::
Home » Verbatim » 2019 » Tuesday 1st October, 2019

Tuesday 1st October, 2019

NATIONAL ASSEMBLY OF SEYCHELLES

Tuesday 01st October 2019

The Assembly met at 9am

National Anthem

Moment of Reflection

Mr Deputy Speaker in the Chair

 

MR DEPUTY SPEAKER

Bon mon ti a kontan dir en bonzour tou bann Manm Onorab.  E tou dimoun ki pe swiv Lasanble Nasyonal dan lakour, lo radyo, lo televizyon, lo rezo sosyal.  En bonzour zot tou.

En bonzour spesyal pour bann dimoun aze.  Ozordi se Lazournen Enternasyonal pour bann dimoun aze.  En zour spesyal pour nou mazin bann dimoun ki pli vye ki nou.  Sertennman pli vye ki mwan, e ki’n kontribye bokou pour devlopman zot fanmir, devlopman pei.  E pour anmenn sertennman dan Sesel sa pei kot i ete ozordi.

Lemonn antye, sa ki mon mwan mon’n konstate se ki ver 2050 pour annan preski 20poursan, 1 dan 5 dimoun pour par lao 60an.  E sa problenm isi Sesel i menm en pti pe pli grav.  Akoz nou remarke ki i annan plis dimoun aze ki pe vin dan sosyete ki plis zenn pe rantre.  E ki kapab prodwir.  Alor ki vedir ki nou ki la, ki ankor kapab prodwir nou bezwen travay pli dir.  E nou bezwen pli apresye sa bann kontribisyon ki’n deza ganny fer par bann dimoun ki ozordi zot in ariv a laz retret.

Avek sa,  mon ti a kontan zis enform Lasanble ki ozordi nou pour adjourn pli boner ki labitid.  Parske ozordi zisteman se Lazournen pour bann dimoun aze.  E pour annan en fonksyon 3er apre midi ki pe ganny fer State House.  I pour annan serten Manm Lasanble ki pour osi partisip dan sa levennman ozordi.

Alor ozordi bomaten lo nou Order Paper, nou annan prezantasyon en papye.  Answit nou pour annan kestyon pour repons.  E kestyon pour ganny-i annan 8 kestyon ki pour ganny reponn par Minis Pamela Charlette, ki Minis pour Lakaz ek Lenfrastriktir.

Answit pour annan osi- e si nou ganny letan, nou pour pran en kestyon irzans.  E mon krwar avek sa nou pour ariv a lafen nou premye sesyon travay pour bomaten.  E avek sa mon ti a kontan demann Deputy Clerk pour fer prezantasyon papye Business Tax.

 

MADAM DEPUTY CLERK

Mersi Mr Speaker.  Bonzour tou bann Manm.  E tou dimoun ki a lekout.  Lo nou Order Paper ozordi en papye pe ganny prezante.  Se S.I 54, en pti typo error, of 2019.  Sa i Business Tax (Business Tax Return Form) (Amendment) Regulations of 2019.  Mersi Mr Speaker.

 

MR DEPUTY SPEAKER

Mersi Deputy Clerk.  Zis en lot pti lanons.  Petet mon ti’n devret fer sa lo komansman.  Mon mwan dan Chair bomaten.  Zisteman akoz Speaker Onorab Nicholas Prea i pe Ankour bomaten,  an se ki konsern sa ka devan Lakour Konstitisyonnel lo Public Service Salary (Amendment) Bill ki ti ganny quash.  E ki Gouvernman in met Lasanble Ankour.  Alor se pour sa rezon ki bomaten, i pa prezan.

Bon avek sa mon a demann Parliamentary Reporter pour envit Minis Pamela Charlette avek son delegasyon dan Chamber.

Alor bann kestyon ki pour ganny demande bomaten.  Premye pour par Onorab Churchill Gill, Onorab Clifford Andre, Onorab Sylvanne Lemiel, Onorab Norbert Loizeau, Onorab John Hoareau, Onorab Wilbert Herminie, Onorab Gervais Henrie e Onorab Audrey Vidot.  Kestyon i sorti kot zot.  Minis se Pamela Charlette.  Minis Labita, Later, Lenfrastriktir e Transpor lo Later ki pour ganny akonpannyen par Madanm Fanette Albert, Sekreter Prensipal pour Later.  Mr Yves Choppy, Sekreter Prensipal pour Lenfrastriktir.  E Manmzel Evelina Antat ki CEO PMC.

Mon ti a kontan swet labyenveni Minis Pamela Charlette avek son delegasyon.  E mon ti ava envit, alor Onorab Churchill Gill pour prezant son premye kestyon.

 

HON CHURCHILL GILL

Bonzour Mr Speaker.  Mersi Mr Speaker.  Bonzour Minis ek ou delegasyon.  Bonzour tou Manm e tou dimoun a lekout.  Kestyon i lir koumsa:-

Eski Minis i kapab enform sa Lasanble:-

  1. Ki siperfisi sa later ki’n ganny Lease avek Vacanze?

 

  1. Konbyen siperfisi ki Vacanze pe aktyelman annan lenfrastriktir lo la?

 

  1. Eski Minis i kapab konsider sub-divide sa later e allocate Vacanze zis sa ki annan lenfrastriktir lo la?

 

  1. E konsider re- allocate sa ki lib avek envestiser potansyel pou ki zabitan Praslin ava benefisye avek lanplwa, pei i a benefisye avek tax?

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Bonzour tou dimoun.  Bonzour Mr Speaker.  E tou dimoun osi ki a lekout.  Mr Speaker pour premye kestyon i annan 3 kare later ki’n ganny pass by avek Vacanze Seychelles Limited.  I konm swivan:

PR32 ki   3, 644 square meter;- .PR413 ki 2,300 square meter.  PR1096 ki 39, ki 39, 806 square meter.  E osi zil Chauve Souris ki fer en siperfisi total 52,756 met kare.  Sa 3 later i sitye Côte D’Or.

Mr Speaker nou pa’n ganny sifizaman letan pour fer en analiz profon.  E sa ki pour konpri fer vizit e konn tou siperfisi sa bann striktir egziste.  Me dapre estimasyon ki nou’n fer en servant GIS, nou’n etablir ki si nou met sa 3 later ansanm, apepre plis ki 60poursan i annan striktir lo la.  Sa i enkli tou bann buildings, semen lipye, e osi semen transpor.

Mr Speaker pour 3enm kestyon, peryod Lease i pour 99an.  E sa ti ganny sinyen an 2007.  In ariv lo son 13enm lannen.  Sa peryod i ankor aktiv.  E an vi ki kondisyon dan sa lease in ganny respekte e sa lease pa ankor ekspire.  Sa devloper i annan tou son drwa pour kontinyen rezouir sa later an antye pandan sa term 99an.

Alor Gouvernman napa en rezon.  E i pa fezab pour diviz sa later pour retir zis kot i annan bann striktir lo la.  A mwen sa Lakonpannyen i fer en demann pour sa redevlopman pa pe konsidere divize.

Konsernan later pour envestiser potansyel, Minister in fini idantifye bann later ki in met- ki pe met lo tender atraver Board Lenvestisman Sesel pour bann biznesmenn lo Praslin.  Mersi Mr Speaker.

 

MR DEPUTY SPEAKER

Mersi Minis.  Onorab Gill.

 

HON CHURCHILL GILL

Mersi Mr Speaker.  Mersi Minis pour tou ou detay.  Vi ki ou’n dir i apepre 60poursan ki i annan lenfrastriktir lo la,  e sa i les nou avek 40poursan ki lib.  Petet zis pour leklersisman.  Eski dan sa lease, sa bann- sa Konpannyen i annan sa opsyon pour li grandi son lenfrastriktir si sa in fini ganny mete dan lease?  Oubyen si i en keksoz i a depan si zot demen zot deside fer sa pour zot vin koz avek Minister lo la?

Apre 2enm kestyon –  pour letan Minis i dir i annan bann later ki’n deza ganny earmark,  Si petet nou ti kapab ganny brièvement ki bor zot ete sa bann later?  E en mannyer bann dimoun ki enterese i a kapab bouze pour zot al fer zot tender parey prosedir i demande.  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker i pour tou depan lo sa devloper pour li met en proze devan.  An vi ki la i annan en- deza en lenfrastriktir tourism.  So kekfwa i ava demann en extension.  Me sa i pour depan tout antyerman lo li.

Akoz dan son lease i pa spesifye vreman son development covenant sa letan.  E i pa spesifye ki kalite devlopman, si i pour annan extension oubyen si i pour annan okenn devlopman ki pour fer apre.

Nou annan apepre 9 parcel ki’n ganny idantifye Praslin.  Ki nou’n fini from April sa lannen ziska up-to-date la.  Nou’n donn SIB pour fer bann tender.  Mon pa konnen si Onorab i oule mon spesifye sak.

 

MR DEPUTY SPEAKER

Onorab Gill.

 

HON CHURCHILL GILL

Non.  Minis si zis petet SIB si in donn en nide kan ki i pour fer sa.  At least pour dimoun Praslin konnen poudir be dan sepa tel mwan sa bann keksoz pour deza komans lo tender.  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

I annan deza ki’n fini met lo tender Onorab.  Me parey mon’n dir i-sa.  Nou, nou zis donn SIB.   Apre SIB i deside kan i met lo tender.  Me parey mon’n dir ou, i annan 9 parcel ki nou’n fini donnen deza.  E tou sa 9 i lo Praslin.  Anse La Blague plito e Côte D’Or.  Mersi.

 

MR DEPUTY SPEAKER

Mersi Minis.  Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun.  Mr Speaker an vi kestyon ki’n ganny poze.  Mon ti ava kontan demann Minis.  An zeneral lo Praslin si i annan en legzersis konpreansiv ki pe fer, pour asire ki bann later ki’n ganny lease pour bann devlopman pe enport, ki i annan en swivi ki bann dimoun i fer sa devlopman dan dele letan ki zot in gannyen.  Ouswa ki zot pey zot lease a ler, ki Gouvernman i benefisye an term tax, e ki zot vreman fer zot devlopman pour ki Praslinois i benefisye avek Lanplwa?

Partikilyerman Mr Speaker i annan sa plot number PR 5446 ki mezir plis ki 4, 240 met kare.  E ki i annan en lease lo la ki dwa plis ki R1milyon.  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker, dan Minister nou annan 2 Komite.  Lease Committee, apre Debtors CommitteeLease Committee i get tou bann kondisyon bann terms and conditions lease en dimoun.  E i call in si i annan okenn issues, i call in sa dimoun.  E i fer fason i annan en dyalog avek sa dimoun.

E osi Debtors CommitteeDebtors Committee i la li pour get tou bann dimoun ki kekfwa i annan arrears oubyen ki pa pey zot lease.  E la nou osi nou antre dan en konversasyon avek zot.  E ziska ler ki nou’n exhaust tou bann opsyon.  E la i fer ki nou osi annan- nou kapab soumet en case avek AG’s Office si nou bezwen pran sa lease avek li.  Mersi.

 

MR DEPUTY SPEAKER

Mersi Minis.  Onorab Henrie.

 

HON GERVAIS HENRIE

Vitman Mr Speaker.  An vi ki Minis in dir zot annan- zot antre an negosyasyon avek bann debtors par egzanp.  Zot annan en dele letan ki zot donn sa bann dimoun pour delivre lo sa ki zot demande?  Avan ki case i ganny refer avek AG’s Office.  Mersi.

 

MR DEPUTY SPEAKER

Mersi Onorab.  Minis.

 

 

 

 

MINISTER PAMELA CHARLETTE

Mersi Mr Speaker.  Wi nou annan bann reminders ki nou donnen.  E osi nou bann dele letan, i diferan.  Me selman nou donnen bann dele letan pour fer bann peyman, oubyen pour zot regilariz en pe zot bann- si i annan okenn breach dan zot lagreman.  Mersi.

 

MR DEPUTY SPEAKER

Mersi.  Onorab Flory Larue.

 

HON FLORY LARUE

Bonzour Mr Speaker.  Mersi bokou.  Mr Speaker eski Minis i kapab dir nou.  Lefe ki i dir nou sa lease ki aktyel la, i annan 13an.  Eski sa propriyete ti lo en lease avan?  E eski i ti avek menm propriyeter?  E si zot in kas sa lease, akoz zot in kas sa lease prior?  E eski i kapab dir nou valer sa lease aktyel ki zot pe peye silvouple?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Premyerman sa parcel ti pour COSPROH.  Sa Lease ti ganny transfer avek kot Côte D’Or Lodge le 8 Zanvye 2001.  Pour le moman sa lease i 99an parey mon’n dir.  E in pey li 7.5- sa lease i 7.5 – ti pey $7.5 milyon Mr Speaker.

 

MR DEPUTY SPEAKER

Mersi Minis.  Onorab.

 

HON FLORY LARUE

Mersi Mr Speaker.  Mersi Minis.  Minis- lefe ki Minis i dir nou ki avan sa.  Sa Lease ti depi- ti annan en lease avan sa an 2001 sorti COSPROH pour al Côte D’Or, kot Côte D’Or Lodge.  E apre sa enn ki lo la, la.  Sa enn ki pour Vacanze li, i ti komans an 2007.  Eski i annan en rezon spesifik, menm management?  Ouswa 2 dimoun separe ki’n repran sa lease?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Zis pour korize Mr Speaker.  Mon’n mank en pti keksoz.  Apre ki ti’n transfer Côte D’Or Lodge.  I ti ganny transfer anba Gouvernman an 2007.  E apre Lease ti gannyen avek Vacanze.

 

MR DEPUTY SPEAKER

Mersi Minis.  Onorab Ramkalawan.

 

 

 

HON WAVEL RAMKALAWAN

Bonzour Mr Speaker.  Mersi bokou.  Bonzour tou bann Manm Onorab.  E Minis avek ou delegasyon.   E tou Manm ki pe- tou dimoun ki pe swiv.

Mr Speaker sa zafer Vacanze, i re anmenn mon lo sa skandal Parmalat.  Parski skandal Parmalat ki ti en gro skandal ti involve zisteman sa size Vacanze ki non selman lo sa bout later la, me osi lo Ile Chauve Souris.  Sa pti zil an deor Côte D’Or.

Eski Minis i kapab dir avek nou.  Si son Minister in vreman pran an konsiderasyon tou sa bann skandal kot larzan ti ganny peye kot in pey 2 fwa kot serten Direkter Parmalat an Italy ti bezwen demisyonn-en bann skandal avek COSPROH?

E vi ki i annan en lenvestigasyon- i annan en- how do you call it?  En enquiry ki pe ganny fer an relasyon avek COSPROH.  Si letan zot pe regard tou sa bann size.  Si zot pour subdivide, si pa pour subdivide sa Lease 99an.  Si son Minister in osi konsidere ki avek tou sa bann skandal pour cancel tou sa bann lease.  Akoz i annan frod pour ki sa later an antye i retourn pour Leta Seselwa.  E ki a parti la keksoz i repran e rekomanse pour ki dimoun Praslin, Seselwa an zeneral i ava kapab ganny sa posibilite pour zot met en tender pour kapab ganny sa bout later.

Akoz Mr Speaker sa zafer Vacanze i pa sa degre senp parey nou pe tande dan Lasanble bomaten.  Mersi bokou.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mr Speaker sa tourism development li menm ou byen Chauve Souris or Vacanze, zot deza annan en Lease 99an.  Si i annan enquiry lo la, mon krwar enquiry ler i ava fer son lenvestigasyon.  Nou a konnen si vreman sa bann keksoz i ladan.

Be pour le moman, nou kontinyen.  I deza annan en lease.  E si nou pour al cancel son lease.  I pour annan bann lenplikasyon legal.  So nou a plis ou mwen les sa enquiry.  Les dimoun ki pe fer enquiry fer son enquiry.  Apre get-desizyon a ganny pran there and then.

Pour le moman sa dimoun i annan son lease lo sa later.  Napa okenn breach, napa okenn arrears.  So nou kontinyen parey i ete pour le moman.  Mersi.  Ziska ler en nouvo devlopman, oubyen enquiry i dir nou otherwise.  Mersi.

 

MR DEPUTY SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker mon ti ava kontan konnen avek Minis, si dan zot file lo sa propriyete.  Vi ki ti annan tou sa bann skandal.  Si zot lo kote Minister, letan tou sa skandal Parmalat ti eksploz-e an Italy an relasyon avek Vacanze.  Si lo zot file zot, zot annan okenn keksoz ki zot ti fer pour zot ganny lenformasyon, pour zot konnen ki pe arive?

Akoz apre tou.  Sa inquiry.  Inquiry in komanse apre ki Mosyon in ganny mete dan Lasanble Nasyonal.  Alor avan sa ki inquiry ti komanse, atraver Mosyon ki nou ti aprouve dan Lasanble,  eski Minis i kapab dir avek nou dan zot file, si zot koman en Minister, koman en Gouvernman zot ti pran okenn lentere pour zot konnen kwa ki pe arive?  Eski sa mo ‘Parmalat’ i egziste dan zot file?  Mersi bokou.

 

MR DEPUTY SPEAKER

Mersi Onorab.  Minister.

 

MINISTER PAMELA CHARLETTE

Mr Speaker mon pa’n vwar file.  Mon’n zis ganny bann dokiman ki ti pe relye avek kestyon dan Lasanble.  So mon pa pour kapab dir si i annan keksoz vreman dan file ki i annan Parmalat lo la.  Fodre nou al tyeke.  Mersi.

 

MR DEPUTY SPEAKER

Mersi.  Onorab Ramkalawan.

 

HON WAVEL RAMKALAWAN

Mr Speaker.  Mon krwar ki sa i enn bann problenm ki nou gannyen dan sa Lasanble.  Kot toultan nou ganny bann larepons, ‘’Nou pa’n vwar file.  Nou pa’n vwar tel dokiman.  Nou pa’n isi, nou pa’n laba.’’

Mr Speaker, eski nou ti ava kapab demande ki vi ki Vacanze i direkteman lye avek Parmalat, avek COSPROH ki nou nobou ganny akse avek sa bann dokiman.  Oubyen ki zot fer nou dan Lasanble konnen.  Parski sansan la ankor enn fwa nou pour trouv nou pe- nou pe trouv nou dan Lasanble akoz nou pa pe ganny sa bann larepons.  Nou bezwen al regard dan Komite pour vini pour demann kestyon e tou.

 

 

 

So, eski Minis ti ava kapab fer nou ganny en pe sa bann lenformasyon silvouple?  Mersi bokou.

 

MR DEPUTY SPEAKER

Bon mon krwar i en demann normal.  E nou pa ekspekte Minis annan tou bann larepons konsernan sa.  Parski i pa direkteman lye avek kestyon.  Me sertennman parey Leader Lopozisyon pe sizere.  Mon krwar ti annan serten keksoz ki si Lasanble i demann Minis pour rode.  Minis a kapab fer sa travay, pour fer bann lenformasyon vin devan Lasanble Nasyonal.  Minis mon donn ou la parol.

 

MINISTER PAMELA CHARLETTE

Mersi Mr Speaker.  Mr Speaker ler nou ti pe rod lenformasyon.  Nou ti pe rod lenformasyon baze lo kestyon ki ti pe demande.  Nou pa ti pour konnen si ti pour al dan Parmalat.  Me parey mon’n dir- ler nou’n- e ler PS in rod lenformasyon dan file.  In rod lo Vacanze.  E en pe listwar sa lease E osi bann later ki parey Msye Onorab Gill in mete dan son kestyon.  Se sa ki nou pe vin reponn ozordi.  Mersi.

 

 

 

MR DEPUTY SPEAKER

Non i- mon konpran ou parfetman Minis.  Sa i ok.  Me selman set en demann ki Lasanble pe demande, pa pe ekspekte tou bann larepons la deswit.  Me si zot- nou kapab ganny sa, petet dan lasemenn or osito posib nou ti ava apresye.  Bon Onorab Loze.

 

HON JOHAN LOZE

Mersi Mr Speaker.  Mr Speaker mon ti a kontan demann Minis.  Vi ki sa swadizan skandal Parmalat ti konsern en fraudulent bankruptcy ki ti deroul devan Lakour Italy.  En fraudulent bankruptcy.  Sete sa skandal Parmalat.  En bankruptcy.  Ki pa ti en bankruptcy ki ti deroul devan Lakour Italy.

Mon anvi demann Minis.  Anmas ou pistol Onorab.  Si i rezonnab pour mon demann Minis.

