::
Home » Verbatim » 2019 » Wednesday 23rd October, 2019

Wednesday 23rd October, 2019

NATIONAL ASSEMBLY OF SEYCHELLES

Wednesday 23rd October, 2019

 The Assembly met at 9am

 National Anthem

 Moment of Reflection

Mr Speaker in the Chair

 

 

 

 

MR SPEAKER

Bonzour tou bann Manm Onorab. Avan nou kontinyen nou travay kot nou’n arete yer lo Order Paper zis mon pou fer en pti kominike, sa i ava swiv avek en First Reading. Avan mon apel Minis pou pran bann kestyon mon pou zis pas lo bann Prozedlwa ki  ankor lo Order Paper pou mwan enform bann Manm e  manm piblik lo zot stati.  Sa ki konsern sa 2 Tax Bills, mon an kontak avek SS Payet e in enform mwan  ki Minister Finans i ankor pe diskit   ek bann stakeholders e i posib ki zot pou dan en pli bon pozisyon, pou raport ek Lasanble a lafen bann deba lo Bidze.

Lo Code Civil, parey nou ti agree dan ABC deba lo Code Civil pou kontinyen zis apre lo repons lo Leta Lanasyon an 2012.

        E Prozedlwa lo Public  Service Salary (Amendment)  2019 i dan Lakour.  In aksepte bann written submissions  e in osi ekout bann largiman ekstra lo tou lede kote.  E Lakour pou donn son ruling le 26 Novanm 2019.

An sa ki konsern Mosyon lo Bidze Siplemanter  ki ankor pending  lo nou Order Paper, SS Payet in osi enform mwan ki zofisye son Minister pou rankontre avek FPAC ozordi 1er  apre midi dan Komite Room 3 pou regard e apre sa  nou pou regard posibilite pou nou kapab dispose sa Mosyon Semenn prosenn avan  nou pran Bidze.

Mon osi enform bann Manm ki semenn prosenn no pou annan 3 Sittings ;- sa i 2 Sittings normal Mardi e Merkredi e i pou swiv par en Sittings  mon  apel li en  pe spesyal.  Sa pou fer Zedi le 31 Oktob e i pou prezantasyon bidze 2020 pou kot Minis Finans pou vini pou vin fer prezantasyon Bidze. 

        Lasanble pa pou pran kestyon ordiner pou sa 2 zour ki pe vin semenn prosenn me nou annan 2 kestyon ki pending sa i en PNQ ki sorti kot Leader Lopozisyon e en Kestyon Irzan  ki Onorab William in anmennen i annan 2 semenn   ki nou pa’n kaba pran pou serten rezon ase delika lo sa sityasyon lo sa size.  E apre kontak avek Minister Finans  sa Minister i pou dan en pli bon pozisyon pou fer en statement sa Vandredi – lafen sa semenn e apre nou ava kapab pran sa kestyon Onorab William semenn prosenn.

E bomaten pour Sesyon Kestyon avek Minis Lasante apard loter kestyon, e le 2 Leaders,  mon pou permet zis en siplemanter pou sak kote e mon pe fer sa touzour anliny avek Standing Orders 33.

Vwala mon kominike pou la bomaten e antretan ki nou pou al fer First Reading mon ava demann parliamentary reporter pou fer antre Minis responsab pou Lasante avek son delegasyon.  Mon ava demann Madanm Deputy Clerk pou nou fer First Reading.

 

MADAM DEPUTY CLERK

Mersi Mr Speaker. Bonzour Mr Speaker. Bonzour tou bann Manm e tou dimoun  ki  a lekout. Bill for First Reading i Appropriation Bill, 2020.

This Act may be cited as the Appropriation Act of 2020. Mersi.

 

MR SPEAKER

Mersi Madanm Deputy Clerk. Savedir parey nou Standing Orders  in dir the Bill has been deemed read e parey mon’n anonse – mon’n fini anonse ki  son Second Reading pou fer Zedi le 31  – 9er bomaten.  Yes Onorab Ramkalawan ?

 

HON WAVEL RAMKALAWAN

Bonzour Mr Speaker. Mersi. Mr Speaker.   Bonzour tou bann lezot Manm, Onorab e bann dimoun ki a lekout. Mr Speaker sa meeting ki ou’n nonmen  – ki ou’n anonse avek Finans pou  1 er apre midi, mon ti a kontan petet si Sekretarya  ti ava kominik avek SS Payet, i annan  serten dokiman ki nou’n demande ki ziska prezan zot pa ankor donn nou. Zot pa ankor donn nou lalis Home Carer e ki sa miting apre midi i pa pou vo lapenn si i pa vin avek lalis Home Carers ki Lasanble in demande alors petet si i pe ekoute osi tou, dir li vini akoz sansan meeting pou fini  1.05.  Mersi bokou.

 

MR SPEAKER

Mersi Onorab Ramkalawan. Bon Deputy Clerk i a va  fer le neseser i ava anvoy en email kot SS Payet  e sa bann dokiman ki Lasanble in demande i ava anmennen taler avek li pou zot kapab fer en meeting ki conducive e pou nou ka[an bouze lo sa travay  ki devan nou. Bon avek sa mon ti a kontan  welcome Minis  Jean-Paul Adam – Minis ki responsab pou  Lasante e Minis i akonpannyen par son Special Adviser Dr Loren Reginald e Direkter pou Servis Lopital Dr Kenneth Henriette.   E byensir son personal assistant Mr Marthy Vidot.  Minister bonzour e ankor enn fwa welcome dan Lasanble Nasyonal.  Nou pou al direkteman lo kestyon e mon ava donn laparol Onorab Churchill Gill.

 

HON CHURCHILL GILL

Mersi Mr Speaker.   Bonzour Mr Speaker bonzour Minis ek ou delegasyon. Bonzour tou Manm e bonzour tou dimoun a lekout. Mr Speaker kestyon I lir koumsa;-Eski Minis pou Lasante i kapab dir avek sa Lasanble: –

  1. a)   Ki demars ki pe ganny fer pou adres twatir andomaze lo vye lopital kin ganny fer renovasyon lo la, e ki Minister pe anvizaze fer avek sa landrwa?
  2. Ki demars ki pe ganny fer pou amelyor fasilite laundry dan Lopital Baie Ste Anne?
  3. Eski Minis pa krwar ki Praslin in ler pou fer demars pou annan en Health Centre ki kapab donn bann servis tel parey Family Planning, antenatal, child health, doctor’s consultation, dressing e specialist consultations?

 

 MR SPEAKER

Mersi Onorab Gill.   Minister.

 

MINISTER JEAN-PAUL ADAM

Mersi bokou Mr Speaker. Mr Speaker, Onorab Leader Lopozisyon, Leader Zafer Gouvernman tou Manm Onorab  e tou bann dimoun ki pe swiv deba, bonzour ankor enn fwa.  Mon remersi Onorab pou sa kestyon.  E an se ki konsern Lopital Baie Ste Anne sa batiman vye lopital  parey bokou dimoun i konnen ti ganny en proze renovasyon ki ti ganny fer ansanm avek American  Peace Corps. Malerezman sa kontrakter ki ti ganny pran par Lanbasad Ameriken lo lapar American  Peace Corps i pa’n kapab termin sa louvraz lo en nivo satisfezan e i annan  serten problenm ki’n ganny dekouver avek sa travay sa  i enkli kot twa i touzour koule e i annan serten problenm osi  avek lafnet e avek laport.

Atraver Minister  Zafer Etranzer  nou‘n fer demars opred Lanbasad Ameriken pou nou kapab rezourd sa sityasyon.  In pran en pe letan me Gouvernman nou pe deside pou nou repran sa batiman e kapab  fer sa bann dernyen pti koreksyon ki pou permet sa batiman ganny itilize.

Akoz sa ki reste pou  fer  an se ki konsern son twatir, son lafnet ek son laport i pa neseserman en gran larzan. E priyorite pou  nou se pou nou  kapab servi sa batiman parey ti nou lentansyon. E sa batiman son bi dan sa renovasyon sete pou nou  met en nouvo laundry laba e pou nou met en nouvo lespas pou laboratwar akoz lespas aktyel kot  laboratwar  i été, i ankonbre. E  nou bezwen ankor adisyon lespas pou nou osi kapab fer bann sesyon occupational therapy e pou nou osi annan lespas pou  unit biomedikal lo  Praslin.

An se ki konsern  dan limedya, enn fwa ki nou regle sa sityasyon sa batiman,  sa bann servis pou bouz laba  e nou ekspekte  kapab fer sa boner lannen prosenn.

An se ki konsern bann nouvo proze e nou plan pou Lopital Baie Ste Anne, nou annan serten proze ki pe vini lannen prosenn ki nou’n fer provizyon, e sa i enkli otour sa nouvo batiman pou  baric chamber.  Sa batiman byensir pou annan sa fasilite hyper baric, me pou annan osi bann landrwa adisyonnel kot  bann additional waiting area kot dimoun pe espere pou war dokter oubyen bann lezot servis.  Pou annan en klinik dedye pou bann pasyan pou lizye;  oktamolozi pou annan  osi bann lasanm pou  Family Planning e ou konsiltasyon zenikolog.

Avek sa nouvo batiman   separeman pou annan osi en nouvo unit pou prodiksyon loksizenn, e a sa pwen osi ki bann landrwa pou nou kapab fer en store pou serten lekipman pou nou amelyor ou biomedical  e dan mwayen a lonterm anliny   avek nou plan redevlopman lopital, nou  vizyon se zisteman pou diferansye ant sa fasilite en sant lasante e en lopital.  Savedir nou in patient services ki lopital.  E nou outpatient  ki enkli bann konsiltasyon avek dokter, spesyalis eksetera e pysio eksetera e sa nouvo batiman dan sa plan 10an  lo redevlopman  lopital  pou  kot zisteman  kot sa vye  batiman lopital i été.

Akoz i annan lespas pou nou kapab ogmant nou bann servis ki disponib dan sa landrwa.  Zis  pou note Mr Speaker e tou bann Manm Onorab ki malgre  bann kontrent lespas ki nou annan laba nou pe ofer en kantite servi  laba enkli  atraver  bann tes laboratwar – enkli atraver bann servis kot dimoun i war dokter spesyalize enkli pedyat, enkli zenikolog, bann servis otour Family Planning e zis par egzanp  lo  nivo bann tes laboratwar zis 2019 ziska Septanm nou’n fer  23,275 tes biosimik, 3,948 tes mikrobiolozi, e nou’n fer 41,311 tes haematology ek blood transfusions.  Mersi Mr Speaker e mersi Onorab Pou  donn nou sa lokasyon pou eksplik en pti pe bann plan pou Baie Ste Anne. E petet zis en dernyen pwen ki mon bezwen azoute, akoz i annan en  manm  piblik ki’n demann mwan resaman konsernan mortuary osi  lo Baie Ste Anne e sa travay pe ganny  konplete prosennman. Nou ekspekte ankor detrwa semenn. Mon konnen ki sa en keksoz ki pe koz serten difikilte pou bann dimoun dan distrik, me nou ekspekte kapab rezourd sa problenm tre prosennman. Mersi bokou Mr Speaker.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Mersi Minis pou ou leksplikasyon. Minis donnen sa palan devlopman kour term e lonterm, eski ou kapab dir sa Lasanble si zot pe osi regard kote manpower si zot pou travay an paralel ler building pe ganny fer, i annan training pe ganny fer ki tou sa bann diferan servis, i ava annan dimoun ki a la pou donn sa bann servis.  Apre eski zot pe osi  mazinen ki pou Lopital Baie Ste Anne nou ganny en yearly maintenace plan byen konpreansif kot apre ki sa bann diferan servis in ganny mete, me nou vwar ki mentenir striktir avek sa bann lekipman, sa osi ganny fer dan en fason ki rezonnab e akseptab.  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Vizavi resours imen sa i en landrwa kot nou pe kontinyelman met bokou lanfaz. Nou annan parey nou tou nou’n   swiv, nou annan bokou zenn dokter ki’n tournen e apre ki sa bann dokter in fer zot rotasyon, bokou zot ou pran sa opsyon pou zot travay dan kominote e nou pe pous sirtou sa spesyalizasyon family  médecine communitiy médecine e ki nou espere ki sa bann dokter pou al dan sa direksyon. Nou pe regard osi pharmacist kot nou annan bokou – nou pe demann par egzanp nou priyorite dan lalis Lazans pou Devlopman Resours Imen ANHRD nou priyorite pou formasyon pharmacist, bann  travayer laboratwar kot NIHSS kot i annan plizyer dimoun ki pe ganny formen lo nivo teknisyen pou travay laboratwar pou teknisyen lo nivo physio e tou sa bann dimoun letan zot pou graduate zot pou antre dan servis lasante e enkli serten ki pou ganny anvoye lo Praslin.

E osi avek ranforsman ki pe fer pou biomedical workshop nou annan en fasilite ase larz lo Mahe  e avek sa bann travay ki mon’n mansyonnen a kour term e a mwayen term ki nou pou fer lo Praslin nou pou ranfors sa kapasite lo Praslin e sa pou enkli osi avek son staff kot pou bezwen al laba.

Apre an se ki konsern maintenance dan tou nou bann sant lasante nou annan serten defi ;- serten i lye avek bann prosedir ek bann lareg ki en pe lour pou par egzanp pran en pti sant lasante pou kapab pas devan bann diferan eleman prokirman, prokirman Oversight Unit eksetera nou’n fer en pe travay avek sant lasante Baie Ste Anne, Grand Anse dan sa lannen 2019 e nou pe met an plas bann prosedir pou nou sey fasilite sa.  Serten bann problenm maintenance in rezourd nou konnen i annan serten ki pe kontinyen, me nou pe apir lekip zesyon dan Lopital Baie Ste Anne pou kapab kontinyen rezourd sa bann problenm. Mersi Mr Speaker. Mersi Onorab. 

 

MR SPEAKER

Mersi Minis. Onorab Wavel Woodcock.

 

HON WAVEL WOODCOCK

Mersi Mr Speaker. Bonzour Minis ou delegasyon  e tou bann dimoun ki a lekout.   Minis zisteman ou repons in adres plizyer size ki mon ti anmennen atraver en Mosyon Lopital Grand ase Praslin ase resaman. Mon kestyon i baze sirtou lo sa part 3 sa kestyon kot ou pe koz lo health care avek bann diferan servis, annefe obor lakaz mor Baie Ste Anne i annan 2 building ki’n fini ganny fer.  E sa  2 building in la en pe letan ; annefe sa 2 building pa pe ganny servi – annefe zot pa pe ganny servi at all e enn sa building la karya pe fer lakaz lo la.   E mon ti a kontan  demann Minis kan ki zot anvizaze servi sa building e ki bann servis ki zot pou mete dan sa 2 building?  Si mon pa tronpe sa 2 building i ti ganny fer par bann American Peace Corps.

Apre dezyenmman i  still annan sa issue ki bann staff kot klinik Grand Anse Praslin pe met devan mwan  an regardan sa issue fungus. Annefe i annan en fiy laba ki’n dir in ganny afekte avek sa issue fungus alor mon pe demande ki zot anvizaze fer  an regardan sa bann dimoun ki pe ganny afekte avek fungus e ki zot pou fer pou rezourd sa problenm?  I pa zis  kot  klinik Grand Anse me osi sa pwen fungus i annan en pe konsern osi dan Lopital Baie Ste Anne Praslin.  Mersi.

 

MR SPEAKER

Mersi Onorab. Minis.    Ou 2enm par kestyon i way an deor, me mon ava donn laparol Minis, Minis i ava regarde si i pou reponn.   Minis.

 

MINISTER JEAN-PAUL ADAM

Mersi bokou Mr Speaker e mersi Onorab.   An sa ki konsern batiman ki in ganny renovate par Peace Corps, sa batiman parey mon’n eksplike i annan plizyer servis pe bouz laba. Mon krwar petet ou pe refer lo en lot batiman obor. I en pe difisil pou mwan konnen egzakteman me solman  ki mon a sizere se apre ou ava donn mwan detay egzakteman sa batiman  e nou ava kapab gid ou lo ki ou plan pou sa batiman.  Me mon konnen ki i annan – akoz sa batiman  ki ou’n eksplike,  nou pe al met laundry, nou pe al met occupational therapy, nou pe al met biomedical workshop e sa i enkli serten bann batiman satelit. Apre nou bezwen lespas pou store osi.

E sa bann diferan fasilite pou kouver lo sa 2 batiman, me letan ou pou eksplik mwan petet an deor  ki spesifikman ki pe fer referans lo la  nou ava kapab dir en pe pli klerman me an bref, i pe ganny servi selon  – i pou mars ansanm avek sa ki mon’n deza dir  ler mon’n reponn kestyon Onorab Churchill Gill.

2enm parti kestyon parey Speaker in dir  i en pti pe dan kad, me mwan mon touzour pran en lapros  nou reponn touzour.    An se ki konsern fungus dan tou nou bann klinik nou pe fer en provizyon pou annan bann kontrakter ki dan en fason regilye, pou kapab adres sa size fungus e nou’n fer serten travay. Par egzanp Grand Anse Praslin nou’n fer serten travay me i vre i revini.  Baie Ste Anne nou pou fer parey e osi dan bann lezot sant lasante enkli dan Lopital Victoria.  Mersi bokou Mr Speaker e Onorab.

 

MR SPEAKER

Mersi Minis. Onorab  Sebastien Pillay.

 

HON SEBASTIEN PILLAY

Meri Mr Speaker. Mr Speaker prenon kont ki n Minis in dir ek  koumsa poudir  ki zot pou fer prosedir oubyen zot an prosedir pou zot fer bann travay eksetera mon ti a kontan demann Minis eski dan Minister Lasante  an se ki konsern renovasyon  oubyen bann travay  ki bezwen  ganny –  eski zot annan en plan renovasyon  ki ava fer ki pandan lannen – pandan sa lannen zot konnen poudir i annan  10 renovasyon lannen prosenn, tou sa bann dokiman in fini pare Tender Board oubyen Procurement pe resevwar sa bann dokiman sa lannen, koumsa si ou pe pran li lannen prosenn tou bann Bidze ler i vini lannen prosenn ou bann proze i bloke, dan plas ki nou pou fer li as and when ki nou pou pran en lenspeksyon  nou pou remarke i annan en problenm.  So eski i annan en plan travay ki  ava fer ki nou pa annan sa bann delay pou ou fer  bann travay neseser parey Onorab  Churchill Gill pe koz lo la.   Mersi   Mr Speaker.  

 

MR SPEAKER

Mersi Onorab Pillay. Minis.

 

MINISTER JEAN-PAUL ADAM

Mersi bokou Mr Speaker e mersi Onorab.   Annefe nou annan en plan maintenance pou sak sant lasante. Me nou annan serten kontrent kapasite ki’n egziste depi en pe letan. Par egzanp sa lannen nou  pe etabli en  lekip maintenance dan lopital e pou nou  bann sant lasante maksimonm dan serten ka  nou pou outsource sa fonksyon.  Me   i vre ki ziska resaman nou napa en lekip maintenance a plen tan dan tou sa bann fasilite.  E sa in enn bann defi an term kapasite  ki nou’n deza annan.  Otour nou plan maintenance nou bezwen rekonnet ki dan lepase, bokou fwa serten maintenance e bokou sa bann kestyon i vin  mon kapab dir depi  bann letan  par egzanp kot ti napa deviz,  kot serten ranplasman lekipman pa’n ganny fer a bon moman.  E i fer ki ou kou maintenance i kontinyen ogmante.  E si nou pran legzanp osi fungus –  an  se ki konsern fungus nou’n kontinyen adres sa size letan in leve.   Me  i kler.  E lapros ki nou  pe pran la se ki  nou annan en  tretman    ki pu ganny fer regilye – regilyerman dan tou nou bann sant lasante pou adres sa problenm  en fwa pour tou.   Sa i vedir ki nou bann kou loperasyon i ogmante e  sa i enn bann keksoz  ki zot pou war i reflekte.  E nou pe sey fer sir ki sa i ganny adrese atraver nou Bidze  operasyonnel  dan pas parey dan lepase, nou ti tant pou met sa  koman en  Bidze Proze.  Nou  pe sey maksimonm pou nou fer sa transfer  konpetans pou  nou fer sa koman en progranm regilye dan nou travay ki  pou diferansye par egzanp  avek bann gran renovasyon ki pou kouver dan bann proze. Mersi Mr Speaker, mersi Onorab. 

 

MR SPEAKER

Mersi Minis.   Bon mon anvi welcome Dr Louange ki Direkter Zeneral pou Public Health ki’n vin zwenn panel  akote  Minis.   Mon a prezan donn laparol Onorab Ramkalawan.

 

HON WAVEL RAMKALAWAN

Mersi bokou  Mr Speaker. Bonzour Minis avek ou delegasyon. Mr Speaker, mon ti ava kontan demann Minis etandonnen ki Baie Ste Anne i spesyal li sa lopital, akoz li osi i en regional hospital i en halfway ant La Digue avek Lopital Victoria.  Parski pasyan La Digne tou  parfwa i ganny transfer Lopital Baie Ste Anne e apre Lopital Baie Ste Anne i anvoy zot Mahe.  Etandonnen lenportans Baie Ste Anne pou  sa 3 distrik, eski Minis i kapab dir avek nou kan i a kapab prezant avek  Lasanble en plan – konmsi pou montre egzakteman sa bann keksoz ki i pe dir nou.   Parski nou vwar bann bout dan sa kestyon en bout lo laundry, en bout health  centre,  family planning, antenatal, child health ki konmsi montre nou kan eski i kapab anmenn devan Lasanble, sa plan konpreansiv pou ki nou ava  regarde  nou ava  dir ah ok la li la sa plan. E an menm tan osi, ki i ava kapab koz lo finansman  tou sa bann diferan eleman ki dan sa kestyon, parski  Mr Speaker nou’n ganny dir – nou’n ganny dir par Minis Finans semenn pase ki poudir Minister Lasante pou sa lannen li i limero –    Minister Lasante oubyen  Ledikasyon ki No.1 me selman napa Minister ki’n akonplir plis ki 50poursan zot investment plan.  Alor mon ti ava kontan demann Minis an relasyon avek zot investment plan e an relasyon avek sa bann keksoz ki pe ganny adrese dan sa kestyon, ki poursantaz sa depans ki zot in   fer i ava tonm pou sa regional hospital Baie Ste Anne Praslin. Mersi bokou.

 

MR SPEAKER

Mersi Onorab Ramkalawan. Minis.

 

MINISTER JEAN-PAUL ADAM

Mersi  bokou Mr Speaker e mersi Onorab.   Mon krwar ki nou ava rapel ki ti annan en  – ki nou ti vin devan Lasanble e nou ti fer en prezantasyon lo  plan redevlopman sa lopital, ki ti enkli osi tou son   bann satelit e tou bann sant rezyonal ki enkli Baie Ste Anne.  Letan nou ti fer sa prezantasyon avek Lasanble  nou ti osi demontre ki pou Baie Ste Anne, son  proze pou son groser sa lopital,  i enkli en sant separe outpatient ki lo sit vye lopital e parey mon’n dir dan mon lentervansyon pou premye kestyon e avek en renovasyon  agrandisman lo lopital egzistan kot i pou vin en fasilite  pirman inpatient.

E sa plan devlopman ek tou son bann satelit, i annan en lenplimantasyon 10an e Minister Finans pe donn resours bidzeter anliny avek sa plan devlopman lopital  avek tou son bann lezot fasilite.   An mezir  sa kestyon ki Onorab Churchill Gill in demande, i ti bann kestyon otour bann keksoz imedya, ki pe ganny fer e ki konsern fonksyonnman lopital dan son imedya, alors sa ki mon’n site, sa bann detay ki mon’n site, i konsern son fonksyonnman imedya e i otour litizasyon sa bann batiman aktyel e sa parpilaz i lo renovasyon a lonterm term e kot ou rebâti ranplasman sa bann lopital.

E plan lenvestisman nou sekter lasante, i otour sa redevlopman lopital.  I vre ki parfwa i annan serten delay dan lenplimantasyon sa bann lenvestisman pou plizyer rezon.   Enn bann fakter kle se ki dan sa plan lenvestisman, bokou i depan lo met an plas bann striktir ase for ki ou planifikasyon, i asire ki i kouver a lonterm bezwen sa bann popilasyon ki pou servi sa bann lopital ek sa sant lasante.   E otour sa, letan nou’n  fer sa bann proze nou fer son bann son tendering konman bann design and built.

E bokou sa bann proze alor in pran en pe letan, premyerman otour son prosesis tender.  E sa ki nou pe war se ki bokou bann proze ki nou’n batch ansanm, i annan en batch ki malerezman ki’n pran 1an zis dan son prosesis procurement ek tender.   Sa ki pozitiv, se ki bokou sa bann proze pe ganny award la aktyelman dan sa mwan ki pe vini.  Serten in fini ganny award.   E sa bann proze i pou alor enn fwa ki sa kontrakter in ganny apwente, se la kot sa travay ki tou dimoun i anvi war sa travay lo teren ki sa bann dimoun pou war sa bann travay i demare.

Letan nou fer konsiltasyon lo Bidze, nou ava kapab donn zot en pe plis detay lo sa bann diferan proze ki pou kontinyen an 2020.  E plan lenvestisman ki Minister Finans pe finanse, i baze lo sa plan redevlopman lopital.  Mwan osi mon partaz konsern bann Onorab ki parfwa letan ou met en resours dan Bidze pou lannen otour en proze sa ki nou apel bann capital projects bann otour public sector investment plan, ki si sa i pran plis letan i regretab.  Me an menm tan i enportan ki nou pran en lapros ki nou fer sir ki sa ki nou fer i byen, e ki nou pa fer en proze a lavites zis pou montre poudir nou fer en keksoz me ki nou fer en proze dan en fason ki nou asire ki tou son bann eleman depi son procurement ziska son lenplimantasyon i ganny fer dan le meyer posib.  Mersi Mr Speaker.  Mersi Onorab.

 

MR SPEAKER

Mersi Minis.  Bon zis avan mon donn laparol Loter kestyon orizinal nou pran zis en pti technical break a few minutes zis pou mon allow Deputy Clerk pou al rod en dokiman.  Ok so nou pran en pti technical adjournment mon pa pou bouze mon pou reste lanmenm akoz i ase vit, mon a zis allow Deputy Clerk akoz i tousel, zis pou li kapab kit son sez e nou ava repran nou travay  dan 2 minit.

Madanm Deputy Clerk you can go.  Bon mon remersye bann Manm, Minis ek son panel pou konpran nou pou pasyant en pti pe nou bezwen fer li konman en technical adjournment, akoz dan labsans Deputy Clerk bann recordings bann prosedir pa pou kapab ganny pran.

 

(technical break)

 

MR SPEAKER

Nou ava kontinyen avek nou travay e mon ava re donn laparol Onorab Churchill Gill.

 

HON CHURCHILL GILL

Mersi Mr Speaker.   Minis pou kestyon maintenance mannyer ou’n eksplike i kler ki prosedir entern i koz en pe problenm, alors petet mon ti a sizere ki zot sey get en pe outsourcing petet i a ede pou ed sityasyon apre lo plan konpreansiv ki ou’n donn detay ki ou deza vin dan Lasanble ou’n koz lo la mon rapel mon ti mansyonnen ki nou bezwen pran kont popilasyon ki pe grandi lo Zil Pros avek Praslin, e apre bann diferan servis ki devret ganny desantralize.  Alors eski ou kapab dan ou bann lalis ki ou’n donnen dan mon kestyon i annan pa mal keksoz ki Minister i annan lide amelyore me selman sa pa tou ki lopital Baie Ste Anne i bezwen.

Eski ou kapab donn sa Lasanble garanti ler sa plan konpreansiv i ganny egzekite nou ava war bokou plis servis spesyalize e an menm tan standar an zeneral i ava annan en amelyorasyon pou bann zabitan?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  E mersi Onorab.  Premyerman sa ki konsern outsourcing wi pou nou bann klinik ek nou sant lasante outsourcing i pou premye opsyon tim maintenance ki nou pe ranforsi pou lopital me sa i pou osi amelyor sipervizyon zisteman outsourcing ki pou ganny fer.

An se ki konsern popilasyon ki pe agrandi e bezwen sa in ganny regarde konman en fakter dan plan redevlopman.  Me osi o moman ki ou antre sa kontrakter i ganny apwente e ki i fer son plan pli detaye, sa travay i ganny osi remet azour pou asire ki nou regard bann trends kestyon bann maladi ki pe evolye eksetera.  Nou deza nou pe antisip serten bezwen lo Praslin e nou pe ranforsi sa ki nou apel the core team otour bann spesyalis ki disponib a plen tan lo Praslin.  Sa i enkli gynae sa nou napa dan limedya me tre prosennman nou pou kapab fer sa lo pedyatri ki nou annan tre prosennman lo kote physician e avek bann nouvo dokter ki pe ganny formen avek bi pou form sa core team lo Praslin.

Plan osi se pou nou kapab ofer bann loperasyon miner lo Praslin, ki redwir nesesite pou refer pasyan avek lo Mahe.  Byensir sa i pou zis dan serten ka e pou kapab osi servis dyagnostik lo Praslin menm ki redwir lakantite fwa ki dimoun i bezwen ganny referans avek Mahe.

E sa i enkli osi meyer fasilite farmasi e osi pou occupational therapy e pou physiotherapy pou kapab osi donn sa bann dimoun plis servis lo Praslin menm san ki zot bezwen deplas lo Mahe.  Osi anliny avek sa plan i annan provizyon pou en lapros tele medsin ;- savedir kot parfwa ou kapab pran sa bann scan parey lo Praslin me ki en dokter lo Mahe ki pe konsilte sa bann scan pou donn gidans pou donn dyagnoz e osi lo plan tretman pou bann pasyan.  Mersi Mr Speaker.  E mersi Onorab.

 

MR SPEAKER

Mersi Minis.  Nou ava al lo kestyon No.2.  Onorab Wavel Woodcock.

 

HON WAVEL WOODCOCK

Mersi Mr Speaker.  Minis mon kestyon i konm swivan:  Etandonnen ki latak laservel i en kondisyon lasante ase komen parmi nou popilasyon e nou bann zil, pasyan ki soufer avek sa kondisyon i bezwen desann Mahe pou swiv bann sesyon reabilitasyon, ki parfwa dir pou en kantite letan, eski Minister Lasante i kapab konsidere pou entrodwir sa servis kot lopital Baie Ste Anne pou bann pasyan Zil Pros?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  E mersi Onorab.   I enportan pou note ki nou servis reabilitasyon pou pasyan latak laservel i baze lo bann standar nasyonal ki nou’n etabli.  E o maksimonm nou fer sir ki tou pasyan ki ganny afekte avek sa sityasyon ki zot ganny sa tretman ki neseser.

