::
Home » Verbatim » 2019 » Verbatim Tuesday 29th October, 2019

Verbatim Tuesday 29th October, 2019

NATIONAL ASSEMBLY OF SEYCHELLES

Tuesday 29th October, 2019

The Assembly met at 9am

National Anthem

Moment of Reflection

Mr Speaker in the Chair

 

MR SPEAKER

Bonzour tou Manm Onorab e bonzour tou dimoun ki a lekout e ki pe swiv travay Lasanble Nasyonal bomaten.  Bon ozordi zis avan nou komanse, avan nou pran nou travay lo nou Order Paper, mon annan en short Statement ki mon pou fer with regards to selebre 130an IPU.  Sa lannen IPU i selebre 130an.  E a lokazyon sa lanniverser tou Parlman ki Manm sa lorganizasyon in ganny demande par Sekretarya IPU pou fer en aktivite pou mark sa lokazyon.

An vi nou bann kontrent bidzeter.  Lasanble Nasyonal pa’n kapab fer okenn aktivite.  Me nou pou mark sa lokazyon atraver sa Statement, sa mesaz ki mon pou lir la bomaten.  IPU ti ganny formen an 1889 par en Franse Frédéric Passy  – Frédéric Passy e Angle William Cremer.

E tou lede dapre zot travay apre, dapre rezilta zot travay, zot ti ganny pri Nobel pou Lape an 1901 e swivi par lot an 1903.  Lobzektif inisyal sete pou negosye e rezourd bann konfli koman en arbitrer.

E la IPU in zwe en rol enportan pou set up Lakour permanan pou arbitrasyon La Hollande.  E sa Lakour i ankor egziste ozordi e i pe travay.  Avek letan misyon IPU in bouz fer promosyon la demokrasi e dyalog enter parlmanter.  Sekretarya IPU i baze Geneva, La Suisse. 

E son Prezidan aktyel i Ms Gabriela Cuevas Barron.  E son Sekreter i Martin Chungong.  Dan 193 pei o monn, 179 ladan i Manm IPU.  Sesel ti vin en Manm IPU le 27 Mars 2010, kot 122enm sesyon plenyer ki ti fer Bangkok, Thailand.

Depi sa, pandan sa bann letan, Lasanble in benefisye atraver plizyer lesanz teknik.  Kot Sekretarya IPU in fer serten workshop e osi aport serten led teknikal dan plizyer domenn.  Lazournen Mondyal Parlmanter ki nou selebre le 30 Zen, in osi en linisyativ pran par IPU.

Ozordi IPU i annan 8 lobzektif prensipal.

Promot konstri bann Parlman ki demokratik e for.

 

Avans gender equality.  Protez e promot drwa imen.

Kontribye pou anmenn lape e travay pou evit konfli e mank sekirite.

Promot dyalog e korporasyon enter parlmanter.

Promot lepanouisman lazenes dan Parlman.

Mobiliz Parlman otour azanda devlopman global.

E frenm sa gap demokratik dan relasyon enternasyonal.

Atraver promosyon la demokrasi, drwa imen, rule of law e lape, IPU in fer ki bokou Parlman in kapab pas plizyer Lalwa lo sa bann size.

Ki’n fer ki ozordi pe anbras la demokrasi e pe viv anba the rule of Law.  Dan son 141tyenm miting ki fek fer la Serbia, IPU in rikord 150 pei prezan ek pros 2mil delege.  E osi zot in rikord 250 miting bilateral.

Sa i montre ankor sa lobzektif pou annan dyalog e partaz ant bann, ant bann Parlman e pei.  IPU i osi ankouraz nou pou anmenn sa dyalog dan nou Parlman nasyonal pou build bridges.  Evit bann hate speeches e travay pou benefis lepep.

Nou ganny ankouraze pou konstri en sosyete ki enkliziv e ranforsi la demokrasi parlmanter an promotan gol SDG16.  Parlman i leker nou demokrasi.  E fodre i ganny tou loportinite pou fer son travay san lenterferans okenn lezot lotorite.

IPU i demann nou pou fer tou, pou protez bann Manm, pou protez drwa imen bann parlmanter.  E ki zot kapab desarz zot responsabilite dan en fason lib.  Me an menm tan parlmanter i osi bezwen servi son bann privilez byen e touzour en respectant bann striktir Leta.

Dan mon entervansyon kot sa dernyen konferans, mon ti fer sorti ki nou bezwen servi sa platform, non pa pou vin lager lo sa bann diferan konfli partou atraver lemonn.  Me pou plito promot dyalog e rod solisyon pou kapab annan lape.

Plizyer pei ti echo sa mesaz e siport bann rezolisyon ki ti ganny prezante par diferan Komite.  Se sa lespri IPU,  pou rod fason pou anmenn lape.  Mon ti osi donn en bilan lo bann akonplisman resan nou Lasanble, pou fer ki Sesel i reste focus lo devlopman nou zenn demokrasi.

IPU i osi siport tre for tou bann zefor pou konbat sanzman klima.  E i osi ankouraz parlmanter pou anmenn Lezislasyon oubyen rezolisyon lo sanzman klimatik.  An 2018, lekip Lasanble Nasyonal, kot 139enm plenyer IPU an
Geneva ti fer listwar.  Ler nou ti prezant en emergency item lo sanzman klima e sa ti fer ki tou lezot items lo azanda pa, anmennen par lezot gran pei ti ganny rezete.  Apre prezantasyon rezolisyon, plenyer ti vot avek linanimite lo la.

An avril 2019, an Doha Qatar, Sesel ti aport son siport par segonn en emergency item anmennen par La Hollande, ki ti annan pou fer avek sanzman klima.  Me sa enn fwa si pou rod sipor pou Malawi, Mozambique e Zimbabwe apre ki siklonn IDAI ti’n frap zot.

Ankor sa ti ganny laprouvasyon inanim plenyer.  E 2 semenn pase an La serbie, Lenn ti etabli en emergency item ankor pou eco sanzman klima.  Sesel ti form par lekip ki ti drafte rezolisyon final.  Ankor plenyer ti aprouve avek gran mazorite.

Sa i demontre ki malgre nou en pti pei e en pti Parlman nou kapab fer nou lavwa tande lo bann tel platform.  Ozordi lemonn pe vin pli konsernen ek bann sanzman letan otour nou.  E la realite i la e i evidan.  IPU i lans lapel pou ki bann pei i pran bann desizyon ki kapab ranvers sityasyon pou ki nou kapab sov nou planet.

Mesaz i kler.  Napa plan B, napa planet B.  E nou bezwen travay ansanm pou kapab kit en planet ki pli meyer pou nou zanfan.  E la mon anvi echo lapel bann zanfan La Serbie, dan selebrasyon louvertir;-

‘’It’s a wonderful world, let’s keep it wonderful forever!’’ Se sa bann mesaz ki IPU i anvoye e i demann nou koman bann Parlman pou travay lo bann Polisi ek Lalwa ki a fer ki nou zenerasyon a kapab fer en diferans.

Mon okouran ki en Manm ki form par delegasyon IPU pe travay lo en Mosyon lo sanzman klima, ki a vin dan Lasanble boner lannen prosenn.  An terminen IPU osi i demann bann Parlman pou table e adopte bann rezolisyon ki ganny pran apre sak Plenyer.

Se sa bomaten ki lo nou Order Paper nou pe etabli deklarasyon Belgrade ki ti fer le 17 Oktob 2019.  Mon pou donn sans Onorab William apre, ki nou’n fer sa prezantasyon, si ou oule dir 2 mo pou prezant sa rapor.

So vwala lafason ki Lasanble Nasyonal Sesel pe mark 130an lanniverser IPU, Inter Parliamentary Union.  Vwala mon mesaz pou sa lokazyon.

 

(APPLAUSE)

 

MR SPEAKER

Mersi tou bann Manm.  E nou ava al lo Order Paper, e mon ava demann Madanm Clerk pou fer Prezantasyon bann Papye.

 

MADAM CLERK

Mersi bokou Mr Speaker.  Bonzour Mr Speaker, bonzour tou Manm.  Sa semenn lo Order Paper, pou Prezantasyon Papye nou annan;

S.I 60 pou 2019.  E sa se,        Police Force (Special Constables) (Amendment) Regulations of 2019.

S.I 61 pou 2019, i    Public Holidays (No.3). 

E parey Mr Speaker in anonse nou annan the Belgrade Declaration – Strengthening International law: Parliamentary roles and mechanisms, and the contribution of regional cooperation.    Mersi Mr Speaker.

 

MR SPEAKER

Mersi Madanm Clerk.  Mon ava zisteman Onorab William si i oule dir 2 pti mo lo Belgrade Declaration.  Onorab William.

 

HON WAVEN WILLIAM

Mersi Mr Speaker.  Bonzour tou dimoun ki a lekout.  Mr Speaker mon krwar ou’n dir laplipar keksoz.  E mwan mon anvi zis, well pas, ouswa enform Lasanble ki pandan diskisyon dan deba, Belgrade, ti annan en kestyon ki ti ganny demande avek tou bann Manm dan plenyer.

Eski zot Gouvernman i enkli en Manm Parlman letan i al fer son bann miting UN, United Nation?  Mr Speaker mon pe lev sa, akoz mon anvi demontre ki, ki fason ki sa Lorganizasyon Parlmanter i antas lenportans avek travay Parlman.   E isi Sesel i annan en ta bann desizyon, i annan en ta bann negosyasyon, diskisyon ki ganny fer aletranze, ki annan en lenpak direk lo pep Seselwa.  Me ou vwar ki bokou lenstans Parlman pa ganny enkli.  E mon krwar poudir dan lavenir i pou enportan ki, atraver ou lofis Mr Speaker, ki sa diskisyon pou bezwen ganny anmennen anver Egzekitiv.

Pou asire ki dan lavenir Parlman i ganny enkli dan sa bann delegasyon ki al UN.  Akoz bokou rezolisyon in ganny pase.  E parfwa nou menm isi nou’n demande.  Be ki fason ki nou Gouvernman ouswa son reprezantan in vote, letan tel rezolisyon in pase,  nou napa sa lenformasyon.

E letan menm ou al bann miting deor, ou pou vwar li difisil parfwa pou ou kapab pran en pozisyon.  Akoz ou napa sa lenformasyon lo ki fason ki ou Gouvernman in pran pozisyon.   Mr Speaker pa akoz mon la devan ou, pa akoz ou ti head of delegation.

Me mon anvi dir ou ki ou ti fer enn bann meyer speech parmi tou sa bann head of delegation ki’n pran laparol.  E mon krwar sa levantay lenformasyon ki ou ti donnen, lo kwa ki Parlman Sesel in fer e pe kontinyelman fer, ti demontre ki Sesel koman en pti pei nou mean business.

E Mr Speaker mon anvi dir ki pandan ki mon ti ganny sans pran laparol, mon ti azoute ki, baze lo sa ki ou ti dir, ki wi nou’n sinyen koman en pei, nou’n ratifye.   Me ki kantite nou’n vreman fer avek sa bann konvansyon, avek sa bann lagreman ki nou’n ratifye?

Mr Speaker mon ti osi azoute ki nou bezwen arete sa business as usual approach partou dan kwen lemonn.  E nou bezwen rod, aret rod leskiz Mr Speaker letan i annan pou fer, keksoz i annan pou fer avek devlopman e defandan drwa imen.

Mr Speaker mon ti osi dir ki nou bezwen arete servi double standard.  Akoz Mr Speaker sa i en reflekte en pti pe partou atraver lemonn.  E osi lontan ki nou fer sa bann keksoz e nou pa al direk pou nou dil avek problenm, nou problenm i pou kontinyelman grosi e i pou agrandi.

E deplizanpli lemonn pou vin pli difisil pou nou.  Mr speaker avek sa 2 pti mo, mon krwar poudir dan sa dokiman, bann manm pou ganny sans lir.  E i annan en ta bann keksoz ki’n ganny dir ladan, ki enportan.

E mon espere ki dan lavenir par egzanp lo Komite Reform nou kapab bord serten bann size ki i annan pou fer avek ki bann kalite Komite dan lavenir ki Lasanble pou annan ki reflekte Lord Dizour.

Par egzanp avek sanzman klimatik.  Eski nou annan en Dedicated Climate Action Fund Sesel?  Eski pa i pou enportan ki Lasanble osi i annan serten Komite pou dedye pou vreman, fer sir ki Gouvernman pe onor son bann langazman?

Mr Speaker mon pou aret la.  Ankor enn fwa parey mon dir, ou’n dir tou.  E mon felisit delegasyon ki ti ganny edit par ou menm.  Mon krwar nou’n fer en bon travay.  E mon demann Parlman pou adopte sa Deklarasyon.  Mersi.

 

MR SPEAKER

Mersi.  Mon krwar nou pran sa aplodi koman Parlman pe adopte sa rapor.  Bon zis pou en pti komanter tre kourt.  Mon’n deza, yer mon’n rankontre Prezidan, i ti dan en fonksyon ofisyel kot nou’n kapab fer serten pti lesanz.

E pandan lazournen mon’n kopi li en let avek Belgrade Declaration.  Mon pou kontinyen fer swivi.  E parey ou’n dir Onorab William, i annan plizyer keksoz ki Linyon Parlmanter pe demann nou pou nou fer.  Mon pou fer sa swivi.

E ozordi mon ava demann Deputy Clerk osi koman Desk Officer IPU, pou copy en kopi sa deklarasyon kot Minister Zafer Etranzer.   E byensir nou ava fer bann swivi parey ou’n dir.  Bon nou ava al prezan retourn lo nou Order Paper.

E mon ava zis pas en pti kou brièvement lo Order Paper.  Nou annan nou 2 kestyon bomaten.  Enn ki pou Minis pou Lanvironnman.  E enn pou Minis Finans.  E apre sa nou pou kontinyen avek nou bann Mosyon ki lo Order Paper.  Nou annan kontinyasyon Mosyon lo Bidze Siplemanter.

Nou annan en ratifikasyon e apre nou ava swiv par lezot Mosyon ki lo Order Paper.  Avek sa mon ti a kontan demann parliamentary reporter pou fer rantre Minis avek son panel.  Yes Onorab Ferrari.

 

HON JEAN-FRANCOIS FERRARI

Mr Speaker avek ou permisyon ler nou pe esper Minis, mon krwar i apropriye pou Lasanble.  E mon ava envit Onorab De Commarmond osi kekfwa pou pran not ki nou dan lasemenn Kreol.  E ki nou pe selebre sa ki nou ete.

E nou swet pep Seselwa en bon lasemenn Kreol.  An mezir dan en fason responsab, travay dir e kontribye dan sa pei, sa pti pei Kreol e fer nou pei monte.  Donk Bonn Fet Kreol pou tou Seselwa.  Mersi.

 

MR SPEAKER

Mersi Onorab.  Onorab De Commarmond ou oule dir de mo?

 

HON CHARLES DE COMMARMOND

Mr Speaker bonzour.  Bonzour tou Manm, tou dimoun ki a lekout.  Pou mwan nap nanryen ekstraordiner avek Festival Kreol.  I en keksoz ki nou parti in konmanse.  E nou pe kontinyen avek.  E nou pe kontinyen met lanfaz e lanpler lo nou kreolite.

Akoz se sa ki fer nou sa pep ki nou ete.  E nou demann tou dimoun e tou bann parti politik osi, pou swiv e kontinyen met lanfaz e lanpler lo sa ki nou parti in konmanse dan sa lespri, dan sa travay, sa traze pou war e fer ki Sesel e Seselwa i ganny li son vre idantite.  Mersi.

 

MR SPEAKER

Mersi Onorab de Commarmond.  Bon lo mon kote osi tou mon ti a kontan swet tou Seselwa en Bonn Fet, en bon lasemenn Kreol.  Nou osi annan bann, bokou bann viziter ki’n rantre spesyalman pou sa lokazyon.

Akoz zot rekonnet ki Victoria i Kapital Kreolofonn.  E yer mon’n ganny plezir osi pou mon resevwar en pti delegasyon ki’n sorti Rodrigues ki is spesyalman pou sa lokazyon.

So alor pou tou Seselwa, bonn fet.

E parey tou lede kote in dir, annou anmiz byen e annou anmiz en fason responsab.  Bon, mon ti a kontan dir bonzour e welcome Minis Responsab pou Lanvironnman, Lenerzi e Sanzman Klima,  Mr Wallace Cosgrow.

E Minister i akonpannyen par son Sekter
Prensipal pou Sanzman Klima, Mr Wills Agricole,  CEO Public Utilities Corporation, PUC, Mr Philippe Morin.  E CEO pou Seychelles Energy Commission, Mr Tony Imaduwa.  Minister avek ou delegasyon bonzour e welcome dan Lasanble Nasyonal.  Nou ava al direkteman lo kestyon.  E mon ava pas laparol avek Onorab Jean-Francois Ferrari.

 

HON JEAN-FRANCOIS FERRARI

Mersi Mr Speaker.  Mersi, bonzour Minis avek ou delegasyon.  Minis kestyon i lir koumsa;-  avek logmantasyon 8 sou lo pri elektrisite, eski Minis Lanvironnman i kapab donn Lasanble sa bann lenformasyon swivan;- 

  1. a) Detay bann kalkil ki’n fer Komisyon Lenerzi ariv lo sa logmantasyon dan kou elektrisite. 

        (b)  Eski zot in etidye lenpak ki sa logmantasyon pou annan lo konsonmater, spesyalman bann ki deza dan en leta vilnerab? 

 

 

        (c) Ki mannyer eski sa logmantasyon pou balanse an-term depans ki PUC i fer?

        Vi ki dernyen fwa letan pri karbiran ti desann PUC pa ti fer desann pri elektrisite, me ti dir ki sa i ava ed zot dan zot depans, eski Minis pa trouv sa dernyen logmantasyon koman en lenzistis ki pe senpleman kontribye pou fer monte pri lavi?  Mersi Mr Speaker.

 

MR SPEAKER

Mersi Onorab Ferrari.  Mon ava pas laparol avek Minis Cosgrow.   Minister.

 

MINISTER WALLACE COSGROW

Mersi Mr Speaker.  Bonzour Mr Speaker.  Bonzour tou Manm Onorab.  Bonzour tou Manm piblik ki pe ekoute.  Dabor Mr Speaker mon ti a kontan zwenn Lasanble Nasyonal pou osi swet en bonn fet semenn Kreol tou Seselwa, tou Manm Lasanble. 

Mr Speaker an dizan sa e an repons bann kestyon Onorab,  mon pou reponn baze lo bann diferan kestyon ki in demann mwan pandan, dan sa kestyon.  Mr Speaker lazisteman pri elektrisite i ganny fer tou le kar dan lannen dapre pri karbiran ki PUC i aste avek SEYPEC

Karbiran i ganny servi dan en, dan bann zenerater, dan bann stasyon PUC pou prodwir elektrisite ki ganny distribye ek konsonmater.  Depi 2013 sa modalité aziste pri tou le 3 mwan baze lo ki mannyer pri karbiran i sanze, i an plas.

 Ler pri karbiran i monte, in monte, tarif in osi monte.  E ler i desann, tarif in osi desann.  Sa legzersis in ganny fer dapre en formel ki’n ganny gazete dan Lalwa PUC.  I annan lenstans dan lepase kot bann lazisteman pa’n ganny fer ler karbiran in monte, oubyen desann, avek bi pou anmenn en pe stabilite dan tarif elektrisite.  Pou sa logmantasyon ki ti’n merit ganny fer pandan 3enm kar sa lannen, par 16 sou par kilowater. 

Komisyon Lenerzi ti pran desizyon pou pa fer sa logmantasyon an vi ki i ti pe ekspekte pri karbiran pou desann pandan sa 3enm kar, pou ki ti pou napa okenn nesesite pou lazisteman. 

Pandan 3enm kar, pri karbiran in desann.  E sa i reprezant en rediksyon 8 sou par kilowater.  E lefe ki sa 8sou i pa sifizan pou balans sa 16 sou ki ti’n monte, Komisyon Lenerzi in pran desizyon pou fer monte tarif elektrisite, par selman 8sou par kilowater pou 4enm kar. 

An term, eski nou’n etidye lenpak Mr Speaker, kalkil in ganny fer e lenpak in ganny estimen.  Par egzanp Mr Speaker, mazorite konsonmater dan elektrisite domestik i konsonm anviron 3san kilowater par mwan. 

E sa Mr Speaker nou pe koz anviron 18mil konsonmater PUC.  So savedir la mazorite konsonmater i anba 3san kilowater par mwan.  Sa 8sou i reprezant R24 logmantasyon lo zot bil elektrisite. 

Pou anpes sa logmantasyon e osi bann fitir sanzman dan tarif annan gro lenpak lo bann, lo bann ki zot saler i pli ba, Gouvernman i annan sa bann progranm swivan an plas;- 

Progranm demokratizasyon fotovoltaik ki pe asiste serten bann dimoun ki pe ganny lasistans sosyal.  Nou osi annan lenstalasyon en megawatt PV ki pe enstale lo zil Romainville. 

Sa bann prodiksyon elektrisite pou ganny distribye avek bann dimoun ki ganny idantifye par Lazans Proteksyon Sosyal ansanm ek PUC, pou ede soulaz en pe zot kou elektrisite.  Redwir en pe zot bil elektrisite.  PUC pe osi, i osi annan fasilite pre-payment meter. 

PUC in prepar li pou enstal 2,500 sa bann meterPUC pe travay ansanm avek Lazans Proteksyon Sosyal ankor pou etidye bann ki pli vilnerab pou kapab ganny konekte avek bann prepaid meter

Savedir prepaid meter i ava ed sa bann dimoun ki zot petet zot saler i en pe pli ba, pou kapab zer en pti pe plis zot usage elektrisite.  Gouvernman pe osi ankouraz manm piblik pou servi bann lezot fasilite ki a zot dispozisyon, pou kapab redwir e zer pli byen zot kou elektrisite. 

Par egzanp SEEREP Loan Scheme avek en lentere ki ba pou konsonmater pou aste bann lekipman teknolozi renouvlab, e bann ki konsonm lenerzi dan en fason pli efikas.  PV Rebate Scheme pou bann dimoun ki’n envestir dan sistenm PV pou ganny en konponan zot lenvestisman back

3enm parti kestyon Mr Speaker.  Ki mannyer si sa logmantasyon pou balanse an term depans ki PUC i fer.  PUC i bezwen sibir sanzman dan pri karbiran.  Sa i en fe.  Alors swa pri karbiran i monte, swa i desann.  Pou li balans sa e vwar sa larzan, vwar sa larzan pou li pey logmantasyon dan pri karbiran pou redwir elektrisite,  PUC i bezwen aziste son pri.  Ler i desann i osi aziste koman i fodre.  Mr Speaker dan ka, dan 2enm kar 2019, pri karbiran ti monte kot ti, kot i ti fer kou pou delivre en kilowater kot konsonmater mont par 16sou,  dan 3enm ka, pri karbiran in desann. 

In fer ki pri pou delivre elektrisite pou konsonmater vin 8sou.  Alor sa diferans 8sou PUC in bezwen fer mont 5en tarif elektrisite.  Senpleman, e la mon oule met laksan lo la, i senpleman pou pey kou karbiran.  I pa plis ki sa. 

E dernyen parti kestyon Mr Speaker, vi ki dernyen fwa, letan pri karbiran ti desann, PUC pa ti fer desann elektrisite,  dan sa lenstans ki ou pe mansyonnen Onorab, desizyon pou pa fer deans, se akoz dan sa 2 kar oparavan, pri karbiran ti monte dapre kalkil tarif elektrisite ti devret mont par 23 sou, e 4sou respektivman. 

Me Board Komisyon Lenerzi ti pran desizyon pou pa fer monte lo baz pri karbiran pe desann.  E ki Board pou desid lo la par, par fer desann tarif pou pa zis les PUC rekiper son depans ekstra lo karbiran.  Me osi pou mentenir stabilite dan pri elektrisite parey mon’n eksplike taler.  Mr Speaker sa i larepons bann kestyon Onorab.  Mon ava aret la e pas laparol avek Lasanble Mr Speaker.  Mersi.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker premyerman mon ti a kontan demann Minis pou benefis piblik – mon krwar i enportan e enn bann rezon prensipal deryer sa kestyon,  se pou piblik konpran byen lozik Gouvernman ler zot re aziste pri.

Minis malerezman la kekfwa ou’n konfiz piblik en pe la.  Akoz mon ti a kontan ou eksplik byen ki ogmantasyon dan pri petrol i pa sel fakter ki ou servi pou fer monte oubyen fer desann pri.  Akoz la ou’n dir nou poudir par ler, ler i ogmante, ou pa fer li ogmant mannyer i devret.

Ler i desann ou pa fer li desann mannyer i devret desann.  Konmsi i annan lezot fakter e piblik in ganny lenformasyon konmkwa i annan 2, i annan 2 progranm. (1),  ki baze lo pri karbiran.  E sa i determin pri elektrisite.

E 2, i annan sa progranm re balansman tarif.  Ou pa’n koz ditou lo re balansman tarif la ozordi.  Me selman ou’n dir ki par ler ou servi, ou pa fer monte mannyer ou devret fer monte, ou pa fer desann mannyer ou devret fer desann.  Se sa ki ou bezwen eksplik piblik.  Akoz piblik i konfize.  E piblik i santi poudir i pa pe ganny en fair deal.  Sa i mon premye pwen.

Mon 2enm pwen.  Minis mon pa en eksper lo pri petrol, lo nivo enternasyonal.  Me selman mon pe war tou bann sif ki mon pe regarde, i montre ki an 2019 pri petrol lo marse enternasyonal in bese at an average at about 15 poursan.   E nou konnen poudir bann devlopman ki mannyer keksoz pe al arive la Iraq, Isiri bann keksoz koumsa, Isil pe ganny sa.

I annan, i annan gran posibilite ki pri pou desann ankor en pe.  So sey donn mwan lezot lesplikasyon ki, akoz pri i kontinyen monte, menm si on average, o nivo enternasyonal, pri pe desann.

E finalman mon a profit lokazyon ki Mr CEO PUC i la.  Pou li re dir nou ankor, pou Minis kapab sey donn nou sa lenformasyon;-  ki lefikasite PUC?  Nou konnen poudir zot annan bann vye masin, zot annan bann sistenm ki pa tro modern.

Me selman i enportan pou nou koman en Lasanble, nou sey konpran si PUC i en lorganizasyon ki efikas.  Oubyen akoz i pa efikas, se sa ki pri pe kontinyen ogmante.

Konmsi donn nou sa lenformasyon pou piblik kapab konpran ki mannyer, ler i get son bil lekel ki responsab pou li, pou sa pri ki lo sa bil?  Mersi.

 

MR SPEAKER

Mersi onorab.  Minis.

 

MINISTER WALLACE COSGROW

Mersi Mr Speaker.  Mersi Onorab pou ou 3 kestyon.  Mr Speaker mon ti a kontan dabor fer byen kler resorti ki mon pa pe mislead Lasanble ni piblik.  Onorab ou kestyon i refer avek logmantasyon 8sou.

Alors mon’n vin reponn ou logmantasyon 8sou.  Me selman par kont i vre i annan 2, i annan 2 mekanizm kot nou aziste pri elektrisite.  I annan mekanizm ki nou pe eksplike la.  Sa 8sou ki’n monte, ki an relasyon avek fuel.  Apre i annan mekanizm rebalancing.

Rebalancing sanmenm sa mekanizm ki ou’n fer referans avek.  Rebalancing li i en mekanizm ki nou apply tou le lannen baze lo en progranm.  Pou nou re aziste bann tarif elektrisite pou kapab rekouver bann kou prodiksyon.  Mon ava eksplik ou.

Par egzanp bann dimoun ki pe konsonm anba 3san kilowater.  Tou bann dimoun ki pe konsonm anba 3san kilowater, menm bann ki pe konsonm an plis, nou striktir tarif ki mannyer i ete, tou sa bann anba pa pe pey sa pri ki kout PUC pou prodwir sa elektrisite.

So sa, se sa legzersis rebalancing.  Me selman par kont, vi ki ou’n demann mwan pou vin eksplik 8sou, mon’n vin eksplik sa 8 sou e mon’n baz mon larepons lo sa kestyon 8 sou.  2enm Mr Speaker, pri kontrol in, sorry, sorry.

Pri petrol in desann par 15 poursan on average.  Onorab i dir nou.  Me sa mon krwar i pri crude oil lo marse enternasyonal.  Sa ki PUC i aste, PUC i aste HFO avek LFO avek SEYPECPUC i aste son petrol avek SEYPEC.

Savedir PUC i annan kontrol lo son pri petrol ki i aste avek SEYPEC.  E mon konnen ou petet ou pou dir mon, be SEYPEC osi son pri i baze lo pri enternasyonal, pri crude oilWell, nou, nou annan kontrol lo sa ki SEYPEC i vann.  Petet sa i ava en kestyon pou SEYPEC si i kapab fer desann pli ba or not.

Me selman PUC li son, parey mon’n dir, son HFO ek son LFO i aste avek SEYPEC.  E se sa ki, ki i pa sa pri.  I senpleman en cost transfer ki PUC i bezwen fer.  Akoz si i pa fer, swa i fouy dan son fon, i kontinyen bous trou.

Or Gouvernman i bezwen donn li dan sa ka i taxpayers money ki bezwen sorti somewhere pou PUC kapab foot in the Bill for, pou karbiran.  So i osi senp ki sa Onorab en.

Trwazyenmman lefikasite PUC.  Mon konnen sa i en kestyon ki’n toultan, sak fwa mon’n vin diskit PUC dan Lasanble, i en kestyon ki’n toultan monte.  E mon ti ekspekte li monte ankor ozordi.  Lenformasyon ki mon annan Onorab, Lasanble.

Se ki lefikasite PUC, son, an term prodiktivite,  i apepre 41poursan.  41poursan, savedir sa nou pe konpar nou avek, avek bann pei par egzanp Maurice ki annan bann, preski dir menm groser masin avek nou, petet en pti pe pli gro tou.  Loperasyon en pe pli gro ki nou.

