::
Home » Verbatim » 2020 » Verbatim Tuesday 24th March, 2020

Verbatim Tuesday 24th March, 2020

NATIONAL ASSEMBLY OF SEYCHELLES

Tuesday 24th March, 2020

 The Assembly met at 9am

 National Anthem

 Moment of Reflection

 Mr Speaker in the Chair

 

 

MR SPEAKER

Bonzour tou Manm Onorab.  E bonzour tou dimoun ki a lekout e pe swiv travay Lasanble Nasyonal.  Bomaten nou pou rankontre pou nou pran Private Notice Question lo sityasyon Coronavirus dan nou pei.

Mon oule fer sorti ki Lasanble Nasyonal i bezwen touzour pare pou rankontre dan bann ka pou konsider bann mezir ki Gouvernman pe pran e osi apport sipor kot fodre.

Nou pou pran sa kestyon, ziska 10.30 bomaten, kot apre nou pou break, e nou pou retournen 11er pou nou konsider lezot biznes ki lo Order Paper.  E sa i bann Prozedlwa ki bann Consequential Amendments to the Anti-Money Laundering Act e osi tou nou annan en Lagreman, en Ratifikasyon pou nou konsidere.  An vi advisory ki nou resevwar sorti kot Minister Lasante, Lasanble pe osi pran serten mezir pli strik, e sa depi semenn pase.

Kot nou’n fer sorti ki nou pa pe resevwar okenn group ki pou vin vizit Lasanble e okenn Manm piblik, swa ki pe vin kot mon lofis oubyen kot lofis le de Leaders.  Nou’n donn strik direktiv avek bann Sekirite lo gate.  Nou osi pran bann mezir isi menm anndan pou nou lev nivo lizyenn nou, nou’n pran osi tou bann mezir kot okenn Manm oubyen staff, ki annan serten kondisyon lasante, oubyen ki’n kapab ganny serten ekspoze pou zot reste se zot.  Parey nou’n, nou’n fer nou bann plizyer rankont and all that, nou pou kontinyen evalye sityasyon anmezir nou ale, me touzour nou pou reste an swivan bann direktiv ki sorti kot Lotorite Lasante.

Avan nou konmanse avan nou pran nou Business lo Order Paper e mon ti’n anvoy en pti mesaz kot tou lede Leaders bomaten, mon pou donn zot ankor laparol bomaten pou fer en pti ladres bref pou popilasyon an deor.  E apre sa nou ava pas lo bann Business lo Order Paper.  Lo mon kote ankor enn fwa mon fer lapel ki dan, ki pandan sa moman difisil ki pei pe fer fas avek mon demann Manm piblik pou pa panik.

Me swiv bann direktiv ki Lotorite pe donnen.  Annou aret senm bann fo nouvel, zis pou fer nou popilasyon panik e tonm dan lafreyer.  Annou reste ini, e osi annou montre konpasyon anver les uns e les autres. Bon mon ava aprezan donn laparol Onorab Charles De Commarmond Leader Government Business.  Onorab.

 

HON CHARLES DE COMMARMOND

Mersi Mr Speaker.  Bonzour Mr Speaker.  Bonzour tou Manm Onorab e tou dimoun ki a lekout.  Mr Speaker mersi pou donn mon laparol bomaten la, poudir de pti mo ankor, lo sa sityasyon sa pandemik ki devan nou e ki mannyer nou pe ale e ki sa ki nou devret pe osi fer.

Mon swiv dan sa lapel ki ou’n fer, e la mon oule osi felisit leadership pei sa Komite spesifikman anba gidans Prezidan Faure, e Dr Jude Gedeon ek zot lekip i enportan sa lekip sa travay ki zot pe fer ;- en travay eksepsyonnel dan en moman eksepsyonnel.  Mr Speaker tou Dirizan i montre son kalite leadership dan bann letan kriz dan en pei.  E mon war la sa letan eksepsyonnel ki nou ladan sa letan, sa letan vreman sityasyon difisil, i pe montre nou ki mannyer pei i anba bon leadership – sirtou letan nou war poudir  sa Komite i pe get keksoz dan en fason stratezik.

E la mon le lans en lapel pou ki dimoun i bezwen angaz li osi dan sa travay ki pe ganny fer.  Savedir mon pe koz community engagement ! I enportan dan sa travay ki pe ganny fer e travay sa Komite pou zot realiz sa pou nou si oule dir a win lo sa viris la, lo sa pandemik, i enportan ki nou, nou annan en langazman tou pep Seselwa.  E la mon oule salye an partikilye bann legliz.  Bann legliz nou pa’n bezwen lockdown pou zot pran bann mezir, bann desizyon.  E sa i en legzanp konkret.  Zot in deside aret fer lanmes – pa – fini.

E vwala ki mannyer e ou gete lo, lo nivo Lasanble pa’n bezwen lockdown pou ou pran bann mezir ki ou’n bezwen pran.  Ou’n pran li akoz ou engage dan sa problenm ki devan nou ki nou pe fer fas avek. E la nou lans lapel avek private sector, bann NGOs e tou leres lenstitisyon ki annan pou zot kapab osi donn zot kontribisyon ladan.  Mr Speaker nou bezwen annan linite ou’n mansyonn sa.  E la mwan osi oule ki nou devret pe pres convergence nou lespri pou kapab rezourd sa problenm pou kapab fer fas a sa sityasyon difisil ki devan nou, nou bezwen annan sa linite.

Olye annan divergence, nou bezwen annan en convergence approach vizavi sa sityasyon difisil ki devan nou.  E ladan i enportan, tou dimoun i pran son responsabilite e i zwe son rol byen.   Sa bann desizyon ki pe ganny pran la, ki pe ganny fer Mr Speaker par sa Komite, i pa pou ganny reisi i pa pou ganny manifeste pozitivman, si bann dimoun pa donn en koudmen e zwe zot rol.  Pran rol dan bann landrwa travay, get sa ki ou’n fer ou gete i annan serten lezot landrwa travay kot zot pe pran konsiderasyon sa ki sa bann vizyon ki sa Komite pe met devan.

Be dot par i annan ki pa pe zwe zot rol korekteman.  E la nou lans en lapel atraver sa koze ozordi nou lans en lapel poudir tou dimoun pran zot responsabilite.  Sirtou kot nou bezwen annan konpansasyon avek bann travayer dan bann landrwa travay.  Annou pa vin rizid.  Annou konpran zot problenm ki zot annan.  Alor fer bann diskisyon, fer bann meeting e pou war kote nou kapab reach out pou nou kapab aranz nou bann travayer, fer ki pei i kontinyen me an menm tan nou pe kontrol sa sityasyon.

E la mon le felisit ankor enn fwa sa Komite, akoz ki nou pe war dan pei pandan sa detrwa zour?  I annan en stabilizasyon lo lakantite ka, e savedir i montre ou poudir nou pe fer byen.  E lezot pei deor pe swiv nou e pe felisit nou !  Lanmerik i pe pran legzanp ki nou pti Sesel nou pe pran vizavi zot bann lendistri touris bann lotel.  Ou konpran?  So annou pa vin en sityasyon parey ler nou pe war Moris.  So nou kapab fer en keksoz ki pli fantastik si nou pran li faz par faz.

E Mr Speaker i annan plizyer travayer, plizyer dimoun bann taxi driver, bann pti biznes ki avek ki travay avek bann lotel ensidswit ki pe apros nou, in apros mon biro in apros bann lezot koleg lo mon kote, e ki zot pe dir nou regarde ki nou pou ki mannyer pou ed zot ensidswit.  Mon pe lans en mon pe dir zot ozordi nou annan Question Time la me an menm tan sa bann lenformasyon sa bann problenm ki zot in met devan mon, mon’n fini pas avek Lotorite.  Mon annan en kontak direk avek Prezidan Faure, avek bann dimoun lo sa Komite.  E o firanmezir ki mon santi ki i annan problenm i annan issues ki ganny met devan mon met avek zot.

Akoz mon pa kapab rezourd sa mon menm be i annan sa Komite mon pas sa lenformasyon avek zot.  Sa ki nou devret pe fer nou tou.  E lo sa pwen ankor ki ou’n mansyonnen sa kestyon bann fo lenformasyon, annou arete mon’n dir lotrozour la e mon repet ankor sa pa pe fer nou dibyen ditou.  So e mon ti ava kontan tou bann parti politik tou bann responsabilite ki annan bann dimoun ki responsab annou dir bann dimoun kondann sa bann, sa bann fo lenformasyon ki zot pe anmennen dan social media nou bezwen kordonen.  Montre nou poudir nou ansanm dan sa lalit dan sa lager e alor kondann sa bann fo keksoz.

E la mon oule osi lev en, en pwen enportan.  Bann landrwa travay ler zot war i annan zot staff, zot dimoun pe fer sa bann move keksoz pran aksyon.  Aksyon i bezwen ganny pran pou dither lezot pou, pou zot pa fer sa bann keksoz.  Akoz sa lalit la si nou pa met nou pa zwenn ansanm nou pa fer keksoz dan en fason ansanm, nou pa pou reisi.

So mon demann ankor enn fwa sa, sa lapros konzwent sa lapros ansanm, sa lapros dan en fason konverzans e dan en fason si oule kot nou pou kapab ariv ansanm lo sa problenm.  Ou war pran ou lo Erport, bann Supervisor zot pa met, zot pa met en konparezon sanitiser, zot pa tyeke si bann zot bann staff in met legan.  Prezan ki arive? En senp bann fot koumsa i kapab kout ser.  Ou war en, en vwayazer in fini ariv andeor Erport li prezan pou tay, taye al rod li pou akoz pa’n swiv bann protokol.  E mon pe lans lapel tou sa bann dimoun ki annan responsabilite, annou desarz sa responsabilite byen, pou ki nou ede dan sa travay nob, ki annan devan nou.  Alor mon dir ki sa Komite kontinyen fer son travay byen.

E nou Lasanble Nasyonal nou lo sa kote latab e nou, nou tou dan sa pei nou pou swiv e swiv zot gidans swiv sa ki zot pe fer.  E nou demande ki bondye i beni zot i gid zot, e i kontinyen aport sa fri enportan pou nou pei e kontinyen fer nou si oule win lo sa, lo sa malez ki devan nou, lo sa problenm COVID-19 la.  Ki sa, sa problenm viris Corona, e nou anvi ki nou, nou ganny li dan en fason eksepsyonnel parey nou pe, nou pe win dan sa lalit ki nou war ozordi.

So vwala Mr Speaker mon, mon lapel ankor community engagement annan en convergence approach, pou nou kapab win lo sa, lo sa problenm.  Behaviour, behaviour nou pep i primordyal, si nou behaviour i al kont sa ki nou pe dir fer menm si ou pou fer lockdown be behaviour pa’n bon.

Be ou pa war Moris behaviour ki mannyer i été ?  So ankor enn fwa mon dir annou fer sa dan sa fason ini, dan sa fason ansanm e la mon lans ankor en lapel ek tou Leaders dan pei, pou zwe zot rol pozitiv fas a sa, fas a sa problenm grav ki nou annan devan nou ozordi.  Mersi bokou Mr Speaker.

 

MR SPEAKER

Mersi Onorab De Commarmond.  Mon ava donn laparol Onorab Ramkalawan.

 

HON WAVEL RAMKALAWAN

Mersi bokou Mr Speaker.  Bonzour Mr Speaker.  Bonzour bann koleg Onorab, Minis ek bann delegasyon, tou Seselwa.  Mr Speaker ansanm avek tou Seselwa ek milye lo milye dimoun atraver lemonn, mon enn sa pti lavwa oubyen enn sa gout ki fer sa gran losean ki enplor Bondye tou pwisan sak maten letan sonmey i kit mwan pou ki limanite i ava trouv en solisyon pou sa problenm COVID-19 ki bann ki malad i ava ganny gerizon ki nou pa ava ganny nouvo ka.

Ki bann ki lo premye laliny defans i ava ganny kouraz ek proteksyon e ki bann fanmir ki’n pas dan vale lanmor i ava ganny lafors ek lafwa.  Nou tou nou ganny demande pou, pou azir konman en sel limanite akoz se dan linite avek menm lespri ki nou pou sorti viktorye.  Lasyans i ankor pe fer nouvo dekouver lo sa maladi, e sa maladi pa pe reste stagnant.  Konman en viris vivan nou aprann ki li osi i pe sanze e pe adopte nouvo karakteristik.

Yer nou ti ganny dir i mor vit dan ler, ozordi nou pe ganny dir en lot keksoz.  Tou sa i montre nou ki nou devret reste dan en leta alert, e fodre zanmen ki nou bes nou lebra e krwar byen boner ki tou pe mars byen.  I avek sa kalite lespri ki nou pou kapab sorti dan sa ranpar kot nou ete, e grenp sa bann gro montanny, travers kannal sa pli gro vandswet pou ariv lot kote.  E repran nou lavi avek en sanblan normalite.

Premye lapel ozordi set enl ot demann anver nou pep pou pran sa ki pe arive seryezman.  I annan tro bokou neglizans e bann rasanbleman an piblik ki kontinyen.  Sa dan li menm se nou pli gran danze konman en Nasyon.  Nou bezwen ekout sa ki bann eksper ek Lotorite pe dir nou.  Rasanbleman pou tap domino, bwar en labyer, anmezir bor lanmer eksetera fodre arete.  Pa mwan ki dir sa, me se bann Syantis ki pe etidye konportman sa viris e ki pe war son karakter ek son danze.  Mwan osi mon ede pou pas menm mesaz, e mon demande ki nou obeir sa bann direktiv.  Dan sa konteks mon ensiste ki Sesel i adopte pratik ki lemonn antye pe fer aktyelman.

Mon kontan war ki lakantite ka COVID-19 in reste lo 7 e ki menm annan en pasyan ki’n ganny teste negativ.  Mon priye ki sa dimoun i ava reganny son lasante e ganny large lopital byento.  Me ankor enn fwa fodre pa ki sa i les nou krwar ki tou i ok.  O kontrer nou devret ranforsi nou guard avek en lot nivo proteksyon ki ava osi permet nou ganny en serten lord avek laklerte dan nou pei.  Sa se pa lot ki en close down.  Kot dimoun i reste se zot pou en minimum 15 zour.

 

(APPLAUSE)

 

HON WAVEL RAMKALAWAN

Mr Speaker, apre demann pou rankontre Mr Faure, mon ti zwenn li Lendi 8.30 bomaten.  Konman de dirizan nou ti adres sa size COVID-19 nou ti tonm dakor lo laplipar mezir spesyalman lo sa demann pou en sanzman konportman lo lapar nou pep, an sa ki konsern ekout sa bann konsey medikal sorti kot Departman Lasante.  Mon ti met devan li sa nesesite pou en close down.  Mr Faure i regard keksoz dan en diferan fason.  Mon satisfe ki mon’n met tou bann largiman devan li.  E konman Prezidan Larepiblik se li avek bann Eksper ki annan sa Lotorite pou pran desizyon final.

Mon reste konvenki Mr Speaker ki Sesel i bezwen en close down konplet akoz en mezir isi en mezir laba, pou plito vin en gran danze akoz dimoun pa pe ekoute.  Nou kontinyen kominike, lo sa size savedir Prezidan Larepiblik ek mon menm la mon anvi repet sa ki nou’n osi tonm dakor lo la.  COVID-19 pa devret zanmen vin en size politik me reste en konsern Nasyonal.  Akoz nou bezwen close down Mr Speaker, premyerman lo en kote medikal en tel viris i propaze atraver dimoun rankontre kanmarad oubyen frekante.

Letan dimoun i ava pe reste se zot sa pa pou arive.  E parey nou dir an Kreol sa ki deor i ava reste deor.  Alor i enportan pou nou ganny sa lespas kot nou pa ekspoz nou lekor pou ganny afekte.  Dezyenmman en close down pou ede tir presyon lo Departman Lasante, me pa pou anpes li fer son travay.  O kontrer avek mwens presyon zot pou kapab pli byen konsantre e nou ava ganny pli bon rezilta ankor akoz bann resours i ava pli pe ganny servi.  Trwazyenmman nou pei ozordi i dan en dezord, e nou bezwen aksepte sa.  Sakenn pe fer sa ki i anvi, e sakenn pe pran son desizyon.

Dan Gouvernman nou war ki serten Departman i deside fermen, tandis ki lezot i reste ouver.  Lakour i fermen, Lasanble i ouver.  Licensing Authority yer in anons nouvo ler ouver, e Vehicle Testing Station i fermen.  Biro Lakaz menm parey tandis ki e zot i reste ouver.  Dan prive osi menm zafer serten biznes in fermen tandis ki lezot ki ofer menm servis i reste ouver.  Eski sa pa pe arive akoz nou pa lo menm paz e napa en sel direktiv e sa i anmenn nou dan en sityasyon bef dan disab sakenn vey son lizye? Nou bezwen annan en lord Mr Speaker ki fer sans ki tou dimoun i swiv.

Katriyenmman dezord nou pe trouv nou avek tou kalite desizyon ki anmenn plis konfizyon.  Par egzanp nou ganny dir ki paran ki annan zanfan anba 15an i devret kapab reste se zot.  Mr Speaker i annan plis ki 18,000mil zanfan anba 15an, ki vedir i fasilman anviron 10,000mil paran.  Mon dakor avek sa, me eski nou realize ki lenpak sa i kapab annan lo serten lorganizasyon ki reste ouver ?  Mon servi legzanp en lorganizasyon ki annan 24 staff e ki annan 14 paran avek zanfan anba 15an, eski i pou kapab fonksyonnen?

Eski i pa ti pou fer plis sans ki partou i fermen pou omwen sa 14 zour ki nou pe dir e apre en bon evalyasyon ek sertitid nou tou nou retourn travay ek lekol.  La mon mazin osi bann dimoun ki annan bann maladi ki nou pe dir i zot a pli a risk bann ki annan dyabet, asma ensidswit.  Ki provizyon ki pe ganny fer pou zot?  Mr Speaker senkyenmman avek sa konfizyon konsernan konze anyel i kler ki en close down i ava permet keksoz vin pli kler, e permet bann biznes planifye zot lekor pou apre COVID-19.

Nou pa pou kapab dan en sityasyon kot letan in ariv ler pou tou dimoun met zefor pou rekonmanse ki aprezan ki serten travayer pe pran konze anyel.  Alor ankor enn fwa fodre ki i annan en serten liberte ek negosyasyon ant anplwayer ek anplwaye pou organiz zot travay e mentenir zot bann lenstitisyon akoz apre tou, apre tou apre lanmor pou annan lavi.

Mr Speaker, sa dernyen pwen e sa detrwa pwen e i annan bokou plis ankor i ase pou montre ki nou devret annan aksyon konkret e en desizyon ferm la mon anvi pran en fraz dan diskour Prezidan Cyril Ramaphosa letan i ti pe adres son pep letan i ti dir ‘staying home, avoiding public places and cancelling all social activities, is the preferred best defence against the virus’.  Mon kontan antann Mr Speaker ki bann nouvo Regilasyon in ganny pibliye, i kler ki zot tou zot al dan direksyon en closedown alor eski i pa ler konm dir Franse pou aret pis ’autour du pot’’ pran desizyon ki ava donn lepep an antye konfyans e sertitid dan direksyon ki i pe ale.

Mr Speaker enn bann deba enportan ki pou bezwen arive, i konsern sa zafer larzan ki Gouvernman pe promet.  Dan nou kiltir kreol nou dir ki letan i annan maler en fanmir i koste ansanm e sakenn i fer en kontribisyon.  Nou war sa spesyalman letan i annan lanmor.

Ozordi mon demande akoz ki Gouvernman, ankor enn fwa parey Sid Lafrik pa etabli en fon pou demann bann ki’n pli byen benefisye avek nou lekonomi pou fer en kontribisyon ki ava ede pou soulaz bann ki pli feb.  Eski sa pa ava en gran zes sorti kot kominote an antye?  Mr Speaker i annan en kantite diskisyon parmi nou pep.

E fodre ki anmezir ki nou ekout Lotorite, fodre ki nou kontinyen ekout sa pep Seselwa akoz sa pei i osi pou li.  E sa bann diskisyon se bann konsern reel.  Mon konnen ki sa deba pou vin devan Lasanble letan sa Bidze i ava ganny prezante.  Me deswit mon ti a kontan met devan serten pwen ki nou pep pe reflesir lo la.  Eski bann dimoun ki self-employed pe ganny regarde anba sa progranm finansyel?  Sa i enkli bokou pti biznes ki travay ek touris, bann taxi, omnibus ek lezot ankor.

Eski bann gran lorganizasyon ki’n fer de milyon profi dan lepase kot laplipar dolar in kit pei pou osi benefisye?  Eski sa capping R45mil i zistifye, eski pou annan kriter lo lekel ki pou ganny asiste?  Ki led direk ki biznes pou resevwar?  Eski bann lakonpannyen ki dan lepase parey Minis Finans in dir nou pa’n pey tax, par deklare ki zot pa fer profi, pou osi benefisye?

Eski bann gran lotel ki anploy plis etranze dan top management e ki souvan pli responsab pou gard larzan deor ki estimen ant 500 a $600milyon pou osi kalifye?  Tousala se en pe bann kestyon ki dimoun pe demande, e alor nou devret konmans prepar nou.

Mr Speaker sityasyon Sesel ek lemonn i ankor dan mal annou ganny sa kouraz pou pran desizyon brav.  Sakrifis ki nou fer ozordi pou vin nou lafors demen, annou pa pran risk an krwayan ki keksoz pou ok parey Minister Lasante menm i dir avek nou ‘fingerrs crossed is not a method of contraceptive’.  E parey nou koleg Onorab Pillay i kontan dir avek nou ‘an abundance of caution is best.’ Annou plito al dan direksyon protez nou pep ek nou pei, pou ki bann zenerasyon ozordi e demen i ava annan en lespwar e viv dan prosperite.  Alor mon dir byen for, ‘’Close down our country!’’

Mr Speaker mon demande ki Bondye i beni lemonn, beni nou pei Sesel ek tou sa ki lo nou later.  Mersi bokou.

 

MR SPEAKER

Mersi Onorab Ramkalawan.  Bon nou ava kontinyen avek biznes lo Order Paper.  Mon ava pas laparol avek Deputy Clerk, pou lir bann papers laid before the House.  Deputy Clerk.

 

MADAM DEPUTY CLERK

Mersi Mr Speaker.  Bonzour Mr Speaker.  Bonzour tou bann Manm e tou bann envite dan galeri, tou dimoun ki a lekout.  Bann papye ki pe, ki pe ganny prezante i koumsa;-

S.I 25 of 2020 Misuse of Drugs Cannabidiol-based Products for Medical Purposes Regulations, 2020. 

S.I 26 of 2020 Employment Act (Exemption) Order 2020. 

S.I 27 of 2020 Lightning of Fires (Restrictions) (Fees) Regulations 2020. 

S.I 28 of 2020 Immovable Property (Transfer Restriction) Fees (Amendment) Regulations 2020. 

S.I 29 of 2020 Beach Control (Amendment) Regulations of 2020.  And dernyen;-

S.I 30 of 2020 Rate of Interest.  Mersi Mr Speaker.

 

MR SPEAKER

Mersi Madanm Deputy Clerk.  Bon mon ava demann parliamentary reporter pou apel Minis.  Anvi ki sa kestyon i annan plizyer morso, e i enplik plizyer Minister, mon’n ganny enformen ki en sel Minis pou vin devan nou ki pou pran kestyon tou bann Minister, sa se Minis responsab pou Finans e Komers Minis Maurice Loustau-Lalanne.

Me i pou akonpannyen par bann diferan zofisye ki reprezant sa bann Minister.  Me anvi ki nou pa pou kapab accomodate tou bann zofisye dan Chamber, e bann advisory ki nou pe swiv, mon pe soumet ki nou pran kestyon pou Lasante avan, apre nou ava al pou Finans avek Tourizm ansanm e firanmezir nou ale bann zofisye pou tel Departman i ava sorti lot i ava antre nou ava pran Ledikasyon e dernyen nou ava pran Lagrikiltir avek Lapes.  So nou bezwen fer li koumsa akoz menm devan lo latab kot Minis i asize i pa kapab pran plis ki enn zofisye akote li.

Ok mon ava demann parliamentary reporter pou appel Minis pou antre.  En moman.  Bon zis mon ti a kontan dir bonzour e welcome Minis responsab pou Finans e Komers Maurice Loustau-Lalanne ki bomaten pe ganny akonpannyen par plizyer bann zofisye dan bann diferan Minister.

E pou nou konmanse nou pou annan Dr Jude Gedeon e Dr Kenneth Henriette e parey mon’n dir nou pou pran sa bout ki Leader Lopozisyon i ava lir son kestyon an antye, me nou ava viz bann kestyon menm bann siplemanter ki annan pou fer avek Lasante avan.  E apre nou ava eskiz bann zofisye Lasante e nou ava fer lezot antre.  Mon a donn en pti moman laparol Onorab Ramkalawan.

 

HON WAVEL RAMKALAWAN

Mr Speaker zis avan mon demann mon kestyon mon ti ava demande ki pou nobou permet Dr Gedeon osi enterakte ki nou Lasanble i tourn son lekor dan en Komite.  Mersi bokou.

 

MR SPEAKER

Mersi Onorab.  Yes Onorab De Commarmond.

 

HON CHARLES DE COMMARMOND

Wi Mr Speaker mon swiv sa ki ou pe fer, me an menm tan lefe ki nou pe realize ki preski tou sa bann Minister i annan de dimoun ki pe vin avek Minis la.

Ou war Lasante i annan de, Ledikasyon mon’n war taler i annan de zot, ensidswit,  mon pe regarde mon pe sey gete si ou pa kapab re-aranz la devan la ki Minis i vin dan milye e ou sey met i bezwen annan en met apepre dan sa de dan kwen mon pa konnen si –

 

MR SPEAKER

Mersi.

 

HON CHARLES DE COMMARMOND

Sansan i vin difisil, si li i oule enterakte, konman i fer ?

 

MR SPEAKER

Mersi Onorab.  Mon krwar dan tou bann konteks normal wi, nou ti pou fer, e nou’n deza menm overcrowd nou latab devan, me nou pe swiv bann direktiv kot pe donn en pti pe sa lespas ant bann zofisye parey nou pe fer avek bann Manm.  E Dr Gedeon ti donn nou en latest advisory yer pou nou kapab permet sa Sitting ozordi, e mon pa anvi nou pe sey, nou pe sey akomod as much as possible sa ki Lotorite  pe dir nou.

Alor annou sey ganny war poudir nou, nou pe adere pou osi tou pas sa legzanp dan lezot landrwa ki ankor pe, pe travay.

Onorab Leader Lopozisyon in mansyonn Lakour, mon’n an kontak avek Rezistrar semenn pase ki osi pe demann nou kwa ki nou pe fer, Lakour i pa en total shut down zot annan en Ziz ki lo standby e i annan enn de ka ki pe ganny mention ki pe ganny enn de pti latansyon Ankour.  So zot pa lo en total shut down me selman zot pe osi limit tranzaksyon limit mouvman manm piblik kot zot.  Yes Onorab Waven William.

 

HON WAVEN WILLIAM

Bonzour Mr Speaker.  Mersi ou’n donn mon laparol.  Mr Speaker, mon pe regarde la i deza 9.30 e ou’n dir nou pou arete 10.30 mon konnen poudir Speakers decision is final.  Me selman mon beg lo ou indulgence akoz sa size i en size ase enportan e nou annan 4 Minister pe ganny reprezante.  So mon ti a kontan konnen avek ou ki kantite letan ou pou akord nou akoz lefe ki la parey mon dir  i 9.30.  E preseman zis 1erdtan edmi.  Mersi bokou.

 

MR SPEAKER

Mersi Onorab.  Mon pe mazin sa osi.  Mon pe pran sa konsiderasyon.  Me touzour avek bann gidans e i annan en Onorab osi ki’n donn nou serten bon gidans bomaten.

Se ki nou ava fer nou ava fer short meetings nou a break apre nou ava retournen so nou pou ale ziska 10.30 nou pou pran en break apre si nou pa fini nou a retournen 11er.

Ok nou ava regarde, nou ava assess firanmezir nou ale.  Bon mon ava aprezan don laparol Onorab Ramkalawan, pou li poz son kestyon.  Onorab.

 

HON WAVEL RAMKALAWAN

Mersi bokou.

 

MR SPEAKER

En moman Onorab.  En moman.

 

HON SEBASTIEN PILLAY

Mr Speaker mon move ki nou …

 

MR SPEAKER

Nou pa ankor eski i annan en konsansis nou oule al lo Staz Komite?

 

HON SEBASTIEN PILLAY

Egzakteman Mr Speaker.

 

MR SPEAKER

Dakor i ok?   Dakor.  Ok mon ava demann Sarge pou move Mace, pou nou al dan Staz Komite ki ava permet bann zofisye osi tou ansanm avek Minis pou kapab reponn bann kestyon bann Manm.  Mersi Sarge.  Onorab Ramkalawan.

 

HON WAVEL RAMKALAWAN

Mersi bokou Mr Chairman.  Mr Chairman avan mon demann mon kestyon, vi ki i fer premye fwa depi sa sityasyon COVID-19 ki Dr Gedeon ki annan sa latas lour lo son zepol i vin devan Lasanble.  Mon ti ava kontan lo lapar nou tou dan sa Lasanble eksprim nou sipor e felisit Dr Gedeon pou travay ki i pe fer e mon ti ava demande ki nou tou nou debout, e nou aktyelman donn li en laplodisman.

 

(Health Commissioner – Dr Jude Gedeon was given a standing oviation)

 

HON WAVEL RAMKALAWAN

Mr Speaker, etandonnen ki nou pei Sesel, parey lezot pei pe fer fas avek danze COVID-19 e ki son lenplikasyon i serye pou tou sekter nou lavi, dan lespri solidarite e avek bi anmenn nou pep ansanm par ganny bon lenformasyon, eski sa bann Minister spesifik, savedir, Lasante, Tourizm, Finans, Komers, Ledikasyon ek Lagrikiltir, i kapab donn Lasanble dernyen mezir ki zot pe pran?

Sityasyon aktyel, zot analiz, stratezi ek prozeksyon, afen ki Seselwa i ava pli byen prepar zot pou tou evantyalite?  Mersi bokou.

 

MR SPEAKER

Mersi Onorab Ramkalawan.  Mon ava donn laparol Minis Loustau-Lalanne.  Minister.

 

MINISTER MAURICE LOUSTAU-LALANNE

Mersi Mr Speaker.  Mr Speaker, Onorab Leader Lopozisyon, Onorab Leader Zafer Gouvernman, dan Lasanble Nasyonal, Onorab Manm Lasanble Nasyonal, tou dimoun ki a lekout, bonzour.

Mr Speaker sityasyon sa pandemik, par sa nouvo viris Corona i dinamik.  E i pe sanze de zour an zour. Sa maladi i en maladi serye.  E dan serten ka i menm fatal.  Departman Lasante in fer travay formidab, pou kit nou azour avek tou bann lenformasyon konsernan bann dernyen devlopman.  Nou’n deza ganny bokou lenformasyon, lo bann statistik avek Komisyoner Lasante Piblik ek son tim.

Ozordi nou konn tre byen konbyen ka ki’n konfirmen kote zot sorti.  Kote zot ete e ki pe arive avek zot.  Nou annan 7 ka konfirmen.  3 Seselwa e 4 etranze.  3 zonm e 4 madanm.  Zot larz i varye ant 20an ek 67an.  Nou osi konnen byen ki dan karantenn e ki zot pou reste laba pou 14 zour.  Si zot pa devlop sentonm.  Nou konnen osi ki i annan bokou ka dan karantenn ki dan lakour pou 14 zour avek ki zot in ganny kontak avek sa bann dimoun ki’n teste pozitiv.  Ziska yer le 23 Mars, ti annan 129 dimoun dan karantenn.  11 Perseverans, 13 Maison de Football, 53 Berjaya Beau Vallon Bay, 52 dan karantenn dan lakour.

Yer lendi le 23 Mars Komisyoner Lasante Piblik in deklar en irzans lasante piblik e dapre Lalwa, sa i permet li lo non lasosyete servi tou bann resours neseser pou adres sa pandemik dan nou pei.  I dan sa konteks ki dezormen lotel Berjaya Beau Vallon  Bay in ganny rekizisyonnen dan en fason legal, konman en sant karantenn ofisyel.  Fodre dir ki Berjaya Group in konper byen avek nou e in konpran rezonnman deryer sa desizyon, pou sa nou remersye zot.  Evantyelman nou pou transfer tou dimoun ki dan karantenn laba akoz i pli fasil pou zer zis en landrwa karantenn.

Bann mezir ki nou’n pran ziska prezan zot fokaliz premyerman anpese ki ankor plis dimoun ki’n enfekte zot antre dan Sesel.  Nou’n legalman anpes vwayaz an deor Sesel pou tou Seselwa.  E tou etranze ki sorti en rezyon kot lenfeksyon i o, pa annan drwa antre Sesel.  Detrwa sa bann pei i bann pei Eropeen, Leta Ini, Lanmerik, Lasin, Iran, Lostrali e serten lezot pei dan Lazi.  Sa lalis in pibliye nou met dimoun Seselwa konman etranze ki’n antre dan Sesel dan karantenn, si zot in kapab ganny enfekte me zot pa ankor devlop sentonm.  Nou’n met serten dimoun dan karantenn apre ki zot in ganny kontak isi Sesel, ek en dimoun ki’n teste pozitiv.

Trwazyenmman nou’n izol bann dimoun ki annan sentonm sa maladi, teste zot e donn zot tretman si i neseser.  Nou’n idantifye lopital Anse Royale dabor ek Lopital Perseverans answit konman sa de sant izolasyon e tretman.  Bann diferan Spesyalis, Eksper dan Lasante in zwenn ansanm pou etablir bann protokol kler e konplet lo ki mannyer zot pou azir dan sak sityasyon pou okip bann diferan pasyan malad.

Tretman bann pasyan par bann dokter, i baze lo en oriyantasyon oubyen guideline prodwir par Lorganizasyon Mondyal pou Lasante adapte spesifikman pou Sesel.  Formasyon neseser in fer pou tou bann group endividi ki ti bezwen plis konesans ek skill pou donn swen bann pasyan.

Katriyenmman, nou’n promouvwar bann mezir distansyon sosyal pou redwir risk transmisyon sa maladi lokalman dan nou kominote.  Se pour sa rezon mezir in pran pou ferm bann lekol e anpes bann gran rasanbleman dimoun.  Dimoun i konpran sa tre byen e laplipar pe korpere.

Senkyenmman nou’n met en kantite lanfaz lo donn medya e tou piblik lenformasyon ki kler korek e konplet.  Nou’n fer Konferans De Pres souvan,  annandler de fwa par zour.  Nou’n etablir laliny telefonn 141 pou donn piblik lenformasyon spesifik lo sa maladi.  E lo bann servis ki asosye ek sa maladi.  Sa servis in inonde toulezour, avek bokou dimoun ki pe rod lenformasyon.  Nou’n fer en kantite kominikasyon promosyon lasante, atraver tou medya.  In menm annan sanson endikatif ki dimoun in servi zot prop linisyativ pou konpoze lo sa viris.

Dimoun in ganny bokou lenformasyon lo ki mannyer sa viris i transmet e ki zot devret fer pou kas sa lasenn transmisyon.  Nou, nou bezwen reste ini reste solider ek kanmarad e fer sir ki nou pratik bann mezir rekomande par Lotorite Lasante pou protez nou lekor protez nou fanmir, protez nou vwazen e protez nou sosyete.

Sityasyon tourizm vizavi COVID ;-

 An se moman sif le 23 Mars 2020 i annan 192 pei lemonn ek teritwar avek en total plis ki 380,000mil ka, ki dimoun in atrap sa VIRIS COVID-19 e lerop in ganny deklare konman en nouvo epicentre. 

Pei Lerop in ganny enfekte i annan 55 an total.  Nou 4 marse prensipal Lerop, Lafrans i annan 16,018mil ka.  Lalmanny i annan 24,873mil ka.  Langleter i annan 5,683mil ka.  E Itali i annan 59,138mil ka.

Ziska 2enm semenn Mars laplipar lotel ti ankor pe fer ase byen.  Tou cancellation e postponement ti ankor en nivo rezonnab.  Me lotel ti pe fer resorti ki nouvo booking pa ti pe antre.  Depi ki Sesel in ferm son lafrontyer avek vwayazer Eropeen, nou’n war ki sif larive touris in tonbe drastikman e nou espekte sa i kontinyen anmezir bann lezot pei i ferm zot lafrontyer e bann lakonpannyen aeryen i redwir ouswa zot aret zot bann servis.

STB in fer en sondaz pou regard lenpak lo bann letablisman touristik dan sa survey ki ti ganny fer pandan weekend e yer Lendi li 23 Mars 72 letablisman in reakte.  Bann letablisman ki’n ranpli sa form 71poursan in bann guest house ek self-catering.  7poursan i gran lotel, 13 poursan i pti lotel 1poursan lotel mwayen e 3poursan villa deliks;- 6poursan i bann accommodation flotan.  Sa 72 letablisman i reprezant 866 lasanm an total.  E tou occupancy pou sa bann lasanm pou sa 866 lasanm i 19poursan.

2,367mil cancellation ant le 25 Fevriye le 23 Mars ki’n ganny rikorde. Valer total sa bann booking in ganny anile ziska prezan i vo $3.8milyon.  Sa 72 letablisman in rikord 215 postponement bann, bann booking pou plitar dan lannen.

Pou bann diferan lakonpannyen aeryen ki pe deservi Sesel lenformasyon lo zot servis i sanz souvan.  Statistik le 23 Mars i montre ki Qatar Airways tou son vol in ganny sispann depi le 23 Mars ziska le 31 Me 2020.

Sri Lankan Airlines pou le moman selman vol depi le 18 Mars ziska le 27 Avril 2020 in ganny sispann eksepte le 28 Mars 2020.  Air Mauritius tou son vol depi le 20 Mars ziska le 28 Avril 2020 in ganny sispann.  Condor son vol 25 Mars ek 28 mars i ankor lo schedule pou repatri viziter, e apre sa tou larestan vol in ganny sispann ziska le 19 Avril.  Turkish Airlines depi le 23 Mars tou son vol in ganny sispann ziska le 13 Avril.  Kenya Airways apartir le 26 Mars tou vol pou ganny sispann.  Ethopian Airlines anil tou vol Lendi, Merkredi e Vandredi depi le 18 Mars ki fer i reste li 4 vol par semenn.

Air Austral tou vol apartir le 27 Mars ziska le 12 Avril 2020.  Emirates tou vol in ganny sispann apartir le 25 Mars 2020, me selman i annan vol repatriation.  E Air Seychelles vol pou Sid Lafrik in redwir pou vin 3 fwa par semenn.  Mumbai in fermen pou 7 zour apartir Dimans e Moris in fermen pou en semenn.

Larestan bann vol ki pa’n ganny mansyonnen pou pa ankor resevwar lenformasyon avek zot.  Pou sa 2enm kar lannen Board Touris an se moman pe travay lo en plan pou ankouraz bann servis touristik lokal pou donn bann loportinite vakans nou Seselwa.

I enportan note ki a sa pwen sa plan pa pou marse deswit anvi ki i annan restriksyon enpoze pou rezon lasante an term mouvman piblik.  Me depandan ki mannyer keksoz i evolye i a kapab vin en lot sours sipor pou nou bann servis touristik e sirtou letan ki nou pe esper nou bann lezot marse reouver.  Zot osi pe travay lo en plan pou relans Sesel lo nou bann marse pou sezon liver 2020 en esperant ki keksoz i amelyore.

Lo kote Departman Tourizm i annan en reprezantan ki asiz lo Komite Intergrated Disease Surveillance Response ki responsab pou pran desizyon lo mezir ek aktivite ki Lotorite Lasanble Piblik i devret pran konsernan COVID-19.  Sa reprezantan i pas lenformasyon ant nou Departman ek Departman Lasante e travay pou asire ki i annan bokou kominikasyon lo bann travel advisories.  Enn parmi bann desizyon ki’n ganny pran, se pou met restriksyon lo voyaz dan bann pei afekte tel ki Lasin, Iran, Sid Kore, Itali e tou resaman Espanny. 

Travay in kontinyen pou nou revwar sa lalis son sityasyon i devlope.  Pou osi ranforsi border security, desizyon in osi ganny pran pou ferm sezon krwazyer boner anvi ki lakantite pasaze ki en bato krwazyer i anmennen alafwa i vreman bokou.  An repons avek desizyon Departman Lasante pou evit bann gran rankont e travay anver social distancing nou’n postpone en gran Konferans Enternasyonal UNWTO ki ti pou ganny fer sa mwan.  Nou’n osi cancel bann meeting piblik i ti pou ganny fer pandan bann semenn ki pe vini.  An term lezot aktivite ki nou pe fer nou’n organiz training pou tou bann staff lo bann bon pratik pou protez zot kont COVID-19.

Nou pe osi travay avek Departman Lasante pou organiz training pou bann staff dan bann letablisman touristik.  Nou pe kontinyelman distribye bann lenformasyon konman posters, video e travel advisories kot bann letablisman touristik.  E nou pe osi reponn bann demann pou lenformasyon ki sorti kot bann letablisman touristik osi byen ki bann kliyan aletranze.

Departman Tourizm pe osi ankouraz bann biznes touris pou silvouple ranbours bann kliyan ki pe cancel zot vizit san sarz zot en cancellation fee.  Sa i ava donn zot loportinite pou reorganiz zot vizit kot nou apre ki sa sityasyon in rezourd e ede gard en lanvironnman konfyans ant nou destinasyon e nou bann kliyan.

Mr Speaker konman en Manm ICAO Lotorite SCAA i bezwen respekte serten lobligasyon e swiv serten prosedir pandan dan lenstans kot i annan bann ka dirzans dan lemonn, dan sa ka pandemik COVID19 SCAA in bezwen reviz tou son bann mezir ki an plas e ranforsi bann zefor dan lentere Lasante Piblik.

Bann nouvo mezir in ganny gide par bann pratik e standar ki ganny rekomande par ICAO ki annan pou fer avek bon preparasyon e zesyon dan lenstans kot Lasante Piblik i dan en leta dirzans atraver lemonn.  Bann mezir proteksyon pardon, bann mezir prekosyon ki’n ganny met an plas pou bann travayer Erport i enkli lenstalasyon bann masin otomatik otour Erport e dan bann lofis SCAA ki met a dispozisyon kliyan ek travayer dezenfektan pou zot lanmen.

Bann travayer ki enterakte direkteman avek kliyan i ganny lekipman neseser tel ki mask ek legan sa i vin swivan gidans lasante.  Provizyon pe ganny fer pou donn lasistans adisyonnel Ladwann ek Imigrasyon pou ogmant zefor pou sansibiliz tou bann travayer SCAA ek bann lezot dimoun ki travay Erport lo lenportans gard en bon lizyenn anliny avek konsey Lotorite Lasante Piblik.  Progranm pou netwayaz e dezenfeksyon bann landrwa piblik lo Erport, Departman Lasante in donn formasyon bann travayer Skychef lo lafason zot pou netway e dezenfekte bann avyon e bann lezot landrwa relevan lo Erport. 

Seksyon ki zer terminal Erport pe travay an kolaborasyon avek bann zofisye lasante ki lo duty.  Pou asire ki bann viziter e rezidan i ganny dirize dan landrwa apropriye pou verifye e tyek zot tanperatir.  SCAA pe al aste e enstal bann camera thermal ki donn en lendikasyon lo tanperatir lekor pou ranplas bann ki deza la kot VIP Lounge kot pasaze i an tranzit e kot terminal domestik.  SCAA in entansifye konpanny pou ankouraz en o nivo lizyenn parmi son bann travayer e lezot servis lo Erport, Mahe e Praslin.

SCAA ti depi byen boner pe angaz li avek Lotorite Lasante Piblik e Departman Lasante.  Zot gidans in primordyal dan desizyon lo ki mezir Lotorite pe met an plas.  Le 2 Mars 2020 SCAA ti zwenn avek Komisyoner Lasante Piblik dan en rankont formel pou diskit sa size dan en fason pli profon.  Lofis responsab pou rezyon Lasante pou zesyon kot SCAA in touzour an kontak, avek Lotorite Lasante Piblik pou kontinyelman reste azour avek sityasyon COVID-19.

SCAA i reste an kontak avek tou bann biznes lo Erport ek bann laliny aeryen ki deservi nou larout pou fer sir ki zot reste azour avek bann mezir ki pe ganny entrodwir e pou redwir risk lentrodiksyon e propagasyon sa viris Sesel.  SCAA in aret tou bann voyaz ofisyel par son bann travayer pou sa prosen 3 mwan anliny avek direktiv Prezidan Faure.  SCAA in anvoy plan pou enplimantasyon bann nouvo sarz ki’n ganny revize.  SCAA pe fer en analiz lo lenpak finansyel, lo lorganizasyon e osi lenpak ekonomik lo lendistri lavyasyon.  Redwir bann gran rankont apart bann ki bezwen ganny fer dan bann ka eksepsyonnel.

Mr Speaker lo kote Lotorite Por zot pe ferm akse pou bann leisure boats ki oule vin Sesel tanporerman.  I annan en kantite gro yacht ki pe demann permisyon pou zot vin Sesel.  E anvi sa sityasyon nou pa kapab les zot antre dan pei.

Mr Speaker an sa ki konsern finans,  swivan bann dernyen devlopman konsernan viris COVID -19 Minister Finans an kolaborasyon avek son bann partner in konmans reviz sityasyon ekonomik pou 2020.

Sa prozeksyon nou worst case scenario.  I endike ki krwasans lekonomi pou 2020 real GDP growth pou desann, pou ariv 10.8poursan negativ konpare ek 3.5poursan krwasans ki ti pe ganny prozekte pou Bidze 2020.

Dan sa nouvo Bidze nou pou espekte en defisit dan plas en sirplis balans primer 2.5poursan ki ti’n prozekte an Oktob pou lannen 2020.  Lenpak imedya sa viris i byensir dan Sekter Tourizm ki pilye nou lekonomi.  Konpare avek en krwasans 5poursan ki ti’n ganny prozekte nou pe predir ki sa krwasans dan sa sekter i pou redwir par 50poursan.  Sa ti 2 semenn pase.