Nou ava rapel ki lo Mahe nou annan en sant reabilitasyon en rehabilitation ward ki baze North East Point.  Sa ward reabilitasyon i pa zis pou bann pasyan latak laservel i pou tou pasyan ki bezwen en form reabilitasyon otour physiotherapy oubyen otour en problenm mobilite oubyen bann problenm similer.

Sa ward ki nou annan North East Point, i baze lo in patient savedir ki sa pasyan i ganny admit e sa normalman i anliny avek son kondisyon.  E si nou regard en sityasyon kot en dimoun in ganny en latak laservel dan limedya son kondisyon pou nesesit en ladmisyon dan en tel fasilite tou fason.  Akoz en latak laservel i en kondisyon ki ase grav.

Me sa i pa vedir ki aktyelman ki nou pa pe fer okenn sa bann servis deza lo Praslin akoz nou ofer bann servis reabilitasyon annefe depi 1990 lo Praslin ek La Digue me byensir lo en sel mwen laz ki sa ki ganny ofer lo Mahe.

E an se ki konsern en fasilite dedye zis pou reabilitasyon lo Praslin e sirtou latak laservel, lakantite pasyan ki nou annan i pa pou neseserman fer li rantab, me nou lentansyon par egzanp avek redevlopman lopital se pou annan sa bann fasilite ki disponib lo bann ward lo Praslin, me sa i depan byensir lo disponibilite staff e nou pe fer provizyon pou nou kapab form ase staff pou nou annan sa bann staff a plen tan lo Praslin, akoz se sirtou sa sipor staff ki pou permet entel fasilite ganny fer.

Zis pou donn zot en pe sif lo lakantite latak laservel ;- si nou pran servi bann sif pou Praslin, an 2018 in annan 6 nouvo latak ka latak laservel Baie Ste Anne Praslin e in annan 4 Grand Anse Praslin.  Savedir en total 10 pou 2018.  An 2019 ziska prezan nou annan 3 nouvo ka Baie Ste Anne Praslin e 3 nouvo ka Grand Anse Praslin.

I annan en swivi ki ganny fer pou bann pasyan ki’n deza ganny afekte par latak laservel, me sa i ganny fer konman en outpatient service ;- savedir sa pasyan pa admit sa pasyan i ganny son swivi ek son tretman atraver servis fizyoterapi.  Sa i parey pou Mahe menm letan en pasyan in fek ganny son latak laservel i ganny  admit lo rehabilitation ward e apre letan i ase byen i retourn kot son lakour, me i kapab swiv en progranm reabilitasyon ki ganny fer dan son klinik – dan son health e dan serten ka i ganny fer North East Point.  Me an tou ka sa i ganny fer konman outpatient.  Savedir sa dimoun pa bezwen admit.  E Praslin i parey nou annan plizyer pasyan ki’n deza ganny latak laservel oparavan me ki pe swiv regilyerman avek bann fizyoterapi, bann fizyo lo Praslin.  E si nou pran lakantite ka nou annan 105 ka Baie Ste Anne ki pe swiv regilyerman e Grand Anse Praslin nou annan 179 ka ki pe swiv regilyerman.

E alors sa i bann ka ki pa bann dimoun ki bezwen ladmisyon dan limedya, e nou bann servis reabilitasyon i la pou zot e nou pe deza ofer sa bann servis.  An se ki konsern bann servis fizyo an zeneral, nou ofer sa servis lo en fason ase larz lo Praslin e menm an 2019 nou’n ogmant lakantite konsiltasyon konsiderableman.  Akoz pou bann dimoun ki ti pe swiv regilyerman avek fizyo an 2018, nou ti pe fer 3280 ka, e deza ziska Septanm 2019 nou annan 3270 ka.  Tou lede sif mon pe koz lo la i pou Baie Ste Anne selman pou Grand Anse Praslin an 2018 nou ti pe fer 1941 ka pou lannen antye e pou 2019 ziska Septanm nou annan 2424 pe swiv regilyerman.

Alor nou war sa logmantasyon dan servis fizyo ki disponib.  Nou annan bann teknisyen fizyo ki travay a plen tan lo Praslin e ki ofer sa bann servis anba sipervizyon fizyo, e nou annan osi bann fizyo kalifye ki vwayaze pou Praslin ek La Digue regilyerman tou lede semenn.  Mersi Mr Speaker e mersi Onorab.

 

MR SPEAKER

Mersi Minis.  Onorab Woodcock.

 

HON WAVEL WOODCOCK

Minis ou’n mansyonnen ki annan apepre 105 ka Baie Ste Anne e 79 ka Grand Anse Praslin pli boner osi ou’n mansyonnen poudir ou koz en pe lo occupational therapy.  E annefe enn bann konsern Praslin pou tou sa bann diferan ka bann dimoun sirtou ki annan problenm mobilite ki enkli bann lefe bann kondisyon swivi par en latak laservel.

Me mon kestyon ki mon pe demann ou baze lo konsern ki bann pasyan in met devan, eski zot annan lentansyon etabli en landrwa spesifik lo Praslin pou occupational therapy en landrwa permanan?  Akoz as it is now mon krwar zot mont forse 2 fwa par mwan – 1 fwa Praslin 1 fwa La Digue, eski zot annan lentansyon met enn ou plis pou tou sa bann ka ki ou’n mansyonnen ki annan Praslin permanan lo Praslin pou deservi bann pasyan pa zis Praslin bann pasyan Inner Island?

E dezyenmman Mr Speaker Minis mon senserman krwar ki prevansyon i pli bon ki gerizon e pou le moman lo Inner Island nou napa lekipman spesyalize pou get leker ek bann blood vessel otour leker ouswa pou deteksyon bann maladi leker.  Ki bann maladi leker ki kapab koz en latak laservel.  Eski ou Minister i kapab konsider met an plas en echocardiogram lopital Baie Ste Anne pou deservi bann zabitan Inner Island olye ki zot bezwen deplase pou al Mahe pou ganny sa servis?  Akoz mon mazinen sa i kapab ede sov bokou lavi.  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  E mersi Onorab.  Parey mon mansyonnen letan mon reponn kestyon Onorab Churchill Gill pli boner, dan sa batiman ki nou pe fer renovasyon ki nou espere ki nou kapab finalize la, nou pe al kre lespas pou occupational therapy laba.  E nou annan osi lentansyon pou gradyelman anvoy plis bann spesyalis occupational therapy lo Praslin e annan dimoun baze laba a plen tan.

Pou nou note anba reabilitasyon nou annan plizyer servis ki ganny ofer deza e ki disponib lo Praslin.  Nou annan premyerman pou fizyo pasyan lo Praslin i pe ganny en servis toulezour akoz sa servis i disponib deza lo Praslin toulezour.  An se ki konsern occupational therapy sa staff sorti Mahe i vwayaze lo Praslin preski tou le 2 semenn.

An sa ki konsern speech pathology sa eksper sa therapist i travay i vwayaze pou li al Praslin 1 fwa par mwan.  An sa ki konsern bann portez sa dimoun sa eksper i vwayaz Praslin tou le mwan.  An sa ki konsern odyolizi bann tes pou zorey eksetera, sa eksper i vwayaze tou le mwan.  E an sa ki konsern acupuncture nou dan prosedir pou annan bann klinik acupuncture dan lopital Baie Ste Anne e sa i pou ganny fer an kolaborasyon avek bann servis ki deza an plas lo Baie Ste Anne.

Alor nou pou deza annan sa provizyon.  Bokou sa bann servis i deza disponib lo Praslin e avek letan, avek plis lekspertiz nou pou kapab ofer sa bann servis pli sistematikman.  An se ki konsern deteksyon bann problenm sirkilasyon e bann problenm kardyovaskiler, ki enn bann pli gran kontribisyon anver bann latak laservel – premye keksoz ki enportan pou mazinen se ki, si ou pe bezwen fer en referans pou al dan en echocardiogram savedir ou deza annan en problenm.  E pli enportan se pou nou kapab ranforsi;- par egzanp verifikasyon enn bann dimoun ki annan bann problenm tansyon i pou fer sir ki tansyon i kontrole.

Nou annan en gran problenm dan nou pei ki malgre ki dimoun souvan i konnen zot annan zot annan tansyon me tansyon i reste an deor kontrol, pou diferan rezon.  Parfwa zot pa pran zot medikaman byen ;- savedir zot in ganny en medikaman zot pa pe pran dan en fason regilye zot krwar enn bann myth ki nou fer fas avek, en dimoun in ganny tretman pou tansyon i krwar i bezwen pran son latizann zis ler son latet i fermal oubyen zis letan son tansyon i monte.

E i bezwen pran sa tretman regilyerman pou kontrol sa tansyon.  E osi problenm se ki ler en dimoun i pran son latizann, i bezwen konsyan ki menm si ou pe pran latizann si ou pa sanz ou stil lavi;- savedir si ou kontinyen konsonm lalkol tro souvan, e ou kontinyen pa fer legzersis, ki sa problenm tansyon pou kontinyen agrave e sa pou anmenn plis risk vizavi bann latak laservel oubyen bann stroke.

Nou pe konmans en konpanny prosennman sa mwan, nou annan World Stroke Day ki pe marke le 29 Oktob nou pe travay avek lasosyasyon stroke pou nou fer plis piblisite lo bann keksoz ki dimoun i kapab fer, pou redwir zot risk pou zot ganny en stroke.  E sa i sirtou otour ladyet legzersis e evit bann konportman a risk tel ki konsonm tro bokou lalkol e fim bokou sigaret.

E i annan osi nesesite pou dimoun kapab pli byen rekonnet bann siny en stroke letan i arive.  Alor bokou keksoz ki kapab ganny fer pou menm tret bann latak laservel se osi – akoz bann latak laservel nou pe koze letan i vin pli sever.  Me nou annan osi bann mild stroke ki parfwa menm pa ganny remarke.  Alor i en kestyon pou dimoun remarke ki bann sentonm letan en dimoun in ganny en tel stroke.

Byensir avek bann nouvo lekipman ki nou anvi met an plas sa i pou enkli ofer en servis kardyolozi lo Praslin.  Pou le moman nou napa bokou nou napa ase kardyolog dan nou pei e i en keksoz ki nou espere bann zenn dokter Seselwa pou regarde konman bann opsyon pou zot fer zot spesyalizasyon.

Nou pou regard opsyon osi pou nou rekrit nouvo dokter ki pou permet nou ofer plis sa servis.  Akoz par egzanp si ou annan ou masin lo Praslin apre napa sa dimoun pou fer marse ou masin i pou napa sans tou fason.  Alor nou pe nou annan en plan otour sa rekritman sa bann ekspertiz osi byen ki ranforsi sa bann lekipman disponib.

Me ankor mon pou repete ki pli gran solisyon anver latak laservel ek stroke, se pou rekonnet bann siny boner otour tansyon e si en dimoun son tansyon ki persiste i bezwen revwar si i bezwen revwar son tretman.

E nou espere ki dimoun i pran sa bann konsey aker pou nou kapab fer en diferans.  Mersi bokou Mr Speaker.  E mersi Onorab.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker baze lo ler mon pe ekoute mon’n tann kestyon Onorab Woodcock, e plizyer fwa osi mon’n tann Onorab Sophola koz lo la.  Ler nou regard lopital Baie Ste Anne ler i ti fek ganny konstrir i ti pe cater pou en popilasyon a en nivo.  Me kontribisyon Praslin ek bann Zil Pros dan lekonomi pei dan en fason zeneral in ogmante.

Eski Minister pe revwar son lapros provizyon servis dan en fason zeneral?  Konmsi pou nou retir en pe sa sityasyon anmenn en dimoun lo en fason tanporer pou provide en servis, me plito annan en servis ki a provided lo en baz permanan.  Akoz sa bann popilasyon i kontinyen grandi.  I pa fer sans anymore pou nou kontinyen annan en terapis ki pe monte pou 1 semen pou 2 semenn.

Plito nou annan enn ki baze Praslin a plen tan, ki pe fer sa louvraz.  Konmsi Praslin i provide sa bann servis de baz e neseser dan en fason kontinyel e konsistan, e non pa dan en fason si oule tanporer kot ou ganny en dimoun pe monte de tanzantan – prenan kont lenportans sa lopital e dinamik popilasyon Praslin ek bann Zil Pros ki’n sanze.  Mersi Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  E mersi Onorab.   Absoliman nou o maksimonm nou ofer sa bann servis lo en baz permanan lo Praslin.  E parey mon dir deza nou pe bouz dan en direksyon sa ki nou apel sa core team bann profesyonnel ki disponib a plen tan a Praslin. Alor  par egzanp pedyat nou annan a plen tan lo Praslin, e nou anvi ranforsi sa avek zinekolozi,  otour physician e bann sa bann rol ki asosye avek sa tim debaz.  E sa nou espekte nou kapab ofer tre prosennman avek nou plan rekritman an 2019 ek 2020, nou espekte ki nou kapab annan sa core team deza an plas.

Pou note otour pa zis sa bann eleman dokter e spesyalis, i osi par egzanp pharmacist nou annan pharmacist ki kapab servi sa ofer sa bann servis ki parey lo Mahe.  Lo Praslin nou kapab ofer sa preski lo menm nivo ki lo Mahe, me nou bezwen ranforsi.  E par egzanp mon sit bann diferan servis parey reabilitasyon.

E si ou regard fizyo, fizyo i disponib a plen tan.  Pou occupational therapy nou pou annan lentansyon met li a plen tan.  Pou serten bann lezot servis i pou depan lo lakantite pasyan ki ou annan.  Akoz si ou pou annan en speech therapist;- par egzanp ki aktyelman i fer vizit lo Praslin i pa pou annan en lamas pasyan ki pou fer li valab pou en dimoun baze lo Praslin a plen tan.

Me lo bann core, lo bann size kot nou konnen ki nou pou annan plis bezwen, nou pou asire ki nou kapab ofer sa bann servis lo Praslin.  Sa ki enportan osi pou note se flow bann pasyan.  Savedir ki mannyer bann pasyan i ganny refere par egzanp bann spesyalis avek idantifikasyon son problenm byen boner.

E sa pou mars ansanm avek sa proze non-communicative disease ki nou pe fer aktyelman ki pe ganny pilote dan de sant lasante me ki pou evantyelman kouver tou sant lasante, e sa i permet en i permet ranforsman par egzanp bann gidans pou referans kot en pasyan i ganny anvoye dan en moman apropriye kot spesyalis, pou fer sir ki son sityasyon i anba kontrol.

Par egzanp mon site ki annan sityasyon bann dimoun ki annan tansyon ki kontinyen pa kontrole, e sa i pa devret en norm.  I devret fer sir ki si pasyan i vin de fwa kot dokter son pasyan son tansyon pa touzour kontrole, nou bezwen fer sir ki i annan en lentervansyon pli aprofondi ki permet adres sa problenm de-baz sa pasyan.

Fodre note ki sa pa pou touzour akoz i annan en kantite fakter ki depan lo sa pasyan li menm lo son responsabilite, me nou santi ki nou kapab ofer en servis pli sistematik, e sa pou enkli lo Praslin dan tou nou bann sant lasante.  Mersi Mr Speaker e mersi Onorab.

 

MR SPEAKER

Mersi Minis.  Kestyon No.3.  Onorab Wavel Woodcock.

 

HON WAVEL WOODCOCK

Mersi Mr Speaker.   Eski Minis i kapab donn Lasanble en lesplikasyon kler lo deplasman bann pasyan dan ka emergency lo Praslin ek La Digue tar dan lannwit?   Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  E mersi Onorab.  Nou laranzman ki nou fer pou transfer pasyan o pli vit posib pou sorti lo Praslin ek La Digue, se ki nou transfer zot atraver en charter avek Air Seychelles.  E sa i kouver bann peryod ant 6er bomaten ziska 12minwi e si zot sorti La Digue nou met zot lo helicopter pou transfer zot direk Mahe dan serten ka, oubyen nou anvoy zot dan bato sorti La Digue pou vin Praslin e answit si zot kapab pran avyon.

Oparavan nou ti annan sa defi otour sa peryod 12minwi ziska 5er bomaten ki Air Seychelles pa pe kapab servi pou bann rezon pilot, me nou’n adrese sa problenm atraver en laranzman ki nou pe fer avek SPDF.  E depi nou annan sa laranzman nou fer 2 transfer dan sa peryod tar dan lannwit bomaten sa i enkli pou bann dimoun La Digue si sa sirkonstans i vini nou transfer zot par bato ziska Praslin e apre zot kapab ganny transfer ziska Mahe.

An se ki konsern bann evakyasyon ki ganny fer anver bann charter bann avyon Air Seychelles sorti oubyen an se ki konsern helicopter an 2018 nou’n fer 67 ka pou Praslin pou La Digue nou’n fer 29 an 2019 ziska prezan nou’n fer 29 pou Praslin e 7 pou La Digue.  Mersi Mr Speaker e mersi Onorab.

 

MR SPEAKER

Mersi Minis.  Onorab Woodcock.

 

HON WAVEL WOODCOCK

Minis in arive dan lepase kot Minister in tarde fer peyman avek Air Seychelles e kot Air Seychelles ti refize pran bann pasyan.  Mon’n aprann poudir sa issue i ganny rezourd.  Me still i annan konsern parmi bann pasyan lo Praslin e bann fanmir, kot a plizyer repriz i annan bann pasyan ki bann kondisyon ase serye, parey mon’n mansyonnen boner latak laservel ouswa bann aksidan lote kot zot in bezwen esper ziska granmaten pou zot ganny flight pou al Mahe avek Air Seychelles.

E dan plizyer ka i annan dimoun ki’n perdi lavi, ouswa zot ka in agrave.   Mwan mon kestyon ki mon anvi demann Minis akoz la ou pe depan lo Air Seychelles ouswa lo SPDF pou ede, eski ou Minister i kapab met an plas en servis medivac ouswa – I don’t know dan bann pei plizyer pei etranze i fer annan en ambulance ouswa avyon oubyen helicopter, pou deservi bann zabitan Zil Pros.  E menm bann lezot zabitan Outer Island an ka i annan emergency i arive.  Mon krwar sa i en direksyon ki nou  merit bouze?  Mersi Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  E mersi Onorab.  An se ki konsern bann evakyasyon oubyen bann ka sever, premye keksoz ki nou bezwen realize, se dan nenport ki sirkonstans kot i annan en trauma oubyen  i annan en irzans, premye priyorite se pou stabiliz sa pasyan.

E letan nou fer nou formasyon avek tou nou bann travayer lasante, sa i labaz zot formasyon pou zot kapab stabiliz pasyan avan ki ganny transfer.  Savedir menm parey en pasyan par egzanp i ganny mete lo Air Seychelles sa pasyan i ganny stabilize dan sant lasante par egzanp Baie Ste Anne.

E sa stabilizasyon i vedir ou konfyan poudir ler ou pou anvoy sa pasyan, sa pasyan pandan sa traze nenport keksoz ki arive sa pasyan i ase stab pou li fer sa tranzit.  Nou’n ranforsi sa formasyon sa lannen kot nou fer formasyon ki apel Basic Life Support (BLS) e Advance Basic Life Support (ABLS) e sa formasyon pe ganny fer konman standar e i en standar enternasyonal, ki ganny sertifye ;- par egzanp American Heart Association e lezot bann lorganizasyon enternasyonal.

E sa i vedir bann dimoun ki pas dan sa formasyon nou annan dan en pti pe tou nou bann sant lasante, ki  zot sertifye ki zot kapab met en dimoun dan en kondisyon ki en dimoun apre i kapab ganny transfer dan kondisyon ki i stab.  E sa formasyon ki nou’n fer an 2019 i osi en formasyon  pou performater;- savedir bann dokter ek bann profesyonnel lasante, ki’n ganny formen pou osi kontinyen form bann lezot profesyonnel dan nou bann sant lasante.

An se ki konsern alor sa bann transfer, dan tou lensidan ki ganny raporte avek mwan, mon pa’n war ziska prezan en ka spesifik, kot sa lensidan in okazyonn lanmor sa pasyan.  I annan ka kot i annan retar – mon dakor.  I annan ka kot i pa ideal, me an se ki konsern sa lanmor sa pasyan li menm, i en kestyon otour eski ou’n kapab stabiliz sa pasyan byen ou non.

E si sa pasyan ler i ti ariv dan ou sant lasante i ti deza dan en staz avanse, i pa neseserman akoz tou sa bann keksoz de-baz ki ou pou fer ou pou bezwen fer li a sa pwen.

An se ki konsern en  servis potansyel pou medivac,  i annan konversasyon par egzanp ek SPDF avek IDC ki zot regard sa konman en opsyon.  E enn bann keksoz ki nou’n diskit avek Gouvernman Lenn par egzanp avek bann lezot partner konman en opsyon a lavenir, ki nou kapab regarde.

Lenportans: Premye lenportans byensir se formasyon, e nou’n form dimoun.  Alor nou annan dimoun konpetan pou asire.  Alor menm si nou pe servi avyon Air Seychelles nou bann travayer lasante ki akonpanny sa bann dimoun ganny formen pou kapab mentenir sa dimoun dan en bon kondisyon maksimonm ki posib.  Mersi Mr Speaker e mersi Onorab.

 

MR SPEAKER

Mersi Minis.  Onorab Noline Sophola.

 

HON NOLINE SOPHOLA

Mersi Mr Speaker.  Bonzour Mr Speaker.  Bonzour Minis avek ou lekip e tou dimoun a lekout.  Minis i vre ki ou’n eksplik en pe ki mannyer pasyan La Digue i ganny deplase pou al Mahe, me selman ou konnen ki vreman sa i en gran konsern sirtou dan lannwit.  Minis kot lopital li menm i sanble mwan i annan konfizyon.  Sa mon pe dir lazournen si pasyan pou al pran helicopter pou Mahe, i annan en konfizyon total la.  E apre sirtou si sa pasyan i bezwen deplase aswar ;- par egzanp eski i annan en protokol an plas ; i annan en bato atase avek lopital pou tir sa pasyan pou vin lo Praslin?

E ler i ariv Praslin Amitie pou pran helicopter whatever aswar e ler i ariv Mahe osi?  Sey eksplik nou protokol ki annan an plas?  Mersi.

 

MR SPEAKER

Mersi Onorab.   Minis.

 

MINISTER JEAN-PAUL ADAM

Mersi Mr Speaker.  E mersi Onorab.  Nou annan bann laranzman charter avek plis ki enn konpannyen ki fer transfer par bato sorti La Digue pou vin Praslin pou bann ka emergency.   E Onorab petet ou’n mansyonnen lefe ki i annan konfizyon, mon pou demann bann servis apropriye dan lopital pou re travay avek sant lasante La Digue, pou nou kapab ki mannyer nou kapab adres sa.   Me protokol i la si i annan en mank klarite otour sa protokol, nou ava fer sir ki sa i ranforsi atraver formasyon.

E letan sa transfer i ganny fer sorti La Digue pou al Praslin, akoz nou pe koz dan en sirkonstans aswar me  alor sa pasyan i apre pran sa avyon pou vin Mahe.  E dan en ka lazournen si sa ka akoz i annan diferan ka irzan – si sa ka i en ka irzan ki i bezwen ganny evakye pli vit posib nou fer li par helicopter sorti La Digue.  Si i en ka i irzan me sa dimoun i en pe pli stab, nou kapab fer li atraver Praslin tou fason.  Sa protokol i deza kler.  Me parey ou’n fer mansyonnen ki i pa ase kler dan pou bann travayer lasante.   Nou ava fer en travay ki entansif pou nou sansibiliz zot lo bann lapros pou pran e pou adres bann diferan senaryo posib ki leve.  Mersi bokou Mr Speaker e mersi Onorab.

 

MR SPEAKER

Mersi Minis.  Onorab mon konnen mon’n fer ou siny.   Non prezan mon realize poudir personn lo kote apard Leader Lopozisyon.  Mon ava donn ou laparol pou kestyon siplemanter.

 

HON CLIVE ROUCOU

Mersi Mr Speaker.  Bonzour Minis ek panel.  Mr Speaker Minis in fer referans avek servis helicopter.  Mon anvi demann Minis oubyen konfirm ek sa Lasanble, ki servis helicopter i 24 lo 24 me i zis  pandan lazournen me pa dan lannwit?  E Minis in fer referans avek stabiliz pasyan osi, mon pe demann Minis ki i pe fer pou ranforsi Departman Emergency lo La Digue?

Menm si in koz stabiliz en pasyan, depandan lo kondisyon, mon pe demann Minis e Minis i kapab fer nou kler, ki si i vre ki tou bann pasyan depan lo zot ka emergency i kapab ganny stabilize lo zil La Digue, avan i ganny transfer lo Mahe pandan en peryod 24erdtan?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  E mersi Onorab.  An se ki konsern formasyon ki nou fer pou tou nou bann travayer lasante, a labaz en pasyan i devret kapab ganny stabilize.  Avek sa formasyon avanse lo Advance Life Support, sa pou ankor ranforsi sa konpetans e nou pou fer sir osi ki i annan dimoun lo La Digue ki ganny sa formasyon ki permet ase stabiliz pasyan.

An sa ki konsern transfer par helicopter aswar, parey mon deza dir pou le moman Lotorite Lavyasyon Sivil pa permet ki helicopter i ganny servi aswar.  E parey mon’n eksplike letan mon reponn premye parti kestyon avek Onorab Woodcock, mon’n eksplike ki dan bann ka parey nou servi bato pou al ziska Praslin e apre kot nou servi charter SPDF pou nou kapab transfer pasyan pou vin Mahe.

Mon oule osi  zis fer sorti ki zisteman pou dan sa kad formasyon e se ki pasyan i kapab ganny zot stabilize lo La Digue, Dr Henriette i ti fer mwan mazinen ki annefe avek nou partenarya avek La Reunion nou ti fer formasyon spesifik pou serten bann travayer La Digue avek sipor La Reunion mwan pase.  Alor sa in ganny anforse e nou pe kontinyen anforsi li atraver formasyon.  Mersi Mr Speaker e mersi Onorab.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker mon anvi demann Minis, dan ka sa bann deplasman ki i lo La Digue ki i lo Praslin kot dokter i war ki poudir en pasyan i bezwen ariv Mahe, lekel ki pran sa desizyon final pou donn sa go ahead pou fer li?  Akoz la mon dakor avek sa ki Onorab Sophola in dir sa ki ou pe dir Minis avek sa ki arive an realite i souvandfwa diferan.  Dokter La Digue u war ki poudir pasyan i bezwen deplase emergency.  Mahe i dir anvoy pasyan Praslin.  E i annan bann lenstans kot fanmir li menm li i pran en charter helicopter i al direk Mahe letan i ariv Mahe deswit parfwa i al direk dan ICU ansipanpan.

Alors mon anvi ganny sa byen kler e dan sa ka letan fanmir pasyan zot ki bezwen pran sa linisyativ, charter en helicopter oubyen charter en avyon nenport ki mwayen, kote eski Minister Lasante i antre pou ranbours sa dimoun espesyalman, letan  in dekouver poudir vreman ti en emergency e ki si sa dimoun ti’n pran bato sorti La Digue pou ariv Praslin probableman Ile Ronde i ti’n mor.  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  E mersi Onorab.  Desizyon lo transfer sorti nenport ki landrwa menm lo Mahe oubyen nenport ki landrwa, se akoz si in ariv dan en sant lasante, sa dokter ki pe war li i annan en responsabilite premyerman pou fer en evalyasyon kondisyon sa dimoun.  E apre baze lo evalyasyon sa dimoun, i pou refer sa avek konsiltan  dan lopital depandan lo sa kondisyon – si i en problenm kardyak par egzanp eksetera, epi desizyon i ganny fer ant sa de profesyonnel.

I annan sirkonstans kot swa lo kote sa dokter ki ti pe fer sa evakyasyon, si i pa’n byen eksplik sirkonstans ki i ladan, me sa dokter i annan bokou pouvwar li.  Si i santi poudir vreman sa pasyan i dan en kondisyon vreman kritik, i son responsabilite pou li konvenk sa konsiltan, akoz sa pasyan i bezwen anvoye e sa i baze lo son assessment ki i fer dan en fason sa ki nou apel en clinical assessment lo sa pasyan ki i pe war.

Sa ka ki ou pe koz lo la, i en – well  mwan mon konn en ka ki’n ganny met devan mwan ki Lazans Swen Lasante pe fer en revi lo sa sityasyon pou war, si ti annan en mankman vizavi sa profesyonnel lasante, vizavi avek sa referans ki ganny fer avek Lopital Sesel.  E byensir si sa dimoun i annan en problenm ki ti ganny war ki ti reel parey in dir petet in bezwen ganny met ICU, definitivman Lazans Swen Lasante i bezwen pran son responsabilite, pou li adres konsern sa dimoun atraver en ranboursman.

Me i enportan pou note ki desizyon ki konstitye en irzans ki transfer en pasyan, i bezwen reste en responsabilite bann dokter, en profesyonnel lasante ki annan sa konpetans pou fer sa kalite desizyon.  Mersi Mr Speaker e mersi Onorab.

 

MR SPEAKER

Mersi Minis.  Bon mon pe donn laparol Onorab Sébastien Pillay akoz Leader Government Business in pas sa privilez pou li kapab demann en kestyon lo lapar Leader Zafer Gouvernman, ki in fer mwan konpran ki son lasante pa tro bon ozordi bomaten.  Onorab Pillay.

 

HON SEBASTIEN PILLAY

Mersi bokou Mr Speaker.   Mr Speaker de pti kestyon e presizyon ki mon ti a kontan gannyen from Minis.  Minister Lasante in ganny sans teste sa sistenm – mon krwar ler i ti annan sa aksidan bis Praslin.  E mon krwar zot in bezwen aprann serten desizyon ek defayans.  Ki bann leson ki zot in aprann avek sa lensidan ki ti arive ler ti annan sa aksidan bis lo Praslin ki zot ti bezwen transport en kantite pasyan lo Mahe?

E baze lo sa, prenan kont ki sa size i kontinyen remonte, eski i pa vin en baz priyoriter ki SCAA pa kapab zis dir avek Minister Lasante ki ou pa kapab anvoy en helicopter?  SCAA i parti prenan i en partner dan sa zafer.  So ki diskisyon ki nou annan tou bann partners pou war, ki solisyon ki zot kapab provide, swa atraver koz ek bann Bailleur  de Fond pou bann ambulance ki a baze avek Coast Guard e sa i ava provide sa servis.

