::
Home » Verbatim » 2019 » Verbatim Tuesday 5th November, 2019

Verbatim Tuesday 5th November, 2019

NATIONAL ASSEMBLY OF SEYCHELLES

Tuesday 5th November 2019

The Assembly met at 9am

National Anthem

Moment of Reflection

Mr Speaker in the Chair

 

MR SPEAKER

Bonzour tou Manm Onorab e bonzour tou dimoun ki a lekout dan lakour, partou aryer e ki pe swiv travay Lasanble Nasyonal.   Mon annan en bonzour spesyal pou en group envite, sa se group LDS Youth Association. 

E i annan Ms Kelly Samynadin, Ms Sheryl Philoe.  Ms Gretel Porice, Ms Veronica Simeon, Mr Trevor Nourrice, Mr Trevor Uzice, Mr Michael Bastienne, Ms Tania Esparon.

Mr Marlon Rose, Mr Warren Hardy, Mr Daryl Labiche, Ms Chamina Moustache e Mr Dean Freminot.  Bonzour e welcome dan Lasanble Nasyonal.  E mon swete ki ou ava kapab pas en bon letan avek nou, pou swiv travay Lasanble Nasyonal.

E parey labitid ler nou pran break premye break bomaten, mon envit zot pou vin anler lo balkon pou pran en dite, en pti kafe avek nou.  E mon envit Manm lo tou lede kote osi tou, pou vini, pou rankontre sa bann zenn, pou nou kapab fer serten lesanz avek zot.

Bon bomaten nou pou kontinyen nou travay Lasanble kot nou ti kite semenn pase.  E semenn pase ti prezantasyon Bidze 2020.

E bomaten nou pou demar nou travay avek repons par le de Leaders, an komansman par Leader Lopozisyon.  E sa apre i ava swiv par lezot Manm.  E mon ava demann parliamentary reporter pou fer rantre Minis avek son bann zofisye.

Mon a zis osi fer rapel bann Manm ki lo Assembly Business Committee, ki nou pe meet dan Speaker’s Conference Room, midi edmi. Mon pa pou kapab chair sa meeting, mon ava demann Deputy Speaker Onorab Afif, mon ava demann ou pou chair ABC apre midi.

E zis formalite pou nou kapab desid lo bann budget heads, ki pou vin devan Lasanble, e pou nou kapab ganny en schedule ansanm an kolaborasyon avek Minister Finans,  pou nou kapab demar nou travay pou semenn prosen.

Mon ti a kontan dir bonzour e welcome Minis Maurice Loustau-Lalanne.  Minis responsab pou Finans, Komers, Lenvestisman e Planning Ekonomik

Minis i akonpannyen bomaten par son Special Advisor Ms Sitna Cesar.  E Kontroler Zeneral Ms Irene Croisee.  Minister avek ou lekip, bonzour ankor enn fwa e welcome dan Lasanble
Nasyonal.

Nou pou pas toudswit lo nou travay, e mon ava donn laparol Leader Lopozisyon Onorab Wavel Ramkalawan.

 

HON WAVEL RAMKALAWAN

Bonzour Mr Speaker.  Bonzour tou bann koleg Onorab e bann lazenes LDS dirize par son Prezidan Ms Kelly Samynadin.  Bonzour Minis e bonzour tou bann dimoun ki pe ekoute.

Mr Speaker premyerman permet mwan pou remersye Minis avek son lekip profesyonnel e dedye pou prezantasyon Bidze 2020.  Sa legzersis parey nou dir, toultan i demann bokou konsantrasyon, akoz i esey tous tou laspe nou sosyete e tou nou zabitan.  Nou apresye zot konpetans ek zot langazman.  Byensir nou osi rekonnet ki letan zot pe prepar sa Bidze zot pe swiv bann prensip e filozofi sa Gouvernman ki la ozordi.

Alor ekspekte ki i pou annan diferans dan lafason ki nou, koman en lopozisyon ozordi, nou regard bokou laspe ek fason fer ki pe ganny propoze. Me sa, dan okenn fason pa devret annan nanryen pou fer avek zot travay avek zot profesyonnalizm.

Apre tou, avek en sanzman Gouvernman, ki nou ekspekte an 2020, se zot, sa bann profesyonnel ki ava kontinyen fer zot kontribisyon dan devlopman nou pei.

Mr Speaker, Gouvernman ozordi i kontinyen pe fer en travay maintenance avek nou pei. Zot mank kouraz pou vin inovativ, e zot per pou pran bann desizyon brav ki ava lans nou ver en lavenir prospere.

Parey mon’n deza dir dan lepase, lepep Seselwa pa ganny sa lespwar pour en meyer demen.  Desizyon ki ganny pran yer i sanze ozordi, nou war i mank aksyon konkret ki pou montre sa pep en larout eklere e donn li konfyans ki koman en Seselwa, i pou kapab partisip dan kreasyon sa larises, e pli enportan, benefisye ladan.

Zabitan Mahé, Praslin, La Digue e tou zil nou larsipelego i oule war son pei bouze dan en fason pozitiv. I pas tro bokou letan pe espere.  Sa i pli gran diferans ant filozofi ozordi e filozofi LDS.

LDS i krwar dan pran desizyon rezonnab ki byen analize, pas dan aksyon e fer keksoz bouze.  Nou krwar dan koz direk avek sa pep, afen ki i konnen kote i debout e kote son pei pe anmenn li.

Nou pa krwar dan evite pran desizyon zis akoz tel dimoun i nou dalon, oubyen kwa ki nou pou gannyen avek li. Kot fodre koze, nou koze e kot fodre pran aksyon nou krwar dan aksyon.

Mr Speaker, zisteman pandan sa legzersis analiz Bidze pou annan lenstans kot nou pou dir non, e dan lezot lenstans, nou pou demande e ensiste ki Gouvernman i met plis larzan. Nou’n deza fer sa avan.

An 2016 letan SPDF ti dir zot bezwen R120milyon pou maintenance Topaz an Lenn, apre ki nou ti’n analiz byen tou keksoz, nou ti dir non.  E zanmen SPDF ti retournen.

Me parkont Topaz ti retournen, fit for duty.  Sa menm lannen, nou ti ensiste ki plis larzan i ganny mete dan Bidze pour ki Lazans Tenny Dife i ganny en nouvo masin ki kapab ariv pli o posib, e nou kontan ki sa proze in materyalize e sa Lazans ozordi i pli ekipe.

Se sa fason ki nou travay Mr Speaker.  Eski sa i en Bidze eleksyon? Byen sir i en Bidze eleksyon.  Sak Seselwa pe deza fer zot prop konklizyon e bokou pe demande akoz ki serten desizyon i ganny pran an 2020, lannen eleksyon prezidansyel?

Seselwa Mr Speaker in mir politikman.  Mon napa gran problenm avek en Bidze eleksyon.  Sa ki nou bezwen gete se si i bon oubyen non.  Me Minis i kapab reste asire ki nou pa pou ganny ebloui par sa lalis proze ek progranm ki’n anboufte Bidze 2020.

Sa ki Seselwa entelizan i bezwen fer, se konpar larepons ki Gouvernman ti donnen letan kestyon ti ganny demande lo serten size ki konsern zot, e desizyon ki’n ganny pran ozordi. Par egzanp, travayer ki lo Kontra dan Gouvernman.  Mazin byen ki mannyer Ladministrasyon Piblik ti dir zot ki zot pa pou kapab ganny long service allowance akoz zot ganny gro benefis lafen zot kontra.  Ozordi i ok?

Travayer parastatal, eski zot rapel zot osi letan mon ti lager pour zot ganny sa long service allowance, ki larepons ki Gouvernman ti donnen? Mr John Adam, Mrs Ivy Orr, Mrs Françoise Shroff, Mr Eric Arnephy ek bokou lezot, zot rapel ki larepons mon ti gannyen konsernan pansyon ki zot pe gannyen?  Mon kontan ki mon’n ede pou sakouy sa pye fri.  E menm si lannen eleksyon ki fer zot riy en ptigit, mon kontan menm, e mon riye avek zot.

Mr Speaker, nou’n war menm zafer dan bann Bidze oparavan.  Bidze i dres en zoli portre lalis proze me bokou sa bann proze apre pa ganny enplimante, e i annan ki revin dan Bidze lannen apre lannen.

Eski alor bann sif i realistik oubyen zot zis anbelir Bidze?  Letan nou balans performans Bidze sa lannen an relasyon avek proze, dapre parol Minis, nou ganny en mwayen anviron 30 a 35 poursan performans zeneral.

Etandonnen ki pli o sikse i anviron 50 poursan e pli ba i 11 poursan.  I senpleman bann promes ki ganny mete koman bann labwet mon kapab dekrir, pou ganny vot.

E pourtan Minis li menm i dir nou ki Gouvernman, i annan problenm pou rekrit eksper pou enplimant sa bann proze.  Eski se pa sa problenm partou dan pei ozordi, enkli dan sekter prive?

I annan nesesite Mr  Speaker pou fini travay lo en national human resources information system e etabli en national manpower requirements database pour nou kapab focus lantrennman bann Seselwa dan bann landrwa kot nou lekonomi i annan gran demann.

La nou ava vreman pe regard devan e pran devlopman nasyonal o serye.  E sa ki ganny mete dan Bidze i ava realistik akoz nou ava kapab akonpli zot.

Mr Speaker dan mon pwennvi, en Bidze Nasyonal, apard regard sif ki Gouvernman i propoze pour kolekte koman reveni e pour depanse pour fer marse pei, i devret osi analize ki mannyer nou lekonomi antye pe fonksyonnen.

E ki nou pou fer pou amelyor li e fer li grandi. Nou devret konstaman pe regard devan e demande ki lot pa ki nou pou pran?  Ki nou pou fer pou solidifye nou bann lendistri e pou anbelir zot pou anmenn plis loportinite pour tou nou dimoun kree larises.

Se sa larises ki ganny kree, ki pou permet Gouvernman soutenir son Bidze e ogmant li kot i neseser a lavenir.  Eski sa Gouvernman pa war ki i annan en gro problenm letan lendistri ki fer pli byen dan nou pei, ankor enn fwa se prodiksyon gines avek labyer pour konsonmasyon lokal?

Mr Speaker, mon krwar Bidze 2020 i devret osi poz sa kestyon pour bann aktivite ekonomik, me sirtou pour nou bann lendistri kle.

Pour nou Lendistri Lapes, ki lot pa?  Nou’n annan en plan devlopman lapes ki Minis ki responsab pour sa lendistri in propoze resaman. Nou devret war en koneksyon dan sa plan avek Bidze. Annou gete kote nou kapab anmenn sa lendistri pour soutenir e agrandi nou lekonomi dan lavenir.

En keksoz ki nou’n koz lo la se anmenn plis partisipasyon Seselwa dan lapes endistriyel. Seselwa i bezwen annan plis partisipasyon dan sa lendistri. Napa dout ki se dan sa direksyon ki nou bezwen ale.

Stok pwason dan nou losean i limite, e bann eksper i koz lo posibilite ki stok i redwir a lavenir.  Donk pou nou kapab gard nivo benefis e ogmant li, nou bezwen annan en pli gran par dan sa lendistri.

Deza, nou annan detrwa antreprener Seselwa brav ki’n antre dan lapes komersyal.  Nou bezwen gete ki mannyer nou pou ed zot pran sa lot pa.   Non selman zot bezwen vin pli gran me nou osi bezwen ki nouvo zenerasyon i kontinyen kot zot in komanse.

Bidze, in mank loportinite pou met divan anba lezel sa bann antreprener Seselwa dan sa lendistri, pou donn zot bann lankourazman tel ki lekipman, marse pou vann zot prodwi, later pou letablisman lizin pour transformasyon prodwi e proteksyon.

Eski Seselwa ki dan lapes in ganny okenn lankourazman Zedi pase? Larepons pour mwan i kler, i en gro non. Si nou anvi en lendistri i grandi e Seselwa i pran kontrol, fodre ki Gouvernman i osi zwe son rol.

Pa zis koz Lekonomi Ble, me fer li vin vreman ble, en realite pour tou Seselwa.  Mr Speaker, pour nou Lendistri Touris osi, nou bezwen gete ki nou fer ozordi pour agrandi benefis demen.

Nou’n ganny lakantite laliny aeryen ki nou, ki pou kapab soutenir, ki nou kapab soutenir.  E nou pe al ver lakantite lotel ki nou kapab soutenir.  In ler pou konsantre pli serye lo ki mannyer nou ganny plis larzan avek touris ki nou annan.

Mon ti a kontan propoze ki Gouvernman i reget ankor litilizasyon nou later ki reste disponib tel ki; Cap Ternay pour devlopman komersyal ki a servi nou Lendistri Touris.

Sa i devret fasilite ki annan bann latraksyon baze lo nou lanvironnman natirel e nou kiltir ki a ofer keksoz azoute pour touris vizite, aktivite pour zot pran, pou zot pran par ladan e prodwi ki zot kapab aste. Sa i fer mwan, e mon sir Minis pou konn egzakteman ki mon pe dir –  i fer mon mazin model lo kontinan Lafrik, tel ki Carnivore an Kenya, oubyen Boma, kot Victoria Falls. Nou deza war popilarite Boat House ek Bazar Labrin, e sa i montre nou deza ki nou bann viziter i anvi plis aktivite.

Ler ou get en landrwa parey L’Union lo La Digue, avek fasilite tre senp, ki, gras a aksyon sa Lasanble, in war son potansyel agrandi.  Nou kapab demande akoz nou pa kapab devlop lezot landrwa pour nou ofer en leksperyans pli ris, pli Kreol pour nou bann viziter e an menm tan kree plis larises pour pei.

Sirman lo nou 3 zil prensipal i annan lespas pou nou fer nou bann viziter apresye nou kiltir e anmiz plis, anmezir ki plis Dolar i rantre dan nou lekonomi.

Mr Speaker, Minis in fer resorti ki 436 morso later in ganny mete a dispozisyon fermye.

Me eski sa pa en bon moman pour gete ki mannyer sa sekter pe pas lo en lot nivo? Ziska konmela, tou nouvo fermye pe fer sa ki lezot pe deza fer.  Setadir prodwi legim, ek fri, ek gro manze pour konsonmasyon tradisyonnel.

Me benefis plant menm legim i kapab war son limit, e fermye pour bezwen nouvo debousman.  In ler pour diriz nou lagrikiltir ver en nouvo letap pour redwir lenportasyon, e osi pou nou rod prodwi avek posibilite eksportasyon.

Mon pa pe sey dir ki si sa ki nou kapab eksporte, me ler ou mazin en prodwi parey lavanniy, ki annan gran valer lo marse enternasyonal, e ki nou’n deza eksporte dan lepase, nou kapab konklir ki posibilite i egziste.

Lasosyasyon Fermye i annan en kantite lide, fodre ki zot ganny ekoute, e olye fer zot fristre avek tax, se lankourazman ek debousman ki zot bezwen gannyen. An retour Mr Speaker, se Sesel ki pou benefisye.

Mr Speaker, mon bezwen osi dir ki apre en kantite vizit ki Komite Zil in fer lo nou bann zil, tou Manm i reste enpresyonnen avek sa ki pe arive lo Denis Island. Lagrikiltir, tourism, lenerzi renouvlab ek konservasyon in may kanmarad byen for e sa zil i donn nou en model devlopman pour nou bann zil.  Felisitasyon Mr ek Mrs Mason!

Si ti annan en pli gran sipor Gouvernman, bokou plis ti a kapab ganny fer.  Zisteman Mr Speaker, se sa ki nou pe koz lo la.  Petet antre tan Departman Leritaz ti a kapab repar sa far istorik, the famous ‘’Denis Island Lighthouse’’, ki lo sa zil.

Mr Speaker posibilite i la. Defi osi i la. Me parey tou keksoz dan lavi, letan i annan en vizyon, ou kapab fer sa ki paret enposib vin vre. Nou bezwen senpleman vin pli inovativ, me an menm tan nou Bidze i dwatet promot lazistis dan tou sirkonstans.

Dan sa Bidze, mon zis espere ki bann sif ki donn lespwar ozordi, pa anmenn fristrasyon ek lakoler pli tar.  Serten i kapab demande kwa sa lazistis ki mon pe koz lo la?  Les mwan eksplike.

Letan nou koz lo proze kapital ek Kontra, annou fer sir ki bann proze i vreman kout sa pri ki pe ganny mete.  E dezyenmman, ki tou dimoun i ganny sans partisipe e ganny sa kontra si son kalkil ek son konpetans i meyer.

Letan nou met larzan pou konstri lakaz e kree bann kare later, annou fer sir ki se bann aplikan ki swiv prosedir e ki kalifye ki gannyen.

Letan nou met larzan pour lasistans sosyal, annou enn fwa pour tou, koup lo labi pou asire ki aplikan ki dan bezwen e ki kalifye ki resevwar lasistans.  An dot mo, annou pa gaspiy larzan lepep Seselwa zis pou fer kontan fanmir, zanmi ek konesans.

LDS in lite kont koripsyon e mal servi fon piblik.  I ankor pe arive, alor tou, alor tou ki konsernen i devret pran en nouvo latitid dan zot fason fer. Nou war sa klerman dan rapor Oditer Zeneral.

Mr Speaker, afen ki ou kapab depanse, nou bezwen annan akse avek larzan. Gouvernman i ganny son larzan atraver tax ki i ranmase avek biznes.  Alor i kler Gouvernman i en fasilitater, e i ranmas tax, biznes i kree larises, e Gouvernman i pran atraver bann fre ek bann tax ki i enpoze.

E la mon bezwen dir Mr Speaker, parey tou Seselwa, mon’n soke letan Minis in dir nou ki zis 10poursan lakonpannyen pe kontribye 97 poursan biznes tax e ki 30 lakonpannyen ki pey 80 poursan total biznes tax dan nou pei.

An plis ki sa, in dir nou ki 717 lakonpannyen pa pey okenn tax akoz zot pa’n fer profi, se sa ki zot deklare omwen.

Sa ki osi sokan Mr Speaker, se letan Seselwa pe konplent pri lavi ki ser, e ki nou war plis laboutik pe ouver dan tou kwen nou kominote,  Minis i dir nou ki 77poursan bann lakonpannyen ki fer wholesale ek retail pa’n pey okenn tax biznes akoz zot in deklare ki zot pa’n fer profi.

Eski vreman nou kapab pe viv dan en tel realite?  Ki vreman pe arive?  Minis mersi bokou pour sa deklarasyon ki ou’n fer dan en fason fran e onnet, pour nou konnen kot nou debout.

Mr Speaker, mon pa ganny en konpran.  E mon demande ki minis i eksplik nou sa byen menm dan son larepons.  An plis ki sa mon pe demande ki dan lespri latransparans Minis i donn nou lalis sa 30 lakonpannyen ki pey sa kantite tax afen ki lepep Seselwa i ava zize pour li menm.

Si Minis pa donn nou sa, FPAC pou bezwen fer son prop lenvestigasyon e fer piblik konnen.  Mr Speaker, ki mannyer eski nou kapab alor dir ki nou lekonomi i an bonn sante, kan mazorite lakonpannyen pe deklar en pert e preski napa larzan ki pe rantre dan Kof Gouvernman atraver tax biznes?  Dan sa ka mon pou dir ki se lekonomi bann endividi ek bann lakonpannyen ki an bonn sante.

Sa ki mon ti a kontan ki Minis i osi fer, se pour balans larzan ki kit nou pei atraver bann Labank ek money changers kot, avek Labank Santral kot zot kapab ganny tou lenformasyon, pou regarde konbyen sa bann biznes ek sa bann endividi ki pe dir zot pa pe fer okenn profi e alor pa pe pey okenn tax, pe transfer deor.

Mon pa ekspekte ki Sesel i ganny servi pou kreasyon larises, me profi ek larzan, ki enkli tax i al an deor Sesel.  Apre nou koz lo pri lavi ki ser? Sa i le ka senpleman akoz Gouvernman pa pe met son lipye ater pou defann nou pep.

Mon espere ki Seselwa i konpran sa sityasyon byen menm.  Sa i apel senpleman tir dile avek Sesel, me pa donn Seselwa en pe sa dile.  Mr Speaker, i pa akseptab e nou ekspekte aksyon lo lapar Gouvernman.  Sa i apel en gro lenzistis pour nou pep.

Mr Speaker, zot ava osi konpran mon konsern akoz lo en lot nivo, Minis in osi dir nou ki bann aktivite lotel i kontribye zis 7poursan reveni total tax biznes.

Mazinen ki 44 lakonpannyen dan Sekter Touris in deklar depresyasyon ki tonm plis ki 50poursan.  E alor pa’n pey en sou tax biznes. I kler alor ki i annan en gro problenm dan nou pei. Lendistri Touris i nou lendistri prensipal.

Nou’n antann ki in annan plis touris ki pe vizit Sesel e ki zot pe ranmas plis reveni. Nou menm ekspekte en logmantasyon 5poursan sa lannen.  Dir nou lekel bann gro lakonpannyen touris ki pe kontribye tax dan nou pei.

Eski pa i ler pou fer en revizyon total afen ki nou ariv lo en sityasyon kot biznes i benefisye, me ki lepep Seselwa osi i resevwar son par.  E sa pour ki nou kapab ganny meyer servis tel ki ledikasyon pour nou zanfan, en bon sistenm lasante ki donn nou konfyans, san oubliy met plis larzan dan pos Seselwa.

Mr Speaker, i normal alor pour mwan demande ki pe arive avek Komisyon Reveni Sesel? Ki zot pe fer pou evalye sa bann biznes ki deklar zot pa fer profi e alor pa pe pey tax biznes?

Eski zot mank kapasite pou fer sa travay?  Minis pou bezwen ekler nou lo la.  Mon krwar ki nou bezwen pran nou pei o serye. Sa Komisyon i bezwen met plis zefor dan koleksyon reveni.

Nou’n toultan donn zot nou sipor, swa pou rekrit plis dimoun e menm pou ogmant zot lapey. Mon bezwen demande ki biro Tax i aret al kot menm pti biznes Seselwa pou fer lenvestigasyon, me ki zot regard plis sa bann gro e ranmas sa ki zot merite.

Eski zot pe osi regarde lekel sa bann lakonpannyen nanm anba ki zot kasyet zot reveni?  E la Biro Rezistrasyon osi tou, i annan en rol pou zwe.  E alor Mr Speaker, zot kasyet tax ki zot devret peye akoz letan zot pe vin gro, pou zot pey tax, zot kas zot an mil pti morso e zot pa pey tax.  Alor nou bezwen regarde tousala.

I evidan ki Sesel pe perdi tro bokou larzan.  Moman in arive pour nou regard plis nou pep ek nou pei.   Sa zafer pa pou kapab kontinyen!

Mr Speaker, mon anvi dir avek Seselwa, mwan, mon pa pe rod pini personn, me mon pe plito rod lazistis, akoz apre tou, letan en dimoun pa pey son tax, i vedir ki i pe pran tou nou larzan i pe met dan son pos pour son byennet.

Letan i pey son tax, i vedir ki nou benefisye letan nou al lopital, letan nou anvoy nou zanfan lekol e dan lezot depans ki Gouvernman i fer dan Bidze, bann pti semen, bann, tou keksoz ki konsern nou pep.

Parey mon’n dir oparavan, mazinen ki se tax ki Gouvernman i ranmase, kontribye par ou ek mwan ki i depanse pou kapab donn nou en bon lavi.  I pa normal pour nou pey tax lo tou komodite dan laboutik e ki sa marsan pa remet sa larzan dan Kof Leta.  Sa, i osi rezon nou kontinyen lager kont koripsyon akoz se nou larzan ki ganny vole. Sa, i senpleman pa normal.

Mr Speaker, dan sa menm lespri, in ler pour ki en sistenm tax kler avek bann regilasyon senp e fasil i ganny etabli enn fwa pour tou.

Bann eksper dan sa domenn i dir ki Lezislasyon Tax ozordi i anbigi e diferan Lezislasyon i kontredir kanmarad, e ki i annan en sel dezord.  Sa ki pey tax e sa ki ranmas tax i enterpret Lalwa sakenn dan son fason, e sa byensir i les ouver bokou bann trou e sanmenm sa ki pei pa pe ranmas larzan ki i devret.

Mon espere ki Sesel i ava byento annan en Lalwa Tax byen analize, kalkile e balanse pour ki pei e tou Seselwa i ava benefisye.  Mr Speaker, parey ou konn byen, LDS i krwar ki tax i bezwen desann; tax i bezwen zis e ki tou dimoun i bezwen peye e ki sa i sel fason pou kapab fer li desann.

 

 

(APPLAUSE)

 

HON WAVEL RAMKALAWAN

Mr Speaker sa, i fer mwan regard en pe, en pe pre sa ki mon pou apel bann gaspiyaz letan pou ranmas detrwa sou, tandis ki gro roupi i disparet.  Ki vreman pou abouti pou fer desann sa sonm R3mil ki en endividi i kapab fer vini prodwi atraver Internet pou fer li vin R1500?

Avek tou son bann konplikasyon Bill of Entry ek lezot, Gouvernman pe senpleman pini Seselwa.  Nou viv dan en monn kot dimoun i kapab fer vini son prop keksoz ki i bezwen, akoz sistenm komers in evolye.

Akoz ki Sesel pe retourn an aryer?  Akoz zot pa plito al ranmas gro larzan tax ki pa pe ganny peye, olye trangle en Seselwa ki fer vini de komodite pour li servi?

Me si i annan ki pe fer gro biznes, apros zot e fer zot pey tax ki zot devret, me pa met tou dimoun dan menm sak.   An tou ka, mon anvi dir avek Minis nou pou bezwen regard byen son regilasyon letan i anmennen.

Mr Speaker, sa zafer tax lo akomodasyon ek loto i osi fer mwan riye, akoz i ranpli avek kontradiksyon. Petet mon bezwen dir Minis ki sa bann dimoun dan son minister ki annan institutional memory ti devret notifye li.

Minis i dir nou ki sa tax lakaz pe sorti 15poursan pou vin 3poursan akoz i krwar ki sa pou fer desann pri lwe lakaz. Eski Minis pe dir nou ki letan sa menm Gouvernman ti enpoz sa tax detrwa lannen pase son bi sete pou fer monte pri lwe lakaz?

Lo sa zafer tax lo loto.  Sa lespri ogmant R25mil levy lo tou transpor i prezant li tro fasilman koman en fason pou pini sa ki annan mwens larzan.  Minis,  se sa lafason ki i ganny enterprete deor alor mon pou dir i pa normal.

Lo kote transpor hybrid, Gouvernman i montre kontradiksyon. Letan hybrid ti konmans rantre dan pei, tax ti 5poursan. Me letan dimoun ti tonm lo sa kalite transpor, ki Gouvernman ti fer?  I ti war sa koman en loportinite pou ranmas larzan e alor i ti ogmant sa tax en sel kou pou fer li vin 12.5poursan.

Eski zot vreman krwar dan hybrid e dan lanvironnman?  Me an menm tan, Minis i dir nou ki en transpor hybrid ki par lao 2mil cc pou ganny trete koman en transpor konvansyonnel.

Apre 2mil cc i nepli en hybrid? I transformen ankor enn fwa?  I vin en lot kalite hybrid, konmsi i retourn parey i ti ete avan?  Sorry Minis, me mon pa ganny en konpran Polisi Gouvernman e kwa egzakteman ki zot anvi akoz mon war li i ranpli avek kontradiksyon.

Mr Speaker, an relasyon avek lanfaz lo koleksyon reveni mon bezwen felisit tou manm FPAC dan sa Lasanble Nasyonal pour travay ki nou’n fer ziska prezan. Nou’n war en kantite, nou’n raport en kantite, me malerezman L’ Egzekitiv pa’n fer ase dan mon lopinyon.

Apre ki Lazans Botanik ti pas devan FPAC boner sa lannen, mon kontan war ki zot in sanz zot prozeksyon an sa ki konsern reveni.  Sa in sorti 1.2 milyon pou vin 6.874milyon pour 2019, e menm sonm in ganny mete pour 2020.

Menm zafer i aplik pour Linyon Estate kot apre ki FPAC ti fer en travay laba, pour premye fwa zot in deklar en profi dan 2 lannen konsekitiv.  Avek lankourazman FPAC, ansyen Minis Larose, ek zot Board, SRC menm ti prezant premye rapor ki montre en gran koleksyon reveni konpare avek bann lannen avan.

Sa, i en lendikasyon ki vreman sa 6enm Lasanble anba direksyon Onorab Speaker Nicholas Prea, dirize par LDS in zwe en gran rol pou amelyor koleksyon reveni dan nou pei …

 

(APPLAUSE)

 

HON WAVEL RAMKALAWAN

… an menm tan ki nou koup lo gaspiyaz ek koripsyon.

Fodre pa ki Seselwa i oubliye ki konpare avek oparavan kot tou larzan dan Bidze ti fini depanse lafen lannen akoz ti napa kontrol, ozordi sa larzan i retourn dan Kof Leta e Minis i kapab deklar lekonomi dan detrwa santenn milyon Roupi lafen lannen.

Nou pe fer en progre definitivman e nou lo bon larout. Mr Speaker, mon bezwen osi mansyonnen ki sa menm Lasanble, atraver bann kestyon ek Mosyon in kapab pous Gouvernman pou fer serten lenvestigasyon mazer dan serten Lazans, tel ki SBFA, e la mon anvi dir Minis, mersi bokou pour lafason ki ou’n azir koman Minis Finans.

E la nou war ki i annan plis ki R80milyon an kestyon.  Nou’n osi fer lamannman dan Lalwa Lazans Anti-Koripsyon e nou espere ki avek en bon korperasyon avek lapolis, koripsyon i ava ganny konbat e larzan sa pep i ava retourn dan kof.

I reste en defi pour sa Lazans pou fer retournen sa $50milyon ki ti disparet. Mr Speaker, mon swe se ki kan sa $50milyon i retournen, i ava retourn avek bokou zanfan e bokou pti zanfan.

E ki sa 50 milyon i ava ofet en granper oubyen en granmer bizael, akoz i ava met bokou larzan dan nou kof. Me Mr Speaker, mon dezapwente ki sa Bidze i en lot ki mank linovasyon pou met divan anba lezel lazenes Seselwa.

Premyerman letan mon koz avek bokou zenn profesyonnel, mon’n toultan renouvle mon prop lantouzyazm avek zot vizyon. Letan par egzanp ou war bann zenn ki anvi lans zot dan volontarya, akoz zot kontan zot pei, e zot konsernen avek son lavenir.

E zot eksplik ou ki letan zot regard bann zanmi zenn ki’n tonbe, zot anvi sanz sa sityasyon e partaz zot konesans, lenerzi, ou senpleman donn lezot lespwar pour lavenir.  Mr Speaker, i donn mwan konfyans dan en meyer demen.

Letan mon regard bann zenn ki dan Lasanble ozordi e ki anvi vin ekoute pou zot konnen dan ki direksyon zot pe ale, mon anvi dir avek zot bann zenn, kontinyen e felisitasyon pour zot lantouzyazm.

 

(APPLAUSE)

 

HON WAVEL RAMKALAWAN

Kan mon rankontre bann zenn ki dan konservasyon nou lanvironnman, e ki donn zot lafors pou ranmas salte lo lans e anmenn kanpanny kont plastik;-  ki krwar dan lapes soutenab, dan ledikasyon e dan proteksyon bann lespes, mon krwar ki nou devret donn zot en plas enportan dan sa Bidze.

Mr Speaker, parey ou konnen Lasanble napa drwa enpoz okenn sonm lo Gouvernman, alor mon fer en lapel spesyal avek Minis ki en serten sonm i ganny mete pour bann NGO lazenes ki travay avek zenn.

Eski pa ti pou bon pour kree en fon pour linovasyon afen ki nou zenn i kapab debourye?  Lazenes, Mr Speaker pe rod divan anba zot lezel, zot pa pe rod nou pou fer tou pour zot.

Sosyete i bezwen donn sa bann lespri vayan, dinamik, ranpli avek lenerzi, ki demen pou diriz sa pei ver nouvo lorizon, sa posibilite pou anvol pli o posib.  Lorizon i devret zot limit lesyel i devret oter ki zot kapab ale.  E la mon anvi dir avek zot, zot annan mon sipor total.

Mr Speaker mon sagren letan mon tann Minis mansyonnen, ki Sesel pe deteryore lo lendeks fasilite fer biznes.  Eski sa i drol?  Pour mwan?  Definitivman non.  Tro souvan en Departman dan Gouvernman pa konnen ki en lot pe fer e sa lenvestiser i ganny anvoye partou kote.

I senpleman annan sa nesesite pou senplifye sa prosedir, e byensir pour le moman olye amelyore nou war keksoz vin pli difisil e pli konplike.

Avek bann reform apropriye, mon annan konfyans ki pou napa okenn rezon akoz en etranze pa kapab debark Sesel bomaten, fer tou lanrezistrasyon son biznes e kit pei aswar.  Mr Speaker, la mon dir avek Minis, mon krwar ladan.

Sesel i kapab vin dan premye 5 pei lo kontinan Lafrik omwen, dan fasilite fer biznes.  E mwan mon menm krwar ki Sesel parey nou kontan dir i kapab vin No.1 dan Lafrik!

 

(APPLAUSE)

 

HON WAVEL RAMKALAWAN

Mr Speaker i annan en mank lankourazman pour Seselwa dan sa Bidze.

Mon ti a kontan tande ki Gouvernman pou ankouraz Seselwa pou fer en dry dock, afen ki bann bato ton pa ava bezwen al Maurice e ki sa larzan i ava rantre dan nou lekonomi.

Mon anvi tande ki Gouvernman, olye ser biznesmenn Seselwa, i ava donn zot posibilite pou lans zot dan bann proze ki ava kree plis larises e plis lanplwa pour nou pei.  Sa lapreferans pour etranze i bezwen ganny eliminen.

Etranze i devret kapab rantre dan biznes ki Seselwa pa kapab fer, e non pa vin tir manze dan nou labous.  Letan ou dir avek Seselwa i annan limit lo lakantite lasanm i kapab servi pour en biznes touris, e rod tou kalite fason pou ser li, me selman pour etranze tou keksoz i glise, ki mesaz eski zot pe anvoye pour nou pep?   Mon ti fer sa kler dan mon Mosyon ki mon’n prezante letan mon’n demande ki plis atansyon i ganny donnen avek nou biznes Seselwa.