Me solman an term lefikasite nou prodiksyon, i apepre 41poursan.  E konparab avek serten bann lezot pei.  Ki pou mwan, e dapre PUC bann expert osi ki’n antre dan PUC, ki’n vin fer bann louvraz dan PUC.  Zot, dan zot lopinyon i en poursantaz lefikasite ki bon, ki tre bon annefe

Ok, dan an term transmission and distribution, an term loss dan laliny.  Nou at 7 poursan.  Kalkilasyon se ki nou at 7 poursan.

Lerop i 7poursan, Lerop ozordi i 7poursan.  So sanmenm sa nivo ki PUC in arive ozordi.  Ok?  E mon asire avek nouvo demars ki pe ganny fer avek bann nouvo laliny ki pe mete, 33 kilovolt, sa i a desann ankor en pti pe plis.
Savedir nou pe sey koup bann inefficiencies kou partou, ok.  Ok.  So Mr Morin ti’n met en pti not la pou consumption stasyon li menm li.  Akoz i bezwen kouran pou li kapab zer son stasyon, i 3 poursan. So bann poursantaz dapre CEO PUC, e dapre bann eksper, i bann poursantaz ki konparab avek bann pei ki annan bann prodiksyon transmisyon efikas.  Mersi bokou Mr Speaker.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Dernyen pti kestyon Mr Speaker.  Mon ti a zis kontan dir avek Minis poudir mon pa’n dir Minis pe mislead Lasanble.  Mon ti dir poudir ou pe konfiz piblik deor.  It’s notMislead i en lentansyon, konfize i en lot keksoz.

Me selman mon ti anvi zis la, pou zisteman, pou tir sa konfizyon lo pri ki PUC i peye pou li ganny fuel.  Ou ava, ou ava aksepte avek mwan ki mwan mon pa pou al kot SEYPEC.  Kan Minis i la, pou mwan demann avek Minis,  dir nou ant Zanvye 2019 e Oktob 2019, ki diferans pri ki PUC pe peye pou HFO avek LFO, avek SEYPEC?  Sa se, se s aki mon oule konnen.

 

MR SPEAKER

Mersi Onorab Ferrari.  Minis.

 

MINISTER WALLACE COSGROW

Mr Speaker zis donn mwan en pti segonn mon a kapab.

 

MR SPEAKER

Napa problenm.

 

MINISTER WALLACE COSGROW

Investigate bann figures.

 

MR SPEAKER

Dakor Minis.

 

MINISTER WALLACE COSGROW

Ok.  Mersi Mr Speaker.  Onorab, ok, an Zanvye 2019, nou ti pe pey LFO 9.49.  An Oktob 2019, nou pe pey li R9.92 pardon en.  Roupi par lit en.

HFO nou ti pe pey li R7.38 an Zanvye, la an Oktob i R7.56. Solman ant in annan bann diferan sanzman.  I posib pou nou kapab fer ou ganny lenformasyon.  Mersi.

 

MR SPEAKER

Mersi Minis.  Onorab Waven William.

 

HON WAVEN WILLIAM

Mersi Mr Speaker.  Bonzour Minis avek ou lekip.  Minis dan ou lesplikasyon, ou’n dir ki bann dimoun ki mwen eze ouswa vilnerab zot pe ganny lasistans.  E i annan sa bann sistenm voltaic pe ganny enstale pou zot.

Me bann ki pe pey pou sa bann ki pli eze.  Ou’n anonse ki poudir i annan bann diferan Scheme.  Mwan mon anvi demann avek ou, ouswa avek ou Zofisye ki Konmisyoner, ki bann kalite promosyon ki zot pe fer?

Akoz mon santi poudir, zot pe dir poudir i annan sa bann Scheme, me selman swa zot vin dan Lasanble ouswa en fwa dan rar ki ou tann zot pe koz lo la.  Ki mannyer zot kapab desantraliz sa, menm sa o nivo distrik.  Ki dimoun i kapab konnen poudir be vwala, i annan sa bann Scheme, nou kapab envestir ladan, pou nou osi kapab fer desann nou pri ki nou pe peye dan lafen di mwan.

Epi dezyenmman si ou permet mwan Mr Speaker,  Minis mon ti a kontan ou konfirm avek nou ozordi,  lefe ki ti annan sa koze ki en letid pe ganny fer pou vwar si pou kapab substitute fossil fuel avek LNG (mon krwar), pou lenerzi dan lavenir.

Ki staz zot ete?  Eski sa i pou vreman redwir kout lavi Sesel, konpare avek fossil fuel?  Ouswa, eski nou pe pous ase pou nou kapab ogmant sa dedicated poursantaz ki Gouvernman in dir pou arive 2030, vizavi availability of solar energy Sesel.  Mersi.

 

MR SPEAKER

Mersi Onorab.  Minis.

 

MINISTER WALLACE COSGROW

Mersi bokou Mr Speaker.  Mersi bokou Onorab.  Onorab lo kestyon piblisite bann diferan Scheme ki egziste.  CEO in enform mwan ki zot annan en nouvo commercial strategy ki’n sorti.

In annan en pe, en pe piblisite ki’n ganny fer dan lepase.  Petet le problenm se ki nou bann piblisite i pa’n enn ki’n konsistan, ki petet nou ti devret pe fer li bokou pli konsistan.  Petet i annan ki’n relye avek bann proze.  Apre ler proze in fini, in arete.

Me solman nou realize ki poudir i enportan ki nou pli konsistan dan piblisite nou bann Schemes, nou bann zafer.  Posibilite met bann leaflet, nou annan bann leaflet.  Par egzanp pou syrup nou annan bann leaflet.  I pou kapab met dan bann distrik.

Si i pa deza dan bann distrik, nou kapab met dan ban distrik, pou desantraliz en pe lenformasyon, fer ki dimoun i vwar en pe sa bann zafer en pe pli vizib avek piblik.

An term LNG, nou  an se moman, an se moman nou annan nou en LNG Steering Committee ki’n ganny konstitye, i ganny chair par PS Agricole li menm.  E lo sa Steering Committee LNG, nou annan ban diferan dimoun dan bann diferan sekter, domenn, pou zisteman drive sa proze LNG dan lefitir.

So nou pe anvizaze dan lefitir, dan tre prosenn fitir zer nou elektrisite avek LNG.  E sa i pou en process tranzisyon.  Akoz nou osi annan en plan 100 poursan lenerzi renouvlab par 2050.

Alors nou pe get LNG konman en lenerzi tranzisyonnel.  Pou nou kapab ariv lo nou target 100 poursan lenerzi renouvlab by 2050.  So nou annan en Komite ki’n ganny set up.  E Komite in fer 2 miting, zot in zwenn.

Zot annan bann keksoz ki zot pe diskit lo la.  I annan apre ki Prezidan ti vizit Mozambique.  I annan en lesanz ki pou ganny fer ant serten Manm Komite, avek bann zofisye Mozambique, pou kapab e sanz en pe lide ki mannyer nou bouze laba.

Akoz Mozambique zot deza, si mon pa tronpe, annan en power plan ki ganny powered par LNG.  Ok, PS in eksplik mon poudir vizit sipoze ganny fer lafen lannen.  E tou sa la i dan nou demars pou nou kapab lans LNG.  Nou’n annan en kantite demann lokalman.

Menm bann lorganizasyon, bann konpannyen enternasyonal ki anvi vin fer.  Me solman nou bezwen realize poudir Sesel nou pa en gran pei;- Sesel nou annan serten keksoz ki nou bezwen fer sir nou veye avan ki nou les okenn nenport ki dimoun zis vini antre dan okenn biznes.

 So sirtou biznes utilities.  Alors sanmenm sa ki nou pe fer sir, nou pe swiv tou bann steps ki neseser pou nou kapab fer li byen, Mr Speaker.  Mersi bokou.

 

MR SPEAKER

Mersi Minis.  Onorab William.

 

HON WAVEN WILLIAM

Mr Speaker mon anvi demann Minis, lefe ki serten letid in montre ki LNG avek fossil fuel son degre apepre menm zafer.  Mon pe demann mon lekor konmsi, akoz ki nou pe al dan sa direksyon?

E dezyenmman, eski zot in fer en kalkilasyon?  Akoz i pou bezwen annan en gro lenvestisman ki ganny fer pou fer sa tranzisyon.

Eski nou’n deza konmans travay lo costing pou vwar, ki kantite larzan pou ganny depanse pou fer sa proze ouswa pou konmans fer sa bann tranzisyon?  E parey mon dir se ki bann serser deor, mwan mon pa eksper, me selman letan nou al bann konferans, nou pe ganny dir poudir LNG avek fossil fuel zot napa tro gran diferans.  So si nou pe koz sanzman klimatik ensidswit –  bann, bann lefe negatif,  ki vreman zot pe panse lo la?  Mersi.

 

MR SPEAKER

Mersi Onorab.  Minis.

 

MINISTER WALLACE COSGROW

Mersi Mr Speaker.  Mersi Onorab.  Wi Onorab, LNG dapre sa ki mwan mon okouran e dapre sa ki PUC i okouran,   i en fuel ki en tyer pli prop ki HFO, ki nou pe servi ozordi.  So an term lanvironnmantal, i annan en benefis lanvironnmantal. I bokou pli prop ki sa fuel ki nou pe servi ozordi.

An term kou, si nou’n asize nou’n fer en letid lo bann kou.  Zisteman parey mon’n dir ou, i annan sa Komite la, ki’n ganny latas pou drive sa prose anmenn LNG Sesel, anmenn teknolozi LNG Sesel.

So zot in ganny sa latas pou zot evalye tou bann keksoz.  E dan sa evalyasyon ki nou pe fer,  i annan diferan opsyon.  I pa neseserman en opsyon kot Gouvernman pou bezwen envesti tou larzan ladan.  I kapab en opsyon kot i antre en sekter prive.  I kapab en opsyon partnership ant en sekter prive ek Gouvernman.  So i annan diferan opsyon, the best option pou ganny evalye.  Sanmenm mon’n dir ki nou bezwen pran letan, pa neseser ki nou taye avek.  Nou bezwen pran letan e ganny sa opsyon ki byen.  E ki finalman ler nou dir nou pe al dan sa direksyon, i the right option e ki pli cost effective pou nou konman en pti pei.  So se sa ki Komite ozordi, sa ki’n ganny set-up ki pe evalye.  Mersi bokou Mr Speaker.

 

MR SPEAKER

Mersi Minis.  Onorab Ahmed Afif.

 

HON AHMED AFIF

Mersi Mr Speaker.  Mr Speaker mon ti a kontan si Minis i kapab dir ek nou, vi ki nou pe koz lo pri en unit elektrisite,  e vi ki in dir nou ki Gouvernman pe osi enstal bann sistenm PV ki pe ede pou redwir pri.

Si i kapab donn nou premyerman kou ki i pe kout Gouvernman pou prodwir en linite elektrisite atraver PV ozordi, konpare avek apepre R3 ler zot pe servi LFO avek HFO?  Kou PV.

E dezyenmman si i kapab donn nou kou elektrisite par linite ki zot pe anvizaze atraver sa proze LNG?  Mersi.

 

 

MR SPEAKER

Mersi Onorab.  Minis.

 

MINISTER WALLACE COSGROW

Mersi bokou Mr Speaker.  Mr Speaker malerezman mon napa sa 2 lenformasyon la.  Cost pou, mon napa ek mwan la.  So nou ti’n vin plizoumwen pou sa 8sou.  Me solman i en lenformasyon ki nou kapab pran, rode donn Lasanble.  I en lenformasyon ki nou kapab donn Lasanble.  Solman i pa dan nou posesyon la.  Mersi.

 

MR SPEAKER

Mersi Minis.  Onorab Afif.

 

HON AHMED AFIF

Mersi Mr Speaker.  Mr Speaker mon en pti pe dezapwente ki zot napa, vi ki kestyon i tre spesifik, i lo kou linite lenerzi.  E mon ti kontan si o pli vit posib, fer nou ganny zot kou, linite pou PV e kou linite pou LNG.

Parske Seselwa i anvi vwar en rediksyon dan son kou elektrisite.  E PV i sertennman enn bann fason pou ganny rediksyon dan ou kou linite.  E nou ti a kontan konnen, vi ki zot pe ankouraz LNG, konbyen Seselwa pou peye pou en LNG?

Alor pli vit posib ki nou ti kapab gannyen, nou ti ava apresye.  Mersi Mr Speaker.

 

MR SPEAKER

Mersi Onorab Afif.  Bon nou’n note.  E Sekretarya osi i ava fer sa swivi, pou nou kapab ganny sa bann lenformasyon.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker eski Minis i kapab met nou, met byen keksoz dan konteks regarding PUC.  Dernyen bout kestyon i dernyen bout ki mwan mon pli enterese avek, e sa kestyon limero, part (b) of the question.

E sa i dir, eski Minis pa trouv sa logmantasyon konman en lenzistis ki pe sipleman kontribye pou fer monte pri lavi?  Alors prenon kont sa dernyen bout kestyon, ki mon’n santi Minis pa’n adrese klerman pou lepep Seselwa ki pe ekout nou, mon ti a kontan demann Minis sa bann kestyon swivan.  Premyerman (1);-

Eski tou dimoun dan Sesel pe pey pri elektrisite ki i ti pou peye si i ti napa serten konpleman ki ti ganny mete?  Sey klarifye sa pwen pou nou.  Konbyen sak dimoun pe peye?

Konbyen nou ti pou peye idealman?  Akoz baze lo sa ki bann eksper ti vin dir nou dernyen fwa, ler nou ti annan miting, kot ti annan prezantasyon ek PUC, i pare poudir tou dimoun ki servi par anba 300 kilowater elektrisite i pey mwens ki nou ti devret pe peye.  So eski Minis i kapab klarifye sa pwen pou nou premyerman.  2enm pwen ki Minis i kapab klarifye;

Prenon kont ki PUC i bezwen kontinyen envestir dan bann diferan fason, sirtou an se ki konsern PV.  Eski Komisyon Lenerzi in fer okenn travay par bann diferan distrik pou vwar, ki kantite lakour ozordi ki pe servi PV?

E ki zot pe fer pou sey ankouraz bann dimoun ki pe fer nouvo lakaz, pou zisteman met PV lo sa nouvo lakaz.  Pou koumsa i ava redwir zot konsonmasyon elektrisite?   Ok?  E trwazyenmman Mr Speaker, mon ava rezerv mon 3enm kestyon si i posib.  Mersi.

 

MR SPEAKER

Mersi Onorab Pillay.  Minis.

 

MINISTER WALLACE COSGROW

Mersi bokou Mr Speaker.  Mersi Onorab.  Onorab wi, ozordi parey mon’n eksplike en pe pli bone,   ozordi tou konsonmater PUC, tou konsonmater domestik PUC, pa pe neseserman pey sa pri ki kout PUC pou prodwir, ler zot konsonm par anba 3san kilowater. 

Savedir i kout PUC R1.90 pou prodwir 1 kilowater, en, sorry en linite elektrisite ki 1 kilowater elektrisite.  Pou bann dimoun ki pe konsonm premye 200 unit elektrisite, 200 kilowater –  zot pe pey selman R1.40sou.  Savedir 46sou i bezwen sorti quelque part.  Savedir zot pa pe peye sa vre pri. 

Si ou pe pey par next 100 kilowater;-  savedir i sorti lo 200 pou al lo 300.  Nou pe pey R1.69.  Still la nou pa pe pey sa pri ki kout PUC pou prodwir en kilowater.  Annefe sa i tou dimoun, nou tou, nou tou.  Mannyer sistenm tarif i ete, nou out nou bezwen pas ziska 300 pou nou, menm si nou konsonm plis. 

So nou premye 300, nou pa pe pey ditou sa pri ki i koute.  Alors se sa rezon ki ou vwar ozordi, mon pe, mon profite pou mon dir sa rebalancing i pou al, i pe sey aziste sa.  I pe sey aziste sa, sa anomaly ki la. 

Alors PUC i bezwen rod en lot landrwa, pou li kapab pran sa larzan pou li bous sa trou ki la.  E se sa ki PUC i bezwen fer sa rebalancing.  Pou tir en pti pe sa disparite ant sa ki bann konsonmater biznes pe peye –  konpare avek bann konsonmater household

2enm parti kestyon Mr Speaker;-  eski Konmisyon Lenerzi in fer letid, letid konsernan PV?  Konmisyon Lenerzi i annan tou lenformasyon lo bann lakaz, bann letablisman ki i annan PV

Akoz tou bann letablisman i bezwen vin atraver Konmisyon Lenerzi pou zot kapab bouze avek zot proze PV.  So zot annan tou sa bann lenformasyon.  Zot konnen konbyen kantite installed megawatt i annan.  Ki kantite install kapasite i annan.  Ki kantite production kapasite i annan.  So i annan en resource assessment for solar energy ki’n ganny fer par Konmisyon Lenerzi.  Sa lenformasyon i kapab available donn Lasanble.  E Konmisyon Lenerzi pe kontinyen promot servi lenerzi renouvlab, atraver PV

Me Konmisyon Lenerzi pe osi promot energy efficiency.  En progranm energy efficiency.  Kot i ed ou servi bann fasilite, bann metod redwir ou elektrisite.  Pou ou pa konsonm o mwen.  Akoz pli nou konsonmen, pli i annan en presyon lo PUC pou prodwir plis. 

So lenportans se ki nou redwir nou konsonmasyon san ki nou afekte nou standar lavi, nou redwir nou konsonmasyon,  par annan bann best practice dan lakour, par met bann lekipman ki pli energy efficient,  dan mannyer ki napa presyon lo PUC.

 Akoz PUC dapre sa ki mon konpran, tou le lannen i annan e increment 5poursan, (non Mr Morin?)  5poursan lo lakantite elektrisite ki i bezwen ogmante. 

So tou le lannen 5 poursan increase lo lakantite elektrisite, akoz?  Akoz nou pe konsonmen.  So Konmisyon Lenerzi prezan i dir, be nou kapab redwir sa konsonmasyon san ki nou sanz nou life style, nou standard, par annan bann pli bon practice dan lakour – par annan bann lekipman ki pli energy savingSo en pe dan sa laliny ki nou pe fer.  I en louvraz ki pa aret la, i en louvraz ki kontinyen.  Toulezour nou bezwen fer sa louvraz.   Mersi Mr Speaker. 

 

MR SPEAKER

Mersi Minis.  Onorab Pillay.

 

HON SEBASTIEN PILLAY

Mersi Mr Speaker.  Mr Speaker eski Minis i kapab dir nou petet briyevman,  pran par egzanp, Pti Zan ki reste La Gogue par egzanp.  Meton i oule met en PV, i dir i fatige pey kouran sa kantite, i oule met, in tann nonm PV i bezwen met en PV.

 Kwa ki i bezwen fer pou li kapab met sa PV lo son lakaz?  Akoz se sa ki nou pe sey fer ou konpran.  Nou pe sey fer ou konpran poudir ou bezwen fer sa aksesib avek tou dimoun.  Me ki mannyer i vini, zot stil fer bann leksplikasyon a en serten nivo ki dimoun pa pe konpran ki zot pe sey dir, ou konpran? 

So i enportan ki zot pe sey fer sa.   So ki i pou fer pou sa.  E dezyenmman ou’n dir ek sa bann dimoun servi bann lekipman ki pli sa.  Be lekel ki monitor sa bann kalite LED bulb ki antre dan pei, ki en dimoun konman i mete i brile, oubyen bann lezot appliances?   

So nou bezwen annan en balans, nou dir dimoun pou fer serten kalite keksoz, me nou bezwen balanse avek serten kontrol, e serten regilasyon ki nou fer sir pou protez sa konsonmater ler in aste sa bann bulb.

 Akoz i end up kout li pli ser ankor apre, ler sa i fer short oubyen en keksoz dan lakaz.  Mersi Mr Speaker.

 

MR SPEAKER

Mersi Onorab.  Minis.

 

MINISTER WALLACE COSGROW

Mersi Mr Speaker.  Mersi Onorab.

Wi Onorab, i annan detrwa lakonpannyen isi Sesel ozordi ki ofer lenstalasyon PV.  So okenn dimoun ki enterese pou enstal en PV kot li, i kapab kontakte sa bann lakonpannyen, sa bann lakonpannyen i konn tou bann prosedir.

Zot konn tou bann laport ki zot bezwen tape pou kapab finalman enstal en sistenm fotovoltaik lo en lakaz or lo en building, lo en batiman nenport.  E zot annan bann, bann bon relasyon avek Konmisyon Lenerzi.

 So i annan bann diferan lakonpannyen.  Mon pa pe mazin zot non la, me solman i annan bann diferan lakonpannyen ki sa i zot advertise zot lekor partou lo medya sosyal, lo zournal, zot advertise zot lekor.

So mon ankouraz bann piblik pou kontakte sa bann lakonpannyen.  E si zot ganny difikilte, zot kapab vin kot Konmisyon Lenerzi, zot ava ganny lenformasyon lo sa bann diferan lakonpannyen ki ofer sa bann servis.  An term lekipman, lekipman ki pli efikas,  an term lenerzi,  sa i ganny monitor par Energy Commission,  an kolaborasyon avek Trade Division si mon pa tronpe.  Zot annan en progranm minimum energy performance standards ki zot in met an plas.

Zot osi annan en progranm lo monitor bann lekipman ki antre dan pei, lekipman elektronik ki antre dan pei.  Sirtou bann household equipment.  E progranm i la.

Petet i annan en nesesite pou nou met li en pe pli o kler dan piblik.  Me solman bann progranm i la.  I annan bann benefis, progranm i la.  Nou ava gete ki mannyer nou travay dan lefitir pou fer sir ki sa i vin pli aksesib avek piblik.

 Nou osi annan Lezislasyon, CEO in remind mwan, Lezislasyon ki pe sorti, pou fer li mandatwar pou bann enportater fer vini bann lekipman ki energy efficient.  So, so en pti pe dan sa laliny Mr Speaker.  Mersi.

 

MR SPEAKER

Mersi Minis.  Minis petet zis en pti komanter dan menm laliny.  En konsonmater in fer mwan rapel semenn pase,  ki in aste en freezer ki sipoze frost free.  Me i kontinyen fer ays.  E dapre li son bil elektrik in monte.

Akoz si en freezer ki frost free i kontinyen fer ays, savedir i pe consume plis linite.  So mon krwar kestyon Onorab Pillay in al en pti pe dan sa direksyon.  Eski i annan monitoring lo sa bann lekipman ki rantre dan pei?

 

MINISTER WALLACE COSGROW

Ok.  Mersi Mr Speaker.  Mr Speaker i sipoze annan, konmsi sa ki lo bwat, lo ou label i dir ou i sipoze perform parey.  Mwan mon krwar si sa lekipman i faulty, premyerman sa dimoun ki’n vann sa lekipman i devret ganny taken to task. 

Malerezman Konmisyon Lenerzi i pa apply standar, me selman i plizoumwen dil avek bann issues promosyon lenerzi renouvlab, sorry – lenerzi, energy efficiency avek lenerzi renouvlab.  Me solman mon krwar kot Fair Trading osi i kapab dil avek en matter koumsa, Mr Speaker.

Me solman definitivman si sa lekipman i dir en serten keksoz lo la, i devret kapab fer sa ki i dir.  Si non, then i bezwen annan en issue ki enn bann Lazans i kapab take up Mr Speaker.  Mersi bokou.

 

MR SPEAKER

Mersi Minis.  Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun.  Mr Speaker mon kestyon mon oule retourn lo enn bann kestyon orizinal, ki dir detay lo bann kalkil ki’n fer Konmisyon Lenerzi ariv lo sa logmantasyon dan elektrisite.

Sa ki mon oule demann Minis se – involvement PUC dan sa kalkilasyon.  So par egzanp senaryo ki nou pe koz lo la, la.  Mon anvi konnen, mon anvi ki Minis i konfirmen si PUC in rekomann plis ki sa 8sou?

E si wi, konbyen ki PUC ti rekomande pou ki nou konnen vreman ki kalite sityasyon PUC ki fer fas avek.   Sa i mon premye kestyon.  Dezyenmman, Minis dan larepons in mansyonn 2 statistik.  Premyerman in dir nou 41poursan lefikasite prodiksyon ki in konpar avek Maurice.

Apre 7poursan ki perdi dan laliny ki’n konpar avek Lerop.  E i dir s alor, i rezonnab.  Me solman mon anvi konnen, eski li PUC i annan son prop lanbisyon pou fer pli byen ki bann Eropeen e fre pli byen ki bann Morisyen?  Alor ki poursantaz ki zot target.  Mersi.

 

MR SPEAKER

Mersi Onorab.  Minis.

 

MINISTER WALLACE COSGROW

Mersi bokou Mr Speaker.  Mersi Onorab.  Onorab premye kestyon wi.  PUC i fer son kalkilasyon baze lo son depans, baze lo son bann matematik ki li i fer.  E i submit sa lenformasyon avek Energy Commission.  Energy Commission i tyek sa kalkil, si i en kalkil ki sound, ki’n byen fer.

Si i napa okenn mistake dan kalkilasyon PUC.  Baze lo la, Energy Commission i pran en desizyon lo kalkil.  E pa zis lo kalkil.  Zot annan manda pou zot kapab esey fer sir ki i kree en serten stabilite dan marse.  So i annan letan kot parey mon’n dir boner.

Malgre kalkil i dir enn, PUC i dir wi mon bezwen sa.  Konmisyon Lenerzi i dir be, tenir en pti kou, mon krwar la pou annan en lefe lo piblik.  Alors wi nou dakor ou kalkil i byen, nou dakor i sipoze annan en logmantasyon.

Me solman annou tenir petet nou pe vwar, akoz zot get en pe pli lwen zot.  Konmsi annou, annou esper en pti kou, nou a gete petet pri fuel pou desann,  nou a kapab sey balans sa avek sa ki pe vini dan 3enm kar.

So Lenerzi Konmisyon i fer sa.  Sa ki PUC ti submit dernyen fwa, i baze lo sa ki, sa logmantasyon ki’n ganny fer la. I pa ti en lot figure.  So ti 8sou.   Ti 8sou.  E se sa ki’n, oparavan ti 16sou.  2enm kar ti 16sou.  Pa ti sanze, pa ti fer monte, ti reste parey i ete.  Akoz nou ti dir nou ava get dan 3enm kar.  4enm kar.  4enm kar in desann par 8sou.  So the net of, in tir sa 8 ek sa 16 ki reste 8sou.  Sa in mont zis 8 sou.

2enm parti kestyon Onorab.  Lanbisyon, wi Onorab PUC i annan lanbisyon as much as possible, as much ki Lalwa Physics i permet li.

Akoz i ganny determinen par Lalwa PhysicsAs much as ki Lalwa Physics i permet li pou li desann pli ba posib.  E in annan bann substantial reduction ki’n arive.  Par egzanp an term transmisyon.  CEO in deza eksplik mwan avan poudir zot ti sorti 14poursan.  Ozordi zot 7poursan.  So in desann par lanmwatye.  E 41 si oule kontinyen mentenir, ki 41 i bon.  E its as good as ki zot kapab fer ozordi avek zot bann masin.

E i pa lwen, i pa lwen avek okenn norm enternasyonal.  Me selman lanbisyon pou fer pli byen posib i touzour la Mr Speaker.  Mersi.

 

MR SPEAKER

Mersi Minis.  Onorab Sylvanne Lemiel.

 

HON SYLVANNE LEMIEL

Mersi Mr Speaker. Bonzour tou dimoun.  Minis konbyen dimoun vilnerab ki’n ganny asiste avek a progranm demokratizasyon fotovoltaik e dan ki distrik?  Mersi.

 

MR SPEAKER

Mersi Onorab.  Minis.

 

MINISTER WALLACE COSGROW

Mersi bokou Mr Speaker.  Mersi Onorab.  Onorab an tou anba sa progranm demokratizasyon avek bann ki nou’n deza enstale, ek bann ki pou ganny enstale dan tre prosenn fitir.  Nou sipoze annan apepre 500 lakour ki benefisye dan tou distrik.

Akoz par egzanp sa 1 megawat ki pou lo zil Romainville la, li in enstale koman en solar farm lo zil Romainville.  Me solman i kapab distribye, sa lenerzi ki i prodwir i kapab ganny offset lo 400 fanmir dan nenport ki kwen Mahe, Praslin, La Digue.

So i kapab offsetBut i depan lo ou status ou lakour.  Si ou lakour i ganny konsidere konman enn ki deserve sa subsidy.  Alors i posib pou sa ganny enplimante dan diferan kwen, Mahe, Praslin, La Digue.  Si ou pe ganny mon kler Onorab.  Mersi.

 

MR SPEAKER

Mersi Minis.  Onorab Lemiel.

 

HON SYLVANNE LEMIEL

Minis mon ganny ou kler.  Me selman i pa reponn mon kestyon.  Mon oule konnen la ziska ozordi konbyen dimoun ki’n fini ganny asiste anba sa progranm?  Mersi.

 

MR SPEAKER

Mesi Onorab.  Minis.

 

MINISTER WALLACE COSGROW

Onorab i pa definir.  Me solman it’s around en 150 dimoun.  I pa definir, it’s around en 150 lakour.  E a i en louvraz ki’n ganny fer ant PUC avek Lazans Proteksyon Sosyal.

So i bann dimoun ki’n ganny idantifye par Lazans Proteksyon Sosyal, kot zot dir petet zot vwar li difisil pou zot pey zot bil elektrisite.  So se sa bann dimoun ki’n ganny idantifye par Lazans Proteksyon Sosyal, refer ek PUC.

E PUC i konekte sa bann PV lo zot lakaz.  Prezan sa 1 megawat ki lo zil Romainville, li osi i pou mars parey.  I pou ganny konnekte avek bann diferan fanmir, diferan lakour.

 

MR SPEAKER

Mersi Minis.  Onorab Stephen Pillay.

 

HON STEPHEN PILLAY

Mersi Mr Speaker.  Bonzour Minis ek ou delegasyon e tou dimoun a lekout.  Mr Speaker mon ti a kontan demann en pti kestyon Minis.  Vi ki PUC i en antite Gouvernman ki pe fer profi mon mazinen –  ki lenpak i kapab annan, pou annan lo zot profit and loss si zot pou fer pert oubyen zot pou kontinyen fer profi.  Si PUC ti abzorb sa 8sou, fer krwar dan son account.  Ki dir ok, nou pa fer monte, ariv 8 sou.

