::
Home » Verbatim » 2019 » Verbatim 24th September, 2019

Verbatim 24th September, 2019

NATIONAL ASSEMBLY OF SEYCHELLES

Tuesday 24th September, 2019

 The Assembly met at 9am

 National Anthem

 Moment of Reflection

 Mr Speaker in the Chair

 

 

MR SPEAKER

Bonzour tou Manm Onorab.  Bonzour tou dimoun ki a lekout e pe swiv travay Lasanble Nasyonal.  Bomaten avan nou konmans nou travay pou sa semenn mon anvi zis anons avek tou Manm e osi bann Manm piblik en pe sanzman ki nou pou fer lo nou bann lord travay lo Order Paper pou sa semenn.

Sa i Standing Orders ki permet ki Speaker sa enn ki dan Chair i kapab ansarz en pe lord du jour e sa i toutafe normal pou nou kapab accommodate nou travay ki nou’n progranmen pou sa semenn.  So se pou sa rezon ki ler nou pou pas lo Order Paper bomaten, nou pou war poudir i annan kestyon. I annan Kestyon Irzan.  I annan PNQ, nou osi tou annan bann Bills.

An vi nou labitid pran kestyon Mardi bomaten e an vi ki Minis ki responsab, ki vin reponn kestyon bomaten i pa disponib ni ozordi ni demen, nou pe pouse ki Minis i ava pran bann kestyon avek PNQ Zedi ler i vini pou li vin prezant zot Bill.  E menm zafer osi tou i aplike pou Minis Finans, ki i annan en Kestyon Irzan pou li e apre i ti pou annan 2 Bill pou li prezante e nou osi tou fer le neseser pou li akomod li demen, an vi ki i annan en delegasyon enportan dan pei ki pe meet avek li avek son bann zofisye ozordi.

E pou sa ozordi nou pou pran en Bill ki pe prezante par Minis Pamela Charlette, Minis responsab pou Land Transport e apre sa nou ava kontinyen nou travay avek Mosyon.  E koumsa nou ava kapab bouz en pti pe lo nou Order Paper sirtou bann Mosyon ki’n la pou en pe letan.

Zis avan nou kontinyen, avan mon fer antre Minis avek son lekip mon annan en Right of Reply ki’n ariv kot mon lofis Zedi apre midi, e se sa rezon ki Zedi nou pan kapab pran li akoz in vin Zedi apre midi.  Sa i swiv en entervansyon ki en Manm Onorab Johan Loze ti fer semenn pase dan Sitting Mardi le 17 Septanm.  E mon pou lir sa Right of Reply an konformite avek lartik 102 nou Konstitisyon.

Zis pou lenformasyon piblik, lartik 102 i permet ki en Manm i servi tou son privilez e i annan freedom of speech isi dan Lasanble, me ler serten alegasyon, oubyen serten koze in ganny fer ki i viz lo en lot dimoun an deor, menm lartik 102(6) i permet ki sa dimoun i kapab ganny en Right of Reply.  So mon pou lir sa Right of Reply ki sorti kot Komisyon Anti-Koripsyon i date le 17 Septanm 2019 adrese

Onorab Nicolas Prea Speaker of the National Assembly Ile Du Port.

E mon’n fer Deputy Clerk osi sirkil tou bann Manm depi yer en kopi sa Right of Reply.  Mon pou lir ;

‘Dear Mr Speaker, I wish to correct an accusation made by Honorable Johan Loze in this morning’s debate 17th September 2019. 

        As a CEO Anti-Corruption Commission i presented a case for the amendment to the Anti- Corruption Act 2016 to the President, the Leader of Government Business, the Leader of the Opposition, some Honorable Members from both US and LDS and the Bills Committee. 

        I had the opportunity to explain the ambiguity in the Act prior to the amendments assented by President Faure on the 5th August.  It is incorrect and untrue to say that I lobbied and asked favors from one political party.  I consulted all parties.  And if you see the email thread below, I sent my comments to the Leader of Government Business as far back as June 2018, prior to a Motion put forward by Honorable Arissol on 22nd June 2018.  The reason for the ambiguity in the Law at that time was that both sections 21 and 22 of the Anti-Corruption Act, 2016 contradicted each other. 

        I informed the Bills Committee that the Law was unworkable and was the AG who informed the Bills Committee that an Advisory Committee was a favored model.  I believe that was  what Honorable Ferrari included in his proposed amendments. To clarify further, the amendments to give ACCS prosecutorial  powers was not initiated by me. 

        I wish to further reitorate that all the amendments debated in July 2019, received cross party support.  I have copied the Deputy Speaker in this email as he was presiding over this morning session.  Yours Sincerly.

Signed May Desilva,  CEO.’

So vwala Right of Reply ki mon’n lir.  Yes Onorab Loze.

 

HON JOHAN LOZE

Bonzour Mr Speaker.  Bonzour tou dimoun a lekout, bonzour tou koleg Onorab.  Mr Speaker mon’n ganny loportinite pou lir sa let yer letan in sirkile.  E let letan mon vwar li in ganny ekrir ek tou bon lentansyon.

Lentansyon se pou reasir Lasanble, piblik an zeneral ki’n napa okenn wrong doing, in napa okenn kolizyon ant Anti-Koripsyon avek okenn politisyen parey mwan mon ti dir.

Be imedyatman la keksoz ki vin a mon panse, se ki si CEO Anti-Koripsyon i senserman panse ki’n napa okenn wrong doing, then mwan mon konmans efreye la! La mwan mon per!

Akoz pou dir franchement, mon pa pe re track nanryen ki mon’n dir! Mon pe mentenir ki sa in arive.  Be pou kas sa lenpas, vi ki la mwan mon pa kapab etablir bann fe klerman, mon ava sizere ki Lasanble i retourn lo enn son presedans etablir, e set up en Commission of Enquiry ki’n ganny fer dan lepase, over en pti nwizans mon krwar kot en Process Server ti vin tap laport Lasanble avek en somonn,  pou etablir bann fe klerman pou lepep Seselwa vwar.  Nou anvi konnen nou, kantite lobby ki en zofisye Gouvernman i kapab lobby politisyen – premyerman.  Mon krwar pep Seselwa i deserve pou konnen.

So en commission d’enquete ki ava annan pouvwar pou somonn – premyerman rikord telefonn tou sa bann dimoun involve, pou gete kantite kolizyon, lobbying ki’n pase tranzaksyon e trafik ant zot, nou a konnen!

Nou a konnen si wi in annan trafik ant tou le de kote.  Etablir li klerman; somonn Attorney Zeneral, somonn tou dimoun ki’n partisip dan tou sa bann deba.  Konnen kote the original kernel of sa lide pou sa bann lamannman ti sorti.

Lekel ki’n premye koz lo la sa bann keksoz.  Etablir en proper timeline.  E la lepep Seselwa i ava dir i satisfe ki wi in annan lobbying, in annan kolizyon ant politisyen avek Anti-Koripsyon.

Akoz Mr Speaker, si pe annan kolizyon ant politisyen avek Anti-Koripsyon-

 

MR SPEAKER

Onorab, Onorab.

 

HON JOHAN LOZE

Yes.

 

MR SPEAKER

Mon krwar mon pou aret ou la.  Ou’n dir avan, ou’n konpran sa let ki mon’n-

 

HON JOHAN LOZE

Mon konpran tre byen son let.  E mon pa aksepte! Mon rezet tou sa ki ladan!

 

MR SPEAKER

Mon pe koze Onorab, mon pe koze.  Ou’n dir avan ou’n konpran sa let e sa let lafason ki in ganny fer i pa’n fer an movez fwa.

 

HON JOHAN LOZE

Non.

 

MR SPEAKER

Me la ou pe retourn ankor pou dir i annan kolizyon?   E sa-

 

HON JOHAN LOZE

Mon pe dir annou etablir Mr Speaker.

 

MR SPEAKER

En moman Onorab.  E sa let, sa let in sorti tre byen.  I pa en movez fwa.

 

HON JOHAN LOZE

Non.

 

MR SPEAKER

In anvi zis korize, e in anvi zis fer konnen poudir ti annan kontak ant le de parti, e vwala ki mannyer keksoz in ale.  Me an menm tan ki ou’n aksepte sa let, ki mannyer mon’n lir dan son entirety, ou ankor pe akize, ou pe fer alegasyon poudir ti annan kolizyon.

 

HON JOHAN LOZE

Mon ti a kontan i ganny etablir Mr Speaker.

 

MR SPEAKER

Ok.  Eski ou pe dir ou pe debout lo Statement ki ou ti fer dan ou entervansyon-

 

HON JOHAN LOZE

Yes Mr Speaker.

 

MR SPEAKER

… pou dir ti annan kolizyon.

 

HON JOHAN LOZE

Mon pe debout lo mon Statement.  E mwan mon ti a swete ki Lasanble Nasyonal i etablir en commission d’enquete, somonn rikord telefonn tou sa bann dimoun involved e nou ava trouve.

Somonn tou dimoun! Kestyonn zot piblikman!

 

(APPLAUSE)

 

MR SPEAKER

Ok mersi.  Mersi Onorab.  Mon pou rezerv mon ruling.   E pli tar mon ava donn mon ruling lo ou pwen ki ou’n met devan. Ok?

 

HON JOHAN LOZE

Mersi Mr Speaker.

 

MR SPEAKER

Lo ou demann.  Bon nou ava kontinyen avek nou travay.  E mon ava demann Parliamentary Reporter pou call in Minister avek son lekip.  Bon mon ti a kontan dir bonzour e welcome Minis Pamela Charlette parmi nou ozordi bomaten.  Minis i responsab pou Road Transport e Minis i akonpannyen par son Sekreter Prensipal pou Road Transport Department Mr Patrick Andre son Road Transport Commissioner Mr Wilson Denis e reprezantan Biro Attorney Generale Mr Samuel Verghese.

Minister avek ou lekip bonzour e welcome dan Lasanble Nasyonal.  Mon ava prezan demen en Mosyon pou Second Reading.  Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker.  Bonzour Minis avek ou delegasyon.  Bonzour tou Manm Onorab e tou dimoun ki a lekout.  Mr Speaker anba 64(2) Standing Orders mon le move ki Road Transport (Amendment) Bill 2019, savedir Bill No.14 of 2019 i ganny lir en Dezyenm Fwa.  Mersi.

