::
Home » Verbatim » 2019 » Verbatim Thursday 7th November, 2019

Verbatim Thursday 7th November, 2019

NATIONAL ASSEMBLY OF SEYCHELLES

 Thursday 7th November, 2019

The Assembly met at 9am

National Anthem

Moment of Reflection

Mr Speaker in the Chair

 

MR SPEAKER

Bonzour tou Manm Onorab.  E bonzour tou dimoun ki a lekout e pe swiv travay Lasanble Nasyonal.   Travay ki repons ki pou pran se repons lo prezantasyon Bidze 2020. Ozordi nou 3enm zour ki nou pe pran repons e mon swete nou ava kapab fini avek sa.  E parey mon’n anonse apre ozordi nou pou adjourn e nou pou retournen Lendi bomaten e kot Minis I avan donn son repons – son reaksyon bann klarifikasyon and son on e apre sa toudswit nou pou komans lo envit bann heads dapre schedule ki nou’n travay lo la yer, pou nou kapab komans nou travay kot nou pou regarde spesifikman bann diferan heads avek zot diferan Bidze.  Zis avan mon demann parliamentary reporter pou apel Minis, mon ti a kontan osi tou zis eksprim en pti pe mon lapresyasyon avek bann servis dirzans yer swar, kot ti annan en gro dife Beau Bel – dan vilaz Beau Bel Bel Ombre ki’n detri 2 lakaz obor kanmarad e mon remersi – I annan enn de Manm ki’n an kontak avek mwan – mon remersi zot pou zot konsern.  Bomaten nou swete ki bann Lotorite konsernen I ava ede pou sa bann dimoun ki’n viktim sa dife yer swar a kapab ganny en lozman pli konfortab;- e osi  kapab pli pros avek zot landrwa travay.  An vi ki yer swar zot in ganny mete dan bann landrwa tanporer en pe an deor lavil.

E de la osi tou mon ti a kontan remersye tou bann vwazen ki’n kapab reakte e ankor I montre poudir dan nou Seselwa I annan keksoz ki bon. Ler maler i arive nou tou nou   retourn dan sa lespri ‘’bon vwazinaz’’ e nou tou nou met lanmen lo keksoz kot nou kapab ede pou evite ki maler i  vin pli grav.

Avek sa 2 pti mo mon ti ava kontan prezan demann parliamentary reporter pou apel Minis avek son lekip.  Petet zis mon ti kontan remersi le 2 Lotorite Administrasyon Distrik – DA Beau Vallon Ms Clarisse e DA Bel Ombre Ms Louise pou zot travay eksepsyonnel yer swar;- kot zot in kapab kontakte tou bann Lotorite e fer le neseser pou ki sa 2 fanmir in kapab ganny serten akomodasyon e serten led yer swar.  Travay pa fini la.   Zot pe kontinyen la bomaten e mon swet zot tou de bon ki tou keksoz I ava mars byen avek bann diferan Lotorite bomaten.

Bon mon ti a kontan dir bonzour e welcome Maurice Loustau-Lalanne dan nou Lasanble – Minis ki responsab pour  Finans, Komers Lenvestisman e Planning Economic  e Minis i ganny asiste ankor  bomaten par son  Special Advisor Sitna Cesar e Deputy Comptroller General Ms Astride Tamatave.  Minister avek ou 2 zofisye ankor enn fwa bonzour e welcome dan Lasanble Nasyonal.

Parey mon’n dir ozordi nou swete ki nou a kapab fini avek reaksyon lo  ou diskour lo Bidze e apre lundi matin nou ava donn ou Right of Reply avan nou bouz lo bann diferan headsSo nou ava kontinyen la bomaten e premye lo mon lalis mon annan onorab Noline Sophola.  Onorab laparol I pou ou.

 

MR SPEAKER

Mersi Onorab. Mon a pas laparol avek Onorab Noline Sophola.  Onorab laparol i pou ou.

 

HON NOLINE SOPHOLA

Mersi e bonzour Mr Speaker,

Bonzour Minis ek ou delegasyon, tou Manm Onorab,  zabitan La Digue ek Zil Pros e tou dimoun  ki  pe ekout deliberasyon lo Bidze’2020!  Mr Speaker, en lannen ankor in arive kot tou popilasyon i anvi aprofondir zot lo  ki mannyer ki larzan pou ganny distribye pour lannen 2020 e sirtou lafason ki lekonomi pei pou fonksyonnen.

Lannen 2019, anba tenm ‘’ Stabilite e Progresyon ‘’ in annan bokou keksoz ki’n arive.  Sa Gouvernman ki o pouvwar in toultan travay avek en lespri pour anmenn sa ki meyer  pour nou pti pei. Pandan moman difisil in al rode pour fasilit lavi son pep e kot in annan in asire  ki in partaz ekitableman  parmi bann diferan Minister pour ki pei i kontinyen reste stab e progrese.

‘’ Rezilta ekitab-Prosperite partaz ‘’ i tenm pour lannen 2020.  En tenm ki’n ganny byen kalkile akoz tou larises pei i bezwen ganny  partaze dan en bon fason pour ki pei i kapab  prospere.  Malgre ki i annan parmi nou ki pa pe apresye e pa pe kapab  rekonnet tou sa zefor,  (parey sa Onorab ki ti pran laparol dernyen yer, i ti’n konpletman dereye e perdi direksyon)  I  pe fer nou krwar  ki tou keksoz i mal dan sa Bidze  ki napa naryen ki’n gannyen pou son distrik pandan 2019. Me  se zot menm ki  pe pli byen zouir e benefisye. Parfwa se pirman lakanmizri ki fer zot reazir dan sa mannyer.

 

(APPLAUSE)

 

HON NOLINE SOPHOLA

Mr Speaker, tou fason travay Lopozisyon se pour opoze. Opoz tou nide  ki  Gouvernman i prezante.  Me zot pa zanmen  kapab vin avek en solisyon.

Mr Speaker, avan ki mon kontinyen, mon anvi montre mon lapresyasyon pour sa bon travay ki Minis Finans ek son lekip in fer.  Mon konnen in pa’n en latas fasil, me mon asire ki zot in fer en travay lekip merveye  pour desarz byen zot responsabilite, par prezant nou avek sa dokiman presye.  Kritik pou annan, me pran zot  pozitivman.

Mr Speaker, pandan lannen 2019, tou pep Seselwa in kapab remarke ki bokou travay konsiltativ in ganny organize, sa ti ek lespri pour ganny pwennvi bann diferan sekter e lorganizasyon piblik e prive osi byen ki endividi.  Tou dimoun an zeneral  ti ganny konsilte dan bann desizyon ki’n  ganny propoze e pran pour byennet  pei.  Si nou fran ek nou lekor, nou pou kapab dir i vre sa bout lenformasyon mon ti koz lo la ek tel Minis oubyen avek Prezidan li menm e la ozordi i dan Bidze.

En Legzanp, Mr Speaker Lasosyasyon Biznes Praslin  ek La Digue, zot ti rankontre  pour premye fwa State House pour diskite avek Prezidan Danny Rollen Faure.  Sirman i bezwen annan en pwen diskisyon ki’n aparet dan Bidze. Sa pa i apel konsiltasyon?

Mr Speaker, personn pa’n ganny kit deryer dan sa Bidze akoz i enn ki enkliziv. Sa i lafason ki sa Gouvernman O pouvwar i travay, e i pe kontinyen travay.  I pa  pran desizyon li tousel me plito adopte en lapros konsiltativ.

Mr Speaker, lekonomi en pei i frazil, dan lafason ki nou zer li.  In pa’n fasil pou nou pei sa lannen, me avek bokou perseverans e determinasyon  nou Gouvernman in arive tenir son pep byen for dan tou domenn e se sa ki i pou kontinyelman fer, se tenir FOR.

Mr Speaker, en sonm R3bilyon in ganny mete pour  reminerasyon ek saler. Travayer i delivre, alor zot bezwen  ganny  byen rekonpanse.  Bann diferan Scheme  osi in ganny revize pour 2020.

Mr Speaker, Lazans Nasyonal pour devlopman Resours Imen in ganny en sonm R205.2milyon   pour ede prodwir nou bann travayer kalifye e kreatif, ki pou ede ogmant prodiktivite travay ek krwasans ekonomik.  Sa Lazans pou travay an kolaborasyon avek Minister Ledikasyon ek Resours Imen osi avek Departman Lanplwa.  Nou parfwa donn lantrennman nou bann zenn san get bezwen pei e  apre nou war nou bann zenn san en lanplwa.  Sa  lapros in ganny servi  – lapros  entegre akoz bann Minister pa kapab travay en izolasyon. Mon krwar   sa  en bon desizyon.

Mr Speaker, sa Gouvernman i envestir bokou dan nou bann zenn Seselwa e i annan ki sezi tre byen sa bann loportinite.  Zis pour nonmen an 2019,  nou’n rikord 199 graduates ki’n sorti dan liniversite swa Sesel ou aletranze.  Pa fini la ankor i annan en nonm 238 ki pe terminen, e  an 2020 i ekspekte annan 358 labours dan diferan filyer. Mr Speaker sa pa bann bon nouvel ki sa Bidze pe prezante?

Sa Gouvernman i krwar dan donn ledikasyon son pep pa zis bann zenn, me osi tou sa ki santi ki zot  kalifye  e anvi avans devan  loportinite i la.  Sezi li.

E anliny, avek inovasyon dan ledikasyon en nouvo lekol Teknik e Vokasyonnel an servan kadreman partenarya Piblik e Prive  pour konmanse an 2020. Plizyer edikater, lontan pe dir ki nou pa kapab met bann etidyan dan filyer akademik ek teknikal ansanm akoz zot napa menm lentere. Gouvernman in ekoute e in azir.

Mr Speaker, nou pe konmans en nouvo lannen avek en nouvo Bidze, Mon demann minister ledikasyon pou adres bann defi ki bann ansennyan Praslin ek La Digue pe rankontre lo nivo deplasman.

Mr Speaker, later ek lakaz in touzour en topik dominan e sansib pour tou popilasyon, akoz tou dimoun i bezwen en lozman konvenab e nou Gouvernman ti promet ki i ti pou konstrir 24 lakaz dan 24 mwan.  I pe delivre.  Nou Digwa nou sanse, nou’n benefisye dan sa Scheme  24/24. En promes akonpli par nou Gouvernman pour nou Digwa. Nou remersye nou Gouvernman pou fer  rev sa  23 fanmir vin en realite  le 10  Oktob sa lannen.

 

(APPLAUSE)

 

HON NOLINE SOPHOLA

Ozordi, zot pe kapab viv konfortab dan zot lakaz.  En bann lakaz ki’n  ganny tre byen design ;- ase lespas anndan e osi byen ki deor.  Eski sa pa en Gouvernman ki annan son pep  Seselwa aker?  Eski i pa en Gouvernman ki pe delivre?  Eski sa pa en Gouvernman ki bezwen reste o pouvwar an 2020?

 

(APPLAUSE)

 

HON NOLINE SOPHOLA

Mr Speaker, Gouvernman i toultan fer tou posib pour kontinyen travay pour amelyor sistenm lasante, pour ki i a kapab vin pli pre avek standar enternasyonal. En sonm R. 1.12bilyon in ganny mete.                             Lefe ki bann sant lasante dan Sesel i satelit, vedir i trouve dan diferan distrik, sa proze sistenm lenformasyon entegre pour osi ede  dan ka emergency,  kot bann  lenformasyon  i enportan i neseser pou sov lavi en pasyan e i pou fasilit  travay bann staff.

Mr Speaker, sa sistenm pou, osi vreman benefisye tou pasyan Praslin ek La Digue kot souvan zot bezwen deplase pou vin Mae.

Mr Speaker, nou bann fitir manman lo Praslin ek La Digue zot pann ganny oubliye. Pour  premye fwa Gouvernman in fer en pa an avan pour ed zot dan deplasman  ler zot  ariv  34 semenn dan zot lansentman, si zot bezwen fer sa traze. I enportan ki tou dimoun i konnen ki in toultan en pratik pour bann manman vin delivre Mahe, pour zot premye zanfan. Zot pou ganny en allowance fiks R1500 pour ed zot dan zot depans. I annan ki’n dir i pa ase.  Me sa i selman en konmansman.  Parey granmoun i dir konmans ptipti apre zot a grosi.

Mr Speaker, depi ki Bidze in prezante, monn ganny plizyer call ek dimoun lo La Digue, Praslin, Mahe e menm lo Silwet ki ‘n montre zot konsern lo sa size “Revizyon dan allowance personnel pour lapos ek kourye ki san taks.”

Mr Speaker, sa allowance  personnel R3mil pou vin R1500, i devret ganny revize. Bokou dimoun i fer sa pour bezwen personnel, me i domaz ki i annan in profite pour fer biznes. Me nou pa kapab kondann tou dimoun.

Mr Speaker, mon’n ed plizyer paran, pou fer vini liv ki zot zanfan i bezwen o nivo segonder ek pos-segonder.  Swa sa bann liv napa lo market ou zot tro ser.  I annan ki fer vini medikaman.  E zot ganny li byen vitman.   Mr Speaker, tax i merit aplikab lo pri sa komodite ki vin par lapos selman, vedir tir pri shipping ek handling lo sa total ki kliyan pe ganny takse.

Mr Speaker, dan sa monn teknolozi ek inovasyon, nou kapab develop en progranm efikas pour kontrol sa size lenportasyon san taks.  Nou pou kapab ranmas lenformasyon ki pou permet lotorite konnen lekel ki pe fer biznes ou non.  Mon konnen ki i kapab ganny fer akoz tou  fasilite i la, avek konviksyon mon dir ki  nou Seselwa i entelizan pour fer sa travay. Nou pa bezwen fer dimoun vini.

Legzanp: Zis get lekip Minister Finans.   Zis get sa lekip ki la ozordi malgre ki i annan zis 2 ou 3 zot.   I en lekip pirman Seselwa.  Zot in fer en tre bon travay.  Alor  donn nou Seselwa  sa loportinite  pou devlop sa progranm  pou regilariz sa problenm.  Mr Speaker, mon demande ki Gouvernman i revwar lenplimantasyon sa size allowance personnel.

Mr Speaker, lo kote taks, mon krwar ki  tou dimoun ki fer biznes san eksepsyon i devret pe pey taks.  Ankor annan progranm. Annan   ase resours imen ki pou kapab dekouver sa bann dimoun ki pa pe deklar zot taks.  E tou taks a ganny anmanse e pei a pli prospere.

Mr Speaker, koupir Kouran PUC ki ti arive  lo La Digue pandan milye  Out ek Septanm sa lannen, ti annan en gro lenpak negativ lo tou popilasyon, konmansman par  en senp lakour ziska dan sekter biznes.  Pou evite, ki sa lenteripsyon pa ariv ankor, en sonm R21.7milyon in ganny mete pour ganny en sistenm zenerater ki pou standby lo La Digue. Konsernan, sistenm zenerater, mon demann Gouvernman pou rod en meyer lokasyon pou plas li. Son lokasyon pa apropriye.  Akoz la i dan en landrwa rezidansyel e biznes an menm tan i defigir nou  zoli pti zil.

An plis ki sa,  nou Gouvernman pe rod en lot loan lavaler R143milyon pou servi pour enstal en trwazyenm kab, ki ler enn pa pe fonksyonnen, sa de lot i a kapab donn kouran sa de zil.

Mr Speaker, mon ti demande ki La Digue i ganny en standby kab.  E la nou pou gannyen.  Sa i montre ki mon anmenn  demann e dezir Digwa devan Gouvernman.

Mr Speaker, transpor elektrik pou annan en gran lenpak pozitiv lo nou lanvironnman, e se sa direksyon ki Sesel i anvi ale.  Mr Mr Speaker, mon pe demande ki pandan ki sa size pe ganny diskite, annou mazinen ki La Digue i en landrwa plato e i souvan inonde. Mon  demande ki Gouvernman i konmans prepar en Bidze pour reparasyon  tou semen  an kontan bann segonder osi akoz  la osi transpor i al  fer sa travay.

Mr Speaker, mon tre konsernen par sa nide transpor elektrik lo kote La Digue, akoz an ce moman bann Digwa pe fer fas avek problenm transpor elektrik ek hybrid akoz sa i en Polisi ki’n ganny mete lo La Digue.

Tou transpor ki rantre La Digue i bezwen pou fer biznes, e si zot pe fer taksi, sa bann kalite transpor i tro pti. Ler ou pran  enn de pasaze napa plas pou met bagaz.  I  pa apropriye akoz lafason ki taksi La Digue i fonksyonnen lo sa zil. Parkont si i ase gran, i tro ba pou roule sirtou dan semen segonder. Transpor i ganny andomaze vitman. E en zenn ki pran en loan i pran li 1an  i li war  pe bezwen met son transpor dan garaz i pa rantab pou zot  fer biznes.   Mr Speaker, fodre ki sa size i ganny revwar pour benefis tou dimoun ki reste lo sa trwa zil prensipal. Mahe, Praslin ek La Digue.

Mr Speaker, sak fwa Bidze i prezante, mon santi mwan oblize pou koz lo sa size, e sa i pa lot ki kou lavi lo La Digue.

Mr Speaker, granmoun i dir, fodre ki ou viv dan sa sityasyon pour ou kapab koz lo la e konn son vre douler.  Akoz i vreman fermal  ler ki nou pe ganny menm saler lafen di-mwan, me nou depans lo zil    i depans doub ki pou lezot an term kou.

Mr Speaker, mon’n demann konsesyon fuel pour bato kargo, sa pou ede dan kou transportasyon marsandiz.  Si SFA pe fer pou peser, akoz ki nou pa servi menm model pour bato kargo ki desarz La Digue?  Si sa pa kapab me omwen annou sey fer letid pou nou ed Digwa silvouple.  Mon donn en legzanp.

Mon bezwen coral fill lo La Digue, sa transportasyon bato, i kout  bokou plis ki pri sa coral fill.  Mr. Spiker, petet, la Minis a konpran pli byen e akord mon demann.

Mr Speaker, mon pa pou kapab manke pou koz lo  sa bon  travay ki APDAR pe fer lo La Digue Mr Speaker,pour le moman nou annan 50 kliyan ki pe servi sa fasilite dan sant La Digue.  Me fodre note pa tou sa 50 ki Digwa.  Malgre ki landrwa i pti me rezilta i satisfezan.

Bann kliyan i ganny servis counseling, zot ganny methadone, e menm ganny plasman dan landrwa travay.

Mr Speaker, vol ek krim in redwir lo sa zil, akoz tou sa bann kliyan i travay zournalye ou a plen tan.   Mazorite paran ki zot zanfan i lo sa progranm, konmela zot kontan akoz zot war sanzman dan zot zanfan.   Zot kapab viv en lot lavi.   An plis zot donn tou zot sipor kot sa sant kan demann i prezante.

Mr Speaker, fodre ki parfwa nou pa zis kritike.  Me met nou dan soulye  sa bann paran ki annan zanfan ki’n viktim ka drog. Paran i soufer. Nou tou ki konsernen nou soufer.  Sa i en rezon ki mon pou toultan  donn tou mon siport sa bann kliyan APDAR e osi mon siport total  pour sa Bidze.

Mr Speaker, mon felisit lofis Sekreter D’Eta e Lazans APDAR pour zot bon travay.

 

(APPLAUSE)

 

HON NOLINE SOPHOLA

La mon fyer pou dir ki en zenn Digwa ki‘n train konman psikolog pe al  byento travay avek nou bann   kliyan lo La Digue. Felisitasyon.

 

(APPLAUSE)

 

HON NOLINE SOPHOLA

Se sa bann loportinite  travay ki mon pe demande pou anmenn La Digue pour ki nou bann profesyonnel a donn lanmen  kontribye dan devlopman  lo nou zil.  Mr Speaker, fodre ki pep Seselwa i konnen ki UNODC in felisit APDAR pou son bon achievement pour sa pti peryod letan son legzistans. Si lorganizasyon enternasyonal in remark sa, akoz ki nou ki la Sesel nou pa kapab war en keksoz ki bon dan sa travay?

 

 

(APPLAUSE)

 

HON NOLINE SOPHOLA

Mr Speaker, si i annan nou ki anvi war sa Lazans fermen, ou serten travayer kite annou mazin de fwa avan ki nou fer li. Pa les nou problenm personnel avegle nou.   Mr Speaker, mon oule ki tou Digwa i konnen e apresye ki nou osi nou’n benefisye atraver bann proze; – bann proze ki mon’n demande, ki Ladministrasyon Distrik in demande pour benefis nou zil.

Mr Speaker, mon pa pou zanmen aret demande ziska ki mon demann i vin en realite. Akoz mwan ki’n demann bann proze, e mon pou asire ki tou sa bann proze i pou bezwen konmanse.  Sa ki pa’n demande pa pou konn nanryen ladan, senpleman zis rabase.  Si mon demann, i  vin  parey en litani dan sa Lasanble, mon a fer li pour benefis bann Digwa. Parey dikton i dir ‘’Plutot tard que j’amais.  Nou dan US nou annan lespwar e nou lespwar pou vin larealite.

 

 Digwa la nou lalis proze.

  • Rekonstriksyon kordgard
  • Rekonstriksyon lopital
  • Rekonstriksyon lekol

Fodre note ki sa pou  lekol pou ganny fer par faz. Premye preparasyon in konmanse.  Sa i  en gran achievement.  Sa  i sa trwa proze ki mon’n ganny dir endirekteman i en  litani dan sa Lasanble. Pa LDS ki pou konsevwar sa trwa proze me US ki pou konmanse, e osi war son finisyon.

 

(APPLAUSE)

 

HON NOLINE SOPHOLA

Les labous koze.  Mr Speaker,

sa Onorab LDS i ti dir yer ki zot a kapab fer sa travay  lo lopital dan 1an, son nivo analiz pe konmans bite.  Mwan petet  dir ki i pou vin dan sa lopital  ki’n konstri par US konman en pasyan.

 

(APPLAUSE)

 

HON NOLINE SOPHOLA

Semen : i dan proze sa.

  • Koko Ibrid
  • Pension Michel
  • Vanilla Road
  • Proze resirfas semen beton ki enkli dezyenm faz semen Boule De Neige.

Mr Speaker, dezyenm faz semen  Boule de Neige i en priyorite.  E mon dir i en priyorite.  Fodre ed sa bann fanmir akoz zot napa senmen pandan letan lapli pou ariv kot zot.  Digwa, si sa lannen zot semen, ou proze kot zot été bann ganny met dan sa Bidze, pa trakase, nou pa kapab fer tou, me zot pou dan 2021, akoz se nou US ki pou ankor pe diriz pei !

 

(APPLAUSE)

 

HON NOLINE SOPHOLA

Mr Speaker,  en alokasyon R. 109.2milyon in ganny mete pour Lotorite Por, pour mentenir son stratezi pour envestir dan lenfrastriktir ek lekipman por pour 2020.  Sa proze re-alinyman miray lo lasose La Digue par 150met,  i pou en gran benefis pour Digwa, akoz i pou ede redwir konzesyon ki nou pe rankontre lo lasose.  Apre ki sa  re-alinyman in terminen, tou bato kargo pou koste laba pour fer sa aktivite.  E sa pou fer ki bato pasaze I ava annan plis lespas pour kapab koste pli pre avek langar e sa a fer ki bann pasaze a pli an sekirite e osi redwir tou konfli ki nou pe rankontre konmela.

Mr Speaker, mon demande, ki nou bezwen revwar prosedir tender, akoz se la ki bokou retar i arive avek proze.  Si i  annan mankman   resours imen, finans ou lezot, annou adres zot. Fodre ki nou bann dimoun i aret koze ki retar i kot

tender.

Mr Speaker,  mon dir Digwa, nou’ ganny bokou proze dan sa Bidze.  Mon fyer.   Akoz? Zot konnen akoz? Akoz zot in byen fer zot zwa dan eleksyon.

 

(APPLAUSE)

 

HON NOLINE SOPHOLA

Sa ki mon pe demann zot pou fer, kontinyen travay  pour US. Akoz se sa parti ki pou diriz pei an 2020.

 

(APPLAUSE)

 

HON NOLINE SOPHOLA

Mr Speaker, avek sa plizyer proze konstriksyon lo La Digue   ki’n  ganny anonse dan Bidze  pour lannen prosenn e osi azout avek  bann konstriksyon  ki deza an progre,  parey sewage, sa pou vreman fer en leksplozyon masiv dan domenn konstriksyon. E byensir plis prosperite e plis krwasans ekonomik. Me sa logmantasyon pou natirelman ogmant bann litilite parey delo ek elektrisite lo zil.  Fodre annan en bon plan zesyon lo sa laliny

Mr Speaker,  devlopman i enportan, fodre ki nou fer li dan en fason byen kordinen  pou minimiz otan posib bann lenpak negativ  parey, lo Sekter Tourizm, ki enn parmi nou pilye lekonomi, e  pandan ki sa bann konstriksyon pe fer mon pa ti a kontan ki mon tann bokou kritik sorti kot bann Lazans Tourizm e osi lo  semen pandan ki bann peak hours ki bato ki pe arive ki plito ankonbran.  E pou fer ki sa arive ki travay I mars byen dan lord mon pou inisye en Komite ki pou konpran bann Digwa ek enn de expert lo Mahe pou asire ki I atann sa bon konprenezon e kordinasyon ant tou bann kontrakter.

Mr Speaker, e la osi i  en rezon pou mwan dir annou revwar sa ki nou ‘n demande pri lavi annou regard bann pri konstriksyon pandan ki  nou bann  batiman pe fer – anyway mon pa konnen si tender in fini, mon krwar si zot in donn zot pri me selman annou revwar pou lezot ki a vini a lavenir.

Mr Speaker, letan pa permet pou  mwan koz lo tou bann sekter, mon konnen ki bann zenn,  biznesmenn,  peser, fermye e lezot ankor ti a kontan tande ki sa Bidze in anmenn pour zot. Pa trakase, zot tou zot ladan.

Mr Speaker,  me mon pe remind Minis ki ti annan en demann par peser Digwa pour fouy 2 lapas pour fasilit zot bato ler i antre ek sorti.  Sa pa’n ganny adrese dan Bidze.  Mr Speaker, mon pou bezwen pran sa pwen dan Staz Komite.

Mr Speaker pour terminen, mon dir mersi tou zabitan, Inner Islands ki’n donn mwan  zot sipor pandan lannen 2019 pour fer nou zil bouze. Mon touzour la pour zot. Mon promet zot ki mon pou kontinyen lager lebra kase pour  plis devlopman  nou pti  zil.

Mr Speaker, tou sa bann  devlopman  in vin realite pour pep Seselwa gras a nou Prezidan  Danny Faure.

 

(APPLAUSE)

 

HON NOLINE SOPHOLA

En zonm kapab.  En zonm determinen ki travay dan linite pour tou dimoun.   Se li sa  sel zonm ki pou kapab anmenn nou  Sesel dan bon direksyon.

  1. Paran se sa zonm ki pou donn en meyer lavenir nou zanfan.
  2. Nou bann zenn, e bann profesyonnel pran tou sa ki bon otour zot, relir sa Bidze e sezi tou loportinite ki annan ladan. Se li sa zonm ki pou ofer zot en meyer fitir.
  3. Nou bann dimoun aze, se li sa zonm ki annan zot aker.

Mr Speaker, parfwa   nou dir ki zanfan i viv dan lemonn fer krwar. E mwan mon krwar se sa egzakteman ki LDS pe viv ladan.  So

 

 

(APPLAUSE)

 

HON NOLINE SOPHOLA

esey viv  dan larealite!  Mwan mon dir Prezidan LDS 2020 State House?   Non!

 

(APPLAUSE)

 

HON NOLINE SOPHOLA

En Minis LDS ki la dan sa Lasanble ki pou prezant Bidze  2020?  Non!

 

(APPLAUSE)

 

HON NOLINE SOPHOLA

En Minis LDS ki la dan sa Lasanble ki  pou Zafer Etranzer?   Non!

 

(APPLAUSE)

 

HON NOLINE SOPHOLA

Alor si tou i Non –   lekel? Repons i senp comme ‘’bonjour,’’

se pa lot ki Mr Danny Rollen Faure ki pou kontinyen asiz State House lannen 2020!  E Sesel  i pou US 2020!  Mersi Mr Speaker.

 

(APPLAUSE)

 

MR SPEAKER

Mersi Onorab Sophola.  Mon ava pas laparol avek Onorab Francois Adelaide.

 

HON FRANCOIS ADELAIDE

Mersi Mr Speaker.  Bonzour Mr Speaker, bonzour Minis ek ou delegasyon.  Bonzour tou bann Manm Onorab.   Mr Speaker, lannen 2016 ti premye fwa kot mwan koman MNA, ti ganny demande pour pran en desizyon lo lapar bann zabitan Baie Lazare e Seselwa an zeneral lo propozisyon Bidze Gouvernman pour lannen 2017.  Sirman lepep Seselwa I a mazin sa levennman tre byen, akoz LDS avek en mazorite dan lasanble ti pour la premye fwa montre Gouvernman Parti Lepep ki ozordi I US ki dezormen tou Departman ki’n ganny larzan sorti anba Consolidated Fund pour bezwen eksplik an detay ki mannyer zot ti’n servi zot alokasyon dan lannen 2016 e ki nou espekte de zot pour lannen 2017.

Sa letan ki Bidze pei ti ganny aprouve dan 2erdtan ti’n fini ganny met dan bin listwar e malgre bokou bann mirmirasyon, nou ti kapab termin sa legzersis e bokou bann anomaly ti ganny deal avek. Me larealite sete ankor bokou travay ti pour bezwen ganny fer pour ki bann abizer I aret abiz lo lasyer Seselwa parey oparavan.

 

(APPLAUSE)

 

HON FRANCOIS ADELAIDE

Nou pa’n zanmen bes lebra e nou napa nide bes lebra ziska ler ki Seselwa I satisfe ki nou larzan pe ganny byen depanse e Seselwa pe vwar vre rezilta zot travay dir.

Sa Bidze ki Minis Finans in anmenn dan sa Lasanble, se byensir en Kontra ki Gouvernman in prezant avek lepep Seselwa a traver lasanble Nasyonal, vi ki se nou ki nou reprezantan lepep Seselwa nou bezwen fer sir ki zot larzan I ganny depanse korekteman.

Mon fyer pour mwan dir ki pep Baie Lazare in osi kontribye dan sa plis ki 9bilyon ki’n ganny prezante koman Bidze Nasyonal, savedir nou osi nou annan par ladan.

Mon oule remersye premyerman Minis pour ou prezantasyon menm si I annan bokou pwen kestyon, swa  pwen lesklamasyon  dan latet, i avek  leklersisman ki mon pour demande sirman I pour ed mwan konpran akoz ki sa Bidze in ganny prezante koumsa.

Kontrerman avek sa ki pe ganny dir ki LDS pe kestyonn abilite e konpetans bann zofisye Minister Finans e tou bann profesyonnel Seselwa, mon oule met lo rikord Lasanble nasyonal ki laspirasyon LDS, se vwar bann profesyonnel Seselwa epanouir e travay dan pli bon kondisyon avek tou sipor neseser, ki pour permet nou pei avanse e nou pep benefisye o maximum pour ki sesel I retourn sa paradi ki nou’n toultan devret ete.

Nou krwar dan en sosyete kot Lalwa I Siprenm;- kot Seselwa I konnen fer e osi konn konsekans pour son aksyon.

Nou krwar ki atraver sa kalite gouvernans, tou dimoun pour bezwen responsab pour son aksyon.  E si ou en profesyonnel swa en teknokrat, ou pou bezwen deliver selon lekspektasyon kot tou ou desizyon I ava baze lo konpetans, lefikasite, bonn gouvernans, rann kont e latransparans. Pa parey sa prensip Parti Lepep/ US ki kontinyelman kasyet lenformasyon e sak fwa zot dir ou en keksoz, zot fer lekontrer.

Mr Speaker, plis ki 40 an nou annan enn menm parti ki’n fer Bidze pour nou pei. Zot menm zot ki ti pas Bidze dan 2erdtan oparavan san bezwen depouye parey nou fer konmela.

Ou kapab konpran akoz parfwa bann manm Parti US zot ankoler ler nou demann bann kestyon.

Sa ki rapel I konn tre byen mannyer ki prezantasyon Bidze ti ganny fer dan 5enm Lasanble.   Bidze ti ganny lir par Minis Finans, bann Manm ti dir enn de mo;- tel parey sa Bidze i bon  – fer en de bann politik bonmarse zis parey ou’n tande lo lot kote latab.   Menm formil zis saboul Lopozisyon apre ler zot in byen saboule Second Reading ti ganny fer, ti napa Staz komite e finalman Bidze ti ganny approve par en mazorite absoli.   Travay pou lannen ti termin lanmenm apre sa kot zot ti ale mon pa tro konnen.

Apre 40an leksperyans dan fer Bidze, eski ou koman en Seselwa ou senserman dakor ki ou larzan in e pe ganny depanse byen? E ou lavi pe amelyore?  Si wi tanmye pou ou. Me mon konnen ki mazorite Seselwa I ankor pe ganny problem pour fer de bout zwenn.  Mon trouv sa fenomenn tou le zour e mon senpatiz avek zot, me mwan anvi dir ki gran met pa pour abandonn nou,

Sa nimero 40 i en sinonim pour bokou levennman dan listwar bann kretyen.  Mon mesaz pour lepep Seselwa se pa zanmen les tonbe. Kit zot lespwar vivan e priye akoz Seselwa osi I en pep beni.   Me bann ki ansarz pe fer nou krwar ki nou bezwen ser sang, fer plis sakrifis, pas tou sa bann martir pour nou vreman arive me kan o fet larealite I lenvers.

Nou deza dan en paradi Mr Speaker me fodre nou sas sa bann demon ki pe fer nou paradi vin en lanfer. Nou’n tann bann MNA lot kote latab demande ki 15 lo 10 in anmennen e ki mannyer in ede pou met larzan dan pos Seselwa?

Mr Speaker, 15 lo 10 in fer ki Mr Michel in kit pouvwar avek son tim Irlandais ki ti pe fer gro, gro sonm larzan disparet.

 

(APPLAUSE)

 

HON FRANCOIS ADELAIDE

E sa ti fer ki en lot msye ki ti pe ganny groomed pou vin Prezidan son plan ti ganny enteronpe e Mr Faure ti vin Prezidan ‘‘pas baton.’

 

(APPLAUSE)

 

HON FRANCOIS ADELAIDE

15 lo 10 atraver FPAC in fer ki L’Union  Estate in rikord en logmantasyon konsiderab dan zot reveni pou zis zot premye lannen legzistans.

 

(APPLAUSE)

 

HON FRANCOIS ADELAIDE  Sa anba mazorite LDS dan Lasanble.  15 lo 10 in fer ki ozordi I annan en Onorab in delibere e san okenn lafreyer I pe defann son zabitan menm si son prop parti pe viktimiz li akoz in aksepte ki sel fason pou avans devan se rien ki laverite.  Menm ki mon’n tann zot yer dir be what you what to be akoz zot pa les sa Onorab,’’ be what he wants to be?’’

 

(APPLAUSE)

 

HON FRANCOIS ADELAIDE

’Me Mr Speaker I anbarasan ki mannyer sa bann menm MNA US zot fer referans lo li e sa Onorab osi in aprenan ki mannyer son nouvo non ki zot in deside deklar li. 15 lo 10 in fer ki Zarden Botanik in anmas plis ki R6milyon konpare avek R1milyon lannen oparavan.

 

(APPLAUSE)

 

HON FRANCOIS ADELAIDE

15 lo 10 in fer ki nou’n kapab konpran nou ansyen Onorab Basil Hoareau, e nou’n kapab liber li.   Me sa in sans en lot Manm  lo bato US ki sak fwa I ouver son labous I  met trou dan sa bato US  e bato I ede koul pli vit.

 

(APPLAUSE)

 

HON FRANCOIS ADELAIDE

Mr Speaker 15 lo 10 pou sirman fer bann MNA lo lot kote latab ler eleksyon Lasanble I anonse al rod en lot travay akoz zot pou nepli la.  Mr Speaker ler ou donn ou lavi pour ou pep, ou deside pour lite e denons lenzistis, rod legalite e lazistis, e krwar ki laverite I sel semen ver prosperite, byensir ou pour ganny targete, menase, denigre perskite.  Ou pour toultan dan labous ou bann oponan akoz zot pa anvi ou reisir.   Me sa ki Gran Met In swazir person pa   kapab dir nou.   E Gran Met in swazir en zonm Sesel pou retir Sesel anba sa gro nyaz nwar.  Personn pa bar li.

.

 

(APPLAUSE)

 

HON FRANCOIS ADELAIDE

Sote, pile, gele, roul ater sa ki anvi me realite I reste.  He had been chosen Mr Speaker.  Mon pa pour nonm son non akoz ‘’The Writing is on the wall.’’ Senpleman the best never rest!

Nou’n tann bokou largiman ki dir ki Onorab Ramkalawan in perdi 8 fwa eleksyon pandan sa dernyen 25 an.  Mr Speaker sa set en mansonz. Rezon I tre senp;- Parti lepep zot ti vole e fer frod … Nou tou nou konnen.