E  davantaz prezan, ler sa helicopter  par egzanp i sorti Praslin i bezwen al apoz lo erport dan lamazorite  unless i ganny en dispansasyon spesyal.  Eski i dan plan Minister Lasante pou fer en helipad dan kot lopital?  Akoz si sa pasyan in ariv apre midi kot Erport i pri dan trafik sa kantite letan ki i pe pase dan trafik i kapab koz son lavi.  So mon pa en dokter, mon pa en eksper, me eski i annan posibilite pou nou war bann dispansasyon ki ganny donnen poudir sa helicopter i kapab apoz direk.   Konmsi pou nou regard sa sistenm from ler sa dimoun i ganny pran sarz pou mont lo sa avyon ouswa sa helicopter, ziska kot i ariv sa landrwa kot i pou ganny sa servis, nou’n fer tou posib pou asire tou sa ki nou kapab fer pou sov son lavi in ganny fer.  Mersi Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  E mersi Onorab.  Mon krwar Onorab in fer en pwen vreman pertinan ;- par egzanp letan in koz lo sa aksidan bis, i en legzanp kot letan nou regard bann sityasyon koumsa, i pa neseserman ki i parfe, me nou kapab montre poudir ki tou bann pasyan in kapab ganny stabilize, in ganny en swen imedya ki ti apropriye.

I annan enn de keksoz ki petet i ti kapab ganny amelyore, me an gro bann pasyan ti ganny idantifye, i ti kapab ganny sa latansyon dan sa bann moman ki apropriye baze lo nou sistenm.  E pou nou fer kler ki protokol pou transfer pasyan i egziste e i la pou gid sa bann profesyonnel lasante e i toultan baze lo sa desizyon sa bann travayer lasante sa e desizyon lo irzans sirtou i en desizyon ki avek dokter pou zot kapab fer transfer sa pasyan.

An se ki konsern konversasyon avek Lotorite Lavyasyon Sivil ;- nou’n annan en konversasyon avek zot otour sa size depi oparavan.  I annan bann rezon sekirite ki zot in site, me an se ki konsern bann helipad i annan bann plan ki nou met an plas.  E mon ava rapel Onorab Churchill Gill ti’n demann en kestyon oparavan mon krwar lannen pase lo sa size.

E dan an se ki konsern nou Lopital Viktoria i annan en revizyon dan nou plan redevlopman pou annan en helipad enkorpore dan sa batiman.  E nou pou letan nou pou travay lo plan rekonfigerasyon Baie Ste Anne, nou pou osi war opsyon pou annan en helipad dan sa bann landrwa.  E sa i byensir i annan serten kontrent ki SCAA in met devan.  Sa landrwa kot lopital Baie Ste Anne i été par egzanp i en landrwa ase difisil, me i en konversasyon ki nou pou kontinyen avek zot, pou nou kapab fer sir ki nou ganny en landrwa ki apropriye pou sa.  Mersi Mr Speaker e mersi Onorab.

 

MR SPEAKER

Mersi Minis.  Onorab Woodcock.

 

HON WAVEL WOODCOCK

Brefman Mr Speaker.  Zis mont i anvi met dan latansyon Minis, akoz sa i en konsern ase pertinan.  Minis nou annan en issue Praslin aktyel la kot plizyer bann teknisyen pe refize mont Praslin pou operate sorti Mahe pou operate bann masin,  me selman mon oule met sa dan ou latansyon akoz i annan plizyer letan la x-ray pa pe marse akoz bann teknisyen pe refize mont Praslin.  Si ou kapab get ladan silvouple pou masin x-ray.  Mersi.

 

MR SPEAKER

Bon mon krwar Minis in pran ou konsern.  Nou ava bouz lo kestyon No. 4.  Onorab Egbert Aglae.

 

HON EGBERT AGLAE

Mersi Mr Speaker.  Bonzour Minis avek ou delegasyon.  Mr Speaker mon ti notifye ou lofis pou en minor amendments avek mon kestyon ki lir konm swivan:

An vi konsern avek bann konplikasyon diformite e retar dan devlopman prouve dan e apre lansentman, ki kalite konpanny sansibilizasyon ou Minister pe fer ?

Ki bann mezir deteksyon pli boner e ki mezir swivi ki zot pe al entansifye atraver Minister?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  E mersi Onorab.  Sa kestyon mon krwar i tre pertinan a sa moman.  Akoz deplizanpli dan nou pei nou pe fer fas avek bann defi otour zesyon bann lansentman bann madanm pou plizyer rezon.  I annan lenpak lo nou sosyete.  Nou pe ganny bann problenm mal formasyon e osi diformasyon, e sa i diformite plito e sa bann keksoz ki asosye me i diferan.  Mal formasyon i sirtou ban problenm zenetik, ki nou annan dan nou sosyete.  E bann diformite i osi bann sityasyon ki nou fer fas avek, me ki souvan koze par bann fakter ekstern – bann fakter par egzanp si sa manman pe dan en lavi sibstans oubyen bann lezot konplemant problenm.

Alors sa bann eleman zenetik, me osi fakter ekstern, i osi i annan en lenpak.  Bann travay entans ki ganny fer se sirtou otour sa prosesis ante natal clinic e bann servis ki ganny ofer dan bann diferan distrik, zisteman pou bann madanm ansent pou zot kapab konsilte e pou kapab alor donn zot sa sipor o maksimonm.

Sesel nou annan en sistenm antenatal ki vreman avanse.  Nou annan mon ti a i pa zis  mwan ki dir – WHO i dir nou annan meyer sistenm dan Lafrik.  E menm nou annan en sistenm ki perform pli byen ki bokou bann pei devlope.  Sa sistenm i prevwar omwen 12 konsiltasyon, par egzanp pou en madanm ansent.  Serten bann defayans ki nou’n war letan nou pe etidye se ki bokou bann madanm ansent pe touzour vin konsilte tro tar.

Si mon pou regard bann statistik ki nou annan, nou lideal se ki en manman i kapab son en profesyonnel lasante pou diskit son lansentman pli boner posib.  E  sa ki nou pe war se bann ki vin kot antenatal clinic avan 14 semenn lansentman – savedir 3mwan i zis pou 2018 i zis 61poursan.

Sa i vedir ki nou bezwen fer bokou zefor pou fer bann manman konsyan lenportans pou vin boner pou zot konsilte pou zot lansentman.  Si en dimoun in ansent pou 3mwan e i pa pe vin devan, i en konsern.  Nou bezwen dir tou dimoun dan nou sosyete ki de ki ou konnen ki ou ansent, de ki menm ou panse ou ansent ou bezwen vin fer en konsiltasyon.

Savedir de ki ou’n mank ou peryod ou bezwen konsidere ki mon bezwen al fer en tes e ki mon bezwen konsilte avek servis apropriye avek sant lasante.  Pli sa konsiltasyon i ganny fer boner, pli i pou permet sa dimoun ganny konsey apropriye pou li kapab ganny sa tretman oubyen sa sipor neseser pou fer sir ki son lansentman i al aven mwens konplikasyon.

Sa ki nou pe war se nou pe ganny bokou pti baba ki pe ne prematir, e sa i asosye avek bokou nou bann defi otour stil lavi ki nou annan dan nou pei. Risk pre matirite i ogmante letan i annan tansyon pandan lansentman ;- dan bann fakter parey lobesite oubyen en dimoun letan i annan Gestational  Diabetes oubyen i annan en manrmay i annan dyabet.

Alor  e tou sa bann eleman i bann fakter ki nou pe war deplizanpli dan nou popilasyon.   Letan nou regard sa nou bann statistik otour konsiltasyon, nou war malgre ki dimoun i vin en pe tar pou zot konsiltasyon, nou war ki laplipar i vin omwen 1fwa pou zot konsiltasyon e sa nou coverage parey  nou dir  an Angle i 99poursan.

Alors sa i en keksoz pozitiv, me pou nou kapab vreman amelyor bann rezilta fodre ki bann manman pe vin o maksimonm sa 12 konsiltasyon ki nou ofer pandan lansentman.  Nou annan bann ka kot malerezman, kot dimoun pa vin ditou konsilte, e zot vin kot lopital zis letan moman pou zot ganny zot zanfan.  E sa i vreman regretab.  E se sa bann ka ki vreman kontribye anver bann rezilta vizavi bann pti baba ki ne avek bann konplikasyon.

Ziska prezan an 2019 nou annan 22 anomali mazer.  I annan en pe plis ki sa, me nou annan 22 nesans avek bann anomali mazer ki nou’n gannyen depi Zanvye ziska Septanm 2019.  Serten sa bann anomali i lye avek bann kestyon zenetik.  Si nou pran par egzanp lamazorite sa bann ka i bann problenm kardyolozi bann problenm leker souvandfwa sa i lye avek bann fakter zenetik me nou annan osi bokou lezot kondisyon ki osi lye a bann fakter stil lavi e ki kapab ganny evite.  Me parmi sa 22 anomali nou annan vreman en varyete kondisyon ki larz e ki demontre bann defi ki nou annan dan nou popilasyon.

Parmi bann mezir ki nou pe pran pou nou adres bann size ki en size priyoriter nou ava note ki to mortalite bann nouvo ne an 2018 ti tre konsernan nou ti annan en sif 18 pou sak mil nesans ;- 18 lanmor pou sak mil nesans, alor sa i enkyetan.  Sirtou an 2017 nou ti ganny en rezilta ki vreman ankourazan akoz an 2017 nou ti ariv dan en rezilta 10.9 ki 2enm pli bon rezilta ki nou deza annan ki ler nou annan rikord.

An 2019 ziska prezan pou le moman nou to i lo 11.2 ki byensir i pli ba ki 2018.  Me lannen pa ankor fini.  E nou kapab konsernen ki malgre ki nou fer serten amelyorasyon ki sa bann defi i touzour la, e stratezi kle se pou fer bann manman konsilte pli boner akoz i permet en swivi pli byen sa bann pasyan.

Bann stratezi pou kapab amelyor sa sirkonstans, nou pe fer en revi konplet dan nou progranm lasante reprodiktif maternel e osi kot i konsern lasante bann zanfan.  E sa i en travay entans ki pe ganny fer.  Nou annan en stratezi en proze stratezi ki nou pe konmans enplimante, e otour sa i lakle se ranforsi bann konsiltasyon ki ganny fer dan bann sant lasante pou ofer bann manman en meyer opsyon vizavi tretman;- par egzanp bann kondisyon ki annan parey bann kondisyon parey tansyon i en bann lezot risk e i idantifye bann risk pli boner dan zot lansentman.

Nou pe osi fer osi fer plis sansibilizasyon atraver nou bann klinik e nou bann sant lasante rezyonal.  Nou pe osi travay avek Minister Ledikasyon vizavi lansennyman lasante reprodiktiv e seksyel dan bann lekol, akoz sa i lakle pou en dimoun konpran depi en zenn laz sa responsabilite ki i annan vizavi son lasante letan i pou fer en zanfan.

Problenm drog i enn ki sever e ki annan en gran lenpak lo mortalite anfantil.  E nou pe konmans sa proze avek sipor APDAR ki bann manman par egzanp ki teste pozitiv pou labi sibstans ki zot ganny en swivi pli aprofondi.  E sa nou pe fer li an partenarya avek APDAR e sa ki nou realize letan nou fer sa letid avan ki nou al dan direksyon ler nou fer sa proze se ki bokou sa bann manman pa ankor par egzanp vin kot sant lasante pou fer konsiltasyon.  Me parkont zot in fini ganny kapte kot APDAR anba progranm Harm Reduction.  E sa i vedir ki nou annan sa loportinite pou nou travay avek sa manman parey dan sa sirkonstans.

Bann lezot stratezi ki nou pou servi anliny ek sa, se osi regard bann lezot group vilnerab e lafason ki nou kapab tous zot menm dan zot landrwa reste bann landrwa ki an deor bann sant lasante akoz enn bann problenm sa dimoun pa pe vin devan kot sant lasante.

Lot defi ki nou annan se e sa i difisil pou nou annan statistik presi, me nou annan en kantite bann ka pert e bann ka aborsyon.  Dan term medikal aborsyon i vedir nenport ki lansentman ki pa ariv a son term e bokou sa bann ka malerezman i difisil pou prouve,  me nou estimen ki i annan lenterferans avan ki sa prosesis i terminen.

E sa parfwa osi i pa marse.  Me sa i annan en lenpak osi lo lasante sa zanfan letan i ne e kontribye osi anver kondisyon bann zanfan e bann diformite ki pe war.  Mersi Mr Speaker e mersi Onorab pou donn nou lokazyon pou koz lo sa size ki vreman enportan pou pei.  Mersi.

 

MR SPEAKER

Mersi Minis.  Onorab Aglae.

 

HON EGBERT AGLAE

Minis mersi pou ou larepons byen detaye.  Minis dan ou larepons ki ou’n donnen ou fer resorti ki 99poursan ou satisfe ki bann madanm pe fer zot konsiltasyon.  Minis mon konsern i sa 1poursan li menm li.  Nou konnen ki i annan bokou keksoz ki fer avek lifestyle, sirtou bann labi sibstans ki egziste ozordi.

Minis eski ou kapab dir nou petet ki mezir adisyonnel ki zot pe mazin  pran, pou zot kapab reach out avek sa 1poursan li menm li ki i pa pe vini.  Sirtou nou konnen atraver sa community nursing ki nou fer dan lakominote, eski zot entansifye en pe plis zefor pou al ver sa bann ki pe sey negliz en konsiltasyon e pe met lavi zot baba a risk?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  Dan bann diferan sant lasante atraver sa progranm revi ki nou pe fer lo reproductive maternal and child health, nou pe war bann stratezi zisteman pou nou kapab adres sa.  E bann kestyon sak distrik parfwa i annan son diferan partikilarite, me bann stratezi otour sa se travay pros avek bann lekol akoz sa difikilte i bann problenm pou- ;- par egzanp bann manman ki pa vin devan souvan, i asosye avek en avek bann zanfan souvan ki konmans aktivite seksyel vreman a en laz vreman boner.  E sa i asosye osi avek akse avek bann kontrasepsyon.  Pou bann zenn zanfan ki souvan en defi zot pa vin par egzanp kot sant lasante, zot per poudir zot paran pou konnen.  Me lenpak ki nou pe war partou dan nou sosyete akoz bokou sa bann ki konmans aktivite seksyel tre boner, souvandfwa zot annan en lansentman boner e souvandfwa osi zot vin devan tar.

E souvan alor zot annan konplikasyon ki asosye avek zot lansentman.  Alor bann sratezi i otour travay pros avek bann lekol. Alor  sa i en fason pou nou ganny dimoun boner.  I osi enportan pou travay avek bann servis sosyal.  E  enn bann stratezi osi se pou travay pros avek bann social worker e osi avek administrasyon distrik.  Akoz bokou fwa sa problenm i arive dan bann fanmir ki annan bokou lezot problenm sosyal.

I annan sityasyon osi kot i asosye avek labi dan bann labi seksyel ;- bann vyolans ki ganny komet dan bann koup sa ki nou apel parfwa gender based violence.  E tousala i anmenn ver en sityasyon kot nou annan bann popilasyon a risk ki nou bezwen adres pli byen.

E sa proze ki nou pe fer avek APDAR  i  asosye  osi avek sa bi pou nou kapab entervenir avek bann popilasyon a risk, ki petet pa pe vin devan dan bann sant lasante.  Mersi Mr Speaker e mersi Onorab.

 

MR SPEAKER

Mersi Minis.  Bon mon annan Onorab Loizeau, Onorab Ramkalawan, Onorab Ernesta avek Onorab Pillay, mon ti a zis demann zot pou hold your thoughts nou pou break e retournen 11er pou nou kontinyen avek kestyon pou Minis e sirtou lo sa bann siplemanter lo kestyon No. 4. 

Avan nou break mon ti a zis enform Caucus  Madanm ki zot pe meet dan Speaker’s Conference Room 1er e ABC nou pou annan nou en short miting osi dan Speaker’s Conference Room 12.30 ok pou pa clash avek FPAC.  Bon nou ava break e nou ava retournen 11er.

 

 

(BREAK)

 

 

MR SPEAKER

Bon nou ava kontinyen avek nou travay.  Mon ava donn laparol Onorab Norbert Loizeau.  Onorab.

 

HON NORBERT LOIZEAU

Mersi Mr Speaker.  Bonzour Minis avek ou delegasyon.  Mr Speaker mon anvi demann Minis sa kestyon, vi ki Lendi mon’n zwenn en madanm i en pe depress apre ki in aprann konplikasyon ki son fiy pe gannyen pandan lansentman.  Mon kestyon  i koumsa Minis sirtou mon kestyon i vize sirtou pou bann zenn manman, bann ki fer premye fwa i  tonm ansent pe al donn nesans baba.  Ler zot dekouver ki i annan serten konplikasyon ek sa zenn manman oubyen serten diformite avek sa zanfan, konmsi ki fason ki i ganny dir avek sa manman – sa zenn manman?  E ki zot dir li dan son figir apre ki in fini pas dan masin fer son tes, ouswa i annan en fason counselling en process ki pas ladan, sirtou si son lansentman i boner dan 3mwan 4mwan – ki fason ki zot dir li sa lenformasyon?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  E mersi Onorab.  Pou letan en diformite oubyen ler en problenm en mal formasyon i ganny dekouver ;- par egzanp ler i pas dan par egzanp dan ultrasound, i rol sa dokter byensir a sa moman pou li koz  avek sa pasyan e eksplik li.  I annan gidans ki ganny donnen avek dokter, lo lafason ki zot fer, me definitivman i pa en fason ki fasil pou fer.   E o maksimonm sa ki nou espekte pou sa pasyan, i napa en fason ki poudir sa dimoun pa pou ganny afekte.  Akoz tou fason i en nouvel ki difisil pou abzorbe.

Me lakle pou fer sir ki sa dimoun osi i ganny sa sans pou fer pou li kapab demann kestyon, pou li regard opsyon, si i neseser pou li war en lot spesyalis.  Si i neseser pou li war psikolog pou li ganny sa sipor ki i neseser pou li adres sa sityasyon.  Mersi Mr Speaker e mersi Onorab.

 

MR SPEAKER

Mersi Minis.  Onorab Paul Ernesta.

 

HON PAUL ERNESTA

Mersi Mr Speaker.  Mr Speaker, Minis ek ou delegasyon tou bann koleg Onorab e tou dimoun a lekout.  Mr Speaker mon kestyon pou Minis i konm tel ;- nou konnen in mansyonn i annan de fason ki bann zanfan i ne avek anomali – in koz fason viv osi zenetik, me osi i annan bann paran bann manman, si oule ki annan bann maladi kronik parey dyabet ensidswit, ki bann protokol ki zot annan pou zot fer sir ki sa bann akoz zot pe servi parey bann latizann parey petet kapab anpes zot lansentman ouswa anmenn serten konplikasyon ki zot protokol ki zot servi?  E  si zanmen zot annan en statistik dan rikord konbyen zanfan ki’n ne dan sa dan serten sirkonstans valab?  Thank you.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  E mersi Onorab.  Annefe letan en dimoun i annan en maladi kronik parey dyabet, i vre ki sa i ogmant risk en kantite, vizavi lansentman.  mM en dimoun ki i dyabetik avan ki letan i ansent, premyerman i bezwen fer sir ki tou dimoun ki pe donn li son tretman i okouran an zeneral tes i ganny fer me i enportan ki sa i ganny fer.

Letan sa lansentman i ganny dekouver, normalman se sa manman pou ganny en briefing lo bann keksoz ki i kapab e merit fer.  En lansentman menm en dimoun ki annan dyabet i posib fodre nou pa kre risk ki pli o me i pa vedir ki otomatikman i annan problenm. E sirtou si en dimoun i swiv tou son gidans par bann profesyonnel medikal, i pou kapab annan en rezilta ki pou konvenab e ki pou annan en bon rezilta.

Sa ki enportan se pou rekonnet ki pandan ou lansentman ou lekor i sanze. E alor lafason ki ou pou kontrol ou dyabet osi i riske sanze.  Akoz ou lekor pa pou dizer menm parey e ou pe dizer plis parfwa ou pe ganny sa balans e alor ou pou nesesit plis kontrol plis verifikasyon disik dan disan.  E pou enportan  annan en plan pou ou fer sir ki pandan ou lansentman disik i reste kontrole, tansyon i reste kontrole, eksetera.  Alor lakle se pou konn sa boner.  Parey mon’n site zis 61poursan dimoun ki’n fer konsiltasyon dan premye 14semenn.  E parmi sa ki pa’n fer konsiltasyon i enkli bann ki annan dyabet.  E si pandan sa premye parti lansentman ;- par egzanp disik pa’n kontrole tansyon pa’n kontrole i kre plis risk.

Alor lenportans  se pou vin se pou konsilte boner e pou annan en plan pou kapab asire ki sa sityasyon pa vin pli grav.  I annan osi bann sirkonstans kot en manman i kapab devlop dyabet pandan lansentman.  Savedir i pa ti konnen i annan dyabet avan, e pandan lansentman avek sanzman dan lekor, i devlop dyabet e sa osi i anmenn son risk ki i vin avek.   Nou annan serten statistik otour  – par egzanp bann diferan fakter risk, mon pou sey rod en pti pe sa lenformasyon e petet donn en pti pe pli tar.   Ok, mersi Mr Speaker e mersi Onorab.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker prenan kont ki Minis in donn nou en sif 22 anomali, ki mon prezimen i pou sa lannen i pou annan bann lezot sif, mon ti a kontan Minis ki Minister pe fer pou etidye lakoz, oubyen sours sa bann anomali?  Vi ki nou’n koz lo en pwennvi zenetik i annan ki asosye avek Down Syndrome so eski Minister Lasante in fer okenn letid pou war si i annan okenn konotasyon zenetik, oubyen okenn konotasyon istorik dan serten fanmir oubyen dan popilasyon, ki fer ki annan serten baba ki ne avek sa bann defect, pou ki nou kapab prevwar oubyen bann prizansarz en pe pli byen avek sa bann zanfan ki ne avek sa bann kondisyon?

E dezyenmman prenan kont osi ki i annan manman ki pou bann – serten manman ki pou al donn nesans i pou annan osi ki pe involve dan labi sibstans ;- swa lalkol swa lo eroin, eski Minister pe travay avek lezot Lazans ;- par egzanp APDAR mon konnen  sa lentansyon pou annan sa mandatory drug testing,  eski sa i en keksoz ki Minister pe met lanfaz lo la, ki i a kapab annan tes ki ava fer ki ava kapab donn bann deteksyon lo  kondisyon sa manman, avan ki i donn nesans, e sa i ava en form lo ki mannyer nou pou kapab deal avek sa zanfan?

Zis pou presize Mr Speaker, bokou zanfan ki ne avek bann manman ki annan listwar labi sibstans, zot devlop zot annan gran potansyel pou devlop ADHD oubyen Attention Deficient Disorder oubyen Apprentiship Disorder ki fer ki fer zot pa kapab fonksyonnen dan laklas oubyen dan en fason striktire an se ki konsern ledikasyon.

So ki Minister pe fer pou tackle sa sityasyon e ki bann resers pe montre zot pou ki nou annan en sistenm priansarz e ki ava deal avek sa bann problenm?  Mersi Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  E mersi Onorab.  Parey nou dir i annan pou reponn kestyon Onorab i annan nou pe fer serten travay pou nou etidye sa bann trends.  I annan keksoz ki kler – i annan keksoz ki nesesit plis aprofondisman an term resers. Letan mon sit par egzanp bann anomali zis sa lannen i annan 22.  Zot kapab war son lanpler.  Ok, ziska Septanm nou pe koze.  Nou pa pe koz lannen antye ziska Septanm 22 anomali.  E  bokou sa bann  anomali i bann keksoz zenetik, me lafason ki sa sityasyon zenetik i marse, i pa toultan otomatik.  Pa akoz en paran i annan sa gene ki toultan i annan sa.

Me nou pe war par egzanp avek bann problenm kardyak, nou’n amelyor en kantite nou fason pou nou detekte boner.   E zis dan sa dernyen 2an i annan mon ava petet konfirm sa sif, me i annan apepre 19 pasyan ki nou anvoy deor bann pti baba pou fer loperasyon lo zot leker dan zot premye lannen lavi.  Parey mon’n dir mon bezwen konfirm sa sif ki akoz nou kapab dyagnoz zot boner, e parfwa i baze lo sa ki nou konnen lo zot family history.

Dan serten ka osi nou kapab donn konsey avek paran.  I annan ka ki serten kondisyon par egzanp ki kapab dir e i annan plizyer fwa ki bann dokter in dir avek en paran, akoz ou kondisyon ou zanfan pou annan sa.  E sa i ka dan cystic fibrosis par egzanp kot si ou konnen sa paran i annan sa gene, ou konnen zanfan osi pou ganny afekte i annan ka osi kot nou dir avek sa paran, ou bezwen konnen sa realite ki si ou fer en zanfan ou zanfan pou fer fas avek sa sityasyon.

Alor parmi bokou sa 22 dan sa ki mon site bokou i bann keksoz ki preski inevitab akoz si sa dimoun i anvi fer son zanfan i son swa.  E bokou sa bann keksoz parey bann problenm kardyak, ou fer sa loperasyon e sa dimoun i riske viv en lavi normal.  Nou annan zanfan ki apre ki in fer  sa lentervansyon, i pa ganny okenn problenm e i viv normalman.

I annan en pti poursantaz ki parfwa i devlop konplikasyon me  bokou sa bann problenm kardyak nou kapab korize –  al pli lwen.  I annan   serten sa bann lezot  kondisyon parey  bann ki ase senp  bann diformite dan figir parey  bann cleft palate  sa osi ou kapab koriz li atraver  loperasyon ase fasilman.

I annan bann problenm bann  central nervous system sa i en pti pe pli konplike e souvan i anmenn bann problenm ki sa dimoun pou gannyen pandan tou son lavi.  E parey in dir osi i annan bann ka parey Down Syndrome sa bann dimoun i kapab viv en lavi normal, me selman zot annan serten difikilte ki zot bezwen fer fas avek serten risk ki zot bezwen fer fas avek.

Nou pe fer sa bann alors sa i konsern anomali en pti pe pli zenetik.  I annan bann fakter a risk ki lye avek stil lavi e si nou get par egzanp bann ka lanmor par egzanp en pti baba in mor, swa o moman kot i pe ne oubyen pa tro lontan apre bann neonatal deaths si ou regard sa tou nou bann ka i konsern prematirite – ok.  E prematirite ;- savedir ki sa zanfan i ne avan son ler, e souvan sistenm iminite sa zanfan pa ankor byen ganny devlope.  E bann keksoz parey tansyon dyabet, i bann fakter kle ki afekte prematirite.  Alor nou annan en kantite ka kot bann zanfan ki ne avan-ler bann zanfan ki ne prematir, zot sans pou zot sirviv i diminyen.  E nou annan osi bann ka kot prematir ekstrenm kot vreman i bann ka kot sa zanfan letan in ne i ant lavi e lanmor.

E i annan serten sa bann ka ki tou pei ou pou annan tou fason ou pou annan en pou en rezon zis dan ou statistik, i en kestyon en pti pe lasans me si ou pe kontrol ou tansyon, si ou pe kontrol ou dyabet, si ou pe kontrol  –  en lot problenm se konsonm lalkol pandan lansentman, akoz i annan dimoun ki ankor krwar ki ou kapab bwar en ver menm si ou ansent.

E mon le kler ozordi si ou ansent la  repons se zero.  Pa touse lalkol pandan lansentman.  I annan dimoun pou dir be letan nou paran ti  pri, ti  annan zanfan zot ti pran.  Me fodre nou rapel si mon al dan bann lannen 60 100 zanfan lo sak 1000 ti mor.  10poursan lo lapopilasyon  ki ti   ne, ti mor preski deswit.  Nou bliye sa nou.  Ok nou bliye poudir ki lontan nou rezilta – konmela nou annan defi, me nou rezilta in amelyor en kantite.  Nou annan meyer rezilta dan Lafrik menm si dimoun pa kontan ler mon dir sa serten.  Me i larealite.

E letan ou regard kot nou sorti en kantite bann pratik ki nou pran konman normal, i osi afekte si nou kontinyen fer li fodre nou kler.  Zero lalkol pandan lansentman, akoz lalkol i afekte devlopman sa fetis.  E atraver bann lentervansyon ki nou pe sey fer, nou pe sey premyerman amelyor lenformasyon ki dimoun i annan, pou zot kapab redwir sa bann risk e an konsekans redwir sa nivo prematirite ki afekte en kantite bann rezilta letan en zanfan i ne.

Alor ou annan sa de fakter ou annan sa fakter mal formasyon zenetik, apre ou annan bann fakter ki ou kapab modifye atraver bann bon pratik pandan lansentman.

E si mon pou kit en mesaz lo en keksoz ki pou ed nou tou, se fer sir bann manman i vin pli boner konsilte.  Parey mon dir 60poursan ki pe vin avan 14 semenn, savedir i annan 40poursan ki pe vin nek apre 3mwan lansentman.  Dan sa premye 3mwan lansentman en kantite keksoz i arive.  E i enportan pou zot konsilte li boner pou zot vin devan pli boner.  Mersi Mr Speaker mersi Onorab.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker letan nou dir nou koz laverite nou koz tou laverite !  Si nou pou dir Sesel i premye lo enn dan Lafrik, fodre nou osi azout lot bout ki kapab afekte sa enn ki nou premye.  Minis in dir nou premye dan Lafrik pou serten.  Fantastik! Good! Bat lanmen pet petar tousala, me sa ki nou bezwen osi dir se ki nou premye dan Lafrik pou eroin, e ki ozordi zisteman sa i enn bann pli gro problenm ki nou pe fer fas avek bann heroin babies ki pe konmans ne !

E ki se sa ki pou fer ki sa sif 22 ki nou’n koz lo la konman bann anomali, i pou ogmante !

Alors annou osi dir nou premye dan Lafrik pou sa, lo eroin.  E la kekfwa nou ava kapab balans keksoz.  Eski Minis i kapab dir avek nou, konbyen – dan sa bann sityasyon abnormalite – ki lye avek bann esey lavortman ki pan reisi e ki aprezan fer problenm?

E dezyenmman si Minis i kapab pli spesifik sir avek nou bann heroin babies ziska aprezan – petet pou sa lannen ki kantite bann ka swa pou lannen pase ouswa sa lannen, konbyen dan sa bann abnormalite dan sa bann konplikasyon diformite, i lye direkteman avek bann manman ki’n lo eroin?  Mersi bokou Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  E mersi Onorab.  Mon krwar Mr Speaker letan nou dir nou premye dan Lafrik dan nenport ki keksoz, se pa poudir nou parfe.  Se pa poudir ki tou keksoz i absoliman 100poursan korek.  E mon le fer Leader Lopozisyon mazinen e osi tou dimoun poudir sa problenm eroin en pe letan i avek nou.