 

MR SPEAKER

Mersi Onorab De Commarmond.  Okenn Manm ki segonn Mosyon?  Yes Onorab Sebastien Pillay.

 

HON SEBASTIEN PILLAY

Mersi Mr Speaker.  Bonzour mon segonn Mosyon.

 

MR SPEAKER

Mersi Onorab Sebastien Pillay.  Motion has been seconded.  Mon ava prezan envit Minis pou li prezant son Bill.  Minister Charlette.

 

MINISTER PAMELA CHARLETTE

Mersi Mr Speaker.  Bonzour tou Onorab, tou dimoun a lekout.  Mr Speaker ozordi nou pou prezant en lamannman dan Road Transport Act.  Annefe an Avril sa lannen Konsey Minis ti aprouve pou ogmant laz minimum pou mont moter sorti 16 a 18an.

E Road Transport Act Cap 206 i dir ki ‘‘No license shall be granted to a person who is under the age of 18 years provided that a license to drive a motorcycle may be granted to a person over the age of 16 years’’.

Sa Bill i pou demann laprouvasyon Lasanble pou amann souseksyon 3 dan seksyon 12 ki vedir pou ogmant laz ki en dimoun i kapab ganny en license pou kondwir en moter, an vi ki pou le moman en dimoun aze 16an i kapab ganny en license pou kondwir en moter.

 

Plis ki 7 a 10an pase Gouvernman ti pran en desizyon pou retir restriksyon lo lenportasyon moter, e sa sete apre plizyer presyon ki Gouvernman ti gannyen avek piblik.

Sa in fer ki nou war en logmantasyon plis ki 500poursan lo lenportasyon moter, scooters dan pei, e osi par lao 75 dimoun ki mont moter i bann zenn.  En rezon akoz sa restriksyon ti ganny tire, ti pou donn plis mobilite espesyalman pou fasilit mouvman dan bann zenn dan konzesyon trafik, an vi ki i annan logmantasyon dan veikil lo nou semen.

Avek logmantasyon dan moter ek scooter lo semen RTC, Lapolis ek Departman Transpor, in obzerv osi en logmantasyon drastik lo nwizans ek aksyon iresponsab ki bann dimoun i pe mont moter i pe fer.  Me sa ki pli alarman i logmantasyon dan lakantite aksidan ki relye avek moter, scooter espesyalman aksidan fatal ki enplik zenn motoris.

An 2017 nou ti rikord 32 aksidan lo moter kot 3 ti fatal e tou le 3 ti enplik bann zenn motoris.   An 2018 nou ti rikord 42 aksidan lo moter kot 4 ti fatal e 3 ti osi enplik bann zenn.  An 2019 ziska dat aktyel nou rikord 85 aksidan lo moter kot enn ti fatal e ti enplik en zenn motoris.

Baze lo sa bann lenformasyon Road Safety Advisory Committee ti vreman konsernen avek sa bann sif alarman, san oblir Lapolis Departman Transpor lo Later e menm piblik an zeneral. Tou sa bann partner i rekomande ki aksyon i ganny pran pou redwir sa logmantasyon dan aksidan, ki enplik moter.

Dan bann diferan forum propoze pli for ki’n ganny ofer sorti se pou ogmant laz pou mont moter pou vin 18an. E sa in ganny aprouve e enkorpore dan nou nouvo Road Safety Policy ki ti osi ganny aprouve par Konsey Minis.

E avek sa amannman ki’n ganny propoze, i anliny avek bann bon pratik ki pe ganny aplike dan plizyer pei.  E nou konfidan ki sa lamannman i pou fer nou bann motoris vin pli responsab.  E sa pou osi amelyor sekirite lo semen ler nou annan motoris pli matir lo semen.

Alor Mr Speaker, mon soumet pour konsiderasyon Lasanble pou seksyon 12(3) Road Transport Act pou nou insert en full stop apre the word age, the word of 18 years.  E pou nou osi remove oubyen repeal sa fraz ‘’provided that a license to drive a motorcycle may be granted to a person over the age of 16 years.’’  Mersi.

 

MR SPEAKER

Mersi Minis.  Bon deba i ouver prezan lo prensip e merit zeneral sa Bill ki devan nou.  Onorab Valmont.

 

HON JUDE VALMONT

Mersi Mr Speaker.  Bonzour Mr Speaker.  Bonzour tou koleg Onorab.  Bonzour Minis e delegasyon ek tou Manm piblik ki pe swiv nou aktyelman.  Mr Speaker mon enn parmi bann MNA ki pou koz an faver sa Bill, akoz zot a rapel resaman lannen pase aktyelman mon ti anmenn en kestyon ler ti annan en aksidan pli presizeman Bois De Rose, kot en bis ti tap lo en moter or en moter ti tap lo en bis.  Me selman ti fatal.

Mwan mon enn bann mon aktyelman mon en dimoun ki mwan osi mon annan license moter, license No.1 alor mon’n mont moter pou en pe letan.  Mon’n mont scooter, mon mont sa enn en pe pli gro.  Mon’n war kantite danze kapab anmennen.

Ou konnen sirtou ler ou zenn ou pa pe mazin – ou konnen the need for speed, ou eksite.  E i annan serten letan mon pa dir mwan ki’n fer me selman mon konnen i annan zenn ki i annan letan zot entoksike zot mont moter, e i bokou pli danzere.  Zis mazinen ou pe roule 100ekek lo highway en larou i pete ou perdi ou lavi soudennman.

Alor mon an faver ki sa Bill ki zot pe anmennen pou ogmant laz ganny license moter sorti 16an pou vin 18an.  Me selman mon pa krwar sa i zis sa ki pou ede pou anmenn responsabilite lo semen.  Akoz ou konnen 16an pou 18an i zis 2an e nou konnen bann zenn 18an osi zot osi bokou ki nou’n war bann dimoun par lao 18an ki’n fer aksidan, dan bann ka, ki zot in rikorde parey zot in dir dan bann ka 2018 e ziska la aktyel deza 85 ka, alor i pe montre ou i pe ogmante.

E mon konnen ki bokou in ganny diskite ankor e parey mon ti refer sorti lo konmansman, mon ti anmenn sa kestyon e mon ti met lanfaz sa zour mon krwar mon bann lezot MNA lo tou lede kote latab mon kote lo kote LDS nou ti met lanfaz lo sa eleman lekipman apropriye mont moter.

Alor mon ti a kontan met lanfaz lo sa bout la lekipman apropriye.  E dezyenmman osi mon ti a voudre ki ler sa Bill i ganny klase, Minister konsernen Lotorite konsernen i get en kou kalite moter osi ki antre dan pei.  Akoz nou konnen serten landrwa diferan mark i annan mark ki ou pa ni deza tann nonmen, i annan masin petet kalite materyo ki ganny servi pou fer sa bann moter zot menm ennler i fay i poz en danze.  Petet ennler sa endividi ki pe mont moter i pa fer ekspre, me selman ennler en senp fot teknik i kapab kout en lavi lo en moter.

E osi Mr Speaker e koleg Onorab mon ti a kontan met lanfaz lo en lot pwen sa eleman petet nou kapab konsidere ler mon konnen i annan bokou bann dimoun ki vann moter, petet zot pa pou tro an faver.  Me selman nou konman en Lasanble responsab nou la pou edike nou la pou donn legzanp e ankouraz bon pratik mon krwar nou merit pous sa lide, poudir ki en endividi ki vin aste en moter i merit at least montre son i demontre ki i annan 18an.

Akoz nou’n war dan lepase parey i leka mon war zenn ki petet paran in vini ou konnen pou annan sa eleman me selman at least sa dimoun si i vin aste son moter, personnelman i a war i a montre ki i a satisfer nou sa dimoun ki pe vann moter ki i annan 18an e i kapab aste sa moter.

I annan en lot keksoz ankor ki’n ganny bokou ki annan bokou koze, sa se sa aktyelman i annan en pe letan mon tann koz lo la Mr Speaker se nou koz lo la, se kondisyon semen. Nou’n koz bokou lo kondisyon semen en.  Nou war Sesel sa kantite moter ki i annan,  e nou war laplipar ditan bis Tata, ou war transpor pe pase e ou war sa dimoun ki lo sa sirtou scooter, bokou mon’n war, ou war ki i annan serten landrwa ki semen i telman konzeste, prezan zot napa landrwa pase.  E ou war zot pas left, right and center, i dir ou pa overtake a gos, me moter laplipar ditan i pas a gos, e tousala mon krwar nou bezwen ler nou pe agrandi semen, nou pe amelyor kondisyon semen, nou bezwen konsidere.

Dan sa laliny Mr Speaker mon dir mon propoz – mon pou siport sa Bill e mon swete ki Minis e delegasyon i tann sa lapel ki mon’n fer.

E mon demann mon bann koleg Onorab pou zwenn mwan, pou anmenn sa bon pratik e siporte ki sa Bill i pase pou at least ede – i pa pou garanti 100poursan, me at least ede ki nou’n fer en pa an avan e lezot eleman ki mon mansyonnen i konplimant sa Bill.  Mersi Mr Speaker.

 

MR SPEAKER

Mersi Onorab Valmont.  Mon ava pas laparol avek Onorab Norbert Loizeau.

 

HON NORBERT LOIZEAU

Mersi Mr Speaker.  Bonzour Minis ek ou delegasyon.  Mr Speaker mersi pou ganny en sans pou koz lo sa Bill tre enportan.  E mwan Mr Speaker a mon avi mwan Norbert, mon panse ki sa lamannman pa pe fer zistis pou serten nou bann zenn ozordi, ki pe konport zot byen lo en scooter.

Mon pe dir sa Mr Speaker, akoz i annan zenn ki serye.  I annan zenn ki pe war par annan en scooter i an lavantaz pou zot deplasman, sirtou pou al lekol.  I en lavantaz pou zot akoz i tir en pe presyon – e i fer zot pa depan lo transpor piblik.

Alors mon krwar i pa pe anmenn zistis pou sa bann dimoun.  Mon konn manrmay Mr Speaker par lao 16an ozordi ki pe servi zot right e ki pa pe fer bann nwizans.  Mon konn en bon pe zot.  Alors Mr Speaker akoz i annan detrwa ensinifyan detrwa nanryen fer ki pe fer dezord lo scooter, alors mon bezwen pini sa bann dimoun ki zot pe servi zot right byen, dan en fason prop, pou zot kapab al lekol pou zot kapab fer zot tranzaksyon byen?  Zot pa pe fer nwizans sa bann dimoun.

