::
Home » Verbatim » 2019 » Verbatim Wednesday 25th September, 2019

Verbatim Wednesday 25th September, 2019

NATIONAL ASSEMBLY OF SEYCHELLES

 Wednesday 25th September, 2019

The Assembly met at 9am

National Anthem

Moment of Reflection

Mr Speaker in the Chair

 

MR SPEAKER

Bonzour tou Manm Onorab.   E bonzour spesyal pou nou bann envite ki anler dan Galeri.  Sa i 14 etidyan avek zot bann fasilitater.  Bann etidyan ki sorti dan, ki pe train kot Military Recruit Center e ozordi ki’n deside pou vin vizit Lasanble.  Nou dir zot bonzour e welcome dan Lasanble Nasyonal.  Zot ava swiv sa sesyon bomaten avek nou.  E apre dan break mon envit bann Manm pou kapab vin pran en tas dite ansanm avek zot.  E pou nou kapab enterakte en pti pe ansanm.

Mon osi tou dir bonzour tou dimoun ki a lekout e ki pe swiv travay Lasanble Nasyonal.  Pou nou 2enm sitting pou sa semenn, parey mon ti’n anonse yer, ozordi nou pou resevwar Minis pou responsab pou Finans.

Ki pou reponn en kestyon Irzan.  E apre Minis pou pran 2 BillTourism Marketing Tax (Amendment) Bill 2019.  E Corporate Social Responsibility Tax (Amendment) Bill 2019.  E si letan i permet, apre midi nou ava kontinyen avek Mosyon ki nou ti’n komanse yer.  Mosyon ki ti ganny move par Onorab Regina Esparon.

Avek sa mon ava demann parliamentary reporter pou apel Minis avek son lekip.  Zis mon anvi remind bann Manm lo ABC, Assembly Business Committee ki nou pou meet ozordi 1er dan Speaker’s Conference Room. 

Bon mon ti a kontan dir bonzour e welcome Minister Maurice Loustau-Lalanne.  Minister responsible for Finance, Trade, Investment and Economic Planning.

Minister i ganny akonpannyen par son Secretary of State Mr Patrick Payet.  E special advisor Sitna Cesar.  Minister bonzour e welcome avek ou lekip.  Nou ava al toudswit lo Kestyon Irzan.

Minis nou pou pran sa kestyon premye, apre sa i ava swiv par sa 2 Bill ki ou pou prezante.  Mon a donn laparol Onorab Waven William.

 

HON WAVEN WILLIAM

Mersi Mr Speaker.  Bonzour Minis avek ou lekip.  Bonzour tou bann Manm piblik ki a lekout.  Spesyalman bann zabitan La Misère e bann dimoun ki’n ganny afekte avek sa polisyon.

Mr Speaker mon ti a kontan demann Minis pou Finans, prenon kont son komitman isi dan sa Lasanble 6mwan pase, lo peyman konpansasyon zabitan La Misère e lezot ki ti ganny afekte.  E prenon kont repons Prezidan dan dernyen Konferans Lapres; No. 1, eski Minis i kapab dir nou ki kalite kominikasyon ki’n annan par son lofis ek Biro Attorney Zeneral, e lofis Prezidan lo sa size?

Dezyenmman, eski Minis i kapab enform sa Lasanble, akoz ki okenn Bidze siplemanter pa ankor vin devan sa Lasanble pou konsider baze lo komitman isi dan sa Lasanble.

Trwazyenmman, eski Mini si kapab dir ek sa Lasanble, baze lo son komitman 2 mwan pou konmans peyman, e sa dele 6 mwan ki’n pase?

Finalman, Minis eski prosesis peyman pou konmanse avan lannen fini?  Ouswa nou pe esper lavey eleksyon prezidansyel pou fer li. Mersi.

 

(Interruption)

 

MR SPEAKER

Mersi Onorab William.  Minister laparol i pou ou.

 

MINISTER MAURICE LOUSTAU-LALANNE

Mersi Mr Speaker.  Mr Speaker, Onorab Leader Lopozisyon, Onorab Leader Zafer Gouvernman, tou Manm Onorab, tou dimoun a lekout bonzour.  Mr Speaker, parey ki Prezidan ti anonse dan son SONA,  ki i ti zwenn avek reprezantan pou distrik Grand Anse Mahe, Onorab Waven William,  akonpannyen par Onorab Mr Speaker, Nicholas Prea.  Onorab Bernard Georges, e ki ti osi senpatiz avek bann fanmir ki ti ganny afekte e ki Gouvernman pou fasilit sa prose, pou ki i annan en konklizyon dan sa zafer, alors Mr Speaker mon lofis in kontinyelman an diskisyon ek Biro Prokirer Zeneral lo sa size Peyman Konpansasyon Zabitan La Misère, ki konsern polisyon delo.

Biro Prokirer Zeneral ti anvoy detay lo sa size kot Prezidan le 26 Zilyet 2019.  Minister Finans ti pe regard kapasite Bidze pou pey sa propozisyon.  Mr Speaker Gouvernman pe vin avek en Bidze Siplemanter le 01 Oktob 2019.

Me mon oule dir sa Lasanble, ki okenn larzan pa’n ganny mete dan Bidze Siplemanter lo sa size.  Mr Speaker parey nou konnen, okenn propozisyon lo peyman i bezwen ganny ankadre dan Bidze.

E nou bezwen vwar koman nou kapab fer sa dan Bidze.  Depi ki nou ti ganny sa detay, nou pe sey trouv en solisyon.  Mr Speaker son total, dapre propozisyon ki sorti kot Biro Prokirer Zeneral e ki’n ganny diskite ek Onorab Speaker Nicholas Prea, Onorab Waven William li menm e Onorab Bernard Georges, i pou en sonm R205milyon.

Mr Speaker sa detay i comme swivan; pou bann zabitan ki ti deza ganny peye konpansasyon, sa ti annan 393 fwaye, oubyen household.  Ladan 1279 adilt ki enkli zanfan par lao 7an, pou en lavaler R50mil par adilt.  E sa i fer total R63.95milyon.

175 zanfan par anba 7an pou en lavaler R15mil par zanfan e sa i fer en total R2.625milyon.

49 zanfan ek staff lekol La Misère pou en lavaler R25mil par adilt, ou zanfan e sa i fer en total R1.225milyon.

99 zanfan e staff lekol Lotelyer La Misère pou en lavaler R25mil par adilt ou zanfan,  e sa i fer en total R2.475milyon.

100 adilt ki enkli zanfan par lao 7an pou en lavaler R50mil par adilt ki reste Pti Barbarons,  e sa i fer en total R5milyon.

E 9 zanfan par anba 7an pou en lavaler R15mil par zanfan, ki reste Pti Barbarons,  e sa i fer en total R135mil.

Mr Speaker pou sa group swivan, nou pou pey 50 poursan konpansasyon an Zanvye 2020, pou en total R37.505milyon.

E sa balans i pou en total 37.705milyon, an Zanvye 2021.  Mr Speaker i annan en 2enm nouvo group ki’n vin rod konpansasyon pou en lavaler R121.845milyon, comme swivan;

99 lakaz ki enkli 187 endividyel ki reste La Misère, pou en sonm total R33.08milyon.  179 lakaz Pti Barbarons ki enkli 786 endividyel, pou en total R77.74milyon.  12 zanfan ek staff lekol La Misère pou en total R300mil.

164 zanfan ek staff lekol Otelyer La Misère pou en total R4.1milyon.  E i osi annan en total 265 travayer ki pe rod konpansasyon pou en total R6.625milyon.  Mr Speaker pou sa 2enm group, nou bezwen diskit ankor ek Prokirer Zeneral e finaliz sa sonm total.

Me dapre nou forecast bidzeter peyman pou sa 2enm group, pou selman kapab fer e peye an 2021.  Mersi Mr Speaker.  Pardon 2022. Mersi Mr Speaker.

 

MR SPEAKER

Mersi Minis. Onorab William.

 

HON WAVEN WILLIAM

Mersi Mr Speaker.  Mr Speaker si mon konpran byen ki Minis, larepons in donnen.

Minis, kestyon, kestyon ti ganny demande an Avril.  E ou pe dir avek Lasanble ki swa ou Minister, swa kominikasyon ti ganny fer le 26 juillet lo travay ki’n ganny fer.  Letan mon regard dan bann larepons ki ou’n donnen, baze lo kestyon ki ti ganny demande an Avril, mon’n vwar Minis ki i annan plizyer bann komitman ki’n ganny donnen.

Par egzanp en Onorab lo sa kote latab isi ti demande, ki akoz sa travay pa kapab ganny fer dan 2 mwan?  Lefe ki laplipar bann lenformasyon konsernan bann zabitan La Misère, bann rezidan, tou bann lenformasyon i la.

Minis ou a dakor avek mwan ki si lenformasyon i la, e baze lo komitman ki ou’n donnen.  Ozordi prosesis peyman bann dimoun La Misère an premye lye ti devret konmanse.  Akoz Minis dan ou larepons ou’n donn nou apepre en 7 a 9 reasiran poudir sa travay pou ganny fer!

E mon anvi demann ou kwa egzakteman ki’n arive pou sa retar?  E dezyenmman Minis.  Ou kapab dir nou zis bann zabitan La Misère, bann ki’n ganny direkteman afekte avek polisyon,   konbyen larzan ki nou pe koze?

San kont bann lezot?  Baze lo komitman ki ti ganny fer an Avril?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pou ou kestyon.  Onorab wi mon rapel tre byen, mon ti la, au mois de mai.

E nou ti realize ki sa ti pe trennen.  E nou ti demann nou tou ansanm Prokirer Zeneral pou akseler sa legzersis.  E parey mon’n konfirmen, in pran en pe plis letan.  E se le 29 Zilyet ki’n soumet son rapor final.

E parey mon’n eksplike dan mon larepons, stratezi se pey sa premye group ki’n deza ganny peye konpansasyon R250mil par household.  Nou konnen lekel sa bann household, nou konnen konbyen dimoun i annan.

E se pour kwa mon’n donn ou sa detay konbyen adilt zanfan.  E sa i pou en sonm R75milyon lo sa kriter ki’n ganny etablir avek zot menm.  Pou pey R50mil, R25mil, 2 fwa dan sa 2 diferan lekol e an plis R15mil pou bann zanfan anba 7an.

E sa kalkil se R75milyon.  Parey ou rapel, mon ti dir, e nou ti annan en diskisyon isi,  nou ti’n met dan contingency pou Bidze 2019, R10milyon.  Akoz nou ti napa en sif.  Nou ti’n met en estimasyon.  Me sa R10milyon malerezman li in fini ganny depanse anba contingency. 

So mon napa en Bidze an 2019 pou mwan nobou pey konpansasyon an 2019.  E an 2020, se la kot nou pe propoze.  Akoz se prezan ki nou’n ganny sa sif final, R75milyon.  Nou kapab zis fer antre dan Bidze 2020, 35milyon.  So, 37milyon.

So lide se pey pou sa bann zabitan dan premye group, lanmwatye sa konpansasyon ki zot, zot in propoze, ki mon’n eksplike.  Tou dimoun pou ganny lanmwatye an 2020.  Apartir Zanvye 2020, apre ki Bidze in ganny aprouve, zot tou zot ava ganny lanmwatye e zot a ganny lot lanmwatye an 2021.  Se sa propozisyon pou le moman.  Mersi Mr Speaker.

 

MR SPEAKER

Mersi Minis.  Onorab William.

 

HON WAVEN WILLIAM

Minis mon’n tann ou nonm R10milyon.  Me nou ti’n ganny dir ki ti annan R15milyon ki ti, ganny mete dan Bidze pou pey bann zabitan La Misère.

Konmsi baz lo verbatim e baze lo larepons ki nou ti gannyen dan Lasanble, se ki ti annan R15milyon.  So eski sa, dan sa R15milyon, la pe dir tou larzan in fini la?  E napa nanryen ki reste pou kapab konmans sa prosesis?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi, mersi Mr Speaker.  Mersi Onorab.  Wi ou annan rezon i ti R15milyon pa R10milyon, eskiz mwan.  E parey mon’n fer resorti.  Bidze contingency pou 2019 ti en Bidze total R50milyon.

E apartir yer nou’n deza depans R47, 086milyon.  Donk i reste nou en pti balans.  R2.9milyon dan contingency.  Se pou kwa mon’n dir ou ki sa larzan nou’n bezwen servi li pou lezot peyman konpansasyon.  Parey ou konnen, nou’n annan osi konpansasyon Fungus, ki nou’n konmans peye depi 2018/ 2019.

I annan lezot konpansasyon Fungus ki’n vini, ki nou’n bezwen peye osi.  E i annan lezot konpansasyon ki nou fer pou later e pou lezot keksoz.  E nou kapab donn detay tou sa bann konpansasyon, ki nou’n peye pou zot vwar pou zot menm, kote nou sityasyon bidzeter i ete ozordi.

Me parey mon pe rezimen, i reste nou zis R2.9milyon anba contingency pou 2019.  Mersi Mr Speaker.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker.   Bonzour Mr Speaker.  Bonzour Minis ek ou delegasyon.

Bonzour tou koleg, tou dimoun ki pe ekoute.  Minis mon ti a kontan ou eklersi ek sa Lasanble.  Vi sa sityasyon in ganny kree par en kontrakter prive, pe fer travay lo en propriyete prive, akoz ki sa larzan i bezwen sorti dan Bidze pei pou pey sa bann konpansasyon?

Sa i enn.  Apre 2enm.  Eski sa bann lalis pou kapab konfirmen ek sa Lasanble ki i kredib?  Tou sa bann dimoun lo la, ti la depi negosyasyon ti komanse, orizinalman ler sa problenm ti konmanse.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab wi mon kapab konfirmen ki sa problenm polisyon in ganny kree enn sertennman par lafot kontrakter sa, sa konpannyen ki’n antreprann sa travay.  E la nou pe koz pli spesifikman polisyon dyezel.

E polisyon delo, mon krwar ki Gouvernman i osi responsab pou sa.  E premye demars ki’n ganny fer, se ki nou’n apros sa konpannyen prive e nou’n demann li 2 domaz pou konpansasyon.

E parey mon ti dir dan sa Lasanble, in fer en peyman R99milyon pou peyman konpansasyon.  E sa in ganny fer, Kontra in ganny sinyen ant sa lakonpannyen, ant Gouvernman menm, par Biro Attorney zeneral.  E bann zabitan ki’n ganny afekte lo sa lalis.

Parey, prezan ou demann mon si sa lalis i kredib ou non.  Mwan sa ki mon kapab dir ou, Lasanble ti demann mwan sa lalis ki mon’n anvoy an Me 2019, mon’n anvoy sa lalis.  So tou dimoun lo sa lalis i lo sa lalis.  Si ou demann mwan si i kredib ou non,  si in ganny peye?

E zot in aksepte peyman, sof en dimoun ki mon konpran pa ankor pran son konpansasyon,  tou lezot in pran zot konpansasyon.  Alor nou bezwen baz nou lo sa lalis, lo sa premye lalis ki nou pe koz lo la.

E sa 2enm peyman konpansasyon ki prezan in ganny negosye atraver sa 3 Onorab avek Prezidan Larepiblik.  Nou pe propoze pey sa konpansasyon, sa premye group ki lo sa lalis.  So nou pa pe al sanz non dimoun lo sa lalis nou.  So koumsa ki mon kapab reponn ou 2enm kestyon.

Me mon bezwen kekfwa profit la ki mon annan sa mikrofonn, pou mon profite pou mon dir ou lo 2enm,  akoz sa ki’n arive apre miting La Misère, in demann bann zabitan ki’n ganny afekte, vini vin gete si zot lo lalis.

Si zot pa lo lalis, me zot in ganny afekte, fer en aplikasyon.  E se sa ki mon’n apel 2enm group.  Alors sa 2enm group Prokirer Zeneral li i pa ankor fer en evalyasyon, pou konnen vreman si tou aplikan i merit ganny en konpansasyon oubyen non.

Sennla ki mon dir ou i ariv apepre R120milyon.  Donk sa en louvraz ki pou bezwen ganny fer pou nou annan en lalis prezan, kredib pou nou pey sa 2enm eleman sa konpansasyon.  Mersi Mr Speaker.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker.  Minis sa sonm ki ou dir nou ou, pou bezwen ganny peye R200 ekek milyon.  I en kantite larzan.  Eski ou Minister ti kapab etablir – akoz ou’n dir sa Lasanble poudir i annan 2 ka.  I annan 1 ka pou kontrakter prive apre 1 ka delo.

Eski zot ti kapab etablir konbyen sonm ki sa kontrakter i devret peye?  E konbyen sonm ki sa bout ki ou dir i annan keksoz pou fer ek delo ki Gouvernman i sipoze peye, si nou ti kapab etablir sa 2 sonm, pou nou kapab vwar lekel ki liable pou pli gro sonm?

Akoz la nou’n ganny dir R200 ekek milyon ki pou al dan nou Bidze.  So si ti annan posibilite pou nou kapab vwar sa diferans.  Konmsi nou ti a kler ki sa ki nou, nou pe pran responsabilite i aktyelman nou ki devret pran responsabilite.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab parey mon’n fer resorti, dan premye negosyasyon ki’n annan, tou lede ka polisyon in ganny enkli dan sa peyman konpansasyon R250mil par fwaye.  Tou lede in ganny rantre ladan.

E si ou oule sa parti prive, li in kontribye pli gro sonm.  R99milyon dan sa, dan peyman sa konpansasyon.  Alor kestyon, si mon, mon pe sey konpran sa ki ou pe sey dir mon, se ki, eski nou merit retourn kot sa endividi ou sa konpannyen e demann zot fer ankor en lot kontribisyon?

Si se sa ou kestyon, mon kapab seye.  Me mon pou bezwen annan ban largiman enportan, pou mwan nobou apros sa sityasyon koumsa.  Akoz bann Kontra ki’n ganny sinyen, i la mon’n anmennen.  E i annan 4 volim.

E parey nou tou nou konnen, i dir ki it’s the full and the final settlement, letan zot in pran.  Konmsi prezan sa dimoun, sa kontrakter li i nepli annan okenn liability pou li pey an plis lo sa ka.  Me selman i en keksoz ki nou kapab eseye si nou vwar li absoliman neseser.  Mersi.

 

MR SPEAKER

Mersi Minis.  Onorab Gill.

 

HON CHURCHILL GILL

Mersi Mr Speaker.  Dernyen klarifikasyon.   Si ou’n dir nou poudir ou’n annan en 2enm lalis, ki bann dimoun in vin apre, sa konpannyen prive pa pe fer kontribisyon pou sa enn.  Se sa mon kestyon.  I paret nou, nou pe pran tou sa ki li in donn nou R99milyon.  E ou’n deza pey en kantite.  E la ou pe al pey R200 ekek milyon.  Savedir i montre poudir mazorite responsabilite pe tonm lo nou.

Se sa rezondet deryer, se akoz nou pa al refer konversasyon ek sa bann dimoun, vi ki i annan nouvo dimoun ki’n antre e i pe kout nou bokou plis.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Wi mon’n konpran sa byen.  Mersi.

 

MR SPEAKER

Mersi Minis.  Onorab Jean-Francois Ferrari.

 

HON JEAN-FRANCOIS FERRARI

Mersi Mr Speaker e bonzour Minis.  Minis mon annan 2 pti kestyon.  Baze lo sa prensip ki enternasyonal, ki rekomande par Nasyon Ini,  ki dan bann a polisyon, se sa dimoun ki polye ki peye.  The polluter pays. 

Mon ti kontan ki ou kapab reasir Lasanble ki zot in fer tou zefor pou, pou ki sa devloper e son kontrakter i rekonnet gravite sityasyon.  E ki zot pare pou zot rekonsider zot pozisyon.  Sa i en pe menm kestyon ki Onorab Gill in demande.

Me selman mon krwar i enportan konmsi ki piblik i konnen poudir, oubyen li i satisfe ki Gouvernman in fer tou sa ki i kapab fer, pou li kapab ganny en pe sa larzan.  Akoz piblik pa tro kontan ki se taxpayers money, ki pou al dan sa direksyon.

Alors reasir nou en pe dan sa direksyon.  Mon 2enm kestyon, se, i annan pou fer avek pwen 4 (1)(4).  Ki mon en pti pe enkyet Minis.  Akoz sa i sorti kot Onorab William.  E kekfwa li i konnen en pe bann prensip ki sa Gouvernman in aplike dan lepase.

Ki bokou bann peyman, oubyen bann kado i ganny dist6ribye avan en eleksyon.   So mon ti a kontan si ou kapab dir nou, ou konman Minis Finans, si ou satisfe ki bann, sa Schedule ki ou’n donn nou napa nanryen pou fer avek eleksyon, eleksyon ki pe vini.

Me ki i en, i en Schedule ki normal, ki baze lo good financial practices.  Vwala Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pou ou 2 kestyon.  Lo premye kestyon, mon santi ki i pou neseser pou nou reouver en diskisyon avek sa devloper avek zot bann avoka sirtou.

Akoz premye negosyasyon, ou konnen dan sa bann sityasyon, ou ale, ou negosye, ou negosye avek comme zot dir an Angle, with the ‘’top’’.  En fwa ki ou’n ganny en l’accord de  príncipe, apre i dir ou i pas sa ek son avoka.  Ale al fer bann detay.  E bann detay se la li la.

So i normal, kekfwa nou kapab re inisye en diskisyon at the top.  E regarde kwa ki nou kapab abouti avek.  So mwan mon pare pou antreprann si i neseser, sa demars pou mwan regarde ki rezilta nou kapab gannyen.  Akoz parey ou’n dir korekteman, lokalman i annan Seselwa ki, ki ok, akoz i pe ganny en pe konpansasyon.   Me i annan en bon pe lezot Seselwa ki pa ok.  Akoz se zot menm zot ki pe peye.   So sa i en, i en pwen ki sansib.  Lo ou 2en pwen, mon krwar tournir sa fraz ki Onorab William in servi, mon pa’n oule reponn li direkteman.

Akoz mon krwar i en pti pe a mon avi i en pti pe i pa domaz, me i pa neseser.   Akoz mwan mon Minis Finans mwan.  Donk mon larepons pou ou se non.  I napa nanryen pou fer ek eleksyon.  I pirman en kestyon alokasyon bidzeter.

Letan nou’n ganny sa sif, nou’n vwar nou pa kapab fer antre R202milyon en sel kou.  Nou pa kapab fer antre 75milyon en sel kou.

Se pou kwa ki nou’n kas li an de.  Se sa ki nou kapab fer antre dan Bidze pou nou respekte nou 2,5 poursan primary balance.  Sanmenm tou.  Mersi Mr Speaker.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Dernyen pti kestyon avek ou permisyon Mr Speaker.  Kekfwa i en pe en sizesyon pou Minis.  Kekfwa i ti a kontan pran sa.  Minis ou pa ti dan Gouvernman sa lepok.  Well ou pa ti dan en pozisyon Minis.  Me selman i en lenformasyon piblik ki Departman Planning ti’n refiz-e donn permisyon pou sa devlopman laba anler.

Me ansyen Prezidan James Michel ti entervenir personnelman, pou dir donnen.  So mwan mon sizesyon mwan se ki, vi ki ansyen Prezidan Michel i, mannyer nou konpran i Abu Dhabi, konmela.  Mon pa asire, me selman mannyer nou konpran.

E ki sa kontrakter i baze Abu Dhabi.  E sa devloper i baze Abu Dhabi.  Kekfwa nou ti kapab a sa moman angaz en pe bann lenerzi, bann kontak ki ansyen Prezidan Michel i annan.  Pou li osi ede dan sa demars!

Akoz finalman, i osi i responsab.  So mon pe zis fer sa sizesyon ki ler bann negosyasyon i pran plas, nou annan en dimoun ki’n enplike dan sa zafer ki Abu Dhabi.  Ki kekfwa nou kapab ganny zot servis.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Zis pou azoute Mr Speaker mon konpran ki parey Prezidan Faure in fer son deklarasyon li osi, i senpatiz avek tou bann fanmir ki’n ganny afekte.  E in dir ki li son Gouvernman pou fasilit trouv en solisyon sa problenm.

 So mon krwar annou trouv sa solisyon.  Solisyon ki nou’n trouve pou le moman i de fwa R37milyon lo 2an.  Kekfwa i en solisyon ki nou kapab amelyore, konmans fer enn de lezot demars mannyer mon santi diskisyon pe ale pou le moman.  Mersi Mr Speaker.

 

MR SPEAKER

Mersi Minis.  Onorab Charles de Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker.  Bonzour Minis ek ou delegasyon.  Bonzour tou Manm e tou dimoun ki a lekout.  E osi nou bann envite dan Lasanble ozordi.  Mr Speaker mon’n apresye larepons detaye ki Minis in donnen lo sa kestyon.

E nou oule ki tou bann dimoun i ganny peye zot konpansasyon e vitman.  Minis in eksplike ki premye group in deza ganny en peyman, La Misère laba, me ou pa’n dir nou konbyen sa total.

Si nou ti kapab dir nou sa total konbyen in arive, sa premye peyman ki tou sa dimoun in gannyen.  Prezan sa 2enm peyman, pou sanmenm sa premye group, ou dir nou i ariv 205milyon.  Ok, 2enm peyman pou sa premye group i ariv 205milyon.  E ou dir nou i annan en 2enm group,  e ki pou ganny peye apartir Zanvye 2021.  Mon ti a kontan ou dir nou, dapre zot bann sif kalkilasyon, kantmenm zot ankor pe negosye,  me baze lo sa lenformasyon ki zot annan devan zot.

Konbyen an total i pou arive sa?  E eski i annan lezot, ou pe ekoute Minis?  Eski i annan lezot konpansasyon ki Gouvernman in promet pou met dan Bidze siplemanter oubyen dan Bidze 2020 apard sa konpansasyon La Misère?

Par egzanp konpansasyon Tarmak bann zans ki’n claim kot Tarmak la, Petit Paris Cascade e si i pou tonm ladan?  Eski i annan lezot konpansasyon?  Ki sa bann konpansasyon?  Zot pa kapab dir nou dan detay sa bann konpansasyon?

E zot sif si ou annan la, zot sif konbyen i pou arive.  E lekel ki pli vye parmi sa bann konpansasyon.  Par egzanp i annan Tarmak, ou annan laba Praslin – bann zafer la – e tou-

 

MR SPEAKER

Onorab, si mon bezwen re diriz ou.  Kestyon i spesifik.  Annou pa anmenn lezot.  Akoz nou pou vwar Praslin pou antre ladan, taler nou pou vwar lezot.  Ok?

 

HON CHARLES DE COMMARMOND

Ou pou vwar Mr Speaker kot mon pe vini en pti moman, pe fini la.  So lekel ki pli vye parmi sa bann konpansasyon.  E ki mannyer Gouvernman pou etablir priyorite pou pey tou sa bann konpansasyon?

Eski Gouvernman alor pou annan kapasite pou pey tou sa bann konpansasyon.  Sirtou sa konpansasyon La Misère, lo sa Schedule ki ou’n dir?   An tenir kont tou sa ki annan.  Pa pou al faid Gouvernman sa?   Mon kestyon.  Mersi.

 

MR SPEAKER

Bear in mind i annan truth and reconciliation tou.  So annou pa al sa zistans.  Mon ava donn laparol.

 

HON CHARLES DE COMMARMOND

Wi me son larzan Gouvernman menm ki pou peye, sa mon pwen.

 

MR SPEAKER

Wi.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Mr Speaker pou klarifye, konpansasyon ki’n ganny peye, ki’n deza ganny peye apre sa Lakor ki la, son total i R113.9milyon.  E parey nou’n dir, i annan 393 household La Misère.  Enn pa’n pran, donk nou’n pey 392 pou R98milyon.

Apre i annan Pti Barbarons, La Misère, Tourism Academy eksetera.  Kot i ariv en sonm total R113.9milyon.  Sa, sa ki’n fini ganny peye.  Propozisyon pou group ki’n deza ganny peye la avek R50mil par endividi – R15mil pou zanfan and so on parey mon’n eksplike, sa i pou ganny peye en total R75.41milyon.  Sa lot group ki zot, zot in rantre lo lalis mwan Me, Zen and so on, apre bann detay in ganny fer an Zilyet e soumet lafen Zilyet, li i ariv en total R121.845milyon.  Me parey mon’n dir ou sa sif i kapab bese.

Akoz i kapab annan serten laplikasyon ki pa pou meet kriter.   Donk me sa i en travay ki pou bezwen ganny fer par en Komite pou zot fer sir ki zot pas lo sa lalis korekteman.  E zot annan bann kriter pou aksepte kriter pou rezete e sa nou napa detay.

Donk nou pa kapab fer nanryen dan Minister Finans avek sa sif ki mon fek donnen la.  Se pou kwa mwan mon’n konfirm ou sa sif R75milyon pou 2enm group.  Alor an sa ki konsern tou lezot konpansasyon ki dan pipeline, i ariv en sonm total apepre ankor R150milyon.

Donk i annan konpansasyon pou PUC lo Praslin.  I annan bann zabitan Petit Paris, zot apel sa Tarmak.  Solman mon pa oule nou konmans konfiz sa ek larzan Tarmak, i pa menm keksoz.

I annan Lasante ek Ledikasyon.  I annan Truth and Reconciliation ki’n komanse.  Mannyer nou konpran i kapab osi annan konpansasyon.  I annan Land Tribunal.  Letan nou analiz tousala e nou konmans met bann provizyon bidzeter pou sa, nou vwar nou, nou pe al dan bann sonm konman R150milyon ankor.

Alor mwan mon kapab sertifye ek sa Lasanble ki ozordi konman Minis Finans, mwan en pe enkyet avek lakantite konpansasyon ki pe vini.  Akoz i riske afekte nou Bidze konsiderableman si nou kontinyen dan sa laliny.  Mersi Mr Speaker.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Mersi Mr Speaker.  Zis La Misère alor son konpansasyon i plis ki tou sa bann lezot konpansasyon met ansanm mannyer ou pe dir nou la?  Eski alor i annan, baze lo bann presedans dan bann polisyon parey, ki bann avoka, ouswa sa ki gid zot legalman, ki nou vwar dan Lalwa egzakt, aktyel la.  Bann presedans lo bann polisyon parey, konbyen bann dimoun i ganny peye pou vwar konmsi si sa bann peyman ki pe gannyen la, i an konformite, oubyen si keksoz pa parey oubyen kwa.

E apre ou pa’n dir nou lo ki mannyer zot etablir priyorite pou bann peyman konpansasyon enkli La Misère.  Konmsi lekel ki ou pey avan?  Gouvernman pou pey en pe dan sak.  Akoz bann dimoun Petit Paris pe espere. Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab mon pa pou konnen la egzakteman kwa ki Lakour in donnen konman en zizman pou konpansasyon delo polye eksetera.  Mon pa pou annan sa sif avek mwan, mon kapab rode.

Me sa ki mon kapab konfirm avek ou, diskisyon ki’n annan ant Prokirer Zeneral avek sa 3 Manm Onorab lo nivo konpansasyon pou peye. Setadir sa 50mil, sa 15mil, sa 25mil i en sif ki’n ganny agree avek Prokirer Zeneral li menm.

So mon sipoze ki Prokirer Zeneral i annan konesans apepre bann konpansasyon finansyel ki Lakour kekfwa in kapab deside par lepase dan sa bann ka koumsa.  Mersi Mr Speaker.

 

MR SPEAKER

Mersi Minis.  Onorab Terence Mondon.

 

HON TERENCE MONDON

Mersi Mr Speaker.  Mr Speaker mon anvi demann Minis, par lefe ki i dir nou ki Prezidan ti fer son commitment ki i pou pey nou bann konpansasyon, akoz ziska prezan Minister Finans pa’n vwar li neseser pou apros sa kontrakter pou sa 2enm porsyon konpansasyon ki nou pe koz lo la ozordi la?   An vi ki in dir, i bezwen fer commitment.  Zot pa’n vwar li neseser.  Aprezan ki i pe dir nou.

Petet zot pou sey al apros sa bann kontrakter.  Sa ti’n devret ganny fer depi avan.  Akoz zot pa’n fer li?  E dezyenmman.  Eski Minis pa krwar ki sa kantite konpansasyon apart ki sa enn ki in koz lo la zisteman,  i rezilta move gouvernans nou pei?  Mersi Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pou ou kestyon.  Onorab mwan anvi zis kalifye letan Prezidan Larepiblik ti fer son SONA,  i ti dir i pou fasilit prose pou nou ariv a en konklizyon.  Mon krwar se sa commitment ki in fer.  E nou dan Minister Finans, letan nou ganny sa sonm total la, nou pe evalye kwa ki nou kapab fer, kwa ki nou kapab delivre lo sa, pou nou termin sa problenm.