 

(Interruption)

 

MR DEPUTY SPEAKER

Non Onorab Loze.  Onorab Loze silvouple retract sa kalite langaz dan Lasanble.  Nou pa servi ‘pistol’, nou pa servi fizi dan Lasanble.  Silvouple retract.

 

 

 

HON JOHAN LOZE

Yes Mr Speaker.  Mon a retract ‘pistol’.  Mon ava plito kit li pour bann dimoun ki’n partisip dan Coup D’état ’77.  Mersi Mr Speaker.

Mr Speaker mon anvi demann Minis, si Minis i santi i rezonnab ki ozordi a sa moman, nou pour kestyonn li lo en bankruptcy ki’n deroul dan Lakour Italy?  E nou pour demann li si li i annan lenformasyon lo son file lo en bankruptcy ki’n deroul devan Lakour Italy?  Mersi Mr Speaker.

 

MR DEPUTY SPEAKER

Bon kestyon pa lye avek sa.  Nou’n deza koz lo la.  Minis in fini tonm dakor, i a rod lenformasyon.  Mon pa pe re ouver sa.  So Minis ou pa oblize reponn sa.  Nou pe al lo 2enm kestyon.  Onorab Clifford Andre.  Onorab.

 

HON CLIFFORD ANDRE

Mersi Mr Speaker.  Kestyon limero 2, i lir koumsa; an vi bann diferan proze land bank ki pe ganny promet par Gouvernman, eski Minis i kapab donn sa Lasanble, detay lo bann proze devlopman semen ki pou permet bann dimoun ki’n ganny en morso later pou ariv se zot?

E eski zot annan en plan konkret pour devlopman semen avan zot fer alokasyon later land bank?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker an vi bann diferan proze land bank ki pe ganny promet par Gouvernman.  E pe delivre par Gouvernman.  Minister i rekonnet ki dan lepase in antreprann serten proze land bank kot i annan serten kare later ki’n ganny vann san ganny deservi pa semen.

Sa ti pandan letan ki Minister ti napa larzan pour sa bann proze.  I annan serten sa bann later ki’n ganny vann avek kondisyon, avek sa dimoun ki nou’n vann avek,  pour konstrir zot prop semen.

Sa i sirtou kot teren i fasil.  Sorry.  E kot nou konnen pour napa posibilite encroachment.  Pour bann later ki Gouvernman in vann, san sa kondisyon, Gouvernman in komans fer provizyon pour konstrir sa bann semen anmezir ki nou ganny demann.

I bon fer resorti ki pour adres sityasyon kot later i ganny vann dan proze land bank san akse, Gouvernman i fer sir ki bann kare later dan son bann nouvo proze land bank i ganny servi par semen, elektrisite, delo avan alokasyon.

Nou’n etabli en Komite pour land bank ki konpri bann teknisyen, zofisye Biro Later, PUC e teknisyen sorti dan Departman Lenfrastriktir.  Sa bann zofisye pe travay an partenarya pour fer avanse bann proze land bank.

Zis pour- zis pour donn en legzanp.  Dan bann land bank lepase ki nou’n fer.  Apepre 13.  Well 12 sorry 17.  17, e nou’n vwar poudir laplipar bann semen in fini ganny fer oubyen pe ganny fer.  Sa i ant 2009 a 2017.

Pour bann land bank ki nou pe plan an se moman, i annan 24 proze ki an mars dan diferan staz.  E ki i ekspekte delivre pandan lannen 2019 a 2020.   E tou sa bann land bank nou pour- nou pe fer le neseser pour met semen avan ler ki nou fer alokasyon later.  Mersi.

 

MR DEPUTY SPEAKER

Mersi.  Onorab Andre.

 

HON CLIFFORD ANDRE

Mersi Mr Speaker.  Mr Speaker mon ti a kontan demann Minis.  An vi ki i annan bann dimoun parey in dir ki zot in ganny vann later land bank, me semen pa ti ankor ganny fer.  E Minis in dir i annan serten progranm pour fer sa bann semen.

Eski i kapab donn nou en dele definitif?  Akoz i annan dimoun ki anvi fer zot lakaz.  Me zot napa semen pour zot kapab ariv kot zot pour zot fer sa devlopman.

E annefe i annan ka kot in ganny dir, fer ou semen ou menm.  Me si sa bann dimoun i annan larzan pour zot fer lakaz.  E si zot pran sa larzan zot met dan semen, zot pour napa larzan pour zot fer lakaz.

So si Minis i kapab donn nou en dele letan, pour ki sa bann dimoun- mon ka koumsa Anse Aux Pins,  pour sa bann dimoun, zot ava konnen ki poudir ok, mon annan ankor 1an pour mwan espere.  I ankor annan 6mwan pour mon espere avan mwan komans mon lakaz.  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Zis pour fer resorti ki bann dimoun ki’n agree.  Parey mon’n dir dan mon lentervansyon.  Bann dimoun ki’n agree pour fer zot semen zot menm.  I plito bann landrwa kot i fasil.  E ti en kondisyon dan zot lavant.  Akoz ki nou fer?  Nou tir en amount pour semen, nou tir dan sa lavant later, sa pri ki zot ti pour aste pour later.

So se sa bann kondisyon ki ler zot ti ganny vann zot later.  Zot ti- se kondisyon ki zot ti sinyen.  E ki zot ti aprouve zot pour fer li.

Me selman i annan par egzanp Caryole Estate, mon pe- i dan mon- i lo nou plan pour fer.  Akoz laba nou ti vann 9 plot.  E 5- zis 4 ki ti ganny deservi avek semen.  E nou annan 5 plot ki pa ankor ganny fer.  E sa i sirtou bann pti feeder road ki pour al kot zot lakaz.  E nou pe met li lannen prosenn pour nou kapab fini.  Akoz nou fer li anmezir ki nou pe fer bann lezot land bank; ki nou fer bann lezot land bank ki osi ki nou’n manke.  Oubyen ki semen pa’n ganny fer.  Mersi.

 

MR DEPUTY SPEAKER

Mersi Minis.  Onorab Andre.

 

HON CLIFFORD ANDRE

Wi.  Minis in dir nou lannen prosenn.  Me eski sa bann zabitan i kapab konnen kan lannen prosenn?  An Zanvye, an Mars, an Desanm oubyen zis avan eleksyon?  Oubyen kan egzakteman ki zot pour annan zot semen pour zot kapab ariv kot zot, e koman zot devlopman?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker nou pe met li premye lanmwatye lannen prosenn.  Akoz parey mon’n dir nou annan 24 proze pour nou fer- ki nou pe travay lo la, la pour lannen 2019 a 2020.  Mersi.

 

MR DEPUTY SPEAKER

Mersi Minis.  Bon avan nou kontinyen, mon annan 5 Manm ki’n lev lanmen lo sa kestyon.  Mon konnen sak kestyon i enn ki kapab ouver laport pour tou distrik.  Sakenn i a komans demande ‘be sa pti feeder road, sa pti semen segonder eksetera ki pe arive.  Nou pa pour ganny letan al an detay.  Parske nou pa pour fini avek sa kestyon.

Mon a permet sa 5 a kondisyon ki zot fer zot kestyon relevan avek sa ki deza la devan.  E en kestyon lo sa prensip zeneral met en semen avan en alokasyon later.  Me annou pa tro al an detay.  Mon a permet sa 5.  E petet ankor 1, si i annan ankor 1 Manm.  Onorab Loizeau.  E nou- mon pour ferm li la.  E nou a kontinyen.  Me kestyon i devret vize lo merit vreman sa kestyon.  Pa al an detay silvouple.  Onorab Phillip Arissol.

 

HON PHILLIP ARISSOL

Mersi Mr Speaker.  Eski Minis i kapab dir sa Lasanble.  Ki progre son Minister in fer an se ki konsern lenfrastriktir?  Savedir delo, semen ek elektrik pour proze land bank ex Olden Pierre Anse Louis.  E kan alokasyon ek bann aplikan i sipoze komanse?  Mersi.

 

MR DEPUTY SPEAKER

Minis.

 

MINISTER PAMELA CHARLETTE

Mersi Mr Speaker.  Mr Speaker Olden Pierre i en land bank ki’n deza komans- nou’n deza komans travay lo la.  I annan deza bann plot ki i annan semen.  E i lo nou progranm pour nou kapab fer li osi lannen prosenn.  Nou pe target lannen prosen pour nou kapab met- fini avek tou bann semen.  Mersi.

 

MR DEPUTY SPEAKER

Mersi.  Onorab Stephen Pillay.

 

HON STEPHEN PILLAY

Mersi Mr Speaker.  Bonzour Minis, delegasyon e tou dimoun.  Minis- Mr Speaker mon anvi demann Minis si nou- parey ou fek pe dir, si nou pour al sakenn nou pti distrik pe rod tou sakenn en lalis sa.  Akoz i pa fer nou ganny en lalis tou bann proze land bank ki i annan?

Akoz dernyen fwa si mon memwar e bonn.  Pour grander Au Cap ou dir nou i annan zis 4.  Konmsi, donn nou tou son lalis whatever- tou, tou proze land bankProbably ou kapab fer li pour sa dernyen 12 mwan a 24 mwan.  Bann ki’n donnen, time frame, costing.  En pe detay ek sa lalis antye ki nou kapab.  Sak distrik i ganny en kopi.  Nou kapab travay lo la pour kekfwa en prosen kestyon letan nou anvi demann li probably personnelman an ekrir or.  Mersi Mr Speaker.

 

MR DEPUTY SPEAKER

Mersi Onorab Pillay.  Minis mon krwar kestyon i byen.  I, si ou kapab fer nou ganny en lalis pour tou bann proze land bank par distrik.  E ki bann proze semen ki asosye avek sa bann proze?  Mon krwar sa i ava ed Manm bokou.  E petet zis ankor en lenformasyon.  Kan proze i ekspekte swa komanse oubyen terminen?  Mon krwar sa lenformasyon ti ava itil.  Ou pa bezwen donn li la.  Me byensir si ou kapab sirkil kot nou.  Mon asire zot annan e nou kapab gannyen menm sa semenn.  Minis.

 

MINISTER PAMELA CHARLETTE

Mersi Mr Speaker.  Nou kapab donn zot nou progranm pour sa lannen avek lannen prosenn bann land bank ki nou pe travay lo la.  E bann- e nou a donn zot en apersi ki kantite travay ki nou bezwen fer avan ler nou kapab allocate en land bank bann aplikan.

So wi nou annan nou lalis ki nou’n fini travay lo la.  Nou met nou progranm.  Nou kapab share avek Lasanble.  Mersi.

 

MR DEPUTY SPEAKER

Mersi Minis.  Onorab William.

 

HON WAVEN WILLIAM

Mersi Mr Speaker.  Bonzour Minis avek ou lekip.  Bonzour tou dimoun ki a lekout.  Mr Speaker mon kestyon i konm swivan; Minis mon ti a kontan konnen.  Ki staz devlopman sa proze semen ki Danny Madeleine avek detrwa bann zabitan pe espere Grand Anse Mahe o-bor BBC?

E mon 2enm kestyon, eski ou kapab dir mwan si sa semen ki pe ganny fer Helvetia, i pe al deservi en nouvo land bank?  Mersi bokou.

 

MR DEPUTY SPEAKER

Mersi Onorab.  Minis.  Eski ou annan sa lenformasyon spesifik?

 

MINISTER PAMELA CHARLETTE

Mr Speaker mon pa pe-nou pa pe ganny sa kestyon byen.  Mersi.

 

MR DEPUTY SPEAKER

Onorab William ou a-

 

HON WAVEN WILLIAM

Wi.  Minis i annan 3an pase nou’n fer plizyer vizit avek meeting pour 1 semen land bank pour deservi Danny Madeleine avek detrwa bann zabitan ki zot in aste en bout later o bor BBC dan montanny.  E mon anvi konnen ki staz devlopman?

Akoz nou’n fer en bon pe meeting.  Me solman nou pa konnen egzakteman ki kote nou ete lo sa proze semen.

Dezyenmman; i annan en proze semen pe ganny fer Helvetia.  Eski i annan en nouvo proze land bank dan Helvetia?  Lefe ki nou ti ganny dir oparavan pour napa later ankor Helvetia pour vann.  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Pour premye kestyon Danny Madeleine.  Sa nou napa lenformasyon.  Dezyenm kestyon Helvetia.  Ler mon’n demann avek bann dimoun o bor mon ki fer semen Lenfrastriktir avek SLTA.  Zot pa pe fer semen Helvetia E.  So i kapab en lot Lazans oubyen en endividi.

 

MR DEPUTY SPEAKER

Mersi Minis.  Onorab William.

 

HON WAVEN WILLIAM

Minis mon en pti pe etonnen ou pe dir mwan ou napa lenformasyon.  Akoz enn.  Nou’n ganny meeting avek ou PSPS in vin fer vizit dan distrik.  PS François avek Planning nou’n fer plizyer vizit.  Mon ti ava demann ou silvouple pour fer nou ganny lenformasyon.  Akoz sa bann zabitan ki’n aste zot bout later en bon pe letan pase.  Pe esper sa semen pour zot kapab komans zot lakaz.

Epi Minis.  Eski ou pe konfirm avek nou la, poudir napa proze land bank dan Helvetia.  Lefe ki nou okouran poudir i annan later ki’n ganny demarke.  Eski- pour met li pli senp.  Bann dimoun La Misère ki’n fer laplikasyon, zot pe demande si i annan en proze land bank dan Helvetia?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mr Speaker.  Helvetia i pa lo nou lalis pour land bank an 2019, 2020.  I kapab annan morso later laba nou- i annan en plot ki’n ganny vann.  Oubyen 2 plot ki’n ganny vann.

Me selman land bank.  Ler nou dir land bank nou pe koz en land bank 4 plot an montan.  Ler i annan 4 plot an montan, ou pe fer semen, ou pe fer tou lenfrastriktir ou menm, ou pe donn sa dimoun.  Me pour Helvetia i pa lo nou lalis pour 2019 ek 2020 pour le moman.  Mersi.

 

MR DEPUTY SPEAKER

Mersi.  Mon pe met en dernyen kestyon.  Onorab William.

 

HON WAVEN WILLIAM

Minis pour lo mon premye kestyon.  Mon pe demande akoz- parey mon dir se ki mwan annan rikord avek mon kot nou’n ganny meeting.  E prezan ou pe- konmsi ou pe dir mwan poudir ziska aprezan la.  Akoz sa bann dimoun mon konnen zot pe ekoute, zot pe espere.  Ou pe dir mon poudir sa proze semen i pa pour-i pa lo lalis 2020.

E mwan mon  anvi konnen kan sa bann dimoun pour ganny zot semen pour zot kapab komans zot proze lakaz?  Akoz pli zot espere Minis.  Sa bann dimoun i pour kout zot bokou ser.

Epi Minis.  Mon annan detrwa dimoun La Misère ki ti pe rod en bout later Helvetia.  E si ou pe dir mon poudir later in ganny vann.  E mon pe demann ou si sa bann dimoun in ganny vann later, zot in jump the queue of the point system?  Mersi.

 

MR DEPUTY SPEAKER

Mersi Onorab William.  Minis.

 

MINISTER PAMELA CHARLETTE

Mr Speaker vi ki i dan lepok PS François,  nou pour bezwen al tyek- nou a get bann file ki nou annan, nou a gete ki i annan lo file pour nou gete si nou kapab go ahead avek sa spesifik land bank ki ou pe dir kot Danny Madeleine.  PS a pran lenformasyon, apre i ava tyek son file.  Mersi.

 

MR DEPUTY SPEAKER

Mersi Minis.  Onorab François Adelaide.

 

HON FRANÇOIS ADELAIDE

Mersi Mr Speaker.  Mr Speaker permet mon pour mwan remersi CEO Herath pour sa zoli travay ki in fer Baie Lazare.  Nou pe ganny nou semen zis a tan pour lafet le 4 Oktob.  Mersi e fotespere nou kontinyen sa bon travay.

 

(APPLAUSE)

 

HON FRANÇOIS ADELAIDE

Minis mon mwan kestyon pour ou,  se ki, par egzanp ou’n dir poudir ti annan bann dimoun ki ti annan kondisyon ki ti’n ganny mete avek zot.  Ki ou donn zot, zot later, zot pour fer semen.  Me eski ti annan okenn plan?

Akoz ou konnen konmela ler ou get teren, ou trouve i fasil.  Me selman ler ou pe aktyelman fer sa semen, i anmenn en lot kou ankor.  E sa bann dimoun pour en rezon ou en lot,  zot pa kapab fini fer sa semen pour zot kapab fer zot lakaz.

Eski ou Minister i annan en fund, ouswa kek sipor dan pa kote ki pour kapab asiste sa bann endividi pour zot kapab ed zot dan- pour zot kapab fer zot semen pour fer zot lakaz?

E mon dezyenm kestyon i, eski par egzanp ankor.  Ler sa dimoun in ganny sa kondisyon.  Vre i fer sa semen li, me solman sa subsidy ki ou gannyen lo sa later.  Ler ou gete sa semen ki in fer, i plis ki sa subsidy ki in gannyen.  E ou pour trouve poudir i annan lezot bann dimoun ki pe al benefisye avek sa menm semen ki sa dimoun in fer.  Me sa bann dimoun pe benefisye for free.  E sa burden i mor zis lo sa dimoun.  Akoz li i ti bezwen ganny sa later pour li fer son lakaz.

E eski i annan en konpansasyon, en form konpansasyon ki sa dimoun i kapab claim pour li koriz en pti gin sa depans ki in fer?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Normalman Onorab nou napa en funding vreman dan nou Bidze pour nou koman en lasistans pour donn dimoun pour fer semen.  Nou annan zis nou bann land bank.  E si ou pour remarke.  La rezon ki nou pa’n fer bokou semen land bank ler nou ti vann later, se akoz nou ti napa larzan menm.

So se la dan sa dernyen 2 lannen la ki nou pe met larzan spesifikman anba Bidze pour nou fer bann semen land bankSo nou- vreman nou napa en funding spesifik pour anba nou Bidze pour asiste bann dimoun ki bezwen led pour fer semen.

E osi si bann- parey mon’n dir oparavan,  kondisyon se pour toultan nou met kondisyon,  se si en dimoun i fer semen i fer li- i reste piblik.  So si en dimoun i annan en claim, nou pour bezwen vwar li spesifik.

Nou pour bezwen vwar li on a case-to-case basis i vini.  E nou, nou get sirkonstans.  E nou osi get, gete si vreman Gouvernman ler in fer sa semen, in ouver en pe pour nou osi ganny lezot land bank.

Bann spesifik lenformasyon ki nou gannyen avan ler nou konsider en claim.  Mersi.

 

MR DEPUTY SPEAKER

Mersi Minis.  Onorab Egbert Aglae.

HON EGBERT AGLAE

Mersi Mr Speaker.  Bonzour Minis.  Minis dan Lespri kot i annan serten bann aplikan ki’n ganny later land bank ki pe pare pour zot zwenn ansanm pour zot kapab finans en pe.  Ouswa apportion en pe larzan pour kapab fer devlopman land bank pour fasilite zot menm.  Eski ou Minister pe ankouraz sa kalite pratik?  Ouswa pe ankor pe fer sa bann kalite demars?

E dezyenmman.  Mon pour follow up en pti gin lo kestyon Onorab Pillay, Minis eski ti posib pour ki tou Ladministrasyon Distrik- ou’n nonmen poudir ou pour fer provizyon pour kapab donn en lalis bann land bank ki deza la ki pe al fer lenfrastriktir semen, me eski ou kapab al pli en pti pe pli devan pandan sa prosen 2an a 3an pour bann distrik sirtou ki i annan bann prominence pour annan proze land bank kapab ganny en Nosyon lo la?  Kan eski bann lenfrastriktir i kapab ganny met an plas baze lo en time table, baze lo zot lespas fiskal?  Mersi.

 

MR DEPUTY SPEAKER

Mersi Onorab Aglae.  Minis.

 

MINISTER PAMELA CHARLETTE

Mr Speaker parey nou’n dir.  Nou kapab donn zot en lalis ki i annan bann 2 diferan progranm bann land bank lo la ki nou ava kapab share avek zot.

Pour premye kestyon si i annan bann dimoun ki zot oule met zot larzan ansanm pour fer zot semen, zot prop semen.  Wi nou ankouraze.  Nou kekfwa, nou a kapab donn en led lasistans.  Par egzanp teknik.  Si nou vwar poudir i en pti pe difisil,  nou annan bann dimoun ki travay lo sa bann semen.  So nou pa pour mind si dimoun i met zot larzan ansanm pour kapab fer semen, si zot anvi fer li en pti pe pli vit.  Mersi.

