::
Home » Verbatim » 2020 » Verbatim Tuesday 2nd June, 2020

Verbatim Tuesday 2nd June, 2020

NATIONAL ASSEMBLY OF SEYCHELLES

Tuesday 02nd June, 2020

 The Assembly met at 09am

 National Anthem

 Moment of Reflection

 Mr Speaker is the Chair

 

MR SPEAKER

Bonzour tou Manm Onorab e bonzour tou dimoun ki a lekout e pe swiv travay Lasanble Nasyonal. Mon pou zis pas en pti moman lo Order Paper, pou nou vwar bann business ki nou annan. Bomaten nou annan 6 Kestyon Ordiner ki pe ganny anmennen par plizyer Manm e sa i dirize ver Departman Lasante.  E apre sa nou annan en Private Notice Question ki pe ganny anmennen par Onorab Leader Lopozisyon, Onorab Ramkalawan.

E apre sa nou pou swiv par serten Mosyon ki annan pou apwent en Commissioner of Declaration to the Office of Commissioner for Public Persons. Nou annan ratifikasyon Trete, e osi nou annan lezot Mosyon osi tou ki pe swiv bann Mosyon Ordiner ki pe anmennen par bann Manm.

E mon’n ganny averti bomaten ki Onorab Le Miel i le fer en pti mesaz a lokazyon Zournen Enternasyonal Zanfan. E mon ava toudswit donn li laparol. Onorab Lemiel.

 

HON SYLVANNE LEMIEL

Mersi Mr Speaker.  Bonzour Mr Speaker tou mon bann koleg Manm Onorab e tou dimoun ki a lekout.

Mr Speaker yer le 01 Zen ti Lazournen Enternasyonal pou bann Zanfan. En lazournen ki normalman tou zanfan i selebre atraver diferan kalite aktivite.  Me sa lannen i pa’n parey labitid. I en lannen ekstraordiner. Napa bokou aktivite ki’n ganny organize, me plito in en lazournen kot bann zanfan in kontinyen avek zot letid dan laklas avek bokou refleksyon.

Mr Speaker, normalman sa zour pa devret zis en moman selebrasyon, me osi en zour pou nou reflesir lo lenportans e rol ki zanfan i zwe dan nou lavi, lakour   e lasosyete. I osi en zour kot nou remind bann zanfan ki zot spesyal e tre enportan.

Mr Speaker koman en pei, nou’n fer bokou progre pou asire ki drwa zanfan i ganny respekte e proteze e ki zot osi ganny ansennyen lo zot responsabilite.

Par kont i ankor annan bokou pou fer. Koman en Nasyon nou bezwen travay ansanm pou protez nou zanfan kont toudsort kalite labi e fleo sosyal.

Zanfan i en kado ki Bondye in donn nou malerezman ozordi dan sa lemonn avek bokou fleo sosyal, zanfan pe ganny eparnye. Annefe zot en group ki tre vilnerab avek bann fleo tel ki drog, lalkol tou kalite labi vyolans eksetera.

Koman paran, nou bezwen reste vizilan e alert. Mon konnen ki annan serten paran ki pe pas dan bokou difikilte avek zot zanfan. Pa bes lebra bann paran, rod led kot i neseser me pa zanmen give up lo zot zanfan. Mon espere, ki bann paran in servi sa lazournen pou pas en pe plis letan avek zot zanfan, e ki zot in profit sa lokazyon pou eksplik zot zanfan akoz ki sa lannen zot lafet pa’n ganny selebre parey labitid.

Pou bann zanfan mon oule dir zot ki zot annan en trezor ki bokou zanfan dan lemonn napa.  E sa se akse a ledikasyon. Pran zot ledikasyon o serye.  Ekout zot paran, ansenyan e lezot adilt ki donn zot bann bon konsey. Zanfan pran letan pou viv e pran letan pou grandi.  Mon osi sezi sa loportinite, pou dir en gro mersi tou bann dimoun ki pe travay tre dir pou edik e protez nou zanfan. La mon mazin sirtou bann ansenyan.  Mon profite pou lans en lapel avek bann zenn ki pe swazir en karyer, pou mazin pran enn kot zot pou travay avek nou bann zanfan.

Zis en pti refleksyon avan mon terminen Mr Speaker.

En zanfan i parey en plant ki nou’n plante. Kan nou plant li nou ekspekte nou rekolte bann bon fri. Pou nou ganny sa bann bon fri nou bezwen okip sa plant byen. Donn li tou son bezwen neseser pou li grandi byen an bonn sante.

Sinon nou pa pou zanmen rekolte en fri avek sa plant. En zanfan osi i parey.  Avek sa Mr Speaker mon espere ki tou zanfan ti pas en bon moman kot zot lekol yer a lokazyon zot lafet. Mersi Mr Speaker.

 

MR SPEAKER

Mersi Onorab Lemiel. Bon mon’n osi ganny averti par Lofis Leader Government Business ki i pe withdraw -. (Wi nou kapab fer li, nou kapab fer li la)

I pe withdraw The SFA Bill e mon ti’n fer Deputy Clerk osi enform tou bann Manm pandan weekend. Onorab De Commarmond mon ava donn ou loportinite pou ou fer le neseser.

 

HON CHARLES DE COMMARMOND            

Mersi Mr Speaker.  Bonzour Mr Speaker, bonzour tou Manm Onorab e tou dimoun a lekout. Mr Speaker anba Order 72 nou Standing Orders mon le move ki Seychelles Fisheries Authority Bill, 2019 (Bill No. of 11 of 2019) i ganny withdraw. Mersi.

 

MR SPEAKER

Mersi Onorab De Commarmond. Bon nou, sa i zis en prosedir akoz nou pan antre dan okenn deba nanryen.  So it will not be put to a vote.  I the withdrawal avan nou komans okenn proceedings lo sa Bill, ok?  Yes Onorab Ferrari.

 

HON JEAN-FRANCOIS FERRARI

Mersi Mr Speaker. Mr Speaker mon ti a zis kontan dir ki par kourtwazi pou Lasanble e par kourtwazi pou lepep Seselwa ki pe ekout nou,  ti ava bon si Leader of Government Business i dir nou, akoz? I pe withdraw i pe sa akoz nou’n travay lo la. Si i pe for more consultation oubyen lot, lot, lot. At least par kourtwazi dir nou.  Akoz ou pa kapab zis vini mete, tire.  I don’t think it’s proper.  Mersi Mr Speaker.

 

 

 

MR SPEAKER

Mersi onorab. Bon Standing Orders pa permet nou pou nou al dan sa direksyon Onorab. Mon konpran ou pwen, se sa rezon ki lo mon kote mon’n fer sir ki Sekretarya in enform tou bann Manm ki zot pa bezwen gaspiy letan over the weekend pou fer zot preparasyon.

Nou ti meet semenn pase ansanm avek Bills Committee. E nou konnen pou dir ti annan serten pwen kontansyon, me mon mazinen se sa bann pwen ki ler retournen ki’n fer ki Minister in retir sa Bill, ki keksoz i a kapab ganny aranze. E mon swete ki tre byento sa Bill i a kapab ganny reprezante avek Lasanble Nasyonal.  Eski i kler nou pa antre deba? Onorab Pillay mon krwar mon’n fer mon pozisyon kler.

The withdrawal of a Bill i pa nesesit ki nou donn en rezon, ok?  Akoz proceedings pa ankor komanse pou nou al lo Second Reading and all that, ok?  E sa i en pwen i en pwen ankor ki next week ler nou pou pran Standing Orders ankor nou pou pas lo la ankor pou nou regard prosedir.  Ok?

 

(Off-Mic)

 

MR SPEAKER

Non, mon’n fini fer Ruling lo la. Ok,  prezan mon ava demann parliamentary reporter pou apel Minis avek son delegasyon. E mon anvi ozordi averti tou bann Manm ki – Non petet mon ava esper Minis rantre akoz sa i pou konsern Question Time ki mannyer nou pou pran Question Time ozordi. Yes, Onorab Bernard Georges.

 

HON BERNARD GEORGES

Mersi Mr Speaker.  An atandan ki Minis i antre e an liny avek Order 72. Annefe mon konpran egzakteman sa ki’n arive e me Order 72 i dir ki at the beginning of the proceedings on a Bill ki i kapab ganny withdrawn e non-pa ler nou pa ankor komans deba lo Bill.  Sete ler nou komans deba lo sa Bill ki i ti pou kapab ganny withdrawn.

Mon pe zis port sa a lentansyon Lasanble.   Sertennman Bill i kapab ganny withdrawn by Leader of Government Business ler i anvi, san deba, parey ou’n dir. Me son moman pou fer li se ler nou komans proceedings lo sa Bill. Mersi.

 

MR SPEAKER

Mersi Onorab Georges pwen in ganny note. Bon mon ti a kontan dir bonzour e welcome Minis Maurice Loustau-Lalanne ki pe stand-in pou reponn bann kestyon pou ki avize ver Departman Lasante Minis i ganny akonpannyen par Anbasader Marie-Pierre Lloyd ki Sekreter D’Eta pou Lasante, Dr Loren Reginald ki Special Advisor to the Minister of Health, Dr Danny Louange ki CEO Health Care Agency e Mr Marthy Vidot ki Personal Assistant to The Secretary of State for Health. Minister avek ou delegasyon bonzour, e welcome dan Lasanble Nasyonal.

Bon zis mon pou diriz en pti pe bann Manm ki mannyer nou pou pran Question Time bomaten. Mon pou pran kestyon orizinal avek sa Manm plis sa Manm pou ganny akorde de siplemanter. I pou deside si i anvi pran son siplemanter toudswit, oubyen si i le pran enn toudswit apre ki Minis in reponn e i le rezerv enn a lafen ler nou’n fini dispose of all siplemanter.

E apre sa mon pou osi donn en siplemanter 2 Manm lo sak kote latab. Savedir pou annan de siplemanter lo sak kote latab, e en Manm ki pou demann son siplemanter i pa pou kapab redemann en siplemanter ankor.

An sa ki konsern PNQ, mon pou osi limit la kantite siplemanter e osi relevans avek kestyon orizinal. Mon le zis fer Lasanble mazinen ki PNQ anba nou Standing Orders i privilez Leader Lopozisyon. Ok? E toudswit nou ava prezan komans avek kestyon e mon ava call on Onorab Regina Esparon.

 

HON REGINA ESPARON

Mersi Mr Speaker. Bonzour Minis ek ou delegasyon bonzour tou Manm Lasanble e tou dimoun al lekout. Mr Speaker mon kestyon i lir koumsa. Eski Minis pou Lasante i kapab dir sa Lasanble ki term Kontra ki sa 45 ners Kenyan pe travay anba la? Kote zot in ganny plase pou travay? Kote zot pe reste e konbyen pe kout Gouvernman pou zot akomodasyon? E ki saler zot pe gannyen e ki lezot allowances oubyen lezot reminerasyon zot in ganny ofer?  Mersi Mr Speaker.

 

MR SPEAKER

Mersi Onorab. Minister.

 

MINISTER MAURICE LOUSTAU-LALANNE

Mersi Mr Speaker. Bonzour Mr Speaker. Bonzour tou Manm Onorab, bonzour tou dimoun ki a lekout. Mr Speaker Gouvernman Sesel ek Gouvernman Kenya in siny en Memorandum of Understanding le 30April. Ki fer provizyon pou travayer lasante Kenyan vin siport nou zefor isi sesel dan kad solidarite Afriken e solidarite rezyonal e bon relasyon Bilateral ki egziste ek Sesel ek Kenya ki en pei vwazen.

Sa Memorandum of Understanding i pou en dire 2an. Me sa premye group travayer lasante zot in vin pou en peryod 3mwan, renouvlab depandan lo sityasyon COVID-19 dan pei e byensir depandan osi lo zot performans.

Koman contre parti pou sa sipor ki zot pou donn nou sistenm lasante Gouvernman Sesel pe donn sa bann profesyonnel Kenya sa bann kondisyon swivan;-

Transpor pou vin   Sesel e kit   Sesel.

Akomodasyon ek nouritir, litilite.

En saler minimonm ki pa takse.

Konze piblik dapre Lalwa e konze anyel ki pou selon Lalwa.

Bann travayer lasante Kenya pe ganny plase dan bann pli par bann Sant Lasante SOPD, Casualty, Sant Izolasyon e avek lentrodiksyon triyaz kot bann lekol, pou le moman napa ase ners pou met dan tou lekol e dan bann Klinik osi pou fer triyaz, la ki tou bann aktivite e servis in retourn normal.

Dan lekol bann ners zot osi bezwen enplimant progranm lekol ki zot fer tou le term tel ki;- vaksinasyon, egzaminasyon bann zanfan e promouvwar ledikasyon e promosyon lasante.

La mazorite sa bann ners Kenya in ganny plase dan bann lekol primer e segonder ek bann sant lasante lo Mahé.  La zot pou fer triyaz koman zot travay prensipal. Kot lekol zot pou osi asiste avek sirveyans zanfan dan sa 3 domenn enportan ki pe ganny met bokou lanfaz lo la.

Vizilans lizyenn e zistans sosyal.  Zot pe reste Lotel Avani ziska la fen Zen. Kot apre zot pou transfer dan bann lezot lozman ki nou ankor pe idantifye. Zot saler prensipal pe peye par Gouvernman Kenya.  Departman Lasante Sesel pou selman donn zot sa bann reminerasyon swivan;-

En saler minimonm R6,206.

En COVID-19 peyman risk pou COVID-19 ki zot Gouvernman in ensiste lo la. R5mil par mwan.

Overtime ki pou ganny peye si zot fer overtime. E en shift allowance ki pou ganny peye si zot fer shift. Mersi Mr Speaker.

 

MR SPEAKER

Mersi Minis. Onorab Esparon.

 

HON REGINA ESPARON

Mersi Mr Speaker. Mr Speaker eski Minis i kapab dir nou kan sa bann ners in komans travay piske ou’n dir mwan zot in ganny plase dan bann lekol, e si zot in meet tou kriter ki Nurses Council i demande, avan ki zot in ganny fer ganny met dan bann plasman? E anba regilasyon Nursing Council i en policy ki tou ners etranze expatriate e bann ners ki lokal ki’n aret practice pou en pe letan, ki zot fer oriyantasyon 14 zour dan en letablisman lasante e ganny en evalyasyon apre sa.  Eski sa i ganny fer?  Mersi Mr Speaker

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab pou ou kestyon. Onorab sa 45 ners ti ariv Sesel le 4 Me e parey ou konnen zot in osi al an karantenn pou 14 zour. I annan 19 dan sa 45 ners ki’n ganny anrezistre avek Nurses Council Sesel.  Me i byen pou mwan fer osi resorti ki tou le 45 ners Kenyan zot ganny akredite atraver zot Kenya Nurses Council. So zot bann ners ki’n ganny kalifye e zot in deza osi ganny anrezistre Kenya.

Pou la balans ki reste zot lanrezistreman pe kontinyen ganny fer, akoz i normal ki Konsil isi Sesel Nurses Council   i satisfe       avek zot bann transcript sirtou zot bann orizinal.

E sa i ankor pe ganny fer a sa ler aktyel.  I annan ankor ki pe, ki pe espere. Lo kote oriyantasyon i konfirmen ki wi zot in fer oriyantasyon. Zot in komans fer oriyantasyon. Mersi Mr Speaker.

 

MR SPEAKER

Mersi Minis. Onorab Clive Roucou.

 

HON CLIVE ROUCOU

Mersi Mr Speaker.  Bonzour Minis bonzour tou koleg Onorab. Mr Speaker mon pou pran kot Minis in kite kot in dir i annan 19 ners ki’n fini anrezistre ki pe travay.

So, mon anvi demann Minis sa letan la, sa leres ners pe travay koman, lo ki pozisyon?  Akoz zot pa ankor bann registered nurses dan mon pwennvi. So, zot pe travay koman kwa dan Minister Lasante?

E usually avek nou Council mon pe demande ki prosedir ki an plas, ki nou’n fini fer sa bann dimoun vini, me solman zot bann papye pa ankor tonm an plas pou zot komans travay koman registered nurse. Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab. Onorab sa 19 ners ki’n anrezistre la zot mazorite zot, zot dan bann Health Centre parey Beau Vallon, i annan 2, Glacis, English River 2, Les Mamelles 2, Mont Fleuri, Anse Aux Pins 2, Anse Royal 2, ensidswit.

Zot pe fer parey mon’n dir pli boner, zot pe fer zot oriyantasyon a lenstan.  E ou bezwen osi konpran ki prensip fer vin bann ners Kenyan ti ganny pran lepok ki COVID ti vreman serye dan nou pei.

Letan nou ti fer nou planifikasyon, nou ti realize ki nou ti bezwen antre dan en Lakor fer rantre sa bann ners pli boner ki posib. O ka ou sityasyon ti pou agrav davantaz.  E se akoz sa ki ou’n war zot in vin boner. Ou kapab dir i annan dimoun i dir be la mannyer sityasyon COVID i ete akfer zot la?  Me zot la pou en purpose si dan dezyenm vag i vini zot fini zot karantenn zot in fini zot oriyantasyon, e travay direkteman pou ed nou donn swen lasante pou sa 2nd wave si zanmen i arive.

Donk i vre ki in ariv boner, me i ti bezwen planifye boner pou ki o mwen zot la. Si nou esper sa  2nd wave apre nou al rod zot ou osi ou konnen sityasyon Kenya in agrav plis ki la. E kekfwa si nou ti pe demande la nou pa ti pou gannyen konteni sityasyon Kenya li menm.

So, mon krwar i en planifikasyon neseser en prevansyon ki nou’n   pran neseser.  I pe koute wi me i en sekirite ki nou’n met dan sistenm. Mersi Mr Speaker.

 

MR SPEAKER

Mersi Minis. Mon pou allow klarifikasyon. Onorab Roucou.

 

HON CLIVE ROUCOU

Mr Speaker, mersi, Minis pa’n   reponn mon kestyon in dir ki annan 19 ners ki’n fini anrezistre. Mon pe demann Minis sa 26 ki reste, pe travay koman kwa dan Minister Lasante silvouple?

 

MR SPEAKER

Mersi Onorab. Minis

 

MINISTER MAURICE LOUSTAU-LALANNE

Wi Mersi Mr Speaker. Onorab eskiz mwan mon’n mank sa dezyenm par ou kestyon. Pou tou sa leres bann ners kalifye Kenyan ki pa ankor ganny anrezistre zot, zot dan diferan sant parey, dan sant triyaz SOPD, Izolasyon Karantenn Accident and Emergency, Beau Vallon, Glacis, English River e osi dan bann lekol.

Kot zot osi zot parey mon’n dir pli boner, zot pe fer oriyantasyon. Setadir zot pa pe travay comme tel zot pe fer oriyantasyon pou le moman. Mersi Mr Speaker.

 

MR SPEAKER

Mersi Minis.  Onorab Wavel Ramkalawan.

 

HON WAVEL RAMKALAWAN

Mersi bokou Mr Speaker.  Bonzour Mr Speaker.  Bonzour tou koleg Onorab e bonzour Minis avek ou delegasyon. Mr Speaker   mon bezwen straight away dir, mon zis swete larepons laverite. Akoz sa ki Minis in dir nou la bomaten, i annan en kantite keksoz ki pa vre!

Minis an relasyon avek bann ners, eski ou konnen ki pou dir se zis yer ki sa oriyantasyon in komanse? Yer ki oriyantasyon in konmanse.  E ki sa bann zafer ki ou pe dir konsernan zot in ganny plase partou kote, zot pou fer triyaz ensidswit, sa bann lezot ki pa’n ki pa ankor anrezistre Minis tou sa la i fo!

Donn nou lenformasyon ki korek!

 

(APPLAUSE)

 

HON WAVEL RAMKALAWAN

Parski i fo sa lenformasyon Mr Speaker.  E nou pe senpleman rod lenformasyon ki korek letan nou pe donn sa bann kestyon. Parske sa zafer ners Kenyan i en size ki konsern tou dimoun. E nou’n   tay avek san ki bann dokiman i pare, e la ozordi nou dan sa sityasyon.

Parske mon pe al demande, Ki pou arive si sa bann dokiman ki swadizan pe ganny travay lo la ozordi, si sa bann dokiman zanmen i arive, ki pou fer ek sa bann ners? Dezyenmman Minis ou’n     nonmen pou dir poudir sa bann ners zot pe ganny en allowance COVID-19 R5mil ki’n ensiste par zot Gouvernman. Mon anvi aprezan demande be si Gouvernman Sesel in aksepte pou pey zot sa R5mil, akoz ki ziska prezan nou bann ners Seselwa ki zot osi zot in involve dan tou sa bann keksoz ki ou’n dir, ziska prezan nou bann ners Seselwa pa tou ki’n ganny zot larzan?  Mersi bokou.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab.  Onorab i pa mon lentansyon pou mwan vin gaspiy letan Manm Lasanble   Nasyonal oubyen piblik Seselwa. Mon re konfirmen ki wi yer bomaten se la ki sa bann ners in ganny deployed.  Parey mon pe dir sa lenformasyon mon fek gannyen la. So letan mon’n dir zot in ganny deployed sa bann landrwa, mon redir ankor mon pa pe lalang mwan. Mon pe dir la verite zot in ganny deploy me wi zot in ganny deployed yer.

Sa R5mil letan negosyasyon ti ganny fer ti ganny baze lo menm R5mil ki bann ners oubyen bann travayer lasante Seselwa, ki lo frontline i gannyen letan i travay dan COVID.  So sel la kot i sorti sa. Donk pou Kenya i egzakteman parey.  Letan zot travay dan COVID zot pou ganny R5mil allowance COVID.  Mersi Mr Speaker.

 

MR SPEAKER

Mersi Minis.    Onorab Ramkalawan.

 

HON WAVEL RAMKALAWAN

Mr Speaker, mon anvi dir Minis ki menm sa deployment, sa deployment eski ou kapab eklersi sa? Parski sa bann ners Kenyan zot menm zot in fer kler ki poudir zot sipoze dan sa klinik kot zot in ganny plase zis pou 2 zour.

Zis pou 2 zour.        Yer avek ozordi e ki zot pa ankor konnen kot zot pou ale. Ok?  Pa ankor.  Sa safer deployment sa pti letour ki zot pou fer yer avek ozordi. E apre sa pa konnen.  Alors progranm i ankor very fluid.  Progranm pa ankor kler.

E pourtan parey ou’n dir avek nou bann ners arive depi tou bann depi en bon pe letan zot isi. Alor eski zot kapab dir nou klerman rezondet e kote zot pou ete?  Parske la nou’n trouv nou avek 45 ners. I annan en pe ki annan zot papye i annord zot in ganny anrezistre lo lot kote i annan bann ki papye pa annord.

E letan ou papye pa annord, ou pa kapab koman en etranze vin rantre dan Minister Lasante! Eski sa pa i senp?  Minis a dakor avek mwan. Parske se pou sa rezon i annan en Nurses Council.

Si sa bann ners i mean ou pa kapab pran Dokter ki pa ganny aprouve par par Medical Council. I mean fodre ki sa bann dimoun i kalifye. Alor si nou pe pran dimoun ki pa kalifye zot in antre dan nou sistenm, mon sorry poudir be avek Minister Lasante i annan en problenm!

E Minis atraver ou Mr Speaker letan nou pe koz lo sa allowance R5mil ki zot pou gannyen, la fason ki ou’n dir zot Gouvernman ensiste ki sa R5mil i form parti zot package pou zot tou. Eski ou a pe dir avek nou ki baze lo ou larepons, eski ou a pe dir avek nou ki poudir pa tou sa bann ners ki pou travay – sa bann ners ek sa bann ki pou kalifye, mon pa konnen mwan ki zot status, eski ou a pe dir avek nou pa zot tou ki pou travay avek dan sityasyon COVID?

   Triyaz i COVID li.  Me nou ners Seselwa ki’n travay dan triyaz COVID li  be i pa’n ganny larzan li.  I pa’n gannyen!

Alor Minis mon ti ava kontan ki sa i ganny eklersi byen menm, pou ki tou dimoun i lo menm paz. Nou pa anvi vin fer polemic avek Minister Lasante, me selman Minister Lasante zot in fer gran travay fantastik atraver COVID.  Dr Louange tou ek son lekip, zoli travay, me selman sa i pa anpes nou rod klarifikasyon, demann kestyon pou nou kapab nou tou nou lo the same page. Mersi Mr Speaker.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker Mersi Onorab. Onorab pou rezimen tou sa bann ners bann ki’n anrezistre sa 19 e leres ki pa ankor anrezistre e zot proses             

pou anrezistre pe ganny kordinen par sa lead Team Leader ki isi.  So li ki an kordinasyon akoz i pe Team Leader pou sa group isi.

Se li ki pe fer sa demars pou obtenir bann transcript orizinal parey mon’n dir ou pou Nurses   Council pas lo la. Pandan kestyon, wi i kapab nou kapab fer li avan, dan le sans ki avan ou anmenn en ners akoz menm Minister Lasante i anploy ners Sri Lankan i anploy ners Kenyan, Malgas and so on.

Ou demande avan i anvoye.  Be sa parey mon’n eksplike ti en ka diferan. Dan le sans ki nou’n fer vini pou nou fer zot pas zot karantenn apre bann prosedir i ava ganny fer. E i pou ganny fer. Nou pa kapab met ners live dan en placement, si i pa ganny anrezistre pou travay    Sesel. So sa ou annan mon sertitid.

Alor letan nou pe espere Minister Lasante li in deside fer sa oriyantasyon ki’n konmanse yer pou tou sa bann dimoun. E oriyantasyon ou met li la ozordi, demen ou met li laba ou fer li vire kekfwa dan en servis i vir plizyer landrwa. Se sa ki baz oriyantasyon.  E Council Ners i osi annan son mo ladan.  E prezan letan sa in terminen plasman sa bann ners.  E fotespere tou i ganny anrezistre, le 45.

Lo progranm Minister Lasante son plasman se sa ki mon’n dir ou la. Ki par egzanp nimero enn la Otanyo li i pe al Beau Vallon Health Centre. Letan i fini son oriyantasyon i pou ganny plase laba.  E ensidswit pou tou le 45 ki lo mon lalis. So lala ki mannyer sa pou pase. Mon dakor triyaz osi i lo frontline e si annan ners Seselwa ki pa ankor ganny sa allowance mon bezwen al find out akoz zot pa’n ganny zot allowance.

Akoz zot in travay zot bezwen ganny zot allowance. E mon ava fer en lapel kekfwa nou bezwen regard sa allowance osi, akoz si zot rapel letan mon ti vini dernyen fwa. Ti annan en frontline ti annan en middleline ti annan en backline.  Donk e i ti annan 5mil, 2,500 mon bliye en pe bann diferan. Annou regarde ki nou armoniz sa zafer.  Akoz COVID kot ou ete e ou pe travay ek COVID ou bezwen frontline.

So, sa ki mon anvi dir avek on Mr Onorab atraver Mr Speaker pou sa larepons. I vre osi ki dan sa MOU i annan en latab kot i met sa per diem ki nou pou donnen, ki mon ti dir R6,206 i annan sa allowance COVID ki nou’n mete apre i annan shift allowance, i annan en indicative amount pou rezon bidzeter.  I pa vedir akoz i la nou’n siny sa memorandum nou pe al pey sa saler. Parey mon’n eksplike dan mon larepons.

So annou pa fer konfizyon osi lo sa bann keksoz. Pa bliye osi zot in pas 14 zour dan karantenn. So sa osi sa COVID allowance pa pe aplike letan zot dan sa karantenn. So vwala Mr Speaker mon larepons. Mersi.

 

MR SPEAKER

Mersi Minis. Onorab Regina Esparon

 

HON REGINA ESPARON

Mersi Mr Speaker. Mr Speaker mon pa anvi mank respe pou Minis, selman mon ti a kontan demann Minis si Lasanble   i kapab ganny en kopi sa MOU ki ou’n dir nou zot annan. Sa MOU ki ti ganny sinyen avek Gouvernman Kenya la, eski i posib pou Lasanble ganny en kopi sa MOU? Ki sa bann ners in sinyen?  Premye.

Dezyenmman sa 19 sa 26 ners ki pa’n kalifye ki pa’n ganny anrezistre, zot in ganny plase dan bann distrik, dan bann klinik, dan bann Departman dan bann landrwa lasante, anba ki tit?  Si ou en nursing assistant ou ganny plase dan en landrwa anba tit nursing assistant    si ou en student nurse ou ganny pase koman en student nurse. Me zot ki pa meet sa kriter zot in ganny plase dan klinik anba ki tit? Ok?

E mon ti ava kontan menm demann Minis ki policy Minister Lasante lo recruitment? Eski nou recruit apre nou get zot kalifikasyon? Oubyen nou get zot kalifikasyon apre nou recruit?

Parske ou dir nou ki annan pe esper transcript.  Ki mannyer zot in ganny recruit? Letan nou ti pe fer recruitment nou ti pe ou pa kapab aste en kilo patat apre nou ganny en kilo mayok.

Nou rod ners nou ganny ners nou pa ganny ners ki pa kalifye ki nursing assistant.  E dan Minister Lasante i annan en kantite dimoun ki’n fer laplikasyon pou nursing assistant   e nou pe aprann ki sa 26 ki pa’n kalifye, pe al ganny plase dan bann klinik koman nursing assistant. Eski ou war sa i fair?  Mersi Minis.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi Mersi Mr Speaker.  Mersi Onorab. Onorab sa MOU mon annan en kopi in ganny sinyen le 30 Avril parey mon’n eksplike.  I annan en Clause ladan ki dir i konfidansyel ant sa 2 Gouvernman. Me nou kapab atraver Biro Speaker partaz sa MOU me fodre i reste konfidansyel.

So, sa i en demann ki mon pe fer. Nou bezwen respekte sa konfidansyalite sa MOU. E toudswit mon pou reponn ou dernyen, ou dernyen komanter. Nou pa’n al Kenya fer advertisement, fer dir ners vin dan en lotel interview zot gete si zot korek zot pa korek. Nou pa’n fer sa nou.

I annan en Demann Ofisyel sorti kot Gouvernman Sesel, Gouvernman Kenyan. Pou demann zot dan sityasyon COVID ki nou ladan pou nou preparasyon, silvouple eski zot ti a kapab ed nou avek en detachment ners?  So, se Gouvernman Kenyan ki’n rod sa bann ners. E nou, nou ti dir nou le ners ki kalifye.

E mon repete tou sa bann ners in fer lekol Nursing e zot tou zot kalifye koman ners, zot tou zot anrezistre avek Kenya Nursing Council.  Si se sa son non.  Mon pa konn son non egzakteman. Alor zot ariv isi e nou pe swiv prosedir parey i demande. E nou pou kontinyen swiv prosedir ziska tan ki tou sa zafer i klarifye korekteman.

Ki zot pe fer sa bann ki pa anrezistre? An oriyantasyon la zot pou fer travay healthcare assistant ziska tan ki zot ganny anrezistre. So, pou le moman vwala louvraz ki zot pou fer ziska tan e mon ekspekte ki sa mannyer lenformasyon mon annan ki sa anrezistreman sa bann ners ki reste, pou ganny konplete dan sa semenn ki pe vini. So, hopefully nou ava ganny tou sa bann ners kalifye.  Mersi Mr Speaker.

 

MR SPEAKER

Mersi Minis. Nou ava move lo dezyenm kestyon. Onorab Flory Larue.

 

HON FLORY LARUE

Bonzour Mr Speaker. Bonzour Minis.  Eski Minis responsab pour Lasante i kapab dir nou Lasanble, konbyen pasyan ki pe fer tretman Sri Lanka ek Lenn an se moman par Minister?  E konbyen Seselwa ki pe fer tretman prive dan sa de landrwa?  Konbyen dimoun an total ki ti lo sa vol repatriyasyon e si tou ti kliyan Minister Lasante?  Ki ti depans total Minister Lasante pour fasilit repatriyasyon bann pasyan Minister e prive Sri Lanka e Lenn?  Mersi.

 

MINISTER MAURICE LOUSTAU-LALANNE

Mersi Onorab. Minis. Mr   Speaker.  Mersi Onorab pou sa kestyon. Mr Speaker an se moman, setadir an Zen 2020, i annan en total 26 pasyan ki pe fer tretman medikal Sri Lanka ek Lenn. Zot akonpannyen par 13 attendants. Tou ansanm i fer 39.  I annan 24 pasyan ki pe fer tretman medikal Sri Lanka anvoyé par Minister Lasante. Zot akonpannyen par 11 attendants e zot tou zot ti mont lo flight le 23 Me 2020.

Dan Lenn i annan 2 pasyan ki pe fer tretman medikal Lopital MIOT Chennai. Sakenn i akonpannyen par en attendant. I osi reste en pasyan ki’n fini son tretman e ki nou pe travay konzwentman avek Departman Zafer Etranzer e bann Lotorite Gouvernman Lenn, pou son retour Sesel. Nou napa lenformasyon lo pasyan ki pe fer tretman prive Sri Lanka ou Lenn.