Letan nou pe koze i annan serten gran proze Seselwa – Seselwa, ki pou anmenn benefis pour nou pei e pou Seselwa ki pa’n ganny aprouve, oubyen pe ganny retarde.

Se sa kalite dyalog Mr Speaker ki mon annan letan mon koz avek Lasosyasyon Biznes Praslin ek La Digue, oubyen SCCI.  Zot santi ki napa ase latansyon ki pe ganny donnen dan sa ki zot anvi fer. Rezilta se ki bokou dekourazman ek fristrasyon akoz zot war etranze ki pran zot plas e larzan i kit Sesel san pey tax.  Petet Minis i devret osi pran konsiderasyon ki sa bann dimoun ti a kontan ganny konsilte avan ki desizyon i ganny pran.

E la Minis, kritik pour sa Bidze i pa’n annan okenn konsiltasyon, ni avek SCCI, ni avek Lasosyasyon Biznes Praslin, ni avek Lasosyasyon Biznes La Digue, ni ek bann fermye, ni ek bann dimoun dan Lendistri Lapes.

Par egzanp, zot in vin dan Lasanble pou antann avek nou, sa nouvo zafer kou GOP.  E deswit, zot in eksprim zot konsern.  Akoz zot konnen ki dan zot diferan lendistri, ou gard en dimoun pour en kantite letan akoz in vin ou lanmen drwat e pandan tou sa bann lannen in annan konfyans, konesans ek lenvestisman ki’n devlope ant sa travayer ek sa biznesmenn.

Me menm dan Gouvernman i annan etranze ki’n travay plis ki 10an, me erezman Gouvernman pa pey okenn GOP.  Alor akoz ki zot pe vin pini biznes prive Seselwa par enpoz en GOP R5mil par mwan lo zot?

Ki pou son konsekans? Eski sa pa pou zis fer monte pri?  Akoz parey nou tou nou konnen, bann tel fre i pou ganny pase lo konsonmater?  I annan en leokri parmi bann biznesmenn Seselwa, ki enkli bann kontrakter.

E mon demande ki Minis i rekonsider en tel desizyon atraver konsiltasyon serye ek tou dimoun konsernen.  En lot pwen kot pa’n annan konsiltasyon i konsern ogmant lakantite zour konze pou sorti 21 pou vin 24.

Parey monn dir Mr Speaker, nou, nou kontan straight talking, koze, adrese, balanse, fer tou dimoun realize.

Mwan koman en dimoun ki ti lager pour ki konze anyel, depi dan premye Lasanble, pou ki konze anyel i enkli zis bann zour travay e ekskli wikenn ek konze piblik, mon’n toultan siport travayer.

Mon senserman krwar ki sa desizyon politik ki pe ganny prezante avan eleksyon in ganny fer pour rezon politik e i bezwen ganny analize par anplwaye e anplwayer.  Nou bezwen regard son konsekans pour nou pei.

Byensir tou dimoun i kontan konze, me si nou pa travay ki pou son konsekans? Mr Speaker, fodre nou regard lefe azout 3 zour lo konze anyel osi an term finansyel.

Ozordi dan Sesel i annan anviron 55mil travayer, etranze e Seselwa e zot tou zot annan en drwa pou zot ganny konze 21 zour.  Alor 3 zour an plis i vedir 3 fwa 55,000 travayer ki tonm 165,000.  Mr Speaker, sa i lakantite zour non prodiktiv ki sa desizyon pou kree.

Aprezan annou get son vre kou.   Si ou konsidere e si ou met tou sa travayer lo saler minimonm, ki R5804, ou diviz li par 22.  Akoz ou travay 22 zour par mwan i tonm R264 par zour.

Prezan Mr Speaker, annou regarde konbyen sa 3 zour non prodiktiv i kout pei, lo baz saler minimonm, ou pran R264 ou miltipliye li par 165mil e ou ganny en total R43,560milyon, ki vedir pou sak zour, lo saler minimonm, i pou kout R14,520milyon.

Mr Speaker, me nou konnen ki pou dir sa i bokou pli o, mon, monn met li lo minimonm.  Mon poz sa la e mon demande ki en deba nasyonal lo sa size i ganny fer lo medya sosyal, lo SBC, lo TeleSesel, lo bann stasyon prive e piblik an zeneral.  Demann nou si vreman nou pei i dan en sityasyon kot i devret ogmant konze anyel sorti 21 zour pou vin 24 zour e analiz son konsekans.

Mr Speaker Air Seychelles byensir i reste en size ki konsern tou Seselwa. I annan bokou fristrasyon dan sa lakonpannyen.  Nou bann zenn pa war lespwar avek Air Seychelles e bokou pe kestyonn lavenir. Zot bezwen bokou lankourazman e sa lapey de baz ki zot gannyen pa donn gran lankourazman.

Sa i aplik spesyalman pour bann ki travay lo avyon. Me i osi enportan pou poz kestyon lo si nou ankor bezwen etranze avek gro lapey ek lavantaz spesyal la ki Air Seychelles i fer zis vol rezyonal?

Mon santi ki nou pa pe ganny dir tou laverite lo Air Seychelles. Kestyon serye ki nou poze nou pa pe vreman ganny larepons.  E la, Minis mon bezwen dir ki nou bezwen konnen ki pe arive avek sa size license ground handling,  ki nou ti koze isi dan sa Lasanble atraver PNQ ki mon ti anmennen.   Minis ti dir ki i pou donn nou detay, me ziska prezan napa nanryen ki’n ganny fer, me ki mannyer mon konpran Gouvernman i anvi kontinyen avek sa plan e ki ozordi i annan presyon sorti kot Gouvernman lo SCAA pou donn sa license.   Sankwa Board i ava ganny dizourd e nouvo dimoun i ava ganny apwente.  Dir nou kwa ki pe vreman arive, pour nou kapab pran en bon desizyon letan nou ariv lo sa sibvansyon pour Air Seychelles.

Eski Etihad pe fer kado R85milyon toulezan Air Seychelles, e se sa ki dan sa Bidze?  Donn nou detay silvouple Minis.  Me en keksoz i kler.  Nou dan LDS nou dir Erport Sesel fodre i reste pour Sesel.

 

 

 

(APPLAUSE)

 

HON WAVEL RAMKALAWAN

Eski i vre ki SCAA konmsi pe subsidies Air Seychelles e ki bann lavantaz ki Air Seychelles i annan lo Erport tel ki lwe biro ek VIP lounge i vreman pour zot lavantaz?

E Minis, dir nou akoz ki Air Seychelles, IDC ek Zil Air, en lakonpannyen prive pa pey okenn fre avek SCAA pour servis Control Tower?  E pourtan se sa bann lakonpannyen ki annan mazorite vol par zour. Akoz ki Zil Air i kontinyen ganny tou sa bann lavantaz?

Vi ki SCAA i sipoze annan proze redevlopman.  Eski sa bann lakonpannyen pa devret pey sa ki zot servi, e sa i ava donn en vre portre lo zot loperasyon?

Nou bezwen konn laverite lo Air Seychelles, akoz i nou laliny avyon e i annan bokou Seselwa ki ganny zot dipen avek sa lakonpannyen.

E la an pasan, ki’n arive avek plan pou permet nou bann zenn Seselwa pilot, bann ki’n fini retour isi pour zot kapab anvole e bann ki ankor pe train, ki zot lavenir?

Mr Speaker, dan sa Bidze, parey mon’n dir zot pe rod R85 milyon pour Air Seychelles.   Eski sa i fer ki Air Seychelles i soutenab?  E alor nou bezwen konnen.

En lot sif Mr Speaker, letan mon pe al ver konklizyon –  en lot sif ki Minis i bezwen donn en bon leksplikasyon lo la i konsern reveni ki nou pou gannyen koman Grants.  Sa sif in sorti 145milyon an 2019 pou vin 647 milyon pour 2020.

Vi ki sa sonm i rantre dan Bidze koman en reveni e apre sa i al osi koman en depans pour bann diferan Departman, mon ti a vreman apresye si tou Manm Lasanble ti a ganny en papye ki donn detay tou sa bann Grants ki ava enkli lekel ki pe donn nou sa larzan e pour ki proze?

Ganny nou byen kler, i nou responsabilite pour nou konnen.  E sa ki pa kler nou pou senpleman demann kestyon avek lespwar ganny larepons kler e onnet.

Mr Speaker, i annan bokou kestyon pou poze lo sa Bidze, me sa, me letan i manke.  Sa ki mon pe kontinyen lager avek pou konpran se lafason ki sa Gouvernman i panse.  I resanble ki lopital, kordgard ek lekol La Digue in vin en litani anyel ki ganny resite dan nou Lasanble.

Bann Digwa osi ki ti dan Lasanble Zedi pase e bann ki ti ekoute La Digue zot ti santi parey.  La zot in ganny dir ki kordgard pou pare an 2021.  Lekol an 2022 e lopital an 2021.

Kestyon ki mon demande.  Akoz ki Gouvernman pa pran en desizyon e dizon, komans avek lopital.  En batiman R15.5 milyon i kapab fini ganny konstri dan 6 mwan.

Eski sa Gouvernman pa fatige antann kestyon dan Lasanble, Kestyon dan miting piblik, konplent ek fristrasyon sa pep La Digue, lannen ale, lannen vini?   Vreman mon pa ganny konpran zot fason panse.  Problenm se ki sa bann prozeksyon lo kou ki zot prezante i monte toulezan.

Mr Speaker vre in ler pour sanzman dan sa pei e LDS i ava montre zot ki mannyer proze i ganny fer.

 

 

(APPLAUSE)

 

HON WAVEL RAMKALAWAN

Mr Speaker, pour Praslin e bokou lezot distrik dan Mahé se sa menm fristrasyon ki renye.  La mon pa konnen konbyen fwa mon’n antann Onorab Phillip Arissol demann kestyon lo lekol Anse Boileau.

Konbyen fwa Onorab Adelaide pe poz kestyon lo klinik Baie Lazare.  Toultan i pe arive, larzan pe vini.  Me selman pou fer Referendum, R20 milyon ti pou aparet en sel kou sorti dan lesyel!  Mr Speaker in ler pour nou pran sa pep o serye.

Minis Mr Speaker i dwa Lasanble en bon leksplikasyon lo larzan konpansasyon pour bann dimoun La Misère ek lezot rezyon ki’n ganny afekte avek polisyon. Dernyen fwa dan Lasanble Minis ti fer en deklarasyon brav e for.

I ti dir nou ki i pare pou al Abu Dhabi pour li al negosye larzan konpansasyon. Me Selman Minis pa’n dir nou nanryen ziska prezan lo ki zistans son negosyasyon in arive, si in ale, kan i pe ale, oubyen si son Gouvernman in les li ale.

Alor, mon ti a kontan ki i fer en deklarasyon kler, vi ki nou’n war ki aktyelman in met en sonm R37.5milyon dan Bidze pou peyman konpansasyon. Ekler lepep silvouple.  Lo sa menm size kot i annan neglizans lo lapar Gouvernman atraver bann Lazans, Mr Speaker nou dan LDS nou krwar ki sa i bezwen sanze.

Akoz ki en drayver Gouvernman ki fer en aksidan i ganny pouse e zot menm tir larzan pou repar sa loto, lo son konpansasyon?  Me selman letan bann gro sef i fer fot napa nanryen ki arive avek zot.

Dan bokou pei en Minis transpor i demisyonnen letan en aksidan tren i arive malgre ki pa li ki ti drayver tren.  Sesel osi i bezwen bouz dan sa direksyon.

Bann sef pa kapab zis les konpansasyon tonm lo Gouvernman;- savedir lo lepep Seselwa pou peye, kan se zot neglizans atraver mank aksyon oubyen move aksyon ki serten ka grav parey La Misère, PUC Praslin, fungus, koltar Cascade i arive. Sef i bezwen pran responsabilite ki al avek son lapey ki i anmenn dan lakour!

 

 

(APPLAUSE)

 

HON WAVEL RAMKALAWAN

Mr Speaker an konklizyon, mon bezwen dir ki larzan lepep Seselwa ki pou ganny depanse dan sa Bidze, i bezwen prodwi rezilta dan tou domenn. Dan Ledikasyon, sa plis ki 1bilyon i bezwen donn rezilta 1bilyon.

Lasante, li osi tou i bezwen donn rezilta 1bilyon.  Fodre pa ki Seselwa i kontinyen viv dan fristrasyon e dan lakoler.  Nou bezwen valer pour nou larzan.

Mon evit tou Seselwa ki annan responsabilite pou koup gaspiyaz, itiliz byen sa larzan. Me osi montre langazman.   Mon osi lans en lapel avek tou dimoun pou kontribye atraver tax ki zot sipoze peye.  Sa i apel nou pei.  Nou lazenes I bezwen bon ledikasyon.

Lasante tou dimoun i enportan.  En bon travay pour tou travayer i esansyel.  Sesel an antye i bezwen anmenn en lalit asarnen kont drog.  Annou koup likou sa bebet ki pe detri nou lazenes, e annou met en target pour nou napa nouvo adikt.

Bann zenn madanm ki lo eroin, silvouple pa met en zanfan o monde akoz i pou annan tro bokou problenm.  Swiv byen counselling e pran proteksyon.   Sorti dan sa drog e apre sa reorganiz zot lavi e konstrir en fanmir.    Si non, nou sosyete pou eksperyans en lot gro problenm.

Mr Speaker, mon anvi eksprim mon sipor pour bann travayer dan Lazans APDAR Mon fer diferans ant Lazans ek Sekretarya.   Mon anvi dir avek Ms Sabury ek son lekip, kontinyen zot travay for, kontinyen al rod bann adikt, e ed zot, fer zot retourn lo bon semen.

Nou pou siport zot dan zot travay.  Mr Speaker LDS i debout lo kote tou travayer e tou Seselwa.  Atraver zot, nou demande ki Bondye i beni nou zoli pei ek nou pep.  Nou pa pou zanmen les tonbe!   Mersi bokou.

 

(APPLAUSE)

 

MR SPEAKER

Mersi Onorab Ramkalawan.  Mon ava pas laparol avek Onorab Charles De Commarmond.  Leader Zafer Gouvernman dan Lasanble.  Onorab laparol i pou ou.

 

HON CHARLES DE COMMARMOND

Mersi Mr Speaker.  Bonzour Mr Speaker.  Bonzour Minis ek ou delegasyon.  Bonzour tou Manm Onorab isi prezan e nou bann envite dan Galeri.   Bonzour lepep Seselwa espesyalman zabitan Cascade.

Mr Speaker mon felisit sa lekip zenn e konpetan ki’n fer travay, en travay formidab pou kapab prepar sa Bidze.  Si zot entelizan e konpetan, savedir son travay ki zot in fer i en e i bon.  Savedir sa Bidze i en bon Bidze.

Mr Speaker, ankor enn fwa, Gouvernman in prezant son plan Nasyonal pou lannen finansyel 2020.  Gouvernman in demontre ki i kontinyen angaze pour sa pep e pou nou zoli pei Sesel.

Menm si bokou pei dan lemonn zot krwasans pe ralanti, konpare avek Sesel.  Minister Finans in prevwar en krwasans 3.5poursan pour lannen 2020 konpare avek krwasans global ki’n ganny predir lo 3.4 poursan an 2020.

En lot endikater fondamantal se pou nou annan ankor en Bidze sirplis primer pour lannen 2020, a en sonm R611milyon ouswa 2.5poursan nou GDP.

Mr Speaker, sa diskour in santre otour sis pilye tematik e atraver bann lanons ki Minis in fer, i kler ki koman en pep nou bezwen partisip plis, etre pli prodiktiv e pli performan, savedir perform pli byen dan lekonomi nou pei.

Loportinite i la e i bezwen ganny sezi par nou pep. Ladministrasyon Prezidan Faure in prezant Bidze 2018, 2019 e la Bidze 2020.   Bokou in ganny akonpli pandan sa 3an ki Prezidan Faure in pran leadership pou anmenn Sesel pli devan.

Mon a zis nonm detrwa bann legzanp. 1574 etidyan in benefisye en Scheme Laptop e sa ozordi I pour benefis tou etidyan konmansman depi premye lannen segonder ziska lekol pos-segonder.

Ogmantasyon dan saler minimonm pour sorti SR33.30 par erdtan an 2018 pour ariv SR 38.27 par erdtan an 2020.  Maternity leave in ogmante sorti 14 semenn pou ariv 16 semenn e paternity leave li in sorti 5 zour pour ariv 10 zour.

Rediksyon lo sick leave sorti 30 zour pou ariv 21 zour.  En plan konpreansiv pour Sekter Lagrikiltir pou ankouraz plis devlopman lokal.  En nouvo por lapes Providence ki ti ouver an 2018.

Nou’n vwar ogmantasyon dan larive touris Sesel.  Letan nou konpar 2017 ek 2019 sa logmantasyon i vin apepre 6 poursan.  Sesel pe anmenn en dezyenm kab soumaren e osi Gouvernman in aprouv pou en proze pour en lot kab soumaren par en operater lokal.

Plis ki 800 komodite e servis napa VAT lo la.  Lentrodiksyon en sistenm tax progresif lo saler ki tou Seselwa ki ganny en saler R8,555.55 e pli ba, pa pey okenn tax lo son saler.

E osi tou Seselwa ki ganny en saler R35,667 e pli ba par mwan, i osi ganny en benefis.

I annan osi en long lalis lo bann lezot peyman ki napa tax lo la, par egzanp, peyman gratwite, peyman lafen Kontra, peyman service charge espesyalman pour bann travayer dan Sekter Touris, peyman overtime, peyman bonus e 13enm mwan saler.

I sitan annan bann bon desizyon ki’n ganny fer anba leadership Prezidan Faure Mr Speaker. ki mon ti kapab kontinyen pandan lazournen antye.

Me Mr Speaker, Sekter Ledikasyon e Sekter Lasante I reste ankor de sekter kle dan nou sosyete e dan Bidze Nasyonal. Mon bezwen fer mazinen nou Lasanble ki le 11 Oktob 2018, Labank Mondyal ti klas Sesel 43enm dan 157 pei dan Lendeks Kapital Imen.

Nou vreman fyer pou sa pozisyon akoz sa se lefe kondisyon e prensip lasante, e ledikasyon, ki Parti SPUP, SPPF, Parti Lepep e United Seychelles in mete e aplike pandan sa 42an son legzistans dan nou pei.  Annefe, nou premye dan larezyon, e premye dan Lafrik.

Personn pa koz lo la akoz se zis nou ki’n fer Seselwa fyer ozordi, letan nou konpar nou avek bann pei vwazen.  Mr Speaker, en Bidze ki mon konnen bokou manm onorab pou koz lo la se Bidze saler.

Nou’n vwar dan liv Bidze ki total Bidze saler ti selman R2.47bilyon pou lannen 2018.  Me la pou lannen 2020, Bidze saler pou ganny prozekte pou en sonm R3bilyon.

I montre ou ki pandan zis 3 lannen sa Bidze in ogmante par R530milyon ouswa 21 poursan konpare avek depans aktyel 2018.   Sa se pour diferan rezon.  Nou ’n vwar ogmantasyon dan saler li menm.

Revizyon dan bann Scheme Saler.  Bann diferan Scheme ki nou annan.  allowance long service, plis travayer ki’n ganny anploye.  Mon konnen kekfwa i annan detrwa nou koman politisyen nou pe dir ki sa pa ase.

Kekfwa nou ava dir i annan lezot Scheme ki nou bezwen revwar. Me sa, Gouvernman, me sa tousala la Gouvernman i bezwen revwar li dan en kad ki soutenab.  Parey nou konnen okenn ogmantasyon saler dan Gouvernman i met presyon lo sekter prive pou zot osi ogmant saler.

Alors nou bezwen annan en responsabilite kolektif lo sa size ki mannyer nou edik nou popilasyon e osi la fason ki nou zwenn lekspektasyon nou bann travayer. Mon’n kontan pou note ki Minis in dir ki Gouvernman i bezwen asize, pou revwar sa striktir saler dan son totalite.  E sa i enportan.

Mon demann Minis pou fer li ase vit e vin avek bann rekomandasyon konkret lo sa size pour Bidze 2021.

Mr Speaker, mon salye zefor Gouvernman pou enkli nou bann housekeepers pour ganny sa allowance long service ki reflekte depi ler zot in konmans travay dan Gouvernman.

Desizyon pour zot ganny mete dan Cleaners Corporative ti desizyon Gouvernman, alors i pa pou annan lazistis si zot kantite lannen servis pour zot benefisye sa long service allowance ti pe konmans ganny konte zis konmansman 2009.

Alors avek sa desizyon mon krwar, lavwa bann housekeepers in ganny ekoute par nou Prezidan.  Mr Speaker, i montre nou ki nou Gouvernman i ekout son pep menm si i annan detrwa ki fer krwar ki sa i pa le ka.

Ozordi, bann diferan logmantasyon pe tous nou bann dimoun aze. Pansyon Retret sorti kot Lazans Proteksyon Sosyal ki pe ogmante par R500.

E osi i annan en group ki pou ganny ankor R500 – bann ki pa pe kolekte en pansyon avek fon pansyon, sa bann dimoun la zot pe ganny ogmante.  Alors pou sa group total adisyonnel dan lakour pou ariv R1000 par mwan.

Minis in mansyonn reform pour rasyonnaliz bann fonksyon ek progranm dan domenn servis sosyal, avek bi pour ogmant efikasite dan performans sa servis, e fer savings.

Mon demann Minis ki avek en tel reform ek lenplimantasyon efektiv, Gouvernman pou bezwen plis lenvestisman dan lezot servis e sipor pli striktire ki nou pou bezwen, an vi nou popilasyon ki pe vyeyi.

Nou bezwen revwar sa bann servis.  E restriktir li propeman.  Plis ners ek dokter par egzanp, ki baze dan kominote avek zot sipor lozistik ki a permet plis vizit kot lakour.

Plis lasistans adapte ki ogmant kantite letan ki en dimoun pour bezwen swen, oubyen ki fer li pli fasil pour donn swen en dimoun dan son lakour li menm.

Mr Speaker mon ti ava profit lokazyon alors pou demann Minis ki ler sa legzersis pe ganny fer zot sey zot mye pou konsantre e rod fason koman pour retir nou sitwayen dan sa serk depandans e servi sistenm proteksyon sosyal pou kapab anmenn bann fanmir e endividi dan bann aktivite pli prodiktiv, e sa i ava osi ed nou avek nou lafors travayer an mezir ki nou popilasyon i vyeyi.

Lefikasite e savings i i ganny akonpannyen par en logmantasyon dan kalite e availability bann servis pour bann ki vreman dan bezwen I fezab sa, i ok.

Me pou sa dimoun ki pou, ki pe evantyelman vwar en rediksyon dan son benefis sosyal, dan en lot kote i bezwen pe vwar bann meyer loportinite ki i kapab sezi.  Pou ki i pa reste toultan lo benefis sosyal.

Alors, mon demande ki i annan en lentegrasyon e kordinasyon ant bann Minister, Departman e Lazans tel ki Minister Ledikasyon, Lasante e  Minister Lanplwa pour ki zot kapab delivre pli bon kalite servis ki ava annan bi redwir vilnerabilite e ogmant prodiktivite dan kous nou popilasyon pli pov.

Personn pa devret ganny kit deryer Mr Speaker. Sa i prensip nou parti United Seychelles e nou devret pe met li an pratik.  Dan Bidze i osi annan logmantasyon pou home carer sorti SR6,060.60 pour ariv SR6,633.47 bann ki travay a plen tan.

Mon lans en lapel pou sa bann home care, pou ki sa bann home carer pou annan plis devouman dan zot travay e donn sa sipor neseser nou bann dimoun aze. I annan ki travay ek devosyon e mon demann zot pou kontinyen.

Mr Speaker, bokou pou ganny dir ki Gouvernman pa pe get pri lavi ditou dan sa Bidze. Sa i vreman zot pe anbet Seselwa.  Si sa kalite komanter i ganny fer.

E ozordi en fanmir mazorite son larzan i ganny servi dan lwe lakaz.  E sa i vreman ser. Alor Gouvernman pe fer sir ki omwen 549 fanmir i benefisye ek zot nouvo lakaz pandan 2019 a 2020.

E osi 461 kare later I ganny met a dispozisyon bann fanmir, pou fer zot lakaz pandan lannen 2019 a 2020.  An total, lakaz ek later se sa pou benefisye 1,010 fanmir.  Savedir plis ki 1000 fanmir Seselwa.

Gouvernman pe osi revwar tax e redwir li tax lo bann lakour rezidansyel sorti 15 poursan pou vin 3 poursan.  Mon swete ki sa bann benefis, parey nou dir i a ganny pase ek bann kliyan.

Mon demande Minis, si Gouvernman pa kapab met bann mekanizm an plas, ki pou fer sir sa bann benefis a tous nou popilasyon ki ankor pe lwe lakaz.  Parey mon dir, ki i annan en rediksyon reel dan bann pri.

Mr Speaker, in osi annan lanons dan Bidze lo en revi Scheme sibvansyon pour lakaz ki fer ki bokou plis dimoun pou kalifye, e sa i fantastik.

Mon osi demann Minis ki son Minister i travay konzwentman avek Minister Responsab pour Lakaz ek Later, pou fer sir sa bann lanons ki Minis in fer pa ganny reste lo papye, me en dimoun i vwar realite, ki vwar sa benefis reel.

Bokou fwa, Minis, Minis Finans li i anons bann bon keksoz, bann bon mezir.  Me i annan lezot Minister ki kontinyelman trenn zot lipye e fer keksoz vin difisil pour nou popilasyon.

Nou demande alor, ki i annan improvement lo la.  Mr Speaker, bokou daycare dan bann distrik ki enkli distrik Cascade pour ganny konstrir. E sa i kler dan sa Bidze ki’n ganny prewar.

Sa i osi pou ed bann fanmir ki bezwen sa servis a en pri redwir vi ki Gouvernman pou konstrir e met a dispozisyon sa bann daycare avek sekter prive.  Dan Bidze i osi annan ogmantasyon pour bann fanmir dan lasistans daycare ek child minding.

Ankor Mr Speaker, mon vreman salye sa propozisyon pour entrodwir travay fleksib dan Gouvernman.   Souvandfwa nou vwar nou bann madanm ki’n fek ganny baba pa kapab retourn travay toudswit.

Alor, sa mon krwar, i ava ede, i ava en benefis pour zot dan sirkonstans ki zot kapab travay kot lakour pour en serten letan avek bann target. Teknolozi konmela in avanse e sa a fer li posib pou annan sa amelyorasyon.

E mon krwar i en bon desizyon ki Gouvernman in pran.  E mon swete ki lezot sekter, menm sekter prive i swiv sa legzanp.

Alor Mr Speaker, mon akey lanons Minis ki Gouvernman pou konstrir plis daycare centers dan bann distrik e ki Gouvernman pou osi entrodwir flexible working hours ki mon’n mansyonnen.

Sa i ava ede pou siport bann manman an partikilye e retir serten sa bann baryer ki limit zot akse ek bann servis e osi anpes zot ganny akse ek bann loportinite ekonomik, pour ki zot kapab provide pour zot fanmir olye depan lo  sa servis e lasistans sosyal.

Mr Speaker, dan Bidze, Gouvernman in anons Prozedlwa Partenarya Piblik, Prive, savedir PPP.  E sa i ava ede pour annan en lankadreman an plas pour protez Gouvernman e osi protez sa biznes, sa devlopman ki ava ganny fer.

Mon demann Minis ki Gouvernman i prepar bann lalis proze apard sa ki, sa enn ki’n ganny anonse lo Ile Aurore.   En fason ki Board Lenvestisman i a kapab konmans prepar pour fer marketing e prepar sekter prive lokal dan sa traze, ki zot osi zot a ganny involve e zot ava kapab benefisye.

Minis, en defi mazer ki nou bezwen travay pou amelyore se sa ease of doing business ki nou’n ariv 100enm lo lalis.  Nou bezwen tir tou sa lanpayaz ki egziste, ki a fer biznes devlop e anmenn plis reveni pour Sesel.

Nou bezwen get sak defi ki egziste ozordi dan sak sa bann mezir ease of doing business. Nou bezwen travay konman en lekip Mr Speaker.  Si i annan Lalwa pou sanze, silvouple anmenn devan.

Si i annan plis Bidze ki bann sekter i bezwen, zot bezwen dir, e dir nou dan diskisyon Bidze.  La mon pe koz ler sa bann antite i vin devan nou dan Staz Komite. Si i annan en mankman dir, en fason ki nou kapab ede pou amelyore.

Sa klasman 100enm Mr Speaker, parmi 190 lekonomi dan rapor ‘’doing business an  2020, parey Minis in dir dan son diskour Bidze i pa akseptab.  Ler nou regard sa rapor nou vwar ki sa de endikater kot Sesel in pli mal performen, se sa bann prosedir pour Komans en biznes.

E dezyenmman sa bann prosedir pour ganny akse avek kredi.   Nou konnen ki akse avek kredi i en size ki’n ganny souleve a plizyer repriz par bann ki dan biznes e osi bann ki anvi antre dan biznes.  Sa i a kapab ganny eksplike par lefe ki i annan en mankman lo acceptable collateral.

Bann Labank i prefere aksepte selman bann propriyete immovable koman garanti lo loan, ki efektivman anpes bann dimoun ki pe rod en loan, servi bann movable assets tel koman levanter, bann masin, stok e ensidswit koman garanti.

Nou’n deza tann Gouvernman fer mansyonn. Fer mansyonnen ki travay pe ganny fer pou etablir en collateral registry Mr Speaker.  E alors mon ti a kontan demann Minis ki zistans sa linisyativ in arive e pour ki i ganny akseler-e?

En collateral registry byen etablir i ava sirman en pa an avan lo kote akse avek kredi.  Lo sa endikater ‘’starting a business’’ nou vwar ki an mwayenn i pran e dimoun 32 zour pou konplet bann prosedir pour komans en biznes isi.

E dan bann pei OECD sa pe ganny fer selman dan 9 zour an mwayenn.  Alor mon demann Gouvernman pou revwar bann prosedir ki ganny servi kot Registrar par egzanp.  Pou ki nou ava kapab amelyor nou klasifikasyon lo sa endikater.

En lot sanzman dan Polisi se lanons pour bann GOP ki pou ogmante sorti R500 par mwan pou ariv R1000 par mwan, si en travayer etranze i dan pei plis ki 6an e R5 mil par mwan si en travayer etranze i dan pei plis ki 10an.

Mr Speaker, nou bezwen donn plas nou Seselwa kalifye dan Sekter Tourism espesyalman.  E lezot sekter ankor pou pran bann pozisyon dan management.

I pa akseptab, i pa akseptab fer en etranze reste 10an Sesel san ki nou met nou Seselwa dan sa bann pozisyon otan ki posib.  Menm bann zanfan lekol dan enn zot progranm televize tou dernyerman in vwar sa byen kler.

Nou pa kapab fer nou bann zenn al Liniversite e perform byen, vini avek bann bon rezilta e apre zot pa progrese dan zot karyer.  Sa fodre i arete toudswit Mr Speaker.   Fodre ki sa Seselwa ki vin lanmen drwat dan sa biznes.  E non pa sa etranze.

 

(APPLAUSE)

 

HON CHARLES DE COMMARMOND

Me mon panse kekfwa i annan ankor en pe diskisyon pou fer otour sa size o firamezir ki nou devlope e nou koz lo sa issue dan Staz Komite petet.  Mr Speaker, mon vreman apresye sa mezir ki Gouvernman in met dan sa Bidze an sa ki konsern peyman davans pour bann pti kontrakter.

Parey nou okouran in annan bokou konplent lo retar ki annan dan Gouvernman pou pey kontrakter a ler.  Ladres Bidze in par kont klarifye tre kler ki Gouvernman i annan li en Polisi lo depans e peyman, ki donn lenformasyon lo kantite zour i pran pou li, pou li pey en invoice.

Alor pou evit konplent ki pa neseser, mon enplore ki tou biznes i familyariz zot ek sa bann dele letan.  Annefe en Polisi kler, sa Polisi i kler.  E i dir ki Gouvernman annan li 30 zour pou pey en invoice.

Okenn peyman ki ganny peye apre 30 zour i annan en lentere ki ganny peye lo la.  Sa i osi a zour avek norm enternasyonal. Me par kont Gouvernman in al pli lwen, pli lwen ki sa.   E i dir ki i pou rektifye tou peyman pou son bann suppliers dan 7 zour.

E la nou pe koz 7 zour travay.  E pou bann pti proze lenfrastriktir 14 zour travay e bann pli gro proze 21 zour travay.  Mon swete ki tou sa i ganny pas a laksyon e nou pa zis koze.  Mon krwar ki i bezwen ganny fer arive sa.

Sa i fer alor ki i donn Gouvernman ase letan pou fer son bann prosedir entern avan ki i pey en invoice pou asire.  Parey bann konpannyen prive ki zot osi zot fer.  Ki sa louvraz oubyen sa purchase ki’n ganny fer i konplet oubyen dan bon fason, dan bon kondisyon avan peyman i ganny fer.   Pou lannen 2020 Mr Speaker, Gouvernman pou prezan met a dispozisyon en lot benefis pou bann kontrakter class 3 ek class 4.

En davans ki pou ekivalan 20 poursan kou en proze ki en kontrakter i gannyen.  E sa i pou ganny donnen parey nou dir davans. Sa fasilite i apel Mobilization Advance Payment, MAP, pou aplik pou proze anba R700 mil.

Sa i pou ganny donnen san lentere, e in ganny entrodwir pou ed bann pti kontrakter ek son bann depans mobilizasyon e osi bann depans preliminer lo en proze.

Parey nou konnen, Sesel en bon pe kontrakter i annan problenm likidite, e sa i enn bann rezon mazer akoz kontrakter i met bokou presyon pou Gouvernman pey li osito ki in konplet en proze.

Menm avan sa dele letan i ganny donnen dan Polisi peyman ek depans.  I enportan pou en dimoun alor, i asire ki i annan ase likidite oubyen finansman avan i antreprann dan en proze.  Me anvi nou bann defi Mr Speaker ki egziste pou bann pti e mwayen lantrepriz isi Sesel, Gouvernman in met an plas sa fasilite pou ed zot.  Mon espere ki bann kontrakter class 3 ek 4 i servi sa fasilite pou ed zot mobiliz zot resours boner, e konplet bann proze Gouvernman ki zot ganny awarded a tan.

