::
Home » Verbatim » 2020 » Verbatim Wednesday 6th May, 2020

Verbatim Wednesday 6th May, 2020

NATIONAL ASSEMBLY OF  SEYCHELLES

Wednesday  6th May, 2020

 The Assembly met at 9.02am

 National Anthem

 Moment of Reflection

 Mr Speaker in the Chair

 

 

MR SPEAKER

Bonzour tou Manm Onorab e bonzour tou dimoun ki a lekout e pe swiv travay Lasanble Nasyonal.  Nou pou kontinyen nou travay bomaten kot nou’n arete yer.  E parey mon ti’n anonse bomaten nou pou pran 2 Bills pou Second Reading pou nou debat lo la.  Be zis avan nou proceed nou annan 2 Bills osi ki nou pou fer First Reading.  Mon ava alor donn laparol Deputy Clerk pou fer First Reading sa 2 Bills ki lo Order Paper.

 

MADAM DEPUTY CLERK

Mersi Mr Speaker.  Bonzour Mr Speaker. Bonzour tou bann Manm e tou dimoun ki a lekout. Bill No.11 of 2020:

        This Act may be cited as the Children (Amendment) Act 2020.

Bill No.15 of 2020

 This Act may be cited as the State Land River Reserves (Amendment) Act 2020. Mersi Mr Speaker.

 

MR SPEAKER

Mersi Madanm Deputy Clerk. Mon ava demann parliamentary reporter pou fer rantre Vis-Prezidan avek Attorney Zeneral, pou nou pran Second Reading pou sa 2 prosen Bills.

Bon mon a dir bonzour e welcome dan Lasanble Nasyonal, Vis-Prezidan Vincent Meriton.  E Vis-Prezidan pe ganny akonpannyen par Attorney Zeneral Mr Frank Ally.  VP ankor enn fwa bonzour e welcome dan Lasanble.  Mon ava prezan pas laparol avek Onorab De Commarmond pou nou fer bann prosedir pou nou kapab pran Second Reading. Onorab De Commarmond.

 

HON CHARLES DE COMMARMOND

Mersi Mr Speaker. Bonzour Mr Speaker.  Bonzour VP avek Attorney Zeneral.  Bonzour tou Manm Onorab e tou dimoun ki a lekout.  Mr Speaker anba Order 91(1) lo Standing Orders mon oule move pou sispann lartik 64(1) lo Standing Orders pou permet nou sot sa 7 zour requirement pour ki the Notaries (Amendment) Bill, 2020: Bill No.17 of 2020 i ganny lir en Dezyenm Fwa.  Mersi.

 

MR SPEAKER

Mersi Onorab De Commarmond, okenn Manm ki oule segonde? Yes Onorab Sylvanne Lemiel.

 

HON SYLVANNE LEMIEL

Mersi Mr Speaker.  Bonzour tou dimoun.  Motion is seconded.  Mersi.

 

MR SPEAKER

Mersi Onorab Lemiel.  Bon nou avar pran en vot pour Mosyon pour sispann Standing Orders pou sa 7 zour notis.  Tou Manm ki an faver? Okenn Manm ki kont?  Madanm Deputy Clerk.

 

MADAM DEPUTY CLERK

Mersi Mr Speaker, mon’n rikord 12 Manm ki’n vot an faver, e personn kont.  Mersi.

 

MR SPEAKER

Mersi Madanm Deputy Clerk Motion has benn approved.  Nou ava move prezan pour fer Second Reading.  Onorab De Commarmond.

 

HON CHARLES DE COMMARMOND

Mersi Mr Speaker, Mr Speaker anba Order 64(2) lo Standing Orders mon oule move ki the Notaries (Amendment Bill, 2020, Bill No.17 of 2020 i ganny lir en Dezyenm Fwa.  Mersi.

 

MR SPEAKER

Mersi Onorab De Commarmond, okenn Manm ki oule segonde.  Yes Onorab Lemiel.

 

HON SYLVANNE LEMIEL

Mosyon in ganny segonde.  Mersi.

 

MR SPEAKER

Mersi. Mosyon in ganny segonde, prezan mon ava envit Minis pour li entrodwir premye Bill.  Vis-Prezidan laparol i pour ou.

 

THE VICE-PRESIDENT MR VINCENT MERITON

Mersi Mr Speaker.  Bonzour Mr Speaker.  Bonzour tou Manm Onorab.  Mr Speaker mon annan plezir pou prezant Prozedlwa, Notaries (Amendment) Bill, 2020, devan Lasanble Nasyonal.

Sa Prozedlwa, pe ganny propoze ogmant lakantite zour ki en noter i kapab absante dan son fonksyon koman noter san permisyon Prezidan Larepiblik.

Sa i prensipalman aplike kan en noter i absante dan pei dapre Notaries Act 1995, en noter i en zofisye piblik e i ganny apwente par Prezidan Larepiblik.  Fonksyon, en noter i ganny prevwar dan Notaries Act.  Dapre sa Lalwa en noter ki bezwen absante dan son fonksyon pou plis ki 3 zour i bezwen ganny permisyon Prezidan Larepiblik pour son labsans.

Sa lobligasyon ou egzizans in egziste depi ler Lalwa ti vin anfors an 1805 pou reglemant sa profesyon. Sa legzizans ti prensipalman.   Akoz ti annan en ptigit noter dan pei letan pou voyaz e ant Sesel aletranze, ti long;-e  laplipar dokiman pou tranzaksyon ti bezwen ganny prepare e drafte par en noter e ganny sinyen devan en noter, e pou sofgard dokiman dan posesyon en noter.  Par egzanp lavant later Testaman, eksetera.

Mr Speaker, alor i ti neseser ki administrater oubyen Gouverner pandan lepok kolonyal e Prezidan apre Lendepandans ti fer sir ki a tou moman, piblik ti annan sifizaman nonm noter dan pei pou donn en servis notarial manm piblik, e reponn a demann zot kliyan.

Ozordi sityasyon in sanze i annan plis noter dan pei i annan akse a noter. Menm ler i aletranze, i pli fasil partikilyerman avek teknolozi lenformasyon e kominikasyon;-  voyaz ant Sesel ek pei aletranze i pli fasil e pli vit.  En kantite tranzaksyon propriyete imobilye espesyalman anba Land Registration Act e Condominium Property Act i kapab ganny prepare e drafte par en avoka e sinyen devan en avoka.

Mr Speaker dapre statistik ki nou’n gannyen sorti kot Biro Rezistrar Lakour Siprenm i annan 46 noter lo role of notaries ki pe donn sa servis notarial.  43 ladan pe an menm tan egzers profesyon koman avoka anba Legal Practitioners Act.

Zis 3 dan sa 46 noter ki pa pe egzers profesyon avoka, avek an vi lapwentman e natir en noter, i reste neseser ki en Noter i bezwen ganny permisyon pou li absante dan son fonksyon pou en serten peryod.  Apre konsiltasyon nou pe propoze ki peryod ki en noter i kapab absante san permisyon i sorti 3 zour pou vin 31 zour, Bar Association in ganny konsilte lo sa propozisyon, e zot an faver en tel logmantasyon dan sa peryod.

Mr Speaker mon ti a kontan demann tou Manm Lasanble pou siport sa Prozedlwa.   Mersi Mr Speaker.

 

 

 

MR SPEAKER

Mersi Vis-Prezidan.  Bon mon avar prezan ouver deba lo merit e prensip zeneral Bill ki devan nou, e mon avar demann okenn manm ki oule entervenir.  Yes Onorab Bernard Georges.

 

HON BERNARD GEORGES

Mersi Mr Speaker.  Bonzour Vis-Prezidan bonzour Attorney Zeneral, bonzour tou bann manm koleg Lasanble ek bann dimoun dan lakour.  Mr Speaker mon pa anvi prolonz sa deba, mon krwar Vis-Prezidan in dir en pti pe tou sa ki mon ti a kontan pe dir bomaten.  Me mon ti a kontan zis azout enn de pti parol lo sa size Noter.  Akoz i en size ase enteresan.

Parey Vis-Prezidan in dir Lalwa Noter isi i san dout pli vye lalwa, in ganny amande resaman.  Me i en lalwa ki’n ariv isi an 1805 1an avan Code Civil, donk i pli vye Lalwa ki nou annan isi Sesel.  E i ti ganny anmenn isi akoz parey Vis-Prezidan in dir.

A sa moman ou ti bezwen toultan annan en noter pou fer tou bann dokiman legal, bann tranzaksyon later, bann Testaman, deklarasyon zanfan eksetera.  Siksesyon anba Lalwa Franse ti noter ki ti fer, me o fir a mezir nou’n vwar ki nesesite pou annan noter in redwir bokou.

Ziska dan bann lannen ’70 ti annan annefe zis 2 noter isi Sesel.  E pandan zenerasyon ek zenerasyon ti lafanmir Nageon De Lestang ek lafanmir Morel/ Duboille ki ti noter e sa ti pas papa, zanfan, eksetera.

E sel fason pou en dimoun vin en noter sete pour li fer en peryod letan – 6an annefe dan Chambers en noter, aprann son profesyon,  epi li menm li vin noter.   E se pour sa ki noter i ankor fonksyonnen dan plizyer pei. La France prensipalman,  me osi nou vwazen Moris o bor nou.

Isi dan nou pei,  a en serten moman nou’n deside conflate   striktir noter ek striktir avoka, e fer tou le 2 vin plizoumwen parey.  E sa in vin a en serten moman kot letan bann avoka ti’n anvi vin noter e ti anvi antre dan sa profesyon ki sa 2 fanmir ti tenir.  E an retour bann noter in dir, be si avoka i kapab vin noter, noter osi i kapab vin avoka.

E donk ti annan sa sanzman dan Lalwa ki ti permet noter vin avoka e avoka vin noter, dan en fason ki ozordi parey in ganny dir, lamazorite avoka apre ki zot in egzers zot profesyon pou en peryod 5an zot vin Noter.

E ozordi nou’n vwar ki avek revolisyon avek bann modernizasyon bann Lalwa, i annan annefe tre pe fonksyon ki zis noter i kapab fer.

1) Se en testaman notarye, zis noter i kapab fer parey nou ti vwar dan Code Civil.

En lot se deklarasyon zanfan. Si en papa i anvi deklar son piti ki i pa ti’n deklare ler zanfan in ne, dan sa 30 zour apre nesans son zanfan, i bezwen al devan en noter.  I pa kapab al devan en avoka.  I bezwen al devan en noter fer en acknowledgement of child devan sa noter.

E 3enm fonksyon noter, e la in annan en logmantasyon  e sa se atraver nou biznes offshore.  Pou ou kapab apostir en dokiman – e bokou dokiman enternasyonal ozordi i bezwen ganny apostiye e ou bezwen annan sinyatir en fonksyonner ofisyel.

E enn sa bann fonksyonner ofisyel se en noter.  E nou ava vwar dan Lalwa 1805, i dekrir en noter koman bann fonksyonner piblik.  En noter annefe i pa parey en avoka ki egzers en profesyon liberal.

En noter se en fonksyonner piblik ki ganny apwente pou li desarz en fonksyon piblik.  I parey en Ziz dan sa sans.   I pa parey en avoka ki prezan par dan ki pran en kote dan en kliyan.

En noter i sipoze en noter dan milye e fer sir en tranzaksyon ant 2 dimoun i pas dan en fason zis.  E i pa i en fonksyonner piblik. I pa en fonksyonner profesyon liberal kot i egzers son profesyon pou zis en kote oubyen en lot.

Mon krwar i ti neseser sitye en pti pe sa konteks Mr Speaker.  Akoz i annan en lot kestyon ki leve e sa se eski nou bezwen annan en kontinyasyon dan Lalwa Noter, mannyer i ete ozordi?

Setadir, en noter Franse en noter sa ki nou apel en noter Laten oubyen, eski nou kapab bouze e vin en notary public parey dan bann pei Commonwealth i annan?  Ki son fonksyon  se zis sa bann fonksyon parey stanp apostir stanp dokiman, pour donn li envalidite.

Me sa set en deba pou en lot zour. Me i sisit en deba ozordi mon krwar ki enteresan a savoir, eski nou devret gard sa nesesite pou noter?  Etandonnen ki i annan en 50enn noter ozordi pour bezwen demann Prezidan Larepiblik permisyon pou li pou sorti dan pei?  Oubyen enform Prezidan?

Parey Vis-Prezidan in dir a en serten lepok ti annan telman ptigit noter, e ler zot ti vwayaze zot ti vwayaz pou en peryod letan ase konsiderab.  Akoz i ti pran ou zis 3 zour pou ou ariv Lafrik, a sa moman letan.

Alor pou ti bezwen notifye Prezidan, pour ki ti annan en noter isi lo pei, si ti annan en dokiman ki zis noter ki kapab fer ki ti bezwen ganny fer pandan labsans sa noter.

Me ozordi, eski sa nesesite i ankor touzour egziste ? Mon sipoze ki etandonnen ki ou en fonksyonner piblik, ler ou en noter e ki ou apwentman i ganny fer par Prezidan sepa en, ou pa pas en legzanmen malgre ki ou pas en legzanmen pou ou vin noter;- malgre ki ou kapab pas en legzanmen pou ou vin noter si ou anvi, me se Prezidan ki nonm ou e sa se dan son prerogativ si i pa anvi apwent ou i pa fer li.

Se kekfwa akoz sa vestiz ki nou gard sa nesesite pour demann permisyon ler nou vwayaze.  Me sa ki nou ava vwar se ki annefe sa pa’n ganny fer.  E annefe i pa ganny fer.  Mwan mon rapel en fwa ler Prezidan Rene ti ankor Prezidan, mon ti toultan demann permisyon pou mwan sorti.  E i annan en fwa kot mon’n demann permisyon e mon pa’n esper larepons, mon’n vwayaze malgre ki mon ti’n demande, mon pa’n esper li vin dir mwan wi mon kapab ale.   Ler mon ti retournen ti annan en let lo mon latab ki dir mon pa fre ankor  ou’n naughty, ou’n sorti san mon permisyon, si ou fer ankor ‘’gara ou.’’  Lentansyon se ki mon ti kapab perdi mon manda Noter.

Donk i ti strik a en serten moman, e toultan nou ti demann sa permisyon, ziska en serten zour ler ti annan sifizaman noter nou’n ganny dir offiscieusement pa ofisyelman, aret demande.  Akoz i vin en problenm administratif kot nou bezwen ekrir li en let.

E toultan nou pou donn permisyon akoz i annan sifizaman Noter.  Alor annou fer krwar ki provizyon pa egziste aret demande.  E depi sa zour annefe personn ou at least mwan, pa kapab koz pour lezot noter me mwan, mon pa’n demann permisyon.  E mon’n sorti mannyer mon’n kontan e mon pa’n ganny en let lo mon latab letan mon’n retournen pou dir mwan ‘’gara mwan!’’,

Donk Mr Speaker mon’n dir sa bomaten pour nou reflesir lo la.  E anmezir ki nou al deba pou nou regarde si i ankor annan en nesesite annan sa bezwen. Akoz sa Lalwa in pase e tou Noter in ekout nou ozordi nou tou nou pou bezwen aplik lalwa.  E sak fwa nou sorti pou en peryod 31 zour ou plis, nou bezwen demann permisyon.

Erezman ki napa bokou nou ki kit pei pou plis ki 31 zour a en serten moman. Donk actually sa provizyon ki nou pe fer la, i en provizyon teknik i pa en provizyon ki pou ganny aplike.  E donk se pour sa rezon ki mon demann sa kestyon eski in the future etandonnen ki nou annan sifizaman noter, eski nou bezwen sa provizyon at all?

Me bomaten mon krwar sa set en bon premye pa, e mon envit parey Vis-Prezidan in fer, tou bann Manm Lasanble pour vot an faver sa pti amannman ki pou annan, en konsekans ase enportan. Mersi Mr Speaker.

 

MR SPEAKER

Mersi Onorab Georges.  Mon avar donn laparol Onorab Clifford Andre.

 

HON CLIFFORD ANDRE

Mersi Mr Speaker. Mr Speaker mon pa pou long.  Bonzour VP ek ou Attorney Zeneral, osi bonzour.  Mon ti a kontan met lanfaz en pti pe lo sa dernyen pwen ki Onorab Georges in dir;- akoz Lalwa in dir ou, ou bezwen demann sick leave of the President atraver Attorney Zeneral.  E mwan osi mon krwar ki a sa pwen, i enportan pou note ki si en sityasyon i leve imedyatman. Dizon mon tonm malad, mon pa konnen konbyen letan mon away.

Mon ale deswit, ler mon ariv laba mon pe fer mon tretman i dir mon ok ou pou bezwen extend e dizon i ariv plis ki 31zour.  Be mon pa’n demann sa permisyon akoz koman bann noter koman bann avoka, nou esey respe Lalwa to the letter.  So si nou pe demande atraver Attorney Zeneral nou konnen i vreman, vreman bizi. I  annan bokou keksoz pe pase eski parey Onorab Georges in dir i ankor relevan a sa pwen ? Akoz pou et onnet mon osi e nou’n ale plis ki 3 zour.

Zanmen permisyon in ganny demande pourtan i dan Lalwa.  E mon siny bokou menm mon siny Attorney Zeneral ki la in annan lenstans ki in kit pei koman en noter e i pa’n demann permisyon, be eski i ankor relevan parey Onorab Georges in dir a sa pwen pou nou gard sa provizyon dan lalwa?  Kot kekfwa i pe anmar nou lanmen kan pa neseser?

Napa problenm pou nou vot an faver 31 zour me selman; eski i vreman en lamannman oubyen en provizyon? Mon ti a ekspekte kekfwa ki Attorney Zeneral ti a mete ‘’by repealing section 33 of the Notaries Act’’ would have been better, (mon believe i seksyon 33 menm) section 33 of the Notaries Act, konmsi tir li konpletman e les nou annan sa liberte.  Mon siny keksoz ti ava mars pli byen.  Mersi.

 

MR SPEAKER

Mersi Onorab Andre. Onorab Waven William.

 

HON WAVEN WILLIAM

Mersi Mr Speaker bonzour tou dimoun ki a lekout.  Bonzour Vis-Prezidan avek Attorney Zeneral, Mr Speaker bokou in ganny dir mon pa pour tous bokou lo sa bann pwen ki Vis-Prezidan in tous lo la, me selman mon anvi sezi lokazyon koman en Manm Elekte pour mwan poz 2 pti kestyon avek Vis-Prezidan oubyen avek Attorney Zeneral.

Mon anvi demande ki nou’n vwar ki i annan bann serten Prozedlwa, ki deswit i ganny travay lo la, me i annan plizyer bann Prozedlwa ouswa bann amannman ki nou vwar ki;- par egzanp Lapolis, zot in koz lo amannman lo MODA – Misuse of Drugs Act.

I annan lezot bann Lalwa osi tou mon pe demande si sa bann lalwa pou vin devan Lasanble?

e dezyenmman mon pa konnen i nou pou ganny prezante avek bann nouvo prozedlwa ki pou vini?

Akoz ki arive Mr Speaker mon pe dir sa, parfwa ou anvi fer serten resers, serten konsiltasyon epi ou vwar bann diferan stakeholders ki enplike ouswa ki sa lalwa i aplik pou zot, ou vwar poudir zot pe dir ki napa  ase konsiltasyon.

So mon pwen mwan se eski  nou kapab si i posib ganny en lalis bann Prozedlwa ki pou vin devan nou pou nou kapab fer ase resers, e konsilte bann serten bann dimoun ki ganny direkteman touse avek sa bann Prozedlwa.

Epi direkteman Mr Speaker mon pou met lanfaz lo la akoz mon santi sa i enportan, i tous Lapolis akoz zot lanmen i tonbe letan nou pe koz LO MODA.

Nou’n ganny dir dan lepase ki MODA pe vini amannman pe travay lo la, nou’n trouv dimoun in sorti in ganny transfer;- mwan, mon anvi ganny direkteman kan ki nou pe ganny the Misuse of Drugs Act?  Mersi bokou.

 

MR SPEAKER

Mersi Onorab Waven William. Mon ava donn laparol Onorab Charles de Commarmond.

 

HON CHARLES DE COMMARMOND

Mersi Mr Speaker.  Mr Speaker sa prozedlwa ki devan nou i en pti, pti Prozedlwa.

Ou a krwar konmsi naryen ditou me mwan mon get li avek bokou fyerte.  Mon get li avek bokou fyerte akoz pou mon la en landrwa konkret et kot ‘77 in anmenn nou!

E mon’n ekout Onorab Bernard Georges byen menm, e in dir nou kler poudir ziska dan bann lannen ‘70 sa Lalwa i enn bann pli vye lalwa ki nou pe sanze ki nou pe amande.

E ziska bann lannen ‘70 i annan zis 2 noter ti enportan sa letan.  Akoz noter fodre pa nou bliye noter i ganny apwente avan ‘70 la dan sa bann letan Lerwa.  Lerwa Franse   Lerwa La France laba li ki apwent Noter.

E apre lerwa letan nou vin en Koloni Gouverner i apwent Noter.  Apre la ler nou’n vin en Repiblik, Prezidan. Me la  ‘77 zisteman.  Apre sa ki mon oule dir se ki Noter zot in aprann avek sa ki pli vye ozordi avek nou bann vye Noter ki nou annan, bann ki pli ansyen i aprann ek sa 2;- Morel/ Duboille  avek Nageon de Lestang.  Me apre sa ki nou’n war sa kantite dimoun sa kantite Seselwa normal. Sa Seselwa  ki’n avoka, ki’n note.  E  ozordi Onorab Georges in menn dir nou in annan sote 40.  Konmsi dan sa bann moman letan modern Sesel la, sanmenm sa letan nou ganny bokou plis Noter.  E i pe kontinyen ogmante.  Bokou avoka e avoka  noter.

E sa bann travay ki sa bann noter ti fer zis noter ti fer avan e la nou’n ganny eksplike byen ki ozordi menm bann avoka.   i fer e sa letan pou travel pou ou al kot Lerwa, Lerwa ti an Frans e sa letan ti napa ni avyon e ti bezwen ki nou enform Lotorite ki’n apwent nou.

So e mon krwar ki ozordi i ankor relevan kantmenm i annan en ta avoka e noter i kapab osi zot akle en sel kou epi i mank zot, akoz konmela i annan bokou kantmenm bann keksoz ki noter i fer.  Napa tro bokou.

Me i enportan ki i annan detrwa noter ki reste e i enportan.  Mon krwar konmela nou kite sa olye 3 zour i ava vin 1 mwan parey nou pe dir la.

Me i enportan ki i annan sa kontrol to a serten ekstrenm, me i enportan i annan en senp dimoun i bezwen en noter, i bezwen en apostil, i bezwen en isi en laba e ki alor s ki noter i fer i ava la.

Nou vwar alor ki sa ki nou pe fer i byen ozordi i fasil pou travel.  Byensir son presyon i vin mwen, me selman i reste itil.  E mon krwar mon poudir sa Prozedlwa i bon ki nou siporte pour ki nou bouze.

E rol noter in osi ogmante o fye anmezir ki nou devlope e la nou pe koz lo offshore ki en keksoz ki pa ti la dan sa letan lontan.  Me la ozordi ankor i montre ou ki mannyer sosyete in grandi nou lekonomi, nou responsabilite koman en sosyete in ogmante.  E la nou pe devlop plis.

E byensir alor nou dir ek bann Noter keep it up, fer en bon travay kontinyen fer en bon travay e fer ki zot desarz sa travay piblik.

E zot non i dir zot, zot tit public notary, kontinyen fer sa bon travay pou piblik Seselwa.  E olye 3 zour la zot a kapab absant pou plis ki 3 zour pou en mwan avek permisyon byensir.  E avek sa mon ti ava demande ki nou tou nou siport sa Prozedlwa Mr Speaker akoz mon krwar i en bon Prozedlwa.  Mersi.

 

MR SPEAKER

Mersi Onorab De Commarmond. Mon ava donn laparol Onorab Wavel Ramkalawan.

 

MR SPEAKER

Mersi Onorab De Commarmond . Mon ava mon’n la parol Onorab Wavel Ramkalawan.

 

HON WAVEL RAMKALAWAN

Mersi bokou Mr Speaker. Bonzour tou bann koleg Onorab, bonzour Vis-Prezidan e Attorney Zeneral.

Mr Speaker sa deba ki nou pe annan bomaten lo sa Lalwa mon vwar li enteresan e in enteresan sa laspe istorik ki both Vis-Prezidan avek Onorab Georges in met devan nou.

E mon osi tou parske sa bann zafer noter i annan en eleman istorik atase avek li. E letan nou pe regard dan sa letan modern e sa ti enn bann dyalog ki monn ti’n gannyen avek Onorab Georges, se eski se Prezidan Larepiblik ki bezwen apwent bann noter ozordi?

Mon se sa kestyon prensipal ki mon anvi ki mon anvi demande. E rezon ki mon demann sa kestyon se parski letan nou retras sa eleman sa eleman istorik e ou demande be ok nou’n erit sa avek Langleter me li Langleter ki mannyer noter i ganny-?

 An Frans me solman wi sete Lalwa me selman nou’n viv pandan sa peryod kolonyal ki nou’n aksepte sa.

E Langleter i annan en lot sistenm. En noter Langleter mon mazinen i pa parey en Noter isi Sesel parske i diferan. E li noter Langleter sa ki nou apel en notary Langleter li i ganny apwente akoz sa koneksyon, ant The Church of England avek koman The Established Church Langleter;- The Official Church en noter i ganny apwente atraver Larsevek Canterbury.

Ki vin en lot zafer osi i ganny apwente by The Court of Faculties of Archbishop of Canterbury. Me solman i en Qualified Lawyer li;- i en Qualified Lawyer me selman pou li ganny sa pti bout papye i atraver The Archbishop of Canterbury.  E ok nou’n erit sa eleman Franse dan nou bann Lalwa nou’n pas bokou letan pe regard Code Civil, tou sa bann lamannman.

E konmsi i anmenn mwan ankor enn fwa dan sa deba, ki nou’n annan lo Code Civil. Si ozordi bann noter ok nou annan Attorney General ki azir prensipalman koman noter Gouvernman.

Tou bann dokiman notarial ki Gouvernman i bezwen fer, se Attorney Generale ki bezwen fer. Alors Attorney General li dan son biro li osi kapab apwent bann lezot asistan ki Prezidan wi.  Solman Attorney   General i kapab dir regarde mon pa kapab fer tou sa la mon menm be alors mon annan bann avoka kalifye la e zot ava kapab apwent zot koman noter, pou zot kapab fer bann pti lavant later isi en lease Gouvernman.  Tou sa bann deal.

So, kestyon ki nou bezwen la ki nou bezwen demande se koman dan lofis Attorney General koman sa public servant ki desarz bann responsabilite Gouvernman, eski nou bezwen annan sa lapwentman bann lot noter dan prive?

Eski zot bezwen ganny apwente e par Prezidan? Oubyen eski i bezwen annan en lot body ki apwente.  Par egzanp en judicial body? Kekfwa Sef Ziz mon konnen mon pe zis poz ou bann kestyon.

Sef Ziz parske letan en Avoka pa egzanp in pas son bar se pa Prezidan Larepiblik ki apwent li ki donn li tou son bann dokiman, se Sef Ziz.  I take son oath devan Sef Ziz.

En Mazistra parey Mazistra osi tou letan i ganny apwente i take son oath devan Sef Ziz.  So eski – kestyon ki mon pe demande, eski moman i pan arive pou nou tir sa responsabilite avek Prezidan Larepiblik e pou nou anmenn li lo kote?

Parske tou son bann travay i legal i tousala lo sa nivo. Se sa kestyon ki mon pe demande.  E an demandan sa kestyon, prensipalman mon pe demande be sa lamannman i la mon dakor antyerman avek Onorab Andre pou sorti 3 zour pou vin tranteen zour ki diferans i fer?

Parski sa bann dimoun Attorney  General li otomatikman Prezidan pou konnen letan i pa dan pei akoz i tonm anba Lofis Prezidan alors si i pe kit pei;- parey nou menm koman Manm Lasanble, si nou pe kit pei nou bezwen enform Speaker,  ki pou nou dir nou pe kit pei. Parski i annan bann lobligasyon, an ka i annan bann state of emergency ensidswit tousala .

E nou labsans osi tou i determinen asi nou kontinyen koman en Manm Lasanble, si nou absant pou 30zour nou ganny retire koman en Manm Lasanble ensidswit, tousala.

So, lofis Attorney General li i pou tou fason enform Prezidan Larepiblik e li koman the main government notary sa i ok. So eski vreman nou bezwen sa lamannman 31 zour la sorti 3 pou vin 31. Mon pa konnen mwan, se sa mon pe dir.  Si nou pou bouze e si nou anvi bouze lets go all the way.

E amwen ki mon ganny bann larepons vreman konvenkan, ki pou dir se ki Prezidan Larepiblik ki bezwen kontinyen apwent bann noter. Mon pa war akoz i bezwen kontinyen.  Mwan mon krwar nou bezwen desann pli ba.

E parske sa dimoun pou li parske la i vin i kapab annan en capricious – en keksoz ki Prezidan li i annan sa e li i pa bezwen dir akoz i apwent enn in apwent lot. Me tandis ki letan ou pas en legzanmen i dir avek ou si ou’n ganny 50poursan sa legzanmen ou’n pas konmela, menm 35 oursan, i kapab dir ek ou this is the pass mark.

Parey ki i annan serten legzanmen ki ou fer, i dir avek the pass mark is 75.  Alor eski pa ler pou nou tir sa eleman pou ki nenport dimoun?  E mon kontan ki Onorab De Commarmond in korize pou dir ki nou’n vin endepandan ‘76 e non pa ‘77. Ki pou dir sa osi tou nou kapab bouze lo sa nivo fairness pou ki nenport dimoun ki kalifye i kapab ganny apwente koman en Noter.

Sa i mon de pwen ki mon ti ava kontan fer Mr Speaker an relasyon avek sa Lalwa. Parske mon krwar ki kekfwa The Notaries Act li menm  etandonnen, nou’n ganny dir pou i enn bann pli vye Lalwa en zour i ti ne en zour avan Civil Code.  Petet the next important travay ki nou ti a bon nou fer, se pou regard li osi tou pou met li anliny avek modernite.

E mon konnen pou dir both Attorney General, Onorab Georges, Onorab Andre nou tou nou kontan modernite e si nou kapab fer li vin modern;- annou anmenn li antye, nou ava moderniz li. Mersi bokou Mr Speaker.

 

MR SPEAKER

Mersi Onorab Ramkalawan. Yes Onorab De Commarmond.

 

HON CHARLES DE COMMARMOND  

 Zis pou mwan koriz Onorab Ramkalawan pou li aret fer sa kalite blunder!  Mon pa’n zanmen dir Lendepandans ‘77 mwan! Mon konn tre byen Lendepandans i ‘76. ’77 ti La Revolisyon. Mersi!

 

(laughter)

 

MR SPEAKER

Mersi Onorab. Bon mon ava …

 

 

(Interruption)

 

 

MR SPEAKER

 Ok, Order! Order! Mon ava prezan envit Vis-Prezidan pou donn son repons e okenn klarifikasyon. Vis-Prezidan la parol i pou ou.

 

THE VICE-PRESIDENT MR VINCENT MERITON

Mersi Mr Speaker. Mr Speaker mon ti ava kontan remersi tou Manm Onorab ki’n pran laparol bomaten. I annan en kantite keksoz mon aprann la avek Onorab Georges pou dir ti annan zis de fanmir ki ti noter.

E osi nou aprann kapab apre La Revolisyon in kapab – e osi Onorab Ramkalawan in eksplik nou ki mannyer i ganny apwente Langleter.  So mon krwar i bann leson listwar ki nou’n pas ladan ozordi.

Mr Speaker  mon ti a kontan fer remark lo sa ki Onorab Andre in dir, in komans son prezantasyon apre in anvoy sa biro lo Attorney  General me solman fodre dir ki sa lofis i annan en serten responsabilite i annan responsabilite ver Larepiblik e viza zi son kliyan sirtou.

E mazinen ler ou pou absante, dan ou posesyon i annan tou en arsiv ki parey ou’n dir Onorab, ou arive ou al deor ou al trete ou pran plis letan, i bezwen serten bann laranzman ki ganny fer, ki ou ale avek permisyon Prezidan Larepiblik ki avek kondisyon.

Pa akoz i bezwen konnen kot pe ale ki ou pe al fer me responsabilite ki ou annan viza vi bann kliyan ki ou deservi.  Akoz Noter i en pozisyon i pa isi anba li byen o.

Se pou sa rezon ki ozordi ki Prezidan pe apwent li.  Nou’n pran sa ek La France nou anmenn li.  I annan en rezon akoz. Pou montre pou reflekte lenportans pozisyon Noter dan pei.  I pa zis en senp Avoka, me i annan sa rol enportan e primordial dan fonksyonnman nou demokrasi, e dan fonksyonnman bann lobligasyon legal ki pei i annan.

Onorab William ou annan en pwen;- mon krwar nou kapab fer gannyen lalis bann Lalwa ki pe vin devan Lasanble, pou ki nou osi tou le de Leaders ki okouran i kapab partaze e nou osi nou komans fer nou homework.

Me selman defi ki nou annan ozordi nou anvi ki ler nou anmenn en Prozedlwa isi, i annan konsiltasyon ki pran plas.  E enn bann rezon ki par ler nou ganny retar avek se sa kestyon pou prosesis konsiltasyon avek bann sekter konsernen, pou fer sir ki ler i vin isi nou’n preski plizoumwen exhaust bann konsiltasyon.  E vin avek en keksoz ki apre Lasanble i donn son stanp lo la.

Onorab De Commarmond in met lanfaz lo responsabilite ki Noter i annan vizavi kliyan, vizavi Larepiblik, mon krwar i enportan.

E kestyon ki Onorab Ramkalawan in met devan e Onorab Georges in met devan, eski nou pran en desizyon la ozordi pou nou ogmant sa 3 zour vin 31 zour. E en lot deba pou en lot zour lo laspe pli larz sa Lalwa li menm.

Onorab Andre in propoze ki nou repeal serten seksyon ladan. Onorab Ramkalawan in demande, eski nou devret retir sa responsabilite anba lofis Prezidan, met li anba Sef Ziz?  Me selman mon repete i koumsa ozordi akoz i annan en rezon.  E rezon prensipal se ki nou bezwen valoriz e respekte pozisyon noter vizavi bann travay ki i fer dan domenn legal.

So, mon krwar in kapab annan en deba pou en lot zour, me selman ozordi mon demande ki si Manm bann Manm Lasanble ti kapab aprouve, donn zot stanp pou nou kapab bouz devan.  E apre kot nou kapab byen sir o fir amezir get sa deba en nivo pli lwen. Mersi Mr Speaker.

 

MR SPEAKER

Mersi Vis-Prezidan. Bon in ariv moman pou nou ran en vot lo merit e prensip zeneral sa amannman ki devan nou. Mon ava demann tou Manm ki an faver? Okenn Manm ki kont? Madanm Deputy Clerk.

 

MADAM DEPUTY CLERK

Mersi Mr Speaker,   mon’n rikord 29 Manm ki an faver e personn kont. Mersi.

 

MR SPEAKER

Mersi Madanm Deputy Clerk.  Eski nou kapab ganny en Formal Second Reading.

 

MADAM DEPUTY CLERK

Mersi Mr Speaker.

A Bill for an Act to amend the Notaries Act Cap 149, to increase the duration of leave of absence from function of office, that may be taken by notaries without requiring the permission of the President. Mersi Mr Speaker.

 

MR SPEAKER

Mersi Madanm Deputy Clerk. Bon eski nou pou bezwen al dan Staz Komite? Yes, mon ava donn laparol Chair Bills Committee. Yes Onorab Georges.

 

HON BERNARD GEORGES

Mersi Mr Speaker. Mr Speaker mon pa krwar ki nou bezwen me i annan en pti lamannman ki mon’n diskit avek AG, e ki menm lamannman ki nou pou fer dan sa de lezot Bill oubyen dan tou lezot Bill from now on mon krwar ti ava bon ki nou pran en desizyon lo la.

E sa se lapelasyon en Bill.  Si nou regard lo son title page, nou pou vwar ki konmela i met a Bill for an Act, e non pa of an Act, parey nou’n fer ziska ozordi. E sa set en kestyon drafting i pa en i pa en kestyon fondamantal. Attorney General in enform mwan o tan ki Chair Bills Committee son biro pe prefer sa formil a Bill ‘’for’’ an Act e non pa a Bill of ‘’an’’ Act parey nou ti pe servi up to now.

Alor mon’n soulev sa la, akoz mon’n dan sa de lezot Bills ki nou’n track e ki devan Lasanble, nou’n  fer menm sizesyon pou amannman avan ki mon koz avek li ‘’to bring it back to a Bill of an Act’’ ki la fason tradisyonnel ki nou ti pe fer.  Me mon les sa avek Lasanble pou deside si propozisyon Attorney  General ki ansarz drafting i enn ki nou vwar li i byen nou ava aksepte.

E donk nou pa move pou sa menm amannman dan bann lezot Bills ler zot pe vini. Mersi Mr Speaker.

 

MR SPEAKER

Mersi Onorab Georges. Onorab de Commarmond.

 

HON CHARLES DE COMMARMOND  

Mersi Mr Speaker. Mr Speaker an realite mon osi mon pa vwar nesesite pou nou al dan Staz Komite.  Me selman mon ti anvi ki Attorney General apard sa ki Onorab Georges in fer sorti, i pronons li petet pou nou Lasanble pou nou satisfaksyon e satisfaksyon piblik.

Aparaman avek COVID-19 avek sa sityasyon ki nou ladan, tou bann noter in absant plis ki trwa zour dan zot biro e zot pann ganny permisyon oubyen kwa?

Eski ou kapab dir en komanter lo la?  Akoz mon krwar petet justice the Bill is that i sa sityasyon ki nou ladan osi, ki anmenn sa nesesite pou nou prolonz sa lakantite zour labsans, san ou permisyon ki en Noter i absante. Akoz la i annan kekfwa serten lefe lo bann travay Noter ensidswit.  Si kapab fer en komanter lo la an pasan avan nou sot Bill Committee.  Mersi.

 

MR SPEAKER

Bon. Mersi Onorab Andre.

 

HON CLIFFORD ANDRE

Mersi Mr Speaker.  An vi ki nou pa ankor deside si nou pou al dan komite mon ava met sa pwen ki mon fer resorti.  Akoz dan seksyon 33 ‘’you shall seek permission’’ so i mandatwar ki ou bezwen demann permisyon.

Mwan mon konsern se ki nou tou nou imen par ler nou pa konnen kantite letan nou pou absante baze lo sityasyon.

Mon met sa sityasyon medikal ki’n arive avek bann noter dan lepase, kot in ale e in bezwen prolonz son letan.  Me si letan i ti pe ale premye kou sete pou 14 zour i pa pou demann permisyon akoz Lalwa i dir tranteen zour.