 

MR DEPUTY SPEAKER

Mersi Minis.  Onorab Ferrari.

 

HON JEAN-FRANÇOIS FERRARI

Wi Mr Speaker.  Mwan ti a kontan demann Minis.  E mon vwar drol ki MNA pour Port Glaud pa’n lev sa pwen.

Ler nou koz lo land bank,  eski i annan en Lareg ki ganny servi lo grander plot, size plot ki i donnen?  Akoz mon ti dan distrik Port Glaud pe fer en pe travay sa wikenn,  nou vwar en ansyen MNA, ki’n ganny li en manman plot later pe eklersi dan milye en land bank.  Konmsi bann dimoun Port Glaud i vreman ankoler, bann dimoun ki pe rod en bout later.

Konmsi eski i annan en lareg?  Oubyen eski land bank i ankor pe mars lo si ou vire, si ou vann ou nanm, ou kapab ganny en pli zoli kopo?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker nou pa kapab met egzakteman en standar.  Akoz?  Akoz topographie i en landrwa i diferan.  E density, land use bann keksoz koumsa i ganny konsidere ler pour fer en plot pour land bank.

I annan landrwa kekfwa i plat ou pour kapab fer li en 400 met kare.  Be i annan landrwa kot ou- ki en pti pe sloppy ki kekfwa i ti pour en pti pe pli gran.  So i depan.  I depan.  Mersi.

 

MR DEPUTY SPEAKER

Onorab Ferrari.

HON JEAN-FRANÇOIS FERRARI

Non zis pour dir avek Minis.  Mon mwan konpran Minis sa ki ou’n dir nou.  Me selman dan en menm land bank, ou vwar bann plot 400 met kare.  Apre ou vwar en msye li in ganny li 1, 800 met kare.  Dan milye ek bann 400 met kare konmsi.  Mon pa konpran ki mannyer bann density i kapab apply!  Konmsi sey gid nou en pti pe silvouple.  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Menm dan en land bank.  En land bank spesifik ou pour ganny diferan topographie.  Ou pour ganny diferan plot size.  E tou nou plot size ler nou pe plan, i pas kot Planning Authority ki ganny aprouve.  E osi tou bann Lazans neseser ki zot aprouve pour donn- pour kapab ganny sa size.

Akoz parey mon’n dir, i pour depan lo topographie vreman.  Oubyen lo land use sa landrwa.  Mersi.

 

MR DEPUTY SPEAKER

Mersi.  Onorab Norbert Loizeau.

 

HON NORBERT LOIZEAU

Mersi Mr Speaker.  Bonzour Minis.  Mr Speaker vi ki Minis in agree ek Onorab Pillay ki i pour provide nou en lalis bann proze.

Alors mon kestyon pour sanz en pe.  Mon ti anvi demann Minis, pour ki i fer sir ki dan sa lalis proze, i enkli sa proze land bank anba grot Grand Croix ki baliz avek Mr Gilbert Pool ki i annan en proze semen, i annan en plan semen pour al la.  Me selman i annan plis ki 10an pa’n fer.  Bann dimoun bor la anba i anvi fer konstriksyon, zot pa kapab.  I annan en semen a kote.  Me semen i pour Mr Gilbert Pool.  Zot pa kapab servi.  Alor sa bann dimoun ti a kontan ki zot enkli sa proze osi la anba, pour zot kapab fer zot konstriksyon.  Mersi.

 

HON FLORY LARUE

(Off-Mic)

Fer acquire sa semen.

 

MR DEPUTY SPEAKER

Mersi Onorab.  Minis.  mon permet ou en komanter lo la.  Si ou napa lenformasyon detaye.

 

MINISTER PAMELA CHARLETTE

Mr Speaker pour sa nou ava tyeke.  Posibilite ki ti annan-PS pe dir mwan, posibilite ti annan kondisyon lo ler nou ti vann sa bann later avek zot.

 

MR DEPUTY SPEAKER

Onorab Loizeau.

 

HON NORBERT LOIZEAU

Mr Speaker dapre paran en fir ki i annan en morso later la.  Ti napa okenn kondisyon ki’n ganny sinyen konmkwa zot sipoze fer semen la.  Akoz i annan plizyer morso la.  Petet akoz ti annan sa semen Mr Gilbert Pool, zot in panse sa semen i en semen piblik pour Gouvernman.  I baliz ek sa bann later.  Me ler zot in dekouver ki sa semen i pour Mr Gilbert Pool.  La ki problenm in leve.  E mon krwar Gouvernman ti merit konnen ki sa semen i pour Mr Gilbert Pool.  I pa pour sa bann dimoun servi pour vin lo sa later.  Mersi.

 

MR DEPUTY SPEAKER

Mersi Onorab Loizeau.  Mon mazinen sa se en lenformasyon ki i a ed Minis pour kapab trouv en solisyon.  E remet li dan sa dokiman ki pour prezant devan Lasanble.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker zis en pti kontinyasyon lo sa larepons Minis in donnen.  Selman Minis, eski ou ti ava kapab dir nou, si letan zot pe koup land bank e apre pour zot fer bann semen ensidswit.  Si topographie dan sa landrwa i konsistan?  Si i konsistan, e non pa en bout ki tonm dan gran ranpar.  Lot bout ki tonm dan montanny.  Eski ou ava dakor avek mwan ki an prensip dan sa bann sityasyon parey.  Tou bann kare ki zot pour donnen i pour plis ou mwen menm grander?

Eski Minis i ava dakor avek mwan?  Parski i deza- dan sa landrwa ki Onorab Ferrari pe koz lo la.  I deza annan bann lezot kare ki zot in koupe, ki zot in fini koupe.  E i donn mwens ki, tou bann lezot kare i donn mwens ki 1,000 met.

Ok ki’n pran konsiderasyon.  Zisteman sa eleman topographie.  Me letan dan sa menm topographie, mazorite bann kare i mwens ki 1,000 met, 1, 000 met kare.  E souden zis ou vwar enn ki enn, 800 met kare par egzanp.

Eski- konmsi Minis i ava dakor avek mon ki i annan en problenm?  E apre si zis Minis ti ava kapab dir nou, an relasyon avek zot Polisi, ki mannyer eski sa prensip en kare, en morso later from Gouvernman i aplike an relasyon avek later land bank.  Eski en dimoun i kapab annan en kare later ki’n deza gannyen avek land bank?  Oubyen ki in aste?  E apre sa ganny en 2enm kare lo land bank?  Mersi bokou.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker si later i konsistan i pour- sa ki nou nou’n fer la dernyerman nou.  I tou preski- preski menm plot size.  Preski en.  Me selman parey mon’n dir, i pour depan lo topographie.  Me selman si i konsistan, i plat,  then i pour bezwen preski menm parey.

Anba nou land point system ki nou’n mete,  e nou Polisi ki nou’n- ki ti vin an viger 2018, Out 2018 nou ti lans li.  Nou Polisi se, si ou’n vann en later avek en dimoun anba land bank, ou pa sipoze ganny en lot later.  Anba nou Polisi ki nou’n- ki nou ti lanse an 2018, an Out 2018.

Wi- so si ou’n pas dan land point system ki nou ti lanse 2017.  Then nou pour annan en database.  Then nou pour vwar poudir ou’n- si ou’n ganny later oubyen non.  E nou bann due diligence ki nou’n fer.  Nou pou vwar ki ou’n deza ganny later.  Ou deza annan posesyon en bout later.

 

MR DEPUTY SPEAKER

Onorab Ramkalawan.

 

HON WAVEL RAMKALAWAN

Mersi bokou Minis pour sa larepons.  I vreman edan.  I klarifye en kantite keksoz.  Me Mr Speaker, Minis in koz lo- anba land point system an 2017.

Me si en konparezon en dimoun ti’n deza- avan 2017 ganny en bout later avek Gouvernman, e whatever in fer avek sa bout later.  Me selman i ti’n deza ganny en bout later avek Gouvernman.  Eski i pour kalifye pour li ganny-?  Konmsi avan 2017, eski i ti pour kalifye pour li ganny en 2enm bout later?

Parski- mon retourn ankor lo- well sa i en case in point kot en dimoun in deza ganny en bout later.  La aprezan i annan en lot bout.   Me osi kot bann dimoun ki’n deza annan en bout later prive.  Mon krwar mon’n deza lev sa size avek ou, kot i ti’n aste en bout later prive.  Apre sa relasyon ant li avek son msye pa’n mase.  Zot in bezwen vann sa bout later pour zot fer partaz bann byen marital.  E ki ozordi letan i vin rod en bout later.  Gouvernman i dir avek li ‘sorry nou pa pour kapab donn ou, akoz ou’n deza annan en bout later lo ou non’.

Konmsi mon- sorry Mr Speaker mon realize ki poudir konmsi nou- mon pe al en pti git an deor.  Me selman vi ki i lo sa size land bank.  Kekfwa Minis ti ava kapab dir nou sa.  Parski i annan- i ankor annan en pe konfizyon.  Mersi bokou.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker nou Polisi i kler.  I dir poudir si ou’n deza annan en bout later.  Ou pa sipoze ganny en lot bout later.  Me selman i annan sirkonstans; i annan sirkonstans par egzanp si en dimoun in divorse.  Ou konpran?  En dimoun in divorse.  Me selman i pour bezwen meet bann kriter lo nou land point system. 

        Akoz si i pa pe meet sa kriter.  Then nou pa pour vann li.  Me selman i kler poudir si ou’n deza- menm si ou’n annan en bout later prive, ou pa sipoze ganny en lot bout later.  E- me selman sa i toultan annan en pti lenpak lo nou-konmsi i reflekte en pe lo nou due diligence.  Fodre nou fer sa due diligence byen.  Pour nou fer sir ki nou atrape.

Me selman dan nou form osi.  Dan nou form laplikasyon in mete, si ou’n mal deklare, oubyen si ou’n mal donn lenformasyon osi, nou annan drwa pour nou vini e repran sa bout later ek ou.  Si ou’n mal donn nou sa lenformasyon.  Mersi.

 

MR DEPUTY SPEAKER

Mersi Minis.  Nou pour al lo 3enm kestyon.  Onorab Sylvanne Lemiel.

 

HON SYLVANNE LEMIEL

Mersi Mr Speaker.  Bonzour Mr Speaker, Minis avek ou delegasyon.  Ek tou mon bann Koleg Manm Onorab.  Mon kestyon i al konm swivan.  Eski Minis i kapab enform sa Lasanble e zabitan Anse Royale.  Kote sa sit oubyen landrwa ki’n ganny demarke dan Anse Royale pou fer bann aktivite lwazir?

a)Lekel Minister konsernen ki pou enplimant sa proze?

 

  1. b) Kan ki sa proze pou komanse? E dan ki dele letan i pou ganny konplete?

 

MR DEPUTY SPEAKER

Mersi Onorab Lemiel.  Minis.

 

MINISTER PAMELA CHARLETTE

Mersi Mr Speaker.  Mr Speaker sa proze, baze lo plan litilite later, Land Use Plan pour distrik Anse Royale ki i ankor en draft pour le moman, i annan 2 sit ki’n ganny idantifye pour bann aktivite lwazir pour piblik.  Sa 2 sit i sitye pa lwen avek Sant Kominoter Anse Royale kot piblik pe aktyelman apel koman Fun Park.

Premye sit C7193 i lo kote lanmer.  Sa sit in ganny divize an 2 bout later. Pour vin C10211 ki 11,000 met kare.  11, 977 met kare.  E lot i C10210 ki i annan en siperfisi 1,944 met kare.

Sa 2enm sit i sitye kot semen vizavi sa enn premye ki konpri en siperfisi 5, 733 met kare.

Lotorite Plan i annan en plan devlopman ki gid kalite proze ki devret ganny fer lo sa sit.

I bon mansyonnen ki nou Minister pa mandate pour envestir e direkteman enplimant bann tel proze.  Se pour sa rezon desizyon ti ganny pran pour diviz sa later pour permet pass bay en bout later avek envestiser Seselwa, atraver tender.  Pour fer en proze lwazir lo sa sit ki ti pour komans donn sa landrwa sa lanpler lwazir ki i merite; preski dan menm loptik avek Beau Vallon.

Pour bann lezot proze lwazir tel ki kiosk – parey lezot proze kiosk pour bann pti artizan.  Gouvernman i kapab enplimant sa atraver ESA.

Sa proze i annan serten konponan touristik ki pour ganny enplimante par sekter prive.  Pour sa ti annan tender ki ti ganny fer, ki konpri devlopman restoran ek laboutik pour vann bann komodite piknik par egzanp.

Pour bann lezot proze lwazir, tel ki kiosk parey lezot proze kiosk pour bann artizan parey mon’n dir oparavan.  Mersi Mr Speaker.

 

MR DEPUTY SPEAKER

Mersi Minis.  Onorab Lemiel.

 

HON SYLVANNE LEMIEL

Mersi Mr Speaker.  Minis si nou konpran ou byen.  Savedir en sit i lo kote montanny,  lot sit i lo kote bor lanmer.  Konbyen letan lease sa envestiser in gannyen?  E ki dele letan in gannyen pour li kapab enplimant son projet?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Dapre lenformasyon ki nou annan.  Sa enn li i pa ankor sinyen son- i pa ankor sinyen son lease.  Akoz i pa ti- ti annan en pe dezagreman lo kote fasilite.  Par egzanp toilet.  So i pa ti ankor.  An se moman i pa ti ankor sinyen son lease.

 

MR DEPUTY SPEAKER

Mersi.  Onorab Lemiel.

 

HON SYLVANNE LEMIEL

Minis i annan sa 2 bout ou’n dir.  1 ki sa envestiser pa ankor sinyen.  Ki mon krwar petet i li menm li sa 10211, oubyen sa lot?  Lekel ant sa 2 parcel ki sa envestiser pa ankor siny lo la?  C10210?  Minister?

 

MR DEPUTY SPEAKER

Onorab Lemiel.

 

HON SYLVANNE LEMIEL

Minister ou pe klarifye?  I C10210.  Ok, savedir sa pli pti plot.  Nou pe koz sa enn ki i annan toilet lo la, in ganny sa bout an desandan.  Akoz petet nou ti pour kontan konnen ki bor sa later in koupe.  Kote ki li i gannyen si bout an montan, oubyen si bout ki an desandanMersi.

 

MR DEPUTY SPEAKER

Mersi.  Minis.

 

MINISTER PAMELA CHARLETTE

I sid avek toilet.

 

MR DEPUTY SPEAKER

Mersi.  Onorab Lemiel.

 

HON SYLVANNE LEMIEL

So, Minis kan petet la ki ou pe mazin kriy sa dimoun pour zot finaliz sa Kontra?  Mersi.

 

MR DEPUTY SPEAKER

Minis.

 

MINISTER PAMELA CHARLETTE

Ok.  Mr Speaker, enn parmi bann kondisyon sa bay ti pour li servi striktir ki egziste, pour repare e transform lo en twalet piblik.  E in demann nou pour nou extend sa letan.  Akoz ti 6 mwan.  E in demann nou pour extend sa letan pour 12 mwan.

So nou’n allow li 12 months.  E nou’n anvoy file kot AG ki pe fer le neseser pour li siny son lease.  Mersi.

 

MR DEPUTY SPEAKER

Mersi.  Onorab Lemiel.

 

HON SYLVANNE LEMIEL

Finalman Minis.  Sa lot morso ki pli gro.  Ki zot pe deside pour fer avek Minis?  Mersi.

 

MR DEPUTY SPEAKER

Minis.

 

MINISTER PAMELA CHARLETTE

Mr Speaker dan plan ki land use plan in idantifye, i annan diferan keksoz ki pour al lo la.  E i parey kiosk– bann kiosk.  Bann beach bar and grill par egzanp.  So i annan bann diferan keksoz ki in fini idantifye lo sa bout later ki pour ganny met an plas.

 

MR DEPUTY SPEAKER

Onorab Lemiel.

 

HON SYLVANNE LEMIEL

Mersi Mr Speaker.  Be eski sa lot morso in pare pour lease Mr Speaker?  Sa lot morso ki i annan devlopman ki pour al fer lo la.  Eski in pare pour zot lans en lapel pour dimoun kapab tender li osi?  Mersi.

 

MR DEPUTY SPEAKER

Mersi.  Minis.

 

MINISTER PAMELA CHARLETTE

Mersi Mr Speaker.  Pour sa later lo sa kote semen li,  nou pour bezwen diskit avek diferan Lazans par egzanp ESA. E osi si pour met lo tender, i pour go through SIB pour fer li.

 

MR DEPUTY SPEAKER

Mersi.  Onorab Stephen Pillay.

 

HON STEPHEN PILLAY

Mersi Mr Speaker.  Mr Speaker mon ti a kontan demann Minis en pti- si i kapab donn nou en pe detay pour lo sa tender pour sa enn ptipti la.  Kan tender ti pe ganny advertise pour lo medya pour sa tender.  E ler si siny sa- son met ki’n siny sa tender ki’n ganny li, ki’n ganny sa tender, konbyen i peye pour al par met kare or par an?  Konbyen pe pey son lease pour devlopman sa landrwa?  Mersi Mr Speaker.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Tender ti ganny award 2016.  Me selman nou napa lenformasyon konbyen pe peye actually la at the moment. 

 

MR DEPUTY SPEAKER

Mersi.  Onorab Pillay.

 

MINISTER PAMELA CHARLETTE

Mon bezwen rod sa lenformasyon Mr Speaker.

 

MR DEPUTY SPEAKER

Onorab Pillay.

 

HON STEPHEN PILLAY

Mr Speaker mon ti pe demann Minis pa kan i ti ganny award, ok.  Be kan sa dat tender ti ganny advertise dan medya?  Epi bann lezot i kapab fer mon ganny apre.  Mersi Mr Speaker.

 

MR DEPUTY SPEAKER

Mersi Onorab.  Minis eski ou annan dat ki tender ti ganny lanse?

 

MINISTER PAMELA CHARLETTE

Mr Speaker nou a rod sa lenformasyon.  Akoz nou napa la devan nou la.  Mersi.

 

MR DEPUTY SPEAKER

Mersi.  Onorab Flory Larue.

 

HON FLORY LARUE

Mersi Mr Speaker.  Mr Speaker mon ti a kontan remind Minis atraver ou ki sa sit beach park ti ganny promet avek zabitan Anse-Royale e sid Mahe depi 2007.  Ozordi nou 2019.  Alor mon vwar li en pe dezapwentan ki ankor i pa kler ki pe arive lo sa later an 2019.  Mon ti a kontan demann Minis.  Sa later lo land use plan ki in dir i ankor en draft pou ozordi, i ganny demarke koman L10.  Sa draft land use plan ti ganny prezante avek piblik Anse Royale.  E zot ti ganny loportinite pour vin donn zot pwennvi lo la.

Sa later beach park parey mon dir, i L10, in ganny mete koman Outdoor Amenity and Open Spaces.  Mon ti a kontan demann Minis, lo sa later orizinal ki zot ti propoz avek zabitan pour fer beach park lo la, konbyen bann kare ki’n ganny allocate pour other uses apard, ki sa open space ki zot in allocate li pour fer avek?  E si i kapab donn nou lalis sa bann plot.  Konmsi ki pour ganny fer lo la, silvouple?  Mersi.

 

MR DEPUTY SPEAKER

Mersi Onorab Larue.  Minis.

 

MINISTER PAMELA CHARLETTE

Mersi Mr Speaker.  I annan- beach park li i- akoz i annan en pe subdivisions ki’n ganny fer dernyerman Mr Speaker.

I annan ki’n ganny allocate avek bann Lenstitisyon Gouvernman.  Par egzanp Lapolis i annan en plot lo la, pour bann proze kominoter.  Nou annan SFRSA osi ki i annan en plot lo la.  Apre PUC.  PUC osi i annan en bout lo la pour son substation.  Me selman PUC pa lo sa bout beach park.

 

MR DEPUTY SPEAKER

Mersi Minis.  Onorab Larue.

 

HON FLORY LARUE

Minis, mon anvi anmenn dan ou latansyon ki en pe semenn pase mon ti ekrir ou en email.  Spesifikman lo en plot number, lo en plot ki zis komans L10 lo kote sid of sa demarkasyon.  Ki ant PUC avek sa plot dan milye ki dan montanny.  Mon krwar ou konnen ki morso mon pe koz lo la.  Sa bout later i demarke koman L10.  Pourtan in ganny allocate avek en dimoun prive pour fer en devlopman ki napa nanryen pour fer avek leisure.

