::
Home » Verbatim » 2020 » Verbatim Tuesday 7th April, 2020

Verbatim Tuesday 7th April, 2020

NATIONAL ASSEMBLY OF SEYCHELLES

 Tuesday 7th April, 2020

The Assembly met at 9am

National Anthem

Moment of Reflection

Mr Speaker in the Chair

 

MR SPEAKER

Bonzour tou Manm Onorab. Bonzour tou nou bann zofisye ki anler dan Galeri e byensir tou dimoun ki a lekout e pe swiv travay Lasanble Nasyonal. Ozordi lo nou Order Paper nou annan en sel biznes, savedir Second Reading pou Appropriation (Amendment) Bill 2020. Zis avan nou pran n nou travay lo nou Order Paper, anvi ki ozordi lazournen travayer lasante. Dan mon kominike mon pou lir en mesaz pou sa lokazyon.

Avan nou komans nou travay bomaten permet mwan pas en mesaz a lokazyon Lazournen Travayer Lasante ki ozordi.

‘Dan sak zour i annan 1440 minit.  Sa i vedir nou tou nou annan 1440 loportinite par zour pou nou fer en lenpak pozitiv dan nou lavi e dan lavi lezot dimoun. I egzakteman dan sa fason ki mon war bann travayer lasante, kot sak sa bann minit zot pe dedye zot letan pou fer sa diferans pozitiv.  Sa i en group dimoun ki travay lo front line pou deservi nou pep dan tou lenstans kot nou bezwen servis medikal.

Nou bann Dokter, fanm sarz, ners, fizyo terapis, farmasis, tou lezot travayer e sipor enkli sa bann ki travay dan kominote. Zot ki backbone pou en sistenm e servis lasante efektiv. Zot avek nou partou, bann care givers edikater zot form parti nou fanmir zanmi, zot nou vwazen, fanm ek zonm ki fer en diferans par natir zot servis ki zot ofer.

I enportan pou nou rekonnet lenportans devlopman resours imen dan devlopman sosyo ekonomik. Okenn pei pa kapab devlope oubyen atrakte lenvestiser, si napa en lafors travayer an bonn sante ki kapab delivre o maksimonm. E la se nou bann travayer lasante ki devan, pou asire ki nou reste an bonn sante par sa bann swen profesyonnel ki zot ofer nou sitwayen.

Mon lans en lapel avek tou anplwayer dan Sekter Lasante;- ki swa piblik ou prive, pou kontinyen eksplor bann fason pou zot renimer nou bann travayer lasante pou kit zot angaze dan sa profesyon nob.

E nou koman bann Lezislater nou a ede dan nou fason pou asire ki zot rol i ganny byen rekonnet e rekonpanse. Sirtou la kot lemonn pe fer fas avek sa pandemik COVID-19. Sesel pan ganny eparnye. mon felisit tou travayer lasante ki pe met zot lekor a risk, e ki pe travay san ses pou swiv sa sityasyon de pros. Pou fourni sa swen neseser e pou rod fason pou met sa sityasyon anba kontrol dan en fason konpetan e profesyonnel.

Pandemik COVID-19  parey osi avek lezot irzans ki zot fer fas avek, i ankor enn fwa montre nou bann zefor eroik ki nou travayer lasante i fer fas avek tou dilon zot karyer, dan zot zefor sanses pou pran swen avek nou kominote e avek sa pep.

Mon osi profite pou lans en lapel avek tou Seselwa pou kontinyen ekout konsey bann profesyonnel lasante vizavi sa pandemik, swa dan lakour oubyen dan piblik. Anmezir ki nou bann travayer lasante pe fer tou pou adres sa sityasyon e pran swen avek bann ki malad oubyen dan karantenn, i osi zot responsabilite pou vey zot lasante e pran tou prekosyon neseser. Tou dimoun san leksepsyon i annan en rol pou zwe pou kas sa lasenn lenfeksyon.

La mon demann Gouvernman pou envestir plis dan training pou nou bann travayer lasante, pou kit zot azour avek bann nouvo devlopman dan sa domenn pou ki zot a toultan pare pou fer fas avek okenn lirzans, lepidemi oubyen pandemik.

Lazournen Travayer Lasante i selman en zour. Me sa travay nob ki zot fer i merit ganny rekonnet tou dilon lannen. Mon krwar fermeman ki lasante e byennet i zwe en gran rol dan lavi sak endividi. E pou sa rezon mon’n toultan estim bann travayer lasante, ki asir en bon servis lasante pou tou zot frer ek ser. Apre tou mon kontan fer mon lekor rapel ki rezon pou mon legzistans toulezour i depan osi lo lezot dimoun otour mwan. Si pa zot kote mon ti pou ete?

Mon konklir mon mesaz par salye zot tou e dir zot en gran mersi pou sa travay difisil, me nob, ki zot pe kontinyelman delivre avek efikasite e profesyonnalizm. Malgre tou bann defi ki zot pe fer fas avek depi sa detrwa dernyen mwan, mon swet zot kouraz e swet zot en bon Lazournen ozordi. Ki avek zot devosyon e profesyonnalizm nou pei Sesel a sorti venker.

Mon pou envit le de Dirizan pou dir de pti mo apre nou ava fer en zes, kot nou tou nou ava debout ansanm e nou ava kapab aplodi nou bann travayer lasante. Onorab Charles De Commarmond.

 

HON CHARLES DE COMMARMOND

Mersi Mr Speaker. Bonzour Mr Speaker. Bonzour tou manm Onorab e tou dimoun ki a lekout. Bann ki dan Galeri enkli. Mr Speaker ozordi le 7 Avril parey in ganny dir se Lazournen Travayer Lasante, pa zis dan Sesel me dan lemonn antye. E nou isi Sesel nou konn tre byen poudir i annan plizyer lannen ki sa Lazournen i pe ganny osi selebre dan nou pei. E la nou profite pou remersye tou bann travayer lasante. Tou bann dimoun ki annan en rol pou zwe e ki annan en koneksyon avek lasante nou pep. E osi nou mazin tou bann travayer lasante dan lemonn antye, akoz i osi annan Seselwa dan lemonn ki pe fer travay nob. I annan ki mon konnen in pass away me selman i annan ki ankor la lo front line. Nou pe mazin zot tou a sa moman la.

Mr Speaker dan sa travay enportan, dan tou bann pandemik si ou le, ki arive dan lemonn nou vwar ki toultan travayer lasante se zot ki lid batay. Se zot ki devan dan sa batay e zot fer bann sakrifis enorm dan sa misyon    difisil ki zot annan. Zot pran bann risk ki bokou nou, nou pa ti pou le pran. Bann risk telman serye ki parfwa i kout lavi, i kout zot lanmor menm. Risk parey nou dir ki ek lavi ek lanmor. Zot osi fer bann sakrifis enorm.

Zot mank lannwit e nou isi nou vwar koman nou bann travayer lasante a sa moman la ki nou ladan i pe fer sa travay, sa extra mile plis. Pou fer sir ki nou konbat sa pandemik, sa viris ki’n ariv osi dan nou pei.

Mr Speaker sa bann travayer, dimoun dan lasante zot osi fer fas avek bann sityasyon ekstrememan difisil e la nou profite ankor enn fwa pou dir zot – E souvandfwa letan zot pe fer tou sa travay nou pa rekonnet, nou pa pe valer sa travay, nou a pe donn valorizasyon sa travay e nou pa dir zot mersi. Souvandfwa nou bliye, nou zis pas atraver. Nou profite la a sa lokazyon pou dir zot mersi pou tou sa travay nob. Pou tou sa travay enportan. Pou sa devosyon dan sa vokasyon ki zot ladan. Akoz sa ki zot ladan i plis ki en travay, i en vokasyon menm. E la nou profite pou dir zot mersi, mersi e mersi ankor enn fwa.  E nou osi demann zot pou donn ankor sa extra mile.  Donn ankor sa travay sa devosyon pou kapab ede ki nou kapab konbat sa pandemik ki la devan nou.

Travayer lasante Mr Speaker zot fer bann keksoz ki nou pa pe mazinen, parfwa dan nou bann problenm, dan maladi ki nou krwar i fasil, en senp aksyon enportan. En senp aksyon ki sorti dan leker e dan kapabilite en travayer lasante i sanz nou lavi konpletman. E se la kot sa lapresyasyon i vini. E mon demande ki nou pep an antye i mazin bann travayer lasante e ki nou pran, e nou deside pou pran aksyon, en fason pli enb avek zot. Pou nou kapab arete dir zot bann keksoz ki pa bezwen dir. Arete maltret zot. Arete pran bann aksyon mal.

I annan de ka nou’n vwar kot i annan abi fizik. Tou sa bann keksoz la nou pe dir ek nou pep e nou pe dir osi, lans en lapel atraver lemonn annou respekte sa bann profesyonnel lasante. Respekte bann travayer lasante. Annou donn zot sa sipor pou ki zot anmenn nou lasante bokou pli devan.