Me sa i atribye prensipalman dan sa besman dan larive pandan 2enm e 3enm kar lannen.  Avek lekspektasyon ki keksoz i redrese pandan 4enm kar.  Nou pe prozekte prezan en bes 64poursan, dan nonm viziter e reset tourizm.

Sekter prensipal ki pou ganny plis afekte i sekter akomodasyon e servis manze.  Sa pou annan reperkisyon dan lezot sekter relye enkli servis sipor ek ladministrasyon wholesale, retail ek sekter transportasyon.  Sepandan nou espekte lezot sekter pou annan lezot aktivite ki pou siport krwasans sa i sirtou dan sekter Lenformasyon ek Telekominikasyon, lasante, Lapes ek Lagrikiltir.

Sityasyon krwasans dan lezot sekter espesyalman dan sekter Finansyel ek Lasirans i reste dan lensertitid.  Mr Speaker parey Prezidan Faure in anonse Vandredi pase, nou pe anmenn en kantite nouvo mezir ki pe ganny met an plas avek bi gard lekonomi vivan pandan ki nou pou fer fas avek sa kriz global.  Ki pou asire ki napa anplwaye ki pou perdi zot job e ki osi napa biznes ki pou fermen an rezilta sa pandemik.  Minister Finans pe finaliz en nouvo Bidze ki mwan, mon pou anmenn devan Lasanble Mardi le 31 Mars 2020.

Pandan letan normal, konsonmasyon prodwir ek servis i anmenn devlopman dan reveni, profi ek tax bann biznes.  Sa i gradyelman ogmant saler ki an retour i vedir ki dimoun i annan plis larzan pou depanse lo konsonmasyon prodwir ek servis ankor.  Dan Sesel laplipar reveni nou’n gannyen pou prodwir ek servis i aktyelman sorti dan Sekter Tourizm ki reprezant 25poursan GDP.  Si sa reveni tourizm pe ganny tire nou pou remark en rediksyon dan konsonmasyon.  An rezilta sa pou kapab devlop dan en resesyon katastrofik.

Bi sa bann mezir ki nou met an plas i pou fer lekonomi kontinyen fonksyonnen.  Pou minimiz risk e kit ase larzan dan sirkilasyon.  Nou osi bezwen ankouraz prodiksyon lokal parey Lagrikiltir ek Lapes pou sa rezon nou enplor tou dimoun pou reponn sa lapel e kontinyen travay ansanm.  Sa bann mezir i konm swivan:

Garanti saler tou anplwaye dan sekter prive pou mwan Avril, Me e Zen.  Pou ganny peye par Gouvernman atraver en striktir ki’n ganny met an plas pou analiz bann demann.

Pou napa okenn redundancy.  Gouvernman pou ogmant Bidze Lazans Proteksyon Sosyal pou ki zot kapab asiste dimoun ki ganny afekte.  Gouvernman pou osi ogmant Bidze Unemployement Relief Scheme (URS) avek lasistans bann Labank Komersyal repeyman loan pou kapab ganny redwir pou en peryod 6 mwan.

Lo kote biznes tou obligasyon tax ki peyman i tonm an mwan Mars pe ganny anvoye ziska Septanm 2020.  Lobligasyon tax Corporate Social Responsibility Tax, Tourism Marketing Tax e Business Tax pou mwan Avril, Me e Zen pou osi ganny anvoye, ziska Septanm 2020.

Mr Speaker STC lo son kote pe kontinyen monitor son stok pou bann prodwir esansyel pou fer sir ki napa en mankman sa bann komodite.  STC in fini konmans pran mezir pou ogmant son stokaz lo sa bann prodwir esansyel.  Mr Speaker an se moman nou pe finaliz revizyon dan Bidze 2020 ki pou ganny prezante ek Lasanble Nasyonal parey mon’n dir Mardi le 31 Mars 2020.  Pou Ledikasyon Mr Speaker, depi ler lenformasyon in ganny donnen sa Minister in formil en plan prevansyon, preparasyon an kolaborasyon avek Departman Lasante ek DRDM. 

Plan lo nivo prevansyon e preparasyon i konpri, premyerman sesyon sansibilizasyon avek tou bann School Health and Safety Committee ek reprezantan lenstitisyon edikasyonnel ek staff headquarters ki ti pe ganny fer Vandredi le 13 Mars.  Bi sa sesyon sete pou ekip bann partisipan pou zot pli byen kapab sansibiliz bann staff ek etidyan dan zot lenstitisyon respektif.  Distribisyon posters and leaflets, print ek digital pou ledikasyon ek lenformasyon dan bann lenstitisyon edikasyonnel enkli headquarters. 

Sesyon sansibilizasyon lo nivo lekol pou etidyan ek staff avek sipor School Health Nurse avek Public Health Officers dan zot Distrik respektif.

Katriyenmman, sansibilizasyon bann Cleaning Agencies ki pe donn servis bann lenstitisyon edikasyonnel enkli bann ki travay dan headquarters.  Pou note Mr Speaker sa sesyon ti ganny fer Merkredi le 18 Mars.  Ranforsi ledikasyon lizyenn anliny avek direktiv Departman Lasante e asir fasilite ek provizyon sanniter adekwat lo nivo tou lenstitisyon.

Antretan ki sa Minister i kontinyen avek son plan prevansyon in reste angaze avek son bann partner an partikilye Departman Lasante an sa ki konsern nouvo devlopman.

Mr Speaker swivan desizyon Lotorite Lasante Piblik ek DRDM lo fermtir lekol Dimans le 15 Mars pou en peryod 2 semenn Minister Ledikasyon ek Devlopman Resours Imen met an mars son plan pou siport ledikasyon bann zanfan pandan sa letan ki zot dan lakour.  Provizyon in ganny fer e enkli resours dapre progranm letid ki’n ganny prepare par Minister Ledikasyon an kolaborasyon avek serten Ansenyan.  E osi resours siplemanter ki’n ganny poste lo website sa Minister.

Fodre note ki i annan serten lekol ki’n pran linisyativ pou prepar serten materyo edikasyonnel pou zot bann etidyan.  Sa bann materyo ki’n ganny distribye avek paran, bann etidyan kot zot lekol respektiv Zedi le 19 ek Vandredi le 20 Mars ant 8er bomaten e 3er apre midi.  Sa lenformasyon ti ganny donnen dan en Konferans De Pres Merkredi le 18 Mars e osi atraver mesaz lo radyo e lo zournal Nasyon.

Minister Ledikasyon ek Devlopman Resours Imen, i oule fer resorti ki rikord lo lakantite paran ki’n vin sers bann resours pou zot zanfan i ankourazan.  Sa i montre ki pran i konsernen avek ledikasyon zot zanfan e osi en lendikasyon ki zot pe onor zot obligasyon e sa partenarya baze lo en responsibility partaze.  Zofisye Minister Ledikasyon pe kontinyen poste resours adisyonnel lo son website.  Swivan dernyen lanons ofisyel par Prezidan Danny Faure Vandredi le 20 Mars ki tou daycare centers, childminders, lekol primer, segonder e bann sant profesyonnel pou reste fermen pou en peryod endefini.

Sa Minister pe kontinyen travay pou soutenir resours odela 15 zour.  Sa Minister pe osi konsider lezot opsyon an kolaborasyon avek sa bann partner.  Setadir servi SBC, radyo ek televizyon.  An sa ki konsern bann sant profesyonnel zot in met an plas en plan ki enkli en progranm letid adapte.  Pou ki bann etidyan i kontinyen zot laprantisaz dan lakour.

Sa i konpri bann resours dapre zot progranm letid bann etidyan i annan kontak direk avek zot bann lenstitisyon travay atraver zot sistenm kominikasyon ki an plas dan sant profesyonnel.  Lo nivo sanitasyon sa Minister pe kontinyen antreprann travay amelyorasyon dan bann lenstitisyon edikasyonnel.  Si i annan nesesite Minister Ledikasyon pou bezwen revwar e realiz son kalandriye skoler, pou minimiz lenpak negativ laprantisaz bann etidyan.

Bann langazman enternasyonal Minister pe reste an kontak avek sa bann lenstitisyon enternasyonal, Cambridge, AAT, City and Guilds e pou swiv zot gidans.  An sa ki konsern legzanmen ki ti pou fer an Me, Zen 2020 Minister Ledikasyon e Devlopman Resours Imen an konsiltasyon avek Cambridge in anvoy sa bann legzanmen pou Oktob 2020.

Sa desizyon in ganny fer atraver en kominike ofisyel le 19 Mars 2020.  Tou bann seremoni graduation e bann sant profesyonnel ek SALS in ganny anvoye.  Sa ti ganny fer atraver en kominikasyon ofisyel date le 18 Mars 2020.  Mr Speaker ANHRD i annan en total 484 etidyan ki pe etidye dan 32 diferan pei apartir Zanvye 2020.

Dan sa 40 etidyan ki ti pe etidye an Chine 34 in retourn Sesel eksepte sa 2 ki ti pe ganny restrikte an Wuhan.  Sa 2 etidyan an kestyon ti ariv Sesel plitar le 17 Fevriye 2020 apre ki zot ti’n pas 2 semenn an karantenn en France, pou note i annan 4 etidyan ki ankor an Chine ki ti prefere reste laba.  Zot an bonn sante e pe kontiny zot letid a zistans.  Lazans pe donn lasistans finansyel serten etidyan ki sorti Lasin, ki napa sa fasilite pou ed zot kouver fre enternet pou zot letid a zistans.

Pou lares etidyan ki ankor aletranze, zot non e ladres email in ganny anvoye kot Departman Zafer Etranzer pou ganny sirkile avek bann Lanbasad e bann Konsil Onorer pou ki zot kapab pran kontak direk avek sa bann etidyan pou gete pou get zot byennet.  I deza annan bann Konsiny e Lanbasad ki pe kontakte personnel ANHRD pou me Lazans azour avek bann devlopman dan sa bann pei.

Pou sa rezon ki ANHRD in soumet dat lalis tou bann etidyan, avek Departman Limigrasyon e Lotorite Lasante Piblik pou kontrol e sirveyans dan ka kot bann etidyan i antre dan pei san fer Lotorite konsernen konnen.

E ouswa pran kontak avek Lazans selman apre ki zot in fini antre dan pei.  ANHRD in imedyatman kontakte Lotorite Lasante Piblik e an menm tan demann zot osi pou fer parey.  Minister Finans in fini donn sa laprouvasyon pou fer peyman stipend bann etidyan pli boner.  Travay in deza konmanse pou fer peyman pou mwan Me, Zen ek Zilyet.

Lagrikiltir ;- Minister Lagrikiltir ti’n deza konmans diskisyon avek bann akter sirtou bann fourniser bann baz ki bezwen dan prodiksyon.  Lo kote livestock an sa ki konsern faktori ki fer manze zannimo i annan stok pou 2 mwan e i deza annan bann matyer premyer ki lo lanmer ki pou anmenn pou en mwan adisyonnel.

An sa ki konsern bann enportater manze zannimo zot in dakor pou ogmant zot stok ki aktyelman anviron 6semenn, pou vin 3 mwan.  Prenon kont shelf life sa bann prodwir ki pa plis ki 6 mwan.  Nou sel problenm se bann day old chicks, ki pa pe kapab ganny enporte an gran kantite akoz limitasyon lo fertilite bann dizef poul.  Se Lazans Lagrikiltir SAA ki prensipalman fourni bann fermye avek langre e legren pou prodiksyon.

Stok ki nou annan pou sa bann prodwir i kouver en peryod 3 mwan.  Mankman ki annan se nitrofoska e urea ki’n order i ankour e nou espekte resevwar sa prosen 25 zour antretan sa bann langre ki annan i kapab ganny servi pou ranplas nitrofoska.

Dan nou zefor pou ogmant komers rezyonal dan bann, dan re alimanter Lazans Bio Sekirite Nasyonal in eklersi lenportasyon swivan pest risk assessment ki’n ganny fer dan sa bann pei pou nou kapab enporte bann danre swivan: Kenya lavyann e legim fey e fri e gro manze.  Ethiopie lavyann e zavoka e zepis.  Sid Lafrik prensipalman lavyann bann agrim e fri tanpere.

Moris prensipalman legim fey e gro manze.  E Madagascar diri avek standar Linyon Eropeen. Tou sa ki pe ganny fer i deza anliny avek sa plan konpreansiv pou Lagrikiltir.  Me sa i neseser se pou redouble zefor e ogmant prodiksyon pli vit ki nou ti’n prozekte.

Mr Speaker Prezidan in osi anonse ki’n idantifye 14 kare later oubyen 9.7ektar later Lagrikiltir ki pou met a dispozisyon Lasosyasyon Fermye pou fer plis prodiksyon e tou bann prodwir pou kapab ganny aste par STC.

En lot mezir se ki entegre ki lentere lo loan Lagrikiltir ek Fisheries pou ganny redwir, sorti 2.5poursan pou vin 1poursan.

Mr Speaker an konklizyon ;- personn pa kapab dir avek okenn sertitid ki mannyer sa maladi pou evolye isi Sesel e aryer.  Baze lo lafason ki’n evolye dan serten lezot pei nou bezwen met nou pare pou tou bann evantyalite.  Nou pe swiv tou bann oriyantasyon ki bann Lorganizasyon Mondyal Lasante i donnen.  Nou annan en plan Nasyonal pou fer fas avek sa sityasyon dan tou son lanpler.  E nou’n mobiliz tou sekter piblik, prive, sosyete sivil e tou endividi pou sakenn zwe son rol.

Apard bann preparasyon Nasyonal ki nou pe fer kontinyelman, nou pe osi devlop oubyen konsolid partenarya avek nou bann partner bilateral e miltilateral pou ed nou an ka nesesite.  Lorganizasyon Mondyal Lasante e serten Gouvernman dan larezyon i dakor pou vin zwenn nou e donn nou en koudmen.  I deza annan en eksper OMS ki pe travay avek Departman Lasante depi yer Lendi.

Sa Eksper i annan bokou leksperyans dan bann lepidemi partou dan Lafrik.  Nou tou nou swete ki sa pandemi i fini vitman ki sa viris i aret propaze dan tou pei e i pe met nou tou kontinyen nou lavi parey avan.  Sepandan si sa lepidemi pa fini vitman oubyen si i agrave, prozeksyon ki nou kapab fer, se sa ki nou war pe arive dan lezot pei.  I annan bann ka ekstrenm e i annan bann ka mwen ekstrenm.  Dan nou bann preparasyon e aksyon nou annan touzour tou keksoz antet. Nou pe swiv sa ki pe arive dan lezot pei e nou pe fer tou sa ki nou kapab pou fer sir ki nou devret fer pou anpese war en sityasyon isi Sesel.  Nou bezwen kontinyen evalye sityasyon konstaman pe pran bann mezir apropriye baze lo levidans e lo meyer pratik enternasyonal.

Sa pandemi i koze par en nouvo viris, i annan bokou keksoz ki nou pa konnen lo sa viris e bokou keksoz ki lemonn pe aprann anmezir nou pe ale.  Lasin in reisi met li anba kontrol pou le moman, gras a en travay eksepsyonnel ki zot in fer e ki aprezan bokou lezot pei pe sey fer parey.  Me dan bann konteks byen diferan, nou pa konnen kan e ki mannyer sa pandemi pou fini Lerop. 

Nou pa konnen si sa pandemi pou reaparet Lasin.  E si i aparet dan ki fason i pou reaparet.  E ki lefe i pou annan lo larestan lemonn.  Sa ki nou konnen e se ki osi lontan ki bann prensipal pei Eropeen i reste anba lockdown reperkisyon pou Sesel pou mazer.  Ziska prezan bokou nou latizann e lekipman medikal i sorti Lerop.  Lockdown Lerop pou kapab afekte nou aprovizyonnman si i kontinyen.  Nou annan fason rod fourniser alternativ atraver nou bann kontak.  Bokou nou bann etidyan dan domenn lasante pe etidye Lerop, zot letid i kapab retarde.  Mon dir byen i kapab i pa en sertitid.  Si zot letid i retarde sa i vedir nou pa pou ganny zot dan nou servis ler ki nou ti’n prevwar.

Mr Speaker mon reste konfidan ki avek tou sa ki nou’n met an plas ankor enn fwa Bondye pou beni nou Sesel.  Mersi bokou Mr Speaker.

 

 

(APPLAUSE)

 

MR SPEAKER

Mersi Minis Loustau-Lalanne.  Bon mon pe propoze petet nou pran en break la nou ava retournen 10.45 pou nou kontinyen avek kestyon.  Me avan nou fer li mon ti ava kontan zis pran kont prezans bann lezot zofisye ki dan Galeri e plitar zot pou vin anba avek nou.

Se Sekreter D’Eta pou Finans Mr Patrick Payet, Sekreter Prensipal pou Finans Mr Damien Thesee, Sekreter Prensipal pou Early Childhood Primary ek Secondary Education Dr Odile Decomarmond, CEO pou ANHRD Madanm Nadia Lauricourt e Sekreter Prensipal pou Lagrikiltir Mr Antoine-Marie Moustache.  Bon mon propoze ki nou break e nou retournen 10.45 pou nou kontinyen avek kestyon.  Ok nou ava break alor.

 

 

(BREAK)

 

 

MR SPEAKER

Bon nou ava kontinyen nou travay savedir kestyon siplemanter prezan pou Minis e nou pou pran kestyon ki vize ver Departman Lasante avan ok.  Onorab Ramkalawan.

 

HON WAVEL RAMKALAWAN

Mersi bokou Mr Chairman.  E mersi bokou Minis pou ou deklarasyon.  Mon krwar i donn nou en, en lide global lo ki mannyer keksoz i ete e alors nou ava kapab chip in. 

Mr Chairman mon ti ava kontan mon annan de pti kestyon an relasyon avek Lasante.  Premyerman an relasyon avek prensip self isolation, parske mon krwar ki la i enn bann problenm ki nou pe gannyen.  I annan bokou bann dimoun ki dan sa sityasyon kot zot ti sipoze pe reste kot zot e zot in ganny trouve Anvil.  Me an plis ki sa i annan bann partner dan sa bann dimoun.  Konmsi eski letan en dimoun in vwayaze i dan self-isolation konmsi nou ti a kontan ou fer sa kler ki tou dimoun ki pe reste dan sa lakaz zot osi tou zot pa devret pe bouze parske i kapab annan transmisyon.  So fer nou, fer nou kler lo sa.

Dezyenmman, eski nou kapab ganny en leklersisman parske mon’n ekout byen nou pa ankor gannyen bann, bann SI’s ki’n ganny pibliye, me selman yer swar parey nou tou nou konnen ti annan sa long interview avek Attorney General kot in etal en pe sa bann diferan S.Is bann Regilasyon ki’n ganny pibliye.  Eski nou pe al dan direksyon close down?  Parske from tou sa ki mon pe war dan sa bann, dan sa bann lesplikasyon kot dimoun pa pou ganny drwa rasanble lot, lot, lot.

Reste se zot, bann aksyon, bann fines ki zot pe mete.  E letan nou pe osi regard tou sa bann keksoz ki pe arive, and I’m sure Mr Chairman Dr Gedeon i ava dakor avek mwan ki i annan en serten konfizyon.  E avek bann zafer transportasyon kot i kontinyen annan bokou dimoun, dimoun ki kontinyen asiz anba laboutik, tou sa bann zafer.

Eski nou kapab ganny en lesplikasyon akoz ki konman Komisyoner Lasante nou ou pa donn sa dernyen Lord parske i dan ou lanmen la, pou donn sa dernyen Lord pou nou kapab an sekirite napa panik tou dimoun close down 14 zour reste se zot e nou ava kapab ganny sa lespas?  Mersi bokou.

 

MR SPEAKER

Mersi Onorab Ramkalawan.  Zis en pti mon nou’n resevwar plizyer S.Is bomaten e Deputy Clerk pe fer le neseser pou partaz ek bann Manm.  E apre midi nou pou Revised Order Paper so that nou kapab lay them before the House.  Dr Gedeon laparol i pou ou, or Minister si oule dir en komanter avan fer komanter.  Doctor. 

 

DR JUDE GEDEON

Bonzour Mr Speaker.  Bonzour Leader of Opposition, Leader of Government Business, tou bann Manm Onorab, dimoun a lekout.  Tou dabor mon ti a kontan remersye zot pou sa rekonesans louvraz ki pa zis mon ki pe fer me en gran tim Lasante, e sa laplodisman mon krwar i vize ver sa kominote travayer Lasante ki pe donn zot tou dan sa moman spesyal difisil.

En si ki bann dimoun an deor Departman Lasante ki pe met sa zefor ansanm pou nou fer fas avek sa sityasyon ki nou ladan.  Mon a sey kit mon repons ase bref e presi pou permet plis kestyon ganny demande.

Mersi Onorab Ramkalawan pou ou kestyon, sa kestyon self-isolation i en prensip ki ganny fer i ganny servi otour lemonn, i pa lideal me dapre bann guidelines ki nou gannyen avek WHO ek CDC bann lezot Lazans Lasante i en prensip épidémiologique, ki ganny servi pou kapab track en kontak en maladi.  Lideal si ou annan fasilite pou ou met sa dimoun anndan letan i ganny kontak, ou fer li.  Me napa en pei o monn ki annan fasilite met tou dimoun an karantenn.

So ki nou fer bann dimoun ki high risk nou a tou pri sey met zot anndan kot i annan aktiv active surveillance letan ou fer self-quarantine nou apel li passive surveillance, kot sa dimoun i ganny demande serten lenstriksyon i ganny demande pou reste se li i ganny monitored a zistans.  Si en dimoun i pa ankor ganny sentonm i ankor boner dan lenfeksyon son kapasite pou transmisyon i minim.  Letan ou konmans ganny sentonm la ki ou kapab annan sans pou transmet ek en lot dimoun.  Setadir bann lezot Manm fanmir pa bezwen an karantenn.  Se pou sa rezon ki contact tracing bann ka sispe i tre enportan e bann ka ki nou an kontak ek en pasyan.

E osito ki nou detekte en ka sispe, nou teste sa dimoun.  Nou fer sir ki son isolation i vin pli strik e nou teste li menm zour.  E se sa ki ganny rekomande par WHO.  Chase after the virus, look for it, pa kasyet li.  La ki nou annan plis fasilite karantenn dan lotel Beau Vallon Bay, nou pou kapab tir bann dimoun ki klasifye konman high risk dan karantenn fermen.  E demen i pou fer 14 zour depi tou bann kontak avek sa premye case ki ti detekte i pou’n arive so  nou annan 107 dimoun ki pou sorti from contact tracing demen.

So vwala so home isolation menm si i pa ideal i enn bann stratezi ki nou pe servi.  2enm kestyon as regards to bann S.I kan ki nou pou ganny sa lockdown, closedown me sa ki dimoun pa ankor realize se ki nou deza dan en leta semi- lockdown si ou get bann vol ki pe vin isi i preske pe al net, pasaze ki pe antre apard ki detrwa Seselwa preski pe al net.  Nou koneksyon avek, avek leres lemonn i pe grind to a halt parey nou dir.  E sa ki tre enportan letan ou fer lockdown letan ou fer closedown se behaviour dimoun.  Si nou pa kapab match sa closedown ek sa lockdown avek en sanzman behavior – enn.

Dezyenmman avek policing sa lockdown ou pa pou achieve ou lobzektif.  E pli gran Expert WHO dan Emergency Response to Outbreak Mike Ryan i ti dir avantyer i dir ‘‘countries are making the mistake of locking down without corresponding Public Health measures’’.  Ki sa bann Public Health measures?  Testing all suspected cases, ki nou pe fer deza.  Yer nou’n run 26 test e tou i negativ.  Bann dimoun ki ti annan sentonm ki ti lo sirveyans.

E fer si ki ou konnen kote bann case i ete ou isolate zot e ou provide treatment, sa pe ganny fer deza.  So zour sa lockdown i arive i pou letan ki nou ganny nou first community transmission sa i dapre guideline WHO sa, osito ki ou depiste ou premye ka community transmission pou bezwen al dan ou level 5 la nou dan level 4 la.  Kot i pou annan en restriksyon pli sever lo mouvman dimoun, kot ou kapab kontinyen track bann case, isolate zot sa bann ki’n teste pozitiv e teste tou bann ki sispe.  Erezman nou’n kapab avek bann demars ki nou’n fer malgre bann short supply otour lemonn, nou’n kapab anmenn sifizaman test i annan ki, ki ankor pe antre la.

E avek sa close down bann Airline nou riske annan difikilte pou provizyon nou avek bann PPEs akoz nou’n deza stok en bon pe me nou pa konn lefitir, e si nou arive kot nou pa pe kapab aste PPE akoz i napa lo marse lemonn oubyen akoz nou napa vol anmenn li isi i pou koz en problenm.  So se pou sa rezon ki en lockdown premature i ti riske kree plis problenm ki solve pou nou.

Apre osi letan ou lockdown napa flight ki vini fodre pa bliye poudir nou annan lezot bezwen koneksyon parti lemonn.  Si i annan dimoun ki bezwen al fer tretman irzan aletranze nou pa pe kapab anvoy sa dimoun ou konnen Sesel nou pa tou servis i vin en problenm.  Masin ki bezwen antre, spare parts so even problenm lozistik.  Se pou sa rezon ki nou pa pe dir napa en lockdown most likely to ou tar pou bezwen annan.  Me nou bezwen esper moman apropriye, pou nou pa kree panik.  E byensir pou fer sir ki sa lockdown i akonpannyen avek sa ki nou apel community engagement.  Nou pe travay en kantite sorry mon krwar mon pe long mon krwar non?

Nou pe travay en bon pe letan pou nou engage community, nou engage legliz depi plizyer semenn pase.  Ziska ler nou ti’n ariv lo konsansis ki pou aret fer lanmes.  E volonterman bann legliz, mosque, legliz anglikann osi tou zot in agree ki sa prensip i bezwen ganny espekte.  E la yer Mon Senyer in dir mon volonterman zot pou aret fer lanterman zot ava rod en lot fason pou zot fer lapriyer pou sak lekor ki pe al antere.  Sa i bann community engagement e bann konsansis ki nou gannyen ek lakominote pou anpese ki annan dezord.

Me i annan mon pou aksepte ki i annan en kours nou popilasyon ki pa ankor pare pou sa lockdown oubyen close down ki ou bezwen lafors pou met zot met lord.  Semenn, sa weekend apre ki nou ti deklare tou bann community gathering i ganny ban prezan Lalwa ti pe ganny travay lo la ki’n pare prezan.  Me dimoun ti pe kontinyen fer zot bann aktivite piknik oubyen bann gathering dan bann flat, dan bann housing estate pa arete sa.

Bann lakanbiz i kontinyen operate, bann home parties i kontinyen.  So si napa sa change of behaviour sanzman konportman, i pou difisil pou nou ganny rezilta ki nou bezwen.  So vwala en pe an gro nou perspektiv lo la.  Mersi.

 

MR SPEAKER

Mersi Dr Gedeon.  Onorab Ramkalawan.

 

HON WAVEL RAMKALAWAN

Mersi Mr Chairman.  E mersi pou ou larepons.  Be zisteman an relasyon avek sa eleman close down mon kontan larepons ki ou’n dir ki zot pe, pe regarde kan pou fer e an menm tan osi ou pe rekonnet osi ki poudir behaviour nou dimoun la i pa bon.

E ofet letan nou dir Bondye ki protez Sesel nou kapab dir ki Bondye i pe kontinyen protez nou pei parske si i antre nou behaviour pa bon.  Me zisteman, i annan behaviour nou dimoun ki pa bon e alor letan behaviour pa bon se la kot, kot bann ki ansarz Lord ek Lape i antre pou nobou ranforsi.  E se la kot mon ti ava espekte ki Lapolis e nou konnen ki poudir militer i ede letan i annan bann letan keksoz i, i tro bokou pou, pou Lapolis.  E deza in annan sa lapel e i yer swar nou’n aprann ki poudir i annan bann dimoun ki pe vini tou.

So lefe ki i deza annan sa kote, mon war li konman en keksoz pou nou kapab, pou nou kapab antre deza.  Me lo en lot kote sa i lo sa kote medikal.  Me selman i annan sa eleman sosyete li menm.  Pei li menm ki mannyer keksoz pe fonksyonnen.  Parey mon’n fer resorti bomaten e la mon mazinen ki Minis Finans i ava kapab ed nou, kot SLA i anons sa ki pou li, son ler louvertir i sanze, Vehicle Testing Station i fermen.  Lot kote en lakonpannyen prive i dir li i pe i a pe ferm son laboutik, i met presyon lo en lot.  En lot lakonpannyen ki fer menm biznes bomaten i ganny en call 3 son travayer zonm i dir nou pa pe vin travay akoz nou annan zanfan anba, anba 15an.

Konmsi en pe sakenn pou li.  Konmsi se la kot mwan, mon pe osi demande si nou pa krwar mon konnen ou’n servi sa mo premature close down ki pa pou bon.  Me selman la nou annan, nou annan sa peryod 14 zour e si nou al lo la nou ava al an Avril ki konmsi nou ava pli asire ki poudir sa kouvertir i konplet.

Konmsi mon pe zis ankor enn fwa met sa bann pwen se zot bann, se zot bann Expert konmsi pou regarde si letan nou parske se zot osi ki dir avek nou prevansyon, Minister Lasante menm ki koz ek nou bokou lo prevansyon.  E eski nou pa krwar ki poudir dan sa sityasyon kot nou ete napa okenn prevansyon ki premature ?  Me ki o kontrer tou form prevansyon i ava ed nou pou nou pli byen fer fas avek, avek sa sityasyon, akoz mon pe osi regard after COVID-19 parske si Sesel nou’n kapab vin en bon, en bon legzanp kot dimoun poudir be tyonbo en kou be Sesel ti handle sa sityasyon, fantastik.  E la i la bann, la i la bann prekosyon ki zot in pran e zot in, zot safe konman en pei, tousala pou ede pou ki letan nou bounce back nou dimoun i vin avek plis konfyans.

E lo kote bann Airlines i vre ki mon’n tann ou dann enn de ou bann interviews pe mansyonnen me selman pa tou bann Airlines ki’n deside pou aret vin Sesel.  E Minis in fek dir, in fek dir sa e nou konnen osi ki dan bann ka emergency pou fer vini en, en ambulance i en lot sityasyon ki, ki nou ava regarde.

Ki nou war ki poudir i annan bann diferan sityasyon kot nou pei i kapab kontinyen ganny sa bann sa bann sipor ki i bezwen menm si internally, internally nou pe demann nou pep pou, pou reste se zot e ki i annan sa close down.  I zis en pti, pti sa bann ki’n vini yer swar lo Airlines parske i annan en pe kestyon eski Pilot tou i dan karantenn?  Mersi bokou.

 

MR SPEAKER

Mersi Onorab.  Doctor.

 

DR JUDE GEDEON

Mersi Onorab.  I vre ki prevansyon pa zanmen ase, me selman si ou pa ou stratezi i pa ase vize ou riske annan lefe advers ou riske fer ou lekor plis ditor ki dibyen.  Setadir si ou fermen selman i pa swiv avek bann aksyon kalkile, organize sa domaz i kapab plis sa ki ou pe anpese.

E menm si mon ki fer sa dir sa dernyen parol i pa mwan ki desid mon tousel lo letan ki’n ariv ler pou fer en lockdown.  I en desizyon ki ganny pran sa Public Health Emergency Operation Community ki i annan bann dimoun teknik lo la avek gidans WHO osi touI pou annan moman ki ou bezwen ariv sa staz i kapab nou pros me selman nou pa ankor arive.

Me sa ki mon konnen ki’n deza ganny fer Minis Lasante in deza demann bann diferan Departman Gouvernman pou re regard zot bann servis ki egziste, kwa ki zot kapab scale down at a moments notice oubyen aret net.   E atraver SCCI osi sa bann sekter prive in ganny demande pou fer parey.  Selman si sa lockdown oubyen close down i arive en sel kou zot konnen ki mannyer zot pou fer, pou zot kapab asir business continuity menm a zistans san koz, san koz okenn risk transmisyon.  So bann pwen ki ou’n fer sorti i relevan wi nou pe konsider tre aktivman toulezour, toulezour nou meet, omwen de fwa par zour apre nou operasyon i kontinyen.

E nou espere ki letan sa lockdown i arive i pou en keksoz ki pou smooth oubyen close down i pa pou koz okenn panik mon kontan taler ou’n mansyonn zafer panik.  E mon kontan ki tou bann politisyen i angaze dan sa demars pou asir piblik pou enform piblik lo bann mezir ki pe ganny pran.  E sa i rekonfort nou ki nou dan sa zafer ansanm.  E mon ti a kontan remersi zot e felisit zot pou sa staz ki ou’n pran ki zot in pran.  Lo ki konsern karantenn yer swar si bann Pilot ek bann crew.

Sa ki enportan mon konnen se ki exposure ki determinen si sa dimoun i bezwen al an karantenn oubyen non.  Sa bann pasaze ki ti Moris zot ti dan kominote laba.  E letan nou koz avek Air Seychelles nou ti eksplik zot ki avan pasaze i bord fodre tou dimoun i ganny screen si en dimoun i annan sentonm i napa drwa anbark dan avyon.  I bezwen reste pou rod swen medikal e sa in ganny fer.  Kontak ant bann pasaze avek crew in minim sa bann crew si zot ti annan sentonm i zot pa ti manifeste so pa pe kapab transmet.

So malgre sa zot ofer pou al zot in al dan home quarantine zot tou.  So menm zot risk i preske non egzistans zot in al dan home quarantine e nou’n met zot anba sa bann radar monitoring osi tou.  Mersi.

 

MR SPEAKER

Mersi Dr Gedeon.  Onorab Regina Esparon.

 

HON REGINA ESPARON

Mersi Mr Chair.  Bonzour tou dimoun.  Mr Chair mon ti a zis kontan demann avek Dr Gedeon, nou’n war dan bann klinik avek bann sant lasante parey Lopital North East Point, kot bann i annan screening ki pe ganny fer avan vizit bann pasyan.

Eski Minister li menm li sa i en demann ki mon pe fer lo lapar Ners, eski Minister i pe mazinen an se moman la pou envestir dan bann touch free digital thermometer pou sa bann landrwa ki pe fer screening kot viziter pe vini?  Parske an se moman ki ou war, ou war sa pov Ners avek sa termomet pe sekwe met anba lebra sa, sa dimoun apre esper son kantite letan pou sa.

Si i ti annan enn sa bann touch free i ti pou zis peze ganny tanperatir sa viziter e sa ti pou fer louvraz sa bann Ners sa bann travayer Lasante pli fasil.  Eski zot pou envestir ladan premyerman?

Dezyenmman, screening lo Por ki mannyer sa pe ganny fer?  Akoz i annan en pe lenkyetid, nou annan bann bato Espanyol ki zot in pran crew isi, e sa bann bato ki pe desarz ton, nou bann debarder i an kontak avek sa bnn travayer lo bato.  Ki kalite monitoring i annan ki kalite screening pe, pe ganny fer pou fer ki nou bann debarder ki pe travay lo bato ton pe desarze pa pe antre an kontak direk avek bann dimoun ki’n enfekte?

E trwazyenmman, ki kalite advisory Minister pe donn bann letablisman touristik.  Akoz nou war i ankor annan etranze ki pe antre bann touris pe antre nou kontan pou bann letablisman ankor pe ganny zot kliyan.  Me selman sa bann etranze zot, zot pe al lo lans melanz avek lezot Seselwa, avek nou bann dimoun konmsi ozordi zot vini zot, zot tes negative.

Me selman si zot fek kontakte sa, sa lenfeksyon i pran 14 zour pou devlope.  E pandan sa letan ki zot isi zot napa okenn advisory ki Minister pe donn bann letablisman touristik poudir sa bann etranze fer prekosyon.

Parske an se moman bann konsey ki pe ganny donnen i an kreol e sa bann dimoun ki la lo konze zot pa pe enterese get televizyon ekout radyo zot, zot in vin konze.  Epi en dernyen pti keksoz Mr Chairman nou’n war en de Labank ki’n konmans servi sa zafer social distancing.  Me i annan lenkyetid avek ABSA parske ABSA is business as usual. 

Kot, kot SRC nou’n war zot donn sa zistans, Airtel i donn sa zistans me Labank ABSA li is business as usual en paran fek dir avek mon son garson i ganny problenm sinus e i an kontak direk avek bann kliyan.  Napa okenn social distancing.  Mersi.

 

MR SPEAKER

Mersi Onorab.  Dr Gedeon.

 

DR JUDE GEDEON

Mersi Speaker.  Mersi Onorab pou ou bann kestyon.  Wi nou pe envestir dan digital thermometer petet Health Care Agency pou konnen kan sa bann nouvo lekipman pe arive e sa semenn.

I vre i pa ideal pou servi en, en manual thermometer bann temperature scanner i pli ideal.  Lo se ki konsern screening kot Por nou annan en prezans zofisye Lasante Piblik permanan lo Por.  Tou bato ki antre, ki swa bato lapes, ki bato kargo i ganny verifye avan ki menm i koste abor.  So si i annan okenn dimoun abor ki malad dapre Lord, dapre guidelines Kaptenn i fer en health declaration form.  E sa i ganny egzaminen par Public Health Officer e i anvoye kot, kot mon 24 lo 24.  Par-ler aswar mon ganny telefonnen oubyen sa ki pe stand-in pou mwan i verifye sa, sa form i gete si i safe pou sa bato koste oubyen nou bezwen al verifye abor avan.  So sa i pe ganny fer.

Bann bato lapes ki dan delo Sesel Zot pa pe kapab pran nouvo crew i annan en pe letan la.  Bann Espanyol par egzanp pe i annan en pe letan depi nou’n blok tou bann, bann crew ki antre pou lo bato EspanyolLetan zot vini zot ti al direkteman lo bato.  Alors bann ki lo lanmer ki’n fini pas 14 zour zot pa poz okenn risk annan sa COVID-19 avek zot.  Me parkont Lotorite Por ansanm avek bann zofisye Lasante Piblik zot still fer bann zot etablir bann sistenm verifikasyon e screening bann dimoun ki pe al travay lo bato pou al desarz bato.

Sa zot met anmars depi i annan 1 semenn de se la.  Zot pe travay avek nou bann zofisye tre pros pou fer sir ki sa bann dimoun ki pe al travay abor pa ganny ekspoze avek okenn risk adisyonnel.  Touris parey zot war sa detrwa zour ki’n pase i annan en kantite vol ki pe antre vid pe pran touris ki isi pe al avek.  Bann lotel  pe vide e by lafen sa semenn mon krwar preski tou pou’n fini vid.

Rezon se akoz nou’n blok tou bann flight kot bann marse touris nou kapab dir Lerop ek Lanmerik tou Lostrali e nou panse pandan sa semenn ki vini pou napa okenn Eropeen ki pou reste isi apard si i pe viv dan en lot landrwa kot napa bann transmisyon aktiv.  E la i ganny verifye pli par Erport konmela pe fer exit screening letan zot antre zot ganny tyeke as well.  So en mannyer ki i minimiz ou risk i pa elimin li net.

Me si nou al dan en lockdown konplet then tou bann vol pou aret vini pou en pe letan.  Nou kontinyen tourn lo sa size lockdown i annan en warning ki nou’n ganny donnen par WHO i dir fer atansyon zot fer lockdown ou pa ganny nouvo ka a lafen sa lockdown ou retir ou gard ou get en rebound of the virus. 

I dir fer atansyon a rebounce.  E sa viris pou avek nou pou en bon pe letan sa.  Ou kapab lockdown pou en mwan i pou ankor still dan lemonn i pou ankor still kapab entrodwir.  Se pou sa rezon ki bann mezir Lasante Piblik i bezwen kontinyen dan en fason sistematik, organize, prolonze sustainable.  E pou nou kapab fer sa nou bezwen tou sa resours neseser.

Bann Labank bann landrwa bann servis piblik nou’n meet avek bann lezot Lazans Gouvernman pandan weekend nou’n idantifye sa konman en febles kot sa social distancing pa pe ariv parey nou ti a anvi.

E nou pou pe donn bann lide ki mannyer zot pou fer li.  Menm pou met bann demarkasyon ater bann tapes kot i dir ou la, la ou kare pou debout ladan e nou bezwen korperasyon sa bann landrwa.

Dezyenmman nou demann zot plis sekirite pou police sa bann lansableman sa bann laliny.  So vwala en pe mannyer nou pe travay pou fer sir ki lavi i kontinyen me selman dan en fason pli organize.  E si nou bezwen fer en close down oubyen lockdown deswit i pa koz en disarray oubyen en dezord total.

 

MR SPEAKER

Mersi Dr Gedeon.  Mon ava donn laparol Onorab Lemiel.

 

HON SYLVANNE LEMIEL

Mersi Mr Chair.  Bonzour Minis.  Bonzour Dr Gedeon.  Mr Chair mon, mon ti a kontan demann avek Dr Gedeon antan ki sa Sant Izolasyon Anse Royale i bann lenformasyon ki nou bann dimoun pe vreman anvi konnen.

Sa Sant Izolasyon Anse Royale pou le moman nou’n ganny dir ki i fermen.  E tou dimoun in ganny anvoye kot Lopital Lafanmir Perseverans.  Nou ti a kontan konnen petet ki pou arive la avek sa sant?  E Sant Kominoter pe ganny servi pou bann servis out patient. 

So nou sipoze annan nou Out Patient Clinic osi ki dan Bidze nou ti annan larzan nou le konnen osi, eski zot pe mazin reste dan sa sant ki pou le moman menm si ler nou’n agree nou ti war poudir i pa apropriye sa landrwa.  Akoz i annan en kantite keksoz ki nou merit ganny fer ek sa sant.  Eski zot pe mazin kontinyen reste lanmenm la pou le moman or zot pe mazin bouze pou al dan en lot landrwa dan Distrik pou donn sa fasilite dan en lafason en pe pli konfor nou bann dimoun dan Distrik?

E donn nou en, en lasirans or en ki zistans Minister in arive avek lo kote avek sa nouvo Outpatient Clinic?

Akoz nou pou war ki letan zot pe servi nou lopital konman sa sant izolasyon nou, nou vreman kwense nou vreman napa sa landrwa so how soon ki nou pe war nou pe mazinen Minister Lasante pe vin fer sa Outpatient Clinic osi?  Mersi Mr Chair.

 

MR SPEAKER

Mersi Onorab.  Annou fer atansyon nou pa tro debord kestyon lo size ki devan nou.  Anvi nou pe rod en nouvo fasilite ki Gouvernman in promet.  Dr Gedeon.

 

DR JUDE GEDEON

Mersi Mr Speaker.  Mersi Onorab Lemiel.  Pou Lopital Anse Royale nou pou gard li konman en landrwa pou surge  an ka ki nou ganny ka adisyonnel ki lopital Perseverans i plen e ki nou bezwen met dimoun dan en lot landrwa e nou annan Anse Royale ki pare ki kapab accommodate nou apel sa en surge capacity ki nou kapab accommodate dimoun.

Osi en lot posibilite se ki nou kapab servi li konman en sant pou tret bann ka ki mild.  So pou nou kapab separ bann diferan kalite kategori pasyan.  An se ki konsern sa nouvo landrwa pou sant lasante mon napa tou detay lo la akoz i annan keksoz pou Health Care Agency selman mon konnen poudir zot pe get zot prepar en landrwa pou kapab re-house bann servis Anse Royale.

Dr Henriette in donn mwan en pti lenformasyon la, sa batiman ki pros avek Lopital Anse Royale kot UNISEY in ganny idantifye konman sa outlet pou Anse Royale e travay pe ganny fer pou kapab donn servis dimoun Anse Royale.  E mon profit sa lokazyon pou remersi bann zabitan Anse Royale ki’n tre konpran sa difikilte ki nou ladan e zot in korpore avek nou.  Nou apresye sa.  Mersi.

 

MR SPEAKER

Mersi Dr Gedeon.  Onorab Clifford Andre.

 

HON CLIFFORD ANDRE

Mersi Mr Chair.  Mr Chair  mon annan 3 kestyon. Mon ti a kontan demann avek Dr Gedeon si an vi ki i annan bann Ners dan sistenm Lasante ki’n train dan bann sistenm communicable disease ki sa mon krwar i tonm dan sa kategori.

E infection control, infectious control, eski zot in rod en fason pou zot reganny sa bann ners oubyen sa bann dimoun ki spesyalize ki’n train dan sa bann domenn pou zot kapab vin asiste avek sa sityasyon COVID-19 ki nou annan?

E apre sa, 2enm, se eski zot in posibleman war en pti pe benefis finansyel ki sa bann dimoun i kapab gannyen pa ki nou bezwen ganny benefis lo en sityasyon Lasante, koumsa me selman letan zot pe travay definitivman zot pou bezwen ganny serten reminerasyon allowance ki asosye avek?

Apre mon 3enm kestyon Doctor se Speaker in dir bomaten, ki ou’n donn serten gidans pou nou kapab asiz dan bann fason ki apropriye anba sa sirkonstans ki nou ladan.  Ki Minister Lasante atraver ou, ou lofis pe fer pou war ki dan transpor piblik, akoz annefe mon’n ganny en text ki dir si nou kapab ganny sa social distancing ki demande me selman lezot dan bis pa pe obzerv sa.

So ki kekfwa ou lofis pe sey fer pou kapab amelyor lo serten sityasyon?  Mersi.

 

MR SPEAKER

Mersi Onorab Andre.  Dr Gedeon.

 

DR JUDE GEDEON

Mersi Mr Speaker.  Mersi Onorab.  Tou bann Ners ofet dan en fason oubyen en lot i engage dan sa demars.  E in menm annan en kantite redeplwayman bann pa zis ners preski tou travayer Lasante in ganny re-deplwaye  bann ki annan bann konpetans spesifik parey bann nurse ki’n train dan communicable diseases zot pe ganny angaze osi tou.

Fodre pa bliye poudir servis Lasante i kontinyen nou kontinyen annan dimoun ki ganny lezot maladi e zot bezwen kontinyen donn, ganny swen.  ICU nou annan pasyan ki antre pou lezot maladi.  Tou bann wards i ankor ouver nou annan en sel lopital referan oubyen en Lopital Santral Sesel ki kapab trete ki kapab fer loperasyon.  Loperasyon esansyel pe kontinyen.  So tou sa bann servis i bezwen kontinyen an paralel avek sa bann demars nou annan zis, tann koz zis COVID-19 be nou travay Lasante i bezwen kontinyen avek business continuity donn servis bann lezot keksoz vaksen i kontinyen.

