::
Home » Verbatim » 2019 » Verbatim Wednesday 30th October, 2019

Verbatim Wednesday 30th October, 2019

NATIONAL ASSEMBLY OF SEYCHELLES

Wednesday 30th October, 2019

 The Assembly met at 9am

 National Anthem

 Moment of Reflection

 Mr Speaker in the Chair

 

 

MR SPEAKER

Bonzour tou bann Manm Onorab e bonzour tou dimoun ki  a lekout ki pe swiv travay Lasanble Nasyonal.  Parey mon ti anonse yer nou annan en Revised Order Paper. Sa pou pran premye Rapor Bills Commitee.  E bomaten zis avan mon donn laparol Chair Bills Committee mon ava pas laparol avek Madanm Clerk ki ava fer Prezantasyon sa dokiman.  Madanm Clerk.

 

MADAM CLERK

Mersi bokou Mr Speaker. Bonzour Mr Speaker.  Bonzour tou manm e tou dimoun ki a lekout. Lo  prezantasyon Papye pou ozordi lo nou Rivised Order Paper nou annan Report of the Scrutiny of Bills Committee for the period of September, 2018 to September 2019 e Rapor pou ganny prezante par Chair  Komite Onorab Georges. Mersi Mr Speaker.

 

 

MR SPEAKER

Mersi Madanm Clerk.  Bon nou ava donn laparol toudswit Onorab Bernard Georges  dan son kapasite koman Chair of  Bills Committee.   Onorab Georges.

 

HON BERNARD GEORGES

Mersi Mr Speaker. Bonzour Mr Speaker.  Bonzour tou bann Manm Onorab e bonzour tou dimoun ki pe swiv nou travay dan lakour.  Mr Speaker mon annan plezir ek loner pou soumet 3enm rapor anyel Bills Committee avek Lasanble Nasyonal.

En parol remersiman avan;-Komite i met lo rikord son lapresyasyon a Manm ek staff Komite pou dedikasyon ki zot annan anver travay Komite souvan dan kondisyon difisil  e envaryableman anba presyon.

Pandan sa lannen e sa lannen  se Septanm 2018 ziska Septanm 2019  parey Clerk in anonse. Onorab Simon Gill in ganny ranplase lo Komite apre Onorab Johan Loze. Nou welcome Onorab Loze lo Komite e remersye Onorab Gill  pou son servis koman en Manm. Nou osi rekonesan ki  ou Mr Speaker ou’n deside reste lo Komite  koman en Manm ex officio apre ou eleksyon koman Speaker boner an 2018.  Speaker e Deputy Speaker ensi ki nou 2 Leader dan Lasanble in asiste bokou e  souvandfwa laplipar meeting Komite e zot in fer kontribisyon son valab.  Attorney General in osi asiste plizyer meeting Komite e nou rekonnet prezans ek kontribisyon ki zot tou zot in fer.

Rapor 2018-2019 :

Parey nou’n fer dan bann lannen presedan, Komite in konsider tou Prozedlwa ki pibliye dan Official Gazette. Dan sa dernyen lannen  Komite in konsider 15 Prozedlwa.  En lalis konplet in ganny anekse a sa rapor.  3 Bill i pending pou le moman  e sa Alcoholics   Drinks Control Bill, Civil Code of Seychelles Bill ki son deba in ganny ranvwaye e Public Service (Amendment) Bill ankor enn fwa ki son deba li osi in ganny ranvwaye pou kontinyen pli tar.  En Bill in ganny remet avek Gouvernman pou plis konsiderasyon e modifikasyon e sa se Mental Health Care Bill ki prezan in ganny modifye e in retourn kot nou. Konsiderasyon  lo 2 lezot Bill in ganny ranvoye an atandan en  rapor OECD e sa se Tourism Marketing Tax (Amendment) Bill e Corporate Social Responsibility Tax (Amendment) Bill.

Parey Lasanble pou rapel sepandan plizyer Bill in ganny konsidere an gran detay e pou fer zot rapel sa se Control Dogs Bill, Tourism Development Bill, Physical Planning Bill, ANTI- Corruption (Amendment) Bill, Referendum Bill ek Seychelles Fire and Rescue  Services Agency (Amendment) Bill. Bill pou amann Kod Sivil, in war Lasanble rankontre pou en 2enm fwa dan en sesyon plenyer  e piblik avek Komite e dan prezans eksper enternasyonal. Apepre lanmwatye sa Bill in ganny konsidere dan Second Reading e Lasanble pou kontinyen deba lannen prosenn pou konplet sa travay. 

        Antan ki Chair Bills Committee, mon ti ganny envite pou adres en seminar a lokazyon Lazournen Konstitisyon an Zen. Mon ladres ti baze lo rol Lasanble dan Sistenm  balans pouvwar dan nou pei. Teks sa ladres ti ganny sirkiler par Sekretarya.

Metod Travay :

Prosedir ki Komite ti’n adopte lannen pase, in kontinyen.  Setadir pou  Bill pli konpleks pou envit promoter sa Bill ek legal drafters pou asiste meeting Komite avek rezilta ki okenn amannman i  ganny fer san en fason konpreansivLavantaz sa prosesis se ki ;- premyerman letan  dan Committee Stage i ganny redwir akoz bann sanzman tipografik i fini ganny fer par Komite.

(2) Bann sanzman dan Polisi  i ganny adrese avan Second Reading e parfwa sa i fer ki bann sanzman plito radikal e  sibstansyel i ganny fer fan en fason sistematik e koeran. 2 legzanp se Tourism Development Bill lo size klasifikasyon lotel e Physical Planning Bill lo size konpozisyon Board en notis ki bezwen ganny donnen lo vwazen en devlopman.

3)  Manm Lasanble i ava konsantre lo merit Bill e non pa lo bann pti problenm.

Natirelman avek sa prosedir lamazorite travay   i tonm lo Komite.  Dan tou ka apard bann pti Bill senp Komite i prepar e in soumet en rapor ek Lasanble avan ki Bill i ganny lir pou en 2enm Fwa.  Sa rapor i souliny okenn problenm lo lekel Minis ek Manm lasanble i devre port latansyon spesyal. Addiyzonelman pou bann Bill plis sibstansyel en versyon tract sa Bill avek bann lamannman propoze e wording alternativ i ganny sirkile e parfwa prozekte pou ed deba e dan Staz Komite Lasanble.

Pandan sa lannen Komite i akey Ms Iris Carolus nouvo Konseye Legal pou Lasanble koman en obzervater dan nou meeting. Koman en avoka avek leksperyans dan legal drafting Ms Carolus in kapab pran en tel responsabilite pou travay Komite tel ki prepar  rapor komite e propoz lamannman a plizyer Bill.

Malgre sa metod travay Mr Speaker, Komite in kontinyen obzerv plizyer defayans. Sa i ganny resite dan prosen seksyon e sizesyon i ganny fer pou lamelyorasyon.

Alor komanter e  rekomandasyon.

Komite i ankor enn fwa remersye Gouvernman  pou son langazman positif avek Komite pou lafason ki i pare pou aksepte konsey ki Komite   i donnen  e pou rankontre avek Komite dan en fason pou promot  meyer devlopman Lezislasyon dan nou pei. Maryaz ant Egzekitiv ek Lasanble Nasyonal an sa ki konsern  Lezislasyon, pa toultan enn ki fasil. Minis pa toultan apresye ki Lalwa ki zot in travay lo la pou plizyer mwan e dan serten ka plizyer lannen i ganny sanze radikalman dan prosesis Lezislatif.  Sa nou konpran me sa i osi inevitab si i balans pouvwar ant bann lorgann Leta pou ganny respekte.

2enm komanter, Komite i eksprim son remersiman pour bann manm piblik ki’n angaz avek nou apre piblikasyon Prozedlwa. Dan plizyer ka sa in anmenn Gouvernman swa pou revwar e reviz en propozisyon. Swa pou enkorpor sizesyon dan sa Prozedlwa.  Sa  langazman ti vizib  ek tre pozitiv  dan konsiderasyon Tourism Development Bill  ek Code Civil.

3enm komanter: Nou regrete ki nou bezwen raporte ki Komite i  krwar ki dan bokou ka Lalwa i  ganny fer tro vit e pa ase letan i ganny rezerve pou konsiderasyon par piblik, ant zot piblikasyon e zot enklizyon lo Order Paper.  Dan nou rapor lannen pase nou ti rekomande ki Gouvernman  i annan son prop lazanda Lezislatif, e  nou ti demande ki ase letan i ganny donnen pou konsiltasyon  ant Manm Lasanble avek zot elekter avan ki Bill i ganny debat.  Nou  kontan pou met lo rikord ki in annan en amelyorasyon dan sa sistenm sa lannen.

An partikilye nou oule remersye ou Lofis Mr Speaker pou kapab met Bill lo Order Paper pou debat osi lontan ki sa Bill pa’n ganny konsidere par Bills Committee.

4enm komanter. An menm tan ki Komite i  rekonnet e apresye lentere  plizyer Manm Lasanble in demontre pou travay Komite par zot  partisipasyon  dan meeting  Komite, nou regrete pou note ki serten Manm Lasanble, enkli Manm Komite li menm pa fer en fason pou angaz avek tou Prozedlwa e les sa  pou zis serten Manm fer.  Nou konpran ki Manm Lasanble pou  pli enterese avek Prozedlwa ki konsern en sekter ki enteres zot.  Me nou bezwen fer lapel Manm Lasanble ki  se Lasanble  an antye ki Brans Lezislatif Gouvernman e non pa Bills Committee. 

         Alor nou demann en tou Manm Lasanble ek bann Caucus Parlmanter  pou pran plis lentere dan tou Prozedlwa pou asire ki deba dan Lasanble i prodiktif e Lalwa Ki nou pase i sa ki pli bon pou nou pei.   Manm Komite i ganny sirtou demande pou asiste  meeting Komite e vin  byen prepare pou kontribye  dan travay Komite.

5enm komanter: Nou’n kontinyen zwir avek lasistans Biro Attorney General pandan sa lannen, me nou bezwen met lo rikord ankor enn fwa ki bokou Bill i ganny pibliye avek fot.  Dan serten ka nou bezwen retourn Bill pou zot revwar parey nou fek dir – enn sa legzanp se Mental Health Care Bill. Sa i pa enpir konfyans piblik. Komite i swete war en amelyorasyon dan sa lannen ki pe vini.

6enm komanter : Komite i swete fer en sizesyon avek L’Egzekitif  pou son konsiderasyon.  Dan plizyer pei  Commonwealth, i annan en pratik pou prezan ansanm avek en Bill en Bidze detaye pou son lenplimantasyon ek en timeline pou  son ruling out.   Komite i  krwar ki en tel pratik pou en bon lide pou Sesel.   Sa prosedir i  permet en Minister ki ansarz sa Bill pou focus lo bi sa Lalwa e i osi permet Lasanble pou annan en bon lide  pou son lenpak finansyel avan ki nou aprouv li.  Nou demann avek Gouvernman pou konsider sa propozisyon, e Komite i swete ki Lasanble i ava siport sa nide.

7enm e dernyen komanter :     Finalman Komite ti a kontan anonse ki avek lefe imedya pou sak Bill ki  ganny aprouve par Lasanble, en memorandum ki donn en pti rezimen rezon deryer sa Bill  e rezon pou okenn lamannman pou swa repeal en Lalwa egzistan, pou ganny prepare dan en fason ki en rikord listwar sa Lalwa pou toultan la pou kontestasyon par Manm e  Lasanble fitir.

Sa memorandum pou ganny prepare par  Minister ki promot sa Bill e pou ganny revwar par Bills Committee apre ki Bill in ganny lir en 3enm Fwa. Apre sa, sa memorandum pou ganny sirkile par  avek tou Manm par Sekretarya e depoze kot  sant resours Lasanble pou konsiltasyon par Manm ler sa i neseser.   Mersi Mr Speaker. Sa se rapor Bills Committee, pou sa lannen ki de-koule Mersi bokou.

 

MR SPEAKER

Mersi Onorab Bernard Georges lo sa prezantasyon. Nou ava kontinyen avek nou  travay lo Order Paper.

 

HON BERNARD GEORGES

Avan ki nou fer sa Mr Speaker, permet mwan prezant ou avek Sekretarya avek 2 kopi sa Bill.  Ou ava war ki Manm in sinyen sof Onorab Aglae ek Onorab John Hoareau ki pa dan pei e zot ava siny sa rapor, ki en rapor ki tou Manm  Komite in aksepte  osito ki zot retournen.

 

MR SPEAKER

Mersi Onorab Georges.  Petet zis ankor pou mwan enform bann Manm nou annan enn de Bill parey Onorab Georges in dir ki’n vini  ki’n komans ganny konsidere  par Bills Committee apre nou bezwen fer retournen. Petet bann Manm ava pe rode kwa ki pe arive avek.  I annan bann travay ki kontinyen ganny fer ant Bills Committee, Biro Attorney Zeneral  e osi tou Cabinet.  I annan bann Bill ki bezwen ganny repas lo la, e i bezwen retourn devan kot Cabinet. Par egzanp Mental Heath Bill e la in retourn ankor kot Lasanble e Bills Committee  i ava donn li en 2enm konsiderasyon.  I annan Immigration Bill ki en Bill vreman enportan ankor ki nou konnen  i annan bann Manm pe demande ki pe arive avek. Li osi tou in retournen e mon okouran Minis in enform mwan ki  i  pe pas dan Cabinet avek bann sanzman ki menm Bills Committee in propoze  ler nou ti war sa premye dokiman e  nou pou  regarde ankor parey mon dir ankor si nou fini boner avek deba lo Bidze, nou pou probableman pran enn de sa bann Bills ki i enportan pou nou  kapab debat lo la  e regarde si nou kapab pran en desizyon lo la avan ki nou al dan recess.  So vwala  en pti pe mon komanter osi. Yes Onorab Sebastien Pillay.

 

HON SEBASTIEN PILLAY

Bonzour Mr Speaker e bonzour tou koleg Onorab. Mr Speaker mon ti a kontan demann ou permisyon zis pou fer enn de pti komanter vizavi sa rapor ki’n ganny table par Chairman Bills Committee.

 

MR SPEAKER

Go ahead Onorab.

 

HON SEBASTIEN PILLAY

Mr Speaker sa rapor ki Chairman Bills Committee in table ozordi i en rapor si oule ki soulinyen pti pe parkour ki nou‘n fer koman en Bills Committee koman en Lasanble  pou nou revwar si oule  lafason ki nou regard Lezislasyon.  E i enportan pou nou souliny sa akoz lenportans travay ki nou’n fer se ki enteraksyon avek Bills Committee i en  learning experience  pou tou Manm.  E si Manm in partisip dan sa prosesis, i pou en loportinite pou nou  kapab aprann  lavantaz  lo lafason ki en Lalwa i ganny striktire,  son lenportans ki i annan. Me pli enportan ki mannyer Gouvernman dan son progranm travay, i pou enplimant sa bann Lalwa.   Alor mon ti a kontan met lanfaz lo 2 pwen ki Onorab Georges in soulinyen.

Premyerman en pwen ki enportan se ki nou  bezwen fer sir ki sa mesaz i al fer L’Egzekitif, ki si nou pe vin avek en Lalwa par egzanp pou en nouvo Lazans, nou bezwen vin avek en leksplikasyon  son konponan bidzeter ki sa pou entail.  Akoz souvandfwa nou  vin avek sa nouvo Lalwa apre nou  pa pou  kapab war en Bidze Siplemanter  or something  pe vini pou dir nou bezwen fer sa. So i bezwen annan en kalkil ki pe vin avan pou montre  poudir i annan en pratik.  E sa i enportan akoz se sa rol Lasanble an zeneral. Mon konnen parfwa nou regard keksoz dan en pwen vi partizan me si nou regard en keksoz dan en pwennvi Lasanble se sa laliny  nou bezwen pran going forward pour ki nou asire ki lepep Seselwa la deor i konpran ki pe pase.

Apre dezyenmman en keksoz ki mon ti a kontan ki nou konman Bills Committee nou konsidere devan Lasanble, se pou nou prepar si oule en fason pou nou angaz avek piblik an zeneral, pou kontinyen edik piblik lo prosesis ki en Lalwa i bezwen pran, e fer dimoun konpran ki en Lalwa pa zis vin dan Lasanble apre once Manm i aprouve, that’s the end of it.

Ou bezwen annan en follow-up lo bann Lalwa ler i pe ganny enplimante.  E se pou sa rezon ki Onorab Georges in koz lo sa mémorandum.  Sa memorandum Mr Speaker i vreman enportan akoz souvandfwa mon par egzanp mon konman en Manm mon pa en dimoun ki’n train dan domenn legal me mon pou arete pou mon konpran akoz en sanzman ti ganny fer dan en Lalwa a en moman, ler ou annan sa memorandum i pou ed ou konpran akoz oubyen i annan bann rezondet deryer sa bann sanzman.

E se pou sa rezon ki i enportan ki sa rapor i ganny parfwa nou konnen nou regard rapor lezot bann Komite ki ou kapab dir sa bann en pti pe plis bann star dan Lasanble ki pran serten presedans oubyen serten limelight.  Me rapor Bills Committee whilst i pa en rapor ki si oule parey pou regard li konman en film d’aksyon, me i en rapor vreman enportan akoz se li ki set labaz pou lezislasyon ki mannyer i ganny fer e nou pou war son lenportans sirtou ler nou pe konsider sanzman dan Standing Orders ki pe vini.

So mon ti a kontan remersi tou Manm Lasanble kekfwa partisip ek nou e osi remersi tou bann dimoun tou bann Manm Bills Committee mon konnen i en zefor konsiderab ki nou mete e pou nou kapab fer sa travay e ki nou kapab kontinyen fer sa travay dan sa laliny e si oule koste pli pre dan standar dan lafason ki nou konsider bann Lezislasyon ler i vin devan Lasanble.   Mersi Mr Speaker.

 

MR SPEAKER

Mersi Onorab Pillay.   Bon mon krwar lapros ki Bills Committee in pran i en lapros ki byen e i en lapros ki enklisiv e nou war dan plizyer lenstans kot nou kapab open up dan Bills Committee.  Nou’n fer li antre nou menm nou.  Nou’n fer extended Bills Committee kot bann Manm ki enterese i vin attend e zot in ganny sans osi tou pou vin fer serten komanter pou donn zot pwennvi.

Me nou’n osi al pli lwen.  Nou’n al osi ver bann Manm piblik parey ou’n dir Onorab Pillay e bann stakeholders zis pou donn detrwa legzanp Alcoholic Drinks Bill.  Nou’n kapab enterak avek bann stakeholders;- par egzanp Retailers Association, Licensing, Lapolis and so on.  Nou’n fer li.  Civil Code nou’n al direkteman an direk avek Manm piblik dan en fason pou nou kapab angaze e pou nou kapab ganny bann rannman bann fason pou nou kapab regarde konman nou Lasanble, nou pou kapab aprouv en Lalwa parey Onorab Georges in dir – en Lalwa ki pa pou suit en dimoun en Lalwa ki ava bon pou nou pei pou tou dimoun.

Nou’n war Tourism Bill par egzanp sa amannman Tourism Bill ankor kot nou angaz avek lezot stakeholders e mon krwar i sa the way forward ki sa Lasanble in set.  E mon pou donn mon lofis e lofis Madanm Clerk pou donn tou sipor pou nou kapab kontinyen dan sa direksyon ki mon krwar i en bon fason pou nou fer nou travay.

Bon avek sa mon ava zis parey labitid mon pas en pti pe vitman brefman lo status bann travay bann Bills ki pending devan nou Tourism Marketing Tax Tax (Amendment) Bill 2019 avek Corporate Responsibility Tax (Amendment) Bill 2019 sa i pou vin i pou ganny pran apre ki nou fini avek Bidze.  E parey zofisye Minister Finans in dir mon i ava donn zot osi letan pou zot kapab fini angaze avek bann stakeholders e osi byen analiz rapor OECD.  Code Civil Sesel nou fini fer en desizyon atraver ABC.  Nou pou kontinyen avek Code Civil apre bann repons Leta Lanasyon an 2020.

E Public Service Public (Amendment) Bill 2019 parey zot tou zot okouran, case i lakour e Lakour Konstitisyonnel pou rann zizman Mardi le 26 Novanm e la apre nou ava regarde the way forward.

Prezan nou ava al lo kontinyasyon travay ki lo Order Paper e Mosyon ki ti konmans ganny debate lo la semenn pase, Mosyon ki ti move par Leader Lopozisyon nou pou kontinyen li a en moman pli tar petet ankor apre Bidze, an vi ki loter Mosyon i lo en Misyon aletranze.  Nou pou alor bouz lo prosen Mosyon ki lo Order Paper e sa i en Mosyon ki pe move par Onorab Jany De Letourdie.

Onorab De Letourdie mon ava donn ou laparol.

 

HON JANY DE LETOURDIE

Mersi Mr Speaker.  Bonzour Mr Speaker e bonzour tou dimoun.  Mr Speaker misyon Minister Lanplwa e Resours Imen se osi pou kre en sosyete avek en fanmir solid, alors se pou sa rezon ki i annan lentansyon pou reviz son Polisi tou le 5an e enn parmi son bann lobzektif son bann polisi se pou promot lanplwa apropriye pou bann travayer e bann dimoun vilnerab, tel parey bann zenn, bann dimoun avek dezabilite e osi bann madanm.  Mr Speaker me an se moman dan Sesel malerezman i annan bokou konsern ki sa kalite fanmir Seselwa ki nou ti konnen otrefwa, ki ti annan manman papa ki ti viv ansanm pou elve soutenir e propaz bann bon valer moral parmi zot bann zanfan pe zour an zour tonm an dekadans.

Parmi bann plizyer rezon akoz ki sa i leka, i sa krwayans ki dir akoz manman nepli la kot lakour pou fer sir e ki pe pran kontrol e pe kordin tou keksoz letan ki li papa in al rod dipen pou tou lafanmir.

Mr Speaker avek evolisyon lavi e lezot defayans ki sirkonstans i plonz li ladan, e lefe ki i pa pe ganny en saler pou sa metye nob ki apel fanm lakour, en madanm i war li neseser ki i al anploye pou li sonny son zanfan, sonny son prop lekor oubyen pou ed papa pou fer sa debout zwenn.

Me an menm tan ki nou pe war plis madanm ki pe kit lakour pou al travay, parmi i annan bann manman e osi bann manman tousel ki napa sipor en papa, oubyen sa lot lanmwatye ki pe reste ansanm pou fer sa fanmir konplet e pou partaz responsabilite,  nou prezan war ki i annan plis bann ka delenkan, labi seksyel e lezot fleo sosyal ki i prezante, akoz bann miner i san sipervizyon pou en gran peryod letan.

Me  en madanm i bezwen travay Mr Speaker – sirtou ler i war li tousel pe debout.  E i inevitab ki i annan en kantite metye ki a tou pri ou bezwen travay shift.

An menm tan ki nou pe war plis manman aprezan ki pe kit lakour pou al travay ,parmi i annan bann manman e osi bann madanm tousel ki napa sa sipor papa, e sa lot lanmwatye ki pe reste ansanm pou fer sa fanmir konplet e pou partaz responsabilite, i annan plis bann ka delenkan ka labi seksyel e lezot fleo sosyal ki reprezante akoz bann miner prezan zot pe reste san sipervizyon pou en gran peryod letan.

Me parey mon dir madanm i bezwen travay Mr Speaker sirtou si i war li tousel pe debourye e par natir i annan en kantite travay ki i antre ladan ki i bezwen annan shift aswar.  Granmoun i dir pa met tou dizef dan menm pannyen.  E la alor mon dir bravo pou sa bann madanm tousel ki an plen sirveyans, malgre zot in travay lizour konman aswar zot in sorti venker pou elve e donn ledikasyon zot zanfan.  Krwar mwan Mr Speaker i pa en latas fasil parey nou dir Angle I’ve been there.  Mon osi rekonnet ki i annan plizyer papa tousel ki pe osi devoue pou fer grandi zot zanfan lebra kase.  Sa ki for i rebondi me sa ki vilnerab i tonbe e pa kapab leve san led lasosyete.

Rapor National Bureau of Statistic Zen 2019, i donn nou en lendikasyon ki lakantite anplwayer ki dan biznes asosye avek lendistri tourizm dan prive dan parastatal dan Gouvernman, i reprezant 23.6 poursan lanplwa.  Ladan i annan 18.3poursan bann travay ki dan servis akomodasyon ek restoran.

Mr Speaker sekter tourizm i ankor reste sa landrwa ki atrakte bokou madanm sirtou bann zenn pou pran en lanplwa petet akoz natir sa travay ki baze gran parti lospitalite lakey e bann travay domestik ki bokou madanm i war ki i pa sitan difisil pou desarz sa responsabilite e osi en pti pe det akoz i pres avek son natir.

I osi ase fasil pou ganny travay dan sa bann sekter.  Sa i en bon siny Mr Speaker akoz sa i montre lenportans ki nou bann madanm nou atase avek sa lendistri akoz zot osi konsyan ki tourizm i enn nou pilye lekonomi pli enportan.  An se moman dan Sesel pos ki bann madanm ki okipe dan sekter tourizm sirtou lotelri i varye.