Eski nou bezwen pini zot?  Eski Lotorite zot bezwen pini sa bann dimoun akoz sa bann ensinifyan lo semen?  Mr Speaker non.  Nou bann Lotorite konsernen i bezwen rod fason pou deal avek sa bann ki pe donn lenfirmite i enportan ki nou deal nou rode kote problenm i été.   Ozordi Mr Speaker nou annan en problenm dan pei nou.  Zour Lotorite i perdi kontrol lo en sityasyon, ki nou fer nou vini ek en Lalwa.  Se sa ki nou fer.

E sa Lalwa souvandfwa ler i vini Mr Speaker, i pini tou dimoun i pa pini bann ki pe donn sa bann lenfirmite.  I pini tou dimoun.   Mwan mon krwar bann Lotorite konsernen i merit travay, pou trouve kote problenm i été.  Si scooter i en problenm, zot bezwen rode kote scooter i été.

La mon anvi demann en kestyon, konbyen manrmay anba laz ozordi, anba laz ki’n enplike dan bann aksidan moter ouswa scooter?   Mwan mon rapel zis en garson 15an ki ti fer sa aksidan lo Zil Eve enn mon zanmi. mon frekant lopital mwan.  Mazorite bann dimoun ki fer aksidan lo moter, lo scooter,  lamazorite se bann dimoun ki par lao 18an.

Petet i annan bann ki pa pe ganny rikorde, me selman mwan sa ki mon krwar lopital mazorite dimoun ki annan plis ki 18an.  Eski Mr Speaker ogmant laz mont scooter, sorti par lao 16an pou vin par lao 18an, eski i pou rezourd nou problenm?

Mwan mon dir non.  Akoz ozordi Mr Speaker menm si Lalwa i dir par lao 16an still i annan manrmay 15an ziska 12an ki pe mont scooter!  Oli obzervasyon Lapolis – bann Lotorite konsernen?  Mon  pa pe war Lapolis – bann Lotorite konsernen zot tou ansanm Mr Speaker.

Menm si ou fer Lalwa vin par lao 18an still pou annan manrmay 17an, 15an, 14an.  I pou vin menm zafer menm ki pou kontinyen mont scooter.  Ki zot fer Lotorite konsernen?  Nou pou met en Lalwa poudir scooter nou pou bezwen mont lo 20an?

Akoz i annan manrmay par anba 18an apre ki zot in fer Lalwa vin 18an, ki pe kontinyen mont scooter?  Ozordi bann Lotorite konsernen i bezwen travay! Zot bezwen fer zot travay pou war pou detekte oli problenm! Zot i bezwen annan bann enforcement ki ganny fer.  Ozordi zot fer spot check konbyen scooter zot in atrape dan spot check?

Ler zot pe fer spot check scooter i vini i tourn lo menm bor,  konbyen zot in tyonbo?  Ler zot in lager avek sa pti lalang tint par lao vit bann soz la, scooter zot, zot pe donn bal Mr Speaker.  Ozordi dapre ki mon pe konpran i annan dimoun ki pe race scooter avek manrmay anba laz. I annan touris ki pe lwe scooter zot okouran sa?   Mon zis demande si zot konnen.  I annan etranze ki pe lwe scooter ; pe monte.

Mwan mon annan en zanmi vini sorti L’Angleterre mon war li lo en scooter i dir mwan i pe lwe ek en zwer.  I annan manrmay anba laz ki pe lwe scooter ki pe monte. Lotorite pa konnen. Zot pa fer resers i zis parey drog.  Sa boug ki pe anmenn sa gro kilo pa ganny tyonbo, me sa enn ki annan 1granm ki pe fimen ki pe fim son granm, zot atak li zot pa al kot sours Mr Speaker. Nou annan en gro problenm.

Mr Speaker an dizan sa, mon anvi dir, ki i enportan ki nou tret maladi. Nou pa kapab tret sentonm.  Nou bezwen tret sa maladi akoz i annan sa maladi.  Ozordi nou annan camera partou dan lavil, konbyen ki marse ?  Pa mwan ki ti dir.  La dan Lasanble dernyen fwa zot ti vini Minis mon krwar Minis Dezinyen ki ti koz lo la.  Ti dir or en Minis ki ti la ek zot ti dir mazorite, pa fonksyonnen.  Be kwa dekorasyon sa?

Ki mannyer – ou trouve mon dir zot tret maladi.  I en problenm.  Ki mannyer nou pou detekte ler i annan bann scooter, bann fouter dezord ki pe met lavi dimoun an risk lo bann scooter lo bann moter selman tou sa bann keksoz ki nou zis mete bann camera pa pe fonksyonnen?

Ozordi i annan en konsep kot Lapolis Mr Speaker, mon demande ki mannyer Lapolis pou kapab fer zot louvraz.  Ozordi Lapolis napa en lekipman menm sa bann lekipman ki zot anmenn sa bann dimoun transpor ki pe fer speed, sepa si enn i marse.

E sa ki enteresan Mr Speaker se Land Transport ki ansarz pou deal avek sa bann zafer. pou ganny sa bann lekipman.  Lapolis li i bezwen al atraver Land Transport pou ganny sa. Lapolis dapre konpran, Lapolis ti a kapab fer vini zot bann lekipman pli sofistike, pli meyer marse, me selman zot bezwen pas atraver Land Transport.

E se ki enteresan ankor dapre konpran, se kot Land Transport menm ki annan sa bann dimoun ki pe fer vini sa – mon pa konnen lekel dapre lenformasyon gannyen, si i annan serten ki pe fer vini sa lekipman pou zot vann ek Lapolis.  Kot nou pe ale?

Minis taler ou a dir mon si i vre.  Sa ki mon pe konnen nou bezwen gete.  Be se sa Mr Speaker mon demande ki mannyer Lapolis pou kapab travay, zot napa bann sistenm sirveyans.  Zot napa nanryen mon pa blanm zot parfwa Mr Speaker.  Konmela ou raport en ka kot Lapolis, Mr Speaker i telman napa konfidansyalite ou kapab raport en ka taler ou war lo Facebook en zofisye in mete, ouswa en Manm dan Lotorite li ki’n mete, sa dimoun in fini konnen ki Norbert Loizeau ki’n dir sa! I annan tousala.

Sa se bann keksoz nou bezwen trete pou atak sa bann problenm. Dernyen fwa mon ti fer konplent mon ti tap en pti garson lo mot- – mon pa ti tap li, i ti tap ek mwan dan mon  pe mont- Ti kot  lekol Bel Eau i ti antre anba mon transpor granmersi, i ti leve i ti taye.  Mon ti pran son limero, mon dir li esper mwan pou mwan anmenn li lopital, kan saler mon ti pou anmenn li Kordgard son transpor ti’n kraze, sa garson i fer phone call mon fer bann warden Headteacher ki ti la lekol Bel Eau – fer  warden pran son limero scooter.  Ler mon desann brother in tourn lo menm bor lo sa scooter kraze.  Mon’n al Kordgard. Mon’n raporte. Mon’n donn limero.  Zot in pran stetment. Mr Speaker plis ki 6mwan la ni kapab dir mwan lekel sa boug, lekel sa garson ki ti lo scooter, si i anba laz pou ki sa scooter.  Be en scooter, en limero en transpor, i pa anrezistre kot Licensing?

Be limero en transpor i bezwen anrezistre kot Licensing.  Dek konman mon vini i donn sa limero zot bezwen ale war konnen, be sa pou Wavel Woodcock ; prezan Onorab Woodcock i a dir, mon ti lwe avek Onorab De Commarmond.  I ti pe monte.  Si Onorab De Commarmond ti prêt Onorab Pillay, i a dir be non sa zour mon ti prêt Onorab Pillay Mr Speaker.  Ziska ozordi 6mwan in arive personn pa kapab dir mwan lekel sa boug. Mwan mon transpor in tape mwan.   Ki sa aksidan ki ou fer Mr Speaker, ki en boug i sorti i ale, i taye ki biznes ou pe fer?

Dernyen fwa mon raport en lensidan kot serten dimoun pe call, pe fer krwar pou aste transpor, pou fer en dimoun anmas larzan, mon donn zot limero sa transpor ki vin anmans larzan, ler mon vin Kordgard pe fer stetment, ou konnen ki en madanm Gard i dir mwan? ‘’ Anr nou konnen sa limero – sa en limero prizon !’’  Be ou konnen en limero prizon ou pa fer en fason al prizon al rode lekel sa limero?

‘’Be  mwan mon konnen en limero prizon.’’ Mon donn li limero sa garson ki’n vin sers son limero telefonn avek son limero transpor, ki vin sers larzan, zot tyonbo sa garson zot larg li sa garson i dir li en transporter.   Zot larg li.  Problenm kote i été?  Problenm i ek Lotorite Mr Speaker!

Mr Speaker sanmenm ki mon dir, nou bezwen tret maladi.  Nou pa trete sentonm.  Mon lo semen toulezour Mr Speaker, i annan scooter mon war pase ek Learner lo la.  I annan plis ki 1an en boug i lo learner!  1an ou lo learner! Savedir ou pa anvi konn dray! Pran sa scooter ek li. Ki en learner ki ou ale pou 1an?  Selman i pe monte li.  I annan 2an ek son pti plak Learner i pe monte.  Ki Lotorite i fer?  Kontinyen les li monte?  I ale i fer letour, apre ki nou fer nou vin ek Lalwa pou pini bann ki pe fer keksoz byen; bann zenn mon pe dir ki pe fer keksoz byen, dan en fason annord. Apre  zot dir, nou kontan zenn.

I annan zenn ki serye. I annan zenn ki pa serye.  Nou bezwen rod sa bann zenn ki pa serye Mr Speaker.   Met lord ek zot, pou ki i pa ava vin en problenm lo lezot zenn, ki pe fer keksoz byen.   E la mon anvi fer sorti en keksoz.  Ozordi – ozordi en dimoun i ganny en license scooter demen ou war li pase lo en manman yamaha, sepa konbyen!  Ki mannyer? Si ou annan license scooter,  ou mont scooter.  Si ou anvi al mont en gro moter, mwan mon krwar si napa nou bezwen aranze sa.  Si ou anvi al mont en pli gro moter ou bezwen pas en license.

