::
Home » Verbatim » 2020 » Verbatim Wednesday 17th June, 2020

Verbatim Wednesday 17th June, 2020

NATIONAL ASSEMBLY OF SEYCHELLES

Wednesday 17th June, 2020

The Assembly met at 09am

National Anthem

Moment of Reflection

Mr Speaker in the Chair

 

MR SPEAKER

Bonzour tou bann Manm

Onorab e bonzour tou dimoun ki a lekout e pe swiv travay Lasanble Nasyonal. Bomaten nou pou kontinyen nou travay kot nou ti’n arete yer.

Savedir deba lo sa 2 Protokol, partenarya Ekonomik lo Lakor Lapes ant Sesel avek Linyon Eropeen.

E mon ava demann parliamentary reporter pou fer rantre panel, Minister avek son delegasyon.  Yes Onorab William.

 

HON WAVEN WILLIAM

Bonzour Mr Speaker.  Mr Speaker mon anvi konnen si lalis non in frenmen.  Akoz mon ti a kontan ki mon non i ganny mete lalis pou entervenir.  Mersi.

 

MR SPEAKER

Bon, mon’n frenm lalis depi yer.  So mon pa pe pran nouvo Manm ki pou entervenir lo lalis bomaten.  Yes Onorab.

 

HON WAVEN WILLIAM

Mr Speaker fransman dir ou yer, mon pa’n tande si ou’n dir ki lalis non in frenmen.

Se pou sa rezon ki bomaten la koman mon’n vini, mon’n demann ou pou met mon non lo lalis.

Akoz yer ou pa’n donn lendikasyon.  Ou’n dir i annan 9 non dimoun lo lalis.  Alor bomaten la, mon pe demann ou permisyon pou mon kapab koze lo sa Protokol Lapes.

 

MR SPEAKER

Bon avan mon reponn Onorab William, mon ava dir bonzour e welcome Minis Charles Bastienne, Minis Responsab pou Lapes ek Lagrikiltir.

Minis i ganny akonpannyen par Mr Roy Mr Roy Clarisse       ki Special Advisor lo Lapes pou avek Minis.

E mon ti a kontan fer en koreksyon osi tou yer.  Kot mon ti dir Mr Vincent Lucas, i CEO SFA. 

Mr Vincent Lucas i Chief Fisheries Officer SFA, pa CEO.  Mon prezant en leskiz.  And, also I would like to welcome Mr Jayaraj Chinnasamy, Principal State Counsel from the office of the Attorney General. Mr Bastienne, Minister avek ou lekip welcome dan Lasanble Nasyonal.

Bon mon retourn lo pwen ki Onorab William in leve.  Mon krwar ti souzantandi. Anfen mon kontan, mon pe kontinyen servi sa mo souzantandi.  Ki by the time yer nou’n al, nou Mosyon in ganny prezante. E by the time ki nou’n adjourn, ki ti dan pre 5. 20 mon krwar  sete ki lalis in frenmen.

Nou tou nou konnen, mon’n dir dan lepase.  Apre ki en Mosyon in prezante, mon donn apepre 30 minit e apre mon frenm lalis.  Mon annan 2 Manm lo kote US ankor, lo kote LDS ki’n endike ki’n lev lanmen yer.  Ki mon’n dir poudir lalis, mon’n fer zot siny lalis in frenmen.

Me Onorab William mon pa’n war ou lev lanmen yer, i malere.  Akoz, wi mon konnen petet mon kapab dir, mon konnen mwan avek ou dan lepase lo bann EPA, nou’n vreman 2 Manm aktiv dan Lasanble.

Me i malere ki mon pa’n vwar ou.  E ou pa dan sa 8 a 9 Manm ki reste lo mon lalis.  Mon pa pou kapab fer en leksepsyon.  Akoz si mon fer lo en kote, mon pou bezwen donn lo lot kote.  Ok?  So mon desizyon i koumsa.  Yes Onorab William.

 

HON WAVEN WILLIAM

Mr Speaker mon pa pe mank ou respe, i pa mon lentansyon ditou.  Me solman i annan bann keksoz ki’n ganny dir dan sa Lasanble yer.  Ki mwan mon santi i pa korek.  E ki nesesit serten bann leksplikasyon.

E baze lo sa bann keksoz ki’n pase, mons anti poudir, nou menm nou dan sa Lasanble Mr Speaker, nou pe dir edik pep Seselwa la deor.  Me i malere poudir serten nou pe dezenform sityasyon.

 

MR SPEAKER

Dakor.  Me petet, yes.

 

HON WAVEN WILLIAM

So mon pe enplor avek ou Mr Speaker, mon konnen parey mon’n dir ou se ki normalman Mr Speaker si ou permet mwan, ou edike, ou dir nou poudir be la lalis pe al frenmen.

Parey mon dir, se ki mon pa’n tann ou.  Akoz si mon ti’n tan ou Mr Speaker, dir lalis in frenmen.  Mon pa ti pou lev sa pwen bomaten la.  Pou mon demann ou laparol.  Mersi Mr Speaker.  E avek lespwar ki ou ava konsider mon demann.  Mersi bokou.

 

MR SPEAKER

Mersi Onorab William.  Malerezman mon pa pou konsider ou demann. Me ou’n fer sorti en pwen klarifikasyon.  Anba Standing Orders en Manm i kapab fer klarifikasyon.

E si ou annan klarifikasyon pou fer, mon ava donn ou laparol ler tou bann Manm in fini entervenir.  Dakor?  Ou ava endike si ou still ankor, ou santi sa bann keksoz i ankor dan bouryar;-  ki pe mal enform piblik deor, e ou annan serten lenformasyon ou anvi pase, ou ava les mon konnen.

E mon ava donn ou sa sans pou fer klarifikasyon.  Dakor?  Mersi Onorab William.  Bon, nou ava kontinyen avek nou travay.  Parey mon’n dir.   E bomaten la mon pou donn laparol Onorab John Hoareau.

 

HON JOHN HOAREAU

Mersi Mr Speaker.  Bonzour Mr Speaker.  Bonzour tou dimoun a lekout.  Bonzour tou Manm koleg.

Mr Speaker ratifikasyon sa Lagreman ant Gouvernman Sesel e Linyon Eropeen, lo lapes ton e bann lespes parey ton, ek sa Protokol lenplimantasyon i reprezant en staz final dan en parkour tre long.  Kot Gouvernman Sesel, reprezante par Minis pou lapes e son lantouraz, ti antre dan en negosyasyon avek Linyon Eropeen lo sa size lapes ton dan nou Zone Eksklizif.

Malgre plizyer demann avek Minis pou enkli o mwen en Manm Lasanble koman obzervater dan sa prosesis. Nou demann ti ganny refize.  Atraver ou Mr Speaker mon oule fer Onorab Valmont rekonnet ki negosyasyon sa Lagreman Lapes pa ti fer dan Lasanm Konferans Lasanble. I ti ganny fer dan 4 renyon, dan diferan parti lemonn.

Mr Speaker sa Lagreman i enn ki tre enportan, akoz i tous tou sekter nou lekonomi.  E i annan potansyel pou anmenn bokou reveni an term deviz etranzer Sesel.  Son lenportans i vin pli prominent, sirtou la kot tourism ki nou pli gro pilye lekonomi in tonbe avek sa pandemik COVID-19.

Mon pa pou fer sa lazistis sa Lagreman si mon pa dir ki an totalite sa Lagreman i move.

I vre ki i annan bokou bann bon eleman, me i vreman enportan pou fer rekonnet ki i annan en kantite lespas pou amelyor sa Lagreman.

E mon konvenki ki avek en Manm Lasanble koman obzervater, nou ti pou ganny en Lagreman ki ti pou benefisye Sesel plis. En obzervater parlmanter ti a kapab anmenn en kontribisyon endirek atraver Minis.  Sirtou ki nou annan 2 Manm Lasanble ki asiz lo forum Enternasyonal ASP-EU. E zot ofe avek bann dosye Economic Partnership Agreement, EPA.

E zot rapor ki zot prodwir apre zot bann misyon aletranze i demontre ki zot toultan sanpyon bann size koman Pti Leta Zil e zot vilnerabilite.

Mr Speaker petet kestyon ki dan lespri Minis an se moman ki mon pe koze, se ki bor mon krwar bann amelyorasyon dan sa lagreman i kapab ganny fer. Pandan sesyon kestyon yer, Leader Lopozisyon in fer sorti bokou bann bon, bon pwen.

Premyerman Lartik 10 ki koz lo size Sectorial support pou human ek institutional capacity building in fisheries sector and development of Blue Economic.

Mr Speaker anba sa Lagreman e bann Lagreman presedans, sa lartik in ganny mentenir.

EU pe donn €2.8 milyon par lannen pou sectorial support.  Me si nou fran ek nou lekor, e nou bezwen demande. Ki fason nou lekol Maritime in benefisye e pe benefisye?  Parski se li ki donn formasyon dan, pou bann dimoun ki fer sa louvraz maren.

Ler nou, koman Manm Lasanble nou ti vizit sa Lenstitisyon, nou ti vwar ki letid ki zot ti anvi ofer pa ti posib.  Akoz zot pa ti kapab ofer en lapey konpetitiv pou atrakte bann lenspekter ki annan sertifika kaptenn.

Menm Minis in dir nou, ki la zot pe demann sa Lenstitisyon pou donn formasyon e bagaz neseser.  Ki ganny rekonnet par Linyon Eropeen pou bann maren peser.  I reste pou vwar konbyen maren peser sa Lenstitisyon pou formen.

Pa bliye, sa Lagreman avek lekol Maritime in deza ganny fer san rezilta oparavan.  Akoz sa lekol i under resourced.  Mr Speaker sa bato ton, sak bato ton i oblize pou pran 2 maren Seselwa.  Oli bann maren Seselwa lo bato ton, apre 35an Devlopman Lapes Endistriyel dan Sesel?

Akoz ki Gouvernman pa negosye ki sa bann maren pe ser Seselwa i ganny en lapey ki reflekte sa ki bann Franse oubyen bann Espanyol pe gannyen lo sa bann bato? E bann lezot kondisyon osi, an tan ki zot annan menm kalifikasyon e pe fer menm travay?

Eski Linyon Eropeen pe siport formasyon kadet lo sa bann bato?  Parey SEYPEC in fer avek nou bann tankers. Parey SEYPEC in egzize ki nou fer sa avek nou bann tankers.

Ozordi, lo size mendev, nou vwar ki SEYPEC tankers i en success story.  Anba sa Lagreman provizyon in ganny fer pou en Joint Committee.  Ki ankor nou pa a ganny ase detay lo la.

E son term referans e ki konpozisyon ensidswit.  Me sel keksoz ki nou konnen, se ki i zwenn enn fwa par an pou donn laprouvasyon lo sa depans €2.8 milyon anba sectorial support.

Rezilta se bann fish processing plant e bazar ki’n ganny konstri, ki pa lo standar.  Plizyer bann pti proze ki zanmen in demare.

Serten akoz kapasite linite SFA.  Zis get Providence.  Dan 9 processing plant, zis 3 ki pe ganny itilize.  Ladan menm sa bann enterprete i bezwen depans gro sonm larzan pou kapab met sa bann processing plants lo standar pou zot kapab export pwason.

I annan bazar ki’n ganny konstri, me ki zanmen peser in tal pwason lo la pou vann.  Finalman zot in bezwen re kase.  I annan menm bazar Cascade ki’n ganny konverti pou fer laboutik.

Mr Speaker dan sa protokol i annan provizyon pou 40 personas erit long liners vin lapes dan Zone Eksklizif. E 50 mil tonn ton koman reference tonnage pou lapes.  Ki mon krwar i tro bokou. Menm si mon napa levidans syantifik lo statistik pou back mon statement, sa i mon pwennvi.

Rezon mon pe dir sa, set akoz dan lepase sa lakantite ton ki’n ganny lapes dan nou Losean Endyen in kree presyon lo a lespes, sirtou lo ton zonn.

E deza IOTC in bezwen met serten kota lo lapes sa kalite lespes. En lobzervasyon se nou lakot li menm, i preski enposib pou lapes, pou peser artizanal ganny en ton.

Mr Speaker mon krwar si nou konsantre en pe plis lo long liners e lapes mwens avek sener, nou kapab ganny plis reveni avek mwens pwason.  Set akoz kalote sa pwason ler i ganny lapes dan sa fason i ganny en pli bon pri.

Mr Speaker Maldiv i lapes mwens ki nou e zot servi pole and line laplipar di tan.  E zot fer pli bokou larzan par tonaz zot ton. Mr Speaker mon pou fer en pledwari avek Minis.  I vre ki fizi in fini pete e bal in ale.  Me ankor, me ou ankor annan en sans dan mid-term review.

Mon konvenki ki sa travay pou tonm lo nou koman en Gouvernman formen par LDS.

Nou oule ki lafason sectorial support i ganny zere, i ganny revwar.  Sa €2.8milyon ki toulezan nou gannyen, i devret antre dan nou lekonomi, non pa zis en pe, akoz en mank kapasite pou lenplimantasyon proze.

Mon siport Onorab Ferrari ki direksyon ki ou’n negosye pou full lotonomi lo lafason sa larzan i ganny zere. Linyon Eropeen pa devret annan en say lo lafason nou depans nou larzan.

Nou annan en sistenm kot larzan i antre dan nou Consolidated Fund.  E en sistenm bidzeter transparan avek bokou oversight.  Alor, kote problenm i ete?  Mon ti a plito kontan vwar ki sa larzan i ganny depanse lo resours imen dan sa sekter.  E avek plis kontribisyon dan nou Lekol Maritim pou ki i os nivo nou bann fitir maren.

Si en zour nou antre dan sa kalite lapes, nou ava pare pou tenir labar.  Pandan plizyer lannen, sa pep in sipliye ki nou annan nou prop bato ton, pou lapes nou prop ton. Si nou’n konstri 6 tankers, menm nou napa delwil.  Akoz nou pa kapab konstri nou prop bato ton?

An vi ki pwason i enn nou resours.  Seselwa anba Gouvernman LDS sa i en posibilite reel. Zot vot pou permet nou devlop sa lendistri o maksimonm.  Nou pei i devret benefisye plis avek nou lor ble.  Mr Speaker sa ti mon kontribisyon.  Mersi.

 

MR SPEAKER

Mersi Onorab Jude Hoareau.  Yes Onorab Charles De Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker.  Bonzour Minis ek ou delegasyon ek tou Manm Onorab ek tou dimoun ki a lekout. Mr Speaker mon oule met en keksoz ki Onorab Hoareau in dir ki manti, ki pa vre.

Mon oule met an perspektiv ki nou Lasanble i arete vin dir keksoz ki pa fonde.  Ki mansonz, mansonzer.  E ki pa vre!  Bazar Cascade napa okenn bazar Cascade ki parey in dir,  ki’n vin, ki’n transfer a en laboutik. I pa egziste, i pa’n egziste e i pa pou egziste!  Sa i lalang, lalang e lalang!

Sa ki in dir, li sa lalang, mon demande ki i retir sa bout ki in dir la dan Lasanble.  Akoz i pa vre e i pa korek.  Bazar Cascade pe fer anba sa vot ki EU Lagreman Lapes i ofer, e i pa ankor fini, i ava fini sa nouvo bazar.  Nou vye bazar i la e i pe ganny servi aktyelman.  Mersi.

 

MR SPEAKER

Mersi Onorab.  Onorab John Hoareau.

 

HON JOHN HOAREAU

Mr Speaker i annan en bazar ki’n ganny konverti laba pou fer en laboutik.  Mon pa’n dir poudir sa bazar in ganny konstri par lasistans EU.  Mon pe dir poudir i annan en bazar ki’n ganny konstri, ki’n ganny konverti an laboutik!  Mersi.

 

MR SPEAKER

Ok.  Bon, annou …

 

HON CHARLES DE COMMARMOND

Non i pa vre!  La Minis i la.  La SFA i la, dir zot klarifye sa.  I lalang sa boug la!

 

MR SPEAKER

Ale Onorab.  Bon kit sa avek …

 

 

 

 

(Interruption)

 

HON CHARLES DE COMMARMOND

Wi lo Facebook Onorab, ou ki lo Facebook.  Ou menm ou.  Eric Brown.  Brown Eric, vini ou!

 

MR SPEAKER

Order!  Order!  Onorab.  Onorab.  Onorab De Commarmond, Order!  Bon, ankor mon a pran sa responsabilite ek mon lofis. Mon ava fer en serten investigation with regards to sa statement ki’n ganny fer.

Non, nou pa dan Staz Komite.  Si nou ti dan Staz Komite mon ti ava donn Minis sans pou li reponn.

Me nou pa dan Staz Komite.  E se sa, petet ankor mon ava demann ek zot Lasanble.

Mon ti ganny gide, desizyon ki ABC ti fer,  se ki Minis ti pou vin fer Statement.  Kestyon ti pou ganny demande lo sa Statement.

E apre sa 2 Protokol ti pou napa bokou entervansyon, ti pou napa bokou deba. E Lasanble ti pou demande pou pran en vot.  Petet ti pou kapab annan 2 Manm, 3 Manm ki ti pou fer entervansyon.

Me apre mon’n ganny demande ki Minis ek son panel i reste apre Statement.  Si i annan posibilite ki nou al dan Staz, ki sa deba i al dan Staz Komite pou les panel osi tou kapab reponn.

Mon ti annan serten Manm ki ti dir wi, pou annan kestyon ki pou ganny leve e pou bezwen enterakte avek panel.  Sa pa’n arive.

Prezan, kestyon ki mon pe demande, e mon’n fer Deputy Clerk anvoy bann Manm ABC en pti not bomaten.

Ki ziska ler nou ti pe fer procession pou vini pou mon antre, Deputy Clerk pa ti’n ganny okenn repons.

Yer Minister avek son panel, e mon konnen Minis ek son 3 zofisye, espesyalman mon kapab koz pou Mr Chinnasamy, i annan en kantite travay dan Lofis Attorney Zeneral. 

E mon kapab koz pou li, akoz nou toultan ganny en pti dyalog mwan avek li, kantite travay ki i annan pou fer laba.

Yer zot in asize preske 3 erdtan as a panel.  Nou pa’n rantre dan Staz Komite. Bomaten zot in vini ankor, only as a panel to listen to the debate. 

        Now, mon demande, si nou anvi panel i enterakte, eski nou bezwen al lo Staz Komite?  E si nou pa anvi, mon krwar mon pou dismiss panel pou zot al desarz zot responsabilite, ki zot tou zot annan bann responsabilite ki heavy.  Ok? 

        So si nou pa bezwen sa panel, mon krwar nou ava les Minis ale avek son delegasyon, ok? Akoz i pa fer sans, i annan, zot pa pou kapab rantre dan deba.  Yes Onorab Ramkalawan.

 

HON WAVEL RAMKALAWAN

Bonzour Mr –

 

(Interruption)

 

MR SPEAKER

Order!  Onorab Ramkalawan.

 

HON WAVEL RAMKALAWAN

Bonzour Mr Speaker.  Mersi pou donn mon laparol.  Mon a dir osi dir bonzour tou bann koleg Lasanble, Minis avek son delegasyon.

Mr Speaker mon dakor avek propozisyon ki mon krwar nou’n demann Minis ase kestyon yer.  E in prezant bann lesplikasyon lo ki mannyer ki zot in negosye sa Lakor.  Mon krwar ki, mon krwar ki sa Lagreman i pou pase li, i pou bezwen pase.

Alors, me selman se zis i annan diferan pwennvi lo ki mannyer keksoz pou bouze.  Mon osi tou mon dakor antyerman Mr Speaker. Ki panel i ganny sans al, Minis sirman i annan en kantite keksoz lo son lasyet.

Par egzanp la bomaten, en dimoun in telefonnen in dir poudir sa bann Sri Lankans ki la dan bor ki zot bato in ganny tyonbo. Zot pe vol dan bann lezot bato.  Petet sa i en size enportan ki Minis i kapab al dil avek.  E, so mwan mon krwar ki panel i bezwen al fer lezot travay.

E nou, nou ava fer, nou, nou ava kontinyen ek sa travay.  E petet zis avan zot ale, pou remersye zot pou lafason ki zot in reponn yer, leklersisman. E nou aprezan nou ava met bann lezot pwen.  E nou ava fer sa travay.  Mersi bokou.

 

MR SPEAKER

Mersi Onorab Ramkalawan.  Onorab De Commarmond.

 

HON CHARLES DE COMMARMOND

Non Mr Speaker, mon napa nanryen pou dir.  Akoz sa ABC, bann Lopozisyon zot menm ti oule Minis i vini ek zot group.

Zot la, si zot in pa bezwen Minis i ok.  Mon kontan, Minis i bezwen – En ta travay pou fer dan Gouvernman.  Mersi.

 

MR SPEAKER

Dakor.  Mersi Onorab.  La mon pou profite, mon pou donn en pti sans pou Minis dir enn de pti parol avan mon dismiss panel.  Minister.

 

MINISTER CHARLES BASTIENNE

Mr Speaker, tou Manm Lasanble e tou dimoun ki a lekout bonzour.  Mr Speaker dabor parey mon’n dir ou yer.

Mon’n remersi ou pou lapenn ou’n les nou vin fer sa Statement isi dan sa Lasanble lo sa Lagreman Lapes ki tre enportan pou nou pei.

E osi nou’n apresye bann kestyon ki bann Manm in demann ou yer.  Mannyer ki nou piblik laba deor zot kapab konpran e apresye.  Lenportans ki sa Lagreman Lapes i annan pou nou lekonomi, pou pei an zeneral.

Sirtou dan sa letan difisil ki nou ladan.  E mon konvenki, poudir parey Onorab Leader Lopozisyon in dir ki sa Lagreman i a pase.  Malgre ki zot, zot ava swete i annan enn de bann lezot pti azisteman avek.

Ki mwan mon krwar ki dan toutfason Mr Speaker,  se ki, wi nou sa tim ki la ansanm avek bann lezot ki pa la, konman en tim profesyonnel Sesel, we’ve got the best deal pou Sesel.  Sa mon kapab asir nou bann Manm piblik ki la deor.

E ki sa Lagreman, malgre ki nou konnen poudir i annan en bon pe travay pou nou fer isi ankor lo nivo lapes kot i konsernen. Nou konnen poudir nou konsyan poudir larzan ki nou gannyen avek EU, atraver sectorial support, nou bezwen met li plis pou nou kapab ed nou bann peser artizanal.

E Mr Speaker, si ou permet mwan, pa ki mon pe reponn en Manm Onorab la bomaten. Me Lekol Maritim nou’n antre pou nou kapab donn li sa sipor neseser pou met Lekol Maritim lo sa nivo ki i devret arive.

E mon krwar travay pou kontinyen.  Me selman an tout fwa, mon remersi zot Lasanble.  E parey zot in dir, se ki nou ekspekte poudir sa Lagreman i ava pase.  E ki nou tou nou ava kontinyen avek nou travay.  Mersi Mr Speaker.

 

MR SPEAKER

Mersi Minis.  E avek sa mon ava eskiz ou Minis, Mr Clarisse, Mr Lucas and of course Mr Chinnasamy.

 

(MINISTER BASTIENNE AND HIS DELEGATION WAS EXCUSED FROM THE HOUSE)

 

 

MR SPEAKER

Bon, mon pa konnen si Onorab de Commarmond ki’n prezant Mosyon, kekfwa i kapab tir sa lour lo mwan, sa zafer bazar Cascade. Dan ou konklizyon ou a kapab donn klarifikasyon lo la.  Ok.

 

HON CHARLES DE COMMARMOND

Mr Speaker mon’n fini fer klarifikasyon.

 

MR SPEAKER

Dakor, dakor.  Ok.  Alright, mersi.

 

HON CHARLES DE COMMARMOND

Wi zot lalang.  I kler sa poudir Onorab Leader Lopozisyon.

 

(Interruption)

 

MR SPEAKER

Wi.  Bon, bon nou ava, nou kontinyen nou travay.  E mon ava donn laparol Onorab Johan Loze.

 

HON JOHAN LOZE

Mersi Mr Speaker. Bonzour Mr Speaker.  Mon ava atann ziska zot a fini.  Bonzour tou …

 

                       (Interruption)

 

 

 

MR SPEAKER

Order!  Order!  Order!  Order!  Order!  Bon, annou montre en pti pe respe.  Mon’n call en Manm, mon’n donn li laparol. Annou, let us hear the Member please.  Onorab Loze laparol i pou ou.

 

HON JOHAN LOZE

Bonzour tou Manm koleg Manm Onorab.  Bonzour tou dimoun a lekout kot lakour.

Mr Speaker koman Manm Lasanble Nasyonal, letan nou aksepte sa responsabilite,  ler nou lev nou lanmen anler, nou swear-in pou fer desarz nou responsabilite – defann nou Konstitisyon nou pei,  It is incumbent upon us pou nou port en minimonm latansyon dan sa ki pase dan sa Lasanble otour nou.

Si yer Minis in pran son letan, in pran en zournen dan son valuable letan travay.  In asiz la, e in enform nou konmkwa – son lavey si mon pa tronpe,  zot in siny en MOU avek Lekol Maritim pou donn lekol Maritime R10milyon.  Ki’n reste dan larzan sectorial support.

E ozordi nou vini, nou batir en lentervansyon otour donn lasistans Lekol Maritim, Lekol Maritim napa sipor.

Kan yer nou’n fek ganny lenformasyon neseser.  Mon pa konnen akoz nou fer sa bann keksoz koumsa.

Selman zis pou remet keksoz dan lord.  Yer Minis ti enform Lasanble, ki son Minister in siny en MOU avek Lekol Maritim. E ki zot pe donn  Lekol Maritim R10milyon.

Mr Speaker letan ou antre dan en negosyasyon, ou bezwen antre avek en bi.  E ou bi ki ou antre avek dan laliny negosyasyon, i bezwen kler dan ou latet.  I bezwen, ou, ou konnen deza, depi kot ou pe vini, ki ou anvi.  Ki ou bezwen?

Kwa ki ou pe vin demande?  Ou pa kapab zis ale, asize sof sez, bwar dite, manz gato.  Ou bezwen annan en bottom line ki ou ou’n set pou ou achieve.  E mon krwar se sa ki Minis in enform Lasanble.

Ki delegasyon Sesel, ki sa delegasyon profesyonnel, byen konpetan ki’n al laba Brussels.

Mon krwar zot ti al Mayotte tou or somewhere.  E egalman Sesel zot ti annan en bottom line.  Zot ti annan en target ki zot ti’n set pou zot achieve.  Now, si dizon mon antre dan en negosyasyon avek mon anplwayer.  E mwan mon target se pou ganny en logmantasyon R200.  Mon ale, mon asize.

Koman mon asize mon anplwayer i dir mwan, non Mr Loze, letan nou’n vwar ou performans nou’n deside donn ou R100 an mwens ki ou ti pe gannyen.

E from that point on, nou antre dan negosyasyon mwan avek mon lentansyon ganny R200 an plis.  Li in set out pou donn mon R100 an mwens.  And lo and behold nou sorti dan negosyasyon, mwan mon sorti ek R150 an plis.  Granted i pa R200 an plis ki mon ti’n annan lentansyon gannyen.  I pa mon asking sum. 

Selman mon’n sorti ek R150 an plis.  Minis ek son delegasyon in al Lerop.  Zot in demann en logmantasyon 20 poursan.  Eropeen in dir, 10 poursan an mwens ki nou ti pe gannyen.  E Mini in sorti avek 15 poursan an plis. Ki dan nenport ki konteks biznes, nenport ki fason ki ou get sa, i en sikse.  I en sikse.

Mon pa krwar ki ni Minis, ni son panel of experts ki in al avek laba, ti al avek okenn lentansyon pou al koriz tou laliny dan sa Kontra.  Akoz dan tou kontra, sa tou Avoka i konnen.  Dan tou Kontra i annan bann laliny ki senpleman dead air. This is how they earn their money.  Sa bann gaz ki zot mete.

Sa bann kalas etik avek mo ki zot fer, this is how they earn their money.  Se koumsa negosyasyon i fer.  E ou pa ti pe al laba pou ou lager tou dernyen fraz, tou dernyen pwen dan sak fraz.  Me ou’n laba avek en bi kler. E ou’n retourn avek en logmantasyon €8milyon pou benefis Sesel e Seselwa.  E mon konnen de fwa nou tant pou dismissive zefor lezot dimoun.

Petet nou Seselwa, mon pa konnen mwan, i pli ba, akoz i pa bann eksper nikleer Endyen.  Ki al negosye nikleer. E nou dismissive letan nou bann profesyonnel i ale, i negosye, i retourn avek 4 scholarships.

And yah, zis 4 scholarships.  Ki fer, nou, nou donn 80 toulezan, akfer 4.  Be sa 4 scholarship la, nou Sesel nou ti annan nou, apre plizyer lannen nou’n reisi annan nou en Seselwa ki’n manage IOT.

E pou serten rezon, sa Seselwa in nepli kapab tenir, in sorti in ale.  Mwan mon pa konnen akoz. Petet ti ava enteresan en zour pou asize fer en konversasyon avek sa msye, find out egzakteman ki ti pe pase laba.

Akoz son bann travayer i dir sa msye ti pe lager lebra kase pou zot benefis e zot proteksyon, li koman en Seselwa i ti konpran zot.

Be letan sa in arive, nou realize la, i en febles la, zis 1 Seselwa.  Nou’n ganny scholarship la. E mwan mon krwar, mon pa pou dikte nanryen ek personn.

Selman otan ki posib mon krwar annou servi sa scholarship, annou train bann dimoun Seselwa dan nivo management kot IOT.

Annou sed sa lakonpannyen avek well- trained, competent Seselwa. Servi sa loportinite ki la devan nou.  Sa 4 scholarships ki zot menm zot in donn nou.  Annou benefisye nou bann travayer ki laba.

Mr Speaker mon letan mon pe get sa Lagreman ek son Protokol lenplimantasyon,  sa ki mon vwar se plis benefis pou Sesel e pou Seselwa.  Be i annan en keksoz ek benefis, i pa zanmen ase.  I pa zanmen ase e mon osi mon pou dir i pa ase. Me eski nou ti’n kapab ganny plis dan sa letan ki nou’n ladan anba sa bann tel kondisyon ki nou ladan?

Sa i en kestyon ki ni menm mwan mon napa en larepons pou li.

Me selman nou’n gannyen.  E nou pa pou senpleman knuckle under i dir mersi, ‘’Yes Massa.’’ ‘’No Massa.’’ Nou’n gannyen e nou pou servi, nou pou itilize pou benefis nou pep. Parey ki i devret ganny fer.

Yer letan nou pe asize la anndan, en madanm i text mwan, i dir mon sa msye ki pe asize obor Minis dan son kote drwat, mon kouzen sa. In pran mwan en pe letan pou mon realize lekel sa madanm.

Akoz mon ti zwenn li zis en fwa dan mon bann travay politik ki mon’n al fer dan distrik, dan door-to-door.  I montre ou en keksoz enteresan, ki Seselwa i annan en serten lafyerte. I annan en lafyerte pou son fanmir.  I annan en lafyerte pou son fanmir letan in vin en profesyonnel.  Letan in grenp serten lesyel, i annan en sense of pride, mon kontan.

E zeneralman Seselwa mon krwar nou kontan.  E nou bann profesyonnel zot fer zot en bon travay, sa nou bezwen dir. I domaz ki i annan serten depi yer, in pas letan zis kestyonnen, tri pikan, rode ki zot kalifikasyon.  Ki zot isi, ki zot laba.  A la menm enstan ki nou extol verti bann nikleer Lenn.

I domaz nou napa eksper nikleer nou.  Pou nou al fer negosyasyon pwason, non.  So, too bad, eskize. Be selman mwan personnelman mon’n en pe kanmi.  Letan mon’n get sa bann dimoun la devan mwan, mon konnen lakantite louvraz ki zot fer.

We bring them in our House.  Apre nou kestyonn zot konpetans.  Zis parey son bomaten nou ti pe kestyonn konpetans tou sa profesyonnel ki asiz lo Board Lotorite Plan.  Sa apre ki nou’n fer en nespes masak avek Lalwa Lotorite Plan. Selman sa i en lot zistwar.

Be negosyasyon in ganny fer.   E in ganny fer par Seselwa, pa par etranze.  Seselwa.   E i annan nou ki fyer pou zot, sa bann dimoun ki’n al fer sa bann negosyasyon. Mr Speaker i annan 1 pwen ki pe ale vini dan sa Lasanble.  Bomaten in lev ankor.

Akoz pa’n enkli LDS dan negosyasyon.  Depi ki nou’n konmans deba sa kestyon pe leve.  Akoz LDS pa’n ganny anmennen dan negosyasyon, pa’n ganny anmennen kot negosyasyon ti fer, pa ti fer la dan Lasanble.

Be Mr Speaker, en Lalis Welfare pa kapab trust zot avek.  En senp Lalis Welfare ki ou Mr Speaker ou ti asiz la devan, ou ti garanti Minis, poudir sa Lasanble can be trusted!

Sa Lasanble i kapab ganny trusted ek lenformasyon.  Yet, nou al dan miting politik, nou lev Lalis Welfare anler, nou nonm non dimoun. Nou kree sityasyon enkonvenyan pou nou prop frer ek ser Seselwa pou rezon politik.

Oli konfidansyalite?  Sanmenm sa, sa inevitable change ki Onorab Andre ti pe dir nou pe vini sa? Sa?  En dimoun ki lo en lalis welfare i dan en pozisyon vilnerab, in tonbe, i pa ti pou pe demann led.

E zot, zot fann son non dan semen.  E la, zot ale, al pran par dan negosyasyon milyon.  Lerop ki zot le anmenn zot la?  Zot oule Minis anmenn zot Lerop pou al negosye milyon Ero.  E en senp Lalis Welfare zot fer nou kanmi avek!  Be ki mannyer pou pase sa?