Ki lenpak i pou annan lo son profit and loss?  I pou kontinyen fer en profi oubyen i pou fer en perd?  Mersi Mr Speaker.

 

MR SPEAKER

Mersi Onorab.  Minis.

 

MINISTER WALLACE COSGROW

Mersi bokou Mr Speaker.  Mersi Onorab.  Zis pou met Onorab en pe dan picture la.  32 milyon ou perdi par lannen si ou pa, si ou pa pas sa 8sou.  So it’s R32 milyon par lannen.

Nou kapab mazinen si i kontinyen, i en 32 milyon ki ou perdi forever sa en?  Malgre si next time ou fer monte ler i monte ou aziste, i en 32milyon ki ou’n fini perdi.  Zis prezan mazinen si ou pa kontinyen pa aziste, ou kontinyen perdi, ou kontinyen perdi.

Ziske ki tan en lakonpannyen, okenn lakonpannyen rezonnab i pou konstaman pran en pert san ki i reazir.  Pou ariv en serten pwen kot i pa pou kapab soutenir son lekor, i pou faid.  So 32milyon par lannen Onorab en?  Mersi.

 

MR SPEAKER

Mersi Minis.  Onorab Stephen Pillay.

 

HON STEPHEN PILLAY

Yes, mersi Mr Speaker.  Mon konpran sa 32milyon ki Minis i pe dir mwan.  Mon kestyon ki, ki lenpak i pou annan lo PUC, fer krwar i pe fer R222milyon profi or R100 milyon, oubyen R50milyon profi, ki lenpak pou annan lo zot profit margin si i abzorb sa 32milyon pou sa lannen?  Se sa ki mon pe demande.

 

MR SPEAKER

Mersi.

 

HON STEPHEN PILLAY

Ki profi zot pe ekspekte zot fer?  Mersi Mr Speaker.

 

MR SPEAKER

Mersi Onorab.  Minis.

 

MINISTER WALLACE COSGROW

Mr Speaker, wi PUC pa kapab afford, parey mon’n dir taler, pou abzorb sa kantite larzan over en long period of time.  I annan letan ki PUC in abzorb.  Par egzanp, par egzanp between Zen a Oktob – Zen a Oktob, 3enm kar pa’n fer monte.

Alors PUC in perdi 16milyon la.  16milyon in fini perdi, i pa pe gannyen sa, in abzorb, in bezwen abzorb.  Sa lannen PUC i ekspekte en profi 90 milyon, ok?  Antye. PUC antye.

Si demen bomaten dizon, 32 milyon i perdi, mon pe sey met li an perspektiv pou ou, i sorti 32milyon i ale.  I bezwen tir ladan pou li met sa 32 milyon.  Dizon Gouvernman pa donn li, pa soutenir li lo la, so 90 tir 32.

Lot lannen PUC pe prozekte en profi bokou pli ba ankor.  Akoz cost i kontinyen monte.  I annan lenvestisman dan lezot keksoz ki pe fer.  So son profi lot lannen i pou ekspekte pli ba.  Dizon i tir ankor 32milyon, I – Ou konpran mwan?  Ou pe konpran mwan Onorab?  Weh.

 

MR SPEAKER

Mersi.

 

MINISTER WALLACE COSGROW

Non, non, le pwen i reste ki si PUC i kontinyen tir larzan dan son fon i pa pas sa on,  i pou ariv en pwen kot PUC pou napa larzan pou kontinyen mete.  Ou konpran?  Se sa le pwen.  Le pwen se ki i pou napa.  Mersi.

 

MR SPEAKER

Mersi Minis.  Onorab Simon Gill.

 

HON SIMON GILL

Bonzour Mr Speaker.  Mersi Mr Speaker.  Bonzour Minis avek ou delegasyon.  Bonzour tou koleg Onorab e manm piblik.  Mr Speaker atraver ou mon oule demann Minis si finalman nou konpran ki politisyen i oule ki pep Seselwa i pey elektrisite pli bon marse posib dan sa pei.

I en swe bann politisyen.  Minis i ava dir ou si in konpran sa.  Poudir politisyen i oule ki pep Seselwa i pey elektrisite pli bon marse posib dan sa pei.  Now.  Ki PUC i bezwen fer atraver ou msye le Minis – ki PUC i bezwen fer dizon dan sa prosen 1an, 2an, 3an or 5an.  Pou ki pep Seselwa i pey elektrisite pli bon marse?  Lot kestyon?  Ki bann kontrent aktyel ki PUC pe fer fas avek ki i trouv li neseser pou fer en revizyon lo pri par linite ki konsonmater i peye pou elektrisite?  E sa i pa zis enkli bann konsonmater ordiner, i enkli osi biznes.

Akoz politisyen osi i dir ou, poudir si kou elektrisite i desann pou bann biznes, sa i a fer ki pri bann servis ki biznes i ofer lanasyon i ava osi desann.  E i ava enpakte pozitivman lo kou e pri lavi dan Sesel.  Lot kestyon ki enportan.

 

MR SPEAKER

Mersi.  Onorab.

 

HON SIMON GILL

Pardon?

 

MR SPEAKER

I annan 3 kestyon ou’n poz Minis la.

 

HON SIMON GILL

Wi.

 

MR SPEAKER

Annou pran en poz.  Minis i ava reponn apre mon a regarde si mon pou donn ou ankor 1.

 

HON SIMON GILL

Ok Mr Speaker.  Mersi bokou.

 

MR SPEAKER

Akoz tou Manm in demann 2 siplemanter.

 

HON SIMON GILL

Akoz mon annan ankor 3 kestyon mon ti a voudre demann Minis ozordi.  Mersi bokou.

 

MR SPEAKER

Minis laparol i pou ou.

 

MINISTER WALLACE COSGROW

Mr Speaker mersi.  Mersi Onorab.  Onorab wi Gouvernman i konpran ki poudir pep Seselwa i anvi pey elektrisite pli bon marse posib.  E se sa ki nou pe fer toulezour.

Se sa travay ki PUC pe fer, Minister pe fer pou asire ki pep Seselwa i pey pri litilite, pa zis elektrisite.  Me delo, sewage a en to pli bon marse posib.  An fezan sa, nou realize osi ki i enportan pou vyabilite PUC, pou fer ki PUC i reste en lakonpannyen ki kontinyen deservi nou.  Bomaten ler nou leve – bokou pei pa koumsa en.  Bomaten ler nou leve, nou pez en bouton, si i ankor fernwanr lalimyer i alimen.  Nou al dan nou lakwizin, nou met nou boulwar on, nou pez en bouton, kouran i vini, nou ouver nou delo, tiyo i koule.

Konmsi i en, i tout en travay enorm ki PUC avek son 11000 staff i bezwen fer toulezour pou asire ki the meyer servis i ariv kot piblik.  Meyer servis i ariv kot piblik a en kou pli meyer marse posib.

Me solman i enportan ki sa kou ki piblik i peye, i touzour reflekte, omwen kou pou prodwi.  Akoz si ou pa kapab reflekte kou ki prodwi, then sa lakonpannyen evantyelman dan longer di tan, i pa pou vyab.  E i pou pas dan bokou difikilte finansyel.

Me solman lefe i reste ki Gouvernman i anvi, i anvi, napa okenn personn ki anvi fer monte pri zis koumsanmenm.  Gouvernman i anvi asir stabilite pri litilite.  E i anvi fer li pli bon marse posib.

Now ki nou bezwen fer dan lefitir pou fer sir ki nou attend sa lobzektif?  Nouvo teknolozi i enportan nou anmennen pou fer sir ki prodiksyon i reste abordab.  Prodiksyon elektrisite i reste abordab.

Nou’n dir taler nou pe envestir e nou pe koz lo LNGok LNG.  Nou’n dir nou pe envestir dan bann nouvo rezo, par egzanp 33 kilovolt.  Nou pe envestir dan bann nouvo pli pti rezo.  Nou pe envestir dan bann nouvo lekipman.  Bann stasyon laponp par egzanp pou delo.  Nouvo danm, extension danm, bann diferan lenvestisman ki nou pe fer,  ki fer ki prodiksyon i pli efikas i ki pri i vin bokou pli ba.  So sa bann lenvestisman i enportan.

Me ankor mon repete nou bezwen fer sir ki nou pey omwen minimonm ki koute pou prodwi.  Pou kapab ganny larzan pou kapab envestir dan sa bann lezot proze.

Ok, kou PUC.  PUC son kou i enn ki o.  Zis bomaten mon ti’n ganny serten lenformasyon ki par egzanp zis fuel pou 2019 i apepre 65, 70 poursan kou prodiksyon elektrisite, zis fuel sa.

E i annan bann lezot kou ankor.  Kou labour, mendev ki ozordi nou pe donn long service allowance R10milyon i kout PUC – 11mil travayer.  13enm Mwan Saler.  Bann bonus.  Logmantasyon, nouvo Scheme of Service ki pe aziste.

So tousala i bann kou ki vin dan PUC, bann kou operasyonnel.  E osi bann lezot kou ki PUC koman en lakonpannyen ki i depan lo li finansyerman, i bezwen incurSo i enportan ki PUC i reste lo sa nivo stabilite.

E sa nou bezwen aziste li atraver bann pri ki PUC i sarze.  Pa an ekse, me reflekte kou ki i prodwi.  Mersi bokou Mr Speaker pou sa 3 kestyon, sa 3 larepons.

 

MR SPEAKER

Mersi Minis.  Onorab Simon Gill ankor 1 kestyon.

 

HON SIMON GILL

Wi mon annan 3, in donn mwan zis 1.  Mr Speaker mersi bokou pou donn mon ankor 1 kestyon dan mon 3 ki mon annan la.  Mon a rezerv dan Budget Reply pou mwan kapab poz mon 2 lezot kestyon.

E kestyon ki tre enportan, ki Minis i devret adrese, se ki si i annan dan peryod dan en lannen, ki pri karbiran i desann, ki PUC i servi, pou kapab fer zenerasyon elektrisite.  Ki sa dan li menm li i en moman tanporer dan prodiksyon elektrisite,  ki enpakte lo kou prodiksyon.  E sa i vedir ki PUC i kapab fer desann pri ki Seselwa konsonmen, or ki Seselwa i bezwen peye.  Ki senaryo nou fer fas avek, si PUC a sak moman ki kou prodiksyon i desann, PUC i pass on sa lo konsonmater.  I pou annan en lefe.  Me ki i arive dan bann lezot moman, dan bann lezot peryod, kot kou prodiksyon i ogmante, e ki PUC pa fer monte pri ki konsonmater i konsonmen?  Zeneralman i pa fer monte? Eske i rezonnab Minis.  Baze lo bann, avek bann expert ki la lo latab – eske i rezonnab pou nou conclude ki Gouvernman toulezour pe subsidized kou ki Seselwa i pey elektrisite dan sa pei.  Eske i rezonnab?  Eski i rezonnab?

Akoz ou’n dir nou taler, ki PUC i annan en prozeksyon 90 milyon profi.  E sa 90milyon profi i bezwen ganny fer pou li kapab garanti reenvestisman, kree lenfrastriktir adisyonnel.

Akoz i annan en prozeksyon ki toulezan ou bezwen pe ogmant ou supply par 5poursan.  E se sa ki fer ki ou bezwen annan en minimonm profi ki ou fer.  Sa i en eleman.

 

MR SPEAKER

Mersi.  Onorab.

 

HON SIMON GILL

Mon pe sey get en kou ki mannyer sa matrix la i marse, ki si Minis i kapab servi sa.  Akoz i riske dir ou Mr Speaker, ki si ou pe fer prozeksyon R90 milyon profi.

 

MR SPEAKER

Onorab.  Onorab.

 

HON SIMON GILL

Ou bezwen kapab fer desann kou elektrisite ki konsonmater i peye.

 

MR SPEAKER

Onorab, Onorab, Onorab annou donn sans Minis reponn.  Ou pe poz kestyon, ou pe walk out en, mon pa konnen si ou’n dir, si matrix oubyen si metrics.   Me ou pe reponn ou menm, ok?

 

(laughter)

 

 

MR SPEAKER

So annou donn sans Minis pou reponn.  Minis.

 

MINISTER WALLACE COSGROW

Mersi Mr Speaker.  Mersi bokou Onorab pou ou kestyon.  Onorab, wi PUC i fer monte – PUC i operate baze lo si i monte, si i desann.  Si i monte PUC i anvoy son kalkil kot Energy Commission parey Lalwa i dir li.

I demann Energy Commission pou li fer monte, pou li aziste, si i desann menm parey.  Now, parey ou’n dir.  Si PUC i deside ler i monte pa fer monte, en pti pe parey senaryo ki Onorab Stephen Pillay in demann mwan;-

Si nou pa fer monte, si PUC pa fer monte.  I pou vwar li dan en sityasyon kot i pou fouy dan son rezerv, dan son fon pou kapab soutenir sa logmantasyon ki pa’n fer monte.  Me pou ariv en serten pwen kot PUC pa pou kapab soutenir, ok?  Pa pou kapab soutenir.  Alors i pou vwar li dan en difikilte finansyel.

Lenportans se ki PUC i reste, e mon repet ankor.  I reste sa servis litilite piblik ki kapab kontinyen donn nou servis, e kontinyen donn nou en servis ki bon.  E kontinyelman amelyor servis.

I pa parfe.  I annan bann letan, landrwa, lenstans kot PUC i kapab amelyor servis.  Me si nou pa donn li sa posibilite pou li vin en lakonpannyen ki stab, mon pa pe dir i pa stab.  Me enn ki pli stab, then nou pou vwar nou dan difikilte.

Idealman pou mwan idealman si nou ti kapab annan nou en kou ki dir, over en peryod letan, kot pa’n bezwen annan bann lazisteman tou lazournen.  I ti pou pli sound PUC.  Me Gouvernman in deside ki nou, ler i annan en logmantasyon nou pass on.  Ler i annan en rediksyon osi nou pass onSo nou’n operate, nou pe operate, nou’n deside operate koumsa tou le kar.

So se sa mekanizm ki nou pe servi.  Now, PUC mon’n dir taler, wi PUC i fer, i pe prozekte en proze, en profi 90milyon.

Proze Kapital, CAPEX pou PUC lot lannen i 423milyon.  Savedir ou 90milyon in fini manze.  Gouvernman wi i donn PUC en Grant pou capital project.  Me i still pa ase.

So larzan ki ganny fer dan PUC, i ganny reenvestir dan lenfrastriktir pou anmenn elektrisite, anmenn delo, anmenn sewage kot piblik, kot popilasyon.  An gro Mr Speaker se sa larepons pou ou kestyon Onorab Gill.  Mersi.

 

MR SPEAKER

Mersi Minis.  Mon a retourn kot loter kestyon.  Onorab Ferrari.

 

HON JEAN-FRANCOIS FERRARI

Mersi Mr Speaker.  En pti kestyon pou presizyon.  Mon ti a kontan si Minis i kapab dir nou dan en fason senp.  Akoz dimoun dan lakour pe rod bann repons senp.

Kan dernyen fwa ki PUC ti fer en rediksyon dan tarif baze spesifikman lo pri fuel ki’n desann?   Mon ti a kontan ganny sa.

Dezyenmman, eski mon ti kapab demande, apard tarif, ki zefor ki PUC pe fer pou li rod en pe plis lefikasite e ki nou pa, ki PUC pa satisfer li avek 41 poursan, me i sey ogmant sa 41 poursan.  E i sey redwir sa 7 poursan loss dan laliny.

Konmsi ki zefor ki pe ganny fer lo sa kote osi.  Akoz zefor pa kapab, kalkil pa kapab baze zis lo tarif.  Ki zefor ki pe ganny fer dan sa domenn.  Mon konnen, mon kapab felisit zot pou enn de bann keksoz.

Par egzanp, mon konnen poudir PUC in koup kouran dan Villa Karoutsou, sa bann keksoz, bann labi lontan ki ti arive …

 

MR SPEAKER

Onorab.

 

HON JEAN-FRANCOIS FERRARI

… ki prezan …

 

MR SPEAKER

Onorab.

 

HON JEAN-FRANCOIS FERRARI

… non in annan en pe zefor ki pe fer, ou bezwen felisite Mr Speaker kan i annan enn de zefor.  Me mwan mon ti a kontan si PUC i kapab dir nou, si i annan lezot landrwa parey Villa Karoutsou, konmsi ki pa ti pe pey zot kouran.  Ki prezan zot pe chop!

 

(laughter)

 

 

MR SPEAKER

Onorab

 

MR SPEAKER

Dakor.

 

HON JEAN-FRANCOIS FERRARI

Sa i sa bann keksoz ki enportan, ok?

 

MR SPEAKER

Bon, mersi Onorab.

 

HON JEAN-FRANCOIS FERRARI

E finalman – e finalman mon ti a kontan si PUC i dir nou,  dan sa drive pou lefikasite, ki zot pe sey rode la,  nou Lasanble Nasyonal e mon felisit ou Speaker,  in met en sistenm PV, ki’n redwir nou kou par pros 45 poursan nou konsonmasyon.

Zot ki’n mete, mersi, e sa in redwir nou kou.  Lakour osi ti pou annan, pa’n annan, State House ti pou annan, mon krwar pa in annan.  In annan?  PV?  In fini mete?  Egzakteman.  Konmsi ki bann zefor ki zot pe fer?  E Minis dir nou.

Akoz sa i enportan pou piblik, i enportan pou piblik.  Eksplik nou byen ankor sa ki ou’n eksplik Mr Pillay la.  Ler en dimoun i anvi met en PV lo son lakaz la, i fer son lakaz apre i kriy zot, zot vini zot gete si i kapab, si i kapab – si son sistenm i kapab tenir sa.  Eski sa ki ou pe dir nou?  Konmsi i enportan pou piblik konpran a ki moman eski i vin kot PUC pou dir mon enterese met en PV lo mon lakaz.  Ki moman?  Ler mon pe fer mon plan, ler mon pe mont mon miray, kan e ki moman?  Akoz i enportan ki sa i konnen.  Mersi.

 

MR SPEAKER

Mersi Onorab.  Minis.

 

MINISTER WALLACE COSGROW

Mersi bokou Mr Speaker.  Mr Speaker mon a pran 2enm kestyon an mezir ki teknisyen pe rod when was the last time ki tarif production ti ganny fer.  Apart tarif PUC pe envestir dan bann nouvo laliny distribisyon,  pou zisteman, mon’n dir taler, nou’n redwir perd dan laliny sorti 14poursan pou vin 7 poursan.  I annan posibilite petet desann ankor en pe.  Parey mon’n dir Lalwa Physics nou pa kapab zwe avek, i Lalwa Physics.  Petet i annan posibilite ki nou kapab fer desann ankor en pti pe.  Me solman i pou bezwen depan lo lefikasite, kalite bann laliny distribisyon ki nou annan.

An term 41 poursan, 41 poursan is pushing it to the limit.  Pushing it to the limit.  I annan en konparezon ki CEO tou kou i kontan fer avek mwan lo kote masin loto, ok masin loto, okenn masin loto normal ki pe marse deor avek combustion, 25 a 30poursan efikasite.  Ou konpran?

So efikasite masin loto kantmenm ou vwar li i la deor pe marse i dan bon kondisyon, sa en konparezon ki tou kou nou fer.  E masin PUC li i apepre 41 poursan, ok?  Akoz li i en pli gro masin.  So i annan bann diferan keksoz.

Prezan ankor mon ava donn ou ankor, nou pa lo la, me selman;- par egzanp delo, non-revenue water.  Non-revenue water nou’n sorti 57poursan.  Ozordi nou 25poursan.  I annan ankor pe pouse, ok?  Sanmenm sa ozordi ki ou vwar nou pa vreman santi letan lapli pa tonbe. Akoz nou pe pouse, fer sir ki tou bann landrwa nou kapab anmas nou delo, bouse kot i annan bann leak.   E fer sir ki bokou plis delo i ganny, i ganny distribye avek piblik.  So i annan en kantite zefor ki pe ganny fer kot PUC, e sa bann zefor i konsern larzan.  Ou bezwen kapab annan reveni, larzan pou met dan sa bann proze partou.  PUC i annan en group dimoun committed, bann travayer committed pe travay anver pous PUC pli devan.

So Mr Speaker konmsi mon anvi fer resorti ozordi dan Lasanble ki poudir, the aim se ki PUC i kontinyen provide sa servis e fer li pli byen ankor.  Sa ki aim PUC.  E napa, konmsi napa okenn letan kot nou anvi zis met en burden lo piblik, non!  Napa personn ki anvi bil monte.

Nou tou letan bil i monte, nou tou i monte, pou Mr Morin i monte, pou mwan osi i monte.  Napa personn ki anvi pey bil pli o.  Me solman i nesesite, se ki ler en kou i monte, PUC pa kapab pran sa kou.  I pa kapab kontinyen pran sa kou over en peryod letan ki long.  Nou bezwen pas sa kou.  At least sa ou prodiksyon.  Ok Mr Speaker?  Sa lo sa laliny.

E an term kan dernyen ti desann.  Ok, 3enm ka 2017 apre sa in monte, in monte, in monte.  Apre ti annan en bout an 2018 kot i ti desan.  Ki pa ti fer pase.  Apre i ti al tonm lo en lot bout, ok.  Ok, savedir bann letan ki i ti’n monte, nou pa ti fer monte, pa ti sanze.  Apre ti annan letan kot i ti desann par 24sou, pa ti sanze.  Akoz pou balans en pe sa bann monte, sa bann monte, ki ti’n monte avan.  So sanmenm mon pe dir ou, taler mon’n dir boner.  Konmisyon Lenerzi ek PUC parfwa zot pa zis get sa sanzman dan soz, dan kou fuel.  Zot sey get osi stabilite pri over en peryod letan.

So zot sey fer bann prozeksyon kot ler i monte.  Parfwa nou pa fer monte.  Ler i desann osi si nou kapab anmas sa larzan ki’n perdi letan ti monte, then pou sey kit en stabilite pri over en serten letan.  Anyway se sa ki nou, nou fer.  Ou konpran?  Ok, se sa ki nou, nou fer.

Me solman an zeneral on average, on average plis,  Ok, so i ti devret – on average, i ti devret mont par 48sou on average,  pandan sa peryod letan depi Zanvye 2018 ziske la, e in mont selman par 44sou.  Konmsi i pa’n mont parey i ti sipoze monte.  Ou konpran mwan Onorab?

 

MR SPEAKER

Mersi.

 

MINISTER WALLACE COSGROW

Well on average, on average, ok.

 

MR SPEAKER

Mersi Minis.  Minis mon krwar dan dernyen bout kestyon lo enstalasyon PV, lo en lakaz prive ler en dimoun pe konstri.

 

MINISTER WALLACE COSGROW

Anr ok, sorry Mr Speaker.  Wi, sorry Mr Speaker,  Wi, wi Mr Speaker, anytime, PUC i dir mon anytime ki en dimoun i dan son prose konstriksyon.  Ouswa en dimoun ki son lakaz in deza la, anytime zot anvi apros PUC, zot kapab apros PUC.  Me par kont i annan Komisyon Lenerzi osi zot kapab aprose.  Zot biro i Unity House lasanm 307.  Zot kapab apros enn bann enstalater ki i annan, i annan detrwa lo market.

Apros sa bann dimoun, sa bann dimoun i konn tou prosedir ki pou fer, pou kapab enstal en PV lo lakaz.  So i annan diferan angle ou kapab apros li.   E de tout fason tousala i pou le de tour en menm landrwa.  Kot finalman ou annan ou PV ki ganny enstale.  Alor …

 

MR SPEAKER

Mersi.

 

HON JEAN-FRANCOIS FERRARI

Mon krwar i annan en problenm, si ou pa bezwen okenn permisyon avek regilater.  Zis ou vini ou met ou keksoz lo la?  Kan ou anvi?   Be later, eski regilater i bezwen vin dan ou lakaz pou vin gete ki ou lenstalasyon ki i kapab siport sa bann keksoz?   Sa ki nou oule konnen.

 

MR SPEAKER

Wi mersi Onorab.  Minis.

 

MINISTER WALLACE COSGROW

Wi, ok.  Mr Speaker i annan en prosedir ki ganny fer.  Mon pa’n dir zis ou ale ou met mwan.  I annan en prosedir kot ou ale kot regilater.  E kot regilater i annan en prosedir ki ou bezwen swiv.  E sa bann lakonpannyen ki enstale, zot konnen sa prosedir.

So demen bomaten si mon apros enn sa bann lakonpannyen par egzanp, zot pou eksplik mwan tou sa bann prosedir.  E zot bezwen abide to bann prosedir ki regilater i demande.  I annan son bann prosedir teknik ek son bann prosedir administrative.

So i annan bann prosedir ki evantyelman ou bezwen pas atraver regilater pou ou kapab enstale.  I annan bann prosedir li.  Ki mon ti pe dir, se ki ou kapab apros swa regilater, swa bann installers, swa PUC, me evantyelman ou pou ganny lead atraver bann prosedir ki ou bezwen swiv.  Mersi bokou.

 

MR SPEAKER

Mersi Minis.  Bon avek son mon ti a kontan, nou’n ariv a la fen nou kestyon pou Minis.  Mon ti a kontan remersi Minis avek son panel.  Ki konpri PS Agricole, CEO Morin e CEO Imaduwa.  Minister mersi e nou ava eskiz zot parmi nou.

 

 (MINISTER COSGROW AND HIS DELEGATION WAS EXCUSED FROM THE HOUSE)

 

MR SPEAKER

Bon nou, mon pou zis call Onorab William pou 2enm kestyon.  Me an vi ki nou napa panel la, i annan en sityasyon ki’n arive vizavi sa kestyon, mon ava donn loter kestyon anba Standing Order 33(7),  pou ler i pou withdraw son kestyon i a kapab donn en leksplikasyon.   Onorab William laparol i pou ou.

 

HON WAVEN WILLIAM

Mersi Mr Speaker.  Mr Speaker mon anvi port a ou latansyon ki mon pa pe pran sa kestyon ozordi.

E mon anvi port a ou latansyon ki sa kestyon ti antre kot Lasanble semenn le 7.  E mon ti ganny dir ki Egzekitif i annan serten travay ki i pe fer.  E ki ti annan en dil ki ti pou al konklir.  E ki mon kestyon ti pou kapab ganny pran le 22.

Me i resanble ki sa pa’n posib osi. E kominikasyon pa’n ganny fer, se pou sa rezon ki sa kestyon in vin lo Order Paper.  E mon pou pran sa kestyon prezan dan Bidze.  Mon krwar i ava apropriye.

E Mr Speaker mon ti a kontan azoute osi ki rezon par deryer sa kestyon, se ki par ou konnen, sa gro sonm larzan ki nou bezwen peye pou sityasyon polisyon La Misère avek Pti Barbarons,  e sa kestyon in vin anliny avek sa pou sey rod larzan ki bor i ete.

Akoz nou santi poudir i annan serten ban sonm larzan ki Gouvernman i pou bezwen anmase.  E pou kapab konble sa bann trou kot nou bezwen tire pou nou kapab pey bann keksoz ki neseser.  Parey pey bann dimoun ki’n ganny afekte avek polisyon La Misère, mersi bokou.

 

MR SPEAKER

Mersi Onorab William.  Bon lo lapar Sekretarya, mon kapab fer sa deklarasyon.  Pou dir semenn pase mon’n an kontak avek Zofisye, Minister Finans, e mon ti ganny dir ki zot pa pare semenn pase pou pran sa kestyon,  an vi ki zot ti annan serten deklarasyon ki zot ti pou fer par lafen lasemenn.  E zot pa ti anvi ki enn i anpakte lo lot.  Se sa rezon ki nou ti dakor, e mon ti kominik avek ou, ki nou pou pran sa kestyon sa semenn.  E Zofisye Minister Finans ti dir poudir zot pou dan en pozisyon pou kapab pran sa semenn.

Me parey ou’n dir, mon pa’n, lo mon kote – e lo kote, bomaten mon’n koz avek Madanm Clerk, nou pa’n ganny okenn lezot lenformasyon.  So se sa rezon ki sa kestyon in reste lo Order Paper.  Be dapre mon konpran ou’n ganny kontakte avek Zofisye Minister Finans.

So vwala rezon ki mon’n allow ou pou ou kapab fer sa lesplikasyon ki ou pe retir ou kestyon.   Bon nou, avan nou pran break, mon zis atir latansyon Lasanble, ki apre ler nou antre, nou pou kontinyen avek Mosyon, kontinyasyon lo Mosyon Bidze Siplemanter.  So nou ava break la, e nou ava retournen 11.15.

 

(BREAK)

 

MR SPEAKER

Bon nou pou kontinyen nou travay.  E parey mon’n anonse, nou pou kontinyen deba lo Mosyon pou Bidze Siplemanter.  E pou nou kontinyen sa deba, mon konnen ki FPAC ti meet avek bann Zofisye Minister Finans.

Mon ava donn laparol Onorab Ahmed Afif, i ava donn nou en pti rezimen bann travay ki zot in fer.  E i a kapab lead nou.  E apre sa mon pou allow, i pa pou, mon pa pou ouver deba ankor for the whole House. 

Mon pou allow 2 Manm lo sak kote ki anvi fer komanter.   E apre mon ava retourn kot mover Mosyon, Onorab de Commarmond pou li fer son closing remarks.  Apre pou nou pran en vot.  Mon ava donn laparol Onorab Ahmed Afif ki pe reprezant FPAC.  Onorab.

 

HON AHMED AFIF

Mersi Mr Speaker.  Mr Speaker mon pe zis donn en rapor preliminer dan labsans Chair FPAC ki overseas lo en misyon travay.  Mr Speaker an rezimen FPAC ti ganny demande pou fer en assessment lo sa Bidze siplemanter, lo bann sif siplemanter ki ti ganny prezante dan sa Mosyon par LGB pou rod en rezolisyon pou siport sa sonm R310 milyon.

Mr Speaker, FPAC i note poudir ti annan en rediksyon, R436milyon dan depans Gouvernman.  E atraver sa rediksyon zot ti demann permisyon pou depans R310 milyon.  An prensip si nou’n swiv diskisyon dan Lasanble li menm, bann Manm pa ti obzekte pou fer sa re alokasyon sa 310milyon.