Mr Speaker me ki nou war en kantite plas travay ki ankor vid me an menm tan ki ankor annan plizyer madanm ki pa dan lanplwa sa sekter li i bezwen fer fas avek gro travayer etranze pou ranpli sa bann pos.  I annan plizyer rezon ki nou isi dan sa Lasanble nou kapab donnen akoz sa sityasyon i tel kel.

Me Mr Speaker i pa totalman vre ki Seselwa pa oule travay i annan plizyer ki kontan pou travay dan lotelri me zot pa ti a voudre fer shift aswar akoz zot santi zot zanfan anba laz pou reste tousel kot lakaz.

E i annan ki pou rezon zot sekirite, zot pa ti a kontan antre dan lakour tar aswar.  An menm tan osi si zot pou pey en dimoun pou reste avek zot zanfan, i pa pou pratik pou zot akoz zot santi ki zot bezwen pe fer saving lo tou sa bann pti sou.

Mr Speaker mon enn sa lavwa pou bann madanm dan 6enm Lasanble, e mon ti a kontan demann avek Gouvernman pou etidye e met an plas bann nouvo kondisyon travay, pou permet ki bann madanm Seselwa ki kapab e ki ti a voudre travay dan sekter tourism, pou ganny priyorite pou travay zis shift lizour si zot prefere, avek bi pou ankouraz zot pou pran lanplwa dan sa sekter enportan pou lekonomi.  E ki a osi ede kre bann kondisyon favorab pou zot kapab pran swen avek zot zanfan, zot lakour anfen pou ed nou pei Sesel  kree sa sosyete bann fanmir solid.  Mon demann tou mon bann koleg madanm Onorab Lasanble e osi bann Onorab msye, pou siport nou bann madanm Seselwa e ed zot antre dan en lanplwa an menm tan ki zot kontinyen bers zot fanmir pou en fitir sosyete solid.

Mon remersi ou Mr Speaker.

 

(APPLAUSE)

 

MR SPEAKER

Mersi Onorab De Letourdie.  Bon okenn Manm ki segonn Mosyon.  Yes Onorab Flory Larue.

 

HON FLORY LARUE

Bonzour Mr Speaker.   Bonzour tou dimoun.  Mon ti a kontan segonn Mosyon silvouple e entervenir lo la.

 

MR SPEAKER

Mersi Onorab Larue.  Bon Mosyon ki devan nou e ki’n ganny segonde pe demann sa Lasanble:

Ki sa Lasanble i demann avek Gouvernman pou etidye e met an plas bann nouvo kondisyon travay, pou permet bann madanm Seselwa pou kapab travay dan sekter tourizm, pou ganny priyorite pou travay shift lizour avek bi pou ankouraz zot pran lanplwa dan sa sekter enportan pou nou lekonomi, e osi ede kre bann kondisyon favorab pou zot pran swen zot zanfan e zot fanmir.

Mon ava pas laparol avek Onorab Flory Larue pou son entervansyon.

 

HON FLORY LARUE

Mersi Mr Speaker.  Mr Speaker dapre statistik pou 2enm kar 2019 i dir nou ki i annan 11,300 dimoun ki travay dan bann sekter ki donn bann servis.  Bokou sa bann dimoun i travay dan sekter tourizm e zot travay bann travay shift work.  Me nou’n osi war bann louvraz shift dan sekter lasante e menm dan sekter sekirite.  Bokou sa bann travay i ganny fer par bann madanm.

Nou osi konnen ki nou annan bokou etranze ki pe travay isi Sesel, dan tou sa bann sekter e sa i enkli madanm ek msye.  En travayer etranze ki ganny anmennen Sesel pou ranpli okenn louvraz dan sa bann sekter ki fer shift i fer ki en lot Seselwa pa kapab ganny sa lanplwa e parfwa i senpleman akoz sa sityasyon familyal ouswa lozistik rezidansyel pa permet li pou li travay aswar.

Akoz sa bann rezon i annan dimoun alor ki napa en lanplwa, ouswa i sanz lanplwa souvan akoz difikilte pou ranpli son devwar pou li kapab travay aswar.  Sa i anmenn en kou siplemanter pou pei akoz sa dimoun i trouv li i pe bezwen al rod lasistans sosyal oubyen tonm dan en aktivite ilegal ki dan li menm i anmenn son konsekans sosyal.

Eski Gouvernman in mank en loportinite pou idantifye tou bann rezon ki kapab fer en madanm ouswa rn msye Seselwa pa travay dan sa bann louvraz shift?  Si sa i leka, eski Gouvernman pa devret reflesir ankor lo bann limitasyon ouswa, aviz nouvo devlopman nouvo striktir pou retourn nou dimoun dan lanplwa?

Parkont Mr Speaker sa Mosyon pe koz spesifikman lo bann louvraz dan sekter tourizm, ki en pilye nou lekonomi akoz sa i en sekter mazer e avek en gran group Seselwa ki pa dan lanplwa, i annan en loportinite pou reviz son rol e enplimant bann regilasyon pou kree e promot bann kondisyon favorab pou nou bann madanm.

Mr Speaker en travayer etranze i pa parey en Seselwa.  Isi laplipar bann travayer etranze i vin Sesel tousel e non pa an koup.  Sa i fer ki zot napa sa kote familyal dan zot lavi toulezour, letan zot pe servi Kontra.  Zot ganny en saler parey sa Seselwa, me li sa etranze son akomodasyon i ganny peye pou li e ganny en Bidze Siplemanter par mwan pou son manze.  Sa i bann benefis ki ankouraz li pou vin Sesel si non i pa ti pou vini.  Pareyman en sitwayen li osi i bezwen rod son lavi, alor li osi i vin travay dan menm louvraz parey en koleg etranze menm si zot fer menm louvraz zot sityasyon pa parey.

Sa etranze li letan i leve i parfwa pa bezwen balye deor, netway lakaz, prepar dinen, pou en fanmir, prepar manze bwat liniform enn de trwa kat ou menm plis zanfan pou al lekol.  Sa i fer ki sa de dimoun pa lev menm ler.  Sa i zwe en rol lo lenerzi en endividi e depan lo kantite responsabilite anver son lakour travay aswar i kapab pa en opsyon.

Bokou sa bann madanm i bann manman e akoz sityasyon sosyal ki pa idantifye Sesel, bann madanm i kapab souvan bann manman tousel nou annan en problenm avek nou striktir sosyal ki’n sanze o kour di-tan lontan nou ti annan granmanman, tantin, tonton en manm fanmir ki ti toultan reste obor kanmarad ki ti la pou kapab ede.  Sa in sanze dimoun pa neseserman reste pre ek fanmir konmela.  Si en shift i konmans 3er apre midi sa madanm ki son zanfan pe antre sorti lekol, eski i asire ki son zanfan pe ganny byen ankadre?  Menm si sa lezot dimoun i pran li e li sa dimoun i travay se apre 5er ki sa zanfan pou ganny anmase.  Napa servis gard zanfan la aswar e menm si i ti annan petet sa bann dimoun dan sa sekter pa ti pou kapab pey sa servis, me selman ti a ede annan pou lezot sekter.

Mr Speaker si en dimoun i travay aswar, i bezwen en dimoun pou siperviz son zanfan sirtou si zot pti zanfan.  Nou’n idantifye ki zanfan i mank sipervizyon, e souvan zot nanryen fer.  Sa mank sipervizyon i anmenn bann defi sosyal ki pou okazyonn serten problenm e mon krwar nou war li otour nou ozordi.

Zanfan Mr Speaker i mank lakonpanyman son paran pou fer homework, akoz son paran pa prezan si i pe shift work.  Minister Ledikasyon i bezwen met lanfaz lo sa lakonpannyman apre lekol ki byen ankadre.  Sa travay i kapab ankadre nou sosyete pou kapab siperviz pli byen aksyon nou bann zanfan e sa osi i kapab kre lanplwa.  I kapab kre en lot kad loportinite travay pou enlot manman ki li son zanfan i pli pti e ankor pe lekol.  Parkont en pli meyer servis sirveyans apre lekol ti pou benefisye tou paran Mr Speaker isi Sesel, ki travay.  Akoz nou tou nou konnen ki lekol i fini 2.30 me travay normal li i fini 4er.  Menm sa paran ki pa travay shift work pa war son zanfan apre 5er ou menm pli tar.

Lekel ki kapab garanti ki son zanfan pe fer si en paran napa bann lozistik pou akonpanny sa zanfan?  Gouvernman i kapab zwe en rol pou asiste nou bann zanfan ek nou bann paran Mr Speaker.

Eski nou bann zenn pe ganny tou lasistans pou distrer zot atraver tou bann diferan aktivite tel ki sipor akademik ouswa spor ou menm lar parey danse, e zwe en lenstriman lanmizik dan bann letan apre lekol?

Mr Speaker tousala i enportan pou siport en manman ki fer shift work pou donn li sa konfyans ki son zanfan pe fer en keksoz apre lekol ziska en lot adilt i pran li.  Mr Speaker lozistik finansyel osi i afekte en madanm pou li travay aswar, akoz zot lokasyon kot zot reste i souvan pres avek zot travay.  Bann travayer etranze zot pa bezwen fer en traze bis ki plis ki enn ouswa 2erdtan.  La mon pe mazin en zabitan sid Mahe ki ganny en lanplwa Eden Island ou menm dan nor Mahe li i bezwen tap sa trafik bomaten, ouswa 4er ki pe vin deplizanpli pir. Gouvernman i bezwen fer en louvraz serye  akoz sa letan ki perdi dan trafik Mr Speaker kontan pa kontan, me i annan en lefe lo lafors travay dan Sesel antye, alor silvouple rod bann solisyon.  Bokou in ganny propoze deside e enplimante akoz i annan en lefe lo sa madanm Seselwa dan sa Mosyon ki nou pe koz lo la.  Servis transpor piblik pa pe devlope i menm keksoz e napa nouvo lide pou amelyor li.  Eski i annan en sekter pou amelyor sekter prive dan sa domenn avek sa sipor pou donn plis konfor e pou deservi plis larout?

Mr Speaker serten landrwa travay i donn tou zot travayer transpor, me sa i zis serten lezot i donn plis etranze e Seselwa li i bezwen fer son deboury pou konmans sa shift oubyen al se li a lafen sa shift si i travay aswar.  Si sa madanm i reste lwen e son landrwa travay i donn li transpor ler i travay aswar, sa i byen.  Me eski sa debark li devan son laport?  Eski transpor i kapab ariv kot son lakour?  Pa bliye ki pa tou dimoun ki annan en motorable access e si aswar e sa madanm i bezwen tap son santye pou ariv kot son lakour.

Souvan napa lalimyer i bezwen antre kot li tousel e dan fernwar.  Si letan i move e i annan lapli e sa bann dimoun pa reste dan plato, se lavalas ki vin zwenn li letan i pe monte dan sa fernwar.  Tou sa Mr Speaker aswar dan fernwar li tousel.  Ankor si sa lakonpannyen pa donn transpor sa madanm i bezwen fer en laranzman prive, akoz napa en servis piblik bis aswar isi Sesel.  E ler i annan i pa deservi tou larout me zis serten.  Alor si li kot i reste bis pa monte aswar ki mannyer i kapab menm mazin pran en lanplwa kot i pou fer shift?

Menm si i dezespere travay, i pa kapab menm pran sa bann kalite lanplwa Mr Speaker.  I perdi sa opsyon.  Mr Speaker nou’n war olye fer semen pou tou dimoun, sa Gouvernman o pouvwar pou plis ki 40an in swazir pou donn en gro semen ziska kot en lakaz, akoz sa dimoun i ek zot.  Olye pas dan en landrwa ki pe deservi plis dimoun, zot fer li pas kot en lakaz ouswa propriyete siporter ouswa zofisye Gouvernman.  Ozordi nou pe santi son konsekans letan nou pan pran aksyon pou deservi en pli gran mazorite me en pti group dimoun.  Loportinite manke dan lepase i konsekans nou popilasyon pe peye ozordi Mr Speaker.

Tou desizyon ki ganny pran dan sa pei i lye avek ozordi.  Pa zanmen oubliy sa ! Menm keksoz Mr Speaker i aplik pou lalimyer dan bann distrik – sou distrik e dan bann semen santye.  Eski pei i annan en plan kordinen pou donn lalimyer nou bann sitwayen aswar konman en priyorite eski sa i en plan stratezik kontinyel ki Gouvernman i committed avek?

Mr Speaker sekirite personnel sa madanm osi i kapab lenfliyans li osi pou ki kapab pran en lanplwa aswar.  Son konfyans dan nivo son sekirite i vin atraver lefikasite konfidans dan nou sistenm Lapolis, pou idantifye en agreser anmas levidans e prosekit en dimoun fer en lagresyon lo en lot, i osi ede pou fer li pli konfidan pou al travay aswar.  Me nou tou nou konnen ki mannyer lenterferans politik dan Lapolis e menm Zidisyer in abes abilite nou servis Lapolis.  Sa i konsekans letan Leta i enterfer dan sistenm.  Ozordi nou pe pey konsekans.  Tou aksyon i annan son konsekans letan e Leta i dir met son pep o sant devlopman, apre i say son responsabilite pou delivre, i afekte devlopman pei dan tou son form, menm dan loportinite travay dan shift work pou nou bann madanm Seselwa.

Sa Mosyon i demande pou ki tou i ganny fer.  Lefe ki bann lendistri i enkli tourizm i annan opsyon travayer etranze, nou pe demande ki priyorite travayer lizour lo en shift i ganny donnen avek travayer Seselwa e sirtou avek bann madanm Seselwa si zot swazir. Gouvernman i bezwen travay pou fer sa arive.  Loportinite bann madanm pou travay aswar i en akimilasyon mank loportinite pou pran bann desizyon efikas a longer di-tan.

Alor Gouvernman i bezwen pran bann desizyon pli detaye e ferm pou ede remet nou bann madanm Seselwa dan tou lanplwa.  Mr Speaker mon pou siport Mosyon Onorab Letourdie.

 

MR SPEAKER

Mersi Onorab Flory Larue.  Mon a donn laparol Onorab Ahmed Afif.

 

HON AHMED AFIF

Mersi Mr Speaker.

 

MR SPEAKER

En moman Onorab Afif.  Onorab Loze ou anvi entervenir lo Mosyon.

 

HON JOHAN LOZE

Non Mr Speaker mon ti pe sers en gidans avek ou silvouple?  Mon ti zis anvi en leklersisman.

 

MR SPEAKER

Go ahead.

 

HON JOHAN LOZE

Si mwan konman Johan Loze mon ouvertman byen avek en dimoun ki dan biznes transportasyon prive, eski mon kapab servi en Mosyon pou mwan solisit Gouvernman pou mon ouver sekter transpor piblik avek bann operater prive?  Akoz mon fek tann sa arive la.  Mersi Mr Speaker

 

MR SPEAKER

Bon mon krwar – mon pa’n enteronp li.  Mon krwar son komanter in viz ver son entervansyon, ki i pe demande ki serten servis i vin aksesib i vin pli aksesib ;- par egzanp menm in koz lo lalimyer nou tou nou konnen poudir parfwa ler sa travayer ki sorti dan lotel aswar, kot i ganny drop i pa ganny drop devan son laport e apre i bezwen pran en semen segonder pou li ariv kot li.  Dan mon distrik i annan bann ka parey e i pe demann ki Gouvernman i provide sa service dan bann semen segonder, i met lalimyer osi tou ki pou ed sa dimoun pou antre – sirtou en madanm aswar pou kapab antre kot li sen e sof.  Mon krwar mon konpran en pti pe son komanter – ok?  Mersi.

 

HON JOHAN LOZE

Mersi Mr Speaker.

 

MR SPEAKER

Wi mersi.  Mon ava donn laparol Onorab Ahmed Afif.

 

HON AHMED AFIF

Mersi Mr Speaker.  Mr Speaker sa semenn nou tann dir ki lasezon kreol in refleri.   Mwan mon le dir ki nou lo sa kote latab nou ti a kontan war Sesel pe fleri osi.  E enn bann fason ki Sesel pou fleri, se ki ler tou dimoun zonm e fanm ki kapab travay i ganny en travay, i ganny sa loportinite i anmenn en lasyet manze se li,  pou li ek son zanfan.  Se koumsa ki Sesel pou fleri.  Dimoun i ganny dekwa.  Biznes i ganny dekwa.  Pei i bouz devan.

Sa Mosyon ki devan nou i dan sa laliny li.  Sa Mosyon ki devan nou pe dir ozordi i annan bokou – 50 ekek mil travayer ki pe travay e ladan ozordi probableman enkli bann dimoun ilegal 25,000 etranze pe travay  dan sa pei. 25,000 loportinite manke pou Seselwa.  E Mosyon pe dir i annan en fason ki nou kapab ranplas en pe dan sa 25,000.  E sa fason se poudir avek bann dimoun ki anploy travayer e laplipar zot se sekter prive ozordi nou dir ek  zot be parmi ou bann travayer etranze, i annan en gran sans ou ti kapab ranplas zot ek Seselwa.  Ou pa pe ganny Seselwa ozordi akoz Seselwa e sirtou madanm pa kapab travay aswar.  Mon krwar sa bann entervenan avan mon in fini eksplike akoz la rezon prensipal si zot pa kapab travay aswar se zot annan zanfan.   E Sesel nou annan en gran proporsyon bann madanm ki single, e zot napa dimoun ki pe reste ek zot ;- savedir e zot bezwen vey zot zanfan.

E alor si ou dir ek li be i annan travay pou ou.  E mwan konn plizyer sa bann madanm ki single ozordi, ki anvi al travay i anvi al travay aswar, e i dir ou i pa pou fer li.   Ou konnen akoz i pa pou fer li?  Akoz i iresponsab lo son lapar si i fer li.  Akoz i pou bezwen abandonn son zanfan e ler ou abandonn ou zanfan i kapab annan tou kalite tandans, i kapab al frekant lezot zanfan ki annan move konportman, i kapab les lezot adilt ki kapab vin kot sa lakaz lenfliyans sa bann zanfan e alor nou pe les nou zanfan tonm dan risk.

Mr Speaker si nou ti kapab, e la mon fer en pti kalkil si nou ti kapab parmi sa 25,000 etranze, ranplas 3,000 e dizon bann madanm.  E mon pe dir sa parske nou annan legzanp kot sa in arive Sesel.  E IOT i enn.  IOT ozordi in adopte li en Polisi kot i pe ankouraz Seselwa e nou konnen laplipar son travayer se bann fish cleaners, in ankouraz zot pou vin travay lizour e etranze laplipar i travay aswar.  E i mars ekstrememan byen.  Ozordi i annan li en gran porsyon son travayer ki Seselwa.

Si nou ti annan 3,000 parmi sa 25,000 etranze isi Sesel ki nou ti kapab ranplase, probableman en kantite par bann madanm e nou dir sakenn ti ganny R7,000 par mwan i fer R21milyon tou le mwan, ki ti pou reste dan lekonomi Sesel.  Dan en lannen R252milyon ekivalan $18milyon.

Zis en Polisi. En Polisi.  Senp i kapab retenir dan Sesel $18milyon. La Gogue Dam pou fer monte pe kout $11milyon.  Si nou ti kapab fer monte La Gogue Dam oubyen en dam tou le lannen, zis avek larzan ki nou pe retenir parske nou pa pe anploy 3,000 etranze e nou annan 25,000.  Pou mwan se en keksoz ki lo en pwennvi finansyel toudswit mon war son merit.  Me nou kapab al pli lwen.  Si ou annan ou $18milyon ki retenir Sesel sa i pou met mwens presyon lo deviz etranzer ki pe kit pei, e probableman la mon pe vreman met en estimasyon, probableman si ou pe retenir $18milyon e plis dan lekonomi mon ti a war to lesanz vin pli favorab pou Seselwa.  Olye R14.20 oubyen R14.30 ki été ozordi probableman dan 1an si pa mwens i ti kapab desann par 50c.

E si tou le lannen i kontinyen desann, petet, petet nou ti kapab trouv nou avek en to lesanz dan R12 parey i ti été dan 2010 e 2011.  En gran porsyon nou problenm to lesanz ki ozordi i ti pe menm pros avek R15 se akoz deviz ki pe kit pei demann ki o, e en gran porsyon sa demann ki o i pa akoz nou Seselwa nou pe manz plis, nou pe konsonm plis, se parske i annan bokou plis konsonmasyon ki pe pran atraver Sesel e pe al deor.  E napa ase travayer.  I en sonm konsiderab e si nou anvi Sesel i fleri, nou bezwen trouv fason pou redwir lakantite deviz ki pe kit Sesel.

Mr Speaker i annan lezot benefis ankor.  Si i annan 3,000.  E mon zis met en sif 3,000 parske mon napa en letid ki pou dir, me mon krwar 3,000 i en sif rezonnab.  I pou annan 3,000 mwens dimoun ki bezwen en twa lo son latet dan Sesel e ki en Seselwa ti kapab ganny sa twa.  I pou annan 3,000 dimoun mwens dan Sesel ki bezwen elektrisite i pou annan 3,000 dimoun mwens ki pou bezwen delo trete.  Tousala i pou ede redwir presyon lo lenfrastriktir nou pei.  I pou osi annan en gran porsyon ki annan zanfan ki pou napa problenm sosyal, parske depi ptipti zot annan en manman ki’n kot zot.  E nou konnen ki mank sipervizyon kot lakour i enn bann gran rezon ki nou war ki bann zanfan lekol i annan bann move konportman.

E alor nou pou ede dan sa lalit pou nou redwir bann move konportman ki pe arive kot lekol parske nou pe donn zanfan en pli bon fondasyon, parske son paran i se li.  Alor an gro Mr Speaker ler mon get sa Mosyon ki devan nou,  mwan  mon krwar Gouvernman i devret seryezman koz avek sekter prive – mon pa tro konnen si sa i kapab vin atraver regilasyon oubyen atraver Lalwa,  mwan mon ti a plito dir ankouraze sekter prive.

E enn bann fason Gouvernman i kapab ankouraz sekter prive, pou li al anver sa Polisi se ler zot vin apros ou pou demann ou GOP ou konman Gouvernman ou kapab fer ou en assesment tou letablisman, ki proporsyon pou Seselwa pe travay lizour, e bann ki pe score o i kapab dir be mon 90poursan mon bann Seselwa i travay lizour li i pou fasilman ganny akse avek GOP.

Me tandis ki enn ki pe montre zis en pti porsyon Seselwa i travay zis lizour, li i pou mwens favorab ki en dimoun pe ankouraz son Seselwa pou travay lizour.  Zis en propozisyon ki mon pe mete devan Gouvernman sirtou Departman Lanplwa ki kapab enplimant sa Polisi pou fer sir ki bann anplwayer toudswit, i ganny sa mesaz e zot konmans enplimant sa polisi san bezwen esper okenn Lalwa e okenn lankadreman legal pou enplimante.  Mon krwar benefis i gro pou Sesel, benefisye evidan pou Sesel, e se en keksoz ki Gouvernman i devret enplimante toudswit.

E avek sa mon le siport sa Mosyon par Onorab Jany De Letourdie e mon espere ki Gouvernman i tann sa lapel tre for parske i annan en kantite ladan pou fer Sesel fleri.

Mersi Mr Speaker.

 

MR SPEAKER

Mersi Onorab Afif.  Mon ava donn laparol Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker mon ti ekout prezantasyon Onorab De Letourdie e bann baz ki’n al lo la ti bann baz pou mwan tre enteresan tre enportan pou mwan konsidere me apre sa suddenly sa Mosyon konmsi Angle went downhill.

In desann li, in plonze e  nou’n konmans tann sirtou apre entervenan ki’n koz avan mwan en lanaliz ekonomik ki mon pa konnen si nou annan nou bann dimoun ki nou travay dan lekonomi bann businessman ki pe ekoute deor.  Me seryezman si nou annan en sanzman Gouvernman ki pe krwar ki nou kapab fer bann keksoz koumsa, de zour o lannmen Mr Speaker,  mon pe repete dan sa Lasanble, nou la ozordi  e nou bezwen stand  and be counted pou bann keksoz ki nou’n dir e bann keksoz ki nou krwar nou pou fer.  E mon krwar i pa fer zistis sa Mosyon pou nou fer bann analiz koumsa.

Akoz i bann analiz danzere, bann analiz ki kre serten lekspektasyon, ki nou pa pou zanmen kapab zwenn.  Nou zis pran R3,000 3,000 dimoun e nou fwa li par 7,000 alor nou war R21,000milyon  ki nou pou save.  Be si nou pran tou Seselwa nou met zot travay lizour, nou pou still bezwen dimoun pou travay aswar. 

        So savedir ou pou annan en group madanm Seselwa ki pou travay lizour en group Seselwa ki pou travay aswar si nou pou ankouraz zot, ou pou still annan dimoun ki pou bezwen travay aswar.  So kote ou pou ganny sa bann dimoun pou travay aswar?

Savedir i pou defet the whole reason sa ki Onorab De Letourdie in anmenn son Mosyon!  Mosyon Onorab Letourdie ki’n anmennen wi in anmennen pou ankouraz bann madanm  vin dan sekter tourizm, akoz i santi poudir si ou donn zot en shift lizour i a pli fasil pou zot cater pou zot zanfan eksetera.  Se sa baz son Mosyon.