Prezan i reste i arive ki i plis ki 31zour prezan i reste i arive ki i plis ki tranteen zour. Ki mannyer Lalwa i ete ozordi savedir sa Noter i pou’n kas Lalwa li menm. So mon panse ki nou bezwen pran sa realite osi ladan e fer li antre dan seksyon 33 ki mannyer nou pou fer mon nou ava diskite me solman mon krwar i bezwen ganny pran konsiderasyon akoz demen i kapab arive, ki mwan mon pe ale mon pe al pou set zour mon dir mon pou al en pti check-up whatever ler i ariv laba i dekouver en keksoz kot mon bezwen extend e i beyond 31 days.  So kote mon ganny sitye la?  Mersi.

 

MR SPEAKER

Mersi Onorab. Bon mon sizere nou ava move Mace nou ava la dan Staz Komite akoz nou allow AG pou entervenir pou li donn son reaksyon.

Bon Attorney General mon ava pran laparol pou ou klarifye bann pwen i annan propozisyon ki’n ganny met devan par Onorab Georges e le de komanter ki Onorab De Commarmond e Onorab Andre in fer.  Attorney General.

 

ATTORNEY GENERAL MR FRANK ALLY

Mersi, Mr Chairman. Bonzour tou dimoun. Bonzour tou bann Manm Onorab bon mon ava komans avek sa pwen ki Onorab Andre in fer sorti.  Wi ou eksepte pou dir ou kapab absant pei e pandan peryod pandan sa tranteen zour ou bezwen prolonz ou sezour dan en pei aletranze, oubyen menm dan Sesel.

Ou kapab malad ou lopital.  Me nou bezwen konpran en fonksyon en Noter. Pou ou kalifye pou ou vin en Noter ou bezwen annan bon karakter, setadir ou annan dokiman ki ou pe drafte e pe sofgard bann dokiman en kliyantel, ou bezwen annan ou en lofis.

E isi Sesel akoz nou’n more or less demokratiz sa profesyon notarye nou’n   menm fer li nou’n redwir la kantite travay ki en Noter i fer. Me si ou al an Frans si ou al Moris en noter i toultan annan en clerk.  E sa clerk i tre souvan swa i son piti ouswa en lot ki pe dousman vini pou vin dousman ranplas sa Noter.

E dan en ka parey si en Noter i serye e i organiz son lofis son clerk, son Sekretarya ki pou bezwen enform Prezidan La Repiblik atraver Attorney Zeneral pou dir be sa Noter i annan posibilite pou li retourn lofis, e alor nou demann en ekstansyon, nou demann en permisyon.

Nou bezwen pran sa profesyon serye e se sa ki en Noter.  Se pran en profesyon avek sa eleman serye, akoz ou annan dokiman manm piblik ou annan en Testaman ou annan bann lezot dokiman, ki an ka en dimoun i mor ou bezwen al ouver son siksesyon.

E pou repran sa ki Onorab Ramkalawan i dir, eski i ankor annan en nesesite pou demann permisyon? Mon pou dir ki en kategorikman mon pou reponn wi – akoz lenportans profesyon Noter.

Mon annan en ka anfet letan nou ti pe go through sa fer sa Prozedlwa, kot i annan Noter ki mon’n ganny lenformasyon in kit pei in ale or i pa pe dan lofis, e kote sa kliyan i ale? Ki  i annan en Testaman ki’n fer. E ki in pas son arsiv?

Kestyon?  se en dokiman enportan ki Noter i fer se siksesyon en dimoun ki kot ou bezwen ouver sa siksesyon so ou bezwen annan e pou ou kapab konpran sa pti lamannman pou tir 3zour pou vi 31 zour ou bezwen konpran Notaries Act ou bezwen konpran pou dir ou bezwen transfer ou arsiv, ou bezwen donn en dat serten, akoz Noter sa ki son rol se donn en dat serten bann dokiman.

So, mon krwar i enportan pou ki e parey Vis-Prezidan in dir ou apwent en Noter, nou bezwen pa bliye pou dir Prezidan Larepiblik i Sef De Leta i pa zis Sef Gouvernman.  So i annan en Lofis.  i annan de Lofis ki i zouir oubyen i egzerse.

E nou Prezidan La replik ler i pe al apwent en Noter i pe azir dan son kapasite koman Sef De Leta.  E i donn lenportans sa lofis Noter pou montre pou dir ou en zofisye piblik e ou pe deservi piblik.

E ou annan sa kapasite e sa karakter pou ou vin Noter mon krwar sa i tre enportan pou nou pran kont ler nou diskit sa profesyon Noter. Mersi.

 

MR SPEAKER

Mersi AG mon krwar ou’n reponn en komanter.  I annan komanter ki Onorab De Commarmond in fer. E osi tou pou propoz amendment ki Onorab Georges in fer. AG.

 

THE ATTORNEY GENERAL MR FRANK ALLY

Bon wi, sa ki Onorab De Commarmond in dir se ki bann Noter in absante dan zot lofis, i enn pti pe sa rezon i annan sa lot Prozedlwa a suspension of prescription to some extent.

Be selman i annan en lardon Laten ki dir ou pa pou kapab;- Lalwa pa fors ou pou fer en keksoz ki ou pa kapab perform. I dir lex non cogit ad impossibilia;- savedir sa ki enposib ou pa pou kapab fer. So dan sa ka kot in annan COVID-19.

In annan bann Prohibition Orders kot dimoun pa kapab sirkile i normal pou ou pa kapab al lofis. So, i enposib ou pa pou kapab fer li so sa i mon pwendvi. Mersi.

 

MR SPEAKER

Apre ti annan en lot pou Onorab Georges. ‘’Of’’ oubyen ‘’for?’’

 

THE ATTORNEY GENERAL MR FRANK ALLY

Bon mon krwar nou kapab pou le moman kit ‘’of’’ nou ava antre dan en diskisyon avek Bills Committee whether it should be a Bill ‘’of’’ an Act or a Bill ‘’for’’ an Act. Nou’n diskite eternelman.  Mon vwar i pe fer en pe plis sans petet menm si nou’n abitye servi a Bill ‘’of’’ an Act.  A Bill ‘’for’’ an Act because ou met en Bill pou ou pas en Lalwa, so it’s a Bill ‘’for’’ an Act rather than a Bill ‘’of’’ an Act.

Zanmen mon’n santi mwan konfortab avek a Bill ‘’of’’ an Act, be selman i en keksoz ki nou’n kapab diskit avek Bills Committee e evantyelman Bills Committee nou ava ariv lo en konsansis lo la.

Mon krwar pou le moman pou nou avoid bann diskisyon prolonze, nou ava go back nou ava fer li vin a Bill ‘’of’’ an Act si Bills Committee i dakor. Mersi.

 

MR SPEAKER

Mersi AG. Mon ava, mon a donn la parol Onorab Andre. Onorab Georges ou kapab met ou osi pare pou ou reponn apre. Onorab Andre.

 

HON CLIFFORD ANDRE

Mersi Mr Speaker. Mr Speaker mon konnen kekfwa letan mon’n dir lo seksyon 33 mon pa ti pe zanmen dir ki i pa en profesyon serye. I en profesyon serye ki bezwen ganny pran to the letter.

Vreman serye e mon zwenn AG par dir akoz natir sa travay, sa posibilite in mete dan Lalwa ki pli o lotorite ki apwent en Noter. Ki mwan mon ti pe dir si nou’n sorti 3 zour ozordi nou’n ariv 31 zour mwan ki mon ti pe tir akoz dan Lalwa i dir ou shall akoz i pe dir ou shall si ou pou reste plis ki 31 zour.

Mon konsern sete si mwan mon pe al fer en routine check-up en egzanp. Mon pe ale mon dir avek Speaker koman en Manm Lasanble 7 zour mon pou absan mon pa demann permisyon akoz mon plan se pa pou mwan reste plis ki 31 zour.

Mon ariv kot mon pe ale mon fer mon routine check-up i dir mwan i annan en problenm ki bezwen ganny rektifye. Prezan mon dir par lefe ki mon la oubyen si sa problenm i grav i dir, mwan wi i grav mon bezwen rektifye imedyatman.  Prezan mon dir be ok e mon tretman i pran plis ki 31 zour.

Lofis mon annan, lofis mon servi nou tou nou annan en lofis nou bezwen donn avek Sef Ziz nou lofis kot i ete, pou nou ganny en  license.

Akoz pou li konnen kot nou ete pou li kapab anmenn bann dokiman so en lofis en arsiv i la, sa bann bout i egziste mon pe dir par lefe ki sa seksyon 33 i dir ou ‘’shall in the first instance’’ demann permisyon.  So sa lensidan i ariv koumsa nou pou’n fini breach section 33.

Mwan mon pe dir annou met en proviso ladan, ki permet en sityasyon parey;- pa toultan ki pou arive, permet en sityasyon parey ler i arive, sa dimoun pa’n kas Lalwa seksyon 33.  Se sa ki mwan mon pe dir. Mersi.

 

MR SPEAKER

Mersi Onorab Andre. Onorab Ramkalawan.

 

HON WAVEL RAMKALAWAN

Mr Chairman mon trouv sa eleman a Bill ‘‘for’’ oubyen en Bill ‘’of’’ an Act enteresan.  Be letan mon pe regard sa ki arive dan bokou dan lezot pei;- in fact sa zafer en Bill ‘’for’’ a Bill ‘’of’’ i pa ni la.

I pa ni la altogether.  Zot in fini. Canada par egzanp in fini tir sa konpletman e i annan son Bill number e nou’n annan nou Bill number e apre sa ‘’an Act to amend.’’  So si nou pe rod en Bill’for’’  oubyen a Bill of konmsi eski nou a pa bezwen senpleman tir sa konpletman?   Whether it’s a Bill ‘’of’’ or a Bill ‘‘for’’ tir li konpletman.

Lo premye paz i annan Notaries (Amendment) Bill 2020 Bill No.17 of 2020 which is an Act to amend.  So mon ti ava zis anvway sa pou ki letan zot pe fer zot deba, sa bit, sa detrwa parol ki pa fer ki pa sanz nanryen i ganny tire konpletman e nou al direk lo la.

Se sa ki mon ti anvi devan zot e mon vwar ki zot dakor se en pti kontribisyon. Mersi.

 

MR SPEAKER

Mersi Onorab.AG.

 

THE ATTORNEY GENERAL MR FRANK ALLY

Mersi Mr Chairman. Bon nou pe prepare en Prozedlwa petet mon kapab enform Lasanble nou pe prepare en Prozedlwa well, nou’n   prepare en Prozedlwa e nou pou komans konsiltasyon avek Bills Committee an relasyon avek Gazette.

Nou’n realize ki petet i neseser pou nou annan petet en Gazette Authorization Bill kot nou reglemant piblikasyon Gazette, rektifikasyon.

E Onorab Ramkalawan ti relev en fot dan Gazette ki nou’n   ti anfet nou ti’n ganny averti sa fot, akoz ti annan en issue fason ki mannyer nou ti’n print en Gazette No.4 ek No.5  e apre nou’n al ganny en lot Gazette No.4 ek No.5.

E lontan ti annan bann Lalwa.  In fact nou’n vwar en Lalwa ansyen ki ti montre ki mannyer ou ti fer bann koreksyon, me for one reason or the other sa bann Lalwa in ganny repealed.

So, nou pou vin devan Lasanble, e kot nou pou bezwen annan en format Gazette e tou bann keksoz e en fason ki mannyer Bills i e ki mannyer nou kapab digitalized li.  E ler nou pibliy Gazette tou bann Manm i war lo zot website;- pa bezwen espere kan Gazette i vini sorti government printing. Mersi.

 

MR SPEAKER

Mersi AG.  Onorab Georges. Yes, Onorab Georges laparol apre mon ava retourn avek AG. Onorab Georges.

 

HON BERNARD GEORGES

Mersi Mr Chair, mon ti anvi zis partaz detrwa pti keksoz akoz enn de pti keksoz AG in dir in sisit en pti lentere.

Enn bann lezot keksoz pou swiv thinking Onorab Ramkalawan, se pou moderniz langaz bann Lalwa osi.  Dan bokou pei Australia, New Zealand nou nepli servi sa mo ‘’shall’’ ki donn telman kantite problenm isi. I ‘’must’’ e i en langaz bokou pli modern.  e mon mazinen ki anba tutelle nou AG aktyel, ki mon konnen i en dimoun ki kontan moderniz bann keksoz, nou kapab espere ki langaz Lalwa li menm li kekfwa nou ava vwar en modernizasyon an mezir nou pe ale.

Dezyenm keksoz pou reponn en konsern Onorab Andre, lo si ou’n bezwen ou’n forse pou ou sorti dan ou fonksyon koman Noter, absant ou lekor koman yer ou kapab atrap sa san ki ou kas Lalwa?

Mon krwar seksyon 33 li menm li i donn en repons, akoz i dir selman si ou ‘’desirous of. ‘’ Setadir si ou annan dezir pou ou pa fonksyonnen pandan en peryod pou plis ki 3zour dan ou biro, la prezan la prezan 31zour ou bezwen demann permisyon. Me si i pa ou swe me i en lobligasyon akoz ou’n tonm malad or whatever, ou pa bezwen demann permisyon.  Mon krwar sa i rezourd son lekor. Se selman ler ou anvi, ou anvi absant ou lekor ki ou bezwen demann permisyon.

E finalman mon krwar zot ava eskiz mwan si mon retourn en pti pe lo istorik, akoz i en Lalwa istorik e i en keksoz ki nou bezwen mon krwar avek lentere listwar, nou konpran en pti pe sa fonksyon noter.

En Noter i ti enn bann dimoun pli enportan dan tou  Koloni Franse ki ti ganny etabli.  E ler nou regard dan nou listwar i annan de dimoun ki toultan ti fodre ariv dan pei premye.

Enn se en Sirizyen akoz ti  napa Dokter sa lepok, ti annan  en Sirizyen si ou ti tonm malad ou ti geri ou lekor, me si ou ti kas en lazanm oubyen ou ti koup ou lekor letan ou pe travay dan bwa, pou ou defriz ou plantasyon whatever, ou ti bezwen Sirizyen pou li kapab koud ou blesir oubyen koup ou lazanm, ou lebra ki’n kase  or whatever, akoz tete le sel mwayen sa ti enn.

E lot sete en noter.  E nou ava vwar ki enn bann premye Noter ki ti isi Sesel sete Mr Despilly Jorre De St Jorre ki ti parmi bann premye ‘kolan’ i ti ganny apwente noter,  akoz ti bezwen annan en noter pou fer bann Act notarye.

E an pasan mon kapab dir mon annan loner annan son liv. Son liv Noter ki enn son bann pti zanfan Madanm Maryse Eichler ti fer mwan kado pou enn mwan laniverser en zour.

Alor mon annan sa liv Mr Despilly Jorre De St Jorre ki ti premye Noter isi Sesel. Mr Chair Onorab Attorney General in koz lo ki arive avek archive en noter?  I vre archive en Noter i en keksoz ekstrememan, ekstrememan enportan e ler en noter i aret son fonksyon i annan en obligasyon anba lalwa pou li pas son archive avek en lot noter, pou ki toultan i annan sa bann dokiman ki pe garde ou konnen kote i ete.

E sak fwa mwan mon fer en Testaman mon dir avek sa dimoun ki mon’n fer son Testaman, mon dir ‘’si mon arive mor avan ou oubyen mon ferm mon biro avan ou, ou pou ganny averti kote ou Testaman i ete.  Avek ki noter sa testaman in pase, akoz i enportan ki sa i arive.

E i nou annan nou bezwen gard en database enportan.  Nou annan plis ki 4mil Testaman ki nou’n fer dan mon peryod 40an preski koman en noter. Lannen prosenn 2021 i pou fer 40an depi ler mon en noter.  Ou’n anmas en kantite dokiman e ou bezwen annan en database.  E ou annan en clerk parey Attorney Zeneral ki fer zis sa.

Ler en dimoun i vini i dir entel in mor e in kit en Testaman la kot ou, i fasil ou al lo database e ou al tir sa Testaman dan archive kot ou gard li.  E sa set en keksoz tre, tre enportan.  E ler Mr  Raoul Nageon De Lestang ti arete koman Noter i ti swazir mwan pou li pas son archive avek mwan.

E mon ti bezwen al rod bann gro kes papye pou garde akoz e prezan son bann kliyan i kapab vin kot mwan.  E parey mwan ou bezwen dir si tou noter i mor, oubyen si tou noter i aret travay en zour tou zot bann archive pou al kot Official NotaryAttorney Zeneral. Alor  bann archive zanmen i perdi toultan i reste.

E finalman Mr Chair avek ou permisyon clerk i en dimoun tre, tre enportan e zot tou zot ava oubyen bann nou ki en pe pli vye, nou ava mazin clerk noter Mr  Ramniklal Valabhji ki ti Mr Hue Butler nou ti apel li Hue Butler.  E li i ti clerk Mr  Valabhji me annefe sete li ki ti noter. Tou keksoz sete li ki ti fer. Tou papye li ki ti fer apre i ti pas natirelman devan Mr  Valabhji pou sinyen.

Sa sete bann clerk ki vreman, vreman enportan e ki run biro Noter.   E ozordi noter pli seleb isi Sesel Noter Gerard Maurel i annan son clerk Madanm Nella Hoareau pandan toultan e si ou demann li okenn keksoz se li ki pou konnen e ki pou dir ou.

Vwala Mr Chair mon ti anvi zis donn sa detrwa pti presizyon, zis pou konplet letid lo sa sityasyon noter.  Mersi.

.

MR SPEAKER

Mersi Onorab Georges.  Well mon ava demann Attorney Generale oubyen VP si i annan okenn komanter avan nou bouze. Non?  Bon nou ava move Mace nou ava retourn dan committee of the whole House.

Bon mon ava demann en Mosyon pou Third reading i annan en pti amannman ki’n ganny fer ok?  Eski nou pran en vot lo sa pti amannman?

Yes, ok?  Non pran en vot lo Bill as amended, ok? Mon ava demann tou Manm ki an faver?  I annan en pti amannman ki’n ganny fer avek Bill.  Okenn Manm ki kont?  Madanm Deputy Clerk.

 

MADAM DEPUTY CLERK

Mersi Mr Speaker.

 

MR SPEAKER

Go ahead Madanm Deputy Clerk.

 

MADAM DEPUTY CLERK

27 Manm in vot an faver e personn kont.

 

MR SPEAKER

Mersi savedir Bill as amended in ganny aprouve. Mon ava demann en Mosyon pou Third Reading. Onorab De Commarmond.

 

HON CHARLES DE COMMARMOND  

Mersi Mr Speaker, Mr Speaker anba Order 71(1) Standing Orders mon le move ki Notaries (Amendment) Bill 2020 Bill No.17 of 2020 as amended i ganny lir en Trwazyenm Fwa. Mersi.

 

MR SPEAKER

Mersi Onorab De Commarmond okenn Manm ki le segonde? Yes, Onorab Sylvanne Lemiel.

 

HON SYLVANNE LEMIEL

Mosyon i ganny segonde.  Mersi.

 

MR SPEAKER

Mersi Onorab Lemiel mon ava pran en vote pou Motion for Third Reading.  Tou Manm ki an faver?  Okenn Manm ki kont Madanm Deputy Clerk.

 

MADAM DEPUTY CLERK

Mersi Mr Speaker.  Mon’n

rikord 26 Manm ki’n vot an faver e personn kont. Mersi.

 

MR SPEAKER

Mersi Madanm Deputy Clerk.  Eski nou kapab ganny en Formal Third Reading?

 

MADAM DEPUTY CLERK

Mersi Mr Speaker. This Act may be cited as the Notaries (Amendment) Act, 2020. Mersi Mr Speaker.

 

MR SPEAKER

Mersi Madanm Deputy Clerk.  Savedir the Bill has been approved by the National Assembly. Bon zis avan nou pran bann prosedir pou sa lot Bill, mon annan de pti komanter pou mwan fer mon pan oule fer li pandan bann moman ki nou ti pe diskit Bill.

Onorab William ki pa dan House la me in fer en demann en request lo non bann Manm Lasanble.  Wi nou bann Leaders nou annan en kopi The Legislation Calendar dan pou 2020, bann proposed Bill ki egzekitiv i  oule anmenn dan Lasanble.

Nou ava fer bann Manm petet apre break, mon ava fer bann Manm ganny en kopi a traver lofis Deputy Clerk, pou zot parey Onorab William in dir VP osi tou in aksepte, pou zot ganny en lide ki bann Prozedlwa ki pou vin devan Lasanble.

Mon osi tou remind bann Manm pou dir bann Bills, bann amannman se pa zis Egzekitiv ki anmenn dan Lasanble. Tanzantan i lev bann largiman ki, eski nou pa devret al pli lwen pou nou fer serten amannman?

Retir serten Clause ladan and so on.

Bann Members also zot osi annan sa rol pou zot zwe pou zot kapab anmenn bann PMBs Private Members Bills – ok?   Si zot vwar pou dir i annan serten Lalwa ki menm i annan par ler nou war bann Clause ki outdated, ki demann modernize all that, zot annan sa pouvwar osi tou pou kapab fer sa – ok?

Bon nou ava pran dezyenm Bill ki devan nou, e mon ava pas la parol avek Onorab Charles De Commarmond.

 

HON CHARLES DE COMMARMOND  

Mersi Mr Speaker, Mr Speaker anba order 91(1) Standing Orders mon le move pou nou sispann lartik 64(1) pou sot sa 7 zour requirement pou permet ki the Suspension of Prescription of Time Limitation Period of (Temporary Provisions) Bill 2020.  (Bill No.18 of 2020) i ganny lir en Dezyenm Fwa. Mersi.

 

MR SPEAKER

Mersi Onorab De Commarmond.  Okenn Manm ki segonde? Yes, Onorab Lemiel.

 

HON SYLVANNE LEMIEL

Mosyon i ganny segonde.  Mersi.

 

MR SPEAKER

Mersi Onorab Lemiel.  Mon ava pran en vote pou nou sispann Standing Orders, pou nou kapab pran Second Reading. Tou Manm ki an faver?  Okenn Manm ki kont?  Madanm Deputy Clerk.

 

MADAM DEPUTY CLERK

Mersi Mr Speaker mon rikord 13 Manm ki’n vot an faver e personn kont. Mersi.

 

MR SPEAKER

Mersi Madanm Deputy Clerk nou ava aprezan bouze pou fer Motion for Second Reading Onorab Charles De Commarmond.

 

HON CHARLES DE COMMARMOND  

Mersi Mr Speaker anba Order 64(2) anba Standing Orders mon le move ki Suspension of Prescription of Time Limitation Period of (Temporary Provisions) Bill, 2020.  (Bill No.18 of 2020) i ganny lir en Dezyenm Fwa.  Mersi.      

 

MR SPEAKER

Mersi Onorab De Commarmond okenn Manm ki le segonde? Yes, Onorab Sylvanne LeMiel

 

HON SYLVANNE LEMIEL

Mosyon i ganny segonde. Mersi.

 

MR SPEAKER

Bon mon ava envit Vis-Prezidan pou entrodwi son Bill.

 

THE VICE-PRESIDENT MR VINCENT MERITON

Mersi Mr Speaker. Mr Speaker mon pe aprezan prezant Prozedlwa Suspension of Prescription of Time Limitation Period of (Temporary Provisions) Bill 2020.  (Bill No.18 of 2020) devan Lasanble Nasyonal.

Le 20 Mars 2020, Komisyoner Lasante Piblik an egzersan son pouvwar anba Lalwa Lasante Piblik 2015 ti deklar en Irzans Lasante Piblik Sesel. Avan ki sa deklarasyon ti ganny fer Lorganizasyon Mondyal pou Lasante WHO le 11 Mars 2020 ti deklare sa maladi afektyez COVID-19 koman en pandemik. Komisyoner Lasante Piblik ti’n osi konfirm 7 ka pozitiv COVID-19 dan Sesel.  Koman par bann mezir prevansyon e kontrol propagasyon COVID-19 bokou lofis, biro Gouvernman ek Zidisyer ti forseman ferm zot laport pou manm piblik oubyen limit zot bann aktivite e akse manm piblik avek zot servis.

Avek sa bann fermtir oubyen limit ou restriksyon ban operasyon, e pli tar par Lord par Komisyoner Lasante Piblik pou anpes sirkilasyon an piblik, bokou dimoun pa ti kapab ganny bann akse fizik avek bann lofis, Lakour e Tribinal pou zot pran bann aksyon, oubyen pou zot met zot ka devan pandan en peryod letan ki Lalwa i demande.

Mr Speaker bi prensipal sa Prozedlwa, se pou ekskli sa peryod Irzans Lasante Piblik dan kalkilasyon peryod letan anba bann Lalwa. Dan sa Prozedlwa, sa peryod ki ganny apele in ganny apele peryod ‘’sispansyon’’ oubyen an Angle ‘’suspension period.’’

Sa Prozedlwa i alor propoze pou sispann anba okenn Lalwa bann peryod letan ki marse;- sa se premyerman peryod preskripsyon oubyen limitasyon ki okenn prose ou case legal i dwatet ganny inifye.

Dezyenmman limit letan dan ki okenn prosedir legal i bezwen ganny konplete, an relasyon avek en prose pou case legal.

Trwazyenmman, limit letan dan ki okenn prosedir desizyon oubyen okenn aksyon, notis, demann ki en dimoun i bezwen azir ou konplete. An rezilta, kalkilasyon bann peryod ki monn mansyonnen pa pou ganny afekte ek sa peryod irzans lasante piblik kot en dimoun ti dwatet azir pandan sa peryod Irzans Lasante Piblik.

Msye Speaker a sa staz mon ti ava kontan donn nou bann Manm Onorab detrwa legzanp;

Premye si en dimoun ti’n ganny kondannen par Lakour Siprenm pandan sa peryod Irzans Lasante Piblik sa peryod trant zour pou li fer rapel devan Lakour Apel pa pou ganny afekte pandan sa peryod.  Akoz i pa pou ganny konte ler pe fer kalkil sa 30 zour.

Dezyenmman, i pou mars parey si en Lakour in donn en zizman kont en dimoun dan en zafer Civil ki sa dimoun e sa dimoun pan dan pozisyon pou soumet son notis pou li fer rapel kont sa desizyon.

Trwazyenmman, sa Prozedlwa pou osi kouver bann ka kot en dimoun ti dwatet pran serten aksyon dan sa peryod Irzans Lasante Piblik tel ki; renouvle son license magazen, oubyen son letablisman touristik, e pou rezon ki Lofis Lotorite License in fermen oubyen son loperasyon akoz serten restriksyon pou sirkile i pan konplet sa formalite.

Katriyenm, en lot legzanp i si en manman i donn nesans en zanfan e pou en rezon ou en lot sa paran pa’n kapab al deklar sa zanfan dan peryod ki Lalwa Leta Sivil i obliz li pou deklar sa zanfan.

Mr Speaker sa i zis detrwa legzanp.  I annan bokou ankor.  Parey nou’n vwar i annan bokou Lotorite Piblik parey SRC, Fon Pansyon ki’n pi bliy bann ekstansyon pou bann dimoun fer bann peyman, e zot in osi enform piblik ki zot pa pou sarz okenn sirsarz oubyen lentere lo sa bann sir sarz lo lentere lo sa bann peyman ki pe ganny fer, apre peryod ki bann Lalwa i obliz zot.

Sa Prozedlwa i ava reglemant  bann Lotorite Piblik an partikilye bann ki pann pibliy okenn notis. Sa Prozedlwa Mr Speaker i pou osi fer ki okenn lekstansyon, i ava vin otomatik e alor bann dimoun ki si sa Lalwa pa ti an fors, ti pou bezwen fer laplikasyon, pou ganny permisyon Lakour an deor sa peryod sa bann dimoun pa pou bezwen fer sa.

E alor Lakour pa pou bezwen annan travay adisyonnel pou ekout sa bann leksplikasyon e pran desizyon. Sa i a tir presyon lo lakour, pou zot kapab repran travay konmsi ti napa sa peryod Irzans Lasante Piblik.

Mr Speaker i enportan pou fer resorti, ki sa sispansyon pa pou aplik dan bann ka swivan;- premyerman drwa bann dimoun anba Konstitisyon ki’n ganny sarze avek okenn lofans.

Dezyenmman, detansyon bann dimoun ki’n ganny sispekte oubyen akize pou okenn lofans, e ki bezwen ganny detenir.  Oubyen ki pe ganny detenir par Lord Lakour.

Trwazyenmman, okenn notis, Lord pou direktiv fer pibliye anba Lalwa Lasante Piblik.

Katriyenmman, okenn prosedir, letap, prosesis desizyon, notis ou Lord anba okenn Lalwa Tax.

Senkyenmman, okenn limit letan enpoze par  en Lakour ou en Tribinal oubyen en Lotorite avek pouvwar Zidisyer, dan okenn aksyon rapel case, ki’n pas devan zot pandan sa peryod sispansyon, kot sa peryod in ganny pran an kont, ler limit letan in ganny enpoze pou deside.

Sizyenmman, si en Lotorite Piblik i an operasyon pandan sa peryod sispansyon, e in permet manm piblik kapab pran dispozisyon e azir dapre zot obligasyon legal.

Mr Speaker anvi sa peryod Irzans Lasante Piblik e fermtir bann lofis, oubyen limit ou restrikte loperasyon bann lofis Gouvernman e sistenm Zidisyer, sa Prozedlwa pe propoze ki sa peryod sispansyon i komans le 20 Mars ziska peryod Irzans Lasante Piblik i ariv a son lafen, oubyen okenn lot dat avan oubyen apre ki Minis Zafer Legal i ava war li oporten pou li deklare.

O moman ki sa peryod i ariv a son lafen, keksoz ava retourn normal dan kalkilasyon letan an relasyon avek bann zafer aksyon, desizyon e prosedir ki monn mansyonnen pli boner.

Mr Speaker avan ki Prozedlwa i ganny finalize e aprouve par Konsey de Minis, in annan konsiltasyon lo la avek la pli par bann lotorite piblik pou sit enn de Lotorite License, Civil Status, Pension Fund, SRC, FSA. Zidisyer in osi ganny konsilte, akoz i annan en lefe lo bann ka ki pou komanse, oubyen ki’n deza komanse devan Lakour oubyen bann Tribinal.

Sa bann Lotorite in pran kont sa sityasyon ki nou ladan, e ki’n pas ladan pli presizeman, sa pros 27 zour kot sirkilasyon in ganny anpese, oubyen restrikte dan pei, pou koman parti bann mezir pou anpes kontrol e siprim propagasyon viris COVID-19 dan nou pei.

Dapre resers ki nou’n fer, plizyer pei enkli La Turquie, Irlann, La France e osi plizyer provens Canada parey British Colombia avek Ontario in pas Lezislasyon pou ‘’sispann peryod preskripsyon’’, oubyen bann ‘’peryod limitasyon mandatwar’’ e ‘’lezot peryod mandatwar’’ kot en aksyon, prosedir ou rapel dwatet komanse.

Provens Ontario zot in sispann sa prosesis pou 90 zour. La France sa ‘’sispansyon’’ in komans le 12 Mars 2020 e i pou termin en mwan apre ki peryod leta Irzans Lasante Piblik ou sanniter i ariv a son lafen.

Mr Speaker mon napa okenn dout ki sa Prozedlwa i ganny sipor mazorite Lasanble e i pou en Lalwa enportan pandan e swivan sa peryod difisil ki nou pe pas ladan.

Alors mon ava demann tou bann Manm Lasanble, pou siport sa Prozedlwa. Mersi Mr Speaker.

 

MR SPEAKER

Mersi Vis-Prezidan bon otan donnen ki ou ariv preski 10.30 mon sizere ki nou ava pran break.  E ler nou ava retournen 11er mon ava deba lo merit e prensip zeneral sa Bill ki Vis- Prezidan in prezant avek nou. Ok?   So nou ava break e nou ava retournen 11er.

 

(BREAK)

 

MR SPEAKER

Bon nou ava kontinyen nou travay e deba i ouver lo Bill Suspension of Prescription of Time Limitation Period of (Temporary Provisions) Bill 2020.

Okenn Manm ki oule entervenir? Non?  Mon ava petet zis donn en parol Chair Bills Committee si oule fer en pti komanter lo la, mon pa konnen Bills Committee in pas lo la and then nou ava retourn kot Vis- Prezidan. Onorab Georges.

 

HON BERNARD GEORGES

Mersi Mr Speaker. Mr Speaker efektivman napa gran keksoz pou dir ki Vis Prezidan pa’n deza dir e mon krwar son desizyon pou donn detrwa legzanp, in ed nou dan sa Lasanble, bann dimoun ki pe ekout nou deor konpran egzakteman lentansyon deryer sa Prozedlwa.

Anba Code Civil i annan sa nosyon preskripsyon.  Me dan bann lezot Lalwa, sirtou bann ki ganny enspire par Lalwa Angle, i annan sa konsep limitasyon.  Se pou sa rezon ki biro Attorney Zeneral e mon devret dir la nou devret remersye Attorney Zeneral akoz pandan COVID an mezir sa Lalwa ti pe ganny drafte i ti share en advance copy avek mwan, e donk nou’n kapab vwar li en pti pandan letan ki i ti pe ganny prepare.

E i en Lalwa ki from nothing akoz i pa en Lalwa fasil pou ou anglob en nosyon preskripsyon, ki en nosyon Franse avek en nosyon limitasyon ki en nosyon Angle.

E bann nosyon preskriptif kot ou ava krwar en byen ek nosyon preskripsyon limitasyon kot ou perdi en drwa, ou kot si ou pa fer en keksoz dan en dele letan, ou perdi ou letan.  E pou li kapab travay sa de nosyon ansanm dan en Lalwa in reisi tre byen.  Parey mon’n dir bann legzanp ki’n ganny donnen bomaten, i eksplik nou rezonnman deryer sa Lalwa.

Parey mon ti pe dir dan Code Civil i annan nosyon preskripsyon, e i annan nosyon sispansyon dan sa Code Civil li menm.  E i ti ava posib san sa Lalwa pou ki sak fwa ki ti ava annan en bezwen en dimoun par egzanp ki pa ti’n file en appeal atan oubyen ki pa ti’n pey son fine atan, ti pou bezwen vin devan lakour e demann en ekstansyon ki ti pou gannyen natirelman akoz sityasyon COVID.

Me sa Lalwa i permet ki olye sak fwa ki en dimoun i bezwen fer en aplikasyon pou li ganny permisyon once and for all sa Lalwa i kouver tou bann sityasyon.

Sel krentif ki mon ti annan e mon ti partaz avek biro Attorney Zeneral sete si nou regard sa Lalwa son Clause 5 si mon pa non 6. Son Clause 6, sa Lalwa 6(1) sa Lalwa pou lapse set a dir ki lemoman ki sa peryod sispansyon i fini, sa Lalwa pou lapse.  Napa nanryen ki mal avek fer en Lalwa lapse. Ki pa pou en Lalwa ki pou la eternelman me en Lalwa ki enn fwa ki’n fer son travay, i pou nepli annan okenn nesesite.

E Attorney Zeneral mon mazinen in met sa provizyon la, pou ki sa Lalwa pa reste dan tou bann revizyon Lalwa vitam aeternam, ler i pou nepli annan okenn nesesite.

Mon kestyon sete, me si dizon en dimoun pe preskrir en morso later.  I pe reste lo en morso later pou plis ki 20an pou li apre dir in acquire sa later par preskripsyon.

E si al i komansman son 20an e dan 20an i pou al devan Lakour i pou dir me monn konplet mon 20an e propriyeter sa later i dir non, non ou pa’n konplet sa 20an akoz an 2020 ou pa ti lo sa later, e li anvi dir wi me i annan en Lalwa ki dir sa peryod i ganny sispann.

Eski i pou kapab argye sa pwen dan 20an, an servi en lalwa ki’n fini lapse?  Sa se mon krentif me Attorney Zeneral in fer mwan konpran whether en Lalwa i lapse or not, lefe ki i ti annan en lefe a en serten moman obviously sa Lalwa pa pou disparet i pou dan bann liv Lalwa.

E si i bezwen dan peryod letan, i ava kapab ganny servi pou sa nosyon. Sa sete mon sel krentif apard sa mon krwar ki mon krwar ki Mr Speaker ki sa Lalwa i koresponn a nou bann bezwen e a nou legzizans.

Bann Manm i ava annan devan zot en track version kot nou’n propose de ou trwa pti amannman minim e mon’n ganny dir pa Attorney General avek Vis-Prezidan ki pe sponsor sa Lalwa ki sa bann amannman i akseptab.

Avek sa detrwa mo Mr Speaker mon ava remersye ou pou donn mwan laparol.

 

MR SPEAKER

Mersi Onorab Georges. Bon mon ava retourn laparol avek Vis-Prezidan si i annan okenn repons ou komanter i anvi fer avan nou bouze. Vis-Prezidan? Non bon nou ariv moman pou nou pran en vot lo merit e prensip Bill ki’n ganny prezante devan nou.

Mon ava demann tou Manm ki an faver?  Okenn Manm ki kont?  Madanm Deputy Clerk.  

 

MADANM DEPUTY CLERK

Mersi Mr Speaker mon rikord 29 Manm ki’n vot an faver e personn kont. Mersi.

 

MR SPEAKER

Mersi Madanm Deputy Clerk eski nou ava ganny en Formal

Second Reading.        

 

MADAM DEPUTY CLERK

Mersi Mr Speaker;

A Bill for an Act to provide for the temporary suspension of the prescription period or time limitation period within which illegal proceedings may be initiated or commenced: or any time limit within which any legal procedure step of process, or to be completed in respect of any legal proceedings, or any time limit within which any procedure, step, process decision or compliance with any notice or order, or to be completed taken or complied within with under any written law of Seychelles. Thank you Mr Speaker.

 

MR SPEAKER

Thank you.  Madanm Deputy Clerk.  Bon eski nou pou al dan Staz Komite?  Mon kapab demann Chair Bills Committee eski sa bann koman dir amannman i nesesit ki nou al dan Staz Komite?  Non, i minor amendments e AG zot okouran deza avek VP, ok?  So mon ava ganny en Mosyon pou nou skip Staz Komite?  Onorab De Commarmond.

 

HON CHARLES DE COMMARMOND  

Mersi Mr Speaker.  Mr Speaker anba Order 91(1) mon le move pou nou suspend lartik 65 a 70 nou Standing Orders pou nou sot Staz Komite sa Bill. Mersi Onorab De Commarmond.

 

MR SPEAKER

Okenn Manm ki segonde? Yes Onorab Lemiel.

 

HON SYLVANNE LEMIEL

Mon segonn Mosyon. Mersi.

 

MR SPEAKER

Mersi Onorab Lemiel nou kapab pran en vot lo Mosyon pou sispann Standing Orders 65 ziska 70 pou sot Staz Komite.

Tou Manm ki an faver? Okenn Manm ki kont?  Madanm Deputy Clerk.