Letan mon’n konsil sa bann dokiman ki la, ki’n ganny sinyen, i dir ou ki sa i full and final.  Alor mon bezwen bann bon largiman pou mwan nobou retourn laba, pou mon dir zot kantmenm i full and final ou pa kapab annan okenn konpansasyon ankor lo sa 2 ka polisyon La Misère par sa propriyeter ou sa devloper, ou sa kontrakter?

Mon bezwen annan largiman neseser pou mon ale avek.  E ziska ozordi, ziska la bomaten, mon pe rod sa bann largiman pou mwan aprose.  Mon’n gannyen en largiman.  E mon krwar ou bezwen annan en dimoun prezan ki annan li en serten skill pou nobou negosye, pou nobou fer konpran an deor sa Lagreman.

Ou pou bezwen met sa Lagreman laba.  E i pa fasil Onorab pou angaz, angaz en diskisyon parey.   Me mwan mon anvi seye.  Akoz mwan osi mon santi ki mon Bidze parey mon’n dir ou, mon pa pou les konpansasyon vin fer fait Gouvernman.

So i osi dan mon lentere.  E se akoz sa mon’n deside bomaten, kekfwa mon ava al mon menm si Prezidan Larepiblik i otorize pou mon al sey negosye avek bann skill ki kekfwa mon annan, oubyen mon napa, mon ava seye.  Mersi Mr Speaker.

 

MR SPEAKER

Mersi Minis.  Onorab Mondon.

 

HON TERENCE MONDON

Mersi Mr Speaker.  Zisteman Minis.  An vi ki Gouvernman ti konnen ki sa peyman konpansasyon pa ti ankor terminen.  Ti annan ka ki ti al Ankour.

E si ou kapab dir nou, kan eski zot ti konnen poudir pou annan ankor konpansasyon ki pou bezwen peye?  Si zot kapab donn nou ki dat zot ti konnen.

E akoz tou sa letan zot pa’n vwar li neseser pou call in sa kontrakter pou dir konpansasyon i ankor Ankour, pou annan en lot porsyon ki nou pou bezwen peye, ki nou pou bezwen re negosye.  Akoz zot pa’n fer sa tou sa letan.  Mersi Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab si mon konpran, tou zabitan ki’n ganny afekte, in aksepte, i annan 1 ki pa’n aksepte.  Rekour ozordi se al Ankour pou ganny en final.  Sa ka pa ankor ganny ekoute.  I ankor lo standby.

Akoz Zidisyer pe ekspekte, i pe esper Gouvernman regle sa problenm.  Pandan sa lepok ki case in ganny file, e in ganny met on hold.  In annan en lot diskisyon ki’n arive.  Mwan mon pe privy ki mannyer sa in konmanse.

Me sa ki mo konnen, in annan en diskisyon ant Prokirer Zeneral e 3 Manm Onorab avek Prezidan Larepiblik, kot sa kestyon in remonte.  E in annan miting ki’n ganny fer La Misère.  In annan prosedir ki’n met an plas.

E Prokirer Zeneral se son biro ki pe lead sa, sa nouvo travay pou regarde lekel an plis ki bezwen ganny pey konpansasyon.  Me i osi, zot in santi ki fodre pey en pe plis konpansasyon.  Sa in vin apre, be sa in fini sinyen sa.  Sa in vin apre.

Alor eski in annan move gouvernans?  Eski nou pa’n fer nou travay korekteman?  La, la lenformasyon.  La, la laverite ki mannyer – lenformasyon ki mwan mon annan.

Prezan si ou demann mwan fer  en zizman, mon ti a prefer ki Lakour i deside.  Lakour i a donn nou en referans.  Lakour i kapab dir ki sa 250mil par household.  Akoz i annan household ki annan zis en dimoun.  I annan household ti annan plis ki 1 dimoun.

So mon pa la, mon pa oule ouver sa deba.  Me sa osi, les Lakour deside.  Lakour ti ava’n donn nou en referans, e apre nou ti ava’n servi sa referans pou nou prezan regarde si nou’n overpay, nou’n under pay, nou bezwen pey an plis and so on pli tar.

Me i pa’n le ka ziska prezan.  Mwan mon pa konnen ki Zidisyer pou deside.  Si zot pe ekout mwan, mon pa pe donn zot okenn lendikasyon ki demen bomaten nou pou termin sa.

Mwan sel lendikasyon ki mon kapab donn ou, parey mon’n dir e mon pe repete, nou pou met R37milyon dan Bidze 2020, e Zanvye 2020 nou ava pey tou konpansasyon, (tou zabitan) pardon,  lo sa premye lalis lanmwatye zot konpansasyon.  Tou dimoun.  E apre lot lanmwatye zot a ganny li an 2021.  Se sel commitment ki mon kapab fer.  Mersi Mr Speaker.

 

MR SPEAKER

Mersi Minis.  Onorab Wavel Ramkalawan.

 

HON WAVEL RAMKALAWAN

Mersi bokou Mr Speaker.  Bonzour Mr Speaker, bonzour Minis, tou bann Manm Onorab e nou bann recruits dan sekirite nou pei. Mr Speaker zisteman mon premye kestyon i an relasyon avek deklarasyon ki Sef Ziz li menm li in fer, ki poudir i pou donn en zizman.

Eski Mini i kapab dir si i annan okenn lendikasyon, kan eski sa zizman pou ganny donnen?  Sa i mon premye kestyon.  Dezyenmman, Mr Speaker sa size in leve dan diferan fason par diferan Manm lo sa kestyon liability.

Petet Minis si ou ti ava kapab eksplik nou egzakteman kote ki Gouvernman li i vwar i liable?  Parski eklersi mwan.    Parski sa parey ti ganny dir, ti en proze prive sa! I pa ti en proze Gouvernman letan mon konpar li avek lezot keksoz.

Par egzanp letan ou’n nonm PUC Praslin.  Sa i antyerman Gouvernman.  Tarmak Cascade, i antyerman Gouvernman.  Me sa sete en proze prive.   E alors eksplik nou egzakteman liability ki Gouvernman i santi li i annan.

E Minis dan milye tou sa bann keksoz ki nou’n tande ziska aprezan, konsernen konbyen ti ganny transfer pou fer s premye peyman ensidswit.  I kontinyen annan serten dout.

E zanmen in deza annan prezantasyon en Lagreman ant sa lorganizasyon, sa kontrakter avek Gouvernman.  Zanmen nou’n vwar okenn dokiman transfer.  Pou dir la i la sa sonm ki’n ganny transfer.  Eski nou ti ava kapab vwar sa a en serten moman?

Parski, ok FPAC ti kapab antre ladan, be FPAC i pa kapab antre dan tou, dan tou keksoz.  Me eski Minis ti ava kapab fer nou vwar en dokiman pou konfirmen, ki poudir tan larzan ti ganny transfer.
E mon dernyen kestyon Mr Speaker, ou konnen, letan nou pe ekout tou sa bann sonm, e i vre sa ki ou pe dir, ki ou trakase.  Mon osi tou mon trakase.  Parski sa ki mon pe vwar set en sityasyon, parey Onorab Mondon sirtou in mansyonnen.

En sityasyon kot, kot in annan mismanagementMismanagement partou kote, letan problenm in konmanse.  Olye rantre pou, pou stop the hemorrhage.  I kontinyen, apre nou trouv nou avek bann gro, gro sonm!

E lo lot kote nou annan larzan, tou sa bann konpansasyon, si nou ganny sa $50milyon, lanmenm la ou ganny ou R750milyon, ki kapab ede pou-

Konmsi, Minis mon kestyon se ki, eski a ler aktyel, Gouvernman pe fer okenn keksoz pou li an menm tan regard otour li, pou anpese ki nou trouv nou dan sa bann sityasyon.

Parski la mon fek aprann ki poudir menm, menm zafer fungus i annan nouvo form ki pe ganny donnen, pou ki i annan nouvo laplikasyon.  E sa i pou tonm ankor dan Bidze.  Mersi bokou.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pou ou bann kestyon.

Onorab mon kontan pou aprann ki Zidisyer pou proceed avek sa case, kan i pou rann zizman?  Mon pa konnen, mon napa en dat.  Me i byen si efektivman zot pa esper nou, zot fer zot zafer zot menm.  E zot rann en ziman lo la, i ava ed nou enormeman.

So mersi pou sa.  Kote ki Gouvernman i liable?  Mon krwar ki i vre ki, i pa’n annan en deklarasyon ki dir wi, li i liable pou polisyon dyezel, mwan mon liable pou polisyon ekskreman.  Be mon santi ki efektivman Gouvernman i vwar li koupab dan en serten fason.

Akoz bann, bann kondisyon dan sa devlopman, parey nou mete dan devlopman bann gro devlopman. Pa’n ganny respekte.  E parey ou’n dir, kekfwa nou pa’n enforce li korekteman eksetera.

Me apre in cascade to that problem.  So mon sipoze se la kot Gouvernman i santi li koupab.  E Gouvernman i realize i bezwen fer en pa pou sa.  Alor mon kapab efektivman konfirm avek ou ki larzan ki sa devloper in peye, in ganny transfer dan en kont Nouvobanq.

E mon pou kapab fer ou ganny sa detay.  Akoz se from sa kont Nouvobanq ki apre bann peyman in ganny fer.  Bann peyman R250mil in ganny fer pou sak fwaye from sa bank account.  So ou pou vwar egzakteman konbyen larzan ki sa devloper in kontribye dan sa.

Me parey mon’n dir ou, i mazorite en.  I apepre R100milyon lekivalan ki’n kontribye dan sa, dan sa premye peyman konpansasyon.  Wi i annan plizyer ka fungus ki kontinyen vin devan nou.

Parey mon konpran i annan ka fungus pou bann travayer Arsiv Nasyonal.  I annan osi fungus ICCS.  I annan kot Lasante, i annan pou Ledikasyon.  So tousala i bann ka ki pou vin devan nou evantyelman.

E nou pou bezwen regard li de tre pre.  Parey mon’n dir ou, i enkyet mon si nou kontinyen koumsa.  So nou bezwen pran aksyon boner, fer sir ki sa bann keksoz pa ariv a en staz kot i konmans afekte lasante dimoun.

E apre nou pey le konsekans.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker mon krwar ki mon echo sa ki Seselwa pe dir.  Ki se pa taxpayers ki sipoze pey sa konpansasyon.

E mon krwar Minis i bezwen pran sa o serye.  Akoz ki, akoz ki taxpayers ki bezwen pey pou en keksoz ki zot, zot pa’n involved ladan?  E malgre ki nou, byensir senpatiz avek bann dimoun La Misère.

Parski menm bann dimoun La Misère, zot osi tou zot santi ki, parske finalman zot menm zot ki ava, tou bann dimoun La Misère ki’n ganny afekte.  Sa konpansasyon ki nou pe, zot osi tou zot pe, zot pe pey zot lekor.  Tandis ki zot pa devret pe peye.

Akoz zot, zot bann viktim.  Alor letan nou pe regard tousala, e mon kontan ki Minis, ou’n dir ki avek permisyon ou ava nobou al kot fodre pou al negosye.  Eski Minis, absoliman parey Mr Faure ti fer, kot i ti annan miting avek 3 Manm Onorab.

Eski Minis ou pare pou ou anmenn sa 3 Manm Onorab dan ou delegasyon pou zot kapab zot osi partisip direkteman dan sa negosyasyon?

E mon dernyen, mon dernyen kestyon, parski mon vreman trakase, mon pa konnen si Mr Speaker pandan break nou ava negosye pou, pou kekfwa demann ou en Urgent Question.

Akoz sa zafer larzan, i pe kontinyen vin en problenm.  Par egzanp eski ou konnen ki poudir Customs right now i lo strike lo Airport e Lasose?  Mersi bokou.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab les mon regarde dabor si mon kapab fer sa voyaz.  E si sa i le ka, e mwan mon pou rekomande ki mon fer sa voyaz.  Si sa i le ka, les mon a swazir mon delegasyon pou vin avek mwan.

Akoz bi se ganny en, ganny en rezilta pozitiv.  So annou, si ou pa mind, annou les sa propozisyon ouver, mon tenir li kont, mon’n note.  Mon pa okouran ki i annan strike lo Airport e lo Por la, a ler aktyel nou pe koze.

Me parey ou konnen, in annan diskisyon pou nou aziste Scheme of Service SRC.  E sa i en travay ki’n ganny fer.  E bann approval in ganny donnen.  Nou’n en pe an retar pou konfirmen.

Me mon kapab konfirmen ki orizinalman nou ti’n met avek laprouvasyon sa Lasanble R10milyon dan Revision Scheme of Service.  E nou’n ogmant li a R17milyon.

Akoz letan nou’n antre dan bann detay sa Scheme of Service, nou’n vwar ki i ti merit, i ti neseser pou nou aziste serten Scheme ankor.  E mon pa konnen si prezan mekontantman se akoz i pa ase menm.  Ou byen si i pou en lot rezon, mon pa konnen.

Be zis mon ti a kontan dir ki par ler nou osi nou tou ansanm nou bezwen sey manage lekspektasyon nou bann travayer.  Osi i enportan, me nou kapab fer sa inikman pou annan en dyalog ouver toultan kontinyen gard zot enformen kot nou ete, ki staz nou’n arive.

So vwala en pti pe bann komanter ki mon kapab fer, lo sa 2enm kestyon ki ou’n poze. Mersi Mr Speaker.

 

MR SPEAKER

Mersi Minis.  Onorab Bernard Georges.

 

HON BERNARD GEORGES

Mersi Mr Speaker.  Bonzour Minis, bonzour tou dimoun.  Mr Speaker mon’n ekout avek bokou latansyon, repons Minis ek kestyon bann Manm Lasanble bomaten.

E, mon devret dir ki antan ki sa dimoun ki bann zabitan La Misère in demande pou fer marse zot dosye devan Lakour,  mon trouv mon lekor dan en fason dan en landrwa troublan bomaten.  Akoz i pareyman si mon konpran byen, ki Gouvernman i anvi ki Lakour i fer en desizyon.

Alor ki, depi son diskour leta lanasyon an 2017, sete Gouvernman ki ti pou lead sa prosesis.  E personn pa pou’n bliye ki si Gouvernman ti’n azir lo son parol.  E konmans pey konpansasyon depi 2017, en pe 2018, 2019, 2020, nou ti pou a la fen sa prosesis.

Olye, o konmansman.  E sa ki pe arive la i pareyman, i parey en zwe, game en zwe snakes and ladders.  Ler ou krwar ou’n ariv nimero 98, ou realize ou ankor lo limero 3.  E mwan mon pa santi mwan avek tou respe ki mon annan pou Minis ek Gouvernman, dan en bon landrwa.

E mon konnen ki Onorab Waven William e ou menm ou Mr Speaker ou partaz, ou partaz mon lenkyetid.  Akoz mwan mon pe al Ankour an Oktob la, byento menm.  I annan 1 semenn ki Sef Ziz in set aside pou ekout sa case.

E ki pou arive ler nou dir avek plizyer santenn dimoun La Misère vin Ankour, enn par enn pou pas devan Ziz pou eksplike ki li in sibir.  E konbyen konpansasyon i pe ekspekte gannyen.  Nou pou tie-up Lakour pou plizyer mwan, pou nou ariv en landrwa kot nou ti krwar nou ti’n fini arive.

Whether se sa devloper ki devret pey konpansasyon, at the end of the day, mon krwar nou tou nou dakor ki se la kot nou devret pe al rod larzan.  Me sa pa reponn legzizans bann dimoun La Misère avek responsabilite Gouvernman.  E Gouvernman i bezwen dan en premye moman ekskiz mwan –  tenir son langazman vizavi son dimoun, epi al rod fason pou li ranbours son depans.  Mon krwar se sel fason.  Alor mon kestyon se, Minis le 11 Novanm 9er bomaten, Onorab Prea ek mwan, nou bezwen Ankour,  akoz li se premye pliyan dan sa zafer pou konmans donn levidans.

Si sa prosesis i konmanse,  quit, promes ki Prezidan in fer dan sa Lasanble.  Quit promes ki Minis siksesiv in fer devan sa Lasanble.

Quit promes ki in ganny fer isi an Me, ki konpansasyon pou peye avan Septanm.  Akoz nou ti pou al Ankour an Septanm.  E annefe nou’n al Ankour an Septanm. E nou’n bezwen dir avek Ziz, sorry nou pa’n kapab achieve nanryen, alor Ziz in dir, be dan sa ka mwan mon pou ekout sa case e mon pou fer li fini sa lannen.  Ki nou pou al dir avek dimoun La Misère?  Ki nou pou al dir, ki mwan mon pou al dir avek mon kliyan?  Ki Onorab Waven William pou al dir avek son bann constituent?

Ki i paret ki larzan napa pou sa lannen, pou 3enm lannen siksesif, napa larzan dan Bidze.  Akoz larzan in ganny servi pou en lot keksoz.  Ou ava ganny en pe larzan lannen prosenn, ou ava ganny en pe lot lannen.  Me sa se zis pou bann ki’n ganny pey R250mil.

Bann lezot, zot a bezwen espere a en letan ki nou pa konnen kan e konbyen?  Eski se sa, eski se sa repons ki mon pe gannyen ozordi,  avek tou respe ki mon annan?  Mon ti krwar ki, mon ti krwar, mon ti pe ekspekte ki ler Onorab William ti pou demann sa kestyon bomaten nou ti pou ganny sa premye bout repons.

La, la nou pe fer, larzan nou pe met dan Bidze.  Nou pe pey tan, fini bap.  Goodbye so long, next question.  Se sa ki mon ti pe ekspekte.  Me 1erdtan en kar pli tar, i pareyman ki nou napa en nide lo kwa ki pou ganny peye? Kan i pou ganny peye?  Kote i pou sorti? Lekel ki responsab?

Me sete la kot nou ti ete 10an pase Minis.  Ler en msye in mont dan bwa, in al vwar malpropte dan larivyer, nou pa’n bouz ditou avek respe.  Alor mon kestyon se.  Ki mon pou al dir Sef Ziz le 11 Novanm 9er bomaten?

Eski mon pou dir li tou keksoz in regle, no case?  Oubyen eski mon pou dir li nou’n perdi ou letan, Sef Ziz pandan 3an avek promes vid.  La prezan nou bezwen rekomans nou case.  Ki mon pou al dir li Minis?

Ant sa de opsyon, le 11 Novanm 9er bomaten?  Mersi Mr
Speaker.

 

MR SPEAKER

Mersi Onorab Georges.  Minis.

 

MINISTER MAURICE LOUSTAU-LALANNE

Mersi Mr Speaker.  Mr Speaker mwan mon’n eksprim ki mannyer mwan mon prefere ki sityasyon i ganny rezourd.  E ki atraver sa ka Ankour, i mon preferans.

Se sa ki mon’n dir.  Me prezan les mon a reponn kestyon oubyen klarifye mon larepons Onorab Georges.  Mwan mon kapab konfirm avek ou, avek Lasanble, nou’n met dan Bidze pou pey lanmwatye tou, lanmwatye konpansasyon tou bann zabitan dan premye batch Zanvye 2020.

Si sa Lasanble i aprouv sa Bidze.  E son balans lanmwatye an Zanvye 2021.  Biro Attorney Zeneral avek son bann travayer zot, zot bezwen rafin sa lalis, akoz zot pa ankor fer sa travay.

Pou konnen sa 2enm group, sa bann nouvo, ki fodre nou pey konpansasyon, i ava travay lo la rapidman, pou nou ganny sa lalis, pou mon konn son lenpak bidzeter.  Ki apre nou pou met dan Bidze.  E nou oule fer en provizyon parey mon’n dir, pou 2022 pey sa 2enm group travayer.

So pou mwan, i annan en finisyon.  Nou vwar 2020, 2021 e 2022.  Pou mwan sa zafer La Misère i pou sorti konman en move boubou lafen 2022 parey in ganny agree ant sa 3 Manm Onorab, Prokirer Zeneral e Prezidan Larepiblik.  Nou pa pe sanz serten keksoz.

En keksoz ki nou pa pe sanze sa R50mil pou adilt, nou pa pe touse sa.  Sa i annan en lagreman, sa R25mil nou pa pe touse.  Sa R15mil nou pa pe touse.  Nou pe fer nou bann kalkil, nou bann estimasyon baze lo sa bann keksoz.

Sa nou pa pe bouz ditou sa.  So commitment i la, nou’n fini pran, si i byen ou mal, mon pa pe antre ladan.  Me mon pe re konfirmen ki these are the amounts.  So mon sipoze, ou kapab dir sa sef Ziz, letan i ekout sa zafer le 11 Novanm.  Mersi Mr Speaker.

 

MR SPEAKER

Mersi Minis.  Onorab Georges.

 

HON BERNARD GEORGES

Mersi Mr Speaker.  Minis, mon annan ou parol ki le 11 Novanm mon kapab dir avek Sef Ziz ki i   pa bezwen ekout sa zafer, akoz Gouvernman in aksepte ki i responsab.  E in fer provizyon e i pou fer provizyon dan bann Bidze fitir pou pey konpansasyon lo en baz ki’n fini tonm dakor avek bann stakeholders.

Mon kapab dir sa?

 

MR SPEAKER
Mersi Onorab.  Minis.

 

MINISTER MAURICE LOUSTAU-LALANNE

Onorab.  Mr Speaker mersi.  Onorab wi ou kapab dir sa.  Akoz tou le fason mon pou devan zot le 31 Oktob, letan mon pou prezant Bidze.

E mon ava gard en paragraf kot mon ava repete sa ki mon’n dir.  So mon donn ou mon langazman, nou pou peye.  I zis en kestyon bidzeter.  E se sa en pe lapel ki mon pe fer.  Si nou kapab pey en pe plis, nou a pey en pe plis.

Sa osi i annan en posibilite.   O fir anmezir nou pe ale lo sa 3an.  Me sa bann minimonm ki mon’n donnen sa i cast in stone, e nou pou delivre lo la.  Mersi Mr Speaker.

 

MR SPEAKER

Mersi Minis.  Onorab Georges nou ava fer sir ou a ganny verbatim pare, avan ou pou al devan Sef Ziz an Novanm.  Onorab Flory Larue.

 

HON FLORY LARUE

Mersi Mr Speaker.  Bonzour Mr Speaker, Minis ek ou delegasyon.  Bonzour tou dimoun.  Minis sa lensidan ti ariv an 2010.  E depi tou sa bann letan Gouvernman ti pe promet ki pou annan en negosyasyon.  I annan en premye faz ki’n ganny fer.

Me selman parey ou pe dir ki lezot dimoun in ganny azoute avek sa lalis.  Mon ti a kontan demande, lefe ki nou pe pas dan lezot prosesis, prosesis kot dimoun pe reklanm konpansasyon avek Gouvernman direkteman,  kot ankor nou vwar dimoun ki ganny azoute lo sa lalis ki internally Minister Finans i reget fason ki konpansasyon i ganny donnen, ki i annan en kantite dimoun final avan nou prosede pou donn konpansasyon.

Kot nou vwar i pou kout nou bokou plis apre.  Lo sa sityasyon ki nou lo la right now.  Ou dir nou ki inisyalman ti annan R99milyon ki ti ganny donnen par sa, sa devloper prive.  Me la nou vwar ki ou’n nonm nou 2 sonm.  R205milyon ek R121milyon ki fer en total R326milyon pou konpansasyon.

Letan nou vwar sa kantite ki sa dimoun in fer li konman, in peye konman konpansasyon.  Sa i 3 fwa plis.  Eski ou kapab eksplik nou lo kote liability, ki mannyer Gouvernman in pran sitan bokou liability, kot i santi li koupab ki i pe pey sa gro sonm?

Akoz tousala parey Onorab Ramkalawan in dir, i pou sorti dan pos taxpayers, zot menm ban dimoun La Misère ki pou pey zot lekor.  Alor, akoz ki konpansasyon inisyal sorti kot private developer i bokou pli pti gin ki sa ki nou prezan Gouvernman nou pou re pey sa bann zabitan.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab si mon’n konpran ou premye kestyon,  lo sa vye lalis la, annou apel li vye lalis.  Nou annan son detay, nou’n sirkile.  I pa mon lentansyon.  Mon krwar pa i nou lentansyon tou le fason pou nou al tir dimoun lo sa lalis.

Akoz sa i en lalis ki’n agree, en lalis ki’n ganny fer, en lalis ki’n ganny sinyen.  Si i an byen, i an mal, sa se pa mwan pou zize, in ganny fer.  E peyman ki nou pou fer pou menm group parey mon’n eksplike, pou sa 75milyon 2 fwa.  Nou pou servi sa menm lalis.  Sel lalis ki Attorney Zeneral i bezwen pas lo la, fer sir ki sa dimoun i merit ganny sa nouvo konpansasyon akoz i pa ankor ganny ditou.  Sa se lalis ki bezwen etablir e pas lo la.  Akoz mannyer mon konpran, i kapab annan bann zabitan ki pa tonm dan sa rezyon kot in annan sa polisyon.

Zot tonm an deor.  E sa zot pa pou kapab ganny peye.  E zot pou ganny eksplike.   So sa i en travay ki Biro Attorney Zeneral i bezwen fer pou nou annan en lalis kredib, pli kredib.  Dan sa sonm, annefe sa sonm total nouvo peyman, lo sa bann kriter ki mon’n eksplik Mr Georges, Onorab Georges avek bann Onorab ki’n travay avek.

Nou pa pe sanz sa 50mil eksetera.  E sa letan nou kalkile, lo premye lalis i ariv 75milyon.  Lot peyman pou 2enm group i ariv 121.845milyon.  Dan sa 121milyon, nou’n met en contingency 7.7milyon lo son total ki 205milyon parey mon’n dir.

So son sonm total i 205milyon, sa nouvo legzersis ki nou pe fer.  E i annan en eleman contingency ki nou’n mete, akoz toultan ou bezwen met en contingency ladan.  E ou 3enm kestyon, ou kapab zis repete silvouple.  Akoz mon’n bliye la.

 

MR SPEAKER

Mersi Minis.  Onorab Larue.

 

HON FLORY LARUE

Mersi Minis.  Minis lefe ki ou’n reget bann sonm, menm sa sif ki ou’n donn mon la – ou’n donn mon 205milyon.  Letan nou pe rod sa sonm orizinal ki Gouvernman ti koz ek sa devloper ti deside ki sa ti total, zot ti pou donn konpansasyon dimoun, ti 99milyon.

La nou vwar letan dan pos Gouvernman, nou pou tir 200milyon.  Me lefe ki letan nou’n vwar sa ti en devlopman prive,  nou pou ankor pe demande kote ki liability Gouvernman i vin ladan.  Mon konnen sa later nou ti donn sa dimoun a en pri preferansyel.

I ti ganny tax free lo son konstriksyon akoz son status.  Nou konnen ki 2000 GOP ti sorti kot Minister Finans.  E dan tousala nou vwar ki napa okenn legzersis ki’n ganny fer pou fer sir ki zot in follow Lalwa.  E al nou vwar ki en polisyon in arive.

Alor ki mannyer Gouvernman pou pey 2 fwa plis?  Kote liability Gouvernman i ete?  Ki i pou pey 2 fwa plis ki li sa propriyeter ti peye orizinalman?  E Minis lefe ki ou’n eksplik mon ki mannyer zot in come to sa lalis, sa premye lalis, ki ou pe apel vye lalis.

Mon pa’n anvoy ou tir dimoun lo sa lalis mwan Mr Minis.  Me sa ki mon pe demande i ki Gouvernman ki donn delo dan La Misère.  Zot ki konnen kote tiyo PUC i desann.  Zot ki konnen kote sours delo i ete.

Mon krwar legzersis ti a kapab ganny fer dan en fason pli responsab.  Lefe ki zot ti kapab idantifye lekel bann lakaz presi ki ti pou ganny afekte?  E come up ek en lalis ki korek, ki fer ki en ta larzan pep Seselwa i ganny larzan taks i ganny servi pou pey konpansasyon dan en fason responsab e byen.

E apre zot ti a kapab demann sa devloper en serten sonm larzan ki pli korek.  E non pa en sif ki prezan nou vwar nou pep Seselwa nou bezwen al pey en konpansasyon.  Akoz sa kestyon liability i enportan.  Nou pa kapab zis Gouvernman, bann zofisye i pran desizyon e apre pep ki peye!  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi.  Mersi Mr Speaker.  Onorab mon toutafe dakor avek ou.  Sa ki ou fek dir la.  E se sanmenm sa ki nou pou fer lo sa 2enm lalis ki nou’n koz lo la.  Akoz nou bezwen, PUC i konnen, parey ou’n dir.  E nou bezwen konsilte PUC, i bezwen lo sa Komite pou deside si wi i dan zone, oubyen si i outside of the zone. 

Si i annan dimoun ki’n ganny azoute lo sa premye lalis ki nou’n deza peye, malapropo.  Sa mon pa pe antre ladan.  Me peyman total premye, parey mon’n dir avek Onorab De Commarmond, i 114milyon an tou – en?  Sa premye peyman ki nou ti fer, i R114milyon.

E li sa devloper i ti kontribye 99milyon.  Annou dir li100milyon ki’n antre dan en kont Nouvobanq, en, pou zot ganny bann sif korek.  Ok?  Be mon toutafe dakor avek ou, mon krwar se koumsa nou ti merit prosede.

Be nou ozordi parey mon’n dir zis pou rezimen, mon ava antreprann sa pelerinaz pou mwan al rod ankor en pe plis larzan an depi sa ki’n ganny fini ganny sinyen. Sa set en langazman ki mon’n pran pou mon esey minimiz dega lo nou Bidze.  Mersi.

 

MR SPEAKER

Mersi Minis.  Onorab Larue.

 

HON FLORY LARUE

Mersi Mr Speaker pou donn mon sa loportinite pou demann ankor en kestyon.  Minis ou’n dir ki lefe ki prezan ki PUC pe come in pou redonn zot en sertifikasyon lo sa lalis ekstra, eski zot pa vwar ki i devret annan en internal enquiry pou vwar ki mannyer nou’n kapab ariv dan sa leta ki nou ete ozordi?  Akoz bokou dimoun in malad La Misère.  I annan bokou dimoun ki’n ganny afekte.  E en kantite zot i krwar akoz sa polisyon ki’n arive.

Alor it is not fair nou zwe avek lavi dimoun.  E eski pou annan en internal enquiry lo kote Gouvernman, pou eksplike egzakteman ki mannyer ti annan 2000 dimoun lo sa propriyete ki pe fer konstriksyon, san ki Gouvernman ti konnen ti annan sa kantite dimoun la pe fer zot bezwen dan en larivyer?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab les mon ava konsilte avek mon koleg Minis Lasante, pou regarde si efektivman i annan ankor dimoun ki pe raporte avek sa bann problenm.  Mon krwar sa i ava en lendikasyon si i neseser pou nou fer en lanket pli detaye.

Mon konnen ki o depar Lasante ti mobilize pou fer sir, pou idantifye kwa sa karakter, tip sa bann viris, sa bann zistwar ki ti dan larivyer, ki ti’n polye eksetera.  So mon krwar i esansyel mon etablir sa premye avan nou deside si nou pou fer en commission of enquiry.  Mersi.

 

MR SPEAKER

Mersi Minis.  Onorab William.

 

HON WAVEN WILLIAM

Mersi Mr Speaker.  Mr Speaker mon annan detrwa pti kestyon pou terminen.  Minis ou a dakor avek mon ki sa bann lakaz an tol, sa bann lakaz an blok zot pa pou santi lefe sa delo polye.

E ou a dakor avek mwan poudir letan ou ti fer peyman par lakaz, i pa ti byen.  E ki se sa bann dimoun ki’n bwar sa delo ki ankor pe santi sa bann dega ki pase dan zot lekor.  Mr Speaker mon ti a kontan demann Minis osi ki i a dakor avek mwan poudir, depi o debi sa sityasyon in ganny mal administre!