How do you expect this to work?  Ki mannyer zot ekspekte ganny trusted ek lenformasyon, ganny anmennen dan en negosyasyon?  E la nou pei i dan en sityasyon kot lekonomi mondyal nou pa konnen, i pe tether on a brink.  Nenport ler i kapab kolaps.  Nou annan zis sa pti lapes la pou nou tenir lo la.  Zot ti oule nou enkli zot dan sa negosyasyon?

Zot ki asiz dan miting politik, zot fann Lalis Welfare dan nenport ki kwen semen ki zot tonbe.  Kan mannyer pou marse sa?  Sanmenm sa, sa inevitable change sa en?

Mwan, dir zot fransman, personnelman, mon ti pou enplor en nenport Minis ki vin dan sa Lasanble, pou pa donn zot okenn lenformasyon ki zot demande.

Kareman, from the panel la devan dir zot non!  Pa pe donn zot! Pa pou donn zot.  Akoz koman ti donn zot, zot ti asize lanmenm la anndan, mon ti tann zot, konmans donn non dimoun.

Entel i lo 2 lalis, i pe ganny led 4fwa.  Konmans kriye lanmenm la anndan koman zot ti gannyen. La zot oule lenformasyon, la zot oule ganny included dan negosyasyon?.  Kan mannyer pou marse sa?  Sa inevitable change for the worst ki zot, zot krwar Seselwa pou fer.  Bliye, pa pe al arive sa enn!

Mr Speaker kestyon FAD lo zil, ki’n ganny aborde dan Lagreman.  E ki Minis in dir nou pou la premyer fwa i annan en fon Lanvironnman ki’n ganny kree. E nou tou nou konnen poudir lanvironnman Sesel i annan en kantite zenn profesyonnel Seselwa involve ladan.

I annan en kantite nou bann up and coming youth, ki oule fer sa en karyer pou zot.  E ki en keksoz vreman swetab. Akoz zot passionate dan sa keksoz ki apel lanvironnman.

E si ou kapab fer ou passion vin ou karyer, la i annan lespas pou sa bann zenn Seselwa fer bann vre sanzman neseser.

Non, selman dan nou pei, non selman dan nou sosyete.  Me dan sa monn dan lekel nou pe viv.

E se pou sa rezon ki nou bezwen koman en Nasyon, nou bezwen get byen sa pti morso, sa pti konponan lanvironnman ki pe vini, an parti sa negosyasyon,  i koman enn bann morso pli enportan, e ki pou tous nou pei pli direkteman.

E a lonterm i kapab apart bokou plis benefis pou nou.  Ki menm son sectorial support ki i pe annan bokou plis larzan ladan.

Akoz sa i pou ede foster bann zenn Seselwa parey mon dir,  ki passionate dan sa zafer lanvironnman.

Be selman yer, i domaz nou’n ganny dir, poudir Onorab Ferrari in dir nou sa, son Leader in mont enn de fwa lo zil. Li ki’n fer sa arive.  Mon pa konnen, fransman ki ou Leader i al fer lo zil.  Me selman mon kapab dir ou sa ki mwan mon konnen, sa zafer FAD la, i azanda sa msye Reziser Zil.

E mwan mon pe tann li koz lo sa, depi dan 2007 par la mon krwar i ti meet avek nou Caucus.  I ti pe diskit sa zafer FAD.  E li sa msye Reziser Zil la, i passionate li sa zafer FAD lo son zil.

Sa ki mwan mon kapab dir, se, mwan mon krwar ou Leader i port parol Reziser Zil, sa mon a dir.  I port parol azanda reziser zil, i pa son azanda sa, sa msye in dir li ale al dir sa, li in ale in al dir sa!

Sa mon a garanti ou sa enn la.  Akoz mwan lontan mon pe tann sa msye pe koz lo sa size FAD, i menm annan progranm lo televizyon, kot in asize in koz lo sa size FAD.

Long before ki LDS dan son current enkarnasyon in vin en mouvman politik.  So, mwan mon welcome sa konponan lanvironnman ki’n ganny mete atraver sa negosyasyon.

Mr Speaker, en lot morso enportan se nou maren peser.  Mwan mon’n konn dimoun ki’n travay dan sa metye.  E zot in travay pou pittance.  Zot in donn zot kouraz.  Mon pe koz ou gro, gro zonm, ti fer karate sa bann letan.

Zenn homme i ti dan son bann letan pe al marye, in marye avek en zanmi fanmir.  In donn tou son kouraz laba. E letan ou gete, in ganny peye pittance.  E sa bann dimoun, zot in toultan konnen ti annan en keksoz mal avek zot saler.  Zot in toultan konnen, zot in toultan konpran.  Zot pa’n zanmen konnen kwa egzakteman.

Sa bout ki zot pa ti konnen kwa egzakteman ki ti mal dan lafason ki zot ti pe ganny reminere. E sa la, i pa ti nesesit bann eksper nikleer Endyen sa pou konnen kwa ki ti mal avek zot saler. Se sanmenm sa bann dimoun ki ti la devan pli boner, zot ki ti figure out what was going on, se zot.

E prezan sa bann dimoun la, zot in fer sa back breaking work, pou asize pou fer rekonsilyasyon pa lo en computer, me dan en karnen.

Dan logbook maren depi 84 ziske 94, ziske 2014, ziske 2014 an montan.  Back breaking work. 

Se zot ki’n fer sa, avek zot staff.  E zot in menm fer rekonsilyasyon pou bann maren ki’n fini desede, ki’n kit nou.

Pou ki zot fanmir par deryer i a nobou tous en benefis.  Zot zanfan ozordi ki vivan i a vwar lasyer, i a rekolte lasyer de leur pére finalman.

E sa se lazistis dan li menm.  E sa lazistis la, in ganny aporte par sa bann dimoun ki ti pe asize laba devan.  Pa par eksper nikleer Endyen en.  Par sa bann dimoun ki ti pe asize la devan.

E i en lensilt pou sa bann dimoun.  I en lensilt pou nou bann profesyonnel. Pou quelqu’un vini, kek ‘Johnny come lately’ i vini, i dir ou, si sa in arive, gras a mwan e Onorab entel.

Nou ti fors en laport ouver, nou ti antre, nou ki’n fer.  Be si ou’n al fors laport kot ou pa’n ganny envite ou malelve! Ou senpleman malelve, ou san konpran!  Si en dimoun in organiz son maryaz, in travay in fer son maryaz.  In mont son salvert, ou antre ou asiz anba son lasalvert, ou al bwar son diven manmpo.  Ou manz son gato maspen, apre ou deklare ou ki’n marye?  Ou ki’n organiz maryaz?  Be depi kan sa?  Annou respe nou bann profesyonnel.

Akoz pe vin en trend dan sa Lasanble.  Pe vin en trend pou n ou denigre e put down bann profesyonnel Seselwa.  In vin en manni sa. Nou isi anndan, nou, nou sharp nou.  Nou bon nou, nou konn tou nou.

Tou keksoz ki bon, ki byen dan sa pei – nou!  Manm Lasanble ki’n fer.  Sa dimoun ki’n actually tyonbo sa pyos, kas sa later pou fer sa arive, i pa’n fer nanryen li!  Nou ki’n fer, nou ti defons en laport, nou ti antre.  Be ou malelve!  Fors laport antre dan miting dimoun i pa en keksoz ki nou devret ankouraz nou zanfan sa.

Mwan personnelman, si mon zanfan i vini, i dir mwan, papa, mon ti tann msye entel pe dir sa, sa, sa lo televizyon.

Mon kareman dir li, ‘’ma fille’’ be sa pa devret pase lo televizyon sa.  Sa msye i malelve! I pa en keksoz pou nou pas lo televizyon sa.  I pa en fason pou nou enstri en zanfan sa.  E mon pa krwar i annan okenn Sesel ki anvi enstri son zanfan dan sa fason.  Akoz i mal, i pa byen.

Annou donn rekonesans sa bann dimoun ki fer the actual work.  Nou pa kapab tou lazournen, ‘arh msye sa msye ki la mon konn ou kapasite, mon konnen ou ti mont Lanmerik ou ti al negosye debt cancellation avek Ameriken.’

Ou bon, ou sharp, ou so. zis li?  Ti annan zis li?  PS Thesee, SS Payet, Sitna Cesar. Tou sa bann dimoun pa ti ladan zot.  Zis li ki ti la, ti annan zis 1 dimoun dan tousala?

Nou pou sant louanz en dimoun akoz i asiz la anndan avek nou? Selman letan i ariv pou sa Lalwa Tax ki li ki ti spearhead, li ki ti mont avek monte desann dir tou dimoun.

Sa i bon Lalwa tax sa.  Personn pa dir li, sa pou ou.  This is one is your baby.

Nou tou nou dir Lalwa Tax i mal, pa bon, pa kolekte tax, ‘’pa permet nou kolekte tax. ‘’Selman nou pa dir li sa li ki ti fer?  Negosyasyon, wi ou’n al negosye 50 poursan nou det, ou sharp! 

This is the change.  The inevitable change ki zot pe dir nou pe vini.  Me i annan en problenm la.  Nou annan en problenm la.  Nou pa kapab ni respe, ni felisit, ni rekonnet nou profesyonnel dan sa pei.

E zot menm zot ki pli sibir nou bann profesyonnel.  Yet, nou ki zot elekte pou reprezant zot, nou inyor zot.  E nou vol zot laglwar.  Ler nou pa vol zot laglwar pou pran pou nou, nou pran nou donn eksper nikleer Endyen.  Zot, nou kestyonn zot kalifikasyon.  Eksper nikleer Endyen ki sharp.  Nou bann profesyonnel pou nou pa bon.

Mr Speaker, nou pei pe al fer fas avek enn bann moman pli difisil ki i pou kapab zanmen rankontre. Atraver sityasyon ekonomik global ki nou ladan.  E la nou dan en moman kot lemonn li menm i pe fer fas avek tou kalite tourbiyon.

Yer an rezilta nou deba, an reaksyon direk avek nou deba,  en gran fanatik LDS in sorti in maltret Minis Bastienne akoz nou deba. E in fer li en deklarasyon konmkwa ki Minis Bastienne i devret al plant koko lo zil.  Sa is the only thing that he is good for.  

E nou tou nou konnen akoz in dir sa.  Nou tou nou konnen akoz in dir sa.  Zis ou get Minis Bastienne, ou konnen akoz i pe dir sa.  Sa dimoun ki’n dir sa, i en rasis.  Nou tou nou konnen i en rasis.

 

MR SPEAKER

Onorab, mon krwar la ou pe al en pti pe tro lwen.  Akoz mon dakor ou pa pe nonmen lekel sa aktivis.  Me la mon krwar ou pe impute.  Mon pe swiv ou en pti pe depi taler.  E mon war –

 

HON JOHAN LOZE

… Mr Speaker, letan en dimoun i sorti …

 

(Off-Mic)

 

 

MR SPEAKER

Order!  Order!  Mon annan laparol.  Mon annan laparol Onorab.  Les mwan a fini koze.

Ou’n fer referans avek bann keksoz ki’n ganny dir dan deba depi yer.  Sa mon ok avek, ou’n fer referans. E akoz sa bann keksoz in ganny dir isi dan sa Lasanble e i annan dan sa deba.  Ok? Par egzanp fors laport pou antre dan en miting, al negosye det and so on. In ganny dir isi, ou’n fer referans lo la.  Mon dakor, mon ti pe veye how far ou pou ale.  Si ou pa pe impute.

Me la mon krwar, anvi ki lafason ki ou pe met li dan ou konteks, sa dimoun, ou pe dir en aktivis.  Sa dimoun pou napa en drwa repons.  E ou’n al pli lwen, pou ou insinuate ki sa dimoun i rasis,  la mon krwar mon bezwen aret ou.  So pull back, kontinyen ou deba.

Ou pa pou kapab al dan sa direksyon.  Akoz ou pa pou kapab fer en lopinyon ki sa dimoun anvi ki in met sa post i rasis, ok?  Vwala mon pozisyon.

Onorab Henrie, ou’n lev lo menm sityasyon.  Mon’n fer kler mon pozisyon, ok? Li …

 

(Off-Mic)

 

MR SPEAKER

Mon pa krwar in afekte ou privilez, non.  Sa in mansyonn en aktivis LDS Onorab.  Onorab nou pa pe rantre dan en deba.  Mon’n pran en pozisyon the Chair. Mon’n demann li pou move away from sa statement.  E kontinyen son deba lo Mosyon ki devan nou.

Mon pa war kote i pe fer lakizasyon lo en aktivis.  I pa’n nonmen sa aktivis, i pa’n nonm ou non. Mon pa war koman i afekte ou privilez.  Ok?  Onorab Loze kontinyen.

 

HON FLORY LARUE

(Off-Mic)

 

 

MR SPEAKER

Ki ou matter of privilege Onorab Larue?

 

HON FLORY LARUE

Mersi Mr Speaker.  Bonzour tou dimoun.  Mr Speaker anba 36(1), mon santi ki mon privilez koman en Manm IAC Lasanble Nasyonal in ganny afekte.

Lefe ki yer Onorab Ferrari ti mansyonnen ki nou ti al dan en miting, e la nou pe ganny fer referans avek koman malelve, pa konpran.

Mon krwar koman en Manm en Komite,  en Komite Mr Speaker, ki ganny met an plas par Standing Orders Lasanble Nasyonal anba 84, order 84.

Alors si en Komite in ganny kree, i annan son rol.  E si Gouvernman pa pe enkli nou e nou, nou bezwen fer en travay oversight, mon krwar i nou rol pou nou pran nou travay o serye.  E sa i nou, i nou, pe pran nou louvraz o serye e pe respekte nou rol.

E la mannyer pe ganny dir lo bann Manm, lo 2 Manm IAC, ki form part en Komite ki reprezant Lasanble Nasyonal, mon krwar i pe afekte nou privilez.

Akoz i nou drwa pou nou al defann nou pei.  Letan $50 milyon ti perdi la, Manm Lasanble Nasyonal pa ti fer zot louvraz Mr Speaker.  Se sa ki nou koumsa ozordi anba COVID-19.  Nou napa larzan nou annan sa pti gin larzan lapes, akoz zot in vol TOU!  Mersi.

 

(APPLAUSE)

 

MR SPEAKER

Onorab, dakor, dakor, ou’n fer pwen, ou’n fer ou pwen.  Bon, non, Onorab De Commarmond mon pa pou ouver sa. Les mwan mon ava dil avek sa.  Mon pa krwar mon pou tret li, mon pa krwar i en matter of privilege.

The statement was made yesterday, ki ti annan 2 Manm ki ti fors zot larantre dan en miting.  The statement was made in the Assembly.  E ou ekspekte ki i pou annan repons.  Ou ekspekte ki pou annan lopinyon ki pou ganny donnen lo la.  The statement was made.  E se sa ki toultan mon dir.  Manm zot pou bezwen careful kwa ki zot dir.

Nou dan en staz ozordi ki byento i pou annan en eleksyon.  E anndan la, se la kot political debate i ganny fer.  E nou bezwen fer atansyon sa ki nou ganny dir, en lot Manm pou ranmase.  E sa statement ti ganny fer yer.  Ler ou’n mansyonn en Komite i anba Standing Orders.  Wi mon dakor.

Me ou konnen ki nou pe vwar ozordi, travay en Komite ki ti sipoze dan en Lasanble atraver rapor.  Travay en Komite ki sipoze ganny prezante dan en Lasanble atraver en rapor.

Travay en Komite pe ganny prezante dan tou sort deba.  E prezan ki nou pe vwar.  En Manm i vini i dir en pozisyon.  Lot Manm i vini i dir non, pa ti pas koumsa, ti mars koumsa.  Be, parey mon’n dir semenn pase.

Zot anvi sa en playing field?  Mon napa problenm, we will turn it into a playing field.Me si zot anvi ki mwan ler mon la anler, mon annan serten kontrol.  Mon fer sir ki Standing Orders i ganny respekte.

Then let’s go in this direction.  Nou annan lord, nou annan rules and regulation koman nou de avek travay Komite.  Travay Komite i annan bokou bann Chairs la e bann Komite ki mon annan full respe.  Zot fer zot travay.  Periodically, zot prezant en rapor dan Lasanble.

E nou konnen poudir ler en rapor i ganny tabled, si i annan en Manm i ganny serten keksoz pou dir, i prezant en Mosyon.  And the report is debated in a Motion in the House.  Alright?  So mon pe vwar bann tandans ki pe ale.

Be bann tandans ki pe ale, i vin atraver lafason ki nou menm nou Manm nou pe azir ozordi.  Si dan en Komite, nou sipoze en Komite bipartizan, nou pa kapab anmenn keksoz koman en rapor. En Komite i bezwen annan kontrayan.  E sa i bezwen sorti piblikman, i pa sorti dan rapor.

Then mon annan kestyon pou mwan poze lo laOk?  Me ankor mon dir, statement ki ganny fer dan Lasanble, byensir en lot Manm i pou pran e i pou form son lopinyon. Mwan koman dan Chair zis mon regarde ki i pa afekte Standing Orders, e sirtou kot ou pe kestyonn, petet ou pe al pli lwen.

Ou pe al dan 54(5).  Kot ou pe al kestyonn the conduct of a Member.  E sa anba Standing Order ou bezwen fer li atraver en Mosyon.  Zot pe impute, mon osi tou mon pe rantre ladan, ok?

E se sa ki mon pe dir avek Onorab Loze.  Ou’n fer sa statement lo zafer aktivis and all that.  Me mon krwar direksyon ki ou pe ale, i tro lwen.  E retournen, konsantre lo ou entervansyon, let’s move on.  Onorab Loze.

 

HON JOHAN LOZE

Mersi Mr Speaker.

 

MR SPEAKER

En moman Onorab Loze.  Yes Onorab Ramkalawan.

 

HON WAVEL RAMKALAWAN

Mr Speaker sa ki mon pe al dir i senp.  Onorab Loze in aktyelman, mon’n reste trankil.  Selman vi ki ou’n lev sa.

In aktyelman impute en improper motive an relasyon avek mwan.  Letan in dir, i pa konnen ki mon al fer lo zil, e an plis ki sa ki poudir mwan mon en senp reprezantan Reziser.

Petet, wi in dir sa li.  In dir sa, ou ava war.  Mr Speaker petet Onorab Loze lefe ki in fek vin dan Lasanble, i pa konnen. Petet ti ava bon remind li ki poudir an relasyon avek zil, mwan mon Chairman Komite Zil.

E ki bann vizit ki nou’n fer li zil, sak fwa ki mon’n al lo zil, mon pa’n al lo okenn zil an deor travay Komite Lasanble.  E ki mwan mon pa reprezantan okenn Reziser Zil.

Letan nou ale, Onorab De Commarmond, Onorab Sebastien Pillay ek bann lezot Manm, nou ale pou nou fer en travay, ki byento nou pou prezant rapor.  Alor, petet ti ava bon, zis pou li relax.  Mersi.

 

MR SPEAKER

Mersi Onorab.  Bon, en pe letan mon pe swiv entervansyon Onorab Loze.  Ankor parey mon dir, menm dan sa konteks, sa aktivis, i pa’n fer referans avek en non, avek en Manm oubyen avek en dimoun an piblik.

Mon’n sey konpran, akoz sa size FADs mon krwar preski tou Manm yer in leve dan kestyon.  So ler in fer referans lo sa FADs, lo FADs, mon pa’n vreman kapab pinpoint lo ki Manm ki i pe anmenn sa.  Me i pa’n nonm ou non Onorab.

 

(Off-Mic)

 

MR SPEAKER

Bon, mon ava fer mannyer mon a ganny Verbatim. Ankor mon ava regarde.  Si i annan okenn bout kot mon vwar in mansyonn ou non, in mansyonn Leader Lopozisyon and so on.  Then mon ava fer li neseser.  Onorab Loze kontinyen.  Me petet mon a dir ou poudir ou napa bokou letan.  Ou annan apepre 5 minit leftPlease.

 

HON JOHAN LOZE

Mr Speaker mon a pran sa 5 minit pou mon clear the air.  Mon ava tender en apology to Onorab Larue. Akoz fransman from sa ki mon’n tande yer, mon ti napa en nide ki sa ti en travay Lasanble Nasyonal.

I will be forgiven for not thinking ki Komite Lasanble Nasyonal i al fors laport dan miting dimoun.

So mon tender en leskiz avek Onorab Larue pou sa.  Si i ti son travay Komite, then fine. E Onorab Ramkalawan mon eskize pou sa zafer zil.  But there again, la mon pou dir en lot keksoz.

Rapor Komite Zil lo Coetivy ti Verbatim, word for word sa ki mon’n deza tann sa msye dir ek nou dan en miting an 2007.  Sa mon pou dir and I will stand by that!  Mr Speaker, les vwar pou lavenir Sesel e Seselwa, i pa kapab ganny separe avek lanmer.

I enposib pou nou separ lavenir e fitir Sesel e Seselwa avek lanmer. Nou pei i zis detrwa gren dipwav lo map, perdi dan milye en losean.  Be, i domaz nou pa vreman en seafaring  Nation, e gran poursantaz nou pep parey mon menm aktyelman pa konn naze.  I am not proud to say it.

Be, i annan gran zefor pou nou fer.  Pou nou devlop nou Sekter Lapes, pou nou devlop nou Sekter Lekonomi Ble. E sa bout sectorial support, mon krwar nou bezwen koz ankor avek sa bann dimoun, koz ankor avek bann kolonizater laba.

Ganny en pli bon parol avek zot.  Akoz, kolonizater li, i pa nou zanmi li.  I pa ou best friend li.  Li i a negosye ek ou ting pou ting.  Eropeen, pa Eropeen an zeneral, Linyon Eropeen ofet i annan li en febles li.  Akoz li i kontan ganny vwar koman bon boug.  So petet li i a negosye ek ou en pti pe pli byen ki leres. Akoz dan son DNA pou li ganny war konman bon boug.  Selman zeneralman kolonizater pa nou zanmi.

Enn bann keksoz ki nou bezwen fer Sesel, se double nou kapasite processing pou ton. E la mon pe koz industrial processing.  IOT pa ase, nou bezwen double sa kapasite ki IOT i annan.

E nou bezwen rod en fason fer sa, akoz nou pa faid nou pe pou nou fer li.  It needs to be done.  E once ki sa in ganny fer, nou kapab abzorb e process plis ton isi.  Sa bann dimoun ki annan bato, i pa pou kapab pran ton, tay avek li, i bezwen anmenn ater isi. Nou ava aste, nou ava servi e nou a process e nou a eksporte.

Ti a byen si bann Eropeen, si nou bann kolonizater ti a kapab akonpanny nou dan sa demars.  Apre posibleman kelken i ava vini, i a dir sa pa pou nou, parey i dir por pa pou nou.

Selman zot ava akonpanny nou dan sa demars, pou nou raport plis benefis e rezilta pou nou pep e nou pei. Mwan personnelman, mon vwar bokou lespwar dan sa lanmer ble ki nou annan.  Mon vwar bokou benefis potansyel si nou enplimant en bon vizyon, bon zesyon. E mon krwar ki nou lo bon semen Mr Speaker.  Mersi Mr Speaker.

 

MR SPEAKER

Mersi Onorab Loze.  Mon a donn laparol Onorab Ahmed Afif.

 

HON AHMED AFIF

Mersi Mr Speaker. Mr Speaker mon oule komanse an diran ki, mwan mon fyer mon en Manm Lasanble Nasyonal!

Mon pli fyer akoz mon en Manm Lasanble Nasyonal lo sa kote latab LDS ki’n fer sa Lasanble travay, sa Lasanble vreman travay, vreman demann kestyon!

Mon konmans koumsa Mr Speaker, akoz i malere pou tann serten komanter ki mon pe tande depi yer. E bann komanter ki pe kestyonn travay Lasanble Nasyonal.

Si en Minis e son tim i vin isi, zot ganny demann kestyon, e zot menm dir zot pa konnen akoz sa zafer in ganny anmennen isi e zot pe ganny kestyonnen?

Pou mwan, i malere ki L’ Egzekitiv i pran en tel pozisyon.  Parske i sizere poudir, zot pa konn zot rol e Konstitisyon. Konstitisyon i fer provizyon pou annan en brans Gouvernman ki apel Lezislatif, ki Lasanble Nasyonal.  Ki son rol zisteman se pou met zot la, demann zot kestyon lo nenport ki size ki i annan pou fer ek zot travay!

I vin parey ler Oditer Zeneral e son staff i antre kot en Minister pou al fer en odit. Sa PS i al kriy sa oditer, i dir be kwa ou pa konnen ki mon pe fer?  Ou krwar konmsi mon en voler?  Non.  I sipoze aksepte sa dimoun pou vin dan sa landrwa. Parske se son rol koman oversight!

Alor sa bann latitid, ‘’aret kestyonnen.  Si ou kestyonnen savedir ou malelve. Ki zot krwar zot ete, eski zot mank respe pou profesyonnel?’’

Mr Speaker sa bann komanter pou mwan i sagrinan.  I sagrinan parske i montre en mank ledikasyon la lapar US e Gouvernman1

 

(APPLAUSE)

 

HON AHMED AFIF

I malere pou dir sa, i malere pou dir sa.  Me i en fe e in ganny reflekte ankor bomaten.  Annefe si ou en zanfan, ou al lekol.  Ler ou al lekol, e ou ansenyan i kriy ou i dir ou, ou’n ganny 70poursan.  Be i krwar ou annan potansyel pou ou ganny 90poursan.

 

MR SPEAKER

Onorab en moman, en moman Onorab Afif.  Onorab De Commarmond.  Onorab De Commarmond ale, you can exit.  Bon, mon anvi fer en keksoz kler.

Onorab De Commarmond ou kapab exit, amwen ki oule rantre pran ou sez ler mon pe koze.  Ou kapab rantre pran ou sez.  Ok? Bon, mon anvi fer en keksoz kler.

E sa in leve lotrozour, le 2 dirizan in leve.
En Manm Lasanble i kapab leve nenport moman, exit the Chamber, i annan lezot keksoz ki zot kapab al fer.  Zot kapab al dan toilet and so on, i zot drwa pou leve.  Ler en Manm Lasanble i leve, en lot Manm pa kapab lev lanmen anler, montre lo li, oubyen fer komanter.

Nou bezwen respe sa.  Mon dir ankor, pou Deputy Clerk leve pou li ale, nou bezwen pran en technical adjournment. Dan Chair, whoever is in the Chair pou li ale, i bezwen fer parey.  Me zot Manm zot lib pou fer li.

Alor, nenport Manm nenport kote latab ki leve ki ale, i lib pou li leve sorti a nenport moman e apre reantre i regain son seat.

Annou montre en pti pe sa respe pou lezot.  Nou tou nou en Manm Lasanble.  Ok?  So, mon konnen Onorab Ramkalawan, mon konnen.  Akoz mon pa pou nonmen lekel sa Manm.

Me sa Manm ki responsab pou provok sa reaksyon i pa fer premye fwa, depi bomaten nou’n komanse.

Pou fer, pou lev lanmen pou montre en Manm pe sorti.  So, mon pa pe insinuate nanryen, mon pa’n nonm non sa Manm. Me annou kontinyen travay.  Onorab Ahmed Afif kontinyen lo ou entervansyon.

 

HON AHMED AFIF

Mersi Mr Speaker.  Mr Speaker mon ti pe zis eksplike poudir nou rol, sa travay ki nou fer ler nou kestyonnen, i en travay primordyal, en travay enportan.

E mwan, lo sa kote latab mon konnen tou dimoun, nou pa pou zanmen les tonbe sa travay nou!  Nou pou kontinyen demann zot kestyon.

Nou pou kontinyen rod repons pou fer sir ki nou, sa manda ki pep Seselwa in donn nou, nou pou enplimant sa manda to the full!

Nou pou fer sir nou demann kestyon.  Akoz se atraver kestyon, atraver oversight ki sa pei, nou pa pe mazin sa Gouvernman nou.

Sa pei pou bouz devan.  Mr Speaker, yer ankor, Minis i malere in ale.  Me selman ler mon ti demann kestyon, par egzanp,  mon dir poudir nou pe ganny R4 par kilo ton ki lapes dan nou delo.

Peser ki vann zot pwason deor laba, i konnen ki savedir R4 en kilo.  Se tou ki nou pe gannyen anba sa Lakor. Sa menm, ekspre mon ti nonm li €3 ki sa bato i al vann.  €3 apepre R64.

Zis pou dimoun konnen ki diferans i annan ant sa ki nou, nou gannyen ek sa ki zansla i gannyen. E pou zot zis fer sa lanaliz, e dir, be eski nou pe byen pase?  E Minis i byen sa ki in dir li.  I dir mwan, ‘’be Onorab balanse, kalkile.’’

Mon pe dir ou i annan en bann i €1100 par tonn, en bann, sa lot i 3mil.  Ekspre mon’n fer sa mwan.  Pou mwan fer li dir egzakteman sa ki mon ti anvi i dir.  Poudir i annan en bann ki pe vann €3mil par tonn, i annan en bann €1100.

Be akoz dan sa Lakor nou pa dir?  Parske nou annan dan Protokol, egzakteman ki mannyer i mezire, ki catch ler ou antre ek 2mil tonn, konbyen yellowfin ou annan?

Konbyen ton ledan ou annan?  Konbyen skipjack ou annan?  Pa i annan tousala, ou bezwen rikord sa an detay.  Dan sa Protokol nou’n war bann form ki zot in mete.  Be si nou konnen ki kantite skipjack bato i anmenn ater, nou pa kapab mete dan sa Lakor si ou atrap tan kantite skipjack.

Ou pa pou pey nou €50 1 tonn.  Ou a pey nou €150 1 tonn, pa kapab mete sa?  Se bann pti keksoz koumsa ki mon krwar i pou fer en diferans.

Mr Speaker nou rol pou nou kestyonnen, i pa vedir nou konn tou.  Nou pa pe dir ki nou pli malen ki zot.  Ditou! Ditou pa!  Nou pa pe dir sa bann teknisyen ki la, pa konn zot louvraz.

E mon ava eksplike mon a donn detrwa legzanp.  Botanic, zis pou ilistre sa pwen.  Ler nou ti kritik Botanic, eski nou ti pe kritik konpetans Mr Brioche?  Nou ti pe dir li i pa konnen landscaping?  I pa konnen ki mannyer?  Mwan mon konnen bann dimoun parey li, bann dimoun ki kapab dekor en landrwa, fer en zoli travay Botanic.

Be pa sa ki nou pe kestyonnen nou.  Nou, nou pe dir, ou louvraz, dan nou louvraz oversight, ou pa kapab pe anmas R700mil par an kot ou baro.  Nou pa pe kestyonn son konpetans nou.  Nou pa pe kestyonn sa bann travayer kot baro nou.  Nou pe demann lafason sistenm kont in ganny organize laba.

I pa en kritik lo sa bann profesyonnel.  Ozordi, olye anmas R700 mil par an, zot pe anmas R6milyon. Sa lannen byensir i pa pou ariv sa akoz nou napa touris, me 6 milyon sepa 8milyon.

Linyon, eski nou isi, nou konnen ki mannyer i fer marse zarden laba Linyon?  Nou konnen mannyer i plante, nou konnen ki mannyer tou sa bann keksoz i marse laba?  Nou konnen mannyer i neseserman vey baro?  Me akoz nou’n kestyonnen.

E nou pa’n maltret sa bann travayer Linyon nou.  Nou pa’n maltret okenn profesyonnel ki travay laba.  O kontrer nou’n siport bann profesyonnel sorti kot Minister Finans avek Public Enterprise Monitoring Commission, nou’n siport zot travay.

Pou fer sir ki olye perdi larzan, ozordi zot pe fer R2 milyon profi.

 

(APPLAUSE)

 

HON AHMED AFIF

Se sa ki nou pe fer dan sa Lasanble Nasyonal.  Nou pa pe mank respe pou profesyonnel.  Ler AMSA, mwan mon rapel mwan lo sa kote latab, mon ti kestyonn dyaliz. Mon ti dir, mon ti dir nou pe pey, sepa 20 ekek milyon, 30 milyon an plis ki nou devret.  Odit in ale, eski mon eksper dan dyaliz mwan?  Ditou.   Nou lwen ek sa.  Nou lwen ek sa.  Eski okenn dimoun lo sa kote latab ki ti pe osi kestyonnen.  Ti eksper dan dyaliz?  Be ditou.  Nou ti pe dir, i annan keksoz ki mal.

Nou war en lafimen,  e nou anvoy en dimoun ki nou respe, en profesyonnel, pou al laba pou al fer en odit.  Parske nou respe zot.  E vre, sete pa bann teknisyen ki ti’n aranze tousala.  Sete bann dil anler, anler ki napa nanryen pou fer ek sa bann teknisyen.  Ki apre zot fer krwar nou, nou pe blanmen.  Se zot bann prop dimoun anler ki ti’n organiz tousala.

E la nou ti’n al sov 20 milyon par lannen.  Dan 4an, 80 milyon.  €4milyon.  Konbyen nou pou gannyen avek Linyon Eropeen, 9.7, lanmwatye sa, zis dan en dil.  Se sa rezon mwan mon fyer mon en Manm Lasanble Nasyonal.

Mr Speaker mon pe vin ankor lo sa pwen oversight.  Larme, ler mon ti, nou, nou ti premye vin dan Lasanble isi an 2016.  R400milyon Bidze.  Ozordi 300, sa lannen mon krwar 322.  Be i ti pou omwen 100milyon an plis.

Dan 4an, R400 milyon saving.  Lekel ki’n fer sa?  Akoz nou konn anmenn en fizi dan nou lanmen?  Eski nou, nou konn stratezi militer nou?  Eski i vedir nou pa pe respe solda?  Eski i vedir nou pa kontan zot, nou pa kontan Coast Guard?  Be ditou.  I senpleman, nou pe rod larzan pou sove.

Akoz i annan serten keksoz ki pe arive ki mal, pa ti bezwen, ti pou vin en gaspiyaz ou en koripsyon.  E ozordi pei i annan bokou plis resours ki kapab ed sa bann dimoun e sa bann profesyonnel. Ki zot, zot pe dir nou pe mank respe pou zot.

