::
Home » Verbatim » 2019 » Verbatim Wednesday 2nd October, 2019

Verbatim Wednesday 2nd October, 2019

NATIONAL ASSEMBLY OF SEYCHELLES

Wednesday 2nd October, 2019

 The Assembly met at 9am

 National Anthem

 Moment of Reflection

 Mr Speaker in the Chair

 

MR DEPUTY SPEAKER

Bonzour tou Manm Onorab.  e bonzour tou dimoun ki a lekout, pe swiv travay Lasanble Nasyonal. Bomaten parey tou bann Manm in ganny notifye nou annan en Revised Order Paper an vi ki i annan en Urgent Motion ki mon’n fer antre anba Standing Order 34 (2)(m) mon’n fer rantre lo Order Paper. 

        Me nou pou konman toudswit avek en Right of Reply apre nou ava al lo Mosyon.  Ankor dan sa laliny pou edik en pti pe nou bann dimoun lafason ki nou travay, ki bann desizyon ki nou pran, kwa ki nou fer i isi dan sa Lasanble, mon anvi donn en pti leksplikasyon anba Right of Reply ki tonm anba lartik 102 (6) nou Konstitisyon.

Parey zot konnen lartik 102(1) nou Konstitisyon, i donn en Manm laliberte pou koze e fer deba san ki i sibzekte e ki i ziridiksyon okenn Lakour, oubyen okenn lezot prosesis, apard ki prosesis dan Lasanble, kan sa Manm pe egzers son drwa.  Oubyen perform son fonksyon konman en Manm Lasanble.

Me an menm tan lartik 102(6) i donn sans pou en dimoun other ki en Manm Lasanble, ki santi ki in ganny afekte par sa drwa anba lartik 102(1) pou li ekrir Speaker e Speaker i sirkil en kopi sa repons ek tou Manm.  E konmansman prosedir sa Sitting ki swiv imedyatman Speaker i lir sa repons dan Lasanble.  E vwala sa ki mon pou fer la bomaten an vi sa Right of Reply. 

        Bon mon’n resevwar let date le 30 Septanm 2019, i adrese pou Onorab Speaker,

Honorable Speaker the National Assembly of Seychelles,

 P.O Box 734,

 Ile Du Port,

 Victoria. 

Dear Mr Speaker,

 

Ref: Right of Reply

Reference is made on the above subject matter. Please find attached Right of Reply in respect of Honorable Regina Esparon for your kind attention.  Thank you.

 Yours sincerely, Flavien Joubert, Chief Executive Officer LWMA. 

        Son Drwa Repons i lir comme swivan : demann pou egzers en drwa pou reponn en statement fer dan Lasanble Nasyonal.  Mon oule fer referans lo en statement fer par Onorab Regina Esparon san son summing-up lafen sesyon Lasanble Merkredi le 25 Septanm.  Kot i ti demande ki LWMA i pey bann kontrakter zot Trezyenm Mwan Saler.

En statement ki donn lenpresyon ki annan ankor Kontrakter ki ti fer laplikasyon avek Lazans, me ki pa ankor ganny peye.  Mon oule enform Lasanble ki Komite pou Trezyenm Mwan Saler kot Minister Finans, in fini travay lo tou laplikasyon pou lannen 2018 sorti kot LWMA. 

        E ki bann kontrakter i swa ganny peye, ouswa ganny en repons, akoz zot ka pa’n ganny konsidere.  Serten ti’n ganny demande pou anmenn dokimantasyon siplemanter, sorti kot Departman Lanplwa ki laplipar ti soumet.

Bann detay i comme swivan ; kantite laplikasyon resevwar an Fevriye 2019 – 29. Laplikasyon aprouve e peyman an Mars, Avril ek Me 2019 – 26.

Laplikasyon ki pa’n aprouve – 2.

Laplikasyon avek dokimantasyon an retar – 1.

Mersi pou sa loportinite pou prezant sa klarifikasyon. Nou reste disponib pou okenn Manm Lasanble ki bezwen plis lenformasyon lo sa size.

Sa i end of Right of Reply, ki sorti kot CEO Flavien Joubert responsab pou Land Landscape and Waste Management Agency.  Yes Onorab Esparon.

 

HON REGINA ESPARON

Mersi Mr Speaker.  Bonzour tou dimoun.  Mr Speaker mon apresye ki in annan en klarifikasyon lo sa size.  Parske letan sa dimoun ti anvoy sa mesaz pou mwan, i ti santi poudir li i enn ki’n ganny afekte kot i pa’n ganny peye son Trezyenm Mwan Saler.  E mon apresye ki zot in kapab klarifye pou dir i annan at least 3 kontrakter, ki’n servi zot bann dokiman de ki dir pa’n ganny aprouve.  E enn ki dir dokiman pa ti annord.

Petet li sa dimoun i tonm dan kategori sa 3 ki pa’n ganny peye pou serten rezon.  E mon apresye ki sa in kapab klarifye.  Mersi Mr Speaker.

 

MR  SPEAKER

Mersi Onorab Esparon.  Bon nou ava bouze lo nou Order Paper e parey mon’n dir bomaten, mon’n allow en Urgent Motion rantre par Onorab Waven William, e mon’n fer sa anba Standing Order 34(2)(m) ki permet Speaker met en Mosyon pou presed ek tou lezot travay ki annan deza lo Order Paper.  E toudswit mon ava donn laparol Onorab Waven William.

 

HON WAVEN WILLIAM

Mersi Mr Speaker bonzour.  Bonzour tou manm piblik ki a lekout.  Mr Speaker mon remersye ou pou permet sa Mosyon antre lo Order Paper.  Mosyon ki mon pe prezante Mr Speaker, i baze lo en santiman ki mon’n santi ki sa Lasanble baze lo kestyon ki mon ti poz Minis Finans e son komikman ki in fer.  E Mosyon Mr Speaker i lir comme swivan:

Sa Lasanble i demann Gouvernman swivan komitman ki Minis Finans in fer Zedi pase dan sa Lasanble, avek viktim delo La Misère, pou donn manda Minis Finans pou re negosye avek sa lakonpannyen konstriksyon, e sa propriyeter batiman, pou ganny ankor en pe larzan pou fini rapidman avek sa case peyman konpansasyon polisyon delo La Misere e Petit Barbarons.

Mr Speaker Minis Finans in fer sa komitman avek Lasanble e avek bann viktim ki’n ganny afekte avek delo polye La Misère ek Petit Barbarons e bann ki’n travay La Misère e vizite.

Lefe ki sa ka in trennen, malgre ki ti annan bann plizyer komitman dan lepase.  Mr Speaker mon pe prezant sa Mosyon e pe demann sipor Lasanble, pou nou kapab anvoy en mesaz kler ki Lasanble i anvi siport sa swe Minis, kot i ti dir si Lotorite pou donn li manda pou li al re negosye, i pou fer li.

So mon panse  ki avek sa Mosyon, i ava pe kal sa dezir Minis, e pou fer ki i ava annan en demann avek Gouvernman, pou soumet sa swe, ki Minis Finans a kapab konmans demars pou re negosye larzan adisyonnel, pou kapab fini avek sa case La Misère. Mr Speaker avek sa de pti mo, mon pe soumet sa Mosyon avek Lasanble.  Mersi.

 

MR SPEAKER

Mersi Onorab Waven William.  Bon Mosyon i ganny prezante.  Okenn Manm ki segonn Mosyon.  Wi Onorab Bernard Georges.

 

HON BERNARD GEORGES

Bonzour Mr Speaker.  Mr Speaker mon ti a kontan segonn sa Mosyon Onorab Waven William e koz en pti kou lo la.

 

MR SPEAKER

Mersi Onorab Georges.  Laparol i pou ou.

 

HON BERNARD GEORGES

Mersi Mr Speaker.  Mr Speaker mon kontan ki sa Mosyon in vin devan Lasanble ozordi, akoz i en kontinyasyon sa deba ki ti arive semenn pase, otour kestyon ki Onorab William ti demann avek Minis Finans, ek lasirans ki Minis Finans ti donn avek sa avek sa Lasanble.

Sa Mosyon ozordi i swiv; i swiv sa lasirans ki Minis ti fer devan sa Lasanble e i focus – i focus lespri Gouvernman lo kote larzan i devret vini pou pey bann dimoun La Misère sa konpansasyon ekstra ki zot pe rode

Mon vwar sa Mosyon al dan sa direksyon.  Akoz se lakonpannyen konstriksyon e propriyeter batiman ki’n benefisye.  E se zot prensipalman ki devret pe pey okenn konpansasyon ekstra.

Sa mon krwar tou dimoun i dakor.  Otan ki posib lepep Seselwa atraver Bidze pa devret pe pey konpansasyon pou benefis ki propriyeter in fer ek neglizans son kontrakter.  Mon krwar tou dimoun i dakor lo la.  E otan ki posib se sa ki konman en asanble nou devret pe demann avek Gouvernman e se ki Gouvernman konman en Gouvernman responsab e rezonnab ki fer en komitman devan sa Lasanble pou pey konpansasyon ekstra, i devret se laliny ki devret pe swiv.

Konteks i enportan Mr Speaker.  E ou a permet mon de parol bomaten pou sitye kot nou ete dan son konteks.

E fodre pa nou bliye, e fodre zanmen nou bliye,  ki sa desizyon pou donn sa propriyeter permisyon pou li fer en batiman sa grander lo sa site, ki in fer se enn bann pli move desizyon ki Gouvernman ki o pouvwar depi 40an in pran nou pei.

E i move pou plizyer rezon.

Premyerman, in deranz en skyline konpletman.

Dezyenmman, in met en gro batiman ki pa apropriye dan milye en Rezerv.

Trwazyenmman, in fer sir ki la kot nou ti kapab annan en Mize Lespas pou nou dimoun ek nou touris avek en park otour sa Mize Lespas, sa nou’n prefere donn en sel dimoun pou son enjoyment. 

        Katriyenm rezon, i en move desizyon.  Se ki enn fwa ki nou donn sa permisyon an depi refi Planning Authority, Gouvernman pa’n supervise sa travay dan en fason pou fer sir ki i ganny fer byen, e rezilta nou konnen, se ki en popilasyon La Misère in bezwen soufer privasyon avek maladi.

Pou tou sa bann rezon, pou tou sa bann rezon Gouvernman dizour – e fodre nou kler, i annan en diferans ki nou bezwen fer ant Gouvernman avek taxpayer.  Gouvernman dizour i bezwen aksepte son responsabilite pou lefe ki in komet sa neglizans dan nou pei.  E the buck i bezwen aret avek Gouvernman.

Malerezman, malerezman ler Gouvernman i responsab, se lepep ki responsab.  E Gouvernman pa pou al tir larzan dan son pos.  I pou aksepte responsabilite, e se nou bann dimoun ki travay dan sa pei, ki pou bezwen al pey lepokase, pou en neglizans Gouvernman.  E se sa mon krwar kot problenm in arive.  Se sa ki’n swivan serten deklarasyon ki’n ganny fer dan sa Lasanble, e lo sa size ki’n pous Onorab Waven William pou anmenn sa Mosyon devan.

Sa Mosyon nou bezwen vwar li Mr Speaker dan konteks en case ki devan Lakour.  E ki pou fini dan en zizman, kont Gouvernman e kont ASCON.  Me sertennman kont Gouvernman e kont PUC, akoz zot responsabilite i la e zot responsabilite pa pou ale.

Alor ki nou kontan, ki nou pa kontan, en bo zour i pou annan en zizman ki Lakour i pou prononse ki Gouvernman pou bezwen peye ;- pou pey konpansasyon pou bann dimoun.  Akoz?  Akoz lafason ki in negosye son konpansasyon an 2011 ti en move fason.

E la mon bezwen dir, ki bann dimoun ki ti’n kapab ed Gouvernman a sa lepok, e la mon pe koz prensipalman ou avek mon Mr Speaker.  Nou ti lo Komite.  Nou ti’n kapab ed Gouvernman e sa problenm pa ti pou’n la ozordi.  Me Gouvernman in prefere met nou a kote, akoz ti annan en eleksyon ki pe vini, al negosye zot menm, rod larzan, deside zot menm okenn responsabilite, san okenn input okenn dimoun ki’n ganny afekte La Misère, oubyen okenn zot bann reprezantan, ale fer en peyman vitman, akoz ti annan en eleksyon.  E i marse pou zot, akoz zot in ganny eleksyon.  E la ozordi nou pe retrouv nou avek, avek en sityasyon kot nou prezan nou bezwen vin rod en solisyon pou en Gouvernman ki premyerman fer en fot, ler i les sa devlopman vini.  E dezyenmman i fer en fot dan lafason ki in al rod larzan e pey konpansasyon.

E nou ozordi, akoz sa fot Gouvernman se nou ki bezwen rod solisyon, e se nou ki bezwen vin dir avek Gouvernman, les nou ed zot prezan, pou esey rod en fason pou ki nou a ganny en konpansasyon pou dimoun La Mísere san ki sa i bezwen sorti dan Bidze Gouvernman.

E Mr Speaker mwan mon pa’n aret travay mwan.  Depi 2011 Onorab Waven William e ou osi ou konnen, mon’n fer plizyer meeting La Misère.  Mon’n ekrir plizyer let bann dimoun La Misère.  Mon’n annan negosyasyon avek sa bann reprezantan.  Mon’n al State House.  Mon’n al avek Minis Morgan.   Mon’n al en pe partou, mon’n koze mwan.  E mon ankor – mon ankor tou lemwan mon ti dir semenn pase mon bezwen al reponn lapel kot Sef Ziz pou dir li la, la sa ki nou pe fer tyonbo ankor en pe, Prezidan in vin Lasanble in promet.  Minis in vini in dir i pou pey nou an Septanm, la mon bezwen ale e dir li be ti dir nou Septanm pa ti dir nou ki lannen.  E la dapre konpran i 2020 ek 2021.

Me tousala Mr Speaker kantmenm, kantmenm nou’n ganny met akote, se nou ki’n la pou travay pou fer sir ki bann dimoun La Misère i ava ganny sa ki zot merite.

E la mon fyer pou kapab dir zot, ki lo polisyon dyezel akoz ti annan de polisyon enn malpropte, enn dyezel. Lo polisyon  dyezel kot Gouvernman ti negosye avek UAE e sa larzan ti’n ganny donnen, zot in pran larzan dyezel zot in pey delo malpropte avek, la atraver mon negosyasyon Gouvernman UAE in pare pou pey sa bann dimoun pou zot pou zot konpansasyon pou dyezel.

Donk ler ou negosye dan en fason an bonnfwa avek bon largiman, e ki ou dir zot nou pa pe rod lasarite parey mon’n dir zot pou dyezel.  Bann dimoun La Misère ki’n ganny afekte ek dyezel pa pe rod lasarite!  Zot pa pe rod en larzan avek en dimoun ris.  Zot pe rod en konpansasyon pou en keksoz en keksoz neglizans ki ou’n fer ou menm.  Aksepte.

E ler ou dir zot sa, e ler ou’n dir si ou pa pe aksepte napa problenm, i annan en Lakour nou a zize, nou a ganny en zizman, zot dakor e zot vin devan.  E la pa pli tar ki Lendi zot Avoka UAE, in ekrir mwan in dir nou’n dakor nou dakor annou, annou proceed nou ava pey zot, zot larzan pou dyezel.

E sete egzakteman sa i Onorab William pe rode isi pou sa malpropte.  Otan ki posib i responsabilite Gouvernman se se Gouvernman pou bezwen pey bann dimoun La Misere annou pa annou pa kas okenn kontour.  Akoz se Gouvernman ki responsab.  Sa ki nou, nou pe rode,  e sa ki Onorab William pe rode ozordi, set en fason pou Gouvernman al rod sa larzan pou pey sa konpansasyon.  E sa i ava deside si atraver son komitman ki in donnen isi devan sa Lasanble e sa lasirans ki Minis in donn nou, nou pou pey avan e apre nou pou al rod en ranboursman kot UAE, oubyen avan sa lasirans 2020, nou pou al rod sa larzan kot UAE, pou fer sir ki sa pa sorti dan Bidze Gouvernman.  Se sa the narrow issue ki devan nou ozordi.

E Mr Speaker mon kontan ki Onorab William in anmenn sa, akoz parey ou konnen, an Novanm nou bezwen al reponn lapel devan Sef Ziz, ki in dir nou ki si nou pa kapab vin avek en bon rezilta, li i pou kontinyen e i pou donn en zizman.  E ler i pou donn sa zizman se Gouvernman ki pou bezwen peye.

Alor mon vwar sa linisyativ bon, ki ozordi nou Lasanble i demann avek Gouvernman, zot in donn nou en lasirans an 2017.  Si ou ti’n konmans peye depi an 2017 nou pa ti pou annan sa deba ozordi.

Larzan ti pou’n konmans antre, tou keksoz ti pou’n fer.  Ankor enn fwa ou pa’n fer s aki ou’n promet pou fer, annou fer li la once and for all.  Alor annou demann avek Minis, avek Gouvernman otoriz Minis Finans spesifikman akoz Lasanble i demande, otoriz li pou li al Abu Dhabi al negosye avek bann dimoun ki pe ganny benefis sa devlopman ki zot in fer.

E dir zot dernyen negosyasyon ti mal pase.  Bann dimoun pa ti pe pran lentere bann zabitan La Misere aker.  Nou sorry silvouple la, la sa ki i merite ganny peye prezan silvouple olye les sa pep Seselwa peye, ou prezan vin devan e donn sa larzan.  Se sa Mosyon Onorab Waven William ozordi.  E mon siport li a 100poursan Mr Speaker akoz i al dan lentere sa ki nou pe rode.

E mon ti ava demann avek bann dimoun ki pe ekout nou, sirtou bann zabitan La Misere, ki nou pou rankontre sa weekend pou eksplik zot sa ki pe pase, pou annan pasyans parey ot in annan pandan sa peryod letan ; konnen ki bann dimoun ki pe travay pou zot per travay dan zot lentere.  Ki otan ki posib se bann dimoun ki’n benefisye ki  pou responsab pou bezwen peye.

E alor pole, pole tyonbo Sanmdi nou ava vin eksplik zot ki sa ki e arive dan en fason ki nou pa pou annan okenn konfrontasyon, okenn lakizasyon ki Onorab Waven William ek mwan, Leader Lopozisyon ki nou’n ganny larzan e ki nou’n met sa dan nou pos.  Ziska prezan mon konn en dimoun ki’n depans larzan e ki pa ankor larzan pa ankor rantre e se sa dimoun ki pe koz avek zot la ozordi.

Alor annou aret anvoy okenn fo lakizasyon.  Annou focus lo en keksoz.  Ganny sa konpansasyon bann dimoun ki’n soufer, e fer sir ki sa konpansasyon i sorti kot sa enn ki responsab.  Mersi Mr Speaker.

 

MR SPEAKER

Mersi Onorab Georges.  Onorab Ramkalawan.

 

HON WAVEL RAMKALAWAN

Bonzour Mr Speaker.  Mersi pou donn mon laparol.  E bonzour tou bann lezot Manm Onorab e tou bann dimoun ki pe ekoute.

Mr Speaker mon ti ava kontan ganny fer en pwen klarifikasyon.  E lefe ki Onorab Georges in konmans koze, mon ti ava kontan premyerman, si Onorab Georges i ti ava kapab donn sa Lasanble en lespri laklarte pou dimoun konnen.  Si ti a kapab dir ek sa Lasanble, letan zot ti annan zot  Komite o nivo laba anler La Misère, lekel ki ti lo sa Komite?

Si i ti kapab dir avek nou letan zot ti negosye, konbyen larzan zot ti demande in the first place?  Konbyen larzan ki zot ti resevwar?  Pou li dir nou dan sa bann larzan ki zot ti resevwar, konbyen ki ti al pou diferan dimoun?  Enkli avoka ki ti fer sa bann demars, enkli avoka ki ti bezwen fer tou bann diferan par egzanp pou bann zanfan ensidswit.  Donn en breakdown total.

E an menm tan osi Mr Speaker mon ti ava kontan si Onorab Georges e osi petet Onorab William zot fer kler, dir avek lepep Seselwa spesyalman avek zabitan La Misère, si a okenn moman dan sa bann negosyasyon, ti annan en msye ki ti apel Wavel, John, Charles Ramkalawan ki ti involve dan sa negosyasyon?  Konmsi fer li kler.  Parski mon krwar sa i ava ed lepep Seselwa, spesyalman bann zabitan La Misere pou konpran egzakteman lekel ki ti negosye lo zot par, tou sa bann keksoz, e ki sa i ava ede dan sa lespri laklarte pou nou pa viv lo rimer.

Apre sa mon ava regarde si pli tar mon pou fer mon entervansyon.  Mersi bokou Mr Speaker.