Me selman ti annan bokou kestyon ki ti ganny prezante lo nivo 4 heading anba sa bann sif siplemanter.  E sa bann headings se bann ‘’Benefits and Approved Programs of ASP.’’  Savedir Lazans pou Proteksyon Sosyal.

E alor Komite ler i ti zwenn semenn pase ti pas en pe letan pou regard 4 Scheme.  Premyerman Home Care Scheme, Disability Benefit, Welfare Assistance e katriyenmman Unemployment Relief Scheme. 

E mon a pran enn par enn briyevman.  Home Care Scheme;-

Bidze ki ti aprouve dan Bidze 2019 ti R240milyon.  E Lazans pou Proteksyon Sosyal, Zanvye ziska Desanm ti’n depans enkli 13enm Mwan R206milyon.

E nou ler nou’n fer nou kalkilasyon, nou ekspekte zot fini lannen avek R266milyon.  Ki vedir ki zot pou mank R26 milyon dan zot Bidze.  Zot demann pou Bidze Siplemanter ti 28.  E zot ti eksplike ki zot in demann 2milyon an plis prensipalman akoz zot ti’n met sa koman en provizyon an ka zot vreman manke e ti en prekosyon.

Alor FPAC ti rekomande ki sa sonm 28milyon i ganny aprouve, a kondisyon ki Minister finans i siperviz sa dernyen 2milyon, si an ka i vreman neseser.

Lo kote bann Disability Benefits;- Bidze 2019 ti 69.3milyon.  Me Zanvye ziska Septanm 2019 zot ti’n fini depans 70.8milyon.  Ki vedir, e nou, nou’n fer en forecast ki zot pou fini lannen avek R94.8milyon.  Ki vedir zot pou annan zot en mankman R25.5milyon.  Me zot Gouvernman zot in demann
R20.8milyon.

Ler nou ti demann zot akoz zot pe depans mwens ki swadizan nou’n forecast zot pou fini avek,  zot ti dir ki i annan bokou dimoun ki pe ganny klasifye koman medikal, e alors zot ti bezwen ganny sa bann welfare.  Me zot, zot ti’n demann mwens larzan ki nou ti’n forecast.  Parske zot santi zot ti pe met an plas deza bann mezir ki ava ed zot redwir labi.  Alor nou, nou’n rekomann ki sa R20.8milyon i ganny aprouve.  Me ki bann monitoring ki zot fer i kontinyen.

Trwazyenmman Welfare Assistance;-  Bidze total pou 2019 ti R40milyon.  Total ki zot in depanse Zanvye ziska Oktob 2019 ti R28.5milyon.

Nou, nou pe prevwar ki zot pou fini lannen avek R34.7 milyon, ki R5.2milyon par anba Bidze.  Me selman zot in demann en Bidze Siplemanter R9.8 milyon.

Alor nou’n demann zot, be si ou pou par anba ou Bidze akoz ou pou bezwen R9.8 ekstra?  E alor la zot ti eksplik nou ki bann sif ki zot in prezant nou i senpleman bann sif direk ki zot pe pey pou welfare.  Me i annan lezot depans ki zot pa ti’n prezant ladan, ki pou fer ki sa sif 9.8 pou neseser.  Zot ti pe depans apepre R1milyon ekstra par mwan.  FPAC ti alors santi ki sa sonm 9.8 i ganny aprouve.  Me a kondisyon ki i annan bann monitoring ki strik par Lazans pou Proteksyon Sosyal.

Katriyenmman Unemployment Relief Scheme;-  Bidze pou 2019 ti R10milyon.  Total ki zot in depanse Zanvye ziska Septanm 2019, ti R12.3 milyon.  E nou, nou anvizaze ki ver lafen lannen zot pou’n depans R16.2milyon.  Ki vedir zot pou annan zot en mankman R6.2 milyon.

Zot, zot in demann R4.7 milyon koman siplemanter.  Zot ti eksplik nou ki kantite dimoun ki zot ti pe donn URS ti’n tonbe an Septanm konpare ek Zanvye.  Me ki depans li i ti’n monte par R500milyon.

E nou pa’n konpran akoz i annan mwens dimoun ki pe ganny welfare, me depans in mont par R500 mil an Septanm.  Me zot ti dir ki lafason ki zot ti pe pey Unemployment Relief, ti par semenn souvandfwa.

E resaman zot in vwar lentandan pou dimoun vin kolekte, pa zis pou en semenn dan en mwan, me plis semenn dan en mwan.  Ki vedir malgre ti annan mwens dimoun, ti annan plis disbursement dan en mwan.

Akoz sa ti lye osi avek lezot fakter;- par egzanp zot ti dir i annan seasonality, i annan vann swet, ki annan serten dimoun pa ti pe kapab al travay dan serten kondisyon.   E alor ti annan plis demann.  FPAC ti regard sa bann rikord.  E nou ti rekomande ki sa sonm 4.7 i ganny aprouve.

Nou konklizyon Mr Speaker i kler ki dan tou le 4 heading;-  Savedir Home Care, Disability, Welfare avek URS.  Tou le 4 bann sif ki pe ganny peye tou le mwan pe monte a en to alarman.

Alor FPAC, nou’n pas sa mesaz avek Lazans Proteksyon Sosyal, e bann lezot Minister ki zot travay avek.  Ki zot devret vreman, konsider bann ka ki bann dimoun i vreman merite.  E welfare peyman, zot bezwen toultan mazinen, se larzan lezot dimoun ki pe travay.

Alors se zot lasyer ki pe pey pou bann ki pa kapab travay.  E alors zot devret vreman fer sir poudir se vreman bann ki pa kapab travay ou, e pa bann ki pa oule travay.  Alor nou ti osi rekomann serten mezir ki devret ganny met an plas toudswit, ki pou adres bann size labi, mismanagement oubyen mank sipervizyon dan sa 4 diferan progranm.  Nou, nou krwar poudir i enportan ki prodiktivite dan Sesel i ogmante.  Parske prodiktivite dan Sesel i pou anmenn plis deviz pou Sesel.

E si i annan plis Seselwa ki pe travay dan Sesel, i pou annan mwens deviz osi ki pou kit pei.  Finalman Mr Speaker nou pe rekomande ki sa sonm R63.3milyon i ganny aprouve anba ‘’Benefits and Approved Programs of ASP,’’  a kondisyon ki sa R2milyon ki ti pe ganny kontrole par Minister Finans i ganny fer pou Home Carer program.  E avek sa Mr Speaker vwala nou assessment.  Nou en pti pe alarme par lafason ki i pe monte.  Me nou demann Lazans Proteksyon Sosyal pou egzers bokou plis kontrol e sipervizyon.  Mersi Mr Speaker.

 

MR SPEAKER

Mersi Onorab Afif pou sa pti rapor from FPAC.   Mon ava prezan donn laparol Onorab Jean-Francois Ferrari.

 

HON JEAN-FRANCOIS FERRARI

Mersi Mr Speaker.  Mr Speaker parey Onorab Afif in eksplike, mon ti a kontan avek piblik, avek bann Manm Lasanble ki isi, retras sa larout ki nou’n fer pou nou ariv lo sa vot ozordi.

Detrwa semenn pase, Gouvernman in vin avek en Bidze Siplemanter ki nou, nou pa’n donn laprouvasyon.  Annefe nou’n refiz-e pou vote akoz nou ti bezwen leksplikasyon lo sa bann vot.

Nou ti demande premyerman plizyer lenformasyon avek Gouvernman, notaman avek Minister Finans e Lazans pou Proteksyon Sosyal,  lo 4 Scheme an gro, Home Care, Disability, Welfare ek Unemployment Scheme.  Nou pa ti gannyen tou sa bann lenformasyon ki nou ti pe rode.  Alors nou’n kontinyen refiz-e pou nou aprouv sa demann.

E FPAC in ganny apre demande pou li rankontre avek Minister Finans ek Lazans Proteksyon Sosyal, pou gete avek zot, akoz zot pa pe donn nou bann lenformasyon.  E ki sa bann lenformasyon ki nou bezwen.

Finalman Mr Speaker, semenn pase oubyen semenn avan nou’n gannyen laplipar sa bann lenformasyon ki nou pe rode.  E mon ti a kontan dir avek sa Lasanble ki, se bann lenformasyon ki annan apepre 3an ki nou pe rode.

E finalman piblik i a kontan konnen ki lenformasyon ki nou’n gannyen se bann lenformasyon ki vreman penn en portre ekstraordiner.

Akoz nou’n ganny lenformasyon lo bann benefisyer, bann akter dan servis home caring e dan bann lezot landrwa, lekel, ki kalite, ki pe benefisye.  Ki kalite kalifikasyon ki ou fer? Ki mannyer bann kalkilasyon? Lekel ki kalifye, e eksetera.  Lenformasyon Mr Speaker ki depi ler nou’n antre dan sa Lasanble, nou, sa group isi dan 6enm Lasanble, nou pe demande e nou pa’n gannyen.  Finalman, mon ti a kontan dir avek lepep Seselwa, ki sa bann bout lenformasyon, nou’n gannyen.

E sa lenformasyon Mr Speaker i vreman alarman.  Mr Speaker nou’n vwar en sityasyon kot servis welfare pe go out of control.  Pe vreman al dan tou direksyon e pe menas sa sistenm li menm.

Personnelman, e mon konnen ki mon bann koleg isi lo sa kote latab, nou’n pran sa bann lenformasyon, sakenn antre nou e nou’n pas atraver sa bann lenformasyon.   E mwan mon’n vwar, mon’n match li, mon’n konpar li avek lenformasyon ki mon annan o nivo mon distrik.

E mon’n vwar plizyer problenm ki alarman.   E sa bann problenm i endik en sel keksoz, se ki Gouvernman an realite i napa en kontrol strik lo ki mannyer welfare e bann servis asosye avek welfare pe ganny manage.

Mr Speaker, pou Lasanble, pou lenformasyon Lasanble, i annan plizyer keksoz ki zot pou vwar.  Ou pou vwar par egzanp en dimoun ki annan en carer me i pa konnen lekel son carer akoz zanmen in deza vwar sa carer.

Ou vwar en dimoun ki pas son letan pe bwar dan kwen semen me selman i lo en Scheme swa envalidite, swa dezabilite, swa menm i en care, swa i en benefisyer Carers Scheme, Home Carer Scheme.

E nou, nou konn zot sa bann dimoun.  Si nou konn nou distrik, nou konnen e nou vwar poudir sityasyon i pa anba kontrol.  Akoz i annan dimoun ki merite ganny sa lasistans e bokou dimoun i merite ganny sa lasistans.

Me i annan osi bann ki pa merite, ki zot lo okenn sa bann Scheme.  Me zot, zot in antre lo la pou en rezon oubyen en lot.  E napa okenn kontrol.

Nou’n remarke, nou’n ganny konfirmasyon avek Lazans Proteksyon Sosyal, ki par egzanp ti annan en sistenm sipervizyon ki mon konnen, ki bokou dimoun dan pei pe fer lapriyer pou retourn en sistenm Supervisors parmi Home Care Scheme.

Akoz i annan dimoun i home carer, i annan dimoun i benefisye avek Caring Scheme.  Me selman napa personn ki pe kontrole, si sa dimoun i travay, si sa dimoun i egziste, si sa vye dimoun pe ganny lasistans, napa personn ki pe verifye.

I en sistenm.  E mon ti a kontan dir, mon ti a kontan remersye bann Manm Minister Finans ki la e Minis osi ti la.   E Lazans Proteksyon Sosyal zot in aksepte ki zot annan en kantite defi o dan management e zot pare pou zot, zot in dir zot in pare pou zot ekout bann sizesyon.

E zot in deza konmans reflesi lo bann metod ki zot devret met an plas, pou kapab annan en pli meyer kontrol lo sa bann depans.  Mr Speaker, nou’n vwar dan plizyer sa bann Scheme par egzanp, ki depan lo en assessment medikal, ki par ler dimoun sorti an deor pe met presyon, mwan mon’n vwar dan mon distrik.   E mon konnen poudir enn bann distrik kot sa lenformasyon in sorti tre for ki Leader lopozisyon ti pe koz lo la semenn pase.

Se par egzanp dan en distrik parey Bel Ombre, dan ou distrik Mr Speaker.  Nou’n vwar par egzanp ki i annan serten lenterferans, serten presyon lo travayer medikal, pou fer en dimoun kalifye menm si i pa devret kalifye.

Pou pas par en lot laport, antre par en lot lafnet, pou kapab benefisye lo en sistenm.  Sa ki mon ti a kontan dir Mr Speaker, se ki nou, nou ti, nou anvi vwar tou dimoun ki kalifye, ki merite ganny aste.

Me nou problenm se ki i annan serten dimoun i ganny kit ater akoz i annan labi.  I annan dimoun Mr Speaker ki nou’n vwar atraver sa refleksyon, atraver sa analiz ki nou’n fer, ki finalman ou vwar zot dan tou Scheme.

Zot aparet dan Care Scheme, zot aparet dan welfare, zot aparet dan one offs, zot aparet dan supplementation allowance.  Zot aparet en pe partou zot.  Akoz i annan bann dimoun ki’n master sa sistenm.  Ok?  Nou, nou dir sa i pa devret kontinyen.

Nou pa krwar – mwan personnelman mon pa krwar poudir ou bezwen donn en dimoun en pti lapey, en pti lapey byen fay apre donn li supplementation allowance.   Sa se bann keksoz ki nou devret arete fer.

Nou devret pey en dimoun en lapey normal, kot i pa bezwen supplementation.  Ou a krwar konmsi nou pez en dimoun en kote, apre nou larg li lot kote, apre dimoun deor i kriye, i dir la, la nou pe donn larzan welfare, nou pe sa …

Personn, napa en Seselwa ki mwan mon konnen, ki pa anvi ki son frer oubyen ser i ganny en bon lapey.  Problenm ki dimoun ki deor, ler zot vwar nou pe demann, ler zot vwar Gouvernman pe demann plis larzan pou welfare.

E ler zot vwar nou, ki sa i ariv devan nou, zot dir avek nou koupe, koupe! Pa donnen, i annan ase larzan ki pe la dan welfare.  Mwan personnelman mon mazinen poudir i annan ase larzan ki pe al dan welfare.

Si nou koup labi, si nou koup mismanagement, nou pou vwar i annan ase larzan ki ale dan welfare.  Me selman i pa pe ganny manage dan fason ki i devret ganny fer.  Mr Speaker mon a met sa legzanp devan ou.

3661 carer, 15, 8 mon krwar.  Oubyen 15 supervisorCome on, come on.  Ler nou pran larzan piblik nou met li dan en progranm e nou dir nou dakor avek sa progranm, be nou bezwen annan bann zouti pou nou fer sir poudir sa progranm pe marse dapre i devret, dapre son lobzektif!  Nou pa kapab zis donnen, apre nou pa fer okenn kontrol.

Se pou sa ki an 2008 nou pei ti retrouv li dan sa sityasyon mannyer i ti ladan.  Akoz zisteman ti napa kontrol.  Ok.?  E la ozordi mwan mon anvi dir avek sa Lasanble i mank kontrol.

E menm bann Lotorite i aksepte poudir i mank serten kontrol.  E taler mon a vin lo serten rekomandasyon e serten azisteman, serten aksyon,  ki nou, nou pe propoze ki Lazans Proteksyon Sosyal pe deza reflesir lo la.  E ki, e pou nou gete ki mannyer nou kapab met en pe lefikasite dan sa sistenm.

Mr Speaker bon pe dimoun parey mon’n dir, ki’n ekout nou pe koz lo sa demann Gouvernman pou en pe plis larzan dan welfare,  in dir avek nou pa donnen.

Mwan mon larepons pou zot se ki solisyon i pa osi senp ki sa, i pa osi senp ki ozordi pou demen ou koupe, ou bloke.  Sistenm i konplike.  Akoz ler ou koupe, ler ou bloke, i annan en dimoun ki pe travay byen li.  Oubyen i annan en dimoun ki merite son larzan dezabilite, oubyen son larzan envalidite.  I merite.  Ler ou koupe, sa enn ki merite i ganny trete dan menm sak ki sa enn ki pa merite, sa enn ki pe abize.  Akoz en dimoun i fer en keksoz mal, tou dimoun i ganny pini.

Sa se en keksoz ki nou, nou pa anvi.  Nou pa anvi.  E solisyon se ki Minister Finans in vin devan nou e in vin dir nou ki i pa pou kapab termin lannen avek sa Bidze ki zot in gannyen.

Onorab Afif in eksplike, zot in donn nou tou bann sif, e zot in donn nou bann leksplikasyon akoz zot pa pou kapab termin lannen.  Be i annan en keksoz ki kekfwa Onorab Afif pa’n dir zot, ki bann Minis avek bann teknisyen in dir nou.  E Minis in konfirmen, se ki bann, sa bann Departman, sa bann Lazans an realite Lazans pou Proteksyon Sosyal.  anba sa bann progranm zot ti demann plis larzan zot.  Zot ti demande plis larzan.

Me Minister Finans ti dir non, non, nou pa pou donn zot sa, nou pou koupe.  E finalman i pa ti en Bidze ki realis.  I ti en Bidze ou a krwar, mon pa anvi impute okenn motif ki pa byen,  ou a krwar konmsi zot in met en pe ba.

Konmsi pou ler i vin devan Lasanble, konmsi bann Lasanble i ava dir be ok, be donn zot sa i pa tro bokou.  An tout konesans ki ler pou ariv Oktob, Novanm sa larzan pou fini li.  Apre nou pou bezwen retourn kot Lasanble ankor.

Be sa en kalite budgeting, en kalite financial management, Budget management ki nou, nou pa dakor avek.

Nou anvi bann sif ki realis.  Se pou sa ki Onorab Afif in dir, ler zot in demann nou tan, nou, nou’n fer nou travay, e nou’n assess, e nou’n vwar ki bann prozeksyon, ki nou ekspekte zot pou bezwen ziska lafen lannen.  Onorab Afif in fer sa travay vreman tre an detay.

E mon ti a kontan remersye li.  Donk i annan en problenm budgeting.  Prezan ki nou fer, ki nou pe ganny demande pou donn sa bann sonm la ki devan nou.

Onorab Afif in dir, i annan en landrwa kot omwen R2 milyon, mon krwar R2.8milyon kot sa nou’n tire, nou’n met, nou’n.  An realite donn, rann Cesar, oubyen donn Cesar son la kot i annan rezon –  an realite sete SS Payet ki ti dir ok.  Sa sonm la nou riske pe demann tro bokou.

Pran sa sonm met anba sipervizyon direk, Minister Finans.  E pa donn Lazans Proteksyon Sosyal.  Akoz si zot pa bezwen i pou reste dan Kof Leta, ok?  Sa i enn bann premye keksoz ki’n ganny fer.

Prezan nou, Mr Speaker nou’n demande, apre ki nou’n dir tou sa ki mon’n repete la, be ki nou pou fer pou lavenir?  Eski nou pou vin ankor dan 6 mwan, oubyen dan 1an, oubyen dan 2an, anfen dan 1an mon krwar Gouvernman probableman pou’n sanze.

Me eski nou pou vin ankor, pou nou dir nou bezwen plis?  Nou, nou dir sa ki sa pei i bezwen, sa ki sistenm welfare i bezwen se plis lefikasite dan son management.  E lefikasite ou pa ganny li lizour ou lannmen.

Parey mon’n dir pli boner, ou pa kapab koupe la, akoz si ou koupe la, an Desanm i annan dimoun ki pa pou ganny zot 13enm mwan saler.  I annan carer ki pa pou ganny peye.  E sa nou pa pou fer.

Me selman, me selman nou’n demann avek Minister Finans, avek Lazans Proteksyon Sosyal, atraver
Minister Finans, serten mezir ki enportan.

Premyerman nou’n demande ki zot kominik avek nou dan en fason regilye e dan en fason monthly.

Pou nou gete ki mannyer sityasyon pe evolye.  Nou’n dir avek zot nou anvi vwar en improvement e plis lefikasite, e ki depans i aret al an deor kontrol.  E sa se atraver en rankont regilye ant FPAC e avek Minister Finans ek Lazans Proteksyon Sosyal.

Dezyenmman, spesifikman lo progranm Carer, Minister, Lazans Proteksyon Sosyal pou lannen prosenn pou demande dan Bidze lannen prosen, fon pou kapab pey en, bokou plis supervisors.

Zot in nonm 80 supervisors.  Nou, nou mazinen poudir i sorti 15 pou al 80, kekfwa i tro bokou.  Me selman nou pe, nou anvi kontinyen angaz avek ASP pou fer sir ki sa sistenm supervisor i retournen.  Mon pa konnen akoz in ganny tire mwan.  Me i bezwen retournen.  E i bezwen annan sistenm an plas pou verifye ki travay pe ganny fer.

Lo sistenm dezabilite e lo sistenm en validite.  Nou anvi vwar ki napa lenterferans par politisyen dan sa sistenm.

Nou’n ganny lasirans ki sa i en sistenm ki baze lo bann assessment medikal.  Mr Marcus Simeon ki CEO Lazans Proteksyon Sosyal in fer byen kler avek nou ki li i pa deside lekel ki pou gannyen, lekel ki pa pou gannyen.

Se pa son rol li.  Li i en Lazans ki peye baze lo rekomandasyon sorti dan bann lezot sekter.  Pou sa 2 pli spesifikman, dezabilite ek envalidite i en desizyon medikal.  E i bezwen reste en desizyon medikal.

E mwan mon ti a kontan, e nou pe reflesir lo en sistenm ki pou fer sir ki nou konnen ler i annan lenterferans, ler en ners in ale, in fer en assessment baze lo Barthel Index.

Ler i retournen Minis oubyen PS, oubyen lot, lot, lot pa vini pou dir ale al reget ankor, reget en kou sa, gete ki mannyer nou kapab fer en dil.  Akoz mon’n pas dan distrik, mon’n vwar tel dimoun pa pe travay.  Sey gete konmsi si nou pa kapab met li en carer en landrwa.

Sa bann keksoz fodre nou arete.  E malerezman nou pa kapab aret deswit.  Me selman nou pe donn nou lekor en serten letan lannen prosenn, pou fer sir ki nou met en pe lord, ki nou vwar en pe lord dan sa sistenm.

E mon ti a kontan Onorab Gill i raport avek ou pou dir Lazans Proteksyon Sosyal pe kont lo nou dan Lasanble, pou nou ed zot.  Zot pe kont lo nou pou nou ede met sa bann sistenm kontrol an plas.

E enn ban keksoz ki mwan mon ti a kontan dir, Mr Speaker, se ki nou koman en parti, mazorite dan sa Lasanble, mon repete mon’n dir taler.  Nou santi poudir sa sonm ki’n ganny depanse, ki pe ganny depanse lo welfare sa lannen i pa devret ogmant epou lannen prosenn.

Nou bezwen retrouv lefikasite dan sa sonm ki nou annan.  Akoz sa sonm i deza en sonm enorm.  Onorab
Afif in donn nou bann figures.

E mon krwar poudir zot tou zot ava rekonnet poudir R40 milyon pou welfare assistance, R240milyon pou Home Carer Scheme.  R69milyon pou Disability Benefit.  Se bann gro sonm e se pa bann sonm ki nou devret pe konstaman sey gete ki mannyer parey nou’n dir avek PUC bomaten.

Ou pa kapab fer monte tarif toultan.  Rod en pe lefikasite.  Al dan ou sistenm gete.  E nou, nou’n demann avek Mr Simeon pou montre avek nou ki mannyer ler ou al dan sa sistenm ou pou vwar bann keksoz ki an deor kontrol, ki ou kapab met lanmen lo la, e fer sir ki, plito ki en sel dimoun ou vwar li dan home carer, ou vwar li dan welfare, ou vwar li envalidite, ou vwar li dan supplementary.   I annan bann fanmir Mr Speaker, ki’n vin expert parey mon’n dir, ladan!  Zot konn tou sa zwe, tou sa keksoz.  Mwan i annan dimoun in deza dir mwan, e mon repete, mon’n deza dir sa Lasanble, ‘’tan ki Mr Rene i vivan mon pa pou travay dan sa pei!’’ E finalman vre in mor dan en fotey avek en pti boutey Pti Ponm.  In mor dan sa fotey an sizan, an sizan i mor.  Ok?  E i pa’n travay.  I annan sa bann sistenm an plas.

E nou, koman bann lezislater ki mannyer nou kapab regard piblik, bann manm piblik dan zot lizye e dir avek zot poudir nou pa vwar okenn problenm avek sa?  La ler mon dir sa, i annan en Manm laba i kriye, konmsi pa – respe dimoun.

Be ki mannyer, ki mannyer ler en keksoz i mal ou kapab respe?  Ler en keksoz i mal, ou pa respe, ou sanze, ou fer li vin byen.  Ou konpran? Se sa mantalite la ki nou bezwen sanze.  E nou, e nou Mr Speaker nou’n met li koman nou target pou nou sanze sa keksoz.  Pou nou sanze.

Se pou s nou pe dir.  E refleksyon ki nou’n fer, ki nou pa ankor partaz avek Minister Finans, ki nou pa ankor partaze, se ki nou anvi o komansman sa lannen ki pou vini, dan sa Bidze.  Ki nou pou al diskite semenn prosenn, nou pe al rod lefikasite dan sistenm welfare.

Pa akoz nou anvi pini personn nou! O kontrer akoz nou anvi ki tou dimoun ki’n merite i gannyen.   E nou anvi ki demen tou dimoun i kapab gannyen en lasistans ler i bezwen.   Mannyer nou pe ale la, mon bann zanmi, mon bann koleg lot kote latab.

Mannyer nou pe ale la, dan detrwa lannen ni en sistenm welfare nou pou napa.  Ni en bout welfare nou napa, akoz i pou al an deor kontrol.  E i pe deza al an deor kontrol.  E nou bezwen met lanmen lo la.  Ok.

Akoz nou’n erit en sistenm ki baze Mr Speaker, ki baze lo en sistenm politik, lekel ki ou konnen, lekel ki ou pa konnen, kot ou annan kontak, ou fer ou kontak e keksoz i marse.  Se sa nou problenm kot nou’n ariv la ozordi. Ok?

Nou pa’n anvi met an plas en sistenm kot tou dimoun in ganny trete dapre en lareg, si i dir avek Onorab Afif sot tel oter pou ou ariv laba, la kot nou met bar.  Selman pou Onorab Ferrari nou met li en pe pli o.  Pou Onorab Gill nou met li en pe pli ba.  Non, non, non, non.  Se sa bann keksoz ki nou bezwen rod en fason.  E nou, nou pou envit zot pou vin avek nou pou anbarke lo sa misyon.  Pou sanze sa bann labi.  Pou fer sir ki nou sov nou sistenm, nou sov nou sistenm proteksyon sosyal.  Ok?

Ki avan zot dir taler, mon ti a kontan dir zot ki depi, depi ‘74 i egziste en.  Taler, akoz taler zot pou konmans kriye pou dir zot ki’n met an plas sa.  Depi ‘74 in konmanse sa, ok?

E nou bezwen sov li, akoz si nou les li al an deor kontrol, nou pou perdi li.  Se sa travay ki devan nou ozordi Mr Speaker.

Alors mon ti a kontan dir avek piblik ki enn nou latas pli enportan ki nou annan dan sa bann mwan ki pe vini.  Met lanmen pou nou kapab met sa sistenm anba kontrol.  Met lazistis ladan.  Met lefikasite e fer sir ki tou dimoun ki merite i gannyen.  E bann ki pa merite, mon a pran en legzanp Mr Speaker.  Dir mwan si mon mal.

Nou fer sistenm URS,  ok? Unemployment Relief Scheme.  Unemployment Relief Scheme i depans 12milyon, nou, ki nou ekspekte.  Ou vwar dimoun ki pe rod, ki unemployed i bese.  Sa i lozik, mon pa vwar, mon pan al Liniversite Harvard oubyen dan en lot gran Liniversite.

Nou fer URS, dimoun ki pa pe travay i bezwen, dimoun ki pa pe travay i bezwen ogmante;- savedir nou annan en problenm avek sa Scheme!  Nou annan en problenm e nou bezwen rod en fason pou nou met nou lanmen lo la.

E enn bann keksoz Mr Speaker ki nou ti ganny dir se ki par egzanp sa Scheme, sekter prive pa antre, napa en, napa.  Mon pa a dir napa enn –  be napa preske okenn dimoun lo URS ki ganny anploye par sekter prive.

Sekter prive pa ladan, be nou annan en problenm.  Tou dimoun ki nou annan dan sa URS pe asize devan en biro brans, nou donn li en pti louvraz, zis grat grate la, pas pase la, fer, fer sa, anmas 2 fey la, fer lot la, la, tap sa, sa.  Be kisisa?

Nou bezwen tir dimoun! Nou bezwen tir dimoun e met li anler.  Nou pa kapab kit en dimoun anba.  Nou pa kapab anploy dimoun pou grat grate.  Nou bezwen, nou bezwen fer en fason ki sa dimoun i sorti dan lapovrete e i annan en lavenir, ok?  Se sa kot keksoz pe sanze dan sa pei.

 

MR SPEAKER

Onorab.

 

HON JEAN-FRANCOIS FERRARI

E se sa ki nou’n –

 

MR SPEAKER

Wrap-up.

 

HON JEAN-FRANCOIS FERRARI

… e se sa ki nou pe demann zot pou zot akonpanny sa mouvman.  Mr Speaker on ava terminen an dizan, repetan en keksoz.  Sa lenformasyon ki nou’n gannyen Mr Speaker, i annan 3an nou pe rode sa.  I annan 3an nou pe lager pou nou gannyen.

Mon pa konnen ki lazar ki’n tonm dan en potis, ki mannyer.  Mon konnen poudir i annan Manm lot kote laba in byen ankoler akoz nou’n ganny sa lenformasyon.  En ta keksoz nou’n vwar.

E lenformasyon, wi parey en dimoun in dir, i annan lenformasyon enportan, ki pandan 3an zot in kasyet avek nou.  Be la nou’n konmans vwar, e nou pe travay lo sa bann keksoz.  E mwan parey mon’n dir zot, mwan mon’n kominike deza avek CEO, pou dir avek li i annan sa enn la, sa enn la.  E plizyer bann Manm, e mon remersye bann ki ti vini kantmenm zot pa ti lo, zot pa lo FPAC, zot in vini, zot in partisipe, pou nou finalman met lanmen lo sa sityasyon welfare.