Mr Speaker mon profite osi la pou remersye davantaz Dokter Gedeon ek son tim, akoz sa travay ki zot pe fer i en travay eksepsyonnel.  En travay dan en moman kritik e en travay ki mon war zot pe reisi. Zot pe reisi akoz la nou vwar ki atraver zot devouman, atraver zot konviksyon, atraver zot determinasyon, atraver tou sa travay enportan ki zot pe fer nou vwar poudir i annan dimoun ki pe recover. Nou vwar poudir i annan 2 dan bann ka pozitiv ki’n recover. Se gras a zot devosyon ki zot in anmennen. Sa konbat ki zot in krwar ladan e ki zot pe donn tou.

E nou demande osi ki nou bann dimoun, nou pep i ekoute sa ki bann profesyonnalizm profesyonnel lasante pe dir nou. I paret mwan ler mon’n ekout sa ki’n arive yer swar, i paret mwan ki sa viris in ariv lo nivo kominoter.  E la i annan en lot danze, e en danze serye! E nou bezwen ekout sa bann Lotorite ki pe dir nou. E nou demande alor ki tou bann lezot lenstans la. Pa zis sa ki dan lasante in the forefront me, osi la nou pe dir bann volonter, ki osi volonter dan lasante, volonter ki pe zwe sa rol lasante piblik, dan lasante piblik. Bann dimoun dirzans, e bann Lapolis sirtou donn sa sipor sa bann lezot travayer lasante pou ki nou kapab anmenn en rezilta pozitiv vis a vi sa coronavirus ki devan nou, vis a vi sa pandemik ki la ki nou pe fer fas avek.

Viola avek sa Mr Speaker mon ti ava demande ki nou bann travayer lasante i pas en bon lazournen. E ki lakominote i donn sa soutyen, donn zot sa sipor, donn zot sa bon valer. E ki bondye i gid zot dan zot travay enportan e ki nou kontinyen priy pou zot.

Malerezman Mr Speaker e se, normalman bann travayer lasante se bann dimoun avek bon etik;- etik eksepsyonnel, bann etik ki normalman dan lasosyete ou pa war. Malerezman toultan i annan ki fer sa ki mal e la mon profite pou mon kondann severman, kondann dan fason pli for si ou le sa aksyon ki pa etik, pa normal ki’n ganny fer yer ki nou vwar lo Facebook. Kot bann keksoz prive dimoun in ganny anmennen lo Facebook. E nou demande akoz sa aksyon i vreman mal, i pa bon nou kondannen.

Nou demande alor ki en lenvestigasyon irzan i ganny fer e ki, vitman i ganny fer pou ki nou trouve lekel sa koupab e i ganny dil avek severman! E ki sa i vin en deterrent pou lezot akoz i pou met nou lasante, nou Minister Lasante e sa travay enportan ki zot pe fer ba si nou les sa bann keksoz pase. I enportan ki lasosyete ler i war sa bann keksoz i dil avek, aksyon vitman e severman keksoz i ganny pran en fason i met nou pei lo en nivo pli bon. Pli devan pli byen.

E alor voila Mr Speaker avek sa de aksyon nou’n dir ki en envestigasyon i ganny fer lo sa kote e an menm tan nou pe dir travayer lasante kontinyen sa travay eksepsyonnel ki zot pe fer. Kontinyen sa bon travay pou ki zot anmenn ankor pli byen lasante nou pep. Nou war sa zot pe reisi e nou, nou pou donn zot tou sa sipor. Mersi bokou Mr Speaker.

 

MR SPEAKER

Mersi Onorab De Commarmond.  Bon mon a pas laparol avek Leader Lopozisyon Onorab Wavel Ramkalawan.

 

HON WAVEL RAMKALAWAN

Mersi bokou Mr Speaker. Bonzour Mr Speaker. Bonzour tou koleg Onorab, tou dimoun ki dan Galeri, tou dimoun ki pe ekout nou dan lakour. E en bonzour spesyal pou tou bann travayer lasante. Mr Speaker lavi i enn sel. Lasante i ed nou prezerv sa lavi. Alor lasante i primordyal. Erezman Bondye i beni avek kantite dimoun ki atraver zot konesans, zot konpasyon, zot abilite pou nou kapab tenir sa lasante, pou ki letan nou tonbe nou kapab re leve e nou kapab repran nou lafors pou nou kontribye pozitivman. Premyerman dan nou fanmir apre sa dan nou kominote.

Letan nou pe koz bann dimoun ki ed nou dan nou lasante, i annan en varyete. E byensir ozordi mwan, mon ti ava kontan azout nou bann fason tradisyonnel. Bann dimoun ki donn nou gerizon atraver bann laform tradisyonnel. En pti fey roz anmer, de pti lezot zerbaz. Ki mannyer pou bwi li, ki parfwa i bokou pli edan ki sa latizann syantifik ki ou gannyen sorti dan lab. En bon ben kannel melanze ek bann diferan fey ki tir ou lafyev bokou pli vit ki sa panadol.

Me byensir nou bezwen osi mazin dimoun ki pran swen avek nou spirityelman, akoz lasante i pa zis nou lafors ki nou annan me, leta lasante i reprezant en leta moral ki bon, en leta spirityel ki bon, en leta fizik ki bon, ki tou sa bann bout i zwenn ansanm se sa ki fer nou sa ki nou ete. Alor pou osi nou bann spiritual leaders, bann healers ki donn nou bann parol lo konsolasyon letan ankor enn fwa nou moral in tonbe e nou santi nou vreman feb.

Alor bomaten mon annan senpleman parol remersiman pou tou bann dimoun ki ed nou.  E ki donn zot lavi, ki donn zot lafors, ki donn zot konesans. Parski pou vin en travayer lasante i pa zis en metye, me set en vokasyon. Ou ganny apele pou ou vin en travayer lasante. E atraver listwar nou trouv bokou bann gran dimoun ki’n montre ki ziska ozordi, semenn pase Langleter zot in ouver en nouvo lopital ki zot in apel li Nightingale Hospital. E sa an memwar Florence Nightingale sa dimoun ki’n donn sa profesyon ners son valer, e ki ziska ozordi nou ankor pe rekonnet li. Parey ki nou rekonnet bokou bann lezot ki’n ede atraver bann resers pou donn bann solisyon. E pou nou kapab par egzanp dekouver penicillin ki ozordi penicillin koman sa antibyotik prensipal ki ganny servi dan lemonn.

Mr Speaker letan ozordi mon pe mazin tou bann travayer lasante mon krwar ki i enportan pou nou osi mazin tou dimoun ki ede spesyalman dan lanvironnman lopital. Parski ozordi nou pe war ki avek sa sityasyon COVID-19 bann cleaners dan lopital zot osi zot annan en rol sitan enportan. Parski se zot ki ede pou dezenfekte lopital e pou fer sir ki bakteri pa fannen. E ki dimoun i kapab pa ganny sa bann lenfeksyon.

Alor mon anvi mazin bann cleaners, mon anvi mazin bann dimoun ki fer tou lezot travay, bann travay ki ede pou ki sa bann travayer lasante zot kapab a zot tour vreman vin lo sa nivo ki nou tou nou espekte. Byensir nou bann travayer lasante zot osi annan zot lavi personnel me, souvandfwa zot lavi personnel i ganny enteronp. I pas dan lenteripsyon zis akoz zot bezwen donn nou zot letan, zot bezwen donn nou zot lafors.

E nou’n war la ki mannyer bokou bann travayer lasante zot in demande ki si zot ti ava kapab ganny en lot landrwa pou zot reste pandan ki zot pe donn swen avek bann dimoun ki’n ganny enfekte avek COVID- 19. E sa se senpleman pou zot pa anmenn sa viris dan zot lakour. E pandan sa letan ki zot pou lwen avek zot fanmir, zot pou lwen avek zot zanfan byensir nou mazin zot. E annou pa bliye ki malgre ki ozordi pe koz lo konze pou bann paran ki annan zanfan anba 14an, 15 an. Nou bann travayer lasante zot, zot bezwen fer sa sakrifis pou zot kontinyen.

So atraver swen ki zot donn nou zanfan. Atraver lanmour ki zot donn nou bann dimoun aze zot ede pou fer nou pei sa ki i ete. E Mr speaker ozordi letan nou pe regard lakantite travayer lasante ki dan karantenn isi menm Sesel par egzanp;- e la spesyalman atraver sa premye ka kot i annan transmisyon dan kominote. Nou konnen ki poudir pou annan plis travayer lasante ki pou al dan karantenn e mon krwar ki an menm tan ki nou pe koz lo nou bann travayer lasante, mwan personnelman mon redemande ki Gouvernman i pran sa sityasyon o serye. In tonm dan kominote, keksoz i grav e mon refer en lapel pou ki i annan en lockdown dan sa pei pou nou kapab dil avek sa sityasyon.