Me sa ki enportan se ki i annan en lapros akoz sa problenm e sa problenm i pa zis pou nou.  Si nou regard par egzanp Moris, Moris osi in pas dan menm ben avek nou e se selman resaman dan dernyen 2an/3an pandan e zot in ganny li preski 10an avan nou se selman dernyen detrwa zan ki zot pe konmans war en rediksyon dan zot konsonmasyon.

E an se ki konsern Sesel si ou pe regard par egzanp enn de bann endikater ki nou annan ;- par egzanp kot i konsern bann tretman otour bann dimoun ki pe ganny  afekte avek eroin, nou annan enn de endikater ki’n sorti lo nou rezilta 2018, i montre poudir ki bann progranm harm reduction ki pe fer atraver APDAR, sa i sirtou progranm méthadone pe anmenn bann rezilta pozitif pou nou kapab adres sa bann problenm asosye avek eroin.

E petet enn de bann rezilta ki mon ava koz lo la, se ki par egzanp Epatit C ki en gran fleo dan nou sosyete, e i asiste sirtou avek litilizasyon bann zegwir par bann dimoun ki adikt avek drog.  Akoz zot servi bann zegwir zot partaz zegwir antre zot.   E ant 2017 ek 2018 nou’n redwir par lakantite ka in diminyen par lanmwatye lakantite Epatit C.  E sa i sirtou parmi  sa bann popilasyon ki servi drog e ki pran pikir atraver eroin.

E sa i direkteman lye avek lefe ki letan zot dan en progranm parey letan zot fer avek APDAR zot probabilite ki zot servi en zegwir enfekte, i bokou diminyen.  E nou war sa deza an rezilta atraver bann rezilta lo Epatit C.

Lot eleman ki nou kapab war sa, an 2018 pou premye fwa dan dernyen 5an pou premye fwa mod transmisyon pou HIV SIDA pou premye fwa i pa atraver bann dimoun ki pe pran drog – pe pran eroin atraver en sereng.  Akoz sa ti mod premye pou transmisyon HIV ek SIDA dan nou pei pou sa dernyen 5an e menm en pti pe pli avan.

Pou premye fwa dan sa dernyen 5an sa in sanze e se sex omoseksyel ki premye mod transmisyon e ankor enn fwa sa i en lendikasyon poudir bann progranm harm reduction ki pe fer atraver APDAR i pe anmenn rezilta vizavi sa kestyon.  E mon ava osi dir ki i montre en pti pe zefor ki travayer lasante, i fer dan en fason zeneral, ki nou annan pli gran problenm eroin dan Lafrik, e enn bann pli gran menm dan lemonn letan ou regard par nou popilasyon.  Me malgre sa nou annan meyer rezilta dan Lafrik atraver nou ratio neonatal mortality.  Malgre sa problenm.

Si nou rezourd sa problenm nou pou annan en rezilta ki pou vreman met nou parmi premye dan lemonn e pa zis dan Lafrik. Alor i enportan ki nou met lanfaz lo sa problenm drog – sa mon dakor avek konpletman Onorab Leader Lopozisyon, me i enportan pou nou rekonnet e rekonnet bann zefor ki ganny fer – par sa bann dimoun ki pe travay toulezour e ki pe lite toulezour pou adres sa problenm.  Bann dimoun ki pe adres sa problenm eroin ki pe adres tretman bann dimoun ki ganny afekte, e osi bann dimoun ki pe travay avek bann manman ansent – bann dimoun ki pe travay avek bann popilasyon a risk pandan zot lansentman.

An se ki konsern aborsyon, nou napa fason pou nou determin a 100poursan ki bann e zis pou mon klarifye osi en aborsyon i diferan sa ki nou apel dan lopital en termination  of pregnancy.  En termination  of pregnancy se letan lopital li menm li – savedir pou rezon medikal dokter i santi ki en lansentman pa vyab e  zot rekonmann ki sa lansentman i ganny terminen.  En aborsyon i nenport ki lensidan ki anmennen ki sa fetis pa vyab, e ki i annan en pert oubyen ki zisteman sa lansentman i ganny enteronpe.

E i annan laplipar bann profesyonnel lasante i estimen ki en bon pe sa bann ka kot i annan en laborsyon ki pa ganny okazyonnen par en lentervansyon en profesyonnel  dan lasante, i probableman lye avek en lenterferans.  Me pou nou dir absoliman – wi i annan en lenterferans difisil.   Se pou sa ki nou napa en statistik presi me sa ki nou kapab war se en logmantasyon dan lakantite aborsyon – avortman zeneral ki pe pase dan bann lannen resaman.

E i konsekan. Mon annan sa sif la me i pa tro kler me petet mon a demann dokter zis pou tyeke apre redir mwan.  Apre vizavi sa bann logmantasyon dan sa bann anomali – bokou sa 22 anomali i pou mwan kler. i bokou zenetik. Ok?  Me sa ki nou vreman konsernen se sa bann ka prematir.  Mon ava rod en pti kou osi sa kantite nesans prematir ki nou’n annan.  I en poursantaz total ki ase gran e dan tou ka kot en zanfan i mor normalman dan lannen 2018 tou ti konsern en zanfan ki ti ne prematir.

E bann fakter ki asosye avek prematirite, wi i annan labi sibstans ki en fakter nou napa en statistik ki montre klerman kote sa bann manman i pe servi eroin akoz zisteman sa bann manman pa vin devan sa bann manman pa ganny kapte dan nou sistenm si zot vini petet zot in vin zis 1fwa e sa fwa ki zot vini e petet ler ou teste zot pa teste pozitiv sa fwa.

E se pou sa, sa progranm avek APDAR i enportan akoz sa bann manman zot ki tonm ansent, zot dan sa sistenm zot dan sa progranm avek APDAR.  E parey in ganny anonse nou pou osi fer sa tes obligatwar pou screening pou drog, me  i pou enportan ki nou fer sa progranm avek APDAR, akoz sa bann manman sa bann dimoun ki pe ansent ki deza dan labi sibstans, zot prefere al laba ki dan nou klinik.  Mon remersye tou dimoun pou zot kestyon e mon ava rod en pti pe sa statistik e mon ava donnen apre.   Mersi.

 

MR SPEAKER

Mersi Minis.   Mon ava retourn kot loter kestyon Onorab Aglae.

 

HON EGBERT AGLAE

Mersi Mr Speaker.  Minis mersi pou ou bann larepons.  Minis mon ti anvi zis fer resorti ki dan sa lager ki Minister Lasante pe anmennen lo sa size, mon pa war li ideal ki zis sa fardo i tonm lo ou Minister, kot ou ava annan ou bout kot ou ava fer kot konman lasante, me selman kot responsabilite i lo sa paran.

Alors dan sa menm laliny Minis eski ou Minister osi pe travay avek bann NGOs osi e osi District Team ki annan konsiltasyon en zofisye lasante onboard pou fer ki sa bann ki pa pe ganny kapte, i kapab ganny reach out, parey mon ti pe demande boner, pou ki zot osi zot kapab donn en koudmen Minister Lasante pou fer sa travay ki i tre enportan?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  E mersi Onorab.  Wi dan sa stratezi ki nou pe fer lo lasante reprodiktif e lasante maternel ek pou zanfan, i enkli en lapros konpreansif. Ki vedir  labaz sa bann konsiltasyon i bezwen dan distrik.   Nou deza dan bann sant rezyonal nou deza annan bann klinik Family Planning bann ners ki okip lasante maternel, nou fer swivi par egzanp letan en zanfan i ne e sa swivi i ganny fer atraver distrik.  E nou pe idantifye en bon pe sa bann – atraver nou bann sant lasante dan distrik,  nou pe idantifye en bon pe bann problenm sosyal ki nou fer deza sa lyezon avek bann diferan servis Gouvernman.

Sa ki enportan e sa ki enn bann pwen fondamantal dan nou stratezi, se nou bezwen kapab fer sa servis en pti pe pli avan lansentman osi.  Sa i vre, i difisil, akoz nou pa konnen a ki moman oubyen si en dimoun pou deside fer en zanfan.  I en swa tre personnel me atraver par egzanp bann travay ki nou anvi fer avek bann lekol, se pou nou idantifye boner dan en fason ki respekte drwa endividyel, me ki nou idantifye boner lekel bann dimoun par egzanp ki aktiv seksyelman a en zenn- az e ki sa bann dimoun i ganny sa ledikasyon, sa gidans pou asire ki zot pa met zot lekor a risk;- par egzanp pou zot ansent boner dan zot lavi e pou retard sa moman kot zot fer en zanfan, pou zot konpran responsabilite ki ale avek fer en zanfan.  E osi ki letan evantyelman zot deside fer en zanfan e zot vin ansent ki zot konpran osi ki mannyer zot pou enterakte avek bann servis lasante.

Ankor premye mesaz mon poudir, menm letan en dimoun letan i pa ankor deside pou pran en i pou fer en zanfan, me sa dimoun i aktiv seksyelman;- savedir sa dimoun i annan posibilite pou li tonm ansent.  I enportan ki sa dimoun i annan serten konsiltasyon.  Nou annan bann dan sak sant lasante nou annan servis pou family planning e i bon ki zot vini ki zot aprose pou eksplike pou eksplik zot sityasyon.  E osi ganny serten lenformasyon ki kapab ed zot ;- par egzanp pou manage zot lavi e osi retard en pti pe kan zot pou fer zot zanfan.  E osi asire ki letan zot ansent zot vin boner kot sant lasante pou konsilte.  Mersi Mr Speaker mersi Onorab.

 

MR SPEAKER

Mersi Minis.  Nou ava pran kestyon No.5.  Onorab Sylvanne Lemiel.

 

HON SYLVANNE LEMIEL

Mersi Mr Speaker.  Mr Speaker mon kestyon i al konm swivan: Eski Minis i kapab eksplike akoz ki lopital Anse Royale pa pe pran okenn pasyan depi mwan Out?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  E mersi Onorab.  E zot tou pou zot pasyans.  Mr Speaker parey petet nou tou nou konnen, lopital Anse Royale i landrwa kot nou dezinyen tanporerman pou ganny servi pou adres nou sant izolasyon dan kad sityasyon Ebola.  Nou Lotorite Lasante Piblik anba direksyon Dr Jude Gedeon le 31 Zilyet, letan zot ti fer zot Meeting Nasyonal, Komite Nasyonal kot i konsern sirveyans bann maladi enfektye ki kapab ganny enporte, letan i ti prezid sa Komite nou ti regard rekomandasyon ki WHO ti fer vizavi sityasyon ki ti pe arive dan Les Larepiblik Demokratik Kongo e dan konteks sa sityasyon, WHO ti’n deklar en ‘’Irzans Medikal Enternasyonal.’’

Sa i en sityasyon ki rar in deza arive.  E ti’n arive byensir letan Ebola ti’n deklare an 2013 e ti en lot lensidan.  Sa lensidan ki’n arive i lo en nivo ki ti fer ki WHO ti bezwen fer sa deklarasyon e tou bann pei ki Manm avek WHO ti bezwen letan en irzans parey i ganny deklare enternasyonalman, i bezwen fer sir ki son bann provizyon Nasyonal i an konformite pou zot kapab adres sa size.

E sa i vedir ki premyerman ou bezwen etablir ou sistenm swivi, pou okenn dimoun par egzanp ki sorti dan sa zone afekte, ki ou kapab swiv sa bann dimoun si zot vin dan ou pei ou bezwen annan kontrol lo frontyer.  E mon krwar ki tou dimoun i ava remarke ki poudir nou annan en form ki pe ganny aplike lo erport bann viziter ki pe antre.  E Lotorite Lasante Piblik pe fer bann swivi avek bann dimoun ki potansyelman a risk, e ziska prezan nou pa ‘n ganny okenn lensidan ki grav ki kre okenn konsern.  Lot eleman se ki ou bezwen prevwar en landrwa pou izolasyon an ka ki ou dekouver en ka.

Dan ka Sesel nou deza dan lepase servi Lopital Anse Royale e alor i ti ase fasil apre sa miting ki ti ganny fer le 31 Zilyet pou nou met an plas bann diferan prosedir pou asire ki diferan lekipman i disponib e apre osi pou revwar bann zofisye e bann profesyonnel lasante ki ti deza ganny formasyon pou adres sityasyon Ebola.

Sa lekip alor i an plas.  E vi ki i annan posibilite ki nou bezwen servi sa sant izolasyon menm si nou pa ankor servi li, nou bezwen redwir lakantite dimoun ki’n ganny refer kot lopital Anse Royale.  E annefe ki nou pa pe fer admisyon aswar dan lopital Anse Royale.  Nou pe plito refer zot kot Lopital Viktoria.

Nou’n bezwen pran sa desizyon rezon sa sityasyon enternasyonal. E an se ki konsern lakantite misyon nou’n annan 130 adminisyon dan Lopital Anse Royale ant Septanm 2018 ek Out 2019.  Alor nivo ladmisyon pa ti tro o i reprezant petet en 10enn pasyan par mwan.  Nou konpran ki i en fasilite ki vreman enportan pou bann dimoun dan distrik e dan sid akoz i permet bann dimoun ki sirtou bann dimoun aze ki annan serten problenm oubyen serten difikilte ki met zot pli pros avek zot bann paran zot bann fanmir.  Me nou bezwen fer sir ki nou annan en landrwa ki konvenab vizavi avek sa bann standar WHO.

Mon apresye atraver lentervansyon ki Onorab in fer ki petet letan Lotorite Lasante Piblik in fer lanons lafen Zilyet, ki petet pa tou dimoun in konpran poudir sa lopital pe ganny servi dan sa fason.  E nou apresye sa lokazyon ki nou kapab apresye sa.  Mon ti a kontan osi reasir popilasyon ki annefe bann nouvo statistik ki pe sorti kot Repiblik Demokratik Kongo e valide par WHO, i montre ki kantite nouvo ka  pe redwir a en ritm  vreman ase eleve.  E dan dernyen semenn pase ti annan  mwan ki 20 nouvo ka e sa i demontre ki sa outbreak i dan son faz terminal.  E nou espekte ki prosennman nou pou kapab reouver lopital Anse Royale plennman pou akse par bann sitwayen dan sid Mahe.

Nou osi annan nou progranm – nou annan nou proze pou konstri nou Sant Izolasyon ki pou ki an parti i konmanse sa lannen akoz nou fini fer sa tender pou sa kontrakter ki pou fer en design and built.  E sa batiman pou baze kot obor kot ansyen batiman NIHSS obor Lopital Viktoria.  I en Sant Izolasyon modern ansanm avek laboratwar.  E sa proze pou kontinyen an 2020 kot konstriksyon pou konmanse an 2020 e enn fwa ki sa in fini pou vedir ki nou annan en Sant Izolasyon konvenab pou bann sityasyon enternasyonal.  Zis pou note konman en dernyen pwen, se ki menm si nou pou annan sa Sant Izolasyon, i pa vedir ki dan serten ka nou pou osi bezwen parfwa rod bann lezot sant izolasyon, depandan sityasyon ki arive enternasyonalman.  Me definitivman letan nou annan en sant ki prevwar spesifikman pou sa i pou ed nou kapab byen zer nou bann resours dan en fason sistematik.   Mersi Mr Speaker.  Mersi Onorab.

 

MR SPEAKER

Mersi Minis.  Onorab Lemiel.

 

HON SYLVANNE LEMIEL

Mersi Mr Speaker.  Minis mon pe regarde par egzanp la letan tou servis in bouz dan lopital, e mon konnen poudir nou sipoze annan sa outpatient clinic osi ki nou ti ganny preski R1milyon dan Bidze e ki ziska ozordi nou pa ankor war nanryen ki pe ganny fer.   Petet kwa ki ou Minister kan ki ou Minister pe mazinen pou konmans travay lo sa nouvo outpatient clinic ki pou kapab liber lespas dan sa lopital aktyel la?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  E mersi Onorab.  Annefe parey Onorab in dir dan Bidze ti annan larzan pou nou fer en faz preparatwar.  Sa in fini ganny tender e kontrakter pou ganny kontrakte tre prosennman.  Mersi Mr Speaker.  Mersi Onorab.

 

MR SPEAKER

Mersi Minis.  Onorab Terence Mondon.

 

HON TERENCE MONDON

Mersi Mr Speaker.  Mr Speaker mon anvi demann Minis par lefe ler mon get zot statistik pou lo to lokipasyon pou 2017 nou ti war par egzanp ki ward medikal zot to lokipasyon ti ariv 105poursan.  E nou napa – mon napa statistik pou 2018,  mon pa’n war, petet si Minis ti kapab eklersi nou ki sa tandans, eski i pe kontinyen ogmante petet sa 100poursan e akoz? Ler mon get distribisyon popilasyon ;- par egzanp ou war Anse Royale i en landrwa ki pe servi anviron 14mil dimoun ki enkli Takamaka, Baie Lazare, e en parti Au    Cap, kwa ki fer zot pran sa desizyon pou  Anse Royale koman sa landrwa ki pou ganny servi –  menm si tanporerman, i pa non lezot landrwa?  Si i ti kapab eklersi  nou lo sa size akoz ki in servi Anse Royale?  E non pa lezot landrwa?  Mersi Mr Speaker.

 

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker. E mersi Onorab.   Rezon prensipal i tou nou formasyon ki nou’n fer akoz ou bezwen fer ou formasyon osi lye avek ou landrwa. Zot pe fer letan ou pe adres en problenm  – en maladi ki vreman efeksye dan ka par  egzanp Ebola ou bezwen fer sir ki tou ou bann travayer i konsyan lafason ki sa landrwa i ete. Nou ti’n fini idantifye sa landrwa depi avan nou ti’n fini sertifye li.

Dezyenmman  sete osi landrwa kot nou kapab fer li  minimonm avek minimonm  mon kapab dir lenkonvenyan pou –  byensir i en lenkonvenyan pou bann dimoun i nepli kapab servi sa lopital,  me  ler ou pou regard ban lezot opsyon ki nou ti pou annan, ti pou annan ankor adisyonnel difikilte vizavi deplas pasyan.  Si nou pe regard dan nou Lopital Victoria, nou Lopital Sesel anvil,   si nou ti pou bezwen adres en keksoz lo en ward anvil nou ti pou kre ankor plis lenkonvenyan vizavi Anse Royale  menm si i enportan  pour sa bann  pasyan. Me  parey  mon’n dir apepre 130  pasyan dan en peryod 1an, i vedir ki e sityasyon i deza   an plas pou nou kapab adres bezwen sa bann pasyan avek bann lezot fasilite, ki nou annan, avek en minimonm lenkonvenyans.   Menm si byensir i annan en  lenkonvenyans. Mersi Mr Speaker. E mersi Onorab.

 

MR SPEAKER

Mersi Minis.  Onorab Mondon.

 

HON TERENCE MONDON

Mersi Mr Speaker.  Mr Speaker  Minis pa’n elabor lo sa size sa  statistics   ki mannyer sa to lokipasyon zot bann ward pe ogmante,  swa si pe diminyen. Mersi.

 

MR SPEAKER

Mersi Onorab.  Minis.

 

 

MINISTER JEAN-PAUL ADAM

Mersi bokou Mr Speaker.   Mon  napa la devan mwan  statistik 2017/2018 me  mon mazinen poudir in amelyor en pe. Prezan en 2017 nou ti ouver lopital Perseverance an 2017 e avek louvertir Lopital Perseverance  in amelyor en pti pe nou sirkonstans konpare avek 2017.  Alor  i annan en parti statistik 2017 ki  kot Perseverance pa ti ankor ouver  e sa in  amelyore an 2018.

Nou annan bann moman kot akoz ou pa kapab prevwar kan dimoun i malad.  Nou annan bann moman kot nou bann ward i plen plis ki 100poursan, kot nou bezwen met dimoun parfwa lo lezot ward e menm parfwa pou  en bann peryod tre kourt, tanporer, nou bezwen annan lili dan koridor.  Me nou’n kapab redwir lensidan sa konpare  ek par egzanp 2an pase.  Definitivman sa bann lensidan i redwir e nou ava verifye son to lokipasyon dapre rapor 2018.  Mersi.

 

MR SPEAKER

Mersi Minis.  Onorab Paul Ernesta.

 

HON PAUL ERNESTA

Mersi Mr Speaker.  Mr Speaker Minis in mansyonn enn de bann konsern pli boner letan in dir bann dimoun ki’n ganny al ganny admit dan lopital, enn bann konsern ki zabitan in met devan mon parler ler sa sanzman in ganny fer, baze lo kalite malad.   Dan ka en dimoun – konmsi nou bann dimoun nou war nou tou malad, maladi ki ganny admet Lopital Anse Royale petet klarifye nou pou nou konnen.  Enn.  Apre dezyenmman ti annan sa konsern osi bann resours.  Parey letan bann dimoun i ganny admet lopital,  par ler zot  ti ganny problenm dra, mankman dra, eski la avek sa letan zot in fermen, ki plan ki zot in fer sir ki zot kapab redwir tousala, pou fer sir poudir letan lopital i reouver, ki nou annan nou en servis a o nivo enkli son staffing as wellThank you Mr Chair.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker.   E mersi Onorab.   Annefe bann dimoun ki ganny admit Anse Royale i bann dimoun ki zot kondisyon i stab.  Savedir ou pa pou kapab anvoy en dimoun ki par egzanp i dan en sityasyon kritik.  Si en dimoun pe bezwen en sipor pou li respire par egzanp i pa pou kapab admit Anse Royale.  Me en dimoun ki annan en problenm kronik ki anba kontrol, e ki la anba lobzervasyon nou plito servi li nou gidans ladmisyon i lo sa laliny.  Si en dimoun i pe bezwen en ladmisyon par egzanp parfwa pou pli byen kapab adres si ou annan en dimoun.  Par egzanp ki annan en blesir oubyen en boubou ki bezwen en pe letan pou geri i landrwa ki nou ti admit dimoun dan san laliny.  Me bann ka pli kritik e pli grav, sa ti nesesit tou fason pou admit zot lopital santral.

         Apre Onorab in lev sa size bann mankman serten keksoz parey dra nou’n fer en zefor konsiderab avek Lazans Swen Lasante pou nou ogmant kantite dra an sirkilasyon, pou osi adres defi parfwa ki’n arive ant nou laundry e bann diferan sant lasante.  E sa ki mon konnen an zeneral in amelyore i annan serten pwen ki touzour i annan bann pti problenm ki parfwa i lye avek kominikasyon pou nou fer sir ki asa dra oubyen sa lezot keksoz i ariv dan sa landrwa apropriye a sa bon moman.   Me avek bann nouvo dra ki nou’n aste sa lannen, nou ekspekte ki nou kapab adres sa sityasyon dan en fason ki bann problenm pou redwir e ki  en meyer servis pou bann pasyan.  Mersi Mr Speaker. Mersi Onorab.

 

MR SPEAKER

Mersi Minis. Onorab Lemiel.

 

HON SILVANNE LEMIEL

Mersi Mr Speaker. Mr Speaker mwan mon annan en sizesyon mon ti a kontan sizere avek Minis.   Petet pa tou dimoun ki tande parey nou dir  letan Dr Gedeon ti fer sorti sa lenformasyon. Petet i ti pou meyer letan nou pe koz travay ansanm nou pas lenformasyon avek distrik i annan Ladministrasyon Distrik, kot nou fer konnen poudir be  lopital pe al fermen pa pe pran dimoun prezan nou, nou a kapab kominik sa avek Takamaka, Baie Lazare.  Konmsi sa rezyon I mean kanmenm pa  Baie Lazare – Baie Lazare osi mon krwar i admit Anse Royale, Au Cap nou  kapab fer dimoun sa rezyon konnen e menm lo zot website osi akoz mon pa sir si zot mete lo zot website. Akoz nou konnen ki kominikasyon i lakle therefore annou si nou pa pe fer sa  ki mon konnen  nou pa pe   kominik ek distrik la pou le moman pou fer konnen ler in  fermen,  so annou komans fer li.  Mersi Mr Speaker.  

 

MR SPEAKER

Mersi  Onorab.  Minis.

 

MINISTER JEAN-PAUL ADAM

Mersi bokou Mr Speaker. Mersi Onorab. Definitivman nou pran sa sizesyon aker e nou ava fer le neseser avek bann Lotorite Distrik.  Mersi.

 

MR SPEAKER

Mersi Minis. Kestyon No.6 Onorab Wilbert Herminie.

 

HON WILBERT HERMINIE

Mersi Mr Speaker. Bonzour Minis avek ou delegasyon e tou dimoun al ekout.   Kestyon No.6; An vi renovasyon ki’n ganny fer lo klinik Rivière Anglaise pou moderniz bann servis e fasilite, eski Minis i kapab dir  sa Lasanble si pou annan bann nouvo servis spesyalize ki pou ganny ofer dan klinik?  Eski Bidze adisyonnel pou ganny mete pou meble sa bann nouvo lasanm?  Eski i pou annan staff adisyonnel ki pou ganny atase ek klinik ou amelyor servis aktyel kot i neseser?  Mersi Mr Speaker.

 

MR SPEAKER

Mersi  Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Sant Lasante La Rivière Anglaise i kouver 6 distrik e sa i enkli Bel Air, St Louis, Mont Buxton, English River, Perseverance 1 ek 2 e son popilasyon ki i kouver i 22mil dimoun. E i pli gran sant lasante rezyonal ki nou annan dan nou pei.  Letan nou’n fer sa renovasyon lo sant La Rivière Anglaise ti baze lo bann konsern ki ti ganny met devan par bann rezidan dan distrik e osi pou asire ki  i annan en meyer landrwa travay pou nou bann profesyonnel lasante.

Dan sa renovasyon nou’n adres sirtou sa lespas pou emergency ki sa casualty ki English River; nou’n fer bann lasal konsiltasyon ki permet plis dokter vini an menm tan pou ofer sa bann servis spesyalize enkli bann nouvo spesyalizasyon ki mon ava tous lo la en pti pe apre.

Nou’n adres osi landrwa kot dressing in ganny fer e landrwa latant pou dressing. Nou’n adres osi lespas pou bann rikord ek bann fasilite. Nou’n adres problenm pou pharmacist.  Akoz ti vreman ankonbre avan.  I pa ti permet delivre en servis apropriye e nou’n si amelyor bann fasilite ki permet nou  fer nou progranm lo bann maladi non-kominikab. E an zeneral e osi lot pwen enportan i premye sant lasante kot nou osi ofer en lespas zwe pou bann zanfan. E mon remersi Onorab ki ti enn bann aktivis ki’n travay tre pros pou mobiliz sipor par bann donasyon  ki  sorti kot sekter prive ki’n permet nou fer sa landrwa zwe pou bann zanfan e ki nou anvi enkorpor sa koman en standar evantyelman dan tou nou bann sant lasante.

An term spesyalis ki offre zot servis  i landrwa apard  lopital  kot nou ofer plis bann servis spesyalize, e avek sa lekspansyon serten sa bann spesyalis i a adisyonnel.  Me sa i enkli spesyaliz sirizyen vaskiler as ki nou dir an Angle muscular surgeon, zenikolog, dermatolozis, eksper ENT,     …, family doctor, physician, urologist psikyat, eksper maxillo facial e nou’n osi ofer bann konsiltasyon pli aprofondi pharmacist.

Nou osi annan La Rivière Anglaise nous ant pou lentervansyon bann pti zanfan e sa i sirtou  osi tou adres par egzanp nou’n ko en pti pe pli boner lo serten bann difikilte laprantisaz, bann dimoun ki pe annan problenm otizm e nou’n kapab alor adres en pe bann kontrent lespas ki ti annan otour sa bann diferan servis.  Avek bann nouvo devlopman ki pe kontinyen vini nou anvi ofer plis sa bann diferan servis e ofer sa dan sa distrik menm.

Atraver sa nou pe met lanfaz sirtou lo spesyalizasyon bann zenn dokter Seselwa lo medsin lafanmir e bokou zot pou baze otour  bann sant lasante parey La Rivière Anglaise pou nou kapab ofer en servis entegre.   Nou pou osi espere kapab ofer en serten plis  fasilite dyagnostik avek en pe plis bann lekipman parey ultra sound  e bann lekipman similer ankor ki pou permet nou ofer plis sa bann servis dan en kad pli pre avek dimoun dan distrik.

Mersi Mr Speaker E mersi Onorab. 

 

MR SPEAKER

Mersi Minis.  Onorab Herminie.

 

HON WILBERT HERMINIE

Mersi Minis pou sa larepons byen detaye.    Minis mon a remersi ou ankor pou sa proze dan distrik La Rivière Anglaise. I annan zis en kestyon ki mon’n gannyen atraver en teks bann health workers dan distrik menm dan La Rivière Anglaise pe zis demande pou amelyor en pe zot fasilite sirtou kot staff room i été pou fasilit bann ners e dokter pou ler zot pran zot break e sityasyon  dan sa zalantour koumsa si zot kapab fer provizyon pou met en pe plis fasilite, lockers eksetera pou zot. Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi  Mr Speaker.  Mersi Onorab.  Nou rekonnet poudir i annan serten meb, serten fasilite pou siport bann travayer lasante laba ki nou touzour bezwen adrese e nou pe met sa an faz pou nou kapab fer sa o pli vit posib.  Mersi Mr Speaker.  Mersi Onorab.

 

MR SPEAKER

Mersi Minis.  Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun dan son larepons Minis in dir ki sa sant i deservi 22mil dimoun, donk mon anvi konnen ki plan Minister Lasante pou sirtou devlop en fasilite lo Perseverance ki a tir en pe presyon lo La Rivière Anglaise akoz ozordi i pe osi deservi Perseverance 1 ek 2.  Sa i premye kestyon.

2enm mon anvi konn vizavi servis lanbilans ki baze sant La Riviere Anglaise?  Mon pe demann sa akoz en dimoun aze Mont Buxton resaman in bezwen esper lanbilans depi 10er e in ariv kot li 4er apre midi ki mon santi i en  pe long?  Mersi Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  An se ki konsern.  E mersi Onorab.  An se ki konsern Perseverance dan nou plan devlopman lopital avek son bann satelit i annan provizyon pou en sant lasante evantyelman Perseverance e sa i enkli dan sa plan.  E i pou kouver pou prosen 10an Perseverance i parmi bann priyorite i pa dan Bidze pou 2020 me nou espekte ki pou vin prosennman 2021, oubyen 2022 avek konfirmasyon Minister Finans.

Sa sant lasante, rezon osi ki nou pa pe fer li deswit se ki, i en nouvo sant lasante ki i pa pe ranplas enn ki deza egziste.  E sa i vedir ki nou bezwen fer sir ki nou annan sa mendev neseser a tou nivo.   E avek nou plan rekritman avek bann nouvo dokter ki’n vini osi tou ki pe spesyalize, nou espekte dan detrwa lannen kapab annan sa nivo staffing ki pou permet nou ofer sa servis dan sa sant lasante Perseverance e ki osi pou en sant a nivo rezyonal akoz son grander i konsekan.