Eski i normal?  Mon kapab konpran pou Dife, pour Lapolis pour PUC.  I bann lenfrastriktir Nasyonal ki nou bezwen, kantmenm mon pa vreman agree avek sa mannyer zot pe devlop sa later.  Akoz mon santi ki Seselwa i bezwen open space, e nou pa bezwen ankonbre.  Akoz i annan lezot later Anse Royale nou kapab servi.

Me solman i annan en plot ki ou paret mon ou’n manke.  Minis eski ou kapab eksplik nou silvouple?

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Sa plot napa nanryen pour fer avek beach park.  Menm si son land use ti L10.  I parey kot lapolis li osi i o bor li, i annan en bout.  Sa plot ki nou’n donnen pour sa ki nou ti pe koz lo la, ki ou pe dir.  Sa i en alokasyon ki ti ganny fer en pe letan pase.  E sa dimoun mon krwar ti vin- ti menm vin dan-en dimoun Anse Royale ki ti pe rod en bout later pour li fer parking.  Se-e Lotorite Distrik ti agree pour osi allocate sa later avek li, through li.  E sa in ganny mete osi through Planning tou bann lezot Lazans.  Me selman pour beach parkBeach park li, i plizoumwen pli- i pli o.  Mersi.

 

MR DEPUTY SPEAKER

Mersi.  Onorab Larue.

 

HON FLORY LARUE

Mr Speaker.  Mwan mon pe regard land use plan ki sorti kot Planning.  E sa bann- sa bout later spesifik nou pe koz lo la. I L10.  E parey Minis in donn nou lalis devlopman lo sa later.  Lapolis pa L10 li.  I lo M20M20 i pour Civic and Community Services.

Li PUC i demarke klerman ki i lo U10.  U10 i Power Production and Distribution.  Sa, sa bann later in ganny demarke spesifikman pour fer spesifikman sa bann proze lo la.

Sa plot number ekstra ki Minis i dir nou in ganny donnen lo sa open space ki L10 Outdoor Amenities and Open Spaces,  mon pe konpran, mon oule konpran ki mannyer en dimoun in ganny en bout later?  Eski ti annan en tender process kot tou dimoun ti kapab apply sa later?  Eski i en servis ki vreman nou bezwen li imedyatman ki i bezwen take up open space?

Mon pa lager kont sa dimoun ki’n ganny sa later.  Mon oule konnen ki mannyer Planning Services ki i annan en land use plan ki zot in submit avek zabitan Anse Royale, i pase i donn en lot bout later en zabitan or anybody, en Seselwa.  En bout later lo en later ki’n ganny demarke pour Outdoor Amenities and Open Spaces.  Mon ti a kontan konnen si ti annan en tender process pour sa bout later?  Mersi.

 

MR DEPUTY SPEAKER

Mersi Onorab.  Minis.  Kestyon se eski Polisi in ganny adere avek?  E eski ti annan en tender?

 

MINISTER PAMELA CHARLETTE

Mr Speaker, parey mon’n dir, sa land use i en draft land useSo parey nou’n dir- parey i annan sanzman ki’n annan lo bann later par lao, nou ti vwar poudir dan sa landrwa la i pli apropriye pour sa dimoun.  Akoz sa dimoun depi lontan i pe rod en bout later.  I en zabitan Anse Royale.  E sa biznes ki ti pe fer, parking pour son- parking i pli apropriye pour nou met la.  I pa ti pour afekte bann lezot servis ki lo sa later.  Mersi.

 

MR DEPUTY SPEAKER

Onorab Larue.

 

HON FLORY LARUE

Mr Speaker mersi.  Mon apresye bokou pour les mwan demann en lot kestyon.  Minis mersi pour ou larepons.

Minis mon vreman- mon konpran en alokasyon later pour en zabitan, mon konpran pour fer en biznes.  Me i annan plizyer dimoun dan Anse Royale ki pe rod later.  E dapre land use plan, zot in met li a kote en development area ki G10.

Zot in demarke tousala.  G10 pour fer devlopman lo la.  Ki mannyer sa bout later in become available pour en zabitan?  Was there tender?  Eski prosedir, zis in vini in apply?  In idantifye, in gannyen?  Ouswa in annan en tender process?

Akoz lezot zabitan osi i anvi konnen ki mannyer dimoun i ganny later dan Anse Royale.  I 1,500 met kare later Minis.  Alor mon pe demann pour tou zabitan Anse Royale e sid Mahe ki anvi fer biznes.  Bokou dimoun pe fer deryer dan zot zarden, dan zot garaz zot biznes.  Zot anvi konnen ki mannyer ou ganny en bout later Anse Royale?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker ti napa tender pour sa plot.  I ti annan en alokasyon ki ti ganny fer an konsilte bann Lotorite Distrik e bann lezot Lazans neseser.  Mersi.

 

MR DEPUTY SPEAKER

Mersi Minis.  Onorab Gervais Henrie.

 

HON GERVAIS HENRIE

Mersi Mr Speaker.  Bonzour ankor enn fwa tou dimoun.  Mr Speaker mon pe sey swiv sa- tou sa bann larepons e mon- e i pa neseserman fasil pour swiv.  Mon ava admet.

Donk Minis pe dir nou i annan 2 plot.  Letan mon pe regarde la lo GIS, konmsi i annan en gro plot aprezan ladan i annan en pti kare.  I korek sa.

So the big one is C10211.  Apre sa pti plot dan miye i C10210, korek?  So mon anvi konnen dan sa pti plot, zis dir nou lekel sa envestiser?  E ki i annan lentansyon fer la?  Mon ti ava kontan konnen lekel li?  Ki lentansyon i anvi fer la?

E dezyenmman; ki rational, parey mon pe get son plan la.  I en gro kare apre i annan en pti kare ladan.  Ki rational sa?  Olye ki si zis in subdivide sa gran plot.  So si mon ti kapab sey ganny sa leksplikasyon, then mon ti ava en pe pli kler dan sa ki nou pe koz lo la, la bomaten.  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker mon’n – mon krwar mon’n pas lo sa kestyon oparavan.  Sa C10210, i 1, 944 square meter.  E li i ti pour konstrir en restoran, laboutik ki vann souvenir.  E bann- pour vann bann keksoz lwazir osi pour piknik.  Ok.

 

MR DEPUTY SPEAKER

E son met?

 

MINISTER PAMELA CHARLETTE

Son met se, La Bonne Couchette Propriety Limited, Mr Hardy Lucas.

 

MR DEPUTY SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mr Speaker.  Pour mon premyerman mwan ti a kontan dir ki, avek larepons Minis, mon trouv bokou konfizyon.  E mon osi konpran akoz Manm pour sa distrik, Manm Elekte pour distrik Anse Royale li osi tou i dan konfizyon.  Parski i bezwen anmenn en kestyon pour li ganny leklersisman.

Minis, eski ou ava aksepte ki poudir sa morso later la, depi ki zot in anons li koman en leisure area an 2017, 2007 sorry – An 2007, in annan en sel melimelo.

Ozordi pour ou ganny permisyon pour servi kot i annan sa stage, ou bezwen demann permisyon avek SFRSAFire Brigade ki ansarz sa bout la.  Ki bor kote dan montanny parey ou pe dir.

So, si Fire Brigade ki ansarz sa bout la.  E apre sa i annan PUC, apre sa i annan lot zafer.  Eski vreman i en leisure park, i en leisure area?

E lo lot kote borlanmer; lo lot kote borlanmer nou pe atann ki poudir depi 2016, depi 2016 tender in ganny fer.  Mon pa konnen- non, non Minis in fact pa’n dir egzakteman ki mannyer in deroule.  Me selman depi 2016 La Bonne Couchette reprezante par MR Hardy Lucas in fini ganny sa landrwa.  E la ozordi, nou dan 2019.  E napa nanryen ki’n arive.

E lo lot kote Mr Speaker.  Devan kot kordgard i ete, ti annan Stasyon Militia en pe pli devan.  Ti annan Stasyon Militia e sa-

 

(Off-Mic)

 

HON WAVEL RAMKALAWAN

(pa trakase ou Mr Valmont.)

E sa bout later, li ozordi ki la devan Kordgard, ou ti ava ekspekte ki i ti pour lozik pour ki Kordgard.  Si i annan extension oubyen sa Sant Administratif kot i annan Lakour Mazistra, e kot menm Fire Brigade ki ti ava lozik pour li la.  Sa in ganny allocated avek en dimoun prive.  E aprezan Kordgard li i pe al dan fun park.  Minis eski ou ava aksepte avek mon ki poudir i en pe dezord dan milye tousala?

E eski Minis i kapab konfirmen, ki poudir rezon ki sa devloper i ankor an negosyasyon avek zot, se parski apre ki in ganny tender pour li fer La Bonne Couchette.  Ozordi i anvi osi fer en letablisman touristik dan sa landrwa, ki pour al kont bann prensip pour ki sa tender ti la dan premye plas?

E si sa i pa vre.  Eski Minis i kapab dir avek nou, ki negosyasyon ki zot pe negosye alor?  Mersi bokou.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker par ler, ler nou fer land use plan, e ler nou pe rod later pour bann lezot Lenstitisyon.  Nou bezwen fer en pe konpromi.

E se sa-e sa ki nou’n fer pour sa bout kot ti annan sa beach park.  Me still i annan en 5,733 square meter pour beach park.  I ankor la li.

I zis ki nou’n bezwen fer subdivision pour nou donn bann lezot lenstitisyon.  Lot kote semen o bor lans kot Mr Leader Lopozisyon pe dir kot sa devlopman ki ti tender.  Ti pour parey mon’n dir pour bann- pour en restoran avek bann lezot ki mon’n mansyonnen.

Lo kote tourism –  i pa’n vin kot nou pour okenn devlopman tourism.  E osi negosyasyon parey mon’n dir oparavan,  i ti pour akoz son letan ki nou ti’n donn li 6 mwan pour li konstrir sa pour nou- pour li fer son- sa toilet ki prezan in demann nou 12 mwan, ki la nou pe negosye- nou pou’n fini negosye ek li.  Nou pour donn li son 12 mwan pour li fer.  Apre nou’n anvoy tou bann keksoz kot AG’s Office.

 

MR DEPUTY SPEAKER

Onorab Ramkalawan.

 

HON WAVEL RAMKALAWAN

Mr Speaker eski- Minis vreman i drol konmsi pour pran 12 mwan pour fer en toilet.  Konmsi i en rikord.  Nou pa konnen ki kalite toilet ki pour ganny fer dan sa landrwa ki pour pran 12 mwan!

Me selman, eski Minis Mr Speaker.  I kapab dir avek nou Lasanble, letan sa tender ti ganny donnen,  parski letan en dimoun i ganny en alokasyon, i annan li en serten letan pour li fer son devlopman?  E an plis ki sa i ti’n bezwen prezant en plan.

Eski Minis, swivan bann direktiv ki zot in deza vin reponn devan FPAC, kot letan en dimoun in ganny lease pour li fer en devlopman.  I ganny 48 mwan parey la kot STC ti ete.  E si napa okenn devlopman ki ganny fer sa lease i ganny cancel e i annan nouvo tender oubyen nouvo alokasyon.  Eski Minis i ava kapab dir avek nou si zot koman en Minister zot pe swiv zot bann prop Regilasyon?  Oubyen eski i annan okenn faver ki pe ganny fer pour sa envestiser an partikilye?  Mersi bokou.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mr Speaker dapre mon konpran, ler ti fer tender, ti napa en survey plot deza.  E ler sa- ler nou ti survey- dan letan ki ti pe survey.  I ti bezwen re aranz son plan ki mannyer i ti’n submit li.  So sanmenm sa ki’n kekfwa i annan sa delay.

E son lenfrastriktir ki ti pour fer.  Ti pour fer sa- sa toilet ki ti pour fer.  Ti pour fer ansanm avek son devlopman ki ti pour fer.  Se pour sa ki nou’n donn li sa 12 mwan.

 

E pour le moman sa dimoun parey mon’n dir.  I pa ankor siny son lease.  E sanmenm sa ki nou’n- ki’n annan sa lagreman pour nou extend li.  E apre once ki i sinyen then nou kapab monitor son bann development covenant.

 

MR DEPUTY SPEAKER

Onorab Ramkalawan.

 

HON WAVEL RAMKALAWAN

Mr Speaker mon pa ganny en konpran la.  E mon pa pe ganny en konpran Lotorite sa Minister.  Si en dimoun an 2016 en lakonpannyen, an 2016 i ganny awarded en lease.  Be zot Minister zot napa en peryod letan dan ki keksoz i bezwen arive?

Si sa dimoun i deside pour li pa sinyen ankor.  La deza i annan 3an i pa ankor sinyen.  E zabitan Anse Royale ansanm avek pep Seselwa i ankor pe esper en devlopman, ki zot in ganny promet depi 2007!  Ki kantite letan eski- e la ankor enn fwa mon bezwen vin lo zot prensip,  eski Minis i kapab dir avek nou ki kantite letan apre ki en dimoun in sipoze met en tender in gannyen?  Ki kantite letan ki i donn li pour li sinyen premyerman?  E apre sa pour li konstrir?

Parski Minis i annan 3an la.  I annan 3an, depi 2016 in sipoze ganny son, ganny sa lease.

E dezyenmman Mr Speaker,  i annan en keksoz la ki mon pa pe trouv- ki mon pa pe trouv byen.  E ki mon en pe konfize.

Minis in dir avek nou in ganny sa lease, me selman ti napa en surveyed plot.  Be si napa en surveyed plot, ki mannyer en dimoun i kapab met tender?  Mon pa ganny en konpran.  Eklersi mon silvouple.  Parski mon pe baz li lo zis sa ki zot pe fer.

E mon ti ava kontan- mon ti ava kontan Mr Speaker,  Parski Onorab De Commarmond i dir avek nou,  Prezidan li tou son keksoz i drwat.  Me la ankor enn fwa nou pe vwar en keksoz ki tord konpletman.  Mersi bokou Mr Speaker.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mon krwar Leader Lopozisyon osi i ape soz mon-sa ki mon’n dir.  Mon’n dir poudir tender ler ti ganny tender, ler ti ganny award son tender.  ti napa en-ti mark li as plot 01.  Ti napa en surveyed plot as such.  Se sa ki ti napa Lease tou sa letan.  Apre ki i ti’n ganny son tender an 2018 i ti sign son offerSo ler ti ganny award son tender dan 2016 ti, parey mon’n dir son plot ti demarcated as plot 01.  I pa ti ankor ganny en plot number.  Apre ki survey ki ti ganny fer, e osi pandan sa letan 2018, i ti ganny son offer.

Wi nou annan en pe retar lo nou kote nou osi pour bann prosedir arive.  E nou remark sa i en weakness lo nou par, ki sa bann prosedir kekfwa pa’n ganny byen- pa’n fer li pli vit ki nou ti kapab.

E and then apre sa ki bann negosyasyon lo lease in vini an 2019 Mr Speaker.

 

HON WAVEL RAMKALAWAN

Mr Speaker mon bezwen dir Minis.  Sorry mon ankor dan konfizyon total, e mon plis ki sir ki Onorab Lemiel osi tou i dan menm konfizyon avek mwan.  E mon pa konnen ki i pour al dir bann zabitan Anse Royale apre ki in demann sa kestyon.  Mersi bokou.

 

MR DEPUTY SPEAKER

Mersi.  Bon nou annan zis Onorab Sebastien Pillay ki ti’n lev son lanmen.  Eski nou anvi pran sa ler nou tournen, oubyen apre break?  Oubyen nou a fini enn fwa?  Ale bref- fer li bref.  E Minis a donn en larepons bref.

 

HON SEBASTIEN PILLAY

Mersi Mr Speaker.  Bonzour tou koleg.   E bonzour Minis avek ou delegasyon.  Mr Speaker prenon kont tou sa diskisyon ki nou pe gannyen lo sa area e sa land use plan, nou osi realize poudir, pli bann demann pour zabitan Anse Royale i vini, i annan bann lezot konsiderasyon ki kapab ganny pran.

Par egzanp sa rezyon Anse Royale si nou regarde ozordi.  Bann dimoun ki dan sa rezyon i bezwen aste bann materyo konstriksyon par egzanp, bann keksoz koumsa pour transporte.  E sa i en very high transportation cost.

Vi ki i annan sa bann plot e nou konnen i annan sa land use plan,  eski within sa land use plan, vi ki i pa ankor vin dan proper legal document.  Napa en landrwa pour squeeze kot par egzanp i ava annan en landrwa kot petet zabitan Anse Royale i kapab- oubyen zabitan sa rezyon i kapab ganny en- some kind of a builders depot something like that dan sa landrwa?  Ki ava reduce the cost of konstriksyon, vi ki i annan en kantite devlopman ki pe komans arive- arive dan sa rezyon?

Is that something ki Minister in konsidere lo sa bann plot later ki deza egziste?  Oubyen i en keksoz ki pa pour kapab ganny konsidere dan limedya?  Mersi Mr Speaker.

 

MR DEPUTY SPEAKER

Mersi Onorab Pillay.  Minis.

 

MINISTER PAMELA CHARLETTE

Mersi Mr Speaker.  Mr Speaker nou ti annan en demann pour sa kalite aktivite Anse Royale.  E wi i annan landrwa within, o bor sa landrwa pour nou kapab ofer.

Me selman i pour bezwen- nou pour bezwen go parey nenport kwa.  Nou pour bezwen go through bann Agencies.  Nou a met en expression of interest pour tender pour gete si i annan dimoun- ki ankor annan dimoun ki enterese pour fer sa.  Mersi.

 

MR DEPUTY SPEAKER

Bon mersi Minis.  Bon avek sa nou’n ariv a lafen sa kestyon.  Nou pour adjourn.  Eski nou a tournen 11er?  Oubyen zot anvi en pti pe apre 11er, i bon.  Nou ava adjourn ziska 11er.

 

(BREAK)

MR SPEAKER

Bon bonzour tou bann Manm Onorab.  Mon tou dabor mon ti a kontan prezant en leskiz pou sa retar ki nou gannyen pou rezon administratif, me nou pou kontinyen avek nou travay ki nou konmanse bomaten sa se kestyon pou Minis Pamela Charlette ki Minis pou Later, Lenfrastriktir e Transpor lo Later.

Nou prosen kestyon se pos kestyon limero 4 par Onorab Norbert Loizeau.

 

HON NORBERT LOIZEAU

Mersi Mr Speaker.  bonzour Minis ankor enn fwa Mr Speaker mon kestyon pou Minis i lir koumsa anvi ki Later dan Bel Air i en komodite rar kot napa bokou kot rezidan i kapab fer devlopman lo la eski Minis i kapab dir avek sa Lasanble si in annan okenn legzersis fer par son Minister e lezot Lazans konsernen pou idantifye nouvo morso later dan sa distrik pou konstriksyon sirtou lakaz?

Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker avek lenformasyon ki nou pe kontinyen resevwar, an lye avek divizyon anrezistreman Minister in antreprann e pe kontinyen antreprann en legzersis Land Inventory kot i pe idantifye later leta dan sak distrik e an partenarya avek bann lezot partner Gouvernman bann sit apropriye e in ganny evalye pou potansyel fer devlopman lakaz parmi lezot litilite.

Ziska le moman dan distrik Bel Air, Gouvernman in idantifye 3 morso later pou proze lakaz sa i konm swivan ; lo V16214 osi V812 tou lede pou konstrir lakaz e sit aktyel osi ki nou idantifye V20899 osi ki nou proze 24/24 pe ganny konstrir lo la.  Mr Speaker vwala sa 3 bout later kot in idantifye dan distrik Bel Air ziska konmela pou nou kapab fer proze lakaz lo la.

Mersi.

 

MR DEPUTY SPEAKER

Mersi Minis.  Onorab Loizeau.

 

HON NORBERT LOIZEAU

Mersi Mr Speaker.  Zis en pti kestyon petet mon pa konnen si sa morso i enn parmi sa bann V ki ou’n dir mon anvi demann Minis kot ti annan vye daycare kot MR Amélie ti été ki’n kraze kot vye stasyon Milisya lontan par lao gran kwa.  Vi ki mon war in kraze la, eski zot pe mazin antreprann serten konstriksyon pou lakaz or si i annan dimoun en pe pli eze ki petet in aste?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mr Speaker.  Sa later ki Onorab pe koz lo la i V16214 ki mon mansyonnen ki ex daycare e sa i pou Gouvernman e i en proze 16 unit ki pou konstri lo la.  Mersi.