E mwan mon krwar ki atraver sa lenformasyon ki nou’n gannyen, nou pou kapab, nou annan lide prezan kote bann labi i ete.   E nou ava fer nou travay.   E mon ekspekte ki tre byento i annan dimoun ki pou vwar rezilta.

Antretan Mr Speaker san mank respe pou personn.  Ler mon’n vwar sa sityasyon, mon’n demann mon lekor eski sa pei i annan en Kaptenn?  Eski sa pei i annan en Dirizan konmsi ki pe tyonbo labarb, ki pe tyonbo volan sa pei.

Mon pa vwar.  Vreman mon pa vwar.  Se pou sa ki napA a lot keksoz ler mon’n war sa sityasyon i telman alarman.  Mon napa lot keksoz ki pou mon dir Mr Faure.  Kekfwa nou’n trenn lipye en pe tro lontan.  La in ler pou nou fer sa eleksyon la.

Fer li en pe vitman nou a met, en dimoun, omwen en dimoun i a tyonbo labar, i a tyonbo sa volan.  Nou pa kapab annan en bato ki pe ale, napa personn lo labar.  Nou pa kapab annan en avyon ki pe anvole, napa en pilot ki pe asize dan seZ.

Nou bezwen, nou bezwen pran en desizyon.  E nou bezwen pran li vitman, met sa labar dan nou lanmen zot a vwar ki mannyer nou kapab fer, sov nou sistenm proteksyon sosyal e fer li vin enn ki lemonn antye vreman pou fyer.

E en sistenm ki pou last pou plizyer zenerasyon.  Akoz se sa nou bi, se pa pou ozordi, ni pou demen, me pou nou fer en sistenm ki pou nou pti zanfan e pou nou ayer pti zanfan kapab benefisye.  Mersi Mr Speaker.

 

(APPLAUSE)

 

MR SPEAKER

Mersi Onorab Ferrari.  Onorab Sebastien Pillay.

 

HON SEBASTIEN PILLAY

Mersi Mr Speaker.  Bonn apre midi, bonzour Mr Speaker, i pa ankor apre midi.  E bonzour tou koleg Onorab e bonzour tou dimoun ki a lekout.  Mr Speaker mon’n ekout atantivman Onorab ki’n koz avan mwan, san lenteripsyon, san enterzeksyon.

So fotespere mon ganny extended menm kourtwazi ler mwan mon pe koz lo sa size ki devan nou ozordi.  Mr Speaker mon krwar i enportan ki nou, nou met serten keksoz byen an perspektiv.  E nou pa, nou pa sey vin fer politik popiler lo en size ki pa ti neseser.

Akoz mwan mon en Manm FPAC, mon ti asiz dan sa miting, mon’n partisip dan sa miting avek en lespri ouver.  Mon’n demann bann kestyon avek en lespri ouver.  E nou’n tonm dakor lo sa rapor ki’n ganny prodwir koman en Komite.

Akoz sa ti reprezant diskisyon dan lespri ki sa diskisyon ti arive.  Avek en Minister Finans, avek Gouvernman ki’n pare pou donn tou lenformasyon ki zot ti pe ganny demande pou demande.  E mon krwar i pa korek poudir ki a okenn moman Gouvernman in sey kasyet sa lenformasyon.

Akoz si nou regard byen bann demann ki Lasanble in fer, Lasanble pa’n zanmen demann Gouvernman pou donn zot sa bann detay swivan.  Akoz sa size pertinan an se ki konsern lekel ki pe ganny en carer?  Lekel sa bann home carer?   Pa’n vin devan Lasanble pou nou diskit lo la.

E de plis i annan, i annan en lobligasyon anba sa Lazans akoz i pa ganny menm proteksyon ki nou Manm Lasanble nou gannyen, pou sa dimoun donn sa lenformasyon a en Komite Lasanble.  Ki li sa Komite i annan sa manda konstitisyonnel pou resevwar sa lenformasyon.

Se pou sa rezon ki zot pa’n, sa bann dimoun pa’n pas sa lenformasyon dan Lasanble.  Me zot in pare pou donn sa lenformasyon dan en Komite.  E sa Minis ti fer kler.

Minis ti fer kler poudir se sa rezon ki zot in vin devan, zot in donn tou lenformasyon.  E nou’n ganny lalis Mr Speaker tou bann dimoun ki pe benefisye.  E ler mon pe regard sa lalis Mr Speaker, mon pa’n vwar aktivis, parti SPUP, SPPF, Parti Lepep, parti US lo la mwan!

Mon’n vwar plizyer dimoun ki mwan mon pa ni konn zot afilyasyon politik.  Ki pe ganny carer, i annan dimoun ki mon osi mon kestyonnen, ki mannyer i kapab pe carer pou en lot dimoun, kan i pa reste kot sa dimoun.

Mon osi mon kestyonnen.  I pa mwan ki’n call pou dir donn sa dimoun en carer.  E i sertennman pa okenn mon koleg lo sa kote latab ki’n call pou fer sa dimoun vin en carer.

So i enportan ki nou met keksoz a perspektiv e nou eksplike kwa ki’n pase, kalite lenformasyon ki nou annan devan nou.  Premyerman lo sa size carer.  Lekel ki deside pou en dimoun ganny en carer?  Nou bezwen fer distenksyon Mr Speaker ant carer, dezabilite ek envalidite e welfare.

Premyerman, an se ki konsern carer Mr Speaker, sa carer, sa dimoun ki oule sa carer i al kot son klinik, son Sant Lasante, ners i vizit li i fer bann prosedir.  E sa bann prosedir i ganny fer par en profesyonnel Lasante, dan sa ka sa ners ki fer sa bann prosedir.

An se ki konsern dezabilite, sa dimoun i al devan en Medical Board e sa bann dokter i sertifye konmkwa sa dimoun i annan en dezabilite, ki pa permet li travay.  I annan dimoun ki zot dezabilite i tanporer akoz zot in ganny en aksidan, zot in deranz zot lanmen.

Ouswa i annan dimoun ki zot dezabilite i kapab pli grav.  Par egzanp dan bann ka, bann dimoun ki annan bann maladi kronik parey kanser e ki pe swiv chemotherapy,  ki pa kapab al dan en lanplwa formel pou en serten kantite letan.  And then nou vin lo welfare.

Be i enportan pou nou dir Lasanble ki welfare son Bidze in desann.  E pe kontinyen desann.   Annefe welfare i laliny an se ki konsern Lazans Proteksyon Sosyal ki pe kontinyen desann.  Akoz zefor e travay ki Lazans Proteksyon Sosyal pe sey fer, pou anpese ki dimoun zisteman i fer labi.

E enn bann mezir ki zot in met an plas, ki i annan en kantite dimoun pa pe kontan –  e mon konnen si nou pou koz fran, i annan menm MNA ki’n call sa Lazans pou konplent lo sa bann size, akoz sa bann dimoun pa pe ganny larzan direkteman.

Me zot pe ganny en bout larzan, e zot pe ganny en voucher pou zot al rod konmisyon.  So i annan plizyer mezir ki Lazans Proteksyon Sosyal in fer.

Me sa ki mon dezapwente avek Mr Speaker, se ki nou pa kapab swazir sa size pou nou fer politik lo la.  Akoz sa ki mon kontan pou enn fwa, mon’n tann lopozisyon admet se ki sa size i bokou pli konpleks ki zot ti krwar.

Zot, zot ti panse ki nou, nou reve aswar e toulezour nou deside nou zwenn en boug dan semen, e nou dir li ale al rod welfare, ou pou ganny welfare.  Me bann travayer ki dan Lazans Proteksyon Sosyal i konn tre byen poudir sa i pa le ka.

E zot in vwar atraver lenformasyon ki zot annan, i menm annan dimoun ki zot, zot konnen pe ganny welfare.  So i enportan Mr Speaker ki nou, ki nou prezant bann fe e la realite parey i ete, parey in ganny prezante devan nou.

Sa ki nou’n vwar Mr Speaker an se ki konsern sa Scheme Home Carer,  ler i ti ganny entrodwi, sa Scheme Home Carer Mr
Speaker.  I ti ganny entrodwi konman en Scheme enformel.

I ti ganny entrodwi konman en mwayen pou donn loportinite en dimoun pou care pou e dimoun pli aze, ki pa kapab fer serten bezwen.  E se la kot sa fanmir, kot sa dimoun in ganny sa carer i antre.

Sa fanmir kot sa dimoun i ganny sa carer, i ti vin koman, i ti sipoze vin koman sa premye layer pou monitor si sa carer pe vin travay oubyen non.  Sa i vin premye layer.

E dan la mazorite ka se dan sa bann fanmir zot menm ki swazir lekel ki sipoze vin zot carer.  So nou vwar poudir i annan en konpleksite e ki egziste.  Akoz ou pou vwar dan plizyer ka kot en dimoun i dir ou, mon pa oule en lot dimoun etranze vin travay kot mwan,  mon oule en manm mon fanmir i vin travay kot mwan.  I annan tou sa bann problenm ki Lazans Proteksyon Sosyal in met devan nou.  E zot in fer nou konpran.  E rezon akoz nou lakantite carer pou kontinyen ogmante, se senpleman akoz sesel nou annan en ageing population. 

Nou popilasyon pe vyeyi a en rate, ki prezan nou, nou bezwen fer sir poudir nou annan bann Scheme pou nou take care of sa aging population.  I pou enportan pou nou.

Me sa ki nou bezwen fer, mon krwar sel keksoz ki byen dan sa ki’n ganny dir, sa ki nou bezwen fer, i bezwen annan en monitoring.  E se pou sa rezon ki Gouvernman in dir, ki Lazans Proteksyon Sosyal i dir i bezwen annan en sistenm sipervizyon pou carer, pou li asire poudir si i pe donn en carer, i pe donn en travay an retour.

I pe fer en travay an retour, i annan en keksoz ki pe arive.  Be ki nou’n fer an plis ki sa Mr Speaker.  E se pou sa rezon ki nou bezwen konpran konpleksite run en Gouvernman i pa zis nou oule ganny Gouvernman apre nou al dan Gouvernman.

Carer in pran sa koman en lanplwa formel li.  Ler i al rod en loan, Labank i dir li, be ou pa ti dan en lanplwa formel, ou pa pou gannyen loan.  Ou pou la kot HFC, i pa ti pe gannyen loanSo Gouvernman i bezwen re balans sa ankor.

Fer li vin formel, fer li ganny en pay slip pou ki i kapab anmenn kot en Labank pou li kapab ganny en loan.  Tousala, non, non, tousala i bann keksoz ki bezwen ganny fer.  Me i enportan pou note ki mannyer koman lopozisyon zot pa realize poudir run en Gouvernman i pa zis ou vini, ou krwar poudir ou pez en bouton en zour en keksoz i ganny fer demen.

I annan en kantite konpleksite.  E souvandfwa mon tann zot dir, sa konmsi i sitan fasil, i sitan sa.  I enportan ki nou met keksoz byen an perspektiv.  E nou aksepte poudir la realite se ki an deor la, nou annan dimoun.

E i byen, sa mon dakor i annan dimoun ki li wi, i pou rod tou fason pou li bat sa sistenm.  E i annan ki fer li, i rod tou fason pou li bat sa sistenm, i pa politisyen ki fer li bat sa sistenm.  Li ki al li menm kot biro distrik pou li fer, kot Ladministrasyon Distrik, fer son laplikasyon.

Li menm ki ale, ki ranpli son bann lenformasyon.  Pa personn ki vini ki donn lenformasyon lo son bi.  Akoz si son lenformasyon pa’n antre dan sa sistenm, i pa sipoze pe ganny peye.  Se pou sa rezon ki nou sa ki nou’n vwar, se ki sa lenformasyon in montre nou en keksoz kler.

In montre nou poudir si nou pou kontinyen avek sa bann Scheme, nou bezwen annan en monitoring pli aprofondi, pli for lo la.  Dezyenmman si nou pou kontinyen avek en Scheme welfare i pou bezwen supplementation of income ki al ver en dimoun ki bezwen en supplementation of income.

E se sa ki nou’n toultan pe rode.  E si nou regard byen Bidze welfare li menm.  E welfare fodre nou konpran.  I annan en diferans ant welfare ek dezabilite.  Dezabilite en dimoun i ganny li anba Lalwa akoz li i pa kapab travay.

Swa pou en moman tanporer, swa pou en moman pli long.  Be ki nou’n fer ankor ek dezabilite ki enportan pou nou fer kler, nou’n match li avek minimum wage.  Se pou sa rezon ki in monte.  Akoz sa dimoun ki ti pe travay sa letan.  I kapab, par egzanp en dimoun suddenly i dekouver poudir i annan en maladi kronik.  I pe travay dan en lanplwa byen normal.  I pa pe travay anymore.  Ler i pou al lo en supplementation of income, ou pa kapab anvoy li lo R2500.

Swa en dimoun ki’n ganny kanser, swa en dimoun ki’n ganny en lot maladi, ki en debilitating illness ki anpes li travay.  Se pou sa rezon ki nou bezwen et realis e eksplik byen sa bann keksoz.  E mon krwar sa rapor ki’n ganny prezante ek FPAC.

Sa rapor ti fer zistis sa diskisyon.  Me nou tou nou konnen poudir nou tou nou en politisyen.  Onorab Ferrari i en politisyen, in fer son politik avek.  E mon pa blanm li pou fer son politik avek.

I normal.  Nou dan sa forum kot nou vin fer politik avek.  Se sa.  Me lesansyel i reste, se ki la i zot loportinite la pou zot vot an faver pou ki bann carer i a ganny zot 13enm  mwan lafen lannen.

La i zot loportinite la, loportinite pou zot pa abstain, ouswa pou vot an faver pou ki nou kapab al dan en direksyon kot nou pe siport en keksoz ansanm avek bann menm konsern ki politisyen nou annan.

E mon osi mon konsernen Mr Speaker avek sa.  Mon konsernen.  Mon konsernen akoz si sa pti group nou ki ankor pe travay, nou ki pou bezwen toultan pe pey pou sa bann ki pa oule travay, then were are we headed?  Be sa i pa en refleksyon lo Mr Faure koman Prezidan pei.

Annefe, annefe si i annan en keksoz ki mon kapab dir dan tou sa, dan klima politik aktyel.  Ki sa msye in Prezidan pei in nobou gouvern sa pei.  Be pou mwan mon dir li chapeau

 

 

(APPLAUSE)

 

HON SEBASTIEN PILLAY

chapeau pou dan sa difikilte politik ki’n pas ladan pou li kapab kontinyen gouvern sa pei.

Akoz i kler poudir i pran en dimoun avek en termite, avek karakter for pou kapab tenir tou sa latak, tou sa bann keksoz.  Be ou konnen, diferans ant mwan ek zot, mwan mon pa get zot bann kritik konman latak mwan!

Mwan mon get zot bann kritik koman bann keksoz ki neseser dan en demokrasi.  I enportan ki en lopozisyon i kritik en Gouvernman.  I enportan, i neseser, ou bezwen kritik en Gouvernman.

Be ou bezwen osi aksepte ler Gouvernman in fer en keksoz ki byen!

 

(APPLAUSE)

 

HON SEBASTIEN PILLAY

I pa kapab tou keksoz i mal dan sa pei, ou konpran?

 

(Interruption)

 

MR SPEAKER

Order!  Order!  Order!  Onorab Pillay kontinyen.

 

HON SEBASTIEN PILLAY

Mersi, mersi Mr Speaker.  Mr Speaker parey mon ti dir ler mon ti konmans mon lentervansyon, mon’n akord bann dimoun ki’n koze depi bomaten, mon’n akord zot gran respe, san lenterzeksyon.  E mon ti ava apresye ganny menm respe.

Akoz mon krwar respe i en keksoz ki ou earn dan lavi, si ou donn respe ou ekspekte ganny respe an retour.   E mon remersi ou Mr Speaker pou sa.  En keksoz enportan ki mon oule soulinyen ankor Mr Speaker.  Se ki ler nou regard sa URS Scheme, i kler poudir pa tou akter dan lekonomi ki pe partisipe.  E la mon dakor avek pwen souleve par Onorab Ferrari.  Ou konpran mwan?  Mon pa pare pou discredit tou keksoz ki in dir mwan.  Akoz i reprezant lot kote latab.

Me li, li kontrerman a sa i discredit tou keksoz ki nou, nou dir.  Ou konpran?  Se sa problenm ki nou annan.  Nou bezwen move from en politik, en politik antagonistik, pou en politik ki anmenn nou ansanm pou nou kapab travay pou pei.

Akoz se sa ki fer ki sa boug ki bwar Pti Ponm anler Corgate, ki pa oule travay ki slip dan milye sistenm.  Ou konnen akoz?  Akoz nou tro bizi pe lager ek kanmarad, be nou pa vwar li kot pe pase.

So sanmenm sa rezon ki nou bezwen regard keksoz byen.  E sa zafer URS i enn bann landrwa kot nou bezwen tackle.  Akoz i bezwen annan en buy-in pli sibstansyel sekter prive ladan.  I enportan pou eksplike Mr Speaker.

Ozordi Lazans Proteksyon Sosyal i zis peye pou URS.   I pa dimoun ki anploy dimoun pou URS.  Sa i ganny fer atraver Departman Lanplwa.  Mon krwar Lasanble in annan dimoun ki zot in pran lo, si mon pa tronpe lo URS Scheme. 

Mon a, you can correct me if I am wrong.  So mon krwar sa ti en zefor.  Akoz Lasanble pe montre poudir ou kapab anmenn en zenn pou travay.  Ou bezwen donn li en loportinite pou li rekomans partisipe aktivman dan lekonomi, dan aktivite ekonomik.  Pa zis pou pei me pou son lekor.  Ou konpran?   Me sa ki kler, e sa ki nou’n ganny dir par Minister Finans, se ki i napa sa kantite buy-in.  Me sa ki fer en problenm pou Lazans Proteksyon Sosyal se lafason ki sa bann lenformasyon pe ganny garde lo nivo  Departman Lanplwa;-  ki sa i bezwen ganny fer, ki i annan en sinerzi, en armonizasyon sa lenformasyon.  Ki li Lazans Proteksyon Sosyal i konnen a tou moman, konbyen dimoun ki pe antre lo URS pe sorti.  E sa ki’n arive, e mon krwar i byen in annan bokou dimoun ki’n al lo URS.

Ki’n sorti lo URS from casual in al lo full time, sa i byen.  Sa i bann keksoz ki nou bezwen kontinyen, kontinyen promote.

Me lefe i reste, ki si en dimoun pa oule travay, ziskan ki tan nou pou bezwen al ziskan kot en dimoun ki pa oule travay, pou anmenn ou dan travay?

Mr Speaker, dikton i dir ou, ou kapab pran bef anmenn li o bor larivyer.  Be si i pa oule bwar delo, ki ou pou fer?  Nou koz lo unemployment.  Nou unemployment i pa’n ogmante, i pa’n al pli o ki i ete.  Me in desann.

Me sa ki nou annan, nou annan nou osi en bon group zenn ki nou bezwen servi sistenm APDAR pou ed zot pou reste prodiktiv.  E annefe Mr Speaker ti pou pli worse.  Sa sityasyon ti pou pli worse si nou ti napa APDAR la.

Akoz si nou ti napa APDAR, sa bann zenn ti pou, pa ti pou lo methadone, ti pou an deor.  E petty theft, petty crimes ti pou ogmante pou zot kapab keep zot habit.  So i annan, sa ki Onorab Ferrari i dir i byen, se ki sa bann keksoz la i pa zis fasil, i complex.

E mon kontan ki in pas sa mesaz an deor pou fer kler, poudir i complex.  I pa straight forward.  I fasil pou nou tou koman politisyen dir ler nou pou vini nou pou fer sa, nou pou fer sa, nou fer sa, wi.  Be ki mannyer?

Se sa ki mon oule vwar.  Ki ou plan alternatif?   What is your alternative?  Nou, nou’n ariv a en moman Mr Speaker dan nou sosyete, tan byen ki mal, nou’n toultan en nasyon ki caring nou Seselwa.

Nou pa’n zanmen en nasyon ki ler nou vwazen i ganny en problenm, frenm nou lizye pa get nou vwazen.  Napa enn ant nou la anndan, nou kapab oponan politik, ki pou sorti la ki pou vwar enn antre nou son larou in mou, nou’n fer en aksidan ki pa pou arete pou get son koleg.

Sa i nou natir Seselwa.  E nou’n build sa dan nou Gouvernman.  Nou’n try pou nou anmenn sa dan Gouvernman.   Be i annan en lot keksoz ki nou pa’n fer, nou pa’n kontinyen sa ledikasyon probableman pou fer nou bann zenerasyon ki pe vini konpran,  poudir sa i pa zis en fe akonpli sa.  I en fason viv ki nou’n anmennen dan en pei.  Kot nou viv an larmoni, nou viv an lape, nou tou nou sey care pou kanmarad.  Nou pa sey bwar ek kanmarad, nou pa sey tiray kanmarad.

E, be mon krwar a en moman donnen, i annan dimoun petet in santi poudir sa i en drwa aki.  I pou leve bomaten i pa pou al travay, Leta pou pran ka ek li.  I pou fer 4 zanfan, Leta ki pou pran ka ek son zanfan.

I pa pou rod en lakaz, Leta ki pou donn li en lakaz.  I pa pou la lekol, Leta ki pou donn li en lanplwa.  Ou konpran?   Be sa i pa akoz okenn sistenm politik.  I akoz defayans modern ki tou pei pe rankontre.  E nou pa le sel pei ki pe fer fas ek sa bann diskisyon.

Me parfwa mon krwar ki nou le sel pei ki serten nou, nou krwar poudir nou annan en solisyon pou sa bann problenm, zis koumsa.  I pa fasil.  Bomaten nou’n tann lo PUC, nou pou tann lo plizyer size ki nou bezwen dil avek dan nou pei.

E nou bezwen aksepte poudir Sesel i diferan.  Nou bezwen fer serten keksoz dan en fason ki match avek sa diferans ki nou annan.  Nou pa pou kapab emulate tou keksoz ki ganny fer partou.  Se pou sa rezon ki mon krwar konman Lasanble nou bezwen get sa ki devan nou la koman en legzersis ki ti neseser.

Akoz pa zis bann Manm lo lot kote latab ki ti annan kestyon.  Bann Manm isi osi ti annan kestyon, kantite kestyon.  Mon krwar nou’n fer sa legzersis koman en Lasanble.  Nou’n al dan sa Komite koman en Lasanble.

Nou’n agree lo rapor sa Komite koman en Lasanble.  Akoz?  Akoz koman en Lasanble nou oule vwar keksoz bouz dan en direksyon.  Sa i nou rol koman Lasanble.  Egzekitiv li i bezwen delivre.

I bezwen egzekite.  Kot nou santi i mal, nou ava dir li i mal.  Me kot i byen osi, nou bezwen dir li laba ou byen ou a kontinyen.  An terminan Mr Speaker.

Sa ki mwan mon apresye ek sa legzersis ki nou’n fer, nou’n ariv a en pwen kot nou kapab, kot nou’n kapab konpran, ganny leksplikasyon lo ki mannyer sa sistenm i marse.  Son Bidze pou retourn ankor.  Nou pou bezwen demann ankor sa bann kestyon lo sa bann Bidze.

Nou pou bezwen kontinyen demann kestyon lo tou Bidze ki vin devan Lasanble akoz i neseser pou nou ganny klarifikasyon e konpreansyon lo sa bann keksoz.  Dimoun i kapab dir be ou ti la, ou pa ti demande eksetera.

Mwan ou kapab dir mon sa ki ou anvi.  Ozordi mon la kot mon pe asize, mon viv dan sa letan kot mon pe viv.  E si dan sa letan kot mon pe viv, sa i bann keksoz ki mon pou bezwen fer,  mon pou fer li akoz i dan lentere mon pei, i dan lentere mon pep, e i dan lentere zenerasyon fitir ki pe vini.  E sanmenm sa Mr Speaker ki gid mwan dan sa Lasanble ler mon vin travay.  Mersi Mr Speaker.

 

 

(APPLAUSE)

 

MR SPEAKER

Mersi Onorab Pillay.  Bon mon’n pran enn lo sak kote, mon krwar nou’n fini egzos deba.  Mon ava donn laparol mover Mosyon i ava fer son remark konklizyon.  E apre nou ava pran en vot.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker mon pa konnen mwan si ti neseser  serten lapros ki serten politisyen Lopozisyon in pran lo sa  Mosyon me petet mon pa konnen mwan petet zot in tann  Pat Pillay yer swar e prezan zot in en pe per …

 

(laughter)

 

HON CHARLES DE COMMARMOND

… sa ki’n fer zot pran sa direksyon.

 

(laughter)

 

HON CHARLES DE COMMARMOND

Me Mr Speaker, sa travay ki devan nou  a Mosyon ki devan nou mon bezwen dir personn pa’n kasyet lenformasyon.  E sa kestyon I annan 3an  pe demann lenformasyon ki Onorab Ferrari in dir, pa korek! FPAC zanmen in demande sa bann lenformasyon.  La ki fek demande.  Lasanble zanmen in demande sa bann lenformasyon la ki in demande e ler in demande Gouvernman in vini in donnen.  Mon krwar Onorab Pillay mon krwar in eksplik rasyonnel deryer tou sa bann rezon ki bann lenformasyon ki  kapab ganny donnen e kwa ki pa  kapab ganny donnen  anba  serten sirkonstans ouswa  mezir Lalwa ki egziste.

E onorab Pillay in byen koze, e in fer byen konpran lo sa issue e mon krwar sa ki SBC I devret pick up pou kapab eksplike pou lepep Seselwa konpran lo sa Bidze Siplemanter ki devan nou e an menm tan lo sa issue ki konsern sa bann pwen ki Lasanble sirtou lo kote Lopozisyon zot ti pe rod leksplikasyon lo la.

E Mr Speaker mon oule osi met lo rikord ki dan diskisyon avek bann Lotorite, Minister Finans avek bann zofisye pou Lazans Welfare e Proteksyon Sosyal i kler  ki bann in sorti ki bann Lopozisyon  bann politisyen lo kote Lopozisyon I email bann zofisye Welfare pou pous zot ka

 

(Off-Mic)

En?

 

HON CHARLES DE COMMARMOND

E ki sa sak fwa zot le ki zot ka i ganny aprouve. Sa osi nou bezwen dir.  In ganny dir e i annan bann rikord.  So mou oule dir ki sa bann zafer konmsi poudir ler zot Manm Lopozisyon, ler zot Manm konmsi bann politisyen ki fer pous zot ka, konmsi ou a krwar konmsi zis lo nou kote.  I partou ler I annan  en ka e mon krwar I normal en Manm Lasanble.

 

 

Ganny mwan kler. I normal ki en Manm Lasanble si I vwar poudir I annan enn son dimoun ki byen merite e ki Lazan pa pe tyonbo, I bezwen pous son case – I bezwen fer sa kontak. E I normal  sa.  So pa fer krwar poudir konmsi I zis lo nou kote ki sa pe ganny fer.   E napa personn ki lalang Onorab Ferrari.   Si pou annan lalang ou ki lalang!  E ou’n abitye lalang!

 

(Interruption)

 

MR SPEAKER

Onorab Onorab, aret en kou!  Non!

 

(Interruption)

 

HON CHARLES DE COMMARMOND

Mr Speaker …

 

MR SPEAKER

Onorab De Commarmond en moman. Onorab Ferrari, Onorab De Commarmond pe fer son lentervansyon e annou pa enteronpe.

 

HON CHARLES DE COMMARMOND

Mersi Mr Speaker. Mr Speaker i kler – I kler ki bann pwen ki’n ganny fer sorti lo tou lede kote nou war,  kote i annan mankman e kote i bezwen annan plis kontrol kot i konsern bann Lazans Welfare e bann lasistans ki ganny donnen anba bann pwen spesifik ki swa pou carer ki swa pou bann dimoun avek dezabilite ensidswit.

Par egzanp nou’n remarke ki i annan serten dimoun depi ki dan biznes, i dan biznes pe fer byen e ki depi papa ek manman pe ganny lasistans welfare akoz i annan en zanfan ki annan serten dezabilite.  Nou’n vwar tou sa.

E an menm tan nou le dir klerman en lot keksoz ki evidan e ki kler e ki bezwen ganny adrese e sa lo tou lede kote latab ou tonm dakor lo la, sa relasyon ant lasistans welfare avek travay.  I pa kapab e sa nou tou nou bezwen met nou lipye ater i pa kapab i annan dimoun ki kapab travay ki i annan laz travay ki byen for zis akoz i deside pou pa travay parey zisteman lo Onorab Ferrari ou’n dir serten dimoun ki dir tan ki Prezidan Rene i la li i pa pou travay, sa bann mantalite koumsa nou pa kapab soutire!

E ozordi menm zafer ou annan dimoun ki dir tan ki Prezidan Faure i la oubyen tan ki Parti US i la li i pa pou vote.  E selman Welfare pe donn li lasistans.  Me la mon krwar i bann area ii bann mezir ki nou bezwen pran.  E la nou bezwen met plis presyon e Lotorite i bezwen kler.  i annan menm ki dir li zour LDS i vin o pouvwar i pa pou travay!   Non i annan dimoun partou i annan dimoun.

So mon pe dir mwan,  mon dir tou sa akoz nou senserman krwar ki sa mantalite i bezwen  arete.   E ki e ki dimoun i bezwen ganny lasistans kot i merite.  Akoz nou vwar i annan dimoun ki byen merite i pa pe gannyen sa lasistans ki neseser.

So nou demande atraver sa legzersis, nou’n demande nou’n met presyon lo welfare pou ki welfare i sakouy li, pou bann Lotorite i sakouy zot, i fer ki sa sistenm sa bann lasistans ki pe ganny donnen, i ganny fer dan en fason pli byen e pli efikas e pli zis.  E sa i neseser.   Nou  tou nou Lasanble  an antye i pou fer la swivi.  I pou follow sa ki pe arive e Minister Finans in ganny met okouran, in ganny met si oule dir anba serten presyon osi pou donn koudmen dan sa travay.   I pa en kestyon zis detrwa nou ki le fer sa.  Me i en kestyon tou bann dimoun ki i annan en konsyans kler, ki serye e ki vwar konman nou devret bouze konman en pei pou en fitir pli prospere i bezwen ganny fer dan en fason byen.

