Sa seans travay ki ti deroul kot Lasanble Nasyonal ti anba tenm “TEKNOLOZI DAN LAPRANTISAZ LALANG MATERNEL” ti dirize par Direkter Lakademi Kreol Madanm Flora Ben David, Serser Sinyor pou literatir, Madanm Gilliane Anacoura, e serser dan devlopman langaz Madanm Christina Albert.
Sa latelye ti pe target bann travayer sekretarya sirtou bann ki ekrir verbatim dan seksyon “Parliamentary Reporting” avek bi ki zot kapab konpran, aplik avek efikasite bann term ki relye avek zot profesyon.
Atraver sa seans, bann partisipan ti osi kapab idantifye kalite model verbatim ki gany servi e pou bli byen Ekip bann raporter verbatim dan Lasanble Nasyonal avek bann nouvo savwar ek konpetans lengwistik dan Lalang Nasyonal, Kreol Seselwa pour zot kapab pli byen retranskrir en deba ou diskisyon dan en Lalang ekrir ki’n standardize oubyen normalize. An retour sa I ava asir sa loportinite pour piblik Seselwa kontinyen ganny akse avek lenformasyon ek konteni lenformasyon dan zot Lalang Maternel; Lalang Kreol Seselwa ki ava ed zot partisip plennman dan devlopman en Sesel soutenab e Ofer sak sitwayen Seselwa posibilite pour pran konsyans bann travay Parlman e rann efektif karakter piblik bann seans travay lasanble.
Dan son diskour avan ki sesyon ti konmanse, klark Lasanble Nasyonal, Madanm Tania Isaac, ti dir ki I premye fwa ki Lasanble Nasyonal I fer en tel latelye, e ki I swete ki sa kolaborasyon ant Lakademi Kreol e Lasanble Nasyonal ava kontiyen. Madanm klark ti osi fer resorti ki verbatim I en dokiman fondamantal dan lezislativ alors I enportan ki bann travayer Sekretarya I reste azour avek devlopman dan nou Lalang maternel.
Lo son kote, Madanm Ben David ti eksprimen ki I santi li tre privilezye pou diriz sa latelye kot lenstitsyon lezislativ dan gouvernman, ki ranforsi rol ki Lasanble Nasyonal i zwe dan promosyon ek prezervasyon Lalang Kreol Seselwa akote Angle ek Franse. E osi asir lefikasite difizyon entern bann kont randi parlmanter dan en Lalang Kreol standardize e dan en laform respektan bann norm Lasanble Nasyonal.
Sa latelye en demi zournen, ti enn tre enteraktiv kot bann partisipan ti kapab demann kestyon, rod lekresisman e aprann bokou lo kote lengwistik. Madanm Ben David in dir ki I swete pou travay pli pres avek Lasanble Nasyonal atarver sekretarya pou ede ki plis dokiman sa lenstitisyon ava kapab gany tradwir an kreol. Alafen sa seans, bann travayer sekretaya ti remersi Madanm Ben David avek son lekip pou tou bann konesans ki zot in partaze.