Zis dernyen eleksyon I kapab konfirm sa.  Zot pa onte?  Zot pe selebre en laviktwar ki zot pa merite.  Mon pa vwar sa drol. Zot labitid vole.

Mwan osi mon pa ti pour la ozordi si mon pa ti dekouver zot bann vilen manni pandan dernyen eleksyon Lasanble Nasyonal.

 

(APPLAUSE)

 

HON FRANCOIS ADELAIDE

Nou’n fini dekouver zot e zot pa pour zanmen fer li ankor.

Zot ankoler akoz zot ti anvi detri Wavel konpletman, me sak fwa zot vol li I kontinyen persevere, I konfront zot e I re-debout ankor.  Ler zot santi lafatig. prezan ki I montre zot son lafors konbativite.  I pa’n zanmen les  sa bann manev degoutan zet li ater akoz I krwar ki laverite I touzour sorti venker.  In vwar 2 Prezidan oparavan anvoy servyet e sov maron. Ki zot Mr Faure pou kapab fer???

Sepandan si Sesel ti annan en plas pou en Prezidan Seremonyal byensir Mr Faure ki pou en kandida ki ti kapab met son kandidatir.   Zis mazinen ler ti fer Premye Minis Lenn Mr Modi I enpresyonnen par sa lakle konplike lo sa sitar.   Erezman ti napa bann eksper ki  ti  kapab grad Sesel koman premye pei avek en pep ki konn met lakle sitan konplike lo sitar!

 

(APPLAUSE)

 

HON FRANCOIS ADELAIDE

Nou’n trouv li osi fer louvertir bann housing estate. Mon krwar sa ti sanmenm sa kalite Prezidan Seremonyal ki i ti pou kapab fer.   Get nou fran e dir ki zot pa abitye vol eleksyon?  E Mr speaker mon pour demann ou permisyon pour eksplike ki mannyer zot vol eleksyon.  E mon asire ki bokou MNA LDS dan lepase in ganny vole parey

Pour 42 parti o pouvwar in pran nou larzan e zot in kontinyen aste nou, vann nou, re-aste nou detrwa fwa.   Ti’n tro gou … nou ti’n tro dosil.    Pli gou ankor, zot ti fer vini zot bann dalon pour vin abiz lo nou zis parey dan ka FIU ki ti enkli bann Irlandais.  Si ti napa LDS dan sa Lasanble … mon pa konpran ki kote nou ti pou ete ozordi.  Eski la an 2020, nou pa’n ase malen pour dir Parti Lepep ek Mr Danny – ‘’’OUT’’??

Pour 42 an, zot in anbet nou ki larevolisyon ti enportan, akoz sa levennman ti pour ede anmenn legalite, liberte e fraternite kot larises ti pour ganny partaze e Seselwa ti pour otosifizans.

Eski sa Bidze I ankor pe kontinyen adres sa bann linegalite e pe koriz sa bann lenzistis e anmenn sa bann bon valer ki zot ti promote??

Mr Speaker, tou sa logmantasyon ki in ganny mete dan sa Bidze se pa lot ki  nou Seselwa ki pour bezwen peye e sa ki  pli tris se bann ki pe  ganny lapey pli ba e pli minimonm  ki pou bezwen fer sa zefor  ekstra pou li peye.

Eski nou bezwen plis taks ganny enpoze ankor lo mazorite Seselwa??  Eski pa ti a bon si Gouvernman ti ava al anmas taks kot bann biznes ki pa pe peye?   Ouswa eski I pa ti a tonm bon si Gouvernman ti ava fer sir  tou biznes ki operate Sesel I pey son taks korekteman pour ki I ava annan  ase larzan ki antre dan lekonomi Sesel e sa I a fer ki taks I ava desann e nou ava kapab pey mwens e benefisye plis.

Sa 10% taks lo labwason se pa lot ki Seselwa ki pour peye San pran kont ki nou pe demoraliz bann lakonpannyen labwason lokal.   Sa R25mil an plis lo transport konvansyonnel, se Seselwa ordiner ki pour bezwen peye.  Sa tranzaksyon lo GOP se nou menm ki pour bezwen peye akoz sa depans pour sirman ganny pase lo konsonmater. Sa allowance sorti R3mil pou ariv R1500 Seselwa menm ki pou ganny afekte.  Fotespere Shirley ou pe ekout mwan.

Minis eski Seselwa I ankor pe kontribye sirtou kot Providence kot I annan dimoun ki pe vin milyonner lo sa bann proze konblaz.  Si wi akoz ki Seselwa ordiner I ankor pe kontinyen pey konblaz ler I annan sitan biznes ki pe prospere e ki pe vin tre ris lo nou ledo?  Eski pa ti ava bon ki nou prezan fer sa bann gro biznes peye e liber nou avek sa fardo??  Minis eski sa i zis??

Lo size R25mil an plis lo transpor konvansyonnel, mon krwar Minis I devret rekalkile. Akoz mon pou dir sa set akoz mon santi ki nou pei pa ankor pare pou anmas sa bann nobou teknolozi an sa ki konsern transpor hybrid a transpor elektrik.  Minis mon ti a kontan ki ou dir mwan, kote ki sa travayer ki annan en pikep 4 tonn pou ale pou li ganny en pikep hybrid akoz logmantasyon I across the board.

Minis mon ti a kontan ou ti a dir mwan kote sa drayver ki annan en bis pou ale pou li ganny en transpor hybrid akoz nou pa konnen kote ki vann sa bann keksoz. Me mon ti a plifere ki en legzersis konpreansif I ganny fer kot tou dimoun I ava met son pwennvi e la Sesel I ava pran sa bann bon desizyon ki I pou fer swa ki I pa pou fer.

Erezman ankor enn fwa ki Seselwa in met LDS avek en mazorite dan Lasanble Nasyonal. E tou bann regilasyon pou bezwen vin swa atraver en S.I.

Wi Minis nou annan pouvwar pou nou quash S.1, si nou vwar ki sa bann regilasyon pa fer okenn sans e pe anmenn plis konplikasyon dan lavi Seselwa.   Si sa  Gouvernman ti pe viv dan larealite, eski pa ti  a pli bon si zot ti amelyor semen, sorti dan sid pour ki transpor  I a travers pli efikas,  e redwir la kantite letan ki  transpor i reste lo ralanti dan traffic jam  lo larout piblik?

Ozordi I kler ki Gouvernman dizour pa konpran priyorite sa pep.  Dan sid e les Mahe toulezour, pour nou bann zabitan ki desann anvil, swa pour al travay, swa al lekol, swa bann biznes personnel nou rankontre bokou problenm.   Nou rankontre trafik bloke e sa I fatigan, zennan e pa akseptab.  Tro bokou letan menm si nou’n koze e propoz solisyon, Gouvernman in reste sourd lo nou demann.  Nou’n toultan tande ki en trwazyenm lane pe al ganny fer.  Lannen ale, lannen vini, menm promes  me ki pa abouti dan nanryen.   I fer anviron 3an depi ler nou pe koz lo sa size…Pa bliy overhead crossing ki nou ti osi ganny promet an 2018.

Nou tande ki negosyasyon I ankor pe ganny fer pour ganny later I a ganny met a dispozisyon ki nou, nou ava trouv sa 3enm lane dan Pointe Larue.   Nou tann isi, laba me sa pep I kontinyelman soufer. Plis fristrasyon me sityasyon I reste parey, senpleman akoz Gouvernman US napa volonte menm si nou lavi I kontinyen vin difisil.

Eski Gouvernman I pran kont tou nou bann depans tel ki pyes, larou, karbiran e lenkonvenyans e letan perdi ler nou pe aste sa litilite ki apel semen?   Sityasyon dan sid I dan en leta deplorab.  Kantite koze nou’n koze dan sa Lasanble me nou ‘n ganny plaster lekskiz ki pa’n ed nou ditou. Be ki I kontinyelman ganny andomaze e nou bann propriyeter transpor zot kontinyelman depanse pou fer sir ki zot transpor I ganny reste lo larout piblik.

Minis eski ou pa panse ki ou devret met Departman ki ansarz semen kot Fair Trading Commission? Akoz zot pa pe donn valer pou nou larzan. Ouswa Minis eski nou demann bann propriyeter pou refize pey patant  ziska ler nou ganny valer pou nou larzan?  Ouswa eski Gouvernman i le  ensit en protestasyon kot  bann propriyeter transpor I a montre  e montre zot mekontantman vizavi sa move sityasyon ki nou pe pas ladan toulezour.  Mr Speaker mon distrik I enn ki’n fer bann progre signifikan pandan sa dernyen lannen.  Sa bann transformasyon ki pa’n ariv fasil … mon kapab dir.  Mon’n bezwen vwar mwan pe telefonn bann menm Departman pour en kantite letan, parfwa esper plizyer zour pour en senp repons pour mon zabitan.

Me avek perseverans nou distrik in vin enn ki pli friendly kot bokou plis Seselwa osi byen ki etranze pe vin rann nou vizit.

Anba LDS, Baie Lazare in sirman fer progre e nou pe kontinyelman fer plis progre, menm si in annan bann moman ki keksoz I difisil.

Lo size 24/24/24 dan Baie Lazare Mr Speaker dan deba lannen 2018, mon ti fer resorti ki sa bann lakaz malgre zot ti’n preski konplete, mon ti fer remarke ki Gouvernman pour kapab servi sa koman en zouti eleksyon e byensir se sa ki’n arive. Tou dimoun I konnen ki si en lakaz pe ganny konstri byensir i bezwen annan plan pou son bann litilite enportan tel ki sewage.  Ziska ozordi, zabitan I ankor pe espere akoz Gouvernman pa’n fer provizyon pour sewage e sa bann dernyen mwan ki zot in komans travay lo la e an se moman, tou in fini. E la Gouvernman pe al fer en ‘’move’’ politik pour ki zot kandida prezidansyel parey noun trouve tou dernyerman, I fer sa zafer lakaz son PPB ler I fer sa bann dimoun ganny zot lakaz.    Fodre arete avek sa politik fer soufrans sa pep pou zot bann gen personnel.  Sa I vreman mal e pa akseptab.  

Baie Lazare Mr Speaker nou ti sipoze annan 54 lakaz pou sa dernyen 4an, ki ti sipoze ganny konstri e met avek nou zabitan, me zot tou zot konn fason fer Parti Lepep ouswa Parti US i kontan fer … les ou vilnerab, fer ou depan lo li, andoktrin ou, ler zot konnen ki zot in byen anbet ou, la prezan zot a deside ki pour fek avek ou.  Zis ou vot ki enportan.

Nou’n ganny swazir par sa pep ki’n met konfyans dan nou, pour pran bann desizyon pour ki nou ava anmenn prosperite pour nou pei.

Eski i etikman normal e korek pour nou koman bann leaders ki sa pep pe kont lo la pour fer en diferans, me nou pe servi nou pouvwar privilezye pour abize lo konfyans sa pep?

Mr Speaker, lo sa kote latab nou dir sa pa akseptab.  Sa I pa etik e nou renons sa bann fason travay ki pour 42an in ganny pratike dan  sa pei.

Sa lannen Baie lazare pour kapab vwar louvertir en semen ki pour plis ki 25an sa bann zabitan in ganny promet.

En semen ki pour sirman amelyor lavi lafanmir, Esparon, Hoareau, Larue, Duval e Confiance.  Baie Lazare avek en MNA LDS, pa’n bes lebra.   Malgre bokou difikilte me perseverans pour sirman kouronn nou sikse.

Nou pe demann sa  bann fanmir pour pran  ankor en pti pe pasyans.

Mr Speaker, nou klinik I reste enn nou priyorite pour distrik Baie Lazare.  Apre ki Parti lepep ti’n dir  dan 5enm Lasanble ki klinik pou Baie Lazare pa  en  priyorite mwan koman MNA ler mon ti vin  dan Lasanble Nasyonal mon ti komans anmenn sa topik  akoz lepep Baie Lazare ti’n konfye mwan pou anmenn sa mesaz e s fer sir ki nou kapab ganny en nouvo klinik.   

Mon pa’n les zot lanvi  pep Baie Lazare tonbe. Mon ti fer sir ki Mr Faure ti ganny met okouran. Nou ti vin vizite – nou ti tonm dakor ki sa klinik pour re antre lo radar Gouvernman e nou klinik pour vin en realite.

Malgre diferan leskiz/kontrent e move planifikasyon, sa proze in kontinyen ganny retarde.  Me mon parey nou moto in dir’’ nou pa pour zanmen les tonbe’’ in motiv mwan pour kontinyen takin L’Egzekitiv, organiz rankont avek Minister Lasante, medyatiz sa size e rod leklersisman pour zabitan Baie Lazare.

Mon annan plezir ozordi pour enform zabitan ki mon’n war en logmantasyon plis ki R9milyon ki’n mete dan sa bidze pou komansman nou klinik parey ti ganny dir detrwa mwan pase lo televizyon.  Fotespere nou kontinyen met presyon lo L’Egzekitiv pou ki sa promes I ganny delivre.

Mr Speaker avek nou lanvironnman sen en zoli, avek nou lospitalite koman en kominote nou’n kapab akeir bann lenvestiser ki’n envestir direkteman dan nou distrik.

Nou welcome zot avek lebra ouver, me nou ti a kontan ki zot pa zis servi nou distrik zis pour zot byennet personnel, e nou, nou pa benefisye preski nanryen.

Mwan koman MNA sa distrik, mon pa aksepte ki Gouvernman I kontinyelman ankouraz nou pour al mandyan e mwan mon pa anvi ki Baie Lazare I ganny gete koman en distrik ki bezwen al mandyan pou nou bann aktivite sportif, sportif, kiltirel eksetera.

Nou Seselwa nou annan dinyite.  Nou en pep ki travay dir.  Gouvernman i annan sifizaman larzan pour kapab siport nou bann program kominoter tel ki spor, kiltir e bann lezot lorganizasyon a baz kominoter.  Gouvernman I bezwen met sifizaman larzan pour epanouisman nou lakominote.

Sa zafer al rod sponsor kot bann gro lotel ouswa gro biznes in ler pour arête, akoz souvandfwa sa bann dimoun I krwar ki nou dan zot lanmen e kapab enfliyans nou pour zot byennet personnel.

Nou’n trouv sa pratik dan lepase, me mwan avek sa konfyans ki mon kominote in envestir dan mwan, mon pour demann Minis pour silvouple aret fer Seselwa kiltiv sa kiltir mandyan, lannen ale, lannen vini.

Met bann program efikas an plas pour ki biznes dan la kominote I a santi li oblize pour kontribye dan son landrwa ki I pe fer son bann aktivite.

Sekirite alimanter ouswa souverennte alimanter, I reste la baz nou legzistans koman en pep Kreol an bann sante

Mr Speaker ler mon koz lo sa topik, mon pa kapab mank sa lokasyon ki koriz sa lenzistis ki Departman Ladministrasyon Piblik pe fer – e viktimiz  – enn mon  koleg – mon pou bezwen nonm son  non – pa pou  nonm son non Mr Colin Payet en zabitan Baie Lazare ki travay dan sekter agrikol.   Minis ti annan en Scheme ki ti ganny entrodwi.  Sa set en Scheme Marketable Skill Allowance kot bann etidyan ki’n sorti avek bann bon grad e zot annan bann bon bagaz ti a kapab benefisye ek en R600.  Mon annan en papye avek mwan ki depi 2012 I ansan bann zofisye kot Biro Lagrikiltir pe gannyen ki ti lekol avek Mr Payet.

Minis ou konnen bann dimoun Baie Lazare i top.  Mr Colin Payet ti pers tou sa bann dimoun e I ti sorti premye dan son laklas.  Me in komans ganny son marketable skill allowance an 2018. Depi 2012 me in ganny pou li an 2018. Mwan man krwar ki I annan en lenzistis.  E mon krwar Minis si ou kapab ed mwan akoz mon ti demann Minis Lagrikiltir pou ed mwan, me mon pa’n ganny en solisyon.   E vi ki ou Minis Finans mon pe demann ou pou aport ou soutyen.  Si fodre koup larzan sa bann dimoun ki pe ansarz Departman Piblik nou a koupe, zot pa pe fer zot travay byen.   Minis mon pe demann ou, ou sipor vizavi Departman lapes ek Lagrikiltir menm si I pa tonm anba ou domenn.

Mwan koman en MNA ki mon distrik i okip pli bokou later lagrikiltir e ki popilasyon agrikilter osi i  No. 1, mon pa pour fer zistis si mon pa koz lo sa topik e adres li avek toute fransiz.

Mon vwar ki Gouvernman Parti Lepep /US pa pe pran sa sekter o serye.  Menm si sa bann fermye in kontinyelman anmenn zot konsern, laspirasyon, nide avek kouraz pour ki lagrikiltir e lapes I reste priyorite okenn Gouvernman ki vin o pouvwar dan Sesel.   Me sa I pa leka pour sa Gouvernman aktyel.

En resers ki sa bann fermye in partaz avek mwan, manze I reste sa komodite ki pou reste pli enportan dan lemonn dan sa bann lannen ki pe vini;-plis ki delwil brit, lor e lezot materyo teres.  Eski sa Gouvernman I okouran sa resers??   Eski sa Gouvernman I okouran sa resers?   Eski nou pe donn sa sekter tou son sipor ki I merite?

Mon pe demann bann fermye avek peser pou pran labar dan zot lanmen aret fye lo sa Gouvernman. Inifye koman en sel lekip fer zot lavwa ganny tande;- anmenn en konba agresif pou ki Gouvernman I ava ekout zot.  Ler in sonnen pou zot kapab fer sa demars.   Sa Plan Konpreansif pa ase konpreansiv parey zot in met mwan okouran. Zot in

Zot ki bann eksper dan sa domenn, pa Minister Lagrikiltir e Lapes.  Zot ki konn zot soufrans.

Parey zot in komanse, kontinyen, lepep Seselwa I bezwen zot pour nou sekirite alimanter. Nou bann MNA dan sid e dan was nou pour donn zot tou sipor neseser pour zot atenn zot lobzektif.  Mon pe fer li mon devwar pour mwan demann Minis ki kantite poursantaz bidze pei   in met dan lokasyon kot Minister Lapes avek Lagrikiltir?  Akoz mon aprann ki nou

siny bann  Konvansyon ki  demande ki 10% Bidze pei  I devret ganny mete  dan sa sekter pou ki sa sekter I bouze devan.

Minis sekter piblik parfwa I pa ase efikas.  Tou dernyerman ou ti aksepte ki i annan en problenm.  Piblik i fristre akoz zot pa pe ganny servis ki zot in peye pou gannyen. Nou dan Baie Lazare sa osi I afekte nou.  Nou bezwen sakrifye nou lekor rod en transpor pas dan bann bos akoz semen pou ariv anvil nepli konfortab. Pri dan trafik souvandfwa I fatigan parey nou’n dir pou ariv dan en biro Gouvernman.

Mr Speaker mon pa pe blanm okenn resepsyonnis ouswa okenn sekreter swa travayer dan sekter servis piblik.  Mon konnen ki tou kou zot bezwen esper lord sorti swa kot Minis swa kot CEO swa kot bann Depite, ouswa menm kot Prezidan. Mr Speaker  pa sa resepsyonnis ki devret ganny blanmen, me I devret annan en zefor total pou ki Gouvernman Mr Faure  pandan dan dernyen detrwa mwan  i reste pou li kapab met lanfaz lo service delivery   e  ede  ki sa pep I ganny en pli bon service pou son larzan.

Ti koumsa depi apre ‘77 e ziska ozordi nanryen pa ankor kapab sanze.  Se pa mwan ki’n dir, me sete Madame ki top dan parti lepep ki ti dir dan en program tet-a-tet. Parti US/ Parti Lepep pa ankor kapab menn apre sa nouvo klima politik pas zot gear akoz zot gear I riske grennen.

Ozordi I kler ki Mr Faure pa kapab donn okenn lord, akoz senpleman bann dimoun pa ekout li. Se sa ki pe fer li fail koman en dirizan.   I tre senp.

E a traver sa kalite style management definitivman se pep Seselwa ki kontinyelman soufer akoz napa desizyon ki ganny pran.  Si vreman zot lo lot kote latab zot krwar ki Mr Faure I popiler e I meyer kandida, dir li, pa reste dan changing room. Pa kit ou bann siporter dan limbo. Anons eleksyon e zot a trouve lekel ki pou anport laviktwar. 

Minis ki’n arrive avek nou proze dan Baie Lazare ki apel West Coast Development Project? Mon’n rode dan sa Bidze on pa’n war sa alokasyon.   Me mon konnen ki ler nou pou  fer deba nou pou kapab eklersi e mon ava ganny pli bon lenformasyon  pou nou kapab donn  mon bann dimoun Baie Lazare.

Mr Speaker an terminan fodre ki Seselwa pa zanmen bliy sa bann speech ki lot kote latab pe fer pou kontinyen anbet lepep Seselwa zis parey bann ki Dirizan ti pe fer dan lepase ki Seselwa pe re-ekoute konmela. Ankor dan 2an bokou nou pou ankor vivan.   Sa rikord pou ganny rezwe.  E lepep Seselwa pou ganny sans analize e retir zot konklizyon.  Si bann MNA US ti senser ouswa nou ouswa si bann Manm LDS tin senser ouswa non.   Mon zwenn ansanm avek mon bann koleg pou remersye tou Seselwa pou zot kouraz ek pasyans.

Byensir LDS I annan bokou nide ki bon pou Sesel. En lekip ki krwar dan Rule of law.  Kot nou krwar dan devlopman nou Seselwa pour ki sakenn de nou, kapab realiz nou rev;- pe enport ki ou krwayans politik, relizyon, ki ou frekante swa ki pe pas atraver.

Ou pour toultan annan en plas dan Sesel.  Avek ou sipor pour LDS, byensir ou pou ede transform ou pei pour le meyer.

Minis pa trakas, ou osi ou pour ganny delivre byento avek LDS kot ou a kapab pran ou retret, e viv ou lavi happily ever after.

Ki sesel I kontinyen ganny beni avek benediksyon divin kot prosperite e lape I a renye parmi nou pep.  Avek LDS ou pa pour regrete.  LDS forever!  Lord deliver Seychelles!

 

(APPLAUSE)

 

MR SPEAKER

Mersi Onorab Adelaide.  Mon kontan ki mannyer Minis in pran sa avek en bon sens   d’humour.  Mon ava donn laparol Onorab Paul Ernesta. 

 

HON PAUL ERNESTA

Mersi Mr Speaker. Mr Speaker, Minis ek ou delegasyon, mon bann koleg Onorab e tou dimoun a lekout espesyalman bann dimoun Takamaka, bonzour. Minis les mwan reasir ou 2020 ou pa pou pran retret ou pou ankor la.

 

(APPLAUSE)

 

HON PAUL ERNESTA

Me an menm tan I enportan Mr Speaker Onorab ki’n koze avan mwan in dir ki nou lo sa kote latab nou ankoler. Eski I pe dir nou ki sa rezilta 15 lo 10 I en rezilta vole?

 

(APPLAUSE)

 

HON PAUL ERNESTA

Zot manz zot bannann apre zot zet  lapo lo nou.

 

 

(APPLAUSE)

 

HON PAUL ERNESTA

En lot pti presizyon Mr Speaker akoz I enportan Onorab in dir ki son dirizan in perdi eleksyon 8fwa mon a koriz li. Son Dirizan in perdi eleksyon 7fwa. Savedir I pe dir nou sa 8enm fwa 2020 ki I pe al gannyen!

 

(APPLAUSE)

 

HON PAUL ERNESTA

Mr Speaker prezan mon fer mon ladres.  An oktob 2016, letan Prezidan Danny Faure ti prêt serman konman Prezidan tou Seselwa, I ti tal devan nou Nasyon en plan anbisye baze lo trwa gran prensip;- rann kont, latransparans e bon gouvernans.  Son plan ti koz avek sak sitwayen nou pei.  E en plan ki baze lo prensip fondamantal nou parti – en prensip sosyalis ki asir egalite pou tou, e met zonm o sant devlopman.   Ozordi, koman en lavwa pou tou zabitan Takamaka mon santi mwan fyer pou koz lo sa Bidze ki pe ganny propoze pou ou benefis pou lannen 2020.

Malgre I annan serten ki pe aspire pou ganny eleksyon lannen ‘’2000 zanmen’’, zot pe dir ki sa Bidze I en Bidze eleksyon e napa nanryen ladan.

Parey zot labitid zot zis kritike.  Zot kontan koze me demann zot solisyon zot napa.  Me ler keksoz I al byen zot ki’n fer, me letan I mal pa zot.  Zot kontan pran kredi ki pa pou zot.

Mr Speaker sa Bidze, I reflekte prensip fondamantal nou parti united Seychelles. Nou dan United Seychelles, parey Prezidan Albert Rene In toultan dir, nou fermeman krwar dan Caring and Sharing. Se United Seychelles ki krwar dan prosperite partaze. Se nou ki krwar dan egalite ekitab. Se nou!  E les mwan dir ankor tre for, se zis nou parti, e nou Prezidan, ki vreman krwar dan vre lazistis sosyal!

 

(APPLAUSE)

 

HON PAUL ERNESTA

Mr Speaker, ladministrasyon Prezidan Faure in souvan ganny akize ki I pe gaspiy tax payers money.  Dir mwan ki mannyer ou ape gaspiy larzan ler ou ape ed enn nou frer e ser ki dan bezwen?  Ser frer, Seselwa, I annan en dikton ki dir kontan ou prosen parey ou kontan ou prop lekor, me I malere pou dir ki i annan en pti group politisyen zot kontan zot lekor e zot pa oule ki zot prosen I benefisye.  Zanmen keksoz I bon e depi ki sa Lopozisyon I la napa ki zot pa pe dir, Sesel pe koule, Sesel i en failed state eksetera. Me Mr Speaker nou pe antre 2020, Sesel pa ankor koule, Sesel pa ankor fail.  Aret zwe avek nou pep, annou aret negativ.

 

Revi 2019

Pandan ki nou pe prepare pou en lot voyaz ver 2020, I enportan pou nou osi fer en levanter lo performans

Bidze 2019.  Sa I ava ed nou pep vwar vre realite lakonplisman nou pei pandan sa dernyen 3an depi ki Prezidan Faure in pran direksyon pei, e I pe kontiny sa travay ki son 2 predeseser in konmanse plis ki 40an pase.

  • Minis in donn nou bann rapor pozitiv lo performans ekonomik pei pandan lannen 2019. In dir nou ki prodwi domestik brit in ariv 3.9% apre revizyon inisyal ki ti 3.5%.

 

  • Dapre Labank Mondyal Sesel I premye lo nivo lafrik dan human capital Index ek en score pres 70% sa I met li 43enm dan 157 pei avek en human capital index pli o.

 

  • Atraver bann diferan program kin ganny met an plas dan sekter lanplwa nivo unemployment in bese. Parkont ozordi I annan plis vacancies ki dimoun ki pe rod travay. Dapre Biro Statistic pou sa dernyen 2an in rikord pres 1550 vacancies konpare ek 1200 dimoun ki pe rod travay.

 

  • Logmantasyon Bidze ledikasyon toulezan in asire ki nou pep I kontinyen ganny sa ledikasyon iniversel pour tou zanfan Seselwa depi ler zot dan lakres, ziska ler ki zot ariv dan pos- segonder menm ziska liniversite pou bann ki ariv ziska sa nivo.

 

  • Gouvernman in reste committed pou asire ki son pep I annan li en twa lo son latet. Pou lannen 2019 plis ki 300 fanmir I ekspekte ganny zot lakaz, e sa I enkli ou zabitan Takamaka.

 

Mon pou demann Gouvernman e sa propriyeter later pou zot kapab tonm dakor lo negosyasyon pou anfen finaliz lenstalasyon proze STP. Pour ki anfen sa 40 fanmir ki pe esper zot lakaz zot a kapab ganny zot lakle avan lannen fini.

I enportan note Mr Speaker, atraver sa enn de sikse ki monn mansyonnen pli boner. I demontre ki letan I annan ti pe kriy DANNY OUT, napa ki zot pa’n fer e dir lo li, me I pa’n zanmen pran zot traka. O kontrer, Danny in outsmart zot. Ansanm ek son lekip in kontinyen travay pou byennet sa pep e nou pei.  O fet Mr Speaker olye rod DANNY OUT annou travay dan ou distrik.

 

(APPLAUSE)

 

HON PAUL ERNESTA

Pou afeblir Gouvernman, lot kote latab ti swazir pou aplik ‘’ek nou pa ek nou’’ letan pou vot lo bidze 2019.  Zot ti vot zis lo serten head, bloke e freeze kot zot ti anvi e abstain letan pou vot lo Third Reading. Malgre sa mannev nou Gouvernman in delivre.

Sa fwa si nou pou vwar ankor enn fwa, parey zot pou fer ek APDAR kot zot pou aplik’’ ek nou pa ek nou.’’

Me mon swete ki sa voyaz LDS I sanz zot lapros, zot a osi vot lo Third Reading ki a montre zot lanvi e siport nou pou met larzan dan pos Seselwa, e pran swen ek nou pep.

Mr Speaker, zabitan Takamaka ti elekte mwan anba banner ‘’Zonm Debouryer.’’ Wi Debouryer ki mon’n ete, mon’n fer tou sa ki mon kapab pou asire ki Takamaka osi I benefisye avek Bidze 2019.

Koman enn nou rol reprezantativ, malgre, parey tou MNA nou pa ganny okenn larzan dan Bidze pou lenplimantasyon okenn proze dan distrik. Me I nou responsabilite, pou pouse pou anmenn devlopman pou distrik.

En MNA pa devret zis konplent fodre I travay e ede rod solisyon.

Parmi sa 210 ti proze kominoter ek en valer R27.4milyon ki Gouvernman Lokal pe ekspekte enplimante, Takamaka pe benefisye avek 18 bann pti proze kominoter.  Parmi I annan k’in fini konplete tel ki

  1. Retaining Wall pou Semen Agathine
  2. Foothpath Dan Kre
  3. Premye faz Recreational Area Ste Ange
  4. Survey semen Samson/Morel e Dan Penpen avan lannen fini nou pe ekspekte konmans tras semen Dan Penpen apre ki tou bann formalite way leave e lezot prosedir I konplete.

 

An menm tan I annan ki ankor dan staz lenplimantasyon tel ki

  1. Retaining wall e crash barrier upper Quatre Borne
  2. Sirfas ek drenaz semen Morel Takamaka
  3. Konstriksyon semen Dogley/Morel Takamaka
  4. Koneksyon semen Hoareau /Dodo anler Takamaka
  5. Dernyen faz recreational Area Takamaka
  6. Footpath Quatre Borne
  7. Retaining wall Quatre Borne.
  8. Survey dan 5 lezot diferan lokasyon dan distrik.

A sa moman ki mon pe fer mon lentervansyon bann travay preparasyon teren in konmanse depi Lendi pou konstriksyon semen ki al kot lafanmir Rose, Loze e Jean e osi semen ki al kot lafanmir Larue ek Michel dan leo Quatre Borne.  Mon apresye ki ozordi sa bann fanmir pou byento benefisye avek zot semen, ki lontan zot ti pe demande.

 

Proze Kapital

Takamaka In osi benefisye avek bann proze Kapital tel ki:

  1. Konstriksyon En nouvo Day care ki pe ekspekte fini sa lannen
  2. Konstriksyon en nouvo kordgard byen modern
  3. Ek lagrandisman semen Agathine bis in konmans monte lo en baz proze pilot. E si tou keksoz I al byen nou ekspekte vwar en revizyon dan sa servis pou sa kominote.
  4. Premye faz lagrandisman semen Bougainville in komanse  e 2enm faz ansanm ek mon koleg Onorab Anse Royale nou’n deza komans diskit lo bann formalite wayleave  pou nou  kapab  al komans 2enm faz.
  5. Lenstalasyon crash barrier e streetlights dan diferan lokasyon
  6. PUC in osi ranplas tou sa bann vye tiyo asbestos depi kot legliz ziska dan zanmerant stasyon lapolis.
  7. Konstriksyon en tank delo pou distribye delo dan leo Quatre Borne. E aktyelman en lot tank delo pe ganny konstrir en pti pe pli o ki san enn.
  8. Dan PenPen osi in ganny en tank delo 100met kib ki pou asir distribisyon delo dan sa kominote.

Mr Speaker otan ki mon la mon pou toultan debourye pour ki Takamaka i kontinyen benefisye 2020;- par egzanp;-

Nou klinik I nesesit en bon renovasyon e lagrandisman. Klinik Takamaka in ganny konstrir boner dan lannen ‘80. In konmans vin tro pti pou lapopilasyon ki ape grandir.  Prenon kont byento nou pou annan en nouvo housing estate ki pe al ouver.  E nou annan en sel lasal ki ganny servi pou casualty, screening, emergency, pou panse e lobzervasyon.

Sa I pa en bon kondisyon Mr speaker.  Nou bezwen amelyor sa sityasyon. E deplis nou servis dokter li osi I bezwen ganny ogmante dan lasemenn pou kapab fer fas ek demann nou distrik

Later ek lakaz I en lot gro konsern pou nou zabitan. Mon pou pouse ki dan sa provizyon bidze Takamaka I benefisye avek ankor plis ek land bank ek konstriksyon dezyenm faz konstriksyon housing estate ex Desaubin.

 

  • Plis regar pou ganny mete dan bann pti proze distrik pour ki I annan plis amelyorasyon dan lefikasite dan lenplimantasyon bann pti proze lo nivo distrik.

 

  • Redevlopman Anse Marie Louise I osi en lot proze ki mon pou pouse pou asir son lenplimantasyon.

 

  • Negosyasyon avek Allied, Shreeji ek Alamannda pou konstriksyon drenaz dan plato Anse Forbans I dan en staz tre avanse. Nou ekspekte ki son konstriksyon I konmanse apartir lannen prosenn.

 

  • Ansanm ek DICT nou’n konmans en travay avek bann operater servis kominikasyon pou amelyor sinyal telefonn dan distrik. I enportan note ki en plan in fini ganny met ater e travay pe al konmanse tre byento.

 

Nouvo Polisi

Mr Speaker, dan sa Bidze prezante semenn pase, in annan plizyer nouvo polisi kin ganny anonse i annan pour bi amelyor lavi nou pep.

A sa pwen mon oule pran en moman pour felisit sa bann zenn dimoun, e pou dir avek zot, ki zot in fer loner, e lafyerte pour nou pei. Avek sa Bidze byen balanse ki zot in prezante, klerman nou kapab war ki lavenir Minister Finans I dan tre bon lanmen.

E Minis, mon egalman bezwen felisit ou, mon asire ki ou osi ou tre fyer letan ki ou get sa tre zenn lekip zonm, ek fanm Seselwa ki ou pe dirize.

 

Progranm Sosyal Gouvernman

Mr Speaker, Gouvernman United Seychelles ti ganny elekte avek en konprenezon ki nou pou promot e defann lentere nou pep a tou pri, sirtou bann ki pli vilnerab.  I pran bokou resours dan en pei pou konbat lapovrete, e pou soutenir bann ki pli vilnerab.

Be I pa korek pou dir ki Sesel I en welfare state, zis akoz ki Bidze ASP in ogmante akoz I enn tre enportan.

Dir sa ki zot anvi, me nou Gouvernman United Seychelles pou mentenir son komitman anver nou bann frer ek ser ki dan bezwen. Zot menm zot in admet ki program sosyal I konpleks. Yer kot  zot ti dir aboli, ozordi zot sanz tune. Anmenn en pei pa sitan fasil parey zot  krwar.

Bann program sosyal Gouvernman I konpri;

R47.7millyon social safety net anba ASP.

R5milyon pour reparasyon lakaz bann dimoun aze anba HFC.

R10milyon pour reparasyon lakaz bann vilnerab anba ASP.

R28milyon konsesyon vwayaz lo bis SPTC pou bann vyeyar, etidyan, e osi pour bann dezabilite.

R18milyon pou subsidy Housing Finance.

R4.2milyon dedicated fund pou lekol.

R6.7milyon pou Scheme Daycare

R3.2milyon pou Scheme Foster Care.

R5.7milyon pou Scheme transpor Inner Islands pour bann etidyan, pansyoner, e medikal

R1.5milyon pou lasistans emergency housing.

R292milyon pou home carers ki enkli zot 13enm mwan saler.

Sa bann sif ki mon’n fek donnen pa pe dekrir en welfare state sa, me plito Bidze pe senpleman reflekte sa ki nou Seselwa nou ete koman en Nasyon.  Nou pran ka avek kanmarad.  E par ekstansyon, nou Bidze I pran ka avek sa ki pli feb.

Parmi tou sa bann lanons kin ganny fer, I annan nou bann zenn etidyan post segonder ki zot, zot pa pe neseserman ganny touse dan en fason zis. Malgre zot allowance in ganny ogmante 2 an pase, I ankor annan mankman. Petet mon pou demann Minis Finans pou get dan posibilite pou ogmant ankor en pe allowance sa bann etidyan. E anmenn en sistenm ki pli ekitab e zis pou zot tou.  Sa I a permet sa bann etidyan kapab etidye san presyon e sa I a osi retir sa presyon finansyer lo zot paran.