Sa issue lo kestyon bann prive pou donn en koudmen dan URS.  I kler, I et ki mannyer Praslin nou’n vwar ki i annan serten businessman Mr Rose par egzanp ler i ti vin koz ek nou la li i pe zwen e rol aktiv en rol enportan.  Me ki mannyer zis li?  Ek enn de lezot petet pa bokou?

Me pourtan biznes prive in fleri dan sa pei pandan sa letan sirtou ki nou’n o pouvwar.  En kantite devlopman.  Me nou bezwen donn en koudmen nou bezwen anvoy lanmen pou tyonbo sa bann ki pli bezwen nou.  E la mon krwar ci bezwen annan en fason ki sistenm  i bezwen an relasyon an partenarya avek biznes prive, vwar ki mannyer nou kapab improve lo sa ki annan e ki egziste dan pei, pou nou kapab zisteman ferm pli byen e avek sa i a fer ki a laliny nou bezwen koupe.  E nou a vwar en desann en rediksyon dan lakantite larzan ki ganny depanse dan Bidze dan sa bann area ki’n ganny mansyonnen.

E mon vwar la mon ki si oule dir an employment i a kontinyen desann.  Akoz i kler, ki i annan ase travay i annan ase travay dan pei pou tou dimoun ki anvi travay.  Si sa i koumsa ou pa kapab kontinyen ganny en ta dimoun ouswa en group zenn ki pa pe travay e zis welfare i  pe donn li i pe pey li. So nou bezwen re vwar e met en pe lord dan plis lord ankor plis kontrol dan tou sa.

Avek sa Mr Speaker mon krwar i  bokou in dir e sirtou lentervansyon Onorab Pillay ankor enn fwa mon dir ki ti tre,tre tris e non i kler son bann pwen avanse i ti bann pwen tre pertinan e ki ganny kapte byen par SBC pou kapab fer konpran sa ki nou pe lentansyon e sa ki nou pe sey fer isi.

Mr Speaker avek sa nou konnen ki pou dir i annan bann lenstans Gouvernman ki pe esper sa Bidze Siplemanter aprouve, pou zot kapab kontinyen avek zot bann travay ;- Biro    Anti-Koripsyon nou annan Truth and Reconciliation tousala e bann landrwa i annan kot Ombudsman oubyen plito kot Komisyon ki Human Rights la ki deal avek bann dimoun la ki zot drwa i ganny abize, tousala ki  ti dir mon’n tann zot dir i annan zis en kote latab en kote sez sepa kwa –  tousala i byen bezwen sa Bidze Siplemanter pou zot fonksyonnen e fer ki bann lenstitisyon davantaz nou pei i zwenn en rol pli enportan, pli pertinan pou fer ki pei li menm i in pli  efektiv dan son fonksyonnman e kontinyen swiv e anba gidans Mr Faure pou nou fer ankor pli byen.

Keep it up Mr Faure – Prezidan Larepiblik ou pe fer byen e avek ou nou pou al lwen.

 

(APPLAUSE)

 

HON CHARLES DE COMMARMOND

Mon demande Mr Speaker, ki nou Lasanble i donn son laprouvasyon sa Bidze Siplemanter ki devan nou, ki devan nou Lasanble pou nou kapab bouze e al devan.  Mersi bokou.

 

(APPLAUSE)

 

MR SPEAKER

Mersi Onorab De Commarmond.

 

MR SPEAKER

Bon mon pa pe pran –

 

 

(Off-Mic)

 

MR SPEAKER

Non mon pa pe pran okenn komanter ankor lo-  Point  of order lo kwa Onorab Ferrari ?

 

HON JEAN-FRANCOIS FERRARI

Onorab De Commarmond in dir pou dir en dimoun dan sa meeting in dir ki bann Manm Lopozisyon i anvoy email, i pa vre !  Se sa ki mon anvi dir i pa vre.  Personn pa’n dir sa.  So se tou.  Mersi.

 

MR SPEAKER

Ok dakor pwen in ganny pran.  Si sa pa’n sorti dan meeting me parey tou lede kote in dir e mon pa’n aksepte ek ki nou konman Manm Lasanble par ler nou annan bann ka ki vin devan nou e ki nou fer en referans.  I pa vedir i pa vedir ki sa Manm i dir ek CEO Welfare donnen.  Me i kapab tou lede kote tou lede kote i kapab refer cases tou an ASP – ok?  Sa mon krwar i kler.

Bon nou’n ariv en moman pou nou pran en vot lo Mosyon ki devan nou, e Mosyon i lir comme swivan;-

That the National Assembly resolves to approve the supplementary estimate of R 310,315,123.64 from a budget cut of the sum of R435,916,171.87 and to provide for a net budget cut of R125, 601,048.23 laid before the National Assembly in Accordance with Article 154(6) of the Constitution read with Article 154(7).

Mon ava demann tou Mann ki an faver, tou Manm ki an faver sa Bidze Siplemanter ki devan nou.  Okenn Manm ki kont?  Madanm Clerk.

 

MADAM CLERK

Mersi Mr Speaker.  Mon’n rikord 11 Manm ki’n vot an faver e personn kont.  Mersi.

 

MR SPEAKER

Mersi savedir Mosyon in ganny aprouve par Lasanble Nasyonal.  Bon zis pou ankor en bout dan ledikasyon ankor zis en pti bout dan kontinyen pas sa lendikasyon avek nou pep deor,   bann en tel Mosyon koumsa zis nou bezwen en mazorite ki vot an faver pou Mosyon pase.  Ok so menm si i annan Manm ki’n absan i en desizyon ki Lasanble Nasyonal i pran, ki’n aprouv sa Mosyon pou sa Bidze Siplemanter.

Bon avek sa nou pou adjourn e nou repran nou travay 2er apre midi.

 

(BREAK)

 

MR SPEAKER

Bonn apre midi tou Manm Onorab.   E bonn apre midi tou dimoun ki pe swiv travay Lasanble Nasyonal.   Bon mon prezant en leskiz pou sa retar ki nou’n konmans avek sa ankor i swiv en meeting, ki mon ti ladan avek plizyer Manm Lasanble avek en Misyon ki sorti aletranze.

Nou pou kontiny nou travay apre midi avek bann Mosyon ki lo Order Paper.  E prosenn Mosyon, se enn ki pe ganny move par Onorab Charles De Commarmond Leader Government Business, e i annan pou fer avek en rektifikasyon.

Toudswit mon ava pas laparol avek Onorab De Commarmond pou li move son Mosyon.  Onorab laparol i pou ou.

 

HON CHARLES DE COMMARMOND

Mersi Mr Speaker.  Bonn apre midi Mr Speaker.  Bonn apre midi tou bann Manm e trou bann dimoun ki a lekout.  Mr Speaker Mosyon i lir koumsa; Pursuant to Article 64 (4) of the Constitution, I move that this Assembly resolves to ratify the:-Protocol to Eliminate Illicit Trade in Tobacco Products.

        Mr Speaker sa Protokol pou Elimin Trafik Ilegal bann prodwir Taba i en Protokol enportan e nou bezwen son ratifikasyon nou Lasanble.

Depi o konmansman les mwan petet dir sa se sa issue tranzaksyon bann prodwir taba se zisteman sa bann tranzaksyon oubyen trafik ilegal ki annan, around sa zafer sigaret bann lezot prodwir taba.

E swa bann sityasyon ki pe arive kot bann dimoun, bann biznes ilegal dan sa direksyon kot, zot bypass sistenm ki egziste pou pa pey tax.  Savedir zot sov tax.  Epi i annan osi ki fer bann proteksyon e lavant ilegal.  Bann fake products lo a baz taba.  Savedir labaz bann eleman ki met dan sigaret ensidswit.  La nou pe koz diferan kalite depi son sigaret li menm sigar, lezot tradwi pei parey nou dir, taba pip e taba sike dan serten pei nou konnen dan L’Inde i bokou soz lontan Sesel ti annan;-  tou sa bann kalite prodwir a baz taba i tonm dan sa eleman sa Protokol.

Mr Speaker sa Protokol ki devan nou Lasanble, i de koul dan en lot keksoz.  I de koul dan en Trete.  En Trete enportan par Lorganizasyon Mondyal pou Lasante WHO e sa Trete konn li konman Framework Convention on Tobacco Control – FCTC.   I en lenstriman legal ki’n ganny ratifye par 179 pei e Sesel ti premye pei Africain pou ratifye sa Trete FCTC, an 2003.  Sa Protokol pou elimin tranzaksyon ilegal lo bann prodwir taba i en premye Protokol ki definir bann provizyon legal otour lartik 15 sa Trete.  Savedir i Trete Framework Convention on Tobacco Control – FCTC. 

E tou bann parti.  Savedir bann pei ki ti prezan kot sa konferans ki ti enkli Sesel byensir ti adopte sa Protokol an 2012 e Protokol ti antre an fors an loperasyon an Zen 2018.   E ziska prezan i annan 57 pei ki’n ratifye sa Protokol.  E sa i enkli L’Union Européen i osi i ratifye sa Protokol osi ki 24 pei sorti dan rezyon L’Afrique. 

Bi prensipal sa Protokol Mr Speaker, se pou elimin tou kalite tranzaksyon ilegal, ki annan otour ki annan pou fer avek prodwir taba.   Sa Protokol i donn tou bann kad legal ki pou ede anpes tranzaksyon ilegal, par protez bann diferan sous tranzaksyon legal ki egziste pou bann pei pou bann prodwir taba.

E sa i enkli letablisman sa ki nou apel en international tracking and tracing system.  Ki pou ede permet sa korperasyon enternasyonal kontinyen.  Savedir parey normal biznes i devret ete,  ou konpran?  Si ou al an deor sa, la i vin ilegal.

Mr Speaker alor ler i annan tranzaksyon ilegal – bann prodwir taba ki nou vwar?  Se ki i annan ogmantasyon dan aksesibilite sa bann prodwir i vin pli abordab e osi en ogmantasyon dan konsonmasyon sa bann prodwir.

E son konsekans i grav e serye.  Son konsekans se ki i anmenn en ogmantasyon dan bann maladi ki lye avek konsonmasyon taba.  Zis pou fer resorti ki statistik an 2017 in montre ki atraver lemonn antye, ti annan 7milyon dimoun ki’n mor an rezilta bann maladi ki lye a konsonmasyon taba.  Sa bann tranzaksyon ilegal Mr Speaker, i deranz bann restriksyon legal lo prodwir taba.  Par egzanp parey bann warnings ki lasante i in mete sa i ganny inyore.  E osi plis lavant sa bann prodwir avek bann miner – bann zanfan, e sa i annan tandans anmenn en ogmantasyon dan konsonmasyon taba akoz [prodwir taba ilegal i pa ganny takse zot pas an deor sistenm tax, sa bann dimoun ki fer sa bann tranzaksyon.  E zot kapab ganny vann a en pri pli bonmarse.

Ler i vin pli bon marse i vin pli fasil ankor parey ou dir  boner pou akse avek sa bann prodwir sirtou pou zanfan.  E la nou vwar i vin danzere pou zot lasante.

Dapre Lorganizasyon Mondyal  pou Lasante – WHO tranzaksyon ilegal bann prodwir taba i apepre 15 a 20 poursan tou tranzaksyon prodwir taba  ki ganny fer  dan lemonn annan tye an e an konsekans sa, i reprezant en    3 bilyon Dolar anform reveni ki bann Gouvernman e bann pei enkli Sesel i perdi toulezan dan zot sistenm reveni.

Dan Sesel Departman Custom in raporte ki pandan 2017 a 2018 zot in sezi 258, 617mil sigaret e osi 1335.86 kilogranm lezot prodwir taba ki napa lafimen.  Savedir bann taba sike, ensidswit, tou bann zafer koumsa.

Akoz ki Sesel i bezwen e i devret ratifye sa Protokol Mr Speaker?  Sesel in pas lezislasyon lo kontrol taba n 2009  Tobacco Control Act, ki an konformite avek an konformite total si oule dir an strong conformity avek sa Trete FCTC ki mon’n nonmen boner.

I enkli ban lo restriksyon, lo fimen dan tou landrwa piblik ki fermen, dan bann landrwa travay e osi dan bann transpor piblik.   E ban lo tou bann form lenvestisman ki annan pou fer avek sigaret e lezot prodwir taba;- sponsorship oubyen promosyon lo prodwir taba;- lobligasyon pou met bann  health warning lo tou bann pake sigaret e en ban pou vann sigaret avek bann miner e osi lezot mezir ki relye avek tranzaksyon ilegal sa prodwir.  E osi kreasyon en Board ki nou apel Multi-Sectoral     Tobacco Control Board pou ede swiv bann kontrol ki Lalwa i demande.

Sesel in osi deza enplimant plizyer provizyon legal pou ede aret tranzaksyon ilegal bann prodwir taba e sa i trouve dan Tobacco Control Act 2009 dan Custom Management Act 2009 e dan Seychelles Licenses Act 2011.

Avek bi siport Gouvernman pou ratifye sa Protokol an kolaborasyon avek Minister Lasante de expert osi kot WHO ti fer en konsiltasyon teknik avek plizyer stakeholders isi Sesel an Avril 2018.  E an rezilta sa, sa de expert ti fer resorti ki Sesel i deza annan bann Lalwa byen for, ki kapab ede dan domestication e lenplimantasyon rapid e efikas sa Protokol.

Ratifikasyon sa Protokol pou nesesit en pti pe modifikasyon – enn de pti modifikasyon e azisteman miner dan Lalwa ek regilasyon ki egziste dan Sesel, akoz zot in deza annan bann framework legal, lokal enportan, ki anliny swadizan sa Protokol pe demande ;- par egzanp pou abolir bann tranzaksyon legal ki annan pou fer avek bann prodwir taba dan Sesel.  Par egzanp Seychelles Tobacco Control Act 2009 i tous sa byen sirtou seksyon 12  a 27 ki adres tranzaksyon ilegal an zeneral.

Provizyon legal provizyon legal ki  nou pou bezwen annan si nou ratifye sa Protokol pou enkli de provizyon swivan ;-

(1) Anliny avek lartik 8 sa Protokol pou devlop en regilasyon pou track and trace tou bann prodwir taba anliny avek seksyon 27 (g) Tobacco Control Act 2009 – savedir la i bezwen annan en pti amannman, ki osi enkli nesesite ki bann pake sigaret bann pake, ki prodwir taba i ganny i pa zis sigaret i bann lezot prodwir taba osi ki ganny anpakte ladan.  E ki sa bann pake i ganny met en lendikasyon kler lo son bann pake ki endike bann lenformasyon esansyel ki annan pou  fer avek sa prodwir ki dan sa pake li menm.  Konmsi ou bezwen donn tou bann detay.  Pou ki dimoun i konnen ki bann danze ki i pe aste sa bann keksoz ki pou afekte son lasante, ki i pou aste.  Letan ou vwar sa, sa i ava osi deter bann dimoun kekfwa pou aste sa bann prodwir taba ki pa bon pou lasante.

Anliny avek lartik  9 sa Protokol osi pou devlop en regilasyon pou gard rikord e osi en rapor sorti kot bann biznes anliny avek seksyon 13 Tobacco Control Act 2009.

Mr Speaker aret sa de mo mon demande ki nou Lasanble i aprouv ratifikasyon sa Protokol ki devan li.  Mersi bokou.

 

MR SPEAKER

Mersi Onorab De Commarmond.  Bon okenn Manm ki le segonn Mosyon?   Wi Onorab Audrey Vidot.

 

HON AUDREY VIDOT

Motion seconded Mr Speaker.

 

MR SPEAKER

Mersi Onorab Vidot.  Bon Mosyon in ganny seconded.  E Mosyon ki devan nou ki ou open for debate, pe demande ki Pursuant to Article 64 (4) of the Constitution, I move that this Assembly resolves to ratify the:-Protocol to Eliminate Illicit Trade in Tobacco Products.  Deba i ouver lo Mosyon.  Okenn Manm ki le entervenir ?  Onorab Johan Loze.

 

HON JOHAN LOZE

Mersi Mr Speaker.  Bonzour tou Manm Onorab.  Bonzour tou dimoun ki pe ekoute kot lakour.  Mr Speaker dabor mon bezwen konmanse par dir ki posibleman mon lentervansyon lo sa Mosyon i en pti pe dezonnet, akoz mon en dimoun ki pa fimen, thus mon pa vreman konn son douler.

Me selman proteksyon lasante lendividi i devret konsern nou tou.  Sa bann prodwir ki Mosyon pe viz pou adrese, i pa neseserman bann ki pe ganny regle e kontrole par sa bann mezir ki an plas aktyelman.  Sa i enn bann keksoz ki WHO in realize li menm ki plis zot met bann mezir kontrol an plas, zot realize ki i annan bann deteryorasyon lo bann lot kote e sa pe sorti for kot sa bann Illicit Trade in Tobacco Products.

I annan bann pei ki’n ganny idantifye konman bann vyolater pa neseserman ki nou bezwen nonm non pei la dan Lasanble an se moman.  Me enn bann keksoz ki’n sorti ker se ki lasante imen i tant pou ganny pli afekte ek bann prodwir ki pa pe ganny reglemante.  Akoz napa okenn tracing ni kot in prodwir ni kot in anbale e ni anba ki kondisyon sa bann keksoz in ganny manufactured.  E zot la pou konsonmasyon imen.

Resaman en zofisye Minister Lasante ti dir avek m  wan ki anba en kondisyon normal, sigaret i son konsonmasyon pa ti pou ganny aksepte konman en nonm, me vi ki in la pandan kantite letan in ganny normalize e nou ki aksepte li konman enorm.

E Minis Adam resaman dan Lasanble i osi i ti dir ki sa i ozordi en prodwir parey sigaret ti pou ganny entrodwir i ti pou en keksoz ki ilegal, i pa ti pou ganny aksepte konman en prodwir legal dan sa monde ozordi, avek tou sa konnesans ki nou annan prenon knot tou sa ki nou konnen lo son lefe nocive lo lasante imen.  Be sa bann prodwir  illicit tobacco zot pli nocive ankor akoz napa kontrol ni lo kantite pestisid ki antre ladanm ni anba son kondisyon ki ganny anbale.

E apepre 5an pase tri annan en case L’Amerique kot tri annan en lo sigaret, e zot ti vwar pou dir son filter ki ti’n ganny met ladan ti posed bann very high concentration of cyanide.   Son filter pa neseserman son taba ki ladan li menm problenm se filter e la osi ti en ka sa bann  illicitly traded  tobacco. 

Sesel sa ki nou bezwen se pou protez lasante nou pep.  Protez nou Nasyon kot bann lefe advers sa kapitalizm fou e sovaz ki pe domin lekonomi lemonn ozordi.

Resaman nou ti tann Minis dir zot lozik par deryer aret vann sigaret an detay, se ki sa i fason primer ki zanfan pe ganny akse avek sigaret, se letan zot aste an detay.  Be sigaret li menm in enn bann  premye keksoz ki’n ganny prouve konman en ka cyanogen son lyen direk avek kanser in ganny etabli klerman e prouve scientifiquement

Son sigaret standar normal  ki nou konman en laras nou’n aksepte pou konsonmen, i deza en keksoz ki tre nocive pou nou lasante.  E la prezan nou annan sa sigaret sa bann prodwir taba ilisit ki li i pli danzere ankor pou lasante imen ki sa enn swadizan ki normal.  Alors mon konpran rezon ki WHO pe bouz dan sa direksyon, pou fer li vin pli difisil pou dimoun ganny akse a konsonmasyon bann tel prodwir limit son distribisyon e limit dega ki i kapab fer lo lasante imen.

Be i pa zis son lefe lo lasante sa lefe pwazon ki annan lo lasante imen i osi ki sa  illicit trade in tobacco i  fuel krim     organize.  I en gran sours finansman pou fuel krim       organize partou atraver lemonn e menm resaman osi in ganny dir ki i pe kontribye ver finansman terorizm dan lemonn.  Pa ki bann tel  keksoz i bann gran konsern pou nou konman en pti pei.  Well unless i tous nou direkteman.

Be mon pa krwar ki konman en pep, nou pou vreman anvi pe kontribye an ver la kriminalite dan lemonn pou ogmant, la kriminalite dan lemonn.  Alors mwan personnelman mon pou siporte.  Mon pou siport sa Mosyon nou pei i ava antre dan en tel demars mondyal pou sey bes en pe konsonmasyon sa ki esansyelman en pwazon – en pwazon pou imen e sirtou en pwazon pou zanfan.  Mersi byen Mr Speaker.

 

MR SPEAKER

Mersi Onorab Loze.  Okenn lezot Manm?  Yes Onorab Sebastien Pillay.

 

HON SEBASTIEN PILLAY

Mersi, mersi Mr Speaker, Mr Speaker mon pran laparol lo sa Protokol akoz i enportan note mon pa konnen ki mannyer mon pou dir sa.  Mon annan serten lentere personnel vizavi sa Mosyon ki devan nou ozordi, mon napa share ladan    personnel dan sa Mosyon ou konnen nou annou aksepte pou dir lemonn in evolye, right?  Lemonn in evolye e diferan group in ganny mon pa konnen si bann fimer pe ekout mwan, zot pou senpatiz en pti pe pa ki mon pe servi platform   Lasanble pou envok oubyen promot servi bann prodwir taba dan sa konteks – sigaret.  Me nou bezwen aksepte pou dir ou bezwen aksepte poudir i annan two side of the coin –     i annan two side of the coin   nou bezwen aksepte sa.  Ya.

E mon vwar Onorab Ferrari pe dir mon laba li i en     i pa oule aksepte me selman nou tou nou konnen poudir  i aksepte.

 

(laughter)

 

HON SEBASTIEN PILLAY

Non nou riye Mr Speaker Akoz ou konnen konman en politisyen sirtou en platform piblik i en pe difisil pou koz lo la.  I en size difisil akoz ou pa oule ganny vwar konman ou pe promot en tandans, oubyen en mers ki i annan en gran mazorite dimoun ki feel serten fason.  Me nou osi nou bezwen regard sa ostracization petet ki’n arive avek bann dimoun par egzanp ki servi en sigaret.

Ozordi par egzanp dan tou lotel kot ou ale lamazorite lotel en dimoun i servi en sigaret i bezwen sorti deor.  Sesel nou ankor sanse kot i annan serten landrwa ouver kot ou kapab fimen, me dan bokou lotel deor sa in sanze.

Repons pou sa akoz in annan en awareness ki’n ganny kree otour servi bann prodwir taba, sigaret, oubyen dan lezot form.  E mon krwar sa i vin akoz lemonn i evolye nou fason vwar keksoz in evolye, e menm ler nou’n entrodwir par egzanp bann e-cigarette   ozordi nou vwar ki e-cigarette pe pas atraver serten, serten en tes serten en si oule konsern atraver bann sosyete pe i annan serten lekspresyon ki menm e cigarette i kap annan en lenpak e-cigarette en lenpak lo nou lasante.

So i pa neseserman sitan fasil pou desosye ki toultan pou annan bann eleman controversial oubyen bann eleman  serye dan sa domenn.

Me ler nou vin lo en lot size petet size pli pros ek nou se ki Sesel nou annan bann konpannyen ki angaze dan prodiksyon sigaret.  E sa konpannyen i provide lanplwa pou plizyer dimoun i enn bann konpannyen ki kontribye atraver – pa ki mon pe fer promosyon pou sa lakonpannyen, me i kontribye atraver son tax pou lekonomi.  I kontribye i annan en kontribisyon ki’n ganny fer.

Me si nou annan en trade kot li sa konpannyen  – ti kapab annan de konpannyen Mr Speaker oubyen 3, me si ou annan sa konpannyen ki li  i ganny regilarize, e i ganny regilarize i bezwen met tou bann norm i bezwen met tou bann kriter.  E apre ou annan en lot group ki pou vini pe servi bann illicit products ki pou met lo market ki pli bonmarse ki kapab atak sa marse ki sa enn ki annan.  Me ki an plis ki sa, sa bann illicit products pa’n pas atraver bann test e sa bann prodwir i kapab afekte ou lasante.

E se pou sa rezon kot dan en  klima   aktyel ki nou annan Sesel par egzanp kot ozordi, dan lamazorite – annan en mazorite kapab ozordi en sigaret i ganny vann dan en bwat kot nou ti annan sa vann an detay nepli annan, i fasil pou nou vwar kot en endividi oubyen en lot dimoun be la i annan en market pou mwan fer rantre mon serten kantite sigaret mon vann li an detay.  Mon al kot en supplier ki pli fasil mon pa konnen kot i ganny sa.  So i annan en risk.  I annan en risk serye, e se pou sa rezon malgre ki piblik an deor pa pou santi pou dir sa size i en size ki vreman annan sa lenpak, oubyen sa konotasyon Polisi kot i  annan en konotasyon lo en pwennvi sosyete, akoz nou bezwen tackle sa bann size, akoz nou annan dimoun ki pe fer zot biznes ;- mon konnen mon annan en zanmi ki bokou zot lo lot kote latab zot bezwen konn li tre byen, ki vann son bann prodwir taba, bann hand  rolled cigarettes ki bann dimoun apre i hand rolled  ou pa oule ki li sa dimoun  ki li i pe fer son biznes dan en fason regulated, i pe bezwen compete – i pe bezwen compete avek en lot dimoun  ki li dan en fason ilisit e la in dir ou poudir  Customs in tyonbo sa kantite.   So i serye sa.  Imagine si Customs pa ti’n tyonbo sa kantite prodwir, zot ti pou lo market. 

        E 200 ekek mil ler ou pe vann enn sa prodwir petet kantmenm ou pou vann li R2 ouswa R4 i 4 par 200mil i R800 mil en lekonomi R800mil.  I sibstansyel.

So Onorab Henrie in remind mwan pou dir en pti lakaz 2 lasanm – wi petet.  Selman nou pa pou kapab pran sa bann sigaret ki nou’n sezi pou vann.  I pa sa ki nou  le fer.  Me sa ki enportan se ki mon krwar sa Lasanble i bezwen pran kosyans ki i annan tou bann lenstriman par fwa ki nou,  nou bezwen pase konman en Lasanble whilst i pa paret sitan enportan pou nou, be ler  ou azout li ek lezot mezir ki pe ganny pran, i vin enportan.

E sa Protokol i enn ki enportan dan sa fason.  E se pou sa rezon ki mwan mon pou siport sa  Protokol.  E ki mon krwar  nou devret fer li.  E enn bann rezon – en lot bann rezon prensipal se ki malgre ki nou Sesel nou fer tou pou nou met an plas nou bann regilasyon – nou bann mezir, o tour nou pa tou pei ki annan menm set-up.  

E bokou fwa sa bann pei i ganny servi konman bann transit point.  E la kot i fasil pou sa bann keksoz ariv dan nou pei akoz i pas par bato laplipar di-tan OUswa i vin pran bann vwayazer ki pou vini e ki nou, nou bezwen fer sir pou dir nou pe nou pe tackle sa.  So, i enportan pou nou annan sa dan nou lespri e pou nou kontinyen fer tou sa ki nou kapab, pou nou ankouraz bann Lotorite konsernen pou pran bann mezir kot i neseser pou protez bann biznes lokal, e pou protez popilasyon bann prodwir ki kapab poz en danze pou sosyete.  Mwan  menm mwan mon pe fer mon mye pou mwan kapab overcome – mon pa dir adiksyon mon depandans lo sigare.  Mon pe dir fran la i pa fasil Mr Speaker i pa fasil, i pa fasil.  E parfwa ou ganny stigmatise par lasosyete.  Tou dimoun i dir ou arete, pran sa met laba, zete.  Ou seye.  Ou pe seye.  Ou konnen i en zefor.  Ou konnen. I en zefor  tou dimoun ki fimen pe ekout mwan la deor.

E mon krwar sa i pa about en dimoun ki fimen me i about i en lekonomi ozordi ki egziste i egziste partou dan lemonn, e se pou sa rezon in annan sa Protokol.   Zis parey en Protokol ki protez illicit trade dan lezot domenn ;- dan lalkol par egzanp  Mr Speaker, enn bann landrwa ki’n egziste ankor, kot i annan bann fake whiskys ki vin lo marse, kot i annan dimoun parfwa i pe al fer son ‘’get together’’ en dimoun i dir li be vini ou ava aste detrwa boutey whisky ek mwan, apre i realize pou dir i pa’n aste boutey whisky in aste en  nespes delo koumsanmenm.

So tousala i bann mezir ki nou bezwen kontinyen pran pou nou asire ki nou protez lekonomi e nou fer nou mye.  Mon konnen Onorab Ferrari i dakor ek sa bann keksoz ki mon pe dir Mr Speaker, akoz i santi pou dir that is something ki nou bezwen al dan sa direksyon.

E avek sa mon ti a demann Lasanble dan son entirety pou siport sa rezolisyon.  Mersi.

 

MR SPEAKER

Mersi Onorab Pillay.  Mon a donn laparol Onorab Waven William.

 

HON WAVEN WILLIAM

Mersi Mr Speaker.  Bonn apre midi tou dimoun ki a lekout.  Mr Speaker de pti mo an siport pou sa ratifikasyon sa Protokol. Mr Speaker, bomaten ou’n fer en entervansyon vizavi nou partisipasyon dan Lasanble 141enm Lasanble Zeneral IPU.

Mr Speaker letan mon regard sa deklarasyon Belgrade, mon santi pou dir nou Lasanble i bezwen met nou anliny avek lafason ki IPU i anvi nou Lasanble bann Parlman atraver lemonn i kondwir zot.  E parey mon’n dir i se ki – enn  – Sesel i demontre ki tou dilon i pe swivre sa bann tandans e bann norm enternasyonal, e i ler konsern bann Konvansyon e bann Lagreman, kot i annan en lenpak pozitiv, pou protez humanité nou napa swa me pou aport sipor.

Alor avek sa de pti mo Mr Speaker mon pou dir ki mon raport mon sipor pou sa Protokol, akoz i met nou anliny avek nou partisipasyon dan IPU.  Mersi bokou.