Sa i ava fer alor redwir retar dan lenplimantasyon bann pti proze.  E la sirtou bann pti proze distrik. Me ankor enn fwa Mr Speaker, la nou demande, ki si nou pa vwar aksyon ki swiv nou pou trouv nou e tou sa bann keksoz ki nou pe koze, nou vwar zot lo MAP.

Mr Speaker, mon oule demann Gouvernman a traver Minis, pou revwar zot sistenm lankadreman ki egziste ozordi lo lenplimantasyon proze. Bokou larzan in ganny donnen dan Bidze, me lenplimantasyon proze i ankor en defi pou Gouvernman.

Dan Bidze, Minis in anons revizyon dan Scheme Saler pour bann zofisye proze dan bann Minister, Departman ek Lazans apartir 2020. Alor mon demande ki en sistenm performans i ganny etabli pour ki sa bann zofisye proze i vin pli accountable.

Nou pa kapab kontinyen donn larzan dan Bidze apre nou war ki proze pa’n ganny enplimante. Sa i pa akseptab Mr Speaker.

Mon osi reste ankouraze ler mon antann ladres Bidze fer mansyon lo reform lo tax biznes Mr Speaker.

Sa revi i vin a tan e o moman ki lezot reform lo tax parey VAT e income tax ki’n konplete.  I neseser ki tax lo biznes i ganny re balanse pou fer li pli ekitab, anvi ki parey nou’n antann, selman serten biznes ki pe kontribye plis dan pey biznes tax.

Sa i ava osi ed SRC avek son ladministrasyon, sirtou nouvo ladministrasyon tax, anvi ki sistenm konmela i pa senplifye. Sa i demontre lentansyon nou Gouvernman pou soulaz e fasilit bann biznes e fer zot lenvestisman vin pli fezab, anvi konpetisyon lokalman e enternasyonalman.

Nou swete ki Gouvernman i met  sa koman en priyorite an 2020 pou vin avek en regilasyon lo transfer pricing. Ki a fer nou annan en pli bon apersi lo bann konpannyen avek bann headquarters aletranze lo ki fason zot transfer larzan kot zot headquarters, dan en fason ki pa abes nou koleksyon tax.

Nou osi a lonterm, bezwen reviz sa bann kantite Double Taxation Agreements, Mr Speaker, DTAs, ki osi ede akseler-e repatriyasyon larzan deor dan bann headquarters.  Par kont, pou promot lenvestisman, Gouvernman pou still permet biznes dan serten sekter benefisye avek accelerated depreciation.

Me selman ziska 100 poursan valer son asset.  Sa i ava ed biznes pour kontiny ek zot lenvestisman.  Sa i ava fer alor ki fardo tax pa a ganny met tou lo zis serten biznes, me sa i avan prolonz lo tou biznes dan en fason ekitab e fair.

Parey nou’n antann, Gouvernman pe konsider entrodwir en rate 15poursan biznes tax lo profi anba 1 milyon, e 25 poursan lo profi ki desot 1milyon.

Sa i vedir ki bokou biznes pou benefisye, espesyalman bann ki dan rezim 30poursan.  An se moman lo zot profi ki par lao 1milyon.  Avek letan ler sa reform in stabilize, mon demann Minis ki bann biznes i pey tax lo en nivo 33poursan, pou zot osi ganny align ek sa nouvo rate.

Sa reform Mr Speaker, pou ganny fer par, an staz pou asire ki Gouvernman i kapab abzorb pert dan reveni gradyelman, kot i pou annan rediksyon dan rate business tax e osi ler bann lezot regilasyon i vin an plas pou asire ki nou baz tax i ganny proteze.

Mr Speaker dan Bidze 2020, Minis in osi anons reform dan tax biznes ki gouvern bann aktivite fabrikasyon anba International Trade Zone Regime.  Ozordi i pa zis letan en lakonpannyen parey IPHS, IOT, Chelle Medical pa dan tax regime biznes.

Savedir zot pa peye, pa kontribye akse.  Me ou annan ou lezot konpannyen, parey Land Marine, Takamaka Bay e lezot ankor ki dan sa tax biznes.   Eski sa i zis?  Mon krwar ki sa i annan en keksoz ki bezwen ganny fer.

Alor avek sa bann lamannman i pou fer sir ki sa bann lakonpannyen zot osi zot a vin dan sistenm biznes tax.  Zot a fer zot kontribisyon zot osi.  Akoz mon aprann osi ki la zot pe, zot pe appeal, akoz zot pe perdi bann benefis ki zot ti pe gannyen, bann exemption.  E la zot pe appeal lo tou sa.

Mon demande ki Gouvernman i revwar ki mannyer e lekel ki ti donn sa bann exemption sa bann konpannyen a sa letan.  Nou bezwen al gete dan tou sa bann keksoz Mr Speaker.

Dezyenmman, Mr Speaker, Gouvernman pou aboli personal income tax lo peser e artis ki ganny anploye. Sa de kategori pou prezan pey en fre anyel ki pou enn rezonnab – tre rezonnab menm mon kapab dir  olye en income tax.  Sa i pou fasilit administrasyon peyman en fre sorti kot sa, dan sa de sekter. Gran zefor osi pou ganny fer pou adres sekter enformel dan nou pei.

Mr Speaker, bokou biznes pe ganny afekte par bann biznes dan sekter enformel. Sa bann biznes pa ganny anrezistre e osi pa pey tax, konpare avek enn ki li i dan sekter formel.

Mon espere alor ki sa i ganny adrese, e mon osi lans lapel a bann Lazans konsernen tel parey Lapolis ek SLA pou entansifye zot latansyon pou detekte sa bann aktivite.

Mon dir sa Mr Speaker, akoz sa i fer alor ki bann biznes ki zot, zot pey zot tax, zot apre mekontan ler zot vwar bann tel aktivite koumsa ki dan sekter formel pe arive, e apre zot reazir par pa pey zot tax zot osi.

Oubyen zot fer demann pou redwir tax, zis akoz zot pe perdi biznes avek sekter enformel.  Sa sityasyon alor i bezwen ganny adrese olye nou servi business tax koman solisyon.  Nou pa kapab zis takse dimoun.  Me selman i pa pe fer profi, e la ou ganny unfair competition osi.

E lanons alor lo corporate social responsibility Mr Speaker.  Sa Corporate Social Responsibility Tax ki mon pe koze,  ek Tourism Marketing Tax i osi ankourazan.  Sa ki Minis in anonse lo sa de tax i ankourazan.  Akoz sa ti de tax ki ti pe ganny sarze lo reveni ki pa dezirab.

Sa i ava osi alor fer ki bann biznes ava lib pou zot deside ki zot anvi sponsor avek sa larzan.  Alor nou apresye ki Gouvernman pou fer sa tax deductible lo business tax lo komansman, e apre aboli sa tax a mwayen e a long term.

Parey nou konnen Mr Speaker, sa bann tax ti ganny entrodwir espesyalman pou bann biznes ki pa ti pe neseserman fer profi, an vi bann incentive zenere ki zot ti pe benefisye.

Alor koman en mezir entermedyer, sa de tax ti ganny entrodwir pou asire ki omwen serten kontribisyon ti pe ganny fer par sa bann biznes oubyen sekter.  Me prezan, reform i neseser pou fer ki nou selman tax en biznes lo son profi e non pa lo son reveni.

Mr Speaker, bokou resours in ganny ogmante pour bann Lazans ki enforce ek bann Lotorite regilatwar, lo kote konbat bann blansisaz larzan e pour e pou lit kont finansman terorizm.

I vreman enportan pour fer sir ki nou Sekter Finansye i ganny proteze. Minis in mansyonn bokou Lalwa ki pe ganny revwar lo sa size. Nou  isi dan Lasanble nou bezwen pran nou responsabilite, nou isi dan Lasanble nou bezwen pran nou responsabilite, pou fer sir sa bann Prozedlwa i adres okenn defayans ki egziste ozordi.

Mon konnen i pou annan bann biznes ki siport nou lo tou le de kote latab, ki pou esey dir fer le kontrer.  Me nou, nou bezwen pran nou responsabilite kolektiv lo sa size e pa mazin bann bezwen personnel koman bann parti politik.

Mon krwar nou bezwen vwar lentere pei e Lanasyon avan nou lentere nou bann parti politik.  Mon oule zis lans sa lapel en pe for e kler lo la, Mr Speaker pou nou koriz bann keksoz ki neseser ganny korize.

An konklizyon Mr Speaker, mon salye zefor ki Gouvernman pe fer, pour fer sir ki nou close sa chapter lo ka konpansasyon pour bann dimoun ki reste kot landrwa ki ti prodwi koltar Petit Paris. E dan Bidze sa pour ganny finalize avan Zen 2020.

I kler Mr Speaker ki bann dimoun in vreman ganny afekte.  E ki bann passed administration dan Seksyon Koltar pa’n fer zot louvraz parey in ganny dir, par Leader lopozisyon, pa’n fer zot louvraz ase byen dan sa konteks.  E zot pa’n pran bann mezir a tan.  E i kler ki Gouvernman i bezwen anmenn en closure lo la.  E nou demande ki sa i pa ganny okenn lezot delay ankor.

Bann zabitan Cascade, Mr Speaker pour lannen 2020, larzan i ganny mete pour rekonstriksyon Sant Kominoter, ki nou konnen in brile, i annan en pe letan.   E osi ek daycare center Cascade.  Tou le de proze i pou ganny konkretize atraver sa Bidze.

I annan osi dan Bidze pour konstriksyon 24 younit lakaz anba kot Ex-PSSW ki ekspekte konplete an Out 2020. Sa pou kout Gouvernman R32.8milyon. Gouvernman osi pour konmans son plan 3mil lakaz pou sa prosen 5an.

E zabitan Cascade pa’n ganny oubliye ladan. Pour annan  osi 56 lakaz dan 2enm faz redevlopman Ex-PSSW e osi 16 lakaz dan Upper Petit Paris.  Tou sa, Bidze pe revwar.  E ki bann keksoz i  pou bezwen ganny fer.

E la nou swete ki ankor enn fwa, nou demande ki bann proze i ganny bouze ase vitman. Nou bann zabitan Cascade Mr Speaker,  pour osi kalifye dan sa konstriksyon 1,034 lakaz lo Ile Aurore, sa parmi plizyer lezot proze ki pou annan pou Distrik Cascade dan sa Bidze.

Tel ki bann semen, tel ki finisyon nou proze bazar ki tou dimoun pe aklanmen, pe vwar li zoli byen.  E tou bann lezot trotwar e tou, nou annan plizyer, plizyer proze.  Gro e petit ki pou ganny fer e ganny dil avek dan sa Bidze.  Mr Speaker, i montre ki Gouvernman i pe get bann distrik.  E la sirtou mon pe koz lo Cascade.

Mr Speaker, lo sa Bidze, i annan bokou ki’n ganny dir.  E mon demande ki i annan en travay kolektif dan zeran e lenplimantasyon par Gouvernman.  Akoz Bidze i pou reste lanmenm la lo papye, parey mon’n dir boner, si napa en bon management e en bon ladministrasyon e lenplimantasyon par Gouvernman.

Nou bezwen reste for konman en Gouvernman Mr Speaker.  E travay pli dir pour Seselwa vwar konman sa prosperite pe ganny partaze avek tou dimoun. Mr Speaker, mon demande ki Prezidan Faure i kontinyen travay for e tre for pour kontinyen anmenn nou pei e nou pep lo sa lot nivo.

Mon demann ki tou Seselwa pou ralye deryer li, i ralye deryer Prezidan Faure pou fer li konfyans.  Akoz Ansanm avek li, Parti United Seychelles pou kontinyen travay dir pour plis prosperite pour pep Seselwa.

Mon demande ki Bondye i kontinyen beni nou pep, e nou nasyon, e nou pei, pou anmenn nou lo sa lot letap dan prosperite e dan lape.  Mersi bokou Mr Speaker.

 

(APPLAUSE)

 

MR SPEAKER

Mersi Onorab De Commarmond.  Bon nou ava pran en break e nou ava retournen 11.15 pou nou kontinyen avek repons lo Bidze.

 

(BREAK)

 

MR SPEAKER

Bon nou ava kontinyen nou travay.  Mon ava demann parliamentary reporter pou apel Minis avek son lekip.  Bon zis avan nou repran nou travay, mon ti a kontan felisit le 2 Leaders.

Mon krwar zot in set ton pou sa deba lo Bidze 2020.  E avan nou kontinyen avek tou lezot Manm, mon pou zis fer en lapel ki bann Manm i konsantre zot repons lo diskour ki Minis ti fer semenn pase, ti delivre isi dan sa Lasanble.

E osi tou the budget book, bann figures ki ganny prezante avek nou.  Mon pa pe toler okenn latak personnel lo okenn Manm, menm lo lezot dimoun an deor.  Le 2 Leaders in set the tone e annou swiv dan sa direksyon.  Avek sa mon ava donn laparol Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun, e mon dir en bonzour spesyal bann zabitan Mont Buxton.  Akoz defayans Bidze 2019, mon ti vreman krwar ki ladministrasyon Mr Faure ti pou vin avek en Bidze pli realis pour lannen prosen.

En Bidze realis se kan en leta i depans selman sa ki i annan e planifye devlopman ki i konfidan i annan kapasite pou akonplir.

Parey Dirizan Lopozisyon in dir  bomaten ladan i bezwen konteni bann desizyon rezonnab e nou bezwen annan kouraz pou pran bann aksyon ki fer keksoz bouze.   Minis Loustau-Lalanne pou konpran ki nou pe koz lo la.

Si nou servi poursantaz bann proze ki ti planifye pour sa lannen e ki’n aktyelman ganny akonplir.  Nou kapab dir ki performans Gouvernman pour sa lannen i pa’n a laoter.

Minister ki’n fer pli byen, petet in akonplir apepre 50 poursan par lao son bann proze ki i ti’n prozekte.   E pli ba i annan  ki ziska 2 poursan.  E parey dirizan lopozisyon in dir an mwayenn, performans in apepre 30 a 35poursan.

Resaman dan Bidze Siplemanter, letan nou ti pe fer deba.  Ou’n antann nou lo sa kote latab pe argimante ki performans Gouvernman pou maksimiz Bidze ki nou ti’n donn zot pour sa lannen in demontre en performans ki pa efektiv e in mank planifikasyon.

Nou pa ti pe egzazere dan nou analiz.  Mon reste konvenki ki lannen 2020, i pou menm zafer.

Sa logmantasyon 9 poursan par lao en Bidze R8.5 bilyon ki ti’n prevwar pour sa lannen, pou mwan i senpleman vedir Gouvernman pe met larzan dan bann landrwa kot i krwar i pou fer dimoun kontan.

E sirtou la ki nou pe al antre dan lannen eleksyon prezidansyel, Prezidan sortan i krwar ki sel fason pou raport sa lakours se par met otan douser ki posib dan sa Bidze pou diferan kategori voter.

Demann ou lekor si sa Bidze pou anmenn en nivo prosperite ekonomik pli o pour ou avek ou fanmir e ki degre i pou devlop nou pei koman enn pli modern pou sa prosen 12 mwan?

Letan Minis Finans i dir nou ki krwasans prodwi domestik brit reel 2019 in ganny revize pli o lo 3.9 poursan konpare ek estimasyon ki ti 3.5 poursan letan Bidze ti ganny prepare,  nou konstate ki sa larises nou pe prodwir koman en pti leta zil an gran parti pe al dan bann depans pou redwir bann lenpak negativ dan nou pei lannen prosen.  Bidze prizon pou kout nou R84milyon.

Lafors Defans pe kout pei R330 milyon.  Kestyon se apard Coast Guard avek Air Wing, ki mannyer nou mezir prodiktivite lezot younit SPDF pour Sesel?  Lalit kot drog pe kout nou par lao R125 milyon.

I osi annan kou pour bann konsern lanvironnman parey lerozyon avek polisyon ki pe menas nou legzistans.  E finalman bann defi lasante e sosyal ki bezwen ganny adrese atraver selman 2 konponan Bidzeter ki ekivalan 24 poursan nou Bidze antye pour en sonm plis ki R2.4bilyon.

Mr Speaker, si nou en nasyon ki reflesir progresivman, nou a onnet avek nou lekor ki dezormen, nou bezwen rekalkil progre nou pei e adopte bann endikater ki mezir progre reel e non pa zis depans ki comme dir Leader lopozisyon i anboufte nou Bidze lannen ale, lannen vini san vreman okenn rezilta tanzib.

Sa detrwa zour ki’n pase bann rezidan Mont Buxton e osi serten biznes in eksprim dezapwentman e fristrasyon avek Bidze 2020. Dan zot lopinyon, sa Bidze pa’n sezi santiman nou popilasyon e i pa adres bann size ki zot ti anvi vwar.

An gro sa i, rediksyon dan kou lavi, rezourd problenm drog, sirtou anpese ki drog i rantre dan nou pei.  Redwir depans Gouvernman e par konsekans donn Seselwa ki pe soutenir sa Bidze en tax break.

Amelyor lefikasite avek performans servis piblik.  Moderniz lanvironnman pou fer biznes e par konsekans ogmant lenvestisman par Seselwa e osi byen ki etranze.  Annan plis lenvestisman dan lakominote kot tou dimoun i reste.

E kree en lavi konfortab pour tou dimoun.  Lannen pase mon repons lo Bidze ti koz lo sa middle income earner ki pe anmas sa fardo tax lo tou servis avek prodwir ki i servi e dir ki in ler pou li ganny en tax break.

Mon akeyir lanons sa rediksyon 15 poursan tax lo alokasyon lakaz pou vin 3 poursan.  Mon apir demann lopozisyon, demann Dirizan Lopozisyon ki Gouvernman i asire ki tou dimoun i fer son kontribisyon zis anba nou rezim tax.

I pa akseptab ki 2an ki apre ansyen Minis Finans, Dr. Larose ti devwal en plan pou met bann striktir an plas pou asire ki tou envestiser e biznes i pey zot par dan lekonomi.

Ozordi nou tande ki plis lotel, biznes komers, konstriksyon avek lavant an gro pe vol Sesel dan gran kler.  Letan nou antann ki selman 30 lakonpannyen pe pey 80 poursan tou nou tax e ki lo lot kote 717 lakonpannyen pa pe peye akoz zot dir zot pa pe fer okenn profi.  Ladan 77 poursan se bann biznes komers avek lavant an gro, i kler ki sa i en fo realite.   Selman sa Bidze li i pe met en fardo finansyel R121.5 milyon  an plis lo Seselwa pou sibvansyonn Air Seychelles, pey konpansasyon zabitan La Misère, Petit Paris e Baie Ste Anne Praslin.

Menm si pa nou ki’n okazyonn polisyon delo, afekte zot avek loder koltar e polye zot lanvironnman avek tapaz zenerater elektrisite.  Lo size konpansasyon La Misère, Seselwa pa dakor ki taxpayers ki pou bezwen pey sa R75 milyon.

Zot anvi konnen ki demars Minis Finans in fer pou ganny en bon parol avek Abu Dhabi?  Parey Leader lopozisyon in demande.  Eski Minis in ale laba? Kan i ti pran avyon e ki zot in dir li? Eski taxpayers Seselwa pou ganny ranbourse?

Lo size det Air Seychelles, nou bezwen en lesplikasyon kler lo sa sonm $6milyon ki taxpayers i sipoze peye toulezan pou sa prosen 5an.

E ki rol Gouvernman Abu Dhabi, ki fodre pa oubliye i annan 100poursan par dan Etihad Airways, partner stratezik Air Seychelles dan sa laranzman.

Parey Dirizan Lopozisyon in dir bomaten, nou pa pou kapab aksepte ki sa i fini par en manev pour bann Arab pran kontrol servis ground handling lo nou erport akoz nou vwar nou dan difikilte pou re pey det Air Seychelles.

Dan milye tousala, fodre lepep Seselwa i pran kont ki nou annan en Gouvernman ki pa pe azir responsab.   La nou pe vwar nou andete akoz bann ki responsab pa’n rann kont lo zot responsabilite vizavi sityasyon La Misère e osi dan move zesyon Air Seychelles.

Mr Speaker, i pou enportan ki Gouvernman etablir en Komisyon lanket dirize par en Ziz pou nou konnen, lekel ki responsab e akoz nou pe pey R75milyon dan ka La Misère.

 

(APPLAUSE

 

HON GERVAIS HENRIE

Sa mank responsabilite i en rezon akoz nou bezwen en sanzman dan brans Egzekitiv lannen prosen.

Letan en Gouvernman pa pran son responsabilite konsekans i grav.  Sa ki nou vwar ozordi se lepep Seselwa i bezwen pey lepokase.

Par egzanp, i annan en pe letan, mon distrik pe ganny neglize akoz inabilite Gouvernman pou desarz responsabilite in ganny konfye pou fer, e mon pa vwar keksoz pou sanze avek sa Bidze ki devan nou.  Mon a sit en deklarasyon fer par Vis- Prezidan Meriton pandan en vizit Mont Buxton an Out 2016.

I ti dir lobzektif prensipal son vizit sete, sitasyon “pour fasilit redevlopman bann sou distrik Mont Buxton ki malerezman pour en bon pe letan in sou devlope.”  Fen  sitasyon.

3an in pase e ladministrasyon Mr Faure pa’n onor son promes pou anmenn devlopman dan nou bann sou distrik.  Mont Buxton pa parmi sa 10 distrik ki pou ganny nouvo Daycare Centre an 2020.

Malgre en alokasyon R5 milyon dan Bidze sa lannen, pour amelyorasyon bann biro ladministrasyon distrik, sa ki pou Mont Buxton i ankor tel lekel.  Nou ti ganny promet ki grannrout prensipal Mont Buxton pou form parti dan Plan Nasyonal re sirfas bann semen primer,  malerezman zis 2 semen segonder ki nou’n reisi ganny SLTA pou met koltar lo la sa lannen.  2an apre ki bus stop Dan Lenn ti ganny demolir, finalman in rekonstri.   Me depi dernyen eleksyon prezidansyel en nouvo bus stop dan nou distrik pa’n ganny konstri.

Nou bann atlet ki servi multipurpose court Greenwich ankor pe esper konstriksyon en changing room avek fasilite twalet.  Depi 2016, distrik in perdi 2 travayer lazenes ki’n kite e al rod lot louvraz ki lapey i pli atiran.

Mr Speaker, sa i souliny ankor ki degre nou pe tret sa group travayer sitan enportan.  E dan zot labsans eski nou konstate ki mannyer distrik i perdi an term aktivite pou bann zenn e lepanouisman lazenes.

Nou a rapel ki dan Bidze sa lannen ti annan en alokasyon R1.2milyon pou en Scheme Animater anba ki bann endividi talante ti pou ganny idantifye pou organiz bann progranm spesifik dan kominote.

Dan sa menm loptik, R3 milyon ti’n ganny met de kote pou siport desantralizasyon bann aktivite.  Ankor mon napa rikord ki Mont Buxton in benefisye direkteman.

Sa ki enportan pour nou konpran, Mr Speaker se ki letan nou ganny dir ki pour Bidze 2020, 88.9poursan sours son finansman i domestik, i vedir ki mwan avek ou ki pe peye.  Alor i natirel nou demande ki nou ganny valer nou kontribisyon.

En Gouvernman i prensipalman la pou amelyor lavi mazorite son pep.  Parmi bann keksoz i oblize fer se konstri lenfrastriktir ki rann lavi son sitwayen pli fasil.  Dan nou distrik spesifikman, si in fer, i ganny fer avek martir.

Get konbyen letan in pran pou proze semen Dan Lenn konplete e sa devlopman Belonie li in sezi dan milye semen.  Gouvernman i oblize fourni lenfrastriktir enstitisyonnel.

Pozisyon Sesel lo bokou bann lendeks enternasyonal, tel ki ease of doing business i les konpran ki i ankor annan bokou pou nou fer.

Gouvernman i oblize donn nou proteksyon fizik atraver lapolis avek larme.  Zot in san dout, antann mwan plizyer fwa pe enplor lapolis pou montre zot prezans fizikman dan nou distrik, sirtou lefe ki nou pa lwen avek lavil.

Patrol apye e entrodwir zot lekor avek bann zabitan.  Sa seri vol ki’n arive resaman dan rezyon Greenwich i fer nou realize ki nou zabitan i ankor a risk krim oportinis dan nou pei.

Gouvernman i oblize ofer bann servi de-baz parey delo trete, koneksyon desarz, proteksyon kont dife, servis lasante e ledikasyon ki mon ava retourn lo la ne pe pli tar.

Pou bann servis, i annan konsern lo servis lanbilans ki baze kot Sant Larivyer Anglez ki deservi distrik Mont Buxton.  Konsern prensipal i la kantite letan i pran pou lanbilans vin sers zot oubyen retourn avek zot dan lakour sorti klinik.

Kestyon se koman en logmantasyon 14poursan dan Bidze Lazans Swen Lasante an 2020 pou sanz sa sityasyon pour le meyer?  An se ki konsern tretman desarz, plizyer housing estate ankor pe eksperyans problem desarz ki refoul dan bann lakaz.

Depi Out 2016 Vis Prezidan Meriton ti promet zabitan Mont Buxton ki Korporasyon Litilite Piblik (PUC) pe fer en letid pour design en sistenm desarz e rod resours finansyel pour kapab konekte bann sistenm santral.   3an in pase, nanryen pan sanze.

Gouvernman i oblize protez sitwayen kont dezas.  Tou dimoun i konnen letan i annan lapli mannyer gro delo i desann dan semen piblik e sa santye ki nou apel Semen MC i poz en danze pour bann lakour e pyeton.

Depi Fevriye 2016, Vis Prezidan Meriton avek en delegasyon zofisye SLTA e osi Departman Sanzman Klima ti vin dan distrik, en zour ki gro lapli ti pe tonbe e promet pou rezourd sa sityasyon enn fwa pour tou.   3an in pase, nanryen pan sanze.

Sa lannen mwan avek administrater distrik nou’n met sa proze lo lalis proze kominoter, me en mank kapasite pou delivre volim travay dan Minister Gouvernman Lokal i fer ki i pa pou materyalize an 2019.

Koman mon pe koz lo lenfrastriktir, pandan sa dernyen 3an dimoun in tann mwan koz lo sa bann rigol Gouvernman dan distrik Mont Buxton e osi Larivyer Anglez.  Sa bann rigol ti konstri dan bann lannen 80 e 90.

Ozordi zot pe an varye e okazyonn delo pou andomaz plizyer propriyete prive.  La i ava fer 4enm lannen ki mon pe lev sa size isi anndan.   E napa en MDAs, ni Lanvironnman, Gouvernman Lokal, Sanzman Klima ouswa SLTA, ki oule aksepte responsabilite pou repar e netway sa bann rigol.

Pourtan nou a pe kontribye finansyerman dan fonksyonnman sa bann menm MDAs.

Gouvernman i sipoze ofer solisyon letan sitwayen napa pouvwar pou lit kont bann lafors ki an deor son kontrol.  La mon pe mazin bann pri egzorbitan ki konsonmater i fer fas avek.  Ki swa pri telekominikasyon, to lentere Labank, price fixing dan Sekter Komers, pri alokasyon lakaz avek landrwa pou fer biznes.  Pri later ki’n vin pirman spekilasyon dan nou pei, eksetera.  Dan son diskour annefe, Minis Finans pa’n mansyonn en sel fwa size pri lavi.

Pourtan sa i size ki sa 6enm Lasanble in diskit plis lo la depi Septanm 2016.  Si nou pran Air Seychelles koman en legzanp dan largiman lo size pri lavi.

I fer lapenn realize ki menm ler Seselwa pe ganny demande pou sibvansyon sa lakonpannyen, me selman Air Seychelles i reste sa laliny aeryen pli ser pou nou.  Mazorite pe bezwen al Sid Lafrik anpasan par Kenya ouswa L’Ethiopie akoz zot pe ofer nou lanmwatye sa pri ki li Air Seychelles pe sarze pou anvol direk Johannesburg dan 4erdtan.

Pou ganny en tiket avyon domestik pou al Praslin i reste en kosmar.  Antretan plan management sa lakonpannyen pou tir Air Seychelles dan troub finansyel i pa kler dan limazinasyon piblik Seselwa.

Nou pa krwar ki zot enterese entrodwir plis vol direk dan bann destinasyon ki Seselwa a kapab ale pour rezon lwazir, biznes e medikal parey Sri Lanka, Singapore ouswa Malaysia.  Nou selman konnen zot pe kontinyen zwir bann gro saler san anmenn rezilta direk e pozitiv pour nou.

Drog i reste pli gro lafors dimal ki pe konfront sak segonn nou legzistans koman en nasyon. Me dan sa Bidze mon pa’n tann ladministrasyon Mr Faure dir o kler en stratezi pou anpes eroin ki nou pa prodwir isi rantre dan nou paradi.

Tel ki en kanpanny asarnen kont bann trafiker.  Eski nou pran kont ki poursantaz larises nou pei ki lannen apre lannen pe al dan alokasyon Bidzeter selman pou zer lenpak drog isi?

Zis atraver Bidze APDAR, ANB ek CARE, pei lannen prosen pou depans R128 milyon.  En sonm ki reprezant Bidze Lasanble Nasyonal pour 3 an.   Konbyen loportinite zabitan mon distrik in perdi an term konstriksyon lenfrastriktir, lakaz, finansman dan sport avek kiltir?

Pou montre ki mannyer nou ti kapab servi sa larzan dan en fason pli pozitiv Mr Speaker, R128 milyon ti kapab konstri 30 blok flat egzakteman parey ex-Bibianne Ah-Kong, Mont Buxton.   Sa blok flat, i konpri 6 younit 2 lasanm e i ti ganny konstri lo en siperfisi 537 met kare, an 2015 pour en sonm R3.9 milyon.

Alor avek R128milyon pou zer sityasyon drog dan pei an 2020, nou ti kapab otreman donn 192 fanmir Mont Buxton sakenn en flat 2 lasanm.

LDS i konsyan difikilte e danze ki bann travayer lo teren dan lalit kont drog i fer fas avek lo en baz toulezour.  Sa i rezon akoz letan nou pou ariv dan Staz Komite nou pou regard pros Bidze APDAR.

E si zot pe ekout, nou pe dir zot ki nou oule zot fourni nou avek bann detay lapey, voyaz aletranze, per diem, loto lwe, sekirite e lokasyon lofis pou asire ki nou larzan pe ganny depanse kot i neseser e fodre e non pa lo okenn ekstravagans.

Mr Speaker, si nou pe pey pou 88.9poursan sa Bidze i natirel ki nou pep i egzize ki Gouvernman i fer li viv dan en pei ki an sekirite, kot i lib,  e ki i an bonn sante e ki i vin pli prospere anmezir ki letan i pase.

Pou son Manifesto an Desanm 2016, Gouvernman aktyel ti promet lepep Seselwa mon site : ‘‘posibilite pou en meyer lavenir.’  Fen sitasyon dapre zot Manifesto.

Me eski sa ki nou pe eksperyanse?  Depi premye Bidze ladministrasyon Msye Faure pou 2017 ziska sa enn la pou 2020, nou Bidze Nasyonal in ogmant par 19.18poursan zis pandan sa dernyen 3 lannen – sorti R7.7bilyon pou ariv R9.2 bilyon.

Letan zabitan mon distrik par egzanp ti pe swete vwar kreasyon plis lanplwa, lenfrastriktir modern e meyer servis dan sekter piblik, zot in ganny zis promes kase.   Pa pran zis mon parol, me ou a konstate ki: dapre rikord ofisyel, swivan en vizit ki ansyen Prezidan Michel ti fer Mont Buxton an Septanm 2007, i ti promet ki konstriksyon lo en nouvo lekol primer La Rosière ti pou komanse an 2009 – sa ti 10an pase.

Finalman an Out 2014, Kuwait Fund for Arab Economic Development ti anonse ki zot dakor pou finans sa proze.  Lagreman ti sinyen par ansyen Minis Finans, Pierre Laporte lo lapar Sesel an Novanm 2014 e sa mwan i fer egzakteman 5an nou ankor pe espere premye pye ganny mete dan later.

Sa retar dan konstriksyon lekol La Rosière, pa montre irzans ki ladministrasyon Mr Faure pe donnen pou relev nou sistenm ledikasyon.

Logmantasyon dan alokasyon Bidzeter pou ledikasyon tousel pa pou anmenn Sesel koman en pei tro lwen.  Letan nou konstate ki depans dan ledikasyon pou annan en diferans 332 milyon R672 mil ant alokasyon 2018 ek 2022 ki reprezant en ogmantasyon plis ki 40poursan, koman en Lasanble nou bezwen demande ki an komans an par zanfan, zot paran, ansennyan, staff sipor, zesyon lekol e Minister Lasante Ledikasyon plito i pran taxpayers Seselwa o serye e prodwir rezilta ki donn valer nou larzan sirtou ler ou tenir kont ki i kout preski menm kantite pou edik en zanfan par an dan lekol Leta ek enn ki dan lekol prive – me rezilta ant lede i totalman diferan.

Pou nou reisi e grandi koman en Nasyon disiplinen, fyer, responsab e travayan – lesel keksoz nou bezwen se pou nou sistenm ledikasyon delivre bon rezilta e akonplir tou son lobzektif.

Baze lo bann rezilta legzanmen skoler Nasyonal e enternasyonal ki pibliye sak lannen, mon pa krwar ki nou kapab dir avek fransiz e konviksyon ki nou pe al dan bon direksyon.

Mr Speaker, letan nou konstat statistik lakaz ki ladministrasyon Msye Faure in reisi fer, i souliny dezapwentman zabitan Mont Buxton avek performans Minister ki responsab pou portfey later avek lakaz.

Minis Finans in dir ki depi Zanvye ziska Oktob 188 fanmir in ganny lakle pou zot lakaz, e ki di si lafen Desanm sa lannen en lot 152 younit avar konplete.

Sa i a fer en total 340 lakaz pou sa lannen – ouswa 236 younit an mwens ki sa prozeksyon 576 lakaz pou 2019 ki Msye Faure ti anonse State House le 18 Oktob 2018.