 

Tax lo Lakaz

Apartir lannen prosenn Gouvernman pe al retir tax lo bann lakaz ki ganny lwe sorti 15% pou vin 3%.  Sa I en bon linisyativ ankor ek lespri pou redwir kou lavi. Me Gouvernman I bezwen met mechanism an plas pou asire ki vreman sa rediksyon I ganny pass on lo bann kliyan.

 

Ler Travay Fleksib

Ler travay fleksib I en lot nide ki welcoming sirtou pou mon distrik. Mon rapel letan mon ti pe segonn Mosyon anmennen par mon koleg Onorab Aglae lo sa size Traffic Jam mon ti zwenn li an di-zan, mon quote”  A mon avi pou annan en re-organizasyon dan serten servis piblik i kapab enn parmi bann pli meyer solisyon.  A labaz, nou bezwen sers plis fleksibilite dan bann aktivite ki pou ganny reflekte an term mwens presyon pou transpor e disparisyon ‘peak hours”. Fen sitasyon.

Sa fleksibilte dan ler travay Msye speaker pou ede redwir bokou problenm sosyal akoz a permet en paran annan en pe plis letan ek son zanfan. e I pou osi ogmant prodiktivite dan serten sans.

 

APDAR

APDAR I en Lazans Gouvernman ki annan en manda tre, tre difisil pou zot anmennen, e APDAR in vin avek en program konpreansiv ki pe mars tre byen, mon konnen, akoz monn war rezilta. Zot en lazans kin ganny kree pou lit kont labi sibstans.  Si I annan en keksoz ki sa Lasanble I devret pe fer, se pou get lefikasite zot program, e rode ki resours adisyonnel ki nou kapab met a zot dispozisyon.

Mr Speaker, mon pou demann LDS pou re aranz zot alignment lo APDAR.  Enn i  vini I dir  nou APDAR I efikas.  Lot I vini I dir nou APDAR in fail.  Eski sa i akoz lazalouzi ouswa vanzans personnel?

Les mon a fer zot mazinen, ki letan zot pe dir ADPAR in fail parey mon koleg in mansyonnen pli boner, UNODC pe aplodir APDAR pou sikse ki in fer anba SS Herminie dan sa dernyen 2an.

 

(APPLAUSE)

 

HON PAUL ERNESTA

Mwan koman en paran responsab, e en profesyonnel mon pli vomye krwar rapor UNODC ki LDS.  E mwan personnelman, mon pa pou kontribye dan okenn mannev ki viz pou target okenn endividi, zis pou satisfer laenn serten dimoun.   Sa bann manni ‘’ek nou pa ek nou’’, in ler pou arête dan sa pei. E mwan mon enn ki pa pou reste trankil si mon war sa bann keksoz pe komans deroule dan sa Lasanble.

Mwan, mon pa’n zanmen servi mon pozisyon ouswa privilez koman en manm Lasanble pou mwan persekit personn, e mon pa pou reste trankil si mon war bann tel lenzistis pe deroule devan mon lizye.

 

Postage Tax Free Allowance

Lo sa size allowance lapos ki’n sorti R3000R, pou desann R1500, Minis, la mon pou ankouraz ou pou reget sa zafer.  Akoz dan mon distrik mon’n koz ek plizyer dimoun ki pa an faver sa revizyon. E monn menm sey eksplik zot an servan lozik bann teknisyen Finans, repons ki mon’n gannyen se al rod sa bann dimoun ki pe fer labi e pini zot, pa bezwen vin pini nou pou fot lezot dimoun.

 

G.O.P

Avek lespri pou lokaliz plis nou bann pos, Gouvernman in met an plas en mezir ki garanti ki bann etranze apre ki zot in travay pou en serten letan dan pei, pou zot pass on ek en Seselwa.

LDS in anmenn en lager kont etranze.  Zot touzour konplent ki etranze pe pran travay e biznes Seselwa.  Me ler Gouvernman I met mezir pou control sa, LDS I kritike parey zot labitid zot war pa bon. Me dir mwan kwa ki bon pou zot?  Sa i konfirm sa ki mon ti dir pli boner e mon pou toultan dir ki LDS zot zis koze, koz, koze, koze,  me ler pou pran aksyon zot pa kapab.

 

 

Kritik

E Mr Speaker pour Gouvernman kapab arive reisi dan son lobzektif, I demann sakenn de nou dan nou landrwa travay e nenport landrwa kot nou ete pou nou fer nou bout.   Sa bann zafer dormi lo travay ouswa trenn lipye zis pou met retar dan delivery machine Gouvernman e fer dimoun fristre annou arête.  Letan nou frer e ser I vin vwar nou dan biro annou aret fer li tourn an ron.

SLTA ek Puc annou akseler sa bann travay ki pe ganny fer dan nou bann semen dan sid, sirtou dan Takamaka, ki afen nou bann semen I ganny amelyore o pli vit posib.   Akoz tro bokou transport pe ganny andomaze.

L’Egzekitiv I merit revwar sa bann sistenm birokrasi pou fer ki desizyon I kapab ganny pran o pli vit posib.   E zot osi bezwen revwar bann kalite kontrakter ki zot donn bann Kontra pou fer proze Gouvernman. Akoz I annan bokou bann kontrakter ki malonnet.  Zot pa respekte zot kontra e I annan menm ki zot travay I vreman par anba standar.

Me mon osi rekonnet I annan en group kontrakter ki travay ek zot leker, pareyman pou tou bann lezot travayer dan Gouvernman ki de fer zot mye pou delivre pou sa pep. Mon dir zot kontinyen.  E mersi pou zot devouman. Nou lo sa kote latab nou apresye zot sakrifis.

Me mon pou demann lezot travayer ki pa pe fer li pou zot osi pou met plis zefor. Aret gaspiy letan e lenerzi sa pep annou travay. Tou keksoz I an plas annou travay pou prosperite sa pei.

De lot kote mon pou osi demann Gouvernman pou revwar striktir e met bann mechanism an plas e kree bann kondisyon pli favorab pou asire ki kominote biznes e sekter prive I zwe son rol koman moter nou lekonomi.

Annou ankouraz tou nou frer e ser Seselwa ki anvi fer biznes pou fer li.  Aret sey rod fason pou fer zot fristre e kree en klima negativ, zis pou dir Gouvernman pa bon e pe anmar nou bann frer ek ser.

 

 

Konklizyon

An konklizyon, letan mon get sa Bidze ki’n ganny prezante pou nou zoli pti pei e nou bann zoli dimoun ki reprezant backbone nou kominote e nou lekonomi, ki nou isi lo sa kote latab nou fyer pou reprezante,   mon annan lespwar pou lavenir.  E mon egalman osi rekonnet ki wi nou kapab fer pli byen.

Mr Speaker, I annan bann moman dan listwar en pei, kot en dirizan I vini, ki’n ne pou li aport byennet pour son pei e son pep.  Dan kad Sesel, Prezidan Faure I sa Dirizan ki nou pei in gannyen pour sa zenerasyon, I en zonm ki pe konstrir, ki pe batir, non pa atraver konfrontasyon, me plito atraver konsansis.

Annou ankouraz li pou kontinyen anmenn plis enklizyon.  Ouver Gouvernman ankor plis e les tou Seselwa ki kapab partisipe e kontribye fer li. In konmans sa travay, annou siport li pou kontinyen.  Prezidan Faure I sa Dirizan ki pare pou travay avek tou Seselwa, nenport ki, ki sa dimoun I kapab ete dan Danny Faure, I pou trouv en willing partner ki pare pou travay men an men avek li.

Lepep annou kontinyen zis met konfyans dan sa zonm ki ozordi lemonn pe konsider 4 enm pli meyer Prezidan lafrik. En Prezidan ki cool dan son lapros me smart dan son delivery.   Ou sa zenn etidyan nou isi lo sa kote latab nou demann ou pou sezi tou sa loportinite pou kontinyen etidye e etidye pour ki anfen ou kapab arive ‘’be what you want to be.’’ E mwan mon pou kontinyen vin ou lavwa pou pouse kot I neseser pour ki Gouvernman e lasosyete I fer ou arive realiz ou rev.

Zabitan Takamaka mersi pou zot konfyans e sipor kontinyel ki zot in donn mwan e prezidan Faure, pandan sa 3 an nou’n arive akonplir bokou pou distrik.

Debouyer ki mon ete mon pa’n reste statik.  Mon’n rode e serse pou zot. Dan mon pe fer mon mye monn kapab dan sa prose petet ofans ou, mon demann zot leskiz pou sa.  E mon demann zot reste fikse e pasyante zwazo pa fer son nik dan en zour. Takamaka pe bouze ansanm nou pou arive.

Mon remersi lepep Seselwa pou zot konfyans ki zot in met dan nou parti o kour sa bann lannen ki’n pase.

Moman I ideal pou nou kontinyen anmenn mesaz lape e linite olye laenn.  Wi Prezidan Faure in montre nou sa, Lepep Seselwa get byen e analiz byen.

Byento nou pou desid nou desten. Lannen 2020 se lespwar ki pou rennyen lo nou pei.  Se sourir ki pou anim nou figir, e nou pou salye kanmarad koman bann vre frer ek ser Seselwa.

Ozordi mon pou dir en parol isi dan sa Lasanble, e mark byen mon parol, avek lagras Bondye, Danny Antoine Faure pou ganny sa eleksyon 2020!

 

(APPLAUSE)

 

HON PAUL ERNESTA

Dan lape e trankilite, i pou asir lape, e larmoni pou sa later Sesel.

Ansanm nou pou fet Laviktwar Prezidan Danny Rollen Faure 2020.   Mersi Mr Speaker.

 

(APPLAUSE)

 

MR SPEAKER

Mersi Onorab Ernesta.  Avek sa nou pou pran break. Nou ou retournen 11.15.

 

 

(BREAK)

 

 

MR SPEAKER

Bon nou ava kontinyen nou travay e toudswit  mon ava donn laparol Onorab Regina Esparon.

 

HON REGINA ESPARON

Mersi Mr Speaker. Bonzour Minis e tou dimoun ki a lekout.

Ozordi parey tou le lannen, nou war nou an fas en dokiman ranpli avek ‘des chiffres et des lettres” konmdi Franse, pour nou analize e pran en desizyon, lo depans ki Gouvernman pe anvizaze fer lannen prosen. Tenm ki zot in swazir se ‘‘Rezilta-Ekitab Prosperite Partaz.’’ I bon fer resorti ki sa menm Gouvernman SPUP/SPPF/LEPEP  e la prezan US, in deza promouvwar kantite tenm oparavan  parey: ‘’Laspirasyon 2013’’, ‘’Stratezi 2017,’’ ‘’Vizyon 2020’’ e tou dernyerman’’ Vizyon 2033’’, ki zot in detaye dan sa ki zot apel Stratezi Devlopman Nasyonal kot zot in tir sa zafer ‘‘rezilta-ekitab prosperite partaz.’ Parey non sa parti, Mr Speaker, zis tit sa dokiman ki sanze me apard sa tou i reste parey.

Mon’n pran en pe letan pou analiz sa Bidze ki devan nou, e mon konpran li dan sa fason- en  Bidze  avek bokou promes pou sa  eleksyon ki dan contour, avek detrwa mezir popilis atraver politik bon marse, ki pa  pe adres vre problenm pei pou lonterm e pa pou sanz sa 40% lapovrete parmi nou popilasyon. Sa 40% lapovrete, se pa LDS ki ti dir sa me atraver en survey ki UNDP ti fer e pli tar ganny konfirmen par Departman StatistiK Sesel.  Par-ler zot azir konmsi nu lo sa kote latab ki’n envant sa. Petet la Mr. Speaker, mon anvi fer zot mazinen ki Mr Mancham ti prezidan pou 11 mwan e depi le 5 Zen 1977 ziska ozordi le 7 Novanm 2019, I sa menm parti Koudeta ki o pouvwar. Sa I zis an ka zot in oubliye  kote responsabilite i tonbe.

 

(APPLAUSE)

 

HON REGINA ESPARON

Logmantasyon saler:

Kan mon’n fini relir sa dokiman Bidze trwazyenm fwa mon’n realize ki tou le 5an sak fwa ki I annan en Bidze, I annan en kalite Bonnonm.  Bonnonm Nwel I parey sa enn ki en santer lokal in sant lo la- I pa ziz byen, I fer riye sa ki travay dan sekter piblik e i met larm dan lizye travayer sekter prive.

 

(APPLAUSE)

 

HON REGINA ESPARON

Akoz mon dir sa?  Mr Speaker dan Bidze nou pe war logmantasyon saler pou sekter piblik, me nou osi  konnen ki se sekter prive ki moter prensipal nou lekonomi. Zot ki  kree larises dan pei e avek tou sa bann taks ek lezot presyon nou konnen ki I deza  difisil pour laplipar lakonpannyen sekter prive fer de bout zwenn.  Alors mon pa pe ekspekte ki bann travayer dan sa sekter pe al benefisye.  Eski sa I normal?  Eski I byen? Akoz ki Gouvernman pa konsantre son zefor dan fer desann pri lavi ki ava benefisye tou dimoun?  Olye zis fer monte saler dan sekter piblik? Kan I konnen ki bokou dan prive pa pou kapab fer parey pou aziste lapey zot travayer.  Annou pa oubliye ki sak fwa ou tann nonm logmantasyon saler, deswit I annan pri komodite e servis ki monte e en sel kou.   I anval okenn pti benefis ki sa logmantasyon I anmennen.

Mr Speaker, Minis dan son diskour in dir ki apartir Zanvye Gouvernman pou ogmant saler minimonm par R500. Apre nou’n osi vwar ki zot pe anmenn en logmantasyon 5% pou tou travayer. Kestyon se- eski zis bann dimoun ki ganny saler pli ba – setadir bann ki ganny 5300 ki pou ganny sa logmantasyon R500 oubyen tou saler de baz pou ogmante par sa sonm?

I enportan pour mwan redir ki nou dan LDS nou pa ti dakor avek sistenm logmantasyon lannen pase kot Prezidan ti pou ganny logmantasyon R4000, tandi ki travayer ti pou ganny zis R250.  Malgre ki zafer I Ankour, mon ti a voudre Minis ti ava eksplik nou ki’n arive avek sa larzan 5% logmantasyon ki ti dan Bidze 2019,  pour sa logmantasyon vi ki I pa’n ganny servi?

 

Fer monte pri GOP

Okenn mezir pou egzers serten kontrol lo la kantite etranze ki pe travay dan Sesel a nenport moman I toultan byenveni. Sepandan i neseser ki sa mezir i ganny aplike dan tou sekter, depi dan sekter prive koman dan Gouvernman li menm, akoz deplizanpli nou vwar ki Gouvernman pe anploy en kantite etranze dan son bann Minister e Departman dan bann pos ki souvandfwa nou prop graduate seselwa ki pe esper travay ti a   kapab okipe.

Dan menm laliny mon ti a voudre ganny en leklersisman lo rol ANHRD dan sa bann sityasyon, pou asire ki avan nou anvoy en dimoun swiv en letid spesifik, ki I annan sa demann pour sa kalite konpetans isi;- koumsa kan I retournen I kapab ganny en bon travay dan son domenn letid pou pa fini parey sa group zenn pilot Seselwa, ki vwar zot lanmen anmare akoz zot pa pe ganny loportinite pou aplik sa ki zot in aprann, akoz napa ase avyon pou zot kapab travay dan en fason ki permet zot devlope. Zot pas en kantite letan pe asiz pe esper en flight. Sa sityasyon pou agrave akoz i annan ankor en lot group ki byento pou graduate.  E Zot pa kapab kite pou al rod lanplwa aletranze akoz sa bond en R1milyon ki zot  sinyen avek Gouvernman.  Eski se koumsa ki nou ede nou zenn epanouir? Mon pa konnen ki Onorab De Commarmond I kapab dir nou lo sa.

Ler mon lo sa size, I obliz mwan demann Minis atraver ou Mr Speaker ki annan pou sa zenn dan sa Bidze. Ozordi en zenn ki anvi form en fwaye I rankontre bokou difikilte lo tou nivo.  En returning graduate I war li difisil pou aste en condominium si son saler pa   alaoter, e I pa zwenn sa threshold ki Gouvernman I mete.  Si i napa zanfan I ganny defavorize atraver sistenm pwen.

La I fer mwan mazin sa zenn garson ki mon ti zwen. I dir mwan I pe travay pandan 13an, e son saler I R12mil enkli son allowance, I annan en laplikasyon lakaz depi 8an pase e I pe pey Home Savings Scheme pou 8an avek bi ganny ede avek en lakaz. Son dezapwentman se ki  sak fwa I al kot Departman  Lakaz zot dir li I pa kalifye pou en lakaz, akoz I napa zanfan. Sa garson I dir mwan I reste dan en konfizyon.   Son rezonnman  se kote I pou met girlfriend ek zanfan kan I ankor pe dormi lo menm lili ek son pti frer e zot pe partaz en lasanm 4 zot kantmenm la I annan 27an.  E I pa kapab afford en lakaz lwe, akoz I ser.  Eski sa sistenm pwen pe fors li fer keksoz ki I pa ankor pare?  Kote li sa zenn I war li dan sa Bidze?

 

Larzan konpansasyon

Mr Speaker pli boner sa lannen Minis ti’n donn Lasanble en langazman ki pou rezourd sa zafer konpansasyon La Misère I pou bezwen al li menm kot Mon Rwa Abu Dhabi pou al rod larzan pou pey konpansasyon zabitan. Ki in fer ziska la? Ki rezilta sa bann negosyasyon? Mr Speaker minis pan onnet avek nou. Minis pa’n onnet avek nou akoz ozordi se larzan taks travayer ki pou ganny servi pou pey sa konpansasyon.  Kwa ki’n vreman arive? Minis, partaz ou lavantir avek nou. Nou ti a kontan en  leklersisman dan son larepons Mr Speaker.

 

Ogmant konze anyel

Annou get en kou sa zafer konze anyel.  Mr Speaker akoz ki Gouvernman pa ti konsilte tou bann sekter avan I ti pran sa desizyon pou ogmant konze anyel pou vin 24 zour ki fer ki kan ou azout avek 8 zour wikenn i pou vin 32 zour, si ou pran tou pou konze en sel kou.  Akoz zot pa ti konsilte sekter prive? Zis pou ganny vot zot in pare pou met sa prodiktivite ki zot koz lo la toultan dan bin!  Pa oubliye ki sa lannen I sipoze tonm anba tenm ‘Valoriz Travay dir’. Eski nou’n sitan travay dir ki nou bezwen 3 zour konze an plis? I devret annan dialog e non pa zis bann desizyon pirman politik avek bi ganny vot. Fodre pa zwe avek nou pei.

 

Bato Eden Island:

Mr Speaker mon ti ava kontan konnen si Gouvernman pe ganny sa maksimonm benefis posib lo bann bato plezir ki antre isi Sesel,  sirtou kot Eden Island.  Akoz ozordi sa bann bato ki reste isi pour mwens ki 3mwan pa pey duty lo bann servis ki zot gannyen.  Sa I ouver en laport pou labi kot bokou propriyeter, I fer sanblan sorti sesel zis avan zot ganny 3mwan e apre zot retourn isi.  Zot menm ki pe benefisye ek duty free, tanka   nou pep e ganny taks a gos  a dwat. Depi lontan sa size pe ganny diskite e ti a bon Minis I dir nou ki nouvo devlopman lo la.

 

Lasante: –

Mr Speaker, mon  apresye ki Gouvernman in koz lo Scheme of  Service bann ners. Wi zot merite.  E mon felisit bann ki pe travay dir.  Me eski Minis in regarde si se sa ki zot ti diskite avek Minis Adam, e kan ti sipoze pran lefe? Eski bann ners ki’n fek ganny zot Degree pe ganny sa ki Minister ti promet? Minis, parfwa ou bann koleg I fer promes deryer ou ledo e sa pa anliny avek sa ki ou met dan Bidze. Nou devret osi ganny dir ki annan pou bann lezot kad travayer, parey  bann clerk, bann porter eksetera.

Yer bomaten mon ti kot lopital Mr. Speaker e en  clerk I dir mwan li in travay 32an dan lopital, I ankor pe tous zis 7200, boner sa lannen I ti ganny en let pou li ganny retention allowance, ki zanmen I ganny, e ler I al gete I ganny dir  non zot  pa tomb dan sa kategori. Eski sa bann kalite travayer napa lenportans pou ganny retenir apre 31an? Oli lankourazman?

Leta lopital:

Mr Speaker, mon pa kapab pa koz lo leta nou lopital, akoz mwan mon en dimoun ki servi sa lopital, mon asiz parmi pasyan lo ban ek mon limero,  mon konn son douler. Ler ou’n esper plis ki 3erdtan tan pou war dokter, e ou ganny dir nou pa war ou rezilta, oubyen nou pa war ou kart, ou kapab mazinen kisisa ki pas dan ou lespri. Mon swete ki sa proze  Health Information System a ganny finalize e pasyan a santi sa soulazman.

Fungus dan lopital, ki kontinyen menas Lasante bann travayer, kot ou pase ou war miray in gri, menm dan bann landrwa ki fek fer renovasyon, fungus pe re-penetre. Ki Minister lasante pe fer pou amelyor sa sityasyon? I annan keksoz dan sa Bidze?

Mr Speaker, sa 6em lasanble ti vot lo en lalwa pou regilariz sa zafer tretman aletranze, me nou war ki I annan bokou pasyan ki pa pe ganny refund kan zot ti merite, e  menm ki zot fer appeal zot pa pe gannyen. I enportan pou pa pran en latitid pini pasyan ki al deor, me plito regard byen zot listwar. Wi, I posib ki sa loperasyon ti a kapab fer isi, me akoz ki Minister Lasante pa’n kapab dekouver malady sa pasyan?

 

Ogmant taks lo veikil:

Msye Spiker in ler pou sa Gouvernman aret zwe avek sa size taks lo veikil.  Sa I sanze toulezan enn ler I en pti larzan lo la, enn ler I ogmant par en gro sonm. Wi, I vre ki nou konsernen avek lanvironnman e nou tou nou ti ava kontan annan en loto elektrik, me malerezman pa nou tou ki kapab afford sa e I annan dimoun ki tin fini met zot order pour zot loto e la en sel kou 25000 an plis pou peye! Ki pou arive?

Touzour lo sa size taks lo veikil, mon pa konpran akoz pe ogmants taks lo veikil komersyal pou met li parey sa ki prive.  En veikil komersyal i en ganny pen pour  en dimoun tandis ki en veikil prive I pou ou lwazir e en mwayen pou ou deplase. Mon demann mwan si sa Gouvernman zanmen in tann sa dikton ki dir dile ou tir avek bef e non pa avek park!  Mon krwar dan pe tro rod larzan, zot pa’n realize ki zot pe zwe avek dipen bann travayer.

 

Logmantasyon dan pri lalkol:

Sa I anmenn mwan lo mon lot pwen Mr Speaker- logmantasyon dan pri lalkol.  La zot pe vreman tir dile avek park la. Tou letan nou pe dir isi dan sa Lasanble ki ogmant pri lalkol pa pou fer dimoun aret bwar. I selman pini bann ki enjoy en pti bwar de tan-z-an tan e I ogmant soufrans bann zanfan dan bann fanmir kot paran I alkolik akoz parey nou konnen pour sa bann paran zot boutey bwar I vin avan tou enn ler. Kan pri I monte zot redwir sa ki zot met dan aste manze e lezot nesesite lafamiy e plito aste zot bwar.  Sa logmantasyon I zis en mezir ranmas larzan kot zot kapab e malerezman zot in fini faid an sa ki konsern annan bann bon nide pou kreasyon larises.  Zot gaspiye lo en kote e apre pini dimoun pou bous bann gro trou ki zot in fouye! Silvouple fer lezot program edikasyonnel pour nou anmenn en vre lalit kot lalkol.  Sa I enkli plis program pour nou bann zenn.  Atak osi bann move labwason ki pe pran lavi nou dimoun. I enportan ki Minis pa ferm lizye lo sa enn.

 

Lazenes ek spor e kiltir:

Koman en dimoun ki byen entegre dan son kominote mon demann mwan ki I vreman annan pou nou zenn dan sa Bidze?  Nou’n antann minis koz lo zwe lespwar e zwe olenpik. Sa I pou kouver zis en pti minorite sportif Seselwa. Bann lezot ki fonksyonn lo nivo lokal I annan gro difikilte e mon pa war provizyon pou vreman ankouraz nou lazenes pratik spor olye abiz lalkol avek drog.  Si nou revwar nou performans dan Zwe de Zil nou devret senserman dir ki I annan bokou pou fer. Felicity Passon ek lezot atlet, enkli lekip madam volleyball ki’n kapab fer nou paviyon flote dan sa zwe, mon dir zot felisitasyon pour zot zefor e malgre tou bann defi.  Me selman nou war ki bann pei vwazen pe kit nou deryer. Festival Kreol sa lannen ti enn pli dezapwentan. Popilasyon pann war zot ladan e in annan en mank aktivite popiler.  Ler nou koz Dimans Kreol Borlanmer, piblik pa pe ekspekte ou anmenn li Roche Caiman  dan grabo, kan I annan sitan kantite zoli lans natirel isi!

 

Distrik:

Mr Speaker, les mwan fer en tour d’orizon dan  distrik Glacis, ki mon reprezante isi dan sa lasanble. Dan sa 3 dernyen lannen, mon ganny sans partisip dan seleksyon bann proze ki pou develop nou distrik ansanm ek DA, e  responsab proze  dan diferan  Minister.

 

  1. Proze agrandisman semen North East Point ki’n komanse pe trennen, travay tanzantan I arete. Eski sa I akoz kontrakter pe ganny retar pou ganny son lazan? Oubyen sa letarzi ki egziste, ozordi dan sa pei, e tou keksoz I mars lo slow motion?

 

  1. Proze agrandisman semen La Gogue: mon pa war sa larzan dan Bidze, se pourtan, CEO SLTA ti donn son langazman ki sa proze pou komanse sanmenm sa lannen.  Oli?   Ase promet e met dimoun lo ler kan zot konnen zot pa pou deliver.

Me malgre sa Mr. Speaker, mon pe enplor Minis pou regarde,  akoz ki sa proze pa’n demare.  Akoz apre en visit ki ti ganny fer avek CEO SLTA e mwan menm ek Lotorite Distrik kot apre  I ti donn en interview  – I ti  donn sa lasirans ki I pou en proze par faz,  E ki annan 2.4milyon ki ti’n fini annan pou komans premye faz.

Mr Speaker mon enplor Minis pou pa zwe bliy bann dimoun  ki servi sa semen La Gogue ki pe pas dan bann difikilte sirtou  letan  I annan lapli.   Akoz ou predeseser ti’n donn son garanti  ki sa semen pou ganny fer akoz li I ti enn ki pas lo la toulezour e I ti’n konpran sa nesesite.  Pa akoz zot in zet li en kote ki prezan zot bliye ki  I ankor annan dimoun ki reste  dan sa rezyon.  Minis atraver  ver ou  silvouple get ladan.

 

  1. Proze store ek bazar ek pantoon pou peser Glacis: Minis Bastienne dan son prezantasyon Plan Konpreansiv,   ti dir nou ki zot pe al fer sa proze e pou komanse avan Desanm.  E I ti dir mwan personnelman,

‘’Onorab ou pa pou bezwen  anmenn mwan dan lasanble, pou demann mwan ki pe arive ek sa proze, akoz mon pou fer sir mon  al delivre.’’  Oli?  Nanryen!  Nou’n deza ariv Novanm.  Desanm I dan kontour! Nanryen! Nanryen!   Nanryen!  Mon pa konnen si Bonnonm Nwel ki pou  vin avek, oubyen ler pre ek eleksyon ki pou demare?  Peser Glacis mon donn zot sa garanti ki mon pou kontinyen pouse.  Ansanm avek Lasosyasyon Peser ki’n formen boner sa lannen pou ki  Minis I deliver lo son promes.

Mr Speaker permet mwan letan mon lo sa size peser pou mwan dir avek Minis pa zet nou bann peser.

Dan en teks  mon fek gannyen la 10.31 en dimoun I dir mwan dir Minis, ice plant Praslin pa pe fonksyonnen. Ice plant Bel Ombre pa pe fonksyonnen.  Ice plant Providence enn I rezerve zis pou bann long line;- priyorite pou bato etranze ki fer long line.   Lot si I annan pa gannyen. Ice plant  Lasose pa pe fonksyonnen.

Minis mon enplor ou atraver Mr Speaker regarde ki pe arive avek sa  bann ice plant akoz nou’n deza anmenn size Ice plant dan sa Lasanble e Gouvernman ziske prezan pe refize aste ice plant nef. I pe pran  zis bann 2enm men ki I ganny en pe partou e se sa ki fer ki  3kar ditan  ou war  ki nou war  bann ice plant I mars en serten letan e apre I pa fonksyonnen e nou peser I soufer.

 

4.Semen kot Lafanmir Hoareau, Machabee:  Sa osi en vye promes ki ankor pe trennen, ki nou pa konnen kan pou  ganny deliver. Leskiz tro bokou. Antretan sa  bann fanmir I kontinyen pas dan difikilte.  E la mon mazin Roseline ki  bezwen  asiste son zanfan an montan , an desandan  sak fwa I bezwen deplase – swa pou dokter oubyen pou physio, akoz son problenm; Mr Hoareau ki’n bezwen aret reste kot son lakaz pou le moman akoz son maladi,  akoz ler lanbilans I vini   zot pa kapab ariv obor son lakour, e li  akoz son malady I pa kapab marse.

Mr Speaker mon pe demann ek Minis pou gete kote retar I ete.  E mon osi demande ki dan sa proze zot konsider fer miray ek lateras kot tou 2 lakour obor, ki zot pou bezwen touse pou fer sa proze;- sa I kot Mr Simara, e madanm Zialor ki sa semen pou pas atraver.

Mr Speaker annou get

proze 24/24/24,  mon war ki  Minis in endike ki sa proze I pending pou Glacis.   Tandis ki lezot distrik pe bouze, e  pou sa proze lakaz ex-Ferrari, en lot proze ki mon ti’n fini diskit ek minis pou MHILT, li mon pa war li dan sa Bidze  pou sa proze.  Pourtan I annan akse semen, akoz nou pa koman sa en antretan ki Gouvernman ankor pe negosye, pou ganny semen pou fer sa proze  lakaz 24/24/24,   lo Ex Sacos. Sa ti tir en pe presyon lo sa demann lakaz  dan distrik.

 

  1. Proze  Playground pou lekol Glacis: en lot proze ki sak fwa ou demande I dir pe al fer  Larzan in fini ganny mete.  Ankor pe trennen. Nou apresye nou’n ganny en daycare ki I pou benefis nou bann manm ki annan zanfan ki bezwen al travay. Nou ti a osi apresye si Gouvernman ti a kapab met an plas en  progranm child minding entansif  pandan letan vakans pou lezot zanfan ki napa okenn landrwa pou zot paran met zot dan letan vakans.  Akoz apard sa progranm NRA, en kantite zanfan I reste an deor sa program e zot napa landrwa pou zot paran met zot.

 

  1. Speaker en lot proze ki pa ti’n ganny met lo lalis pou Glacis se sa proze kordgard,  ki diran sa lannen nou’n konstate ki fodre fer keksoz pou amelyor sa sitasyon. E  nou’n anmenn sa diskisyon lo diferan nivo, ziska  ki nou ti inisye en visit kot tou akter  in  dakor ki nou ava pous playground en  pe par deryer e sa I a donn en pe lespas pou ki sa kordgard I ava ganny fer. Mr Speaker mon demann Minis pou regarde kote dan son Bidze  I kapab ganny en pti larzan pou fer nouvo   en Kordgard Glacis.

 

  1. Parkont I annan lezot proze, ki ganny met on hold akoz difikilte pou ganny teren;- parey proze Bus-stop  ek shelter dan sant Glacis;- proze lagrandisman laplenn foutbol, semen loto  Machabee, pou deserve la fanmir Barreau, Azemia e Beaudouin e lezot.

 

  1. Mersi pou Proze miray kot flat Malaysian in komanse en promes  ki’n la depi 3an pase. Me annou pa bliy  promes ki  zot Prezidan ti fer 2017 ler I ti visit distrik Glacis. Mon’n anmenn kestyon parti kestyon pou Minis kot     Mwan pase apre ki mon’n fer visit kot bann Flat North East Point, nou’n deside ki pou bouz devan, fodre ki Minis I vin fer en meeting lo vilaz e koz ek sa bann dimoun pou konpran sityasyon e ganny en way forward. Larepons mon email sete ki bann zofisye lenfrastriktir pe finaliz sa proze avan zot zwenn ek zabitan.

Mr Speaker sa I parey konmsi nou pe met en bef par deryer en bef, olye met bef devan saret.  Akoz ou bezwen konstate aval sa bann dimoun pou konn zot bezwen avek ki ou finaliz zot demars apre zot a vin enpoze. Ankor mank konsiltasyon!

 

  1. Lo kote lekol nou’n war, kot Gouvernman I bezwen depans plis ki R2.4milyon, pou koriz fot ki retir bann risk ki sa konstriksyon fer pa lakonpannyen Sinwan ki ti donn Gouvernman sa lekol. Wi nou dir mersi letan nou ganny en Don, me an menm tan, nou bezwen get ki kalite louvraz zot donn nou.    Mon pou kontinyen enplor Gouvernman pou get byen, e annan plis sipervizyon lo bann proze ki bann lakonpannyen Sinwan I fer, e fer sir ki I lo standar, ek bann norm ki Sesel I servi.  Legzanp I la devan nou;- Lasanble Nasyonal,  Lakour,  lekol Au Cap, e la ankor lekol Glacis.

 

Nou distrik ti a’n kapab benefisye dan en lot proze ek sa R2.4milyon ki in bezwen ganny depanse pou  rektifye lerer.

 

 

  1. Me ki nou war?  Bann proze ki kontinyen tren lipye.  I annan tro bokou letarzi ki ganny donnen ler ou demande kote proze in arive. En ler ou krwar ki zot pe pini bann distrik ki’n vot LDS. Sa mantalite  pini I ankor anzandre ek zot, me nou

garanti ki sa pa pou lontan.  Akoz tre byento, mon dir ankor tre byento, zot letan pini dimoun pou expire, akoz sa pep pe al zet zot anba dan sa prosen eleksyon. Konmdir Hon Herminie, MNA Elekte pour  La Riviere Anglaise ‘The long waiting President to be Hon Wavel Ramkalawan  to  ranport laviktwar.’’  ‘’And The time Is right.’’

 

Konklizyon

An konklizyon Mr Speaker, pou konklir ler mon’n ekout deba lo sa Bidze depi sa 2 zour, I fer mwan krwar, ki nou bann dirizan I dekonekte ek larealite. I kler ki parol sa parol laverite ki Onorab Gill ti dir Mr René ti dir li pa ankor koul byen dan zot latet.  I ti dir byen kler, ki ‘’zot in okip zot lekor e negliz lepep Seselwa.’’

Ozordi US I vin dir nou  ki zot pou partaz larises sa pei avek tou dimoun. I fer lapenn kot zot kontinyen anbet sa pep e zot in fer pandan 42an. Lekel sa fou bet  ki  pou krwar ki si I donn zot ankor 5an keksoz pou sanze?   Eski sa enn ki lo lalis esper lakaz, oubyen en bout later dan distrik Glacis I sante ki in ganny en par dan sa prosperite?  Eski Shamira ek lezot I santi ki prosperite in ganny partaz dan en fason ekitab, letan li I pe monte desann kot biro Housing pou  li ganny asiste e I pe ganny anvoye demen tanto?  Eski Florette I santi ki I annan lazistis letan in fini pey son bout later depi Avril e Gouvernman pa oule transfer son later lo li pou li kapab ganny en loan?   Eski zabitan Glacis  e lezot I santi I annan lazistis ler zot get lo montanny Sorento zot war en boug ki ti napa Nanryen, nanryen, nanryen, nanryen ki  son semiz ki ti lo la 3an pase pa ti pour li…

 

MR SPEAKER

Onorab …

 

HON REGINA ESPARON

… sato 5 letaz ek tou son letalaz …

 

MR SPEAKER

Onorab zis fer atansyon.

 

HON REGINA ESPARON

Mon pa’n nonm non personn Mr Speaker.

 

HON REGINA ESPARON

Kontinyen.

 

HON REGINA ESPARON

Mon pa’n nonm non personn  mwan!   Mr Speaker …

 

 

MR SPEAKER

Onorab  Standing Orders I kler lo la. Si I annan okenn kestyon – ou konn tre byen nou swiv Standing Orders. Ok?  Kontinyen.

 

HON REGINA ESPARON

Wi Mr Speaker son semis ki ti lo li 3an pase pa ti pou li ozordi sato 5 letaz ek tou son letalaz ki’n ganny konstri dan landrwa ki ou, ou ti  ganny dir I tonm dan Rezerv. Akoz proksimite Danm La Gogue I  zis par anba. Me pour lezot ki dan lopilans zot, zot gannyen.