IOT, dan Bidze 2016 ti annan R7milyon sibvansyon pou 13enm mwan pou 2017, mon rapel.  Nou tou nou rapel.  E ler nou, lo sa kote latab nou ti kestyonnen, ‘’be lala, zot pa kontan travayer.’’  ‘’Zot pa kontan travayer.  Zot pa anvi sa bann travayer i ganny 13enm mwan. ‘’

Ozordi dan Bidze, i annan zis R400mil.  En saving plis ki R6, R7milyon, tou le lannen pandan 4an, R24 milyon.

€1 milyon lanmenm.

 

(APPLAUSE)

 

HON AHMED AFIF

Zis IOT.  Eski i vedir nou, nou pa respe Mr Payet kot Finans ek Mr Thesee?  Be ditou.  Parske se pa zot ki fer sa bann desizyon pou mete.  Zot ganny dir mete, akoz sa en politik sa.  E se sa bann politik ki sa oversight ki nou fer dan Lasanble Nasyonal i anpes arive.  Pa akoz nou pa respe bann profesyonnel.

 

(APPLAUSE)

 

HON AHMED AFIF

Mr Speaker si ou azout Botanik, 5milyon.  Linyon, detrwa milyon par an. Larme R100milyon.  IOT R7milyon.  Zis sa bann, zis detrwa, mon pa’n ni met dyaliz ladan.  Ou pe ganny ou dan en lannen R140milyon, dan 4an R562milyon.  26, FIU mon pa’n mete.  €26milyon pandan sa 4an.  €26milyon i reprezant lanmwatye larzan ki sa bann zans in al negosye avek tou sa difikilte.

Zis travay Lasanble Nasyonal.  E i malere pou vwar lot kote latab ki zot dir, me war zot napa respe pou profesyonnel.  Zot napa respe pou Gouvernman.  Zot krwar sa bann zans pa konnen ki zot pe fer.

Be selman, akoz nou’n demann kestyon, nou’n met presyon lo sa Gouvernman.  Nou’n reisi sov sa pei R562 milyon.  Ki lanmwatye Bidze ki nou fek vote akoz sityasyon COVID.

Be nou’n save sa zis dan 4an ek nou travay ki zot dir pa enportan.

 

(APPLAUSE)

 

HON AHMED AFIF

Mr Speaker sa travay ki nou pe fer dan Lasanble i en travay ki vreman enportan.  E sa Protokol i vreman enportan pou Sesel.  I enportan pou Sesel akoz nou napa resours Sesel.  Nou annan zis pwason.  Apard sa lans, sa zoli soley ek sa labote ki nou annan, nou napa nanryen ankor pou nou ganny deviz avek.

Me selman tou sa ki nou manze, preski tou, tou, sa lenz ki lo nou, sa mont, sa bann computer.  Tou sa ki la devan nou ou bezwen deviz pou gannyen.  Sel mwayen ozordi, sirtou avek COVID se sa pwason ki dan lanmer.

Alor, ler nou, nou asize nou dir ek sa bann zans, nou dir avek delegasyon.  Be zot i enportan pou ou kapab ganny meyer, meyer deal.  E mon kontan, Onorab ki’n koz avan in dir ek mwan, i pa krwar nou’n ganny meyer dil.  Kolonizater li i annan son fason panse li.  E mon kontan sa mwan.

Parske mwan avek tou respe pou bann profesyonnel, mwan mon krwar zot, zot in fer zot meyer travay.  Zot in fer zot, zot meyer travay zot.  Me selman kot mon krwar nou ti kapab fer pli byen, se annou pran bann legzanp kot nou’n deza fer pli byen.

E mwan mon a donn zot en legzanp, IOT.  IOT dan lepase, mon pa pou pran bokou letan, mon konnen napa.  Me selman mon pou donn en legzanp IOT,  ki li i en gro lizin ton.  Probableman 2enm pli gro dan lemonn.  E sa letan ler i ti etablir Sesel, toultan i ti vin kot Gouvernman Sesel.

I dir ek Gouvernman Sesel, ou bezwen donn mwan, ou bezwen sibvansyon mon elektrisite.  Ou pa pou kapab les mon pey, fer mon travayer pey tax lo zot saler.  Mon pa pou kapab pey bann fees debarkasyon bato.  E mon pa pou kapab deklar ou mon vre profi.  Akoz, ou konnen dan sa biznes la, dan sa biznes, nou, nou bezwen reste tight lo lenformasyon.

E si ou pa dakor ek sa, nou pou frenmen nou pou ale.  E tou ou travayer, ou annan 500 travayer zot perdi zot job. Akoz ou bezwen konpran, poudir si nou, nou pa isi, si nou pa la ou pou soufer.

E nou, nou kapab al plizyer pei dan lemonn, nou pou etablir en lizin ton.  Set en pti pe sa lapros ki zansla ti vin devan nou.  E zot in ale pou plizyer lannen.  Me an 2008 avek reform. E se la kot mwan mon pe dir i pa depan zis lo nou.  Wi nou osi nou kapab demann kestyon, wi nou osi nou konpran ki pase dan en lizin.

Me selman, avek led Labank Mondyal, e sa letan, mwan mon ti ankor dan
Finans, mon rapel byen.  Nou ti demann zot en lasistans.  Ki pou fer.  Zis anmenn bann eksper.  Pa akoz zot pli malen ki nou. Pa akoz zot pli malen ki nou.  Zot, zot annan sa leksperyans ki zot, zot in regard lafason bann lizin dan lezot pei in ganny striktire.

Ki kondisyon sa bann Gouvernman i donn zot.  E sirtou ki kondisyon zot annan ler zot antre ek zot ton dan Linyon Eropeen. Se sa bagaz ekstra ki manke.  E ler ou al sa bann negosyasyon.

Par egzanp mon a dir zot dan ka IOT.  Zot ti dir ek nou poudir ou pa kapab aksepte liv ki ganny prezante avek ou par sa lakonpannyen.  Kot i pe montre ou i pe zis break even.  Annefe Mr Speaker sa ti sokan.

Eski zot konnen poudir en gro lizin koumsa, i pa zanmen deklar son vre reset avek son aksyonner ki ti Gouvernman?

I senpleman dir ek li, profi i baze lo prodiksyon.  Se tou.  Si mon prodwir 5milyon kes kartron ton, mon a donn ou 50 sou Dolar Ameriken lo sak kes.

Pa vin demann mon konbyen mon’n vann en bwat ton.  Pa vin demann mwan mon kou.  Pa vin demann mon ki bor lavant i ete, parey yer nou ti pe demann ek Minis konbyen ou vann en ton, en yellowfin en avek en kilo bigay, pa demande sa bann kestyon.

E ler Labank Mondyal ti vin kot nou, i ti dir ek nou, be ki mannyer ou kapab aksepte sa?  Zot in ale, zot in fer en letid. E zot dir, kot lakonpannyen pe dir ek i fer zis €1milyon profi dan en lannen, i ti pe fer €10 milyon profi dan en lannen!

E ler zot ti fer sa, nou, nou ti servi zot koman en lebra pou vin dan negosyasyon.

Alor nou al atab ek zot, avek en dimoun ki annan bagaz enternasyonal avek lenformasyon konparativ sorti dan lezot ziridiksyon.  Kot ou asiz atab e ou dir, be lo sa konponan mon pa dakor.

Nou pa kapab kontinyen pey ou Bill elektrik.  Ou bezwen pey tax lo ou travayer.  Parske an Ghana ou pe peye.  Ou bezwen pey lending fees.  Tel landrwa kot ou pe debark pwason ou pe peye.

E nou’n sorti dan en sityasyon zis lo IOT, kot Gouvernman ti pe sibvansyonn apepre €3milyon tou le lannen.

Ozordi mon napa sif ozordi.  Selman i pa pou sirprann mwan, si zot atraver income tax, dividends lo zot profi ki zot pe pey SSI ozordi, Gouvernman endirekteman pe ganny li €4 a €5milyon olye sibvansyonn €3milyon tou le lannen.

 

(APPLAUSE)

 

HON AHMED AFIF

Se sa kalite, se sa kalite bagaz ki Lasanble Nasyonal pe demande ek Gouvernman.  Ler zot al asiz atab avek Linyon Eropeen, nou pa pe kestyon Ms Mangroo nou. Mwan mon konn Ms Mangroo ki travay Minister Finans koman one of the top experts dan Trade. Mwan mon konn Mr Lucas koman en dimoun ki konn son metye dan SFA.

Mon konn Mr Clarisse koman en dimoun ki konn son metye dan pwason avek resers. Me ki nou pe demande, Parey dan negosyasyon ek IOT, parey dan negosye ek det Mr Speaker.

Sete pa Ahmed Afif ki ti zis li lo li menm, avek Mr Charlette sa letan kot Finans, Mr Thesee i pa ti tro involved dan det negosyasyon.

Zis pou lenformasyon Manm ki laba, i ti annan en tim.  Ms Croisee eksetera ti ladan. Me selman sete pa zis akoz nou, nou ti al avek en lekip Seselwa ki nou ti reisi.  Se parske i ti annan en lot travay par kote, kot nou ti pe servi lafors en Lenstitisyon Miltilateral tel ki IMF ek Labank Mondyal. Ek zot bann konsiltan ek zot ban eksper.  Ki ti asiz ansanm ek nou.

Prezan ler nou pe negosye avek L’Angleterre par egzanp lo son det.

Nou dir L’Angleterre poudir ou devret re donn nou plis letan pou re pey sa det.  E li i dir non, i pa pou kapab, i bezwen koup sa par 4an. Sa eksper ki la, ki’n deza negosye det L’Angleterre ek Iraq, oubyen avek Afghanistan, oubyen avek en lot.  I dir, e, e zis pou lenformasyon PS, lala ki ti ganny ofer laba.

Sa kalite bagaz akote ou i for, for, for!  Pa akoz ou, ou pa konn sa.  Be ou napa akse avek sa lenformasyon sa letan.  Be zot, zot anmenn sa bagaz.  Sa sipor enternasyonal se sa ki manke.  Mon krwar dan sa negosyasyon sa ki Onorab Ferrari pe demande, se plis ou annan dimoun, pa neseserman i pe al override ou dan sa negosyasyon.

Me i la koman en obzervater, i pou ed lekip Sesel.  E dan Sesel, mon pa oule nonm non.  Me nou annan dimoun ki’n deza travay dan lizin.  Nou annan dimoun ki’n deza travay, ek eksper ozordi, zot dan biznes pwason.

Nou annan dimoun ki’n deza fer leksportasyon pwason.  Zot konn valer pwason, zot konn ton.

E diferan kalite ki’n ganny anmennen devan ladwann  Lerop.  Zot konnen konbyen sa bann keksoz pe ganny vann.

Sa bann keksoz ek sa leksperyans.  Ou koman en teknisyen, ou pa pou neseserman annan ou, e personn pa devret blanm ou si ou napa.  Me ou devret konnen kot i annan, kot i annan, rod li, met li akote ou, pa bezwen per pou ouver lasal, pa bezwen frenm laport pou okenn Manm IAC. Pa bezwen met Lasanble an deor!

O kontrer, fer li vin pli ris, pran tou sa bann dimoun anmenn ek ou.  Met zot la, fer ou delegasyon for, anmenn World Bank avek ou.  Ler ou asiz atab ek sa bann zans, zans, ou menm nivo ek zot.  Pa akoz ou annan eksper nikleer, non.  I parey en eksper nikleer li.  Selman i nikleer dan en lot fason.

Se sa ki Onorab ti pe eksplike.  Me zot, zot fasilman pran sa bann parol, detourn li, fer li vin gou.  Konmsi isi anndan i en komedi!  Nou pe koz keksoz serye.  Si nou ti fer keksoz pou ton, si nou ti ganny, zis €25, zis €50 an plis, i pou vedir €5milyon probableman pou Sesel tou le lannen.

€5milyon i plis ki R100 milyon.  Ou ti kapab fer plis ki 100 lakaz.  La byento zot pe al ouver bann lakaz partou, partou. Akoz eleksyon pe vini, nou konnen sa.  Be nou, nou pe dir, sa ki nou, nou pe rode.  Se bann keksoz lonterm.

E se sa ki mon krwar i enportan pou Sesel.  Alor Mr Speaker, mon oule zis dir, i annan bokou dan sa Lagreman ozordi ki nou’n kestyonnen.

E nou’n kestyonn pou bon rezon.  E mon krwar sa pa devret ganny enterprete konmsi okenn dimoun i malelve. Okenn dimoun pa devret pe kestyonnen.  E okenn dimoun i annan lentansyon denigre okenn dimoun dan Gouvernman.

Nou, nou pe dir, Sesel i devret fer pli byen.  Nou’n deza fer pli byen.

E byento ler i pou annan en Gouvernman LDS, la ki zot pou realize ki oter Sesel pou arive.

 

(APPLAUSE)

 

HON AHMED AFIF

Se la ki zot pou realize.  Parske i pou annan en nouvo komansman.

Nou pou al lo en nouvo oter, nou pou annan e nouvo standar.  E pei pou annan en meyer lavenir.  Mersi Mr Speaker.

 

(APPLAUSE)

 

 

MR SPEAKER

Mersi Onorab Afif.  Bon nou ava pran en break.  E nou ava retournen pou kontinyen deba 11er.

 

(BREAK)

 

MR SPEAKER

Bon, nou ava kontinyen nou travay.  E mon ava donn laparol Onorab Wilbert Herminie.

 

HON WILBERT HERMINIE

Mersi Mr Speaker.  Bonzour tou Manm koleg Onorab e tou dimoun ki a lekout. Espesyalman bann zabitan La Riviére Anglaise.  Mr Speaker ankor enn fwa sa deba lo sa Lakor Lapes i enn ki vreman enteresan.

Me ava mon al ladan, i annan detrwa pwen ki bezwen ganny fer sorti Mr Speaker. Ankor enn fwa mon reste etonnen dan sa Lasanble kan entervenan avan mwan, i dir ki zot valoriz nou bann profesyonnel.

Me solman yer, son Leader lo menm kote latab avek li, in 2 fwa devan Minis, lekel ki ti al diskit sa Lakor Lapes pou nou.

Minis ti dir, in nonm nou bann profesyonnel lo nou kote.  E i ti anvi konnen lekel lo lot kote, lo kote EU ki ti fer sa negosyasyon.

E ler Minis in demann li, in dir li sa.  In re demann sa ankor.  Konmsi i pe konpar kapasite sa 2 group negosyater.  Li Onorab Afif i dir nou koumsa, ki valoriz bann manrmay dan Finans, Mr Clarisse. Me selman lo lot kote, Onorab Ferrari li i dir, li koman en politisyen ti kapab fer en pli bon travay.

Konmsi mon pa pe ganny en konpran ki mannyer sa 2 i aziste.  Apre ki nou’n fer en fot, nou pe sey fer en reverse.  Enn i dir enn, lot i dir lot.  Konmsi napa en serten alayman dan konversasyon ki pe ganny fer.

Nou, lo nou kote dan United Seychelles, nou’n toultan valoriz nou bann profesyonnel, mon bann koleg.

Parey Onorab Ramkalawan in toultan dir, kontan dir, servi sa term, zot in burn the midnight oil.  Nou toultan lo sa kote, kontan donn zot sans pou zot eksprim zot lekor, pou perform e montre zot kalite abilite ki zot annan.  So, ozordi mon bezwen solider avek mon bann konfrer profesyonnel.

E akoz mon santi sa kalite domaz ki LDS in fer ozordi ler zot pe dir zot pa siport nou bann profesyonnel.  Wi, Onorab Ramkalawan.  Ler Onorab Ferrari i mont la anndan, i dir li ki’n al negosye pou bann maren peser, i pe montre en lack of respect pou sa bann dimoun ki’n al fer sa negosyasyon.

Sa bann dimoun ki’n asize depi bomaten ziska aswar pou get dan tou sa bann logbook pou zot al fer sa bann azisteman.  Zot ki’n travay depi bomaten ziska aswar.  Pa en politisyen ki’n al fer bann maren peser ganny zot larzan.

E sa i sorti kot enn sa bann maren peser, ki dir mon dir sa Komite Teknik mersi. Ki la finalman zot a ganny zot 10 milyon.  E zot dir mersi, atraver ou Mr Speaker.

Mr Speaker i fer, pa fer premye fwa ki ler mon pe koze, Onorab Wavel Woodcock i disturb mwan.  I pe akt parey en manrmay laba lot kote.  Sey ekoute ou ava konn en pe keksoz.  Mersi Mr Speaker.

Mon kontinyen.  Mr Speaker dan sa Lakor i annan bokou keksoz ki Komite Teknik in pas ladan. Ki’n benefisye nou kominote lapes, nou Komite Peser.  E i domaz, i domaz ki dan plas ki LDS in vini, in donn nou sipor, zot in vin fer politik avek sa Lakor, i domaz.

Me selman nou pa war li drol.  Mwan mon etonnen.  Me solman mon pa war li drol. Akoz i pa fer premye fwa ki zot vin fer politik avek en senp keksoz ki’n anmenn bokou benefis pou Sesel. Bokou benefis pou Sesel.

 

(Off-Mic)

 

HON WILBERT HERMINIE

Mr Speaker mon ava aret la.  Mon ava esper trankilite en pti kou.

 

MR SPEAKER

Bon.  Mon fek, mon’n fer komanter avek Sarge ler nou pe desann.  Mon ti ekspekte ki nou ti kapab fini entervansyon lo sa 2 Mosyon, sa 2 Ratifikasyon par midi, pli tar midi edmi ozordi.

Me mon krwar nou pou bezwen al plis.  Akoz, de tanzantan mon bezwen entervenir. Annou sey montre en pe respe ler en Manm i ganny laparol.

Continuously interjection i pou fer ki sa Manm pa pou kapab kontinyen son entervansyon.  Silvouple.  Onorab Kontinyen.

 

HON WILBERT HERMINIE

Mersi Mr Speaker Sir.  Sa Lakor Lapes li menm li i montre en improvement lo sa enn ki ti la oparavan.  E sa ankor enn fwa nou bezwen felisit nou bann negosyater.  Menm si zot pa eksper dan nikleer.  Me selman zot in fer ase byen.  Zot in ase debourye.

E mwan koman en profesyonnel, mon pou respe zot e mon felisit zot pou sa travay ki zot in fer.  I domaz ankor Mr Speaker, ki pandan sa travay ki zot in fer, e zot in prezante devan nou, zot in dir, serten Manm in dir ki zot in anmenn zis serten pti gin keksoz, pa bokou.  Nou’n ganny zis serten lagrenn, nou pa’n ganny bokou keksoz lo la.

Me si nou gete 15 poursan logmantasyon lo previous Lakor, sa i montre ki sa ti en mark of success.

Bokou keksoz in ganny fer.  E mwan lo mon kote, mon apresye e mon kontinyen felisit zot, sa bann dimoun ki’n fer sa travay pou nou.

E osi, nou al pli lwen.  E pou osi dir zot, ki nou lo nou kote isi, lo kote United Seychelles nou’n toultan siport nou bann profesyonnel.  Akoz si zot mazin byen, se lo kote isi ki toultan vot lo Third Reading Bidze.

E sa se sa 10 Manm, sa 14 Manm lo sa kote latab ki toultan vot lo la.  E lepep Seselwa i bezwen ganny sa kler.  Akoz kantmenm zot lo zot kote zot pe dir, zot ti kapab fer pli byen. Be mon pou sirprann si zot ti pou kapab anmenn menm 1 poursan logmantasyon dan sa nouvo Lakor Lapes.

Avek sa Mr Speaker, mwan mon pou siport sa Lakor.   E mon pou vot an faver.  Mersi Mr Speaker.

 

MR SPEAKER

Mersi Onorab Herminie.  Mon ava donn laparol Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun.  Yer bomaten letan mon ti fer mon lentervansyon dan Lasanble, mon ti komans avek parol en sanson.

Sa ki mon’n oubliye dir zot.  Sa sanson i apel, ou pa ou tousel.  Ralph ki sante sa sanson.

Ozordi mon anvi komans avek parol en lot sanson.  E sennla i annan detrwa parol ki dir, nou bezwen met lanmen ansanm.  Isi anba nou paviyon, sanmenm rezon nou tou la pou fer tande nou lavwa.

Sa i bann parol dan en sanson ki apel ‘Pour Sesel’, Georges Payet ki sante.  E i enn mon bann sanson prefer par sa artis.  Mon konmans koumsa, akoz Onorab Pillay atraver ou Mr Speaker i pou rapel sa konversasyon nou’n deza fer, dan en taxi sorti kot nou lotel Lonn pou al Airport pou retourn Sesel sorti attend premye Konferans bann Parlman Pei Commonwealth. 

E mon ti pe dir ek li poudir i pou bezwen ariv en moman kot i annan en zenerasyon politisyen i tonm dakor lo serten size nou pei.

Bann size nasyonal ki cross across party line, akoz i konsern nou pei.  E nou bezwen debout e defann menm lentere ki ou US, ki ou LDS. 

Mon a donn detrwa legzanp, Imigrasyon par egzanp.  Nou en pti pei nou e i annan en moman kot nou pou bezwen tonm dakor lo kantite dimoun nou les rantre dan nou pei.

Lekel ki nou les vin travay se nou.  Sanzman klima.  Nou tou nou pou koul ansanm.  Nou bezwen tonm dakor lo la, bann size lanvironnman.  E ozordi sa ki nou pe diskite, i en lot sa bann size.

Nou pe koz lo Lendistri Ton.  Sesel pa ankor dekouver delwil li.  Me si nou annan en delwil, Onorab Ferrari yer i dir, lor ble, se sa ton la.  E pou mwan, alor i domaz ki serten entervansyon in anmenn sa deba sa nivo ki in arive.

Dan en rigol mon pa pe ale laba mwan.  Mon sorry.  Si i annan nou la ki’n lir en liv ki apel Sunshine and Shadows, ekrir par Dr Maxime Ferrari.

Nou ava edik nou lekor lo sa zafer bann negosyasyon ant Sesel avek Lerop lo devlopman Lendistri Ton, date depi ‘84.

I en liv ki mon ti ava, i en sapit ki mon ava advise bokou nou la anndan pou lir.  E nou ava aprann ki mannyer tou sa bann zafer in komanse.  E ziska la kot nou’n arive.

Aprezan, parmi tou bann keksoz ki’n ganny dir yer, nou ti’n merit sezi en keksoz.  Sa deba la, i istorik ki nou pe fer. Pou en senp rezon.  Zanmen, zanmen, zanmen dan listwar Lasanble Nasyonal, depi retour miltiparti an ‘93.  Deba lo en Lakor Lapes avek Linyon Eropeen e son protokol in ganny diskite libreman e ouvertman parey i pe fer dan 6enm Lasanble.

 

(APPLAUSE)

 

HON GERVAIS HENRIE

E se pou sa rezon alor, ki nou pe pran sa pwennvi ki nou nou’n pran.  Nou, nou pa pe dir avek bann profesyonnel ki zot pou fer, ouswa ti merit fer.  Nou pe gete ki zot in fer koman oversight.  E ki mannyer a lavenir nou kapab batir lo la.

E LDS in sorti avek en pozisyon kler dan lentervansyon Onorab Ferrari,  poudir dan evantyalite e ki mon krwar ladan,  en sanzman Gouvernman dan prosen eleksyon prezidansyel.  Nou, nou koman en Gouvernman LDS, nou pou renegosye avek Linyon Eropeen pou en better deal.

E, akoz nou pa kapab eseye?  Menm zafer nou’n vwar ki i ti arive avek Lagreman Etihad ek Air Seychelles, zis avan ki Prezidan Michel i pas baton, zot taye zot renegosye.

Akoz evantyalite ki i ti pou annan en sanzman Gouvernman.  E alors zot met nou pei an notaz.  E i annan en Manm ki’n koz lo la ankor.  6an i sot sa peryod letan ki en lot Gouvernman pou vini.  E i met nou pei an notaz.  Alor, se sa ki i fer ki i annan en diferans fondamantal ant sa kote latab avek lot kote latab.

Nou, nou pe dir poudir it could have been a better deal.  E Onorab Afif in fer sa tre byen bomaten dan son prezantasyon.  E depi yer se pourtan, se pour sa rezon akoz sa kote latab pe demann bann kestyon pertinan.

E konmsi mon bann zanmi dan medya, tre pwenti.  Par egzanp letan Onorab Afif in kestyonnen lo tonaz.  Ki mannyer nou’n ganny sa sif?  Mwan mon’n demann, lo sa ki Minis in apel en satellite account fisheries.  Ki zot ankor pe evalye.

Ozordi koman en Gouvernman, zot ti merit dan en pozisyon pou dir ek nou, konbyen zot krwar en kilo ton ki sorti dan lanmer Sesel i vo lo marse enternasyonal?  Sa i bann kalite konversasyon ki en Lasanble serye i oule fer.  Non pa pou met nou dan en politik nou kont bann profesyonnel.

E mon oule dir avek bann profesyonnel, sa i en politik ki nou pou tann ankor plis ki pe vini.  Pa bezwen pran sa bann zafer serye.  Akoz nou parey zot nou.  Nou parey zot.

E nou konnen poudir ni annan bann kestyon ki ou bezwen demande.  E koumsa ki nou grandi.  Sa image la, sa zimaz ki Onorab Ferrari in servi yer, ki mannyer nou sort en zanfan e nou’n grandi.

Parski si depi ‘84, konbyen letan i fer, pase vitman si mon pou fer Matematik.  La, 36an. 36an sa Lendistri dan Sesel.  Eski zot santi.  Annou analiz en kou la koman endividi Seselwa.

Eski seryezman nou santi poudir nou annan en irzans par sa menm Gouvernman tou sa letan, vreman pou donn valer nou Lendistri Lapes e partikilyerman Lendistri Lapes endistriyel.

Sa lenportans ki i dwatet annan.  Eski in fer? Non i pa’n fer.  E ozordi nou dan problenm. Tourism i dan problenm.  La prezan ki nou pe sey taye pou nou kapab fer en keksoz.  E si nou pou pran bann legzanp debaz otour nou.

Mon koleg i asiz a kote mwan drwat la.  Depi ler in vin dan Lasanble an 2018, pe demann en bwe pou son bann peser Anse Boileau. Eski in gannyen?  Non i pa ankor gannyen.  Onorab Speaker ou menm ou koman MNA Bel Ombre, depi 2002, 2007 apre la ankor 2016.

Devlopman Por Lapes Bel Ombre, i pa ankor ariv a sa faz ki i ti merit ete.  Bann bazar o tour bann distrik.  Son purpose ki mannyer i ganny.  Mwan mon’n ne preski dir Cascade.  E mon’n fer tou mon letid primer, mon konn byen zistwar Cascade bazar.

Be vre ti annan en bazar ki’n ganny convert dan en laboutik, in ganny convert, in laboutik. Apre en lot bazar in fer o bor.  Mon pa konnen lekel propriyeter.  Mr U en keksoz koumsa, mon pa tro sir.  La nou pe al fer en 3enm.  Be konmsi, irzans konsantrasyon.

E mon’n war en portre mon Prezidan pe vizit Cascade, dimoun pe vann pwason o bor semen, en bazar ki ganny servi pou vann en pti pe legim.  Apre bann boug i chase ladan, ouswa zot zwe lanmizik tou le lafen dimwan. Lirzans pou met resours dan nou Sekter Lapes.

Letan nou pe koz lo sor bann maren peser. Be in pran sa kantite letan pou bann dimoun dan Gouvernman tande poudir tou sa letan bann Eropeen pe vol zot?  Plizyer fwa.

I annan Pat Stravens Mont Fleuri, ki zwenn mwan, in koz ke mwan lo sa size.  REGAR in ekrir lo la.  Le Seychellois in vini in ekrir lo la.  Be Lotorite ti pe tande?  Alor irzans pou anmenn sa bann devlopman.

Training, la aprezan sa semenn ki nou’n tann Maritime Training School, pou fer en MOU avek SFA.  E anfen mon a felisit msye ki ansarz SEYPEC, Mr Benoiton.  Parski li ki Chairman sa Board.  E kekfwa i pe mazin dan menm loptik ki SEYPEC in fer.  Sa progranm training ki SEYPEC pe fer.  Be it’s too little, to late.  Training dan term met bann zenn lo tanker.  La prezan nou pe al pou dan domenn lapes.  E alor, malgre tou little too late, nou pou siporte sa bann linisyativ parey.

Ler nou get demars ki pei in fer, lenvestisman ki pei in fer dan bann zafer tanker, nou napa nanryen pou fer avek tir delwil bann keksoz koumsa. In fer byen, pe anmenn en pe larzan pou pei.  Be akoz nou pa ti mazinen fer parey dan domenn bann purse seiner, bann bato ton.

Alor Mr Speaker, se sa ki nou pe dir, nou dan LDS,  nou krwar poudir i merit annan plis latansyon e irzans. Pou ki, pou ki sa lendistri, nou ganny maksimonm avek e nou ganny best deal.

Mont Buxton i le sel distrik dan Sesel ki landlocked pou bann ki pa tro familye avek Zeografi nou pei.  Nou le sel distrik ki napa border lanmer.  Selman nou annan en gran kominote maren, e se pou sa alor mon’n bezwen retourn dan Lasanble sa semenn pou koz lo zot behalf.

E pou siport tou bann demars, pou ki zot ganny zot konpansasyon pou tou sa bann letan ki bann Eropeen i pa’n tret zot byen.

E depi yer alor, mon’n koz avek bokou ki dan sa lendistri.  E zot dir ek mwan sa ki LDS pe dir, be i vre. Be lontan bann Eropeen pe ranpli zot pos.  E nou, nou pe ganny konmsi lakourt ki pe tonbe sorti lo latab.

Akoz enn bann rezon zot krwar ki bann Eropeen i prefere, zot prefere pey sa $35.  In sorti €20, in ariv €35 pou si zot pa anploy maren Seselwa? Akoz zot pa oule Seselwa lo bato vwar ki zot pe fer.  Sa rezon.  E sa bann dimoun, zot pe fer zot menm zot sa ki nou apel IUU.

Savedir Ilegal Unreported, Unregulated fishing.  E i dezole Mr Speaker, ki Minis in vin la.  I pa’n denons sa lakizasyon, ou alegasyon ki in annan, ki bann Espanyol in overfish.

Sepaman konbyen mil tonn pwason dan nou lanmer an 2017 e an 2018.  Pourtan, pourtan, Minis in koz lo bann nouvo eleman dan sa Protokol. E alor pou mwan, mon santi poudir mwan mon ti an faver ki zot ti pou reste.  Me malerezman zot in ale.  Ki i annan bann pwen ki nou bezwen ganny en larepons lo la.

Akoz ler nou, nou pe diskit sa, nou pe fer nou rol oversight e nou pe reprezant, ki dimoun dan nou distrik i ganny en rezilta tanzib. Par egzanp, nou koz lo lapes soutenab.  I enn bann nouvo eleman dan sa Protokol.

Parey mon’n dir, nou pa’n tann nonm, nou pa’n tann denons alegasyon over fishing.  Alor ki nou lentansyon fer? Ki mannyer sa i marye avek nou plan konpreansiv pou lapes, avek plan ki’n demark bann zone Maritime Sesel? Tousala ki mannyer i marye?  Ki mannyer i pou anmenn en rezilta tanzib?

Ki kalite letid ki nou’n fer pou nou, lo lasante stok ton dan nou lanmer.  E ki zistans a lavenir nou pe ekspekte poudir leksplorasyon sa resours pou annan dan nou pei.

E Mr Speaker i annan bann letid enternasyonal ki’n fer, ki’n dir, disi 2048, 28an disi stok pwason pou kolaps globalman. Ankor dan 28an mon riske ankor vivan.  E pou tris pou mwan.  So, sa kalite konversasyon ki nou ti merit pe annan, e bann konsern ki tou lede kote latab ti merit pe leve dan sa konversasyon ozordi.

I annan en eleman ki apel korperasyon syantifik.  Alor ki nou ekspekte?  Ki pou bann retonbe? Ki pou bann rezilta?  Pou mwan letan mon tann sa, mon en pe eksite.

Akoz lot zour letan Minis ti vini, mon’n lev en kestyon lo loportinite lazenes dan Lekonomi Ble.

E Lekonomi Ble, nou rapel byen, i en konsep ki koz lo lentegrasyon, zesyon bann, tou bann konponan nou resours Maritime, non?

Savedir i annan loportinite trading, letid e travay pou nou bann zenn Seselwa, enkli bann zenn sorti Mont Signal, Mont Buxton, Belonie, Hangard Street partou. E mon dir zot debrouye lekol, vini vin pran sa bann responsabilite.

I annan sa konponan debarkman pwason.  E Mr Speaker, non selman, pou mwan zis sa, i pa satisfer, i pa satisfer mwan. Akoz mon krwar i bezwen annan bann lot servis ki’n anmennen dan pei, pou nou kapab ganny plis retonbe. E kestyon ankor ki mon ti pe demande, the value of this industry?  E nou bezwen grosi li.

E la mon mazin mon zanmi lekol, nou’n NYS ansanm, nou’n zwe lanmizik dan band Youngsters. Nou reste bon zanmi, Pierre, Pierre Prospere.  Ki Onorab Leader Lopozisyon in deza anmenn en kestyon isi dan Lasanble lo son behalf.  Kestyon dry dock.  Ki li i enterese, en zanfan Glacis.  Onorab Pillay avek Onorab Regina Esparon, i a konn li byen.

Sa i bann kalite lankourazman ki nou bezwen ankouraze. E bann kapitalis Seselwa, bann dimoun ki kapab met larzan dan bann lezot sekter. Akoz nou bezwen rely zis lo IOT pou fer canning?  Akoz nou pa kapab annan en 2enm?

E zisteman koman mon lo sa pwen, i annan en Onorab ki’n koz lo zafer IOT.  E premye Seselwa ki ti ansarz sa lizin. E mwan dan mon fourayman koman en zournalis, sa ki mon’n aprann, se ki bann Eropeen pa ti tro kontan li. Bann Eropeen, e propriyeter ki bann Thai.  Akoz i ti annan lentere sesel li, i ti defann bann Seselwa.