Mr Speaker mon pa pou kapab terminen san dir ki i byen ki ozordi nou pe koz bann parol dou pou nou bann travayer lasante. Me mon dir annou pa zis servi parol dou. Annou osi tret zot byen. Annou donn zot sa ki zot merite. Annou pa zis vin isi dan sa Lasanble pou fer promes me, apre sa letan zot retourn dan Minister, oubyen retourn dan bann landrwa kot i neseser tou sa bann promes i evapore e nou trouv nou bann travayer lasante bezwen desann ziska kot Lorloz.

Alor mon dir annou tret nou bann travayer lasante byen. Montre zot respe ki zot merite e an menm tan osi mon fer en lapel ek tou bann travayer lasante pou zot donn tou zot kliyan sa swen ki neseser. Koz ek nou bann dimoun byen, adres konsern bann dimoun. Parske souvann fwa se pa sa pilil ki geri sa dimoun, me sa parol lankourazman;- se sa swen, se sa lanmour ki vin bokou, ki form, petet 90 poursan sa tretman ki sa dimoun i gannyen.

Letan mon pe swet tou bann travayer lasante en bonn lazournen e mon swet zot kouraz, mon swet zot lafors, mon demann benediksyon pou lo zot dan zot travay. Mr Speaker mon krwar ki nou isi Sesel nou’n perdi semenn pase en travayer lasante dan, Madanm Moustache an Italy.  E mon profite pou mwan ankor enn fwa eksprim avek son fanmir nou sipor e nou kondoleans. Madanm Moustache ti en dimoun ki ti devoue dan son travay. Tou dimoun ki’n konn li e son fanmir osi tou i koz bann bon parol lo li. Alors nou dir ek fanmir rezouir ki dan Madanm Moustache en travayer lasante lemonn in ganny tretman, e in annan bokou dimoun ki’n ganny konsolasyon. Alor tou travayer lasante bonn sans e bon kouraz e tou benediksyon. Mersi bokou.

 

(APPLAUSE)

 

 

MR SPEAKER

Mersi Onorab Ramkalawan. Bon aprezan mon a demann tou Manm pou debout e nou pou aplodir nou bann travayer lasante.

 

(APPLAUSE)

 

MR SPEAKER

Mersi tou Manm Onorab. Bon nou pou, mon ava demann parliamentary reporter pou apel Minis avek son delegasyon pou nou kapab kontinyen avek nou travay lo nou Order Paper.

Bon mon ti a kontan dir bonzour e welcome Minister Maurice Loustau-Lalanne ki responsab pou Finans Komers Envestisman e Planning Ekonomik. Minis i ganny akonpannyen par son Sekreter D’Eta Mr Patrick Payet. Son Sekreter Prensipal pou Finans Mr Damien Thesee. Deputy Comptroller General, Ms Astride Tamatave. E anler dan Galeri nou annan Ms Nellie Coopoosamy ki Director Public Budget Management. Mr Yannick Vel, Director General Macroeconomic Forecasting & Analysis. Mr Dick Labonte ki Principle Economist.

Minister Loustau-Lalanne bonzour e welcome dan Lasanble Nasyonal.  Bon prezan mon ava demann en Motion for Second Reading. Yes, Onorab Charles De Commarmond?

 

HON CHARLES DE COMMARMOND

Ankor enn fwa mersi Mr Speaker. Bonzour e bonzour Minis ek ou delegasyon. E tou manm e tou dimoun ki a lekout. Mr Speaker anba Order 64 to the standing order mon le move ki The Appropriation (Amendment) Bill 2020, Bill No.14 of 2020 i ganny lir en Dezyenm Fwa.  Mersi.

 

MR SPEAKER

Mersi Onorab De Commarmond. Okenn Manm ki segonde? Yes, Onorab Sebastien Pillay?

 

HON SEBASTIEN PILLAY

Mersi Mr Speaker bonzour. Bonzour tou koleg Onorab, bonzour Minis. Mosyon in ganny segonde.

 

MR SPEAKER

Mersi Onorab Pillay. Bon Motion has been seconded.  Mon ava prezan mon ava envit Minis pou entrodwir son Bill. Appropriation (Amendment) Bill 2020. Minister Loustau-Lalanne laparol i pou ou.

 

 

MINISTER MAURICE LOUSTAU-LALANNE

Mersi Mr Speaker.  Mr Speaker, Onorab    Leader    Lopozisyon, Onorab Leader pou Zafer Gouvernman dan Lasanble Nasyonal. Tou Mann Onorab, pep Seselwa bonzour.

Nou pe pas dan en moman tre difisil dan nou listwar. Nou vwar nou dan en sityasyon kot nou pa ti pe swete ki ti pou arive. En sirkonstans san presedan ki fer nou pou bezwen re-prevwar tou keksoz e re-aziste avek sa realite pou nou kapab revwar en lavenir.

Limanite pe eksperyans en gran defi ki pe met afekte e met a risk lasante tou son bann sitwayen. Bann mezir prekosyon pe ganny entansifye par bokou dan bann pei ki pa ankor ganny tro afekte par sa pandemik COVID-19 e lezot pe lit for pou met sa pandemik anba kontrol. Sesel alor i pa en leksepsyon. Sirveyans Lasante Piblik i reste alert depi konmansman sa fleo pou met an gard bann mezir prekosyon ek tou sipor ki pe ganny donnen avek bann Lotorite konsernen ki evite sa sityasyon i esap nou.

Mr Speaker pou Bidze 2020 ki ti annan tenm ‘’Rezilta- Ekitab Prosperite Partaze’’ ki mon ti prezante le 31 Oktob 2019, ti enn kot nou ti pe lans Bidze otour nou vizyon 2033 e mon site,

‘’Pou transform Sesel koman en Nasyon ki rezilyan, responsab e prosper.  Ki an bonn sante, edike e emansipe e ki pe viv ansanm dan larmoni avek lanatir e angaze avek larestan lemonn.

An se moman sityasyon global i demande ki nou demontre nou rezilyans koman en nasyon. En rezilta, sa i pou osi enportan koman en Gouvernman responsab nou revwar no stratezi devlopman nasyonal pou sa prosen 5an, an prenon kont sa nouvo realite ekonomik ki nou pe fer fas avek. Nou apersi ki otour lefe ki krwasans global ti pou fini lo en prodiksyon 3poursan an 2019 e ki pou amelyore e mont lo 3.4poursan an 2020.

Dan konteks Sesel, nou pe ekspekte fini 2019 avek en krwasans 3.9poursan, anvi dan en logmantasyon dan aktivite tourizm ki ti’n ogmante par 5poursan ver le 20 Oktob 2019, konpare avek prediksyon inisyal ki ti 4poursan.

Pou lannen 2020 nou ti pe ekspekte krwasans reste pozitiv lo 3.5poursan pouse par bann aktivite kontinyel dan Sekter Lenformasyon e Kominikasyon e ki touris pou reste kontribiter prensipal dan prodwi domestik brit avek krwasans 5poursan an zeneral. Nou ti pe osi ekspekte larive touris ogmante 2020 an vi nouvo larive vol Air France e frekans vol Qatar Airways ki ti pou vin 14 vol par semenn komansman Mars 2020.’’ Fen sitasyon.

Apersi global ekonomik swivan COVID19.

Mr Speaker, sa pandemik ki annan gran lefe advers lo nou lasante pou osi annan lenpak direk lo nou lekonomi. Dapre rapor prepare par lorganizasyon pou Devlopman e Korperasyon Ekonomik ouswa OECD, krwasans global ti feb an 2019 me sa ti pe komans stabilize ziska larive viris COVID-19.  Bokou pei i alor ferm zot frontyer pou kapab kontenir propagasyon sa viris.

Sa i fer alor ki demann pour komodite, prodiksyon e distribisyon bann komodite vwayaz e lendistri touris partou dan lemonn pe ganny afekte severman. I annan bokou lensertitid globalman an se moman. Sa pandemik COVID-19 dapre OECD pou pran bann pei bokou lannen pou rekipere. Sa pandemik in fini deza pe fer en pli gran domaz ekonomik dan lemonn konpare ek sa ki nou ti eksperyanse dan kriz finansyel 2007 a 2009.

Alor krwasans global ki ti pe ganny ekspekte pou 2.9 poursan an 2020, i aprezan ekspekte pou negatif 3.3 poursan. Tou pei pe vwar zot pe re analiz zot prozeksyon mikro ekonomik pou lannen 2020 e osi an mwayen term. Lefitir i reste enserten me nou ekspekte amelyorasyon gradyelman pandan lannen 2021 e entansifye dan bann lannen ki vini.

An rezilta sa, nou pe ekspekte en rediksyon dan nou bann aktivite ekonomik anvi lazistaz dan konportman bann endividi e biznes. Swivan ban endefini ki’n ganny entrodwi par Komisyon Lasante Piblik, konsernan larive tou viziter sorti dan okenn pei o monn sa pou annan en lefe advers lo nou lendistri tourizm ki pilye nou lekonomi.