Resaman nou ti konmans en, en konpanny vaksen pou larouzol, e nou’n war poudir nou ti ganny korperasyon en kantite retired nurse ti vini pou donn koudmen ek sa vaksen.  E nou’n war poudir lanmwatye, lanmwatye semen bezwen retire slow down pou nou kapab mount response sa COVID-19 en pe pli byen.  So tou sa bann demars pe ganny fer pou redistribye bann staff pa zis Ners me lezot staff esansyel ki travay dan Lasante.

An se ki konsern allowance wi, HR konman enn sa bann cell dan Public Health Emergency Operation Committee i pe travay lo en striktir allowance pou tou bann dimoun tou bann staff Lasante ki pe travay avek COVID-19.  Mon pa kapab donn nou en sif la me selman sa pe ganny travay lo la pou resevwar.  Public transport, i enn nou bann challenges.  Nou, nou ti a kontan bann sanzman ki al dan public transport i pa zis pou, i en keksoz ki pou kapab zis soutenir a la lonterm.  Nou pe travay avek SPTC premyerman pou zot netway zot bis en pe pli byen.

Nou pa satisfe avek en kantite letan sa bann bis ladan.  Me nou kontan ki annan demars ki pou ganny nouvo bis.  I annan pli bon fason pou kapab fer social distancing dan bis e sirtou si i annan plis bis lo semen ou kapab limit lakantite pasaze dan sa bis. 

So nou pe travay avek zot me zot osi zot bezwen sa korperasyon piblik pou letan ki dir zot nou pe pran zis en pasaze par seat ;- dimoun pa lager pou obzekte.  Nou konnen nou bezwen sa, sa korporasyon piblik.  Mersi Onorab pou ou bann kestyon.

 

MR SPEAKER

Mersi Dr Gedeon.  Onorab Afif.

 

HON AHMED AFIF

Mersi Mr Chairman.  Mr Chairman mwan kestyon i pou Dr Gedeon, mon osi mon ti a kontan felisit bann travayer Lasante ki pe vreman vin devan pou met zot, zot lekor lo front line, e zot pe fer en travay ki ekselan.  Me mon ti a kontan demann Dr Gedeon en kestyon.  E si i kapab donn mon 3 bon rezon.  Akoz Sesel pa kapab adopte sa ki Langleter in fer bomaten?  Zot in apel li en lockdown selman in defini in donn en definisyon.

I dir en lockdown tou dimoun reste se zot, me i donn 4 rezon pou li kapab war ou dan semen.  Enn, se ou pe al laboutik pou aste manze, 2enm ou pe al fer legzersis ;- 3enm ou pe al lopital e 4enm ou pe al travay dan en landrwa esansyel.  E i defini lekel ki esansyel.  E dan ka Sesel mon mazinen nou ti kapab dir si ou travay PUC oubyen ou pe al anmas bann salte obor semen.  2enm si ou, ou dan telefonn biznes telefonn, radyo, ek televizyon.  3enm si ou dan en Labank, si ou dan lafors sekirite, si ou lo Por ek Erport akoz i annan kargo ki pe antre.

Si ou dan biznes transportasyon parey SPTC, si ou en laboutik ki vann manze ek komodite esansyel enkli latizann, si ou dan Lopital Sesel oubyen si ou pe donn maintenance, ki pou tenir okenn sa bann lezot ki mon’n mansyonnen.

Donn mwan 3 rezon akoz nou pa kapab fer sa, pou 14 zour nou’n ferm nou lafrontyer apard pou kargo.  E apre 14 zour nou konnen personn pou napa sa maladi e bann ki’n gannyen nou’n fini tir zot, nou’n met zot laba, pou tretman.  E apre 14 zour, nou pa bezwen ouver nou lafrontyer.

Nou monitor deor ki e arive, me selman antretan nou konnen bann ki malad nou’n fini pran swen ek zot.  Bann ki pa malad nou kapab permet zot sirkile.

Akoz nou garanti apre 14 zour napa sa ka Sesel.  E dan sa ka sirkilasyon e lekonomi i repran dan en fason entern e zour nou santi lafrontyer deor i ok nou a ouver li.  Donn mon 3 rezon akoz nou pa kapab fer sa?  Mersi.

 

MR SPEAKER

Mersi Onorab.  Doctor, Dr Gedeon.

 

DR JUDE GEDEON

Mersi Onorab Afif.  Ou konnen 3 ou 4 semenn pase letan mon ti war bann ka konmans monte Langleter, Lafrans mon dir mon lekor sa kestyon mon dir akoz ki Langleter pa ban sa bann foutbol match ?  Akoz zot kontinyen zot le i kontinyen?  Akoz zot pe kontinyen sa bann aktivite piblik gran mass gathering?  Sa Langleter mon pe koze sa menm pei kot ou’n advise nou pou pran advice avek.  Sa ki ou pe dir nou pou fer nou’n deza fini liste tou sa bann aksyon ki pou swiv en lockdown. 

Nou’n travay avek DRDM nou’n in idantifye tou bann servis ki bezwen kontinyen, e sa lanons pou ganny fer si i arive nou bezwen al dan sa close down oubyen lockdown se son rezon tre, tre valid.

E nou’n fini fer sa travay avek DRDM osito ki nou pran desizyon ki nou konmans ganny 1 case pa 100 case pa 1000mil case parey serten pei in espere 1 case community transmission nou pou bouz lo sa lot nivo.  So mersi pou ou bann sizesyon mon krwar ou’n konpran stratezi ki nou pe fer. Langleter ti devret fer sa detrwa semenn pase.  Mersi Onorab.

 

MR SPEAKER

Mersi Dr Gedeon.  Onorab Egbert Aglae.

 

HON EGBERT AGLAE

Mersi Mr Speaker.  Bonzour Dr Gedeon, Minis ek ou delegasyon.  Dokter mon premye kestyon ki mon ti a kontan demann ou kot i konsern bann rekomandasyon ki WHO kot i konsern protokol latizann, eski Sesel ou Minis atraver ou Minister zot pe met zot pare ouswa zot annan ase stok baze lo rekomandasyon WHO pou ki kapab tret okenn evantyalite si sa viris i arive al an deor nou kontrol?

Dezyenmman ki ou Minister pe mazin fer anvi ki nou annan serten mankman ozordi par egzanp bann prodwi sanitanizasyon, sanitizers li menm, nou annan serten mankman parey bann farmasi ki lopital napa vitamin c li menm e farmasi prive ki si pe donnen, eski ou Minister pe travay konzwentman avek bann lezot Departman ki konsernen avek serten, avek sa bann lenportasyon e menm biznes prive pou ki kapab procure sa bann item ki ozordi napa preski napa ditou lo marse?

E dernyerman mon ti a kontan demann ou, ki mezir ki zot pe pran anvi ki ou’n fer bokou lanons toulezour lo, lo televizyon kot i konsern bann mezir ki ou pe met anfors sirtou parey dan bann Departman ki ankor ouver.  Eski ou annan serten dimoun dan ou Lazans ouswa ou Minister ki pa pase pe revwar si sa bann mezir pe ganny aplike korekteman?  Mon dir korekteman, akoz mon war serten landrwa i kapab i annan in met serten sanitizer selman i dan kwen sepa ki kote ki piblik pa ganny akse avek ouswa ki lwen.  Ouswa kan i fini pa pe ganny re mete pa pe ganny parey nou dir replenish, eski i annan posibilite ki i annan serten dimoun ki pase petet ki travay Lasante, Lanvironnman pou al gete si bann mezir ki ou’n ganny mete i pe marse 100poursan?  Mersi Dokter.

 

MR SPEAKER

Mersi Onorab.  Doctor.

 

DR JUDE GEDEON

Mersi Mr Speaker.  Mersi Onorab Aglae.  3 kestyon, protokol tretman nou’n deza i annan en group Expert dan medikal ki’n ase i annan detrwa semenn de se la i pe travay lo en treatment protocol en treatment guidelines pou COVID-19 ki enkli son bann tretman ki lo trial dan plizyer pei ensi ki tretman bann lemoni ek konplikasyon ki kapab ou kapab gannyen avek sa maladi e sa in fini ganny.

Nou annan en, en group Dokter Spesyalis ki’n asize pe travay lo la e sa tretman sa protokol tretman ki pe ganny servi pou manage bann pasyan, stok latizann parey zot konnen napa tretman spesifik pou COVID-19.  I annan bann lesey ki pe ganny fer e nou osito ki en lesey i war, nou war i pe marse par egzanp CCDC Lanmerik i dir sa latizann pe marse nou adopte sa bann guideline e nou osi servi.  Erezman nou annan sa bann latizann ki’n demande e bann ki nou short stock nou’n enporte.

Sanitizers i vre i annan en shortage e nou’n rod bann diferan fason pou enport ankor me odela nou’n konpran poudir i annan en kantite lalkol ki SRC ti’n sezi detrwa barik e zot in pare pou donn nou sa bann barik lalkol mon krwar i annan 96poursan.  E nou pe servi pou nou fer, in deza transport en pe barik kot nou farmasi production unit nou pe refill bann boutey sanitizers, pou fer bann dimoun gannyen.  Nou byensir dilute li pou son lafors ki neseser SBS in fini teste son bann konsantrasyon sa bann barik lalkol.

E mon krwar menm kot bann serten manufacture lalkol dan pei zot annan, zot deza pe al lo sa menm laliny zot osi pou prodwi bann sanitizers pou met lo market.  Yer zot ti anmenn en pe sample pou montre nou i bon i annan, menm i annan ki pi vodka, me selman fodre pa bwar akoz i annan bann kemikal ladan.  I annan bann kemikal ladan ki fer li, i pou anpwazonn ou si ou bwar li wi, wi.

So tou sa bann demars pe ganny fer selman fodre nou pa, nou pa deviate from sa, sa mesaz fondamantal ki lav lanmen i pli bon metod pou ou tir sa bann viris dan ou lanmen.  Ou lav li pou omwen 20 segonn ou plis avek savon, delo regilyerman ok?  Konman zot sorti dan sesyon zot tou devret premye landrwa zot ale fer social distancing lav zot lanmen byen, evite donn ponnyendmen mon krwar sa dimoun pe fer sa byen even mezir de baz ki pou marse.

Resours pou verifye sa bann landrwa partou kot sipoze annan social distancing nou annan Sanniter ki pe fer sa bann louvraz me pa ase.  Se pou sa rezon ki bann Departman Gouvernman in ganny demande pou regard zot bann mendev ki annan, regarde ki kantite by demen, demen apre midi, tou bann Departman Gouvernman i ganny demande pou submit kot mon biro tou bann resours imen adisyonnel ki zot kapab met a nou dispozisyon pou servi dan diferan fason.

Be sa enn bann fason ki nou kapab servi sa bann resours imen pou fer sir ki nou bann eyes and ears nou bann enforcers en pe partou akoz anba Lalwa Lasante Piblik okenn dimoun i kapab ganny designate konman en Public Health Officer pou li fer en travay prevansyon en travay lo nou behalf.  So sa pe ganny fer pa ase se pou sa rezon nou pe rod plis mendev pou nou kapab ranforsi li.  Mersi Onorab.

 

MR SPEAKER

Mersi Dr Gedeon.  Onorab John Hoareau.

 

HON JOHN HOAREAU

Mersi Mr Speaker, Mr Chairman.  Bonzour Dokter avek ou lekip ek Minis, ensi ki tou lezot dimoun.  Mon kestyon i baze lo Berjaya Beau Vallon Bay mon ti ava kontan konnen konbyen sa pou kout Minister Lasante pou raise sa lotel?  Ki kriter ki’n ganny servi pou lwe sa lotel?

Pou konbyen letan pou lwe sa lotel? Ki pou arive ek travayer sa lotel?  Eski Minister Lasante pe take over oubyen akoz sa bann travayer zot napa any training dan sa sityasyon so ki pe arive avek zot si zot pe ankor la?  Apre i annan osi en pti pe konsern lo social distancing sirtou dan bann landrwa kot i annan factory parey IOT kot i annan plis ki 1500 travayer pe travay, and bann ki travay sirtou lo conveyor belt e zot proximity i ase pre zot pa kapab fer li without at a distance;- konmsi ki pe arive avek sa bann sityasyon?  Mersi.

 

MR SPEAKER

Mersi Onorab.  Dr Gedeon.

 

DR JUDE GEDEON

Mersi Onorab.  Mersi Mr Speaker.  Mon pa pou kapab reponn ou sa kestyon Finans akoz sa pe ganny still pe work out kantite pou kout nou.  Me selman sa desizyon ti ganny pran anba Public Health Act kot i donn once kot en Public Health Emergency i deklare i donn Public Health Commissioner Lotorite pou acquire oubyen pran posesyon okenn building ou infrastructure pou kapab delivre servis.

In ariv sa staz kot bann servis karantenn ki nou ti annan pa ti pe kapab cater nou’n gete partou dan pei, me nou’n kont kantite mass dimoun ki nou pe gannyen i pa ti sifi, alors se pour sa rezon ki Komite ti asize ti deside ki Beau Vallon Bay i ti sa landrwa ideal.   Lefe ki tou dimoun i dan en menm lokasyon, i ti annan sa nonm lasanm ki pou permet ou akomod plis ki en 100enn dimoun alafwa, e son fason ki i plase osi i ase lwen avek kominote i pli fasil pou met sekirite pou police li.

E letan sa owner ti ganny aprose i pa ti pran li i pa ti ganny difikilte pou war lesansyel ki i fer son propriyete available pou fer sa.  Nou pa ti bezwen al fer servi lafors menm si bann kad legal in ganny mete nou pa ti bezwen al servi lafors pou zot aksepte ki sa fasilite i ganny servi.  Nou ti fer meeting avek son management Vandredi ek Sanmdi e nou ti met bann diferan kondisyon an plas.  E enn bann kondisyon se ki zot travayer pa pou ganny kontak avek sa bann dimoun ki pou dan karantenn.

Nou’n met nou prop dimoun la ki pou donn servis sa bann dimoun ki dan karantenn, parkont serten zot travayer ki pou reste ki pou fer par egzanp bann back of house work i annan boiler, i annan sistenm delo, i annan air condition ki bezwen kontinyen marse.  E lezot travayer zot HR ti pe workout ki mannyer pou bann ki pou kapab reste ki pou kapab al konze ki pa lye avek karantenn.  Mon krwar Employment osi pe ed nou dan sa demars pou handle lezot travayer

Social distancing IOT, IOT i annan en servis medikal sirplas e zot annan en sistenm screening ki zot fer ek zot bann travayer zot annan bann infection control practices ki depi lontan i an plas.  E i vre ki social distancing an term al pou la i pa parey nou ti a, parey i devret, me selman zot ganny screen ahead.  Si i annan dimoun ki ganny war i annan sentonm i pa pou al lo conveyor i pa pou al lo laliny prodiksyon.  Vwala.  Mersi.

 

MR SPEAKER

Mersi Dr Gedeon.  Onorab Wavel Woodcock.

 

HON WAVEL WOODCOCK

Mersi Mr Speaker.  Mon kestyon i konsern Praslin, pou le moman sant izolasyon pou bann pasyan viris COVID-19 i dan en ward dan Lopital Baie Ste Anne Praslin ki pa neseserman ideal, e mon okouran ki travay in deza komanse pou en nouvo sant izolasyon kot vye Lopital Baie Ste Anne.  E mon kestyon i kan ki sa travay pou konplete e eski sa sant izolasyon Praslin pou ganny ekipe avek ventilators?  E osi test kit pou fer tes Praslin olye ki bann sample i ganny anvoye Mahe?  E finalman eski en sant karantenn pou ganny etabli lo Praslin e kote sa sant pou baze?  Mersi.

 

MR SPEAKER

Mersi Onorab.  Dr Gedeon.

 

DR JUDE GEDEON

Mersi Mr Speaker.  Mersi Onorab Woodcock pou ou 3 kestyon.  Mon pa kapab donn ou en dat spesifik kan sa travay pou fini, mon pa konnen si Dr Henriette i konnen i a kapab fer mon konnen.  Me selman travay pe ganny fer lo sa sant nouvo sant izolasyon.  An se moman en wing dan lopital pe ganny servi.  Nou napa dimoun ladan ti annan 2 semenn pase ki apre nou’n teste ti negative.

Test kits;- i annan sa tes an se moman i en tes tre spesyalize i kapab ganny fer zis dan nou Biomolecular Lab Lopital.  Me selman nou pe ganny bann rapid test kits ki pe antre sa semenn kot nou pou kapab fer en tes preliminer lo sa bann sample avan ki tes konfirmasyon i ganny fer Mahe.  So letan sample i ganny kolekte i ganny deactivated so sa virus i nepli kapab enfekte dimoun avan i ganny process laboratwar pou ganny teste.  Pou karantenn, batiman Pension Fund in ganny fer available pou met dimoun an karantenn Praslin.  Mersi.

 

MR SPEAKER

Mersi Dr Gedeon.  Onorab Churchill Gill.

 

HON CHURCHILL GILL

Mersi Mr Chair.  Bonzour Minis.  Bonzour Mr Gedeon.  Mon premye kestyon ki kapasite sa sant izolasyon ki anba renovasyon, ki annefe lannen pase mon ti’n met devan pou fer renovasyon lo la?

Apre lo kote mendev Praslin deza lopital i annan problenm mendev eski ou kapab donn nou en lide ki pou ganny fer ler sa sant izolasyon i fini pou asire ki i annan mendev?

Apre pou La Digue, eski La Digue osi pou annan en sant izolasyon?  E dernyen kestyon se ki vi ki tou ou bann lotel mazorite i fermen Praslin petet en sizesyon pou sa sant izolasyon antre an diskisyon ek zot pou zot kapab provide linen avek sa sant akoz la zot, tou zot servi, zot fermen e sa bann keksoz pa pe ganny servi?  Mersi.

 

MR SPEAKER

Mersi Onorab.  Dr Gedeon.

 

DR JUDE GEDEON

Mersi Onorab Gill.  Kapasite sa nouvo sant izolasyon, 15 pou annan, fasilite pou pran 15.  Me sa 15 i ganny divize an 3 seksyon, i annan seksyon ki bann dimoun ki malad grav ki bezwen lo vantilater oubyen respiratory support parey nou dir.

Bann ki annan sentonm ki mild e bann ki annan lenfeksyon me selman napa okenn sentonm, so i pou annan diferan grad.  Pou La Digue i pou annan en sant izolasyon, karantenn, en sant karantenn plito si en pasyan i bezwen ganny trete i pou bezwen ganny transfer Praslin byensir avek bann, bann kontrol pou fer sir ki i pa kapab kontamin lezot dimoun.

I pou ganny transfer Praslin akoz si ou servis i tro eparpiye partou avek bann challenge ki annan avek staff i fer li difisil pou manage detrwa landrwa an menm tan.  E si i annan nesesite pou re deplway staff sorti Mahe pou al travay Praslin si par egzanp i annan staff ki bezwen, pasyan ki bezwen al lo vantilater oubyen tretman pli pros, nou bezwen regard sa osi tou.  So i annan sa bann opsyon fleksibilite ki annan an plas pou deservi dimoun Praslin osi byen ki dimoun Mahe si i neseser.

E ou sizesyon ki ou’n fer pou bann lotel mon krwar i tre bon, e mon espere bann lotel pe, pe ekout ou zot vin devan avek sa bann lof.  Be mon a profite pou dir Mr Speaker ki pandan sa letan ki nou pas dan sa preparasyon ek sa repons, nou annan en kantite dimoun ki’n vin devan pou ofer zot led, apard ki bann sipor moral be bann sipor fizik tou.  I annan dimoun ki’n donate bann test kits, i annan ki’n donn ki donn manze bann staff.

I annan ki’n ofer zot transpor so nou annan en, en mouvman Nasyonal ki mon krwar i tre, tre mon vreman kontan pou war akoz finalman dimoun pe angaz zot lekor.  E vi ki sa pa pou al deswit la e nou ti a kontan ki sa langazman i mentenir, pou pandan sa peryod ziska ler nou kapab dir nou’n, nou’n stab e nou’n elimin sa zafer Sesel.  Mersi.

 

MR SPEAKER

Mersi Dr Gedeon.  Onorab Francois Adelaide.

 

HON FRANCOIS ADELAIDE

Mersi Mr Chair.  Bonzour tou dimoun.  Dr Gedeon mon pe ekout lavwa bann zabitan Baie Lazare sirtou bann ki ti vot pou mon, e i pe demande ki o pli vit posib ki Lotorite Lasante i kapab gannyen pou zot fer en lockdown, pa en lockdown konman en close down sirtou pou piblik.

Akoz i vreman enportan zot vreman konsernen.  E vi ki ou ki pe ansarz lo kote Lasante nou tou nou konnen ki, nou tou nou konnen ki WHO son meaning of being healthy se pa zis ler en dimoun i annan en maladi me selman ler i fizikman, emosyonnelman, fit e si i, i napa sa bann kalite nou, nou konsider en dimoun malad.  E vi ki ou ki annan sa Lotorite e la mon santi poudir mazorite Seselwa zot pa, zot emotionally not fit e zot pa pou donn sa rannman ki zot ti pe donnen dan travay.

Eski Mr Gedeon pa in ler, pa in plis ki ler pou nou konsidere at least pou 14 zour, les sa bann dimoun dan lakour pou ki zot a kapab petet re aranz zot, zot lasante mantalman e pou ki zot ava retournen apre sa 14 zour ki zot in konnen poudir tou keksoz i ok.  E kot zot a kapab donn plis rannman, eski o pli vit posib ou pou kapab donn sa lord silvouple?  Mersi.

 

MR SPEAKER

Mersi Onorab.  Bon annou swiv en pti pe nou Standing Orders annou evit repetisyon i fer 4 Manm ki’n demann Dr Gedeon menm kestyon lo lockdown e a 3 repriz Dokter in reponn in aviz pozisyon Lotorite.

Annou anmenn bann nouvo kestyon, Dokter pou donn menm repons ankor parey in donnen avan ok, e nou Standing Orders i fer kler repetition.

 

HON FRANCOIS ADELAIDE

Non Mr Speaker.  I pa repetition sa mon pe dir li.

 

MR SPEAKER

Ou le spesifikman pou Baie Lazare?

 

HON FRANCOIS ADELAIDE

Non pa pou Baie Lazare me mon pe koz ek li lo being healthy ki WHO i donnen.  So la pou le moman nou lasante mantal i pa bon, so eski i pou konsidere?  Mersi.

 

MR SPEAKER

Mersi Onorab.  Dr Gedeon.

 

DR JUDE GEDEON

Mersi Mr Speaker.  Mersi Onorab Adelaide.  Mon kontan ki ou konn definisyon Lasante byen, nou kontan osi ki bann dimoun Baie Lazare i pare so pou donn nou en koudmen pour fer sir zot reste anndan letan lockdown i arive, en?

 

MR SPEAKER

Ok mersi Dr Gedeon.  Ale Doctor.

 

DR JUDE GEDEON

Non mon ti a zis kontan remersi li pou sa preskripsyon akoz nou bezwen gete prezan si nou pou bezwen issue sa latizann.  Parey mon ti dir avan mon ti a kontan petet ranforsi sa pwen sa lockdown oubyen sa close down i bezwen akonpannyen pa en lot seri mezir, ki nou deza konnen ki pou fer me sa moman i kapab i pros annou met nou pare.

 

MR SPEAKER

Mersi Dr Gedeon.  Onorab Jany De Letourdie.

 

HON JANY DE LETOURDIE

Mersi Mr Speaker.  Bonzour Mr Speaker.  Bonzour tou dimoun.  Mr Chairman eskiz mon, mon pe adres bann dimoun ki tonm dan kad bann self-employed e nou konnen poudir isi Sesel nou annan en gran kominote artis, e parmi sa bann mon kapab nonmen la sirtou bann ki ganny zot lavi direkteman avek lendistri tourizm.

Me osi pa zis lendistri tourizm akoz vi ki letan lotel i fermen zot osi al fer bann performans dan bann maryaz e vi ki prezan pou napa bann rasanbleman zot pa pou kapab al zwe bann maryaz bann parti prive e bann DJ.  Savedir dan sa kominote artis mon kapab dir i annan bann recording studios artis i annan bann artizan, i annan bann pent, i annan bann santer, bann mizisyen e avek bann ki fer ladans osi.

Mr Speaker, Mr Chairman mon pe demande si i pou annan en rekour pou zot akoz zot osi pandan sa peryod 2 a 3 mwan e nou pa konnen plis zot kapab war zot akoz si zot pe fer sa zis konman zot gagne pain zot pou napa en dipen.

 

MR SPEAKER

Onorab, Onorab mon pou stop ou lanmenm i pou napa nanryen pou fer avek Dr Gedeon i pou annan sa lot bout avek Finans.  Rekour pou bann biznes bann pti biznes i pou vin avek Minister Finans apre.  Hold your fire, ler nou ava annan zofisye Finans.

 

HON JANY DE LETOURDIE

Ok alright ok.   Mersi Mr Chair. Savedir mon pran lo sa bout pou Mr Gedeon.

 

MR SPEAKER

Pou Lasante.

 

HON JANY DE LETOURDIE

Dr Gedeon nou konnen poudir i annan bann recording artist ki al direkteman dan studio i annan 2 semenn mon konman en artis mwan osi.  Mon ti sipoze pe al ed en lot kanmarad pou al fer met lavwa dan lo son album.

E mon, mon pa’n ale kategorikman 2 semenn akoz mon annan en lafreyer, alors mon ti a kontan si ou ti kapab adres bann dimoun ki annan recording studio akoz nou an kontak direk avek sa microphone ler en lot in fini servi, nou konnen nou pe dir bann droplets osi.  Alors si ou ti kapab adres donn en konsey bann dimoun ki annan recording studio lo zot safety e ki ou krwar zot devret pe fer.  Mon lot pwen Lasante Mr Chair se zour Sesel i detekte en ka dan transmisyon kominoter, sa pou vedir konbyen lezot ka ki annan dan pei an realite?  Eski i annan en ratio ki’n ganny etabli par WHO lo sa size?  Mersi.

 

MR SPEAKER

Mersi Onorab.  Doctor.

 

DR JUDE GEDEON

Mersi Onorab De Letourdie.  I vre ki en recording studio i en landrwa fermen i annan en pake lekipman e letan en Artis i sante par-ler i kriye lavwa i monte bann, bann droplets i ale partou.

So si i annan enn ki pe port sa viris son sans pou transmisyon avek lezot dimoun la i tre o e i annan en zafer ki nou apel fomites, fomites i en nouvo, en nouvo mo pou zot.

Fomites i bann lobze ki kapab port sa viris lo la lo telefonn, en microphone, en jug, en ver i bann fómites.  E fodre nou vey byen sa bann lobze ki nou pa pe pran sa viris lo sa bann lobze pe met lo nou figir.  Selman lo telefonn fomites i kapab aport plis lenfeksyon akoz nou pe, pe pran li ater nou pe met ek nou zorey toultan.  So fer sir zot vey byen lafason ki zot servi zot telefonn e netway li souvan.  So pou plis direk lo ou kestyon wi si bann Artis ti kapab postpone zot bann recording pou le moman akoz sa bann recording studios i en landrwa sitan fermen e mon krwar i enn bann servis ki kapab ganny postpone pou le moman.  

As regards to sa threshold kot en ou dir ki nou annan community transmission i enportan pou fer piblik konpran sa term, community transmission i letan ou annan en lenfeksyon ki’n arive e ou pa konnen kot i sorti.  Tandis ki local transmission ou’n ariv en dimoun ki’n gannyen ou pou kapab track son sours, ou konnen lekel ki’n afekte li e pou le moman dan pei sa ki pe arive sa 7 ka ki dan pei nou konnen zot sours.

Bann ki’n travel nou konnen zot sorti deor e bann ki’n atrap isi nou konnen lekel ki’n enfekte zot e so far sa bann ki’n ganny enfekte i bann dimoun ki’n annan kontak pros avek sa index case ki ti sorti Ukraine.  So once ou ganny premye ka kot nou pa konnen kot i sorti la nou pou bezwen al lo nivo 5 kot i annan bann, bann aksyon parey close down oubyen lockdown, fer dimoun reste se zot e pran bann mezir pli strik.  So i annan sa threshold i ganny byen defini i annan en latab ki WHO i fer in byen defini sa e nou travay lo la nou’n met nou pare ki aksyon pou pran letan in ariv sa nivo.  Mersi.

 

MR SPEAKER

Mersi Dr Gedeon.  Onorab Jude Valmont.

 

HON JUDE VALMONT

Bonzour, mersi Mr Chair.  Mon kestyon Dr Gedeon se lo kote Lopital Sesel nou konnen bokou dimoun in i servi sa, sa fasilite en.  Parey pou, pou vin vizit bann dimoun ki, ki fek ganny baba, bann malad and whatnot .  Mwan, mon anvi konnen donn nou en, en lasirans ki mezir zot in pran pou restrikte bann dimoun or koup lakantite dimoun ki’n vini.

E bann ki la ki bann mezir ki’n ganny pran pou asire ki zot osi zot safe.  Akoz parey ou’n dir mannyer mon’n aprann menm dan lopital serten landrwa i mank sanitizers and what not.  Alor reasir nou bann mezir ki zot pe pran pou restrikte mouvman kot sa lopital li osi e protez bann ki vini?  Mersi.

 

MR SPEAKER

Mersi Onorab Valmont.  Dr Gedeon.

 

DR JUDE GEDEON

Mersi Mr Speaker.  Mersi Onorab Valmont.  Mon ti apresye si Dr Henriette ti kapab reponn sa kestyon me selman mon a sey donn larepons ki mon konnen e si i oule keksoz adisyonnel i ti a kontan ekrir oubyen vin dir.

Nou’n deza fer en bon pe keksoz pou redwir risk transmisyon dan lopital.  I annan bann sanitizers ki available partou dan bann kwen kot lopital sirtou kot bann ward, visiting hours in ganny redwir, lakantite dimoun ki kapab vizit en pasyan  at any one time in ganny redwir  – enn – 1 dimoun alafwa.  Byensir pa toultan dimoun i respekte sa me nou pe fer sey fer enforcement oubyen nou pe sey polis sa nouvo regleman.

Bann loperasyon e bann lezot servis, nou apel sa bann cold cases ki pa irzan in deza ganny anvoye pou en lot dat, e erezman dimoun laplipar dimoun in konpran akoz nou bezwen fer sa.  Me bann keksoz irzan i bezwen kontinyen.  So tou sa i ganny fer pou redwir aktivite ki pa vreman irzan kot lopital, an menm tan pou fer mendev pli available pou donn en repons pou preparasyon pou COVID-19.

Mon pa konnen si Dr Henriette ti annan keksoz adisyonnel ki i ti a kontan dir.  Mersi.

 

MR SPEAKER

Ok mersi Dr Gedeon.  Onorab Jean-Francois Ferrari.

 

HON JEAN-FRANCOIS FERRARI

Mersi Mr Speaker.  Bonzour tou dimoun.  Mon ti a kontan komans par remersye Dr Gedeon pou rekonnet ki nou tou nou pe al dan en sel direksyon e nou tou nou’n donn ou sa sipor ki, ki ou merite e mon espekte ki la nou pe avanse la nou ava aret sak fwa nou demann en kestyon nou ganny dir poudir nou pe fer politik nou pe divize.  Donk la mon vreman kontan ki nou, nou dan sa sesyon e se pou sa rezon ki i ti enportan ki nou zwenn ozordi.

Mon premye kestyon Dr Gedeon se proteksyon travayer Lasante sa bann dimoun ki nou ki lo front line e ki nou, nou vreman apresye zot zefor eski ou kapab reasir nou ki tou bann mezir in ganny pran, tou bann mezir posib in ganny pran pou asire ki bann travayer Lasante ki an kontak ek sa viris i ganny proteze o maksimonm?  E ki zot, e ki zot tou bann mezir i ganny pran pou donn zot, zot letan repo eksetera?

E tou bann protective gear and protective material ki zot bezwen i la.  Akoz pli boner mon ti en pti pe enkyet ler mon’n tann ou dir poudir Erport prezan zot, zot pe, zot pe fer la prezan zot ankor dan prosesis pou rod enn de lekipman enn de keksoz pou met an plas.  Fotespere mon kestyon se dan servis medikal, eski nou’n fini ariv la kot nou devret arive an term proteksyon?

Mon 2enm kestyon osi proteksyon sa lendistri Lapes ki, ki mwan, mon enn bann dimoun  ki toultan esey protez li e pou fer sir ki i grandi.  Mon ti a kontan si Dr Gedeon i kapab reasir nou ki bann prekosyon ki pe ganny pran lo Por Lapes ou satisfe avek? Oubyen eski i annan bann improvements ki nou devret fer?  I annan bann lezot Lazans ki devret ganny ki devret vin ansanm ki kalite korperasyon ki ou pe gannyen avek, avek lezot Lazans bann dimoun ki ganny zot lavi, ki ganny zot metye ki annan zot biznes dan Por ki kalite led ki zot pe fer pou anver sa zefor Nasyonal?  E finalman dernyen pwen i konsern bann convicts ek bann remandees.

Mon ti a kontan demann Dr Gedeon si vi ki Prizon i enn bann landrwa kot bann confinement i bokou, i bokou pli strik e bokou pli enn lo lot, bann dimoun i anta.

Ki bann mezir ki’n ganny pran o nivo sa bann sant detansyon e eski Gouvernman pe konsider bann pou tir presyon e pou minimiz bann risk si i annan bann, bann convicts oubyen bann remandees ki, ki pa lo bann sarz serye, lo bann konviksyon serye ki a lafen zot pe, zot pe ariv a lafen zot kondannasyon zot in servi zot letan, eski pa i le moman pou evalye posibilite pou ganny, pou donn zot en conditional discharge pou zot tir presyon en pe lo sa, sa bann servis detansyon.  Mersi.

 

MR SPEAKER

Mersi Onorab.  Dr Gedeon.

 

DR JUDE GEDEON

Mersi Mr Speaker.  Mersi Onorab Ferrari pou ou kestyon.  Lo kote sa zafer proteksyon bann travayer Lasante sa i primordyal pou nou.  I pa pou korek pou nou ekspekte en dimoun pou al ekspoz son lekor par en risk en maladi pandan ki i pe donn swen en lot.

Se pou sa rezon ki nou’n travay tre dir pou nou anmenn sifizaman stok e nou pe kontinyen pe rod nouvo stok pou anmennen pou ranpli sa bann ki pe servi.  E sa i tonm anba kad infection prevention and control.  Sa bann travayer ki ganny mete lo fron batay devan zot bezwen konn servi sa bann lekipman se pou sa rezon ki bann training ki lontan pe ganny fer parkont depi letan, well zot training ners, bann training dokter, training travayer Lasante sa bann training i form par.

Me training dan Lasante i pa zanmen arete me letan ou annan en outbreak ou bezwen ranforsi sa bann skill.  Menm si ou konnen ki ou pou fer ou training i enkli plis ou latitid anver met sa bann lekipman tir sa bann lekipman e handle li byen pou anpese ki lenfeksyon i transmet.  Nou pa pe dir ki pou napa okenn travayer Lasante ki pou kapab ganny enfekte me selman nou donn zot tou bann neseser pou protez zot lekor e fodre ki zot servi li korekteman toultan.

Repo i enportan bann, bann Leaders i fer sir i aranz bann progranm travay.  I vre i en travay stressful pou fer sir ki bann travayer i ganny sifizaman repo in between zot bann shift zot bann ler travay.

I enportan pou fer konnen poudir prizon ler mon get en email ki Mr St Ange ti anvoy mon depi en pe letan pase 10 zour pase pres 10 zour pase.  In delir son progranm Prizon an term bann viziter ki vin Prizon zot bann work program ki mannyer in aziste sanitization control measures, other responses, tou sa in delinyen in deza pe enplimante dan Prizon.  Me sa issue ki si a serten moman i redwir popilasyon Prizon par larg serten prizonnyen oubyen deteni ki sa i en desizyon ki bezwen ganny pran a en lot nivo oubyen i bezwen ganny mete lo latab pou diskite.  Si i arive en zour ki nou ganny ka Prizon ki mannyer nou pou manage sa bann dimoun ki kapab pe ganny enfekte oubyen ki’n ganny ekspoze.  So sa i en keksoz ki deza pe ganny fer.

Non  fek fer rapel poudir nou annan confinement PPE ki pe antre apre midi apre i annan mon krwar i annan an tou si mon tronpe 11 tonn PPE ki sorti UAE mon krwar ki mon’n ganny sa sif byen okMinister Lalanne i a donn plis detay lo la.  Bann lekipman bann PPEs bann, bann.  Mon krwar mon’n reponn bann kestyon si mon pa tronpe, non?

Anr wi lo Por;- lo Por nou bann Sanniter i laba toultan mon, mon poudir ki nou pa zanmen 100poursan satisfe avek infection control oubyen avek prevansyon.

Once ou dir ou 100poursan satisfe la ou vin complacent. So, mon dir bann travayer toultan ou fer ou maksimonm e letan ou fini fer ou maksimonm reget ankor.  Se pou sa rezon ki en travay kontinyel avek bann Lotorite Por ki mannyer nou kapab toultan pe improve lo sa ki zot deza pe fer.  So i en travay ki pa pou zanmen arete.  Mersi.

 

MR SPEAKER

Mersi Dr Gedeon.  Onorab Clive Roucou.

 

HON CLIVE ROUCOU

Mersi Mr Chair.  Bonzour Minis.  Bonzour Dr Gedeon.  Mr Chair premye kestyon ki mon annan pou Dr Gedeon, apart ki bann ward e lezot unit spesyalize ki Dr Gedeon in mansyonnen, mon anvi demann Dr Gedeon si bann lezot Departman par egzanp fizyo, dental zot pe osi pe kontinyen donn sa servis neseser?  E dan menm laliny pwennvi ki detrwa paran ki annan bann etidyan kot NIHSS espesyalman bann etidyan 3enm lannen ki ankor pe travay menm si lekol in fermen, mon anvi konn ou pwennvi lo la silvouple?

Epi apre tou sa bann outbreak ki nou’n pas ladan e lemonn in pas ladan, eski Dr Gedeon i kapab donn nou sa garanti ki sa voyaz Gouvernman pou bezwen fer en sant izolasyon, kot nou pa ava war nou pe taye dan sa bann deryer sirkonstans koumsa i arive?

Epi mon 3enm pwen se kot WHO i met lanfaz lo teste, teste, teste alors mon ti a kontan demann Dr Gedeon e in tous en pti gin taler lo la kot in dir bann pasyan, bann dimoun ki pa pe prezant sentonm si mon’n ganny li byen kler ki napa sa kantite, kantite risk.  Me parkont Dr Gedeon dan mon bann, mon bann literatir ki monn lir in fact mon pe get en resers le 17 Mars 2020 sorti dan New England Journal of Medicine ki’n dir ‘the rate of transmissions seems to be what makes COVID -19 a more serious threat than an earlier iteration of Coronavirus outbreak’.  E ‘transmission rate aided by carriers who are asymptomatic’ so i montre ki menm si nou, nou pe pran li a la, a la lezer ki sa bann dimoun pa pe kapab transmet sa viris.

Me resers in prouve ki sa dimoun ki healthy carriers zot pe as much as posib pe transmet en kantite sa viris.  Mersi.

 

MR SPEAKER

Mersi Onorab.  Dr Gedeon.

 

DR JUDE GEDEON

Ok mersi Mr Speaker.  Mersi Onorab Roucou.  Mon kontan ou’n fer sorti sa issue teste, mon a donn plis lesplikasyon apre lo la.

Redeplwayman bann staff Lasante en legzersis ki pe ganny fer, tou bann heads bann lezot Seksyon ki pa direkteman involve avek repons COVID-19 par egzanp dizon kot fizyo, kot dental, zot pe ganny demande pou zot revwar zot cohort staff ki zot annan e lekel ki zot kapab met dan pool response team pou COVID -19.  NIHSS i bann etidyan medikal ki ladan nursing e lezot travayer ki pou travay Lasante plitar so zot annan en rol pou zwe, mon pa pou al an detay lo la me selman konman en future health care workers menm si ou pa pou ganny mete dan front line me selman i annan serten keksoz ki ou kapab fer.

Mon, mon annan en zanfan ki pe etidye aletranze i pe fer medicine si demen i ganny apele pou li al lo front line pou al donn koudmen zot a, i a pran bann proteksyon neseser, mon pa pou kapab dir non, akoz i pe vin en travayer Lasante demen li.  Sant izolasyon demars i ankour pou nou kapab fer sa sant, i long outstanding mon poudir nou’n pa’n, ganny sifizaman resours pou nou kapab fer li letan ki nou ti bezwen.  E la i annan en tim pe travay lo la i annan medical architect ki pe design sa sant izolasyon pou ganny konstri lo teren kot lopital.

Mon pa konnen konbyen letan i pou pran me selman mannyer mon konpran dapre tou bann lenformasyon ki mon annan i pou pran detrwa mwan petet pandan sa lannen i ava kapab konplete.  Sa protokol teste oubyen stratezi teste WHO Director General Dr Tedros in dir sa e i pa’n fail apre sa poudir ‘test and test all suspected cases’.  So tou ka sispe Sesel nou pe teste an se moman.  Risk teste indiscriminately letan en dimoun pa’n manifeste sentonm se ki ou ganny false negative e ou ganny en nespes rekonfor ki sa dimoun i ok kan sa dimoun i en carrier. 

Letan ou en carrier pa toultan ki ou pou kapab ki ou pe transmet sa viris, sirtou si i pa ankor ganny ase letan dan son staz incubation.  Sa viris an mwayenn i pran apre 4 zour pou aparet dan ou sistenm respiratwar pou kapab depiste li dan ou airway pa dan disan, dan airway.  E si ou teste li avan sa ou pou ganny negative test kan saler i en carrier.  Ki nou pe plan pou fer dan bann zour ki vini letan nou ganny bann rapid test kit, tou dimoun ki pou klasifye konman en kontak nou pou kapab fer rapid test lo li.

E pa enn fwa me once in teste la i pou kontinyen reste dan nou radar.  E si i teste pozitiv avek en rapid test nou pou proceed pou fer en confirmation test.  So sa testing strategy i enportan pou fer li byen akoz ou riske run out of test, prezan zour i annan bann suspected cases ki ou bezwen fer parey pe arive Lanmerik an se moman ou pou napa tes pou fini.  So ou bezwen teste avek guideline, avek en stratezi byen organize.  Mersi Onorab pou ou kestyon.

 

MR SPEAKER

Mersi Dr Gedeon.  Onorab Wilbert Herminie.

 

HON WILBERT HERMINIE

Mersi Mr Speaker.  Bonzour Minis avek ou delegasyon.  Bonzour Dr Gedeon.  Dokter mon a premyerman remersi ou pou donn nou en kontrandi lo ki mannyer en lockdown i marse dan en fason syantifik.

E osi remersi ou pou fer nou konpran e lepep Seselwa konpran ki en lockdown pa pou depan lo Politisyen me lo bann profesyonnel Lasante.  Mr Speaker mon premye kestyon pou Doctor i ki bann mezir ki bann ou Departman pe met an plas pou deal avek bann sityasyon sirtou bann adikt ki bezwen ki tre vilnerab ki pe pran zot tretman?

Ki bann mezir ki ou Departman in met an plas pou protez nou bann adikt?  Sa i enn.   2enm kestyon i lo kote nou lakantite staff e volonter Lasante ki zot annan eski sa i ase pou nou kapab deal avek sa sityasyon ki nou ladan, e si sa sityasyon i agrave eski nou pou annan ase volonter e staff pou deal avek sa sityasyon?  E mon dernyen kestyon sa i en kestyon ki sorti dan distrik i pe demande ki ou pwennvi medikal lo bann sanitizer ki napa lalkol ladan eski i kapab ganny servi?  Mersi Mr Speaker.

 

MR SPEAKER

Mersi. Onorab.  Dr Gedeon.

 

DR JUDE GEDEON

Mersi Mr Speaker.  Mersi Onorab Herminie pou ou bann kestyon.  Bann adikt i en group nou popilasyon ki mon kapab dir ki a risk si i arive ki zot ganny afekte zot a risk kapab ganny plis konplikasyon.

Akoz? Zot deza annan en sistenm defans ki afebli, laplipar zot i fimen epi zot annan bann compromise zot sistenm respiratwar e parey zot konnen sa maladi i afekte ou sistenm respiratwar.

So nou annan sa konsern e se pou sa ki nou’n travay avek APDAR pou rod fason pou zot letan zot al pran zot medikaman zot tretman zot sey fer sa social distancing pli byen.  E dan sa laliny nou’n demann Larme ek Lapolis pou donn APDAR plis sipor pou kontrol sa bann crowds, sa bann zenn, sa bann dimoun letan zot pe al pran zot tretman methadone.  En lot laspe sa issue bann adikt se dan bann landrwa ki nou apel dan bann ghetto bann landrwa zot i annan aktivite pike ki pe arive, servi drog, Lapolis oubyen Larme bezwen rod fason pou kontrol sa bann gathering dan bann groupman koumsa.

I pa en louvraz fasil ki nou pou bezwen bann sipor bann lafors pou met en pe lord ladan.  Me selman si i arive ki nou ganny bann pasyan ki en adikt i ganny enfekte nou bezwen donn li swen parey nenport ki endividi.  Nou bezwen rod en fason pou kontrol avek an servan medikaman, kontrol son bann withdrawal pou li kapab resevwar tretman parey nenport ki endividi.

Nou deza pe map bann resource pool ki nou annan resours imen mon pe dir i annan en kantite dimoun i vin devan konman bann volonter Red Cross i deza pe travay avek nou pou fer sa bann contact tracing.  E nou apresye sa byen e i annan bann lezot group dimoun ki nou pe map out tou bann resours sorti dan bann lezot Minister sorti dan bann sekter prive ki nou deza lo nou, lo nou map, lo nou radar nou kapab dir.  E sa bann dimoun pou resevwar training apropriye pou task ki zot pou ganny donnen pou fer e i annan dimoun ki’n ofer nou pou par egzanp pou manage bann nou bann 141 – nou laliny 141 i annan ki’n ofer pou ede avek housekeeping.  

