::
Home » Verbatim » 2020 » Verbatim Tuesday 17th March, 2020

Verbatim Tuesday 17th March, 2020

NATIONAL ASSEMBLY OF SEYCHELLES

 Tuesday 17th March, 2020

The Assembly met at 9am

National Anthem

Moment of Reflection

Mr Speaker in the Chair

 

MR SPEAKER

Bonzour tou Manm Onorab e bonzour tou dimoun ki a lekout e pe swiv travay Lasanble Nasyonal. Bomaten nou pou kontinyen avek nou travay me mon anvi zis fer en pti kominike avan ler ki nou travay lo nou Order Paper.  Mon zis anvi fer rapel ek Lasanble ek manm piblik ki mon Lofis, Secretariat ti ganny en Private Notice Question ki sorti kot lofis Leader Lopozisyon ki i ti’n soumet avek nou e sa i lo size Coronavirus dan nou pei.                 Me nou ti sipoze pe pran sa PNQ bomaten me an vi ki bann Lotorite konsernen sirtou Minister Lasante i tre pre okipe pou kontenir sityasyon e swivan let ki mon Lofis in resevwar sorti kot Anbasader Marie-Pierre Lloyd ki responsab pou Minister Lasante sa kestyon, pa pou kapab ganny pran bomaten dan Lasanble. Se pour sa rezon ki mon pou donn le 2 Leader serten kantite letan pour fer serten ladres lo sityasyon, e petet pas en mesaz pour reasir manm piblik.                      Lo mon kote pandan sa moman difisil ki pei pe fer fas avek mon lans en lapel avek tou Manm piblik pou pa panic, me swiv bann direktiv ki Lotorite pe donnen.  Annou reste ini dan sa moman donnen me osi montre konpasyon anver bann viktim.  Alor mon pou donn laparol le 2 Leaders apre nou ava kontinyen avek nou travay. Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker.  Bonzour tou Manm isi prezan, tou dimoun ki a lekout.  Mr Speaker vre lafors en pep i ganny mezire dan lafason ki reazir dan bann fason difisil e kritik.  Ozordi nou pei pe fer fas a enn sa bann moman pli difisil dan listwar i kler ki lafason ki sa viris corona in aparet person pa’n prevwar en tel sityasyon.  Partou dan lemonn nou’n vwar bann pei pe lite pour met sa viris anba kontrol e Sesel i annan bokou leson pou tire dan sa domenn.                         Depi konfirmasyon bann ka isi, nou pep i natirelman trakase e pe reazir e pe sey adapte avek sa nouvo realite. Me nou koman bann dirizan politik nou rol prensipal se pou reasir zot, reasir nou pep e donn zot lespwar e gidans pour sirmont bann vreman movetan.  E lo sa not mon ti a kontan remersye e felisit sa Rapid Response Team ki Prezidan Faure in met ansanm e ki’n konmans travay byen avan sa viris in ariv isi Sesel. Zot in fer bokou refleksyon, bokou preparasyon e menm si pa’n fer bokou tapaz zot in travay pour prepar nou pour sa ki bokou nou pa ti pe ekspekte. Permet mwan Mr Speaker o non United Seychelles isi dan Lasanble Nasyonal e lo non zabitan Cascade remersye sa lekip for ki’n ganny met ansanm pou gid nou e akonpanny nou pandan sa kriz.

 

(APPLAUSE)

 

HON CHARLES DE COMMARMOND

E la mon oule remersye spesifikman Dr Gedeon enn bann zanfan Cascade Mr Speaker, e tou travayer Lasante ki lo en leta alert byen avan sa viris ti’n ariv Sesel e tou seselwa ki pe swiv bann konsey ek bann gidans ofisyel. Bann konsey ki sorti dan bann sours ofisyel Mr Speaker.                                        Mon ti a kontan fer en lapel spesyal avek bann ki servi rezo sosyal pou aret fer politik  e aret kre panik  dan nou popilasyon.   Bann isi lokal e bann ki aletranze arete sa bann ensinifyan ki zot pe fer lo rezo sosyal, pou detrakte bann dimoun e anpes Lotorite fer son louvraz ki enportan pou li fer.  E sa nou lo sa kote latab nou kondann enfiniman sa i enkli bann ki pe kontinyen zwe politik ‘’blame game’’ parey nou’n vwar lo bann platform medya sosyal,                 Mr Speaker.