Mr Speaker ti annan 88 pasaze lo sa vol repatriyasyon le 23 Me, 2020.  74 ti sorti dan Lenn, Chennai e 14 ti sorti Sri Lanka. En total 55 pasyan ek attendants dan Lenn. 21 pasyan ek 20 attendants ti sorti dan Lenn. Ti annan 14 sorti Sri Lanka, en pasyan ti pe fer tretman peye par Gouvernman e 6 pasyan prive ek 5 attendants.

Ti osi annan 2 Seselwa ki ti’n pri Colombo. Ti annan 33 pasaze prive sorti dan Lenn. 28 Seselwa ek 5 Endyen. 2 ki’n marye ek Seselwa e 3 rezidan permanan sorti dan Lenn. En Seselwa i sorti Sri Lanka. Mr Speaker depans total Lanbasad Lenn i R17, 200 e Lanbasad Sri Lanka i R540, 175 pou en total 55,375.

Depans Lanbasad Sri Lanka pou R540,175 i comme swivan. Lanbasad in pey R53mil par personn pou sa 10 pasyan e zot 3 attendants depi le 30 Mars ziska le 23 Me.  Ki’n ariv en total R530mil. Lanbasad in osi pey R925 par personn pou zot tes COVID ki’n ariv R10,175 pou en total R540,175.

Depans Lanbasad Lenn R17,200.    Dan sa 41 pasyan ek attendants selman 33 pasyan, attendants MIOT ti ganny asiste par Lanbasad avek R500 Endyen sakenn apre ki zot ti konplent napa larzan pou aste fri, juice ek lizyenn personnel e osi zot flight le 15 Me ti’n sanze pou vin le 23 Me.

Sa ti ariv en total Roupi Endyen 16,500 ki apepre R3,850 Sesel. En pasyan prive akonpannyen par son madanm ti ganny desarze lopital le 16 Mars kot Lopital SIMS. Zot ti transfer kot Ramada Plaza Hotel, Chennai e ti pe pey pou zot menm pou plis ki 2 mwan. Zot larzan ti’n fini e zot zanfan ti pe ed zot.

Apre ki ti napa flight repatriyasyon le 15 Me. Lanbasad ti pey pou zot lotel ek manze pou en semenn ziska flight le 23 Me. Lanbasad ti pey zot en total R10, 900   Sesel. En Seselwa ki ti lo vakans e pe reste avek zanmi Endyen ti’n pri dan Leta Gujarat pou plis ki 3 mwan ti demann lasistans finansyel. I ti resevwar lasistans finansyel avek fanmir sorti Sesel.

Me i ti bezwen plis larzan pou aste manze ek nesesite debaz. Nou Lanbasad ti donn li sipor finansyel R500 Endyen par zour pou 21 zour pou en total R10, 500 Endyen apepre R2,450 Seselwa.

Peyman pou flight le 23 Me. Depans pou tiket pasaze par Gouvernman pou tou Seselwa ti ariv R968, 270 pou 93 pasaze.  5 pasaze    pa ti desann zot pa ti anbarke. Selman 88 pasaze ki ti lo flight e sa in kout R915, 770. Fodre note ki 28 pasaze enkli 4 Endyen in pey zot tiket zot menm e personn pa ankor ganny refund. Mersi Mr Speaker.

 

MR SPEAKER

Mersi Minis. Onorab Larue.

 

HON FLORY LARUE

Mersi Minis pou larepons. Mr Speaker mon kapab demann

mon kestyon apre ki sa de lezot in demande silvouple?

 

MR SPEAKER

Wi. Onorab ou kapab. Mersi Onorab. Onorab Wavel Woodcock.

 

HON WAVEL WOODCOCK

Mersi Mr Speaker. Bonzour Minis ek ou delegasyon tou Manm e tou dimoun a lekout. Minis orizinalman Gouvernman avan sa repatriation flight, zot ti pe demann bann pasyan bann attendant avek bann dimoun ki ti dan sa de pei pou pey tiket sa repatriation flight tiket pou valer R10,500. Me apre Gouvernman ti retourn son desizyon sa i mon annan en kopi en e-mail kot Anbasader Selby Pillay ti anvoy kot Lopital MIOT pou communicate sa lenformasyon avek bann dimoun dan sa lopital.

E zot ti dir ki dezormen bann dimoun pa pou bezwen pey sa tiket ki Gouvernman pou kouver sa kou sa bann tiket, me ki bann dimoun ki ti’n deza pey tiket ki Air Seychelles ti pou refund sa bann dimoun.  Bann ki ti’n pey sa tiket R10,500.  E mon kestyon i eski Air Seychelles in refund tou sa bann dimoun ki’n pey sa tiket?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker. Mr Speaker   parey mon’n dir dan mon larepons. Okenn refund pou tou sa bann dimoun ki’n pey direkteman pa ankor ganny fer. Mersi. Mr Speaker

 

MR SPEAKER

Mersi Minis. Onorab Woodcock.

 

HON WAVEL WOODCOCK

Minis be mon bezwen demann en kestyon la. Be kan zot pou ekspekte refund sa bann dimoun? Eski i annan en deadline? Kan konmsi ki zot pou refund sa bann dimoun akoz zot pe demande zot ankor pe espere? Mersi?

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mon ava fer sir ki Minister Zafer Etranzer i ava antreprann sa demars avek Air Seychelles.   Mon konnen egzakteman son montan, so i en aritmetik senp pou nobou fer sa. Mersi.

 

MR SPEAKER

Mersi Minis. Onorab Flory Larue.

 

HON FLORY LARUE

Mersi Mr Speaker.  Mr Speaker Minis in donn nou en sif 39 letan in komanse pou dir nou konbyen pasyan ki Sri Lanka ek zot 13 attendants 26 ek 13. Kestyon i ti demande konbyen Seselwa ki reste India? Konbyen ki annan ankor India ek Sri Lanka?  In donn nou sa ki’n mont lo sa avyon pou al fer tretman. Me i pan           donn nou konbyen dimoun.

Mon konpran ou pa konnen konbyen prive me ou pa’n dir nou konbyen dimoun.

Minis i dir nou ki enn, enn en kliyan li in reste India i pa   desann, eski Minis i kapab dir nou akoz?  E kan zot ekspekte fer sa dimoun desann lefe ki’n fer plis ki trwa mwan India kan zot ekspekte fer li desann e konbyen pou koute par zour pou kit li laba?

Letan Minister Lasante ti fer son Statement about reentry Sesel i ti dir nou ki okenn dimoun ki lo GOP pa pou antre Sesel.  Me solman lo sa flight ti annan 5 dimoun, 5 dimoun ki pa ti kliyan.  Si zot pa Seselwa e Minister ti’n fini dir ki zot pa pe ganny zot pa pe allow dimoun lo GOP antre, akoz ki leksepsyon in ganny fer? E ki zot pou fer pou Seselwa ki a aletranze pou retourn Sesel?  Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab. Onorab parey mon’n mansyonnen i annan 3 Seselwa dan Lenn. I annan 2 pasyan ki MIOT ki’n monte lo sa flight e i annan 1 Seselwa ki li i pa’n kapab desann. So, li i ankor laba.  E sa pasyan i pa MIOT li i an deor en lavil ki apel Cochin. Me akoz lockdown dan Lenn i pa’n nobou organize pou li sorti Cochin pou vin Chennai oubyen Sri Lanka for that matter kot avyon i apoze pou nobou mont lo sa avyon.

E nou an diskisyon avek Air Seychelles e Gouvernman Lenn, pou regrade si nou pa kapab reparti sa dimoun ki’n fini byen, in nepli malad ki Cochin pou nou reparti li osi. I kapab annan posibilite me nou touzour an negosyasyon.

E akoz i menm kapab annan en sa vol Air Seychelles ki pou prolonze ziska laba letan sa vol pou arive, si arive akoz i en vol ki pou retir en pe resortisan Endyen isi pou al dan Lenn.

Me sa i en keksoz ki nou pe nou ankor pe planifye. So si nou kapab fer dan en semenn, si nou kapab postpone li parey en lot semenn parey sa flight nou fer li dan 2 semenn pou reponn ou kestyon, i pou depann lo sityasyon lockdown dan Lenn.  E si avyon Air Seychelles i ariv Cochin definitivman nou pou pran sa dimoun e nou ava retourn avek li Sesel.

Lo kote bann GOP holders ki’n retourn lo sa flight ,parey mon’n eksplike e parey in ganny eksplike atraver La Konferans Lapres ki Lasante i fer tou 2 fwa par semenn, sa bann dimoun i annan ki’n marye avek Seselwa.  E i sa labaz ki nou’n fer zot retournen. Akoz parey ou konnen, nou ti dir ki nou pou rapatriy tou Seselwa ki’n pri. E se sa ki nou’n fer pou sa flight.

  Mon pa pou kapab dir ou akoz senn la pa sa lot akoz sa 5 pa’n vini mon pa konnen. E Air Seychelles in donn mwan manifest i annan 5 ki pa’n turn up.  Pou ki rezon zot pa’n turn up mon pa konnen. Eski ti annan plis ki 93 enskrir lo sa lalis pou konmanse? Mon pa konnen. Me vwala, vwala le bi sa repatriation flight se pou tir tou Seselwa ki ti’n pri e anmenn zot Sesel. Mersi Mr Speaker.

 

MR SPEAKER

Mersi Minis.  Onorab Larue.

 

HON FLORY LARUE

Mersi Mr Speaker. Mersi Minis pou ou larepons. Minis premyerman sa kliyan ki reste India, pa ti ganny aprouvasyon Minister Lasante pou li travel pou li al Airport. Solman sa lopital ki i ti ladan ti annan lezot etranze e ki ti pran sa trip pou desann pou al Airport.  Ti annan Morisyen i sel etranze ki reste dan sa lopital.  Minister Lasante kantmenm ti ganny 2 email enn le 13, enn le 18.  Zot pa ti respond avek sa lopital e zot pa ti fer laranzman.

Zot pa ti aprouv laranzman ki sa lopital ti fer pou fer sa madanm desann. I annan 2 zanfan en zanfan 4an, en zanfan 8an in fer plis ki trwa mwan dan Lenn e la ou pa konnen kan ki i pou retourn Sesel.  Alor sa i en ka i en gro problenm pou sa dimoun.

Mr Speaker Minis in dir nou koumsa ki sa lot avyon ki zot pou al fer repatriyasyon lo la pou annan Endyen lo sa flight. Eski Minis i kapab dir nou si nou’n ganny lotorizasyon avek Lenn pou repatriate zot national?  Eski i annan kek not verbal ki dir nou non zot pa oule ouswa wi zot le?  Si i kapab klarifye pou nou ki sitasyon avek bann letan in dir nou i pe anvoy dimoun back lo sa flight, si zot in ganny lotorizasyon pou fer sa?  Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab. Onorab mannyer mon konpran Minister Lasante pa’n otorize wi akoz pou sa Seselwa sorti Cochin pou ariv Chennai par semen i pran li plis ki 14erdtan e zot, zot in pran en desizyon ki sa i pa dan lentere e se sa desizyon in ganny pran. Non, mon napa okenn otorizasyon sorti kot Gouvernman Lenn pou dir sa flight repatriyasyon ki pou al dan Lenn in otorize.  Parey mon pe dir ou i ankor an planifikasyon.

E Zedi mon annan en meeting avek Anbasader Endyen mon ava konn en pe plis lo Leta levolisyon sa demann.  Me pour lenstan napa okenn lotorizasyon ki’n ganny donnen. So, nou ankor pe travay lo la.  Me i parey mon’n dir ou i en posibilite ki nou pou kapab rapatriy sa dimoun Cochin atraver sa laranzman, si nou ganny tou lotorizasyon. Mersi.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker.  Bonzour Minis ek ou delegasyon tou Mann Onorab ankor enn fwa bonzour e tou dimoun ki a lekout.  Msye Minis atraver ou Mr Speaker, ek son bann dimoun ki antour li la,  eski sa bann dimoun i kapab donn Minis lenformasyon korek lo sa ka ki Onorab Flory Larue in met devan?

Eski Minis i kapab konfirmen, konsilte ek ou bann dimoun avan ou konfirmen, eski zot in zwenn paran sa fiy ki an Cochin la ki’n reste?  Eski zot pe fer en keksoz pou sa bann dimoun sa de zanfan?

E an menm tan sa 13erdtan ki ou pe dir zistans pou travel dan loto sa depi Cochin ziska Chennai, eski sa letan, sa moman letan ki negosyasyon ti pe ganny fer, eski i korek ki an Tamil Nadu kot laba sa fiy ete i ti’n lock down i pa ti kapab travel otherwise?  E la parey ou dir i difisil sa long zistans i pa ti pou dan son lavantaz dan son zentere dan son lentere pou li kapab vini?

E ozordi ki nou pe koze, lockdown la sa fiy in text mwan,  E in dir mwan ki domestic flight in komanse depi en semenn pase 2 semenn pase, in komanse an Cochin e definitivman i kapab pran domestic flight pou vin Chennai.

Eski ki avyon any time zot fer zot laranzman pou Air Seychelles al dan Lenn al an Chennai pou al fer lezot travay la, eski zot kapab fer en laranzman ek Lanbasad sinon avek Konsil Generale fer tir sa fiy Cochin pou anmenn Chennai kot i pou pli fasil pou li vin Sesel dek ki i ava annan en flight konvenab. Mersi bokou Mr Speaker.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab. Onorab mon konnen ki sa i en sityasyon ki delika me mon krwar ki lotorite in fer tou sa ki posib pou sey rapatriy sa Seselwa sa Seychelloise la zot in dir Seychelloise.

Wi in annan ou mwen 2 a de repriz in annan diskisyon direk ant Minister Lasante, Health Care Agency, menm Ladministrasyon Minister Lasante avek paran sa Seychelloise. Letan nou ti pe fer sa vol repatriation ti dan lockdown     an Lenn, e sel fason ki nou ti pou kapab fer sa dimoun desann Chennai nou ti kapab demann en lotorizasyon spesyal par semen.

Me letan Minister Lasante in evalye sa risk, i ti deside pa fer sa demann pou lotorizasyon pour sa dimoun deplase par semen. Ozordi parey ou’n eksplike si lock down in sorti, in leve, i pa pou neseser letan nou planifye sa vol pou fer sa vol ariv Cochin pou al anmas sa manmzel.

Nenport ou kot Air Seychelles i apoze si i apoz Bombay, si i apoz Gujrat, si i apoz Delhi, si i apoz Chennai e si domestic flight pe operate i ava nobou deplase la kot Air Seychelles i apoze e nou ava fer laranzman pou reparti sa demwazel Sesel.  Mersi Mr Speaker.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Mersi Mr Speaker. Mr Speaker mon pa satisfe avek sa ki Minis pe dir mwan. Mon le Minis i donn nou plis leksplikasyon e mon le i konsilte e mon le son bann dimoun ki la i dir li ler sa meeting in fer ki zot in fer pou paran sa fiy.

Ou pa kapab zis dir Minis en rough lide koumsa.  Dir li egzakteman, dir li ki sa ki Gouvernman in fer, pou paran e zanfan sa fiy silvouple. SS i konnen, Dr Louange i konnen, dir Minis.   Dezyenmman mon oule en leklersisman si lockdown in fini an Cochin e in kapab vini par domestic flight e ki son kondisyon reste laba, i pa bon. Fer li desann Chennai.  Fer laranzman la ler zot avyon i ava ale i a deza la Chennai i a pli fasil pou li.  Konmsi sa fodre en dimoun avek legan dir zot?  Mersi bokou.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mr Speaker donn mwan en segonn akoz i annan en ensistans ki mon rod tou lenformasyon silvouple donn mwann en minit 2 minit, 3 minit mon pa konnen. Mersi.

 

MR SPEAKER

Dakor Minis.

 

MINISTER MAURICE LOUSTAU-LALANNE

Mersi Mr Speaker. Mr Speaker sa lenformasyon ki mon gannyen i comme swivan;- Le 25 Me SS an vi ki ou’n mansyonn son non e i la SS in rankontre avek manman sa fiy laba. E in annan bann diskisyon avek Foreign Affairs avek Air Seychelles lo sa flight ki mon pe koz lo la dan enterim sityasyon finansyel sa manman ek son 2 zanfan isi, i ase pre-care.  E en desizyon in ganny pran pou asiste li ek son 2 zanfan atraver striktir ki Gouvernman in met an plas. Me sa i en sityasyon lokal.

An sa ki konsern sa demwazel, Lanbasad Sesel dan Lenn i kontinyen e pou kontinyen asiste li ziska tan i ganny rapatriye. Me le prosen vol ki al dan Lenn irrespective son destinasyon final, sa demwazel pou ganny met lo sa vol e pou ganny anmennen Sesel.

Akoz nou dir nou rapatriye tou Seselwa ki’n pri. So, mon pa pou kapab dir ou ki i en bon lide ozordi pou nou fer li deplase sorti Cochin pou al Chennai si Air Seychelles pa ale Chennai.

Akoz kekfwa pou anmenn sa bann Endyen back dan Lenn avyon i terminate Bombay nou bezwen fer li al Bombay.  So sa i ankor an planifikasyon.  I pa vo lapenn anvoy li Chennai apre tir li Chennai anvoy li Bombay si destinasyon final Air Seychelles i Bombay.  Fotespere sa i prezan kler. Mersi Mr Speaker.

 

MR SPEAKER

Mersi Minis. Onorab Flory Larue.

 

HON FLORY LARUE

Mr Speaker mersi bokou mon apresye. Minis Mersi pou ou larepons. Minis pou mwan met ou plis dan picture. Sa lopital kot sa manmzel ti ete ti annan lezot etranze zot tou zot in kit sa lopital zot al Chennai zot al rod avyon pou zot retourn se zot.  Dernyen dimoun ki ti reste la ba ti 3 Morisyen ki ti pe desann en zour avan nou flight pou nou ti desann. Zot ti desann par taksi se zot lopital ki ti fer. Flight ti le 23 Me meeting ki ou’n koz lo la ti le 25 Me Minis. Le 25 Me sa fiy pa kapab desann Sesel i bezwen desann Sesel   le 23 Me.

Mon a dir zot ki Minister pa ti fer Minis. Akoz le 13 Me lopital laba ti anvoy en email ti dir avek en madanm kot Minister Lasante ti dir zot ki i annan 650 kilomet i pou pran 12 a 13 erdtan pou ariv laba we will arrange car or ambulance for the patient to travel to Chennai. Zot ti donn pri konbyen sa ti pou koute zot pa ti donn okenn larepons Minis. Ti anvoy email 2 fwa le 13 ek le 18, zot in kit sa fiy laba.

Onorab De Commarmond atraver ou Minis.  Prezan le 25 zot ti fer meeting. Letan mon ti kopi tou dimoun ziska SS Faure kot Foreign Affairs 2 zour avan ziska ler VP Meriton ti call mwan, e ti call Dr Louange pou sey demann li si sa fiy i kapab mont lo avyon.  Zot ti desid en semenn davans ki sa fiy pa kapab mont lo avyon san en medical zot dir i pa kapab desann letan Lopital ti garanti ki i kapab ariv Chennai parey tou lezot etranze enkli 3 Morisyen ki ti desann Chennai lo Airport par loto pou arive pou pran zot flight. En manman ek 2 zanfan zot ti kit dan Lenn Mr Speaker.  Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mr Speaker mersi. E mersi Onorab. Onorab mon konsilte Dr Louange ki akote mwan la. Alor i dir mwan ki i okouran. Me apre ki zot ti pran zot desizyon konmkwa i tro riske parey mon’n eksplike.  I ti pran son telefonn i ti telefonn sa lopital laba. Pou dir sa lopital pa pou kapab antreprann sa trip. Sa se ki Mr, Dr Louange pe dir mwan la.

So mon krwar Mr Speaker nou kapab kontinyen ale vini lo sa zafer.  Mon regrete ki sa zenn fiy pa’n kapab ganny rapatriye e nou fer le neseser pou nou rapatriy li le pli vit posib. I a retournen e vwar son manman ek son 2 ser.  Mersi Mr Speaker.

 

MR SPEAKER

Mersi Minis nou pou al lo kestyon nimero 3. Kestyon pou Onorab Jude Valmont me dan son labsans pe ganny move par Onorab Audrey Vidot.  Onorab Vidot.

 

HON AUDREY VIDOT

Mersi Mr speaker lo la par Onorab Valmont son kestyon i lir comme swivan;- Eski Minister   Lasante i kapab dir nou Lasanble ki progre ki zot in fer pou teste lensidan prezans viris COVID-19 dan kominote par egzanp, ki kalite tes e metod zot annan lentansyon servi? Mersi Mr Speaker.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab pou en kestyon ki tre valab.  Mr Speaker i vreman en portan pou nou konnen koman en Nasyon la kantite dimoun ki kapab ganny enfekte par viris SARS corona virus 2 dan nou kominote ki lakoz sa maladi COVID-19 e lakantite nouvo ka dan le fitir.

A ler aktyel nou deza fer 966 test rapid.  E zis en dimoun ki ti vwayaze ti teste pozitiv avek antikor endikatif en vye lenfeksyon e ler i ti’n   ariv Sesel i pa ti enfeksye. Atraver tou sa bann test rapid e sirveyans ki kontinyel, nou kapab etablir ki ziska prezan napa sirkilasyon sa viris   SARS Coronavirus 2 dan nou komite ki lakoz sa maladi COVID-19.

La ki nou pe re ouver nou lafrontyer e o fir anmezir ki vwayazer i vin Sesel nou bezwen reste vizilan akoz i toultan annan en risk pou sa viris re ganny entrodwir isi e kree en 2enm vag sa lepidemi.

Si i annan transmisyon dan la kominote i enportan pou nou kapab konnen ki kantite dimoun ki’n ganny enfekte, e i osi enportan pou nou kapab estim la kantite nouvo lenfeksyon avek en pli gran lasirans.

Koman ou konnen pa tou dimoun ki ganny enfekte ki manifeste sentonm sa maladi. Pou nou kapab ariv annan sa bann lenformasyon, nou bezwen annan en sistenm sirveyans serologique ki fer bann letid dan la kominote a bann enterval byen kalkile e presi pou nou konpran levolisyon COVID-19.

I annan en lekip teknik ki pe travay lo en protokol resers ki bezwen laprouvasyon etik, akoz pou ki resers lo imen i kapab ganny fer, sa dimoun i bezwen donn son konsantman. Sa letid seroprevalences dan la kominote pou enn kot dimoun tou kous lavi.  Diferan laz ek seks pou ganny selekte aléatoirement kot en senp kestyonner pou ganny administre, ki pou swiv par en koleksyon en lesantiyon disan. Sa disan pou ganny teste antikor kont viris SARS Coronavirus 2 lakoz sa maladi COVID-19 e pa okenn lezot tes.

Tou bann demars i ankor pou nou kapab anmenn en tes spesyal ELISA ki ganny rekonnet koman standar pou sa kalite letid ki ava fer ki nou bann rezilta i ava fyab. Normalman i rekomande ki sa bann test i ganny fer a en lenterval 21 zour swa menm dimoun pou ganny teste repetitivman oubyen bann nouvo dimoun i ganny selekte. Osito ki tou keksoz i an plas e letan i apropriye nou ava kapab demare avek sa seri letid seroprevalence tre enportan ki pou ed nou dan nou swivi sa pandemik. Mersi Mr Speaker.

 

MR SPEAKER

Mersi Minis. Onorab Vidot.

 

HON AUDREY VIDOT

Mersi Mr Speaker.  Minis mersi pou ou larepons 2 siplemanter. Premye, Minis mon konpran wi zot dir zot pou fer en kriter pou petet pran form lo kote etik zot pe regarde si sa dimoun pou annan son konsiltasyon avan zot fer bann tel tes. Be si sa dimoun i refize ki konsekans?  Enn.

Dezyenmman ki lezot mezir prekosyon?  Parey nou konnen nou pou bezwen to ou tar ouver nou frontyer ki lezot prekosyon ki lasante avek management kot Airport zot pe fer, pou asire ki letan Sesel i reouver son frontyer, nou kapab dir nou’n   pare pou nou kapab deal avek okenn evantyalite, contact tracing e bann lezot prekosyon pou anpese ki sa i arive spread dan kominote?  Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab. Onorab sa survey i pou lo en sistenm volontarya. Nou pou swazir si i refizye nou pou bezwen aret lanmenm rod en lot dimoun.  Me konteni lenportans sa sirveyans ki nou’n met an plas, se fer sir ki nou kapab konbat sa 2enm wave si i vini. Mon krwar  i dan lentere tou dimoun pou fer sa tes.

E parey mon dir sa tes li en tes ki pli o nivo e pli fyab son rezilta ki sa rapid testing ki nou’n deza fer. Prekosyon lo Airport parey ou konnen bann norm in ganny etabli, vizit in ganny fer par Departman Lasante, pou asire ki tou bann mezir ki’n bezwen met an plas i an plas avan nou ti ouver lafrontyer le 01 Zen.

E mon konnen ki i annan bann lekipman en pe pli sofistike osi ki’n ganny mete, pou fasilit letan ki bann pasaze i vini, pou ganny screened eksetera, in ganny met an plas. So, mon krwar ki bann demars preparatwar ki’n ganny fer pou reouvertir, i an plas.  I zis prezan nou bezwen fer bann deteksyon boner pou anpese nou annan sa community transmission parey toultan nou’n dir. Mersi Mr Speaker.

 

MR SPEAKER

Mersi Minis. Onorab Wilbert Herminie.

 

HON WILBERT HERMINIE

Mersi Mr Speaker.  Bonzour Mr Speaker Minis avek ou delegasyon, tou Manm Onorab e tou dimoun ki a lekout. Minis ou’n tous en pe lo ler ou pe koz lo bann tes ki pe fer ou tous en pe lo Airport me sityasyon lo Por, donn nou en pe leklersisman lo la.  Eski zot pe fer ler bann bato i vini i annan lenspeksyon ki vin fer par bann Zofisye?

E sirtou bann Zofisye Public Health ki mont lo sa bann bato, ler i annan lenspeksyon. Eski ki mekanizm zot in met an plas pou sa bann lenspeksyon ganny fer. Eski i annan tes ki ganny fer avan sa bann Zofisye i monte?  E epi lo sa kote ler Zofisye i mont lo bato vi ki bato cargo i ankor still pe vini …

 

MR SPEAKER

Onorab, Onorab annou tenir en pti pe kestyon siplemanter dan konteks dan relevans kestyon orizinal.

 

HON WILBERT HERMINIE

Yes Minis, Mersi Mr Speaker. Yes, dan kestyon orizinal menm, sa.  Mon zis pe demande eski sa bann dimoun i ganny zot allowance ler zot monte?  Sa bann Public Health Officer. Eski zot ankor pe gannyen?  Mersi.

 

MR SPEAKER

Bon Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab.  Onorab wi mon krwar letan Departman Lasante Piblik i promulgué son bann kriter, i aplikab pou sa de port of entry. So i merit egzakteman parey.  I pa kapab annan diferans akoz nou bezwen fer sir ki tou sa bann konsiny i ganny respekte.

Mon napa detay egzakt lo por mon krwar kekfwa si nou pann ganny bokou, bokou piblisite ki’n ganny donnen lo la. Me an sa ki konsern bann allowance bann dimoun definitivman, akoz sa parey ou konnen i dan en striktir. Alor si zot pa pe gannyen les konnen nou ava regarde egzakteman ki pe arive.

Akoz por i kontinyen fonksyonnen akoz pa bliye nou ti ouver la frontyer pou bann bato, bann mega yacht, bann mouvman bato pli boner ki nou ti ouver Airport. So fotespere ki tou sa bann mezir in ganny swiv. E mon napa okenn lendikasyon ki dir mwan pou dir i annan ki’n sey avoid sa bann soz.

An sa ki konsern bato cargo sa ki mon konnen se ki zot an kominikasyon direk menm ki zot vini e zot ale. Zot donn zot bann prélévman lasante tou bann lekipaz abor sa bato cargo, avan menm ki zot koste e komans zot transbordement.  Mersi Mr Speaker.

 

MR SPEAKER

Mersi Minis. Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun. Mr Speaker dan son larepons Minis i dir ki Lotorite Lasante ziska prezan in fer 966 rapid tests. So, mwan anvi konnen son konsekans finansyel enn sa test konbyen i koute? E pou nou kapab fer 966 konbyen in koute so far?  Sa i mon premye kestyon.

Dezyenm kestyon mon enterese avek sa zafer mass test dan kominote, ki al anliny avek kestyon ki’n ganny poze. Moris par egzanp zot in fer 100mil, zot pou fer 100mil tes dan sa prosen 2 semenn zot anons sa an Avril. Germany osi zot in fer sa e Wuhan Lasin zis Dimans zot in fer 60mil e zot annan lentansyon teste 11milyon dimoun.

So, mon anvi konnen si isi Sesel nou pa kapab aplik sa menm prensip ou si en zafer tro konplike ou tro ser. Sa mass testing ki nou’n tann pou fer Maurice, Germany e legzanp Wuhan Lasin ki’n komanse yer – Dimans plito. Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mr Speaker avan mon vin lo konbyen i koute sa rapid test mon a pe rod lenformasyon mon pa konnen mon konnen ki sa lot test sa PCR test la li i ti pe kout apepre en pe plis ki R2mil par test. En sa i servi sa PCR machine ki li i en test confirmatoire.  So sa rapid test mon ava donn ou letan mon ganny larepons.

Me lo kote mass testing. Mwan mon pa en Dokter mwan e toultan zot dir mon mislead the House sa bann kestyon zot bezwen poz bann Dokter dan zot Konferans De Pres de fwa par semenn. Pa poz sa – pa enpoz en problenm lo mwan. Me mwan sa ki mon konnen mon a dir ou.

COVID-19 Sesel la ozordi dan popilasyon hand on my heart napa. Parey nou’n dir dan sa 9san ekek tes ki nou’n fer nou’n depiste enn.  Alor nou konfirmen ki napa communitive transmission. Alor pa vo lapenn al teste akoz nou pa pou war bann antikor. Nou pe met pare pou nou an ka nou annan en 2enm wave    pou nou nobou teste vit pou konfirmen apre nou fer sa test confirmatory laba.

Me nou bezwen teste nou popilasyon pou gete.  Akoz nou dir i annan, i annan dimoun i kapab gannyen i pa’n   montre okenn sentonm. So kekfwa dan sa 11 ka ki nou’n detekte, ki nou’n trete, ki nou’n large, i kapab ki i annan en pti transmisyon somewhere, me nou pa konnen. E akoz sa nou bezwen komans fer sa bann tes. Pou nou regarde si vreman dan nou popilasyon i annan dimoun ki annan sa antikor, ki vedir in deza ganny sa maladi at some point.

Me nou pa dan en mass community transmission parey Maurice. Maurice i annan en bon pe ka e nou konnen in annan community transmission so i enportan pou zot fer sa tes. Ou war?

Parey La Reunion menm zafer. O bor nou in annan en bon pe sa bann pei ki annan en bon pe sa bann ka, so nou pe fer vini sa bann tes ELISA pou nou nobou lans sa proze pilot si oule, pou nou regarde dan nou popilasyon si i annan dimoun ki’n deza ganny sa maladi. Mersi Mr Speaker.

Mon ava zis dekonekte en kou pou mwan tyek sa lenformasyon. Mersi Mr Speaker.   Ou war ou aprann keksoz toulezour. E i enportan fer li ou devwar aprann en nouvo keksoz toulezour. Mr Speaker sa rapid test i kout USD10, enn.

E Dr Louange in fek enstrir mwan sa ki mon’n dir pli boner i korek. Me mwan pe get li pirman lo dimoun ki’n ganny sa maladi. I osi dir mwan i annan en laspe ki osi tre enportan. Se sa laspe sirveyans, e alor letan en pasyan i vin lopital e i kapab annan problenm respiratwar ki ase konplike, definitivman zot pou fer enn sa tes lo li.

I pa vedir i annan COVID me pou sirveyans pou gete kekfwa i asosye avek, kekfwa i pa asosye avek. So en bon pe sa bann, sa bann dimoun ki pou bann dimoun kliyan sa prose, pou en pe sa bann kliyan ki dan sa kategori. So i pou elarzi son sirveyans lo la popilasyon Seselwa. Mersi Mr Chair.

 

MR SPEAKER

Mersi Minis. Onorab Egbert Aglae.

 

HON EBERT AGLAE

Mersi Mr Speaker. Bonzour Minis ek ou delegasyon SS tou. Minis lemonn ozordi pe petet pe met pe bet parey nou dir an Angle lo devlopman en antikor petet akoz vi ki bann trial vaksinasyon pe i pran bokou letan. Minis mwan mon ti a kontan demann ou eski Minister Lasante ok baze lo referans ki kestyon Onorab Henrie in demande, vi ki i annan en kou asosye avek sa PCR test pou kapab detekte bann antikor,  eski Minister li menm li akoz zot annan bann expert zot in etabli zot en sample size popilasyon lo en baze lo en rezon selektif, pou kapab enplimant sa tes ki zot prezimen zot pe al fer, ok?