 

MR SPEAKER

Mersi Onorab Ramkalawan.  Bon ou pe demann en klarifikasyon.  Mon pou allow ou’n adres Onorab Bernard Georges – mon pa konnen si i annan tou sa lenformasyon.  Mon ava donn li laparol, e petet sa osi a kapab enable deba lo sa  Mosyon.

E pou latansyon Lasanble i en Mosyon ki direk and all that.  Mon annan mwan 5 Manm la ki anvi entervenir.  Mon ti a kontan ki zot fer zot entervansyon presi e short lo Mosyon.   Onorab Georges mon ava donn laparol pou klarifikasyon.

 

HON BERNARD GEORGES

Mersi Mr Speaker.  Mr. Speaker sityasyon i koumsa, ler problenm in arive e ki premye meeting ti ganny called dan sant Souvenir avek DA, MNA ek bann lezot zofisye PUC par egzanp, mon ti ganny demande par enn de zabitan La Misère pou vini akoz mon pa en zabitan La Misère;- mon pa en claimant,    mon napa okenn lentere dan sa zafer personnel.

Zot ti demann mwan vini e pou asiste serten parmi zot.  E mon ti vini, mon ti partisipe e nou’n tonm dakor dan en premye letan.  Ki sa ki ti pou arive, se ki en form ti pou ganny prepare pou ki sak zabitan ki ti’n ganny en – ki ti’n ganny afekte, ti ava met lo sa form ki problenm Lasante ki zot in gannyen, konbyen zot ki’n bezwen depanse e konbyen zot espekte pou depanse pou zot sanz tiyo, sanz tenk bann keksoz dan zot lakaz.

Efektivman mwan ki ti’n drafte sa form.  E kopi ti ganny fer, form ti ganny sirkile.  E dan en 2enm meeting, ou en 3enm meeting avek Mr France Bonte, ki i en avoka i en zabitan La Misère, e en kopi avek DA, en Komite premye keksoz ki ti ganny fer, avan en Komite ti ganny setup, premye keksoz ki ti ganny fer se en sonm ti ganny propoze e sa sonm ti  R650 mil par zabitan.

E sete mwan ki ti dir dan sa meeting e mon rapel tre byen e mon ti dir R650mil en kantite larzan.  Mon krwar i o.  E dezyenmman mon ti dir silvouple pa al konmans depans larzan avan ki larzan i al arive.  Mazin tre byen.

En Komite ti ganny setup e sa Komite ti konpri Mr France Bonte ek mwan menm konman avoka, en seri reprezantan zabitan La Misère, mon rapel ti annan Mademoiselle Jumeau Lydia ti annan Mr Westergreen, ti annan DA, mon pa konnen mon pa rapel si MNA ti la  lo sa Komite.  I tre probab ki i ti la e en Komite ase larz.   E sa Komite ti rankontre avek Minis Morgan.  E atraver sa Komite en let ti ganny ekri par Minis, avek en Schedule ki ti ganny atase e ki pe fer letour lo rezo sosyal, ki sa Schedule i annan sinyatir Mr Bonte, i annan mon sinyatir, i annan sa ki pou Minis apre i annan en lot ki mon pa pe rekonnet.

Anyway bref en claim ti ganny fer baze lo en sonm R650mil par latet en pe mwens kekfwa bann zanfan eksetera.  En sonm global ki ti en plizyer santenn milyon Roupi ti ganny ti ganny anvoy kot UAE. 

E UAE i ti anvoy en delegasyon – ou plito ASCON eskiz mwan pa UAE ASCON ti anmenn en delegasyon avoka isi Sesel, zot avoka zot ti pran en avoka Seselwa ti annan en meeting dan lekel zot ti dir sa i pa akseptab i bokou tro o, annou regard en sonm ki i ava akseptab.

E mon devret dir avan sa nou ti gannyen meeting State House avek Prezidan Michel, ki ti’n dir klerman devan tou dimoun, ki sa ki ti arive i ti inakseptab ki li i ti pou lead en langazman pou fer sir ki bann dimoun La Misère ti pou ganny zot konpansasyon.

Apre sa meeting  avek bann avoka ASCON, nou ti ganny dir ki sa Komite High Level ti’n ganny disband e ki prezan Gouvernman ti pou kontinyen son negosyasyon li tousel.  E mon pa’n konn plis ki sa.  Mon pa’n engage.  Mon pa’n involve plis ki sa.

Mon pa konnen ki negosyasyon ki’n arive.  Sof ki mon konnen ki mon’n aprann pli tar, ki en sa ki zot ti’n tonm dakor lo la, akoz mon’n ganny bann papye, sete ki ASCON ti pou pey Gouvernman en sonm larzan ki ti’n kalkile lo R250 mil par household La Misère.

E zot in pey sa larzan e isi  menm dan sa Lasanble nou’n ganny dir, ki sa larzan ti ariv R99milyon, i ti ganny partaze par tou bann household, e ki ti reste R4mil dan kont, sa ki fer ou Mr Speaker sel dimoun ki pa’n pran son R250mil ou ava ganny R4mil i a mank ou R246 mil ki en dimoun ki pou bezwen kontribye at some point. 

Bann dimoun La Misère ti vin kot mwan pou dir be ki nou pou fer, eski nou pou pran eski nou pa pou pran? Mon dir zot bezwen pran, akoz mwan mon pa kapab garanti ki zot pou ganny plis.  Zot bezwen pran.  Ale pran.  E si zot ganny demande pou siny en disclaimer, siny enn under protest.  Enn de dimoun in seye, zot pa’n dakor pou aksepte under protest.  Mon’n dir zot sinyen menm  si i pa under protest, e si i neseser nou ava al rod en top-up my words – en top-up.  Nou ti fer enn de meeting e bann zabitan La Misère ti dir mwan ki zot pa ti satisfe avek R250mil e mon osi Onorab William nou tou lede nou ti dakor ki R250mil pa ti fair, akoz i ti par household. I annan serten household kot ti annan zis en dimoun ki ti ganny R250  i annan serten household ki ti annan bokou plis dimoun e ki ti bezwen R250mil, zis pou aranz zot tank avek zot tiyo, me zot pa’n ganny nanryen, in terms of money.  E se la kot desizyon ti ganny pran pou al Ankour e demann en konpansasyon ekstra.  E se la kot nouete ozordi, e nou pou pas devan Sef Ziz le 11 Novanm.

Mon kapab dir ki dan tou sa bann negosyasyon Onorab Wavel, John Charles Ramkalawan pa ti involve ditou ni anler La Misere, ni dan bann meeting ki’n arive e ni dan sa case ki pe pase Ankour.  Sa set en keksoz ki nou’n fer briyevman atraver ou e kat lezot dimoun La Misere ki’n fayle sa case. 

        E lo nivo dyezel, sa in en keksoz ki Gouvernman pa’n invovle ditou.  Sa 120 dimoun ki ti ganny afekte avek dyezel, mwan konman zot avoka avek Gouvernman UAE.  Ni ASCON pa enterese ladan.  Nou’n anmenn Gouvernman UAE Ankour akoz Gouvernman UAE ki’n ki ti propriyeter sa later.

E parey mon’n dir dan sa enn osi negosyasyon ti ganny fer zis avek mwan, pa avek okenn lezot dimoun – pa avek okenn Minis, avek okenn Prezidan e pa nanryen.  E la nou annan konfirmasyon ki zot pou peye.  Mersi Mr Speaker.  Sorry wi ti annan de bezwen legal dan sa negosyasyon ki ti ganny fer ant Gouvernman ASCON avek bann rezidan La Misère.  Mwan mon ti’n ganny met de kote.  Bann papye ki mon’n vwar subsequently sete ki ti annan lo kote ASCON zot avoka sete Mr Kieran Shah.

Lo kote siny dokiman akoz sak zabitan ler i ganny son larzan, i ti bezwen siny en disclaimer, sete Mr France Bonte ki ti azir konman zot avoka ek zot noter.  E sa i lo bann papye.  E mon konpran ki pou bann zanfan ki ti miner, akoz zot Lakour ki ti bezwen aksepte larzan pou zot e non pa zot menm zot ti miner.  La se Cabinet Chetty & Hoareau Associates ki ti anmenn sa case Ankour, pou ganny permisyon Lakour pou pey – pou aksepte e pou pey bann miner.

Mwan mon pa ti involved.  Mon pa konnen konbyen zot in ganny peye.  Mon’n tande me mon pa kapab konfirmen e alor i pa apropriye pou mon dir en keksoz ki hearsay devan Lasanble.  Mon konpran zot in ganny peye.  Yes. 

 

MR SPEAKER

Mersi Onorab Georges. Bon mersi pou sa klarifikasyon.  Nou ava prezan pran bann Manm e parey mon’n averti Mosyon i spesifik.  Klarifikasyon in ganny fer e annou fer nou lentervansyon bref, pou nou apre kapab move lo lezot item lo nou Order Paper.  Mon ava donn laparol Onorab Charles De Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker, bonzour tou Manm Onorab e tou dimoun ki a lekout.  Mr Speaker Onorab William in koz ek mwan lo sa Mosyon.  E mwan osi mon donn li son blessing.  Mon siport li e mon siport son Mosyon ki devan nou Lasanble ozordi.

E mon demann tou Manm isi lo nou kote nou pou osi siport sa Mosyon.  Sa Mosyon i en bon Mosyon e sa i swiv deklarasyon, oubyen komanter ki Minis Finans li  menm i fer dan nou Lasanble.

E i en follow-up lo la.  E Minis Finans mon’n koz ek li osi.  E Lotorite pei e in diskite ek Prezidan.  Nou’n tonm dakor ki si sa negosyasyon i kapab ganny fer, ki nou donn li sa responsabilite pou li fer.  Alor lo sa ki nou pe dir la, Minis i stand son ground ki i kapab pran sa negosyasyon e al avek.  E nou konnen Sanmdi ki vini la, weekend la i annan en meeting avek bann zabitan La Misere, e Minis dan son sazes, i pou fer sir ki i ava ganny li si i bezwen Komite en bon Komite.

Mon ti a kontan par demande ki sa Komite, alor i reflekte bann dimoun ki konsernen.  E la Onorab Georges ou menm Mr Speaker, Onorab William, ti kapab form parti sa Komite si i neseser.  E Mr Bonte si li i konn history li osi i en avoka.  E si i annan detrwa lezot dimoun konmsi ki i annan en Komite o nivo ki kapab ansanm avek Minis, pou fer travay formidab, travay ki byen.

Mwan mon krwar ki sa issue – vre en keksoz in arive, i mal ki sa bann dimoun i bezwen ganny zot konpansasyon, personn pa pe dir sa  an mal.

E menm mon asire bann dimoun UAE, menm konpannyen, menm bann Lotorite laba, zot pa pe deny ki pa pe antre pou ede, pou fer konpansasyon.

Alor mon krwar mwan nou bezwen fer keksoz osi avek lasazes.  Annou fer li byen. Nou pa bezwen fer bann ensinifyan.   E mon krwar mon ki Minis anba son gidans ek en Komite, i kapab fer ki en travay pli konpreansiv i ganny fer en diskisyon pli korek pi fran, pli reel i ganny entamer, e ki an menm tan en latransparans i bezwen annan.

Pep Seselwa i osi deryer sa bann zabitan La Misère.  E i bezwen pe swiv ki pe arive.  Mon krwar tanzantan zot bezwen pe dir nou, la i la kot nou’n arive ek diskisyon.  La, la ki pe ganny propoze, en fason ki personn pa fer son prop lenvansyon, son prop dediksyon e met bann keksoz ki pa neseser partou kote.

Mon krwar sa.  E an menm tan mon demande osi ki, i annan bann dimoun ki osi in ganny afekte.  Par egzanp i annan bann dimoun La Misère, Barbarons, Petit Barbarons whatever.

        Apre i annan bann dimoun ki ti pe travay laba.  Par egzanp i annan bann dimoun Cascade, mon’n anvoy kot ou menm Mr Speaker, enn de fwa nou’n koze Onorab Georges ki ti pe osi travay laba e sa bann dimoun i bezwen osi lo lalis.  Ou konpran?

Alor petet profite zot les en letan ouver, pou permet si i annan detrwa lezot dimoun ki krwar ki annan en case ki pa’n anmenn zot bann zafer devan ki osi i vini.  Annou pa espekte pep Seselwa annantye akoz pa nou tou ki ti La Misère sa zour, la sa bann letan.  Me selman si i annan enn de ki’n tonm an deor, ki a ganny en sans pou zot kapab antre pou fer sir ki zot enkli dan sa lalis.  E ki alor nou fer konfyans ek Minis Finans. Mwan mon konnen Minis Loustau-Lalanne en msye ki vreman, vreman serye, in zwe plizyer rol ki pep Seselwa mon krwar i konnen ki son kapasite pou negosye.  E in la dan letan mersener e tou.  Mon krwar mwan ki set en boug ki kapab fer keksoz vreman, vreman byen pou pei e pou sa group dimoun.

Avek sa Mr Speaker, mon demande osi ki dan nou negosyasyon dan sa travay ki nou pe fer, annou fer atansyon osi.  Akoz nou bann zanmi Arab la, UAE zot enn bann partner avek nou dan plizyer domenn dan relasyon nou pei dan-  I annan avyon lot, lot ;- kantite biznes ki mon krwar zot annan zot d pei en kantite si mon pa tronpe.

Alor mon ti a kontan mon lans en lapel nou pa deranz keksoz.  Annou fer atansyon konbyen nou fer.  Be toute an dizan sa, mon pe dir  alor ki annou fer keksoz byen, e mwan mon krwar ki avek komitman ki Minis in fer dan nou Lasanble, e ki pe ganny siporte par Gouvernman e mon krwar mwan ki le Minis i pou anmenn en diskisyon entamer –  en diskisyon ferm, for, e ki pou dan lavantaz e dan lentere tou dimoun.  E ki sa konmsi ti ava al en pe vit – ou pli kourt dele posib, sa zafer La Misère ti kapab met li deryer pou nou kapab kontinyen nou lavi dan pei, dan en fason ki nou kapab adres lezot issues ankor enportan  ki nou annan devan nou comme –   nou konn tre byen cost of living i en issue ki nou bezwen re tous li ankor, e kontinyen re tous li.  I annan keksoz ki nou bezwen focus lo la plis, e alors mon ti a demande ki nou siport sa Mosyon, pou nou bouz vitman e ariv a en solisyon ki tou dimoun i a happy avek sa zafer La Misere.   Mersi.

 

MR SPEAKER

Mersi Onorab De Commarmond.  Mon ava donn laparol Onorab Jean-Francois Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon ti a kontan remersye bann dimoun ki’n entervenir ziska prezan lo sa Mosyon.   Mon remersye Onorab William pou son Mosyon.  Sel keksoz ki mon ti a kontan dir, e yer Onorab William ti’n sinyalman mwan poudir i ti annan en Mosyon, me pou mon santi mon dan en lobligasyon mon krwar mon annan rezon pou fer, ki poudir ki  mwan konman en Whip dan sa Lasanble, mon ti ava’n prefere, mon ti ava’n pli byen prepare, si mon ti’n ganny sa Mosyon en pe pli boner, plito, ki zis bomaten ler mon’n arive;- en pe pli boner pou mon kapab kominik avek mon bann koleg, akoz i enportan ki mon kominik avek mon bann koleg.  E ki nou prepar nou lentervansyon pli byen.  Donk kominikasyon, kominikasyon, kominikasyon i absoliman enportan, pou nou kapab fer bon travay dan sa Lasanble.

Letan mon’n fini dir sa, prezan mon ti a kontan al lo sa Mosyon li menm.  Mr Speaker mon ti a kontan konmans par dir ki, detrwa – plizyer mwan pase, mon ti pran li konman en devwar e en keksoz personnel konman dan mon krwayans politik, pou mwan al defann drwa bann stevedores lo lasose.

E mon ti fer li e mon krwar avek serten sikse, akoz apre sa in annan en revizyon zot saler.  Me pou sa mon ti ganny apele en voler.  E sa e sa bann komanter ti ganny en    echo osi par lezot Manm lo lot kote latab, ki ti ki ti repet sa bann lakizasyon, konmkwa mon’n pran gous, mon’n al negosye deryer zot ledo, bann keksoz koumsa.

 

(Off-Mic)

 

HON JEAN-FRANCOIS FERRARI

Mwan mon –

 

MR SPEAKER

Ok.  Onorab annou al spesifikman lo Mosyon.

 

HON JEAN-FRANCOIS FERRARI

Wi. Non mon pe met mon konteks.  Mersi Mr Speaker mon pe zis dir ki dan lavi – dan lavi parler ler ou fer keksoz koumsa, ler ou fer.  Ler ou antre dan en negosyasyon parler ou menm ou ki ganny brile, ou ganny atake.

E ozordi bomaten nou’n ekout Onorab William, nou’n ekout Onorab Georges eksplike ki mannyer, zot, zot in angaz zot konpletman dan en travay pou anmenn lazistis pou bann zabitan La Misère e Grand Anse.

E pou sa zot in ganny akize.  E pou sa e zot in ganny akize trete tou kalite non, me selman mon vwar ki ozordi, zot tou lede zot bann dimoun solid e zot pe fer en travay ki en pe en gra.  Me zot in kontinyen fer li.

Si Onorab William ti anvi en lavi trankil re ganny elekte, cool easy laba Grand Anse, pa fatig personn, i pa ti pou leve sa bann size koumsa.   E laprev ki i sa bann size prensip i enportan pou li, in menm ganny problenm sispann dan son Parti pou lapenn in fer sa bann pozisyon.

 

(Interruption)

 

MR SPEAKER

Ok. Ok. Order! Order!  Order!  Order!  Order! 

 

(Interruption)

 

MR SPEAKER

 

 

Bon annou pa touy lide lespri deryer sa Mosyon.

 

(Interruption)

 

MR SPEAKER

Order!   Order!

 

HON JEAN-FRANCOIS FERRARI

Onorab Georges-

 

MR SPEAKER

En moman en moman Onorab Ferrari.  Annou annan en pe lord silvouple!  The Speaker has floor at the moment.  Ok?  Bon parey mon’n dir, mon’n permet sa Mosyon bomaten, e parey mon’n dir mon’n servi diskresyon anba Standing Orders.  Sa Mosyon i spesifik.  Alor pa dilute son meaning akoz mon krwar Lasanble i le-

 

(Interruption)

 

HON JEAN-FRANCOIS FERRARI

Ok Mr Speaker.

 

MR SPEAKER

En moman mon pa ankor fini Onorab.  Mon le latansyon tou Manm silvouple.

Mon krwar atraver sa Mosyon rezolisyon ki Lasanble pou pran, se pou anvoy en mesaz ki tre for kot Gouvernman e osi tou kot lakonpannyen avek owner sa property. 

Annou fer li byen dan en fason ki byen, ki tou dimoun deor bann stakeholders, i ava vwar pou dir Lasanble i serye e i pe anvoy en rezolisyon ki inanim ki en desizyon Lasanble Nasyonal annantye.

Alor annou reste focus lo annou reste focus lo lespri deryer sa Mosyon.  Onorab Ferrari ou kapab kontinyen.

 

HON JEAN-FRANCOIS FERRARI

Mersi Mr Speaker.  Mr Speaker mon remarke poudir bann Manm pe enteronp mwan.  Me selman zot pa ti enteronp Onorab Georges ler Onorab Georges ti pe dir lekel ki  responsab?  E mwan  mon pou ensiste, mon pou ensiste – e les mwan koze silvouple, mon pou ensite ki zot pa pou kasyet lekel ki responsab, pou sa sityasyon ki nou ladan.   Ok?

 

(Interruption)

 

MR SPEAKER

Order!  Onorab Ferrari kontinyen.

 

HON JEAN-FRANCOIS FERRARI

 Alors in ariv en sityasyon kot in demann bann desizyon brav. Onorab William in pran en desizyon, Onorab Georges in pran en desizyon e nou nou’n donn zot nou sipor.  Tandis ki zot, zot in pa’n donn sipor pou sa bann keksoz.  Zot in pas par deryer e se sa ki Onorab Georges in dir.  So les mwan-

 

(Interruption)

 

MR SPEAKER

Order!  Order!  Order! 

 

(Interruption)

 

MR SPEAKER

Order!  Order!  Order! 

 

(Interruption)

 

MR SPEAKER

Order! Order!    Onorab De Commarmond non Onorab De Commarmond.  Onorab Pillay mon pe adres Leader Government Business.  Onorab De Commarmond ou non pa’n come up. Wi i annan sa lakizasyon tou lede kote.

 

(Off-Mic)

 

MR SPEAKER

Wi me ou’n fer lentervansyon ki mon krwar i tre bon – ok?  I pa pe fer okenn lakizasyon lo ou.