Nou a rapel ki koman parti plan Gouvernman pou konstri 3000 lakaz dan sa prosen 6an an gran parti avek sipor finansyel Gouvernman Indien, prozeksyon sete ki an 2020, 558 lakaz e an 2021, 506 lakaz respektivman i sipoze pare.  Me eski sa target i realis?

Dan milye sa bann plan  -tro anbisye mon ava dir – se souvan sa ki pli vilnerab ki sibir konsekans.  Si mon pran legzanp mon distrik, depi retour Miltiparti 26an pase, Leta in konstri 178 lakaz ki reprezant 6 lakaz par an Mont Buxton.

Ladan menm, ex-Dominic Savio ki ti ganny konsevwar depi Zanvye 2015 in ganny azoute dan kalkilasyon proze 24/24/24 – ki li ti ganny anonse 2an pli tar, pli presizeman an Fevriye 2017.

An dot mo, zabitan Mont Buxton in ganny trope dan gran kler.  Pourtan lavey Eleksyon Lasanble Nasyonal 2016, Vis-Prezidan Meriton ti vin fer en vizit dan distrik Mont Buxton e anonse ki Lotorite distrik i annan en Master Plan 5an ki ale ziska 2021, ki mwan koman MNA zanmen mon vwar.

Anba sa plan ti sipoze annan konstriksyon condominium  Mont Signal pou bann profesyonnel Seselwa.

Sa menm promes ti ganny fer par ansyen Minis Christian Lionnet kot seremoni depoz pyer fondasyon condominium 2 Perseverans an Oktob 2016.  3an in pase, i paret plan pou konstriksyon condominium in ganny oubliye.

Anba sa swadizan master plan 2016 – 2021, ti osi annan propozisyon pou redevlopman sa propriyete ki pou Dokter Ramados, lo Lari Hangard.   Gouvernman ti promet pou negosye avek bann propriyeter prive pou fer lesanz oubyen aste bann kare later pou re devlop sa bann landrwa, pou permet bann fanmir ki’n fer zot aplikasyon zot osi zouir sa polisi ki sak fanmir Seselwa i annan en twa lo zot latet.

Ki’n arive avek sa promes?  Leta nou mazin devlopman ex-Bibianne Ah-Kong lo en siperfisi 537met kare, bann tel linisyativ i fer sans pou distrik Mont Buxton.

Me nou konnen ki sa bann promes ti ki fer an Out 2016, zis lavey Eleksyon 6enm Lasanble Nasyonal pa ti senser.  Zot ti ganny fer zis pou esey aste vot dimoun Mont Buxton.

Me menm si zot in perdi Eleksyon Lasanble, se US ki antet brans Egzekitiv Gouvernman e i enportan ki i gard son promes.  Si i pa fer li, Mr Speaker lepep Seselwa pa pou kapab kontinyen fer konfyans san group ‘’gran prometer, pti donner.’’

Apre i annan plan pou redevlopman sa teren kot lakaz emergency i ete Dan Lenn ouswa i ete Dan Lenn pou konstri 2 lakaz semi-detach lo sa teren.

Swivan louvertir Transit Homes Grand Anse Mahé an Zilyet sa lannen, mon swete ki Minister konsernen i swiv lord Msye Faure e komans fer le neseser pou demar sa proze.

I osi annan plan pou redevlopman sa teren ki ti pou Gouvernman La Rue Hangard pou sa ki ti pou Gouvernman La Rue Hangard.

Sa ti osi en pwen diskisyon pandan vizit Msye Faure Mont Buxton le 11 Out 2017.  Mon swe i se ki sa proze i ganny konsidere koman parti sa plan 3000 lakaz ki Gouvernman Indien pou finanse pou sa prosen 6an.

Vizavi propozisyon pou entrodwir en logmantasyon 10poursan excise tax lo lalkol, i kler ki Gouvernman pa pe ekout konsey pou takse prodwir selon son poursantaz lalkol.  Sa i sistenm ki Lorganizasyon Mondyal pou Lasante pe promouvwar. Sa ti pou ede soulaz Seychelles Breweries ki’n fidel avek Sesel pou plis ki 40an dan botan ou movetan.

Nou tou nou konnen ki tax lo lakol pa vedir ki sa larzan pou al dan progranm pou adres labi lalkolM ouswa i pou redwir konsonmasyon lakol nasyonalman.  Olye entrodwir en tax lo lalkol akoz Gouvernman pa propoze ki bann lakonpannyen ki pe prodwir lalkol i kontribye en poursantaz lo zot profi, dan en progranm ouswa proze pou adres labi lalkol?   Omwen nou a konnen ki sa larzan vreman i a ganny servi pou rezon ki i pe ganny anmase.

 

 

(APPLAUSE)

 

HON GERVAIS HENRIE

Mon osi konstate ki Gouvernman pe finans 19 Lorganizasyon Non-Gouvernmantal an 2020 pou en total R6.665milyon.  Kestyon mon anvi konn larepons se ki kantite piblik Seselwa i benefisye avek travay sa bann NGOs?  Koman en MNA elekte, pandan sa 3an mon dan lofis pa’n zanmen ganny aprose par en NGO pou anmenn zot servis pli pre avek kominote dan mon distrik.

I annan NGO ki pe ganny plis ki R900, selman sa menm Gouvernman i refiz-e permet okenn Ladministrasyon Distrik zer lavaler R1.2 milyon an term pti proze, an giz desantralizasyon.  Sa i en keksoz ki Lasanble Nasyonal fodre i touse.

Mon ti a kontan konnen si kont bann NGOs ki’n benefisye dan lepase e ankor pe benefisye in ganny odite par biro Oditer Zeneral, anvi ki zot in benefisye avek larzan taxpayers ?

Eski Minister Finans i konfortab ki prensip Performance Based-Budgeting pe ganny aplike atraver sa alokasyon R6.6 milyon?

Nou osi konstate ki apard aplikasyon direk bann NGOs pe fer avek National Grant Committee, zot pe osi fer laplikasyon avek Women’s Trust Fund, Children Special Fund, Art Trust Fund, Disabled Trust Fund, Environmental Trust Fund, SeyCCAT eksetera.

Kestyon se ki Gouvernman pe fer pou koup labi ?  Propozisyon mon anvi fer se ki en sel komite ki administre tou Grant ki bann NGOs i rode anba bann Trust Fund dan Bidze, la nou kapab komans zisteman avek sa National Grant Committee.  E li mon propoze ki i ganny li 2 zofisye a plen tan pou sirvey progre avek lenplimantasyon bann proze e apes labi larzan piblik.

An konklizyon Mr Speaker sa ki nou oule avek bann politisyen ki lot kote latab avek nou se en pe lonnekte.  Mont Buxton e lezot distrik dan Sesel i fatige avek zwe politik.  Nou’n fatige avek promes kase.  Nou’n fatige avek mank aksyon.

Nou bezwen vwar vre langazman e langazman senser sorti kot Gouvernman e nou oule vwar sa toudswit.

Pou sa arive, nou bezwen en servis piblik e politisyen ki donn zot direktiv ki annan volonte pou asiste e ofer servis nou popilasyon.

Sa popilasyon ki pe pey nou saler tou le mwan, ou 13enm mwan  a lafen lannen, mou Kontra, nou bann allowances, Gratwite e bann lezot benefis parey allowance pou karbiran, telefonn, divertisman, lenz, sekirite, per diem e tiket avyon pou voyaz ofisyel, eksetera.

Zis mazinen ki lannen 2019 pa ankor fini, me ou sa travayer servis piblik e osi politisyen, ou 13enm mwan pou lannen 2020, ki a permet ou aste en kado nwel pou ou zanfan i presi dir fini asire.

Pa oubliye ki R3bilyon dan sa Bidze ki reprezant 12.5poursan nou GDP i selman pou saler bann ki sipoze pe travay pou popilasyon Seselwa.

Tandis ki sa travayer sekter prive, i pa ni menm sir ki 2020 pe anmennen pou li.  Eski sa Bidze pe enspir konfidans dan nou lekonomi e par konsekans ankouraz konsonmater depans plis e garanti lanplwa travayer sekter prive?

Alor annou annan plis konpasyon pou zot ler zot bezwen nou led avek servis.

Mr Speaker, Bidze en pei, menm si son prezantasyon isi anndan in pran egzakteman 2 erdtan pou lir Zedi pase, i mars egzakteman parey en Bidze ki nou fer kot nou lakour.

I permet nou kree en plan lo mannyer pou depans nou larzan, i asire ki nou toultan annan ase larzan pou depans lo keksoz ki nou bezwen e keksoz ki enportan pou nou.

Ler nou adopte en Bidze i osi anpes nou andet nou lekor ouswa i ed nou sorti dan det letan nou dwa.  Seselwa, lannen prosen nou pou mark 250 depi ki bann premye dimoun ti vin isi.  Sa lokazyon pou en moman pou nou pez bouton e rekomanse.

Nou pou rekomans premyerman par tir SPUP/SPPF/Parti Lepep e United Seychelles o pouvwar apre 43 an atraver bwat vote.

 

(APPLAUSE)

 

HON GERVAIS HENRIE

Sa i pou premye sans ki nou pou donn nou pei.  E deplis nou bezwen –  mon repete nou bezwen  annan en sanzman latitid, akoz sa Bidze si i montre nou en keksoz se ki tro bokou Seselwa pe depan lo sa pti gin nou ki pe travay pou fer Sesel marse.

I annan 3an, Lasanble Nasyonal i aprouv en Mosyon ki demande ki Gouvernman i vin avek en plan, pou enkorpor sekter enformel dan son kalkilasyon pou ganny kontribisyon tou dimoun dan lekonomi.

Si nou pa oule etranze dan nou pei, se nou ki  bezwen pran nou responsabilite premyerman ki swa en zanfan ouswa en adilt pou vin pli konsyansye e prodiktiv pou ou pei Sesel.

Annou pa mank sa loportinite pou sov nou menm koman en Nasyon e nou pei.  An 2020, Sesel i bezwen LDS pou sov li.  Mersi Mr Speaker.

 

(APPLAUSE)

 

MR SPEAKER

Mersi Onorab Henrie.  Mon ava donn laparol Onorab Johan Loze.

 

HON JOHAN LOZE

Mersi Mr Speaker.  Bonzour tou dimoun ki ale kout.  Mr Speaker an lannen 2019 parti Parti LDS i bezwen plis klarite dan son bann konfizyon.  Zot anmenn en konba asarne kont etranze    dan nou pei.  E la ozordi zot oule vin defann bann etranze ki’n fer plis ki 10an,  kont fer en pti kontribisyon an plis pou sa gran privilez ki zot annan pou travay lo nou later beni Sesel.

Zot pe dir avek lepep Seselwa ki zot in anlev R120 milyon dan Bidze, 3an pase – 120 milyon ki ti en Grant sorti kot Gouvernman L’Inde pou repar Topaz ki’n depans dan L’Inde par Gouvernman L’ Inde menm dan enn zot bann shipyards ki zot pa’n zanmen tire ki ti ganny depanse pou repar Topaz.

Mr Speaker zot pe dir nou konsilte avek Chamber of Commerce sa menm Chamber of Commerce ki zot menm zot LDS zot le koup son Bidze.  Lannen 2019 LDS i bezwen plis klarite e mwens konfizyon dan son fonksyonnman.

Mr Speaker mon pou konmans par dir enn de mo lo sa size APDAR.  Trend deba dan Lasanble pe montre nou en direksyon ki serten dimoun i deside pran lo sa size.  E mon krwar lepep Seselwa i annan lenformasyon ki zot bezwen konnen, alors mwan mon en dimoun ki koz fran mon pou konmans avek sa.

Mr Speaker mon pa fer okenn diferans ant Lazans avek sekretarya APDAR.  APDAR i pa problenm li.  E napa personn dan APDAR ki form parti problenm.  Posibleman i annan serten nou ki pe trenn bann     line personnel kont serten dimoun dan APDAR, me APDAR li menm i en lorganizasyon profesyonnel ki pe senpleman fer en travay irzan ki annan pou fer dan sa pei.

Problenm ki mon pe trouve se sa tre o poursantaz enkli APDAR ki’n dir dan en survey ki zot in ganny abize seksyelman ant laz 8an a 12an.

I annan en keksoz abnormal ki pe deroule dan nou sosyete.  Avan ki sa bann avan sa ki sa bann kalite sikatris mantal ki  lo sa bann zenn i geri, i pou pran bokou e bokou.  Mon konpran ki  mannyer ki serten zot in tonm dan eroin.  Mon pa pe defann lizaz eroin me mon pe zis sey atir latansyon lo sosyete kote nou vre problenm i ete.  Nou pe fail pou protez nou bann zanfan e sa i pa akseptab, e i pa ni pardonab.

Letan APDAR ti konmanse, sa pei i ti’n dan en kriz.  E kriz ti ganny agrave letan serten ti pouse pou fer fermen NDEA.  La kot la sezi drog ti plonze pou sorti 100 kilo eroin an 2016 pou vin 2 kilo an 2017 e 8kilo an 2018.  Avek fermitir   NDEA drog in arete ganny sezi Sesel.  I sorti 100 kilo in desann 2 kilo.

Mr Speaker, annou fer Kreol kler.  Depi ki serten in pouse pou ferm NDEA bann enportater drog in annan carte blanche   dan sa pei.  Zot in annan en port ouver.  Zot in fer sa ki zot anvi.  Lapolis i kapab seye me pou atrap drog oubyen lentelizans e annou admet.  Si ou napa nimero  Abdul  Kaful laba Kabul    ou pa pou zanmen atrape sa ki apel eroin.   Mon pa konnen si sa ki’n arive i zis kwensidans ouswa si i entansyonnel, e keksoz ki’n ganny planifye pou deroul koumsa, me selman sa ki mon kapab dir avek Seselwa, eski zot rapel zis apre ki NDEA ti’n fermen ti annan en lasesres eroin Sese ?   E partou nou ti pe ganny dir ki sete akoz NDEA ti’n fermen e ki sa nouvo Lazans ti pe fer pli bon travay.  Be oli sif pou prouve?  Oli lasezi?

Enn ler mon oule krwar ki sa en zafer organize.  Zot fer fermen NDEA apre bann dealers i kasyet drog pou en pe letan tou dimoun i aplodir zot, apre nou carry on nou trouv business as usual.  Selman la aprezan drog pe pet avek nou.   Akoz pandan 2an depi ki NDEA in fermen pa’n sezi okenn drog dan sa pei personn.  If any thing drog in akimile avek nou in kalsinen.  E si ti napa APDAR pou sey anpare zafer ti pou’n fini sal Sesel!

Mwan mon en dimoun ki koz fran, la mon repete avek sa sityasyon ki zot in kree si ti napa APDAR    pou anpare sa pei ti pou’n flanbe lontan.  Sa panik ki LDS pe ozordi ladan dan sa size APDAR se zisteman akoz ki sa progranm APDAR pe marse.

 

 

 

(APPLAUSE)

 

HON JOHAN LOZE

Tandis ki zot, zot in reste kole parey en rikord reye avek zot zistwar ‘’cold turkey.’’ 

        Dan lepase tou zot largiman otour eroin in tourn otour zis sa toxicomane li menm.   Selman sa in annan son bann viktim ki li menm li sa toxicomane i kree e sa toxicomane li i annan son fanmir e i senm la kriminalite, partou dan son kominote.

APDAR in antre avek en filozofi pou non selman ed sa  toxicomane, me egalman son fanmir son kominote ek son bann viktim potansyel.  E se la kot sikse APDAR in vini.  Sa lapros holistic   ki APDAR in pran in ozordi ed bokou Seselwa pou repoz an pe.  E se la kot zot pe konmans trakase.  Se apartir la kot zot pe konmans fabrik mansonz pou dir ki entel ouswa entel pe fer politik dan APDAR. 

Mon annan en mesaz pou zot.  Zot in dir e nou’n tande ki zot pe vin koupe.  Byen bon koupe zot, nou pa kapab anpes zot.  Selman sa Nasyon Seselwa pa pou zanmen kapab fye zot ankor dan sa size drog !

 

(APPLAUSE)

 

HON JOHAN LOZE

Zot pe lite, pou sa bann zenn pli APDAR retournen e re vin vot pou zot ankor, parey zot ti fer an 2015.  Zot pe priye pou paran sa bann zenn toxicomane vin donn zot ankor en vot dezespwar parey i ti leka an 2016.  Sa pa pou zanmen arive.  Lager lite mannyer zot anvi me i pa pou arive Seselwa in fini debiste zot !

Mr Speaker mon defen granmanman in toultan dir mwan pa bezwen anmas larzan pou letan dir.  Akoz letan dir i en move boug ki i pou pran tou ou larzan e pa kit en sou pou ou.  Plito anmas larzan pou botan akoz botan li i si ou’n byen prepar ou lekor menm  dan letan pli dir i pou annan moman botan, prosperite e loportinite.

E se zisteman sa ki sa Nasyon Seselwa in fer.  Nou’n trimouse nou’n eskente e nou’n prepar nou pei e nou lekonomi pou botan.  La ozordi nou pei i annan sote $500 milyon Americain an la rezerv sa i an rezilta sakrifis direk tou sa Seselwa ki ozordi pe viv rente e trimouse lo sa later Sesel.

Konman rezilta e     travay dir ozordi devan nou Gouvernman pe prezant en Bidze   Appropriation depans R9.29 milyar Sesel.  Mon dir rezilta nou’n travay dir akoz ladan 88.9poursan appropriation depans Gouvernman pou ganny finanse lokalman, atraver nou bann prop resours domestik.  4.1poursan atraver pri.  E 7poursan atraver don.

Me kwa sa fanmir  domestik ki pe finans 80.9poursan depans Gouvernman?  Sa se pa lot ki larises Seselwa ki’n ganny kree isi menm isi lo sa later Sesel par Seselwa ki pe viv e travay Sesel.  Resours ki’n ganny kolekte konman reveni Gouvernman dan form tax ki pe aprezan ganny redistribye la popilasyon atraver sa mekanizm Bidze.

E la mon le dir ki larsitek sa reform business tax, ki’n donn nou sa sistenm tax pou zis 10poursan bann lakonpannyen ki pey 96poursan tax dan sa pei, ozordi pe asiz laba obor zot.  Alors okenn kestyon ki zot kapab annan lo sa size tax dan zot kapab demann avek li.  Akoz se li ki konnen.   Sa sityasyon ki nou ladan i fri son travay sa !

Mon’n en ti til mon prezantasyon ozordi ‘’prosperite partaze’’ en tit ki mon’n ganny enspire par 2enm lanmwatye   Bidze li menm.  Mon’n swazir sa tit akoz enn bann fonksyon kle Bidze se pou asir en redistribisyon pli zou mwen ekitab dan larises pei.

Tre souvan nou konman sa pep Seselwa ki pe kree larises dan sa pei Sesel, nou get a lokasyon Bidze bann diferan Minister e Departman e deside ki sa napa naryen pou fer avek nou e nou kontinyen rode kwa ki i annan pou nou dan Bidze,  san realize ki sa alokasyon Bidze ki nou fek  pas lo la i en fason pli ekitab posib pou partaz e redistribye larises pei.  E ki son rezilta final pou enpakte lo nou lavi dan en fason pozitiv.

Me sa i normal akoz ozordi nou pe viv dan en pei kot en serten fo profet in sey bat latet nou pep an fezan krwar ki zot in pe vin met larzan dan pos Seselwa.  En keksoz ki pa’n zanmen arive.

Me kwa ki vre fonksyon Bidze?  Ki fason ki larises pei i ganny redistribye?  24.7poursan alokasyon depans Gouvernman in ganny Bidzete pou sekter ledikasyon avek lasante ladan.  Avek lasante ladan R1.8milyar pou ledikasyon e R1.12 milyar pou lasante.  Si nou bezwen en legzanp kler redistribisyon larises dan en fason ekitab, pa bezwen al sers pli lwen ki sa 24.7poursan alokasyon depans ki pe ganny envestir dan ledikasyon avek lasante nou pep.

Se zisteman la kot bokou nou, nou pri e nou dir ki sa pa larzan dan pos.  Me se sa ledikasyon ki pou permet ou pou met larzan dan ou pou se sa lasante ki ou pe eseye ki permet ou kontinyen debourye pou met manze lo latab.  Alors mon largiman i tre senp.  Lenvestisman dan ledikasyon avek lasante, se larzan direk dan pos nou pep.   Me sa i depan antyerman lo lafason ki ou, ou get keksoz.  La konman nou lo sa size larzan dan pos i annan en sonm R3 milyar dan sa alokasyon depans 9.29 milyar ki’n ganny met a kote, pou alokasyon saler wages and salaries.  Sa i reprezant en logmantasyon R382.6 milyon ouswa 15poursan lo logmantasyon lo Bidze saler final e total pou lannen 2019.  R382.6milyon i en logmantasyon tre konsiderab ki pou al direkteman dan pos nou bann travayer Seselwa.

E ladan i annan en sonm R81.4 milyon ki pe servi pou reviz bann Schemes of Service ki’n fini ganny aprouve.  A sa moman mon oule atir latansyon Minis lo size bann assistant teachers zot in apros nou pou felisit nou led pou sey fer e pledwari lo zot lapar.  Zot osi pe swete vwar en revizyon pozitiv, dan zot bann term e kondisyon.

Provizyon i osi ganny fer pou logmantasyon 5poursan dan grid saler ki ankor devan Lakour.  Sa en sonm R74.4 milyon.  E la mon oule profite pou fer rappel Lanasyon Seselwa ki LDS ti napa okenn problenm avek sa logmantasyon 5poursan ziska ler Onorab Valmont avek Onorab De Commarmond ti fer sorti ki Manm Lasanble osi pe al benefisye avek sa logmantasyon 5poursan.  Sela a sa moman ki problenm i konmanse ki ou vwar sa zafer i ankor devan Lakour ziska ozordi.

Si dimoun pa ankor ganny logmantasyon 5poursan, i senpleman akoz LDS i tro kanmi pou admet piblikman ki zot ti pe al benefisye egalman avek sa logmantasyon zot osi.  Si  ou pa oule krwar mon zis al get lo YouTube, ou ava trouv laverite.  Fransman mon pa konpran ladan ki i annan pou kasyet.  Letan ki Onorab De Commarmond ti premye lev sa kestyon ogmantasyon MNA diran sa deba 5poursan, i annan enn zot Manm ki ti kriy ‘’mansonz.’’  Misleading the House Mr Speaker.  E sete apre sa ki zafer in konmans deteryore.

Avan sa zot ti ok avek 5poursan.  Ti napa okenn problenm avek.  Sa case devan Lakour in vin en lanbarasman pou nou lenstitisyon zis akoz i annan nou ki kontinyelman sers pou azir dan en fason dezonnet fas avek nou bann group siporter e avek lepep Seselwa an zeneral.

 

MR SPEAKER

Onorab, Onorab zis devan Lakour i subjuduce ziska ler Lakour i a pronons son lekor le 26 Novanm.  Rezerv ou largiman bann largiman ki leve devan Lasanble.  Ou kapab kontinyen.

 

HON JOHAN LOZE

Thank you Mr Speaker.  Mr Speaker zot in met retar dan grid saler e ziska la nou pe apros lafen lannen bann travayer pa ankor tous en sou.  Me nou segonn zot in amann     AML pou ranpli pos enn zot dalon.  E ziska prezan zot pa ankor ganny kouraz pou dir avek zot bann siporter, konbyen de santenn milyon ki in benefisye e ki kantite risk ki zot in reisi pou met nou pei an risk pou fer plezir en sel endividi, sa zot pa koz lo la sa enn.   Sa en size ki zot in napa  kouraz pou aborde.  Zot napa lonnekte pou enform zot bann siporter dan en fason fran e onnet lo kwa egzakteman ki zot in fer.  Akoz ki zot in fer li e ki danze ki zot aksyon i kapab poze pou pei.  Ankor enn fwa mon pe dir avek zot se zot lentansyon ki move.

Sesel avek son pti popilasyon mwens ki 100 mil zabitan a lannen 2019 in reisi pou li fer graduate 95 zenn Seselwa dan bann Liniversite aletranze e 104 dan Liniversite Sesel.  199 zenn Seselwa ki’n ekipe avek bagaz akademik pou konmans kontribye dan lekonomi nou pei.

Now i annan bokou ladan pou nou selebre konman en Nasyon.  Me Sesel nou bezwen konmans azir pli byen anver nou bann zenn profesyonnel.   I pa sifi ki nou akeyir zot, me nou bezwen akonpanny zot lo zot semen ankadre zot e donn zot sa ki zot merite an retour pou zot servis.

Nou bann profesyonnel Seselwa i donn bokou pou zot pei, e i annan zot sa ki sakrifye bokou osi sirtou nou bann profesyonnel madanm.  E zot osi zot rekonpans i bezwen an proporsyon avek zot servis.  Latransparans bon gouvernans e rann kont.

Prezidan Faure depi ler ki’n asim la Prezidan Sesel in diriz avek imilite kouraz e lespwar.  Ou pa’n zanmen atann li pe atak personn ou pa’n zanmen trouv li pe montre ledwa lo personn e sirtou, sirtou ou pa’n zanmen tann li pe pres la dezespwar pou li sey anmas en pti byen politik a retour.

I en zonm ki solid e ziska prezan in diriz sa pei dan kalm e trankilite malgre tou bann defi prezante.  Depi lo komansman in met lanfaz lo latransparans, bon gouvernans, e rann kont.

Mon kontan pou vwar ki Bidze devan nou ozordi pe enkarn sa filozofi gouvernans ki Prezidan Faure pe diriz avek.

R221.8 milyon pe al pou bann lenstitisyon ki da en fason ou en lot, i kontribye pou ranforsi la demokrasi e pou fer oversight lo Egzekitiv.  Ladan ou annan 102 milyon pou Zidisyer. 43 milyon pou Lezislatif 21.3 milyon pou Oditer Zeneral, 3.8 milyon pou Ombudsman, 2.1 milyon pou CAA, 8.9milyon pou Komisyon Elektoral, 19milyon pou Komisyon Anti-Koripsyon, 12.1milyon pou Komisyon Laverite, 3milyon pou Public Officers Ethics Commission e 6.7milyon pou Komisyon lo Drwa Imen.

Sa en fraksyon konbyen i koute pou mentenir ou demokrasi dan en leta normal.  Sa i esansyelman zis son maintenance cost sa.  I annan lezot kou asosye avek en demokrasi performan e efektiv dan en pei modern.

Me sa bann sif  ki devan nou i demontre en keksoz, sa se komikman ki Prezidan Faure i annan an ver la demokrasi Seselwa.  Sa senserite e lafors konviksyon, ki i ti posede zour ki i ti pou donn son lekor lo sa 3 prensip gouvernans ki pou gid son prezidans,   i ankor enn fwa ganny ranforsi dan lapratik atraver Bidze.

Bon gouvernans latransparans e rann kont.  Si i annan en keksoz ki sa Bidze pe montre nou se ki Prezidan Faure i en zonm parol.  I pa zis koze dan vid me i trankilman aksyonn lo sa ki in dir.  Menm letan ki nou nou’n fini oubliye li i a pe gard son parol.

Bidze, Bidze 2020 pou Lazans proteksyon Sosyal i vwar en logmantasyon R100.5 milyon ouswa en logmantasyon 7poursan lo Bidze final e total pou lannen 2019.  Avan ki mon kontinyen avek sa annou esey met keksoz an perspektiv.  An lannen 2015 en rapor ti sorti ki ti deklare konmkwa ki Sesel i aflize avek 40poursan lapovrete.

Bann nou ki lir marginal note sa letid, nou kestyonn sa sif, me pou largiman ki devan nou annou zis dir 40poursan lapovrete.  I napa en sosyete  fonksyonnel ki pou zis asize e aksepte en tel keksoz parey.  San ki  i  sey aport en solisyon .  Kot i annan lapovrete i nou devwar pou sey nou mye pou elimin li.  Sa i nou fonksyon konman en sosyete imen.  Nou donn en koudmen sa ki pli feb nou esey le sa ki in tonbe nou pa mars ouswa pyetin lo sa enn ki deza ater.  Nou pa fer parey sa enn ki semenn pase ti deklare konmkwa ki dan son travay dan distrik i vwar bokou,  bokou madanm ki dan problenm ki pa dan lanplwa.  Me selman zot pa lo sa lis 711 madanm ki pa dan lanplwa.

Letan ou vwar e dimoun ki pa dan lanplwa, ou fer li antre dan sistenm kot i kapab ganny asiste kot i kapab ganny leve, ou pa kit li ater laba dan lenzirditan apre pou deklare i byen fyer konmkwa ki li i pa lo sa lalis madanm ki pa dan lanplwa.  I pa lo lalis akoz ou’n abandonn li Onorab!  Me nou sosyete Seselwa li i pa kapab abandonn dimoun.  Sa i pa son fonksyon o kontrer nou la pou akonpanny nou dimoun pou mars akote sa ki pli dan bezwen.

R1.49milyar Sesel pe al pou Lazans proteksyon Sosyal.  1.49milyar.  Zis sey konpran enormite sa sif pou en moman.  Ladan 1.28milyar ouswa 88porsan sa alokasyon 1.89 milyar pe al anver benefis pou retrete dezabilite envalidite e saler pou Home Carers.  

La fodre ki nou osi rapel ki avek logmantasyon dan saler minimonm pansyon bann retrete in osi ogmante e egalman benefis envalidite e dezabilite in osi ogmante.  I osi annan en pansyon spesyal ki’n lanse pou bann Seselwa ki’n pran zot retret avan kreasyon Fon Pansyon e fodre pa ki nou oubliy logmantasyon dan saler bann Home Carers. 

En sosyete i pa vreman en sosyete fonksyonnel armonye si nou pa kapab fer le neseser pou epol sa ki pli feb.   Nou bezwen a tou moman pe sers bann ki nou kapab ede pou nou ede.  Par egzanp bann retrete ki pe tous mwens ki R1000 atraver Fon Pansyon, Gouvernman pe enplimant en Polisi Pansyon minimonm R1000 ki pou kout R4.8milyon sa lannen an lannen 2020.

Konpare avek bann lezot sif sa i en ptipti sonm.  Me lenpak lo lavi sa bann dimoun letan ou adisyonn pansyon minimonm R1000 avek en logmantasyon R500 pou resevwar lo zot sekirite sosyal atraver ASP i pou annan en lenpak ase pozitiv lo zot lavi.  5i pou ede soulaz zot en pe.

Bann paran ki e resevwar lasistans R500 pou daycare, ouswa choldminding sa sonm pe al ogmante par R250 pou vin R750  ki pou ede kouver anviron lanmwatye zot fre lo bann ki pe ganny sarze ozordi.

Lazans Proteksyon Sosyal in osi ganny mandate pou pey en flat  one of  R1500 bann madanm ki sorti Praslin e La Digue letan ki zot in vin ganny baba Mahé sa i pou al anver zot kou lozman.  Sa Polisi i enn ki nouvo.

I annan de mezir dan sa Bidze ki ilistre tre byen sa zefor pou re partaz larises sa pei dan en fason pli ekitab.  Premyerman sa se taxation propriyete rezidansyel bann etranze swivi par en base par en base tax i ganny kolekte lo bann lakaz lwe sorti 15poursan pou vin 3poursan.  La nou vwar kot zefor pe ganny fer pou  diminyen en pe rent burden lo nou bann fanmir Seselwa.

Mr Speaker sa Bidze in akonpli son misyon.  Pou vin en Bidze balanse.  I mon lo lestimasyon ki sa group profesyonnel dan Minister Finans in fer zot mye zot in e vre pou delivre en Bidze avek pep Seselwa ki lepep Seselwa i kapab fyer.  Nou kapab annan lafyerte pou dir ki nou bann zenn ki nou’n envestir ladan ki nou’n formen in ozordi kapab delivre en Bidze balanse pou nou pei.

Mr Speaker me selman mon swete ki Bidze pou ganny laprouvasyon tou Manm Lasanble.

An lannen 2008 Lopozisyon ti  lev lanmen pou aprouv Bidze Nasyonal pei lo son Third e final Reading.  Sa Bidze sa lepok ti annan ladan en logmantasyon saler pou tou bann MNA e a sa moman ou ti annan en Lagreman kot nou tou nou ti vot an faver Bidze lo Third e final Reading. 

Me ozordi napa logmantasyon saler MNA me i annan logmantasyon pou carer i annan pou retrete, i annan pou benefis envalidite i annan pou bann dezabilite i annan logmantasyon across the board dan en fason ou en lot pou lepep Seselwa.  E se la  kot mon sourir i vini ki nou fer ankor parey lannen 2008 kot Lopozisyon anba direksyon Leader Lopozisyon ti vot pou en logmantasyon dan saler MNA.  Annou vot pou en logmantasyon dan saler carer ozordi dan lannen 2019 Mr Speaker.

Mr Speaker saler en travayer i sipoze an proporsyon avek servis ki sa travayer i ofer son anplwaye.  Ou konman en travayer ou’n agree pou met tan erdtan par semenn a dispozisyon son anplwaye e an retour pou sa travayer ou menm sa travayer ou agree ou resevwar tan larzan cash money, larzan Sesel.

An retour pou ou servis se sa saler en travayer osi senp ki sa, en Lagreman ant en travayer e anplwaye ki definir en serten nonm e en tan  servis an retour pou en serten sonm larzan.

Si en travayer oubyen en group travayer i santi ki sa servis ki zot pe ofer zot anplwayer i vo plis ki sa saler ki zot pe resevwar la sa travayer i bezwen antre an negosyasyon avek son anplwayer, pou zot tonm lo en nivo Lagreman e an ka kot i annan plizyer travayer la mon sizere ki zot organiz zot anba bannyer en   travayer pou zot nobou pli byen fer zot negosyasyon.

Mon lev sa size akoz i annan bokou travayer Seselwa isi Sesel ki pe ganny dir par zot anplwayer ki se Gouvernman ki pe fer pey zot en saler minimonm e ki li sa anplwayer i pa kapab fer nanryen ladan akoz sa i en Lalwa e ki zot annan travay e ki zot bann travayer zot pou bezwen esper Gouvernman donn logmantasyon pou zot gannyen .  Alor esper Bidze e petet i ava annan keksoz ladan pou zot.  Mon oule dir kategorikman ozordi ki saler minimonm i pa saler personn dan sa pei, saler minimonm i zis en preskripsyon legal ki anpes leksplwatasyon travayer parey i ti leka dan lepase.  Ou saler se sa ki ou negosye e tonm dakor lo la avek ou anplwayer.  Se sa ki ou saler pa minimonm wage.