Alor parey bann lezot pei ki pe ganny afekte avek sa pandemik i neseser ki Gouvernman i met en mezir san presedan. An vi sa kriz nou pe reazir vitman pou ki tou nou bann akter ki prodiktiv dan nou lekonomi entakt otan ki posib e evite ki nou baz ekonomik i ganny erode e ganny detri konpletman.  Gouvernman i alor reakte avek lefikasite e in met an plas bann mezir ki’n ganny anonse par Prezidan      Larepiblik dan son Diskour le 20 Mars 2020.

Sa bann mezir i pou pli ou mwen lo bann Polisi Tax akonpannyen par bann mezir administrative dan zesyon tax e osi bann lezot lasistans ki pou ede soulaz bann biznes dan sekter prive ki pou ganny severman afekte.

Mr Speaker e i enportan note ki i annan en ta lensertitid otour sa sitasyon.  Gouvernman ti komans swiv sa sityasyon de pros depi Zanvye 2020 ler La Chine ti ankor epi sant sa viris, swivi de pros ler Italy ti ganny afekte e apre sa tou zefor in ganny entansifye avek devlopman sa viris dan pei Lerop an antye ki e aprezan pe propaz dan Leta Ini.

An servan nou analiz pli konservatif, nou prezimen ki sa sityasyon i kapab kontinyen pou prosen 4 mwan. Parkont nou senaryo ki nou konsider koman nou worst case scenario se ki nou pa pou vwar larive okenn viziter pou sa prosen 6 mwan.

Avek sa rediksyon dan larive touris ki kontribye pros 25poursan dan nou prodiksyon domestik brit, ouswa GDP lakantite reveni ki nou pou kolekte an deviz avek lendistri tourizm pou redwir konsiderableman. Sa pou osi annan en lenpak lo nou to deviz etranzer.

Nou to deviz etranzer i alor eksepte depresye. An retour sa pou osi definitivman annan lefe lo lezot sekter ki endirekteman relye ek tourism. Nou krwasans ekonomik i osi i ekspekte redwir, pou bese pou vin negatif 10.8poursan konpare avek prozeksyon en krwasans 3.5 poursan dan prezantasyon Bidze 2020.

Sa i vedir ki nou lekonomi i eksepte al dan en resesyon. I kler ki nou ekspekte krwasans dan nou Sekter Akomodasyon e Servis Manze e osi dan Sekter Administrasyon desann. Nou prozeksyon se en bes dan sa de sekter pou vin negativ 50 poursan. Prozeksyon dan Sekter Transportasyon e Stokaz pou osi bese pou vin negativ 25poursan.

En bes 20poursan dan Sekter Lar Kreasyon e Entertainment e en bes 15poursan dan wholesale e retail trade. Par kont dan Sekter Lenformasyon e Kominikasyon nou pe ekspekte en krwasans 3 poursan.

Presyon lo to deviz etranzer i alor kapab fer lenpak lezerman lo to lenflasyon. Nivo ki nou rekipere apre sa pandemik i pa fasil pou prevwar e i pa conclusive.  Nou bann analiz pe ganny gide avek lekspektasyon avek konfidans ki ava monte dan lemonn dimoun ava rekomans vwayaz gradyelman dan ankor 6mwan e nou Sekter Tourizm i ava komans releve. Sa i ava ede relev krwasans e aktivite ekonomik plis ankor dan bann tel sekter parey Lagrikiltir, Lapes, Telekominikasyon e Sekter Finansyel.

 

Reveni:

Reveni tax:

Avek sa resesyon ki nou pe ekspekte dan nou lekonomi Gouvernman alor pou ekspekte kolekte mwens tax.  An 2020 proporsyon reveni tax a total reveni ti ekspekte kouver 78poursan nou bann depans nou pe ekspekte dan nou worst case scenario en rediksyon R1.826bilyon  dan nou koleksyon tax  pou sa lannen konpare ek sa ki ti’n ganny estimen pou Bidze 2020. Nou alor eksepte kolekte selman R5,9bilyon konpare ek R7.7 bilyon dan tax pou lannen 2020. Nou pli gran pert ki nou’n prevwar se dan tax valer azoute ouswa VAT avek en rediksyon R944milyon e dan tax lo biznes avek en rediksyon R355milyon.

Nou pe osi prevwar en rediksyon 183.8milyon dan koleksyon excise tax, 210milyon dan income tax 59.6milyon dan other tax, 55.8milyon dan custom duties, 44.4milyon dan corporate social responsibility tax e 38.3milyon dan tourism marketing tax.

Bann lezot tax ki pli o mwen bann license pou osi redwir par R64milyon. Sa i fer ki nou pe ekspekte en rediksyon 24poursan dan koleksyon tax konpare avek sa ki nou ti’n prevwar dan Bidze 2020. Sa i reprezant en koleksyon tasks konpare avek son prodiksyon domestik brit ouswa tax to DGP a 27poursan konpare avek en mwayenn 32poursan pandan sa dernyen 5an.

I enportan note, ki sa bann rediksyon i osi pran kont lefe ki sa bann mezir ki Gouvernman anons anver prolonzman peyman serten bann tax par bann biznes.

 

 

Reveni ki pa sorti dan tax: An sa ki konsern koleksyon dan reveni ki pa sorti dan tax nou pe aprezan ekspekte kolekte selman R884milyon konpare avek 1, 477bilyon pou Bidze 2020.

Nou pe prevwar en rediksyon 442milyon dan dividends ki ganny peye par bann lantrepriz piblik.  Sa i anvi rediksyon dan profi ki nou pe ekspekte dan sa bann lantrepriz avek rediksyon dan larive bann viziter notaman pou SCAA e IDC.  Nou osi eksepte en rediksyon dan biznes avek posibilite rescheduling bann loans par bann envestiser avek la bank – Nouvobanq. Nou pe osi prevwar en rediksyon R150milon dan fees and charges ki ganny sarze par bann diferan Minister, Lazans.  An vi revi prozeksyon dan larive bann viziter nou alor ekspekte reveni dan passenger service fees e entrance fees dan Zarden Botanik ki nou kolekte i desann.

En prozeksyon pli ba dan koleksyon GOP fees e attestation fees i osi ganny fer an vi ki Gouvernman pa pou aksepte okenn nouvo aplikasyon GOP ziska prosen notis.

 

 

Amannman Bidze 2020:

Sa i fer alor Mr Speaker ki Gouvernman i war li prezan neseser avek tou sa bann lensertitid e defi pou reprezant en lot Bidze 2020. Nou pe propoz en lamannman dan Bidze 2020 par soumisyon en Appropriation (Amendment) Bill, 2020.

Parey nou Public Finance Management Regulations 2014 i site anba lartik 54.2, en Bidze Siplemanter pa devret modifye konsiderableman en Bidze ki ganny aprouve. An dot mo the Supplementary Estimates shall not substantially modify the approved estimate.

Sa i en vi ki en realite ki nou pa pou fer en sirplis fiskal 2.5poursan lo nou krwasans domestik brit pou lannen 2020, parey ti ganny prozekte dan Bidze 2020. Sa Bidze ki nou prezante ozordi pour laprouvasyon e sipor Lasanble Nasyonal dan sa letan difisil, pou fer ki nou prevwar pou annan en defisit fiskal primer, negativ 14poursan.

Sa i fer Mr Speaker ki tou sa travay dir ki nou’n fer depi 2008 avek reform makro ekonomik avek gran sakrifis e devosyon lepep Seselwa, kot nou’n touzour fer en sirplis fiskal ki’n ganny ranforsi avek bann bon zesyon finans piblik, ki’n finans bokou progranm e proze esansyel pou dezormen pe ganny ranverse du jour au lendemain.

En 2008 ti reste nou zis14 zour rezerv avan ki nou ti forse fer desizyon pou fer reform ekonomik. Si ozordi nou ti ankor dan sa menm sityasyon nou pa ti pou kapab fer sa bann mezir pou asiste sekter prive. E alor nou sityasyon ti pou pli agrave. Nou desizyon pou fer reform makro ekonomik 2008 in kapab fer nou vin pli rezilyan e in prepar nou pou kapab aziste ek bann sirkonstans ekonomik ki devlope e ki menm sirpas abilite pour nou abzorb le konsekans parey nou vwar nou ladan ozordi.

Malgre tou, nou en pep for, determinen e rezilyan i pou pran en zefor kolektif pour nou releve dan sa sityasyon. Nou kont alor lo nou tou pou apiy sa bann mezir e zefor ki nou pe met an plas pour, relev nou lekonomi protez nou lasante, soutenir nou pep e sofgard nou pei.

 

Mezir pou soulaz lefe advers corona lo nou lekonomi: Mr Speaker, pou nou kapab anpese ki nou lekonomi i retonbe, nou bezwen alor   met bann mezir ki pou ede fer nou lekonomi kontinyen marse otan ki posib.