E baz son Mosyon i annan serten relevans, akoz nou annan en kantite parey single mothers ozordi ki pe travay.  E sa in ganny prouve par AECD.  I annan bann figures ki prouve.  Be zis pou nou dir 3,000 fwa 7,000 lo 21milyon i en analiz  pou mwan vreman drol sorti sirtou en dimoun ki’n deza nou PS pou Finans.  Mon dir sa Mr Speaker akoz si ou al la deor ozordi ou demann avek nenport dimoun ki dan sekter tourizm, kote de zour o lannmen nou pou ganny 3,000 dimoun pou sorti pou ale parey Onorab Afif ki dir nou ki ler si li somehow i end up dan en Gouvernman, i kapab de zour o lannmen.  Be i drol!  I zis parey ler Onorab Afif ti dir nou pa bezwen swiv okenn regilasyon lo Money Anti- Laundering enternasyonal nou.  Akoz nou Sesel nou en pei souveren e nou, nou kapab fer serten keksoz.  Ou konpran?

Konmsi mon war i drol pou en dimoun ki mon annan en gran respe pou li e son abilite analitik, ki in vin fer en analiz pou li vin sey satisfer en gen politik, ki dapre li i pou anmenn nou pli lwen.  Me i pa realize poudir lefe ki i annan sa leksperyans ki i annan, lefe ki i annan sa Pedigree ki i annan, i annan dimoun ki pou tonm ladan zot krwar poudir sa i posib.  Kan i pa pou zanmen kapab delivre. Ler ou  dir nou poudir 3,000 an mwens ki pa pou pey elektrisite, en kestyon fondamantal, mon ti a kontan demann zot, konbyen madanm ki annan zanfan ozordi as a statistic ki pa pe travay?  Konbyen ki pa pe travay?  Onorab Ferrari i dir mon en bon pe atraver ou Mr Speaker.  Mon ti a kontan i dir mwan kote i konnen poudir i annan en bon pe?  Zis parey ler i ti dir nou poudir  lenflasyon in monte avek unemployment in monte, kan apre Minis i dir non i pa le ka.  That’s the way ki nou war politik pe ganny fer Sesel !

Ou konnen i fer 2enm fwa mon war LDS i vin avek en Mosyon ki annan valer – 2enm fwa zot vin ek en Mosyon e dan plas anbelir sa Mosyon, e rod fason pou nou regard ki mannyer nou get sa Mosyon e fer sa Mosyon vin pli for, nou ganny 2 dimoun sirtou nou ganny enn ki fek koze ki aspiran pou Vis-Prezidan, en aspiran Vis-Prezidan e i vin fer en analiz ki pou mwan, mon’n soke ler mon’n tann li fer Mr Speaker !

E mon pou eksplike akoz mon soke ler mon tann li fer Mr Speaker.  Sa 3,000 travayer etranze ki ou pou zis tire dan sistenm de zour o lannmen la.  Ou pou tir zot de zour o lannmen dan sistenm ok?   Nou’n  dir nou pou ranplas zot par lekel?  Sa R7,000 alors tou sa R7,000 pou retourn dan Kof Gouvernman sa.

Savedir ler ou fer 3,000 ale pei pou anmas R21milyon en sel kou.  Be kot i mars  koumsa – ?  Be se sa ki ou’n donn lenpresyon.  Se sa ki’n donn lenpresyon koz tou analiz i baze lo la li.   I baze lo ou pran 2,000 ou fwa 4,000 i donn ou 8,000 sa 8,000 deswit i vin la.  Be sa 7,000 pou fer letour dan sa sistenm.  I pou pran ou de lannen avan i retournen!  Akoz i annan ki pou ale tou, akoz dan sa 7,000 letan en dimoun pe travay la,  i pa pou pran forex pou li al travel al aletranze  dan sa 3,000 Seselwa ki pe travay?  Napa serten kantite larzan ki pe perdi?  Mon krwar sa bann analiz parfwa nou bezwen fer li dan konteks sa ki nou pe dir.  Dan konteks sa ki nou pe pase ozordi dan sa pei.

Ou dir koumsa poudir i sitan fasil pou nou fer sa de zour o lannmen parey IOT pe fer li.  Be mon ti a kontan demann zot ler nou ti vin avek lamannman dan Lalwa e nou ti siport lamannman pou fer ki tou konpannyen i mars dapre Employment Act – ok?  Ki zot ti fer zot?  Zot ti dir nou non.  Zot ti dir nou bann dimoun dan SITZ i kapab fer sa ki pou zot.  IOT ozordi i kapab fer sa annefe i akoz i dan SITZ.

Me Lalwa Lanplwa dan pei, ki mannyer i pou determinen?  Sa ki ou pe dir ek nou esansyelman la – e mon konpran akoz mover Mosyon in met sa ki’n mete la, in met  etidye e met an plas.  I pa’n dir poudir sa i en fet akonplir.  Me ler mon ekout ou koze is as if ou krwar poudir demen dan en Gouvernman, ou pou kapab fer sa an zour o lannmen.  E sa i danzere.  I danzere.

Ou konnen Mr Speaker sa i zis parey yer nou ti war Onorab Ferrari fer en speech kot apre pandan plizyer lannen in atak nou dan sa Lasanble, nou’n servi welfare pou gen politik, in vini in vin  dir nou poudir welfare i konpleks.  Apre plizyer lannen ki zot atak nou, nou servi welfare pou gen politik,  welfare konpleks. Mwan  mon pe dir ek zot koumsa atraver ou Mr Speaker Onorab Ferrari avek son kalite politik, i pou met sa pei lo son zenou.

 

 

(laughter)

 

HON SEBASTIEN PILLAY

Ler in fini met sa pei lo son zenou – ok, se sa ki i krwar poudir i pou anmennen …

(Off-Mic)

 

HON SEBASTIEN PILLAY

… be zot bezwen ganny dir sa Mr Speaker!  For too long mon krwar sa kalite politik in prevail ki zis nou vini nou krwar poudir nou pou flip en switch.

 

(Off-Mic)

 

HON SEBASTIEN PILLAY

Mr Speaker mon ekout tou dimoun koze mwan.

 

MR SPEAKER

Annou les Onorab Pillay eksplik son lekor.  Onorab kontinyen.

 

HON SEBASTIEN PILLAY

Mersi Mr Speaker.  I reste en keksoz enportan  – mon pa  konnen ki pou arive Mr Speaker avek nou pei.  Ou konnen kwa ki reste pou arive avek nou pei Mr Speaker?    Apre ki tou dimoun in fer bann desizyon ki zot in pran zot pou tap zot lanmen lo zot lestoman, zot poudir ‘’se ma fot.’’ Ou konnen akoz Mr Speaker?

 

 

(Off-Mic)

 

HON SEBASTIEN PILLAY

Ou konnen Mr Speaker, ou konnen akoz Mr Speaker akoz Mosyon li menm ti annan en lentansyon pou regard en kategori dimoun ki neseser pou nou kapab regarde.

Me li menm li sa Mosyon i annan en konpleksite avek.  Ozordi si ou war dan lamazorite lotel ou pou regarde ou war menm bann dimoun pe travay aswar i bann etranze.  Si nou ti kapab poudir sa kantite dimoun pou antre dan sekter lanplwa, then yes de zour o lannmen nou ti a kapab ranplas 3,000 dimoun.

Nou’n vizit   Onorab ki ti avek nou, nou’n vizit bann zil kot i annan bann lotel e nou’n koz avek bann operater sa lotel e zot in dir nou poudir difikilte ki zot in gannyen se ki lespri Seselwa  an se ki konsern travay dan lotel lo zil in sanze.  Malgre ki i annan ki zot pey byen, me en kantite bann etranze ki vini, zot vin travay.

Si nou regard dan lezot landrwa dan lezot lotel, lezot lotel ou pou war osi menm zafer.  So pou mwan konpleksite kot i vini i en Mosyon ki mon krwar i annan en merit, i annan en merit akoz i annan en difikilte pou en manman tousel – sirtou bann manman tousel kapab ekip son zanfan si li i pe travay shift.  Be i annan en lot lavantaz probableman ki vin ek sa travay shift aswar.  Petet en lankourazman ki nou kapab fer se eski sa shift aswar i kapab pey plis?   Eski mon pa konnen par egzanp eski dan lotel par egzanp ozordi, eski en dimoun i kapab koriz mwan en dimoun ki dan sa domenn, eski par egzanp i annan en diferans ant shift lizour ek shift aswar?  Si ou pe fer shift aswar ou ganny en pe plis.  Eski par egzanp dan shift aswar ou ganny ou plis kliyan ki fer ki ou kapab ganny ou plis service charge.- ou kapab benefisye dan en fason?

Ou konnen i tou bann dinamik ki nou bezwen konsidere. Mwan mon pa eksper dan sa domenn.  Se pou sa rezon ki mon’n dir poudir lideal Mosyon filozofi deryer sa Mosyon, i enn ki bon. I enn ki bon,  akoz nou pe tous en kous dimoun.  Me lo en lot kote osi nou bezwen sezi loportinite ek sa Mosyon pou nou koz lo en keksoz ki nou war pe arive dan nou sosyete ozordi.  I annan en keksoz ki pe arive;- par egzanp en kantite paran – e mon pa pe blanm personn, i enportan ki nou dir sa, zanfan i kit kot lakaz e paran i dan night fair pe marse.

Nou war sa arive  plizyer fwa.  So nou – i dan aktivite.  So mon krwar ki i osi enportan ki – nou’n koz lo baz responsabilite ki nou bezwen annan vizavi konman paran towards nou zanfan, e mon siport lefe ki ou annan single mothers.  Akoz mon siport sa Mr Speaker, akoz an 2011 oubyen 2012 IECD ti fer en letid sirtou an sa ki konsern child minding pou etabli lekel dimoun ki servi child minding.

E dan en gran kantite ka bann dimoun ki servi child minding e sa i en scientific data, dan gran kantite ka bann dimoun ki servi child minding sete bann single mothers – bann manman tousel.  E se pou sa rezon ki in annan sort of petet en formalizasyon – en striktir otour sa zafer child minding.  E sirtou bann sipor ki’n adisyonnel ki’n vin avek pou ed bann manman tousel ki pe anvoy zot zanfan kot en child minder akoz sa bann manman zot tousel, zot pe cater pou sa zanfan ;- papa par egzanp i kapab pe kontribye atraver Tribinal pou en serten kantite larzan.  Income petet pa ase e se pou sa rezon ki in annan sa en deboursman pou sey ed sa bann manman tousel.

Sa ki mon pa konnen Mr Speaker i konbyen ki sa bann manman ki travay probableman dan sekter tourizm.  Sete sa petet en pwen depar ki nou ti devret sey rode, pou nou kapab etabli bann baz pou sa Mosyon.  En lot pwen enportan Mr Speaker ki mon ti a kontan tous lo la se lefe ki lapros nou pou pran – pa zis avek par egzanp lendistri tourizm, akoz lendistri tourizm i en lendistri.  Me i  kapab al dan lezot lendistri osi kot i involve bann manman tousel – single mothers.  Petet si nou ti kapab dir nou pe target sa kous avan a en nivo, pou nou kapab monte gradually ariv lo lot nivo.  Pa de zour o lannmen me i pou pran nou letan pou nou arive, sa i kapab en starting point pou nou.  Ou konpran?  Akoz nou le ankouraz bann single mothers pou al travay, nou pa oule ankouraz bann single mothers pou reste kot lakaz, pou depan lo supplementation of income – en keksoz ki tou lede kote latab nou’n koz lo la.

Nou anvi si en dimoun i able bodied i kapab travay  pou li al travay.  Nou osi pa anvi ki en zanfan osi i pa kapab grandi akoz i pa pe ganny ede.  Malgre ki i annan dedicated fund kot lekol pou ed bann zanfan, ou pou war dan lamazorite ka – par egzanp bann manman ki pe servi bann dedicated fund, zot pou dir ou poudir be nou apresye ki nou annan en dedicated fund kot lekol e ki nou kapab ganny akse avek.  E ki Gouvernman in met an plas as en striktir pou ede dan serten sirkonstans  kot serten depans ki zot pa kapab fer.  Me selman i annan manman  pou dir mon ti a kontan debout lo mon de lipye akoz fanm Seselwa zot bann fanm proud zot! Zot bann fanm ki tre for.  Ou konpran?  E nou tou ki la nou take for granted.  E nou bezwen mazinen poudir nou tou ki la nou zanfan en manman, e sa ki nou manman i fer pou kapab elve nou, i enportan pou nou tou konsidere.  So i annan serten kote ki ganny fer akoz mon krwar fanm Seselwa i for.  I kapab annan fanm Seselwa ki ok pou li, li travay shift aswar.  I kapab ki i  ok.  I kapab ki i annan ki kapab kontan ki travay son shift aswar akoz petet sa i en mod travay ki li in etabli ok?  Alright?  So se sa ki nou bezwen ranforsi.

E mon krwar i dan en letap kot nou konman en sosyete Mr Speaker, Sesel nou’n si oule nou vin avangard dan lafason ki nou regard en kantite keksoz konsern sa size gender.  E an se ki konsern sirtou rol ki bann madanm i zwe dan lekonomi ;- lenportans bann madanm dan lekonomi – ankouraz bann fiy depi lekol pou zot devlop en karakter for, en karakter ed zot pou zot antre dan en lanplwa e ler zot fini, pou zot mazin annan lo en karyer i bann keksoz ki nou bezwen fer enportan.

Me sa ki nou pa devret fer,  ki nou devret careful about annou pa esey anmenn en kalite  affirmative action e baz li lo Seselwa or etranze.   I kapab annan par egzanp en fiy etranze en madanm etranze in vin travay ki osi i annan en zanfan.   I kapab annan. Ou konpran?   I kapab annan lekar.  Konmsi  mwan mon pe dir annou get sa avek en leker imen.  Annou regard lo tou lede kote.  Annou  regard pa zis en kote. E  sa ki …

 

(Off-Mic)

 

MR SPEAKER

Bon annou pa enteronpe.  Akoz mon pou bezwen rod ankor en pe letan pou mwan donn Onorab Pillay pou li koze.  Ok?  The more ki nou enteronp Onorab Pillay the more mon pou bezwen prolonz son letan – ok?  Onorab kontinyen.

 

HON SEBASTIEN PILLAY

Mersi Mr Speaker.  Parey ou’n remarke, parey nou’n toultan dir nou os nivo lafason ki nou fer politik – ler nou koze dan sa Lasanble, e mon remersi ou pou konpran sa  -a nouvo dinamik.  So sanmenm sa ki mon pa enteronp personn pou ki ou pa donn zot plis letan koze, e  mwan mon apresye ki mon pou ganny plis letan sak fwa zot enteronp mwan.  So mon pou sey mon mye pou zot pa enteronp mwan, me si zot enteronp mwan, mon pou napa swa mon pou bezwen kontinyen koze.

Bon en lot keksoz ki reste relevan dan sa Mosyon en, e ki mon pa konnen si nou fer ase travay pou nou regarde, be petet ti ava bon ki Minister Lanplwa i kapab regarde, eski i annan eski i annan parfwa parmi bann HR – eski i egziste mon pa konnen si i egziste I stand to be corrected, eski i annan en manev par egzanp pou plas serten madanm pou travay aswar?

Ou konpran?  I kapab annan serten konsern dan sa nivo akoz nou tande plizyer fwa nou tann bann mon pa konnen nou tou konman koleg mon asire ki Onorab Letourdie ler ti anmenn sa Mosyon i bezwen in koz avek bann madanm ki travay dan sa lendistri, i bezwen ganny serten konsern kot petet i annan serten parmi sa bann fiy oubyen sa bann madanm, in santi poudir HR i plas zot travay shift.  Ou konpran?

So eski i annan en sistenm rotasyon ki egal?  Sirtou dan sekter tourizm – touristik, akoz par egzanp nou konnen i annan si i pou al travay dan en restoran, si sa dimoun i en waitress ouswa sa dimoun i en barmaid, ouswa sa dimoun i travay deryer dan lakwizin, eski i annan en sistenm rotasyon ki fer ekitab dan bann lotel sa i en size ki nou bezwen regarde e  sa i en size ki  mon dakor i  enportan e sa ki fer sa Mosyon ganny son valer. Ou konpran mwan ?  I lev bann lezot kestyon relevan avek sa size.  Sa size ti’n kapab pli laz ou kapab regard tou travayer dan sekter lotelri me nou pe zero-in lo bann madanm Seselwa e mwan mon pe konsider sirtou sa bout kot ou’n koz lo  la Onorab kot ou’n koz lo bann manman tousel.  Sela kot mon per regarde.  So sa i en kestyon ki nou petet pe demann  Departman Lanplwa pou gannyen.   An terminan Mr Speaker pou nou kapab achieve sa i annan pei ki’n go down that road.  Par egzanp Sid Lafrik mon pa’n dir zot neseserman bann bon legzanp mon’n dir zot i annan bann pei ki’n al dan sa semen.  I annan Sid Lafrik, i annan lezot serten pei par egzanp Philippines mon ti konnen derynerer ti pe konsider menm kalite zafer – i  napa bokou, me i annan pei ki’n sey go down that road. Nou Sesel, nou nou’n vin parti zeran en kantite bann Konvansyon enternasyonal bann Lakor WTO e enn bann eleman dan Lakor WTO  se presence  of natural persons. Savedir prezans en dimoun en lot pei dan ou pei.  E anba WTO prezans en dimoun dan en pei par egzanp Seselwa i kapab al travay  Moris ;- en Morisyen i kapab vin travay Sesel.  Sa i Lakor mouvman dimoun anba WTO.  E sa i dir ou poudir ler sa dimoun i bouze dan sa lot pei, i annan  bann  Lalwa ki  ganny met an plas, me i osi annan bann –  mon krwar ti ava bon  letan nou pe koz sa deba pou nou eksplore  eski i annan en eleman kot ou bezwen restrikte serten kondisyon ki ou enpoze  pou ou dimoun vizavi sa lot dimoun ki’n vin dan ou pei.

Eski i annan serten restriksyon?  Akoz sa presence of natural person kot sa dimoun i bouze meton ou annan en profesyonnel Seselwa ki‘n travay dan domenn accounting ki’n al travay dan en lot pei dizon La France ou L’Angleterre oubyen menm dan larezyon, eski i annan den fason ki i pou ganny gete diferaman?

Akoz i annan de kote sa pwen.   So nou bezwen fer sir ki nou koman en Lasanble nou get the balance right. E mon ti a kontan donn mon sipor pou  sa Mosyon si nou kapab oryant li ver lideal ki mon krwar Onorab in anmenn li e non pa servi li koman en – si oule en loportinite pou nou anmenn bann eleman ki apre nou  pa kapab substantiate akoz sa Mosyon i annan en relevans ozordi sirtou pou bann manman tousel ki travay dan sa sekter e ki nou oule war en petet en solisyon pou  zot, e ki probableman pe konplent me zot pe konplent an silans e  sa i  nou rol koman Lasanble parfwa to become the voice of the voiceless.  Mersi Mr  Speaker.

 

MR SPEAKER

Mersi Onorab Pillay.    Mon  a donn laparol Onorab Waven Woodcock.

 

HON WAVEL WOODCOCK

Mersi Mr Speaker.  Mr Speaker permet mwan pou dir 2 pti mo lo sa Mosyon.   I en Mosyon ki annan bokou merit.   Annefe Mr Speaker  mwan osi atraver ou mon bezwen eksprim en pti pe mon dezapwentman avek entervenan avan mwan Onorab Pillay – i en pti pe dezapwentan ki in dir poudir   ki bann propozisyon  ki bann entervenan lo kote nou latab Onorab Larue, Onorab Afif i dir i bann Polisi  –   or bann propozisyon ki pou anmenn nou pei lo son zenou. Me Mr Speaker mon krwar ki Onorab Pillay in bliye  – i pa pe realize poudir   i deza anba Parti US,  Parti Lepep in fini anmenn nou pei lo son zenou !

 

HON FLORY LARUE

Wi la i la.

 

(APPLAUSE)

 

HON WAVEL WOODCOCK

Mr Speaker  pou koriz en pti pe enn de bann keksoz ki Onorb Pillay in dir dan son lentervansyon,  Mr Speaker Mosyon pa’n dir ki tou dimoun pou bezwen travay lizour. Pa sa ki Onorab Letourdie in  fer resorti  e osi  bann entervenan lo kot latab.   Mon santi Mr Speaker ki i pe met lanfaz o bann manman sirtou lo bann manman tousel ki ozordi zot war zot ki zot bezwen pe travay shift  e akoz sa bann zanfan zot  war zot  tousel kot lakaz, zot mank sipervizyon zot manman zot manm lafeksyon  zot manman e i annan serten kontrent ki sa pe kree dan nou sosyete.

Mr Speaker  mon pa pe dir ki fodre forse ki tou bann manman zot bezwen travay lizour.  Akoz   mon asire poudir i  annan bann madanm ki zot, zot pou  kontan travay zot shift.    Me selman nou, nou pe dir annou come up  ki Gouvernman i kapab vin avek bann propozisyon oubyen bann Polisi ki pou ankouraz plis madanm sirtou pou antre travay dan sekter touris, ki tir sa lobligasyon lo bann manman  zot bezwen travay sa shift work ki zot bezwen travay aswar ki enn bann rezondet akoz ki ozordi bokou bann madanm pa antre dan lendistri touris, akoz zot konnen ki zot bezwen travay aswar e ki sa i kre en serten kontrent pou zot akoz napa personn pou get zot zanfan ouswa  ki zot zanfan i bezwen reste tousel.  E parfwa ki nou war Mr Speaker se zanfan pe vey zanfan dan lakaz. Napa paran la  e i annan  bokou bann danze, bann risk, bann keksoz   ki kapab arive  ki pou annan en lefe advers lo bann zanfan me a lonterm lo nou sosyete.

Mr Speaker, ankor enn fwa mon pou dakor avek sa ki Onorab Afif in dir kontrerman avek leksplikasyon  ki Onorab Pillay in sey anmenmen pou defeat sa analysis ki Onorab Afif in fer.

Mr Speaker  si nou kapab ankouraz 3000 madanm pou travay  dan lendistri touris si nou kapab fer sa Mr Speaker parey mon dir ozordi bokou madanm dan nou sosyete bann zenn fiy ki fini lekol STA ouswa dan bann lezot landrwa skoler, ler zot fini zot letid zot bokou zot pa le, mon koz ek bokou bann zenn, bokou bann zenn fiy zot pa oule al travay dan lendistri touris, akoz zot bezwen travay shift e menm bann manman.

E ozordi nou annan en kantite single mothers Sesel, zot pa oule al travay dan lendistri touris, akoz zot bezwen al travay aswar, e zot napa personn pou kit zot zanfan avek e zot anvi la pou zot elve zot zanfan.  Analysis ki Onorab Afif in fer, se ki si nou kapab ganny 3,000 madanm e ankouraz zot pou travay dan sekter lendistri touris, e in fer  en senp analysis in dir  – ok on average en dimoun ki’n fek konmans travay dan lendistri touris, i pe ganny li  – ok  let’s  say R7000mil – R6000mil – R7000mil R8,000.  Annou dir  R7,000 parey Onorab Afif in servi sa sif, 3,000 fwa R7,000 konbyen i fer?  3,000 fwa R7,000 i fer R21milyon e sa larzan ti kapab reste.  R21milyon ti kapab reste dan lekonomi nou pei, olye ki sa saler ki pe pey sa bann expatriate ki pe sorti dan son pei pe al aletranze, partou Bangladeshi – Lenn isi laba dan lemonn, sa larzan ti kapab reste dan nou lekonomi e ti ganny servi dan nou pei Mr Speaker!   E mersi Onorab Ghislain mon a eksplik ou lekel  ki pou travay aswar, akoz i annan en propozisyon ki en Manm in fer.  Mon krwar Onorab Larue in fer sa propozisyon.  Son propozisyon ki’n fer se ki met lanfaz lo bann expatriate pou travay aswar, e ankouraz sa bann expatriate pou travay aswar, e les sa bann madanm – nou pa bezwen 3000 pou travay aswar, akoz i pou annan bokou pou travay lizour.

Annou ankouraz bann expatriate pou travay aswar, come up ek en Polisi e donn loportinite bann manman – sa bann single parent pou zot kapab travay pandan lazournen, ki zot bezwen travay shift.

Onorab Pillay osi en keksoz ki’n dir ki Mr Speaker ki mansonzer mon krwar i bezwen al fer en pti pe plis resers lo la;- most bann etranze ki antre Sesel pou vin travay isi zot napa zanfan zot,  mwan mon war 90percent sa bann expatriate ki vin travay isi zot napa zanfan.  Zot vin travay isi zot larzan ki zot ganny peye, zot anvoy deor dan zot pei pou zot zanfan aletranze.  Me Sesel i diferan.  Nou bann madanm Seselwa i reste isi, zot annan zot zanfan e zot fanmir isi, e i enportan ki ozordi nou ankadre zot.  I enportan ki ozordi nou get dan nou sosyete, akoz si nou pa fer atansyon direksyon ki nou pe ale, i pa pou bon pou nou pei.

Mr Speaker en fanmir solid i labaz en sosyete an bon sante.  En manman kot lakour i vreman enportan Mr Speaker.  En manman kot lakour i annan plizyer keksoz enportan.  I anmenn stabilite.  I anmenn disiplin.  I anmenn lanmour pou sa zanfan, i anmenn lafeksyon, gidans e bokou lezot laspe ki enportan pou devlopman dan lavi en zanfan Mr Speaker.