I ti parey Onorab Afif in dir bomaten, sa bann kalite negosyasyon pou fer sir ki Sesel i ganny the best deal. Li koman en Seselwa.  Alor i ti try to find the fair balance.  E sa i pa’n neseserman go down well avek management e  owners.  E la zot ti pe rod en lot ranplasman pou IOT.

Zot in met en pti lanons dan en pti kwen zournal.  Lendi, i dir Vandredi fodre ou’n fini vin apply.  E nou tande poudir en Portige ki basically in fini ganny sa pozisyon.  Alor sa i bann keksoz ki i sagrin nou en pe koman en pei.  Akoz mon krwar poudir Sesel, i bezwen ganny plis.

Lo en lot pwen, ki bann nouvo eleman dan sa bann Protokol,  i annan sa kestyon FAD.  Be ki mannyer nou koman en pti pei, ki sanpyon lanvironnman, nou pa’n kapab dir non, annou arete ek FAD. Alors en zour nou’n lager, nou’n dir, annou arete avek kazye ki fer ek feray.  Be nou’n kapab fer koman en pei?

Alor akoz nou bezwen kontinyen avek FAD?  Mon krwar poudir nou bezwen ankouraz linovasyon nouvo teknolozi, pou nou rod sa bann pwason. E bann Eropeen pa kontan sa zot.  Alor zot dir avek Sesel, non, non, non, sa ou pa pe negosye.

Mon pe met mon lipye ater.  Be sa i bann kalite konversasyon ki nou pe dir.  Poudir non, we want a better deal.  Akoz FAD mon’n fatige avek.

 

(APPLAUSE)

 

HON GERVAIS HENRIE

E FAD ki i fer, i atrakte tou pwason.  Prezan sa ki bann Eropeen pa manze, ki nou, nou manze, parey king fish, zot zete.  E zot menm atrakte bann pwason fon ki mont anler.  Be nou ti kapab pe gannyen sa bann keksoz.  Ou konpran mwan?  So, alor nou pe dir poudir nou ti merit kapab negosye en better deal.  E i annan sa osi sa laspe sirveyans.  Ou vwar, sirveyans.  I kapab anmenn en nouvo loportinite.

Mr Speaker la mon pe mazin lentere bann lorganizasyon non gouvernmantal dan sa lendistri. E la mon pe mazin at the top of my head, transparency international.

I merit annan en pli gran lentere, akoz sa lendistri i annan lespas pou koripsyon.  E tousala, koman en pti pei, nou bezwen port atansyon lo la.  Nou bezwen lir en kantite.  Nou bezwen konnen ki pe pase.

E pou nou asire poudir pei i ganny best deal.  So transparency international, mon pe ankouraz zot pou pran en lentere pou zwenn avek bann obzervater, koz avek zot.

Konnen ki bann difikilte zot pe gannyen.  Rod bann training neseser avek bann pei, ki konsyan poudir i kapab annan labi par sa bann kolonizater, zot in deza apele.  E zot mete sa bann kalite presyon.  Letan nou bann dimoun i al lo bato laba deor avek zot. Ki mannyer nou konnen ki kalite konversasyon ki pase?

Ki mannyer alor nou empower nou dimoun to stand up e dir non, mon annan en etik travay. Mon bezwen fer li drwat, mon bezwen raporte.  Nou’n met, nou’n dir dan sa Lagreman pou annan bann zafer camera.

Alor eski nou up to standard pou nou war live stream ki pe pase? Eski nou annan bann fasilite an term lekipman, an term resours imen, pou nou kapab sirvey? Parski sa, i nou pli gran resours ki nou annan ozordi.  Sirtou, sirtou dan sa moman ki nou pe viv ladan Mr Speaker.

Alor mon ava termin lo sa pwen.  Mon salye, mon salye tou bann Seselwa ki konsernen e ki’n milite ziska prezan.  Pou ki Sesel i ganny a better deal avek nou Lendistri Ton.  Depi o zofisye dan Gouvernman ziske sa senp maren peser ki’n travay dan sa lendistri.  E la mon mazin en msye e en constituent Les Mamelles, Charles Louise.

E Charles  Louise nou’n war li lo televizyon, in monte desann.  Mr Albert Napier.  Parey mon pe dir Mr Stravens ki plizyer fwa in fer sa konversasyon avek mwan.  So i annan en kantite sa bann dimoun, ki tro bokou pou nonm non.  Kontinyen milite.

Kontinyen soufle souflet.  E sonny alarm letan zot santi poudir i annan en keksoz ki pa pe mars byen.  E nou en Lasanble nou ava fer nou devwar koman oversight. Pou nou kapab asire poudir nou pa pe perdi.

E Mr Speaker, Lafrik e Sesel i form parti sa kontinan. Lemonn i reste enterese avek nou, akoz nou bann resours natirel ki nou annan.  Mon pe mazin delwil Angola, ouswa dan plizyer lezot pei osi pros avek nou parey Madagascar, Tanzania. Lor Sid Lafrik.  Dyanman Botswana.  Kakao Côte d’Ivoire.  Kazou, Ghana.  E Sesel ton.

E i annan lentere sa bann dimoun pou vin ver nou.  E zot pou flat nou.  Solman dan sa flate zot pou anbet nou en pe.  E nou, nou bezwen port konsyans poudir nou kapab ganny may zanbek.  Alor mon ava termin kot mon ti komanse.  Pou dir, dezormen, i bezwen annan en konsansis across party line.

Pou dir sa ki pou Sesel nou bezwen debout.  Met lanmen ansanm, anba nou paviyon, fer tande lavwa nou pep, pour Sesel, defann nou lentere, defann nou resours e asire ki pep ki nou reprezante isi anndan i ganny meyer deal avek sa ki apel pour Sesel.  Mersi bokou.

 

MR SPEAKER

Mersi Onorab Henrie.  Mon a donn laparol Onorab Sebastien Pillay.

 

HON SEBASTIEN PILLAY

Mersi Mr Speaker.  Bonzour Mr Speaker. Bonzour tou koleg Onorab. E byensir tou bonzour tou dimoun ki pe a lekout e ki pe swiv nou. Mr Speaker, pandan sa 2 zour mon’n asize mon ekout atantivman bann diferan eleman sa deba. Mon’n pran sa letan pou mon fer kantite resers ki mon kapab fer. Pou koz avek kantite dimoun ki mon kapab koz avek. Mon’n tann bann kestyon ki’n ganny demande yer. E ou a rapel yer mon’n prefere ekoute, malgre ki ler mon’n sey demann permisyon, ou ti dir mon poudir, ti’n fini close lalis pou kestyon. So, mon’n konpran sa.  E mon’n respekte sa.

Mon’n ekout tou sa ki tou dimoun i annan pou dir.  Dan en fason konmsi pou fer sir poudir nou asire ki Lasanble i toultan prezant sa ki ou apel en pwennvi balanse, en size ler i ganny met devan nou. I malere pou dir ki ozordi, ler nou asize nou ekoute.

Mon’n vwar enn mon koleg ki tre entelizan koz avan mwan. In bezwen vin fer damage control. In bezwen vin fer damage control pou bann keksoz ki’n ganny dir par bann politisyen lo son kote latab.  Ki’n al direkteman ver fer bann lakizasyon, e kree bann, si ou le bann persepsyon ki sa bann profesyonnel ki’n travay.

E nou bezwen retourn lo sa pwen. Sa bann profesyonnel ki’n travay lizour, lannwit, lo sa bann Lagreman pandan en kantite lannen. Sa bann dimoun pa’n fer naryen ki byen. E si, par egzanp serten Politisyen, e la nou pou site. Par egzanp Chairman IAC an traver ou Mr Speaker, ti lo sa Komite. Definitivman, nou Lakor lapes ti pou enn ki pou meyer. Ti pou enn ki nou ti pou ganny plis. E lamazorite ka nou Lakor lapes ti pou’n ogmante probableman par 100poursan.

Sa i la realite ki ozordi LDS pe sey fer nou anvale dan sa Lasanble.  Zisteman, apre ki ler yer nou’n demande ki credential sa bann dimoun ki’n al negosye. Credential bann menm dimoun ki nou aksepte dan bann lezot sirkonstans ki’n vin devan nou. Swa koman PS pou Trade, swa koman eksper dan domenn lapes. Bann credential ki menm nou nou’n raise koman Manm Lasanble.

 

(Off-Mic)

 

MR SPEAKER

Yes, Onorab Ramkalawan?

 

HON WAVEL RAMKALAWAN

Mersi bokou. Mon krwar ki i bon pou mwan raise en point of order, o moman ki Onorab Pillay i rantre dan sa direksyon. Mon ti demann Minis, ki credentials bann Eropeen! Pa credentials bann Seselwa. Alor mon ti ava kontan met sa, pou nou aret sa direksyon ki i dir in fer resers. Parski deza la i pe komans mislead.  Mersi bokou.

 

MR SPEAKER

Mersi Onorab. Onorab Pillay annou bouze, e annou servi bann facts.  Parey mon dir i annan bann remark ki’n ganny fer dan Lasanble. Ki zot pou annan lopinyon lo la, me let’s get it right.

 

HON SEBASTIEN PILLAY

Mersi Mr Chairman, Mr Speaker.  Dan lentere get it right, mon pwen ki mon ti le dir, se ki si nou demann credential sa bann dimoun Eropeen, nou pe osi fer referans avek credential sa bann dimoun lo lot kote.  Konmsi, nou pe sey etabli, eski i annan en parite lo nivo bann dimoun ki pe negosye?

E mwan personnelman, vi ki mon’n lekol, mon’n pas mon letan lekol avek serten sa bann profesyonnel,  e mon konn zot tre byen. Mon konnen poudir sa bann dimoun, zot kredansyel i without question.

E i annan bokou nou la anndan ki yer, mon pa pe koz lo Leader Lopozisyon Mr Speaker. Mon pou tir Leader Lopozisyon la. Me serten Manm sa Lasanble, ki’n fer serten komanter par deryer, e sa bann dimoun in tande la devan pa pou menm kapab tous ti bout ledwa serten sa bann profesyonnel.

E la mon tir  e mon dir byen mon tir Leader Lopozisyon, akoz li i pa’n remarke ki reaksyon son komanter in sisite lo son menm kote latab. An relasyon ek sa ki’n ganny dir. Mr Speaker, mon dir sa, akoz i enportan ki nou sitye largiman byen.  Si nou pran letan e nou al regard par egzanp website IOTC. E nou regard lakantite dokiman ki’n ganny prodwi. Sa bann dokiman in ganny prodwir an traver partisipasyon osi nou bann eksper Seselwa.

E la i annan en keksoz ki mon krwar nou bezwen et fran e dir ek lepep Seselwa.  Si ozordi nou ankor annan en Lendistri Ton, nou ankor annan en Lendistri Lapes, apre tou sa lannen, i se akoz sa lendistri, malgre tou son defayans, in ganny manage ase byen. Akoz, bokou lezot pei otour nou.

Si nou ti’n pran sa letan vreman pou nou al regarde.  Pou nou al en pe pli in depth. Bokou pei otour nou zot Lendistri Lapes endistriyel in fini ganny detri.  In fini ganny detri akoz in napa en kontrol. In napa lenvestisman dan dimoun.  In napa lenvestisman pou nou anmenn en nivo konservasyon ki nou Sesel nou’n anmennen.

E sa nou, nou bezwen konpran. E nou bezwen koz lo la. Nou pa kapab vin dan Lasanble e fer krwar poudir Gouvernman, oubyen bann dimoun ki’n mannye sa sekter, in fer li sitan mal, e ki zanmen nou’n deza ganny sa ki nou devret gannyen avek sa sekter.  Toultan nou pou annan en fason pou nou dir nou kapab ganny plis. Annou pran sa largiman regarding sa bann cost.

Mr Speaker, mon krwar i pou en businessman tre drol, ki ler i pou vann en prodwi ki li in gannyen oubyen in pran, in aste. Ki i pou al vann li pou li pa fer en profi. Premyerman.

Me dezyenmman, sa bann bato ler i vin lapes dan nou delo, eski zot pa bliy karbiran? Eski zot napa depans?  Sa pri ki atraver ou menm Mr Speaker, ki Onorab Afif in site.  I sa pri ki zot gannyen wi, me eski nou’n mazin zot bann kou? Annou prezant larealite dan value chain sa industry.

Annou prezant la realite sa lasenn finansyel dan lendistri. Annou pa fer krwar poudir Lendistri Lapes i zis en kestyon ou al dan lanmer, ou tir pwason, and then, ou antre ater.  Akoz menm peser endistriyel pou dir ou, poudir sa i pa posib.

Se pou sa rezon, ki parfwa ou tann piblik konplent pou ganny en pake pwason ler i pas o bor. Akoz tou kou dimoun i krwar poudir ler en peser i ale, i al la lo en koray. I ganny tou sa pwason ki i devret gannyen, and then i vin ater pou vann ou. Se sa ki nou bezwen konpran koman en larealite.  E nou, nou bezwen apresye poudir i annan plizyer lannen. Malgre zot defayans, malgre zot enperfeksyon, parey mon koleg Onorab Gill i kontan dir. Akoz personn pa parfe.

Sa bann dimoun in fer en travay ki nou, nou bezwen apresye koman en Lasanble.  E mon dakor, mon dakor ki i annan size ki bezwen transcend the political divide. Be annou pa fer politik vin main issue dan en size avan, apre pou nou vin dir annou fer politik pa transcend en size.

Mr Speaker, nou pa kapab fer koumsa. Nou pa kapab vin dan en Lasanble, and then dir poudir Linyon Eropeen i enn nou partner privilezye, apre nou fini nou prezantasyon kot nou dir, poudir sa bann dimoun bann kolonizater.  E zot toultan rod fason pou zot ganny ground over nou.

Pa nou ki ti dir sa Mr Speaker.  Sa ti ganny dir par Onorab Ferrari, dan son lentervansyon!

 

 

(Off-Mic)

 

HON SEBASTIEN PILLAY

Mr Speaker, sa ti ganny dir yer par Onorab Ferrari.

 

 

MR SPEAKER

Onorab kontinyen.

 

HON SEBASTIEN PILLAY

Mersi Mr Speaker. Mr Speaker ou ava note ki pandan sa 2 zour. E dan lamazorite ka ler ban Manm dan lot kote latab in koze, mon pa’n entervenir, monn pa’n enteronp personn. Be i paret poudir dan en Gouvernman LDS, dan en Lenstitisyon LDS, ler ou pou al kont sa ki tou dimoun pe panse, ou pou ganny problenm.

Akoz, si mon pe dir en keksoz ki zot pa kontan, tou dimoun pe entervenir. Pe interject.  Tou dimoun i le interject, i le dir nenport kwa.  I annan menm Manm ki prefere pou zot koz off-mic. Be zot in ganny peye pou vin dan Lasanble pou zot koze. So, lev zot lannmen si zot anvi koze! Annou aret koz par deryer rido. Ok?

Mr Speaker, nou bezwen aksepte en lot realite. En lot realite se ki nou mislead dimoun ankor lo la. Dan 400 ekek mil tonn pwason ki ganny tyonbo dan Losean Endyen, 20 poursan i ganny tyonbo dan nou delo. Larestan i ganny tyonbo an deor nou delo. Be selman zot, zot oule claim, e la mon’n soke yer ler Onorab Afif, atraver ou Mr Speaker fer sa lanaliz.

I le claim selman, i le claim re tonbe pou sa 400mil tonn selman. I le claim full retonbe finansyel pou sa 400mil tonn akoz, tou sa bann pri ki in site lo valer sa tonaz. I ganny pran lo sa 400mil. I pa ganny pran lo sa 20mil tonn ki’n atrape.

Me toultan parey labitid ler nou dir en keksoz, zanmen nou’n dir. Zanmen nou fer, zanmen in koumsa. Sa i koumsa dan Lasanble. Zanmen nou le pran responsabilite pou sa ki nou dir, akoz i pa nou ki’n dir. E ler nou’n dir li, li i ti dir en lot fason. E parey ou’n dir bomaten Mr Speaker. Sa i en larenn politik, so obviously ler zot dir en keksoz, nou pou reponn. Nou bezwen reponn.

Eski nou le en sityasyon dan en Lasanble kot nou pa kapab reponn zot? Larealite i reste se ki Mr Speaker, se ki enn bann dimoun. E, la mon pou al lo rikord Mr Speaker. Nou ava get rikord ABC. Enn bann dimoun ki ti demande, e ankor enn fwa mon pou tir bann ki pa dan ABC.  Enn bann dimoun ki ti demande pou ki Minis i la ler nou prezant sa Lakor.  E ki nou fer Committee Stage ler nou pe debat Protokol, sete Onorab Ferrari Mr Speaker.

Akoz mon ti attend sa premye meeting ABC, ki i ti dir sa.  I ti dir, e i lo rikord. Me ler nou’n vin dan Lasanble, e mon kontan Onorab Henrie i dir, i ti a kontan Minis i reste, me Onorab Henrie ti a lev son lanmen i ti ava dir non, mon anvi Minis i reste.  E si nou ti ava pran en vot, zot annan mazorite. Minis ti ava reste pou reponn sa bann lezot kestyon.

Akoz sa ki enportan, fodre dimoun la deor i konpran kwa ki pe pase. Ti napa rezon pou nou al fer tousala.  Nou tou nou dakor nou le rod plis avek nou Lendistri. Si nou ti’n vin lo sa baz lo komansman, nou ti ava kapab ganny en Lagreman lo ki direksyon pou nou ale. Me i pa sa baz ki nou’n vin lo la.

Baz ki nou’n vin lo la se ki nou’n vin akiz en kote, konmkwa poudir sa kote i pa care about Seselwa.  I pa care about nou resours. I pa care about ganny en pli bon deal pou lepep Seselwa. Se sa ki’n arive. E se sa ki’n sirsit sa kalite deba ki nou’n gannyen dan Lasanble. E mon krwar sa i pa sa lideal ki nou ti pe rode atraver sa deba.

Annou pran en lot size Mr Speaker, ki enportan. IOTC ti sipoze zwenn sa lannen, mon krwar la an Zen, le 22 Zen. Pou regard sa size yellowfin tuna.   E, enn bann size ki ti pou ganny diskite se konsepsyon bann FADs ki pe ganny servi. Nou bann dimoun pe kontinyen, akoz IOTC i pa zis Sesel. I en groupman plizyer pei.  E ka ki zot in dir, i annan plizyer rezolisyon ki’n ganny pran. E enn bann desizyon ki’n ganny pran sete ki, vi ki yellowfin tuna (1), son valer komersyal i pli o, me (2), son popilasyon ti’n decline.   Se sa rezon ki bann kota ti ganny entrodwir.

Me nou realize osi ki dan lamazorite ka, pli o popilasyon i migrate dan nou delo. Me nou, nou’n bezwen agree akoz zis pou nou protez sa lespes. Petet kestyon ki nou ti devret vin avek prezan, ki mannyer nou kapab anmenn en lot kalite lapes an ski konsern yellowfin. Parey i ganny fer pou Atlantic blue fin.

Kot sa pwason i ganny atrape lo bann ban deor, i antre dan por apepre 1 erdtan, e i pe ganny shift dan en pei etranze. E, son quality i vreman o, e sa valer ki ou pe gannyen pou sa pwason i bokou pli o.  Se sa bann deba ki nou kapab anmennen lo en additional.  Ki dan sa Satellite Fisheries Account nou kapab rod sa larzan ki ava ed nou devlop sa sekter.

E nou, nou pa’n fer sa deba nou.  Nou’n focus lo en sel deba. Ki Gouvernman pa’n byen negosye, nou pa’n amenn IAC, nou pa’n anmenn isi laba. Look, napa en pei ki pou vin negosye ek Sesel, ki pa pou vin negosye lo son baz osi pou li regard ki mannyer li, li i pou balans keksoz dan son faver. Ennler nou gete, ler nou gat sa deal ki nou, nou’n gannyen konparab par egzanp avek deal ki Maurice in gannyen. Konparab avek bokou lezot pei in gannyen, annou konpare, Sesel in ganny en bon deal. Sesel in ganny en bon deal.

Eski Sesel pou ganny ankor plis dan lefitir?  Wi, i pou gannyen ankor plis dan lefitir. Akoz, as time goes by, e mon kontan la aprezan ki nou, e mwan mon en dimoun ki pasyonnen par lapes. Mon kontan la, as time goes by, nou pe komans met lanfaz lo ki mannyer nou devlop nou Sekter Lapes. Mont lo en pwennvi artizanal. Lo en pwennvi endistriyel. Lo en pwennvi semi endistriyel. E lo en lot pwennvi, mannyer ou kapab apel sa, lo en pwennvi komersyal.

Atraver negosyasyon ki nou bann dimoun in anmennen, nou’n ozordi annan en provenance. En Sertifika provenance pwason.  I enportan sa.  Akoz ou pa kapab annan en pwason ki transship sorti Sesel, i ariv Maurice and then ganny eksporte as if in ganny lapes Maurice. Tousala i bann bon keksoz ki’n ganny arive atraver travay ki’n Mr Lucas, Mr Clarisse, tou bann lezot lekip bann dimoun in fer.

E se sa ki nou, nou bezwen apresye ler nou fer nou bann largiman ki nou vin fer dan Lasanble. Nou bann largiman i bezwen baze lo how much facts ki nou annan otour re devlop sa Lendistri, oubyen ed sa Lendistri avans pli devan.  E i ti devret toultan baze e fonde lo la. Yer menm a en pwen Mr Speaker, e mon hope ki mon pa pe impute naryen.

I annan menm en pwen kot yer Onorab Ferrari in dir, as if ki li personnelman, i pa pou koz lo lezot koleg. As if li personnelman i pa pou siport sa, i pa an faver sa Lagreman.  E sa in bezwen ganny korize par Onorab Ramkalawan bomaten ki’n dir, poudir sa Lagreman pou pase. Akoz Onorab in realiz lenportans sa Lagreman.

Me sa i ganny fer par Chairman nou Komite zafer etranzer. Mr Speaker, atraver ou, eski Onorab Larue si i annan en keksoz pou li dir i kapab lev son lanmen, e koze dan Lasanble parey nou tou nou fer?

 

MR SPEAKER

Mersi Onorab Pillay. Bon, mon pou adres direkteman Onorab Flory Larue. Depi ler mon’n donn laparol, e mon’n nonm Onorab Pillay, ou’n fer en remark. Konman mon’n nonm son non pou donn li pou entervenir, ou’n fer en remark.  E mon’n tande sa remark. Mon pa pou repete la an piblik.  E konstaman, anmezir in entervenir, ou lavwa in sorti.  E la ankor.

Onorab Pillay in fer en remark. Ki depi yer dan sa deba, in reste trankil in ekout zot tou. Me omwen, koman en Manm i annan en dwa anba Standing Orders pou li fer entervansyon.  Annou donn li en sans, i a fer son entervansyon. Annou donn li en sans i a kapab fini son entervansyon. Mon annan mwan ankor 4 Manm lo lalis. E nou anvi sey fini sa deba. Mersi. Onorab Pillay kontinyen.

 

HON SEBASTIEN PILLAY

Mersi Mr Speaker. Mr Speaker, sa i esansyel pou nou etabli bann baz ki sa bann travay ki’n ganny fer dan lepase, e akoz nou’n ariv la ozordi pou nou debat sa Protokol. E nou pe debat sa Protokol, i pa vedir poudir dan sizyenm Lasanble i annan zis Manm LDS. Nou pe debat sa Protokol, i annan Manm lo tou lede kote latab. Ki pe rod en fason pou fer sir poudir nou avans keksoz pli devan dan en fason pozitiv.

Me, pou nou avans keksoz pli devan, nou bezwen admet e aret fer serten komanter, ki pa neseser dan serten sirkonstans, zis pou nou score serten pwen politik. E se sa lesansyel ki nou bezwen fer. Annou pa pran bann dimoun ki napa naryen pou fer ek nou politik, met zot dan milye. Apre pou nou sorti pou nou fer bann, fer serten meakoulpa. Pou nou fer serten damage control ki pa neseser.

Mr Speaker nou pep i bezwen apresye lefe ki, par egzanp ozordi si nou peser i ankor pe atrap yellowfin. Swa atraver bann charter, swa atraver lespes ki zot al lapes. Si nou ankor annan pwason demersal pou nou tyonbo, ki nou kapab ankor annan zob, annan bourzwa. I pa akoz sa bann keksoz i an abondans dan nou lanmer. I akoz, nou tou koman en pep nou’n pran bann desizyon pou nou protez nou bann resours.

Nou annan en Marine Special Plan ozordi ki nou’n met an plas. Ki fer ki plizyer morso nou teritwar i proteze. Sa in ariv avek diskisyon ki, nou bann profesyonnel ki’n al negosye sa. E, avek bann sipor, bann lenstitisyon parey Linyon Eropeen.  Wi i dan son lavantaz pou li ed nou protez nou resours, akoz i still provide li avek en landrwa pou li ganny sa bann resours.

Me i osi dan nou lavantaz pou protez nou resours pou soustenabilite nou pei. I annan en kantite travay ki’n ganny fer pou nou kontinyen lo sa baz. E mwan, mon pe zis donn mon bann koleg, pran legzanp bann pei;- par egzanp parey dan bann pei Lazi. Kot zot lapes in ganny desinen par lafason ki zot in pran li.

Pran bann pei parey Moritani, ozordi ki zot Lakor Lapes i enkorpor eksportasyon preski tou keksoz.  Enkli zourit, enkli tou kalite keksoz. E en eksportasyon lo en nivo bokou pli o. E se pou sa rezon ki ou annan bann initiative parey Fisheries Transparency International, ki pe antre dan sa bann pei, pou ed sa bann pei pou provide, pou demokratiz lenformasyon vizavi lapes.  E ou konnen ki lavantaz Sesel i annan, se ki si ou regard Sesel par egzanp.  Nou’n deza al ver sa laliny, akoz sa ki nou pe fer esansyelman, se pou anmenn transparans dan lafason ki lapes i ganny manage. 

So, annou apresye zefor ki nou tou nou’n fer kolektivman. E annou pa rod fason pou nou tap en lot, oubyen montre nou pli konnen ki en lot, eksetera. Mon pa eksper dan domenn negosyasyon pou lapes, e mon pa pou zanmen presume pou mwan dir bann dimoun ki’n fer en letid dan Fisheries Management, ki mannyer pou manage lapes.

E mon krwar nou bezwen aksepte sa. Napa naryen ki anpes nou krwar dan zot konpetans. Nou santi nou annan kestyon pou demande, nou demann zot serten kestyon.  Me nou pa dir dan in one breath ki, nou siport sa ki   zot in fer, me, in another breath is as if konmsi tou sa ki zot in fer pa matter. Akoz nou, nou pa krwar poudir sa Lagreman i donn nou sa ki i devret pe donn nou.

I pa pou zanmen ase. E i fasil pou nou, ler pa nou ki’n negosye, dir nou ti kapab fer pli byen.  Fasil sa.  Mr Speaker, sa ki i annan devan nou from now on, Sesel se pou nou deside.  Nou pou annan bann desizyon ferm pou nou pran. Nou pe koz lo re negosye sa bann Lakor.  I pa zis sa bann Lakor ki pou en problenm pou nou.  Nou pou bezwen rod fason pou nou vwar, ki mannyer nou kapab ankouraz nou sekter.

Nou pa kapab koz lo fer en Sekter Lapes lokal, al rod purse seiners. Eski nou realize poudir, si ozordi Sesel ti’n devlop dan en fason brit. An relasyon ek Sekter Lapes, nou ti pou napa pwason. E, zot bezwen, pa pran bokou, al online, e regarde. Al vwar bann resers ki’n ganny fer.

La devan mwan la, mon annan azanda sa meeting IOTC ki ti sipoze fer le 22. Mon krwar i le 22 Zen.  Si mon pa tronpe, prezan pa pe ganny fer. E sa meeting i review of conservation and management measures relating to tropical tunas. Ki enkli skipjack, mon krwar i enkli bigay tuna, e i enkli yellowfin tuna.

Tou sa bann travay i ganny fer par nou bann profesyonnel lokal. Annou donn zot lapresyasyon ki zot deserve. Annou trust ki sa bann dimoun in fer zot mye dan bann sirkonstans avek bann mwayen ki zot annan, pou zot fer sir, ki we’ve got the best.

E fodre nou aret sey fer krwar popilasyon, poudir i annan en cash cow la deor, ki nou, nou kapab fer bokou pli byen. E ganny bokou plis.  San regard bann kou ki asosye avek en lendistri ki vreman, vreman costly.  Sa i enportan pou nou met an perspektiv. E i enportan pou nou koz ek lepep Seselwa.

Mr Speaker, mwan koman en Seselwa, koman en patriyot. Mon fermeman krwar ki poudir nou resours i enportan pou nou, e nou bezwen manage li byen. Ziska la, nou pa’n fer tro mal nou. Me la nou annan en lot danze ki pe face nou lo lorizon la. Avek sa sityasyon COVID-19, nou pe vwar ki nou bezwen annan ekspansyon dan nou Sekter Lapes. I pou enportan nou take pause, e nou pa zis koz lo en ekspansyon dan en fason brit.  Me, nou komans koz lo ekspansyon dan en fason kontrole.

Akoz, si tou dimoun i le al lapes, e tou dimoun i le fer eksplwatasyon pwason. E tou dimoun i le eksport pwason.  Mr Speaker, nou kapab mazinen ki pou arive. Nou bann lakot ki bann nursery  pou nou bann pwason pou war plis kazye.  I pou decimate sa bann landrwa kot bann pwason i reprodwir.

Pou sa bout la, ou pa en eksper akoz ou pou atrap pli pti pwason o bor lakot. E ou pou atrap bann pli gro an deor. Tousala i bann konsiderasyon ki nou, nou bezwen pran konman en pep.  Lo sa size par egzanp, bann lakantite bato lapes. Nou pou bezwen realize poudir, i pou redwir lakantite bato lapes pli ki nou enlarge bann protection zones  ki nou annan.

So, i annan bann size bokou pli enportan, e bokou pli pertinan, ki nou bezwen fer largiman otour.  Ki, olye koz lo pou nou ganny, kot nou krwar nou ti kapab fer pli byen pou nou ganny en Dolar. Annou move on ek sa Lagreman.  Let’s get down now to planning for that sector moving forward, e asire ki nou fer li dan en fason soutenab.

E parey ki Mr Bernadin Renaud i kontan dir, annou regard the socioeconomic impact of human rights. Akoz, as a Human Right Commissioner, i annan socioeconomic impact ler nou pran serten nou bann rezyon nou met li koman bann protected areas. I vin bann No Take’ zones, kot dimoun pa kapab lapes ladan.

Nou pe deny dimoun akse ek sa bann zone, pou fer en income. En reveni avek. So, i annan diferan konsep ki pe vini, ki pe antre dan bann largiman. Ki nou, nou bezwen koman en Lasanble pran konsyans. Mr Speaker, mwan personnelman, mwan pou siport, mon pou vot an faver ki nou ratifye sa bann Protokol.

Mon krwar i neseser, mon krwar i enportan a sa moman. Nou annan en kantite lendistri ki depan lo sa Protokol. I annan en kantite bann lezot Lendistri Satelit, ki Minis in apel sa the FIFI satellite account, ki zot bezwen manage.  Zot bezwen konnen ki pe pase. I annan lezot bann downstream industries ki kapab vini.

E an terminan Mr Speaker, les mwan tous sa pwen sa sectorial program. Ki bokou in koz lo la, e dir sa larzan i devret vin pou nou. Mon krwar nou bezwen eksplik dimoun, what this is about.  I en larzan ki’n ganny mete pou devlop Sekter Lapes. E enn bann Sekter Lapes ki ganny devlope plis se, ou kapab dir semi-endistriyel e Sekter Lapes Artizanal. Sa bann ice plant, sa bann bazar, tou sa bann keksoz i ganny fer atraver sa larzan.

E nou pe dir poudir EU pa devret dictate.  Me mon pa’n zanmen, i tourn dan Gouvernman annefe. Me mwan ler mon’n vin dan Lasanble, zanmen mon’n tande EU i dictate poudir ou pou fer sa, ou pou fer sa, ou pou fer sa, ou pa pou fer sa. Non.

Me sa ki enportan ki, the real thing ki nou pe koz lo la, the real issue e ki, ou bezwen koz lo son lenplimantasyon. Kwa ki retar son bann lenplimantasyon. En kantite sa bann gear stores, par egzanp i ganny retarde akoz, i annan en laprouvasyon Lanvironnman ki bezwen ganny donnen, akoz servi delo lo bor high watermark. Ou pa kapab met en toilet la.  E peser ler i sorti lapes, dapre lamazorite sa bann sa, ti’n met en landrwa pou zot bennyen, ouswa pou zot lav zot lanmen.

E ou ganny problenm pou met sa, akoz Lanvironnman i dir ou, ou pa kapab met sa regarding planning. Akoz lamazorite i o bor lans. Dan en bon pe ka, i annan en problenm pou ganny bann later, sekir  ou bann later pou kapab fer sa bann gear stores. So, i annan bann defi reel ki Gouvernman, oubyen ki whatever Gouvernman ki la. Be it ki pou vin en lot Gouvernman, be it ki i pou sa enn. Be it ki i pou sa lot.

E la mon pe koz koman en dimoun ki kontan sa sekter.  Ou pou still rankontre serten defi, ki pa fer dimoun krwar ki poudir, ou pou kapab overcome tou sa defi de zour ou lannmen ler ou vini ou. I pa pou arive. E tou sa ki nou bezwen pe fer la, se pou nou siport sa sekter, devlop sa sekter. E ed sa bann dimoun. So, annou et realis ler nou dir dimoun bann keksoz ki pe pase, bann reelman.

Avek sa Mr Speaker, mon le swet tou bann dimoun ki’n travay lo sa Lagreman. Mon le swet zot bonn kontinyasyon zot travay. Mon le swet nou bann peser ki dan domenn, ki dan Sekter Semi-Endistriyel, ki en kantite zot, zot livelihood i deroul from whether or not sa bann FADs, oubyen sa bann lapes i kontinyen decimate nou bann fish stock.