 

(Interruption)

 

MR SPEAKER

Onorab Ferrari sum-up please.  Ok wrap-up. 

 

HON JEAN-FRANCOIS FERRARI

Mr Speaker mon annan detrwa pwen pou mwan fer apre mon ava sum-up.  Mr Speaker mon anvi dir ki dan sa travay – e se sa pwen ki mon pe sey fer.  Dan sa travay ki nou pe sey fer la, nou pou ganny nou’n ganny akize.  E nou pou ganny akize.  Me mon anvi dir avek tou bann dimoun ki involve ladan, dan trouv en solisyon, aksepte sa difikilte.  I pou vini sa difikilte.  nou pou gannyen.  Me selman nou pe fer li akoz nou anvi vwar lazistis.  Nou pa pe fer li pou eleksyon – parey dan lepase in ganny fer, delo La Misere in ganny servi konman keksoz eleksyon, nou pe fer li akoz nou pe rod lazistis.  E si nou, nou pa ti pe rod lazistis, Mr Speaker, nou pa ti pou fer nanryen, akoz dernyen fwa ler nou ti pe rod lazistis La Misère, nou vot ti desann, ok?  Bann ki pa ti pe rod lazistis zot vot in monte nou, nou vot in desann.

Alors nou, nou pe kontinyen pou nou rod sanmenm sa lazistis.  Onorab Minis semenn pase in vin dan sa Lasanble, in dir i ti a kontan volonterman in dir, i met pli devan pou li al negosye.

Mon ti a kontan dir avek tou dimoun ki konsernen, sirtou mon bann zanmi La Misère.  Nou’n deside pou dir larzan pou konpansasyon, i pa isi Sesel.  Larzan pou konpansasyon i laba Abu Dhabi se sa ki nou, nou deside pou nou pran konman en prensip.  Mon krwar nou tou nou dakor lo la.  Nou pa pran larzan, larzan piblik taxpayers money pou nou pey en det ki parey santer Mr Ernesta i dir ki, ‘’det ki bannla in fer.’’ Nou pa pe pran larzan piblik pou nou al fer sa.  Larzan i laba kot Abu Dhabi!

        Me i annan dimoun i bezwen ale Abu Dhabi pou li al sa.  I annan dimoun ki bezwen donn konsey.  Parey bann Avoka, bezwen al laba.  Nou, nou pa pou konnen nou pa pou vwar zot laba Abu Dhabi ki zot pe fer.  Nou pa kapab asiz Sesel e maltret zot e dir zot poudir, zot pe pran larzan.   Nou pa kapab fer sa bann keksoz koumsa.  Mwan mon pe koz pou sa, pou mon bann zanmi ki anler La Misère, pou mwan dir avek zot, nou’n montre zot dan lepase – Onorab Georges in montre zot ki nou kapab pouse pou nou rod lazistis.

Me pou enn fwa annou annan konfyans dan bann dimoun ki’n montre zot lentegrite ek zot lonnekte!  Annou annan konfyans ladan.  Annou donn en sans sa negosyasyon reisi.  Akoz mwan sa ki mon ti a kontan vwar se tou sa bann dimoun La Misère ganny en keksoz.  Se sa lobzektif!  Se lobzektif se pa pou mwan demande ki entel, entel i al dan prizon.  Sa i pa mon rol sa mwan.   Sa i pa mon rol!   Mon rol se mon pa anvi ensilte personn.  Mon rol se mon rol se, se pou ankouraz tou dimoun pou fer fason ki sa larzan i desann Sesel, e i ganny partaze dan en fason ekitab e zis!  E ki tou sa bann problenm i ganny mete deryer nou.  Se pou sa ki nou bezwen fer.

E zot, zot pa kapab nerve, ler nou pe dir zot pou dir nou pa fye zot.  Vre nou pa fye zot akoz zot mal negosye dan lepase.  Aksepte! Premye – Mr Speaker mon termin  lo  la mon wrap-up mon termin lo la.  Dan en moman kot i annan en Truth and National Reconciliation, omwen aksepte kot zot in mal fer.

 

(Interruption)

 

HON JEAN-FRANCOIS FERRARI

Fer parey  mwan mon fer.  Pa bezwen-

 

(Interruption)

 

HON JEAN-FRANCOIS FERRARI

Fer parey  mwan mon’n fer pa bezwen fer parey bann ki al kasyet Abu Dhabi!  

 

(Interruption)

 

HON JEAN-FRANCOIS FERRARI

Vini vin devan vin koze.  Aksepte ki zot in mal fer!  Mr Speaker-

 

MR SPEAKER

Mersi.

 

HON JEAN-FRANCOIS FERRARI

Mr Speaker mon konmans, mon konmans pa kontan sa bann kalite enteripsyon.

 

(Interruption)

 

HON JEAN-FRANCOIS FERRARI

Mwan mon annan laparol.  Se mwan  ki annan laparol – ok? 

 MR SPEAKER

Order!  Order! 

 

(Interruption)

 

MR SPEAKER

Order!  Order!  Onorab wrap-up Onorab Ferrari.

 

(Interruption)

MR SPEAKER

Order!  Bon mon pou konmans prezan servi Standing Order. Okenn Manm ki kontinyen disturb ler enn i annan laparol, mon pou bezwen konmans aplik the rules.  Ok?  Onorab Ferrari wrap-up. 

HON JEAN-FRANCOIS FERRARI

Mr Speaker mon ozordi sa Lasanble, mon pran pozisyon – mon aksepte pozisyon ki Minis Maurice Loustau-Lalanne min pran.  E i en dimoun ki annan sa konpetans ki kapab ale al fer sa travay.  Si i bezwen anmenn lezot dimoun avek li, anmenn lezot dimoun avek li.  Fer sa travay.  Fer li dan lonnekte.  Fer li dan en fason diferan ki’n ganny fer dan lepase, ki ozordi nou dan sa problenm.  Fer li dan lonnekte e dan lentegrite.  E dan latransparans.  Dan sa fason ki tou mon bann zanmi, tou mon bann frer, tou mon bann ser ki’n soufer pou sa problenm, i ava satisfe enn fwa pou tou ki i annan en lazistis dan sa pei.

E sa i konmans par rekonnet kot zot in mal fer Mr Speaker, e sa tan ki zot pa fer li nou pa pou kapab avans devan.  Mersi Mr Speaker.

 

MR SPEAKER

Mersi Onorab Ferrari.  Bon mon a donn laparol Onorab Sebastien Pillay.

HON SEBASTIEN PILLAY

Mersi Mr Speaker.   Mr Speaker mwan mon pou sey fer zistis dan sa Mosyon ki devan nou ozordi.  Mon konnen Mr Speaker sa ki enportan dan lavi fodre nou get sityasyon ozordi ki devan nou, regarde lekel ki’n ganny afekte par s sityasyon, e kwa ki mon bezwen fer pou ed zot.  Prezan dan tousala nou bezwen mazin de keksoz – premyerman lekel ki pli enportan, e dezyenmman kwa ki nou devret pa fer pou fer sa sityasyon vin pli konplike, oubyen fer li vin pli anbrouye ki i ete.

Mr Speaker se zabitan La Misère ki’n ganny afekte.  Bokou zabitan La Misère in demontre zot fristrasyon, in demontre zot mekontantman atraver bann sityasyon.  E sa i come from bann diferan kestyon, anmennen par Onorab reprezantan dan asanble.  Minis pou Finans in vin reponn sa bann kestyon nou’n ganny bann lenformasyon, nou’n ganny bann diskisyon nou’n ganny lenformasyon adisyonnel.  E nou konman bann Manm Lasanble, nou bezwen fer en desizyon baze lo sa bann lenformasyon ki nou’n gannyen.

E sa ki nou pe ganny dir se ki, lenportans la se re atab en negosyasyon pou kapab rod solisyon pou sa problenm.  Se sa bottomline.  Bottomline i rod solisyon pou dimoun La Misere.

Me sa ki nou devret pa fer Mr Speaker ki  nou bezwen very be careful about, se pa pran sityasyon La Misère ozordi pou fer li vin en sityasyon politik.  E fer li vin konplike ki i ete.  Dan lesans ki Mr Speaker ozordi ou vwar dimoun ki pa menm reste La Misère, pe antre dan bann diskisyon, pe antre dan bann konversasyon, ki pa pe neseserman ed sa bann dimoun La Misère.  Mwan mon krwar sa ki nou bezwen fer ozordi se desin en laliny kler.  Bann zabitan La Misère i bezwen annan en Komite – en group dimoun sorti La Misère ki reprezant zot lentere.  Sa bann dimoun i bezwen form parti sa lot Komite ki pou liaise avek bann Lotorite konsernen pou ki i annan sa bann negosyasyon.

E rezon akoz nou bezwen annan sa Mr Speaker, se ki nou bezwen kapab fer en pe klarite dan sa sityasyon.  Mwan mon krwar Mr Speaker 5senserman se bann dimoun ki reste La Misère, ki’n ganny afekte dan sa letan, ki devret ganny konpansasyon an premye.  Sa i en keksoz fondamantalman  i bezwen arive.

Okenn lezot konpansasyon ki vin apre, kot en dimoun ouswa in al kot lekol otelyer in bwar en ver delo oubyen in al en lot landrwa, oubyen i pe travay lo en site, La Misère sa i devret vin 2enm.

An premye lye se zabitan La Misère ki bezwen ganny zot konpansasyon ;- bann ki reste La Misère ki annan zot lakour La Misère ki viv La Misère.

Apre 2enm  i ava annan sa bann lezot group dimoun ki pe fer travay La Misère ;- bann etidyan ki’n lekol La Misère pandan 1an, 2an, 3an, ki’n pas en serten kantite letan La Misère.

Me sa ki nou bezwen tre pran serten kosyon, ler nou pe fer, se nou bezwen regard byen ler sa levantay pe ganny ouver si ou pa pe les dimoun ki pa neseserman petet ganny afekte parey lezot dimoun, pou vin lo tit egal,  sa bann dimoun  La Misère ki sipoze pe ganny  sa konpansasyon.  Petet loter Mosyon i ava eksplik nou ki mannyer, i annan serten modalite san ki i al dan bann detay.

Me bottomline i reste Mr Speaker se ki, bomaten letan mover Mosyon in move son Mosyon letan sa dimoun ki’n segonn sa Mosyon ki in koze, Lasanble in lo en sel paz.   E sa paz  se pou nou siport sa Mosyon, e donn e lans en mesaz – en mesaz kler avek Minister Finans, atraver Minister Finans avek Gouvernman.  Akoz ler Lasanble i pas sa Mosyon, i pa zis Lasanble sa bann Manm ki la anndan ki pe pas sa Mosyon.  I sa bann distrik, ki sa bann Manm ki reprezante.  I sa bann constituency ki sa  bann dimoun i reprezante, ki pe vot atraver zot Manm  pou dir zot annan zot sodalité avek La Misère, e zot anvi vwar en solisyon pou dimoun La Misère.

E i enportan dan tousala, ki personn pa fer bann alegasyon kont lekel, kont lekel akoz i annan en travay ki bezwen ganny fer e respekte travay ki bezwen ganny fer.  E sa bann delegasyon pa devret ganny fer until ki si ou ariv en moman pou demann en lenvestigasyon dan sa ki in arive.  Se sa ki nou bezwen  met devan.   E nou bezwen être rezonnab.  osi ksi nu kontinyen nou kontinyen pran sa konman en mon pa le servi sa term me konmans zwe avek sa size.  Ou pou annan toultan en kote, lot kote en kote lot kote, pou annan en bout dan milye, e prezan ou pa pou konnen kote ou pou konmans pran li.

Mon krwar sa ki nou bezwen reste focus lo la se zabitan La Misère ki’n ganny afekte se zot an premye lye ki bezwen ganny andomaze avek oubyen afekte.  Eski sa ki zot in gannyen i pa ase, e si pa ase then nou bezwen al rod sa adisyonnel.

Prezan i anmenn nou lo sa pwen whether  Gouvernman pou servi larzan tax oubyen non.  Nou pe dir no taxpayers money.  Be si mwan mon en zabitan La Misère par egzanp, mon’n ganny afekte, i pa vedir pou dir mon 100poursan dakor ki larzan tax ki devret pey sa.  Mwan osi mon krwar pou dir nou bezwen al rod sa larzan oubyen kapab al negosye sa larzan avek sa bann dimoun ki’n poz sa problenm in the first place. 

        Me si nou bezwen donn en finalite sa problenm, e i annan dimoun ki bezwen ganny en finalite sa problenm pou en rezon kelkonk.  Swa i dan kondisyon ki i maladi swa i kondisyon pou lezot keksoz.

So nou bezwen pran tout en seri keksoz an konsiderasyon, me sa ki reste enportan e sa ki sa Mosyon pe demande, se ki nou annan sa posibilite, pou nou kapab fer sa negosyasyon.  E se sa ki Lasanble i devret reste focus lo la ozordi.

Pou nou kapab rod en solisyon.  Pe enport lekel ki form par sa tim sa Komite, mon krwar idealman i devret sa bann dimoun ki bann lead sa sityasyon ozordi.  Obviously zot Manm Lasanble reprezantan Lasanble i devret form par sa Komite ;-nou annan Onorab Georges ki’n segonn Mosyon, ki’n enterakte avek sa size parey Onorab De Commarmond in dir, i devret form parti sa Komite.  Mon krwar Mr Speaker, san ki mon pe overstep mon boundary konman en Manm Lasanble, mon krwar ou osi form par sa Komite.  I bezwen annan en group dimoun ki pe take  the lead, ki pe pran bann aveni, rod bann solisyon pou dimoun La Misère.

Me mon le osi lans en lapel ek dimoun La Misère. E mon konnen i pa popiler ler mon dir sa, me mon bezwen dir li.  Zot in santi zot in ganny zot afekte i  byen.  Me i pa osi korek pou nou restrikte drwa mouvman en lot dimoun.

Si nou dir nou pou bloke nou anpes en dimoun par egzanp,  ki annan son travay pou li al fer pou li al fer.  Oubyen dimoun ki pe mont  dan sa landrwa, tel fason.

Akoz zot bezwen aksepte, zot bezwen apresye  pou dir nou tou nou pe solider ek zot.  E ozordi rezon akoz nou  tou nou pe siport sa Mosyon, se akoz nou tou nou anvi sa sityasyon i fini ganny deal avek.  Se sa ki nou anvi vwar.  E liltim solisyon ki nou oule vwar se ki i annan en sort of en of, en mea coulpa ki ganny fer en lakseptasyon lo apar bann dimoun ki’n involve dan prezans sityasyon, zot aksepte poudir sa ki nou’n fer i pa’n ase.  Prenon kont sityasyon ki’n evolye, e nou krwar pou dir nou kapab  fer plis e la, la sityasyon ki nou le fer.

E mwan mon pou donn 100poursan sipor dimoun La Misère pour sa ki nou pe rode.  E lentansyon Mr Speaker lentansyon sa Mosyon i en lentansyon ki nob, i en lentansyon ki bon, pou rod en solisyon pou en problenm ki pe kontinyen ale/vini.  E sa ki  nou bezwen fer, se regard sa problenm pou sa ki ete, en fason pou rod solisyon pou dimoun La Misère, e se sa ki mon krwar Lasanble i bezwen fer.

Mon remersi ou pou latansyon Mr Speaker e mwan mon pou donn mon sipor sa Mosyon.

 

MR SPEAKER

Mersi Onorab Pillay.  Onorab Simon Gill.

 

HON SIMON GILL

Mersi Mr Speaker.  Bonzour Mr Speaker.  Bonzour tou koleg Onorab e manm piblik ki pe ekout nou.

Mr Speaker Mosyon prezante par Onorab Waven William i en Mosyon ki annan en merit.   Lo nou kote parey Onorab De Commarmond, Onorab Pillay in dir nou siport lespri e lentansyon sa Mosyon.  Akoz nou konnen se ki nou pe, rod ankor plis keksoz pou dimoun ki reste dan distrik Grand Anse Mahé e presizeman dan rezon La Misère.

Mr Speaker nou’n tann bann entervenan koze lo sa Mosyon, e in pran en serten to Nasyon e direksyon, ki mon ti ava swete ki lezot entervenan ki koz lo sa Mosyon.  Nou sey fer fason pou nou depolitiz sa size li menm li sa size konpansasyon pou dimoun dan distrik Grand Anse Mahé presizeman dan rezyon La Misère ki’n ganny afekte, avek bann levennman ki nou pa bezwen al repete.

E Mr Speaker i en portan pou note ki Gouvernman ki o pouvwar, i sanmenm sa Gouvernman ki parti ki mon siporte ozordi i reprezante isi dan sa Lasanble Nasyonal.

E i enportan pou rikord e de nouvo nou ava fer li konman enn bann dirizan dan nou parti, pou aksepte responsabilite vizavi bann domaz ki bann zabitan La Misère in santi zot bezwen fer fas avek en desizyon pou donn aprouvasyon pou fer en devlopman anler La Misère.

Tout an akseptan responsabilite Mr Speaker, Prezidan Danny Faure ler i ti vin dan nou Lasanble, i ti egalman aksepte responsabilite lo lapar son  Gouvernman letan li i ti’n pran direksyon pei.

E ankor enn fwa mon repete ozordi mon oule pronons nou responsabilite vizavi sa ki’n arive.  E Mr Speaker se dan sanmenm sa lespri pran nou responsabilite konman en Gouvernman, ki ou ti bouze  al fer en negosyasyon avek ASCON e menm ziska serten degre angaz Gouvernman UAE dan sa prose negosyasyon.

Mon konpran soumisyon ki Onorab Georges in soumet, e mon konpran bann moman kot zot langazman son langazman i pa’n sitan an plen dan sa prose, mon konpran sa tre byen.

Me pe enportan kwa Mr Speaker, lanfaz, sete Gouvernman ti pe pran son responsabilite,  pou angaz bann dimoun konsernen pou rod en solisyon, pou problenm ki pei e bann zabitan La Misère ti pe fer fas avek.

E Mr Speaker ou rapel sa lepok ki ti annan en kantite presyon.  Ti annan manifestasyon lo semen.  Ti annan blokaz semen.  Mr Speaker mon krwar ou rapel sa bann moman e sete dan sa konzonktir a sa moman ki Gouvernman ti dir nou napa letan pou nou perdi.  Annou bouze annou met presyon pou nou ganny keksoz pou omwen apez sityasyon met sa tansyon sa tanperatir tre o ki ti’n leve a sa moman.

Me malerezman, malerezman parey in ganny dir, e parey Onorab Georges in dir dan son soumisyon, ti dan en bann moman nou kapab dir dan politik lavey en eleksyon.  Malerezman i ti dan sa bann moman.  E Gouvernman ti santi li oblize pou angaze e bouze pou donn en repons e i dan sa lespri ki nou’n fer li e i dan sa lespri ki bann diferan soumisyon ki’n ganny fer, e ler i annan en soumisyon ki ganny fer byensir negosyasyon in al agree dezagree, me dan lanaliz final, sa ki ti arive a sa moman, se ki en solisyon tri ganny ariv lo la.  E sa solisyon eske in satisfer tou bann stakeholders?  Prensipalman sa bann dimoun La Misère ki ti pe rod konpansasyon.  Eske in satisfer zot dan son totalite?

Mr Speaker byensir ozordi e menm dan sa moman serten dimoun pa ti satisfe avek sa solisyon.  Me pe enport kwa nou ti ganny en solisyon.  Ankor enn fwa i ti satisfezan pou met lanfaz lo la?  Non pa tou dimoun ki ti aksepte sa solisyon.  Non i pa ti satisfezan.

E se sa ki laport ti reste ouver.  E byensir bann avoka Onorab Georges avek serten lezot avoka ti rod fason pou kit en laport ouver, pou ki negosyasyon i kapab kontinyen bouze, pou ki ka i ganny anmenn Ankour e met presyon kot i devret pou kapab ganny ankor plis benefis, pou bann dimoun ki’n ganny afekte dan sa lepok.

E Mr Speaker mon’n deza dir dan sa Lasanble, mon annan mon prop ser.  Mon annan mon prop ser malerezman in mor.

E bann lenfestasyon ki’n gannyen, nou pe prezimen i kapab an rezilta sa sityasyon.  I kapab.  Me malerezman in mor.  In ganny son premye konpansasyon, in partaze avek son zanfan, avek son garson.  E in seye rod en solisyon, rod bann latizann pou li kapab sonny li.  Mon santi mon konman son frer osi konsernen ladan.

E se pou sa rezon ki dan kalm, dan trankilite, mon’n osi ede pou met presyon ki Gouvernman i rod en solisyon pou tou zabitan La Misere.  E mon’n fer li dan trankilite avek kalm.