Dernyen fwa mon konn en garson son papa i fer 17an, son papa i fer li kado en gro moter i pase lo la mon pa war li mon war zis moter.  I sa groser li.  17an lo en manman moter sepa 400ekek cc. Tousala se bann keksoz ki nou bezwen revwar.

Mr Speaker an terminan mon anvi dir ki mon pa dakor avek sa lamannman ki pe anmenn devan. Mon pa dakor avek.    Akoz i pa pe fer zistis bann zenn ki pe konport zot byen bann zenn ki pe konport zot byen.  Bann zenn ki pe servi zot right parey zot dir, dan en fason normal, pou zot kapab fer zot deplasman e an menm tan i tir problenm lo transpor piblik.

Mr Speaker mon a remersi ou pou permet mwan dir sa de parol.

 

        (APPLAUSE)

 

MR SPEAKER

Mersi Onorab Loizeau.  Onorab Ferrari ou ti’n lev lanmen non?  Onorab Sebastien Pillay.

 

HON SEBASTIEN PILLAY

Mersi Mr Speaker, bonzour.  Mr Speaker i nou louvraz konman Manm Lasanble i enteresan e nou lanvironnman konman politisyen osi i vin pli enteresan. E parfwa ler konman en politisyen ou fer fas avek serten size ki devan ou, ki kapab kontansye kout ou, ou vot, mon pou dir fran kout ou, ou vot. Ou bezwen balans sa ki lafason  ki nou  pou apros li.

 

(Interruption)

 

MR SPEAKER

Order!  Order!  Onorab mon ava entervenir.  Silvouple annou respekte ler mon donn parol en Manm pou entervenir.   Onorab Loizeau in koze ti napa enterdiksyon lot kote. Annou respekte parey tou lede kote.  Onorab Pillay.

 

HON SEBASTIEN PILLAY

Mersi Mr Speaker.  Mr Speaker si Onorab ti les mon kontinyen ti ava konpran akoz mon konmans ki mannyer mon pe konmanse.  Rezon mon pe dir sa Mr Speaker, akoz annou pran sa dan en fason zeneral, mon pa pe refer avek ni lentervansyon ki Onorab Loizeau in fer ni Onorab Valmont, me annou pran li dan en fason zeneral.

La deor nou annan nou en gran popilasyon zenn, ki zenn ki annan lenfliyans swa lo zot paran swa zenn ki annan ki kontan lanmizman.  E ozordi Lasanble nou pe vin avek en Lalwa ki pou restrikte en kategori nou bann zenn ki kapab fer aktivite.

E nenport ki politisyen ki vin ek en Lalwa ki vin restrikte, ler ou vin ek en Lalwa ki restrikte zenn fer en keksoz, i pou annan en reaksyon.  I pa pou annan en reaksyon avek sa bann zenn ki pe ganny afekte, par lefe ki pe donn zot sa restriksyon, me pou annan en reaksyon avek lezot zenn ki zanmi avek sa bann zenn, ki zenn i frekant kanmarad. E se sa ki se sa le pwen ki mon ti anvi fer.

I pa – Onorab  in koz lo from son perspektiv, e mon respekte sa ki’n dir. E serten keksoz mon dakor avek i annan zenn wi ki pe servi en moter.  Wi dan en fason serye, dan en fason responsab ki sorti depi Glacis par egzanp ki al kot SALS Anse Royale san fer en aksidan, san okenn problenm.  Eski mon poudir ek sa zenn ozordi mon pou aras ou license moter, pran en bis pou al politeknik  kan ou’n servi moter?

Konpran mwan?  Se sa dilenm ki nou trouv nou lekor ladan. Be lo en lot kote osi, nou’n ganny en reaksyon, plizyer dimoun, plizyer paran e si nou swiv par egzanp – mon rapel ti annan en aksidan resaman, kot plizyer dimoun ti eksprim zot lekor ki Lotorite i bezwen vin pli proaktiv dan lafason pou deal ek sa.

E nou kapab fer en deba lo eski Lotorite i vin pli proaktiv atraver met bann mezir, oubyen enplimant Lalwa, dan en fason pli strik?  Me ki kantite strik ou pou kapab strik ler en scooter i sitan mobil parey i été?   Nou’n koz lo plizyer legzanp. Mon asir ou osi letan mon demann motoris la deor, kot bann scooter i pas dan milye de loto, e kot sa bann loto in ganny reye, sa bann motoris osi pou annan en lopinyon, poudir ki nou bezwen fer sir pli responsab.

E kestyon ki Lasanble kestyon fondamantal ki Lasanble i devret pe debat lo la ozordi, se pa si sa bann manrmay i annan en right pou servi, me eski laz ki en problenm, an se ki konsern servi en scooter?  Oubyen, se eski lafason ki sa bann manrmay i ganny sa license pou servi en scooter, oubyen se eski enplimantasyon Lalwa ki fer ki i sipoze annan en monitoring, lo sa ki pe servi scooter?

Se sa bann kestyon ki nou bezwen pe demande ozordi.  Akoz mon santi poudir nou bezwen regard sa size pa zis dan en konteks nou menm nou.  E mon konnen mon pe dir sa akoz mon ti a kontan nou regard li, olye regard li konman nou politisyen nou pe fer en deba politik lo en size, me annou regard lentere ki nou annan pou nou protez lavi bann zenn.  E asire ki en paran – okenn paran demen pa perdi en zanfan a laz 16an akoz en aksidan scooter.

 

 

(APPLAUSE)

 

HON SEBASTIEN PILLAY

En keksoz ki nou kapab ozordi avoid e anpes arive. E mon konpran poudir an deor bokou zenn pa pou dakor ek sa ki mon pe dir.  E i pa pou fer nou vin popiler, me pa tou keksoz ki fer nou vin popiler ki nou bezwen tonm ladan. Nou bezwen osi analiz konsekans serten aksyon ki nou pran vizavi sa popilasyon ki nou annan ozordi.

Mon pou donn ou en legzanp Mr Speaker. Mon pe swiv laliny trafik anvil e en zenn lo en scooter en bokou pli zenn ki 18an sa zenn, i deside pou li pas ant de laliny loto ; mon konpran sa li ki’n deside fer sa pa nou ki deside.  Me sa enn ki la li in deside fer sa li. Ler in fer sa in end up kros de loto par devan, e in ale menm li, e nou ava dir ok met Lapolis lo sak kwen trafik pou vey tou scooter ki pase.

Me konbyen Gard ki nou pou bezwen pou nou kapab fer sa – ok?  So sa Lalwa lo li menm, zis sa lamannman ki nou pe fer lo li menm, i annan en bon kote.  Son bon kote se  ki nou pe dir poudir  manrmay 18an, sa mon retourn lo sa pwen laz, en zenn ki annan 18an i pli responsab ki en zwenn ki annan 16an.  Eski  sa ki nou pe sey dir?

Prezan annou pran sa menm largiman ler nou regard en zenn 18an ki’n fek ganny en license ki kraz en loto.   Eski prezan nou poudir prezan nou pou fer monte license loto pou li vin 20an, akoz en zenn ki annan 18an napa responsabilite?  Se pou sa rezon Mr Speaker ki mon dir ki sa zis sa pti lamannman i met nou Lasanble, dan en dilenm – en dilenm serye.

I dan en dilenm serye, akoz nou les satisfer tou kategori san ki nou ofans en lot.  Me par ekstansyon ler nenport largiman ki ou pou servi pou zistifye fer monte sa license pou mont en scooter 18an, par ekstansyon mon kapab servi menm largiman pou zistifye akoz ou pa devret donnen en manrmay 18an en license loto.

Par ekstansyon mon kapab servi menm largiman pou 18an menm en zenn pa ankor pare pou en scooter.  Ki mon ti ava konpran e ki mon ti ava dakor avek, se si zot ti vin dir ek mon ki zot tre an derogasyon pou scooter avek moter baze lo kantite CC ki sa i transpor i carry.   Son pwisans, sa mon ti a konpran.

Akoz en scooter i annan serten pwisans, me en moter – bann mon pa konnen bann Kawasaki bann lot la, ki annan bokou plis pwisans, sa en lot kategori.  Set alor poudir en zenn li ki’n ganny license scooter, li i pa sipoze pe mont sa enn gro, ki annan mon pa konnen mwan – 400/500-cc ki fer en pake tapaz, ki al bokou pli vit.

E la mon krwar kot nou pou bezwen annan en konpromi pou nou kapab achieve sa ki nou le achieve.  Lotorite i le fer ki i annan plis proteksyon lo vizavi bann zenn ki servi bann scooters, me eski Lotorite in angaze dan lafason ki bann zenn in ganny sa license scooter par egzanp?

E ki go back to sa pwen ant CC sa bann kalite moter.  So i pa en size fasil pou zis nou dir nou oule fer en desizyon fasil lo la.  E kot zot raise en lot konsern pou mwan personnelman prezan, se ki ler nou fer sa lamannman, nou annan zenn ki ozordi i pou annan 17an, oubyen ki annan 16an ki’n fek ganny en license scooter.  Swa zot in met en moratorium zot aret donnen. E si zot in fer sa mon ava konpran me si zot pa’n met en moratorium me zot in kontinyen donn sa bann license ziska la, e la nou pe fer li vin 18an ki arive ek sa bann license ki zot in fini donnen?

Akoz efektivman malgre ki ou pou donn mwan tou lesplikasyon legalman, sa bann zenn pou an kontrovansyon, akoz zot pou le mont en scooter a laz 16an ler Lalwa i donn li vin 18an.  So mon krwar nou pou bezwen rod en middle ground pou nou kapab fer keksoz aziste, pou nou kapab achieve sa ki nou le achieve.

E mwan sa ki mon pou dir zot se ki, mon pa’n zanmen mont en scooter mon napa license No.1 – mon pa’n ganny sa loportinite parey mon koleg Onorab ki’n dir mwan sa, me i annan en keksoz ki toultan war ler, mon ti pe etidye, i annan en sign ki partou Australie  par egzanp ou pou war bann dimoun i mete se ki, zot ti apel bann dimoun ki mont moter bann temporary citizens, akoz laba zot ti pe servi bann gro moter e ti annan bokou bann aksidan.

Eski isi nou pa kapab fer serten keksoz, ki ou annan sa zenn ki responsab ki pe servi sa moter byen, apre ou ava annan sa enn ki li i le fer son speed i le graduate pou li servi en pli gro transpor – en pli gro masin eksetera, ziska ler i ava ganny en loto.