 

MR SPEAKER

Mersi Onorab William.  Bon mon a retourn Onorab Ferrari.  Ale Onorab Ferrari.

 

HON JEAN-FRANCOIS FERRARI

Mersi Mr Speaker.  Mon ti a zis kontan dir avek Lasanble ki nou lo sa kote latab nou, nou kont okenn trafik okenn komers ilisit.  Sa i enkli prodwir taba.  E alors nou pe siport sa Protokol.  Mersi.

 

MR SPEAKER

Mersi Onorab Ferrari.   Mon a re donn laparol loter Mosyon pou fer son remark konklisiv.   Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker mon vwar ki Lasanble in konpran byen kontenir sa Protokol.  E parey zot in entervenir zot in fer zot bann lentervansyon kout e straight forward, savedir i montre pou dir nou’n konpran pou dir vreman sa bann keksoz ki ilegal ki  ilisit e nou bezwen kondannen.

E mon remersye bann dimoun ki’n intervene, ki’n dir keksoz dan sa direksyon.  Mon osi  oule met rikord ki oparavan mn en dimoun ki ti fimen.  E mon’n arete akoz maladi ki lye avek sigaret.  E mon kontan ki mon’n arete akoz mon santi vreman ki mon pli byen.  E ou santi  diferans ki ou annan ler ou pa fimen ek ler ou fimen.

E mon ankouraz tou dimoun, ki kapab fer sa zefor pou zot met sigaret ater.  Akoz i pa bon pou lasante.  Me la Mosyon i e tous tou prodwir sigaret e lezot prodwir taba ki ilegal.  Me i pa zis sa ki i pe touse. I osi tous akoz letan dimoun i bypass sistenm tax la,  i osi sigaret ki legalman ganny fer ki’n ganny fer dapre Lalwa ki’n ganny otorize.  Me ki serten dimoun petet fer enportasyon sa bann sigaret ouswa eksportasyon zot bypass sistenm tax. 

Savedir la letan i ganny sezi sa bann sigaret i annan bnn ki substandard savedir bann sigaret ki ganny fer substandard ki pa bon, li i ganny detri i bezwen ganny sezi.  Apre i annan lezot sigaret ki li i dan sistenm normal, savedir in ganny otorize, li letan i bupass sistenm tax i ganny sezi,  i ganny revann a lan kan    option e la i al ankor lo market.  Me selman i annan serten fees ki’n ganny anmase.  Mon le fer sa pwen sorti.

Me i enportan montre ki bann prodwir ki pa reglemante i annan en bann risk avek.   Risk ki alarman akoz la parey nou dir i substandard.  I pli ba son standar ki lezot akoz i annan bann kalite prodwir ki ganny azoute avek, pou fer li vin pli attractive ouswa pou son pri vin pli bonmarse, ki savedir kou pou prodwir li i ba.  E souvandfwa sa bann prodiksyon in ganny fer an kasyet li, Lotorite pa vwar.  E zis i ou vwar li lo market, e i fer son dega parey nou dir la, sa bann dimoun ki konsonmen sirtou bann zanfan bann zenn i vreman vwar zot fasilman ganny problenm lasante pli tar.

Alor Mr Speaker nou demande ki tou dimoun i vin pli vizilan lo sa bann prodwir legal, sirtou bann prodwir sigaret e lezot prodwir taba, ki pa bon pou lasante.   Bann taba ki  kapab ganny servi ouswa sa bann ki nou pe koze sa bann ki pa bon.

E la, e la nou dir i enportan tou dimoun i vin vizilan e raporte pou ki i ganny deal avek dapre Lalwa,  e dapre bann Trete, bann Konvansyon ki nou’n sinyen, bann Trete.  E la dapre sa Protokol ki  nou ava ratifye parey mon’n antann in ganny eksprimen dan nou Lasanble ki nou pou ganny sipor pou sa Protokol.  Nou bann regilasyon e lezislasyon dan Sesel i anliny.  Parey mon dir kekfwa enn de pti laranzman isi pa gran zafer, savedir i pou fasil pou nou met laplikasyon sirtou avek nou vizilans met an laplikasyon konteni sa Protokol.  E i pou bon i dan lentere nou pei dan lentere nou pep, so i pou bon.  E mon ti ava kontan alor ankor enn fwa mon demann Lasanble pou siport ratifikasyon sa Protokol.   Mersi.

 

MR SPEAKER

Mersi Onorab De Commarmond.   Bon Lasanble i dan pozisyon pou pran en vot, en desizyon lo ratifikasyon Protocol to Eliminate Illicit Trade in Tobacco Products.  Mon ava demann tou Manm ki an faver? Okenn Manm ki kont?  Madanm Clerk.

 

MADAM CLERK

Mersi Mr Speaker.  23 Manm in vot an faver, e personn kont.  Mersi.

 

MR SPEAKER

Mersi Madam Clerk.  Savedir Mosyon in ganny aprouve par Lasanble Nasyonal.

Nou ava move lo prosen Mosyon lo Order Paper e mon ava call on Onorab Gervais Henrie pou prezant son Mosyon.  Onorab Henrie.

 

HON GERVAIS HENRIE

Mersi Mr Speaker.  Bonn apre midi tou dimoun.  Mr Speaker anliny avek parti 10 seksyon 64 Interpretation and General Provision Act, mon pe anmenn en Mosyon ki pe demann Lasanble pou anil S.I 59 pou 2019.

Mr Speaker, sa S.I i kouver bann regilasyon ki permet annan en Speakers’ Corner anba Public Assembly Act.  Sa S.I i date le 15 Oktob, e anba son pouvwar, Lasanble Nasyonal i annan ziska le 15 Zanvye pou anil li.

Me lefet ki nou pe al dan deba Bidze 2020 apartir Zedi sa semenn,   avan ki  nou al lo recess lafen lannen, mon apresye ki ou Lofis in dakor pou konsider sa Mosyon konman en irzans.

Piblik a rapel ki le 13 Desanm lannen pase, Lasanble ti vote pou quash sa menm S.I ki mon kapab dir –  avek 27 vot, an faver ki ti reprezant 18 MNA LDS, avek 8 MNA Parti Lepep sa letan, akoz tou lede kote latab ti annan konsern avek S.I 73-2018.  Demann ek swe nou Lasanble ti kler, ler nou ti quash S.I 73.  Nou ti demann brans Egzekitif pou  e mon quote ’’go back the drawing board’’ e retourn avek en S.I ki tou dimoun i aksepte, e asire ki reponn a tou nou bann legzizans.

Me eski brans Egzekitif in ekoute?  Comme dir Kreol  zot i anvoy nou pronmnen deryer Ste Anne.

Mr Speaker, fodre fer resorti ki annan detrwa keksoz dan sa regilasyon, ki nou dan Parti LDS nou’n adere avek epi piblikasyon son versyon orizinal.  Sa i sirtou enkli size ki kontrol lo labi lalkol avek drog kot Speakers’ Corner. 

        Me nou ti quote serten provizyon dan sa regilasyon, e malerezman brans Egzekitif in retourn avek bann menm provizyon.

Permet mon Mr Speaker pou pas lo sa bann pwen.

Regilasyon 4 i dir ki zis Seselwa ki kapab adres piblik dan Speakers’ Corner.  Lasanble Nasyonal ti eksplike pou dir, non sa i pa devret leka.  Nou ti donn legzanp bann travayer etranze, kot si zot  krwar zot in ganny abize, par zot anplwayer dan en serten fason, sa i a en landrwa kot zot a kapab desann pou al koz lo sa labi ki zot pe gannyen.  E kekfwa zot ava anvi fer li dan en fason spontane akoz sa labi fek larive e zot desann an group pou al fer sa.

Regilasyon 5 i dir ki Speakers’ Corner dan Dimans i reste fermen.  Lasanble ti argimante;-   ki Dimans se sanmenm sa zour kot dimoun i annan plis letan lo zot lanmen, pou desann anvil e al fer en vire kot Speakers’ Corner. 

Dan lezot ka dimoun i kapab travay Lendi ziska Sanmdi e zot annan letan lib zis Dimans pou partaz zot lopinyon avek piblik.  Dan Dimans dimoun i sorti lanmes i kapab vwar sa ki pe pase dan Speakers’ Corner enteresan e osi sa ki sorti travay sa zour.

Regilasyon 5, i osi annan restriksyon dan ler ki pe ganny propoze, ant 8er bomaten ziska 6er diswar Lendi a Sanmdi.  Lasanble ti dir ki Speakers’ Corner fodre ganny promouvwar konman en landrwa ki spontane.

Dimoun i merit kapab vini nenport moman si i annan en keksoz lo son leker i merit kapab vini pou koze.  Parey bann MNA ti dir, loportinite pa kapab Lotorite pa kapab tir Dimans nou ti propoze ki 24 lo 24 en dimoun i devret kapab ganny akse avek Speakers’ Corner.

        Regilasyon 6 i dir ki pou en dimoun vin koze dan Speakers’ Corner i bezwen notifye Komisyoner Lapolis.  Lasanble ti obzekte sa zafer notifikasyon.  Bann MNAs ti dir lefe ki Speakers’ Corner li i sipoze ouver, alor personn pa bezwen notifye Lapolis keler i pe al koze ensidswit.

Lasanble ti demande ki Lapolis i fer le neseser e asire ki i annan patrol regilye kot sa landrwa, pou fer sir ki keksoz pa zanmen al an deor kontrol.

Regilasyon 6 pe osi presize ki laplikasyon fodre fer an ekrir.  Lasanble ti rezet sa nosyon ki fodre dimoun i dir gard ki dat ler i koze, konbyen dimoun i pou koze, zot non, ensidswit.  Lasanble ti averti ki sa regilasyon pe aplik menm kondisyon ki annan anba Public Assembly Act. 

E ki al kot lespri laliberte lekspresyon pou Seselwa vi dir sa ki zot santi pou zot i enportan.

Regilasyon 7 i dir ou pa kapab servi Speakers’ Corner letan i annan lezot aktivite dan vizinite Freedom Square kot Speakers’ Corner pe ganny propoze, pou ganny etablir.  Lasanble ti dezagree avek sa kondisyon.  Akoz zisteman kekfwa a sa moman presi ki dimoun a profite poudir be la zot annan en lafoul  pou koz avek e ki zot merit kapab fer sa.

Regilasyon 8 i dir ki en dimoun dan Speakers’ Corner, pa devret servi okenn sistenm anplifikasyon. Lasanble ti an faver ki regilasyon i fer kler ki decibel ki pou ganny tolere dan sa landrwa prenon kont ki pa vwazinaz pa ganny enteronpe.

Bann Mam ti eksplike ki zis en pti anplifikasyon i ava ede pou ki, sa dimoun i a ganny antann me byensir i bezwen ganny fer dan en fason pou ki pa deranz sa lot dimoun ki kapab lanmenm obor ki pe koze akoz Speakers’ Corner i kapab annan plis ki en dimoun alafwa pe koz lo sakenn son size.

Regilasyon 10 (c) i anpese ki dan Speakers’ Corner ou pa ganny drwa display banners, films, photography, placards, posters, signs, writing, ensidswit.

Lasanble ti’n eksplik Gouvernman ki si en dimoun i deside koz lo en size e pou piblik konnen lo kwa ki i pe koz lo la, i a toutafe normal pou annan en fason pou li ilistre son size vizyelman.

Regilasyon 10 (d) i dir en Speaker pa devret koz lo okenn size, ki fer referans direk avek krwayans relizye lezot groupman.  Lasanble ti rekonnet ki larelizyon i 2enm size, pli enportan apard politik ki nou popilasyon i kontan diskit lo la.   Tou dimoun i anvi koz lo bann krwayans relizye.

Dan lespri promouvwar laliberte lekspresyon, e pli enportan tolerans pou diverzans lopinyon, sa Lasanble ti an faver ki sa regilasyon i ede ki nou vwar sa laliberte lekspresyon ganny egzibite dan nou pei.

Swe Lasanble sete pou vwar sa S.I koman ankor en pa ki pou fer dan lepanouisman nou bann drwa e sirtou dan drwa a lekspresyon.

Malerezman ankor enn fwa sa dokiman in retourn kot nou koman enn ki pe al kont lespri laliberte lekspresyon e drwa rasanbleman, e plito ver plis kontrol e sansir.

Avan mon terminen, mon oule rapel Lasanble serten keksoz ki bann MNA, MNAs United Seychelles ti dir an sipor desizyon pou quash S.I  73 10 mwan pase.

Mr Speaker Leader Zafer Gouvernman, Onorab Charles De Commarmond ti demann Lotorite pou revwar sa S.I, anbelir li, e fer li pli senp.   Mon sit sa ki i ti dir “Fer li pli senp pou tou Seselwa; pou tou  dimoun ki pou servi li e annou fer li ki nou demokrasi ava avanse dan laliberte lekspresyon, e i ava al lo en lot oter.”

Mon oule asir Onorab De Commarmond atraver ou Mr Speaker, ki bann konsern i ankor tel lekel.

Onorab Waven William  ti dir ki bann konsern ki ti ganny leve ti fer sans.   Mon oule asir Onorab atraver ou Mr Speaker ki bann konsern ki ou ti dir I ankor tel lekel. Manm elekte pou distrik Port Glaud, Onorab Egbert Aglae ti dir i santi poudir i annan serten keksoz dan sa S.I ki bezwen ganny aranze pou rann li pli ouver.  I ti ensiste ki i bezwen ganny revwar en pti pe dan son laform e konteni. Me keksoz bann konsern Mr Speaker i ankor tel lekel.

Onorab Pillay ti siport desizyon pou anil sa lot S.I 73, akoz i ti dir i a fer ki nou ava kapab anmenn en lot S.I. ki pli responsive avek sa ki Lalwa pe demande.  “E se sa ki enportan,” i ti dir.  Me eski S.I 59 i pli responsive?

Mr Speaker en lot Onorab en lot Onorab ki ti entervenir dan deba pou anil sa S.I orizinal ti en Onorab ki son lentervansyon ti ganny konpare avek en morso lanmizik klasik Indien. Apre en performans 30 minit, en not nou pa ti ankor antann isi anndan.

Prezan Mr Speaker ki nou vwar se ki ladministrasyon Mr Faure in seye rode sa not lo sa sitar, me pou fini kont zot in reanvoy menm zafer kot nou, ki Lasanble ti rezete par  en vot 27 MNAs.

Si prezan nou get sa de S.I sa enn la 73 of 2018 sa enn la i 59 of 2019.  Lo son premye paz ‘’the arrangement of regulation’’ dan 59 i annan zis en keksoz lo son 8enm pwen zot in retir sa mo ‘’prohibition of.’’  

Apre si nou al anndan, son regilasyon 9 in sanze konpare avek orizinal akoz orizinal ti annan pwen 1 avek 2.  E sa ki reste se ki zot koz lo ‘’fodre pa ki fer vyolans’’ ‘’ensit vyolans.’’  Sa in reste.  Me zot pa koz lo lalkol ki orizinalman ti annan me son marginal note zot in kite.  Mon krwar en fot ki zot in fer.

Apre dan son 10enm regilasyon, sel keksoz ki aktyelman zot in tire baze lo komanter ki  nou ti fer lo S.I orizinal ;-  dan orizinal ti dir a Speaker or a member of a public who attends the delivery of a speech at a Speakers’ Corner shall observe discipline conduct himself or herself, in a non- adversarial, non-partisan and non-confrontational manner and shall ..’’  Sa in ganny retire.

Alor le sel keksoz Mr Speaker ki’n ganny tire apre sa S.I i tel lekel parey mon’n dir.  Dernyen pwen ki mon ava fer en komanter lo la se dan son schedule,  kot i koz lo i donn sa pwen egzakt kote ki sa Speakers’ Corner, i pou sitye dan Victoria.  E ler nou’n kalkil li i dan vizinite Freedom Square alor pou bann dimoun ki pe kalkil Freedom Square annou debout kot Peace Park e nou figir pe vir avek direksyon stenn bis.  Savedir pou sa pti bout lo nou kote gos kot ti zwe hockey la i annan en lot pti bout laplenn – nou prezimen pou dir i la dan sa bann coordinates ki zot in donnen;- western side of the  Freedom Square.  Alors eski vreman i en landrwa pli apropriye ki Lotorite ti kapab met Speakers’ Corner? 

Letan nou mazin depi lepok bann demars pou lendepandans Lesplanad ti en landrwa kot ti annan bokou bann rasanbleman piblik.  Enn, pou rezon prensipal akoz Biro SPUP ti la kot batiman Hassan Ally la  i ete, be mon santi mon pou dir i en landrwa apropriye.

E ozordi dan lepase nou’n vwar Lasanble Nasyonal ti la, in annan bann rasanbleman piblik tou le 3 Oktob, Lopozisyon i zwenn laba pou zisteman selebre laliberte lekspresyon dan Sesel.  Nou konnen pou dir konmela i annan bann dimoun larelizyon ki asiz lo bann ban, ler ou pe mont direksyon Mont Fleuri zot donn ou en pti papye.  I annan en kantite dimoun ki aret la lo Lavenir 5 Zen zot travers anndan kot batiman National Cultural Centre ki dimoun i apel Library National. 

Donk toultan i annan en i annan sa trafik pyeton la.  Kot dimoun i vin la kot Cable and Wireless zot al Gran Kaz zot vin la kot Lesplanad.  Mwan personnelman mon santi kekfwa la i va en landrwa ki ti a kapab apropriye, ou si non i annan sa pti kwen la kot nou’n fer louvertir Festival Kreol ofisyel sa semenn bor la kot Lakour ti ete, i annan en landrwa la.

Alor sa i bann propozisyon ki mon ti ava fer.  Alor eski li Lotorite i santi pou dir sa i en landrwa pli apropriye ki nou’n swazir?  Donk lo sa pwen Mr Speaker mon ti ava demande ki Lasanble Nasyonal i pas en rezolisyon pou anil S.I. 59 of 2019 ki annan tit ‘’Public Assembly Speakers’ Corner Regulations, 2019’’ ki ti ganny gazete le 15 Oktob 2019.   I beg to move Mr Speaker.  Mersi.

 

MR SPEAKER

Mersi Onorab Henrie.  Okenn Manm ki segonde?   Ki segonn Mosyon.  Onorab Georges ou Segonn Mosyon.

 

HON BERNARD GEORGES

Mon an loner segonn Mosyon Mr Speaker.  E mon ti a kontan dir detrwa mo.

 

MR SPEAKER

Mersi, Mosyon i ganny segonde.  Mon donn ou laparol Onorab Georges.

 

HON BERNARD GEORGES

Mersi Mr Speaker.   Mr Speaker letan donnen yer ti Lazournen Kreol e ki ozordi nou pe fet li dan sa Lasanble avek ou permisyon mon ava adres zot an Kreol apre midi.

 

MR SPEAKER

Go ahead Onorab Georges.

 

HON BERNARD GEORGES

Mersi Mr Speaker.  Mr Speaker i rar ki mon kapab dir ler mon’n ekout en dimoun ki mon antyerman dakor avek tou sa ki in dir.  E mon pa kapab trouv en keksoz ki Onorab move Mosyon Onorab Gervais Henrie in dir apre midi ki mon pa dakor avek.

E mon ti dir resaman devan Komisyon Laverite ek Rekonsilyasyon Nasyonal, ki si en zour mon ti pou ekrir en listwar nou pei mon ti pou apel li ‘’Loportinite manke.’’  Akoz a sak tournan – a sak tournan nou listwar,  sak keksoz ki nou fer i en loportinite  manke.  Sak fwa Bondye i tal en keksoz devan nou, nou pa fer li byen.  Sak fwa ki nou ariv dan en fork ki dan semen nou pran sa enn ki move.  E nou pa pran sa enn ki nou ti devret pran.

E sa in vin – in vin en keksoz ki i vin en 2enm natir pou nou, i paret.  Mon krwar e mon annan konfyans ki lannen prosenn nou ava kapab enn fwa pou tou met sa deryer nou, e pran sa bon semen ki eleksyon ki i ava donn nou en loportinite pou swazir.

 

(APPLAUSE)

 

HON BERNARD GEORGES

E mon dir sa Mr Speaker akoz mon pa vwar en rezon, e mon konnen ki lot kote osi zot pou dakor avek mwan, mon pa vwar en rezon akoz en lide osi enkontroversyal parey en Speakers’ Corner i devret anmenn otan restriksyon, otan kontrent, pou son servis ki sa S.I i anmennen.

Gouvernman in ganny en sans apre ekout tou sa bann entervansyon dan Lasanble dernyen fwa ki sa S.I ti vin isi e ti ganny quash, pou li fer en keksoz diferan e mon sorry pou dir in resof menm bouyon e in anvoy sa devan Lasanble ankor enn fwa.

I paret mwan ki Gouvernman i anvi i anvi fer en keksoz me zot pa oze.  E nou ti vwar egzakteman menm zafer ler ti pou pas nouvo Public Order Act.  Zot konnen e nou, nou konnen akoz ou menm dimoun lo tou lede latab ki fodre annan en mouvman dan en serten direksyon e sa direksyon se ver laliberte se ver larg lanmen.  Me i paret mwan ki a dernyen moman Gouvernman i per.  I per pou li pran sa lepa e donk i pa fer li.

E nou vwar sa a plizyer repriz.  Nou vwar sa ler i ti pou pas ler nou ti pou ratifye Statute of Rome pou nou join Lakour Penal     enternasyonal.  Tou dimoun ti pe dir nou fer, napa okenn napa okenn kontrent nou napa okenn rezon pou nou per.  Personn pa pou ganny ziz-e.  E i ti pran en kantite letan e nou ti enn parmi bann dernyen pei L’Afrique pou nou finalman aksepte li.  La  ozordi nou vwar menm zafer ozordi.

I paret mwan i paret-mwan Mr Speaker ki rezon pou sa se akoz sa Speakers’ Corner la i pa’n sorti anba pou monte.  I pa’n en mouvman popiler ou populiste, me i en lide Gouvernman top down.  Akoz en Speakers’ Corner zeneralman sete en keksoz ki arive akoz dimoun i fer li e apre Gouvernman i met li dan en lankadreman legal. I pa ki Gouvernman i leve en bomaten i dir i ti ava bon annan en Speakers’ Corner.  E se sa ki’n arive la.  Se ki sa set en lide ki’n sorti dan Diskour Leta Lanasyon Prezidan san ki okenn dimoun ti’n milite pou annan enn, e si nou regard son lentansyon nou kapab konpran ozordi avek sa bann kontrol ki pe ganny mete, ki son lentansyon sete pa pou donn dimoun en loportinite me pou tir pou tir dimoun dan bann lezot landrwa e pou anvoy zot dan enn kot zot pou ganny kontrole.  E i kler ki sete egzakteman sa.

Me Mr Speaker avek nou Konstitisyon e avek bann sanzman ki’n arive an 1993 tou dimoun i konpran ki nou annan en gran seri laliberte.  Including laliberte pou ou pa fer en diskour en Speakers’ Corner si ou pa anvi.  Me pou ou debout obor Lorloz parey bokou in fer.  Pou manifeste kot ou anvi se sa se sa, sa ki nou Konstitisyon i permet nou fer.  Si nou anvi debout demen bomaten devan Lapos avek en plakar ki dir ‘’Ban email akoz nou Lapos pe soufer. ‘’ E nou bann zoli term ki koleksyonner i kontan pa pe vann ase akoz dimoun pa pe anvoy lanvlop zot pe ekrir email. 

        Mon annan toutafe permisyon pou fer li.  Personn pa pou kapab anpes mwan.  Nou Konstitisyon i garanti nou sa drwa.  E si ou pe neseser avek enn de lezot dimoun ti anvi asiz lo en bor miray obor Lorloz, avek en plakar, ti annan parfetman rezon pou fer li.  Zot in fer li dan lape, dan san okenn problenm.  Sa ki’n kontan in kontan sa ki’n pa’n kontan pa’n kontan.  Se sa lespri lavantir demokratik ki nou pe viv ladan Mr Speaker.  Pa en lespri kot ou le tir tou sa bann keksoz dan sa bann landrwa, ki anbelir nou landscape, politik Nasyonal e kiltirel.  E anvoy zot dan en landrwa e nou fek regarde la lo map, dan tou Freedom Square sa landrwa ki pe ganny propoze se landrwa kot dimoun i al mwens,  kot dimoun i al mwens.  Si ou anvi koze pou dimoun tande which is the whole, purpose of a Speakers’ Corner plis dimoun a tann ou si ou al Takamaka oubyen Baie Lazare ki si ou al lo sa pwen Freedom Square la ki pe ganny dezinyen. 

Alor, alor Mr Speaker mon pa anvi politisiz en keksoz ki deza politik e dir ki old habit die hard, me mon vwar mn vwar annefe en serten retisans, en serten dezir atraver sa bann kontrol ki pe ganny mete, parey mon’n dir pa pou epanouir nou pep.  Pa pou donn li plis a liberte, me pou restrikte, pou son laliberte e met li  dan en landrwa kot i kapab ganny kontrole – non selman fizikman dan sa landrwa me osi atraver bann restriksyon, ki’n ganny mete dan sa S.I. 

        Mon pa pou repet sa ki Onorab Gervais Henrie in dir dan en fason bokou pli elokan ki mwan, mon kapab dir li apre midi.  Me mon pa konpran Mr Speaker, akoz ki par egzanp ou pa kapab anmenn en plakar pou fer en pwen ki fer li pli byen ki parol.  Mon pa vwar akoz si demen i annan en group dimoun ki pe kont en baz militer Assumption pou pran en legzanp ki deza ganny servi, ki zot pa kapab anmezir ki zot pe fer en pti diskour avek lepep,  ki zot pa kapab annan enn de panel ki pou dir ‘’No military base on Aldabra.’’ Mon pa konpran lentansyon deryer sa.  E mon pa konpran restriksyon parey in ganny dir lo en pti amplifier.  Oubyen lo topik ki ou devret servi.

E mon pa konpran si ou annan en Speakers’ Corner ki son lide se pou atrakte dimoun pou koze, dan fason pou ankouraz dimoun pou dir sa ki zot anvi dir, ki nou pou dir i annan serten topik ki zot pa kapab koz lo la.  Akoz sa i pa pou zanmen kapab ganny kontrole.  Oubyen ki ou pou bezwen behave.  Dan en Speakers’ Corner, son bann nou ki’n vwar Speakers’ Corner pe marse,  Hyde Park L’Angleterre toultan pou annan en boug ki pe vin konfront ou, e that the whole purpose.  Si ou pa anvi konfrontasyon reste kot ou, anvoy en text,  anvoy en WhatsApp, anvoy lo Facebook pa tou dimoun ki pou desann lapenn pou al debout lo en bwat pou fer en diskour.  Sa se en kalite dimoun ki fer li.  E set en dimoun ki bezwen aksepte ki annan de fwa sa ki pou dir pou anmenn en reaksyon avek piblik.

E o kontrer annan de fwa i pou ankouraz en reaksyon 3avek piblik e se sa labote ki nou, nou konnen o sa morso latab e mon konnen ki zot osi zot pe aprann lo zot kote.  Se sa labote annan, annan freedom of expression.  Akoz Mr Speaker, parey nou ki travay dan Lawa difamasyon nou konnen, se ki ler Lalwa Difamasyon i dir ou fer comment i en defans.  Nou konnen ki annefe se pa fer comment i en defans.  Se unfair comment ki en defans.  Lalwa, Lalwa Freedom of expression i pou les dimoun dir ou en keksoz ki pa anvi tande, pa zis en keksoz ki ou anvi tande.  I donn li permisyon pou dir ou en keksoz ki pou ofans ou, se sa lespri.

E si nou anvi en Speakers’ Corner ki pou marse, e ki pou dir not  only, son non Speakers’ Corner me pou dir sa square kot i pou été pou apel Freedom Square nou pou bezwen sanz sa S.I ziska ki ler sa bann restriksyon i sorti.   Nou pou bezwen premyerman si nou anvi reste Freedom Square, anmenn li obor taxi stand e non pa lo lot bout laplenn.

Oubyen rod en lot landrwa anvil k i pli apropriye tel parey mover Mosyon in dir kot dimoun  pou pli pare pou debout, e kot dimoun pou kot pou annan en piblik pa vo lapenn ou annan en Speakers’ Corner pou koz avek en pye mang oubyen avek en pye koko, oubyen avek paviyon, ki pou arive, si sa Speakers Corner i reste kot i ete.

Akoz Mr Speaker si nou pa si nou pa fer en fason pou ki dimoun i servi sa Speakers’ Corner parti restriksyon e fer li vin en landrwa aksesib e apropriye sa ki pou arive, se ki sa Speakers’ Corner pou mor e dimoun pou kontinyen retourn devan Lapos oubyen obor Lorloz ler zot pou bezwen  fer manifestasyon.  E sa ki vedir ki sa Lalwa pou en Lalwa anven.  E nou, nou en Lasanble ki pa pas Lalwa anven.  E ki ler nou vwar en Lalwa anven nou quash li ! Alor, Mr Speaker apre midi mon pe zwenn mon frer Onorab Gervais Henrie pou mwan quash sa S.I.   Mersi.

 

(APPLAUSE)

 

MR SPEAKER

Mersi Onorab Bernard Georges.  Mon ava donn laparol  Onorab Sebastien Pillay.

 

HON SEBASTIEN PILLAY

Mersi.  Mersi Mr Speaker.  Mr Speaker Onorab Ferrari malerezman mon pa ti la le 5 Zen 1977, me mon la ozordi mon.  E mwan mon pou sezi loportinite ki mwan mon pe gannyen ozordi akoz mwan mon viv dan sa letan ki la.  E mwan personn pa pou dir mwan ki pou dir, ki pou fer. E mon pa krwar personn devret dir mon ki pou dir ki pou fer, a okenn moman.  Si Onorab Ferrari  i krwar sa i posib ..,

 

MR SPEAKER

Onorab, egzers ou drwa – ou freedom of expression. 

 

HON SEBASTIEN PILLAY

Mersi Mr Speaker.  E mon kontan lespri ki ou’n dir sa ladan.  E mon krwar nou devret aplodir sa ki Speaker in dir.