Me ki nou pe war ozordi dan nou sosyete Mr Speaker, se ki bokou manman zot pa la kot lakaz pou vey zot zanfan.  Pou zot la avek zot zanfan.  E nou bezwen konpran Mr Speaker, ki ozordi nou annan en kantite single parent, bann manman tousel Sesel.  En kantite.  En kantite broken homes – en kantite broken families – bokou manman tousel. E ler zot al travay aswar, ler zot al travay aswar parey mon’n dir zanfan i tousel kot lakour.  Ler zanfan i sorti kot lekol i antre kot lakaz manman pe prepar li pou al travay, e manman i ale i kit sa zanfan la, e bokou fwa se bann miner ki reste tousel kot lakaz.  Kekfwa zot manman i kit zot avek en laptop zot lo la ou konnen zot napa sa enteraksyon avek zot manman.  E sa Mr Speaker i afekte devlopman sa zanfan.

I pou annan bann konsekans advers ki pou vin avek sa.  E parfwa Mr Speaker a plizyer repriz in arive plizyer ka dan lepase, akoz mon en dimoun dan lepase mon travay dan sosyal e mon konn sa tre byen kot parfwa manman napa swa, me pou kit sa zanfan pou reste avek en lot Manm fanmir ouswa avek en vwazen, ouswa avek boper e dan bokou fwa ki’n arive dan plizyer ka kot bann zanfan in ganny abize.  Ou konnen sa bann zanfan zot vilnerab ou konpran?  E in ariv bokou sa bann e ozordi i alarman Mr Speaker kantite labi ki i annan dan nou pei.  E ozordi tou sa bann lenfliyans ozordi dan nou pei dan nou lakominote.  Ozordi menm dan plizyer sirtou – mon pa pou mansyonnen me selman ozordi i annan bann dan bann neighborhood kot i annan bann dimoun ki la ki pe pous drog avek bann zanfan.  Zot pe sey vann drog avek bann zanfan, zot pe sey lenfliyans bann zanfan pou fer bann akt delenkan, pou fer bann keksoz Mr Speaker ki pou afekte izt fitir demen e ki pou annan en move lenpak lo nou pei.

E nou pe war ozordi Mr Speaker ki bokou nou bann zenn ozordi popilasyon lakantite zenn ozordi, i adikt avek drog nou ariv 6,000 e dan sa 6,000 i annan manrmay anba laz ki pe servi drog.  E i alarman Mr Speaker ki zisteman mon fek annan en konversasyon pa tro bokou letan pase avek en teacher kot i dir poudir drog ozordi Sesel pe menm antre dan nou lakour lekol.  Sa i en konversasyon pou en lot ler me selman i montre ou ki mannyer sa bann lenfliyans i partou.

Si drog i antre dan lekol what about dan bann housing estate dan bann kominote dan nou vwazinaz, e sirtou letan napa en manman kot lakaz ki kalite lenfliyans ki sa zanfan i kapab tonm ladan Mr Speaker.

Mr Speaker sa Mosyon i vreman senp sa Mosyon i vreman kler.  Mosyon pe demann avek Gouvernman pou etidye e met an plas bann nouvo kondisyon travay, pou permet bann madanm Seselwa ki kapab travay dan sekter tourizm, dan lendistri tourizm pou ganny priyorite pou travay shift lizour pou donn zot sa priyorite pou travay shift lizour, pou ki zot bezwen travay aswar.

Mr Speaker e parey mon’n dir e parey serten entervenan in propoze, olye ki sa bann expatriate i travay shift lizour ek aswar, gard lizour pou bann manman – pou sa bann single parent i pa bezwen annan zis expatriate Sesel Mr Speaker.  Ki nou pe dir ankouraz plis manman pou antre dan sa sekter, donn zot sa loportinite pou travay lizour e met sa bann expatriate travay aswar.  Parey mon dir i pa forse sa Mr Speaker.  Pou annan manman ki pou li i pou ok ek sa.  Me ou konnen madanm i pou anvi travay son shift me selman zis annou get dan posibilite pou nou anmenn en Polisi pou nou get en pti pe plis dan welfare nou bann manman nou bann single parent.

Avek sa de pti parol Mr Speaker mon pou siport sa Mosyon.  Mersi.

 

MR SPEAKER

Mersi Onorab Woodcock.  Bon nou ava pran en break e nou ava retournen 11er pou kontinyasyon deba lo Mosyon.

 

 

(BREAK)

 

MR SPEAKER

Bon nou ava kontinyen avek travay.  Savedir deba lo Mosyon ki’n ganny move par Onorab De Letourdie. Mon ava prezan donn parol Onorab Sylvanne Lemiel.

 

HON SYLVANNE LEMIEL

Mersi Mr Speaker. Bonzour tou dimoun. Mr Speaker sa Mosyon ki devan nou i en Mosyon ki annan merit. Ou konnen ozordi letan nou pe koz madanm – nou pe koz manman sirtou bann manman ki tousel. Ozordi ler nou pe regarde nou annan bokou lakour kot se manman ki pe run sa fanmir.  Papa  in ale in kit li  li tousel e  lamazorite sa  bann manman i annan plis ki en zanfan. Zot pe sey travay e lamazorite zot, zot pe fer 2 louvraz e lavi pa fasil ou sa bann manman koumsa. E i annan de ka kot sa bann manman zot menm ki annan sa bann zanfan ki en pe tirbilan. E sa bann zanfan zot bezwen latansyon sa manman – ou konnen?

E ou war osi  ki ler nou pe get madanm  ki nou pe dir  i travay shift nou bezwen get papa osi bann zonm. Konmsi annou pa bliye ki nou osi annan bokou zonm ki tousel ; ki pe okip zot zanfan. E sa i bann zonm ki responsab. I bann zonm ki pe anmenn zot fanmir byen – osi byen ki en  manman pe fer li.   So e  pour sa bann zonm osi petet zot osi zot pe travay shift zot pe get zanfan aswar.  E la kot nou war ki  zanfan i vilnerab, zanfan i kapab sorti zanfan i kapab ale, al indulge zot dan bann keksoz ki pa bon pour zot, dan move lenflians.  E se sa ki mon krwar ki sa Mosyon li menm li i annan en serten sans.

E ozordi Mr Speaker, letan nou pe regarde osi travay shift – travay aswar i annan en pli gro lefe lo bann madanm sirtou lo zot lasante ou konnen?  Zot pa pe ganny ase repo sirtou la  letan  ou  pe gete si en manman ki pe travay en shift, 6er-6er. I annan madanm ki sekirite, i pa neseserman i travay dan tourizm akoz ozordi travay shift i depi dan lasante lapolis dan bokou sekter me selman nou, nou pe met lanfaz lo tourizm e ler nou gete bann sekter tourizm kwa ki zot annan an plas ozordi ki zot in mete pou sa bann madanm ki pe travay shift dan ou lotel dan ou letablisman  kot sa madanm, sa manman sa bann dimoun pe fer ou ganny larzan. Kwa ki’n ganny etabli pou sa bann dimoun?

I annan ki mon konnen zot annan serten daycare. E ler mon pe koze sa daycare ou met sa bann zanfan zis lizour. Me solman sa bann ki pe travay aswar li  vre i napa nanryen pou li.  Me selman sa manman  oubyen sa papa tousel i bezwen war li vin travay  e kit sa zanfan. Parfwa sa zanfan  i reste avek en ser, frer ki pli gran me parfwa i annan ki dir ou Mr Speaker I tak sa zanfan anndan.  La kot problenm i  pli mal  kot ou’n tak en zanfan annan e ou pa zanmen konnen kwa ki kapab arive – sirtou ou’n ale deryer ou ledo ou pa konnen ki arive.  Kouran i koupe, manrmay in al alim labouzi, ou ou’n pran lakle ou’n al avek, dife i pran i bril tou ou zanfan anndan e sa  pou en trazedi konmsi ki pou afekte sa dimoun leres son lavi. Ou konnen?

E konmsi sa size la i en size ki demann bokou letid i en size ki demann bokou refleksyon i ganny fer lo la pou ki vre kekfwa nou  kapab come up avek en serten mechanism ouswa mon pa konnen  – petet  mon pa konnen si nou poudir Lalwa ou kwa  me selman bann sekter prive  sirtou tourizm ki anploy bann dimoun aswar petet nou kapab sizere osi varye en pe zot bann shift hours.   Ou konnen?  Kekfwa pa fer sa bann madanm travay sa 12erdtan.   Oubyen sa msye  ki en msye tousel travay sa 12 erdtan. Konmsi donn bann interim shift osi ou konnen, bann rest between shift osi i enportan  pou nou bann dimoun  sirout lo zot lasante ou konnen?  E apre petet osi Mr Speaker nou, nou la koman bann edikater osi nou koman bann Manm Parlman.

Petet dan nou koze nou bezwen  pe pas serten mesaz,  or serten lenformasyon ki nou pou kapab  osi edik  nou bann dimoun ki pe travay shift.  Akoz parey in ganny dir,  in fer resorti la i annan bokou madanm ki kontan travay shift sirtou bann ki napa zanfan oubyen zot zanfan in gran pour zot i ok zot ou konnen?  Me solman  ozordi Mr Speaker ler ou pe gete mwan dan mon distrik i annan bokou zenn ki’n lekol SHTA, i napa zanfan  li me i pa le al travay tourism, i dir ou akoz travay aswar. Zis regarde i napa zanfan li, me selman i pa oule al travay dan lotel.

E petet la kot ledikasyon i antre. Nou bann zenn  zot bezwen kalkil byen, zot bezwen mazin byen ki zot anvi. Eski ou pe lekol pou tourism pou ou al travay mon pa konnen kote dan labank or whatever  petet ki ou pe manie pou al travay? So annou fer byen  nou swa.  Lo kote bann zenn annou fer byen nou swa. Si nou  ou’n lekol pou dan tourism, tourism i annan en kantite prospects, definitivman.   Me selman ou bezwen travay dir – definitivman ou pou bezwen travay aswar.  So ou pou bezwen fer si ki ou’n make the right chosice.  E   ler ou ‘n fini lekol – ou’n fini ou letid ou konnen ki poudir mon pou al direk dan sa travay.  E si i arive pandan lavi nou grandi zanfan i arive nou pou bezwen  konnen prezan ki laranzman prezan ki nou pou bezwen fer pou nou kapab cope petet avek sa travay ki nou pe fer.

Mr Speaker letan mon pe regard osi ozordi petet IOT menm si IOT i pa ganny gete  anba Lalwa Lanplwa en, i enn bann  landrwa  kot parey in ganny sizere kot nou target bann madanm etranze pou fer zot travay dan bann landrwa touristik –  or mwan mon pe pran IOT akoz i en legzanp kot li i fer mazorite madanm etranze travay aswar. Napa bokou madanm Seselwa ki travay IOT, me parey nou pe dir i pa ganny trouve anba Lalwa Lanplwa li IOT, sekter Tourizm i anba Lalwa Lanplwa … ou konpran?  E nou bezwen zot bezwen fer sir ki zot pe war bann diferan fason pou zot kapab war ki mannyer zot kapab soulaz en pti pe nou bann dimoun ki pe donn ot sa servis. Mwan Mr Speaker mon’n koz avek bokou dimoun sirtou  madanm en  ki aktyelman zot pe fer waitress chamber maid  zot in sir mwan Mrs Lemiel mwan mon annan 40an mon  pe travay dan sa sekter travay aswar pa’n en problenm pou mwan mon’n donn nesans 4,5,6 zanfan i pa’n en problenm  ler nou pe regard bann zenerasyon la ki m[pe ote la konmela ki’n vin en issue pou zot ou konnen me solman nou  bezwen sey rod en fason sey travay ansanm ;- sekter prive vin ansanm pou nou kapab vwar dan ki laliny ki nou pou bezwen pran ki nou pou kapab al ladan- ki pa en keksoz ki pou bezwen vin ozordi pou demen – en keksoz ki pou pran letan.

Akoz ler nou pe koz en letid i pou pran en kantite letan, me parkont mon asire osi ki petet i annan serten letid ki pe ganny fer akoz mon rapel dan bann diskisyon dan lepase, letan nou pe gete ki mannyer  ou pou soulaz bann madanm ki travay.  Menm en ler nou pe gete Mr Speaker  8 er, 4er  la i en problenm get nou koman bann Manm Lasanble.  Nou komans travay 9er nou, ke ler en ler nou sorti la? 8er.  I pa toultan. I pa toultan li,  me i en difikilte pour nou parfwa, sirtou ou koman sa madanm, menm ou annan msye se pa kwa kot ou, me ler ou war ou petet msye osi pe antre tar, ou bezwen pe ale, pe al kwi sa manze al met en keksoz defrost.

Konbyen fwa ou koman sa dimoun ou’n bezwen pas kot en takeaway zis aste en manze anmenn kot lakaz, ler ou arive gete zanfan ou’n fer ou homework?  Anmennen mon a regarde.’’ Ou konnen?  I vin en pti lenkonvenyans pour ou.  Ou santi sa ou menm si pa toultan ki pe arive.  So mon konnen pour dir travay shift, travay long hours, travay aswar i en dilenm wi.  I en dilenm sirtou, sirtou pour nou bann madanm. Ok ?

So Mr Speaker an gro mon krwar sa Mosyon li menm parey mon pe dir, i annan son sans, me nou bezwen fer sir ki an konsiltasyon nou sey regarde ki fason ki mannyer nou pour vwar, pour nou kapab amelyor sa sityasyon nou bann madanm.  E osi bann msye tousel ki kit zanfan.

En lot legzanp Mr Speaker, yer mon fek pe koz avek en manman tousel e sa madanm i dir ek mwan i ti’n ganny en travay dan en kazino. I annan zanfan – son pli  ba zanfan mon krwar i annan 7an, e li aswar in ale in komans ek sa louvraz 1 mwan 2 mwan, me zis apre in ganny threaten avek en dimoun ki’n dir li poudir mon pe al dir sosyal poudir ou kit ou zanfan tousel, ou al travay aswar.  Ou konnen, i pe sey debrouye i pe sey rod lavi li.  Me i sitan annan sa lobstak – bokou lobstak devan nou bann madanm ki nou bezwen osi travay avek nou bann madanm, empower zot ankor en pti pe plis.  Nou konnen nou bann madanm in ganny empowered en kantite, akoz zot in depas bann msye bokou. E se sa ki ozordi ou war zot, zot pe lead zot lakour.  E parey in ganny dir bann madanm i for.

Wi nou for nou, me selman still nou bezwen lapir akoz enn ler, ler ou regarde bann managers sa bann letablisman touris, i plizoumwen bann zonm. Me selman sa bann HR officers osi i annan i kapab zonm i annan i kapab fanm, petet zot bezwen en pti pe pli lenient.  Zot pour bezwen regard en pti ki mannyer zot kapab zwe, zwe avek sa bann shift hours pour kapab amelyor kondisyon travay nou bann madanm.

So mon krwar avek sa enn de pti mo Mr Speaker mwan mon pour siport sa Mosyon, pou nou kapab war, ankouraz Gouvernman ansanm en sekter prive pour travay ansanm, pour nou gete ki mannyer nou kapab soulaz bann manman tousel  e osi bann papa tousel ki travay aswar.  Mersi Mr Speaker.

 

MR SPEAKER

Mersi Onorab Lemiel.  Mon ava donn laparol Onorab Simon Gill.

 

HON SIMON GILL

Mersi bokou Mr Speaker.  Bonzour. Bonzour tou koleg Onorab e tou Manm piblik ki pe ekout nou. Mr Speaker Mosyon prezante par Onorab De Letourdie i en Mosyon ki dan son lespri sa Mosyon i en Mosyon ki pozitif.

E mon swete ki tou bann lezot entervenan, i ava koze apre mwan, i ava kapab gard tou sa lespri pozitif deryer sa Mosyon. Mon dir pozitif Mr Speaker, akoz i annan en gran similarite avek bann prensip fondamantal ki nou parti in krwar ladan e kontinyen krwar ladan.

E dan nou dernyen revizyon nou Konstitisyon, Konstitisyon United Seychelles dan lartik 23(1) e 23(2), 23(3), nou koz lo sa size ki apel gender.  E nou krwar ki nou demars i bezwen demars kot nou kontinyen montre sa parite dan gender isi dan Sesel e annan konesans lo nou listwar parkour listwar Sesel kot bann madanm ti annan en lot kalite konsiderasyon lo zot. Mon konnen ki nou’n fer en kantite progre dan sa direksyon Mr Speaker pour nou revwar la fason ki mannyer madanm dan nou sosyete i repozisyonn zot.  E sa i pa’n arive akoz zis in arive.  In arive akoz in annan en zefor kontinyel, sistematik pour kapab empower bann madanm Seselwa.

Nou mazin en lepok kot bann madanm ti reste kot lakaz, pour zot fer tou amenazman lakaz.  R nou osi bezwen mazin en moman kot sa dinamik sosyal dan nou sosyete in sanze kot madanm in ganny akse avek ledikasyon, in ganny akse avek training formasyon liniversite, zot in ganny bann karyer ekivalan avek bann karyer bann zonm e zot in ganny empower pour zot zwe en rol enportan e desisiv e donn  nou en koudmen pour definir direksyon sosyete Seselwa Mr Speaker.  E in napa okenn lezot parti Mr Speaker ki’n la o pouvwar ki’n kree sa kondisyon pour ki bann madanm i reisir ariv kot limit, kot zot oule arive.  E mon’n fer en referans avek nou Konstitisyon United Seychelles e ladan nou’n mete ki otan ki i posib, otan ki tou bann kondisyon i annord, nou bezwen rasire ki lo tou nivo striktir nou parti, ki nou bezwen fer sir ki si i annan en zonm ki dan latet en striktir son segon, son depite, oubyen son Vis-Chair i bezwen en madanm.  I sa degre ki nou’n reisir transform nou parti e met li dan nou Konstitisyon.  E ler mon fini Mr Speaker, mon pour remet en kopi Konstitisyon United Seychelles avek nou Lasanble. Pour ki bann Manm i kapab lir lo paz 23, Lartik 23 kot nou koz lo gender e bann provizyon ki nou fer dan nou Konstitisyon.

 

 

(APPLAUSE)

 

HON SIMON GILL

E Mr Speaker nou’n dir osi ladan ki nou bezwen asire kil o tou nivo nou striktir i bezwen annan en minimonm 30 poursan pozisyon ki ganny rezerve eksklisivman pour bann madanm dan nou parti.

 

(APPLAUSE)

 

HON SIMON GILL

E mon salye Onorab De Letourdie pour anmenn sa Mosyon ankor enn fwa Mr Speaker, e mon pour dir avek Onorab De Letourdie mon pour siport son Mosyon akoz i anliny avek filozofi United Seychelles!

 

 

(APPLAUSE)

 

HON SIMON GILL

E Mr Speaker nou al pli lwen. Mon pa pour al lo bann matematik ki Onorab Ahmed ex PS dan Gouvernman Parti Lepep, SPPF e la kandida Vis- Prezidan pour LDS pour prosen eleksyon Lasanble Nasyonal in dir.  Mon pa pour al dan sa bann matematik.  Me nou pour fer en analiz lo bann eleman enportan ki nou krwar merit sa Mosyon prezante par Onorab De Letourdie i pe debout lo la.

Mr Speaker Lalwa Lanplwa ozordi mannyer i ete dan Sesel, i dir nou ki nou bezwen fer sir ki dan tou bann lenstitisyon kot zonm fanm i anploye, ki nou bezwen fer sir ki nou napa diskriminasyon. Nou bezwen fer sir ki i annan en tretman egal.

 

MR SPEAKER

Onorab Gill en moman. Bon mon’n allow en pti pe sa bann interjections.  Annou pa les li deborde, al pli lwen. Onorab Gill annou kontinyen.

 

HON SIMON GILL

Mr Speaker dan nou Lalwa Lanplwa ozordi, bann provizyon ki mannyer i ekrir i dir i etablir ki tou bann lenstitisyon i bezwen rasire ki i annan en tretman egal pour bann diferan sex, zonm fanm – tretman egal. Sa i enkli depi saler, pour menm pozisyon travay, menm responsabilite e sa i enkli osi bann ler travay. E i enportan ki nou pa bliye se nou parti ki’n lite pour bann madanm ganny menm lapey ek bann zonm isi dan Sesel.  Pa ti le ka avan.

E nou debout for pour nou kontinyen rasire ki sa prensip nob ki ankor en rev dan bokou pei, ki isi dan Sesel ki nou respekte li e met li an aplikasyon. Me byensir sosyete i evolye Mr Speaker.  E sosyete Seselwa in evolye. Bann madanm pe reklanmen ozordi atraver Mosyon ki’n ganny prezante, ki i annan en konsiderasyon spesyal dan bann diferan lenstitisyon travay pour zot.  E pe demann en konsiderasyon spesyal ki nou donn zot posibilite pour travay zis shift lizour e sa dan li menm li pour demann en lamannman mon krwar, mon stand to be corrected par avoka ki dan nou Lasanble ozordi, mon krwar i pour demann en serten lamannman dan nou Lalwa Lanplwa isi dan Sesel.

E si sa i le ka Mr Speaker mwan mon dir si nou kapab met li an aplikasyon mon krwar i pour bon.  Mon krwar i pour en lot loportinite ki pour ganny kree pour bann madanm Seselwaz pour zot kapab rantre e zwe en rol bokou pli aktiv an pli gran nonm dan devlopman ekonomik sa pei, e zot menm zot vin ekonomikman endepandan e finansyerman endepandan koman en konsekans pozitif sa nouvo misyon ki zot ava anbark lo la ;- savedir pran responsabilite en travay byensir pour bann ki pa travay. E pour bann ki deza dan en lanplwa osi petet sa i ava kree en lot loportinite pour zot vwar loportinite pour sanz zot ler travay.  I a kree en nouvo dinamik pour zot fanmir e pour zot menm zot.  E anfen kont dan lanaliz final Mr Speaker, sa ki nou pe rode se pour angaz tou Seselwa e Seselwaz dan devlopman ek kreasyon larises dan nou pei Sesel.                                          Iltilman se sa ki nou oule i arive.  Se tou bann zonm fanm ki annan lafors, ki annan lenerzi ki annan kapasite abilite pour kontribye, travay e kree larises dan pei, pour ki nou devlop nou pei, se sa ki nou oule i arive avek sa Sesel Mr Speaker.  E sa ankor en n fwa i anliny avek filozofi, avek misyon United Seychelles e i en misyon ki nou kandida prezidansyel, pe reste firm lo la e i pour kontinyen dan son prosen Manifesto, ki i pour prezante avek lepep Seselwa.  Lanfaz ki i pour mete se en lanfaz kot nou bezwen kree tou kondisyon posib, pour nou donn loportinite bann madanm, bann fanm Seselwaz pour zot kapab zwe en rol bokou pli aktiv dan kreasyon e dan devlopman Sesel Mr Speaker.  E sa in dir mwan ki i pour mete dan son prosen manifesto mon pe donn LDS deza touzour e avan gou ki pour annan dan Manifesto nou kandida prezidansyel.  E nou a dir zot osi probableman zot devret amann zot Konstitisyon pour ki zot met dan zot Konstitisyon en provizyon focus lo bann madanm dan zot Konstitisyon ki zot napa ozordi en poursantaz ki dir vwala ki nou pe aim koman loportinite pour bann madanm dan LDS.  E menm dan SNP zot Konstitisyon zot napa.

So mon ava demande ki zot organize met sa dan zot dan Konstitisyon, pour ki nou vreman vwar laparol kot i ganny enskri e met li dan en Konstitisyon pour ki nou kapab swiv li. Dan zot Konstitisyon napa landrwa kot zot dir ki zot pour rezerv an mwayenn 30poursan pozisyon pour bann madanm ki siport zot mouvman.  Napa sa dan zot Konstitisyon. Mon ti ava voudre zot mete.  Amann zot Konstitisyon!

Mr Speaker si Onorab Gervais Henrie i oule kestyon Koudeta e Onorab Woodcock i oule kestyon Koudeta, mon ava demann li dimoun ki i bezwen demann kestyon Koudeta avek  se Onorab Jean Francois Ferrari!

 

(APPLAUSE)

 

MR SPEAKER

Onorab, Onorab, Onorab, Onorab …

 

(Interruption)

 

MR SPEAKER

… en moman, en moman, en moman.  Onorab,

 

(Interruption)

 

HON SIMON GILL

… ki pa asiz tro lwen avek zot!

 

 

MR SPEAKER

Onorab Gill,

 

HON SIMON GILL

… e ki  zot Chief Whip!

 

(Interruption)

 

MR SPEAKER

Onorab Gill, Onorab Gill annou – mon demann ou pour ou retract sa dernyen bout.  Ou ti pe byen ale lo ou Mosyon. Ou pe montre relevans Konstitisyon avek sa Mosyon, pour empower bann madanm. Me mon pa krwar ou’n ganny provoke sa kantite pour ou fer sa dernyen remark, e mon ti a kontan m ou retract sa dernyen remark, kontinyen avek ou lentervansyon.

 

HON SIMON GILL

Mr Speaker si oule mon retract ki si Onorab Woodcock e lezot Onorab i bezwen demann kestyon relevan lo Koudeta avek Onorab Jean-Francois Ferrari, Mr Speaker mon ava retract sa.

 

(laughter)

 

MR SPEAKER

Non, non.  Order! Order!  Order!   Koudeta pa’n antre ladan, involvement Onorab Ferrari pa’n antre dan sa deba.  E bann komanter ki mon’n tande lo sa kote pa’n provok en reaksyon parey.