E dezyenmman eski zot pe mazin en kou asosye akoz bokou pei pa pe al dan ver sa laliny pou fer PCR test, akoz son kou ki asosye avek. Eski zot pe met en bidze avek pou fer ki son lenplimantasyon i kapab ganny enplimante depi son konmansman, ziska zot mazinen li menm li zot in reach sa sample size neseser? Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Wi Mersi Mr Speaker. Onorab parey mon ti mansyonnen, i annan en lekip teknik kot Minister Lasante ki pe efektivman travay lo tou sa bann detay. E tou sa bann pwen ki ou’n fer sorti i relevan pou zot travay. So i annan diferan kou an Dolar pou diferan tes. So ou bezwen en selektif.  Nou pa pou gaspiy larzan me i enportan nou ganny en lide lo sa sirveyans ki mon’n koz lo la taler. Me tou sa bann kriter pou ganny etablir.  Son kou pou ganny etablir e nou ava kapab donn sa bann detay pli tar. Ozordi mon pa pou kapab konfirm e antre dan sa bann detay. Mersi Mr Speaker.

 

MR SPEAKER

Mersi Minis. Onorab Flory Larue.

 

HON FLORY LARUE

Mersi Mr Speaker.  Mr Speaker mon ti a kontan demann Minis apre ki bann tes in ganny fer lo sa bann premye batch dimoun ki’n ganny COVID, eski sa maladi in evolve dan son form isi Sesel?  E eski bann sentonm in vin diferan?  Akoz letan ou get sa dezyenm ka sa dernyen ka i ti al de fwa Lopital e Dokter pa ti pick up, eski sa in evolye dan son form?

E lefe ki enn bann keksoz ki Minister pe travay lo la i prevansyon, ki mezir ki Minister Lasante pe pran pou enplimant social distancing dan bann Prizon, dan bann Sant Detansyon e dan bann kaso? Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Lo ou dezyenm kestyon. Wi i annan en guideline pou sa bann landrwa ki ou’n mansyonnen pou fer pou aplik bann mezir prekosyon, ki nou tou d’ailleur nou bezwen aplike. E donk sa i egziste.

Sa viris parey mwan mon’n lir e mon konpran se ki i kapab evolye.  Sertennman i pou evolye i annan apepre 150,160 zour, 170 zour ki egziste e i evolye si i so, si i fre me son form i egzakteman parey li, sa COVID-19. Donk nou bezwen ekspekte ki wi e se pour kwa par egzanp mon’n dir ou taler i annan sa lot test ki nou pe servi ki pou pli donn nou rezilta ki pou bokou plis valab, olye ki ou al depans initilman dan bann test ki pli bon marse e ou pa kapab detekte li korekteman.

E parey mon’n dir ou, i ganny konfirmen ek sa PCR test ki li i pli ser ankor.  E donk li i en pti pe parey letan ou fer en scan ou fer en X-ray apre ou fer en CT scan apre ou al fer MRI and so on. I annan diferan power for the course.

So fotespere mon’n, mon’n servi mon knowledge medikal ki limite pou mwan kapab reponn sa kestyon. Mersi.

 

MR SPEAKER

Mersi Minis.  Onorab Larue.

 

HON FLORY LARUE

Mr Speaker mersi bokou. Minis Mersi pou ou larepons. Eski ou kapab dir mwan kote mon kapab ganny en kopi sa guideline? E eski Minister i kapab dir nou si sa bann si zot in al verifye si i pe ganny enplimante silvouple? Akoz nou pe koz lo en group vilnerab. Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Wi mon ava partaz sa avek ou Onorab. Nou ava fer sir ou ganny sa kopi guideline.  Prizon eksetera. Napa problenm.

 

MR SPEAKER

Mersi Minis. Onorab Ramkalawan.

 

HON WAVEL RAMKALAWAN

Mersi Mr Speaker. Mr Speaker premyerman mon anvi felisit Minis, parski pou in dir li i pa en Dokter me bann leksplikasyon detaye ki in donnen mon vreman enpresyonnen. Ou kapab fer en kantite keksoz.

Mr Speaker dan milye tou sa bann zafer ki pe arive, e mon’n deza swiv en Konferans De Pres kot en fraz ti frap mwan letan ti dir mon krwar Dokter Gedeon ki ti dir, “nou konn bokou plis ki zot” ek bann zournalis.  Dakor. Mon kestyon alor. Eski i annan keksoz ki zot konnen an relasyon ek COVID ki nou, nou pa konnen, piblik pa konnen e ki zot pe gard zis pou zot?

Sa bann zafer antikor, pa’n   manifeste, ensidswit? E dan sa konteks mon ti ava kontan ki si Minis ti ava kapab konfirmen, ki wi zot in deza fer tes e war antikor COVID-19 dan serten pasyan ki pa’n   ganny deklare avek COVID-19. Mersi bokou.

 

MR SPEAKER

Mersi Onorab. Minis. Go ahead Minis.

 

MINISTER MAURICE LOUSTAU-LALANNE

Mersi Mr Speaker. Mr Speaker la mon pou postpone mon larepons, akoz mon pa le vin anpay plis sityasyon. Mon propoze. Kestyon i valab mannyer mon lenformasyon mon pe gannyen. Mon propoze ki dan lot Konferans De Pres Minister Lasante setadir demen an ozordi, ozordi menm ki sa kestyon i ganny aborde e nou a demann Dr Gedeon eksplik sa pou tou dimoun konpran.

So i preferab ki nou les Lotorite koz lo sa bann prensip antikor.  Ariv lo staz lenfeksyon, transmet ou pa transmet tou sa la i lye sa.  Akoz ou kapab annan antikor akoz ou’n ganny sa maladi de trwa mwan pase somewhere mon pa konnen mwan. E i manifeste son lekor.  I pa neseserman dir ki ou’n tonm malad mon’n enfekte madanm Lyod li lo respiratwar i pa sa.  Ou war?  So i pli bon ki nou postpone larepons e les Dr Gedeon antre dan son detay Mr Speaker. Mersi.

 

MR SPEAKER

Mersi Minis. Nou ava les – Yes, Onorab Wavel Ramkalawan.

 

HON WAVEL RAMKALAWAN

Non. Mwan mon pati pe la rod detay mwan. Mon ti anvi zis akoz Dr Louange i la, Dr Reginald tou i la.  Mon ti anvi zis en larepons wi oubyen non. E from sa ki Minis in dir.  Mon’n ganny larepons, larepons i wi. Mersi.

 

MR SPEAKER

Bon nou ava esper Konferans De Pres apre midi. Nou ava esper bann Zofisye Lasante. Onorab Vidot.

 

HON AUDREY VIDOT

Yes, Mersi Mr Speaker. Zis mon annan zis en dernyen kestyon pou Minis an referans ek premye kestyon orizinal, eski Minister Lasante pe kit zot en pti pe a zour avek petet bann nouvo tes ki kapab pe ganny entrodwir byensir pou ede pli detekte sa viris pli boner? Eski zot annan en tim an plas ki pe konsider okenn bann bon tes ki vini pou benefisye zot travay?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi larepons i wi. E dan Minister Finans osi nou pou fer le neseser, pou asire ki si zot le sanz serten pti tes eksetera, ki nou donn zot sa Bidze neseser, pou nou annan sa bann, sa bann tes isi e bann menm bann remed ki kapab ede si nou napa. E mon kontan anonse osi ki i annan bokou endividi ki’n kontribye dan sa fon finansyel pou ed sa COVID sa batay kont COVID-19. Mersi Mr Speaker.

 

MR SPEAKER

Mersi Minis. Bon i reste nou ankor 3 Kestyon Ordiner pou Minis sa ki konsern Departman Lasante. Mon sizere nou pran en break e nou retournen 11.15 pou nou kapab kontinyen avek bann kestyon.

 

(BREAK)

 

MR SPEAKER

Onorab Ferrari ou annan en -?

 

HON JEAN-FRANCOIS FERRARI

A matter of privilege Mr Speaker, very short one.

 

MR SPEAKER

Yes. Go ahead Onorab.

 

MR SPEAKER

Mersi Mr Speaker. Mr Speaker an relasyon avek propozisyon ki Minis in fer ki pou Lasanble kapab ganny sa lenformasyon lo dernyen kestyon ki Leader Lopozisyon ti poze.  Avek respe mon krwar i kapab en lantors avek nou bann metod travay.  Akoz premyerman napa okenn garanti ki okenn antre nou pou dan Press Conference e napa garanti ki si sa lenformasyon pou arive kot Lasanble.

Alors mon ti a kontan propoze ki kekfwa Minis i servi en metod ki nou’n, ki nou’n teste ki mars ase byen, se ki sa lenformasyon ki Dr Gedeon pou donnen dan son Press Conference i ganny anvoye kot nou as an information sheet.  Konmsi plito ki nou, nou al dan Press Conference. Konmsi it’s a bit more in line avek travay nou Lasanble.  So si sa i akseptab pou Minis avek CEO mon ti ava apresye. Mersi.

 

MR SPEAKER

Mersi Onorab.  Mon war Minis in balans latet in acknowledge.  Minis i ava fer nou ganny sa lenformasyon le moman ki Dr Gedeon ek Dr Louange i ava fini prezant lenformasyon dan Press Conference, i ava osi fer Lasanble atraver Sekretarya ganny bann lenformasyon neseser.  Mersi Onorab.

Bon nou ava pran Kestyon No. 4 e mon ava donn mon ava call on Onorab Sylvanne Lemiel pou poz son kestyon. Zis en pti leklersisman. Parfwa mon war i ekri Sylvianne. Sylvanne dakor? Onorab Sylvanne Lemiel ale kestyon i pou ou.

 

HON SYLVANNE LEMIEL

Mersi Mr Speaker. Mon kestyon i al koumsa, an vi ki i annan serten konsern e konfizyon lo Lopital Anse Royale. Eski Minis pou Lasante i kapab donn en lesplikasyon detaye sa Lasanble e osi zabitan Anse Royale lo,

  1. a) Akoz ki Lopital Anse Royale i ankor bloke pou donn servis outpatient?
  2. b)  Akoz ki zot pe bezwen al bouz servis ki zot pe donnen dan Sant Kominoter dan en lot lokasyon?
  3. c) Eski zot in kapab re negosye pri ki sa propriyeter pe sarz Minister Lasante?  Si wi konbyen?
  4. d) Ki zistans zot in arive avek Proze Outpatient Clinic Anse Royale? Mersi.

 

MR SPEAKER

Mersi Onorab Lemiel. Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pou kestyon. Mr Speaker Lopital Anse Royal i aprezan en sant izolasyon segonder, an ka ki nou ganny en sityasyon ki bann ka COVID-19 ki nou’n gannyen dan lefitir i depas kapasite Sant Izolasyon Perseverance.

Parey nou konnen Sant Izolasyon Perseverance i annan en kapasite tret 30 pasyan. La ki nou lafrontyer in reouver le 01 Zen 2020 e nou pa konnen egzakteman si nou pou gannyen oubyen nou pa pou gannyen en 2enm vag i pli pridan pou nou fer preparasyon pou senaryo pli pir ki posib and hope for the best.

        Servis Lasante ki nou pe donnen dan Sant Kominoter Anse Royale, pou bouz dan en lot lokasyon e akoz.

Premyerman lespas dan Sant Kominoter i en pe kwense e i fer ki nou pa kapab ofer tou servis ki nou ti ava anvi ofer.

Par egzanp Servis Danter ek Fizyoterapi ki ti abitye fer Anse Royale, in bezwen transfer dan lezot Sant Lasante.  Sa i koz serten konplikasyon pou popilasyon ki ti abitye ganny sa bann servis Anse Royale. Fizyoterapi pe ganny fer Anse Boileau ek Les Mamelles tandis ki Servis Danter dimoun i bezwen al Anse Aux Pins e Baie Lazare. Dan sa nouvo l‘arc en ciel pou annan tou sa fasilite dan en sel building.  E sa i ava annan mwens lenkonvenyans pou popilasyon.

Dezyenmman, i annan problenm vantilasyon avek lasaler dan sa Sant Kominoter ki fer li pa apropriye totalman pou pasyan e pou staff. I annan en problenm napa ase twalet e napa ase fasilite pou lav lanmen e mentenir en bon lizyenn. Sa i absoliman neseser dan sa letan COVID-19 ki nou ladan.

Katriyenmman, i osi annan en problenm avek sirkilasyon pasyan a lenteryer sa batiman. Pasyan ki pe vin rod diferan lasistans i tro krwaze-sase e sa i pa ideal. Finalman nou dan en fasilite ki apartenir a en lot departman e osi lontan ki nou laba sa lot Departman li i pa kapab fer son travay e akonpli son manda.

Travay Ladministrasyon Distrik Anse Royale, i osi enportan pandan sa letan COVID-19.  Mr Speaker nou pa ankor siny okenn Kontra pou le moman.  Nou annan en pri tantativ pou lokasyon sa fasilite e sa i anviron R246milyon par mwan( pardon) R246mil par mwan avan VAT.  Vi ki Kontra pa ankor sinyen teknikman nou ankor an negosyasyon avek sa propriyeter.

Proze Nouvo Outpatient pe progranmen aprezan pou pli tar. COVID-19 e nou sityasyon ekonomik in sanze, pou sertennman retard sa proze.  Akoz nou priyorite an se moman, se pou nou fer nou mye avek resours ki deza a nou dispozisyon e pou minimiz lo nouvo konstriksyon. Mersi Mr Speaker.

 

MR SPEAKER

Mersi Minis.  Onorab Lemiel.

 

HON SYLVANNE LEMIEL

Mersi Mr Speaker.  Mersi Minis pou ou larepons. Minis mon ti a kontan konnen petet kan ki zabitan Anse Royale pou kapab war sa plan? Ki zistans zot in arive avek sa plan pou Outpatient Clinic? In fini design?  Ki staz in arive sa plan?  Kan ki nou zabitan pou kapab vwar sa plan, ki zot in travay lo la? Kan ki zot pe mazin lenplimantasyon sa proze Outpatient osi?

Akoz, Mr Speaker, nou tou nou konnen poudir i annan 3an depi ler nou’n kontinyelman pe donn larzan. 1milyon, 2milyon. La sa lannen mon krwar, nou ti’n aprouv 2milyon, pou ki sa proze i ganny fer. E ler Bidze in koupe la dernyen fwa, nou ti vwar ki sa 2milyon in ganny reste. Ti’n ganny dir pou Outpatient Clinic.  

So, donn nou en detay en pti pe, en lenformasyon en pti pe pli detaye, ki zistans zot in arive ek sa plan?  Apre lo kote pou bouz dan sa nouvo lokasyon. Konbyen letan petet zot pou mazinen reste dan sa nouvo lokasyon? Eski i annan en peryod letan zot pe mazin reste dan sa landrwa?  Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab pou ou Kestyon Siplemanter. Onorab mwan, mon war li koumsa, Departman Minister Lasante pou bezwen sorti dan Sant Kominoter. Pou bann rezon ki mon’n deza dir. Sa premye keksoz.

Dezyenm keksoz, zot pou bezwen rantre dan l’arc en ciel pandan le mois juin. E, pou lemoman, en dat tantativ pou zot kapab antre e vin operasyonnel, koman en Sant Lasante, kominoter. Sa i kapab arive pli boner, 1e 15 Juin. Pli tar, trwazyenm semenn Juin. Setadir zot pou fonksyonnel dan l’arc en ciel.

Lopital Anse Royale, li parey mon dir i en Sant Izolasyon segonder. Akoz i annan zis 30 pasyan ki nou kapab met dan Sant Izolasyon Perseverance. Le moman, ki COVID i plizoumwen anba kontrol, e sa nou pa konnen kan, nou pou retourn Lopital Anse Royale koman en lopital fonksyonnel. Alors i annan sa 3 eleman.

Dan Master Plan ki’n deza fer pou Lopital Sesel. Sant Lasante Anse Royale, i pou en nouvo batiman ki pou dan precinct kot Lopital Anse Royale i ete ozordi. E kot vye klinik ti ete ava. E li, in ganny sifre pou apepre ant R40 a R60 milyon.

Mon reponn ou lot kestyon, en fwa ki zot in antre dan l’arc an ciel, le 15 juin. A mon avi, zot pou bezwen reste la, pou omwen en minimonm 3an. Akoz i pou pran nou sa letan pou nou konplet proze, nouvo proze Sant Kominoter Lasante Anse Royale. Tender, konstri e fer li vin operasyonnel.

Akoz parey mon’n dir, finansman nou’n bezwen re aranze. E bann priyorite Minister Lasante an sa ki konsern proze. Se Klinik Baie Lazare, Lopital La Digue, Sant Dyagnostik Anvil, Clinical Lab, CSSD kot i fer steriliz bann lekipman and so on. E apre i annan Sant Izolasyon.

E sa Sant Izolasyon, li parey ou konnen i osi dan Victoria. Premye priyorite se sa Sant Izolasyon kot Victoria. E li, parey nou’n dir, son plan in deza ganny fer par en arsitek profesyonnel, pou design son sant. E, nou espekte ki en fwa ki i ganny aprouve, i pou pran 12 mwan pou fini.  Alors, ou pe espekte ki ver trwazyenm kar 2021, Sant Izolasyon Pou’n pare, Anvil. Letan in pare, si COVID i ankor ek nou, se le moman ki nou pou reouver Lopital Anse Royale. Akoz, nou pou annan kapasite adisyonnel dan nouvo Sant Izolasyon Anvil.

So, ou ganny mon bann sekans apepre. So, Sant Kominoter nou pou vacate. Arc en ciel, nou pou occupy pou en peryod 3an apepre, minimonm. Nou a konstri Sant Izolasyon Victoria. Lemoman nou konstri li, e i operasyonnel, nou a reouver Lopital Anse Royale, koman en lopital pou sa distrik.  Mersi Mr Speaker.

 

MR SPEAKER

Mersi Minis. Onorab Lemiel.

 

HON SYLVANNE LEMIEL

Mr Speaker, nou’n ganny dir ki pri pou sa lokasyon i R246 mil, mon krwar par mwan. Petet, konbyen nou pe ganny sarze par met kare pou tonm lo sa R246 mil?  Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab. Onorab, sa pri mannyer mon konpran i en premye negosyasyon ki’n ganny fer. Depi sa, in annan bann depans ki propriyeter in bezwen fer pou nobou meet standard lasante. In envestir ankor en pe larzan.  Kontra pa ankor ganny sinyen. Me pou sa sonm R246mil, i reprezant R271.50 sou par met kare.

Akoz i annan nou son main klinik i 603met kare. Danter i 102met kare. Fizyo i 67 met kare. Administrasyon i 67 met kare. E biro pou bann sanniter, bann PHO i ankor 67 met kare. Ki fer en total apepre sote 900 met kare.  So, kestyon ou’n poz mon, i R271.50sou par met kare, san VAT.  Mersi Mr Speaker.

 

MR SPEAKER

Mersi Minis. Onorab Terence Mondon.

 

HON TERENCE MONDON

Mersi Mr Speaker. Mon kestyon pou Minis, mon anvi konnen si ti annan en tender avan swazir sa lokasyon pou sa servis lasante?  E, si Minis i kapab osi dir nou, konbyen i pou kout Minister pou re lokasyon sa servis dan sa nouvo batiman? Mersi Mr Speaker.

 

MR SPEAKER

Mersi Onorab. Minis.

 

MINISTER MAURICE LOUSTAU- LALANNE

Mersi Mr Speaker. Mersi Onorab. Onorab, ti napa tender.  Mon krwar sa ki ti arive se ki Minister Lasante in rod dan Anse Royale, en landrwa soutenab. Akoz parey mon’n eksplike Sant Kominoter i en keksoz ki’n ariv vitman. I pa vreman ditou adapte.

E donk, sel landrwa konvenab, ti sa landrwa. Kot osi Gouvernman ti an negosyasyon pou met bann Biro NISTI la osi.  So, Lasante prezan in pran metraz NISTI, in azout avek sa ki li i bezwen pou antre dan sa batiman.

Zot in depans apepre en pe plis ki R1milyon ziske ozordi, pou bann amelyorasyon, renovasyon, adisyon neseser. Pou zot nobou meet standar lasante. Ki mon pe dir par sa?  Parey nou’n dir Danter, in al en lot landrwa. Me, Danter pou antre la dan sa space l’arc en ciel.

Donk, i pou bezwen fer tou son bann elektrik, son bann zafer, pou nobou pran danter. E i annan lezot servi osi ki’n bezwen fer serten sanzman dan son batiman. So, vwala lenformasyon ki mon annan to this time. Mersi Mr Speaker.

 

MR SPEAKER

Mersi Minis. Onorab Mondon.

 

HON TERENCE MONDON

Mersi Mr Speaker. Zis pou klarifye, eski sa milyon ki sa propriyeter pe depanse la pou akomod Minister, i pou ganny pran kont dan sa lagreman? Konmsi, eski Minister pou bezwen abzorb sa kou?  Ouswa sa pri ki zot in dir par mwan, i fini, pou napa en lezot cost ki pou vin avek apre? Mersi Mr Speaker.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Larepons sa kestyon i non.  Sa i son kou. E sa pri 246 nou ankor pe sey negosye pou war si nou kapab bes ankor en pe. Me sa i ava bann diskisyon ki zot a fer. Me i pa enkli, i pa pou sanze pou enkli sa additional depans ki bezwen fer. Mersi.

 

MR SPEAKER

Mersi Minis. Onorab Egbert Aglae.

 

HON EGBERT AGLAE

Mersi Mr Speaker. Minis eski, an vi ki Nasyon WHO in fer rekomandasyon ek tou pei pou envestir plis dan zot sistenm lasante, an-term menm lenfrastriktir. Eski ou Minister petet pe mazinen, an vi ki i annan en kou 246mil par lannen, e ler mon mon’n kalkil lo 2an pre R6 milyon. Ki petet ou ti’n kapab konstri en lot ti klinik par la, pou ou bann zabitan. Vi ki i annan sa bann destriksyon mouvman. Eski ou Minister i get sa move koman en bon deal pou lemoman?  Sa i enn.

Dezyenmman, ou’n koz lo en plan ki pou annan bann outpatient ki pou etal-e lo en peryod letan. E nou’n war kontrent ki’n arive sirtou konsern lozistik transportasyon. Ler ou pe servi Anse Royale koman en Sant Izolasyon, eski dan sa plan pou santraliz sa servis, kot i konsern Sant Izolasyon zot pe mazin osi enkli bann lezot servis adisyonnel ki sirtou atase avek bann Sant Izolasyon.

Tel ki, parey nou konnen ou bezwen annan en plan. Parey i annan laspe sekirite, staffing, tou sa bann keksoz, expert medikal. Eski zot pe travay lo en plan ki pou al anliny avek sa nouvo Sant Izolasyon? Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab. Eskiz mon pou sa delay. WHO in deza ed bokou Departman Lasante e i pe kontinyen anmenn son sipor. Par egzanp resaman in pey sa nouvo sant, Command Centre pou COVID-19 Lopital Victoria. E in ed enormeman avek bokou bann PPE’s pou sa fight kont COVID. Nou, nou bezwen envestir dan sa ki dir.

Donk, dan sa nouvo Sant Izolasyon ki nou pou konstri Victoria, parey mon’n eksplik ou.  Sa in ganny fer par en arsitek lasante spesyalize, e tou sa ki i demande i pou ganny mete dan sa Sant Izolasyon. Annefe, mon krwar i enkli menm akomodasyon pou bann tretman. Bann ki trete, lanmenm la sirplas dan sa batiman. E letan i pou vini, i pou vin fully equipped. E, ankor nou pou espekte ki WHO pou kontinyen siport sa linisyativ.

An sa ki konsern Lopital Anse Royale, i annan ozordi dimoun ki kontinyen regard sa lopital, kantmenm i pa pe fonksyonnen. I annan son maintenance ki zot pe fer, pou fer sir ki sa lopital i pa avarye pandan sa peryod ki i pa pou an operasyon. So, sa osi i lo plan Minister Lasante. Mersi Mr Speaker.

 

MR SPEAKER

Mersi Minis. Onorab Aglae.

 

HON EGBERT AGLAE

Mersi. En pti klarifikasyon Minis. Kestyon petet ki ma repoz li, se sa 246mil ki ou pou al peye si zot konsidere, ok?  E ler ou pe e tal li dan 2an, i pre 6milyon, e dan 3an apepre 9milyon. Eski ou Minister petet pa’n mazinen petet pou konstri, an vi ki sa fermtir i annan lefe lo bann pasyan sa distrik e dan sa rezyon?

Petet sa larzan ki kapab ganny servi pou konstri en lot klinik parla dan sa menm rezyon. Pou kapab, anvi ki WHO pe dir envestir plis. Akoz nou pa konnen ki lezot pandemik ki nou kapab fer fas avek. Sa i mon kestyon.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Wi, mon, mon krwar ki konteni tou bann difikilte ki nou pe pas ladan. Sa batiman in vin a en moman oporten. I vre, si nou ti annan finansman e nou kapab ale konstri li, pou nou fer li. I preferab. Parey taler nou pou diskit lo Baie Lazare. I en case in  point letan mon ava reponn sa kestyon lo Baie Lazare, ou ava konpran problenm ki par ler nou fer fas avek. Me la i ready operational, e COVID i la ek nou li.

So, nou pa kapab espere ankor avan nou fer sa. E lot keksoz, nou’n depans en bon pe larzan pou nou annan sa ki nou apel the Victoria Master Plan. E i pou de milyon de roupi. E tou sa ki nou fer, nou bezwen fer sir nou respekte sa Master Plan.  E, sa Master Plan i pa zis pou Victoria, i pou osi pou bann Sant Lasante dan bann distrik osi.

Alors, mon pa pou kapab dir ou la kote, pou Anse Royale par egzanp, sa sant i respekte sa Victoria Master Plan. Kot nou pou al met li son groser, kote i pou ale, eksetera.  I respekte sa plan. Me pou lezot parey, mon pa konnen, Baie Lazare. Pa Baie Lazare, lezot dan lanvironnman mon pa pou konnen. Fodre mon al verifye pou mon dir ou egzakteman ki kalite devlopman fitir nou pou fer. Mersi.

 

MR SPEAKER

Mersi Minis. Onorab Flory Larue.

 

HON FLORY LARUE

Mersi Mr Speaker. Minis, devan mwan la, mon annan en dokiman date le 25 Me 2018, e i pou en expression of interest pou procurement for the services of a civil consultant ouswa consultancy firm. E i annan diferan Lazans ek Minister. E pou Minister Lasante, i liste;- construction of a new hospital on La Digue, reconstruction works on a new Outpatient Service Block Anse Royale, construction of new Health Centre Baie Lazare, construction of new Isolation Unit e, construction of a new NIHSS School. I fer 2an Minis, Onorab Lemiel in dir ki larzan dan Bidze i annan plis ki 3an. Sak fwa i monte i demande, oli Outpatient Clinic?

3an apre, ou vin dir nou COVID i upon us. 3an pase COVID pa ti upon us, solman tou sa bann plan ti la. Minis ou kapab eksplik nou, akoz ki kontinyelman pep Seselwa i pey pou zot mismanagement through Bidze?

Akoz si en rent i 246mil par mwan, pou en batiman ki nou pa ti’n bidzete, i fer nou R2,952milyon par an. I fer nou R8,856milyon pou 3an. Si zot ti’n konstrir nou batiman depi ler zot ti dir nou zot ti pe fer Minis, nou pa ti pou bezwen depans tousala.

Alors, eksplik mwan akoz ki pep Seselwa i kontinyelman pey zot bann det mismanagement? Apre Minis, eski ou kapab dir mon si ti annan en tender pou sa Isolation Centre?  Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab. Onorab, parey ou, mon osi mon pa kontan letan nou bidzet en proze, apre proze pa demare. Sa i pa akseptab e mon’n deza dir plizyer fwa isi dan sa Lasanble. Ki tou le mwan dan Minister Finans, nou fer en kontrandi tou proze, tou Minister lo son leta lavansman. E parey nou ti deza dir i annan serten Minister son completion rate i annan ki par anba 5 poursan.

So, i sanble mwan i annan en problenm ki par ler pou divers rezon. E sak proze, nou bezwen regard sak proze par proze. Mon pare si ou demann mwan en kestyon, sa bann Minister apropriye i ava vin reponn zot menm.

Par ler zot blanm ou lo POU.  Zot dir ou POU akoz sa i dan mon Minister.  I dir ou in retarde akoz POU.  Wi i annan, be bann prosedir i kler, e nou bezwen antisipe bann delay ki nou bezwen fer.  E mon dakor avek ou, Anse Royale i fer plizyer lannen, menm mon ti ankor Lasante, mon ti vizite. E, mon ti met sa en top priority.  Be apre lezot keksoz i vini, nou bezwen sanz, parey Anse Royale son lopital li menm nou pa ti pe anticipate. Nou ti bezwen tir twatir, e remet en nouvo twatir. Ou war?

So nou’n bezwen fer bann lazistaz o fir an mezir. So, nou war nou dan en sityasyon ozordi, kot si nou pou ale pou nou build sa nouvo Sant Klinik Anse Royale. Kot i sipoze ete, an accordance avek Victoria Master Plan, i pou pran en kantite letan ankor. E nou napa sa letan pou nou perdi, nou konsyan, me it’s the best solution mwan, mon war pou lemoman.

Alors, pou ou lot kestyon Sant Izolasyon, i pa ankor tender.  I pa ankor tender, nou an diskisyon avek sa arsitek. Nou pe regarde ki mannyer nou pou atak sa proze evantyelman. Me pou reponn ou kestyon, non, tender pa ankor fer.  Mersi.

 

MR SPEAKER

Mersi Minis. Onorab Larue.

 

HON FLORY LARUE

Mr Speaker, mersi bokou mon vreman apresye. Minis, mersi pou larepons. Minis, mon’n nonm 5 proze  la mwan, ok?  Lopital La Digue, Outpatient Anse Royale, Klinik Baie Lazare, Isolation Centre, Lekol Nursing. Lo en papye ki date 2an. Son zistwar, la Lopital La Digue i annan lannen pe vini. Savedir napa retar Minis, i pa zanmen arive. Sa Master Plan ki ou dir mon in kout milyon la, ki son bi? Si nou pa kapab achieve la, mon’n donn ou 5 proze nou pa kapab achieve!

Prezan nou pou al depans 3 milyon dan 3an, pou en private dimoun pou li rent son landrwa. Letan nou i annan 3an nou pe bidzete pou en Outpatient Unit Anse Royale.

Minis, ou’n nonm mon arsitek pou Isolation Centre, eski ou kapab dir nou si prezan ki zot pe desin plan? Akoz si sa papye li i annan 2an, Isolation Unit i lo la, prezan ki nou pe desin plan dapre zot Master Plan?  Ouswa zot bann papye pa annord? Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Wi, mersi Mr Chairman.  Mr Chairman, mon pa le polemic sa kestyon Onorab Larue. Tou sa bann proze ki nou’n mansyonnen, i la ou annan rezon.  E parey mon’n dir ou, mon osi mon konsernan ki in pran retar. La Digue osi i annan problenm, me dan Bidze amande 2020 ki nou’n mete, nou’n fer sir, akoz nou ti’n donn en commitment, ki nou pou met en larzan pou sa bann proze kontinyen. Baie Lazare i enn, La Digue i lot.

Me, lenplimantasyon sa bann proze ki kot nou annan problenm. I pran tro bokou letan pou organiz tou son bann step pou delivre sa proze.  E sa i pa dan mon lanmen. Mwan sel keksoz mon kapab fer, se tou le mwan raporte leta lavansman. E kot i bloke, entervenir pou sey fer debloke. Repet mwan ou lot kestyon silvouple?

 

MR SPEAKER

Mersi Minis. Onorab.

 

HON FLORY LARUE

Mersi Mr Speaker. Minis, ou’n dir nou oparavan ki ou’n koz lo en arsitek lo kote tender, kote zot ete ek bann plan? Swa Minis, si zot pa kapab delivre, sa bann dimoun fodre resign. Danny Faure osi fodre resign akoz nou pa kapab kontinyen koumsa. Mersi.

 

MINISTER MAURICE LOUSTAU-LALANNE

Wi mersi Mr Speaker. Mr Speaker, sa ki mwan, mon kapab dir ou, Sant Izolasyon inisyalman ti en proze nou ti le fer lo Erport. Pou pli o bor kot problenm i vini, nou izol lanmenm. Apre pa ti kapab kontinyen ek sa, ti sanz sit. E o fir an mezir ou sanz sa sit sa, sityasyon osi i sanze lo sa proze.

Resaman, letan mon dir resaman lannen pase. Ti deside avek sa Victoria Master Plan ki i pou bezwen dan lansent lopital akoz i annan lezot servis spesyalize o bor li. E se la kot in ganny idantifye, son sit i kler.

E avek sa sit, prezan lekel ki pou vin design sa Isolation Centre? I en keksoz spesyalize.  Nou pa kapab zis donn nenport arsitek. E i annan en, zot in antreprann en konsiltasyon, e zot in trouv en arsitek Sid Afriken. Ki’n deplase, in vin isi. In regard sit, in komans elabor bann plan.