Mon kapab liste en gran pool dimoun.  As regards sanitizers ki napa lalkol ladan, parey zot konnen, apard ki lalkol i annan lezot prodwi ki touy bann germs oubyen bann viris e sa i bann ki annan chlorine klorin oubyen hydrochloride so i annan bann sanitizer ki napa lalkol ladan ki kapab ganny servi pou vi i annan sa hydrochloride ladan oubyen chloride a son konsantrasyon neseser.

Pou bann chloride based product ordinerman son poursantaz i devret at least (pwen) .5poursan par egzanp si ou get dan bann boutey javel oubyen DEEPEX i apepre 4.5, 4.6 oubyen 5poursan so ou kapab dilute li pou apre 5.5 poursan e sa i ase pou touy sa bann viris.  Mersi.

 

MR SPEAKER

Mersi Doctor.  Onorab Flory Larue.

 

HON FLORY LARUE

Mersi Mr Chair.  Bonzour Minis avek Dokter ek tou dimoun ki pe ekoute.  Mon ti a kontan lefe ki Onorab Lemiel in tous lo sa extension Outpatient Clinic ki zot pe travay lo la, la konmela mon ti a kontan demande akoz zot pa’n reenvestir dan bann health centres in the area tel ki Takamaka, Anse aux Pins, Baie Lazare ek Anse Boileau?

Olye met dan en nouvo infrastructure ki montre en gaspiyaz larzan?  Apre mon ti a kontan demann Dokter konbyen tes ki nou annan available la pou le moman dan pei?  Konbyen sa bann rapid testing kits ki pe vini, e kan egzakteman ki zot pou arive?  E i annan en konfizyon deor ki dimoun i konpran ki sa tes a en pwen i  bezwen al aletranze eski ou kapab konfirmen si sa i korek oubyen non?

Ou’n dir nou i annan PPE, PPE pe vini si ou’n dir 11 tonn me si ou kapab donn nou dan en sif silvouple apepre konbyen sa i reprezante?  Ou’n koz lo sa limero 141 e nou’n war ki en kantite dimoun i konplent ki sa limero i, i souvan busy e overloaded, eski zot annan plan met enlot limero pou bann lot kalite servis akoz dapre mon konpran sa 141 i sipoze pou dimoun ki pe ganny sentonm.  Me selman i paret tou lezot call pe antre lo sa menm limero eski sa i ou kapab klarifye sa pou nou?

Lo kote ventilators Doctor si ou kapab dir nou egzakteman ankor pou Lasanble konbyen i annan dan pei, eski zot annan lide pou order ankor ventilators?  Si sa i leka konbyen e kan ki nou pou gannyen?  Dokter nou’n osi tande ki Prezidan in apele ki Militer bann ex-Militer i raporte mon ti a kontan demande akoz ki Prezidan pa’n apel bann exHealth Workers ek ex-Police Officers?  E ki mannyer egzakteman spesifikman Militer pe asiste ou silvouple?  Bann medical emergencies nou’n ganny dir ki akoz Erport pa pe shut down dimoun i bezwen kit pei pou medical emergencies, klarifye pou nou Dokter ki sa bann servis i ganny donnen spesifikman par bann air ambulance ki pa baze Sesel.

So ki mannyer eski sa i afekte sa bann dimoun ki ganny irzans dan en lot ka?  E bann dimoun ki pe self-isolate ki bann dimoun pe al vizit zot e letan i al vizit zot, zot pa la eski i annan en penalti pou bann dimoun ki break sa isolation advice ki zot ganny donnen?  Mersi.

 

MR SPEAKER

Mersi Onorab.  Dr Gedeon.

 

DR JUDE GEDEON

Mr Speaker sa en lapli kestyon.  Mon a reponn Onorab Larue.  Mersi pou ou bann kestyon mon a reponn bann ki mon kapab ki mon annan formasyon, bann ki mon napa mon ava rod lenformasyon mon a fer ou gannyen, dakor?

Extension outpatient Anse Royale akoz ki Gouvernman pa envestir dan lezot Health Centers mon a plito demann en Health Agency pou anvoy larepons pou ou sa akoz mon napa larepons pou donn ou la konmela.  Nou annan 7 cases konfirmen i annan 3 Seselwa, 4 etranze ki dan sant izolasyon.  An se moman i annan 6 sa bann dimoun zot byen napa sentonm me selman zot ankor pe porter sa viris.

I annan en etranze ki ankor lo vantilater i pa ankor improve nou pa konnen ki direksyon i pou ale si i pou improve oubyen si i pou kontinyen deteryore.

Teste mon pa’n tro ganny ou sa kestyon lo tes ou pe demande si sa bann tes i fer isi?  Ok, nou annan nou apepre, nou annan nou apepre 2500 bann tes PCR bann tes confirmative  ladan nou servi 91 so far.  So savedir nou annan nou apepre 2400 ekek.  I reste e nou annan ankor ki pe vini sirtou bann rapid test i annan ki pe vin atraver donasyon, nou pa tro sir konbyen pou annan dan sa donasyon me selman at least 2500 a 3000 bann rapid test.  

E i annan ki Minister Lalanne pou koz lo la i a donn plis detay lo sa bann tes ki pe vini ankor.  Apre sa bann lezot PPEs ek lezot lekipman ki pe vini.  Me selman a ler aktyel ou annan nou 5 ventilators kot Sant Tretman Perseverans, lopital i annan 10 ventilators ki i annan 3 ki pe ganny servi kot ICU e lezot i annan lezot ki standby.  Komann in ganny pase pou ankor ventilators mon pa konnen ki egzakteman kantite, petet mon koleg i a kapab donn detay lo la oubyen Minister Lalanne.

141;- i malere poudir ki in ganny mal servi sa limero avan nou ti ouver li pou Measles avek COVID-19 prezan nou tir Measles ladan nou dir dimoun pa call lo la pou Measles call pou zis COVID-19 be dimoun i fer prank call en kantite bann call ki zis i pe zwe ek nou bann staff ki pe mind sa bann limer.  Prezan ki fer ki dimoun ki vreman bezwen access pa pe gannyen.  Me selman isi Sesel dimoun i annan limero preski tou dimoun, en kantite call oubyen text sorti en pe partou, partou.  E lezot staff osi parey so plis ki posib nou sey reponn sa bann kestyon ek query ki dimoun i annan.

So mon a lans lapel avek piblik ki silvouple servi sa 141 proprement.  Pa ankonbre li ki apre bann ki bezwen ganny li pa pe ganny akse  – en? Mon krwar i enportan ki dimoun i donn nou sa koudmen.

Militer;- Militer pe asiste nou dan diferan fason – enn – pou sekirite par egzanp zot sekiriz landrwa kot sant karantenn i ete Perseverans.  Zot osi pe provide Beau Vallon Bay, zot osi pe provide mendev fizik;- par egzanp kot bann landrwa kot nou bezwen lev bann bwat bann, bann keksoz bann louvraz fizik pou fer.  Zot pe ed nou pou netwayaz osi. So zot la available a nou dispozisyon pou ede pou donn koudmen kot i neseser.  E nou tre kontan ki nou annan sa resours a nou dispozisyon.

Ex-Health Care Workers fodre nou fer atansyon ki letan nou envit bann ex-Health Care Workers ki laplipar in konmans ganny laz nou pa met zot a risk, akoz dimoun ki a risk ki annan en pe plis laz ki pli a risk ganny konplikasyon si zot atrap sa lenfeksyon.  Si zot pou vini zot pou bezwen vin dan bann landrwa ki pa ogmant zot risk atrap lenfeksyon.  Me selman i annan lapel ki’n deza ganny fer e i annan dimoun ki’n deza fini tournen konman bann volonter.

Yes i annan en pti laranzman payment ki ganny fer me selman i deza annan bann ex, ex-Health Care Workers ki’n vini i annan volonterman i annan apre ki nou’n apel zot pou tournen.

Air ambulance pardon, air ambulance e sa fasilite i pa bon marse me si i annan emergency ki arive ki Gouvernman i bezwen bann lasistans air ambulance, nou toultan annan bann kontak ki available ki nou kapab access pou repatrier en pasyan pou al trete aletranze sa i ganny fer konzwentman avek Foreign Affairs avek nou Lazans Lavyasyon lokal.

Me selman i pa en keksoz ki nou kapab fer li souvan pou nenport ki ka i bezwen en ka vreman kritik ki i pa pou kapab anvol dan en vol normal ki nou bezwen pran air ambulance.  Self-isolation avek penalty, vre i en issue, se pou sa rezon ki avek AG pandan weekend nou’n kapab finaliz Lalwa, ki obligate dimoun prezan pou reste an karantenn nenport ki karantenn.  E si ou kas sa bann Regilasyon par egzanp viziter i vin vizit li oubyen sa dimoun i sove Lalwa i kapab appréhender li e i kapab ganny sarze en lanmann ziska R20,000mil oubyen ziska 2an prizon.  So sa Lalwa in deza ganny pase, sa Regilasyon in pase anba Quarantine Act ki fer li obligatwar.

E nou’n osi devlop en gid pou bann dimoun ki annan karantenn the do’s and don’ts ki responsabilite ler ou dan karantenn tousala in ganny ekri e letan ou antre dan karantenn prezan ou bezwen siny en engagement ki lo kote lasante en dimoun i siny lo mon behalf e sa dimoun osi i sinyen ki i pou obei sa bann lord ki pe donn li.  So vwala travay ki nou pe fer e i hope ki mon’n capture tou ou bann kestyon Onorab.  Mersi.

 

MR SPEAKER

Mersi Dr Gedeon.  Onorab Bernard Georges.

 

HON BERNARD GEORGES

Mersi Mr Chair.  Mr Chair mon annan zis 2 kestyon pou panel.  Premyerman enn, de dimoun in eksprim zot konsern akoz zot pe reste dan bann pei ki dan lockdown.  Si i annan Seselwa par egzanp ki Itali oubyen etidyan ki Malezi e zot anvi retourn Sesel, premyerman eski zot pou kapab e dezyenmman ki mannyer sa pou fer?

E mon 2enm kestyon i konsern bann dimoun ki santi ki zot en pe at risk mon pe koz lo bann drayver SPTC par egzanp oubyen Pilot domestik Air Seychelles kot ou pa kapab fer social distancing dan bis ek avyon eksetera oubyen i pa fasil.  Mon kestyon ki sorti dan sa bann konsern se ki, e mon pa oule ouver sa, sa kestyon lockdown se ki obviously si ti annan en lockdown ti pou annan mwens dimoun ki pe vwayaze alors sa problenm pa ti pou arise.

Me mon kestyon permet mon demann ou Dokter e Minis akoz ki nou pe esper en, en community infection arive avan ki ou pas lo sa prosen staz?  Akoz ki nou pa esey anpes sa community transmission par pran en pe plis mezir en pe pli strik etandonnen parey zot tou zot in aksepte bokou nou bann dimoun pa pe swiv zot bann konsiny?  Mersi Mr Chair.

 

MR SPEAKER

Mersi Onorab Georges.  Dr Gedeon.

 

DR JUDE GEDEON

Ok mon a petet pran ou 2enm kestyon, premye kestyon avan lo as regards to bann students ki deor.  Konsey ki nou’n donn bann etidyan ki deor ofet nenport ki citizen, travel an se moman i en risk dan li menm parey nou’n war sa 2 premye ka ki nou annan isi i dimoun ki’n atrap pandan travel posibleman bann ka ki’n enporte.

So letan ou sorti kot ou pe izole dan ou lakaz, dan ou flat konman etidyan oubyen konman rezidan ou komans ekspoz ou lekor, ou safer dan ou lakour oubyen kot landrwa kot ou ete.  Parkont si i annan etidyan oubyen rezidan ki anvi tournen konman en pei nou pa kapab refiz tou dimoun.  Me selman ou pou bezwen al dan en karantenn obligatwar.

So vwala Lalwa pa anpes nou resevwar nou, nou sitwayen.  En lot keksoz ankor si i annan en sitwayen Seselwa ki annan en lot paspor ki anvi aletranze dapre nouvo Regilasyon i kapab ale selman i pa pou kapab tournen pou lespas 3 mwan, so i annan sa provizyon.

As regards to akoz ou pa pran mezir la pou fer sir i pa ganny community transmission be nou kapab annan en lot senaryo dizon nou fer lockdown oubyen closedown la e apre 14enm zour nou ganny 2 ka do we lockdown again, pou konbyen letan?  E pandan lockdown nou ganny ankor 4 ka, nou lockdown ankor?

I kapab vin en serk ki apre i, i out of control so ou bezwen lockdown a moman presi apropriye pou fer sir ou capture letan ki i pli kritik.  En mannyer ki ou annan minimum disruption avek sosyete so i vre ki presyon pou nou fer lockdown, pou nou fer en close down i la me selman si sa pa asosye mon pou repete ankor avek sanzman konportman. Letan ou lockdown bis i aret sirkile, loto i aret sirkile, i annan en lalis bann servis ki kontinyen bouze;- servis elektrisite, delo lasante nou bezwen kontinyen travay, sa napa zis en o risk ki ganny asosye avek i mouvman dimoun.  E i annan i redwir that’s right be si sa risk i redwir dan bann dimoun ki pe mouvmante selman dan lakour, dan kominote i ogmante.  Akoz ler ou lockdown sa bann dimoun i sorti lo semen an sirkilasyon i ariv dan bann kominote e laba osi ki zot sa behavior i enportan dan bann housing estate, dan bann flat, dan bann vilaz, ou war?  Se pou sa rezon ki i bezwen fer i en keksoz ki par egzanp Itali zot in fer lockdown selman bann house party i kontinyen i annan menm bann corona party.  Wi, zot pe fer dan kasyet ou pa war zot selman i vid partou be dan lakaz en bann zafer pe arive!

 

MR SPEAKER

Mersi Dr Gedeon.  Onorab Waven William.

 

HON WAVEN WILLIAM

Mersi Mr Speaker.  Mr Speaker mon dir ki mon remersi Bondye pou faver ki i annan lo Sesel akoz ziska prezan nou annan nou zis 7 ka ki’n teste pozitiv.  Mon kestyon i konm swivan;- mon ti a kontan demann Komisyoner Lasante lefe ki nou pe koz lo social distancing ki vreman garanti nou annan ki kot Prizon la lefe ki bann rimann in sorti kot zot ete zot in mont anler Prizon, lekel ki pe vreman garanti sa laspe social distancing.

 E par lefe ki nou konnen ki prizon avek bann sityasyon ki ti deza egziste o par avan i pli at risk?   E dezyenmman mon ti a kontan demande ki kriter ki ganny servi pou met dimoun lo karantenn par egzanp ou bezwen fer bann tes e bann ki ganny anvoye kot zot lo karantenn lekel ki garanti ki sa bann diferan tes pe ganny fer byen?

E dernyerman Mr Speaker mon anvi demann Konmisyoner lefe ki mon war ki plizyer kestyon malgre Mr Speaker ou’n dir pa retourn lo la.  Me lo sa zafer lockdown la mon konnen poudir Konmisyoner in dir fodre nou mont lo nivo 5, me dizon pep Seselwa demen bomaten i leve avek lafreyer avek diferan lenkyetid i deside pou fer en petisyon pou anvoy kot Gouvernman poudir be regarde nou krwar poudir la i neseser en lockdown, ki Komisyoner poudir lo la?

Akoz letan mon pe sivre bann sekans ki pe devlope pou war ki sa desizyon pe ganny tarde, petet pou rezon valab me selman pou Seselwa retourn dan son lavi normal, mon santi ki petet i devret annan sa pti breakdown la ou nou kapab kontinyen nou lavi dan en fason byen.  Mersi.

 

MR SPEAKER

Mersi Onorab.  Dr Gedeon.

 

DR JUDE GEDEON

Mersi Mr Speaker.  Mersi Onorab William mon ti a kontan echo en fraz ki ou fek dir sa desizyon pe tarde pou bann rezon valab mersi pou sa.  Mon krwar ki nou pe ganny lasirans ki nou pe fer bon desizyon ki nou pa pe sot ladan e nou pe fer li byen, mersi pou sa rekonesans.

Nou pa pou kapab donn ou tou garanti ki Prizon pe fer tou keksoz byen me selman zot montre sa langazman pou fer tou sa ki neseser pou zot kapab mentenir plis lord, plis social distancing dan Prizon.

Me mon pa pou kapab donn ou sa garanti 100poursan ki tou sa ki devret pe ganny fer pe fer byen zis parey mon pa pou kapab donn ou garanti ki tou sa ki pe arive dan en housing estate pe fer parey nou demande e sa bann Lotorite kominoter Distrik i devret kapab engage lapopilasyon dan sa ka Prizon pou donn zot sipor pou fer sir ki bann basic infection prevention control practices pe ganny fer korekteman, i enkli social distancing.  Quarantine i en term ki ganny servi par ler loosely pou fer li parey ou a dir izolasyon, izolasyon ou izol dimoun i annan sa viris avek li pou tret li pou donn li swen, quarantine sa dimoun i zis en kontak i kapab ou’n ganny ekspoze me selman i pa malad ok.  E letan ou karantenn ou risk transmet lenfeksyon i pa la akoz ou napa sa maladi.

Se pou sa rezon letan ou dan quarantine ou ganny verifye toulezour – enn – si ou annan sentonm par egzanp lafyev e si ou en high risk contact ou tanperatir i ganny mezire.  Par egzanp bann pasaze ki ti dan avyon ki ti pros 2 seat otour tou sa bann pasaze, zot tanperatir in bezwen ganny mezire toulezour.  E nou annan en dimoun ki fer sirveyans ki kre en database, i update li toulezour i call tou bann sa bann landrwa dan tou bann sant karantenn, bann dimoun i dan lakour ki tanperatir sipoze ganny mezire e i fer sa antre dan en database.  E nou war lo en baz real time si i annan en dimoun pe devlop sentonm.

E la nou annan en Rapid Response Team ki ganny konpri par Sanniter, Dokter nou annan en gran group bann Dokter, nurse ki al kot sa dimoun i ete i met bann lekipman neseser e i fer sa tes, i pran sample pou sa tes.  Se pou sa, sa ki nou apel li nou teste tou bann suspected cases.  Zis yer menm nou’n run nou 26 tes dan bann dimoun ki’n sispe ki ti annan kontak zot in ganny serten pti sentonm e nou’n teste zot a rezilta ti sorti tar yer swar e nou pa’n ganny okenn cases pozitiv ladan.  La laboratwar nou deza annan 9 ka pe teste taler nou a ganny rezilta.

So sa i en legzersis real time aktiv ki nou pe fer.  As regards to petisyon si ti pou annan en lockdown, mon krwar ou’n ed nou reponn sa kestyon par donn en reasiran dimoun ki letan pou arive me letan i arive annou pare pou fer li, petet i pou tanto, petet i pou demen be ready.  Mersi.

 

MR SPEAKER

Mersi Dr Gedeon.  Bon mon annan ankor 4 Manm lo mon lalis, nou kapab kontinyen nou relieve Dr Gedeon ek Dr Henriette apre, me selman bear in mind nou pa pou lo SBC AM akoz SBC AM pe al off, i pe al kontinyen ek son lot progranm nou lo televizyon SBC 2.  So si sa i ok e mon krwar i ava ok tou avek SBC nou ava kontinyen e bann dimoun ki a lekout i ava kontinyen swiv nou lo televizyon SBC 2.  Mon ava donn laparol, i ok, si sa i ok avek bann Manm?  Dakor.  Onorab Sandy Arissol.

 

HON SANDY ARISSOL

Mersi Mr Speaker.  Bonn apre midi tou dimoun a lekout.  Mr Speaker mon ti a kontan demann Mr Dr Gedeon mon kontan letan zot nou met lanfaz lo bann staff Minister Lasante.

E nou tou nou apresye sa me selman mon konnen dan sa lalit dan sa travay ki nou pe koz lo la Covid-19 sirtou lo bann border control nou annan lezot Lazans, par egzanp nou annan bann Customs Officer.  Nou annan sa bann Sanniter sa bann group dimoun ki nou apel zot bann Sanniter nou annan bann Biosecurity Agent ki zot osi zot laba.

So mon ti a kontan demann avek Dr Gedeon parey lasirans ki’n donn avek Onorab Ferrari an relasyon avek bann travayer lasante eski sa bann group dimoun ki devan lo front line zot osi zot pe ganny menm tretman parey bann staff Minister Lasante an term en allowance, an term bon lekipman? Parske zot osi zot premye devan pou ganny kontak ek bann dimoun ki pe antre lo border oubyen bann dimoun ki pe deal avek COVID-19 mon ti a kontan Dr Gedeon i donn nou sa lasirans?  E letan mon, mon lo border control Mr Speaker lo menm respirasyon mon ti a kontan demann avek Dr Gedeon si i annan en travay ki pe ganny fer ant Minister Lasante avek Departman Imigrasyon pou ki i annan en travay ekstraordiner ki ganny fer ant sa ki konsern nou bann borders, lasose, nou bann lans ki nou annan ki ouver en pe partou, partou.

Nou bann zil, ki a dispozisyon nenport ki, ki sorti lwen i kapab retrouv li lo enn nou bann zil en pe an deor apre se sa menm group dimoun ki mon’n koz lo la ki pou bezwen ale si zanmen i annan en keksoz pou zot al debloke an relasyon avek nou border control.  Sa i mon premye kestyon?

Mon 2enm kestyon Mr Speaker mon ti a kontan retourn lo pwen ki Onorab Roucou in fer resorti an relasyon avek bann etidyan ki pe lekol kot lekol Minister kot Lekol Lasante ki tonm anba Minister Lasante, ou konnen nou annan en group etidyan bann ki pa pe fer work attachment la, zot deza dan lakour zot, i annan en group ki dan lakour parske tou lekol Pos-Segonder in fermen be mon aprann i annan enp e bann etidyan ki pe fer zot sa ki nou apel work attachment kot Minister Lasante.  Be mon ti a kontan demann Dr Gedeon ozordi letan nou pe koze la eski i advisable pou bann etidyan Minister Lasante par egzanp i annan en pe ki dan lakour la i annan in ganny dir ki i annan semenn prosen zot pou bezwen ak fer work attachment.

Eski la letan nou pe koze dan sa term COVID-19 eski i apropriye pou nou bann etidyan ki dan lakour oubyen bann ki deza Minister Lasante pou zot pe fer a work attachment kot Minister Lasante?  Mon pe demann sa Dr Gedeon atraver ou, Mr Speaker parske si mon memwar i bon bann etidyan pa ganny kouver legalman anba Nurse Council, Minister Lasante.

Eski alor nou pe dir bann etidyan ki deza dan lakour la ki’n ganny dir reste dan lakour zot reste dan lakour e zot pa ganny war pe fer okenn attachment, Minister Lasante akoz la pour le moman nou pe les sa avek bann profesyonnel, mon ti a kontan ganny en kestyon lo la.

E mon dernyen kestyon ki mon ti a kontan demann Dr Gedeon Mr Speaker i an relasyon avek bann pasyan nou annan plizyer pasyan ki aletranze parey Dr Gedeon in remind nou taler.  Travel ozordi i, i pa advisable eski mon ti a kontan demann Dr Gedeon nou bann pasyan Seselwa ki war li aletranze pe swiv en tretman e ki zot tretman in fini.

Eski i annan en protokol pou zot retourn se zot?  Donn nou en pti parol lankourazman pou bann manman, bann fanmir ki pe ekoute deor an relasyon avek si zanmen zot annan en Manm zot fanmir ki aletranze ki aprezan pe war li i bezwen retourn Sesel akoz son tretman in fini?  Mersi bokou Mr Chair.

 

MR SPEAKER

Mersi Onorab.  Dr Gedeon.

 

DR JUDE GEDEON

Mersi Mr Speaker.  Mersi Onorab Arissol.  Mon a sey adres ou bann kestyon pli mye posib.

Border control i annan plizyer Lazans ki travay laba enkli bann Sanniter bann Public Health Officers sa ki mon konnen se ki nou’n travay pros avek bann Departman parey Customs, Imigrasyon, SCAA, bann Ground Handling Agents parey nou dir depi en pe letan.  Mon konnen poudir zot menm rod bann lekipman proteksyon pou zot servi ki en pe bann hand sanitizer ki otomatik Minis a donn en pe detay taler lo la.  Zot ava remarke ki lo Erport nou bann Sanniter i bann dimoun ti pe met mwens sa ki ou apel bann PPEs, konpare avek bann lezot Lazans e rezon se akoz zot fer li anba gidans ki zot annan, zot konnen kan ki ou met en PPE.

Nou annan PPE ki baze Erport nou apel sa bann pre-positioning nou annan legan, nou annan mask, nou annan N95, tousala i la me selman zot servi letan i neseser.  Akoz i enportan pou ou servi ou PPE korekteman se akoz i annan en shortage otour lemonn, si ou servi li tro an gran zour ou pou vreman bezwen li ou napa.  So zot in ganny train mannyer pou fer li e nou, nou’n provide sa bann gidans ek sa bann lezot Lazans ki mannyer pou servi PPE.

E mon kontan dir poudir o konmansman i ti annan en pti pe panic avek be apre zot war poudir i annan rezon sa ki nou ti pe dir zot e zot in adopte bann pratik ki korek.

Allowance mon pa pou kapab konfirm allowance fodre zot front line agents lo Por ek Erport kot pou travay lasante i pou annan nou deza pran sa desizyon mon pa konn pou lezot.  Sa zafer border control osi as regards to security bann dimoun ki antre, i en issue nou annan en frontyer ki tre ouver Coast Guard i fer son mye pou patrol dan teritoryal, me pa toultan ki ou kapab kouver tou landrwa a tou moman.

Ofisyelman anba International Health Regulations nou annan nou zis 2 port of entry;- i annan Sea Port avek Erport.  Si i annan okenn clearance ki pou ganny fer dan lezot Zil Asanspsyon oubyen en lot landrwa i pa en designated port be i annan bann ka eksepsyonnel kot par egzanp letan ti annan bann cruise ship bann zofisye ti monte ti al fer clearance lo sa bann landrwa.  Me selman i annan bann aktivite ilegal ki kapab i pe pase lo lanmer ki kapab nou pa konnen, so sa si en petet en febles ki nou bezwen rod fason pou nou adrese.

Me zisteman i donn plis kredibilite sa mezir pou aret bann pleasure craft aktivite dan nou lanmer.  Nou kapab at least si nou war en pleasure craft en, en bato pe antre ou pa sipoze la ou.  So sa enn bann rezon akoz pleasure craft ti’n ganny demande pou arete pou le moman pou nou kapab annan plis kontrol.

Bann students NIHSS i pa en keksoz ki zot pou ganny forse pou fer si i annan etidyan ki malgre i annan sa bann sa konsiny pou reste dan lakour akoz lekol in fermen.  Si i annan etidyan ki anvi pou reste pou li ganny leksperyans i lib pou reste, me selman avek konsantman son paran.  Si paran pa ankor santi pou li reste nou pa pou kapab fors li pou reste.  Personnelman konman en Health Care Worker mon’n deza en etidyan mon osi letan i annan bann keksoz koumsa lanmenm ler ou ganny plis leksperyans e nou ti toultan pare pou al devan pou anmas sa bann leksperyans akoz la ki ou aprann.

Bann pasyan ki’n al trete deor aletranze letan zot fini zot tretman malerezman si pei in lockdown zot bezwen esper ziska ler sa lockdown i sorti i annan okenn vol available, e nou ki nou kapab fer se donn zot bann advice ki mannyer pou protez zot lekor pandan flight ziska ler zot ariv isi.  Mersi.

 

MR SPEAKER

Mersi Dr Gedeon.  Onorab Norbert Loizeau.

 

HON NORBERT LOIZEAU

Mersi Mr Speaker.  Bonzour tou dimoun.  Mr Speaker mon premye kestyon pou Dr Gedeon, mon anvi demann Dr Gedeon vi ki mesaz pe al deor i enportan pou nou popilasyon, pou anpes annan panik vi ki lately lo SBC in annan bokou interview ki’n ganny fer ek plizyer lezot dimoun menm ki an deor lasante.

E dan sa bann interview i annan serten mesaz, ki pa tro bon pou popilasyon tande eski zot okouran sa, eski ou zot an kontak avek SBC pou zot diskite pou war pou ki okenn keksoz ki annan pou fer avek COVID-19 okenn interview i bezwen ganny fer par ou ek ou lekip kot Public Health.  Sa enn.

Dezyenmman, lately ler sa viris ti ganny rikorde isi nou’n tande ki’n annan en sant izolasyon Anse Royale apre nou’n tann en sant karantenn kot Coast Guard e la nou’n trouve ki sa sant izolasyon Anse Royale in tro pti e zot in bouz Perseverans kot Lopital Lafanmir kot i pli gran.  E osi la nou pe tann en lot sant karantenn kot Berjaya Beau Vallon eski sa pe dir nou ki sityasyon i grav ouswa i zis bann prosedir proteksyon ki zot, zot pe pran kot zot Minister laba?  Mon 3enm kestyon pou Dr Gedeon tar lannen pase Minis Lasante ki ti Minis Adam sa letan ti dir devan Lasanble dan en stetment konmkwa ki i annan en mankman ners e pou zot annan lide pou ogmant lakantite ners par omwen 30 pou 70poursan, mon pa pe mazinen mon pa’n rod verbatim.

E pou li fer sa zot ti pou fer antre bokou ners etranze pou zot kapab meet sa demand eski Minister Lasante in reisi kapab meet sa ki, ki Minis Adam ti dir ki vi ki la Praslin, Onorab Churchill Gill in dir ki i annan en mankman travayer Lasante laba sirtou ners avek si okenn ka viris i ganny raporte Praslin.

E dernyerman mon anvi demann Dr Gedeon vi ki zot annan bokou travayer, drayver ki pe travay ek zot laba kot Public Health kot Lasante e ki zot osi pe involve direk pa avek pasyan me petet avek bann ners ki zot, zot pe akonpannyen pou anmenn dan sa bann landrwa.  Eski zot osi zot pou ganny asiste avek okenn risk allowance akoz dapre konpran zot pa pe gannyen, vi ki zot osi zot a risk ek sa maladi?  Mersi Mr Speaker.

 

MR SPEAKER

Mersi Onorab Loizeau.  Dr Gedeon avan ler mon donn ou laparol zis mon pou azout en pti bout an sa ki konsern Berjaya Beau Vallon Bay mon annan bann staff, bann skeleton staff oubyen bann auxiliary staff  ki pe travay laba zot pe ganny demande pou reste pou fer sa ki nou apel month end closing.

Zot pe regarde management pe demande pou reste e zot konsernen en pti pe ek zot lasante.  Mon’n sey reponn zot poudir ki zot pa sipoze an kontak avek sa bann dimoun ki dan karantenn, mon ti a kontan petet dan ou repons pou Onorab Loizeau osi tou, de ou par ou a kapab reasir zot pou zot safety e zot health.  Mersi Dr laparol i pou ou.

 

DR JUDE GEDEON

Ok mersi Mr Speaker.  Mersi Onorab Loizeau.  I vre ki i annan en kantite lenformasyon ki’n sirkile e par-ler i annan bann lezot Lazans zot fer zot kominikasyon avek SBC se pou sa rezon ki nou’n fer rankont avek SBC ek ki zot senior management e nou’n deside pou okenn lenformasyon ki antre zot verifye avek nou, avan ki zot release oubyen pibliye.  Nou annan en WhatsApp group deza ki ou pe travay avek e zot release sa zot fer nou konnen si zot in ganny lenformasyon pou nou verifye avan ki zot fer release. 

Sa ki nou napa kontrol ase kontrol lo la se lenformasyon lo social media ki’n menm donn nou 1500 ka malerezman.  Apre serten non dimoun ki servi ki pa korek konnen so tousala i pa bann bon keksoz i pa ankourazan.  Lo kote Anse Royale Sant Izolasyon, ok Sant Izolasyon Anse Royale nou’n ki ti servi li o konmansman, e tout fwa nou ti annan Lopital Perseverans konman en 2enm lokasyon.  Me selman ti annan pasyan laba nou pa ti kapab tir dimoun deswit akoz nou ward medikal pa ti ankor kapab fini renovate.  Me nou stok in fini renovate nou’n kapab relocate sa bann pasyan laba e nou’n move bann pasyan ki ti Anse Royale, Perseverans ki pli konvenab pou tret dimoun ki malad avek sa maladi i pli fasil pou izol zot – enn.

Dezyenmman, i pli konvenab pou bann staff osi tou i annan plis lespas.  Karantenn nou pa ti pe antisipe ki ti pou ganny sa downflow of Seselwa ki pou vini akoz Lerop in ganny anflanm en sel kou an gran e nou annan en kantite dimoun ki’n sorti Lerop ki’n desann ki’n anvi retourn Sesel.  E en pti kou nou isolation nou karantenn Perseverans in plen.  Nou’n bezwen ganny enlot landrwa kot Maison De Football kot football house e li osi vitman in ranpli e nou ti war nou avek en sityasyon kot nou ti annan en mass dimoun ki pe vini sorti Moris kot sa lepidemi pe ti pe konmans montre en trend elarzisman ase vit dan lespas detrwa zour zot in ganny 24 ka.

E ti annan en laliny tes zot ti pe fer ankor pou gete si ti napa ankor case ladan.  E nou ti war poudir nou ti bezwen en fasilite vitman e se pou sa rezon ki nou ti napa lot swa se pou deklar sa Public Health Emergency pou nou kapab rekizisyonn nou fasilite Berjaya.

An se ki konsern bann ners, i annan bokou bann ners ki’n antre bann ners etranze mon pa konn sif egzakteman nou a kapab rod sa sif pou donn ou poudir ou ki kantite ners etranze ki’n ganny anploye depi ler ki Minis Adam ti’n fer sa deklarasyon.  Me selman mon oule dir ki nou deza an kontak ek serten pei vwazen serten pei zanmi si an ka nou bezwen travayer Lasante adisyonnen pou nou kapab reponn a sa lepidemi.  Nou deza fer kontak atraver Minister Zafer Etranzer pou nou ganny lasistans avek personnel.  Byensir WHO i nou, nou lyezon kle dan sa demars.  Drayver i form par travayer Lasante so si i annan okenn allowance i donnen zot pou osi zot pou ladan.  So mon krwar mon’n, mon pa’n tro capture kestyon.

 

MR SPEAKER

Wi, Doctor bann staff ki bezwen pe travay in ganny dir bezwen travay Beau Vallon Bay pou fer zot month end closing zot clear lo sa ki ou’n dir with regards to bann ki dan karantenn.

Me la zot konsern i leve se ki i annan bann expat staff osi tou ki pe travay avek zot.  Malgre zot in ganny mete dan en wing separe.  Eski zot pou kontinyen al lo premises pou al reponn lapel management pou zot kontinyen travay, eski i safe pou zot, zot anvi en garanti?

 

DR JUDE GEDEON

Wi mersi Mr Speaker.  Sa bann staff expat zot deza dan pei depi lontan zot, zot pe travay la lotel zot reste dan en wing separe ki napa kontak avek sa bann dimoun, sa bann dimoun ki dan karantenn.  Sa bann staff i esansyel pou run bann servis esansyel lotel par egzanp boiler, fer sir ki elektrisite i reste fonksyonnel, delo, bann servis mentenans, me selman dan term kontak avek sa bann dimoun dan karantenn zot pa gannyen.

Sa bann dimoun dan karantenn zot pa sorti dan lasanm zot, dimoun ki annan access ek zot se zis bann staff Lasante pou al tyek zot tanperatir oubyen si i annan okenn needs ki zot annan zot la zot al war sa bann dimoun zot pa sorti pou deplase pou marse partou.  Manze osi i ganny anmennen dan lasanm;- room service.  Mersi.

 

MR SPEAKER

Ok mersi Doctor ,mon mazinen ou a kapab reasir sa bann staff Seselwa ki pe travay laba.  Onorab Sebastien Pillay.

 

HON SEBASTIEN PILLAY

Mersi Mr Chairman.  Nou’n fer fas avek en moman, en moman eksepsyonnel dan nou listwar e nou bezwen vin alaoter.

Mon ti a kontan Mr Chairman, demann en kestyon Dokter, enn bann konsern ki nou war pe ganny eksprimen se lefe ki lafason ki lapres e medya enternasyonal in medyatiz sa viris in fer ki bann zenn dimoun i krwar poudir zot annan swa en serten pa immunity me zot pou overcome sa maladi bokou pli vit ki lezot.  E nou’n war ki bokou zot par egzanp dan lezot pei menm si i annan lockdown zot sorti zot al borlanmer zot al lo lans La Floride, Moris menm parey bokou lezot pei nou pe war.

Eski an prenon kont sa sityasyon Departman Lasante ek bann Lotorite konsernen Minis i la pou ranforsi bann mesaz ki pou ganny pase avek bann dimoun pou fer  sir ki zot konpran ki malgre ou zenn ou still kapab enfekte bann dimoun kot ou lakour eksetera ler ou ganny ler ou atrap sa maladi.  Mon lot pwen i konsern sa size lockdown, petisyon eksetera mon pa pou al dan sa, dan sa size lockdown.

Me i enportan pou nou note ki i annan dimoun ki vin ki pe koze pou zot siny petisyon me zot, zot annan farmasi e zot in pare ek zot stok sanitizer ek zot stok keksoz pou zot se zot, zot.  E bokou dimoun pa ankor kapab ganny en sanitizer akoz i annan dimoun in ale in aste tou e larestan dimoun pa pe gannyen.  Mon kontan ou’n dir se ki nou pe prepar nou pou antre dan en lockdown, me tou dimoun i bezwen prepar zot pou antre ou pa kapab en dimoun pe antre dan en lockdown i pa pare pou li antre dan en lockdown.  Sa i enportan sa.  E  mon kontan ki pei pe fer sa bann zefor.  Par egzanp lannen pase ler Minis ti vin avek lide pou annan en Korperativ pou aste tou pwason nou ti shoot down lide.

La nou war poudir se sa ki nou pou bezwen al sey fer la, ok? So i bann mezir ki nou pou bezwen pran zisteman pou ease nou dan en lockdown.  Nou’n war poudir ou’n koz lo en lockdown me nou tou nou bezwen aksepte, poudir ki mannyer nou konport nou; par egzanp si nou dir dan en lockdown nanryen pa antre, nou pa kapab vini demande poudir en bato antre dan pei.

Nou pa kapab anvoy email par egzanp poudir sa bato i pa’n pas tel landrwa, tel landrwa pou demande pou li antre.  Tou sa bann keksoz i bann keksoz ki nou bezwen konmans pratik li la.  Savedir ki dan mon lespri se ki Minister eski i pou kontinyen anmenn sa mesaz lo ki mannyer dimoun pou bezwen konport zot pou ranforsi lo ledikasyon ki dimoun i bezwen gannyen nou tou, nenport ki nivo nou ete dan lasosyete premyerman?

Dezyenmman eski nou pou ede ranforsi mesaz e ledikasyon ki nou fer avek bann Lasante avek bann sirtou bann zenn pou zot konpran lesansyel ki zot practice sa social distancing?  Akoz mwan personnelman mon’n war zenn al en kantite lo lans eksetera.

Apre trwazyenmman Mr Chairman, eski nou kapab fer en dimoun konpran sa myth ki lasaler nou klima i annan bokou dimoun pe krwar poudir lasaler nou klima i annan lavantaz e alor zot pa pe egzers sa kalite caution ki Minister pe dir.  E petet pa pe lav lanmen pa pe fer bann keksoz koumsa, so eski i annan bann ledikasyon ki pou kontinyen ganny fer lo sa, lo sa size?  Mersi Mr Chairman.

 

MR SPEAKER

Mersi Onorab Pillay.  Dr Gedeon.

 

DR JUDE GEDEON

Mersi Mr Speaker.  Mersi Onorab Pillay.  I vre ki bann zenn zot tant pou manifeste form pli mild sa maladi parkont lefe ki sa i leka, zot santi zot pa tro malad zot pli fasil i annan plis loportinite pou zot transmet avek lezot dimoun avek zot paran e zot gran paran.  Se pou sa rezon sa mesaz reste anndan si nou ariv staz kot nou pou fer lockdown oubyen close down.  Pa krwar poudir zot pou kontinyen parwaze partou akoz risk pou zot i parey risk pou lezot i annan zenn ki’n perdi lavi avek sa maladi sirtou si ou sistenm defans i annan en problenm i annan plen zenn ki annan maladi kronik.

Par egzanp asma ki bezwen pran steroid, en dimoun ki annan i annan en kantite zenn ki fimen ki a risk.  I annan en kantite zenn ki lo drog ki pli a risk, so zenn napa en proteksyon adisyonnel bann zanfan parkont zot tant pou so far dan sa sif ki’n montre napa preski ditou zanfan anba 9an ki’n mor.  Lasin antye napa personn anba 9an ki’n perdi lavi so sa i pa en paspor pou ou akt dan en fason iresponsab.  E nou lenformasyon ki nou donn piblik avek dimoun an zeneral se ki pa vin complacent tret li parey nenport ki.

Klima avek sa viris i annan en kantite deba en kantite lartik in ganny ekri.  I vre ki avek Influenza bann flu viris, zot mwen performan avek lasaler, se pou sa ki nou napa bann flu season dan bann pei tropik.  E sa viris i pe behave en pe parey flu parey Influenza.  Me selman i annan serten landrwa ki son severite i bokou pli for ki Influenza, so nou pa kapab dir, WHO i warn nou poudir pa krwar bann pei Lafrik i eparnye akoz lefe ki nou annan lezot challenge Lasante i kapab annan mutation oubyen i kapab adapte pou vin pli agresiv dan sityasyon kot i annan lasaler.

So nou pa kapab dir a se moman ki nou an proteze akoz nou dan en klima tropikal.  Nou bezwen think about the worst case senario ki nou napa sa proteksyon e pran tou bann mezir neseser pou protez nou.  Mersi Onorab.

 

MR SPEAKER

Mersi Dr Gedeon.  Mon ava donn dernyen parol Onorab Ramkalawan.

 

HON WAVEL RAMKALAWAN

Mersi bokou Mr Chairman.  Mr Chairman mon krwar ki sa sesyon la in vreman enteresan e I’m sure Dr Gedeon in trouv li bokou pli enteresan ki bann Press Conference ki ou fer.  Mr Chairman mon kontan sa dernyen komanter ki Dr Gedeon in fer.  Sa lafason ki sa viris pe, pe prezant son lekor, lafason ki i pe behave.  Parske, petet en keksoz ki enportan pou nou, pou nou dir ki Moris, La Renyon, Madagascar avek Sid Lafrik akoz nou dan sid zot pe antre dan zot sezon Liver, egzakteman parey Lerop i ete.

Well Lerop pe sorti dan son sezon Liver e alor sa ki pe arive Lerop i kapab repete bor kote dan sid e nou, nou lucky akoz nou, nou pozisyon pre avek equator e nou napa, nou napa liver.  Me selman fodre nou fer atansyon.  Detrwa pti kestyon vit, vit bann, bann larepons kourt.  Eski tou bann dimoun ki dan karantenn Beau Vallon Bay, zot tou zot pou reste laba zot 14 zour, oubyen i annan serten ki pou sorti avan?  E zis poudir Mr Chairman parey ou osi ou’n ganny en pe konplent bann pasyan, well mon apel zot, bann dimoun ki laba zot pe konplent i so, lasanm i so.  Zot pa pe ganny, zot ganny zis en boutey delo.  Konmsi si i kapab get en pe dan zot welfare.

WHO guidelines i enpe lo minimum sa e i pa anpes, i pa anpes nou al bokou pou fer bokou plis parske apre tou, prevention is better than cure.  Bann ners ki pare pou travay lo front line, me ki an menm tan pe mazin zot fanmir  ki posibilite pou zot si zot pe travay lo front line pou zot pa retourn dan lakour me pou zot annan en landrwa, en landrwa pou zot letan zot fini travay ale dan en serten sans pou protez zot fanmir?

En ler pou ou konman Health Commissioner, nou pe ganny bokou rasanbleman otour bann laboutik dan aswar, ek bann ki posibilite zisteman pou, pou fer Lapolis e pou donn en lord pou eklersi oubyen pou annan en ler pou bann laboutik fermen?  La ki nou dan sa sityasyon, dizon 6er diswar, 7er diswar tou laboutik fermen, e sa i ava dekouraz bann dimoun pe asize obor laboutik pe fer nwizans ensidswit.

Indian, bann construction workers, construction workers ki ankor pe ganny transporte open air dan bann pick up.  Eski, e napa social distancing ditou nou war zot, zot in asize eski sa osi tou i pa keksoz ki nou bezwen, ki nou bezwen regarde?  Sa Dutch, eski ki dan kondisyon kritik eski i annan bann lezot kondisyon lasante oubyen eski se zis sa COVID-19 ki pe, ki pe afekte li?  Dimoun i anvi konnen.  E finalman zis pou mon montre ki mannyer konmsi i annan en pe konfizyon.  Vallee De Mai i ouver, Zarden Botanik in fermen, L’Union Estate i ouver, konmsi ki standar?  Mon krwar ki se sa bann keksoz parey ki dimoun i anvi konnen.

E apre zis en pti retraction ki mon anvi fer Mr Chairman, mon’n ganny en, en mesaz ki se biro Licensing Authority kot, kot Testing Station ki’n fermen e nou pa Testing Statio,n me selman zot pe, zot osi tou zot lo zot, zot lo zot annan mwens dimoun ki pe travay.

E sa kargezon latizann Moris ki mon’n tann ou nonmen detrwa fwa, eski in vini yer dan sa avyon?  Mersi Bokou.

 

MR SPEAKER

Mersi Onorab Ramkalawan.  Dr Gedeon.

 

DR JUDE GEDEON

Mersi Mr Speaker.  Mersi Onorab Ramkalawan.  Quarantine 14 zour, tou dimoun pou reste laba eksepte si pandan son sezour i devlop serten sentonm, ki nou pe tir li.  Si sentonm i konsistan avek Covid-19 i pou ganny tire met dan en zone ki nou apel person under investigation, ki kot Lopital Perseverans i separe avek sa enn isolation.  E la tes i ganny fer, si i negativ then i kontinyen son peryod karantenn.  2enm sirkonstans ki en dimoun i kapab ganny tire si i annan lezot problenm medikal ki i fer li pa kapab reste an izolasyon i bezwen en sipor.  I annan dimoun ki bezwen, par egzanp zot annan problenm leker ki pa kapab okip son lekor ki bezwen swen en carer, la i pou kapab petet, nou get son lakour mannyer i ete, nou a kapab fer home quarantine.