Akoz se sa mon krwar largiman ki nou bezwen pe regarde.  Akoz otherwise ki nou pe fer nou pe dir ok fer license moter vin 18an, me kestyon fondamantal ki prezan pe demande se eski sa pou anpes annan aksidan lo en scooter ler manrmay i  annan 18an as oppose  to ler manrmay annan 16an?

Eski i pou ede?  Eski zot kapab prezant mwan avek en resers konkret, ki’n prouve poudir laz lo en scooter i konekte avek lakantite aksidan ki arive lo en scooter?  Ou konpran?  Se sa bann largiman ki nou bezwen avanse.  Akoz la nou pa pe zis konvenk politisyen dan sa lasal, nou pe sey konvenk lepep an deor, avek plizyer dimoun pou nou regarde si sa is the right approach.

E mon pa le dezapwent bann ki santi poudir be en manrmay tro zenn pe anmenn en masin wi – me probableman en scooter i sa pwen konmansman, pou li graduate demen, pou li aprann servi semen, pou lo graduate apre arive servi en loto.  Se koumsa mon krwar lentansyon behind annan sa kalite transpor pou meet sa kalite market.  Si nou le vin limit landrwa kot sa scooter i pase, annou limit landrwa i pase.  E sa ki pli enteresan, tou dimoun ki’n aprann mon bisiklet swa zot in konmans aprann mont bisiklet avek sa 4 larou, apre ou mont bisiklet lo semen.

Ki diferans i annan ant en bisiklet ki desann dan desant St Louis, pa lo 4 larou – lo 2 larou  – en bisiklet li en, e ou annan lo sa bisiklet ou annan ou en zenn ki pli zenn ki 16an.  Ou konpran?  Konmsi i annan plizyer largiman otour sa, ki mon konnen ki zot pe achieve.   Mwan mon pa oule shoot sa Bill down, me nou bezwen rod en compromise. Nou bezwen rod en compromise, pou nou kapab – rod en middle ground pou nou kapab pase sa ki pe pase.

Nou oule ki bann zenn i vin pli responsab.  E nou ti a kontan ozordi bann paran oubyen bann zenn ki pe ganny loportinite ekout nou, i ekout  nou.  Sa ki nou oule nou le ki zot i vin pli responsab. Nou pa oule retire sa loportinite ki bann zenn i annan pou kapab rod en pe plis deplasman.

Akoz apre tou nou viv dan en sosyete ki’n evolye ki pa parey avan.  Me at the same time osi nou pa kapab dir poudir konkretman poudir that is the reason.  E lo sa baz se sa baz ki fer sa Lalwa pri.  Lo baz se ki ou annan dimoun, ou annan manrmay ki annan 16an ler sa Lalwa i pase. Ou annan manrmay ki pou annan 17an ler sa Lalwa i pase, zot pou an kontrovansyon avek sa Lalwa ler  i pase.

So ki ou pou fer ler sa bann manrmay i an kontrovansyon ?  Eski ou pou dir demen ok mon pou lans en recall mon pe pran tou bann license ki bann dimoun i annan?  E si li son largiman avek ou poudir be zanmen mon fer aksidan be zanmen mon fer okenn keksoz, ki ou pou largiman an retour?

Akoz mazinen poudir sak aksyon ki zot pou pran, ki nou pou pran, konman Lotorite oubyen ki Lotorite pou pran i pou annan en reaksyon egal par sa popilasyon, oubyen par sa demografi ki pou ganny afekte par sa aksyon ki ou pou pran.

E se sa ki nou problenm i vini. So Mr Speaker mon krwar ki i annan lespas pou nou fer serten azisteman avek sa, E mon ava esper Committee Stage pou mwan fer serten sizesyon ki mon krwar i ava ede pou nou kapab – si oule anmenn nou ver en common ground, ki nou tou nou kapab dir poudir ok, nou dakor avek sa ki zot pe met devan, pou nou kapab fer li bouz pli devan.  Akoz mon krwar se sa ki nou bezwen rode ; rod en fason pou donn Lotorite en loportinite me osi rod en fason pou asire ki nou pa pe overstep bann keksoz ki nou oule fer.

E an konklizyon Mr Speaker – Mr Speaker, mon le dir mon felisit bann zofisye Lapolis ki fer zot travay pou fer bann spot checks.  I enportan ki zot fer sa akoz i ede protez popilasyon, me mon bezwen dir osi parfwa nou blanm sa bann zofisye en pe tro bokou.  Annou osi konman motoris osi annou korpere.  Annou donn zot korperasyon.

Si konman motoris osi nou ti sey fer en fason pran en responsabilite, pou donn korperasyon, akoz nou ki Lasanble nou bezwen fer sir annou pa lans en mesaz deor ki i pa ok pou en Lotorite fer en aksyon.  I ok pou en Lotorite fer en aksyon, as long ki i pe reste within the confines of sa Lalwa ki i fer son aksyon.  E i normal pou annan bann spot checks. I normal pou zofisye Lapolis fer bann spot checks, me as long ki zot fer li byen e si zot pe fer li byen, mon pe dir zot mon felisit zot.

I normal pou Departman Transpor set Polisi – Polisi ki pou fer sir pou dimoun reste pli safe lo semen, me i osi enportan ki Departman Transpor i asire ki ler in set sa Polisi, bann lezot Lazans swa  dan Lapolis,  swa lezot, i annan manda abilite pou kapab ed zot fer lenplimantasyon sa bann Polisi.  Akoz sa ki nou Lasanble loportinite ozordi – an terminan Mr Speaker, pou nou lans en mesaz kler pou lasosyete Seselwa,  nou viv dan en pei ki nou bezwen enterakte ek kanmarad, nou tou nou zwenn kanmarad, annou annan respe pou kanmarad, annou annan responsabilite dan lafason ki nou été ek kanmarad, e sirtou – sirtou ler nou lo semen annou asire ki nou pe servi semen dan en fason drwat, dan en fason korek ; si nou bezwen met en seat belt annou met en seat belt – si nou bezwen asire ki deryer dan pickup en dimoun pa pe debout, oubyen en dimoun pa’n konsonm lalkol, dan nou pickup.  Annou fer en fason pou asire ki sa dimoun pa deryer.

Si ou lo en scooter pa sey overtake en transpor kote gos, akoz ou pa sipoze pe overtake en transpor kote gos.  E si ou konnen ou pe al out avek ou bann zanmi ou annan 18an akoz ou annan 16an, akoz ou pa sipoze pe konsonm lalkol akoz ou annan 18an ou’n al out ek ou bann zanmi, ou konnen ou pe al konsonm lalkol kit ou scooter dan lakour! Dir paran ou pe al out avek zanmi.  Sey  organize -rod en fason  fer transpor anmenn ou.  Si ou pa pou ganny transpor asiz dan lakour, pran homework fer, pran ou liv lir, konsantre dan ou letid.  Sa ki nou le fer, se ki nou bezwen kontinyen edik nou popilasyon, e pa fer en Lalwa parfwa ki kre plis konfizyon ki kapab anmenn nou dan plis problenm.  Avek sa Mr Speaker mon pou esper Committee Stage pou mwan fer serten propozisyon, ki nou ava regarde.  Me selman Mr Speaker mon konnen ki nou pa’n ganny 72erdtan, me mon pa krwar ki sa bann propozisyon pou sitan mazer ki nesesit ki nou bezwen go through sa prosedir.  Nou ava gete nou ava les nou lekor dan lanmen Chair, e si i neseser nou ava war ki mannyer nou  kapab bouze.  Nou  a sey met devan ou.  Mersi Mr Speaker.

 

MR SPEAKER

Mersi Onorab Pillay.  Onorab Wavel Woodcock.  En moman Onorab Woodcock.  Yes Onorab Ramkalawan.

 

HON WAVEL RAMKALAWAN

Mr Speaker bonzour.  E bonzour tou dimoun enkli Minis.  Mr Speaker sa dernyen pwen ki Onorab Pillay in leve konsernan lafason ki nou pou fer nou travay.  Parey ou konnen ou lofis in resevwar en proze lamannman, ki mon’n fer mon ti ava kontan mon osi partaz li avek Onorab De Commarmond – yes Deputy Clerk in gannyen, in gannyen in reponn tou.  In dir avek mwan Clerk – Bon mon ti anvoy sa yer Mr Speaker, pou mon ti adres li lo Clerk avek Deputy Clerk e mon ti ganny en larepons sorti kot Clerk, ki ti dir avek mwan.

‘’Dear LOTO,

Received with thanks.  Deputy Clerk will process in my absence. 

Thank you,

Clerk’’.

E mon si nou pe travay koumsa parske en pe sa ki Onorab Pillay in mansyonnen ki anliny avek sa lamannman ki  mwan mon ti anvi propoze.  E alor mwan mon point se pou regarde si nou pou fer sa bann kalite lamannman. Parske napa 72hours.  E ki si se sa dan sa direksyon ki ou pou ale ki sa proze lamannman i ganny sirkile. Ki sa dan li menm i ava osi ed nou deba.

Mersi bokou Mr Speaker.

 

MR SPEAKER

Mersi Onorab.  Bon mon ava demann Deputy Clerk si ou in receipt, pou sirkile touzour e mon osi tou apre dan break mon a ganny sans war bann lamannman e pou mon konsidere, si nou pou sot sa prosedir 72hours pou nou kapab konsider sa.

Ok, mon ava donn laparol Onorab Woodcock. Annou evit repetisyon.  Annou tant pou nou fer nou entervansyon presi lo sa amannman ki devan nou.  Onorab.

 

HON WAVEL WOODCOCK

Ok mersi Mr Speaker.  Bonzour Minis tou dimoun panel bann Manm e tou dimoun a lekout.  Mr Speaker mon bezwen admet ki mon annan en serten rezervasyon lo sa Bill ki devan nou pou fer monte laz ki en dimoun i kapab ganny license, pou dray moter pou vin 18an.

Le rezon pou sa se ki parey en konparezon Mr Speaker zisteman avan mwan entervenan ki’n koze – Onorab Valmont, ler mon’n ekout li lenpresyon ki in donn mon se ki i napa konfyans dan nou bann zenn ozordi.  Akoz mon dir sa Mr Speaker, Onorab Valmont in dir ki bann zenn anba 18an, zot annan the need for speed.  Me Mr Speaker mon pa pou dakor avek li. Ou konnen ou pa kapab pran tou zenn met zot dan menm sak.