 

(APPLAUSE)

 

HON REGINA ESPARON

Sanmenm sa  – sanmenm sa ‘’rezilta-ekitab prosperite partaz’’ sa Mr Speaker?  Sanmenm sa Mr Rene  ti pe dir zot, zot okip zot lekor zot pe negliz lepep Seselwa!  An terminan Mr Speaker mon a dir ‘’Pa trakase.’’  Ozordi nou annan en Gouvernman ki pe tate dan fernwanr konmsi I per –  ou a krwar  I pe mars lo lakok dizef.  Kontinyen met zot konfyans dan LDS akoz anba en Gouvernman dirize par Hon Ramkalawan ek Hon Afif, nou pei pou konn prosperite e en bon lavenir pou tou Seselwa!  Mersi Mr Speaker.

 

(APPLAUSE)

 

MR SPEAKER

Mersi Onorab Esparon.  Bon ler mon’n port ou latansyon zis mon’n averti zot zis fer atansyon pou pa al pli lwen – se tou ki mon’n anvi fer. Mon konn ou drwa – ou ekspresyon annan sa laliberte pou eksprim ou me zis mon’n kosyonn ou.  Ok?  Mon a donn laparol Onorab Simon Gill.

 

HON SIMON GILL

Bonzour Mr Speaker.  Bonzour Minis avek ou tim.  Bonzour tou koleg Onorab.  E tou manm piblik ki pe ekout nou.  E Seselwa partou kot zot ete ki pe swiv nou deliberasyon lo sa Bidze 2020.

Mr Speaker, apre ki mon’n ekout Bidze prezante par Minis Finans, le 31 Oktob, sa Bidze i en soulazman.  En soulazman pour lepep Seselwa.  I en soulazman pour tou bann zabitan dan tou kwen nou kominote, dan tou kwen Sesel.

Me an menm tan ki mon dir sa Mr Speaker.  Sa mwan ki nou pe debat lo Bidze 2020, i en mwan ki anmenn serten memwar tris pour mon fanmir.  Akoz ozordi nou le 7 Novanm,  e i dat ki mon ti anter mon manman sonnyen.

Apre ki i ti’n ganny masakre avek en bis SPTC.  I ti’n ganny kite dan milye en semen dan en basen disan.  Drayver pa ti arete.  In reste dan en milye soley pour apepre 45minit avan ler ki i ti kapab ganny transpor lanbilans pour vin sekour li.

E dan sa 6er edmi bomaten, ler mon ti monte sorti pran en boutey gas lo Shell – ler mon monte, sa 01 Novanm mon vwar li dan milye soley dan milye semen dan son basen disan.   E mon apros li, koz avek li.  I dir mwan, ‘’mon piti sov mwan!’’  Malerezman, i ti’n tro tar.

E dan sa bann sirkonstans Mr Speaker, mon’n rode vitman lekel drayver ki ti responsab pour masakre sa tantin 83an, e in kit li dan en basen disan.

Ler mon’n ganny lenformasyon, mon atann- esper sa bis SPTC desann.  E mon’n enterakte avek sa drayver.

Napa en sel moman Mr Speaker, ki mon ti tir sa drayver dan son bis pour mwan assault li.  Parey Onorab Ferrari ti dir semenn pase isi dan sa Lasanble.

Mr Speaker, se sa drayver Mr Stephaney Edmond ki ti ouver laport bis lo mwan.  E sot lo koltar.  E la ti annan en enteraksyon.  E Mr Speaker la baz se pa sa.  Mrs Dugasse ne le 30 Zen 1930,  i enn parmi bann fanm konbatan,  ki depi bann premye moman in lalit pour liber Sesel, pour nou Sesel ganny son Lendepandans e sorti anba dominasyon Pouvwar Kolonyal Angle a lepok.

 

(APPLAUSE)

 

HON SIMON GILL

E la baz, i pa zis sa Mr Speaker.  Sa msye malgre 2 Onorab dan sa Lasanble in sey portre sa msye koman en ero, e mwan koman en vilenn, sa msye in ganny kondannen.  Le 12 Avril 2018, apre 5an ki nou’n ganny lazistis.  18mwan, kondannasyon sispann, pour 3an R10mil lanmann, 3an sispansyon son license dray.  Sa i sityasyon.  E mwan mon’n ganny demande pour mwan pey R20mil.  This is the beauty of our justice.   Pa problenm sa!

Me lefe i reste, ki dan sa Lasanble Mr Speaker, nou bezwen arete sa pratik kot ler nou oule asasin karakter nou bann koleg dan sa Lasanble, nou toultan ale, nou al fouy dan son pase.  Akoz nou krwar i annan en posibilite pour nou ganny lavantaz politik.

Me Mr Speaker, mon demann mwan ki mannyer bann Onorab lo lot kote latab pour santi, si mon fer zot rapel ki Onorab Ramkalawan,  sa zonm ki zot pe promot li, pour li lead sa pei.  Zot pe assume ki i pour ganny laviktwar dan prosen eleksyon Prezidansyel.  Sanmenm sa zonm ti assault enn son koleg Onorab dan Lasanble Nasyonal kot Libreri Nasyonal!

 

MR SPEAKER

Onorab …

 

HON SIMON GILL

Ki mannyer zot pour feel si sak moman …

 

MR SPEAKER

Onorab Gill.  Onorab.

 

HON SIMON GILL

… mon reiter sa sityasyon  ki malerezman ki’n arive avek sa zonm ki zot pe promot li.

 

MR SPEAKER

Onorab Gill.  Onorab.  Onorab aret en pti moman.  Mon krwar ou devret konsantre ou entervansyon lo Diskour ki Minis ti fer avek Bidze.  Mon’n donn ou sa sans pour ou kapab koriz sa alegasyon ki’n ganny fer kont ou semenn pase.  Mon krwar now it’s time to move on Focus lo travay ki devan nou.  Si nou- ankor Standing Orders i gid nou tre klerman,  bann Leaders ki dan nou Lasanble si nou oule kestyonn zot konportman,  menm dan lepase,  nou annan en fason ki nou Standing Orders i gid nou pour fer sa.

E ankor mon dir menm avek tou lezot Manm.  Depi Prezidan, Vis-Prezidan, son bann Minis. E plizyer bann Pos Konstitisyonnel.  Nou annan en fason ki nou Standing Orders i gid nou, pour nou kapab anmenn serten keksoz, oubyen kestyonn zot konportman.  Annou fer li koumsa Onorab.  E annou retourn lo travay ki devan nou.  Onorab Simon Gill.

 

HON SIMON GILL

Mersi bokou Mr Speaker.  Mr Speaker.  Mrs Melissa Dugasse in antere parey mon’n dir, 2013 7 Novanm.  E mon mwan ti enn- tre zenn.  Laz 13an in donn mon en direksyon.

Lespri combatif, sa determinasyon Mrs Melissa Dugasse pa’n anven.  I pa’n anven akoz Sesel in ganny Lendepandans.  E Seselwa in ganny libere.  Sistenm sosyal in sanze dan sa pei.  Diskriminasyon in ganny eliminen dan en gran poursantaz dan sa pei!

E ozordi ki mon pe adres Lanasyon Seselwa lo size Bidze 2020,  I enportan ki mon salye tou bann konbatan, menm sa ki’n mor, e menm sa ki la.   Pour zot travay dir.  Pour zot combativité, pour zot determinasyon pour kontribye pour liber Sesel.  E pour donn Seselwa son dinyite Mr Speaker.  Nou fyer sa ki nou’n reisir achieve dan sa pei.

Byensir i napa okenn lezot parti ki’n o pouvwar depi 1977.  Nou konnen sa.   Pa bezwen nou ganny fer mazinen sa.  Sa ki zot bezwen fer lepep mazinen Mr Speaker ler nou pe adres Bidze 2020, se fer zot mazinen poudir ti annan lapovrete avan 1976, avan 1977.  E lapovrete dan sa pei pa en lenvansyon SPUP/SPPF/Lepep e United Seychelles.

 

(APPLAUSE)

 

HON SIMON GILL

I en lipokrizi pour fer krwar lepep ki lapovrete, sa 40% ki nou pe dir, UNDP in met dan en rapor ki konmsi i en lenvansyon nou parti.  Nou parti pe ede depi ler i o pouvwar pour elimin lapovrete dan Sesel.   E zanmen nou pour kontinyen arete.  Zanmen nou pour arete!  Nou pour kontinyen.

Malgre ler nou met bann vot.  Larzan anba welfer, anba lezot Head.  I annan bann smart capital Mr Speaker.  Zot oule dir zot pour koupe.  E sa pe mete akoz eleksyon.

Mr Speaker eleksyon, pa eleksyon, sa nouvo zenerasyon leadership dan United Seychelles i determinen pour derasin sa dernyen pti poursantaz lapovrete ki i annan dan sa pei.

 

(APPLAUSE)

 

HON SIMON GILL

E si LDS son lekip ki la dan Lasanble Nasyonal zot sitan brav.  Nou dir zot koupe!

 

(APPLAUSE)

 

HON SIMON GILL

Koupe sa Bidze welfer.  Koupe!  Si zot sitan brav.  Koupe or freeze!  E de le moman ki zot koupe e freeze,  sa i ava met en lafen dan lo okenn retorik 40% lapovrete isi dan sa Lasanble Nasyonal.

 

(APPLAUSE)

 

 

HON SIMON GILL

Mr Speaker, lot eleman ki tre enportan ki nou adrese.  E ki’n sorti dan plizyer lentervansyon.  Se nou’n met Sesel lo son zenou.  Mr Speaker sak Bidze, ki Minis Finans i prezante.  A sak moman- Bidze i annan en misyon tre spesifik ki ganny definir pour li akonplir.

E tou sa bann Bidze, aksepte oubyen non.  In akonplir son misyon.  Nou a debat lo ki poursantaz son misyon in akonplir?  Akoz poursantaz lakonplisman misyon en Bidze i depan en kantite lo dinamik sosyete.  Lo kapasite sosyete a diferan moman.

E nou tou isi dan sa Lasanble nou konn dinamik sosyete.  Nou konn dinamik sosyete Seselwa.  Nou konn kapasite delivre dan nou sosyete.  Delivre lo bann proze.  Delivre lo bann prozeksyon, delivre lo tou bann keksoz ki nou dir.

Nou annan en limitasyon lo nou kapasite.  Alor lakonplisman misyon e lobzektif Bidze i depan lo nou kapasite.  Byensir an depandan nou kapasite, i sa rezon ki serten Onorab o tour latab dan LDS poudir ki dan mon distrik, pa tou mon wish list ki’n ganny realize.

Me labote ek tousala Mr Speaker.  Se ki malgre limitasyon kapasite pei.  Preski mazorite bann MNA dan LDS ki’n entervenir.  Zot in vin ankor avek en wish list.  E zot oule ki pei, zot oule ki sa Gouvernman i enplimant sa lalis ki zot in vin avek ozordi dan Lasanble.

Me the bottom line Mr Speaker i kwa?  The bottom line, se ki nou sitan pa oze rekonnet ki sa Gouvernman pe delivre.  Nou sitan pa kapab dir mersi.  Akoz pangar i ava donn kredi Gouvernman.  Nou zis dir napa nanryen ki’n arive.

Sa i en pratik pli dezonnet ki egziste parmi bann profesyonnel.  Ler ou fail pour acknowledge keksoz ki byen.  E ou pa zanmen bliye pour ou dir.  napa nanryen ki’n ganny fer.  E sa nou bezwen fer atansyon.

Akoz i pa ki nou oule semen parmi nou popilasyon.  Nou oule ki nou popilasyon i en popilasyon ki rezonnab.  Rezonnab ler sa ki byen zot dir i byen.  Ler sa ki mal, zot dir i mal.  Ler sa ki’n ganny fer, zot dir in ganny fer.  Nou dir mersi.

I annan i kapab dir be nou pour dir mersi.  Nou larzan ki’n fer, fer sa.  Larzan taxpayers.  Me i pa zis larzan taxpayers Mr Speaker.  I en Polisi, i en prensip en parti ki o pouvwar.

 

(APPLAUSE)

 

HON SIMON GILL

Mr Speaker, Sesel pa lo son zenou.  Sesel pe debout byen for e fyer anba Leadership Prezidan Faure.

 

(APPLAUSE)

 

HON SIMON GILL

Mr Speaker, Sesel pa lo son zenou, ler mon dir atraver nou Leadership, depi ’77 ziska la.  nou’n reisir donn housing ownership pour 93% nou popilasyon.  Kote ankor ki egziste sa?

 

(APPLAUSE)

 

HON SIMON GILL

Nou’n reisir anmenn elektrisite avek delo kot apepre 90% nou popilasyon.  Kote ankor ki egziste sa?

 

(APPLAUSE)

 

HON SIMON GILL

Mon oule taler zot dir, ki kote i egziste?   E nou annan Onorab Afif ki domin byen bann statistik.   E mon ti ava demande pour li dir nou bann statistik le kontrer ki i annan.

Mr Speaker Sesel pa lo son zenou.  Ler mon a dir ki ozordi Sesel i ganny klasifye koman en pei a reveni o.  I en model pour Lafrik, i en model pour bann pei Losean Endyen.  Ki kote ankor i egziste sa?   Sesel menm ki nou pe koz lo la, la?  Oubyen i en pei ki egziste dan serten lespri dan en lezas parla?

Mr Speaker Sesel pa lo son zenou.  Ler mon a dir poudir ozordi, dapre bann dernyen statistik.  Nou annan nou $545milyon nou gross foreign exchange reserve.  Ki kote ankor i egziste sa, apard bann gran pei devlope?

E dapre bann ekonomis.  I dir nou, nou annan apepre 3.5 mwan valer lenportasyon nou rezerv an deviz etranzer ozordi.

Eski en pei ki lo son zenou i mentenir en rezerv $545 milyon?  Eske i korek pou dir sa?

Mr Speaker, Sesel pa lo son zenou.  Ler mon a dir poudir Sesel i ganny klasifye koman enn parmi bann pei ki i annan bann pli o devlopman lendeks devlopman imen-resours imen.

E i en model pour Losean Endyen.  I en model pour Lafrik.  Sesel menm ki nou pe koz lo la?  Oubyen en lot pei?  Wi Mr Speaker Sesel ki nou e koz lo la.

Mr Speaker Sesel pa lo son zenou.  Ler mon a dir poudir sa Gouvernman atraver son Polisi.  Nou’n elimin bann kabinen trou ki ti anvair partou dan nou bann distrik.  Ki ti en manifestasyon nou lamizer, e lamizer nwanr, fernwar menm ki nou ti ladan dan sa pei.

 

(APPLAUSE)

 

HON SIMON GILL

Mr Speaker Sesel pa lo son zenou.  Ler mon a dir poudir atraver nou Polisi nou’n reisir preski elimin stov petrol dan sa pei.  E mazorite bann fanmir Seselwa pe servi LPG gas.  Sesel menm ki nou pe koz lo la sa?  Mr Speaker tousala i ganny akonplir atraver bann misyon, bann lobzektif ki ganny definir dan bann Bidze ki ganny prezante a sak lannen, a sak moman dan devlopman nou pei.

Mr Speaker Sesel pa lo son zenou ler mon a dir poudir nou’n reisir anmenn o nivo dan nou sistenm lasante.  E ozordi nou sistenm lasante pe kontinyen ganny pli gro poursantaz nou Bidze.  Egalman ledikasyon, pli gro poursantaz nou Bidze.

Mr Speaker pa vo lapenn- mon rapel bokou nou isi dan sa Lasanble.  Ki i dan nou servis lasante avan ’76, avan ’77 ti annan sistenm Klas premyer, segon, trwazyenm.  Nou’n eliminen.  Nou’n aboli sistenm Klas dan nou sistenm lasante.  I en Polisi, i en Prensip sa Gouvernman parti SPUP/SPPF/Lepep and United Seychelles Mr Speaker.

 

(APPLAUSE)

 

HON SIMON GILL

Mr Speaker mon a dir Sesel pa lo son zenou.  Ler mon a dir poudir dan nou servis lasante, ozordi nou annan nou en kantite Seselwa kalifye pe travay.

Resaman nou’n annan bann nouvo group dokter ki’n desann pour donn en koudmen dan nou servis lasante.  Nou dir zot felisitasyon.  Mersi pour retournen e zwe zot rol dan nou sistenm lasante isi dan Sesel.  Nou bezwen zot.

Nou bezwen zot pour anmenn pli o nivo kalite dan nou sistenm lasante.  E fer sir ki nou dimoun i reste an bonn sante pour kapab kontribye efektivman dan devlopman nou pei.  E pour ki an retour nou ava ganny plis larises.

E Minis Finans ler i a vin prezant Bidze, prosennman ki i pa pour retire.  Akoz i ankor en zonm for.  I en zonm ki annan en kantite kapasite.  I ava kapab prezant nou avek en lot Bidze, avek en nouvo prozeksyon, nouvo perspektiv pour Sesel Mr Speaker.

Mr Speaker Sesel pa lo son zenou.  Ler mon a dir poudir dan nou sistenm ledikasyon.  Nou’n demokratiz nou sistenm ledikasyon.  Me nou konnen i annan mankman.  Nou oule ki nou standar dan nou sistenm ledikasyon i ogmante.  Nou quality of teaching i ogmante, pour ki an retour nou ganny bann meyer rezilta.  Pour ki an retourn nou anvoy plis nou bann zenn formen dan Liniversite Sesel oubyen dan Liniversite dan lezot pei.  Pour ki an retour nou build up nou rezerv bann Profesyonnel kalifye e kapab partisip efektivman dan devlopman Sesel Mr Speaker.

Mr Speaker Sesel in devlope.  Sesel in progrese.  Mon kapab konpran lannwi, langwas ki serten i trouve i egziste dan Sesel.

Mr Speaker sa lannwi, langwas ki egziste,  sa tirayman ki egziste parmi en serten nou popilasyon byensir.  Se bann privilez lepase.  Bann loportinite lepase.  I tarde pour retournen.

Me en mesaz enportan Mr Speaker.  Se ki bann levennman dan nou listwar in anter sa bann privilez.  Bann privilez ki ti pour enn detrwa.  Bann loportinite, bann mwayen ki ti pour zis enn detrwa.  Me lamazorite nou popilasyon ti pe ganny servi koman bann marspye devan laport bann gran msye, bann gran madanm.

Nou’n antere sa peryod dan nou listwar.  E nou pe dir O Pouvwar, pa o pouvwar nou pour kontinyen lager.  Nou pour kontinyen bataye pour ki nou met en rezim ki vreman reflekte sa vre lazistis sosyal dan Sesel.

Mr Speaker lo sa pwen ki mon fek dir.  Zot pour kont mon, mwan konnen.  Me sa ki mon a dir zot.  Se ki mwan, pa Onorab –  pa Onorab!  Simon Gill, depi ler mon’n komans siport Parti SPUP/SPPF/Lepep e United Seychelles napa en moman ki mon’n siport okenn ekse par okenn endividi dan nou parti pe enport ki ran ki zot ete.

Mon reste fermeman krwar dan lazistis sosyal.  E mon fermeman krwar poudir Seselwa i bezwen ganny trete koman bann et imen avek en dinyite.  E nou bezwen donn zot, zot valer koman bann Seselwa.

(APPLAUSE)

 

HON SIMON GILL

E si in annan bann mankman Mr Speaker.  Dan en moman dan nou listwar, sa ki nou’n ekrir dan nou Konstitisyon.  Pour enn mon bann koleg tre respectueuse dan sa Lasanble ki’n dir Onorab Esparon.  Nou a dir li.  I pa zis bann parol, bann mo dan liv.  Nou pe strive pour nou enplimante.  E nou bezwen enplimant li pour ki Sesel i reste sa Sesel meyer.  Pour pa zis nou.  Me pour bann viziter ki vizit nou.

Se sa labote sa nouvo Leadership ki dan nou parti e ki anler Statehouse dan kapasite Prezidan Faure.

Mr Speaker dan mon lentrodiksyon mon ti fer referans avek Onorab Ramkalawan.  E mon’n fer referans avek Prezidan Faure.  Zot pa 2 zonm parfe.  Zot pa 2 zonm parfe Mr Speaker.

Zot 2 zonm avek limitasyon.  E zot 2 zonm ki dan bann diferan sirkonstans diferan moman pe donn zot kontribisyon.

Me sak sa 2 zonm Mr Speaker.  Zot parkour dan lavi Mr Speaker in donn zot sakenn en CV.  E se CV Danny Faure, Prezidan Faure ki ler nou evalye li.  Se sa ki lepep pour dir wi.  Sa i sa zonm ki nou oule i lead Sesel.  Akoz i sa zonm ki nou krwar i annan sa kapasite, abilite, e potansyel pour li anmenn Sesel pli devan.

 

(APPLAUSE)

 

HON SIMON GILL

Pa bann retorik bann politisyen ki pour fer lepep vot pour Prezidan Faure, Danny Faure.  Se son kapasite, abilite e son CV ki i annan.

E i annan enn bann best CV a sa moman aktyel ki mon pe koze la.  Si i annan en lot.  Mon pa ankor trouve.  E Mr Speaker lo sa baz.  Mon a dir avek Prezidan Faure atraver ou, ou Minis Finans.  Nou dir li mersi pour son travay dir ki i pe fer.  Pa pour li.  Me pour Sesel.

Sa bann kontribisyon, bann kritik ki kolektif, Cabinet of Ministers i fer.  Or in fer lo Bidze 2020, nou dir zot mersi.  Kontribisyon, soumisyon ki ou lekip, bann teknisyen.  Messieurs le Ministre Finance in fer dan Bidze 2020.  Nou dir zot mersi.

 

(APPLAUSE)

 

HON SIMON GILL

Nou konnen ki dan Sesel nou annan bann profesyonnel kapab, konpetan.  Zot merit ganny respekte.  Me ler i annan bann kritik pour fer.  Ler i annan bann mankman pour fer.  Mon mon’n enn bann dimoun ki’n fer bann kritik lo bann mankman ki’n annan.

E nou merit fer li.  Nou merit fer li.  Akoz nou krwar toultan i annan lespas pour fer bokou pli byen.

Me Mr Speaker, i enportan ki a sa pwen mon adres nou servis piblik.  Lo kote nou servis piblik Mr Speaker…

 

MR SPEAKER

Onorab.   Onorab ou annan ou 4 minit.

 

HON SIMON GILL

I reste mon 4 pwen menm Mr Speaker.  Mon krwar ou’n vwar byen.  Lo kote nou servis piblik Mr Speaker.  En keksoz ki nou bezwen acknowledge.  Se ki sa bann zonm, fanm ki dan servis piblik.  Zot bann zonm, fanm bann imen avek bann limitasyon parey nou isi dan sa Lasanble.

Me an menm tan ki nou dir sa Mr Speaker, i enportan ki nou fer sorti en pwen.  Ki fodre pa bann politisyen LDS i servi zot bann manm e siporter dan servis piblik pour sabotaz nou servis piblik.

 

(APPLAUSE)

 

HON SIMON GILL

I enportan ki nou fer mesaz sorti ozordi.  Nou’n kritike, nou’n dir servis piblik i bezwen dan son lankadreman zeneral en Lenstitisyon ki montre en nivo Profesyonnalizm.  Mon swete, e i mwan swe senser.  Ki nou retir politik dan servis piblik.  Nou oule en servis piblik ki profesyonnel.  Nou oule en servis piblik ki pa pas letan asize ekout radyo, get televizyon, get deliberasyon Lasanble Nasyonal.  E kit file bann dimoun ki pe esper en repons dan kwen.

Nou oule en servis piblik ki donn son letan dan en fason prodiktif.  Se sa ki nou oule avek nou servis piblik.  E si sa i arive.  Nou pour annan vreman en sistenm ki delivre.  Pa parey enn nou koleg Onorab in servi taler dan son lentervansyon kot in dir ‘ou a dir tou in ariv, in ganny mete lo en pause.

E si i annan dan servis piblik ki’n met keksoz lo pause.  Sa se pa lot ki LDS siporter, Manm ki dan Gouvernman.

 

 

(APPLAUSE)

 

HON SIMON GILL

Akoz zot pe kre kondisyon pour Gouvernman ganny kritike.  E dir poudir Gouvernman pa pe delivre.  E sa nou konn tre byen Mr Speaker.

Be dan servis piblik napa byensir zis LDS.  I annan bann manm siporter United Seychelles.  E egalman nou mesaz i pour zot.  Nou oule zot pull up.  Nou oule zot delivre.  Nou oule ki zot aret gaspiy letan.  Nou oule ki zot vin bann zonm, fanm prodiktiv kot zot ete e delivre ver lekspektasyon sa pep Mr Speaker.

Mon dezyenm pwen Mr Speaker dan mon katriyenm.  I anmenn mon pour dir avek tou nou bann zenn dan Sesel.  Nou bann zenn ki dan nou sistenm ledikasyon.  Mon a dir zot en laverite.

Mon pa en gran savan.  Me en laverite ki mon pou dir zot ozordi.  Note e travay lo la.  Se ki dan sa prosen 5an a 10an e 15an d’ici Mr Speaker.  Si ou napa en bagaz akademik enportan.  Ou lavenir i riske sonm.

Me pa vedir ki nou pe dir tou dimoun i bezwen annan bann bagaz akademik.  Me nou pe osi dir.  Ki si ou pa pran ou letid serye.  Si ou pa dan domenn akademik, ou pa dan domenn pe fer resers syantifik e teknik.  Nou pour bezwen bann mason, bann enzenyer, bann architect kalifye e kapab diriz sa pei.  Pran leadership sa pei Mr Speaker.

Prezidan Faure pour al fer son prosen 5an manda.  Nou zenerasyon ki isi dan sa Lasanble.  Bann nou ki vye, seve pe blan.  Nou pe ale.  Nou pour kit sa sosyete avek zot.  Lazenes zot bann relev sa pei.

 

MR SPEAKER

Wrap-up Onorab.

 

(APPLAUSE)

 

HON SIMON GILL

Mr Speaker i reste mon 2 pwen.  Mon pe al wrap-up.  Mon trwazyenm pwen Mr Speaker.

 

MR SPEAKER

Non.  OnorabMon donn ou 4 minit.  Ou 4 minit i over.  Zis ou wrap-up.  Ou pa pour tous ou trwazyenm ek ou katriyenm pwen.

 

HON SIMON GILL

Pa pour tous- mon ava…

 

MR SPEAKER

Pandan deba.

 

HON SIMON GILL

Ok Mr Speaker.  Mon ava fer konklizyon Mr Speaker.  Si ou pa oule mon tous sa de lezot pwen.

Lo konklizyon Mr Speaker.  I enportan ki koman en pti pei nou rekonnet ki nou osi annan en kantite zanmi la deor.  I annan en kantite pei ki zanmi avek nou.  I annan en kantite pei ki siport nou.  I annan en kantite lenstitisyon ki siport nou.

E dan mon konklizyon Mr Speaker.  I enportan ki nou anvoy en mesaz pour zot.  Nou dir zot mersi pour siport Sesel.  Mersi pour rekonnet ki Sesel, li tousel pa kapab fini akonplir tou sa misyon pour devlop son pei.

Nou bezwen lasistans.  Nou bezwen Grant.  E nou dir zot mersi pour donn nou bann Grant, pour donn nou bann lasistans pour ki nou kapab kontinyen akonplir nou misyon.  Nou misyon se pour fer Sesel, en Sesel meyer.

E lot sa note Mr Speaker dan mon dezyenm konklizyon se pour mwan …

 

MR SPEAKER

Onorab.

 

HON SIMON GILL

Spesifikman.

 

MR SPEAKER

Mon pour bezwen koup ou.

 

HON SIMON GILL

Wi ok.

 

MR SPEAKER

Bon nou pran en break la.

 

(APPLAUSE)

 

MR SPEAKER

Nou pran en break.  E nou pour tournen pour nou kontinyen nou travay 2er apre midi.

 

 

(BREAK)

 

MR SPEAKER

Bonn apre midi tou Manm Onorab. Bonn apre midi Minis e lo ou panel nou annan Ms Croisee, e Ms Cesar – bonn apre midi zot osi. E bonn apre midi tou dimoun ki a lekout e ki pe swiv travay Lasanble Nasyonal. Avan nou kontinyen mon pou zis donn en pti parol Onorab Sebastien Pillay ki’n sinyal mwan en serten size bomaten e mon pou permet li dir en pti parol lo non Lasanble Nasyonal. Onorab Pillay.

 

HON SEBASTIEN PILLAY

Mersi Mr Speaker. Mr Speaker lo non Lasanble Nasyonal mon ti a kontan koman bann Manm nou zwenn ansanm pou nou kondann okenn aksyon ki arive dan bann lekol kot swa teachers swa etidyan ki ganny agrese for whatever reason whether en kote I annan tor whether en kote I annan rezon zis pou dir ki lekol I pa en landrwa pou sa. E si I annan okenn problenm ki bezwen ganny rezourd dan lekol I toultan devret ganny rezourd dan lord, dan kalm, dan lape.  E ki bann zanfan an zeneral pa devret ganny ekspoze avek sa – pe enport lekel ki annan tor. Mersi Mr Speaker.

 

 

MR SPEAKER

Mersi Onorab Pillay.  Bon sa I en konversasyon lo non Lasanble Nasyonal.   Bon nou ava kontinyen avek nou travay e  mon a donn laparol Onorab Norbert Loizeau.

 

HON NORBERT LOIZEAU

Mersi Mr Speaker. Bonzour Minis ek ou delegasyon. Mr Speaker mersi pou permet mwan sa lokazyon pou mwan kapab dir 2 pti mo mwan osi.  Malgre ki bokou keksoz in ganny dir e bokou pwen in ganny fer sorti me mon panse ki atraver mon lentervansyon Minis I kapab osi anmas serten pwen petet ki kapab ed li dan son refleksyon.

Mr Speaker  moman pli  enportan dan lannen pour en Lasanble se ler i annan en Gouvernman i vin donn deklarasyon kot i anvi nou pei i ale, atraver bann laliny depans ki dan Bidze.  Sanmenm  sa zour ki lepep Seselwa i konn klerman kote i pe ale e si i war li dan sa Bidze. Sa ki pli enportan alor se direksyon e leadership.  Malerezman sa 3 lannen ki’n pase, Sesel in mank direksyon ek leadership. Bokou desizyon in ganny anonse, me napa aksyon ni gran lakonplisman. Pandan sa 3 lannen Sesel in vin parey en bato ki pe drive, me ki pe esper en brizan pou li kapab apir avek.

An dizan sa Mr Speaker, i fer mwan mazin bann gran, gran plan ki ti ganny propoze detrwa lannen pase, me zanmen in ganny akonplir e pep Seselwa zanmen in war nanryen arive.

Premyerman ti annan Laspirasyon 2013 kot Lazenes Seselwa ti ganny prezante avek  en  gro dokiman avek tou sa ki ti pou annan pou lazenes dan nou pei.  Me nanryen pa’n ganny akonplir.   La i fer mwan main Vizyon 2017 – i en lot ki ti ganny prezante me nanryen ankor nou pa’n war arive.  In osi annan Vizyon 2020, kot Mr Gilbert Pool ti sa dimoun ki ti ansarz sa proze. Pandan louvertir nou ti vwar ki kantite larzan ki ti’n mete dan sa proze.  Gro, gro flatscreen ti ganny display partou kote dan  ICCS, pou demontre ki mannyer sa Vizyon pou ete.  Me Mr Speaker, 2020 i zis la obor nou e napa gran keksoz ki nou war lo lorizon.  Nou  pa’n war nanryen arive.

Petet Mr Speaker, petet ti zis en fason pou donn en dalon sans fer en pe larzan.  Sa i mon lopinyon. Petet mwan ki pe mazin li koumsa. Me dan tousala Mr Speaker, lepep Seselwa, i ankor pe espere menm pou war ki i annan pour zot.  E la tou dernyerman, mon’n tann Vizyon 2033. Mr Speaker la mon anvi dir avek Gouvernman, Minis aret zwe avek lepep Seselwa.  Aret anbet sa pep, akoz Seselwa nepli krwar dan sa bann zafer!

E semenn pase Mr Speaker, Minis Finans in vin prezant nou avek Bidze pour lannen prosen.  In fer en gran diskour pou anviron 2erdtan. Nou’n espere menm Mr Speaker. Nou pa’n vwar nanryen ki arive.  E la mon anvi dir avek Minis ki sa Bidze pa’n donn lespwar sa pep Seselwa sirtou bann ki mwen fortinen – bann ki pli bezwen lasistans, bann ki pli feb e sirtou bann ki pe ganny en lapey minimonm. Akoz still zot pa pe kapab fer 2 bout zwenn.  Keksoz i vreman difisil pou zot, sa bann kous dimoun ki mon pe koz lo la.

Pou bann par egzanp ki ganny en lapey pli ba, menm si zot in ganny en pti logmantasyon R500 Mr Speaker, mon anvi dir Minis still nanryen pa pe sanze pou zot.  Still lavi i pa fasil. La Mr Speaker i fer mwan mazin sa manman tousel ki reste Perseverance lo sa R5,800  ki i pou gannyen  – lo sa  5,800 ekek Roupi ki i pou gannyen ler in pey son loan lakaz R1800 a R2,000, pey elektrisite ki pe kontinyelman ogmante, pey lezot bill  tel ki delo ek telefonn  e lezot ankor, Minis mon pe fer ou konnen ki ni R10  pa reste pou sa madanm pey son bis pou li al travay dan bomaten. Menm en pti bwat goute pou ki met dan sak son zanfan pou al lekol, i pa kapab afford.  I pa kapab fer li.  E sa Mr Speaker i tris.  I vreman tris. I annan bokou bann ozordi ki pe plennyen, ki pe soufer akoz zot pa pe war nanryen ki pe ganny fer pou tir zot dan sa sityasyon kot zot ete ozordi.

E dan tousala Mr Speaker, i bezwen al raport kot Sosyal, pou li kapab ganny serten lasistans.  Minis zis mazinen ki lenfirmite pou gannyen ki sa bann dimoun i gannyen ler zot al kot Sosyal avan-ler zot kapab ganny asiste avek en pti keksoz.

Pourtan mon’n tann dir par serten manm lot kote latab ki nou pa en welfare state.  Mon’n tann dir tou dilon bann lentervansyon.   Me Speaker me depi ler mon tann sa mon pe mazinen sa bann dimoun pa pe frekant zot bann dimoun. Zot pa al lo teren si zot dir sa.  Zot pa pe konn soufrans ki sa bann dimoun pe pase.  E pou nou ki pe frekant sa bann dimoun nou war sa bann soufrans ki zot pe pase.

Lot zour Mr Speaker, nou ti ganny bann dokiman ki nou ti demande sorti kot Sosyal.  Menm si Sosyal pa ti oule tro, tro donnen me a lafen apre zot ti bezwen forse donnen.  Mr Speaker be pa nou ti war ki kantite dimoun ki menm si zot pe travay zot still pe ganny asiste ek Sosyal?  Nou ti war – mon annan dokiman.  Mon annan dimoun Bel Air lo la ki mon konnen Mr Speaker.

I annan serten bann adikt drog – bann ki pe abiz lalkol osi, zot osi zot ankor for, zot kapab travay me solman zot pe ganny asiste avek Sosyal anba en tit ki apel’’ Medical.’’ Pourtan zot for, zot kapab travay.  Zot, zot  pa pe travay zot ganny asiste. E dan tousala Mr Speaker, zot pa pe ganny en pti larzan R500, Minis, zot pe ganny zot R2500 par mwan.  I annan menm dimoun aze ki pe ganny zot sekirite sosyal ki pe ganny asiste avek ‘’Medical’’. I annan. Nou’n war.  Eski Mr Speaker si i annan tousala, savedir i tre probab ki nou pou komans vin en welfare state a mon avi.

Me sa ki vin pli enteresan ankor Mr Speaker, se ki bann travayer ki pe travay, ki pe kontribye zot ler zot malad zot bezwen pey en preskripsyon pou zot kapab ganny en latizann. Me solman lezot zot ganny asiste ek sosyal pou medical.  Mr Speaker eski i annan lazistis ladan?

Me la Mr Speaker ler mon lo sa pwen bann adikt drog, mon bezwen dir serten keksoz lo APDAR.   Pandan tou sa bann lentervansyon ki’n arive, mon’n tann bokou keksoz byen mal ki’n dir lo APDAR.   E mwan Mr Speaker mon anvi dir serten keksoz sirtou lo son Sekretarya.   Mr Speaker nou koman en Lasanble i pou enportan pou nou demann kestyon Minis. Minis mon krwar ou pe dakor ek mwan.  Kestyon i enportan ki nou demande.  Pou nou kapab konnen ki pe arive.   Mon kontan demann kestyon Mr Speaker akoz pandan 3an pase ti napa APDAR.  Nou tou nou rapel. Ler Mr Herminie ti pe asize la anler lo sa sez kot APDAR ti ete?  Drog ti parpiye partan an abondans, ti napa APDAR.   Mr Herminie ti la anler pe asize pe kontrol son Lasanble!   Ti annan bann adikt partou kote Mr Speaker, ti napa APDAR.   Kan ki APDAR in vini?