Minimonm wage i selman vin ou saler si ou ou’n aksepte li koman ou saler letan ki  ou anplwayer in propoz ou sa sonm.  In napa okenn Lalwa ki anpes ou ki anpes li pou pey ou plis.  I napa okenn Lalwa dan sa pei Sesel ki anpes okenn anplwayer pou pey okenn son travayer son anplwaye plis ki saler minimonm sa i zis en mansonz e en lot form eksplwatasyon modern dan li menm.   Me selman bout pli enportan pou rapel se ki ou servis i bezwen an proporsyon avek ou saler – pa mwens.   Mersi Mr Speaker.

 

(APPLAUSE)

 

MR SPEAKER

Mersi Onorab Loze.  Bon nou’n ariv a lafen pou sa bomaten pou repons pou kontinyen nou travay 2er apre midi.  E toudswit la ABC pou rankontre dan Speakers Conference room anba direktiv Deputy Speaker.  Nou ava break e nou ava repran 2er apre midi.

 

(BREAK)

 

MR SPEAKER

Bonn apre midi tou Manm Onorab, bonn apre midi Minis ek ou lekip –  Ms Cesar, Ms Croisee.  Bonn apre midi tou dimoun ki a lekout e pe kontinyen swiv travay Lasanble Nasyonal.  Nou ava kontinyen avek repons lo Bidze 2020 e mon ava pas laparol avek Onorab John Hoareau.

 

HON JOHN HOAREAU

Mersi Mr Speaker.  Bonn apre midi Mr Speaker.  Bonn apre Minis ek ou delegasyon.  Bonn apre midi tou dimoun a lekout.

Mr Speaker larepons Bidze i en legzersis ki donn tou Manm, sa loportinite inik pou analiz bann propozisyon ki Minis in detaye e pronons nou, lo sa ki  nou krwar i bon pou Sesel.  Egalman sa ki nou krwar pa bon pou Sesel e propoz serten sizesyon an tenan kont laspirasyon nou zabitan nou distrik.

Dan mon repons Bidze mon pou baz mon lentervansyon lo sa sis pilye stratezi devlopman Nasyonal ki mon krwar i labaz filozofik sa Bidze.  Les mwan konmans avek sa ki bon pou mon distrik.  Apre bann diskisyon entans avek Prezidan li menm, mon tre kontan ki sa propriyete bazar labrin ki ti kapab vwar en devlopman prive, in finalman vin en propriyete ki Gouvernman in aste e pou ganny dedye pou zabitan Beau Vallon e Seselwa an zeneral.

Pandan diskisyon ki mon’n fer avek SSI ek ESA, de lorganizasyon ki pou zer sa propriyete, nou’n  finalman tonm dakor lo en devlopman entegral, ki pou pran kont nou laspe kiltirel, sosyal, e ekonomik avek en modalité devlopman Private Public Partnership.  Finalman zabitan Beau Vallon pou vwar konstriksyon bann kiosk prop e permanan, e bann fasilite twalet, lwazir, kiltirel, restoran laboutik e sportif a en nivo siperyer ki pou fer Beau Vallon fyer.

Si pa ti mon langazman e si pa LDS dir mwan lekel?  San dout, mon konnen ki zabitan Beau Vallon pou rekonesan ver LDS.

Mr Speaker, malerezman sa sis pilye stratezi devlopman Nasyonal ki Minis in santre son Bidze pei otour, i annan bokou krak.  E tou dimoun ki’n fer konstriksyon i konnen ki si en pilye i annan krak, i pa pou kapab siport en batiman pou lontan.  Sa striktir pou tonbe.  Seselwa in vwar kler e partou ou tan zis ‘’sanzman Gouvernman pou bezwen arive lannen prosen.’’

Aprezan, mon pou adres sa bann krak lo sa sis pilye.  Premye pilye bonn gouvernans.  Sa vot, pou kout taxpayers 221.8milyon e i reflekte en logmantasyon 13.6poursan par rapor avek lannen presedan.

Mr Speaker, i vre ki la demokrasi i kout ser, me en keksoz osi i enportan se ki le pep i bezwen vwar rezilta sa bann lenstitisyon i prodwi, an vi ki se zot larzan tax ki ganny servi pou pey sa bann lenstitisyon.  Apre plis ki 2an Anti-Koripsyon in egziste ziska prezan nou pa ankor vwar okenn prosekisyon.  Lepep i le vwar ki sa ki responsab pou fer koule son larzan e propriyete leta i ganny prosekite devan Lakour.

Public Officers Ethics Office osi menm zafer.  Toulezan sa lofis pe ganny en Bidze, me zis ka prezan nou ankor pe ganny dir ki staff recruitment pa ankor ganny fer.  Mr Speaker, nou’n ariv lanmwatye nou manda e nou pa ankor fer okenn deklarasyon nou asset, ni menm Prezidan ek son bann zofisye servis piblik.

Mr Speaker sa i fer mon vin lo dezyenm pilye ki pilye imen o sant devlopman.  Mr Speaker lo kote devlopman imen, mon konvenki ki en nouvo Lekol Vokasyonnel i a donn en santye pou bann zanfan ki annan sa lentere e sa bezwen pou develop zot karyer.

Me akoz, Gouvernman I ankor pe vwar li difisil pou konstri en Lekol Ekselans (akademik) pou bann zanfan ki doue?  Afin ki zot osi zot a kapab  prodwi pli bon rezilta posib.

Sa model skolarizasyon I egziste dan laplipar pei e i kre bokou konpetisyon ki lev nivo ledikasyon.

Mr Speaker, larzan pa devret en fakter determinan, pou en zanfan ganny loportinite pou devlop li o maximum ou non.  Se sa ki nou apel Loportinite pou tou, san get fonder ou pos, ou ras, e ou krwayans.  E se sa fondamantalman LDS i  krwar ladan.  Se pou sa ki Onorab Ramkalawan i toultan dir ki ‘’the sky is the limit!’’  Fodre pa bliye ki lenvestisman dan ledikasyon,  lasante fizik e reprodiktif nou lazenes i en fakter enportan pou devlopman en pep, e i fer ki i benefisye nou kapab benefisye avek demographic dividend dan lefitir.

Ozordi plis ki zanmen, i enportan pou nou reget lafason ki nou Liniversite Nasyonal i ganny zere.  Dan laplipar en pei lemonn en Liniversite Nasyonal i ganny sibvansyonnen.  Sa i enportan pou soustenabilite sa lenstitisyon e i osi permet kour reste abordab pou tou  bann etidyan lokal.  E i osi permet devlopman resers ki en fakilte enportan pou stati sa Liniversite.

Ozordi nou Liniversite Nasyonal i devret nou lafyerte akademik, pe war li difisil pou mentenir standard akoz son sityasyon finansyel e sa pe annan en lenpak negatif lo lakantite etidyan ki swazir sa Liniversite pou etidye.  Retar peyman par ANHRD i osi azout difikilte sa lenstitisyon.  Serten lenstitisyon pos-segonder pe war zot dan menm difikilte resours imen e finansyel.

Nou lenstitisyon teknolozi par egzanp ki sipoze pe enskri nou zanfan dan domenn teknolozi modern, i ankor pe servi menm lekipman ki zot ti ouver zot laport avek en 2003.  Mon espere ki Minis Finans i a pran sa an kont.

Mr Speaker, kolizyon sosyal i trwazyenm pilye krake.  Ler ou analiz sa vot, ou vwar ki i annan en logmantasyon 7poursan lo Bidze revize ant 2019.  Sa bann logmantasyon i fer demann bokou kestyon lo son rezondet.

Eski vreman la kantite dimoun ki lo benefis ek Home Carers in soudennman ogmante?  Eski  in annan en logmantasyon dan sonm ki ganny donnen konman benefis?  Oubyen benefis sosyal pe ganny servi pou en kanpanny politik?

Fodre pa ki nou bliye, pandan ban lannen eleksyon dan le pase in touzour annan en bis servis sosyal ki’n park dan kek kwen dan distrik e ti pe donn benefis a gos e a dwat.

En lot gro defayans, se dan alokasyon lakaz kot nou’n war ki menm si flat Gouvernman ki ganny konstri, me i pran bokou letan avan ki dimoun i ganny donnen son lakle.  Souvandfwa rezon ki ganny donnen se ki Minister pa’n fer provision pou sewage.  Sa sityasyon i fer bokou Seselwa fristre.  Sa i montre ankor linefikasite sa ladministrasyon.

La ankor Mr Speaker, en sistenm pwen ki defavoriz dimoun ki serye e ki’n fer bon desizyon dan lavi pou sey rod en lakaz avan batir en fanmir par rapor avek bann ki depese e fer bokou zanfan. An fezan bokou zanfan, zot in met zot lekor dan sityasyon vilnerab e zot ganny plis pwen pou zot ganny lakaz.  Tandis ki sa lot pli esper vitam eternam san ganny asiste.

Eski nou sistenm pwen pe ankouraz dimoun fer zanfan san planifikasyon zot fanmir?  Mr Speaker i anmenn mon katriyenm pilye e sa katriyenm pilye krake se pilye transformasyon ekonomik.

Mr Speaker, pandan sa 3 dernyen lannen mon pa’n vwar okenn gro proze lenvestisman ki anmenn FDI Sesel.  I vre ki dan nou pei i annan kontrent lespas e en moratwar lo konstriksyon nouvo lotel.  Me mon osi krwar ki lefe ki ease of doing business i en fakter ki pa pe amelyore, i fer ki bokou dimoun ki pe pran desizyon pou envesti Sesel i finalman dekouraze akoz tro bokou baryer biznes.

Victoria Waterfront project par egzanp i en proze ki annan potansyel pou anmenn en kantite lenvestisman ek FDI, me napa volonte politik pou pous sa proze an avan.

Mr Speaker lenvestisman kontinyel lo plan 5an par SCAA i enn ki enportan pou devlopman Lavyasyon Sivil ki pou anmenn sa transformasyon ekonomik, SCAA i en lakonpannyen parastatal ki kontribye dan Consolidated Fund  e zot in prevwar pou depans 103milyon 2020 dan plizyer sekter zot loperasyon.

Me ankor nou war ki i annan provizyon atraver en direktiv ase o, pou anmar lanmen sa konpannyen e don 30poursan preferencial shares avek Etihad  konman en garanti pou ed Air Seychelles dan son difikilte finansyel. La ankor mon annan toutafe rezon pou krwar ki serten parti biznes SCAA ki pli profitab i riske tonm dan lanmen etranze.

Mr Speaker, eski sa Egzekitiv kontrole par Myse Faure pou kontinyen fer bann deal kot nou pei i ganny van bout par bout?

Kestyon mon pe demande i se ler LDS pou ganny elekte e mont State House, nou pou vwar nou ganny anmare ek bann Lagreman partou kote ki pa dan benefis pei?

Dan sekter lenerzi, Minis in dir ki la Digue i devret vin model konman en ‘’zil ver.’’  An servan transpor ki elektrik.  Me ler ou analiz sa sityasyon i fer ou demann en kestyon pertinan.

Premyerman, elektrisite ki La Digue i servi i prodwi Praslin e Praslin i bril light fuel oil pou zener elektrisite.  Light fuel oil i pli polyan, i pli ser e i donn mwens lenerzi an konparezon avek heavy fuel oil.  Napa okenn proze e lezot keksoz ki pe ganny fer lo La Digue, pou fer ki La Digue i depandan lo lenerzi renouvlab.

Alor mon demande eski La Digue dan sa  ka, pe ede pou redwir nou carbon footprint?  Konklizyon dan sa ka, se polisyon i bon pou Praslin me pa bon pou La Digue.

Mr Speaker, bokou Seselwa i kont sa nouvo tax lo veikil konvansyonnel.  Premyerman, sa bann veikil elektrik ki zot pe ankouraz dimoun pou aste, zot batri i dir pou en kourt term ant 4 a 5an.  E menm son pri i preski lanmwatye pri sa transpor.  Napa bon mekanisyen pou sa kalite veikil, e napa versyon bis oubyen pickup ki bokou dimoun i servi dan biznes, dan bann pti biznes.

Eski Minis in pran kont tousala avan i fer sa lanons?  Eski Minis pou fer kou lavi Seselwa mont pli o par lao zot latet ler i pran sa desizyon ?

Eski nou pou bezwen ouver en lot simityer loto elektrik dan detrwa lannen akoz napa spares?  En lot desizyon ki Minis in pran ki Seselwa pa dakor ditou avek, se sa rediksyon lo tax pay allowance lo ban keksoz enporte online par lapos ek DHL.

Mr Speaker, bokou dimoun i profite pou fer online shopping akoz pri sa komodite sirtou lenz i tro ser lokalman, e la kalite pa reflekte son pri.  Mr Speaker R1500 tax free pa rezonnab parske zis freight deza i kout R500 ki kou ki adisyon avek sak item.  E sa i vedir valer sa ki ou pou enporte pou desan ziska R1000.

Kwa ki ou pou gannyen avek R1000? Mr Speaker pa gran keksoz.  Olye koup tax lo free allowance bokou dimoun ti a kontan ki frekans lenportasyon par mwan i redwir, e i ti a pli rezonnab pou koup serten labi si egziste.

Mr Speaker, en lot pilye krake se pilye lekonomi inovativ.   Sak fwa mon ganny sa sans pou adres sa size pou fer serten kontribisyon.  Sesel souvandfwa nou mank bato.  Digitalization avek e-governance i pa en swa me i en nesesite pou anmenn nou pei  nou lekonomi pli devan.

Bokou plis zefor i devret ganny fer oubyen i devret ganny mete pou devlop bann platform enformatik ki a ede pou desizyon ganny pran pli vit e prosedir administrativ a ganny fer dan pli ti gin letan posib.  Ozordi zour biznes enternasyonal e bann servis finansyel nepli ganny kominike par let dan lapos.  Tousala i ganny fer atraver rezo enternet.

En prenant kont groser nou pei, bokou aktivite offshore i kapab ganny kontrole dan nou pei.  Bokou lenvestiser i ti a kontan fer en melanz offshore e onshore business, kot sa sekter biznes onshore i kapab kontribye dan nou rezim taxation.  La i annan en potansyel enorm e si nou annan 5G internet e osi bon intranetting platforms ant bann Department Gouvernman, nou pou atrakte plis lenvestisman si nou fer li.

Mon dir ki nou nou pe les nou les bato kit Por, akoz pre obor nou, Maurice ki lontan in antre dan sa direksyon, e nou ankor pe trenn lipye.

La DICT i devret zwe en rol pli proactif olye met screensavers politik pou selebre 3an pas baton.

Mr Speaker nou bezwen osi envesti plis dan innovation hub atraver NISTI pou fer ki bann zenn i ganny imerse dan en kiltir kot zot a swaf pou dekouver an servan teknolozi modern.  Incubation centres pou osi ede pou soutenir e fer grandir biznes i pa devret ganny oubliye.

 

Mr Speaker, 6enm e dernyen pilye krake se program sosyal.  La mon pou dir senserman ki vot pou sa pilye in grosi plis ki lekspektasyon.  Menm ler ou analiz vot ki’n ganny donnen dan sa dernyen 10an, e vot ki’n prevwar pou lannen 2020, 2021, 2022 ensidswit ou kapab konstate ki sak lannen eleksyon tandans i montre ogmantasyon sibstansyel zis dan sa lannen eleksyon.

Sa i fer lev bokou kestyon.  Parey mon’n dir avan dan lepase in annan bokou labi lo la fason  sa fon in ganny zere.  I kler ki Gouvernman i bezwen travay pli for lo size re-skilling pou ki dimoun ki lo benefis i retourn dan lanplwa formel pli vit ki posib.  E aret depann lo safety net.  Dezyenmman, Gouvernman i devret ankouraz dimoun pou pran travay formel e desan, kot zot kapab kontribye lo tax.

An disan sa i kler ki nou pei i bezwen osi reget dan fason saler debwaz i ganny striktire.  Sa i bezwen ganny fer an kolaborasyon avek sekter prive e en prenant kont prodiktivite e lenflasyon.  Formil ki ganny adopte bezwen enn ki pa pou touy sekter prive e ti biznes me ede pou anmenn plis prodiktivite e osi benefis pou travayer.

LDS i toultan krwar ki tax lo biznes i kapab vin pli ba pou permet aziste saler.  Me an menm tan bokou plis zefor i devret ganny fer pou elarzi la base pou koleksyon tax.

SRC i bezwen an plis i bezwen annan plis forensic accountant e lenspekter pou pas dan bann letablisman ki lannen apre lannen pe deklar zero tax liability.  Pou fer sir ki tax lo profit i ganny peye.

Size transfer pricing i devret en lot travay ki SRC i bezwen enn fwa pou tou met son regar lo la.  Nou en pei ki kapab anmenn bokou pou nou zabitan, me nou bezwen serye e pa soutir dalon pou benefisye e pa soutir koripsyon, tandis ki lezot travayer ki ganny en saler  de ba i pe trimouse pou fer enn ek enn zwen.

La zistis sosyal i ganny promouvwar ler en zonm, en fanm ki kapab travay i travay e ganny son lavi dan en fason dir e onnet.  Sa ki i posede se son lasyer e non pa lasyer lezot.  Alor i enportan pou donn dimoun pou donn travay eskiz mon alors i enportan pou dimoun travay e pa depan lo benefis sosyal ki fonde lo lasyer lezot.

Benefis lo la pou bann ki bezwen.  Mon swete ki tou Seselwa i a realize ki zot kontribisyon dan sosyete i enportan pou devlopman pei.  LDS pou touzour siport tou travayer e koman en Lopozisyon responsab, nou osi rekonnet ki sa ki vilnerab e dan bezwen i ganny osi gete.  Dan nou vizyon napa plas pou parese e ban ki le zistis lo kouraz lezot.

Mr Speaker, avek sa pti refleksyon mon pou termin mon kontribisyon lo merit sa Bidze. Mersi.

 

MR SPEAKER

Mersi Onorab John Hoareau.  Mon ava pas laparol avek Onorab Sylvanne Lemiel.

 

HON SYLVANNE LEMIEL

Mersi Mr Speaker.  Bonn apre midi Mr Speaker, Minis avek ou delegasyon ek tou dimoun.

Mr Speaker, lannen 2019 pe ariv a son lafen, in enn ki’n al telman vit.  I pann en lannen ki’n fasil, nou’n fer fas avek bokou defi me nou’n reisir sirmonte menm avek en pe difikilte.

Zedi le 31 Oktob 2019 nou’n antann Minis Finans vin delivre son diskour pou Lannen Finansyer 2020 avek tenm “Rezilta Ekitab-Prosperite Partaze’’ isi dan sa Lasanble.

Bokou dimoun ki mon’n enterakte avek i annan divers lopinyon lo sa Bidze pou lannen ki pe vini.  Bokou pe dir ki Bidze i zeneralman bon.

Serten ki dan biznes in dir ki 2020 pou en lannen kot zot pou bezwen transpire, tanka serten travayer dan sekter piblik zot, zot vwar ki sa Bidze i annan serten keksoz pozitiv pou zot sirtou bann ki pe al annan revizyon dan zot Scheme travay.  Serten pansyoner e osi dimoun ki pe viv avek serten dezabilite zot in dir mwan ki zot ase satisfe e ki zot pe esper 2020 arive pou zot resevwar sa logmantasyon dan zot sekirite sosyal e pou serten pansyoner, zot pe osi al ganny e pou serten pansyoner zot pe osi al ganny sa ogmantasyon dan zot pansyon spesyal ki pou fer li ariv R1000 e ki oparavan zot ti pe ganny pli ba.  Pou bann ki pa ti pe ganny ditou en pasyon, zot, zot pou ganny R500.  Sa i avar soulaz zot ankor en pti pe avek dan depans lemwan ki zot annan pou fer.

Mr Speaker, Bidze Leta i en zouti pou montre ki politik Gouvernman i tradwi an aksyon.  I byen pou sak dimoun annan son divers lopinyon lo sa zafer Bidze, me sa ki nou devret mazinen i se ki nou pa pou zanmen kapab satisfer tou dimoun.  Gouvernman i kontinyen demontre son langazman anver promes ki ti fer ek sa pep depi 1977 an term lozman, ledikasyon, lasante e servis sosyal.  E bokou dimoun zot dir ki zot apresye tou sa la.  Tou le lannen, Gouvernman pe kontinyelman rod fason pou amelyor lavi pep Seselwa.  Mon konsyan ki i pa pou kapab fer plezir tou dimoun, me pandan sa plis ki 40an ki Gouvernman SPUP/SPPF/Parti Lepep e ozordi United Seychelles in o pouvwar, dimoun ki annan lizye dimoun ki annan lizye e ki ziz byen pou dir ou ki in annan devlopman e bokou amelyorasyon dan zot kondisyon lavi.  Mon konsyan ki i annan ankor bokou pou fer pou nou pep pou nou os kalite lavi dan sa monn modern ki ozordi nou pe viv ladan.

Mr Speaker, prosperite en pei i depan bokou lo son bann lakonplisman ki in fer e an rezilta sa bann lakonplisman sirtou ekonomik, sa bann benefis i devret ganny pase avek son pep dan en fason ekitab.  Gouvernman o pouvwar, i reste angaze anver bann dimoun ki pli dan bezwen e se pou kwa ki Lazans Proteksyon Sosyal in ganny en pli gro sonm dan sa Bidze pou lannen 2020.  En gran parti sa Bidze pou sa Lazans pe al anver peyman bann benefis parey sekirite sosyal, benefis pou bann dimoun ki pe viv avek en dezabilite, Home Carers, Benefis orfelen, benefis lanterman, lasistans daycare, dedicated fund kot bann zanfan lekol ki mwen fortinen, subsidy pou pey bis pou bann vye dimoun e osi nou bann dimoun ki pe viv avek en dezabilite parmi lezot ankor.  E pou rezourd bann problenm lapovrete dan tou distrik.  Me menm sa nou’n tann bokou kritik.  I annan ki pe dir ki nou’n vin en welfare state. Me eski sa i vre Mr Speaker?

Annou pa bliye rezilta sa survey ki ti ganny fer par UNDP detrwa lannen pase kot zot ti dir ki 40poursan popilasyon Sesel pe viv dan lapovrete.  Nou a rapel byen ki akoz sa rezilta, Gouvernman ti ganny bokou kritike.  E ozordi, kan sa menm Gouvernman pe met an plas plis fasilite pou rezourd problenm lapovrete, nou pe dir ki Sesel pe vin en welfare state.  Vre tou sa ki ou fer lo sa later napa byen.

Mr Speaker, konpare avek lepase, mon vwar ki in annan bokou amelyorasyon ki Lazans Proteksyon Sosyal in fer par egzanp entrodwi sistenm kart pou bann benefisyer aste zot komodite neseser lo la.  Nou’n osi vwar sa Lazans travay konzwentman avek Departman Lanplwa pou ede plas bann dimoun ki lo welfare dan en lanplwa.  I osi byen note ki tou dimoun ki al fer aplikasyon pou welfare, zot non i otomatikman al kot lanplwa e la en zofisye lanplwa i pran kontak avek zot pou plas zot dan en travay.

Tou sa Mr Speaker, i bann amelyorasyon ki sa Lazans in fer me i pa vedir ki tou i parfe, petet zot bezwen asiz avek bann lezot partenaire e vwar ki mannyer pou kontinyen amelyor sa sityasyon.  Fodre ki dimoun pa reste depandan lo welfare, i vreman gou ler ou pe travay e ou pe ganny en saler desan tou le mwan pou ou soutenir ou fanmir.

Mr Speaker, nou’n tann dir ki en sonm R 3 bilyon ki ekivalan 12poursan GDP in ganny prevwar pou reminerasyon ek Saler pou lannen 2020.  Mon apresye ki serten travayer pou benefisye anba nouvo bann nouvo Scheme Saler ki pou ganny enplimante.  Mon espere ki sa ya motiv zot pou travay pli dir e delivre en pli bon servis avek pep Seselwa.  Parkont i annan travayer ki menm si zot pou tonm anba serten Revised Scheme, zot pa santi ki zot pou benefisye akoz serten kondisyon ki’n ganny atase mon donn en legzanp par egzanp bann profesyonnel ki ganny held against the post. Mon repran sa Mr Speaker, parkont i annan travayer ki menm si zot pa’n tonm anba serten Revised Scheme zot pa santi ki zot pou benefisye akoz serten kondisyon ki’n ganny antase par egzanp held against the post.   Mon pran en legzanp en travayer ki antre dan en travay dan sekter piblik avek en doktora e sa dimoun i ganny held against the post pou 3an.

Nouvo Scheme i vin an Mars me sa profesyonnel pa benefisye akoz sa kondisyon.  Ladan menm, sa menm profesyonnel ki sipoze ganny en responsibility allowance, me ni menm sa i pa pe gannyen.  Se pourtan Mr Speaker, i pe perform byen dan son travay e i pe fer tou sa ki i ganny demande pou fer, mon zis demande akoz tenir en dimoun tou sa letan avan konfirm li dan en post? 3an i tro long, swa sa profesyonnel i kapab fer sa travay oubyen i pa kapab.   Se sa bann keksoz koumsa ki fer ki nou bann profesyonnel i vin fristre e degoute.  Fodre ki Gouvernman i revize e revwar bann kondisyon travay parey.

Mon osi lans en lapel avek bann diferan Minister e Lazans  pou kontinyen revwar bann lezot Scheme dan lezot Departman pou Minister e Lazans pou lezot kad travay.

Nou’n ganny dir ki abilite Gouvernman pou retenir son lafors travay e atir lezot travayer avek kalifikasyon apropriye pou zwenn servis piblik in vin enn pli gran priyorite mon 100poursan dakor avek sa Mr Speaker, akoz bann travayer byen kalifye parey bann ki annan masters doktora i annan en gro rol pou zwe dan lekonomi sa pei.  Ledikasyon avanse ek resers    deba lo lasenn enternasyonal.

I byen Gouvernman i rekonnet pei i bezwen plis dimoun kalifye letan in met a dispozisyon ANHRD en Bidze plis ki R212 milyon pou train plis nou bann dimoun.  Gouvernman i devret rekonnet ki bann Seselwa ki’n ganny zot kalifikasyon pli o sirtou zot doktora i annan en rol mazer pou zwe, dan en monde kot dimoun ki vreman edike, e ki annan bann skills teknik e profesyonnel dan en knowledge base, ekonomi resers i montre ki i annan en relasyon ant human Capital e economic growth.  Bann zenn profesyonnel Seselwa zot fer sitan sakrifis pou ganny zot doktora.  I annan i ganny zot doktora.  I bezwen ganny pli byen rekonnet pou sa ki zot pe kontribye dan lekonomi nou pei.  Fodre kontinyen amelyor kondisyon travay pou ki bann profesyonnel i ganny sans bouze e progrese entern-man dan zot landrwa travay.  Fodre ki bann Minister, Departman e Lazans i kontinyen donn kapasite zot travayer pou ki zot kapab okip bann pozisyon pli sinyor.

Mr Speaker, mon’n byen akeyir sa propozisyon ler travay fleksib dan Gouvernman.  Mon rapel nou bann madanm nou bann Manm dan Caucus Madanm ti fer propozisyon pou permet sirtou bann madanm pou travay fleksib akoz sa i pou ed zot sirtou avek zanfan pou okipe dan bomaten, apre al anmenn daycare oubyen dan childminding.  I vreman enportan ki bann bon mekanizm i ganny met an plas pou ki napa labi.

Mr Speaker, Gouvernman i reste touzour angaze lo son promes pou delivre lakaz avek tou bann dimoun ki dan bezwen.  Mon konstate ki menm si Departman Lakaz avek Later pe fer zot mye, me akoz diferan kalite kontrent ki zot fer fas avek, souvandfwa i pran bokou letan pou sa Minister delivre.  Mon swete ki pandan lannen 2020, 24 fanmir dan mon distrik ava ganny asiste avek zot lakaz dan sa proze 24/24 ki pou konplete an Fevriye 2020.  Mon osi espekte ki lenfrastriktir neseser pou sa 30 kare later Ex-Deltel i ganny konplete pandan lannen 2020 e ki alokasyon osi i ganny fer pandan menm lannen avek bann dimoun ki’n kalifye pou ganny en morso later.

Mr Speaker, Anse Royale i annan ase later Leta pou konstri plis lakaz ankor, mon demann Minister konsernen pou vwar ki fason pli vit ki bann devlopman lakaz i kapab ganny fer pou ed bann zabitan mon distrik ki ankor pe espere e ki kalifye pou zot ganny en lakaz konvenab pou viv ladan.

Mr Speaker, nou kontinyelman pe rod fason pou amelyor lavi tou dimoun dan distrik atraver bann pti proze kominoter ki ganny fer.

2019 in en lannen ki pa’n fasil an term pou delivre tou bann proze ki nou tin planifye pou fer.  Nou’n kapab akonpli serten me i reste ankour bokou pou fer.  Nou’n fer fas avek bokou defi pandan lannen 2019.  Serten sa bann defi se way leave oubyen permisyon ki nou pa’n gannyen avek serten propriyeter later pou nou kapab fer serten proze, mankman kapasite resours imen dan Gouvernman Lokal sirtou surveyor e sa in met bokou retar dan lenplimantasyon bann proze parey bann pti semen.

Mon espere ki an 2020, nou ava vwar en amelyorasyon an se ki konsern delivre lo bann pti proze kominoter.  Mon osi annan bokou proze nou osi annan bokou proze Kapital ki nou’n soumet avek diferan Lazans e Departman konsernen pandan lannen 2019. Me lo sa kote osi, nou vwar ki enplimantasyon serten sa bann proze pa ankor kapab ganny enplimante pou bokou rezon.  Nou’n osi ganny enformen ki sa prosedir procurement in met en pe retar.  Mon ti a rekomande ki pandan lannen 2020, sa Lalwa Procurement i ganny revize pou ki bann proze i kapab ganny enplimante pli vit.

Nou distrik in osi benefisye avek serten Proze anba fon Indien, mon espere ki byento bann zabitan ki pou benefisye avek sa bann proze parey semen Grand Rivière ki pou ganny finanse anba sa Fon a kapab vwar komansman lenplimantasyon lo teren.  Mon osi apresye ki Gouvernman in met en lot sonm       R2 milyon dan Bidze 2020, pou 2enm faz sa menm semen.

Semen dan kre ki osi pou ganny finanse anba menm fon in fini ganny kontrakter e konstriksyon sa semen pe al komanse pandan sa mwan Novanm e i a ganny konplete lannen prosen.  Nou pou osi annan serten fanmir ki pou benefisye avek lakaz anba sa menm Fon.  Mon profite mon profit sa lokazyon pou mwan remersi Prezidan Faure ki’n al fer bann negosyasyon avek Gouvernman L’Inde pou ki nou’n kapab ganny serten lasistans pou ed nou akonplir serten proze mazer dan nou bann distrik.  Sa bann proze pou vreman annan en lenpak pozitiv lo nou bann zabitan.  Kontinyen sa bon travay Prezidan Faure.  Kontinyen met Sesel avan tou.

Mr Speaker, kot i konsern ankor proze pou distrik Anse Royale mon oule enform bann zabitan ki akoz serten amannman ki SFRSA in bezwen fer avek plan stasyon tenny dife, sa in met en retar dan komansman sa travay.  Nou’n ganny konfirmasyon ki byen boner lannen prosen sa proze pe al demare.

I byen note osi ki zis akote kot sa stasyon pe al ganny konstri, nou pou annan en landrwa lwazir ki li osi nou’n planifye komans konstriksyon en stage permanan e lezot fasilite ki pou vin avek an 2020.  Alors zabitan Anse Royale mon donn zot sa garanti ki zot pou ganny en lot landrwa pou ki nou bann aktivite labitid i kontinyen deroule.

 

(APPLAUSE)

 

HON SYLVANNE LEMIEL

Mr Speaker, an 2019, Lotorite Distrik nou’n ganny bon korperasyon serten Businessmen ki’n ed nou atraver zot CSR, pou nou akonplir serten proze.  Mon ti a kontan profit sa lokazyon ozordi pou mon remersye Mr Gilbert Frichot ki’n kontribye anver nou proze met nouvo lalimyer LED dan distrik.  Ozordi nou vwar Anse Royale i pli byen eklere.  I reste ankor bokou pou fer an term sekirite dan nou distrik.  Nou annan ankor lalimyer pou enstale sirtou dan bann sou distrik ki ankor fernwar, nou osi annan en lot proze mazer e sa se pou enstal CCTV cameras dan distrik.

La nou pe demann bann biznes pou ed nou atraver zot CSR pou nou kapab akonplir sa proze.  En tel proze pou ede ranforsi sekirite dan nou distrik.  Ler nou an sekirite, nou tou nou pou santi nou pli byen.

Ozordi, bokou dimoun pe lwe en lakaz an atandan  ki zot pe esper Gouvernman pou asiste zot avek enn.  Nou tou nou konnen ki serten lakaz lwe i vreman ser.  Gouvernman pe depans bokou larzan atraver part rental ki i pe ed dimoun ki pe esper en lakaz avek Gouvernman e ki zot pe pey zot kontribisyon atraver Home Saving Scheme.  I osi annan bokou dimoun ki pa pe gannyen lasistans avek Gouvernman me ki zot bezwen tir bann gro sonm larzan tou lemwan pou pey en rent avek sa rediksyon dan tax lwe lakaz sorti 15poursan pou vin 3poursan, mon espere ki sa bann propriyeter lakaz  zot pas sa benefis avek bann lokater.

Mr Speaker, mon vreman apresye ki Gouvernman i pran sa desizyon pou amann dezyenm schedule Lalwa tax pou reveni ek benefis non-monneter pou enkli pansyon retret ki sekter prive i donnen pou fer ki napa tax lo sa pansyon.  Mon konnen ki bokou travayer sekter prive in byen akeyir sa nouvel.   Sa bann travayer zot osi, zot a kapab zouir fri zot travay a lafen zot servis.