 

MADAM DEPUTY CLERK

Mersi Mr Speaker mon rikord 15 Manm ki’n vot an faver e personn kont.  Mersi.

 

MR SPEAKER

Mersi Madanm Deputy Clerk. Bon nou ava pran en vot lo ban amannman ki’n ganny anvoy devan ok?  E parey nou dir bann minor amendments, ok?  E wi nou ava – i annan plizyer sa bann pti amannman, ok?

Nou pran en vot alor lo Bill as amended, ok?  Tou Manm ki an faver? I annan bann amannman ki’n ganny fer ok tou Manm ki an faver? Okenn Manm ki kont Madanm Deputy Clerk.

 

MADAM DEPUTY CLERK

Mersi Mr Speaker 29 Manm ki’n vot an faver e personn kont. Mersi.

 

MR SPEAKER

Mersi Madanm Deputy Clerk bon mon kapab ganny en Motion for Third Reading.

 

HON CHARLES DE COMMARMOND  

Mersi Mr Speaker, Mr Speaker anba Order 71(1) Standing Orders, mon le move ki Suspension of Prescription of Time Limitation Period of (Temporary Provisions) Bill, 2020, as amended i ganny lir en Trwazyenm Fwa. Mersi.

 

MR SPEAKER

Mersi Onorab De Commarmond. Okenn Manm ki segonde? Yes, Onorab Lemiel.

 

HON SYLVANNE LEMIEL

Mosyon i ganny segonde.  Mersi.

 

MR SPEAKER

Mersi Onorab Lemiel.  Nou kapab pran en vot. Tou Manm ki an faver for Third Reading? Okenn Manm ki kont?  Madanm Deputy Clerk.

 

MADAM DEPUTY CLERK

Mersi Mr Speaker 23 Manm ki’n vot an faver e personn kont. Mersi.

 

MR SPEAKER

Mersi Madanm Deputy Clerk mon kapab ganny en Formal Third Reading?

 

MADAM DEPUTY CLERK

Mersi Mr Speaker. This Act may be cited as the Suspension of Prescription of Time Limitation Period of (Temporary Provisions) Bill, 2020.  Mersi Mr Speaker

 

MR SPEAKER

Mersi Madanm Deputy Clerk savedir Bill ki devan nou Bill No. 18 Suspension of Prescription of Time Limitation Period of (Temporary Provisions) Bill, 2020 in ganny aprouve par Lasanble Nasyonal.

Bon avek sa mon ti ava kontan remersye Vis-Prezidan ki’n vin parmi nou bomaten pou prezant sa de Bill. E byensir mon ti ava kontan sirtou remersi Attorney General Mr Ally e nou ava eskiz zot parmi nou. Mersi bokou.

 

(THE VICE PRESIDENT AND THE ATTORNEY GENERAL WERE EXCUSED FROM THE HOUSE)

 

MR SPEAKER

Bon nou ava pran lo biznes lo nou Order Paper e sa se Mosyon.  E nou premye Mosyon ki pe ganny move par Onorab Charles de Commarmond Leader of The Government Business mon ava donn Onorab De Commarmond laparol pou move son premye Mosyon.

 

HON CHARLES DE COMMARMOND  

Mersi Mr Speaker, Mr Speaker Pursuant to Article 64 (4) of the Constitution, I move that this Assembly resolves to ratify the SADC Protocol on Industry.

Mr Speaker sa Mosyon ki devan nou pou nou Lasanble pou ratifye sa protokol SADC lo lendistri,  i en Mosyon straight forward e mon swete apre ki mon’n entervenir bann manm sirtou nou Lasanble ki lo diferan Komite SADC ki petet okouran en pti pe bann lo Trade ensidswit, kekfwa zot kapab osi dir en pti keksoz ki konsern sa Mosyon.

Mr Speaker stratezi e map endistriyel pou pei Manm Kominote Devlopman pou Sid Lafrik byen koni koman SADC ti ganny adopte dan en SOME Ekstraordiner ki ti ganny fer le 29 Avril 2015 an Harare Zimbabwe.

Sa ti swivan laprouvasyon an tenm SOME an Out 2014 entitile ‘’Servi o maximum bann divers resours larezyon, pou anrisir en lekonomi soutenab anver atraver valer azoute.’’

Pandan sa SOME Mr Speaker pei manm atraver secretariat SADC ti ganny manda pou devlop sa stratezi e map pou endistriyalizasyon    dan la rezyon.

Bi prensipal sa stratezi e map se pou resi kree en transformasyon mazer dan lekonomi Manm SADC avek teknolozi, ki I ava akse ler devlopman atraver endistriyalizasyon.

Departman Lendistri ti pran sarz kordinasyon pou Sesel dan en seri konsiltasyon avek bann Manm parey bann diferan parti prenon.  E an 2015 sesel ti finaliz son polisi lendistri konpetitiv enklizivman pou lannen 2015 a 2020.

Sa Polisi I ganny regarde koman en parasol ki gouvernen endistriyalizasyon Sesel dan en fason soutenab. Kad legal sa stratezi e map, i protokol lendistri ki determin bann diferan domenn korperasyon lo nivo rezyonal, pou batir en baz endistriyel e en lekonomi ki varye e konpetitif globalman.

Pou resi attend lobzektif protokol lendistri, Manm SADC pou bezwen kolabor lo bann size tel ki;- devlopman bann zenn valer, ki ganny priyorite lo nivo rezyonal.

Promouvwar valer azoute bann diferan e prodwi dan larezyon.

Konzwentman mobiliz resours disponib pou siport endistriyalizasyon. Sa i parmi sa bann pwen sa bann obzektif.  lenplimantasyon sa protokol lo lendistri i eksepte ranforsi lekonomi nou pei e asire ki I ganny pouse par devlopman lendistri,  e pa senpleman lo baz leksportasyon nou resours brit.

Lobzektif sa protokol, pou konplimant zefor ki Departman Lendistri e Devlopman Lantreprenarya I fer pe ou promot aktivite valer azoute e diversifikasyon dan nou pei.

Sesel i anvizaze benefisye atraver sa protokol. Finansman premyerman finansman pou bann proze endistriyel ki ganny fer konzwentman lo nivo rezyonal, pou siport enterogasyon e devlopman endistriyel.

Bann formasyon teknik al ki pou promouvwar devlopman endistriyel.

Letid ouswa lanaliz lo bann senn valer pou bann sekter spesifik tel ki;- Lekonomi Ble.

Promosyon lenvestisman dan bann sekter prodiktiv ki dan larezyon I priyorite an term konpetisyon.

Fasilit devlopman bann lendistri ki deza an egzistans;- espesyalman bann micro enterprise, pti e mwayen antrepriz pou ki zot vin pli konpetitiv e osi pou promosyon leksportasyon diferan prodwi varye.

Malgre en kar pei bann manm SADC pa’n siny sa protokol, i annan en provizyon dan sa protokol ki pou ganny ratifye part tou Pei Manm an vi ki la mazorite pei in sinyen. Alors nou pe amann sa protokol devan Lasanble, anmenn sa protokol plito devan Lasanble Nasyonal konmen lenplimantasyon.

Zot ava dakor ki dan sa moman difisil ki nou ladan aktyelman ek COVID-19, nou pe fer fas avek dan nou pei,  en tel laranzman I ava ed nou pei sirmont bann defi ekonomik ki devan nou. Yer mon krwar nou’n koz en pe lo sa direksyon, letan nou ti pe get pwason avek lagrikiltir.

COVID-19 pa devret ganny vwar solman koman lennmi koman en problenm pou nou, me osi komann loportinite ki devret ganny eksplwate pou progres nou devlopman.

La i le moman kot nou pou seryezman kapab get dan sa direksyon bann keksoz ki nou kapab pe regard bann vizyon ki sa challenge I anmenn nou pou regarde an relasyon avek sa Mosyon, i fer ki;- enn, I get vre demann marse ki swa domestik ki ouswa rezyonal, e osi petet enternasyonal.  E pou vwar kwa ki nou kapab fer pou nou al pli lwen.

Reevalye nou matyer premyer, san oubliy nou kapasite avek bann lenfrastriktir ki deza an plas.

Revwar nou striktir e bann prosedir ki fer sa bann proze materyalize.

E les transformasyon valer azoute inovasyon pran kontrol. E finalman etablir en sistenm swivi pou asire ki sa plan pe ganny enplimante.

Alors Mr Speaker mon demann sipor pou ki nou kapab al dan en bon direksyon, al dan sa direksyon ki nou’n mansyonnen, la kot nou promouvwar en lekonomi ki pe rezilyan inovatif, prodiktif e soutenab pou le fitir.

E avek sa mon ti avek demann nou bann Manm pou donn zot laprouvasyon donn zot sipor sa Mosyon ki devan nou Lasanble ozordi. Mersi bokou. Mr Speaker.

 

MR SPEAKER

Mersi Onorab De Commarmond okenn Manm ki segonn Mosyon? Yes, Onorab Egbert Aglae.

 

HON EGBERT AGLAE

Mr Chair mon segonn Mosyon e mon ti ava kontan de de pti parol lo sa Mosyon.

 

MR SPEAKER

Mersi Onorab. Yes, go ahead.

 

HON EGBERT AGLAE

Mr Speaker i bon konstate ki travay e rol ki SADC i zwe e Sesel koman en Manm sa lorganizasyon, in fer bokou kontribisyon dan le pase atraver nou bann past Leaders bann past Members, osi ki la dan Lasanble e ki ankor la dan Lasanble e ki pe zwe sa rol enportan.

I bon konstate ki nesans sa protokol i en travay kontinyel ki’n ganny fer, atraver bann diferan Summit ki nou bann Leaders in partisip ladan.

I nesesite ki Lafrik koman en pe osi koman en rezyon, nou vreman annan bokou potansyel e bokou bann resours natirel;- ki fer bokou bann pei larestan lemonn pe depan lo nou bann resours ki exist.

E alor sa protokol li menm li, i ganny etabli pou kapab anmenn bann diferan fason fer an term legal li menm li, pou fer ki i annan bann armonizasyon kot i konsern sa bann Lalwa. Ki fer ki okenn bann aksyon ouswa si ou pe form par sa protokol li menm li, ou annan bann safeguard osi ki ganny mete, pou fer ki bann pei i swiv byen e ki keksoz i deroul dan en fason normal.

E nesans sa protokol Mr Speaker i osi i amenn nesans sa ki nou apel AFTA sa i African Free Trade Area.  Li osi ki form parti en bout ki sa protokol i form parti ladan, kot i konsern trade lendistri, bann lenvestisman ki osi anmenn en louvertir;- en louvertir enportan.

Akoz bokou pei, bokou nou bann pei o nivo SADC zot vwar zot parfwa tousel.  E menm pa zis tousel me solman zot pe ganny dan en fason zot kapab dir ganny abize, akoz zot resours.  E parfwa ou demande kote ki zot fer kote zot ale.

E sa SADC li menm li i en platform en lorganizasyon, kot nou tou nou zwenn ansanm pou donn en koudmen, pou fer ki annan bann armonizasyon serye kot lendistri i marse.

E kot bann fakter sirtou parey nou koz lenportasyon bokou nou bann resours kot i annan en armonizasyon kot i konsern trade.

Kot napa bann baryer parey i egziste ozordi.  Se pou retir en pe sa bann baryer kot i konsern sirtou parey bann to preferansyel ki nou vwar i annan lo trade bann taksasyon, double taxation. Be tousala Mr Speaker sa protokol i pe donn gidans bann gran laliny pou nou kapab swiv.

Me selman pou sa protokol kapab marse i annan bann volonte politik, ki bezwen vin atraver sirtou nou bann Leaders.

En volonte politik sirtou, souvandfwa ki nou vwar se ki nou ratifye bokou bann protokol bann Konvansyon bann Charters me le i ariv ler pou fer bann domestikasyon nou vwar bokou bann retar li menm.

Bann keksoz ki pa ganny materyalize, ki sipoze materyalize Sesel.  Nou pa’n eparnye avek sa.  E alor i annan en nesesite pou annan bann swivi neseser pou fer si, kan nou fer bann ratifikasyon, kan nou form parti bann Konvansyon i bezwen annan bann swivi ki ganny fer.

I bezwen annan bann rapor ki ganny soumet, pou vwar kote ou’n arive avek tel ou tel bann ratifikasyon.

E Mr Speaker koman en Manm SADC PF mon osi koman en Manm lo kote lendistri, nou vwar pou dir nou achieve bokou me selman i annan bokou plis nou kapab fer pou fer ki Sesel i benefisye.  E koman en Manm Parlmanter lo SADC nou vwar pou dir Gouvernman osi i bezwen vin en pti pe pli pro aktiv, kot i konsern sa bann ratifikasyon.

E ler nou’n soumet bann lenstriman, i bezwen annan bann swivi ki pou fer sir  ki nou’n mete – sa ki nou’n dakor i pe ganny tradwi an aksyon, pou nou bann prop lendistri, pou nou bann dimoun, bann biznes ki egziste pou zot kapab osi benefisye.

E nou’n   war tou resaman osi nou annan bann Lagreman Bilateral ki nou sinyen ki par egzanp i annan Kenya kot i konsern lagrikiltir, i annan domenn lapes.

Nou annan bann lezot domenn lesanz teknik, ki enportan ki nou gannyen avek nou pei zanmi.

E tousala Mr Speaker, bokou keksoz i annan pou fer avek Foreign Affairs. E i annan bokou Konvansyon, bokou protokol ki’n sinyen e osi nou annan bann model laws osi ki atase.  Akoz ou bezwen pou gid ou protokol i fer ki keksoz i bouz parey nou ti ava swete pou benefis pei.

E si keksoz i marse dan domenn komers, lendistri nou pou vwar poudir Sesel an term resours, benefis kot i konsern finansyel i pou annan en lenpak pou nou kapab benefisye e nou ava vwar nou en pti pe pli azour e pli devan.

Menm si nou koman Sesel, nou ganny gete koman en pti pe pli avanse avek bokou nou bann pei zanmi SADC, nou vwar poudir nou annan ankor plis ki nou kapab benefisye e donnen.

E mon dakor ek Noter Mosyon ki’n nonmen pou dir avek COVID-19 la, ki pe tap nou SADC in fer sorti e osi en rapor lo ki mannyer i pe anvizaze kot i konser ekonomikman, pou kapab ed son bann manm,   ganny sipor pou zot pa tonm dan bann kriz finansyel.

E ki zot a kapab dan en kourt delay letan vwar zot lekonomi moter zot lekonomi sirmonte, e revin lo en nivo akseptab pou zot kapab kontinyen fonksyonnen.

E Mr Speaker koman en zefor ki petet nou tou menm si pa nou tou ki Manm SADC koman en zefor nou tou, nou bezwen apiy nou Gouvernman kot i enportan pou fer ki keksoz i marse.

An nou pa zis siny bann Lagreman, shelve li, me osi annou pran bann target ki’n ganny mete bann aim, bann lobzektif dan sa bann lenstriman ki nou’n sinyen, pou fer ki i vin bann zouti pou kapab dan en fason inovasyon remont nou lekonomi parey i sipoze ete.

Me osi profit nou bann benefis ki sa i anmennen;- tel ki bann benefis pou nou kapab akse bann marse finansyel, i kapab osi kree bann lanplwa.

Nou koz bann lesanz la  swivan la nou annan bann diferan zanmi ki i ava ed nou ek bann resours, parey Botswana zot anvoy zot bann teknisyen, Sid Lafrik i ed nou en kantite;- e bann lezot pei osi dan lepase in ed Sesel  pou kapab fer Sesel  monte e vin sa kil i  ti anvi ete dan en sans.

E pou sa Mr Speaker mon krwar ki sa protokol i enportan pou nou kapab donn en siport pou nou kapab ratifye.  E nou swete ki aksesyon sa i ava anmenn en pe plis louvertir pou nou bann akter ki isi prensipalman e osi nouvo louvertir.

Ki enportan pou nou kapab dan en larezyon annou fer biznes ansanm annou fer nou lendistri marse e sezi loportinite.  E Mr Speaker avek sa mon pou donn sipor sa protokol. Mersi.

 

MR SPEAKER

Mersi Onorab Aglae. Okenn lezot Manm i anvi fer komanter oubyen entervenir lo sa protokol? Yes Onorab Ramkalawan.

 

HON WAVEL RAMKALAWAN

Mersi bokou Mr Speaker. Mr Speaker premyerman i enportan swivan sa ki Onorab De Commarmond in dir, pou nou fer en distenksyon ant SADC e SADC PF.  Parske zot de diferan lorganizasyon e zot fonksyonnman i mars totalman diferan.

SADC PF i en parliamentary forum sa PF i stand pou Parliamentary Forum e nou koman en Manm Lasanble ou Manm SADC PF. Konman en Lasanble nou pa Manm sa SADC me koman en pei nou Manm SADC.  E tou bann diferan komite ki annan dan SADC PF parfwa ou menm demann ou ki koneksyon i annan pou fer avek SADC?

E se sa enn bann konplikasyon ki arive.  E letan SADC PF i anvi bouze souvandfwa SADC i met li retar. Par egzanp ozordi SADC PF i anvi bouze pou li vin en regional parliament, me SADC i met li retar.

E dan sa menm SOME kot sa protokol lo lendistri ti ganny sinyen, malerezman Sesel pa ti sinyen. Dan sa menm rankont bann Heads of State zot ti deside pou zot pa siporte pou ki SADC parliamentary forum i vin en SADC parliamentary – i vin en Parlman i vin en SADC Parliament.  

E sa ti ganny prensipalman spearheaded par Prezidan Tanzani ki li ti servi tou son lenfliyans senpleman akoz li i pa anvi i annan sa SADC Parliament.  E alor i ti servi son lenfliyans lo bann lot Sef Leta enkli Sef Leta Sid Afriken pou ki sa pa ganny pase.

Alors si mon pe mansyonn sa parski i annan en melimelo.  E mwan mon pou dir ki tou sa bann lorganizasyon laplipar sa bann lorganizasyon Afriken, i annan en problenm avek.

E letan zot zwenn zot koze zoli koze, me selman letan i ariv ler pou met an aplikasyon i annan problenm. SADC i pa en eksepsyon.  Nou’n koz lo PAP African Parliament e PAP African Parliament menm zafer.  Nou annan Manm e mwan osi tou mon ti en Manm lo PAP. PAP African Parliament me ki nou vwar?

Zot ti al laba Malabo zot ti fer en gran en protokol, zot ti siny Protokol Malabo pou form en PAP African Parliament. Sid Lafrik Midrand kot nou bann Manm i ale, Sid Lafrik i dir vin fer zot parlman isi Sid Lafrik me solman ler zot regarde Mr Speaker menm Sid Lafrik i pa ratifye Malabo Protokol.

Pourtan Parlman i kot li. E i donn tou sa ospitalite tou sa zafer.  E tousala Mr Speaker i fer ki par egzanp ozordi letan nou al al laba model law isi model law laba i plito annan kankan espesyalman lo PAP African Parliament, parey nou konnen in pas dan en bann boulvers.

Alors letan ou pou regard sa protokol napa nanryen harmful ladan.  En nenport zoli parske se bann profeser ki’n ekri sa protokol, se bann dimoun ki eksper ki’n ekri tou sa bann zafer. E alor napa nanryen mal ladan, me selman letan ou regard sa ki ladan, e ou konpar li avek sa ki pe arive lo teren, totalman diferan Mr Speaker.

Letan par egzanp ou al Cote d’Ivoire ou tann tou bann, zot pe koze, koze lo ki mannyer Kakao, Lafrik i prodwi Kakao, ki mannyer nou bezwen servi nou Kakao, nou pa kapab les Lerop paran nou Kakao anmenn Lerop e apre vann nou son sokola.  Nou ki devret fer sokola.

Ou al Cameroun zot koz ek ou ki lo ki mannyer nou bann gro pye dibwa nou bann lafore, pe ganny detri ki mannyer, nou pa kapab les tou nou bann dibwa al La France e apre sa La France i pran nou menm dibwa zot anvoy kot nou koman furniture.

Letan ou koz Senegal i dir avek ou ki mannyer i bezwen protez the Rosewood e ki fodre pa ki rose wood enn bann dibwa pli presye i nobou ariv La Chine parske La Chine apre i eksplwat sa i vann. Tou sa la zot koze me selman lo border, sa Rosewood ki sorti Senegal i rantre i cross border e i ganny eksporte.

Menm parey lo proteksyon lespes espesyalman konmela dan was Lafrik, letan ou pran en avyon pou al dan was Lafrik ou pa kapab pran enn la konmela ,me ou reste ebete la kantite Sinwan ki lo menm avyon.

E letan ou demann kestyon tousala zot in siny protokol zot. Ok, Was Lafrik i pa dan SADC me i lo PAP African Parliament i lo African Union;- parske sa bann menm Protokol la se la osi kot i annan diplikasyon, triplikasyon tou kalite “syon” akoz sa bann menm protokol  Linyon Afriken i annan enn, PAP i annan enn, SADC i annan enn lot kote lo Was Lafrik i annan enn.  Zot tou zot pran zot tour, pou zot fer enn sa bann protokol.  E tou sa bann protokol i dir menm zafer.

Me selman nou konnen pou dir letan serten dimoun i ganny atrape, ou regard la kantite lelefan ki’n ganny touye atraver la kantite tron, ki ganny tire dan bann containers nou vwar la kantite lapo lyon oubyen bann lezot ki’n ganny, lapo rhino tou sa bann zafer bann tronp rhino tou bann deal ki pe ganny tire, pou anmenn tou sa bann landrwa e letan ou regarde Mr Speaker lekel bann dimoun ki responsab pou sa.

Lot zour nou vwar Zimbabwe, ki en Manm SADC ki koz lo proteksyon ki siny bann protokol, lekel ki responsab Madanm Robert Mugabe.  Ansyen Prezidan.

Konmsi mon pe dir lo papye napa okenn problenm avek sa bann protokol.  Zot bon e i byen ki Sesel i ratifye me selman sa ki arive lo kontinan Lafrik li menm vizavi sa bann protokol zot pa fer gran keksoz.

E parey ou konnen Mr Speaker mwan mon’n enn ki debout pou protez sa bann model laws. Modern laws lo eleksyon.  Me model laws lo eleksyon me nou’n fek pase lo SADC PF be Malawi i sipoze annan in fek fer eleksyon in pran model laws in met laba e zafer in ganny en zizman Ankour.

Botswana zafer i Ankour, Malawi li son eleksyon ti ganny apele Tippex Election parske ti annan tro bokou Tipp-Ex ki ti ganny servi pou sanz rezilta.

Namibia Lakour i dir ki eleksyon pa ti normal me senpleman akoz avoka letan ti pe anmenn case devan Lakour konstitisyonnel sa pa ti dan zot prayer pou zot pou deklar sa eleksyon null and void.  Alors Lakour i dir be i pa ti dan ou prayer, alors nou pa kapab deklare me solman nou vwar ki pou dir eleksyon pa ti mars parey i ti devret marse.

Zimbabwe li osi tou osi tou i ankor dan problenm son eleksyon.  Parey mon dir Botswana osi tou i annan case akoz pourtan i annan model law pou protez bann dimoun ki annan albinism menm zafer ankor. Malawi mon fek lir en rapor tou dernyerman i annan dimoun ki’n ganny atake, ki’n ganny touye.

Tanzania zafer i ankor parey, bor kote Angola osi tou i ankor annan problenm.  Be pourtan tou sa la bann protokol ki nou’n sinyen nou tou nou’n dakor zot in fer bann gran, gran diskour e alors.

Wi nou bezwen ratifye parske nou form parti sa lorganizasyon e nou krwar dan sa bann keksoz ki ladan.  Be selman nou bezwen anmenn zot pli pre avek nou.  E petet la mon ava dir e mon dakor ek sa ki Onorab Aglae. E Onorab Aglae i asiz lo mo kote koman en Chairperson SADC PF Komite lo Industry e mon koman Chairman Human Rights Justice and Democratization e osi koman Chairman bann Komite mon pa konnen kan nou pou zwenn ankor.

Mon pa konnen sa Lalwa ki nou’n fek pase la, ki pou sispann nou peryod, parske nou osi nou peryod ki nou servi lo sa Komite koman Chair avek COVID-19 la i ale li.  Parske nou sipoze ekspire mon krwar Septanm non Onorab Aglae?

Alor mon pa konnen si zot pou anmenn en Lalwa koumsa, tou pou dir sa peryod COVID pa konte, mon pa konnen?  Me mwan mon dakor avek sa ki Onorab Aglae in dir ki nou bezwen fer tousala.  E Sesel i seye dan son prop fason me annou nou koman en Lasanble met lanfaz koman en Gouvernman e an menm tan osi koz avek nou pep.

Nou  fer nou pep konpran, ki letan nou pe pran sa bann protokol, sa bann model laws ensidswit bann Trete ki nou sinyen nou bezwen fer zot rantre dan nou Lalwa isi.

Parey toultan nou’n koz lo la sa prosesis domestikasyon i enportan.  Parske ozordi Sesel. Nou anvi nou pe donn trant poursan par egzanp nou lanmer koman zone proteze me si nou pe donn sa 30poursan i annan keksoz ankor ki vin ladan.

Letan nou dir nou pe donn 30poursan nou anvi osi ki bann lespes ki sipoze ganny proteze zot ganny proteze. E isi lo Mahe pou nou kapab koz avek nou pep poudir be regarde si nou pe protez torti, tortidmer annou vreman protez li, parski zot pa pou, nou pa pou vwar torti, nou bann zanfan pa pou vwar torti pe ponn otour Mahe.

E apre sa nou pou dir pou al lo zil i lwen ensidswit.  E alor annou protez bann torti isi otour nou bann zil ki pre.  E sa prensipalman lo bann zil kot i annan popilasyon permanan Praslin, La Digue ek Mahe.

Alor Mr Speaker nou bezwen met lanfaz lo la, e nou pa pou kapab zis ratifye bann dokiman, me apre sa nou pa trouv son domestikasyon oubyen nou pa trouv li vin dan en fason pli for. Me mon ti ava osi letan mon pe koz lo sa Trete lo lendistri ki enportan en kantite pou nou, pou kontinan Lafrik regarde ki mannyer nou prezerv nou bann resours natirel.

Parey Onorab Aglae i mansyonnen, nou bann resours natirel. E Lafrik wi lemonn antye i rekonnet pou dir Lafrik i kontinan ki pli ris ozordi. Zimbabwe i pei i enn bann pei pli ris, non selman Lafrik me dan lemonn, me regard li al laba regarde ki mannyer i ete?

Mwan mon’n al laba pa tro lontan pase avan COVID-19 byensir, i annan en larises enorm it was the bread basket of Southern Africa.  Sa bann laferm mai ti ekstraordiner, i annan tou bann mineral.

Lor zot pa konnen ki kantite zot annan e bann lezot mineral ankor menm parey avek Angola.

Angola ou tande pou dir fiy ansyen Prezidan i en pe dan problenm tou son kont i ganny sezi parski larzan in pas atraver bann sours en pe avek bokou doutans koripsyon ensidswit.

Alor nou pou bezwen bouze pou ki Lafrik koman sa kontinan ki nou Sesel nou form parti nou kapab debout e dir larises ekstraordiner,  e alors nou pep pa kapab viv dan la lapovrete; pa kapab viv dan la povrete.  En Zimbabween pa devret dan la povrete parske son pei li sa Zimbabween letan i travel sorti en bout pou li al lo en lot bout, i pe pas lo lor i pe pas lo bann mineral ki annan en valer ekstraordiner.

Menm parey avek bann zanfan Angola.  Zot pa sipoze dan la povrete, Sidafrik pa sipoze annan sa bann shanti towns ensidswit, se parski zot annan ase larises pou zot pep viv byen.

Alors Mr Speaker wi i bon ki nou ratifye sa protokol me selman nou bann dirizan azir dan en fason pli serye.

E letan nou al sa bann rankont pou met bann pwen for devan pou sa kontinan ki pli for dan lemonn i ava kapab bouze e i ava kapab zwe son rol enportan. Mersi bokou Mr Speaker.

 

MR SPEAKER

Mersi Onorab Ramkalawan, petet mon zis fer en pti komanter.  Ou’n mansyonn Zimbabwe a plizyer fwa, nou tou nou konnen poudir i annan en pwa osi tou ki, sirtou pei was in mete lo Zimbabwe, sanksyon.  E dan dernyen SADC PF plenyer ki nou ti fer Desanm Namibia, ti annan en rezolisyon ki SADC PF ti pran.  E mon mazinen i pran lo nivo SADC osi Head of State Summits pour retir demande pour ki lemonn i retir sanksyon kont Zimbabwe, e sa i en keksoz ki mwan lo mon kote lo kote Parlman Sesel, mon ti donn sipor mon koleg Speaker Modenda pour ede pour lemonn kapab les Zimbabwe.

Akoz dan sa sanksyon se son pep ki soufer, i annan serten dirizan parey Onorab Ramkalawan in mansyonnen serten fanmir bann dirizan se zot ki benefisye.

Me lepep Zimbabwe i soufer e nou espere ki avek tou sa rises, tou sa potansyel ki enn nou pei dan sa group SADC  nou pei frer e ser, i zouir tou sa larises.  E fotespere zot a kapab devlope e pour kwa pa zot annan Out, sa potansyel pou retournen pou vin the bread basket of second Africa.  Mon a donn laparol Onorab Waven William.

 

HON WAVEN WILLIAM

Mersi Mr Speaker.  Mr Speaker lo sa demann pour ratifye sa protokol mon’n ekout prezantater fer son komanter ki’n ganny fer par Onorab Aglae avek Leader Lopozisyon.  Me mon pe zis demann mon lekor sa kestyon se ki la deor pou bann piblik ki pe ekoute ler zot pe ekout sa deba mon pe demande zot pa konfize, akoz letan ou regarde ou annan egzekitif ki ale al fer diskisyon, swa i siny serten dokiman, epi ou ganny Lezislatif ki vini, i bezwen ratifye.  E a lafen dizour ou demann ou lekor, eski ou annan swa?

E kestyon ki monte se ki finalman letan ou’n ratifye lo en baz reel, Nasyonal kwa vreman ki arive.  Nou pa ganny donnen en pwen depar ki kote nou anvi arive.

E eski sekter lendistri li menm li, ki degre enplike i enplike ladan?  E koman en Lasanble eski nou annan ou bann mekanizm an plas pou take the Government  to task?

Mon krwar problenm i la.  Egzekitif li ki annan manda pou egzekite.   E letan mon’n ekout prezantater mon pa’n vreman lo en baz lokal apresye letan nou pou ratifye sa protokol, egzakteman kwa ki nou pou benefisye avek.

Me mon’n osi sezi poudir i annan en ta problenm.  Letan mon’n ekout Onorab Aglae ki dir be sa en lavolonte politik, akoz toultan dan plizyer forum kot ou ale parlmanter pe koz lo problenm volonte politik.  E finalman ou vwar poudir nou angaz nou, nou annan bokou resours nou, nou dir nou resours i limite.

Me selman nou angaz nou, parfwa nou demande me eski sa ki mon pe envestir nasyonalman avek sa partisipasyon, an retour vreman sa retonbe eski i pey fre?

Me pour li pey fre i bezwen annan en prosesis.  I bezwen annan en mekanizm an plas kot nou kapab dir poudir, be sa ki nou’n komanse, se sa direksyon ki nou anvi ale.

Par egzanp la avek sa sityasyon COVID-19, nou war nou dan en sityasyon kot nou lekonomi in santre otour nou lendistri tourizm, me  mwan pou  en bon pe letan ki mon dan Lasanble mon’n tann pe koz lo en nouvo model ekonomik ki pei ti ava kontan anbark lo la.   Me nou’n zis koze Mr Speaker! Me sa transformasyon pou vreman sanz sa model i vreman dousman.

E mwan, mon demande ki atraver ratifikasyon sa protokol ki Lasanble Nasyonal, i vre ki nou annan serten bann lakin, me nou pa kapab zis ratifye epi pa take the Government to task, poudir be regarde nou’n ratifye sa ou’n dir nou i annan sa, kwa ki nou pe fer finalman?

Akoz si nou pa kapab adopte en fason travay pou nou kapab swivre egzakteman ki Egzekitiv pe fer, nou vini nou ratifye, nou anmenn bann lagreman, bann protokol pou ratifye, e  finalman;- enn,  bann rapor osi eski nou pe ganny bann rapor pou nou konnen ki zistans nou’n arive?

Akoz koman en Lasanble Nasyonal ou en nenport ki Parlman, i pou enportan pou nou kapab sivre egzakteman, vwar vreman ki Egzekitiv pe fer.  E mon pou dakor ek Leader Lopozisyon mon krwar sa domestikasyon osi i enportan.

Akoz nou koman ban Manm Parlman nou pa ansarz sekter endistriyel, me eski bann akter dan sekter endistriyel zot ase okouran avek sa bann protokol, sa bann lagreman pou zot kapab tap in, pou zot kapab vreman rod debousman?

I fer lapenn parfwa ou tan plizyer bann dimoun bann akter dan ekonomik pe dir, be ou konnen la mon annan sa, mon pa konnen ki fason pou mwan al deor ouswa sorti pou kapab met mon prodwi o nivo enternasyonal.  Be prezan ou dir be lo kote egzekitiv koman fasilitater, kwa ki i pe fer an plis pou ed sa sekter pou li kapab bouze?

Akoz nou pa kapab get zis nasyonalman, me selman parey mon’n dir ozordi la avek sa sityasyon COVID-19 i prezant nou avek en loportinite.

E yer pandan Question Time, nou’n koz bokou lo Sekter Lagrikiltir avek Lapes, petet atraver ratifikasyon sa protokol, i ava pous nou pou nou dir be ok Egzekitif ou pe koz lo en nouvo model ekonomik.

Annou bouze lo la silvouple.  Annou annan bann diferan striktir ek fason travay pou nou kapab mezire.

Mr Speaker avek sa pti kontribisyon mon napa swa me dan mon lopinyon swa mon abstain, swa mon vot an faver.  Mersi.

 

MR SPEAKER

Mersi Onorab William. Bon mon ava donn laparol mover Mosyon pou fer son konklizyon. Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker mon byen akeyir bann pwen ki’n ganny leve dan diskisyon otour sa Mosyon.  E mon annan detrwa komanter pou mon fer.

Premyerman koman en Manm Lasanble, nou annan en swa, ou kapab vot pour, ou kapab vot kont, ou kapab abstain.  Tousala i en swa.  E ou deside ki ou pou fer, e an menm tan koman en Manm Lasanble  nou bezwen osi – pa espekte Egzekitif i met tou dan nou labous pou nou zis anvale.

I enportan koman en Manm Lasanble pou nou sakenn de nou pou nou zwe nou rol.  E fer ki nou pouse e nou kontinyen pouse.  E sa i en, nou tou ki la nou pou ale, sa ki pour vini apre i pour bezwen kontinyen fight, pou li kapab ofer ki Lasanble i kapab ofer son proper role.

E an menm tan mon pour al lo en pwen zisteman ki letan nou pe koz SADC PF, la sa challenge osi i tonm lo SADC PF.

Mon rapel dan son instructions SADC PF mon ti la, dan bann premye lenstans letan pe kree SADC PF, mwan mon ti en Manm sa bann premye group pou kree SADC PF.  E son challenge ti la.  Ki challenge?  E sa ki ou’n nonmen ou annan parfetman rezon Onorab Ramkalawan depi komansman nou dir.

E SADC PF i bezwen al lo pli o lenstans e se sa ki mon krwar ki nou Lasanble osi pe dir avek Egzekitiv i en kestyon political will i agree.

E ki nou pe dir ki Lasanble letan ki i annan sa bann negosyasyon letan i annan SOME pli o, prezidansyel laba letan Egzekitiv pe al dan sa bann SOME i bezwen anmenn Parlman avek li.  E nou pe dir ki i bezwen ede.

I pa kestyon Parlman zis ale pour be non parlman i annan en rol osi pour zwe pou gete zisteman sa bann keksoz ki nou pe pase ki nou pe ratifye, sa bann keksoz ki nou pe diskite lo nivo Parlman rezyonal kontinantal.  Si i pe ganny enplimante si nou kapab ganny en la tribi si ou pa kapab etre dan sa bann diferan lenstans, ki mannyer alor ou zwe rol oversight? Rol oversight Manm Parlman.

E Parlman per se i pa zis lokal domestik, i pa zis dan ou pei.  Me si ou annan sa bann body rezyonal e kontinantal, i bezwen osi al to that extent pou nou kapab vwar be la i anmenn mwan lo en pwen.

E nou ti dir nou ti warn SADC PF letan ti komanse ti pou dir pa fer sa vin en lot European agenda, akoz laba L’Europe fodre pa nou kopye sa ki zot pe fer akoz i pa aplike pou L’Afrique, L’Afrique i annan son spesifisite pou li.  E L’Europe i oule ou fer parey li e apre nanryen pa ganny fer, ou zis marse ou zis, depanse ou zis isi laba, e aksyon pa’n ganny fer e ou pep i kontinyen reste dan lamizer.

We warned – I recall e anmenn tan sa i fer mon bann pwen ki’n avanse zot annan parfetman rezon;- menm zafer ek dyanman, bann lezot pei i vini zot pran dyanman L’Afrique, e Afriken pe diskite li i dir koumsa nou bezwen fer nou osi Korperasyon, en body ki nou donn valer nou dyanman pou nou kapab ganny plis larzan ek nou dyanman.

Pou nou kapab ed nou pep ziskan ozordi pa ankor fer, ou konpran? I annan tou sa bann challenge e sa pa devret bes nou gard, sa pa devret fer ki nou tou nou dir i ok nou pa kapab fer naryen let us go home.

Non nou bezwen kontinyen pouse, e mwan mon kontan Sesel malgre son ptipti ki i ptipti, tou nou bann dimoun ki pe ale lo SADC PF, lo COMESA lo Pan African Parliament.  E enkli Egzekitiv e sirtou anba gidans Prezidan Faure, la sa i vivid, i kler e ki Sesel i bezwen rod leadership.

E nou pe dir ek bann pei menm pli gro ki nou, swiv nou, get ki nou pe fer e al dan sa direksyon.  E Sesel i pe anmenn vreman, vreman en lager asarnen, pour fer ki nou rezyon lemonn i fer pli byen e vreman i annan ki pe swiv.

I annan ki pe ekout Sesel, e dan diferan domenn Sesel is playing the leadership role, malgre son ptipti e son kapasite. E mwan mon krwar ki sa kestyon domestikasyon zot annan parfetman rezon e nou pour pouse, ou konnen sa nou Departman Lendistri tousala pe zwe en rol enportan be nou pe dir osi parlman.

Nou Lasanble letan pe aprouv sa ratifikasyon sa Mosyon ki devan li i pe dir avek Egzekitiv i pe dir avek sa bann buddies double zot zefor e sirtou dan sa bann moman COVID-19  pour ki zot anmenn pli bon benefis pour nou pep.  I en kestyon political will ankor mon repete.