Sa i enportan Minis ki bann Manm lo lot kote latab zot konpran sa. APDAR ti aparet dan Sesel ler serten politisyen ti perdi zot lanplwa;- parey Mr Herminie Mr Speaker apre 15 lo 10 i ti napa en lanplwa.   E osi i ti en fason pou ki Gouvernman i anmas tou   bann politisyen ki ti ganny bate dan eleksyon 2016 – bann kandida akoz zot ti napa en lanplwa.  Alors Mr Speaker mwan mon pa pe dir ki APDAR pa merit la, me solman i enportan ki nou konpran ki mannyer APDAR in vin la.

Alors mwan mon kontan demann kestyon.  Akoz mwan Mr Speaker ler mon ti an deor Lasanble, mon pa ti ganny anmase mwan.  Mon ti al travay, mon ti fer tou sa ki mon kapab pou mwan kapab viv.  E de tou ler ou vin dan politik ou bezwen konpran ki ler ou ganny en koudpye ou al deor, ou bezwen al travay. Ou bezwen al travay e ou pa kapab zis ganny anmase koumsanmenm. E dan tousala, Minis mon pa pe dir ki APDAR pa merit la mwan. Me selman mon pe fer konnen ki fason ki APDAR in vini.

Ozordi Mr Speaker, Minis ki pe ekout mwan I annan dimoun ki pe travay kot APDAR zot dir nou ki APDAR pa pe fer ase.  Mwan koman MNA Bel Air mon war sa akoz mon parwaz partou.  I annan adikt – la mon pou koz dan mon distrik – I annan adikt dan mon distrik ozordi i  annan plis ki 2an i lo eroin, i lo methadone. Mr Speaker ziska aprezan i pa ankor sorti.  E dan tousala Mr Speaker, mon anvi fer kler mon pa pe dir ki i annan ki pa’n sorti me solman i annan pa ankor sorti.  Zot ankor parey menm.   Senpleman akoz, i byen i annan Lazans ki pou deal ek sa bann keksoz.

Mr Speaker me zot pa pe met zefor ase. Napa swivi.  Bann adikt i fer sa ki zot oule. Ozordi ou kapab vini pran methadone Minis, apre ki ou’n santi ou ok ou kapab aret paran methadone.  Ou kapab arete, ou al ankor lo drog.  Ler ou santi ou mal ankor ou kapab revini, pran methadone.  Me zot les zot!  Zot pa strik.  Minis pou sa ta larzan ki zot pe gannyen zot pa ase strik anver sa bann adikt.  Ou  pa kapab ler ou fini pran ou methadone, nou war ou anba  La Salle D’Oeuvres deryer, dan La Rue Bazar partou pe konsonm tou bann lalkol sepa konbyen poursan, zis pou zot tir zot craving, akoz zot  pou le al repran zot  lot pti doz apre midi.  Minis se sa ki pe arive.  Ok?

Konbyen ki’n antre dan lemonn travay? I annan in antre, me parkont mon pa dir zot in fail mwan, me parkont i annan fanmir ki zot, zot zanfan pa’n kapab sorti lo la, Minis. Savedir i annan travay ankor pou zot fer.  Zot pa ase strict e se pour sa rezon ki nou, nou bezwen demann kestyon.  Pou sa groser Bidze ki nou pe donnen 2fwa sepa 3fwa plis ki nou dan Lasanble nou pe gannyen Mr Speaker, nou bezwen demann kestyon.  Nou bezwen demann kestyon.   Nou bezwen demann kestyon lo la.  Bann travel pou Mr Herminie travel avek son pti zanmi – deor al partou kote – al soz. Nou bezwen demann kestyon ki i anmennen pou nou, pou bann adikt!   Nou bezwen gete Minis. Minis ou konpran mwan?   I  ok.  I byen si ou pe konpran mwan.

Minis dan tousala mwan mon annan Mr Speaker mon annan en mesaz pou dir tou bann adikt ki pe ganny dir par serten bann politisyen kot APDAR, ki Mr Ramkalawan ek LDS pa kontan zot pe pran methadone.  Mr Speaker nou pa kapab fer politik avek sa bann dimoun parey. Eski nou pou fer politik avek  6mil dimoun pou zot  desid lavenir nou pei?   Minis ou pe konpran laliny ki mon pe al ladan?  Eski I pou byen pou 6mil adikt ki pa pe kontribye nanryen swazir ki lavenir nou pei pou al ladan?  Sa en keksoz ki mal.  E mwan mon anvi dir avek sa bann adikt akoz mon ganny konfronte Mr Speaker. Mon pe koz koumsa – mon’n pas Roch Lane lotrozour mwan en group adikt in vini in antre lo mwan  selman knowing me Mr Speaker mon pa per zot, mwan osi mon en manrmay ater, mon’n dan street mon konnen – initil zot vini.

Zot in sey vin dir nou ki kot APDAR laba zot dir ki Ramkalawan ek LDS pa oule zot pran methadone.  Ki fo!  E la mon anvi dir zot ki LDS avek Leader Lopozisyon Mr Ramkalawan nou pa, pa anvi zot pran methadone.  Nou anvi ki ler zot fini pran zot methadone,   zot antre dan en lanplwa zot form zot fanmir e menm si zot anvi al lo eroin ankor, zot pa pou kapab ale lo eroin akoz koman en Gouvernman LDS nou pou fer sir ki eroin i ganny eliminen alors  ou pa pou kapab ale ankor lo eroin.  Se sa  ki nou nou, anvi.

Mr Speaker, Minis, pa ti a byen nou annan en Sesel kot napa eroin?  Konmsi zis get nou bann zenn.  Al dan Lari Bazar ou pase Lari Bazar Minis. Mwan mon pase mon fofil partou;- ale – leker i fermal.  Pase en ler.   Personn pa pou fer ou nanryen.  Si oule mon a vin ek ou nou ava ale.   Ou leker pou fermal Minis.  Mwan mon pase mwan. Mon fofile mon ale, mon al gete.

E la Mr Speaker mon annan en mesaz osi mon anvi dir avek bann dealers ki mon krwar zot in ganny ase larzan;- aret fer nou bann zenn soufer Mr Speaker.  Sa en mesaz mon anvi dir zot.  Donn en lape.  Al fer biznes prop aprezan.   Akoz sankwa tou sa travay ki nou Seselwa i sipoze fer isi Sesel nou pou kontinyen war etranze vin fer, akoz nou  zenn in fini.

E la mon mazin en parol ki en ners  en pe lontan – dan nursing  in dir mwan  – I dir mwan ankor dan 10an nou  pou war lanterman zis zenn dimoun.  Mon demann li akoz?  I dir mwan atraver eroin, bann konplikasyon ki pe arive ankor dan 5an a 10an nou pou al zis lanterman bann drug addicts.

Alors Mr Speaker mon pe plede e si fodre nou a tonm azenou devan zot bann dealer ‘’arete.’’  Les nou pei repran son souf pour ki nou a re-fleri ankor.   Mazin sa Sesel ki nou ti ete bann letan ki ler mwan mon ti pe grandi sorti lekol Belonie, kot ou pa ti war sa bann zafer partou dan street.

E la Mr Speaker permet mwan mon anvi kot lo en size ki vreman pre avek mon leker, sa se lazenes ek sports. Ozordi sports dan Sesel   Minis atraver ou Mr Speaker pe pran en lapant kot si nou pa fer atansyon nou pou tourn a zero. Minis ladan sa bann zafer ki mon pe koz lo la sport – mon frekante, mon konnen.  Dernyen fwa mon ti tann Mr Georges Bibi  pe koze ki fason foutbol pe  ganny afekte.  Ozordi dan nou sports bokou etranze pe antre pou vin zwe bann rol kle dan bann lekip senpleman akoz nou napa zenn dan sa domenn.  Sa tim ki nou annan pa ase. Tou zenn i lo ghetto. Mr Georges Bibi ti vin koz lo la lot fwa.

E la mwan mon pe dir ou ankor Minis. Malgre bann coach Seselwa pe fer bann zefor, pe fer bann travay me sipor lo kote Gouvernman napa.   Zot pa pe tro gannyen sipor Minis. Gouvernman pa pe donnen sipor – pa pe donnen lankourazman bann ki pe donn zot letan  – pou fer serten keksoz, pou ankouraz bann zenn  komans sport.  Minis a en tre zennaz sa bann dimoun parey zot pa pe ganny sipor avek Gouvernman.  Sak Bidze ki vini mon koz lo la mon dir siport sa bann dimoun.  Mon ti ekspekte ki dan Bidze apre ki plizyer Bidze mon’n koz lo sa size, ki ti ava annan larzan ki’n ganny mete pou ede, ankouraz, pou annan bann lakademi sportif dan tou disiplin. Mon pa’n war sa Minis. Mon pa konnen si  i parla dan  en kwen petet mon pa tro, tro war kler mon pa’n war, si i annan ou a dir nou.

Mr Speaker mon anvi dir Minis atraver ou ki ozordi I annan serten endividi ki’n pran bann linisyativ fantastik pou form bann lakademi, me solman zot war zot tousel zis avek bann paran ki pe kontribye en pti larzan, akoz zot pe anrezistre zot zanfan pou sa lakademi.  Zot war zot tousel.

E la Mr Speaker mon anvi felisit enn mon zanmi Mr  Che Dorasamy ki’n form en lakademi  football All Star Football – Academy avek siport son manman, son tonton Bernard, Vincent e serten ansyen  zwer  dan lekip foutbol St Louis zot pe train sa bann zenn tou le Merkredi e pandan lezot zour dan lasemenn lo Freedom Square. E mwan mon’n pase mon’n war.  I pa fasil Minis. Sa bann dimoun i bezwen sipor.

Ozordi dan sa lakademi ki Che Dorasamy in formen, i annan pres ki anviron 100 zenn sepa si pa plis e I annan I ankor pe anrezistre akoz bann paran in war ki fason pou anmenm zot zanfan fer en   keksoz  ki byen.  E sa msye in menm dir mwan ki i anvi extend sa lo  Praslin ek  La Digue, me solman  pou rezon finansyel i pa fasil.  I pa fasil ditou.   Pourtan Mr Speaker sa msye Che Dorasamy, son lavi pa’n an roz dan son zenn tan li e sa ki mon apresye ek li.  In rankontre bokou difikilte dan son zenn tan koman en foutboler me  li in santi ki lavi I  bezwen kontinyen malgre difikilte li i bezwen bouze.

E in form sa lakademi pou ede tir sa bann zenn dan bann move lenfliyans, e  pran foutbol koman en keksoz ki  a ed zot demen menm si zot pa fer byen akademik lekol, me selman zot ava annan en keksoz pou zot kapab fer. E mwan mon anvi dir avek li, ‘’Yes mon frer!   That’s the spirit!  E en Gouvernman LDS pou donn ou sipor, si zot, zot pa donn sipor sa bann lakademi – en Gouvernman LDS pou donn tou sipor akoz zot pe fer en keksoz ki byen – en keksoz ki nob!  I en keksoz ki pou ede dan devlopman nou zenn.

E mon anvi dir ek Minis e atraver ou Mr Speaker se ki dan sa fason ki nou sport pou evolye Sesel.  Se atraver form bann manrmay a en tre zennaz – form zot, donn zot sa lankourazman. Alors Minis mon panse dan ou repons ou ava reflesi lo la e ler ou a tournen ou ava vin  ek en keksoz pou sa bann dimoun ki pe fer sa bann travay nob e ki pe pran zot letan –  fodre ou annan pasyans travay ek manrmay pou zot kapab kontinyen  fer sa bann travay.

E nou is dan sa kote, Minis, Mr Speaker sanmenm sa ki nou, nou apel ‘’met divan anba lezel nou zenn e fer li anvole, al pli lwen posib!’’  Sa en parol ki Onorab Ramkalawan i kontan dir e mwan mon krwar ladan.

Mr Speaker an pasan mon ti ava kontan dir ek Minis – demann Minis ki mon’n war en larzan ki’n ganny mete pou Zwe Olenpik par egzanp.  Dan ou Diskour mon’n tann ou dir. I annan en keksoz petet mon pa konnen Minis Zwe Olenpik i an 2020 i annan zis en atlet ki’n kalifye.  En garson ki fer sailing ou okouran? I fek kalifye lotrozour mon krwar I ti al  Algerie.  Zis enn.  Be pa ti pou gou nou annan plis ki enn?  Si depi lontan nou ti ankouraz sa fason fer ki bann dimoun – serten sa bann dimoun pe fer travay ek zenn pou pouse. Ozordi Ian avan Olenpik nou ti devret annan 4-5 dimoun ki pou al Zwe Olenpik e sa ti pou bon pou nou.

Avan mon terminen lo sa size sports mon  anvi dir avek Minis – Minis  sa an pasan mon pou  dir ou sa akoz mon fatige koz lo la ler i annan  Bidze.   Get dan alokasyon pou bann klib ki anrezistre avek distrik.   Sa pti larzan ki pe donnen i fay.  Pa kapab fer nanryen avek.  Minis mon’n dan sport, mon’n dan lekip mon konnen mwan pa kapab fer nanryen avek. Mon pa pou al pli an detay. E la dapre konpran sa mwan ki nou’n arive la Novanm, i annan klib pa ankor ganny nanryen.  Desanm pe arive. Nou’n tande Onorab Arissol in koz lo la. Lezot in koz lo la.  I annan pa ankor ganny nanryen.  Eski zot pou double  ler pou donnen?

Mr Speaker e mon anvi dir ek Minis mon ekspekte – dernyen fwa  mon ti demande ki sa larzan I ogmante  sorti R8mil I al R25 – R20mil omwen, akoz I pa fasil pou travay ek R8mil sirtou ek bann gran lekip parey foutbol, basketball ek lezot. R8mil pa nanryen e sirtou ler ou pe ganny li par quarter ou pe ganny ou R2mil pou aste en soulye ouswa detrwa per soset ou pe ganny li pas par quarter.

E Minis mon panse ki ou pa met sa dan ou refleksyon e ou a fer keksoz pou nou bann klib.

Mr Speaker aprezan permet mwan koz le en size ki Minis in anonse pe fer dimoun ankoler laba deor. Sa size allowance R3mil lo bann personal items ki’n sorti ki’n vin R1500 – ki’n redwir ki’n vin R1500.  Be Minis sa i mal, akoz si en pti group dimoun pe abize nou pa kapab pini tou dimoun.   Sa i mal e deplis se Gouvernman Minis se Gouvernman ki ti fer krwar ek tou dimoun ki zot tou zot kapab vin biznesmenn.   Olye ankouraz dimoun pou pran bann travay nob parey ners, teachers e lezot zot in kontinyen ankouraz dimoun pou fer biznes – vin biznesmenn kot bann larzan zot in donnen atraver YES Scheme, lot, lot e mon demande konbyen successful sa bann biznes Mr Speaker.

 

MR SPEAKER

Onorab 2minit.

 

HON NORBERT LOIZEAU

2 minit?  Donn mwan 5.

 

MR SPEAKER

Kontinyen Onorab.

 

HON NORBERT LOIZEAU

Onorab Gill in koz 45.

 

MR SPEAKER

Kontinyen Onorab.

 

HON NORBERT LOIZEAU

 Ok mersi.   Minis mon krwar sa desizyon i bezwen ganny ranverse. Menm zafer avek Lalwa Scooter kan detrwa zenn pe donn bal – pe donn lenfirm nou oule pini tou zenn. Menm zafer ek lalkol. Akoz detrwa dimoun desann Lari Bazar i fer dezord ler zot in bwar zot in sou, nu bezwen pini tou dimoun ki pe servi en pti grog onnetman. Mr Speaker an zeneralman sa  Bidze nou pa’n war nanryen.  E i annan bann dimoun bann kategori dimoun mwen fortinen pa’n war nanryen zis parey ti annan en pyes teat ti pe zwe dernyen fwa detrwa semenn pase ‘’Esper Godo.’’  Dimoun ti’n vini rasanble pandan dezerdtan pe espere pou war Godo, personn pa ti vwar Godo spektak ti fini koumsanmenm.   Onorab Georges ti al gete demann li.  Onorab Larue. Zot in espere pou war Godo zot pa’n war.  E  sa Bidze nou’n espere Mr Speaker, nou’n espere  nou pa’n war nanryen.

E an terminan Mr Speaker mon a tir enn de paz mon a fou laba.  Mr Speaker an terminan mon’n ekout bokou entervenan koze.  I annan in fer zot politik – ki byen.   Letan politik nou bezwen fer politik.    I annan ki’n fire  enn de bann bullet lo Mr Ramkalawan pou denigre li, pou fer dimoun krwar li i en dernyen lisyen me sa bann bal in pas lwen ek li.  Petet zis enn – petet zis en bal sa enn ki ti pas obor zorey Mr Michel zour Koudeta ki ti al tonm dan bann fri imakilez ti grenn tou – ti grenn tou zavoka dan plantasyon madanm Onorab.  Zis enn   ki ti pas obor zorey Mr Michel Mr Speaker.

 

(laughter)

 

HON NORBERT LOIZEAU

E ler mon’n ekout Leader Gouvernman Mr Speaker, mon pa’n tann nanryen.  In koz lo tou bann devlopman ki’n arive se son Gouvernman ki’n fer. Mr Speaker wi i bezwen son Gouvernman ki bezwen fer sa. Onorab Gill tou in koz lo la akoz apre ’77 zot ti pous tou dimoun. Zot ti dir ‘’Ale’’ – ‘’Sa ki pa kontan kite ale!’’ Zot ti anvoy legzil.   E alors mon ti anvi demann zot lekel, lekel sa Gouvernman ki ti pou bezwen fer tousala sa bann keksoz in arive?  I bezwen sa Gouvernman ki’n o pouvwar pandan tou sa bann letan.

Mr Speaker mon’n ekout Minis, parey mon’n dir nou’n espere parey dan pyes teat nou’n pa’n war Godo pa’n vini.  Me ler mon’n ekout – an terminan – e ler mon’n ekout Diskour Onorab Ramkalawan mon annan lespwar – mon annan en Dirizan – mon  annan en group ki kapab pran aksyon e mon  anvi dir ek  pep Seselwa laba deor aret ekout sa bann  parol ki bannla pe dir lo Mr Ramkalawan.  Akoz se sel  boug ki pou kapab pran aksyon e pou anmenn nou State House e pou diriz sa pei e pou tir sa bato lo brizan, se li.

E mon anvi dir zot ki ‘’the time is now! ‘’ Mersi Mr Speaker.

 

(APPLAUSE)

 

MR SPEAKER

Mersi Onorab Loizeau.  Mon ava pas la parol avek Onorab Waven William.

 

HON WAVEN WILLIAM

Mersi Mr Speaker.  Bonn apre midi tou dimoun ki a lekout, espesyalman bann zabitan Grand Anse Mahe.

Mr Speaker avan mon komanse, mon anvi remersi ou pour ou-grant mwan letan pour mwan al deal avek en case irzan.  E lo sa note mon ti a kontan pas mon senser kondoleans avek lafanmir Jean avek Esther ki’n perdi enn zot bien aimer. 

        Me Speaker, byen koze, i fer byen konpran.  Enn mon refleksyon, lalang ki flate, i danzere.  Dezyenmman, mon anvi dir ki tou i permetab.  Me pa tou ki benefisyab.

Mr Speaker mon felisit Seselwa ki en pep rezilyan e beni.   E dan ki nenport ki fason, i rod en fason pour sirmonte.   Ler en Gouvernman i ganny elekte par lepep, i vin serviter lepep.  I ganny mandate par sa pep pour pran swen ek li, diriz li ek bann Polisi e plan stratezik ki pep i vwar li ladan.  I ganny rekonforte ki son larises e reveni pe ganny byen zere.

Mr Speaker nou osi koman Manm Elekte, nou bann serviter lepep.   Nou rol se fer sir ki sa Seselwa i reste o sant devlopman par sa Gouvernman elekte.  Asire ki Gouvernman i delivre sa ki in dir i pour fer,  e ki larzan lepep i ganny byen zere.

Mr Speaker nou rol osi, se pour demann kestyon.  E anmenn Mosyon neseser ki pour fer sir ki Seselwa, apre Bondye i reste pli gran ki nou koman serviter lepep.

Mr Speaker, ler ou konnekte ek lepep, travay ki nou fer pour reflekte lo son figir sa pep.   E atraver konversasyon ki ou gannyen avek li.

I devwar Manm Elekte pour asire ki Gouvernman i depans dapre mwayen, anpes labi dan Kof Leta e veye ki sa pep pa sibir presyon aksyon iresponsab Gouvernman kot larises Sesel,  e reveni lasyer, son fron, pep Seselwa i ganny mal depanse an deor sa manda.

Me fer tou ki sa Gouvernman i delivre lo son promes, enplimant en plan devlopman kot Seselwa i reste e ganny sa latansyon préférentiel lo later Sesel Mr Speaker.

Alor Gouvernman i bezwen a lekout tou kous pep Seselwa.  Konsilte ek bann zot ki pe skente, trimouse dan diferan Sekter Lekonomi ki konnen ki problenm, ki kote, ki fodre aranze, e dan ki fason pour kapab fer li byen ankor ki personn pa vin pli mizer, ouswa pli vilnerab, ouswa vin lesklav.

Me pour ganny ankouraze e soutenab pour travay pli dir ankor.

Mr Speaker bann ki dan pozisyon ansarz. Pa devret servi zot pozisyon ouswa lenfliyans pour fer zot privilez pas par devan lentere sa pep.  Sirtou ler ou’n fini pran desizyon pa gaspiy nou letan pour konsilte.  Akoz nou leksperyans, se ki ler desizyon final i ganny fer, i konmsi zot in ekoute.  Me zot pa’n tande.

Ler  sa ki konsernen i demann kestyon.  Zot flank sa dan nou latet, ki sa i ti desizyon kolektif.  Byen koze i fer byen konpran Mr Speaker.  Mon poz sa la.

Mr Speaker konmela serten zofisye ki ganny peye pour sofgard nou lentere, leskiz e fer letan pase in ganny azoute lo zot job description.  Minis sa fodre ganny get ladan.  Akoz i resanble ki zot pa’n fer byen sa travay evalyasyon sekter piblik ki Prezidan ti demande pour fer.  La si ou pa kontan, i aksepte zot fason fer, ou pour ganny problenm.  Mon pe dir ou.

Mr Speaker zot pour target ou, e zot pour fer sir ki zot rent ou e fer ou fristre.  Solman epi, ler pep i dir, ki ti a bon en sanzman.  Zot komans tay partou, kan keksoz ti senp Mr Speaker.

 

(APPLAUSE)

 

HON WAVEN WILLIAM

Get dan welfer sa pep, e pa zwe ek son lentelizans.  Erezman, nou kreater i annan faver lo nou.  Tou laglwar e remersiman i pour li.  Li ki kontinyen beni nou pei, e nou lafors travayer pour prodwir.  San son faver, son proteksyon e gidans Mr Speaker, nou ti pour napa en Bidze.  Nou bezwen touzour rekonnet sa, proklanm sa, e annan gratitude anver li.

Mr Speaker, Minis in swazir Tenm Rezilta-Ekitab e Prosperite Partaze pour Bidze 2020.  Dimoun dan plizyer Sekter deor pe dir, ki sa Bidze, i en Bidze mank ase konsiltasyon.  Be i en fason fer enpoze.

Kestyon se;-  eski sa bann endividi ki nou’n dir leve debourye, i vwar li parey?  Eski sa zenn profesyonnel i reste konvenki ki son rev pour ganny realize?  Eski sa bann ki dan Sekter Tourizm, Konstriksyon, Lagrikiltir e Lapes parmi lezot ankor, zot vwar li parey?  Mr Speaker, e eski tou sa bann ki’n pran risk e pran en loan ozordi pour vin endepandan, eski zot ankouraze e pe kontinyen ganny lespwar?  Sirtou ki la nou’n glis lo en lendeks dan the ease of doing business pour vin 100enm.

Minis eski nou kapab krwar ki sa lot Komite o nivo pour adres sa problenm?  Ki nou konnen, me pa’n fer sa ki merite?  Si nou prop Seselwa pe ganny anpaye avek bann prosedir avek kondisyon konmela.  Eski fodre Konsiltan etranze ki bezwen vin dir nou ki Sesel larises pa pe ganny partaze?  Kan isi dan sa Lasanble atraver kestyon e Mosyon, nou pe dir ki resours pa pe ganny byen distribye e larises-avek larises avek pep Seselwa?

Eski Lotorite ki konnen, me napa kouraz pour pran serten desizyon brav pour pa perdi popilarite nou fer Konsiltan vini, e dir piblikman keksoz ki nou fer.  E ki nou deza konnen pour finalman pran en desizyon Mr Speaker.

Mr Speaker mon pe vwar en tandans, en stratezi déjà vu atraver sa Bidze, sirtou lavey en eleksyon.  Pep Seselwa ek en lespri pli ouver, ek en zorey pli ouver, e lizye pli ouver,  akoz en rezilta 15 lo 10 menm si serten pa dakor avek sa.  Me Seselwa in fini konn sa zwe.  Ki fer Mr Speaker, tou dimoun in antre dan sa zwe rol.  Pour ganny en pti granm, i pa normal wi.  Me sa ki senser i admet ki i en realite.

Mr Speaker si Bidze pe adres serten lenzistis, mon kontan.  Akoz tro bokou letan gate, e letan gaspiye dan vreman anmenn serten lazistis ki i merite.

De lot kote, lafason ki i pe ganny fer, kan 2 a 3an pase, nou’n souvan ganny dir ki napa, pa pour kapab ganny fer.  Akoz napa larzan.

Mr Speaker mon konfirm sa pwen.  Akoz mon’n fer li mon devwar pour koz ek serten bann eksper dan Lekonomi, ki zot osi zot pa konpran sa fason fer letan ou Lekonomi i vilnerab.

Mr Speaker annou pa oubliye ki en Minis ti vin dir nou dan sa Lasanble.  Ki si nou pa vey byen, nou lekonomi pa pour kapab soutenir tandans ekspektasyon.

Eski nou pe kontredir nou prop parol?  E pe fer sa pep krwar li osi ki i kapab fer menm parey.  Mr Speaker oli sa bon legzanp?  E oli sa konsistans pour efas tou det pei pli vit pour nou respire, e vin pli lib?

Mr Speaker si Seselwa pe travay dir, pe donn rezilta remarkab,  nou bezwen valoriz son travay dir par donn li son donn li ki i merite.  Pa zwe kouk kasyet ek son merit, ouswa anvoy li demen tanto e ekspekte ki pa pour rod son drwa.

Pour sef i annan, e zot pe fer zot privilez pas par lao merit travayer ki pe donn tou son lenerzi.  E menm zwe lo son moral par dir li ‘Valoriz en Kiltir Travay Dir’.  Kan Lotorite i kontinyen toler gaspiyaz e koripsyon ki sanz laform parey kanmeleon pour Seselwa pa ganny en konpran ki pe arive.

Malerezman Seselwa nepli dormi boner Mr Speaker.  Akoz i pe swiv tou ki pe pase o tour ek loportinite 15 lo 10.

Mr Speaker kestyon fondamantal, se eski vreman dan sa swadizan partenarya ant Gouvernman e bann akter kle dan lekonomi, sa konsiltasyon enklizif in ganny fer?

Eski sa fran konsiltasyon kot kart in ganny met ater, in le ka?  Sa ki mon tande apre Diskour Minis, i pa paret Sekter Prive zot dakor ek desizyon ki’n ganny pran.  Zot pe vwar zot lavi difisil e pe vwar kou lavi monte ankor.  Zot pe dir ki stratezi Gouvernman pe fer kondisyon fer biznes Sesel pli difisil sirtou ek kalite problenm ki zot pe fer fas avek.  Zot demande ki mannyer prodiktivite a ogmante, e ki mannyer ou oule kout lavi i a desann ek sa kalite fason fer ki pa konsistan?

Mr Speaker, ki mannyer ou pour ganny konfyans, kan lensertitid pe pez lo ou konsyans?

Mr Speaker, byen koze i fer byen konpran.  Lekel ki pour al sibir konsekans sa bann aksyon?  Be mwan ek ou.  Nou tou Mr Speaker.

Sa dan li menm i en gro lenzistis pour aksyon ki pep pa responsab ki’n ganny pran lo zot depan.  Si Seselwa pa vey byen,  i pa pour santi sa lefe logmantasyon dan benefis lo son tan servis par mwan.

I pour evapore dan ler ek potansyel lenflasyon monte, e kout lavi ki pour otomatikman monte.

Ler sa Lasanble pe dir Gouvernman fer las 2 mannyon dan sang,  de lot kote sang pe al sere.

Nou pa konnen kan Mr Speaker.  Nou pe demande ki Gouvernman Labank Santral ki pe vey take pers Seselwa, i vin koz lo la.

Ease of doing business Mr Speaker, akoz nou pa ankor tann entervansyon interview lo sa size par Lasanm Komers e avek Mr Fanny.  Ti pour enteresan pour Seselwa konn zot bann pwennvi lo sa Bidze.

Mr Speaker se sa osi bann analiz dan konteks sa Bidze, ki Manm Lasanble i bezwen pe sansibiliz pep lo potansyel evantyalite sa kalite Bidze.

Mon konsey pour pe Seselwa.  Se ki zot bezwen pli pridan dan zesyon zot Bidze lafanmir.  Tenir kont ki tou i kapab sanze, si prozeksyon Nasyonal pa mars parey i targete.

Baze lo nou bann pwen vilnerab ki nou’n erite koman en pri Leta Zil, e bann problenm ki annan deor.

Mon pe dir sa Mr Speaker, pa akoz mon pa siport plizyer linisyativ ki Gouvernman pe pran pour koriz bann lenzistis dan serten ka ki merite.  Ouswa ek bann proze ki’n tarde enplimante, akoz konfizyon dan bann diferan plan stratezi ek gran plan ki’n mank konsiltasyon ase.  E pa’n ganny byen kalkile.

Mr Speaker si nou’n travay dir, wi nou merit ganny serten benefis e rekonpans.  Wi nou osi krwar ki sa ki vilnerab, nou bezwen pran swen ek zot dan en fason responsab e elimin labi.

Annou pa zwe lo sa bann febles ek en lapros ki nou pe fer li en faver.  Kan nou pe re donn li sa-akoz nou pe re donn li sa ki sorti lo son lasyer Mr Speaker.

Mon lans en lapel solannel ek sa ki ansarz, pour zer reveni e larises Seselwa.  Pa donn bal ladan Mr Speaker.

Mr Speaker sa ki mal, se ki Minis pa’n dir nou tou, kan keler, e dan ki fason nou pe ganny trangle a lavenir.  E lekel ki pour ganny trennen par son kol semiz pour konble sa trou dan nou kof.

Mr Speaker dan Bidze en Nasyon, pep bezwen santi li form par ladan.  Son input merit ganny reflekte parey nou term Kreol i dir ‘ki i annan par ladan’.

Mr Speaker kot i byen, nou pour anbelir, e nou pour dir mersi.  Kot i mal nou pour bezwen kapab dir, koman bann politisyen responsab ler i mal.  Nou bezwen kapab dir, i pa vedir ki ou pe opoz-ki ou pe enpoze parey serten i oule fer nou krwar.

I pa vedir ki nou kont tou keksoz.   Pep Seselwa ki pli gran ki nou, i a zize pour li menm Mr Speaker.  Sa pep i en pep ki’n mir.  Ki’n matir, in konnekte ek realite lavi.  Nou kapab koze e dir nenport kwa.  Me son desizyon li ki pour fer, san ki nou bezwen enpoz e dikte lo li Mr Speaker.

Avan terminen mon anvi atraver ou demann-atraver ou Mr Speaker, ki letan bann diferan Minister e Lazans Gouvernman ki pour vin devan sa Lasanble pour defann zot Bidze.  Ki zot vin ek zot konnen.  Pa vin isi ek leskiz, ki nou napa lenformasyon.  Zot annan leksperyans, alor zot bezwen vin pare Mr Speaker.

Mr Speaker mon ti kapab fer en pli gran diskour lo sak Minister.  Me mon pour rezerv mon entervansyon, personalize letan sak Minister e Lazans zot vini.  Alor mon demande ki dan ou sazes, ou akord nou serten fleksibilite pour rod leklersisman ouswa dakor ki dan kestyon-dan Question Time sa bann loportinite parey dan Bidze nou pa gannyen, mon dir ou mersi davans pour ou konsiderasyon.

Mr Speaker, akoz mon annan bokou keksoz pour rod leklersisman pour rezidan distrik e pep Seselwa.  Mon ganny lenpresyon ki distrik Grand Anse Mahe pe ganny peze e sere par serten Minister e Zofisye Gouvernman an krwayan ki zot pe pini mwan.

Akoz mon fason koze isi dan sa Lasanble, e akoz sa prensip kot i byen, mon a siporte.  Me kot i mal, mon pour dir i mal.  Mon anvi dir si sa zot lentansyon.  Zot pa pe pini mwan.  Me zot pe pini pep Grand Anse Mahe.

 

(APPLAUSE)

 

HON WAVEN WILLIAM

Zabitan ki pe swivre sa sekans.  Mon koz ek zot, zot tann mon e trouv mwan.  Pe rod sa ki byen e sa ki meyer pour Sesel.  Lo sa note, mon osi remersi tou sa bann dimoun ki mon pa ti menm ekspekte pe swivre mwan, pe priy pour mon e pe siport travay ki mon pe fer dan distrik, e an deor distrik.

Mon dir zot, ki mon en serviter lepep.  E mon pour fer sir ki mon pa oubliy sa.

Mr Speaker pour konklir, atraver ou Mr Speaker,  mon pour poz serten kestyon Minis.  Ou larepons, e fer serten sizesyon ek lentansyon pour koriz ankor lenzistis dan distrik, e dan pei.

Premye kestyon Mr Speaker.  Minis lefe ki la pour la 2enm fwa, Lakonpannyen Cable & Wireless in vann.  Nou konnen ki stamp duty ki larzan ki devret antre dan Kof Leta pour Seselwa, eski in ganny peye ek lentere?

Akoz ki tou sa letan, sa larzan pa’n ganny ranmase?   Ki Gouvernman ti pe espere?

2enm kestyon Mr Speaker.  Eski sa 50 ka kot Tribinal Lafanmir-kot Tribinal Lanplwa mete par sa 27 travayer ki ti ganny met a kote.  Lefe ki lavant in ganny fer.   Eski Gouvernman pour fer sir ki zot welfer i ganny get ladan?  E ki zot pa kontinyen trenn lipye parey oparavan.

Trwazyenmman Mr Speaker, lefe parey Angle i dir ki sa kalite biznes i en cash cow.  Akoz ki Gouvernman pa’n ankouraz Fon Pansyon e Sosyete Lenvestisman Seselwa pour envestir ladan pour ankor ogmant opsyon fer larises pour pei e pour pep Seselwa?

Ki garanti ki nou annan, ki vre sa 40% pour ganny lese ek Seselwa pour envestir?  E eski sa prosesis pour transparan?

Mr Speaker katriyenmman;-  Minis pa in ler osi pour anmenn plis latransparans dan travay Lazans Gouvernman dan distrik?  Ki ganny finanse par larzan Seselwa, kot bann Reprezantan Gouvernman a vin rann kont dan meeting piblik ek zabitan distrik.  Tel parey larzan ki depanse lo proze distrik;-  larzan ki’n ganny fer dan lwe bann fasilite distrik Mr Speaker.  Ki konmela pep pa pe gannyen dan distrik.

Senkyenmman;-  akoz ki Gouvernman ek bi siport distrik ek resours pa met dan Lalwa, ki bann biznes i kontribye anver Corporate Social Responsibility, zot-olye donn tou Gouvernman santral, ki zot kontribye 0.25% dan Fon distrik.  Sa i ava-a ede Mr Speaker.

Sizyenmman;-  akoz ki ler i annan dezas dan distrik ki Lotorite Distrik i-pa ganny enkli lo bann Komite o nivo pour fer sir ki larzan ki’n ganny apropriye i ganny byen servi pour bous sa bann lespas pour anpes gaspiyaz e tandans koripsyon.

Setyenmman;-  akoz ki sa-akoz ki la aprezan parey ti ganny fer ek fermye ki IECD e SRC kot Child Minders i konsernen.  Zot ti ganny dir ki zot pour pey selman Fon Pansyon e ki la zot pe bezwen-zot pour bezwen al pey tax.  E sa, sa peyman pour ganny backdated ziska 2010 Mr Speaker.  Akoz, akoz Mr Speaker?  Sanmenm sa prosperite partaze e rezilta ekitab?

Mr Speaker akoz ki fermye e prodikter zot bann sibvansyon lo ki lo lavyann pe trenn lipye lo la pour peye.  Dan sa plan stratezi ki pe marse.  Mr Speaker, dernyerman.  Mon anvi envit pep Seselwa e sa Lasanble pour reflesir ansanm avek mwan lo sa ka polisyon ki’n arive La Misère avek Petit Barbarons.