Malgre nou pa pou tonm dakor lo la, me letan mon pe swivre prosesis, lafason keksoz in ganny fer, in annan mismanagement of the whole process.  E Minis, petet – mon trouv Onorab Georges, i pa la, mon konnen poudir i ti annan en demann par Lakour, pou ganny en let ofisyel avek Gouvernman, me pa verbatim konmkwa ki zot pe aksepte liability e pou fer sa peyman.  Parey mon dir, Minis ou dir, ou oule donn sa garanti la ozordi.

Minis be mwan mon krwar poudir i annan en let dan miting osi ki ti ganny fer dan miting, Onorab Georges ti demande poudir fodre en let sorti kot Gouvernman i ganny anvoye Ankour.  Ki mon konpran ziska aprezan sa let pa ankor arive.

E mon ti ava demann ou Minis, pou regard dan sa sityasyon pou fer sir ki sa let i ganny anvoye.  Minis mwan osi pa ganny en konpran tou sa letan ki Prezidan in fer sa deklarasyon, mon vwar poudir i annan en pti pe mank proaktivite lo lefe ki ozordi nou bezwen vwar nou pe al, tor sa larzan dan Kof Gouvernman.  Me tou sa letan Minis, akoz desizyon pa ti ganny pran pou rod bann lezot fason pou kapab al negosye, pou kapab ganny serten sonm larzan pou kapab boost up avek sa ki Gouvernman pou donnen.

Konmsi mon vwar poudir in annan en pti pe mank proaktivite lo la, baze lo larepons ki ou pe donn nou.  E Minis, mon’n regard verbatim, mon’n vwar bann commitment ki ou’n fer.  E mwan mon anvi ou reasir nou ankor Minis ozordi, ki sa ki ou pe dir nou, se ki wi bann zabitan ariv Zanvye ouswa Fevriye, sa peyman pou konmans fer e ki wi sa larzan pou dan Bidze.

Minis lot keksoz se ki mon pe demann mon lekor la, sa kestyon se ki  si par egzanp ti annan en Referendum, nou ti pou vwar larzan pou nou met dan Bidze pou donn sa proze zis pou fer sa Referendum.

 

(laughter)

 

HON WAVEL RAMKALAWAN

E Minis ti a bon ou eksplik nou, lo sa 15milyon la, ki fason sa larzan in ganny depanse?

Akoz parey mon pe ekout ou Minis, akoz mon ti a kontan ki ou dir nou, be sa larzan la in ganny depanse, sa 15milyon ki ti sipoze pey konpansasyon bann dimoun La Misère.  E in ganny servi, nou ti a kontan konnen.

E Minis pou terminen mon pe vwar ki ou’n dir poudir i annan R99milyon ki sa Lerwa ou ASCON in donnen,  e ou’n dir poudir dan en lot sif, ou pe dir, poudir in ganny peye avek zabitan La Misère se 113.9milyon.

Savedir Gouvernman li in pey li zis R14 a R15milyon dan sa sif.  En pti leklersisman Minis, akoz ou pa’n mansyonnen, ou pa’n donn detay lo la; bann fermye, bann dimoun ki ti annan biznes, eski dan sa sonm ki ou’n nonmen la, eski sa bann dimoun osi, sa bann fermye ki fer zot biznes; sa bann dimoun ki ti annan zot pti biznes, eski dan sa sonm ki ou’n nonmen Minis, zot ganny enkli ladan?   Finalman Minis, dimoun La Misère osi pe demande, be sa larzan dyezel la?

Akoz lotrefwa ou ti donn en larepons lo la dan kestyon mon ti demande,  si ou kapab update nou en pti pe osi, update nou lo sa zafer larzan dyezel ki Gouvernman ti commit son lekor osi pou ede pou fasilit sa prosesis, ki finalman nou anmenn en lafen avek sa problenm.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab lo kote mismanagement mon krwar nou’n diskit en pe lo la.  I kapab letan ou weigh sa hindsight ou regarde, ou vwar ki nou ti’n kapab reazir pli boner lo bokou keksoz.

E ozordi nou’n ariv nou dan sa sityasyon.  An sa ki konsern en let mon pa okouran, mon’n note.  E si fodre ki mon organize pou sa let ganny anvoye kot Lakour, nou ava fer li.  Akoz parey mon dir e mon repete – langazman ki Prezidan Larepiblik i annan avek sa 3 Manm Onorab ek Attorney Zeneral, nou pe respekte.  So lo sa bann sif ki mon’n donnen, si sa let i en let ki pou konfirm sa langazman, sa mon kapab fer li e fer anvoye mwan menm Lakour, sa pa en problenm.

Lo commitment 37.5, nou dir, annou zis fer sir nou ganny nou sif korek la.  37, 37.5.  R37,705milyon dan Bidze 2020 pou sa konpansasyon, pou ganny peye an Zanvye 2020.

Mon reconfirm mon komitman, e mon pe redir osi ki son 2enm amount pou ganny peye an Zanvye 2021, pou sa premye batch.  E la zot pou ganny, parey mon dir 50 poursan tou dimoun an Zanvye 2020.  E son lot balans 50 poursan tou dimoun an Zanvye 2021. Mon re konfirm sa.

Sa 15milyon parey mon’n dir, nou’n, ki ti’n ganny mete dan contingency 50milyon Bidze 2019, in evapore, akoz nou’n bezwen pey lezot commitment.   E on ava fer sir zot ganny sa detay Bidze ki ava montre zot ki nou balans ozordi i zis R2.9milyon.

E zot a vwar kot nou’n peye ladan.  E i enkli plizyer keksoz ki’n arive, ki pa’n ganny prevwar.  Osi zot ava vwar detay.  So dan latransparans nou ava sirkil sa avek zot, zot ava vwar.

Ou annan parfetman rezon, sa devloper li i ti kontribye 99milyon, R100milyon, an deviz dan en kont Nouvobanq.  E apre son balans in ganny kontribye par en donater prive.

Mon dir ou en donater prive, akoz sa donater i pa oule ki son non i ganny devwale.  So Gouvernman li i, tou lede sa bann peyman ki’n ganny fer, enn in ganny fer par devloper e lot par sa donater prive pou sa premye peyman, R113.9milyon.

Pou dyezel, wi mon krwar ki i annan en sonm ki’n ganny kalkile pou dyezel.  Me dan negosyasyon ki’n ganny sinyen isi, i enkli dyezel.  So si i an byen, si i an mal, mon pa konnen.

Me negosyasyon in ganny fer, dokiman in ganny sinyen.  I enkli konpansasyon dyezel ladan.  Donk in ganny settle avek sa R250mil par fwaye ki’n deza ganny peye.  Mersi Mr Speaker.

 

MR SPEAKER

Mersi Minis.  Onorab William.

 

HON WAVEN WILLIAM

Mersi Mr Speaker.  Mr Speaker lefe ki Minis pe dir ki larzan dyezel in osi ganny kalkile parmi.  Eski ou pe konfirmen Minis ki dan sa 205milyon, larzan dyezel osi i konpri ladan?  Ou kapab eklersi nou Minis.

Akoz letan ou pe dir ki kalkilasyon in ganny fer.  Eski ou annan sa sif avek ou?  Epi ou pa’n mansyonnen Minis, bann dimoun ki ti fermye, apard ki bwar sa delo dan zot lakaz, me ki zot biznes in ganny afekte.  Eski zot osi zot pe enkli dan sa kalkilasyon 205milyon.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mr Speaker dyezel liability devloper dan sa Kontra ki’n ganny sinyen, i enkli son liability dyezel.  Dan sa nouvo konpansasyon ki nou pe koz ladan, koz lo la ozordi, i pa enkli dyezel.  Sa ki enkli dan sa contingency 7.7milyon ki mon’n koz lo la,  dan sa 205milyon total, i enkli 2 keksoz.  Pou peye, konpansasyon sa fwaye ki pa’n pran son konpansasyon R250mil oubyen plis, depandan ki Lakour deside.  Nou’n met en provizyon.  E osi nou’n met en provizyon, pou pey domaz propriyete ek biznes bann fwaye osi.

So nou’n met en contingency pou pey claim, domaz propriyete eksetera dan sa 2enm batch.  Me i dan sa contingency R7.745milyon.  Mersi.

 

MR SPEAKER

Mersi Minis.  Onorab William.

 

HON WAVEN WILLIAM

Mr Speaker dernyen kestyon.  Minis, ler mon get travay ki’n ganny fer par Biro Attorney Zeneral, letan parey ou menm ou ti admet dan verbatim, poudir nou’n trenn tro bokou lipye lo sa, lo sa problenm la.

Eski ou kapab donn nou sa garanti poudir letan zot, ou pe donn nou garanti poudir sa 37.5milyon in ganny mete,  eski bann mekanizm pou fer sa lokasyon pou administre sa prosesis, pou fer bann dimoun La Misère ganny zot larzan, in fini ganny met an plas.

Akoz Minis, parey mon dir, se ki ler mon pe regarde, mon pa’n realize, in annan tro bokou trenn lipye, ou osi ou’n dakor lo la.  Tro bokou letan in ganny gaspiye.  E parey Onorab Georges pe dir, si depi an 2017, 2018, 2019 ti’n konmans fer serten peyman, petet ozordi nou pa ti pou vwar nou avek sa gro sif.

So mwan mon anvi ganny sa garanti avek ou, poudir ler larzan in ganny mete, nou pou annan en mekanizm ki pa pou al konplik keksoz ankor, ki finalman, nou pou vwar nou pe trennen ankor.

E se pou sa rezon mon’n met dan mon 4enm kestyon, poudir, akoz mon ti dir o konmansman mwan.  Annou pa pous sa peyman ziska lavey eleksyon.  Me se sa ki pe arive Minis!  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Nou pou pey sa 37.5milyon an Zanvye 2020.  Se lui ki pa pey sa an Zanvye 2020, i pou bezwen souk le konsekans.  Me parey ou konnen Bidze i a la probasyon Lasanble Nasyonal.

Donk le 31 Oktob, mon pou met Bidze devan zot, e fotespere lo sa laliny konpansasyon pou La Misère 37.5milyon nou ava ganny en Lakor pou nou nobou disburse an Zanvye 2020.  Mersi Mr Speaker.

 

MR SPEAKER

Mersi Minis.  Bon an vi ki mon non osi tou in ganny mansyonnen.  E mon’n form par sa Komite.  Mon anvi zis dir de pti mo pou eklersi, an menm tan edik nou bann dimoun deor.

Akoz nou pe kontinyelman ganny bann komanter ki ‘’nou pa realis.’’  I annan ki pe dir ‘’dimoun La Misère i voras’’ and so on.  Mon anvi zis fer konnen poudir depi ki nou 3 Onorab nou ti rankontre Prezidan e Prezidan ti vin fer son prononsyasyon isi dan sa Lasanble, tou keksoz, tou negosyasyon ki’n swiv and all that, in ganny fer an bonn fwa.  An bonn fwa spesyalman sorti kot nou 3 MNA.  Akoz sonm ki bann dimoun ti pe demande deor, tousala nou’n met lo latab.  E ler nou’n kalkile, pey parey Onorab in dir, ti pou bankrupt.

Nou’n come up avek en sonm ki realis.  En sonm peyman par latet, e mon dir ki i realis.  Akoz si ozordi ou ekout sa ki serten dimoun pe gannyen atraver kontaminasyon fungus,

mon annan lenformasyon ki i annan plizyer dimoun ki’n ganny afekte par fungus, in ganny par lao R200mil.

E nou konnen poudir sa kontaminasyon delo La Misère, i bokou pli worse ki fungus.  Mon konn i annan dimoun, parey bann zofisye medikal ti dir, i pou bezwen viv tou son lavi avek sa bann mikrob.  Ok?

E nou tou nou konnen ki kalite mikrob, akoz mon anvi partaz ankor avek bann piblik deor ki pe kontinyen fer bann komanter negativ, e menm parfwa mon kapab dir pe, pe gognard bann dimoun La Misère, bann viktim.

Si zot vwar portre ki nou ti anmenn devan Lakour e mon a fer zot konnen poudir prosesis Lakour in ale pou plizyer mwan.  Si zot vwar portre kwa ki ti dan nou water catchment.  Zot menm zot, zot ti pou dir be nou pa devret annan kontak avek dimoun La Misère – ok?

 So sa i gravite.  E sa sonm ki nou’n agree avek Biro Attorney Zeneral ki ozordi i ganny fer piblik, i en sonm –  wi byensir i pou enpakte, akoz lakantite dimoun, nou pe pey par latet.  Me parey Onorab William in dir, si dan premye plas, sa premye konpansasyon ti’n ganny fer byen e i pa ti’n ganny atase avek lakaz.

Kot nou’n vwar i annan lakaz ki annan en dimoun in ganny R250mil.  Me mon konn lakaz pa lwen avek mwan, ki annan 11 dimoun, ki’n ganny R250mil.  So si i ti’n ganny fer parey nou premye Komite La Misère ti pe demande, par latet, ozordi Gouvernman ti pou vwar li relieved en kantite.

So sa ki mon annan, sa ki mon anvi met devan bann dimoun ki pe ekoute e osi tou bann Manm. Byensir Gouvernman i pran son responsabilite an vi ki PUC i tonm anba li.  Planning i tonm anba li, Lanvironnman i tonm anba li.

E tou le 3 sa Departman ti manke dan zot responsabilite pou monitor sa proze e pou fer sir ki napa nanryen dan sa proze, ki enpakte lo nou lanvironnman dan nou delo.  E parey ankor, mon krwar i annan en Onorab ki’n dir, an menm tan, an menm tan ki nou ti dekouver sa sityasyon Lotorite pa ti rantre pou met en stop avek sa konstriksyon.

Se, se selman ler zabitan La Misère ti bar semen ki nou ti kapab retard en pe sa konstriksyon pou lavwa dimoun La Misère ganny ekoute.  Alor mon dir ozordi, wi Gouvernman i bezwen rantre.  Kot i pou al rod larzan, nou ti a swete ki i ti al rod larzan avek sa developer.  Pa taxpayers ki peye.  Me dan tou ka kot Gouvernman i reklanm son responsabilite i bezwen end up avek Bidze ki pou pey konpansasyon.  Prosesis i long.  E mwan osi tou mon zis dir ek bann dimoun La Misère pasyant ankor en pe.

E zis mazinen poudir travay ki nou’n fer, ki nou’n, mon krwar nou’n egzos tou sa mwayen, nou 3 Onorab ki lo sa Komite.  Nou’n fer li tout an bonn fwa e nou’n pran you keksoz an konteks pou nou kapab come up avek sa sonm.

E parey mon dir, ki i pa pou kree sa gro lenpak lo Bidze nasyonal lo nou pei.  Vwala mon pti remark ki mon’n anvi fer.  Minis mon pa konnen si ou oule dir en keksoz dernyen avan nou break.  E apre nou ava retournen pou nou pran sa 2 BillsMinister.

 

MINISTER MAURICE LOUSTAU-LALANNE

Mersi Mr Speaker.  Mon krwar ou rezimen i apropriye.  Mon napa plis pou azoute, zis ki mon ava sey mon mye pou ganny ankor en kontribisyon avek sa devloper dan sa ka, mersi.

 

MR SPEAKER

Mersi Minis.  Bon avek sa nou pou pran en break e nou pou retournen 11.15.  Mon ava envit tou nou bann zwenn recruits ki la, zot ava join nou deor.  E ankor byensir mon envit bann MNA ki anvi enterakte avek nou bann recruits.  Nou retournen 11.20 – ok.

 

(BREAK)

 

 

MR SPEAKER

Bon nou ava kontinyen avek nou travay. E parey mon ti anonse avan nou break, nou pou pran 2 Prozedlwa ki devan nou e ki pou ganny prezante par Minis Finans Minis Loustau-Lalanne. E Minis nou pou pran sa premye Tourism Marketing Tax (Amendment) Bill, 2019 e mon ti a kontan an menm tan ki mon fer resevwar lekip ki pe akonpanny Minis, mon ti a kontan dir bonzour E welcome zot dan Lasanble, Ms Seylina Verghese ki Direkter Zeneral pou Tax and Finance Sector Policy Division, Mrs Gayathri Andre ki Manager Taxpayer Unit, Mr Darel Uranie ki Senor Legal Interpretation and Advice Officer and Mr Samuel Verghese ki pe reprezant lofis AG’s Office.  E byensir SS Payet avek Ms Sitna Cesar i touzour prezan pe akonpanny Minis.

        Bon nou ava mon a kapab ganny en Mosyon pou Second Reading?

 

HON CHARLES DE COMMARMOND

Mersi Mr Speaker. Mr Speaker bonzour.  Bonzour Minis ek ou delegasyon e bonzour tou dimoun ki a lekout –  nou bann Manm. Mr Speaker anba  Order 64(2) nou Standing Order mon oule move ki Tourism Marketing  Tax (Amendment) Bill, 2019- savedir Bill No. 12, 2019 i ganny lir en Dezyenm Fwa.  Mersi.

 

MR SPEAKER

Mersi Onorab De Commarmond. Okenn Manm ki segonde? Yes Onorab Sebastien Pillay?

 

HON SEBASTIEN PILLAY

Bonzour Mr Speaker mersi. Mosyon seconded.

 

MR SPEAKER

Mersi Onorab Pillay.  Bon, mon ava donn laparol Minis pou prezan son Bill.  Minister.

 

MINISTER MAURICE LOUSTAU-LALANNE

Mersi Mr Speaker.  Mr Speaker zis pou mwan enform Lasanble atraver ou permisyon pou fer zis en sel stetment – en sel lentrodiksyon tou lede sa draft Bill.  Akoz zot egzakteman parey.  Eksepte enn i lo CSR e lot i lo TMT.

 

MR SPEAKER

 Ok. En moman Minis. Me nou ava pas Mosyon pou tou lede, me selman apre nou vot i pou separe lo sak Bill – en? So mon a ganny en Motion for Second Reading pou sa 2enm Bill ki Corporate Responsibility Tax.  Onorab De Commarmond?

 

HON CHARLES DE COMMARMOND

Thank you Mr Speaker. Mr Speaker anba Order 64(2) nou Standing Order mon oule move osi ki the Corporate Responsibility Tax (Amendment) Bill, 2019 – Bill No. 13, 2019 i ganny lir en Dezyenm Fwa. Mersi.

 

MR SPEAKER

Mersi Onorab De Commarmond. Okenn Manm ki segonde?  Yes Onorab Pillay.

 

HON SEBASTIEN PILLAY

Mersi Mr Speaker. Motion seconded.

 

MR SPEAKER

Mersi Onorab Sebastien Pillay.

Minis laparol i pou ou.

 

MINISTER MAURICE LOUSTAU-LALANNE

Mersi Mr Speaker.  Mr Speaker lobzektif prensipal lamannman sa Prozedlwa an sa ki konsern definisyon turnover dan Corporate Social Responsibility Tax Act 2013 – CRST e osi dan Tourism Marketing Tax Act 2013, TMT i annan pou bi aliny sa definisyon e fer li vin menm parey definisyon accessible income ki annan dan Business Tax Act, 2009.  Nou ava rapel ki CSR Tax i ganny aplike lo bann biznes ki fer en turnover par lao R1milyon pou lannen oparavan, e peyman sa tax i ganny fer par mwan.

Dan Prozedlwa aktyel sa vedir CSR Tax 2013, turnover i ganny defini selman koman, ‘’the gross receipts from carrying on the business  including the consideration received from the disposal of trading stock and the  gross fees  for the provision of  services derived by a person from sources in Seychelles.’’

Reveni Komisyon Sesel – SRC i ankor ganny difikilte epou enplimant sa tax lo gross receipts tel parey i ete dan Lalwa.  Sa i vedir ki serten biznes i ganny serten dezavantaz, ler sa tax i ganny aplike lo zot gross receipts.  Par egzanp bann biro desanz, bann Lazans Vwayaz ek bann tour operater dan Sesel.

Sa i akoz pa tou reveni ki sa bann tel biznes i fer, i neseserman pou zot anvi ki zot selman pe perform koman en azan, pou zot kapab resevwar en komisyon lo bann tel lavant ki zot fer. Annefe sa bann tel biznes i bezwen remet laplipar porsyon sa reveni lo en lavant, kot son propriyeter biznes ki zot pe fer lavant lo zot par.   E zot selman kit en serten pti poursantaz koman komisyon.

Si nou pran en lot legzanp kot en biro desanz i bezwen pey CSR Tax lo sak Roupi e deviz, ki zot in resevwar par mwan, pou vedir ki i pou osi konpri larzan ki pou ganny vann ek bann kliyan, e pou sa menm larzan ki avan i ganny aste.   Sa tax alor tre sibstansyel  an vi ki sel reveni ki aktyelman  a laporte sa  bann biro desanz, i pou sa komisyon ki zot fer ler zot vann deviz ek sa bann kliyan.

Dan menm loptik Mr Speaker, en Lazans Vwayaz pou rankontre menm defi ler i resevwar en reveni ek bann touris, an vi ki sa reveni i kapab par egzanp enkli peyman pou en lasanm lotel ki sa Lazans pou bezwen met ek sa lotel e osi son prop komisyon.

Le nou regard anba Business Tax Act 2009, i annan en definisyon pou accessible income ki pli detaye, menm si i annan serten similarite e definisyon turnover anba CSRT. Alor pou rezourd sa bann defi, Gouvernman i vwar li neseser an konsiltasyon avek bann diferan stakeholders pou revwar sa definition, pou aliny li avek definition accessible income bann Business Tax Act.  Pour ki osi i annan konsistan, alors Gouvernman pe osi fer menm lamannman dan TMT Act, 2013, an vi ki li osi i annan menm definisyon pou turnover parey dan CSR Act.

Alors Mr Speaker CSRT Act, 2013 ek TMT Act, 2013 i ganny amande par repealing seksyon 2(g) dan tou lede Act an sa ki konsern definisyon ‘’turnover’’  e enkli sa bann definisyon ki ou vwar  dan sa Act atraver sa CSRT 2019 e TMT (Amendment) Bill,2019.

Parey nou vwar Mr Speaker sa lamannman i alor fer li pli ekitab pou sa bann biznes kapab opere, san ki zot ganny takse an plis ki zot merite.  Mersi Mr Speaker.

 

MR SPEAKER

Mersi Minis.  Bon deba i ouver lo Tourism Marketing Tax (Amendment) Bill, 2019 e osi Corporate Social Responsibility Tax (Amendment) Bill, 2019. Okenn Manm ki oule entervenir? Yes Onorab Ahmed Afif.

 

HON AHMED AFIF

Mersi       Mr Speaker.  Bonzour Minis ek ou delegasyon, Bonzour tou dimoun ki a lekout.   Mr Speaker mon konpran bi sa lamannman ki devan nou.   E ler mon’n ekout leksplikasyon Minis, i kler poudir zot pe sey re aliny bann definisyon, pou asire ki ler tou bann dimoun ki sipoze pey tax i pey tax, i annan mwens kestyon parske nou kler lo ki mannyer bann kalkilasyon e labaz kalkilasyon i ganny fer.

Me an regardan lamannman No.2  mon krwar i apel lartik 2 sou-seksyon 2(g)(2) (italics 2) kot ou met ‘’the gross receipts from the employment   of the capital of  the business including dividends, interest, royalties, rent and natural resources amounts.’’  Ki mon lir ladan, se ki CSR ler i pou ganny kalkile, si okenn dimoun ozordi pe resevwar dividends, sa dividends i ganny konte koman reveni, etandonnen ki CSR i en tax lo reveni, dividend osi prezan pou ganny takse dapre tarif CSR.  Sa pou mwan set en keksoz nouvo dan tax.

An se ki konsern tax lo dividend Sesel, parski menm anba Business Tax Act malgre ki definisyon i parey, dividends pa ganny takse.  I pa subject to business tax.  E mon mazinen i annan en rezon pou sa.  Akoz dividends pa ganny takse?  Enn se ou pe ankouraz dimoun pou envestir. Ler i envestir dan en biznes, son biznes i anploy dimoun,  zot pey income tax;- son biznes i fer en profi, zot pey business tax, si  i annan lezot tax ki zot peye, trades tax eksetera dan  bann keksoz ki zot in konsonmen,  i ganny peye. E answit lo son profi i pe pey Gouvernman business tax.  

Sa ki reste se profi.   Profi pou sa aksyonner ki met larzan ki’n envestir, ki nou anvi ankouraz zot fer sa.   E prezan si en etranze ki li i propriyeter sa biznes, i fer son profi i pey son tax. Ler i pa pe re-pey son dividend ki in gannyen i bezwen pey withholding tax 15poursan.

Savedir tou dilon sa dimoun in pey tax. La prezan nou pe dir ek li osi menm avan ou pe repatri ou larzan, sa larzan ki ou’n fini pey tax lo profi, sa osi ou bezwen met CSR.

        Alor pou mwan sa i en konsep nouvo, ki nou pe entrodwir  la.  I pa al an faver  ankouraz dimoun envestir dan biznes.  I osi tonm dan kad kot pe takse en dimoun 2fwa.  Parske in pey tax deza – business tax. Apre i pe al pey CSR tax apre i pe ankor withholding tax – 3enm fwa ler pe sorti. E mon rapel osi klerman dan – mon pa rapel si biznes si dan State of the Nation, kan Mr Faure ti dir poudir – koman Prezidan ti dir pou ‘keep it simple. ‘   Annou fer tax senp. Me eski sa i tonm dan laliny fer tax senp?  Parski la i annan en lot return ankor.  Lo ou lenvestisman.

E mon 2enm pwen lo la se ki Sesel si nou get montan tax ki Sesel Minister Finans – SRC i kolekte, pres R8bilyon an konparezon avek GDP nou pei, nou pe kolekte plis ki 33poursan. Tax i form parti 33poursan nou lekonomi Sesel, i gro.   I gro en kantite e bokou lezot pei i pli ba.  Bon nou pa pou al dan sa deba la me mon pwen se ki si nou pe deza peye en tax ki o, ler ou met totalite VAT, trades tax, duty, income tax, CSR, tourism marketing tax, eski  nou pe fer li senp?   Eski nou pa pe pran tro bokou? E eski i lozik pou nou ozordi apre ki nou pe dir i deza o, i deza konplike, i deza tro bokou,  ki prezan nou al entrodwir en nouvo atraver CSR pou bann dimoun  ki pe deza envestir.  Mon santi sa premyerman i en lenzistis.

Dezyenmman lo lartik  italic (4) kot i met ‘’an amount of an  expense loss or bad debt previously allowed as a deduction, that has been reimbursed or recovered by the business including by way of insurance compensation, damages or indemnity.’’

        Savedir ki ou pe dir la, si par egzanp mon’n resevwar dan en lannen en ranboursman avek lasirans, pou en depans ki mon ti’n fer, sa ranboursman prezan i pe la ganny takse.

         Akoz i pe reveni.  Me eski sa i normal?  Parske i form parti mon depans, mon’n pey profi   lo mon prop lakonpannyen. Si i en ranboursman i bezwen keksoz in al mal. La prezan ler mon ganny ranbourse zot vin takse mwan ankor!   Mon pe demande si sa i en keksoz i normal pou nou fer, parski i zis en keksoz ki petet en zour mon’n ganny aksidan – fer krwar ti aksidan loto, mon santi mon annan rezon mwan – mon met mon claim ek mon lasirans,  me zafer pou al  Ankour. I kapab pran 1an – i kapab pran 2an.   Me ler mon pe espere mon’n deza perdi.  Mon’n pran mon larzan – mon’n deza peye. 

Me prezan zour mon ganny ranbourse sa ti zis en cash movement – zour mon ganny ranbourse mon ganny takse.  Mon pa’n trouv li normal pou zot al takse en ranboursman sirtou lo lasirans par egzanp.  Mon santi poudir atraver sa  lamannman ki pe pase ozordi, nou pe entrodwir eleman  pe fer sistenm tax en pti pe pli konplike, me pli enportan ki en dezavantaz pou bann dimoun ki dan biznes oubyen   pe envestir. Vi azordi nivo tax i deza o. Pou mwan i tro o.

E  me selman malgre ki mon’n dir sa Minis, mon konpran tre byen sa ki ou, ou pe sey fer, se anmas plis larzan.  E mwan sa lo sa kote, mon antyerman dakor avek ou lo anmas plis larzan, parski Gouvernman osi i annan bokou depans pour li fer. Me diferans kot mon vini avek  ou, se si nou anmas plis larzan, oubyen  nou bezwen anmas plis larzan, mwan, tou respe,  nou pa bezwen ogmant tax.

Nou bezwen senpleman target bann dimoun ki nou krwar pa pe pey zot tax korekteman – pa tous tarif, zot pa pe pey zot tax korekteman, target zot e nou fer sir poudir  se zot ki pe deklar vreman sa ki zot pe gannyen e zot pey zot tax korekteman.   Se tou.   Nou pa pou al viktimiz personn – nou pa pou al atak personn, me selman nou dir tou biznes – tou sitwayen, tou bann aksyonner si ou fer biznes Sesel ou bezwen fer ou kontribisyon. Parski pou ou kapab zouir sa biznes, i annan en lot dimoun e sa se Gouvernman ki fer lezot keksoz li.  Met semen an plas, i annan lenfrastriktir pou lopital, lekol e fer sir ki ou annan dimoun ki kapab travay, alor li osi i annan depans, e ou pey ou bout normal.

Me selman mon pa krwar kot nou ete ozordi, se ler pou nou azout nouvo tax.  Se sa ki mon pa dakor avek.  Mon pa krwar se ler pou ou azout nouvo tax. Mon pa krwar se ler pou nou kre lensertitid parmi bann dimoun ki dan biznes. E dimoun  ki dan biznes i enportan.   Parski se zot ki kre lanplwa. Se zot – zot aktyelman pli gro moter dan sa lekonomi ozordi. Gouvernman pe anploy li enkli carer 15mil dimoun, e sekter prive probableman pe annan li ankor 40mil dimoun ki i pe anploye.   E i pli gro masin sa lekonomi.  E nou bezwen ankouraz bann ki  dan leker sa bann masin, se bann biznesmenn parski  se zot ki pe kre tou sa job.  Se zot ki pe pey tou sa tax, se zot ki pe kre lanplwa.  Alor nou pa kapab met okenn keksoz met dout dan zot lespri konmkwa Gouvernman pe vin pran plis, kan Gouvernman i devret senpleman ranmas korekteman sa ki i sipoze pe anmase, e i kapab fer plis larzan san takse zot  en tarif ki pli o.

Alor Mr Speaker, mon pwen tre senp, mon ti a kontan Minis i konsider anba (2) pou retir dividends dan tax ki pe ganny mete lo CSR, e answit kot i pe koz lo bann expenses ki pe ganny ranbourse, ki ou tir lasirans par egzanp.  Oubyen domaz ki’n ganny arive.  Parski mon pa krwar i normal si ou pe ganny ranbourse  pou en keksoz ki ou pe pey  en tax lo la.

So vwala, sete sa mon pwen.  Mon ti ava kontan ki sa i ganny pran an konsiderasyon. Son prensip mon pa vwar problenm ek sa, me sertennman sa bann item ki devret ganny korize. Mersi Mr Speaker.

 

MR SPEAKER

Mersi Onorab Afif.  Onorab Sebastien Pillay.

 

HON SEBASTIEN PILLAY 

Mersi Mr Speaker. Ankor enn fwa bonzour Mr Speaker.  E bonzour Minis ek ou delegasyon. Byensir bonzour tou koleg Onorab e tou dimoun ki a lekout.  Mr Speaker ler mon’n ekout Minis prezan sa 2 Prozedlwa  sa ki in dir ek nou, in dir ek nou koumsa poudir sa i pe fer pou ki nou align  definisyon turnover  avek accessible income  anba Business Tax Act; savedir sa ki ladan i sipoze deza enkli dan Business Tax Act.  I vedir i pa nouvo. I la. I pa en lenvazyon. According sa ki zot pe dir nou la, zo pe align li avek sa definisyon-

Prezan  dan sa alignment ki zot  in fer dan sa definisyon, zot entrodwir sa ki dapre zot  i sipoze en definisyon pli kler  pou turnover ki ava fer ki sa bann eleman  turnover i liable to the tax under Corporate  Social Responsibility Tax  oubyen anba Tourism Marketing Tax.

Petet sa ki Minis i devret eksplik nou en pe pli byen avek bann zofisye ki la, se i annan bann pwen ki mon krwar i fer sans. I annan bann pwen ki mon pa neseserman dakor avek entervenan avan mwan, lo sa ki konsern dividends, akoz i tou depan ki groser konpannyen ki ou pe koz lo la;- ki kalite biznes ki i  pe fer; ki  kalite antite ki i egziste.  Akoz apre tou  sa ki nou bezwen mazinen, si nou pran Corporate Social Responsibility Tax, tou sa resours, sa lanvironnman kot sa biznes pe operate i  ganny met an plas par Leta. Gouvernman.