E plan final in ganny soumet avek Lasante. E prezan zot bezwen move on ek sa proze, akoz nou nou’n mete R20 milyon dan Bidze 2020, ki zot in aprouve isi, pou sa Sant Izolasyon. Pou depanse an 2020. E son balans, pardon pa 20 i R25milyon. R20milyon pou lannen 2021.

So, sa proze, la mon pe konfirm ek ou ankor. Ki sa proze, it needs to happen an 2020, e fini an 2021 lo nou kalandriye. Mersi Mr Speaker.

 

MR SPEAKER

Mersi Minis. Bon, zis mon anvi atir latansyon bann Manm Lasanble pou montre en pti pe respe pou nou bann diferan Lofis. E, dan konteks ki nou servi, parey ti annan en slogan DANNY OUT, mon ok avek sa.  A en moman ti annan en deba dan Lasanble, DANNY OUT, tir DANNY, mon ok avek sa, ok? Me ler nou pe servi non Prezidan just like that, nou bezwen montre en pe respe, ok? Si ou pe demande ki Prezidan i resign, ou bezwen servi.

Annou mazinen demen,  demen pouvwar i sanz lanmen e nou ti a kontan sa ki nou pe senmen ozordi, nou rekolte demen.  Se en part ledikasyon.

Mon konnen, mon komanter ki mon fer dan sa Chair, mon ganny krisifye apre. Mon ganny apele tou sord kalite apre. Me selman mon bi, parey mon ti dir ler mon ti pran sa sez, sa responsabilite, se pou sey edik nou dimoun osi deor laba.

Ki demen nou a kapab form en sosyete ki meyer ki sa enn ozordi.  Si nou ozordi bann leaders nou pa pe montre respe, nou pa pe espekte demen si en lot parti i form Gouvernman zot pou ganny sa respe.

So, annou komans montre depi ozordi. Ok?  Se sa rezon osi tou par ler ki mon ganny bann Manm ki vin kot mwan ki dir, manm piblik pa pe respekte zot. Ou vwar?

So, i fason ki nou azir koman Leaders. E respe nou bezwen, i mars 2 kote. We have to earn respect, me an menm tan, we have to show respect. Ok, annou ganny keksoz byen san servi non okenn dimoun ki annan serten tit, ki annan serten pozisyon dan pei an mal.

Bon, nou ava pran kestyon No. 5. Mon annan 2 aparaman, mon annan ankor 2 Manm. Onorab Paul Ernesta, apre Onorab Ramkalawan. Onorab Ernesta.

 

HON PAUL ERNESTA

Morning Mr Speaker.  Minis ek ou delegasyon. Mon bann koleg Onorab. E tou dimoun a lekout, bonzour. Mr Speaker, permet mwan demann Minis dan son repons ki in donnen. I annan diferan issue ki pe arive ozordi avek sityasyon Anse Royale, Klinik Anse Royale. Akoz Minister pa konsider met Dokter Takamaka pli regilyerman?  Ki kapab ede osi redwir lakantite dimoun ki pou vin dan Sant Anse Royale. Mersi Mr Speaker.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Ok. Mersi Mr Speaker. Mersi Onorab pou sa propozisyon. Mon krwar i pou bezwen toultan reste a letid avek Minister Lasante, sirtou HCA. E mwan, mon krwar ki sa Klinik Baie Lazare, letan nou pou fer i pou en test case. Akoz nou dir par ler, met Dokter i fasil. Me Dokter osi par ler i lwen li.  I bezwen voyaz gran distans pou li arive, i ariv an retar. I annan bokou bann sityasyon koumsa ki arive par ler.

E, mon krwar letan nou refer nou bann Sant Lasante, i enportan ki nou sey fer en fason domisil sa bann Dokter lanmenm la dan sa sant. E la i vin bokou pli efektiv parey ou dir. Akoz en zour ou annan Dokter ou napa pasyan, en lot zour ou annan plis pasyan, napa Dokter. I en kestyon progranmen ki nou bezwen fer. E mon demann Minister Lasante touzour gard sa dan zot plan. Mersi.

 

MR SPEAKER

Mersi Minis. Klarifikasyon Onorab.

 

HON PAUL ERNESTA

Mersi Mr Speaker.  Mr Speaker, mon pa neseserman satisfe avek en tel larepons. Avek sa lespri ozordi ek sa sityasyon COVID, i annan bokou mouvman ki pe arive, eski Minis pe dir nou, nou bann zabitan, actually nou pe sorti Takamaka nou pe al Baie Lazare. I mean Anse Royale. Eski nou pou sorti Takamaka pou nou al Baie Lazare? Ki aktyelman Baie Lazare li osi, pa ankor fini konplete. Mon krwar, the best opsyon se konsider parey ou’n dir pou domisil en Dokter dan lakominote dan son distrik. Mon krwar, i ti a meyer fason. Mon krwar, zot kapab fer li si i annan sa will pou fer li. Mersi Mr Chair.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Wi, mon krwar nou dakor toutafe Mr Speaker, ki i preferab domisil bann Dokter lanmenm la. E parey dan proze ki nou pe propoze, nou mont an oter, e lo top nivo nou met akomodasyon pou domisil. Pa zis Dokter, lezot anplwaye neseser pou fer marse sa bann klinik dan sa bann distrik. Mersi Mr Speaker.

 

MR SPEAKER

Mersi Minis. Onorab Wavel Ramkalawan.

 

HON WAVEL RAMKALAWAN

Mersi bokou Mr Speaker. Mr Speaker, eski Minis i kapab eksplik nou, e la mon ti ava kontan spesyalman avek sa bann zafer Sant Izolasyon, prezan ki zot pe ganny dimoun ensidswit.  Mon ti ava kontan Mr Speaker, komans par lir deklarasyon Mr Faure letan i ti vin isi dan sa Lasanble pou delivre son Diskour lo Leta La Nasyon. Mon’n ganny son versyon Angle. ‘’I am pleased to announce that construction of this Isolation Centre will start in March this year at the Seychelles Hospital.’’  Eski Minis i ava dakor avek mwan ki, si ou pe dir, e sa ti Fevriye. Pe dir pou komanse an Mars. Savedir, plan ti’n devret fini fer, e ki sa ki nou pe tande la ozordi, totalman diferan.

 

(APPLAUSE)

 

HON WAVEL RAMKALAWAN

E, sa i montre en commitment ki definitivman konmsi plan i en pe partou kote. E an plis ki sa, letan nou pe koz bann zafer Isolation Centre, baze lo sa ki Minis in dir an relasyon avek Anse Royale osi, ki bi kestyon, parske Anse Royale li toultan i pri avek sa zafer Isolation Centre.

Mr Speaker, eski Minis i ava dakor avek mwan, propriyete ki Gouvernman i annan Anse Royale, C7834,  ki donn 16,239 met kare. Savedir 1.62 ektar.  I en propriyete ki pou Gouvernman depi mon pa konnen konbyen letan, in toultan pou Gouvernman. E ki sa propriyete ozordi, kot zot pe move in, i en propriyete ki sa devloper pa tro bokou letan pase in aste avek en prive.  E alors prezan nou pe bouz laba.

Konmsi, eski i pa kler ki poudir lo kote nou planifikasyon, nou zero. Lo kote planifikasyon zis pou kout nou larzan. La parey en Manm in dir o paravan, nou pe al koz R246mil par mwan pou 3an, kan ofet konstriksyon sa batiman, ou’n dir 1300met kare ki nou pe al koz lo la. A, R13mil met kare en batiman ki pou kout anviron R17 milyon. Me ki la ozordi nou pe koz 40 a 60milyon, baze lo larepons ki ou’n donnen. Konmsi eski pa i kler poudir napa plan?

E, san bliye osi Mr Speaker, ki poudir Anse Royale li, i pa’n zis tonm dan en plan medikal. Anse Royale in osi tonm dan plan 2enm Lavil. Ki zanmen in ganny realize. So, eski Minis i ava kapab dir nou klerman? Be mon mazinen i pa pou kapab dir nou klerman. Konsernan ki vreman zot anvi fer? Oubyen si sa bann larepons ki nou’n gannyen bomaten avek tou respe pou Minis, se bann plan ki pa’n vreman balanse. Parski se la prezan ki Isolation Centre pe ganny konstri.

Lasin i konstri en lopital dan 2 semenn. E, Mr Speaker ou ava rapel pandan sa letan COVID, mon ti pe dir akoz pa ganny tou sa bann Lakonpannyen Konstriksyon. Fer zot met zot lenerzi ansanm, e ofer Sesel en real Isolation Centre. Eski nou ava kapab still konsider sa ankor?

Apre sa Mr Speaker, letan nou pe koz sa bann klinik ensidswit. Eski Minis, oubyen eski Minister Lasante, Departman Lasante. Kan eski Minister Lasante i ava pare pou li vin devan sa Lasanble e prezant en plan konkret?

Kot konmsi zot ava konnen egzakteman ki zot pe fer, pou nou kapab annan en plan. Pou nou konnen ki poudir la i la, La Digue, Baie Lazare, Takamaka, Anse Royale, e tou.

Parski ankor enn fwa nou war ki poudir letan problenm i arive, parey COVID. Byen, nou pa ti envit COVID kot nou, COVID in vini. Me selman nou’n ale nou’n fer en plan. 1.2 bilyon, 30milyon, lot laba. Nou’n vini nou’n fer tousala pou ki once and for all Mr Speaker, nou sistenm lasante nou pa ava pe kontinyen ganny tou sa bann zafer.

E par egzanp la ankor enn fwa pou tire anba latant pou fer bann striktir semi permanan. Ki ziska aprezan si mon ti pe al lo la. E, mon kapab met sa an relasyon ek Anse Royale, konbyen striktir semi permanan ki’n ganny fer depi ki nou ti koze isi dan sa Lasanble?

Larepons se, latant ki ankor laba. Latant i ankor menm plas. Alors konmsi nou ava aret tann keksoz, me nou ava pe viv dan en realite. E non-pa lo rev oubyen lo promes. Mersi bokou.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab. Onorab ou’n sit deklarasyon Prezidan Larepiblik, son State of the Nation Address. Wi, nou’n les li down, akoz sa premye plan ki ti ganny prezante i pa ti ase spesyalize. Se akoz sa, ki Departman Lasante ti bezwen al rod en arsitek spesyalize pou sa Isolation Centre.  E, sa osi in pran en pe letan. E sa Msye in nobou deplase, ankor mon met lo COVID menm la mon. In deplase avan COVID, apre in kontinyen son travay laba.

Me san sa plan detaye, nou ti pou al fer en building ki pa ti pou apropriye. E nou ti pou annan plis kritik ankor. Donk, nou prefere pran en pti retar, be nou bezwen. E mon redir ankor, nou bezwen egzekit sa proze an 2020. Akoz COVID i la ek nou sa voyaz.  Nou bezwen annan sa Sant Izolasyon pou nou free up Anse Royale. Apre, Minister Lasante pou dir ou, ah i mank li project officer, project manager eksetera, eksetera. Me nou kapab rod en lot solisyon. Nou kapab rod en solisyon kot nou fer en tender kot i annan bann dimoun ki fer sa bann travay preliminer pou en poursantaz proze avek ou. E nou bouz de lavan, si i napa sa dimoun kalifye pou lemoman.  So, nou bezwen regard tou sa bann keksoz pou anpes nou retard sa bann proze Mr Speaker.

Mwan, mon ti a kontan retourn dan Lasanble, e mon a demann Minister Lasante prepar en statement lo sa ki zot pe fer, e sa ki zot pe anvizaze, pou prezant ek Lasanble. Apre zot kapab kestyonnen, pou nou ganny en clear way forward. Sa mon, mon pare pou vini, e prezant en statement lo la a en moman apropriye.

E mon krwar i neseser, akoz dan sa COVID. E letan nou pou bouz de lavan nou bezwen annan en plan kot zot osi zot montre nou kwa ki nou bezwen fer an priyorite, an priyorite e delivre lo la. Si fodre met 2 priyorite, nou delivre lo 2. Si fer met en priyorite, ki nou kapab delivre lo enn, annou met enn. Si nou kapab fer plis, napa problenm mete. Mwan mon ava vin isi, e mon ava prezant sa koman en Statement. Mersi Mr Speaker.

 

MR SPEAKER

Mersi Minis. Onorab Ramkalawan.

 

HON WAVEL RAMKALAWAN

Mr Speaker, I’m sorry, me mon pa pe ganny en konpran la. Mon ava zis eksplike, e Mr Speaker ou konn byen sa ki mon pe al dir. Nou’n pey sepa konbyen milyon pou fer en Master Plan, e non selman Master Plan, me osi pou design. E mon konnen ki poudir Dr Todorovic avek en lekip, ti parmi bann dimoun ki ti planifye. E mon pa pe ganny en konpran ki mannyer Dr Todorovic, ki en Seselwa ozordi, ki’n design e build Apollo Hospital, en sant spesyalize Moris, ki lo son plak ou war li mete, Head Designer, Dr Todorovic.

Ki poudir nou annan bann dimoun isi ki kapab fer sa bann travay koumsa. Ki la ozordi, nou pe tann Sid Afriken, nou pe tann lot. E li an plis ki sa si in kapab design en landrwa, ki kapab fer open heart surgery, ok, Ki’n kapab fer en proze ki’n kout $446 mil, ok?  Pou design, well sa plan la, sa plan ki nou pe koz lo la, this is what we paid for.

E apre, ki nou’n pey $446mil, la ozordi nou dir pa kapab, fodre i pli spesyalize ensidswit. Eski, nou pa pe vreman pa servi bann resours ki nou annan? Pou nou kapab get on with it?

E, Minis letan ou dir, nou pa’n deliver ensidswit, mon pa pe met ou la. Me selman mon konnen ou kontan servi bann lekspresyon premye warning letan pa deliver, dezyenm warning. Trwazyenm, lekspresyon ki ou pa pou servi. Be la, kote nou ete? Mayos. Where? Kote nou ete? Mersi bokou.

 

MR SPEAKER

Mersi Onorab. Minis.

 

MINISTER MAURICE LOUSTAU- LALANNE

Mersi Mr Speaker. Mersi Onorab. Onorab, si mes souvenirs sont bons, Dr Todorovic ek son tim, i ti annan en tim li  ki ti travay lo sa Victoria Master Plan. E son tim ti enkli bokou expert, diferan expert sorti osi Sid Afrik.  Me, son lobzektif primer ti pou li regard fasilite ki egziste. E regarde ki mannyer nou pou entegre li.  Ki mannyer nou pou amelyor li. Kote nou pou agrandi, kote nou pou kraze. Sanz sirkilasyon semen, en kantite travay in fer. E nou’n pey li en kantite larzan.

E, se akoz sa ki mon dir, letan nou fer proze lye avek sa Victoria Master Plan, ki enkli pa zis Victoria Hospital. Lo bann zil, nou bann klinik ki enkorpore ladan, nou bezwen respekte sa plan.

Akoz sa plan ti ganny aprouve, me i zis en Master Plan, en konsep Master Plan. Par egzanp, i dir Laboratwar la ozordi, ki nou konnen kot i fer bann tes. Fodre tir li la, transfer li dan Sant Dyagnostik. Ki nou konnen Sheik Khalifa, transfer li laba. E apre consequence, sa ki deza kot Sant Khalifa i bezwen transfer dan Red Roof.

So, i annan en bann sekans ki bezwen arive. Nou bezwen swiv. Son design detaye, parey sa Isolation Centre, li osi i dir met la. Se pou kwa i pe vin la. Me, son design detaye ki pou prezan pou fer en tender, donn en kontrakter pou vin fer, Dr Todorovic ek son tim, pa’n fer sa louvraz. E se la kot nou annan sa mankman. Ou konpran?

So, mon krwar i enportan donk, ki nou fer sa revi an antye. E, regarde menm si nou pran zis sa Victoria Master Plan ek tou son devlopman lo tou son fasilite ki mannyer pou arive. E, donn nou en leta de lieu kot nou ete.

E parey mon’n dir dan nou Bidze CAPEX pou Minister Lasante, nou’n prezerv, avek laprouvasyon Lasanble Nasyonal. Serten sa bann proze, menm ki Onorab Larue in mansyonnen, e ki nou’n koz lo la pli boner. Mersi.

 

MR SPEAKER

Mersi Minis.  Onorab Sylvanne Lemiel.

 

HON SYLVANNE LEMIEL

Mersi Mr Speaker. Mr Speaker mon ti a kontan petet letan mon’n demann sa kestyon ozordi pou profit sa lokazyon. Petet menm si nou sistenm Lasante i annan serten defayans lo li menm. Me, mon oule dir mersi Minis Lasante avek son lekip pou kontinyelman petet rod fason pou amelyor kondisyon lasante pep Seselwa.

E letan mon pe dir sa, mon kestyon ki mon santi Mr Speaker, ki pa’n tro ganny adrese. E ki mon ti a kontan ganny en larepons pli konkret, se lo sa Outpatient Clinic li menm. Akoz zabitan la, i annan dimoun ki pe ekout zot byen, in call mwan in dir mon i pa’n tann Minis nonm ditou sa plan Outpatient Clinic. Ki nou’n dir ki distans zot in arive avek, zabitan pa’n tann zot dir ki zistans.

Eski i ankor dan konsepsyon? Eski in fini fer sa plan? In ganny aprouve kot Planning? Ki zistans in arive avek?

Apre, en kestyon Minis ki pa’n ganny reponn. Ler ou pou dir mon ki zistans in arive, kan ki zabitan pou ganny sans vwar sa plan? E petet si zot in konsidere ladan, tan ki mon’n tann zot in nonm avek Onorab Ernesta, ki petet nou pou bezwen annan rezidans permanan pou serten Dokter. Pou ki petet nou bann distrik dan la rezyon i a ganny Dokter ki reste Anse Royale.

Antan, ki nou’n ganny dir nou annan 16,239 square metres later pou Minister Lasante, eski swa dan sa Outpatient Clinic design ki’n ganny fer, eski nou pe mazin met Doctors Residence ladan? Or, nou kapab servi sa compound, sa gran area ki nou annan pou met detrwa lakaz Dokter osi?  Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mr Speaker, leta lavansman sa proze i comme swivan, Departman Lasante pou al fer en tender. Kot i pou al tender en project management and design, pou sa Sant Anse Royale. Tou an respektan Victoria Master Plan. Setadir parey mon’n dir i pou dan lansent sa konpleks lasante, Servis Lasante Anse Royale. E son met kare nou konnen, son floor area. Akoz sa in deza ganny preskrir dan Victoria Master Plan. Prezan pou mont, mon krwar i pou mont an oter. Nou pe sey kopye en pe bann design ki’n deza pe fer pou lezot sant.

Konmsi nou annan en design ki pou fer, parey nou annan design lakaz, diferan sa. Nou swazir enn koumsa, nou ale. I annan pli pti, i annan pli gro, me omwen nou servi li koumsa. So, la, la kot son staz i ete. Nou bezwen rod en project design e en project management pou sa proze avan nou al de lavan.

E wi, lontan Outstation Anse Royale, ti annan, lakaz Dokter lanmenm o bor. Anse Boileau, ti annan lakaz Dokter o bor. Me i ti la pou en rezon. Bon, nou bezwen kontinyen fer sir ki nou met Dokter la, olye anvoy li anvil, met li dan en transpor mont avek li dan leo tou lazournen.

Nou bezwen sanze sa, nou bezwen retourn kot nou ti, parey nou ti fer. E i annan sifizaman later. Ou annan rezon. Kot mwan mon ankor rapel laba i annan en laplenn i ankor ouver. Kot nou kapab fer bokou building ankor neseser. Entegre konpletman lo sa site.

So, mwan, mon ti a kontan fini par dir le swivan Mr Speaker. Mon krwar ki pandan sa peryod COVID nou tou nou’n vreman bizi, fer diferan keksoz.

Lasante prensipalman li, in konsantre pou fer sir ki okenn Seselwa pa mor avek sa zafer. E sa nou’n nobou achieve.  E nou pe kontinyen travay pou nou anmenn en meyer servis. E nou annan difikilte, me mon konnen ki zot pe fer li kantmenm zot pe tackle COVID.  Fodre pa ki nou bliye ki lopital i bezwen kontinyelman fonksyonnen. Nou pa kapab met enn lo en stop, enn lo en go.

Klinik i bezwen kontinyen fonksyonnen. Dimoun i annan maladi kronik i bezwen vin rod son pilil. I bezwen ganny konsilte ek Dokter avan i ganny nouvo pilil. Bann standar ki nou’n deza arive nou pa kapab les slip.

So, mon enplor Manm Lasanble pou konpran sa sityasyon ki nou ladan, i pa fasil. Nou annan defi, me avek en nouvo defi nou pou kontinyen travay, pou fer sir ki Seselwa, okenn Seselwa pa perdi son lavi bonnavini pou en naryen ditou. Mersi Mr Speaker.

 

MR SPEAKER

Mersi Minis, nou ava pran kestyon No.5. Onorab Francois Adelaide.

 

HON FRANCOIS ADELAIDE

Mersi Mr Speaker. Bonzour Minis avek ou delegasyon. Bonn apre midi, bonn apre midi tou dimoun a lekout. E byensir ki tou bann Onorab. Eski Minis i kapab, donn detay avek sa Lasanble lo progresyon konstriksyon nouvo Klinik Baie Lazare e rea lokasyon bann lokater Zofisye Lapolis pour permet sa konstriksyon abouti? Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab pou ou kestyon. Mr Speaker, konstriksyon Sant Lasante Baie lazare i reste en priyorite pou Lazans Servis Lasante, pou komans demars planifikasyon ek tendering pou lannen 2020. Nou pe ganny led avek Minister MHILT pou kapab prodwir plan pou en Sant Lasante modern, avek bann fasilite modern pou kapab deservi popilasyon Baie lazare byen.

Sa pou enkli fasilite akomodasyon pou Dokter, ki ava ede pou soulaz presyon akomodasyon e, elimin sa problenm kot Dokter i vin an retar akoz i reste tro lwen. Souvandfwa zot reste Anvil. Diskisyon avek Departman Lapolis ek Departman Housing, pou rod nouvo lokasyon pou bann Zofisye Lapolis i anmars. Mersi Mr Speaker.

 

MR SPEAKER

Mersi Minis. Onorab Adelaide.

 

HON FRANCOIS ADELAIDE

Mersi Mr Speaker. Mersi Minis pou ou larepons vreman bref. Ou okouran poudir nou ti al fer en vizit le 23 Septanm, so avek Depite CEO. Ki dapre sa ki zot ti dir nou, e nou ti rikorde, e ti vin en news item ki zafer plan. Lo kote plan. Zot in fini tender. Ti reste, non, wi ok. Kontra i sipoze ganny awarded Oktob 2019. Premye quarter 2020, kontrakter ti pou ganny apwente, e travay ti sipoze komanse milye lannen 2020.

Eski nou’n depart from sa? Nou pa ankor ganny okenn kontrakter e prezan ki MHILT pe fer bann demars?  E ki napa okenn konsiltasyon akoz lo sa rapor ki mon annan, Mr Denis Barbe Principal Secretary, ti dir poudir, lo la, ki reallocation of tenant pou sa 2 lakaz in deza komanse. Eski ou pe dir mwan poudir napa naryen ki’n ganny fer? Akoz mon’n an kontak avek bann tenant laba, zot dir zot pa ankor ganny ni kontakte. E, Minis sey donn mon en pti leklersisman? Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab. Onorab mon konfirmen ki napa okenn Kontra ki’n ganny donnen avek okenn kontrakter pou fer Sant Baie Lazare. Sa ki’n arive, wi in annan en tender pou en project management ek design.  E sa, in annan 2 bid.

I annan en bid ki ba, e i annan en bid ki tro o. E, i annan diskisyon ki pe go on la, pou rezourd e pran en desizyon lo sa problenm. Sa bid pli ba, i sanble ki i vreman i annan en problenm somewhere. Sa bid pli o, i o, be solman i within sa Bidze ki Minister Lasante ti’n demann Minister Finans.

Parey ou konnen pou 2020, nou, nou ti’n met R6 milyon pou komans sa proze. E konplet sa proze an 2021. E sa i en langazman ki mon ti fer koman Minis Finans. E sa i reste la.  Alor, Minister Lasante ou HCA, mon pa konnen lekel  zot, zot bezwen al klarifye e deside lekel dan sa 2 bid pou sa proze ganny tender pou en kontrakter vin fer. La kot nou’n arive.

Lo kote lakaz mon pa konnen. Mon ava konsilte rapidman la, me i sanble mwan ki zot ankor pe rod landrwa pou tir sa bann Lapolis. Akoz parey ou konnen, e si ou’n al lo site ou pou konnen, lide se ekraz sa bann lakaz e konstri proze nouvo lo la. E apre amenaz kot i egziste ozordi pou fer lezot keksoz, entegre fer lezot keksoz parey parking, eksetera.  So, sa son plan ki pou fer pou Baie Lazare. Mersi Mr Speaker.

 

MR SPEAKER

Meri Minis, Onorab Adelaide.

 

HON FRANCOIS ADELAIDE

Minis pou tou respe ki mon annan pou ou avek ou lekip. Tou respe ki mon annan pou Minister Lasante, ozordi mon vreman dezapwente pou depi 2017 nou’n al vizite avek Prezidan Faure. E Mr Speaker depi 2017 si zot ti konnen poudir zot pa anvi fer sa proze, me solman zis pe bat nou latet i vreman, konmsi mon vreman santi mon koman MNA Baie Lazare konmsi mon vreman santi desepsyon. Pou sirtou mon bann piblik ki ti pe espere, akoz souvandfwa in monte dan meeting piblik.

E, pou Prezidan koman Minister Lasante, i vreman en, mon pa konnen mannyer mon pou dir.  Me solman kantmenm nou dir pa blanm li, me solman si Mr Danny Faure apre tou sa vizit ki nou’n al fer, ozordi napa naryen ki’n abouti, Mr Speaker napa lot swa. Se DANNY OUT!  Mersi.

 

MR SPEAKER

Mersi Onorab. Minis komanter?

 

MINISTER MAURICE LOUSTAU-LALANNE

Mersi Mr Speaker. Mersi Onorab. Onorab mon konpran parfetman ou fristrasyon, avek ou bann rezidan Baie Lazare. E mon osi mon konnen ki Prezidan i atas enormeman latansyon a sa proze. E i neseser parey mon’n dir ki nou fer bokou plis progre. E, fotespere letan nou sorti la, en desizyon i ganny pran pou gete ant sa high bid, ek sa low bid. Ou pou vwar tender sa e award sa Kontra.

Akoz nou napa bokou letan ki reste, e fodre ki i ganny awarded. Ki travay i konmanse an 2020, akoz larzan i dan Bidze. E mwan, mon pou port en latansyon spesyal e konteni ki mon vin isi pou reprezant Minister Lasante dan Lasanble. Mon pou bezwen redouble mon zefor menm ki mon anba bokou mayosman, pou fer sir ki nou regle sa problenm.

Mon partaz ou problenm. Mon konpran ou sityasyon. Mon konpran ou fristrasyon. Be ansanm nou pros pou nou komans li. Mersi bokou Mr Speaker.

 

MR SPEAKER

Mersi Minis. Minis dernyen kestyon osi pe al dan menm direksyon. Mon ava donn laparol Onorab Churchill Gill.

 

HON CHURCHILL GILL

Mersi Mr Speaker. Bonn apre midi Mr Speaker. Minis mwan mon plito rod leklersisman dan plas mayos. Bonn apre midi Minis ek ou delegasyon. Minis kestyon i pli senp. Eski Minis i kapab enform sa Lasanble kwa ki pe koz sa gran retar lo renovasyon Lakaz Mor kot Lopital Baie Ste Anne Praslin? (a) Ki kalite travay ki pe ganny fer lo sa Lakaz Mor? Kan ki travay i ekspekte konplete?  Mersi.

 

MR SPEAKER

Mersi Onorab.  Minis.

 

MINISTER MAURICE LOUTAU-LALANNE

Mersi Mr Speaker. Onorab mersi pou ou kestyon. Renovasyon Lakaz Mor Baie Ste Anne i deza dan en staz avanse, e i pre pou konplete. Retar in koze prensipalman par prosesis tender.  Ki kapab met retar si bann zofisye ki responsab pou proze pa atantiv lo tou bann ti detay. Sa posesif lapel dof in bezwen repete omwen en fwa. Akoz ti annan serten keksoz ki pa ti ankor avek bann regleman.

La aprezan i reste ankor detrwa pti louvraz pou fer. Tek ki koneksyon delo dan lavabo. Bezwen fer en nouvo laliny tiyo pou konekte. Koneksyon elektrisite dan plafon pou moderniz sistenm elektrik. Koneksyon e met an servis sa nouvo refrwadi ser pou bann kadav. E sa refrwadi ser li i annan kapasite pou 3 kadav.

Fodre dir ki sa Lakaz Mor ti ganny fer par Ameriken. Nou estimen ki sa bann louvraz Pou’n fini dan mwens ki 1an. E ver le 01 zilyet, Lakaz Mor Baie Ste Anne a kapab re ouver.  Mersi Mr Speaker.

 

MR SPEAKER

Mersi Minis. Onorab Churchill Gill.

 

HON CHURCHILL GILL

Mersi Mr Speaker. Minis donnen ki sa Lakaz Mor, i pe desarz en zil grander Praslin, e i annan de lenstans osi ler i annan en sityasyon La Digue. I osi cater pou pasyan La Digue. Pardon, eskize, pou bann fanmir ki’n perdi zot pros. Alors sa renovasyon ler mon pe ekout ou larepons, i pa pe vreman pran kont magnitid popilasyon. E, eski apre ki sa i fini le 01 zilyet, eski lo plan lonterm Minister i annan plan pou kapab donn Praslin en Lakaz Mor ki bokou pli gran, pli ekipe? Akoz nou bezwen konpran si i ariv en evantyalite kot nou annan, en sityasyon kot nou annan plis ki 3 lanmor alafwa. Then, nou pou santi nou dan problenm.  Mersi.

 

MR SPEAKER

Mersi Onorab, Minis.

 

MINISTER MAURICE LOUSTAU-LALANNE

Mersi Mr Speaker. Wi mon krwar ankor, tou i relye avek bon planifikasyon. Mannyer mon konpran sa Lakaz mor Praslin Baie Ste Anne, deza i annan enn, en refrwadi ser ki la, ki kapab pran 6 kadav. E sennla i pou pran 3.  Donk, son kapasite pou Praslin i pou 9 kadav. Enn bann rezon ki in retarde, kontrakter pa ti oule travay avek kadav dan refrwadi ser kot i ti pe travay. Donk, ti bezwen sanz pozisyon pou donn li en landrwa pou li travay. E sa in zwe en rol pou delay.

La Digue, ou’n koz lo La Digue. Be La Digue li osi i annan son landrwa spesifik pou plizyer, mon pa konnen egzakteman son kapasite. Pou 3 kadav li osi. Me si i neseser; pou aranz la kot zot fer servis ekspoze, whatever it is o bor. Sa mon ava demann Lasante regarde. Akoz mon krwar i annan ase batiman laba anler kot sa bann batiman i ete, kot Ameriken ti refer. Ki nou kapab amenaze pou fer le neseser dan le fitir. Mersi Mr Speaker.

 

MR SPEAKER

Mersi Minis. Onorab Waven Woodcock.

 

HON WAVEL WOODCOCK

Mersi Mr Speaker. Minis mon kontan pou aprann ki sa proze pe al finalize by le 01 Zilyet. En proze ki sipoze fini depi 2017. Mon kestyon i ankor enn fwa lo laliny ki Onorab Gill in demande lo kapasite, lakantite kadav ki i kapab pran. Si mon konpran byen ou dir i pou ogmante pou sorti 6, pou vin 9. Savedir, avek sa nouvo chiller ki zot pou enstale. Si ou kapab zis konfirm sa?

Epi mon dezyenm kestyon i, konbyen an tou i pou koute, pou sa renovasyon ki, konmsi konbyen sa proze pou koute an total?  E osi, lekel sa kontrakter ki pe travay lo sa proze aktyelman? Mersi.

 

MR SPEAKER

Mersi Onorab, Minis.

 

MINISTER MAURICE LOUSTAU- LALANNE

Mersi Mr Speaker. Mersi Onorab.  Onorab sa proze li, i ti ganny tender an 2018. Pou en sonm R355,498mil, e travay ti komanse an Out 2019. E i ti sipoze konplete an Zanvye 2020. Me ozordi avek tou bann retar ki’n arive pou diferan rezon parey mon’n eksplike, e, menm kontrakter pa ti santi li tro konfortab pou fer travay avek lekor lanmenm la. Ozordi, kou final pou sa proze i estimen a R438, 221mil e 30 sou pou konplet sa louvraz.

E, kontrakter, mon napa sa lenformasyon. Mon ava regarde si mon kapab ganny sa lenformasyon en pti moman. A wi, i apel, ou le konn son non? Ok. I apel St Joseph Enterprise. Mersi Mr Speaker.