Mon ti a kontan enplor zot pou aret stigmatiz Seselwa ou etranze ki’n porter sa viris dan nou pei.  Personn pa swete pou li malad.  E viris napa sinyatir, Mr Speaker.  I napa boundary.  I napa nasyonalite.  I napa ras e sirtou i napa kouler politik. Mon ti a kontan osi fer lapel avek tou popilasyon e tou politisyen pour nou donn sa lekip Nasyonal lespas pour zot fer zot bann travay profesyonnel. Annou respe bann profesyonnel Mr Speaker.  Annou ekout sa ki lasyans pe dir nou annou servi bann protocol ki WHO in etablir.  Annou pa gat zot letan ki zot deza napa bokou pou pran pou anmenn sa swen pou Nasyon Seselwa.  Annou pa gat zot letan Mr Speaker, les zot travay e anmenn sa solisyon pou nou.

Parey Prezidan in dir dan son Deklarasyon,            dan bann zour ki vini i pour kontinyen evalye sityasyon baze lo levidans, gidans, e rekomandasyon bann eksper medikal ekonomik, tourizm, ledikasyon, kominoter, komers, lagrikiltir, e sosyal, e i pour anons bann nouvo mezir Nasyonal dan en fason kalm e konsistan.

 Nou responsabilite koman bann Leaders se pour edik nou pep lo meyer fason pou nou pa ganny sa maladi e anpes sa maladi propaze. Koman enn sa dirizan politik mon oule demann tou dimoun tou Seselwa pour;

  • lav nou lanmen avek delo e savon pli souvan.
  • Servi sanitizer kot sa i posib.
  • Evite tous figir, lizye, nennen, labous, en sit swit parey nou’n ganny averti.
  • Evite anbras e donn ponnyendmen e menm hug.
  • Kouver figir ler nou touse oubyen eterne.
  • Gard nou zistans avek lezot e an ka kot nou sispekte nou’n atrap sa viris telefonn limero 141 e Minister lasante i ava diriz nou lo the next step.

Mr Speaker mon demann pep seselwa pou reste kalm e annou annan konfyans dan nou sistenm Lasante dan nou bonn profesyonnel e diriz nou pei.  Sa viris i pour ariv a son lafen si nou swiv byen bann protokol e nou met an pratik sa ki neseser pou mete e non pa fer bann ensinifyan.  Si nou fer bann ensinifyan sa viris i pour detrir nou.  Mersi bokou Mr Speaker.

 

(APPLAUSE)

 

MR SPEAKER

Mersi Onorab De Commarmond. Mon ava donn laparol Onorab Wavel Ramkalawan.

 

HON WAVEL RAMKALAWAN

Mersi bokou Mr Speaker. Bonzour Mr Speaker.  Bonzour tou bann koleg Onorab tou bann dimoun ki a lekout.  Mr Speaker, nou pei pe pas dan en moman kritik son legzistans.  San okenn dout en moman ki zanmen okenn nou in deza trouve.  Sa COVID-19 ki pe fer dega atraver lemonn e dan bann pei pli gran e pli for ki Sesel, e la prezan antre dan nou prop lakaz.

Nou sitwayen e viziter etranze in ganny afekte e en gran lafreyer pe ganny leve parmi nou popilasyon.   Mon koz pour tou seselwa san okenn konsiderasyon politik, relizye, nivo sosyal oubyen lezot konsiderasyon, akoz sa viris pa fer okenn distenksyon lekel ki i pour atake.  Nou tou nou vilnerab, me sirtou nou bann dimoun aze.  E serten dimoun ki annan bann maladi spesifik, ler sa viris i pase i pa swazir lekel ki i pour tape.                               Mon premye lapel alor i pour nou regard sa sityasyon ki nou ladan, koman enn ki kot nou bezwen ini ansanm pou kapab raport laviktwar kont sa maladi.  Nou dan en moman kot sa lyen ki tenir nou ansanm koman en Nasyon pou ganny teste.  Se dan sa moman difisil ki nou pou konnen si nou pou kapab vin ansanm dan lentere Nasyonal.                                         I enportan pou komans par salye zefor ek devosyon tou bann profesyonnel Lasante ki depi plizyer semenn pe met zot lasante, lasante zot fanmir e menm zot lavi dan risk, pou esey kontenir propagasyon sa viris.  Nou’n war lo zot figir en kantite lafatig e en kantite presyon.  Nou konnen ki zot pe donn tou sa ki zot kapab menm dan sityasyon kot bann resours e fasilite pa sifizan.  Mon krwar ki mon koz lo lapar mazorite seselwa pou dir zot mersi pou zot devosyon.  A sa pwen mon demande ki zot ganny s lankourazman neseser ki sa respe sorti kot tou dimoun.