Gouvernman i enkli nou tou ki la anndan – i enkli tou dimoun enkli tou dimoun ki kontribye avek tax.  E se nou ki provide the basis, the stability, the environment pou sa biznes kapab grandi.    And it is only fair ki sa biznes from the perspective i rann.   I donn en pe pou li kapab kontribye dan sa konteks sosyal, amelyor konteks sosyoekonomik sa landrwa kot i pe operate son biznes.   E se sa mon krwar lideal deryer sa.   Me kot mon annan en problenm mwan Mr Speaker, en konsern petet, mon pran Tourism Marketing Tax, mon vwar zot in met ‘’Derived by the business from sources in Seychelles.’’   Prezan an relasyon avek Tourism Tax  petet mwan ki pa pe konpran keksoz mon pa konpran sa Lalwa mannyer i vini be eski sa i pa limit zot prezan, pou konsider ler zot pe koz sources in Seychelles, eski  zot osi  pe deal avek sa size management fees, ki bann gran, gran letablisman touristik i peye  aletranze? Kot lamazorite larzan booking pa antre dan pei, i reste deor, zot fer booking atraver bann konpannyen dan plas anmenn larzan dan pei.

Akoz short of dir mwan poudir, sa i pou ed zot dan sa konteks pa pe kree en sityasyon kot en bout e en eleman, kot nou sipoze pe ganny larzan, nou pa pe gannyen pa pe gannyen?  I fer mwan raise en point of concern vizavi abilite pou nou kapab fer si ki dan konteks legal i asire, poudir si ou pe fer en biznes isi – se  nou pei ki  pe provide ou avek labaz ou  biznes, ou devret pe kapab pey ou tax parey ou devret dan nou pei.

I pa kapab kliyan pe boukte everywhere around the world. I annan bann fees and so on, ki pe arive ki at the end of the day,  ler  ou par egzanp  ou pe regarde  reset  ki nou pe gannyen lo business tax, i pa neseserman commensurate avek volim aktivite ki pe arive dan en sekter.

E prezan, menm si mon pe koz lo business tax, Tourism Marketing Tax i annan en konponan enportan, akoz i relye avek aktivite ki arive dan sa sekter.   So se pour sa ki i enportan. akoz sa ki nou, nou enterese avek se pou  asire ki si i annan en lakonpannyen ki fer biznes Sesel,  e si Sesel i  provide the basis for son konpannyen egziste, labote nou pei, stabilite, nou lanvironnman, obviously pou   maintain sa lanvironnman i koute.   Nou bezwen pran larzan taxpayers pou fer sir poudir nou kontrol coastal erosion pou ki en lotel i kapab egziste obor   lakot.

Nou bezwen servi larzan marketing sorti dan Kof Gouvernman pou market lendistri tourizm Sesel.  Sa ki nou le asire se ki everybody – tou dimoun i kontribye son par, dan sa reset, pou ki ler nou kwi sa manze ki pe ganny kwi tou dimoun i met son bout pou asire ki at the end of the day,  nou tou nou kontribisyon in ede pou nou ariv  sa rezilta ki nou  anvi  ariv ladan.

Me ler nou pe koz lo business derived by the business from sources in Seychelles only, what happens par egzanp – how do we deal avek bann fer kot par egzanp bann biznes ozordi parey mon’n dir i annan, i annan sa eleman kot bann management fees par egzanp i ganny pey aletranze?  I annan en kantite transfer pricing ki bokou expert ki’n zwenn avek nou Manm Lasanble,  in koz lo la e travay ki  par egzanp OECD, pe fer  pou tackle zafer transfer pricing; diskisyon ki  nou, nou’n gannyen avek IMF lo sa size – nou’n gannyen avek World Bank lo sa size;- en size i konsern nou.  En size ki nou santi pe afekte nou lendistri, akoz nou pa santi ki reset ki nou devret pe gannyen ek sa lendistri, i sa reset ki devret pe antre dan nou pei.

Prezan ler nou vin lo sa size whether or not nou pe fer lanvironnman less konpetitiv oubyen non.  Mon krwar sa i tou depan lo SRC. SRC mon krwar zot ki get landscape tax e ler zot santi poudir i annan nesesite pou entrodwir en nouvo tax, akoz petet zot santi poudir i annan en reset ki zot pa pe kapab capture atraver en sekter, zot in fer li.  E se pou sa rezon mon krwar Minis ou pou bezwen donn nou en pe plis, akord nou en pe plis lenformasyon vizavi labaz.  Nou pa kapab al zis lo en baz ki sa i en alignment of sa definisyon avek Lalwa Business Tax. I bezwen al lo en baz spesifik, baze lo lenformasyon ki zot in kolekte, lo akoz nou krwar poudir resanz sa definisyon;- akoz par sanz sa definisyon i fer  ki zis parey sa Onorab ki’n koz avan mwan in fer- in koze, nou pou prezan pe takse lezot eleman ki oparavan nou pa ti pe takse.  So i enportan ki nou kapab eksplike.

Akoz lesansyel la se pa zis fer en Lalwa e dir poudir prezan SRC i annan free hand pou zot kapab al deal ek sa sityasyon me sa ki nou oule fer se ki, nou asire ki ler nou pas sa Lalwa, Lasanble Nasyonal pa pe inadvertently fer lanvironnman biznes vin less competitive, vin pli opaque, vin pli cumbersome e dekouraz probableman dimoun ki ti ava anvi antre dan en lanvironnman biznes. I enportan ki sa i ganny pli byen eksplike, e i ganny fer kler.

Prezan ler nou vin lo sa size lasirans, mwan osi mon en pti pe pa ganny en konpran.   Si ou’n incur en loss, pou en keksoz ki ou’n peye orizinalman, ou’n pran lasistans ki ou’n pey son bann premium tou le mwan – deza ou’n  incur en cost, prezan ler lasistans pou rann ou, ou larzan, i  bona fide sa, en – in ariv en aksidan en keksoz, ou enpoz en tax lo la ankor.   Mon pe sey konpran the logic behind it. Eski in annan lenstans kot en peyman pou indemnity in sitan ganny fer dan en fason drol – dan en fason ki SRC pa kontan – en fason ki SRC pa agree avek   e ki prezan SRC in vwar li neseser pour nou al dan sa direksyon?

Alor lozikman – lozikman mon pe koz from en layperson‘s perspective mon pa en dimoun ki en eksper dan tax.  En dimoun i ganny peye in ganny indemnified pou en keksoz oubyen in ganny peye pou en keksoz, mon pa vwar rezon akoz i sipoze pe annan en tax ki’n ganny sarze lo la.

Si par egzanp sa biznes i ariv en aksidan, e en aksidan koze dizon par PUC, or Fire Brigade or nenport antite, e i pe ganny en konpansasyon e ou pou takse sa konpansasyon?

E si par egzanp sa konpansasyon in antre dan en prosesis legal, kot sa antite in bezwen pey en avoka – pey bann court fee, in pey bann cost, whether the tax i minim menm si tax i ptipti, i pa en gro tax i still en tax.

What is the principle behind sa? What is the idea dernyen sa? Petet mwan ki pe mal konpran. Akoz mon santi poudir i annan areas ladan ki mon dakor avek, me i annan serten areas ki nou bezwen ganny serten leksplikasyon an plis ankor, pou nou kapab konpran, kwa ki nesesit  vreman ki nou annan sa gran definisyon of turnover;- kwa ki  nesesit  prezan ki nou’n enkli  sa bann eleman ladan, ki’n fer ki nou vwar nou pe fer sa ki nou pe fer ozordi, fer sa bann amannman vizavi sa Lalwa.

Mon krwar i annan en keksoz enportan ki nou bezwen mazinen Mr Speaker.  E mwan mon pou koz fran en lensidan bomaten la  in ganny met a mon latansyon, ki mon krwar dan Gouvernman pe enport nou krwayans politik, nou tou nou bezwen fer nou louvraz byen.   Ok? Si nou annan en let pou nou issue en staff, oubyen i annan lenformasyon pou nou pas ek staff, annou zwenn ek staff  fer pas nou lenformasyon.  Si nou annan en keksoz pou nou fer, annou fer sir ki nou fer tou nou travay neseser.   Pa zis vin donn nou en Lalwa, vin dan Lasanble e dir nou poudir sa i en alignment of Business Tax Act. Pe enport correspondence ethic akoz nou’n ganny en louvraz pou nou fer e nou bezwen fer li alaoter sa fonksyon ki nou’n gannyen.

E si mwan mon pe koz fran akoz mon konsernen akoz si avek staff internally Mr Speaker – petet mon pe al an deor topik, me si avek staff internally nou pa kapab fer sa, la ou pe donn mwan en lenformasyon ki mon bezwen konnen, mon bezwen doubt – mon vin Thomas the doubter . Akoz mon oule konnen kwa egzakteman ki zot oule achieve avek sa Lalwa.

So i pou enportan ki i annan en  leksplikasyon pli konkret  – pli an detay, menm Mr Speaker malgre ki sa bann Lalwa pa paret konplike oubyen konpleks, ti ava bon nou ava al dan Committee Stage e nou kapab ganny bann expert i ava eksplik nou. petet kekfwa i annan bann rezondet solid deryer sa.

So mwan sa ki mon demannde  Mr Speaker e mon ti a kontan ki Lasanble e mon bann koleg i take sa onboard,  si nou oule vreman konpran sa Lalwa  fodre nou al dan en Committee Stage proper kot nou les bann expert eksplike osi donn nou bann lenformasyon. Klarifye avek nou bann eleman ki zot in met dan sa Lalwa e fer sir – reasir nou poudir zot  on top of things  e ki keksoz pe ganny fer dan lentere – dan lentere pep Seselwa premyerman, e there par ekstansyon dan sa lepep Seselwa, i enkli sa bann biznesmenn Seselwa. Zot enkli ladan. I annan businessmen etranze- wi.  I annan businessmen etranze/Seselwa partnership, me i annan.  Zot form par sa pep ki nou, nou pe donn zot servis ki nou anvi donn zot.  So i pou enportan ki zot eksplik nou pli klerman what exactly ki oule achieve avek serten sa bann propozisyon ladan.

Akoz si non, nou pou vwar nou dan en sityasyon kot sa bann propozisyon pou tonbe, akoz nou oule reste lo en baz ki nou pe entrodwir serten keksoz san ki nou’n donn ase lenformasyon, leksplikasyon.  E mon servi legzanp sa let  bomaten, pou montre ki i enportan e Minis ou a dakor avek mwan – mon konnen ki i enportan ki lenformasyon i ganny pase, i ganny donnen avan ki nou fer bann desizyon ki kapab –  pou nou kre bann persepsyon oubyen bann  sityasyon an deor.

Avek sa Mr Speaker mon remersi ou.  E mon pou atann leksplikasyon ki ganny donnen pou mwan kapab konpran egzakteman kote nou pe ale avek sa. Petet i annan keksoz lenformasyon ki mon pa konnen.  Mon pa oule pronons mon lekor poudir nou devret tir sa about oubyen tir sa bout. Mon oule et pli pridan.  Mon oule vreman cautious. –Eksplik nou egzakteman ki nou pe achieve avek sa and then nou kapab move forward.  Mersi Mr Speaker.

 

MR SPEAKER

Mersi Onorab Pillay.  Onorab De Commarmond?

 

HON CHARLES DE COMMARMOND

Mersi Mr Speaker.  Mr Speaker, zis en pti keksoz. Pa mon lentervansyon, me solman swivan sa 2 entervenan ki  in fer, mon krwar i enportan at this stage ki Minis i tous sa bann definisyon sa definisyon turnover, tou le 5 morso. Mon krwar i eksplike, pour ki tou dimoun i esey konpran kote i anvi anmenn nou, pou nou kapab vreman pran desizyon lo la.  Mersi.

 

MR SPEAKER

Mersi Onorab.  Bon Minis in fini prezante. Petet si nou pou al dan Staz Komite oubyen si nou bezwen an konsiderasyon bann amannman ki ganny propoze, then nou a donn Minis sa sans   i ava kapab al plis an detay.  Ok? Onorab Ramkalawan ou ti oule entervenir?  Onorab.

 

HON WAVEL RAMKALAWAN

Mersi bokou Mr Speaker.  Mr Speaker en keksoz ki kler se ki lo tou lede kote latab nou annan en question mark lo kwa egzakteman ki nou pe fer ozordi dan Lasanble.  E i annan diferan konsern ki deza pe ganny eksprimen. E mwan osi mon krwar ki definitivman dan Staz Komite, i pou enportan pou nou ganny leksplikasyon kler. Akoz sa size tax i konsern tou dimoun. E enn bann keksoz ki ganny eksprimen souvan, se ki biznes i ankonbre avek tax e mwan lafason ki mon vwar li ozordi sa ki nou pe fer la parey Onorab Afif in dir klerman nou a pe fer li pli ankonbre ankor.

E en legzanp – Onorab Afif in mansyonn lasirans. Nou tou nou konnen ki  si  ou aste en lote R250mil  ou fer en aksidan i fer en write-off zanmen lasirans pou rann ou R250mil.  I ava rann ou R230mil – R240 mil si ou sanse. I pou depreciate. E tou bann kalite keksoz i arive.   Me la sa ki mon pe gannyen se ki sa dimoun ki aste son loto lo R250mil ki’n pey en premium ki ase ser, i fer en aksidan  loto i write-off letan i pou ganny son larzan, i pou annan en tax lo la.  Definitivman mon pa vwar sa koman en layman  dan  sa bann zafer taxOk Onorab Afif li i en pe eksper parski in zwe dan sa bann  – in asiz dan plas SS Payet pandan bann bokou lannen.  I konn en pe bann lezot dimoun la ki konn en pe.  Me selman mwan pou mwan koman en layman deswit mon pou dir i pa fer sans.  Mon perdi;-  mon pey mon lasirans, mon pe al ganny mwens larzan e dan sa mwens larzan ki mon gannyen, ou pe al takse mwan ankor.  Alor mon pa vwar en sans ladan.

E mwan Mr Speaker mon osi vwar ki dan sa nouvo definisyon turnover, ankor enn fwa mwan mon regard li avek lizye, en layman – e pli mon ganny leksplikasyon, pli mon kapab pli byen konpran.   Ou konnen mon pe pran legzanp e kot Gouvernman malerezman zot pa antre pou zot ed biznes e la mon dir spesyalman pou ed biznes Seselwa.

Ozordi nenport dimoun ki annan en pti guest house oubyen en pti lotel i depann lo booking.com – Trip Advisor pou li ganny son bann kliyan.  E Gouvernman i konnen li ki poudir sa dimoun letan in vann son lasanm  100Euro i annan 15poursan lo sa 100Euro  ki pa pou li. 15poursan oubyen plis parfwa sa i pou Trip Advisor  -sa i pou booking.com.

 

Me Gouvernman i okouran sa li. Me selman letan mon pe regarde la koriz mwan si mon mal.  Letan i pou soz son turnover i pou work son turnover i pa pou kapab mete 85 Euro parski in vann pou 100 Euro menm si 15 i pa pou li.  Me mwan mon vwar ki poudir it’s not fair!  I a pe pey tax lo  – i a pe pey 2 tax.  I a pe pey 15poursan to sa booking.com;- i a pe pey 15poursan lo sa 100Euro ki i  pa’n antre dan son pos zis 85.  Be selman mon vwar ki Gouvernman li, i reste trankil lo sa li.  I pa sey rod en fason pou li regarde me ki mannyer eski mon pou ed sa biznes Seselwa, pou li olye pey tax lo sa 15poursan.  E an plis ki sa sa bann rates ki booking.com i mete, Gouvernman i konnen sa li.  Minister Tourizm i konn egzakteman konbyen sa bann Lazans, i pey me napa en fason pou nou ed sa biznes li osi tou pou li pa pey tax lo tax e pou li kapab ganny en pti mwenza ankor dan son lanmen?

        Se sa malerezman ki mon pe vwar dan sa bann definisyon.  E Onorab Afif in koz lo dividends. Mon osi mon dakor avek li.  Akoz?  Me in fini peye tax.   Me pa in fini pey tax? E aprezan dividends i vin lo profi.  Dividends i vin parti profi kot nou dir be letan nou’n fini pey sa, sa, sa i reste R100. I annan 4 shareholders nou ava donn sakenn      R25. Be sa R25 ki mon pe gannyen koman en shareholder i vin apre tax.  Me la prezan nou met en lot tax ankor lo tax e dan mon lespri sa pa kapab normal.   Akoz letan ou a pe pey 2fwa tax lo en sel komodite, i pa kapab normal.

E la par egzanp ankor en fwa, mon pe zis – mon pe mazin bann travayer Barclays koman en legzanp. E la Mr Speaker, mon ti ava kontan si Minis i pran note  sa byen pou nobou eksplike;- i annan bann private insurance Schemes, me sa, letan sa dimoun – sa travayer in fini pey son tax, aprezan son larzan ki in gannyen apre tax, i deside pou li – parske son lakonpannyen i annan en bon Scheme i deside ou li dir, be mwan mon pou fer en kontribisyon – parey osi tou ou kapab letan ou’n fini ganny peye ou dir be mon pou pran en life insurance avek SACOS, mon ti ava kontan konnen si sa bann zafer la i antre ladan?

Ou konnen poudir en dimoun i pa toutafe travay lo turnover, me selman lefe ki nou pe koz lo tax mon ti ava kontan ganny en leksplikasyon oubyen pou ganny en konprenezon si Gouvernman – parski la pou le moman i annan en gran konplikasyon lo sa – si Gouvernman i annan lentansyon,  pou ki letan sa dimoun ki’n kontribye lo son larzan an deor, dan en insurance Scheme, si letan i pou ganny son larzan, at the end  of son peryod letan, si i  pou bezwen pey tax lo la.   Parski sa osi tou i en gro issue ki pe leve.

Mr Speaker, CSR nou bezwen dekri li koman i ete – koman en tax ki unfair.  Akoz i unfair?  Se parski li i pa regarde okenn bann depans. Li i pe regard zis son turnover li.  Tandis ki business tax li i diferan li akoz ou pa pe pey lo profi ki ou’n fer.  Be lafason ki nou pe fer sa lamannman lo sa CSR tax ek tou sa bann lezot keksoz, mon krwar nou pe fer li vin bokou pli unfair.

E mwan letan en keksoz i unfair, mon pa dakor – otomatikman, Minis osi tou si en keksoz i unfair,  e plizyer fwa  Minis dan  Lasanble in dir sa i pa normal, alors nou bezwen pran aksyon! E mon 100poursan lo menm paz avek ou Minis!

So  si CSR tax i deza en tax ki unfair, parske tou keksoz i ganny pran an konsiderasyon tanpi konnen ki ou depans ki ou’n fer – tanpi konnen si ou’n fer profi i dir avek ou la i la ou turnover e lo ou turnover nou pou pran en larzan.   Mon krwar nou bezwen fer bokou latansyon letan nou pe get sa bann  nouvo definisyon, parski sa bann  nouvo definisyon, i pou fer  ki en biznes i pou pey plis ankor.   E annou pa osi bliye Mr Speaker ki anba kot SRC – anba kot SRC si ou annan ou mank 1 zour  ou mank 2 zour li i pa pou mank ou li!  Li i tap ou sir-sarz li.

E bokou biznes e la ankor enn fwa Gouvernman li i pa enterese. Sa menm Gouvernman ki sa kontrakter, sa biznes la, in fer en travay pou en Departman Gouvernman i a pe monte desann pou li ganny son larzan 4mwan – 6mwan ensidswit, li Gouvernman li i pa enterese! Sa dimoun i kapab vini poudir be get sa, be mon dan problenm.  Mon pa pou kapab pey sa tax akoz Gouvernman li menm pa ankor pey mwan! I annan 4mwan ou ‘n fin sanz en twa lo batiman Minister Finans e Minister Finans menm pa ankor pey mwan.  I a pe fer mwan monte desann, alor mon napa larzan pou mwan pey ou. Oubyen si mon pe pey ou an retar se parski se prezan ki mon ganny larzan.  I kapab vin avek tou son laprev, bann la i dir ek li, ‘’Sorry Lalwa sa! Ou bezwen peye.’’

E mon kapab dir ki tousala i fer ki i annan ozordi bokou bann pti biznes ki ape soufer.  Zot pe soufer avek sa parski zot napa sa kapital.  E Apre sa ler i a riv sa lafen dimwan ou pou al dir travayer Gouvernman pa ankor pey ou? Be li sa boug pou dir avek ou be mon’n travay, mon anvi mon lapey!’’ E pa bliye si prezan pa ankor ganny larzan e ou pa pey li i anmenn ou Tribinal e Tribinal menm zafer ankor ou pa’n pey sa dimoun e ou dan problenm ankor!

Alor Mr Speaker sa ki mon pe sey dir wi nou bezwen fer sistenm tax dan en fason pli senp osi e mon pa oule repet sa ki Onorab Afif in dir lo KIS – ‘Keep It Simple’’ – stupid ,me la ki mannyer mon vwar mwan i pe vin pli konplike.

I pe vin pli konplike lo en kote e lo lot kote biznes pou ganny afekte parski biznes i deza pe struggle zot pou trouv zot pe pey bokou plis, parski sa bann definisyon ki mannyer i ete i pa pou ede.  Mon pe vwar laboutik pou annan plis sir-sarz parski sir-sarz son poursantaz i o.  Alor lefe ki mon pa pe vwar sa lizye imen sa konprenezon me nou pe vwar zis tax;-  nou pe zis vwar sa plis keksoz ankor  ki pou vin dan tax, mwan mon krwar Mr Speaker, Minis pou bezwen regard ankor sa.  I pou  bezwen re-egard ankor e pandan Staz Komite nou a kapab enterakte, regarde kwa ki nou pou kaba fer li vin pli senp, me selman mon krwar sa i devret a lafen dizour nou bi ki nou  sey achieve.

        Parski ou konnen letan nou regard li i annan serten tax osi tou ki n ou kapab dir i unfair.  Par egzanp en dimoun ki fer vini nenport keksoz – en gran lakonpannyen i fer vini loto, i pey CIF. E mwan personnelman letan mon koz lo pri lavi – nou koz lo tousala, mwan mon krwar ki freight i en keksoz ki en dimoun pe peye pou fer sa keksoz.   Ou pa kapab sarz mwan tax lo sa ki mon peye!  E sa i ede pou fer li monte.  E aprezan li i pas sa avek kliyan sa bout freight. In peye  e apre i met son profi lo la.   Me selman tousala i form parti son turnover. I form parti son turnover. E tousala Mr Speaker se bann keksoz ki nou bezwen, atansyon fer atansyon letan nou pe get sa 2 morso Lezislasyon e nou bezwen fer sir ki nou pa zis pas sa bann Lezislasyon, me nou balans li byen pou nou fer sir ki – e la mon koz spesyalman pou nou bann biznes Seselwa, ki poudir nou bann biznes Seselwa zot kapab respire e zot kapab santi ki poudir be mon pa travay zis pou mwan pey tax, me mon pe kapab ganny en lavi.   Mon pe kapab viv dan en sitasyon kot mon pou kapab anploy plis dimoun, e sa i ava ede pou nou konstri nou pei. Akoz Mr Speaker yer swar mon’n vreman riye letan en gran biznesmenn Seselwa i dir avek mwan, be lafason pei pe ale – direksyon, biznes Seselwa spesyalman pou dan problenm.  E avek sa bann zafer tax isi tax si pa ganny peye laba i dir avek mwan, zot dir ‘’leve debourye’’, me selman finalman i vin leve – ( sorry   krwar mon ti take note) i dir i sipoze  ‘’leve debourye’’  me la lafason i dir ou ‘’leve, deboule!’’  I vin ‘’leve deboule!’’

        E nou, nou bezwen fer sir ki letan nou pe regard sa Lalwa, nou pa vin ‘’leve deboule’’ me vreman i vin ‘’leve debourye.’’  Mersi bokou, Mr Speaker,

 

(APPLAUSE)

 

MR SPEAKER

Mersi Onorab Ramkalawan.  Bon i reste ankor 1 entervenan e apre nou a ganny Right of Reply Minis. Mon sizere ki nou break. Nou bezwen rann lantenn SBC e nou ava retournen nou ava repran nou travay 2er, Mon zis ankor enform bann Manm Komite Assembly’s Business Committee ki nou pou zwenn dan  Speaker’s Conference Room 1er. So nou break, nou retournen 2er.

 

(BREAK)

 

 

MR SPEAKER

Bonn apre midi tou Manm Onorab.  Bonn apre midi Minis avek ou delegasyon.  E bonn apre midi tou dimoun ki a lekout e pe kontinyen swiv travay Lasanble Nasyonal.

Bon premyerman mon ti a kontan prezant en leskiz pour sa pti retar ki nou’n gannyen.  An vi travay ki serten Komite ti pe fer pandan break.

Nou pour kontinyen nou travay kot nou’n kite avan nou pran lunch break.  E mon ava donn la parol Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker mon pour bref and short.   Bonn apre midi Minis ek ou delegasyon e tou dimoun.

Mr Speaker sa 2 Bill ki devan nou, i lentansyon- sa 2 Bill i bon.  Lentansyon and sense ki i oule adres en keksoz ki nou’n manke avan letan Lalwa ti vini.  Pour ki bann biznes ki pe ganny zot living atraver bann commission ki zot gannyen, i sa CSR letan i tire, avan ti pe afekte zot.  La avek sa lamannman ou oule met en lord ladan ki zot pa pey lo tou sa larzan ki pa antre kot zot.  I pa al pour zot, me al pour en lot entity.  E zot, zot retenir zis sa commission.  So la ou pe adrese ki sa CSR i ava al pirman lo sa ki vreman zot earn.

Sa bout la napa en sou problenm avek.  E an menm tan selman i annan parey in ganny leve avek lezot dimoun ki’n koz avan mwan, serten keksoz- se sa ki mon ti demann sa leksplikasyon taler pour revwar.

Mon krwar taler dan ou Right of Reply Minister, ou ava kapab elabor en pe lo sa definisyon turnover pli byen.  Me selman i kler ladan ki i annan serten keksoz ki bezwen ganny retire pour pa konplik lavi bann dimoun dan biznes – sirtou bann Seselwa.

E la par egzanp sa kestyon dividend nou pe demande pour retire.  E ler nou ava ariv dan Committee Stage nou pour adres sa.

E ou pouvwar.  Mon aprann osi ki byento pour annan en- i annan en travay ki pe ganny fer par Minister Finans avek mon krwar OECD pour revwar through the system tax baze lo lapel ki Prezidan in fer pour keep it simple.

Prezidan i pe fer byen li.  I pe dir keep it simple.  Me selman Gouvernman li dan son lenplimantasyon sa ki Prezidan pe dir,  nou souvandfwa nou konplik keksoz.  E i pa devret reflekte lo li.  Li i dir en keksoz. Annou fer sa ki i dir.  Prezan nou a vwar ki mannyer Gouvernman i a kontinyen improve byen.

E parey la ki pe arive lo Erport, menm zafer.  I en keksoz ki senp.  Me selman bann dimoun i pe rebel laba.  Akoz? bann dimoun ki fodre eksplike, pa oule eksplike.  Bann fodre keep it simple, pa’n keep it simple!

So nou pe ensiste lo la.  E zis parey mon krwar letan zot revwar tou sa zafer tax avek OECD.  I annan en keksoz ki taler in ganny touse.  E petet pa’n al ase o profon ki mon krwar i devret ganny pran an konsiderasyon serye.

Anfen kont 2 keksoz.  Enn se CSR lo excise tax ki mon krwar zot devret take up.  E lot se bann private pension or gratuity. 

        I annan par egzanp- nonm Barclays.  I annan lezot Konpannyen prive ki i annan- Seybrew mon konnen ti annan sa.  Zot annan bon sistenm pansyon.  Cable and Wireless i annan.  E bann staff i ganny afekte, akoz zot al ganny penalize atraver bann incentives ki zot annan, tax i al ganny tire lo zot.

Mon krwar tousala i bann keksoz ki zot bezwen gete.  I pa tonm ladan direkteman sa.  Me selman ler mon konnen ki zot pe al fer sa legzersis.  Tou sa i devret ganny gete.  Akoz plizyer fwa sa bann staff in kominik avek nou poudir i touy bann incentive ki zot kapab annan.  E fodre ki Gouvernman li i ankouraz son Seselwa, pour kapab kontribye pli byen dan pei, pour kapab earn pli byen.  E pour kapab anbelir zot lavi e lavi tou Seselwa.  Pour kapab vreman epanouir dan en fason pli satisfezan dan son pei.

Lo la Mr Speaker.  Nou demande- nou demande osi ki sa Lalwa ki paret senp ki la devan nou.  Minis dan ou leksplikasyon ankor,  nou anvi ki i ganny eksplike byen pour ki dimoun i deor- ki deor i konpran lentansyon sa ki ou pe anmennen.

Akoz sansan nou pe petet mal enterpret.  Akoz nou pa konpran.  Nou kapab mal enterpret sa ki sa Lalwa pe dir nou.

So nou ti ava kontan ki ou adres sa.  E an menm tan mon krwar si mon pa tronpe i annan en lot keksoz- wi lo sa kestyon lasirans.  Par egzanp en Konpannyen ki dizon son transpor in write-off.  I sorti koman son- lo son lalis asset.  Me apre letan lasirans i pey li, mon krwar la osi nou bezwen regete sa.  Ou pa kapab fer li pey CSR lo sa transpor.  Konmsi pour mwan, mon pa vwar son relevans.

Deza parey nou’n dir, sa kestyon CSR i en konsern li menm.  Me an plis ki sa, mon krwar nou pe al tro lwen letan nou pe pran CSR lo en keksoz ki mon krwar nou pa devret pran.

Konmsi napa nanryen pour fer la.  Mon krwar mwan kot ou pour bezwen al pran CSR lo la ankor.  Ou pe suffocate biznes en pe tro bokou.  So mon krwar ki i devret ganny gete.

E ler CSR ti ganny entrodwir Mr Speaker, plizyer konsern ti ganny leve.  Akoz 2 tax?  Akoz plis ki 1 tax nou pe sarz bann dimoun?

E ou vwar 1 i vin lo turnover.  Lot i vin lo profi.  Lentansyon CSR ti pour ti sipoze ed initially par egzanp lo kote medikal, lo kote sports, ensidswit.

Be annou vwar Gouvernman o fir a mezir in pran sa tax li menm pour son Bidze direkteman.  E ki mon krwar i bann kestyon ankor ki nou bezwen poze a se moman la,  ler ou pe fer sa gran legzersis avek OECD pour ou kapab revwar tou sa concept la dan lespri nou Prezidan ‘keep it simple’.  Pour kapab vwar, olye annan detrwa kalite tax.  Fer li en sel si ou konnen tousala tax pour al dan ou Bidze pour al servi pour fer marse pei dan en fason.  Be revwar li.  Fer li senp.  Rod en fason ki ou a ganny sa ki ou bezwen an menm tan biznes osi i pa ava vin konplike pour li.

E i osi ava kapab pa perdi letan avek sa bann zafer tax.  I a kapab rod fason pour li kapab fer sa ki biznes in merit fer.  Se fer profi, se fer ki son kondisyon son bann travayer ensidswit, i ganny amelyore.  E non pa anpay li.

Avek sa, mwan mon krwar poudir Mr Speaker nou ava siport lentansyon sa Bill.  Son prensip.  Me apre mon krwar apre dan Committee Stage nou ava vwar kwa ki nou bezwen tire la.  Pour kapab permet ki sa Prozedlwa i ava fer sa ki i merit fer.  Mersi.

 

MR SPEAKER

Mersi Onorab De Commarmond.  Mon ava donn Minis la parol pour li donn son Drwa de Repons e okenn leklersisman.  Minister.

 

MINISTER MAURICE LOUSTAU-LALANNE

Mersi Mr Speaker.  E bon apre midi tou Manm.  Mr Speaker mon’n ekout atantivman tou bann entervenan lo sa 2 Prozedlwa.  E mon rezwenn bokou komanter ki’n ganny fer.  tou dabor lo son prensip.  Se egzakteman nou ti anvi capture bann commission agent.  Akoz sa, se zot ki annan en fardo pour le moman an sa ki konsern sa 2 tax.