E akoz rezon ki nou fer bezwen fer sa top up?  Mr Speaker, met zot dan plas sa bann dimoun.  En zour bomaten ou leve, ou tande ki delo dan ou lakaz in ganny polye ek desarz kabinen.

Ou pa ni menm konnen, kan ki ou menm e ou fanmir ti pe konsonm sa delo?  Kwa kalite maladi ki sa bann travayer ti annan?   Kwa mikrob ki ti dan zot lasel ki ou’n kapab bwar?  Ou komans trakase pour ou zanfan ou menm, e pa konnen si vreman tou sa ki ou’n bwar koman posib mikrob pour sorti ouswa ou pour viv avek.

Mr Speaker, sa soufrans moral.  Sa lenkonvenyans pa fini.  Pa fini.  Pour larzan ganny donnen pour rektifye sistenm delo kot lakaz, kapab lakaz ki’n bwar delo Mr Speaker.  Me se dimoun ki’n bwar delo.

Se sa ki nou bezwen korize, se sa lenzistis.  E gran mersi Onorab Speaker, ki’n kit sa laport ouver.

Onorab Henrie mon konpran ou parfetman.  Nou pa totalman dakor pour tir larzan dan Kof.  Me se Gouvernman atraver PUC, Lanvironnman, Seksyon Planning, Lasante an premye lye ki responsab, ki form parti Gouvernman.

Mon ti ganny re konfronte ler ou Leader ti dir ek Minis Finans isi menm dan sa Lasanble, ki si Gouvernman i anmenn en Bidze Siplemanter pour pey bann zabitan La Misère, Petit Barbarons ki zot, lot kote latab zot pour apporte zot sipor.

Mon ti rekonnet en si ki sa bann serten zabitan ki ti dan Galeri.  Mon’n tenir for lo zot parol.  E mon demann zot pour onor zot langazman ki finalman sa bann dimoun a ganny zot pti zafer parey zot souvandfwa demann mon letan mwan fer vizit.

Nou anvi anmenn-nou anvi anmenn-nou anvi ferm sa liv Mr Speaker.  Mr Speaker de lot kote Minis, eski ou’n ganny manda Ofisyel pour al re negosye, e kan sa pour pran plas?

Eski Lazans ki pour fer sa bann peyman pour nou organiz zot byen ki nou pa trenn lipye lo la boner lannen prose Minis.  I enportan ki ou dir nou.

Finalman zabitan Grand Anse Mahe, Barbarons, Petit Barbarons, La Misère, Solitid, Beauvoir, Souvenir, Grand Anse, Savy Estate mersi pour konpran mwan.  Mersi pour debout a kote mwan.  Serten pour sey diviz nou.  Serten pour sey sali mon repitasyon, serten pour menas mon lavi.  Sa ki mon a dir zot se ki mon pli per Bondye ki zot.  Si ansanm nou anba lagras, lekel ki kapab kont nou?  Zonm i propoze, me c’est Dieu ki dispoze.

Sa travay i kontinyen pour sa ki meyer pour distrik e pour pep Seselwa.  Mersi Mr Speaker.

 

(APPLAUSE)

 

MR SPEAKER

Mersi Onorab William.  Mon ava prezan donn laparol Onorab Clifford Andre.

 

HON CLIFFORD ANDRE

Mersi Mr Speaker.  Bonn apre midi Mr Speaker.  Bonn apre midi tou bann dimoun ki a lekout, espesyalman zabitan Anse Aux Pins.  Mr Speaker avan mon konmanse.

Mon oule dir ki i regretab letan nou pe asize ozordi, nou vwar lot kote latab, 7 Manm i absan.  Zot pa pe montre ki zot serye pou zot delivre e i montre ki poudir US pa en parti ki serye, e zot pa devret pe diriz sa pei.

Se sa rezon Mr Speaker, ozordi i enportan pou revwar sa Bidze ki Minis in prezante semenn pase avek sa Lasanble.  Me avan mon fer sa, mon ti a kontan dir –

 

MR SPEAKER

Onorab, Onorab, en moman, en moman.  Ki ou point of order Onorab Pillay?

 

HON SEBASTIEN PILLAY

Mr Speaker this is a direct imputation on the character of those Members!  Parey ou’n dir bomaten.  Plizyer fwa i annan Manm ki’n absan.  Premye Manm pou fer referans avek bann Manm absan.

Yer Onorab Pillay ti pe koze, i pa ti la li Onorab Andre.  I pa normal!

 

MR SPEAKER

Ok, Onorab Pillay, ok.  Bon mon’n les sa pase akoz mon krwar i toutafe i annan rezon.  E mon osi tou mon ti pou fer sorti taler.

Mon osi mon pa krwar i akseptab, dan en moman koumsa, kot tou Manm in asize in ekout tou lezot Manm e ozordi pou plizyer Manm absante.  E napa en Manm ki’n soumet en tender of apology to my Office oubyen to the Office of the Clerk …

 

(APPLAUSE)

 

MR SPEAKER

… ki’n donn rezon pou zot labsans.  Onorab William bomaten in absante, in call mon lofis, e apre in soumet en tender of apology pou son labsans, ok?  E napa okenn rezon la ozordi apard Onorab Terence Mondon ki lo misyon aletranze, pou zot absante.

Napa okenn Manm ki’n tender en apology avek mon lofis oubyen lofis Madanm Clerk.  Mon pa okouran.  So i normal pou en Manm kapab fer remark lo la.  Ok?  Me zis mon regarde.  Parey tou le de kote, i annan moman, e mon’n dir annou retir laliny.

Mon’n remarke, i annan tanzantan, i annan en Manm ki met lipye lot kote laliny, apre i retournen.  Le moman ki mon pe al aprose, i retournen.  I arive sa.  Me son remark, in fer remark lo Manm ki absante.

I pa’n al direkteman, oubyen spesifikman lo en Manm.  Ok?  Onorab Andre kontinyen.

 

HON CLIFFORD ANDRE

Mersi Mr Speaker pou siport sa propozisyon ki mon’n met devan, pou montre ki poudir nou bezwen pli serye avek nou Lasanble, e akoz ki nou lo kote LDS nou serye e nou la pou nou ekoute e partisipe.

Mr Speaker, ozordi parey mon’n dir, i enportan pou revwar sa Bidze ki Minis in prezante semenn pase avek sa Lasanble.  Me avan mon fer sa mon ti a kontan dir Mr Speaker, ki plis mon’n ekout mon bann koleg ki dan minorite dan sa Lasanble koze lo sa Bidze.

Apard ki Onorab Waven William,  mon konvenki ki Sesel nou annan nou en sel swa devan nou an 2020, e se pa lot pou nou vot Wavel John Charles Ramkalawan pou Prezidan e pou met en Gouvernman LDS dan L’ Egzekitiv pou ki nou ava war en Sesel pli prospere.

Yer Mr Speaker Onorab Herminie in dir ki nou lo kote LDS nou’n dir ki dan Gouvernman pa fodre annan politisyen,  me selman technocrat.  Mr Speaker sa i fo, nou dan LDS nou’n dir ki fer eleksyon apre nou a donn sa ki gannyen son bann politisyen pou travay avek.

Avek en Gouvernman ki pa’n ganny elekte, nou ti dir ki dan sa ka fodre annan bann technocrat.  Pa fer pep Seselwa krwar sa ki pa’n ganny dir dan sa Lasanble par bann MNA LDS.  Akoz Seselwa in war kler e zot pa pou les zot ganny anbete.

Onorab Herminie ti osi dir ki Prezidan Faure in reste dan lakwizin ler lanmans pwalon i so.  Me mon oule dir li ki se pa li ki pou dir si pou reste dan lakwizin ler lanmans pwalon i so, me se pep Seselwa ki pou tir zot dan lakwizin akoz manze dan four i pe ganny kwi zis pou zot.

Pep Seselwa pou met LDS anba direksyon Wavel Ramkalawan ek Ahmed Afif dan sa lakwizin.  Akoz bann menu pou bokou pli bonn e tou Seselwa ava ganny en lasyet olye get par lafnet lakwizin.

 

 

(APPLAUSE)

 

HON CLIFFORD ANDRE

LDS pou fer sir ki ou konsern i ganny pran an konsiderasyon.  Mr Speaker tax i reste eleman pli enportan ki kontinyelman preokip nou pep. Nou bann travayer i pey deza ase tax.  Mr Speaker sa pep pe ganny trangle avek plis tax lo tax.

I paret Minis in bliye ki sete sa menm Gouvernman ki’n o pouvwar tou sa letan. Enn de dimoun in koz ek mwan lo sa size redwir sa tax fee allowance sorti R3mil pou vin R1500.

Minis i bezwen revwar sa akoz ozordi rent i ser;- bann enportater i annan bokou tax pou zot peye, alors zot komodite i evidaman ser.  Sa bann dimoun ki parfwa war enn de pti zafer pou zot zanfan ou menm pou zot menm personnelman, zot touzour kapab fer vini.  La zot pou nepli kapab. Mon oule demann Minis pou arete pran nou bann dimoun pou bann fou bet.  Les zot avek en serten fleksibilite pou zot fer vini enn de pti prodwi.  Nou pep deserves better.

Mwan mon dir ki fodre fer monte sa duty free allowance, pou li vin R6mil an vi ki la tou keksoz pe kontinyelman monte.  Pri lavi i fer direksyon plafon non pa an desandan.

Ler nou pe get alokasyon pou bann pti proze distrik, nou vwar ki i annan en logmantasyon dan alokasyon pou sa bann proze.  Me dan sa Bidze Siplemanter ki ti ganny prezante, sak distrik ti’n fer en savings anviron R500mil.  Akoz ki la tout en sel kou en lot logmantasyon?

Eski sa pa i montre commitment Gouvernman pou akseler sa bann proze?  Mon asire ki sa se akoz eleksyon pe vini an 2020.  En keksoz ki enportan pou note, se ki MNA LDS, napa en say lo ki proze ki ganny fer ou non.

 MNA LDS in ganny sideline tou dernyerman.   Me se sa bann menm DA ki dir avek dimoun pou zot vin vwar bann MNA LDS e se nou ki pa pe permet sa bann proze bouze.

Sa i pa akseptab!  Akoz si zot met sa bann fon dan lanmen MNA LDS, nou pou fer sir ki bann proze ki neseser i ganny fer e non pa pou bann rezon politik.  Zot pe kontinyelman zwe politik bonmarse avek pti proze dan distrik, avek bi pou fors dimoun vot pou zot.

Dan sa Bidze nou’n tann Minis dir ki pou annan en logmantasyon dan alokasyon pou bann dimoun aze repar zot bann twatir.  Sa Mr Speaker i pirman en manev politik bonmarse.

Bann dimoun aze, zot menm in dir ki ler zot al kot Ladministrasyon Distrik, zot ganny en kantite difikilte pou akse sa bann fon.  Sa i ganny demontre dan sa sipoze savings ki’n ganny fer anba Bidze 2019 ki’n ganny prezante dan Bidze Siplemanter par ou menm Minis 2 semenn pase.

E la ou vin donn nou en resiklaz sa menm zistwar.  Ler nou get bann proze dan distrik, mon oule fer resorti ki Prezidan Faure ler i ti vizit Anse Aux Pins en pti pe plis ki 2an pase, i ti ganny met okouran sa proze Dan Kreson kot bann Payet.

Nou ti ganny en langazman ki sa ti pou lo Bidze 2019.  Nou pa’n war li lo sa Bidze, me kontrer nou’n war plis leskiz ganny donnen.  La i pa ni lo proze 2020.

Mr Speaker mon pou pouse pou realiz sa proze, akoz nou’n fini get serten dimoun dan sekter prive ki pare pou ede.  Si mon pa war en mouvman dan direksyon fer sa semen, mon pou bezwen ralye bann zabitan e nou ava konmans fer sa semen avek led sekter prive nou menm.

Sa bann zabitan i bezwen zot semen.  Akoz zot pou kontinyen pey tax si semen pa deservi zot korekteman?   Sa i en labi zot drwa ki bezwen ganny rektifye e fodre pa zot tarde.

Si zot pa fer sa, mon oule donn zabitan Dan Kreson mon langazman, ki lannen prosen anba direksyon Prezidan Wavel Ramkalawan, mon pou met sa devan pou konsiderasyon.

Egalman Mr Speaker mon oule osi fer resorti ki sa semen ki ranpli ek delo ler lapli i tonbe anndan kot lafanmir Pillay Anse Aux Pins, pa ankor konplete.  Annefe i pa ni ankor komanse.

Gouvernman ti’n vin fer survey plis ki 6mwan pase e naryen pa’n ganny fer apre sa. Dan miting ki ti ganny fer par CAMS avek Regional Council, lafanmir Pillay dan mon prezans ti ganny asire ki sa proze pou demare e ki i annan R2.5milyon ki’n ganny met de kote pou sa.

Ankor enn fwa sa lannen, lapli pe al komans tonbe, sa bann fanmir sirtou Sylvia avek Maryanne e lezot, pou bezwen mars dan labou e konmela avek risk maladi dan delo, i fer keksoz pli pir.

Silvouple Minis, fer sa proze pou rezourd problenm ki egziste.  Egalman Mr Speaker Gouvernman i fer devlopman kot Carefree Guesthouse me ler i fer miray avek bi pou amelyor sa semen, zot bliye ki bann peser dan sa rezyon i pou bezwen sot miray ros e sa i danzere, akoz zot kapab tonbe avek masin bato e ganny dimal.

Minister Lanvironnman ti donn mwan personnelman langazman ki zot pou fer peron avek bi pou fasilit mouvman peser avek masin.  Ziska ozordi Minis nanryen pa ankor ganny fer e bann zabitan sa rezyon pe fristre.

Anler dan Kapisen kot bann Nourrice bann zabitan in demann en semen pou ki letan lapli i tonbe bann zanfan ava kapab al lekol dan en pe plis konfor.   Akoz en kantite fiyapen i tonbe e sa i met zot a risk pou glise e ganny dimal.

Esperons ki la ki mon’n dir sa bann sityasyon, Gouvernman Lokal atraver Biro Ladministrasyon Distrik zot ava plan sa bann proze an men e seryezman.  Lot kote anler Dan Gravye osi semen kot bann Nourrice pa’n zanmen kontinyen e konplete, e konplet sa faz ki zot ti promet sa bann zabitan.

Sa faz pa’n zanmen ganny mete lo son lot staz, apre ki i ti’n konplete pou bann zabitan pli anba.  Mon pou demann Minis Responsab pou Lenfrastriktir Semen, pou get en pe sa bann proze akoz semen pa bezwen zis ganny fer anvil.

Akoz sa ki reste dan Gravye e Kapisen osi i pey menm tax ki sa dimoun ki pe servi semen anvil.  Alors silvouple fer sa ki onorab e donn nou bann zabitan sa ki zot merite.  Zabitan Anse Aux Pins nou pou bezwen fer sir ki sa Gouvernman i delivre lo sa ki nou demann zot.

Sa bezwen ganny fer a tou pri.   Alors mon oule demann zot pou fer konfyans LDS an 2020 pou ki bann proze parey sa enn ava ganny fer.  Semen i reste komodite pli enportan ki nou bezwen pou fer nou pep vin pli prodiktif.

Letan mon ekout Minis pe dir ki larzan pe ganny apropriye pou fer proze semen anvil, mon demann mon lekor, eski nou serye pou esey rezourd problenm semen?

Akoz nou bezwen sorti kot nou dan sid ek les pou vin travay dan lavil e si napa fason ki pe ganny fer pou amelyor sirkilasyon trafik dan sa bann rezyon, nou pou war ki sa ki zot pe fer anvil pa pou benefisye nou bann zabitan sid ek les enkli was mon asire.

Sa se akoz zot pou kontinyen fer fas avek bann defi dan zot rezyon respektif, ki pou fer ki ler zot ariv anvil zot pou fer fas avek menm retar.  Lo size don, Mr Speaker Grant ou don in sorti R145milyon an 2019 e in mont R647milyon.

Sa i merit fer nou koman bann sitwayen pou demande akoz sa bann don?  Lekel ki pe donn nou sa bann don?  E kestyon pli enportan se ki bann kondisyon ki atase avek sa bann don?  Mr Speaker mwan mon pou demann Minis pou eklersi nou lo sa ban kestyon.

Sesel i nou pei e tou bann latasman ki zot pe mete lo nou, lo nou pei, nou pou bezwen konnen.  E se nou ki pou bezwen dir si nou dakor avek sa bann kondisyon. Fodre pa i annan okenn hidden agenda.

Mr Speaker dan mon pe parwaze dan wikenn pe esey rod en pe feedback sorti kot bann zabitan dan mon distrik, mon bat avek 2 msye ki demann mwan,’’   Onorab, be kan nou pou fini donn Air Seychelles sibvansyon?’’   Mon osi mon war sa en bon kestyon.

Si tou sa letan nou’n ganny dir ki Air Seychelles pe fer profi, alors i enportan ki zot eksplik sa pep.   Akoz ki nou pe pey R30milyon pou Air Seychelles?  Sa Mr Speaker i selman par dan sa bann don ki Minis in koz lo la e nou bezwen ganny en vre leksplikasyon lo tousala.

Reaksyon serten akademik.   Yer Mr Speaker dan mon parkour pou sers reaksyon, ou plito Lendi dan mon parkour pou sers reaksyon bann akademik, mon bat avek en zenn onm.  I dir mwan si mon rapel lontan dan quiz ant bann lekol ler nou ti ganny demande sa kestyon,

‘’Which Ministry gets the lion share of the budget?’’  E toultan Mr Speaker larepons se Education.   I dir mwan ki ozordi ler nou get Bidze Ledikasyon ou war ki i mwens ki Benefits and Approved Program for Social Protection. 

An 2019 Mr Speaker alokasyon pou Ledikasyon ti anviron, mon met li egzakteman, 825,685milyon, eskiz mon Mr Speaker R825 milyon 685 mil tandis ki pou Benefits and Approved Program for Social Protection ti R1.293 915bilyon.

An 2020, Mr Speaker, nou vwar ki alokasyon pou Benefits and Approved Program for Social Protection i 1, 457bilyon.  Tandis ki pou Ledikasyon i 944 milyon.  Sa msye i dir mwan ki sa sityasyon i montre defayans dan lafason ki Gouvernman o pouvwar in fer dan sekter benefis sosyal.

Son analiz se ki si ou Bidze pou welfare i kontinyen ogmante, sa i montre ki ou pa’n fer en bon travay pou fer depandans lo welfare diminyen.

Si ou Bidze pou Ledikasyon i pli ba ki welfare, sa i vedir ki ou pa pe atas lenportans lo sa sekter ki pou fer depandans lo welfare kontinyelman diminyen avek bi ki annan en pep ki pe fer marse keksoz e bann zenn pe travay pou benefisye nou pei.

Mr Speaker mon retourn ankor lo Air SeychellesAir Seychelles Mr Speaker i reste en konsern.  Mr Speaker ki kantite letan nou Bidze pou kapab soutenir en lakonpannyen, menm si Gouvernman i shareholder la ki i annan en lot shareholder dan zwe?  Annou fer sir ki tou sa ki bezwen kontribye, i kontribye.

Eski en lakonpannyen ki sipoze fer biznes i fer sa ki i sipoze fer?   E si zot pa kapab fer biznes les sa avek en lakonpannyen prive pou antre dan sa biznes e fer en turnaround lo sa lakonpannyen, konmkwa presyon lo Bidze ava redwir.

Nou pou bezwen demann Gouvernman pou vin donn en leksplikasyon kler lo proze Abu Dhabi dan ground handling lo nou erport.  SCAA i dapre lenformasyon anba presyon pou antre dan lagreman pou fer marse ground handling par Abu Dhabi.

Silvouple Minis vin enform pep Seselwa akoz pa sa ki fodre ganny fer ki zot pe fer.  Minis ti dir avek sa Lasanble ki si i ganny mandate pou li al re negosye konpansasyon pou ban dimoun La Misère, i pou ale e al fer sa ki i pou ganny mandate pou fer.

Ziska ozordi, nou pa ankor tann nanryen Minis.  E nanryen pa ankor ganny akonplir.  Me Minis in dir nou ki konpansasyon pou dimoun La Misère pou R75 milyon e dan sa Bidze in fer, dan sa Bidze 2020 in fer en alokasyon R37.5milyon pou sa bann konpansasyon.

Onorab William fek demann nou, fek dir nou ki poudir silvouple les sa bann dimoun ganny zot konpansasyon.   Nou konpran sa, nou konpran ki poudir sityasyon in arive, e konpansasyon i bezwen ganny donnen.

Me selman nou bezwen sa bann, rektifikasyon sa bann lesplikasyon, e kan ki sa bann ranboursman pou ganny fer.   Akoz menm si PUC i en antite Gouvernman, me sa in ganny koze par sa kontrakter ki ti pe fer sa travay.

Sa i sorti dan kontribisyon sa 37.5milyon i sorti dan kontribisyon ki bann taxpayers i peye e sa pa byen.  Akoz se pa nou ki’n fer sa lerer.  Me se sa bann propriyeter sa bann proze ek zot bann kontrakter.

I kler ki mezir apropriye pa’n ganny pran ler ti neseser.  Alors akoz ki se nou ki bezwen pey lepok kase?  Pep Seselwa i demann en leksplikasyon tre kler sorti kot Minis avek bi pou met fen avek sa sityasyon.

Eski sa i en Gouvernman ki serye e ki merit kontinyen gouvern nou pei?  Mwan mon dir non e se sa rezon ki nou bezwen vot LDS e pou Wavel Ramkalawan an 2020, pou li vin Prezidan kot nou ava annan en direksyon e kontrol apropriye.

Mr Speaker, business tax in ganny dir i annan zis 30 lakonpannyen ki pe peye, konpare avek sa kantite gro lakonpannyen ki pe fer biznes Sesel.  Bokou zot, zot fer biznes avek bann etranze akoz zot dan Sekter Tourizm.  Sa Mr Speaker i bezwen ganny revwar.

Sesel i bezwen tou son kontribiter pou kontribye pou fer Sesel pli zoli e pou li reste zoli.   Komisyon Reveni i bezwen fer sir ki tou sa ki sipoze pey tax i peye.  I enportan pou fer resorti ki ziska ozordi tou sa ki’n ganny fer resorti i neseser ki bann koleksyon i ganny fer.

Mr Speaker akoz ki dan Bidze, nou bezwen met larzan de kote pou file case pou ki Gouvernman i kolekte tax sorti kot serten dimoun?  Kan ti kapab ganny fer byen avan sa larzan, apre sa larzan ti a ganny servi pou en lot keksoz pli enportan.

Sa i montre nou akoz ki sa Gouvernman i neseserman ganny ranplase par LDS an 2020.  Mr Speaker dan mon ti pe koze dan mon lunch break, mon ti pe koz avek en biznesmenn.  I ti dir mwan ki li i war ki sa Bidze pe met plis presyon lo li.

Akoz koman bann main taxpayers i santi ki zot pa pe ganny bann mezir kot tax pe donn zot en breather.  Savedir kot zot ganny bann rediksyon ler i neseser pou permet zot fer serten benefis adisyonnel.  Mr Speaker i enportan.  Mon a donn en lot legzanp kot vreman sa Gouvernman ek son bann azan i vreman target sa Seselwa zis pou ganny 5 sou e menm fer zot perdi zot travay, e menm perdi zot travay.  Me les pase sa ki pa pey milyon dan tax.

Ou apel letan bann staff SRC ti lo strike, tou dimoun ti antre dan pei san ganny tyeke par Customs.  Akoz ti napa zot ki ti pe travay.

Ozordi Air Seychelles, ansanm avek SRC pe tyek tou footage ek resi kot SRC, zis pou gete lekel travayer Air Seychelles, ki petet in antre, in rantre avek en pake sigaret an plis.

E zot pe menm mazinen pous sa anviron 10 travayer.  Tanpi konnen ki zot pou fer e pa ni enterese avek zot lavenir.  Mr Speaker, lo lapar LDS, mon demann pardon pou zot e mon plede ki personn pa ganny pouse.   E mon demann SRC pou al kolekte bann milyon avek sa bann lakonpannyen ki pa pe pey tax.

 

(APPLAUSE)

 

HON CLIFFORD ANDRE

Ozordi Mr Speaker, tou amenity pe monte par lao plafon, e sa pe fer tou keksoz vin pli ser e non abordab pou nou tou.  Alors koman ki zot ekspekte ki Seselwa i war li dan en tel Bidze?  I pa war li Ladan ditou e kontrer sa pti logmantasyon ki zot dir zot pe donn bann carer ek bann dimoun aze, pou ganny konsonmen dan lezot tax ek logmantasyon dan tarif elektrisite ek delo.

Mr Speaker en lot eleman dan Bidze ki bokou dimoun pe demande, pe demann kestyon se dan sa alokasyon R73milyon pou APDAR.  Kot en don R21.7 milyon sorti Abu Dhabi pe osi ganny donnen.

Mr Speaker i vre ki sa bann zenn pe fer fas avek realite lavi, me i osi enportan pou note ki bann sitwayen ki pe travay e pe pey tax osi zot fer fas avek realite lavi.

Mwan mon pou demann Minis pou revwar sa alokasyon.  Sey met bann servis ki kapab ganny ofer par Minister Lasante pou sa bann servis ganny ofer laba e nou ava ogmant zot Bidze kot sa sekter.

Apre Mr Speaker sa Sekretarya SS Herminie pou APDAR avek 23 dimoun i tro bokou.  Sa Sekretarya i konsonm Bidze R5milyon par an.  Mr Speaker ou Sekretarya napa menm 10 dimoun ladan e get sa travay ki nou pe fer anba ou gidans.

Sa bann zenn ki lo methadone Mr Speaker, zot bezwen latansyon, pa ganny mwan mal.   I enportan ki nou rod bann plasman e met zot travay.   Ler zot ganny peye lafen di mwan tir sa tretman lo sa saler.

E sa i ava donn zot en motivasyon pou zot fer zot mye pou zot pa re tonm dan sa fleo.  Mr Speaker mon dir sa akoz en dimoun ki malad e bezwen al trete deor, zot bezwen rod en pti led apre zot sey claim.   E ladan menm i annan de fwa zot pa ganny refund.   Minis.

 

MR SPEAKER

Onorab 2 minit.

 

HON CLIFFORD ANDRE

Pe al fini la Mr Speaker.  Minis balanse parey koze i dir.  GOP par lao 10an Mr Speaker, kot en dimoun pou bezwen pey R5mil. Sa i pa akseptab.  Akoz sa bann dimoun i bezwen, zot in fer zefor, mon konpran nou bezwen ankouraz zot.

Mr Speaker mon ti a demann Minis pou get en pti kou kot PUC dan Gouvernman.  I annan bokou etranze ki plis ki 10an.  Akoz Gouvernman pa sey fer en fason pou lokaliz sa.  PUC i annan ki plis ki 10an laba.

E annefe ki zot fer, zot fer vini zot dalon pou travay e zot aste bann pyes avek bann lakonpannyen ki zot annan deor.  E ki fer ki zot kontinyelman reste la, akoz zot krwar zis zot ki kapab fer sa travay.

Pour konklir Mr Speaker mon ti a kontan dir avek nasyon Seselwa, partikilyerman zabitan Anse Aux Pins, pou zot vwar en lavenir pli prospere kot pri lavi i ava desann, vot pou LDS, vot pou Wavel Ramkalawan.

Akoz se zis avek en Gouvernman LDS ki ou pou vwar bann debistaz ki FPAC in fer avek pep Seselwa, ki nou pou fer sir ki nou al rod sa bann larzan e retourn li dan Kof Leta. Avek US bliye. Vot LDS, vot Wavel, vot Ahmed, LDS Sesel!  Mersi.

 

MR SPEAKER

Mersi Onorab Andre.   Bon zis avan nou break, mon annan en pti koreksyon pou mon fer.  I  annan 2 Manm ki lo overseas mission, sa se Onorab Ramkalawan e Onorab Mondon.

E mon annan laprev ki mon annan 3 Manm ki ti absante la ki’n prezant zot apology.  Sa se Onorab Wilbert Herminie, Onorab Egbert Aglae e Onorab Charles De Commarmond, ki ti bezwen sorti e al attend en miting irzan, ok?

Me mon komanter ki mon’n fer, zis annou bear in mind osi bann Manm, poudir sa semenn Minis in avek nou 3 zour.  Minis in kit tou son travay, in vin asiz avek nou 3 zour.  E mon krwar nou prezans osi tou i montre li serten respe.

Ki li in kapab vin avek nou depi 9er bomaten ziskan 5er sonnen.  Ki nou osi tou si nou napa nanryen ki grav ki nou pe attend to, nou bezwen montre sa respe pou nou vin la.

Nou anvi ki Minis i ekout nou, me nou osi tou nou fer li mars lot kote.  Ok, vwala sa ki mwan mon ti oule dir.  E nou pou break la, nou re pran nou travay 4.10.

 

(BREAK)

 

 

MR SPEAKER

Bon nou ava kontinyen avek nou travay.  Mon ava aprezan donn laparol Onorab Jean-Francois Ferrari.

 

HON JEAN-FRANCOIS FERRARI

Mersi Mr Speaker.  Mr Speaker i fer mwan ankor en fwa en gran loner pou pran laparol lo Bidze Nasyonal, e mon fyer ki mon pe fer sa lo lapar zabitan Mont Fleuri e tou sitwayen Sesel.

Mersi Minis pou ou ladres, mon konnen ki ou, ou zis messagère Gouvernman.  Mr Faure alors pa pran mon mal lo sa ki mon annan pou dir.   Apre tou sa bann lannen lalit pou en meyer pei, tou Seselwa i aprezan konnen kote nou, nou debout lo kestyon larzan lepep.

Nou debout an priyorite pou lonnekte, latransparans e lazistis.   Me nou osi debout pou en lekonomi ki fonksyonn byen e pou byennet tou Seselwa.

Depi preski 30an nou pe travay pou transform nou pei e fer li enn kot tou Seselwa i annan son vre plas e sa par ki i merite.  Bidze 2019, lannen pa ankor fini, e nou pe vwar plizyer konplikasyon.

Serten depans ki pe al an deor kontrol e bokou proze in sezi lanmenm.  Plan ki Gouvernman Mr Faure ti met devan nou ler lannen pase pa pe ganny realize.

Sa bato ki apel Sesel pe zis drive lo losean e menm si tanzantan kaptenn i donn en lord, ou a krwar son bann zofisye pa ni pe antren li.

Sa ki pe degaze pou fini son gro lakaz, sa ki pe rod en lot bout later, en Minis pe rod en louvraz deor, sa ki pe vir an ron, sa ki pe anons sanzman dan laz pansyon me son pep pa konnen.  Vwala.  Sanmenm sa realite nou lavi depi en bon pe lannen.

E dan tousala, Mr Faure pe met tou kalite labwet deor pou ganny en kandida Vis- Prezidan me napa okenn dimoun serye ki pe lev lanmen.

MNA US pou Larivyer Anglez i dir nou ki sa i en Bidze kontinyite, stabilite, espere, pran pasyans, konsilte, akoz li i pa dan soulye sa dimoun ki pe trimouse.  Pou li, tou keksoz pe vin dan dalo, alors i fasil pou pran pasyans.

E li Onorab Gill i pe rod lefikasite son Gouvernman e i bliye ki Minis in dir ki Gouvernman in konplet ant 11% e 50% Bidze lenvestisman selman.  Sa se lefikasite Gouvernman US.

Dan sa sityasyon konfizyon, mank direksyon e linefikasite, annou get detrwa lanons ekonomik ki Minis in fer dan son diskour.  Krwasans in ariv an rezilta meyer prodiksyon e lavant lalkol ek sigaret.  Mwan, mon pa ti pou tro fyer ver sa anons.

Akoz sa i vedir ki nou lekonomi pe grandi, me nou problenm lalkol pe grandi pli vit ankor.  Popilasyon i reste parey me nou pe servi 21% plis gines e 12% plis labyer.  Mon poz sa la pou tou dimoun etidye.

Minis i dir nou ki serten konstriksyon in repran sa lannen, ki sekter in repran sa lannen.  Me ler mon regard bann sif kantite tax ki sa sekter i peye, mon trouve ki VAT sorti kot sa lendistri in bese.

Bidze 2019 ti’n estim en reveni VAT pou Sekter Konstriksyon a R142milyon.  Me a la fen zot in kolekte zis R87milyon. R55milyon an mwens.   Sanmenm sa ki sekter i an krwasans, oubyen Minis, eski i annan konpannyen dan sa sekter ki pe kasyet reveni?

Si sa i vre, eski SRC in apersevwar problenm pou zot fer en lodit en pe vitman?  Dapre bann sif dan Bidze, lakantite touris ki vin Sesel pour zot vakans in desot 350mil lannen pase e sa lannen i pou ogmant ankor par 5%.

Mon pa konpran alors akoz passenger service fee ti ganny bidzete pou lo 62milyon an 2019.  Me la dan Bidze zot pe dir nou ki zot in anmas, zot pou anmas a lafen sa lannen, zis 25 milyon.  Touris i ogmante me larzan i desann?  Pli tar Minis ava kapab eksplike.

Immovable Property Tax ti sipoze antre anfors depi Zanvye 2019, me pour en rezon ki mon pa tro konpran, sa in ganny retarde pour ankor 12mwan.  Sa i en tax ki lontan LDS ti pe demande lo bann lakaz ki bann etranze i posede Sesel.

Dan tou pei i annan sa kalite tax. Dapre lenformasyon, serten presyon pe ganny mete lo Gouvernman par bann etranze ek bokou larzan e lenfliyans.   E la mon bezwen get sa bann eksepsyon sirtou ler Minis i dir egzanpsyon.

Considered to be commercial or industrial land will be exempt.  Sa pa pou bann gro devlopman pou bann milyonner dalon?  Lalwa pa ankor pase deza nou pe koz egzanpsyon?

Mon anvi kestyonn pozisyon Gouvernman lo lafason ki i pe kolekte reveni tax avek bann lakonpannyen telefonn.  Dan son diskour, Minis in dir nou ki lavant data par bann konpannyen telefonn in ogmant par 19% lannen pase.

Me Selman nou vwar ki reveni tax VAT i ogmant par zis 2%.  Eski sa i en fot, eski sa bann konpannyen pa pe pey sa ki zot ti sipoze peye?  Eski tou konpannyen dan sa sekter pe pey tax?

Mon ganny lenformasyon ki i annan serten tax ki en konpannyen tel ki Intelvision li i pa peye.  Serten tax ki lezot konpannyen, dan sa menm lendistri zot, zot bezwen peye. Kekfwa Minis i ava kapab eksplik nou.

Pareyman, nou ankor pe esper en Lalwa ki kontrol biznes lwe bato par bann lakonpannyen ek propriyeter etranze.  Dan sa Bidze, mon rod partou me mon pa trouve kote nou pou anmas en pe plis larzan avek sa lendistri yachting. 

Ki enn bann biznes ki pe grandi pli vit dan Sesel. Eski nou’n, nou pou kontinyen aksepte skipper etranze, lo bato etranze ki dir nou ki zot la zis pou friends and family?   Kan eski Seselwa pou ganny meyer formasyon dan lekol Maritim e priyorite pou ganny louvraz dan sa lendistri ki bokou nou zenn i kontan.  Dan Staz Komite mon pou koz bokou lo lekol Maritim e bann challenge ki zot pe fer fas avek.

En lot sekter kot mon santi i annan kontradiksyon se dan bann biznes finans e lasirans.

Nou ganny dir ki i annan bon krwasans laba, me ler nou get bann sif, nou trouve ki estimasyon se pou nou anmas R59 milyon dan tax.  Me ler nou pou ariv lafen lannen 2019, prozeksyon se ki nou pou anmas zis 49 milyon, 10 milyon an mwens.  Eksplik nou sa kontradiksyon Minis?

Mon pe get bann reveni ki Departman Ladefans i sipoze resevwar e mon pa vwar okenn reveni sorti dan lwe langar avek Zil Air.  Minis dir nou si nou ankor pe donn sa konpannyen prive en gran langar pou nanryen?  Lontan mon pe demann sa kestyon.  Lontan nou pe rode ki sa larzan i antre dan Bidze.  Fotespere ou ava kapab finalman donn nou en larepons sa lannen.

Mon vwar nou pe donn en gro grant SPTC.   Sa i byen, me Minis, eski ou kapab dir nou si Lasirans in pey domaz pou sa dife dan stor SPTC lannen pase?  Dife ti konmans lot kote dan stor fedartifis.  Eski sa lakonpannyen in pran responsabilite oubyen in larg sa lo SPTC parey zot abitye fer?  E nou, nou kouver pou zot akoz zot koneksyon i bon?

Pour Lagrikiltir, Minis,  mon vwar ki tou bann proze pou ganny finanse ek larzan sorti dan Livestock Trust Fund.  Eski sa i byen Minis?   Sa larzan pa ti sipoze spesifikman pou bann prodikter lavyann ek dizef?  Ki mannyer se dan sa fon kot nou sipoze siport sa lendistri, ki tou bann proze Lagrikiltir pou sorti?  Ile du Port?  Mon ti a kontan demann ou Minis.  Oli larzan pou lenvestisman dan lenfrastriktir pou devlop sa Sekter Lapes?