 

Lasistans pou sekter prive:

Tax;- Sekter prive i moter nou lekonomi e alor i bezwen ganny sa sipor neseser pou kit li anmars. Sa bann biznes prive partikilyerman bann dan bann sekter ki relye ek tourism pou annan gran difikilte, pou annan liquidité avan ki zot pa pe ranmas okenn reveni.

Alor par entrodwir bann mezir pou sispann peyman bann tax ki relye lo reveni pour ede amelyor liquidité sa bann biznes en pe. Sa i par prolonz peyman tou bann tax ki sipoze ganny peye par Mars pou Septanm 2020.

Peyman Corporate Social Responsibility Tax, Tourism Marketing Tax, Tax lo biznes e tax lo Income Monument Monitoring Benefits pour Septanm 2020.

 

Garanti saler:

Dapre Biro Nasyonal pou Statistik a lafen katriyenm kar 2019 sekter prive ti anploy 37, 409 travayer en total.  An vi rediksyon dan bann aktivite e dan larive bann viziter pou evit en sityasyon kot bann biznes i fer redundancy e pou permet bann sekter prodiktif kontinyen marse, Gouvernman pe garanti saler dan bann travayer dan sekter prive.

En sonm R1,90milyon 531,1200bilyon i alor ganny propoze dan lamannman Bidze 2020 pou garanti saler. Parey lanons Prezidan Larepiblik i dir saler pe ganny garanti pour 3 mwan. Par kont Mr Speaker anvi lensertitid sa pandemik nou’n fer en provizyon en pe pli a lonterm pou kouver sa prosen 6 mwan.

Limit lasistans pou ganny Cap par en sonm pou R30mil.  Sa i swivan diskisyon entern ki’n ganny fer tenir en kont ki le bi se pou garanti o mwen en lasistans pou tou travayer. E anvi nou pa konnen ziska kan sa sityasyon pou persiste. Sa bann sa lasistans pou osi kouver travayer etranze.

Mr Speaker i enportan ki otan ki posib i annan mwens lenteripsyon dan aktivite ekonomik sekter prive e ki zot ganny asiste pou asire ki zot relev zot aktivite o pli vit posib.

An sa ki konsern travayer etranze ki bezwen transfer larzan dan zot pei gidans ki Labank Santral i anvi donn bann biznes se pou li lyez avek zot bann Labank pou fer prosedir pou transfer saler zot bann travayer.

Nou swete ki sityasyon pa deteryore me parkont nou reste depandan lo sityasyon dan lemonn ki mannyer i devenir partikilyerman Lerop kot nou depan lo nou bann viziter.

Alor i pli pridan pou fer en tel provizyon dan evantyalite ki plis lasistans i bezwen ganny donnen sa sonm pou ganny zere par en Komite ki konpri o zofisye dan Gouvernman e pou osi annan reprezantan sekter prive. Pou annan bann kriter kler ki fini ganny kominike deza ki pou gid lekel konpannyen ki pou ganny asiste avek sa fon.

Se selman bann sekter formel ek bann biznes ki’n anrezistre e ki’n azour avek soumisyon zot deklarasyon ouswa peyman tax, ouswa ki annan en license ki pou ganny aziste.  Mr Speaker parey sa Komite in deza anonse zot in met sa bann prosedir kler pou fer sir ki nou protez larzan piblik.

Premyerman form laplikasyon i kapab ganny download lo sit web Minister Finans.

Dezyenmman nou osi etabli en Hot line 282.88.262 pou ed bann biznes avek zot konsern. Zot osi kapab telefonn Minister   Finans lo 438.20.00. Bann form i osi ganny mete dan bann sant Ladministrasyon Distrik.

Katriyenmman, lo sa bann form nou osi met sa bann dokiman ki sa bann biznes i bezwen soumet avek sa Komite pou ede dan zot evalyasyon.

Senkyenmman sa komite pou pran 10 zour pou evalye bann soumisyon sorti kot bann anplwayer. E 15 zour pou bann soumisyon sorti kot bann endividi ki napa travayer.

Sizyenmman sa bann laplikasyon pa pou aplikab pou bann travayer etranze ki an deor   Sesel.

Setyenmman sa lasistans pou kouver saler de baz e osi allowance ki fix pou le mwan me sa lasistans i ekskli saler ki sanze tou le mwan parey service charge   ek overtime.

Wityenm, Gouvernman pou osi etabli en sistenm appeal ki sa bann biznes i kapab servi si pa satisfe avek desizyon sa Komite.

Sa lasistans pou osi kouver bann dimoun ki pa pe anploy okenn travayer par egzanp bann operater taxi. Mr Speaker i bon note ki pandan sa dernyen semenn in osi annan plis ki 90 biznes ki vin a novo pou anrezistre zot TIN ouswa soumet zot payroll avek Komisyon Reveni Tax   Sesel SRC.

Alokasyon R30milyon dan Bidze Lazans Proteksyon Sosyal. Nou pe osi propoz en sonm 30milyon dan Bidze Lazans Proteksyon Sosyal ouswa ASP pou asire ki bann lezot endividi dan bezwen i osi ganny assisted. Bann endividi dan sekter enformel e ki osi war zot ganny afekte pou ganny asiste par ASP pou asire ki nou pa kit personn deryer.

Sa i pli omwen bann biznes ilegal ki pe fonksyonn san en license ouswa san en permi ou petet pa pe menm pey zot tax. Alor i ariv ler pou sa bann biznes fer sir ki zot met zot biznes a zour avek Lalwa. I annan bokou sa bann tel biznes ki fer konpetisyon avek bann biznes ki dan sekter formel e ki’n kontribye par pey zot tax byen pandan lannen.

E alor I pa pou moralman byen ki sa bann biznes dan sekater enformel i ganny asiste par sa fon ki garanti saler travayer sekter prive. Me parkont nou pou ganny asiste par Lazans Proteksyon Sosyal.

En sonm adisyonnel R10milyon pe osi ganny propoze dan Unemployment Relief Scheme.

 

Lasistans pou Sekter Lagrikiltir ek Lapes:

Mr Speaker soutyen pou nou Sekter Lagrikiltir e Lapes i osi nou priyorite pandan sa pandemik to lentere dan fon Agricultural Development Fund pou sorti 2.5poursan pou vin1 poursan selman pandan dirasyon sa pandemik.

Pou asiste bann fermye ek akse resours pou kontinyen envestir dan sa sekter. An sa ki konsern lapes parey in deza anonse par Prezidan Danny Faure to lentere pou redwir sorti 3poursan pou vin 1poursan anba Fisheries Development Fund.

Mon pou prezan prezant propoz bann repriyoritirasyon dan Bidze 2020.

Mr Speaker dezyenm mezir ki Gouvernman pe met an plas se pou revwar son bann alokasyon Bidze ki ti ganny donnen avek bann Minister Departman ek bann Lazans dan Bidze 2020. Par kont sa bann revizyon pa pou ganny adopte pou Minister Lasante, Lazans swen Lasante, Komisyon Swen Lasante Piblik e bann lezot Lazans ki ofer bann servis esansyel.

I enportan ki dan sa moman difisil nou alor revwar nou bann priyorite e pa enplimant serten progranm ki neseserman esansyel pou nou kapab donn resours bann lezot Lazans e osi finans sa bann mezir tre enportan ki ganny anonse deza.

Premyerman, desizyon pou tir VAT lo manze ki ti sipoze aplike apartir le 01 April 2020 pou ganny prolonze.  Nou pou anons dat aplikasyon pli tar apre ki nou war amelyorasyon dan nou sityasyon fiskal.

Gouvernman i osi war li neseser pou entrodwi serten mezir kot nou pou aplik bann mezir force majeure.  An vi ki nou pe eksperyans en sityasyon ki an deor kontrol e ki san presedans. Sa desizyon i neseser pou ki nou kapab aziste nou depans baze lo bezwen ki pli enportan. Sa bann mezir ki nou pou osi aplik force majeure bi comme swivan;

 

Restriksyon lo rekritman:

Avek lenplimantasyon imedyat tou bann nouvo rekritman dan Gouvernman i ganny restrikte i neseser ki provizyon Bidze i kouver selman bann travayer ki deza ganny anplwaye dan servis piblik.  Sa mezir pou fer ki nou redwir anviron R54.3milyon ki ti’n ganny aprouve dan Bidze 2020 pou bann nouvo rekritman.

Sa freeze pe osi ganny aplike pou tou bann konpannyen antrepriz piblik sa i en direktiv Gouvernman koman shareholder sa bann lantrepriz. Public Enterprise Monitoring Commission – PEMC pou fer sipervizyon lo sa bann lantrepriz pou asire ki sa direktiv i ganny swiv e i pou travay avek zot pou war kan i neseser pou permet bann rekritman ki tre esansyel selman dan sa ka eksepsyonnel.

An vi lensertitid dan lanvironnman ekonomik, i osi enportan ki sa bann lantrepriz i revwar zot loperasyon e minimiz depans ki pa neseser. Par kont Gouvernman i garanti pou anploy bann graduates ki zot lantrennman i vize  anver bann servis piblik tel;- ki lasante e ledikasyon par egzanp. Bann lezot graduates ki pou bann difikilte annan en lanplwa pou ganny ankadre anba en progranm My First Job anba Departman Lanplwa.