Mon pa’n lager ek personn.  Mon pa’n batonn personn. E mon pa’n akiz personn.  Me mon fanmir – mon prop ser in ganny afekte ladan.  E mon annan bann lezot fanmir ankor ki reste anler an desandan La Misère, ankor la.  E zabitan La Misère ki’n ganny afekte.  E ki nou pe ede pou nou rod en solisyon pou zot.  E ozordi Mr Speaker, mon pe dir ankor enn fwa mon santi mwan konsernen egalman pou tou sa bann dimoun La Misère.  E lo non nou bann leaders dan Gouvernman, nou pe dir nou bezwen kontinyen donn sipor tou zabitan La Misère, ki pe rod en keksoz meyer – en meyer solisyon pou zot bann konsern ki zot annan vizavi bann afektasyon ki zot in annan.  Sa i devret nou lespri, annou depouy tou bann lezot eleman, ki kapab anmenn distraksyon dan sa negosyasyon Mr Speaker.

Mr Speaker mon’n fini avek mon lentrodiksyon konman mon premye pwen ki mon pou adrese prezan dan sa soumisyon se dir avek Onorab Ferrari atraver ou Mr Speaker ki serten bann statement ki in fer ozordi dan sa Lasanble an relasyon avek leta Onorab William an relasyon avek nou Parti ki i pa korek.  Onorab William pa’n zanmen ganny sispann dan nou Parti.  Nou Konstitisyon pa permet sispann e ekspilsyon okenn Manm dan nou Parti.

Si en dimoun i anvi expel son lekor, i anvi sorti dan nou Parti, i kapab atraver son prop aksyon resign.  E ziska pou le moman Onorab William i ankor en Manm United Seychelles.  Sa i nou soumisyon ki nou fer lo sa size.  E mon ava anmenn en kopi nou Konstitisyon United Seychelles, mon a remet avek Clerk atraver ou Mr Speaker, pou ki nou bann koleg ki enterese ki annan lentere pou konpran en pe plis konteni nou Konstitisyon, i ava kapab ã temps voulu   Mr Speaker lir e konpran en pti pe plis kwa ki annan konteni dan nou Konstitisyon nou Parti.  Napa okenn lobligasyon Mr Speaker pou personn lir konteni nou Konstitisyon.  Mersi bokou Mr Speaker.

Mon 3enm pwen lo size ki devan nou Mr Speaker ozordi bomaten, se mon oule atraver ou Mr Speaker dir Minis Finans Mr Lanbasader Minis Loustau-Lalanne ki lo nou kote latab isi dan sa Lasanble, nou siport li pou go all the way, pou kontinyen sa negosyasyon pou anmenn en meyer rezilta dan sa demars ki nou pe dir nou pou donn li sa favour ozordi bomaten e ansanm avek Gouvernman pou kontinyen negosye e anmenn en pe plis laklerte otour sa sityasyon, e anmenn en pe plis rekonpans pou tou zabitan dan distrik La Misère, ki’n ganny afekte.

Mr Speaker ou en dimoun ki’n annan en kantite pasyans.  Ou en dimoun ki’n ganny afekte.  E ler ou’n pran en desizyon pou ou pa pran sa bann peyman, sa premye peyman ki’n donnen, mon krwar ou’n fer li avek tou konnesans de soz.

Er ou’n pran en desizyon ki osi in kot sa laport ouver.  E ozordi i enportan nou dir ou nou remersi ou osi pou ki sa laport i reste ouver e bann lezot dimoun osi ki’n met bann ka devan ki’n kree sa laport ouver.  E Onorab Georges i byen, i byen ki ou’n kontinyen pourswiv sa negosyasyon.

E nou Gouvernman Mr Speaker, in osi touzour dan fason ou en lot, pe kontinyen fer demars diskite.  Me sa ki nou konnen in napa bann piblisite lo la, me in annan touzour bann demars bann diskisyon ki’n kontinyen ganny fer.

Me Mr Speaker lot pwen ki mon oule koz lo la ozordi, se size konpansasyon an servan sa ki nou apel taxpayers money.  Larzan bann dimoun ki pey tax dan pei, ki’n leve e ki konekte avek sa size konpansasyon pou dimoun La Misère.

Mr Speaker sa ki vre, sa ki korek sa ki byen, se ki otan ki nou kapab anmenn sa, size konpansasyon kot bann dimoun ki responsab pou koz serten bann domaz serten bann lafektasyon pou zot pran zot responsabilite i ekstrememan enportan ki nou fer li.

E nou bezwen kontinyen fer li Mr Speaker.  Annou kontinyen sa negosyasyon.  Annou kontinyen angaz ASCON e son bann lezot partenaire pou nou ganny ankor plis resours pou nou donn konpansasyon bann dimoun ki’n ganny afekte dan distrik Grand Anse Mahé presizeman dan rezyon La Misere.

Me Mr Speaker byensir pa tou konpansasyon ki nou pou kapab evite pran larzan taxpayers pou nou peye.  I annan en bann presedan ki’n arive e bokou nou bann koleg dan sa Lasanble, oubyen nou tou dan sa Lasanble, nou okouran ki ler i annan okenn domaz ki arive, oubyen okenn reklanm ki ganny fer dan en pei, touzour se sa Gouvernman ki ultimately i bezwen pran sa responsabilite.

E en landrwa ki Gouvernman i rode or i sourse pou li peye, byensir, se atraver en konterzan ki  i garde e dan okenn  finansyel dan en pei, se touzour reveni ki Gouvernman i anmase.  E byensir ladan i enkli dan son gran kantite, se taxpayers money. 

So alor nou bezwen osi fer atansyon, ler nou dir annou pa pran taxpayers money pou pey konpansasyon.  E dan sa ka spesifik nou donn rezon ki otan ki nou kapab kontinyen persyad sa bann dimoun ki responsab pou pey konpansasyon dimoun La Misère let’s  go ankor enn fwa all for it, e anmenn zot pou pran zot responsabilite.

Mr Speaker konklizyon lo sa Mosyon ki devan nou Lasanble, konklizyon sete ankor enn fwa mon swiv lapel ki Onorab De Commarmond in lanse e lapel ki Onorab Pillay in lanse, se avek nou bann koleg pou nou siport lespri lentansyon e lobzektif final ki sa Mosyon prezante par Onorab William, i annan lentansyon attend dan tou son dimansyon pou zabitan ekspreseman bann dimoun Seselwa La Misère ki’n santi zot ganny afekte par rapor avek lensidan ki’n arive.

Mr Speaker lo sa not mon remersi ou pou donn mwan laparol e mon demann tou mon bann koleg dan Lasanble pou siport sa Mosyon.  Mersi bokou Mr Speaker.

 

MR SPEAKER

Mersi Onorab Simon Gill.  Onorab Wavel Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker mon byen apresye sa leklersisman ki Onorab Georges in donn nou Lasanble.  Parske sa ion ede pou met byen sa konteks.

E dezyenmman ki finalman mon pa vreman konpran akoz ki letan Onorab Ferrari ti pe koze, ti annan tou sa bann diferan tapaz, akoz Onorab Simon Gill konman Depite Sekreter Zeneral son Parti in aksepte egzakteman sa ki Onorab Ferrari  ti a pe dir.

Onorab Gill in fek dir avek nou ki i rekonnet ki pou dir ofet se son Parti ki ti o pouvwar sa letan, ki annan ki responsab pou sa lensidan polisyon ki’n arive La Misère.  E alor mon ava Mr Speaker ankor enn fwa atraver ou felisit Onorab Gill, pou aksepte omwen pou aksepte en tel fe dan listwar.

E mon ti remarke ki pandan ki pou bann lezot Manm, ti pe fer bann enteraksyon ensidswit, ou Onorab Gill ou ti asize trankil.  E mon krwar ki ou ti a pe prepar ou pou ou fer sa deklarasyon.  E alor sa i lo rikord e alor nou fini avek sa bout nou met li la !

Mr Speaker dan entervansyon Onorab Gill mon vin lo la, in mansyonn nou in mansyonn ki pou dir ou en dimoun Onorab ou, ou pa’n pran sa R250mil e se gras a ou ki dan en serten sans, mon pa pe sit antyerman son parol verbatim ki pou dir se atraver ou ki sa case in kapab kontinyen.  E in servi sa pou li koz lo son ser ki en dimoun ki mon ti konn tre byen, ki i ti en gran siporter LDS ki ti asiste plizyer nou bann meeting ki nou’n fer dan nou distrik Grand Anse ;- e ki mon konnen mon konnen son soufrans akoz in koz avek mwan e Onorab Gill i ava mazin byen ki pou dir zour son ser ti mor mon ti la prezan akoz zisteman i ti en zanmi pou mwan.

E Mr Speaker atraver sa ki Onorab Gill in dir lo ou size.  E ou avek mon nou’n sa letan nou ti dan biro Arpent Vert nou ti koz byen lo sa size e nou rappel ou ti pran sa desizyon pou pa pran sa larzan e pou ou kontinyen avek  en case  ou ti ou tousel.

Me Mr Speaker mwan mon krwar ki poudir la i annan en problenm, ki montre nou ki finalman lentansyon bann dimoun dan sa letan, i pa ti en bon lentansyon.  Parske Mr Speaker, me si ou pa’n pran larzan me ti devret annan ou 250mil la.  Ou R250mil ti devret la!  Me akoz ou R250 mil pa la?  Savedir in annan en manboulouk dan partaz larzan!

 

(APPLAUSE)

 

HON WAVEL RAMKALAWAN

I pa ti kapab reste zis R4mil – e parey Onorab Georges in dir i annan R246mil ki manke pou ou.  Sa i montre nou problenm.

E Mr Speaker parey ou konn byen, mon’n swiv byen sa bann zafer larzan.  E nou tou nou konnen ki pou dir ti annan manboulouk. Letan larzan ti pe partaze, sa dimoun ki tri pe travay laba anler, ti annan serten lakaz kot ti annan en household me selman ti donn zot larzan pou 2 household!  Ti donn zot larzan pou 3 household!  Levidans i la i annan.  Tandis lo lot kote i annan serten lakaz kot ti annan plis ki en household ki zot, zot ti ganny pou zis en household.  E tousala se bann issues ki ozordi i ankor pe leve!  E nou tou nou konnen ki mannyer sa bann keksoz ti pase.

Pli boner mon’n demann Onorab Georges osi konbyen bann avoka ti gannyen.   I dir wi i ganny peye.  Ankor enn fwa nou konnen Mr Speaker ki pou dir i annan serten pou sak sinyatir e la mon pa pe nonm non pou sak sinyatir ti annan R1500 ki ti ganny peye.

E finalman in en pe parey Nasyon Z-Ini.  In en pe parey Nasyon-Z-Ini kot pli gran konplent kont li se ki, mazorite larzan pa ganny depanse pou ed refizye avek bann dimoun ki’n ganny deplase.  Me mazorite larzan i pey staff New York.  E se sa en pe sityasyon ozordi e se sa ki fer in annan sa de balansman.

Mr Speaker mon kontan ki Onorab Gill in aksepte ki pou dir tou sa bann keksoz ki’n arive, se responsabilite son Parti ki sa letan ti apel Parti Lepep.  E Mr Speaker letan mon fer refleksyon lo lafason keksoz in ale, i montre mwan personnelman malerezman,  e letan mon azout parol ki Minis li menm li, Minis Loustau-Lalanne letan in vin devan sa Lasanble, letan in koz lo tou bann lezot konpansasyon, ki pe tonm devan ki pe tonm lo son latab, lakantite milyon ki sa Parti ki Onorab Gill i en Leader ladan ozordi, pou bezwen rod en fason ki’n mismanage bann keksoz.

E se sa Mr Speaker nou problenm ozordi Sesel.  E se sa nou ankor annan sa problenm La Misere 11an pli tar.  Se mismanagement !  E sa mismanagement i kout nou pei tre serye.  E Onorab Gill i konn sa tre byen li Mr Speaker.  i konnen ki pou dir parske li en kontrakter i konn byen ki pou dir si son site i ganny mismanage, kot en dimoun i fouy en trou kot pa devret fouye;- i met en laport kot pa devret mete, e ki apre sa lefe ki formenn pa’n fer son travay byen i bezwen pey plis.  I bezwen pey plis.  En pe parey Anse Royale Mr Speaker.  Lo sa fun park yer sa ki nou ti pe koz lo la.  Zot in fouy en trou kot pa devret fouye.  Apre sa   be pa la i devret fouye pou met fondasyon, i devret-. Nou’n mank plot.  E alors sa in kout nou.

So i annan sa minsmanagement. E Mr Speaker mwan toultan, toultan mon mazin sityasyon La Misère mon dir La Misère i ti en keksoz ki ti fasil.  Nou ti bezwen senpleman regard listwar sa landrwa, pou nou konnen be la i annan en sours larivyer. Ki poudir letan Americain ti la zanmen zot ti annan en septic tank.  Ti napa septic tank La Misère, US tracking station.  Zot treatment plant Mr Speaker toulezour sewage ti ganny ranmase  la anler La Misère tracking station.  Pourtan ti annan en kantite Americain ki ti reste la.  Kot son treatment plant ti ete, sete anba kot lekol Tourism ozordi.  Ti napa en sou sewage ki ti rantre dan later, akoz sete akoz sa sours delo La Misère ki desann, ki Ma Josephine i tonm ladan li osi tou, parske bann larivyer i zwenn ansanm.

Alors Mr Speaker sa sityasyon ti’n kapab ganny evite, si ti annan proper supervision.  E ozordi nou tou nou konnen, si ou a pe fer konstriksyon tanzantan ou trouv en zofisye i pase.  Stop notice i ganny mete.  Lot kalite problenm i ganny mete.  Me mwan mon pe vin lo sa mismanagement. 

Onorab Gill atraver ou Mr Speaker, in fer en soumisyon, onorab.  En soumisyon onorab letan in dir i responsab.  Me selman mon ti ava espekte li al en pe pli devan.  Mon ti ava espekte li apre ki’n aksepte sa responsabilite, pou li dir ouvertman dan Lasanble Nasyonal, avek tou zabitan La Misere Parti Lepep, US ozordi i demann zot en gran leskiz!  Se sa ki’n manke Mr Speaker dan son soumisyon.  E mon espere ki pou dir apre ki mon’n koze Onorab Gill en Manm Onorab Parlman Africain, i ava ganny sa liminite pou li zisteman fer sa.  Parske sa i ava montre ki poudir vreman i ka pe travay pou fer L’Afrique bouz devan enkli Sesel.

Mr Speaker nou bezwen an menm tan osi mazin, en pe bann sityasyon.  Letan mon mazin lalit bann dimoun La Misère Mr Speaker mon’n debout a kote bann dimoun La Misère, mon’n anmenn delo pou zot.  Mon’n anmenn juice pou zot.  Mon’n debout avek zot dan lapli.  Mon’n vwar AK47 avek SSU ki’n standby la pou nobou pou fer zot per.  Me mwan ozordi mon salye bann dimoun La Misère, ki’n debout avek kouraz e mwan osi tou parey mon’n dir Mr Speaker, mon’n debout a kote zot.  E mon krwar ki pou dir zot merit ganny sa ki zot merite.  E sa negosyasyon mon krwar ki i ava enportan.  E ou ava rapel Mr Speaker, letan Minis ti la mwan mon ti enn ki ti dir be sa negosyasyon i bezwen ganny fer dan bonn konprenezon.  I bezwen ganny fer avek sa lespri pou ganny en solisyon e non pa avek en lespri pou annan plis konfli.

Mr Speaker mon bezwen dir ki sa Mosyon – e mon siport Onorab William antyerman dan son Mosyon.  E petet mon ti a kontan dir Onorab Gill ki kot mwan mon asize mon vwar Onorab William letan ou pe koze, ou pa vwar li ou.  Mon ti a kontan dir avek ou ki letan ou ti a pe koz lo ou Parti an relasyon avek Konstitisyon, an relasyon avek parkour Onorab William, ti annan en lot reaksyon avek Onorab William e mon plis ki sir Onorab William i ava koz pou li menm letan i pe fer son summing-up.

        Me selman Mr Speaker, ozordi – ozordi mon krwar ki an menm ta sa Mosyon i fasil, akoz i annan – e  mwan mon krwar ki poudir polluter i peye.  Ozordi i fasil pou dir be anvoy Minis i ava negosye ek sa lakonpannyen pou fer fini sa case.  E nou’n osi koz lo taxpayers money.  Be mwan mon kestyon – mon kestyon i vin, me letan nou pou ariv lo bann case kot Gouvernman ki responsab?  Par egzanp Mr Speaker letan nou pou ariv lo case bann zabitan  Baie Ste Anne Praslin, ki reste otour stasyon elektrisite.  Kote nou pou anvoy Minister Finans negosye?  Kote nou pou anvoy li?  Nou pou anvoy li negosye avek PUC?  Pou PUC peye, akoz PUC ki’n soz e pa bliye zot in met 8sou ankor la.  Konmsi pou nou ki pe pey sa 8sou an plis.  Akoz sa taxpayers ki pou peye?  Sa bann dimoun ki reste otour stasyon, zot osi tou zot in ganny 8sou an plis lo zot bil.  Alors zot pou peye zot menm?

Letan bann lezot ka kot dimoun pe rod pe rod konpansasyon, e mon ti a kontan si Onorab Gill ti ava sa menm lespri ki’n koz lo la bomaten, pou li dir letan i ariv pou pey konpansasyon bann dimoun ki’n ganny abize apre koudeta le 5 Zen, spesyalman letan pou sorti klerman ki pou dir se Mr Rene Dirizan Parti SPUP sa letan ki ti responsab pou koudeta, e ki se li ki ti Prezidan.

Mon ti  kontan ki mon ti a kontan ki Onorab Gill i fer menm deklarasyon tou pou dir ki zot responsab pou tou sa bann soufrans – pou tou sa bann soufrans!  Pa rod sa ki obor mon ou!

 

(laughter)

 

HON WAVEL RAMKALAWAN

Pa rod sa ki obor mwan ou.  Nou ava rod – be ou pa rod sa ki ti dan Milisya?  Onorab De Commarmond ti dan Milisya li!  Onorab Gill i ti dan Milisya li!  E tou bann kriyote ki’n arive i annan plis kriyote ki’n ganny fer pandan peryod Milisya,  apre le 5 Zen !  Alors Onorab Pillay letan ou pe dir demann sa ki obor mwan, mon ti a kontan ki ou osi tou ou demann sa ki obor ou!  Ok?

       

(laughter)

 

HON WAVEL RAMKALAWAN

Wi Mr Speaker, alor mon espere ki Onorab Gill i ava dir ki se son Parti  ki responsab pou tou bann kriyote ki’n arive, akoz se zot ki ti o pouvwar, e ki alor sa bann konpansasyon letan Minis i vin devan nou, nou ava dir avek li al kot Maison Du Peuple e Party Leader se Mr Vincent Meriton, alors fer negosyasyon e Onorab Gill konman enn bann leaders li osi tou i ava asiz lo sa lot kote latab.   La ozordi nou pe anvoy be letan nou pou anvoy Minis Finans pou vin kot ou safwasi, e alor ou ava donn li, nou ava garanti ki pou dir ou pou donn li en bon parol.

Alors Mr Speaker les mwan termin lo sa pwen.  Wi fodre i annan negosyasyon parski premye negosyasyon in fail.  E si zis zot pa ti’n fer politik – wi.  Mr Speaker si ti’n napa politik dan sa zafer La Misère, si sa Komite ki ti’n ganny etabli an premye lye, ti ganny sans pou li fer son travay, ozordi mon krwar nou Lasanble ti ava pe koz lo bann lezot keksoz.

Politik in ganny fer e ozordi letan nou koze pa blanm nou pou fer politik.  Akoz pa nou ki’n konmans avek politik.  Se zot lo sa lot kot e latab, ki’n konmans fer politik avek sa zafer La Misère.  E la ozordi nou kontan ki Onorab William in deside pou li tir tou politik ladan.  Onorab William – wi Mr Speaker – Onorab William konman Manm ki’n ganny elekte anba bannyer Parti Lepep pou vin dan sa Lasanble, in deside pou li tir politik ladan.   In deside pou li abord sa dan en fason rezonnab, dan en fason lozik.  E nou, nou’n debout lo kote Onorab William pou nou donn li nou full siport.

E ozordi nou pou osi donn li nou full sipor atraver sa Mosyon.  Mersi bokou Mr Speaker.

 

MR SPEAKER

Mersi Onorab Ramkalawan.  Mon ava don laparol loter Mosyon Onorab William pou li fer son summing-up.  Onorab.

 

HON WAVEN WILLIAM

Mersi Mr Speaker.  Mr Speaker pou konmanse mon ti a kontan remersi tou bann Manm ki’n rekonnet lespri sa Mosyon.  E pou nou ansanm konman sa 6enm Lasanble, pou nou esey koriz sa lenzistis.