Ou pa kapab met tou zenn dan menm kategori.  E ler mon pe get sa Lalwa sa ki mon pe war Mr Speaker se ki mon war ki inosan pou pey pou le koupab.  Mr Speaker ozordi dan nou pei Sesel, i annan en kantite zenn ki vreman responsab.  E i pa en kestyon ki zis sa bann zenn ki responsab Mr Speaker, ozordi i annan bokou bann zenn 16an a 17an, ki pe fer en pti partime pou ki li fer en pti extra income.

Ozordi nou pei pe evolye e i annan bokou bann zenn ki fer en pti travay parey delivery, zot al deliver pizza, ouswa bann lezot pti komodite pou zot ganny en pti income.  Sa i bann zenn ki responsab i fer en pti travay pou li ganny en pti larzan en pti pocket money an menm tan i pe ed son fanmir.  Konmsi nou bezwen fer sir ki bann Lalwa ki nou pe anmennen la nou pa pe pini bann zenn ki serye ; bann zenn ki fer keksoz, pou ed son lekor e osi pou ed son fanmir.

Mr Speaker ozordi Onorab Sebastien in koz lo la, ozordi nou annan bokou bann zenn sirtou bann zenn Pos- Segonder bann i al SALS bann ki al lekol Politeknik Anse Royale, ki sirtou bann zenn ki sorti dan nor ou war zot lo zot scooter tou le bomaten zot pe al lekol lo la Anse Royale SALS ek bann lezot lekol ki annan laba.

E  mwan mon santi poudir sa Lalwa pou pini zot, akoz le moman ki sa Lalwa i pase ou pou bezwen al kennsel tou sa bann license.  Sa bann etidyan ozordi ant 16an a 17an.  E mon pa krwar poudir sa i fair, pou en manrmay responsab, pou en manrmay ki serye ozordi.  Ou konnen nou pa kapab pini nou bann zenn, akoz enn ou de ki pe fer abriti lo moter.

Mr Speaker parey Onorab Loizeau i dir mon krwar pli gro problenm ki nou annan Sesel se enforcement Lalwa.  E  mwan mon krwar ki pou nou deal avek sa sityasyon, bann ki pe fer abriti lo moter, bann ki pe fer speed lo moter, se pran aksyon neseser avek zot.  Si ou’n tyonbo li pe fer speed ou impound sa scooter, oubyen ou fine sa dimoun lo sa moter ki pe fer speed ou met en fine ase sever, ase serye.  Once ou’n fine li R3mil R5mil, ou krwar i pou fer speed ankor lo moter?  Mon pa krwar mwan.

Mr Speaker penaliz bann ki pe kas Lalwa se sa ki nou merit pe fer.  Bann ki pa parey en konparezon ozordi nou war bokou tanzantan ou war bann pti men pase lo scooter san en helmet be ki nou fer?  Mr Speaker fodre nou pran aksyon avek bann ki iresponsab.  Annou pa pini tou.  Annou pa met tou dan menm sak.

Mr Speaker Onorab Sebastien in koz nou bezwen proactif dan lafason, ki nou deal avek bann sityasyon.  Me proactif pa vedir ki nou pini nou bann zenn responsab.  Ou konnen Mr Speaker ler mon pe get sa Lalwa i fer mwan mazin mon letan lekol. Ou konnen dan mon letan lekol, mon krwar plizyer nou bann Onorab nou’n fer fas avek sa, kot ou dan en laklas ou de manrmay i disturb, i fer tapaz apre mis i pini tou manrmay, i met zot tou anba detention apre ler lekol, ou reste apre ler lekol.

Akoz?  Aksyon enn ou de etidyan ki’n mal konport zot dan laklas.  Mr Speaker sa Lalwa is not fair.  I pa fair at all e mon pa dakor.  Onorab Sebastien en keksoz ankor ki in dir se ki sa Lalwa i pou protez bann zenn ant 16an a 17an. Mon dakor ki nou bezwen proteze nou bann zenn ant 16an a 17an but what about bann 18an an montan?

Ki laz ki nou merit mete, pou nou protez nou zenn?  Tou zenn nou bezwen protez tou zenn pa zis bann ki annan 16an ek 17an 18an an montan.  E pou nou protez zot Mr Speaker solisyon se nou bezwen enpoz Lalwa.  Nou bezwen enforce bann Lalwa ki deza la ozordi.  Si nou met nou Lalwa an aplikasyon, si mon konpran ozordi difikilte ki nou pe fer fas avek  dan nou pei, i annan en mankman zofisye Lapolis, me selman si nou ti annan ase resours imen dan Lapolis, e nou ti annan bann parey i annan landrwa kot i annan dan bann pei i servi bann speed camera oubyen bann spot check en pe partou, mon konnen parey mon dir sa defayans resours imen, me si nou ti annan sa resours imen dan Lapolis, nou ti pou kapab annan sa resours ki nou bezwen pou nou kapab vey en pti pe pli byen, nou semen e bann dimoun ki pe servi moter ouswa scooter.

Mr Speaker bokou bann zenn en keksoz ki ozordi – annefe nou tou nou konnen nou okouran se ki bokou bann zenn ozordi ki ou war zot pase lo en scooter oubyen lo en moter zot napa license, zot pe dray abriti akoz sa moter pa pou zot.

En dimoun ki annan en moter ouswa son scooter i pran responsabilite ek son moter ek son scooter.  I veye sa be bann ki ozordi ki pe arive dan nou pei se ki bann dealers bann drug dealers pe donn bann zenn scooters, pou al delivre drog partou kote dan kwen Mahe, Praslin ek La Digue.

Ozordi se bann drug dealers ki pe touy nou bann zenn.  Ler i donn zot en fix apre pou zot ale pou al anmenn drog partou dan tou bann kwen, eski nou pa okouran ki sa pe arive?  Ki nou fer Mr Speaker mon krwar i annan en kantite fakter ozordi ki pe kontribye pou fer ki i annan bokou plis aksidan scooter ouswa moter dan semen.  E parey mon dir enn bann fakter se sa bann dealers dan tou bann kwen ki pe servi nou bann zenn pou al anmenn drog partou dan tou bann kwen sa ki nou bezwen deal avek Mr Speaker.

Pa anmenn en Lalwa pou vin pini de ou trwa zenn pa anmenn Lalwa ki pou vin pini lamazorite nou bann zenn serye e responsab, akoz de ou trwa abriti de ou trwa zenn ki pa pe pran zot responsabilite?  Mr Speaker senserman mon pa pou kapab siport sa Lalwa as it is akoz mon santi ki pou unfair lo en kantite nou bann zenn Sesel.  Mersi Mr Speaker.

 

MR SPEAKER

Mersi Onorab Woodcock.  Mon ava donn laparol Onorab Valmont pou fer klarifikasyon.  Onorab.

 

HON JUDE VALMONT

Mersi Mr Speaker.  Mersi zis en pwen klarifikasyon. Mon krwar Onorab ki’n koze avan mwan ou konnen dan son leksitasyon petet in dir sa ki mon’n dir – in enterpret li dan en move fason.  I pe mislead. Mon pa pe dir mon pa pe ankouraz bann zenn, mon pa an faver bann zenn, keksoz ki mon’n dir – mon’n dir mwan mon pare pou siport sa Bill mannyer i été, me selman mon met bann largiman devan.

Akoz mon santi ki i annan lezot eleman ki mon’n anmenn devan, e nou bezwen asire ki nou protez nou bann zenn.  Se sa ki mon’n anvi dir.

Mersi Mr Speaker.

 

MR SPEAKER

Mersi Onorab Valmont.  Onorab Ahmed Afif.

 

HON AHMED AFIF

Mersi Mr Speaker.  Bonzour Minis e delegasyon.  Bonzour tou dimoun a lekout.  Mr Speaker mon premye reaksyon, kan mon ti war sa Bill, se ki Gouvernman ti annan en konsern vizavi aksidan ki pe arive.  E Gouvernman petet ti annan en panse ki bokou bann aksidan e sirtou fatal i lye avek bann zenn ki anba laz ki ti lo en moter.

Alor sa sete mon reaksyon toudswit kan mon ti war sa Lalwa.  Alor mon’n demann mon lekor me si sa i vre eski bann fe ki mon kapab trouve i siport sa?   E ler mon’n regard bann fe ki mon konnen dan seksyon trafik – i annan mon esey trouv ki kantite aksidan in annan dan sa dernyen 4an –  sif ki mon’n gannyen 6,809mil aksidan -pa neseserman moter me tou aksidan dan pei pandan dernyen 4an – depi 2015.  Dan 6,809mil aksidan si mon’n ekout Minis bomaten i annan zis 6 ki involve en juvenile.  Ti annan bokou plis aksidan moter, me zis 6 aksidan parmi 6,809mil aksidan ki involve en juvenile ;- savedir en zanfan ki par anba 18an.  Ki vedir enn dan apepre 10mil dimoun ki en juvenile ki lo semen ki’n fer aksidan e ki pe ganny afekte.

Pou mwan si sa i leka i kler poudir, si ou pe al afekte laz konman en solisyon, pou ou evit en aksidan, i pou napa en lenpak, parske zot pa lakoz laplipar aksidan.  Se pa zot.  Sa i kler.

2enm keksoz ki mon esey trouve ki sa norm enternasyonal ozordi, an se ki konsern moter?  E sa ki mon trouve norm enternasyonal se ki laplipar pei i permet ki bann manrmay depi 14an i kapab mont moter, me selman i annan restriksyon.

Par egzanp zot a dir ou kapab monte moped me selman light motorcycle, me selman ler ou pou ariv 17an ler ou ariv 18an ou a kapab al par lao 125-cc, eksetera.  Zot met serten kontrol – wi, me i pa anpes ou mont en moter.  Mon 3enm pwen ki mon ti a kontan fer Mr Speaker se ki moter ozordi i en fason pou nou redwir konzesyon – transpor lo semen.  Akoz mon dir sa?  Parske en moter souvandfwa pe ganny servi par bann zenn pou zot al lekol ;  bann zenn ki pe rod en pti income apre ler.  I en fason ki bokou lakonpannyen i servi pou al fer delivery ozordi.  Se moter e bann zenn. E i kler ki from Statistik, se pa bann zenn ki pe koz aksidan even fatalite souvandfwa, se pa zot ki lamazorite.