Alor Onorab Gill retract ou dernyen statement e kontinyen ou lentervansyon.

 

HON SIMON GILL

Mr Speaker mon retract sa statement.  Mersi.

 

MR SPEAKER

Mersi. Kontinyen ou lentervansyon.

 

HON SIMON GILL

Mr Speaker lo Mosyon Onorab De Letourdie, Mr Speaker mon krwar mon ti pe byen ale e mon’n donn serten lespas tolerans e mon krwar zot in pran tro bokou.

 

MR SPEAKER

Non, non, Onorab, Onorab e moman, en moman, en moman  Onorab Woodcock mon’n antann ou sa enn.  mon oule ou retract sa komanter. Met ou mic on mon oule ou retract sa komanter. Ok.  Ou pa bezwen repet nanryen.

 

HON WAVEL WOODCOCK

Mr Speaker mon retract komanter lo sa bounced cheque.  Sorry.

 

MR SPEAKER

Mersi, mersi, Onorab Woodcock. Non, non, mwan mon’n tande nou pa oule repete.  Onorab Gill kontinyen.

 

HON SIMON GILL

Mr Speaker en Mosyon ki sitan annan en kantite sibstans ladan nou’n detourn li e zot entervenir pour provoke e fer mwan detourn lo lesansyel Mosyon.  E mon swete – mon swete  ki nou kapab reste en pti pe kalm, trankil, e les mwan al lo dernyen 15 minit mon konklizyon.

Mr Speaker nou ava …

 

(Off-Mic)

 

MR SPEAKER

Order ! Order! Order! Bon plis nou entervenir nou annan sa bann interjection, plis mon pou allow li plis letan pour li koze. Alor annou donn sans Onorab Simon Gill i ava fer son dernyen bout entervansyon i ava wrap-up.  Ok?  Akoz plis nou pour enteronpe, mon pour bezwen donn li sa e letan ki in perdi. Onorab Gill kontinyen.

 

HON SIMON GILL

Mr Speaker mersi bokou e mon ti ava voudre ki Onorab Ferrari i fer atansyon son bann statement ki i fer dan sa Lasanble.

I annan en bon pe letan mon pe obzerv li, mon pe swiv son bann statement letan mon pe koze.  E Onorab Ferrari pa kapab dir dimoun  ay mwan akoz si i annan en dimoun ki ganny pli aye dan sa pei se en dimoun ki rasis parey Jean-Francois Ferrari!

 

(Interruption)

 

MR SPEAKER

 Ok. Order!  Order! Order!  Order !

 

 (Interruption)

 

HON SIMON GILL

Onorab Ferrari ou en rasis  Jean- Francois Ferrari ! 

 

(Interruption)

 

MR SPEAKER

Order!  Order! Order!

 

 (Interruption)

 

HON SIMON GILL

Ou en rasis  Jean-Francois Ferrari ! 

 

 (Interruption)

 

HON SIMON GILL

Ou en rasis  Jean-Francois Ferrari ! 

 

MR SPEAKER

Order! Order! Order! Order.

 

(Interruption)

 

HON SIMON GILL

Ou en rasis ! 

 

(Interruption)

 

MR SPEAKER

Order!  Order!

 

(Interruption)

 

MR SPEAKER

Bon, bon mon pour donn laparol tou le de kote.   Onorab Ferrari mon’n antann sa komanter.  Ok? Mon anvi ou retract sa komanter ki dimoun deor i ay Onorab Simon Gill e apre sa Onorab Simon Gill osi tou i ava retract son statement ki in fer.  Onorab Ferrari mon komans avek ou.

 

HON JEAN-FRANCOIS FERRARI

Ok, mon retract sa ki mon’n dir Mr Speaker.

 

MR SPEAKER

Mersi.  Mersi.  Onorab Simon Gill. Mon oule ou retract sa dernyen statement osi tou.

 

HON SIMON GILL

Wi Mr Speaker mon retract statement Onorab Ferrari i en rasis !

 

(Interruption)

 

MR SPEAKER

Non, non, non, non, non, non. La ou pe, yer mon fek lir en statement ;- mon fek lir en statement yer kot nou pe koze kot nou devret la osi pour nou build bridges ;- pa pour nou servi hate speaches and so on. Annou move dan sa direksyon. Onorab Simon Gill, annou retract e annou fini ou ava wrap-up ou lentervansyon.

 

HON SIMON GILL

Mr Speaker Onorab Florry Larue i ava vin retract pour mwan si i pa tande.  Mr Speaker mon retract sa statement, Mr Speaker.

 

MR SPEAKER

Ale dakor. Annou move on.

 

HON SIMON GILL

Mr Speaker lo Mosyon….

 

(Off-Mic)

 

MR SPEAKER

Order! Order! Order!  Kontinyen Onorab.

 

(Off-Mic)

 

MR SPEAKER

Bon.  Order!  Si nou ti pe ekoute nou ti pour tande pour dir in retract. Ok?

 

(Interruption)

 

MR SPEAKER

Non, non, non!

 

(Interruption)

 

MR SPEAKER

Order! Order!  I annan en Chair dan sa Lasanble!  Mon’n donn li sa sans pour li retract e son mic ti on.

 

 

(Interruption)

 

MR SPEAKER

Bon, mon dir ankor i annan en Chair dan sa Lasanble, i annan en Chair dan sa Lasanble.  Ok?   E mwan mon’n antann Onorab Simon Gill on mic in retract ler in adres Onorab Flory Larue. Mon aksepte ki Onorab Simon Gill in retract for the record e mon demann Onorab Gill pour li wrap-up son lentervansyon.

 

HON SIMON GILL

Mersi bokou Mr Speaker. Mr Speaker mon ava dir avek Onorab De Letourdie pa trakase, malgre tou sa bann enterzeksyon dan mon lentervansyon, personn pa pour anpes mwan pour siport  ou Mosyon, akoz i dan laliny ki United Seychelles i pourswiv e nou pour kontinyen pourswiv sa menm laliny.  Mersi bokou Mr Speaker.

 

MR SPEAKER

Mersi Onorab Simon Gill.  Mon ava donn laparol Onorab Clifford Andre.

 

HON CLIFFORD ANDRE

Mersi Mr Speaker.  Mr Speaker lentervenan avan mwan in dir annou focus e reste dan lespri sa Mosyon ki’n ganny anmennen par Onorab De Letourdie.  Me Mr Speaker letan mon get sa Mosyon mon pa vwar kote ladan ki fer referans avek Konstitisyon okenn parti politik.  Napa ditou. E alors pour Onorab Simon Gill dir ki en lot parti politik i bezwen enkli parey son parti politik US i annan dan zot Konstitisyon, i pa anliny avek sa Mosyon.

In dir avek nou ki i ti a swete nou reste focus lo sa Mosyon, me li menm li in tir son focus lo sa Mosyon e in al fer politik bonmarse avek.

Mr Speaker sa Mosyon in vin a en letan ki vreman, vreman enportan. Sesel i en pei ki depann lo touris e nou tou nou konnen ki si nou al kot en lotel pour nou al dezennen oubyen menm pour nou al dinen, nou pour vwar plis etranze pe travay pe travay dan restoran ki annan Seselwa.  Alors Mr Speaker sa i montre ki poursantaz etranze ki pe travay, i plis ki Seselwa. Alors i vreman enportan ki dan sa konteks, bann Seselwa  mwan mon pou dir  parey Onorab Lemiel in dir ki osi bann msye ek bann madanm, i ganny gete en pe favorableman.

Mon’n tann Onorab Sebastien Pillay letan in dir poudir nou pa kapab kree en sityasyon kot nou donn faver Seselwa, e nou kree en sort of lenzistis oubyen de-balans dan sa bann dimoun ki’n vin travay isi e zot osi in dir i annan ki kapab annan zanfan. Wi i normal zot vini en manman ki pe vin isi avek son zanfan i pe vin isi avek son fanmir, so i annan sa lot kote ki la kot lakour.  Alors ki fer ki nou tou nou konnen poudir Sesel i annan bann single parent, mon pa pou dir single mothers akoz i annan single fathers osi. I annan single parent, alors ki fer ki letan li i pe al travay aswar posibleman par ler i napa landrwa pour li kit son zanfan.

So si i pe al lizour son zanfan i dan lekol, i konnen i annan en landrwa kot son zanfan i kapab ganny garde e par ler i annan bann extended periods ki ganny fer apre lekol pour gard bann zanfan ziska 5 er, 6er kot bann teachers i take on sa.  Nou menm nou, nou’n diskit sa dan sa Lasanble isi.  Alors Mr Speaker mwan mon krwar sa Mosyon i tre bon e sa Mosyon pe get en kou nou Seselwa Sesel, ki vreman, vreman enportan. Sa i nou pei. Ou vin travay kot nou, menm si nou’n siny bann Konvansyon enternasyonal, dan tou konvansyon i pour fer sir ki ou koman sa pei ou annan serten lavantaz dan sa domenn.

Ozordi nou ekout Lanmerik, Prezidan Trump i dir ou America first e Onorab De Letourdie ki sorti dan en LDS in byen fer e sa Mosyon Mr Speaker i sorti pa lot ki kot en Manm LDS. Pou dir, pour demande ki Seychellois in Seychelles i first.

Pa vedir ki nou pa bezwen etranze.  Far from it Mr Speaker e alors mwan mon oule dir avek Onorab De Letourdie ki mwan mon pour donn sipor sa Mosyon. Me mon ti a kontan si i kapab konsider en pti lamannman.  E si i posib Mr Speaker mon ava lir ki mon ti ava sizere. ‘’Sa Lasanble i demann avek Gouvernman pour etidye e met an plas bann nouvo kondisyon travay pour permet bann paran Seselwa ki kapab travay dan sekter tourizm, pour ganny priyorite.’’ Mon dir paran akoz i anglob tou le de. So i en keksoz ki demen en msye Seselwa pa pour kapab dir avek nou ki poudir be gete ou’n get zis madanm ou pa’n get nou, me nou dir bann paran oubyen bann Seselwa ki pe travay dan sa sekter.  Mr Speaker fodre pa ki nou les bann HR, i annan bokou ki bann etranze, e ler zot vini zot vin avek bann persepsyon kot zot sorti.

E i annan zot osi ki pa konpran kiltir Seselwa, e ki parfwa nou vwar ki i annan sa bann konfizyon oubyen difikilte, kot bann HR etranze i fer bann Seselwa si oule degoute dan bann landrwa e se sa apre nou vwar bokou etranze i vini. I annan en kantite zenn Seselwa ki pa oule, pa oule al travay dan lotel. Pa akoz i pa kontan sa travay.  Lotrozour la nou’n tande i annan 14 ki’n ganny fer ale.  Alors nou, nou bezwen donn nou sipor e demann Gouvernman pour revwar sa afon pour ki nou pep irespektiv Mr Speaker, ki parti politik i siporte pour ki i kapab annan en travay pour ki i kapab sonny son fanmir e pou ki i kapab enjoy sa travay akoz i annan dimoun ki al travay, i dir ou la zis mon bezwen al travay akoz mon lafen. Mon bezwen manze.  I enportan ki dimoun i dir ou wi nou pe al travay akoz mon annan en misyon pour konplete dan mon landrwa travay pour mon fer sir ki Sesel sa landrwa sa lotel i prospere e Sesel nou ganny plis touris ki revin Sesel bann repeaters ki vini pour zot travay Sesel.

Mr Speaker mon’n ganny loportinite parey lezot kil o Komite Zil pour nou al vizit Denis Island. I enteresan pour vwar ki mannyer Seselwa pe esey fer kondisyon akseptab pour bann dimoun travay lo zil. Me par kont par ler ou ganny sa konsern ki zot leve, se ki lavi zil i pa parey lavi Mahe alor zot santi ki zot fer en pti pe letan, apre zot ale alors ki etranze i bezwen antre.

I enportan ki nou devlop sa kiltir kot nou en pei kot nou annan zil  e alors mon krwar nou bezwen ganny train e moulded pour nou kapab osi viv en pe lavi zil e Mahe, i en zil me selman i en gran zil ki annan bokou aktivite me selman nou bezwen adapte nou avek sa.

Avek sa detrwa mon Mr Speaker mon pour dir avek Onorab De Letourdie ki mon pour siport son Mosyon.  Me avan mon terminen mon ti a kontan dir en keksoz. Onorab Gill, Simon Gill in dir ki pour poudir  tou sa bann lenstans ki egziste ozordi, in ganny mete par son parti politik pour bann dimoun ki la.

Mr Speaker set akoz in ganny mete par sa parti politik ki o pouvwar ozordi e nou pe vwar defo avek.  Nou pe dir fodre aranze.  Me napa lot parti politik ki ti la. Alors sa lerer in ganny komet par sa parti politik ki la ki sanmenm sa ozordi sa parti politik ki pour pran pouvwar an 2020, pe dir avek zot la i annan serten keksoz ki bezwen ganny aranze pour fer sir ki Seselwa ki benefisye e Seselwa ki reste premye dan Sesel. Mersi Mr Speaker.

 

MR SPEAKER

Mersi Onorab Andre. Bon i reste mon ankor 4 entervenan lo mon lalis. Nou pour, wi i fer 5 la, nou pour pran break la akoz mon annan en apwentman ase irzan – en meeting enportan ki mon pour bezwen deplase e mon sizere nou retournen 2er pour kontinyasyon deba lo Mosyon ki devan nou. So nou ava break e nou a retournen 2 er apre midi.

 

(BREAK)

 

MR SPEAKER

Bonn apre midi tou Manm Onorab, e bonn apre midi tou dimoun ki a lekout e pe swiv travay Lasanble Nasyonal. Bon parey mon ti’n anonse avan nou break mon annan mon 5 Manm lo mon lalis ekskli mover ki pour fer son Right of Reply apre.  Onorab De Commarmond ou osi oule koze, i fer 6 Manm, ok?  E mon ti a kontan zis pour gidans enform bann ki pour entervenir pour dir i annan bokou keksoz ki’n ganny dir, annou evit repetisyon e annou anmenn bann pwen ki nouvo, bann argiman ki nouvo lo sa Mosyon, e annou sey fer entervasyon dan en 10, 15 minit koumsa.  Wi. Ok, so lala fason ki nou pour bouze avek sa Mosyon e toudswit mon ava donn laparol Onorab Johan Loze.

 

HON JOHAN LOZE

Mersi Mr Speaker. Bonn apre midi tou koleg Onorab e tou dimoun a lekout. Mr Speaker mon pran laparol lo sa Mosyon koman enn koman en paran, me koman en paran ki’n fer en parkour mon lavi kot mon konnen ki savedir travay shift sirtou sa ki bann Anglo Sakson i kontan term koman grave yard shift. Mon’n fer shift 4er apre midi ziska 8er bomaten. Mon’n fer shift 8er diswar, 8er bomaten, e mon’n menm konnen savedir double shift.

E koman en paran plizyer lannen pli tar ki ou zanfan i apros ou, i dir ou papa mon rapel letan ou ti al travay aswar toultan mon ti pe get nouvel, mon ti plere aswar letan ou ti ale.  E la ou pa pe koz en single parent ou pe koz lo nuclear family, manman, papa 3 zanfan e i tough menm pour en fanmir konplet – let alone en manman tousel ki pe anmenn en heavy burden detrwa zanfan pe tay deryer bills bann lezot harrasment lavi ki vin avek ankor, i pa fasil. Mwan mon ti sanse dan lesans ki mon ti travay avek en very good company ki ti annan tre bon management e ki ti pran bon ka avek son staffSo mon ti pran tou sa bann shift aswar mwan. Anvoye, konze piblik, Nwel, Lannen. La ler i annan bann zafer staff party  manman mon kontan menm, donn mwan mon a travay.  E ou motive pour fer lim akoz ou ganny peye.  Seselwa i annan sa pti dikton ki dir  ou ‘’ou travay akoz ou vant.’’

Be travay aswar pour bokou nou ki’n fer sa parkour ki konn son douler, ki konn son soufrans. Sa ki nou konnen se ki i ede pez sa gro lafen gal pour ou, pour ou zanfan, pour ou madanm, swa pour en madanm pour son msye, i ede stabiliz keksoz. That is si ou pe ganny byen reminere pour sa servis ki ou pe donnen. E mon pran li koumsa akoz i annan en lot kote lo travay aswar ki petet nou pa’n gete osi se ki i annan serten lakonpannyen ki pey byen.  Zot pey ou pli byen pour travay aswar ki pour sa travay lizour, e i annan bokou dimoun ki opte pour pran sa travay aswar.  Zot go over and above sa ki zot devret pe fer senpleman akoz sa motivasyon ki zot gannyen from fer sa.

Be letan mon ti pe travay aswar enn bann keksoz – a en serten pwen ou komans santi bann, ou santi ou tansyon i monte, ou santi ou bann febles sirtou si ou pe donn en pe bokou, sa bann letan mon ti donnen an term letan sirtou, prezan ou ale ou al fer bann resers lo kwa ki en dimoun i fer letan ou travay aswar.  Enn bann premye keksoz ki zot dir ou se pran ka avek ou prop lasante.  Sa i No.1. Si ou en dimoun ki travay aswar fodre ou pran byen ka avek ou prop lasante avan anything else. Prezan ou komans rode ki mannyer ou fer sa.  Zot dir ou priyoritiz letan dormi.

E enn bann fason zot dir ou priyoritiz letan dormi zot dir ou be housework pa ou priyorite si ou en dimoun ki travay aswar, dormi ki ou priyorite. E mon rapel enn bann keksoz mon ti lir i dir ou koumsa ‘’the dishes will be still in the sink when you wake up. ‘’Alors ou dormi ou, ou a lav ou dishes letan ou- Be Mr Speaker o, lekel sa madanm Seselwa ki pour al dormi ki pour kit lasyet dan sink?  Angle petet,  petet Angle, les sink.  Sa madanm Seselwa pou  ki sorti travay aswar i pour vini i pa pour dormi i pour netway sa ki dan sink me i pour pran son balo lenz. I pour al lave.  Zour i napa balo lenz pour lave i pour pran sa pannyen lenz i pour drese.

Mon konn sa tre byen akoz mon annan enn dan lakour, ki tan i pa war defen louvraz travay pa ankor ganny lekstrenmonksyon, i pa pour arete li.  E sa se nou fanm Seselwa, sa se nou kiltir, sa se sa fanm Kreol li.  Deza sa bout enportan kot i dir ou pran ka avek ou prop lasante. Priyoritiz letan pour ou dormi deza mon pa war zot pe fer li. Mon pa pe vwar madanm Seselwa pe fer sa  bout akoz i pa dan zot natir.   Letan i pou’n ariv kot sa lakaz i pour komans tay deryer dega ki zanfan in fer, i pour poli son lakwizin, i pour okip son lenz i pour fer son lakaz spic and span petet si i reste li 2 erdtan i a dormi, petet, mon pa asire mon krwar pa.  Kantmenm 15 minit petet i a gannyen apre i ava al lager ek sa bis apre i retonm dan son louvraz ankor.

En lot konsey ki i donnen konsonm plis delo, konsonm bokou delo si ou travay aswar, manz keksoz ki healthy e ki donn ou lenerzi e Sesel parey nou konnen zot menm zot ki kout en pe pli ser e souvan dimoun ki end pe travay lo shift, li menm li i pa pe afford pour manz sitan healthy li osi.

Apre enn bann keksoz final i dir ou fer letan pour ou lekor e pour bann keksoz ki ou anvi fer. Sa i pour gard ou sanite entakt.  But there again en madanm ki li i annan zanfan ki pe travay shift byen rare nou bann madanm zot pa selfish zot, zot donn zot letan pour okip zot fanmir, pour okip tou dimoun otour zot e si i annan en keksoz ki lamazorite madanm Seselwa ki mon mon’n ganny loner pour mon konnen zot pa fer,  se letan pour zot lekor. E sa i enn bann lezot keksoz ki dir ou fer letan ou pe travay shift.

E enn bann keksoz final ki i dir ou fer se annan en network otour ou, en network fanmir ouswa en network zanmi ki ou kapab rely lo la, ki ou kapab apir lo la pour ed ou avek sirtou pour ou bann zanfan.

E la kot i vin difisil.  I vin difisil akoz Sesel i annan en kanser ki pe ronny nou sosyete sa se labi dan fanmir. I vin difisil.  Lontan sa dikton ‘’it takes a village to raise a child’’ ti vre, nou tou nou ti ede nou ti met, donn en koudmen pour fer grandi en zanfan. Konmela si ou annan zanfan pran tak dan bife.   Pa les personn ganny akse akoz ou pa zanmen konnen ki kapab arive.   E sa kestyon labi zanfan mon parfetman dakor avek Onorab Woodcock ki i en maler  – i en nespes malediksyon  lo nou sosyete an se moman e i posibleman – posibleman bokou, bokou pli pir ki okenn nou la anndan la ozordi i pe sispekte ki i ete.  E  sa set en keksoz ki in kasyet nou‘n toufe, nou’n pez anba tapi, nou’n pez anba dra.  Nou asize nou vey zaksyon tou otour nou. Nou vey zaksyon adilt sa ki bann gran gran dimoun pe fer e nou pa koz zanmen sa ki pe arive avek zanfan e sa i en keksoz ki bezwen sanze dan nou sosyete so, build an army of support network around you pou  ed ou avek ou zanfan mon pa krwar  ki nou bann madanm i vreman kapan fer li.

I annan en pwen ki Onorab Larue in tous lo la ki sa mon parfetman dakor avek li  se sa 24hour licenced daycare i enportan e menm si in dir ki posibleman sa bann dimoun ki pou bezwen li sa servis zot pa pou afford mon krwar koman en sosyete nou pou bezwen met some form of subsidy available si i neseser.

E mon pou dir Onorab Letourdie ki i pou gannyen mon siport lo la. I pou ganny mon sipor akoz mon konn sa realite e mon kapab met mon lekor dan soulye en paran ki en manman ki en papa i en paran ki li i  pe bril son lannwit  – i pa sakrifye son lasante pou fer grandi son zanfan i en keksoz tre nob e mon krwar nou devret pran letan pou salye e ankouraz bann paren ki fer li ki swazir pou  fer li  ki zot sa i zot vokasyon zot fason pou fer grandi zot zanfan.

So lentansyon Mosyon mon krwar  i tre bon Onorab  Letourdie e ou  pou  annan mon sipor personnel. Mon krwar  lo nou kote  nou  pou siport ou dan sa demars ki ou pe fer.  Premyer fwa ki mwan mon ti tann sa ti dan en  – ti fer en konversasyon  apre Bills Committee  nou de Onorab Afif, nou ti pe fer en friendly exchange of views e mon rappel mwan mon ti pe propoz ki sa bann 5 Star hotel sa bann gran lotel ti devret annan  en  24hour daycare on site  akoz bann madanm Seselwa son konsern primer se son zanfan li.   E se dan sa konversasyon ki Onorab Afif ti dir be  i senp sa annou fer parey IOT. IOT li i fer bann etranze travay aswar e bann madanm Seselwa i travay lizour. E  mon war ou pe sekwe ou latet  Onorab Afif  petet ou memwar i en pe kourt, selman mon rapel sa konversasyon tre byen. Mon  konnen sa ti ou propozisyon ou ti dir mwan e even then letan ou ti dir, mon rekonnet lentansyon selman posibleman i kapab annan bann pti issues legal avek ki mon sipoze  nou  kapab work out.

Mon kontan lafason ki Onorab Letourdie in  propoz son Mosyon in prezant son Mosyon in avoid tou bann polemik – bann polemik in vin apre selman mwan  i annan en keksoz ki mon ti a kontan  petet war, mon krwar petet i annan  en fason pli byen pou nou defann lentere nou pep – defann lentere  nou Nasyon defann lentere Kreol Seselwa san ki nou kre konfrontasyon avek personn dot dan nou pei.   Mon krwar ki  nou kapab defann lentere biznesmenn Seselwa, Kreol Seselwa san ki nou  pout down bann biznesmenn Seselwa a lorizin Endyen. Mon pa krwar  ki i neseser.   Mon pa krwar ki sa bann retorik ki ganny dir souvan i neseser. Mon konpran  – mon konpran kote i sorti  mwan.  I  en bann retorik politik ase fatige, ki  la depi en pe letan SNP in trenn sa kales kase e la, lavey eleksyon zot santi ki zot bezwen retourn kot zot core koz avek zot core.  E se zisteman sa ki zot pe fer. Set up sa konfrontasyon, ant Kreol Seselwa avek bann lezot dimoun  bann  lezot Seselwa a en lot baz etnik ouswa bann etranze kareman ki dan nou pei, personnelman mon pa santi ki sa i meyer fason.  Mosyon i bon – i tre bon parey mon’n dir i fantastik me dan nou deliberasyon nou pe fer bann keksoz danzere. Nou pe sey kree lekar, ant bann diferan dimoun ki pe vin lo sa bann pti bout ros dan milye en losean ki apel Sesel.   E sa i lafason ki zot, zot swazir pou zot delibere. I byen. Mon aplodi zot pou sa ki zot pe fer. Fotespere demen zot asim responsabilite pou rezilta sa bann keksoz ki zot pe fer. Letan i ariv ler pou fer sa mea culpa ki Onorab Sebastien Pillay in dir boner zot pou fer sa, ‘’c’est ma faute, c’est ma faute c’est ma plus  grande faute,’’ ki zot ou fer fotespere zot annan kouraz fer li e asim responsabilite pou sa bann keksoz ki zot pe fer.