Me an se moman nou annan zis en dimoun, en dimoun ki, en travayer medikal ofet ki en pe aze ki pa’n kapab tenir dan quarantine institutional ki’n bezwen nou’n bezwen met li dan lakour.

An se ki konsern lozistik, wi nou pou bezwen rod fason pou amelyor, pou amelyor konfor sa bann dimoun ki laba e mon pran note sa bann issues.  Nou pou annan staff ki pou baze laba ki pou fer sir sey adres tou bann febles ki nou pick-up anmezir.  WHO guidelines wi, i the, i annan serten keksoz i basic be selman li osi i donn ou de ekstrenm.  I dir ou ‘this is the minimum guideline’ me selman sa lot i donn diferan level of intervention.  Appart sa nou pe osi get guideline CDC, Lanmerik, ki en lot Lotorite Lasante e European CDC.  Avek COVID-19 nou’n servi osi Chinese CDC Centre for Disease ControlSo nou get plizyer guidelines.  Dan nou rezyon nou sant referan laboratwar i National Institute of Communicable Disease Sid Lafrik.  I sant referan WHOSo i provide kantite guidelines pou nou zot osi in regards to testing espesyalman.

Bann fanmir bann nurse ek zot staff ki dan front line, sa i en, i en size ki Public Health Emergency Operation Centre i deza pe adrese.  Posibilite pou ganny en landrwa reste pou bann staff ki pe travay pou zot reste pa al melanz ek fanmir.  Wi petet en lot lotel.  Nou ava regarde ok?  Sa zafer laboutik i enn nou bann, mon poudir latet fermal.  Akoz i enn bann landrwa kot dimoun i kontan congregate.

Dimoun i pa zis fer zot shopping, zot fer, zot aste sa ki zot pou aste apre zot asiz deryer laboutik zot fer ta.  Swa zwe domino, swa zot fer zot bann konversasyon la.  So Lapolis pou bezwen ed nou pou, si pa pe kapab dispers sa bann dimoun then next step nou fer en curfew, demann en curfew oubyen ferm bann laboutik boner.  E letan ou annan curfew anba Lalwa nou kapab fer en Public Health Curfew, bann novo Regilasyon, kot ou napa dwa deplase lo semen apre sa ler.  So nou bezwen get sa tre pros pou gete si nou bezwen pran sa kalite mezir.

E sa pou pandan sa semenn la ki nou ladan.  Construction workers, wi en challenge.  Nou guidelines lo zot landrwa reste se ki tou travayer i bezwen annan landrwa, at least 4.6, 5 met kare pou kot i viv.  E dan zot landrwa reste zot social distancing si ou re aranz zot, zot pa pe kapab manage.  Me nou deza konmans travay avek bann travayer konstriksyon, bann Lakonpannyen Konstriksyon pou zot improve hygiene premyerman.

Dezyenmman, lefe ki nou napa nouvo travayer ki pe antre akoz GOP in ganny kennsel, e nou krwar poudir sa risk entrodwir en dimoun enfekte dan sa group dimoun in redwir konsirableman.  Be i reste en konsern akoz zot tant pou viv tre pros.  Nou bezwen nou rod fason pou nou adres sa.  Bann landrwa lwazir Vallee de Mai, L’Union Estate, Botanical Garden, even landrwa ouver.  Menm nou’n war Langleter zot vey dimoun, si ou lo semen fodre ou pe fer legzersis, fodre ou pe al laboutik, serten keksoz fiks.  Be en zarden i en landrwa kot dimoun i al li tousel i kapab detant, akoz pandan letan lockdown oubyen close down ou, ou permet serten aktivite minim endividyel.  So, be selman i pa bann group, i pa bann group visit,  mon krwar.

Apre bann latizann sorti Moris mon pa ankor ganny, ganny lenformasyon si in arive oubyen non.  Dutch, Dr Henriette bomaten mon’n koz ek li, i dir mon son sityasyon i ankor kritik.  I annan 54an. Mon pa konn okenn underlying medical condition ki i annan.  Pardon?

 

MR SPEAKER

Mersi Dr Gedeon.  Onorab Ramkalawan.

 

HON WAVEL RAMKALAWAN

Mr Chairman konman dernyen parol vi ki mon ki’n demann sa kestyon, mon ti a kontan ankor enn fwa de lapar nou tou remersye Dr Gedeon pou tou son bann larepons konpreansiv.   E pou swet li avek son lekip all the very best.  Rest assured ki poudir ou annan sipor nou tou ki la san eksepsyon, parske nou tou nou anvi ki sa size COVID-19 i vin en size lepase.  Mersi bokou e tou kouraz e tou benediksyon.  Mersi bokou.

 

MR SPEAKER

Mersi Onorab Ramkalawan.  Mon pou annan en dernyen, dernyen pti parol avan mon donn parol Minis.  Ankor mon adres ek Dr Gedeon.  Mon fek ganny en zofisye Lapolis ki O plase pe ensiste, pe demande ki prosen mezir ki ganny pran shop closing time i bezwen ganny revwar.

I pe met zot anba en kantite presyon sa social distancing pa pe ganny kite e bann ler ki laboutik pe reste ouver i pe toler gatherings, public gatherings.

So mon krwar dan sa sityasyon parey Manm piblik a bezwen konpran ki poudir i annan en ler kot laboutik i bezwen fermen.  Sa i bezwen ganny adere par Lotorite.  Minister dernyen parol avan nou release bann zofisye Lasante.

 

MINISTER MAURICE LOUSTAU-LALANNE

Mersi Mr Speaker.  Mr Speaker mon pa pe oule antre dan bann diskisyon me mon krwar i enportan ki mon donn en 2pe lenformasyon pou eklersi nou lo bokou size.  Premyerman lo sa kestyon self-isolation mon krwar i, i enportan mon dir de keksoz.  Pou premye keksoz se ki avan ki Lasante i deside anvoy en dimoun self-isolation, i annan en prosedir ki swiv e i annan en follow-up swa personnelman en dimoun i vini oubyen par telefonn.

So i annan en prosedir i pa nou pa met dimoun nenport kote akoz i annan osi en prosedir ki ou bezwen swiv dan lakour.  E taler mon a revin lo la letan mon, mon ferm mon lentervansyon.  I osi kler ki sa viris la apre 14 zour i pa ale li, i ankor la li, i kapab reste la ziska en maksimonm 5 semenn.  So la, la kot son sa timing 14 zour la i pa final li so nou bezwen bare that in mind.  An sa ki konsern lekipman i annan bokou Manm Onorab ki’n koz lo la.  Mon kapab konfirmen ki i annan de consignment ki pe antre sa semenn.

En premye consignment i sorti kot Jack Ma Foundation an Sin e li i pe ariv lo Ethiopian Airlines.  I annan en donasyon 100,000mil mask, 25,000mil test kit e apre i annan 1000mil item protective clothing.  E parey taler Dokter in koz lo sa consignment United Arab Emirates, li i pe ariv osi sa semenn kekfwa ozordi, me i iminan.  I annan 10,000mil over all, i annan 23,000mil isolation gowns, i annan 650,000mil legan, 8,400mil sanitizers, e 20,000mil mask.  Sa pe antre la.

E i annan serten donasyon finansyel ki serten dimoun prive i osi fer mon pa pou al antre dan son detay.  E nou’n osi ganny parey Dr Gedeon in dir taler bann sekter prive ki’n deza fer donasyon testing kits.  I annan Gran Kaz par egzanp, i annan osi lezot komers ki’n deza sponsor kot in ed nou ganny bokou plis test kits.  E zis pou lenformasyon tou dimoun letan nou fer en tes i kout nou R2mil Seselwa.  So en kit i R2mil pou le moman.  Parey tou keksoz ek latizann ek medikal o firanmezir ou pou war ki sa test kit pou kout R10 dan enn de lannen me pou le moman i kout R2mil enn.

Mr Speaker in annan en lentervansyon, bon Onorab in koriz son lenformasyon lo Vehicle Testing Station, i byen parey Biro Later osi i ankor, i ankor pe fonksyonnen.  E lenportans la se ki tan ki nou napa parey en, en parey en lockdown si oule.  Desizyon i ganny pran, tou servis i bezwen fonksyonnen.  Letan nou pou ariv dan en lockdown zis servis esansyel ki pou bezwen kontinyen.  E menm la parey Dokter in dir nou pou pe regard adisyonn plizyer kategori biznes lo sa lalis.  Akoz i annan en lalis ozordi ki egziste anba Lalwa, me i pa kouver tou keksoz.

So sa travay ki nou’n fer prealab pou nou aranz sa.  Alor larive touris wi, le 22 par egzanp Mars zis 87 viziter in antre Sesel.  E normalman si nou pran en semenn avan ti annan 1564mil ki antre, donk i montre ou dan en semenn ki mannyer in desann e i pou ka ziman zero byento.  So i pou en cascading effect be parkont son ale le 22 ti annan 1024mil ki’n ale.  So Sesel pe ganny vide avek touris e napa personn ki pe antre sof bann Seselwa ki le retourn Sesel.  Sa i enportan pou mon osi donn sa lenformasyon.

Alor SPTC wi, lekol pa fonksyonnen, bis pa pe anmenn marmay lekol, so i annan availability bis pou regard schedule.  Setadir lo peak hours si nou le fer sa social distancing nou kapab olye met 60 dimoun dan en bis nou met 30 dimoun dan en bis.  Me nou fer son progranmasyon en tel fason kot pou annan mwens dimoun ladan.  So i annan posibilite pou reorganize e sa SPTC pe reorganize.

Berjaya Beau Vallon Bay wi Onorab Hoareau nou pou bezwen pey zot en larzan.  Gouvernman i angaze pou pey, akoz nou’n rekizisyonnen i en keksoz, me, nou bezwen peye pou en servis.  So sa parey nou pe dir nou pe negosye pou nou peye e i ava tonm dan nou Bidze e zot a war li letan mon ava anmennen.

Praslin en bon keksoz ki nou pe dir se ki si nou pe pey saler bann travayer dan lendistri touris se pou sa lotel i kontinyen fonksyonnen.  In train son staff pandan sa peryod kot pou napa touris.  E mon kontan ki bann hôtelier Praslin zot in get together e zot pe servi zot staff, zot pe kwi manze pou anmenn lopital Baie Ste Anne pou donn manze travayer Lasante.

Se sa ki nou anvi war.  E felisitasyon ! Alor Praslin e felisitasyon pou bann hôtelier Praslinios ki’n konpran sa mesaz ki nou pe sey anvoye.

Isolation Centre kestyon Onorab Roucou i en bon kestyon.  Parey ou konnen dan Bidze 2020 nou ti’n mete R40milyon pou nou pey konstriksyon sa Sant Izolasyon Seychelles Hospital.  E donk sa i dan Bidze pou nou pey sa proze e i pe go ahead.  E an plis nou pe anmenn en Bidze isi pou R3milyon pou nou repar barak militer Ile Du Swet ki pou ganny osi servi konman en sant karantenn.  Sa i en lot lenformasyon ki mon krwar i enportan ki mon pase.  Wi leres mon pa pou al repete.

Me zis mon, mon ti a kontan fer en lapel an konklizyon Mr Chairman, Mr Speaker.  Parey la ozordi nou’n vin isi mon war nou pe follow mezir Dr Gedeon ‘a la lettre’ parey nou dir an Franse.  Be letan nou sorti la nou tourn dan lakour tanto annou fer sir nou fer li ankor.  Akoz nou, nou’n kapab anmas sa zafer letan nou pe marse.  I lo nou lenz.

Letan nou ariv dan lakour tir nou lenz met dan landrwa spesyal, bennyen, sanitize.  Non i enportan ou pa kapab zis antre dan ou lakaz koumsa al tyonbo ou pti zanfan, and so on.  Nou osi nou bezwen fer sa so, annou fer sir nou extend sa teknik ki nou’n gannyen, sa protokol ki’n nou’n gannyen ki nou pe pratik isi dan Lasanble Nasyonal dan lakour.  Mersi Mr Speaker.

 

(APPLAUSE)

 

 

MR SPEAKER

Mersi Minis Loustau-Lalanne.  Bon i reste pou mon remersye le de zofisye Lasante Dr Kenneth Henriette e Dr Jude Gedeon pou vin pas sa demi zournen parmi nou e pou donn nou lenformasyon.  Mon osi remersye bann dimoun an deor ki’n ganny kontak ek bann Manm enkli mwan menm ki’n anvoy en pti pe zot bann konsern, ki nou’n kapab pas devan avek Minis avek Dokter pou kapab reponn.

Pou apre midi mon pe sizere ki nou pou repran 3er.  Akoz nou annan ABC meeting nou bezwen regard en pti pe nou travay ki mannyer nou pou fer.  Mon anvi demann ek bann Manm Lasanble, eski nou vreman bezwen bann zofisye Minister Ledikasyon?

An vi ki mon krwar Minis in donn ase detay bann mezir ki Minister Ledikasyon pe pran and so on.  Eski nou kapab release zot apre midi?   Nou, nou pli bezwen mon krwar Finans avek kote Lagrikiltir.  Yes, Onorab Ramkalawan.

 

HON WAVEL RAMKALAWAN

Mr Chairman mon krwar ki wi pou Minister Ledikasyon mon krwar kestyon prensipal sete bann, bann etidyan ki aletranze, ki petet si Minis i kapab ganny sa larepons.  Then i ava kapab donn sa larepons li menm Finans definitivman.  E lo kote, lo kote Lagrikiltir tou, mon krwar ki, mon pa konnen mon pe take the lead la.

Mon krwar ki nou’n ganny en bon pe lenformasyon lo, lo ki mannyer bann provizyon i ete ensidswit.  E, e ankor enn fwa mon krwar ki Minis Finans li menm li i ava kapab, i ava kapab diriz nou dan sa, dan sa direksyon parske dimoun i anvi zis sa eleman food security.  Si i annan ase manze ki mannyer keksoz pou marse.  E petet osi tou, parske lo prodiksyon ensidswit sa i ava, i ava definitivman tonm anba Finans pou regarde ki kalite lasistans ki bann fermye ki la pou le moman zot prodwi.

Ki zot abitye vann avek lotel ensidswit, ki mannyer zot pou, zot pou pase.  E lo kote Tourizm mon krwar ki, I mean Minis li menm li i ava dan en pozisyon pou li kapab adres sa direkteman.  So, mon ti ava dir otan posib bann, bann teknisyen zot pa ava bezwen vini apre midi e Minis i ava kapab debourye.  Mersi.

 

MR SPEAKER

Dakor mersi Onorab Ramkalawan.  Yes, Onorab Churchill Gill.

 

HON CHURCHILL GILL

Mersi Mr Chair.  Mr Chair dan tou sa bann keksoz ki’n ganny mansyonnen i annan en sekter ki pa’n ganny nonm preski ditou li, se Fisheries.  E parey ou konnen i annan bokou distrik ki annan Kominote Peser.

Mon krwar menm si Minis Lagrikiltir pa vin pou koz lo Lagrikiltir me at least Fisheries nou devret kouver.  Apre IECD osi si i posib.

 

MR SPEAKER

IECD ;- Petit Enfance.  Mon krwar mezir in ganny anonse yer ki tou lakres osi tou daycare i fermen non?  Se sa ki mon’n tande non?

Ok me, me si sa i leka, si sa i leka nou pa vreman bezwen zot savedir mezir in fini ganny pran.  Be Minis osi i kapab rod sa lenformasyon ekstra apre midi partaz avek nou.  Me definitivman pou Fisheries.

 

HON CHURCHILL GILL

Fisheries fodre i vini li.

 

MR SPEAKER

An vi petet Minis mon ava met en pti konsern devan ou.  An vi ki mon krwar se Cabinet ki’n, ki’n mansyonn sa ki zot in war, Prezidan mon krwar ki in war li neseser pou apwent en CEO pou SFA par enterim, e pou met en pti pe lanfaz pou boost up lekonomi.

Anvi ki COVID-19 pe annan lefe negativ lo lezot sekter lekonomi.  Nou pe war kot petet lapes i kapab ed nou en pti pe ki forex i kontinyen antre dan pei.  Me konsern ki’n ganny leve se pou le moman i annan en labondans pwason, Peser i anvi kontinyen al lapes, me zot pa pe kapab akse marse.  Yer mon annan en Peser ki’n kontakte mon i annan de bato ki’n antre e i pa ankor kapab tir pwason akoz i napa marse.  I annan en 3enm bato ki pe antre probableman ozordi so zot napa akse pou zot vann zot pwason.

Si petet dan sa laliny parey mon war pe dir poudir the Fisheries sector i kapab antre boost up en pti pe, se sa bann lenformasyon ki mon krwar ki Peser.  Eski i annan pei par egzanp dan la rezyon Moris ki zot kapab petet pran enpe pwason ekstra avek nou?  Oubyen mon pa konnen La Renyon and so on?  Se sa ki Peser i anvi konnen akoz pou le moman lotel, restoran pa pe pran pwason.  E local market in fini saturate.  Bann kestyon dan sa laliny Minis si ou kapab fer nou gannyen.

Petet osi si mon ava dir lo kote Lagrikiltir ti annan en, en lenformasyon ki pa ti korek ki ti ganny pase lo kote nitrofoska ki i ti available dan pei plizyer marsan, fermye in an kontak avek mon ki sa i pa vre.  Me Minis in fer kler bomaten poudir napa nitrofoska ek urea dan pei.  E mon krwar consignment pe antre byento.  So sa osi tou Minis in eklersi, mon pa war prezan vreman litilite ki zofisye Lagrikiltir i la prezan.

So, mon krwar Minis an gro ou’n ganny en pti pe kwa ki nou bezwen ki Lasanble i bezwen apre midi, e nou ava ganny bann zofisye Minister Finans, SS, PS e apre nou ava regarde si nou pou pran sa bann Prozedlwa ki mon krwar i pou straight forward.  Nou’n fini ganny enformen ki pou annan en prezantasyon lo sa bann Bills e mon pa krwar, i bann pti lamannman.  Mon pa krwar i pou annan gran deba lo la.  Kot nou a kapab enn fwa pou tou fini avek Minis Finans apre midi.  So nou ava break e ankor enn fwa mersi bokou, e mersi osi tou SBC pou kontinyen avek nou transmisyon.  E ABC nou pe rankontre 2er dan Speaker’s Conference Room.

Wi ok 2.15 e Lasanble pou retournen 3er.

 

 

(BREAK)

 

 

MR SPEAKER

Bonn apre midi tou Manm Onorab.  Bonn apre midi Minister, SS avek PS.  E bonn apre midi tou dimoun ki a lekout ki pe swiv travay Lasanble Nasyonal.  Zis avan ki nou repran nou travay lo kestyon mon ava demann Sarge zis tou move Mace back en pti kou dan Komite of the whole House.

Nou annan en Revised Order Paper devan nou pou Deputy Clerk kapab fer lir bann Papers ki pe ganny laid on the table.  Ok mon ava donn laparol Madanm Deputy Clerk.

 

MADAM DEPUTY CLERK

Mersi Mr Speaker.  Bonn apre midi a tous.  I annan, bann papye ki pe ganny prezante i konm swivan:

S.I 31 of 2020 Public Health (Amendment of Schedules) Regulations 2020.  

S.I 32 of 2020 Public Health Emergency Notice 2020. 

S.I 38 of 2020 Quarantine (Maritime) (Amendment) Regulations 2020.  

S.I 39 of 2020 Quarantine (Air) (Amendment)  Regulations of 2020.  

S.I 40 of 2020 Transfer of Statutory Functions (Quarantine Act) Order, 2020. 

S.I 41 of 2020 Public Health (Infectious Disease) (Amendment)  Regulations of 2020.  

S.I 42 of 2020 Public Health (Requisition and Compensation) (Amendment) Regulations of 2020.  Mersi Mr Speaker.

 

MR SPEAKER

Mersi Madanm Deputy Clerk.  Bon swivan Assembly Business Committee meeting ki nou fek fer, nou’n pran serten desizyon ki nou pou dedye sa 2erdtan apre midi ziska 5er, pou kestyon pou Minis Finans baze lo sityasyon lo (COVID -19 dan pei.

Lenpak lo lekonomi nou pou petet abord en pti pe lendistri Lapes and so on konsern bann peser.  E nou pe regarde avek Minis finans pou sa bann Bills si i ok, nou konnen i annan bokou travay zot pe fer avek bann teknisyen pou prepar sa Bidze pou Mardi le 31.  Me si posib nou pran zis bann kestyon apre midi e demen matin Minister, ou retournen avek ou bann teknisyen pou nou fer sa bann Consequential (Amendment )Bills.  Mon mazinen parey nou, nou pe prevwar ou pou fer one statement ki pou kouver tou e mon mazinen nou kapab dispose of petet by 10.30 kot nou a kapab les ou ale apre ek ou bann teknisyen.

Si sa i ok ek ou Minister?  Ok? Dakor.  Bon mon ava demann Sarge pou retourn nou dan Staz Komite e nou ava pran bann kestyon ki pou konsern dan lo kote Finans, Lekonomi and so on.  Mon ava konmans avek Onorab Ramkalawan ki Loter PNQ.

E anmezir Onorab Ramkalawan pe demann son kestyon mon ava ganny lezot Manm pou show of hands bann ki pou demann kestyon.  Ok? Onorab Ramkalawan ou kapab poz ou kestyon.

 

HON WAVEL RAMKALAWAN

Mersi bokou Mr Chairman.  Mr Chairman mon ti ava kontan ki Minis i eksplik nou dan en fason kler sa propozisyon ki Gouvernman in fer, ki poudir Gouvernman pou asir tou lapey bann lakonpannyen dan ki dan prive.  I en konsern ki bokou dimoun pe poz kestyon lo la e alor definitivman mon ti a kontan ganny en pe leklersisman.  Mon ti ava kontan ki Minis par egzanp i dir avek nou, akoz ki Gouvernman pa mazin etablir en Fon anba Public Finances Act?  Kot bann, premyerman i ava legal, i ava annan bann Regilasyon kler ; i ava ganny odite byen menm e ki tou keksoz i ava kapab above board.  E atraver sa definitivman mon pe mazin osi FPAC konman sa Komite dan Lasanble Nasyonal ki annan sa responsabilite pou li regard tou bann kont odite e demann kestyon, alor sa i mon premye kestyon.

Mon 2enm kestyon Mr Speaker, Mr Chairman sa parol ki poudir pou asir tou saler i en parol ki fatigan e la mon anvi anmenn Minis lo sa ki i ti dir nou lannen pase.  Kot Minis ti dir avek nou ki 1o 10poursan lakonpannyen pe kontribye 97poursan taks biznes taks.  E ki 30 lakonpannyen ki pey 80poursan total biznes taks dan nou pei.  An plis ki sa Minis ti dir avek nou ki 77poursan bann lakonpannyen ki pe fer wholesale ek retail pa’n pey okenn taks biznes, akoz zot in deklare ki zot pa’n fer profi.  Sa i lenformasyon ki Minis ti donn nou.  Alor eski Minis i krwar ki vreman Gouvernman i devret asir lapey tou bann biznes dan, dan sekter prive?  Oubyen eski i devret annan en triyaz?  Vi ki sa lenformasyon ki mon fek lir i montre ki, e mon parey nou tou nou konnen mwan, mon pa krwar ki tou sa bann lakonpannyen ki’n deklare ki poudir zot pa’n pey okenn taks, zot in fer fait, zot pa’n fer profi ki sa i la realite.

Zot in fer me selman zot pa’n peye.  E vi ki la ozordi zot avek COVID kekfwa tousala i bann led ki i bann, i bann laverite ki sorti.  Vi ki sa bann dimoun zot pa’n fer okenn profi akoz zot biznes pann marse.  Eski alors aprezan Gouvernman pe dir ki menm sa bann lakonpannyen, parske zot annan tou bann detay sa bann lakonpannyen.  Menm sa bann lakonpannyen pou ganny asiste avek larzan ki zot, zot pa’n kontribye dan Fon, dan lakes Leta?

Eski Minis i kapab dir avek nou dan sa led parske i pa tro kler, eski bann dimoun ki self-employed ki’n ganny afekte oubyen ki pe ganny afekte, spesyalman bann dimoun ki travay dan biznes touris.  Parey non’n koze bomaten taxi, omnibus e bokou bann lezot pti biznes ki, ki menm si zot pa direkteman involve avek touris me i annan en lefe, i annan en, en cascading effect letan en landrwa i ganny afekte.  Akoz par egzanp la nou kapab mazin bokou bann lezot biznes.  La nou pe koz lo lanterman ki mannyer i ete, si en dimoun i annan biznes fler i pou ganny afekte.

E nou’n war Langleter par egzanp mothering Sunday Dimans, Dimans ki’n fek pase, en lokazyon kot tou bann florist Langleter i vann plis fler, zot in dan problenm e, e Sesel i pan en leksepsyon. E byensir i annan bann lezot, bann lezot pti biznes tou.  Ki mannyer eski Gouvernman pe mazinen pou asiste zot?  Me lo en lot nivo osi tou, eski Gouvernman pe mazin asiste biznes direkteman?  Par egzanp lo kote, pa demann pou donn zot larzan akoz zot biznes lotel in fermen.

Mon konnen ki poudir Labank, Labank in deza prezant en keksoz an relasyon avek loan se tou.  Me pou delo, elektrisite, parske menm letan zot dan sa moman close down parey bokou lotel pe, pe antre ladan i pou still bezwen serten, zot pou still annan depans elektrisite, zot pou still annan depans delo.  Parske zot bezwen mentenir sa bann, sa bann lenstitisyon dan en leta  ki plitar zot pou kapab repran.

E  mon dernyen kestyon dan sa relasyon i konsern bann gran lotel.  E mon, mon enn mon konsern ki Minis ava pou ankor enn fwa eksplike, se an relasyon spesyalman ek bann gran lotel.  Ki tanzantan nou koz lo transfer pricing, nou koz lo larzan ki zot sipoze gannyen ki pa antre e in ganny estimen ki sa sonm i kapab ant 500 ale ziska $800milyon ki pa antre dan nou lekonomi me ki sa bann gran lotel, sa bann larzan i reste laba deor li.

E pa bliye osi ki poudir tou sa bann gran lotel zot profi i pa reste Sesel me i ganny konverti an Dolar pou anvoy kot zot bann owners, pou anvoy kot bann, kot tousala.  Eski Minis pe dir avek nou ki la ozordi nou, Sesel Gouvernman Sesel, Sesel oubyen Seselwa apre ki sa bann gran lakonpannyen in fer tou sa bann profi dan lepase nou ki pou, dan nou napa, en rezerv 4 mwan –  eski nou ti pou al plonz dan nou rezerv pou nou, pou nou pey sa bann det?  Nou ti ava kontan ganny enpe leklersisman silvouple.  Mersi bokou.

 

MR SPEAKER

Mersi Onorab Ramkalawan.  Minister.

 

MINISTER MAURICE LOUSTAU- LALANNE

Mersi Mr Speaker.  Mersi Mr Onorab pou ou bann kestyon.  Onorab an sa i konsern premye kestyon tou lapey, larepons se wi, lapey Seselwa e lapey etranze.  E parey mon’n dir dan mon prezantasyon lide deryer sa se nou oule ki sa bann biznes pandan sa premye 3 mwan ki zot kontinyen fonksyonnen.

Pou letan nou sorti dan sa kriz zot in pare pou zot fer biznes.  Se koumsa ki nou, nou war li.  Me Gouvernman nou pa la pou nou micro manage bann biznes prive, akoz la nou pe koz sekter prive.

Nou pou donn zot en lasistans e nou deside pey sa lasistans ziska R45,485mil saler.  Ziska anba kot lo minimum wage i annan whatever it is.  Me kot i pou konsern Sekter Tourizm avek tou son bann servis ki lye avek.  I annan ki argye i dir ou ki tou biznes i relye ek Tourizm, me i vre an menm tan i pa vre.  Me selman tou sa bann biznes ki relye Tourizm i pou ganny enpakte an premye.  Mon pou servi en mo kekfwa mon pou regrete, me nou pou regrete me nou pou donn li priyorite.  Lezot biznes zot, zot osi avek lanons Prezidan Larepiblik zot pou ganny asiste, me zot pou ganny asiste si oule dan en 2enm faz.

Apre sa lanons nou’n bezwen asize e regarde ki mannyer nou pou fasilit travay ki nou bezwen fer pou nou donn sa saler o mwan Avril.  Alor nou’n pran en desizyon ki nou pou kree en biro dan Minister Finans, en biro Praslin, en biro La Digue kot pou annan zofisye apartir lendi prosen ladan ki pou nobou gid bann businessmen oubyen bann dimoun ki mannyer zot pou fer zot laplikasyon.  Pa akoz nou’n dir nou pou donn tou saler zis nou pe al donn saler.  Non.

I annan en prosedir ki ou bezwen pas ladan.  Be kisisa sa prosedir?  Nou ankor pe travay lo la e parey ou konnen mon Deputy Minister li ki tyermenn sa Komite Ekonomik.  O Komite Ekonomik ki Prezidan in met an  plas pou fer sa travay.

Biznes ki annan en license, biznes ki pey son taks, biznes ki annan en kont labank, zot pou bezwen soumet avek nou zot payroll par egzanp pou mwan de Fevriye oubyen mwan Mars.  Zot pou bezwen donn nou zot payroll pou mwan Avril, akoz nou pe al pey zot Avril nou bezwen regarde.  Akoz parey ou pe fer in France nou osi nou pa oule ki akoz COVID-19 biznes ki avan COVID-19 in fait ou pe al fait nou, nou pe al donn li 3 mwan saler.  Akoz pou annan tou sa bann keksoz ki nou bezwen regarde.  Se pou kwa nou demann zot soumet.  Alors zot bezwen pas atraver sa prosedir pou nou donn sa lasistans kot i merite.  Donk vwala si oule son rasyonal dan lesans ki nou donn li son saler, li sa endividyel i annan en lakaz, i annan en fanmir, i annan en loan, i annan en personal loan, i annan en housing loan, i annan plizyer keksoz ki i bezwen peye li osi.

Me nou, nou donn li sa konfor pandan sa 3 mwan ki i pa bezwen fatig son latet.  E nou demann son anplwaye fer li reste dan travay.  Retrain li si ou kapab.  Koumsa i pare letan nou relanse pou li siport sa lendistri pou nou demare.

An sa ki konsern en Fon pou le moman i pa egziste me nou kapab fer sa bann donasyon, sa bann kontribisyon dan Consolidated Fund e nou osi annan parey ou konnen sa Disaster Fund ki li i egziste, i annan en larzan ladan deza.  E annefe mon pe tir en larzan dan sa Fon pou nou aste en masin pou teste sa PCR pou teste sa viris e nou’n fini plas komann.  Donk i en Fon ki pe deza fonksyonnen.

So nou, nou ava regarde si fodre nou fer en lot Fon oubyen non, me selman i annan mekanizm ozordi pou antre ladan.  Alor sa bann konpannyen ki, atraver sa prosedir ki zot pou bezwen vin apply nou pou konnen leta sa bann konpannyen.  Sa ki mon anvi dir.  Si i annan en biznes i napa en license, i dan informal sector, i pa pe pey taks, i pa pe pey nanryen, i pou difisil pou nou servi sa mekanizm pou nou pey li son saler.

Me nou donn li en lot rekour, nou dir li al kot Lasistans Sosyal oubyen al kot URSSo i annan en opsyon pou li fer, pou li servi.  Bon self-employed, ou’n koz lo taxi.  Madanm, Onorab Letourdie in koz lo artis eksetera.  Wi zot relye avek Tourizm, la ankor mon met, mon le met lanfaz se ki sa mizisyen, sa Artis ki annan en Kontra avek en lotel.  I vini i zwe de fwa par semenn, li nou pou kouver li, akoz i legal li i annan Kontra avek en lotel nou konnen i pe travay ek sa lotel.  Alor ki i pou ganny son, son lasistans.  Me enn ki napa, i pou difisil pou nou met li anba sa premye kriter. So, nou donn li sa lot opsyon.  So fotespere.  Bon taxi menm zafer, ou war taxi, i annan taxi annefe bann taxi ozordi zot travay zis ek touris.

Mon pa krwar ki i annan bokou taxi ki anmenn Seselwa eksepte bann pirat.  So, nou pou bezwen koz avek en 10enn, en 15enn, en 20enn taxi operators ki travay ek touris, pou regarde avek zot, akoz zot, zot pey en flat taks.  Pou regarde avek zot kwa ki zot saler.  Akoz nou pe koz saler la.  En enn fwa ki nou’n etablir sa saler zot osi zot ava ganny zot saler pou siport zot, akoz zot pe travay ek touris.

So ou war nou, nou pa le antre dan sa bann detay pou nou vin micro manage.  Nou napa letan pou nou micro manage, nou bezwen zis set sa bann lareg e, sa pou travay Mr Payet avek son Komite.  Manm Komite ki reprezant tou biznes.  I annan Chairman SCCI ki lo la, ki reprezant tou biznes.  I annan SRC ki en lenstitisyon Gouvernman ki enportan.  I annan Fon Pansyon ki li osi i en lenstitisyon enportan kot nou annan lenformasyon.  Me  i peye son pansyon?  Si i kontribye son pansyon, nou pou war e kontribisyon en pansyon i lieu avek ou saler, dan en serten fason.  So nou pou konnen, nou pa pou estimen.  Si li i dir nou 10mil letan nou, nou fer nou verifikasyon nou war i 15mil.

Nou pou donn li 15mil.  E nou pe demann zot vin onnet ek nou.  Be si i met 15mil apre nou, nou war i ti’n kontribye lavaler 10mil.  Nou bezwen annan en diskisyon pou nou tir en laliny.  So i en travay fen ki nou pou bezwen fer.  I pou pran letan, me wi nou pe asiste tou, depi minimum wage ziska R45,485mil saler.  Parey dan Tourizm ou konnen zot ganny service charge zot ganny enn de lezot allowance.  Sa pou bezwen tonbe akoz i pa antre dan sa kalkilasyon.

Mon’n koz lo lofis, ok wi.  Elektrisite ek delo wi sertennman la osi Prezidan in anonse kot nou le fer en rediksyon lo kou elektrisite avek bann biznes.  Akoz nou konpran, parey ou’n eksplike i egzakteman sa e nou ava regarde.  I annan de fason nou kapab regarde.  E sa, sa Komite i ava, i ava antre dan son detay ki mannyer nou pou asiste.  Nou kapab zis donn en sibvansyon PUC pou sa lekivalan oubyen nou donn en base tan sou par kilo water e nou pas li straight on.  Me sa nou pa ankor deside egzakteman son mekanizm ki mannyer nou pou fer sa.

Alor ou dernyen pwen large hotels 500, $800milyon aletranze eksetera.  Sa en tre bon pwen Mr Onorab.  E napa zis gran lotel, ki gard zot larzan deor i annan en kantite endividi osi ki fer menm zafer.  E mwan, mon ti a demann en mon ti a fer en lapel, la se le moman pou montre zot annan zot pei aker.  Akoz vre deviz pa pou antre bokou.  I pou antre en pe, pa bokou me nou pou depans davantaz deviz.

Donk si ou annan fer onnet fer antre.  E nou pou bezwen ariv, sa COVID-19 la i pou donn nou en sans fer en kantite keksoz.  Konnen bann ki onnet, bann ki pa tro onnet, e fer sir tou dimoun i vin onnet avek sa sistenm ki nou pe al met an plas.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mr Chairman,  mon konpran en pe sa ki Minis pe dir an menm tan osi mon pa konpran serten keksoz ki i pe dir.  E mon krwar ki nou bezwen ganny li kler.  War sa, par egzanp sa National Disaster Relief Fund.  Mon vreman krwar ki Gouvernman ti fer li byen parske i ti vin anba en S.IS.I 7 of 2013 kot ti met tou son bann keksoz kler.

Son Board, ki mannyer i pou ganny etabli, the objects of the Fund, e ofet mon demann mwan si sa pwen ki ou’n dir la ki nou pe al tir en keksoz dan sa Fon pou COVID -19 si vreman ou kapab fer li.  Parske mon krwar konmsi ou pe glis an deor the objects of the Fund e ki nou kapab pe bite.  E se pou sa rezon ki, ki nou’n propoze ki nou fer li byen.  Parske pou ou fer sa bann larzan ensidswit i bezwen ganny tire anba en Lalwa, pou ou pey nenport dimoun.  Ok.  It’s not akoz ou’n pas en, en Bidze e ki aprezan zis ou, ou pey tou dimoun.  Ki konmsi pou nou ganny li byen ki i annord e kot wi nou tou nou realize ki poudir maler in tape e alor lefe ki maler in tape nou, nou still reste anba nou bann Regilasyon finansyel.

Se pou sa rezon ki mon ti ava Mr Chairman demann Minis pou, pou rekonsider sa pwen an relasyon ek Bidze me pou nou al byen  ki i byen ganny etabli e, parske menm i mete accounts ki mannyer pou ganny retenir e, e apre sa ki mannyer i pou ganny odite tousala.

So sa ki mon pe, sa ki mon ti ava ankouraz Minis se e byensir SS Payet nou napa okenn dout dan son abilite.  Se pou nou fer li byen.  Pou ki nou pa, nou pa demen tande ki poudir ‘’ar mon pa ti gannyen, lot ti gannyen akoz li i ti annan kontak’’ ensidswit, lezot, lezot dezord.  Pou nou fer li byen e nou kapab, nou kapab balans li dan en fason korek.

Me zisteman Mr Chairman Minis in mansyonnen ki, e boner mon osi tou bomaten mon’n dir ki letan nou dan maler nou sipoze koste.  E be zisteman akoz nou bezwen koste ansanm ki nou espekte ki an menm tan osi serten i plonz dan son rezerv.  Parske letan ou pe regard bann fanmir, fanmir i kapab annan manman papa la e en kou angran i ariv, i ariv en problenm ek papa e sa lapey ki papa       ti pe gannyen i fini lanmenm.  Ni son pansyon nou pa kapab touse e aprezan fanmir i konmans plonz en pe dan rezerv, si zot annan en pti bout later zot dir be get sa annou vann sa bout later ensidswit.

Me la e se sa pwen kontansyon ki mon pou dir kot bann ki annan bokou larzan se la kot dimoun letan pe tande pou al pey bann lapey.  Ok en pti lankourazman letan pe dir pou cap li R45mil.  Parske i annan serten bann gran lakonpannyen kot dimoun pe ganny R100mil.  Lot pe ganny sepa konbyen.  Ki mesaz ki Gouvernman pou anvoye pou sa bann gran lakonpannyen, gran lotel ensidswit?  Parske nou koz lo nou lekonomi.

E si nou dir nou lekonomi ziska aprezan in en lekonomi ki for ensidswit.  Savedir i annan dimoun ki’n fer zoli larzan lo akoz Sesel.  Konmsi mon pe rode kwa ki Gouvernman pe fer pou li ankouraz spesyalman bann lakonpannyen etranze, poudir avek zot be plonz en pe dan zot pos akoz probableman, zot rezerv i plis ki rezerv Sesel.  E alor nou konmsi dan nou napa nou premye pou vini pou ofer?  Ou sezi mwan Minis mon pa, se lo sa pwen la ki mon krwar ti a bon nou, nou fer keksoz kler e apre sa nou balanse.

E en pe parey ki ozordi, parske COVID i annan son kote pozitiv.  Lasin zot dir zot pe konmans pre pou zot war zetwal dan kapital.  Itali dan larivyer i konmans annan pwason.  I annan bann keksoz pozitiv kot later li menm li an menm tan i pe renouvle son lekor.  Be lo kote finansyel osi tou si sa i ed nou pou nou fer serten analiz enpe kler pou nou balanse, annou osi fer sa pou ki letan COVID i fini nou sityasyon finansyel i ava osi pli, pli kler.

Mon krwar ou konpran mwan ki mon pe dir.  E byensir nou konnen ki poudir sa deba pou vini osi tou ler nou pe fer Bidze.  Me mwan, mon ti ava propoze ki etabli sa Fon pou ki letan mou pe diskit Bidze sa i ava’n, i ava eklersi avan.  Mersi.

 

MR SPEAKER

Mersi Onorab.  Minis

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab parey mon’n dir ou wi nou kapab, nou kapab etabli en Fon spesifik.  Parey ou’n fer referans sa Fon Dezas ki nou’n met la ti vini apre Felleng war e larzan ti antre ladan e i annan en Board parey ou dir, i annan sekter prive lo la, i ganny odite eksetera, eksetera.  Letan nou ganny en pe larzan nou remet ladan nou, nou servi.

So, in etabli pou en purpose ou annan rezon.  So sennla kekfwa nou ava konsidere  ki other purpose.  Me rest assured mon pe donn ou tou mon, mon langazman i pou reste transparan sa.  I pou ganny odite tou bann prensip finansyel ki we stand for i pou dan sa zafer.

An sa ki konsern bann gro konpannyen parey mon’n dir ou mon, mon preferans se pou asiste Sekter Tourizm ek son bann servis relye.  Akoz se la ki problenm i ete.  E problenm i grav la.  Lezot parey ou’n dir letan zot pou soumet zot cashflow, akoz la nou dir nou pou get tou.  Letan zot pou soumet zot cashflow nou a war.  Letan zot pou soumet zot payroll Fevriye, letan i pou met son Mars, i pou met son Avril, si i pe zwe nou pou war.  E i pou bezwen li osi met lanmen dan son pos, akoz nou pa kapab donn larzan ki nou napa.  E parey ou’n servi sa, sa legzanp fanmir be nou osi nou dan sa sityasyon ozordi.  Parey ou konnen pandan 12an e Onorab Afif i konn sa byen li,  pandan 12an nou’n trimouse pou nou anmenn larises Sesel.

E zanmen Gouvernman in pret larzan avek Labank Santral.  Zanmen! E ou konn tre byen nou mete en provizyon dan Bidze R100milyon pou nou al pret ek Labank Santral o ka ou.  Be zanmen nou’n, in neseser pou nou fer sa.  Ziska ozordi nou pa’n pret en sou.  Nou’n nobou fer travay lekonomi, dimoun in ganny plis larzan.  Dimoun in ganny bokou profi, in met bokou larzan deor.  Me an menm tan zot in benefisye parey ou dir.  E ozordi nou war nou dan en sityasyon kot nou bezwen al lanprent larzan avek Labank Santral.  Nou bezwen antre dan nou rezerv pou la premyer fwa dan 12an.

Be nou realize nou annan en, en sityasyon ase grav.  So, nou pe mesaz mon pe anvoye atraver ou kestyon se zot osi zot bezwen fer zot bout.  Me sa nou pou arive lo la letan nou pou konmans travay konpannyen par konpannyen.  Mersi Mr Speaker.

 

MR SPEAKER

Mersi Minis.  Onorab Afif.

 

HON AHMED AFIF

Mersi Mr Chairman.  Mr Chairman mon, mon ti a kontan demann Minis kestyon lo sekter monneter an partikilye.  Vi ki sa bann sa ki pe arive ozordi.  Mon ti a kontan demann Minis, ki mezir ki zot pe anvizaze pou asir stabilite pri dolar?

E rezon mon pe dir sa se vi ki Minis in dir i pe espekte en bes ziska 64poursan dan nonm dimoun, viziter ki pe vini e mon pe pran the balance of payments IMF zilyet 2019, $627milyon.  Sa i preski 2 tyer, so nou pe koz apepre $400milyon shortage dan lekonomi.

I en sif  ki efreyan me selman mon pran rekonfor dan lefe ki malgre ki sa reset i a tonbe pa tou ki neseserman nou pe perdi parske, en bon bout ladan i al pou pey keksoz ki nou aste pou sa bann touris e nou pa pou bezwen peye.  Nou pa pou bezwen pey manze, nou pa bezwen pey zenerater pou zot, eksetera.  Me selman i pou annan en bon bout ki zot profi, ki lakonpannyen i fer.  Mon pa konnen konbyen i ete, si $80milyon ladan posibleman.  Ki benefis ki Seselwa, travayer, taks, VAT, tousala i ladan ki pa pe al antre?  Dizon i $100milyon, $100milyon mank dan lekonomi Sesel klerman i pou fer monte pri Dolar, san dout.  Mon pa konnen si i pou ariv R17/R18.

Me nou pa anvi i arive.  Mon kestyon, ki mezir monneter zot pe fer?  Ki negosyasyon i annan ant Gouvernman Sesel, Labank Santral ek bann lenstitisyon finansyel pou asire ki, akoz nou konnen demann pou toultan la, zot pe vers posibleman $100milyon a en pri ki zot satisfe, ki borde i pou revann sa Labank pa pe al profit ladan e pri pou reste stab.  E ki dan sa fason nou gard lenflasyon ba dan en moman difisil?  Alor sa i mon premye kestyon, mon ti annan en 2enm kestyon me mon a les reponn sa enn la premye.  Ankor lo sekter monneter.  Mersi Mr Chairman.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Mr Speaker avek ou permisyon mon ti osi kontan ki Mr Payet  i vin apre mon lo sa larepons.  Wi mon krwar nou, nou konvenki ki Dolar pou depresye, se kler.  Ok Roupi pou depresye me sa ki pou arive ki nou osi konsyan se ki sa saler ki nou pe donn sirtou bann etranze dan sa moman difisil akoz nou le ki sa, sa lekonomi i kontinyen marse, i circular sa.

Akoz i pey son PIT konmsi ou menm ou’n fer referans eksetera.  Be i pou pran en pe sa larzan i pou anvoy deor an deviz e sa osi pa pe ed nou.

Nou napa ki pe antre.  Nou pe donn li e an menn tan, i pe tire i pe al avek.  Donk se akoz sa mon dir ou plizoumwen serten ki i pou annan sa devalyasyon.  E nou konsyan e, mezir ki nou pou pran nou a bezwen regarde letan nou komanse konbyen sa quantum i ete.

Nou annan IMF ki pare pou ed nou avek $15milyon.  Nou annan ADB ki kapab ed nou ek en BOP $9milyon.  Nou annan osi Labank Mondyal ki kapab ed nou anba en progranm CAT DDO zot apel sa en Catastrophe disbursement $7milyon e, i annan an pti fasilite kot i annan en lentere lo la pou $2.5milyon.  Donk sa i bann sif avek bann lorganizasyon finansyel kot nou kapab ganny lasistans an dolar.  Avek sa Mr Speaker mon ava demann Mr Payet pou konplet mon larepons.  Mersi

 

MR SPEAKER

Mersi Minis.  SS.