Ozordi SRC i annan en public ruling ki i pe servi pour li fer bann commission agent pey CSRT avek TMT.  Me sa i pour zot ki mannyer zot, zot enplimant Lalwa.

E si demen i annan en challenge.  I pour trouv li dan difikilte.  En challenge Ankour mon pe koze.  E nou lentansyon sete anmenn sa amannman pour capture zisteman sa public ruling ki dan sa Labib SRC, lo sa size.  E li senpleman i dir ki sa threshold i pour baze lo Komisyon, pa lo total turnover.  E se sa ki nou’n anvi fer.

Me mon rekonnet osi ki letan nou’n aliny li avek accessible income, sa kestyon dividend i come up.

E Onorab Afif i annan rezon ki dan Seksyon 12 Business Tax Act anba Exempt Income dividend i exempt.  E donk zot pa pey business tax lo dividend.

E la anba CSRT i vin en problenm.  Nou kapab dir pour lasirans osi, se en pe menm tretman.  Menm ki mwan mannyer mon vwar li, se ki anba sa Lalwa lo Roman IV i dir ou ‘‘that it was a previously allowed as a deduction’’.  Setadir ou ti’n tir li e dan tou tax base in tonbe.  E prezan letan ou rann, ou ganny sa ranboursman, se la kot ou vin pey CSRT.  Vre i kapab en lenzistis.  Me lo son baz, se koumsa ki nou ti pe anvizaz li.

Nou tax system anba Business Tax (Amendment) ki nou ti anmennen isi, an Desanm 2018, in fer nou tax system teritoryal.  So se akoz sa ki ou vwar ki sa bann Langaz nou pe takse income rezidan Sesel i aparet.

Mon pour koz en pe – pa bokou lo 2 laspe ki napa nanryen pour fer avek sa ki nou pe diskite.  Me ki’n ganny met lo floor, ki mon bezwen reakte.  Sa Private Insurance Scheme wi i fer en bon pe letan ki Gouvernman i okouran sa problenm.

E nou dan Minister Finans nou’n aprofondi.  E sa ki mon kapab dir zot, se ki wi byento nou pour annan en propozisyon kot nou oule osi exempt PIT lo sa.  Me son moman pa ankor ler pour nou anmenn sa.  E se sa ki nou anvi fer.  Akoz ou pa kapab annan en sistenm kot bann travayer dan sekter piblik pa peye.  Me sa bann ki dan sekter prive i peye.  So i en konsistan ki nou oule korize.  E parey zot in mansyonnen, i annan osi Nouvobanq ek Labank Santral ki annan sa bann Private Pension Scheme pour le moman.

En keksoz ki nou pa’n koz lo la.  Se si nou pas sa Lalwa –  si Lasanble i pas sa Lalwa,  son effective date- zot ava rapel dan mon Bidze lannen pour 2018 pour 2019.  Mon ti mansyonnen ki nou pour fer sa lamannman.  E mon ti dir ki effective date ti pour le 01 Zanvye 2019.

Nou konnen osi ki si zot, zot pas sa Lalwa isi, i pour al kot Prezidan Larepiblik pour li assent.  E letan assent sa osi i kapab vin son effective date.

Me mon mwan pe propoze Mr Speaker, ki nou fer effective date sa Lalwa- apre ki nou’n fer serten amannman ki’n ganny diskite bomaten,  son effective date pour Zanvye 2020.

Rezon mon propoz sa, se ki OECD e son travay ki i pe fer pour revwar nou tax system; parey zot konnen zot in vini, zot in rankontre plizyer group konsernen par sa.  Zot in retourn se zot, e nou pe ekspekte zot rapor ver lafen sa mwan.  E pour le moman  mwan mon pa konnen ki zot pour propoze pour CSRT ki pour zot proze, ki tretman nou pour annan pour TMT.  E donk i enportan ki nou esper sa rapor.  Nou regard sa rapor, nou armoniz li pour fer li simple or simpler. 

        So mon propozisyon Mr Speaker, se annou adjourn diskisyon lo la.  Nou a kit li lo latab isi, si zot Lalwa i permet.  Mon pa konnen.

E enn fwa ki OECD in anvoy son rapor e nou’n nobou konsilte,  fer rantre sa bann lamannman, koumsa nou ava meet sa deadline Zanvye 2020 pour nou al dan sa direksyon ki nou’n diskite.  Mersi Mr Speaker.

 

MR SPEAKER

Mersi Minis.  Bon i annan en propozisyon ki’n ganny fer par Minis, avan nou pran en vot lo merit e prensip.  Si zot dakor, nou ava pran en vot lo merit e prensip.  E apre nou ava adjourn ziska ler nou a ganny rapor OECD.  E apre nou ava pran sa lot bout pour nou rantre dan Staz Komite pour nou- Minis i ava partaz en pti pe konteni rapor avek nou.  E nou ava regarde ki mannyer nou pour go forward.  Onorab De Commarmond.

 

HON CHARLES DE COMMARMOND

Mr Speaker, mannyer mon pe konpran.  Si mon’n swiv Minis osi byen.  E ki mon pe ekout vibes lo tou lede kote.  Nou pe tonm dakor ki nou sispann diskisyon lo Bill e nou pa ni menm vot lo merit pour le moman.

Nou dir petet nou sispann diskisyon pour until further notice letan Minis i a’n pare pour re anmenn li.  So si i permet lo la.  Mon kapab move ki- a mon mon’n fini koze.  Fodre en dimoun ki mon krwar ki pa’n koze ti kapab move pour nou adjourn debate lo la.  Mersi.

 

MR SPEAKER

Mersi Onorab De Commarmond.  Bon i annan en propozisyon pour sispann deba la.  San menm ki nou pran en vot lo merit e prensip.  Eski i annan okenn Manm ki oule move Mosyon, pour adjournment of debateYes Onorab Lemiel.

 

HON SYLVANNE LEMIEL

Mersi Mr Speaker.  Mon pe move ki nou annan en adjournment of the debate.  Mersi.

MR SPEAKER

Dakor.  Okenn Manm ki segonde?  Yes Onorab Churchill Gill.

 

HON CHURCHILL GILL

Mersi Mr Speaker.  Mosyon i segonde.

 

MR SPEAKER

Mersi.  Bon Mosyon pour adjourn debate lo sa 2 Bill ki devan nou –  sa Corporate Social Responsibility Tax (Amendment) Bill avek Tourism Marketing Tax (Amendment) Bill.  Mosyon in ganny segonde.  Mon ava ganny desizyon Lasanble.  Yes Onorab De Commarmond.

 

HON CHARLES DE COMMARMOND

Nou kapab koz lo Mosyon?  Non zis en leklersisman Mr Speaker pour demann Minis, poudir si mon ganny li byen osi son lentansyon se ki tax SRC i pa pour- konmsi i pour take it ki sa i on hold e ki bann biznes ki tonm dan sa kategori i- pour le moman sa pa pour aplike.  Konmsi pa pour ganny pini lo la.

 

MR SPEAKER

Wi mon krwar prosesis ki nou pe fer la, se ler nou pe put sa on hold i pa sanz nanryen.  Sa ki pe go on, i kontinyen go on.  I pa sanz nanryen.  Ok?  E zis sa se bann- en nouvo lamannman ki’n ganny- ki pe ganny anmennen.  E by putting it on hold, keksoz i kontinyen parey i ete pour le moman.  Yes Onorab Pillay.

 

HON SEBASTIEN PILLAY

Mersi Mr Speaker.  Mr Speaker mon pe demann ou anba Order 91 pour sispann Standing Order pour allow sa Mosyon for adjournment pour aplik tou- pour tou lede Mosyon.

 

MR SPEAKER

Wi dakor.  Bon ler mon’n aksepte Mosyon, mon konnen ki without mansyonn Standing Orders and all that, lentansyon i se ki nou pe fer li dapre nou lareg, parey Minis in demann nou.  Se nou lareg, the House  rules i permet.  E nou lareg i permet.  E nou’n donn rezon osi tou akoz ki nou pe fer sa move,  e nou pe bouz sa Mosyon.  Yes Onorab William.

 

HON WAVEN WILLIAM

Mersi Mr Speaker.  Mr Speaker zis en pti leklersisman avek Minis.  Lefe ki i annan sa mansyon ki OECD i annan lentansyon fer sa revizyon,  eski Minis pe donn nou garanti poudir sa revizyon i pour permet li meet sa deadline ki i pe dir sa pour pran lefe Zanvye 2020?

So Minis, eski sa dele letan la –  mon pa konnen kan ki OECD pour finaliz zot revizyon.  Eski sa revizyon ki ou pe dir, pour meet sa deadline ki ou pe demande?  Ou pe dir pour ganny enplimante an 2020?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Wi pour sa 2 draft Bill ki devan nou, mon krwar nou pour kapab- apre ki nou resevwar rapor OECD lafen sa mwan.  E en delegasyon OECD pe vin Sesel mid-Oktob pour nou diskit lo sa rapor avek tou bann stakeholders pour nou annan en nouvo way forward.

Donk nou pour anmenn serten amannman, tenir an kont sa ki nou’n diskite depi bomaten lo la e apre midi.  pour vin amann sa 2 draft Bill.  Se pour kwa mon mwan pe rod en fason pour nou sispann, adjourn pour nou zis re kontinyen e nou kapab anmenn bann amannman neseser pour anmenn sa 2 draft Bill.  E mon krwar nou pour kapab meet sa deadline pour sa 2 draft Bill Zanvye 2020.  Mersi Mr Speaker.

 

MR SPEAKER

Mersi Minis.  Bon Mosyon in ganny move, in ganny segonde.  E ankor anba Standing Order 91, mon pe permet ki nou pe pran en sel vot pour nou sispann deba lo tou lede Bill until the Minister i sinyal nou ki in pare, pour nou kapab kontinyen deba.

Mon ava demann tou Manm ki an faver?  Okenn Manm ki kont?  Madanm Deputy Clerk.

 

MADAM DEPUTY CLERK

Mersi Mr Speaker.  Bonn apre midi a tous.  Mon’n rikord 13 Manm ki’n vot an faver.  E personn kont.  Mersi.

 

MR SPEAKER

Mersi.  Savedir Mosyon in ganny aprouve par Lasanble.  Deba lo sa 2 Bill in ganny sispann until further notice.  Bon avek sa mon ti a kontan remersi Minis Loustau-Lalanne avek son delegasyon parmi nou.  E nou ava osi eskiz ou Minis.

 

(MINISTER LOUSTAU- LALANNE WAS EXCUSED FROM THE HOUSE)

 

 

MR SPEAKER

Bon nou pour kontinyen nou travay.  E nou retourn lo Mosyon.  Mosyon ki ti ganny prezante par Onorab Regina Esparon yer.  E nou pour kontinyen deba.  Mon ava donn la parol Onorab Ahmed Afif.

 

HON AHMED AFIF

Mersi Mr Speaker.  Mr Speaker sa Mosyon ki devan nou, i tre kler, i tre evidan an se ki konsern peyman ki i annan pour fer avek kontrakter.  E retar ki i annan pour fer avek kontrakter.

Mr Speaker mon premye pwen.  Se ki sa Mosyon ki’n ganny anmenn i adres en problenm ki bokou bann pti kontrakter, dimoun ki pe travay i rankontre dan zot demars pour zot ganny zot lavi.

Mr Speaker premyerman ler sa bann dimoun ki prive i rod zot Kontra, problenm i komans la plen fwa.  Parske sa prose tender pour mwan ler mwan regard dan mon distrik.  E mon konnen bokou MNA osi in vwar dan zot distrik i pran tro bokou letan.

Ler pour aprouv en pti Kontra- e la nou pa pe koz bann par lao 150, 000 oubyen 750,000.  Menm bann ki kout 50, 000.  E taler mon a donn legzanp ki mannyer mwan mon’n vwar dan mon distrik.

2 legzanp.  Sa retar ki ganny mete pour en dimoun ganny en Kontra pour komanse, i deza met sa dimoun retar.  Akoz?

Akoz in plan son resours, son dimoun, petet son materyo akoz in tender.  I krwar in met en bon pri, i pe al gannyen.  E la deza si i pa gannyen, senpleman akoz pa ankor fer alokasyon.  Ou deza met sa dimoun an retar.

Dezyenmman.  Ler louvraz i komanse, ou ganny bann konplikasyon, in ganny son tender li.  Louvraz i komanse.  Ou ganny bann konplikasyon kot detay sa louvraz pa kler.  E prezan la sa dimoun i trouv li i bezwen depans plis ankor.

Trwazyenm problenm, se in fini fer son louvraz, i pran son invoice i depoz avek, par egzanp Gouvernman Lokal.  La ankor i pran en kantite letan pour peye.  E mon bezwen repet sa ki mon krwar en Onorab ti mansyonnen – si mon pa tronpe Onorab William ti dir.  Ki souvandfwa ler invoice i ariv kot Minister Finans.  Invoice i ganny peye.

Problenm pa kot Minister Finans dan lamazorite bann ka.  Problenm i avan i ariv kot Minister Finans.  E sela kot lide sa Mosyon, se pour demann Gouvernman pour fer sir ki sa bann retar ki ozordi, bokou dimoun pe trouv zot pe rankontre, i bezwen ganny rezourd.

Mr Speaker dan mon distrik, mon a donn- Mon ti dir mwan a donn 1 legzanp-2 legzanp.  Enn se dimoun, en Kontra anviron R40, 000 senpleman pour fer en access road ki pas kot detrwa lakaz pour ariv -i antyerman lo semen piblik.

Sa dimoun premyerman in pran en pe letan.  Mon krwar 4, 5 mwan avan in ganny son tender aprouve.  Finalman ler i ganny aprouve, zot dir ek li be komans louvraz.  E mon koman MNA dan mwan distrik par egzanp mon sey swiv.  Mon demande be proze kot pe ale?  E ler lo sa proze an partikilye mon met- mon pe demann bokou kestyon.

Gouvernman Lokal i tay deryer sa kontrakter, i dir be komanse!  Prezan sa boug i dir be, wi ok.  Mon mwan pa okouran sa diskisyon apre ki mon met presyon.  Be apre ki ou met presyon, sa boug i ganny demande komanse toudswit.  Be li i pa kapab komanse, akoz napa materyo.  Lapousyer ros, makadanm, keksoz koumsa ti manke.

Nou kontinyen met presyon, oli louvraz?  Napa sa kominikasyon.  La problenm.  Napa kominikasyon e sa kontrakter i ganny demande ale komanse.  Si ou pa komanse, nou pour tarde pey ou.  E pov dyab, bougla i vini, i komans kas en pti pe sa later rouz kot pour al fer semen.  Ler i kas later rouz, i napa makadanm, i pa kapab komans sa louvraz.  Lapli i tonbe, labou i al partou.  Ki labou pa ti pe ale avan.

Prezan i ganny blanmen li pov dyab.  Sa boug i ganny blanmen akoz personn pa konnen akoz i pa’n vin lo site apre ki in kas semen, in kas later rouz.

Mon osi mwan antre ladan.  Prezan mon sey rod li.  Ler mon ganny li, i dir ek mon zot in dir ek li ‘‘Komans sa louvraz’’.  I dir ek zot, ‘‘Mon pa kapab komanse akoz napa materyo, les mwan ganny materyo’’.  Be sa se bann pti keksoz koumsa ki Gouvernman Lokal ti kapab ede pour anpes en boug komans met larzan dan en proze, apre trouv li ganny blanmen pour en keksoz ki pa son lafot.

Solisyon?  Kominikasyon.  Senpleman kominikasyon, enform tou dimoun konsernen depi MNA, depi tou dimoun ki dan proze, napa makadanm an se moman.  Pa ekspekte louvraz komans toudswit.  E sa boug, sa kontrakter, i pa ti ava fer polisyon, i pa ti ava ariv tou sa bann zafer, si zis ti annan sa kominikasyon ek konprenezon ant li ek Gouvernman Lokal.

Ler in fini fer en louvraz, finalman pov dyab, 3 semenn pli tar in ganny materyo, in vini in fini fer.  Tou dimoun in vini in get louvraz, i paret ok.  Mon osi mon’n vwar sa louvraz i ok.  I anvoy son invoice kot Gouvernman Lokal.  I pas detrwa semenn.   Mwan mon’n satisfe.  Detrwa semenn pli tar zis par azar mon bat ek li, mon demann li.  Mon dir ‘‘be ou zafer i normal non?’’  I dir mwan non, mon pa ankor ganny peye’’.

Prezan mon sey fer en swivi pour etabli akoz sa boug pa’n ganny peye.  Ler finalman mon ganny konpran, zot dir ek li ‘be ou konnen ler ou’n fer sa semen la, ou’n kouver son bann bor ek later, be anba sa later i pa drwat sa beton’’.  Prezan i dir ‘be zot pa’n dir mwan sa. ‘’ I dir,’’ Non, non ou devret konnen poudir ler ou fer en semen, met son bann bor dibwa, fer sir i drwat, apre kouver.’’   La pov dyab i tourn ankor, i refer sa louvraz, i met sa bor drwat, i fini aranze.  I dir- e in pran li ankor en demi zournen.

Mr Speaker finalman ler mon get sa louvraz la.  Kantite letan in pran pour fer sa louvraz li menm ti devret en zour travay.  En zour travay, kas semen, met ou materyo, brouy ou siman, met ou feray, fer ou semen en zour, enkli son bor.  Ti en louvraz en zour sa.

Sa boug in pran li pros 6 semenn.  Pa ankor ganny peye li.  E finalman ler i ganny- mon mazinen la in ganny peye.  Sa proze depi Zanvye sa.  Mazinen la in ganny peye.  Mon santi pour mwan dan sa legzanp, sa kontrakter i en dimoun inosan.  Me lafason proze pe ganny manage-non sa problenm ki pe ganny souleve dan sa Mosyon, i pa sel problenm.  Problenm se lo nivo management en proze kot dan distrik pour mwan sipervizyon i pa a la oter.  E sa bann keksoz koumsa si nou pa adrese i fer ki sa bann pti kontrakter i perdi bokou.  Akoz zot depanse, zot met zot resours 2 kote, e larzan pa antre toudswit.  Ki vedir nou pe fer zot mizer.

2enm legzanp Mr Speaker.  En kontrakter an Desanm lannen pase.  Li i koup dibwa.  I ale in koup dibwa.  In fini fer son travay.  I anvoy invoice kot Departman Desanm.  Nou konnen Desanm toultan zot ferm Bidze en pe boner.  In tarde, i pa’n ganny peye.  I ariv Zanvye.  Zot dir li ‘‘be Bidze fek aprouve, pour gannyen an Fevriye.’  Prezan li tou fason pour serten rezon zot pa’n vwar son invoice Desanm.  I re donn zot ankor an Fevriye, R48, 000.

Be i espere an Mars, i pa ganny peye menm.  Louvraz Desanm ki’n ganny fer.  An Avril in vin vwar mwan.  Parske ti en louvraz dan mon distrik.  Prezan mon sey met presyon kot Gouvernman Lokal.  Mon demann zot, be akoz sa boug pa ankor ganny peye?  I pa en gro sonm.  I pa bann sonm ki ou bezwen al fer tou kalite tender.  Ti R40 ekek mil.  Akoz sa boug pa pe ganny peye?

E ler mon find out, mon’n koz ek zofisye laba.  Zot in perdi son invoice.  Ki arive.  I arive, me ankor kominikasyon.  Ou’n perdi invoice?  Kontakte sa boug, dir li nou pa vwar ou invoice.  Eski ou annan en kopi?  Oubyen si ou-petet i pa sitan organize.  Fer en lot invoice, nou a met en note dan file premye in perdi.  La 2enm invoice.  Nou pe al process.

Sa boug i bezwen antre dan biro, in ganny zoure li menm, akoz i pe-zot dir li i pe fatig zot.  Be i pa kapab pe fatig zot.  Parske in fer en louvraz pour zot.  Zot ki drwa li.

Mr Speaker se resaman detrwa semenn pase, ki sa boug i ganny peye pour louvraz ki’n ganny fer an Desanm 2018.  Nou pe koz 9 mwan pli tar.  Sa i en pti kontrakter, sa i en boug ki al ek en chainsaw i koup en pye dibwa.

Pour mwan mon pa oule blanm zis bann zofisye Gouvernman mon.  Mon pa oule blanm zis zot.  Akoz mon mon’n travay avek- parey sa 2 legzanp kot mon pe koze.  Mon’n koz ek sa bann dimoun ki project officers.  Mon’n koz ek zot mwan.  Zot aksepte zot annan serten tor.  Zot aksepte.

Me Mr Speaker, problenm se ki napa ase resours ki pe ganny mete.  E resours kalifye ki pe ganny mete pour planifye sa bann louvraz, siperviz sa bann louvraz e fer sir ki sa bann kontrakter i ganny peye a ler.  Se sa problenm.

Prezan ou annan detrwa sa bann project officers.  E la dan sa legzanp ti Local Government, ki ou pe met zot anba tro bokou presyon.  Zot menm ki- mon mazinen zot napa bokou accounting skills posibleman.  E zot ganny met anba en presyon pour fer tou keksoz lo dernyen minit.

Zot pa ganny letan planifye sa bann proze.  Zot ganny met anba presyon pour delivre a tan.  E finalman nanryen pa marse.  Kontrakter i soufer, kominote i soufer.  I pa ganny fer.  Minister Finans pe ganny blanmen.  Sa bann project officers pe ganny blanmen.  E finalman partou, tou dimoun in perdi.

So Mr Speaker sa Mosyon ki devan nou, I annan en kantite merit.  Pey sa bann kontrakter a ler.  Me mon mwan sizesyon, se pour fer plis ki sa.  Pour ou kapab pey dimoun a ler, ou bezwen annan ou en Planning Younit.  E ou bezwen annan ou resours dan sa bann Minister ki pe fer sa bann proze.  Ou bezwen annan ou resours ki sifizan.

Mon pa pe koz en kantite resours mwan.  Akoz mon, mwan krwar kot Local Government si ou annan ou 3, 4 enzenyer ki siperviz proze,  sizesyon, petet ou devret ankor annan 4 enzenyer ki siperviz sa bann proze.  Petet konbyen 4 enzenyer pour kout sa pei e Bidze?  Eski i en fortin?

Me mon garanti Mr Speaker, annan detrwa sa bann dimoun ekstra, pour fer enormeman diferans dan lafason proze i ganny enplimante.  E en ptigit training.  La mon pa pe koz ni recruit ankor dimoun.  En ptigit training pour sa bann dimoun ki dan kont e dan project management.  En ptigit training lo lafason ou manage en proze.  Ki mannyer ou kominike avek ou kliyan, avek ou project manager ek ou kontrakter.  Pour fer sir ki tou keksoz i smooth, i mars byen ki personn pa espere san konnen akoz.

Sa bann pti keksoz koumsa ki bann pti depans.  Me pour anmenn en gran benefis an term lafason proze i ganny fer, lafason dimoun i ganny peye.  E lafason dimoun i depans zot resours.  Pour mwan sa i lakle pour nou kapab amelyor sa sityasyon ki egziste.

E alor Mr Speaker mon pe parey mon’n dir, mwan mon kontan get keksoz dan en fason obzektif kot, non-selman nou pran konsiderasyon problenm ki sa bann zofisye dan Gouvernman i gannyen pour zot enplimant zot proze.  Me nou bezwen fer sir ki a lafen dizour kominote i satisfe, sa bann pti kontrakter ki zot osi zot pe kontribye dan sa Lekonomi pa soufer.  E ki tou sa bann proze ki nou menm ki vot lo la dan sa Lasanble i mars byen.  E tou dimoun i kapab ganny son lavi, e pei i kontinyen devlope.  Mersi Mr Speaker.

 

 

MR SPEAKER

Mersi Onorab Afif.  Onorab Clive Roucou.

 

HON CLIVE ROUCOU

Bonn apre midi Mr Speaker.  Bonn apre midi tou dimoun.  Bonn apre midi tou dimoun ki a lekout dan lakour, espesyalman bann pti kontrakter dan distrik Plaisance.

Mr Speaker Mosyon prezante par Onorab Esparon pe fer demann- en demann kler.  En Mosyon ki demann Ladministrasyon bann Minister ek Lazans Gouvernman pour pey bann kontrakter a tan letan zot termin zot Kontra avek satisfaksyon.  San bezwen atann en kantite mwan pour zot ganny zot larzan.

Me Mr Speaker i enportan pour note, ki sak fwa nou vwar en Mosyon sorti lo sa kote latab, ou kapab asire ki i en bon Mosyon.  E enn ki i annan pwa, enn ki i annan nou pep a ker.  Bann Mosyon ki vize lo ki mannyer nou kapab amelyor lavi e benefisye nou pep an zeneral.  E tou sa bann Mosyon ki nou anmennen e demonstre failure sa Gouvernman.

Alors mon anvi salye Onorab Esparon pour en tel Mosyon.  Mr Speaker parey mon toultan dir, kekfwa lo lot kote latab pa tro kontan ler mon dir sa.  Sak fwa ou vwar i annan en keksoz mal, oubyen keksoz i al mal dan sa pei, se Gouvernman anba Ladministrasyon Mr Faure ki responsab.

Mr Speaker, alors mon bann frer ek ser.  Fodre ki zot toultan mazinen ki sak fwa zot pas dan okenn difikilte koman bann pti kontrakter pour zot ganny zot lapey, apre ki zot termin zot Kontra.  Se Ladministrasyon Mr Faure ki responsab.

Mr Speaker, be mon anvi dir avek mon bann frer ek ser kontrakter.  Pa bezwen trakase, pa bezwen perdi lespwar.  Better days are coming!  Anba en Gouvernman LDS avek Onorab Ramkalawan e Onorab Afif dan latet zot ava vwar.

 

(APPLAUSE)

 

HON CLIVE ROUCOU

Mr Speaker, yer nou’n tann Onorab Esparon in donn en levantay problenm e prosedir konpleks, zis pour bann kontrakter ki’n termin zot travay pour zot ganny peye.  Bann prosedir ki Minister Finans in met an plas ki konpleks.  Kantite letan ki zot pran pour bann dimoun ganny peye, prosedir peyman e lezot ankor.

Tousala i annan en lefe direk lo nou bann kontrakter ler zot konplet sa bann travay, akoz i annan en kantite keksoz ki vin o bor konpleks- zot terminasyon zot travay.

Mr Speaker.  Mon’n fer li mwan devwar pour mon koz avek detrwa kontrakter dan mon distrik.  La mon mazin Claude, mon mazin Vincent, mon mazin Tony ki’n eksprim zot lakoler e difikilte pour zot ganny peye apre ki zot konplet zot travay avek sikse.

Zot in dir mwan ki birokrasi i pli gro problenm.  Kot zot fer letour dan diferan biro,  e perdi en kantite dan zot letan e monte desann san nanryen.

Zot in dir mwan kot napa striktir e prosedir konpreansiv ler zot fer demars pour zot ganny peye.  E alors zot kontinyen perdi letan.  Ki ler zot ganny peye…

 

(Technical problem)

 

HON CLIVE ROUCOU

Ki ler zot ganny-

 

(Interruption)

 

HON CLIVE ROUCOU

Mr Speaker ou kapab dir Onorab Loze silvouple aret malelve, toultan ou menm?

 

MR SPEAKER

Onorab Roucou kontinyen.

 

HON CLIVE ROUCOU

Fodre ou bwar en pe delo osi.  Mr Speaker ki ler zot ganny peye tar, i afekte zot cashflow.  Zot pa kapab ganny- zot pa kapab pey zot travayer a ler, e zot menm napa en saler pour zot anmenn dan lakour.

Zot osi konfirmen ki gous i bezwen ganny pase dan bann biro pour fasilit zot peyman.  Claude in menm dir mwan ki apre ki in konplet en pti bout rigol ki lavaler R4, 000, in pran li apepre 6 mwan pour li ganny peye.

Vincent in dir mon ki apre plizyer mwan ki’n monte desann, kot i pa ankor ganny son larzan, e finalman zot in dir li, son invoice in perdi.

Alor Mr Speaker, tousala se Ladministrasyon Mr Faure ki responsab.  Si ti annan okenn keksoz pozitiv an plas, sa ti ava fasilit prosedir pour sa bann kontrakter ganny peye.

Mr Speaker mon sizesyon, se ki mon swete ki sa Gouvernman si i annan ankor okenn lafors e sans direksyon,  silvouple met bann striktir pli fasil pour amelyor bann fasilite pour bann frer ek ser ganny peye, dan en dele letan pli kourt posib.  Menm si i en gro Kontra, menm si i en Kontra kakayonyont, zot a kapab ganny peye.

 

HON SANDY ARRISOL

(Off-Mic)

Donn li son larzan zot.

 

HON CLIVE ROUCOU

Mr Speaker, tou sa bann Lazans e Departman Gouvernman i konnen – i konnen ki i annan travay pe ganny antreprann.

Alors si i annan proper monitoring, si i annan proper evalyasyon, tousala i a kapab koz ek sa bann kontrakter, kot i annan koreksyon ki devret ganny fer, ki sa i a bezwen fasilit zot lapey.

Alor Mr Speaker pour konklir, mon anvi remind mon bann frer avek ser kontrakter.  Ki ler zot tarde oubyen pa ganny peye, apre ki zot in termin zot louvraz, se Ladministrasyon Msye Faure ki responsab.

Ler zot perdi letan dan bann biro Gouvernman pour zot lapey, ankor  se son Ladministrasyon ki responsab.

Ler zot bezwen donn gous pour zot ganny peye,  se son Ladministrasyon ki responsab.  Okenn koripsyon pour ganny Kontra ankor se son Ladministrasyon ki responsab.  Alors tou sa ki mal ki pase dan sa pei,  se Ladministrasyon Mr Faure avek US ki responsab.  Sel rekour ankor mon bann frer ek ser se 2020 ki nou pour vwar.  Alors mon bann frer ek ser pran kouraz.  Mr Speaker mon mwan pour siport sa Mosyon.  Mersi.

 

MR SPEAKER

Mersi Onorab Roucou.   Mon ava donn la parol Onorab Simon Gill.

 

 

HON SIMON GILL

Mersi Mr Speaker.  Bonn apre midi Mr Speaker.  Bonn apre midi tou Koleg Onorab.  E tou manm piblik ki pe ekout nou.

Mr Speaker Mosyon prezante par Onorab Esparon.  I en Mosyon ki ler ou analiz li dan son profonder, mon krwar ki i en Mosyon ki merit ganny konsidere.  E vwar dan sa menm sa sirkonstans ki bann propozisyon ki ou kapab anmenn devan pour nou Minister.  Bann diferan Minister, e an gro Gouvernman konsidere.

Mr Speaker mon swete taler letan Onorab Ferrari i ava pran la parol, i ava kapab li osi fer son kontribisyon, parey Onorab Afif in fer.

Mr Speaker ou konnen dan nou pei, dan Sesel, apre ki Prezidan Faure in anmenn en nouvo fason fer, or petet in koz lo en nouvo filozofi an term latransparans, rann kont e bon gouvernans.

Ou konnen sa 3 mo dan li menm li, lafason ki in ganny enterprete.  E lafason ki mazorite nou bann dimoun dan servis piblik in enterprete e met an aplikasyon.  Sa transparans, rann kont e bon gouvernans.  Dan li menm li mon krwar in kre serten problenm.

E la ozordi nou pe koz peyman pour bann pti kontrakter.   Onorab Afif mon ti ekspekte i al dan en pe plis detay lo process ki li osi i ti ede pour met an plas an sa ki konsern peyman pour bann diferan kontrakter ler zot in fer zot proze.

E parey ou’n komanse.  Menm avan ler proze i ganny award e egzekisyon swivi peyman.  Be Onorab Afif i kapab dir poudir dan son lepok ti annan retar Mr Speaker.  Me probableman i kapab argimante osi ki ti annan en pe lavites osi ek bann peyman.

Be sa i annan son leksplikasyon sa.  Pran li byen kalm, annou byen trankil, annou ekoute.  Epi nou ava konpran byen sa nouvo fenomenn ki nou pe fer fas avek ozordi.

Be Mr Speaker, dan lepok Onorab Afif ler i ti PS dan Gouvernman PS Finans, i ti annan en rol tre enportan dan sa Minister.  E ti met an mars diferan striktir, diferan lenstans e spesifikman bann prosedir tendering.  E prosedir Contract award prosedir peyman bann Kontra.  Ki arive dan serten moman kot Onorab Afif ti dan Gouvernman?  Nou ti vwar poudir pa neseserman kot bann zofisye dan Minister Finans a lepok ti bezwen al fer verifikasyon lo tou bann proze avan ler peyman ganny fer.