Mr Speaker, en   fraudulent slip set en lerer ki pa entansyonnel me i  en lerer ki souvan i revel bokou keksoz ki dan laryer panse en dimoun – ki dan son subconscious.  E mwan personnelman si zot demann mwan mon konvenk ki sa 3000 travayer la ki Onorab Afif in mansyonnen ki i  pou  adisyonn par 7000 I  pou ganny 21milyon i pou fer danm i  pou fer danm tou le mwan mon asire ki sa 3000 travayer ki la – dabor les mwan etablir en baz. I annan 711 madanm ki unemployed Sesel, 711 pa 3000, i annan 711 madanm  whether zot single mothers or not me 711 madanm ki unemployed. Ou konnen kote ki annan 3000 dimoun?   Mon a dir zot kote ki  i annan 3000 dimoun e  Onorab Ferrari ti pe kriye off-mic taler ‘’a tir dan carer !’’  ‘’A tir dan carer !  Akoz dan carer wi carer i annan 3000 dimoun. I annan 3000 dimoun dan carer. Nou’n tann ou Onorab Ferrari nou annan zorey nou.  I annan 3000 dimoun dan carer e mon war li tre enteresan ki (1)  i le fer 3000 dimoun al travay  dan lotel li, e lot i dir kote i pou  ganny 3000 dimoun dan carer. Ou konnen mwan mon krwar i annan keksoz in  sap zot ozordi. I pa ti zot lentansyon dir  poudir  zot anvi ferm progranm carer  Sesel. In sap zot. In sape ! In sape unintentionally li zot in  dir, zot in dir la ozordi kote zot pou ganny 3000 dimoun pou anvoy travay dan lotel  – carer carer in sap zot. Be si sa i zot lentansyon fer kler annan kouraz grow a pear e  dir sa bann dimoun ki pe travay carer i  lentansyon LDS pou ferm sa progranm pou anvoy zot travay dan lotel !  E la la .E sa la i pa lentansyon Onorab De Letourdie sa. Sa i zot. Sa i zot dan leadership sa.  Sa i zot dan leadership. Zot pe eksplwat sa Mosyon Onorab Letourdie pou zot tir bann gran, gran koudpwen politik e la kot i sap zot. Laverite in sape.  Be dir !  Dir kler dir fran.   Annan kouraz. Annan kouraz mes chers amis !

Pa vini vin dir nou sepaman 3000 plis 7000 i fer 21milyon ou pou fer ou en danm toulezour !

 

 

 (Off-Mic)

Mr Speaker, toulezour?  Mr Speaker!

 

HON JOHAN LOZE

Pa vini vin rod nou tousala.

 

(Interruption)

 

MR SPEAKER

Onorab.  Onorab.

 

HON JOHAN LOZE

Yes? 

 

MR SPEAKER

Ou non i lo lalis.   Ou  ava take  it up.

 

HON JOHAN LOZE

Laverite !

 

 

(Interruption)

 

HON JOHAN LOZE

Laverite!

 

(Interruption)

 

 

MR SPEAKER

En moman Onorab.

 

HON JEAN-FRANCOIS FERRARI

(Off-Mic)

…  selman pa kapab dir …

 

MR SPEAKER

Onorab, attends!  Attends!

Mon annan …

 

HON JEAN-FRANCOIS FERRARI

(Off-Mic)

I pa kapab dir en keksoz parey Mr Speaker …

 

(Interruption)

 

MR SPEAKER

Bon Onorab Loze ou annan ou  2 minit pou ou wrap-up.  Annou pa anmenn – trenn sa deba dan  bann direksyon ki pa devret. E i annan bann alegasyon ki i pe fer me Onorab Ferrari ou non i lo lalis ou ava reponn taler, me i annan alegasyon ki’n ganny fer kont Onorab Afif ki’n deza koze, mon ava  donn laparol Onorab Afif.  Onorab Afif.

 

HON AHMED AFIF

Mersi Mr Speaker.  Mr Speaker mon ti a kontan port a ou latansyon ki Onorab Loze i  pe impute en improper motive. E i pe suggest poudir sa kote latab, nou, nou anvi tir carer dan zot louvraz e fer zot al travay lotel. Zanmen nou’n dir sa! E mwan sertennman zanmen mon’n dir sa ! Mon pa aksepte ki i impute poudir nou annan lentansyon ki  move pou fer dimoun perdi zot job e in osi dir ki poudir mon’n dir 3000 plis 7000 ki fer 10000 e li in ganny 21 – 3000 x 7000  i ganny 21milyon e nou pou fer en danm tou  le mwan! Mon pa’n zanmen dir keksoz sitan bet ki enfantil ki pa ni fer sans!  So pa bezwen   – si  ou pa kontan en dimoun pa bezwen ni denigre son karakter. E dezyenmman, pa bezwen impute keksoz lo lentansyon par deryer sa Mosyon e mon  krwar i devret retract sa statement. Mersi Mr Speaker.

 

MR SPEAKER

Mersi Onorab.   Bon mon ava zis fer en keksoz kler – ok?  Mon konnen i annan bann moman kot tou le de kote i profite i fer politik – ok?  Sa i landrwa kot politik i ganny fer – ok? Bomaten Onorab Simon Gill in dekrir ki i annan dan sn Konstitisyon  – in promet mwan en kopi Konstitisyon ki in donn mwan  – ok ?  I en fason pou li promouvwar e sa  landrwa ki i servi – sa platform pou li promouvwar kontenir son Konstitisyon.  Kwa ki zot pe defann and all that. I annan lezot Manm ki pou vini ki pou vin defann e nou pou war ankor byento dan deba Bidze kot zot pou defann bann diferan Polisi zot parti . Annou fer li. Nou kapab debat Polisi,  nou kapab atak Polisi en parti oubyen en lot, me annou fer li san ki nou pe denigre sa Manm. E dan konteks sa Manm mon’n swiv en pti pe sa largiman ki Onorab Loze pe anmennen, mon krwar la i annan en pe distortion   akoz …

 

(Off-Mic)

 

MR SPEAKER

… en moman … akoz mon pa’n antann okenn Manm dan zot lentervansyon dir poudir nou pe al  ferm  – ni enn ni lot kote – nou pe al ferm  sa progranm carer – ok?  Sa pa’n arive dan  okenn entervansyon e osi tou  Onorab Afif in mansyonnen  poudir avek sa larzan si nou kapab save 21milyon  nou kapab  avek – nou kapab lev oter Danm La Gogue, nou kapab fer en danm –  mon pa konnen  si in dir  petet tou le mwan oubyen tou le 2 mwan me pa en danm  – me pa en danm toulezour.

Annou pa distort – ok ? So annou konsantre lo merit Mosyon. Annou pa lans lo latak personnel pou nou denigre enn a lot. Avan nou break mon kapab e parey mon dir nou kapab annan en pti diferans lo Polisi me an menm tan, nou kapab build bridges.

Mon  kontan Onorab ler ou’n dir apre en Bills Committee meeting ou ti annan en konversasyon avek Onorab Afif. Se sa ki manm piblik  i oule konnen deor. I annan manm piblik ki sante poudir ler zot sorti la anndan zot  fini zot largiman deor i annan plis lager.  Ok?

 

(Off-Mic)

 

MR SPEAKER

Non, non, non, Onorab  – Ok?

So  kontinyen ou lentervansyon ou annan 2 minit pou wrap-up pou nou kapab donn lezot dimoun en sans pou zot entervenir.  Kontinyen Onorab.

 

HON JOHAN LOZE

Mr Speaker napa 3000 madanm unemployed Sesel.   I napa. I annan 711. Napa 3000 madanm single mother and or otherwise pou satisfer sa progranm ki Onorab Afif ti pe dir earlier.  I pa pou raise okenn 21milyon pou fer ni okenn lanmwatye en danm let alone enn dan sepa ki kantite  letan  ki i ti pe dir.  E si nou koz lo fer politik, e distorsyon, Onorab Afif i kontan fer distorsyon sif. I konn tre byen li. I konn tre byen ki from sa Mosyon ki la  – from tou bann propozisyon ki zot in fer personn pa  pou al raise 21milyon.  Sa i bann keksoz – bann labwet ki zot semen pou ganny siporter deor  bat lanmen. I enposib !  I pa pou arive.    Pa pou ariv zanmen !  Zot zis senm sa bann labwet deor, in the hope – in the hope ki dimoun a donn en vot.

Be ou annan ou en dimoun ki pe aspire pou diriz en pei, i asize la i  vin avek en sif koumsa, i pa ni konnen – i pa en keksoz  ki pou materyalize sa !  Premyer man parey mon’n dir  napa 3000 dimoun. Swa i en dimoun iresponsab ouswa parey mon’n dir son lentansyon sel landrwa ki annan 3000 dimoun se dan progranm carer. Sel landrwa ki annan 3000 dimoun available i dan progranm carer.

I annan zis 711 madanm unemployed. Mr Speaker, tou polémik politik aside i annan bokou merit pou Mosyon ki’n ganny aporte par Onorab De Letourdie ozordi dan nou Lasanble. Mosyon i annan bokou merit. Be sa ki mwan mon konvenki se ki madanm Seselwa e la mon pou siport largiman ki Onorab Sebastien Pillay in anmennen pli boner, zot for.  Zot vreman for. Zot pa bezwen ganny chouchoute zot pa bezwen  ganny met dan en bwat koton, zot pa bezwen bann progranm aksyon afirmatif e sirtou pa okenn aksyon afirmatif ki pou diskrimatwar kont en lot. Me selman wi nou bezwen en progranm   bann bon progranm ki pou met divan anba zot lezel ki pou ed zot fleri, devlope e  siport lafanmir e sosyete Seselwa.  Mersi Mr Speaker.

 

 

(APPLAUSE)

 

 

MR SPEAKER

Mersi Onorab Loze. Mon ava donn laparol Onorab Chantal Ghislain.

 

HON CHANTAL GHISLAIN

Mr Speaker mon pa pou long me solman koman en madanm mon oule siport en lot madanm dan son demars.  Me Mr Speaker mon war en pti pe danze dan en bout son demann ki in dir ler in demande ki  konmsi ki Gouvernman  i sey rod met an plas en sistenm kot zis  bann madanm  Seselwa  i travay lizour e  bann madanm etranze i travay aswar . Danze ladan se ki par egzanp si nou pou pran Lalwa Lanplwa  konmela and dan sa bout la dan lartik  46(a)  ki dir ou, ou pa devret pe discriminate okenn dimoun akoz i dir ou ki sa Lalwa Lanplwa i sofgard drwa tou travayer Sesel, ki pe travay Sesel.  E sa i osi enkli travayer etranze.  E bann travayer etranze zot osi zot form parti dan sa sistenm enn ki fer ki zot osi zot ganny proteze.  And ladan i dir ou dan sa Lartik 46 i dir ou pa kapab discriminate zot okenn travayer lo okenn grounds of lo zot laz, lo zot gender, zot sex, zot ras, zot kouler, zot nasyonalite zot langaz, relizyon dezabilite ouswa ki zot status ouswa sexual orientation. Sa i dan Lalwa sa. And ki vedir mon pour vwar en pe danze ladan.

Onorab Simon Gill in dir be si nou kapab fer sa nou ava sanz Lalwa.  But by zis sanz sa bout Lalwa, nou bezwen mazinen osi pour dir be kekfwa dan Mosyon nou pe dir bann madanm ki pe travay dan lotelri, be nou annan en kantite madanm osi ki travay aswar dan bann lezot sekter. Dizon konmela vre demen Lasanble i deside sanz sa bout la kot i dir be nou kapab bann landrwa travay i kapab fleksib, be demen bann ners osi pour komans sir ou pour dir be mon osi mon annan zanfan, mon bezwen ganny travay zis lizour.  Bann madanm ki dan fireman, bann, madanm ki gard. Mon vwar en pe danze ladan dan sa.  Akoz tou dimoun, tou madanm koman i pour ganny zanfan koman i pour war li dan en difikilte, i pour dir ou be dan Lalwa nou kapab fleksib kot i sanze.  So se sa danze ki mon vwar ladan me i pa vedir ki mon pa pour siport Onorab Letourdie dan son demars.  Ne kekfwa sa pti bout la sa demann ki mon vwar i en pe konmsi i annan danze ladan.

Mr Speaker ozordi nou pe ankouraz bokou bann madanm pour pran lanplwa ki bann zonm vreman pa ti pran lontan. Donk nou bezwen siport zot osi ladan.  And pour mon zis pa le fe ki nou pe ankouraz zot pour pran sa bann lanplwa i zis zonm ti fer si prezan nou komans dir be ok, be akoz ou madanm nou bezwen fer en keksoz koumsa konpare ek bann zonm, but konmsi tou sa bann demars pour tonm dan delo.  Finalman nou ki’n ankouraz zot pour pran sa bann lanplwa parey …

 

MR SPEAKER

Kontinyen Onorab.

 

HON CHANTAL GHISLAIN

(Onorab pe disturb laba dir li arete koze.)

 

(Off-Mic)

 

 

HON CHANTAL GHISLAIN

Be mon tann ou pe koze. Ou pa ti la semenn pase ti napa sa bann disturbance !

 

MR SPEAKER

Onorab …

 

(Interruption)

 

MR SPEAKER

… Bon, Order! Order! Order! Order! Bon mon krwar mon pour bezwen, mon a bezwen fer parey Premiere League mon ava met servis sistenm far, ok?  Si mon pa tande mon a bezwen demann lasistans video assistant. Ok?

 

(Off-Mic)

 

HON CHANTAL GHISLAIN

Be ou koz for !

 

(Interruption)

 

HON CHANTAL GHISLAIN

Ou koz for!

 

(Off-Mic)

Ler zot koz for i ok?

 

MR SPEAKER

Bon Order! Onorab, Order! Kontinyen Onorab Ghislain.

 

HON CHANTAL GHISLAIN

Ok Mr Speaker, Mr Speaker …

 

 

(Interruption)

 

MR SPEAKER

Mon pa’n tande.  Se sa ki mon dir ki mon krwar sak moman ki i annan enteronpsyon mon a bezwen pran en technical adjournment mon a bezwen fer koumsa parey refri Premye League i fer e mon ava demann IT pour donn mon sa lenformasyon. Annou sey kapab konport nou.  Nou annan en Mosyon e nou anvi fini sa Mosyon.  Nou annan en lot sitting ankor demen. E nou annan en mwan ki pour long, ki pour entans  devan nou. Annou sey fini sa Mosyon byen.  Onorab Vidot.

 

HON AUDREY VIDOT

Mersi Mr Speaker.  Mon oule lev en point of order. Mr Speaker i pa kapab a sak fwa laba lot kote latab zot pour dir letan en madanm i koze, zot pour servi sa term i pe ronfle. Onorab Sandy Arissol in dir sa kekfwa ou pa’n tande.  I pa zoli, i pa fer premye zot fer li. Annan respe pour nou bann madanm silvouple. Espesyalman nou lo sa kote latab.

 

MR SPEAKER

Bon si sa i komanter ki’n ganny fer, mon krwar i pa apropriye akoz Onorab Vidot in deza vin vwar mwan avan ki sa komanter in sorti lo sa kote. Mon ti tande e mon pa ti konnen ki rezon ti pe ganny servi.  Me si sa komanter pe ganny servi akoz en Manm i annan en problenm medikal mon pa krwar i apropriye. So si vreman Onorab Arissol ou’n fer sa komanter, mon ti ava demann ou pour prezant en apology.

 

HON SANDY ARISSOL

Mr Speaker mon’n fer komanter avek Onorab Vidot?

 

MR SPEAKER

Non.

 

HON SANDY ARISSOL

Egzakteman. Sanmenm sa nou problenm dan Lasanble Nasyonal.

 

MR SPEAKER

Non. Onorab, Onorab.

 

HON SANDY ARRISOL

Yes.  Ou anvi mon retract sa ki mon’n dir?

 

MR SPEAKER

Onorab en moman, en moman.  Ler sa komanter i ganny anvoye lot kote, e li i konnen pour dir i pe ganny vize ver li.  Ok?  Mon ti a kontan ou retract ou demann li en leskiz.  Mon demann ou en leskiz Onorab Vidot, mon pa ti konnen si sa komanter toultan i asosye avek ou. Mr Speaker mon retract’ronfle!’’ Mersi bokou Onorab.

 

MR SPEAKER

Mersi, annou sey konport nou. Ok, wi nou annan nou privilez, wi nou kapab fer bann komanter me annou mazinen parey mon fek dir taler ler mon’n adres Onorab Loze, annou pa fer li pour nou denigre en imen. Nou pa ti a kontan ki bann keksoz koumsa i vize ver nou. Ok? Onorab Ghislain kontinyen.

 

HON CHANTAL GHISLAIN

Mersi Mr Speaker. Mr Speaker mon’n antann en serten group kantite dimoun travayer dizon ki’n nonmen i 3000. Be kekfwa si Onorab Letourdie dan son prezantasyon kekfwa i ti ava annan bann statistik kekfwa ti ava anbelir en pti pe plis, ti ava an tonm lot ou sa bann zafer 3000. Akoz dapre lanplwa la i annan selman 1799 dimoun ki pa travay Sesel – ki unemployed e ladan zis 711 ki madanm, napa 3000.  So kekfwa si sa ti’n lo latab depi lo komansman ti ava aret annan sa bann zafer kot nou kapab demen bomaten ranplas 3000 dimoun ki travay aswar.  Be mon zis demande ler nou’n tir 3000 dimoun, ouswa sa 1700 dimoun ki travay nou met travay lizour be kote ki nou gannyen pour ranplase pour travay aswar prezan? Nou bezwen still annan dimoun travayer etranze ki pour travay.  So nou pour bezwen al rod ankor travayer etranze ouswa i pour still reste parey. Sa en pti pe mon largiman.

Mr Speaker kekfwa en pti sizesyon pour Onorab De Letourdie, mwan mon pa dakor avek sa bout kot tou madanm Seselwa i bezwen travay lizour ouswa annou fer Lalwa pour madanm Seselwa travay lizour.  Pour travay lizour o etranze i a pran plas pour li travay aswar.

Mwan mon pa dakor avek sa bout la, akoz parey mon’n dir se ki nou pa kapab discriminate ant bann travayer.  Kekfwa sa ki nou ti kapab pe dir se ki nou redwir lakantite erdtan kekfwa ki sa madanm i sipoze travay aswar.  Dizon par egzanp en madanm ki travay dan lendistri touris i bezwen repeat sa shift aswar 3 ou 4fwa – konmsi enn deryer lot. Kekfwa i ti a fer de premye zour and son lanmen ti ava lizour ouswa i ti a pran son off, i ti ava konmsi i ti ava redwir en pti pe sa kantite letan ki zot travay lizour.

And byensir osi daycare dan bann landrwa travay i enportan and i ava annan osi letan pour create lanplwa pour nou prop Seselwa osi parski bokou dimoun konmela zot pe rod daycare, zot pe rode ki toultan ki Gouvernman pe konstri daycare, la en landrwa kot bann sekter prive i kapab antre sirtou bann lotel zot ava konstri sa bann daycare and Seselwa i ava kapab manage sa bann daycare zot ganny en biznes pour zot menm.  And sa bann travayer Seselwa, bann madanm ki annan bann zanfan i kapab anmenn zot bann zanfan i ava la dan daycare and then ler zot fini zot pran zot zanfan zot al avek.

Apre osi nou bezwen koz en pti pe avek nou bann msye. Dizon par egzanp li sa msye in travay lizour.  Se madanm ki’n lave kot lakour se li ki’n netway lakaz in kwi manze 3 kar di-tan and sa msye ler in vini dizon 4er, 5er i annan li zis pour okip zanfan kekfwa pour fer leson and sa madanm i al travay aswar.  Sa nou pe koz dan bann landrwa kot i annan msye ek madanm.

I annan bokou parey nou kapab remarke osi ki i annan bokou bann madanm osi ki tousel parey mon’n dir e i annan msye osi ki tousel. E la dan sa bann ka parey si i i annan sa bann lenfrastriktir dizon sa bann daycare dan bann landrwa travay la sa bann madanm i ava kapab met zot zanfan, e zot ava kontinyen travay.  Se sa mon kontribisyon Mr Speaker Onorab Letourdie mon pour siport ou Mosyon.  Mersi.

 

MR SPEAKER

Mersi Onorab Ghislain. Onorab Sandy Arissol laparol i pour ou.

 

HON SANDY ARISSOL

Mersi Mr Speaker. Bonn apre midi Mr Speaker mon bwar en pti git delo avan.

Mon a pez en pti git mon tansyon, mon a respir en pti pe pour fer sir mon kalm dan mon lapros mon pa pe ofans personn.

Mr Speaker mon kontan Mosyon ki Onorab De Letorudie in anmennen parski i en Mosyon ki mon krwar tou dimoun in koz an byen lo la.  I en Mosyon ki ekselan e Jany i enn sa bann dimoun ki toultan i annan bann madanm a ker. Toultan i mazin bann manman li koman en fanm koman en manman e mon osi konnen ki pour dir i annan en sanson ki i sante ‘’Fanm ki kalite lavi.’’  So alor Jany mon krwar i sa dimoun ideal pour li anmenn en tel Mosyon ozordi dan nou Lasanble ki nou pe debat lo la. Alor Jany Onorab Jany De Letourdie felisitasyon pour en tel Mosyon.

 

 

(APPLAUSE)

 

HON SANDY ARISSOL

Mr Speaker Onorab De Letourdie son Mosyon i lir koumsa;

Sa Lasanble i demann avek Gouvernman pour etidye e met an plas bann nouvo kondisyon travay pour permet bann madanm Seselwa ki kapab travay dan sekter tourizm pour ganny priyorite pour travay zis shift lizour avek bi pour ankouraz zot pour pran lanplwa dan sa sekter enportan pour nou lekonomi, e osi ede kree bann kondisyon favorab pour zot pran swen ek zot zanfan ek zot fanmir.

Mr Speaker nou tou nou konnen pou dir Mosyon i pa forse, i pa bidding, i pa vedir letan sa Mosyon i pase ozordi ki Lalwa Lanplwa i sanze deswit, i pa vedir ki letan sa Mosyon i pase ki tou sa travayer Seselwa i vin travay lizour deswit.  I pa vedir ki tou travayer etranze i ganny forse pour travay aswar. I en Mosyon anmennen dan Lasanble Nasyonal zisteman avek bi pour mazin en pti pe bann manman, bann madanm laba deor ki donn zot letan, zot lenerzi pour zot fer en travay nob, zisteman legzanp ki in donnen se dan sekter tourizm. Sekter tourizm ozordi i en landrwa kot nou bann zenn pa tro kontan pour al travay.  Senpleman rezon i senp parski i annan sa bout aswar, weekend, konze piblik. Alor mon santi pour dir sa moman letan ki Onorab De Letourdie in anmenn sa i ekselan e nou pe mazin bann dimoun laba deor, spesyalman bann manman tousel parey tou dimoun in koz lo la an relasyon avek sa Mosyon.

Me selman par kont parey mon’n dir, sa  Mosyon pa vedir ki tou keksoz pour sanze deor me sa i donn nou, i donn bann dimoun ki pe ekoute deor poudir  nou mazin bann madanm ki travay dir laba deor ;- enkli bann msye osi nou bezwen pran kont pour dir trend in sanze ozordi lontan bann manman ki ti anmenn zanfan klinik, lontan se bann manman ki ti anmenn zanfan kot lekol al get report. Lontan bann manman ki ti anmenn zanfan pize. Anmenn zanfan peze kot lekol. Ozordi tousala in sanze. Sa msye osi ozordi i fer son bout e pour sa nou rekonnet sa. Me selman ozordi Mosyon i lo bann madanm alor bann msye laba deor eskize nou bezwen konsantre lo bann madanm parey Mosyon pe dir.

Mr Speaker dernyen fraz dan Mosyon se, ‘’kree bann kondisyon favorab pour zot pran swen zot fanmir, zot zanfan ek zot fanmir.’’  Ler mon get sa fraz Mr Speaker premye madanm dan mon lavi ki mon ti annan e ki mon’n kontan sa se pa lot ki mon manman Nancy Arissol ki ankor vivan. E li i ti en madanm ki ti travay lotel sa letan ti Seychelles Hotel. Almost 20an e li i ti pran sa desizyon parey sa dernyen fraz pe dir. Parski i ti annan li 6 zanfan alor i ti santi pour dir lotel i travay shift i antre letan nou, nou sorti lekol nou pa zwenn li, parski in al travay 4 er minwi.  Ler li i antre minwi 1 er bomaten, nou, nou pe dormi e kekfwa letan nou pe ale granmaten nou pe debrouye li kekfwa i ankor pe repoze.

Alor i ti pran sa desizyon pour li okip nou koman son bann zanfan e pour sa Mr Speaker mon ti a kontan ozordi dir li mersi bokou pour sa desizyon ki i ti pran pour donn nou sa pti letan.  Menm i ti bezwen fer sanzman dan karyer ki li i ti kontan pour travay lotel.  E pour sa mon anvi dir mon manman Nancy Arissol mersi bokou koman sa madanm ki ti pran sa desizyon. Me de lot kote i ti annan osi mon papa ki li osi i ti travay Seybrew pour 22an alors li osi i ti bezwen arete sanz son karyer parski sa letan son saler ki i ti gannyen avek son bann zanfan i ti santi poudir i pa ase. Alor i ti dir be why not anploye i ava al deor i ava fer plizyer lezot pti louvraz pour kapab soutenir nou koman zot zanfan. Mr Speaker sa i relye avek sa dernyen ki Mosyon pe dir.