Yer nou’n dir yer mon menm mon personnelman mon’n dir e apre mon’n ganny en ta call e en ta felisitasyon e en ta komanter ki’n vini lo telefonn partou, ki’n vini ki’n dir ‘’yes Onorab De Commarmond, kontinyen.’’

E se sa, letan nou ti pe koz lo lapes par egzanp, lo kestyon en lot canning industry, i annan dimoun la ater dan Sesel zot in pare, i annan 2an pe espere.  Konmsi i annan sitan keksoz osi akoz sa i en kestyon osi i pa zis esper Gouvernman.  Me osi sekter prive i bezwen pouse ki sa bann keksoz i bezwen arive.  Labank i annan rol pou zwe akoz zot ki annan larzan.

I bezwen donn sa bann loan, e Gouvernman li i bezwen negosye sa bann loan.  E konmsi letan nou’n ganny sa bann larzan pou donnen annou pa tarde.  I annan tou sa bann keksoz ki ansennen ek kanmarad e ki fer ki lendistri li menm i ava devlope.

Nou pe dir nou en atraver sa protokol, ki nou pou ratifye la nou pe dir nou Sesel annou zwe nou bout annou kontinyen nou role leadership, e annou fer ki nou private sector.

Annou la sirtou dan sa moman difisil e Gouvernman nou pe dir li donn koudmen sa private sector, pou li kapab fer devlopman ki anmenn bokou plis forex;- bokou plis deviz, ki ranplas sa deviz, ki annan sa lespas la, sa mankman ki’n kree par tourizm ki pa la.

Me nou pe dir annou donn sipor sa private sector dan sa sans la, pou kapab kontinyen etre inovativ, e devlope ensidswit.  E an menm tan yer osi nou’n trouve kot en problenm i egziste akoz la nou pa kapab zis pran larzan taxpayers, envestir  e siport private sector e apre private sector i vin trangle nou.  I pa kapab vini avek pri telman o.

Nou pe dir annou revwar pri osi, nou pe fer tou sa pour ki i anmenn zisteman en rannman pour sa pep.  Sa pep prezan li i bezwen kapab annan a son laporte bann komodite ki avek pri rezonnab, pour li kapab vwar en amelyorasyon dan son lavi, dan son kondisyon lavi, dan son sityasyon lavi, pou li kapab dir wi i byen mon viv dan sa pei;- i gou viv dan sa pei. Akoz mon war sa benefis mon war sa lavantaz. E pour mwan kapab kontinyen siporte.  I pa a vin zisteman parey Zimbabwe parey ou pe dir wi, i ti the bread basket of Africa nou konn tre byen.  E nou war ki’n arive i sagrinan dan serten sa bann pei.    I sagrinan ler sirtou bann nou ki’n al dan sa bann pei pou plizyer fwa, ou war sa degradasyon kot i arive konmsi devan pou lizye konmsi i vreman sagrinan.

Mr Speaker, e nou pe dir atraver sa, nou pe lans osi en lapel pa zis ek nou Parlman la, me ek nou Egzekitif,  ek nou Leadership pou pei poudir annou pa les nou ariv dan sa bann sityasyon la.

Annou fer sa ki korek.  Annou fer sa bann bon Lalwa pour zisteman sirvey nou bann lendistri, nou bann resours ki nou annan.  Nou pe koz pwason, enn nou resours, nou napa bann gran resours natirel. Pou le moman la nou pa ankor war delwil akoz nou napa dyanman, nou napa lot. Me selman nou annan nou pwason, nou annan nou lanvironnman.

Sa i nou bann resours ki nou bezwen an menm tan pe gete ki mannyer i devlope. Nou bezwen gete sa bann Lalwa ki diriz devlopman, sa bann resours, zisteman nou ankor pe esper Minister Lapes avek Lagreman Lapes avek EU.

Nou bezwen re get seryezman, e sa i rol nou Parlman. E mon demande ki nou parlman i kontinyen zwe sa rol aktiv, kontinyen pouse e kontinyen fer pou montre sa diferans pou pep Seselwa war le nesesite, pou elekte nou bann dimoun solid dan Parlman. Ou konpran mwan? Si nou pa pe zwe nou rol, i fasil nou pep pou dir be tyonbo en kou sa pa neseser pou remet li dan Parlman.

Avek sa Mr Speaker mon pou remersye ou, e mon pou demande ki nou Manm nou Lasanble an tou i siport sa Mosyon ki devan nou. E nou demann osi lans lapel ek Gouvernman poudir donn sa sipor kontenir sa Mosyon;- domesticate li, e kontinyen pouse pour ki nou pep a lafen dizour, i benefisye.  I ganny sa ki best!  Mersi bokou.

 

MR SPEAKER

Mersi Onorab De Commarmond, Bon in ariv moman pou nou pran en vot lo Mosyon pou ratifye sa SADC protocol on industry.

Tou manm ki an faver? Okenn manm ki kont? Madanm Deputy Clerk?

 

MADAM DEPUTY CLERK

Mersi Mr Speaker, 27 manm in vot an faver e personn kont. Mersi.

 

MR SPEAKER

Mersi Madanm Deputy, Mosyon alor pou ratifye SADC protocol industry in ganny aprouve par Lasanble Nasyonal. Yes, Onorab Ramkalawan.

 

HON WAVEL RAMKALAWAN

Mr Speaker en konsern ki pe leve la, ki mon ti ava kontan an port a ou latansyon e les ou lofis petet fer demars, i annan en gran lenkyetid parmi bann pasyan Seselwa ki pe fer tretman Lenn.  Gouvernman in anonse ki poudir avyon i sipoze vin a Lenn pou al sers zot, parey ti ganny anonse, me i annan en mank kominikasyon avek lopital.

Lopital kot zot ete zot pe dir ki napa okenn kominikasyon ki’n arive e ki alors si napa okenn kominikasyon, zot pa pou kapab menm si avyon i arive i pa pour les zot parski Lenn i ankor dan sa sityasyon lockdown li osi.

Alors petet mon ti aver demande parski i annan sa lenkyetid la, mon ti aver demande petet ki ou lofis i ava pran kontak avek Departman Lasante pour kapab eklersi sa, pour ki nou bann pasyan i a kapab retourn isi sen e sof. Mersi bokou.

 

MR SPEAKER

Mersi Onorab Ramkalawan.  Nou ava fer le neseser pandan break.  Bon mon annan zis en pti lanons pou mwan fer, Bills Committee pe rankontre midi edmi dan Committee Room 3. Ankor i pou Bills Committee not Extended Committee ok?  E avek sa nou pou pran break, e nou retournen 2er pou nou kontinyen nou travay pou nou pran lot Mosyon ki lo Order Paper.

 

(BREAK)

 

 

MR SPEAKER

Bonn apre midi tou Manm Onorab.  E bonn apre midi tou dimoun ki a lekout e pe swiv travay Lasanble Nasyonal.  Nou pou kontinyen avek nou biznes lo Order Paper.  Nou dernyen item ozordi se dezyenm Mosyon e sa sete en Mosyon ki pe ganny move par Onorab Wavel Ramkalawan, Leader of the Opposition.  Onorab Ramkalawan laparol i pou ou.

 

HON WAVEL RAMKALAWAN

Mersi bokou Mr Speaker.  Mr Speaker, Mosyon ki mon anvi prezant avek Lasanble Nasyonal i lir koumsa ;-

Lasanble Nasyonal i demande ki Gouvernman i gard nou frontyer frenmen pou viziter ziska ki sityasyon COVID-19 dan lemonn i amelyore.  E ki i annan en sistenm deteksyon efektiv pour sa viris ki an plas, oubyen en bon progranm proteksyon pou nou popilasyon ki’n fini ganny aplike.

E sa Mosyon ki mon pe anmennen apre midi, i pa en Mosyon ki mon espekte en kote i pran en pozisyon, lot kote i pran en lot pozisyon.  An dot mo, pa en deba parey sa ki mon espekte.  Se pa en deba parey nou abitye fer.

Sa Mosyon se prensipalman pou nou konman en Lasanble fer en refleksyon lo nou sityasyon apre sa leksperyans COVID, apre sa leksperyans lockdown.  E an menm tan osi mon trouv li konman en refleksyon lo sa bann lanons ki’n ganny fer, spesyalman an relasyon avek retourn nou pei swa dan sa ki nou apel ‘’sa nouvo normal’’, e an menm tan osi petet pou nou regarde ki mannyer nou bouze.

Annou ansanm apre midi fer en refleksyon lo ki mannyer nou popilasyon i santi, ki mannyer bann eksper i santi, e ki mannyer nou bann Manm Lasanble Nasyonal, ki mannyer nou santi.

E ofet Mr Speaker, mon pou dir o konmansman menm ki tan a sa ki konsern mwan, sa bann lafason ki mon’n ekrir sa Mosyon i pa’n ganny ekrir an ros parey nou dir, ‘’carved in stone.’’  Nenport Manm ki santi i annan serten lamannman ki zot ti ava kontan anmennen avek sa Mosyon, nou ava regarde ki mannyer i fer sans. Mwan mon pare pou al dan nenport direksyon.  Me konsern parey mon’n dir, i aplik pou nou tou.

E mon konnen ki poudir nou tou konman Seselwa, nou pe swiv tou bann keksoz kler.  E letan mon pe regard bann konferans de pres ki pase, bann kestyon ki ganny demande mon konnen ki poudir Seselwa i annan en keksoz, ki ozordi i met devan li dan en fason serye.  E sa se son proteksyon.

Nou tou nou annan en lafreyer pou sa COVID-19.  Nou tou nou annan en konsern pou nou lasante e nou tou nou ti ava kontan, an menm tan ki nou annan tou sa bann konsern nou ti ava kontan vwar keksoz amelyore.  Par egzanp mon plis ki sir ki nou tou dan sa lasal nou ti pou kontan si demen letan nou met nou televizyon on, nou tande ki poudir i annan en vaksen ki’n ganny trouve pou COVID-19. Nou tou nou pou kontan.

Nou tou nou ti pou kontan vwar ki non selman ki en vaksen in ganny dekouver.  Me si nou ti osi antann ki poudir i annan en latizann spesyal ki’n ganny dekouver.  Si par egzanp sa ki Madagascar pe propaze, si ti dekouver ki poudir ou bwar 2 sa boutey e COVID i ale.  Mon krwar ki poudir nou tou nou ti pou pare pou donn Air Seychelles en pe plis larzan pou li al Madagascar, al Antananariv ranpli avyon avek sa bann boutey e anmenn zot isi.

Alor mon krwar ki poudir dan nou fason panse, i pou annan definitivman en sans solidarite.  E nou dan sa Lasanble fodre pa ki nou sey konsider nou lekor konman pli eksper ki eksper.  Me selman mon mazinen ki parey nou’n anmenn sa deba bomaten, kot nou’n fer en analiz par nou responsabilite ki nou annan vizavi nou pep.  Me non selman vizavi nou pep, vizavi nou rezyon, vizavi nou kontinan, vizavi lemonn, nou ganny demande pou nou fer serten refleksyon.  E apre midi mon envit tou Manm pou nou fer sa refleksyon.

Mr Speaker, enn bann lanons ki’n ganny fer, se ki apartir le 01 Zen ;- Ozordi nou, ki dat ozordi ?  Ozordi nou le 6, savedir dan ankor 3 semenn nou Erport pou ouver. 

E i vre ki Dr Gedeon letan i ti fer sa lanons, i ti anonse dan son Konferans de Pres ki poudir pou annan bann kontrol lo Erport e ki pou annan bann travel advisories ki pou ganny issued e ki pei ki bann dimoun pou kapab, Seselwa premyerman pou kapab vwayaze, e ki bann pei ki nou pou osi les pasaze rantre Sesel.

E nou’n osi ganny dir ki otomatikman pou annan parmi bann mouvman ki nou kapab espekte la, se bann mouvman kot bann e sa i deza pe arive, se bann vol repatriasyon.

E nou’n ganny enn semenn pase, avek Qatar ki ti pran bann lezot dimoun ki spesyalman ki pe travel ver Lerop ki’n anvi ale, pou anmenn zot atraver Doha. 

E letan nou regarde nou’n osi antann e ava nou ti break mon ti lev size bann Seselwa ki pe fer tretman medikal Lenn.  Sa i en problenm spesifik, me nou osi annan Seselwa ki pe fer tretman Sri Lanka e zot anvi retourn Sesel.  Nou konpran.  E in fini anonse ki poudir bann Seselwa letan zot pou retournen zot pou pas 14 zour karantenn e apre sa zot ava kapab al se zot.

Alor letan nou pe regarde, i annan serten keksoz e taler mon pou vin lo bann preparasyon ki’n sipoze mete, me selman ki otomatikman nou vwar ki bann diferan Lenstitisyon Touristik, petet zot pa ankor gannyen e napa okenn gran preparasyon ki pe ganny fer.

Me selman mon konnen ki poudir Minister Lasante in deza prepar en papye, me selman sa papye pa ankor ariv kot bann dimoun e parey nou pe dir dan 3 semenn Erport i devret ouver.

Mr Speaker, in annan diferan pwennvi an relasyon avek louvertir Erport spesyalman. Par egzanp letan mon regard date le 5 Me, letan mon regard sa ki Seychelles News Agency in dir, par egzanp letan i pe quote Mrs Sybille Cardon dan Lendistri Touris, i mete Mrs Cardon i dir, ki pou zot biznes sa lanons pa pou sanz absoliman nanryen. Akoz Lerop dimoun pa kapab vwayaze.

 

E byensir Sesel son Lendistri Touris i depann prensipalman lo Lerop e alor zot pou, nou pa pou kapab ekspekte touris retournen.  E i panse ki poudir se lannen prosenn ki keksoz pou bouze. En lot dimoun, Michael Thomas ki ofer bann tours spesyalman bann touris ki koz Alman.

Bann Alman, i dir ki menm si i konpran ki bann touris, bann viziter pa pou re antre dan nou pei tre byento. Li i santi i tro boner pou nou ouver nou border. 

Savedir fodre ki sa border i reste fermen.  E bann konsern ki ganny eksprimen se spesyalman letan nou pe koz lo sa 2enm wave ki kapab arive.  E la mwan bezwen dir Mr Speaker, ki letan mon ekout bann eksper medikal letan zot koze e la mon pe ekout Dr Gedeon li menm, ki kontinyelman don nou warning.  Ki dir nou pa ankor sorti dan danze e ki en 2enm wave i kapab vreman grav, serye en kantite.

Letan ti annan louvertir sant karantenn Ile Du Swet, mon ti tann Dr Louange pe dir ki nou pei nou bezwen pare parski sa dezyenm wave, kekfwa 500 dimoun i kapab ganny enfekte.  Se sa sif ki ti mansyonnen e alor nou bezwen regarde ki mannyer nou pou fer fas avek en tel sityasyon.

Alor e avek larive bann ners sorti Kenya, ankor enn fwa letan mon ekout Dr Gedeon i a pe koz lo nou bezwen prepar nou, konmsi ou krwar ki sa ki nou’n pas ladan deza sa i ti lo en i ti nivo ba, me nou bezwen fer plis preparasyon.

E nou bezwen rod led an deor, pou nou fer sir ki si i annan sa 2enm wave, konmsi keksoz pou vreman grav.  E alor tousala mon espere i ava ed nou dan nou refleksyon.  E nou konnen ki poudir i annan presyon en kantite.

E petet la mon anvi met lanfaz ki se pa dat ki enportan.  E menm si in anons le 01 Zen, mwan mon plito pe regard an term kondisyon ki prévalant pou nou al ver en louvertir.

Pou nou regarde nou pei li menm li ki mannyer, ki bann kondisyon ki’n sanze oubyen ki bann kondisyon preparasyon ki nou pe fer pou nou met nou pare. E se la mon krwar ki nou refleksyon osi tou i kapab anmenn nou.

Mr Speaker, annou, annou zis sitye nou kot nou ete Sesel, nou’n ganny nou 11 ka pozitiv pou COVID-19, transmisyon dan kominote i en kestyon.  Menm si nou koz lo sa onzyenm ka nou pa konnen kote nou frer in ganny sa COVID-19, me i resanble ki pli nou fer refleksyon pa’n ganny li dan kominote in ganny li dan travay.

Avek sa dernyen flight British Airways ki ti pe, sa flight ti pe anmenn bann pasaze.  Parske i ti pe travay e i posib ki in ganny avek en kliyan.

Me selman sa dan li menm li osi i fer nou poz kestyon, parski sa kliyan ti Sesel.  E nou’n sanse ki sa kliyan si in ganny sa laba, sa kliyan ti Sesel, me i pa’n partaz sa avek bann lezot dimoun, alors ankor enn fwa nou get ver lesyel e nou dir Lesyel, mersi bokou.

Alors nou dir ki tou bann cases ti enporte, menm si sa Seselwa ti ganny li Four Seasons ankor enn fwa nou konnen ki bann soz. Nou’n sanse nou’n napa okenn lanmor.  E tou bann pasyan, tou bann pasyan ozordi, ok i reste zis 2 ou 3 ki ankor dan sant izolasyon Perseverance, me apard sa bann dimoun in geri e zot in al dan lakour.

E lo lot kote nou annan en sistenm karantenn ki’n ganny etablir, e alors sa i en pe nou sityasyon.  E nou konnen ki poudir touris si nou pe ouver nou frontyer, ou pa kapab met en touris dan karantenn.  Parski si i pe vin en konze 7 zour, sa dimoun pa pe vin en konze karantenn, alors i pou bezwen rantre dan kominote.

E Mr Speaker, la mon ti ava kontan dir ki, ou konnen nou popilasyon i lo full alert.  Par egzanp depi bomaten mon’n ganny plizyer calls an relasyon avek en bato kargo ki sorti Moris ki’n koste avek Por e ki pe vin, ki mannyer mon konpran pran pwason.

E bann dimoun ki travay lo Por in eksprim en pe konsern ki poudir i annan enteraksyon ant sa bann dimoun lo sa bato avek bann Seselwa.

E konmsi zis pou montre ki mannyer nou bann dimoun i lo full alert, e kabann bann zofisye Lapolis Botswana osi tou i montre nou ki mannyer bann dimoun i lo full alert e dimoun pe poz kestyon.

Alor sa i en pe nou kondisyon ozordi.  E letan nou regard nou sityasyon, letan nou ti deside pou nou ferm nou border, le 28 Mars 2020. Dan lemonn ti annan 491 mil ka, ki ti aktiv parmi sa 664mil dimoun ki ti’n atrap sa viris.

Ozordi i annan i annan 2, 177milyon 869 mild cases, i annan 49, 248mil ka ki serye, e an tou sa i fer en total 2, milyon 227milyon – 117mil dimoun ki ankor annan sa viris ki aktiv.

E byensir lakantite dimoun an tou ki’n tous sa viris i plis ki 3.5 oubyen 3.8milyon atraver lemonn.  E lakantite dimoun ki’n mor i 258, 338mil dimoun.  E sa Mr Speaker, letan ou regarde i plis, letan ou pe regarde ozordi pe dir ki Lanmerik lakantite Ameriken ki pe mor i plis ki ti mor pandan lager Vietnam.  E letan ou balans bann latak teroris, i pa’n zanmen annan en latak teroris ki’n touy sa kantite dimoun parey ozordi nou pe trouve.

E L’Angleterre li osi tou menm parey e L’Angleterre son trend i ankor efreyan.  E letan ou regard sa trend COVID-19 an relasyon avek lakantite ka, an relasyon avek lakantite lanmor son graph i pa ankor monte ki konmsi i pe desann, son graph i ankor pe monte.

E i resanble dapre bann eksper ki sa graph i pou kontinyen al dan sa direksyon pou ankor en bon pe letan.  Lo lot kote, nou pe osi vwar ki e sa parey mon pe dir, sa le 28 Mars letan ou konpar le 28 Mars avek ozordi, definitivman sityasyon i bokou pli grav.

E nou osi konnen son lot realite se ki i annan diferan pei ki pe fer bann resers pou kapab ganny en vaksen.  Nou konnen ki poudir L’Angleterre zot pe fer serten demars, Lanmerik zot pe fer serten demars.  Lasin zot pe fer serten demars, Israël zot pe fer serten demars. I annan diferan pei ki a pe fer bann demars pou kapab ganny en vaksen o pli vit posib.

Me selman sa ki nou pe osi tande sorti dan lemonn syantifik, se ki pa pou espekte ganny en vaksen avan 1an.  Letan zot in fini fer tou bann test e sa peryod ki zot, sa peryod syantifik pou regarde si vreman i marse ensidswit.

E nou osi konnen ki poudir in annan en kantite diferan lesey, bann latizann. La nou’n tande poudir latizann ki’n servi pou Ebola, Lanmerik in dir i kapab ganny servi pou sey fer tretman.

Nou’n osi aprann ki latizann ki servi pou Malarya, nou osi tou nou’n ganny en stok sorti Lenn, ki kapab sey servi pou sey donn sa tretman.

Alors dan sa prosen 12 a 18 mwan, kekfwa nou ava ganny en keksoz.  Me selman la pour lemoman napa naryen.  E byensir Mr Speaker, letan nou’n ferm nou border, i annan bann dezavantaz e osi bann lavantaz.  Ok, napa okenn aktivite touris me partou kote lemonn antye in fermen.

Alors nou pa kapab espekte nanryen e sa i afekte nou lekonomi, nou pa pe ganny foreign currency, pri dan laboutik i pou monte parske i annan devalyasyon ki pe arive.  Mon ti pe regard rates ozordi, MCB zot rate pou Dolar selling in ariv R18.42 sou sorti R14 keksoz.  E ki otomatikman pres pou ariv R5 logmantasyon e R5 lo sak Dolar i pou vedir ki otomatikman keksoz pou ogmante.

E an menm tan osi lo kote lanplwa, lo kote lanplwa bann posibilite pou lanplwa i desann e sa i otomatik, sa se en pe bann dezavantaz.

Tandis ki bann lavantaz byensir nou napa nouvo ka COVID, e nouvo ka COVID i vedir ki nou pep kot son lasante i konsernen i annan plis sekirite.  Nou napa lockdown, nou napa curfew e nou lekonomi domestik i kapab repran menm si ankor enn fwa i pou pran dousman, dousman. Me selman omwen i kapab annan serten aktivite ekonomik e sa byensir i pou annan en lenpak lo dimoun ki pe viv lo welfare e in annan bann ka spesifik ki’n ganny mansyonnen.  Par egzanp letan lekol i ava reouver, tuck shops i ava reouver, i ava annan en pe plis aktivite. E la deza bann hairdressers, bann keksoz ki nou’n vwar bann hairdressers in konmans fonksyonnen, alor zot pou ganny en pti larzan e mon mazinen ki an mezir ki nou sorti dan sa sityasyon i ava annan plis aktivite e dimoun i ava kapab i ava kapab enjoy zot lekor en pe plis.

But lenplikasyon pou nou ouver nou border, parey mon’n mansyonnen deza dezavantaz prensipal posibilite pou en dezyenm wave of Covid cases.  Sa i nou pli gran danze.  Posibilite pou nou retourn ankor dan lockdown ek curfew. Lekonomi domestik, re al ankor dan en slowdown oubyen dormi.

Bann lavantaz, se ki aktivite touris i ava kapab rekonmans e nou kapab ganny en pe plis larzan. Kekfwa bann kou marsandiz i ava desann e avek bann plis posibilite pou lanplwa.

Alor Mr Speaker, mon dan milye tou sa bann keksoz zis pou regarde ki mannyer nou pep i mazinen, mon’n trouv li enteresan ki in annan en poll ki’n ganny fer par enn mon zanmi e in demann en kestyon, ki lopinyon dimoun lo reouver lafrontyer, le 01 Zen ?  Eski i tro boner?  E dan sa poll in annan 525 dimoun ki’n pran zot letan pou zot partisipe.

E dan 525 partisipan in annan 442 ki’n dir i tro boner.  E sa 442 i reprezant 85poursan e bann ki’n dir i ok pou re ouver i annan 83 ki reprezant 15poursan.  Sa i montre nou en pti git ki mannyer dimoun i panse.

En poll byen sir i pa reprezantatif lo tou dimoun.  Zisteman se pour sa rezon i apel en poll, parski i pran en sample bann dimoun ki anvi partisipe.

Alors sa i montre nou en pti git ki mannyer nou dimoun li menm li i reprezant ki i pe panse. E letan ou regarde, enn bann kestyon ki letan bann zournalis ti a pe koz avek dan enn bann konferansdepres, ti pe dir ki parmi bann mezir ki’n ganny anonse.

E bann mezir lockdown i relax, tou dimoun i happy.   Repatriasyon pou bann etranze ki’n pri isi, dimoun napa problenm.  Repartriasyon nou bann dimoun ki malad pou retourn dan pei, dimoun napa problenm.

Bann cargo flights pou antre, toutfason sa ti pe arive, dimoun ankor enn fwa napa problenm.

Me Mr Speaker, mwan mon krwar ki petet nou leta preparasyon, kondisyon preparasyon i la kot nou mank en pe.  E letan mon pe, letan mon pe regarde parey mon sir nou tou nou’n regarde ozordi i annan bann diferan laplikasyon telefonn ki pe ganny, ki’n ganny evante.

E mon pe regarde la, UAE in fek fer enn nouvo ankor, e Australie li osi tou i annan enn e en senp fason, e nou ava rapel la ki Gouvernman Minister Lasante ti pe mansyonnen ki mannyer i difisil pou fer sa contact tracing.

 Be letan ou pe regarde par egzanp letan ou regard sa laplikasyon Australien, ou download li zot in travay lo la en pe parey, e sa i pa etranze avek nou.  Parske ozordi Sesel nou annan de Labank ki annan bann laplikasyon.

Nou annan MCB ki annan juice apre nou ABSA, li osi tou kot la letan nou pe asize mon kapab transfer en larzan lo ou kont, mon kapab pey en bill, mon kapab fer diferan keksoz.  MCB osi tou sa i la.

So, nou deza annan sa teknolozi, bann aplikasyon.  E teknolozi in al dan sa direksyon, an relasyon avek COVID. E par egzanp sa aplikasyon Australien i dir apre ki ou’n download li ou ganny demande pou ou anrezistre ou non, ou laz, ou post kod avek ou nimero telefonn.  Sa lenformasyon i ganny encrypted lo en server pe dil vreman avek Minister Lasante e apre sa, sa laplikasyon letan ou met ou bluetooth on, i rikord nenport dimoun ki li osi tou i annan sa aplikasyon.

E konmsi sa 2 telefonn, sa aplikasyon i rezwenn sa lot aplikasyon e si i annan en dimoun ki’n ganny, ki annan sa COVID-19, aprezan ou aplikasyon i pou notifye ou.  Parski li sa dimoun, li osi tou son rikord in ganny mete. E si aprezan zot bezwen fer contact tracing, i fasil pou zot konnen lekel bann dimoun ki annan sa viris ki’n antre an kontak e alor i fasil pou zot vin direk lo ou.

E an menm tan osi i annan en fason ki i donn ou en serten prekosyon, parski sa dimoun i annan COVID-19 e in anrezistre.  Konman ou letan ou pe vin obor sa dimoun ou telefonn pou dir avek ou, sa laplikasyon i pou dir avek ou fer atansyon pou annan en red flag ki pou leve, pou dir avek ou fer atansyon pa bezwen.  Konmsi pran tou ou bann prekosyon social distancing, ensidswit pou ou nobou protez ou.

So i annan sa eleman protez ou e an menm tan osi i annan sa eleman konnesans e lo kote lasante, lo ki mannyer pou zot pou zot fer sa contact tracing, lo ki mannyer keksoz i sipoze ete.

Alor Mr Speaker, i annan diferan keksoz.  E mwan parey mon pe dir mon’n ganny en sans, pou mon regard en pe bann guidance ki Minister Lasante in travay lo la e zot in fer en bon travay.

Parey zot in osi konman paran ki zanfan pe retourn lekol, Independence School nou’n gannyen ki bann keksoz ki bann zanfan i fer.

Me letan ou regard bann keksoz ki i demande ladan, bann training ki neseser,  mon krwar ki kekfwa nou devret konmans fer sa bann training ki enkli infection prevention control measures, ki sa bann diferan fasilite touristik i bezwen rantre ladan, sa human resource plan e contingency workforce plan. 

Ki mannyer pou fer bann monitoring, kominikasyon, bann plan dezenfeksyon, staff training, konmsi pou ki tou bann staff dan bann Lenstitisyon Touristik zot konnen egzakteman ki mannyer pou zot deal avek.  Ki mannyer zot pou lo nivo hygiene.

 E byensir sa i pou fer ki tou bann Lenstitisyon Touristik deza pou konmans met zot pare pou fer sir ki zot annan tou bann, konmsi dan sa ‘nouvo normal,’ ki pou dir zot annan bann fasilite lo kestyon health and safety.  Lo kote physical distancing guideline e ki pou fer si en kliyan i prezant li avek bann kondisyon ensidswit.

Alor Mr Speaker, i annan en kantite keksoz ki dan sa manual me ki nou bezwen fer.  Alor letan mon pe regard tousala, e letan mon’n pas lo tou sa bann diferan pwen, parey mon pe dir Mosyon i demande ki petet nou pran ankor en pti git letan.

Le 01 Zen ki lanmenm la anba nou lipye, kekfwa i en dat ki tro pre pou nou kontanple.  Annou pa bezwen anons okenn dat, me ki bann vol spesyal ki bezwen vini zot ava zot ava vini ek tou bann prekosyon i ava ganny i ava ganny fer, parey ki parey ki bann ners Kenyan in antre.

Parey ki bann zofisye Lapolis Botswana in antre, parey ki bann Seselwa ki pe fer tretman i ava antre ;- parey ki bann ki pe ganny rapatriye sorti Sesel zot ava kapab ale.

Parey ki bann kargo bann kargo flights ki Air Seychelles oubyen en lot avyon pe fer, i ava kapab kontinyen, parey bann prekosyon ki pe ganny pran lo Por i ava kapab kontinyen pou ki nou kontiny dan sa direksyon.

E olye zis set en dat pou reouver nou borders pou bann viziter annou plito, mon ti ava demande annou met lanfaz lo kree bann kondisyon vreman solid, agreab pou nou kapab met nou pei an tout sekirite.

Avek sa detrwa parol Mr Speaker, mon ava demande ki Lasanble ek bann Lotorite konsernen zot ekout nou, e zot pran konsiderasyon bann pwen ki nou pe met devan.

Parske apre tou se sekirite pou nou pep, sekirite medikal prensipalman pou nou pep ki nou pe rode.  Mersi bokou Mr Speaker.  I beg to move.

 

MR SPEAKER

Mersi Onorab Ramkalawan. Okenn Manm ki segonn Mosyon?  Yes, Onorab Clive Roucou.

 

HON CLIVE ROUCOU

Mersi Mr Speaker.  Bonn apre midi Mr Speaker.  Mon segonn Mosyon Onorab Ramkalawan e   permisyon pou mon dir de mo silvouple.

 

MR SPEAKER

Mersi Onorab Roucou.  Bon Mosyon has been seconded, laparol i pou ou Onorab Roucou.

 

HON CLIVE ROUCOU

Mersi Mr Speaker. Mr Speaker pou konmanse, mon anvi felisit Onorab Ramkalawan pou prezant sa Mosyon lo lapar lepep Seselwa ki, an gran mazorite ki mon osi mon’n koz avek zot vreman konsernen.  Avek desizyon Gouvernman spesifikman, pou reouver nou lafrontyer apartir le 01 Zen avek bann viziter.

Mwan personnelman, mon senserman krwar ki sa i en gran risk ki nou pe pran konman en pei si nou fer li sitan boner koumsa, san get kondisyon e lanvironnman ki pe pase otour lemonn.

E an getan, an lirzan Mosyon Onorab Ramkalawan, mon vwar ki li menm i pe tous tou bann pwen kontansye pou fer sir ki primordyal-man nou pa ganny en 2enm wave COVID-19 isi Sesel.  E mwan koman en Manm sa sizyenm Lasanble e en ners pa profesyon, pou mwan sa lalit kont COVID-19 is far from over.

E sa in ganny dir ankor par nou bann profesyonnel lasante espesyalman Dr Gedeon avek Dr Louange dan bann interview ki zot in fer lo SBC.  Zot osi zot konnen e mon konnen zot konnen ki en 2enm wave i kapab arive.

Alor mon pe demann lepep Seselwa pou pa bes lebra konmsi tou keksoz i ok akoz nou en pe dan soft ziska la konmela.  E Gouvernman osi fodre pa ki donn lenpresyon ki nou kapab zis rekonmanse kot nou ti kite yer.   Nou tou nou konsyan ki sa viris i kontazye e i touye.

Mr Speaker, nou bezwen zis remersi Bondye toulezour.  Kot in protez nou dan sa premye wave sa viris.  Kot nou’n ganny eparnye kont bann konplikasyon sa maladi ek sa viris.

Okenn dimoun lo front line pa’n ganny afekte, napa personn ki’n mor.  E konman en pei nou’n redrese an konparezon avek bokou lezot pei.  Alors nou bezwen pridan ler nou pe kalkil louvertir nou pei.  E nou konman en Pti Leta Zil nou vreman vilnerab avek en kantite risk.  Espesyalman lo nou depandans lo touris e nou bann kalite lenportasyon.

Alors nou devret fer tou zefor e en zefor ekstra pou anpese ki nou ganny tape avek sa 2enm wave parey mon dir.

Mr Speaker, God forbid si en 2enm wave sa viris i tap nou.  Mon asire nou konman en pep nou pou vwar li pli difisil pou adapte, kekfwa avek bann lockdown e curfew pli sever.  Kot nou, apre ki nou’n pran sa souf e nou’n vin en pti pe pli free pandan sa en mwan, 2 mwan nou pou vwar li difisil pou nou zis re antre ankor dan en lockdown. 

An kontinyasyon mon pe fer en lapel avek nou bann profesyonnel lasante.  E bann dan bann pozisyon ki fer desizyon, annou fer bann desizyon ki profesyonnel a labaz syantifik.  Pa les okenn presyon sorti kot personn pou enfliyans zot desizyon, akoz mon konnen Lepep Seselwa pou soufer.

Mr Speaker, avan ki mon al pli lwen mon bezwen fer kler ki nou lo sa kote latab, atraver sa Mosyon nou pe rod sa ki pli bon e sa ki pli meyer pou Sesel.  Kot nou pa anvi, nou pa anvi, napa en Seselwa la, ki anvi nou re ganny tape avek en lot wave sa viris COVID-19.

Alor Mr Speaker, Mosyon ki devan nou pe fer 2 demann prensipal.  Premyerman se ki sa Mosyon pe demande ki Gouvernman i gard nou frontyer fermen pou viziter ziska sityasyon COVID-19 dan lemonn i amelyore.  E pour mwan sa i en pwen kardinal.  Lanfaz fodre i ganny mete lo sa pwen dan sa Mosyon.

Alor Mr Speaker, permet mwan donn detrwa statistik pou prouve ki keksoz pa ankor bon otour lemonn e tou keksoz i ankor ovif.  Alors ouver nou lafrontyer nou bezwen kalkil 2 fwa.

Par egzanp, ler mon get bann pei ki nou depan en kantite pou touris, par egzanp Italy i annan plis ki 218mil ka in konfirmen.  L’Angleterre plis ki 212mil ka, L’Alemany plis ki 166mil ka.  Larisi plis ki 145mil ka.  Zis Moscow li menm i annan 50mil ka, La France plis ki 132mil ka e lezot pei Lerop.

Sa i prouve ki zis dan Lerop li menm i annan plis ki 1.5milyon ka COVID dan Lerop e sa i nou bann landrwa prensipal kot nou touris i ete.  E sa i montre ki sa 1.5 milyon ka COVID i apepre en pti git plis ki lanmwatye ka total COVID dan lemonn, kot i apepre 3.5milyon. Alors nou bezwen vreman pridan ler nou pe deside pou nou ouver nou frontyer.

Mr Speaker, nou kapab pa al tro lwen osi, zis get dan Losean Endyen.  Tou nou bann frer ek ser zil zot osi zot pe anmase.  Ankor Bondye i ankor kontan nou pou li donn nou sa sans, pou asire ki nou’n kapab drese dan en pti peryod letan.  Alors tou bann ki pe fer desizyon, annou fer sir ki nou, nou pa al sa zistans tro vit.

Mr Speaker, zis yer swar menm, apre mon pe fer en pti pe literatir, mon pe get en pei parey Lagres ki li osi i depan en kantite lo touris e zot, zot annan plan pou ouver lafrontyer zot pei pandan Lete.

Me zot Premye Minis in fer kler, ki pou zot fer sa zot bezwen asire ki tandans dan lemonn COVID-19 i desann.  Parey zot Premye Minis in dir, zot pa anvi fer en desizyon vit kot zot pour regrete.  Zot osi zot in vwar ki zot pei pe rekipere dan en peryod letan ase kourt.

Alors Sesel koman en pti pei, en pti pei ki depan lo touris, nou osi nou bezwen byen kalkile.  Nou bezwen byen kalkil nou touris, nou lekonomi, me nou bezwen met an valer nou pep osi.

Mr Speaker, dezyenm parti sa Mosyon pe demande ki i annan en sistenm deteksyon efektiv, pou sa viris ki an plas oubyen en bon progranm proteksyon pou nou popilasyon ki’n ganny byen aplike.

Alor, dezyenm parti sa Mosyon pe asire ki nou devret met nou pare, pou nou kapab detekte bann ka sispe e anpese ki nou ganny tape avek sa 2enm wave parey mon’n dir.  Nou tou nou bezwen pran kont ki sa viris pou la pou plizyer lannen, Mr Speaker.  Mon re dir sa ankor, ki sa viris pou la pou plizyer lannen.  Fodre pa ki nou bes nou lebra.

Me san en tretman oubyen en vaksen, nou pou kontinyen dan problenm.  Nou pou dan en problenm grav.  Alors tou sa ki nou fer i bezwen dan laklerte.  Alor lekipman servi pou deteksyon pou bann testing i bann keksoz primordyal ki nou devret pe fer, antretan ki en vaksen ou en tretman i ganny detekte.

Tousala pou mwan Mr Speaker, mon krwar i vreman en keksoz ki difisil.  I pa enposib, nou reste optimis, akoz according to WHO i annan plis ki 100 tes pe sey devlope pou tret COVID-19.  Me tousala nou swete ki i ava arive, me ler nou get listwar nou pran parey HIV ki annan plis ki 40an ziska ozordi nou pa ankor ganny en vaksen pou li.

Ler nou get en lot kondisyon parey Lavaryol ki ti ganny detekte an 1958, me nenk an 1967 ki zonm ti vwar en vaksen.  So, ti pran apepre 9an zis pou ganny en vaksen pou Lavaryol.

Nou swete ki zanmen, i pa pran 9an ankor, i pa pran 10an.  Me tre vitman, nou kapab ganny enn pou COVID-19.  Me koman en viris nou konnen i pa fasil zis pou ganny en vaksen.  So, nou bezwen prepare e asire ki zanmen e zanmen nou met nou at risk.