 

Allowance Information Officers:

Nou’n   osi pran desizyon apartir le 01 Avril 2020 sispann peyman bann allowance pou bann Information Officers.  Sa pou save nou R3.4milyon an 2020 e R5.2milyon dan bann Bidze mwayen term. Nou pe alor rekomann en lamannman Bidze 2020 pou saler pou en sonm 2,9bilyon konpare avek R2.98bilyon dan Bidze 2020.

 

Byen e Servis;

Mr Speaker lo kote byen e servis bann mezir i comme swivan;-

 

Board fees:

 Premyerman peyman pou bann Manm ki ti’n ganny ogmante an Zanvye 2020 pou bann Lazans dan Bidze e pou bann Lantrepriz Piblik ki ti ganny ogmante lannen pase pou osi redwir. Board fees ki pou ganny peye prezan pou sa sonm ki ti ganny aplike oparavan avan logmantasyon dan rates.  Sa pou fer en rediksyon R18.2milyon dan Bidze.

 

Rediksyon dan bann lezot byen e servis:

Swivan ban lo vwayaz a aletranze par bann travayer Gouvernman e swivan sa deteryorasyon sa sityasyon, nou pou redwir bann vot ki ti’n ganny aprouve dan Bidze 2020 comme swivan;

Redwir tou vol vwayaz e allowance aletranze par 100poursan. Sa pou permet nou fer saving R52.4milyon.

Par kont nou’n met en alokasyon selman R5milyon ki pou ganny zere par Minister responsab pou Finans an ka i annan nesesite pou okenn zofisye Gouvernman vwayaze. Mon fer kler sa i pa aplik pou bann pasyan ki pou bezwen vwayaze pou tretman medikal anba Bidze Lazans Swen Lasante.

En rediksyon 75poursan dan bann Bidze pou ospitalite ki save nou R6.1milyon. Redwir tou bann Bidze ki relye ek organiz bann workshop e konferans. Sa pou save nou R850.

Redwir an totalite tou bann Bidze pou lwe bann lasal konferans ki pou save nou R8.6milyon. Nou pe osi aplik en rediksyon 25poursan dan tou bann Bidze pou printing and stationary. Sa pou save nou R8.1milyon. En rediksyon 50poursan dan tou bann Bidze minor capital nou pou save R27.1milyon.

Pou osi napa okenn Konferans e Kolok ki ti’n deza ganny prevwar sa lannen tel ki Konferans Ministeryel pou bann Minis Touris Afriken e en kolok HIV SIDA.  Sa i pou fer en rediksyon R1.5milyon dan depans.

 

Rediksyon dan bann aktivite ki nesesit rasanbleman;

Mr Speaker nou demann lepep Seselwa pou ini ansanm pou sa lannen 2020 pou donn zot soutyen e konprenezon dan sa tel sityasyon ki nou vwar nou ladan. Nou tou nou annan responsabilite e se devwar sa Gouvernman osi pou asire ki protez son pep.

Etandonnen ki sa sityasyon en force majeure  nou alor pran en desizyon ki sa lannen pou napa okenn rasanbleman ki pou anmenn gran lafoul dimoun tel ki;- bann aktivite kiltirel e levennman Nasyonal. Alor bann aktivite swivan pou ganny anile sa lannen e sa bann sonm pa pou ganny depanse parey ti’n bidzete.

Lafet Nasyonal pou R11milyon, Festival Kreol pou R5milyon, Lafet 250an Letablisman R2.5milyon e bann lezot aktivite mizikal e lar tel parey lafet La Francophonie, Festival Jazz and Blues e Biennale des arts. An tou sa i a redwi Bidze par en total R20milyon.

Nou osi annan bann aktivite e partisipasyon sportif ki pou ganny anile;- sa i konpri partisipasyon dan Zwe Olenpik, Zwe Lespwar, Zwe La Francophonie, Tenis detab e Konpetisyon Rezyonal pou Lavwal.

Konpetisyon FINA ki ti osi ekspekte ganny fer an May e Out ki ti pou kout R5milyon pou osi ganny anile. Census ki ti pou ganny fer par Biro Statistik avek en sonm R6.2milyon pou osi ganny anile pou lannen prosenn. Sa i fer alor ki Bidze ki pe ganny propoze pou byen e servis dan sa lamannman Bidze 2020 i reprezant 2.7bilyon konpare avek 2.9bilyon dan Bidze 2020.

 

Bidze Proze Kapital:

An sa ki konsern Bidze pou bann Proze Kapital, i reste enportan ki Gouvernman i kontinyen egzekit sa bann proze otan ki posib. Nesesite pou annan aktivite ekonomik espesyalman dan nou Sekter Konstriksyon i en portan afen ki ede kree louvraz e kree krwasans. Nou osi rekonnet ki tou pou depann ki mannyer sityasyon i devlope, e i kapab annan serten retar dan bann proze kantmenm sa.  Sepandan nou bezwen fer serten lazistaz dan Bidze Proze Kapital comme swivan;

En Bidze 2020 ki ti 1.1 bilyon pe aprezan pe ganny re komannde pou revize pou 1. 2 bilyon. Sa i anvi lenpak devalyasyon ki nou pe ekspekte lo to deviz ki pou afekte pri bann proze, espesyalman bann ki ganny finanse par bann loan.

 

Sekter Lasante;

Dan Sekter Lasante en ogmantasyon 50.6milyon pe ganny propoze pou sa Sekter dan sa lamannman konpare dan Bidze 2020. Sa i an vi en sonm 25milyon ki’n ganny rekomande pou konstri sant tretman.  Sa sant i sipoz ekout 40 milyon e i ekspekte konplete dan lannen 2021. En sonm 4milyon pe osi rekomande pou renovasyon bann barak lo Ile Du Swet ki pou ganny servi pou ogmant kapasite karantenn an se moman.

I osi annan en sonm 21.6milyon ki pe ganny rekomande pou konplet bann lezot proze ki pa’n konplete an 2019 e ki son progresyon oubyen neseser i ganny materyalize osi vit ki posib.

Sa i konpri renovasyon lo sant lasante Baie Lazare, konstriksyon lopital La Digue e konversyon sant dyagnostik dan lopital Sesel. Malerezman nou pa pe prevwar ki sa bann proze renovasyon dan Lopital Sesel anba Victoria Hospital Master Plan ki nou ti’n fer provizyon anba sa don sorti La Chine pou aprezan materyalize.

Sa i pou en sonm R35.4 milyon.

 

Sekter Transpor lo Later: Dan Sekter Transpor lo Later en rediksyon 20.8milyon pe ganny propoze pou ganny redwir dan lamannman Bidze 2020 konpare avek Bidze 2020.

Sa i swivan diskisyon ki’n ganny fer avek Lazans Transpor lo Later pou vwar bann proze ki pa ankor inisye an se moman e ki serten retar pe ganny ekspekte avek pou rezon wayleave. Sa bann zot proze zot finansman i ganny propoze pou dan Bidze pou lannen 2021.

Sa i konpri proze konstriksyon trotwar Belle Vue Port Glaud. Agrandisman semen Cap Ternay, konstriksyon semen Caryole Pointe Larue. Proze amelyorasyon faz 4 lo semen dan Lenn Mont Buxton.

 

Sekter Ledikasyon;

Dan Sekter Ledikasyon Bidze i selman anvi bann proze ki sipoze finanse par La Chine e ki pa pou materyalize sa lannen sa i enkli proze konstriksyon Lakademi Letid Biznes e Lenstiti pou L’Art e Design.

 

Sekter Lenfrastriktir;

Dan Sekter Lenfrastriktir en sonm adisyonnel 95.8 milyon pe ganny rekomande dan sa lamannman Bidze 2020 pou finans bann proze ki sipoze ganny finanse anba PMC Bond ki pa’n fini vann. Gouvernman pou alor aste proze condominium konstri par Fon Pansyon Sesel avek en loan ki i pou pran avek sa fon pou en peryod 3an e avek en to lentere 6poursan.

 

Lezot sekter;

En sonm proze total 21.3milyon pe osi ganny prolonze pou ganny egzekite anba Bidze lannen 2021 ki ti ganny prevwar dan Bidze 2020 oparavan Konsey Nasyonal pou Sport, Lenstiti Kreol e Ladefans.

 

Nouvo alokasyon bidzeter:

Mr Speaker swivan lanaliz ki Gouvernman in fer nou vwar li neseser pou osi rekomann serten nouvo alokasyon dan sa lamannman Bidze 2020 e sa i comme swivan;

Scheme pou bann ners e bann health care assistants;- provizyon in ganny fer pou ki Scheme  pou bann ners e bann health care assistants i ganny revize e pran lefe apartir Zilyet 2020. En sonm R13.68milyon pe ganny rekomande pou sa. Pou note ki tou bann lezot Scheme ki ti ganny deza anons e dan Bidze 2020 pou kontinyen ganny enplimante.