An se ki konsern servis lanbilans, mon pran not sa konsern ki’n ganny mete e mon si oule donn mon non apre sa dimoun mon kapab verifye en pti pe pli an detay kote difikilte ti été.  Mon konnen ki parfwa akoz toultan dan servis lanbilans priyorite i vin definitivman pou bann ka irzans, me nou osi ofer sa servis lanbilans i vre menm si sa dimoun i annan en problenm deplasman e sa dimoun i vreman i malad, i annan problenm mobilite kot nou kapab sey ede, me i vre ki parfwa si sa i  par egzanp i pou annan retar lo la i enportan ki nou kominik avek sa pasyan  pu  pou fer konpran kan pou arive.  Si ou donn mwan petet plis detay lo sa case mon  ava kapab verifye petet kot problenm ti été e nou ava sey aranze pou kaba amelyore la prosenn fwa.   Mersi Mer Speaker e mersi Onorab.

 

MR SPEAKER

Mersi Minis. Onorab Henrie.

 

HON GERVAIS HENRIE

Mersi Mr Speaker.   Si zis mon ti kapab demann en lot kestyon vitman anvi ki nou pe koz lo sant lasante Rivière Anglaise ki Minis in dir nou i pli gran health centres lo nivo rezyonal, mon konnen i annan en legzersis dan  Minister Lasante ki zot fer baze lo interview ki zot fer avek bann kliyan pou war  performans bann sant lasante nationally enkli prive mon ti a kontan konnen ki  pozisyon La Rivière Anglaise how well perform sa sant i perform vizavi lezot?  Mersi.

 

MR SPEAKER

Mersi Onorab. Minis.

 

MINISTER JEAN-PAUL ADAM

Mersi bokou Mr Speaker. Mersi  Onorab.   Mon napa sa dokiman ek mwan selman parey ou’n dir nou ‘n fer sa  e nou’n fer plizyer sa bann kalite survey, nou’n fer patients safety survey kot La Rivière Anglaise si mon mazinen byen ti perform vreman byen.  Nou’n fer osi sa enn lo ki satisfaksyon kliyan, e La Rivière Anglaise i vre  ki akoz i en gran sant lasante  –  deservi en kantite dimoun, parfwa konplent i vin o nivo par egzanp lakantite dimoun lakantite letan ki zot bezwen atann.

        Me parkont si mon mazin byen sa survey, vizavi servis ki zot ti gannyen avek dokter,  servis ki zot ti gannyen avek bann profesyonnel lasante si mon pa tronpe La Rivière Anglaise ti perform ase byen.  Alor  i balanse en pti pe avek sa bann diferan defi. Mon napa sa rapor la devan mwan mon ava konsilte mon ava kapab petet donn ou en larepons pli detaye pli tar. Mersi.

 

MR SPEAKER

Mersi Minis.   Onorab Audrey Vidot.

 

HON AUDREY VIDOT

Mersi Mr Speaker.  Bonzour Mr Speaker, Minis ek ou delegasyon e tou Manm Onorab e bann piblik ki a lekout, Minis ankor dan sa laliny prenan kont ki English River pe deservi sa kantite distrik sa kantite dimoun, ki provizyon petet ki Minister pe siport sa rezyon, sa lopital prenon kont ki i annan en kantite outreach program zot bezwen fer, pou fer sir ki sa bann distrik pa ganny eparnye an term resours imen e osi rezours transpor ki pou fasilit zot pou zot kapab fer  sir ki zot  pa kit okenn distrik deryer ? Mersi Mr Speaker.

 

MR SPEAKER

Mersi Onorab. Minis.

 

MINISTER JEAN-PAUL ADAM

Mersi bokou Mr Speaker e mersi Onorab. Definitivman nou bezwen fer sir ki bann sant lasante parey La Rivière Anglaise, zot kapab kouver  sa distrik an antye – sa rezyon an antye e sa i enkli en plan prkirman pou transpor en nouvo transpor ki pou amelyor en pti pe zot kapasite pou zot deplase a  al plis ver zot popilasyon konsernen pa zis osi ofer konsiltasyon dan sant lasante. Me mon konnen zot deza ofer en bon pe bann konsiltasyon atraver home vizit pou bann pasyan ki annan serten difikilte  ki zot bezwen  serten swivi me definitivman i en landrwa kot nou anvi ofer plis e kapab fer plis e kapab fer plis avek plis mobilite.   Mersi Mr Speaker. Mersi Onorab.

 

MR SPEAKER

Mersi Minis.  Minis i reste 2 kestyon.  Mon pe regard pou disponibilite apre midi 2er nou kontinyen avek sa 2 kestyon akoz  mon annan en Anbasader ki mon pou rankontre la midi avek Onorab Ferrari osi tou i parmi koman Chair IAC.  So mon pe regarde Minis apre midi 2er nou a kapab kontinyen avek sa 2 kestyon ki reste. Bon dakor.  Avan nou break mon ankor  enform bann Manm ABC pe rankontre 12.30 Speaker’s Conference Room, FPAC Committee Room 3 – 1er e group  Caucus Madanm Speaker‘s Conference Room 1er. Avek sa nou ava break e nou a repran nou travay 2er apre midi.

 

        (BREAK) 

 

 

MR SPEAKER

Bonn apre midi tou Manm Onorab.  E bon apre midi tou dimoun ki a lekout e pe kontinyen swiv travay Lasanble Nasyonal.  Nou pou kontinyen avek nou travay e mon ava demann parliamentary reporter pou apel Minis avek son lekip.  Antretan mon annan de pti lanons ki mon anvi fer partaz avek zot.  Komite Zafer Etranzer i pe envit tou Manm Lasanble pou en vizit kot lekol Maritim Vandredi le 25 savedir sa Vandredi la devan nou kot zot pou rankontre e diskit bann issues avek bann profeser e etidyan.

Tou Manm ki disponib zot ganny envite.  E mon pa’n ganny ler lo la ki ler egzakteman mon pa konnen si i annan en Manm IAC si i okouran 9er bomaten zot pou rankontre laba?  9er bomaten isi kot Lasanble.  Ok dakor.  2enm ankor IAC zot pe osi resevwar en delegasyon Departman Komers dan Minister Finans Lendi le 28 Oktob isi kot Lasanble kot Committee Room 3 apartir 1er apre midi e ankor zot in extend sa lenvitasyon avek tou Manm Lasanble.

E mon 3enm pti lanons ki mon pou fer, se kontinyasyon kanpanny Cancer Awareness kot Caucus  Madanm avek bann lezot partner ki’n antre dan sa konpanny pandan sa mwan Oktob, pe envit tou Manm Lasanble e bann Manm  staff Lasanble osi tou Sekretarya pou kot en lanmes ki pou fer Persévérance kot Legliz St Esprit, Dimans apartir 8er bomaten.  Ok so vwala sa de pti lanons ki mon anvi partaz avek zot.

Bon mon ti a kontan dir bonn apre midi Minis avek son delegasyon e Minis i la pou kontinyen nou travay ki nou ti konmanse bomaten seri kestyon pour son Minister.  Yes Onorab Ramkalawan.

 

HON WAVEL RAMKALAWAN

Mr Speaker.  Bon apre midi mersi non vi ki ou’n fer sa de lanons mon krwar ki i enportan osi pou lo lapar FPAC parey ou konnen nou ti annan sa miting 1er avek Minis Finans lo size an relasyon avek Bidze Siplemanter.  E zis pou enform tou Manm ki demen 9.30 bomaten nou pou zwenn ankor dan Room 3 pou kontinyen lo sa size e nou ganny bokou plis lenformasyon ankor.  E apard FPAC nenport Manm ki enterese i envite pou zot vin join nou.  Mersi bokou.

 

MR SPEAKER

Mersi Onorab Ramkalawan.  Bon mon krwar i byen ozordi ki nou pe war bann extended Committee meetings i fer ki bann Manm ki enterese i ganny en pe plis lenformasyon e konesans lo kwa ki pe ganny diskite, prior ki i vin dan Lasanble.  So ankor pou fer lapel pou bann Manm pou sezi sa lokazyon pou zot atenn sa bann miting e pou konn en pti pe plis kwa ki pe pase.  E nou pe swete petet apre sa miting demen, nou a kapab dispose of sa Motion lo Supplementary Budget 2019 semenn prosenn.

Bon avek sa nou pou kontinyen nou travay kot nou ti’n arete bomaten e nou pe al lo dernyen de kestyon ki reste pou Minis Adam – Minis responsab pou Lasante, mon ava pas laparol avek loter kestyon No.7 Onorab Regina Esparon.

 

HON REGINA ESPARON

Mersi Mr Speaker.  Bonn apre midi tou dimoun.  Eski Minis i kapab dir sa Lasanble ki plan Minister pe fer ki eye clinic ki sitye dan batiman SOPD kot Twa Zonn i vin pli konvenab pou ki bann pasyan wheelchair, stretcher oubyen bann ki servi bekir ganny akse pli fasilman?  Mersi.

 

MR SPEAKER

Mersi Onorab Esparon.  Minister.

 

MINISTER JEAN-PAUL ADAM

Mersi bokou Mr Speaker e mersi Onorab.  Annefe depi dernyen 3an nou pe fer bokou zefor pou nou adres bann konsern otour bann pasyan ki bezwen servi eye clinic.  E nou annan plizyer renovasyon ek amelyorasyon ki ankour prosennman.  Premyerman anliny avek nou partenarya avek en lasosyasyon enternasyonal ki apel teaching eye surgery, nou’n agree en plan pou nou fer renovasyon lo nou eye theatre ki baze dan Twa Zonn.  Alors sa pou donn nou en meyer fasilite pou nou kapab fer serten sa bann loperasyon lamazorite loperasyon lizye dan Twa Zonn li menm li san ki bezwen pran pas dan main theatre.

E sa don in fini ganny negosye e agree.  E i osi enkli sipor finansyel ki pou sorti kot Sheik Mossad Al-Dhakil atraver son fondasyon SOS kot zot pe fer en donasyon ki pou permet nou fer sa renovasyon  sa eye theatre.   I pou enkli osi en lift ki pou ganny enstale a leksteryer batiman Twa Zonn e ki pou permet nou annan akse avek fasilite eye clinic, osi byen ki tou bann letaz.  Akoz batiman Twa Zonn i annan li ground floor plus 2 e nou pou kapab annan akse avek tou sa bann letaz avek sa nouvo lift ki pou ganny enstale.

Aktyelman sa plan, sa arsitek medikal ki ankor in ganny fer par sa Fondasyon in ganny soumet avek nou, nou pe valid li, e enn fwa ki i ganny valide kontrakter pou ganny idantifye ankor enn fwa par sa Fondasyon pou kapab fer sa travay o pli vit posib.   Dan plan redevlopman lopital a long term, pou annan plis fasilite lizye ki pou baze dan Twa Zonn osi ki enkli serten fasilite ki nou pou kapab met ground floor.  Me avek lefe ki nou pou enstal en lift pou osi ed nou adres sa bann kestyon a long term.

Mon ava note ki an term bann tretman ki nou ofer a long term bann konplikasyon  otour lizye, mon felisit lekip anba konsiltan ansarz Dr Roland Barbe akoz nou’n fer bokou progre dan sa sekter.  Zis an 2019 depi konmansman lannen, nou’n fer 228 ka katara isi menm Sesel.  Nou ava rapel ki dan lepase, nou ti depan bokou  lo bann lekip sorti aletranze ki ti vin isi. Me  konmela nou pe fer konman en loperasyon routin baze isi Sesel menm e avek bann rezilta ki vreman ankourazan.

Nou osi pou la premyer fwa, depi lannen pase nou’n fer bann ka – nou’n fer bann loperasyon pou bann ka retinal detachment.  Sa i ganny fer avek sirizyen ki pe vizit ‘’Teaching Eye Surgery’’ me asiste par bann sirizyen Seselwa.  E nou’n fer 4 ka avek sikse zis avek enn ki bezwen swivi pli avanse.  E nou annan bann zenn dokter ki pe osi swiv sa bann travay ki pe ganny fer, pou kapab osi annan en laprantisaz e apre al spesyalize.  E nou annan 2 ki annan 1 ki ankour spesyalizasyon e i annan lot ki pou ale tre prosennman.

E lot eleman ki mon ava zis mansyonnen, se ki avek sa sipor sa Fondasyon, nou’n kapab redwir en kantite bann dimoun ki pe esper pou fer loperasyon pou katarak, e sa renovasyon ki nou pe prevwar avek sipor sa Fondasyon, i anliny avek amelyorasyon sa servis ki nou pe ofer.  Mersi bokou Mr Speaker e mersi Onorab.

 

MR SPEAKER

Mersi Minis.  Onorab Esparon.

 

HON REGINA ESPARON

Mersi Mr Speaker.  Mersi Minis pou ou larepons.  Eski Minis ti a kapab dir nou ki dele letan ki i pe mete ki sa renovasyon pou arive?   Parske kantite fwa nou dir i dan plan me ennler i pran years avan ler ki keksoz i materyalize e la i fer mwan mazin Mrs Gabrielle,  Mr Poponneau ki pe vin kot eye clinic souvandfwa e zot war zot avek sa difikilte pou akse eye clinic, parske i sitye lo 2enm letaz.

E Minis eski ou kapab dir nou, par egzanp letan ou annan bann pasyan – )Minis pa pe ekout mwan)

 

MR SPEAKER

Kontinyen Onorab.

 

HON REGINA ESPARON

Ok Minis, eski ou kapab dir ek nou letan ou annan bann pasyan bann in patient ki bezwen ganny akse avek eye clinic mon konnen zot bezwen sorti anler dan ward pou zot vini, ki ou plan akoz dan ou Master Plan mon pa’n tann ou letan ou ti pe prezante, dir ki pou annan en walkway en shelter walkway from anler lopital pou vin anba, parske parfwa ou war bann pasyan dan soley, dan lapli dan en wheelchair pe vin ganny akse isi anba, ki plan ki ou annan pou amelyor sa sityasyon?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker e mersi Onorab.  An se ki konsern son dele letan son plan in ganny soumet apepre 1 mwan pase avek nou.  I annan serten enteraksyon ki’n ganny fer, e nou espekte lo nou kote nou kapab valid sa plan dan bann semenn ki pe vini.  Enn fwa ki sa plan i valide, sa partner pou idantifye bann kontrakter ki nou espekte kapab pran ankor 1 mwan a 6 semenn.  Alor mon mazinen ver lafen lannen, nou ava kapab konmans demare lo konstriksyon lo sa proze.

Lot keksoz ki nou pe al konmans ofer apartir mwan Novanm, se pou serten nou pou fer serten konsiltasyon lo ground floor, pou bann dimoun zisteman ki annan difikilte akse pou zot ariv anler atraver eye clinic.  Sa i en keksoz ki pou redwir sa nesesite pou zot bezwen servi peron.  Nou pe osi ogmant la kantite klinik ki pe ganny fer dan bann klinik rezyonal pou konsiltasyon.  Mon le fer kler ki byensir pa tou keksoz ki kapab ganny fer lo ground floor, akoz byensir zis pou al fer en lentervansyon ou bezwen al lo premye letaz.

Apre an se ki konsern sa kestyon lo walkway, dan plan redevlopman lopital.  Sa flow pasyan sorti dan bann diferan unit, in ganny pran an kont, letan ou pou sorti dan en landrwa pou al dan en lot, lo ki mannyer sa transfer sa pasyan pou ganny fer.  E o maksimonm ki posib enkli konekte bann batiman dan sa rezyon lopital santral, o maksimonm pou ganny fer atraver bann walkway ki kouver.

Me nou ava note ki menm parfwa dan bann lopital aletranze, e enn par egzanp mon vizite La Reunion kot ou pou annan parfwa bann batiman ki pa konekte li menm li akoz i depan sa servis.   Lakle se asire ki sa pasyan i anba proteksyon ki i pa pe ki son lasante pa pe ganny afekte dan sa transfer.  Me dan nou plan redevlopman lopital nou pe adres sa.  Mersi Mr Speaker mersi Onorab.

 

MR SPEAKER

Mersi Minis.  Onorab Esparon.

 

HON REGINA ESPARON

Mersi Mr Speaker.  Eski Minis ou annan en evalyasyon ki’n ganny fer konbyen sa proze pou koute silvouple?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker e mersi Onorab.  Dapre sa kalkilasyon ki enkli renovasyon theatre e osi enstalasyon sa lift sa lift pa telman kout ser, me son proze total i anviron dan $400mil.  Mersi.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mr Speaker zis konman en konsey etandonnen ki bann dimoun ki pou annan problenm lizye zot kapab aveg tou, eski Minis letan zot pe fer zot plan pou mazinen pou met en lift ki friendly pou bann dimoun ki aveg en lift ki koze ki dir ki letaz  in arive ;- en lift ki annan posibilite ki lo son bann kot i pe met son floor i osi annan Braille.  Bann pti keksoz koumsa, ki ava fasilit sa bann dimoun.  Mersi bokou Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  E sertennman nou ava verifye avek sa kontrakter asire ki sa lift i pran sa an kont.  Me  mon sir ki sa i leka akoz nou pe fer sa proze dan konteks spesifik pou siport klinik lizye.  Mersi.

 

MR SPEAKER

Mersi Minis.  Nou ava al lo dernyen kestyon.  Kestyon No.8 Onorab Regina Esparon.

 

HON REGINA ESPARON

Mersi Mr Speaker.  Eski Minis i kapab dir sa Lasanble kwa ki pe al ganny fer kot sa right wing kot Regional Home for the Elderly North East Point ki ankor vid depi son legzistans?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Nou annan en plan renovasyon pou North East Point ki e sa renovasyon pou konmanse tre prosennman.  Bann dokiman tender in fini e nou dan staz final pou sa kontrakter ganny valide pou li kapab konmans son travay renovasyon.  Sa travay i kouver sa fasilite antye e i enkli sa bann wing ki ou’n site.

Enn bann – parey nou dir sa wing lo kote drwat i enn ki’n ganny konstrir avek provizyon a lavenir lagrandisman bezwen ki nou pou annan.  E aktyelman deza nou kapab dir ki nou annan bokou ka ki pou benefisye letan nou pou kapab agrandir sa landrwa.  I enportan pou note ki en parti dan sa wing kote drwat pe ganny servi par Occupational Health Therapy Unit pou bann pasyan – pou bann day patients pou zot aktivite ki zot fer dan lazournen.

Sa renovasyon ki nou pou fer premye parti sa renovasyon nou pe bezwen adres bann bezwen bann pasyan mantal.  Alor enn bann premye akoz sa renovasyon pou ganny fer avek bann rezidan dan zot landrwa.  E pou nou kapab fer sa nou pou bouz bann pasyan sorti dan ward mantal, pou al dan enn sa bann ward ki vid.  An mezir ki renovasyon i ganny fer laba, apre zot a kapab retournen dan zot landrwa.  Sa renovasyon pou ward pou pasyan mantal, pou adres bann bezwen spesifik ki zot annan alor i en renovasyon ki konsekan.

Sa wing lo kote drwat in ganny prevwar pou bann aktivite adisyonnel pou occupational therapy;- bann aktivite adisyonnel osi pou bann dimoun ki rezidan dan Regional Home for the Elderly.  E nou’n osi siny en memorandum of understanding avek Seychelles Alzheimer Foundation ki koz lo korperasyon an zeneral me enn bann aktivite prensipal ki’n ganny propoze se ki nou kapab osi servi sa landrwa pou fer bann aktivite ki spesifik e ofer en fasilite daycare osi byen ki en pe pli avanse pou bann pasyan ki soufer avek alzheimers.

Alor sa sizesyon ki’n ganny fer par Lasosyasyon Alzheimers i anliny avek plan ki Gouvernman i annan pou itilizasyon sa fasilite me nou pe swiv sa prosedir pou nou kapab agree egzakteman ki mannyer sa partenarya pou ganny fer an pratik e pou sa ganny fer, zot pou fer en prezantasyon avek Board Lazans Swen Lasante ki pou ganny fer prosennman.  E swivan sa nou ava war bann aksyon spesifik lo ki mannyer nou pou kapab bouz pli devan pou fer sa arive.  Me avek sa renovasyon ki pe ganny fer par Gouvernman lo sa bann diferan wing, e avek partenarya ki pe kapab fer avek bann lorganizasyon lasosyete sivil, parey Seychelles Alzheimers Foundation, nou pou kapab amelyor kondisyon lavi pou bann dimoun ki pe deza dan sa Regional Home for the Elderly.  Mersi Mr Speaker e mersi Onorab.

 

MR SPEAKER

Mersi Minis.  Onorab Esparon.

 

HON REGINA ESPARON

Mersi Minis pou larepons.  Mr Speaker, eski Minis i kapab dir nou dan son plan orizinal, ler sa landrwa ti ganny fer sa bout right wing ti sipoze en vin en rezidan tanporer pou bann dimoun ki annan son paran ki le met la, sepa si i pe al aletranze, 5 semenn met la tanporer.  I sipoze en rezidan tanporer.  Me i malere ki sa pa’n zanmen arive.

E sa bout right wing in toultan reste vid, vid, vid e la ou pe dir nou ou pe al renovate.  Wi i annan en kantite letan ki i la, mon mazinen in avarye.

Minis occupational health pe servi son bout anler ek en pti bout anba sa gran bout i vid, petet si ou kapab dir nou, ler sa renovation pou ganny fer, konbyen lasanm zot pe espekte pe gannyen la dan sa bout la, e ki porsyon ki alzheimer pou okipe?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Mon krwar parey Onorab in dir i annan en bout anler i annan en bout ki ganny servi par occupational therapy.  An se ki konsern litilizasyon konman en landrwa ki dimoun i kapab met zot paran eksetera, pou letan zot al par egzanp aletranze oubyen le pran en vakans, bann carer i le pran en vakans, nou defi lo sa size i nou tou bann nivo lakantite staff.  Pli ou fer ou bann rezidan eparpiye otour sa sant, apre byen  sir  ou bezwen annan staff pou kapab asir sa nivo swen.  Nivo staffing i enn bann defi.  Nou annan en plan pou nou kapab adres sa nivo staffing.  Nou’n fer bann formasyon e nou pe ranforsi bann formasyon ki pe ganny fer dan sa laliny, ki pou permet nou itiliz sa landrwa plennman.  E osi sa partenarya avek Alzheimers Foundation, i pou fasilit sa partenarya pou nou kapab idantifye bann dimoun ki pe travay avek sa bann dimoun ki enkli bann volonter e byensir bann travayer lasante.  Me parey mon’n dir sa konversasyon i ankor en keksoz ki pe ganny diskite Board Health Care Agency pou nou kapab agree egzakteman ki bann responsabilite Alzheimers Foundation – ki bann responsabilite Health Care Agency.

An se ki konsern lakantite lasanm – i mon pa mazin son konfirmasyon egzakt aktyelman, me sa bout ki nou pe regard pou travay avek Lasosyasyon Alzheimers, i sa bout ground floor.  E nou pou kapab osi kontinyen avek nou bann progranm occupational health.  E nou pou kapab osi met bann lespas adisyonnel pou bann rezidan.  E letan nou kapab fer en pe plis staff i enkli sa posibilite pou nou pran bann dimoun aze ki parfwa letan zot fanmir i bezwen en landrwa tanporer pou met zot.

Mon ava rod en pti pe plis detay lo egzakteman la kantite lasanm e  son konfigirasyon son ward pou kapab donn Lasanble pli tar.  Mersi.

 

MR SPEAKER

Mersi Minis.  Onorab Esparon.

 

HON REGINA ESPARON

Mersi Mr Speaker.  Mr Speaker, eski Minis i kapab dir nou dan sa plan renovasyon i pou Lopital North East Point antye?  Sa ki nou apel Lopital North East Point ki enkli son Regional Home for the Elderly, nou annan en bout physiatric, nou annan en bout rehabilitation.

Eski dan sa plan renovation i pe menm mazin met en lift?  Sirtou sa bout deryer kot i servi pou rehabilitation deryer kot bann pasyan i vin pou physio bann sa, eski ou pe mazin met en lift?  Olye ki pou toultan bezwen vin pas la dan milye kot i annan sa ramp pou zot mont anler.   Parfwa i annan bann sa bann tantin/tonton en pe partou konmsi – zis konmsi zot kapab ganny akse par deryer olye ki zot pas par la devan?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Nou ava sertennman asire ki sa i enn bann eleman dan sa – otan ki posib, otan ki i finansyerman antre dan sa plan, mon krwar sa i fer sans absoliman.   Mersi Mr Speaker, mersi Onorab.

 

MR SPEAKER

Mersi Minis.  Onorab Johan Loze.

 

HON JOHAN LOZE

Mersi Mr Speaker.  Mr Speaker i fer 2 zour ki Minis i la e pandan sa 2 zour i annan bokou demann ki’n sorti kot nou bann Manm lo tou lede kote latab, ki pou met en lift ki koze, e ki pou fer renovasyon ;- pou benefis dimoun ki pe ekoute, mon ti a kontan si Minis i ava konfirmen ki tou sa bann redemann ki’n ganny enpoze lo son Minister, i kapab selman ganny materyalize atraver Bidze pei.  Bidze ki ganny large …

 

MR SPEAKER

Onorab, Onorab, Onorab.

 

HON JOHAN LOZE

… lo Third  Reading ki zis United Seychelles ki aprouve.

 

MR SPEAKER

Onorab Loze.

 

HON JOHAN LOZE

Mersi Mr Speaker.

 

MR SPEAKER

Bon nou pa pe antisip Bidze, Bidze pe vini semenn prosenn, apre nou ava swiv par repons and all that.  Onorab Sébastien Pillay.

 

HON SEBASTIEN PILLAY

Mersi Mr Speaker.  Mr Speaker mon ti a kontan demann Minis, prenan kont ki lopital North East Point Home for the Elderly, ler nou regard lakantite servis e fonksyon ki pe mete dan en landrwa, e prezan ou annan sa enteraksyon diferan kalite pasyan, diferan kalite nivo bann endividi, eski Minister pa pe regard en lot kalite plan pou manage sa landrwa, sa area?  Akoz nou confine.  Nou pe met – Lamazorite dimoun ki la i swa bezwen en latansyon en lot dimoun, e konplent ki ou pe gannyen se ki lamazorite bann pasyan i  end up lo bor semen, enn ler,  eksetera.

So ki mannyer nou kapab ed sa bann travayer ki pe travay?   Ki Minister Lasante i mazinen fer, ed sa bann travayer ki pe travay laba, avek bann renovasyon, avek bann sanzman ki pe ganny fer, pou annan en plan maintenance ki pli current?  E pa esper tro bokou letan pou antre kot nou bezwen apre al fer en major maintenance pou ki sa bann travay i ganny fer lo en regular basis.

Akoz laba nou annan dimoun ki nou espekte bann miray pou Sali ;- nou espekte pou annan bann travay ki pou bezwen ganny fer.   So eski zot pe regard dan son management from en health perspective, ki mannyer nou pou manage sa landrwa?  E ki nou pou fer pou nou regard dan – pa zis bann reparasyon ki pou ganny fer lo building, me bann travay ki bezwen ganny fer avek bann landrwa kot bann dimoun i frekante, bann pasyan i frekante?   Mersi Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Zisteman otour nou lorganizasyon otour North East Point – e mon krwar fodre nou realis e nou osi mazin istorik sa landrwa.  Fodre nou rapel ki nou ti annan en lenstiti Fiennes, nou ti annan kot bann dimoun aze ti reste.  I ti en Home ki pou bann dimoun aze, me bezwen ki nou annan in kontinyen evolye.

E letan nou fer sa Regional Home for the Elderly, bann dimoun ki’n ganny plase laba, i enkli en varyete rezidan.  Parmi ou annan bann dimoun ki si ou ti pou servi nou kriter aktyel parey pou bann ladmisyon, pa tou ki ti pou ganny ladmisyon akoz zot annan en serten lotonomi.

Si en dimoun par egzanp i annan kapasite pou li marse en pti pe partou lo li menm, sa dimoun pa neseserman bezwen dan en lenstitisyon.   Rol en lenstitisyon parey, se pou donn en sipor pou en dimoun ki i annan en difikilte mobilite, i annan en problenm pou li fonksyonnen normalman, ki fer li difisil ki petet kot son lakour, kot son fanmir, i pa fezab pou li fer.

E sa i rol fondamantal otour sa Regional Home.  Nou rekonnet ki dan nou sosyete, nou annan en kantite diferan ka, e nou rekonnet osi konman en Gouvernman ki nou pa anvi les en dimoun ki par egzanp, i annan en problenm i napa landrwa reste – en dimoun aze, ki i bezwen nou bezwen donn li en solisyon.  E sa Regional Home ki sa landrwa ki tonm anba Lazans Swen Lasante, i konplemant bann lezot Home ki annan tou bann lezot distrik ki Gouvernman in fer zisteman pou rekonnet sa nesesite pou nou siport bann dimoun aze, e ki annan sa fasilite ki an plis ki sa bann fanmir i kapab ofer.

Mon le nou remarke ki i annan bokou pei se ki pa Gouvernman ki fer sa.  Dan bokou pei se bann Lorganizasyon Lasosyete Sivil se menm bann konpannyen ki fer.  E Sesel nou osi ouver laport ki si i annan dimoun ki anvi fer sa lo en baz komersyal, me byensir an respektan serten standar, ki i en keksoz ki kapab fer.  Nou realite North East Point se ki nou annan bann ka bann dimoun ki otononm, ki annan en kantite kapasite lo zot menm, me nou annan dimoun ki zot bezwen en swen ki pli entansif zot petet zot lo en lili, zot pa kapab marse.  I annan bann difikilte i annan ki annan serten mobilite, me ki bezwen led ;- par egzanp pou zot bennyen, pou zot fer par egzanp serten keksoz lo zot menm.

E se pou sa nou annan dimoun ki annan problenm vizyon.  I annan dimoun ki annan lezot dezabilite, asosye osi avek zot laz.  E sa landrwa i permet nou donn sa bann dimoun en serten dignité.  En serten sipor ki si kekfwa zot pa ti pou gannyen kekfwa si zot ti napa en lot landrwa pou ale.