 

MR SPEAKER

Mersi Minis. Mon ganny en konpran akoz Minis in poz ou sa kestyon, si ou le konn non sa kontrakter? Ok, la ou’n konnen se St Joseph ki pe fer sa travay, wi. Onorab Woodcock.

 

HON WAVEL WOODCOCK

Minis, mon dernyen kestyon. Avek sa renovasyon ki zot pe fer, ti annan konsern osi lo kote staffing. Akoz sa dimoun ki ti pe fer letopsi lo bann kadav, i menm dimoun ki ti pe travay La Digue. I ti en kontrent ki ti, i koz en pe en kontrent. Alors avek sa renovasyon ki zot pe fer, eski zot pou ogmant lakantite staff ki pou travay avek sa mortuary? Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker. Wi, Onorab pou reponn ou kestyon. Zot dir mon wi, zot pou transfer en dimoun sorti Mahe pou anvoy Praslin, pou nobou fer sa louvraz.  Mersi.

 

MR SPEAKER

Mersi Minis. Onorab Sebastien Pillay.

 

HON SEBASTIEN PILLAY

Mersi Mr Speaker. Bonzour Mr Speaker. Bonzour Minis. Bonzour tou koleg Onorab. E bonzour tou dimoun ki a lekout, pe regard nou. Mr Speaker, mon ti a kontan demann Minis, prenon kont ki si ou remarke i annan en patern anski konsern bann size proze.  Pa neseserman avek Minister Lasante. Me, i kapab zeneralman bann size proze ki pe koz en konsern vizavi bann timeframe, ou bann deadline ki ganny donnen.

Kwa ki ou Minister pe fer realistikman pou ed par egzanp Minister Lasante ki annan bann konponan proze konsiderab? Ki nou ti ava prefere sa bann Dokter ki la bann dimoun kalifye, e profesyonnel pe dil avek parey zot in fer. Protez nou kont bann maladi afektyez. E ki i annan bann dimoun konpetan e kalib ki pe travay lo nivo realiz sa bann proze. E ki i ava soulaz en pe burden presyon ki vin lo nou bann profesyonnel ki la? Sa i mon premye kestyon.

E mon dezyenm kestyon, san ki mon met ou dan okenn lezot problenm pou ganny mayose, Eski in annan okenn lapros pou, mon pa kapab dir Gouvernman al fer sa lapros me, eski Gouvernman i kapab, mon demann Lasanble son lendilzans la.  I kapab vwar nesesite pou allow petet sekter prive osi pou vin dan sa domenn lo bann zil? Ki i ava ede petet soulaz en pe presyon ki i ava annan lo Minister Lasante, oubyen Departman Lasante. Sirtou Health Care Agency, dan sirkonstans kestyon ki Onorab Churchill Gill in le ve. Mersi Mr Speaker.

 

MR SPEAKER

Mersi Onorab. Minis.

 

MINISTER MAURICE LOUSTAU- LALANNE

Wi Mersi Mr Speaker. Mersi Onorab pou sa kestyon, e sa propozisyon. Parey, wi nou tou nou realize ki efektivman ki annan defayans. I annan challenge avek project management dan Gouvernman. E dan Minister Finans, nou’n realiz sa depi lannen pase, ou menm kekfwa lannen avan. E se akoz sa ki nou’n komans sa prosesis tou le mwan dan Cabinet. Nou enform Cabinet leta lavansman tou sa bann proze.  Sa i enn.

Me, bann mezir pratik ki nou’n pran dan Minister Finans, nou’n ale nou fer en rekritman bann project management, e nou’n bezwen al a leksteryer. E nou’n fer antre sa bann dimoun, e nou’n plas zot dan serten Minister ki annan bokou proze lenfrastriktir mazer, pou fer avanse. Tel ki par egzanp, Minister Ledikasyon, e nou’n war en reversal.

I annan en sikse, zot in sorti en completion rate apepre 30 poursan, zot in ariv pros 65 poursan la. So, zot project delivery lo bann proze enfrastriktir i bokou pli bon. Me an fezan sa, nou’n osi realize ki nou bezwen donn responsabilite en Minister Gouvernman, pou tou proze Gouvernman lo lenfrastriktir. E sa i Minister MHILT, kot PS Choppy i ete laba. Donk, se li ki annan sa responsabilite pou fer sir ki tou proze Gouvernman lo lenfrastriktir, i pas atraver son Departman. E, li osi nou’n shore li up avek en pe bann profesyonnel neseser dan sa domenn. Pou fer sir nou delivre.

Alors, mon ava regarde letan mon sorti la egzakteman pou Lasante, egzakteman kote. E si nou kapab asiste atraver sa lot Scheme ki nou annan dan Minister Finans pou siport zot. I en keksoz ki mon war prezan i irzan. Akoz i relevan direkteman avek mon letan mon vin dan Lasanble. E nou bezwen fer sir ki nou aranz sa bann keksoz.

I mean, zis get sa Lakaz Mor, in fini kout nou, ek retar ki nou’n pran. Pros R100mil an plis. War? I pa akseptab, konpran. Se pou kwa toultan nou ensiste nou bezwen delivre on time. So, vwala Mr Speaker. Mersi pou ou sizesyon e ou kestyon. Mersi.

 

MR SPEAKER

Mersi Minis. Onorab Pillay.

 

HON SEBASTIEN PILLAY

Mersi Mr Speaker.  Mr Speaker, prenon kont ki nou le, mon ti a kontan impress lo Minis, the sense of urgency ki sityasyon COVID-19 pe mete. Par lefe ki, nou pe vwar enkontrolab ki bann pri materyo, oubyen bann pri konstriksyon pou monte.  Mon krwar ou Minister napa ni menm en semenn ouswa 2 semenn pou antre, e komans bouze. E, tackle bann sityasyon ki devan zot.

Akoz sinon si nou al ankor en mwan, 2 mwan, by the time sa bann proze i retournen, bann kou ki nou’n mete pou fer sa bann proze pou’n konsiderableman ogmante.

So, mon pe enplor ou. E enplor Gouvernman, an traver ou, ki bann kestyon parey mon ser, e mon frer sorti Anse Royale e Baie Ste Anne. Bann kestyon ki tous zot bann dimoun direkteman, i a kapab ganny adrese dan en fason konkret.  Mersi Mr Speaker.

 

MR SPEAKER

Mersi Onorab, Minis.

 

MINISTER MAURICE LOUSTAU-LALANNE

Wi, mersi Mr Speaker. Wi, nou okouran. Mon’n osi aprann ki siman aparaman in sorti R90 in ariv R150 en bal. Me, mon krwar ti R125 in ariv R150, me lefe se mon pe tyeke egzakteman kwa ki’n koz sa ogmantasyon.

I pa zis lazistaz foreign exchange, deviz, non.  I annan lezot kou, e mon bezwen al analize o profon, lo en item ki’n vin a mon latansyon la. E donk wi, nou bezwen reste focus lo la.  Akoz definitivman kou konstriksyon pou ogmante, i kler.  Mersi Mr Speaker.

 

MR SPEAKER

Mersi Minis. Onorab Wavel Ramkalawan.

 

HON WAVEL RAMKALAWAN

Mersi bokou Mr Speaker. Mr Speaker mon anvi zis demann Minis. Ki lespwar ki i annan? Vi ki pou renovate en Lakaz Mor, ou met 3 extra chillers. E, ti annan bann problenm tiles ater. Ki scope of work i pa’n, sa batiman pa’n bezwen. I napa naryen spesyalize. Parske, en Lakaz Mor ou met en dimoun ki’n mor, ou pa bezwen al rode kot pou met ventilator, ki mannyer pou fer isi, ki mannyer pou fer laba.  Si, pou renovate en lakaz mor, i pran Minister Lasante 2an, ki lespwar ki ou annan ki en Isolation Centre ki parey ou’n dir ki en batiman spesyalize, pou konplete dan 2an? Mersi bokou.

 

MR SPEAKER

Mersi Onorab, Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab. Wi, mon tann ou loud and clear. E, mon krwar nou resolve se fer sir ki sa bann metod travay pa kontinyen. Sa i enn. 2) nou bezwen bokou pli serye dan nou travay toulezour. I annan challenge, mon pa dir napa.  I annan problenm mendev, mon pa dir napa. I annan problenm Bidze. Me nou osi, nou donn bokou larzan pou fer sir ki sa bann keksoz i ganny depanse korekteman e a ler.

So, mon larepons se, nou pou kontinyen persevere, e mon pou port en latansyon bokou, bokou pli spesyal si i neseser. Pou fer sir ki tou proze Gouvernman, proze lenfrastriktir Gouvernman. Partikilyerman sa Isolation Centre, akoz nou dan COVID. I pa pe ale pou omwen 18 mwan o minimonm. I annan ki dir i pou reste ek nou toultan. Ki sa Isolation Centre i vin bokou pli irzan, e nou’n koz lo li, time and time again. Prezan dan son delivery, letan nou annan larzan tou zafer in pare. Nou annan bon plan arsitektir al par bann expert.  Nou bezwen make it happen! Mersi Mr Speaker.

 

MR SPEAKER

Mersi Minis. Nou a pran en dernyen kestyon. Onorab Churchill Gill.

 

HON CHURCHILL GILL

Mersi Mr Speaker. Minis, pou sa 2an, in pou nou pep Praslin, in koz nou bokou lenkonvenyans. Menm semenn pase nou’n annan dimoun ki’n bezwen al La Digue pou fer letopsi, apre retourn Praslin. E, mon ti a swete ki sa deadline ki ou’n donn nou, i ganny respekte 100poursan. Pou ki nou bann dimoun, zabitan Praslin i a kapab ganny sa bann servis parey ki zot devret. Mersi.

 

MR SPEAKER

Mersi Onorab, Minis komanter?

 

MINISTER MAURICE LOUSTAU-LALANNE

Mersi Mr Speaker. Mersi Onorab.  Onorab, mon’n poz sa ater mon. Prezan mon bezwen fer sir i ganny enplimante. So, si ou le, ki mannyer, sharpen ou lafrin, sharpen ou lafrin ou. Mersi bokou Mr Speaker.

 

MR SPEAKER

Mersi Minis. Bon, nou’n ariv a lafen kestyon pou Departman Lasante, ki Minis pou responsab pou Finans ti pe stand in pou reponn sa bann kestyon. Mon ti a kontan remersi Minis. Me, byensir nou pou vwar li apre midi ankor. E mon ti a kontan remersi Anbasader Llyod, Dr Reginald, Dr Louange, e Mr Vidot, ki’n akonpanny Minis bomaten.  E pou nou kapab dil avek sa 6 kestyon pou Departman Lasante.  ABC pe rankontre 2er dan Speaker’s Conference Room.  E, Lasanble pou resume son Sitting 2er edmi apre midi. So, Minister nou pou vwar ou 2er edmi, pou Private Notice Question.

 

(BREAK)

 

MR SPEAKER

Bonn apre midi tou Manm Onorab.  Bonn apre midi Minis Maurice Loustau-Lalanne. Bonn apre midi tou dimoun ki a lekout, e pe kontinyen swiv travay Lasanble Nasyonal. Premyerman mon a prezant en leskiz pou sa pti glitch teknik al vizavi son. Me mon ava osi prezant en leskiz pou retar ki nou gannyen pou nou repran nou travay apre midi. Sa an vi travay Komite ki nou ti pe fer pandan lunch time.  E byensir mon prezant mon leskiz osi tou avek Minister Loustau- Lalanne.

Nou ava al direkteman lo Private Notice Question, ki pou ganny poze par dirizan Lopozisyon Onorab Wavel Ramkalawan. Onorab.

 

HON WAVEL RAMKALAWAN

Mersi bokou Mr Speaker. Mr Speaker, etandonnen ki zil Praslin ek La Digue, i spesyal par lefe ki preski tou biznes ek zabitan i annan en koneksyon, oubyen travay dan nou Lendistri Prensipal, Tourizm. Ki’n vreman ganny afekte avek lenfeksyon COVID-19. Eski Minis pou Finans i kapab dir sa Lasanble, premyerman, konbyen biznes par zil ti fer laplikasyon pou lasistans finansyel? Dezyenmman, konbyen in ganny aksepte? E konbyen in ganny rezete? Ki rezon?

3) Eski Gouvernman i ava rekonsider bann laplikasyon ki’n ganny rezete? Avek bi siport lanplwa pou tou Pralinwa ek Digwa. E finalman, dan ki sekter eski bann dimoun ki’n perdi lanplwa dan sa 2 zil, pou al fer progranm reskilling? Mersi bokou.

 

MR SPEAKER

Meri Onorab. Minis.

 

MINISTER MAURICE LOUSTAU-LALANNE

Mersi Mr Speaker. Mr Speaker, Onorab Leader Lopozisyon. Tou Manm Onorab Lasanble Nasyonal. Tou dimoun ki a lekout, bonn apre midi. Mr Speaker depi ki Minister ti lans lapel pou dimoun fer laplikasyon pou lasistans.  Minister in resevwar 4,837 laplikasyon. E sa i 772 an plis ki mon ti’n deza anonse, e ki ti 4,065. Ladan, 4,819 in ganny konsidere, e 3,305 in ganny peye pou en sonm R145milyon pou mwan Avril.  Pou mwan Me, 3, 178 laplikasyon in ganny peye pou en lavaler 141.97milyon. Ladan, 699 laplikasyon in ganny rezete. E, i ti reste ankor 8 laplikasyon pou assess.

Mr Speaker, dan sa sonm i annan 539 laplikasyon pou Praslin, pou lavaler R25.8 milyon. E 212 pou La Digue pou lavaler R8.71milyon. Bann biznes i varye. I annan tour operater, diving Instructor, skipper, Taxi operater, lotel, bakery, fitness gym, souvenir shop, boutique, fermye, take away, boat charter, guest house, car hire, mizisyen, restoran, building contractor, fisherman, football club, bike operator, self-catering, eksetera.

Pou Praslin i annan 463 laplikasyon ki’n ganny aksepte. Pou en valer R16.8 milyon, e  76 in ganny rezete pou en sonm R6,4 milyon.

Mr Speaker, pou La Digue ti annan 178 laplikasyon ki’n ganny aksepte, pou en sonm R5.7 milyon. E, 34 in ganny rezete pou en lavaler R1.6 milyon.

Mr Speaker bann rezon akoz serten laplikasyon i ganny rezete i varye. Par egzanp, i annan biznes ki annan ase larzan lo zot kont labank pou zot kapab pey zot travayer. I annan biznes ki pa’n zanmen anrezistre kot SRC, oubyen zot pa annord avek zot bann tax return. Serten biznes pa donn tou lenformasyon, e ler in demann zot, zot in kontinyen pa donnen.

E katriyenmman i annan bann biznes konstriksyon class 1 e 2, eksepte si zot ti annan en Kontra avek en lotel, e sa Kontra in ganny kennsel.

Mr Speaker, an sa ki konsern bann laplikasyon ki’n ganny rezete, i deza annan en appeal process. E, alors mon ankouraz bann biznes pou fer zot appeal. I annan osi ki’n apply pou mwan Me.

Mr Speaker, Prezidan in fer 4 meeting lo sa size avek Minister konsernen. Reprezantan SCCI, e private sector, Lasosyasyon Biznes Praslin e la Digue. E osi reprezantan Linyon Travayer pou fer sir, ki tou bann issues ki relye avek travayer, i ganny fer dan en fason byen e korek.

Antretan, pou kontinyen annan diskisyon e konsiltasyon, avek tou parti konsernen. E Mr Speaker la bomaten, in annan en senkyenm meeting State House.  Mr Speaker, parey zot konnen, sa 2 zil zot depan bokou lo Sekter Touris. E lamazorite bann zabitan i swa anplwaye, oubyen fer zot prop biznes dan sa sekter.

Minister Lanplwa, pe analiz sityasyon e zot pou travay etrwatman avek Lazans pou pti biznes ESA. E bann lezot lotorite lo sa 2 zil. Pou war ki zot bann bezwen an-term lanplwa, e formasyon pou pti biznes.

Apre ki sa bann bezwen in ganny etablir, e depandan lo konpetans sa bann dimoun. La, sa progranm reskilling i a ganny fer. I enportan pou note ki serten dimoun ava ganny reskill dan bann nouvo domenn. Ki ava ganny etablir byento.

Me, serten i ava ganny nouvo skills, relye avek Sekter Tourism. Sa i enportan, akoz dan le fitir ler Lendistri Tourizm i reouver lo La Digue ek Praslin. Sa bann endividi ava annan plis konpetans pou deservi sa lendistri. Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi Mr Speaker. Mr Speaker, premyerman, mon anvi demann Minis en kestyon. E la mon anvi fer Minis konpran ki poudir sa ki mon pe sey fer atraver sa kestyon, i vin prensipalman apre ki Onorab Afif ek mwan menm, nou’n aktyelman asiste en meeting kot bann dimoun ki pe travay direkteman dan Lendistri Tourizm, zot in eksprim zot lekor. Eski Minis i realize premyerman, sa premye rezon konsernan larzan dan labank.

Ki pou dir, i pa’n zanmen annan okenn negosyasyon, okenn konversasyon. Okenn dyalog ant Minister Finans, sa Komite avek sa bann dimoun pou rod en lesplikasyon lo sa larzan ki dan zot kont.

E alors, zis baze lo la, Minister in war larzan, zot pa konnen akfer sa larzan i lo kont. E, zot in zis rezete. Par egzanp, e Minis i konn byen Lendistri Tourizm ki mannyer i marse. I annan bann, avek COVID, in annan bann eleman komisyon ki sa bann landrwa kot zot link avek. Bann Lazans, ki aprezan pe dir avek zot, fodre ki zot refund. Sa dan li menm li, i tir en kopo larzan.

I annan serten biznes, ki letan zot regard son kont zot war son larzan. Me, sa larzan ti’n fini ganny earmarked par egzanp, pou renovasyon zot batiman. Zot lenstitisyon. E i annan bokou lezot rezon, tel ki sa dimoun ki’n fer biznes, in pey tou son travayer, e li aprezan li osi tou in met son savings dan sa kont. E sa i apel son savings.

Alors sa premye kestyon. E se la kot mon demann re konsiderasyon, pou fer ki, eski Minis i ava rekonsidere, afen ki i annan sa konversasyon avek sa bann diferan dimoun an-term zot larzan, ki zot in servi prensipalman pou rezete?

E, dan sa konteks, eski i ava konsidere pou li, parski i annan en demann Minis pou ou vizit Praslin avek La Digue pou koz avek sa bann dimoun.  E menm, eski Minis i ava konsidere pou ki i annan zofisye, la ki zot travay in vin mwens.  Zofisye ki ava mont lo sa 2 zil pou zisteman rankontre prensipalman, sa bann dimoun ki zot laplikasyon in ganny rezete.  E, nou pe war la, ki napa bokou Minis. Konmsi mon pe demann ou pou ou konsider sa? Konmsi avek en serten dirzans.

Praslin ou dir i annan 76, La Digue i annan 34. E, La Digue pou lavaler 1.6 milyon e 34 dimoun. Mon sir ki i en travay 2 zour, 3 zour pou asize pou ganny sa konversasyon.  Sa i mon premye kestyon. Parske Minis, eski letan, si zot in pran kont ki poudir letan zot pe regard larzan ki en biznes i annan dan son kont. Letan zot in fer tou sa bann analiz, eski zot in pran kont ki poudir letan Lasanble ti aprouv sa larzan, sa Bidze 1. 090 bilyon, son laliny anba ki i ete se wage Grant.

I pa ti pou al ed sa biznes li. Sete pou ed lapey travayer. Alors, eksplik nou akoz ki zot in vin devan Lasanble pou rod en wage Grant, pou travayer, e ki nou’n aprouve, e ki ozordi, zot in vir sa wage Grant pou zot regard biznes?  Biznes napa naryen pou fer avek wage Grant. Parski wage Grant i al direkteman pou sa travayer. E, dan sa konteks, eski Minis pa krwar ki spesyalman pou sa bann landrwa, parey in dir li menm, kot bann dimoun, e kot mon kestyon osi tou in report sa. Spesyalman kot sa bann dimoun, pran La Digue par egzanp parski i pli ptipti.

Tou dimoun i annan en koneksyon avek tourism. Letan sa biznes pa ganny ede, e sa biznes i trouv li dan serten difikilte, sa travayer, i napa en lot landrwa pou ale. Mahe, parey ou menm ou konnen, i ava al IOT. Si IOT pe rod travayer. I ava kapab al dan en lot lendistri. Be lefe ki sa bann landrwa, both Praslin avek Mahe, i senpleman napa en lot louvertir. E ki sa wage Grant i sipoze al direkteman pou sa travayer, eski alors Minis i ava vreman rekonsider sa?

E, dan sa menm konteks Mr Speaker, mon anvi osi met devan Minis, letan mon pe dir sa re konsiderasyon, parski mon anvi Minis, si Minis i realize ki poudir letan ou pe balans welfare avek bann dimoun ki ti lo en lanplwa fulltime. E ki la son biznes, zot biznes i en pe, i pou trouv zot dan problenm, eski Minis i realize ki poudir sa i kapab fer en serten lakoler?

Parski lo en kote, bann dimoun ki lo welfare zot, zot pe ganny asiste, e mon napa problenm avek sa. Me selman lo lot kote, dimoun ki ti pe ganny en lanplwa, e ki ti a kapab kontinyen. Zot, zot trouv zot pe sorti lo en lapey dizon R8mil, kot zot pou al tonm lo welfare R3mil. Alors, mon pe met sa bann sityasyon. Parski apre tou, letan ankor enn fwa mon pe regard ou bann shift Minis, konmsi mon pa pe trouv i pou kas leren sa Bidze.

Parski nou pe koz 1.6 milyon, ki I’m sure avek sa konversasyon kekfwa i ava tonm en pti git pli ba. Kontrakter, ensidswit. Tou sa bann rezon pou La Digue e 6. ekek milyon pou Praslin. Ki konmsi si nou pa kapab rezourd sa sityasyon, olye les li trennen. Mersi bokou.

 

MR SPEAKER

Mersi Onorab Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab pou sa bann kestyon e sizesyon. Pou komanse, pou Komite letan i ti rankontre, i ti met li serten kriter pou evalye bann laplikasyon. E dan sa kriter i annan, e i ti demande pou met bank statement e tou bank statement;- an Roupi, an Euro, an Dolar, pou ganny en apersi. E Komite in etablir en cut off.

Setadir, in pran konsiderasyon lo sa laplikasyon, bann depans sa biznes lo form 1. E akoz osi ou’n demann mwan wage Grant, apre nou pe ed biznes and so on. So, mon pou donn ou lesplikasyon ansanm. Nou ti dir met payroll. So, nou konnen ki sa i en kou fixed, payroll. Zot in azout, si i annan loan. Si i annan lezot depans, parey elektrisite, delo.

E apre zot regard lakantite larzan ki annan dan kont sa biznes. E zot annan en formil ki zot servi.  Si ou annan plis ki en serten kantite, ou pa ganny asiste.  Si ou annan mwens ou ganny asiste. E donk, danze lo la desizyon i ganny pran. Ou annan rezon, letan ou dir, pa’n annan konsiltasyon direk avek sa biznes pou dir li, ok nou war ou annan R2milyon. Ki ou ti pe al fer ek sa R2milyon?  I pa’n annan sa diskisyon.

Se pour kwa ki, sistenm ki nou pou servi. E mon’n mansyonnen annou servi appeal.  Akoz letan ou appeal, ou pa zis ekrir en let, ou dir, ou’n dir mwan non, mon pe appeal, donn mwan. Ou bezwen eksplike. E si ou dir ok, dan sa 2milyon, mon ti annan 1milyon ki mon ti pe al depanse pou mwan fer tel keksoz. Mon ti annan en transfer mon bezwen fer overseas pou tel keksoz. Ou tonm par anba sa barenm, ou kalifye.

E strikteman lo La Digue, e mon dakor avek ou. La Digue se en zil touristik. E ozordi napa en sel touris lo La Digue. E mon konpran sa ki ou pe eksplik mwan. E mon konsyan. E depi lontan nou pe dir ki sa pou arive. E ozordi i arive dimoun i war. So, nou bezwen regard zot diferaman. Alors, en biznes La Digue ki kekfwa nou’n rezete, akoz i ti annan ase larzan dan son kont pou Avril. Definitivman pou Me, i pou annan mwens larzan. Akoz naryen pa pe antre. Alors, letan i fer son aplikasyon pou Me, i riske kalifye li.  I bezwen kalifye.

E lot pwen ki nou anvi fer sorti se ki, letan nou ed sa biznes lo form 1, nou donn li larzan zis pou saler son travayer. Nou pa donn li larzan pou lezot keksoz. So, i ankor pou wage. Parey nou ti demande dan Lasanble.

Apre ou annan form 2. Form 2, i pou bann self-employed. E ou annan biznes zot apply lo tou lede form. Lo form 1, akoz i anploy 4 travayer dan en car hire. E form 2, li sa propriyeter car hire li osi parey ou’n dir, in fer saving. I annan en larzan lo son kont. So, i apply lo form 2.

E nou konsider tou lede laplikasyon.  Pou son 4 anplwaye, nou donn li en desizyon. E pou li menm nou donn li en desizyon.

So, vwala ki mannyer sa i marse. Me mwan, ou’n demann mwan rekonsider appeal.  I annan 2 keksoz, nou ti osi dir ki apre sa premye travay ki Komite pou fer pou aplikasyon Avril. Zot pou fer en debrief e zot pou fer en bann rekomandasyon.  Kote zot in al mal. Kekfwa kriter i tro strik. Pou regarde ki mannyer pou relax kriter.

E sa in ganny fer yer. Sa meeting  in ganny fer yer apre midi. Enkli reprezantan Sekter SCCI, ki part sa Komite. E zot pou fer rekomandasyon Lendi, pou nou prezan regarde ki mannyer nou pou adapte, sanze, si i neseser kriter.

Mwan, mon krwar ki i annan en diferans ant gro biznes ek pti biznes lo sa kriter larzan dan labank. E nou bezwen aziste. So, mon pe dir ou wi, nou pou revize. Me nou bezwen ganny sa rekomandasyon sorti kot sa Komite pou nou revize.

Lot keksoz, pou mont la Digue, mwan mon napa problenm pou mont La Digue. Dernyen fwa mon ti mont La Digue, mon ti desann Mahe pou mwan vin en fonksyon, apre mon ti re mont La Digue.  Mon ti pe travay mwan. Mon’n pran mon bisiklet mon’n met la o bor jetty, mon’n pran schooner mon’n desann. Sa lepok schooner sa. Pa lepok Cat Rose, ferry boat sa.

Letan mon retournen apre mon fonksyon isi, Plantation Club sa fonksyon.  Mon remonte, mon rod mon bisiklet, napa bisiklet. Ou konnen ki zot in fer? Zot in pran mon bisiklet ki mon’n lwe, pa pou mwan sa bisiklet mon’n lwe. Zot pran mon bisiklet, zot in zet dan delo sale. In noy mon bisiklet. E, prezan mwan, mon bezwen desann al rod sa bisiklet sa boug ki mon’n lwe. Ou war, so par ler zot tret mwan dan en serten fason spesyal.

Me mwan, mon pa re pou mwan mont La Digue, mon pa per personn. Mon pou mont La Digue mon al koz ek zot. Mon ava mont enn, de Manm Komite. Nou pa bezwen mont tou dimoun. Ou konpran? E nou ava koz avek zot, nou ava fer zot konpran ki mannyer sa zafer i marse. Me, mon pe sipliy avek zot. Akoz par ler, letan sa Komite i pran en desizyon. I annan lenformasyon ki pa’n anpli dan sa bann form. Kekfwa zot pa’n konn anpli, oubyen zot in pa’n mete, whatever it is.

So, kantmenm in ganny konsidere i ganny met pending. Letan nou dir met pending, nou telefonn sa bann dimoun, nou demann zot plis lenformasyon. E, parey mon’n dir dan mon larepons, i annan serten lenformasyon ki zanmen i vini. E, i annan nou’n bezwen rezete, senpleman akoz zot pa oule donn sa kont labank, par egzanp.

I annan plizyer ka koumsa kot nou’n rezete akoz zot refiz-e donn sa kont.  Kantmenm nou’n demande plizyer fwa. I annan kot SRC nou dir taks. I annan biznes in demann lasistans, me depi 2010 i pa pey en sou tax.  So, nou pou rezet li otomatikman. Mon pa pe dir ou i annan biznes La Digue ki pa pey tax depi 2010. Alors zot in ganny rezete. Me tousala i bann -.

I annan biznes i demann ou en lasistans saler, R40mil. Son larzan dan labank 3 milyon.  So, nou pe dir come on, ou kapab siport o mwen Avril. I annan R10milyon son saler i demande, i annan li R 2 milyon dan son kont. So, ou war mon pe don ou bann legzanp koumsa ki enportan.

Apre, i bon nou lesanz lenformasyon. Nou refiz en biznes, pa konpletman. Kekfwa mo i mal, nou aprouv pou li demann R20mil, nou donn li R19,600, nou tir R400 dan nou -. Komite i fer son analiz, tir R400. I appeal, i dir donn li sa R400. Be ou konpran, mon pe donn ou sa lesplikasyon akoz nou fer fas avek tou sa bann keksoz, e en dialog i enportan.  Pou lesanz sa bann lenformasyon. Pou dimoun konpran ki i pa en task fasil.

E kote appeal, letan ou dir re vizite.  Kote appeal mwan mon’n dir avek Komite, e Appeals Committee an partikilye, fodre ki zot annan en lizye imen lo appeal.  Akoz la nou pe tous difikilte ki bann dimoun, bann biznes pe pas ladan. So, vwala Mr Speaker mon larepons pou sa. Mon pare pou mwan mont Praslin, mon pare pou mon mont La Digue pou nou regarde.

E wi, nou prefere kontinyen donn lasistans bann biznes pou zot kontinyen anploy Seselwa. Si zot biznes zot le fer redundant, sa i en lot diskisyon. Me, nou, nou pare osi pou anpes sa Seselwa perdi son louvraz. E, si i perdi son louvraz fer sir i ganny en lasistans, e nou pou pey li son saler ki i ti pe gannyen an ka i fer ganny redundant. E, nou pou met li anba sa Scheme ki ou’n demann mon taler lo reskilling.

So, vwala ki mannyer nou pe proceed. Me, pou konplet sa larepons akoz i enportan, nou’n pey parey mon’n dir, Avril ek Me. Nou’n ganny delay so nou pe fast track Me, pou tou sa bann ki’n ganny peye. E la nou’n catch up, nou preski fini. Nou annan enn de pti zistwar ki nou pe kontinyen fer.

Me, pou Zen, nou santi ki Lendi ki vini, nou pou eksplike bann sanzman.  E nou pou osi eksplike prosedir pou fer laplikasyon pou Zen. Akoz ki nou vwar definitivman bann ki kekfwa nou’n ede an Avril, an Me, Kekfwa an Zen, sirtou bann biznes lo Mahe. Serten sekter biznes i diferan. E nou pa pou bezwen kekfwa ed li ziska sa kantite. Me i en keksoz nou bezwen regarde.

Parkont, i annan lezot biznes parey ou’n dir korekteman lo La Digue, lo Praslin, kekfwa lo lezot zil. Kot napa en sou touris, zot reveni i zero.  Nou bezwen letan zot fer sa laplikasyon konsider li anba en nouvo lizye e nou pou bezwen asiste zot. Si nou pa’n asiste zot an Avril akoz zot ti annan ankor en pe larzan dan zot kont. So, vwala en pti pe Mr Speaker, mon larepons pou Onorab Ramkalawan. Mersi.

 

MR SPEAKER

Mersi Minis. Onorab Ramkalawan.

 

HON WAVEL RAMKALAWAN

Mersi Mr Speaker. E petet mon ti ava dir Minis mersi bokou pou sa re lasirans ki in donn tou sa bann biznes, ki poudir byento, i pou Praslin e i pou osi La Digue avek son lekip pou koz avek zot.  Be, Mr Speaker, mwan mon pous ankor en pti git lo sa size sa larzan ki nou’n vote koman en Lasanble pou bann travayer. E petet la i vin lo 2 nivo, enn bann biznes kot bann dimoun i travay. Bann retar ki zot in gannyen.

Par egzanp, en dimoun la in anvoy mwan en let, ki date le 4 Me, me selman in ganny sa let ozordi.  Ki i annan fristrasyon. E anmenn tan osi, i osi annan en pe fristrasyon lo bann demars ki dimoun in fer.  Serten dimoun par egzanp in ganny demande pou anvoy son kont labank. Mon konn dimoun ki’n anvoy son kont labank 4 fwa. E apre in ganny dir in perdi, nou pa konnen kot in plase. E ziska aprezan nou pa ankor ganny en sou.

Petet dan sa konteks letan Minis pe donn bann, letan Minis in donn sa bann detay. E an plis ki sa vi sete Minis menm ki ti anonse ki Gouvernman baze lo sa sonm ki nou ti vote. In trouve ki zot ava kapab annan ase larzan ziska Desanm.