 

MR DEPUTY SPEAKER

Mersi Onorab Loizeau.

 

HON NORBERT LOIZEAU

Mr Speaker en dernyen pti kestyon.  Sa 16 unit pou comprise of kwa 2 lasanm bedsitters, condominium pou bann returning graduate ki reste dan distrik donn mon enpe lesplikasyon?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker i pou social housing i pou 2, 3 lasanm nou pa konn exact number how many 2 bedroom ek 3 bedroom selman i pou annan 16 unit an tou.  Mersi.

 

MR DEPUTY SPEAKER

Mersi Minis.  Zis avan nou kontinyen mon ti a kontan nou rekonnet dan nou gallery prezans ansyen Speaker North Ireland Ms Eileen Bell ki ganny akonpannyen par Ms May De Silva.  I like to acknowledge the presence today of the former Speaker of Northern Ireland Ms Eileen Bell welcome to the National Assembly it’s a priviledge to have you here and she is accompanied by Ms May De Silva.

Bon nou kontinyen avek nou bann kestyon e nou pou al lo kestyon limero 5.  Mon a permet ou Onorab Loizeau.

 

HON NORBERT LOIZEAU

Minis sa en dernyen pti kestyon sa 16 unit kan zot ti pe mazin konmanse?

 

MR DEPUTY SPEAKER

Minis.

 

HON NORBERT LOIZEAU

An pasan si ou kapab.

 

MINISTER PAMELA CHARLETTE

Mr Speaker i dan nou proze 3000 lakaz ki nou pe fer dan pandan 6an e in li in ganny son in ganny konseptyalize pou li konmanse next year dan premye lannen ki nou pou fer sa bann proze lakaz.  Mersi.

 

MR DEPUTY SPEAKER

Mersi Minis.  Prosen kestyon Onorab John Hoareau.

 

HON JOHN HOAREAU

Mersi Mr Speaker.   Bonzour Mr Speaker.  Bonzour Minis avek ou lekip.  Bonzour tou Manm Onorab.  E bonzour tou dimoun alekout.  Mr Speaker si ou ti a permet mwan sa mwan i mwan kanser alor mon ti le prezant nou solidarite avek sa bann Cancer Concern sa group ki apport zot solidarite pou bann dimoun ki pe soufer avek sa maladi.

E i osi lasemenn bann Ansenyan mon ti a kontan osi egalman dir mon bann lezot koleg ansenyan parske mon osi mon ansenyan par profesyon keep up the good work e zot louvraz i ganny byen apresye en louvraz nob.

 

MR DEPUTY SPEAKER

Mersi.

 

HON JOHN HOAREAU

Mon kestyon i lir koumsa Mr Speaker: Eski Minis i kapab eksplik sa Lasanble akoz ki apre plis ki 1an depi semen dan Gala Le Niol  in terminen travay pou agrandi kontour pou ki en servis bis i kapab ganny materyalize pa ankor ganny fer?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Proze elarzisman semen Le Niol Dan Gala ti konmans dan lannen 2013 e ti ganny fer an de faz e i ti konplete an finisyon lannen 2016 a en kou total R3.5milyon.  Sepandan i annan en morso sa semen ki SPTC in enform nou ki pou rezon sekirite i pou pli meyer ki nou elarzi en kontour pou ki zot kapab donn en servis bis dan sa landrwa.

Me pou anba SLTA sa proze semen li menm in fini fer.  Vizit neseser ti ganny fer avek Lotorite Distrik avek Lofis MNA, SPTC pou war sa demann e nou ti konstate poudir i annan posibilite pou fer sa travay elarzisman.  Sepandan nou pou nou kapab fer sa proze i pou nesesit ki nou antre lo en later prive.

SLTA in fini prepar bann desen neseser alors pou nou kapab elarzi ankor sa kontour nou pou bezwen antre 2.6met lo sa later prive e sa pou anviron 48 met kare.  Divizyon later dan Minister pou antre an negosyasyon avek sa propriyeter tre byento.  Desito ki nou pou konklir sa negosyasyon SLTA pou kapab antre pou fer sa elarzman adisyonnel.  Mersi Mr Speaker.

 

MR DEPUTY SPEAKER

Mersi Minis.  Onorab Hoareau.

 

HON JOHN HOAREAU

Mr Speaker mon le dir Minis mon byen dezapwente avek sa larepons ki in donn mon parske depi 2016 ler sa semen in fini konstrir sa negosyasyon ti ganny antreprann par mon menm avek Lotorite Distrik avek sa propriyeter later i ti pare pou donn serten morso later an negosyasyon avek ankor en pti bout par deryer kot ki son balizaz i baliz avek later Gouvernman.

Akoz ki ziska prezan sa negosyasyon ki Mr Valmont ki ti PS sa lepok pa ankor ganny fer ziska prezan ?

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mr Speaker nou rekonnet poudir i annan retar lo nou kote pou negosyasyon.  Nou ti resevwar en let sorti kot kliyan an Mars 2018, apre let ki sa madanm ti ekri nou son let ti date Zanvye 2018 me selman nou ti resevwar li an Mars 2018.  E nou ti ekri e nou ti poste en let le 27 Me 2019, so i annan en lapse enpe letan ki processing li menm li pe ganny fer.

Vizit ti reganny fer par nou LTO savedir bann Lands Officers an Me 2019 e Biro Later ti konsilte SLTA an Zilyet 2019 menm mwan sorry menm mwan SLTA ti anvoy rapor e plan kot Biro Later.  Le 01 Out biro later ti ekri SLTA pou demann en sit plan ki montre klerman kantite later e kote SPTC pe demann 50met kare later adisyonnel.  SLTA ti anvoy plan detay ki survey in kapab servi pou propoz layout ki montre siperfisi kot encroachment in ganny fer an relasyon avek apepre 50met kare an plis ki SPTC i dir zot pou bezwen.

Later kot encroachment i été i 129 met kare plis later adisyonnel 48 met kare ki fer en total 170 met kare Mr Speaker.  An Septanm 2019 Biro Later in met rekomandasyon pou Minister antre an negosyasyon avek sa madanm.  So i annan enpe prosedir ki ler nou ganny bann dernyen devlopman ki nou still ankor pe fer pou nou kapab then apre apros sa parti prive pou nou kapab fer negosyasyon.

 

MR DEPUTY SPEAKER

Onorab Hoareau.

 

HON JOHN HOAREAU

Eski Minis i kapab dir nou konbyen i pou koute ler sa proze sa pti lagrandisman pou fini fer silvouple?

 

MR DEPUTY SPEAKER

Minis.

 

MINISTER PAMELA CHARLETTE

Mersi Mr Speaker.  Estimasyon i ant R150 a R200mil.  Mersi.

 

MR DEPUTY SPEAKER

Mersi Minis.  Nou pou al lo prosen kestyon par Onorab Wilbert Herminie.  Onorab Herminie.

 

HON WILBERT HERMINIE

Mersi Mr Speaker.  Bonzour Minis avek ou delegasyon e tou dimoun a lekout.  Kestyon limero 6 i lir koumsa: Eski Minis i kapab dir sa Lasanble kan ki tou travay renovasyon lo proze condominium Union Vale pou konplete, ki bann proze ki Minister pou fer pou sekiriz sa morso teren?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  proze reparasyon bann diferan defo konstriksyon lo bann unit condominium Château Vallon in konplete an Zilyet 2019.  Apard reparasyon avek bann sliding windows ki delo i ranpli ki sorry ki delo i antre ler lapli ek gro divan dan 42 unit reparasyon in fer lo 39 unit.  Pou sa 3 unit ki louvraz pa’n fer i annan 1 dan Blok A2.  Akoz sa unit pe ganny lwe e i pa aksesib pou fer louvraz and dan Blok A3 ki’n ganny vann e Minister pa’n angaze pou repar li.  Enn dan Blok A5 anvi ki sa zabitan pe fer en exchange e reparasyon a fer apre exchange.  En lot konponan ki reste pou konplete kot Blok A1 se pou konstri en morso retaining wall e sa i an progre.

Pou bann lafnet travay ki’n ganny fer konman trial pa’n en sikse alor Minister pe rod plis konsey avek bann konpannyen ki spesyaliz dan sa kalite louvraz pou rod en solisyon.

Proze pou fer louvraz lo blok A1, 2, 3, 4, 5 e osi Blok B3 ki en total 36 unit in kout R10.8milyon. Bann louvraz in konpri reparasyon avek bann sistenm plonbaz, refer bann shower reparasyon avek bann sistenm elektrik, repar bann problenm avek beton retaining wall kot blok A5 ek A1 reparasyon lafnet penn repar kabinet azout kanopi avek bann Blok A.

Louvraz ti konmanse an Me 2017 e in ganny fer par blok par 2 a 3 unit alafwa – ki in fer ki in pran sa kantite letan pou konplete.  Pou blok B2 – 6 unit li ti en kontra ki ti ganny antreprann ant Septanm 2016 ziska Novanm 2016.

Sa Kontra ti enkli reroofing e sanz striktir twa ki’n ganny afekte avek karya, repenn louvraz reparasyon sistenm plonbaz ek elektrik sa proze ti kout R1.25milyon.  An sa ki konsern travay pou sekiriz teren avek proze 24/24 ki pe antreprann obor site Château Vallon sa proze i osi enkli en nouvo semen ki pou deservi sa nouvo estate.

Sa semen ki pou fer letour kot basen ki enn ki pli larz pou kapab deservi sa logmantasyon lakantite rezidan avek sa nouvo devlopman.

Avek sa nouvo devlopman piblik ava servi sa nouvo semen ki a permet en proze boundary fence pou bann condominium.  Sa proze pou kre 3 compound pou bann blok condominium enn ki pou fer A5, A4, A3 dan en compound enn ki pou A2, A1 ek B3 e en 3enm ki pou anferm Blok B2.

Sa laranzman i a permet sa gran peron pou reste an deor lakour bann condominium pou tou piblik kontinyen annan en akse pyeton ase kourt e i a osi permet bann zabitan ki reste par anba Blok B2 ek B3 kontinyen ganny akse loto pou zot lakour.

Antou sa proze pou war konstriksyon anviron 640met longer miray, en parking piblik kot ansyen bin site ti été ; reorganizasyon parking B2 avek B3. Minister in deza fer miting avek bann reziman condominium ek bann rezidan ki reste anba blok B2 ek B3 pou diskit bann propozisyon. Aprezan proze i dan staz fer laplikasyon Planning avan met proze lo tender.  Zistifikasyon sa proze i pou asize ki avek sa nouvo devlopman lakaz ki pe ganny antreprann, i annan en bon sistenm sirkilasyon ki benefisye tou dimoun dan zalantour, pou evit okenn lefe advers avek sa nouvo devlopman.

Mersi Mr Speaker.

 

MR DEPUTY SPEAKER

Mersi.  Onorab Herminie.

 

HON WILBERT HERMINIE

Mersi Mr Speaker.  Mersi Minis pou ou repons.  Minis zis pou en pti recap ou’n dir Blok A3 avek A2 i annan de unit ki pa ankor fer reparasyon, eski ler zot pou kapab ganny an kontak avek sa de propriyeter, eski zot pou kontinyen met larzan dekote pou tackle sa de unit?  Sa i enn?

Mon lot kestyon i regarding access ler zot in blok zot in fini fence sa landrwa antye, eski tou bann dimoun pou ganny fasilite pou zot antre e sorti libreman access avek gate?  Sa i de?  E mon lot kestyon ankor regarding sa din later ki dan milye sa sit condominium ki zot kwa ki zot anvizaze fer pou liber enpe lespas pou bann dimoun kapab ganny akse pou bann lezot fasilite lwazir?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker parey mon ti dir dan mon larepons i tou akoz sa unit pe ganny lwe avek en lot dimoun nou pa pe ganny akse avek.  So si son owner li menm li nou kapab ganny akse avek pou kapab fer renovasyon i ok nou ava fer li nou napa problenm.

A3 osi in ganny vann e Minister i osi si nou ganny akse nou pou kapab repare.  Lo kote akse wi lafason nou pe fer li tou dimoun pou ganny akse partikilyerman avek son blok kot i reste.  E kot sa dune ti été nou fini aplati nou fini tir tou bann debri ki ti la, e i prezan i a reste kominote dan distrik pou gete ki kalite keksoz ki zot kapab mete whether ou still en parking ogmant parking oubyen en playground whatnot.

Mersi.

 

MR DEPUTY SPEAKER

Mersi Onorab Herminie.

 

HON WILBERT HERMINIE

Enn final. Minis zis pou terminen eski in kapab konfirmen si tou dimoun ki ti fer bann relocation, eski zot ti bezwen – bann cost ki zot ti incur pou relocation pandan konstriksyon, eski tou sa bann cost i pou kapab ganny kouver?  Mersi.

 

MR DEPUTY SPEAKER

Mersi.  Minis.

 

MINISTER PAMELA CHARLETTE

Onorab pou le moman nou napa okenn bann claim ki pending avek nou so nou pe mazinen ki tou dimoun ki’n ganny claim in fini ganny refund son larzan.  Mersi.

 

MR DEPUTY SPEAKER

Mersi.  Onorab Noline Sophola.

 

HON NOLINE SOPHOLA

Mersi Mr Speaker.  Bonzour Minis e tou dimoun ki a lekout.  Mr Speaker avan mon poz mon kestyon mon oule fer resorti ki mon  en rezidan dan sa landrwa pangar zot a dir konfli lentere.

 

(laughter)

 

HON NOLINE SOPHOLA

Mr Speaker Minis Mr Speaker eski Onorab Ferrari i kapab les mon poz mon kestyon silvouple?

 

MR DEPUTY SPEAKER

Onorab Ferrari i pa’n dir nanryen ou kontinyen koze.

 

HON NOLINE SOPHOLA

Mersi. Mr Speaker Minis condominium Union Vale i annan preski 9an depi ki i pe abite.  E la ler dan ou prezantasyon ou’n koz sirtou lo batiman, me ler nou ti agree pou antre la lo plan ti annan bann lenfrastriktir ki la mon pan tann nonmen ; par egzanp ti lo plan ti annan pou fer en pti landrwa kot bann zanfan i kapab défoule, e sa i tre enportan nou konnen dan devlopman zanfan pa kapab reste a lenteryer batiman depi bomaten ziska tanto sirtou dan wikenn.

E osi i annan sa guest parking ki ti sipoze pou nivle e la dan sa bann readjustment ki zot pe fer mon pa konnen kote i pou été.  E apre ler mon pe regard sa semen aktyel ki nou pe servi i en one way e sa i pe deservi 42 unit san an kontan bann lezot dimoun ki dan lanvironnman ki definitivman nou bezwen donn zot en semen antre en semen sorti.  E mon war li ki vreman i en pe ankonbran parfwa pou pase e ler dimoun ki dan bann lezot blok in mal park i pa fasil ditou.

Eski Minis ou kapab dir mwan ki pozisyon i été sa bann keksoz e si i pou fer, kan ki i pou ganny fer?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker lo kote playground menm si i ti dan menm si petet i ti dan plan i pa ti dan nou scope of work kot Minister, me selman sa i en keksoz ki kekfwa i kapab ganny antreprann anba bann proze distrik si i annan en laranzman avek distrik pou fer en playground laba.

Lo kote guest parking, nou louvraz se nou pou resurface sa enn ki egziste, e i pou annan enlot guest parking ki nou pou mete dan A5 compound.  Lo kote semen mon krwar sa nouvo semen ki nou a fer i ava fer en pti pe plis deboursman i pou en 2 way. E koumsa laplipar dimoun pou pas lo sa nouvo semen e sa akse anndan dan condominium i ava pou bann dimoun selman ki condominium.  Se sa ki nou fer sa lot gran semen al lot kote se pou kapab tir en pe konzesyon ki arive dan sa landrwa.  Mersi.

 

MR DEPUTY SPEAKER

Mersi.  Onorab Sophola.

 

HON NOLINE SOPHOLA

Mersi Mr Speaker.  Minis aktyelman la semen i dan en move leta, petet mon demande ki mon pa konnen si distrik i fer en vizit i vin regarde, akoz si en dimoun pe vini si par egzanp menm lizour oubyen aswar tou bann demarkasyon ki ti ganny mete in fini sorti.  E i demann en bon retouse.

E apre mon pe regarde osi parey ou’n dir petet si distrik i antreprann pou playground me selman petet a lavenir letan nou donn en estate osi  dimoun, nou dir li i pou comprise sa, sa ladan e ou en dimoun ki annan zanfan ou pe look forward poudir be wi mon zanfan pa pou reste zis anndan i pou al deor.  E la nou war nou 9an bann dimoun ki annan zanfan zot zanfan i anndan ek zot lazournen antye, e la nou pa konnen lo proze distrik kan sa ki pou ganny fer.

Petet i ti devret defini kler poudir sa malgre i lo la, me selman pa nou ki pe fer !  Mersi Mr Speaker.

 

MR DEPUTY SPEAKER

Mersi Onorab Sophola.  Minis i pa vreman en kestyon me mon a permet ou.

 

MINISTER PAMELA CHARLETTE

Non zis mon a fer en pti komanter Mr Speaker.  Lo kote semen distrik ansanm avek SLTA i kapab monte pou al gete ki laranzman zot kapab fer.  Lo kote playground par egzanp lo bann estate ki nou pe fer konmela si nou pe kite en pti landrwa pou playground me sa i fer parey mon dir atraver Local Government and Family Affairs ki pe ed nou pou met bann par egzanp bann zouzou dan playground.  Me nou, nou kit en lespas lenfrastriktir pou la pou playground.  Mersi.

 

MR DEPUTY SPEAKER

Mersi.  Onorab Gervais Henrie.

 

HON GERVAIS HENRIE

Mersi Mr Speaker.  Mr Speaker kestyon ki mon anvi demande, akoz entervenan devan mwan in dir nou poudir sa proze i annan 9an – 9an in fer. -Prezan 9an mon mazinen i annan dimoun probableman in preski fini peye sa zot condo.  Sa ki mon anvi konnen se ki sa lalis problenm ki Minis in dir zot in bezwen rezourd dan sa proze renovasyon, akoz Gouvernman ti santi li oblize pou antre pou fer sa ?  Eski sa kontrakter li ki ti fer inisyalman i pan pran okenn shares of responsibility pou malfer serten keksoz?

Akoz konprenezon condominium se ki i annan en Condominium Act ki dimoun i, i annan serten keksoz zot sipoze fer lo zot menm mon anvi konnen akoz sa de sonm ki Minis in donnen i tonm pres R12milyon.

Akoz a sa lenstans Gouvernman in war li neseser pou antre e depans 12milyon taxpayers money pou repar condominium ki’n basically vin prive?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker rezon akoz Gouvernman in bezwen antre pou fer sa bann renovasyon, se akoz sa bann defo ti ganny konsidere konman bann defects dan bann staz konstriksyon sa proze.  E ki nou ti fer se nou pa ti donn kontrakter son retention money son nou ti bezwen pran sa larzan nou pa ti donn li tou son larzan akoz sa bann defo avek konstriksyon.

Sa kontrakter i ti sa kontrakter ki ti fer sa proze en one-off e i nepli anrezistre osi isi Sesel so basically menm si Gouvernman in antre ladan nou pan donn li tou son larzan ki i tin bid pou fer.  Nou retain en pe larzan.

 

MR DEPUTY SPEAKER

Mersi.  Onorab Henrie.

 

HON GERVAIS HENRIE

Vitman mon oule konnen savedir konbyen Gouvernman in retain pou nou balans li avek sa 12milyon ki nou’n peye.  Mersi.

 

MR DEPUTY SPEAKER

Mersi.  Minis.

 

MINISTER PAMELA CHARLETTE

Nou ti retain apepre en R600mil Mr Speaker.

 

MR DEPUTY SPEAKER

Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon ti a kontan demann Minis pou klarifye son stetment ki in dir ki ou bann problenm par egzanp semen access bann keksoz koumsa, ava gete si avek distrik i kapab antre dan bann proze.  Mon ti a kontan demann Minis si i pe sizere ki larzan distrik La Riviere Anglaise, i ganny servi pou amelyor fasilite pou bann dimoun ki zot reste La Digue zot annan zot propriyete La Digue.

 

(Interruption)

 

HON JEAN-FRANCOIS FERRARI

Les mon a fini mon kestyon Onorab Pillay.

 

MR DEPUTY SPEAKER

Onorab fini ou kestyon.