Zot ti fer bann spot visit oubyen bann selective visit pour kapab ganny en lesantiyon, ki mannyer sityasyon en zeneral e baz zot desizyon ki zeneralman keksoz i ok.

Be dan sa lepok osi Mr Speaker, lakantite volim proze.  Mon pe fer referans avek Onorab Afif.  Akoz i en dimoun ki nou kapab fer referans avek e i pour pran li pozitiv li.  Mon konnen sa.

Volim proze Mr Speaker dan son lepok ti tre minim.  E i pour dakor ek sa li.  I ti minim, volim proze.  E ozordi an 2019, menm 2an, 3an pase.  Volim proze in ogmante.

E lakantite kontrakter in osi ogmante.  Par konsekans in ogmante.  I annan serten bann proze ki ti ganny peye e process direkteman dan sak bann Minister.

Sa i en fe sa.  E in annan modifikasyon e sanzman.  Nou annan Tender Board ki son prosedir proze, evalyasyon, tendering, son lespas letan eksetera, avan ler i award ti pli kourt.  Sa i kler sa.  I annan serten bann Minister ki ti otorize pour zot zis rod approval apre ki zot selekte kontrakter pour zot al fer proze.

Byensir zot ti annan en Bidze, ankadreman Bidzeter ki zot ti travay ladan.  E tousala ti donn en kalite dinamik dan the whole project cycle.  E ozordi i diferan.  I diferan ozordi.

Mr Speaker i annan en serten moman an 2017, nou’n komans vwar lentrodiksyon bann pti proze.  Bann proze maintenance ki ganny process.  Dizon nou pran legzanp Local Government.  Zot fer process bann peyman, zot pey li san bezwen al aryer kot Minister Finans laba.

E sa i fer ki mazorite bann proze maintenance, oubyen bann maintenance Contract i kler ki i mars vit.  E nou napa problenm dan sa direksyon.  Napa problenm.

Nou annan problenm avek bann proze kominoter.  Son prosedir.  E ki mon pour dakor ki nou bezwen revwar sa prosedir.  Prosedir depi ler distrik i anvoy en lalis proze kot Minister Gouvernman Lokal.  Bann zofisye, bann project officer, nou ava apel zot.  Zot mont dan bann distrik, zot al fer bann vizit.  Zot definir scope sa proze e zot desann anba zot fer en costing.  Apre zot anvoy pour tender.  Serten zot anvoy pour tender byensir.  E i annan serten kategori zot pa anvoye pour tender.  Akoz i dan paramet sa Minister entern pour zot kapab pran en desizyon akoz son valer ki i koute, selekte kontrakter 3 zot gete, al koze, aranze.  I ale zot award.  E byensir apre ki zot swiv, en serten listwar sa bann diferan kontrakter.

Me dan en lot kategori ki zot bezwen anvoy kot en lot group dimoun, pour zot asize, analize, e deside ki mannyer pour ou award sa bann Kontra.  ou annan retar ankor la.

Finalman Kontra i award, travay i ganny fer.  Kontrakter i mont lo site, i donn ou en letan pour komanse.  Ou annan en letan pour fini.  Avek bann difikilte materyo, eksetera i annan bann retar ki i arive.  Ou annan ekstansyon proze.  Me finalman ou fini.

Ler ou fini file i anba kot Gouvernman Lokal.  Zot bezwen fer kopi bann dokiman dan sa file, anvoy kot Minister Finans pour fer process peyman.

Probableman i annan serten ki’n ganny bann peyman par enterim.  Bann interim payment.  Swa o komansman oubyen dan milye zot in ganny en pe larzan.  Me la ankor, i annan bann retar ki arive.  E ki nou bezwen rode ki mannyer nou rezourd sa problenm.

Mr Speaker i annan en dokiman ki Onorab Afif i konnen mon fer referans avek li ankor, sa ki nou apel ‘Procurement’.

E sa dokiman Mr Speaker, nou bezwen asize re dizer sa dokiman pour ki nou rann sa prosedir proze.  Depi komansman ziska son lafen bokou pli fasil, bokou pli senp kot nou elimin bann layer, bann staz ki pa neseser.  Oubyen ki koz bann retar dan lenplimantasyon bann proze.  Nou bezwen eliminen.

Lot keksoz ki mon krwar i ekstrememan enportan.  Ki mon prezimen Minister Finans pe ekout nou, akoz mazorite sa bann peyman i ganny fer santralman kot zot laba.

Ou’n donn Bidze bann Minister.  Bann Minister mazorite zot, zot annan en younit proze.  En younit ki responsab pour enplimant bann proze.  Kestyon ki poze?  Ki bann problenm, bann difikilte ki nou pour gannyen pour nou donn lotonomi sak bann Minister, pour zot servi zot provizyon bidzeter, process sa bann peyman ki bezwen ganny process ler bann kontrakter in ganny award en proze.  Proze pe enplimante, bann peyman i ganny request pour ki nou kapab akseler sa prosedir.

Ki bann difikilte?  Eske i koz en problenm pour donn lotonomi sak bann Minister ki i annan son proze pour zot internment process peyman pour bann kontrakter ki pe enplimant zot proze?  Tout an rekonesan ki ozordi mazorite sa bann accounting officer i annan relasyon direk avek Minister Finans or dan en nutshell zot anba payroll.  Oubyen zot lo payroll Minister Finans.

Eske pa kapab donn lotonomi sa bann Minister?  Par egzanp Local Government ki i annan en volim proze.  Kot pe responsab pour enplimant ziska 300 a 400 proze kominoter dan tou nou 25, 26 distrik par lannen.  Akoz nou pa donn zot sa lotonomi pour komanse e fini?

Epi ou, ou pran ou bann zofisye dan Minister Finans,  ou kapab ale al fer bann verifikasyon.  E santralman ou konnekte avek sa bann process.  Ou konnen ki pe pase a diferan moman dan sa bann diferan Minister kot i annan proze ki’n komanse.  E kot bann peyman parey mon dir, enterimer in ganny demande.  Peyman i bezwen ganny fer, e ziska finalman proze i fini e final payment i bezwen ganny fer lo proze.

Mon krwar dan sa fason;  dan sa fason, nou pour kapab elimin en kantite bann retar ki nou rankontre ler pour pey bann kontrakter ki’n fer en proze kot nou pa met retar ki pa neseser pour bann kontrakter ganny zot peyman.

Mr Speaker mon repran sa.  Mon ekspekte ki bann dimoun ki pe ekoute, i ava kapab note sa.  Nou bezwen devlop en sistenm kot dan sak bann Minister nou donn zot, zot lotonomi pour zot komans en proze, e fini en proze depi son award, depi son bann peyman enterimer, depi son peyman final.  Epi Minister Finans li i kapab anvoy son bann zofisye pour al fer bann verifikasyon.

Zot pour dir i annan risk.  Zot pour dir napa accountability, zot pour dir i annan lezot size dan bon gouvernans.  Nou kapab enplimant sa.   Mwan mon krwar ki nou kapab enplimante.  Nou donn responsabilite bann dimoun ki’n ganny prepare pour desarz sa bann responsabilite vizavi bann proze.

Onorab Afif taler mon’n tann li mansyonn enzenyer.  Be enzenyer i ava dan sa Minister.  Sa Minister i ava annan son enzenyer, son 2, 3, 4 enzenyer ki i ava pe fer bann verifikasyon lo son bann proze.  I sertifye poudir sa proze nou krwar i pe- in ganny fer byen.  In ariv son staz pour fer son peyman parey Kontra lo schedule of payment bann diferan staz in ganny fer.  E mon sertifye konmkwa ki i annord.  Me pa zis enzenyer.  I annan QS.  Zeneralman se QS ki pour fer sa bann sertifikasyon or bann payments certificate.  Bann QS ki pour fer sa.

E byensir i ava al dan son younit account, i ava process.  I process online.  E bann dimoun kot Minister Finans i ava pe trouve sa bann processing.  I ava pe trouve sa bann dokiman letan pe ganny prepare, pe ganny process pour peyman.

Ou’n donn en Minister son Bidze, les li administre son Bidze.  Si i annan okenn mankman ki pe arive par lefe ki zot online, zot konnekte,  zot annan integrated system.

Zot pour kapab fer bann verifikasyon e met bann cheques kot bann diferan popup i ava aparet pour alert zot.  La tel proze in kickstart.  La peyman in due.  Lot, lot eksetera.  Konplet the whole project cycle.  Mon krwar sa i fason.  Now lo sa pwen Mr Speaker mon’n koz taler lo sa nouvo filozofi transparency, accountability, good governance.

Transparency, accountability, good governance Mr Speaker, pa vedir ki nou konplik e ki nou met en ta layer ki pa neseser dan okenn process dan Gouvernman.  Pa vedir sa!

Pa vedir sa!  Transparency, accountability, good governance,  nou pe koz en Gouvernman ki efikas, en Gouvernman ki efektiv.  Pa kot serten bann zofisye bann teknisyen parey Onorab Ramkalawan i kontan dir ‘parey bann technocrate kot nou krwar fodre nou annan en ta layer pour nou dir nou efikas or pour nou dir nou pe pratik transparency, accountability, good governance. 

        Pa bezwen sa.  ‘Keep it simple’.  Yes keep it simple.  Sa i filozofi Prezidan Faure.  Keep it simple, ok?  Me problenm, se ki Mr Speaker, or challenge Mr Speaker se ki Prezidan Faure.  Malgre ki i Prezidan pei, me i pa dan sak sa bann Minister toulezour pe micro manage li.

Sa ki nou bezwen Mr Speaker.  Se en zenerasyon dan public service, en zenerasyon ki nou donn zot formasyon neseser pour zot kapab perform a sa legzizans nou lepok.

I annan byensir ki’n byen train.  Me mon krwar ki avek letan zot a vini.  Me antretan nou bezwen pe rode ki mannyer nou fer fas avek sa bann defi ki nou annan.

Mr Speaker i annan en lot eleman ki mon oule koz lo la.  Lo sa Mosyon ki Onorab Esparon in anmenn devan.  Lot eleman ki mon’n anmenn devan, Onorab Ferrari taler ou pour ganny sans koze.

E ou ava les mon trankil la.  Donn mon sans.  Akoz mikro Speaker in donn mwan ok.

Mr Speaker lot eleman ki mon bezwen koz lo la.  Se ki dan nou Gouvernman ozordi Mr Speaker.  Dan servis piblik nou annan nou- e tout en respectent tou dimoun.  Akoz ozordi mon pa pe fer okenn statement pour dir resign, non!  Mon pa pe fer sa.  E mon swete ki Onorab Ferrari oubyen lezot Onorab ki pour koze pa mansyonn sa ditou.

So Mr Speaker dan nou servis piblik ozordi.  Sa ki Onorab Ferrari i konn byen, sa ki Onorab Afif i konn byen e bann lezot Onorab.  Onorab Hoareau i konnen, se ki ozordi dan nou servis piblik nou annan nou en melanz affinité politik dan servis piblik ozordi.

E Mr Speaker sa i en fe.  Fodre pa nou anbet nou lekor, pour nou fer krwar poudir ozordi, sa ki zot apel ‘Ladministrasyon Prezidan Faure or Gouvernman Prezidan Faure la’ poudir i annan zis bann United Seychelles ki dan public service ozordi!  I pa korek!

 

(laughter)

 

HON SIMON GILL

Now! Now!  Now Mr Speaker.  Mr Speaker mon konnen sa enn ti pour provok en pe leksitasyon.  Ekspre mon’n met li dan milye mon lentervansyon.  Akoz mon ankor zis dan milye mon lentervansyon.  Mon pa ankor fini bouze.

(Interruption)    

 

HON SIMON GILL

Me Mr Speaker.  Mr Speaker nou napa zis United Seychelles dan public service ozordi!  Nou annan tou affinité politik dan public service ozordi.

E Mr Speaker ou konnen ki pe arive?  Les mon a dir ou laverite.  Nou annan nou bann politisyen ki eksit serten zot bann aktivis dan Gouvernman to hold the process!

 

(APPLAUSE)

 

HON SIMON GILL

La, la kot nou ete.  La, la kot nou ete ozordi.  Mon konnen osi sa statement ti pour provok leksitasyon sa.  But it’s reality! It is facts.  E Mr Speaker lot realite ki nou annan ozordi – lot realite ki nou annan,  koman en problenm i arive dan serten Departman, dan serten Lenstitisyon, bann politisyen ki an kontak avek sa bann dimoun, dan bann diferan lenstitisyon i eksit zot pour fer strike!

 

(APPLAUSE)

 

HON SIMON GILL

I eksit zot pour fer strike.  Epi zot reste par deryer rido zis pour zot kre en sityasyon enstab dan sa bann diferan Lenstitisyon, dan sa bann diferan Minister!  Politisyen ki pe fer, ki pe eksit serten sa bann dimoun dan public service pour zot fer bann denonsman, pour zot fer bann strike, pou zot come out e kre en destabilizasyon entern dan sa bann diferan Departman, dan sa bann diferan Minister.

Now!  Now, Mr Speaker.  Mr Speaker, ler mon’n dir sa.  ler mon’n dir sa-ler mon’n fer sa statement mon pour kalifye li.  Mon a kalifye li par dir ki sa pa vedir ki sa bann travayer napa en merit lo zot bann grievances ki zot annan.  Mon pe kalifye sa.  me ki arive?

Olye konsey sa bann travayer pour persuade zot bann grievance avek ladministrasyon, pouse pour zot vwar Minis, pouse pour zot vwar PS, oubyen zot CEO.  Non! Nou dir, non!  La sityasyon i bon.  Ale al deor, desann lo semen, fer bann plakar, manifeste, kre tansyon dan pei.  Sa i a donn nou lavantaz politik pour nou mont Statehouse an 2020!

 

(APPLAUSE)

 

HON SIMON GILL

Mr Speaker sa nou konn byen sa bann zwe.  E nou konnen lekel politisyen ki par deryer serten sa bann mouvman!

 

(APPLAUSE)

 

HON SIMON GILL

Mr Speaker mon pe dir sa.  Mon konnen ki pour arive taler.  Oubyen mon konnen ki pe- ki pour arive avan ler nou fini.  Lo social media zot pour trigger tou sa ki zot anvi trigger.  Zot pour fer tou zot bann denonsman e atake letan zot entervenir taler.

Mon konnen zot pour sey vin counter atak mwan.  Me Mr Speaker kot mon pe dir sa avek tou…

 

MR SPEAKER

Onorab, Onorab, Onorab.  I reste ou 5 minit.

 

HON SIMON GILL

Mon pe dir sa, avek tou konesans sityasyon, ki pe pase dan sa pei.  E Mr Speaker, lo sa kote latab.  Lo sa kote latab Mr Speaker, nou senpatiz avek tou kontrakter.  Nou senpatiz avek tou travayer.  Akoz deryer sak travayer i annan en fanmir.  Deryer sak kontrakter, i annan en fanmir. Deryer tou bann dimoun dan public service, nou konnen mazorite zot, zot annan en fanmir.  E nou siport zot, nou deryer zot.

E an plis ki sa Mr Speaker.  Malgre ki nou ganny gognarde ki nou’n dir leve, debourye.  Sa ki nou proud nou lekor.  Se ki dan sa filozofi leve, debourye.  I annan en kantite Seselwa in leve in debourye, zot in flourish.  E ozordi zot bann milyonner.  E i annan i multi-millionaire dan sa pei!  Msye travayer, dan sa pei i annan.

Pa zis bann msye ki fer tapaz.  Bann msye milyonner i annan dan Sesel ozordi.  E sanmenm sa bann msye milyonner ozordi ki pe fer marse sa pei.  Zot bann dimoun ki tre pozitiv.  Akoz zot rekonnet ki sa Gouvernman ki’n la. Se sanmenm sa Gouvernman ki’n gard sa stabilite e ki’n kre sa bann posibilite pou zot kapab fleri dan zot biznes, dan zot venture.

E ozordi i annan en kantite zot, si zot in ariv kot zot arive Mr Speaker, definitivman zot pa kapab felisit okenn lezot Gouvernman.  Zot bezwen felisite e remersi sa Gouvernman ki’n la.  Malgre avek tou son bann lenperfeksyon.  Me ki nou’n permet zot kapab egziste e kontinyen egziste e kontinyen fer zot biznes marse dan Sesel ozordi.

Mr Speaker, personn Mr Speaker, personn!  Dan sa Lasanble pa pour fer nou lo sa kote latab  la mars latet anba e kanmi pour sa ki nou’n fer dan sa pei!

 

(APPLAUSE)

 

HON SIMON GILL

Nou konnen- nou konnen ki nou pa’n en Gouvernman parfe Mr Speaker.  E napa en Gouvernman ki parfe dan sa pei.  Napa en Gouvernman ki parfe dan sa lemonn.

Ozordi.  Ozordi Lanmerik.  Lanmerik enn bann Gouvernman, enn bann Prezidan ki lemonn ozordi pe dir,  i annan en kantite bann practice, bann mannyer fer ki corrupt.

Pourtan zot prozekte zot lekor koman bann-en Gouvernman model.  L’Angleterre parey, La France parey.  So napa Gouvernman ki parfe.

Me tou Gouvernman Mr Speaker, tou Gouvernman Mr Speaker, espesyalman Gouvernman parti SPUP/SPPF/Lepep/United Seychelles i en Gouvernman ki krwar dan Seselwa.  E i en Gouvernman ki’n kre atraver bann lannen loportinite pour Seselwa, avek tou son bann defayans ki i annan.  Avek tou son lenperfeksyon ki’n kapab annan!

E ozordi Mosyon Onorab Esparon Mr Speaker.  I anmenn nou pour nou dir avek nou bann travayer dan public service, pour nou met zefor pour nou fer sir ki nou travay pour nou met an mars bann prosedir, pour nou akseler lakantite letan ki bann kontrakter i ganny peye.  Oubyen bann dele letan ki travayer pour li ganny peye lo son proze ler in fini fer son proze Mr Speaker.

E mon ava dir avek Onorab Esparon, ki son Mosyon i annan son merit.  Me nou bezwen vwar sa Mosyon dan en konteks lakantite travay ki i annan pour fer.  Sistenm ki i annan an plas.  Nou pe koz lo amelyorasyon striktir, amelyorasyon bann process e formasyon bann dimoun, donn lotonomi bann diferan Minister e kre bann younit pour kapab arive amelyor sa bann keksoz, sa bann striktir ki i annan an egzistans.

Dan sa konteks Mr Speaker.  Laport i reste ouver pour ler in ariv ler pour nou vot lo sa Mosyon.

Mr Speaker avek sa detrwa pti mo ki mon’n dir.  Mon a remersi ou pour donn mwan la parol pour koze.  Mersi bokou.

 

MR SPEAKER

Mersi Onorab Simon Gill.  Nou pour pran en break.  Nou pour retournen 4.05 pour nou kontinyen deba lo Mosyon.  Me avan nou leve, mon anvi enform tou bann Manm PAP ‘Pan- African Parliament’ ki nou pe meet deswit la dan Speaker’s Conference Room.   Dite, kafe pe ganny provided anler menm dan meeting ok.  Nou retournen 4.05.

 

(BREAK)

 

MR SPEAKER

Bon nou ava kontinyen nou travay deba lo Mosyon.  Mon annan 7 Manm lo lalis.  Nou pou sey fer mannyer pou nou fini annou fer mannyer pa rantre dan repetisyon.  E annou fer nou bann entervansyon ase kout nou ava regarde avek SBC si nou kapab ale petet ziska ver 5:15 – 5:30.  Avek en bi ki nou kapab fini sa Mosyon.  Mon a donn laparol Onorab Audrey Vidot.

 

HON AUDREY VIDOT

Mersi Mr Speaker, pou donn mwan laparol.  Bonn apre midi tou Manm onorab, tou manm piblik i pe ekout ki ale kout.  E zabitan Roche Caiman.

Mr Speaker tou Minister ek Lazans Gouvernman, i annan en sistenm an plas pou fer marse peyman pou sak travay ki bann kontrakter i fer avek satisfaksyon pou bann Minister, nou bann Lotorite.

Konman en ansyen Administrater Distrik refleksyon ki mon pe fer lo sa bann Minister ek Lazans atraver sa Mosyon, se eski sa sistenm peyman ki pe ganny servi i efektiv, eski tou prosedir i ganny byen respekte eski i pe ganny byen administre pou asire ki napa dokiman ki perdi oubyen mal plase?

E eski sa bann dokiman neseser pi ganny soumet a tan pou fasilit prosesis peyman?

        Mr Speaker dan deba yer mon’n tann serten Manm koze spesyal man for lo Gouvernman Lokal sa ki mon kapab dir se ki tou zofisye i konn tre byen prosedir pou fer marse dosye en kontrakter, pou fer sir ki i ganny ki i ganny byen fer e asire ki sa bann peyman kontrakter i kapab ganny peye azour.

        Mr Speaker sa ki sa Minister i bezwen ranforsi, se aksyon disipliner avek bann ki pa pe respekte sa bann prosedir e nou bann Administrater Distrik i bezwen pe kontinyelman ranforsi met zot rikord annord pou ki demen napa okenn kontrakter ou zofisye servis piblik kot son Minister ki met bann ki dosye kontrakter in priy dan zot distrik.

E bann Administrer Distrik i kapab servi son bann liv, kliyan pou rikord met azour ler ki bann kontrakter i depoz okenn zot bann dokiman.  E Minister i annan rikord ki zot ava vwar lo bann monthly feedback avek report weekly report ki bann DAs i fer pou ki zot a vwar en sistenm evolisyon e vwar ki mannyer bann travay i ganny rikorde dan distrik. Pou ki bann DAs pa vwar zot toultan pe ganny blanmen ki napa dokiman oubyen file pa’n desann.

E sa bann rapor i montre detay bann vizit bann rapor e piblik ki DA i vwar oubyen in fer, e spesyalman kot i konsern proze dan distrik, Mr Speaker.

Minister Finans i bezwen konnen lekel sa bann Minister ek Lazans Gouvernman, ki pe kontinyelman pe anvoy bann dokiman kontrakter e fer zot ganny peyman retar, e idantifye kote problenm in ete.  Ki fer sa bann peyman retar ozordi.

E apard sa bann refleksyon ki mon’n mansyonnen, mon’n site pli boner, eski sa bann Minister ek Lazans Gouvernman i annan Problenm kapasite resours imen pou fer bouze sa bann file peyman pou sa bann kontrakter.

Mr Speaker konversasyon ki mon’n gannyen avek serten bann kontrakter se ki menm si zot respekte deadline, pou soumet zot bann dokiman, zot resevwar peyman parfwa atraver zot labank, pa neseserman a ler.

E la mon pa pe koz zis pou bann kontrakter ki fer pti proze.  E bann lezot kontrakter ki avek Lazans Gouvernman.  Parfwa labank i peye swa le 30 oubyen le 31 lo zot kont, dernyen zour lemwan.  E lenformasyon ki zot in donn mon bann kontrakter se sa bann peyman i antre tar lo apre midi.  Ki fer difisil pou zot ganny peye, pou zot pey zot bann travayer a ler.  E konsern ki zot annan se ki sa bann travayer i annan komikman loan.  E lezot det ki zot bezwen adrese a ler si non zot vwar zot pe pey sir-sarz avek labank ou lezot idantite.

Mr Speaker enn bann konsern ki mon le met devan nou Lasanble se travayer bann kontrakter ki tarde kot osi parfwa pou pey saler zot bann travayer, e menm zot Trezyenm Mwan Saler.  Menm si Lazans Gouvernman in fer tou posib pou fer sir zot ganny peye a ler.  La lo sa not Mr Speaker mon pou servi menm konsey ki serten Manm Onorab  dan LDS ti fer resorti yer, dan zot lentervansyon kontrakter avek travayer zot bezwen konn zot drwa.  Espesyalman ler zot kot konsey legal.  Fer sir zot pa anpay zot dan bann sityasyon kot zot vwar zot konsey legal, ki zot al rode pou reprezant zot pa met zot ater e prezan al reprezant zot adverser.  Alors fer byen atansyon.

Mr Speaker i pa dan lentere okenn Minister ek Lazans Gouvernman pou anpes en kontrakter resevwar peyman son peyman a ler.   Me nou bann zofisye servis piblik i bezwen pli byen montre ki zot pe valoriz servis ki nou bann kontrakter i fer, espesyalman bann ki touzour fidel e pare pou mobilize fer travay bann ka dirzans.

Alors i tre enportan ki Minister Finans i ki idantifye sa bann defi ki serten sa bann Minister oubyen Lazans Gouvernman pe fer fas avek.  E pran bann nouvo mezir ki pou reasir nou bann kontrakter ki zot kapab resevwar zot peyman a ler e adres konsern zot bann travayer osi.

Dan menm laliny bann kontrakter ki resevwar zot peyman a ler zot osi zot merit valoriz travay ki zot ki zot bann travayer i fer.  E pey zot a ler zot osi, pa akoz enn i annan en problenm disiplin ki kontrakter pou pini li osi e pou pini lezot e pey zot dan le 4 le 5 le 6 mazinen i osi i annan son det pou li peye.

Mr Speaker bann Minister ek Lazans Gouvernman kot in annan zofisye ki’n absante pou bann rezon valab tel ki medikal, training, e lezot, i enportan ki provizyon i ganny fer pou ki bann prosesis peyman pou bann kontrakter i kontinyen bouze e file pa reste dan tirwar ki apre ozordi zot vwar zot pe ganny bokou kritik.  Fer zot louvraz.  E non pa dokiman i reste parey mon’n dir avek sa zofisye, e la pou detrwa zour e napa personn pou kapab sir e aprouv aprouve ki sa kontrakter i kapab resevwar son peyman.

Mr Speaker pou konklir, mon lans ankor en lapel avek Minister Finans, pou fer sa evalyasyon lo prosesis peyman bann kontrakter pou asire ki tou Lotorite konsernen, i-respekte tou bann prosedir e transfer peyman bann kontrakter a ler, ki bann labank a kapab permet bann kontrakter resevwar zot larzan e pey zot travayer e osi byen zot bann det lemwan.

E pou terminen mon pou felisit tou bann zofisye servis piblik ki pe kontinyelman fer zot travay e menm remersi tou bann kontrakter ki’n touzour fidel e fer byen zot travay avek sa larzan ki taxpayers i pey zot.  Mersi Mr Speaker.

 

MR SPEAKER

Mersi Onorab Vidot. Onorab Wavel Woodcock.

 

HON WAVEL WOODCOCK

Mersi Mr Speaker.  Mr speaker sa size kontrakter i ganny peye an retar i enn ki lepep Seselwa i kapab tir plizyer leson ladan.  Lo ki mannyer Gouvernman US, Egzekitiv i fonksyonnen.

Sesel nou annan nou en Gouvernman ki pa zanmen le pran son responsabilite.  En Gouvernman ki parey Pilat ki per pou pran bann desizyon serye.

En Gouvernman ki’n toultan sey blanm lezot pou son prop lenkonpetans, pou son bann failures.  Parey nou’n vwar Onorab Gill in fer pli boner, ler i sey fer nou krwar pou dir se LDS ki pre enstabilite dan nou pei,  par ankouraz bann protestasyon bann diferan letablisman Gouvernman.  Kan an realite Mr Speaker se zot se US ki pe kree enstabilite parey dan ka sa bann travayer SRC, Customs ki pe fer strike ozordi.  Zot ti kree enstabilite ler zot Minister e Gouvernman Msye Faure tou promet zot pou ogmant zot basic salary ek allowance sa bann staff.

E annou pa bliye Mr Speaker, pandan sa dernyen 2an, en kantite antite Gouvernman in vin devan in fer strike e fer protestasyon akoz sa bann saler sa bann pti saler ki zot ti pe gannyen akoz bann saler ki pa alaoter ki below standard. 

Annou pa bliye ners in fer strike, stevedores in fer strike, la staff SRC ek Customs pe fer strike.  Staff Air Seychelles, i fer strike, bann ler zot ti pe ganny met redundant zot ti ganny bann package ki pa ti vo nanryen.  Bann teachers ti fer strike pou sa bann hours e sa bann difikilte ki zot ti pe fer fas avek dan travay. PUC, ti fer strike, se LDS ki pe ensit sa?  Ouswa sa i mark sa, i lendikasyon ki lepep Seselwa i fristre avek Gouvernman US, SPPF, SPUP, Parti Lepep!

 

  (APPLAUSE)

 

HON WAVEL WOODCOCK

Mr Speaker ozordi nou annan en Gouvernman ki kontinyen fail.  Akoz mon dir sa Mr Speaker?  I kler ki Gouvernman US in fail kot i konsern peyman ban kontrakter lokal ki’n konplet en proze.  Zot in fail kot i konsern peyman bann kontrakter ki’n termin en Kontra Gouvernman.  E i enportan en kote Mr Speaker ki menm en senp pti travay ki zot in fer pou Gouvernman, plizyer Kontrakter i bezwen esper en leternite pou zot ganny zot peyman.  Sa i sirtou bann pti kontrakter License No.3 e osi ban kontrakter License No.2.

Ozordi i annan plizyer kontrakter ki’n faid.  Ouswa zot andet.  Zot an retar avek plizyer peyman akoz defayans Gouvernman pou pey zot dan en dele letan ki rezonnab.

Mr Speaker mon konn kontrakter ki’n esper pou plizyer mwan.  Menm plis ki 1an pou ganny pey avek Gouvernman.  Mr Speaker sa i pa akseptab e Gouvernman napa en leskiz pou tarde pey kontrakter ki’n fini en louvraz ouswa termin en Kontra, parey Onorab Esparon in dir avek satisfaksyon.

Ler en Kontra in fini ganny awarded avek en kontrakter, kou sa proze in fini determinen.  E sa kontrakter pou ganny peye dapre son bid, peyman en kontrakter pou okenn proze i fini ganny determinen ler sa kontrakter i ganny awarded sa Kontra.

Lobligasyon sa kontrakter, se pou termin son proze dapre Lagreman apre ganny peye parey in ganny defini dan Kontra.

Alor mon pa vwar ki problenm Gouvernman pou pey en Kontrakter ki’n konplet en louvraz.

Mr Speaker i annan en kalite politik sal, ki Gouvernman Parti Lepep/ US pe sey fer pou anbet bann kontrakter e lepep Seselwa.  Ler zot pe ganny retar pou pey bann Kontrakter, ki dan mon lopinyon e a plizyer repriz zot pe fer par ekspre,  ou konnen ki zot fer Mr Speaker zot dir bann Kontrakter ki LDS pa’n aprouv Bidze pou pey zot!  Sa i mansonzer Mr Speaker.  Konmsi Onorab Gill.

Ozordi Mr Speaker, nou annan nou en sistenm bidzeter ki apel PPBB, Programme Performance Based Budgeting.  Bidze pou tou Minister e Lazans dan Gouvernman ‘i ganny prepare par Egzekitiv. Notaman Minis Finans.  E aprouve par Lasanble Nasyonal tou le lafen lannen pou nouvo lannen ki pe vini.

Parey lafen lannen 2018, Lasanble ti aprouv Bidze pou forecasted expenditure, pou 2019.  Ki ti enkli tou proze Kapital pou tou Minister pou sa lannen e en Bidze pou Gouvernman Lokal fer proze dan sak distrik Mahé, Praslin avek La Digue.

I kler Mr Speaker ki sa Gouvernman US pe mislead nou bann kontrakter.  Larzan pou tou proze 2019 i deza dan Bidze 2019.  E napa okenn leskiz pou pa pey bann kontrakter er zot fini zot louvraz.  Ler sa kontrakter i fini zot Kontra silvouple Gouvernman US pey zot! Ase net nou bann frer an retar.

Mr Speaker a plizyer repriz mon’n antann Gouvernman Lokal konplet kontrakter, mon bezwen admet i vre ki i annan serten kontrakter ki pa serye. Parey en legzanp proze daycare Grand Anse Praslin ki ti sipoze fini depi Oktob lannen pase,  Gouvernman Lokal ti’n pey davans anviron R900mil en kontrakter pou komans sa proze.  Me sa kontrakter pa’n onor Lagreman Kontra e afen dizour Gouvernman Lokal ti bezwen cancel sa Kontra e retender sa proze.