So, eski Minis dan sa ka, letan i ape re konsidere. E regard ankor de nouvo sa bann laplikasyon. E la, mon bezwen dir ek Minis, ki sa sete en pwen ki mwan, mon ti dakor ki si ou pa’n pey ou tax byen. Si ou an dezord i pou bezwen annan, ou bezwen regilariz ou sityasyon. Avan ki ou kapab kalifye.

So, lefe ki bokou sa bann biznes, e la petet mon ti ava menm dir avek permisyon Speaker, menm lo nivo Mahe tou i annan en kantite sa bann pti, pti spesyalman. E letan ou pe koz bann ptipti biznes Seselwa. Mwens ki 24 lasanm ensidswit ki’n ganny rezete.

Eski Minis i ava seryezman konsidere ki lefe ki sa larzan i la, e ki Gouvernman in dir ki i pou pey bann travayer, ki petet ganny fer redundant.  Ki alors, i ava rekonsider sa pou ki sa bann biznes zot menm, zot pa ava santi sa nesesite pou fer okenn travayer redundant. Parski zot ava annan sa garanti ki poudir zot pou gannyen sa, zot salary bill pou ganny peye. Vi ki Gouvernman pe donn sa commitment.

E, sa Mr Speaker, mon pe dir sa Minis pou ankor enn fwa sov Gouvernman li menm li. Sov Leta sa sirkonstans kot li i pou bezwen ranmas sa bann dimoun ki ganny fer redundant. E apre al etablir nouvo progranm. Al ankonbre li.

Par Egzanp ki ou pou al fer avek 200 chambermaid, me si sa 200 chambermaid ou’n fini dir ou pou pey zot lapey, zot reste dan sa biznes kot zot ete. E, sa i ava fasilit ou travay, e ki i ava annan sa korperasyon ant anplwayer avek anplwaye. E ki sa biznes li, i konnen ki poudir sa bann dimoun i ankor lo son payroll, e letan in ariv ler pou nou tou hands on deck parey nou dir, sa bann biznes i ava la. Pare pou relans sa Lendistri Tourizm. Pou nou kapab reganny larzan.

E alors basically mon pe fer propozisyon pou ki Gouvernman li menm li, i trouv li dan en sityasyon kot son lanmen li menm li. I pa anpaye dan sa bann zafer, me lo lot kote tou sa bann biznes, zot osi tou zot pe ganny sa led, e zot bann travayer ki zot kontan en kantite. E letan zot pe mazin lavenir zot biznes i a kapab balanse. Pou ki once and for all, nou rezourd tou sa bann sityasyon. Se sa ki mon pe met devan ou Minis atraver Speaker. Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Wi, Mersi Mr Speaker. Mersi Onorab. Lo kote bann delay, mon premye pou aksepte ki’n annan bokou defayans avek kominikasyon. Fer aplikasyon, ou call pa reponn ou call, dir ou wi i pe process. Semenn i pase ou pa tann naryen. Mon osi mon’n dil avek bokou sityasyon resaman. Kot zot in vin direkteman kot mwan, e mon osi mon’n al regarde ki leta zot laplikasyon ti ladan. E, mon’n war kote i ete. Sistenm ki nou ti annan an plas ti en sistenm manual pou komanse.

Apre, shut down in vini, plis dimoun in kominik ek nou par email. Avek sa sistenm email, in annan osi problenm. In annan ki’n anvoy dokiman tro bokou. Ou war dokiman selman ou pa kapab enterpret sa dokiman. I annan akoz in anvoye, i krwar in anvoy kot nou. In annan sa bann delay.

E la sa bann aplikasyon nou pe dil avek, sa detrwa ki reste la. I annan in fer laplikasyon depi komansman Avril. E prezan ki nou’n re antre dan sistenm nou pe al rode kot i ete. So, sa sistenm i defayans.

E nou’n fer DICT travay lo en sistenm automated online system, email.  Setadir letan ou antre i pou sequencely one time. Ki vedir letan ou’n anvoye, nou pou konnen i la, e i pou rantre dan nou repertwar. E nou pa pou perdi li ankor. Sa sistenm pe ganny teste la ale moman. E nou le entrodwi li, apartir Lendi. So, pou sa nou apologies, in annan sa bann defayans, nou konnen.

Me, nou pe travay pou nou fer sir ki sa bann fristrasyon i retire. E mon remersi tou aplikan ki’n bezwen esper en pe letan. Me nou’n nobou ariv a lafen sa louvraz.

Lo kote redundancy, avek peyman saler, parey ou’n eksplike. Wi, i toutafe posib, e nou, nou prefer sa solisyon. Setadir, pey sa biznes e fer li   pey son travayer e gard fer son travayer. Akoz si, e nou pa oule osi vin manage biznes prive dimoun. Si, li i deside i le fer ale son bann dimoun. Nou dir li fer son laplikasyon e nou, nou a pran sa bann dimoun. Enn bann rezon se ki Lendistri in osi dir nou, ki anvi ki Gouvernman pe pey sa saler, zot antisipe en rezistans konmkwa i dir be i pe peye, napa touris.  Annou pran dan ka lotel. Dan bann pti guesthouse. Nou pou reste dan lakour.

Be sa nou demande ki Linyon Travayer, nou menm, nou fer zot konpran ki nou pe pey ou en saler desann vin travay.  Akoz, nou pe pey ou en keksoz vin travay.  Si menm ou vini pou nou reskill ou, oubyen pou sa biznes li menm fer sa chambermaid, vin en barman. Oubyen fer sa barman, vin en junior supervisor, mon pa konnen kwa. Dan sa lanvironnman vini, desann.

I en pledwari mon pe fer, pou tou travayer ki pe ganny asiste direk avek Gouvernman anba sa Scheme.  Preferableman avek zot biznes. Reponn lapel zot propriyeter biznes. Vin travay, donn en koudmen, annou fer li avanse.

So, sa i en pledwari pou fer.  Me parey mon dir ou mwan, mon napa okenn obzeksyon. O kontrer si nou kontinyen pey zot pou reste dan zot biznes i en fason pli korek e mon siport sa sizesyon ki ou’n fer. E mon demann parey mon’n dir en pledwari ki zot travay, zot pa zis reste dan lakour, zot dir Gouvernman pe pey zot. Nou pa anvi tann sa dialog. Vwala Mr Speaker. Mersi bokou.

 

MR SPEAKER

Mersi Minis.  Onorab Ahmed Afif.

 

HON AHMED AFIF

Mersi Mr Speaker.  Mr Speaker mon kestyon i vize lo sa enn bann rezon Minis in donnen pou rezet bann laplikasyon, enn sete zot annan ase larzan e ou’n eksplik ou’n donn en pe lesplikasyon lo bann rezon par-ler ki zot in rezete.  Parey ou’n dir en dimoun i annan R40mil saler, me i annan R3 milyon dan kont.

Minis eski ou kapab eksplik nou premyerman lekel sa bann kriter dan en fason kler parske ou dir zot servi en formil?  Tou biznes i diferan e en biznes i kapab annan en larzan dan en kont ki in kit la, me sa larzan pa pou li.  I kapab larzan aksyonner, ki’n deside met sa la.  I kapab larzan loan ki ti’n pran e i pa reveni ki sa biznes in gannyen alor i pa son larzan.  Alor premye kestyon ki kriter kler ki zot in etabli, pou zot kapab determinen si sa i en rezon ki sifizan pou rezet en aplikasyon?

Mon 2enm kestyon se Minister Finans in eksplike ki pou bann dimoun ki pa pe ganny lasistans, Gouvernman i pare pou abzorb en pe sa bann travayer pou pey zot.  Me nou pe get sirkonstans La Digue e Praslin.  E La Digue pli partikilye, kot i vre si napa touris tou keksoz i fermen laba, akoz zot napa okenn lendistri ki fer prodiksyon.  Tou sa ki zot fer La Digue i annan pou fer avek touris.  E si ou napa touris tou i ater.

Alor eski pa i pa normal pou pep bann dimoun Digwa, espekte ki Gouvernman dan sa sityasyon koumsa, si azir dan en fason pli favorab anver zot, vi ki sa bann sonm ki nou pe koze 5.7milyon in peye rezete 1.6 i pa bann gro sonm, vizavi 142milyon zot pe peye par mwan.

Eski Minis ti a trouv li normal k i zot devret ed sa bann biznes e annan mwens latansyon pou si i annan en pe larzan dan kont ou non, parske kriter pa kler, ki alor tou dimoun i ganny ede La Digue.  Napa okenn rezon pou zot fristre, akoz zot fristre en kantite zot ki pa pe kapab anploy dimoun prezan.  E Gouvernman i dir be i ok si ou pa pe anploy sa dimoun, mwan mon ava pey li mwan.  Me akoz ou pa ti kit sa larzan ek sa biznes li menm li i ti a pey sa bann dimoun, i ti a tenir en pe i ti a rod en fason balanse.  E alors lavi ti a kontinyen san okenn sa bann lanmerdasyon pe rod papye oubyen annan ase larzan dan kont.

So mon ti a demann Minis ki i posib pou zot get La Digue e Praslin avek en lizye vreman spesyal, vi bann sirkonstans spesyal ki zot trouv zot ladan, e ki koumsa sa 2 zil ki depan antyerman lo touris a kapab sirviv sa peryod difisil ziska ler touris i repran dan en pli gran lanpler?   Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Parey mon’n eksplike kriter ki Komite in mete pou mwan Avril in ganny aplike.  I pa zis larzan dan kont labank.  I annan lezot kriter osi parey mon’n mansyonnen.  Pou mwan devwal sa kriter la, mon krwar i kapab kree serten sityasyon.

Me parey mon’n eksplik ou, mon krwar ki sa larzan ki dan kont labank i ganny miltipliye oubyen i ganny divize, par en serten sif, pou regarde si i annan ase larzan san upset sa biznes me i vre nou pa konnen pou kwa sa larzan i deza la.

So i en desizyon ki’n ganny pran dan sa Komite.  Me parey mon’n dir ou apre sa debrief, mwan mon krwar i neseser pou revwar sa kriter.  E fer en distenksyon, ant gro ek ptipti.  La ou pe demann mwan fer en lot distenksyon, ant Mahé, Praslin ek La Digue.

E mon konpran, La Digue mon konpran 100poursan, Praslin osi a 90poursan.  Ki efektivman napa touris napa reveni.  Me par-ler osi ou ava sirprann.  Bann pti biznes touristik lo sa bann zil, pou sa ki pe demande, konman en sipor salaryal, ek larzan ki zot annan, i vreman formidab.  E mon dir ou bravo.  Zot in byen fer.

Donk ed nou pas sa letap Avril me i pou pir.  Parey mon’n eksplike.  So wi pou reponn ou kestyon nou pou revwar sa kriter pou fer li pli akseptab.  So sa ou annan mon garanti lo la.  Pou La Digue i annan plizyer sa bann biznes ki annan plizyer biznes.  Ou konpran?  E bokou biznes touris lo La Digue i annan bisiklet, i annan lotel, i annan restoran, i annan taksi, i annan plizyer.  Letan i fer aplikasyon i fer 8 aplikasyon.  I annan laferm, and so on. 

Me nou asiste zot partou nou.  Ou vwar?  Donk i pli spesifik i pli partikilye lo La Digue.  So se pou kwa nou’n met sa Appeals Committee la pou nou konpran en pe pli byen.  So nou lo menm wavelength. Zis  nou bezwen konplet sa nouvo kriter.  Ganny li aprouve nou a lans li Lendi, e sa voyaz letan ou fer aplikasyon i pa pou perdi.  Parey nou’n vwar in perdi.  Pou lev en pe sa fristrasyon.

Mon krwar si ou eksplik en dimoun i pou konpran.  Par egzanp i annan en biznesmenn lo Praslin call mwan i dir mwan, li in apply Avril i pa’n tann naryen, in apply Me, apre nou’n dyaloge i dir be ok, les tonbe Avril.  Konsider Me.  En pti biznes li.  Nou’n al rode nou kote son aplikasyon Avril i ete dan nou sistenm.

I annan drwa i annan nou demann zot, akoz nou’n annan sa bann glitches malerezman ki ki’n vini.  E sa in add en pe bann fristrasyon.  Me nou’n recover.  Ozordi nou napa bokou aplikasyon.  Pou mwan Me nou’n ganny nou 150 aplikasyon, nouvo aplikasyon.

E deza nou’n fini tret 42 aplikasyon, pou mwan Me.  Donk mwan Me i pou ale ase vit, napa bokou aplikasyon e fotespere mwan Zen nou, vwar apepre menm zafer.  Enn de sa bann ki’n rezete an Avril.  Mon vwar zot pou kalifye otomatikman sirtou da sa bann lo sa bann zil.  Mon pe repet mon lekor.  Me mon krwar i enportan mon re repet sa ki mon’n dir, zot pou vwar zot pe ganny asiste si zot ti’n ganny rezete pou konmanse.  Mersi Mr Speaker.

 

MR SPEAKER

Mersi Minis.  Onorab Noline Sophola.

 

HON NOLINE SOPHOLA

Mersi Mr Speaker.  Bonn apre midi Minis e tou dimoun ki a  lekout.  Minis ler mon pe regard lo La Digue 34 aplikan ki’n ganny rezete pou mwan i vreman bokou.  Akoz zil i ptipti e en bomaten ki ou fer letour ou fini tann menm sanson dan ou zorey partou in fini fatig ou.

Petet pou ou akoz ou isi ou vwar sa kantite ou pa pe santi parey nou.  Minis Vandredi le 29 dan meeting ti annan aplikan ki zot ti’n dir mwan ni en acknowledgement letter zot pa ti ankor gannyen.  E sa i vreman pa akseptab.  Si tou sa letan zot ti’n fer zot laplikasyon.

E osi Minis ou’n koz lo larzan.  Kantmenm 2 entervenan in koze, mon pe re tous ankor akoz parfwa ler nou vwar larzan en dimoun dan son kont, avan ki nou ti rezete sa aplikan nou ti’n devret apel li annan sa tête-ã-tête avek li, konnen pou ki rezon.  Rezon petet sa dimoun tou sa letan in anmas son larzan pou li fer son reparasyon son landrwa.  Me zis ler nou’n regarde nou’n vwar sa gro sonm, nou dir non nou pa pou donn li.

Me petet en dimoun li ki zis la avan COVID in arive, in servi sa ki i ti annan dan labank in fer son aplikasyon in fer son renovasyon, e li i pas tre byen tou son travayer i ganny peye.  Pou mwan sa i pa pe akseptab Minis. E mon pe demande ankor ki sa i ganny rekonsidere e nou revwar lafason ki sa bann dimoun pa ganny aksepte.

Minis mon apresye selman kantmenm ou’n dir ou pou annan sa prosedir kot ou pou revize, me revize nou pa servi menm kriter.  Revize nou bezwen adopte en lot kriter.  Me i domaz mon pa konnen ki kriter ou’n servi la, e ki kriter ou pou al servi ler nou sanze nou sanze nou pa met sanmenm ankor lo nou.

Mr Speaker mon ti a kontan Minis in, dir ki i pou vin La Digue ek Praslin ek son bann zofisye pou vin koz ek bann aplikan.  Minis mwan mon pe demann en pti pe pli lwen ki sa.  Eski ou pou kapab sa prosedir appeal i lo telefonn la avek email.  Me mwan mon pe demande si ou staff i kapab vin lo sa 2 zil kantmenm 2 zour.  Vin asiste sa bann aplikan bann aplikan ki’n ganny reject. 

        Akoz swa sa bann dimoun ler pe koz lo telefonn mon pa pe vwar ou lo lot bout difil, ki ou pe fer si ou pe entertain mwan, si ou pe riye eksetera.  Apre si i annan kestyon pertinan ki ou anvi demande, i mon pa pe vwar;- pa pe kapab me tandis ler nou tête-ã-tête mon kapab dir ou be sa ti koumsa sa ti koumsa ou pli konpran ou aplikan.

E osi pou tir sa konfidansyel lo sa bann dimoun.  Si zot bezwen vin Mahé dan sa napa larzan zot pou bezwen pey ankor.  E zis pou swiv sa, mon ti a kontan konnen Minis si ou annan en nide bann ki pa ankor ganny larzan mwan Avril, kan ki zot pou kapab gannyen?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Wi lo kote kominikasyon ankor enn fwa mon apologies ki in annan sa bann vatevyen.  Parey mon’n dir ou mwan personnelman mon’n enterakte avek bokou biznes Digwa lo sa sityasyon.

Menm apre midi avan mon vin la letan dan enterval dezennen,  mon’n kominik avek en biznes ki annan 3 biznes lo La Digue.  E zot osi zot fer zot aplikasyon depi Avril.  E mon’n konfirm avek zot desizyon Komite, zot pa ankor ganny peye.  Akoz la peyman pe al ganny fer.

Me pa reste bokou sa bann aplikasyon.  Me toulezour nou vwar aplikasyon ki vini.  Parey mon’n dir ou ti annan 4,065 nou’n ariv 4, 800 ekek.  E nou pa pe fer frenm en sel kou, akoz nou konpran sityasyon ki nou ladan e nou kontinyen travay.  Donk pou mwan Avril lo konsiderasyon in pli zou mwen terminen.  Me peyman pou sa detrwa ki reste zot ava gannyen la dan enn de zour.

E parey si nou pey zot Avril parey nou’n dir, e i pou Avril sa determinasyon nou pou pey zot Me an menm tan.  So zot pou ganny de peyman.  So si zot ti dir zot le R10 mil e Komite in dakor pou donn zot R10mil.  Letan zot pou ganny peye, zot pou ganny peye R20 mil.  E si zot apply ankor an Zen zot pa pe espekte zot pou ganny R20 mil an Zen.  Ou konpran?  Akoz nou pe met 2 ansanm pou nou catch up akoz nou konpran zot annan problenm finansyel.

Ou vwar sa bank statement ki nou pe demande, nou pa zis regard i annan 2 milyon lo dernyen laliny.  Sa, bank statement i osi ganny verifye atraver sistenm SRC.  Akoz nou bezwen osi regarde si i annan en TIN en Tax Identification Number, si in pey son tax, e parey mon’n dir nou vwar biznes depi 2010 i pa pey tax. 

        So li nou pou rezet li nou.  Me kekfwa vreman i dan difikilte.  Se pou kwa kot appeal mon dir annou get annou gard ek li ek en lizye imen.  Me tax nou pa pe demann zot osi e azour ek tax 2017, 2018 nou pa pe dir sa.

E sa mon kapab donn zot sa kriter akoz i pa telman sansib.  Se ki si en biznes pa’n pey son tax, pou 2015 an montan, nou pou konsider son laplikasyon.  Setadir nou bezwen vwar ki in pey son tax ziska 2014.  Si i par anba nou pou rezet en sel kou.  E nou demann li letan nou asiste li ale al aranz son sistenm tax.  E nou vwar konbyen larzan i pe peye.

So par-ler i fer en aplikasyon i demann en sonm, me apre letan nou regarde nou vwar ki i ti pe bank en diferan sonm.  E sa i par-ler i fer nou aziste sa ki i pe demann nou.

Tousala i bann keksoz ki sa Komite i servi konman kriter.  So nou annan en sistenm entern ki permet nou verifye serten lenformasyon.  Mon krwar kekfwa mon’n reponn tou ou kestyon.  Mon vwar mon’n met Avril.  La mon pa tro mazinen.  Mersi.

 

MR SPEAKER

Mersi Minis.  Onorab Sophola.

 

HON NOLINE SOPHOLA

Mersi Mr Speaker.  Minis i annan prosedir appeal ki mon ti pe demann ou si i posib pou anvoy ou staff, e apre konman mon lo la.  Kan bann dimoun in ganny aksepte zot pou gannyen?  Eski ou kapab eksplik zot prosedir ki servi akoz i annan ki dir mon zot bezwen al tyek lo zot mail.  Sa ki napa mail i dir mon zot bezwen al telefonn labank pou regarde.  Petet tou dimoun ti a konnen once and for all ki si sa ki zot pe bezwen fer.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi mersi.  Wi pou appeal i annan apepre nou’n ganny apepre 120 ka appeal pou lemoman, dan sa 619 ki nou’n rezete.  Nou annan nou 120 ka appeal napa bokou.

Inisyalman nou pa ti pe anvizaze apel sa biznes oubyen sole trader pou nou annan en dyalog avek zot.  Me nou ava regarde avek.  Akoz i annan bann case appeal mon krwar i 3 i ase senp i annan enn de mwan mon menm mon mon’n vwar mon krwar i ase senp pou zis fast track li annou ale.  Me sa i pou sa appeals Committee ki pou deside ki mannyer i pou, fer son travay.  Me mon take note sa ki ou pe dir, mon krwar enportan nou ganny serten klarifikasyon lo sa larzan e nou eksplike osi, lo sa larzan.

Tou let ki nou ekri letan nou rezete oubyen nou aprouve nou dir akoz.  Si ou’n demann 20 nou’n donn ou 19, 600 i annan 400 ki nou’n tire nou pou dir ou.

Prezan pou pey dan ou kont labank la osi i annan bokou retar i annan bann kont ki dormant, e nou pey an Roupi dan en kont an Roupi.  E paler bann ka toulezour letan nou’n anvoy peyman labank i dir nou tyonbo en kou sa kont pa ankor annord, alor nou hold back ziska letan zot clear.  So sa osi i annan delay, me nou pey tou dimoun dan zot kont labank.

So fodre tanzantan zot tyek zot kont labank me sa bann detrwa ki reste ki’n vreman esper lontan e mon senpatiz avek zot e mon remersye zot mon menm mwan mon anvoy zot bann mesaz par-ler oubyen bann email pou konfirm avek zot e Komite in pran en desizyon tel fason tel mannyer.  E zot demann mon deswit sa kestyon.  Kan mon pou ganny mon peyman.  Me i pran enn de zour pou li ganny son peyman parey mon’n eksplike.  Mersi Mr Speaker.

 

MR SPEAKER

Mersi Minis.  Onorab Jean-Francois Ferrari.

 

HON JEAN-FRANCOIS FERRARI

Mersi Mr Speaker.  Mr Speaker en kestyon avek en pti propozisyon.  Premyerman Minis en kestyon kekfwa en pe legal.  Eski ou Minister apre ki nou’n ki Lasanble in vot sa sonm pou salary support, e ki sa ti ganny baze lo en estimasyon bann saler dan sekter prive.  E  ki Prezidan i sinyen.  In agree ki ou Minister i deside pou sanze, sanz en pe bann kondisyon e dir serten pou annan bann kriter ki ou’n mete eksetera.

Eski ou asire pou dir ou Minister i an konformite avek Lalwa baze ki nou’n vot pou saler tou dimoun, sa i lo rikord Lasanble.  So reasir nou pou dir ou’n fer sa legzersis e ki ou krwar ki mannyer zot pe fer i byen.  Mon pe demann sa kestyon akoz nou, nou osi nou’n ganny – well parey ou.  Nou’n ganny bate laroul nou, i annan dimoun in dir nou pou dir nou’n donn tro bokou larzan travayer, nou’n siport saler.  Kan nou ti sipoze siport biznes.  Me wi nou siport saler.  Me selman la nou pe vwar pou dir pa tou saler ki pe ganny siporte.  So dir nou en pe, kote ou debout lo kote legal.

Dezyenmman en propozisyon, si en dimoun Minis in fer en demann pou R20mil.  I dwa tax R10mil.  Eski i pa en solisyon pou dir la en tyek R10mil sa tyek sa lot 10mil la i pe al pou pey ou tax?  Eski i pa finalman i reste dan kont Gouvernman.  Me an menm tan i pa diskalifye sa aplikan, akoz i annan en retar eksesif.  Eski sa osi i kapab ganny konsidere pou dan en fason imen.  E dan en fason entelizan osi mon mazinen.

Se ki si mon dwa ou 10mil, ou, ou swa mwan 20mil ou pa kapab dir mwan mon pa pou donn ou 20mil akoz ou dwa mwan 10mil.  Mon donn ou 10mil.  Mon gard 10mil.  So eski sa i en konsiderasyon ki ou Minister i ava pare pou pran?

E finalman, ou’n koze Minis lo bann Scheme ki Gouvernman pe mazinen pou reskill oubyen pou diriz bann travayer ki napa lanplwa ladan?

Pou bann travayer Praslin ek La Digue sirtou ki sa 2 zil zot konponan lanvironnman i tre, tre enportan akoz i end up zot Lendistri Tourizm, eski dan sa bann sekter, Gouvernman in deza konmans reflesir lo met en pe travayer dan bann dan Vallée de Mai dan Fond Ferdinand, dan Curieuse dan   bann keksoz koumsa?

Konmsi fer bann travay itil, pou zisteman siport sa Lendistri Tourizm dan en mannyer ki ler, tou bann touris i rekonmans vini, nou’n pare nou pe fer nou pe catch up lo bann larzan ki nou pa’n fer.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab lo kote son legalite, mon krwar ki si nou retourn an aryer, e mon pa al lev en lot deba lo la.

Prezidan Larepiblik, letan i ti fer son ladres,  i ti dir, e parey mwan letan mon’n asiz la mon ti dir e zot ti dir mwan mon’n ganny – mon out of tune.  I ti dir ki i pou siport saler travayer.  I ti osi dir de lezot keksoz, ki mon’n fer referans avek.  I ti dir pou bann ki ganny afekte avek COVID.  E i ti dir i pou annan en striktir.  So nou’n met sa bann kriter an plas, e nou’n ase zenere dan nou konsiderasyon sa bann kriter pou asiste, peyman saler travayer.  Akoz sa ki nou’n le fer letan ou koz lo tax.  Saler en travayer i annan en kote legal, e li osi letan nou peye son biznes pou pey li son saler, si i taxable i bezwen pey son tax.  I bezwen pey son pansyon.

Pa akoz nou’n donn ou li R25mil i pa pou pey son pansyon, i pa pou pey tax sa travayer.  Akoz nou le fer sa lekonomi kontinyen marse e nou le fer en pe reveni osi Gouvernman antre pou nou kontinyen.  So tousala i ansanm sa.  So mon pa vwar ki annan keksoz ki ilegal.

Wi i vre nou’n siport travayer nou tou, nou dir ek biznes prive in dir avek nou me ki ou pe fer pou siport biznes.  Nou’n ekoute, e nou’n sorti avek en Scheme, ki Labank Santral in lanse.  E briyevman mon ava rapel e i ti dir ok i pou donn R500 milyon konman en loan facility tou Labank Komersyal.  At zero interest rate.  I pou pret sa larzan at zero interest rate. 

Prezan sa bann Labank Komersyal ki le partisipe li i pou on lend 1.5poursan, pou bann biznes a en turnover R25 milyon par anba.  E apre in annan plis diskisyon sekter prive in dir ti a bon nou regard bann vreman ptipti par anba en milyon.  Akoz zot, zot napa sa fasilite pou met en garanti avek labank pou zot pret larzan dan sa 500milyon.

I annan diskisyon ki go on la konmela pou nou vwar ki mannyer nou pou ede.  Pa bliye letan ou regard bann diferan lezot Scheme ki nou annan pou ede.  I annan en one-off ou ganny R50mil ou pa pey lentere ou.  So nou pe sey gete si nou pou kapab amalgamate sa bann keksoz pou fer nou konsantre li pti biznes.

Akoz zot osi zot annan problenm.  E apre nou’n ouver en fasilite ki nou’n diskite e fotespere nou ava ganny konsansis ozordi lo la pou bann biznes par lao R25 milyon.  R25milyon turnover.  E nou le met en lot fasilite kot zot osi zot a sorti kot Labank Santral, nou pou met li at zero interest with lended to the Commercial Bank e bann labank ki le vini zot a partisipe e zot, zot a on-lend a en to lentere pli o ki 1.5poursan.

E nou Gouvernman parey nou’n garanti pou sa MMEs ziska R25milyon turnover a 70poursan sa loan, prosenn la nou santi nou kapab kekfwa garanti 50poursan.  Me i annan diskisyon ki pe on going akoz zot le 100poursan me nou pa kapab, garanti 100poursan.

So nou osi nou pe dyaloge nou pe vwar ki mannyer nou pou siport biznes prezan.  Pou al pret en loan.  E sa mon krwar i tre enportan.  Lanvironnman ou’n koz lo lanvironnman ou annan rezon.  Mwan osi mon krwar ki i annan bokou keksoz pou nou fer, dan sa bann peryod letan nou espere ziska touris i vini.

E dan enn mon Konferans De Pres mon ti dir letan nou ti aret lekay torti ti annan bokou artizan ki ti fer lekay torti, …, penny bann zistwar koumsa, nou ti reskill nou ti met zot dan lot lanplwa.  Si ti byen marse pa’n byen marse mon pa konnen.

Me avek sa nou bezwen fer sir from the start, ki nou ankadre li byen e i mars byen.  E Lanvironnman i en landrwa efektivman kot nou kapab fer en kantite keksoz.  Plant pye dibwa menm sa i enportan.  E i depan ki pye dibwa.  Pye fiyapen, mon dir plant pye fiyapen, lo sa 14 bout later, plant fiyapen.  Ou konpran?  I a donn nou sa ki nou bezwen dan detrwa zan.  E fiyapen ozordi i ptipti koumsa ou kapab kas fiyapen ou pa bezwen mont anler laba.

Sa i bann keksoz ki nou pou bezwen planifye bezwen fer arive, bezwen fer arive.  So wi sa, sa bann lankadreman mon pe koz lo la Mr Speaker.  So ou pwen i valab.  Fodre absoliman ou pa zis dan Lanvironnman i annan lezot landrwa.  Mon‘n koz lo sa bann lalyann anvaisan.  Ou koz al get Curieuse donn li en koudmen.

Me eski ou konnen osi ki la dan sa peryod COVID la, Curieuse malerezman i annan en lot defi li.  Marine park i annan en bann poaching ki pe go on.  Ki vreman pa korek,  Ou vwar?  E donk i byen ki nou i byen ki nou ralye tou nou bann troup, pou nou fer sir sa bann keksoz pa arive.  Akoz letan sa i arive nou pe detri sa Patrimwann ki nou le sofgarde pou en nivo enportan letan touris i retournen.  Ou konpran?

I tir ki mannyer i tir kazye dan marine park i anmenn Curieuse son louvraz sa in vwar i pa sipoze la.  I pran i met ater lo lans.  Apre i vini i repran i tay avek.  Pe arive sa.  Be vwar diskour ki mwan ek ou nou pe tenir la lo sa.  E sa ki pe arive dan realite i en lot zafer. E mwan mon dir fodre nou annan zero tolerance lo sa bann keksoz.

Mr Chairman mon’n sorti en pti pe an deor eskiz mwan.  Mr Speaker pardon.  Mersi Mr Speaker.

 

MR SPEAKER

Mersi, yes Onorab Ferrari.

 

HON JEAN-FRANCOIS FERRARI

Non mon ti’n demann Minis si i pare pou konsider sa negosyasyon nivo SRC, ki ler i annan posibilite pou konble en retar, nou fer li.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi mersi Mr Speaker.  Wi mon krwar solman fodre nou en pe pli sensitive, en?   Akoz sa i saler en dimoun ki nou pe peye.  I bezwen annan son konsantman e SRC ki lo tax nou pa kapab zis akoz mon pe donn ou enn ti 3 kar donn SRC nou pa’n pran sa lapros.  Lapros ki nou’n pran nou dir si ou pa’n pey ou tax 2014 an desandan nou pa pou asiste ou ditou.  I ou devwar ale al organiz ou laba e apre konmans pey ou tax.  Ou ganny mwan.  Nou’n en pe pli soup.  Mersi Mr Speaker.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Savedir Mr Speaker sa i enteresan.  Minis ou pou konfirm avek nou dan Lasanble ki sa enn pwen 1.2 bilyon ou 1.09 ki nou’n vote pou salary support i pou al 100poursan pou salary support.  Pa pou ganny tire pou fer lezot keksoz avek siport bann lezot keksoz.  Sa i pou al travayer parey nou nou’n dir e zot, zot in aksepte?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Wi mon konfirmen, i en budget line item.  E i kler e nou pou raport lo la.  Nou ti osi donn avek zot laprouvasyon 30milyon ASP.  Letan i pou fini i pou fini.  Ou konpran?  E i osi pou sa purpose ki nou’n donnen.  E zot pou annan en regar lo la.  So mon donn ou mon garanti.  Mersi Mr Speaker.

 

MR SPEAKER

Mersi Minis.  Onorab Wavel Woodcock.

 

HON WAVEL WOODCOCK

Mersi Mr Speaker.  Minis dan en deklarasyon ki ou Minister ti fer sa ti ganny fer par SS Payet dan en Press Conference e osi ti ganny fer devan sa Lasanble Nasyonal,  kot zot ti dir ki bann biznes sirtou bann, bann pti biznes bann sole traders ki kekfwa zot bann dokiman pa annord ouswa zot napa payroll, ou menm ki zot pa’n anrezistre avek SRC zot napa en TIN ki zot pou ganny asiste avek minimum wage  R5804.