Mr Speaker, koman en pei pandan sa letan ki nou’n pran sa sof mon krwar i sa letan oportin kot Minister Lasante ek Gouvernman i pran pou li re assess sityasyon ;- re gete ki mannyer nou kapab protez nou an ka nou ganny en 2enm wave.

Eski Minister Lasante pou annan ase nou bann swabs pou lagorz, pou nennen? Eski nou bann PCR machine nou annan ase pou nou fer diagnostic testing, pulse oximeter, vantilater pou ede dan okenn sityasyon kot bann pasyan i ganny difikilte respire?

Eski nou annan ase PPEs pou protez nou bann dimoun ki lo frontline? Alors sa peryod letan ki la avan nou sot dan en louvertir nou bezwen byen kalkile e met tou keksoz devan, pou asire ki nou pa ganny tape.

Primondyalman Mr Speaker lemonn antye pe koz lo lenportans teste, pou mwan osi mon senserman krwar ladan.  Mon senserman krwar ki dimoun i bezwen ganny teste ler tou bann ka sispe i ganny teste sa i pou donn nou en Bird-eye view lo sa kondisyon li menm ki mannyer sa viris pe progrese.

Alor teste pou donn en lide pou Minister Lasante e Gouvernman li menm, ki mannyer pou atak okenn sityasyon.

Nou bezwen pran kont ki sa i en zouti primordyal dan sa lalit.  Mwan mon senserman krwar ki tou bann dimoun ki pou antre fodre i ganny teste, me parkont mon demande si Minister Lasante ek Gouvernman li menm in pare pou teste sa kantite dimoun, si nou lafrontyer i ouver.

Mr Speaker kondisyon Sesel i kapab vin grav, si nou pa pran kontrol deswit la.  Alor sa mosyon pe fer sir ki nou tou isi la dan sa pei nou bezwen met li devan nou ki sa pei e nou pep fodre ganny proteze.

Alor Mr Speaker dan mon konklizyon, mon demann Gouvernman pou fer sir ki louvertir nou lafrontyer i devret byen ganny planifye, byen kalkile e en desizyon pridan.

E asire par zis donn en dat san get lanvironnman dan lemonn pa enportan zis pou deside ouver koumsanmenm koman en pei nou devret asire ki nou kapasite materyel e nou resours imen i devret adekwa,

Mr Speaker pou terminen ankor enn fwa mon bezwen felisit mon bann frer ek ser ki lo frontline dan sa lalit kont COVID-19.  Mon pwen final se mon pou siport sa mosyon prezante par Lonorab Ramkalawan e mon demann tou bann koleg Onorab pou fer parey.  Mersi.

 

MR SPEAKER

Mersi Onorab Roucou. Mon ava donn laparol Onorab Ahmed Afif.

 

HON AHMED AFIF

Mersi Mr Speaker.  Bonn apre midi tou bann Manm Onorab e tou dimoun a lekout. Mr Speaker mon konpar sa sityasyon avek ki nou ladan ozordi vizavi COVID-19 parey en père de famille ki’n pran en bato konzele kit son fanmir deryer avek 2 dalon peser, in al dan zanmirant e ler i laba i pe lapes e en sel kou i pas en movetan, laroul i antre dan bato zot degaze zot vin i zot sey tir en pe delo ;- zot annan en pe pwason ek zot.

Zot sey degaz lasasen pa marse zot konnen zot pa pou kapab retourn Mahe toudswit, zot war ban Afriken, zot antre dan sa lapas, zot anvoy en lank e zot tenir lanmenm ;  prezan zot dekouver ki en jelikann in tonm deor.

Napa bokou bennzin zot pa pou kapab sorti dan sa lapas lanmer i reste move e bato Mr Savy pa pou pase, parske li osi pa pou sorti, bato Coast Guard pa pou sorti.

E alors ki i pou fer, i kapab pran en risk sey sorti pas dan menm ben i riske pa ariv ater, lot posibilite se i reste lanmenm lapes, lapes en pti gin i a tenir son lekor, me selman son fanmir Mahe pa pe ganny en larzan e li osi pou soufer.

Alor i en pe sa dilenm ki nou trouv nou ladan koman en pei. Nou’n war COVID dan lemonn, nou’n ganny tape nou’n tenir sa kou, me nou pe kalkile si nou pou re ouver baro pou les dimoun antre. Alor pou mwan parey Onorab Ramkalawan in eksplike, mon osi mon krwar nou merit adopte en latitid ki nou pa fikse dan nou lespri lo en dat  ki nou pe al fer la direkteman.

Me selman nou devret demann nou lekor kestyon lo ki sirkonstans ki pou permet nou kapab dir be la mon krwar nou kapab komans bouze parey avan ?

E pour mwan ler mon get, mon’n ekout Onorab Ramkalawan e mon antyerman dakor avek li, ler nou regard bann risk si nou ouver lafrontyer konpare avek bann risk ki nou ferm lafrontyer, i kler ki to ou tar nou pou bezwen ouver lafrontyer ;- to ou tar nou pou bezwen fer li.

Sa dat pou mwan mon pa krwar nou devret fikse li.   Mwan mon krwar nou devret regarde ki moman letan i pou fer sans pou nou ouver.   Akoz mon dir sa mon dir sa parske ler nou to ferm lafrontyer, ti le 28 Mars 2020, ti annan anviron 500mil dimoun dan lemonn ki ti malad aktivman avek COVID.

Me selman zot ti raport apepre 700mil dimoun ki ti annan sa maladi, en pe ti’n geri malerezman en pe ti’n mor 500mil dimoun, me ozordi nou pe koz 2.2milyon dimoun ki ankor malad.  Ki  kontazye i kapab donn en dimoun en lenfeksyon.  Me sa i reprezant en risk 4 fwa plis ki le 28 Mars ozordi.

Si le 28 Mars lafrontyer i ouver e nou’n ganny nou 11 ka be si nou ouver ler risk i 4 fwa pli o, nou kapab ganny kekfwa 50 ka si keksoz i al vreman mal parey mon pa konnen – si Onorab Ramkalawan in mansyonnen i kapab ariv 500ka. Dr Louange ti mansyonn 500ka.

E alor mon krwar pou nou, nou devret dir be ok annou asize e fer en refleksyon lo ki mannyer nou, nou pa kapab anpes maladi propaze, me ki mannyer nou, nou kapab veye, kan sa risk pou nou i kapab vin pli ba ?

E pour mwan lafason mwan, mon krwar dan term pratik nou kapab redwir sa risk i annan plizyer fason ;- premye fason se ki tou nou bann dimoun frontline ;- savedir mon pe koz depi ler sa touris i ariv Erport sa zofisye imigrasyon ladwann, lasante, lapolis, zot tou zot in ganny training lo ki mannyer ou pou reazir dan en fason kot ou ganny en  2enm laroul COVID ki tap Sesel.

Nou bezwen osi si an ka i ariv en ka nou bezwen ogmant tou bann fasilite tretman, e tou bann fasilite karantenn dan Sesel.  Sa i de fason ki mon krwar toudswit i bezwen kondisyon avan ki nou ouver lafrontyer.

Annou fer sir nou annan bokou plis dimoun ki’n train, bokou plis fasilite an plas.  Mon krwar osi ankor, mwan, mon pa eksper medikal me mon pe zis mazin bann risk ki mannyer nou kapab minimiz li nou ensiste avek tou sa bann airline ki anmenn pasaze Sesel, avan ou board en avyon, fodre ou’n teste  negativ.

Mon konnen i pa en garanti, me fodre ou’n teste negativ e sa bann tes ki zot pe fer i bezwen bann tes an servan bann sistenm ki nou kapab kont lo la.

Sa dimoun in kapab teste negativ i antre dan en letablisman e i devlop sa viris akoz ler i ti ganny teste zot pa ti war ;- ti napa sentonm e alor pa ti detekte.

Be ankor i posib malgre tou son zefor ler in ariv dan son letablisman, sa bann dimoun i devlop sa maladi, be alors nou bezwen fer sir prezan non selman frontline me bann dimoun ki travay dan lotel, chambermaid, dimoun ki travay dan restoran, resepsyon kot lotel tou sa bann dimoun osi in ganny training lo ki mannyer pou lo en baz vizyel ,koman ou gete ou doute sa dimoun i kapab annan me an plis ou annan lenstriman parey en termomet ;- tou sa bann lotel letablisman i bezwen annan sa. E zot bezwen annan en rikord tou le zour lo tou zot kliyan ki zot in vwar, ler nou ti fer en pti tes lo li i ti 37 degre, i ok.

Nou bezwen fer sa kalite e pa mon ki pou dir egzakteman ki pou fer.  Me mon krwar Minister Lasante i devret annan bann tel guideline kot zot pou etabli pou tou bann letablisman kapab konnen, ki mannyer pou dil avek sa bann ka.

Mon krwar osi nou devret ogmant, avan nou ouver nou lafrontyer nou devret annan en sistenm kot regilyerman nou kapab teste tou bann dimoun dan nou popilasyon.  Pou nou konnen si wi ou non zot annan.  Parske nou bezwen annan sa bann sistenm an plas parske zour nou pou ouver lafrontyer sa risk i kapab en nenport landrwa.

E fodre nou annan bann fason teste, fodre nou annan bann rapid test kit e fodre bann rapid test kit i bann ki meyer dan lemonn, ki pou donn pou en rezilta ki vreman bon.

Mon krwar nou devret osi dan sa bann training ki nou pe fer, train tou dimoun dan Sesel.  Me selman sirtou bann ki dan sa bann letablisman, kot zot pe dil ek touris e mon pe koz lo touris parske se zot ki pour mon krwar pli gran risk dan nou popilasyon.

Akoz mon dir sa ?  Akoz dan sa 11 ka ki nou’n gannyen Sesel – 2 – tousala se bann dimoun ki sorti aletranze.  Zot pa ti touris zot tou me zot sorti aletranze.  Preske tou risk in vini sorti aletranze apard enn ki nou krwar i en local transmission.

Alor i paret poudir risk pou sorti deor.  Alor tou bann touris ki antre nou bezwen annan bann sistenm kot tou dimoun ki rankontre en touris, e si i dekouver oubyen i krwar sa dimoun i annan, i bezwen annan en fason vit pou li alert Lotorite.

En hotline kot i pou alert Lotorite.  Me an plis ki sa li in bezwen ganny train si ou kot en lotel pou ou kapab donn en kontrandi vitman lo tou mouvman sa dimoun.

Kote in ale e an plis bann larestan staff i devret kapab ganny train ki mannyer pou dezenfekte sa bann landrwa kot sa dimoun in ale.

I bezwen annan lekipman. I bezwen annan sa bann latizann.  Tou a bann lotel i bezwen annan sa, si nou pe al ouver lafrontyer.  Nou pa pou kapab ouver avan nou fer sa.  Mon krwar nou bezwen annan lo medya byen avan nou ouver lafrontyer en kantite lenformasyon lo COVID.

Mon konnen ozordi ler ou met televizyon kler ou met CNN, BBC, Al Jazeera tousala, zis COVID-19 ki monte.  Be selman petet ki nou devret annan plis ki sa, se ledikasyon lo ki mannyer pou anpes Seselwa ganny COVID-19. Sa bann kondisyon avan ouver lafrontyer.

E mon krwar finalman nou bezwen enn bann kondisyon osi ki li si ou annan otomatikman, mon ti pou dir pou ouver lafrontyer se en vaksen. Me nou tou nou konnen poudir en vaksen i riske  pa zanmen egziste pou COVID-19 pou en bon pe letan.

Mon pa konnen ki sa en bon pe letan eski 12mwan, eski 18mwan?  I tou depan lo devlopman dan sa sekter medikal e bann laboratwar ki pe travay lo la.  Osi mon krwar Mr Speaker, en lot keksoz nou kapab fer se ankouraz e servi tou teknolozi posib ozordi, pou nou kapab fer tou nou dimoun kapab travay apartir dan lakour.

Dizon demen nou ouver lafrontyer prezan nou ganny ankor 50 ka, esperon zanmen i arive, me si i arive i kler nou pou annan en lockdown nou ti annan en lockdown ek 11.

Annou train tou lorganizasyon ;- met an plas la ozordi avan nou ouver sa lafrontyer, en sistenm kot son staff i kapab se li e travay kontinyen fer travay. Pa tou lorganizasyon ki pou kapab fer sa e pa dan tou loperasyon, ki sa pou kapab marse, me i annan en bon pe ki kapab marse apartir dan lakour.  Me sa i osi en keksoz ki mon krwar ki nou kapab met an plas, avan ki nou ouver lafrontyer.

Vwala Mr Speaker mon krwar parey mon’n dir lo konmansman sa risk se nou ki konnen nou pa kapab, nou pa pou kapab kontinyen asize parey mon ti konmanse dir avek sa peser ki’n pri deryer  Bar Afriken, pa pou kapab kontinyen asiz la dir be ma gete ma fer dalon, mon desann ater Mon a  –

Mon pa konnen ki zot pou fer pou zot manze si zot pou touy en torti, si zot pou al ater oubyen zot a lapes la ater zot pa pou ganny bokou.  Me zot pa pou sirviv tro lontan.  Zot pou bezwen desann ater e si zot, zot kapab sirviv zot fanmir pou trouv zot dan difikilte se zot.

Sa bann keksoz koumsa se bann realite ki nou pe fer fas avek ozordi, se en realite ki nou,  nou pou bezwen pran desizyon serye, me nou pou bezwen fer li baze lo en letid ki nou fer – en plan d’action serye kot nou pou train nou dimoun.  E nou pou met fasilite an plas, e kot nou pa kapab, rod en led pou met sa bann fasilite an plas, pou fer sir ki avan nou lafrontyer i ouver, nou konnen nou pou minimiz bann sans pou COVID kapab fannen dan Sesel.  E ki pou afekte nou popilasyon e kapab anmenn bokou ditor pou nou.

Alor vwala Mr Speaker mon ti a kontan dir ki mon pou siport sa Mosyon.  E mon krwar i devret fer bokou dimoun fer refleksyon, enkli nou bann Lotorite, pou ki nou pran en desizyon ki fer sans e ki protez nou popilasyon.  E an menm tan fer devlope nou lekonomi.  Mersi.

 

MR SPEAKER

Mersi Onorab Afif.  Mon ava prezan donn laparol Onorab Waven William.

 

HON WAVEN WILLIAM

Mersi Mr Speaker.  Mr Speaker se atraver Lagras Bondye e son faver lo pei ki selman 11 ka COVID-19 ki nou’n gannyen e se atraver faver Bondye ki sa lekip fanm ek zonm ki’n travay dir pou asire ki propagasyon sa viris i ganny met anba kontrol.  Lo non distrik Grand Anse Mahe e pep Seselwa mon salye zot zefor.  I pa pour zis si mon pa osi remersi pep Seselwa osi ki’n solider patriyotik e ini an sipor bann mezir prekosyon, prevansyon.

An sipor sa Mosyon mon pou dir ki nou pe kontrol lager me batay pa ankor fini Mr Speaker. Sa Mosyon pe demande ki pei i gard son vizilans e i pa pran keksoz a la lezer akoz nou’n ganny zis 11 ka, e nou’n reisi kontrol sa propagasyon.  Nou vilnerabilite i ankor osi o e i pou reste o akoz nou lendistri tourizm.

Mr Speaker par lefe ki nou enter konekte nou pou bezwen pli vizilan Mr Speaker. Mr Speaker parey in ganny di mon pou repete akoz si ou pa tous lo bann sif, bokou dimoun petet pa pe realiz groser sa problenm ki nou pe fer fas avek.

Mr Speaker, lefe ki nou depan bokou lo Lendistri Tourizm, e nou bann marse potansyel se dan L’Europe, me si ou pou get par egzanp Itali ou annan ou 213mil ka ki’n ganny konfirmen e sa i plis ki 2 fwa plis ki popilasyon Sesel ;- ou annan ou 85mil ki’n recover e ou annan ou 29mil ki apepre mon kapab dir  (en kar) en tyer popilasyon Sesel.

Mr Speaker si ou pran bann pei L’Europe se menm realite.  Si ou pran popilasyon Sesel ou et dan sa bann marse potansyel se popilasyon sesel an antye.  E ler ou regard to mortalite i reprezant en kar nou popilasyon. So sa Mosyon mon krwar i annan gran lenportans pou nou konsidere pou nou dyalog lo la e pou nou vwar ki fason nou bouz devan.

Mr Speaker mon osi mon pe egzers mon rol, akoz nou rol koman Manm Parlman se pa anpes Egzekitiv fer son travay. Akoz bokou fwa parfwa letan ou dir serten keksoz ouswa anmenn serten Mosyon i annan ki vwar ki petet ou pe tro enterfer dan rol Egzekitif, me nou, nou pe egzers nou rol.  Akoz rol Lasanble se conduct oversight lo kwa ki Gouvernman i fer pou fer sir ki lentere Nasyonal i pas avan tou.

So Mr Speaker si mon vot atraver sa Mosyon mon ava pe egzers sa rol e manda ki pep Grand Anse Mahe i donn waon akoz mwan osi mon’n konsilte avek bokou dimoun e zot pe eksprim menm konsern.

Mr Speaker par egzanp si ou pe pran bann pei ki nou pe annan bokou lenteraksyon nou pe pran Lenn, Lenn osi menm senaryo pe devlope ;- ou get L’Espagne ou get L’Angleterre, La France, Lanmerik, Sud Afrique osi, zis pou montre pou dir nou annan rezon pou nou konsernen.

E Mr Speaker nou bezwen osi angaz pep Seselwa lo en progranm konpreansiv prevansyon.  E mon kontan poudir bann gid in ganny fer sorti, me mwan mon a  demande ki sa bann gid i ganny aborde toulezour dan lekol dan landrwa travay e partou.  E o kontrer Mr Speaker mon oule remersi ou ki ou’n met detrwa latab, pou asir konfor nou bann Manm dan Lasanble.

E mon demande ki lo nou kote isi petet serten microphone ti ava ganny mete pou fasilit ankor sa social distancing.  Mon oule remersi ou pou sa rol pro aktiv ki ou’n pran.

E Mr Speaker letan mon pe evalye sityasyon osi mon vwar ki Egzekitif se li ki lead the way, me  mwan mon santi poudir petet Lasanble zis anmenn Mosyon, ekout Minis vin fer en statement dan Lasanble, mon santi poudir sa i pa ase.

Mwan, mon krwar poudir i annan 2 swa, akoz bomaten nou’n tande poudir lo en Mosyon poudir Lasanble i bezwen angaz li. Me Lasanble pa kapab zis la i vin koze e piblik osi deor pe  dir be akoz Lasanble pa fer nanryen.

Me mwan mon annan serten propozisyon Mr Speaker ;- swa nou’n deza fer sa oparavan vi ki nou dan en sityasyon  en pandemik e mwan, mon napa lavwa mazorite e mon pe demande pou konsiderasyon ki Lasanble i form en Komite COVID-19 tanporer, pou sirvey lo sa 2 High Level Committee ouswa nou ganny en pozisyon  observationship lo sa bann Komite, koumsa ki nou pa vwar toultan pe anmenn Minis isi, me nou ava annan bann  rapor nou ava garanti bann rapor akoz nou ava annan bann reprezantasyon ki pe obzerve.

Ouswa parey mon dir ki i annan en komite ki pe obzerve koumsa i pa kapab dir be donn sa FPAC pou li fer sa travay. I pou tro bokou pou li akoz li osi i annan bann lezot keksoz pou fer.

E Mr Speaker mon ti a kontan osi petet met serten propozisyon osi devan atraver sa mosyon. Mr Speaker, wi nou’n ganny en lakonpannyen Sesel ozordi ki pe fer bann prodwi dezenfektan.  E nou annan en ta koudriyez, akoz Gouvernman pa regarde fason pou ankouraz zot fer bann mask?

Mon pe demann mon lekor kwa ki konplike pou fer bann mask isi Sesel, mon pa konnen si deza i annan bann koudriyez in konmanse me mon sa en propozisyon, mon pe met devan mon pe dir be akoz Gouvernman …

Bomaten nou’n koz lo ratifikasyon protokol SADC, mon krwar petet dan sa laliny petet nou devret petet vwar akoz ki Sesel nou pa kapab fabrik bann mask ?  Akoz sa i fabrik ek latwal e mon pe met sa devan pou konsidere.

Mr Speaker me mon lanfaz mon ti ava mete mwan, se ki pep Seselwa a tou nivo nou bezwen reste vizilan ;- vizilan raport bann keksoz ki nou trouv abnormal ki kapab pe menas nou lasante Nasyonal.  E mon pou demann bann paran, akoz bann paran i annan en gran rol pou zwe dan lavi bann zanfan.

Nou konnen bann zanfan osi parfwa petet zot fer nenport kwa, me i enportan ki nou kontinyen annan sa solidarite, sa linite pou nou kapab fer fas avek sa pandemik.

E ankor enn fwa Mr Speaker mon pou aport mon sipor pou sa mosyon mon krwar osi i timely e i annan nesesite pou revwar sa timeframe ki’n donnen.

Menm si i annan bann lezot pei aletranze ki pe ler ou regarde annan en pti pe lipokrizi.  Nou santi ki annan serten ki pe koz en pti pe manti vizavi bann sif.

Akoz letan nou al dan forum deor ou trouve i annan bann dimoun ki fabrike bann zistwar zis – akoz lentere Nasyonal ouswa lentere serten Gouvernman.  Avek sa 2 pti mo Mr Speaker mon remersi ou e Onorab Leader Lopozisyon ou pou ganny mon sipor pou sa Mosyon.  Mersi.

 

 

MR SPEAKER

Mersi Onorab Waven William, bon mon anvi enform Manm Lasanble ki mon’n ferm lalis. Mon annan mon ankor 4 Manm lo lalis e depi 2.04, Leader Lopozisyon in komans prezant son Mosyon,  Mosyon in ganny segonde 2.37. Mon pa’n vwar bokou lanmen ki’n fermen e nou pou annan en moman kot mon ti’n set 3er pou mwan ferm lalis mon’n set 3.15 e mon’n ganny mon ankor 4 Manm.

So, ok, la mon ganny Onorab Ferrari mon ava allow sa enn koman dernyen.  Leaders i annan son priyorite si i oule koze – ok ?  So pou le moman lo mon lalis mon annan Onorab Sebastien Pillay, Onorab Johan Loze, Onorab Simon Gill, Onorab Sandy Arissol e Onorab Jean-Francois Ferrari. Mon ava donn laparol Onorab Johan Loze.

 

HON JOHAN LOZE

Mersi byen Mr Speaker, bonzour tou koleg Onorab bonzour tou dimoun a lekout kot lakour. Mr Speaker sa pandemi ki nou pe viv sa pandemi global in aport avek li en polarizasyon lemonn.

Lemonn pe desir an 2 diferan lopinyon diferan pozisyon, diferan fason vwar, diferan fason fer.  E bann diferans i vreman polarize tre lwen ek kanmarad letan ou pe get otour lemonn i annan dimoun ki napa negosyasyon dan bann pozisyon ki zot pran.

Isi Sesel ozordi nou ganny sans fer premye konversasyon lo sa size.  Nou pe antann nou premye diskisyon.  E wi pou annan diferans be sa ki nou swete koman en nasyon se ki nou diferans i pa bann ki polarize ki napa en pozisyon milye e ki nou pe further polariz nou pep par bann pozisyon ki petet nou menm nou pran.

Letan nou pe komans lo sa deba, ozordi mon mazin en lartik ki mon’n lir resaman Le 20Avril mon krwar Chancellor Allemande Angela Merkel ti adres son parti CDU e i ti dekrir bann konversasyon ki pe pase l’Allemagne bann konversasyon politik sirtou otour size lockdown e louvertir l’Allemagne.

E mo ki li i ti servi sete i ti dir l’Allemagne i annan bann ‘’discussion orgies’’ sirtou parmi politisyen.  I ti pe eksprim son fristrasyon i ti’n vreman ganny ase avek sa ta koze ki ti pe ganny koze otour sa ki li i ti vwar, koman en size ki devret ganny gide par lasyans e lekspertiz.  E Mrs Merkel li menm i en syantis e son fason vwar keksoz  se ki politisyen i devret ganny gide par sa ki eksper dan la matyer pe dir.

E se pa politisyen ki vini ki dir sa, sa  enn ouswa sa lot lo sa size. E sa letan mon mon’n swiv son pozisyon mon’n vwar ki sa madanm petet dan lafason i en syantis i en politisyen, e lafason ki li i pe gete i ;– enn – ki fer bokou sans.

Now i annan en prensip mondyal ki politik i devret reste an deor Public Health.  Partou dan lemonn kot ou pou ale i koumsa.  Ofet   Sesel letan ti annan Reform mon krwar an 2012, 5enm Lasanble letan ti annan reform dan Gouvernans Sistenm ler avek kreasyon Lotorite Swen Lasante avek Public Health, koman 2 antite ki ava ganny gouvernen par eksper e profesyonnel dan Lasante. E  non pa by political minders ouswa par bann diferan akter dan la politik.

Minis, PS e an se moman Sekreter D’Eta zot, zot run zot sekretarya, ki li i responsab pou Polisi me non pa loperasyon lasante.  Lalwa pa donn zot sa pouvwar.

Lalwa i donn pouvwar Dr Louange avek Dr Gedeon pou fer en loperasyon lasante e gouvernans Swen Lasante Piblik Sesel, so deza par lafason ki nou’n kadre Lezislasyon i deza pe gid nou ki politisyen, i napa en plas dan Public Health li.  I pa son pozisyon.  Public Health i the express domain of bann eksper ki zot, zot ganny gide par zot leksperyans e zot formasyon e laplikasyon lasyans, dan lekel zot in ganny formen.

So deza sa i la etabli dan nou pei. E  dan ka en kriz lasante piblik parey i leka an se moman, Lalwa i further donn pouvwar Komisyoner Lasante Piblik.

Se li ki akter prensipal se li ki gouvern e diriz la sityasyon.  E an se moman swivan deklarasyon Prezidan, kontrol lo lafrontyer pei i retonm lo Komisyoner Lasante Piblik. Pa lo okenn politisyen. Me dan lanmen Dokter Gedeon. Koman sa eksper dan la matyer ki li in ganny sarze pou anmenn sa sitasyon ziska en konklizyon.

Bon an dizan sa mon bezwen dir ki mon’n apresye lafason ki Onorab loter Mosyon in prezant son Mosyon. Mon’n apresye bann pwen ki in fer sorti. In eksplik keksoz ki petet nou pa ti’n konpran ki li i ti pe sey dir, sa morso konsernan teknolozi, bann apps e tou.  Mon krwar ki Dr Gedeon i pe komans eks plot serten keksoz dan sa direksyon.

I annan kestyon bann test kit ki’n leve.  Mon sey swiv en pe son bann deklarasyon ase pre, mon krwar in, mon’n deza tann li resaman konmkwa i annan 25mil tes konfirmativ. Sa pa rapid test kit or anything bann ki servi pou konfirmen. Sa son tes pli enportan ki baz son desizyon lo la. Mon krwar in dir 25mil.

E mwan personnelman sa ki mon anvi fer ozordi se eksprim konfidans e konfyans dan gouvernans Dr Gedeon, dan gouvernans Dr Louange e tou zot lekip otour zot.  Depi sa dimoun ki’n volonter pou al koman en driver laba, pa zis ners ek Dokter.  Depi sa voluntary driver, sa dimoun ki pe volonter pou reponn telefonn. Pa zis lapresyasyon me konfidans dan zot kapasite e abilite pou zer sa sityasyon korekteman.

Si i annan en keksoz mon krwar nou kapab fer ozordi. I keksoz pli enportan ki nou kapab fer ozordi se zisteman sa. Convey avek nou pep nou koman Leaders nou konfyans dan sa lekip ki son lanmen i lo labar, i lo pon sa problenm. E sa pou mwan i tre, tre enportan.

Mr Speaker i annan bokou keksoz ki ganny dir de fwa dan politik. Selman mon pa santi i normal pou nou equate travay dir, travay sanses, ki’n raport sikse dan sa konba ziska prezan, avek en pti kannot dan lapas kek par. Sa mon santi petet enn bann keksoz ki pa ti’n devret ganny dir e i bes en pe lenportans diskisyon ki nou pe fer ozordi.

E se sa ki mon’n dir nou pou annan diferans. Nou pou annan bann dezagreman ant nou lo bann size e bann keksoz ki pe ganny diskite. Be a la menm enstan nou pou osi egalman annan lagreman lo serten keksoz. Akoz apre tou i nou pei nou tou nou bezwen sers fason pou li bouz devan.

Be nou bezwen osi les nou pep konpran si nou kot nou ete ozordi i pa en aksidan. I pa en azar, i pa’n ariv par pran en pti kannot antre dan lapas kekpar e deside si pou manz torti ou non. In ariv par konnesans, lekspertiz, bon zesyon e travay dir,  24 lo 24 sa bann dimoun ki ti an kontrol sa sityasyon.

Nou keksoz pli dir ki nou ti ganny demande pou fer sete pou reste se nou, pas letan avek nou fanmir, okip nou zanfan, zwe en pe dan nou bann plant e aras zerb kot nou. Sa keksoz pli dir ki nou ti ganny demande pou fer pandan letan ki lezot ti bezwen desann vin travay, mank sonmey e asim la responsabilite pou sa sityasyon ki nou pei ti trouv li ladan.

E responsabilite in ganny asimen e in ganny tre byen asimen menm. La mon pou servi en mo ki Onorab Pillay i kontan servi, mon pou fer en segway la dan mon diskisyon.

Mr Speaker Prezidan Faure depi in pran pouvwar in ensiste lo en keksoz, kree bann lenstitisyon for, met bann eksper dan la matyer a latet sa bann lenstitisyon, donn zot tou sipor ki zot bezwen e donn zot, zot lendepandans. Les zot travay, les zot fonksyonnen.

E sa en kantite sa bann dimoun a latet bann lenstitisyon i kapab temwanny e pou zot menm.  Ki sa zonm ki nou Prezidan ozordi se sa son stil travay. Okenn ensinyasyon ki bann eksper, bann Sef bann lenstitisyon i sibir presyon, zot pa devret ekout presyon, non.

Anfet i lekontrer. Se sa bann eksper ki dir avek Prezidan be la in ler pou fer sa. E ziska prezan nou pe inyor tou sa ki sa bann eksper pe dir.

Sa bann eksper pe kontinyelman dir nou poudir an Zen la pou napa touris la. Pou napa touris ki pou vini nou pa pe ouver lafrontyer pou touris vini. Be nou inyor zot nou.  Pourtan  zot ki eksper dan la matyer, e nou, nou vini nou asize nou dir la kapab touris vini la pa bezwen touris vini, nou bezwen train tou travayer  lotel pou touris vini. Nou bezwen train Sesel antye.  93mil dimoun pou touris vini la avan le 01 Zen. E pa donn en dat ditou.

Be, pourtan sa bann eksper pe dir nou ki napa kestyon touris la. La le 01 Zen napa touris la, napa okenn konsiderasyon tourizm la, la dan limedya le 01 Zen la. E zot pe repet sa over and over.

E nou isi anndan nou bann dimoun tre entelizan nou. Nou tande ki zot dir, nou process sa ki zot dir e nou vini nou régurgite  en fake news pou dimoun kot lakour ekout nou. Letan nou’n dizer parol tre kler ki sa bann Dokter in dir nou repet en lot zafer nou. Pourtan i kler, napa kestyon tourizm la le 01 Zen la. Be nou, nou anmenn li dan en lot direksyon.

I annan en kantite konversyon pou nou fer, e nou pou bezwen fer li ansanm otour sa sityasyon COVID-19 la.  I annan en kantite keksoz pou nou diskite. I annan en kantite refleksyon parey Onorab Ramkalawan in dir ki nou pou bezwen fer.

Yer ofet dan Bills Committee letan nou ti pe diskite, Onorab John Hoareau in lev en pwen lo kestyon sispansyon. E i ti demande si sa Lalwa i pou aplik zis Sesel ouswa i annan reperkisyon enternasyonal dan lezot ze ziridiksyon. Onorab Georges parey labitid in graciously eksplik Bills Committee antye. In eklersi nou lo pwen ki Onorab Hoareau ti leve.

Be letan sa ti pe ganny diskite, mon’n fer serten refleksyon mon osi apre letan nou’n antre apre midi ti pe diskit lo pwason.  Be i fer mon realize be Sesel nou annan serten limitasyon lo nou.

Nou annan sa limitasyon yellow fin tuna ki’n ganny enpoze lo nou pei, e Mr Speaker avek ou permisyon mon le servi sa moman dan sa Mosyon ki nou pe diskit COVID pou mwan sey lans en lapel avek Gouvernman ek Foreign Affairs ouswa Minister Lapes be fodre re gete sa zafer la.

Nou pei dan sa sityasyon irzans ki i ladan nou pa pou kapab bit lo en pwen kot 4 mwan avan lafen lannen ouswa 5 mwan avan lafen lannen, nou vwar bann tonnye in anmare dan larad pa pe kapab al lapes. E bann doker pe bezwen al tap laport ASP.  On top of everyone else ki pou al tap laport ASP kan nou kapab sey adres sa zafer limitasyon ki annan lo nou pei lo kestyon lapes ton. E sa mon krwar i en keksoz irzan.

Rezon mon lev sa se Minister Finans pe kontinyelman dir nou, nou pou annan nou 14 poursan defisit bidzeter. Defisit i det li, nou, nou toultan koz lo repartisyon larises be det osi pou bezwen ganny reparti. At some point pou annan en reckoning nou pou bezwen annan en repartisyon sa det, sa 14poursan defisit la.

E si nou annan nou 14poursan defisit nou pa pou kapab annan nou en resours ki pandan 4 mwan nou pa e kapab touse. E sa osi i enportan nou adrese.  E mon pa pou esper en lot moman pou mon lev li, kan nou kapab lev li la koman enn bann form refleksyon ki nou annan pou fer otour sa bann size COVID-19.

Mr Speaker mwan personnelman si sa worst case scenario ki mon bann koleg in penn la ozordi kot le 01 Zen nou ti pe al ouver nou laport pou en lavalas touris antre, en lavalas etranz antre e fer je ne sais pas quoi dan nou pei.  Mwan osi mon ti pou partaz menm krentif ki zot.  Mwan osi mon ti pou annan bann menm lafreyer ki zot e mon ti pou pran menm pozisyon ki zot. Be sa i pa leka, i klerman pa leka.

Lafrontyer nou pei pou dan lanmen Dr Jude Gedeon ki ziska prezan i pa’n donn nou okenn e okenn dout lo son kapasite pou mannye sa sityasyon. I pa’n fer okenn fo pa. I pa’n donn nou okenn dout ki i kapab tenir labar sa kriz dan son lanmen.

Bon mwan, mon annan en lapel, se ki nou ti bat lanmen pou li ek son lekip letan i ti vin dan Lasanble. Mon lapel se ki nou pa bat lanmen dan vid. Put your money where your clap is! Nou’n bat lanmen prezan nou fer li konfyans pou lavaler sa gro lanmen ki nou ti bate pou li. Nou fer li konfyans koman sa eksper, koman sa syantis formen dan sa field, ki nou okenn nou la anndan nou pa ete. Mwan, mon lapel se ki nou translate sa lanmen bate ki nou ti bate dan en vre, en vre santiman konfyans. Trust dan li son kapasite e son lekspertiz.

Parske a lafen dizour mon konnen i annan serten ki pou tante petet pou fer sa about lanons Prezidan Faure. Be at the end of the day i pa about Prezidan Faure sa !  Pa Prezidan Faure ki pe dir ki pou fer dan sa kriz se Dr Jude Gedeon. So koman en form remersiman pou tou sa ki in fer pou nou pei ziska aprezan mon krwar nou fer li konfyans. Mersi Mr Speaker.

 

MR SPEAKER

Mersi Onorab Loze. Mon ava donn laparol Onorab Sandy Arissol.

 

HON SANDY ARISSOL

Mersi Mr Speaker. Bonn apre midi tou manm e tou dimoun ki pe a lekout. Mr Speaker topik ki nou pe adrese mosyon anmennen par Leader Lopozisyon in en topik ki’n sirkile parmi lapopilasyon pou en pe letan. E in en topik enteresan parske sakenn dimoun in annan son lopinyon personnel e lopinyon diferan an relasyon avek louvertir lafrontyer.

E mwan, mon ti a kontan letan mon pe koz lo sa topik ki annan pou fer avek COVID, mon ti a kontan premyerman profite pou mwan remersye tou bann zanfan. Tou bann zanfan Sesel, parske se atraver COVID ki mon’n realize poudir bann zanfan zot in konport zot pli byen ki nou koman bann adilt. Parske letan mon’n ekout Mr Songor lo televizyon, lakantite case ki’n annan an relasyon ek bann adilt ki’n kas bann Lalwa an relasyon ek COVID i enpresyonn mwan. Parske letan mon’n dan ledikasyon pou en bon pe lannen e ozordi letan nou pe koze plizyer dimoun, adilt i blanm zanfan an relasyon avek konportman dan lekol. Me granmoun i dir ek ou pye ponm i raport ponm, pye zoranz i raport zoranz1

So si ozordi nou pe ganny sa bann konportman dan lekol atraver nou bann zanfan, larepons i senp zis get rezilta ki Mr Songor in donn nou pandan letan COVID. Kot bann adilt pann kapab konport zot lekor ! Prezan ki nou espekte avek nou bann inosan dan lekol. Nou inosan i sorti dan en pye zoranz alor i pou konport li parey en zoranz si i en zoranz !

Mr Speaker mon komans koumsa parske sa Mosyon ki annan pou fer avek sityasyon COVID-19 dan nou pei an relasyon avek ouver la frontyer, in fer mwan reflesir lo plizyer keksoz. Ou konnen voyaz, nou tou nou kontan voyaze. Tou dimoun pe espere pou lafrontyer ouver. Parey Onorab Afif in dir frontyer pou bezwen ouver li, to ou tar i pou bezwen ouver. Koman en pti pei parey Sesel nou depan lo la pou nou viv ekonomikman. E nou annan plizyer nou bann Seselwa ki’n leve in debourye e son biznes ozordi i depan lo li voyaze, al aste, anmennen pou revann pou li kapab viv pou li sonny son fanmir. Nou rekonnet sa. Alor frontyer pou bezwen re ouver.

Me par kont kestyon ki devan nou se, eski le 01 Zen i pou ideal pou li ouver? Ouver pou mwan koman en Seselwa al Thailand al rod mon prodwir retournen. Eski i ideal pou sa touris sorti Langleter vin sesel? Tousala, se sa topik ozordi ki nou pe diskite. I pa neseserman zis pou sa touris antre Sesel, me osi pou sa Seselwa.

E mwan, mon enkyet letan i koz lafrontyer reouver ankor dan detrwa semenn ki le 01 Zen, lafet zanfan. Parske ozordi nou pe komans ganny nou bann sityasyon sekre.