Mr Speaker mon anvi remersi ou osi tou e Onorab Georges,  ki nou’n sanses dan en fason konsistan pou fer en travay dan lentegrite,  pou nou kapab amenn sa rekour e met a la fen avek sa sityasyon ki’n afekte bann rezidan, e travayer La Misère, e Petit Barbarons.

Mr Speaker mon anvi dir avek Leader lopozisyon ki wi.  Parey Onorab Georges in dir, ou pa ti form parti Komite.  Sa premye Komite.  Annefe all along, depi mon konesans, ou pa’n involve dan okenn miting Komite La Misère.

Mr Speaker mon anvi met lo rikord osi, ki mon ankor rapel.  E sa in mark mwan dan mon parkour politik.  Letan sa sityasyon ti arive, mon ti vwar mwan mon tousel dan semen Kennedy Road avek ex DA.  Kot letan nou ti pe rode ki pou fer.  Ki fason pou nou anmenn sa size devan Gouvernman.  Pou anmenn rekour.  Mr Speaker mon remersi Bondye.  Akoz mon santi poudir san son gidans, e sa, donn mwan sa kouraz avek DA pou nou pran en desizyon, pou dir regarde, nou pou bezwen fer sa miting piblik dezormen.  Malgre ki bann dimoun dan Lotorite ki nou ti ekspekte pou vin devan, pa ti reponn lapel.  Me mon kontan ki nou’n pran sa kouraz, pou nou kapab fer sa miting, ki ozordi keksoz pe deroul dan sa fason.  Pa parey nou ti ava ekspekte.  Me at least pou sey amenn rekour.

Mr Speaker mon anvi dir ki, mwan mon ti sorti lo Komite, akoz ti annan bann diferan miting ki pe ganny fer, malgre ki ti annan en Komite, me ler ou vwar keksoz i al koumsa, detrwa Manm pe ganny ris en kote, mon pa ti santi mon ok e alez pou travay dan sa fason.  Akoz i annan serten bann prensip ki mon respekte.  Alor mwan, depi byen boner menm, mon ti vwar mwan an deor Komite.

Mr Speaker e parey zot konnen.  2011 mon pa ti debout pou eleksyon.  Pou kapab swivre sa case.  Me mon anvi dir ki, apre mon ti annan dimoun dan distrik.  E i domaz ki depi 2011 ziskan 2016, ‘17 nanryen pa ti ganny fer.  Me Mr Speaker mon remersi ou avek Mr Onorab Georges.

Ki nou ti kapab zwenn ansanm pou nou rekonmans sa lalit pou fer sir ki lazistis i ganny anmennen.  Mr Speaker mon anvi dir ki mon respekte Minis Finans en kantite.  E mon konnen ki in ase senser avek sa Lasanble, letan in dir ki si i ganny sa manda avek Lotorite pei i pou al fer sa travay.

Mr Speaker se dan sa lespri, e pou montre en baz konsistans sa Lasanble, ki mon’n anmenn sa Mosyon,  pou dir be regarde, nou pa oule bann komitman i ganny fer e keksoz i kontinyen parey, business as usual.

E mon kontan ki ozordi tou bann Manm dan Lasanble, lafason zot in koze, zot pou donn sipor sa Mosyon.  Mr Speaker mon anvi dir avek bann zabitan La Misère, Petit Barbarons e bann ki travay La Misère, ki mon’n ganny lenformasyon ki sa miting piblik pou ganny fer sa Sanmdi 2er apre midi, kot Lasapel La Misère.  2er ziskan 4er, akoz apre sa, 4.30 i pou annan servis, parey labitid.  E mon anvi lans en lapel avek serten group dimoun La Misère ki pe manifeste ankor.

Mon anvi dir zot pou, ki baze lo progre ki nou’n fer, e demann ki sa Lasanble pe fer atraver sa Mosyon, mon ti ava demann zot pou zis kontinyen sa protestasyon pou anpes sa bann travayer monte.  Miting pe al ganny fer Sanmdi.

Lasanble dan son fason inanim, mon konnen i pou siport sa Mosyon.  Alors i annan en prosesis travay ki pe ganny fer dan zot lentere.  E mon ava demann zot pou dis-kontinyen.

E pou servi sa moman sanmdi dan miting, pou zot vin rod zot leklersisman, akoz mon’n ganny parol ki Minis Finans pou la e Attorney Zeneral osi pou la.

Avek sa 2 pti mo Mr
Speaker, ankor enn fwa mon anvi remersi Leader Lopozisyon, Leader Zafer Gouvernman e tou Manm ki’n koze e tou Manm ki pou siport sa Mosyon.  Mersi.

 

MR SPEAKER

Mersi Onorab William.  Bon moman in arive pou Lasanble pran desizyon lo Mosyon ki devan nou.  E ki lir comme swivan;-

‘Sa Lasanble i demann Gouvernman, swivan komitman ki Minis Finans in fer Zedi pase dan sa Lasanble avek viktim delo La Misère,  pou donn manda Minis Finans pou re negosye avek sa lakonpannyen konstriksyon, e sa propriyeter batiman, pou ganny ankor en pe larzan pou fini rapidman avek sa case peyman konpansasyon, polisyon delo La Misère e Petit Barbarons.  Mon ava demann tou Manm ki an faver?  Okenn Manm ki kont?  Madanm Deputy Clerk.

 

MADAM DEPUTY CLERK

Mersi Mr Speaker.  Vot i unanimous.  Tou le 28 Manm prezan in vot an faver sa Mosyon.  Mersi.

 

MR SPEAKER

Mersi Madanm Deputy Clerk.  Savedir Mosyon i pase avek en vot inanim.   Bon, mon pa’n anvi enteronp deba.  Mon anvi zis dir 2 pti mo, 2 pti klarifikasyon.  Mon, remersi premyerman tou zabitan La Misère ki’n tenir sa konfyans dan mwan, Onorab Georges, Onorab William.

E ki’n pasyante pandan tou sa letan.  E i annan 8an depi ler case in al Ankour.  Kot nou’n kapab kit sa laport ouver parey plizyer Manm in dir, pou ki sa negosyasyon i kapab kontinyen.  Mwan osi tou mon fer en lapel.

I annan zabitan La Misère, i annan dimoun an deor La Misère pou raport en pe respe.  Keksoz pa’n fasil dan sa 8an.  I annan bokou difikilte, i annan bokou defi.  Defi lo Gouvernman, lo kote Gouvernman pou kapab sey konpran nou kwa ki nou’n anvi.

Parey Onorab Georges pe dir, nou’n anvi 2 lapriyer devan Lakour, se kelken ki pran responsabilite, lazistis.  E apre nou ti pe demann Lakour pou regarde, si nou kapab ganny en top-up, en domaz.  Gouvernman in aksepte responsabilite.

Prezidan in fer son prononsman is dan sa Lasanble.  E apre sa nou’n swiv par Onorab Georges, Onorab William e mon menm, Biro Attorney Zeneral avek Biro Lofis Prezidan pou nou kapab kontinyen dan sa negosyasyon.  Me i malere.

Parey mon dir i annan menm zabitan La Misère, e dimoun an deor La Misère, ki’n lans bann move lakizasyon kont mwan.  Ki mon en triker, mon en voler, mon’n pran larzan anba latab.  Mon’n pran larzan deryer rido.  I pa fasil.  8an mon’n ale/vini Ankour.

I annan plizyer dimoun zabitan La Misère ki’n swiv mwan, ki’n swiv sa prosesis e in vwar kwa ki nou ti pe rode, e nou ti pe fer tou keksoz an byen dan latransparans.  E la ozordi mon anvi zis dir ankor,  tou zabitan La Misère e tou dimoun dan Sesel.  Nicholas Prea pa’n pran larzan.  Nicholas Prea pa’n fer okenn dil deryer rido oubyen anba latab!  Si ozordi mon krwar Lasanble i pas en rezolisyon inanim, mon krwar menm Manm dan sa Lasanble in aksepte poudir dan sa prosesis mon pa’n vin en dimoun dezonnet.

Mon’n anvi anmenn en konba;- en konba ki mon’n krwar senserman ladan, pou ganny lazistis, pou sa kominote ki mon’n viv ladan.  Mon krwar i fer mon 26an oubyen 27an mon pe viv dan sa kominote La Misère.  Ok? Depi ki mon’n sorti L’ Angleterre.

‘92, mon pe reste La MisèreSo mon’n part ladan.  Mon’n pas dan sa soufrans avek zot tou.  I annan bokou ki pe akiz mwan pou dir ozordi mon pe fer ki larzan tax, zot larzan pe al ganny servi.

Ankor atraver sa deba bomaten, mon krwar in pli kler ki ler Gouvernman i pran responsabilite, sel larzan ki Gouvernman i fer marse pei, i pey ledikasyon, i pey lasante, i pey progranm drog.

Gouvernman pa al rod larzan drog avek dealers.  Gouvernman i pran larzan dan Bidze pou li anmenn sa progranm avek APDAR.   So ler en Gouvernman i pran responsabilite, byensir i pou tay  kote i annan larzan, se larzan dan Bidze ki ramase atraver taxpayers. 

Byensir, byensir nou pou regard lezot laveni.  E Minis Finans osi in rankontre mwan Vandredi pase.  Kot in dir mon poudir zot in deza komans rantre an kontak avek Gouvernman UAE.  So vwala 2 pti mo ki mon ti anvi partaz avek zot.

E mon donn sipor sa prosesis.  Mon ti a swete ki menm si i annan en Komite ki ganny setup, sa i pa ganny vwar koman en leskiz pou delay sa prosesis plis.  Ok?   Me mon donn tou mon sipor sa prosesis, ki finalman parey bann de kote latab in dir, nou a kapab put closure e zabitan La Misère i a kapab bouze avek zot lavi.  Yes Onorab William.

 

HON WAVEN WILLIAM

Mr Speaker swivan sa ki ou’n dir la, lefe ki nou annan en formil ki nou servi.  Parey la sa Mosyon in pase, e mon konnen poudir i pou annan serten prosesis dokiman ki pou anvoy anler State House.

Me mwan mon anvi demande ki an menm tan Gouvernman i annan en let ki i bezwen anvoy Ankour.  E sa i bezwen ganny swivre ki sa let.  Akoz Minis Finans in dir ki i pou swivre sa.  Me sa let i bezwen al Ankour.  Akoz si non, i pou konplik keksoz.

E dezyenmman lefe ki nou annan en Komite Lasirans dan Lasanble, mon ti ava propoze osi ki Komite Lasirans i pran sa anmen, pou fer sa swivi lo la.  Ki nou kapab ganny bann pti – mon kapab dir rapor sorti kot Minis Finans baze-

Parey ou’n dir, pe enport si en Komite i ganny formen ki nou ganny en pti detay lo kwa ki pe arive.  Akoz la parey mon vwar 6enm Lasanble pe angaz li pou vreman swivre pou fer sir ki keksoz i progres dan lafason transparans.  Mersi.

 

MR SPEAKER

Mersi Onorab William.  Bon mon kapab dir lo premye pwen, ki dan mon rankont avek Minis Finans Vandredi pase, in, nou’n abord sa size en let.  E i dir mwan i an kontak.  I pe koz avek Attorney Zeneral ki pa dan pei, i rantre dan pei mon krwar demen.

So i annan en travay lo la.  E yer osi tou mon’n ganny sans pou mon koz avek Prezidan lo la.  Prezidan osi tou i angaz li pou, ki nou kapab ganny en dokiman formel, ki sorti kot Gouvernman atraver Biro Attorney Zeneral,  ki parey Onorab Georges osi in dir, nou a kapab prezant avek Lakour, ok?  Pou nou regard the way forward.  E byensir lo kote Lasanble, mon krwar komitman ki Minis in fer Zedi pase, e rezolisyon ki Lasanble in pran la bomaten, i en for lasirans ki byensir Komite i take onboard.

E petet a en moman atraver sa prosesis, en Manm Komite oubyen menm Chair Komite COGA, i kapab menm asiste miting pou regarde e pou kapab report back to the Committee, ki progre ki pe ganny fer.  Ok.

Me lo nou kote Lasanble Sekretarya, definitivman nou pe fer nou rapor pou nou anvoy kot Cabinet Secretary.  Wi, nou pou kopi Lasanble, nou kopi tou bann Manm, tou keksoz ki nou gannyen Onorab De Commarmond.  Mersi.

Bon zi avan nou break, mon zis pas en pti pe lo bann Bills, lo bann status bann Bills ki pending devan nou.  Sa 2 Tax (Amendment) Bill, Minis ankor dan nou pti koze ki nou’n fer Vandredi, i ti pe esper bann dernyen klarifikasyon avek OECD pou li retournen pou report back lo sa 2 Tax (Amendment) Bill, ki nou’n touse semenn pase apre nou’n defer pou nou pran en vot lo la.  Lo kote Civil Code, Civil Code – ABC will take it up.

Ozordi ABC pe meet 1er dan Speaker’s Conference Room.  E Public Service Salary (Amendment) Bill, bon case Lakour Konstitisyonnel in konmanse.  Yer devan Lakour tou le de kote in fer bann written submission.

E Lakour Konstitisyonnel in set dat le 22 Oktob 9er bomaten ziska midi pou hearingSo apre sa mon mazinen en short dele letan, Lakour i a kapab donn son ruling lo la.

So vwala koman nou ete with regards to bann Bills ki pending devan nou.  Avek sa mon ti a kontan enform Lasanble, an vi ki en lot komitman ki mon annan pli tar.

Ler nou pou retournen apre break, Deputy Speaker ki pou chair e pou kontinyen avek travay lo Order Paper.  So nou ava break e nou retournen 11.30.

 

(BREAK)

 

MR DEPUTY SPEAKER

Bon bonzour tou bann Manm Onorab.  Bonzour tou dimoun a lekout e ki pe swiv Lasanble Nasyonal.  Ankor enn fwa mwan mon pe chair dan labsans Speaker Onorab Nicholas Prea ki annan en lot komitman la bomaten.

Bon lo nou Order Paper ozordi, nou’n fini dil avek sa Mosyon ki ti ganny mete dan en fason irzan bomaten.  E nou aprezan ariv lo Mosyon No.2 par Onorab Gervais Henrie.  E Onorab Henrie mon a donn ou laparol.

 

HON GERVAIS HENRIE

Mersi Mr Speaker.  Bonzour tou dimoun.  Mr Speaker anba Order 44(1) mon oule withdraw mon Mosyon.  Mersi.

 

MR DEPUTY SPEAKER

Mersi bokou Onorab Henrie.  Vi ki nou’n fini dispose of sa Mosyon alor, etan ki ou pe retir li, nou pou al direkteman lo Mosyon No.3, ki Mosyon par Onorab Waven William, Manm pou Grand Anse Mahe.  Alor Onorab William mon donn ou laparol.

 

HON WAVEN WILLIAM

Mersi Mr Speaker.  Mr Speaker, mon Mosyon i lir comme swivan;

‘An vi konsern piblik e viziter, sa Lasanble i demann Gouvernman pou an partenarya avek sekter prive, pou met kabinen piblik dan bann landrwa neseser e pou osi deziny bann landrwa lo lans, kot Seselwa i kapab enjoy son lekor libreman an respectant norm Lalwa.

Mr Speaker mon’n anmenn sa Mosyon, lefe ki dan mon travay mon rankontre plizyer Seselwa ki koz lo sa size.  Zot vwar poudir i annan en mankman.  Mon osi annan zanmi etranze ki vin vizit nou pei.  E parey nou konnen Sesel i en destinasyon touristik 5 Zetwal.

E toulezan dapre mon resers, nou annan bann nouvo rikord nonm viziter etranze ki vizit nou pei.  Mr Speaker sa bezwen i en bezwen ki ti’n devret ganny fer firamezir ki ozordi lo tou nou bann lans e landrwa piblik ki ganny byen frekante, ti devret annan bann kabinen kot nou bann viziter e nou prop Seselwa, letan parey nou dir – nature calls, bann dimoun ti kapab ale pou zot fer zot bezwen.

Mr Speaker i pa normal konman en Seselwa ki ou vwar bann etranze lo lans, zot pe ganny enteronpe avek bann loder ki nou dir malsen.  E nou prop Seselwa ki letan pe al fer piknik, zot osi pe eksperyans menm difikilte.

Mr Speaker mon’n koz avek plizyer bann Manm Onorab isi anndan lo sa size.  E zot in dir mwan ki wi, i annan en mankman.  E sa bann ki nou annan, i annan dan lavil.  Plizyer pa pe marse.  Nou bann zil elwanye osi, napa ase.

Alors se pou sa rezon ki mon santi poudir sa Mosyon i annan son merit, akoz i enportan ki nou Seselwa, nou Nasyon e bann viziter ki vizit nou pei, zot kapab ganny deservi byen si sa bann fasilite i egziste dan bann landrwa ki vreman popiler.

E la parey mon pe dir, mon pe koz dan rezyon lavil, dan bann distrik kot landrwa i konsantre.  Par egzanp si mon pe pran Grand Anse Mahe, kot lans Grand Anse definitivman i annan sa bezwen pou annan sa fasilite.

Mon pe koz kot sa 2 bus stop roundabout
Grand Anse, mon pe koz dan krwaze Grand Anse e osi Barbarons, i annan sa nesesite.  E la mon mazin plizyer bann landrwa ki mon konnen bann lezot Manm Onorab ki konn zot distrik pli byen ki mwan, zot pou dakor avek mon poudir i annan sa nesesite.

Mr Speaker letan nou pe koz lo sa size, mon pa’n zis dir ki be Gouvernman ki bezwen fer li. Nou annan plizyer bann biznes, bann gro lantrepriz.  La nou pe koz depi lotel, lakonpannyen konstriksyon.

E mon santi poudir lefe ki sesel i en pti pei, petet pou les prive tousel fer li i pa pou rantab.  E mon mazinen poudir Departman Lanvironnman i kapab kre en Scheme, parey i pe fer avek, pou retir bann bin salte.  Ouswa netwayaz semen, i kapab kre en Scheme kot sekter prive i kapab rantre.

Akoz si ou al deor ozordi, nou annan bann fasilite mobil kot dimoun i ale.  E zot pey en pti larzan e zot fer zot bezwen.  Alors lefe ki Sesel i en destinasyon touristik, mon santi poudir Lotorite, Gouvernman i bezwen antre e pa tro tarde.  Akoz parey mon di ri en gro lenkonvenyans ki nou pe fer fas avek.

Mr Speaker prezan mon pou al lo mon 2enm parti mon Mosyon.  Mon’n tous lo lefe ki i annan sa nesesite pou annan bann landrwa devan dezinyen kot nou sitwayen i kapab anmiz zot libreman, an swivre norm Lalwa.  Mr Speaker Seselwa i en Nasyon ki kontan anmize.

E Seselwa avek devlopman bokou nou bann sitwayen ozordi, i pas zot letan lo lans avek zot fanmir, avek zot zanmi.  I annan ki anmenn lanmizik, zot fer bann diferan parti.  E nou’n tande osi i annan bann diferan konplent.

Akoz kot sa bann aktivite parfwa i ganny fer o bor lans, ou vwar bann laliny kouran ki pas lo semen, in kouver avek en pe disab i pa byen i danzere.  Me si ti annan en landrwa ki’n ganny dezinyen, ti annan en pwen kouran kot dimoun i konnen poudir be la mon kapab vini, konekte mon lanmizik.  I ti pou fasilit lavi Seselwa.  E par egzanp si mon pran dan mon distrik, mon pe koz Petit Barbarons, kot sa vilaz bann solda i ete la, i en landrwa tipik kot bokou ganny frekante par bokou Seselwa.

Me Mr Speaker ou a dakor avek mwan, ki i ariv en serten moman, en serten ler dan lannwit, kot dimoun i anvi serten trankilite.  So si i annan bann landrwa ki ganny dezinyen ki en pti pe lwen avek bann lakaz.  Me parey mon dir i bezwen annan bann norm, kor, poudir be regarde a tel ler ou bezwen bes en pti pe sa lanmizik.  Be selman i manke bann landrwa dezinyen partou dan Sesel, kot Seselwa, letan i anvi pas son letan ek son fanmir, ouswa fer son pti parti, i annan en landrwa ki i konnen poudir, ‘’Be la mon pou ale mon pa pou ganny problenm.  Mon kapab fer mon tapaz lanmizik e anmize.’’  So Mr Speaker vwala an grosso modo Mosyon ki mon pe prezant devan Lasanble.  Mosyon ki mon santi i annan son merit ozordi.

E mon kapab dir ki petet nou ti devret fer li en pe pli boner.  Me parey dikton i dir, plito tar ki zanmen.  Alors Mr Speaker avek sa 2 pti mo, mon pe poz sa Mosyon devan Lasanble pou zot reazir lo la.  Mersi.