Mon demann zot pou kontinyen fer zot louvraz.  Kontinyen be nou lizye out there pou monitor ki pe pase, e raport sa bann en fraksyon. Si zot war bann en fraksyon ki pe pase si zot war. Swa ilegal fishing, swa otherwise. Raport li avek SFA. Raport li ek Coast Guard.

Mon, mon krwar dan tou Seselwa ki dan sa sekter ozordi, pe fer son lavi. E nou vwar son – E, la nou’n ganny sans war son lenportans plis ankor. E mon pledge ki mon pou donn mon sipor from en pwennvi pirman, apolitical. Pou ki nou kontinyen devlop sa sekter. E, ki bann dimoun ki fer en livelihood dan sa sekter. E, bann lezot fanmir i kontinyen benefisye, e ki nou kapab fer sa sekter vin enn ki prodwi plis pour Sesel. Avek sa Mr Speaker, mon remersi ou. Mon remersi Lasanble pou son latansyon. Mersi.

 

MR SPEAKER

Mersi Onorab Sebastien Pillay.  Mon a donn laparol Onorab Wavel Ramkalawan.

 

HON WAVEL RAMKALAWAN

Mersi bokou Mr Speaker. Mr Speaker efektivman sa deba in anmenn nou dan direksyon ki pa ti neseser. E letan ou regarde in osi annan serten bann deklarasyon ki mon pa tro konnen egzakteman kote zot sorti.  Par egzanp, Onorab Jude Valmont ki konsider son lekor koman en Diplomat. “An regard an sa Lagreman, ant Linyon e Sesel, nou annan laprev konkret ki pou en peryod plis ki 40an depi ki nou’n etablir Relasyon Diplomatik, Relasyon ant sa Linyon e Sesel”. Mon pa konnen kote in ganny 40an. E pourtan pou en diplomat i ti’n devret donn nou bann bon lenformasyon, parski Linyon Eropeen ti ganny formen an 1993. Savedir 27an. Be, li i dan an Korperasyon Lapes depi 40 an! Nou pa konnen kote i sorti sa.

Apre sa nou’n ganny en bann politik ki pe senm parey nou dir an Angle, ‘gloom and doom.’ Ki pou dir, ‘’pep pou mor lafen’’, ki pou dir ‘’nou bezwen garanti vant Seselwa.’’ E Onorab Ghislain in menm dir ki bann biznes pou fermen.

“Eski zot realize si vreman nou pe siny en tel Lakor la, depi son Hunt Deltel, depi son Sapmer, depi son IOT, tousala pou fini! Koule! Depi son Land Marine, tousala pou fini! Tou sa santenn stevedores ki desann tou le bomaten pou al rod en tyak pou desarz bato, pou fini! Nou pa pou manze Sesel.

Mr Speaker, i fer mwan, demann mon lekor, eski vreman zot konnen ki zot pe dir?  Mizerikord Dye, sov sa pei.”

Mr Speaker, nou’n ganny dir tou kalite keksoz, e mwan, pou mon sa bann deklarasyon parey, parfwa i zis montre nou linyorans lo sa ki nou pe koze. E pourtan, tou sa ki nou pe koz lo la, sa Lakor depi Oktob lannen pase in fini travay lo la. E depi Oktob lannen pase, sa Lakor in ganny kite koman en keksoz sekre sa. E la, le 24 Fevriye, depi le 24 Fevriye in fini sinyen. Ozordi nou an Zen.

Akoz sa Lakor pa’n ganny anmennen depi pli avan? In fini sinyen depi an Zen li.  E pourtan nou pe koz doom and gloom. Nou pe koz pep pou mor lafen, ensidswit. Tou sa bann zafer. E pourtan, nou’n kontinyen parski i annan lezot keksoz ki pase behind the scenes. E se sa ki danze, letan nek zis nou vini nou fer bann gran deklarasyon, san ki nou konnen vreman kwa ki pe arive.

Mwan Mr Speaker, from, toultan mon dir kot mon reste, mon swiv tou sa ki pase dan por. E letan sa bann lekipaz, bann ki pa, napa sa privilez mon ava apel li. Letan bann lekipaz Espanyol ti vini, lakantite bato ton ki ti pe sorti, i enn deryer lot. Premye fwa, mon ti war en keksoz, en vi parey.

Kot anmezir sa bann lekipaz ti rantre dan zot bato, bato ti ale. Ti annan en moman ti annan 8 bato ton, enn deryer lot. Pe swiv kanmarad pou zot kit por. E antretan depi ki sa Lakor in ganny sinyen an Fevriye, ziska la, kot ozordi nou pe rod ratifye li. Eski stevedores in aret travay lo por? Oubyen eski in annan ofet en nouvo lakonpannyen stevedores ki’n formen, e ki pe donn servis lo por. E ki pe donn en bon servis.

Eski nou’n ganny okenn konplent?   Zot, annou koz sa ki nou konnen, sa ki nou ale nou rode. E non pa vin fer Seselwa per ki poudir i pou aret manze, stevedore. Me sa Mr Speaker, mon pa trouv li drol sa. Akoz sa i tipik politik bon marse ki sa lot kote i anmennen!

 

(APPLAUSE)

 

HON WAVEL RAMKALAWAN

Sak fwa i annan en eleksyon zot pou al, zot pase zot fer per bann vye dimoun. ‘’Zot pa pou ganny sekirite.’’ E, si nou lo nou kote nou propoze ki poudir nou pou ogmant pansyon, zot vini zot fer zot bann progranm, sa i en rev. Enkli Mr Faure tou ti form parti ladan. ‘’Si en keksoz koumsa i arive, pei pou faid.’’ Konmsi ou a krwar. Annou arete avek sa bann kalite politik.

E lo en kote nou’n war bann politik fer dimoun per. Lo lot kote, zot in pas zot letan, zot in pas plis letan pe koz lo profesyonnel ki pe koz lo Lakor Lapes. Eski sa ki nou ti pe vini?  Pou nou koz lo profesyonnel?  E pou zot lenformasyon, e la Onorab Audrey Vidot, “Mon dir sa akoz nou bann profesyonnel ki’n ekout zot depi bomaten, mon asire ki zot konpran ki LDS pe dir zot, i pli byen kapab travay ki zot. Mr Speaker i sagrinan” tatati, tatata.  I kontinyen ensidswit avek sa bann zafer.

Be mwan mon anvi dir en keksoz avek zot, pou zot lenformasyon, zot konnen, souvandfwa se profesyonnel ki vin koz avek nou. Se profesyonnel, sa bann profesyonnel ki zot dir avek nou, nou, pe maltrete, nou pe ensilte, se sa bann profesyonnel ki vin koz avek nou. Ki donn nou detay lo kwa ki pe mars mal.  E ki mannyer letan zot donn zot lopinyon, i pa ganny pran an konsiderasyon.  An plis ki sa, silvouple, zot lo zot kote, aret koz lo profesyonnel. Akoz si i annan en Gouvernman ki’n pous plis profesyonnel dan sa pei, se zot lo kote Parti Lepep!

 

 

(APPLAUSE)

 

HON WAVEL RAMKALAWAN

Zot in pas zot letan pous profesyonnel Seselwa, ziska ki viktimiz profesyonnel Seselwa, ziska ki profesyonnel Seselwa in bezwen kit sa pei al rod en travay aletranze! E alors ozordi, zot vin koz lo profesyonnel. E Mr Speaker, ou war yer osi tou mon’n trouv li drol. Pou en Minis, ok, mon kapab dekrir li koman junior Minister, parski i napa ni menm 2an depi ki i Minis. Pou en junior Minister kestyonnen  ki akfer i pe reponn kestyon? Be sa i nou rol sa parey Onorab Afif in dir. Sa i nou rol prensipal pou demann kestyon!

E, mon anvi dir sa Minis, ki poudir wi, nou pou anmenn li ankor dan Lasanble.  Pou demann li kestyon lo sa vizit ki in fer Dimans, pou li al rod semen ki pou desann dan distrik kot Onorab Waven William i ete. Pou li al fer, nou pou demann li kestyon lo sa gran bout later ki zot pe donnen. Ki pou pran en kare dan biodiversity later laba. Wi, nou pou anmenn li, nou pou demann li kestyon.

 

 

(APPLAUSE)

 

HON WAVEL RAMKALAWAN

Parski sa i nou travay pou nou demann kestyon. Mr Speaker ou konnen, letan mon tann zot pe koz lo, pe fer en komanter lo sa ki nou, nou’n dir. Nou an relasyon ek bann profesyonnel, e Onorab Afif in eksplik sa byen. Nou, nou pa pe dir nou bann Seselwa i zero. Non.

Me, mon a donn zot en senp legzanp, letan i annan Zwe De Zil pe aprose.  Be pandan tou sezon, be pa nou war bann coach Seselwa ki pe travay ek nou bann lekip. Be akoz ki letan i pros Zwe De Zil, nou tande ki poudir i annan en coach Larisi ki pe vin train nou bann marmay bokse.  Nou tande ki poudir i annan en coach Sinwan ki pe vin travay avek nou bann zwer badminton avek table tennis. Nou tande ki poudir i annan en msye ki nou bezwen donn li nasyonalite pou li vin, son zanfan pou li travay avek nou bann nazer, ensidswit.

Se parski i annan bann moman kot nou santi nou bann Seselwa ki’n fer bon travay. Me selman zot bezwen en sipor an plis, pou zot nobou partaz en lekspertiz ki nou bann coach i manke. E dan sa negosyasyon, sete egzakteman sa ki nou ti ape dir. Parski Linyon Eropeen, e a mon ava dir Mr Speaker, Linyon Eropeen i annan plis ki 22 Lakor parey sa enn ki nou’n sinyen, avek bann diferan pei.

Savedir sa lekip, sa boug ki zot ti mansyonn son non yer, sa msye avek son 2 teknisyen, zot, zot annan konesans lo 22 Lakor Lapes.  E alors zot lekspertiz i gran.

Me, i annan bann lezot dimoun osi tou, ki annan sa lekspertiz. E si zot ti pe asiz o bor nou, zot ti pou kapab ed nou konpran pli byen. Lo ki mannyer sa bann Lakor i ete. Donn nou serten konsey. E Onorab Gill i konn sa tre byen. Nou de Onorab Gill, nou ti al Cameroon ansanm. Nou ti al asiste en konferans zisteman lo sa bann size ki mannyer Lafrik i ganny eksplwate.

E ti annan bann prezantasyon ki ti vreman ekstraordiner. Ti annan en msye Sid Afriken, mon’n bliy son non. Onorab Gill kekfwa i ava mazinen, ki ti eksplike, ki mannyer resours Lafrik i ganny eksplwate. E ki mannyer i annan tou kalite keksoz lo ki mannyer Eropeen, i retir resours.  E ki mannyer Lafrik i bezwen sey fer en fason pou li inifye. Pou ki nou kapab annan bann pli bon negosyater posib. E, la pe koz lo nivo Lafrik.

E zis letan nou ti Cameroon, par egzanp. Parski, Cameroon i annan en gran Lendistri Dibwa, mon ankor rapel letan ti annan sa resepsyon kot Mr Roger. Ki Prezidan Pan African Parliament, nou ti war bann gro kanmiyon pe pase aswar ek bann dibwa.  Bann pye, premye fwa mon war bann pye dibwa sa groser. Bann log sa groser. Enorm. Onorab Gill i rapel li, i pe sourir.

E, zot ti pe, osi dan konferans, zot ti ape koz lo leksplwatasyon.  Lo ki mannyer Lerop atraver bann diferan Kontra ki zot fer,  zot vini zot pran resours dibwa, anmenn kot zot, apre sa zot vann Kameroun bann set pake. Bann meb.

E letan nou ti al Cote D’ivoire osi tou. Mwan mon ti al Cote D’ivoire. Nou ti war ki mannyer Cote D’ivoire. en pei ki prodwir plis kakao. Enn bann pei ki prodwir plis kakao dan lemonn.  Me lekel ki pli gran prodikter sokola? Se Cadbury’s. E mwan, mon ti ganny sans pou mwan etidye Birmingham.  E Birmingham loder ki pli popiler dan ler, se pa fler. Me se loder kakao ki pe ganny prodiksyon sokola.

E Lafrik i bezwen zwenn ansanm. Lafrik i bezwen par egzanp atraver Linyon Afriken. Linyon Afriken i bezwen ede. E ki mannyer pou ed bann pei pou pli byen negosye, pou nou kapab ganny the best deal posib. E Mr Speaker, kestyon ki mon demande ozordi. Apre tou sa bann lannen, ki Sesel in dan Lendistri Ton,  e ti annan en Manm pli boner ki’n demande, kwa egzakteman ki nou annan pou nou montre ki nou gannyen dan sa lendistri?

E larepons se ki, onnetman napa gran keksoz pou nou montre. Napa gran keksoz pou nou montre lo kwa ki nou’n gannyen atraver sa Lendistri.  E si nou ti pou al fer en resers, e mon ti ava kontan si en zenn i pran sa resers. Pou pas dan tou bann Bidze, pou regard bann proze kapital. Pou regarde konbyen sa bann proze kapital. I mean, ki zot bann sours finansman.

E, tanzantan wi, Linyon Eropeen i vini, e i ouver par egzanp, fish processing plant, wi, i ti en proze Linyon Eropeen, me nou’n regard son leta. Laba anler Anse Royale, sa proze dumpsite. I en proze Linyon Eropeen sa. E eski i pe marse? Oubyen i la parey nou dir, en white elephant.

Sa bann bazar?  Bazar Anse Royale. Eski i vreman en bazar? I annan en pti bout, mon war dimoun pe vann en pti bout. Me selman, apart sa. Letan nou regard enn de bann bazar ki zot in fer, ki Linyon Eropeen in vini i ouver. Wi, wi gran, gran zafer. Me selman tousala nou larzan sa.

Letan Mr Speaker nou pou asize nou pou balanse, nou pou war ki nou Lendistri Ton, i pa’n anmenn sa ki nou ti devret gannyen. Sa i en keksoz ki nou bezwen aksepte. E mon kontan ki Onorab Loze in rekonnet ki poudir nou bezwen koz ankor avek kolonizater. Pa mon parol, parol Onorab Loze. E alors parfwa mon pa tro ganny en konpran. Parski se sa ki nou, nou pe dir. Se sa ki nou pe dir nou, at the end of the day. Nou pe dir, e se pou sa rezon ki bomaten mon’n dir ek Minis, sa Lakor definitivman i pou pase. I pou pase akoz se sa ki nou annan la.

Me nou pe dir, annou koz ankor. E ozordi letan nou koz avek Linyon Eropeen, nou tou nou konnen ki poudir pli gran parol li Linyon Eropeen i servi ozordi.  E sak fwa ki i annan bann, lannen pase letan zot bann Anbasader i vini, mwan, mon enn sa bann Manm ki ganny sa privilez koman Leader Lopozisyon pou mwan asize ansanm avek enn de mon bann koleg, lo en latab avek tou sa bann Anbasader, pou koz lo devlopman.

E pli gran parol ki sorti dan labous Linyon Eropeen, se Sesel i ganny konsidere koman en high income country, e alors i annan bokou keksoz ki nou ti ava kontan fer, selman nou pa kapab fer.

E alors, kestyon ki mon krwar nou devret seryezman demande, se eski se sa kalite Lakor ki Sesel i bezwen dezormen rantre ladan avek Linyon Eropeen? Oubyen eski nou pa devret plito pe rantre dan bann Commercial Agreement?

E dan en Commercial Agreement nou ava kapab dir ok, nou asiz lo en latab, ou anvi vin lapes dan nou lanmer, annou tonm dakor. La i la ki nou peye. Ki ou pou pey nou, nou pran nou larzan, nou monitor sa ki fodre monitor. E apre sa, nou, nou deside kwa ki nou pou fer avek nou larzan.

Si nou santi ki poudir avek nou larzan ki nou gannyen dan lapes, nou bezwen al met en cold storage, oubyen nou bezwen met en pli bon ice plant dan tel distrik.  Nou, nou ava fer li. Nou pa ava bezwen pran avyon, mont Bruxelles. Kot letan nou pou Bruxelles, sa i pou ganny chaired par en Eropeen kot nou aprezan nou pou vin met nou proze. Nou, nou ava desid nou zafer isi dan nou pei. E nou ava kapab bouze.

En Commercial Agreement, e nou dan sa Commercial Agreement nou ava osi met, nou ava kapab ganny en keksoz ki annan plis valer. E atraver sa nou ava kapab nou, pran kontrol nou Lendistri nou menm.

E Mr Speaker, ou war sa zafer ton. E nou tou nou rekonnet ki poudir, e la spesyalman avek touris. Touris, nou bezwen depan lo Lerop ki mannyer i ete. Tandis ki nou ton, Lerop i bezwen. Get sa ki’n arive avek bann zafer COVID. Lerop in bezwen negosye avek Minister Lasante pou li charter en avyon, fer sir tou bann keksoz i bon pou li desann Sesel.

Savedir, la i montre nou en keksoz la. Lo tourizm zot ki annan gro lebra. Zot ki annan sa upper head, parey nou dir. Me kot nou pwason i konsernen, nou ki annan the upper hand.  Nou ki sipoze pli for.

Be alors, si nou sipoze pli for, nou devret kapab negosye avek tou nou lafors ki nou annan. E letan nou negosye avek tou nou lafors ki nou annan, nou osi anmenn lezot dimoun. E la ankor enn fwa zis pou mon servi en lot legzanp. Akoz ki tim foutbol St Michel, tim foutbol St Louis, tim foutbol La Passe, ek tou sa bann lezot tim Zot annan bann etranze ki pe zwe ladan?

Eski akoz Parti US pou dir sa bann tim napa respe pou Seselwa. Napa respe ensidswit. Eski zot pou servi sa menm largiman?  Parey zot in seye avek bann profesyonnel. Oubyen, eski sa bann tim akoz zot anvi ranport sa lakoup. Zot pare pou zot envestir dan en bon goalkeeper. Zot anvi envestir dan detrwa bon strikers ki pou met gol. Pou zot kapab ranport laviktwar. Se sa. Alors, annou pa servi bann largiman ki fay.

E la ankor enn fwa Mr Speaker, letan ou annan bann dimoun ki annan sa bann lezot leksperyans, ki arive?  Letan lot kote. Parske Parfwa letan lot kote zot zwe avek kart lapay. Selman zot ganny parti kart avek zot kart lapay.  Be letan zot annan kart lapay, sennla ki ou’n peye pou vin asiz o bor ou la, sa konsiltan i pou dir ek ou, kart lapay sa. Pa bezwen tonm ladan. E alors ou ganny lavantaz, e ou kapab bouze.

Alors Mr Speaker, mwan pou mon, mwan war ki poudir ozordi Sesel, son resours ki i annan, e ki i bezwen eksplwat li dan en fason ki byen. Se lapes. Lapes nou pa ni bezwen rod langre, nou pa ni bezwen rod en faktori ki pou prodwi manze. Nou bezwen zis konnen, ki mannyer nou pou manage li.

E nou bezwen fer atansyon.  E, la mon mazin en parol ki enn nou bann eksper, ki zot in kit li ater. Se Dokter Nirmal Shah. Zot in kit li ater li, akoz? Akoz zot in kit li ater? Akoz li, i en hard bargainer li. Li letan i al lo latab, i lager lebra kase pou ki i ganny the best deal. E in dir, in donn en warning. In dir, e mon annan gran respe pou sa msye. Parski li, i en eksper, e i en profesyonnel.

In dir, si nou pa fer atansyon, yellowfin, nou riske en zour trouv li dan en mize. Sete sa son parol ki i ti dir Merkredi pase dan ‘Bonzour Sesel.’ Nou riske trouv yellowfin dan en mize, egzakteman parey Morisyen. I al dan mize pou li war Dodo. Se parski zot ti annan bokou Dodo, Dodo ti partou kote. Me Dodo in ganny eksplwate ziska pov Dodo in al dodo. E nou pwason, li osi tou i kapab ariv dan sa pozisyon.

Alors Mr Speaker, nou, nou pa pe rantre dan sa bann zwe politik bonmarse, gloom and doom.  Seselwa pou mor lafen. Stevedores isi, laba.  Tou sa bann zafer. Tou bann lakonpannyen pou fermen.

Mwan, mon krwar ki poudir bann lakonpannyen ziska aprezan, enn bann rezon akoz ki malgre ki Minis i dir avek nou,  i annan zis 21 mil tonn ton ki yellowfin ki ganny lapes dan nou lanmer. Me, selman tou sa bann bato, zot prefere vin isi, se zisteman akoz sa bann lakonpannyen in donn en bon servis.

E mwan, mon anvi dir avek sa bann lakonpannyen, sapo. Akoz se gras a zot ki nou Lendistri Ton, nou pe sey tir the maximum. E atraver zot, e letan nou’n ganny bann konversasyon avek zot, zot in pare pou zot ogmant sa ki zot pey bann stevedores. E sa i fer ki ozordi, bann lenfrastriktir ki annan isi i bon.

E bann lakonpannyen zot pa pe trennen, napa sa kantite vol akoz bann lakonpannyen zot pe fer en bon travay. Mr Speaker, mwan, mon pa ganny en konpran, akoz ki nou bezwen en joint Committee. En Joint Committee ki parey serten in dir yer. Ki napa, nou pa ni konnen lekel ki lo sa Joint Committee. Ki mannyer i ganny swazir.

E, ki mannyer keksoz i ete. Mwan, mon krwar ki i annan bokou keksoz dan sa Lagreman, ki avek, nou bann eksper Seselwa. Avek nou bann profesyonnel Seselwa, ansanm avek sipor bann lezot dimoun ki abitye rantre dan sa bann gran negosyasyon. Mon krwar ki nou pou kapab ganny bokou plis avek nou Lendistri Ton. E nou ava kapab met bokou plis lenportans lo la.

E mwan mon pa anvi sound koman en profet of doom and gloom parey serten. Me selman mon anvi dir, annou swiv listwar lapes ton atraver lemonn. E nou pa bezwen al pli lwen ki reste lo kontinan Lafrik. Annou regard was Lafrik. Ki’n arive was Lafrik?  Sa lapes ton dan Atlantik? Ozordi, se pou sa rezon sa bann semesye i isi. Se parski sa ki zot in fer laba, zot in eksplwat li ziska en nivo ki pa akseptab. E sel rezon ki i annan bokou Senegale lo bann bato ton. Se parski sa bann Senegale, zot ti pe lapes lo bann bato ton Espanyol laba. Zot ti pe lapes lo bann bato ton laba. Aprezan zot in ganny anmenn isi.

Sesel i bezwen ganny bokou plis ankor. E nou yellowfin ozordi, pa mwan ki ti dir. IOTC ki’n fer dan zot bann resers syantifik pou montre ki poudir, i en lespes ki pe ganny menase.  E an plis ki sa, zis pou nou pran ton pou met dan bwat. Nou konnen ki poudir, i pa meyer fason pou nou eksplwat sa resours.

Se pou sa rezon ki ozordi, Maurice in depas nou. E, la Mr Speaker, statistik ki’n vreman sok mwan, Maurice pe enport plis ton ki nou faktori isi Sesel i servi. Maurice ki pe enporte, se parski Maurice son Lendistri ton ki’n komans bokou apre nou. Ozordi i bokou pli avanse ki sa ki pou nou. Zot leksportasyon i bokou plis, e alors nou, nou bezwen demande, be ki pe arive avek nou.

Donk Mr Speaker, mwan mon krwar ki poudir i annan lespas pou re negosyasyon. Me selman, definitivman sennla in ganny sinyen. Pou lemoman mon krwar, ki nou pou bezwen al anba sa enn, me selman mon demande. E, gran mersi nou annan ankor zis detrwa mwan la devan nou. E mon demande ki o pli vit posib, nou rantre dan en nouvo negosyasyon, pou nou kapab ganny en Lagreman Komersyal, kot Sesel pou pli byen pase.

E mon pa kapab terminen, san mansyonn en dimoun ki’n fer bokou travay pou bann pêcheur marin. Ozordi mon kontan letan nou koz lo pêcheur marin, pêcheur marin.  Be, i annan en dimoun ki’n fer en kantite travay. E, sa se Mr Albert Napier.  Mr Albert Napier mon tir sapo avek li.

E pou lenformasyon Lasanble. Mon mon’n deza partisip, bon atraver son lorganizasyon, Apostola de la mer, kot bann Franse, ti annan en lekip televizyon Franse ki ti vin isi Sesel pou zisteman fer en raportaz. Lo ki mannyer, nou bann pêcheur marin zot pe ganny eksplwate.

E sa Mr Speaker, i pa 5an pase. I pa la. I pa 10an pase. I ant 15 a 20an pase.  Savedir i annan plis ki 15an depi ki nou bann pêcheur marin pe ganny eksplwate. E Lerop i konn tre byen sa leksplwatasyon ki’n arive. E mwan, lo kote sa bann pêcheur marin, mon, mon demande ki i annan en bon back pay ki zot gannyen avek sa bann lakonpannyen ki eksplwat zot pandan tou sa bann lannen.

Parski sa bann dimoun ozordi zot in karyate, e zot in fer en bon travay. Alors mwan, mon ensiste ki Lerop i pey zot en bon back pay pou zot. E, si sa bann in mor, ki zot bann dimoun, zot bann pti zanfan, zot bann zanfan, i ganny sa larzan.

Akoz Sesel, e Seselwa i merit bokou plis ki sa ki nou pe gannyen ozordi. Alors Mr Speaker, avek sa de parol mon ava dir ou mersi bokou.

 

(APPLAUSE)

 

MR SPEAKER

Mersi Onorab Ramkalawan. Nou ava pran en break e nou a retournen 2er pou kontinyasyon deba lo sa 2 Lagreman.

 

(BREAK)

 

MR SPEAKER

Bonn apre midi tou Manm Onorab e bonn apre midi tou dimoun ki a lekout e pe swiv travay Lasanble Nasyonal.  Nou pou nou pou kontinyen nou travay deba lo sa de Lagreman.  E prosennman lo mon lalis mon annan Onorab Clifford Andre.

 

HON CLIFFORD ANDRE

Mersi Mr Speaker.  Bonn apre midi Mr Speaker, bonn apre midi tou dimoun ki pe ekoute.  Mr Speaker Sesel i annan en pti pei, e i en pti pei avek bann resours limite.  Lekonomi en pti pei, i dekoul lo bann abilite e resours ki sa pti pei i annan.  Sesel in ganny dir ki nou lekonomi i depandan lo tourizm, lapes e lar nou pou pe al dan sekter finansyel.

Mr Speaker, mon pe prezant en papye avek Linyon Eropeen lo lapar Sesel akoz mon sete alegasyon ACP-EU ACP ki vedir African Caribbean ek Pacific countries.  So i en regroupman enternasyonal bann Parlmanter, ki ekout ou partisip dan bann topik ki konsern sa bann pei e pou vwar ki mannyer Linyon Eropeen i kapab amelyor son lasistans ki donn sa bann pei.

Avan Mr Speaker Onorab Waven William ti a konpanny mwan lo sa bann misyon, e la prezan vi ki in annan serten sanzman se Onorab Gill, Onorab Churchill Gill ki pou akonpanny mwan dan sa bann misyon.  E nou ti pou ale la Mars, Mars ki’n pase me akoz COVID-19 nou pa’n kapab.

E Onorab Gill ti pou son premye leksperyans ki mon siny ti pou ti pou vin rann oubyen vin koz byen lo sa bann topik, e pou vwar ki mannyer sa enteraksyon e pou vwar Mr Speaker kote bann pei ACP i met zot lipye ater letan i neseser pou met nou lipye ater, pou nou fer konnen Linyon Eropeen nou pa satisfe avek serten keksoz ki nou fer.

Mon’n konmans koumsa, Mr Speaker pou mwan montre ki pou dir yer mon’n en pti pe dezapwente, letan mon’n tann dir pou dir me sa se sa ki Linyon Eropeen in ofer nou.  E menm si nou’n met en pti presyon me selman nou lo sa kote latab nou santi ki nou pa’n al maximum ki nou kapab gannyen.

Mr Speaker sa Lagreman i koz lo lapes ki mannyer Linyon Eropeen ek Sesel lo en plan Bilateral i pou egzers zot drwa dan sa konteks.  E mwan mon dir, letan mwan mon gete parey Leader Lopozisyon Onorab Ramkalawan in dir ki nou ki annan the upper hand.

 Sa ton menm si i migratwar, i pas kot nou.  E mwan letan mon pe gete migratwar letan nou dir i dan tou dan tou sans nou lekonomi.  Akoz touris i kapab swazir pou vin kot nou.  E i kapab osi pou al Maurice.

Alors nou bezwen prodwir the best deal pou  sa larzan ki nou pe demann li pou peye.  E osi mon santi ki nou ti bezwen fer the best deal, ki pandan sa letan, ki sa ton i kot nou e i bezwen ganny eksplwate, akoz nou pa pou kapab dir Linyon Eropeen ok mon pou esper lo border letan i sorti pou mwan  atrape, pou mwan fer sa ki i bezwen ganny fer avek ton.

So i enportan pou nou -.   Yer mon ti dir ki annou pa mislead nou pep.  Sa letan, sa letan ki sa ton i kot nou se nou ki dominan dan sa Lagreman.  E enn bann keksoz ki nou’n vwar dan ACP-EU, nou’n vwar ki diversifikasyon lekonomi i enportan.  Mr Speaker sa topik ti leve depi lannen pase, e mwan mon’n ganny mandate par mon bann koleg ACP, pou mon vin raporter avek en koleg Linyon EropeenE annefe nou ti pou prezant sa papye parey mon dir an Mars sa lannen.

E COVID-19 in vin en eleman enportan prezan, akoz nou pa’n ganny sans prezant sa papye e nou’n vwar ki mannyer bann pti pei in ganny afekte la avek COVID-19 montre nou lenportans diversifikasyon en lekonomi parey pou nou Sesel.  E mwan mon krwar ki letan nou annan sa loportinite pou nou fer sa diversifikasyon, nou bezwen maksimiz lo bann resours ki nou annan.

Akoz nou tou nou konnen, resours pou fini li en zour.  Kontan pa kontan si nou pa mentenir dan en standar soutenab, i pou fini.  Alors i enportan ki pandan sa letan ki i la kot nou, nou fer sir ki nou pei, nou pep i benefisye maksimonm.

En keksoz ki enportan letan nou pe get sa Lagreman;-  parey in dir en Lagreman i egziste.  E Sesel pe benefisye.  Nou konman bann dirizan responsab, nou pa pou zanmen dir annou tenir la, pa bezwen pran sa benefis ki nou pe gannyen e ale al re negosye la.

Me nou pe dir ki pou dir re negosyasyon i en eleman enportan.  Akoz nou lo sa kote latab nou’n vwar bokou landrwa, bokou landrwa kot benefis ti’n kapab vin plis ki sa egziste la.

Me selman parey mon’n dir bokou in dir lo lot kote latab, ki pou dir nou, nou pe kestyonn abilite bann profesyonnel.  Me Mr Speaker kwa ki pe fer nou vin profesyonnel?  Letan en keksoz ki nou met ater i ganny kestyonnen, i ganny teste, se sa ki fer nou vin pli for.  Se sa ki fer sa profesyonnel li menm, al dekouver son abilite pou li kapab fer pli byen.  Si konman i fer en keksoz nek nou dir li yes i ok.  Non!

I bezwen annan enn ki vini ki’n met en kestyon pou montre sa dimoun pou dir ou menm ou konman en profesyonnel, ou kapab fer pli byen.  E se sa ki mon kontan mon annan en sekter kot toultan ou abilite lo en kestyon, i ganny teste, e ou menm ou vwar ki mannyer ou ti kapab fer pli byen.

E sa dan konteks legal ou vwar poudir wi posibleman mon ti’n devret met sa kalite largiman, me selman next time mon mete akoz napa naryen ki fini ek sa enn ki la.  Alors nou, nou pa pe dir – e mwan mon pou dir Mr Clarisse i reste Anse Aux Pins, e mon’n vwar li la konman Special Advisor e Minis in dir ti form par delegasyon.  Mon pa pe kestyonn son abilite mwan.  O kontrer letan nou zwenn nou koze nou met bann pwen devan ki fer nou vin bann profesyonnel ki nou pei i bezwen.

Alors sa eleman ki pe ganny dir ki nou, nou pa kontan bann profesyonnel i fo.  Fodre bann profesyonnel Seselwa ozordi i ganny sa kler.  LDS i valoriz zot travay.  LDS i krwar dan zot.  Me en keksoz ki LDS i dir Sesel i bezwen ganny plis.  Alors bann profesyonnel annou ale annou al rod plis, annou al fer pli byen, pou benefis nou pei e nou zanfan demen e nou bann pti zanfan.

Alors sa konsep mwan mon pe dir zot bann profesyonnel mwan mon en profesyonnel.  Pa zanmen krwar.  Ozordi mwan mon la en mon’n bouz bokou pli devan ki kekfwa mon ti ava’n espekte mon pou bouze.  Akoz mon’n toultan, toultan aksepte ki lezot dimoun i bezwen e i kapab annan kritik lo mon fason fer.  E se sa ki fer nou avanse.

Alors Mr Speaker apre Oktob, avek en nouvo Gouvernman LDS anba direksyon Onorab Ramkalawan, Sesel pou bezwen tou son bann profesyonnel.  E zot tou zot pou annan en plas dan sa ‘nouvo Sesel’ ki pou fer sir zot valer i ganny met o pli onivo dan zot prop pei.

Mr Speaker valer en profesyonnel i enportan.  Lotrozour nou’n koz lo en morso Lalwa kot menm Vis-Prezidan i dir i pa ti okouran si mwan konman en profesyonnel mon ti travay lo en morso Lalwa, ki finalman in ariv dan nou Lasanble.  E se sa ki enportan.

Letan nou bann zenn, i retournen avek zot kalifikasyon, fodre nou donn zot sa plas ki zot deserve.  E bomaten ankor.  Onorab Ramkalawan in dir, ki poudir bokou profesyonnel Seselwa, in ale akoz zot in santi ki zot kontribisyon dan zot pei pa ganny valorize parey zot, zot ti a swete.  I pa zis larzan, ki fer en profesyonnel santi serten valer.