Letan mon ti  clap – bat lanmen parey in ganny dir pou Dokter Gedeon isi dan Lasanble, pou travay ki i pe fer. Parske dimoun in konport li, nou Seselwa nou’n konport nou dan e fason responsab parski ti napa naryen ki ti ganny kasyet avek nou. Ti napa naryen !

Tou keksoz ti ganny dir lo medya, 2,3 trwa interview par semenn.  Mr Faure i monte i koz ek nou, Dr i koz ek nou. Be ozordi mwan, mon per koman en endividi parske nou komans annan bann sityasyon sekre. Nou pa kapab dir sa akoz sa i sekre ! I bann laranzman ki’n ganny fer ant sa pei ek sa pei ! Gouvernman ek sa Gouvernman !

La si i pou koumsa la mon santi pou dir i pou annan en zafer ki pou pase lo nou Erport swa lo nou por, se mon zanfan, nou zanfan ki pou re antre ankor dan sa kazo kot i ti ete plis ki 2 mwan. Se sa ki fer mwan enkyet Mr Speaker ! Annou pa bliye nou ti ganny dir pou dir COVID ti zis en pti  (uhuhuh) En pti latou ! E apre nou’n realize pou dir in vin en keksoz serye dan nou pei e nou bezwen vey sa 2enm wave ki nou pe koz lo la.

Mr Speaker letan nou’n dan lakour an relasyon avek COVID, i annan en keksoz ki plizyer dimoun in fer refleksyon lo la. I annan klinik, letan ti napa COVID tou le Lendi bomaten klinik ti plen. Dimoun ti al rod en konze, son latet ti fermal, son vant ti fermal. Pandan letan COVID, personn pa’n ganny sa bann sentonm ! Bann ki ti bezwen al klinik ti bezwen al fer son tes tansyon, son dyabet oubyen al pran son medikaman. COVID in fer nou realiz sa.

Dezyenmman Mr Speaker COVID in fer nou realize kapasite nou paran dan lakour. Letan ansenyan toulezour kot lekol i kriy nou zanfan, nou zanfan e plizyer paran in mete lo rezo sosyal i pe priye keler sa curfew, oubyen sa lockdown ki mannyer i apele ‘’i large weh !’’, Akoz ?  Son piti i tro bokou pou li dan lakour !

Prezan nou demann nou lekor atraver sa mosyon ki pe koz lo sityasyon COVID, be sa ansenyan ki pas en peryod, en zournen, en semenn, en mwan, en term, en lannen avek 30 kalite zanfan dan en sel laklas, li alor ki i dir ?

Alor mwan mon pwen lo la se letan nou ansenyan pe demann en koudmen laba deor bann paran, silvouple anvoy nou lanmen pou nou soulaz sa ansenyan. Akoz sa menm soufrans ki ou ou’n santi avek ou prop zanfan dan ou lakour, li i fer fas avek sa preski tou le zour son lavi pandan en lannen antye. E sa avek plizyer lezot zanfan ki li i pa pou li.

E parkont i annan menm keksoz ki zot in mete lo rezo sosyal ozordi zonm nou ki vin zannimo e zannimo in vin adilt. Sa i senp Mr Speaker atraver COVID, parske zannimo nou met li dan en kazo nou ferm li, met en lasenn dan son likou e la nou nou’n vin zannimo parske nou ti bezwen anndan me zot, zot ti lib parske zot, zot ti pli lib ki nou dan en sans.

COVID in ed nou dan tou fason pou revwar, asize, analize, rode kwa ki nou kapab amelyore.

Alor mwan, mon pwen Mr Speaker letan mon’n get sityasyon dan nou pei avan nou komans al lo zafer ouver frontyer, i annan en kantite dimoun ki’n travay pou ede dan nou pei atraver COVID.

Letan nou felisit Minister Lasante, mon touzour mazin sa fiy ki nou war li dan back ground dan screen letan Dr Gedeon oubyen Dr Louange pe eksplike, li i pe don nou bann sign language pou bann lezot group dimoun avek en abilite spesyal kapab konpran kwa ki pe ganny dir lo medya.  E sa se atraver Madanm Anita Gardner.  Zot osi nou bezwen dir zot mersi. Parske dan tou bann lezot levennman avan zanmen nou’n annan en posibilite pou ganny sans vwar sa zenn madanm sa zenn fiy pe ed bann lezot dimoun avek abilite spesyal pou konpran sityasyon aktyel dan nou pei.

Ozordi nou ti ganny dir pou dir dan letan COVID bann ladministrasyon distrik pou reste ouver 7 lo 7. E in arive e sa in fer ki zot e ansanm antre nou bann MNA ki’n annan kontak avek zot bann DA, pou vwar ki mannyer ansanm keksoz i kapab amelyore.  Pou ki keksoz i bouze e nou’n retourn dan en fason pa tro normal ozordi kot nou kapab dir en keksoz.

Mr Speaker bann travayer PUC sak fwa apre 6.30 nou’n sitan vin en labitid ozordi letan 6.30 ou pa vwar personn lo semen, akoz nou’n sitan abitye ek sa. Laboutik magazen i fermen alor nou dimoun i antre. So nenport keler ou tann en transpor ou tyeke si pa Lapolis, i bezwen bann travayer PUC.

E bann travayer PUC in lo semen, zot in fer sir ki nou, nou ganny delo prop pou bwar e zot in fer sir ki elektrisite i kontinyen antre dan bann lakour. So mon krwar sityasyon COVID dan nou pei in ed nou pou nou reflesir.

Me letan in ed nou pou reflesir se la kot mosyon pe fer, pe dir en keksoz pou ki Gouvernman i revwar sa zafer lafrontyer zis ouver soudennman. Pou ki nou pa trouv nou dan en lot sityasyon ki pou fer ki nou lavi pa pou sa normal ki nou, nou abitye viv li nou normal Mr Speaker.

Mwan, mon ti a kontan mazin lo serten keksoz an relasyon avek bann desizyon ki’n ganny pran. Letan pe dir pou reouver lafrontyer, kestyon ki mon demann mon lekor, eski i vreman desizyon ki Dokter Jude Gedeon i anvi partaz avek nou?

Eski sa i bann desizyon ki zot Dokter Jude Gedeon avek son lekip zot in tonm dakor lo la? Sa i bann kestyon ki mwan, mon demann mon lekor. Oubyen senpleman li i pe enplimant serten desizyon ki par lao li, me li i bezwen vin devan e dir. Sa osi mon demann mon lekor serten kestyon an relasyon avek sa. Pou nou balanse, pou nou analize.

Letan nou re ouver lafrontyer, eski ozordi nou annan ase lekipman parey Onorab Roucou in dir, pou ki letan lafrontyer i ouver? Pa neseserman zis pou sa touris me pou sa Seselwa ki anvi al aste son keksoz pou li revann.

E la letan nou pe mon pe ganny mesaz ki bann landrwa kot ou kapab fer rezervasyon, ou kapab aste tiket, pa krwar pou dir napa Seselwa ki pa’n al komans fer son booking touzour. Parski i anvi ale li, i anvi al en kou Thailand li, i anvi al en kou Langleter li. I annan Seselwa pe fer son debrouy la deor.

Pou ki koman laklos i sonnen le 01 Zen li i fer sir i lo premye flight parske i pou bezwen fer sir i pou anvoy en portre lo Facebook pou poste koman sa premye Seselwa ki’n ganny sa sans pou sorti dan pei. Sa osi nou bezwen pran kont.

E tousala i bann keksoz ki nou bezwen mazin li lo pli gran lanpler. Me par kont Mr Speaker mwan, mon krwar letan nou pe fer tou sa bann refleksyon. Letan nou pe mazin lafrontyer mon krwar nou koman en pti pei, i annan bann housekeeping anndan menm antre nou koman en pep, koman en Gouvernman, koman en Lasanble nou kapab sey rode ansanm kwa ki nou kapab fer pou amelyor nou sityasyon avan nou ouver laport pou lezot sityasyon antre.

Par egzanp letan nou pe koze ozordi i annan sa zafer saler la, an relasyon avek sityasyon COVID. Nou annan plizyer dimoun e la bomaten dimoun pe konplent lo rezo sosyal nou, nou pe koz lo SADC PF, nou pe koz lo PAP li i pa ankor ganny peye. Nou annan en sityasyon dan nou, a la medya Mr Speaker.

Letan nou pe koz COVID nou pe koz re ouver lafrontyer, nou annan en kantite Seselwa la deor mon bann zanmi ki pa ankor ganny en saler. I annan son bill pou li peye, i annan son zanfan ki i pe mazin anvoy lekol i pa ankor ganny naryen. Me malerezman nou’n ganny dir poudir plitar le 13 tou keksoz i ava organize. Me nou tou nou konnen ki letan in ariv lafen di mwan tou dimoun i kontan ganny son pti larzan dan son lanmen.

Mon dir sa parske mon rapel letan sekirite sosyal ti pou kriye le 15 Avril, Mr Simeon ti mont lo medya ti dir, i ti demann tou bann dimoun aze, pa bezwen desann zot tou demen bomaten, annou fer li en lot zour. Be son lannmen bomaten apre SBC ti montre nou Labank Savings 3 laliny. Ti plen !  Parske tou dimoun i kontan annan son pti larzan. Mwan, mon krwar nou bezwen rezourd sa problenm larzan.

Nou annan bann part time teachers ki lo payroll, ki lo Kontra avek Minister Ledikasyon. Tou lezot dimoun in ganny peye e zot, zot pa ankor ganny peye me, zot pe ganny ankouraze pou retourn travay.

Alor tousala i met nou dan dout avan ki nou komans mazin ouver lafrontyer. Annou gete anndan menm kwa ki ou kapab fer. Nou annan nou bann pti biznes Mr Speaker sa ki nou dir leve debourye. Kot ou annan bann anployer ki li i annan en pti biznes li, e la in komans re ouver Lendi li, me son travayer i refize vin travay parske i dir ek ou i pa ankor ganny peye oubyen i bezwen vey son zanfan. Nou annan tousala Mr Speaker ki nou bezwen vwar.

Letan nou lo sa topik mon ti a kontan osi bann laplikasyon ki bann pti biznes in fer pou zot ganny lasistans. I annan plen pti biznes ki’n fer laplikasyon mon bann zanmi, ziska prezan i pa ankor ganny en larepons pou dir li wi ou kalifye oubyen non ou pa kalifye, pou li kapab fer en lot debrouy.

Konmsi letan nou pe dir re ouver lafrontyer mon, mon krwar sa nou bezwen tyeke sa bann zafer. Annou balanse ki nou Seselwa i happy, epi then nou ava mazin etranze antre dan nou pei.

Trwazyenmman Mr Speaker lizyenn. Mon kontan letan lo medya mon vwar SPTC pe ganny flite, pe ganny netwaye. Anse Aux Pins laba zot in fer en zefor. Lekol Independence School. Be bann Lekol Leta kot mwan, mon zanfan i lekol, ki Minister Ledikasyon pe fer? Ki Gouvernman pe fer pou ki lizyenn parey nou tou nou’n veye, lav lanmen, fer sir i annan hand sanitizer.

Mr Speaker kot bann lekol Gouvernman nou napa savon nou, napa savon. Eski napa toilet paper pou nou zanfan servi se paran ki donnen. So mon anvi ki Gouvernman ansanm nou tou nou sey rode ki mannyer nou ouver anndan avan then nou ava al get deor. Pou nou fer sir ki nou lakaz i annord.

Nou bann zanfan pe al lekol en pe le 11, en pe le 18, eski nou’n annord? Eski nou pare? Lekol in pare? Yer swar monn tann IECD pe fer meeting avek bann child minders e pe advice zot ki mannyer pou get bann zanfan. Eski tousala? Mwan, mon santi pou dir anndan Mr Speaker nou bezwen fer sir ki tousala i annord.

Bann landrwa piblik, Par egzanp lo bann bus stop, lo bus stenn nou’n trouve. Eski sa i pou fer zis pandan letan COVID? Eski i pou kontinyen? Konmsi i enportan pou nou organiz tousala met tou annord.

Mon lot pwen Mr speaker mon ti a kontan dir se an relasyon avek Imigrasyon. Letan nou pe koz COVID dan pei ozordi aktyelman napa personn ki kit pei, napa personn ki antre letan nou pe koze. Apard letan lafrontyer i ava ouver parey Mosyon pe dir sa i ava le 01 Zen.  Mr Speaker nou annan en kantite etranze dan nou pei nou, kantite etranze.

Mwan, mon krwar la a sa pwen Imigrasyon, Departman Imigrasyon, Customs, Lapolis, Sanniter, se la ki zot ti kapab fer en travay kolaborasyon pou zot pas en kou lo bann laferm. Get en kou dan bann magazen. Lo bann sit konstriksyon ki nou annan, pou fer sir ki bann dimoun, bann etranze ki dan nou pei zot legal.

Annou pa bliye pou dir Vis-Prezidan ti vin dan nou Lasanble ti dir nou, nou annan anviron 500 ekek dimoun ilegal dan nou pei. La ti moman letan pou nou netway en kou. Annou pase, annou balanse, annou gete. Letan nou ava pe fer sa, sa i a fer pou ki nou lezot keksoz anndan i annord. Parey Imigrasyon.  Nou napa bann dimoun ilegal dan nou pei.

E sa i ava fer ki mon ava al lo mon senkyenm pwen an relasyon avek lanplwa.

Sa i ava donn nou loportinite la dan sa moman letan, letan nou frontyer i fermen pou nou revwar en kou bann lanplwa ki nou annan. Annou ankouraz maximum Seselwa pou li pran en lanplwa dan nou pei. Pou nou revwar bann etranze ki la pti a pti. Par egzanp IOT kot nou kapab gradyelman dir avek IOT nou annan en bon pe zenn, nou annan bann Seselwa ki lo URS nou pou bezwen gradyelman tir en pe bann etranze ki pe travay ek ou pou nou ranplas zot par bann Seselwa.

Ou mwen sa i bann keksoz kad kler ki nou ava’n gannyen, nou ava’n met ansanm ater koman en nasyon. Gouvernman, Lasanble, bann biznes pou nou vwar ki mannyer ansanm nou kapab ed nou pei bouz pli devan apre sa kriz ekonomik ki nou’n fer fas avek Mr Speaker. Mwan, mon krwar i ava enportan pou nou ansanm fer en travay kolektiv. Annou rod nide, annou pa sakenn fer pou li enkrwayan sa i en zafer Egzekitiv, lot i pou Lasanble. Mwan, mon krwar nou bezwen annan en keksoz kolektiv pou fer ki nou pei i kapab bouz de lavan.

Mon dernyen pwen lo la Mr Speaker i pou bezwen an relasyon avek manze dan nou pei. Alimantasyon, mon krwar tou dimoun in koz zil me mon pa tann gran keksoz an relasyon avek zil. Tanzantan nou pens en pti kou zil sakenn nou dir. Be letan mon tann IDC pe selebre 40an legzistans.

Eski pa dan letan COVID ozordi mon ti a konpran pou dir nou legim, nou fri pe sorti lo bann zil. IDC pe supply Mahe parske nou 115 zil sa kantite ki nou annan ansanm, me i annan de trwa, kat, senk zil ki’n nobou anvoy lavyann pou nou Mae. Ki’n nobou anvoy fri, ki’n nobou anvoy legim.

Me pa sa ki nou’n vwar Mr Speaker. Nou’n vwar nou bann Seselwa pe met laliny pe al kot Global Supply, pe al lot kote kot SIBA pou zot kapab al aste bann legim ki zot fer vini.

Konmsi dan sa moman COVID mwan, mon krwar in donn nou tou loportinite Seselwa pou nou balans tousala. Revwar, gete ki mannyer nou kapab met nou pei annord lokalman, pou ki nou larzan i kapab reste.  E osi nou kapab annan serten keksoz dan nou pei ki nou kapab eksporte pou ki Dolar i antre dan nou pei.

La avek lakantite travayer etranze ki nou annan, avek rezerv ki nou annan, mwan, mon en pe trakase. Parske otomatikman la kantite etranze ki nou annan dan nou pei ou bezwen pey li.  E tou le bomaten ler nou pase nou tou nou vwar bann Bureau de Change laliny i plen. Parske nou bezwen pey zot bann etranze ki’n travay dan nou pei parey nou pey nou travayer Seselwa. Be nou Dolar i ale me nou napa nouvo Dolar ki pe antre pou ki nou rezerv i kontinyen monte.

Alor tousala Mr Speaker mwan, mon krwar pou dir mosyon anmennen par Leader Lopozisyon ki lir, Lasanble Nasyonal i demande ki Gouvernman i gard nou frontyer fermen pou viziter, ziska ki sityasyon COVID-19 dan lemonn i amelyore, e ki i annan en sistenm deteksyon efektiv pou sa viris ki an plas oubyen en bon progranm proteksyon pou nou popilasyon ki’n fini ganny aplike.

E mwan Mr Speaker mwan, mon krwar sa i en bon mosyon. Mon krwar ki pou lemoman parey sityasyon pe dir ek nou la, annou get anndan kot nou reste, annou fer sir ki nou menm nou’n nou annord.

Then nou a kapab ouver nou frontyer, re ouver nou frontyer pli tar. Me la pou le moman nou kit li fermen pou fer sir ki lokal antre nou tou keksoz pe al byen e nou tou nou pe mars lo bon semen. Avek sa de trwa parol Mr Speaker mon ti a kontan re asir mon sipor pou sa Mosyon. Mersi bokou.

 

MR SPEAKER

Mersi Onorab Sandy Arissol. Bon nou pou pran en break 15 minit, kont li 20 minit nou ava retournen 4.15 pou kontinyasyon deba lo Mosyon.  Ok nou retournen 16.15.

 

     (BREAK)

 

 

 

MR SPEAKER

Bon nou kontinyen nou travay.  E nou kontinyen ek sa deba lo Mosyon ki’n ganny move par Onorab Ramkalawan.  E mon ava donn laparol Onorab Sebastien Pillay.

 

HON SEBASTIEN PILLAY

Mersi Mr Speaker.  Bon apre midi tou koleg Bonn apre midi tou koleg Onorab e bonn apre midi tou dimoun ki pe ekout nou isi oubyen ayer.

Mr Speaker devan nou, nou annan en Mosyon kit re enteresan esisit en deba vreman serye.  Akoz nou pe diskit en size ki laktyalite ozordi.

En size ki menas si ou oule legzistans oubyen lafason ki lemonn pou kontinyen vire going forward pandan sa bann lannen si ou oule ki vini.

Rezon mon dir sa Mr Speaker, set akoz nou tou nou’n vwar atraver bann aktyalite lo medya lokal e enternasyonal ki lenpak sa viris, sa pandemic COVID-19 in annan.

E ki bann fason fer ki in anmennen, ki in fer ki ozordi dimoun in entrodwir dan zot vokabiler en mo oubyen de mo ki apel nouvo normal.

Ler mon dir sa Mr Speaker mon prezan regard sa Mosyon ki devan nou.  E i annan serten kestyon ki mon poze vizavi sa Mosyon.

Akoz i vreman enportan pou nou sitye nou kot nou ete, nou rol koman Lezislater e nou rol osi koman sitwayen.

An premye lye Mr Speaker ler mon regard wording sa Mosyon li menm, i fer mon poz serten kestyon e eksprim serten konsern.

Mon eksprim serten konsern akoz mon’n ekout tre atantivman mover sa Mosyon.

E mon krwar li menm li in realize dan son lentansyon ki in entrodwir son Mosyon ki wording son Mosyon li menm i kapab sisit serten eleman ki kree serten sityasyon ki kapab ganny mal enterprete.

An premye lye Mr Speaker, mon pou servi legzanp en entervenan ki’n entervenir an faver sa Mosyon pou ilistre mon pwen.

En entervenan in dir ki sa bann eksper medikal ki pe donn bann advise lo lafason ki nou dil ek sa sityasyon pa pe fer li.

Akoz dapre zot profesyonnalizm zot abilite teknik e profesyonnel, me zot pe fer li akoz zot pe ganny dir ki pou fer.  Se sa ki en entervenan in dir.

Mr Speaker atraver ou, pou nou anmenn Lasanble lo le pwen, ler Onorab Roucou in entervenan in dir ki sa bann profesyonnel i bezwen pran bann desizyon ki pa baze lo sa ki zot pe ganny dir.

Now, esansyelman sa i vedir ki ou pe call into question lentegrite profesyonnel sa bann dimoun ki’n fer sa bann desizyon.

Prezan si nou swiv sa largiman ki annan en dimoun ki pe dir sa bann dimoun ki pou fer.  Eski nou atraver sa Mosyon ki nou anmenn devan Lasanble ozordi, nou pa pe esansyelman fer egzakteman sa.

Se ki nou pe dir ek sa bann dimoun ki pou fer.  E alors fer ki nou pe si i vre ki sa bann dimoun in ganny dir ki pou fer, re kree menm fot ki sa Onorab in dir i en fot in the first place.

Akoz i kler poudir desizyon an se ki konsern en public health emergency e an se ki konsern lezot public health i bezwen ganny fer par Komisyoner Lasante Piblik.

E dan sa konteks Komisyoner Lasante Piblik i en Antite otononm ler i fer sa bann desizyon.  I pa parti prenon Gouvernman par lefe ki se pa Gouvernman ki pou dictate ki Komisyoner Lasante Piblik i bezwen fer.

Sa i en pwen enportan ki enshrine dan son Lalwa e dan lafason ki nou’n vwar ki mannyer nou’n dil avek sa sityasyon as it has unfolded.

Mon dir sa Mr Speaker, akoz nou bezwen fer referans avek lanons ki ti donn sa, si ou oule sa, sa lenformasyon ki nou pou pe reouver nou lafrontyer apartir Zen.

E sa lanons ti dir ki baze lo gidans bann profesyonnel lasante, nou pou pe reouver nou lafrontyer. Me sa reouver osi i pou baze lo bann gidans e lo bann legzizans ki pou arive pandan sa letan.

Sa i vedir ki si nou lafrontyer pou reouver, i pou reouver baze lo bann kondisyon ki pou ganny set par sa bann menm profesyonnel ki handle sa pandemik isi Sesel?

E kestyon ki fer nou poz nou lekor,  se eski sa bann profesyonnel in a la oter sa pandemik ziska la?

Si mon ti pran largiman ki mon’n tande an faver sa Mosyon, par la mazorite Manm ki’n koze, an faver sa Mosyon.  E ki mon krwar zot pa’n neseserman ekout byen mover sa Mosyon, ou ava krwar poudir se non.

Ou ava krwar poudir sa bann dimoun zot pa’n handle sa sityasyon byen, nou pa trust zot zizman.  E alors nou krwar poudir sa desizyon in advise nou pran avek bann gidans ki zot in donnen, i pa en bon desizyon.

E nou, nou konn pli byen ki zot e alors nou krwar vwala ki nou devret fer.  Se sa largiman ki nou nou’n sey avanse an premye lye.

E prezan pou nou zistifye sa largiman nou’n anmenn tout en seri eleman ansanm. I annan nou ki’n propoz fer en Komite COVID-19 pou oversee sa Komite ki pe dil avek COVID-19 !

So nou pou annan en Komite Lasanble ki pou al oversee bann Dr Gedeon, Louange, 2enm Dr Louange, Dr Henriette, tou nou bann profesyonnel Lasante ki’n train.

Nou pou annan en Komite Lasanble ki pou oversee sa bann dimoun.  Mon pa konnen si nou pe realize ler nou fer sa bann statement, ki lenpak sa i annan lo popilasyon an deor.

Akoz popilasyon vre tou dimoun i anvi dil ek sa sityasyon dan en fason.  Nou tou nou annan krentif.  Nou tou nou anvi war ki sa sityasyon i ale, nou kapab retourn nou lavi normal.  Me i pa leka.

E set alors ki le pwen fondamantal i se ki nou bezwen trust dan sa ki sa bann profesyonnel in dire k nou.

Me mon al pli lwen Mr Speaker pou ilistre akoz i paret poudir nou selektivman ekout sa ki ganny dir vizavi sa bann lanons e apre nou pa regard lezot keksoz ki’n ganny dir.  Mr Speaker mon annan devan mwan la, en press release sorti from Seychelles News Agency ki detail en pti pe sa bann diferan lanons.

E dan tou sa lanons i fini avek si ou oule 1, 2, 3, 4, 5 mo.  Guidance from the Department of Health.  Sak mezir ki pe ganny pran, pe ganny pran avek gidans ;- an premye lye konsey Departman Lasante.  Fodre pa bliye poudir Sesel i pa en bato ki’n pri o bor Bar Africa li.

Sesel i en pei kot i annan dimoun, kot i annan endividi ki zot lavi ozordi swar, zot lavi ekonomik i an menas.  Pou en dimoun ki annan bann underline health condition, son lavi i dan en pwennvi medikal i kapab an menas.

E sa bann zofisye Departman Lasante Piblik, swa Departman Lasante, zot met tousala an perspektiv.

Napa enn ant sa bann mezir ki’n dir ki, nou pou fer tou sa bann keksoz ki nou pou’n fer, nou pou relev tou sa bann regilasyon, san ki i annan gidans from the Department of Health.  E ki sa bann gidans from the Department of Health.

Mon ti ekout Dr Gedeon ki ti pe donn en Press Conference lo sa size ler en zournalis ti demann li, an relasyon avek bann maren ki sipoze antre Sesel.  E i ti dir sa.  I ti eksplik from ler sa bann dimoun i debarke, to when zot anbarke lo sa bato ki i pe fer.

Me i ti osi eksplike poudir i pa vedir ki nou pe al ouver nou lafrontyer, gidans.  Nou pe al ouver nou lafrontyer dan en fason brit san ki i annan travel advisories ki ganny mete pou asire ki dimoun i sorti dan tel pei oubyen dan lot pei pa pe kapab antre an premye lye.

An 2enm lye, pou asire ki Seselwa pa met zot lekor a risk pou al dan en pei kot apre zot a retournen avek posibilite anmenn sa maladi dan nou pei.  Se sa ki nou fondamantalman nou bezwen reste ferm lo la.  Konman Leaders nou bezwen asim en rol leadership.  Nou kapab nou tou pran nou latet, anter dan disab e espere ki sa problenm i ale, e ki tou keksoz pou al byen.

Malerezman i pa le ka.  Nou kapab dir tou dimoun i lo lockdown, tou dimoun i al se zot, napa travay.  Malerezman i pa le ka.  Nou pa kapab a sa moman ekspekte ki tou Seselwa pou kapab work from home parey mon’n tande.  I pa posib.

E sa i montre mon ki bann dimoun ki’n koz lo sa Mosyon, bann Onorab ki’n koz lo sa Mosyon zot pa’n neseserman fer zistis sa Mosyon.  Sa Mosyon i pe demann en keksoz ki li menm li sa ki i pe demande i deza anba en kontrol.  I deza annan en kontrol lo la.  I deza annan bann striktir ki’n ganny mete pou anpese ki nou pa pe war demen 5mil Italyen pe antre dan pei.

Akoz sa 5mil Italyen i deza pa pe kapab travel dan zot pei.  Nou pa pe war 2 mil Alman pe antre dan pei.  Akoz sa 2 mil Alman i deza pa pe kapab travel dan zot pei.  Sa bann mezir pa’n ganny fer san resiprok alman gard sa ki pe pase dan lezot pei.

Se sa ki nou bann profesyonnel in fer.  Dan 1 mo, dan en fason nou felisit sa bann dimoun, nou dir nou trust zot zizman.  Me dan en lot nou oule fer oubyen score en pwen lo en size ki pa neseserman nou bezwen score en pwen lo la.

Akoz an se moman la, napa enn antre nou la anndan, ki pou kapab diriz en Komite ki tackle en pandemik, napa enn antre nou la anndan. Napa.  Napa.  Sel dimoun ki annan training pou dil ek sa, se sa bann dimoun ki’n dil ek sa problenm.

E Mr Speaker fodre note, fodre note ki lafason ki bokou nou la anndan, mon pa pou dir tou Onorab Mr Speaker.  Ki annan serten nou la anndan in apros, ler sa pandemik ti vini, e bann komanter ki nou ti pe fer dan sa Lasanble, pa tou Onorab Mr Speaker.

E si piblik i mazinen e i gard zot memwar kler, zot a rapel ki bann dimoun ti pe dir lo sa bann menm profesyonnel.  Wi, avek lagras Bondye Mr Speaker nou’n nobou sirmont sa ki zot a pe apel the first wave. 

Me i pa zis avek lagras Bondye.  Bondye in donn potansyel dan sa bann dimoun pou ki sa bann dimoun i kapab fer en travay pou nou.  Se sa ki arive Mr Speaker.

Me i tipik pou war, i tipik pou war ki mannyer parfwa konman politisyen nou bliy lesansyel.  Nou koz donn lespas bann dimoun pou fer travay ki zot in ganny mandate pou fer.  But at the same time nou oule obligatwarman endirekteman donn sa bann dimoun direksyon lo ki mannyer zot devret fer zot travay.

Mr Speaker i kler poudir sa Mosyon premyerman dan son wording i kree en konfli ek li menm.  Akoz ou pe demann en Lotorite otononm e ou pe demann Gouvernman pou atak Selman enterfer dan travay en lotorite otononm.

E lo sa premye ground Mr Speaker sa Mosyon o pa stand.  Lo 2enm ground pli enportan Mr Speaker, napa enn ant sa bann mezir ki’n ganny anonse, ki’n ganny dir pa pou ganny fer san gidans Lotorite Lasante Piblik.

Napa enn ki’n ganny dir.  Ziska la mon’n ekout sa bann dokter dan sak Press Conference ki zot in ale, zot in reponn tou sa bann kestyon.

Me i paret Mr Speaker ki apard sa bann dokter i annan serten dimoun ki petet i travay dan sa bann Departman, i pli konnen ki sa bann dokter ki zot, zot anvoy bann text en pe partou, zot donn lenformasyon en pe partou.

Ki mon pa ganny en konpran.  Tou Seselwa ozordi i konsernen avek sa ki pe arive ek lekonomi son pei.

I annan en rezon akoz nou bezwen konmans koz lo selektivman ouver nou frontyer, i annan en rezon.  E nou tou nou konnen.

I pa neseserman la mazorite lopinyon Seselwa ki nou pe eksprimen.  Me eski par fer, eski nou pou fer zistis la mazorite lopinyon Seselwa si zis nou pas en Mosyon.

Non, it’s not up to us pou dil ek sa sityasyon.  Nou siport sa bann dimoun, e nou’n fer li, nou’n siport sa bann dimoun.

Lo sa kote latab  nou’n fer li par vot an faver en Bidze pou siport sa bann dimoun.  Nou’n fer li.  I pa anpese ki Manm Lasanble i anmenn okenn Mosyon ouswa okenn kestyon, akoz sa i drwa sa Manm Lasanble.

Me nou pa kapab toultan tonm dakor lo tou keksoz.  Si sa Mosyon ti’n vin a en moman kot i annan, i ankor annan ka COVID  Sesel.

E lamazorite pei ti’n kit zot border frenmen, tou pei ti pe kit son border frenmen, personn pa ti pe diskit ni selektivman ouver son border.  Personn !  Mon ti ava donn sa Mosyon sipor 100 poursan.  Be mon ti pou fer li avek en kondisyon a sa moman.

Me i pa sa letan ki nou ladan.  En lot pwen enportan Mr Speaker, sa Mosyon i koz lo en bon progranm proteksyon.

Mon dakor, mon dakor i bezwen annan en bon program proteksyon.  E i annan zefor pou fer en bon program proteksyon.  Sa ki mon pa dakor avek se ki ler mon tan Manm Onorab pe dir ki fodre donn ledikasyon lepep Seselwa.

Be Mr Speaker si nou regard televizyon, nou ekout lo radyo, lakantite spot piblisiter ki i annan lo ki mannyer pou lav ou lanmen, lo ki mannyer pou fer tou sa bann keksoz.

Be sa pe ganny fer, i pe ganny fer.  So ki mannyer nou pou dir poudir sa bann keksoz nou bezwen en bon mezir proteksyon.

I deza annan ki pe ganny fer.  Si sa Mosyon ti’n vini ti’n dir mon demann Gouvernman pou entansifye bann mezir proteksyon ki pe fer avek tou Seselwa.

Entansifye, mon dakor entansifye, napa nanryen mal dan fer keksoz annabondans ki en pozitiv.  Se sa problenm.

Be mon pa dakor ek sa Mosyon kot i dir poudir ou pe demann Gouvernman pou frenm nou lafrontyer baze lo ki, lo ki baz?

E ou fer egzakteman le kontrer ki nou’n toultan dir, se ki ou pe enterfer dan travay en body otononm ki li ziska la in manage sa crisis.  E ou, ou krwar poudir nou kapab fer li pli byen ki zot.  Se sa problenm ki nou annan Mr Speaker.

Nou problenm ki nou annan ozordi, se parfwa, e mon konpran Mr Speaker, nou tou nou dan sa pozisyon.  Nou tou koman Seselwa nou konsernen.

Be i annan en keksoz mon oule met devan Lasanble ozordi.  Esansyelman, akoz si zot in ekout zot bann komanter ki zot in fer, si zot vreman in ekout zot bann komanter, mon’n asize mon’n ekout tou dimoun atantivman, san interjection, san enteripsyon.

Serten komanter ki zot in fer, i donn alizyon konmsi sa bann dimoun ki pe manage sa sityasyon pa care pou zot prop fanmir.  Sa i kree lenpresyon.  Akoz sa bann dimoun ki pe manage sityasyon, zot annan zanfan, zot annan manman, zot annan papa, zot annan kouzen, zot annan kouzin.  Eski ou krwar enn ant sa bann dimoun i anvi enn zot manm fanmir i ganny sa maladi, non.

Me zot pe fer en travay dan en fason profesyonnel, akoz zot pe balans tou bann keksoz.  E mon asir ou si i ariv en ka ankor Maurice i escalate, oubyen en pei kot en dimoun sorti i escalate.  Premye dimoun pou vin dir nou poudir be i pa re go back to sa desizyon se Dr Gedeon.

Be annou donn, annou donn, annou donn sipor sa bann dimoun, par nou osi koman Leaders konmans koz lo lafason ki nou pei i repran apre sa sityasyon ki nou’n pas ladan.

Se sa ki esansyel.  Napa okenn analozi ki mon kapab sey servi pou vin dekrir sa sityasyon, akoz i napa enn ki’n parey avan. Mon pa rapel pas dan enn ki’n parey avan.  Pou nou tou i nouvo sa.

Mr Speaker ou annan dimoun ozordi ki mwan mon’n koz avek, ki dir mwan Gouvernman pa ti devret par egzanp lev curfew.

Curfew ti bon.  Zot pou etonnen, i annan en kantite dimoun ki santi koumsa.  Eski la mazorite dimoun, mon pa konnen.

Mon pa kapab vin dir poudir annou pa lev curfew, annou fer sir laboutik ler in frenmen 8er par egzanp, tou dimoun i se li.  Mon pa konnen.  Mon pa konnen Mr Speaker.  Me i annan dimoun ki santi, i annan dimoun ki santi pandan sa letan COVID, lefe ki la mazorite dimoun ti se zot, vif familial in ganny ranforsi.

Lafanmir ti ansanm, pe get televizyon ansanm, manz ansanm, travay kot lakour bann pti travay ti pe ganny fer.

I annan dimoun ki’n devlop talan dan fer bakery, i annan dimoun ki’n devlop talan dan kwi manze.  En kantite keksoz.  Ou konnen, sa sityasyon i sitan nouvo e in montre nou en kantite keksoz.  Me en keksoz ki nou pa devret bliye, se sa sityasyon in ariv koumsa akoz profesyonnalizm sa bann dimoun ki’n manage li.

E la sa bann dimoun pe dir ek ou koumsa, gete, nou pou ouver nou border, as of the of 01of June. 

Baze lo sa ki pe pase, e baze lo gidans Departman Lasante.  Nou pou ouver daycare, baze lo sa ki pe pase, baze lo gidans Departman Lasante.

Nou pou ouver child minding, baze lo gidans Departman Lasante.  E si nou pran legzanp child minding kot in annan interview ek bann child minders yer.

Konbyen nou, konbyen nou Manm Onorab la ki pa’n fyer yer ler nou’n get sa bann child minders, mon get sa madanm ki dir be li in ale in aste sa bann mat ki allow li kit son bann zanfan 1 met apar.  I montre ou poudir Seselwa i anvi fonksyonnen within sa ‘nouvo normal’, zot anvi pran sa bann mezir.

Nou pe koz lo lekol. I pou annan Press Conference Minister Ledikasyon.  Bann Head teachers in konmans ganny kriye pou raport lekol at least en semenn davans pou zot fer bann preparasyon.

In annan travay ki pe konmans ganny fer vizavi Minister Ledikasyon Mr Speaker.  Me tousala i pa relye avek lefe ki nou pe ouver nou border dan en fason selektif avek gidans Departman Lasante Piblik.

Pou nou allow serten keksoz ganny fer.  E prezan mon donn zot en lot largiman.  Nou ti ki’n travel la, nou’n vwar lo Erport par egzanp nou avek nou paspor Seselwa si nou pe vin Sesel. Lo sa Erport kan nou arive, sa dimoun i get nou paspor, napa problenm.

Me ler bann travayer ki pe vin isi, sa dimoun i demann li en kantite kestyon, mon’n vwar sa Kenya, dernyen fwa ki mon ti ganny sans ale.  Sa zofisye Imigrasyon laba, sa zofisye ki devan la, i demann li oli ou bann dokiman GOP eksetera.

Now Sesel i bezwen lans en mesaz lo kan ki i pou ouver son border.  Akoz si i annan sitwayen kot son border laba kot i ete in ouver, pou li, dimoun i bezwen konnen poudir be ou pei son border pa ankor ouver mon frer, mon pa kapab les ou travel.

Me si ou border in ouver, mon bezwen les ou travel.  Nou’n koz lo bann, lo nou bann pasyan ki dan Lenn, nou bann pasyan ki aletranze.  Si i annan ki bezwen pe retournen, i pou bezwen annan bann vol selektif ki ganny fer pou anmenn zot.  Pou retourn ek zot si nou bezwen retourn ek zot.

E mon santi poudir sa lekip ki’n dil ek sa sityasyon i santi zot konfidan pou zot fer fas ek sa problenm.  Pou zot dir be vwala, si sa bann dimoun i vini, nou a met zot dan karantenn eksetera.

En keksoz fondamantal ki’n souleve, se ki si ou konsider en touris, lekel sa touris ki pou oule vin dan en pei, pou li al pas karantenn 21 zour avan i pran son vakans.

Malerezman ou pa pou gannyen en touris ki pou vin fer karantenn.  Se pou sa rezon ki in dir ou i pou annan en selective opening of the border.  

Se sa ki, se sa ki’n ganny dir.  Mon pa konnen si nou, sa mo selektif nou’n servi li dan lafason ki nou’n ekout sa ki’n ganny dir, dan plas vreman regard bann mezir ki’n ganny met an plas.  Mr Speaker nou, nou’n ariv a en pwen dan nou Lasanble, ki tou dimoun i bezwen konpran en keksoz.  I pa ase pou nou zis fer bann statement dan Lasanble.