Mr Speaker, ozordi tou dimoun pe sey rod fason pou zot eparny sa bann pri egzorbitan ki serten magazen i vann zot komodite e la mon pou koz spesifikman lo lenz.  Gouvernman ti tir tax lo lenz lannen pase me nou vwar ki serten magazen ki vann lenz, zot pri i tro o.  Alors bokou dimoun in annan sa loportinite pou fer vini zot prop lenz oubyen, lezot keksoz personnel online.  I domaz ki i annan ki’n vwar loportinite pou fer komers avek sa keksoz ki ti sipoze personnel, ki ti sipoze personnel.

Me Mr Speaker, redwir allowance sorti R3mil pou vin R15san lo bann keksoz personnel ki en dimoun i kapab fer vini atraver lapos petet ti devret ganny fer en pe plis letid olye zis vin enpoz sa tarif ki a mon avi mon vwar i tro ba.  Pran legzanp en dimoun ki pa fer vini lenz, me in enport en prodwi pou li servi personnel e sa prodwi i kout plis ki R15san.  La sa dimoun pou vwar li vreman kwense.  Mon ti a sizere ki petet en tel desizyon i devret ganny revwar e annan en mekanizm an plas ki zot kapab trace lekel sa bann dimoun ki pe order online e pe fer komers atraver Facebook. E la met serten kondisyon pou sa bann dimoun.

Mr Speaker, Gouvernman in donn son komitman pou kontinyen siport e soutenir bann divers Scheme biznes ;- divers Scheme biznes parey Lagrikiltir, Scheme mon Premye Dyob, Scheme Lantreprenarya Lazenes e Scheme pou bann pti e mwayen antrepriz.  Sa i vreman byen, mon ti a profit sa lokazyon pou demande ki bann formalite e prosedir pou kapab ganny akse avek sa bann loan i ganny amelyore, e vin pli fasil.  Ozordi, i annan tro bokou formalite pou en pti antreprener fer avan ki zot ganny akse avek swa loan oubyen Grant e laplipar ditan, zot degoute e kit dan semen.  Mon lans en lapel avek tou bann zenn pou leve e profit sa bann loportinite ki’n ganny met devan zot.

Mr Speaker, letan mon regard devlopman dan sekter prive, mon oule pran en sekter kle pou nou pei e sa se lagrikiltir.  I annan ankor keksoz ki nou kapab fer pou amelyor sa sekter.  Pandan sa lannen 2019, bokou fermye Anse Royale zot laferm in ganny afekte avek movetan, e zot in fer bokou pert an term larzan akoz tou zot prodwi ti anba delo.  Zot pa’n ganny okenn form rekonpans, akoz zot ti napa en lasirans.  Serten zot ti’n koman peye, me apre zot in ganny dir arete pou ki Lazans Lagrikiltir i retourn kot bann lakonpannyen lasirans pou negosye en pli bon deal.  Mon ti a rekomande ki Lazans Lagrikiltir i finaliz  negosyasyon avek bann lakonpannyen lasirans pou fer sir ki an 2020, tou fermye ava kapab pran en lasirans pou kouver zot laferm an ka okenn kalamite i arive.

Mr Speaker, mon konstate ki i annan bokou bon keksoz ki’n sorti dan sa diskour Bidze pou 2020.  Nou’n vwar ki lannen 2019, bokou Minister, e Lazans in ganny repran larzan ki zot ti’n demande dan Bidze akoz zot pa’n arive servi tou sa i pou diferan rezon.  Mon oule lans en lapel avek tou Minister, Departman e Lazans pou travay pli efikas e servi larzan ki’n donn zot dan Bidze pli efektivman.

Avan mon terminen, mon oule felisit Minis avek sa tim tre konpetan kot Minister Finans ki’n travay lo Bidze pou 2020.

Mon konnen ki i pa’n en travay fasil.  I pa zanmen fasil pou satisfer tou dimoun.

Mon oule osi profit sa lokazyon pou remersye tou zabitan Anse Royale pou zot korperasyon e kolaborasyon pandan lannen 2019.  Zot kontribisyon e siport anver distrik in ganny byen apresye e valorize.  Mon demann zot pou kontinyen gard sa kontak parey zot in fer pandan lannen 2019.  Mon reste touzour angaze a zot dispozisyon an ka zot bezwen mon lasistans.

An termin-an Mr Speaker, 2020 i en lannen ki promet bokou keksoz pozitiv, mon lans en lapel avek pep Seselwa pou pran bann loportinite ki annan, annou travay ansanm pou ki nou kapab kontinyen batir en meyer Sesel e anmenn li ver sa destinasyon kot i a fer tou pep Seselwa pli prospere.

Pou ki sa i kapab arive Mr Speaker, mon demann pep Seselwa pou tenir for e vot pou en zonm ki annan en vizyon, en zonm ki pe anmenn bokou transformasyon pozitiv dan Sesel en zonm ki pe anmenn linite dan nou pei, vot pou Mr Danny Rollen Faure an 2020 e nou a vwar plis devlopman, plis larises pou nou pei Sesel.

Mersi

 

(APPLAUSE)

 

MR SPEAKER

Mersi Onorab, Onorab Lemiel.  Mon ava pas laparol avek Onorab Jany De Letourdie.

 

HON JANY DE LETOURDIE

Mersi Mr Speaker.  Bonn apre midi tou dimoun.  Mr Speaker, an zeneral, mwan mon’n vwar sa diskour Bidze koman enn ki pe esey le mye posib pou konvenk lepep Seselwa ki i pou vin en Nasyon pli rezilyan, pli edike, pli prospere e pli an bonn sante.  Apre tou lekel ki pa pou dakor avek sa vizyon ?  Mon pa dir napa sa dezir me eski vreman i annan sa volonte pou ki Nasyon Seselwa i vin pli responsab?  Oubyen sa vizyon i reste zis en vizyon ki pou vin en lot vizyon letan tou in fini fail?

Mr Speaker, Seselwa i anvi vwar plis rezilta, i pa zis anvi antann  zoli parol ki pou fer li reve me i osi anvi vwar sa rev vin realite.  Frank Pierre i dir  “i nepli tan pou asize pou ekout poem ek zistwar akoz letan pe ale”.  Seselwa i anvi vwar li dan sa bann transformasyon kot li osi i pe benefisye reelman.

Minis, in anons en logmantasyon dan aktivite tourizm ki pilye mazer nou lekonomi e in dir ki sa pe kontribye ver en revizyon favorab.  Me eski Mr Speaker Seselwa sirtou nou bann zenn pe vreman ganny sa sans pou kontribye plennman?  Eski bann kondisyon travay i favorab, zot saler eski i atir zot pou reste dan sa sekter?  Eski i annan demars serye ki pe ganny fer pou ankouraz plis Seselwa pou ranplas bann etranze dan sa sekter?  Mr Speaker resaman mon’n osi anmenn en Mosyon ki pou demann Gouvernman pou empower plis bann madanm osi dan sa sekter.

Eski bann biznesmenn Seselwa zot pe ganny sa bann lankadreman neseser pou promouvwar zot lentere dan Sekter Tourizm? Se sa Mr Speaker ki Seselwa ti a voudre i arive.  Plis dyalog, plis konsiltasyon e plis proze inovativ pou ki zot vin pli prospere e pli responsab atraver bann desizyon brav ki ganny pran.

Mon dezyenm pwen Mr Speaker i annan pou fer avek konsern ki bokou dimoun i dir ki servis internet ek lizaz data i ankor bokou ser.  Apre 5an ki sa sekter in reste rezilyan akoz demann in kontinyen ogmante, me i ankor annan bokou lakour ki ti a voudre annan sa fasilite e bokou paran i anvi aste en package pou ki zot zanfan ti a kapab benefisye lo sa kote resers kot lakour menm.  Me i zis ki i pa ankor fasil e i pa ankor posib pou zot.  Mr Speaker kote ki sa rezilta ekitab prosperite-partaze i tous sa bann dimoun?  Eski i annan en revizyon lo en pri pli abordab ki pe ganny konsidere?

Mr Speaker, lasante avek ledikasyon ki reste priyorite avek pli gro parti Bidze, mon’n apresye ki Minis in anonse ki nou ekspekte vwar lenplimantasyon en solisyon pou en sistenm elektronik entegre pou rikord medikal, e sa i sipoze pou kouver 100poursan popilasyon Sesel.  Fayl perdi Mr Speaker dezormen avek lenformasyon pasyan i a va ariv a son lafen enn fwa pou tou, en konplent ki dimoun tipe fer kontinyelman.

Mon lot pwen Mr Speaker i konsern allowance pou bann madanm ansent ki reste lo zil pros.  Mr Speaker en lansentman i kapab ganny planifye oubyen non.  Napa personn ki responsab si en madanm i tonm ansent apard li menm oubyen son partner.  Me, servis lasante i la pou donn li sa lasistans medikal pandan parkour son lansentman ziska ki i akous son baba.  Me akoz ki sa bann madanm lo Zil Pros, zot bezwen vin Mahé?  Mon mazinen akoz i annan bann kondisyon spesyal ki nesesit bann swivi oubyen lezot rezon valab. Me Mr Speaker si nou sistenm lasante ti’n avanse depi sa dernyen 40an, lopital Praslin ek La Digue ti’n devret osi byen okipe parey pou Mahé.

 

(APPLAUSE)

 

HON JANY DE LETOURDIE

Depi son lenfrastriktir, son bann personnel ek son bann lekipman pou fer fas avek nenport evantyalite.

Pa sanmenm sa bann Mosyon ek kestyon ki nou bann MNA Zil Pros i kontinyelman anmennen dan sa Lasanble?  Mon pa donn sa bann madanm tor ler zot dir sa depans i met presyon lo zot Bidze, e Mr Speaker me i vre ni menm sa R1500 pa pou sifi.  Me ou trouve Mr Speaker sa Gouvernman i kontinyen zwe ek son pep, e met lour lo son pep akoz li menm li Gouvernman i pa pran son responsabilite!  Pa ti pou bezwen al rod donn R1500 si sistenm lasante anba sa Gouvernman avek direksyon Mr Prezidan Faure pa ti’n retarde e sa i anmenn mwan lo mon lot pwen Mr Speaker.

Minis in dir ki dan kad bann proze Kapital, plizyer Minister pe ganny difikilte pou enplimant zot bann proze respektif, sirtou bann ki pe avarye e ki bezwen latansyon o pli vit ki posib.  Mr Speaker la mon mazin Minis Charlette.  Enn fwa mon ti annan en antretyen avek li e mon ti sa pe dir li difikilte nou kapab gannyen letan ou fer en koud telefonn pou ganny en dimoun pou ed ou kot son Minister.  E la i ti fer mon konpran ki son switch board in vreman demode e ki i bezwen ganny sanze pou ki zot a kapab reponn a bezwen zot bann kliyan!   Sa i en legzanp les mon a donn en lot.

Mr Speaker i annan en fasilite avek bokou potansyel ki apel Sant Konferans Enternasyonal.   E li i ekipe avek en gran lakwizin modern e restoran, me malerezman i pou tonm an rin, si en desizyon pa ganny fer konsernan son fitir.  Akoz move maintenance i a pe ganny anvair avek fungus li osi.  I pou tre domaz si pa kapab restor li pou ki i a kapab anmenn ankor plis reveni.  I annan 3 lasal avek kapasite asize 250, 150 e 100 plas ki ler in ganny aranze i osi konfortab ki bann lasal konferans ki bann Minister parfwa I al lwe kot bann lotel pou fer zot konferans.

I ti pou en bon nide  petet si zot ti lwe sa bann fasilite avek ICCS, koumsa sa larzan ti ava al dan en fon pou ede avek restorasyon ki pou kout apepre R45milyon.  En desizyon i merit ganny pran osito posib Mr Speaker pou deside ki pou fer si pou restor li oubyen si pou demoli, si non Minis ou pou bezwen vwar ou pe met pare pou ou prepar Bidze pou pey rekonpans pou bann lezot dimoun ankor ki pe ganny afekte avek fungus.

Mr Speaker mon swete ki sa plan anbisye ki Gouvernman i annan pou adres enplimantasyon sa bann proze, pa pran plis letan ankor avan ki i materyalize, e ki desizyon i ganny fer pou deal avek bann ka priyorite olye ki anmenn solisyon tanporer ki kapab kout pli ser e met plis presyon lo Bidze.  Mr Speaker bann lenfrastriktir ki a la servis piblik i bezwen a laoter avek bann servis efikas, ki pou rann nou pep mwen fristre olye ki bann servis ki plonz en dimoun plis dan en leta defayans apre ki en dimoun in sorti laba.

M Speaker servis piblik i bezwen plis ki fer en travay avek efikasite e lonnekte, me i osi devret osi dedikasyon en Gouvernman anver son pep.

Letan mon pe koz dedikasyon en Gouvernman, mon ti a kontan dir de mo an relasyon avek Bidze pou target dimoun pli vilnerab  Mr Speaker.  Si nou pa oule ki etranze i vin fer bann louvraz ki nou Seselwa nou kapab fer e sirtou si i annan sa bann Seselwa pou met dan sa bann dyob, nou annan zis pou leve e al travay.

Lotorite konsernen i bezwen fer sir ki napa labi ;- fer sir zis sa ki vreman bezwen led ki ganny asiste malgre son kouler politik. Enn fwa pou tou Mr Speaker malerezman mon bezwen dir nou pou bezwen les tonbe sa sistenm ek nou pa ek nou, Mr Speaker akoz i ankor annan plizyer ka viktimizasyon kot i konsern sa size.  Mon siporte ki sa mon siporte ki dan bezwen ki sa ki dan bezwen fodre i ganny ede, me mon swe se ki Gouvernman ek lezot partenaire i fer fason a tou pri pou remet dimoun dan lanplwa.  E sa bann larzan i a reganny depanse pou konstrir plis lakaz ki nou pep i vreman bezwen.

Mon dernyen pwen Mr Speaker i en size ki pros avek mon leker, sa se lar ek kiltir.  Mr Speaker lar i permet kominikasyon bann nide lo pwennvi politik, spirityel, filozofik, pou kre en sans labote, pou eksplor lanatir, pou detann e osi pou eksit bann lemosyon dimoun.

Mr Speaker nouvo Polisi kiltirel li Nasyonal i met lanfaz lo lenportans pou ankouraz kreativite artistik, pou anrisir kiltir Seselwa e promouvwar bann prodwi e servis kiltirel aletranze.  Sa i en Polisi ki reflekte sa enn ki ti deza la – toutfason. Pe enport Mr Speaker ou kapab annan pli zoli Polisi me si i pe reste zis fermen dan en fayl i pou napa okenn lefe.

Mr Speaker a sa lenstans ki mon pe koze la, mon kapab dir ou ki apard Sant Konferans Enternasyonal Victoria, i napa lezot landrwa pou akter, mizisyen ek danser vann zot spektak.  Stad lanmizik li i annan son prop saga, teat Nasyonal i anba renovasyon mazer apre ki in reste fermen pou en kantite letan e teat des palmes osi i anba renovasyon.

Sak artis Mr Speaker i annan diferan repertwar e alors i annan diferan lodyans e bezwen landrwa diferan.  Mr Speaker ICCS i vreman difisil pou ganny en booking si ou pa’n mete preske 1an davans e mini stadium li ki dabor i pou NSC e ki pa ideal pou bokou artis e an menm tan son kou i ase eleve.  Akoz zot in met artis dan sa sirkonstans?  Akoz zot in les tou sa bann keksoz tonm en panne    Mr Speaker?   En?   Sanmenm sa ki apel promouvwar aktivite artistik e promouvwar vizibilite  domenn lar?  Akoz zot in les tou sa bann lenfrastriktir vin enservyab    Mr Speaker?

Minis, atraver ou Mr Speaker eski ou konnen pou dir in vin deplizanpli difisil pou en lorkes tradisyonnel ganny travay dan bann lotel Sesel?  Oli sa Polisi, oli sa bann demars ki pe ganny fer pou ki zot ganny proteze.  Oli sa platform kot bann aktivite kiltirel i ganny showcase dizon tou le semenn e piblik Seselwa ek bann viziter i kapab aste zot tiket pou vin vwar.  Viziter li i konplent akoz i pa’n antann lanmizik kreol oubyen vwar spektak kiltirel tandis ki bann manager lotel i dir ou i kout tro ser oubyen tourist i konplent tapaz.

Selman pli tar ou kapab vwar en DJ oubyen en duo enternasyonal pe sant zis sanson angle dan son lotel.   Nou pa kapab fors ou lotel manager, pou pey artis Seselwa pou vin perform dan ou lotel si i pa anvi.  Me Mr Speaker kantmenm en CD avek sanson kreol ou pa oule zwe.  La la parfwa mannyer artis Seselwa i ganny trete dan son pei Mr Speaker.

Mon konnen ki avek en Bidze plis ki R15 Milyon Departman Kiltir pou esey depans sa larzan lo bann keksoz pli esansyel e mon konnen ki pa ni menm ase Mr Speaker.  Me mon ti a osi demann Gouvernman pou konsider osi konstriksyon en galeri lar profesyonnel pou egzibit travay bann artis lar vizyel e osi en mize Nasyonal ki pou gard koleksyon bann travay o nivo.

Mon apresye ki i annan en zefor pou met a dispozisyon bann lasosyasyon e artis endividyel, bann grants ki zot a kapab gannyen pou devlopman e promouvwar zot bann form lar respektif. Mr Speaker mon swete ki la osi fodre napa labi e preferans e ki sa ki merite i a gannyen.  En swivi i merit osi ganny fer par rapor avek bann ki’n benefisye pou fer sir ki vreman sa larzan in ganny servi byen oubyen pou zot pa anpese en lot dimoun ki pli serye benefisye.  I pa bon ki menm artis ki pe benefisye toultan akoz sa i kre divizyon.

Mr Speaker, pou terminen mon anvi dir ki revizyon serten Shceme, enplimantasyon allowance, long servis, reminerasyon ek saler, pa pou fer sa diferans dan lavi Seselwa tan ki pri bann komodite esansyel parey manze, telekominikasyon, elektrisite ek delo pa desann a en pri abordab en keksoz ki LDS in sant sa toultan.

E tan ki napa en zefor pou elimin middlemen, Seselwa pa pou santi sa rezilta ekitab prosperite-partaze, Seselwa i konnen ki pou dir pe donn ek lanmen gos e pou repran ek lanmen drwat.

 

(APPLAUSE)

 

HON JANY DE LETOURDIE

Mr Speaker mon anvoy en mesaz pou bann Seselwa ki santi zot fristre e dezespere akoz zot dezapwente avek letarzi sa Gouvernman anba Ladministrasyon Prezidan Faure.  La mon mazin bann ki pa ankor konnen kan i pou ganny en lakle lakaz;- bann paran ki an pler lo zot zenou e pe priye pou zot zanfan sorti lo drog ek lalkol;- bann ki ankor pe monte desann dan bann biro e pe ganny anvoye demen/ tanto san en solisyon pou zot problem e bann ki pe vreman eskente pou fer bann bout zwenn.  Mon konnen i difisil, me LDS i debout dan zot kote.  Kouraz, lavi i kontinyen.  Pli long larout laviktwar i pli gou.  Mersi Mr Speaker.

 

(APPLAUSE)

 

MR SPEAKER

Mersi Onorab De Letourdie.  Mon ava pas laparol avek Onorab Jude Valmont.

 

HON JUDE VALMONT

Mersi Mr Speaker.  Bonn apre midi Mr Speaker.  Bonn apre midi tou koleg Onorab.  Bonn apre midi tou Seselwa ki e swiv nou.  E en  bonn apre midi spesyal pou tou zabitan La Pointe Larue.

Mr Speaker, padan mon manda dan sa 6enm Lasanble, souvandfwa monn antann serten kritike ki sa Gouvernman napa en plan, napa en vizyon.  Selman la, apre tou sa lannen nou Bidze i kontinyen ganny prezante e zanmen sa pei in deza faid depi sa Gouvernman in o pouvwar.

Ozordi plis ki 40an apre nou ganny prezante avek en lot laprev ki sa Gouvernman avek en zonm for a latet i kontinyen angaze, e fonksyonn avek en vizyon ki garanti devlopman ekitab e byennet son pep.

Mr Speaker kontrerman avek lenpresyon LDS in donn nou, bokou konsiltasyon in al ver kreasyon en Vizyon 2033, e se sa bann konsiltasyon profon par bann profesyonnel devoue Minister Finans ki’n ede prepar Bidze 2020.

Rezilta se ki Bidze 2020 i santre otour sis pilye tematik premye letap lenplimantasyon vizyon 2033 ki trouve dan Stratezi Devlopman Nasyonal (SDN) 2019 ziska 2023.

Sa enn Bidze san leksepsyon, i promot bann prensip en Prezidan ki annan en vizyon pou inifye son pep.  Bann prensip tel ki, lazistis, egalite dan loportinite e lazistis sosyal.

Malgre en krwasans mondyal pli ba ki ti antisipe pou sa lannen, Sesel nou krwasans prodwi domestik brit in monte. Sa Mr Speaker, set ankor gras a bonn performans dan sekter manufacturing, logmantasyon dan aktivite tourizm, krwasans favorab dan sekter lenformasyon ek telekominikasyon an rezilta demann pou plis data ek servis internet, e finalman osi avek domenn konstriksyon ki’n ganny bokou sipor atraver plizyer proze Gouvernman.

I enportan pou remind lepep Seselwa ki bokou sa bann proze in ganny inisye ou enspire par Prezidan Faure li menm.  Nou Prezidan dan son bann lide in reste gide par lespri Konstitisyon nou Parti United Seychelles e diriz son Gouvernman pou ankouraz sekter prive devlope e zwe sa rol ki devret dan kreasyon larises e prosperite ekonomik pou pep Seselwa.

Mr Speaker, mwan osi konman enn bann Leaders United Seychelles dan mon distrik mon’n travay dan sa menm lespri pou fer ki ozordi sak zabitan Pointe Larue i kontinyen vwar laprev devlopman e santi lamelyorasyon dan son lavi personnel e pou son fanmir.

Mon partaz swe bokou mon bann zabitan ki lefikasite serten Minister, Lazans ou antite Gouvernman I bezwen amelyore otan ki posib.  Nou osi nou krwar dan stil leadership Prezidan Faure pou ankouraze ki bann decision-makers zot delivre lo zot bann lobzektif anliny avek sa trwa prensip kle ki latransparans, rann kont e bonn gouvernans.

Mr Speaker, prezan mon ti a kontan koz lo serten eleman enportan pou montre ki mannyer sa Bidze i viz ver sey amelyor lefikasite dan Servis Piblik.  Sekter Ledikasyon in ganny allocate en bidze R1.18bilyon ki permet li an etrwat kolaborasyon avek Lazans Nasyonal, ensi ki Minister Lanplwa fer provizyon neseser pou devlop bann skill ki bezwen dan marse lanplwa.  Sa i a permet ki nou pei i annan en rezo travayer ki tre kalifye e kreativ pou ki a permet an retour ogmant prodiktivite.

Atraver finansman dan Bidze 2020, 358 endividi pou kapab benefisye avek en labours dan diferan domenn.  Alors ou sa zenn Seselwa, ou sa zenn Pointe Larue ki pe aspire pou spesyaliz dan serten domenn travay, sa Bidze i pou ou.  Mon lans en lapel pou ou e tou lezot Seselwa ki oule aprofondir zot konesans pou profite, etidye byen, e sezi sa loportinite.  Fer sa Bidze vin pou ou.

Mr Speaker, sa Bidze i osi permet reform dan ledikasyon e formasyon ki pou vin atraver konstriksyon bann nouvo lekol.  Langazman nou Gouvernman pou amelyor sistenm e lefikasite dan lasante i vin atraver en propozisyon bidzeter a valer R1.2bilyon ki a permet lentrodiksyon en sistenm lenformasyon entegre, konstriksyon nouvo lopital e renovasyon kontinyel lo bann egzistan

Amelyorasyon dan lenplimantasyon bann proze Kapital Gouvernman atraver rekritman bann travayer etranze, pou ede deal avek lakantite proze ki annan

Kontinyen priyoritiz retenir lafors travayer sekter piblik e atir lezot travayer avek kalifikasyon apropriye.  E finalman prezant bann opsyon pou bann Polisi anver reform dan Ladministrasyon Piblik.

Mr Speaker nou Gouvernman in toultan konsantre lo enn bann prensip fondamantal nou Parti United Seychelles, pou fer sir ki i redistribye larises e permet e ki zonm Seselwa i touzour reste o sant devlopman.

En sonm R81.4milyon in ganny apropriye pou bann reminerasyon e saler dan kad revizyon bann Scheme servis konman lankourazman pou lafors travayer.

Mr Speaker, Gouvernman in adisyonnelman, annan lentansyon revwar kad sipor komen e ki nou dir Common Cadre an Anglais an 2021.  Sa i enkli kad resours imen, ladministrasyon ek sekreter, tousala avek bi pou atir e retenir bann striktir sipor de kalite dan bann diferan lorganizasyon ki krisyel pou ki bann Lorganizasyon Gouvernman i mars byen.

Mr Speaker Gouvernman pe osi fer provizyon dan Bidze pou sa bann eleman swivan;-logmantasyon saler par 5poursan, saler minimonm pou ogmante par R500 par mwan, parey Prezidan ti anonse pou Lafet travayer, e sa pou vin efektiv apartir le premye Zanvye 2020.  Logmantasyon dan bann benefis ek bann progranm aprouve kot Lazans Proteksyon Sosyal.  Sa i enkli parmi lezot;-benefis retret pou bann dimoun aze, sorti R5, 250 pou vin R5, 750.  Benefis envalidite ek dezabilite, sorti R5, 250 pou vin R5,750.  Pansyon Minimonm R1000.  Pansyon Kategori Spesyal R500 pou en group retrete.  Logmantasyon lasistans daycare ek childminding sorti R500 pou vin R750 apartir 2020.  Logmantasyon konze anyel sorti 21 pou vin 24 zour anliny avek lanons Prezidan Faure padan selebrasyon Lafet Travayer sa lannen.

Ler travay fleksib dan Gouvernman, sa fodre refer sorti Mr Speaker ki Onorab Aglae en MNA lo nou kote latab ti anmenn en tel Mosyon dan sa laliny.  Allowance Long Service, lentrodiksyon long service allowance pou bann anplwaye Komisyon Servis Piblik ek bann Kontra Lazans.  Allowance long service pou bann housekeepers ki pe travay avek korperativ kliner, e bann zofisye sekirite ki pe travay avek unit VVIP.

En alokasyon R10 milyon anver Unemployment Relief Scheme URS e 3.1milyon pou progranm Re-skilling pou Lanplwa.  Sipor kontinyel pou bann Scheme Biznes tel ki:-R3 milyon pou Fon Devlopman Lagrikiltir, atraver DBS.  R5 milyon pou Youth Employment Scheme My First Job.  R1 milyon pou Youth Entrepreneurship Scheme.  R25 milyon pou Scheme bann pti ek mwayen lantrepriz SMEs Scheme

Mr Speaker, enn bann pli gran priyorite e preokipasyon Nasyonal ozordi i konsern distribisyon later ek lakaz.  Pointe Larue pa en leksepsyon avek plis ki 400 zabitan pe esper en bout later swa en lakaz.

Alokasyon lakaz deza pandan lannen 2019 i donn lespwar nou bann fanmir ou endividi Pointe Larue ki pe espere depi en pe letan.

Parmi sa bann lakaz in deza annan omwen 17 fanmir ki’n benefisye atraver tel proze parey; faz 1 redevlopman Nageon Estate ou rekonstriksyon lakaz Emergency dan Matata.

Me Mr Speaker, sa pa fini la, avek linisyativ 24/24 inisye par Prezidan Faure, Gouvernman i ekspekte donn ankor 152 fanmir lakle pou zot prop lakaz avan lafen Desanm sa lannen.  Sa pou fer ki 24 fanmir Pointe Larue pou benefisye direkteman atraver nou proze faz 2 Ex-Albert Housing Estate, Anse des Genets.

An plis ki sa Mr Speaker, dan Bidze 2020 pou annan osi R2 milyon ki pou al ver konstriksyon Ex-Charlesia Estate ki konpri 3 lakaz 2 lasanm sa pou ganny servi konman bann relief houses pou konplimant proze 2enm faz redevlopman Nageon Estate

Mon kontan pou enform zabitan Pointe Larue ki swivan en meeting, demars in deza konmanse par Minister konsernen pou antre an konsiltasyon one-on-one avek bann fanmir ki pou enplike dan sa proze.

Gouvernman in osi fer provizyon atraver en Grant pou konstriksyon ankor 3mil  lakaz dan sa prosen 5an.  E lo sa kote nou distrik pou vwar proze Anse Francois Housing Estate Phase 2 demare avek konstriksyon 24 unit lakaz.

Parmi provizyon bidzeter ki’n ganny fer pou bann diferan land banks dan Sesel, Pointe Larue pa’n ganny oubliye.  Mon annan plezir pou enform tou zabitan ki’n kalifye pou ganny en bout later, ki demars pou allocate bann morso later Ex-Mellon i dan bann staz final.

Alors mon lans en lapel avek tou bann zabitan Pointe Larue ki lo lalis later ou lakaz, pou gard tou zot lenformasyon azour e kontribye ver zot Home Savings Scheme afen ki zot a kapab annan tou sans kalifye.

Mr Speaker, nou Gouvernman in osi fer provizyon pou en bond a en sonm lavaler R200milyon atraver HFC ki pou permete ki proze lakaz Fon Pansyon Ile Perseverance i ganny aste e lwe a en pri abordab avek bann graduates ziska ki ler zot a kalifye pou ganny zot prop kondominyonm ou en bout later par Gouvernman.

Mr  Speaker, mon’n toultan krwar ki enn bann meyer fason ki nou Gouvernman in redistribye larises, i lo nivo kominoter atraver bann pti proze ki ganny administre par Departman Gouvernman Lokal.

Pandan 2019, Departman Gouvernman Lokal i ekspekte konplet 210 pti proze kominoter pou en lavaler R27.4milyon.  En lot R30milyon in ganny met de kote an 2020 pou sa bann tel proze.

Tanka Pointe Larue Mr Speaker, mon annan plezir enform tou zabitan ki en sonm R1.67milyon in ganny depanse pou fer 29 pti proze sa lannen.  Sa bann proze in tous partou depi Anse Faure an desandan ziska Anse des Genets.

Sa bann tel pti proze i enkli ;- rekonstriksyon peron e lenstalasyon railing Anse Faure e Pointe Larue Santral Upper.  Turning areas e drenaz dan Matata e Anse Francois, Anba Fiyapen.  Parking dan Nageon Estate phase 2.  Konstriksyon ou reparasyon semen ou drenaz tel ki parey Anse des Gents, Anse Francois – Ex-Mellon, Pointe Larue Central Lower, Matata Estate, ekseter.

Sa lannen provizyon in osi ganny fer pou survey e get dan posibilite konstrir 5 semen loto e turning areas dan sa bann landrwa swivan;-

Anse Faure plato pou al konekte avek turning area kot lema.  Faz 2 Semen Adela, Pointe Larue Central Upper.  Nageon Estate Lower ziska kot turning area Nageon faz 1.  Nageon Estate faz 2 sorti kot turning area dan zanmirant kot lafanmir Melanie pou konekte avek sit proze lakaz Ex-Charlesia.  Nageon Estate faz 2 turning area anler pou konekte avek semen Caryole Pointe Larue

Mr Speaker nou osi annan lezot pti proze kominoter ki pou benefisye nou bann zanfan e zenn sportive egalman. Le 30 Oktob o non tou zabitan Pointe Larue mon’n annan gran plezir aksepte en Proze Mini Grand Stand e Changing Room, don Gouvernman Sinwan ki’n kout R900mil. Sa proze ti faz 1 redevlopman nou laplenn foutbol.

Atraver komitman Minis Dezinyen dan sa menm Lasanble swivan en kestyon mon ti demande, sa lannen pou osi vwar, demaraz faz 2 sa redevlopman ki pou enkli re-leveling e fencing nou laplenn foutbol.

Sa proze Mr Speaker a permet devlopman kontinyel nou bann foutboler, lezot sportsmen, e zanfan Lekol egalman.

Last but not least Mr Speaker, tre prosennman zabitan pou kapab benefisye avek extension e upgrading nou play ground ki sitye akote batiman Ladministrasyon Distrik Pointe Larue.

Mr Speaker, problem trafik pa pe zis afekte nou ler nou dan Victoria.  Nou eksperyans sa sityasyon toulezour, lasemenn dan Pointe Larue.  Alors zabitan Pointe Laure i akeyi provizyon pou en sonm R85.2 milyon dan Bidze 2020 anba Lazans Transpor lo Later pou bann diferan proze lenfrastriktir semen.

Ou sa zabitan Pointe Larue ki pas atraver sa latet fermal tou le bomaten pou al travay ou al lekol, mon annan sa mesaz lespwar pou ou.

Provizyon dan Bidze SLTA in ganny fer pou sa bann proze swivan dan nou distrik;-konstriksyon en 3enm lane ki pou enkli pavement, drenaz sorti Anse Faure ziska Airport, Dan sa laliny Mr Speaker mon ti a kontan lans en rapel avek Lotorite konsernen atraver Minis Finans ki la avek nou ozordi pou konsidere.  I annan retar konsiderab dan konstriksyon 3enm lane i annan negosyasyon ki bezwen ganny fer me mwan mon enplor zot o non zabitan Pointe Larue sirtou bann zanfan ki al lekol ki marse sorti Airport ziska Anse Francois, pou konsider e pran get posibilite servi sa larzan konmans fer drenaz konmans fer pavement pou sa bann dimoun servi.  Pou garanti  sekirite.  Apre si fodre nou ava negosye pou fer sa 3enm lane.  Me selman nou konmans serten keksoz tre prosennman.

Mr Speaker i annan konstriksyon en semen ki pou konekte Caryole Pointe Larue, Nageon Estate avek semen Ex-Albert, survey i dan faz final.  Tre prosennman mon kontan pou enform zabitan Pointe Larue ki scope pe al ganny fer.  Me selman deza i annan en sonm 2milyon ki’n ganny met de kote pou omwen konmanse e mon swete ki larzan i ganny bidzete lannen prosen pou kontiny sa proze.  En proze ki kle parey serten Onorab in fer resorti en proze ki kle pou ede avek sa sityasyon trafik.  Akoz sa semen i kapab konekte avek Point Larue avek Airport, e fer sir ki nou tonm direkteman dan lo highway alor i ede pou   sa problenm trafik.