Me lafason ou pran son lide, lafason ki ou anmenn son lide devan oubyen lafason ki ou donn li loportinite, pou li partisip dan devlopman sa sekter kot li i pe pratike.  Sa i vreman enportan e se sa ki nou LDS pou fer letan nou pran Egzekitiv.

Mr Speaker pou retourn lo sa Lagreman, akoz nou’n al dan en Lagreman, kot nou’n anmar nou lanmen a plizyer repriz.  Yer mon’n dir e Minis in eksplike, me mon still pa konvenki, akoz si ou pou santi dan en Lagreman termination of the Agreement i dir ou en parti i kapab sorti dan Lagreman, me selman lo en baz ki i annan en resers oubyen en papye ki tou lede parti in dakor i egziste.

Me si Sesel i le sorti dan Lagreman, akoz i dir ki poudir menm si in napa resers, akoz sa i dir ou fodre i annan en resers.  Me si napa resers e sa eksper sanmenm sa profesyonnel ki nou pe dir la, ki zot pe fer li krwar pou dir letan LDS i vini pou napa en plas travay.  Si sa profesyonnel ozordi i dir poudir resours in limite, e i pe al lo pou en extinct, alors si Linyon Eropeen pa’n sinyen oubyen pa’n dakor avek sa Lopinyon Sesel pa pou kapab sorti dan sa Lagreman.

Eski sa i byen Mr Speaker?  Non me selman parey mon’n dir la kot nou ete nou pe benefisye.  Nou ava antre ladan me apre nou pou bezwen revwar sa bann laspe.  Mwan mon krwar sa bann eleman koumsa pa ti devret ganny met ladan.

E se sa rezon parey Onorab Ferrari ti dir a plizyer repriz nou, nou’n demande konman bann Manm IAC ki Onorab Valmont i a konfirm sa, ki pou dir nou, nou anvi form par sa bann sa delegasyon pou negosye sa Lagreman.

E Mr Speaker, sa Lagreman parey i ete la, nou’n vwar la nou.  Onorab Valmont i kapab konfirm sa ok?  Si, si nou ti’n vwar sa Lagreman letan Minis ti’n vini ti’n donn nou sa Lagreman parey kekfwa i ti pe propoze, dan son draft format, nou ti ava’n kapab konnen kote ki nou pou met plis lanfaz, e kote ki nou, nou pou dir li.  Parey mwan mon ti pou’n dir li ou pa kapab annan en termination parey i ete la.

Ou kapab annan en termination dan en Lagreman, wi me selman parey i ete i pe anmar ou lanmen, i pe anmar ou lanmen.  Nou ti annan en Lagreman ki nou ti fer, pou nou zone maritim avek Tanzania.  Ankor enn fwa mwan mon pou dir kot nou pa ti ekout nou ban profesyonnel.  Nou ti dir avek Tanzania ki nou, nou napa drwa nou, nou pa pou submit en proposal, lo nou menm, nou pou bezwen fer en joint submission avek li.  Me selman li i pou annan drwa fer, e Tanzania ti ale ti al fer, pou nou maritime boundaries. 

        E se sa kot mon dir nou bezwen valoriz nou bann profesyonnel.  Nou bezwen valoriz nou bann profesyonnel.  E mwan lo mon menm lo mon menm konman en endividi ki i annan lekspertiz dan sa bann domenn ki nou pe koz lo la, an partikilye sa Lagreman ki a lekspertiz the UNCLOS ki ganny mansyonnen lo la.  Mwan mon ti pou dir ale, al revwar.

Me akoz mon konsyan ki en pti pei parey Sesel, nou pa kapab met en poz lo reveni, akoz nou bezwen reveni nou pa kapab met en poz lo sa reveni, akoz nou annan sa bann laspe ki nou dir bezwen ganny konsidere.

E alors mon pou dir mwan dir avek pep Seselwa e avek bann profesyonnel, e avek sa bann sa tim ki ti al negosye, mwan mon pou donn mon sipor lo sa Lagreman la.  Selman avek en kondisyon.  E mon krwar en kondisyon ki bezwen ganny pran serye, ki nou ale, nou al revwar ankor the best deal. 

E mwan mon konsern ankor lo sa size.  Parey mon ti dir yer, akoz nou anmar nou avek en Lagreman pou 6an?  En Lagreman sa, i pa en Konvansyon, en Lagreman.  En Konvansyon nou sinyen wi, nou ratifye.

Me akoz nou anmar nou lanmen pou 6an avek en Lagreman?  E larepons ki Minis ti donn mon stabilite.  Eleksyon Prezidansyel i fer pou 5an.  I apel stabilite.  Me akoz nou fer Lagreman 6an.  Nou pa vwar pou dir i annan serten issues ki nou bezwen gete?  Annou fer li byen 2an.  I renouvlab kot nou kapab pandan sa 2an al tous lo bann laspe ki nou kapab aranze.  E son next time ki nou pe al negosye apre 2an nou vin avek bann ki pli bon.  Akoz nou pa oule fer sa?

Akoz nou le dir ki pou dir nou resours pwason nou zis donnen pou 6an nou met laba, nou pa pou touse, nou pa pou gete.  Mr Speaker en landrwa kot mon dir ankor enn fwa kot i neseser pou nou get en kou, ki mannyer nou valoriz nou bann profesyonnel, Seselwa mon pe dir en.  Minis in dir nou Mr Clarisse i lo la.  Epi in dir nou mwan mon byen ek Mr Chinnasamy, nou koleg.  Oule dir mwan napa en Seselwa pou al get sa?  Napa en Seselwa pou al avek Minis letan ou vini ou dir en delegasyon Seselwa, en delegasyon Seselwa, ok?

Me se sa ki mon dir valoriz nou bann profesyonnel.  Met en zenn Seselwa.  I annan bokou Seselwa ki’n etidye Lalwa Maritim konmela, mwan mon ti 2enm leta mon ti al fer mon letid, apre Joe Athanasius E apre mwan ti vin Ziz Robinson.  Me ozordi i annan bokou plis, sa lepok ti annan enn oubyen de nou.  Ozordi i annan plis.  Mon konnen i apepre 4, 5 ki’n al fer sa letid apre ki Ziz Robinson in fini.

Alors drafte zot, montre zot ki pou dir demen letan bann, bann ki en pe pli aze pe ale zot ki pou pran larelev.  Se sa lafason ki nou bezwen montre nou bann zenn Seselwa.  E avek sa detrwa mo Mr Speaker, mon le dir ki mon dezapwente avek kontenir sa Lagreman, me mon pa dezapwente avek sa bann profesyonnel sa bann profesyonnel ki’n al negosye sa.  Mon konnen zot lanmen in anmare.  Mon konnen sa.  Zot lanmen in ganny anmare, serten landrwa.  E alors i enportan ki zot kontinyen, kontinyen fer zot travay.  E kontinyen pouse, pou ki Sesel i ganny the best deal out of this Agreement. 

En lot keksoz ankor avan mon terminen Mr Speaker.  Se ki akoz nou konman en pti pei nou peg nou bann marin pêcheur at the lowest level.  Akoz mon dir at the lowest level Minis yer in dir nou minimum wage Sesel oubyen minimum wage ILO.  Me i pe rantre lo en bato ki pe fer milyon.  I pe mont lo en bato ki pe fer milyon.  Akoz nou pa peg son saler at the same level avek sa sitwayen Linyon Eropeen

Mon annan en msye ki anvoy mon i reste Praslin in anvoy mon i dir mon li in fer 11an konman marin pêcheur.  E i dakor ki pou dir zot in ganny vole.  Zot pa’n ganny sa ki zot devret gannyen.  E mwan mon dir menm sa dan sa konteks kot nou pe dir nou bann peser nou bann marin pêcheur, i bezwen ganny zot benefis, annou konmans avek sa ki pli o. Les i a desann.

Nou pa kapab dir nou al lo minimum wage, minimum wage nou pe travay la ater e sa i risky laba.  I dan delo nou pa konnen ki kapab arive, e aksidan i ariv vitman dan sa bann kalite sekter travay.  Alors annou, annou valoriz ankor, nou’n dir profesyonnel, zot osi sa bann marin pêcheur. zot bann profesyonnel.  Annou valoriz zot ekspertiz zot kontribisyon ki zot kapab fer dan sa pei.  Mersi Mr Speaker.

 

MR SPEAKER

Mersi Onorab Andre.  Mon ava donn laparol Onorab Simon Gill.

 

HON SIMON GILL

Mersi bokou Mr Speaker.  Bonn apre midi Mr Speaker.  Bonn apre midi tou koleg Onorab e manm piblik ki pe ekout nou.

Mr Speaker sa dokiman ki devan nou Lasanble, ki pe rod sipor tou Manm Lasanble an relasyon avek nou Lakor avek Lakor Lapes avek Linyon Eropeen.  I enportan ki nou, ganny tou nou bann Manm Lasanble, pou siporte ozordi.  Mon konpran bann dezakor ki’n kapab annan, lo serten bann provizyon, final dan sa Lagreman.

Me i enportan ki nou tonm dakor nou tou konman en Lasanble, pou nou fer pase sa dokiman.  Tout an rekonesan ki posibilite pou nou ganny bokou plis avek nou resours dan nou Zone Ekonomik Eksklizif, i la.  Nou dir posibilite pou nou ganny plis ankor, i la li.

E antretan ki nou pas sa dokiman ozordi, nou rezerv nou drwa, pou nou tonm dakor en anvoy en mesaz, kot Minister konsernen, e Lazans ki pe travay avek Minister, pou zot prepar en delegasyon, pou asize get tou bann eleman ki zot santi nou bezwen take it on avek nou bann partenaire.

E mon’n tann Onorab Andre, kot in dir i pe prepar en paye, dan son pozisyon konman Chairperson delegasyon Sesel Lasanble Nasyonal dan son bann travay ki i annan ki fer avek ACP-EU.  E mon krwar Onorab William osi i la.  E si fodre agrandi baz konsiltasyon lokal lo nivo Lasanble petet sa osi i en eleman ki kapab ganny konsidere, dan ka demann bann travay preliminer ki nou kapab fer.

E byensir langazman nou bann lezot partenaire lokal isi, pou nou kapab enternman dakor lo en sa ki nou ava apel si oule en ‘position paper’ pou nou al negosye davantaz avek Linyon Eropeen lo kontenir sa Lagreman ki nou pou – mon swete ki dan en fason inanim nou kapab donn nou laprouvasyon ozordi.  Sa i premye pwen ki mon ti ava soumet devan Mr Speaker.

2enm pwen i enportan ki mon mansyonnen e mon ava siport leko serten bann largiman ki’n ganny avans devan, dan nou Lasanble, ki bann pti pei e menm bann pei ki 10 fwa pli gran ki Sesel dan L’Afrique, zot ganny en kantite difikilte pou zot negosye bann deal, avek bann partenaire etranze.  Si mon pou servi sa term ki’n ganny servi bann ansyen pouvwar kolonyal, ki Sesel i enn bann pei ki’n ganny kolonize.  I difisil.  E i pran ou en kantite lenerzi pou diskite pou negosye, e ganny bann bon deal pou pei.

I annan bann i annan bann rezon pou sa.  Fodre nou pa nou per pou koz lo la, pou kanmi pou koz la, i annan bann bon rezon.   E sa i dan psychique ki or the psychic sa bann pouvwar kolonyal.  Akoz zot toultan vwar ou zot krwar pou dir zot ankor anba oubyen ou ankor anba zot dominasyon.  Sa i byen ki nou koz lo la sa konman en Lasanble.

E mon bann koleg serten in koz lo la, be mwan zot konnen mon abitye koz lo sa size.  Mon pa pou aret koz lo la ziska ler L’Afrique i ganny libere vre libere.  Akoz nou pa ankor ganny libere, konman en kontinan.  I ankor annan en kantite presyon ki ganny mete left, right, and  center lo nou pou fer sir ki nou ganny minimum ek sa ki pou nou.  Nou ganny minimum sa ki pou nou.

E nou, nou bezwen fer sir ki mon’n tann lavwa in anvoye, nou bezwen fer sir ki ler nou al negosye prosennman ki nou al avek en delegasyon ki robust, pou nou fer sir ki bann koup isi, koup laba ki nou kapab nou osi dir non.  Vwala mannyer nou, nou vwar li e pa dan sa direksyon ki ou vwar li nou vwar li dan sa direksyon.

Si fodre nou postpone meeting prosennman, nou a postpone meeting.  Wi si fodre walkout nou a walk out Onorab Gervais Henrie.  Ou expert ladan ou.   (laughter) So nou ava fer sa.

Me nou bezwen fer sir ki nou ganny bann bon deal, bann best deal.  E sa bann best deal pa pou LDS, i pa pou United Seychelles, i pa pou One Seychelles, i pa pou Nouvo Lalyans, i pou Sesel e pep Seselwa!  Akoz i nou resours i dan nou lanmer.  Sa i 2enm pwen ki mon ti ava voudre koz lo la ozordi Mr Speaker.

3enm pwen;- 3enm pwen i enportan ki mon lans en lapel avek nou menm nou isi dan sa Lasanble, ki fodre zanmen, Mr Speaker mon repete fodre zanmen, e mon repete fodre zanmen, okenn Manm Lasanble isi dan sa 6enm Lasanble i fer sa fo pa, pou dir avek pouvwar kolonyal oubyen avek nenport ki lenstitisyon, pou tap Sesel kot i fermal.  Fodre zanmen sa i arive i repete dan nou listwar ankor zis akoz pou serten lavantir politik.  Oubyen serten lavantaz politik.  Fodre zanmen i arive sa.

Mr Speaker mwan mon reste en patriyot en Seselwa natif Sesel, e mon pou defann tou sa ki bon pou Sesel!  E lo sa kote latab, nou pou defann tou sa ki bon pou Sesel.  Byensir i annan bann limitasyon, ki nou acknowledge i annan.  E nou bezwen toultan tonm dakor parey mon’n dir pli boner, ki i annan loportinite or ki nou bezwen kree loportinite pou nou ganny bann best deal pou nou pei.  E sa an relasyon avek nou resours k i dan nou lanmer.

Nou katriyenm pwen Mr Speaker ki mon ti ava voudre aborde ozordi se mon krwar konman en Lasanble konman en Lasanble nou pou dakor e konman en Gouvernman mon krwar ki in deza annan en pozisyon firm lo la, ki si in annan bann mankman atraver bann lannen, ki nou pa’n donn sitan sa lenportans, e met sa lenerzi dan nou Sekter Lapes, ki la i moman pou nou pran en pozisyon desiziv e nou bouz devan.  Pou nou fer sir ki nou Sekter Lapes i aport nou sa ki devret kapab aport nou.

E nou bezwen dir avek tou dimoun konsernen, ki sa moman kot nou pe fer fas avek en challenge COVID-19 ki si napa en pli bon moman pou nou donn sa Sekter Lapes son lenportans primer pou nou napa ankor en lot moman.  So mon trouv Onorab Afif pe dir mwan The time is now.  Onorab Afif oule mon repet sa ou?

Me mwan mon dir wi annou koste Seselwa, pou nou fer sir ki nou tou ansanm nou transform nou Sekter Lapes e fer li vin sa Sekter Ekonomik No.1 pou Sesel, e pou Seselwa.  Sa i mon mesaz Onorab Afif.  Prezan si oule met lezot lazektif avek ou kapab azoute.

Mr Speaker mon 5enm pwen ki mon ti ava voudre aborde ozordi apre midi, se dir avek nou bann Onorab isi dan Lasanble, ki ozordi i annan en filozofi, ki pe pase atraver lemonn entelektyel L’Afrique.  I annan bann gran profeser entelektyel bann profesyonnel Africain, pe dir, ‘’Make Africa great. ‘’

Mon krwar letan zot in tann Prezidan L’Amerique dir, ‘’Make America great again!’’ Zot in dir serten pe dir dan bann skoler pe dir, ’Make Africa great. ‘’

E dan sa 5enm pwen ler mon dir ’Make Africa great. ‘’ Mwan mon a dir konman Lasanble annou dir, ‘’Let us together, make Seychelles great.  Se sa ki nou bezwen nou tou dan sa moman la ki nou pe traverse, make Seychelles great.

Me Sesel Mr Speaker pou selman great,  ler nou kontinyen rekonnet potansyel tou Seselwa, parey Prezidan Faure depi ler in pran direksyon anler State House, pandan preski sa dernyen 4an in rekonnet,  acknowledge lenportans kapasite potansyel tou Seselwa.  Sa laspe konsiltasyon, sa konsiderasyon tou bann lopinyon divers.

Dernyen fwa mon ti dir in parti DNA son administrasyon, or in form par son DNA.  E fodre pa nou ezite pou nou diskite, pou nou kontinyen konsilte lo bann size ki annan en lenportans Nasyonal, parey nou Sekter Lapes.  I sel fason ki Sesel pou great. 

Me an menm tan Mr Speaker, lo sa 5enm pwen i enportan ki nou dir, nou bezwen get nou touzour dan konteks sa ki pe pase dan nou rezyon, dan konteks sa ki pe pase lo kontinan L’Afrique, e dan konteks sa ki pe pase otour lemonn.

Nou bezwen pran sa bann eleman or sa bann fakter bann sirkonstans an konsiderasyon serye.  Sa bann diferan blok ekonomik ki Sesel i form par ladan, nou kapab dir ki sa Lagreman avek Linyon Eropeen, dan li menm li i kontenir en blok ki nou ladan.  E ACP-EU i en lot blok ki sey devlop en sinerzi pou get en pe dan bann pei L’Afrique.  Zot bann bezwen ki kote zot kapab devlop serten sinerzi ansanm.

Mr Speaker i annan en keksoz ki nou bezwen mansyonnen a sa moman.  Dan bann leksperyans, dan bann lekspoze ki mwan personnelman mon’n gannyen avek bann lezot Manm LDS kot nou’n dan bann diferan forum parey Onorab Ramkalawan in dir, malerezman L’Afrique pa ankor kapab debout avek en sel lavwa.

E menm dan sa ACP-EU ki Onorab Andre in koz lo la, i annan bann diverzans.

Detanzantan ki arive Mr Speaker ou trouv serten sa bann power house, bann reprezantan bann ladministrasyon, lenstitisyon L’Europe, i ris enn sa bann dirizan akote i annan bann konversasyon direk avek bann leadership.  E apre ki zot fer, zot sey fer bann keksoz ki limit sa bann prop pei dan zot kapasite pou diskite, negosye e ariv lo bann Lagreman, konsekan pou zot pei.

Mr Speaker sa dokiman ki devan nou Lasanble i donn nou en loportinite ozordi ekstraordiner, pou nou, nou menm nou vwar bokou pli lwen ki sa.  E parey mon ti dir mon’n dir pli boner dan mon lentrodiksyon, ki i difisil pou L’Afrique ganny bann deal.  E bann bon deal pou zot prop resours.  Mon pa pou bezwen al repet tou sa ki Onorab Ramkalawan in dir, me i difisil.

E se pou sa rezon ki en pwen ki li menm li Onorab Ramkalawan ti leve dernyen fwa dan enn son bann lentervansyon, ki mon krwar i ti en mankman in fer en lapsus parey Onorab Daniel Belle ti kontan dir.  E malerezman nou pa’n kapab ganny en sans partaz sa nou de diskit lo la an deor sa forum. 

Nou bezwen fer sir ki dan bann lenstitisyon kot nou ete, ki nou pa fer duplication dan bann lenstitisyon.  E sa i en mouvman.  I en pa delibere lo lapar sa bann lenstitisyon or pei ki finans bann diferan lorganizasyon lo kontinan Africain Mr Speaker.  Deliberaman zot fer nou kree lenstitisyon apre lenstitisyon rezyon parti rezyon.  E prezan ki arive, bann rezyon pe opoz diferan rezyon me lo bann menm size ki osi annan en lenportans kardinal pou L’Afrique. 

Par egzanp, par egzanp si mon pou fer presizyon, lo la Onorab Ramkalawan, se lo sa Parlman rezyonal, ki pe ganny pouse.  Pa ki mon pe defann PAP non, byensir non, me ou pe trouv pou al annan en konpetisyon ki en pe letan in konmanse.  Akoz bann diverzans lopinyon e pozisyon bann diferan personnalite, ki a latet sa bann diferan rezyon e lentere partikilye bann diferan Leta.

E ki arive L’Afrique i kontinyen reste divize.  L’Afrique i kontinyen bann diferan sou rezyon, bann diferan lenstitisyon ki annan kontinyen lager antre zot.  E rod predominans.

E sa si Onorab Georges ti pou pran floor la apre midi, Onorab Georges ti pou siport mon lo sa size ki  mon pe koz lo la.  Akoz i enn bann dimoun ki mon konnen i konsernen avek sa tandans ki annan lo kontinan L’Afrique. 

E annou pa fer sa fot, pou nou krwar ki kolonizater mon ava repet ankor ki kolonizater in sanz son natir.  Zot pa ankor sanz zot natir.  Zot ankor krwar ki zot kapab domin bann diferan Leta kot zot in kolonize pou lannen e syek!

E fodre nou, fodre nou fer sa arete.  Fodre nou fer arete sa bann kalite mantalite ki bann gran pwisans i adopte vizavi bann pei L’Afrique.  Zot le dikte nou zot bann reset pou attend zot bann lobzektif Nasyonal.  Nou bann misyon, nou bann lobzektif pou nou, i pas toultan segonder zis akoz zot annan resours.  Zis akoz zot annan mwayen.

San realize pou dir tou sa bann lannen ki zot in koloniz nou zot in eksplwat nou bann resours, e nou, nou pa’n ganny preski absoliman nanryen ladan!  Zot in anrisir L’Europe e nou, nou pa’n ganny preski nanryen ladan.

And this time round Mr Speaker, nou bezwen anvoy en mesaz kler.  E tou sa ki pare, isi dan sa Lasanble annou join ansanm, pou nou anvoy en sel mesaz.  Dir this time round, no way!  Nou bezwen fer keksoz diferaman.  Byensir parey mon bann koleg isi lo sa latab in echo, nou respekte tou dimoun, tou bann travay ki zot in fer e ki zot pou kontinyen fer dan zot profesyon, dan zot domenn respektif pou kapab kontinyen annan bann Lakor avek bann lezot pei.

Me nou bezwen pe definir en road map byen kler, pou nou Sekter Lapes isi.  E ki mon konnen nou Minis Bastienne in fer en pa tre enportan de lavan dan sa domenn.  E nou bezwen set en dele letan spesifik, kan ki Sesel i kapab tourn lavantaz, e met an mars nou bato pou nou lapes nou ton.  Get bann lezot partenaire ki kapab antre avek nou, pou nou kapab annan nou prop flot bato pou lapes nou pwason, pou nou ganny en better deal pou nou resours dan nou lanmer.

Byensir zot pe dir 43an i ok 43an.  43an pou en pei i parey konmsi ou a dir 43 zour.  Me dan bann diferan moman diferan Gouvernman ki la, i definir bann priyorite e mon pa pou bliye dan nou listwar in annan bann lesey pou nou annan nou flot bato pou lapes nou ton.  In annan bann lesey.

Me ou konnen i annan en keksoz ki nou bezwen osi konpran.  Taler mon’n tann dir annou angaz bann expert.  Mon pa kont expert.  Mon konnen parfwa sa bann expert ki ou anvoye pou definir pou ed ou pou donn ou en road map ou konnen ki i fer?  Zot pas par deryer laport zot ganny zot kick back.  Epi zot vin donn ou mil rezon akoz ou pa kapab annan ou, ou bato laflot.  Zot donn ou mil rezon akoz ou pa kapab annan ou prop laflot.

E akoz ou bezwen kontinyen depandan e siny bann Lagreman avek Linyon Eropeen, pou ou kapab eksplwat ou resours.  Zanmen zot donn ou en rezon or 5 rezon dan sa mil rezon, akoz nou pa kapab donn ou 5 rezon e defini en plandaksyon konkret ki mannyer ou kapab finalman achieve,  keksoz ki dan ou lentere Nasyonal.

Mr Speaker mon konn sa tro bokou dan mon pti leksperyans letid ki mon’n fer lo revolisyon listwar L’Afrique, lo revolisyon listwar L’Europe.  Dan sa pti gin letan ki mon’n viv dan mon parkour mon’n konpran zot tre byen.

E pa bezwen ankor personn pou vin donn okenn lektir lo la.  E nou zis nou bezwen avangard e met nou pare, pou nou dir sa i direksyon ki definitivman nou pou pran e nou reste determinen konsekan pou nou pran sa direksyon.

Byensir i pou annan son bann defi, me si L’Europe in kapab, akoz ki L’Afrique pa kapab, akoz ki Sesel pa kapab?  E sa ki pa arive Mr Speaker, sa ki pa arive or sa ki pran letan pou arive.  Se pou L’Afrique.  Annou pran par egzanp Komisyon L’Ocean Indien. Ki Sesel i form parti sa lorganizasyon ekonomik, sosyo kiltirel, politik, rezyonal depi 1982.  Kot Msye Rene ki ti spearhead sa a sa moman.

Akoz sa bann pei ki dan Komisyon L’Ocean Indien pa tonm dakor pou antre nou annan nou laflot?  Byensir la ankor i anmenn nou lo en pozisyon bann diferan lentere Nasyonal kot nou pa vwar dan son totalite, dan son globalite ki mannyer konman en groupman ekonomik rezyonal nou ti kapab fer en mervey.

Byensir, byensir zot pou dir mon be ou konnen si ou fer sa, L’Europe pou blok son market laba, ou pa pou kapab eksport pwason.  Me L’Europe i bezwen pwason.  Kote i pou gannyen pwason?

Européen i kontan manz ton.  Mon tann Onorab Arissol i dir i pou ganny anler kot i reste laba, anr Onorab Woodcock ki’n dir sa? Ou  vwar zot anvi mon arete Onorab Speaker pou entervenir, kantmenm zot in fer tou sa bann zafer mon pa’n aret ditou mon’n les zot trankil.  La zot pe al en pti pe tro.  Mon pa pou zwe rol Speaker mwan.  Me selman zis konmsi dan mon en pti sans mon ava koze, mon pe al fini mon lo mon 8enm pwen, e i reste mon ankor zis 2 ok? Mon lo mon 8enm la, i reste mwan 2 ankor.

Now Mr Speaker mon krwar ki nou annan potansyel pou nou fer sa ki mon pe dir.  E sa i anmenn mon lo pwen kot mon pou fer lapel avek Onorab Ramkalawan, li ki diriz FPAC, pou dir li annou gete ki mannyer nou kapab ranforsi, prezans Sesel, kad Diplomatik Sesel dan bann pei larezyon.

Nou konnen zot annan bann for santiman lo kestyon reprezantasyon Sesel, Maurice, me si i annan en moman kot nou bezwen pull ansanm konman en rezyon, i sa moman la.

E si i annan en moman ki tou bann reprezantan diplomatik dan kadreman mon pe koz strikteman Komisyon L’Ocean Indien la nou bezwen pull nou resours ansanm e negosye konman en lafors konman, en lavwa devan sa bann lorganizasyon, e lenstitisyon enternasyonal, se zisteman la i sa moman pou nou fer li.

E annou gete ki mannyer konzwentman, konzwentman tout an tenir kont bann byensir bann lobzektif Nasyonal konman en lorganizasyon, konman en lenstitisyon Komisyon L’Ocean Indien, nou kapab servi lavantaz nou pozisyon, e nou resours ki nou annan son potansyel ki i annan en potansyel ekstraordiner, pou nou kapab ganny en better deal pou sakenn nou bann pei.

Mon krwar i moman in arive Mr Speaker.  E mon les sa dan lanmen Onorab Ramkalawan, pou kapab rezourd sa dilenm tir sa  stalemate.  Mon krwar ou pe ou ti pe antisip mon 9enm pwen, mon pe al lo le 25 Oktob.  Nou pe fini nou pe fini mon 9enm pwen.

Mr Speaker zisteman mon 9enm pwen pe pran mon al lo mon 10enm pou mwan fer mon konklizyon se nou konnen nou, nou konnen ki Komisyoner Eleksyon, lanons bann dat provizwar eleksyon, 22, 23, 24 Oktob, e mon’n tann Onorab Andre, Onorab Afif, Onorab Ramkalawan li menm li in koz lo, lo le 25 ki pou annan en nouvo Gouvernman.

Me mwan mon a dir zot en keksoz.  Sa pep ki la deor, pou anvoy en shockwave dan sa Sesel an Oktob!  E Mr Speaker, sel parti ki pou sorti the winner sel parti ki pou sorti venker, ler rezilta eleksyon i anonse, mon prezimen i pou le 25 se sa parti ki apel parti pep Seselwa, pep Seselwa.

 

(APPLAUSE)

 

HON SIMON GILL

Se sa parti ki pou sorti venker, akoz Sesel Seselwa i en parti dan sa konteks eleksyon.  Ki pa depandan ni lo LDS ki pa depandan ni lo United Seychelles, ni lo Lalyans, ni lo One Seychelles.  Sa pep i ase matir pou selekte sa meyer lider pou diriz son desten!

 

(APPLAUSE)

 

HON SIMON GILL

E si zot oule mon quote prezan ler mon’n dir sa pep in matir i pou anvoy en shockwave la deor se i pou elekte the best man for the job!  E ozordi i sa pep mon napa okenn dout avek respe pou tou bann kontestan, bann kandida prezidansyel e zot bann Vis, mwan mon ava dir zot se annan en dimoun ki’n montre ki i kapab anmenn sa pep ansanm, e permet sa pep akonpli son misyon istorik odela bann partizan politik, mon pe dir odela bann partizan politik, se zisteman se pa lot ki Prezidan Danny Faure.

 

(APPLAUSE)

 

HON SIMON GILL

Son Vis pa trakase, i la e byento zot pou vwar li.  E zot pou happy. 

Mr Speaker i pa par zar dan mon konklizyon mon 10enm pwen mon konklizyon, i pa par azar ki mon ti sit bann lartik bann paragraf dan nou Konstitisyon United Seychelles lo paz No.3 ki ti ganny aprouve le 24 Novanm 2018, ki nou dan nou parti, nou krwar ki nou bezwen bouz Sesel, bouz sa pei,  o dela bann partizan politik.

Nou bezwen rod en fason pou nou kapab ini tou Seselwa, ansanm pou nou kapab akonplir nou misyon.  E en misyon kot tou Seselwa i vin en parti prenant dan zouisman larises son pei.

Byensir i kontribye e i kapab an retour reklanm son par lezitim dan sa larises ki i ava kontribye pou kree.  Mr Speaker mon dernyen pwen konklizyon i pa par azar Mr Speaker ki depi ler mon’n antre dan sa Lasanble, mon’n tenir lo en mesaz ‘’Together.’’  Mon senser lo la e nou parti i senser lo la ki nou krwar se zis ‘‘ansanm’’ ki nou kapab batir sa Sesel modern sa Sesel meyer pou tou nou pep.  San okenn konsiderasyon politik.

E Mr Speaker, ou ava dakor avek mon ki Prezidan Faure in demontre depi ler i la anler State House ki i kapab open up in open up pou donn sak Seselwa posibilite e donn zot loportinite pou demontre ki zot kapab fer pou demontre zot pei.  E mon reste konvenki ki i zonm, e i en zonm ki senser e i en zonm ki pou kapab anmenn sa pei odela tou bann konsiderasyon politik.

E annou bouze Mr Speaker.  E mon ava dir ki sa Protokol ki devan nou Mr Speaker ozordi dan sa Lasanble pou montre nou en keksoz ozordi an depandan, ki mannyer nou bann koleg LDS i pran zot vot lo sa dokiman ki devan nou Lasanble.

I pou anvoy en lendikasyon kler, pou nou tou isi dan sa Lasanble e an deor pou nou pep vwar ki sa ki nou koze si vreman nou pou met li an pratik.  E pou nou kapab bouz devan e anmenn Sesel devan.  Ankor enn fwa parey mon’n dir tout an rezerv-an posibilite pou nou kontinyen diskite e negosye e nou annan kapasite pou nou kontinyen diskite e negosye.

Mr Speaker mersi bokou pou donn mon sa pti 5 minit ekstra, e mwan mon pou siport sa dokiman ki nou LGB in anmenn devan nou Lasanble, e mon demann tou nou bann koleg LDS pou sipor pou siporte.  Mersi bokou Mr Speaker.

 

(APPLAUSE)

 

MR SPEAKER

Mersi Onorab Simon Gill.  Bon Onorab Waven William.  Ou annan en pe mon donn ou apepre 10 minit pou ou fer bann klarifikasyon.  I pa entervansyon, mon ti pe mon’n donn ou sans pou fer serten klarifikasyon.  Onorab.

 

HON WAVEN WILLIAM

Mersi Mr Speaker pou donn mwan laparol.  Mr Speaker mon swete ki loter Mosyon lefe ki i annan labsans panel i a kapab dan son wrapping-up ouswa si i pa kapab mon mazinen i ava konvenk lenformasyon avek Minis konsernen, pou nou kapab ganny lenformasyon an ekrir.

Mr Speaker premyerman, mon ti a kontan eklersi en lentansyon pou dezenform sa pep deor la vizavi travay ki Egzekitif i annan pou fer.

Mr Speaker dan lartik 66 nou Konstitisyon e Mr Speaker ozordi nou lavey lanniverser Constitutional Day ki sipoze demen.  E mon krwar pou dir sa bann komanter ki mon pe al fer i enportan.  Lartik 66 i dir ki pouvwar Egzekitif reste avek Egzekitif.  Me selman i annan en lot lartik ladan ki osi koz lo kwa ki Lasanble i kapab fer vizavi sa travay ki Egzekitiv i annan pou fer.  E i osi dan lartik 86 donn pouvwar Lezislatif Lasanble Nasyonal.

Mr Speaker letan mon pe dir sa mon’n vwar serten tantativ pou fer dimoun krwar deor pou dir ler ou demann kestyon, ouswa letan ou demann leklersisman i konmsi ou pe enterfer dan rol Egzekitif.  Ki pa vre Mr Speaker ditou.