 

SS PATRICK PAYET

Mersi Mr Chair.  E bonn apre midi tou Manm Onorab e tou dimoun a lekout.  Mr Chair letan nou’n get en pe krwasans ki nou’n diskite avek IMF e osi avek Labank Santral.

Nou’n war ki menm si dan sekter Tourizm definitivman pou annan en negative growth ki almost 50poursan baze lo tou sa bann sekter,  nou’n war ki i annan sekter ki nou pou war amelyorasyon.  Par egzanp en sekter ki letan nou’n fer assessment ki dan Bidze nou ti’n target manufacturing of food 4poursan, me selman letan nou’n war demann e diskisyon par egzanp ki nou’n gannyen avek IOT demann in ogmante for production of tin can tuna.  E nou espekte i, i pou annan en positive growth ki almost 14poursan letan nou’n fer nou estimasyon.

Dan sekter Lagrikiltir osi nou’n war vi ki pou annan plis demann dan plis locally produce.  Lagrikiltir nou’n revwar son growth sorti 2poursan pou ariv 6.  Dan Fishing osi e dan Health and Social Work activitiesSo i menm si i annan en pe negative growth dan en serten sekter nou’n war en pe pozitiv ki nou estimate osi kekfwa i pou ed en pe balance of payment sirtou dan enportasyon.  Apre osi en eleman pozitiv ki nou’n war avek karbiran, ki son pri in desann.  So, sa osi pou ed en pe market menm si demann dan aviation fuel i pou desann.

Me parey Minis in dir ki nou pe diskite apre midi nou annan en conference call avek IMF avek Labank Santral pou war en pe, finaliz en pe balance of payment.  Pou nou war sa actual figure ki nou kapab diskit avek zot for budget support.

So letan nou’n asses enpe bann budget support facility avek African Development Bank, World Bank avek IMF nou’n war en total apepre $80milyon ki nou kapab ed balance of payment.  Me nou ankor pe diskite pou nou war the real figure ki nou kapab ede dan tou son totalite.

 

MR SPEAKER

Mersi SS.  Onorab Afif.

 

HON AHMED AFIF

Mersi Mr Chair.  Mr Chair mon ti a kontan zis en, en pti remark an pasan mon pa konnen e petet SS i kapab konfirmen.  Si i annan en 14poursan growth dan IOT ki i vedir pou Sesel an Dolar?  Milyon Dolar nou pe konnen poudir nou pe kapab ganny lasistans 33.5 avek sa bann lenstitisyon ki Minis in mansyonnen.

Me ki i vedir 14poursan growth dan IOT?  Akoz mon krwar zot pey apepre 5, $6milyon avek Gouvernman dan en lannen.  Si zot annan growth ki kantite i pou ete?  Me mon lot kestyon ki mon ti le demande.  Se lo sekter monneter vi ki Gouvernman son taks VAT avek touris ki sibstansyel R1bilyon Sesel.  I pe al tonbe par lanmwatye i en, i en pert R500milyon lanmenm.  E bann lezot taks ki zot in dir zot pe al perdi se Business Tax, Tourism Marketing Tax, CSR apre Business Tax, Income Tax, Business Tax, CSR, TMT. 

Si mon get Bidze 2019 e mon get 4 mwan ladan mon estim zis sa apepre R880milyon.  An plis 500milyon an plis lot Tourizm.  Zis lo Tourizm, pou annan lezot VAT ankor ki pou perdi. Lanmenm la nou pe ganny nou R1.3bilyon ki zot pou short dan zot Bidze.  Mon konnen zot pou al prete sa larzan e zot pou al kot bann Labank Komersyal.  T Bills atraver Labank Santral Minis in dir i pa le al kont lo sa R100milyon avek Central Bank e mon, mon dakor avek li, akoz ou pa pe pret ek Labank Santral nou demann Labank Santral pou al pret larzan lo ou lapar.

Ki mekanizm zot pou met an plas vi ki nou pe al pret sa kantite larzan?  Ki Minis i kapab asir nou ki Labank pa pou profite dan en letan difisil pou kapitaliz lo lafebles Gouvernman, pou li prezan fer larzan lo pep Seselwa?  Atraver sa pret ki Gouvernman pou fer avek li.  Ki negosyasyon ki zot annan pou kapab redwir sa bann kou lentere?  Mersi Mr Chairman.

 

MR SPEAKER

Mersi Onorab.  SS.

 

SS PATRICK PAYET

Mersi Mr Chair.  Mr Chair mon konnen nou pe prezant Bidze le 31 me selman bann estimate ki nou’n fer se anviron apepre 1.7, dan nou worse case scenario ki nou’n fer anviron 1.7bilyon lo tax revenue nou pou perdi.  So definitivman nou pe target en balans primer 2.5 me sa i pou redwir significantSo nou pou al dan deficit pou sa lannen baze lo sa loss e sa bann additional expenditure.  Nou an se moman pe negosye the financing structure e nou pe diskit avek Labank Santral pou nou Labank Komersyal baze lo additional T Bills ki nou pe pran.

So baze lo, lo nou estimate lafen 2019 nou debt-to-GDP ratio ti apepre 59poursan GDP e nou estime avek tou sa bann konponan financing, nouvo financing sa i pou monte pou apepre, apepre 72poursan so significantlySo definitivman nou pou bezwen antre dan negosyasyon avek Labank Santral me an menm tan avek Labank Komersyal pou fer sir ki baze lo sa nouvo Monetary Policy rate ki’n fek sorti yesterday, ki Labank Santral in anonse, nou pa anvizaze war significant increase dan T Bills ouswa dan bann Bonds ki nou pe al pran.

Me an menm tan nou pou pran definitivman additional loan avek budget support pou ed en pe balance of payment.  Me aktyelman la nou pe finaliz en pe the financing, me letan nou vini mardi kekfwa nou a kapab donn zot en pli bon lendikasyon dan striktir ki nou’n finalize avek Labank Santral.  Mersi.

 

MR SPEAKER

Mersi SS.  Minis.

 

MINISTER MAURICE LOUSTAU-LALANNE

Mersi Mr Speaker.  Zis pou azoute ki sa debt-to-GDP ratio pou 2021 nou ti dir 50poursan be li i mor.  Nou pa pou zanmen kapab ariv lo la at least for the forseeable future.  E nou best estimate ozordi ek sa Bidze ki nou pou anmennen ki ankor pe dan draft la.  I pou 60poursan an 2025.  So nou pou bezwen al re negosye al sanz bann (ki mannyer ou apel sa) bann kriter, pa kriter en, bann paramet ki nou ti’n agree avek IMF.  E sa osi nou an diskisyon pou le moman avek zot.  Mersi Mr Speaker.

 

MR SPEAKER

Mersi Minis.  Onorab Egbert Aglae.

 

HON EGBERT AGLAE

Mersi Mr Chair.  Bonn apre midi Minis ek ou depite.  Mon premye kestyon, Minis ou’n fer resorti ki dan sa stimulus package la, bann travayer etranze osi pe feature ladan.  Me i annan konponan ki en pe konsernen ladan se, anvi ki sa bann travayer e nou pe war poudir pou annan rediksyon, ou menm ou ou’n dir dan lakantite foreign exchange earning ki nou annan.  Eski sa bann travayer pou pe kontinyen atraver sa saler ki zot pe gannyen pou anvoy larzan osi kot zot fanmir deor?

Dan sa 22,000mil travayer etranze ki nou ki deza annan egziste.  Mon 2enm kestyon, eski Minister Finans pe mazin pran serten mezir adisyonnel kot i konsern lenportasyon?  Lenportasyon serten bann komodite goods ki nou kapab klasifye konman bann non-essential ouswa bann luxury item a lavenir?  E dernyen kestyon ki mon, mon ti a kontan demande.  Anvi ki zot pe fer bann, bann revi finansyel, e ou’n koz en pti gin lo la atraver kestyon Onorab Afif.

Petet si ou ti kapab donn nou petet en forecast kour term, medium term e, e si keksoz i al pli worse zot pou bezwen vin ek en, en forecast long term?  Lo kantite pert an term foreign exchange, ki nou pou kapab pe fer.  E an menm tan lo kote Roupi Sesel pou, pou evite ki nou annan sa de balansman ouswa bann lenflasyon ki kapab zis monte en sel kou?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mon a pran premye kestyon apre mon a pas laparol a Mr Payet.  Ou konnen Onorab depi en bon pe letan Sesel nou napa okenn restriksyon lo foreign exchange.  E sa i en, en komannman IMF si oule.  Alor pou nou sey met en restriksyon, nou pou bezwen tourn kot li, demann li permisyon pou regarde si nou kapab met li pou en peryod kourt.

Kekfwa pou en peryod detrwa mwan.  Nou pa ankor abord sa kestyon, nou pa oule abord sa kestyon.  I en kestyon stratezik pou le moman.  Me ou’n poz en kestyon sel fason ki nou pou nobou anpese ki sa deviz etranzer nek i sorti i ale parey pe arive ozordi.  Akoz ozordi marse i lib.

Se fer li koumsa nou pou bezwen poz sa kestyon regarde.  E mon pa konnen si apre midi sa kestyon pou ganny poze.  Me se sel fason nou pou nobou regarde ki mannyer nou kapab kontrol sa depar foreign exchange.  Mersi Mr Speaker.

 

MR SPEAKER

Mersi Minis.  SS Payet.

 

SS PATRICK PAYET

Mersi Mr Chair.  Mersi Onorab.  Dan balance of payment ki nou annan la ki aktyelman nou pe diskite avek IMF se zis pou donn en legzanp lo tourism earning.  An lannen 2019 nou ti pou, zis dan tourism nou ti kolekte nou apepre $590milyon.

Estimasyon letan nou ti pe finaliz, letan nou pe finaliz 2019.  Me estimasyon avek lekonomi aktyel e estimate ki nou pe fer se sa pou redwir pou ariv $311milyon pou sa lannen so i montre ou sa shift from 590 dan tourism earning pou ariv 311.  Me however dan nou estimasyon osi nou war baze avek ki i pou bounce back 2021 me, selman pa pou alaoter parey ti ete 2019 e nou estimasyon se pou 2021 apepre $398milyon.

E gradyelman increase kekfwa i pou ariv sa oter ki nou, ki nou ti annan 2019 dan 2024 koumsa baze en pe lo bann mwayen term letan nou fer estimasyon.  Me sa i ankor work in  progress nou pa nkor finalize, nou ankor pe diskite avek Labank Santral e apre IMF osi.  Mersi.

 

MR SPEAKER

Mersi SS.  Minister.

 

MINISTER MAURICE LOUSTAU-LALANNE

Wi mersi Mr Speaker.  Nou pou, nou ok pou partaz en pe sif avek zot me i pa bann sif definitif ankor – ou konpran?  So sa stimulus package ou pe koz lo la.

Letan nou’n kalkil li premye kou i ariv apepre zis anba R900milyon e dan Bidze Gouvernman in fer zefor nou’n nobou freeze pou apepre 344milyon.

En so sa i se de sif mon krwar i en pe relye avek kestyon ki ou’n poze me pa pran li konman laverite, laverite dir en, i zis en bann sif.  Akoz toulezour keksoz i sanze en?  Mersi Mr Speaker.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi, mersi Mr Chair.  Mr Chair nou konpran ki Gouvernman pe sey ranplas sa, sa income from touris an servan sa package pou met li lo wages e fer ki lekonomi i kontinyen vire.  Esansyelman then i pou still i pou en bes konsiderab.  Prenan kont ki Gouvernman pe fer sa e, e ki nou pe dir nou pe garanti saler bann dimoun ki dan sekter prive up to a certain extent parey ou’n donn bann lesplikasyon?

Eski par egzanp bann Kontra Gouvernman ki bann antite oubyen bann endividi ki bann biznes i annan ek Gouvernman, vi ki zot deza annan sa Kontra nou pa pe, nou pa pe espekte ki bann dimoun ki annan sa Kontra e ki zot annan bann salarye ki ganny peye atraver income from sa Kontra zot osi pe vin devan.  So eski bann kontra gouvernman pou osi kontinyen dan lamazorite ka?  Oubyen eski nou pou war en bes dan lakantite bann Kontra oubyen bann proze ki bann diferan lakonpannyen i sipoze annan sirtou avek, avek Gouvernman?  Si ou ti kapab reponn sa, sa premye kestyon pou mon?

Mon, mon 2enm kestyon ki mon annan i konsern sirtou par egzanp ler nou pe koz bann konpannyen konstriksyon.  E ki annan en kantite travayer etranze osi ki zot, zot servi.  Nou konnen ki pei i kapab pran desizyon nou pa konnen ki mannyer sityasyon i evolye.  Kot nou pou bezwen sa bann konpannyen etranze pou fer serten swa travay, swa kontinyen ek bann proze.  Me nou osi realize ki sa bann konpannyen mannyer zot cashflow i ete i pa deswit la ki zot ti al ganny peye zot.

Zot ti pe al ganny peye petet an Zen, so zot ti pou still annan larzan pou zot pey zot bann travayer ki la.  Eski sa osi i bann konsiderasyon ki zot pe pran pou asire ki dan sirkonstans kot bann lakonpannyen ti pou COVID pa COVID kapab pey zot, zot travayer.

Sa bann konpannyen i still pey zot bann travayer e la kot ler keksoz i vin pli difisil la ki Gouvernman i ava, i ava pe antre pou li, pou li step-in so, to speak.  Si ou ti kapab klarifye sa de pti pwen.  En dernyen pti kestyon apre Mr Speaker.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Wi mon pou servi en legzanp.  Ou war parey i annan en Kontrakter ki pe konstri sa nouvo lotel Ste Anne pou Club Méditerranée i annan plis ki en milye travayer lo sa sit.  I annan en deadline pou fini sa lotel an Septanm.  E lotel pou pran konmans loperasyon an o

Oktob.  I annan 2 swa ;- enn ou fer li fini sa lotel.  Setadir letan nou recover i annan en, en lotel ki nouvo nef la ready for business.

Oubyen, ou dir non, postpone.   Ou war? Mon donn sa legzanp akoz mon krwar son, son larepons i senp.  Kot in arive la ou bezwen siport sa konpannyen pou fini sa lotel.  Me ou annan osi rezon ki en konpannyen koumsa i annan ase mendev i annan ase larzan pou li kapab kontinyen sa san ki nou ed li.  Me fodre ki nou annan sa diskisyon an priori.  E sa diskisyon nou pou gannyen letan i vin fer son laplikasyon dan Biro Finans Lendi, oubyen Mardi, oubyen Merkredi, mon pa konnen kan i pou vini e nou ava regard dan son detay.  Akoz i bezwen soumet serten dokiman ki pou permet nou get dan son, get dan son zafer.

E prezan i lib pou li deside ki i le fer, ou konpran?  Si i deside, sa ki ou pa oule ki i fer, nou pa oule ki i gard etranze e i fer Seselwa ale.  Sa nou pa oule.  Donk e, e se akoz sa ki nou bezwen regard tou lede ansanm e siporte kot nou kapab siporte.  Akoz si nou kas enn nou fer lot i pou, i pou refoul ek nou.  Pa bliye ou konnen konbyen etranze nou annan dan sa pei ozordi?  Nou annan 17mil etranze ou war?  I annan 6,000mil ki annan GOP i ankor deor, i pa ankor vini li.

Me desizyon ki Gouvernman in pran i dir li reste laba pou le moman.  Nou pou ed sa 17mil ki isi avek nou. Letan sistenm i ava ok ou ava tournen ou ava kontinyen.  Me pou le moman reste laba.  War nou pe sey manage sa bann gran prensip.  Akoz demen nou pa anvi ok konmela nou pe fer gathering pou diferan rezon.  Nou pa oule annan gathering pou lezot rezon Sesel pandan sa sityasyon.  Nou annan ase problenm pou nou rezourd. Nou pa le en lot lo nou latet.  

So mon donn ou sa legzanp pou mon ilistre lenportans ki nou atase pou fer sir ki bann biznes bann proze ki kapab ganny konplete par sekter prive i ganny priyorite pou terminen pou nou pare.  Sa i mon larepons pou premye.  Pou 2enm par ou kestyon mon pa konnen si SS i le pran premye par ou kestyon.

 

MR SPEAKER

Mersi Minis.  SS.

 

SS PATRICK PAYET

Mersi Mr Chair.  Mersi Onorab.  Definitivman bann Kontra ki egziste avek Gouvernman i pou kontinyen.  Me sanmenm sa ki nou’n met reprezantan SRC e osi dan Minister Finans lo sa Komite.  Ki letan sa bann dokiman i vin kot nou, akoz tou lakonpannyen dan sekter prive, ouswa, i en sole trader, ouswa en lakonpannyen i kapab apply.

Me however i bezwen kapab ganny assess properly.  Baze lo bann parameters.  E aktyelman la bann lezot Manm Komite pe zwenn zis pou met en pe sa bann parameters pou fer sir ki letan Lendi nou sorti avek sa bann form, pou annan bann diferan sekter.  Par egzanp nou konnen bann sole trader keksoz pou zot i en pe diferan konpare avek bann lakonpannyen.

Bann lenformasyon ki zot bezwen donn nou pou nou kapab assess, i bezwen vreman kler lo sa form ki zot bezwen soumet.  E nou, nou bezwen kapab servi en pe lenformasyon ki nou annan kot Minister Finans baze lo bann peyman.  E bann dokiman ki SRC osi i annan.  So tousala nou pe pou servi letan nou pe fer nou assessment.  I pa otomatikman ki letan ou’n soumet sa bann dokiman ki ou pe al ganny peye the full saler.  Menm si Gouvernman li in dir ou ki i garanti.  Me selman Gouvernman in dir ou ki i pa anvi i annan redundancy.

Me selman nou, nou bezwen revwar si sa bann par egzanp, sekter prive eski i annan ase larzan dan son kont, dan son rezerv?  I bann kondisyon ki at least nou pe diskite selman by Lendi nou pou’n vreman pli kler dan sa bann kondisyon.  Zis kekfwa pou donn zot baze lo sa 420milyon estimasyon lapey bann travayer dan sekter prive.  Par egzanp nou annan the financial sector insurance aktivite i annan R36milyon e nou pa anvizaze bann Labank avek bann lakonpannyen Lasirans pe vin soumet sa bann, pou zot ganny lasistans.

So i annan 36milyon deza.  Dan Konstriksyon i annan 44milyon par mwan.  Manufacturing apepre 52milyon.  IT 16milyon.  Wholesale and Retail apepre 23milyon.  Me dan sekter ki nou apel touris avek tou son bann lezot sekter i apepre R195milyon.  E sanmenm sa ki fer sa total apepre R420milyon par mwan.  Mersi.

 

MR SPEAKER

Mersi SS.  Onorab Pillay.

 

HON SEBASTIEN PILLAY

Mersi, mersi Mr Chairman.  Mr Chairman mon krwar i en, i enportan ki nou, ki nou konpran byen serten keksoz.  Lepep Seselwa an zeneral e nou tou nou, nou par deryer sa mezir, akoz nou’n war lezot pei pran menm mezir pou asire ki dan en sekter vilnerab ki nou annan ozordi.

In vin vilnerab par sa sityasyon COVID-19, nou bann frer ek ser ki riske perdi zot saler oubyen ganny difikilte ek zot saler.  Zot kapab ganny zot larzan al, pou al se zot avek, pou aste zot konmisyon.  Si fermye i prodwi legim sa bann dimoun i kapab annan sa larzan pou aste sa legim.  So sa larzan i kontinyen marse dan lekonomi dan labsans larzan ki touris ti pou anmennen.  Nou dakor ek sa nou napa problenm ek sa.

Me kot nou annan en problenm la kot nou annan en sityasyon ki nou bezwen klarifye se ki si ou pe dir mon par egzanp sa gro lakonpannyen ki pe fer sa lotel lo Ste Anne.  Ler i ti angaz li dan sa kontra i ti konnen poudir son balans peyman ti pou vin lo premye quarter i ti pou’n ganny li serten tan milyon ki ti pou permet li pey son 1000mil travayer.

Mon pwen i se ki lo tou sa bann gro lakonpannyen Gouvernman i bezwen fer en proper assessment of ki kantite larzan nou pou al disburse within the first phase of sa measureWithin the first phase of sa measure nou devret pe target par egzanp en pti restoran Seselwa ki ti pe rely en kantite lo kliyan, me i pa pe ganny sa kliyan akoz li i directly ganny afekte par lefe ki avyon pa pe anmenn lakantite Italyen, lakantite Franse, lakantite Angle ki bezwen vini.

That is the reassurance ki nou bezwen donn dimoun an deor.  Apre nou ava vin, mon pa pou nonm non sa bann lakonpannyen, akoz mon pa le personn krwar poudir ki mon pe, mon pe regard zot dan en fason me i enportan.  Akoz mon pa krwar poudir menm ler en dimoun pe fer en lakaz ou pey sa Kontrakter tou ou larzan deswit.  Ou pey li ler ou lakaz in fini, i annan en bout peyman ki i gannyen in between e li i bezwen prepar son balans peyman.  Akoz otherwise si nou bouz dan sa direksyon nou pou manz sa 1.2milyon vreman, bokou pli vit ki nou pe antisipe.  E se sa mon krwar mon main konsern ki sa 1.2 i bezwen tenir nou pandan sa peryod ki lemonn antre pe fer fas ek sa sityasyon.  Ki ler nou konmans retournen menm si i annan mezir adisyonnel nou ava pran.

So, mon kestyon pou ou i koumsa, eski zot bann assessment zot pe deza konmans internally tir sa bann ki pli gro, regard zot bann sif d’affaire sa bann ki pli gro?  Si i pa pe provide ou ek sif d’affaire ou dir, be gete mon zonm ou pa le vin donn mon ou sif d’affaire ou pa pou kapab vin pran larzan Leta.   Akoz la i loportinite pou Gouvernman fer sir enn tou sa gro, gro lakonpannyen ki mon pe dir gro lakonpannyen bann ki pe fer sif d’affaire par lao en serten kantite larzan,  pou Gouvernman konnen kwa ki vreman pe pase laba.  E ki popilasyon pa santi poudir lefe ki sa i en mezir ki mwan, mon dakor ki enn mon frer i gannyen enlot dimoun pa pou take advantage of it.  Sa  i en reasirans ki nou bezwen donn pa zis dimoun, nou Lasanble osi i bezwen sa reasirans me popilasyon antye i bezwen reasirans.

2enm keksoz ki vreman, ki vreman enportan se ki ozordi par egzanp dan retail sector nou pe advise dimoun pou servi kart.  Sa i donn loportinite pou fer ki tranzaksyon i al direk dan kont Labank bann retailers.

So, la zot annan en fason direk pou tyeke kwa ki pe antre kot sa bann retailers dan zot POS dan sa cash banking ki retailers i fer.  Sa osi i bann travay adisyonnel ki zot kapab fer pou close bann loops ki petet ti ava kapab egziste.  Ki ava fer ki plis reveni i reste anndan and then lo sa.  So eski zot pe pran bann lezot mezir adisyonnel otour sa 1.2billion stimulus package?  Ki Konstitisyon i donn zot, i donn en ta pouvwar Leta pou fer sa.  Atraver en Fon, en Bidze Siplemanter, Konstitisyon i donn zot pouvwar.

Me sa ki nou oule se ki i ganny byen depanse, i ganny byen servi e ki lepep i santi li konfortab ki i al ver le mezir ki, ki pe anvoye.  E dernyen, dernyen pti pwen Mr Chairman mersi pou ou lendilzans.  Sa ki Onorab Aglae in raise i enpotan me ou bezwen osi eksplike poudir si ou konmans met restriksyon ou pou osi ouver en black marketSo sa osi i en, i en keksoz ki ou bezwen, nou bezwen kapab la a sa moman donn nou lesplikasyon lo la.  Akoz zot pa pe pran serten mezir ki kapab annan bann lezot lenpak?  Mersi Mr Chairman.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi mersi Mr Speaker.  Mersi Onorab.  Wi mon toutafe dakor ek ou.  Se pou kwa ki mon’n dir ki inisyalman sa gro porsyon saler ki mon’n dir i Tourizm avek bann servis related ek Tourizm.

Se zot ki pou annan priyorite.  Lezot konpannyen gro, pti, pti ki fer larzan, e son cashflow i montre i kapab soutenir Mars, Avril, Me, sorry Avril, Me, Zen pardon.  I pou pas dan en lot kategori.  So, e sa travay pe ganny parey in eksplik ou, pe ganny fer la konmela sa bann kriter pe ganny aranze.

E nou bezwen fer sir ki napa sa black market ankor.  Mon’n mansyon sa mon senpleman pou mon eksplik Onorab kote nou bezwen ale si nou le met en restriksyon tanporer.  Nou bezwen tourn kot IMF.  Non, mon dakor akoz le moman i pou tande nou pe sey fer i pou tir avan.  That’s itSo, me IMF li i pa le tann parle li ditou.  I dir ou marse i lib fodre ou les li lib.

E nou’n, nou’n fer sa depi tou sa bann lannen so akoz monn mansyonn li pa krwar nou pe al met li demen bomaten.  Non, non pa les sa anzandre dan zot lespri akoz zot pa pou dormi aswar.  Mersi Mr Speaker.

 

MR SPEAKER

Mersi Minis.  Onorab Jany Letourdie.

 

HON JANY DE LETOURDIE

Meri Mr Speaker.  Bonn apre midi ankor tou dimoun.  Minis mon konnen ki poudir boner ou’n adres en pti pe sa problenm Artis ki fodre zot ava al kot lotel pou ganny zot kontra.

Mon ti ava kontan met a ou latansyon ki i annan apepre 500 Artis sepa si pa plis, tousala ansanm i kouver bann dimoun ki dan studio, ki annan recording studio, bann artizan, bann pent, bann santer ek mizisyen, bann danser e osi bann DJ.  Tou ansanm zot nou konnen poudir ti annan sa problenm kot pli ale ti napa bokou band ki ti pe ganny sans zwe avek lotel.  Se detrwa ki ti annan, oubyen sa detrwa soloist oubyen duet ki ti annan mon pa asire ki zot tou ti annan en kontra avek lotel.

Mon menm monn deza perform 3an avek en lotel ki zot ti dir nou vin lo en mutual lagreman ki nou’n zwe pandan 3an me selman i ti napa en kontra.  Ok prezan sa bann dimoun ki mannyer zot pou prouve?  Akoz zot ki pa pe zwe dan lotel avek touris ki zot profit lo la?  Vi ki prezan pe napa rasanbleman, zot profit lo bann maryaz, lo bann parti prive, lo bann fonksyon, lo bann rallys, lo tou bann lezot keksoz ki dimoun ti get zot, en Minister ki get e dimoun pou vin sante.  Ki mannyer i pou proof i en, i en Artis.  E ou’n dir poudir atraver zot Fon Pansyon, la ankor mon ti a kontan fer lapel, akoz toultan ler nou ti dir Artis kontribye anver zot Fon Pansyon.

Artis i enn bann group dimoun ki pa kontan kontribye malerezman.  Mon pa pe zeneralize i annan i fer byen.  La en fason ozordi kot zot ti a kapab ganny en laklerte kekfwa pou zot deklare.  Me toutfwa nou aprann par nou leson.  Alors Minis ki rekour, kote zot pou ale sa bann dimoun?  Ki mannyer pon kapab annan en laklerte pou zot akoz mon pe koz ou 500 artis e 500 fanmir.  Mon pa pe koz ou bann ki fer sa part time, mon pe koz bann ki fer sa a plen tan pou li ganny son, son gagne pain avek pou li sonny son fanmir.  Mersi.

 

MR SPEAKER

Mersi Onorab.  SS.

 

SS PATRICK PAYET

Mersi Mr Chair.  Mersi Onorab.  Parey nou’n dir nou pou donn lasistans tou biznes ki enkli bann artis e tou bann lezot konponan ki vin avek.  Me en keksoz ki nou pe diskite la se, ki Komite i ankor pe diskite.

Mon konnen i pou fasil bann ki’n ganny peye par egzanp ki annan en bank statement ki nou kapab war enpe bann reveni ki’n antre lo zot bank statementSo nou kapab fer assessment war ki kantite reveni par mwan ki i ti pe gannyen.

Me difikilte ki mon konnen Komite pou gannyen ki nou ankor pe diskite bann ki kekfwa pa ti pe bank sa bann cash ki zot ti pe resevwar.  Sanmenm sa kekfwa ki mon konnen nou bezwen ankouraz Seselwa menm si ou dan biznes ouswa ou en endividi ki pe ganny income,  akoz pou ou kapab demen kapab ganny en loan menm avek Labank ou bezwen kapab bank sa bann larzan.  Labank i kapab war ki kantite reveni ki ou ti pe gannyen tou le mwan ki zot fer zot assessment.

Me en pe bann diskisyon ki nou pe gannyen lo Komite se sa bann kategori koumsa ki mannyer nou asiste zot e ki quantum nou donn zot.  E sa i bann diskisyon ki nou pe finalize e once ki nou konplet sa legzersis nou kapab vini, vin devan poudir ki kalite lasistans nou pou donn sa kategori.  Akoz par egzanp ou konnen i kapab annan taxi drayver osi.  Vi ki kekfwa bokou zot kekfwa zot in ganny euro, dolar avek touris zot in sanz li direk avek bureau de change without kekfwa bank sa larzan direk dan zot kont me zot in servi li par egzanp on a day to day basis.

E sa i bann assessment e bann framework ki nou pe diskite lo Komite pou nou kapab fer sir ki at least napa labi demen.  Ki at the end of the day letan i ganny odit i vreman kler ki bann kriter.  Me i definitivman lasistans me sa i bann diskisyon ki nou pe finalize.  Mersi.

 

MR SPEAKER

Mersi SS.  Onorab John Hoareau.

 

HON JOHN HOAREAU

Mersi Mr Chair.  Mr Chair bomaten Minis ti fer referans avek en survey ki in fer dan 72 letablisman touristik e in dir nou ki zot in perdi apepre 3.8milyon Dolar through cancellation.  

Mon ti a kontan si Minis ti, ti ava eklersi nou si sa i pandan sa peryod ziske sa 3 mwan ki, ki zot pe, pe prevwar pou peye oubyen si sa i pou, pou sa lannen antye?  Dezyenmman mon ti a kontan demann de pti kestyon vize ver Lagrikiltir osi ki mon krwar Minis i a kapab donn nou en serten leklersisman lo la.

Sa 14 plot later ki pou donnen malerezman i pe ganny allocate avek Farmers Association be pa tou Fermye ki aktiv dan prodiksyon e i ti a kontan increase son prodiksyon ki Manm Farmers Association.  Eski sa pa pe disenfranchise sa group dimoun?  Dezyenmman lo size pti poul ki pe son pri parey i ganny dir pe sorti 15 pou vin R26 eski pou annan en subsidy ki pou donnen lo sa nivo?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab sa sif ki mon’n donn ou i valer an Dolar sa bann booking ki’n ganny kennsel.  Donk se larzan ki ti pou antre si sa touris ti’n vin reste dan sa bann letablisman ki mon’n mansyonnen akoz zot in perdi 800 ekek booking pandan sa peryod.  

So sa i zis an valer larzan an dolar ki reprezant sa bann booking.  Me parey ou konnen lentansyon Gouvernman se siport tou bann letablisman touristik dan sa ka guest house, pti lotel and whatnot avek saler pou en peryod 3 mwan.  Konbyen egzakteman i pou reprezante ?  Sa mon napa sa sif pou mon donn ou me langazman Gouvernman i annan sa garanti nou pou, nou pou siport zot a 100poursan.

I annan osi en demann ki mon anvi la sezi sa lokazyon pou fer avek ou i annan en demann par Lasosyasyon se ki sa VAT, li osi i pa ganny peye i ganny deferred e nou, nou’n dir avek zot ki nou pa kapab defer sa VAT pou le moman senpleman akoz VAT se en koleksyon sorti kot sa kliyan ki ou fer apre ou, ou pran sa larzan ki in donn ou e ou pey Gouvernman.  So largiman prezan se ki parfwa zot ganny peye apre donk zot pa Ankor tous sa larzan ki mannyer zot kapab donn sa larzan.

Alor dan sa bann ka spesifik nou, nou’n dir zot al fer, zot al plenny zot sor avek Revenue Commission avek SRC.  SRC i a deside.  I kapab annan en solisyon dan le sans ki si en dimoun i vini la i pey cash sa VAT lo son, i pran sa cash VAT i donn Gouvernman atraver SRC me sa i bann dikisyon detay ki zot a bezwen regle avek SRC.

Lo bann pti poul lo subsidy ou konnen keksoz pou sanze vi sityasyon, akoz si avyon prezan pe fer zis freight son kou i, i pli elve i pou aziste akoz si lontan i lo en avyon ki pe amenn pasaze son freight cost i en pe mwen ser i pou vin en pe pli ser i tre difisil pou mon dir ou demen si i mont R40 ki nou fer.   Ou konpran?  So i annan en Fon Lagrikiltir i annan en Fon Lapes kekfwa zot kapab regard ladan pou konmanse akoz sa bann Fon i egziste ek larzan ladan i en diskisyon ki nou pe bezwen fer.  Me mon pa kapab konfirm ek ou la ki nou pou subsidies sa logmantasyon lo pti poul lo sa sif ki mon’n tande yer swar mon osi yer swar lo televizyon.  Mersi Mr Speaker.

 

MR SPEAKER

Mersi Minis.  Onorab Hoareau in fini reponn ou kestyon non.  Ok, in fini.  Yes Minis.

 

MINISTER MAURICE LOUSTAU-LALANNE

Wi pardon, pardon Mr Speaker.  I ti’n demann mon lo zafer plot later pou Lagrikiltir.  Wi ou konnen dan sa sityasyon ki nou ladan parey nou’n tande depi bomaten i annan ki, ki li menm li i volonter in vin devan in dir les mon donn en koudmen.

Alor sa Chairman sa Lasosyasyon Fermye Lagrikiltir sorry Lagrikiltir pardon ou war li in vini ek en dinamizm i dir li i pare pou donn en koudmen.

I le later donn li later so Gouvernman in rod later in donn li later e nou’n donn li 14 bout later pou 9, 9 ekek ektar later kote i ete e mon konnen so pa poz mon lot kestyon akoz mon pa konnen.  Me, nou’n donn Lasosyasyon prezan devwar sa Chairman li se li met son kriter rod son Fermye e si nou nou’n pran later ki abandonnen la ler Lagrikiltir ki pa ti prodiktiv e nou donn li.  Be later in fini pare setadir i bon pou Lagrikiltir degaze al plante ou konpran ?  Setadir komans plant deswit alor li i bezwen swazir sa bann fermye akoz li osi i annan en stratezi i dir i pou al plito lo bann carbohydrates i pa pou al tro bokou lo lezot keksoz.

So se koumsa ki sa in vini i, i bon mon eksplik ou sa akoz i enportan donk se en, en homme en Seselwa ki annan en linisyativ i anvi fer en keksoz nou’n donn li sa later nou’n dir li plante get on with it.  Mersi Mr Speaker.

 

MR SPEAKER

Mersi Minis.  Onorab Audrey Vidot.

 

HON AUDREY VIDOT

Mersi Mr Chair.  Minis bonn apre midi ek tou bann Onorab e tou Manm piblik ki pe ekoute.

Mr Chair mon kestyon pou Minis, Minis nou konnen parmi nou popilasyon ozordi nou annan tro bokou koneser e ler nou annan koneser parfwa zot donn fo lenformasyon avek piblik.  Alors avek bann sa bann Konferans Lapres ki bann Lotorite Gouvernman pe fer avek bann media houses pou asire ki bon lenformasyon i a dispozisyon pou nou, nou pep.  Eski i pou posib mon konnen SS in koz brefman lo la eski i posib pou annan bann lezot fason petet pou pas sa bann lenformasyon avek piblik partaz li petet zot kapab piblik menm zot kapab partaze ede.

Pou asire ki bann dimoun i azour e zot konnen kote pou ale ki bor laport pou tape.  Mon pe dir sa osi ki sa bann biznes ki at least ki swa i anrezistre oubyen i pa anrezistre ki pe tax oubyen pa pey tax i pa santi perdi akoz se sa ki pe arive ozordi.  E sanmenm sa ki pe fer zot fristre, ankoler e akoz zot napa zot pa konnen ki bor zot pou ale.  E finalman petet annan en kad klasifikasyon petet ler zot fini fer sa legzersis ki sa bann dimoun i konnen ki bor zot tonbe.  Par egzanp mon pe mazin bann child minders anrezistre pa anrezistre, dimoun ki aste revann, bann dimoun ki freelance pou Tourism, bann tuck shop operators.

Ou konnen bann konmsi ki sa bann dimoun ki kestyonnen pe demann lenformasyon, zot santi zot, zot pli byen enformen zot lekor e pou zot konnen ki zot pou bezwen kwa ki zot bezwen prepar zot pou zot konnen ki bor zot pou al tap laport.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Onorab.  Mersi pou ou kestyon.  Wi i enportan sa ki ou’n dir e sertennman nou pa anvi fristre dimoun ankor so akoz sanmenm desizyon ki nou’n pran se ki nou pou annan sa 3 biro enn Minister Finans, enn Praslin, enn La Digue.

Komite in ganny met an plas par Prezidan Larepiblik, dimoun ki lo sa Komite i bann dimoun konpetan dan sakenn sa bann servis, akoz nou dan Gouvernman ou bezwen konpran atraver nou bann servis nou annan bokou lenformasyon dan sistenm.  Nou annan bokou lenformasyon si i pa dan sistenm ;- setadir nou pou napa sa lenformasyon ki mon oule dir pa sa.

Ou’n koz lo freelance si ou en Tourist Guide ou pe freelance ou bezwen en license.  Si ou annan en license ou dan sistenm ou.  So nou pou war ou dan sistenm si nou pa war ou dan en sistenm nou pou war ou dan en lot sistenm si nou pa war ou dan sa sistenm nou pou war ou dan en lot ankor.  I annan 3 sistenm ki nou annan kot nou pou war ou.  Alor i enportan ki nou ganny sa bann bon lenformasyon pou nou pa fristre li ankor.

Mon bezwen fer sa premye konmanter, me SS Payet letan in fini travay la apre midi ek son Komite whatever it is i pou fer en Konferans De Pres li osi Vandredi sa Vandredi ki pe vini pou eksplik tou sa bann kriter, lokasyon son biro, limero telefonn pou annan en telefonn fotespere i pa 141.

E fer sir ki dimoun i annan sa lenformasyon e Lendi bomaten i pou annan dimoun la e dimoun ki annan konpetans pou nobou reponn parey ou pe dir korekteman sa bann kestyon.  Pa neseserman lo open air me en koumsa enn ek enn poudir egzakteman ki fodre anmennen ki fodre fer kot fodre ale.  So sa i dan nou plan la e fotespere mon’n donn en bon lenformasyon i pe sekwe son latet, so i koumsa i pou pase Vandredi Konferans, Lendi biro i ouver Mahe, Praslin, La Digue.  Mersi Mr Speaker.

 

MR SPEAKER

Mersi Minis.  Onorab Vidot.

 

HON AUDREY VIDOT

Yes, zis en dernyen pti follow- up avek ou permisyon Mr Chair.  Petet Minis mon a rekomande ki letan sa bann lenformasyon i ganny kominike e parey sa bann dan lapres ki’n fer resorti bann travay konmsi annou travay ek nou bann medya pou repete akoz dimoun i bliye ki ou’n fer pou li yer so i enportan ou bezwen remind li kwa i kapab ganny sa sipor kote i bezwen ale pangar i bliye.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi mersi Mr Speaker.  Wi en bon sizesyon mon note akoz zot osi zot annan zot devwar pou zot kontinyen enformen.  Mersi.

 

MR SPEAKER

Mersi Minis.  Onorab Clifford Andre.

 

HON CLIFFORD ANDRE

Mersi Mr Chair.  Mr Chair mon ti a kontan baze lo en repons ki Minis in dir letan Onorab Hoareau in demann li lo sityasyon e in dir bann dimoun ki annan VAT zot in demande pou zot defer sa VAT e ou’n dir ki ou’n dir zot pa pou kapab me vin plenny zot sor.  Me akoz Gouvernman pa ti kree en Fon avek sa larzan 1.2/13.3bilyon e met la e les dimoun, biznes prive vin plenny son sor apre zot ti ava gete?

Akoz i annan de sirkonstans ki zot dir vin plenny ou sor, i annan de sirkonstans ki i dir zot pa bezwen vin plenny zot sor mon a donn ou apre nou a gete ki mannyer i balanse.  Sa i enn.

Dezyenmman konbyen i pe kout Minister oubyen definitivman Minister Finans sa sityasyon COVID-19 konbyen i pe kout nou?  Akoz ozordi letan nou pas serten landrwa vi ki pa ankor fer lockdown nou war kot i annan serten klinik kot i annan bann latant ki’n ganny mete pou ki rezon nou, nou pa tro konpran, konbyen i pe koute sa bann latant?

Eski sa bann biznes ki annan sa bann latant la akoz pa Minister Lasante ki annan sa bann latant, sa bann biznes ki annan sa bann latant zot osi zot pou ganny saler zot staff peye, menm si i pe ganny en larzan ankor lo sa i pou ganny ankor en lot larzan?  Mon ti a kontan konn sa.

E 3enm plito se ki eski Air Seychelles vi ki nou ti’n antann ek bann sityasyon en pe pa tro, tro bon e la ki li i amenn touris, konmsi ki mannyer li i pou ganny pase?  Eski son bann staff pou anba presyon pou pran bann konze, e si sa i leka ki, ki mannyer zot pou zot i marse?

Mr Speaker mon pe met kestyon travay ansanm akoz vi ki Minis vi ki Minis i la so si ou permet mon.  Minis i annan en lenformasyon ki mon’n gannyen en text ki mon’n gannyen bomaten ki en Madanm ki travay dan sekter touris ankor i dir kot son landrwa travay pa ankor arive sa sirkiler ki dir ki si ou en paran ou annan zanfan anba 15an ou kapab demann ou konze.  E in dir poudir zot dir li poudir sa pa ankor ganny kominike alors pa pe ganny enplimante.  So ou kapab donn nou detay lo akoz sa pa leka e ki mannyer i pou marse?

Mon lot pwen se apre 3 mwan ki Gouvernman in pey sekter prive, eski sa lotel si li i deside fermen zot pou anpes li fermen?  Zot poudir li i pou bezwen si sityasyon i re stabilize, ou konpran ? Akoz i kapab pran sa larzan 3 mwan e apre i dir mon fermen mon gard mon larzan ki mon ti annan en pti morso.  So sa i  en keksoz ki mon ti a kontan ou tous lo la.  I annan bann kiosk owner en madanm fek anvoy mon en text i dir mon napa touris, alors zot pa ni pe kapab pey zot rent zot fermen zot pa pe kapab fer en income e li in dir mwan i annan 2 zanfan so i war li dan difikilte ki mannyer i pou sonny son zanfan.

So eski li i pou bezwen al atraver sa prosedir lanniy oubyen zot pou donn li?  Sa bann kiosk ki, ki Au Cap sa en, bann dimoun ki bann kiosk owner ki Au CapE si en dimoun i annan li plis ki en konpannyen Minis e dan tou son lakonpannyen i pey li R45mil i annan 3 lakonpannyen eski zot pou pey tou le 3 son lakonpannyen pou pey li R45mil savedir i fer li en bon sonm.

Mon dernyen kestyon se anba ki Fon ki Gouvernman Sesel pe negosye avek IMF akoz IMF son Direkter Zeneral in dir ki poudir i annan en in setup en massive emergency finance kot dan son press release yer in dir ki i annan li 80 pei ki’n demann lasistans.  Eski nou pe demann en lasistans nou oubyen nou pe al rod en loan vi ki in dir ki annan li $1trilyon lending capacity ki pe fer available?  Mersi.

 

MR SPEAKER

Mersi Onorab.  Minis zis pou sa bout Air Seychelles mon anvi zis azout en pti bout mon pa konnen si sa ki Onorab pe sey mean ki an Mars la anvi ki Air Seychelles ti deza konmans redwir son bann flight ti annan en group staff ki ti ganny forse pou pran konze.

Eski bann lanons ki Lotorite in fer prezan eski zot pou ganny refund sa bann konze bann travayer i le konnen si zot pou ganny refund sa bann konze e zot pou tonm dan bann lanons ki Gouvernman anonse.  Go ahead Minis.

 

MINISTER MAURICE LOUSTAU-LALANNE

Mersi Mr Speaker.  Nou a partaz larepons mon avek Mr Payet.

Wi alor lo sa 1.2bilyon, sa 1.2bilyon i sorti senpleman letan nou’n regard dan nou bann statistik ki nou, nou annan dan nou bann Departman, saler ki bann biznes prive i peye i deklar taks i ariv 420milyon, 420milyon par mwan.  Alor nou dir nou pou donn 3 mwan lo sa sif ki dan nou sistenm e se la kot nou ariv a 1.2bilyon la, la kot i sorti.  Akoz parey mon’n dir stratezi se fer sir nou donn saler pou 3 mwan pou rezon ki Onorab Pillay in byen eksplike taler pli byen ki mwan ler mon eksplike.

Me nou dir pou ou ganny sa 1.2bilyon i annan en prosedir ou bezwen swiv.  So pou mwan i revin a menm keksoz.  Ki ou ti pe propoze dan le sans fer en Fon met sa larzan ladan apre dir vin rode me ler ou pou rod ek son lorizin e akoz nou’n deside siport saler tou biznes so la, la kot sa i sorti.

An sa ki konsern Air Seychelles wi nou pou siport saler staff Air Seychelles osi i pou nepli  en fardo si oule lo Air Seychelles nou deside pou siporte.  E sa dernyen desizyon ki’n ganny pran pou reponn kestyon Mr Speaker parey in ganny anonse yer par Mr Baker i pou osi aplike.