 

MR DEPUTY SPEAKER

Mersi Onorab William.  Eski Mosyon i ganny segonde?  Onorab Aglae.

 

HON EGBERT AGLAE

Mersi Mr Speaker.  Mon pe segonn Mosyon prezante par Onorab William.  E mon ti a kontan fer mon lentervansyon.

 

MR DEPUTY SPEAKER

Proceed.

 

HON EGBERT AGLAE

Mr Speaker sa Mosyon i en Mosyon ki annan son merit.  An mezir ki popilasyon pe agrandi, an mezir ki i annan plis devlopman, e an mezir ki nou pe vwar plis aktivite imen, ki swa Seselwa, ki swa aletranze.

Ler ou fer ou letour, en pe lo Mahe sirtou Mr Speaker,  Nou kapab koz osi Praslin, La Digue, nou bann Zil Pros ki abite, e ki i annan bann aktivite ekonomik, lwazir, sosyal, ki deroule.

Nou konstate e vwar ki i annan en mankman, serten bann fasilite izyenik, ki nou, nou menm imen, i a nou dispozisyon pou nou kapab servi.  E nou koman en pei ki sanpyon lanvironnman, nou’n toultan vwar ki sirtou kot i konsern nou bann aktivite wikenn, kot bokou dimoun i groupe.

Ki swa an fanmir, zanmi, zot groupe dan bann aktivite.  E la nou vwar ki koman en imen, nou annan nou bezwen ouswa serten fason fer.  I annan son moman letan i arive.  E bann landrwa ki pli popiler Mr Speaker, parey dan Nor nou dir Beau Vallon.

Dan kote Les kot nou ete, in annan Roche Caiman, nou annan isi menm Perseverance kot dimoun i groupe.  Nou annan Anse Royale, nou en pe Intendance, Takamaka.  Dan larezyon Was, Anse La Mouche, dan Baie Lazare, Anse Boileau, Grand Anse osi kot lans.

Nou annan Port Glaud osi, Port Launay ki frekante.  E Mr Speaker bann pratik ki nou’n vwar se ki tanzantan, ou vwar enn ou de endividi ki’n antre dan en pti trou.  E menm bann ki pase dan zot transpor par ler, ou vwar zot in park.

Zot antre dan en pti trou, zot maske pou zot swa pas zot lirin ouswa lezot bezwen.  In arive Mr Speaker.  E nou koman en sanpyon lanvironnman, i pa en pratik ki mon krwar nou devret vwar li en norm akseptab.  E se sa ki Mosyon pe demande,  Se ki i annan plis fasilite dan bann landrwa.  Nou’n vwar avek serten devlopman ki’n arive, parey tou resaman ler mon pe pase mwan osi.  Mon ti donn pasaz serten dimoun pe monte lo lakot les pou al Anse Royale,  ki’n anvi fer son bezwen.

E mon dir sel landrwa, si ti wikenn sa, sel landrwa se kot nouvo bus terminal ki’n fek konstri Anse Aux Pins, mon a met ou laba.  Malerezman ler mon’n ariv laba Mr Speaker, mon ti ganny dir ki i pa operasyonnel, i frenmen sa ler, napa attendant, zot pa pou donn lakle.

Mon tous sa taler, sa size taler lo en pti pe Mr Speaker.  Mon pou retourn lo lesansyel.  Mr Speaker parey Mosyon pe demande, i dir Gouvernman ek sekter prive pou donn en sipor pou kapab met sa bann fasilite.

Sa ki nou pe demande i pa en gran fasilite, ouswa en gran building ki bezwen al ganny konstri ki pou kout 2milyon.  I en fasilite ase senp kot ou pou bezwen met ou 3 a 4 toilet dan en lankadreman.

Kot i ava annan fasilite delo avek serten bann utilities ki neseser.  E pou nou kapab fer sa arive, se sa lapros konzwentman, en lapros kolaborasyon, ki en bout dan Gouvernman.  E Onorab William, loter Mosyon in koz en pe in mansyonn Minister
Lanvironnman koman enn fasilitater.

Avek en petet en lentrodiksyon en Scheme.  E mwan mon pou al pli devan osi, mon ti a swete.  An vi ki sa i pa pou benefisye zis Seselwa, se ki Minister Touris osi i bezwen annan en rol ki i pou zwe, pou kapab fasilit en pe ladan.  E osi i bezwen annan en konsiltasyon avek gouvernans lokal.

Akoz ler ou pou’n met serten sa bann fasilite, difikilte.  Mon dir difikilte baze lo leksperyans.  Akoz mon annan en tel fasilite dan mon distrik ki egziste.  Me son difikilte se pou maintain li, lo en faz regilye toulezour.  Ou pou bezwen annan dimoun la, lo en baz toulezour.

Ki pou vini, ki pou ouver, frenmen e menm fer netwayaz.  E nou tou nou konnen poudir en fasilite twalet i pa rantab.  Akoz ou pou annan petet ki ou pou sarze.  E nou konnen poudir en servis parey, i pa merit en servis gratwit.

I pou bezwen annan en kou ki atase avek.  E difikilte Mr Speaker ki mon pe soulinyen, se pou kapab ganny en responsabilite, en dimoun responsab ouswa en lorganizasyon.

Me selman i pou tou depan lo lokasyon kot sa bann fasilite ki avek sa bann Lazans ki mon’n mansyonnen konzwentman, i kapab tonm dakor kote ki zot pou plas sa fasilite?  Petet i ava annan landrwa ki nou ava dir be ok, nou ava enkorpor avek en devlopman.

Petet i ava annan en building.  Nou ava dir ok, tel ou tel organizasyon, tel biznes i kapab pran sa koman zot responsabilite.  Be dan landrwa ki mon santi ki napa okenn biznes, ouswa en landrwa izole, i pou bezwen annan en still management pou sa.

E nou, mon pe fer referans avek distrik Port Glaud, atraver Ladministrasyon Distrik, nou’n sey apros Servis Sosyal anba URS, ki nou ava annan en part, koman en part timer.

I pou annan son louvraz ki i pou fer li.  Me selman i kapab pran sa anmen.  Nou ankor pe negosye dan sa laliny e mon krwar ki demars i pou korek.  Mr Speaker ler Onorab William in prezant son Mosyon, in fer serten mansyon avek en Scheme anba Departman Lanvironnman.  Mon santi ki sa fasilite li menm li, i en fasilite ki pou protez nou lanvironnman.  Akoz nou pa pou pase pou nou petet santi bann loder, ouswa malpropte ki pa dezirab.  E parey ozordi nou annan Lazans LWMA ki li i responsab zerans netway nou bann semen, kot nou pase.

Ki fer sir ki i prop.  E sa i annan en laliny Bidze pou li.  E mon santi petet si nou komans dan en laliny parey, nou annan en pti laliny Bidze.  Petet dan lespri ‘’Leve Debourye’’ osi, i kapab annan en pti ladisyon ki kapab ganny mete pou fer ki en pti kontrakter ki kapab dan sa distrik, i kapab pran sa responsabilite avek en pti ekstra larzan ki i a gannyen.

Pou li kapab siport e maintain sa fasilite dan en fason korek, izyenik.   Kot dimoun ler pou ale, pou servi, i pa pou vwar sa fasilite.  Ouswa i poudir plito mon al dan lapay ki mon servi sa, akoz son leta ki i ete.

E sa i bann keksoz ki mon santi ki nou bann Manm osi i ava annan serten kontribisyon ki a ganny fer lo la, pou siport sa Mosyon.  Ouswa bann lezot sizesyon.  Pou fer ki dan tou rezyon at least, menm si nou pa pou kapab fer li dan tou distrik.  Me selman dan tou rezyon bann landrwa popiler, bann landrwa ki ganny frekante bokou i kapab ganny en fasilite.  Akoz souvandfwa, mwan mon’n zwenn touris ki pe demande, kote i kapab ale pou li kapab ganny en toilet piblik.

E bonnfwa, koman nou Seselwa osi, ki annan en leker pou nou bann etranze, i annan de fwa ki Seselwa in envit touris pou vin dan son landrwa ouswa en lakaz ki o bor semen ki’n dir be madanm be vini ou ava servi.

Mon konpran ou’n anbarase, vini ou a servi mon twalet.  Me selman avek sa Mr Speaker.  Mon krwar ki i enportan dan sa laliny GS ki nou met bann fasilite.  2enm parti Mosyon pe fer referans avek en landrwa pou enjoyment parey nou dir.

En landrwa kot nou menm nou koman Seselwa, koman bann zenn osi, sirtou nou bann zenn, i kapab de foule.  Mr Speaker mon rapel ki Gouvernman li menm, atraver en koze ki mon ti koze avek CEO Planning, ti fer mon konpran poudir Gouvernman anba land use plan pe konmans demarke bann landrwa.  Osi ou kapab annan bann enjoyment, kot dimoun i kapab ale, parey Mosyon i dir, respectant norm ek Lalwa.  I pa pou afekte propriyete dimoun.

E i osi pa pou disturb lavi prive okenn endividi.  E avek sa Mr Speaker, mon tre optimis ki si nou kontinyen dan sa laliny, e mon santi ki Gouvernman i devret al en pti pe pli devan, ki ler nou kapab idantifye bann landrwa akseptab, nou angaz nou lo nivo lokal.  Pou nou annan en plan e kalite aktivite ki nou kapab tolere e akseptab.  E referans en landrwa enjoyment ki ozordi i bann landrwa kot dimoun i ale.  Parey mon’n site boner, i annan serten mankman.

Mon dir serten mankman akoz dan lapratik ozordi ou vini avek ou groupman ouswa ou fanmir.  Ou dir ou pe al fre tel aktivite.  E la ou bezwen, byensir si ou pou bezwen demann permisyon si i en aktivite lamas.

Me selman bann aktivite, sirtou parey lo wikenn lafanmir.  Ou bezwen kouran,  si ou pe al fer en pti parti.  I annan landrwa napa ditou bin site.  Ou bezwen anmenn ou prop fason pou ou kapab contain ou salte.

E menm parfwa nou’n vwar poudir i annan dimoun ki ler in fini, in kit tou son keksoz la, in zis lev son kan, in ale.  E osi nou kondisyon letan nou konn byen poudir nou annan soley, nou annan lapli.  Si ou’n plan en keksoz davans, ou dir ou pe ale, ou’n fini koz ek tou ou dimoun pou ale, pou vin tel landrwa pou fer serten aktivite.

E letan i deklare, lapli i tonbe, petet ou napa en landrwa.   Ouswa ou bezwen zis kennsel ou aktivite.  I bann fasilite ki mon santi i pa kout bokou.  I pa kout en fortin.  E si nou koman bann endividi, nou annan dan nou distrik.

Nou annan bann biznes, ozordi nou annan CSR,  nou devret zwenn ansanm dan en fason pozitiv e tonm dakor byensir lo en plan ki pa pou gat okenn lanvironnman.  Ki pa pou koz okenn danze, pou okenn endividi osi.

Annou met sa bann keksoz an mars.  Annou zwenn ansanm.  Kot i bezwen bann power point annou mete.  Delo osi i en fakter ki nou bezwen, petet i ava annan bann pwen delo e en fason osi ki a ganny reglemante si ou pe servi, ou peye.

Ozordi nou pe entrodwi en sistenm parey PUC, pou entrodwi pou bann dimoun dezavantaze.  En sistenm kart kot ou vini ou boure pou ou ganny ou kouran.  Ou mete.  Me osi i ava en fasilite pare kot i ava annan en sistenm kot ler u pe vin servi, ou aste sa kart, lala ou kapab servi bann fasilite ki dan a disponib dan sa bann landrwa.

E Mr Speaker ozordi bokou nou bann zenn i zwenn.  Zot defoule ziskan tar.  Petet sa osi i en fason ki zot ava al dan sa bann landrwa apropriye ki a ganny dezinyen, pou pa fer okenn, ouswa pou nou tann konplent is, konplent laba. tapaz.

Me zot a ganny en landrwa, akoz zenn pe rode.  E avek sa Mr Speaker, se sa lespri ki mon pe siport sa Mosyon, pou nou kapab annan bann landrwa kot dimoun i kapab al fer zot bezwen.  E osi en landrwa pou dimoun defoule.  Avek sa Mr Speaker mon siport sa Mosyon.  Mersi.

 

MR DEPUTY SPEAKER

Mersi Onorab Aglae.  Lo mon lalis mon annan Onorab John Hoareau.

 

HON JOHN HOAREAU

Mersi Mr Speaker.  Sa Mosyon ki devan nou, i en Mosyon ki’n vin a en letan kot mon krwar i enportan pou nou realize avek devlopman pei, nou pe price nou lekor koman en 5 Star destination parey in ganny dir, ki bann fasilite twalet dan bann landrwa piblik, i en keksoz ki endispansab.  Mr Speaker mon oule koz lo mon distrik li menm, Beau Vallon.  Mon pa’n kapab pa pran sa loportinite pou mwan siport sa Mosyon.

Akoz i en Mosyon ki al dan en bon direksyon;- en Mosyon ki pe demann sekter prive avek piblik.  Pou gete ki fason kapab met sa bann kalite fasilite dan bann landrwa piblik.  Beau Vallon parey zot konnen i en landrwa touristik.

Me i malere ki laplipar bann teren ki nou annan Beau Vallon, se bann teren prive.  Me ozordi zour avek bokou zefor ki mwan menm mon’n fer, ki Beau Vallon sa landrwa kot nou apel Bazar Labrin, in ganny aste par Gouvernman.

Alor keksoz ki mon pe demann mon lekor, depi ler sa purchase in ganny fer, depi dan milye sa lannen, mon pe demann mon lekor ki kantite letan i pou pran, pou zot kapab met bann fasilite ki mon apel endispansab, bann fasilite twalet.

E osi petet en fasilite dous pou bann dimoun ki pran en bennmer, ki ler zot monte,  Kot zot pe al repran zot transpor pou zot ale, zot kapab servi en pe delo pou zot retir disab lo zot.  Sa bann keksoz Mr Speaker, parey mon pe dir avek modernite, i bann keksoz ki endispansab.

Ler nou pe koz lo beachfront development, i enportan ki okenn devlopman ki pou anmenn en serten kantite dimoun, ki Lotorite i pran kont poudir nou bezwen bann fasilite twalet piblik.

Ozordi zour parey nou vwar, bokou dimoun i bezwen al servi sa bann keksoz dan bann lotel ki en pti pe o bor, oubyen bann restoran ki en pti pe o bor.  Me sa dan li menm i koz en lenkonvenyan pou sa bann owners, pou sa bann dimoun ki pe zer sa landrwa.  Akoz zot pa sipoze pe donn sa fasilite pou nenport ki dimoun.  Zot ti sipoze pe fer sa fasilite pou zot kliyan.  Mr Speaker parey ou konnen, dan sa area ki nou apel Bazar Labrin, i annan bokou aktivite vann manze, i annan bokou aktivite kot zot servi kliyan avek bann prodwi lokal, bann juice, bann ensidswit.

E an se moman la, napa okenn landrwa kot sa bann dimoun i kapab ganny en fasilite delo.  Zot bezwen anmenn avek zot, bann gro, gro tenk delo, e sa dan li menm i pa zoli.  Mon pe mazinen o bor Coral Strand en pti pe pli devan kot i annan sa car park,  i annan en morso teren ki Gouvernman i annan.  E LWMA in ganny ziridiksyon lo la, pou fer twalet.   Me LWMA pe demann sekter prive si zot kapab fer en proze konmsa.  E answit zener serten reveni par sa.

Me parey nou konnen i en keksoz ki bezwen mentenans, i bezwen o nivo lizyenn.  Alor i en keksoz ki menm si ou pou sey sarz en larzan, i posibleman i pa pou tro rantab si nou pa donn serten lavantaz sa bann biznes pou ganny fer dan sa landrwa.

Ler mon pe dir lavantaz, mon pe dir nou kapab fer li en pti pe parey nou vwar ki konsep zot pe fer pou bann Home of the elderly.  Kot serten tax rebate i ganny facilitate pou sa bann dimoun kapab zener zot larzan ki zot in envestir premyerman dan sa bann keksoz konmsa.

So sa i en fason, en moralite petet pou kapab ede pou fer konstri sa toilet dan sa landrwa la.  Me nou pa bezwen zis en sel toilet.  Nou bezwen toilet en pti pe partou, partou, otour pei.  I annan detrwa landrwa osi nou kapab konsider CSR parey in ganny dir.

I annan bokou lotel ki ganny fer.  E en parti zot CSR i kapab ganny servi zisteman pou anmenn sa bann keksoz konmsa.  Bann devlopman konmsa.  Me mon oule azoute osi, pa zis toilet facilities, shower, ki nou bezwen.

Nou bezwen osi plis bin.  E bann bin ki lisyen pa kapab devire pou met ater, pou zot fann tou salte.  Sa bann keksoz koumsa i ava ede pou anbelir nou bann lans, nou bann landrwa piblik, pou fer li reste a en nivo pli prop posib.

Mr Speaker avan mon terminen, mon pa pou al tro bokou lo sa.  Mon oule koz en pti gin lo sa toilet ki annan Victoria zis o bor Taxi Stand.  Parey nou konnen, sa landrwa in ganny konstri en pe letan pase e nou pa’n vwar sa kontinyite pou rann sa servis.

Mon pe demande ki lotorite konsernen i fer li en priyorite pou re anbelir sa landrwa, remet, si i annan mentenans fodre ganny fer, i ganny fer.  E sa servis i ganny donnen avek piblik.

Akoz bokou konplent sorti kot Legliz Anglikan lot kote, churchwarden i dir ki bann dimoun ki bezwen twalet i bezwen koup semen vin Legliz, e sa i en konvenyan pou zot.

Akoz zot ki bezwen servi zot larzan pou ranplas toilet paper, ranplas netwayaz ensidswit.  So avek sa Mr Speaker, mon remersye ou pou sa loportinite pou mon met sa enn de pwen devan.  Mersi.

 

MR DEPUTY SPEAKER

Mersi Onorab Hoareau.  Onorab Henrie.

 

HON GERVAIS HENRIE

Mersi Mr Speaker.  Bonzour tou dimoun.  Mr Speaker mon krwar sa Mosyon ki devan nou, parey bann ki’n koze avan, in dir poudir i en Mosyon ki annan son merit.  E dan sa 3 entervansyon ki nou’n antann ziska prezan, mon krwar tou le 3 Manm in enkli loter Mosyon, in byen koze.

Zot in kouver tou bann lesansyel ki pou anvoy sa mesaz spesifik avek bann Lotorite konsernen, poudir Lasanble Nasyonal se sa son swe, pou deservi bann dimoun ki nou, nou reprezante.  E mon krwar avek sa lespri Mr Speaker, anba Order 23(1), mon ti ava demande ki nou met sa Mosyon pou ki Lasanble i pran en vot lo la.  Mersi.

 

MR DEPUTY SPEAKER

Bon i annan en proposal ki nou, nou al pou sa ki nou apel en closure lo sa size.  Eski Mosyon i ganny segonde?  Onorab Arissol.

 

HON PHILLIP ARISSOL

Mr Speaker Mosyon in ganny segonde.

 

MR DEPUTY SPEAKER

Mosyon i ganny segonde.  Bon si Mosyon in ganny segonde, be nou a pran en vot, pou nou close debate lo la.  E answit nou a pran en vot lo-  So premyerman annou pran en vot, for us to close debate on the issue.  Tou Manm ki an faver?

Madanm Deputy Clerk ou a donn nou count.  Okenn Manm ki kont.  Madanm Deputy Clerk ou a donn nou.

 

MADAM DEPUTY CLERK

Mersi Mr Speaker.  13 Manm in vot an faver e personn kont.  Mersi.

 

MR DEPUTY SPEAKER

Ok.  13 Manm in vot an faver savedir nou ava pran en vote on the Motion itself.  Mon a donn the mover of the Motion son Right of Reply.

 

HON WAVEN WILLIAM

Mersi Mr Speaker.  Mr Speaker mon pa’n trouv okenn problenm pou vot an faver closure.  Akoz mon santi poudir santiman dan Lasanble in annan sa sipor inanim.  E mon oule remersi bann entervenan ki’n koze.

Akoz mon vwar ki bann pwen ki zot in avans devan, i bann pwen ki rezonnab.  E ki fer sans.  Par egzanp Onorab Aglae in koz en pti pe lo kote distrik vizavi bann responsabilite kot ler sa bann fasilite pou ganny mete.  E mon santi poudir wi i annan sa nesesite.

Sa nesesite pou Departman Lanvironnman antre ladan.  Wi i annan sa nesesite pou Minister Tourism antre ladan.  E i vre ki i pa pou rantab.  E vwala akoz nesesite ki Gouvernman i bezwen an premye lye, antre pou kapab permet ki ansanm avek sekter prive, sa servis i kapab ganny donnen.