 

HON JEAN-FRANCOIS FERRARI

Ki reste La Digue ki reste dan lezot distrik e ki’n aste zot landrwa e tandi ki bann pov zabitan Persévérance bann ki’n aste zot landrwa zot pe ganny dir pa pou kapab aranze akoz zot in fini aste !  So eski nou pou dan sa pei nou pou privilezye bann dimoun ki’n deza annan milyon ki annan later ek Gouvernman ki’n aste en condominium ek Gouvernman pou nou dan lo depan bann malere?  Eski sa se Polisi?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker mon dir sa akoz playground i a reste en proze kominoter.  Playground, semen tousala se bann proze kominoter.  So si nou pa antre dan bann proze koumsa – parey mon dir nou kapab rod par egzanp dan nou estate ki nou fer pou playground, nou fer lenfrastriktir e menm e apre bann lezot partner i vin ansanm ek nou pou met zouzou dan playground e whatnot. 

        So se sa ki mon dir kekfwa i kapab war avek Local Government dan distrik kominoter e menm bann dimoun prive ki kapab asiste avek bann proze koumsa.  Mersi.

 

MR DEPUTY SPEAKER

Onorab Sophola ou’n deza ganny sans demann kestyon mon pa pe retourn kestyon.

 

HON NOLINE SOPHOLA

Mr Speaker pou en klarifikasyon mon pa pe poz kestyon mwan !

 

MR SPEAKER

Eski ou pe raise en point of order. Eski  ou pe raise en point of order ou pe rod en klarifikasyon?

 

HON NOLINE SOPHOLA

En point of rrder Mr Speaker.

 

MR DEPUTY SPEAKER

Ok mon a permet ou anba en point of order.

 

HON NOLINE SOPHOLA

Ok Mr Speaker mon oule fer referans lo sa ki Onorab Jean-Francois Ferrari fek dir. Mwan Noline Antoine Sophola, mon en Seselwa, mon annan drwa mars partou kot mon oule dan Sesel ! Reste nenport ki landrwa ki mon anvi dan Sesel !

 

(APPLAUSE) 

 

HON NOLINE SOPHOLA

E de plis sa kestyon pe koz lo condominium.  Pa’n koz lo Eden Island. Pa’n koz lo Anse Royale e nou pan koz lo alimoni.  Mersi Mr Speaker.

 

(APPLAUSE) 

MR DEPUTY SPEAKER

Mon pa war ki klarifikasyon ki’n ganny fer ditou, parske ou non pa’n ganny mansyonnen.

 

(Interruption)

 

MR DEPUTY SPEAKER

Ou non pa’n ganny mansyonnen. E i kler poudir sa i en keksoz ki ou’n zis raise.  Ou non pan ganny mansyonnen.  Nou pe kontinyen avek prosen kestyon Onorab Gervais Henrie.  Order Onorab Gervais Henrie.

 

HON GERVAIS HENRIE

Mersi Mr Speaker.  kestyon limero 7 i lir koumsa: Eski Minis pou Lakaz i kapab dir avek sa Lasanble ki desizyon son Minister pe pran pou amelyor plan bann nouvo lakaz Gouvernman, e fer li en pe pli gran pou asir plis konfor bann rezidan?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker ti pe swiv par aktyalite baze lo bann alokasyon lakaz ki’n ganny fer resaman i ti ava remarke ki in annan sanzman an term grander bann lakaz, ki Minister in konstri dernyerman.  Grander lakaz ki Minister i konstrir anba sa bann diferan progranm lakaz i depan lo bann fakter swivan kou konstriksyon lespas later ki annan pou devlopman bann proze bann konsiderasyon spesifik teren kot proze i ganny antreprann.

Prenan kont nesesite pou ankouraz bann kondisyon pou annan fanmir pli solid, e kondisyon pou bann zanfan kapab pli byen konsantre lo zot letid e travay lakour, depi 2017 Minister in deside revwar bann design standar ki i servi pou bann proze lakaz dan progranm social housing.  Bann design ki’n fer depi 2017 i alor annan serten amelyorasyon an term grander bann lakaz konpare avek bann ki ti pe ganny konstrir an 2010 a 2016.

Sa diferans in remarkab dan bann proze ki’n konplete resaman, ouswa ki pe al allocate byento ; par egzanp proze Pascal Village Beau Vallon 64 unit Ile Persévérance Baie Lazare ex Hunt – Bel Air ex FIBA. Diferans i remarkab konpare avek bann lakaz ki ti design pandan 2010- 2016 par egzanp Marie-Jeanne extension ek ex Desaubin Takamaka bann nouvo standar an term grander i konm swivan ;- lakaz 3 lasanm ant 1200met kare i konpri 3 lasanm dormi lakwizin salon ek lasal a manze lasanm deben kabinen e lavarang.  Oparavan pli pti 3 lasanm, ti 172 met kare ex Desaubin par egzanp, an term grander sa i en amelyorasyon anviron 17poursan.

Lakaz 2 lasanm ant 80 a 85 met kare, i konpri 2 lasanm dormi lakwizin salon ek lasal a manze ansanm lasanm de ben lavarang. Oparavan pli pti de lasanm ti 62met kare par egzanp ankor ex Desaubin an term grander sa i en amelyorasyon 29poursan.

Sa bann amelyorasyon pa aplik pou bann lakaz ki ganny konstrir anba special housing avek poverty alleviation ki bann standar ki grander standar ki aplikab i 3 lasanm 85met kare 2 lasanm, 55met kare e en lasanm 25met kare.  Mersi Mr Speaker.

 

MR DEPUTY SPEAKER

Mersi Minis.  Onorab.

 

HON GERVAIS HENRIE

Mersi Mr Speaker.  Pou lenformasyon Manm piblik Minis ek son delegasyon e pou bann Manm Onorab ki’n riye lot kote, sa ki pas dan aktyalite napa nanryen pou fer avek kestyon ki nou anmenn isi dan Lasanble Nasyonal.

 

(APPLAUSE)

 

HON GERVAIS HENRIE

Kestyon ki mon anvi demann Minis e mon krwar ki Minis in mislead nou Lasanble, parske si i pe konmans konstriksyon depi 2017 ler nou pou get ex Oliver ti sa ex Oliver St Louis apre Marie-Jeanne Praslin ki COGA in al vizite in fer 2017 e mon krwar poudir sa bann lespas i vreman, vreman ptipti.

Donk mon ti ava demann Minis poudir baze lo bann spesifisite ki’n donn nou, tou bann konstriksyon ki Gouvernman in fer lekel ki pli gran e konbyen met kare i donnen ?  Parske i kler ki dan lepase e serten landrwa ki mon pase i kler ki dan lepase ti bokou pli gran, apre in ratresi, in ratresi ziska ozordi ki nou war dan Mont Buxton.  Donk mon anvi Minis i dir nou pli gran ki Gouvernman in deza konstrir, konbyen met kare i donnen e pou ki rezon?  Well mon ava zis demann senn la.  Mersi.

 

MR DEPUTY SPEAKER

Mersi Onorab.  Minis.

MINISTER PAMELA CHARLETTE

Mr Speaker si Onorab ti ekout byen mon dir ki sa bann lakaz ti design pandan 2010 a 2016 e ex Oliver i enn ki ti ganny design dan sa range.  Lo kote bann lezot lakaz ki pli gran, sa bann lenformasyon ki nou ki nou annan la nou annan pou bann ki la konmela, me si nou le bezwen fer en legzersis pou nou war bann avan menm kekfwa si ou ti kapab en pti pe pli spesifye lekel ki ou krwar i ti pli gran ki nou ti kapab gete konbyen square meter i été.

 

MR DEPUTY SPEAKER

Onorab Henrie.

 

HON GERVAIS HENRIE

Ok Mr Speaker par egzanp Roche Caiman ouswa bann Bel Eau i vreman gran, me selman kestyon mon ti ava kontan demann Minis akoz i ozordi bann dimoun ki dan lendistri tourizm e ki pe fer en landrwa kot etranze pou vin reste en zour, de zour.  Zot ganny en spesifisite ki zot pa kapab al anba.  Akoz ki Gouvernman i pa servi sa konman en model ki i santi i byen pou bann touris pou bann etranze e aplik li pou sa Seselwa ki li i pou viv dan sa landrwa pou larestan son lavi.  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mr Speaker mon krwar nou pe koz de keksoz la.  Ler ou pe dir touris avek social housing e kou ki pou ki nou kapab ki nou konman en Gouvernman nou kapab abzorb i pou kout nou plis si nou pou fer lakaz en pti pe pli gran deza nou war poudir kou konstriksyon i ogmante e pli gran lakaz i pou vin son siperfisi pou pli gran, alors nou kou konstriksyon pe pou plis.

E sa i pou annan en lenpak osi lo repeyman ki sa bann dimoun pou fer, menm si nou pe dir nou pe subsidise bann proze lakaz.  So pou mwan i tou en nou bezwen konnen ki nou anvi ki nou priyorite whether nou bezwen donn dimoun en gran lakaz.  Pou le moman sa ki nou pe fer la ki’n ganny design lately i bann gran lakaz e menm i annan dimoun ki dir ki i bann zoli lakaz ki’n byen ganny design e ki grander i sifizan !  Mersi.

 

MR DEPUTY SPEAKER

Mersi Minis.  Onorab Waven William.

 

HON WAVEN WILLIAM

Mersi Mr Speaker.  Mr Speaker mon anvi demann Minis prenan kont lo sa proze 24/ 24 zabitan Grand Anse Mahe in note ki Minister i dwa nou 24 lakaz, mon anvi demann Minis lefe ki ou pan mansyonnen eski 2enm faz proze ex ION i lo sa lalis ?  Eski sa bann nouvo area pe ganny pran an konsiderasyon?

E mon anvi konnen si zot pou konsilte osi avek Lotorite Distrik?  Akoz Minis mon pe demann sa se ki mon santi poudir i mank en serten nivo konsiltasyon akoz ozordi menm letan ou pe koz social housing mon annan en lakaz ki’n ganny fer kot BBC la i annan 3 adilt garson be zot in fer lakaz 2 lasanm.

Be ou demande ler sa 3 zenn zonm pou anmenn zot fanm dan en lakaz 2 lasanm ki mannyer zot pou été?  So  mwan mon demande ki i annan serten nivo konsiltasyon, akoz mon santi poudir i annan en dezavantaz la akoz napa sa konsiltasyon ki pe ganny fer etrwatman avek distrik menm si nou pe met devan nou bann problenm.  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker ex ION par egzanp 2enm faz i pou enn parmi bann lakaz ki pou ganny konsidere e ki pou anba sa bann nouvo standar ki nou’n nonmen.  E lo kote lot kestyon Onorab regarding ler nou fer lakaz nou fer li dapre nou osi get demann dan distrik si fodre fer plis konsiltasyon avek Lotorite Distrik, nou ava fer li selman nou get en pe demann ki nou kapab at least met demann tou lede kalite 2 bedroom avek 3 bedroom.  Mersi.

 

MR DEPUTY SPEAKER

Mersi.  Onorab William.

 

HON WAVEN WILLIAM

Minis mon ti a kontan ou donn nou sa lasirans, akoz sa proze sa case Samuel Madeleine ek son bann frer ki mon’n met devan ou Minister bann seksyon pa konnen si lakaz in konmanse ler nou pe swiv avek zot.  Zot pa konnen poudir lakaz in konmanse. Nou’n demande ki 3 lasanm i ganny fer me selman letan lakaz i konmanse nou war zis 2 lasanm.  E parey mon dir se ki mon santi poudir i annan sa mank konsiltasyon avek Minister avek distrik.  So mon a demande al avenir nou ganny en pti pe plis konsiltasyon e nou anvi sa lasirans avek Minister silvouple.  Mersi.

 

MR DEPUTY SPEAKER

Mersi.  Minis.

 

MINISTER PAMELA CHARLETTE

Mersi Mr Speaker zis pou klarifye sa lakaz ki Onorab pe dir i tonm anba special housing. I pa dan social housing.  So son standar i diferan avek social housing.  Mersi.

 

MR DEPUTY SPEAKER

Onorab William vitman.

 

HON WAVEN WILLIAM

Yes Minis mwan la mon pa pe ganny en konpran akoz zot pe fer en lakaz menm si i en special housing ou annan ou 3 adilt e ou pe donn zot en lakaz 2 lasanm sa bann dimoun pe demande, be regarde donn nou ankor en lasanm, nou ava peye.  So Minis then mon war poudir nou pa pe rezourd problenm sa fanmir letan ou’n donn zot sa de lasanm.  Mersi.

 

MR DEPUTY SPEAKER

Mersi antretan ki Minis pe konsilte mon a permet Onorab Georges ki dir mwan i annan en kestyon ki relye avek sa menm sa kestyon.  Onorab William.

 

HON BERNARD GEORGES

Wi mersi Mr Speaker mon ti anvi siport sa pwen Onorab Waven William. Akoz konsiltasyon i vreman pa egziste la mwan Mr Speaker mon ti a kontan Minis i donn mon en repons zot pe fer en lakaz Les Mamelles mon demann a de repriz en miting avek bann dimoun ki pe ganny afekte e ziska prezan mon ankor pe esper en miting pou eksplik avek sa bann dimoun, ki grander lakaz pe ganny fer? Ki ras lakaz?

Akoz frankly mon konman MNA ki’n ganny elekte mon dan fernwar e bann dimoun ki la ki pe get lakaz pe monte devan zot, zot pli dan fernwar ankor.  Oli sa konsiltasyon?  Oli sa respe pou bann dimoun pou ki lakaz pe ganny fer?  Mersi Mr Speaker.

 

MR DEPUTY SPEAKER

Mersi Onorab Georges e Onorab William.  Minis.

 

MINISTER PAMELA CHARLETTE

Mersi Mr Speaker.  Pou sa case spesifik nou bezwen get ki Onorab William in dir nou a get bann spesifikasyon en pti pe plis detay pou nou kapab donn li en larepons.  Lo kote Onorab Georges parey nou konnen tou bann plan i anvoy dan bann distrik pou ganny zot pwennvi  lo la, me selman nou a fer sir ki zot ganny en miting avek lenfrastriktir pou kapab dir piblik ki pe arive.  Mersi.

 

MR DEPUTY SPEAKER

Mersi.  Bon i annan 4 lezot Manm ki’n demann kestyon lo la.  Si mon ti kapab demann zot silvouple annou pa al lo bann ka spesifik me servi zot koman en referans pou brefman endik sa problenm ki’n ganny soulve dan sa kestyon, me annou pa al lo bann detay spesifik.  Onorab Valmont.

 

HON JUDE VALMONT

Bonzour mersi Mr Speaker.  Bonzour Minis ek delegasyon, tou koleg Onorab e tou Manm piblik ki pe swiv nou.  Antan ki kestyon pe koz lo reasir plis konfor pou bann rezidan, Minis mon ti a voudre demann ou si zot in konsider okenn demars pou met bann fasilite pou bann dimoun ki annan dezabilite?  Akoz nou konnen nou annan dimoun ki annan dezabilite i pa zis akse anba pou monte me selman bann railing parey pou al dan toilet kot staircase tousala.

E 2enm, eski la ou le fitir zot kapab konsider sa eleman sekirite osi ki dir burglars bar sirtou lo playground floor avek 2enm floor burglars apropriye, akoz nou war detanzantan dimoun i retourn kot nou i dir i annan sa issue alor si zot kapab konsider sa osi.  Mersi.

 

MR DEPUTY SPEAKER

Mersi Onorab.  Minis.  Bon letan ki Minis pe konsilte Onorab Esparon ou dir mwan pou ou i relye avek, mon a permet ou prezant li.

 

HON REGINA ESPARON

Mersi Mr Speaker.  Mr Speaker mon kestyon ti relye avek sa zafer dezabilite si dan bann striktir ki zot pe fer an se moman kantmenm zot pa pe met dan tou lakaz, me selman at least dan bann housing estate annan en landrwa enn oubyen de ground floor ki annan en pe fasilite pou bann dezabilite. Sa ti en kestyon.

Epi dezyenmman pou bann lakaz ki’n deza fini fer mon konnen parey Perseverans telman mon bann peron i etrwat ki parfwa ni en double bed, ou pa pe kapab pase avek dan peron e mon konn dimoun ki bezwen demont zot lili pou mont anler dan lasanm, eski zot pe mazin fer serten amelyorasyon dan sa bann striktir ki deza egziste?  Mersi Mr Speaker.

 

MR DEPUTY SPEAKER

Mersi Onorab Esparon.  Minis.

 

MINISTER PAMELA CHARLETTE

Mersi Mr Speaker.  Mr Speaker dernyerman ki nou pe fer nou pe met pou dezabilite sirtou nou pe fer li ground floor e nou mete bann ramps pou dimoun ki pe servi wheelchair whatnot pou kapab servi.  I annan enn de proze ki annan sa deza e osi lo kote burglars bar nou pa mete akoz lo kote cost control nou anvi kontrol en pe kou.  Me selman bann dimoun ki anvi mete i zis demann permisyon avek PMC, PMC i kapab allow zot pou met zot own burglars bar.

E lo kote lezot lenfrastriktir si i annan en needs spesifik pou en serten estate then, i fer i annan en proposal zot kapab fer en proposal gete ki mannyer nou kapab aranze e sa proposal i a vin kot PMC ki apre i ava lyez avek Departman Lenfrastriktir.

 

MR DEPUTY SPEAKER

Mersi Minis.  Onorab Egbert Aglae.

 

HON EGBERT AGLAE

Mersi Mr Speaker.  Minis i annan de konsern mon ti a kontan met devan i bann tenant zot menm zot koz lo la. Minis premyerman i konsern bann blok flat – sirtou bann ki pe ganny konstrir si ou Minister dan sa plan ki ou dir ou pe reaziste pou sa bann nouvo devlopman la konsider kot balkon sirtou bann ki dan premye letaz 2enm letaz ziska 3enm letaz akoz zot santi poudir sa balkon ki zot pe gannyen, i pa en balkon ase ki zot kapab manouvre zot lekor anvi bann ki anba zot benefisye avek sa ground floor.

E dezyenmman i konsern staircase – bokou i ganny fer resorti ki staircase parfwa i tro pti kot ler zot annan zot bann keksoz pou move in i kwense e menm osi si zot pou move out akoz zot a dir i annan keksoz ki ou kapab mont anndan me si i annan ki pe move out osi i en konsern pou zot mon ti a kontan si sa i ti a ganny adrese.

E dezyenmman Minis i konsern ler zot pe fer bann plan lakaz, sey konsider osi dan en landrwa lwazir an deor sa bann propriyete pou evite ki nou pe war bann zanfan pe tay taye pou al zwe dan semen.  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker pou lo kote balcony nou pou bezwen fer en konpromi, akoz i enkli dan ou total square meter ki sa standar ki nou’n mete. So i pou bezwen annan en konpromi ant par egzanp balcony si nou fer li pli gran nou redwir en pti pe lasanm bann keksoz koumsa oubyen lezot nou bezwen fer sa konpromi.  E osi staircase i en keksoz nou kapab konsidere nou kapab elarzi li dan nou standar e osi tou bann estate ki nou pe fer konmela nou pe kit en lespas pou playground kot zanfan i kapab anndan dan sekirite annan en landrwa kot zot kapab zwe.  Mersi.

 

MR DEPUTY SPEAKER

Onorab Audrey Vidot.

 

HON AUDREY VIDOT

Mersi Mr Speaker.  Bonzour Mr Speaker tou Manm Onorab Minis ek ou delegasyon e tou dimoun ki a lekout.  Minis mon kestyon i dan sa bann nouvo lakaz Gouvernman ki pe ganny fer ozordi bann ki ou pan mansyonnen petet kwa ki pe anmenn plis konfor konpare avek bann lakaz Roche Caiman ki depi 24an pase?  Mersi Mr Speaker.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mersi Onorab.  Onorab keksoz ki diferan parey nou pe dir i annan par egzanp bann ground floor ki nou pe met ramp pou bann dezabilite i annan bann built-in cabinets ki nou fer antre osi ladan apre bann landrwa bann fasilite par egzanp kot zot met washing machine kot zot met kot zot pou grat zot pwason whatnot.  Nou fer en pti landrwa pou zot sa bann keksoz adisyonnel ki nou pe pran kont dan design lakaz.  Mersi.

MR DEPUTY SPEAKER

Mersi Minis.  Prosen kestyon Onorab Audrey Vidot.