15an ti osi en desizyon ki ti ganny pran yer e Mr Baker in fer son Konferans De Pres e la ankor mon sipoze in pase mon pa’n war, in konfize.  Donk nou pou bezwen klarifye akoz pou nou i ti kler nou ti annan en diskisyon, diskisyon se ozordi Lalwa i dir ki en zanfan i 12an anba lanplwa.  Lalwa lanplwa – 12an anba.  Me nou nou’n dir 15an anba e 15an ou pa en zanfan.  So i en desizyon ki Gouvernman in pran pou met sa bar lo 15an.  E donk nou ava fer sir nou ava servi medya ankor pou fer sir ki zot eksplike byen ;- pa koup dimoun letan dimoun pe donn bann keksoz koumsa.  I enportan letan ou pe donn ou pa koup li lanmwatye semen, akoz ou tann zis en bout ou pa tann lot bout apre i kree sa konfizyon.

Donk sa fodre nou al rektifye. Mwan, mon napa antet la egzakteman bann detay pou reponn ou kestyon me mon donn ou ankor lorizin kote i sorti e akoz nou’n met li 15an.  Akoz en zanfan 15an ozordi i kapab vey en lakour avek son pti ser, son pti frer letan son papa ek son manman in ale oubyen enn ant son papa e son manman i deside reste avek zot lot i kapab travay.  Akoz nou pa dan lockdown ozordi,  ankor.

So la, la en pe rasyonnel sa zafer.  Wi 3 mwan apre i fermen nou, nou pou ed li pou 3mwan.  Son desizyon se son desizyon ou konpran si en propriyeter lotel prive i deside ferm son lotel sa se son desizyon nou, nou pe dir li nou pou ed ou pran ou travayer dan bomaten retrain li, fer li fer en keksoz, gard li, akoz nou pe siport ou.  Nou pe donn ou fer li vey ou lotel si fo sa ki nou anvi fer.  Me si i deside fer li ale fermen nou pa kapab anpes li.  Sa bann kiosks mon pa tro konnen egzakteman kot problenm i ete.

Me lo dimoun ki annan plis ki 1, 2, 3, 4, 5 biznes nou, nou pou pey lo payroll.  Lo payroll nou annan en NIN so nou pou pey en fwa nou pa kapab pey menm dimoun 3 saler nou pou pey li en fwa.  So la, la nou referans pou lo sa NIN.  Prezan IMF wi ou annan rezon IMF li in met 5, swa 50 milyon, $50bilyon a la porte lemonn pou vin pret larzan avek li.  Ladan $10bilyon i pou bann pei ki zot konsidere konman frazil.

E malerezman nou, nou pa tonm dan sa kategori nou pe plennyen ki nou, nou ekstrememan frazil me tou le fason sa 10bilyon ki zot pou prete son lentere i zero, be selman ou bezwen rann.  Menm si ou frazil ou bezwen rann me nou, nou pa kalifye ladan nou bezwen mont dan sa la lot dan sa 50bilyon e laba nou bezwen pey li en to lentere –  i konsesyonnel dakor me selman i 2.5poursan lo en peryod ant 5 a 7an.  So ou war pret larzan ek IMF i pa en keksoz  ki i pa donn ou larzan, ou konpran?  So la, la kot nou ete avek, avek IMF nou bezwen travay for pou nou kapab ganny li konpletman konman en GrantSo fotespere mon’n nobou reponn mazorite ou kestyon kot mon pa’n kapab reponn kekfwa Mr Payet i kapab konplet mon larepons.  Mersi.

 

MR SPEAKER

Mersi Minis.  SS oule azout keksoz oubyen –. Non?  Yes Onorab Andre.

 

HON CLIFFORD ANDRE

Mr Chair,  Minis pa’n reponn en kestyon vreman enportan konbyen pe kout Gouvernman latant ki annan ek konbyen pe kout nou pou sa COVID-19 e sa sityasyon latant par zour.  Pa par zour konmsi konbyen pe kout Gouvernman an referans avek sa sityasyon latant ki pe ganny mete kot tou bann klinik?

Apre Mr Speaker mon ava zis profite pou mwan enform nou Lasanble letan mon’n poz sa kestyon manrmay anba 15an e ki Minis in dir Lalwa ozordi i dir 12an i 15an.  Mon koleg Mr Hoareau in anvoy mon en text e ki in dir mwan rapel Minis ki poudir par lefe ki napa Regilasyon ozordi ki vre anba Employment Act savedir bann anplwayer menm si Mr Baker in dir yer lo televizyon bann anplwayer, pa oblize comply avek.

So fodre i annan en Regilasyon ki sorti an referans avek sa e mon pe met sa a laporte a latansyon Minis pou ki bann gard ki annan zanfan anba 15an, bann ners ki annan zanfan anba 15an, bann teachers.  Ok bann teachers la napa lekol so zot kapab akoz ou konnen Minister Ledikasyon in donn leson pou fer e nou konnen mannyer manrmay i ete.  Si ou pa la pou supervise li menm si nou pa bann teachers parey mwan, mon ganny difikilte avek pou mwan.  Menm si nou pa bann teachers me selman fodre nou la at least nou pe dir li fer sa, fer sa.

Me si napa en paran en manrmay 15an pa pou kapab ed son frer ki annan 10an akoz i pa pou ekout son frer 15an li, so son paran fodre i la e i bezwen, i neseser ki i annan Regilasyon dan sa konteks.  E pou ou lenformasyon Minis sa madanm kot ou’n koz lo kiosk i dir mwan i pa konnen kot i pou ale e ki i pou fer e ou ou’n dir ou pa konnen kote i annan problenm.  So bann kiosk owners Au Cap fodre zot ganny en gidans ki zot pou fer kot zot pou ale pou zot ganny lasistans.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi mersi Mr Speaker.  Ok annou nou a konmans ek kiosk parey nou’n eksplike i en biznes i ale Lendi kot Minister Finans e nou a dir li egzakteman ki i pou fer.  Si son bann papye i annord tou son zafer i annord nou kapab etabli son saler, napa problenm.  Si nou pa kapab i baskil kot ASP oubyen i baskil kot URS.

Sa i la a mon nivo la pou le moman.  So randevou Lendi bomaten kot Finans i ava konnen egzakteman.  Me laba ki i bezwen ale si i annan en biznes al laba.  So sa i enn.

Sa bann zafer latant la mon pe sey konpran ou ek latant.  Kisisa sa latant la mwan, mon vreman senserman mon pa’n tro, tro konpran.

 

MR SPEAKER

Yes Onorab Andre.

 

HON CLIFFORD ANDRE

Mon, mon konnen ou reste La Misère me si kekfwa nou fini la nou kapab mont ver Anse Royale nou ava war en pti pe bann latant deor e i pa zis, i pa zis kot Anse Royale i annan lezot distrik.  So sanmenm sa mon pe demande konbyen COVID-19 pe kout Gouvernman Sesel e si sa bann lenfrastriktir parey bann building ki nou annan, bann building ki nou annan i pa sifizan so se sa bann additional fasilite.

Kekfwa i annan bann bon rezon ki’n ganny mete la mon pa konnen se sanmenm sa mon pe demann sa kestyon akoz bokou dimoun pe demann sa kestyon.  Ki mon krwar bokou nou lo lot kote laba mon pa konnen si zot konnen si zot pa konnen bann ki dan US kekfwa zot pa konnen be mon dir zot poudir i egziste sa.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi mersi Mr Speaker.  Alor si mon konpran prezan Onorab setadir i annan bann landrwa dan bann distrik kot i annan bann klinik ki i annan en latant obor li. Se sa?  Ok.  Be mon pa pou konnen mon ava la rod sa lenformasyon e mon a fer sir nou ava kominik avek ou konbyen i pe koute sa bann latant si zot in ganny ek Larme si zot  in ganny kote mon konnen, nou ava al regarde egzakteman konbyen i koute.

 

MR SPEAKER

Mersi.

 

MINISTER MAURICE LOUSTAU-LALANNE

Donk sa i sa e an sa ki konsern pardon Mr Speaker.  An sa ki konsern Regilasyon ou annan parfetman rezon si fodre fer Regilasyon nou pou fer Regilasyon.  Si fodre amend en Act, nou a vin isi e annefe fotespere ki demen letan nou pran nou Consequential (Amendment) AML CFT ek BIO e nou annan osi enn ki irzan ki nou bezwen anmennen ki konsern lamannman Central Bank (Amendment) Act avek Financial Institution Act 2004.

Pou donn fer Lasanble aprouve pou donn bann modifikasyon enportan pou permet Labank Santral extend peryod, ki i sanz fason ki bann Labank i pret larzan a 180 zour pou ziska 3an dan bann ka eksepsyonnel kot nou pou bezwen define en natural disaster.  E donk se bann keksoz pratik ki nou bezwen fer, akoz si non nou pou blok lafason nou travay dan sa peryod COVID ki en emergencySo sa osi nou pe anmennen e mon profit sa lokazyon reponn sa kestyon pou mon enform Lasanble.  Mersi Mr Speaker.

 

MR SPEAKER

Mersi Minis.  Onorab oou kestyon in fini ganny reponn.  Non, non mon ankor annan 12 Manm e nou ti, Air Seychelles i pa’n reponn ok.

 

HON CLIFFORD ANDRE

Ou ti’n dir sa zafer letan mon, mon ti’n demann sa kestyon Air Seychelles ou ti’n dir zafer leave, konze ki Minis pa’n reponn.  So mon oule zis kekfwa nou klarifye sa.

Mon pe ed ou Mr Speaker.  Mersi.

 

MR SPEAKER

Wi Minis an Mars i annan bann staff ki’n ganny forse pou pran en semenn konze an vi ki Gouvernman i re anons lafason ki mannyer konze pou marse.

Eski sa bann staff pou ganny refund sa en semenn konze?

 

MINISTER MAURICE LOUSTAU-LALANNE

Wi Mr Speaker.  Larepons kestyon i senp i wi, e pou tou lezot sekter osi ki sa in arive nou pou break it back to sa peryod.  E an sa ki konsern saler mon’n konfirmen ki wi sa package ki nou pe fer pou osi pey saler Air Seychelles.  I pa pou en fardo lo li.  Mersi.

 

MR SPEAKER

Mersi Minis.  Onorab Wavel Woodcock.

 

HON WAVEL WOODCOCK

Mersi Mr Chair.  Minis avek sa pandemik i annan en konsern ki plizyer bann marsan in fer monte pri bann komodite dan zot laboutik menm zot in fer monte a bann pri vreman, vreman egzorbitan.

Mon kestyon i ki mezir ki ou Minister pou pran pou protez bann konsonmater?  Mon, mon en dimoun ki krwar dan free marketing ekonomi me selman avek sa sityasyon aktyel avek sa kritik COVID-19 eski ou Minister pou konsider en sort of pri kontrol pandan sa letan pandan sa pandemik ziska ler sa sityasyon i, i amelyore?  Zis pandan sa peryod 3 mwan, 4 mwan pou ed en pe avek sa bann labi ki pe arive dan bann, dan bann laboutik.

E dezyenmman i annan plizyer Manm ki’n koz avan mon zot in koz lo bann sole traders lo bann diferan biznes sirtou bann pti biznes oubyen bann endividi ki travay direkteman ou endirekteman avek Sekter Tourizm.

I annan ki’n mansyonn bann drayver taxi e mwan, mon pe azout enn de bann lezot dimoun ankor swa bann sole traders avek bann dimoun ki pa neseserman pe anploy, pe anploy travayer.  Parey bann dimoun nou annan en kantite bann dimoun propriyeter bann pti guest house kekfwa en koup pe travay ladan zot pa pe anploy dimoun zot be selman zot pey zot taks swa zot pe fer zot, zot banking regilyerman.  E osi la i fer mon mazin bann gid parey Vallee De Mai, bann peser ki al konzele lo bato ki retourn avek bann tonaz pwason ki bann lotel pe nepli pran, bann bato ekskirsyon, bann boat charter.

Onorab Letourdie in koz lo ban mizisyen e osi mon pe mazin bann car hires osi, operators  e plizyer bann lezot biznes parey menm bann craftsman ozordi ki zot nepli pe kapab vann zot bann, zot bann skilptir, zot bann prodwi avek, avek bann lotel ouswa avek bann kliyan, bann touris.  E eski Minis i ou konnen akoz sa kestyon mon pe gannyen avek bokou bann dimoun dan tou sa bann kategori.  Eski ou Minister pe garanti ki ou Gouvernman pou asiste tou sa bann dimoun finansyerman ki tonm dan tou sa kategori ki, ki mon mansyonnen ek bann lezot Manm in mansyonnen an zeneral?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab mon krwar pri kontrol i pa first line of defense la mon koz parey Dr Gedeon.  Me nou bezwen – dabor mon krwar Retailers Association i osi in fer en lapel avek son bann Manm pou silvouple pa fer sa akoz i imoral sa ki zot pe fer.  Sa i enn.

2) Mwan, mon pou donn en lenstriksyon Fair Trading Commission. Annefe mon pou regarde avek Mr Lebon la si deza ale al konmans en travay si i pa’n ale i ava konmans en travay deswit avek son bann partener ki normalman zot mobilize pou met sa sityasyon anba kontrol.  Akoz nou pa kapab annan sa sityasyon parey ou’n dekrir.  Pou lot wi akoz parey nou dir pou tou biznes sirtou ki relye avek Tourizm nou pou asiste.  E parey nou’n diskit en pe bann sistenm ki nou pou fer swiv sa sistenm al kot Mr Payet e zot ava ganny en rekour avek nou pandan sa peryod 3 mwan.  Mersi Mr Speaker.

 

MR SPEAKER

Mersi Minis.  Minis mon pe zis enkyet pou lofis ki SS Payet depi Lendi, eski i annan lezot mwayen petet atraver mon pa konnen met en keksoz lo website ki bann biznes i kapab ganny akse avek pou zot fer zot aplikasyon dan plas – ?

Akoz mon krwar mesaz ki pe sorti la se fizikman sa bann dimoun i desann i al kot lofis SS Payet.  Si ou kapab petet SS i kapab eklersi sa.

 

SS PATRICK PAYET

Mersi Mr Chair.  Mr Chair ou annan rezon mon krwar ki Vandredi letan nou fini Press Conference nou pou make available sa bann forms sa bann dokiman lo website Minister Finans e osi bann lezot website ki dimoun i kapab download.  E osi nou pou met en email address available ki dimoun i kapab konmans soumet.  Okenn lenformasyon swa dokiman ki zot in, bann ki’n pare e osi bann ki kekfwa i bezwen further klarifikasyon zot kapab telefonnen ouswa anvoy email pou annan limero telefonn.

E i pou annan detrwa staff ki pou available pou reponn sa bann kestyon par telefonn, me osi ki nou pe kalkile kekfwa nou pa pou kapab fer tou dimoun vin alafwa kot Minister Finans avek social distancing osi mon krwar kot Minister Finans sansan pou plen.  Ki nou ava travay lo en mwayen travay ki at least pa sa kantite dimoun Lendi i desann.  Mersi Mr Chair.

 

MR SPEAKER

Mersi SS.  Onorab Paul Ernesta.

 

HON PAUL ERNESTA

Mersi Mr Chair.  Mr Chair Minis, delegasyon bann koleg Onorab bonn apre midi.  Mr Chair mon premye kestyon i preski anliny avek ki Onorab Woodcock in demande.

Annefe avek sa sityasyon ki nou ladan i pe osi nesesit ki pou annan avek bann prodwi ki pa pe vini bann komodite ki pa pe antre dan pei parey mansyonnen pli boner lo zafer lo size pti poul.  Kot nou pou war nou pou annan en increase lo bann freight e sa pou amenn en increase lo, lo bann komodite osi.  Ki bann mechanism ki Minister pe mazin swa si zanmen pou, pou met an plas pou evite ki bann, bann komodite bann pri komodite i ogmante dan pei ki pou si oule pou protez nou bann konsonmater.  I enn?

Apre dezyenmman nou annan osi la i annan bann Departman bann lorganizasyon ki pa ankor fini pey zot bann, zot bann travayer.  Eski zot pe par egzanp bann Kontrakter LWMA i enn bann ka spesifik e apre bann lezot ankor eski zot pe set en serten deadline pou asire ki bann dimoun i kapab fini ganny peye?  Pou zot kapab fer zot bann, zot bann achat  neseser parey pli boner nou’n koze menm si  Chair pou dir pa koz lo la.

Lo sa zafer lockdown si zanmen nou ariv dan en sityasyon dimoun pa nkor ganny peye ki pou arive dan, dan sa ka?  Apre Mr Chair dernyen kestyon i annan provizyon pe ganny mete pou sa, pou sa 3 mwan la, apre 3 mwan nou konnen tou keksoz pou, pou retourn normal e bann keksoz osi ki nou kapab war nou kot parey bann forex atraver bann touris ki pa pe antre ozordi, me apre plitar tousala i pou amenn en lefe.  Ki bann mezir ki nou pou annan pou asire ki nou lavi,  dan pei  i retourn normal e nou fonksyonnen normal, san ki nou lepep nou santi sa kou direkteman ki pe anpakte lo nou?  Mersi Mr Chair.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab an sa ki konsern sa kestyon lo bann pri eksetera i annan en lot Komite onivo ki’n ganny etabli par Prezidan Larepiblik e son mon koleg Minis Bastienne ki chair sa Komite e sa i en Komite lo Food Security.  

Donk i regard tou laspe manze donk e osi bann fournis bann tou lezot bann fourniser par egzanp STC, SEYPEC bann akter kle dan lekonomi.

Sa i, i en travay en lot Komite donk pou reponn sa kestyon donk sa i pou travay sa Komite pou fer sir ki ;- enn – napa mankman,

2) i abordab e nou rod li dan bann landrwa ki pli pros pli bon marse posib parey mon’n fer resorti dan mon diskour bomaten.  Peyman ;- nou le fer peyman bon nou’n anonse ki nou le fer peyman milye Avril me mwan, mon krwar i kapab kekfwa en pti pe pli apre.  Me solman nou pou definitivman fer peyman pou le mwan Avril en?  So sa note e nou pou fer pou mwan Me apepre menm parey.

Parey ou konnen dan Gouvernman nou fer tou bann saler par milye le mwan so se sa ki nou ti dir dan milye le mwan so sa i en gidans ki mon pe donn ou.  Normal mon pa konnen mon, nou tou lede nou pa pou konnen.  Touris pou konmans retournen letan Lerop in sort out.   Akoz tan ki Lerop pa sort out e i reouver pou zot vini nou pou dan menm sityasyon ou konpran e nou pa konnen personn pa konnen.

 

 

(Interruption)

 

 

MR SPEAKER

Mersi.  Order!  Order!  Order! 

 

MINISTER MAURICE LOUSTAU-LALANNE

So vwala sa ki mon kapab reponn ou.  Alor nou letan nou pou anmenn Bidze nou pou anmenn ou sa bann Bidze ki nou’n diskite en pe bann gro eleman nou pe anmenn ou en worst case scenario ou war.  E nou esper ki tou nou bann, tou nou bann pei ki pe sey konbat sa viris dan menm fason nou annan menm rezilta.  So vwala se tou ki mon kapab dir ou annou fer en pe lapriyer annou sey fer fason sa sityasyon i ganny regle le pli vit posib.  Mersi.

 

MR SPEAKER

Mersi Minis.  Bon mon anvi averti bann Manm ki nou lentansyon ti pou fini 5er, mon annan 10 Manm lo lalis mon ti ava kontan dan plas nou fer en stetment nou al direkteman lo nou kestyon e nou fer nou kestyon short.

E Minister avek SS osi repons short e presi.  Nou ava ale e mon pe sey negosye la mon annan  de bout pou nou fer lo kote staff Sekretarya nou bezwen reorganiz transpor pou drop zot apre.

E osi tou lo kote SBC nou pa ankor ganny repons me mon lentansyon se nou pran tou le 10 Manm e nou pou sey extend ziska 6er diswar – ok?  Prosennman lo mon lalis Onorab Jean-Francois Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon ti a kontan ranforsi sa pwen ki Leader Lopozisyon in fer lo sa Fon stabilizasyon kot tou sa bann larzan i antre ladan.  Minis mwan, mon avek SS Payet mon kontan zot konman de dimoun, selman zot bezwen konpran kote nou’n sorti.  Dernyen kriz $50milyon ti pas an pasan nou pa anvi sa i ariv ankor !

 

(APPLAUSE)

 

HON JEAN-FRANCOIS FERRARI

Nou pa anvi i ariv ankor e nou pa pe akiz personn nou pa pe dir zis nou anvi ki ler larzan i antre i pa al ni dan kont STC ni dan en kont A,B,C,D i al dan en kont determinen pou sa !  Konmsi se sa nou lapriyer nou anvi fer pou ki sa latransparans ki ou pe, ki ou pe advocate i arive e ki nou pa retourn ankor dan sa sityasyon.  So sa i mon premye pwen.

Mon 2enm pwen mon anvi demann ou Minis eksplik mwan akoz mon’n fer en pti pe lekonomi dan mon lavi mon pa kapab konpran ki mannyer nou Gouvernman pe al pret larzan 0poursan me selman pe al donn larzan pou nanryen?

Konmsi napa en sistenm kot si ou pret 0poursan ou pret nou 0poursan nou travay avek nou sorti dan sa kriz.  Konmsi akoz, akoz sa obsesyon, sa obsesyon pou donn tou, tou travayer etranze konman Seselwa?  Lenformasyon ki mon gannyen zot a koriz mon Minis ki Prezidan Faure zis in vini in koze in dir tou, prezan tou dimoun i anbarase pa kapab dir nanryen e tou dimoun pa dakor avek sa, me selman personn pa kapab dir nanryen !  Problenm ki nou’n fer fas avek la Mr Speaker, se ki avan menm ki nou’n demann dimoun pran, pran zot responsabilite endividyelman konman Seselwa nou konman en Gouvernman, nou’n vini nou pran tou sa responsabilite nou’n tir tou keksoz dan lanmen dimoun nou’n dir pa trakase nou pou okip zot pa bezwen, pa bezwen per nanryen.

Si ou pa le al travay mon madanm mon, mon annan en, en zanfan 14an mwan, mon madanm i kapab kite al, al asiz ek, al asiz ek li e demann son lapey.  I pa pou fer li akoz i pa devret kalifye me pourtan dan zot sistenm ki zot in dir zot in kalifye tou dimoun.

Konmsi en ler kantmenm mon kontan Sekreter D’Eta Payet mon ti a kontan dimoun i vin dan son biro tou popilasyon antye i vin dan son biro e akoz ou’n dir zot vin kot mwan, mon ava rezourd tou problenm, tou problenm mon ava rezourd pou zot, zot napa nanryen pou fer desann !  Mr Speaker, Mr Speaker mon ti a kontan Minis i eksplik i dir avek nou i dir avek nou in koz avek nou lo solidarite, be nou tou nou bezwen solidarite nou tou nou bezwen fer  en keksoz.  Nou pa kapab donn tou keksoz zis pou nanryen nou bezwen ankouraz dimoun plito ki en dimoun, dir en dimoun vin rod en lapey nou pou kapab dir li be ok annou sey gete ki mannyer nou kapab grat, grate, gete ki mannyer ou kapab fer en pti keksoz.

I ti annan en bitasyon deryer kot ou nou ale nou fer letan i dir annou responsabiliz sa pep en pe.  Annou move away konmsi pou zis dir non, non pa bezwen trakase nou pou anmas tou keksoz.  Ler nou prete laba nou a donn zot pou nanryen.

Kanmenm nou napa kantmenm nou napa nou ava donnen.  Konmsi mwan, mon ti ava kontan ki Minis i dir avek mon kote ki nou’n al mal e ki nou pe zis perdi fer tou dimoun abandonn zot responsabilite, tou travayer abandonn zot responsabilite e vin lo peron Minister Finans oubyen lo peron Labank Santral e tou keksoz i ava ok.  I pa pou ok Mr Speaker !  So Minis mon ti a kontan ou dir mon en keksoz lo la.

Mr Speaker mon 2enm pwen se pou, se pou demande akoz dan sa bann lasistans ki nou pe donnen nou pa kapab war en sistenm ki progresiv.  Si en travayer pe ganny minimum wage ou ed li pou li ganny son minimum wage akoz this is the minimum, akoz nou bezwen pey 100poursan R20mil, 100poursan R30mil, 100poursan R40mil?

Akoz nou pa sey fer li menm parey menm kestyon ki sa enn premye ki nou fer dimoun konpran ki nou tou in ariv en maler dan nou pei, i pa nou lafot sa i sorti Lasin in ariv lo nou pei, nou pa kapab fer en pti zefor nou tou?  So  sa laspe progresiv mon ti a kontan tande.

Mr Speaker mon ti ava kontan prezan ki Minis i dir avek nou ki zefor ki Gouvernman li menm li in deside pou li fer, in konmans diskite pou li fer ler i get son Bidze, son Bidze 2020 ki nou’n fini vote, pou dir mon ti promet sa mon pa pou kapab donnen ;- mon ti promet sa enn, mon ava donn li lannen prosenn mon ti fer sa nou pa pou kapab.  Ki zefor eski Gouvernman i pare pou li fer ?  Akoz tan ki Gouvernman pa pare pou fer en zefor zot pa pou kapab demann lepep Seselwa pou fer sa zefor.  So mwan, mon ti a kontan konnen ki kote diskisyon in ale pou nou dir be ok nou dan en problenm nou pou bezwen fer en zefor.

E finalman Mr Speaker mon ti a kontan demann Minis ki mannyer nou pe avanse kan nou annan Lekol Maritim nou annan en, en hostel laba nou pa servi nou al lwe lotel nou kekfwa ou a dir mon laba i tro pti laba i pli gran.

Me nou annan bann fasilite nou pe dir yer  en owner en car hire i dir avek mon DRDM fek lwe 15 loto, 15 loto pou met pare in case si i bezwen 15 loto.  I annan 150 car hire dan Sesel e i dir mon i annan 15 ladan omwen 20 ladan ki pare pou pret Gouvernman en loto non nou pa rode nou, nou pa demann nanryen nou akoz nou tro fyer konman en Gouvernman !  Nou bezwen demann solidarite Nasyonal Minis i enportan ki nou koz lo sa bann keksoz koumsa.

 

(APPLAUSE)

 

HON JEAN-FRANCOIS FERRARI

Annou,  mwan, mon ti a kontan ki nou aret koz lo zis donnen nou koz lo solidarite Nasyonal !  E se pou sa ki mwan, mon ti a kontan dir an konklizyon Minis ziska prezan mon’n ekout zot la tan ki sa kestyon lapey travayer etranze pa ankor rezourd mon, mon pa pare pou mon vot pou sa Bidze.  Akoz nou bezwen nou’n anploy dimoun pou vin travay kot nou,  nounapa louvraz pou donn li nou napa louvraz be nou kit li la nou pey li apre nou dir li train ?  Be Minis si ou dir avek sa anplwayer ou pou pey sa travayer be of course i pou reste ! Of course i pou reste ! Nou, nou bezwen dir li retournen ler botan i ariv ankor la nou dan movetan nou a gete ki mannyer nou kapab travay.

Annou fer en gran distenksyon Mr Speaker, tou bann travayer etranze ki lo laferm, zot pe prodwi zot, tou bann Kontrakter zot pou kontinyen travay zot, zot pou kontinyen.

Sa bann travayer Ste Anne parey partou kot ou’n dir zot pou kontinyen travay me selman, me selman Prezidan i dir tou dimoun pou gannyen.  E mon asire ki i annan dimoun menm si travayer pe travay pou vin rod larzan akoz nou annan en Gouvernman ki menm – les.

 

MR SPEAKER

Onorab mon krwar le pwen in ganny fer.  Annou donn Minis sans pou reponn.

 

HON JEAN-FRANCOIS FERRARI

Mersi.

 

MR SPEAKER

Minister.   Minis.

 

MINISTER MAURICE LOUSTAU-LALANNE

Mersi Mr Speaker.  Mr Speaker mon pou bref.  Fon stabilizasyon akoz ou pa le sa zafer 50milyon i ariv ankor.  Ok, mon note.  Mon krwar parey mon eksplike nou ava ale mon ava regarde ki mannyer nou kapab fer sa spesifik.  Mersi.

0 poursan wi me parey nou’n osi dir bann tax menm letan nou pe donn sa lasistans salaryal bann tax, PIT poursantaz ki anplwayer i pey Pension Fund, tousala pou ganny dedwir sa – ou war ?  E nou’n defer li pou 6 mwan.  Apre zot a vin pey nou zot ou konpran.  So i annan en trade- off.  I pa konmsi nou’n donn tou nou.  Nou’n dir ou defer ou tax vin pey nou, nou pe donn 6 mwan, vin pey nou apre.

Be ok i pou bann nouvo lim ba pli ba me selman nou pe nou pa’n tire sa.  Setadir son, son tax i bezwen gard son kont e i vin i bezwen vin pey son tax nou’n fer en deferment.  Peyman R45mil, annou reste lo R45mil i annan de fason ok i vre nou’n dir 10,000mil en lepok nou ti’n mazinen kekfwa nou ava fer li graded, me apre desizyon nou’n pran nou dir non i tro konplike.  Nou bezwen osi fer konfyans sa bann Kontrakter, sa bann biznes, sa bann endividi alor nou pey li si son saler i 45,485mil nou pey li 45,485mil nou ti kapab fer en lot fason.

Nou ti kapab dir nou al tir nou larzan PIT nou a pey tax SCR nou a tir Pension apre nou a pey Pension, apre nou a donn ou net me sa i tro konplike.  Si ti pou annan 50 dimoun kot Finans pou annan 2milyon dimoun kot Finans nou pa kapab cope ek sa.  So i annan de keksoz enn nou’n deside trust sa bann biznes, trust sa bann endividi, donn li tou sa larzan, me nou pou vey li mwan apre i pou bezwen vin peye akoz sistenm pa pou sanze kot SRC.

Sa i en pe sa solidarite ki nou pe rode. Vre nou dan en sityasyon grav nou pare pou ede be pa dir mon ou biznes in fait prezan ou servi COVID pou mon donn ou larzan mon pe servi zis en legzanp ou konpran? Pa vin zwe ek nou.  Mr Speaker mon aret la.

 

MR SPEAKER

Mersi Minis.  Onorab Terence Mondon.

 

HON TERENCE MONDON

Mersi Mr Speaker.  Mr Speaker mon, mon premye remark i konsern sa 5milyon an plis ki ti donn DRDM an preparasyon pou COVID-19 petet ti ava neseser ki Minis  i anmenn bann detay depans ler pe reprezant Bidze semenn prosenn pou nou war ki mannyer sa larzan in ganny depanse an mezir ki nou diskit Bidze.

Mon kestyon mon, premye kestyon i konsern loan ki Gouvernman pou pe anvizaze pran.  Minis in dir nou ki i annan anviron 80milyon ki ekspekte gannyen avek bann partener etranze IMF, World Bank, ADB eksetera.  Be lo kote domestik petet Minis i kapab dir nou konbyen zot pe anvizaze prete avek Labank Komersyal domestik?

E mon demann sa kestyon sirtou akoz mon konnen ki Gouvernman i deza zot det domestik i ase eleve e ki nou’n kontinyen ogmante dan bann lannen ki’n pase.  E  ki garanti ki zot kapab ganny en, en bon deal avek Labank Komersyal par lefe ki zot deza annan en det ase eleve?  Mon lot kestyon Mr Speaker (se sa stokaz,) Chairman SFA ti pe koz lo bann diferan senaryo ki zot prezant avek Gouvernman pou ed bann peser.  E enn bann senaryo ki zot pe koz stokaz pwason  e enn bann eleman kou ki zot dir i pli, pli mazer ler nou pe koz stokaz pwason se elektrisite.  E in fer resorti ki sa, sa rediksyon dan karbiran pa ase signifikan pou kapab ed sa bann lakonpannyen fer sa stokaz pwason pou, pou bann peser.

Petet mon pa konnen a ki nivo in arive pou ki bann desizyon pe ganny pran petet ki kalite sipor Gouvernman pou donn sa, sa sekter pou kapab petet rod bann alternativ?  Par egzanp ed sa bann lakonpannyen met bann lenerzi soler, par egzanp ki kapab ede pou bes zot kou elektrisite si oule i kapab donn sa sipor pou kapab annan sa stokaz pwason pou nou, nou konsonmasyon domestik.

Mr Speaker mon osi annan en pwen klarifikasyon Gouverner Labank Santral ti anonse ki lentere pou desann par 1poursan be selman i ki bann dimoun ki ti, ki annan loan pou ganny sa rediksyon i si kapab eklersi nou eski tou dimoun ki annan loan pou benefisye avek sa rediksyon,  ouswa i pou ganny targete pou bann, bann dimoun ki pe ganny afekte konmsi dan sa anba sa sityasyon, ki bann dimoun ki pe ganny plis afekte ki pou ganny ;- sa rediksyon ouswa i pou across the board pou tou dimoun ki deza, ki deza annan loan?

Mr Speaker zis mon ti anvi dernyerman fer en pti remark ki parey nou’n war dan lepase petet i, i bann leson pou lavenir ki nou’n war dan Lasanble ler nou’n ganny sa lespas fiskal premye keksoz ki Gouvernman i fer in al anmenn Bidze Siplemanter ki nou depans bann larzan an plis nou apel sa bann lespas fiskal.

Petet sa i montre en lokazyon petet kot nou ti devret met sa bann larzan dan bann Fon Lagrikiltir, Fon Lapes petet ki ozordi i ti ava en soulazman pou Gouvernman dan bann sityasyon parey.  Petet sa i bann leson pou, pou lavenir.  Mersi Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mon pou pran de kestyon pou reponn apre Mr Payet a reponn lezot.  An sa ki konsern sa 5milyon DRDM mon pa okouran en, so sa mon ava fer ou ganny lenformasyon si i 5, si i 6 whatever it is sa i enn.  De ou’n demande ki letan nou vin avek Bidze nou montre napa problenm sa nou kapab, nou kapab fer.  An sa ki konsern stokaz pwason e pli boner avan nou al dezennen Mr Speaker osi ti poz sa kestyon lo Lapes sa ki mon anvi konfirmen se le swivan.

Taler mon koz lo sa Komite ki chair par mon koleg Minis Bastienne lo food security ki enkli Lapes.  Alor in annan e sa Komite osi i pe fer en travay li in fer meeting ozordi bomaten avek Lasosyasyon bann Peser pou efektivman regard ki mannyer pou regle sa problenm.  Problenm stokaz, pri, pri pwason li menm, eksetera.

E konklizyon sa meeting se ki FBOA pou fer son propozisyon demen avek li.  So sa i bann biznes ki ongoing me son, son report mechanism se ki dan 1semenn sa Komite i raport avek Prezidan Larepiblik e apre i al Cabinet deswit e Cabinet la i pe rankontre tou le semenn.  So i en keksoz ki nou’n sanz nou progranm pou fer si ki tou le semenn Cabinet pe ganny appraise sa bann sityasyon kote ki annan blokaz kote fodre debloke and so on.  So sa i larepons ki mon kapab donn ou lo la.  Mon konnen ki ti annan kekfwa en propozisyon servi bann refrigerator trucks anvoy zot en pe partou lo Mahe al kolekte pwason kot i debarke anmennen vann li santralman and so on.

Nou pa pou antre dan sa diskisyon me se sa bann detay ki zot pe sort out la e apre nou a kapab vin konfirm avek ou, desizyon final.  Mon pas laparol avek ou permisyon Mr Speaker a Mr Payet.

 

MR SPEAKER

Mersi Minis.  SS.

 

SS PATRICK PAYET

Mersi Mr Chair.  Mr Chair pou lo kote domestik det 2016 aktyel ti apepre 40.5poursan GDP e sa i ti redwir a 2019 ti’n ariv 32.1poursan GDP e estimasyon ki nou’n fer la se pou remonte ankor pou ariv 40.9.  So definitivman i pou annan en increase. Me selman parey mon’n mansyonnen pli boner the financing vi ki nou pe finaliz revizyon dan Bidze la nou pe finaliz avek Labank Santral e osi avek IMF their financing mechanism pou tou sa bann deficit, pou sa deficit ki nou war.  Apre secondly lo sa Monetary Policy rate ki Labank Santral in redwir par 1poursan e Labank Santral ki in dir i pe ankouraz bann Labank osi pou pass on sa benefis avek bann lezot konsonmater dan servis finansyel.  Mersi.

 

MR SPEAKER

Mersi SS.  Onorab Waven William.

 

HON WAVEN WILLIAM

Mersi Mr Speaker.  Mr Speaker premyerman mon ti a kontan demann Minis lefe ki Minister Lagrikiltir zot in dir zot pe donn sa 14 bout later, mon anvi konnen si zot pou donn zis sa 14 bout later me lo kote agri-inputs eski zot pe mazin ed bann Fermye ki pou well ki Lasosyasyon Fermye pou deside pass on sa bann bout later avek.  Akoz i annan landrwa petet delo pou manke, semen pou manke so mon anvi konnen si provizyon pe ganny fer pou sa?

Dezyenmman Minis mon trouv, mon trouv serten febles dan lafason ki sa bann Fon pou ganny zere ;- par egzanp ou’n dir poudir i pou annan en biro ki pou, ki pou baze Mahe, enn Praslin, enn La Digue.  Me letan ou regarde i annan bokou sa bann pti biznes se bann distrik eski petet mon ti ava, mon ti ava demann ou pou konsidere si par egzanp dan bann biro Administrasyon Distrik ouswa lo en baz rezyonal si sa bann servis osi pa kapab ganny donnen zis pou an menm tan nou pe koz social distancing ki a fer lavi bann, bann dimoun en pti pe pli eze?

E de lot kote i annan bann child minders la, ki depi Mars desizyon in ganny pran ki paran i kapab reste kot lakour.  Me i pou annan en, en mankman lo kote zot reveni ki pou antre i pou annan en problenm, so bann child minders pe demande la ki bor zot ale?  Akoz sa desizyon i pe afekte zot reveni e nou, nou Gouvernman pe dir ki i pou konmans sa an Avril, Me ziska Zen me mon ti ava kontan ou donn en leksplikasyon lo la.

Epi Minis lefe ki i annan sa Trust Fund la Agri Trust Fund i pou annan en rediksyon lo la lefe ki i posib ki i annan rediksyon dan lenportasyon mon pe zis mazinen si pa ti a bon ki Minister Lagrikiltir i revwar son stratezi lapros vizavi depans anba sa Fon?  E dernyerman Minis sak fwa i annan bann sityasyon dezas la mon pa pe dir ou mon pa pe dir SS Payet me i annan en bann dimoun ki annan en pti pe lanmen long, so i pou bon pou nou konnen ki bann mekanizm an plis ki met an plas ki fer sir ki sa bann larzan pe ganny byen depanse.  Mersi.

 

MR SPEAKER

Mersi Onorab William.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab wi Onorab parey mon’n dir sa 14 later mon pa konnen zot kondisyon, me mon krwar bann later lagrikiltir me prezan si mank semen, delo whatever it is definitivman mon asire ki mon koleg pou servi sa Trust Fund dan sa ka Agriculture Trust Fund akoz i annan larzan ladan e donn priyorite.

Akoz sa zennonm parey mon dir ou i anvi al plant kanbar li i anvi al plant gro manze.  E nou bezwen sa kanbar ek sa gro manze pli vit posib e nou le war en reaksyon pozitiv.  So tousala i mars ansanm.

Eski nou merit revwar be sa i ava pou mon koleg regarde e mon krwar si i pe ekout mwan, mon ava dir li sertennman regarde.  Akoz nou bezwen sipor ek sa de lendistri akoz foods apard Lasante kot nou pou met larzan neseser nou bezwen osi met larzan neseser kot i konsern Lagrikiltir avek Lapes dan sa peryod ki nou ladan.  So wi mon dakor ek ou.  Lanmen long, lanmen kourt sa mon pa pe antre ladan pou le moman si annan levidans nou ava deal avek sa bann lanmen long o moman apropriye.  Mersi Mr Speaker.

 

MR SPEAKER

Mersi Minis.  Onorab amwen ki enn ou kestyon pa’n ganny reponn, me mon pa pou pran nouvo kestyon.  Yes Onorab William.

 

HON WAVEN WILLIAM

Mr Speaker.  Petet lo kote Lagrikiltir la i annan enn ki tre enportan ozordi STC letan fermye pe anmenn legim bann ki pe reste pa pey zot pe fer zot retournen.  Eski STC la pou pran tou i pa pou bezwen retournen ki sa Fermye i santi li i ganny afekte?

Epi dezyenmman en lot keksoz ki pa’n sorti kler se ki sa bann peser ki ozordi zot pwason pa pe vann a sa pri ki zot sipoze fer zot benefis pou zot fer marse zot biznes, nou ti a kontan ganny en pti pe garanti lo ki mannyer bann nouvo prosedir pou ete?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mon pa pou kapab reponn ou de kestyon me sa ki mon kapab dir ou wi STC pou i pou annan en mekanizm kot STC nou pou aste tou sa prodiksyon.  E kote Peser parey mon dir ou meeting in ganny fer bomaten zot pe esper en propozisyon sorti kot FBOA demen e apre sa, sa Komite Food Security i ava pran son desizyon lo la.  Mersi.

 

MR SPEAKER

Mersi Minis.  Onorab Regina Esparon.

 

HON REGINA ESPARON

Mersi Mr Speaker.  Zis de pti kestyon mon pou bref.  Minis ou’n dir poudir ki tuck shop avek daycare pou tonm anba en sistenm enn ant sa 3 sistenm be bann vander Bazar Labrin.  I annan ki anrezistre avek ESA i annan ki pa anrezistre avek ESA anba ki sistenm zot pou tonbe?

Bann Kontrakter ki sub-contract avek enl ot lakonpannyen me li i pa anrezistre li, li ki mannyer i pou pase li?  Sa lakonpannyen i anrezistre li i pe sub-contract li i pa pe ganny anrezistre li anba ki sistenm li i pou tonbe.

En klarifikasyon Mr Chair bomaten nou ti dir poudir Berjaya in ganny transfer an karantenn e ou rapel Mr Speaker ou ti pe dir poudir i annan travayer ki’n ganny demande pou zot travay ziska lafendimwan.  Me i annan en lot kategori travayer bann ki ti lo probasyon zot konman zot in anonse ki Gouvernman ki pou subsidize zot in ganny demande pou al se zot e al kot Sekirite Sosyal pou zot ganny peye.

E la i annan en dezord parske letan zot al kot Sekirite Sosyal zot in ganny dir ki non, pa pou kapab pey zot.  Mon ti a kontan zis en pe leklersisman lo la Mr Speaker.  Mersi.

 

MR SPEAKER

Mersi Onorab.  Minis, SS.

 

SS PATRICK PAYET

Mersi Mr Chair.  Mr Chair parey nou’n dir oparavan ki tou kategori biznes zot pou kapab ganny sa fasilite, me definitivman avek bann diferan kategori ki egziste kekfwa i annan ki nou pa okouran sanmenm sa ki nou pe pran sa 3 zour ki nou pe diskite avek SRC avek Departman Lendistri so tou bann Departman pou zot dir nou kekfwa avek Chamber of Commerce bann sekter kekfwa nou pa ti pe mazinen e apre nou ava enpe pli kler.

So letan nou pe sorti Vandredi avek the press communique nou pou pe pli kler avek tou sa bann sekter kategori.  Par egzanp ou pe dir Bazar Labrin apre bann sub-contractor ki annan so by Vandredi nou pou enpe pli kler lo la avek bann diskisyon ki nou pou’n gannyen avek Chamber of Commerce.  

Letan yer nou pe diskite avek Chamber of Commerce in ale li osi in al diskite avek son bann Manm ki ozordi letan in vin lo, lo Komite this afternoon in bezwen met sa bann sizesyon devan.  

Me nou prenon kont bann sizesyon ki zot in mete ozordi pou nou go back letan nou diskite avek Komite nou ava met en pe sa bann sizesyon.  Mersi.

 

MR SPEAKER

Mersi SS.  Minis.

 

MINISTER MAURICE LOUSTAU-LALANNE

Wi zis pou reponn ou dernyen kestyon Onorab se ki nou’n met dan Bidze sa nouvo Bidze 2020 ki nou pou anmenn isi R30milyon anba asistans ASP e apre nou’n met R5milyon anba URS.  Be sa fodre nou anmenn isi pou aprouvasyon Lasanble sa avan ki sa sistenm i kapab kick-in.  Mersi Mr Speaker.

 

MR SPEAKER

Mersi Minis.  Onorab Gervais Henrie.

 

HON GERVAIS HENRIE

Mersi Mr Chair.  Bonn apre midi tou dimoun.  Mon premye kestyon ziska la ki kantite larzan ki Gouvernman in depanse avek COVID-19?  Mon 2enm kestyon swivan lanons ‘’Economic Stimulus Package’’ ki Prezidan in fer, mon anvi konnen parske la anndan nou annan 3 dimoun tre konpetan PS Thesee, SS Payet, Minis li menm avek bann lezot teknisyen dan Minister Finans e osi dan Labank Santral.

Mon anvi konnen si sa sete sa zot lide orizinal e koumsa menm ki Prezidan in prezant nou?  Si sete, sete zot lide zot in donn li sa e in prezant nou sa mon le konn sa.

Trwazyenmman ziska prezan nou’n war Gouvernman in vin avek parey mon koleg Onorab Ferrari in fer byen resorti se ki Gouvernman i annan abilite pou donn tou, tou sa ki oule i pa’n koz avek nou lo bann mezir ki mannyer i pou koupe ki mannyer i kapab freeze, kot sakrifis i kapab ganny fer, ouswa si vreman bann ki dan firing line ki pou ganny ki pou benefisye.  Mon kapab donn de legzanp par egzanp letan nou pe koz zafer loto Gouvernman i annan enta loto bann loto GS napa bann Minister ki kapab sakrifye enn i annan bann Grant ki dan Bidze ;- Art Grant par egzanp kapab koupe la ou pa donn larzan pou al fer CD be pey bann mizisyen ki pe ganny letan dir.

Nou pa tann Gouvernman pe koz lo sa bann mezir mon anvi Minis i redir nou kwa ki zot kapab fer parske sa Economic Etimulus Package la i pou 12poursan total Bidze ki Lasanble Nasyonal in vote pou sa lannen.  1.2 right it’s about 12percent of 9.29billion?