E alor si sa i leka, si i permet dimoun deplase dan en fason ekonomik, parske moter i ekonomik opred en loto ; si i pe permet manrmay ariv lekol Politeknik byen menm avan  zot al Politeknik, zot  ankor dan segonder, i annan manrmay ki mon pe koz 16an ki ariv lekol – ki servi en moter e  sa i en fason fasil pou li, ou fer son lavi fasil.

E laplipar sa bann manrmay ki pe fer sa ozordi, se pa bann manrmay ki pe koz aksidan.  Me si nou pas en Lalwa koumsa ozordi, nou pe al pini tou sa bann dimoun ki pran prekosyon, ki pe fer tou sa ki zot kapab pou zot asire, ki zot pa koz en danze pou lezot dimoun.  Me pli enportan zot pa poz en danze pou zot lekor dan lafason ki zot pe kondwir.

E mon krwar sa i primordyal.  Fodre nou pa bliye poudir tou dimoun i annan en responsabilite.  E tou dimoun pe mazin son lekor avan.  Alor akoz nou bezwen al sitan lwen pou nou fer keksoz ki laplipar pei pa pe fer?  E kot son lefe pou preski zero an term anpes aksidan.

Alors mon ti ava an faver ki avan Gouvernman i pran en mezir, i konvenk nou poudir sa mezir i pou annan en lenpak serye lo sa keksoz ki nou anvi evite.  Ki aksidan i fatalite. Mon ti a kontan fini avek en sizesyon, e mon sizesyon i en pti pe anliny avek sa ki Onorab Pillay in dir.  E Onorab Ramkalawan in propoze dan son lamannman se premyerman ; annou adopte en best practice enternasyonal, ki 16an pou ganny en license me pou en moter restrikte par anba 125-cc dizon, moped dek ki ou’n ganny en pe laz ek leksperyans – 2an leksperyans ou kapab graduate ou al pli o.  Sa i norm enternasyonal.

Mon 2enm keksoz mon ti a kontan sizere, e sa i pa vin dan Lalwa, me ki Lapolis oubyen Lotorite ki donn license, fer zot pas tes ler zot ganny 16an, i osi donn en konsey avek bann zenn.

Par egzanp  mwan mon ti annan mon garson ler i ti annan 16an, i ti rod en moter.  E son premye moter i ti en 250-cc.  Mon ti per parske be sa boug i annan 16an adrenaline i ankor pe ponpe i pou al fer speed mon pou regrete.  Me mwan mon ti propoz 4 keksoz avek li.  Fer li kado en moter mon ti propoz 4 keksoz.  Mon dir li premyerman – ou pa pou mont aswar.  Dezyenmman ou pa pou fer speed lo la. Trwazyenmman ou pa pou mont dan lapli. E katriyenmman ou pa pou al okenn parti lo sa moter.  Si ou swiv sa 4 rules mon happy mon a les ou mont en moter.  Mon sanse i pa’n ganny aksidan.  I pa vedir si ou pa swiv sa 4 ou pa pou fer aksidan.  Me bann pti konsey parler i ede avek en zenn, ki petet pa pe prevwar bokou, pou li konnen ki poudir kote bann danze i vini.

E si Lapolis ki ozordi mon krwar se zot ki donn license bann zenn, olye zis fer li pas tes apre dir vin dan biro mon a siny ou papye ou ale zot kriy zot e ou donn li sa counseling.  Ou dir li la bann fason.  La, la lafason nou war aksidan pe arive ozordi, bann zenn parey ou ki pe al mont moter demen.  Ler zot pe ale lo semen zot sanz lane, konman zot sanz lane zot bliye get dan zot laglas sa lote par deryer i tap zot.  La, la kot aksidan i arive. Ou donn li bann legzanp ki bor i arive.  E enn fwa ou’n donn sa bann kalite gidans avek en zenn ki premye fwa i pe al ganny en license, sa mon ti pou dir ou i ti pou evit aksidan a lavenir, me pa sanz Lalwa.  Lalwa i ok li. Laplipar zot pa pe fer sa, me sa zis fer sa bann pti keksoz mon krwar ti pou fer en gran sanzman dan lakantite aksidan ki nou pe gannyen.  I ti pou permet bann zenn ozordi kontinyen mont zot moter, kontinyen travay, kontinyen al lekol san okenn difikilte avek transpor piblik, oubyen  transpor prive, e an menm tan nou konman en pei nou ti pe bouz dan en fason ki modern, e ki anliny avek norm enternasyonal.  Mersi Mr Speaker.

 

MR SPEAKER

Mersi Onorab Afif.  Onorab Sandy Arissol.

 

HON SANDY ARISSOL

Mersi Mr Speaker.  Bonzour Minis avek ou delegasyon.  Mr Speaker mon ti a kontan konmans avek en lanons ki mazorite letan nou tande lo radyo oubyen televizyon.  Sa lanons i dir poudir Lapolis pe lans en lapel avek Marizolenn i pa’n antre dan lakour in absante dan lakour son paran i annan 3 semenn, silvouple sa ki war li raport avek Kordgard pli pre.

I annan en lot bout sa lanons ki vin avek, dernyen bout lanons anba i dir ek ou, i en lofans anba Lalwa pou ou harbor okenn zanfan anba laz.  Lanons i pase lo radyo, televizyon nou tou nou anvi rode lekel sa Marizolenn piti lekel finalman en semenn plitar radyo i anonse poudir Marizolenn in tourn kot son paran.

Kestyon ki mon demande se, sa dernyen bout mesaz ki ti ganny dir i en lofans pou ou harbor en zanfan sa anba laz be letan Marizolenn in tournen Lapolis li, eski i rode lekel ki ti pe harbor Marizolenn pou 1mwan, anvi ki i ti en zanfan anba laz?

Non Mr Speaker zis nou tande poudir Marizolenn in tourn kot son fanmir tou keksoz i go as business as usual ; pei i kontinyen fonksyonnen e semenn prosen en lot Marizolenn No.2 i perdi.

 

(laughter)

 

 

HON SANDY ARISSOL

Ou konnen akoz mon konmans koumsa Mr Speaker, parske ozordi dan nou pei Lapolis i fer pou li, Licensing i fer pou li Land Transport i fer pou li. Napa korperasyon ant sa 3.   Akoz mon dir sa?  Ti annan en legzanp kler ki nou tou nou ti lager lo la lannen pase, ti annan sa fame kot bann madanm ki al rod en keksoz aletranze, pou li vin vann dan lavil, finalman Lapolis ti tay deryer zot, bann biznesmenn i tay deryer zot, tou  dimoun ti tay deryer zot. Ou  napa drwa vann lo trotwar ; ou napa drwa vann lo Lari Bazar ; ou napa drwa vann laba.

Prezan kestyon ki nou ti demann nou lekor, be lekel ki responsab?  Ler nou ti al rod Lapolis, Lapolis i dir ek ou Licensing. Ler ou al kot Licensing, Licensing i dir ek ou Land Transport finalman tou dimoun i get kanmarad business as usual lavi i kontinyen.

2enm legzanp Mr Speaker ; kot Butchers Grill ler ti ouver aswar ler i park lo sa pti bout pavement parske i pa ti annan sa napa kantite trafik parey dan lazournen, Land Transport i deside met pti pilye feray pou fer sir ki aswar personn pa park lo sa pavement.  Pou ki rezon? Pou rezon sekirite zot ki dan lozistik zot kapab eksplik nou, zot a dan en pli bon fason pou donn nou sa legzanp.

Me parkont kot Barrel Trading lot kote semen ki tonm dan mon distrik, dimoun i park mannyer zot anvi lo sa bout parking, personn ziska prezan sa 3Lotorite konsernen ki Licensing ki Land Transport ki Lapolis pa ankor fer en fout nanryen pou rezourd sa problenm.  Sa mon 2enm legzanp Mr Speaker.

3enm legzanp ki mon ti a kontan donnen kot napa korperasyon an sa pei, oubyen Gouvernman napa sa kouraz, sa lafors, pou li deal avek bann dimoun ki pe donn lenfirmite dan sa pei – mon a donn lot legzanp.  Ozordi nou annan plizyer magazen ki kontinyen vann zanfan lalkol, ki kontinyen vann zanfan sigaret, la ler nou pe koze si mon mont dan distrik Gervais Henrie – Onorab Henrie Mont Buxton i annan laboutik dimoun i met sez, zot zwe domino, zot ouver latant, zot fer parti devan en laboutik i annan license ki vann bwar ki tou dimoun i konnen Mr Speaker. Lapolis pa konnen!  Licensing pa konnen!  Land Transport pa konnen !.

Be nou annan en problenm dan sa pei?  Nou sel problenm se ki nou annan en Gouvernman ki napa kouraz pou li pran aksyon Mr Speaker! Si zot anmenn Minis dan Lasanble Nasyonal deranz li dan son lofis, kan i annan dimoun St Louis ki pe esper lakaz Megan Nicette laba, son lakaz in dekouver lapli pe devid dan son salon Megan Nicette i ankor pe esper en pti prefab, ki in ganny promet par Minis e avek PS pou Lakaz.  Megan li i pe bwar delo tou lannwit, Minis i la i pe anmenn en S.I. pou ki laz i sorti 16an pou vin 18an Mr Speaker !  Nou annan en problenm.

Lot legzanp mon kapab donnen i annan nou bann transpor ki pase, ki fer avek lanmizik dan zot loto zot disturb tou dimoun – i ok. Lapolis nou tou nou pase nou gete be nou kapab ekoute, son madanm pa’n tranble dan son transpor?   I ok business as usual lavi i kontinyen Mr Speaker.

Dan vwazinaz ou annan ou en vwazen ki zwe lanmizik 24 lo 24 nou tou nou konplent nou tou nou kriy lasasen, ki arive Mr Speaker?  Nanryen pa arive business as usual Lalwa i vin devan Lasanble Nasyonal e nou, nou deal avek  koman politisyen. Me selman i enportan pou nou fer en keksoz byen e kler.

Nou konman en Gouvernman responsab, nou pa kapab anmenn Bill oubyen Lalwa pou ganny vot.  Ler nou anmenn Bill oubyen nou fer lavwa dan Lasanble Nasyonal, i bezwen pou pei.  Sa ki vin apre i kontiny lo bann bon Lalwa ki nou, nou anmennen.