An menm tan nou alor sa i al lorizin sa landrwa.  Sa landrwa ti zis en Home pou dimoun aze.  An pratik nou pe bezwen fer li vin en sant pou Geriatric Care;- savedir pou sipor e swen pou bann dimoun aze, baze lo tou bann bezwen medikal ki zot annan.  E nou re organizasyon otour North East Point, enkli atraver sa renovasyon, se pou zisteman regard sa dan en fason konpreansiv.  Akoz nou annan dan sa menm lokasyon, nou annan Regional Home for the Elderly.  Nou annan rehabilitation ward nou annan nou physiatric ward kot nou pasyan ki annan bann defi, ki annan difikilte mantal, ki zot baze la osi.  E nou annan osi nou hospice ki ofer palliative care.   Letan ou regard tou sa kalite servis ki disponib dan sa sant, nou anvi aforsi li atraver sa swen medikal ki laba e sa i enkli ranforsi lekip dokter ki laba ;- annan dokter ki baze – i annan bann dokter ki deza baze laba a plen tan, me annan en lekip dokter ki pli for a long term e ki asir sipervizyon swen medikal tou sa  bann dimoun laba.

Nou pe osi fer formasyon pli aprofondi zisteman avek Lasosyasyon Alzheimers nou fer en formasyon resaman Laswed, kot nou anvoy plizyer nou bann travayer Laswed pou fer formasyon lo lafason ki swen i ganny fer parmi bann dimoun aze – enkli bann dimoun ki annan problenm  parey alzheimers, oubyen menm lezot problenm asosye avek lavi lavyeyes.

Alor avek sa reorganizasyon nou sant North East Point, avek sa renovasyon ki pou ganny fer e avek sa ranforsman formasyon e partenarya ki nou annan avek lasosyete sivil nou pe revwar misyon sa landrwa e son rol ki i zwe dan nou sistenm lasante.  Mersi Mr Speaker e mersi Onorab.

 

MR SPEAKER

Mersi Minis.  Onorab Pillay.

 

HON SEBASTIEN PILLAY

Mersi Mr Speaker.  Zis en dernyen pti kestyon en pti presizyon.  Prenan kont bann dimoun ki travay dan sa avek tou sa bann servis dan sa landrwa, zot dan en lanvironnman ase konzeste, eski Minister Lasante in konsider war zot konman en kad travayer ki provide en servis spesifik?  E prenan kont spesifisite sa travay ki zot in fer, eski Minister Lasante in osi mazinen ki nou bezwen renumerate spesifisite sa travay ki zot fer?

Akoz par egzanp mon konnen i annan diferan spesifisite dan Minister Lasante, eski nou pe travay pou nou regard spesifisite bann louvraz, e difikilte bann dimoun i annan, ler zot pe travay.  Akoz ler nou pou’n fer sa renovasyon ki nou pou bezwen sa bann dimoun ankor pou kapab delivre sa servis.  So nou bezwen regarde ki nou kit zot dan sa servis pou zot kapab kontinyen donn sa care ki neseser.  Mersi Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Wi zisteman atraver sa bann diferan formasyon ki nou pe fer, nou pe rekonnet sa bann talan, sa bann konpetans kle,  ki sa bann dimoun i bezwen pou travay dan sa landrwa.  Kot i mars avek son reminerasyon, deza dan Scheme of Service i annan en location inducement allowance ki pou bann dimoun ki travay dan sa bann landrwa.  Me nou konnen ki nou bezwen revwar osi – akoz nou annan sa difikilte pou nou rekrit dimoun pou nou travay dan sa milye, e asosye avek sa formasyon spesifik ki sa bann dimoun i bezwen, pou kontinyen etidye bann fason atraver bann Scheme of Service ki nou kapab fasilit nou kapab rekonnet e rekonpans bann dimoun ki pe fer en louvraz spesifik dan sa landrwa.

Mon’n bliye mansyonnen Mr Speaker e mon’n ganny rapel par Dr Reginald ki nou osi anliny avek sa renovasyon ek sa travay ki pe fer North East Point, pou annan osi en Halfway Home, ki pou ganny konstrir dan menm landrwa.  E sa i zisteman pou adres sa konsern pou bann dimoun ki tanporerman petet bezwen en soutyen pou zot vye paran aze ki bezwen en landrwa, oubyen pou bann dimoun ki bezwen en dimoun par egzanp ki annan problenm psikyatrik me ki pe reste avek fanmir, me ki parfwa i bezwen reste dan en landrwa sekirize pandan en serten peryod.  Mersi Mr Speaker e mersi Onorab.

 

MR SPEAKER

Mersi Minis.  Nou’n ariv a lafen sesyon kestyon pou Minis Adam.  Minis oule azout  keksoz?  Go ahead.

 

MINISTER JEAN-PAUL ADAM

Mersi bokou Mr Speaker.  Non mon ti annan serten presizyon ki mon pa ti ankor klarifye bomaten ki konsern sirtou bann statistik.  Avek ou permisyon petet mon a zis donnen.

 

MR SPEAKER

Yes go ahead.

 

MINISTER JEAN-PAUL ADAM

Mersi Mr Speaker.  Nou ti koz lo lakantite aborsyon avortman, e mon krwar i vreman enportan ki mon donn sa bann sif, akoz i montre en pti pe bann defi ki nou annan dan nou sosyete.   E pou nou eksplike ankor ki diferans en avortman an term medikal oubyen aborsyon, se en aborsyon i kouver tou lansentman ki pa ariv a son term pou en rezon ou en lot e ki ganny enteronpe.  Sa i kapab par rezon en pert i kapab osi par rezon enterferans, e i annan osi ladan i annan sa ki nou apel sa ki bann term medikal bann termination pregnancy, ki letan sa i en sa loperasyon oubyen sa lentervansyon pou rezon medikal, akoz sa lansentman pou anmenn en risk swa pou sa manman swa pou sa zanfan.

E total pou 2017 dan lakantite aborsyon ti 551.

Pou 2018 ti 473.  Alor ladan si nou pran 2018 lakantite ki ti en termination pregnancy;- savedir kot ti annan lentervansyon medikal ti zis par lao 80 pou 2018.  Alor la gran mazorite i bann pert oubyen bann lezot lensidan ki kapab asosye avek diferan keksoz.  Nou ti koze bomaten lo problenm lenterferans.  Dan bokou ka nou pa pou konnen absoliman pou kapab dir i annan lenterferans.  Me si mon pran bann sif 2018 i annan o mwen 10 ka ki ti enfekte, ti bann aborsyon ki apre sa bann dimoun ti aport lopital avek lenfeksyon e la probabilite dan en ka koumsa se ki konsern lenterferans.

I kapab annan plis ki sa me i annan 10 ka kot probabilite i vreman o.  E lefe ki nou pe war sa lakantite lavortman ki tre o i demontre dan nou sosyete ki nou annan bokou zefor pou nou fer otour lasante reprodiktiv, ki nou bezwen asir disponibilite kontrasepsyon;- ki nou bezwen annan en sansibilizasyon tre for parmi nou bann zenn, parmi nou bann zanfan, otour lafason pou adres sa kestyon seksyalite, sa kestyon reproductive health e zot osi zot akse avek kontrasepsyon.

Lot eleman ki mon ava tous lo la tre briyevman Mr Speaker, akoz Onorab Henrie ti osi demann otour sant lasante La Riviere Anglaise.  E an 2017 nou ti fer en Patient Safety survey e en Service Availability Readiness survey ki ti kouver tou bann sant lasante gouvernmantal, i ti osi kouver plizyer bann sant lasante dan sekter prive.  Sa survey ti regard  sa ki nou dir patient safety;- savedir lafason ki zot bann protokol i ganny swiv, pou pli byen protez sa pasyan.  E osi ki bann servis i disponib e i bann servis ki koresponn avek latant sa bann dimoun.  Savedir i annan en eleman satisfaksyon ladan me sa ranking pa zis satisfaksyon. i tou.

E English River ti sorti 5enm nasyonalman e ti pli bon ki la gran mazorite bann klinik prive.  Annefe ti annan zis en klinik prive par lao li dan premye 5.  Mersi Mr Speaker e mersi Onorab.

 

MR SPEAKER

Mersi Minis pou donn nou sa bann lenformasyon ekstra ki bann Manm ti pe rode bomaten.   Bon avek sa mon ti a kontan remersi ou Minis e ou delegasyon Dr Reginald, Dr Henriette, Dr Louange e Mr Marthy Vidot e nou ava eskiz ou avek ou delegasyon parmi nou.  Minister.

 

(MINISTER ADAM AND HIS DELEGATION WAS EXCUSED FROM THE HOUSE)

 

 

MR SPEAKER

Bon nou ava kontinyen nou travay e nou pe bouz lo Mosyon ki lo Order Paper e nou pou al lo 2enm Mosyon.  E zis pou fer rapel ki yer avek bann deba lo kanser, nou ti move 3enm Mosyon deswit ki ti swiv sa stetment ki ti enkli bann lenteraksyon, e la nou pou al lo e la nou pou al lo 2enm Mosyon ki pe ganny move par Onorab Wavel Ramkalawan.  Mon ava donn ou laparol Onorab pou prezant ou kestyon.

 

HON WAVEL RAMKALAWAN

Mersi bokou Mr Speaker.  Mr Speaker Mosyon ki mon pe met devan Lasanble i lir koumsa: Sa Lasanble i demande ki Gouvernman ki propoz nouvo regilasyon ki ava asire ki biznes Seselwa i ganny proteze, afen ki plis larzan i reste dan lekonomi e plis Seselwa i ganny sans fer biznes e ganny lanplwa.  Mr Speaker byensir letan nou regard sa Mosyon ou pou war i annan serten sa mo kle dan sa e parmi bann mo kle i annan sa mo ‘’biznes Seselwa’’ i annan sa mo ‘’proteze’’ i annan sa mo ‘’plis larzan’’ ‘’lekonomi Sesel’’ ‘’Seselwa ganny sans fer biznes e ganny lanplwa.’’

Mr Speaker rezon ki mon’n anmenn sa Mosyon devan Lasanble, se parske ozordi mon plis ki sir ki nou ki Manm nou sa Lasanble, nou ganny aprose par diferan dimoun e sa bann dimoun ki apros nou se prensipalman bann businessman, bann Seselwa ki anvi antre dan biznes ;- oubyen bann Seselwa ki deza dan biznes.  E letan zot koz avek nou se prensipalman pou rod nou sipor.  Zot pe war ki biznes Seselwa i ganny met de-kote e ki privilez ek lavantaz i vin plis pou bann etranze.  Zot santi ki bokou bann biznes ki Seselwa i ladan i a pe ganny bann challenge par bann etranze.  E dousman i vin pli difisil pou en Seselwa fer biznes ki pou en etranze fer biznes.

E byensir Mr Speaker letan Seselwa i koz avek nou lo sa bann diferan problenm nou konman en Lasanble nou konman bann dirizan dan sa pei, nou ganny demande pou nou koz lo la e pou nou pran aksyon.   Akoz nou pou bezwen koz lo la premyerman?  Nou bezwen koz lo la pou plis dimoun i donn zot pwennvi.  Plis dimoun i met nou okouran lo kwa egzakteman ki pe arive, e dezyenmman nou bezwen pran aksyon ;- aksyon ki fer ki nou Seselwa, nou biznes Seselwa i ava ganny proteze e letan nou pe koz protez  biznes Seselwa, nou pe ko zed en frer avek en ser, pou li kapab avanse dan lavi, pou li kapab ganny en bout dipen ;- me non selman pou li ganny en bout dipen, pou ki li a son tour i kapab fer en lot fer en lot ser ki reprezant bann lezot son fanmir pou ki zot osi tou zot ganny en bout dipen.

Me Mr Speaker letan nou pe koz biznes Seselwa, nou a pe fer osi koz fer sir ki plis larzan i reste dan lekonomi Sesel.  E byensir letan nou koz lo nou lekonomi, nou konnen ki poudir letan larzan i ganny zenere par Seselwa, zot pran zot larzan zot met dan labank Sesel premyerman, e i zot larzan sa roupi ki zot gannyen i reste an Roupi dan labank Seselwa ziska ki petet i annan serten keksoz ki zot bezwen aste aletranze oubyen zot bezwen vwayaze.  E se a sa moman ki sa larzan sa Roupi i ganny konverti pou li vin Dolar.

Me aprezan Mr Speaker letan nou pou regard son lot kote, nou pou war serten keksoz nou pou war ki en etranze oubyen en biznes etranze ki vin Sesel, e ki fer biznes dan nou pei, li pou li prensipalman sa roupi ki i gannyen atraver son Kontra ki i fer atraver sa servis ki i rann sa Roupi i otomatikman ganny konverti an Dolar e apre sa Roupi ki’n vin Dolar i pran larout e i ganny anmennen dan en lot pei sa se bann depandan lo nasyonalite sa bann dimoun.

Parske Mr Speaker i annan en keksoz senp ki fodre pa neseser nou en syantis oubyen nou en gran malen pou nou konnen, me keksoz senp, sa travayer ki vin travay Sesel, i vin travay pou li nouri son fanmir ki  in kit deryer dan son pei.   E alor i toutafe normal ki i a pe rod meyer lavi ,e alors letan i pe rod meyer lavi sa larzan i ganny konverti e apre sa, sa larzan i al aletranze.

Mr Speaker me nou bezwen gard antet ki tou dimoun i fer deboury.  Letan lontan ler Seselwa sorti Mahe oubyen Praslin oubyen La Digue, ti al travay lo bann zil ki zot ti al rod fer?  Zot ti al travay lo zil pou zot fer en lekonomi, pou zot anmas larzan afen ki pli tar zot ti ava kapab avek sa larzan ki zot tin anmase, zot ti ava kapab retourn Mahe.  Si zot ti deza annan en bout later zot ti ava kapab fer zot lakaz, oubyen si zot ti napa en bout later pou zot aste en bout later.

E la ankor enn fwa nou tou dan sa Lasanble en kantite nou konn nou bann granmoun ki’n pas dan sa leksperyans, e se ki gras a sa travay ki zot in al fer lo zil, ki ozordi zot annan en bout later, oubyen zot annan zot gro rezidans lo zil prensipal kot zot reste.

Me la nou osi war ki Mr Speaker dan listwar nou pei, ti annan en moman kot ti annan bokou Seselwa ki ti al travay deor prensipalman Berout avek Jordan.  E ankor enn fwa sa bann Seselwa ki ti al travay avek sa bann diferan fanmir zot ti annan zot zis en bi, sete pou zot anmas zot larzan laba anvoy pou zot fanmir isi, pou ki zot fanmir ti ava kapab ganny en meyer lavi e an menm tan ki zot ti pe fer zot savings zot ti pe mazin en meyer lavi pou zot menm.

Alor Mr Speaker sa baz i kler li.  Nou pa kapab konteste sa baz.  E ozordi nou rekonnet ki poudir i annan bokou Seselwa ki ankor pe travay aletranze.  Konbyen nou letan nou vizit Dubai en landrwa kot bokou Seselwa i al vizite kekfwa ou pe pase dan en mall ou zwenn en Seselwa, ou demann li ‘’be ou lo vakans?’’ I dir  ek ou ‘’non, mon pe travay isi.’’ Swa i a pe travay avek en airline ;- swa i a pe travay avek en labank;- swa i dan lasirans;- swa i dan  en laboutik.  I annan kantite keksoz.  E la par egzanp letan nou detrwa lannen pase letan nou ti tou Sesel ti soke, letan Mr Confait en Seselwa Marcus ki ti lo FLY DUBAI sa avyon ki ti kraze Rostov-on-don ki Mr Speaker Onorab De Commarmond, Onorab Afif ek mwan menm nou’n ganny sa privilez pou nou vizit sa moniman ki’n ganny mete an memwar, tou sa bann dimoun ki ti mor, i vreman ras ker letan ou trouv non sa garson Seselwa, ekri dan langaz Larisi ki’n perdi son lavi la devan  sa anba Erport kot sa avyon ti kraze.

Me kwa ki i ti al fer?  Akoz ki sa Seselwa sorti Mont Buxton ti perdi son lavi Rostov-on-don?  Se parske i ti a pe rod lavi.  I ti’n al debourye.  E parey mon’n dir Seselwa ozordi i ankor pe debourye.  Dan preski tou pei i annan bann Seselwa ki a pe debourye.   E parfwa tanzantan mon dir ti pou kon ki ti pou annan en resansman regarde kote Seselwa i été atraver lemonn, kot i a pe rod deboury.  Me selman Mr Speaker sa Mosyon i pe koz prensipalman lo biznes Seselwa.   E ozordi i annan en keksoz ki pe arive.  E bokou spesyalman bann gran lakonpannyen – bann gran konpannyen konstriksyon, zot pa pe donn Seselwa sa posibilite osi pou li debourye.

Ki nou pe war Mr Speaker?  Nou pe war ki i annan bann gro lakonpannyen ki letan zot ariv en serten groser, zot deside kas zot lakonpannyen.  Sa i enn bann fason pou pa pey sa kantite taks ki zot devret pe peye, alor zot kas zot lakonpannyen. Me aprezan dan kas zot bann lakonpannyen, nou osi trouve ki zot fer bann lakonpannyen ki met en bar, ki met en baraz pou bann lezot pti biznes Seselwa.  Par egzanp letan en gro batiman pe ganny fer, i annan diferan Kontra ki en pti biznes Seselwa i kapab gannyen.  Kekfwa li sa pti biznes Seselwa li i napa license No.1 me selman i annan license pou met aircon; i annan en license plonber; i annan en license elektrisyen, e i posib ki i annan ankor enn de bann lezot kategori anba ki zot tonbe.

Me aprezan Mr Speaker sa bann Kontra i pa ganny donnen direkteman a bann pti lakonpannyen Seselwa. Se bann ptipti lakonpannyen ki sa pli gran lakonpannyen in donn nesans, se zot ki donn sa bann biznes, se zot ki ganny sa bann Kontra e alor tou sa larzan i koul dan sa menm larivyer, e tou sa bann larzan finalman i tonm dan en sel losean e sa se bann larzan, bann larzan ki apre i ganny konverti pou li vin Dolar pou li kit  nou pei e pou li ale.

Prezan Mr Speaker i annan en lot sityasyon osi tou ki konsernan an relasyon avek nou bann Seselwa ki anvi fer biznes.  Ozordi nou trouve ki serten bann etranze zot pa vin rod en GOP pou zot ganny anplwaye par en lakonpannyen, en biznes Sesel.  Ki zot fer i annan en etranze ki form en lakonpannyen – en lakonpannyen landscaping – en lakonpannyen dan lezot domenn, e aprezan sa Seselwa ki perdi son plas travay oubyen  ki ganny met deor apre sa i trouv son travay ki li i ti a pe fer pe ganny fer par en etranze.

E letan aprezan i al demann kestyon, i fer demars oubyen nou menm nou, nou ed li fer sa demars, ki nou ganny dir?  Nou ganny dir non.  Seselwa pa’n ganny pouse pou ganny ranplase par en etranze.  Sa lotel i annan en Kontra avek en lakonpannyen etranze.  E la nou ti war sa par egzanp Bayan Tree. Bayan Tree ti annan Seselwa ki ti pe travay zot ti ganny fer redundant e sa prosesis li menm li ti en prosesis ki ti annan manboulouk ladan, me selman deswit apre ki sa bann Seselwa ti’n perdi son plas travay e zot ti menm vin isi tou kot Lasanble Nasyonal, sa ki ti arive, nou ti war bann etranze ki pe pran zot plas.  E letan nou ti demann kestyon zot ti dir non. Nou ti demann kestyon isi dan Lasanble, e aprezan ti dir nonm  se pa etranze ki’n vin pran plas Seselwa.  Me sa lotel i annan en Kontra avek en lakonpannyen ki anploy etranze.

Mr Speaker sa vreman i mal.  I mal akoz tout fason sa Roupi i pran lavol apre ki in mertamofoze   pou li vin Dolar.  E lekel ki perdi?  Se Sesel ki perdi.  Alor letan  mon pe met sa Mosyon devan, mon pe demande ki nou osi tou, nou ede pou ki i annan nouvo regilasyon.  E nouvo regilasyon ki ava permet pou nou gard maksimonm larzan dan nou pei e pou met divan anba lezel Seselwa.

E Mr Speaker wi mon met lanfaz lo met divan anba lezel Seselwa.  Biznes Seselwa.  Travayer Seselwa.  Kontrakter Seselwa annou fer sir ki dan tou bann gro proze ki nou pei i antreprann, i annan Seselwa ki osi benefisye.  I pa kapab annan en sityasyon kot ozordi letan i annan gro bout, nou war zis etranze ki pe manze.  E Mr Speaker letan mon pe met lanfaz lo la, mon pe osi met lanfaz lo plis reveni ki ganny kolekte par SRC.  E atraver koleksyon tou sa reveni, i ava fer ki nou pei li menm, nou pep i ava kapab ganny en morso dan sa larises Nasyonal.

E Mr Speaker nou tou mon krwar ler nou regarde – espesyalman nou isi dan sa Lasanble, ozordi mon ti ava kontan fer en lobzervasyon, e mon ti ava kontan zot osi tou si zot in obzerv li byen bon, me si zot pa ankor obzerv li mon a demann zot fer sa lobzervasyon.  Fer sa lobzervasyon pandan ler repa ant midi avek 1er, zot pou war en kantite etranze pe marse sorti la pre kot IOT in fer sa nouvo batiman kot zot pe met dimoun reste, ou pou war en kantite etranze dan bomaten me osi pandan ler manze, ki pe marse sorti la pou al kot stasyon SBC pe ganny konstri Union Vale.

E si zot fer en lot obzervasyon, regarde letan travay i konmanse dan bomaten, e letan travay i terminen aswar, konbyen Seselwa ki sorti dan sa sit travay?  Larepons i zero.  Sa ki mwan  mon’n obzerve si zot in obzerv otreman ti ava bon.

Alor Mr Speaker se be eski Seselwa fanmir, Seselwa pa pou ganny en manze dan sa konstriksyon nouvo stasyon SBC?  E mon plis ki sir ki nou tou ki la letan mon pe regard dan bann lezot batiman well lezot batiman ki’n ganny  konstri oubyen ki ankor an konstriksyon, nou pou war Seselwa pe vin en ras an vwa disparisyon lo bann sit konstriksyon.

Nou war etranze ki pe fer tou travay.  E nou war ki nou bann kontrakter Seselwa, nou bann businessman Seselwa, nou bann profesyonnel Seselwa, zot pe ganny met de-kote e zot pa pe gannyen – zot pa pe ganny nanryen ladan.

Alor  mwan Mr Speaker mon pe dir be annou met plis regilasyon ki vin pli serye.  Regilasyon ki ava asire ki annan plis Seselwa ki kapab ganny en 5sou – ki kapab ganny en kas dan sa bann biznes, e ki atraver sa nou Seselwa nou ava pe fer nou lekonomi grandi.  E la Mr Speaker letan nou pe regard bann regilasyon, mon krwar ki premyerman enn bann danze ki nou fer fas avek Sesel, se bann nasyonalite ki nou’n donnen.  Nou’n zis donn nasyonalite gos/drwat e ozordi sa bann dimoun ki’n ganny sa nasyonalite zot form en lakonpannyen e atraver sa lakonpannyen ki zot formen, se zot ki ganny sa bann pti biznes.

E la mon pou dir klerman, annou regard par egzanp bann pti lakonpannyen endyen – bann dimoun ki bann dimoun avek lorizin endyen ki’n ganny nou nasyonalite, si nou ti pou al kote licensing nou ti pou war sa kantite lakonpannyen – bann pti lakonpannyen ki’n ganny formen.  E nou, nou menm noum spesyalman bann nou ki pli vye, nou pou war bann dimoun ki ti vin Sesel pou travay avek en lakonpannyen.  Kwa ki apel Laxmanbhai, kwa ki apel bann lezot Vijay ensidswit;- well Vijay li menm li i ti vin konman enzenyer avek Laxmanbhai apre sa in formen – e nou pou war sa bann dimoun ki ti a pe travay avek en gro lakonpannyen, e la ozordi zot annan zot prop lakonpannyen.  E letan zot annan zot prop lakonpannyen, nou war ki mannyer zot met zot prop non ki’n arive zot in ganny zot prop nasyonalite.  E letan zot in ganny nasyonalite en pti kou zot in ganny zot in kite avek sa lakonpannyen ki zot ti pe travay e zot in al form zot prop lakonpannyen.

E Mr Speaker sa ki Seselwa i osi konnen, se ki sa bann dimoun i koz menm langaz, e alor letan zot koz menm langaz i fasil pou zot ganny sa bann pti biznes ;- pou zot ganny sa bann Kontra pou zot met air condition, ganny bann Kontra pou zot fer plonber, ganny bann Kontra pou zot fer lezot keksoz, e finalman Seselwa i ganny met de-kote sa bann dimoun nou bann nouvo Seselwa se zot ki benefisye.  Me selman sa ki enteresan se ki menm sa bann nouvo Seselwa Mr Speaker sa larzan ki zot gannyen, sa larzan ki zot fer bon zot ava fer en batiman e sa plis larzan ki zot gannyen, zot pe anvoy sa larzan dan zot pei aletranze.  E letan ou fer levanter ti pou bon ankor enn fwa pou fer en letid ladan pou regarde, sa bann dimoun al regard dan zot vilaz kot zot sorti ki mannyer zot in debourye laba.

I annan ki annan batiman 4 letaz, 5 letaz.  I annan ki annan lekol, i annan ki annan lenstitisyon skoler, ensidswit dan zot pei orizinal.  Alor Mr Speaker eski pa i ler pou nou konman en pei non selman pou nou reveye pou nou regarde ki mannyer reveni dan nou pei i ganny sorti e i zis al aletranze.

E la mon ti ava zis an pasan pou osi azoute Mr Speaker pou nou regarde ki mannyer i annan en kantite money changers, bann money changers se pa pou bann Seselwa sa bann biznes.  En kantite money changers se zisteman asosye avek sa bann dimoun, asosye avek bann etranze.  E nou’n deza koz lo la e ki mannyer mon konpran i annan bann ka devan Labank Santral ki pe fer lenvestigasyon kot i annan bann non – zot servi bann money changers i annan serten kot si en dimoun avek en non avek en serten nasyonalite i vini in sanz larzan en fwa, me parfwa zot menm servi sa bann non san laprouvasyon sa dimoun pou zot fer larzan kit pei e ale.

I ti ava enteresan pou nou konnen ki kantite larzan ki pe kit pei, ki pe al aletranze.  Alor Mr Speaker  mwan mon krwar ki in ler pou ki i annan keksoz, i annan bann regilasyon pli strik ;- kot sa bann zafer biznes ki rezerve pou Seselwa i vreman rezerve pou Seselwa.  Parske sa bann zafer donn nasyonalite apre sa ou trouv en dimoun ki ganny nasyonalite li i a pe run en pti lotel ki sipoze rezerve pou Seselwa.  E letan ou poz kestyon ou dekouver ki poudir sa dimoun in ganny nasyonalite.  E alors i en Seselwa i pe fer sa ki ou konman Seselwa ou devret kapab fer.

Mon krwar Mr Speaker i annan en kantite landrwa, kot nou kapab annan bann regilasyon ki vreman strik e la mon ti ava menm koz lo lakantite larzan ki pe kit nou pei, me la osi tou nou ti ava kapab annan bann regilasyon ki annan bann pli gran kontrol lo lakantite larzan ki pe kit nou pei – bann gro sonm. e pou nou ankor enn fwa balanse.  Afen ki nou lekonomi i pa ava pez son lagorz pa ava sek me ki nou lekonomi, i ava pe vreman grandi.  E atraver sa nou pei i ava ganny en meyer lavi.  E ki dan tou sa bann gro proze e dan tou sa bann gro proze, nou fer sir ki bann pti biznes Seselwa zot osi tou zot ganny enkli ladan.

Alor Mr Speaker mon krwar ki i enportan sa.  I enportan ki nou ensiste.  Me an menm tan osi, mon krwar ki dan sa bann regilasyon, pou nou kapab ed nou bann etidyan – nou bann Seselwa pou zot kapab osi debourye, egzakteman parey ki  sa bann dimoun ki’n vin avek en lakonpannyen apre sa zot in debourye e zot in kapab form en lakonpannyen,  mwan mon krwar ki i bezwen annan regilasyon, ki ensiste ki sa bann gro lakonpannyen zot train nou bann Seselwa.  Kot par egzanp sa bann gro lakonpannyen konstriksyon, zot donn serten kantite erdtan tou le semenn, pou zot train nou bann etidyan ki dan lekol konstriksyon.  Ki zot train nou bann etidyan dan bann diferan lekspertiz, e ki atraver sa nou Seselwa i ava kapab take over e zot ava kapab vreman delivre lo sa standar.

Parske gran leskiz ki zot donnen parfwa, se ki Seselwa pa travay lo sa nivo ki zot, zot pe demande, be alor zot ava train nou bann Seselwa e nou bann Seselwa i ava train pou – i ava train i ava ganny sa training pou li kapab delivre lo sa nivo.  E an menm tan osi bann prosedir ki ava fer ki, ozordi letan nou tann Design and Build i vedir prensipalman zis bann gro biznes etranze.

Be  mwan mon krwar ki in ler pou sa Design and Build ki nou bann Seselwa i ganny en priyorite.  Nou bann enzenyer lokal, nou bann arsitek lokal, nou bann dimoun ki’n al train pou zot kapab fer bann plan, bann planifikasyon irben  zot osi tou zot ganny sans pou zot antre ladan.

Mr Speaker mon pe dir tousala akoz mon krwar ki dousman, dousman si nou pa fer atansyon Seselwa pou vreman vin etranze dan son pei.  E  mwan mon pa anvi ki sa i arive.  Mon anvi o kontrer war ki Seselwa i vreman pran kontrol son desten.  I vreman debout for dan son pei, e ki atraver sa nou ranmas plis reveni, me non selman ki nou pei i anmas plis reveni, me ki larises nou pei i ganny partaze avek tou Seselwa.  E tou sa bann issues ki nou’n koze zis sa semenn, ki nou ava kapab osi atak zot e fer zot debourye.

Alor Mr Speaker mon konnen ki poudir diferan Manm i annan diferan propozisyon.   Mwan mon’n sey met sa fondasyon.  E atraver nou bann kontribisyon, mon krwar ki konman bann dirizan dan sa pei, ki kontan letan nou war nou pep, letan nou Seselwa pe debourye, mon krwar ki tou sa i ava ed nou pou nou kapab bouz devan.

Mr Speaker mon demande ki Lasanble i konsider sa Mosyon e ki nou aprouv li e ki nou ava kapab trouv aksyon pou nou bouz devan.  Mersi bokou Mr Speaker.

 

MR SPEAKER

Mersi Onorab Ramkalawan.  Bon Mosyon in ganny prezante okenn Manm ki segonde.  Yes Onorab Henrie.

 

HON GERVAIS HENRIE

Mersi Mr Speaker.  Bonn apre midi tou dimoun.  Mon ti ava kontan segonn sa Mosyon e dir de pti mo lo la.