I pa ase zis pou nou lev en bann size, en bann polemik lo diferan size.  Akoz deplizanpli nou pou ganny demande pou nou substantiate sa bann keksoz. Pou nou met levidans devan.  E mwan mon krwar bokou zot, zot konnen poudir zot pou vot atraver sa Mosyon akoz zot in pran en collective caucus decision probableman.

That’s the only reason why.  E mon pa krwar senserman zot letan zot pe mazin sa Mosyon, zot pe regard sa Mosyon.  I annan antre zot ki anvi stamp son lekor e dir be ok, dan Gouvernman ki LDS pou siporte se sa Prezidan ki pou vin dir ek sa officer Public Health ki pou fer.

Akoz se sa latitid ki nou pe pran.  E nou pa devret pran sa latitid.  Nou devret donn laliberte sa bann lenstitisyon pou zot fer zot travay.

E si sa msye demen i vin, sa dokter demen i vini, i dir ek mon koumsa, Onorab tou dimoun pou reste se li, mon pou respekte sa ki i dir mwan, mon pou al se mwan.

Me la pou le moman in dir ek nou koumsa poudir baze lo gidans ki zot pou donnen, zot ava dir nou ki mannyer pei i pou ouver.  E se sa ki mon pe baz lo la mwan.  Mon pa kapab vin baz mon, vin met mon krwayans dan lezot politisyen parey mon menm, ki napa leksperyans dan dil ek sa sityasyon parey sa bann dimoun i annan.

E mon pou demen lepep Seselwa pou fer parey.  Nou bezwen baz nou krwayans dan sa bann dimoun ki’n handle sa sityasyon.

E la devan nou, larepons i kler, i an nwanr e blan.  In ganny raporte dan bann zournal.  In ganny raporte partou.  Mon pou fini lo sa note Mr Speaker.

En dimoun in  anvoy mwan en interview ki en dimoun mon krwar kot UN or something, pe koz lo bann pti pei ki’n handle sa sityasyon.  E zot in felisit Sesel.

Zot in felisit Mauritanie, apre i annan en lot pei mon krwar ki zot felisit regarding sa problenm, ok. 

(Wi Onorab Ferrari, mon konnen ou pa kontan bann pti pei parey Mauritanie, bann pti pei kot i annan en pti pe kouler en pe fason.

Akoz ou, ou kontan bann lezot pei en pe blan, blan ou, en pe lwen, lwen ou.  Wi Onorab Ferrari.)

 

MR SPEAKER

Order!  Order!  Order!

 

HON SEBASTIEN PILLAY

Mon konpran ou mwan.

 

MR SPEAKER

Non, nou pe deza run late.  E annou pa fer ki nou fini 8er diswar parey yer swar.  Onorab Pillay in ekout zot tou koze.  Annou donn li sans fer son konklizyon.  Onorab Pillay.

 

HON SEBASTIEN PILLAY

Mersi Mr Speaker.  Ou en dimoun tre wise e ou en dimoun ki war keksoz tre byen.  Annefe vre, mon’n ekout tou dimoun atantivman.

E mon pa’n interject personn, pou le senp rezon ki mon osi mon apresye ki ler mon ganny sans koze, mon sans koze i ganny respekte.

E mon pe servi mon sans koze pou dir ek lepep Seselwa.  Annou met konfyans dan sa bann dimoun ki’n manage sa sityasyon ziska la.  Nou pa’n ganny ankor, okenn lezot dimoun ki’n malad avek sa maladi, malgre in annan plizyer polemic ki’n ganny fer otour sa maladi.

Plizyer latak ki’n ganny fer lo sa bann profesyonnel.  Plizyer komanter ki pa ti devret ganny fer kont sa bann profesyonnel lo rezo sosyal.  Me sa bann dimoun in reste ferm.  Zot pa’n cave in, zot pa’n tonbe.  Zot in kontinyen travay e zot pe kontinyen travay pou nou.

E le sel keksoz ki nou devret fer nou koman Manm Lasanble, se kontinyen donn zot nou sipor.

Akoz nou konnen zot pe protez nou popilasyon, zot pe protez nou pei, zot pe protez nou nasyon e zot pe protez nou menm.  Avek sa mon remersi ou Mr Speaker e mon remersye Lasanble pou son latansyon.

 

MR SPEAKER

Mersi Onorab Sebastien Pillay.  Mon ava donn laparol Onorab Simon Gill.

 

HON SIMON GILL

Mersi bokou Mr Speaker.  Bonn apre midi Mr Speaker.  Bonn apre midi tou koleg Onorab e manm piblik ki pe ekout nou.

Mr Speaker Mosyon prezante par Onorab Ramkalawan i lir koumsa.  Lasanble Nasyonal i demande ki Gouvernman i gard nou frontyer frenmen pou viziter ziska ki sityasyon COVID-19 dan lemonn i amelyore.

E ki i annan en sistenm deteksyon efektiv pou sa viris ki an plas.  Oubyen en bon program proteksyon pou nou popilasyon ki’n fini ganny aplike.

Mon pou demare Mr Speaker, an diran ki sa Mosyon i prezant nou Lasanble, bann zonm onnet senser.  Pou nou dir mersi a tou bann profesyonnel spesifikman dan Lasante.

E bann lezot profesyonnel, ki dan sa moman kot COVID-19 in atak nou pei, ki’n donn zot letan, zot kapasite fizik e entelektyel pou ki nou kapab met sa sityasyon anba kontrol.  Byensir dan en pei i annan en leadership.

E zeneralman dan ka Sesel politik dan nou pei se Prezidan Larepiblik Sesel, ki Prezidan Danny Faure, avek on lekip dan Cabinet Minister.  E tou bann lezot profesyonnel teknisyen dan sistenm gouvernans pei.  E bann lezot Lenstitisyon osi ki’n la dan en fason direk ou endirek, in siport tou demars pou gard la popilasyon Seselwa dan sekirite, dan bonn sante.

Pou ki nou tou nou kapab retrouv nou menm nou pe re pran nou travay, dan bann moman ki nou bezwen re pran nou travay.  Byensir donnen bann diferan domenn ki nou ladan.  Nou bezwen dir zot mersi.  E Mr Speaker, Mosyon Onorab Ramkalawan i osi donn nou en loportinite pou dir mersi Dr Gedeon, son lekip Dr Louange.

Pou mansyonn de, e tou lezot manm dan sa lekip ki’n travay depi ler COVID in atak Sesel e ziska ozordi.

Mr Speaker sa Mosyon i donn nou osi en loportinite pou nou konpran ki Komisyoner Lasante Piblik pa’n fer en one man show.  In travay avek en lekip, in travay avek en tim anba en leadership.  Efikas efektiv e mon kapab dir, pwisan.

Kot zot in met zot latet, lespri tou sa ki zot potansyel in permet zot met ansanm, pou ki zot kapab elabore e defini bann mezir e aksyon ki zot bezwen pran.  Pou ki Sesel, Seselwa, teritwar Sesel i ganny proteze kont sa pandemik, ki nou dir li Covid-19.

Mr Speaker, me odela sa, sa Mosyon i donn nou en loportinite ozordi pou felisit Sesel, Gouvernman Sesel.  Ki avek tou son lenperfeksyon ki nou annan, nou’n nobou annan en sistenm, en servis Lasante parey i ete ozordi, malgre tou son lenperfeksyon.

E ki ozordi, ler nou’n ganny mete anba tes COVID-19, pti, pti ki nou pti, pti nou’n nobou ganny servi koman en model koman en legzanp.  E ki plizyer Lenstitisyon pe koz lo legzanp e lo model Sesel.  Mr Speaker this is beautiful.  E i donn mwan en gran lespwar.

En lespwar ki si nou kontinyen anbelir nou sistenm servis Lasante, ki Sesel, nou Seselwa pou kontinyen zwir enn parmi bann meyer sistenm Lasante ki annan dan Lafrik.  E menm en model pou serten pei Eropeen, ki apel zot bann pei devlope.

Mr Speaker sa Mosyon Onorab Ramkalawan, i donn nou en loportinite pou poz detrwa kestyon lo son merit sa Mosyon.  E son moman ki sa Mosyon in ariv devan nou Lasanble.  Lo son merit, premye kestyon, ki Gouvernman i gard nou frontyer frenmen pou viziter.

Ler Prezidan atraver konsey ki in gannyen avek tim e lekip Lasante Lotorite Piblik.  In dir ki nou krwar i pridan pou ouver lafrontyer Sesel apartir le 01 Zen.  Bat, ne atraver bann konsey sorti kot Lotorite Lasante Piblik.  Zot in apel sa bann travel advisory.  Ki merit en travel advisory Mr Speaker?

Travel advisory byensir i pran konesans, i swiv lenformasyon, i monitor devlopman bann deklarasyon, bann statement, bann Lenstitisyon Enternasyonal, Rezyonal.

Sa ki pe monitor dinamik bann sanzman dan diferan Leta, diferan pei.  Byensir an relasyon avek COVID-19.

Ki mannyer sa bann diferan Leta, diferan pei pe definer zot prop sityasyon entern.  Si zot pe les zot sitwayen, apard voyaze, internment dan zot teritwar, si i pe permet zot pran avyon pou voyaze, e al an deor zot teritwar.  Vedir an deor zot pei.

Sa i bann konsiderasyon enportan ki travel advisory i konsidere dan moman kot nou Sesel nou pou deside ki landrwa nou kapab permet Seselwa ale.

E ki landrwa nou pa kapab permet Seselwa ale.

Dan en lot mo Mr Speaker, dir nou, nou ouver nou teritwar apartir le 01 Zen, i pa pe donn en carte blanche tou Seselwa ki anvi voyaze pou sorti kit teritwar Sesel e al dan nenport ki kwen lemonn.  Apre tou or avan tou apre tou si nou laliny avyon pa ganny direktiv pou sorti dan teritwar Sesel, i pa pou kapab sorti dan teritwar Sesel pou al apoz lo okenn Erport enternasyonal dan okenn pei dan la rezyon ou dan lot kwen lemonn.

Dan sa konteks Mr Speaker Onorab Ramkalawan dan son mosyon in met en statement ki deza napa validite nimero de ki ziska ki sityasyon COVID-19 dan lemonn i amelyore. Me byensir sa i kalifikasyon ki pou determin ki mannyer Sesel ki mannyer Seselwa i bouze sorti Sesel e al dan lezot pei.

Si i pa amelyore pou napa clearance pou Seselwa bouze pou al dan okenn kwen lemonn, pou al met zot lekor an danze e par laswit ler zot pou retournen pou met Seselwa e Sesel an danze.

Lot eleman Mr Speaker ki en sistenm deteksyon efektiv pou sa viris ki an plas oubyen en bon progranm proteksyon pou nou popilasyon kin fini ganny aplike, sistenm deteksyon efektiv. Mr Speaker si nou’n nobou malgre tou nou lenperfeksyon ki nou kapab dir nou annan, si nou nobou detekte 11 ka mon prezimen i pa’n neseserman vin par azar.

Probableman en dernyen ka malerezman nou zanmi ki reste Anse Aux Pins ki sistenm pa’n detekte li atan apre ki li menm li i ganny bann sentonm in vini. Me zeneralman se atraver bann mezir ki’n ganny met an plas par sistenm lotorite Lasante Piblik se sa kin fer met deteksyon e pran bann mezir apropriye ki’n fer ki’n noun kapab detekte pran bann mezir e finalman sonnyen e sa bann dimoun la mazorite zot in geri;- mazorite zot in geri.

Mr Speaker progranm proteksyon pou nou popilasyon in fini ganny aplike progranm proteksyon pou popilasyon i ganny aplike.  E napa pli gran protekter nou popilasyon Mr Speaker ki nou menm nou sakenn de nou zwe nou rol nou respekte bann direktiv ki ganny donnen.

E nou asire ki nou pe kontribye dan sa zefor Nasyonal pou nou redwir lenpak e lefe penetrasyon or transmisyon COVID-19 parmi la popilasyon.  Sakenn de nou i annan sa rol e sa responsabilite.

Mr  Speaker  lo lot pwen ki i enportan nou konsidere dan mosyon Onorab Ramkalawan se dir ki wi koman en Lasanble nou annan en drwa pou nou fer nou komanter pou nou fer nou bann lobzervasyon, pou nou fer nou bann kritik.

Me, Mr  Speaker  nou bezwen fer sir ki dan la fason mannyer nou fer nou pa pe anvoy en mesaz ki anmer pou nou bann profesyonnel ki donn sitan kantite zot lenerzi pou kapab  asir sekirite lasante piblik ziska ozordi, an fas avek sa pandemik COVID-19.

Mr Speaker nou drwa ki nou annan pou nou koze pou nou donn nou lopinyon pa devret fer nou perdi sans or perdi sa posibilite pou nou ozordi dan moman ki nou pe diskit lo sa Mosyon pou nou dir avek nou bann profesyonnel, ki dan forefront sa batay anvoy en mesaz pou zot dir zot ki Lasanble Nasyonal Sesel i trust zot.

I trust zot lo tou laspe tou an rekonesan ki zot bann zonm fanm, bann imen ki kapab fer bann fot ki i annan bann limitasyon parey tou zonm fanm be ki nou trust zot malgre tou.

E mwan personnelman Mr Speaker mon krwar i en loportinite sa i 7.09 ki mon trouv nou revey i montre la lo lapar nou lekip isi dan Lasanble Nasyonal dir avek nou bann profesyonnel ki dan sa batay dan forefront sa batay COVID-19 dir zot nou trust zot.

Mr Speaker nou bezwen pa anvoy okenn mesaz pou nou konfiz nou pep la deor, ler nou dir pa ouver teritwar Sesel, pa met en letan definir pou dir kan nou pou ouver teritwar Sesel, malgre probableman lentansyon Onorab Ramkalawan pa en lentansyon pou konfiz le pep deor la.

Malgre son lentansyon se pa pou dir ki i annan trust dan bann profesyonnel lasante me endirekteman ler bann profesyonnel lasante in advice in konseye in dir ki nou pe konsidere, pou ouver teritwar Sesel  apartir le 01 Zen, nou pa kapab pe dir pa ouver teritwar Sesel  apartir le 01 Zen.

Akoz sa i pe demontre direkteman ki nou pa trust zot zizman.  Nou pa trust tou bann eleman ki zot in met ater avan ler zot ariv lo sa konklizyon, pou konseye ki nou kapab ouver nou teritwar parey mon dir – but atraver advisory strict.  Atraver gidans strict Komisyoner Lasante avek son lekip.

Sa i kalifikasyon or sa i kondisyon louvertir teritwar Sesel apartir le 01 Zen e Mr Speaker dan en fason kategorik mon pou dir avek nou Lasanble ki United Seychelles mazorite nou ki isi dan sa Lasanble, nou pa parti en pozisyon parey ki’n ganny defini dan Mosyon Onorab Ramkalawan!

Mr Speaker an konklizyon, Mr Speaker nimero enn;- sa batay kont COVID-19 malgre nou de kote latab i sorti dan de parti politik diferan, malgre nou bann lobzervasyon e kritik mon ava dir ki sa batay ki bezwen depouy son lekor avek tou partizan politik.

Annou pa politiz sa batay kont COVID.  Koman en Lasanble mon lapel ozordi Mr Speaker se pou nou bouz ansanm – together an fas avek sa batay pou nou sorti venker.  Pa koman de parti politik dan Lasanble Nasyonal, me koman en Sesel!  Koman en sel Nasyon Mr Speaker.  Se sa ki devret gid nou dan tou sa ki nou fer.

Nimero 2 Mr Speaker dan nou i konklizyon i amenn mwan pou dir avek lasanble lo nou kote latab isi donnen bann defayans ki annan dan Mosyon Onorab Ramkalawan e baze lo trust ki nou annan dan zizman e dan leadership bann zonm, fanm ki devan dan sa batay kont COVID19 ki nou pa pou kapab vot an faver sa Mosyon.

Nou agree pou nou dezagree ki ler nou pa pou vot ler no pou vot kont sa Mosyon eskize sa pa vedir ki nou pa pou kapab bataye ansanm koman en sel Sesel, koman en sel Nasyon.  E koman en sel lasanble malgre tou nou bann diferans ki nou kapab annan e nou bezwen fer li akoz sa i nou sel kondisyon pou nou sirvivans, pou nou laviktwar kont sa viris visye ki apel COVID-19.

Konklizyon nimero 3, Mr Speaker se dir avek nou bann koleg ki isi dan sa Lasanble Nasyonal ki sa 2nd wave ki Onorab Ferrari pe soufer avek Mr Speaker se byensir i la parmi nou.

Mr Speaker mon dir i la parmi nou akoz en 2nd wave parey in ganny dir si pou aparet i pa pou sorti a eksteryer Sesel pou antre Sesel dan sa moman aktyel la, ki nou komans ouver.  I pou sorti parmi nou isi dan Sesel.

e sa ki bann profesyonnel lasante pe dir nou malgre ki nou pe konsidere ki nou ouver;- kree serten lespas tir serten bann restriksyon ki nou bezwen fer ekstrememan atansyon, gard nou distans, pran tou bann swen neseser dan tou bann tranzaksyon ki nou fer.

Se sa mezir ki pe demann nou pou pran pou asire ki napa sa 2nd wave akoz nou teritwar i ankor fer men i ankor restrikte.  zeneralman 99poursan restrikte teritwar Sesel avek enn de leksepsyon.

Mr Speaker dernyen konklizyon, Mr Speaker mon pou dir ki Sesel malgre ptipti ki nou ptipti nou pe fer mervey nou annan bann Leaders dan sa pei ki care pou la nasyon pou byennet lasante fizik mantal nou pep.

E Mr Speaker si ti napa bann zonm fanm ki care pou la nasyon Seselwa , zot lasante i si ti napa en Gouvernman ki krwar dan lenvestisman dan lasante son pep,  nou pa ti pou koumsa ozordi.

Nou ti pou parey serten bann pei ki malerezman Mr Speaker zot pa’n kapab atan bouze pran bann mezir annan bann sistenm santral kordinen pou evite ki de santenn e de milye zonm, fanm i mor

Mr Speaker ler ou swiv nouvel lo televizyon, bann zournalis i dir ou dan serten pei dan lopital   zot pran desizyon pou deside lekel ki zot pou les mor e lekel ki zot pou donn vantilater pou zot sov lavi.  Mr Speaker in bann moman artisan.  I bann moman sagrinan ler ou mazin bann pei kot zot ranpli avek bann milye e de milye resours, me akoz zot sistenm lasante;- zot loperasyon ki mannyer zot met an plas i kout de santenn e  de milye lavi bann zonm fanm ki ti ankor annan en kantite lannen pou zot viv. E i sagrinan.

Nou annan bann zanmi ki nou’n ansanm dan Pan African Parliament Mr Speaker nou’n ganny bann nouvel ki plis ki senk zot in mor, zis akoz zot sistenm.  Zis akoz  zot sistenm lasante, natir gouvernans dan zot sistenm Lasante.

Mr Speaker mon salye zefor tou Seselwa.  Mon salye zis akoz zefor tou bann profesyonnel lasante ankor enn fwa ki’n nobou permet Sesel e Seselwa reste nou latet anler pou nou kapab dir toultan nou fyer, ki nou en Seselwa.  E nou fyer ki nou ankor pe kapab respire e respir e viv byen malgre tou nou bann limitasyon ki nou annan.

E ansanm, Mr Speaker, together Mr Speaker, nou bezwen prepare asire Sesel nou kapab leve, pou nou kapab ranforsi nou batay ekonomik prezan, apre sa batay kont COVID-19.  Pou ki Seselwa lavi i normalize.  Pou ki nou Sesel, nou Sesel nou kontinyen epanouir nou.

Mr Speaker, mersi bokou pou donn mwan sa detrwa minit pou koze.  E mersi bokou tou koleg Onorab ki ekout mwan e manm piblik. Mersi.

 

MR SPEAKER

Mersi Onorab Simon Gill. Mon ava donn laparol Onorab Jean- François Ferrari.

 

HON JEAN-FRANCOIS FERARRI

Mersi Mr Speaker, mon sey fer ase vit an respe pou bann dimoun ki pe ekout nou Lasanble e pou Lasanble. Mr Speaker sa COVID19 in fer bokou keksoz aparet dan nou pei e dan lemonn ki kekfwa nou tin bliye nou pa ti realize ki sityasyon i koumsa.

Enn bann sityasyon kin leve se ki nou’n vwar en fenomenn ki en pe natirel kot si par egzanp ou pran en zwazo ou met li dan en lakaz ou kit li ladan plizyer lannen, ler ou ouver laport ou dir li ale i pa oule ale i sorti i vir, vir lanmenm la i retourn dan son lakaz.

Parey ler ou anmar en lisyen avek en pye mang oubyen ou kit li dan en kazo ler ou ouver i pa kapab al pli lwen i pa ale pli lwen zis i vir, vir lanmenm kot son lakord i kapab anmenn li i esper lanmenm la, akoz in fini perdi son laliberte.

Nou Mr Speaker sa ki nou anmenn dan sa Lasanble sa dernyen 4an se laliberte ek responsabilite pou nou zwe nou rol koman bann sitwayen e koman bann Leaders ki konekte avek Gouvernman e ki anmenn otan konsey posib ki nou kapab anmennen pou sa Gouvernman.

Nou rol se pou nou konplemant travay ki Gouvernman i fer e donn li sa leko lo kwa ki pe pase dan pei ater kot bann grassroots.  Parey mon krwar ansyen Prezidan James Michel ti deza dir i ti deza demande ki Manm ki Manm   son parti i re konekte, akoz zot ti’n dekonekte.

Me nou akoz nou konekte nou santi ki i enportan ki dan sa moman, kot bann desizyon enportan pe al gran pran, nou koman en Lasanble nou koman bann Leaders dan sa pei nou bezwen fer nou bout, pou nou anmenn lenformasyon ki nou,  nou annan e ki lezot napa.

Akoz pa bliye nou dan en pei  kot bann dimoun ki lo teren bann dimoun dan Gouvernman e nou en brans Gouvernman se bann Manm  Lasanble.

Bann Minis, Prezidan bann Ziz Lakour zot pa Rochon, Corgat Belvedere zot pa la zot nou ki la,  e nou i nou devwar pou nou anmenn sa refleksyon ki pep pe fer, pou ki Gouvernman Egzekitif  i kapab fer en meyer desizyon.

E se sa ki nou pe fer ozordi.  Nou dan en sityasyon kot i annan en desizyon tre enportan ki pe al ganny pran  e nou, nou fer li nou devwar pou nou konsilte e pou nou anmenn sa bann rezilta nou konsiltasyon avek Gouvernman.

E rezilta prensipal nou anmennen se pou dir avek Gouvernman son pep sa pep avek lekel in dekonekte pe dir avek li fer atansyon.  E Leader Lopozisyon e lezot dimoun lot kote latab in eksplike ki bann keksoz ki nou bezwen fer atansyon.  E akoz nou pou ran desizyon pou nou ouver nou frontyer.

Mr Speaker i annan de keksoz ki nou ti ava kontan gannyen nou ti a kontan ganny en pei ki napa okenn viris COVID ladan;- kot nou kapab viv en lasante kot nou kapab enjoy nou lasante koman en pep, san ki nou bezwen trakase pou sa viris.

An menm tan nou ti a kontan en lekonomi ki vibran ki pe fonksyonnen, e ki pe annan krwasans pou nou kapab fer e anmenn sa devlopman pou nou pei nou ti ava kontan vwar sa de keksoz.

An menm tan la realite lo teren i montre nou pa pou kapab ganny sa de keksoz, an menm tan la konmela nou lekonomi pou soufer ler nou pe protez nou lasante.  Nou lasante, lasante nou pep pou soufer ler nou protez lekonomi.

I en swa difisil me selman i en swa ki nou pou bezwen fer de nou, pou bezwen baz li lo bann realite lo bann fe, lo bann sif, lo bann keksoz ki bann eksper pe met devan, otan ki bann eksper dan lasante, bann eksper lekonomi, bann eksper dan touris tousala.  Nou pou bezwen met tousala ansanm e pran en desizyon.

Nou’n montre depi komansman ki nou annan respe pou tou bann profesyonnel, ki angaze dan sa travay e sa bann profesyonnel i konnen, ki ler nou dir ler nou fer en sizesyon avek zot, oubyen ler nou demann zot en kestyon, i pa en mank respe.

Sa se en kote latab sa senm sa bann zwazo ki’n pri dan en kazo pandan 40an, ki zot pa kapab konpran ki ou kapab respe en dimoun, ou kapab respe ou partner, ou kapab respe ou boss, ou kapab respe Prezidan Larepiblik me ou kapab osi kestyonn son rezonnman.

E se sa nou rol se sa nou rol e i fer 4an nou pe get sa avek mon bann koleg lo lot kote latab, pa kapab gannyen sa akoz si ou kit kestyonnen ou pe kritike, ou pe atake, ou pa kontan.

Zot in dir nou taler la nou pa kontan Dokter Gedeon, nou pa kontan lot, nou pa kontan akoz nou’n demann detrwa kestyon.

Me selman nou pou kontinyen donn sa.  E mwan mon konnen e nou sa kote latab nou konnen ki bann dimoun, bann profesyonnel dan Gouvernman, met bann Minis apar, akoz zot pou bann apwentman politik bann profesyonnel dan Gouvernman.  E pa zis dan Minister Lasante;- non solman zot apresye sa bann kestyonnman ki nou pe fer, me zot osi vin kot nou pou rod sa kestyonnman ki zot pa pe gannyen avek dimoun lo lot kote latab, ki sipoze pe ed zot pa pe gannyen.

Alors nou kontinyen fer sa travay e dan sa swa difisil ki devan nou Mr  Speaker  sa swa difisil ant lekonomi ek lasante, nou napa okenn laont pou nou dir ki depi komansman nou’n balans lo kote lasante nou pep se sa ki nou’n fer Leader Lopozisyon depi komansman.  Depi plizyer semenn, depi mwan Mars in dir i ti apel pou en lockdown pou protez lasante nou pep.

Nou swa ti toultan ker e nou swa i rete kler akoz i pa kapab ou pa kapab annan en kont labank, me selman ou fanmir in mor oubyen sa msye i dan en serkey, me selman son milyon i dan labank, i pa pou servi li dan nanryen nou bezwen premyerman prezerv sa lasante – ok?

Alors nou pou bezwen pran bann risk ki kalkile, akoz nou pa pou kapab ganny tou keksoz parey Onorab Afif in dir nou pa pou kapab ler nou’n pri lo en kannal dan en tanpet, nou pa pou kapab eksepte ki tou keksoz i normal.  Nou pou bezwen fer bann swa – ok?

E sa bann swa parey mon’n dir i baze lo bann fe, e lo bann sif ki egziste sa peser ki dan sa kannot li nou bezwen annan konfyans avek li.  Akoz li ki konnen ki pe la rode laba deor. Normalman ler i sorti parey tou biznesmenn dan sa pei,  ler  nou lans nou dan en biznes, en peser i pe rev sa de zoli bourzwa ki i pou gannyen.

Me si i pa ganny de zoli bourzwa i a desann ek en bordmar i ava dir, mersi Senyer i ava nouri son fanmir.

Alors nou, nou pe dir dan sa moman difisil, menm si nou pe nou ti ava kontan si tou keksoz i marse, annou pa pran bann risk ki pa bon, ki pa rezonnab.  E sa bann risk e sa bann risk se sann bann la koumsa Mr Speaker.

Nou e mwan an partikilye, mon fer li mon devwar pou mwan koz avek en kantite dimoun dan Lendistri Tourizm, en kantite dimoun. Ti annan en lannwit mon ti pe dormi e ou konnen ou roule ou pa ganny sonmey, prezan mon madanm i demann mwan, be ki arive aret fatig ou avek sa bann zafer touris.

Mon pe sey mazinen lekel mon pa ankor koz avek pou mwan sey konpran ki zot, zot pe rode?  Ki lendistri pe rode?   Ki biznes ti ava kontan vwar?   Bann dimoun dan touris,  i dir avek mwan ki  zot booking;-  e sa la ki mwan, mon’n al lo la mwan, zot booking bann forward bookings parey nou apel sa zot pa pe vwar nanryen signifikan ziska Septanm.  E Minis Tourizm in dir nou sa li.  Air Seychelles osi in dir nou menm zafer.  Septanm ki nou vwar bann mouvman signifikan.

Alors demann en kestyon, akfer nou pou ouver pou nou ganny 4, 5 dimoun, oubyen 50 dimoun oubyen menm 100 dimoun!  Ladan, nou pou anvoy 2 Fregat, 4 Ile Du Nord de Ephelia lot laba. I pa fer okenn sans.

E son risk ki i vin avek i tro bokou.  Se sa ki nou pe dir nou pe partaz avek bann dimoun ki deside, ki mannyer lendistri i mazinen.

I annan lotel ki dir avek mwan ki pa vo lapenn pou li ouver, si i annan 50 lasanm.  50 lasanm i tro pti gin pou li ouver akoz son larzan ki pou perdi, i pou tro bokou.

Alors tou bann dimoun pe sey gete ki mannyer nou kapab esper Septanm hopefully laba deor i ava’n kalme;- dan nou bann market pli enportan i ava’n kalme.  E i ava permet nou pou annan en larive touris, ki nou kapab ouver nou lotel,  me pa la.

An Septanm, ver Septanm mon pa konnen mwan mon pa eksper ladan, me selman i dan sa moman la.  Annou fer atansyon ki nou pe tay avek detrwa touris, ki pa pou fer gran diferans.

E si sa i arive si nou fer sa fot nou gannyen en ka, nou ganny en ka, nou pou detri nou posibilite pou nou re demare e nou pou set li back ankor plizyer mwan.  Pou le moman nou annan en keksoz ki nou’n fer e ansanm koman en pei  nou travay pou nou fer li vin COVID free.

I reste de ka ki byento avek lagras pou deklar negativ.  Ki nou pe montre le monn nou pe montre lemonn ki pe enterese avek nou lasante e lasante nou pep.  E ler nou pou fer sa nou pou enterese avek zot lasante.  Nou pa pou pran touris Sesel ler nou, nou pa asire pou dir zot pou an bonn sante Sesel. Se sa ki nou pou fer.

Savedir antretan nou ava ganny sa letan pou nou vire, pou nou fer lekonomi lokal marse. I annan dimoun pou soufer.  Dimoun ki depann 100poursan lo touris, zot pou soufer.  Me selman o mwen en bout nou lekonomi i ava marse, e nou ava kapab avanse.

Alors Mr Speaker nou pe advocate prevansyon, proteksyon lasante premye.  Se sa ki nou anvi fer, me nou santi presyon sorti kot biznes me selman nou dir avek zot, pa bezwen paran bann pti desizyon la ki pou afekte ou seryezman dan bann mwan ki kapab afekte ou.

Annou espere. Annou annan en pe pasyans annou fer sir ki nou gard e nou protez sa COVID free status pou plizyer lannen. E de tout fason Mr Speaker parey i annan bokou Manm in dir napa touris ki pou vini.

Akoz mon pe gete lo mon dernyen lalis, dernyen lalis WHO mon krwar bann Pei ki napa, ki pan deklar COVID se North Korea. Me selman nou konnen ki North Korea – well i kapab lezot Manm i konn en pe pli byen dan North Korea koman yer i pase laba.

North Korea, Turkmenistan sa mon pa’n deza ale, mon pa konnen lekel ki’n deza ale. Turkmenistan pa’n gannyen apre detrwa pti zil dan Pacific.  Napa dan tou bann landrwa kot nou bann touris i vini i annan problenm.

Alors annou pa taye pou nou ouver, annou fer sir ki protez nou frontyer. Me ler nou pe fer sa annou sanz nou lapros.  Annou fer sir ki nou rekomans ekoute.

Ou konnen ozordi nou annan en kote en group politisyen, ki pe atak nou en lot group politisyen, akoz nou fer bann propozisyon.

Me en ler mon pe mazinen be si Prezidan Faure pe ekout sa deba, i pou byen ankoler akoz li in fer bann prononsman e la zot, zot pe dir ki politisyen napa fer prononsman.  Konmsi  kwa li in mank respe Dr Gedeon li?  Akoz li ki’n fer prononsman pou ouver Erport.  Pa Dokter Gedeon.

E nou konnen Mr  Speaker  ki politisyen, se son rol pou li fer sa bann keksoz. E pou li annan en deba dan tou bann pei  kot keksoz in mars pli vit.  Parey Alman Sanselye Merkel in konstaman, diskite avek Leader Lopozisyon avek bann parti dan Lopozisyon avek son Parlman.  Toultan involve tou dimoun.

Nou ganny met ater nou ler nou demann kestyon.  Nou mank respe, nou mank respe.  Personn pa demann nou kestyon selman ler nou dir keksoz zot ankoler.

Alors Prezidan i fer prononsman li ki fer prononsman apre Dr Gedeon i bezwen al gete ki mannyer pou ,i pou kapab navige dan a prononsman.  Par egzanp sa dernyen direktiv pou met dan en lakaz Grand Police me Dr Gedeon ti napa nanryen pou fer ladan li! In dir nou li menm li desizyon in ganny pran.    Kwa zot mank respe pou Dr Gedeon?  Anse Polite, wi.

Ler Prezidan ti anons louvertir frontyer kwa i mank respe pou Dr Gedeon?  Mon krwar pa.  Mon krwar pa.  I pe dir prezan i annan en deba.   E nou osi nou konnen pou dir i annan bann diskisyon ki bezwen toultan pe ganny fer annou pran.

Par egzanp sa pwen ki Onorab Leader Lopozisyon in leve dan Lasanble pli boner yer lo kestyon crew change, pou bann bato endistriyel, lapes ton endistriyel, sa i en keksoz enportan pou nou lekonomi; sel pilye ki ankor debout.

So nou pe ankouraz bann bon prosedir.  Se pour sa ki Leader Lopozisyon i lev sa pwen poudir fer sir ki i annan bann protokol an plas ki bon, ki efikas.  E ki nou pa ariv parey en avyon sorti Sidafrik pou vin pran 4 Alman isi!  En dimoun in dir zot vini, mon pa konnen lekel ki’n dir vini.  Ler i ariv isi Dr Gedeon i dir ‘’non, non, non pa pou kapab.’’

Nou bezwen kordinen nou bezwen fer keksoz byen.  Se pou sa ki nou lev sa bann pwen.  E nou anvi – e la nou pe tande nou’n tann Dr Gedeon dir bann protokol ki mannyer pe marse.

Nou kontan ler keksoz i mars byen.  Nou bato a kontinyen lapes, pa nou bato malerezman.  Sa bann bato ton a kontinyen lapes, stevedores a kontinyen travay.  Faktori Ton a kontinyen travay.  Nou anvi sa bann keksoz i marse selman nou pa anvi parey in ganny mete dan lalis, bann keksoz ki pou arive an Zen louvertir of international flights!

Sa nou pe met an gard Gouvernman pou fer sir ki sa pa arive.  Akoz sa bann keksoz koumsa la, mwan mon ti ava dir menm si demen en milyonner, bilyonner i vin Sesel i dir i ti ava kontan lwe Fregat, oubyen lwe Ile Du Nord,  zis pou li pou 3 mwan  be  i ava annan travayer ki  pou bezwen travay laba?  Si i ariv en ka, ki nou pou fer?  Konmsi annou vreman fer atansyon lo ki mannyer nou pe avanse.

Alors Mr Speaker monn koz lo forward bookings si pa pe ki Septanm ki nou ape koze, koz lo legzanp lo bann lezot pei. Lezot pei i montre nou ler nou ouver tro gran, tro vit.  Problenm e son nonm i komans monte.

E alors nou bezwen fer atansyon.  Bann kondisyon e bann paramet ki devret an plas.  Nou’n demande, Leader Lopozisyon in fer en lalis tou bann training, tou bann keksoz tou bann prosedir dan l’aeroport i nepli posib!  I nepli posib! Nou pa kapab zis aziste fer en pti mouvman isi en pti mouvman laba,  ler i annan en sityasyon. Nou bezwen sistematik.  E nou, nou pe ankouraz Gouvernman pou pran sa letan pou fer sa bann prosedir, pou fer li tonm byen.

Mr Speaker mon ava termin koumsa, dan sa pei, nou’n toultan depi ler nou’n ganny mazorite dan sa Lasanble, fer nou devwar e fer li dan en fason onnet e konplet.  Nou pa’n zanmen per eksprim nou lopinyon.  E nou konnen parey mon dir pli boner, ki nou bann partner dan Gouvernman i apresye sa.  Sa travay ki nou annan pou fer.  E zot konnen pou dir nou pa vin zwe.

Par egzanp nou pa pe vin dir pou dir COVID  (en-en-en) – en pti latou.  Ou konpran?  Nou pa vin dir sa bann keksoz koumsa nou reste dan laverite.  Se sa ki mank respe pou bann syantifik.  Ler politisyen i vin pronons li parey  Bolsonaro laba dan Brazil, i vin pronons li lo kestyon lasante.   Nou, nou pa pe pronons nou lo la nou.  Nou  pe zis fer konnen nou bann pwen ki nou bezwen toultan fer nou travay avek respe.  E se sa ki nou pou kontinyen fer Mr Speaker.

Parey mon’n dir e mon ava termin lo la, ler peser pe kit ater i konnen li ki pe al rode.  I konnen ki bann risk ki pe pran.  Si i war pou dir lanmer i move, si i war pou dir lapli lo lorizon, si i war pou dir laliny pe flote akoz i annan bokou kouran, i kalkile, eski i vo lapenn pou mwan kit ater pou mwan lapes ouswa mon ava esper demen?

Se menm keksoz ki nou pe demann avek Gouvernman.  Akoz at the end of the day se Egzekitif ki pou pran sa desizyon.  E mon kontan tande  ki pou ganny pran par gidans sistenm lasante.  Nou, nou pe dir avek zot pran sa bann desizyon avek tou prekosyon posib.  Sa pep ki la deor ki nou, nou konekte avek pe dir avek nou pas sa mesaz avek Gouvernman.

Dir li pa zwe avek nou lasante. Pran bann desizyon byen kalkile, pran bann risk ki’n byen kalkile.  I annan risk ladan.  Nou konnen sa.  Nou pa pe deny pou dir sa i en desizyon vreman difisil, e mwan mon debout isi, parey tou mon bann koleg pou mwan salye bann profesyonnel Lasante.  Pou mwan salye zot akoz sa desizyon ki zot bezwen pran s e bann desizyon ki vreman difisil e pa toultan ki desizyon i dan zot lanmen.

Alors nou ankouraz zot pou zot pran, pou zot reflesir byen, koz avek lendistri.  Kekfwa Gouvernman pe mazinen pou dir lendistri parey Lanmerik dan serten Leta Lanmerik, pe met presyon pou zot ouver.  I pa le ka Mr Speaker.   Mwan mon ava dir ou onnetman, onnetman mon pa ti pou debout la pou mwan koz lo lapar lendistri, lo lapar Lendistri Otelye par egzanp pou mwan dir le kontrer ki zot in dir mwan.