Me letan mon lo sa dernyen fraz Mr Speaker, mon ti a kontan met lanfaz lo sa ki Onorab Gill in dir. E letan Onorab Gill in dir pour dir dan zot Konstitisyon i annan sa. Mon anvi remind Onorab Gill Mr Speaker sa desizyon ki mon manman ti pran ti napa nanryen pour fer manifesto Parti SPPF sa letan. Sa ti en desizyon ki mon manman ti pran koman en fanm solid ki ti annan son bann zanfan aker pour li kapab okip son zanfan. Ti napa paz 24, 32 dan Konstitisyon sa letan Parti SPPF ki ti o pouvwar Mr Speaker.  Me parkont mon ti a kontan kalm dan mon lapros pour mon dir avek Onorab Gill Mr Speaker pour dir – e mon kontan letan in mansyonn son Konstitisyon. E Onorab Gill koman Sekreter Zeneral son parti Mr Speaker. Onorab Gill koman Manm Proporsyonnel dan nou Lasanble Mr Speaker. Onorab Gill koman mon CC Member St Louis Mr Speaker mon kontan li mwan. Ou konnen akoz mon kontan li Mr Speaker akoz dan prosen eleksyon mon pour bat li ankor parey mon abitye bat li dan tou eleksyon !

 

 

 

(APPLAUSE)

 

HON SANDY ARISSOL

Me selman nou pour toultan byen e mon pour toultan respe li Mr Speaker.  San fer rasizm, mon ti a kontan remind Onorab Gill Mr Speaker, letan in koz lo son Konstitisyon pour dir wi letan in koz lo son Konstitisyon bann keksoz ki zot in fer, mon ti a kontan osi remind Onorab Gill be eski Konstitisyon ti dir zot pran later dimoun sa letan? Eski Konstitisyon ti dir ek zot fodre dimoun i al an egzil Mr Speaker?  Mon war ou kot ou pe vini Mr Speaker.  Mon ava servi zis da pwen.  Be selman akoz sete Onorab Gill ki ti balans topik avek Konstitisyon son parti.

E mon anvi osi remind Onorab Gill Mr Speaker san okenn komanter rasis, dir li pour dir i annan en lartik dan son Konstitisyon osi ki mon krwar i ti ava enportan zot amande dan zot Konstitisyon. Sa mon krwar lartik 26 mon krwar ou a gete sa paz Mr Speaker in donn ou enn anler, ti a bon sa osi zot fer amannman.

E mon ti a kontan dernyen pour fini lo sa pwen remind Onorab Gill Mr Speaker atraver ou ki Onorab Gill napa okenn manda pour li donn LDS ki pour fer dan nou parti, oubyen kwa ki nou pour ekrir dan nou Konstitisyon!  Sa nou ki ava deside Mr Speaker. Alor letan mon lo topik Konstitisyon Mr Speaker, mon a met li laba pour mon donn legzanp prezan dan mon distrik.

Par egzanp letan mon get dan mon distrik, ozordi mon fyer letan mon annan Nadya Desnousse, en madanm Mr Speaker ki travay kot Airport e i travay shift li. Ozordi Nadia avek son bann travay ki i fer in nobou prodwir en dokter. Parmi bann zanfan ki fer retournen, li i annan en dokter. E ozordi Nadia i bezwen en manman ki proud. Parski menm in travay aswar i annan prodiksyon dan son lakour.  Son bann zanfan zot in nobou frer ek ser ed kanmarad e bann granmoun ki’n la kot lakour ede pour ki letan li i pe fer en travay son bann zanfan i annan en gidans lo la.

Letan mon get madanm, msye ek madanm Banane anler Belonie ozordi zot annan Lucia Banane ki en dokter e son manman pourtan ti ners, ti travay aswar, ti annan bann shift travay e tousala i bann realite lavi ki nou fer fas avek.

Me par kont Mr Speaker i enportan pour nou pran kont poudir i annan plizyer lakour ozordi. Plizyer lakour, espesyalman dan St Louis plizyer lakour kot bann manman parfwa ki’n tousel me parfwa ki’n annan sipor en papa kot zanfan menm kot zot in travay shift, swa zot in travay dan tourizm, swa zot in travay dan lapolis, swa zot in travay dan bann sekirite prive, swa zot in travay dan lezot landrwa ki shift. Me zot zanfan in vin bann dimoun pozitiv dan nou pei e se sa ki Mosyon pe demande Mr Speaker.

Alor mwan avek Mosyon ki Onorab De Letourdie in anmennen, mwan mon krwar i enportan pour ganny sa sipor, parski akoz si sa Mosyon nou pe anmenn pour ki Gouvernman ansanm avek Minister Lanplwa ek bann sekter prive, nou kapab vwar pour dir sa i ava vin en rekonpans pour sa bann dimoun ki travay lotel.

Par egzanp letan mon ti vizit Beau Vallon Bay mon ti koz ek en madanm ki reste Anse Aux Pins i direk mon msye Arissol sa lannen i pour fer mwan 30an mon travay Beau Vallon Bay.  Ler mon ti balans son saler i dir mon letan in tir tou sa ki i annan pour tire lo la, i anmenn dan lakour R9mil. Sa i en lot topik, 30an servis.  Sa i en lot topik.

Be selman par kont si sa Mosyon ki Onorab Jany pe anmennen ozordi i ti a vin en rekonpans pour sa travayer lotel, apre ansanm avek Minister Lanplwa avek tou bann polisi ki ava egziste, pour ki bann dimoun par egzanp vin travay lotel apre en peryod letan, me avek en lot peryod letan i ti a kapab ganny sa rekonpans pour dir be get sa apartir tan lannen la aprezan ou a kapab shift dan sa bout lizour ki Onorab Jany De Letourdie pe demande.

Dezyenmman Mr Speaker si sa Mosyon ki Onorab Jany pe anmennen i pour fer ki fleo sosyal i desann i a tonbe dan nou pei parski pour annan plis manman kot zot lakour pe get zot fanmir, pe get zot lakour, i annou pa bliye, ozordi bann fanm zot pli determinen pour zot okip zot lakour.  Ozordi en fanm i pare pour li lager pour li defann son zanfan Mr Speaker. I annan bann fanm menm i kapab donn son lavi pour li prezerv son lakour. Sa i montre lenportans nou bann madanm ozordi dan Sesel.

E trwazyenmman Mr Speaker mon ti a kontan dir si sa Mosyon ki Onorab De Letourdie pe anmennen i ava kapab ansanm avek Minister Lanplwa avek bann sekter prive, avek Polisi ki gouvern bann travayer etranze dan nou pei, i a ede pour ki nou bann madanm Seselwa i a ganny en pti keksoz dan sa Mosyon ki nou pe anmenn mwan mon krwar i ava fantastik Mr Speaker e bann madanm laba deor zot a mazin nou pour dir be omwen i annan en keksoz ki nou’n sey fer an relasyon.

Nou pa’n neseserman kapab tous zot saler, be selman lo en lot bout incentive i ava en keksoz ki zot kapab achieve sirtou pour bann madanm. Ozordi Mosyon pe fer referans avek sekter tourizm sirtou bann madanm ki dan sekter tourizm Mr Speaker, zis parey Mosyon pe demande. Mr Speaker mon ava aret la parski ou’n donn en lenstriksyon pour nou koz 10 minit me pa 22minit. Alor mon ava dir ou mersi pour permet mon sa letan.  Mersi bokou.

 

MR SPEAKER

Mersi Onorab Sandy Arissol. Mon ava donn laparol Onorab Audrey Vidot.

 

HON AUDREY VIDOT

Mersi Mr Speaker. Bonn apre midi Mr Speaker, tou Manm Onorab e tou Manm piblik ki a lekout.

Mr Speaker okenn letid ki Gouvernman i konsidere fer avek bi pour amelyor kondisyon travayer Seselwa, i bezwen enn ki pa anmenn okenn diskriminasyon ant okenn fanm ou zonm Seselwa. Menm si ou’n dir Mr Speaker pli boner pour evite repet menm keksoz, me parfwa i enportan ki nou remet lanfaz lo serten size pour permet ki bann keksoz i ganny ranforsi e ganny amelyore.

E si kot Onorab Lemiel bomaten in fer resorti pli boner kot bann zenn parfwa zot swiv zot letid menm parfwa 1 an 2an kot STA, me apre nou vwar pour dir zot pa kontinyen dan sa lendistri tourizm oubyen zot pa al ladan e nou vwar kot Gouvernman in envestir.  E petet mon a demann lotorite parey Minister Ledikasyon, pour zot ranforsi en pti pe zot ankor plis lo zot progranm career choice ansanm avek bann partner, bann paran byensir avek bann lenstitisyon pos segonder, pour ki bann zenn letan i fer zot swa zot fer enn ki zot konnen sa kantite lannen ki zot in etidye, zot pourswiv en karyer dan sa domenn.

Mr Speaker lo la mon osi oule demann Gouvernman pour met an plas, letan Mosyon pe demann ek Gouvernman pour met an plas bann nouvo kondisyon travay pour permet bann madanm Seselwa travay dan sekter touris, mon sizere ki bann manman ki annan baba espesyalman bann ki annan ki ganny plis – konmsi pour zot ganny plis kot Mosyon pe demande ki zot ganny plis priyorite pour travay shift lizour. Mon sizere bann ki annan baba i vin priyorite wi.  Akoz mon dir sa Mr Speaker  mwan mon’n konn manman ki’n vwar li in bezwen sanz louvraz menm si i ti kontan son louvraz ki i ti pe fer pe enport si i ti shift, me in vwar li in vin en manman de zanfan kot in ganny twins, e in bezwen aret son louvraz  pour li rod en lot louvraz akoz son lorganizasyon travay apre ki in retournen sorti maternity leave i pa’n konsider pour kit li shift lizour ankor en pe letan prenan kont ki zanfan i ankor en pe pti. E pour sa rezon ki in vwar li ki in bezwen arete akoz i pa pe ganny sa sipor.

E en lot problenm ankor ki bann lorganizasyon touristik ;- parfwa i annan manman ki petet son lansentman i en pti frazil kekfwa en dan lepase in deza perdi en zanfan e lasante pe monitor li en pti pe zot in vwar pour dir i annan en nesesit ki i al lo light duties, me parfwa i annan lorganizasyon ki pa vreman pe okip byen zot bann travayer.  E mwan mon’n ankor kot i annan dimoun ki’n vwar li pour rezon menm si in ganny papye medikal pour li al lo light duties, son lorganizasyon pa’n onore e sa manman in perdi ankor son zanfan.

E petet ti ava en lapel pour bann lorganizasyon prive pour annan en pti konpasyon e si zot anvi zot war sa travayer in toultan la i annan komitman in vin travay dan en moman parey zot devret annan plis sa konpasyon e sa sipor anver zot travayer.

Mr Speaker nou bezwen osi rekonnet ki nou annan bann papa bann papa ki tousel, oubyen nou kapab dir bann papa ou menm manman ki swa li ki pe plis sa travay be it i pe fer shift oubyen i pe sey fer de louvraz an menm tan pour soutenir.  Akoz petet enn dan lakour i annan en problenm lasante, ki pa permet li kontiny son travay ki avan i ti pe fer e ti pe resevwar en pli mannyer kontribisyon pour anmenn kot lakour, e i vwar li ki son enn partner i pe anmenn pli pti git e i vwar pour dir zot bann depans zot bann komitman ki pa permet zot kapab zwenn ansanm.

E ou vwar parfwa i annan bann issues ki vini kot zanfan i perdi, menm si i kapab annan enn kot lakour me i annan sa serten dezabilite ki anpes li kapab petet fer plis ki i ti kapab pour soutenir zanfan, oubyen donn sa sipor zanfan akoz son lasante.  Me sa lot i absante li osi i pa li osi pour li donn sa sipor kot latansyon zanfan, partisipasyon dan lekol e vwar li pe debrouye –  petet sa osi nou bezwen mazinen reflesir lo la dan la fason ki mannyer nou vwar nou kapab soutenir pour mentenir bann fanmir solid ki tou le de pe donn sa sipor kot lakour pa zis neseserman lo kote finansyel me lo kote sa laspe lanmour ek lafeksyon e langazman ki zot annan ver zot zanfan.

Pour azoute Mr Speaker, mon oule siport komanter ki Onorab Ghislain in fer resorti dan Mosyon letan loter Mosyon in koz en pti pe lo kondisyon ki petet bann madanm Seselwa i ganny priyorite lo kote shift lizour.  Lo sa note mon oule refer sorti ki wi mon krwar Onorab Lemiel osi pli boner ti’n dir ki i enportan ki nou pran note ki i annan paran be it lo kote papa ki santi ki li i kontan son shift aswar, akoz bomaten i permet li pour li kapab fer son bann tripotaz kot lakour.  E i permet li parfwa osi menm depandan son shift ki i fer aswar son ler, si i war li permet li kouver serten erdtan lanmwatye zournen lo bomaten, pour li ganny en pti louvraz ekstra pour anmenn ankor en pti pe plis kontribisyon kot lakour.

Nou bezwen psi pran konsiderasyon sa.  Nou pa zis dir ki zis bann madanm Seselwa toulezour zot tou zot ganny priyorite zis pour kote lizour.  Me kit li libreman parey en koleg in fer resorti ki zot osi akoz mon konnen i annan ki paran ki santi ki letan i ganny sa moman lizour i kapab pas kot lekol regarde ki mannyer son zanfan pe fer, partisip dan laprantisaz son zanfan.  E letan i aswar i parfwa ki mannyer son shift i vini i pa permet li. Letan lekol i annan sa bann meeting sa bann rankont i war li prezan i difisil pour li kapab attend.

Parey ou’n dir Mr Speaker i annan bokou pwen for ki’n ganny fer resorti.  Zis mon avan mon terminen mon santi ki i sagrinan pli boner en koleg lo lot kote latab in dir poudir, menm si in angaz li dan bann aktivite sosyal kot i konn i travay lo travay lo travay sosyal, in konn en pti pe bann issues bann dimoun dan kominote i pas atraver, mon santi in mank en loportinite spesyalman koman en zonm pour remind bann msye osi bann responsabilite.

Parey bann paran kot bann single mothers kot zot vwar zot zot pa pe ganny sipor msye ki pa pe pey alimoni e prezan li i war li i bezwen fer 2 ou kat louvraz zis pour li kapab sey siport son zanfan. Espesyalman bann ki i malere ki dan nou kiltir ozordi ki annan msye ki’n marye ki pa pe respekte son relasyon maryaz in fer zanfan an  deor e sa madanm li wi i ti konnen pour dir sa zonm in marye me ler in ariv en zanfan in ganny conceive tou le de paran i responsab me apre ou war sa zanfan li i pe ganny sipor zis sa manman ki li i bezwen fer de 3 louvraz ki prezan son zanfan i perdi en pti sa latansyon ki li akoz  li i bezwen debrouye pour kapab fer sir son zanfan i defwaye de tou. Petet sa osi i enportan met lo rikord ki nou bann papa nou osi ki nou bezwen pran responsabilite espesyalman bann ki pa pe pran li o serye. Mersi Mr Speaker.

 

MR SPEAKER

Mersi Onorab Vidot. Mon a donn laparol Onorab Waven William.

 

HON WAVEN WILLIAM

Mersi Mr Speaker.  Bonn apre midi tou dimoun ki a lekout. Mr Speaker lo sa Mosyon mon anvi fer Onorab, prezantater sa Mosyon konnen ki mon pour aport mon sipor, me an menm tan mon pour serten pwen refleksyon ater.

Mr Speaker mon kontan la fason ki sa Mosyon in ganny fraze. E mon santi ki Onorab prezantater in fer li avek responsabilite. Akoz i pa’n zis vini i pe enpoz en travay lo Gouvernman, me sa mo ‘’demann Gouvernman pour fer en letid pour etidye sityasyon, epi i ava deside ki bann mezir ki kapab met an plas baze lo nou sityasyon. ‘’

Mr Speaker mon pe koz lo sa Mosyon avek lespri ouver le fe ki koman en pti pei nou napa bokou diversifikasyon dan nou lekonomi. Bann sekter kle se tourizm, lapes, e se sa de sekter ki atrakte pli bokou travayer. E an menm tan dan en monn globaliz.e nou pe osi atrakte bann envestiser etranze pour vin envestir dan nou pei e pour ou kapab fer sa ou bezwen ofer bann kondisyon ki favorab ki ou pa pe met bann baryer pour kapab fer anpes sa dimoun pour kapab fer son biznes. e kree sa larises ki an retour i annan retonbe dan lekonomi Sesel.

Mr Speaker mon konnen ki wi nou bezwen sipor nou bann madanm. E i annan bann diferan rezon akoz. E mon santi pour dir dan sa partenarya Gouvernman avek sekter prive i bezwen annan negosyasyon, i bezwen annan konpromi. Mr Speaker i bezwen annan give and take parey nou’n dir.

Enn pa pour kapab pran tou e les lot ater. Me nou bezwen annan en balans dan la fason ki nou vwar keksoz.  Si koman en pti pei letan nou pe get son frazilite son vilnerabilite, opre bann lekonomi mondyal. Mr Speaker pa obliye ki nou dan en lakours, nou dan en konpetisyon avek bann lezot pei vwazen. E nou, nou bezwen fer sir ki la fason ki nou fer keksoz i pa defavoriz nou pei, ouswa kree sa policy space parey nou dir pour kapab permet nou lekonomi e nou pep epanouir.

Mr Speaker sanzman i arive toulezour avek devlopman.  E nou bezwen osi edik nou pep.  An menm tan ki nou pran bann mezir pour asire ki i annan serten konfor zot kapab rezouir. Me an menm tan nou bezwen rekonnet ki – enn – i annan bann sanzman ki nou pa pour kapab eparnye. E parey mon dir se ki nou bezwen annan give and take.  Par egzanp si nou pe dir ki nou bann madanm avek serten bann konsern ki zot pa pour travay lizour, aswar baze zot bann sirkonstans, me nou bezwen mazin sa sekter prive ki dan lotel ouswa dan restoran, ki pour li kapab fer marse son lantrepriz i pour napa swa, i pour bezwen fer vini travayer etranze.

E la kot mon e dir ki nou bezwen annan give and take. Nou bezwen vwar ki konsesyon mon pa konnen lo kwa par egzanp lo GOP ki – enn – si li i pare pour konpran nou kiltir e nou fason fer nou pour bezwen osi larg son lanmen pour li kapab – enn – ratrap sa revini ki kapab perdi. Letan mon pe dir ratrap sa reveni ki enn i kapab ganny travayer etranze pour li kapab bous sa trou. Be selman an menm tan nou konnen pour dir i annan sa konsern osi lo lakantite travayer etranze dan pei.  Me la ankor parey mon dir se sa balans i enportan ki fason nou ki fason nou anvi keksoz ganny fer dan nou pei.

Mr Speaker sa partenarya sekter piblik ek prive i tre enportan. I tre enportan ki enn sa lespri dyalog sa konpromi i ganny fer. E i enportan osi ki lekol serten lenformasyon. Serten lenformasyon enportan konsernan travay i karyer i ganny pase avek nou bann zenn.

Pour fer sir ki nou pa ganny kit deryer epi nou pour konplent letan nou vwar etranze pe pran sa bann plas. La parey mon dir mon pa pe koz kont sa Mosyon be mon pe met bann fe devan mi nou bezwen evalye e konsidere an mezir ki nou pe fer sa letid, an mezir ki nou anvi kree bann bon kondisyon pour permet ki sa Mosyon pe demande i ganny fer.

Mr Speaker i enportan ki nou koman en Lasanble osi nou zwe nou rol enportan me pa met politik par devan tou keksoz, me pour osi fer nou pep konpran serten realite.  Akoz si nou se sa menm pep demen bomaten ki pour pran aksyon avek nou akoz nou pa’n desarz nou rol koman politisyen pour edik sa menm pep ki anvoy dan sa Lasanble pour defann zot dwa e pour regard dan zot lentere. E nou bezwen regard sa Mosyon dan en lespri vreman larz Mr Speaker avek sa de pti mo ankor mon dir avek loter Mosyon ki mon pour donn li mon sipor, akoz mon santi pour dir i annan en santiman responsabilite ki in anmennen avek la fason ki in prezant son Mosyon.

E mon krwar ki i annan merit e ki lotorite e tou bann akter kle letan zot pe pran bann desizyon zot ava mazin lo sa bann pwen kle ki a fer ki enn nou pti pei e nou pep i ava al pli devan.  Mersi.

 

MR SPEAKER

Mersi Onorab William. Mon ava donn laparol Onorab Jean Francois Ferrari.

 

HON JEAN-FRANCOIS FERRARI

Mersi Mr Speaker. Mr Speaker premyerman mon ti a kontan remersye e felisit Onorab De Letourdie pour son Mosyon. Mon krwar i en Mosyon ki vreman volapenn e ki devret lev en bon refleksyon dan pei e kekfwa dan Minister Lanplwa, dan Minister Tourizm e devret kapab satouy en pe bann lespri pour gete ki mannyer nou kapab servi swa tou swa serten morso sa bann rekomandasyon ki’n ganny fer ozordi.

Mon ti a kontan osi remersye Onorab William pour son prezantasyon, ki li in ki fer ki mon pa pour bezwen retourn lo eksplik bann Manm lot kote latab kwa ki’n ganny dir lo sa Mosyon akoz obviously zot, zot pa’n konpran, e Onorab William in fer zot byen konpran ki dan sa Mosyon i annan priyorite, liberte swa e fleksibilite. Sa bann keksoz gide dan sa bann Mosyon ki zot sak fwa ki zot, ou a krwar zot en pe anbarase pour zot vot pour sa Mosyon. Zot pa devret anbarase i ok pour vot pour en Mosyon ki byen. Ok.

E zot pa devret war li pour tou kalite pti lipou, tou kalite keksoz avan zot vot pour sa. Alors mersi Onorab William mon konpran prezan akoz zot in met ou dan bout laba e ki ou pa tro, tro fit dan sa tim la.

Alors Mr Speaker mwan mon ti a kontan premyerman dir avek piblik ki pe ekout nou, kil ide deryer sa Mosyon se pour rod, pour fer fason pour nou ouver lespas pour ki bann madanm Seselwa an priyorite parey mon’n dir, fleksibilite i kapab include en pe zonm osi ki mannyer lorganizasyon travay dan bann lotel i kapab vin pli condusive pour kapab atrakte bann travayer Seselwa. E sa i en lapros rezonnab. I en lapros patriyotik. I en lapros ki fer ekonomikman en kantite sans.

Nou anvi ouver sa bann loportinite.  E nou konnen mon pa bezwen retourn lo la Mr Speaker ki travay shift i en keksoz ki pa dan kiltir Seselwa. I pran bokou letan pour sink in e ki me pli grav ki sa ankor i annan bann kondisyon reel, i annan bann kondisyon reel ki fer li preski enposib pour en madanm aksepte en travay shift.

Mon fer sa distengsyon akoz mon anvi ki nou fek fer taler la i annan en manm ler in koze i lir dan nou parol sa ki li i anvi tande e apre li i vini i dir pour dir enn nou Manm in dir i pour fer danm tou le mwan, lot, lot sa bann keksoz koumsa. Toulezour i ti dir konmsi sa bann keksoz koumsa kekfwa Mr Speaker kekfwa pour nou fasilit nou travay dan sa Lasanble enn bann keksoz se ki nou bezwen annan en white board, en landrwa par ler pour nou fer bann desen, konmsi pour nou desinen sa ki nou pe dir pour ki serten dimoun sa ki pa tro, tro konpran sa ki nou pe dir omwen zot a war sa desen. Be la, that is not an insult i en leksplikasyon.  Par egzanp –

 

 

E la nou ava kapab war egzakteman sa ki nou, nou pe dir lo sa kote latab.  Par egzanp

 

(Off-Mic)

Rasis !

 

HON JEAN-FRANCOIS FERRARI

… war, war Mr Speaker kantmenm zot apel mwan en rasis napa problenm Mr Speaker, non, non i ok. Mon pa demann li tire.

 

MR SPEAKER

En moman, en moman, mon pour bezwen servi VAR ankor. Ok. Eski sa ki mon’n tande i sanmenm sa?  Ok, bon Onorab parey mon’n fer avek Onorab Arissol met ou mic on. Met ou mic off Onorab Ferrari.  Onorab Loze.

 

HON JOHAN LOZE

Mr Speaker mon retract ki Onorab Ferrari i en rasis.

 

MR SPEAKER

Non, non, non. Onorab, Onorab, la mon oule ou retract e ou prezant en apology.

 

HON JOHAN LOZE

Mr Speaker mon retract e mon prezant Onorab Ferrari en apology pour lapenn mon’n dir li i en rasis.

 

MR SPEAKER

Onorab I call you to order.

 

HON JOHAN LOZE

Mon retract e mon apologise Mr Speaker.

 

MR SPEAKER

Thank you.  Kontinyen Onorab Ferrari.

 

HON JEAN-FRANCOIS FERRARI

Mr Speaker mon remersi ou pour sa lentervansyon. Akoz mon personnelman mon pa mine zot apel mwan mon bann non akoz mon ki mon ete alors mon konnen ki mon ete, ki mon reprezante, bann lensilt i pa tro, tro afekte mon.