Mr Speaker mon’n privilezye pou akote ou letan ou’n al fer ou’n partisip dan bann sesyon Linyon Enter-Parlmanter, e osi mon’n asiste Onorab Andre, lo Komite Konzwent ACP-EU. 

        Mr Speaker ou a dakor avek mwan ki bokou lanfaz ozordi pe ganny mete, lo the oversight role of Parlmanter.  Mr Speaker rezon ki sa pe ganny mete se ki, bann Manm Parlmanter in vwar ki Egzekitif letan zot al fer negosyasyon lo zot tousel, zot pran bann desizyon parfwa baze lo retenir pouvwar politik.  Me i pa neseserman pe pran kont konsiderasyon zot bann pep dan bann diferan pei.

E in annan plizyer bann largiman ki’n monte e se pou sa rezon ki ozordi sa bann diferan groupman Parlmanter pe met lanfaz lo the oversight role.  E ki sa i vedir Mr Speaker.  I vedir ki Manm Parlman bezwen demann kestyon.  Manm Parlman i bezwen rod leklersisman avek Egzekitif letan i al negosye bann Lakor deor, letan Manm Egzekitif i al form parti bann trite enternasyonal.

Mr Speaker i malere isi nou pa pe fer li, letan bann gro, gro loan i ganny negosye deor.  Kot sa pep ki bezwen peye pli tar i pa konn bokou lenformasyon Mr Speaker.

Mr Speaker mon pou dir i malere osi ki petet letan nou pe konsyan avek diskisyon lo nou Standing Orders i ava annan en protokol ki gid nou Lasanble lo vizavi travay Komite zafer etranzer vizavi diskisyon lo en White Paper avan ki bann Trete bann Lakor i vin devan Lasanble.

Mr Speaker parey in ganny dir me petet oparavan nou’n tonm dakor avek sa, Mr Speaker dan letan lunch break dan en demi zournen lo en Lakor sitan enportan ou konn sa tre byen, akoz i form parti nou travay letan nou al aletranze, i pa ase Mr Speaker.  I pa ase pou pas lo en Lakor sitan enportan ki konsern lentere pep Seselwa.

Mr Speaker la avek ou permisyon mon ti a kontan demann ou permisyon Onorab Georges ki Chairman Bills Committee akoz letan nou ti pe diskit the Civil Code mon ti demann li en kestyon.  E mon mazinen pou dir sa i an relasyon osi avek nou ton.

Mr Speaker mon kestyon sete letan sa lera i lo propriyete, eski i ou propriyete, i ti dir mwan wi.  I dir mon be letan i la kot ou vwazen laba i pou ou vwazen.

Mr Speaker me si nou defini nou Exclusive Economic Zone savedir sa ton ki’n ganny trouve dan nou Exclusive Economic Zone Onorab Georges ou kapab koriz mwan eski nou ton ouswa i ton Linyon Eropeen?(laughter)

        Eski nou annan pouvwar pou negosye for the best deal Mr Speaker dan Lakor?  Mr Speaker mon’n pas lo sa de dokiman, sa Lagreman ek sa Protokol Mr Speaker, i annan serten keksoz ki mon pa tonm dakor Mr Speaker.  Akoz mwan ek ou avek Onorab Andre letan nou al deor i bann menm keksoz ki nou pa tonm dakor avek Mr Speaker.

Mr Speaker, avek nou blue gold nou annan serten pouvwar.  Malgre ki serten i anvi fer nou krwar pou dir annou degaze annou vot sa, i ok sa.

Mr Speaker, Joint Committee dan sa Lagreman i dir devret annan en Joint Committee Mr Speaker.  Me the Joint Committee i pa defini lekel bann Manm ki sipoze lo sa Joint Committee.

        Mr Speaker lo sa oversight role, ki Linyon Parlmanter pe egzize lo nou ki nou bezwen form parti bann negosyasyon bann diskisyon lo sa bann Lagreman, mon santi pou dir leve ki sa Lagreman i pa dir lekel bann dimoun ki sipoze lo la, e mon krwar pou dir demann Komite Zafer Enternasyonal i devret ganny konsidere.  In annan propozisyon pou revwar sa Lakor pli tar.

Mr Speaker lot lartik mon pa dakor, dan sa Protokol i dir poudir nou kapab konsider pou en mid-term review Mr Speaker.  Mr Speaker sa pa devret.  I devret dir, ‘’There shall be a mid-term review Mr Speaker’’, akoz sa Lakor i pou 6an.

Mr Speaker avek sa sityasyon COVID la mon krwar ki i enportan ki nou sey konsider review dan 3an ouswa pli boner.  Akoz nou annan bokou ki pou perdi.  E sirtou dan nou Sekter Tourizm Mr Speaker nou’n perdi preski tou.  Nou pa konnen ki mannyer sityasyon pou ete, me nou annan en oportinite Mr Speaker.

Mon lot pwen Mr Speaker ki mon pa tro tonm dakor avek, se ki the termination of sa Lagreman.  Lafason zot bann item i ganny ekrir anba la Mr Speaker konmsi we are the mercy of sa lot partenaire. 

        Mr Speaker en lot kestyon ki monte se ki dan sa gran parasol Contrary Agreement Sesel in sinyen in form parti ladan,  Mr Speaker eski spesifisite, special treatment, ki bann Pti Leta Zil ki vilnerab i sipoze gannyen, eski lespri sa ki pe ganny dir in ganny enshrine dan negosyasyon pou sa Lakor?

Mr Speaker la mon pe refer avek lartik 2, lartik 32, lartik 35, lartik 56, 68, e 89 Mr Speaker ki endike kler dan Cotonou  Agreement ki bann kalite tretman bann pti Pei Leta Zil ki vilnerab i devret gannyen Mr Speaker.

Mr Speaker i domaz, dan sa Protokol avek sa Lagreman osi in nonmen plizyer bann lartik dan Cotonou Agreement ki enn, mon santi poudir nou Lasanble konpare avek bann Lasanble kot nou ale deor, napa bann oversight tools Mr Speaker.  Napa bann oversight tools pou nou kapab take Executive to task pou fer oversight lo sa bann diferan item, ouswa lartik konsernen.

Mr Speaker mon ti ava swete mwan, ki vreman sa Lakor ti ava’n ganny fer avek partisipasyon dan en gran dimansyon sa political dialogue ki Cotonou Agreement kantmenm anmenn en lartik dan sa Lagreman ki koz lo la, kot political dialogue i pa zis Egzekitiv Mr Speaker!  Political dialogue ki ACP-EU avek Linyon Enter-Parlmanter pe met lanfaz lo la pou annan en greater political dimensions Mr Speaker.

Mon santi pou dir sa Lakor pa pe fer provizyon Mr Speaker.  E i dezole Mr Speaker akoz nou annan en Lakor avek lapes Linyon Eropeen pou en bon pe letan.

Me i malere.  Me mon pa oule ki sa bann eksper deor, sa bann profesyonnel parey, pe ganny fer krwar par serten isi dan sa Lasanble ki nou pa tonm dakor avek zot abilite, ouswa nou pa siport zot travay.  Zot in fer en travay wi, nou aksepte, nou aksepte.

Me selman nou santi poudir i annan serten keksoz an plis ki ti kapab ganny fer pou anbelir sa Lakor. Mr Speaker i paret nou napa swa, me mon pou rezerv mon drwa vote a lafen pou mon swa vot pour or abstain.  Mersi.

 

MR SPEAKER

Mersi Onorab William.  Mon pou donn Onorab De Commarmond laparol pou fer konklizyon, nou pran en vot.  Ou annan enn de pti pwen ki’n tous lo involvement Lasanble, Manm Parlman and all that. 

I en keksoz ki nou’n menm dan katriyenm Lasanble, mon konnen mwan avek ou nou’n sey pous sa devan, me mon a fer en pti komanter lo la apre ki nou’n fini pran en vot tou.  Akoz mon pa oule ki sa ki mon dir from the Chair i kapab lenfliyans anyone ler zot pran zot vot.  Onorab De Commarmond.

 

HON CHARLES DE COMMARMOND

Mersi bokou Mr Speaker.  Bonn apre midi Mr Speaker, bonn apre midi tou Manm Onorab e tou dimoun ki a lekout. Mr Speaker mon annan gran plezir pou fer mon Right of Reply e pou koz finalman lo sa Lagreman ek Protokol ki devan nou Lasanble, en Lagreman ek en Protokol tre enportan pou pei e pou nou pep .

Mr Speaker tou pei, tou Gouvernman, i konnen ki bann pei ris bann pei neokolonyal parey in ganny dir bann    neokolonyalis, bann pei Linyon Eropeen ensidswit i sey fer zot tou i fer zot mye pou zot kapab pran lavantaz lo resours natirel e larises bann pei pli pov, bann pei ki pe devlope.  E sa i enkli Sesel e enkli osi nou larises natirel nou pwason dan nou lanmer.

Nou tou nou tonm dakor osi ki nou bezwen fer en zefor ekstra, en zefor an plis pou nou vey nou larises pli byen.  Akoz sa larises parey in ganny dir i pa ni pou en parti politik sa.  I en larises pou pep Seselwa, pou nou pei.

Me Linyon Eropeen dan sa konteks Lagreman ek Protokol ki devan nou, zot pa negosye sa deal zot tousel zot.  E nou bezwen koze, nou bezwen korpore i annan en relasyon an koz.

E pa akoz sa relasyon ki e sa larises sorti kot nou ki nou, nou bezwen fer pli gro lebra, e zot pa akoz zot pouvwar ki zot annan e zot petet kapasite finansyel e kapasite eksplwatasyon ki zot bezwen fer gro lebra.  Non!  E an menm tan nou tou nou konnen ki tou Lagreman i bezwen konmans kekpar.

Tou bann Lagreman i bezwen konmans en bor pou kapab o firanmezir a longer ditan i devlope tou bann parti prenant vin pli eksperyanse, i vin i ganny plis konesans.  E i konpran pli byen ki enn a lot i le fer e pou zot kapab improve sa relasyon, improve kontenir sa Lagreman ek son Protokol.

E improve lo lafason ki sa larises an eksplwatasyon i ganny fer dan en fason pli byen e pli zis.  E nou konnen ki sa lazistis i pa en lazistis net me nou bezwen travay for e dir pou kapab arive annan en keksoz ki byen pou nou pep.  Have been said that Mr Speaker, nou Lasanble in en rol enkrwayab.  I pa zis en rol istorik li, i en rol enportan ki nou Lasanble i bezwen zwe, e i bezwen zwe li a laoter.

E fodre pa ki nou Lasanble dan pa zwe son rol dan en fason byen, dan en fason alaoter, dan en fason plen, i anvoy sa lour lo Egzekitiv or lo lezot brans Gouvernman.  Sa fodre pa nou fer.  I enportan alor ki dela mon met detrwa keksoz an perspektiv.  Enn se ki nou Lasanble i konplent e i pe konplent i pe fer sorti i pe fer tande son lavwa si nou le servi sa mo, i poz kestyon vizavi sa Lagreman ek son Protokol. I annan parfetman rezon.

E nou bezwen kontinyen poze kestyon.  Nou bezwen kontinyen show concern.  Nou bezwen kontinyen diskite lavantaz sa.  Nou bezwen kontinyen pa zis fer lebra krwaze, me nou bezwen kontinyen pe gete sa Lagreman ek sa Protokol ki devan nou, si nou pa kapab fer pli byen.  I normal e sa i rol i enn nou rol Lasanble Nasyonal.

E mwan mon remersi Lasanble pou show that concern.  Me nou tou nou konnen osi poudir diran sa bann letan akoz sa Protokol la, ek sa Lagreman i pa’n fek premye fwa nou pe diskit li.  In la en pe letan depi ‘93 something like that, me i pe kontinyen li depi ler EU i la menm avan la depi ‘ 84 in la in kontinyen fer son parkour.

Me nou bezwen pli nou avanse pli nou fer negosyasyon ki pli byen.  E mwan mon rapel dernyen fwa leta bann Manm Parlman Linyon Eropeen ti vin isi, e nou’n annan nou Lasanble ti reprezante sa dan sa meeting ti en meeting for nou kapab dir ti kapab vin pli for wi i annan room for improvement dan tou sa ki nou pe fer.

Menm dan sa Lagreman ki pe ganny sinyen ki pe ganny ratifye la, devan nou Lasanble i pou annan room for improvement.  E i pou toultan annan room for improvement.  Nou bezwen perfeksyonn li o firanmezir ki nou ale.

E la dan meeting avek Linyon Eropeen nou’n fer sorti Lasanble an diskisyon in fer sorti son vizyon, son swe, tre for.  E enn bann keksoz tre for ki’n sorti se lakonpannyman Lasanble Nasyonal dan tou sa bann misyon, dan tou sa bann Lagreman letan pe negosye letan pe ganny sinyen.

E sa mon rapel tre byen, e nou’n dir be mwan sanmenm sa enn bann keksoz ki ozordi la pou anonse e Mr Speaker mon le ou ganny everything on records e la sa kote nou Parti US dan Lasanble, nou pe voice sa for pou ki vreman en keksoz konkret i ganny fer apartir aujourd’hui.  Apartir de la ki nou’n nou ava’n aprouv sa, me nou bezwen pa reste avek menm status quo nou bezwen improve la ki nou pe fer.

         Ki mon le dir la, e i en moman oporten Mr Speaker.  mon oporten akoz nou pe diskit lo nou lo nou Lalwa Lasanble si oule lo nou Standing Orders, lo nou Protokol Lasanble Nasyonal.

E la en keksoz ki bezwen antre, e ki bezwen en nor nou Lasanble Nasyonal dek aujourd’hui, sak misyon nou Lasanble Nasyonal deor, i bezwen vin ek rapor donnen dan nou Lasanble Nasyonal.  Sa Mr Speaker pa pe ganny fer.  E mon demande ki sa i ganny fer.

Mon a eksplike akoz mon pe dir tou sa.  E an menm tan ler i annan sa bann Lagreman ki pe ganny diskite, nou bezwen osi an ekrir anvoy nou konsern.  E nou konsern letan nou anvoy li an ekrir, bann konsern for koumsa ki montre osi nou kontribisyon, i bezwen ganny share par nou bann Manm dan Lasanble Nasyonal.

I bezwen gannyen as the Paper Laid also, dan nou Lasanble pou ki la, la nou Lasanble Nasyonal in montre poudir nou pa dakor lo lafason ki sa Lagreman i pe ganny negosye.  E ki nou, nou annan serten kontribisyon la, la nou bann kontribisyon e nou pe dir ki nou bezwen ganny enkli ladan.

E lo la, nou lans e n lapel en la nou pe formelman lans en lapel avek Egzekitiv, pou dir ek Egzekitiv revwar restriktir negosyasyon.  E sa ki mon pe dir la, i pa zis pou sa Lagreman la li.  I tou nou bann gran Lagreman ki nou fer ki swa en Lagreman Petrol in future e,  ou gas oubyen bann gro loan nou’n mansyonnen dan Lasanble, Lagreman Lapes, IOT, Cotonou Agreement, nou Parlman i bezwen onboard.

 E mwan sa mon dakor e i bezwen annan en striktir, i pa kapab zis koumsa konmsi ozordi nou deside Parlman bezwen onboard to sa e ki nou peye e nou ale epi nou vini napa Lakor napa naryen.  I bezwen organize strongly ale e letan nou ale nou bezwen pe al fer keksoz serye.

Savedir ki osi en lot pwen ki mon bezwen fer avanse, se ki Parlman ler i anvoy en group deor pou al pou tel, tel misyon i bezwen liaise ek Egzekitiv, demande laba ki dernyen file i annan en update, lo tel, tel keksoz.  Parey letan nou ti al mon rapel nou ti al La Russie Onorab Ramkalawan, Onorab Afif mon menm nou ti demande, nou dir donn nou en update.  E i ti byen ki nou pe al laba an kwa zis nou ti pe al pronmnen non? I bezwen konkretman sa misyon ki nou pe al fer ki pozisyon Sesel vizavi sa Misyon.  Ok i pa ti vin fasil me nou ti ganny apre en serten kontrandi.

E mon pe dir sa, akoz mon anvi mon ki apartir de la ler nou bann dimoun i ale ACP-EU ,Onorab William Onorab Clifford Andre, Onorab Gill, Churchill lot ki ale dan ACP-EU lot dan Cotonou Agreement pou al diskit isi diskit laba, tou i bezwen annan en brief ki pe al diskite pou li konnen.  Akoz zot pa kapab zis ale al asize laba ou,  ou lofis in pey in pey gro, gro sonm larzan.

E alor ler i vini alor bezwen donn en rapor.  Me sa rapor akoz demen si sa Manm Parlman i annan en problenm ki pa kapab al ankor sa lot ki pou al dan son plas, i annan en kontrandi konnen ki pe al fer.  Sa standar ki mon le nou Lasanble Nasyonal i al lo la Mr Speaker.

E sa i a fer ki apartir de la the next Lagreman ki Lasanble Nasyonal i ava partisip plennman e sa bann komanter ki nou’n tande, sa bann konplent ki nou’n tande isi i ava pass and gone.  I ava en nouvo pratik en nouvo fason e la osi sa Manm ki ava partisipe ouswa 2 ou 3 Manm ki a partisipe i a kapab osi donn nou Lasanble kwa ki pe pase.

Sa i ava anmenn osi plis transparans e dedikasyon e konesans dan bann gran Lagreman e Protokol ki nou fer dan nou pei.  E la nou pe demande alor ki sa Lagreman ki devan nou.  Lefe ki in annan diskisyon, around it.  E mon kontan tande ki Leader Lopozisyon in dir ki zot pou siport sa Lagreman  la. Me parey nou pe dir nou bezwen nou pou future vwar son improvement.  E nou tou nou tonm dakor lo la menm lo sa kote latab.

Lot pwen Mr Speaker se ki avek sa nou pouvwar pou dir bann kontribisyon ki’n ganny fer ki mon’n apresye bokou, lo sa Mosyon, se ki pou anmenn nou pou nou kapab vwar serten keksoz.  I annan serten keksoz ladan ki mon panse apre ki nou’n diskite la, ki mon krwar pou next time nou kapab improve. 

Me petet menm nou pa kapab neseserman esper next time, menm ki nou pou ratifye li vi ki Lagreman in sinyen, nou ratifye napa problenm nou donn aprouvasyon.  Me selman nou pou zwenn avek Egzekitif.  Nou Lasanble i a zwenn ek Egzekitif i annan serten keksoz ki mwan mon krwar nou kapab dan semen improve.  Par egzanp nou a pe koz lo lasistans ki Linyon Eropeen i donn anba sa anba sa Lagreman i donn bann distrik oubyen lendistri lapes sa ki nou apel Mr Speaker sa ki nou apel sectoral support. 

Zisteman sa, mon krwar sa larzan i devret vin direk dan pei, pou nou al pli vit ek nou bann proze.  Nou tou nou pe konplent proze lapes ki’n konmanse ouswa ki tarde konmanse, mon – Cascade mon annan legzanp konkret.  Nou bazar Cascade ki egziste ki la, sa bazar napa okenn bazar la mon profite, pou mwan ankor enn fwa demanti bann fo alegasyon bann lalang ki serten Manm in anmennen devan nou Lasanble, napa okenn bazar, i pa’n egziste, napa okenn lo rikord naryen ki bazar Cascade ki’n vin laboutik.  Pa’n egziste sa.  It’s not true!

        E sa mon le i vin lo rikord e Mr Speaker dezormen personn bann Manm Lasanble ki sey mansyonn sa, mon le ou met en stop akoz mon pou retaliate e i pou vin mal.  Akoz sa i pa’n egziste ditou.  E Onorab Flory Larue ou menm ou avek ou enn de koleg, mon anvi ki zot arete sa bann lalang! Akoz nou konnen zot koz byen lalang zot!

Me e sa ki nou fer Cascade i annan sa lot proze, nou bazar ki nou fer nouvo bazar, ki i pou en zoli proze, me li mon’n mansyonnen la akoz in pran plis ki 6an, nou ankor pe negosye.  In fer en pe ankor pe bouze.  I tarde akoz li i tonm anba sa progranm Sectoral Support EU.

 E mon krwar mon si nou larzan ti ek nou isi Sesel, nou ti ava’n fini e nou ti ava’n bouz pli devan e pli lwen avek sa proze ti ava’n fini, e bann peser Cascade ti a santi zot bokou pli byen.  E osi bann lenvestiser dan Cascade akoz nou’n met en lareg ki lenvestiser Onorab Ferrari, Kaskadyen, Kaskadyen.  Pa laba Eden Island kot ou ale bann dimoun laba, ki mon ti vwar ou la, non pa laba.  Isi dan Cascade ki sa bann proze i pou marse i pou benefisye bann pep Cascade.

Mr Speaker sa i bann komanter ki mon krwar i kapab aranze o firanmezir sa proze, kantmenm nou pou siny la, me i bann keksoz ki nou kapab rod improvement dan semen.

E alor pou fini Mr Speaker, sa Lagreman ki devan nou i en Lagreman enportan.  Akoz deza serten larzan in ganny donnen a pei akoz la nou dan en sityasyon de kriz.  Nou konnen nou dan pandemik COVID-19 e la sa bann fraka ki sa pandemik pe fer i for i pe tap nou bokou e i pou kontinyen li.  Tan ki nou touris pou antre.

E la kot nou bezwen akseler devlopman lapes to a maximum.  E nou vwar pou dir anba Lagreman i annan bout ki pou tous bann suppliers, bann envestiser lokal ki swa atraver bycatch ensidswit, bann ki donn supplies bann dimoun, bann bato lapes e osi SEYPEC e tou.

I annan en kantite benefis direk lo endirek, ki atraver sa Lagreman nou pe gannyen.  Sa osi nou bezwen regard li.  Nou pe rod better wi, normal, me selman annou pa perdi osi sa ki nou annan la.  E nou demande ki bann dimoun ki i annan en rol pou zwe dan sa Lagreman zot zwe sa rol, zot kontinyen sa rol to the best to the ability and capacity, ki fer ki nou a vwar ankor plis benefis dan sa direksyon.

        Par egzanp en keksoz direk ki mon’n toultan koz avek enn de mon bann, bann dimoun ki mon konnen dan sa sekter ki donn servis, mon dir zot bann bato Francais sirtou zot rod delo Elyan delo ki pou zot dir ou si i pa sa, sa bann delo lokal zot pa oule akoz i mank serten standar dapre zot.

Me nou, nou bann dimoun ki prodwir delo isi i bezwen rod sa bout an plis pou fer sir ki nou kapab substitute sa, ki en fason sa biznes lokal sa delo lokal i kapab pas devan, sa ki nou enporte.   Sansan sa bann suppliers i enport sa delo epi i re vann avek sa bann bato.

So i annan bann improvement tou fason ki kapab ganny fer menm ki nou’n siny sa Lagreman.  Lot pwen e nou, nou bezwen kontinyen nou partisipasyon dan bann lezot forum nou Lasanble Nasyonal.  I al plizyer forum.  Mwan menm mwan mon’n ale, Onorab Gill, dan Lopozisyon osi i annan dimoun ki’n ale, sa bann forum kot i organize pou ed nou pou kapab annan en pli bon kontrol, en pli bon oversight lo nou resours natirel.  E sa enkli nou fason byensir.

E dan Lalwa ki ganny fer Lagreman ki ganny fer.  Tousala nou bezwen kontinyen al perfeksyonn nou konman Manm Parlman, pou vwar ki mannyer nou rol i ganny zwe pli byen e sa i pou fer nou improve … be tousala nou bezwen pe partisip ladan plennman.

Nou annan bann pei zanmi, nou annan bann pei zanmi bann pei Skandinav they are very good lo zot kontrol e oversight lo zot resours natirel, zot enn parmi dan lemonn parmi bann pei ki fer sa pli byen me nou bezwen, e zot byen avek nou.  Nou bezwen rode sa korporasyon e ganny zot lekspertiz fer nou Seselwa formen;- al ganny plis konesans e leksperyans laba atraver sa bann korporasyon e nou bezwen improve, e kontinyen improve lo la.

Si i neseser nou bezwen zot led i annan serten sa bann pei i annan serten sa bann lorganizasyon ki pozitiv, ki revolisyoner, ki progresiv mon kapab dir, i kapab osi ed nou avek leker.  E nou, nou bezwen reach out pou sa Bann keksoz pou nou kapab improve sa ki nou, nou annan isi pou nou kapab ganny en better deal pou nou pei pou nou pep.

Mr Speaker, sa i bann keksoz ki mon krwar nou bezwen met devan, e ki mon demande ki Lotorite politik nou pei, Egzekitiv i pran de serye sa ki nou pe dir letan nou pe dir zot ok ale nou pou donn zot sipor vizavi ratifikasyon sa Protokol ek sa Lakor Lapes.

Me selman an menm tan nou pe dir zot osi vwala bann keksoz ki nou anvi zot seryezman pran konsiderasyon.

E mwan mon’n koz avek le Minis e mon’n koz avek le Prezidan i annan will dan sa direksyon.  E mwan mon krwar pou dir political will Mr Speaker i vreman, vreman enportan.

Ler nou vwar nou annan en Prezidan ki believe dan bann striktir ki bann lenstitisyon pou ed nou as a country, pou nou go forward dan sa bann direksyon pou mwan it gives a lot of hope.  Savedir i montre pou dir nou annan en Prezidan ki krwar dan son pep, i krwar dan profesyonnalizm nou bann teknisyen, nou bann dimoun dan sa bann profesyon, ki krwar dan konesans ek kontribisyon Seselwa e zot profesyonnalizm.

E alor sa Mr Speaker letan ou annan en Prezidan ki krwar dan tou sa, e ki parey mon’n deza dir plizyer fwa dan nou Lasanble ki enkli bann dimoun i le partisipasyon tou Seselwa pou mwan it’s a beauty.  It’s a beauty akoz la ou annan en Prezidan alor ki kapab anmenn Sesel lo sa lot nivo.

I en e sa Prezidan ki nou bezwen dan Sesel sa kalite dimoun kalite leader avek sa foresight, avek en leader vizyoner koumsa ki nou bezwen dan nou pei

Pou fini Mr Speaker i enportan fer resorti, rol oversight Lasanble i pa zis en kestyon parey kekfwa FPAC i fer.  FPAC sa rol oversight ki i fer i pa zis konmsi i vini i tyeke li, konmsi i annan n kantite pou nou aprann ek FPAC, FPAC i pa pou Onorab Ramkalawan li, i pou Lasanble Nasyonal.  I en keksoz ki Lasanble i bezwen cherish la.  E si nou pe fer en travay formidab se FPAC ansanm.  E ansanm nou pe fer li ‘together’ konm dir Onorab Gill, nou pe fer li byen e nou annan bann dimoun kale lo FPAC, Onorab Sebastien, Onorab Afif bann dimoun ki kale byen.  E se sa ki nou bezwen pe fer.

E alor Mr Speaker ler Chairman i lo pa mal ou a pe vini ek letan.  Me selman ki mon le dir mon se sa rol oversight la i pa zis en kestyon check.  I en kestyon rode ki mannyer nou osi nou pe partisipe.  Nou osi nou pe zwe en rol aktiv, konmsi.  E mwan mon krwar pou dir i annan bann landrwa dan bann Komite ki ganny formen ki ganny fer ki sa rol i pe marse.  I annan landrwa dan serten Komite ki vreman pa pe marse, la Mr Speaker nou le lans avek ou, e letan nou ava fini diskisyon lo Standing Orders pou zot kapab vwar improvement lo la e donn ou osi pouvwar pou kapab transe ler fodre transe.

Mwan mon ti ava kontan alor ki sa Mosyon ki devan nou sa de Mosyon, nou Lagreman Lakor Lapes avek son Protokol Mr Speaker i ganny sipor nou Lasanble Nasyonal.  E mon a remersi ou pou donn mon laparol ozordi.  Mersi bokou Mr Speaker.

 

MR SPEAKER

Mersi Onorab De Commarmond.  Bon moman in arive pou nou pran en desizyon lo sa de Mosyon i annan de Lagreman, nou ava pran en vot lo premye sa se Sustainable Fisheries Partnership Agreement between the Republic of Seychelles and the European Union. 

        Mon a demann tou Manm ki an faver, okenn Manm ki kont?  Madanm Deputy Clerk.

 

MADAM DEPUTY CLERK

Mersi Mr Speaker, mon’n rikord 28 Manm ki’n vot an faver e personn kont.  Mersi.

 

MR SPEAKER

Mersi Madanm Deputy Clerk.  Savedir premye Mosyon in ganny aprouve par Lasanble Nasyonal.  2enm Mosyon se pou ratifikasyon Protocol of the Implementation of the Sustainable Fisheries Partnership Agreement between the Republic of Seychelles and the European Union (2020- 2026).  Tou Manm ki an faver, okenn Manm ki kont?  Madanm Deputy Clerk.

 

MADAM DEPUTY CLERK

Mersi Mr Speaker 28 Manm in vot an faver e personn kont.  Mersi.

 

MR SPEAKER

Mersi Madanm Deputy Clerk.  Savedir sa 2enm Mosyon osi tou in ganny aprouve par Lasanble Nasyonal.  Bon zis avan nou break mon pou sey vitman klarifye de pti keksoz ki Onorab William in dir. Mon konnen ki Onorab De Commarmond osi tou in tous en pti pe dan son konklizyon.

Byensir mon krwar nou en Lasanble ki an faver ki bann Manm i form par bann delegasyon ki Egzekitiv i anvoy aletranze menm isi bann Komite Egzekitiv i formen, kot bann travay i konmans ganny fer konmans ganny prepare;- kot bann negosyasyon bann Trete ki konsern bann Lagreman and so on, ki demen i bezwen retourn dan Lasanble pou ki i bind Sesel.

In deza annan serten, serten mouvman dan sa direksyon kot nou’n vwar enn de fwa bann delegasyon Egzekitiv in ale, Lasanble Nasyonal i ganny envite onboard.  Mwan mon’n deza ale konman Deputy Speaker mon krwar i annan enn de Manm osi tou in form par bann delegasyon.

Me nou anvi ki sa i ganny pran konman en keksoz serye ki nou pa ganny kit ater.  E mon anvi fer referans osi tou lo katriyenm Lasanble, ler Onorab William li menm ti Chair IAC kot nou’n fer nou mye nou’n lager lo sa Komite sirtou ek Foreign Affairs pou nou antre, me nou ti kapab ganny sans omwen de ki mon mazinen la rantre pou negosyasyon EPA.

 E finalman nou ti tonm lo sa Lagreman Interim EPA ki’n fer ki Sesel an vi ki bann blok L’Afrique ki nou ti ladan pa ti ankor pare nou ti an retar, me at least Sesel pa ti perdi bann tretman preferansyel e nou ti kapab bouz lo en Interim EPA. 

E mon fer referans osi avek WTO me WTO unfortunately nou ti rantre en pe an retar.  Nou pa’n vreman kapab met serten keksoz devan akoz preski tou negosyasyon ti’n fini ladan.

Me i annan osi tou demann e mon pa tro lontan mon lofis in ganny en request par egzanp i annan en O Zofisye Lapolis ki part sa training L’Amerique i ti rankontre en o zofisye Lapolis ki dan trafik, en House Committee on Land Transport.  E mon krwar lafason ki semen ki pei pe devlope semen pe devlope e tou bann keksoz ki al avek semen ki enkli nou pe demann crossing la ozordi nou pe vwar bann hump crossing or raise crossing, pavement, barriers, lights, nou pe menm petet pe prevwar overhead crossing.  I annan en demann ki Lasanble osi tou i form en Komite e i kapab anmenn bann nide ansanm avek sa Komite ki deza konpri Land Transport, Seksyon Trafik dan Lapolis.

So menm lo kote lokal bann diferan proze osi tou i annan sa nesesite.  Byensir Lasanble Nasyonal osi lo kote Sekretarya nou pou bezwen beef up bann parey Onorab in dir, pou nou kapab ede avek sa oversight tools.  Nou kapab annan Komite me si nou napa sa sipor lozistik kote Sekretarya sa Komite i riske pa pe kapab fer son travay.

Mon zis fini par dir ler ou koz SIDS mon apresye ou ler ou’n akonpanny mwan dan plizyer rankont IPU kot ou’n champion sa regroupman SIDS e mon rapel premye rankont nou ti konmans avek 3 pei, dernyen rankont mon krwar nou ti annan plis ki 12 pei.  E nou pe sey pouse ki sa li menm i vin en regroupman anba IPU ki nou a kapab annan en lavwa.

E la ankor kot zot rol enkli Onorab Churchill Gill, Onorab Andre i enportan osi tou dan ACP-EU akoz i annan sa konponan osi tou kot bann Pti Leta Zil ki i annan pou fer avek lapes and all that, i rantre ladan.  E nou bezwen regarde koman bann Pti Leta Zil sirtou ek en lekonomi vilnerab i kapab osi tou ganny serten tretman, spesyalize, mon pa pou servi preferans me petet spesyalize.

So i en travay ki mon krwar nou tou ansanm nou kapab fer konman en Lasanble.  E nou osi tou nou bezwen parey mon’n dir rod en fason pou nou kapab rantre e negosye avek Egzekitiv.  E mon pou konklir par kot ou sit lartik Konstitisyon Executive power and  Legislative power. 

Me apre ler ou regard lo Konstitisyon i demande ki sa de lebra osi i kapab travay ansanm pou devlopman e avansman nou pei.  Onorab Andre mon a donn ou en pti parol.

 

HON CLIFFORD ANDRE

Mersi Mr Speaker.  Mr Speaker, apre ki ou’n mansyonn sa.  Me i pa’n form par nou diskisyon an vi ki i ti lo largiman Lapes.  Annefe mon krwar Sesel i en champion dan bokou landrwa.  Ou’n nonm IPU e nou’n osi champion en SIDs forum dan ACP-EU kot nou’n nobou anmenn, nou levantay i pli gran, i ACP.  Nou’n anmenn Pasifik.  Annefe Sesel i Chair, i ganny Vice-Chair by Pasifik, apre nou annan Manm sorti Karabi, i annan Haiti ki lo la.  So, i annan en levantay, kot nou pe menm form en WhatsApp group kot kominikasyon e lenformasyon i ava al bokou pli vit.