Me Mr Speaker i enportan osi note e fodre note ki Gouvernman osi pe ede kree en serk visye.  Mon ava eksplik sa.  Pou okenn konpannyen kapab fonksyonnen, i bezwen cash flow i bezwen larzan pou re envestir dan son lakonpannyen e i bezwen larzan pou son operational cost, peyman travayer, materyo, inventory eksetera.

Ou pa kapab konpar en lakonpannyen klas 1 avek en lakonpannyen klas 2, ek 3.  Bann gro lakonpannyen zot deza annan ase larzan.  Zot annan sa cashflow pou esper plizyer mwan avan zot ganny peye ek Gouvernman.  Toudmenm deza zot pe ganny pe ganny bann Kontra ki vo plizyer milyon Roupi.

Onorab Gill ankor enn fwa Mr Speaker in dir, ki US in fer en bann biznesmenn vin milyonner Sesel.  Wi Mr Speaker zot in fer en bann biznesmenn vin milyonner Sesel.  E sa i sirtou zot bann dalon ki’n ganny soutire, Mr Speaker e parey Onorab Gill osi mon prezimen i enn parmi sa bann milyonner Sesel ozordi.  Menm Mr Speaker-

 

MR SPEAKER

Onorab, Onorab.

 

HON WAVEL WOODCOCK

Mr Speaker, ok mon retract sa bout.

 

MR SPEAKER

Mersi.

 

HON WAVEL WOODCOCK

Me Mr Speaker, enn d zot bann dalon ozordi in vin milyonner, me sa bann pti kontrakter zot, zot bezwen esper en leternite. Zot bezwen struggle e se pou plizyer mwan menm lannen ler zot ganny zot ti larzan pou zot kapab run zot biznes pey zot travayer pou zot kapab ganny en bouse manze pou sonny zot fanmir.

Mr Speaker bann pti kontrakter klas 3 e menm 2 zot pou vwar li difisil e zot vwar li difisil pou survive, san larzan.  Sirtou ler bann peyman pe tarde pou rantre.  Zot bezwen zot peyman avek Gouvernman a en pli kour dele letan posib kouver zot bann depans, zot bann kou.  Pou pey zot bann travayer e sirtou pou annan sa cashflow pou konmans en lot proze.

Parfwa ki arive ler Gouvernman i tarde pey zot Mr Speaker ki malere, ki vreman unfortunate zot vwar zot andet.  E zot struggle finansyerman pou kouver zot bann depans, e ler en lot dimoun i pey zot davans ouswa i pey zot, pou konmans en lot proze ki zot fer olye konmans sa proze, proze sa dimoun zot servi sa larzan pou pey zot bann lezot det pou pey zot travayer pou pey zot bann suppliers, pou bann lezot arrears ki zot annan, an atandan  ki zot ankor pe pey ki zot ankor pe esper Gouvernman pou pey zot sa ki Gouvernman in drwa zot.  E sa i tarde vini Mr Speaker e i vreman, vreman mal.

Mr Speaker i annan bann ka, kot menm sa bann menm kontrakter zot bid pou en lot proze Gouvernman.  E ler zot ganny sa proze, en sonm larzan i ganny disburse pou konmans sa nouvo proze, olye konmans sa nouvo proze sa bann kontrakter zot servi sa larzan pou kouver kou sa proze avan.  Akoz zot pa ankor ganny resevwar larzan ki Gouvernman in drwa zot pou proze ki zot in konplete.

Gouvernman i bezwen ankouraz bann pti kontrakter.  Fodre pey zot on time.  Pa bezwen fer zot espere pou plizyer mwan. Zot bezwen zot larzan pou zot viv e pou zot reenvestir dan zot biznes.  Mon pa ganny en konpran akoz ki Gouvernman pe tarde pou pey menm bann pti Kontra pou bann pti proze ki’n konplete.  Kwa ki difisil ladan Mr Speaker?  Si en pti kakayonyotn zot pa kapab pey a tan.  Me bann gro sonm ki zot drwa bann pli gro konpannyen.

No wonder Mr Speaker ki plizyer kontrakter ozordi dan nou pei Sesel pe struggle.  E loter se Gouvernman US e Gouvernman Faure Mr Speaker pa lot.  Se zot ki’n fail sa bann kontrakter.

En lot konsern Mr Speaker, se sa zafer sa zafer zak.  Konmsi Onorab Loizeau.  Pou en kontrakter ganny son peyman pli vit i bezwen pey gous, ouswa en koko.  Mr Speaker nou bezwen elimin pey gous dan Gouvernman.  Plizyer Kontrakter in rakont mon dan lepase ki mannyer zot in bezwen pey gous pou zot peyman ganny process pli vitman.  Si zot pa peye, zot file i asize lo desk i ganny lapousyer lo la.

Mr Speaker i malere e i sagrinan ki en Kontrakter ki’n transpire pou konplet en Kontra ki deserve peyman e rekonpans pou son travay, pou li ganny peye i bezwen pey en boug gous pou li ganny son dues. 

Onorab Pillay i konn sa tre byen li.   Mr Speaker, sa bann kalite dimoun ki blackmail zot prosen ouswa ki pe demann gous, zot parey sise, lo reken!  Zot atas  zot avek Gouvernman apre zot sis nou bann frer ek ser.  E anba en Gouvernman LDS sa bann keksoz pou arete !  Nou pa pou toler sa bann kalite magouy dan nou pei.  Napa personn ki pou profit lo lasyer son prosen anba en Gouvernman LDS.  Nou pa pou tolere sa bann keksoz !

Mr Speaker, an konklizyon anba Gouvernman US – ‘’US’’ parey zot dir zot menm, ‘’Together’’ dan sa 3an parkour ou 6enm Lasanble nou’n montre lepep Seselwa ki sa Gouvernman Parti Lepep/ US vre i en Gouvernman us.  Nou’n montre ki vre, vre mon dakor zot en Gouvernman ‘’US’’ Mr Speaker.  Akoz zot in get zis zot lentere.  Pa mwan ki ti dir Mr Speaker, Onorab Gill ki ti dir.  Zot in swazir pou pini bann kontrakter pou zot byen politik, pou zot azanda politik. Mr Speaker mon bezwen dir zot fer onte!

La ozordi i le 25 Septanm, pa Novanm.  I annan proze distrik e nou bann Manm Lasanble LDS in submit depi 2017, ki faz enn in konplete an 2018 e la lannen 2019 pe koule.

2enm faz proze dan nou distrik pa ankor konmanse.  Mon servi mon distrik konman legzanp,  Mr Speaker.  Distrik Grand Anse Praslin tou le lannen mwan ek DA nou soumet nou lalis proze avek Gouvernman Lokal byen avan lannen fini pou nouvo lannen ki pe vini.

E zot in fini mazinen Mr Speaker zot in, fini demann mwan lalis proze pou 2020 e mon’n fini mon ek DA nou’n fini soumet lalis avek Minister Gouvernman Lokal avek PS Gouvernman Lokal.  Me yer proze ki sipoze 2019 napa preski enn ki’n konmanse.

La nou pe apros Desanm, menm apre plizyer korespondans en meeting Mr Speaker, ek Minister, ek PS Gouvernman Lokal, napa en proze 2019 ki’n konmanse dan mon distrik.

A lenspeksyon de semenn ki’n ganny grate pou met beton lo la.   Tou bann MNA, LDS pe fer fas avek sa difikilte.  Mon santi ki bann distrik ki LDS i an mazorite pe ganny pini!  Sa menm sa ki nou apel ‘’United Seychelles ‘’Mr Speaker.

 

(laughter)

 

HON WAVEL WOODCOCK

Mr Speaker, sa ki Mr Faure pe anmennen Sesel se pa en ‘United Seychelles’ me en ‘Divided Seychelles.’  En Sesel kot menm en MNA i ganny pini akoz son lapartenans politik.  As long ki zot, zot bann happy people zot ok Mr Speaker.

Zis mazinen Mr Speaker, resaman nou’n vwar ozordi dan en Sesel kot proze lapes i ganny fer dan zis en distrik, akoz lot distrik i lopozisyon.  Sanmenm sa ki nou apel United Seychelles, kot Prezidan Faure pe get zis bann ki avek li.  Fodre aret zwe ek sa pep annou travay pou konstrir nou pei.  Arete avek sa zafer ‘’ek nou pa ek nou.’’  Pa detri nou pei.  Annou rekonpans bann ki merite.   Apre tou,  parey Mr Faure i kontan dir, e nou osi nou dir sa Sesel i pli gran i pli gran ki nou tou.  Annou pran ka avek nou pep annou pran ka avek sa bann Kontrakter, annou pran ka avek nou travayer, annou pran ka avek tou dimoun, tou Seselwa !  Mersi Mr Speaker.

 

MR SPEAKER

Mersi Onorab Woodcock.  Mon ava donn laparol Onorab Noline Sophola.

 

HON NOLINE SOPHOLA

Mersi Mr Speaker.  Mersi Mr Speaker pou donn mon laparol.  Mon pa pou tro long.  Mr Speaker, sa Mosyon i annan son merit.  Akoz larealite i la devan nou.  Nou konnen ki i annan en pe kontrakter ki pe pas dan en pe difikilte peyman.

Mon distrik i pa en leksepsyon, mon dir serten kontrakter osi pe rankontre menm difikilte.  Mr Speaker me selman i tre malere pou dir ki i annan serten Manm ki’n fer lentervansyon ki’n gat valer sa bon Mosyon, avek bon avek bann komanter inapropriye.  Me Mr Speaker, be fodre ki pep Seselwa i tenir byen kont lo serten pwen ki’n ganny dir.  Zis ou’n amenn parey zot in dir sa bann problenm pe arive gras a US. 

Eski zot oule fer nou krwar ki dan tou sa bann biro i annan zis US?  Mon dir pep Seselwa zize zot menm. Mr Speaker parey Mosyon i dir pey bann Kontrakter a tan letan zot termin en Kontra avek satisfaksyon.  San bezwen ant atann en kantite en kantite mwan pou ganny zot larzan.  Me sa ki enportan isi apre lenspeksyon proze rezilta, satisfezan, e kontrakter in soumet tou dokiman neseser mon pa vwar rezon akoz ki i bezwen annan tou sa dele dan peyman.  Sa mo ‘satisfaksyon’ i sa mo kle ki pou fer sa Kontrakter kalifye pou li ganny peye.

Mr Speaker sa bann Kontrakter tou dimoun i konnen ki zot bezwen depanse aste materyo pou travay.  Zot bezwen pey travayer, e san tenir kont sa 5poursan oubyen 15poursan retention ki i annan.  E an plis i annan bann depans enprevi.

Sa sityasyon retar dan peyman,  i pa pou zis en kategori kontrakter. Parey souvan i ganny dir bann pti kontrakter.  Mwan mon dir ki bann gro kontrakter mwayen kontrakter zot tou zot osi zot depanse, zot tou zot bezwen zot larzan.  Akoz zot osi si zot ti’n delivre avek satisfaksyon, zot bezwen pe ganny peye.

Mr Speaker mon kont ki sa bann retar pe arive, i pa devret pe arive.  Mr Speaker me dan en lot kote, bann kontrakter osi zot bezwen konn zot drwa anba Lalwa.   I pli enportan konnen ki ekrir dan zot Kontra lir byen, avan siny nenport dokiman.  Akoz? Si ou konman en Kontrakter ou pa respekte kontenir ou Kontra, i an aksyon ki ganny pran avek ou.   I annan en penalti pou okenn retar ki arive, e sa penalti i parfwa bokou lo zot.

Alor i enportan ki ou  osi ou met ou kondisyon an ekrir ki si ou pa ganny peye a tan ki aksyon ki ou pou bezwen pran.  Ler sa Lagreman in ganny sinyen tou dimoun konsernan i a bezwen respekte sa ki in ekrir ladan.

Mr Speaker pou terminen mon pou demande ki tou Minister ek lazans Gouvernman i revwar prosedir donn Kontra ek peyman ki an plas.  Bann kontrakter met tou zot kondisyon non pa verbal.  E asire ki i ganny sinyen par tou dimoun konsernen.

Mr Speaker prensip sa Gouvernman ki la a o pouvwar i ankouraz tou dimoun san leksepsyon pou leve, debourye e valoriz travay dir.

Alor mon demande ki tou bann kontrakter ki annan aryeraz zot ganny peye. E ki pou lefitir sa retar dan prosedir donn Kontra e peyman a amelyore pou benefis tou dimoun.  Tou kontrakter mon dir zot kontinyen avek zot bon travay akoz pei i bezwen zot.  Mersi Mr Speaker.

 

MR SPEAKER

Mersi Onorab Sophola.  Onorab Wilbert Herminie.

 

HON WILBERT HERMINIE

Mersi Mr Speaker.  Bonn apre midi tou bann koleg Onorab.  E tou dimoun a lekout.

Avan mon konmans mon lentervansyon, mon anvi remersi tou bann koleg e lezot zofisye Gouvernman ki pe travay dan departman ki pe fer sa travay nob ki pe fer sir ki peyman i ariv on time parey in ganny fer dan Kontra ki usually 28 zour.

I annan bokou bann travayer ki pe fer zot louvraz dan en fason zis e ki pe ganny e proze pe ganny delivre on time.  Me malere e mon ti a kontan lot kot osi i annan serten Onorab ki’n kestyonn zot professionalism par dir ki zot in pran gous.  Fotespere ki mon bann ko frer pe ekoute e zot pe ekout atantivman.

Mr Speaker Mosyon anmenn par Onorab Esparon i annan enn ki annan serten merit ladan.  Me kot in arive avek sa Mosyon i annan tro bokou politik ki ganny fer e sa i bokou afekte lide par deryer sa Mosyon.  Mosyon ti pou anmenn kit benefis pou bann kontrakter, me i ganny touye par bann largiman banal ki serten Onorab i vin avek.

Mr Speaker annou pas en pe dan prosedir peyman ki mannyer i ete konmela.  Prosedir peyman ki mannyer i ete i depan lo groser proze.  I annan bann pti proze ki sa peyman i pas sitan vit ki napa bokou difikilte.

Me pou bann gro proze bann ki par lao R150 mil sa i annan en prosedir ki ganny etablir par Minister Finans e Procurement Oversight Unit.  Ler proze i ganny inisye en kontrakter depan lo son kapasite finansyel i kapab demande pou li pran en advance payment sa advance payment usually i 20poursan pou Kontra e sa prosedir li i sitan vit ki napa bokou, bokou step ki annan avek.

Me ler proze pe ganny fer, dapre scope of work ki ganny etablir dan Kontra, i annan bann diferan prosedir ki pas ladan pou ler peyman i ganny fer.  Usually i annan 3 step pou peyman.  I annan son first installment, second avek son final ler proze i fini.

  bann Lotorite Konsernen i annord.  E la sa project officer avek sa kontrakter i al lo sit pou verifye si proze in ganny fer parey plan e scope of work e Kontra.

Dan sa letan kontrakter avek sa zofisye project officer dan sa departman ou Minister zot mezir sa devlopman ki annan lo sit ansanm.  E si zot in agree lo kantite devlopman ki’n arive akoz dan proze pa tou keksoz ki fix i pou annan evalyasyon e si miray sipoze 12 met i kapab 11.5 e tousala i form par dan evalyasyon sa project officer i fer lo site.  Ler i tourn dan lofis prezan i bezwen re adjust sa invoice sa kontrakter in anmennen.  E sa i pran letan sanmenm sa i donn sa dele letan 28 zour, i pran letan kot prezan kontrakter i bezwen adjust sa en pe son invoice according to as has been lo site.  Sa i premye prosedir.

2enm ler tou keksoz in ganny agree, sa project officer i fer sir ki bann dokiman relevan i ganny antase avek sa peyman tel ki approval Procurement.  Sa i enn.

E osi i annan bid sa proze in ganny aprouve dan Bidze.  E i fer sir ki tou sa bann dokiman i al kot sa financial controller.

        Once sa prosedir i ganny konplete sa file i ganny anvoye kot dan Minister Finans zot annan sa unit proze ki verifye ki verifye ki si tou sa bann dokiman i annord e ki proze e portre in ganny tire e ki vre ki sa kantite louvraz in ganny fer i parey ki sa project officer in ganny fer.  Epi sa file i ganny anvoye kot Trezor pou peye.

Mr Speaker dan sa bann prosedir ki mon’n eksplike la kote ki United Seychelles i antre?  Kot mon vwar ki bann Zofisye Gouvernman pe fer zot louvraz dan en fason senp, swiv lareg ki’n ganny mete pou zot kapab process sa peyman.  Be nou mon pa vwar kote ladministrasyon Danny Faure i antre ladan.

SNP, LDS, pe fer nou krwar ki zot, si zot ti o pouvwar zot ti pou fer pli byen.  Me selman pa bliye ki zot Vis-Prezidan i fek dir nou ki i kapab fer en semen dan en zour.

 

(APPLAUSE)

 

HON WILBERT HERMINIE

Sa vre zot lo learner  menm sa enn.  Mr Speaker i byen note, i byen note ki prosedir vre i annan serten step ki i annan retar ladan, me sa nou ti devret demande ki Minister Finans i fer lodit lo sa bann step, pou fer en fason pli fasil pou eliminate bann keksoz ki repetitiv.  I annan keksoz, keksoz ki’n deza ganny fer par sa departman ki reganny fer kot Minister Finans.  Sa bann step koumsa nou kapab tire sa ti devret en propozisyon ki loter Mosyon ti devret met dan son konklizyon.

En lot keksoz ki zot ti kapab fer pou amelyor fason ki proze li menm i ganny fer, peyman i ganny fer, se pou fasilit peyman online.  Sa ki proze pa bezwen ganny fer peyman pa bezwen ganny fer par file ki tou keksoz i digitalize.  Sa nou bezwen aprouv amann Lalwa dan sistenm digital signature, pou fer li posib ki nou kapab sinyen online e sa i ganny rekonnet dan Lalwa.

Sa i en fason bann propozisyon ki kapab ganny mete pou improve sistenm peyman e fast track li.  E sa ki ti en propozisyon ki nou devret mete konman bann Onorab serye, non pa zis blanm ladministrasyon Prezidan Danny Faure.

Akoz tou keksoz i nou bann teknisyen ki travay.  Ozordi i enportan note ankor, zot in ganny dir ki zot pran gous.  Zot tou zot in ganny met dan menm sak sa se pa bann Onorab LDS i dir zot, zot in koronpi.

I enportan note ki nou lo kote United Seychelles, nou tanzantan pe reach out avek nou bann kontrakter.  Nou ki met sa bann Scheme ‘’Leve Debourye.’’  Wi i annan issue i annan problenm. Me nou pe sey find solisyon par diskite, pa par montre ledwa.  Nou tou nou annan nou travay pou fer e nou bezwen fer li byen dan en fason nob, e fer sir ki sa Kontrakter i osi i ganny son peyman on time. 

Bokou keksoz i kapab ganny fer, pou amelyor peyman ki kontrakter i kapab ganny son peyman boner.  I annan keksoz ki evantyalite ki arive lo teren ki sa teknisyen ni menm sa kontrakter pa kapab idantifye beforehand. 

E sa i vin dan sa sans ki fer ki serten peyman i vin an retar.  Pa tou peyman ki ganny an retar.  Si i annan varyasyon definitivman peyman pou vin an retar.  Akoz ou bezwen re quantify sa evalyasyon e refer sa peyman.  E sa napa nanryen pou fer avek Ladministrasyon Prezidan Faure.  Sa i zis realite lavi lo teren.

Me mon bann frer ek ser annou pa ganny anbete par bann zoli parol avek bann zoli parol kot zot pe dir nou zot pe vin avek zot baton mazik ankor, pou fer en semen dan en zour.

Nou’n tande sa kalite politik bonmarse avan.  Zot me pe vin ankor avek sa same politik ankor pou fer nou krwar ki zot, zot kapab fer keksoz diferan ki nou wi zot kapab fer keksoz diferan ki nou.   Se sel keksoz ki zot pou fer pli byen se zis kritike.  Fer dezord san vin avek okenn, okenn propozisyon konkret ki pou ed loter Mosyon fer son konklizyon pou kapab anvoy kot ladministrasyon Danny Faure pou donn li bann bon konsey mannyer pou improve, bann peyman pou bann kontrakter san pas letan pou rakont bann zistwar lalang mansonzer bann keksoz ki zot dir zot in tande ki napa okenn laprev e zot pa kapab substantiate .

Mr Speaker avek sa de mo mon pou dir mon bann pti kontrakter dan mon distrik, pou pasyante espere ladministrasyon Danny Faure pe travay pou improve lafason ki peyman i ganny fer dan bann Minister.  Mersi.

 

(APPLAUSE)

 

MR SPEAKER

Mersi Onorab.  Bon annou zis rantre en pti pe respe.  MR Faure son non i ganny adrese konman MR Faure oubyen swa Prezidan Faure.  Ok annou zis montre en pti pe respe i annan en tit.  Annou fer sa respe marse e de kote.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker Mosyon ki devan nou i en Mosyon ki serye, i en Mosyon ki pe tous en size ki byensir i konsern bann fanmir akoz apre tou en kontrakter i en dimoun ki osi pe siport bokou plis dimoun.

E Onorab Esparon in anmenn sa Mosyon, parski i en problenm reel.  I en problenm ki reel e i anvi trouv en solisyon.  E i pe demande ki en demann serye i ganny fer pou ki ladministrasyon ek bann Lazans Gouvernman, i pey bann kontrakter a tan.

Letan mon’n ekout bann diferan entervenan, i kler ki pou dir sa problenm i reel.  Tou dimoun ki’n koze dan nenport ki fason ki zot in fer li, zot in montre ki pou dir i annan en problenm e ki sa problenm fodre i ganny adrese.

Ofet Mr Speaker letan mwan mon regard a problenm, mon pa vwar kote sa retar i vini.  Parey onorab Woodcock in dir letan en proze i ganny donnen, in deza ganny bidzete.  E alor letan sa dimoun i fini sa proze i bezwen annan lenspeksyon e apre sa lenspeksyon i devret ganny peye.  Me alor akoz sa pa pe arive ?

Mr Speaker i malere pou mon’n trouv en en attempt par Onorab Herminie pou li fer en politik en pe tro ba.  Letan in sey dir nou’n akoz tou dimoun pou koripsyon.  In ale i pa la mon ti a kontan dir avek li ki wi, wi pa pou dimoun dan bann diferan Minister ki koronpi.  Me i annan ki koronpi.  I annan ki met retar e ki demande direkteman, pou ganny en keksoz pou fer en file bouze.  Annou fer fas avek realite.  Annou pa zis vin rod senpati.

Mwan mon annan en kouzen ki en kontrakter, e i koz ek mon i rakont mon, i rakont ki pou dir wi i annan serten i annan serten landrwa kot letan i travay pou fer son keksoz bouze, i bezwen donn serten dimoun en larzan e apre sa son peyman i ganny fer en pe pli vit.

Alor Mr Speaker sa koripsyon la ki Onorab Ghislain in koz lo la.  Sa koripsyon-

 

MR SPEAKER

Onorab Ghislain pa entervenir lo sa Mosyon.

 

HON WAVEL RAMKALAWAN

Onorab Ghislain in entervenir Mr Speaker.

 

MR SPEAKER

Onorab Ghislain pa’n entervenir lo sa Mosyon.

 

HON WAVEL RAMKALAWAN

Mr Speaker, i pa’n dir nanryen mal li.   In entervenir.  In koze off-mic.  Non, non off-mic in dir en keksoz.  Off mic in dir ki sa dimoun in partisip dan en koripsyon.

Be zisteman sa pwen i enportan en kantite.  Parski letan dimoun pa pe ganny peye a ler pou li nobou ganny en keksoz pou met manze lo son latab, sa i kapab pous li pou li partisip dan en koripsyon.

Savedir i annan en keksoz ki imoral.  E alor ki mannyer nou rezourd sa nou rezourd sa par fer keksoz dan en fason drwat.  Ki letan sa dimoun i devret ganny peye i pa bezwen ganny anvoy demen, tanto, me i vini i ganny son peyman e alors nou ede pou nou elimin tou form koripsyon.

Se sa ki se sa ki sa Mosyon osi dan en serten sans pe demande.  I pe demande ki keksoz i ganny fer dwat e keksoz i bouze.

Me Mr Speaker mwan mon demann serten kestyon akoz ki letan ou koz avek bann kontrakter – spesyalman bann kontrakter ki fer en travay pou en dimoun dan prive souvandfwa ba peyman letan zot in fini zot travay zot ganny peye.  E nou menm nou isi dan sa Lasanble  amwen ki nou malonnet, me selman si en dimoun i vin fer en travay pou nou, be eski nou pa pey sa dimoun letan i fini son travay nou pey li.

E nou’n fini tonm dakor avan konmsi nou fer en Kontra nou’n tonm dakor ki pou dir pou ou vin fer tel keksoz i pou kout tan.  E letan sa dimoun pe fini si i demann nou en davans nou donn li e apre letan i fini sa travay i ganny peye.  E mon krwar ki pou dir i devret annan en bon pratik dan sa direksyon.  E se sa Mr Speaker i fer ki ozordi bokou Seselwa ki dan biznes, pe ganny problenm.

Bomaten mon’n servi sa lekspresyon avek Minis kot, serten dimoun en dimoun an partikilye ki’n dir avek mwan leve debourye in vin ‘’leve ‘deboule!’’

E senpleman akoz letan serten dimoun i leve e parfwa pou ou ganny en Kontra spesyalman bann pli gro Kontra pou ou ganny tender ou bezwen ou annan ou sertifika, sertifika ki ou napa ou napa liability, sertifika ki konmkwa ou’n pey tou ou bann tax ensidswit.

Me parfwa Mr Speaker lafason ki i ete, sistenm i ete kot ou pa pe ganny ou peyan a ler ou pa pe kapab pey ou tax a ler.  Tousala ki vin bann lobstak.  Alors i anmar lanmen Seselwa.

E mon krwar ki Onorab Regina Esparon pe dir annou larg lanmen Seselwa!  Parske i vre osi tou i annan en kantite nou tou nou konnen ki pe arive ozordi spesyalman dan biznes konstriksyon.  Dan biznes konstriksyon Mr Speaker enn de sa bann gro lakonpannyen zot kas zot dan diferan lezot pli pti lakonpannyen.

E pa krwar ki pou dir letan ou tann en pti lakonpannyen aircon ki pou dir i en lot lakonpannyen.   I menm lakonpannyen.  E souvandfwa zot fer sa pou zot avoid zot turnover i vin pli ba parske lakonpannyen in kase.  E alors i tousala i vin bann tax avoidance measures ki zot servi.

E aprezan i annan bokou sa bann gran lakonpannyen ki zot bann ki zot bann dimoun in ganny nasyonalite Seselwa e alors ou trouv li konman en biznes en biznes Seselwa.  Me selman nou konnen ki mannyer sa bnn zafer i marse.  E nou krwar e sa i en lot keksoz ki bezwen ganny regard ladan kot finalman se Leta Seselwa ki pa pe kolekte sa tax ki devret kolekte.

Mon konn en gro lakonpannyen enn omwen ki pa pey preski ditou tax.  Parski lafason ki i deklare e mo sir isi dan sa Lasanble nu konnen en pe sa bann trikmardaz ki pase.

Alor nou bezwen regarde ki mannyer nou ed nou Seselwa ki mannyer peyman i ganny fer a tan,  pou ki sa dimoun i  kapab menm fer en savings ki sa kontrakter i pa viv pou li resevwar son larzan apre tou larzan i fini e i pa kapab ni menm fer en savings.

        Mr Speaker dan milye tousala, nou bezwen proper management.  Nou bezwen proper management pou ki keksoz i kapab i kapab bouze.  Letan dimoun i travay pey zot.  Annou pa fer zot espere, annou swiv bann prosedir.  Annou pa betray trust ki nou dimoun i mete dan zot dan zot travay lanmour ki zot annan ensidswit.

E Mr Speaker, ankor enn fwa dan menm direksyon ki mon ti dir Minis bomaten, Gouvernman i enterese ranmas son larzan, me selman i pa enterese pou li regard, regard problenm ki sa bann dimoun i pas ladan.

Si ou ganny en proze e ou pa termin li kan i devret ganny terminen, i annan en heavy penalty pou late completion.  Nou tou nou konn sa.

Me selman pou late payment i zis en poursan.  Ou kapab ganny en poursan lentere lo sa ki zot pey ou.  Mr Speaker i pa balanse.  E se sa ki parfwa i fer dimoun vin fristre.  Sa bann sir-saz isi, sir- saz laba, tax ki ou bezwen fer atansyon, me solman lo lot kote i annan sa partnership ant sekter prive atraver bann kontrakter e Gouvernman.  E byensir Bidze pe vini la ankor enn fwa kot nou pou regard bann nou pou regard bann proze.

E se la kot se la kot, sekter prive i marye avek Gouvernman osi pou kapab benefisye.  Me apre tou sa bann lannen, mon sipoze keksoz i ava ti ava bokou pli ti ava bokou pli serye.

E Mr Speaker mon bezwen dir ki mon trouv i drol letan Onorab Gill in koz lo strike.  In koz lo strike e in akoz in akiz bann politisyen ozordi.  E in fer serten lakizasyon direk, mon mazinen parski in menm fe referans avek sa lo bann dimoun SRC ki travay dan Customs, ki’n fer strike. 

        Mr Speaker napa naryen pou fer ek politisyen sa.  Ofet,  ofet i enteresan pou vwar ki tou sa bann sa bann strike ki’n arive kot dimoun in desann sa bann dernyen moman, se pa politisyen ki’n organize.  Se sa bann dimoun zot menm zot ki’n organiz zot lekor zot in desann e letan zot in desann wi in annan politisyen ki’n montre zot solidarite.

E Mr Speaker bann travayer Customs mwan bomaten mon’n ganny en text ki pou dir Customs i lo strike.  Be napa naryen pou fer avek politisyen organize.

Me selman sa ki mon konnen se la kot Onorab Gill i bezwen ganny sa byen,  dimoun i desann pou fer strike se parski sa parti politik ki la ozordi o pouvwar dirize par Mr Danny Faure zot pa pe gard zot promes.  Zot pa gard zot promes.  E se sa ki fer dimoun ankoler.  E bomaten nou’n vwar dan Lasanble Mr Speaker.

Onorab De Commarmond in akiz Minis direkteman.   Parski Onorab De Commarmond in dir Msye Faure li i deliver.  Me selman Mr Faure pa kapab al partou.

E sa bann par anba li e i konmans avek Minis zot pa pe deliver.  E mon ava dir Onorab Gill e ankor enn fwa mon trouv i drol letan i fer statement Mr Speaker.  Akoz Onorab Gill li in lo forefront.  Tanzantan i koz lo Mr Rene e mon trouv i drol ki i pa mazinen ki pou dir si i annan en politisyen dan listwar Sesel ki’n organiz plis strike se Mr France Albert Rene – defen Mr France Albert Rene.

E i annan en kantite rezon i annan strike, akoz i annan bann problenm e Onorab li menm li i ti fer nou mazinen ki pou dir parmi son dernyen fwa ki i ti zwenn Mr Rene, Mr Rene ti avek li, ‘’Nou problenm tou dernyerman –‘’ e i ti li byensir sa apre 15 lo 10 ti dir avek li’’ Nou’n problenm se nou’n pran plis swen avek nou prop lekor!’’  E alor letan ners i desann teachers i desann, travayer Customs i desann i revolte, travay Air Seychelles napa nanryen pou fer avek politisyen.  Se parski sa Parti US la zot in pran tro bokou swen avek zot lekor e se sa ki annan problenm ozordi.

E prezan mon pa konnen si sa US la, enn ler mon vwar li konman stress konmsi zot sitan under stress ki aprezan zot pa konnen lekel  ki zot pou blanmen.  Blanm isi blanm laba ensidswit.

Me nou, nou Mosyon, Mosyon i a pe senpleman demande i dimoun i ganny peye letan zot fer zot travay.

Alor mwan mon’n mon lapel tre senp se annou an men tan osi ed Seselwa ed sa Seselwa ki konmans son pti biznes, ed li pou li grandi.  Wi Onorab Gill ed li pou li vin en milyonner, mer lafason ki lafason ki keksoz pe ganny fer sa boug zanmen i pou vin en milyonner.  I pou reste en mizerab, en mizerab ki pe tay isi pe tay laba akoz letan in al lo en masin – en Seselwa ki ale pou lwe en masin pou li fer en travay apre i pa ganny peye i pa kapab apre demen zot i pou ganny dir ki nou pa pou kapab prêt ou sa ankor.