Me selman la konman mon pe koze la mon konn plizyer bann pti biznes bann sole traders parey drayver taksi, craftsman e bann propriyeter bann pti laboutik souvenir, bann laboutik touristik ki zot pa’n ganny asiste.  Zot in ganny dir poudir dir zot pa pe ganny okenn lasistans finansyel.  E mwan mon pe demande akoz ki sa promes ki ou Minister in fer pa’n ganny garde, pou ed sa bann dimoun ki ozordi zot pa konnen ki mannyer zot pou siport zot fanmir?

Mon 2enm kestyon Minis i sagrinan ki ou aprann ki i annan 76 biznes Praslin ki pa pou ganny sa lasistans finansyel.  E zisteman mon konn plizyer sa bann biznes mon fek ganny en mesaz la kot ozordi kot en biznes in ganny dir poudir pa pou ganny en lasistans finansyel.  E mon konn plizyer biznes ki’n ganny dir ki zot pa pou ganny sa lasistans, akoz zot annan ase larzan lo zot kont.

Minis mwan mon vwar ki sa i vreman unfair.  Sirtou bann biznes ki’n travay, dir ki zot in fer en pti saving zot in met en pti larzan a kote, e ki dan mon lopinyon Minis mon santi ki sa bann dimoun pe ganny pini.  An menm tan en lot biznes li, e i annan sa bann biznes e nou konn tre byen ki li in diverti kontan in donn bal dan son larzan in monte desann al Dubai partou, e li in ganny lasistans finansyel. E  sa biznes ki li in serye, in save son larzan, in anmas son larzan, li i pa ganny okenn lasistans finansyel, mwan mon santi Minis ki sa i vreman unfair.

 E an menm tan mon konn osi  bann gro biznes bann gro lotel, bann gro lakonpannyen ki annan bann gro kapital par deryer zot ki zot, zot in ganny asiste finansyerman, me sa bann pti biznes zot, zot pa’n ganny nanryen.  Eski i annan 2 pwa 2 mezir ki pe ganny servi dan lafason ki zot pe asiste bann biznes Sesel?

E finalman eski lafason ki zot pe fer keksoz la par sa ki zot pe dir pou dir biznes ki annan ase larzan lo zot kont ki zot pa pou ganny asiste, asiste finansyerman.  Eski zot pa pe kree en sityasyon kot dan lefitir bann biznes Sesel pa pou le kit bann larzan Sesel, ki zot pou rod en fason pou tir sa larzan dan nou pei pou al met lo en kont aletranze, ki dan lefitir i kapab kree en sityasyon en problenm ekonomik dan nou pei dan lefitir.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Si en biznes pa kalifye, i pou dir li akoz.  E parey ou’n dir i kapab i annan ase larzan pou li soutenir son travayer pou mwan Avril.  Nou pe koz byen mwan Avril.

Si i pa ganny nanryen me i merit baskil lo R5,804 sel rezon akoz sa i arive se ki i refiz-e donn nou son kont.  Napa lot rezon.  E mwan mon konn detrwa ka ki’n arive, ki’n arive mon pa mansyonn sekter oubyen sa kalite biznes kot sa i arive.  Zot refiz-e donn kont.  E i annan enn menm ki nou fek deal avek la weekend, i donn zis en kont, e nou dir lo form met tou lo kont.  So nou pe demann li tou kont.

Alor rezilta final letan in met tou son kont ou pe espekte i annan plis larzan non?  Me nou’n asiste li nou.  Akoz in ranpli sa kriter korekteman.  So nou pa kapab konmsi focus lo enn oubyen lo lot.  Akoz sakenn i ganny fer. – Napa unfairness, dan sa sistenm.  Mon pa krwar nou donn en lotel akoz nou kontan sa manager nou’n mont laba, nou’n pas weekend whatever it is.  I pa mars koumsa sa.

E pa nou ki dir sennla in gannyen sennla pa’n gannyen.  Zanmen mon’n fer sa.  E zanmen mon pou fer li.  So mon pa konnen letan zot dir mwan entel pou lotel in gannyen solman sa lot pa’n gannyen.  Mon pa’n dir personn mon.  Me kote ou’n ganny sa lenformasyon.  E apre zot fer sa bann konparezon, mon konpran sa ki ou pe dir mwan.  Me mon krwar i enportan se pou krwar la ankor sa   Appeal Komite la, li menm li ki bezwen vwar 120 appeal ki devan li i bezwen pas ladan apre nou ava vwar en pe plis laklerte.

I annan en wholesaler i dir nou, nou pa’n donn li me nou’n donn son kanmarad, e nou’n dir li i ti pe operate dan lockdown.  Alor i pe roul son biznes dan lockdown.  Sa ki li i dir me sa bann lezot osi, ki nou’n asiste zot osi zot ti pe operate dan lockdown.  Alor where is the fairness or the unfairness?  I en keksoz nou bezwen regarde.

Son sel channel i pou fer dir li be appeal.  Met ou appeal me pa vin dir nou akoz nou pa’n donn ou R400 ou ekrir en let ou dir donn mwan mon R400 ki ou pa’n don mwan.  Ma tir R400 dan mon pos mon a donn li.  Nou bezwen serye.  So mon pe espekte ki sa whole saler i fer son appeal e i met son facts devan nou.  Akoz nou bezwen retire sa bann animozite 2 pwa 2 mezir isi laba.  Sa Komite i travay diligently e sifo zot ava vin eksplike zot menm dan bann detay pou zot konpran pli byen.

Me mwan hand on my heart mon krwar pa.  Akoz nou’n donn en lotel nou pa’n donn lot lotel, akoz nou’n donn en operater nou pa’n donn en lot operater;- akoz nou byen ek sennla oubyen nou pa ek sennla, i pa mars koumsa.  Mersi Mr Speaker.

 

MR SPEAKER

Mersi Minis.  Bon pou nou, yes zis mon averti bann Manm osi tou an, an vi rezon letan osi tou, annou esey evite fer gran statements, nou vin direkteman lo seksyon.  Minister.

 

MINISTER MAURICE LOUSTAU-LALANNE

Wi mersi Mr Speaker Onorab Woodcock i fer sorti en bon pwen, i dir kekfwa nou kapab kree en tandans kot sa bann biznes i tir zot larzan i ale.

Nou, nou pa anvi ki sa i arive.  Senpleman parske sirtou bann en, mazorite ki dan biznes touris i fer bokou larzan.  Mon’n dir e mon repete letan mon dir mon budget speech ki mon ti fer mon ti fer en lapel pou dir zot silvouple la se lemoman pou ede kot in byen pase ed en kou.  E i annan ki annan kont an deviz isi dan Sesel nou pe demann zot fer marse nou lekonomi.  I annan ki kont i deor nou pe demann zot osi rezet en koudey lo zot patri, fer vini.

Olye kekfwa nou pa’n donn zot la pou tir tou nek pou ale.  Nou pa anvi sa diskour.  Akoz nou tou nou pou vwar konsekans COVID.   Ou pe konman slo La Digue kot La Digue i pli vilnerab nou dakor ek sa.  So annou reste dan en dyalog konstriktif nou tou ansanm.  Annou pa zis ou konpran ki mon pe sey dir?  Mersi Mr Speaker.

 

MR SPEAKER

Mersi Minis.  Onorab Woodcock.

 

HON WAVEL WOODCOCK

Zis en kestyon ki Minis pa’n reponn lo sa promes ki zot ti fer ki bann dimoun parey ki zot bann dokiman pa annord ki zot napa   SRC zot pou ganny asiste avek at least sa R5804.  Ki’n arive ek sa promes ki zot ti fer?  Akoz i annan plizyer sa bann trader sa bann pti biznes ki pa’n ganny ki pa’n ganny nanryen.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi mersi Onorab.  Non sa ki mon’n mansyonnen si i pa’n ganny R5804, setadir i refizye donn ou son kont labank.  Mersi Mr Speaker.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker.  Bonn apre midi Mr Speaker.  Bonn apre midi, Minis.  Mir Speaker ou a permet mwan le met zis met lo rikord ki Praslin avek La Digue i form par dan teritwar Sesel e sa ki nou pe diskite, Praslin ek La Digue i deserve.  Mon le felisit sa bann biznesmenn Praslin ek La Digue ki’n donn zot bank statement, akoz i montre pou dir zot senser dan sa ki pe arive.

E mon premye kestyon pou Minis, eski sa bann dimoun ki’n donn zot bank statement, ki annan ase larzan lo zot kont zot in peye zot tax?  Sa i premye kestyon. Akoz sa larzan se larzan tax ki zot ti sipoze gannyen pou pey zot travayer.  Savedir si zot in peye i bann tax ki zot in deza kontribye.

Mon 2enm kestyon mon le atir latansyon Minis ki sa lasistans in dir pou travayer.  Me selman prosedir mannyer i ete, i dir poudir pou met lo kont anplwayer.  Ler desizyon i ganny pran i pran lo en baz anplwayer.

Eski sa Komite avek ou menm Minis in reflesir poudir ler sa anplwayer desizyon pe pran baz pe pran lo baz sa anplwayer, sa travayer napa nanryen pou fer ek sa li.  Sa larzan ki lo sa kont napa nanryen pou fer ek sa travayer li.  Akoz ki sa travayer li i bezwen ganny pini?  Oubyen i bezwen esper plis letan esper en appeal kan li son fanmir pe esper manze lo latab?

Mon krwar nou bezwen konpran sa ler nou pe dir sa dimoun i sa anplwayer i annan larzan lo kont, nou bezwen pran kont pou dir larzan ki i pe donnen se pou sa travayer.

Apre lo kote bann ou dir si en dimoun in pey i pa ankor pey tax depi 2015 ziska la i gannyen peye.  Me ou pa’n dir nou solman ki groser biznes ki ou pe koz lo la depi 2015 ziska la.

Rezon ki mon demann sa akoz si en gro biznes i pa ankor pey son tax depi 2015 ziska la i gannyen peye i ok.  me selman sa ki i pou drwa tax baze lo son groser i pa pou parey sa sole trader ki li i pa ankor anrezistre i pa ankor pey tax.  Oubyen si i ti’n anrezistre petet 3an, 4an sa sonm i pa ti pou nanryen konpare avek sa gro biznes ki li in ganny larzan depi in ganny peye akoz i pa ankor pey son tax depi 2015 ziske la.

Alors mon ti a kontan Minis i donn larepons lo bann kestyon apre ler pe fer revizyon.  Ou pe revwar kriter pou pran kont sa bann keksoz osi mon pe met devan.  Mersi.

 

MR SPEAKER

Mersi Onorab.   Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab wi si ou ranpli ou laplikasyon e tou sa ki nou demande i ganny ranpli korekteman, ou pou ganny asiste.  Me sa ki nou vwar en bon pe sa bann retar ki’n arive se ki sa bann form i pa dir tou laverite.

Mon a donn ou en legzanp.  Nou dir si ou met ou payroll pou Fevriye, Mars ek Avril,  pou nou vwar son trend.  Nou dir saler i cap R30mil.  Ki nou vwar?  Nou vwar payroll i vini e i annan en gran sanzman ant Mars pa bliye COVID ti vin milye Mars li ek Avril nou vwar en gran diferans.  Prezan letan nou tyeke deklarasyon ki zot fer lo zot form ek deklarasyon ki zot fer pou tax i pa parey.  Sa i premye problenm.

Dezyenm problenm zot soumet sa payroll e zot pa aziste payroll pou R30mil.  I annan bokou travayer ki ganny plis ki R30mil e zot claim lo payroll ti pe ganny 40 mil i met 40mil li.

E i annan letan nou’n asiste nou’n bezwen dedwir ziska 600mil, R700mil akoz zot met payroll san respekte kriter.  Alor tousala i bann keksoz ki fer ki zot pa ganny satisfaksyon e nou, nou bezwen aplik sa bann kriter, parey nou’n mete.

Me pa bliye, nou pe pey travayer lo sa payroll ki ganny aprouve.  E sa larzan se pou travayer se son responsabilite konman anplwayer pou li pey son travayer.  I annan de ka, kot nou’n tarde peye e sa biznes in fer zefor e mon salye sa bann biznes fer ou zefor pou pey travayer, Seselwa konman etranze si i leka, zot saler avan ki zot ganny sipor finansyel.

I annan plizyer ki’n fer li.  Me ozordi zot vwar zot balance in desann e otomatikman zot pou kalifye pou en sipor.  So sa osi i annan lot anver figir.  So bann revizyon ki ou pe sizere parey mon’n dir ou, nou pe fer sa debrief e nou pe remet an konsiderasyon pou nou regarde ki mannyer nou kapab amelyor sa sistenm, plis ankor.

Nou’n vwar en kantite keksoz.  E i pa le moman isi pou mwan fer en rapor lo sa bann zafer me nou’n vwar bokou, bokou keksoz.  Dan en semenn i annan 10mil biznes ki’n anrezistre en semenn, 10 mil sanmenm tou ki mon pou dir ou.  Mersi Mr Speaker.

 

MR SPEAKER

Mersi Minis.  Onorab Gill.

 

HON CHURCHILL GILL

Mon ti le zis atir latansyon Minis osi lo sa bann kont dimoun Praslin ek La Digue ki nou’n ganny dir pou dir i annan i annan R2milyon.  Mon le fer Minis konpran bann lotel ki nou’n pey 3 par lao R3 milyon.  Sa i saler.  Eski nou’n demann nou lekor konbyen turnover sa bann lotel si son saler i 3.6?

E si nou’n pa’n fer sa ler nou get dan kont, eski nou’n fer analis pou nou dir be si ou depans i 3milyon, dan kont e tan, me ou turnover pou ou kapab pey sa 3milyon ler ti napa COVID,  ti bezwen bokou plis.

So mon anvi met sa dan ou latansyon pou ou kapab fer ou Komite osi fer bann analiz ki parfwa petet zot in manke pou zot vwar poudir be sa R2 milyon ki lo sa kont sa dimoun Praslin/La Digue la, konpare avek sa, i annan en gran diferans.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi mersi Mr Speaker.   Mon konpran egzakteman ki Onorab Gill pe dir zis mon ti a kontan reasir li ki sa Komite i annan 6 manm ki asize.  Aplikasyon i ganny assess par plizyer departman.  SRC i enn, Internal Audit i en lot, Financial Planning i en lot dan Minister Finans, Policy Planning i en lot i annan bann ekonomis bann finansyel partou.  E zot, zot fer premye assessment. 

Apre sa dosye i vin devan sa, Komite 6 dimoun.  Prezan sakenn de zot, zot etidye annou dir en ven tenn aplikasyon.  E letan zot in fer zot sentez en aplikasyon parey nou dir se mon tour prezan pou input mon fer sentez sa aplikasyon, i a lekout tou sa bann lezot 5 Manm Komite.

E rekomandasyon ki mon fer i ganny diskite e a pran en desizyon final i ganny pran par Chairman Komite lo sa aplikasyon.  So tou keksoz i ganny diskite i ganny diskite i ganny vwar e revwar, avan en desizyon i ganny pran pou aksepte pou rezete oubyen pou donn li R5804.

E si i annan keksoz pending zot pa tro, tro satisfe sa osi i ganny aziste.  Mon a donn ou en legzanp.  I annan en pti biznes lo La Digue li i annan 3 biznes.  Son payroll ou konnen ki soumet mon pa blanm li mwan, me i soumet son payroll i met payslip.  Nou pa’n rezete son aplikasyon.  Nou’n asize nou’n servi son bann payslip son 3 biznes, nou’n met ansanm, e nou’n kree son payroll. 

E i annan serten diplikasyon, akoz i annan menm dimoun.  Nou bezwen tire.  Mon donn en senp legzanp pou montre ou ki mannyer sa travayer i en travay sirizikal, pou nou ganny son bon rezilta.  Mon pa pe dir ou sa boug ti pe fer trik mon.  Me la, la travay sa Komite.

So mwan mon full satisfaksyon, mon annan full konfyans ki mannyer zot pe travay sa bann profesyonnel e zot pe delivre en louvraz ki korek, e kot fodre poz kestyon Appeal Committee i a reponn pou sa bann ki’n ganny rezete.  Mersi Mr Speaker.

 

MR SPEAKER

Mersi Minis.  Onorab Clifford Andre.

 

HON CLIFFORD ANDRE

Mersi Mr Speaker.  Bonn apre midi tou dimoun.  Bonn apre midi Mr Speaker.  Mr Speaker mon premye kestyon i letan Minis ti vin kot nou Leader Lopozisyon in tous en pe lo la.  Letan i ti vin kot nou pou Bidze i ti donn nou 1.2 bilyon i ti demann nou 1.2 bilyon lo en baz kantite konpannyen ki annan dan Sesel e zot payroll ki ti’n met ansanm.

Eski la vi ki sa in ganny aprouve, Onorab Ferrari osi in dir sa, eski i pa devre sa Gouvernman pou pey sa bann saler, e par lefe ki i pe refiz serten konpannyen parey Onorab Gill in dir, Churchill Gill in dir, par lefe ki i pe refiz serten konpannyen, eski sa i pa en mannev politik, pou fer ki sa bann biznes i ava otomatikman fer redundancy e Gouvernman in anonse ki pou garanti sa bann saler sa dimoun sa bann dimoun ki pe gannyen ziska Desanm?

Akoz i pa senpleman pran sa bann saler donn sa dimoun, pou li kontinyen anploy sa bann dimoun omwen ziska Desanm?  Mersi Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab lorizin sa 1.2 bilyon ki ti ganny mansyonnen avan ki mon anmenn Bidze amande 2020,  sa, sif ti sorti lo peyman tax ki bann saler prive i peye, kot SRC.  Se la kot sa sif 420 milyon i sorti.  E nou ti fer en matematik miltipliye par 3, e nou ti dir la i la.

Letan nou’n travay Bidze amande 2020 nou’n travay lo la, nou’n regard en pe plis an detay.  Nou’n konte konbyen ekspatriye i annan eksetera, akoz i annan en pe pa isi eksetera nou’n re balans sityasyon.

E nou vwar ki nou ti bezwen en R1,990bilyon en bilyon R90milyon ki nou’n demann dan Bidze.  I annan en laliny pou tousala.  E nou ti dir pou saler, e sa i kler e in ganny aprouve.  Sa ki nou pe fer la nou pe regard revolisyon.  Akoz i annan presyon nou’n ganny presyon sorti kot sekter prive ki dir nou zot le fer redundancy.  E nou diskite.  E nou rod en fason.

E nou’n dir pou detrwa mwan pou napa, me apre le 01 Zilyet ou kapab i annan en prosedir pou ou fer.  E nou, nou ti anvi konmansman komans a parti le 01 Zilyet.  Me apre ou dir non ou kapab fer ou demann pli boner me selman i pou aplikab le 01 Zilyet.  E sa i atraver diskisyon ki’n arive.

I pa en manev politik li.  Ditou o kontrer akoz sekter akoz nou pa la pou nou al manage bann biznes prive nou.  Nou pa kapab fer sa.  Nou bezwen les li pran son responsabilite.  Akoz en biznes i en lour responsabilite.

So les zot deside.  Si zot le fer ale ekspatriye zot kapab fer ale ekspatriye, me zot konnen bann konsekans zot bezwen pey tou bann konpansasyon, zot bezwen pey tou bann dues repatri  li fer li ale and so on, and so forth.

 E nou dir li si oule fer ale Seselwa, nou pa fer sa diskriminasyon. Me nou a pran zot e nou a met zot dan en Scheme.  Sanmenm tou i napa mannev politik.  Me parey nou’n dir e nou’n avans pli devan nou dir si i pou pli fasil ki nou pou donn sa sipor salaryal sa biznesmenn pou gard sa Seselwa, nou napa enzeksyon ek sa nou.

E nou pare pou konsider li dan nou nouvo kriter.  So i pa en mannev politik ditou.  Nou pe zis protez lanplwa Seselwa ki dan lanplwa.  E bann ki pa dan lanplwa, nou pe dir zot nou ava annan sa reskilling, ou annan serten progranm ki nou pou fer join it e nou ava donn ou en skil  E letan i a repran ou ava kapab kontinyen avek en louvraz.  Mersi Mr Speaker.

 

MR SPEAKER

Mersi Minis.  Onorab Andre.

 

HON CLIFFORD ANDRE

Mersi Mr Speaker.  Minis ou’n fer en statement ki vreman, vreman enportan, ou’n dir ki ou le protez lanplwa Seselwa.  Me pey sa anplwayer pou li pey anplwaye Seselwa!  Simple akoz si Gouvernman atraver en fason ou en lot, ki swa sa biznes i La Digue, ki swa sa biznes i Praslin, ki swa sa biznes i Mahé,  i vwar en fason e i annan biznes ki’n demande son 2 mwan i pa ankor ganny peye i annan care hire ki’n demande in ganny zis R1100, eski pa ou pe dir li ki ou pou bezwen fer en aplikasyon pou redundancy.

 Akoz zot pa ankor fer zot.  I pa ni pe met presyon lo Gouvernman pou li fer redundant, pou li apply for redundancy.  Me si ou pa pe pey sa biznes sa ki’n anmenn devan ou, e zot pe pey tax zot annord ek zot tax annefe.  I montre ou mon pe pey mon tax, mon annord apartir 2019, 2020 pa ankor arive, apartir 2019.  E Gouvernman pa pe donn li sa larzan ki anba R30mil par travayer, pou li pey son travayer, eski parey mon pe dir ou, ou pa pe dir li ou pou bezwen apply for redundancy?  

E apre nou konman Gouvernman nou a takeover nou a fer li reskill pou li al dan en lot landrwa.  Mon santi i annan sa dishonesty dan sa mendev ki la.  Mersi Minis.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Meri Mr Speaker.  Non pa ditou mon parey mon krwar i enportan nou retourn lo deba peye, pa peye.  Akoz nou pa peye?  Nou pe koz e mon repete, pou le mwan Avril 2020 saler anplwaye dan sa bann biznes oubyen bann self-employed e nou pe dir zot annan ase larzan san afekte zot biznes pou zot pey sa saler Avril.  Sanmenm tou nou pe dir nou.  Kot  nou rezete la 699 ki nou’n rezete, sanmenm tou.  Nou pe dir ou pa dakor appeal silvouple.  Nou annan 120 ka appeal nou pe deal avek e nou ava regarde.  Sanmenm tou napa mannev.

Letan nou pe think forward akoz i annan presyon mon repete, presyon sekter prive pou fer redundancy nou’n koze, nou’n diskite nou’n ariv lo en formil.  Mersi Mr Speaker.

 

MR SPEAKER

Mersi Minis.  Onorab Egbert Aglae.

 

HON EGBERT AGLAE

Mersi Mr Chair.  Bonn apre Minis.  Minis mon kestyon premye i relye avek kestyon (4) PNQ.  Minis ou’n fer resorti ki dan bann faz reskilling li osi annan bann travay ki annan nesesite ki kapab ganny fer la, mon ti a kontan demann ou, eski i annan en konversasyon atraver Gouvernman, pou  ou idantifye sa bann travay sirtou ou’n koz lo bann Kontra netwayaz lot, lot, pou met li available lo sa lo marse Kontra ki egziste dan pei la an se moman;- ki bann ki petet pe mazin fer diversion dan lanplwa kapab ale antreprenan sa bann travay ouswa anrezistre.  Petet si fodre en pti lakonpannyen zot menm pou kapab fer sa travay, anmas bann travayer ki pou persi zot lanplwa.  Sa i enn.

Dezyenmman Minis, ou’n nonmen ki ou pe pran en lot lapros i enportan dan bann kriter pou kapab petet soulaz en pe bann ou kapab dir bann malantandi dan li menm, ki’n rann sa bann biznes fristre.  Minis eski ou pe konsider osi ki vi ki  sa form li menm li i pou en lapros syantifik, i napa en baz petet imen emosyonnel atraver ki ou pou dan lesplikasyon, eski at least ou kapab konsider annan en minimum dyalog osi, ki en biznes i permet li vin donn en serten lesplikasyon?  Sirtou sa bann pti biznes ki zot threshold turnover i tonm anba 2milyon?  Akoz zot menm zot laplipar letan ki pa kalifye.

E rezon set akoz zot osi zot napa petet en bon accounting system, parey bann gro biznes, ki annan en financial controller ki fer tou keksoz azour. E ki vwar zot sa bann pti biznes an defo ek tax?  Ki mannyer i ava en negosyasyon ki a ganny fer.

E dernyerman Minis kot i konsern tax, mon pa pe koz PIT la mon pe koz business tax.  Ou’n fer resorti ki bann ki dwa tax depi 2014 ok zot totalman zot pa klarifye.  Me selman mon ti a kontan demann ou Minis petet ou Minister osi pou antre an dyalog.

Ou’n konmans koz lo la, antre an dyalog, met serten kondisyon ater avek sa bann biznes ki’n an defo, ki zot kapab ganny en lasistans.  Pa pou pey zot tax me ki ler keksoz i bounce back, zot kapab rekonmans fer en kontribisyon lo zot tax, me ki zot a ganny ede ek sa larzan pou zot salaryal pou zot pey zot travayer.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi mersi Mr Speaker.  Mersi Onorab.  Onorab lo ou premye kestyon mon krwar sa i en kestyon plito pou Minister Lanplwa pou koz lo la.  Mon pa le vin, vin kree ankor bann konfizyon kekfwa.  Me sa pwen ki ou fer resorti mon antas bokou lenportans avek, e mon krwar ki Minister Lanplwa dan ankor enn de semenn i ava nobou elabor sa Scheme ki mannyer i pou marse.

E nide se efektivman remet dimoun dan lanplwa, pou bann ki perdi zot lanplwa menm ki nou pou asiste zot ek en saler.  So les zot vin eksplik sa.  I pa vreman mon domenn pou mon entervenir an detay lo la.

Lo sa lot de pwen.  Nou’n osi donn bann tax holiday.  Nou’n dir nou postpone sirtou bann biznes dan tourism.  Peyman tourism marketing tax CSRT, nou’n postpone tousala, nek an Septanm ozordi letan nou tax revenue nou pres pa pe ganny nanryen.  Akoz nou pe donn li sa boufe loksizenn pou li nobou kontinyen avek son biznes.

So nou’n fer sa bann keksoz.  E mon a donn ou en legzanp, i annan plizyer skipper, i annan pa ti anrezistre, zot in demann lasistans.  Me zot in bezwen siny en prosedir.  E ou konnen ki zot in fer, zot in ale zot in anrezistre zot kot SRC. 

I annan mwayen ti permet zot nobou pey en pe zot tax.  E ou konnen ki nou’n fer nou’n asiste zot.  So par-ler sa ki ou pe dir i vre nou bezwen annan sa dyalog sa kote imen.  E i annan bokou skipper ki ti pe ganny en kantite larzan lemwan, mon pa pou mansyonnen la.  E zot in ganny asiste pa a sa nivo, me zot in ganny asiste avek en larzan ki ase sibstansyel ki reflekte zot saler, ou zot reveni ki ti pe antre ki prezan zot in rekonsilye avek SRC.  E mon felisit zot sa bann.

E i annan skipper osi malerezman ki pa tro, tro annord.  In ganny li en pti larzan 5,804 oubyen in ganny li en lot sonm larzan.  So sa i enportan ki nou servi sa lepok pou nou aranz nou biznes. I enportan teribleman enportan.  Tou lede kote i bezwen fer zefor.  Mersi Mr Speaker.

 

MR SPEAKER

Mersi Minis.  Onorab Aglae.

 

HON EGBERT AGLAE

Minis mersi pou ou larepons fransiz.  Minis mon premye kestyon mon pou donn ou zis en legzanp petet ou’n dir mwan i pa ou Minister ki pou reponn, me selman i pou annan en relevans.  En senp legzanp, ou’n fer resorti par egzanp lalyann anvaisan si nou pou al fer en proze dizon pou nou al fer, i pou tonm anba Minister Lanvironnman.

E li Minister Lanvironnman i kapab dir ou be en kontrakter i aprose i pou dir ou be mon napa larzan, i bezwen vin kot Finans.  So i annan en konversasyon ant ou Minister Lanplwa an menm tan avek sa bann larzan ki nou pe kapab earmarked kote i annan sa bann travay ki kapab ganny fer pou, avan petet gran louvertir, parey ou ti mete dan ou bann lapres ki ou’n fer. So i bezwen annan sa kondisyon pandan sa negosyasyon ant sa bann Minister li osi.  Mon ti a kontan si sa i ganny klere.

E osi Minis petet sa i en sizesyon se pou sa vi ki kestyon i lo La Digue ek Praslin annou apply menm kondisyon osi ler ou pe revwar pou Mahé osi, fer sir ki tou keksoz i across the board lo menm wavelength.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi mersi bokou Mr Speaker.  Wi non definitivman mon krwar ler nou bezwen fer sir kriter i align e nou kouver tou dimoun.   Ou vwar?  Parey mon dir ou menm sekter prive pe dir nou pa pe vreman regard bann ptipti biznes en R1milyon par anba.  Mon konpran.  So nou pou fer sa zefor.  Me nou bezwen fer bann distenksyon kot i neseser.  Me enn fwa ki nou fer sa distenksyon, i bezwen aplik dan sa paramet pou tou dimoun parey.

Bon nou, nou pe pey saler Seselwa ki si demen i pa dan en lanplwa.  E nou pe demande, ki zot vin travay pou en serten peryod letan dan en ankadreman ki nou pou fer.

Mon pa kapab donn ou plis detay, akoz letan mon pou konmanse i riske sanze apre.  So i annan bann diskisyon ki pe ale avek Linyon Travayer par egzanp, pou li osi fer sa ki mannyer sa pledwari pou zot konpran.  E wi i pou annan bann travayer ki nou kapab comme dir ou menm, met a dispozisyon en pti biznes deza.  Oubyen fer li al kot Minister Lanvironnman pou mont dan fore fer en latas 3 erdtan pou li tir mon pa konnen mwan 200 met philodendron or whatever it is. 

        Mon pe donn ou legzanp, me ou vwar lemoman    legzanp ou vwar ki i riske arive la al aras patatran, donn manze torti, plant pye bannann.  Taler mon’n koz lo plant pye fiyapen.  Ou konpran i annan en kantite nide.  E mon krwar sa bann legzanp koumsa i montre ou ki nou bezwen chart en way forward e servi sa mendev ki la ki pa pe ganny anplwaye me pe ganny en peyman i pe ganny en saler.  Mersi Mr Speaker.

 

MR SPEAKER

Mersi Minis.  Onorab Norbert Loizeau.

 

HON NORBERT LOIZEAU

Mersi Mr Speaker.  Mr Speaker mon anvi demann en kestyon en pe obor sa enn ki Onorab Woodcock ti demande pli boner.  Vi ki Minis mon pa’n tann ou tro tous lo la, mwan mon pou demann ou sa kestyon dan en lot fason.

Minis vi ki Gouvernman in toultan ankouraz dimoun, biznes pou adopte, en kiltir savings anmas larzan.  E akoz ki la parey Onorab Woodcock ti demande pli boner kot ler sa biznes li ki’n fer son saving ki’n sakrifye tou son letan pou li anmase li i ganny pini.  Me tandis li i ganny trouve ki i annan ase larzan o kontrer pran sa larzan ede, tandis ki sa lot li ki’n lese fer in donn bal pa’n fer nanryen li i ganny met dan en plato i ganny asiste?

Eski Minis a mon avi si ou pa pe ankouraz sa bann biznes pou zot pou zot kit zot larzan deor, pa fer akoz Minis tou sa bann biznes lo Praslin La Digue zot biznes touristik.  E zot tou zot foreign exchange laplipar ditan.  E dan sa ka la ou pa panse ou pe ankouraz zot pou zot dan lefitir apre COVID ler keksoz i retourn normal pou zot kit zot larzan deor.

Akoz si zot kit isi zot montre zot annan zot ganny dir ki zot, zot annan ede.  Me tandis ki sa enn ki lesefer li i ganny dir nou ava ede.

2enm Minis, Minis kot Finans menm laba en pti kestyon an pasan, kot Finans sa bann manrmay ki pe monte desann Praslin/ La Digue pou deal avek sa bann ka claim ki bann la pe fer.  Eski zot pe ganny gete?  Dapre konpran zot pa ankor ganny zot allowance, overtime pou sa bann monte desann La Digue.  Pou zot kapab travay pli byen konmsi?

I enportan akoz i annan pe konplent zot pa ankor ganny nanryen zot, selman zot pe donn tou zot letan nwit o zour monte desann Praslin/ La Digue pou zot deal ek sa ka.  Sa 2enm.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mr Speaker mon kapab demann Onorab zis presize lekel ki pe monte desann Praslin/ La Digue?

 

MR SPEAKER

Onorab Loizeau.

 

HON NORBERT LOIZEAU

Minis bann mammary Finans ki pe travay nwit o zour pou deal ek sa bann claim sorti Praslin/ La Digue pou sa bann biznes an zeneral.  Zot in ganny promes en pti larzan zot osi en pti overtime, ziska aprezan tou sa travay, zefor ki zot pe donnen, zot pa ankor ganny nanryen.  En pti parol an pasan pou zot.

 

MR SPEAKER

Mersi Onorab Minis.