Pour lemoman okenn biznes pa kapab bouze akoz PUC pa kapab supply elektrisite ek servis sewerage.   Ki pe arive Minis?  Eski Konbyen lannen ankor nou pou bezwen, pou nou kapab fer sa pilye nou lekonomi devlope?

Mon ti a kontan prezan koz en kou lo bann problenm sosyal.  Mr Speaker, konbyen fwa nou’n tann repete ki fodre nou leve e debourye.  Sa i en bon prensip e nou dan LDS nou’n montre par legzanp ki mannyer nou’n vin debourye dan sa Lasanble.

Nou dan LDS, nou annan en vizyon fondamantal kot nou pran tou mezir posib, pou ankouraz dimoun sorti lo welfare e antre dan lanplwa, sirtou bann ki ankor an bonn sante e ki kapab travay e kontribye.

Tou lede, Mr Albert Rene, Mr James Michel ti kontan sa parol, sa dikton ;-  ‘’si en zonm i lafen, initil ou donn li en pwason me plito donn li en laliny ek en lanmson e montre li lapes koumsa i ava kapab ganny en pwason toulezour.’’

Mon krwar sa ti en keksoz ki ti anpandan dan zot biro zot tou lede.  Malerezman, sa de msye pa’n met sa parol an pratik, akoz tou zot lavi zot in sey fer Seselwa, atraver welfare, depan lo zot pou tou sa ki zot bezwen.

‘’SPPF pou la from cradle to grave,’’ nou ti ganny dir.  Sa Bidze i fer sanmenm sa filozofi Sosyalis, Kominis.  I annan en kantite larzan e progranm pou bann dimoun ki pa prodiktif, me tre peu de sou pou bann ki pe sey debourye.

Les mon a donn detrwa legzanp ;-  Gouvernman pe propoz en Bidze welfare e lasistans sosyal ki’n kas tou rikord.  Nou’n ariv dan bilyon.

E ler Gouvernman i pez en koud fren lo depans proze distrik e i met en freeze lo rekritman travayer, parey mwan pase dan Bidze Siplemanter, sa menm Gouvernman i an menm tan met lipye lo akselerater depans lo welfare.

En lipye lo fren en lipye lo akselerater.  Apre zot rode, parey Mrs Potter i dir, akoz gear box pe grennen.  Se pour sanmenm sa rezon ki ozordi mon anvi sonn en warning pou tou Seselwa.

Sa bis welfare, ki Gouvernman i kontan ler nou anbark ladan pou li kontrol nou vot, sa bis i dan desant, akselerater in kole, fren in kase e si nou pa reakte en pe vitman, nou pou al dan presipis.

E ler sa pou arive, ni sa enn ki pe ganny lasistans ozordi, ni sa enn ki pe kontribye pou son pansyon demen,  ni nou zanfan ek nou pti zanfan pa pou konnen kisisa sekirite, pansyon ek welfare.  Nou koz lo soustenabilite dan lanvironnman.

Minis mon ti a kontan nou konmans koz lo soustenabilite dan nou sistenm sekirite sosyal.   Ser, frer ek ser Seselwa, sa size ki mon pe aborde i enportan.  Bann dirizan dan L’Egzekitif e menm bann Manm US ler nou rankontre dan bann Komite spesyalize, zot osi zot dakor,  ki sa i en size ki merit ganny mete en pe deswit.   Me selman, se zot ki kontan fer politik lo la.  Ler nou pe sey analize pou rod solisyon, taler ou pou tann zot pe dir ki nou pa oule donn dimoun welfare.

Ou pa kapab donn sa ki ou napa e si ou kontinyen lo sa lapant, ou pou napa nanryen pou partaze.  Mon krwar zot bezwen tande sa.

Pozisyon LDS i kler.  Fodre annan reform pou ki sa ki sa sistenm, sa ki bezwen i gannyen, e sa ki pa bezwen i ganny ofer plito en louvraz prodiktiv.  Fodre bann nouvo mezir lankourazman pou fer Seselwa pran en pe plis swen avek zot bann vye paran, plito ki zis depan lo Leta.

Si nou aranz sa sistenm ki pe dekontrole, nou pou garanti plis benefis pou bann ki bezwen, akoz i annan en kantite ki bezwen plis.  E en sistenm pansyon ki ankor la pour sa prosen 100an.  Pa fer nanryen, parey sa Gouvernman, pa en solisyon.

Zis depans plis larzan pa en solisyon.  Nou dan LDS, apartir 2020, nou determinen pou nou sov nou sistenm proteksyon sosyal.  Akoz nou’n fini trouve ki sa Gouvernman ki la pe kapab kont lo zot pou fer sa travay.

Nou dan LDS, nou pa pou per koze ler i annan en problenm, sirtou ler nou vwar ki i annan labi e mank kontrol.  Dan miting avek Minister Finans ek Lazans Proteksyon Sosyal, nou’n tande ki i annan milyonner ki pe ganny carer peye par Leta!

Nou’n tande ki i annan dimoun ki ganny lasistans medikal, me ki son biro i anba laboutik avek e Pti Ponm, koman son medikaman.

Nou’n ganny laprev ki i annan dimoun aze ki pas zot letan Amusement me Gouvernman pe pey carer pou zot.  Nou’n tande ki i annan carer ki pe ganny peye me sa dimoun aze pa ni konnen si i annan en carer, pa ni vwar li.  Ki mezir nou pou pran pou koup sa labi?  E sa pa zis en labi, me i en lenzistis akoz i annan dimoun ki vreman bezwen sa sipor.   Vreman i annan dimoun ki lo half day carer, ki vreman bezwen en full day carer. 

Me zot pa pe gannyen, e zot pa pe gannyen akoz i annan labi dan sistenm.  Sa ki pa merite i gannyen me sa ki merite i ganny refiz-e.  Menm keksoz pou lasistans welfare, pou lasistans envalidite e lasistans dezabilite.  Nou bezwen serye nou dan sa pei.

Lontan nou ti annan en sistenm supervisor pou carer me pour rezon politik, ankor sa in ganny arete.  Lazans Proteksyon Sosyal i rekonnet ki nou bezwen retourn sa sistenm kontrol.  E nou dan LDS nou dir wi, nou pou donn larzan dan Bidze 2020 pou ki otan supervisor ki nou bezwen i ava ganny rekrite.   Alafendefen nou pa krwar sa pou kout nou an plis.   Akoz nou ekspekte ki labi i ganny redwir.  Wi, nou siport sa 5% logmantasyon lapey pou tou carer.

Me nou oule en meyer litilizasyon Bidze.  Nou lans en lapel avek bann o zofisye dan Gouvernman, sirtou dan sa lannen eleksyon ;  sirtou bann Minis, ki ler zot pe fer zot kanpanny politik, aret ofer carer ek plas carer pou  tou dimoun pou zot ganny vot!  Respekte assessment bann ners kalifye e aret servi bann nurse manager pou sanz desizyon dan zot faver zis pou zot ganny en vot.

Mr Speaker, mon vreman, prezan mon ti a kontan koz pou Air Seychelles.  Mr Speaker, mon vreman per pou nou lakonpannyen aeryen.  E mon oule anmenn sipor pou bann parol ki Mr Ramkalawan in leve lo size nou erport e nou laliny aeryen.

Malgre en tre, tre long miting avek management ek Chairman Air Seychelles detrwa semenn pase, bann lanons resan dan Bidze i lev ankor en bon pe konsern.  Pour ki rezon ki Gouvernman Abu Dhabi ti pou donn nou pros R100 milyon kado sak lannen pour sa prosen 5an?

Vre sa sonm i zis pou pey lentere lo sa gro det ki Air Seychelles i dwa?  Ki nou pe donnen an retour?  Ki lanmson ki’n anmare avek sa laliny?

Minis, dir nou kisisa sa zafer preferencial shares pou lavaler $30 milyon ki, pa Air Seychelles, me Gouvernman Sesel pe al sinyen avek Etihad ?  Ki lanmson i annan dan sa enn nilon, Minis?  Dir nou silvouple, konbyen nou dwa lo nou laliny aeryen ?

Akoz still nou pa konnen konbyen nou dwa.  Nou tande ki bannla i oule pran ground handling e evantyelman nou erport antye.  Nou tande.  E finalman, lo sa size, nou oule konnen ki plan pou lavenir Air Seychelles?

Eski nou pare?  Nou kapab e nou anvi depans $6 milyon zis lo lentere sak lannen?   Management i dir nou mwan pase ki zot pe prevwar ki o kour bann lannen ki pe vini, Air Seychelles pou perdi an $2 a $3milyon sak lannen.  Minis, eski nou kapab tenir sa pert?

Eski nou anvi tenir sa pert?  Mon krwar nou bezwen annan en diskisyon fran lo sa size.  Akoz nou, an tou ka lo sa kote latab, e nou ki’n dan sa bann rankont avek Air Seychelles, nou anvi remersye management Air Seychelles pou en zefor ekstraordiner ki zot in fer pandan ser dernyen 2 lannen pou met en pe lord dan zot finans.  Nou rekonnet sa zefor, me Minis i annan en gro nyaz nwanr ki pe flote par lao sa lakonpannyen.

E nou bezwen konpran e nou bezwen deside enn fwa pou tou –  parey Onorab Andre in dir, si nou kapab soutenir sa sityasyon.  Mr Speaker, nou fatige viv dan fernwanr.  Nou oule lenformasyon.

La, lo kestyon lo lapes ton, nou pa konpran akoz Minis Bastienne i ensiste pou kit Lasanble dan fernwanr.  Nou, konman reprezantan lepep, nou ki pou ratifye sa Lakor, nou bezwen konnen.  Eski benefis nou bann maren pe ganny prezerve?  Eski larzan ki nou pe gannyen i valer sa Lor Ble ki apel ton?

Eski nou’n demann plis louvraz e meyer lapey pou Seselwa dan sa lendistri?  Eski nou’n ensiste ki sa bann amater bato i envestir en pe zot profi dan nou pei?  Sa larzan ki amater ti peye dan lepase, eski in al kot i merite pou bann travayer?

Akoz Minis, mannyer keksoz in deroule depi sa plis ki 30an, zis nou’n donn nou pwason pou detrwa milyon Ero e nou pou napa nanryen pou montre pour sa lendistri sitan enportan, ki la, menm sa stok pwason pe ganny menase.

Ni sener, ni cold store, ni Fon Pansyon pou maren peser, ni en bon lasose kot por lapes.  Nou bezwen ganny plis pour nou resours, Mr Speaker.

E mon konnen ki avek en Gouvernman LDS anba direksyon Mr Ramkalawan, keksoz pou sertennman diferan e maren ek peser pou vwar sa vre benefis sa lendistri.

Demen, Mr Speaker, i annan en rankont  Minis Lapes avek bann maren peser.  Mon pa’n ganny envite me mon pou laba pou akonpanny e defann drwa nou bann dimoun e pou met lalimyer dan zot fernwanr.  Mr Speaker, i osi annan fernwanr lo size later ek point system.  Gouvernman in deside zwe politik.

Later ek lakaz ki ti ganny promet sa lannen, dimoun in ganny zot let, sa prezan pe ganny anvoye pou 2020, lannen eleksyon.  Graduates i fristre, bann zenn  pe sey get on avek zot lavi pe fristre.  La Mervin ek Farah zot dezespere.

Arete, Minis si ou kapab anmenn sa mesaz pli devan kot Cabinet.  Aret zwe politik avek later, silvouple.   Met lazistis e les nou bann zenn e nou bann profesyonnel anvole.  Dimoun i annan zot larzan, zot in fer zot kontribisyon. Zot in pare pou peye!  Pran sa larzan e servi sa larzan pou devlop lezot land bank, lezot kare later pou plis dimoun benefisye.

Ler Gouvernman i zwe politik e zot sey pez bann ki zot pa kontan, se bann inosan ki soufer.

E la i annan en kantite dimoun ki dan dezespwar, apre nou rode akoz nou graduate i kit pei e ale.  Mon oule osi aprezan koz lo sa vot ki Minis in mete dan Bidze pou APDAR.  Pozisyon LDS lo sa size i kler, menm si zot dan US zot eksper dan senm konfizyon lo sa size,  nou an faver tou zefor ki ed bann adikt pou lager kont eroin e lezot drog.  Progranm methadone i enn sa metod ki dan plizyer pei i marse akoz i annan sa konponan counselling e sipor.

Sesel, APDAR napa counselling regilye e malerezman bann viktim i tro souvan ganny large dan kannal apre zot doz methadone.  Sa i vreman en sans gate, en loportinite manke e en larzan zete e se pour sa rezon, ki bokou dimoun i fristre avek APDAR.

E menm bann viktim, bann paran, bann adikt zot fristre.  Sanmenm bokou piblik i ankoler, akoz zot pa vwar benefis zot larzan ki zot pe envestir dan sa progranm.

Dimoun i ankoler ler zot tande ki bann ki bann ki lo methadone i retourn lo gento aswar.  Dapre bann Onorab US, progranm methadone i bon pou en senp rezon, akoz dimoun in aret kas lakaz.  Come on!

Nou’n fer en progranm methadone pou fer dimoun aret kas lakaz?   Dapre bann, konmsi mon pa kapab konpran ki mannyer zot kapab happy avek sa.  Nou, nou bit se 2 keksoz, anpes drog antre dan Sesel e geri bann adikt pour ki zot retourn konman bann dimoun normal e prodiktif nou sosyete.

Nou pa la pou met en progranm  pou kit dimoun lo methadone tou zot lavi.  Nou problenm alors i lo Sekretarya APDAR, kot nou santi ki i annan tro gro bout Bidze ki ganny servi zis pou bann manager e bann top dimoun.

Nou santi ki tro bokou larzan i ganny servi lo transpor lwe, tiket avyon, sekirite, lwe lakaz, transpor, tou sa bann keksoz.  Lot problenm se ki laba, si ou pa dakor avek SS Herminie, ou lavi i vin en martir.

Parey dan Lasanble lontan, tou travayer ti ganny bully.  E mwan mon konn tre byen, akoz konman mon ti fer ‘’wenk’’ – deor !   Sa klima travay negativ i fer ki tou dimoun i terorize e napa okenn nouvo lide e nouvo lenerzi ki pe antre laba.

Dan diskisyon Komite, mon pou lev tou sa bann size akoz mon santi ki nou ti kapab fer bokou plis e bokou mye pou bann kliyan APDAR.  Nou determinen Mr Speaker, pou met en lord dan sa sekter, met lefikasite parey nou’n fer dan plizyer lezot landrwa.

Wi nou kritike e sa zot dan US, zot pa kontan.   Zot pa krwar dan kritik.  Zot pa krwar ki kritik i bon e i anmenn keksoz meyer.  An realite zot per kritik akoz lontan si ou ti kritike, ou ti fini dan prizon!

Me nou, nou la pou fer nou kritik parey nou’n fer lo Linyon Estate, lo Zarden Botanik e sa in anmenn rezilta pozitiv.  Pou APDAR, kontan pa kontan, nou pou siport bann kliyan, nou pou siport sa progranm.  Me nou krwar ki sekretarya sa progranm i kapab meyer e pli efektiv.  Sote, pile, ganny kriz, roul ater si zot oule, nou pou fer APDAR mars pli byen dan benefis nou pei e nou zabitan.  Bidze nou’n donnen lannen pase pou APDAR.  Bidze nou pou donnen sa lannen pou APDAR.   Me nou pou fer sir ki sa ki nou donnen i ganny servi pou fer, pou lefikasite, e non pa pou en zwe politik.

Legzanp Zarden Botanik i bon revin lo la.  An 2018, nou ti ganny en soupson ki i annan trik dan zwe e ler nou ti sonn lalert, dife ti pran dan biro kot liv resi i mete.

FPAC ti lev founga e nou ti demann Oditer Zeneral pou fer en lanket.  O komansman, tou blanm ti tonm lo travayer me byen vit nou konpran ki frod i en lot landrwa. O firamezir ki lanket in progrese, nou ti vwar bann larzan ki’n disparet konmans reaparet.

An 2018, zis 1.2 milyon ki ti ganny deklare lo baro pou sa lannen antye.  2019, mirak i arive pep Seselwa.  En sonm 6.8 milyon pe ganny anmase.  Plis ki 5milyon ti pe pas dan konversasyon.

Sa i menm parey nou ti fer avek L’Union Estate.  E zot ti ankoler avek nou.  E la ozordi nou vwar ki sa landrwa, ki pe aprezan anmenn plizyer milyon roupi profi apre plis ki 20an pert!

Si Onorab Herminie i dir i pa vwar ki 15 lo 10 in anmennen, Mr Speaker, fodre swa i pa war kler, swa i totalman sourd.  Mon ti ava prezan an konklizyon kontan dir detrwa mo lo bann propozisyon tax ki dan sa Bidze.

Premye, mon siport tou bann manm ki pe demann en pe plis linisyativ e modernite dan sistenm koleksyon tax. Minis, nou tou ki pe, ki pa aveg i vwar serten biznes pe grandi a en vites ekstraordiner.

Sa i byen.  nou felisit  sa bann biznesmenn.  Me son konsekans se ki zot bezwen pey zot tax parey fodre e sa malerezman pa pe ganny fer.  Ler nou get en kou Zone Endistriyel Providence, nou vwar bann building enorm ki pe  sorti dan later, ki pe ganny konstri.

Nou vwar bann biznes ki’n konmans avek en pti laboutik, apre en pti hardware store, apre en pli gro store, apre en wholesale license, apre en konpannyen konstriksyon.  La nou pe vwar bann building 4 letaz monte partou kote.  Felisitasyon !

Nou kontan pou tou konpannyen ki pe devlope.  Me nou oule ki SRC i reasir nou ki lo tou sa profi ki sa bann dimoun in gannyen pou zot envestir, tax i ganny peye.

Mon krwar nou en pti pei.  Sesel i ptipti, Minis e se pour sa rezon ki mon siport demann Leader Lopozisyon ki Lasanble i ganny lalis bann ki pe pey tax pou nou konnen lekel ki pa pe peye !

Aret zis tay deryer Jean Dingwall, oubyen Herman Maria, oubyen lezot Seselwa onnet.  Plito ki vin avek nouvo tax, annou rod bann ki Minis in admet pa pe peye.  Mon totalman siport vizyon LDS pou sistenm tax dan Sesel.  Nivo tax fodre desann !

Nou dan LDS nou pou fer tax desann par en senp metod.  Fer sir ki tou dimoun e tou konpannyen ki dwa i pey son bout ki i devret peye.  E ler tou dimoun i pey son bout, sa pou vedir mwens pour sa bann ki pe pey tro bokou.

Mon krwar sa i kler.  Anba en Gouvernman LDS, personn pa pou kapab kasyet son profi, personn pa pou ganny permet pou pa pey son tax.  Sa i ganny permet anba sistenm  kot nou ete konmela.

Me selman i en keksoz ki pou arete.  Zisteman, mon vin lo en size aktyalite, Mr Speaker, ki relye avek tax.  Lavant Cable and Wireless.  Minis, Lasanble Nasyonal, reprezante par LDS mazorite e Chairman FPAC pe demann ou pou silvouple reponn sa bann kestyon swivan dan ou larepons ;-

Akoz eski Liberty Global pa ankor pey son 16.5 milyon sanction fee depi ler zot in aste lakonpannyen Cable 3an pase?  Si zot pa’n peye, akoz zot in ganny permisyon anrezistre e fer tranzaksyon Sesel?

Ki advice eski Attorney Zeneral in donnen o size sa tranzaksyon?  Lekel ki propriyeter Cable & Wireless aktyelman akoz Liberty Global pa’n pey sa sanction fee ki zot dwa Gouvernman depi 3an?

Lenformasyon se ki Gouvernman in aksepte ki sa nouvo group dimoun ki pe aste Cable la, se zot ki pey sa ki Liberty Global ti sipoze.  Ki mannyer sa in ganny permet?  Aprezan, eski sa nouvo konpannyen in pey sa lot $16.5 milyon  tou ek son lentere tou?

Akoz Gouvernman ler i prêt larzan, i prêt ek lentere li.  Be ler ou dwa Gouvernman, mon krwar ou bezwen pey sa lentere.  An sa ki konsern sa nouvo group Seselwa sa consortium.

Eski zot in met larzan cash dan sa tranzaksyon oubyen eski i korek ki zot in pret 70 milyon avek TBD Bank?  Eski Gouvernman in donn son permisyon pou sa kalite pri?

Lekel ki pou responsab pou pey konpansasyon sa bann travayer ki ti ganny peye, e zot ti ganny pouse, e depi 3an zot pe esper zot benefis?

Mr Speaker, konman Chairman Komite Zafer Etranzer dan Lasanble, mon ofisyelman rikord mon lobzeksyon pou sa sonm R1.9 milyon ki’n ganny mete dan Bidze pou ouver en Lanbasad Maurice.

Dan sa monn aktyel, kot tou kapital lemonn i konekte avek kominikasyon modern, enternet, transpor aeryen, e tou lezot kominikasyon.  Mon pa vwar okenn zistifikasyon pou nou ouver en Lanbasad Maurice.

Mr Speaker, mwan – nou ava demande, e lontan nou pe demande, en lodit pou konnen ki mannyer bann Lanbasad atraver lemonn;-  bann Lanbasad Sesel pe perform, pou nou konnen si nou devret gard zot.  Oubyen improve zot, oubyen frenm zot.

E nou pa pe gannyen sa lodit.  Alors mon pa vwar ki mannyer nou kapab konsider en lot Lanbasad.  E mon ti ava dir ki sa R1.9milyon ki pe ganny mete pou, pou sa Lanbasad Maurice, i ganny servi pou reget en pe dan kondisyon e saler bann Anbasader e bann travayer.

Akoz mon konnen poudir bann travayer protokol zot pe al ganny en review of there Scheme.  Me bann Anbasader parler, mon kanmi piblikman, pou mon dir konbyen Lanbasader i gannyen, ki pe reprezant nou pei.  Parler se bann sonm larzan ki fer nou onte.

Mr Speaker mon terminen an dizan detrwa mersi pou bann dimoun avek lekel mon’n travay.  Mon remersye premyerman Land Transport Autority Agency dan Mont Fleuri pou zot korperasyon.

Mon  remersye management, Headteacher e lekol, sa 2 lekol Mont Fleuri, primer e segonder.  Ki’n fer en travay ekstraordiner sa lannen pou tir nou lekol dan en repitasyon ki pa ti tro bon.  Me pou met li dann enn bann lekol ki annan meyer disiplin dan larepiblik.

Mon salye zot pou sa gran zefor, e sa sikse ki nou’n fer ansanm.  Mon salye bann ners ek bann dokter e tou travayer Lasante dan Lopital Victoria, e dan klinik Corgate Estate.  E mon remersye zot pou zot devosyon e pou zot kouraz e zot zefor ki zot mete dan zot travay.

Mr Speaker mon pa kapab terminen, si mon pa dir en gran mersi travayer Ladministrasyon Distrik ki ganny lead par DA Jency Volcere.   Sa bann dimoun in travay, sa ezit-e lizour koman aswar pou fer avanse nou bann proze e pou anmenn zot soutyen a pep Mont Fleuri.

Mr Speaker mon krwar ki in annan bokou plis proze ki’n ganny fer e konplete dan distrik Mont Fleuri sa 3 dernyen lannen, ki sa dernyen 42an.  Alors mon remersye tou bann dimoun.  E sirtou mon lans en lapel avek Gouvernman Lokal,  pou bann travayer ki pli ba dan sa seksyon.  Bann field workers, bann field technicians, Mr Speaker, Minis.  Zis pran en not field technician.  Ale al demande ki lapey zot gannyen, nou pou kanmi, akoz i vreman, vreman fer lapenn pou sa travay ki zot fer.

Annou sey gete ki mannyer nou kapab met zot en pe pli, en pti pe pli dan konfor.  Mr Speaker, mon remersye finalman zabitan Mont Fleuri pour zot sipor e zot lwayote pandan sa bann lannen.

Zot konnen poudir nou travay i pa fasil.  Me selman zot in siport en kantite e zot in donn zot kouraz.  E zot konnen poudir ler nou ansanm, nou pli for, e ler nou pli for, nou fer keksoz arive dan nou distrik.

Alor mon dir avek zot, annou kontinyen travay.  Ler bokou bann size ki enteres zot pou ganny diskite dan seksyon, dan travay, dan Komite.  E la mon envit zot pou zot anmenn mwan zot bann lobzervasyon e zot bann pwen ki zot ti  a kontan leve.

E mon dir avek zot, mon pou travay parey mon’n travay pandan sa bann dernyen lannen.  Pou mwan fer sir ki Mont Fleuri, me sirtou pou mwan fer sir ki sa pei ki mon kontan en kantite, sa pei Sesel i retourn lo en nivo formidab e ki nou fer li vin en pei beni.

Kot tou zabitan i annan en sans pou li en zour arive attend son rev.  Mon remersye ou Mr Speaker.

 

MR SPEAKER

Mersi Onorab Ferrari.  Mon ava prezan donn laparol Onorab Sandy Arissol.

 

HON SANDY ARISSOL

Mersi Mr Speaker.  Bonn apre midi tou Manm.  Bonn apre midi tou zabitan distrik Saint Louis avek lepep Seselwa, Minis avek ou delegasyon.

Mr Speaker ser ek frer Seselwa.  Bidze pei i vreman enportan se pou sa rezon pandan sa dernyen 3an, nou koman en lopozisyon serye, onnet e byento dan Egzekitiv.

Nou’n fer li nou devwar pou fouye, demann kestyon, e rod tou lesplikasyon, klarifikasyon neseser an sa ki konsern Bidze nou pei.  In annan moman kot nou’n freeze, wi Mr Speaker, in annan moman kot nou’n freeze.  Ziska ler nou’n ganny plis lenformasyon.

In annan moman kot nou’n koupe, e nou’n azout lo bann ki nou ti santi e asire koman en Lasanble zot bezwen en pe plis pou zot kapab desarz zot responsabilite e delivre pou nou pei.

Mr Speaker pou sa 42 dernyen lannen mon lavi mon’n konn zis en sel parti politik sa se SPUP, SPPF, LEPEP ozordi zot in vin US.  Zot filozofi sete pran avek ris donn ek bann ki pli prov.  Pran later ek bann ki annan bokou e partaz avek bann ki napa ditou.

Zot ti pou fer Sesel vin en bizou dan Losean Endyen, en pti Dubai dan Lafrik, e nou pep ti pou mars latet anler.  E ti pou napa lapovrete ankor Sesel.  La bomaten nou’n ganny dir, poudir lapovrete pa lenvansyon parti US.

Selman nou ti ganny dir liberasyon ti pou tir nou dan lapovrete.  Mr Speaker, konman en premye Lafrik, zot ankor pe assess nou pei atraver kabinen trou avek stov petrol.  Ozordi 42an pli tar sa menm parti politik i ankor la Mr Speaker.

Zot in pran ek ris e zot in donn zot lekor.  Zot in vin pli ris, Mr Speaker.  Zot in pran later ek sa ki ti annan bokou zot in partaz antre zot menm, Mr Speaker.

Sa ki’n ganny 52 morso, sa ki’n ganny 33 laplenn foutbol, sa ki’n ganny plizyer lakaz, sa ki’n pran plizyer loan apre pa’n peye, nou ti sitan annan larzan, Mr Speaker.

Zot in pran, i annan menm larzan Sesel, zot in anmenn zot dalon etranze e zot in pran ankor Mr Speaker li osi.  Me li sa Seselwa menm si Bidze i ganny prezante e parti US i vot lo la, li i viv anba nivo lapovrete.  E nou zenn, son latet pa anler li Mr Speaker.

Son latet i tous ater.  Akoz i pe kick avek eroin.  The time is right, konmdir  Onorab Herminie.  Seselwa pe dormi dan semen, Seselwa pe mandyan, drog in anvai nou pti pei.

Nou pei in vin en bin salte pou komodite lemonn, etranze in pran nou pei koman en call box, kot i kapab met R1, swa R5, swa pa met nanryen e ekspekte fer en phone call.  Tou sa anba en sel parti politik ki ozordi in pri dan United Square.

Zot in apel zot lekor kakayonyont en lepok.   E zot in deside pou pa al plant pwason sa voyaz, me kont la kantite lespes reken ki nou annan dan nou lanmer.  E la zot in pran en desizyon pou export korsol ek zavoka e zot in dir, bon, akoz the time is right!

Pri in ariv ziska $9, 1kg.  E fodre pa bliye ni kandida Vis- Prezidan zot napa.  Selman zot pe fer kanpanny pou Mr Faure.   Me zot lizye i frenmen ler zot dir sa.  Zot lavwa i tranble.  E pa bokou zot ki bat lanmen.

E Onorab Gill in avoue bomaten Mr Speaker, vin o pouvwar, pa vin o pouvwar zot, li i pou kontinyen lalit.   E mon’n fini war Onorab Gill pe pran son plas koman Leader Lopozisyon an 2020!  Me si ou dir Mr Speaker, ou koz lo sa bann zafer zot ronfle, zot ankoler, zot dir ou vye retorik, ou pa kontan sa Gouvernman, zanmen nou satisfe, zis nou kritike.

Nou’n ganny dir bef pe manz zerb, alor zot pou manz zot bef zot menm.   Avyon pa pou take-off, nou devret fer parey 5enm Lasanble.  Vot Bidze dan en demi zournen, al Maurice al tir petar akoz Sesel sa Gouvernman Koudeta li i per tapaz petar li.

6enm Lasanble anba gidans nou Speaker Sir Onorab Prea ki toleran, pasyante, nou’n fer nou par Mr Speaker.  Seselwa atraver pei, aletranze zot in swiv.

Zot in anvoy kestyon, klarifikasyon, zot in partisip dan diskisyon ek desizyon nou Bidze e plizyer lezot size dan sa Lasanble Nasyonal letan nou ti a pe travay.  Ki nou’n fer isi kot nou Lasanble Nasyonal.  Fer li nou Lasanble nou ti dir.  Savedir ou Lasanble Nasyonal!

Se sa rol Lasanble rod tou klarifikasyon neseser pa zis vote.  Donnen e apre napa swivi.  Sa i ekstrememan enportan akoz sa i larzan lepep Seselwa ki nou pe vote.  Pou en pei progrese ki Bidze i ganny vote fodre ki Gouvernman i kapab, kosto, konpetan.

‘’En vre Leader pa zanmen abandonn son pep e son responsabilite’’ Mr Michel i dir nou.  Espesyalman letan pwalon pe pran dife, Mr Speaker.  Me parti US son filozofi se dir pou fer apre napa aksyon, Mr Speaker.

Akoz mon dir sa?  Bidze 2018 son tenm sete ‘’Travay Pou Prosperite Tou Dimoun.’’  Sa Bidze ti fer provizyon en komitman ki Gouvernman in fer se pou konstri 24 lakaz dan 24 mwan dan 24 distrik.

St Louis, nou zabitan in ganny anbete parey zabitan Mont Buxton.  Akoz nou proze pa’n zanmen materyalize.  Proze Oliver ti’n deza demare, Gouvernman pa serye, Mr Speaker.  Zis parey pou proze Dominic Savio dan distrik vwazen, Mont Buxton, parey mon’n mansyonnen.

Zot dwa nou, nou proze 24 lo 24 dan 24!  Konstriksyon younit izolasyon ti ganny en alokasyon dan Bidze 2018, 3.5 milyon.  Oli sa Sant Izolasyon?  Kote i ete, mon pa ankor vwar li?

Travay renovasyon lo Sant Lasante Baie Lazare ki’n ganny, ti ganny en alokasyon sa letan 5milyon.  Konstriksyon nouvo Lopital Logan La Digue ti ganny en alokasyon 5 milyon dan Bidze 2018 Mr Speaker.

Konstriksyon lekol La Rosiere primer ti ganny en alokasyon R36milyon li dan alokasyon 2018.  Konstriksyon en stasyon dife Anse Royale pou Lazans Fire and Rescue Services ti ganny en alokasyon 13.6milyon.

Oli sa bann proze ki nou ti ganny promet isi dan sa menm Lasanble e bann manm US i koz gro labous.  Bidze i bon! Nou Prezidan pe travay!  Zis promes Mr Speaker zot pa delivre.  Ki mannyer ou espekte Seselwa i fer zot konfyans ankor 5an?  Bidze 2019 li son tenm sete ‘’Stabilite e Progresyon.’’

Annou gete kwa ki nou ti ganny promet ek sa menm Gouvernman isi dan sa menm Lasanble, dan sa menm Lasanble ki dimoun nepli krwar lada – Mr Speaker, sa Gouvernman.   Akoz zot en bann promoter ti donner, zot promet zot pa delivre, zot dir e zot pa fer sa ki zot devret dir fer.

Dan Bidze 2019 ti fer provizyon ankor pou rekonstriksyon lekol La Rosiere primer, sa voyaz avek R15 milyon, Mr Speaker.  Mon krwar lekol La Rosiere, mon pa konnen konbyen letaz in gannyen.  Konstriksyon Logan Hospital, li i ganny ankor en sonm 5.6milyon.

Mon krwar lopital in fer, li osi in ganny en letaz, Mr Speaker.  Konstriksyon Sant Lasante Baie Lazare 5milyon ankor.  Mon krwar zot in fer en sant Dame Le Roi, e la zot in fer enn Anse Gaulette.

Konstriksyon outpatient unit Anse Royale 2milyon, mon pa konnen si deryer Administrasyon Distrik, oubyen deryer Politeknik.   Konstriksyon Sant Izolasyon sa voyaz i ganny 7milyon, mon pa konnen si Ile Aurore.

Konstriksyon laboratwar pou Public Health –  mon pa konnen si dan bazar Sir Selwyn Clark.  Mr Speaker tou sa proze promet an 2018/ 2019.  Larzan in ganny allocate dapre lenformasyon ki nou ti gannyen sorti kot Finans atraver zot bann dokiman.

Me nanryen pa’n arive.  Oli sa bann larzan?   Kote in ale?  Gouvernman pa serye Mr Speaker.  Nepli kapab fer zot konfyans.  Zot in vin fer gran promes pou donn lenpresyon ki ladministrasyon Mr Faure pe delivre.  Zot pa pe delivre Mr Speaker!

Bidze 2020 parey nou’n tann dir plizyer keksoz in ganny anonse.  Parey plizyer lezot koleg in dir, i en Bidze eleksyon, donn en logmantasyon par isi, donn enn par laba.

Promet madanm anvwad fanmir allowance;- konze in vin 24 zour, plis larzan pou servis welfare.  Me Seselwa in fini konpran tousala.  Tenm pou sa Bidze li se ‘’Rezilta-Ekitab Bidze Partaze.’’

Mr Speaker Bidze ekitab partaze, letan Minis i vini e dir ek Lasanble ki bann marsan mazorite bann marsan, se bann mazorite bann endyen.  E ler nou, nou ti zanfan Mr Speaker, mon rapel tre byen, bann Endyen nou ti apel zot bann Malbar.

Napa lofans ladan sa Mr Speaker.  Dan Sesel en letan nou ti tann Kreol leo, kreol dezil, bann Kenya born, ti annan bann letan nou ti zanfan, nou ti menm apel zot bann Swahili.

Ti annan menm bann Sinwan, ti annan menm Laskar dan nou pei e nou ti apel zot koman zanfan e plizyer lezot ankor.  Sa ti senpleman en fason koze dan nou pti pei melanze ek kiltir tradisyon e relizyon sa letan.

Minis in dir ki bann biznes retail ek biznes wholesale pa pe pey zot tax.  Eski alor Minis in dir, sa ki Minis in dir sa, i vedir ki Minis i zenofobi Mr Speaker?  I pa kontan etranze alor ler Minis pe blanm zot?

Non, Minis pe senpleman dir sa ki ti devret ganny dir en bon pe lannen pase.  Omwen li in annan kouraz pou li dir ek sa Lasanble.  Kote i antre ekitab ek partaze, tou sa bann marsan pe fer milyon e zis zot menm, Mr Speaker.

Kot nou pase dan distrik, zot ti konmans ek en laport dibwa ek krose e ozordi mazorite zot, zot in ganny building marble partou.  Alor zot pa pe fer profi?  Sa pa akseptab e tousala Mr Speaker pe ganny soutire par Gouvernman US!

Zot pa pe zot pey tax Selman marsandiz pri i reste egzorbitan dan nou pei.  Sa i vedir nou zenofobi Mr Speaker?  Zot ti dir nou ti ekrir sa bann menm dimoun let Mr Speaker.  Be i enportan pou nou rapel lekel ki ti siny papye oubyen ekrir let lezot etranze e vann nou paspor avek zot?

Pran zot larzan ek sa bann etranze epi export zot parey kargo dan milye lannwit.  Eski ti zenofobi sa Mr Speaker?  Sanmenm sa nou pa enterese konnen kot nou desandans i sorti.  Akoz nou’n fer parey avek zot.