E Onorab Hoareau, son bann pwen ki in met devan i osi fer sans.  Wi obor bann lans ler i annan sa bann fasilite, i neseser annan en pwen delo pou dimoun kapab servi.  E bin osi i neseser.  Akoz nou pa, akoz i annan plizyer bann landrwa, nou vwar ki dimoun, serten, pa tou dimoun.

Bann ki responsab pa pe fer li, me i annan parfwa.  Nou ganny carried away, nou zet en pti pe nou bann salte partou, partou, alors i annan bin.  I ava fer li fasil pou gard bann landrwa prop.  E en pwen kouran i enportan.

Parey Onorab Aglae in mansyonnen.  Ozordi teknolozi in avanse kot nou kapab servi bann kart.  So en nenport fanmir ki anvi servi sa ban fasilite i kapab al en landrwa, aste.  E i kapab servi e ganny kouran.

Mr Speaker mon santi poudir atraver plizyer Mosyon ki nou’n anmennen dan sa Lasanble, letan nou ti pe dir ki i annan sa nesesite pou zot donn en pe plis lotonomi bann distrik.  La atraver sa Mosyon mon vwar poudir, distrik i kapab anmas en pti larzan si Gouvernman i permet,  kre bann kondisyon, kot si vreman nou demark sa bann landrwa, mon krwar poudir atraver en tim ki ganny selekte dan distrik, pou okip sa bann landrwa kot bann dimoun i vin lwe, pou fer zot aktivite.  Mon santi poudir keksoz i kapab mars byen.

Mr Speaker wi, mon toutafe tonm dakor ki anba sa CSR, i annan bann plizyer gro lotel ki kapab kontribye pou ede pou ofer sa bann fasilite osi dan distrik.  Ler ou regarde i en travay ki nou bezwen fer li an tim, par tou bann important stakeholders.  Mon pa vwar li difisil Mr Speaker.  Me mon vwar ki nou’n pran tro bokou letan, pou nou kapab met an plas sa bann fasilite.  An menm tan fasilit nou bann Seselwa ki anvi fer zot aktivite lo lans, sirtou bann zenn.

Mr Speaker, alor atraver sa Mosyon, mon pe demande ki Lotorite i reazir ase vit.  Akoz mon pa vwar akoz nou pa kapab konmans serten aksyon par faz.  Akoz vreman, vreman i annan sa nesesite.  Akoz mwan mon’n witness serten bann keksoz ki arive avek nou bann viziter ki i pa gou, letan ou tann zot koz lo la.  E ler zot al deor zot pa fer dibyen Sesel, letan zot met sa bann pwennvi devan zot bann lezot zanmi, ouswa manm fanmir.  Mr Speaker avek sa 2 mo, mon remersi tou Manm ankor parey mon’n dir.  E mon remersi zot pou zot vot.  Mersi.

 

MR DEPUTY SPEAKER

Mersi Onorab William.  Bon in ariv ler pou nou pran en vot lo sa Mosyon par Onorab Waven William, ki lir comme swivan;

‘An vi konsern piblik e viziter sa Lasanble, i demann Gouvernman pou an partenarya ek sekter prive pou met kabinen piblik dan bann landrwa neseser, e pou osi design bann landrwa lo lans kot Seselwa i kapab enjoy son lekor libreman en respektan norm Lalwa.

Tou Manm ki an faver?  Okenn Manm ki kont?  Madanm Deputy Clerk ou a donn nou count.

 

MADAM DEPUTY CLERK

Mersi Mr Speaker.  Mon’n rikord 25 Manm ki’n vot an faver e personn kont.  Mersi.

 

MR DEPUTY SPEAKER

25 Manm an faver.  Savedir sa Mosyon par Onorab William i ganny aprouve par Lasanble Nasyonal.  Bon lo nou Order Paper i reste ankor en Mosyon.  I 12.13.  Mon sizere ki nou adjourn.

Oubyen si zot anvi nou kapab pran sa Mosyon? So mon krwar an vi ki nou pou osi annan ABC 1er apre midi nou ava adjourn ziska 2er apre midi.

 

(BREAK)

 

MR DEPUTY SPEAKER

Bonn apre midi tou bann Manm Onorab.  E nou kontiny nou travay lo Order Paper pou ozordi le 2 Oktob 2019 e zis avan nou konmanse Onorab Ghislain in sinyalman mwan i ti a kontan fer zis en statement bref e mon donn ou laparol.  Onorab Ghislain.

 

HON CHANTAL GHISLAIN

Mersi Mr Speaker, Mr Speaker i lo e devwar Lasanble Nasyonal pou diskit ti ou size ki tous popilasyon e ki bann konsern Nasyonal, nou dan mwan Oktob e parey tou lemwan tou dimoun nou konnen ki Oktob mye konnen konman ‘’Pink October’’, i en mwan dedye a sansibilizasyon lo maladi kanser.

Donk i apropriye osi ki mon ki nou konman Leaders e lavwa lo kominote, nou debout an siny respe pou tou bann- (mon pe demann ou Mr Speaker pou nou kapab omwen avan mon konmans sa pti mesaz) pou nou kapab debout atraver Lasanble pou nou kapab obzerv en minit silans, pou nou mazin nou bann zenn frer e ser manman, papa e zanmi ki’n perdi batay kont sa maladi.  Bann ki ankor pe anmenn sa batay e pou bann ki’n fini perdi lespwar.

 

MR DEPUTY SPEAKER

Dakor nou ava debout.

 

(One minute of silence was observed in respect for those who died of cancer)

 

HON CHANTAL GHISLAIN

Mr Speaker mon konnen i pa nou koutim pou debout dan Lasanble pou koze e permet mon pou sa pti bout koze, mon pe debout pou adres Lasanble pou en sel rezon, e sa pou koz lo sa 7 madanm isi dan sa Lasanble sa i form parti Caucus, bann Madanm sa i Onorab Sylvanne Lemiel, Onorab Flory Larue, Onorab Noline Sophola, Onorab Audrey Vidot, Onorab Jany De Letourdie, Onorab Regina Esparon e lo mon non personnel, pou montre nou langazman e kouraz pou lead the way, akoz konman bann leaders nou rol se pou lead  by the example.

Mr Speaker sa minit silans ki nou fer obzerve dan Lasanble i pa en silans konmkwa nou lebra i tonbe.  Me en silans lespwar.  Letan nou’n obzerv sa minit silans an memwar tou bann viktim sa maladi, tou bann ki’n win zot konba kont kanser bann zanfan e bann zonm e fanm ki’n perdi zot konpanny  nou pa’n fer li an sipliyan sa maladi pou aret atak nou me plito an siny determinasyon pou nou met en lafen avek li.  Sa minit silans i mark kontinyasyon en mouvman dan nou pei, kot Seselwa pou nepli per  kanser e plito kanser pou per nou, olye kontinyen i vin viktim kanser nou merit pran trou mezir neseser pou fer ki i vin immune  avek sa maladi e sa i konmans avek sa kanpanny.

Mr Speaker Caucus bann madanm dan Lasanble in sot sa loportinite pou partner avek Minister Lasante Cancer Association Sylvie mye connue konman Madanm Franchement kot K-Radio, National Sports Council NSC, e Seychelles Woman in Sports Committee SWSA pou servi tou mwayen kominikasyon ki swa radyo televizyon zournal, legliz, klinik ek lopital e sports pou anmenn plis sansibilizasyon lo lenportans deteksyon kanser boner.

Kanser i afekte tou dimoun e konman bann madanm nou santi nou pli pa ganny afekte e ka kanser dan en fanmir i afekte sa fanmir antye.  Kanser i en size ki konsern tou Seselwa.  Sak Seselwa i bezwen santi li konsernen par sa maladif.  Sa ki nap sa maladi swa i annan en manm son fanmir ki per posib avek li, oubyen i annan en zanmi ouswa en dimoun ki annan sa maladi.  E pou nou  batay kont li nou bezwen konn li.

Donk se pou sa rezon ki nou konman bann madanm leaders dan Lasanble, nou’n deside ansanm avek sa bann lezot partners ki mon’n nonmen, pou nou fer en mwan kanpanny lo kanser.  Zot a ganny plis detay lo progranm konpanny demen dan konferans lapres ki nou pou fer isi dan kot Lasanble Nasyonal.  Mersi Mr Speaker pou donn mwan sa pti moman.

 

MR DEPUTY SPEAKER

Mersi.  Mersi Onorab Ghislain pou.  Onorab Regina Esparon.

 

HON REGINA ESPARON

Mersi Mr Speaker.  Sa linisyativ i enn ki pli partizan.  Enn kot nou pa kapab divize lo la.  Lo sa kote latab nou pe osi ankouraz tou dimoun pou vin partisip dan sa bann aktivite ki pe ganny organize, an sodalité ek bann dimoun ki pe soufer ek sa maladi kanser.

Ozordi i kapab kot ou, demen i kapab koup semen vin kot mwan.  Mr Speaker sityasyon i vreman alarman.  E bann viktim i bezwen nou soutyen, nou sipor, nou lankourazman ek nou lapriyer pou afront sa maladi kanser.

Alor bann madanm, vin partisip an gran nonm dan bann aktivite e osi nou envit bann msye pou partisip  akote sa bann madanm.  Komite Lasante osi mon lans en lapel Komite Lasante  pou Lasanble, pou zwenn nou dan sa bann aktivite, ki’n progranmen pou mwan Oktob, an sodalité avek bann dimoun ki pe soufer avek kanser.  Mersi Mr Speaker.

 

MR DEPUTY SPEAKER

Mersi Onorab Esparon.  Bon nou pou kontiny avek travay lo nou Order Paper e prosen Mosyon ki devan nou se enn Onorab Egbert Aglae Manm pou Port Glaud, mon a demann ou pou prezant ou Mosyon.

 

HON EGBERT AGLAE

Mersi Mr Speaker.  Bonn apre midi tou Manm Onorab e tou dimoun ki a lekout.  Mr Speaker Mosyon i lir koumsa sa Lasanble pe demann Gouvernman an partenarya avek sekter prive pou etablir en fasilite Billing Center par rezyon avek bi, premyerman ;- desantraliz peyman bann bills, redwir nesesite desann Victoria pou fer sa kalite peyman; e dernyerman elimin letan perdi e son kou asosye avek tel demars.

Mr Speaker lespri sa Mosyon i al dan lespri ki viz ver desantralizasyon bann servis.  E anmezir ki pei i devlope, bann teknolozi i antre anfors, e la popilasyon ki pe agrandi e plis dimoun ki konekte avek bann servis e litilite ki egziste lo en baz lokal e mondyal, nou vwar poudir i annan nesesite pou nou annan bann pwen komen.  E ozordi nou vwar pou dir bokou dimoun i vwar li sirtou kan i ariv letan lafen dimwan pe taye olye al pey son bann itilite ouswa servis –ki li in servi.

E sa Mr Speaker i fer ki i annan en langazman komikman ki dimoun i bezwen bouze deplase pou zot al kot sa pwen santral pou al fet bann peyman.  Wi desantralizasyon in konmanse, me selman nou santi poudir nou bezwen al dan pli, pli profon.

Mon dir pli profon akoz Mr Speaker, ler ou fer serten analiz ozordi e dimoun bokou i koz ek ou i dir ou i travay dir depi le premye ziska le 31 pou ganny son larzan me osi i vwar li bezwen travay dir ouswa fer sakrifis parler kantmenm  i fatige pou al debout dan en laliny pouli al fer peyman son bann itilite.

E menm osi ozordi malgre teknolozi in avanse kot in annan bann e-billing pa tou sekter dan sa bann domenn itilite, ki azour ouswa ki’n pare pou zot kapab entrodwir bann tel servis.

E nou konstate ki i pou pran en pe letan plis ankor pou nou kapab ariv lo sa pwen parey bann bokou bann pei avanse, ozordi kot zot annan bann fasilite billing, kot ou kapab asiz se ou lo internet pou fer bann peyman.  Me nou, nou pa pe vwar sa arive isi en pwen en bon pe letan.

E alors Mr Speaker Mosyon pe demande, ki nou annan lo baz rezyonal, en landrwa en pwen santral kot ou kapab al fer ou bann pay point, kot i ava annan bann servis itilite e sa i ava fer an partenarya avek bann diferan akter ki relye avek sa bann servis.

Premyerman Mr Speaker, bann servis ki toulezour nou pe servi ki nou bezwen pey nou bann bill.  Nou annan PUC ki  li i pli gran konsonmater sa bann bills.  Nou annan nou plis ki 50 mil konsonmater lokal ki servi sa servis delo, elektrisite ouswa sewage.

E ozordi Mr Speaker ler mon’n kalkil par rezyon, mon’n get rezyon was nou annan nou omwen 4, 500  konsonmater sa servis e ou kapab mazinen ki ler lafen dimwan sa kantite tranzaksyon sa 4,500 konsonmater ki bezwen pe bouze pou zot al lo en pay point system swa zot desann anvil.

E sa i relye Mr Speaker, avek konzesyon.  Nou tou nou konnen pou dir ozordi lakantite veikil sa plis ki 30 mil transpor ki pe roule, lo en pwen e ler i pou ariv moman sirtou dan lafen dimwan an montan dan le 28 an montan, nou’n vwar pou dir bokou sa bann landrwa i konzeste.  Si nou al anvil menm nou vwar pou dir aliny in long.  Ou pou al lanmenm la obor Roche Caiman kot i annan en fasilite obor STC nou vwar pou dir laliny i long.

Alors Mr Speaker desantralizasyon sa servis i pou anmenn en lenpak enorm.  E en kou redwir osi akoz letan ou perdi ouswa deplasman kot ou bezwen pey en transpor i fer mon mazin bann dimoun sirtou bann dimoun aze ki zot, zot bezwen desann pou zot al fer sa bann kalite demars.

Mr Speaker lot itilite enportan ki nou santi i kapab ganny ankadre anba sa servis Mr Speaker i télécommunication

.  Ozordi nou’n vwar en ogmantasyon enorm e statistik ki mon’n fer resers lo la, i montre pou dir logmantasyon dan sirtou kot i konsern bann fix line, sorry Mr Speaker i annan en rediksyon dan fix line malgre 23poursan, me selman nou vwar lo kote cellular services sa i bann mobiles i annan en ogmantasyon plis ki 166poursan.

Lo kote internet service parey 26poursan logmantasyon dan sa dernyen 3an.  Sa i fer ki dimoun i bezwen bouze pou fer bann tel demars.  Lot servis ankor ki dimoun i servi bokou sa ki nou apel Cable TV ozordi.  Bokou lakour lamazorite pe servi bann sistenm Cable TV pou zot kapab get zot televizyon.

E li osi nou annan sa de lakonpannyen prensipal Airtel ek Cable, zot nou konnen zot pwen peyman i ete zot osi.  Se enn Roche Caiman pre Providence, e nou annan   anvil.  E tousala nou vwar sirtou kot nou dekoneksyon i ariv dekoneksyon kot nou bezwen taye e al peye.  E tousala i annan bann laliny ou bezwen perdi letan pou arive.

Mr Speaker nou annan servis parey sistenm tax SRC.  Bokou biznesmenn osi i bezwen vwar zot pe desann sirtou lafen dimwan, pou zot al fer zot bann peyman tax.  E si sa servis ti kapab desantralize dan sa bann Billing Centre par rezyon, i ti a ed letan perdi.  E nou konnen pou dir biznesmenn malgre nou dir i annan serten ki nou kapab fer onlin,e e osi i annan ki deside ki li i pa tro azour avek teknolozi i al fer son peyman direkteman.  E tousala i ava rantre ladan.

Mr Speaker ankor dan lespri desantralizasyon nou annan Licensing, kot nou pey bann diferan Licenses ki nou bezwen al peye.  Bann learner bann kart pou License li menm, e bann lezot License ki nou bezwen.  E en servis dan desantralizasyon dan sa menm laliny, i a ede ki bann zabitan bann antreprener, bann biznesmenn, i pa bezwen bouz bokou pou zot al  fer zot bann peyman.

Mr Speaker osi mon konstate, i annan bann lofans ki relye avek trafik ki parfwa tanzantan ou pe gannyen.  Kot ou ganny ou tiket ki ou bezwen al peye.  E bokou nou bezwen vin la Ile Du Port e nou konnen pou dir ler ou ariv anvil ou’n pran en bis, ou bezwen petet tyake ouswa ou bezwen pran en lot bis pou vin  la.    Tousala i kapab ganny enkorpore avek sa Billing Centre ki nou pe propoze.  Nou annan bann lakonpannyen lasirans, kot ou bezwen pey ou bann lasirans.  E ozordi laplipar ankor Mr Speaker i santralize pou al kot Harry Savy ouswa kot SACOS tousala i anvil.  E nou, nou swete pou dir desantralizasyon sa servis dan bann rezyon i ava ede.

Mr Speaker i enportan pou nou konstate osi ki letan perdi i kout larzan.  E nou tou konnen pou dir sa demars pou nou bouze, pou nou desann menm si pa nou ki fer direkteman ouswa nou kapab anvoy en zanmi ouswa en fanmir i pran letan pou li kapab fer sa.

Mr Speaker bokou a demande be ki mannyer nou pou fer en tel fasilite?  I pa konplike.  Mosyon i demande ki Gouvernman an partenarya avek sekter prive.  Bann propozisyon rezyon ki mwan mon pe mazin lo la, i kronm swivan.  Parey dan rezyon was nou kapab konsider Grand Anse Mahé ouswa menm Anse Boileau ki a deservi Port Glaud, Grand Anse li menm, Anse Boileau e Baie Lazare.  E Anse Royale lo rezon sid, vi ki i pe vin en 2enm lavil e nou konnen pou dir i annan en serten fasilite ki’n deza annan la, i kapab petet agrandi son lekor e fer ki bann lezot servis i ava ganny ankadre ladan.  E li Anse Royale i a kouver depi Takamaka, Au Cap, e Anse Royale li menm.

E pou rezyon Les Mr Speaker, nou pe mazin swa nou fer li Anse Aux Pins ouswa Pointe Larue ki ava kouver sa distrik parey Cascade i a kouver Pointe Larue li menm e Anse Aux Pins.

E lo kote lavil Mr Speaker vi ki si nou desantralize i ava tir presyon lo sa bann Billing Centre ek sa bann soz ki deza la e i a fer lavi bann dimoun ki da rezyon lavil vin pli fasil.

E lo kote nor Mr Speaker nou pe mazin Beau Vallon, i en landrwa santre i en landrwa biznes e touristik osi e sa demars i kapab ganny mete laba ki a kouver depi Bel Ombre, Saint Louis, Glacis dan bann rezyon koumsa.

Mr Speaker Mosyon osi pe fer referans lo en fason ki mannyer nou kapab akonpli sa, sa demars.  Ozordi nou annan bann lofis ki nou kapab konsidere ;- par egzanp i annan serten landrwa ki nou kapab servi kot en extension avek serten Ladministrasyon Distrik kot pa fezab nou kapab petet konsider Gouvernman i alokasyon en bout later en bout teren ki ava konstri en bilding ki ava pros ouswa house sa bann fasilite.

Me lenportans Mr Speaker se ki sa bann partner ki mon’n nonmen ki pe provide sa bann itilite i fer zot vin en fason konzwent ansanm i ava annan en diskisyon ki ava ganny fer e kote finansman tou parti PUC i kapab dan son rol pou li zwe, Cable and Wireless i ava annan son kontribisyon, Airtel, Licensing, parey mon’n dir bann departman osi parey kot Lapolis ouswa Zidisyer kot bann peyman i santraliz i vin fer kot zot.  Nou team up ansanm e zot kapab vwar resours neseser pou zot kapab finans bann tel proze.

E menm sirtou bann ki dan Sekter Prive zot kapab servi serten zot bann larzan anba CSR pou kapab fasilit sa.

Mr Speaker Mosyon li menm li pe fer zistis pou tou zabitan, pou tou dimoun ki ozordi zot annan en servis ki zot pe servi ki zot bezwen peye o mwan.  Pou bann ki dan biznes osi ki bezwen pey tax pou bann ki annan bann arrears sirtou bann sirtou parey bann parking tickets ki ou gannyen.  Osi pou bann osi ki annan serten lenformasyon adisyonnel ki krwar i pou bezwen relye avek sa servis provider ki li i antase avek.

E tousala i ava annan son sistenm enformatik pa zis sistenm finansyel kot pou peye, me osi i ava annan bann pwen ransennyman ki ava etablir avek sa Billing Centre pou zot kapab ganny plis lenformasyon lo koman amelyor zot ban sistenm itilite ouswa servis ki zot pe gannyen.