 

MR SPEAKER

Mersi Onorab Henrie.  Mosyon in ganny segonde e deba i ouver lo la.  Mon ava donn laparol Onorab Henrie.

 

HON GERVAIS HENRIE

Mersi Mr Speaker.  Mr Speaker 3mwan pase en group kontrakter Seselwa ti fer en lapel piblik avek Gouvernman ler mon pe dir Gouvernman, se a dir Brans Egzekitiv ki zot fer plis e zot fer li pli fasil pou bann lakonpannyen konstriksyon ki son propriyeter Seselwa i ganny plis Kontra avek bann antite Leta.

Sa demann zot ti fer li atraver en petisyon sinyen par plis ki 30 kontrakter ki klas 2, 3 avek 4.  Dapre demann sa bann kontrakter, Kontra piblik ki pibliye par Property Management Company;- savedir PMC, Land Transport Authority SLTA, Minister Gouvernman Lokal e osi Minister Ledikasyon i merit rezerve pou Seselwa selman.

Sa size in leve akoz zot dir ki bann lakonpannyen ki pou bann etranze, e zot in single out bann Endyen e osi bann Bangladeshi, zot dir i pe pran laplipar louvraz dan lendistri konstriksyon, ki anfet i pe grosi dan pei.  Alor zot dir ki par konsekans bokou kontrakter Seselwa ki zot biznes i pli ptipti souvan zot fer fas avek bokou difikilte e menm forse fermen.

E ki zot ti fer sa bann kontrakter, se adres en open letter direkteman avek Prezidan Larepiblik Mr Danny Faure konman son kapasite konman Sef Brans Egzekitif Gouvernman, e osi Minis pou Lanplwa Madanm Myriam Telemaque.  E pou al en pe pli lwen sa bann kontrakter in osi fer en alegasyon ki bokou bann o fonksyonner Gouvernman i enplike dan sa kontrovers.  Zot dir ki sa bann dimoun i kre bann lakonpannyen kot sa bann fonksyonner Gouvernman i bann silent partners, me selman zot bezwen sa bann dimoun akoz i fasilit zot ganny license e pour kwa pa menm Kontra sirtou avek bann antite Gouvernman.

Sa bann Seselwa parey mon dir zot i pa enplike dan loperasyon on a day to day basis zot, zot plito bann silent partners dapre sa bann kontrakter.  Anfet Mr Speaker de legzanp ki in ganny raporte ek mon resaman en dimoun Mont Buxton ki ti pe fer en building lo later konble, ki’n ganny difikilte avek son kontrakter, in eksplik mwan ki mannyer letan i ti al soumet son proze, bann zafer koumsa in ganny bann lasistans ek bann dimoun dan public service i dekouver pli tar ki enn sa bann dimoun ki ti pe advise  kot pou ale i shareholder dan sa lakonpannyen konstriksyon.  Sa i enn.

Dezyenmman en dimoun ki’n akont mwan ki mannyer enn son fanmir ki travay avek en lakonpannyen Endyen isi Sesel, en gran lakonpannyen zot fer li met en lakonpannyen konstriksyon lo li, e li ki i bezwen fer li i zis war en larzan toulezan en gro sonm.  So i annan sa bann keksoz ki nou konman bann community leaders, letan nou koz ek bann dimoun, nou bezwen pran kont poudir sa bann i pa zis alegasyon sa.  ‘’Napa lafimen san dife’’ zot dir.  Non?

Alor ki zot dir sa bann kontrakter dan sa let ouver ki zot in adres Prezidan Larepiblik e menm siny en petisyon ki mon annan en kopi lo mon telefonn sa petisyon, zot pe demann Licensing Authority pou fer lenvestigasyon dan sa bann lakonpannyen avan donn license.  E mon ava dir menm nou annan en Ethics Commission la konmela, ki bann o fonksyonner i bezwen siny en form, parske konman en Nasyon parey loter Mosyon in dir, nou pe fer fas avek en sityasyon reel, ki pe afekte devlopman nou Nasyon e nou lekonomi.  I annan osi largiman ki bann kontrakter i dir, ki sa bann lakonpannyen zot kree bann lakonpannyen konstriksyon avek bann diferan grad license.  E rezon pou sa se ki ler zot soumet zot tender zot kapab ganny met dan klas 3 dan klas 1 dan class 4 e ankor i fer li tre difisil e i limit lespas pou bann kontrakter Seselwa kapab manivre e epanouir.

En lot alegasyon ase seryemki konman Lasanble nou bezwen anvoy en mesaz for avek Brans Egzekitif, dan sa bann zafer alokasyon later lo bann lo later konble, kot zot dir bokou bann etranze natiralize pe ganny preferans.  E semenn pase en dimoun in antre an kontak avek mwan kot in donn mon en legzanp kot en envestiser Beau Vallon ki reste Beau Vallon in perdi en bout later ki malerezman i pa’n kapab devlope pou en pe letan e ki sa in ganny pran avek li e pass on avek en envestiser Endyen.

E sa ki malere se ki parfwa ou antann poudir in annan lenterferans serten politisyen ki’n fasilit sa bann keksoz arive.  E sa i pa byen.  La sa bann alegasyon i kapab outrageous dan limazinasyon bokou dimoun, me  mwan pou mwan mon get li konman en keksoz serye ki nesesit annan en lanket ofisyel pou determin bann fe otour sa bann alegasyon, ki sa plis ki 30 kontrakter in siny en let  pou Prezidan Larepiblik e Minis Lanplwa, pou dir zot be annou get en size tender dan  bann louvraz Gouvernman e osi alokasyon later.

Alor i pa zis en keksoz ki nou pe koze la.  I 30 sinyatir ki pe dir zot pe ganny afekte kontrakter klas 2 ziska 4 – Seselwa, ki pe dir zot pe ganny afekte par en sityasyon dan Sesel ozordi.  Now nou pe koz lo en Mosyon e ladan i annan sa mo ‘’etranze’’ mon konnen sa size pou leve, me enn fwa ki’n ganny nasyonalite ki fer li vini.  Nou pa pe al dan bann size – nou napa en lafreyer etranze nou.  Nou pa pe dir sa.  Nou konsyan nou poudir nou bezwen bann biznes ki own by etranze dan pei.  e nou konsyan benefis ki sa bann etranze ki fer biznes isi i anmennen pou lekonomi.  Zot kre lanplwa zis parey en lot biznes ki pou en Seselwa i fer.  I kre larises dan lekonomi.  Zot pey taks, aste materyo e zot anmenn sa benefis.

Me solman Mr Speaker i en fenomenn atraver lemonn kot bokou pei pe konmans regard sa sityasyon kot etranze i antre e preski dir take over lekonomi.  e sirtou nou konman en Pti Pei  Leta Zil

Nou bezwen konsyan sa. E kestyon i retourn lo ki Gouvernman i kapab fer pou redres keksoz.    E se sa ki Mosyon pe demande.   I pe dir propoze nouvo regilasyon.   Anfet enn bann dernyen pei pou pran en desizon parey se Sid Lafrik apre ki in annan troub laba, akoz bann etranze.   E loportinite biznes. E i annan plizyer pei dan lemonn anfet Sesel nou konnen poudir nou poudir ti deza annan serten regilasyon ki rezerv serten biznes pou Seselwa.  Me apre  enn fwa ki en dimoun i natiralize, i distort sa realite.   E lor Sid Lafrik parey mon’n dir resaman la zot in anonse ki zot pe al pas sa Lalwa ki serten lezot pei  ki serten lezot pei parey Nigeria, Zimbabwe, Ethiopie, Ghana, Tanzania, Bangladesh e menm Pakistan i annan.  Dan sa bann landrwa se ki sekter serten sekter biznes i rezerve pou zot sitwayen.  I annan par egzanp komers.  biznes farmasi par egzanp, zis pou nonm enn de.

E menm dan sa bann sekter zot anpese ki etranze i ganny anploye dan sa bann sekter.  E ozordi zour Mr Speaker enn bann sekter ki letan mon war toulezour dan nou sekter retail komers parske letan mon ti pe grandi mon ti fer mon letid primer Cascade, ti annan en kantite bann laboutik kot Krizer kot Miris, kot Tann Time,  me ti bann Seselwa ki ti annan laboutik, e apre sa ti reste bann biznes fanmir zot  ti pas avek zot zanfan. E   pour mwan ti ava mazinen poudir sa bann biznes ti grandi e ozordi zot ti ava bann gro biznes Seselwa. Me  malerezman sa i pa leka.

E alor letan  nou  pe diskit sa Mosyon i en size en pe i pres avek nou leker, alor i kapab annan en kantite lemosyon pou bann dimoun ki nou koz lo la, me selman nou bezwen get the bigger picture konman bann community leaders, poudir ki kalite Sesel demen nou anvi?  Nou anvi war en Sesel kot Seselwa i vreman annan biznes zot biznes i grosi zot vin bann dimoun tre doue dan sa bann profesyon ki zot pe fer.  E ki zot annan – mon pou zis reponn sa telefonn mon pou met li pou sa dimoun tande poudir mon pe koze dan Lasanble, akoz kanmenm nou dan Lasanble Mardi, Merkredi i ankor still dimoun pa ankor tande poudir nou dan Lasanble.

Alor sa ki mon pe dir Mr Speaker, i ava donn nou en moman pou nou reflesir.  E mon kontan ki sa deba i vin en pe avan en eleksyon Prezidansyel lannen prosen, parske sa Gouvernman ki pou ganny elekte an 2020, i parmi bann refleksyon ki i pou bezwen fer lo nivo Nasyonal kote nou pe anmenn nou pei.  E alor mon pe espekte ki nou ganny bann kontribisyon enteresan.

E  mwan mon krwar poudir i retourn anver regilasyon e regarde kwa ki Gouvernman i kapab fer pou re anmenn en ekilibrasyon dan an term bann sekter ki etranze Seselwa ou Seselwa i kapab envestir.  E osi kot Seselwa etranze i kapab travay pou ki alor i ava anmenn sa epanouisman lo nivo Nasyonal pou sak Seselwa koman  bann endividi.  Sa kontribisyon ki mon ti anvi anmennen Mr Speaker.  Mersi pou ou latansyon.

 

MR SPEAKER

Mersi Onorab Henrie.  Onorab Loizeau eski ou lentervansyon pou long?  I pou long?  Konbyen letan apepre 10minit?  Ok.  Mersi savedir dan sa ka nou ava pran en break e nou ava retournen 4er pou kontinyasyon deba lo Mosyon.

 

 

(BREAK)

 

 

MR SPEAKER

Bon nou ava kontiny nou travay lo deba lo Mosyon ki’n ganny move par Onorab Ramkalawan.  Mon ava donn laparol Onorab Norbert Loizeau.

 

HON NORBERT LOIZEAU

Mersi Mr Speaker.  Bon apre tou dimoun.  Mr Speaker mersi pou ganny sa sans pou koz lo en Mosyon ki vreman enportan.  E mwan konman en dimoun ki’n fofil en pe dan sa domenn konstriksyon e ki konn soufrans serten mon bann frer dan sa domenn spesyalman bann pti kontrakter e mon konpran akoz Mr Ramkalawan in met sa Mosyon koumsa, kot i pe propoz bann regilasyon kot pou asire ki biznes Seselwa i ganny proteze afen ki larzan i reste dan nou pei.

Mr Speaker mon anvi siport sa Mosyon, akoz  mwan mon santi ki nou pti biznes Seselwa, pa pe ganny sans parfwa pou zot kapab ganny serten louvraz parey bann gro kontrakter etranze i gannyen.  Mr Speaker ozordi i annan bann gro kontrakter ki pe mazin zis pou zot;- spesyalman bann kontrakter konstriksyon etranze bann ki gran.  Bokou fwa zot fer sir ki sa bann travay ki Seselwa i ganny fer.  Etranze i ganny priyorite lo la fer vini etranze lo la.

Mr Speaker mwan, mon’n partisip dan serten travay bann letan ki mon pa ti dan Lasanble, mon ti pe sey debourye mwan osi.  Kot serten bann gro kontrakter ki ti pe antreprann sa konstriksyon.   Pandan sa bann letan i pa vedir bann kontrakter ki ti anvi ki mwan avek mon bann zwer ki nou ti pe fer sa travay ansanm,  vin fer sa travay.  Me plito sa lenvestiser ki ti ensiste ki nou ki vin fer sa kategori louvraz, ki annan dan sa Kontra.  Se pa zot sa bann kontrakter sa bann gro kontrakter.  Si ti zot byen gete nou pa ti pou gannyen sa pti tyak pou nou kapab vin ganny en dipen parey bannla, parey nou, nou kontan dir.

Mr Speaker ozordi i fer lapenn pou war serten travay ki nou Seselwa ti fer, ozordi ou war etranze – travayer etranze.  Mr Speaker ou kapab krwar ki ozordi louvraz penn ozordi dan serten kontrakter konstriksyon, se etranze ki pe penn – Kenyan, Nepale, Endyen, pourtan Mr Speaker nou annan painter Sesel nou.  Ozordi zot pa pe gannyen sa sans, akoz serten sa kontrakter i trouve ki zot pri i en pti pe o.  Pourtan sa Kontra ki sa kontrakter i gannyen i en Kontra ki kout en ta larzan e sa pti sonm ki ti pou donn sa painter oubyen sa plonber Seselwa, i peanuts konm dir Angle.  Me selman zot, zot toultan le plis alors zot sakrifye sa bann travayer Seselwa, pou anmenn sa bann etranze.  Ozordi dan Sesel Mr Speaker, si nou get en pe partou – la mon pou al lo bann biznes, ki vann bann lekipman elektronik parey fridge, aircon, televizyon, ozordi zot annan zot prop teknisyen etranze.  Pourtan i annan bann pti biznes Seselwa dan sa domenn isi Sesel.  Mr Speaker  mwan mon fofile mon konn tou.  Mon zwenn zot toulezour mon pran kontak ek zot.

I annan Mr Speaker me zot pa ganny sans. Zot pa ganny sans.  I annan konpannyen Samsung ki fer vini Samsung.  Mon krwar en lakonpannyen mon krwar Ramani and Company owner sa lakonpannyen.  Mon pa konnen si i annan zofisye dan Gouvernman petet ki annan share ladan, mon pa konnen mon tande posib i kapab annan.  Be zot tou zot teknisyen se bann Endyen.  Pourtan Mr Speaker sa bann lekipman elektronik ki zot fer vini se bann lekipman ki fasil travay lo la.  I fully electronics.  Parfwa zis vini sanz en pti board teste en pti isi laba sanze e zot anmenn etranze.

Nou Seselwa nou kapab fer Mr Speaker.   Mwan mon fer sa Mr Speaker.  Mon kapab fer sa, menm si mon pa pe tro pratik li ozordi.  Ozordi nou bann zenn nou bann zenn ki sorti SIT bannla lo kote teknolozi, bannla i sharp.  I zot letan la e tou sa bann gadget ki vini i fully electronic parey mon’n dir, i fasil.  Akoz ki nou bezwen etranze nou annan lekol SIT, SIT i prodwir kwa li?  Ners? I prodwir teknisyen.  Eski nou pa kapab pran en pe sa bann manrmay, atas zot anvoy zot en training petet sa brand zot a konpran laba i demande ki en teknisyen spesyalize lo sa brand pou vin deal avek?  I pou arive. Anvoy en Seselwa laba, i ava aprann.  I a vini i a take on i ava ed bann lezot frer Seselwa ki a vin travay ansanm pou nou kapab fer bouze.

Mr Speaker ozordi tousala nou war etranze.  Teknisyen etranze ki pe al aranz fridge Samsung ki pe al aranz aircon Samsung televizyon.  Pep Seselwa nou napa? Napa etidyan ki fer elektronik?  Dan mon letan ti annan.  Ozordi Mr Speaker mon a nonm ou kantite dimoun ki fer sa kalite travay ki ozordi zot in plifere zis arete, akoz zot pa pe ganny travay, akoz zisteman akoz sa bann kalite pratik koumsa.  Ozordi elektrisyen, elektrisyen i en travay ki enteresan.  I en travay ki isi Sesel lontan nou ti annan bokou dimoun ki ti kontan fer sa travay, e nou ankor still annan sa bann dimoun ki ti ankor pe fer sa travay.

Me ozordi laplipar nou bann elektrisyen pe plito konsantre lo bann dan prive kot en pti lakaz prive, fer en pti bout fer en pti lazistaz pou en dimoun.  Akoz dan bann gro kontra ki bann gro lakonpannyen i gannyen, zot pa fit in ladan.  Zot pa gannyen.  Zot pa gannyen senpleman, set akoz serten sa bann gro kontrakter.  Ki zot fer?  Zot fer vini en enzenyer Endyen.  Laplipar di-tan se bann enzenyer Endyen ki vini akoz kot PUC i annan en bon pe bann enzenyer Endyen ki travay PUC alor zot zanmi i fasil pou bann keksoz flow pou zot kapab ganny zot license whatever pou fer.

E apre ki ou war travayer etranze i vini i sipervize par bann enzenyer Endyen.  Seselwa li i ganny kit en kote. E apre sa ki pli vilenn Mr Speaker zot, e  laplipar di-tan i annan enn de sa bann gro kontrakter, zot, zot fer sa travay selman lekel ki siny zot form en lot kontrakter Seselwa laba ki li i pa fer nanryen li i vini dapre groser sa travay ki ou’n fer, li i vini i siny ou form 20mil 25mil, selman pa zot ki’n fer louvraz.  Se sa bann etranze.  Mr Speaker i annan sa pe arive. Mwan  mon’n war mon konnen i annan sa pe arive.

E pourtan Mr Speaker lontan nou ti annan bann lakonpannyen elektrisyen ki ti fer bann gro, gro building.  Ler mon mazinen MEJ Mr Brian Orre, Mr Brian Orre dan son lakonpannyen ti annan mazorite elektrisyen Seselwa. Avan sa bann gro, gro konpannyen etranze i antre, lekel ki ti pe fer tou sa bann travay partou lo tou sa bann building lo Mahe?  MEJ e mazorite son travayer ti Seselwa.  I annan bokou bann manrmay ki ti lekol ek mon politeknik, zot ti al attachment laba, zot in anploye laba e ozordi i annan in kre zot prop pti kontrakter.  E zot pe struggle Mr Speaker.  Zot pa pe gannyen louvraz, akoz sa bann kalite manboulouk ki pe arive.  Zot pa pe gannyen.

E bann elektrisyen i telman dan mal ki zot in bezwen kre en lasosyasyon – mon pe koz ek en frer lot zour kot Linro, i pe dir mwan ki zot bezwen kre en lasosyasyon tou bann elektrisyen, pou zot kapab gete Seselwa pou zot kapab gete ki mannyer zot kapab zwenn ansanm, pou zot kapab siport kanmarad, pou zot kapab bouze zot osi dan sa bann keksoz.  E mon siport zot lo la Mr Speaker.

Mr Speaker i annan en keksoz ki pe arive nou pe koz lo konstriksyon si mon koz lo bann domenn konstriksyon refrizerasyon bann lezot keksoz, mon pou koze ziska demen bomaten.  Me i annan en keksoz ankor ki pe arive lo nouvote komers.  I annan gro problenm Mr Speaker dan sekter komers.  Ozordi bann pti komersan Seselwa zot pe konplent, zot pe santi zot kwense e menm si zot pe anvoy zot lavwa pli devan, Gouvernman kot Finans laba pa pran zot traka.  Zot zis la dan en dilenm, bann gro, gro.  Bomaten mon pe koz ek enn bann gro konpannyen offshore pe detri zot.

Ozordi Mr Speaker i annan en lakonpannyen International Food Solution bann gran konpannyen, ozordi i enn bann konpannyen ki pe detri nou bann komersan Seselwa ki pe enport bann keksoz.  Mannyer zot fer sa?  Ozordi nou bann komersan lokal, i pas  kot meton laboutik Onorab William, en legzanp.  I donn ou son konmisyon ki i enporte, i donn ou 30zour i dir ou negosye apre 30zour ou pey mwan.  Be zot sa konpannyen zot telman annan larzan zot pe donn ziska 90zour pou ou pey li.  Be sa pti komersan ki pe enport son pti keksoz li, lokal mannyer i pou viv? Ou  konnen mannyer biznes i été?

Sa dimoun li i pou prefere al kot sa enn ki pou donn li en pli bon deal 90zour me sa enn ki donn li en pli bon deal zot vreman eze.  Zot annan e sa pe dekouraz bokou nou bann komersan, nou bann dimoun Seselwa ki annan bann biznes parey.  Akoz zot pe santi zot pe ganny bare.  E ozordi lot zour mon ti demann Minis pou Lagrikiltir ki nou kapab fer pou anpese ki bann prodwir ki bann gro lakonpannyen koumsa, pa ariv lo nivo kot bann pti fermye pe vann zot prodwir.  I ti annan rezon i ti dir mwan in realize.  Komers lib.  I byen  me selman atraver sa Mosyon mon krwar ki serten regilasyon i bezwen vini, pou nou protez sa bann pti kategori biznes, koumsa kot Seselwa osi i a form par dan kontribisyon ki i pe fer pou son pei.

Be ozordi Mr Speaker.  Ozordi laplipar bann konpannyen Seselwa ki mon pe koz lo la, la,  zot anploy Seselwa ki pe travay pou zot, tandis ki sa bann gro konpannyen ou war zot sa konpannyen ki mon’n nonmen apepre 10 Endyen lo scooter  zot roam partou  zot fer zot deal.  Ou war  zot Mr Speaker.  Mon’n war kot Bel Air Store mon war zot vini lo ipad, lo tablet, ‘’vini, sa, sa, sa, vini,  nou a donn ou.’’ Mon’n tande dan mon zorey kot zot pe dir ‘’napa problenm, sa nou a fer li olye 30zour dan 60zour, ou ava pey nou sa 90zour.’’

E li sa lot kontrakter Seselwa ki vin avek son kargezon biskwi, ki i pe sey vin market pe ganny dir ‘’non akoz nou annan la.’’

Mr Speaker tousala pe ganny arive ozordi mon panse ki sa Mosyon i kler, i merit annan travay ki reste pou Seselwa. Ozordi nou pa kapab war lo en charter bato en skipper etranze kan nou annan Seselwa.  Nou’n tann dir toultan dan sa Lasanble, i annan i menm vini napa landrwa dormi zot reste lo sa bato pou dormi.  I annan Seselwa ki kapab.

Mr Speaker avek sa de pti mo mon anvi donn sipor pou sa Mosyon, akoz mon santi i annan en nesesite pou nou propoz bann nouvo regilasyon, pou ki nou bann pti biznes Seselwa zot a refleri ankor.  Zot ava santi zot annan konfyans pou zot kapab bouze e kontinyen annan sa travay.

Mr Speaker sansan nou pa pou war nanryen.  Nou Seselwa.  Nou Seselwa i pares?  Nou Seselwa pa pares.  Seselwa ler i ganny kit de-kote i rod serten keksoz pou li fer.  Ler ou tande en dimoun sepa in al vann drog akoz i pe struggle i ganny kit de-kote akoz etranze pe pas dan son soz, alors i al fer bann lezot keksoz.  Seselwa i toultan rod en keksoz pou li ganny en larzan.

Be la mon anvi dir avek nou bann dimoun nou bann zenn Seselwa, i annan travay Sesel vini vin travay.  Bann ki lo eroin ki lo drog, sorti lo la vini nou a travay.  Si nou pa anvi  etranze vin  pran nou plas,  nou vini, step up, vin devan al  fer sa travay.

Ozordi i annan en papye ki nou’n gannyen sorti kot sosyal laba.  Lo mon papye mon pe gete i annan dimoun ki mon konnen i ankor for, zenn, lasistans medikal napa travay.  Lasistans medikal mon war li pase ek en masin  koup zerb.  Ou kapab travay.  Ozordi nou annan bann lakonpannyen sekirite ki pe anploy zis etranze akoz?  Nou bann dimoun pa oule vini.  I annan travay, me pourtan la nou war i annan.  Lo sa part zot annan zot osi, gete i annan ki ankor for pe travay, i dir ou medikal.   Mwan mon konn en boug la en sarpantye qualified Mr Speaker, ozordi kanmenm ou donn li en klou, i pa pou kloute medikal akoz i pli kontan son baka.   I pli kontan sn baka, ki son travay sarpantye.  Zenn dimoun Mr Speaker.  E nou ki peye sa.  Sosyal, medikal.  Nou bezwen ankouraz nou bann dimoun Mr Speaker pou sorti dan sa bann keksoz vini, si nou pa anvi war etranze pran nou plas, nou bezwen step up e vini pran lavenir nou pei dan nou lanmen e bouze.  Mersi Mr Speaker.

 

MR SPEAKER

Mersi Onorab Loizeau.  Mon ava donn laparol Onorab Waven William.

 

HON WAVEN WILLIAM

Mersi Mr Speaker.  Mr Speaker lo sa Mosyon mon pou konmanse par demande si vreman ozordi kot nou arive dan letap devlopman lemonn an fas avek globalizasyon, an fas avek sa bann diferan Konvansyon, Lagreman avek MOU ki Sesel parey nenport ki pei, ozordi i bezwen war li pe sinyen.  E letan bann dimoun  dan Egzekitif ki’n al partisip dan sa bann negosyasyon avek tonm dakor, ki sa bann lagreman konvansyon i ganny adopte, mon demann mon lekor si letan zot pe fer li dan nou lespri nou ti pe dir ‘’nou kontan Sesel e ki nou annan Sesel a ker. ‘’

Mr Speaker mon’n konmans koumsa e letan mon lir preamble nou Konstitisyon, mon osi demann mon lekor, si nou preamble ozordi i ankor relevan fas avek sa bann boulvers ki pe arive dan serk ekonomik mondyal, ki annan en lenpak direk malgre serten endirek dan nou lekonomi.

Mr Speaker sa Mosyon i bon li. Mon’n ekout loter Mosyon, bann sipor ki in donnen vizavi bi son Mosyon, me sa pli gro travay i reste avek Egzekitif.  Letan i antre dan sa bann Konvansyon sa bann Lagreman pou fer sir ki bann Lalwa, bann Lalwa ki ganny devlope nasyonalman, i vreman donn otan posib en balans, ki bann biznes Seselwa i ganny sa proteksyon e sa sans pou li epanouir.

Mr Speaker ler mon get preamble i annan sa paragraf ki dir: ‘‘ exercising a true and undeniable right to a framework of Government which shall secure for our selves and prosperity the blessings of truth, liberty, fraternity, equality of opportunity, justice, peace, stablity and prosperity’’.  Mr Speaker letan nou pe dir: ‘‘maintain Seychelles as an independent state both politically and economically’’.

Mr Speaker i fer ou kestyonn ou preamble ozordi  dan sa konzantir devlopman kot nou’n arive.   Resaman dan delegasyon ki ti ganny headed par Speaker, parey touzour letan ou dan bann serk Pti Leta Zil ou santi leko.  Me nou tou nou konnen ki si nou senser letan nou pe fer bann negosyasyon, nou bezwen fer sir ki lentere pep Seselwa a tou pri pe ganny tenir kont.

Mr Speaker par egzanp ozordi, dan Sesel nou 3 sekter kle se tourizm, lapes e la dan sekter offshore.  Mr Speaker eski vreman, eski vreman dan sa bann lendistri bann dimoun ki dan Lotorite zot pe fer sir ki Seselwa pe pran en plas priyorite?  An menm tan Mr Speaker an relasyon avek sa, nou pe fer bann negosyasyon lo kontinan Lafrik.  Semenn prosen IAC pou asiste en miting avek bann reprezantan Minister Finans kot sa bann menm keksoz pou ganny diskite.

E konman en Lasanble petet nou pa pe pran li mon pa dir poudir nou pa serye lo la petet a lavenir nou pou bezwen donn plis latansyon.  Me selman i malere Mr Speaker ki negosyasyon i ganny fer byen boner par Egzekitif, e Lezislater i ganny kit ater li.  Lezislater ki sipoze ganny fer oversight, pou fer sir akoz bann Manm Lasanble in ganny elekte e zot reprezant lepep zot ki fer sa oversight. Zot ki konn lentere swe sa pep.  Nou pa pe dir poudir Gouvernman son progranm pa tou ki pa bon, me solman ler ou a tune avek ou teren, avek ou dimoun dan tou nivo, ou pou konnen egzakteman kwa ki zot espere, kwa ki zot pe aspire e kwa ki zot anvi.  E ou kapab anmenn sa poudir be regarde, la mon krwar ou pa pe koz sa langaz Seselwa son dezir i été.

E nou kapab donn sa input.  Me ozordi mon santi poudir nou pa pe ganny tro bokou sa sans pou kapab fer li, pou nou vreman fer sir ki enn – vreman sa lentere pe ganny defann. Mr Speaker mon donn ou en legzanp, ozordi kot ou ti a mazinen ki ozordi nou ti ava annan en Lazans Etranze dan Foreign Employment Agency, ki’n ganny kre Sesel.  E nou annan bann Seselwa ki pe struggle pou zot make ends meet.  E la nou war poudir i annan en lakonpannyen etranze ki’n antre.

E nou konnen poudir li i pou kapab ganny plis lavantaz lo sa bann Seselwa. Mr Speaker menm ki mon dir sa, mon ti a kontan fer serten rekomandasyon.  Mon krwar i enportan ki nou pa focus zis lo problenm.  Mon trouve poudir sa Mosyon i ouver i annan en ta keksoz nou ti kapab koz lo la.  I annan en ta keksoz 6enm Lasanble dan bann diferan deba avek diskour lo Leta Lanasyon avek Bidze, nou’n fer sorti bann pwen ki nou pe repet ankor ozordi.

Mr Speaker me pou mwan i pou enportan ki dan sa bann negosyasyon, nou bezwen fer nou mye posib regarde ki fason nou kapab ganny rod  bann derogasyon, lefe ki ler nou pe koz lo bann Pti Leta Zil, bann nou bann frer e ser etranze pei etranze, zot bezwen regard nou spesifisite Mr Speaker.  Unless ki nou kapab tonm dakor si nou pe dir nou kontan Sesel, nou pe met Sesel devan, nou bezwen rode sa derogasyon.  Akoz si nou pa rod sa derogasyon, e les nou ganny trete parey bann pei menm parey, nou pa pou sorti byen Mr Speaker.

Nou pa pou sorti byen e letan ou pe koz strain ou pe koz ‘’goods and services’’ e services si nou pa vey byen i pou afekte sa pti biznes Seselwa.  E sa derogasyon Mr Speaker,  mwan mon santi ozordi Minister Finans, Departman Zafer Etranzer zot bezwen lager tou, e nou Manm Lasanble nou bezwen fer sir ki dan sa bann Lagreman, dan sa bann MOU sa derogasyon i bezwen ganny reflekte.  Si non Mr Speaker i pou en lager fay akoz sa lakours deor la  i feros.