(APPLAUSE)

 

HON WAVEL RAMKALAWAN

Mr Speaker bann reprezantan Minister Lasante in dir nou, ki zot telman okipe ki i pour difisil pour zot vin devan Lasanble ozordi.  Sa i domaz akoz nou lentansyon sete pour ofer zot sa lokazyon pou reponn serten lenkyetid ki laplipar nou bann MNA nou pe tande sorti kot nou bann elektora, e an menm tan osi pou nou eksprim zot direkteman nou lankourazman.  Bokou dimoun i enkyet e zot ti pe esper sa rankont ozordi pou zot bann konsern ganny met devan e larepons ganny donnen.  I enportan sa moman met lanfaz lo kominikasyon e lenformasyon.  Se selman ler nou kominike e selman ler nou konpran sa problenm, e kwa ki pe arive a ler nou sezi sa konpleksite sa viris COVID-19 ki manm piblik pou kapab adapte zot konportman e pran tou bann mezir pou redwir son lenpak dan nou pei.             Alors mon ensiste ki kominikasyon i kontinyen dan pli pti detay lo evolisyon sa sityasyon.  San bon kominikasyon dimoun pou viv an en leta panik e lozik pa pou ganny swiv.

Mr Speaker, menas pa zis lo bann travayer Lasante me lo tou bann travayer ki lo front line,.  Bann travayer Imigrasyon, Customs, Air Seychelles, bann drayver bis ek taxi, tou lezot travayer dan lendistri touris e lezot ki travay direkteman avek piblik, zot osi zot pe fer fas a en gran risk e nou bezwen donn zot sa rekonesans ki zot merite.                 Mon profite pou etann en parol rekonfor pou nou 2 Seselwa 2 mon zanmi ki’n kontrakte sa maladi e osi sa 2 Olande. Ansanm avek tou Seselwa nou priy ki zot ava re ganny zot lasante e retourn kot zot fanmir.  Menm parol rekonfor i al pour bann dimoun ki dan karantenn oubyen dan izolasyon forse dan lakour.  Byensir nou mazin nou bann Seselwa atraver lemonn spesyalman bann ki dan Lerop e ki dan lockdown.  Mon swete ki byento sa gro nyaz nwanr i ava sorti e zot a kapab re ganny sa lazwa pou zwenn zot fanmir e selebre.                                    Mr Speaker mon apresye ki Gouvernman in pran sa desizyon pou frenm nou frontyer aryen avek tou bann lezot pei Eropeen avek tou lezot ki’n ganny plis afekte.  I annan ankor lezot desizyon ki pe ganny propoze par lezot dimoun me nou koman en Lasanble koman bann politisyen nou pa anvi pran plas bann profesyonnel dan lasante e dir zot ki nou krwar zot merit fer.  Senpleman nou anvi ankouraz zot pou pran bann bon desizyon, bann desizyon brav e pran zot vitman.  Letan pa dan nou faver e nou pa kapab esper tro lontan. Koman en Lasanble se nou ki ganny demande pou aprouv bann depans ekstra dan bann moman difisil kot sityasyon pa’n prevwar.                   Mon anvi dir avek tou bann travayer Lasante bann dan lendistri ek biznes ek tou travayer ki nou pare pou vin ansanm e a nenport ki moman pou konsider bann resours ki neseser. Nou pou pran nou responsabilite o serye parey nou’n fer li ziska prezan.             Nou osi demann Gouvernman lo son kote pou koup tou ekstravagans e pou met latansyon lo sa ki neseser, akoz nou sityasyon ekonomik i dan en sityasyon serye.               Antretan Mr Speaker mezir prevansyon i ganny met an plas o nivo Lasante, serten mezir i bezwen ganny pran pou protez biznes dan nou pei.  Nou lendistri prensipal tourizm pou pli ganny afekte.  Tou letablisman  touristik pe ganny zis kliyan ki pe  kennsel zot vakans e avek nouvo restriksyon lo nou bann marse prensipal biznes pe ganny afekte.  I neseser ki Gouvernman i rankontre avek sa lendistri pou rod en semen devan.  Sa i ava enkli pou koz lo zot loan, reveni, travayer ek tou size enkyetan akoz apre COVID-19 lavi i bezwen kontinyen e sa lendistri i bezwen zwe son rol a plen.                                Mon eksprim mon solidarite spesyalman avek bann pti otelye Seselwa ki pe trimouse pour fer 2 bout  zwenn dan sa moman difisil.