HON AUDREY VIDOT

Mersi Mr Speaker.  minis eski Minis i kapab dir avek nou Lasanble ki zistans PMC in arive avek proze pou sanz bann roofing tiles ki’n andomaze dan bann housing estate e eski Minis i kapab donn plis detay ki mannyer sa proze pou ganny enplimante e lekel bann distrik ki pou benefisye?  Mersi Mr Speaker.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker apre rekomandasyon Lasanble Nasyonal an Zilyet lannen pase pou PMC ansanm avek Minister Lakaz pou travay lo en Scheme pou asiste bann fanmir avek bann lenplimantasyon rekouver bann lakaz ki annan roofing tiles en survey in ganny fer pou idantifye bann lakaz dan estate ki annan roofing tiles.  En total 754 avek roofing tiles in ganny idantifye 80poursan in ganny konstri 20an pase ou plis kou total pou ranplas sa bann roofing tiles avek tol in ganny estimen pou ariv anviron R69.9milyon.

Dan sa 754 lakaz 73poursan in fini ganny aste par bann kliyan anba Home Ownership Scheme – 14poursan kliyan pe peye pou aste lo House Purchase Agreement e 13poursna pe ganny lwe e i tonm anba responsabilite PMC.

An Novanm lannen pase Gouvernman ti aprouv lafason ki sa proze pou ganny finanse e enplimante. Bann detay i konm swivan tou bann lakaz ki annan 15an ou plis ziska lannen 2018 savedir bann lakaz ki ganny konplete an 2013 ou avan bann lokater pou bezwen an 2003 ou avan bann lokater pou bezwen re-pey proze antyerman atraver PMC.

Bann lakaz ki annan mwens ki 15an savedir ki’n konplete konmansman lannen 2004, Gouvernman pou fer kontribisyon 50poursan e lokater pou finans 50poursan atraver repeyman ek PMC. I annan 66 lakaz ki pou tonm dan sa kategori.  Pou bann lakaz ki pe ganny lwe sa i pou tonm anba responsabilite PMC pou finans 100poursan atraver son Bidze maintenance kontribisyon PMC pou bann lakaz ki pe lwe ki R9.13milyon.  Sa proze pou ganny enplimante par staz dan 4an e bann ka pli irzan pou ganny priyotize.

PMC in ariv lo staz kot in sirkil lalis priyorite, kot bann administrater distrik pou zot komanter.  Bann komanter in fini antre le an Me 2019, e sanzman neseser in ganny fer sa lalis in ganny baze lo lannen ki bann lakaz in ganny konstri e bann landrwa kot kliyan pe eksperyans plis problenm koule.  Gouvernman pe travay lo en mekanizm pou ganny 30milyon an roupi atraver en loan ki PMC pou pran pou kapab finans sa proze an 2020.

Proze pou konmans an 2020 konmans finansman i ava pare. Proze pou ganny enplimante par PMC avek led teknik par Departman Lenfrastriktir. I enportan pou note ki serten proze parey in ganny enplimante dan lepase. Scope in ganny prepare par Departman Lenfrastriktir e ganny tender e supervise par PMC.

Bann distrik ek kontribisyon ki zot pou benefisye i konm swivan ;- bann distrik bann distrik ki lakaz i annan mwens ki 15an par egzanp Brillant, Cascade, Beoliere, Port Glaud, ex Moulinié Praslin, ex Foam Au Cap, Nouvelle Vallee Beau Vallon, St Ange 2 Takamaka, Caryol ex Archange Michel Anse Aux Pins.

Bann distrik ki lakaz i annan plis ki 15an e ki pou pey repey 100poursan i Grand Anse, Mont Signal Mont Buxton, Roche Caiman 1 – Roche Caiman 2, Marie-Jeanne Estate, St Andre Union Vale, Upper redevlopman Les Mamelles, Copolia flat e Vakwa.  Tou distrik pou benefisye avek led teknik e bann konsiltasyon neseser pou eksplik kliyan basically Gouvernman pou refer sa bann lakaz a son cost e apre i pou annan en mekanizm kot bann dimoun pou kapab re-peye avek PMC.  Mersi Mr Speaker.

 

MR DEPUTY SPEAKER

Mersi.  Onorab Vidot.

 

HON AUDREY VIDOT

Mersi Mr Speaker.  Mr Speaker avan mon demann mon lot kestyon zis Minis in al en pti pe vit mon ti le zis konfirmen eski ou pe dir sa bann dimoun 2enm batch ki ou’n mansyonnen zot pou pey 100poursan zot menm oubyen zot pou ganny en serten sipor?

 

MR DEPUTY SPEAKER

Mersi.  Minis.

 

MINISTER PAMELA CHARLETTE

Nou pou fer proze me selman zot bezwen peye 100poursan zot pou bezwen re-pey sa kou pou devlopman.  E sa bann lakaz kot tou bann dimoun i plis ki 15an e ki zot in fini aste zot lakaz.  Mersi.

 

MR DEPUTY SPEAKER

Mersi.  Onorab Vidot.

 

HON AUDREY VIDOT

Mersi Mr Speaker.  Dan sa ka Minis prenan kont ki parey Roche Caiman mon dir pli boner, i en distrik ki depi 24an pase in ganny konstri, e ladan nou annan dimoun ki i deza annan loan ki pe peye avek HFC pou li fer maintenance pou anbelir son lakour eski i pou annan bann Scheme adisyonnel apard ki – wi i pou fer repeyman si i pou kapab benefisye swa atraver HFC pou li kapab ganny en loan pou li kapab fer reparasyon pou pey Gouvernman ?  Si wi eski HFC li i annan sa kapasite dan sa peryod letan pou li kapab asiste sa bann fanmir, pou zot kapab ganny en loan pou kapab rekouver zot twatir.

Oubyen si i annan osi ki pou kapab ganny means test pou regarde si vreman zot finansyel i permet zot kapab raise en loan pou zot kapab kontribye si zot pa kapab ganny kouver anba en lot sipor atraver Gouvernman.

E mon lot kestyon Minis eski letan sa proze faz 4an i fini, si son Minister i kapab regarde posibilite si i ankor annan sa bann dimoun ki annan ankor sa bann roofing tiles, napa ankor progranm ki zot kapab kontinyen ki asire ki sa bann dimoun pa ganny problenm demen ki ou war zot pe sey ganny difikilte pou sey ganny finansman pou zot kapab fini tir sa bann roofing tiles.  Akoz a lafen dizour menm si zot ki ti sa zot in aste wi, me zot war zot en difikilte pou sanze akoz koneksyon sa bann twatir ki mannyer i été avek lezot lakaz e napa lo market.  Mersi Mr Speaker.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Ki mannyer sa mekanizm pou marse zot pa pou bezwen al pran loan avek HFC. Se PMC ki pou fer tou laranzman pou fer konstriksyon tire.  Zot, zot pou zis pey PMC en pti larzan, en pti repeyman tou le mwan. Se sa ki nou pou pe fer.  E osi dan sa dan nou progranm nou pe anvizaze ki dan 4an nou fini tou bann lakaz ki annan tiles.  Nou pa pou kit personn deryer nou pe fer sir by lannen par egzanp premye lannen nou pou annan lamazorite nou pou annan apepre 10 distrik apre 2enm lannen i annan 3 3enm 3 – 4enm lannen 4.

So nou fer en progranm deza pou diferan lannen a bann distrik ki pou ganny enkli dan sak proze.  E tou sa bann lenformasyon nou fini sirkil kot DA deza.  Mersi.

 

MR DEPUTY SPEAKER

Dernyen klarifikasyon Onorab Vidot.

 

HON AUDREY VIDOT

Zis dernyen Minis.  Eski PMC pou fer en konsiltasyon avek bann dimoun pou fer sir ki sa bann lenformasyon oubyen kantmenm atraver medya pou fer zot konnen egzakteman ki mannyer sa prosesis pou marse?  Mersi.

 

MR DEPUTY SPEAKER

Mersi.  Minis.

 

MINISTER PAMELA CHARLETTE

Byensir Onorab.  Once ki nou bann finansman pou fini pare nou pou then al anver bann distrik sirtou annan en miting avek bann dimoun ki enpakte par sa devlopman ki pou arive.

 

MR DEPUTY SPEAKER

Mersi Minis.  Onorab Wavel Woodcock.

 

HON WAVEL WOODCOCK

Minis le 3 Oktob 2017 almost 2an pase, mon ti demann en kestyon lo sa size.  Sa letan Minister ti pe dir e sa kestyon ti baze lo housing estate Moulinié sa letan Minis sa letan ti Minis Bastienne ki ti la ti MLUH ti dir ki sa bann tenant ki pou reste dan sa bann lakaz ki annan sa bann tiles lo la ki zot ti pou bezwen pey 50poursan ankour pou ranplas sa bann twatir ki ti pou en kou R25mil.

Mon rapel ki nou ti demann kestyon lo la e nou ti ensiste avek Minis Bastienne sa letan, ki i pa sa bann tenant ki merit pey kou pou ranplas sa bann twatir, par lefe ki sa bann tiles ti deza substandard.  E ler ou vann en dimoun en lakaz ou merit vann li en lakaz ki lo standar son twa i lo standar e sa tiles i bann tiles ki pa ti lo standar. E i responsabilite Gouvernman pou sanz sa bann tiles. Pa enpoz lo sa bann tenant ki pe reste lo sa bann lakaz.

E Minis ti donn en langazman e Mr Speaker la mon verbatim avek mwan Minis ti donn en langazman ki zot pou sanz sa bann twatir san ki sa bann tenant i pey en sou. La i 2an plitar – 2an – 2years later apre ki mon ti demann sa kestyon Mr Speaker e plizyer sa bann lakaz Moulinié Estate i ankor telekel e dan plizyer sa bann lakaz ki bann tiles i ankor lo la bann tiles pe grennen bann twatir pe pouri e in menm annan dimoun ki’n kit zot lakaz akoz zot nepli kapab reste ladan.

Alor mon kestyon Mr Speaker, se akoz ki Gouvernman pe enpoz lo sa bann dimoun ki pou pey sa bann lakaz in the first place se ou Gouvernman ki’n donn zot bann lakaz substandard – below standard ek en bann twatir ki pa bon kalite ki pe grennen laba.

E mon ti a kontan ki Minister ki ou Minister i donn nou en time frame kan ki sa bann lakaz Moulinié e dan bann lezot distrik, i son poursantaz lo sa bann lezot lakaz olye ki zot pe enpoz lo sa bann tenant Mr Speaker ki mwan dan mon lopinyon, i unfair e i pa byen ditou.  Mersi.

 

MR DEPUTY SPEAKER

Mersi Onorab Woodcock.  Minis.

 

MINISTER PAMELA CHARLETTE

Mr Speaker lenformasyon ki mon annan Moulinié faz one Gouvernman ti kontribye 50poursan e bann kliyan ti kontribye 50poursan atraver loan HIL. E tou bann lakaz ki’n fer se bann dimoun ki’n agree pou zot kontribye pou zot kontribisyon 50poursan.  E bann lezot prezan ki ava vini ki ava form parti sa nouvo Scheme ki nou pe met an plas.  Mersi.

 

MR DEPUTY SPEAKER

Mersi.  Onorab Woodcock.

 

HON WAVEL WOODCOCK

Mr Speaker dan sa ka mon pou advise tou sa bann dimoun tou sa bann tenant ki pe reste dan sa bann lakaz pou al fer en ka kot Fair Trading Commission akoz Gouvernman in donn zot bann lakaz ki pa-  I below standard ek bann twatir ki pa lo standar e prezan ou pe enpoz lo zot pou pey bann keksoz ki pa merit peye e ki mal Mr Speaker i kont Lalwa.  Mersi.

 

MR DEPUTY SPEAKER

Mersi.  I ti plito en komanter.  Onorab Egbert Aglae.

 

HON EGBERT AGLAE

Mersi Mr Speaker.  Minis ou kapab konfirmen ouswa dir ek sa Lasanble anvi ki dernyen apepre 2an – a 3an pase ti annan en legzersis kot bann aplikan ti benefisye 25poursan apepre lo zot pri lakaz.

E enn bann kondisyon sirtou avek bann lakaz, ki ti annan serten problenm rezon ki zot ti pe fer sa se pou zot kapab, osi kapab raise serten larzan, petet atraver zot benefisye avek en konsesyon, pou zot kapab antreprann serten laspe maintenance, avek zot lakaz,  eski ou krwar sa ti pe ed zot dan en fason pou zot kapab fer sa maintenance? Akoz ozordi ou war poudir still ou fer desann zot in benefisye, me still zot pa kapab fer, repayment maintenance.

Dezyenmman Minis dan sa sif 4an ki ou pe mazinen ou’n nonm en sif preliminer mon mazinen – dan son totalite pare sa 4an ki tou sa legzersis maintenance, ouswa bann roofing in fer konbyen i ekspekte pou Gouvernman dan son totalite?  E si zot annan sif egzakt konbyen konsesyon ki Gouvernman, zot pou bezwen war, akoz i annan pa pou pey i annan pou pey 25 i annan pou pey 50poursan i annan pou pey 100poursan, konbyen konsesyon i riske kout ki zot pe sey mansyonnen la?  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker pou premye kestyon lo kote sa HOS ki ti an 2006, nou pe war wi ti annan en discount, well bokou discount mon kapab dir i annan dimoun ki ti an mwayen i annan kliyan ti aste son propriyete apepre R50mil, e lagreman se ki ti pou zot fer kapab fer zot maintenance zot menm.

Parey mon dir lamazorite kliyan ki ti fini pey zot lakaz, zot ti ganny en discount en pe parey.  Lo kote sibvansyon ki Gouvernman pe pran li menm li, i en kou par egzanp pou sa 50poursan ki mwens ki 15an i en 3milyon e osi sa bann ki anba rental PMC, osi pou pey apepre en 9milyon pou fer li.

 

MR DEPUTY SPEAKER

Mersi.  Onorab Jany De Letourdie.

 

HON JANY DE LETOURDIE

Mersi Mr Speaker.  Bonzour tou dimoun.  Minis i vre ki sa bann lakaz la mon pe pran dan sa estate kot mon reste Roche Caiman, i vre ki i annan 24an pase me mon ava dir poudir sa bann batch lakaz ki mon parey mon pe reste ladan Minis son bann roofing i ankor ekstrememan for.

I annan diferan fason akoz i annan roofing ki’n ganny andomaze, akoz son kalite pa ti bon me selman kantmenm 24an pase mon bann roofing avek plizyer lezot roofing i ankor telman bon.  En lapel ki mon ti ava lanse avek nou bann vwazen silvouple aret met nou manman zot manman avek nou vwazen dan difikilte akoz la aprezan nou pou bezwen al pey 100poursan akoz ki’n arive Minis zot in vol tou sa bann diplon lo sa bann roofing e se sa enn sa bann rezon ki fer sa bann roofing koule.

En kantite lakaz Roche Caiman diplon in ganny vole toultour in dekouronnen e la sa i pe fer sa bann roofing koule e la gete ki pe al ariv nou prezan nou bezwen pey lakonsekans pou nou al pey 100poursan akoz laplipar sa bann dimoun zot in fini aste zot lakaz.

Mon 2enm pwen Mr Speaker Minis ki rekour ou ava donn sa dimoun ki’n fer son laplikasyon housing avek Housing Finance pou li refer son roofing depi Avril in ekri son let ziska i pa ankor ganny en larepons ni menm en acknowledgement pou dir son let in vreman vin kot li, akoz li i vreman anvi bouze i pa pe esper personn.  Mersi Mr Speaker.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mon pa konn sa ka spesifik kote in anvoy son let si in anvoy Minister oubyen kot HFC direkteman selman donn nou lenformasyon nou a sey gete kote son let i été.  Mersi.

 

MR DEPUTY SPEAKER

Mersi.  Onorab Waven William.

 

HON WAVEN WILLIAM

Mersi Mr Speaker.  Minis lefe ki ou’n nonm proze Grand Anse Mahe, mon konnen poudir i deza annan serten travay ki’n konmanse me selman mon krwar si mon konpran ou byen bann zabitan ouswa rezidan oubyen dan sa bann flat pou pey 100poursan?  Ou kapab konfirm sa silvouple?

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Wi Mr Speaker zot form parti sa bann ki plis ki 15an.

 

MR DEPUTY SPEAKER

Mersi.  Onorab William.

 

HON WAVEN WILLIAM

Minis mon pe mazinen mon anvi konnen si zot in pran kont ki sa bann flat ti ganny fer an par faz e letan ou pe dir ki tou sa bann dimoun pou pey 100poursan eski i korek baze lo zot kalkilasyon ki zot in fer?  Mersi.

 

MR DEPUTY SPEAKER

Mersi.  Minis.

 

MINISTER PAMELA CHARLETTE

Mersi Mr Speaker.  Mr Speaker PMC in enform mon ki i annan bann ki’n deza fer ki ti pe ganny kontribisyon 50poursan me la sa bann ki pa ti ankor fer i pou antre dan sa nouvo Scheme so menm si i 15an i pou pey 100poursan.

 

MR DEPUTY SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker eski Minis i kapab dir nou si PMC ler ti pe entrodwir sa premye Scheme, akoz zot pa ti antreprann diskisyon avek tou bann dimoun dan sa bann lakaz, pou etablir en peryod repeyman ki zot kapab met an plas dan plas ki aprezan zot pe dir nou ki prezan i pou vin en one size fit all pou tou dimoun?

Akoz zot ou rankontre bann sityasyon ki annan dimoun pa pou kapab afford pou pey sa so zot annan diskisyon?  Eski in annan advice ki zot in gannyen pou zot revwar modalite ki sa i kapab ganny fer e retourn ver Gouvernman pou entame diskisyon lo sa size prenan kont tou sa bann keksoz ki nou pe tande?  Mersi Mr Speaker en kestyon tre senp.

 

MR DEPUTY SPEAKER

Mersi.  Minis eski in annan konsiltasyon pou pran  konsiderasyon bann ka en pe difisil?

 

MINISTER PAMELA CHARLETTE

Mr Speaker nou napa direkteman pou sak endividi me selman sak endividi son repeyman pou diferan.  So i annan en mekanizm ki PMC in met an plas me selman sa i pou ganny diskite avek bann on a  case-to-case basis avek tou bann kliyan ki pou antre lo sa Scheme.

 

MR DEPUTY SPEAKER

Mersi.  Onorab Gill ou ti annan en kestyon.

 

HON CHURCHILL GILL

Zis en kestyon pou klarifikasyon plito vi ki PS i la.  Inisyalman ler nou ti deside pou servi sa kalite roof tiles eski nou ti annan en lide son lifespan?  Konmsi pou nou kapab war si petet si nou ti konnen poudir son lifespan pa pou sitan bokou letan petet nou lapros ozordi i devret pran en lot dimansyon pou kapab adres sa problenm.   Mersi.

 

MR DEPUTY SPEAKER

Mersi Onorab (Christopher) Gill.  Bon mon ti donn parol Churchill Gill – tro bokou Gill Churchill Gill mon ti donn laparol Onorab Simon Gill, me selman ou’n antre ladan vitman mon bezwen les li.  Minis.

 

(Off-Mic)

 

MR DEPUTY SPEAKER

Minis ou kapab.

 

MINISTER PAMELA CHARLETTE

Mr Speaker dan sa bann letan nou ti napa okenn lendikasyon akoz i ti en nouvo prodwir e ti napa okenn lendikasyon mon krwar i en keksoz ki’n deza demande dan sa Lasanble, nou ti napa okenn lendikasyon lifespan sa prodwir.  E nou pan konnen Lenfrastriktir pan konnen konbyen pou pran sa letan e i ti en prodwir ki ti nouvo e sa bann letan ti napa tol ditou lo market se sa ki ti annan pou fer konstriksyon avek.  Mersi.

 

MR DEPUTY SPEAKER

Mersi.  Mr Onorab Simon Gill.

 

HON SIMON GILL

Mersi bokou Mr Speaker e Minis avek ou delegasyon, tou koleg Onorab.  Mr Speaker mon submission i vreman senp mon ava demann Minis avek management PMC pou retournen e al fer ankor en pe travay avek bann dimoun kot zot pe al rekouver lakaz, e eklersi de keksoz.

Limero 1, i annan en soumisyon ki’n ganny fer par Onorab Wavel Woodcock kot in dir avek tou sa bann dimoun ki’n ganny afekte pa peye akoz sa bann materyo ki’n ganny servi pou kouver sa bann lakaz a lepok i substandard. Sa i enn.