Kontinyasyon lagrandisman semen Anse Francois.  Kontinyasyon re-surfacing semen Nageon Estate Upper ziska kot lekol segonder.

Mon swete ki avek sa bann tel devlopman zot lavi a ganny fasilite e zot sekirite e sekirite zot zanfan lo semen a ganny garanti.

Mon demann zot osi pou get sa bann devlopman konman en loportinite pou zot e zot fanmir ganny plis fasilite pou konstriksyon lakaz, loportinite biznes tel ki laboutik eksetera.  Annou pa zis get kondisyon semen, me annou osi gete kantite semen ki sa Gouvernman in konstrir tou sa lannen, e kantite akse nou’n gannyen.  Sa i laprev devlopman pozitiv dan nou pti pei Sesel.

Mr Speaker, pou konklir mon ti a voudre lans en lapel avek tou Seselwa pou step up, pran par dan devlopman soutenab nou pei, travay dir pou kontinyen solidifye vizyon nou Prezidan, vizyon nou Gouvernman pou en Sesel pli prospere.

Mon profit sa lokazyon pou remersye tou travayer Seselwa, tou travayer e fanmir Pointe Larue pou met konfyans dan nou Prezidan, en zonm senser, kapab e disiplinen ki met son pep e pei avan tou.

Ou sa zenn, ou sa profesyonnel, ou sa paran, sa granparan, annou reste touzour konsyan kote nou sorti e kantite nou’n akonplir ansanm konman en sel Nasyon.

Annou tou donn en koudmen konbat kont bann fleo sosyal ki pe detrir nou bann zenn e andikap nou lekonomi.

Ou sa biznesmenn, sezi bann loportinite ki nou Prezidan in donn nou, pou ede konbat kou lavi, mon osi profite pou demann Gouvernman an retour pou kontinyen persevere pou kree bann kondisyon favorab pou nou sekter prive pou permet zot zwe sa rol kle.

Mon profit loportinite pou demann tou biznes dan Pointe Larue pou zwenn mwan pou kontribye ver devlopman distrik Pointe Larue e osi nou pei ki nou kontan.

Pou sa zenn garson, sa zenn fiy, mon lans en lapel avek ou pou sezi tou loportinite ki sa Bidze in prezant ou pou garanti ou karyer, batir ou fanmir, reziste tantasyon labi drog ek lalkol, vin pli responsab e anmenn sa pei ver lavan pou ou fitir zenerasyon.

Mr Speaker, finalman mon ti a senserman voudre remersye tou bann ki’n siport mwan konman en leader dan distrik Pointe Larue. Mon remersye zefor tou public servants ki pe travay dir pou fer keksoz marse.

Set anba direksyon Prezidan Faure a latet en Gouvernman avek son pep a ker ki ansanm avek zot monn kapab akonplir bokou, fer Pointe Larue bouze, empower zot pou vin pli responsab e konsernen dan devlopman nou distrik.

Avek zot mon bann frer e ser Pointe Larue mon’n kapab akonplir mon bann promes ki mon ti fer avek zot pou zot elekte mwan konman sa zonm ki pou donn sa distrik en nouvo souf e fer li vin pli meyer.

Mon envit tou zabitan pou profit Staz Komite, pou angaz mwan, swa par en call ou en pti text, met zot konsern devan, ansanm nou ava pran nou par dan sa Bidze.

Alors mon bann zanmi annou ralye deryer sa sel zonm ki annan leksperyans diriz sa pei, sa pa lot ki Prezidan Danny Antoine, Rollen Faure e garanti en viktwar pou Eleksyon 2020.  Pointe Larue for Danny! United Seychelles for Danny! Danny For Seychelles!  Mersi Mr Speaker.

 

(APPLAUSE)

 

MR SPEAKER

Mersi Onorab Valmont.  Bon nou ava pran en break e nou ava kontinyen nou travay 4er.

 

(BREAK)

 

MR SPEAKER

Bon nou ava kontinyen nou travay.  E toudswit mon ava donn la parol Onorab Bernard Georges.

 

HON BERNARD GEORGES

Mersi Mr Speaker.  Bonn apre midi Mr Speaker, Minis, ou delegasyon.  Tou bann Manm Onorab.  E tou dimoun ki pe swiv travay Lasanble.

Mr Speaker i annan de moman dan lavi politik en pep, kot ou konnen ki ou pei i dan bon landrwa, kot tou keksoz pe mars byen, kot i annan en feeling byennet.

E kot ou vwar en Gouvernman enspire e angaze.  Pran sa divan e anmar sa laroul pozitiv, ankouraz sa latmosfer e enspir son pep pour al pli lwen ankor pour sot pli o, e pour bouz pli vit.

Sa bann moman pa vin souvan.  E ler zot vini, nou tou nou bezwen sezi sa loportinite.  E ansanm koman en Nasyon ralye, rantre dan sa latmosfer ankourazan.  E trenn tou seksyon popilasyon ver en desten pli briyan, pli ris, pli bon, pli solid.  Zedi pase, pa ti enn sa bann moman.

Depi en pe letan mon pe fer nou rappeler ki lavi nou pei depi toultan, se en lavi loportinite manke.  En nespes dezir ou ti a krwar pour nou swazir pour fer en move desizyon, olye enn ki bon pour pran semen ki mwen bon ler nou ariv dan en fouka dan larout.

E pour mwan Diskour Bidze Minis Finans i ankor enn fwa demontre ki nou’n mank en loportinite pour nou pei.  Tou keksoz i la sepandan Mr Speaker, pour nou fer nou pei sa model pour lemonn.   E sa pei kot tou nou zabitan pour ere viv.

Me i paret ki swa nou Dirizan pa vwar sa lanmes petar ki zot bezwen alimen.  Swa zot vwar, me zot per pour alimen.  Avek rezilta ki petar olye pete, i fize.

Nou mank loportinite apre loportinite.  E nou pei, e nou pep pa ariv a son nivo krwasans ki i merite.  Natirelman si nou konpar nou avek bann pei ki i annan plis problenm.  Nou pour krwar ki nou dan en bon landrwa.

Me trazikman, ler nou konpar nou avek bann pei parey nou, sela ki nou vwar kote nou’n al mal.  E kwa ki nou devret fer pour anmenn nou pei ankor pli lwen, pli vit posib.

E Minis, eskiz mwan pour dir ou, se pa avek en Bidze parey sa enn ki ou’n propoze ki sa pour arive.  I kler ki pa’n annan okenn planifikasyon a lonterm dan sa bann lannen pase.  E ki nou Dirizan ti pli enterese avek zot Fondasyon JJ Spirit ek zot batiman Espace ki avek fer lakaz pour zabitan Les Mamelles.  Ouswa en bis SPTC…

 

(APPLAUSE)

 

HON BERNARD GEORGES

… ouswa bis SPTC ki pa grense sak fwa ki i pez fren.  La en sel kou nou bezwen fer fas avek en seri proze amelyor lenfrastriktir tou ansanm avek konsekans ki nou konnen.  E an menm tan pour esey fer en sirplis bidzeter.

Nou pa kapab kontinyen viv dan sa bann circle kot en lannen nou deside ki se 2,000 lakaz ki pour ganny fer.  E nou bliy tou larestan devlopman lenfrastriktir.

En lot lannen nou deside ki problenm delo i grav.  E alor nou taye pour met stasyon desalinasyon partou.  E en lot lannen nou deside ki nou lespwar, se dan tunnel atraver montanny.

La sa lannen, se fer monte pri GOP.  Tousala, se bann mezir kneejerk ki nou pa kapab kontinyen fer.

Sa Gouvernman ki O Pouvwar Mr Speaker, i parey en zanfan.  Ouswa parey Prezidan Donald Trump.  I kapab focus zis lo en keksoz a lafwa.  E zis lo sa dernyen keksoz ki in tande.

Nou lespwar Mr Speaker, se ki sa, se dernyen lannen ki nou pour koz koumsa.  Lannen prosenn mon konnen ki mwan, mon pour lo lot kote latab pe siport en Bidze kler vwayan, konpreansiv.  E ki reponn a legzizans nou pei, e byennet nou pep ki Minis Finans LDS pou’n prononse dan sa Lasanble!

 

(APPLAUSE)

 

HON BERNARD GEORGES

Fini avek tourn an ron.  Fini avek tunnel vision.  Nou pei i merit, e i pour ganny en Sekter Finansyel apropriye avek en leadership ki pour kapab tis en pyes latwal an antye.  Olye zis fer mouswar apre mouswar.  Epi rod koud zot tou ansanm pour fer li vin en dra lili.

Mon pa en Ekonomis Mr Speaker, alor, mon a les depouyman Ekonomik sa Bidze a sa bann ki pli kapab ki mwan.  Les mwan zis fer detrwa komanter koman en sitwayen senp.  E enn ki’n o servis nou pei pour plizyer lannen.  Sa Bidze se enn ki selon mwan, i rekonnet ki lo nivo balans fiskal, nou pei i ok.

E alor i pe sey konsolid lo sa baz.  Sa i byen.  Me i pa ase.  Business as usual pa pour anmenn nou okenn par.  En Gouvernman ki zis pe fer maintenance, parey Leader Lopozisyon in fer nou rapel, pa ase.

Sa ki nou pei i bezwen,  Sse loportinite pour grandi e pour zwenn kominote Nasyon ki pe grandi pli vit ki posib.  Non pa zis kontinyen vir lanmenm kot nou ete.   E se la kot sa Bidze selon mon pa ase prevwayan.

Nou pei i en pei ris.  Parey Minis in dir, larzan ki nou Lendistri Touris i anmennen dan nou pei i sibstansyel, e i kontinyelman grandi.

Sa larises touris i filtre atraver tou sekter nou Lekonomi, sirtou Praslin e La Digue.  Sa i evidan pour tou sa ki anvi regarde.

E tax ki nou pei i anmase, i ase pour subvenir a nou bezwen parey Minis in dir.  Nou pa bezwen depann lo Don bann lezot pei pour bokou nou depans.  7poursan selman dan sa Bidze.  E sa se bann proze lenfrastriktir parey nouvo Lakour Mazistra, Biro Attorney Zeneral eksetera.  Gouvernman i kapab mars lo tax ek lo son lenvestisman.  Sa se en bon landrwa ki nou ladan.  I ti ava pli meyer, si nou ti annan plis reveni lo lenvestisman.  E donk depann mwens lo tax.  Me annou aksepte sa sityasyon mannyer i ete.  E regarde ki nou bezwen fer.

Sa ki konsern mwan Mr Speaker parey mon’n dir, se sa mank vizyon ki Gouvernman i annan.  I sanble mwan ki i satisfe ki nou kapab balans nou Bidze e i kay lanmenm.

Sa ki nou bezwen, set en vizyon krwasans.  La ki nou konnen ki nou kapab balans nou Bidze entern.  Se la ki nou bezwen lans nou dan bann nouvo defi dan bann sekter ki pour prodwir plis lanplwa, e plis larises.  Lo sa kote, Bidze i missing in action.

Mon pa vwar en sel nouvo nide.  Plito, mon vwar en pti lagrandisman isi, Air Seychelles pour al Tel Aviv.  E laba, Ste Anne lotel pour agrandi.

Oli sa lide, parey envestir dan tankers?  Oli proze highway ziska Anse Royale?  Oli nouvo terminal Erport?  Oli Victoria Waterfront?  Sa Bidze i parey son Gouvernman Mr Speaker.  I fatige.   I en Bidze ki parey en travayer 4er mwen 5 apre midi, in travay, in soulaze ki in kapab ariv lafen lazournen san gran problenm.  I pe prepare pour al dan lakour.  Epi pour al relax.  Nou pei pa bezwen sa.  Sa ki nou bezwen, set en Bidze ki pour stimil Lekonomi ki pour relans krwasans ki pour kre nouvo lespas pour biznes.  An dot mo.  Sa ki nou bezwen set en Bidze loportinite.

Mon a eksplik mon lekor.  Ki nou bann defi ozordi koman en Nasyon?  Enn, se sanzman klima.  Relye a sa, se agrandi vitman nou resours lenerzi renouvlab.  En lot, se kontinyen krwasans Lendistri Tourism.

Sa pa pour demann-sa pour demann, non selman plis lotel.  Me en meyer Erport ek batiman terminal.  En trwazyenm.  Se plis e meyer fason kontrol trafik, pour asire ki sa bann lanbouteyaz avek trafik ki pe antre e sorti Victoria, i redwir.

Redwir lakantite travayer etranze, se en lot.  Atak problenm drog e mank mendev Seselwa ki sa i anmennen.  Fasilite fer biznes, mank lozman.  Mon aret la Mr Speaker, akoz lalis i tro long.

        Dan tou sa bann sekter ki mon’n mansyonnen.  Swa Bidze i pa tous li ditou.  Swa son lenpak i modes.  En tinkering parey Angle i dir.  napa nanryen ki sa Bidze i anmennen ki fer mwan eksite,  e krwar ki Gouvernman atraver en depans pres R10bilyon pour amelyor okenn sityasyon.  Sa ki mon war set en Bidze statik.

Permet mwan pour tous lo enn de sa bann problenm ki nou fer fas avek aprezan.  Travayer etranze.  Avek bi redwir lo lakantite travayer etranze, Minis i propoze fer sa bann ki’n isi pour plis- pour pli lontan pey plis pour zot GOP.  Ki solisyon egzakteman ki sa pour anmennen, apard fer plis larzan pour Gouvernman?

Si sistenm Lanplwa isi pa sanz,.  sa biznes ki annan- ki anploy en etranze, pour still bezwen anploy en etranze.  Alor, i pour zis ranplas enn par en lot, tou le 5an pour evit sa logmantasyon dan kou GOP. 

        Rezilta –  se ki lakantite travayer etranze pour reste parey.  E nou bann biznes, pour kontinyelman bezwen train en anplwaye etranze pour ranplas sa enn ki ti’n ganny train.  E ki ti’n abitye dan son lanplwa, e ki ti’n fini aprann Kreol.

Redwir congestion trafik;  La apre ki sa bout semen o bor Hypermarket in pran pros 2an pour li konplete,  nou pe al ganny en lot lane traffic pour ed veikil antre Victoria.  Sa set egzakteman Mr Speaker sa ki nou pa bezwen.  Olye rod en fason pour anpes trafik antre lavil, par fer semen bypass a kour term, e fer parking an deor lavil ek en shuttle pour antre lavil par egzanp.  Ouswa amelyor stok parking o bor Lavil li menm.  Plan Gouvernman se pour fer li vin pli fasil pour loto antre dan Lavil, san met en sel plas parking an plis pour tou sa bann loto.

Vey mon parol Mr Speaker.  Sa ki nou pe al vwar, se pa en amelyorasyon.  Me nou pe al dan plis problenm trafik ankor, e plis lanbouteyaz.  E Gouvernman, si i ti ankor O Pouvwar, ti pour vini lannen prosenn e propoz ankor en lane traffic.  Sa fwa si lo La Venue Francis Rachel.

Erezman ki se bann dimoun lo sa kote latab,   e mon mazinen en Onorab ki pa pe asiz lwen avek mwan, ki pe propoz Bidze lannen prosenn.

Lozman.  Zabitan Les Mamelles i ankor pe esper son 24 lakaz dan 24 mwan.  Pour le moman, nou ankor lo zero lakaz dan 36 mwan.  A sa vites nou pour ganny nou 24 lakaz dan 72an.  Setadir an 2092.

Bidze Minis, pa anmenn okenn soulazman.  Akoz i propoz selman 361 lakaz ant la ek Desanm 2020 pour tou Sesel an antye.

A sa ritm,  si i pour arive, Les Mamelles pour ganny 14.4 lakaz avan lafen lannen prosenn.  Oli 24?  Erezman Mr Speaker, ki se en Onorab lo sa kote latab ki pour Minis Lozman lannen prosenn pour deblok sa lasasen.

Erport;-  Mon fek sorti Maurice.  Nou konpetiter tourism dan sa morso losean.  Zot Erport in amelyor ankor plis.  E in ariv lo en nivo enternasyonal.  Nou, nou langar- eskiz mon pour apel li sa.  Me nou langar ki son kapasite i fill konpletman ler plizyer avyon i ariv ansanm, i ankor parey ki i ti ete.

Laliny Imigrasyon i tro long.  E i pran tro letan.  Nou sel karousel bagaz, pa kapab cope ler i annan plis ki en avyon a la fwa.  Landrwa an antye pa akeyan.

La nou’n ariv dan en sityasyon, kot nou terminal domestik i pli smart ki nou terminal enternasyonal.  Kote ankor ki ou vwar sa kalite keksoz?   Me ki i ganny propoze dan Bidze?  SCAA pe al fer son office block.  E pe al aranz semen akse, e pontoon pour bann bato sovtaz.  Sa ki nou bezwen pour akey nou touris, ki Sekter mazer nou lekonomi, nou pa pe fer.

Erezman Mr Speaker, ki lannen prosenn.  Minis transpor pour sorti lo sa kote latab.

Victoria Waterfront.  Caudan Maurice fek ganny en face lift.  Nou, nou Waterfront i ankor en mess san plan, ni envestiser.

La mon ti a profite pour felisit Mer Lavil, Mr David Andre pour son linisyativ pour komans en pti proze amelyorasyon nou Waterfront.  Well done Sir David!  Kontinyen silvouple, ziska sa proze i ariv kot Lasal Konferans STC.  Antretan Minis i trankil lo sa group proze- lo sa pli gro proze lenvestisman ki nou Lavil i bezwen.  Avek larzan Sekter Prive, e proze son Gouvernman i ankor dan en bwat an vit dan lobby ICCS.

Erezman Mr Speaker ki lannen prosenn, Minis Lenvestisman pour en dimoun lo sa kote latab.

 

(APPLAUSE)

 

HON BERNARD GEORGES

E sa Minis avek Mer Lavil pour kapab enn fwa pour tou, fer nou Water Front vin sa bizou ki i devret vini.  E anmenn en lot sours reveni pour nou pep.

Si serten nou bann Sekter kle in ganny kit ater Mr Speaker,  i annan lezot sekter ki montre mon ki Gouvernman pa serye lo sa ki i pe fer.  Ouswa i pe fer ekspre pour trenn lipye.

Striktir tax lo lalkol in ganny koz lo la.  I annan plizyer lannen ki nou’n dir ki sa sistenm takse lalkol isi, i pa zis.  E i pa anmas ase tax avek serten prodikter.

Semenn pase Minis in dir nou, ki zot in vwar en loophole dan bann prodikter lokal, ki bann prodikter lokal ti pe eksplwate.  Ki mannyer in pran zot tou sa lannen pour vwar sa defayans?  E ki kantite reveni ki pa’n ganny anmase tou sa bann lannen?

Me sa pa tou;-  la nou’n ganny dir, ki se sa lannen ki en Konsiltan pour ganny rode pour etidye sa problenm.  E i pour pran ankor en lot lannen pour son bann rekomandasyon ganny enplimante.  Ki mannyer ou apel sa?   Si pa en loportinite manke, e en dezir kler, pour pa pran en mezir neseser.  E sa zis dan 1 fason pour les labi kontinyen ankor.

Lekel, mon demann mon lekor ki pe profite?  Sa se mon kestyon.  Erezman ki lannen prosenn, Minis Finans- Mon kontinyen Mr Speaker?  Mon pa kontinyen?  Veikil elektrik.  Ti’n ler.  Me, eski se meyer fason pour anbras sa fenomenn?  Mon pa krwar Mr Speaker.

I byen ki nou bouz dan direksyon veikil elektrik ouswa hybrid.  Me selon mon, nou’n mank en loportinite ankor enn fwa.

Apard ankouraz dimoun prive pour bouz dan direksyon loto elektrik, eski i pa ti pour pli bon pour amelyor transpor piblik pour sa plizyer dizenn mil dimoun ki pran bis toulezour?

Akoz ki Gouvernman pa envestir si fodre, atraver Don ki pei parey Lenn ek La Chine i donn nou dan transpor piblik elektrik?  Avek bis modern ki pa fer tapaz.  E ki pour redwir non selman kou transportasyon, me osi lefe nocive lo lanvironnman ki sa bann vye bis SPTC i desarze, e an menm tan anmenn pase dan plis konfor.

Olye fer plis semen pour anmenn veikil dan lavil.  Annou fer Lavil plito vin traffic free.  Olye pous prive, dan veikil elektrik.  Annou fer sa ki pour transpor piblik an premye.

Sa ti ava en propozisyon ki mon mwan ti ava kapab siporte.  E pandan ki nou lo size.  Minis in konsantre lo devlopman semen dan Victoria.  Kan eski bann drayver e pase ki pas Au Cap pour ganny en soulazman avek sityasyon semen laba?

 

(APPLAUSE)

 

HON BERNARD GEORGES

Me sa Bidze i pa zis en Bidze mank loportinite.  Avek tou respe ki mon annan pour Minis Finans, e zot tou isi zot konnen ki nou relasyon,  mon bezwen dir Mr Speaker, ki sa Diskour Bidze ek sa Appropriation Bill ki nou pe diskite, i pa lot ki en Bidze eleksyon.  Sa nou ti ekspekte.

Apre tou, lannen 2020 pour lannen Wavel.  Eskiz mwan, pour lannen eleksyon.  E alor, i toutafe normal ki en Gouvernman i pran sa loportinite pour fer promes dan en fason pour ogmant son sans dan lavenir.  Sa i normal.

I pa byen, me i normal.  E i nou responsabilite pour montre lekel sa bann labwet eleksyon dan sa Bidze.  Logmantasyon pansyon, retret ek dezabilite i enn.

Logmantasyon dan konze anyel, i en lot.  Logmantasyon saler par erdtan.  E saler home carers i en trwazyenm.  De nouvo logmantasyon pansyon- logmantasyon dan benefis maternite madanm Praslin ek La Digue, e pour lasistans Day Care ek Child minding i en lot ankor.  Logmantasyon dan Scheme Housing Subsidy i en lot.  E pour bann ki annan larzan, number plate personalize pour zot bann loto i en labwet ki’n ganny anvoye.  Minis, nou’n depiste ou.

A lafen sa legzersis, permet mon pour regarde ki mannyer sa Bidze pour amelyor zabitan mon distrik.  I kler ki logmantasyon dan pansyon retret ek dezabilite pour ed pansyoner ek bann ki pe ganny pansyon dezabilite.  I

I osi kler ki logmantasyon saler pour travayer home carers, pour ed dimoun dan sa kategori.  Lasistans Child Minding e Housing Subsidy Scheme parey.

Me sa lasarite pa ase.  E se pa sa, ki nou zabitan pe rode.  Sa ki zabitan mon distrik pe rode, se kan sa meeting ki nou’n ganny promet isi menm dan sa Lasanble par Minis Lenfrastriktir 2 mwan pase, avek zofisye son Departman pour ganny fer, pour nou konnen ki proze lakaz ki pe ganny konstrir dan distrik.

Sa ki nou zabitan i oule, se ki si zot pare pour debourye pour fer zot lakaz.  Zot pour ganny ase larzan pour konplet zot proze, parey fir Mrs Louise, Le Rocher ek pti zanfan Mrs Barrack Semen Karoutsou pe rode.  Se sa ki sa pei i bezwen Mr Speaker.

Minis in dir lo televizyon ki nou pa en welfare state.  Ler en Bidze i donn R1.4bilyon avek lasistans- Lazans Proteksyon Sosyal, setadir 12poursan son Bidze, napa lot mo pour dekrir sa pei, apard en welfare state.

Sa ki nou zabitan i bezwen Mr Speaker.  Se pa en Bidze welfare, ni en Bidze eleksyon, ni en Bidze loportinite manke.  Me en Bidze ki pour ed sa ki anvi debourye.  E an menm tan fer sir, ki sa ki byen fer.  I kontribye atraver en sistenm tax byen striktire pour benefis tou popilasyon.

Me pour sa, nou ava bezwen esper ankor.  Mon donn Seselwa randevou dan bwat vote 2020.  En attendant les mon eksplike kisisa ki mwan ti pour kontan vwar?  Nou sistenm tax i bezwen ganny revwar.  E nou’n koz lo la depi bomaten.  E mon krwar tou dimoun i dakor lo la.

Nou bezwen koman en pei anmas tou tax ki nou kapab.  Me anba en sistenm ki pli zis, kot sa ki- kot se pa zis 30 Lakonpannyen ki pey 80poursan tax biznes.  Tou biznes ki fer profi bezwen kontribye zot par.  Tou dimoun ki ganny en saler sibstansyel, bezwen kontribye son par.  Tou dimoun- pardon- lanfaz i bezwen lo lazistis tax.  Sa ki pli kapab peye, pour ganny takse.  E lanfaz pour bezwen osi, lo fer sir ki sa ki devret peye, i fer li.  Dan sa fason nou pour rantre-nou pour fer rantre tou larises pei.  Pa zis sa ki nou krwar ki nou bezwen pour balans Bidze.

Avek sa sirplis,  nou pour nepli bezwen ki Minister Finans an Septanm i demann bann Departman koup depans Lasanble, koup depans- pardon- ki Lasanble ti’n vote pour kapab annan en sirplis Bidzeter parey nou’n bezwen fer sa lannen.

MCB– Labank MCB Maurice fek pey zot staff an plis ki 13enm mwan saler.  Staff in ganny en bonus ant 3 a 8 mwan lapey.  E setadir ki serten staff in ganny 21 mwan lapey an 2019.

Mon’n deza dir Mr Speaker,  e mon repete isi, ki mon mwan napa okenn problenm vwar en zofisye SCR ki kolekte tax par lao la norm ganny sa kalite bonus.  Se pei ki pour benefisye.

Nou Erport i bezwen a la oter nou pei koman en destinasyon touris 5Zetwal.  La ki nou annan bann Konpannyen avyon deliks parey Emirates ek Qatar e lotel 5Zetwal pour akey zot.  Nou nepli kapab akey touris dan sa batiman egzistan.  Premye lenpresyon, e dernyen lenpresyon i sanmenm ki fer plis pour fer en viziter al avek en bon memwar son sezour isi, e anvi retournen.

Krwar mon Mr Speaker, mwan vwayaz bokou parey tou Manm isi.  E bokou sitwayen Sesel.  E mon pe koz lo leksperyans.  Pa SCAA ki bezwen nouvo biro.  Se nou viziter, premye pilye nou lekonomi ki nou devret deservi an premye, par donn zot en Erport terminal a laoter.

E ki mannyer nou pour kapab pey pour sa bann tel lenfrastriktir.  Pa zis Erport terminal ki nou kapab afford Mr Speaker.

Me nou kapab osi, avek en bon sistenm koleksyon tax, e bon reveni Nasyonal dan Sekter prodiktiv targete, ganny sifizaman larzan pour fer en terminal erport a laoter, pour fer Waterfront Victoria, e menm a pli lwen e pay off Etihad pour nou repran nou Air Seychelles e fer li marse.

 

(APPLAUSE)

 

HON BERNARD GEORGES

Ler mon koz lenvestisman, mon konnen ki Gouvernman pa devret al dan biznes.  Nou lo sa kote latab nou pa krwar ki Gouvernman i merit al dan biznes.  Me i annan serten Sekter ki enportan.  E ki bezwen sipor Gouvernman.  Litilite Piblik par egzanp, transpor aeryen.

Me, i annan en lot.  Telekominikasyon.  La ki mon konpran ki propriyeter Cable & Wireless pe al vann sa Lakonpannyen.  E ki en consortium Seselwa pe prepare pour aste li.  Mon krwar, ki si Gouvernman pa partisip dan sa biznes, sa pour ankor en loportinite manke.

SSI, Société Seychellois D’investissement,  in ganny formen pour envestir lo la par Gouvernman dan bann Sekter Prodiktif.  Akoz ki zot pa pran par dan sa demars pour zwenn sa consortium ki pe al aste Cable & Wireless koman en lenvestiser dan sa Sekter.

Lezot pei in fer li, avek gran sikse.  Cable & Wireless ek lezot Lakonpannyen Telekominikasyon i en gran sours reveni san gran risk.  Gouvernman i bezwen partisip dan sa bann sekter.  Pa koman Gouvernman, me koman en partner avek sekter prive pour ogmant reveni sorti dan lenvestisman, e ed redwir lenpak tax- lenpak tax lo sitwayen, an menm tan ki reveni i ogmante pour fer bann proze Kapital ki nou merite parey sa detrwa ki mon’n mansyonnen.

Bidze 2020, Mr Speaker an konklizyon, pa donn mwan okenn lespwar ki sa Gouvernman pe mazin dan sa direksyon.  Nou devret antre dan bann Sekter Prodiktiv atraver veikil legal ki’n ganny kree pour sa rezon.

E an menm tan koup middleman, parey sa ki fourni STC.  Dan en fason ki nou ava kapab redwir pri, e ogmant reveni Leta pour envestir dan proze Kapital esansyel ek bann-dan bann sekter kle.

Vwala Mr Speaker en vizyon finansyel pour nou pei, pour ranplas sa enn ki Minis in propoze.  Mon soumet sa avek lekip LDS ki pour form sa Gouvernman lannen prosenn pour met li an aplikasyon.  E mon annan lankourazman ki nou letan tourn an ron pe al fini.  E lavenir loportinite ek linovasyon pour tou nou pep pe al komanse tre byento, avek LDS Sesel!  Mersi Mr Speaker.

 

(APPLAUSE)

 

MR SPEAKER

Mersi Onorab Georges.  Mon ava donn la parol Onorab Sebastien Pillay.

 

HON SEBASTIEN PILLAY

Mersi Mr Speaker.  Bonn apre midi Mr Speaker.  Bonn apre midi tou koleg Onorab.  E bonn apre midi tou dimoun ki pe ekout nou dan lakour, oubyen aryer.

Mr Speaker, repons Bidze i toultan en moman kot nou Lasanble, nou kritik, nou analiz Bidze, e nou regard Bidze dan tou son bann eleman pour nou kapab eksplik lepep Seselwa, kwa ki sa Bidze pe anmennen de nouvo pour zot.  E kwa ki lavenir pe anmennen pour zot.

Mr Speaker entervenan avan mwan, in koz lo 10 mouswar.  Mon krwar Mr Speaker nou pour kontinyen tis detrwa mouswar.  Akoz an 2020 nou ava kapab partaz detrwa mouswar avek tou bann koleg lo lot kote latab, apre ki United Seychelles i re ganny eleksyon.

 

(APPLAUSE)

 

HON SEBASTIEN PILLAY

Mr Speaker i malere ki, mon koleg avan mwan in pas plizyer minit pe sey noy en pwason.  E en retorik ki mon’n tande pandan plizyer lannen, kot toultan mon’n tande poudir Bidze pei pour anmenn nou ver nouvo faid, pour anmenn nou ver nouvo kasir, nouvo felir.  E menm ozordi nou’n tann bann nouvo mo koman ‘crack’ e koman lezot ki’n aparet dan nouvo vokabiler ki LDS pe servi.  Me sa se politik Mr Speaker.  E sela kot bann Manm Lasanble Nasyonal i ganny loportinite pour vin fer politik.

Permet mwan Mr Speaker, pour detay en pti pe bann diferan retorik ki’n ganny pase avek nou.  E pour nou konpar bann diferan keksoz ki’n ganny dir par lepase.  Ouswa ganny fer par lepase pour sey fer lepep Seselwa konpran kwa egzakteman, e kote nou pe ale koman en pep.

Mr Speaker si mon ti en- mon ti ankor dan en laklas lekol, e LDS ti enn mon etidyan.  E i ti’n desen, mon ti pour donn li en lagonm.  E sak fwa ki LDS ti pour koze, mon ti pour dir li efas en keksoz lo sa desen.

Akoz se koumsa ki nou pour kapab rezim lafason ki LDS in apros sa bann Bidze pandan sa 3 dernyen lannen.  A sak fwa ki Gouvernman in anmenn en mezir, oubyen en keksoz pozitiv.  LDS in rod en fason pour shoot li down, e pour dir i pa pour bon, i pa pour marse.  Oubyen pa pour anmenn nou okenn par.

Me sa i en retorik ki nou toultan tande.  Par egzanp retorik lo tanker.  Eski memwar lepep Seselwa i sitan kourt, pour rapel ki Lopozisyon ti dir lo bann tankers?  Eski nou bliye?

Me kan ozordi nou pour servi legzanp bann tankers, koman en legzanp lenvestisman.

Mr Speaker lalis i long.  I annan plizyer mezir ki nou’n entrodwir ki toultan Lopozisyon in vwar problenm avek.  Me zanmen Lopozisyon in vin avek en mezir alternatif.

Se pour sa rezon ki mon ti a kontan demann zot.  Si zot krwar poudir zot pare pour form prosen Gouvernman, alors, lesansyel ki zot ti devret vin avek ozordi, se en Bidze alternatif.

En Bidze alternatif ki i ava montre kote zot, zot krwar bann larzan i devret ganny depanse, dan en fason kler.  Me pa servi Bidze ki Gouvernman in anmennen pou dir ek nou koumsa, poudir sa Bidze i en Bidze eleksyon.  E sa Bidze i pa en Bidze ki pour anmenn prosperite pour lepep Seselwa.

 

(APPLAUSE)

 

HON SEBASTIEN PILLAY

Mr Speaker i osi kler ki malerezman i annan serten Manm lo lot kote latab ki ankor stuck.  Stuck dan en mindset kot nou vwar tou keksoz dan en portre negativ.  Me nou pa vwar positivité.

E mon eksplik sa konfizyon dan sa fason Mr Speaker.  Ler mon’n ekout bann Manm ki’n koze.  Mon’n tann Manm ki’n vwar ki dan Bidze in annan bann eleman ki’n anmenn benefis pour zot distrik.  Me parkont mon’n vwar i annan distrik ki nanryen pa’n ganny fer.

Kestyon ;-  ki si mon ti en elektora dan sa distrik mon pour demande,  se ki, eski mon pour re vot pour en MNA ki dan son distrik nanryen pa’n ganny akonpli?

 

(APPLAUSE)

 

HON SEBASTIEN PILLAY

Sa i en pwen fondamantal Mr Speaker.  I en pwen fondamantal.  Akoz ler nou campaign koman politisyen, nou campaign lo en baz ki nou demann elektora pour donn nou sipor, pour ki nou kapab travay, e akonplir sa ki nou krwar nou pa’n akonplir.