 

MINISTER MAURICE LOUSTAU-LALANNE

Si mon konpran byen ou pe refer detrwa travayer Minister Finans ou?  Ok, ok dakor ok.  Wi.  Mr Speaker e mersi Onorab pou ou kestyon, sa en R1, 90bilyon ki nou annan dan Bidze i dan lentere tou dimoun pou nou fer li ariv ziska lafen lannen 2020.

E an menm tan nou ou pe anticipate dan en serten ensektisid ki kapab arive, down the line.  E nou bezwen port atansyon ki nou pa kapab donn tou biznes lasistans en sel kou.  I annan en serten etik ki nou bezwen itilize.  E se sa ki nou pe sey fer.  Nou’n pey R140milyon e nou’n refiz R100 milyon apepre.

I donn ou en lord ki mannyer sa legzersis pe deroule pou Avril.  Me larzan ki nou kapab ki nou bann biznes i kapab siporte, akoz zot COVID pa kapab pa pe afekte zot.  Zot reveni i tonm en pti git, me zot ankor pe fer profi.  I annan serten  sekter nou ti dir.

Parey télécommunication lenformasyon, manufacturing, IOT li.  IOT pe byen fer nou pa kapab al donn larzan IOT.  Ou konpran? I annan biznes nou pa kapab.  O kontrer IOT pe eksport plis container pwason ozordi, e i pe fer rantre deviz etranzer plis ki zanmen i pe fer.  I pe anploy Seselwa.  In anploy 100 i reste li ankor 50 mon krwar pou anploye e i pe rod dimoun pou anploye.

E i annan e mon konnen serten dimoun dan Sekter Tourizm ki li in al rod en 2enm dyob.  Akoz i krwar kekfwa i riske ganny en problenm pli tar i al fer part-time overtime mon pa konnen kot IOT.  Mon felisit zot sa bann dimoun akoz li in konpran tou keksoz li.  In konpran.  I a pe fer en pti larzan i met la an plis, akoz demen i kapab al dan letan dir.

E se sa nou kiltir save en pe larzan.  Sa bann gro konpannyen Seselwa, ki annan kont deor, nou konnen lekel.  Nou vwar.  So nou konnen lekel.  E pou fer ankor en pledwari, mon pe repet mon lekor, nou pa pou anvi ki sa deviz ki la ater ki nou’n gannyen la nek i ale demen bomaten.  Nou pa le sa.  Akoz si sa i sa ki zot anvi fer i pa en keksoz ki wi malonnet, that’s the word mon pe rode.  I malonnet mon’n mank sa mo.  Ou vwar so nou bezwen kontinyen sa dyalog.

Lo kote Minister Finans ou annan rezon.  I annan bokou mon bann staff dan Minister Finans e an deor.  Minister Finans in ed nou dan sa parkour.  I annan staff Trezor, staff Finans dan account, e mwan mon’n otorize pou donn zot en allowance.  E zot tou, zot pou ganny en allowance.  Kot nou pa dakor la se kan nou pou donn zot.

Akoz mon konnen i annan en dimoun ki mon konnen li toulezour i pey R100 dan son pos pou fer en dimoun vey son pti zanfan, akoz i pe travay ziska 8er diswar, pou fer sir ki bann biznes, bann sole traders ki pe ganny peye lannmen bomaten.  I pa konplent li.  Sa bann dimoun ki nou fodre kiltive.  Nou pou ed li.  Nou pou donn li son allowance.  Me nou anvi ki nou tir sa lasasen lo nou e apre zot pou ganny zot allowance zot osi.

E mon kontan ou’n poz mon sa kestyon.  E la mon re konfirmen e mon vreman tou le swar mon pase mon vwar zot, mon pas lo sa bann floor pou sa bann ki la.  Pou donn zot en pe lankourazman menm ki mwan mon monte latet anba.  Mersi Mr Speaker.

 

MR SPEAKER

Mersi Minis.  Onorab Loizeau.

 

HON NORBERT LOIZEAU

Mr Speaker en pti keksoz an pasan mon’n oubliye pou mon demann Minis.  Minis ler ou ti pe koz lo reskilling, ou ti koz lo lekay torti, bann letan ki ler ti pe fer aret tyonbo torti pou fer sa bann soz artizanal.  Ti annan en progranm reskilling, mannyer ti fer sa progranm?  Akoz mon papa ti fer lekay torti mon frer ti napa reskilling.  Mon pa ti vwar okenn reskilling, akoz mon papa ti ganny zis R20mil ti dir li al fer en lot biznes mon frer ti bezwen sorti al L’Angleterre i pa ti ganny reskilling mannyer ti fer sa?  Donn mwan en nide.

 

MR SPEAKER

Onorab fodre nou pa move away from lesansyel kestyon, me mon ava permet si Minis i annan okenn lesplikasyon an bref pou donnen.  Minister.

 

MINISTER MAURICE LOUSTAU-LALANNE

Mersi Mr Speaker si mon ti fer referans dan sa enn mon bann Konferans De Pres, se efektivman lenformasyon ki mon annan se ti en legzersis ki nou ti’n kapab fer pli byen.  Ti napa bokou artizan ki ti pe tous travay lekay torti sa lepok, ti annan kekfwa en dizenn, en douzenn.  I annan ki’n gannyen en lot skil me lamazorite i sanble mwan i pa’n abouti korekteman. E se sa legzanp mon’n servi pou nou fer sir ki sa voyaz dan sa Scheme nou pa repet sa menm fot.  Mersi.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker mon ti a kontan avan mon demann mon kestyon zis dir ki mon le remersi sa bann staff Minister Finans ki’n travayer nwit o zour en bon pe letan, pou ki nou kapab ganny sa bann konpannyen ki’n ganny asiste.  E mon ti s kontan ganny en pledwari avek Lasanble, ki sa i en prosesis ki pe involve bann teknisyen ki pe regard tou bann lenformasyon.

E i pou enportan ki dan sa konteks nou konman en Lasanble, nou pa politiz ki sa ki esansyelman en mekanizm ki’n ganny mete par en antite Gouvernman.  Nou ava egzers nou oversight baze lo bann donnen ki nou gannyen nou pa ankor ganny sa bann rapor devan nou.  Me i enportan ki nou pa fer sa, akoz i annan bann tern i ganny servi ozordi apre midi dezonnet eksetera, ki pa apropriye pou sa bann staff sa Minister ki pe fer sa travay.

E ler mon pe dir Minis sa mon osi konpran, mon osi konpran konsern akoz i annan plizyer biznesmenn, plizyer dimoun ki zot pa’n ganny peye drayver taksi eksetera, ki’n al kot plizyer MNA dan plizyer lenstans.  E kestyon i baze lo sa 3 zil.  E mon krwar kestyon in   no konteks sa bann zil.  Sa ki nou bezwen careful se ki si nou etabli en konteks sa bann zil, annou pa fer li zis akoz en meeting i ganny fer.  Me annou fer li baze lo bann done, lo bann baz ki annan zeneral lo sa bann zil ki konpar sa bann lakonpannyen.

Akoz krentif parey Onorab Aglae ki in dir se ki ou annan konpannyen Mahé osi.  Ki santi pou dir zot osi petet pe ganny asiste zot pa pe ganny asiste.  So dan sa loptik, eski Minis i kapab dir nou si zot idantifye whether or not i annan en problenm avek lafason ki serten dimoun pe ranpli oubyen pe provide bann lenformasyon?

Akoz mwan par egzanp mon’n rankontre en drayver taksi ki dir mon ki li i annan bann Kontra ki i fer, kot i ganny en resi, me i pa’n enkli sa bann resi dan son laplikasyon. E alors in ganny R5,800.  So eski zot in rankontre ki i annan en problenm ek sa bann baz lenformasyon?  E ki mannyer zot pe sey travay avek bann ki probableman pa’n ganny aprouve lo en baz mank lenformasyon, ki zot kapab provide serten lenformasyon davantaz, ki zot kapab ganny sa lenformasyon?  Sa i enportan.

Apre lo en lot pwen ki vreman spesifik sa ki Onorab Churchill Gill in raise,  Onorab Gill in met en propozisyon devan Gouvernman, ki mon ti a kontan Minis ou donn nou en – pa en garanti, me ou dir nou en keksoz lo la.

Ou annan ou en konpannyen ki son payroll i dan en R1milyon.  Me si son payroll i en R1milyon then i bezwen i ti pe fer en pe larzan pou li kapab kouver en payroll en R1milyon.  So ki bann baz tax nou’n al kolekte lo sa bann lakonpannyen pou nou vwar ki kantite larzan pe reste, Sesel e kantite larzan petet pe sorti an deor?  Petet si ou ti kapab dir nou sa

E mon 3enm pwen konsern sa zafer si nou pa donn en dimoun asistans, then i pou pran son larzan i pou anvoy deor.  Be annou tyonbo en kou.  Ler sa bann travayer ti pe   travay pou ou, travay ti reggae, ler pou pey sa bann boug lapey i slow dance, ou pa kapab, ou annan isi ou annan laba.

Be fodre nou konpran -?  I annan biznes ki genuinely i bezwen led.  I annan biznes ki i kapab pa bezwen led.  E mwan mon pa kalifye pou fer komanter lo la.  Se pou sa rezon ki mon’n dir o komansman nou devret fer sir ki sa i en legzersis syantifik ki pe ganny fer, me ki nou reste annan loportinite pou nou egzers oversight lo la.  Mersi Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab, wi Onorab ou annan rezon i annan serten detay lo sa form ki koz serten aplikan difikilte.  Sa i kler.  Nou vwar e letan nou vwar olye zis rezete nou met li pending nou call nou sey ganny lenformasyon.

I annan de fwa nou call plizyer fwa nou pa gannyen.  E parey mon’n dir ou bank account paler nou demande zanmen nou gannyen, e apre de semenn ou espere ki nou fer ou kennsel.  Ou pa kapab esper ankor.  So sa i arive.

Taksi drayver, parey mon’n deza dir e mon repete i annan taksi drayver ki’n ganny R5,804 i annan taksi drayver pardon i annan taksi drayver pa’n ganny nanryen.  I annan ki’n ganny 5,804 i annan in ganny 10mil, i annan in ganny 12mil, i annan ki’n ganny 20mil e i annan 4 ki’n ganny 30mil.

Akoz sa bann ki’n ganny 30mil se ki zot, zot ki mannyer zot soumisyon tou i annord.  I montre ou ki se sa, sa income ki ti pe derive, tou le mwan akoz i afilye ek en lotel par egzanp, i annan en Kontra i monte, desann e ou kapab trace li tou back kot SRC e vwar.

So si i annord e i ti pe fer sa income e napa touris i pa pe debourye, ou donn li.  Ou ganny mwan?  Sa, sa lozik.   I pa akoz nou kontan Pyer Pol e nou pa kontan Zan Mari i pa sa.  So wi pou reponn ou kestyon sa form i vreman enportan.  I vreman enportan.

Prezan lo gro lotel oubyen gro konpannyen i menm assessment ki ganny fer.  Menm assessment selman parey mon pe dir ou i kapab osi parey in fer resorti plizyer fwa, ki zot pran zot larzan zot larzan zot park dan en kont deor.

E mwan mon konn en sityasyon kot i leka kot i annan en zizman ki pozitiv e menm pti biznes i negativ.  E sa nou bezwen regard dan son detay.  E mwan mon pe dir ok ou fer ou appeal ou vin devan nou ava regarde pou nou koriz sa bann keksoz.  Premye fwa nou fer sa.  Zanmen nou’n fer sa.  Zanmen Gouvernman in konmans enterfer li dan en serten fason dan biznes prive.  Zanmen.

Me nou bi ki nou pe fer li se pou donn en saler tou travayer.  Sanmenm tou.  Sa zanmen pou sanz e i pou sanze.  E mon kontan remersi ou pou ou bann mo afeksyonn ki ou’n fer pou staff Minister Finans.  Mersi bokou, mon a convey  sa avek zot.  Mersi Mr Speaker.

 

MR SPEAKER

Mersi Minis.  Onorab Pillay.

 

HON SEBASTIEN PILLAY

Mersi Mr Speaker.  Mr Speaker mon, ti a kontan osi demann Minis ki baze lo serten lenformasyon ki mon’n kapab gannyen, i annan menm konpannyen ki’n angaz dan prosedir pou al fer redundant travayer Seselwa e pou sey gard travayer etranze.  E zot in bliye pou dir ki Lasanble ti pas en Lalwa en lamannman ki mon ti anmennen ki ou pa kapab fer redundant en Seselwa dan en pos kot ou annan en travayer etranze.

Ler en travayer i konmans fer sa prosedir la, la.  I annan en anplwayer ti pa al konmans fer sa prosedir.  So kestyon ki mon annan pou ou se prenon kont sa sityasyon la.  E i kapab lo La Digue ek Praslin i pa neseserman i bann redundancy travayer etranze vizavi travay Seselwa me ki realistik-man lo sa 2 zil prenon kont par egzanp La Digue ki sa bann income i derived antyerman from tourism;- antyerman from tourism ki pou annan bann letablisman ki dan sa sityasyon.  Ki kalite langazman oubyen kordinasyon ou Minister pe annan avek Departman Lanplwa, pou asire ki ler lanplwa pe resevwar serten lenformasyon,  Departman Finans pe provide Lanplwa ek lenformasyon pou dir be ekout en kou, sa konpannyen in ganny asiste oubyen pa ankor ganny asiste akoz i pa ankor ganny asiste?

Konmsi Lanplwa i a ed ou raise serten query vizavi en lakonpannyen, zis pou nou asire ki okenn nou Seselwa okenn dimoun ki travay dan sa domenn, ki ozordi pe vwar nou dan difikilte pa pe perdi son lanplwa?

Eski zot in nobou etablir sa baz lenformasyon ki zot kapab share li across bann Departman Gouvernman sirtou lanplwa ek Minister Finans, zisteman pou ed bann travayer ed bann biznes, an ka ki i ava annan bann laplikasyon bezwen ganny fer.  E sirtou an relasyon avek sa 2 zil Praslin/La Digue ki nou konnen zot ekonomi i tourn en kantite otour tourism e ki zot anmenn en kantite reveni dan kof Nasyonal, dan kof  pei.  Mersi Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab stratezi se sertennman pa pou fer redundant Seselwa e gard travayer etranze.  Sa i totalman al an kont sa ki nou pe fer.  Ou konpran?  Nou ensiste ki si zot le fer redundant, fer redundant sa travayer etranze, les li ale.

Komite O Nivo pe travay osi lo en sistenm GOP.  Renouvle GOP i annan GOP ki’n expire, i annan GOP ki annan ou travayer deor pa ankor rantre.  Tousala bann keksoz pe ganny met ater e pou ganny en klarite byento.  Ozordi ti annan en meeting lo la ki mon pa’n kapab attend akoz mon’n pri isi.

Donk tousala nou pe fer, pou fer sir ki i annan sa kordinasyon e ki nou toultan pe prezerv lanplwa pou nou bann Seselwa, dan sityasyon devan nou ki enserten.  Wi nou pran bann lenformasyon sirtou letan travayer li menm i pran kontak ek Minister Lanplwa e i dir en tel pa pey mon saler i dir pa ankor ganny peye FA4JR kestyon i ganny poze nou tyek lalis nou konfirm avek PS Lanplwa ou dir non, non sa biznes zot pey li.  E nou’n pey li tel sonm tel dat.  Akoz nou pe pey li pou li pey son travayer.  In annan de ka in annan de ka lo La Digue.  Kot in ganny peye travayer pe konplent i pa pe ganny peye.  In annan de ka.

Donk nou lesanz sa lenformasyon pou fer sir ki sa i arive.  I arive, plizyer gran lotel.  Propriyeter etranze sa sityasyon osi i arive, ou vwar?  E i annan ki dir i pou pey son travayer etranze akoz i pa ankor ganny asiste, i pa pou pey Seselwa.  I annan sa bann koze.  I annan sa bann pozisyon stratezik ki zot pran.  E vwala.  E se pou kwa ki nou toultan nou dir non, non, non i al kot sa prensip.

So wi nou kordinen avek Minister Lanplwa sirtou letan travayer i konplent e nou pas nou lenformasyon.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker mon bezwen dir ki n en sesyon vreman enteresan, kekfwa Minis i a menm dakor pli enteresan parfwa ki bann Press Conference ki zot fer ou ankoler.

Mr Speaker mon anvi premyerman demann Minis vi ki sa Vandredi i ti anvi ki bann dimoun La Digue i vin Mahé, pou rankontre li dizon 10er bomaten.  Eski i pa ti ava deswit la mazinen ki petet ti ava pli bon olye zot, zot desann ou, ou monte avek ou lekip parske mon ganny en mesaz zot dir zot pa pou zet ou bisiklet dan delo safwasi.  Ok?  So si ou ti ava konsider sa.  E an menm tan osi lo kote Praslin tou pa konnen ki mannyer ou kapab diviz ou lekor bomaten La Digue e apre midi Praslin, pou ki zot kapab ganny sa dyalog parey nou ti’n koze.

Mr Speaker mon anvi dir Minis ki mon’n ganny let la, kot i annan serten dimoun e en pti biznes Praslin 5 Seselwa ki i pe anploye en pti biznes ki’n konmanse 3an pase, ki i a pe debourye menm i a pe met tou menm ladan, e son premye let le 25 Avril i dir avek li in ganny rezete.  Fer en appeal le 18 Me 2enm let in ganny rezete ankor.

Konmsi se sa bann kalite keksoz ki mon krwar i enportan, pou letan nou pe koz lo sa way forward e ki mannyer nou kapab balanse.

Mr Speaker mon ti a kontan demann Minis be akoz ki serten dimoun letan zot fer zot laplikasyon, par egzanp en commission agent ki en sole trader.  I pe travay dan Lendistri Tourizm li, i pe rod touris pou donn charter.  E i pey son i pey son pansyon e peye e letan i pey son pansyon i pey son pansyon lo R8,500, e in anvoy tou bann dokiman.  Me selman letan zot donn li en pti mwenza zot donn 5,800.  Mon krwar i annan en unfairness la.  Parski sa dimoun i annan son lakaz, i annan bann lezot depans.  Parski si non i pou al tonm lo welfare kot i pou al rod en supplementary, alor konmsi bann keksoz koumsa.

E an relasyon ek bann car hire.  Mr Speaker la mon annan en legzanp e mon ti a kontan ganny en leklersisman ek Minis kot par egzanp en car hire ki letan zot anvoy tou son bann zafer, ok zot in vwar ki i annan R13mil dan son kont ek 18mil Ero.  E zot dir avek li non nou pa pe donn ou akoz ou kalifye.

Me sa i en legzanp ankor kot zis zot regard kont, R13 mil, 18mil Ero, i zis larzan pou ou kapab aste en lot loto.  E sa dimoun li i met son 18mil Ero e sa bann lezot loto ki i annan tou nou konnen ki pou dir spare parts in monte.  Konmsi sa bann kalite balans ki petet dan sa nouvo fason regarde, petet nou bezwen pran an konsiderasyon.

En lot garson li i manager son biznes, me i pa pe pran son larzan.  I annan R700mil lo son kont, e son depans monthly depans i R80mil zot dir ek li non ou annan ase larzan.  Sa bann kalite keksoz spesyalman kot bann Seselwa i konsernen.

Mr Speaker taxi drivers ki serten pa gannyen, akoz ki serten menm sa minimum zot pa pe gannyen.  Mon en garson la ki dir ek mwan i annan patant pou li peye pe al fini i napa e zot in dir avek li zot pa pe donn li zot pa pe donn li nanryen.

Finalman Mr Speaker, mon ti ava kontan dir ek Minis e mon kontan poudir sa kestyon menm si nou’n demande pou Praslin ek La Digue.  E kontrerman ek sa ki Onorab Pillay in dir, baze lo en meeting.  Souvandfwa i bezwen annan en komansman e sa meeting La Digue in en konmansman pou ed nou reflesir plis ankor.

E probableman e la Minis mon bezwen dir avek ou vreman ou prezans ti manke dan sa meeting.  E ou koleg Minis pa tro ed ou en.  Tanzantan i met ou anba bis.  Wi tanzantan ou’n al anba bis.  Kot nou bezwen konmans en landrwa.

E sa meeting ti probableman premye meeting piblik apard bann meeting ki High Level ensidswit, kot bann dimoun ti pe eksprim zot par egzanp ti annan en zenn garson Rudy, ki in debout in eksprim li dan en fason kler, kler, kler e letan in fini eksprim li tou dimoun in bat lanmen.

Alor nou konmans nou konmans annan drwa pa serye an menm tan osi i ede pou tir fristrasyon.  E la letan nou pe koz mon kontan ki pou dir an mezir ki’n nou’n konmans lo La Digue nou’n fer rantre Praslin e byensir Mahé tou i antre ladan.  Parski si ou pa al sanz serten bann keksoz pou pran konsiderasyon bann biznes Seselwa parey Onorab Gill in dir Praslin ek La Digue zot form parti Sesel.

Me Mahé osi tou nou form parti nou form parti Sesel. Alor ki konmsi tou sa bann keksoz i ava ganny regarde pou ki a lafen dizour, tou Seselwa, travayer Seselwa i ava ganny sa larzan anba sa wage Grant COVID-19 line ki nou ti mete dan soz.

Parski Mr Speaker petet dir Minis, parski La Digue spesyalman petet i annan en kantite fristrasyon.  Premyerman pou zot build sa guesthouse, i kout 3 fwa plis ki si ou ti pe fer sa konstriksyon lo Mahé, blok i pli ser, tou sa bann materyo.

Bann kondisyon i bokou pli kot en dimoun ti ava kapab fer detrwa plis lasanm i ganny kondisyon; club car i ganny kondisyon; lo tou keksoz i ganny kondisyon. E sa i fer i annan fristrasyon.  En transpor i annan Richard Mussard ki anvi ede dan konstriksyon, Transport Commissioner i dir ek li non pa pou anmennen sa teleskopik pou met beton pli o.

Pase mon koz ek en garson ki i annan en bato Mr Henry Mussard i dir ek mon i la i pe rod zis en forklift, en forklift pou li letan i anmenn marsandiz pou leve pou met pickup, zot dir ek li non.  Kan i annan bann pti keksoz forklift nou pou al fer pronmnen dimoun ladan?  Ou pou al welele ladan?  Non!  Ou pa pou al taroza ladan Vandredi swar.  Me bann pti keksoz koumsa kot zot ganny restrikte.

Alor Minis konmsi tousala bann keksoz ki nou bezwen pran konsiderasyon pou nou kapab ede e pou fer biznes antre.  E parey nou parey nou’n dir plis ki 80poursan touris ki poz zot lipye Sesel, zot osi al La Digue e La Digue bann dimoun i pey zot tax. 

E finalman, finalman Mr Speaker mon ti ava kontan nek zis ou konnen parfwa ou bezwen osi edik nou dimoun.  Sa lekspresyon letan ti pou travay reggae letan pou peye slow dance.  Mr Speaker mon krwar i enportan pou osi dir, en travayer i ganny peye lafen dimwan e sa travayer i negosye.  Si i annan en Degre dan en Masters ensidswit i negosye pou son Masters. 

Alors i ganny peye pou son Masters.  Biznes li i met son larzan i envestir pou li ganny profi.  E alors sa 2 keksoz fodre pa ki nou anbet dimoun.  E se sa ki parfwa i fer konfli koumsa sa dimoun i get ou kont akoz ou’n dan biznes pou li dir,

‘’Arr i annan en ta larzan!  Mwan mon en travayer –‘’ Be pa ou ti ganny peye lafen dimwan?  Me pa ou ti satisfe ou ti ganny peye?  Letan keksoz i en pe tough prezan ou regard dan lot kont?

Konmsi sa bann keksoz mon krwar ki fodre nou ganny li byen e sa peryod la i enportan pou nou kapab pas ladan, ganny bann keksoz byen Seselwa biznes i kapab kontinyen marse.  Parski i pou annan en demen.  Ozordi i annan COVID ki pe – me nou pe look forward pou sa demen kot nou kapab refer.  E parey mon pe dir tou Seselwa e Minis kan nou pou ganny sa premye rapor?  Mersi bokou.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pou ou bann entervansyon.  Wi mon ti’n konfirm en meeting pou 10er edmi Vandredi bomaten.  Mon ava regarde efektivman si mon kapab ranvers sa i monte, pou ed sityasyon.  Sa voyaz mon pou marse.

Sa ka spesifik kot ou’n koz lo la lo sa   rejection, parey mon fer toultan, si ou pa mind fer donn mwan son detay e mwan mon ava regarde kote i ete akoz eksetera, e mon ava enterakte sa aplikan.  5,804 pou en commission agent,  wi mon’n konn enn de ka.

E i annan enn in deza lo appeal akoz mon krwar parey mon’n dir, letan nou get appeal nou bezwen regarde avek en lot lizye.  En lizye en pe pli imen.

Sa car hire son 18mil Ero e son R13mil wi li osi en ka kot i enportan nou regarde.  Akoz si i ganny refiz-e mon krwar i byen i appeal, i permet nou apre servi osi sa bann keksoz pou nou aziste kriter.  E parey mon’n fer resorti mon krwar kriter pou bann pti biznes par-ler i en pe kekfwa tro stringent   ver – se bann kriter bann gro biznes nou bezwen modifye li.  I en keksoz ki mon’n deza pran en commitment lo la.

Taksi drayver ki ganny zero, i senpleman akoz zot pa oule donn zot kont labank.  Zot refiz-e sistematikman.  Mon pa konn okenn lezot ka kot taksi drayver pa’n ganny asiste e si i annan en ka spesifik zis dir sa msye ouver en kont labank soumet son kont labank, fer son aplikasyon pou Zen e nou a regarde.  Akoz nou’n pey bokou taksi drayver lo Mahé lo Praslin e i annan en bon pe parey nou konnen in pas lo 5,804 pou rezon ki mon’n deza eksplike.

Rapor pou Avril, ou ava dakor avek mon Onorab e tou Manm Lasanble, sityasyon ki nou retrouv nou ladan i pa pou fer sans pou soumet en rapor pou Avril selman akoz for all    purposes nou’n amalgam Avril ek Me ansanm.  Akoz nou’n fini pey Me la lo sa bann ki ti ganny aprouve Avril.

So nou pou fer en rapor ki nou pou soumet ki pou annan Avril ek Me ansanm.  Sa, sa ki mon anvi enform zot.  Fer sa rapor e nou kapab fer li kase rapidman kontenir ki napa bokou aplikasyon pou mwan Me ki nou pe trete la.

E lemoman nou fini fer sa Press Conference Lendi nou bann nouvo kriter nou ava travay lo sa rapor e lemoman nou annan sa rapor nou ava soumet li pou Mwan Avril e mwan Me.  Avek sa Mr Speaker mon rann ou lantern.  Mersi.

 

MR SPEAKER

Mersi, mersi Minis.  Onorab Ramkalawan.

 

HON WAVEL RAMKALAWAN

Mr Speaker Minis in dir mwan mon ava donn li serten, serten, serten non.  E mon ti a kontan termin lo pwen ki si nou’n kontinyelman annan sa enteraksyon pou nou konnen ki pe pase ensidswit, nou konnen ki pou dir ou Minis ou devan, me par deryer ou i annan sa lekip.

Mon ti vreman mon ti vreman touse letan ou ti met ou pti ‘’Thank you card’’ kot letan ou ti dir i annan zis en ‘’Thank you card’’, be nou dan Lasanble, letan nou anmenn kestyon, mon anvi dir avek ou ki i annan bokou ‘’Thank you cards’’ ki sorti dan Lasanble.

Parski nou tou nou pe donn ou sa foul sipor.  Premyerman nou’n approve sa Bidze e apre sa nou rekonnet travay ki sa bann dimoun pe fer e alors rest assured ki pou dir ou annan nou sipor e anmezir ki nou fer sorti sa bann pwen nou pe osi apiy tou biznes e travayer Seselwa.  Mersi bokou and all the very best. 

 

(APPLAUSE)

 

 

MR SPEAKER

Mersi Onorab.  Minister dernyen komanter.

 

MINISTER MAURICE LOUSTAU-LALANNE

Mersi Mr Speaker.  Mr Speaker mon tre satisfe avek sa bann diskisyon ki nou’n gannyen.  Mon’n mentenir mon fransiz ladan.  I annan serten keksoz mon pa’n kapab donnen, me mon krwar si nou kontinyen lo sa larout nou ava nobou, byento met en lafen avek sa bann fristrasyon ki i annan, akoz nou pe amelyor sistenm, pou fer sir ki presyon ki lo travayer Minister Finans pou delivre sa louvraz ki en louvraz tre difisil, sa i ava redwir.

E an menm tan bann kliyan ki nou pe deservi i ava bokou pli satisfe.  E avek sipor Lasanble mon krwar ki nou pou kapab kontinyen dan sa dyalog pozitiv pou met sa louvraz deryer nou byento.   E fotespere ki nou pa vwar COVID ditou e nou kapab relans nou ekonomi dan en fason apropriye pli vit ki posib.  E nou kontinyen avek sa determinasyon, pou nou reganny nou lekonomi lo en footing pozitiv olye  sa footing negativ ki nou ladan.

Avek sa mon ti a kontan remersi ou Mr Speaker, remersye le de Leader pou zot lentervansyon e tou Manm Onorab otour sa dan sa Lasanble ki’n entervenir lo sa diskisyon.  Mersi bokou.

 

MR SPEAKER

Mersi Minis.  Mon pa pou kapab les ou ale san partaz en pti mo mon osi mon annan plizyer ka ki’n vin kot mon lofis.  Mon’n fer swivi avek ou Departman ki pe deal avek.  Me mon kapab dir tou bann case dernyen mon krwar ti pandan weekend la tou bann case in ganny dealt with, properly accounted for. 

Mon pa pou nonm personn an partikilye.  Me sa manmzel, mon pou zis nonm sa manmzel ki pou annan kontak i konnen lekel li,  i form par dan sa lekip ki tanzantan mon anvoy en pti mo courage.  I konnen lekel li e mon ti anvi felisit li avek lekip annantye.

So Minis ou’n pas en lazournen antye avek nou.  Bomaten ou’n deal avek kestyon pou Minister Lasante e nou’n pran apre midi annan tye san en break pou deal avek sa PNQ.  Mon ti a kontan remersi ou ankor enn fwa e nou ava eskiz ou parmi nou.

Petet mon osi mon ava dir ou kouraz Minis parey mon pas avek ou bann travayer.

 

(MINISTER LOUSTAU-LALANNE WAS EXCUSED FROM THE HOUSE)

 

MR SPEAKER

Bon, Onorab Flory Larue.

 

HON FLORY LARUE

Mersi Mr Speaker.  Mr Speaker mon ti anvi raise en point of order anba 56 (1) en intervention, Minis ti promes mwan en lalis depi bomaten pou kestyon bann guideline pou social distancing dan bann prizon bann detention centres.  Mon pa ankor resevwar.  Mon pe sey regarde.

 

MR SPEAKER

Mersi Onorab.  Sekretarya in note.  Nou ava fer le neseser.  Nou ava fer swivi.  E mon swete par demen nou’n kapab an posesyon.  Yes Onorab Pillay.

 

HON SEBASTIEN PILLAY

Mersi Mr Speaker.  Mon le demann ou en gidans lo anba order 8 avek Order 2 lo Standing Orders.  Mon pe tann dir sa demann bann dokiman.  Me mon pa pou vwar Manm acknowledge osi ki zot in resevwar dokiman.

Par egzanp bomaten i annan Manm ti demann MOU lo lot kote, nou’n demann MOU pa neseserman an konteks sa dokiman ozordi.  Me an konteks de lezot dokiman.  Semenn pase nou ti demann lezot dokiman sa osi nou gannyen.

Petet osi nou ti ava – mon pa konnen ki mannyer nou pou fer ki nou sizere ki nou annan en acknowledgement zot dokiman.  Akoz kekfwa i ava send a wrong message deor poudir ki Minis pa pe provide lenformasyon.  Kantmenm in provide serten lenformasyon petet i annan ki pa ankor fini donnen.  Mersi Mr Speaker.

 

MR SPEAKER

Mersi.  Bon tou bann dokiman ki ganny demande dan House i vin atraver Sekretarya e Sekretarya nou fer le neseser pou nou distribye sa bann dokiman.  E nou osi tou nou acknowledge avek sa Minister konsernen, ki nou gannyen sa bann dokiman.

Okenn bann Manm ki demann spesifikman par egzanp Onorab Flory Larue and all that, i kapab fer swivi direkteman avek Sekretarya akoz se nou ki pou fer swivi ek sa Minister.  E with regards to sa dokiman spesifik bomaten MOU nou’n deza gannyen.  Nou’n partaz avek le de Leaders ok, e ankor parey Minis in dir, i annan bann pwen sansib ladan bann pwen konfidansyalite.  E mon swete ki okenn Manm ki ava vwar sa dokiman, i ava osi tou tenir li o tout konfidansyalite, ok? 

Nou pou termin nou travay pou la ozordi e nou pou rezwenn demen 9er bomaten.

 

(ADJOURNMENT)