Tandis ki be sa nou bezwen dir byen for sa, ozordi sa konpetisyon ki  annan ant bann kontrakter Seselwa ek bann kontrakter avek lorizin Indien, zot marye pike antre kanmarad zot.  Letan enn i bezwen en masin oubyen enn i bezwen Kontra zot ed kanmarad.

Tandis li sa Seselwa i debout plizoumwen li tousel.  E i pe struggle.  Alors annou fer dan en fason nou ava donn lankourazman sa bann kontrakter Seselwa, nou ava donn zot tou sa ki neseser nou a pey zot a tan pou zot osi tou kapab grandi.  Pou zot osi kapab debourye.

E atraver sa nou ava osi aret dir ki Seselwa i parey Seselwa isi Seselwa i parey laba.  Me annou pa ser zot lebra, anmar zot lipye e apre sa  ganny tou kalite dir ek li debourye i pa [pou debourye pou zis deboule.

Avek sa detrwa parol Mr Speaker mon anvi dir ki definitivman mon pou siport sa Mosyon, e mon espere ki pandan sa mwan Septanm sa detrwa zour ki reste e pandan sa mwan Oktob, nou ava vwar ki bokou bann kontrakter ki’n travay zot ava ganny zot peyman bokou bann ki pe esper zot peyman tou bann diferan zofisye ki konsernen i ava process zot bann papye zot ava ganny zot ava ganny zot larzan ki zot merite e, e atraver sa zot ava kapab pey zot tax byen, zot ava kapab fer zot kontribisyon e pli enportan zot ava kapab ganny en lavi pou zot menm letan zot ava pe debourye.

Avek sa detrwa parol mon felisit Onorab Esparon pou en Mosyon sitan byen, sitan bon, e mwan mon pou vot an faver.  Mersi bokou Mr Speaker.

 

MR SPEAKER

Mersi Onorab Ramkalawan.  Mon a donn laparol Onorab Sebastien Pillay.

 

HON SEBASTIEN PILLAY

Mersi, mersi Mr Speaker.  Bonn apre midi, bonn apre midi tou koleg Onorab.  Mr Speaker sa Mosyon i en Mosyon tre enteresan isi bann manm piblik bann kontrakter ki’n ganny sans ekout nou apre midi in ekout bann deba lo sa Mosyon mon krwar lepep Seselwa in bezwen enjoy sa legzersis dan la demokrasi ki nou’n vwar dan Lasanble ozordi kot en Mosyon ki desideman laplipar dimoun i tonm dakor lo son pwen final nou’n kapab fer nou en tourdorizon politik dan diferan konteks dan diferan lanpler.   Menm bann parfwa ki’n al dan lanpler pou lans bann lakizasyon, pou lans bann largiman ki nou bezwen kapab substantiate apre ki fer nou realize pou dir nou demokrasi i vivan e vivan.

Mr Speaker mon kontan akoz nou pran sa deba koumsa se akoz i donn loportinite Seselwa pou analize kwa vreman nou pe anmenn lo latab.

Kwa vreman ki nou konman politisyen ozordi dan sa Lasanble nou anvi anmenn lo latab apre 3an ki nou’n dan Lasanble ansanm apepre 3an ki nou’n fer bokou nou, nou’n fer menm speech nou’n fer menm retorik, nou’n fer menm kalite latak.  E apre 3an nou pa ankor kapab e-lev nivo lo deba.

Mon kontan mon kontan ler entervenan avan mon Leader Lopozisyon i dir ki Onorab Herminie i fer politik en pe ba.  Me mon santi pou dir Leader Lopozisyon osi in fer in fer en pe politik.  In fer li tre souple li osi li.   E politik.  E,  me i enteresan akoz esansyel sa Mosyon, e ler mon ti pe ekout Onorab Esparon pe fer son ler mon ti pe ekout Onorab Esparon fer son fer son prezantasyon, mon ti’n fini realize akoz, akoz nou pe rankontre nou en sityasyon parey ou pe rankontre, ler ou pe regard sa bann prosedir.

Akoz a sak pwen sa bann prosedir i pa en parti politik, ki fer sa bann desizyon.  I pa en parti politik ki deside ki sa kontrakter i met son file lo mon latab, alors mon pou anvoy son file pli devan.

I pa en parti politik ki pou deside si mon pou pran sa resi ki sa kontrakter in donn mwan pou met dan son file.  A sak pwen sa bnn prosedir ki Onorab Esparon in eksplike Onorab Herminie osi in met lanfaz lo la i annan en endividi.  I annan en dimoun oubyen en group dimoun ki zot, zot louvraz se tir sa file kot i ete anmenn li lo sa lot nivo anmenn li lo sa lot nivo, pou ki finalman nou’n ariv a sa nivo kot sa dimoun in ganny sa peyman.

E dan tou sa bann entervansyon ki mon’n tande n kestyon fondamantal ki mon pa’n tann personn demande se konbyen, konbyen egzakteman kontrakter ki ozordi pe ganny peye an retar?  Konbyen egzakteman peyman ki pe ganny peye an retar?

Sa ki Onorab Esparon i fer li e ki fer ki byen i prezant nou bann kontrakter lo nivo konstriksyon.  Me annou regard sa Mosyon sa Mosyon i pa zis pe koz lo Kontrakter lo nivo konstriksyon li.  I pe koz lo peyman bann kontrakter ki par ekstansyon i en demann pou ki prosedir i ganny servi pou pey en servis ki en dimoun i rann Gouvernman i ganny swa streamline oubyen i al dan en fason pli vit pou permet sa dimoun ki rann sa servis ganny peye dan en dele letan ki rezonnab.

E pou sete sa esansyel sa Mosyon.  Me apre ki mon’n ekout bann entervenan yer avek ozordi, mon’n realize pou dir nou annan en konpleksite dan sa Mosyon e sa se konpleksite imen ki zanmen nou pou kapab retire.

Zanmen nou pou kapab retire, set akoz i tou depan lo sa endividi a sa moman ki pe fer sa travay, si li i anvi fer sa travay pli vit oubyen pli byen.   Mon servi sa term endividi, Mr Speaker pou mwan pa zeneralize, akoz mon konn tre byen ki i annan plizyer, plizyer staff dan bann Departman ki  fer bann sistenm peyman ki fer zot louvraz byen, ki reste ziska apre 4er ziska dan 7er diswar dan zot biro, pou fer sir ki zot bann invoices i bouze, zot bann file i bouze.  Plizyer zot i fer sa.

E nou konman Manm Lasanble sa ki nou bezwen fer se pou ou pa zeneralize e pran tou sa bann dimoun pran zot met zot dan en menm basket e dir tou sa bann dimoun i koronpi ranpli ek koripsyon alors Gouvernman i bezwen sorti.

Akoz sa ki mon bezwen dir zot se an realite se sa.  I fasil pou zot Lopozisyon kritik sa Gouvernman akoz pa zot ki pe  bezwen delivre.  Ler Gouvernman pou delivre zot pou pran kredi, akoz zot pou dir gras a zot, zot in demann Gouvernman pou fer ki sa keksoz in ganny fer.  Me ler Gouvernman pa delivre i lafot Gouvernman antyerman.

Me mon pa krwar sa i sa ki Onorab Esparon in adrese avek son Mosyon.  Sa ki li in adrese avek son Mosyon, se pou adres sityasyon ki egziste ki pou egziste menm si ou sanz Gouvernman.  Akoz menm si ou sanz Gouvernman i pou still endividi ki pou bezwen fer bann prosedir peyman.  I pa pou en masin ki pou fer bann prosedir peyman.  Unless nou ariv a sa moman dan pei kot tou bann sistenm i ganny enformatize.  Me napa en pei ozordi menm L’Angleterre, ki son bann prosedir peyman pa fasil ganny fer par endividi, par bann imen ki bezwen fer bann travay.

E nou tou nou konnen par ekstansyon ki imen, tou imen i pa fer fot oubyen i kapab fer, fer lerer.  Me en lot kote osi i kapab osi se prosedir ki pe fer sa bann dimoun vwar zot dan konplikasyon, pou kapab delivre lo sa ki zot sipoze pe fer.  E mon krwar sete sa Lasanble ti devret fokaliz lo la.  Sete sa ki nou devret fokaliz lo la akoz si pa egzanp pou fer en peyman ou annan ou 3 prosedir vetting apre ki proze in ganny fer, akfer ou bezwen 3 prosedir vetting?

Akfer ki apre ki DA in al lo site par egzanp dan en proze kominoter in sertifye pou dir proze in ganny fer peyman desann.  Ou annan en lot layer ankor ki pou retournen pou al verifye e si proze in ganny fer.  Eski i neseser?   Oubyen eski i pa neseser pou pran en sample bann proze, regarde si i annan completion,  pou vwar pou dir tanzantan ou pe fer bann checks and balance.

E onorab Gill i annan rezon ler i dir pou dir, sistenm li menm li in vin dan en fason ki sa zofisye i santi pou dir si li i pa fer tou sa bann check i pa tik,  tou sa bann bwat ler Oditer Zeneral i vini, si i mank en papye dan son file, li i pa le ganny konsidere akoz parfwa nou tro zeneralize ler nou regard sityasyon san get lafason ki keksoz in arive.

E sa i enn bann rezon ki ou vwar parfwa en peyman i pou an retar.  Me osi i pa en eskize pou dir parfwa i annan lefikasite kot ou annan legzanp kot dan plas fer peyman ganny process sa dimoun i ganny dir peyman i kot         Accounts, me peyman pa ankor zanmen ariv kot Accounts.

        E la kot kestyon Onorab Herminie i antre se kote Gouvernman US i antre ladan? Akoz personn pa’n telefonn ni sa zofisye, ni sa lot pou dir ek zot, pa bouz peyman sa dimoun.

Si nou kontinyen fer tou deba o tou bann size i vin politik e i ti byen Onorab Gill i bezwen reponn.  Akoz sa pa’n  konmans lo sa kote latab zin konmans lo zot kote latab, ki’n konmans raise size inefikasite Gouvernman,  i par ekstansyon drag nou parti politik ladan,  san pran konsiderasyon ki sa bann menm fonksyonner ki zot pe ensilte ki zot pe akize konman koronpi,   i kapab menm zot siporter.

 

(Interruption)

 

HON SEBASTIEN PILLAY

E prezan sa ki mon pe dir se senpleman se ki i apel en zeneralizasyon.  Ou bezwen pa kapab ou pa kapab fer zeneralizasyon si ou annan levidans.  Si par egzanp Onorab Woodcock atraver ou Mr Speaker i annan levidans, ki sa bann dimoun in fer.  Me ou al devan.  Ou anmenn li devan.  Akoz se sa ki nou bezwen fer.

E mon konpran largiman Leader Lopozisyon ler i dir sa dimoun i bezwen fer sa.  Be still i kont konman en lofans ki sa dimoun pe fer.  Akoz sa kontrakter li i pa devret pe go through sa additional process i pa’n ekrir anywhere dan bann prosedir ki Onorab Esparon, e Onorab Herminie in dekrir ou kot i bezwen vin pey sa zofisye pou vin fer sa. I pa’n ekrit anywhere sa. I pa en prosedir.

Mon krwar nou bezwen get larealite an fas.  E si nou kontinyelman, e mwan mon krwar i enportan Mr Speaker atraver ou pou mon remind mon bann koleg lot kote latab, ladministrasyon piblik  i pa mars avek en bouton ki ou peze e ou krwar pou dir konman ou pez sa bouton tou keksoz i ganny fer.  E souvandfwa mon tann zot koze as if sa i sitan fasil me i pa leka.  I pa leka ditou.  E God forbids si en zour zot ariv dan Gouvernman zot krwar pou dir sa i leka, akoz zot pa pou kapab fonksyonnen pou nepli annan personn pou zot blanmen.  Akoz ozordi fasil pou zot blanm tou dimoun akoz se pa zot ki pe fer !

E ler mon tann zot fer sa bann alegasyon, zot pe dir sa bann keksoz, me anmenn sa bann levidans devan e  deal avek.  Akoz tou sa ki nou anvi vwar mon pa anvi nou vwar en kontrakter  pe bezwen vin konplent pou dir mon pou dir be mon’n fini mon proze i annan mon 2 semenn, 3 semenn, 4 semenn, en mwan, 2 mwan in vizite lot in vizite in dir in fini.  Akoz ki pou arive demen Mr Speaker nou pou fer kontrakter sa ki nou pe fer, nou pe fer sa bann menm kontrakter perdi konfyans dan sistenm ki pe pey zot.  Zot second guess sa bann keksoz.  E apre dan plas sa bann dimoun fer par egzanp dan bann sirkonstans kot ou bezwen zot pou fer louvraz emergency, sa bann dimoun pa oule vin fer.

Mr Speaker mon krwar konman, konman en Lasanble nou annan nou e bon Mosyon devan nou, nou ti annan en Mosyon ki annan bokou merit, me, me parfwa nou bezwen osi servi sa Mosyon konman en loportinite pou nou kapab aranz keksoz.  Rod fason pou aranz keksoz.

Par egzanp enn bann prosedir ki mwan mon santi pou dir ozordi i pe kree en konsern pou mwan se, ler en dimoun i fini en Kontra, dan distrik, ou’n fini verifye laba.  I bezwen desann somewhere ki apre sa i al dan en lot landrwa.

I enportan alors pou sistenm gete annou track en peyman, annou pran en peyman abitrerman pou nenport ki dimoun nou gete kantite letan in pran.  Pou nou etabli along the way kote i annan bann huddle bann keksoz ki anpes li arive.

E sa i lava ed nou met an plas en lot sistenm.  Si dan plas bezwen fer li pas atraver en sistenm ozordi kot i bezwen al kot Trezor, parey Onorab Gill in dir petet i ava pli meyer dan plas ki i bezwen vin kot Trezor pou li al dan prosesis Trezor, i al dan en prosesis kot i ganny peye dan sa Minister ki’n komisyon sa louvraz.  Me nou etabli en sistenm ki ava annan en verifikasyon otomatik ki konman sa peyman i sorti i ganny verifye si sa i posib.

Oubyen en keksoz ki devret ganny fer, e ki devret ganny entrodwir en protokol kot en protokol kot si en zofisye pe deal ek peyman en kontrakter, kontrakter X, oubyen Y dan sistenm ler in antre peyman  kontrakter X i donn en dele letan pou sa peyman.  Zis par, egzanp Lapolis in donn en response time, i dir ou pou dir by 10 minit oubyen en lot i dir ou lanbilans i dir ou par egzanp apre en erdtan edmi whatever ki pou response time, mon dir ok peyman after project completion  i devret 3 semenn.  Meton.  Me apre 3 semenn sa sistenm i devret pe donn ou en alert pou dir ou pou dir ou annan ou 10 peyman ki pa ankor pase apre 3 semenn.  Ou konpran ?  Se sa ki nou se sa ki nou bezwen fer pou nou kapab avans keksoz.

Mwan mon lenkyetid i se ki  e i byen sa ki Onorab Gill in dir e i vre.  Ou annan politisyen wi, ki servi tou loportinite ler bann staff i dan en landrwa i montre serten i montre serten, serten lanmertim, zot taye zot ale zot la, me apre zot kasyet.  Case stevedores i en case in point.  Nou annan bann ka ki’n arive.  Konpran?

So i enportan pou nou konman politisyen pou nou asize analize, par egzanp si nou pe koz lo rezondet akoz  travayer i al lo strike e i tie-in avek zot satisfaksyon dan zot louvraz, eski par egzanp bann dimoun ki pe travay dan sa domenn avek sa load travay ki zot annan i permet zot pou zot donn plis, pou zot process plis peyman?  Sa i bann kestyon fondamantal ki nou, nou ti devret pe demande konman politisyen pou nou kapab rod en solisyon.

Me olye fer sa nou gognarde, nou fer bann alegasyon ki pa ti neseser.   Sa ki neseser se ki nou koz lo lesansyel sa Mosyon sete rod en solisyon pou sa bann kontrakter ki pe vwar zot pe ganny retar pou ganny zot peyman.

E sa ki pli enteresan Mr Speaker, mon’n tann mon tann koze pou dir poudir nou annan alegasyon kot pe ganny dir ki peyman napa larzan pou fer.

Be which is far from truth, akoz nou’n vwar pou dir menm kapasite Gouvernman pou pli kapab abzorb lakantite capital projects ki annan i limite baze lo son abilite pou annan ase manpower pou delivre lo la.

Mazinen dan sa pei  nou’n ariv a  en pwen kot nou annan plis larzan ki proze.  Dan serten sirkonstans.  E se sa ki nou’n, vwar.  Ou vwar ?  I montre ou nivo devlopman ki nou pei in arive e nivo demann nivo demann ki annan lo sa sistenm.  E la mon krwar i enportan ki nou reflesir lo la.

Enn bann revi enn bann revi ki IMF ti fer sete ki nou annan nou en public service ki tro gran.  Ki tro gran.  E enn bann rezon sanmenm sa keksoz ti arive sete nou ti bezwen stream down nou public service akoz sa ki apel nou wage to GDP ratio ti’n monte.  Tro o.

Ok, e sanmenm sa nou ti entrodwir osterite, dan nou sistenm.  Se pou sa rezon ki parfwa nou ti refer to PS at the time as the austerity PS.  Akoz the essence    was on.  Lenportans ti lo frugality, e limiting expenditure.

Me la ozordi ki nou pe vwar nou pe vwar nou dan en sityasyon kot eski nou pou bezwen al increase lakantite dimoun ki nou annan ki pe travay pou delivre?

Lakantite project officers ki nou annan pou fer vizit dan bann proze.  Eski nou annan ase?  Mon krwar se sa ler mon pe regard bann prosedir ki le de Onorab in highlight, se sa bann arrears kot nou annan problenm.  Eski nou annan ase dimoun pou monitor sa bann proze?

Sa i bann keksoz ki nou bezwen pe targete.   Mwan i pa mwan ki pou fer  desizyon lo si lepep Seselwa pou met zot dan State House pou zot administre Gouvernman.  Sa i ava vin apre eleksyon.  Mon pa pou preempt rezilta eleksyon Mr Speaker, me selman sa ki enportan,  se ki ler zot ti fer konpanny pou fer li ‘’zot Lasanble’’, sa ki zot, zot ti dir ek lepep Seselwa se ki zot in donn nou State House donn zot Lasanble akoz zot, zot kapab travay pli byen ki sa bann MNA ki ti dan sa bann distrik oparavan.  Ok. 

 

 

(Interruption)

 

HON SEBASTIEN PILLAY

E ler en Onorab lo zot kote i anmenn en bon Mosyon dan plas striktir zot deba otour son Mosyon e anbelir, anbelir son Mosyon, parey mon krwar nou kote latab in fer pou anbelir sa Mosyon. Malgre ki bann Onorab i asiz lo lot kote latab, zot in prefer servi son Mosyon konman en platform politik pou fer latak, politik.   E se sa se sa diferans ant zot ek nou.  Mr Speaker.

 

 

(Interruption)

 

MR SPEAKER

Order!  Order!   Annou esey fini.

 

HON SEBASTIEN PILLAY

Mersi Mr Speaker.  Mon pe al ver konklizyon Mr Speaker.  Mr Speaker sa ki nou’n remarke menm lo sa kote latab e mon asir ou Mr Speaker si mon ti en manm piblik pou ekout zot mon ti pou krwar tou sa ki zot ti pe dir, fransman.

Mon pou dir zot akoz mon ti pou krwar sa ki zot pe dir.  Akoz si mon pa ti asiz lo sa kote latab e nou’n menm nou, nou ti’n ganny meeting avek Procurement pou sey nou  osi konpran akoz tel keksoz i mars koumsa, akoz tel keksoz i mars koumsa akoz tel keksoz i mars koumsa, akoz mon ti lo Bills Committee, pou mon kapab konpran.  Ou realize pou dir parfwa nou annan bann Lalwa ki nou’n met an plas ki nou bezwen eksplik dimoun ki mannyer zot marse dan plas atak atak sityasyon.  Nou bezwen eksplike akoz pou dir anba Lalwa Procurement i annan sa bann prosedir ki zot swiv.

E menm parfwa par egzanp kot mon’n tann bann Onorab dir ou en Kontrakter ki’n mal travay annan en proze re ganny menm proze, be ler ou al gete se in ganny the procurement.  Me en lot kontrakter ki li in fer bon proze in re bid i pa gannyen.

E sa tousala i pas atraver en Procurement.  So  sa bann prosedir nou, nou bezwen eksplik dimoun la, la bann prosedir ki nou annan e prezan travay lo amelyor son konteks pou ki i kapab match avek larealite ozordi.  Se sa ki nou bezwen fer.

E se sa ki Mosyon Onorab Esparon pe demann nou pou fer, se zisteman anmenn en largiman otour ki mannyer nou kapab fer sa sistenm mars pli byen.

E mwan mon krwar enn bann eleman enportan ladan se annan ase dimoun pou fer verifikasyon,  koup lo lakantite verifikasyon e asire ki verifikasyon 5i ganny fer premye fwa byen, bann konteks i ganny etablir byen, e bann konteks i ganny etablir dan proze in fini.

E si i annan retar peyman i bezwen annan en sistenm an plas ki alert bann zofisye, oubyen bann desk officers ki annan en retar peyman.  I pa kapab sa kontrakter pe bezwen call everybody, i Tom, Dick and Harry pou li konnen kwa ki pe arive ek son peyman.  Akoz son peyman ennler i ganny dir kot Trezor, ennler i ganny dir kot sa enn.

So sa i bann sistenm ki nou bezwen deal avek.  E mwan mon pa pou swazir pou mon gete ki krwayans politik sa bann zofisye i annan, sa ki mon anvi konnen se ki eski zot kapab delivre.  Eski nou’n donn zot zouti pou delivre, e ki mannyer nou kapab ed zot pou delivre.  Se sa ki enportan.

So an fen kont Mr Speaker mwan mon krwar sa i en bon Mosyon.  E fotespere ki nou take onboard bann rekomandasyon ki bann Manm in fer e ki nou a kapab anvoy en serten ki ava permet nou ed bann kontrakter zisteman pou ganny sa peyman a ler, e se sa mon krwar lanbisyon e nide deryer sa Mosyon.  Mersi Mr Speaker.

 

MR SPEAKER

Mersi Onorab Sebastien Pillay.  Mon ava donn laparol loter Mosyon Onorab Regina Esparon, pou li fer son konklizyon.  Onorab.

 

HON REGINA ESPARON

Mersi Mr Speaker.  Deba in tre enteresan.  Mon oule dabor remersye tou Manm ki’n entervenir lo sa Mosyon tre enportan.  Dan bor mon, mon remersi Onorab John Hoareau pou segonn sa Mosyon.  In fer resorti ki menm dan bann payment bann Departman i pran en kantite letan pou peye.  Sa i pa zis rann sa kontrakter fristre me i osi met bann proze an aryer, akoz ler sa kontrakter napa larzan pou aste materyo pou fini en louvraz, ki  in konmanse e par lefe ki si i en kontrakter ki son louvraz son larzan in pri dan en lot louvraz ki in fer pou oparavan pou sa Minister ki pa ankor ganny peye, son Bidze, i kout e la kot i vwar li bite.

I osi fer resorti bann problenm mank dokiman i retard peyman.  Problenm kot kontrakter i perdi bon travayer, akoz larzan pa rantre a tan pou pey zot, kot zot bezwen rekonmanse 2 ou a 3 fwa.  In ganny fer resorti ki kontrakter i degoute pou louvraz pou al travay ek Gouvernman, akoz sa mank konfidan pou ganny peyman a ler.

Onorab Andre ti fer sorti ki fodre annan plis konprenezon, e dyalog ant bann ko kontrakter e Departman oubyen Minister.  Lenportans etablir en sistenm first come first serve dan prose i a osi ede ki kontrakter pa ganny pini.

Enforcement sa 10 zour dele, pou peyman apre ki travay i konplete parey Minis Finans ti fer resorti.  Respekte Lagreman ki bann Kontrakter in sinyen.  E ler scope travay i sanze fodre zofisye proze i notifye POU, pou ganny laprouvasyon e sa i a fer ki tou dimoun a okouran e sanzman  dan scope louvraz a ganny a prouve avan ki proze i konplete.

E non pa ler kontrakter pe esper son larzan ki sa largiman i ganny fer resorti.  E sa i devret ganny fer par sa project officer oubyen sa  ki siperviz louvraz supervise proze dan sa Departman.

E la sa pwen Mr Speaker i fer mon mazin en proze dan distrik Glacis.  Kot sa dimoun ti ganny tou laprouvasyon verbal pou en proze, me i pa ti siny en Kontra. I ti siny en Kontra pou premye faz sa proze ler ti pou fer 2enm faz proze zot ti dir li verbalman fer sa proze.  Me selman apre letan i ti al kot Minister Gouvernman Lokal pou rod son peyman, la ki i ti dekouver pou dir sa 2enm bout proze pa ti pas kot POU, e ki fer ki sa kontrakter li i pa’n zanmen ganny peye.  In monte desann kot Minister Finans zanmen in kapab rekiper son larzan, parski sa problenm letan zot ti adere pou li fer sa 2enm porsyon dan sa proze pa’n pas kot POU me zot ti dir li fer verbalman e la kot li in perdi son R75 mil.

E Mr Speaker, la ki nou pe apros letan eleksyon, kot pou annan pli bokou pti proze dan distrik,   kot nou pou vwar pti peron, pti semen e lezot ki pou refleri, nou swete ki sa bann kontrakter ki ganny swazir pou zot fer sa bann proze, ki apel ‘’Proze Eleksyon’’ zot ganny peye dan en dele letan rezonnab apre ki zot in termin sa louvraz.  E ki nou pa bezwen esper 5an pou en lot konpanny eleksyon pou fer sir ki zot peyman i ganny donnen.

Mr Speaker la ki nou pe koz lo retard peyman, i annan en lot kategori travayer ki pe dir ki an Novanm sa lannen i a fer 1an depi ki zot in zot pe esper zot larzan.  E sa i bann drayver pickup ki’n travay lo proze danm.  Swa zot in fini travay swa zot ti travay lo proze danm ki ankor pe esper zot larzan.

Onorab Afif in fer nou konpran ki avek plis mendev e plis sipervizyon avek dimoun, ki annan konnesans sa ti pou osi ede pou amelyor sa sityasyon, e sa ti pou dan benefis tou dimoun.  Onorab Roucou in fer resorti ki avek en sanzman Gouvernman, sa bann problenm parey i bezwen ganny eliminen.  Tro bokou birokrasi, tro bokou retar, mank responsabilite, parfwa lo lapar serten zofisye, me an menm tan ou kontinyen felisit ou ki pe travay drwat ki pe travay ek en responsabilite pou fer avanse sa pei.  E ki konpran sak penn i merit son saler.   E non pa e nou pe demande ki zot vin en legzanp pou bann lezot.

Onorab Gill in osi konpran lenportans e merit sa Mosyon.  E in fer nou mazin 3 eleman kle.  Latransparans, rann mont e bonn gouvernans dan tou bann proze Gouvernman in antreprann.

Lenportans revwar prosedir peyman, pou fer ki i vin pli efikas e redwir retar.  Donn plis lotonomi bann Minister pou process peyman apre ki travay in konplete.  Donn plis responsabilite accounting officer ki deza tonm anba Minister Finans pou process peyman e sa i a elimin bann retar dan peyman.

E la mon dir sa pou bann ptipti proze pa anba sa threshold 150mil, sa i devret ganny fer.  Me pou bann proze ki mont par lao 150mil sa mon krwar i devret pas atraver tou bann prosedir normal.

Onorab Vidot in fer resorti ki Minister parey Gouvernman Lokal, i bezwen vin pli serye.  E sa i enkli bann Administrater Distrik.  Li konman en ansyen DA i dir ki parfwa papye par annord oubyen i manke e se sa ki met retar.  Travayer sa bann kontrakter pa e ganny peye a ler e ni zot Trezyenm Mwan Saler zot pa pe gannyen.

E la  i fer mon mazin en text ki mon ti gannyen yer, kot en dimoun i dir ek mon regarde akoz ki bann kontrakter ki travay avek LWMA pa ankor kapab pey zot sa bann travayer zot Trezyenm Mwan Saler.

E la mon pou dir avek sa dimoun probableman li osi sa kontrakter, i pe esper son peyman avek Gouvernman ki pa ankor gannyen e ki i fer ki i pa pou kapab pey ou, si li menm l i sa kontrakter pti kontrakter i pa ankor ganny son larzan avek LWMA.  Adres bann defayans.

Onorab Woodcock in koz lo PPBB kot larzan i ganny prozekte davans pou bann proze, alor aret zwe ek bann pti kontrakter, akoz larzan i deza ganny mete dan Bidze – aret fann rimer.   Ms Noline-

 

MR SPEAKER

Onorab.

 

HON REGINA ESPARON

Onorab Sophola in dir pey tou kontrakter a ler, pa tri pikan e pa vin selektif.  E i enportan ki kontrakter i konn zot drwa e fer sir ki zot konnen kwa ki zot sinyen e kwa ki ganny mete dan zot Kontra.

Onorab Herminie in sey zistifye akoz peyman i an retar.  Me selman an menm tan osi in konfiz mwan li.  In paret en pe konfize, i dir napa peyman ki pou an retar, selman i pe zistifye akoz i an retar.

Me selman en bon pwen ki Onorab Herminie in fer sorti i dir fer peyman online.  E mwan mon pou dir li Onorab Herminie  (ok i pa la)  Sa sizesyon ou konman en Manm elekte ou kapab anmenn en Private Members Bill pou amann sa seksyon e fasilite fasilit sa si vreman serye.  Ankouraz nou kontrakter Onorab Ramkalawan in dir, ankouraz bann kontrakter pou leve debourye e non pa dekouraz zot pou deboule, ok?   E finalman zot pou vwar zot avek en kantite det pe akimile.

Pou konklir Mr Speaker, annou dir annou elimin birokrasi, vin pli efikas dan bann prosedir, bouz avek teknolozi, pou fasilite peyman online, bouz ver e-government fer internet banking, larg lanmen nou bann Kontrakter, pou zot kontinyen epanouir e grandi.  E avek sa Mr Speaker nou demande ki Lasanble i aprouv sa Mosyon.

 

(APPLAUSE)

 

MR SPEAKER

Mersi, Onorab Esparon.  Mon krwar ou’n mank Onorab Sebastien Pillay.  Wi.  Bon in ariv moman pou nou pran en desizyon, pou nou pran en vot lo Mosyon ki’n ganny anmennen par Onorab Regina Esparon.

Mon ava demann tou Manm ki an faver?  Okenn Manm ki kont?  Madanm Deputy Clerk.

 

MADAM DEPUTY CLERK

Mersi Mr Speaker, mon’n rikord 22 Manm ki’n vot an faver e personn kont.   Mersi.

 

MR SPEAKER

Mersi Madam Deputy Clerk, savedir Mosyon mon bezwen lir Mosyon.  Mosyon ki lir comme swivan: ‘

Lasanble Nasyonal i fer en demann serye pou ki ladministrasyon bann Minister ek Lazans Gouvernman, i pey bann kontrakter a tan, letan zot termin en Kontra avek sa satisfaksyon, san bezwen atann kantite mwan pou zot ganny larzan.’Sa Mosyon in ganny aprouve par Lasanble Nasyonal.

Bon avan nou adjourn mon anvi zis enform bann Manm ki nou annan en nou pou annan en Revised Order Paper ki pou ganny release, mon mazinen in fini ganny release.  So bann Manm ava tyek zot bann mail.  I en Revised Order Paper akoz nou annan en short Motion demen bomaten nou pou pran lui premye konman priyorite, ki sorti kot Komite FPAC. 

        Apre nou ava swiv parey nou ti’n progranmen, avek kestyon e PNQ pou Minis Dezinyen.  E Minis osi tou i ava prezant son Bill ki lo Order Paper.  E si letan i permet nou ava pran lot Mosyon pandan lazournen.

Vwala mersi bokou pou travay ozordi, ki nou’n akonpli.  Mon ti a  kontan remersi tou bann Manm, tou bann dimoun ki’n ekout nou ki’n swiv travay Lasanble Nasyonal.  E byensir mon remersi bann teknisyen SBC         i annan bann ki la parmi nou i annan bann ki behind the scene  ki pe fer sa travay pou nou pou kapab re transmet travay Lasanble Nasyonal.  Mersi zot tou.  Lasanble i adjourn e nou repran nou travay demen maten 9er.

 

(ADJOURNMENT)