 

(APPLAUSE)

 

HON SEBASTIEN PILLAY

Mr Speaker mwan mon’n ekout le de entervenan ki’n koz avan mon, e entervenan ki’n anmenn sa Mosyon in tre astisye pou servi sa ki’n ganny dir par bann Manm lo sa kote latab pou eksplik son pwen.   E mon bezwen dir from the outset i annan keksoz ki’n ganny dir mon dakor avek.  I annan e keksoz ki’n ganny dir ki mon pa neseserman dakor avek,  mon pou eksplike akoz e mon pou eksplik mon propozisyon a lafen.

Premyerman Mr Speaker si mon pran sa ki Onorab Georges in dir mwan i en Onorab ki mon annan en gran respe mon’n aprann en kantite avek li, mon bezwen aksepte Mr Speaker. Onorab Georges in dir mwan de keksoz apre midi.  A lafen son speech in dir koumsa nou bezwen kree sa Speakers’ Corner pou ki dimoun i kapab servi li pou li pa al kot Lapos.  Me in osi dir nou oparavan ki si dimoun pa oule sa Speakers’ Corner i still free pou  li al anba Lapos.

So pou mwan sa i montre en pti pe lespri kot nou pe regard sa size from diferan angle.  E se sa ki enportan.  Ou bezwen regard li from diferan fason vwar keksoz.  Sa ki pou servi sa Speakers’ Corner, sa ki pou still pa servi Speakers Corner.  E rezondet akoz nou devret ankouraz dimoun 5pou servi sa Speakers’ Corner dan plas en lot alternativ.

E se la kot mon vin lo bann pwen kot mon tonm dakor avek sa ki mover Mosyon in dir.  Mover Mosyon in dir ek nou koumsa pou dir par egzanp dan bann regilasyon in koz lo fodre nou en Seselwa pou al kot Speakers’ Corner.  E mon osi vwar sa en pe drol akoz si lentansyon se pou anmenn dimoun en lot landrwa pou zot fer en lansableman, eski i pa fer sans alors pou zisteman fer zot al laba e sa i enkli tou dimoun.  Pa nou tou ki kontan vwar en santenn travayer konstriksyon ki pa’n ganny peye pe bar en bout lavil oubyen pe mont dan lale State House, oubyen pe al somewhere else. 

Petet ler sa bann dimoun in kapab al dan sa landrwa zot a kapab ganny interview par TéléSesel bann dimoun i va filmen zot i ava montre ki pou dir i annan en rasanbleman sa bann dimoun, sa i ava dan lespri kree en landrwa pou sa bann dimoun kapab ale.  E  sa mon krwar i fer sans sa.  Mon pa krwar pou dir sa regilasyon kot nou pe restrikte Seselwa pe neseserman zistis kreasyon en Speakers’ Corner in the first place.   Ok sa mon krwar i en pwen ki mwan mon tonm dakor avek mover Mosyon lo la.

En lot eleman enportan Mr Speaker ki mon osi mon vwar i en pe drol, se sa bann zour.   Ou konnen mon  konpran bokou fwa nou dir par egzanp Dimans nou annan ki al lanmes i annan dimoun ki    lamazorite parti politik i fer rali ennler dan Dimans.  Nou fer bann rasanbleman deza dan Dimans, ou konpran.

So i fer sans pou nou espekte poudir nou pou vwar dimoun pe servi Speakers’ Corner dan Dimans.

E i enportan Mr Speaker a sa pwen pou mon pran en poz e pou fer Lasanble ek piblik an zeneral konpran.  Gouvernman li i kapab propoz son Speakers’ Corner, be nou ki Lasanble Nasyonal.  Dan Lasanble Nasyonal i annan LDS e byensir LDS pou sey tir son   kou politik ladan.  Zot bezwen atak Gouvernman.  Mwan mon pa’n vin la pou atak Gouvernman mon’n vin la pou regard sa lezislasyon ki Gouvernman in anmennen e si i pou meet sa Lezislasyon i deside ou li fer.

Mon dir sa Mr Speaker akoz mwan mon’n eksperyans kritik ki mon’n gannyen, avek zot lo lot kote latab e zot bann siporter apre ki Public Order Act ti pase.  E si dan lavi toultan ou pa aprann par leksperyans mon pou advise bann Onorab ki pli vye lo lot kote latab, pou servi leksperyans pou zot aprann ki fer menm kalite politik dan menm fason pa pou anmenn nou pei okenn par.

Set en politik ki nou bezwen fer kot nou regard keksoz dan en fason pli zis.  E i byen ki Egzekitiv in anmenn sa kot nou akoz nou, ou bezwen debat li.  Nou ki bezwen vwar kwa ki mal avek, nou ki bezwen anmenn nou bann konsern la.  E mon asire lo  mon kote latab i annan Manm ki dakor ek serten size ki  mon pe dir i annan ki pa dakor i annan ki dakor avek lezot size.  Me sa i lefe ki akoz nou pe fer sa rol prezantasyon ki nou annan pou dimoun.

Sa ki enportan Mr Speaker, se ki nou bezwen aksepte pou dir i annan keksoz ki nou bezwen fer li dan en serten fason.  E la kot mon vin sa bann pwen ki mon santi en pe kontansye la fason ki zot in move sa Mosyon.

Par egzanp ler sa regilasyon i koz lo bann plakar  bann keksoz koumsa.  Mon krwar sa ki nou pa lir se sa bout kot i dir ‘’containing violence or  lewd, obcene  or  indecent     expressions.  Sa dernyen  fraz i kategoriz tou sa bann kalite plakar ki pe vin avek.   Savedir esansyelman ki  mwan mon konpran la se ki pe dir ou, ou pa kapab anmenn en plakar ki demontre vyolans ;-  savedir ou pa kapab anmenn en plakar pou dir touy tou tel kalite dimoun, oubyen touy oubyen pous tou kalite dimoun.  Ou pa kapab anmenn sa bann kalite lekspresyon.  Se sa ki sa morso Lalwa pe dir. Ok?  Si ou plakar pa contain a lewd, obcene  or  indecent     expression, then i pa pou fer sans pou ou dir pou dir be i en keksoz ki ou pa kapab anmennen.  Mon krwar nou bezwen lir sa lartik  annantye sa regilasyon annantye.   I pa zis lo li tousel pe dir ou pa met plakar i dir ou i bezwen contain vyolans oubyen sa bann keksoz.

Lot pwen ki’n ganny raise se article 10 (d) la ki’n koz lo religiouis expression.  E mwan mon pa dakor 34avek assessment Onorab Georges avek tou respe ki mon annan pou li, ki mon krwar ki i pou en bon nide pou nou allow en dimoun ki annan en belief pou vin dan en landrwa e koz libreman lo son belief.  Mon dakor si i pe koz libreman lo son belief me pou koz libreman lo son belief e atak belief en lot dimoun.

Mon krwar nou bezwen nou bezwen met keksoz an perspektiv e serye about sa.  Akoz  mwan mon santi pou dir wi ou annan drwa eksprim ou lekor me ou drwa Lekspresyon i arete kot mon drwa i konmanse.

I normal sa, sa dimoun ki pe mars ek son plakar devan Lapos i ok i mars ek son  plakar devan Lapos.  Me i mars avek son plakar devan Lapos i pa devret pe anpes dimoun antre dan Lapos pou servi Lapos.

Konstitisyon i fer kler sa i annan en derogasyon ki egziste avek tou nou bann drwa.  E si nou, nou krwar pou dir egzers nou bann drwa e permet nou pou nou maltret nenport ki dir nenport kwa lo tou dimoun, ler nou dir en keksoz lo en dimoun nou pa provide levidans nou le atak tou dimoun.  Then i pa sa mon krwar kote nou le ale.  I pa sa souf ki nou le donn nou demokrasi.  Mon krwar nou lo bon semen me ki  fodre ou feR sir pou dir nou anmenn ou lo sa bon semen dan en fason dan en fason dan en fason drwat, akoz sa ki pou ariv nou a lafen dizour se ki nou pou perdi kontrol sityasyon.

Mr Speaker mon pou servi de legzanp pou montre resaman dan medya ki montre nou sa ;- nou pran legzanp Hongkong par egzanp.  Hongkong ler tou bann dimoun ti konmans fer protestasyon, lamazorite sitwayen ti par deryer bann dimoun ki ti pe fer protestasyon,

Be la ozordi ki nou’n vwar e Onorab Henrie in bezwen swiv sa lo CNN in annan  interviews ki’n ganny fer.  Bann menm dimoun ki siport sa mouvman pa siport lafason ki bann dimoun ki pe demann protestasyon pou eksprim zot lekor.  Akoz zot pa krwar dan kraz loto dimoun ;- zot pa krwar dan kraz laboutik dimoun ;- zot pa krwar dan atak en lot dimoun.

Me sa bann keksoz pe ganny fer akoz sa laliberte lekspresyon ki sa bann dimoun i annan, i pe ganny eksprimen dan en fason.  E se dan sa lespri ki m on oule osi ki  nou regard nou regard serten kontrol ki sa S.I in anmennen.

Me parey mon’n dir sa  bann kontrol i pa fer ki fer sa S.I bon.  Annefe se balans laliberte balans kontrol ki fer ki sa S.I i perdi son  valer, akoz kontrol i bokou plis ki sa laliberte  ki nou, nou anvi donn dimoun.   E se pou sa rezon  ki fer s S.I perdi dan en serten konteks.

En lot landrwa resaman ki nou’n vwar sa arive Mr Speaker se L’AngleterreL’Angleterre i annan sa bann dimoun ki ti proteste kot sa lesofman klima, the Extinction Movement.   Me ki nou’n vwar en moman donnen zot in menm mont lo bann tren ok, e fer parey anmar zot lekor ek tren menm lo avyon i annan problenm e ki nou’n vwar nou’n vwar lezot dimoun ki siport zot, ki pe dir ou sa i pa lafason ki ou bezwen fer li.

So mwan mon pa pou sezi sa loportinite pou mwan dir poudir  se sa ki LDS pe war.  Mon pa krwar ki sa ki LDS pe war.  Tou sa bann dimoun ki lot kote latab  i m on frer e mon ser Seselwa.  Personn pa anvi vwar nou pei dezenere.  Sa ki nou anvi vwar se ki tou dimoun i annan en  loportinite pou eksprim son lekor dan en fason ouver, e pou li kapab dir sa ki anvi dir, san ki i santi poudir i pe ganny constrain.  

Mon krwar se sa ideal deryer en Speakers’ Corner.  En Speakers’ Corner pa devret vin en legzersis dan sey kontrol ou regulate.  E mon konpran mon konpran Lotorite kote pe vini, Lotorite pe get li from perspektiv Lotorite.

Akoz se zot ki bezwen se Lotorite ki bezwen enforce Lalwa.  Se Komisyoner Lapolis ki bezwen fer sir i annan  ase zonm pou li mete otour sa Speakers’ Corner ler bann dimoun pe fer bann son bann deliberasyon,  ler bann aktivite pa arive.

So zot bezwen pe get sa dan son perspektiv.  Sa ki ou, ou pe anmennen ozordi konman Lasanble Nasyonal, ou pe anmenn perspektiv Lasanble Nasyonal.  Nou ki enterakte lamazorite ka avek plis dimoun.  Nou ki annan deliber koz avek dimoun – dimoun pe call nou pou en problenm kelkonk.  Dimoun pe enterakte lo bann problenm e nou, nou pe vin lo sa baz pou anmenn sa deba,

So mwan mon krwar nou bezwen ariv a en pwen  kot ou kapab ganny en lezislasyon for the Speakers’ Corner – ki parey mon ti dir dernyen fwa i reponn a lapel sa ki nou pe rode ozordi.

Son  lokasyon mon pe konklir Mr Speaker, son lokasyon i montre ou pou dir ankor enn fwa kot i annan sa de balans.  Mon krwar i bezwen annan en lokasyon pli ideal ki nou kapab propoze.  Onorab Henrie in koz lo Lesplanad mon krwar.

Ok sa letan ler ti annan nou ti annan an ’64 onwards nou ti napa sa kantite devlopman dan sa landrwa.  Probableman i ti ideal dan sa landrwa sa moman.   Me i kapab annan en  landrwa ki as ideal  ozordi ki match ek sa.  Akoz parey nou pe  dir en Speakers’ Corner,  oule en dimoun vwar ou, pe fer sa pwen.  Ou konpran?  It’s not ki oule al dan en lobskirite.  Mon krwar the thing i se ki ou pa oule sa dimoun i vin en afterthought.   Ou pe kasyet li laba akoz ou pa anvi vwar li pe koze.

Mon krwar se sa lespri ki’n soulev sa me kontantman towards serten pwen dan sa S.I. 

E  mwan mon krwar ki nou kapab fer konman en Lasanble Mr Speaker.  Mon remet sa devan Lasanble.  S.I in retournen avek an gran parti avek bann menm eleman, ki Lotorite ti’n vwar.  Mon ti a kontan konnen ki lesplikasyon Lotorite i annan pou sa.  Mon ti a kontan konpran ki lesplikasyon zot ti a donn nou.

Mon pe  get nou Order Paper Mr Speaker e mon pe vwar ki demen eski mon pe met devan Lasanble – eski i enposibilite ki nou kapab ganny bann Lotorite konsernen pu zot vini eksplik nou akoz serten desizyon ki nou kapab annan en dyalog aprofondi pou nou kapab move devan e rod en solisyon.

Selman as it stands la Mr Speaker mon pa santi poudir dan mon lopinyon pou mon sa S.I i reponn a sa ki  nou pe rode.   Malgre ki nou tou nou kapab fer nou politik avek sa S.I mon napa problenm.  Me selman nou bezwen aksepte osi poudir i  annan en pwennvi ki nou pa pe tande.  Depi ler nou’n diskit sa S.I premye fwa e la 2enm fwa nou pa ankor tann pwennvi Lotorite.

E mwan si Lotorite i vini i dir mwan i le stick ek sa, mon pa pou siporte.  Sa mon pe fer commitment and this is what that I think la.  Me selman  mon ti a kontan – mon ti a kontan konnen akoz nou  santi poudir i annan serten regilasyon ki zot bezwen mete;- akoz sa dimoun i bezwen en sitwayen Seselwa sa i mon lesplikasyon ki konman bann Manm Lasanble lezitimman  mon annan drwa demande pou gannyen.  E sel fason mon kapab ganny li se ki, si Lotorite i kapab vin dan Lasanble pou ou pou eksplik  nou.  Sa i demann ki mwan mon pe fer dan Lasanble.    Bearing in mind ki mwan mon napa – mon pa sorti lo kote lamazorite – mon pa pe eksprim lopinyon tou dimoun lo sa kote latab.  Mon pe eksprim mon lopinyon e mwan mon ava krwar sa i ava en legzersis ki  a permet nou ganny plis leklersisman.  E si nou deside apre sa ki nou  desizyon ti byen pou nou dir be sa S.I nou bezwen re aranz li, then nou fer li  pou nou re aranz li.

 Sa ki nou le selman Mr Speaker ki mon le termin avek se ki nou bezwen kapab bouz dan en direksyon kot nou allow serten freedom pou dimoun  kapab eksprim zot lekor.  Akoz nou’n pase sa  moment –   nou viv dan en lot letap e nou bezwen apresye sa nouvo letab ki nou pe viv ladan.   Mersi Mr Speaker.

 

MR SPEAKER

Mersi Onorab Pillay.  Bon nou pou pran en break nou a retournen 4:15 pou kontinyasyon deba.

 

(BREAK)

 

MR SPEAKER

Bon nou ava kontiny nou travay avek  deba lo Mosyon ki’n ganny prezante par Onorab Gervais Henrie.  Okenn lezot Manm ki le entervenir?  Yes Onorab Ferrari.

 

HON JEAN-FRANCOIS FERRARI

Bonn pre midi Mr Speaker.  Tre vit.  Moman ki m on pe siport Onorab Henrie i al dan sa Mosyon.  Pou mwan pa repet sa ki n dir mon ti a kontan azout de pti pwen ;-  premyerman mon ti a kontan dir avek bann Manm lo l ot kote latab ki sa kestyon Speakers’ Corner se zot ki pou benefisye an premye sa.

Alors  get li dan sa  loptik.   Akoz nou, nou pou dan bann Minister i annan ki pou State House, zot ki pou dan Speakers’ Corner!

 

(laughter)

 

HON JEAN-FRANCOIS FERRARI

Nou be!  E nou, nou.  Zot napa nanryen pou zot enkyet.  Nou pou serye, ek  bann zafer Lapolis la nou pou serye.

Me selman apart sa, apart sa zot pou ganny tou zot laliberte

 

(Interruption)

 

HON JEAN-FRANCOIS FERRARI

Zot pe nerve, tou kou.  Ou vwar Mr Speaker se pou sa ki enportan ki mon fer sa pwen.  Akoz bann Manm lot kote zot pa ankor realize poudir sa i en keksoz ki bon pou zot.  E se zot mon bann premye benefisyer.  E nou anvi ouver sa lespas konman en lespas laliberte. Pa en lespas kontrol.

Pli boner  ler  mon’n tann Onorab Pillay koze mon vwar pou dir menm si i pe fer en gran zefor pou li avanse ver sa laliberte ki pe – sa divan laliberte ki pe soufle lo nou pei, i annan sa bann bout kontrol ki reste.  Parey dan Lalwa.  I difisil mn konpran i difisil.  Apre 40an ki ou’n en Gouvernman in diriz en pei par lafors – par kontrol i difisil pou zot sanz sa mindset me selman mwan mon krwar ki – e mon dir zot ki zot napa nanryen pou per.  Se dan sa direksyon ki nou bezwen ale.  Nou bezwen brav, nou bezwen bold e zot bezwen akonpanny sa moman.  Zot pa devret reziste.  Se pou sa ki  mwan mon espekte i dan zot prop lentere – dan zot prop lentere zot siport sa Mosyon, ki pe anmenn laliberte lekspresyon pli pre avek dimoun pli pre avek sant lavil.  Ok?

Alors Mr Speaker mon’n dir mon pa pou koz bokou me selman mon ti anvi fer sa pwen, e mon santi vreman i en mesaz k i nou bezwen anvoye kot Gouvernman, kot Egzekitiv ler zot re vini avek bann sanzman   ki – Akoz nou tou, nou tou nou  anvi sa bann sanzman.  E ler zot re vini avek sa bann sanzman ki ouver sa lespas laliberte, fer li dan sa lespri, e fer li dan lespri ki se zot ki  pou bann premye benefisyer e alors pran otan plas dan sa mouvman ki pe arive.  Akonpanny li e fer li  vin zot Speakers’ Corner.  Mersi Mr Speaker.

 

(APPLAUSE)

 

 

MR SPEAKER

Mersi.  Non napa Right of Reply Onorab, ou’n koze.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker bonn apre midi tou dimoun.  Pa ti mon lentansyon pou koze lo sa Mosyon ozordi la.  E nou ti pe al siport sa Mosyon zisteman e avek lentervansyon Onorab Ferrari nou pa pou vot lo sa Mosyon.  Mersi.

 

(laughter)

 

MR SPEAKER

Mersi Onorab De Commarmond.  Bon napa personn ankor pou entervenir.  Mon ava retourn kot loter Mosyon.  En moman Onorab William ou ti le entervenir?  Laparol i pou ou Onorab William.

 

HON WAVEN WILLIAM

Mersi Mr Speaker.   Mr Speaker mon’n donn mon sipor pou Bidze Siplemanter.  Mon’n osi donn mon sipor pou ratifikasyon sa Protokol, lo bann prodwir taba, e Mr Speaker mon’n vwar pou dir sa de vot ki mon’n pran ti dan lentere pep Seselwa.  E lo sa Mosyon mon pou osi donn mon sipor, akoz mon santi pou dir nou merit dan en keksoz ki pli bon e mon espere ki ava annan bann kontribisyon ki’n anvoy devan letan ki sa S.I in ganny quash pou nou kapab ganny en meyer propozisyon.  Avek sa de pti mo Mr Speaker, mon pou raport mon sipor pou sa Mosyon.   Mersi.

 

(APPLAUSE)

 

MR SPEAKER

Mersi, mersi Onorab William.  Bon mon pou donn en dernyen entervenan laparol e Onorab mon donn nou pa plis ki 15 minit.  Onorab Simon Gill.

 

HON SIMON GILL

Mersi bokou Mr Speaker.  Mr Speaker mon pa pou ni konsonm 3 minit.  Me en mesaz ki  mon oule pase ozordi dan sa Lasanble, ozordi pa pou bann banben ki fek ne ki pa konn nanryen ki’n pase.  Me pou bann dimoun serye ki’n konnen ki’n pase dan sa pei.

Mon a dir zot e ki pase dan lemonn laliberte, you’re not given!  You fight for it!  E se sa ki nou’n fer depi ’64.

 

(APPLAUSE)

 

HON SIMON GILL

We fought for it e nou pou kontinyen fight for freedom dan sa pei.  Pe enport ki kote nou ete.  Si nou dan Lopozisyon demen bomaten oubyen si ou reste dan Gouvernman, pa enportan ki kote nou ete pa relevan kot nou ete.

Nou annan nou bann dimoun ki determinen.  Nou annan en misyon pou nou akonplir, konman en mouvman ki’n lager pou anmenn lendepandans dan sa pei ;- ki’n liber sa pep, ki’n donn sa pep son lidantite.  E nou fyer sa ki nou’n akonpli malgre tou bann lenperfeksyon ki’n kapab annan.  Nou pou kontinyen lalit pou ki sa pep Seselwa i reste touzour fyer, partou dan lemonn kot i ale!  Mersi bokou Mr Speaker.

 

(APPLAUSE)

 

MR SPEAKER

Mersi, mersi Onorab.   Mon krwar ou’n reste dan ou letan 3 minit.   Bon mon ava retourn kot loter Mosyon Onorab Gervais Henrie pou komanter ou Drwa Repons.  Onorab Henrie.

 

HON GERVAIS HENRIE

Mersi Mr Speaker.  E mon ava dir mersi tou ban dimoun ki’n entervenir lo sa Mosyon.

Mr Speaker laliberte i en batay konstan, e dan nou realite ozordi 2019 anmenn sa Mosyon pou lager kont en brans Egzekitiv.  Ki anvoy en Lasanble pronmnen kot bann dimoun ki la anndan, in ganny elekte, e reprezant lavwa dimoun laba deor en Egzekitiv in anvoy nou pronmnen deryer Ste Anne i touzour en lager pou nou ganny liberte, kont en egzekitiv ki i krwar i tro dominer ki pa oule ekoute.

Letan nou pe tann koz lo lager pou liber sa pep pou donn lidantite, pou donn lafyerte.  Be mon anvi dir ek bann dimoun laba deor pa bliye zot ti tir nou  dan en kaso zis pou met nou dan en prizon !

E nou bezwen kontinyen lager pou sa liberte.  E ozordi nou annan en Egzekitiv ki pa oule ekoute!  Mr Speaker Onorab Georges dan son prezantasyon in donn nou en zoli fraz, ‘’loportinite manke’’ e mon ava dir avek atraver ou Leader of Government Business, pou rekonsider son pozisyon.

E pou ankouraz son bann dimoun pou rekonsider zot pozisyon.  Parski nou pa pe lager avek Egzekitiv nou.  Solman nou le Egzekitiv i ekout Lasanble poudir i annan 3 lebra Gouvernman e nou kree  en lekilib dan nou demokrasi.

Lasanble in koze, Mosyon la zot ti kapab demann verbatim pou konn detay, ki nou ti dir.  E mon prezimen, ki Lasanble i anvoy en summary bann Mosyon ki i pase, kot Egzekitiv.  Zot ti annan zot 10 mwan – pa 10 zour.  Pa 10 semenn.  10 mwan.   Nou konnen nou isi anndan konbyen Minister ki angaze avek nou ki vin isi pou eksplik nou  bann keksoz en e teknik par egzanp.  Yer nou fek fer en konversasyon avek Departman Trade, lo bann Konvansyon, bann Lalwa ki zot pe bezwen anmennen.

Semenn avan nou’n koz avek Minis Finans – Minister Finans.  Semen pase mon Komite Medya Kiltir in zwenn avek Komite 250an parski i annan bann problenm bidzeter ki zot le solisit sipor Lasanble.

I annan en konversasyon ki pe bezwen deroule dan sa pei.  Nou pe koz lo koabitasyon.  Nou pe koze lo la.  E mon krwar ladan pou dir wi akoz sa pei i bezwen kontinyen marse li.  Ou konpran mon so si Lasanble in dir en keksoz pou dir get sa napa personn ki kont lideal sa Speakers’ Corner.  Me nou anvi ki i embrace sa ki nou demokrasi i sipoze ete epanouir lekspresyon laliberte lekspresyon right, pou gather pou eksprim ou lekor.

Be nou’n dir sa S.I ti annan tro bokou kontrol ladan.  Be bann dimoun pa’n tande.  Ki  fodre nou fer?  Nou bezwen desann ek en plakar anvil ?

Mr Speaker nou bezwen anvoy en mesaz for e ferm, kot Egzekitiv, pou dir nou pa pe asize on the fence, nou ti dir zot ki zot ti bezwen fer.  Zot pa’n fer dezormen nou pou bezwen pran en desizyon pou nou quash sa S.I. 

E mon santi mwan   pou dir ki rezon ki Gouvernman in kapab retourn avek sa parey i ti ete.  Mwan mon krwar pou dir en brans Egzekitiv ki pe flex son muscle en pti  pe mwan.  Konmsi pou dir nou pou dir sa ki zot, zot anvi.   E prezan nou deside ki nou pou fer avek.

E sa ki sagrinan dan tousala, bomaten dan deba lo Supplementary Budget de Manm lot kote latab Onorab Pillay Onorab De Commarmond in praise fason gouvernans Mr Faure.  Pou dir dan sa tirbilans politik par egzanp Onorab Pillay ti dir konmsi dan sa tirbilans politik in en Dirizan ki’n kapab tenir gouvernay e anpese ki nou tro balot isi e balot laba.

Be sa i kontrandi avek sa ki mon vwar brans Egzekitiv in fer.   Malgre pa li ki’n siny sa S.I,  se Minis pou Minis Dezinyen akoz portfolyo Internal Affairs i tonm anba son responsabilite Mrs Macsuzy Mondon ki’n sinyen.  Solman i kont sa lespri dyalog i kont sa lespri partaze, ekoute koabitasyon.  I kont sa lespri.

Nou pou quash sa S.I Mr Speaker, akoz  pou la senp rezon ki nou le ki  dezormen brans Egzekitiv i ekout swe e laspirasyon Lasanble  Nasyonal.  inisyalman   27  Manm ti vot an faver pou quash S.I 73 of 2018 ;-   27 Manm dan 33.

Be i en lavwa ase for sa.  E pou mwan it’s a slap in the face pou brans Egzekitiv retourn avek presidir menm dokiman word for word e parey mon ti’n eksplike pli boner, i annan zis en fraz ki’n tire konpare avek son orizinal.

E alor mon krwar poudir i kler, nou lentansyon, pou dir nou pa pe lager avek zot, me nou swete ki zot ti ava’n ekout nou e nou ti kapab bouz devan pou nou kapab epanouir nou demokrasi, sirtou an se ki konsern drwa lekspresyon dan Sesel.   Mersi Mr Speaker.

 

MR SPEAKER

Mersi Onorab Henrie.  Bon Lasanble in ariv lo en pozisyon pou pran en desizyon pou pran –  Yes Onorab Pillay.

 

HON SEBASTIEN PILLAY

Mersi Mr Speaker.  Mon konnen ou pe to the question before the House mon ti pe demann Lasanble mon ti le demann ou gidans Onorab Henrie in dir nou Egzekitiv in flex son muscle Lasanble pe deside pou quash en S.I e dan milye i tou dimoun ki pe esper en Speakers’ Corner. 

Eski demann  ki mon’n fer atraver Lasanble pou anmenn bann Lotorite konsernen dan Lasanble pou eksplik nou zot pwen i demann pou kapab ganny aksepte.  Sa mon pe met devan ou.  Mersi Mr Speaker.

 

MR SPEAKER

Mersi Onorab.  Mon krwar ou’n fer en demann, me loter Mosyon i pa pe aksepte sa demann,   i ti ava’n entertain sa demann.  Me ou annan en lot mwayen pou ou kapab bouz ou demann se ou anmenn li atraver en Mosyon anba mon krwar Standing Order 80.        Mon pa konnen  si oule mon donn ou sa sans si oule move  sa Mosyon.  Me selman non mon krwar pa si ou pou kapab,  mon krwar pa akoz ti devret moman ki ou, ou ti pe koze ou ti’n devret move sa Mosyon – ok?

        Dernyen opsyon se ki  loter Mosyon ti ava aksepte sa demann e i ti ava demande ki nou move dan ki nou parey ou pe demande demen nou al dan Staz Komite pou nou anmenn sa bann dimoun.  Me pa’n arive, ok? 

So strikteman dan Standing Orders  i pa pou allow, so nou pou pran en desizyon lo Mosyon ki devan nou, The National Assembly resolves to quash S.I 59 of 2019 in accordance with Section 44(2) of the IGPA Interpretation and General Provision Act.

Mon ava demann tou Manm ki an faver? Okenn Manm ki kont?  Madanm  Clerk.

 

MADAM CLERK

Mersi Mr Speaker.  15 Manm in vot an faver, personn kont.  Mersi.

 

MR SPEAKER

Bon savedir Mosyon in pase.  E S.I 59 of 2019 in ganny quash;- savedir in ganny anile par rezolisyon ki Lasanble Nasyonal in pran.  Non mon en pti pe per sak fwa zot quash en S.I ki mon a kapab ganny en 2enm case.  Me sa i ok nou kontinyen – se sa nou abitye.

Bon mon pou demann ek zot si nou pran en desizyon la, nou adjourn pou ozordi dan plas nou komans lot Mosyon lo Order Paper. E mon zis enform zot ki nou pou annan en Revised Order Paer pou demen bomaten sa ki pou enkli Scrutiny of Bills Committee Report. 

Ok nou pou kapab prezant sa rapor demen matin.  E apre nou ava kontinyen avek travay ki lo nou Order Paper.  Si sa i ok avek zot dakor i annan konsansis ki nou adjourn la nou repran travay demen matinOk?  So Lasanble i adjourn e nou pou repran nou travay demen 9er bomaten.

 

(ADJOURNMENT)