So, letan ou’n mansyonn ACP-EU.  Zis pou mwan dir ou poudir sa i deza dan progre e i deza en staz avanse parey IPU i pe fer.  Zis mon pa ti’n ganny sans mansyonn sa.  In espas mwan, annefe akoz nou ti pe koz lo lapes e sa Lagreman spesifikman.  Mersi.

 

MR SPEAKER

Mersi Onorab Andre.  Onorab William.

 

HON WAVEN WILLIAM

Mr Speaker, permet mwan rod sa leklersisman avek ou.  Lefe ki in annan bann komitman dan bann lentervansyon ki’n ganny donnen la apre midi par LGB, par Leader Lopozisyon li menm li e an menm tan Chairman IAC.

Mr Speaker, mon pe lev sa pwen akoz mon atas vreman lenportans avek nou deba dan sa Lasanble e mon anvi vwar kontinite, mon anvi vwar swivi.  So, mwan mon anvi konnen lekel ki pou take the leadership pou annan sa negosyasyon avek Egzekitiv? Akoz parey mon pe dir se ki sa lagreman ki nou’n vot lo la, mon osi mon’n vote.  Me selman avek bi pou nou amelyor li.  Lefe ki lapes, Sekter Lapes i nou dezyenm pilye ekonomi e sityasyon COVID la i monter nou ki nou bezwen eksplwat li.

So, mon ti a kontan ki nou ganny serten komitman e nou vwar ki direksyon nou pe ale e lekel ki pou swivre.  Nou annan serten timeline pou nou kapab negosye avek Egzekitiv, pou asire ki pep Seselwa i touzour ganny sa meyer deal.  Mersi.

 

MR SPEAKER

Mersi Onorab William.  Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker, koman Chair IAC mon ti a kontan remersi tou bann Manm ki’n partisipe dan sa deba, e remersi zot pou zot kontribisyon.  Mon krwar in enteresan ki sa deba in montre ki i annan premyerman lanvi pou partisip dan desten nou Nasyon e dan desten sa lendistri.  I anvi tou lede kote i santi poudir sa i en keksoz enportan pou nou partisip anndan.

Dezyenm keksoz, avek lakantite lentervansyon ki’n annan pou fer,  i kler ki nou tou, tou bann reprezantan i konsider sa lendistri koman en lendistri vreman, tre, tre enportan.  E i annan menm ki’n dir ki i kapab menm vin lendistri pli enportan, premye pilye nou lekonomi si nou fer li byen.

Alors, kot nou ale sorti la?  Mon krwar ki mesaz ki nou anvi anvoye avek L’Egzekitiv e avek Linyon Eropeen, ki mon krwar personn pa’n denonse ki zot pa nou partner prefer, privilezye.  Zot nou partner.  Ki mesaz nou kapab anvoye avek Linyon Eropeen e avek Gouvernman Sesel?  Se ki isi dan sa Lasanble i annan lenerzi, i annan volonte, i annan lentelizans, i annan kapasite pou nou fer en kontribisyon.  Pou nou amelyor reveni e amelyor tou bann loportinite ki Lendistri Lapes Ton Endistriyel i kapab anmennen pou nou pei.

Alors, nou swete ki dan sa dyalog Nasyonal e la mon remersi Onorab Waven William pou sa linisyativ.  Sa dyalog ki byento nou ava pe diskit lo la, nou ava pe sey gete ki mannyer nou kapab kree en dyalog Nasyonal.  L’Egzekitiv i anmenn Lasanble onboard e i enportan ki nou pa ganny kit deryer.  Akoz i annan keksoz ki nou kapab fer, i annan en kantite kontribisyon ki nou kapab fer.

Anmenn nou onboard osi vit ki posib pou nou kapab premye loportinite ki nou gannyen, asiz en kou avek Linyon Eropeen e dir avek zot, ‘’Nou’n vot sa Lakor, nou’n vot sa Protokol.  Nou ti a kontan kapab vwar enn de pti improvements.’’

Annou komans la, annou fer sir ki L’Egzekitiv ki diskit avek Linyon Eropeen, i anmenn sa mesaz devan.  E mwan la aprezan mon donn en challenge Leader of Government Business, ki’n anmenn sa Lagreman ek sa Protokol devan nou.  Mon donn en challenge pou li convince L’Egzekitiv ki i annan merit dan travay ansanm.  E ki si nou travay ansanm, si zot ekout Lasanble, nou pou ganny plis pou nou dimoun.  Nou pou ganny plis pou nou pep, nou pou ganny plis travay, nou pou ganny plis larzan, nou pou ganny plis tou keksoz.

Alors sa i mon swe, sa i mon lapriyer e mon konnen ki lo sa pwen, lo kote LDS dan sa Lasanble, nou fully committed pou nou travay dan sa direksyon.  Mersi.

 

MR SPEAKER

Mersi Onorab Ferrari.  Onorab Charles De Commarmond.

 

HON CHARLES DE COMMARMOND

Pa gate, pa gate, pa gate. Mr Speaker, si Onorab ti’n ekout mwan byen i ti pou’n konpran dan sa direksyon ki nou ep ale e ki mon avi nou Lasanble i al ladan. E mon ranforsi sa avek komanter ki’n ganny fer.  Ki nou pou fer.  Mwan mon sizere detrwa keksoz.  Enn, rapor i enportan.  Tou vizit, meeting ki zot al fer deor bezwen annan en rapor dan nou Lasanble Nasyonal.  Pour ki pa zis zot lo WhatsApp group ki konnen.  Lasanble i bezwen konnen e tou Manm i bezwen konnen.  Sa enn.

From there nou a konnen ki zot in diskite vreman, ki outcome e sa i bezwen ganny share avek L’Egzekitiv.  L’Egzekitiv pa pou anmenn nou onboard si i pa konnen nou, ki nou pe fer.  Nou, nou bezwen fer li konnen osi ki nou pe fer.

Savedir i bezwen annan en kopi rapor ki al osi kot Foreign Affairs.  E an plis ki sa mon krwar ou koman Leader nou lenstitisyon, nou annan sa ki nou apel Leaders Forum e nou ladan.  E nou letan nou vwar poudir sa issue i en issue vreman, vreman serye e ki nou krwar poudir la ti a bon ki Lasanble i vin en pti pe pli soz.  Prezan i annan, ler mon’n dir rapor.

Prezan i annan bann pwen enportan, kekfwa nou’n diskit atraver Mosyon, i annan bann kestyon ki’n vini dan nou bann Komite.  Nou, sa osi i anbelir davantaz rapor ki sorti deor e ki la prezan ou, ou fer en sentez ek tou son bann pwen enportan, ek bann sizesyon konkret e dan Leaders Forum nou kapab raise sa avek Prezidan.  E Leader Lopozisyon i la, ou la, mwan mon la.

So, nou kapab vwar sa semen devan, sa semen pas.  E mon konnen mwan Prezidan ek son sazes i pou definitivman annan en korperasyon, en diskisyon around it. E nou a konnen from there ki mannyer nou al devan.  Me selman mon konnen mwan poudir i pou arive en keksoz konkret dan sa direksyon si nou Lasanble i zwe son rol enportan.

Konmsi Lasanble i bezwen fer li byen.  I pa espere Egzekitiv konmsi dir e vini vin.  Non.  Nou annou prouv nou lekor e L’Egzekitiv mon asire i pou napa lot fason pou li kapab soz avek.  Prezan from there i ava annan en fason parey mon’n dir.  Dan mon Right of Reply mon’n dir.  I ava annan en keksoz striktire from now on lo sa bann gran Lagreman, gran Protokol, ensidswit, ensidswit.  Loan, si i annan en massive loan pou al pran, ensidswit.  I ava annan en diskisyon around it akoz lepep Seselwa ki pou bezwen peye apre sa.  Ou konpran?

E IOT. Ou konpran? Ou pa kapab zis les sa avek en boug, ek de boug ale, al diskit IOT lo soz epi en bann zafer i vini.  Lot zour nou’n vwar nou.  IOT i en legzanp konkret kot nou’n bezwen resanz keksoz.  IOT bann dimoun ki’n al negosye originally apre zot elektrik ensidswit ti’n ariv sa bann zafer.  Zafer utilities.

Me selman alor, nou krwar nou poudir i kapab annan en fason pli kordinen, pli byen ki nou kapab al ansanm dan sa zafer.  Vwar la nou bann propozisyon.  Mersi bokou Mr Speaker.

 

MR SPEAKER

Mersi Onorab De Commarmond.  Bon zis mon pou fer detrwa pti komanter.  Mon kontan i annan en bon lantant.  I 2 Lakor ki vreman enportan pour Sesel e nou’n ariv dan en bon konklizyon osi lo la e se sa rezon ki mon’n allow en pti pe sa detrwa komanter.

Mon pa konnen, ordinerman mon konnen IAC ki ti osi meet avek sa delegasyon Linyon Eropeen ler zot ti vin isi.  IAC ansanm avek mwan ti al Maurice e laba osi tou, sa osi sa topik in sorti ler nou rankontre delegasyon Linyon Eropeen avek Lanbasader tou ki baze Port Louis.

Petet mon kapab dir, eski IAC i dan sa bon pozisyon pou li fer en swivi, pou li engage dan sa dyalog ki nou pe rode avek Egzekitiv.  E egzekitiv avek Linyon Eropeen tou akoz deza i annan sa kontak.  Me mon’n dir of course Lasanble Nasyonal i pare pou come onboard.  Nou ava fer le neseser e i annan bann moman osi tou kot pou lobby, parfwa ou vwar ou bezwen lobby en lot Parlman parfwa. E Manm Lasanble, Manm Parlman i koz menm langaz ek kanmarad e i pli fasil pou en Manm Parlman Sesel pou al lobby en lot Manm Parlman. E once ki ou’n eksplik li spesifisite Sesel koman en pti Leta Zil and all that.  I’m sure si ou pe donn li serten bon facts and so on, nou pou ganny sipor.

Lo kote partaz rapor, by all means.  Mwan mon pe fer li koman head delegasyon SADC PF.  Mon pe fer li e mon fek fer webinar 2 ou 3 semenn pase, rapor in pare, mon’n fini anvoy kopi kot Lofis Prezidan e osi tou en kopi kot Foreign Affairs.  E nou annan ecopy ki nou pou sirkil pou sa komite ki al sa.  Me i pou available, nou kapab fer anvoy tou le de lofis osi tou.  By all means, si zot santi i annan rapor ki ler zot sorti misyon overseas ki zot bezwen forward kot Lofis Prezidan avek Foreign Affairs, please do it.

So, sentez.  Nou’n koz lo sentez.  Nou annan en lagreman konmela ki Lasanble Nasyonal, Sekretarya i met serten bann bon pwen ki’n sorti lo bann diferan deba, diskisyon and all that.   E apre sa i en lagreman ki nou’n gannyen avek Cabinet Secretary, nou forward sa kot Cabinet Secretary.  Alright? So i annan bokou keksoz ki nou pe fer e se sa rezon ki mon dir mon fyer pou sa Lasanble, nou’n lev bar sitan o.  Nou pa kapab fer bar desann. Onorab Esparon.

 

HON REGINA ESPARON

Mersi Mr Speaker.  Mr Speaker, petet zis en pti remark mon ti a kontan fer.  Ler nou al bann misyon aletranze, nou anvoye bann rapor kot Sekretarya me trwa i devwar Sekretarya osi, acknowledgement enn, premye poudir in resevwar, epi pou sirkil avek bann lezot Manm.  I pa en kestyon ki nou pa pe anvoy rapor letan nou al aletranze.  Zis pou klarifye.  Mersi.

 

MR SPEAKER

Mersi Onorab.  Pwen note.  Onorab Ramkalawan.

 

HON WAVEL RAMKALAWAN

Mr Speaker, eski mon’n tann ou dir ki ou’n fini anvoy en kopi rapor kot Prezidan avek –  Be sa i montre nou en problenm.  I montre nou en gro problenm.

Akoz i montre nou en gro problenm?  Sa i konsern SADC PF.  Mon ti ava ekspekte ki premyerman sa delegasyon SADC PF, parski SADC PF i en Parliamentary Forum e mon ti ava espekte ki mwan koman Sef Delegasyon, letan ou, ou al lo sa nivo Komite Egzekitiv ensidswit, me ki sa enn ki toultan ki ape al asiste tou bann Komite, ki poudir omwen nou ti a’n ganny en kopi!

Menm parey lot zour, ou sispann Pan African Parliament, mou ti ava espekte.  Konmsi mwan mon ti ava kontan ki nou termin sa, nou termin Lasanble parski la sa ki nou pe fer i an deor nou travay koman Lasanble.  Me selman mwan sa ki mon’n fek antann la, mon vwar en gran mankman.

Parski si Lasanble li menm i ganny met dekote, i pa ganny lenformasyon sorti kot Lasanble, sa ki devret konnen,  mon trouv li en pti difisil ki mannyer pou ganny lenformasyon sorti kot L’Egzekitiv.

E in deza arive bann zafer.  But selman Mr Speaker, mon krwar ti pou meyer pou nou adjourn Lasanble la, san ki nou al komans antre dan bann polemic, parski i deza komans aparet.  Mersi bokou.

 

MR SPEAKER

Mersi Onorab Ramkalawan.  Bon mon swete ki mon komanter pa’n anmenn Lasanble dan okenn polemic.  Ok? Mon’n zis ouver en pti pe sa komanter swivan klarifikasyon ki Onorab William in demande pou fer e mon pa’n anmenn li, mon pa’n anmenn mon diskisyon e sa pti diskisyon avan nou’n pran vot, me nou’n fer li apre.

E mon anvi fer mon pozisyon kler, akoz mon ki’n lev sa zafer rapor.  I annan moman nou pa ti pe gannyen rapor.  Onorab Esparon ou dir mwan ou pe anvoy rapor, me nou konnen kote rapor i vini.  Rapor i vin kot Lofis Clerk oubyen Deputy Clerk.  E anybody, nou Polisi ki anybody ki oule access ek sa rapor i kapab ganny li from the office of the Clerk.

Mwan ki mon pe dir e mon’n dir poudir mon kapab, nou kapab extend sa rapor avek le de kote.  Me rapor ler mwan mon al misyon, mon responsab pou mon fer rapor, pou mwan soumet en rapor.  Alright, e nou pe demande, sa ki nou pe demande se lezot manm osi tou i soumet en rapor.

E nou konnen, se the Policy ki nou swiv, se rapor i al kot lofis Clerk.  Any member ki anvi view en rapor i bezwen fer li koumsa.  Mwan mon pe sizere ki nou extend li to the 2 officers.  Me nou kapab tenir lo kot Lofis Clerk, Manm ki oule i ava sa.

Rezon ki mon dir mon anvoy en kopi kot Foreign Affairs avek the President’s Office, lo kote SADC PF i annan sa sityasyon transformasyon.  Transformasyon from SADC Parliamentary Forum to a SADC Regional Parliament.  E sa i konpri bann Head of States osi ki lo Komite SADC e i annan langazman kot Head of State i pran e i bezwen okouran bann desizyon ki forum in pran pou zot kapab azour.

E la osi tou kot Foreign Affairs i antre.  E vwar la rezon ki ler mon fer rapor, an menm tan ki lofis Clerk i gannyen, lofis Prezidan i ganny en kopi e Foreign Affairs i gannyen en kopi.  I pa ti mon lentansyon pou atraver mon komanter pou nou antre dan okenn polemic. Onorab Bernard Georges.

 

HON BERNARD GEORGES

Mersi Mr Speaker.  Mr Speaker, mon ti anvi zis profit sa lokasyon pou retourn nou lo sa ki nou ti dir 2 semenn pas ler nou ti pe koz lo Standing Orders.  Rapor ki sak Manm Lasanble i ganny anvoye par Lasanble pou al fer en travay an deor Lasanble i bezwen ganny donnen avek tou Manm.  Pa zis avek Lofis Clerk.

Mwan mon’n al en fwa dan sa letan ki mon’n la dan sa letan ki mon’n la dan Lasanble, dan sizyenm Lasanble.  Mon’n fer en rapor ki mon’n anvoy kot Lofis Clerk akoz napa prosedir konmela.  Me non pe proze dan nouvo Standing Orders ki tou rapor i ganny laid on the Table, i form parti proceedings e i al dan record room pou ki tou Manm i kapab at any point dan Library, mon’n bliy son non.  Documentation Centre, pou ki tou bann Manm at any time i kapab ganny akse rapor olye al deranz Clerk ler zot bezwen.  Mersi.

 

MR SPEAKER

Mersi Onorab Georges. Mon kontan ki sa i ava antre dan prosedir enn fwa pour tou.  Bon i annan en Mosyon ki mon krwar i pe ale lo Order Paper pandan detrwa semenn, i en Mosyon ki ti leve rafal diskisyon zis koman nou’n antre apre restriksyon pou form sa komite.  Mosyon No.3.  Mon pa konnen si nou break, nou retournen nou pran sa Mosyon, oubyen si pou napa deba, sa Mosyon i ganny prezante, i ganny segonde e le de kote apre a nonm zot Manm ki pou, i formasyon en Komite.  Alright? E mon konnen ti annan en serten irzans pou en Komite ganny formen pou fer serten travay.

Mon pe met sa avek Lasanble e avek mover Mosyon, si i santi e si zot santi pou napa deba lo la.  I zis en Mosyon ki pe propoz formasyon en komite, si nou kapab pran li la apre nou adjourn zis apre sa.

Mon pa konnen, mon pe met sa devan zot.  Si non, nou pran en break, nou retournen oubyen si zot oule adjourned konpletman e sa Mosyon i pou carry forward. Me selman semenn prosenn mon’n ganny dir, ABC in deside semenn prosenn, 3 zour Standing Orders.  Savedir sa Mosyon pou ganny anvoye ankor.

Yes Onorab William.

 

HON WAVEN WILLIAM

Mr Speaker, mon kapab prezante e parey ou’n dir si napa deba, lenportans pou mwan, se ki pa zis pou mwan me pou pep Seselwa, se ki Lasanble i al en pa an plis pou donn zot sa ki meyer.  Mersi.

 

MR SPEAKER

Mersi Onorab William.  Eski i annan en konsansis.  Mosyon i ganny prezante i ganny segonde, napa deba e nou form sa komite ki dapre Mosyon i en National Assembly Committee on COVID-19.  Eski i annan en konsansis?  Dakor, Onorab William, mon call on you to move your Motion. 

 

HON WAVEN WILLIAM

Mersi Mr Speaker.  Mr Speaker, avan mon al lo sa Motion permet mwan dir comme swivan;-  Tou laglwar i pou nou kreater, Bondye tou pwisan pou son proteksyon divin lo nou.  En gran remersiman pou tou ki’n enplike pou met sityasyon anba kontrol.  Mersi, mersi bokou pou zot tou.

Mr Speaker, lo en lot remark Mr Speaker, mon ti a kontan quote Steve Maraboli e mon quote ‘Dimoun ki mank laklerte, kouraz ouswa determinasyon pou sivre zot prop rev, zot pou fer tou pou dekouraz ou pou zwenn ou target.  Ler ou sanz pour le meyer, dimoun otour ou pou ganny enspire pou sanze osi.  Me selman apre ki zot i sey fer tou sa ki posib pou fer ou fail e anpes ou.  Alors kontinyen ek laverite e pa zanmen arete’ Mr Speaker, fen kotasyon.

Mr Speaker, an lakordans ek Lartik 104 Konstitisyon Larepiblik Sesel,  e Lartik 84 nou dokiman gid travay 2009, Lasanble Nasyonal.  Sa Lasanble i aprouv rezolisyon pou kree en Select Committee COVID-19. Mr Speaker, mon pou osi azoute ki si mon ti’n met devan sa Mosyon devan Komite lo nou kote, mon anvi dir ek leksperyans, tandans panse serten nou bann dirizan, ki diriz sa kote, mon asire ki sa Mosyon pa ti pou zanmen aparet lo azanda travay Lasanble.  Mon ti pou ganny dir ki timing pa bon e akoz mon pe met sa Mosyon dan sa moman pou retard L’Egzekitiv dan son travay.

Mr Speaker, mon pe dir akoz I’ve been there and I know it.  Realite in prouve Egzekitiv in sanz zot konportman e vites travay, depi ki Lasanble Nasyonal in komans kler tors, fouray, anpes Prozedlwa pase parey zot ti anvi.  Ganny enteraksyon direk ek sekter prive, anmenn Mosyon pou en konversasyon nasyonal e plito tar ki zanmen.  Mr Speaker, ozordi pou kreasyon sa komite.

Mr Speaker, i osi lontan ki kote lekip ki dan L’Egzekitiv zot vwar travay Lasanble koman en lenterferans dan travay L’Egzekitiv, Seselwa pa pou zanmen apresye alternativ ouswa sa pli meyer fason, ler egzekitiv i anvi al solo e pa anvi Lezislatif ki lavwa lepep pou donn son soutyen e kontribisyon.

Eski bonn gouvernans pa egzize ki tou lafors gouvernans pei i ini pou le meyer nide?  Kwa ki mal ek sa Mr Speaker?  Kwa ki mal letan en Manm i kestyonn desizyon, aksyon e demars egzekitiv?

Mr Speaker, sa i nou rol, zisteman ki Seselwa i ganny sa pli meyer deal parey mon kontan dir e plizyer lezot Manm isi anndan.  Mon remersi lekip LDS lo komite ABC dan zot mazorite pou kree sa posibilite.

Mr Speaker, bote ek Komite Lasanble, se ki i annan pouvwar parey en Lakour ler i fer son bann fonksyonnman.  Konpare ek kestyon pou Minis dan sa sesyon kestyon dan Lasanble, i kapab pli byen enteroz Minis dan son aksyon e desizyon pran.  Al fer lenvestigasyon, zwenn ek bann endividi afekte e propoz rekomandasyon pou amelyor striktir ouswa loperasyon an plas ek bi pou donn sa pli meyer servis e rezilta avek sa pep, pe esper sa bon deal avek nou.

Mr Speaker, pandan ki mon ti pe rod leklersisman pou anmenn sa Mosyon pou kreasyon sa Komite, ou ti demann mwan si mon annan en lide lo son term of reference, savedir son referans travay Mr Speaker.  Wi Mr Speaker, sa i pa neseser, akoz par lefe ki mon’n propoz Mosyon pou kreasyon sa Komite i osi byen ki mon prezant serten lide lo kwa ki sa bann referans travay i devret ete.  Mon pe propoz comme swivan, koman sa referans travay pou konsiderasyon sa Lasanble Mr Speaker, i pa vedir ki sa bann pwen final.  Akoz sa Komite letan i pou zwenn Mr Speaker, i pou annan sans pou vwar sa ki mon propoze, me an menm tan anmenn devan bann lezot ouswa amelyor lo bann sizyenm ki mon pou met devan.

Mr Speaker, referans travay ki pe ganny propoze pou konsiderasyon sa Lasanble Nasyonal i comme swivan;-

Pou kontinyen ankouraz Gouvernman e bann lezot endividi ouswa group relevan pou angaz dan prose konsiltasyon pli enkliziv, realis ek popilasyon pou adopte en lapros stratezik pli konpreansiv, kler e pli byen targete pou adres nouvo defi devlopman sosyoekonomik pandemik COVID-19..

Mr Speaker, mon krwar Onorab Georges letan i ti prezant son Mosyon, i ti elabor ki mannyer i pe mazinen.

Dezyenmman, pou egzamin e sirvey lenplimantasyon plandaksyon sa de komite onivo met an plas par Gouvernman.  Mr Speaker, Gouvernman in met an plas 2 Komite O Nivo e zot pe pran bann mezir zot pe pran bann desizyon.  Bann aksyon pe ganny enplimante me selman pou santi poudir pep deor i annan serten kous, ki ankor pe espere pou en larepons ouswa i ti a kontan vwar keksoz dan en lot fason.

Alors, sa Komite i ava osi annan serten oversight ouswa ganny rapor par egzanp mon’n tande dan Nouvel yer ki zot in fer en sizyenm rankont.  Be si Lasanble sa Komite i ganny en rapor oubyen i ganny sans asiste sa miting, mon krwar i ava ed Egzekitiv me pa anpes li fer son travay.  Me pou ede pas konsern si ou lepep Seselwa dan kous ki pe ganny afekte.

Mr Speaker, trwazyenmman se pou fer bann rankont neseser ek bann parti prenon relevan, pou asire ki lentere nasyonal e drwa imen endividi ek group endividi zot ganny proteze otan posib.  Mr Speaker, sa i neseser akoz i annan en bon pe bann dimoun ki’n kontribye la deor.  Me ki pa ankor ganny en larepons.  Ouswa i annan serten group ki santi poudir lasistans ki zot pe gannyen i pa parey zot ti ava swete.  Me i manke la serten mekanizm pou kapab ale, fer serten envestigasyon ouswa zenn avek zot pou konnen vreman ki problenm i annan, pou kapab sey adres sa bann problenm ki zot pe fer fas avek.

Katriyenmman Mr Speaker, mon kontribisyon se pou raport ek Lasanble Nasyonal kan i neseser.  I bezwen sa Komite raport avek Lasanble Nasyonal.  Par egzanp si i annan bann rekomandasyon ki i anvi pas devan.  Par egzanp si i annan bann rezolisyon osi ki anvi met devan pou, enn, pa retard travay Gouvernman, me pou anbelir lo bann desizyon ouswa aksyon ki ganny pran.

Senkyenmman Mr Speaker, pou angaz osi ek lezot bann Lenstitisyon Lasosyasyon Parlmanter etranze pou ralye sipor kan e kot i neseser e posib.  Mr Speaker, nou’n koz en pe lo la taler dan deba.  Isi dan sa Lasanble nou annan plizyer groupman, bann Manm ki al asiste bann miting aletranze lo diferan bann groupman Parlman.

E mon konnen poudir tou sa bann Manm Parlman dan diferan pei zot konsernen avek sa sityasyon COVID-19. e menm i annan bann ki pe anvi ralye sipor avek bann lezot pei ki pe ofer sipor sa lorganizasyon.  Alors mon santi poudir sa Komite osi a kapab pe enn, pas mesaz avek nou bann Komite ki al deor an menm tan ganny serten soutyen avek sipor avek zot letan zot al partisipe.

Mr Speaker, sizyenmman, pou met an plas en laliny kontak koman en hotline pou manm piblik ki santi zot afekte par bann mezir ki’n met an plas.

Mr Speaker, sa mon pe propoze.  Mon konnen petet serten Manm i kapab vwar li en pti pe an tro.  Me Mr Speaker, pou manm piblik deor la, letan in egzos tou bann mekanizm avek bann striktir ki an plas, zot vin kot bann Manm Lasanble.  Me si nou Lasanble ti annan en pwen fokal.  Pa kot konmsi nou pou vin rezourd problenm tou dimoun, me sa dimoun ava konnen poudir be sa konplent in vin la, si i konsern serten Manm dan serten distrik, sa Manm ava ganny enformen ouswa sa dimoun ava ganny gide ki fason i pou ale pou li sey rezourd son problenm.

Setyenmman Mr Speaker, pou angaz dan okenn lezot travay ki Lasanble Nasyonal i kapab donn sa Komite.  Mr Speaker, sa 7 pwen ki mon’n met devan i sizesyon ki mon kapab donnen, ki mon krwar sa Komite si i ganny formen i a kapab fer en bon atraver.  Parey mon’n dir, mon repete.  Mon pa pe enpoz sa 7 pwen lo sa Komite letan in ganny formen, me zot pou annan sans pou zwenn pou zot revwar si i annan lenportans pou retenir zot ouswa anbelir lo la.

Mr Speaker, sa Komite propoze i ava ed Egzekitiv pou delivre dan en fason presi e dan en dele letan realis dapre zot manda.  Ki bann endividi e group endividi ek larzan ki’n ganny aprouve i a ganny lasistans merite dapre zot bann diferan ka.  I rasker Mr Speaker, pou vwar serten nou frer e ser Seselwa pa ankor ganny en larepons ouswa lasistans depi Avril.

Sirtou pou bann ki’n skente e kontinyen senserman anver lekonomi pei.  Zot ankor pe espere Mr Speaker, me sa i an tro. Pa i bouz keksoz ek ou Mr Speaker, letan ou asize ou kontanple ou bann douler ki ou pe pas ladan. Egzekisyon e lenplimantasyon bann mezir pa ase kler ki bokou dimoun pe demande,  ki bann kriter ki pe ganny servi pou donn lasistans?  Serten menm pe demande si fodre annan kontak ek sef e ki bor fodre pase, Mr Speaker? Sa bann fason fer pe vin fatigan e annwiyan sirtou ler ou vilnerab e dan bezwen.

Mr Speaker, ou pa pou konn sa douler si ou pa ladan Mr Speaker. Mr Speaker, pli pir bann laliny telefonn ki reste angaze ouswa sonnen, me personn pa pran.  Mon a partaz enn de senaryo ki sitwayen ki al devan pou lasistans zot pe fer fas avek e zot pe eksperyanse.  La si ou pa konn lir ek ekrir pli pir.  Bann term ki ganny servi ek ou, ki fer ou kit biro Mr Speaker, avek en latet lour.

Pou ganny sa R5,800 ki problenm, tourman ou pas ladan Mr Speaker.  Pou gannyen pti lasistans welfare bezwen espes ziska ou konnen ou, akoz zofisye i refize konpran sa fenomenn extended family dan nou lakour ozordi Mr Speaker.  Pou ganny dir ki ou papye pa annord, desann vin re fer, ou statement labank pa annord, mon ti krwar ou annan email address.  Let pou ariv kot sant ladministrasyon distrik ki zanmen arive, ‘’ti ou nimero telefonn sa?’’

Sa se bann kestyon, Mr Speaker ki pe ganny demande.  Sa bann kalite larepons i vin tou le lafen dim wan e ou ganny dir sistenm computer pa ti pe marse ouswa problenm network.

Mr Speaker, en bann larepons ki pa tou ki vre kot saler e vant i konsernen dan lafanmir.  Pou kalme ou zot dir ou solider e menm valoriz en kiltir patriyot avek en vant vid.  Mr Speaker,’’ pa zot pe pran nou pou en bann fatra?’’ Konmdir Morisyen?  (laughter)

Mr Speaker, tou in ganny dir.  Sa Mosyon i pou get dan lentere pep Seselwa e tou laglwar i reste pou Bondye Tou Pwisan.  Finalman ki Bondye i kontinyen beni Sesel, tou Seselwa pandan moman difisil ek sa Komite dan son travay, prenon an kont ki Bondye tou pwisan in kree botan ek move tan pou zonm konsidere e apresye.

Mr Speaker, I beg to move.

 

MR SPEAKER

Mersi Onorab William.  Bon okenn Manm ki segonn Mosyon.  Yes, Onorab Audrey Vidot.

 

HON ANDREY VIDIT

Mosyon seconded, Mr Speaker.

 

MR SPEAKER

Mersi, bon an vi ki nou’n agree pou napa deba lo la nou pou pran en vot e nou pou pran en vot lo Mosyon.  Mon ava lir.

In accordance with Article 104 of the Constitution of Seychelles and Standing Order 84, this National Assembly resolves to approve the setting up of a Select Committee to be known as the National Assembly Committee on COVID-19.  Mon ava demann tou Manm ki an faver?  Okenn Manm ki kont? Madanm Deputy Clerk.

 

MADAM DEPUTY CLERK

Mersi Mr Speaker.  24 Manm in vot an faver e personn kont.  Mersi.

 

MR SPEAKER

Mersi Madanm Deputy Clerk.  Savedir sa Mosyon in ganny aprouve e i ava reste le de kote pou zot nonm zot Manm.  Nou pa bezwen fer li ozordi.  Sa i kapab ganny fer dan prosen sitting.  Nou kapab fer li dan prosen sitting.

Ou le prezant pou ou enn fwa ozordi.  Ok.  Go ahead.

 

HON SIMON GILL

Nou annan Onorab Waven William li menm li koman mover Mosyon. Nou annan Onorab Paul Ernesta epi nou ava met Onorab Churchill Gill. Mersi bokou Mr Speaker.

 

MR SPEAKER

Mersi Onorab Simon Gill.  Eski lo kote Lopozisyon zot in pare.

 

HON SIMON GILL

Mr Speaker.

 

MR SPEAKER

Yes.  En moman.

 

HON SIMON GILL

Si nou kapab fer en sizesyon ki Onorab William i Chair sa komite li menm li.  Mersi bokou.

 

MR SPEAKER

Ok, sizesyon in ganny fer.

 

(APPLAUSE)

 

MR SPEAKER

Bon, sa se komite ki fer dan zot premye rankont.  Ok?  Ou’n fer en sizesyon me dan zot premye rankont zot ava elekte zot Chair ek zot Vice-Chair.  Lo kote Lopozisyon.  Onorab Ferrari.  Si ou pa pare.

 

HON JEAN-FRANCOIS FERRARI

Non mon pa ankor pare akoz pozisyon kot mon pe asize la, mon pa’n ganny sans konsilte avek mon bann leaders.

 

(Interruption)

 

MR SPEAKER

Non, non i ok.  I byen, i ou drwa.  Si ou le prezant ou bann manm, ou 4 Manm Mardi ou kapab fer li Mardi.

 

HON JEAN-FRANCOIS FERRARI

Absoliman.  Mon kapab fer li apre. En Vis-Prezidan osi kandida ou kapab nonm apre.

 

(laughter)

 

 

HON JEAN-FRANCOIS FERRARI

So i ok alors.  Nou pa bezwen prese lo sa bann zafer.

 

(laughter)

 

MR SPEAKER

Mersi Onorab Ferrari.  Bon nou’n ariv a lafen nou sesyon ozordi.  I reste pou mwan remersye tou bann Manm, remersi tou dimoun a lekout e ki’n swiv travay Lasanble Nasyonal.  Lasanble pou repran son travay Mardi le 23 Zen, 9er bomaten.  Lasanble i adjourn.

 

 

        (ADJOURNMENT)