 

Contingency;

en sonm 60milyon pe ganny propoze anba Bidze Contingency pou kouver bann depans relye avek prokir an bann lekipman e latizann e osi pou loperasyon e lozistik anver bann mezir prevansyon COVID-19.  Sa Bidze pou ganny zere par Minister responsab pou Finans e pou kouver bann depans Lazans Swen Lasante Komisyon Lasante Piblik e bann lezot servis esansyel ki angaze dan sa loperasyon.

 

Sibvansyon pou Air Seychelles:

Anvi sispansyon vol Air Seychelles avek ban pou bann viziter dan pei, en sibvansyon R109.469milyon pe osi ganny propoze pou lakonpannyen Air Seychelles, pou li kouver depans son travayer pou sa prosen trwa mwan. Sa provizyon par kont i pou sis mwan an ka sityasyon i persiste.

 

Sibvansyon pou Seychelles Trading Company; En sonm 20milyon pe osi ganny propoze koman en davans pou STC.  Sa an ka i neseser ki STC pou bezwen sipor Gouvernman sipor pou soutenir son liquidité e son abilite pou asir stokaz bann komodite esansyel.

Bann lezot antrepriz piblik ki war zot dan difikilte pou ganny asiste osi apre evalyasyon zot sityasyon par PEMC. Sa pou ganny kouver anba sa lasistans ki’n ganny kree.

 

Bann lezot Polisi:

Mezir lo pri bennzin. Mr Speaker nou pe propoz serten mezir an sa ki konsern pri karbiran lo laponp an partikilye mogas pli byen koni koman bennzin. Ozordi pri i R15.76 par lit. Si pri enternasyonal i kontinyen desann sa sif osi pou desann.

Gouvernman i pran desizyon si pri i desann pli ba ki R15.76sou, nou gard pri lo laponp R15.76 sou e la diferans pou ganny anmase koman en tax adisyonnel. Dernyen fwa ki pri lo laponp ti pli ba ki R15.76 ti an Zanvye ziska Mars 2016. Alor menm avek sa propozisyon bennzin pou pli bon marse ki in deza ete dan sa dernyen 4an. Me sa mezir i a permet Gouvernman anmas en pe tax pou siport Bidze redwi defisit e konserv en pe demann pour karbiran.

Par egzanp si pri bennzin i tonbe e ti pou vin R15.46 dan letan normal avek sa propozisyon pri lo laponp pou reste R15.76 e lo sak lit bennzin Gouvernman pou anmas 30sou.

Mr speaker si pri pa desann pli ba ki R15.76 nanryen pa sanze. Me nou reste kot nou ete ozordi e sa pou en mezir tanporer an vi ki sityasyon eksepsyonnel ki nou ladan.

Sa mezir pa pou aplikab pou dyezel. Dyezel i ganny servi an mazorite par bann pickup, bis e lezot gro masin endistriyel. Sa bann gro veikil, zot zot permet nou kontinyen konstrir transport dimoun e gard dimoun dan lanplwa san ki lakonpannyen i bezwen lasistans finansyel. Alor nou pa tous dyezel e permet striktir nou lekonomi aziste en pe e bouz li pli byen ver aktivite ki redwir lenportasyon.

 

Logmantasyon dan levy Livestock Trust Fund:

Mr Speaker Sekter Lapes pe ganny defi dan leksportasyon.  Zot in eksprim konsern anvi ki zot marse prensipal ki Lerop i telman dan boulvers ki zot pa pe kapab eksport pwason fre.

An plis ki sa, vi ki la kantite vol aeryen sorti Sesel   in tonbe, menm si sa marse si sa marse eksportasyon ti la i pa pou posib pou eksport pwason. Dan Sekter Lagrikiltir, nou pe osi vwar en zefor spesyal par bann fermye pou os prodiksyon lavyann. Sa rediksyon dan vol e enportasyon lavyann fre i loportinite pou zot.

I osi benefisye pei vi ki nou aste prodiksyon lokal.  I redwir demann pou deviz pou lenportasyon lavyann. Letan ou met sa de ansanm ou vwar ki nou pou annan en ekse lo lakantite pwason ki lo marse lokal e pou annan en logmantasyon dan prodiksyon lavyann par fermye. An menm tan nou annan en bes dan reveni deviz an vi sa bes dan touris.

Alor Gouvernman i pran en desizyon tanporer pou ed sa sityasyon mars dan benefis tou dimoun.  Sa Komite Sirveyans lo Sekirite Alimanter ki Prezidan in etabli anba Chairmanship Minis pou Lagrikiltir ek Lapes Minis Charles Bastienne pou revwar sa levy, ki ganny plase lo lavyann enporte avek lentansyon ogmant li.

Sa mezir pou annan lentansyon redwir demann pou lavyann enporte, ki pou ede redwir presyon lo demann deviz etranzer espesyalman vi ki nou annan opsyon lokal pou nou konsonmasyon protein.

Sa progranm ki pou ganny met an plas par sa Komite pou kree loportinite pou ogmant akse la popilasyon avek pwason fre par tou dan pei.  An plis ki sa avek mwens lenportasyon i devret   pli fasil pou fermye lokal pou kapab vann zot prodwi zot osi ogmant zot prodiksyon ki pou kontribye anver sekirite alimanter.  Sa mezir pou vin an fors apartir le 01 Me pou donn Minister Lagrikiltir ase letan pou etabli mekanizm pou sa mezir kapab mars efektivman.

 

Restriksyon tanporer lo lenportasyon veikil:

Mr Speaker la i moman ki enportan pou nou pridan avek prodwi ki nou enporte nou bezwen asire ki nou enport selman bann komodite esansyel e redwi lo lezot otan ki posib.  Sa i ava ede avek nou zesyon deviz etranzer entrodwir. Nou pou alor entrodwir restriksyon tanporer pou lenportasyon veikil dan pei.  Neanmwen sa restriksyon pa pou afekte veikil spesyalize;- par egzanp lanbilans. Sa restriksyon pou afekte bann nouvo aplikasyon permi e Biro Permi Lenportasyon dezormen pa pou aksepte aplikasyon permi pou veikil imedyatman.

 

Finansman lamannman Bidze 2020:

Mr Speaker sa lamannman Bidze ki nou pe rekomann Lasanble Nasyonal pou aprouve ozordi, pou bezwen ganny finanse avek bokou det an vi i en defisit. Nou dan en sityasyon san presedan parey mon’n kontinyen fer resorti dan mon diskour ozordi.

Premyerman; Labank Santral pou ofer Gouvernman davans a zero lentere anvi sa sityasyon i enn force majeure.

Dezyenmman ansanm avek La Bank Santral nou pou met en bond lo marse.

Trwazyenmman nou pe pran budget support loan avek bann Lorganizasyon Enternasyonal comme swivan;- Labank Mondyal en sonm 7milyon Dolar Ameriken  anba fasilite Catastrophe Deferred Drawdown oubyen Cat DDO  ki nou ti sinyen avek Labank Mondyal an 2013.

Sa i en contingent credit line ki permet donn Sesel liquidité imedyat, swivan en dezas.  Nou’n tonm dakor avek Labank Mondyal pou ki sa fasilite i osi enkli ka en irzans lasante parey ki nou trouv nou ladan ozordi. Labank Mondyal i osi annan 14milyon Dolar Ameriken  ki met a dispozisyon bann pei koman bann loan pou siport repons COVID-19.

Sesel nou kalifye en sonm ki ekivalan 0.1poursan nou prodiksyon domestik brit, ki ekivalan anviron 2.5milyon Dolar Ameriken. Nou osi annan en fasilite anviron 47milyon Dolar Ameriken   avek Labank Mondyal avek bann lezot prodwi i ki sa labank i ofer.

 

Fon Monneter Enternasyonal:

Atraver Fon Monneter Enternasyonal ouswa IMF en fasilite 50bilyon Dolar Ameriken  ti   orizinalman ganny mete koman lasistans irzans. Me anvi magnitid sa sityasyon ki nou trouv nou ladan le 03 avril Fon Monneter Enternasyonal ti anonse ki i prezan double sa fasilite pou ariv 100bilyon Dolar Ameriken. Sesel i kalifye pou ganny 50 poursan son quota ki anviron en sonm ekivalan 15.4milyon Dolar Ameriken

Labank Devlopman Afriken pa ankor anons okenn prodwi lasistans spesifik pou asiste bann pei ki pe ganny afekte avek sa pandemik COVID-19. Sesel selman i annan sipor fasilite bidzeter pou en sonm 9milyon Dolar Ameriken.

Gouvernman pou osi kontinyen pibliy bann treasury bills to le semenn, pou finans son bann depans a kourt term ki pou osi ede kit en prezans lo marse finansyel.