Mr Speaker parey nou konnen nou annan plis ki 50mil travayer dan pei ki enkli omwen 23mil etranze ki vedir 27mil travayer seselwa ki dan lanplwa swa dan Gouvernman 15mil, enkli bann home carers e larestan 12mil i dan sekter prive. En kestyon ki kler se eski resours nou pei spesyalman Lasante, pou kapab fer provizyon pou donn servis sa bann travayer an ka keksoz i agrave?                                       Eski Gouvernman pa devret met sa size anba mikroskop e petet konsider restrikte mouvman sa kantite travayer konstriksyon, par egzanp?  Oubyen menm petet demande ki dan sa moman zot retourn se zot?

Eski zot pe koz avek lenn par egzanp ki annan plis travayer pour regarde si zot pour ed nou avek latizann dan ka ki sa lepidemi e afekte nou pei dan en fason vreman serye?       Mr Speaker, Gouvernman dan sa moman difisil i pour bezwen donn en lasirans tou travayer sirtou dan sekter prive lo kwa ki pou arive dan sa peryod omwen 3mwan ki devan nou.  Ki bann mekanizm ki pou ganny met an plas pour permet sa bann biznes prive pou gard otan travayer spesyalman travayer Seselwa e gard zot lenvestisman ek biznes ki montre nou lekonomi.  I en balans delika me fodre pa nou zis tande ki travayer pe fer redundant avan ki nou regard bann opsyon reel.                              La mon anvi ki sityasyon Air Seychelles i ganny adrese seryezman.  Pour le moman i annan gran mekontantman akoz ler travayer pe ganny demande pour ser sang, nou aprann ki gran delegasyon bann Sef pe al Lalmanny pou resevwar nouvo avyon e ki zot depans dan lotel 5 Zetwal i tre o. Silvouple letan nou ganny demande pou ser sang annou nou tou ser sang.

 

 

(APPLAUSE)

 

HON WAVEL RAMKALAWAN

Mr Speaker, nou’n war ki pou adres sa size ekonomik, bokou pei in fer sa atraver zot labank Santral ki’n fer desann lentere ki finalman i’n permet kou finansman pli ba pou overdraft  oubyen  loan e dan serten sirkonstans, loan ki ganny anvoye pour pli tar avek serten kondisyon.  Nou an en kriz e i pour neseser ki        Labank Santral Gouvernman ek bann labank i travay ansanm pou kapab met an plas en fasilite ki biznes prive a kapab kont lo la.         Si neseser fodre ki nou bann tarif i ganny enpoze pou anpes okenn labi lo sa bann biznes pa okenn lenstitisyon finansyel, byensir sa pou vin ek en kou e bann eksper i bezwen toudswit fer nou konn son lanpler pou ki ansanm avek sekter prive nou pou trouv en fason pou ki sa pei i kapab fer fas ek sa kou ki a ganny partaze san ki okenn antre nou i bezwen soufer plis ki lot.

 

(APPLAUSE)

 

HON WAVEL RAMKALAWAN

Dan tousala,            Mr Speaker Gouvernman i bezwen kapab asir serten servis i reste ouver a tou moman.  Sa pour enkli servis lasante, lopital ek farmasi;- servis por ek airport kot i konsern lenportasyon e mouvman marsandiz, laboutik kot i konsern manze e bezwen neseser, karbiran, servis dirzans ek lapolis, servis telefonn ek lenformasyon, servis banker e servis tanporer ek transpor an zeneral.  Sa ki nou’n war se bann pei ki’n adopte prekosyon maksimonm zot in ganny rezilta pozitiv ase vit.