Desandans ti vin Sesel dan bwat dibwa alor nou tret nou bann etranze osi e fer zot ale dan bwat dibwa parey?  Oli konpasyon Mr Speaker?  Lanmour ki mon’n tann zot lot kote koz lo la?  Zot fer riye bann Manm Onorab.

Alor en lapel pou Gouvernman US, Mr Speaker, en lapel pou Gouvernman US.  Si retail avek wholesale pa pe fer profi, silvouple aret donn zot nouvo license, sa bann dimoun.  Akoz napa profi dan sa biznes e i pa profitab.  Aret donn zot nouvo license.  Parske laboutik i lo laboutik dan distrik.  E zot pa pe fer profi!

Letan US zot pe trangle nou peser ek nou fermye pou pey tax, sa ki fer milyon zot les pase e zot, zot pe transfer tou zot larzan atraver money changer dan zot pei soutire par Gouvernman US, Mr Speaker!

Larzan pou nou donn travayer logmantasyon Sesel, i annan, kantite i annan Mr Speaker.   Gouvernman pa konn kolekte e pa konn redistribye.  E zot anvi ankor 5an?  Non Seselwa pa pou donn zot ankor 5an Mr Speaker.

Konbyen pei, konbyen nou pei in perdi anba zot ladministrasyon pandan sa 42an?  $50milyon Mr Speaker in perdi.  Letan Minis i dir ki bann lotel pa pey zot biznes tax sa i ekitab e en Bidze, partaze? Mazorite zot ganny konsesyon pou konstriksyon zot lotel.

Zot ganny COE pou fer vin sa ki zot anvi pou travay dan nou pei Mr Speaker.  Seselwa pa progrese li.  Zot kay dan zot pozisyon dan bann lotel. Selman Seselwa ki montre etranze travay dan lotel.

Lotel li i kontinyen agrandi, selman zot pa fer profi.  Zot ase pran Seselwa pou bann mifoun, we!   Sa pa akseptab Mr Speaker e tousala soutire par Gouvernman US.  Ki mannyer nou kapab donn zot ankor 5an letan zot pa responsab pou kolekte nou larzan e larzan lepep Seselwa?

Apre ou ganny en Manm ki vini ki dir ek ou, ki son granmoun ti dir ek li pa anmas larzan pou letan dir, annou anmas li pou letan difisil.  Akoz letan difisil i vin letan dir.  Letan dir i vin letan yer, letan yer i vin konze.  E konze, mon pa konnen ki vini.  Sa kalite filozofi, mon zanmen mon’n deza tande dan mon lavi.  Si nou swiv sa kalite filozofi sel solisyon se met pwazon dan nou delo e swiside.   Me nou dan LDS nou pa pare pou mor koumsa Mr Speaker.

Me de lot kote ou vwar sa menm Gouvernman ki napa kouraz pou al anmas nou larzan tax i vini e i harass nou zenn li.  Letan en zenn i fer vini en pti keksoz atraver lapos Gouvernman i lager ek zot, i lager ek sa zenn.  Sa i mal!  Si i annan ki pe fer biznes e bann dil sal, dil ek sa enn.  Me pa pini tou zenn nou zenn Mr Speaker.

Letan en zenn Seselwa parey Ramona ki annan en morso later o bor kot son paran i sey apros Lotorite Distrik swa Minister konsernen pou li kapab fer en prosedir pou aste sa pti morso pou li tir presyon kot son paran, e konstri en pti lakaz pou reste, pou li abrit son zanfan, Mr Speaker tou sort kalite lanpayaz.

Me bann gro zofisye State House zis en let i ganny ekrir, e pou li tou i vin ekitab e i vedir partaze pou li.  Me Ramona li i reste anpaye dan lakour kot son paran.

Parey Angel Mr Speaker, ki son mari in kondannen pou son fot ki in fer,   me ennler ou a krwar Angel osi in ganny kondannen ansanm ek son mari.  Me solman li an deor prizon.  Parske letan i al tap tou laport, pou li ganny en led e en lasistans, pou li, tou laport i frenmen Mr Speaker.

Letan sa zenn i leve i debourye, parey Christa Bastienne i sey rod en pti tender pou debourye li i ganny dir i pa kalifye, akoz bann gro biznes in ganny kase an pti morso pou zot pa pey tax dan nou pei.

E zot menm ki ganny tou kontra pou travay e li sa zenn li i kontinyen ganny kit ater.  Tousala Mr Speaker soutire par Gouvernman US.  Oubyen zot proze i ganny soumet e zot ganny dir, zot proze pa’n kalifye.

Apre sa menm proze ki pa’n ganny kalifye, nou vwar li pe ganny enplimante par en lot gro pwason, oubyen zanmi dan sa Gouvernman, Mr Speaker.  E nou zenn i kontinyen ganny kit ater.

Letan Graham ki annan son pti biznes i ganny en vizit par tou Lotorite, enkli Prezidan Larepiblik.   E i ganny promet en led Mr Speaker,  pou li kapab tir son garaz dan en landrwa rezidansyel e agrandi son biznes pou li sonny son fanmir dan en zone e met son biznes dan en zone endistriyel li i espere anven.

Me i annan ki pe konble pou kontinyen agrandi son biznes avek led Lotorite, Mr Speaker.  Eski sa Bidze i ekitab e i partaze?  Pou tou dimoun dan tou distrik Mr Speaker?

Eski sa i zis ekitab e en Bidze partaze ankor mon demande?    Letan sa zenn fiy Angelique ki’n perdi son manman, akoz son manman in mor Mr Speaker,  i vwar li, li tousel avek pti ser, pti frer, lakaz pou peye, delo, elektrisite, e lezot depans, i apros welfare, Mr Speaker.

I demann en lasistans, ou konnen konbyen zot donn li?  Zis R500.  Me dan mon distrik mon vwar gro fanm, gro zonm ki pa travay, zot gannyen ziska R5 mil welfare, Mr Speaker.

I annan pe ganny 2500 tou le mwan dan mon distrik e li i monte desann li, i voyaze 3, 4 fwa par an.  E li i pa travay li.  Akoz i pa kapab travay.  Eski sa ki Bidze i ekitab e partaze, mon redemann ankor?   Mr Speaker tousala soutire par Gouvernman US!

Zot napa kouraz pou adres bann defi pou pran desizyon e pou kit nou lo bon semen.  Parey Onorab Georgse in dir en Bidze fatige parey sa Gouvernman fatige.    Menm zot konpanny vot pou Mr Faure, ou a krwar i get fatige letan zot dir, Mr Speaker.

Mr Speaker mon kontan letan bann manm US zot dir Bidze i annan plizyer defayans.  Proze pa materyalize;- fodre met plis presyon, dimoun i bezwen annan letan espere pou vwar spesyalis;- bann dimoun ki’n esper bokou letan lo ban.  Mon’n tande zabitan i ankor pe bwar delo asbestos.  42an pli tar zabitan pe reste dan lakaz en laport parey Pointe Larue, kot zot fer bann dimoun sorti lo zil Mr Speaker, ganny en lakaz avek en laport.

Senpleman zot in tret zot dimoun parey en kakatwa dan kazye.  Sa i mal Mr Speaker, soutire par Gouvernman parti US.

Mon’n tande MNA i bezwen aste liv avek latizann, menm si in vot lo Bidze.  Lalis i long Mr Speaker, zot in aksepte pou dir wi tou sa ki nou dan LDS nou’n dir dan lepase i vre, e zot in repete plizyer fwa.  Keksoz ki bon ladan se ki zot ti dir, Mr Speaker ki zot in bliye.  Letan LDS, si LDS i ganny en mazorite;

Nou pou blok Bidze!

Travayer pa pou ganny peye!

Pei pa pou progrese!

Nou pou dan en kriz, Mr Speaker.

Me ozordi anba sa Lasanble ki zot pa ti oule sa swadizan dance hall, selman zot ki dans plis ki nou.  Gete ki nou’n fer koman en Lasanble serye, Bidze in ariv Bilyon Mr Speaker!

Ekout en kou nou Lasanble ki in fer anba sa 15 lo 10 ki mon’n tann Onorab Wilbert Herminie kestyonnen zot de Onorab
Ernesta Mr Speaker.   Lasanble in negosye saler minimonm pou ki bann travayer ki ganny pli ba pa pey tax lo zot saler.

Nou’n pas Prozedlwa pou 13enm mwan saler.  Nou’n demann kestyon lo klarifikasyon lo long service award.  Ozordi bann Lazans in rekonnet lenportans donn zot travayer sa benefis.

Napa tax lo bann benefis ki travayer i gannyen konpansasyon, servis Gratwite, service charge eksetera lalis i long Mr Speaker.  Eski sa pa vedir plis larzan pou sa manman?  Eski sa pa vedir plis larzan pou sa papa ki pe travay?  Eski sa Lasanble pa’n travay Mr Speaker, anba ou gidans?

Me annou fer en pti tour d’orizon.  Annou get en kou progre anba Lasanble 26-0 dirize par SPPF. 5an pase.  $50milyon perdi Mr Speaker.  218 milyon vole par Irlande Mr Speaker.

Milyon sorti State House pou plezir personnel Mr Speaker.  Selman 40% lapovrete Sesel.

Proze sorti 5milyon in vin 40milyon Mr Speaker.  Stad lanmizik lanmenm la lot kote o bor nou.

Donn bal dan nou SBFA loan, pran loan pa peye Mr Speaker.

8milyon an term tax dwa lo Shell Beau Vallon Mr Speaker.   Lasanble ti annan bann Kontra drol ki ti pase isi kot nou Lasanble Mr Speaker.

Linyon Estate ti pres pou faid.

Zarden Botanik pres pou faid.  Apre ti fini avek en dife.  Tousala Mr Speaker, anba 5enm Lasanble, 26-0, dirize par US ozordi.

 

(APPLAUSE)

 

HON SANDY ARISSOL

Sa swadizan Lasanble ki ti pou bloke, in delivre Mr Speaker.

Letan zot ti pe bizi danse nou nou’n gid Egzekitiv dan bon semen par netway zot Lalwa, anba gidans Onorab Georges e lezot ankor.  Alor sel laplas bann danser USLDS ki kapab devret diriz sa pei.

Stad Lanmizik pre pou fini, nou ava donn zot sa Kontra, pa trakase.   Mr Speaker mon anvi dir granmersi Onorab Ramkalawan, ki ti anmenn FPAC lo La Digue.   Granmersi Onorab Ramkalawan ki ti anmenn en Mosyon pou La Digue, pou ki ozordi son MNA i ganny kouraz pou li koz gro labous e in konn pri disab, pou mont sorti lo bato pou al La Digue!  Granmersi Onorab Ramkalawan Mr Speaker.

Pa bliye Mr Speaker letan zot in donn en pti logmantasyon dimoun aze, sete LDS ankor atraver Onorab Ramkalawan ki ti demande sanses ki nou bann aze i ganny en logmantasyon sorti R3100 pou R5mil sa letan.

Zot, zot ti dan Lasanble, zot ti ronfle! Zot ti konplent!  Akoz ti annan en group cowboy lo en pikep blan ki pe shoot bann blanks dan Lari Bazar.  Sete Onorab Ramkalawan Mr Speaker.  E ozordi bann Trwazyenm-Az zot fyer pou zot R5050.

E pli gro logmantasyon ki LDS in donn bann Trwazyenm-Az se anviron R2mil, sorti 3100, pou ariv R5 mil ekek kot i ete ozordi.  Felisitasyon Onorab Ramkalawan avek LDS Mr Speaker!

 

(APPLAUSE)

 

HON SANDY ARISSOL

Akoz nou ti donn sa logmantasyon, nou ti demann sa logmantasyon, nou ti konnen ki plizyer dimoun aze ki responsab zot pti zanfan ozordi.  Akoz swa zot paran i dan drog swa zot paran pa travay.  Alor mon dir en felisitasyon nou bann dimoun aze.

Nou kontan e nou mazin zot.  La avek sa pti logmantasyon lannen prosen,  nou swete dousman, dousman zot ava kapab fer sa ki zot annan pou zot fer.   Mr Speaker mon pa’n tann Minis koz lo sityasyon drog dan nou pei.

Selman mon’n tann bann manm pe defann APDAR e demann osi si nou pe target serten endividi kot sa Lazans.  E apre nou lapros in sanze anver bann travayer.  Mr Speaker mwan mon anvi fran e onnet ozordi;-

Mr Speaker, parey Onorab Loizeau in dir taler, ti napa APDAR.  APDAR ti ganny konsevwar ler nou ti ganny 15 lo 10.  APDAR ti ganny kree akoz US ti’n ganny defet dan dernyen eleksyon Lasanble Nasyonal. Alor Dr Patrick Herminie ti ganny propoze avan, koman Minis isi dan nou Lasanble Nasyonal.  Lasanble pa ti aprouve.   Alor sa pozisyon Sekreter D’Eta ti ganny kree avek bi pou anmas ansyen Speaker Lasanble Nasyonal, ki Dr Patrick Herminie avek bann lezot Manm parti US ki ti’n ganny defet dan dernyen eleksyon.

E se sa ozordi ki pe kout nou pei R73milyon.  Me avan APDAR, zot pa ti mazin bann adikt? Souden apre defet dan eleksyon zot in konnen i annan adikt dan nou pei?

Dapre zot travay avek bann adikt sa i ava fer ki sa diferans vot dan prosen eleksyon, i ava annan en diferans.  Zot kontan reve dan gran lizour, nou vwar zot parfwa.   Kontinyen reve zot.

Pa servi nou bann zenn pou zot ganny senpati, pou protez detrwa dalon.   Parey pe get zot, zenn in vwar zot.  Nou latitid in sanze anver bann travayer Mr Speaker?  Larepons i wi, akoz i senp.  Ler nou zwenn zot pe la lo gento pou edik bann adikt, se sa bann travayer ki an kontak direk avek group zenn, Mr Speaker.   Me se Dr Herminie ki mars avek en bodyguard arme.  Me pa sa travayer ki al lo gento.

Alor si bann travayer pe fer en bon travay, i nou responsabilite pou dir.  Alor la mon’n dir, oli problenm mon’n dir?  E mon’n dir ankor la Mr Speaker!

 

(APPLAUSE)

 

HON SANDY ARISSOL

Tir portre, pa lipokrizi sa Mr Speaker, pou Onorab Herminie ki pa la.

In dir nou letan nou tir portre se ipokrizi.  Lipokrizi se letan zot Manm i dir siport APDAR dan Lasanble Nasyonal, me dan miting, dan zot distrik, zot fer taye bann manm APDAR e dan semen zot dir zot pou fer lamars kont APDAR!   Sa ki apel lipokrizi Mr Speaker.  Pa bliye lo Board APDAR i annan Manm, i annan plizyer dimoun ki kont proze APDAR akoz li i krwar dan en lot fason fer, e annan NGO ki pratik en lot fason fer.

Me selman zot, zot lo Board APDAR.  Zisteman i annan paran ki kontan travay ki APDAR, nou bezwen aksepte sa.   I annan paran ki kontan travay ki APDAR pe fer Mr Speaker, avek son zanfan.  Me par kont i osi annan paran ki pa krwar dan APDAR.

E zot dir poudir APDAR i en failure, zis parey Onorab Roucou ti rapel nou pwennvi bann paran letan i ti koze.  Sa i senp Mr Speaker.  Akoz son zanfan in antre, in swiv en tretman e apre son zanfan in retourn dan sibstans.

Alor pou sa paran, sa pou li pa efektiv.  Wi Mr Speaker, se Dr Herminie ki ansarz Lazans, annou pa bliye ki letan nou ti pran responsabilite Lasanble Nasyonal, nou ti bezwen kriy li pou rod serten klarifikasyon atraver FPAC.

La si ozordi nou pe demann kestyon se parske Bidze in mont 73milyon, plis ki Bidze Lasanble Nasyonal Mr Speaker.  I nou rol pou kestyonnen parey nou kestyonn lezot Lazans.   Drog in vin en fleo dan nou pti, bann manm US in dir Mr Speaker se nou ki’n ferm NDEA.

E zot in menm dir ki ANB ti kasyet tou drog pou en pe letan e fer droger lafen, apre remet drog lo marse.   I ti ava bon, parey Onorab Pillay toultan i dir ek nou si zot kapab substantiate zot largiman akoz the time is right, konmsi Onorab Herminie.

Dir nou lekel sa zofisye ki ti kasyet drog?  Dir nou kote in kasyet sa drog e kan ki ti release e remet lo market?  Vin fran onnet, aret kasyet deryer Lasanble Nasyonal pou zot fer bann fo statement isi anndan.  Gouvernman pa met lanfaz, pa’n met lanfaz lo anpes drog antre dan pei.

Mr Michel ti dir ki i konn tou eskobar.  Oli bann eskobar ozordi Mr Speaker?  Konbyen ki’n ganny anmase.  Zot napa kouraz akoz zot konnen ki si zot pas lasenn se zot dalon ki pou pri dan lasenn.  Alor nou zenn li i vin viktim.

Alor Gouvernman, si ti serye, pa ti devret negosye avek bann pei zanmi pou ki tou bann bagaz ki pe vin Sesel i ganny en spot check par zofisye avek bann lisyen, ki sniff bann sak depi Erport avan cargo i antre lo avyon ek bann pei zanmi.  Omwen sa ti ava en keksoz ki nou’n, zot in komanse koman Gouvernman.   Zot napa volonte ed sa pep Mr Speaker.  Akoz Gouvernman pa envestir dan en scanner pou scan bann container ki rantre dan pei.

Proper detection kit lo Erport pou nou bann custom officer pli byen kapab detekte drog.  Napa volonte Mr Speaker.  Zot pa enterese, zot les nou zenn noye dan drog e zot pe rod ankor en vot 5an pou Mr Faure.

Mr Speaker letan mon lo size drog, mon oule lans en lapel ek Lazans ki konbat drog, pou zot servi menm lenerzi letan zot atrap en garson ek de pye kanabis, fer li pas Ankour, pey bail, fouy lo son kont.

Servi sa menm lenerzi ler zot atrap en lot ek detrwa pilil ecstasy, me ler zot al fouy kot li 300 pilil an plis i ganny trouve, dekouver kot li.  E li i ganny large akoz napa ase levidans.

Bann paran in call Mr Speaker, e zot in ekrir mwan plizyer let akoz zot pe anvoy en leokri pou Belonie.  Mr Speaker spesifikman Spectra Design.

En bann nanryen fer sorti partou kote zot vin asize devan laboutik, drog kasyet dan tou trou, deryer dustbin, dan rigol e nou zanfan ki servi sa magazen konman premye pwen kontak an sortan lekol pou ganny en ayskek ouswa en limonnad.

Alor dimoun Belonie pe demann en led silvouple pou netway en kou sa border.  Bann pti biznes zot kliyan i vin la, zot pa santi zot konfortab.  Bann Paran i per pou zot zanfan Mr Speaker.

Bann paran in osi dir mwan ki i annan en nonmen ‘’Gato’’ dan Belonie ki vann drog ek zot zanfan.  I asiz lo peron piblik e zot bezwen demann pardon pou zot pase Mr Speaker.  Mon’n tyeke dan rezis voter Saint Louis Mr Speaker.

Mon pa’n vwar en nonmen ‘’Gato.’’  Mon pa konnen si gato koko, si gato bannann, swa gato piman.  Selman napa lo rezis voter Mr Speaker sa non ki zot in donn mwan.  Alor mon pe kit sa avek NDEA, pou zot fer en travay.

Mr Speaker letan pou konklir mon ti a kontan dir, parey Onorab Ramkalawan in dir.  Nou erport i bezwen reste pou Seselwa.  Mr Speaker, nou Sesel i bezwen reste pou Seselwa.

Nou idantite i bezwen reste pou Seselwa.  Sanmenm sa ki nou pa pou kapab fer konfyans ankor parti US.  Parske zot pa tro konnen egzakteman ki zot anvi.  Mr Speaker mon ti a kontan profite remersye Minis Finans ki la ozordi.  Se ou ki’n bezwen vin tenny dife Minis.

Me ou lekip i ankor zenn, bann profesyonnel Seselwa.  E nou dir zot mersi pou zot korperasyon pandan lannen ek zot gidans ki zot in donn noun letan nou’n bezwen.  Mersi bokou ankor.

Mon ti a kontan dir mersi Mr Speaker, zabitan distrik Saint Louis ek lepep Seselwa pou zot sipor pandan lannen.  Nou swete ki sa travay ki nou pou fer dan Committee Stage ava aport fri pou Seselwa ek nou pei Sesel.

Tanka nou dan LDS ki annan en lekip solid, nou Prezidan ek nou Vis-Prezidan ki nou’n prezant avek lepep Seselwa nou’n pare pou servi nou pei ek nou zabitan san faver e san lafreyer.

Pa al fer sa fot pou vot pou bann korsol ek zavoka me pou en lekip serye e dinamik.  Alor nou dir LDS Sesel Mr Speaker.

 

(APPLAUSE)

 

 

MR SPEAKER

Mersi Onorab sandy Arissol.  Bon an vi ki personn pa’n koz lo Bel Ombre mon pou profite pou dir 2 pti mo.  E mon pou osi petet tous enn oubyen pti size Nasyonal, me en pe an bref.

Alor please bear with me.  Mon kapab dir ki pandan 2019 Bel Ombre nou’n war serten amelyorasyon dan travay par serten Lotorite dan distrik, tandis ki dan bokou ka nanryen pa’n sanze.  Mon pou koz lo sa 2 pti keksoz pozitiv avan.

La mon ti a kontan remersi Lazans Transpor lo Later, son CEO ek tou son bann zofisye e sa bann kontrakter pou en travay remarkab kot zot in kontinyen amelyor kondisyon bann semen segonder dan distrik, met crash barriers e osi rann nou semen pli safe par met laglas;-  enstal raised crossings e la zot pe fer sa family footpath, oubyen pavement dan plato Beau Belle ziska kot lekol primer.

Mon ankor mazin premye fwa mon ti lev sa size an 2003 dan 3enm Lasanble e Mr Belmont ti Minis ki ti ansarz Transpor lo Later sa letan.  Mon swete malgre retar ek sa proze, nou a war li konplete omwen ziska Beau Belle par lafen Novanm.

Me ankor enn fwa sa lannen mon felisit sa Departman pou zot response e efikasite.  Mon osi apresye sa relasyon ki mon’n partaze ek MHILT sa lannen.

Minis li menm ek son bann zofisye in respond tre vit dan tou ka ki mon’n aport devan son Minister, malgre pa tou ki nou’n ganny solisyon.   Mon kapab partaz avek zot en keksoz ki Bel Ombre i gannyen.  Bel Ombre dan son lalis proze, in ganny en pti proze.  Pa mal, pa mal omwen.  En pti proze.  Me mon pou al en pti pe lo bann sityasyon negativ, bann keksoz ki pa’n arive dan distrik.  Malgre in annan en Komite ki pe rankontre me keksoz pa’n bouze, oubyen si i pe bouze, i pe bouz lantman.

E sa in fer ki i annan plizyer dezapwentman lo sa ki konsern devlopman nou por dan distrik.  Sa premye batiman ki ti pou ganny konstrir lo ansyen sit Corsair pa’n arive.  E plizyer lezot travay osi pa’n ganny fer.

Depi gro divan plis ki 3 mwan pase kot langar ti andomaze reparasyon pa ankor fer e sa i reste koman en sikatris dan lizye piblik.  Mon demande par ler kote ki’n bloke?  Mon konnen sa bann proze pa tonm direkteman dan Bidze.

Me omwen mon bezwen fer serten mansyon.  Sheila ek Paul ki ros ti kraz zot lakaz Septanm lannen pase, i ankor pe reste dan en guest house e ros i ankor dan milye zot lakaz.  Mon dir zot pran ankor en pe pasyans.

Mrs Agathine ki miray ti grennen ek gro lapli Zanvye sa lannen e ki vizit apre vizit nanryen pa ankor ganny fer.  Mon konpran son lenkyetid la ki nou’n antre ankor dan sezon lapli.  Mon pou bezwen rode kote ki keksoz in bloke?

Semen Nicette oubyen parey nou kontan apel li ‘’Semen Dan Dipwav’’, ki ti dan Bidze 2019, nanryen pa ankor ganny fer.  Nou’n vizite e nou’n war en solisyon pou fer sa semen vin pli safe.  Mon swete ki tre prosennman sa travay a ganny fer.

Angele, sa fiy andikape Le Niole son fanmir i ankor pe esper 2, 3 mars peron ek en railing plis ki 2an.  En pti proze, mon pou rode ankor kote in bloke.  Swivan vizit Prezidan 2an pase Minta ki sa lannen i fer 24an dan emergency housing. 

Ou’n azout ankor 2an.  Prezidan ti dir ki sa pa akseptab.  Alor kote in bloke?  Paul ek Jane in osi azout 2an pou fer 14an dan bedsitter emergency.  Zot fiy in ganny 14an e zot annan en 2enm zanfan.

Nanryen pa ankor ganny fer e zot ankor dan en bedsitter 4 dimoun.  Proze land bank, Le Niole ki ti ganny promet 3an pase, zabitan i ankor pe espere, semen in fini.  Kan eski later pou ganny allocate?  Steven sa atlet ki’n anmenn loner pou Sesel e fer monte nou paviyon a plizyer repriz.

I ankor pe share en lasanm kot son manman ek son madam ek son pti fiy.  En Anbasader pou nou pei, me Steven pa dekouraze.  Sa zabitan Bel Ombre ki’n fer aplikasyon pou enn pti devlopman touristik lo son later e pa ganny okenn vizit ek Lotorite me ganny en let ki dir ki son proze pa’n aprouve akoz density.

Pa trakase mon’n lager e vizit pou ganny fer demen.  Sa Vandredi vizit pou ganny fer e Nicholas Prea koman MNA Bel Ombre pou prezan.  La mon anvi mansyonn sa msye Cascade ki li osi ki baliz ek lakot i war tou dimoun depi La Retraite ziska Talbot pe konble dan lanmer me li son aplikasyon i ganny refiz-e san menm en vizit.

Pasyante, sa 2 dernyen legzanp i demontre klerman ki i ankor annan de pwa de mezir dan nou pei.  Ler nou pe dir ki pozisyon Sesel pe kontinyen tonbe lo lendeks enternasyonal lo ease of doing business,  ki pe arive lo lendeks lokal?

Kot sa Seselwa ki anvi fer biznes dan son prop pei, pour ki larzan i rantre e reste dan son pei.  Akoz ki nou fer zot lavi martir zis pou zot degoute?  Sesel i son pei e Sesel i sa pei ki devret donn li sa sans, sa loportinite pou li epanouir.  Mon demande annou ankouraz Seselwa envestir dan son pei.

Lanbilans.  Silvouple Minis fer nou Sant Lasante Beau Vallon ki dan distrik Bel Ombre ganny en lanbilans.

Nou ti’n ganny enn e la aprezan in ganny repran.  Sa ti en demann ki nou de Onorab John Hoareau ansanm ek Ms Estico nou ti’n met devan Prezidan le 01 Desanm 2016.

Proze 24/24/24 Bel Ombre i reste parey Les Mamelles.  Onorab Georges nou dan menm league, nou pe zwe foutbol dan menm leagueSewage, R8milyon depi 2018 pou konekte bann zabitan upper Beau Belle.

La nou pe al 2020, zabitan Kashoggi Estate i get sewage par anba zot, me zot pa ganny konekte.   La mon war en Bidze pou konekte sa bann fanmir dan zalantour Fisherman’s Cove.

Me la ki H Hotel in aste propriyete Fisherman’s Cove, mon swete ki PUC a negosye pou met sa lifting station la lo sa later ki annan pli gran siperfisi.  En loportinite ki PUC ti manke an 2006/ 2007.

Proze pou ed bann fanmir ki pli vilnerab anba ASP pa’n materyalize.  E la mon mazin pov Bernadette dan zil Bel Ombre.  I for pou mwan dir ou ankor Bernadette pasyante kekfwa lannen prosenn.

Mon dernyen pwen i anmenn mwan lo sityasyon emergency ki devret priyorite nou Gouvernman pou nor Mahe.  Dan 4enm Lasanble mon ti demande ki nor Mahe i ganny en stasyon emergency ki a konpri Fire Service osi.

3an pase ankor nou de Onorab John Hoareau nou ti fer sa demann.  Reaksyon Gouvernman ti met en veikil tenny dife o bor biro Administrasyon Distrik Beau Vallon depi 6er bomaten ziska 6er diswar.

Me sa lannen sa in ganny retire konpletman.  Dife yer swar Beau Belle in demontre ankor enn fwa ki nou bezwen en stasyon dan nor.  E ankor enn fwa in osi montre serten defayans dan nou sistenm pou annan en emergency service ki efikas.

Zis mazinen depi Glacis, Beau Vallon ek Bel Ombre konbyen lotel, guest house, restoran e rezidans prive i annan.  Mon remersi bann zabitan Beau belle, bann vwazen, yer swar ki’n reakte vit pou aport lasistans sa 2 fanmir ki’n ganny afekte par sa dife.

Zot aksyon in osi ede pou anpes keksoz agrave avan larive servis tenny dife.  Mersi bann zofisye lapolis ki’n fer en bon travay pou kontenir sa scene e yer swar malgre movetan pou reste la pou vey sa 2 lakaz.

En pli gran mersi pou bann zofisye Servis Tenny Dife e ankor Mr Madeleine ek ou lekip malgre tou bann defayans – chapeau!  Zot in kapab reazir vitman pou konteni sa dife.

Zot devouman e profesyonnalizm in ankor montre lanmour ki zot annan pou zot travay, pou zot sov lavi ek propriyete.  La mon anvi dir Minis pou pas sa ek nou Gouvernman.  CFO pa ankor ganny son bann dues parey i ti ganny dir isi dan sa Lasanble.

Silvouple get dan son welfare e osi dan welfare tou bann travayer sa servis.  Moral i ba e bann travayer i dekouraze.

Mon’n osi aprann ki SFRSA, Servis Emergency ti’n enkli dan son Bidze post pou recruit o mwen 60 personnel ki ti pou komans ganny lantrennman pou ranplas bann ki’n pran retret, pou prepar bann nouvo stasyon tel ki Anse Royale, Anse Boileau ek Praslin.

Me sa in ganny koupe konpletman.   Minis mon enplor ou pou revwar sa, e boner lannen prosenn anmenn en Bidze siplemanter si fodre e nou Lasanble mon konnen pou siport sa avek linanimite.

Minis mon osi atraver ou demann Gouvernman pou fer sir ki tou bann housing estate i ganny fire hydrants ki dan kler e ki fonksyonnen.  Lasanble in deza pronons li lo la.  An menm tan ki Sesel i devlope, annou osi regard bann nouvo standar dan konstriksyon ki pe antre.  Plizyer batiman ozordi pe servi sa bann menm kalite cladding ki ti fasilit dife pou fannen tre vit e detri Grenfell Tower, Lonn an 2017.

Plizyer dife in ganny rikorde kot sa materyo in ede propaz dife pli vit.  Sesel pe al osi dan sa direksyon.  Kingsgate House, Nouvobanq, zis pou nonm 2.  Sa materyo i menm poz danze pou bann zofisye Servis Tenny Dife.

Ler i brile i fonn e si i tonm lo zot lenz i fouy trou e i bril zot osi.  Bann lotorite avan zot aprouv bann plan annou pran rekomandasyon SFRSA o serye.  An bref, mon pou donn en pti bref lo detay sa lepisod Grenfell Tower.

Zis mon pou partaz detrwa pwen.  Sa dife ti ariv le 14 Zen 2017.  E lanket in blanm sa cladding.  Me in kout lanmor 72 dimoun, 70 blese, 223 ti ganny sove.  Dife ti pran plis ki 60 er tan avan ki London Fire Service ti kapab met li anba kontrol.

E an Me 2017, zis 1 mwan avan sa lensidan, London Fire Service ti’n warn sa 33 Council dan Lonn, pou revwar litilizasyon sa bann cladding.  Ozordi Zofisye SFRSA i konsernen, e zot pe lans menm warning.  Annou pran sa warning o serye.

2 pti mo lo konpansasyon pour kominote La Misère.  Mon konpran ki plizyer Manm pe dir pa servi larzan tax.  Me ler lotorite i al mal, kote domaz i ganny peye?

Dan ka fungus, ler en Lafors Sekirite i abiz en sitwayen e Lakour i ordonn domaz, pou zabitan Praslin ki PUC pe al peye byento, tou sa i larzan tax.  Bidze APDAR i osi larzan tax.  Bidze ki byento TRC pou bezwen demande pou pey konpansasyon bann viktim, i pou osi sorti dan larzan tax.

Alor annou les zabitan La Misère met en closure avek sa case e nou a kapab kontinyen avek nou lavi.   I fer 8an, mon dir i fer 8an ki mon’n anmenn sa case Ankour e mwan avek Onorab Georges koman mon avoka nou’n fatige monte desann Ankour.  Les nou move on avek nou lavi.

Les mwan termin par felisit mon DA Ms Louise e dir li ek son Office Manager Annaelle, en gro mersi.  Ansanm nou travay kot-a-kot sa lannen pou esey fer en diferans pou nou distrik.  Malerezman Ms Louise ou pe ale e mon swet ou tou de bon dan ou nouvo post.

Mon osi swete ki mwan ek nouvo DA ki ava vini, nou a kapab kontinyen dan menm semen.  Mon osi anvi remersi DA Beau Vallon Mrs Clarisse pou son sipor enorm comme sa enn ki ansarz rezyon Nor.

Ou reaksyon lo scene sa dife yer swar, in montre ki mannyer ou annan bann kalite eksepsyonnel;- kot ou’n kapab fer bann kontak e osi ede pou kalme sa 2 fanmir.  Mon swete ki bann travay parey i ganny rekonpanse.

E la mon fer en lapel ek Minis pou demann Gouvernman, pou ankor regard package bann DA.  Zot responsabilite i enorm.  Mersi mon constituency clerk, Mrs Nathalie Marie pou son travay e son kolaborasyon avek Biro Ladministrasyon Distrik.  Sipor ki in aport mwan dan mon distrik.

E mersi tou dimoun pou aport mwan zot sipor an menm tan ki mon’n MNA e Speaker.  Mon’n fer mon mye pou kapab desarz tou le 2 travay san oubliy mon responsabilite anver mon distrik.  Mon kont ankor lo zot sipor lannen prosenn.

Mon pa kapab fini san remersi mon lekip ki’n travay pros ek mwan dan mon biro.  Genevieve, Nada e Gerda.  Mersi pou kit mon lofis going parfwa in tough me ansanm nou’n reisi.

En gran mersi pou Sekretarya Lasanble Nasyonal.  Ankor en lannen ranpli ek challenges me nou’n kapab reisi pou sirmont tou e delivre lo pli o nivo.  Mersi pou tou bann Manm Onorab ki’n raport mon sipor.  Mersi pou zot tou.

Mon pa pou kapab zanmen fini remersi zot e i annan plizyer ki’n aport mwan bann sipor eksepsyonnel, zot konnen lekel zot.  Last but not least, Minis ou pa’n ganny oubliye dan sa lalis ‘’mersi.’’  Minis ou avek ou lekip mersi bokou pou sa travay ki zot in fer.

Mersi pou sa kolaborasyon ek Lasanble Nasyonal pou lannen 2019.  Se dan en tel lespri ki nou pou kapab rod sa ki meyer pou Sesel.  Vwala mon 2 pti mo ki mon ti anvi partaz avek sa Lasanble.

I pa’n vreman en repons kot mon’n tous bann sif, ki Minis in prezant nou.  Me ler nou pou egzamin bann diferan heads, si mon annan okenn kestyon pou klarite, mon ava poze.

 

(APPLAUSE)

 

MR SPEAKER

Avek sa 2 mo mon krwar in ler pou nou frenm sa lazournen.

Me parey nou’n dir, nou’n donn randevou pou Lendi 9er bomaten.  Kot Minis i ava ganny sans avek son bann teknisyen pou prepar en pti pe bann klarifikasyon, bann kestyon ki’n leve.  E Minis i ava vin fer son Right of Reply.

E apre sa nou pou pran en break.  Ki ler nou ava re antre, mon mazinen kekfwa ver 11er, nou ava konmans avek bann diferan heads.  Madanm Clerk nou’n ganny bann schedule, bomaten, ok?  Madanm Clerk i dir mon in fini sirkil bann schedule ek tou bann Manm.

E nou ava met nou pare alor, pou Lendi pou nou kapab al lo sa lot faz travay pou nou kapab re egzamin tou bann Bidze e tou bann heads.  E nou fer sir ki nou kapab fer en bon travay pou nou pei.

Avek sa mon ti a kontan ankor enn fwa remersi tou bann Manm.  Mon remersi Minis, Ms Croisee, Ms Cesar, tou dimoun ki a lekout e byensir nou 3 ( mon krwar nou annan 4, nou annan 1 deor –  nou 4 teknisyen SBC, pou permet transmet nou travay an direk.  Mersi bokou.

E randevou se Lendi 9er bomaten.  Lasanble i adjourn.

 

(ADJOURNMENT)