2enm soumisyon nou annan en stetment kin ganny fer par Onorab De Letourdie Jany kot in dir nou poudir akoz bann diplon in ganny vole, nou kapab dir sa en akt en pti pe pa tro lo la ki’n arive e se sa ki lakoz ki’n fer ki sa bann lakaz i koule dan serten bann sirkonstans.

Now an tenir kont tousala mon ti ava voudre ki i annan en re konsiderasyon tou sa bann paramet ki’n ganny etablir e ki finalman Lotorite PMC apre ki in fer sa bann re konsiltasyon tou an tenir kont bann depans ki’n ganny fer kot serten bann fanmir pa’n peye or in pey en minimum fee so letan ou re balanse mon krwar ou ava kapab pe vin devan avek en bi nouvo laranzman ki ava – si oule rekonsilye tou sa bann lentere ki annan, vizavi sa bann soumisyon ki nou’n tande la ozordi Mr Speaker.

Mon submit sa anba ou lofis avek konsiderasyon pou Minis avek son lekip.  Mersi Mr Deputy.

 

MR DEPUTY SPEAKER

Mersi bokou Onorab.  Minis sa en propozisyon si oule fer en komanter?  Minis si oule fer en komanter oubyen –

 

MINISTER PAMELA CHARLETTE

Non Mr Speaker.  Mr Speaker zis nou ava PMC i ava go back avek tou son bann partner HFC whatnot avek bann sa ki pe al pran loan tou avek e osi pou bann distrik pou gete ki kalite propozisyon ki i kapab vin avek ki ava annan en konpromi.  Mersi.

 

MR DEPUTY SPEAKER

Mersi Minis.  Nou pou al lo nou dernyen kestyon par Onorab Audrey Vidot.

 

HON AUDREY VIDOT

Mersi Mr Speaker.  Mon kestyon i lir konm swivan:  Eski Minis i kapab dir nou Lasanble ki bann lezot mezir prekosyon pou pyeton e motoris Lazans Transpor lo Later pa ankor enstale lo nouvo lagrandisman Roche Caiman ziska Bois De Rose e kan ki bann mezir sekirite pou kapab ganny enplimante?  Mersi Mr Speaker.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker swivan konpilsyon semen Roche Caiman ziska Bois De Rose Lazans Transpor lo Later Lofis Komisyoner lo semen, in pran sa bann mezir swivan pou asir sekirite lo sa morso semen.  Demarkasyon trotwar, markaz en nouvo pasaz pyeton pre avek ron pwen Roche Caiman enstalasyon plizyer siny trafik ek markaz ki enkli 40kilomet siny ‘’No Stopping.’’  ‘’Clear Way’Give Way. ‘’ No Right Way’’ e plizyer lezot siny trafik ankor.

Bann markaz apropriye konman separasyon lane semen ; lalimyer semen.  Mezir sekirite adisyonnel ki ekspekte ganny enplimante i enkli en pasaz pyeton tanporer dan rezyon Angel Fish.  E en progranm edikasyonnel pou edik bann motoris ek pyeton lo lafason pou servi sa morso semen.  E nou osi anvizaze dan le fitir fer konstriksyon en overhead pedestrian crossing pou bann pyeton.

Nou ti a osi lans en lapel avek tou motoris pou respekte sa maksimonm vites e tou bann siny endikatif ki’n ganny enstale e osi bann pyeton pou servi landrwa dezinyen pou travers semen.  Mersi Mr Speaker.

 

MR DEPUTY SPEAKER

Mersi Minis.  Onorab.

 

HON AUDREY VIDOT

Mersi pou ou larepons.  Minis prenan kont ki a plizyer repriz dan bann Bidze enkli letan nou pe diskit lo kote SLTA lo sa size overhead bridge nou ti ganny dir ki pou fer Providence, e pou Roche Caiman i pou le moman zot pan met li en priyorite zot ti met Providence avek Bois De Rose.

Mwan mon pe demann avek SLTA atraver ou Minis eski zot pa kapab konsidere fer li lo nivo partnership prive pou fer sa overhead bridge Providence e konsider Roche Caiman en priyorite, si Gouvernman pou envestir ladan, pou ki bann zanfan lekol e lezot bann endividi ki servi ki pou bezwen travers semen pou al Stad Linite, pou bezwen servi bann lenfrastriktir sportif, zot ava pli an sekirite.  Akoz pa tou drayver menm si nou fer ledikasyon ki ankor pe pran zot responsabilite pou pran plis prekosyon lo semen.  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker nou anvizaze annan 5 overhead crossing e parmi 2 i Roche Caiman ;- ladan enn kot Palais de Sport avek enn kot Eden Island apre sa enn Providence.  So nou’n fini tender pou nou kapab ganny en konsiltan pou travay lo son laparans artistik, lo son bann desen final, bann detay e osi pou preparasyon kou sa proze li menm.

So nou espekte resevwar partisipasyon – Nou’n resevwar 4 konsiltan ki’n fini tender anvoy zot bid, ki pare pou partisipe e bann dokiman pou ganny soumet avek sa bann konsiltan ankor de semenn.

E priyorite ki nou annan se sa enn Providence, sa enn Roche Caiman kot Palais de Sport e sa enn Bois de Rose complex.  Mersi.

 

MR DEPUTY SPEAKER

Mersi Minis.  Onorab Vidot.

 

HON AUDREY VIDOT

Mersi Mr Speaker.  Savedir Minis eski ou pe dir nou si zot pou fer enn la kot Palais de Sport ler zot pou fini finalize pou fer sa overhead bridge, eski zot pou kontinyelman sak fwa letan i annan bann gro levennman National Day zot pou tir sa bann feray kot kort pou reganny refer trafik semen oubyen zot pe konsider petet bouz li en lot landrwa sa overhead bridge ek kit zebra crossing la kot roundabout.  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Onorab nou pa ankor sitan al dan detay akoz once ki sa bann site designer pou desin son plan e ki nou pou kapab konnen kote nou kapab – kote egzakteman pou met li, koumsa ki nou fer sir ki dan bann trafik avek pyeton tou lede, i ganny lespas pou sirkile e anpes bann konzesyon sirtou dan sa bann letan ki annan bann festivite.

So apre ki nou al ganny bann design la ki nou pou byen konnen apresye kote nou kapab pou fer plis lenpak.  Mersi.

 

MR DEPUTY SPEAKER

Mersi.  Onorab Bernard Georges.

 

HON BERNARD GEORGES

Mersi Mr Speaker.  Mr Speaker mon ti a kontan remersi Minis avek bann zofisye Land Transport pou sa travay ki zot in fer resaman pou re sirfas semen ziska roundabout Eden Island e ziska STC Hypermarket anfen ziska Maison Du Peuple.

Mon kestyon se – anfen avan ki mon ariv lo mon kestyon permet mon demann en lot pti kestyon.  Akoz ki nou pa kapab fer en semen ki plat?  Akoz menm ler i nef i annan landrwa ki pa plat, e akoz nou pa kapab e avek tou respe ki mon annan pou bann line markers akoz nou pa fer en laliny blan ki dwat.

Si ou regarde Mr Speaker nou laliny i tord partou e i pa zoli pou en travay ki’n fek ganny fer pa profesyonnel.  Me mon kestyon se sa lo sa stretch Minis ant roundabout Roche Caiman ek roundabout Eden Island kot i annan en double white line dan milye semen, akoz ki zot pa’n kapab fer en pti semen en pe pli larz pou zot kapab met en crash barrier tou dilon milye semen?

Akoz tantasyon e nou war dimoun ankor pe overtake dan lane ki zot pa sipoze.  E mon per ki en zour en aksidan pou arive lo sa stretch semen.  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Pou premye kestyon lo kote laliny unfortunately resours imen ek lekipman ki nou annan ki mon asire in fer li vin koumsa.  Pou lo kote crash barrier parey ou’n dir en restriksyon lespas ki’n anpes nou met sa crash barrier dan milye e osi bann pye dibwa lot kote osi i difisil pou ganny aprouvasyon pou koupe.  So sa osi in limit nou pou nou kapab met en keksoz dan milye, akoz si ou pou met dan milye then ou pou bezwen agrandi semen ankor en pti pe pou ganny sa bann lane ki nou bezwen.  Mersi.

 

MR DEPUTY SPEAKER

Onorab Georges.

 

HON BERNARD GEORGES

Mersi Mr Speaker.  Mon konpran sa e annefe mon ti konnen se sa repons ki Minis ti piu donnen, me selman avek 300cm elarzi semen mon krwar i ti pou posib.  E mon regrete ki sa pa’n arive akoz parey mon’n dir, i fer sa semen bokou pli danzere ki i ti merite.  Eski ler zot pou fer sa 2enm morso ant roundabout Roche Caiman ek roundabout Providence, kot semen i ase larz, eski zot pou prevwar la pou met crash barrier, akoz sa se enn bann morso semen ki ankor pli danzere.

E kot i annan plis overtaking in the face of  oncoming trafik ozordi.  Mersi.

 

MR DEPUTY SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Onorab pou sa bout semen, i annan en konsiderasyon en central medium pa neseserman en crash barrier me selman en central medium ki en pti pe pli larz.  Mersi.

 

MR DEPUTY SPEAKER

Mersi Minis.  Onorab Chantal Ghislain.

 

HON CHANTAL GHISLAIN

Mersi Mr Speaker.  Mr Speaker mon annan 3 pti kestyon.  Premyerman an relasyon avek kestyon Onorab Georges, li in koz pli o me mon pou koz sa enn pli ba ki sorti kot nouvo roundabout ki ariv ziska Maison de Peuple.  I annan de lane ki desann ek en lane ki monte.  And nou konnen osi ki tou dernyerman la i annan de aksidan fatal ki’n arive la.  And a plizyer repriz plizyer dimoun i konfize zot krwar i annan de lane monte e de lane desann.

Ou pou remark sa letan pou dan lane pou ou desann anvil ou pou remark transpor ki pe mont lo lane lot.  Mon kestyon i akoz ki zot in fer zis sa pti bout stretch la i pti zot in fer li zis en lane monte de lane desann apre pou pli o zwenn ek sa roundabout ki deza de lane ; konmsi 4 lane 2 monte 2 desann.

Mon 2enm kestyon Minis eski ki mannyer zot deside ki larzer pasaz pyeton zot fer e akoz de kote semen zot bezwen met pasaz pyeton ki mannyer zot desid sa parske nou remarke poudir trwa kar sa bann pasaz pyeton i deza larz ou a krwar toulezour i annan kantite dimoun ki pe pas lo la kan i pa an realite i pa leka Mr Speaker.

E mon 3enm kestyon dernyen, i sa pti bout sorti la kot sorti kot sa roundabout pou antre kot sa semen ki al ISPC ;- pa sa enn ki kot biro PUC, me sa enn dan semen.   Mwan mon kestyon i akoz zot in fer sa louvertir pou sorti la, pou al kot konmsi zot in kit sa vye louvertir pou al laba, akoz i telman difisil letan ou sorti la pou ou kapab get gos avanler ou get drwat pou al ISPC.  Mersi Mr Speaker.

 

MR DEPUTY SPEAKER

Mersi Onorab.  Minis.  Minis.

 

MINISTER PAMELA CHARLETTE

Mr Speaker lo kote round about ankor i annan restriksyon lo lakantite lespas ki nou gannyen so sanmenm sa i annan zis 3 lane ki nou gannyen e nou pan kapab dapre CEO zot pan kapab zot pan ganny allow nou ti kapab fer li si nou ti al en pti pe plis dan lanmar, me selman nou pa’n ganny lotorizasyon so se sa ki ou war li annan en 3 lane la anba.

Lo kote pavement nou pavement i standar se 1.5met par 2met, e nou’n fer li tou lede kote akoz sa i en main artery e konmsi dimoun i kapab pas lo tou lede kote.  Lo kote ISPC i vre toultan la in en i annan en landrwa kot i annan bokou aksidan, e nou, nou’n seye pou minimiz kote dimoun i pase, e nou menm met plis arrows kot dimoun i kapab pou al ISPC e menm kot pou sorti.

So i  bann mezir ki nou’n pran.  Nou konnen i bann landrwa kot i annan bokou aksidan, e bokou dimoun i mal servi sa bout semen.  Nou annan bann ledikasyon pou nou fer pou kapab edik en pe piblik ki mannyer pou servi sa bann semen byen.  Mersi.

 

MR DEPUTY SPEAKER

Mersi.  Vitman Onorab Ghislain i pros 1er.

 

HON CHANTAL GHISLAIN

Yes Mr Speaker mon krwar Minis in mal konpran mon de kestyon, sa enn semen ISPC la akoz ou sorti lo roundabout pa sa enn anndan par anndan kot biro PUC ler ou sorti kot round about si ou ti pe al drwat koumsa ou ti pou definitivman war trafik kip e vin lo gos.  Me lefe ki ou atraver koumsa i difisil pou war trafik ki pe vin lo ou gos pe monte li osi.

Mon kestyon i akoz nou pa fer en sel blok sa semen, ler once ki ou ariv la roundabout olye kontiny semen al laba, ou ava pas anndan ou ava monte kot ISPC pou al kot ISPC. Sa i enn.  E mon 2enm kestyon ki in mal konpran aksidan fatal i pa ariv la li. I ariv lo sa nouvo kot zot in fer 3 lane – 2 lane monte e 2 lane desann.  Sa 2 garson in mor la zot.

And trwa kar letan aswar ou zwenn trafik pe monte lo sa enn lane desann ki ou pe desann anvil, olye pran sa enn li i pe sa – prezan zot kwaze vit la, la.

 

MR DEPUTY SPEAKER

Bon mon pa konnen ki degre detay nou kapab al ladan la Minis, me selman mon mazinen ou a pran not konsern ki pe ganny leve tou otour sa design li menm.  E si i annan keksoz ki zot kapab konsidere plitar pa la ozordi, parske sa i en kestyon design, ki zot kapab sizere ki kapab amelyor sityasyon.  Mon pou al lo prosen i reste nou zis de dimoun ki’n demande Onorab Simon Gill.

 

HON SIMON GILL

Mersi Mr Speaker.  En kestyon tre senp ankor mon retourn lo overhead bridge ki Perseverans ou annan Providence i annan enn ki nou pe rode osi epi i annan Roche Caiman.   So mon pa’n tann nonm Perseverans nou koz lo Providence avek Roche Caiman.  Now i annan en soumisyon ki bokou bann businessman in fer.  Si nou al get enpe dan bann listwar nou ava trouve ki bann businessman anler Providence zot ti’n dakor pou kontribye pou ede finans sa overhead bridge.  Nou pe demande ki Land Transport ki atraver ou  Mr Speaker,  Minis ki zot pursue ki zot war e fer sa vin en realite, pou ki sa 2enm overhead bridge anba Roche Caïman li i tonm priyorite No.1! I ekstrememan enportan sa, donnen lakantite sirkilasyon dimoun ki annan e bann zanfan lekol manrmay lekol ki cross la.

Mon krwar i enportan sa priyorite ki Roche Caiman i ganny mete priyorite No.1 anba Bidze Gouvernman e ki anler Providence parey in deza annan bann prononsman – ankor enn fwa mon repete, ki bann businessman zot in pare pou kontribye dan finansman sa overhead bridge.Aalor mon demande ki atraver ou ankor enn fwa mon repete Mr Speaker ki nou pursue sa pou ki nou kapab war e ganny en solisyon pou sa de size devan nou Lasanble ozordi.  Mersi bokou Mr Speaker.

 

MR DEPUTY SPEAKER

Mersi Onorab Gill.  En sizesyon lo finansman. Minis oule fer en komanter?

 

MINISTER PAMELA CHARLETTE

Mr Speaker mersi.  Non zis pou mwan dir si nou ti kapab ganny bann detay bann biznes ki ti anvi SLTA ki ti anvi partisipe oubyen kontribye oubyen through IEA fer nou konnen.  Apre osi apre ki Roche Caiman i enn parmi bann priyorite me selman nou a fer further assessment – SLTA i a fer further assessment pou gete, si nou pou met li premye. Me selman i enn nou bann priyorite Roche Caiman pou nou fer sa bann overhead crossing.

 

MR DEPUTY SPEAKER

Mersi Minis.  Dernyen kestyon lo dernyen kestyon Onorab Sandy Arissol.

 

HON SANDY ARISSOL

Mr Speaker mon ti anvi lo pwen ki Onorab Ghislain in fer an relasyon avek tou sa bann lesplikasyon ki nou pe koz lo la.  Ou konnen i annan en senp senaryo mon ti a kontan partaz avek Minis avek Mr Herath an relasyon avek semen. E nou apresye bann travay ki zot pe fer me selman parfwa lafason ki i retourn lo nou konman drayver parfwa sanmenm sa ki fer nou raise sa bann kestyon.  Mon a zis met Minis dan perspektiv en sityasyon.  Ou konnen pou al kot SMB depot kot ou al aste bann hardware, ou al SMB depot ou bezwen al pey dibwa avek plywood SMB depot prezan letan ou’n aste ou dibwa kot SMB depot ou bezwen al pran plywood isi anba obor Maison Malavois kot i fer dipen.

Ler ou’n sorti kot SMB depot ou bezwen sorti al lo roundabout anler Roche Caiman kot Onorab Audrey i été, retournen vin lo 2enm roundabout vizavi avek Malavois re-antre pou ou prezan kapab pran ou plywood pou ou kapab.  Ler ou fini pran ou plywood ou bezwen remont an montan refer semen roundabout about ankor zis mon anvi met zot dan sa perspektiv en pti pe zis sa sityasyon ki Onorab Ghislain pe koz lo la zis dan sa zanmerant la, kot SMB depot pou ou kapab sorti, an relasyon avek tou sa ki nou pe koz lo la ozordi.  Zis en pti kontribisyon Mr Speaker.  Mersi bokou.

 

MR DEPUTY SPEAKER

Mersi Onorab Arissol.  Mon krwar Minis i a pran kont sa bann konstrent ki sa bann konstrent ki ou pe koz lo la, dan okenn revizyon ki zot fer lo la.  I paret mon ti mank ou Onorab Loizeau, mon a permet ou.  Mon konnen ou normal presi e kourt.

 

HON NORBERT LOIZEAU

Mersi Mr Speaker.  Mr Speaker mon anvi demann Minis vi kestyon pe koz lo mezir sekirite i annan sa bout semen ki konekte avek round about Bois De Rose ki al ziska semen Rifned Jumeau  obor Weeling, eski zot kapab eksplor sa posibilite pou zot kapab lev en pti island parey nou dir la, akoz i annan en dezord total la.

        Transpor ki sorti kot sa round about kot sipoze pe al zis an montan zot desann an desandan, zot pa sipoze al Foret Noire zot still al Foret Noire i annan en dezord avan i ariv en aksidan eski zot kapab eksplor sa posibilite pou fer sa ki mon pe koz lo la.  Mersi.

 

MR DEPUTY SPEAKER

Mersi Onorab Loizeau.  Ankor lezot lide pou amelyor sekirite ki anliny avek kestyon ki la devan nou.  Minis mon a permet ou en dernyen komanter avan nou adjourn pou lazournen.

 

MINISTER PAMELA CHARLETTE

Mersi Mr Speaker.  Non zis pou reasir Onorab i annan en letid kip e ganny fer la anvi ki osi lekol in konmanse lo kote International School pou nou get deroulman la pou nou kapab met en pli bon mezir dan sirkilasyon trafik e safety osi.  Mersi.

 

MR DEPUTY SPEAKER

Mersi Minis.  Se avek sa nou ariv a lafen question time.  Mon ti a kontan remersye Minis Pamela Charlette avek son delegasyon Mrs Albert, Mr Choppy, Mr Antat e Mr Herath e nou ava eskiz zot parmi nou.

 

(MINISTER CHARLETTE AND HER DELEGATION WAS EXCUSED FROM THE HOUSE)

 

 

MR DEPUTY SPEAKER

Bon avek sa nou ariv a lafen nou sesyon travay pou ozordi parey mon ti dir nou pou adjourn en pe pli boner. Mon osi lo lapar Lasanble Nasyonal mon ti a kontan swet tou bann ansenyan en bon semenn travay e pou tou bann vi ki sa mwan i mwan pou bann dimoun ki pe soufer kont kanser osi lo lapar Lasanble Nasyonal dir zot ki nou mazin zot dan sa bann moman difisil, kanser i en maladi ki troublan parfwa danzere, e nou espere ki avek lagras Bondye zot a retrouv zot lasante.

E avek sa nou pou adjourn Lasanble Nasyonal ziska demen bomaten 9er anba Speakership Onorab Nicholas Prea.

 

 

(ADJOURNMENT)