Zot in dir mwan ki nou bezwen al ‘’molo, molo’’ e ki nou bezwen fer tre atansyon.  E ki nou pa kapab ouver pou kat touris, pou 4 touris zis pou 10 touris.  Nou bezwen fer li byen, nou bezwen fer en gran zefor, en gran zefor marketing fer sir ki bann avyon pe komans roule, e la ou ava kapab anmenn en nonm ki sibstansyel, ki vo lapenn pou nou kapab ouver sa lendistri ankor.

Antretan mon toultan mon dir se le moman pou fer repatriyasyon.  I annan dimoun deor ki anvi retourn Sesel  annou fer dan bann lareg avek prekosyon neseser.  I annan bann dimoun ki anvi kit Sesel,  bann etranze ki pe travay isi ki anvi kit Sesel  pou retourn dan zot pei,  annou fasilit sa pou zot.  Annou fer sir ki nou met nou Seselwa  ki laba deor ki pe soufer.  Mon tande bann lekol Malaisie la pe al fermen e tou dimoun pe al lo e-learning annou sey kit en zorey ouver regarde ki pe pase;- ki mannyer nou kapab anmenn nou bann zanfan retourn isi Sesel,  si sa i leka.

Donk annou fer sa bann keksoz. Annou tenir bann flights enternasyonal anba en microscope.  Annou fer sir ki nou pran tou prekosyon ki neseser.  Alors mwan mon ti ava kontan dir avek Leader Lopozisyon, ki mon napa okenn dout ki sa Mosyon – sa demann sa rekomandasyon ki i pe fer avek Gouvernman lo sa rekomandasyon, i ganny sipor gran mazorite Seselwa lo la.   Gran mazorite Seselwa  ki kontan ki annan zot lasante a ker e ki anvi plito – plito nou soufer en pti pe ekonomikman, me selman annou protez nou lasante e annou protez lasante osi bann ki pli feb

Alors mon ti ava kontan remersye ou e mwan personnelman mon pa konn lezot Manm, i dir pou dir zot pou vot kont.  Zot asire zot tou zot pou vot kont zot?  Mon pa tro, tro asire mwan.  Be solman any way nou ava vey zot nou ava gete ki zot annan pou dir, akoz si zot vot kont sa, zot pa pe montre pou dir zot in fail dan zot responsabilite e zot in fail pou zot pran en desizyon brav!

Yer zot fek dir avek Gouvernman – Onorab Leader of Government Business fek dir avek Gouvernman ‘’tasyon bann zafer sa bann zafer levy la en?  Fer mannyer –!‘’

I fek dir yer li, selman la ozordi lo sa enn i pa kapab enterfer.  Yer in enterfer, byen for en, in enterfer.   La ozordi i pa kapab enterfer.  Sa  i enterferans, me nou a gete kekfwa i pa ankor koze, mon pa kapab met impute nanryen.

Me kekfwa i ava koriz en pe sa ki son de koleg in dir, me selman mwan mon ti ava kontan vwar poudir, si zot santi si zot annan zot pous lo pou lepep Seselwa, zot ava siport sa Mosyon.  E zot ava anmenn sa lankourazman, parey nou, nou pe anmenn sa lankourazman pou nou fer, ki sa lalit kont COVID-19 i enn ki en sikse;- pa zis ozordi me demen e pour lavenir.  Mersi.

 

(APPLAUSE)

 

MR SPEAKER

Mersi Onorab Ferrari.  Mon a donn la parol Onorab Charles De Commarmond.

 

HON CHARLES DE COMMARMOND

Mersi Mr Speaker, Sir.  Mr Speaker, avan mon komans mon lentervansyon parmi bann ta mesaz ki mon pe gannyen, les mwan lir sa enn dernyen ki mon’n gannyen.  Sa enn avan dernyen Mr Speaker i dir – i annan rezon akoz apre sa i annan 2 ankor kin vini, savedir i montre sa i avan dernyen ki mon pa ankor lir. Mon a dir;-

I dir,

‘’Dir LDS Onorab Ferrari an partikilye, zot, zot pe ganny zot gro saler tou le mwan, e nou ki dan biznes touris nou a bezwen mandyan.’’  I dir ‘’nou pe note e nou pe not seryezman bliye nou vot dan lot eleksyon!’’ Vwala ki mon pe ganny dir, dir avek zot.

E mwan Mr Speaker … ah i annan ankor ki vini ankor.

Mr Speaker i kler ki sa ki Onorab Ferrari in dir e lezot dimoun ki koz atraver sa Mosyon, i vreman zot pa ekoute ki zot dir.  E tou sa ki zot dir in vid. Sa Mosyon li menm i en Mosyon vid. Sa Mosyon li menm i pa fer okenn sans!

E mon pou dir zot taler sa ki bann profesyonnel Lasante i dir mwan di zot dan Lasanble.

E mon pou lir egzakteman sa ki zot in dir mwan lir dir zot sa bann LDS.

 Mr Speaker si Onorab Ferrari ki in fek fini koze la  ti’n ekoute ki li menm li in dir i pa ti pou zanmen mont laba pou li al dir sa.

Si tou pei, si tou pei  ki annan sa viris parey in dir, tou sa pei  i annan viris.  Alors ki Sesel  li osi i bezwen fer sir i protez li.   E si tou sa pei  alors  i pran menm mezir e menm aksyon ki zot dan Lopozisyon e bann ki’n koz an faver sa mosyon i pe dir nou fer, savedir personn sa bann pei  pa ti pou – e lemonn antye pa ti pou retourn normal preski ditou!

Letan dan ou kalkil a ta ka ki annan partou Lanmerik, Italy ensidswit, me zanmen pa ozordi ki nou pou kapab retourn normal! E prezan nou lekonomi e lemonn an antye sa in dir basic ou vwar?  Konmsi i en mon pa le servi sa mo rabasman, me selman se sa egzakteman.

Mr  Speaker  lot pwen ki enportan fer resorti, tou sa ki zot in vin dir la me zanmen sa bann dimoun kot Lasante in dir sa!  Zanmen, Dr Gedeon i dir sa! Zanmen bann advisories i pe dir sa!

Zot pe evante.  Parey tou sa ki vwar lo Facebook la ki zot en vante pou fer lepep Seselwa  anvale la,  se egzakteman sa ki zot in vin fer ozordi!

E nou lo nou kote nou pa kapab tolere sa bann zafer koumsa.  E nou pa kapab al vot pou en Mosyon parey, ki napa sibstans.  E nou pou  vot ‘’kont’’ sa Mosyon!  Si i annan dimoun lo  nou kote ki le sivre zot e vot ‘’pour’’, tanpi!

Me nou an mazorite, an gran mazorite nou pou vot ‘’kont ‘’sa Mosyon!  Akoz sa Mosyon i pa dan faver pep Seselwa, i pa dan faver biznes touris, i pa dan faver okenn nanryen! Akoz i napa nanryen!  I napa sibstans! Nanryen menm i napa!  Wi.

 

(laughter)

 

HON CHARLES DE COMMARMOND

Mr  Speaker serten zot in vin dir la fason ki zot koze, e sa ankor en bann teks in dir mwan dir zot, i dir, ‘’e zot krwar zot LDS zot eksper dan tou keksoz? Zot eksper dan later dan isi, e la zot osi eksper dan Lasante?’’

I dir ‘’dir mwan, dir zot tou sa ki zot pe dir la, i vreman, vreman montre en mank de respe pou sa tim ki pe gid, nou pou sorti venker dan sa problenm COVID-19 ki nou vwar nou sityasyon lemonn i ladan.  I en pandemik e  ki nou ladan.’’

So far nou pe fer ekselan si nou pe fer dan en fason ekselan nou pe manage korekteman, savedir i montre poudir sa tim, sa lekip ki  pe fer en travay ki byen.  Si pe fer en travay ki byen e ki so far i annan bann konsey ki zot in dir nou i annan bann advisories, ensidswit.  Tou sa ki pe ganny fer tou le de semenn 2fwa Dokter Gedeon ek son tim i mont lo radyo i vini i fer Press Conference.

E mon swete dan next Press Conference Mr Speaker  demen zisteman enn bann zournalis, Clive or Ralph nenport, i poz sa bann profesyonnel kestyon zisteman lo sa Mosyon ki nou pe diskite ozordi. Mon swete zot tann mwan la e zot vreman fer sa.

Ou vwar Mr Speaker, mwan mon pa pou vin la pou nou pran en ta letan lo sa Mosyon, akoz sa ou kapab koze ziska demen bomaten pou montre ki mannyer LDS ki ler zot in vin dan sa Lasanble an mazorite, e ki zot in anbet lepep Seselwa pou donn zot sa mazorite, zot pe kontinyen anbet pep Seselwa e pep Seselwa pe dir sa voyaz ‘’forget about it!  Sa mazorite zot pa pou ganny ankor!

E eleksyon pe vini pa trakase e zisteman, akoz zot pa pe krwar dan leadership ki pe anmenn sikse dan sa pei.   E sa leadership ki pe anmenn sikse dan sa pei,  ozordi nou pe vwar li atraver Minister Lasante.  Minister Lasante Mr  Speaker,  si vreman nou pe krwar sa ki pe ganny fer dan Pei  vizavi COVID  i byen savedir leadership Dr Gedeon ek son tim through the Minister for Health ;-savedir son Prezidan li menm Mr  Danny Faure, se sa ki pe donn nou sa rezilta!

E ki bann Pei  deor taler in ganny dir i pe dir Sesel  ‘’you are an example!’

En egzanp atraver son striktir ki i annan.  Atraver sa keksoz ki ganny etabli e atraver son bann profesyonnel ki annan e atraver good leadership of the country.

Be i montre nou be si sa pei ti dan zot lanmen, ki mannyer ti pou ete?  Mon asire nou ti’n ganny detrwa ka lanmor.  Nou ti’n fini bite avek sa viris. Be mon krwar zot ti pou overthrow li, zot ti pou par lao li, zot ti pou vin en nespes diktater lo Dr Gedeon!  E sa bann profesyonnel Mr Speaker pe note.

Par kont i enportan fer resorti ki keksoz i pa depan zis lo Dr Gedeon tousel li.  I enportan kot Erport kot bann port of entries no matter ki bann desizyon korek, brav e fantastik ki nou pran, ki sa bann dimoun dan frontline i bezwen osi zwe en rol enportan.  Pa zis sa ki fizikman la, me sa ki osi pe lead par deryer.

Mon ava donn en legzanp lo sa ki mon pe sey dir pou ki i ede ranforsi sa bann desizyon ki sa lekip Public Heath pe fer.  Ou pran ou lo Erport.

En pasyan en dimoun ki’n ganny en aksidan ouswa ki dan en problenm lasante, i sorti Praslin i pe vin Mahe e lanbilans pe vin zwenn li kot Erport.  Mon donn sa legzanp pou kapab konpran ki mannyer vizilans i enportan.  E sa nou bezwen sirtou la egzers en pli o nivo vizilans lo bann port of entries.

E sa dimoun ki dan sekirite kot Erport, ki vey baro pou lanbilans antre, i pa’n ganny averti li pou dir i annan emergency pe vini e lanbilans pe ale.  E alors i kit son baro fermen akoz si i ouver kan pa ti neseser i kapab ganny pouse travay perdi son bouse manze.

Mon pe dir sa pou montre e Air Seychelles osi pa’n dir, be la prezan si sa lanbilans i tarde sa pasyan i kapab osi si i grav i mor.

Mwan mon dir sa pou montre pou dir kot sa bann port of entries la, i enportan ki vizilans ekstra i ganny fer.  Ki vreman la nou bezwen smart and sharp, pou ki vreman okenn ka i pa antre, kan pa fodre antre.

E i enportan fer resorti personn ni Dokter Gedeon, ni nanryen, personn pa’n dir ki apartir li 01 Zen, Erport pou ouver pou nenport ki, nenport kwa!  Personn pa’n dir!

Sa  i bann lenvansyon Lopozisyon. Zot tou ki’n koz e pe dir it’s as if lo Erport konmsi apartir le 01 Zen tou avyon pou vini pe anmenn touris! Be non! Pa’n dir sa.  Kote ki in dir?

I montre ou ankor ki mannyer zot sey bat latet dimoun e pe kontinyen bat latet dimoun! Les mwan prezan Mr  Speaker  avan mon vin lo konklizyon final, dir avek nou Lasanble ki bann profesyonnel ki pe deal avek COVID-19 i dir mwan pas sa mesaz avek Lasanble.

I dir mwan mon pe donn ou an Angle lir li an Angle.

‘’All that can be done for surveillance at port of entry has been done already or will be completed in May;- that is training, frontline staff at ports who had not been trained yet health, symptomatic, checks of passengers, thermal scanners installed at Arrival and Transit.’’ Tousala pe ganny mete sa.

Prezan zot dir mwan lot pwen sa dir zot, ‘’Protection of population is a shared responsibility. Messages and activities for people’s engagements started many months ago and will be continued for a long time given that COVID-19 will be with us for sometime.’’  E zot dir mwan dir sa pwen lo sa Mosyon. I dir  ‘’a totally full proof protection program, as suggested in the Motion does not exist anywhere in the world;- even in the world with worst cases, because it is not humanly possible. What we have are best practices that are well anchored on sound public health principles, that have been put in place.’’ Dir avek  zot – i dir mwan dir avek zot, ‘’Aret enterferans politik dan Public Health silvouple!’’

‘’In June when commercial activities opened up in the Airport,  travel restriction through Public Health advisories,  will still be in place for countries that are still at risk .’’

Si zot pa’n konpran, pa’n tande dir nou a redir ankor, ‘’Travel to and from such countries will not be allowed !’’(Onorab Ferrari ekoute)

‘’  It has been projected by aviation experts that the airline industry will not pick up until after July or August, since the number of passengers that can enter will make regular flight not  be viable.  Therefore the June gradual opening will allow Seychelles to ease back into commercial travel in a controlled and safe manner.’’

Nou konpran sa bann keksoz ki pe ganny dir ?   Pou ki napa nanryen ki’n dir la, parey zot, zot in vin dir avek nou Lasanble ?  E erezman nou bann dimoun deor in tann mwan ankor la.  E demen zot a tann ankor dan bann Press Conference, e zot a konpran ki mannyer nou’n contain sa viris ziska la, e ki mannyer nou bezwen perform e sorti ladan dan en fason sistematik, korek e venker.

An finisyon Mr Speaker i enportan dir ‘’the cure cannot be worse than the disease.’’  Avek sa mon swete zot konpran poudir sa Mosyon i pa tenir substance e sa Mosyon nou devret zet li.  Si nou pa zet li,  nou demann Lotorite just ignore it!  Thank you very much Mr Speaker.  Nou pou vot ‘’kont ‘’sa Mosyon!  Mersi.

 

(APPLAUSE)

 

MR SPEAKER

Mersi Onorab De Commarmond. Bon mon a retourn parol avek loter Mosyon pou fer son konklizyon son bann remark konklizyon.  Onorab Wavel Ramkalawan.

 

HON WAVEL RAMKALAWAN

Mersi bokou Mr Speaker. Mr Speaker premyerman mon remersye tou bann Manm ki’n entervenir lo sa Mosyon.  Mon bezwen dir, parey mon ti dir o komansman sa Mosyon i enn ki mon ti anvi i solisit en refleksyon.

E mon krwar ki monn reisi solisit en bon refleksyon lo sa Mosyon.  Nou’n ganny diferan entervenan ki’n prezant diferan eleman ;- bann ki’n koz pour, bann ki’n koz kont.

E bann ki’n koz pour i lo tou le de kote latab tandis ki bann ki’n koz kont i zis lo en kote latab.  Selman mon ti ava kontan premyerman dir ki mwan, mon konnen ki sa Mosyon in aktyelman ed Dr Gedeon avek son lekip.

In osi ed bann profesyonnel.  E pour lenformasyon Lasanble Nasyonal, an mezir ki keksoz in pase la apre midi, mon kontan e mon ti ava remersye bann profesyonnel ki’n antre an kontak avek mwan.  E pour lenformasyon sa bann ki pa konnen louvertir Erport, bann profesyonnel ti pe planifye pour fer li komansman Septanm. Se sa ki zot ti pe mazinen.

E i annan en sours presyon e sa sours presyon se Air Seychelles. Air Seychelles ki pe met presyon pou ki Erport i re ouver pli boner e zot anvi retourn Maurice, Lenn avek Sud Afrique.

Se sa ki’n sanz tou keksoz akoz zot panse zot pe servi larzan.  Alor bann profesyonnel mon espere ki sa deba i ed zot parski nou parey mon’n dir o komansman nou pa pe rod dat, nou, nou pe rod kondisyon.

E la Mr Speaker mon anvi an menm tan osi, letan nou pe rod preparasyon –  mon konnen poudir Minister Lasante i mank li en kantite lekipman. Par egzanp ozordi menm letan nou pe koz lo bann thermal thermometers, mon ti ava kontan si demen dan sa Konferans De Pres  parey Onorab De Commarmond in demande, ki Dr Gedeon i dir avek nou ki kantite sa bann termomet zot annan dan pei dan zot stok ?

E nou pou soke mon plis ki sir pou nou aprann ki kantite. Me selman mon ti a kontan ki Onorab De Commarmond i pas en mesaz si i en vre mesaz avek sa dimoun ki dan biznes touris, poudir avek li menm si Erport i ouver, e mwan si mon ti Onorab De Commarmond mon pa ti pou lir sa mesaz.

Ou konnen akoz mon pa ti pou lir sa mesaz Mr Speaker?  Akoz enn, napa mesaz.  Enn, i obvious!

 Me dezyenmman mwan si mon ti Onorab De Commarmond mon ti pou servi mon lentelizans, parske Onorab De Commarmond in montre nou poudir in ganny en mesaz e i pa’n servi son lentelizans.  Parski i ti ava reponn sa dimoun poudir, get sa mon frer menm si Erport i ouver le 01 Zen pou napa okenn touris ki pou vini!

E alor parey dan son lenvansyon menm si tou Manm Lasanble dapre li i pe ganny bann gro lapey, e li osi tou i parmi ou, ou pa pou ganny okenn touris ! E petet osi tou avan mon ti ava pran sa mon ti ava demann sa dimoun frer, ser, sa dimoun imaziner, konbyen booking ou’n gannyen pou mwan Zen?  Konbyen booking ou’n gannyen pou man Zilyet?  Konbyen booking ou’n gannyen pou mwan Out?

E larepons, ou ti ava sir avek sa dimoun mon pa konnen imaziner ensidswit, tou sa bann zafer parski la ou pa konnen, i ti pour dir avek ou’’ zero, zero, zero !’’ E se sa la realite ozordi.

Alor nou a koz lo bat latet dimoun?  Onorab De Commarmond! Ou menm ou’n fek dir si Onorab Ferrari ti ekout son lekor, i pa ti a dir bann keksoz ki in dir.  Be i ti bezwen dir avan pou li ekout son lekor! Mon pa ganny en konpran mwan!  Mon pa konnen si lefe COVID.

Sa e mon pa konnen si demen i ti a demann Dr Gedeon si sa i en lefe COVID.  I en lefe konfinman kot i fer ou panse pa drwat anymore.  I fer ou vin dir en ta bann  keksoz.

Parski Mr Speaker, wi, be zisteman parski mwan apre ki mon’n ekout 4 Onorab lo lot kote latab an partikilye, Onorab Loze, Onorab Pillay, Onorab Gill avek Onorab De Commarmond, pa konnen kot zot debout. Problenm bannla !

Enn i dir, kontan mon prezantasyon.  Mersi bokou ou kontan  mon prezantasyon.  Enn i dir i kontan mon prezantasyon. Onorab Pillay i dir Mosyon pa ti’n devret zanmen ganny prezante.  Onorab Gill i krwar ki poudir sa Mosyon i donn en bon loportinite, pou remersye bann – in nonm omwen 4 diferan zoli loportinite ki sa Mosyon i donnen.  E  beautiful !  Beau..ti..ful !

 

(laughter)

 

HON WAVEL RAMKALAWAN

E Onorab De Commarmond li i krwar ki poudir sa Mosyon, manman napa kalite keksoz ki i pa’n dir.  E in menm annan en konklizyon final apre sa in annan en konklizyon, e son konklizyon final ti vin avan son konklizyon lefe COVID-19.  Be mwan, mon ti a kontan dir Mr Speaker be sa loto US i dan en gro problenm ! Pa bezwen penn zis kapo, ouver masin e get ladan. Parski dan masin ki annan problenm!  Pa bezwen penn zis kapo get dan masin.

Mr Speaker nou’n anvi fer en refleksyon.  E mon’n dir zot annou fer en refleksyon petet ou konnen mwan, mon pa kontan sa zwe ki zot in sey zwe an relasyon avek bann Minister dan Lasante.

Nou tou ki la nou bezwen rekonnet e letan ki mon ti pe grandi, ti annan en  fraz ki en dimoun ti’n dir.  I dir ou war bann Dokter zot bann dimoun pli sanse dan lemonn.  Soley i glorifye zot sikse, e later i kouver zot febles, zot bann failures, Dokter  parey nenport dimoun zot pa Bondye.  Dokter pa Bondye li. Dokter pa parfe nou tou ki la nou pou rekonnet Dokter pa parfe.

Konbyen leksperyans ki nou menm nou, nou’n fer kot Dokter in fer fot. Konbyen dimoun kot enn zot bien aime in mor, e zot in vin kot nou poudir fot medikal! Konbyen case ki’n al Ankour.  E Minister Lasante in bezwen peye, akoz parski i annan fot medikal ki ganny komet.

E alor annou pa krwar ki poudir akoz en Dokter i dir en keksoz tou keksoz i parfe.  E mwan mon soke letan mon tann Onorab Sebastien Pillay pe met dout lo lafason, ‘’ar Dokter in dir sa’’ ensidswit, be sa menm Onorab Pillay konbyen fwa in al fer tapaz dan bann klinik! Konbyen in fer tapaz dan klinik kriy ek Dokter, kriy ek ners?

Wi Onorab Pillay, mwan ki pe dir.  Konbyen fwa ou’n fer sa?  La ozordi ou vin dan Lasanble ar nou pe soz ek Dokter nou pe, be Dr Gedeon  petet si zot, zot per poudir mwan mon ava dir.

Be Dr Gedeon Mr Speaker, Dr Gedeon i en imen parey nou !  Be si nou, nou koz ek Bondye nou tou koman krwayan nou kapab koz avek Bondye, be si nou koz ek bondye nou pa kapab koz ek en imen?  Be Dr Gedeon i konn byen sa li.  Parey tou bann lezot dimoun.  Zot konn sa tre byen.

E alor si i annan serten bann keksoz ki nou santi, konsey ki nou kapab donn Dr Gedeon, nou koman en Manm Lasanble nou ganny drwa donn Dr Gedeon konsey.  Menm parey avek en nenport eksper en nenport profesyonnel, nou annan drwa pou nou donn konsey.

E si nou, nou en Manm, nou en Lasanble Nasyonal koman politisyen, pa vin dir nou pa kapab koz lo lasante?  Be depi kan?  Be dan sa ka dir nou kwa ki nou pou ganny drwa koz lo la?

Dan ledikasyon nou pa pou ganny drwa koz lo ledikasyon akoz nou pa bann eksper ledikasyon?  Nou pa pou ganny drwa koz lo la, bomaten nou’n pas en Lalwa lo noter, dan sa ka zis Onorab Georges ki ti devret koze zot de Onorab Andre?  Nou pa ganny drwa koz lo la?

Be akfer ?  Nou koman en Lasanble Nasyonal, nou ganny drwa koz lo tou size.  E  mwan mon ava dir wi nou’n ganny proteze pandan sa 2 mwan ki’n pase.

E la mon dakor avek Onorab Waven William, parski nou de Onorab William depi yer nou’n komans nou diskour dan menm fason.

Se Bondye Tout Puissant ki’n protez nou pei Sesel, e se li ki nou devret donn li tou laglwar e tou loner e sant son louanz!

 

(APPLAUSE)

 

HON WAVEL RAMKALAWAN

E Bondye i kontinyen vey lo nou.  Bondye wi i donn nou tou.  I pa donn zis Dokter lasazes dan sa sityasyon COVID.  I donn nou tou.  I donn nou ki la dan sa Lasanble tou, pou nou fer sir ki nou donn bon direksyon.  Nou donn bon konsey, parske nou tou nou annan en rol pou nou zwe.

E wi, Dr Gedeon i pran lord li osi tou.  E se la kot mon dir zot penn zis kapo loto, zot pa regard dan masin.  Be Dr Gedeon in bezwen swiv lord.  E Onorab De Commarmond in dir, son Minis lekel?  Son Minis se Mr Faure.

E letan Sesel in fer sa Lagreman avek Botswana, be pa li menm li in dir ‘’mon pa ganny drwa dir.’’ Li ki’n dir nou dan Konferans De Pres.  I pa ganny drwa dir, i pa ganny drwa dir, kote sa bann dimoun i été, akoz sa i dan Lagreman.

Be si i ti annan tou laliberte i ti ava dir.  Savedir li osi tou i bezwen swiv li osi tou i a pe servi en Sef.  I annan en sanson ki ti dir nou tou nou bezwen servi en dimoun.  Nou tou koman imen nou servi en lot imen.  Parski nou tou nou annan en lot dimoun ki par lao nou. Nou tou nou annan direktiv ki nou pran.

Alor Mr Speaker, mwan mon trouv i drol ki mannyer sa deba serten laspe in deroule.  E mon kontan enn bann mesaz ki mon’n gannyen, i dir ‘’our thoughts are about making the right decisions for our people and our country, and to think and behave as grownup individuals in the Assembly.’’ 

This is what nou nou’n fer.  Nou’n sey fer en refleksyon.  E mon, mon konnen poudir ki sa refleksyon, sete nou ti pe mazin nou pei.  Nou pe mazin ki mannyer keksoz pou re ouver san ki nou tonm dan sa menas, kot i kapab annan bann konsekans vreman, vreman serye.

E Mr Speaker nou’n dir tou ki annan pou dir.  Nou’n koze a an mezir ki bann Manm ti a pe koze, mon ti pe zis regarde n prediksyon ki zot pe fer pou Itali ;- si Itali i ganny en 2enm wave.

Zot pe dir si 20poursan popilasyon i zis retourn travay zot kapab ganny zot 30mil nouvo cases.  Si 40poursan i retournen e la nou pe koz lanmor la nou pa pe koz zis bann keksoz nou pe koz deaths. Sa bann prediksyon.

E si 40poursan zot kapab trouv zot avek 53mil lanmor within 8weeks, dan sa 2nd wave.  E si zot pa pran bann prekosyon, e bann lezot pei tou pe kontinyelman fer sa bann analiz.

Mwan, monn osi ganny mesaz sorti kot ners ki’n bezwen eksperyans karantenn.  Ners i dir wi i enportan pou ki nou pran letan.  E ki nou very careful.

I menm annan en pasyan ki’n anvoy mon, en dimoun ki’n ganny COVID-19.  E in rakont mon ki mannyer se li ki’n bezwen met li devan pou al fer bann tes akoz letan in swiv the history ki mannyer ti été, i ti santi ki li osi tou i negativ.

Wi nou pou kontinyen dir mersi nou bann dimoun dan Minister Lasante e tou bann dimoun ki lo frontline. Nou rekonnet ki poudir zot imen e dan zot limanite i annan febles e i annan fot ki zot pou osi fer. Me selman nou, nou annan konfyans ki poudir nou ava kapab letan nou tou nou koste ansanm, nou ava kapab mannye sa.

E Mr Speaker letan mon pe anmenn sa Mosyon osi mon pa pe zis koz lo sa maladi. Nou pe koz lo son bann konsekans. Lo konsekans ekonomik.

E mon kontan ki serten Manm in koz lo ki mannyer nou met Sesel annord. Ki mannyer, e yer nou’n pas tou sa bann letan pou koz lo lagrikiltir, lo food security. I annan en kantite keksoz pou nou fer. Letan par egzanp nou ankor pe regard nou nivo prodiksyon.

Byensir la i moman, mwan, mon ti ava dir la i moman pou nou pa koz prodiksyon 23 poursan, Prodiksyon 40poursan.

La i moman pou nou pouse pou ki prodiksyon i vin pli pre avek 100poursan, pou nou kapab koup lo lenportasyon e pou nou kapab fer lekonomi nou forex e gard nou larzan pou nou kapab fer bann lezot keksoz.

Alors ki mannyer nou met nou annord? Nou pe koz en kantite. E pandan sa lock, pandan sa lockdown nou’n osi trouv bann desizyon bet.

La par egzanp Mr Speaker mon ava donn ou en legzanp bet. Nou annan nou 2 quarry isi, 2 quarry CCCL avek UCPS. Pandan sa peryod lockdown olye defann sa 2 quarry prodwi bann materyo konstriksyon, sa ti en landrwa kot zot ti devret pe prodwi materyo Konstriksyon, pou ki letan pei in re ouver Lendi. Olye ki bann kontrakter bezwen al espere ziska depi 4er bomaten, 3er bomaten, zot tou zot ti ava gannyen. E la se zis demen ki zot pou kapab vann materyo.

I annan en kantite desizyon ki pa ti devret ganny fer.  E ankor enn fwa mon, mon pou retourn ankor kot Bondye. Parski pandan sa peryod curfew, curfew ti 7er bomaten ziska 6er diswar, ou ti a krwar ki poudir sa viris la i en viris ki travel aswar.

Be pandan lizour letan tou bann dimoun ti lo stenn. Letan tou bann dimoun ti dan supermarket. Letan tou bann dimoun ti dan bis tata. Sa viris li i pa ti kapab marse ?

E se sa bann desizyon ki fer dimoun poz kestyon. E nou koman en Lasanble nou bezwen poze kestyon! E i annan en kantite bann desizyon mon krwar ki letan nou pou regarde.

Letan Minis Finans yer i vini i dir avek nou, i pa ankor konnen konbyen Beau Vallon Bay pou sarze. E pou zot lenformasyon ozordi Beau Vallon Bay in anvoy en kont, in anvoy en bill kot Gouvernman e Gouvernman i dan en sok letan in ganny sa bill!

Akoz se la aprezan ki i konnen vreman konbyen zot pe ganny sarze. E byento nou ava konnen konbyen egzakteman i ete. E nou tou, I mean pandan sa lockdown kot ozordi zot pe koz lo tou bann problenm, ki kantite letan pou pran ensidswit, be tou sa bann dimoun bann financial dimoun dan bann diferan Departman Gouvernman, si ti’n byen planifye, pa ti kapab ganny zot pou ede?  Pou ede pou sort out sa bann zafer?   Be zot in reste se zot.  Tousala i apel planifikasyon.

E mwan mon pou dir onnetman e parey bokou Seselwa i analize, bokou Seselwa i war.  Menm Lapolis, wi Lapolis in maintain en curfew, me sa pa vedir ki Lapolis in fer son travay 100 poursan.

Wi in ede, me selman i annan en kantite keksoz mal ki in fer.  E mwan Mr Speaker se pou sa rezon mon pa ti ezite pou mon defann dan mon big interview Onorab Valmont. Akoz mon krwar ti annan en mankman la, be sa boug ti se li ! Ou pa pran en boug se li pou met li an detansyon. Ou kit en boug se li. Ou ava fer keksoz dan en lot fason.

Bann problenm ki’n arive Grand Anse Mahe, ki’n arive avek Spiderman, ki’n arive avek tou sa bann lezot dimoun.

Byensir nou pou asize nou pou fer, (Spider) nou pou fer tou bann diferan analiz e nou pou war ki poudir i annan en kantite bann keksoz ki.

E nou bezwen fer sa koman en pei.  Koman en pei i enportan pou nou fer tou sa bann analiz, pou nou kapab pa repet ankor sa bann menm fot. Nou bezwen fer keksoz dan en fason pou nou bouz devan.

E Mr Speaker mon’n prezant sa Mosyon, mon kontan ki poudir in annan sa deba.

E nou, nou anvi dir avek bann dimoun ki dan bann pozisyon responsab, ki poudir lo nou kote dan LDS nou pou toultan pran nou responsabilite !

 

(APPLAUSE)

 

HON WAVEL RAMKALAWAN

E letan nou pran nou responsabilite nou pou demann kestyon kot fodre demann kestyon. E parey Onorab Ferrari in dir si zot, zot per pou demann kestyon nou, nou pa per pou demann kestyon. Akoz nou, nou koz ek Bondye e si nou koz ek Bondye nou bezwen kapab koz avek imen parey nou.

Alor Mr Speaker mon dir tou ban dimoun ki annan bann pozisyon responsab kouraz. Parey toultan mon dir avek zot, zot annan nou sipor e nou, nou pou kontinyen apiye pou ki Sesel pa ganny anvair avek viris COVID-19.

Ki nou pep i viv an sekirite. Ki nou pep i viv an bonn sante. Kouraz e tou benediksyon dan zot travay e Bondye Tou Pwisan kontinyen beni nou pei Sesel! Mersi bokou.

 

(APPLAUSE)

 

 

MR SPEAKER

Mersi Onorab Ramkalawan. Bon in ariv moman pou Lasanble pran en desizyon. Pou pran en vot lo Mosyon ki lir konm swivan ;-

Lasanble Nasyonal i demande ki Gouvernman i gard nou frontyer fermen pou viziter, ziska ki sityasyon COVID-19 dan lemonn i amelyore, e ki i annan en sistenm deteksyon efektiv pou sa viris ki an plas, oubyen en progranm proteksyon pou nou popilasyon ki’n fini ganny aplike.

Mon ava demann tou Manm ki an faver? Okenn Manm ki kont?  Mersi.  Madanm Deputy Clerk?

 

MADAM DEPUTY CLERK

Mersi Mr Speaker.  Mon’n rikord 18 Manm ki’n vot an faver e 10 ki’n vot kont.  Mersi.

 

MR SPEAKER

Mersi Madanm Deputy Clerk. Savedir Mosyon in ganny aprouve par Lasanble.  Bon avan nou kite pou sa semenn mon zis anvi fer tou manm konnen ki nou’n fini tou travay lo nou Order Paper.  Me ti annan en klarifikasyon, en keksoz ki Leader Lopozisyon ti leve pli boner.  Mon’n esey rod klarifikasyon e mon’n ganny atraver en sours kot Departman Lasante. E mon annan sa pou mon partaze.

Lanons pou repatriy bann pasyan ti ganny fer dan Konferans Lapres Zedi le 30 Avril. Bann laranzman pa ankor ganny finalize.  E an vi ki Lenn i ankor dan lockdown, negosyasyon pe kontinyen. Se selman apre ki en lagreman in ganny agree in ganny arive a, ki Lopital Miot e bann pasyan pou ganny enformen.

 

Departman Lasante i anvi retourn nou bann pasyan isi Sesel, me napa naryen ki’n finalize e konfirmen. Departman Lasante pou kit bann pasyan e bann Direkter Lopital, bann Lotorite lopital enformen. Alor viola lenformasyon ki mon ti anvi partaz avek Lasanble.

Yes, Onorab Pillay? Onorab Sebastien Pillay.

 

HON SEBASTIEN PILLAY

Mersi Mr Speaker. Mr Speaker an akor avek nou Standing Orders i annan en komanter ki’n ganny fer ki donn lenpresyon ki mon pas mon letan drive partou kot tou bann klinik e al fer tapaz ek bann Dokter. I totalman kontrer. Mon krwar ou devret  get byen ou facts, akoz si ou’n ganny sa bann lenformasyon, ou devret vey byen sa bann lenformasyon avan ou pas li ek ou Leader.

 

MR SPEAKER

Onorab, ou’n fer ou pwen?

 

HON SEBASTIEN PILLAY

Ok. Mon le met sa lo rikord Mr Speaker. Akoz mon rapel i annan 1fwa wi.  Sa fwa ti an 2009 e sa zour ti zour ki mon papa ti mor. Sa fwa ti an 2009 e sa zour mon papa ti fek mor. That was the day ki petet en zour.

Napa en dimoun la anndan, enkli Onorab Ramkalawan osi, ki pa’n deza ler ou dan en bereavement oubyen ou’n dan en moman difisil, ki ou’n eksprim en lakoler.

Me i pa’n zanmen en lakoler entansyonnel towards okenn dimoun. So sa zour ki mon ti fer sa, ti sa.  Me selman sa ki pe donn sa bann lenformasyon Mr Speaker, parey taler ou’n lir, i montre fodre nou verifye nou bann facts avan nou vin impugn karakter nou kanmarad. Mersi Mr Speaker.

 

MR SPEAKER

Mersi Onorab. Ou pwen in note. Bon mon anvi enform bann manm ki Sitting semenn prosenn. Lo kote Bills nou pou annan sa bann Bills swivan lo Order Paper, Children (Amendment) Bill, 2020. State Land and River Reserves (Amendment) Bill, 2020. Nou pou annan Defence (Amendment) Bill, 2020. Employment (Amendment) Bill, 2020. So nou pou annan nou 4 Bill ki Bills Committee ozordi in agree ki nou kapab pran semenn prosen.

Bann lenformasyon sa bann Bills, sa bann amannman in fini ganny partaze avek bann Manm. E okenn lezot lenformasyon ekstra ki Bills Committee i santi i neseser ki bann manm i gannyen zot ava kapab gannyen. Yes, Onorab Ferrari?

 

HON JEAN-FRANCOIS FERRARI

Mr Speaker i annan en nouvo ler ki nou sipoze vini demen?

 

MR SPEAKER

Non mon’n ganny enformen anvi ki i annan plizyer meeting demen nou pa pe kapab, nou ti pe sey re schedule sa meeting pou apre midi.  Me nou pa pou kapab nou bezwen kontinyen fer li bomaten. E sa i en meeting Bidze kot Sekretarya i osi tou envit reprezantan sa 2 lofis.

Akoz Bidze Lasanble.  Menm  dan bann lenformasyon kot Bidze ki’n ganny amande ki nou bezwen partaz avek zot – ok ?  E nou pe regard osi tou e petet revwar nou bann, nou Bidze nou bann diferan vot pou lannen prosenn. Ok?

Nou pe fer li demen bomaten 10er menm dan Speakers Conference Room. Nou napa en lot swa.  Ok, so nou ti a kontan ki at least le 2 lofis i anvoy kelken pou reprezant zot.

Bon apre sa mon ti a kontan remersi tou bann Manm pou travay ki nou’n fer pandan sa 2 zour. Remersye bann manm piblik ki’n swiv travay Lasanble e byensir mon remersi bann travayer, bann staff Sekretarya e osi tou bann travayer SBC ki’n ed nou pou nou kapab transmet sa 2 zour Sitting avek lodyans deor. Avek sa mon anvi anonse ki prosen Sitting i pou Mardi le 12 Me 9er bomaten. Lasanble i stand adjourn.

 

                             (ADJOURNMENT)