Sa ki nou tou nou anvi vwar Mr Speaker se ki Sesel i konbat sa COVID-19 avek sertitid ek metod kalkile ki pour anmenn rezilta konkret kot tou fanmir i ganny dekwa pou li viv lo la e ki delo, elektrisite karbiran, manze ek latizann i reste a nou dispozisyon e pei i kontinyen annan lord ek stabilite.                 Sa pei i bezwen en direksyon kler e mon pe demann ek sa Gouvernman pou met kart lo latab pour ki nou tou nou bos ansanm pou ki nou reisir kont sa konba mondyal ki pe menas nou ozordi. Mr Speaker fodre ki bann diferan Minister i pran zot responsabilite pli serye e se sa ki nou ti anvi ki zot vin devan nou Lasanble ozordi pou adres lepep Seselwa.                       Par egzanp ki pe arive avek nou bann etidyan aletranze kot bokou Liniversite pe frenmen?            Ki plan letid konkret pou nou bann etidyan isi Sesel pandan sa peryod kot lekol i fermen?  E bann dimoun lo Praslin ek La Digue pe demande, akoz ki lekol Praslin ek La Digue osi pa frenmen pou fer menm keksoz e bann paran osi ek bann etidyan pe demande akoz ki bann lekol Pos-Segonder pa osi fermen pandan sa moman difisil?          Ki mannyer sistenm welfare pou marse pou bann ki pou perdi zot travay dan en resesyon posib?  E ki mezir sekirite an plis ki pou annan dan lapolis pou anpese ki krim i ogmante, vi ki nou bann vye dimoun zot dan en sityasyon pli a risk. Ki bann mezir ki pe ganny pran an relasyon avek bann Old People’s Home? E osi bann dimoun ki dan lakour pou asiste zot?

Mr Speaker i byen ki sa size sekirite alimanter i ganny adrese dan en fason pli konkret.  I pa sifizan pou dir dimoun zis pa panic e se la kot mon retourn lo mon premye pwen. Kominikasyon dan sa moman i pli enportan ki tou lezot keksoz, e se sa rezon ki mon ti’n osi demande dan mon Private Notice Question pou ki Minister Lagrikiltir e osi brans komers i vini pou adres nou.         Mr Speaker sa i en sityasyon ki pe arive partou dan lemonn, kot dimoun pe fer panic buying akoz personn pa konnen kan ki sa sityasyon pou amelyore.  Akoz apre tou keksoz i ankor pe deteryore e nou pa ankor ariv lo sa plato.  Mwan osi mon ti a kontan dir avek dimoun pou pa antre dan panic e aste en gran kantite.  En rezerv i toultan bon pou annan me pa egzazere, akoz ou frer ek ou ser ki napa sa kantite larzan i riske trouv li dan problenm. Lespri kominoter, solidarite ek lapartaz i devret vin bann valer ki enspir nou dan sa moman difisil.

Mr Speaker ozordi mon pe fer en lapel avek kouraz ek lasazes lepep Seselwa, sa i en moman grav dan nou listwar e bokou nou i annan lafreyer dan leker.  Nou per pou nou menm e osi pou nou bann paran ek zanfan.  Mon lapel pou zot se pour transform sa lafreyer dan en fason pozitiv ki pour gard nou solid dan sa moman difisil.       Annou osi kiltiv en sans disiplin dan tou sa ki nou fer. Akoz sa pou permet nou fer sa ki byen e anpes nou met a risk nou lekor e bann dimoun ki nou kontan, Lasanble Nasyonal an antye i debout lo kote tou Seselwa san okenn eksepsyon, se dan linite ki nou pou travers sa siklonn e se dan linite menm ki nou pou reisi re met nou pei lo en semen normalite. Mon swet tou Seselwa bon kouraz dan milye sa konba e mon dir nou en pep ki for e alors annou montre nou lafors ankor enn fwa.                                                 Mr Speaker, avan mon terminen pou tou manm piblik mon ti ava kontan lir sa Private Notice Question ki mon ti’n anmennen.