 

Rezerv:

Sif sorti Labank Santral i montre ki rezerv total pei an deviz etranzer i aktyelman 591milyon Dolar Ameriken.  Sa sif i date Vandredi le 03 Avril 2020. Lakantite sa rezerv i an dispozisyon pei apre ki bann langazman e tel ki finansman serten proze e det avek IMF in ganny pran an kont, i 439milyon. Anliny avek desizyon son Board, Labank Santral pou asire ki pei i kapab asir peyman pou bann komodite kle ki nou enporte e sa i karbiran, bann prodwi manze esansyel e latizann.

Sa peryod difisil ki nou ladan, kot i annan bokou lensertitid i nesesit korperasyon tou dimoun pou asire ki pei i kapab zer byen resours deviz etranzer ki a son dispozisyon.  Sa $439milyon ki mon’n mansyonnen i ekivalan la kantite demann ki ti annan deviz etranzer pou en peryod 7.8 mwan an 2019 ki ti fourni par labank e bann Bureau De Changes.

Labank Santral i estimen ki si rezerv pei i ganny servi selman pou garanti peyman pou bann komodite esansyel, parey mon’n dir pli boner, sa pou sifizan pou kouver bezwen lenportasyon pei pou anviron 18mwan.

 

Det pei:

Mr Speaker   nou ava rapel ki nou annan en target pou akonplir redwir nou det pou ariv 50poursan nou GDP par lannen 2021 pardon par lafen 2021.  Avek sa sityasyon COVID-19 i malere, ki mon anonse ki nou pa pou realiz sa target aprezan. Nou anvizaze fini lannen 2020 avek en debt to GDP ratio 85.1poursan konpare avek 52poursan ki nou ti’n prozekte dan Bidze 2020.

I enportan note par kont ki nou ti angaze pou attend nou target, pou redwir nou det a 50poursan nou GDP par 2021 avek bokou disiplin e bon zesyon finans piblik, ki nou’n fer depi 2009, nou aprezan si tan pros me nou sitan lwen.

Sa i fer alor ki Gouvernman pou apros tou son bann krediter, pou diskit posibilite restriktir tou nou bann det enternasyonal. Mr Speaker bann mezir ki nou’n pran i permet reviz Bidze pou reprioritize nou bann progranm ek nou aktivite. Tou sa bann rediksyon dan alokasyon vot saler e byen e servis i ariv en sonm R234milyon. Gouvernman pe rekomann laprouvasyon Lasanble Nasyonal pou redwir sa bann alokasyon ki ti ganny fer dan Bidze 2020 dan sa lamannman Bidze 2020 ki pe ganny prezante ozordi.

Par kont nou pe rekomann en logmantasyon dan bann lezot vot comme swivan;

Bidze Proze Kapital pou en sonm adisyonnel 105. 5milyon.

Bidze Central Program for Government pou en sonm R1. 088bilyon. Bidze Transfer to Public Enterprise pou en sonm R114.09milyon. Bidze Benefis E Lazans Proteksyon Sosyal pou en sonm R52.8milyon.

Bidze Development Grant pou en sonm R30milyon, Bidze Net Lending pou en sonm R25.16milyon e Bidze Contingency pou en sonm R60milyon. Parey nou konstate, nou pe vin ek en Bidze ki depans plis ki reveni par R3 bilyon lo en baz fiskal primer e 3.7bilyon an term finansman total. Sa i fer en defisit fiskal 14poursan Mr Speaker. E sa i en larout tre enkyetan me inevitab, ler nou pran kont sa dilenm ki nou trouv nou ladan. Me sa i pa fini la pandan bann lannen ki pe vini nou bezwen travay pli dir ankor pou re konsolid e amelyor nou pozisyon. Pou le moman nou pe vwar sityasyon pou 2021 e 2022 ki pou amelyor gradyelman par rediksyon konsiderab sa defisit fiskal.

Pou Bidze lannen 2021 nou pe prevwar en defisit fiskal negativ 5.3poursan e pou lannen 2022 negativ 3. 8poursan. Sa i donn nou lespwar ki nou pou rekipere avek bokou travay ansanm avek bann diferan sekter lorganizasyon, Lasosyete Sivil e lezot parti prenan dan lekonomi.

An konklizyon Mr Speaker Gouvernman pa pou met okenn restriksyon lo tranzaksyon deviz etranzer. I enportan ki nou kit sa konfidans avek nou bann lenvestiser, pou ki nou ankouraz zot kontinyen fer biznes Sesel san restriksyon.  Sa i osi en lapel pou bann biznes e endividi ki annan bann kont an deviz a aletranze pou aprezan ouver en kont Sesel e met sa deviz ladan.

Sa bann biznes Mr Speaker in zouir lo Sesel kan ti dan botan. La ki nou war nou dan en moman difisil in ler pou zot fer zot par prezan. Pou ed sa lekonomi ki’n fer zot vin sa ki zot ete ozordi. Alor nou lans en lapel spesyal, pou sa ki pe kontinyen gard bann kont an deviz an deor pou met Sesel aker. Nou dir zot mersi davans pou sa.

Mr Speaker mon swete ki nou bann frer ek ser Seselwa nou apresye ki Sesel koman en Pti Leta Zil pou ganny bokou difikilte, pou sorti dan sa kriz ekonomik ki lemonn antye pe fer fas avek ozordi.

An se moman Seselwa nenport ki larelizyon, kouler krwayans politik nou annan en sel swa. Pou le moman nou bezwen met nou bann diferans a kote e travay ansanm dan solidarite pou revwar ankor sa botan dan Sesel.

A moman ki nou Sekter Tourizm i relev ankor nou pa anvi war en sityasyon kot bann viziter i anvi vizit nou pei me tou nou bann pti biznes touris in fini fermen. Sa bann mezir ki nou pe propoze pou konsiderasyon Lasanble Nasyonal, i esansyel pou asire ki sekter prive i reste dan en leta vyab e solid.

Pou konklir, mon remersye tou bann endividi e parti prenon dan Sekter Prive pou zot kontribisyon pou ki nou kapab formil en Bidze ki pou ede siport tou travayer, stabiliz nou lekonomi e bann biznes, rekonstrir konfidans e rezilyans dan nou sosyete e protez nou lasante.

En remersiman spesyal pou Prezidan Danny Faure pou son gidans; mon bann koleg Minis e bann Minister Departman Lazans, ki’n vwar zot bezwen re angaze dan sa prosesis Bidze; tou mon bann staff Minister Komers Lenvestisman e Planifikasyon Ekonomik pou zot travay konpetan e o nivo pou refer sa Bidze dan en letan tre limite.  E pli enportan pou zot fidelite.

Mersi osi Gouverner e bann staff Labank Santral pou zot langazman tre profesyonnel dan sa travay. Mersi a Mr Speaker e son Sekretarya Lasanble Nasyonal, pou ofer son sipor e konprenezon dan sa prose, pou ki nou kapab soumet sa lamannman Bidze kantmenm i pa’n enn ki fasil.

Nou remersi enfiniman tou bann travayer Imigrasyon, La Dwann, Departman Risk ek Dezas, Lapolis,  SPDF e partikilyerman bann travayer Komisyon Lasante Piblik e Lazans Swen Lasante ki pe fer en travay ekselan dan sa moman difisil. Mon aprezan demann sipor tou Manm  Lasanble  anver sa Bidze ki pou kapab ede soulaz sekter prive bann vilnerab e  travayer servis esansyel ki pe devoue pou anpes sa pandemik propaze.

Mon alor lans en lapel pou bann Manm Lasanble, pou ki nou travay around the clock ziska minwi, si nou oblize, pou nou ganny sa nouvo Bidze aprouve par Zedi le 09 Avril 2020.  Mr Speaker mon alor rekomann pou laprouvasyon Lasanble Nasyonal en sonm R10, 447,151,547bilyon e 0 sou koman lamannman Bidze 2020.  Mersi.

 

MR SPEAKER

Mersi Minis Loustau-Lalanne. Bon nou fek swiv prezantasyon Appropriation (Amendment) Bill 2020. An bref Revised Budget pou 2020. Nou pou aret nou travay pou ozordi e nou pou annan en Assembly Business Committee 11er anler kot Speaker’s Conference Room pou nou regard fason ki nou pou travay sa de zour.

Lasanble pou repran son travay demen Merkredi le 8 Avril 9er bomaten kot nou ava swiv repons par bann Manm.  Nou ava komans avek le de Leaders e osi tou apre nou ava antre dan deba lo bann pwen for dan Bidze, kot nou ava al dan Staz Komite kot bann Manm a demann leklersisman;- i a kapab demann bann kestyon lo bann diferan sonm ki’n ganny apropriye dan sa Revised Budget.

Avek sa mon ti ava kontan remersi Minis ankor enn fwa avek son bann teknisyen. E mon remersi osi tou bann Manm e tou dimoun ki a lekout. Lasanble i adjourn e nou repran nou travay parey nou’n anonse, demen 9er bomaten.

 

(ADJOURNMENT)