E finalman, finalman Minis bokou lanfaz pe ganny mete la lo sa zafer COVID-19 ki bann benefis ekonomik ki dimoun pou gannyen nou bliye poudir pandan sa dernyen 12 mwan i annan kat mezir Bidze ki’n ganny anonse ti annan lanons an Me 2019, in vin ladres Bidze 2020, in vin SONA 2020 la i vin lanons COVID 2019.  I annan bokou lezot mezir finansyel ki’n anonse e ki fodre pa nou bliye ki Gouvernman in promet bokou keksoz bann konpansasyon La Misère lot, lot, lot bann new salary schemes e dimoun laba deor pe dir be bannla pa’n bliy nou, akoz i retonm zot anvoy mesaz kot mwan konman Chairman COGA i dir ou bezwen al gete ti promet.  So 4 kestyon Mr Speaker.  Mersi bokou.

 

MR SPEAKER

Mersi Onorab Henrie.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Konbyen COVID-19 in kout nou ziska prezan mon pa konnen si i annan ki konnen i a dir.

Propozisyon wi Minister Finans nou ti mont State House avek en propozisyon ki nou ti prezant avek Prezidan Larepiblik e in annan bokou diskisyon swit a sa propozisyon ki nou, nou’n fer propozisyon in ganny amande, propozisyon in ganny elarzi si oule e ozordi desizyon in ganny pran avek propozisyon ki nou tou nou pe diskit lo la ozordi.

So wi nou ti pe fer en preparasyon nou ti mont avek e i ti ganny diskite.  Ou annan rezon letan nou regard nou Bidze Gouvernman e sa ki nou kapab fer nou menm an entern olye al fer bokou plis keksoz, nou osi nou ti oule olye ki bann striktir Gouvernman olye en lotel konman en karantenn.  Me sa striktir Gouvernman ki nou annan kot nou pa pe pey rent oubyen nou pa pe pey en kou i pa apropriye.  Sa problenm ki nou, nou’n annan war letan nou’n regarde.

Me i annan lezot landrwa parey nou dir bann staff ki pa merit dan travay i kapab travay from home ;- i annan public servant ki pe al travay from home be letan i pa pe, i pe travay from home i annan resours Gouvernman ki pa pe ganny servi i annan loto ki pou al park dan parking pa pe ganny servi.  Re-deploy sa bann loto mon dakor avek ou i annan dimoun ki kekfwa nou kapab servi li dan en lot landrwa ou konpran.

Bann manrmay dan tourism par egzanp ki vizit lotel pou fer bann licensing renewal bann keksoz koumsa.  La zot pa pou fer nou pou donn en automatic renewal pou fasilit keksoz, nou pa oule sa bann kontak be nou kapab servi sa bann dimoun akoz zot annan serten skill dan en lot Departman ale al ed Lasante ek son contact tracing mon pa konnen kwa.  Mon pe dir sa konman en legzanp war so sa osi i en keksoz an entern ki nou bezwen fer.  E kot Bidze direkteman i konsernen.  Nou’n koup R344milyon letan nou pou prezant ek zot la semenn prosenn zot a war tou sa detay i annan bann gro depans ki nou’n tire i annan menm bann pti, pti ki azoute so i sorti from 1,2milyon pou i al dan 50milyon so sa ou ava war son detay e nou a ganny en sans diskit lo la osi.

Mersi Mr  Speaker.  Ar pardon wi, bann commitment ki nou’n fer nou stand-by parey La Misère Onorab William in donn mwan ase latet fermal ek sa kouyonnad !

 

(laughter)

 

MR SPEAKER

Order!

 

MINISTER MAURICE LOUSTAU-LALANNE

E mwan kanmenm i annan COVID-19 mon diskit ek Dr Gedeon, Dr Gedeon in dir mon ki nou kapab peye me fodre nou pey pti gin, par pti gin.  So nou’n sanz sistenm e nou pou peye akoz nou’n fer en commitment nou pa kapab abstract ou war?  E nou pou peye bout par bout La Misère dan lekol sa semenn.

Akoz nou’n fini ekri cheque pou 580 non 558 rezidan premye group so sa pe proceed so letan nou pran en, en commitment nou’n ganny laprouvasyon Lasanble nou bezwen delivre.  Mersi Mr Speaker.

 

MR SPEAKER

Mersi Minis.  Onorab Jude Valmont.

 

HON JUDE VALMONT

Mersi Mr Chair.  Bonn apre midi a tous.  Mr Speaker, Mr Chair mon pe demann sa kestyon Minis se konsernan bann loans, bann Grants, bann finansyel ki nou’n gannyen avek bann lenstitisyon enternasyonal.

Sirtou atraver bann Lakor Bilateral nou konnen bann mezir ki bann pei pe pran bokou pe lockdown zot pe focus resours finansyel se zot pou sey deal avek sa sityasyon.  Alor mon pe demande eski en analiz in ganny fer isi par zot pou, pou gete si sa i kapab annan okenn lenpak ou lefe negativ lo nou?

E 2enm kestyon se konsernan sa bann pti biznes ki zot, ki Gouvernman i dir pou antre pou ede.  Eski kan ki zot pou kapab submit zot payroll e kan ki annan cut-off date?  E osi ler enn mon koleg Onorab Ferrari i refer sorti ki lo kote ki si zot pou ganny en led zot bezwen fer en kontribisyon and whatnot pa donn larzan pou nanryen.

Mon’n ganny en mesaz pou pase e sa e i paret en business owner ki’n koz ek mon enn bann pti biznes ki konsern dan distrik.  I dir be parey Minis in rightly said zot pey tax zot alor i normal pou ed zot.  Mersi Mr Speaker.

 

MR SPEAKER

Minis Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Wi Onorab i annan plizyer nou bann pei zanmi ki kontinyen ed nou la nou’n bomaten nou’n koz lo UAE pe donn nou sa consignment e i pa pou aret la i pou annan ankor lezot, lezot led ki i kapab donnen.

Lasin par egzanp i en lot pei ki i pe konsider osi si nou pe demande anvoy en ranfor en dispatch Dokter, ners eksetera pou entervenir direkteman.  Ok nou pa ankor ariv dan sa, dan sa faz me i annan sa.  I annan lezot ankor parey i annan bann pei dan Les Lafrik kot Departman Zafer Etranzer i deza pe pran kontak.  E nou pe prepare an ka ki sityasyon i degrade nou bezwen annan en loperasyon eskiz mon servi sa term en loperasyon militer pou nou deal ek sa – ou konpran ?

So nou bezwen prepar nou met tou nou bann sistenm an plas e soumet en call sa avyon i vini avek sa tim and away we go.  So mon krwar lentervansyon e lasistans bann pei vwazen, bann pei zanmi pou dan sa form inisyalman.  Mersi.

 

MR SPEAKER

Mersi Minis.  Mon krwar 2enm i annan en 2enm kestyon.  Yes Onorab Valmont si ou kapab repet ou 2enm kestyon.

 

HON JUDE VALMONT

Mr Chair mersi bokou.  I annan sa pou bann pti biznes submit zot payroll e ki cut-off date pe.

Mr Speaker si mon kapab azout en pti bout ankor i annan bann business owners, small business owners pe demande si zot osi, si zot anplwayer konmsi zot they are the employers zot anploy de dimoun zot anplway employee i ganny garanti saler e zot, zot pe ganny par anba 45,000mil eski zot osi zot pou ganny sa lasistans ?  Mersi.

 

MR SPEAKER

Mersi Onorab.  SS.

 

SS PATRICK PAYET

Mr Chair mersi.  Mersi Onorab Lendi letan nou sorti Vandredi letan nou sorti communique nou pou sorti avek bann timeline osi akoz nou pou fer sir ki at least lafen Avril letan i arive zot pou kapab pey anplwayer.

So nou osi Komite i bezwen annan letan osi pou fer assessment e ganny bann lenformasyon avek SRC ouswa bann lezot konponan.

Se definitivman by Vandredi nou pou annan en proper timeline.  Me si sa dimoun i dan biznes i osi kapab fer son soumisyon parey en sole trader parey bann lezot osi.  Mersi.

 

MR SPEAKER

Mersi SS.  Onorab Flory Larue.

 

HON FLORY LARUE

Mersi Mr Chair.  Mr Chair mon ti a kontan remersi Minis ki in angaz li pou pran sa propozisyon pou sa Fund ki’n ganny propoze lo nou kote.  Me selman mon krwar ki time is of the essence e fodre ki i ganny travay lo la imedyatman pou nou kapab ganny en functioning body pou kapab deal avek sa larzan ki pe antre ouswa pe ganny depanse pou sa Fund.

Kestyon ti ganny demande avan par Onorab Ferrari avek Onorab Gervais, Onorab Henrie mon krwar kestyon pa ti vreman kler Prezidan Danny Faure ti fer en lanons le 12 Mars e dan sa lanons i ti promet ki tou dimoun pou garanti zot saler ;- kestyon i eski sa propozisyon ti sorti kot en tim sa tim ki nou annan sorti kot Minister Finans ek Central Bank poudir li ki i kapab fer sa promes ek tou travayer?  Mon ti a kontan osi demann Minis lo kote Air Seychelles la ki napa incoming tourist ki pe antre ki pou arive ek nou bann avyon?

Nou annan de, nou annan enn ki nou fek gannyen i annan en lot lo tarmak nou annan de lo lease eski zot annan okenn lide pou convert sa bann avyon pou kapab pran cargo akoz i annan en gran demann right now pou Cargo Aircraft?  Alors sa de deza ki deor si nou kapab mazin pou lefitir pou nou al kas sa lease pou nou kapab gete si nou kapab repran sa avyon pou cargo si i annan en benefis ladan pou airline akoz nou pe met $6milyon par lannen pou the next 4 years, 5 years an total pou Air Seychelles?

Eski Minister desid, in regarde lo en fasilite pou kapab freeze bann bill PUC pa neseserman absorb li me freeze li ki dimoun i kapab pey apre si i annan difikilte pou fer repeyman at a lower cost si i posib?  Mon’n tann Minis osi dir zot pe al renovate Ile Du Swet selman mon pa’n byen konpran si i ti pou en isolation center ouswa si ti pou en quarantine center.  Me si i pou karantenn eski zot pa kapab servi sa menm lide lefe ki zot pe al renovate en fasilite larme pou al renovate bann klinik dan bann Distrik olye al pran larzan al met dan en nouvo fasilite silvouple?

E lefe prezan ki nou prezan nou’n pri avek tou sa bann travayer etranze Sesel ki nou, nou prezan nou pou garanti zot saler, eski Minis i kapab vitman al antre an negosyasyon avek bann plito bann Kontrakter ki pou annan excess workers pou kapab al fer sa bann semen ki Minis Lagrikiltir pou bezwen, pou al fer sa isolation center ki zot anvi fer toudswit pou al renovate tou bann health care centers pou kapab fer pou nou kapab donn en bon servis.  At least servi zot si nou pe pey zot annou rod en fason pou nou kapab servi zot.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mon’n sey note osi vit ki Onorab ti pe poz kestyon mon krwar mon mank de eskiz mwan.  Avyon Air Seychelles wi i zis son kon figirasyon se pasaze e tou lede i egzakteman parey i kapab ganny konverti an cargo me i pou bezwen ki sa avyon i retourn dan en, en shop kot i kapab fer sa konversyon an cargo. 

Ou kapab osi annan avyon ki lanmwatye pasaze lanmwatye cargo, donk sa fodre fer bann letid pou regarde me tou fason nou kapab servi nou bann avyon pou al rod cargo i pa pou vreman efektiv e met li dan plas kot ou met bagaz pasaze sa i osi en posibilite ki nou kapab servi sa bann avyon an ka ki nou annan bann irzans neseser.  I pa rekomande ki nou freeze bill PUC akoz PUC osi i bezwen cashflow – ou konpran?  PUC i annan en kantite proze ou konpran?  So fodre ki son larzan i antre li osi i kontyen antre se pou kwa se sa labaz sa lasistans ki nou pe donnen pou fer lekonomi kontinyen flow.  

Apre ou’n demann mwan lo Ile Du Swet avek klinik, wi mon, mon krwar nou bezwen fer tou lede me zis pou klarifye lo Ile Du Swet i pou en sant karantenn inikman.  E donk i obor Erport i sekirize i pli fasil pou kontrole osi e donk se sa bi ki nou pe fer sa renovasyon akoz sa bann batiman i ankor la i annan tou keksoz si renovasyon pa gran pou nou nobou met en bon pe dimoun osi la o ka ki nou bezwen.  Me mon krwar pwen ki ou pe fer sorti lo lezot enfrastriktir lasante ki nou kapab osi fer fodre ki nou fer e sa i kler akoz nou pe donn priyorite Lasante.

So mon ava regarde dan mon detay avek Project Unit Minister Lasante kot zot, ki proze zot annan kot zot arive.  E isolation center li parey nou’n eksplike i en staz tre avanse e nou anvi fini li plitar lafen sa lannen avek sa Bidze ki nou’n donnen R40milyon.

Vwala, me i annan enn ki ou ti demann mon o komansman ki mon’n manke kekfwa ou kapab repete.  Ar wi, wi mersi sa Fon i ok mon’n note mon ava fer le neseser pou sa zis pou osi dir ou ki sa cargo dan Por ek son derik ki’n kase i pe debark marsandiz i annan ankor 44 container enkli manze zannimo ladan ki’n bloke pou le moman.

I annan 33 container ki pou ganny eksporte me reparasyon pe ganny fer par Mazorchi e tanto 8er nou pou konnen si in repare si pa’n repare.  Vwala sityasyon mannyer i ete lo Por.  Mersi Mr Speaker.

 

MR SPEAKER

Mersi Minis.  Onorab Wilbert Herminie.

 

HON WILBERT HERMINIE

Mersi Mr Speaker.  Bonn apre midi Minis.  Mon pou go straight to the point mon pou refize fer politik avek sa size COVID-19 parey serten Manm pe fer.

Premye kestyon ki mon anvi demann Minis, lo sa size tax ki pou ganny pouse pou ziska Septanm si ou kapab Minis repas en pe lo sa diferan kalite tax ki nou pe koz lo la.  Sa i premye pwen?  Mon 2enm kestyon regarding sa use of loan ki ti ganny anonse, bokou dimoun pe demande dan ki sekter sa pe ganny touse?  Mersi Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mon a pran lo loan apre Mr Payet a pran lo ou kestyon.  Sa loan ki mwan, mon ti mansyonnen anvi ki kestyon ti lo Lagrikiltir i konsern Lagrikiltir ek Lapes.  Ozordi atraver en Labank Devlopman i pret larzan sa sekter a 2.5poursan lentere me la i pou redwir a 1poursan lentere.

 

MR SPEAKER

Mersi Minis.  SS.

 

SS PATRICK PAYET

Mersi Mr Chair.  Pou lo kote sa bann tax tou bann tax ki due an Mars in ganny postpone pou peye an Septanm 2020.  E osi CSRT Corporate Social Responsibility Tax, Tourism Marketing Tax avek Business Tax ki pou mwan Avril, Me, Zen sa osi in ganny postpone pou Septanm 2020.

 

MR SPEAKER

Mersi SS.  Onorab Sandy Arissol.

 

HON SANDY ARISSOL

Mersi Mr Speaker.  Mr Speaker mon, mon annan en problenm pou mon demann Minis Finans e i an relasyon avek bann child minders avek paran in ganny tous lo la me selman Onorab William i demande me kestyon pa’n ganny adrese.

Nou annan bann paran ki pe reste dan lakour in tir son zanfan kot bann child minder e i pe gard avek li dan lakour.  Prezan i annan de sityasyon i annan en sityasyon kot sa paran pe ganny dir par sa child minder ki ou bezwen pey mwan still kantmenm ou pe vey ou zanfan dan lakour, parske ou zanfan pe vey kot mon e mon, mon pa pe ganny okenn reveni a lafen dimwan.

2enm sityasyon nou annan bann child minder ki pe dir an vi ki paran pe pran zot zanfan pe reste avek dan lakour, li konman sa dimoun ki pe run en pti biznes i napa nanryen pou li donn son prop zanfan dan lakour, akoz tou paran in pran zot zanfan e pe kit dan lakour.  Sa i mon premye sityasyon.  Me parkont bann paran pe osi demande ansanm ek bann child minder ki madanm ki ansarz Petit Enfance Madanm Choppy i vin devan donn zot en parol konfidans, donn zot en parol rekonfortman lo sa size, me selman an vi ki ou la Minis mon a demann ou en pti parol pou bann paran ek bann child minder ki pe ekoute anvi ki zot osi zot bezwen anmenn dipen dan lakour kot zot fanmir?

Dezyenmman mon ti a kontan demann Minis Mr Speaker, eski letan zot sorti la ozordi parske tou le swar lo televizyon nou annan en seri lanons an relasyon avek COVID-19, ki fantastik.  Be eski Minister Finans la avek sa bann zafer lapey ou konnen Minis letan nou konsern lapey tou dimoun i sey anvoy ou en pti, en pti en mesaz i telefonn ou parske i osi pe rode si i tonm dan sa kategori ki pou ganny en larzan avek Gouvernman.  

So tou dimoun i call ou parske ler i konsern larzan tou dimoun i enterese, alor mon ti a kontan demann Minis avek PS si letan zot pou sorti la zot pou travay ansanm avek SBC ek lezot Lazans pou zot fer en keksoz kler pou tou Seselwa konnen?  Par egzanp si zot poudir, poudir tou sa dimoun ki annan en biznes e ki anploy travayer par egzanp dan mon distrik mon annan bann dimoun bann madanm ki annan en pti laboutik dan lari bazar ki annan de travayer ki pey en rental e ki li i vann serten komodite parske in leve in debourye zis parey sa pti hairdresser.  Eski li i pou ganny dir par egzanp si ou pey ou tax, ou pey ou license, ou fer ou kontribisyon on pou al kot SS Payet.

Dezyenmman i annan en lot group dimoun Minis i pou annan sa dimoun ki nou apel zot bann self-employed par egzanp dan mon Distrik mon annan bann driving instructors ki montre dray mon annan mwan bann dimoun dan kiosk kot Lesplanad parey Elvis Jeanne.  Mon annan mwan bann drayver pickup zot, zot pou ganny dir avek Minister Finans poudir get sa zot si zot pa pey tax zot pa pey license me zot pe fer li lo zot own pou zot anmenn en dipen dan lakour zot, zot pou al annou dir kot Mr Simeon oubyen zot pou al en zot Lazans.

Eski i annan sa travay la ler zot sorti la pou ki napa konfizyon anymore ;- dimoun pa pe telefonn tou dimoun oubyen pa konnen kot i tonbe pou zot konnen egzakteman ki zot pou fer pou ki lavi i kapab retourn normal pou bann dimoun ki pe ekoute?  Mersi bokou Mr Chair avek Minis.

 

MR SPEAKER

Mersi Onorab.  SS.

 

SS PATRICK PAYET

Mersi Mr Chair.  Mersi Onorab kekfwa mon ti a kontan dir dimoun kekfwa annan en pti gin pasyans ziska Vandredi, akoz aktyelman la sanmenm sa ki nou pou pran en pe letan pou nou pran tou sa bann kategori pou vreman kler kote zot pou ale.

Akoz mon krwar vi ki yer swar kekfwa letan SBC in fer interview nou’n pran li nou’n donn li en pe Nasyonal en pe lo son gro Nasyonal ki mannyer keksoz sipoze pe marse lo bann sa 45,000mil ki nou pe mete e ki bann prosedir ki nou pe mete.

Me selman la be nou pe fer li en pe micro en pe pli detay lo tou sa bann sekter ki nou kapab vini Vandredi en pe pli kler.  So nou ti a kontan dir dimoun i annan en pti gin pasyans Vandredi letan nou fer Press Conference i pou en pe pli kler.  E osi pou annan bann dokiman ki zot kapab servi pou konmans soumet kot Minister Finans konmansman Lendi.  Mersi. Lo kote child minder kekfwa nou kapab klarifye sa avek IECD osi sa osi kekfwa apre nou a kapab donn en pe plis lenformasyon lo sa.  Mersi.

 

MR SPEAKER

Mersi SS.  Onorab Churchill Gill.

 

HON CHURCHILL GILL

Mersi Mr Chair.  Mon premye kestyon mon konnen Minis son latet in, in fermal avek konpansasyon me selman mon anvi zis remind li PUC osi Praslin.  Mon, mon kestyon se in mansyonn nou Air Seychelles me selman mon anvi konnen pou letan Air Seychelles i, i partner avek Etihad eski bann depans pou Air Seychelles, Etihad pou kontribye?

Pou letan sa enn i partner avek en partner enternasyonal lezot biznes sa nou konpran.

Apre sa loan ki ou’n dir pou Lagrikiltir avek Lapes sa osi petet ti a bon nou fast track li akoz menm si sa i anfors bokou sa bann dimoun i ganny difikilte pou, pou ganny zot loan.  I pran zot bokou letan e la ti a bon nou ti a war en, en fast track process ki sa keksoz i a kapab ganny fer pli vit e dan sa stimulus eski bann staff SEYPEC ki travay lo tanker ki zot, zot in tournen zot ater la zot osi zot pou ganny kouver ladan?  Apre lo kote peser ou’n dir poudir dan sa process ki nou pe fer la si i annan de sekter ki pli enportan se Fisheries avek Agriculture, me selman mannyer mwan, mon’n swiv diskisyon mon konnen poudir i annan en lot Komite ki fer sa me se sa ki bomaten mon ti demande sa, sa ki pe Chair sa Komite akoz sa i tre enportan akoz i sa de pli enportan me selman mon a poz mon kestyon.

Ou dir poudir STC pou pran tou bann prodwi Lagrikiltir ek peser, me selman pou Praslin STC i napa bann fasilite pou li kapab stok sa bann keksoz.  E mon krwar avan Vandredi ki nou’n ganny dir pou annan Press Conference pou eksplik plis detay.  Mon krwar en travay i devret ganny fer ki mannyer STC pou ganny fasilite stokaz pou ki bann peser lo Praslin i a kapab deswit tir sa bann stok ki’n pri avek zot?

Akoz la ler nou pe koze weekend pase bann bato konzele antre e zot stok i ek zot so i annan en nesesite ki en desizyon i ganny pran vitman pou kapab pran sa bann stok existing.  An menm tan pou kontinyelman pran bann stok anmezir sa bann bato i antre.  Apre zis en presizyon lo Ste Anne ou’n eksplike kantite travayer i annan me selman mon krwar i demann en presizyon akoz i annan dimoun ki konfize.

Ste Anne i en biznes ki pa ankor komanse e i annan son provizyon son lenvestisman ki’n fini ganny fer.  Me selman lo kote Seselwa zot in deza konmans anploy Seselwa pou training so ti a bon eklersi si sa bann peyman ki ou ti pe koz lo la pou Ste Anne i pou sa bann staff Seselwa ki pe pran training ki ler lotel i pare pou zot antre dan lanplwa?  Oubyen si nou pe koz sa bann kontrakter ki pe fer sa biznes ki’n fini bidzete e sa biznes pa ankor komanse e stimulus in dir klerman pou bann biznes ki operasyonnel.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Mon ava konmans avek sa konpansasyon lo Praslin wi nou’n osi dir ki sa i pou ganny peye an 2020 me parey ou konnen sa peyman sa konpansasyon pou ganny fer par PUC li menm.  Etihad parey ou konnen dan sa plan transformasyon Etihad ti met en larzan deza e nou baz nou transformasyon lo Gouvernman prezan pou siport li avek 6milyon tou le lannen pou 5an.

So sa i reste parey en, e son plan transformasyon ti pe al tre byen la sa sityasyon in anpir keksoz nou ava bezwen regard son bilan e nou an kontak tou le semenn, pou nou regarde ki mannyer zot pe ale.  Me la i pa tre, i pa tre prometan so nou pou bezwen asiste Air Seychelles ankor e nou ava regarde si nou pou met dan Bidze oubyen non,  sa i en lot diskisyon nou pou fer.

Lo stokaz mannyer mon konpran stokaz lo Mahe la kot i annan bann stokaz frigorifique pou nobou pran pwason sirtou konzelater pou bann fri ek legim, i annan ase dan le sans ki son tonaz ozordi ki egziste kot STC avek kot lezot prive i annan ase pou pran tou prodiksyon demersal fish.  Sa ki mon, mon’n ganny dir.  Lo Praslin mon pa konnen donk be nou bezwen fer sa resansman regarde si i pa avek STC kot i ete an prive e rod en fason pou nou regle sa problenm.  Mon krwar sa mon ava anmenn devan mon koleg Minis an sa ki konsern stokaz lo Praslin.  Wi pou Ste Anne mon ti pe servi legzanp son proze konstriksyon sa lotel fodre i fini akoz nou bezwen nouvo lotel letan nou, nou re demare.

Mon pa ti pe koz pou pey konpansasyon sa bann dimoun lo Ste Anne.  Ou war i zis mon ti pe donn en, en ilistrasyon proze Ste Anne en.  Me pou peye i pou pas atraver sa sistenm tou le fason.  Ou war?  Mersi Mr Speaker.

 

MR SPEAKER

Mersi Minis.  Onorab Ramkalawan dernyen mo.

 

HON WAVEL RAMKALAWAN

Mersi bokou Mr chairman.  Mr Chairman mon, mon krwar ki vreman in en, in en lazournen ranpli e mon krwar ki nou’n ganny otan lenformasyon ki nou kapab e an menm tan osi nou’n fer pa mal bann, bann sizesyon.

E mon krwar ki pou annan plis bann sizesyon ankor ki, ki nou popilasyon pou, pou met devan.  Mr Chairman zis enn de bann kestyon en pe vit, vit pou terminen parske tou bann gro pwen in ganny fer resorti.  Premyerman mon ava pran kot Minis in terminen an relasyon avek STC pou aste tou keksoz.  Ou konnen Mr Chairman mon annan en pe lafreyer mon akoz sa propozisyon i fer mon mazin SMB apre ‘77 kot SMB ti aste ti sipoze aste tou bann prodiksyon bann Fermye.

E apre sa e Onorab Gill, Onorab Gill, Onorab Woodcock e tou bann lezot dimoun i ava rapel ki mannyer ti annan bann montanny ponm, ponmdamour d.  E ti annan zis en gaspiyaz kot zot ti bezwen antere ensidswit ;- kot lo en kote mon konpran lide me selman eski nou pa pe retourn dan menm sistenm SMB e ki si nou pa balans li byen nou kapab trouv en, en katastrof ankor?  So mon ti ava kontan zis met sa konman en sityasyon.

En group travayer ki pa’n ganny mansyonnen se bann carers, bann carers ki zot osi tou zot annan, zot annan zanfan anba 15an eski zot travay se pou al pran swen avek en lot dimoun.  Eski zot pou kontinyen ganny zot lapey si zot pe reste pou zot vey zot zanfan e la deswit demann kestyon be ki pou arive avek sa, sa dimoun ki pou ki zot sipoze pe pran swen avek?  Parske sa mon krwar i vin en sityasyon, en sityasyon en pe delika.  Parske zot sipoze al pran swen ek en dimoun pou zot ganny peye me si zot pe reste kot zot silvouple zot anvi konnen ki pou arive avek zot?

Letan Minis Mr Chairman i koz lo negosyasyon avek bann drayver taxi, eski sa negosyasyon pe ganny fer atraver Lasosyasyon Taxi oubyen eski zot pe fer li endividyelman?

Mon konnen poudir pa tou Manm pa tou taxi drivers ki dan Lasosyasyon be selman mon sipoze i vin menm parey avek pa tou Fermye ki dan Lasosyasyon Fermye me selman mon war zot pe negosye avek Lasosyasyon Fermye.  Alors mwan, mon ti ava ganny sa leklersisman e an menm tan osi letan nou pe koz lo ki mannyer bann pri souden i monte I’m sure Mr Chairman ki Minis i konnen  ki deswit la i annan en keksoz ki bann Fermye in osi fer pri dizef in sorti R2 in mont R3  e konmsi mon krwar ki sa osi tou i devret ganny adrese.  E mon ti ava kontan ki si Lasosyasyon Fermye ek tou bann dimoun ki involve i pou e ou’n byen dir bomaten ki poudir be i pou pouri avek zot akoz dimoun pou, pou pa pou aste.  Mon krwar Mr Chairman ki i vreman enportan pou nou konnen sa bann konbyen in ariv nou ziska prezan pou sa COVID-19 akoz, akoz si nou pa fer atansyon, si nou pa fer atansyon i annan serten, i annan serten labi  ki kapab pe arive e mon krwar i pa pou bon pou nou.

Par egzanp pli boner letan in koz lo bann zafer latant mon ki mannyer mon konpran i annan serten latant ki pe ganny I stand to be corrected serten dimoun ki pe ganny 1500 a R2000 par zour  pou serten latant.  E alors nou bezwen regarde tousala parske i pa akoz nou dan en sityasyon emergency, kriz  ki an menm tan osi nou servi sa – serten i servi sa  pou abize  pou profite.

E lo sa size, lo sa size bann larzan ki pe donn bann lakonpannyen pou lapey zot bann travayer enn bann propozisyon ki well i tonm en pe dan sa ki Onorab Ferrari in mansyonnen, se pou dir avek bann lakonpannyen si zot annan bann problenm e an plis ki sa zot anvi retenir zot staff akoz ki sa larzan i pa ganny trouve konman en loan anver sa bann lakonpannyen me en loan ki letan keksoz i bounce back konmsi ki Gouvernman la i ava pe soutenir zot.  Me selman somewhere dan en liv laba i konnen ki poudir tel lakonpannyen in, in nou’n par egzanp nou’n pey son, nou’n pey son, son salary bill pou 3 mwan e sa salary bill i ariv R35mil.

E ki letan sa, letan sa biznes letan tou keksoz i retourn normal sa, sa i ava annan bann laranzman lo ki mannyer pou, pou re-peye pou retournen.  Parske apre tou sa larzan ki Gouvernman pou donnen i pou sorti dan Fon Gouvernman be letan i retournen i ava kapab retourn dan Consolidated Fund e ki nou a kapab re balanse parske pei i re flote apre COVID-19.  So?

Anfen en dernyen pwen an relasyon avek bann etidyan ki aletranze ki bomaten mon ti mansyonnen, kot bomaten mon ti mansyonnen.  Letan mon ti, letan mon ti poz kestyon lo spesyalman nou bann etidyan an Malezi parske i annan en pli gran group kot zot pe dir ki zot pa’n ganny okenn kontak avek bann Lanbasad ensidswit.  E  ki serten paran ki’n anvoy mon mesaz i dir ki bann etidyan i annan serten lenkyetid parske in annan lockdown laba e i annan en serten lenkyetid zot pa kapab antre dan pei konmsi pou ki i annan sa, i annan sa kominikasyon pou ki nou kapab nou kapab, nou kapab bouz devan.

E finalman mon’n osi ganny en mesaz ki par egzanp ok i byen ki Gouvernman  pe sey donn en serten lasirans bann lakonpannyen.  Me selman letan nou pe koz lo travayer etranze ki isi avek, avek nou Seselwa mon anvi zis Mr Chairman fer sorti en pwen ki poudir mon’n ganny en mesaz ki an Frans en Seselwa ki pe travay in senpleman ganny dir al se li, e i pa konnen si i pou ganny son lapey lafen di-mwan.  E ki i a pe viv lo son savings ki alors fodre pa ki nou, fodre pa ki nou, nou tro krwar ki poudir nou bann Seselwa ki aletranze pe pli byen pase.

Emirates in fini anonse ki poudir nou bann travayer Seselwa ki pe travay avek Emirates, i annan ki zot lapey pe ganny koupe par ziska 50poursan.  E alor, e alor konmsi tousala se bann keksoz ki nou bezwen, nou bezwen regarde pourtan Emirates se en lakonpannyen, ki son rezerv  i plis  ki pou nou Gouvernman Sesel.  I mean zot vann zis en avyon e, e zot kapab kouver nou lapey, nou salary bill pou Gouvernman antye pou en mwan, si pa plis.  Alors dan milye tousala mon ti ava kontan dir Seselwa annou letan nou pe apros sa bann size finansyel, annou apre apros li avek en lespri kalm rezonnen.  San ki nou pe regarde pe fer, pe fer diskriminasyon kont enn kot lot.

Me ki dan milye sa sityasyon nou tou nou pe koste ansanm pou nou kapab sey rod en solisyon pou ki, pou ki lepokase i pa vin sa degre enorm.  Me ki i permet nou pas dan sa kriz e apre bounce back e nou kapab repran ankor konman, konman en pei.  Mersi bokou Mr Chair.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab an sa ki konsern bann pwen ki ou’n soulve lo ou dernyen pwen mon toutafe dakor.  Mon krwar firanmezir nou, nou enplimant sa mezir kot nou kapab fer li mwen, pez mwen for fodre sa nou lobzektif.  Mon krwar si tou dimoun i kapab kontribye e nou fer li dan en fason onnet korek sa lafason nou merit prosede mon dakor avek ou 100poursan.

Lo kote carers mon ava rod sa lenformasyon mon a transmet avek ou akoz mon napa sa lenformasyon.  Lo kote taxi parey mon eksplike nou bezwen koz avek en 10enn en 15enn taxi drivers pou nou sey etabli ki zot lapey nou kapab fer sa atraver Lasosyasyon mon pa war akoz le bi se sey enterakte avek en 10enn en 15enn pou nou.  So nou ava servi Lasosyasyon mon ok avek sa mon napa en problenm.

Bon mon’n note sa zafer SMB  mon krwar le bi la se pou zis fer sir ki sa Fermye i prodwi i pa annan sa traka kot i pou al vann tay isi tay laba zis nou met en landrwa.  Letan nou tie over ok si i prive – akoz ozordi lotel pa  kapab  pe aste.  Se akoz sa ki nou pe rod sa fasilite pou nobou vann tou sa bann prodwi en sel landrwa.

E an menm tan esey reglemant sa pri.  Nou pa oule osi i annan sa eksplwatasyon me mon tenir an kont sa ki ou pe dir.  Lo kote loan i en bon pwen, akoz nou osi orizinalman nou ti santi ki kekfwa avek sa asistans lo saler ou’n demande kekfwa nou, nou tret saler osi konman en loan kekfwa konman en deferment si mon kapab servi sa mo.  Me nou, nou ti santi kekfwa loan e se pou kwa ki nou’n koz avek Labank Santral ek bann Labank pou regarde si zot kapab osi donn loan a en to preferansyel apre parey ou konnen osi si zot annan existing loans nou pe donn en moratwar nou pe difer eksetera.

Sa bann nouvo loan par egzanp en konpannyen kot i annan bokou ekspatriye i bezwen i annan lwaye pou peye nou pa pe antre dan son lwaye dan son rent, nou pa pe antre dan son elektrisite, nou pa pe antre dan son delo.  Me sa i kapab en kou ki pez ase for lo son konpannyen pey son travayer i en keksoz me la nou, nou oule ki al rod en loan si i dan difikilte i al rod en loan ek Labank lo sa to preferansyel pou ki i nobou reste sa 3 mwan avek son rent. 

So i annan en mixture dan nou propozisyon saler e apre lo en loan preferansyel ki nou’n osi negosye.  Me mon ava regarde ki mannyer kekfwa nou kapab assoupli sa en pti pe akoz nou pe sey regarde ki mannyer i kout nou le mwen posib.

Bon ANHRD mon konnen e mon ti dir dan mon diskour ki i annan li 487 etidyan aletranze en pe partou gro kantite i Malezi i annan 133 non 197, 197 Malezi an Zanvye 2020.  Apre i Langleter 88 e la in redwir akoz i annan fini lekol i annan in tournen i annan ki’n deside retournen e ozordi i annan 368 etidyan ki ankor aletranze e i annan 133 Malezi e 79 Langleter.

So sa i annan de gro landrwa kot zot été.  E parey mon dir nou annan en lalis detaye bann dimoun e nou pou fer sir ki sa lalis in ganny anvoye kot bann Lanbasad, pou bann Konsil Onorer pou annan sa kontak.

So kekfwa i pa ankor ariv kot tou dimoun me nou annan lalis nou a fer sir mon a fer sir ki sa i ganny, i ganny sirkile pou donn en pe peace of mind bann, bann paran.  Mon krwar avek sa Mr Speaker mon’n reponn plizoumwen bann dernyen kestyon Onorab Ramkalawan.  Mersi.

 

MR SPEAKER

Mersi Minis.  SS.

 

SS PATRICK PAYET

Mr Chair.  Kekfwa zis lo kote klarifikasyon lo bann kou ki’n deza depanse nou konnen ki Health Care Agency avek Public Health Authority ti demann mon en request letan ti’n konmans sa COVID-19 apepre 10 a 15milyon me selman nou pa’n disburse okenn larzan ki nou’n dir zot servi dan zot Bidze ki nou’n allocate avek zot.  Me however la nou pe re assess li dan son totalite pou war bann additional akoz apard ki sa 10 a 15milyon zot in zot ti fer zot plan konpreansiv ki apepre $1.9milyon so nou pe met li dan sa additional Bidze revizyon ki nou pe fer.

So Mardi letan nou a vini nou a kapab prezant zot en pe plis an detay tou sa bann soumisyon ki’n ganny fer par bann antite e kwa ki zot in depanse aktyelman.  Mersi.

 

MR SPEAKER

Mersi SS.  Yes Onorab Ramkalawan.

 

HON WAVEL RAMKALAWAN

Non, Mr Chairman.  Zis en kestyon lo prosedir parske sa ki Minister pe vin prezante sa ki Gouvernman pe vin prezante i en Bidze.

E ki si mon pe ekout Minis ki mannyer i pe koze parske in bezwen re balans en kantite bann, bann keksoz.  E ki, e ki sa ki pe vin prezante pou vin nouvo Bidze pou 2020.  Alors mon pe kalkil nou prosedir i vre ki pou annan bokou keksoz ki pou’n fini diskit lo la pandan deba Bidze lannen pase.  Me selman lefe ki ou pou al tous en pe partou ki mannyer nou pou fer sa prosedir?  Parske sa mon krwar pa si pou kapab pas dan 1 zour.

Mon pe zis rod gidans avek ou Mr Chairman lo ki mannyer nou pou fer sa e prezant sa le 31 e apre sa nou ganny nou detrwa zour pou nou reazir lo la e apre nou retournen.

Konmsi ki mannyer nou pou, nou pou fer sa?  Parske i pou al parske la mon, mon’n deza ganny en, en text sorti kot en, kot en Departman Gouvernman ki dir be zot pe koup mon Bidze be ki mannyer mon pou, ki mannyer mon pou kapab fer mon travay?  So mon ti ava kontan ganny en pe gidans lo ki mannyer nou pou, ki mannyer nou pou pran sa, sa Bidze.  Mersi bokou.

 

MR SPEAKER

Mersi Onorab.  Bon nou’n diskite taler dan ABC e priyorite ki nou pe donnen se pou sa Bidze Mardi nou pou annan lo nou draft Order Paper ki nou anvi par Zedi i ava sorti.  Nou pou annan enn de lezot biznes me selman nou pe donn priyorite Bidze mon kapab dir Bidze ki pe ganny revised par Minister Finans.  Me ler Minis i fini prezante nou ava regarde, nou ava regarde ki kantite bann lazisteman ki Minis pou fer bann Minister and so on.

E nou ava regard nesesite si nou pou set en 2 zour zis apre sa pou nou kapab debat lo la rod plis klarifikasyon and so on.  E nou lentansyon se ki semenn prosenn menm nou pou bezwen aprouv sa Bidze, ok?  Mon ava donn Minis laparol.  Minis ou’n endike ou’n anvi dir de mo lo la.  Go ahead Minis.

 

MINISTER MAURICE LOUSTAU-LALANNE

Wi Mersi Mr Speaker.  Wi parey Onorab in fer remarke annefe mon krwar i pou premye fwa ki nou anmenn en nouvo Bidze dan menm calendar year.

Akoz fason nou legalman mannyer nou fer Bidze, nou fer Bidze apre si nou sanz Bidze, nou sanz Bidze atraver en Bidze Siplemanter ou konpran?  Be la nou pa pe fer en Bidze Siplemanter.  Nou le anmenn en nouvo Bidze an antye so i bezwen annan en, en lenterpretasyon legal konstitisyonnel osi an sa ki konsern sa nouvo Bidze.  E mon ankor pe esper gidans avek Prokirer Zeneral lo, lo sa keksoz.  Me in the House li menm parey Mr Speaker in propoze, mon krwar si nou kapab deal avek li expeditiously i ava enportan me i pa i ase kler finalman sa ki nou pe fer.

Nou, nou’n pran serten desizyon deza dan Cabinet lo, lo fason ki Gouvernman li menm i pou freeze serten keksoz pou esey konble sa defisit ki nou pe, nou pe war nou pe antisipe.  Mersi Mr Speaker.

 

MR SPEAKER

Mersi Minis.  Yes Onorab Ramkalawan.

 

HON WAVEL RAMKALAWAN

Mr Chairman.  In fact mon krwar ki fodre pa ki nou apel li en nouvo Bidze.  Mon krwar ki i pou bezwen tonm anba en Bidze Siplemanter parske letan ou pe regard Lartik 154 (6) avek (7) i donn ou de sityasyon parey nou konnen.

1) ;-si ou santi poudir larzan i manke i pa pou, i pa pou ase then ou vini pou li ganny aprouve.

E dezyenmman si ou’n depans larzan e alor ou, ou vini avan ou depanse oubyen si ou’n depanse.  Me lafason ki i vini ki sa Supplementary Appropriation son Act li menm li son Bill i ganny prezante son the year following.  So mon krwar ki, mon krwar ki ofet i pa devret vin konman en nouvo Bidze pou 2020 me ki i devret plito vin konman en Supplementary Appropriation e la se la kot Onorab De Commarmond konman Leader of Government Business i bezwen anmenn sa Mosyon.

E apre sa nou ava, nou ava kapab regard tou sa bann parske i annan bokou bann virements ki ou bezwen fer e se la kot i ava vin parey nou ti fer lannen pase kot letan Gouvernman pou li nobou mentenir sa, sa 2.5 sirplis i ti fer bann diferan virements.  E ki se sa lafason ki mon krwar i ava, si mon konpran si mon pe swiv byen nou, nou Konstitisyon e lafason ki nou fer li e lafason ki nou menm nou dan FPAC letan nou konsider sa bann sityasyon.

Mon krwar ki i pa pou vin konman en nouvo Bidze me i a plito vin konman en Supplementary Appropriation.  Me pou li, pou li vini premyerman kekfwa nou ti ava kapab ganny sa Mosyon avek tou bann detay e apre sa nou ava, nou ava tackle from there.  Mon krwar ki se sa ki nou Konstitisyon  i gid nou pou nou fer.  Parske nenport keksoz ki ou pou pase pou, pou sa lannen son Bill i pou bezwen ganny prezante 2021.

Mersi bokou Mr Chairman mon espere mon’n kapab ede dan sa sityasyon.  Mersi.

 

MR SPEAKER

Mersi Onorab.  Yes Onorab Pillay.

 

HON SEBASTIEN PILLAY

Mersi, mersi Mr Chairman.  Mr Chairman pa ki mon oule, mon oule kontribye e kree en, en deba otour, otour Lartik 154 (6) e bann Lartik ki gid Supplementary Budget.  Mon krwar problenm ki nou annan avek sa enn ki la se ki si nou get menm sa montan sa amount i plis ki en Bidze National as you would usually present it.

Sanmenm sa enn nou bann problenm ki nou annan avek bann realiman Bidze.  E sa ki fer ki si ou pou annan bann realiman Bidze the, the reasons why they were appropriated for zot pe sorti anba sa bann heads of where they were appropriated and moving to other heads.  Zot pa pe move within sa bann heads.  That is why ki si i pou vin as a supplementary the realignment ki annan i pou more complex.  Mon krwar what we can do in annan sa konsern ki ganny leve dan ki laform i vini Minis i a retournen zot a work out la form korek ki i bezwen vin ladan, me selman i pa pou neseserman vin koman en Supplementary akoz  zisteman akoz bann realignment ki annan i pou more complex. 

Mon krwar what we can do i annan sa bann konsern ki’n ganny leve dan ki laform i vini.  Minis i a retournen zot a workout laform korek ki bezwen vin ladan.  Me selman i pa pou neseserman kapab vin konman en Supplementary akoz zisteman akoz bann realignment of bann heads ki pou egziste vi i bann keksoz ki ou pe dir nou i pou, i pou konpleks.

Petet sa ki ava ed nou se ki si Minis bann preparasyon ki ou fer pou nou avoid annan bann long debate bann landrwa ki pa pe ganny touse ou eklersi sa bann landrwa e nou kler poudir nou pa pe tous a ziska z and then nou ava konnen ki bann landrwa ki nou pou touse.  Selman i ava’n plito nou les li al fer sa homework and then come back pou nou fer sir ki nou ganny nou get it right.  Mersi Mr chairman.

 

MR SPEAKER

Mersi Onorab.  Bon parey mon’n dir Minis osi in dir pou an kontak avek Biro Attorney Zeneral pou nou zis clear bann keksoz legal ki devan nou.  Me e Lasanble Nasyonal pou donn sa deba sa Bidze ki pou ganny prezante son priyorite Mardi le 31 ok.

Minis oule fer okenn dernyen komanter?  Non.  Bon nou ariv a lafen sa sesyon kestyon ozordi lo sityasyon COVID-19 dan pei.  Mon ava demann Sarge pou move Mace pou nou retourn Komite of the whole House.  Bon mon ti a kontan remersi an premye Minis Maurice Loustau-Lalanne avek son delegasyon SS Payet e PS Thesee pou vin pas en lazournen avek nou ozordi pou klarifye bann konsern bann Manm.

E mon ti a kontan osi tou remersi bann Manm byensir tou bann dimoun an deor ki’n fer serten kontribisyon atraver, zot anvoy zot konsern atraver bann Manm.  Mon ti a osi kontan remersi SBC pou letan ki in donn nou ozordi e se en sanzman osi tou ki nou’n fer dan nou ler ki nou’n retournen apre midi.  Mon annan zis pou mon dir zot mersi bokou.  E Lasanble i adjourn nou pou repran nou travay demen 9er bomaten kot nou pou konsider bann Bills ki deza lo Order Paper.  E Minister in warn nou ki pou annan osi tou en amannman nou pa ankor gannyen me si nou gannyen demen bomaten oubyen menm pandan ki nou pe ale nou a kapab fer Revised Order Paper e nou a kapab deal avek.

So nou adjourn e nou repran nou travay demen 9er bomaten.

 

 

(ADJOURNMENT)