Alors pour revin lo sa Mosyon mon ti a kontan e mon lentervansyon se zisteman pour dir avek bann Manm lo lot kote konmsi annou reste en pe dan bann fe, dan laverite. Sanmenm rezon par ler i annan bann Manm mon krwar sete Onorab Gill ki ti dir en fwa pour dir ler i pase lo semen dimoun i zour li.  Pa mwan ki’n dir li menm li ki’n dir sa. Konpran se sanmenm sa bann keksoz koumsa ki fer dimoun piblik apre agresiv avek zot.  Se koumsa ki arive. Pa mwan ki ti dir sa. Ok e alors akoz mwan Mr Speaker ler mon pe koz lo sa Mosyon ler mon pe koz lo sa Mosyon. Mwan pa’n zanmen tak okenn travayer dan container mwan!  So mon pe rod – o kontrer mon pe rod en keksoz pli meyer pour travayer. Mon pa’n deza redi en drayver bis met li koltar bat li. Mon pa fer sa bann keksoz koumsa.

 

MR SPEAKER

Non, non Onorab napa relevans avek Mosyon.  Se sa ki mon dir.  Nou tant pour nou reponn en Manm direkteman. Nou tant pour nou rod tou keksoz lo sa Manm. Nou annan en Mosyon devan nou. Ok annou pa perdi lesansyel sa Mosyon. Retourn lo Mosyon.

 

HON JEAN-FRANCOIS FERRARI

Ok. Mersi Mr Speaker.  Mr Speaker zisteman mon lo sa Mosyon akoz mon santi ki bann dimoun i bezwen ganny respekte. E sa bann kalite lakizasyon i pa devret arive. Par egzanp ozordi nou’n fer en pe refleksyon e Onorab Afif in fer en pe refleksyon, en pe klarifikasyon, a apre in ganny tou kalite latak, kan nou konn tre byen par egzanp ki enn bann rezon akoz nou pe sey konsantre lo travay bann madanm se ki sa sif 700 se bann dimoun ki al anrezistre. Be zot konnen konbyen dimoun deor ki pa pe anrezistre. Ki pa pe travay me selman ki’n abandonnen akoz zot pa pe gannyen sa loportinite pour zot al fer en travay regilye?  Zot konnen kantite dimoun. Mwan mon konnen en kantite dimoun dan mon distrik kekfwa zot, zot pa konnen zot. Kekfwa bann ki napa distrik e la mon pe konte i annan detrwa zot la, kekfwa zot, zot pa konnen. Akoz zot pa travay dan distrik.

Mwan mon travay dan mon distrik e mon konn en kantite e mon konnen pour dir pour dir nou tou lo sa kote latab nou’n fer sa legzersis pour nou sey konpran ki mannyer nou kapab ofer ouver sa bann nouvo loportinite pour bann dimoun akoz dimoun i dan problenm. Bann madanm i dan problenm akoz zisteman sityasyon in sanze, sityasyon kiltirel in sanze dan pei e zot bezwen pe retrouv zot avek bann single parent, zot menm zot ki pe vey zot zanfan, zot reste lwen avek granmanman tou sa bann keksoz se lontan granmanman, granpapa ki ti vey en pe.

Tonton, tantin ki ti reste lanmenm la obor ki ti veye. Konmela napa. Mon tann pe dir met en daycare. Annou serye nou, nou pa kapab pe koz la daycare, nou pe koz lo bann dimoun pour zot pa travay aswar ou pe dir les zot travay aswar nou ava fer daycare be lekel ki pour run en daycare aswar?  Konmsi annou serye nou sanmenm sa ki mon demande Mr Speaker.

Ler nou, nou pe fer bann propozisyon serye zot, zot pa pe respond avek bann keksoz ki serye.  Alors Mr Speaker, nou bezwen mon kontinyen, nou bezwen annan en konversasyon avek bann lotel. Nou bezwen annan en konversasyon avek lendistri touris.  E se sa ki nou lo sa kote latab nou anvi  annan – en konversasyon lo ki mannyer nou kapab devlop sa bann travay fer zot en pe pli fleksib. Gete ki mannyer ki bann bezwen, ki bann demann e ki bann nesesite, bann travayer Seselwa e gete ki mannyer sa lendistri i kapab adapte avek travayer Seselwa.

Akoz a lafen lazournen kisisa ki nou pe rode, nou pe rode ki plis travayer Seselwa i antre dan sa lendistri, plis larzan i reste Sesel e ki en fanmir Seselwa i viv li pli byen, pli konfortableman i pa bezwen. I pa bezwen annan bann fanmir kot zot check pe bounce partou parey – bann ‘’Karoutsou.’’ Bann ‘’cheque Karoutsou’’ partou se sanmenm sa bann keksoz ki nou war dan pei. Sa bann kalite konsekans ok?

E se sanmenm sa ki ler nou dir zot annou fer en zefor, zot, zot kriy nou bann rasis, zot atak nou.  Se sa bann keksoz ki mal.  Ki montre poudir zot pa pe pran sa bann keksoz ki nou pe met devan o serye Onorab Jany De Letourdie in fer en prezantasyon remarkab. E mon krwar in montre nou pour dir son lanmen son ledwa son pou s i lo pou bann madanm Seselwa ok. E ki i konekte avek bann madanm. Pa parey serten ki’n konpletman dekonekte avek – prezan ki zot parti i bezwen dir zot tanzantan re konekte, re konekte al dan distrik al rode ki bann dimoun.

E sa ki zot devret fer.  E si zot ti fer li, zot ti pour war pour dir bann madanm Seselwa pe demande e bann msye osi pe demande en pe sa bann travay.  E ki mannyer i pour benefisye. E mon a termin lo sa pwen Mr Speaker.  Ki mannyer i pour benefisye lepep Seselwa. Ki mannyer i pour benefisye Sesel?  Byensir i pour annan toultan travayer etranze e bann travayer etranze, zot, zot napa fanmir isi zot, zot reste dan ward zot ki zot travay lizour ki zot travay aswar i pa fer okenn gran diferans, alors annou dan sa sityasyon challenging parey nou dir – dan sa sityasyon kot nou retrouv nou malerezman.   Annou gete ki mannyer nou kapab servi sa bann travayer etranze dan en fason bokou pli efikas.  La kot nou kapab fer plas pour Seselwa. Nou fer plas pour Seselwa e travayer zot, zot vin pour dan bann landrwa kot nou pa kapab anpli.  Se sa en Gouvernman ki annan leker pour tou Seselwa.  Se sa bann kalite keksoz ki nou bezwen pe komans konsantre lo la.

Alors plito ki nou ensilte dimoun ler nou pa dakor avek en dimoun, ler dimoun i dir ou en keksoz ou maltret li ou dir li pour dir i en rasis, se sa bann kalite keksoz ki nou devret arete fer.

Nou nepli kapab pran en kritik. Ou a krwar lot kote latab laba zot nepli kapab pran en kritik. Zot annan bann konpleks, zot pe mars avek bann konpleks ki fer ki zot nepli kapab ler ou dir zot en keksoz tou keksoz ki ou dir zot –‘’ rasis.’’

Mr Speaker nou pei pa pour avanse si nou reste dan sa kalite keksoz. Sa se bann politik lansyen epok e i pa pour marse. Alors mwan mon demande ki nou vote pour sa Mosyon nou anvoy en mesaz for pour Gouvernman an dizan zot devret proaktiv, L’Egzekitif Minister Lanplwa ek Minister Tourizm i devret proaktiv pour sey devlop sa bann nouvo metye, sa bann nouvo louvraz. Nou anvoy en mesaz tre for pour bann dimoun ki sekter prive dan lendistri ki i annan en konsern, i annan posibilite re-etidye sa bann posibilite e kekfwa zot a kapab ganny en pe plis travayer Seselwa ki ava e mon konnen ki pour dir bokou dimoun dan lendistri touris zot pe rode sa bann travayer Seselwa. Be selman sa bann travayer zot osi zot annan en kantite kontrent. Alors annou pran kont sa bann kontrent.

Annou fer sa bann kontrent avanse e annou pa fer li ki sak fwa zot war en keksoz ki byen – mon konnen i pour fermal pour vot pour en Mosyon ki Ms Jany in anmennen, i fermal. Ladan zis Onorab William ki kler, ki kler wi sa i byen, nou pour vot an faver. Zot sa i byen selman, sa pa byen, sa pa byen selman e manke taler  Onorab Leader of Government Business ler pour koze pour fer parey li osi. Sa pa byen, sa pa byen selman sa.  Be si i pa byen pa vote an faver, si i byen se koumsa ki nou devret gete. Nou devret en Lasanble serye pa en Lasanble ki zis vin zwe avek bann keksoz, ki pe zis vin envant bann keksoz e tou fason malerezman pour zot bann dimoun deor pa pe anvale sa bann labwet pouri.  Alors serye zot annou fer sir ki sa ki nou fer se dan lentere lepep Seselwa, dan lentere bann madanm Seselwa e ki nou avanse dan sa pei ki nou pa reste an aryer, nou pa reste an retar parey zot in met nou depi sa bann dernyen lannen. Mersi.

 

MR SPEAKER

Mersi Onorab Ferrari. Mon a donn laparol Charles De Commarmond.

 

HON CHARLES DE COMMARMOND

Mersi Mr Speaker. Bonn apre midi Mr Speaker e bonn apre midi tou Manm e tou dimoun ki a lekout. Mon konpran akoz prezan ki sa Tet-a-Tet ki ton part in fer pe fatig serten dimoun ki pe fer son lefe.

 

(APPLAUSE)

 

HON CHARLES DE COMMARMOND

Si dernyen entervenan avan mwan Mr Speaker ki’n koze i ti’n ekout byen son bann Manm ki’n dir dan zot bann entervansyon, zanmen i ti pou’n fer serten komanter mal plase ki in fer. E sa bann komanter, e sa bann mantalite pa pour anmenn nou Lasanble Mr Speaker tro lwen.  E mwan mon krwar pour dir nou Lasanble i bezwen al lo en lot nivo.  En oter pli byen e fer bann kontribisyon pli valab ki parfwa ou tande sirtou ki sorti lo lot kote latab.

Mr Speaker sa Mosyon ki devan nou i en bon Mosyon i en Mosyon ki annan son merit. I annan son merit e nou bezwen admet ki i annan sa issue, sa problenm deor la. Mwan koman en Manm Lasanble plizyer fwa i annan bann manman bann zenn madanm, zenn manman, zenn fiy, ki par egzanp zot in fini lekol otelyer zot pe komans travay dan lotel, e ki mank sa sekirite letan zot sorti travay.

Letan zot travay shift sorti, zot debarke aswar, zot lakaz i en pe lwen ek semen, zot lakaz i en pe lwen kot transpor i larg zot.  E ou annan en issue kot paran  i bezwen vin zwenn zot dan serten sirkonstans.  E i annan en mank sekirite.  Savedir zot bezwen lakonpannyman. Par fwa wi i annan en issue lalimyer e sa petet nou koz avek Land Transport zot mete. Me i annan lezot issue ki pli konplike me i annan en lot problenm ki nou, nou bezwen get li kot mon krwar mon loter Mosyon Onorab De Letourdie in fer li anmenn sa Mosyon la. E ki nesesit sa Mosyon. Sa lot problenm i osi vini kot bokou bann dimoun ki pa pe travay ki’n kalifye petet e zot a en serten moman komans travay dan lotel dan bann letablisman touristik ouswa dan sa lendistri kot zot in war zot pa pe travay.

Zot bezwen arete pour bann rezon plizyer kalite rezon swa zanfan ki’n ne, swa problenm kot lakour swa zot in war zot, zot tousel ensidswit e sa bann issue i fer ki letan zot aret travay zot al lo welfare, zot al welfare akoz i en nesisite zot annan zanfan pour sonnyen petet papa i prizon, I don’t know tou sa bann kalite issues i fer ki zot pa travay prezan zot servi sa leskiz. Zot servi sa leskiz zot dir ki si nou ti pe travay lizour petet nou ti kapab kontribye.

Nou anvi travay me le fe ki nou pour travay dan lotel se la kot nou’n train i fer li pli konplike pour nou.  E vre i vin pli konplike ler ou ekout zot e letan ou sey konpran zot problenm ki zot ladan.  Lekel ki pour vey zanfan aswar? Napa sa dimoun ki pour donn zot sa latansyon i vreman konplike Mr Speaker.

E se sa rezon ki mon dir ki i annan merit dan sa Mosyon. E letan ki Mosyon pe dir, i dir avek Gouvernman pour etidye met an plas bann nouvo kondisyon travay la i pe dir sirtou Minister Tourizm avek Lanplwa pran en pe aksyon vitman. Pa bezwen mon pa krwar mon ki sa i bezwen al pran 1 an sa.  Sa di Gouvernman i ekout nou bann pwen i annan pwen valab ki’n sorti dan serten entervansyon ki’n ganny fer sa bann pwen valab si Gouvernman i ekoute Cabinet i donn en lord. I donn en lord avek Minis Lanplwa ek Tourizm i dir ale al gete i annan en issue koze ek lendistri e vwar sa posibilite. Akoz mind you i annan dan lendistri, i annan serten lotel, i annan serten landrwa ki deza annan sa konpasyon i sey konpran e i pran en pe sa bann dimoun lo baz lizour.  E i marse, be i annan lot ki vin difisil e ki pa pe pran sa desizyon.

Alors si i annan sa lankourazman petet i kapab aranze petet i annan en improvement ki kapab ganny fer. Par egzanp pran dan URS. Letan nou pe sey, progranm URS, i sipoze ede pour tir bann dimoun lo welfare e met zot pti, tap pti dan lanplwa pour permet annan sa kontribisyon lokal, sa kontribisyon par nou bann dimoun dan travay.  Me alor letan sa i ganny fer, petet la en landrwa fasilman en desizyon i ganny pran i dir ale ler letan nou pe koz ek lotel annou demann zot pour annan sa priyorite prezan ou lotorite i bezwen zwe avek GOP sa bann lotel ;- sa bann kondisyon ki ou GOP ki vini sa bann travayer etranze i kapab focus e konsantre lo shift aswar pour kapab donn sa bann manman tousel, sa bann zenn fiy, zenn manman, zenn fiy ki zot anvi kontinyen sa trade ki zot in aprann me akoz sa problenm lensekirite akoz sa bann lezot issues alors zot pa kapab travay dan sa landrwa ki zot anvi  travay.

Pa vedir ki zot pa anvi travay. Zot anvi me selman sa kondisyon, sa sityasyon ki fer annou annan sa konpasyon, annou annan sa understanding, annou annan sa volonte pour nou travay ek sa bann dimoun ki dan sa bezwen ki annan sa bann problenm pour kapab war sa lavansman. Mon krwar prensipalman se sa ki loter Mosyon i anvi keksoz i ganny met devan. Mosyon i spesifik.

E alor nou demande nou ki vreman Gouvernman i ekoute sa ki sa Mosyon pe dir. I ekoute ki bann kontribisyon e Gouvernman i kapab pran aksyon vitman lo la. Mwan mon war li koumsa e mon krwar ki i pour kapab ganny pran.  E mon pou fer mon bout mon koman Leader of Government Business mon pour koz ek Gouvernman pour dir silvouple sa Mosyon i annan en keksoz ki kapab ganny fer en pe vitman la. Let us do it ale montre pour dir United Seychelles, nou parti i kapab pran desizyon e parey in pran plizyer desizyon vitman sa enn osi i kapab pran en desizyon vitman parey bann lenformasyon ki pase dan Cabinet i ganny dir sa osi i a ganny dir dan en fason tou bann ki annan zorey i ava tande.  E bann ki anvi fer aksyon vitman i ava fer e la lepep Seselwa i a vwar ankor davantaz relevans United Seychelles Mr Speaker nou parti, parti ki vreman i merit kontinyen diriz sa pei, e parti ki vreman bezwen anmenn pep Seselwa lo sa lot nivo.

Se sa ki nou pep pe demande. Se sa ki pep Seselwa i anvi war sa nouvo parti United Seychelles la pour al devan e pour fer ki Sesel i kontinyen lo sa semen prosperite de zwa e kot tou dimoun i annan en travay e i kapab kontribye dan son pei.

Avek Onorab De Letourdie mon pour donn ou mon sipor parey ou’n donn mwan toultan dan lepase kot nou’n lo stage.  Mon pa bliye, la mon trou mon pour donn ou sa sipor garanti lo nou kote latab, nou pour siport ou e nou pour vot pour sa Mosyon. Mr Speaker mersi bokou e mon krwar sa bann kontribisyon i merit ganny tande par Lotorite.  Mersi.

 

(APPLAUSE)

 

MR SPEAKER

Mersi. Mersi Onorab De Commarmond. Mon krwar ou entervansyon i vreman bon, ou’n ganny aplodi lo lot kote LDS osi.

Bon ava prezan donn laparol Loter Mosyon, donn laparol Loter Mosyon. Onorab De Letourdie pour li fer son closing remarks. Onorab.

 

HON JANY DE LETOURDIE

Mersi bokou Mr Speaker. Bonn apre midi ankor tou dimoun, vreman enteresan.

Mr Speaker mon ti a kontan dabor remersye Onorab Larue ki’n segonn Mosyon, Onorab Afif, Sebastien Pillay, Onorab Woodcock, Lemiel, Simon Gill, Andre, Loze, Ghislain, Onorab Sandy Arrisol, Onorab Vidot, William, Ferrari e Onorab LGD. Pour entervenir lo sa Mosyon sirman zot bann kontribisyon ki ti valab i ava donn pwa sa Mosyon.

Mr Speaker mon ti a kontan tap en pti mon lentrodiksyon ki mon ti fer taler o komansman.  Mon ti dir Misyon Minister Lanplwa ek Devlopman resours imen, se osi pour kree en sosyete avek bann fanmir solid. Alors se pour sa rezon ki li Minister Lanplwa i pe fer revizyon son bann Polisi tou le 5 an. E enn parmi son bann lobzektif se pour bann polisi se pour promot lanplwa apropriye pour bann travayer ek bann dimoun vilnerab tel parey bann zenn, bann dimoun avek dezabilite  e osi bann madanm.  Akoz nou anmenn Mosyon? Be zisteman nou pa anmenn Mosyon – an fen i enteresan Onorab LGB in dir pour dir i pour fer sir ki sa Mosyon pour pase, ti ava en mirak, ti a enteresan. Me akoz nou anmenn en Mosyon.

Nou konnen poudir Mosyon i pa binding, me selman nou zisteman nou anmennen pour nou fer dyalog, pour nou met devan bann propozisyon ki dimoun i kapab trouve. E menm si de koleg Onorab Ghislain ek Onorab Vidot in dir i pa pour zis, i napa en landrwa ki’n dir ki pa met bann travayer etranze dan Mosyon.  E si zot pour swiv zot pour war pour dir i annan fleksibilite parey Onorab Ferrari in dir pour sa bann ki anvi, pour sa bann ki anvi. So i en Mosyon ki ouver ki i la a laporte pour Gouvernman avek Minister Lanplwa fer son bout li osi.

Mr Speaker mon re aport mon rekonesans e apresyasyon pour sa detrwa papa ki pe fer grandi zot zanfan zot tousel. E zot fer sa o tan byen e parfwa pli byen ki bann madanm. Sapo pour bann papa tousel ankor enn fwa.

Mr Speaker o tan ki Gouvernman ek sekter prive i konpran sa nesesite pour soutenir nou bann madanm sirtou bann ki pli vilnerab pli vit nou sosyete i pour redrese.

Zis mazinen ki pour dir en paran ki ganny sans din avek son zanfan tanzantan i ankouraz konversasyon menm si i en paran tousel.  Sa osi i kapab ankouraz en adolesan pour manz pli byen olye ki al rod manz junk food parey nou dir.

Mr Speaker benefis ki en paran i gannyen letan i la aswar avek son zanfan i bokou parey tou bann Onorab in fer resorti.  Dapre en pti sondaz ki mon’n fer sa bann kategori madanm swivan Mr Speaker i tonm dan sa group ki zot, zot pa kontan pour travay aswar dan lotel. Alors, zot, zot bann madanm tousel, bann zenn marye, oubyen bann ki’n fek komans en lavi a de, bann madanm ki annan en pe problenm lasante, bann madanm ansent, bann ki reste lwen ki transpor lalimyer pa ariv ziska kot zot lakaz.  Bann ki pratik sport sirtou bann ki’n ariv lo nivo nasyonal e enternasyonal.

Mr Speaker i enteresan pour konnen ki i annan detrwa madanm ki’n deza travay dan lotel me pour en rezon ou en lot zot in arete. E zot sa bann madanm la zot aze 50an e plis. Mr Speaker me fodre fer resorti osi ki i annan plizyer madanm ki’n dir mwan donn mwan zis mon kar aswar.

En lot nide enteresan ki’n ganny resorti parmi bann paran tousel i si ti annan en landrwa ki ofer child minding aswar sa ti pour en gran fakilte petet la en propozisyon pilot pour Gouvernman e bann prive. Well mon a poz sa la.

Mr Speaker permet mon koz en pe lo son dezavantaz medikal ki en travayer shift i kapab fer fas avek. Resers in montre ki i annan en gran nesesite pour pran konsyans ki bann shift workers ki’n lo en schedule iregilye i kapab annan en lenpak serye lo zot lasante. En resers ki WHO in pibliye an 2018 i montre ki bann madanm ki’n travay shift pour en peryod 5an e plis i a plis risk pour devlop kanser tete maladi leker, tansyon o, dyabet tip 2, depresyon e en mank vitamin 2 ki bon pour fer fonksyonnen lezo.

Letan en dimoun i pe travay aswar Mr Speaker ki i pe fer?  Se ki i pe fors son lekor fonksyonn kont son rythm natirel akoz se ler en dimoun i dormi ki son lekor i pran letan pour konbat e geri okenn douler ek maladi e osi pour detox. Alors pour bann madanm ki’n travay shift pour bokou lannen la petet i ti a en bon nide si zot bann anplwayer ti konsider seryezman pour fer rotasyon e met zot shift lizour aprezan.

Mon bann frer ek ser Seselwa ki travay shift permet mwan met a zot latansyon ki zot vilnerab a plizyer risk lasante sirtou bann madanm. Mon ankouraz zot pour fer sa pti resers e lir lo la. I tre enportan pour zot pran swen avek zot lasante. Pa fimen, pa servi lalkol an ekse. Pa esey bwar kafe pour ou pa dormi, fer sir ou al dan soley tanzantan pour rekiper en pe sa bann vitman 2 ki ou pe manke, bwar delo, fer en pe legzersis, manz byen e esey manz en ladyet balanse o tan ki posib, e par lao tou fer sir ou dormi ase pour ki pandil ou lekor i kapab retourn a sa rythm natirel tanzantan.

Mr Speaker pour konklir mon oule dir ki sa Mosyon pa pe rod anpay ni sekter prive e ni Gouvernman. Sa Mosyon pe senpleman rod fason pour anmenn plis nou bann madanm Seselwa pour travay dan sekter tourizm, dapre en lanplwa di-tan ki pour permet zot pran swen avek zot lavi, zot fanmir. E dan lot kote pour ki prodiktivite, e plis lanplwa i a ogmante dan sekter tourizm e pour ki plis larzan i a reste dan nou pei Sesel.

Mr Speaker mon a demann tou Manm Onorab pour siport sa Mosyon pour madanm Seselwa. Mersi.

 

(APPLAUSE)

 

 

MR SPEAKER

Mersi Onorab De Letourdie. Mon krwar sa i montre e tre bon finisyon.  Bon in ariv moman pour nou pran en desizyon lo Mosyon ki prezante par Onorab De Letourdie e i lir konm swivan :

‘’Sa Lasanble i demann avek Gouvernman pour etidye e met an plas bann nouvo kondisyon travay pour permet bann madanm Seselwa ki kapab travay dan sekter tourizm pour ganny priyorite pour travay zis shift lizour, avek bi pour ankouraz zot pour pran lanplwa dan sa sekter enportan pour nou lekonomi e osi ede kree bann kondisyon favorab pour zot pran swen zot zanfan e zot fanmir.’’

Mon ava demann tou Manm ki an faver? Okenn Manm ki kont? Madanm Clerk.

 

MADAM CLERK          

Mr Speaker, rezilta inanim.  24 an Manm an faver e personn kont.  Mersi.

 

MR SPEAKER

Mersi.  Savedir Mosyon in ganny aprouve par Lasanble Nasyonal.

Bon nou pour adjourn. Me avan nou adjourn mon ti a kontan zis enform bann Manm Lasanble e osi bann Manm piblik, ki demen i en zour enportan dan travay Lasanble Nasyonal e i en zou rosi tou enportan pour nou pei.  Sa se kot Minis Finans pour vin prezant Appropriation Bill savedir Bidze 2020. Sa i vin toulezan kot Gouvernman i bezwen prezant en Bidze pour kapab kontinyen fonksyonnen pour lannen answit.

Alor demen bomaten e ankor SBC ki la koman nou partner, i pour transmet prezantasyon Minis an direk lo radyo e osi lo televizyon. Nou pour rankontre pour 3enm fwa demen bomaten 9er pour prezantasyon Bidze 2020. Lasanble i adjourn ziska demen bomaten 9er.

 

(ADJOURNMENT)