E sete sa baz ki la mazorite nou la anndan nou’n campaign dan bann eleksyon pase.  E se sa baz ki nou’n servi pour nou ganny eleksyon.  Me Mr Speaker, me!  Kontrerman ek sa pti laroul, sa pti laroul ki LDS ti gannyen kot ti annan tou Manm dan Lasanble Nasyonal ki ti reprezant en parti politik,  Safwasi, se zot ki dan hot seat dan sa bann distrik.  E se zot ki dimoun pe met bann lekspektasyon lo zot.  E se zot ki bezwen delivre pour dimoun.

Onorab Georges, atraver ou Mr Speaker. Mon bezwen remind ou ki malerezman LDS in sot tro boner lo zot laroul.  E aprezan zot pe zwe catching up.  I en pti pe tro tar Mr Speaker.

 

(APPLAUSE)

 

HON SEBASTIEN PILLAY

Mr Speaker, nou bezwen aksepte.  Aksepte larealite pour dir nou pei in sanze, e  konzonktir politik in sanze.  Mon pa vin la anndan pour vin denigre mon bann oponan politik.

Mon vin la anndan pour sey os nivo sa deba.  Pour nou anmenn sa deba pli devan ki kot i ete.  Akoz anmenn en Gouvernman, e manage en Gouvernman i pa en keksoz fasil.

Napa nanryen ki ganny fer ler ou pez en bouton.  E ekspekte poudir ou pour ganny en rezilta ki pour anmenn ou tou bann solisyon ki ou, ou anvi vwar.  Par egzanp Mr Speaker.  Annou regard Ledikasyon.  Mon ti ava ekspekte ki tou Manm Lasanble i remind lepep Seselwa, konbyen Gouvernman pe depanse dan ledikasyon?

Mon ti ava ekspekte ki tou Manm Lasanble i remind tou etidyan Seselwa konbyen Gouvernman pe depanse lo zot ledikasyon par zour, pour fer ki zot in pli serye, e pran zot letid o serye.  Me non!  Nou’n swazir pour kritike, e dir ki bann taxpayers pe pey bann teachers dan Minister Ledikasyon, oubyen pe pey bann dimoun dan Gouvernman pour zot travay.

Me kestyon Mr Speaker.  Ankor i ilistre en konfizyon.  Eski sa bann teachers pa osi bann taxpayers?  Eski sa bann dimoun ki travay dan Gouvernman, pa osi bann tax payers?

LDS i oule fer nou krwar poudir i annan en group dimoun ki apel ‘taxpayers’ ki reste akote,  e Gouvernman li a kote.

Me esansyelman taxpayers i bann dimoun ki osi travay dan Gouvernman, e travay dan sekter prive.  E zot osi zot kontribye.  Set alors ki sa ki nou devret pe dir, se ki tou etidyan, tou Seselwa ki annan loportinite pour li fer en travay, oubyen pour li fer en keksoz.  I bezwen sezi sa loportinite.  Si ou en etidyan lekol, aret donn ou ansennyan latet fermal.  Konsantre dan ou laklas.  Aret disturb lezot.  Sanz ou behavior, aret mank lekol.  Se sa mesaz ki nou devret pe pase.

Me eski nou’n tann sa mesaz ozordi apre midi, avek bomaten Mr Speaker?  Non!  Sa ki nou’n tande, se ki sa i en Bidze eleksyon, e ki sa i en demars ki zot in dir, ‘’ dezespere par Prezidan Faure pour li retain Statehouse.’’

Mr Speaker eski sa se retorik ki nou pour tande de zour an zour, an zour dan sa politik Sesel?  Nou bezwen sanze.  Nou bezwen sanz nou lapros, e nou bezwen vwar keksoz diferaman.

Mr Speaker annou regard depans dan Lasante.  Ankor enn fwa Gouvernman pe depans plizyer milyon.  Annefe- almost 1billion pe ganny depanse dan Lasante.

Eski sa i pa montre poudir nou pe pran larzan taxpayers e pe met li kot i neseser?  Eski sa i pa montre ki nou bezwen annan lafason ki nou tret nou sistenm lasante, nou pour komans-lapros ki nou pour pran avek li i bezwen sanze?

Mr Speaker si nou kontinyen atak nou sistenm lasante e redwir konfidans ki piblik i annan dan nou sistenm lasante, me byensir- byensir sa pour afekte moral bann travayer dan Minister Lasante.  E sa pour fer ki nou dimoun pa pour trust nou sistenm lasante.  Mon krwar nou bezwen an komans anmenn en mesaz positivité.

E la Mr Speaker mon pour dir en keksoz.  Si LDS i sitan anvi vin o pouvwar, me zot pour vin o pouvwar apre ki zot in pran Gouvernman met li lo son zenou e i pour dan en bouret.  E ler pour zot trenn sa bouret, zot pou dir sa i lafot sa Gouvernman ki ti la avan zot.

Sa i pa lafason ki nou bezwen apros li.  Akoz pour nou manage e run en public service, e run en Ladministrasyon.  I bokou pli diferan avek ler nou dan Lopozisyon.  E nou kapab kritike ki dayer i nou louvraz wi koman en Lopozisyon pour nou kritike, e sey ede pour rod solisyon.  Sa mon aksepte Mr Speaker.

Mr Speaker koman Lasanble, nou bezwen osi apresye;-  apresye lefe ki nou koman Manm Lasanble nou’n demann plizyer mezir.  Plizyer mezir ki Gouvernman in entrodwir ki’n fer ki ozordi nou pe fasilit lavi bann travayer.  Par egzanp, flexible working hours;-  konbyen Manm Lasanble ki’n demann sa lo sa kote latab e lo lot kote?  Me ozordi nou pa’n tann lot kote latab pour koz lo la.  E i en mezir pozitiv ki i annan dan Bidze.

Me nou’n focus lo sa ki nou vwar i negativ dan sa Bidze.  E pour mwan Mr Speaker sa ki’n difisil pour lot kote latab fer ozordi.  E sa ki mon’n vwar i drol, zot in vwar li tre difisil pour atak sa Bidze.  E la zot in sey rod bann eleman an deor sa Bidze pour zot sey fer zot pwen.

Mr Speaker nou’n koz lo sa size, bann social programs.  Be eski i pa i fer sans ki nou annan bann social programs?  Akoz se sa enn bann battle cry ki LDS in annan pandan sa bann dernyen lannen Mr Speaker, se ki i annan 40poursan lapovrete.  Me si ou pa sey adres sa lapovrete ki sipoze annan?  Ki pour arive?  Sa bann dimoun pour reste dan lapovrete.

Se pour sa rezon ou annan en social safety net.  Me i annan en konfizyon ki’n toultan ganny kree.  LDS in toultan dir nou poudir Bidze welfare pe monte.  Bidze welfare pe ogmante.

Be pa Bidze welfare ki pe ogmante.  Se lefe ki nou annan en popilasyon ki pe vyeyi.  E nou pe pey plis dimoun, Sekirite Sosyal, nou pe met plis dimoun pour carer.  Nou pe pey plis dimoun bann benefis statutoire.

Statutoire savedir, bann benefis ki dimoun i devret gannyen anba en Lalwa.  Benefis envalidite.  Bann benefis koumsa.

Eski nou pour al dir demen ki en dimoun ki’n koup son lanmen, i nepli koup son lanmen?   Non Mr Speaker!  Nou pa pour kapab fer sa.  Se pour sa rezon ki nou bezwen et fran e onnet.

E diskisyon fran e onnet, i vedir ki nou realiz e pran potansyel bann keksoz ki dan Bidze, e koz lo la.

Mr Speaker in annan en analiz ki’n ganny fer lo konze anyel.  Kot nou dir konze anyel in al 21 zour pour 24 zour.  Ankor pour mon i ilistre en pti pe konfizyon dan lapros ki LDS i pran ler zot tret Bidze.

LDS in donn nou en kalkil, plizyer milyon Roupi.  Me dan sa kalkil i annan en eleman ki manke.  Eski alors LDS pe dir nou ki tou travayer pour pran zot konze anyel o menm moman?  Ki sa ki i a fer alors?  Ki ou ava annan plizyer sa bann milyon ki perdi?  Be nou tou nou konnen ki larealite, pa tou travayer ki pran zot konze anyel o menm moman.

Set alors ki fer ki sa sif pour bokou pli ba, in terms of en pert.  Me sa ki LDS pa’n met an perspektiv Mr Speaker.  Konbyen larzan ki Gouvernman e bann biznes pe perdi atraver bann konze dokter.

Rezon pour entrodwir en 24 zour koman en konze anyel, se pour fer zisteman koup lo lakantite zour ki en dimoun i al pran koman konze kot dokter.

Se sa- e sa i en lapros ki pe ganny pran partou pour sanz lanvironnman travay pour tou bann endividi ki travay dan bann Departman Gouvernmantal.  Sa i en lapros ki’n ganny pran dan plizyer pei.  I en lapros ki mon mwan krwar i en tre bon lapros pour nou pep.

Mr Speaker lo sa size tax.  E ankor enn fwa, i permet mon Mr Speaker pour mwan koz lo sa size tax dan lesanz ki, nou koman MNA nou vin dan Lasanble, nou demann bann keksoz.

Nou koze nou dir bann keksoz i devret ganny fer. mon rapel plizyer Onorab in koz lo la.  Nou’n koze pou dir ki pour lwe en lakaz i ser.  Pour dimoun kapab ganny-lwe en lakaz i tro ser.  Alors nou bezwen sanz lafason ki nou pe vwar keksoz.  Be Gouvernman i vin ek en mezir, pour tir 15poursan tax, pour fer li 3poursan.  Dan plas aplodi travay ki nou menm nou nou’n fer, koman en Lasanble.  Nou vwar en kritik pour nou fer ladan.  E sa i fer mon mazinen konmsi poudir, be ler ou pour bezwen lead, eski ou- ki mannyer ou pour kapab lead, si toultan ou pe vwar kritik dan menm keksoz ki ou’n fer koman pozitiv?

Akoz.  Si ou analize ozordi, sa 3poursan pour fer ki plis dimoun ki pe lwe lakaz pour al anrezistre, as oppose to bann dimoun ki pe pey 15poursan.  As oppose ek 15poursan ozordi.  Me parey mon Koleg Onorab Lemiel in fer sorti ozordi.  Zis parey ler nou ti retir tax lo lenz.  Eski sa benefis a ganny pase avek konsonmater?

E se sa ki mon krwar nou bezwen apresye dan nou Lekonomi ki arive parfwa.  Malgre ki Gouvernman i kapab vin ek en tre bon mezir.  I pa toultan fasil pour asire ki en lot sekter pour pran sa bann mezir met li an plas.  Se la kot travay Minister Finans i vini, an se ki konsern enforcement.  An se ki konsern pas lenformasyon pour fer sir ki bann diferan Sekter i pran sa bann mezir onboard.

Mr Speaker nou bezwen regard bann mezir pour deal avek sa bann dimoun ki pa pey tax.  I kler.  E i enportan pour nou soulinyen, akoz nou annan sa bann sityasyon ozordi dan nou pei.

Sa i pa akoz Gouvernman pa anvi sa bann dimoun kot pey tax.  Oubyen Gouvernman pa anvi kolekte tax ek sa bann dimoun.

Plizyer dimoun i ganny plizyer diskisyon avek bann Manm lo sa kote latab, kot ou’n eksprim nou konsern otour par egzanp Retail Sector.  An se ki konsern lakantite tax ki zot pe peye.

I pa vedir poudir nou, nou krwar Retail Sector pa devret pey tax.  Oubyen zot devret pey plis tax.  Me nou krwar zot devret pey lakantite tax ki zot devret peye.

E se la kot problenm i vini.  Kot mon krwar poudir i bezwen annan en langazman lo la par bann Lazans konsernen ki pe fer sa travay.   Diferans ek zot ek nou.  Se ki kot nou vwar Bidze i mal.  Nou pour dir.  Me kot nou vwar Bidze i byen.  Nou pour osi dir.  Se sa lonnekte, se sa fransiz.  Nou pa pour kapab vwar tou keksoz i mal.  Kot i annan positivité, ou bezwen kapab dir pour donn lespwar, e pour donn ou pe pep en sans lanbisyon pour vwar keksoz pli devan.  Si nou kontinyen dwell dan négativité, e nou oule en dimoun avans devan.  E nou rely lo son négativité pour anmenn nou pli devan, nou pour al pli devan nou.  Me négativité dimoun- sa dimoun pour reste.  Nou bezwen rod en fason pour retir sa négativité.

An se ki konsern tax, mon krwar i annan en travay ki bezwen ganny fer.  sa bann zofisye ki pe fer assessment.  Si o kour bann lannen ou pe vwar poudir ou annan sa sityasyon.  Kot dan sa sekter lakantite tax ki sipoze ganny peye, pa pe ganny peye.

Kwa ki ou’n fer?  Ki bann red flags ki’n ganny raised?  Ki bann rapor ki’n ganny submitted?  Tousala i bezwen ganny met an perspektiv.  Akoz mon pa krwar poudir se Prezidan Faure ki lev en telefonn ki dir ‘‘Minis Lalanne pa pour pey tax’.’  Oubyen mwan menm ‘’Onorab Pillay pa pour pey tax.  Oubyen Onorab Henrie pa pour pey tax’’.

Personn pa fer sa.  E mon pa krwar i annan okenn MNA la anndan ki call okenn dimoun kot tax ki dir fer sa.  Set alor ki i depan lo sa bann Antite ki’n ganny sa bann manda pour li fer sa travay.  E se pour sa rezon ki parfwa dimoun i bezwen konpran.  Dan en Gouvernman ou annan plizyer Antite ki bezwen fonksyonnen pour fer li marse.

Me parfwa ou pour ganny Antite- e Minis i a dakor ek mon pour ganny Antite ki pa pull son weight.  E ler i pa pull son weight, malgre ou’n entrodwir plizyer bon mezir.  I difisil pour ou kapab fer li.

E mwan mon krwar nou pe perdi en kantite atraver larzan tax.  Akoz Mr Speaker, mon pour donn ou en legzanp.  Ou pour marse ou pour 4 laboutik, dan sa 4 laboutik en komodite pe vann diferan fason.  Me si ou al- si mon al tande- par egzanp sa bann dimoun pa pe pey tax, i pour drol.

Akoz ou annan 4 diferan pri pour menm komodite.  So i bezwen annan en travay ki ganny fer.  En travay kot par egzanp, nou entrodwir en point of sale dan tou bann laboutik ki konnekte ek en sistenm santral, ki ou konn inventories tou sa ki sa bann marsan pe vann.  Ou konn son inventory.  Ou konnen konbyen in vann.  E ou a konnen konbyen in aste osi.  Pour ou konnen kantite tax i bezwen peye.  Akoz otherwise, si sak dimoun i ganny lese a son prop device,  i pour fer sa ki i anvi.

Mr Speaker en lot mezir ki mon krwar mwan i bezwen annan en re think lo la,  e sa i konsern sa ki en- sa allowance R3, 000 pour vin R1, 500.

Ou vwar la Minis.  Mon mwan- i annan landrwa kot Bidze i bon.  Me kot Bidze mon santi poudir i annan serten lackin, mon krwar nou bezwen adrese.

Si sa i en Polisi ki Gouvernman in entrodwir, ok.  Me eski Gouvernman in regarde lekel sa bann endividi par egzanp?  I bezwen annan en rikord ki pe fer vini lo sa allowance R3mil a plizyer repriz.

Si ou annan en rikord sa bann endividi ki pe fer vini lo sa allowance R3mil a plizyer repriz.  Then go to sa bann endividi, dir ek zot be ki kalite aktivite ki ou pe fer pour fer vini dan sa R3mil?

Si non, ou pa zis redwir sa pour fer li vin R1, 500.  Akoz sa i annan en lenpak lo dimoun ki ti deza annan en allowance.  Mon krwar i pour en pti pe de balanse pour nou pran en mezir pour nou pini dimoun ki pe fer sa keksoz byen, kan i annan dimoun ki pe fer sa keksoz mal.  I bezwen annan en balans.

En lot eleman Mr Speaker ki enportan, se par egzanp sa R25mil lo transpor.  Sa eleman ankor i enportan.  Mon krwar nou bezwen regard dan lapros, the time frame ki nou entrodwir sa mezir.  Akoz a sa moman donnen.  Eski tou bann Lazans Loto i kapab fer vini lakantite- lakantite transpor elektrik ki zot kapab fer vini.

Mr Speaker.  Sa i depan lo sa Konpannyen ki provide zot ek sa bann transpor.  I annan dealership ki kapab ganny sa bann transpor.  I ganny en serten kantite units.  I annan i pa gannyen.  Si nou pour ankouraz dimoun aste transpor elektrik, me napa sa bann transpor elektrik, i pour en problenm.

So alors ki mon krwar.  Nou bezwen regard dan sa mezir.  E fer sir poudir ki, si nou pour entrodwir li, nou entrodwir li a en moman ki nou kapab deal avek.  E ki nou kapab fer sir ki dimoun pe ganny servis.  Oubyen ganny sa ki nou ekspekte zot gannyen, atraver sa mezir ki’n ganny entrodwir.

Mr Speaker mon oule tous lo en lot pwen, a se ki konsern sa size GOP.  La mon pa ganny en konpran Mr Speaker, akoz ki bann Manm lo lot kote latab i koz 2 kalite Langaz lo sa size?

Premye Langaz nou ti gannyen lo sa size, Shannon College.  Ler nou bann etidyan i sorti Shannon College, zot in kalifye, zot al dan lotelri, laplipar bann pozisyon Management, i pran par etranze.

E souvandfwa sa bann etranze i reste dan sa bann pozisyon Management pour plizyer lannen.  Alors nou dir be ok.  Gouvernman mon krwar in mazin koumsa.  In dir be ok, si ou pe kout sa dimoun plis letan la, i kout ou pli ser pour kit li plis letan.

So si  i kout ou pli ser ki pour kit li plis letan, ki olye ou fer fer monte sa anplwayer Seselwa,  dernyen i ava en mezir pour dekouraz ou pour gard sa etranze plis letan.  E pour fer monte sa travayer Seselwa.

Prezan dan konstriksyon.  Wi i pour en problenm pour nou pti kontrakter.  Me nou bann pti kontrakter i bezwen realiz en lot problenm ki arive, ler en etranze i vin travay ek en Konpannyen konstriksyon.  I reste isi pour bokou letan.  Ou konnen ki i fer Mr Speaker?  I ale, i al ouver en Konpannyen pour li menm.  E se sa ki nou oule?

 

 

So, nou’n konplent.  E Gouvernman in vin ek en mezir.  Mon krwar sa ki bezwen fer prezan.  Dan enforcement sa mezir, nou bezwen fer sir nou enforce li dan en fason.  Si ou pran par egzanp en gro Konpannyen Konstriksyon ki i annan plizyer 1,000 travayer, e i pe gard sa bann travayer pour plizyer lannen.  I pour vin en kou lo li pour li gard sa bann travayer pour plis letan.

Me dezavantaz ki i annan ek sa,  se ki sa gro Konpannyen pour annan sa resours pour li pe fer vini travayer ankor.  Probableman sa pti Konpannyen pour napa resours.  Se la kot nou bezwen fer sir ki nou trouv en balans dan lafason ki nou apros deal ek sa sityasyon.  Me sa i en mezir enportan.

I en mezir enportan pour asire ki nou bann zenn ki fini SIT, i a kapab antre dan bann domenn ki bann-ki zot kapab fonksyonnen ladan, ki zot in train ladan pour zot kapab pran bann pozisyon ki pe ganny okipe par bann etranze.

Akoz Mr Speaker mon, mwan pa anvi nou Seselwa reste- vin zis chambermaid, oubyen vin waitress, vin bann keksoz koumsa dan lotelri.  mwan mon oule nou Seselwa i Managers.  E lezot ki al pli ba.  Ou a pran etranze si ou bezwen.  Me bann kad pli o, ou ava donn nou bann Seselwa ki’n train ki kapab fer sa louvraz.

Se sa ki mon krwar nou bezwen Mr Speaker.  Set alors ki mon krwar poudir ler nou koz lo bann mezir ki dan sa Bidze.  Nou bezwen realize poudir sa bann mezir dan sa Bidze, i al dan laliny pour nou kapab revwar konteks ki i annan.  E i bann demann ki nou Lasanble Nasyonal nou’n fer.

Now!  Eski Minister Finans in ganny li totalman byen?  Probableman zot in ganny li 80poursan byen.  Be sa i en komansman.  E se sa lapros ki nou bezwen pran.

Lapros se vwar sa komansman ki nou annan, pour nou kapab al pli devan.  Se sa ki nou bezwen pe rode Mr Speaker, ler nou pe regard sa Bidze ozordi.

Prezan annou vin lo en lot eleman ki contentieux Mr Speaker.  Mon annan la avek mwan la Mr Speaker Seychelles Investment Economic Activities Regulation.  I size en Mosyon Mr Speaker san ki mon pour preempt deba lo sa Mosyon,  mon pour selman share serten keksoz avek Lasanble.  Pour ki nou konpran akoz nou annan en serten problenm dan sa pei, kree par nou menm nou Seselwa.  Mr Speaker, i annan serten Sekter ki rezerve zis pour Seselwa.  I annan en lalis deza dan en Lalwa, ki fer kler sa bann sekter.

Apre i annan serten Sekter, ki fer ki en se en Seselwa ek en etranze i kapab fer en konpannyen.  Me ki nou pe vwar?  Deplizanpli nou pe vwar Seselwa, nou prop ser ek frer ki pe ed bann etranze form bann lakonpannyen pour zot antre dan serten sekter.

Be sa nou pa’n koz lo la ditou.  E se sanmenm sa ki ler nou dir nou koz fran, nou bezwen et fran.  I annan en konpetisyon ki pe ganny kree par Seselwa li menm ki pe touy biznes son lot frer ek ser Seselwa.

E se pour sa rezon ki mon mwan krwar Gouvernman i bezwen entrodwir sanzman dan Lalwa.  E ki sanzman i bezwen entrodwir?  Se entrodwir en sanzman kot nou fer tou Beneficial Ownership;-  ki dan Lalwa Companies Act 1972 pour bann Konpannyen ki anrezistre kot Rezistrar, parey Leader Lopozisyon in koz lo la.  Kot Rezistrar i ete.  Ki bann Konpannyen ki dan Offshore?  Ki sa Rezis Beneficial Ownership i ganny mete kot FIU, e ki prezan nou a kapab investigate tou bann ki bann actual propriyeter sa bann diferan propriyeter.  Nou a konnen lekel ki par deryer.

Akoz i pa akseptab Mr Speaker ozordi kot nou pe koz lo la, Sesel nou vwar nou dan en sityasyon, kot si en dimoun i form en Lakonpannyen, nou pa konnen lekel ki vreman benefisye ek sa Lakonpannyen.  Nou vwar zis son bann Direkter.

E sa i enportan Mr Speaker.  Akoz i pour ed nou rezourd en problenm fondamantal.  Sa problenm se, pour nou kapab ankouraz Seselwa.  Bann zenn- bann piti biznes Seselwa pour zot kapab epanouir dan nou pei.

Mr Speaker zot in dir sa Bidze, i en Bidze eleksyon.  I annan en kantite depans ladan.  Mr Speaker, san depans, biznes Seselwa pa pour viv.

Enn bann pli gro- enn bann pli gro kliyan nou bann pti biznesmenn Seselwa, se Gouvernman.  Atraver bann diferan prodwir ki i ofer.  Tender pour liniform, tender pour lot, lot pour lot.

E si Gouvernman pa depanse dan sa bann Sekter.  Sa bann biznes pa gannyen sa larzan.  Sa larzan pa retournen dan Lekonomi.  Se pour sa rezon ki Gouvernman in bezwen met sa bann mezir la.  Akoz pour nou ankouraz davantaz Seselwa pour pran biznes, pour fer biznes.  E mwan mon oule ankouraz tou Seselwa ki kapab fer biznes, fer biznes.

E la kot Minister Finans i bezwen angaz li.  Tir bann lanpayaz kot i annan pour anpes Seselwa fer biznes.  Kot nou kapab fer li, nou retire.  Kot par egzanp en Seselwa i reste o bor lanmer, si i anvi konble, i kapab konble.  Les li konble.

Akoz pa neseser ki nou esper etranze vini vin konble.  Si sa boug i kapab konble, les li konble, les li fer son biznes.  Akoz sa ki enportan, se ki loportinite i pour en Seselwa.  E li i a ede kre larises pour en lot Seselwa.  Se sa ki nou oule war.  E se sa ki sa Bidze i kapab fer, si nou enplimant li byen.  E si nou tou dan sa Lasanble, koman en kolektif, nou donn sipor sa bann plizyer mezir ki trouve dan sa Bidze Mr Speaker.  Sa ki enportan pour mon.

Mr Speaker, pour mon i reste en keksoz drol.  Drol, akoz toultan ler mon vwar sa size APDAR monte, mon vwar diferan lopinyon ganny avanse.

Ler premye Bidze APDAR ti vin dan Lasanble.  Lopozisyon dan Lasanble ti le siprim li konpletman.  Ti annan en latak asarne lo sa Bidze APDAR lo premye kou.  Lo ozordi i pa APDAR ki annan problenm, me son Sekretarya ki i annan problenm.

So mon pa tro konpran.  Eski nou pe sey target endividi?  Oubyen nou pe-nou annan lezot lentansyon?  Sa, mon pa kapab preempt ki pour arive dan Committee Stage.  Be nou ava trouve.  Me i enportan pour lepep Seselwa realize.

Akoz sa ki nou pa devret fer Mr Speaker- e la mon ti a kontan nou tou nou sezi kanmarad la anndan.  Nou tou nou’n koz lo sa zafer ‘ek nou pa ek nou’.  Nou tou nou’n koz lo la.  Be annou pa retourn sa menm kalite latitid ki nou dir ti annan avan.

Si nou tir li, nou tir li.  Nou siprim li, nou tou nou dakor, nou tir li net.  Akoz si enn pour retournen pour refer li parey.  I pa vo lapenn.  Blan bonnen, bonnen blan finalman Mr Speaker.

So i enportan Mr Speaker ki nou vwar- ki nou vwar travay ki APDAR pe fer.  E travay ki ADPAR pe fer in bouze Mr Speaker.  La ADPAR pe entrodwir mandatory testing pour bann manman ansent.

 

 

I enportan sa Mr Speaker.  Pour nou konnen si i annan labi sibstans parmi sa bann manman.  Pour nou kapab predir, ki mannyer nou pour pran swen avek zot zanfan.

Sa bann mezir i neseser.  Mon konnen poudir nou pa dakor neseserman avek pran larzan pour depanse laba.  Me alternatif i kwa?

Bomaten en Onorab ti fer en analiz lo lakantite larzan ki nou pe mete avek drug rehab.  E tackling the drug issue.  E nou ti koz lakantite lakaz mon kapab fer.  Wi.  Ok, annou tire nou al fer sa kantite lakaz.  Me mon asir ou, sak sa bann lakaz pour ganny kase son landmen ki’n fini fer, si ti napa APDAR.

Mon krwar sa ki enportan, se ki nou bezwen sanz la kalite politik ki nou oule fer ozordi dan nou pei.  Mon krwar poudir i neseser annan kritik.  Mon welcome kritik.  E mon apresye kritik.  Me nou bezwen regard sa ki pozitiv e sa ki nou kapab anmennen pozitiv dan Bidze Mr Speaker.  Akoz i pa fasil.  I pa fasil.  Akoz nou bezwen regard lesansyel ki Bidze i met devan nou.

Mr Speaker, Gouvernman i annan plis ki 200 Scheme.  200 Schemes of Service.  E pour en Ladministrasyon krwar poudir dizour o landmen, ou pour ale, ou pour review tou sa bann Scheme of Service,  Mr Speaker i enposib pour okenn dimoun ki’n travay dan Public Service, i enposib.

E sak sa bann Scheme,  ou pran letan pour ou review li.  Akoz ou bezwen tonm dakor avek lamazorite travayer lo ki direksyon i bezwen pran.

Me mannyer mon’n tann Lopozisyon koze, i paret poudir sa pour fasil 2020.  Akoz apre 2020 nou pour pez the reset button, tou Schemes of Service pour a laoter.  E tou dimoun pour ganny peye parey zot devret ganny peye.

Mr Speaker, R3 bilyon pour saler, i en gro sonm, i en gro sonm.  E si nou krwar poudir nou pour al koup sa, i pour vedir ki nou annan retrenchment 2020, let’s say nou sanz Gouvernman.  I vedir, dimoun pour perdi louvraz 2020, si nou sanz Gouvernman.  

So sa ki nou bezwen fer,  nou bezwen regard nou lapros byen.

Nou kapab vwar sa bann statistik, zwe avek Mr Speaker.  Nou kapab dir poudir, par mwan kantite nou pe depanse lo ledikasyon par lannen par lannen, par zour konbyen nou pe depanse.  Eski nou pe fer sa depans byen?

 

Lesansyel i reste Mr Speaker.  Se koman Manm Lasanble, kwa ki nou fer pour asire ki Gouvernman i depans byen?

Mr Speaker mon mwan en Manm lo FPAC.  Ler mon al lo FPAC Mr Speaker, mwan fer mon travay parey en Manm FPAC.  Mon pa vin zwe politik.  Mon pa vin zwe okenn kart.  Mon vin fer mon travay parey Manm FPAC.

E dayer Chairman FPAC la anndan, i kapab ateste.  E ler mon vin fer mwan louvraz Mr Speaker.  Mon fer li koman en Manm Lasanble, pour asire ki mwan mon fer li a laoter toultan.  E mwan mon dir poudir mwan mon apresye travay ki nou pe fer koman en Lasanble.

Malgre lo nou diferan kote latab.  I zot louvraz koman Lopozisyon pour kritik Gouvernman. E i nou louvraz koman parti ki pe reprezant Gouvernman pour vwar sa ki byen dan sa Bidze.  E sey anmenn nou dan en laliny kot nou kapab tonm lo lagreman lo kwa ki nou ki nou pour fer pour pei demen.

Koman en Nasyon Mr Speaker.  Nou pour only kapab bouz devan, si nou bouz devan ansanm.  Nou pa pour kapab bouz devan si nou kontinyen sey diviz nou.  E desin en laliny dan disab e dir ‘‘ mwan mon  lo sa kote, ou lo sa kote’.  Sa pa pour anmenn nou okenn par Mr Speaker.  Listwar in montre poudir nou’n seye.  E pa’n byen.

Mr Speaker nou, nou bezwen regard sa ki devan nou.  Devan nou, nou annan en lideal.  E sa se ki mannyer nou anmenn pep Seselwa pli devan.

Dan Lasanble Nasyonal Mr Speaker, nou tou nou ganny demande pour nou koze.  E pour nou defann bann prensip ki nou krwar ladan.

Mon en prensip ki mwan krwar ladan.  Se asire ki tou Seselwa ki kapab e ki annan loportinite pour li debourye, i devret debourye.  Asire ki tou loportinite ki Seselwa i kapab gannyen pour li fer keksoz dan son lavi,  i devret fer li.

Asire ki tou baryer ki pe anpes en Seselwa fer en keksoz san ki i al kont Lalwa, i ganny retire.  Lesansyel mon lavi dan sa Lasanble, se sa Mr Speaker.

En dimoun i kapab vin dir ek mon, poudir be ou’n dan Lasanble oparavan.  Ou’n fer isi, ou’n laba.

Mr Speaker, ozordi mon la dan 6enm Lasanble.  E mon la pour mwan stand to be  counted.  Mon la pour asire ki sa ki mon pe dir, e sa ki mon fer.  I annan en lenpak lo sak lavi sak Seselwa.

Mon la pour asire ki demen, tou zanfan lekol i kapab leve bomaten e al lekol.  Ki pour annan ansennyan dan laklas pour enstrir zot.  Ki ler Seselwa i malad, i pour al kot dokter, pou annan en dokter pour vwar li.

Ki ler en Seselwa pa kapab travay,  swa in malad avek en maladi kronik parey kanser.  I pour annan en sistenm ki pour donn li en larzan pour li kapab soutenir son fanmir.

Kot ler Seselwa napa en lakaz.  Nou pour rod en fason pour nou donn li en lakaz Mr Speaker.  Sa ki reste pour nou fer Mr Speaker koman en kolektif e koman en Nasyon, e koman en pep, se pour nou travay ansanm.  Ansanm pour nou anmenn nou pei pli devan.

E dan sa Bidze Mr Speaker.  Dan sa Bidze i annan ase ladan pour nou kapab anmenn nou pei pli devan, si nou travay ansanm.  Si nou met zepol ansanm.  E si nou regard Sesel ver menm lorizon.  Ansanm nou kapab fer li.  Mersi Mr Speaker.

 

(APPLAUSE)

 

MR SPEAKER

Mersi Onorab Sebastien Pillay.  Bon nou pour aret la pour ozordi.  Nou ava kontinyen nou travay demen bomaten 9er.  Mon ti a kontan remersi Minis avek son 2 zofisye, ki’n pas en lazournen avek nou ozordi.  E mon ti a kontan osi remersi tou bann Manm.  E mon apresye sa latmosfer.  Mon apresye sa direksyon kot nou pe ale.  E mon swete sa 2 zour osi tou nou a kapab al dan menm- nou a kapab kontinyen dan menm latmosfer.

Bon, demen-mon’n ganny enformen demen ki ABC pour rankontre ankor midi, avek bi pour nou kapab vwar en way forward ki mannyer nou pour al lo bann detay.

Mon pe osi sizere ki Jeudi apre ki nou fini, avek repons, nou pour adjourn.  E Minis i a ok avek ou, Lundi ou ava fer ou Right of Reply.  Lundi matin.  E apre toudswit nou kapab petet apre Right of Reply nou ava adjourn en pti moman.  E toudswit apre nou ava komans rantre dan bann detay bann diferan Heads.  Ok so vwala en pti pe ki mannyer nou pour travay.

Mon ti a kontan remersi tou Manm, tou dimoun ki lekout.  E byensir SBC.  E Lasanble i adjourn.  E nou repran nou travay demen 9er bomaten.

 

(ADJOURNMENT)