Avek sa Mr Speaker dan lespri sa Mosyon mon konnen pou dir petet ankor dan 10an, 15an, nou pou vwar en sistenm petet e-billing pli fasil. Me lefe i reste ki ozordi sa servis pa ankor vin 100poursan nou’n vwar pou dir i annan en rezon pou nou kapab annan bann servis desantralize nou bann pay point system ki kapab ganny servi.

Avek sa Mr Speaker mon demann laprouvasyon Lasanble pou sa Mosyon.   Mersi.

 

MR DEPUTY SPEAKER

Mersi Onorab Aglae.  Okenn Manm ki segonde?  Onorab William.

 

HON WAVEN WILLIAM

Mersi Mr Speaker.  Mon le segonn sa Mosyon.  E dir de pti mo an sipor.

 

MR DEPUTY SPEAKER

Proceed.

 

HON WAVEN WILLIAM

Mr Speaker sa Mosyon lespri sa Mosyon i le koul depi lepok District Council i en demann i len demann ki mon santi dan sa Lasanble even dan 6enm Lasanble konmans par Onorab Sandy Arissol mon rapel ti anmenn en Mosyon. E plizyer bann lezot Manm e mwan menm nou’n anmenn en pledwari avek Gouvernman vizavi sa prosesis annan plis desantralizasyon resours an menm tan servis.

Mr Speaker mon’n segonn sa Mosyon, akoz mon krwar ki nou rol isi se koze, fer bann rekomandasyon e se Egzekitif ki enplimante.  Me nou osi konstate ki lo k ote Egzekitif i annan bokou ki zot kapab fer vizavi desantralizasyon ki annan pou fer avek distrik, ki bann zabitan lo nivo lokal zot kapab benefisye e an menm tan fer lekonomi.

Mr Speaker mon krwar ki in ler ki Gouvernman i ekout sa pledwari ki Lasanble ouswa bann reprezantan bann distrik pe fer vizavi ankor plis desantralizasyon.  E sa Mosyon malgre i limit deba me i permet nou met devan plizyer bann lezot keksoz, ki annan pou fer avek benefis pou nou bann dimoun lo nivo lokal.

Mr Speaker mon anvi osi lans en lapel avek Divizyon Gouvernman Lokal, nou isi dan Lasanble nou bann reprezant lepep e par lefe ki atraver sa size delinking zot anvi anpes Manm Lasanble get involve District Team, me se nou ki vin isi dan sa Lasanble pou met devan swe lepep.  Alor mwan mon anvi demann avek Gouvernman Lokal pou pa entrizib letan bann Manm Lasanble i anvi konnen ki pe pase dan District Team akoz finalman se nou Lasanble ki aprouv Bidze. E nou, nou anvi form par e nou pa kapab divors nou avek nou distrik!  Nou pa kapab divors nou avek realite n ou distrik!  E sa Mosyon  dan li menm atraver plizyer Mosyon ki’n vini, i demontre ki bann reprezantan lepep zot a lekout e zot konnen ki e dezir zot bann rezidan.

Mr Speaker osi lontan ki nou napa en progranm kler lo vreman ki direksyon ouswa ki lanpler ki nou anvi sa bann desantralizasyon i ganny fer, Mr Speaker mon pe vwar nou lo nivo lokal pe kontinyelman anmenn sa lalit e sa lalit i bezwen kontinyen pou nou ankor vwar plis sa desantralizasyon resours e servis.

Mr Speaker mon pa pou dir tro bokou, akoz Mosyon i koz pou li menm.  Atraver sa 3 bout A, B, C ki loter Mosyon in met devan, mon santi ki sa Mosyon i annan son merit.  E ankor enn fwa mon le lans en lapel avek Egzekitif, lefe ki annan sa leokri, sa leokri ki konstaman nou anvi vwar plis desantralizasyon lo nivo lokal.  Mersi Mr Speaker.

 

MR DEPUTY SPEAKER

Mersi, mersi Onorab William eski i annan okenn lezot Manm ki le entervenir lo sa Mosyon?  Onorab Chantal Ghislain.

 

HON CHANTAL GHISLAIN

Mersi Mr Speaker.   Mr Speaker mon pou tre bref lo sa Mosyon parske sa Mosyon i li menm li i vreman direk.

Mr Speaker mon pou koz lo lapar lefe ki sa billing sa fason peyman nou kapab dir an Kreol i enn ki telman vit oubyen menm fasil.  Mon regard sorry mon pe nonm en lakonpannyen, me selman mon pe nonmen akoz mwan mon en kliyan Cable and Wireless.  Ou al pey ou bill ou antre laba kot sa billing sa i ete, ou bill i ariv mon pe zis donn en legzanp R584.35sou ler in azout sa VAT R87.65sou son total i R671.90sou.  E ler ou peye i pa pe donn nou sa swa pou ou pey R671.90sou menm si i vit ou bezwen round li off pou R672.  I koumsa sa.  And bann dimoun ki fer ki al top-up osi tou zot pou remarke osi letan zot pe zot met larzan pou top- up sa bann masin 3menm si i pe dir ou top-up R49 ouswa R99 ou pou met sa R100 ouswa sa R50 i pa pou zanmen rann ou sa Roupi.  I vit i fasil me zis nou demande ki kote tou sa bann pti sou i ale.

Mr Speaker mon pe koz lo koumsa akoz mon osi mon santi mon konsernen ouswa wi i en fason ki vit, me selman mon krwar i bezwen aranze.

Tandis ki par egzanp kot PUC, PUC li in donn nou en masin, ou vini ou vin get ou bill ou antre ou vin get ou bill ou kapab i donn nou sa slip konbyen ou drwa ou bezwen ale al remet ankor laliny ankor pou pey sa bill.  Dan sa moman kot ou ti pe sey rod rode ou bill delo ou bill elektrik by that time, 5 ou 6 dimoun in fini pas avan ou dan laliny e still ou vwar ou an retar.

So mon krwar i devret aranze tou sa bann keksoz i byen, nou bezwen pe modernize nou pe bouz annavans enn menm si pou mete dan bann distrik dan bann rezyon, mon pou totalman dakor avek sa, me selman zot bezwen vwar en fason en pe [pli byen pou aranz li  pou ki nou pa pe vwar nou bann pti sou ki pe ganny pran san ki nou pe pran an kont.  Se sa Mr Speaker ki mon ti anvi koze.  Mersi Mr Speaker.

 

MR DEPUTY SPEAKER

Mersi Onorab Ghislain.  Onorab Ferrari.

 

HON JEAN-FRNCOIS FERRARI

Mersi Mr Speaker Mr Speaker mon ti a kontan anmenn mon sipor pou sa Mosyon, me selman mon ti a kontan ki an menm tan ki nou pe koz o bann e pou bann fasilite, nou pa bliy konsern premye konsern ki Seselwa i annan.  Seselwa i annan bokou bill i annan bokou gro bill. 

        E sa groser sa bill e pri lavi ki difisil.  Whether nou pey li anvi oubyen nou pey li Grand Anse Mahé oubyen nou pey i Port Glaud se groser s  bill ki fer lafanmir Seselwa soufer.  Alors mwan mon ti a zis kont dir Mr Speaker mon kontribisyon dan sa deba se pou dir avek tou bann Manm, annou pa oubliy lesansyel.  Annou mazinen ki nou la toultan pou nou rod en fason pou nou fer desann sa bann bill.  Pou nou fer desann sa bann presyon ki annan lo lafanmir Seselwa.  An menm tan ki nou sey moderniz fasilite, nou bezwen osi tou pou nou a pez en pe sa douler ki en fanmir i gannyen.  Ennler i ganny en bill ni anvi gete ou pa ni anvi gete, akoz i pa konnen ki pou fer avek.  Alors sa i nou premye konsern e mon ti a kontan ki ler nou repran en vot lo sa bill toultan annou mazinen pou dir ki plis ki nou kapab fer ankor pou nou kapab fer desann pri lavi dan Sesel.  Mersi Mr Speaker.

 

MR DEPUTY SPEAKER

Mersi Onorab Ferrari.  Eski i annan okenn lezot entervenan?  Onorab Larue.

 

HON FLORY LARUE

Mersi Mr Speaker. Mr Speaker mon osi mon ti a kontan anmenn en sipor pou sa the Mosyon ki devan nou, me selman parey nou tou nou konnen Mosyon i non-binding    and ki sorti Lasanble i non-binding   lo Gouvernman.

E i fer lontan ki nou pe tann nonm desantralizasyon sa bann zabitan Anse Royale lontan zot pe tann nonm desantralizasyon bann servis pou zot kapab fasilit peyman, fasilit zot bann paper work fer lavi pli fasil.  Nou konnen ki pou lemoman nou annan en gran problenm trafik both dan bomaten ek dan apre midi pou dimoun antre kot zot, bann ki reste dan sid Mahé, i pran ziska 1erdtan edmi pou nou kapab ariv Victoria dan bomaten.

Alor Mr Speaker mon ti osi kontan ranforsi sa ki  Onorab William in dir, ki Gouvernman i pran sa an ker e zot vreman sey rod en fason pou sa promes ki zot in fer pou desantralize, pou zot kapab anmenn sa kot piblik Anse Royale, e osi dimoun ki reste dan sid Mahé.

Mr Speaker Gouvernman i annan li en bout later ki fer 14mil met kare kot Ladministrasyon Distrik Anse Royale i ete – Anse Royale.  14 mil met kare later i en gran bout later.  E mon’n tande souvan dir ki ozordi napa finansman, Gouvernman pa pe ganny finansman.

Me nou deza tande ki Gouvernman in deza fer bann kalite Scheme kot zot in koz lo PPP si nou’n kapab fer PPP avek Green Island Construction ki Prezidan letan i ti’n dir nou pou fermen, mon krwar Gouvernman i kapab rod lezot loportinite pou rod finansman pou fer bann devlopman dan sid Mahé, ki kapab enkli bann en bilding ki dimoun bann biro Gouvernman menm i kapab servi tel ki Rezistrar.  Zot kapab servi pou Lakour, zot kapab servi pou land use, later, lakaz bann servis ki Seselwa i deplas bokou pou zot kapab fer.

Alor mwan mon  sipor sa Mosyon e mon a demande ki  nou ki nou ganny tande e nou fer en plan konkret.  Me solman  mon pa krwar i pou vin anba sa Gouvernman.  Mon plito krwar i pou vin  anba  Gouvernman LDS akoz  nou ki pou vin o pouvwar lannen prosenn.   Mersi.

 

MR DEPUTY SPEAKER

Mersi Onorab Larue.  Onorab Simon Gill.

 

HON SIMON GILL

Bonn apre midi Speaker.  Bonn apre midi tou koleg Onorab e manm piblik ki pe ekout nou.  Mr Speaker Mosyon prezante par 0Onorab Aglae i annan en bon lentansyon.  E mon pe koze pou mon sipor sa bon lentansyon deryer sa Mosyon pe enport ki Gouvernman ki gouvernen dan Sese.  Lentansyon sa Mosyon i reste en lentansyon ki bon ki pozitiv akoz i pou enpakte lo lavi sak sitwayen Seselwa.

Mr Speaker mon ava dir dan en revizyon bann fasilite ki annan dan tou nou bann distrik kot nou annan bann Ladministrasyon Distrik ki nou gete ki bann adisyon nou kapab mete kot ki fezab, kot ki annan lespas si menm Gouvernman pa rantre pou fer li  si ii annan en laranzman ki kapab gannyen avek sekter prive, nou kapab kree sa fasilite.  E kree en outlet kot dimoun i kapab vini elektronikman pey son bann bill ki i annan.  Sa i pa demann en gran lenvestisman, me i demann en letid ganny fer e tonm dakor ki mannyer nou enplimant son pla.  Mon krwar dan sa lespri nou pa devret pe vwar bann gro lenvestisman ankor enn fwa mon repete, me bann lenvestisman minim me avek bann dimoun ki pare pou rantre e fer sa bann lenvestisman ansanm, avek sa lenstitisyon.

Par egzanp nou dir PUC, PUC malgre ki i en antite Gouvernman antite piblik nou touzour kapab si nou tonm dakor ki ladministrasyon distrik dizon Pointe Larue i annan posibilite ki nou kree en bout or nou transform en bout pou nou met sa fasilite elektronik, dimoun i vini i pran son bill i pez detrwa bann bouton i pran son bill i inserted dan sa masin, i pey son larzan i ale, i fini clear son bill.  Ozordi nou pe pey Intelvision online.  Ou asize dan konfor ou sez kot ou, e ou pey ou bill Intelvision. 

        I annan bann lezot osi servis ki ou kapab fer kot ou ozordi. I montre nivo devlopman e laplikasyon teknolozi ki Sesel in anbark lo  la.  Me eski i sifi ?  Non nou dir i pa ase nou dir nou devret kapab rod bann lezot mwayen e kree bann lezot fasilite tout otour ou teritwar Sesel.

Mr Speaker mon pa pou long lo sa Mosyon.  Parey mon dir lespri Mosyon deryer prezantasyon ki Onorab Aglae in fer, mon krwar i tre pozitiv  e mon demann tou mon bann koleg pou siport sa Mosyon.  Mersi bokou Mr Speaker.

 

MR DEPUTY SPEAKER

Mersi Onorab Gill, i pa paret i annan personn ankor ki’n lev lanmen mwan mon ti pou zis met de pti komanter lo sa lo sa Mosyon.  Onorab Aglae mwan mon serten krwar i annan merit pou desantralize pou fer sa aktivite peyman regilye preski tou lemwan pli fasil e mwan mon ti a sizere vi ki ou’n, ou’n nonmen dan ou entervansyon pou dir kantite mobile phone ki egziste i monte par 166poursan.  i vedir i annan Seselwa ki annan probableman plis ki en travay ou de telefonn.

E vi ki telefonn i en fason modern ozordi ki tou dimoun i servi pou fer bokou keksoz enkli peyman.  Ki bann labank Sesel e bann service provider e la mon pe koz Cable and Wireless, Airtel, Intelvision, Lasirans, tou bann group bill ki ou’n nonmen ki al peye tou lemwan.  Zot devlop en app ansanm ek labank ki tou lemwan zis lo ou telefonn parske i konekte ek ou labank pou fer ou peyman ou pa ni bezwen ni Billing Centre.  Kot ou ete ou kapab deor ou ganny ou bill ou peye.  E sa se bann fason ozordi lemonn modern pe dimoun i pey bill konmela.  Personn pa al dan en stasyon pou al pey okenn keksoz.  Pa isi.  Me sa se mon krwar en fason modern pou nou ariv dan s direksyon ki ou pe sizere.  Me sertennman parey ou pe dir a mon lavi se en konmansman pou al dan sa direksyon.

Vi ki napa lezot okenn entervenan, mon a donn the Right of Reply. Well ou summing-up ki ou kapab fer lo sa Mosyon.  Onorab Aglae.

 

HON EGBERT AGLAE

Mersi Mr Speaker.  Dabor mon ti a kontan remersi tou bann Manm ki’n entervenir lo sa Mosyon, dan en lespri pozitiv.  E Mr Speaker mon konstate bann kontribisyon ki’n ganny fer e mon santi poudir nou bezwen konmans somewhere, somehow pou nou kapab achieve serten sa bann keksoz.

E an mezir ki nou pe devlope Mr Speaker mon krwar konman en Lasanble responsab nou, priyorite se rann lavi nou pep pli fasil dan en sans fer ki the ease of doing bokou keksoz la nou pe koz lo bill i vin pli fasil.  E osi anmezir ki lavansman teknolozi i bouze e nou konman en pei nou osi nou bezwen bouz dan sa menm direksyon.  Me selman mon konstate osi ou bezwen annan en backup plan, akoz failure teknolozi i en realite, e nou bezwen mazinen osi pou dir nou kapab kont lo en lot kalite servis si an ka i annan en tel dezas teknolozi ki arive.

E osi Mr Speaker ozordi avek parey mon’n dir letan gate, letan gate i larzan perdi parey nou dir dan term finans.  E konsesyon i rann lavi dimoun fristre debout longman dan en laliny sirtou avek presyon lavi i fer ou osi vin pli fristre.  E osi parey i annan ki’n fer resorti Onorab lot kote logmantasyon dan ou  bill i reel e nou bezwen fer li osi en devwar kolektiv konman en Parlman konman en endividi konman en sitwayen rod tou fason i pa zis responsabilite Gouvernman pou fer desann pri lavi, me osi responsabilite nou tou ki dan komers dan biznes dan prive pou nou osi kapab anmenn kontribisyon reel ki ler en dimoun ki’n travay  depi le 31 depi le premye ziska le 31 i kapab i bezwen pey son bill wi me selman i ava annan en bill ki abordab ki a kapab osi ed li annan bann lezot bann lezot fason fer avek son larzan ki swa dan en pti lenvestisman avek son fanmir pou li zouir e pou li be happy parey nou dir.

E Mr Speaker, lespri osi deryer sa pou sa centre i pa pou zis al pey bill osi.  Me selman i ava en pwen osi ransennyman kot ou kapab ale.  Rod plis lenformasyon menm si ou kapab ganny bokou lenformasyon ozordi elektronikman ki mon konstate i elektronikman.  Me selman si nou konnen tou kou pou annan serten endividi ki kontan fer son keksoz dan en fason en pe manual anmezir.  Petet avek levolisyon popilasyon avek bokou bann dimoun  ki pou doue, pli doue dan domenn teknolozi avek letan byensir sa pou sanze anmezir zenerasyon i sanze.

Me lefe i reste ki nou pou bezwen annan bann pwen dan bann landrwa kot ou kapab ale dir e la mon kapab fer sa tel servis.

E Mr Speaker son lenpak i pou pozitiv, i pou pozitiv akoz i pou rann nou lavi en pti pe pli agreab, en pti pe  pli konfor.  E mon remersi tou Manm e mon konstate poudir pou nou konmans dan en fason i enportan.  E Gouvernman i sa lakle ki pou kapab konmans sa servis.

Mon donn en legzanp Mr Speaker.  Tou le lannen nou diskit Bidze diskit Bidze bann entity i vini bann lorganizasyon, gouvernans departman nou bezwen konmans osi demann zot osi be ki ou plan pou anmenn ou servis pli pre avek lakominote ;- eski ou annan en  plan?

E nou met bann sizesyon devan zot.  En lot model ankor ki nou kapab i annan bann forum ki nou fer, i annan bann forum ekonomik ki ganny fer dan pei.  Nou kapab sezi sa loportinite pou koz ek sa bann partners bann ki dan prive bann servis, dir zot be vin ansanm annou vwar ki mannyer nou kapab fer.

E Mr Speaker ou’n koz lo en keksoz parey ou’n dir devlop en app.  I en keksoz dan en bon direksyon pou nou dir be ok zot tou zwenn ansanm parske ozordi mon pran legzanp parey dan
télécommunication, si nou ti annan plis service provider parey isi ozordi lema i ganny mete tou servis provider i kapab servi menm lema baze lo serten Lagreman ki DICT i fer avek zot.  Sansan sak lakonpannyen ti pou ale ti pou met en lema e nou ti pou annan zis lema partou.

So i bann kolaborasyon neseser, ki bezwen ganny fer avek sa bann service provider sa bann itilite pou zot asiz ansanm e vwar ki mannyer zot enpakte.

Akoz se konsonmater li menm zot ki’n rann zot, ki pey zot pou zot ganny profi pou agrandi zot biznes.  Alor fer en lozistik fer en lozistik anmenn servis pli  pre avek nou e rod fason e solisyon pli inovativ pou rann nou lavi pli abordab e osi pli konfortab.

Avek sa Mr Speaker mon demann laprouvasyon Lasanble Nasyonal pou sa Mosyon.  Mersi.

 

MR DEPUTY SPEAKER

Mersi Onorab Aglae.  Bon in ariv ler pou nou pran en vot lo Mosyon par Onorab Aglae ki lir comme swivan ;

Sa Lasanble pe demann Gouvernman an partenarya avek sekter prive pou etablir en fasilite Billing Center par rezyon avek bi :- desantraliz peyman bann bills, redwir nesesite desann Victoria pou fer sa kalite peyman; elimin letan perdi e son kou asosye avek tel demars.’

Tou Manm ki an faver? Eski i annan okenn Manm ki kont?  Madanm Deputy Clerk.

 

MADAM DEPUTY CLERK

Mersi Mr Speaker.  Mon’n rikord 22 Manm ki’n vot an faver e personn kont.  Mersi.

 

MR DEPUTY SPEAKER

22 Manm an faver personn kont.  Savedir sa Mosyon par Onorab Aglae i pase par Lasanble Nasyonal.

Bon lo nou Order Paper nou’n ariv a lafen nou travay pou ozordi. I reste zis pou mwan swet zot en bonn lasemenn e nou pou repran Lasanble anba Speakership Onorab Prea Mardi le 8 Oktob 9er bomaten.

 

(ADJOURNMENT)