Mr Speaker dan sa lekonomi ouver sa derogasyon i enportan.  Mr Speaker nou bezwen rod bann tretman preferansyel.  Se sa langaz ki pe ganny servi ozordi.  Sa tretman preferansyel i tre enportan pou Sesel konman en Pti Leta Zil, akoz si non nou pou ganny anvair.

Mr Speaker dan nou preamble nou’n koz lo vilnerabilite, an menm tan nou koz lo soutenabilité Mr Speaker.  Be i annan bokou travay pou nou fer.  E mon toultan dir ki personn pa pou vin fer pour nou si nou pa rode.  Nou bezwen lager for e rode.  E nou bezwen met nou pwen kler ater dan azanda letan nou pe diskite.  Akoz si non nou pou perdi tou, e se nou menm nou ki pou koz bokou kestyon e menm i kapab kre enstabilite entern dan pei.

Petet ozordi nou pa pe mazin sa, me tandans Mr Speaker i annan serten tandans.  E Lotorite pou bezwen konsyan lo sa bann keksoz.  Mr Speaker lot keksoz pou demande eski vreman dan Sesel i annan fair competition Mr Speaker?  Eski Lazans Fair Trading pe vreman fer sa travay ki i devret pe fer?  Petet an menm tan mon a demande, eski i annan ase resours, ouswa kapasite pou li kapab fer li.

Mr Speaker si sa Lazans pa marse, akoz letan ou dan en pozisyon dominer, parey nou dir gro pwason i manz pti pwason me nou bezwen fer sir ki Lalwa.  E mon dakor avek loter Mosyon e petet ti devret azout, amande an menm tan anmenn nouvo Lalwa, me nou bezwen fer sir ki sa keksoz i antre, akoz si i pa la i pou difisil pou nou bann frer ek ser Seselwa ki dan biznes.

Mr Speaker parey serten in dir mwan osi mon propaze, mon fofile, ozordi i annan bann kontrakter ki byento zot pou al perdi zot Kontra akoz nouvo Kontra ki’n sorti zot pa pe gannyen. Mr Speaker zot santi ki zot pe ganny kit ater.  Zot santi koumsa Mr Speaker.

Mr Speaker avek sa de pti mo mon pou donn sipor sa Mosyon mon krwar ki i en moman ki bon, e mon konnen poudir osi dan Bidze nou pou aborde sa size, me mon a dir se ki annou pa zis toultan nou dir sa nou anmenn bann zoli Mosyon, me sa swivi i enportan.  Ki fason nou kapab annan en stratezi pou kapab fer swivi, an menm tan fer sir ki keksoz pa reste parey.

Mr Speaker mon dir ou mersi pou sa letan ki ou’n donn mwan.  E ankor mon pe dir avek loter Mosyon poudir mon pou apport sipor pou sa Mosyon.  Mersi.

 

MR SPEAKER

Mersi Onorab William mon ava donn laparol avek Ahmed Afif.

 

HON AHMED AFIF

Mersi bokou Mr Speaker.   Bonn apre midi tou bann Manm Onorab e tou dimoun a lekout.  Mr Speaker mon premye keksoz mon le dir se ki sekter prive e Seselwa i konn fer biznes.  Seselwa i ankor pe fer biznes.  E Seselwa si ou donn li sans fer biznes i pou fer biznes menm pli byen ki bann etranze ki fer biznes Sesel.

Mon konmans koumsa Mr Speaker akoz mon krwar i enportan, ki nou fer en pti tour istorik zis pou nou konpran kwa ki’n arive avek sekter prive dan Sesel, e akoz i dan sa pozisyon kot i été ozordi, pou nou mye kapab mye konpran akoz Onorab Ramkalawan i pe dir dan son Mosyon, ankouraz sa sekter.  Donn li bataz pou li kapab fer mye pou lekonomi Sesel.

Mr Speaker si nou al dan listwar e nou get Sesel e tou sa ki nou annan ozordi.  Nou annan semen nou annan Erport.  Nou annan en por.  Nou annan batiman ki vye par egzanp Liberty House, State House, Kordgard Rochon Danm, House, Kordgard Rochon Danm La Gogue, lekel ki ti konstrir tousala?  Seselwa. Seselwa.  Kekfwa  en lakonpannyen etranze parey Costain ki’n fer Dam La Gogue me i ti anploy Se..se..lwa sipervize petet par detrwa etranze profesyonnel ki kalifye.  Me pou laplipar son bann travayer sa bann dimoun in vye ozordi zot ti napa en gran ledikasyon osi me zot ti travayer.   Zot ti annan sa ki zot kapab travay pou swiv lenstriksyon pou swiv en plan travay e prodwir.

Ler nou get nou bann zil dan lepase, bann zil elwanye, Seselwa ki ti travay ladan.  Zot ti eksport gwano, zot ti fer pwason sale, zot ti eksport lavani, kopra, Seselwa ki ti travay.  Sekter prive ki ti travay lo sa bann zil e zot ti fer li byen.  I enportan ki nou apresye sa listwar, pou nou kapab annan sa konfyans poudir Seselwa e sekter prive Seselwa, in deza travay ekstrememan byen dan sa pei.  Me  e la petet zot pou dir mwan  mon pe akiz Egzekitiv.  Mon pe al dan listwar pou mwan atak.  Mon pa pe fer sa mwan.  Mon pe selman fer en revi listwar faktyel.

An ‘77 Mr Speaker apre le 5 Zen ‘77 ti vin en nouvo filozofi, e sa filozofi ti esansyelman dir ki sekter prive li, i napa sa rol pou li zwe.  I pa pe kapab  fer travay.  I pa pe anploy  ase dimoun li.  E alor i bezwen ganny ranplase li.  E ti annan bann ankor dan sekter prive Gouvernman ti deside pran son bann biznes ek li – mon pa bezwen al pli lwen – si nou ekout ozordi dan Truth bann zistwar ki nou tande, sa i zis detrwa. Me en kantite biznes ki ti pe travay, ki ti pe prodwir zot ti ganny fermen.  Propriyeter ti ganny fermen oubyen ankouraze kit pei. Gouvernman ti deside osi an plis ki sa pou li nasyonaliz plizyer aktivite ekonomik, oubyen pou li konmans serten aktivite ekonomik.  E i enportan nou realize ki degre ki Gouvernman ti’n al dan aktivite ekonomik.

Ozordi nou annan en tuna manufacturing company (IOT) i pa ti été ler i ti konmanse.  I ti konmans avek Conserverie de L’océan Indien Gouvernman 100poursan.  E i ti perdi si mon pa tronpe R2milyon tou le mwan evantyelman zot ti privatize. Gouvernman ti dan ULC.  Ler bato i vini dan por, se li ki ti annan sel dimoun ki ti kapab lev container met ater fer clear kot Customs.  Gouvernman,  se li ki ti fer handling i ti manage por apre i ti fer handling cargo lo por.  Se li ki ti menm asanble bann item elektronik, televizyon ti apel Elektronik Seychelles.  I ti dan prodiksyon water heater anesole i ti dan Printec.  Wi  be selman pa sekter prive Gouvernman. Gouvernman.

 

Off-Mic

 

HON AHMED AFIF

Non, non ekoute petet zot pa akoz zot pa ekoute petet sanmenm zot pa konpran listwar e  ki Onorab Ramkalawan pe dir.   Zot ti dan bookshop Space, zot ti dan radio and télécommunication system mon pa ti dan okenn sa bann zafer mwan.  Ou annan rezis pou ou al get ladan ou a war si mon ladan.  Mirtel ti fer kominikasyon tousala Gouvernman.  Zot ti dan konstriksyon CCCL ti pou Gouvernman tousala.  Seselwa ti pe travay ladan wi.  Ozordi be ozordi sa bann keksoz apre in sanze.  Nou a vin lo la nou.  Indian Ocean Marine prepar lekipman eksetera, li osi Gouvernman menm.  Tou sa bann aktivite i annan en whole lalis.  Dan tourizm si nou al dan tourizm bann lotel ;- Beau Vallon Bay, Mahe Beach, Flying Dutchman, Cote D’Or, Sauve Souris, Reef Hotel, Vakwa Village, Gouvernman ki ti pe run tousala, akoz Gouvernman ti krwar zis li ki devret fer biznes.

Malgre ki zot pe dir wi Seselwa ki ti ladan Seselwa ki ti pe marse, i pa ti marse.  I pa ti marse zot tou enkli SMB ek son Coetivy Prawn Farm ek tou sa aktivite ti fait.  Zot ti fait e Gouvernman ti pran desizyon.  E ler i fait ki arive, nou pe kriy Seselwa, tousala ti perdi zot dyob.  Zot ti bezwen ganny re-deplwaye dan en kantite lenstans.

E ler ti ariv tou sa bann keksoz,  e annou al ankor zis avan nou al lot lo la annou al dan sekter retail. Dan retail akoz  mon’n fek mansyonn SMB ti en pe parey nou ti dir sa bann marsan e sa lepok e ankor mon pa pe atak okenn parti mwan, me mon pe dir zot larealite.  Dan tou speech politik  ki i ti annan, ou ti tonm nonmen Teemooljee, Adam Moosa.  Dan bann speech rally politik, zot target en marsan Seselwa.  I ti en Seselwa li zot target li, zot denigre li, e answit zot dir poudir i pa devret dan biznes li, zot pa donn li permi.  Zot pa donn li license.  Zot pa donn li later e resours pou li fer biznes, evantyelman ki nou war i annan enn de ki’n sirviv.  Teemooljee i ankor la li, malgre tou sa bann latak lo li.  PNJ i ankor la malgre tou sa bann latak lo li.  En kantite potansyel ki biznes Seselwa i kapab annan ti mor.  Sa lespri lantreprenarya ki Seselwa ti annan ti mor.

Me i annan en lot keksoz ki ti arive.  Akoz mon dir i ti mor?  Akoz ti annan plizyer kekfwa zot fanmir, zot zanmi, ki dir be ok be sa loportinite in ale, mwan  mon a sey antre ladan.  Ler zot sey antre ladan ti annan en sistenm ki apel security clearance.  Oule fer boat charter ou, ou pa ganny security clearance ou pa pou fer boat charter.  Oule ganny license konman elektrisyen ou en Seselwa?  Ou pa ganny security clearance?  Licensing pa pou donn ou en license.

Ti sa degre!  Ozordi i difisil pou nou krwar poudir i pa koumsa, akoz ozordi ler ou ale ou gannyen.  Me pou bokou lannen depi 1977 pa ti posib sa.  Annou al dan sekter medikal, lontan ti annan dokter prive.  Ti annan en kantite zot ki ti la Dr Jivan ti la.  I la ozordi be i ti ale, apre in tournen.  Dr D’Offay ti annan plizyer zot, zot ti pe travay prive zot ti ale, Gouvernman ti dir napa plas pou dokter prive dan Sesel.  Avoka osi zot ti ganny bloke zot pa ti ganny license akoz zot pa ganny security clearance.

E alor mesaz ki mon pe dir, sekter prive Sesel dimoun ki ti kapab dimoun ki ti entelizan, dimoun ki ti annan resours pou mobilize, nou’n touy sa bann resours.  Nou’n touy zot.  E ler nou realize poudir nou’n touy nou resours e sa ki nou kree pou ranplas li pa marse, in marse pou en pe letan, selman in kre det.  In marse zis in perdi nek nou prêt larzan e finalman ler nou nepli kapab prêt larzan ou nepli kapab kontinyen ou bezwen dir be ok be fermen sa det nou ava mars avek e apre nou ava gete ki mannyer nou pou pey sa det.

Mon oule dir zot an menm tan,  mwan mon rekonnet poudir i annan serten keksoz biznes ki Gouvernman in fer eskan ozordi i ankor bon.  I annan SEYPEC se en legzanp.  Ozordi i en lakonpannyen Gouvernman i annan 5 tanker ki pe vwayaz otour lemonn pa demann en sou Bidze.  Air Seychelles parkont li olye anploy Seselwa ki nou’n fer nou pran etranze depi 2012, nou’n met zot ansarz Air Seychelles manage sa ler avan ti annan Seselwa – li osi i ti pe fer fot, selman i pa ti anmenn sa lour ki ozordi Air Seychelles pe anmennen.  Pa’n anmennen sa kantite lour.

Nou fek zwenn ek Air Seychelles resaman zot dir nou zot krwar la akoz zot annan plis management Seselwa akoz zot annan plis management Seselwa desizyon i ganny fer Sesel konmela, ki zot in nobou rezourd en kantite problenm ki Air Seychelles i rankontre.  Zot in aret fer laliny etranze zot pe fer plis domestik.  Zot pe fer plis rezyonal.  Zot pe fer plis ground handling e sa i tenir zot.

Me selman e nou pou war dan Bidze ki vini la, zot pou rod en gro larzan ek nou, akoz zot dir nou pe tenir debout la nou be selman sa lour – sa sak lo nou ledo, zis lannen pase 40 ekek milyon Dolar pert ki zot in fer zis dan en lannen.  En lannen 40 ekek milyon Dolar 40 ekek milyon Dolar ou ti kapab aste en tanker nef donn SEYPEC.  Yes sa kantite larzan ki nou’n perdi.  E zot dir nou donn zot $6milyon tou le lannen pou sa prosen 5an zis pou kapab pey lentere lo zot det.  Pa  pou pey det, lentere lo zot det.  Eski nou pa pe vreman mis manage sa lekonomi?  E Seselwa ki bezwen peye.  Akoz nou fer move desizyon.

Lekol; ti annan lekol prive avan.  Zot in fermen pou rezon politik, filozofi e finalman ozordi lekol prive i back.  Annefe i annan en mank pou lekol prive ozordi, akoz i difisil pou ganny en slot.  Ou piti i ne, menm avan i ne ou bezwen al met ou non si ou anvi i al dan en lekol prive ozordi.

Mwan mon pe dir poudir Seselwa ozordi Independence School en biznes Seselwa, i mars tre byen. Tre byen  e i pe marse, be selman malerezman i fek konmans marse dan bann ’90 an montan.  Si nou ti pe fer sa tou sa letan si nou pa ti pe blok Seselwa tou sa letan, si bann marsan Seselwa, ki ti anploy Seselwa dan laboutik zot ti ganny menm sans pou zot kapab epanouir depi sa letan, Sesel pa ti pou ranpli avek biznes etranze ozordi.  I pa ti pou ranpli ek biznes etranze.

E zot konnen ki’n arive?  Ler nou’n blok tou sa Seselwa Onorab Pillay i bon ou ekoute akoz mon krwar ou pa konn en bon pe sa bann listwar ou!  Ler bann biznes Seselwa i pa’n ganny sans – i pa’n ganny sans pou zot epanouir, byensir en dimoun in bezwen antre pou pran sa plas ;- en dimoun in bezwen antre pou pran sa plas.   Lekel ki ti antre sete bann etranze.  Akoz?  Zot ganny en security clearance.  Zot napa en listwar politik Sesel zot.  Me sa lepok nou konn byen mannyer ti marse, zot ganny dir ou bezwen travay avek nou.  E zot ti ganny tou Kontra Gouvernman.  Zot grosi, zot grosi.  Zot tender pou bann proze pli ba, apre zot vin avek additional costs avek tou kalite.  Legzanp  i devan nou Music stadium pa ti konmans avek R5milyon?  I pe al fini dan 40.  Lopital Beau Vallon ti konmans avek R5milyon ti fini si mon pa tronpe pros 40 li osi.  Alor se sa bann proze, se sa bann manipilasyon  ki …

 

 

 

 (Off-Mic)

 

HON AHMED AFIF

… mon a dir ou Onorab Loze ou konnen akoz  mwan mon konn sa bann keksoz akoz mon ti negosye pou mwan  anpes zot arive !

 

(Interruption)

 

HON AHMED AFIF

Mon ti negosye pou anpes zot arete.  Ler mon ti negosye pou zot arete ou konnen ki ti arive?  Mon ti bezwen ale.  Sanmenm sa mon’n ale!

Me e ou konnen ki lot keksoz mon ti bezwen fer, tou sa bann det ki Gouvernman in kree ki zot pa ti kapab peye?  Mwan zot kapab lir listwar – mwan avek en tim ki i ti siporte par IMF siporte par IMF ek zofisye IMF nou ti al negosye Paris Club pou write- off sa bann det.  Ok?   Alor mon mesaz pou zot, mon mesaz pour zot  i tre senp, sekter prive ozordi si nou al dan sekter konstriksyon par egzanp, sekter konstriksyon ozordi i kler poudir zot tou ki la si zot in fer en lakaz oubyen zot in fer en konstriksyon, zot konnen ou bezwen rod Endyen ozordi, bezwen rod Malbar pou zot fer ou keksoz.  Akoz?  Akoz i annan en mank i annan en trou dan lekonomi kot sa bann dimoun in antre. I annan en trou ki’n arive kot nou nepli annan Seselwa ki konn travay, ki kapab kontribye pou son pei e sa bann trou i ganny anpli par bann etranze.

E ozordi ler ou pou get dan sekter lapes, mon konnen akoz zot riye lot kote, akoz se pa zot ki pou run sa Gouvernman a lavenir se nou.  Zot pa bezwen mazin lo la se nou ki bezwen al mazin lo la nou ki bezwen rektifye sa fot ki’n ganny fer dan lepase.  Annou get nou sekter lapes lekel ozordi ki pe lapes dan nou delo?  Lekel  ki  lapes dan nou delo ozordi? Ozordi ou annan 40 bato apepre pe lapes laplipar zot Eropeen, Espanyol ek Franse.  Zot lapes probableman 200mil tonn pwason – 60mil dan nou delo larestan an deor nou delo.  Nou sarz zot en license fee nou anmas kekfwa 10 $15milyon par lannen ki minim – i minim.

Seselwa parske Mosyon i lo Seselwa, sekter prive Seselwa konbyen Seselwa pe lapes?  Seselwa pe lapes forse 5mil tonn.  Zans la i lapes 200mil tonn, zans la i ganny fuel duty free, zans la pa pey taks Sesel, zot pa pey nanryen me Seselwa bann peser nou manz forse 5mil – 6mil tonn dan sa lekonomi.  Sa lekonomi Seselwa ki ti kapab annan bato Seselwa e tonnye Seselwa nepli annan.  Zot nepli annan.  So ki pe arive se ki etranze e sekter prive etranze pe benefisye dan nou losean.  Sekter prive etranze pe benefisye avek nou tourizm. Bayan Tree i annan plizyer Kempkinski, Four Seasons laplipar nou bann gran lotel Fregate i annan detrwa, detrwa Seselwa ki pe fer byen.  Denis Island i en legzanp Bird Island i en legzanp i pe fer byen,  zot ptipti zot devret ganny ankouraze. Ephelia i en lot legzanp i annan partner etranze me se Seselwa finalman.  Lemuria i en bon legzanp Seselwa.  Me akoz nou pa ti kapab annan plis ki zot?  Akoz nou pa ti kapab annan plis ki zot?

Akoz lanvironnman pa ti bon pou zot kapab envestir. Seselwa i kapab envestir dan biznes. Seselwa i kapab fer biznes, me avek bann Polisi ki nou annan, avek en mank direksyon ki nou annan Seselwa i nepli kapab, nepli kapab antre dan biznes fer biznes osi fasil ki etranze in fer li.

Akoz mon dir sa?  Si nou get later – get later endistriyel annou al Providence Industrial Estate, ler nou get laba i kler poudir en kantite sa bann later ki ozordi ou war, se etranze ki annan.  Zot a dir ou zot Seselwa i ganny paspor Seselwa.  Zot a dir ou zot konpannyen i lokal me finalman lekel ki pe kontrol sa lakonpannyen e kote i rapatriye son profi ou pou war ki son bann profi pa reste Sesel.

E alor pou mwan i kler ki lafason ki sistenm in été, in pli fasil pou en etranze antre Sesel fer biznes e li Seselwa pou plizyer rezon in ganny kit deryer.  Sa se bann fe sa si ou al Providence ou al gete ou pou war, si ou al dan biznes lapes ou pou war, si ou al dan biznes tourizm ou pou war.  Onorab Loizeau taler in koze i ti pe koz lo bann pti biznes aircon, small maintenance tou sa bann pti keksoz sa bann pti biznes ki Seselwa i kapab fer, ozordi nou war etranze i servi tou loop hole pou li antre pou li fer.

Ki solisyon Mr Speaker ? Mr Speaker pou mwan apard sanz sa Gouvernman e met en dimoun ki ansarz e konnen ki pe arive dan sa pei, e donn Seselwa sans travay, sa i a vin pli tar me nou kapab donn zot konsey pou le moman.  Nou kapab donn zot konsey pou le moman.  Ler zot donn travay Gouvernman akoz nou pa fer sir sa bann dimoun ki ek Gouvernman i donn Kontra avek i met kondisyon?  Kondisyon par egzanp ki si ou anploy en kantite Seselwa dan ou lakonpannyen, ou pou eligible pou donn sa Kontra ou.  Nou pou fer ou gannyen sa Kontra.  Nou kapab fer sa bann kondisyon.  Ler nou al rod proze, eski zot pou war Danm La Gogue pou fer monte nou pa ti kapab ganny en lakonpannyen Seselwa pou fer sa?  Zot krwar i sitan konplike pou fer sa ki ou bezwen etranze pou fer sa?

Ler La Gogue Danm ki’n fer 1milyon tonn son stokaz, Seselwa ki’n fer.  Ler pou fer monte par 600mil tonn pa ni 1milyon, etranze ki bezwen vin fer.  Seselwa pa konn fer li?  Li ki ti fer sa danm.  Ozordi zis pou fer monte ki pa konplike lo en pwennvi enzenyer, osi pli konplike ki ler pou fer sa danm li menm, sa i bezwen ganny etranze.

Sa etranze prezan lot konsey dir ek li si ou  vin Sesel premyerman, annou restrikte li pou Seselwa.  Dezyenmman si ou kontrakte par egzanp transpor, soukontrakte ek Seselwa.  Ou ti kapab met en kondisyon ladan.  Sa bann drayver pickup pa ti pou bezwen al fer strike.  Eskan ozordi i annan en bann ki plis ki 9mwan i pa ankor ganny peye, akoz problenm Kontra sepa kisisa.  Biznes Seselwa ki Onorab Ramkalawan pe dir i devret ganny ankouraze.  Pa pe ganny ankouraze.  Me sa lakonpannyen Sinwan pe ganny peye li.   Li i ok li.  I pa zis ok  ziz lo lot kote, lo konblaz zis lanmenm la dan kontour La Retraite, Ile Aurore in fini ganny en baz.  In met fence tou otour partou.  Biznes Seselwa ki la lo lakot Seselwa la ti pe rod en pti landrwa pou li vann bann fish accessories – mon konn en envestiser ki’n demande,  pou lannen apre lannen i a pe demande, pa gannyen.

Demann pou li konble en pti bout par devan, pa gannyen.  En msye ki annan laboutik i demann en pti bout la devan pou aranze pa gannyen.  Planning i rod tou kalite rezon.  Zis i sorti la dan biro Lasanble an deor nou biro la, al lanmenm la dan lanmer la, i annan  en msye ki’n ganny permisyon konble.  Nou ti fer tapaz ni Planning ti napa – ti pe konble  san met rock amor la devan, me akoz i annan lapreferans?  Akoz toultan sa bann etranze i ganny sans e sekter prive Sesel li i pa ganny sans pou li kapab epanouir, pou li kapab kre dyob pou li kapab fer sa bann keksoz Sesel?  Se sa ki manke.

Annou al dan tourizm ankor pran bann lever board par egzanp.  E  mwan mon pou konpar li mon pe dir sa Mr Speaker, akoz nou ti ganny sa sans pou nou zwenn avek Praslin Business Association e zot ti akont nou ki mannyer en lakonpannyen lokal parey William Rose, li i anploy Seselwa i annan 50 travayer zis 2 etranze ladan.  Sa en lakonpannyen ki anploy Seselwa.  Me parkont kot i met son bato lanmenm kot lasose i war bann lever board zot vini sa bann lever board zot pa anploye dimoun zot, zot pran ou zournen.  Savedir sa boug kekfwa ou a gannyen detrwa kreol ki al travay lo la, me sa boug ler i travay i pa asire konbyen letan i reste la i pa dan en lanplwa fiks li.

Si ou travay kot William Rose ou travay fiks.  Ou ganny training.  Ozordi bann skipper Seselwa pou al kot lekol Maritim, i a pran ou 3an avan ou sorti avek en sertifika.  E posibleman akoz mon konn detrwa sa bann manrmay, zot sorti apre 3an, pa zot lafot zot pa konn anmenn en bato.  Zot pa ankor certify zot. 3an me parkont dan lakonpannyen prive, zot pran en manrmay apepre 3mwan –  3mwan zot train li anmenn en bato zot train li anmar lakord, zot train li netwaye konpran en pti keksoz dan masin, zot fer li al pas tes dan 3mwan i en certified skipper.

Me li Gouvernman ler i fer, i pran 3an i pa gannyen.  Eski akoz nou pran skipper etranze Sesel?  Kan sa bann manrmay zot annan 17an zot pa pe ganny loportinite pou zot ale, pou zot al fer training.  Parske se pa zot ki pou organize ki mannyer pou al fer training.  Se sekter prive se Gouvernman ansanm ek zot me sa zefor pou met tousala ansanm pa egziste ozordi Mr Speaker.  E ler i koumsa se nou lekonomi ki soufer.  Se bann zanfan Seselwa ki mank loportinite, se etranze ki profit dan sa loportinite.  Mon pa pe blanm zot sa bann etranze ki vin Sesel i annan en dyob pou en skipper byensir i bezwen pran.  Se sa ki manke dan Sesel.

Mr Speaker mon ti le zis dir poudir i annan en kantite mank loportinite Sesel ozordi.  Si mon pou koze mon pou desot mon letan pou nou koze.  Mon pou zis donn en legzanp ankor ki drwat devan nou, ki nou war toulezour.  Kot i annan en mank loportinite pou sekter prive antre ladan.  Zis get kot Ile Longue ti pou annan en lotel par en etranze i apel Shanguila plis ki 10an in ganny donnen en lease, pa konnen si in aste mon pa konnen si i pe lease be nanryen pa arive.

Saler i ti en landrwa ki ou ti kapab annan mon pa konnen petet en 50 lasanm pe vann €400 par nwit?  Pa pe arive e ki Gouvernman i fer ladan?  Nanryen.  Se sa bann loportinite kot Gouvernman ti devret antre dir get sa la en loportinite pou kre dyob dan Sesel, ou en etranze ou annan sa landrwa ou pa pe fer li nou pe pran sa landrwa e nou pou regard dan sa bann Kontra nou pou fer sir ki sa sekter prive Sesel e Seselwa otan ki posib i kapab antre ladan pou al fer biznes.  Se koumsa ki ou devlop en lekonomi.  Mr Speaker Gouvernman ti fek annan en Mosyon resaman pou pey kontrakter a ler – sa osi i en problenm.  Ou konnen akoz?  I met retar sekter prive akoz zot annan en clause dan ki dir poudir ki si ou pa’n pey ou taks pa pou kapab met ou non pou tender.

Be ou konnen akoz sa msye pa’n pey son taks li, akoz Gouvernman pa’n pey li a-ler zot pa’n kapab pey taks.  So sa bann sityasyon koumsa se Gouvernman ki responsab se Gouvernman ki bezwen rezourd pou fer sir ki sekter prive i kapab annan en lipye pou li compete avek tou sa bann etranze ki pe vin Sesel pou fer biznes, parske zot annan tou loportinite posib.

So Mr Speaker mon le zis dir ki si Gouvernman i serye, si Gouvernman i fer sir ki zot aksepte tou dimoun korekteman, si Gouvernman i fer sir i travay ek sekter prive pou annan en platform ki zot tou zot kapab devlope, zot kapab train Seselwa, zot kapab envestir e zot war zot larzan taks i korek par rapor avek tou larestan ki pa peye en kantite fwa, Seselwa ti pou envestir plis dan son pei.  Sa bann Seselwa ki’n ale pandan menm avan ‘77 menm apre bokou ti pou deside tournen, si sekter prive Sesel i santi ki lanvironnman i korek pou li Sesel i pou tournen.  E sekter prive Seselwa diferans ek li se ki li i pou anvi re envestir isi i pa pou oule pran son profi rapatriye pou al dan Lenn.

Taler nou ti pe dir al get sa bann landrwa kot sa bann malbar i sorti e gete ki kalite lakaz ki zot viv ladan, dan sa ka Seselwa si i pa envestir isi sa bann zoli lakaz ti pou fer isi, akoz li son rasin i isi.  Se sa bann keksoz koumsa ki mwan mon krwar – ki mwan mon krwar nou devret ankouraze.  E si Gouvernman i serye e i ti serye nou ti pou war en sekter prive ki for, en sekter prive ki ti pou kontribye dan lekonomi atraver kreasyon lanplwa e pey taks, e i ti pou vreman devlop sa lekonomi.

E avek sa Mr Speaker mon ti a kontan siport sa Mosyon e dir ki nou bezwen fer tou pou donn en lipye avek sekter prive, me mon bezwen dir Mr Speaker finalman ki malgre ki mon dir tousala mon pa war li pe arive.  Me i pou arive 2020 anba leadership Prezidan Ramkalawan.  Mersi bokou.

 

(APPLAUSE)

 

MR SPEAKER

Mersi Onorab Afif.  Bon i reste ankor 5 Manm ki lo mon lalis nou pa pou arive konplet sa Mosyon ozordi.  Non nou pou bezwen aret la akoz i annan lezot Manm ki annan lezot langazman ki’n sinyal mwan.  Nou pou kontiny sa deba Onorab Ghislain ou lo lalis wi.  Non nou pe arete akoz i annan Manm ki depi 5er i sipoze absante la, so nou ava kontinyen deba Mardi prosen.

Zis mon anvi avan nou adjourn, mon anvi remind bann Manm ki demen bomaten FPAC pe meet pe kontinyen sa miting avek Minister Finans lo Bidze Siplemanter e tou Manm i ganny envite pou attend osi.  I en extended FPAC miting.  Vandredi i annan sa rankont avek Lekol Maritim ki IAC pe organize e osi Lendi 1er apre midi kot Departman Komers dan Minister Finans osi pou vin isi kot Lasanble, ankor i pou en deba kot tou Manm i organize par IAC tou Manm i ganny envite pou pran par.  Ok so vwala sa ki mon ti a anvi anonse.

Lasanble i adjourn e nou repran nou travay Mardi le 29 Oktob 9er bomaten.

 

 

(ADJOURNMENT)