Kestyon ki mon ti pe demande se;                                                   ‘’Etandonnen ki nou pei Sesel parey lezot pei pe fer fas avek danze COVID-19 e ki son lenplikasyon i serye pou tou sekter nou lavi, dan lespri solidarite  e avek bi anmenn nou pep ansanm par ganny bon lenformasyon, eski sa bann Minister spesifik savedir;- Lasante Tourizm, Finans, Komers, Ledikasyon ek Lagrikiltir i kapab donn Lasanble dernyen mezir ki zot pe pran sityasyon aktyel zot analiz stratezi ek prozeksyon afen ki Seselwa i ava pli byen prepar zot pou okenn evantyalite.’’                          Mr Speaker mon bezwen dir avek tou regre ki mon vreman dezapwente, mon dezapwente ki Gouvernman i deside pou pa war sa kestyon enportan pou vin isi dan Lasanble pou ekout reprezantan zot pep;- reprezantan Lepep Seselwa. E an mezir ki nou lo nou kote nou anvi ekout nou pep pou nou kapab envok pwisans Bondye lo nou pep dan sa moman zot, zot pe regard li dan en fason diferan fason.                   Prezidan pou adres mezir sipor Vandredi, me ki mannyer i kapab fer sa si i pa ekout reprezantan Lepep –  nou ki bann reprezantan Lepep ki’n ganny elekte.  Alors Mr Speaker mon pou demann ou leskiz pou la ozordi nou pe demann ou leskiz pou tou nou bann Manm lo sa kote, akoz larestan biznes ki lo Order Paper osi napa okenn irzans ladan e Gouvernman pa pe trouv sa sityasyon COVID-19 ase irzan pou li vin dan Lasanble, alor nou pe sorti dan Lasanble! Mersi bokou.

 

 

    (LDS walks out)

 

MR SPEAKER

Bon, mon ti zis remersi Onorab Ramkalawan pou zon Ladres.  An vi desizyon ki LDS pe pran nou pou napa en quorum pou nou kapab kontinyen.  E avek sa mon ti a kontan remersi tou bann Manm ki’n vini la bomaten, remersi tou bann manm piblik ki a lekout. E osi tou  mon ti a kontan remersi Minis pou Finans ek son delegasyon ki’n deza prezan parmi nou kot nou ti pou kontinyen lezot travay ki lo nou Order Paper.  E mon ava prezant en leskiz from the Chair ki nou pa pou kapab kontinyen nou sitting ozordi.  E mon ti a kontan enform bann Manm ABC ki toudswit nou ava rankontre dan Speaker’s Conference Room pour nou regard nou travay pour nou regard nou travay pour sa 2 zour.

 

 

HON CHARLES DE COMMARMOND

Pa vo lapenn nou pou vini Mr Speaker.  I regretan sa sityasyon.  Me pa vo lapenn, nou pou vini nou osi.

 

 

 

MR SPEAKER

Bon mon deza napa en …

 

 

Off-Mic)

 

MR SPEAKER

Dakor.   Ava fini avan mon adjourn. Mon deza napa en quorum, mon pa kapab adres Lasanble.

 

HON CHARLES DE COMMARMOND

(Off-Mic)

(Ki ou pe debout, ale! Ou pe debout kwa?  Ale!)

 

 

MR SPEAKER

I ok Onorab Commarmond.

 

(Off-Mic)

 

 

HON CHARLES DE COMMARMOND

Mwan ki annan laparol, ok?  Nou pou adjourn Lasanble an vi ki nou napa en quorum e nou pa kapab kontinyen nou travay.  E parey mon’n dir mon ava demann bann Manm ABC pou nou rankontre toudswit dan Speaker’s Conference Room e si ABC osi tou pa prezan, then mwan ki pou bezwen pran en desizyon final, lo ki mannyer nou pou travay pandan sa semenn.

Lasanble i adjourn ziska notis ki ava sorti kot Lofis Speaker kan nou pou tre zwenn e ki travay ki nou pe pran.  E ankor enn fwa mon prezant leskiz avek Minis ek son delegasyon e osi tou Manm piblik deor ki pe ekout travay Lasanble.

 

(ADJOURNMENT)