Ozordi Mr Speaker nou pe koz lo en bout Lalwa ki pe demann Gouvernman, pou sorti 16an pou vin 18an.  E nou pe fer spesifikman lo sa ki nou apel bann scooter ki bann zenn i monte.  E nou’n ganny bann zenn statistik aksidan. Be kestyon ki mon pe demann mon lekor alor, eski pou bisiklet osi nou pou bezwen annan laz pou mont bisiklet?

Napa nanryen ki’n ganny mansyonnen pou bisiklet! Parske bisiklet sa ki anvi mont bisiklet i monte nenport ki La Digue, pti zanfan, mwayen zanfan, gran zanfan, vye zanfan, tou dimoun i mont bisiklet La Digue, eski i annan Lalwa pou bisiklet par egzanp?

Akoz nou pe get zis scooter sa i mon premye legzanp?  2enm legzanp si nou pe ogmant laz 16an pou vin 18an pou sa scooter, akoz dapre nou bann zenn pe mor bann paran pa kontan letan zot bann zenn zanfan i mor nou bezwen retourn en kou lo license pou dray loto.

Statistikman konbyen bann zenn i napa scooter me ki annan en transpor en loto konbyen zenn ki’n perdi lavi?  I ti napa 16an, li i ti annan 21an, 22an an montan, eski si nou pe reviz pou scooter eski nou pe osi mazin reviz pou bann license normal sorti 18an pou vin 21an, akoz i annan en kantite ka lanmor lo bann zenn?

Mr Speaker  mwan mon krwar nou bezwen serye dan sa pei.  Nou bezwen kapab nou pa kapab osi annan en problenm avek en dimoun si nou annan 95mil dimoun Sesel nou bezwen fer Lalwa pou 95mil dimoun nou bezwen annan Lalwa poudir pou deal avek lapopilasyon.

Alor Mr Speaker sa ki mon pe dir mon pou siport sa ki Onorab Loizeau i dir. Sesel ozordi nou annan bokou zenn ki responsab ; kantite zenn responsab dan nou pei.  Letan sa zenn i responsab, i aste en pti loto i pran son loan zot dir li leve debourye, i leve in travay in rod en pti loto, i anbelir son loto, i met en pti tinted nou lager ek li.

I zis parey en dimoun ki aste son lakaz, i tir louvez i met sliding window, sliding door.  Sa i apel lanbelisman son lakour, be sa zenn ki aste son transpor i osi i fer parey i met en pti lalimyer i met en pti dekorasyon i aranze sa i en fason ki li i fer.

Ki nou fer nou lager ek sa zenn la en zenn i ganny 16an in fer byen dan lekol segonder i pe al Pos-Segonder son paran i dir ek li mon boy mon happy rezilta ki ou’n donnen e mon kontan ou’n ganny en sans dan Pos-Segonder pou ou kontiny ou letid alor vi ki i reste Bel Ombre dan distrik Mr Speaker Dan Bernard i pou lwen pou li al Anse Royale alor son paran i pran en pti loan i aste en pti scooter i donn li pou li kapab deplase bomaten pou li ariv Anse Royale kot Onorab Lemiel laba Politeknik.  Alor eski la ozordi nou pe dir poudir sa zenn la bann ki dan S5 zot paran pe mazin aste en pti scooter pou zot nou bezwen kas sa Lalwa definitivman fer li vin 18an?

Be pa i en fason pou tou bann paran ozordi rekonpans zot zanfan, apre ki zot in fer byen pou donn li en keksoz pou li kontinyen debourye, en fason ki dan vakans i kapab li osi fer en pti partime ganny en pti larzan pou li aste son liv, pou li ganny sans aste en soulye nef, pou li ganny sans aste de pti keksoz e larzan pou li al avek lekol.  Eski pa sa ki nou ankouraze Mr Speaker?  Eski pa sa ki nou apel pozitivite bann keksoz pozitiv?  Pa sa ki nou pe dir Mr Speaker?  Alor mwan mon pa pou dakor avek sa zafer lamannman sorti 16an pou vin 18an.  E pa bliye sak fwa nou koz lo keksoz negativ i zis parey Sesel toultan nou dir, Seselwa pa oule travay me nou bezwen osi kapab dir poudir i annan en pti group Seselwa ki pa oule travay dan sa pei.

Mazorite nou Seselwa i leve granmaten sanmenm sa i dir statistikman i dir SPTC anmenn 40mil dimoun an montan an desandan, parske nou annan dimoun ki travay.  Me letan nou koz lo zenn ozordi Mr Speaker nou annan nou bann zenn pozitiv dan nou pei.  Annou aret lager ek nou zenn.  Dan bann lekol segonder ozordi dan ledikasyon Minister Ledikasyon i met plis lanfaz ozordi Mr Speaker lager ek sa zenn avek son seve.

Ok.  Zot pa met lanfaz lo rod mis rod sez rod latab ek lekipman pou nou travay nou lager ek sa zenn depi i pe lekol dan segonder, lager ek son seve, me eski statistikman i annan en rezilta ki’n prouve pou ki letan ou raz ou latet bald head parey mwan ou pwen i monte konpare ek sa zanfan ki lekol prive li i kapab al ek son seve, be selman annord, byen aranze, byen prop, eski son rezilta pa i ogmante laba Independent School, International School?

Sa i bann keksoz ki nou devret kapab balanse. Annou aret lager ek nou zenn. Parske si en fiy i kapab vin ek son seve i ganny son zoli seve long in pennyen byen me sa garson ki li depi ne in ganny son bon mannyer seve, parske son paran in okip son seve byen e letan i al pos letan i vin dan lekol Gouvernman i bezwen raz son latet kler akoz senpleman nou annan en Polisi.

Depi lekol mon bann zanmi depi nesans nou pe lager ek sa zenn la in ariv 16an i fini pos segonder kot nou lager ek li akoz son seve la ler i ganny 16an, pou li mont en scooter nou lager ek li ankor lo son scooter nou dir ek li, non, non, non,  ‘’pa laz scooter ou a esper 18an.’’

Silvouple annou aret lager ek nou zenn.  Annou montre zot bann keksoz pozitiv annou ed zot pou zot epanouir, pou zot fer bann keksoz pozitiv ki nou anvi dan sa pei.  Me parkont Mr Speaker pou mwan fini mon retourn lo mon premye pwen ki mon ti fer resorti – i annan en mank kordinasyon Lapolis, Licensing avek Land Transport. Si tou Lotorite konsernen ti zwe zot rol byen Mr Speaker, nou pa ti pou ganny bann parey Onorab Loizeau in servi sa term bann ‘’donner poum.’’

Tro bokou donner poum dan nou pei ozordi la si nou pe koze la i 10.32 ler Lasanble nou al la kor Melchi  Lari Bazar nou pou war en bann pe debout, pe tonm tousel, Lapolis i zis  lot kote semen, pa ni bezwen transpor, ni en bisiklet ni en scooter pou zot vin la Lari Bazar.

Si nou al kot Regis Mein kot i aranz lor, ou a get kantite dimoun pe asize ozordi la Lapolis i zis lanmenm de pa.  Sa ki mon pe dir Mr Speaker i mank en kordinasyon, ant bann Lotorite konsernen.  E Gouvernman i bezwen annan kouraz, Minis i bezwen annan kouraz avek son bann zofisye, pou zot enplimant bann Lalwa. Sesel i annan plizyer Lalwa, bann bon Lalwa me problenm se enplimantasyon.  Pa bezwen  nou anpli nou fayl avek Lalwa,         Mr Speaker.   Nou bezwen enplimantasyon.  Alor  bann dimoun ki travay dan seksyon enplimantasyon, si zot pa kapab fer sa louvraz, zot bezwen avanse, sed laplas.  Nou a rod bann dimoun ki kapab enplimante, pou nou kapab enplimant Lalwa dan nou pei!

Mr Speaker ler mon a konklir, mon a demann ou en pti leskiz a penn mon pe koz en pe pli for, be pou Lotorite tande!  Se tou ki mon’n fer Mr Speaker.  Mersi bokou.

 

(APPLAUSE)

 

MR SPEAKER

Mersi Onorab Arissol.  Bon mon ganny en kopi sa lamannman mon ava demande ki Clerk osi pou sirkil avek tou Manm, nou a kapab regarde.  E ler nou ariv Staz Komite pou nou konsidere.  Avek sa nou ava pran en break e nou retournen 11er pou kontinyasyon deba lo sa Bill.

 

 

(BREAK)

 

 

MR SPEAKER

Bon nou ava kontiny nou travay deba lo Bill ki Minis in prezante devan nou bomaten.  Mon ava donn laparol Onorab Aglae.

 

HON EGBERT AGLAE

Mersi Mr Speaker.  Bonzour Minis ek ou delegasyon, tou Manm Onorab e tou dimoun a lekout.  Mr Speaker sa Prozedlwa ki la devan nou i fer referans avek en senp sanzman, ki paret en senp sanzman, se pou sanz laz ki en endividi i kapab ganny en license pou li mont en moter.   Se sorti 16an pou vin 18an.

Mr Speaker lamannman i paret senp, me son reperkisyon i enorm.  Mr Speaker parey nou tou nou konnen en moter i en veikil ki pe kalkil li pran 4 larou, kot i annan en masin ki atase avek pou fer li bouz pli vitman e par 2 larou sorry.  E Mr Speaker parey Ameriken i kontan dir en moter i ganny kategorize konman ‘‘a coffin on a wheel’’.

E avek sa Mr Speaker mon krwar i enportan ki sa deba ki nou pran lo sa size, avek sa lamannman ki pou mwan, mon war ki poudir sa lamannman i en shortcut pou en problenm ki swadizan in ganny site avek bann statistik.

Mon dir en shortcut akoz i pa pe neseserman pou adres sa problenm ki nou, nou krwar i egziste atraver bann endividi, nou pe koz bann zenn an partikilye, ki ler zot ganny en license 16an zot konmans mont moter.  Nou fek fer revizyon avek Civil Code ki nou pa ankor fini li menm e nou’n dir poudir en adilt i laz 18an an montan e anba 18an ou en miner.  I pe dir ki a laz 16an konman en miner ou  ankor anba responsabilite en adilt, sa i ou paran, ouswa ou guardian ki fer ki menm si ou pe ganny en lotorizasyon en license ou pou bezwen annan bann sipervizyon neseser ki  ou, ou pe bezwen ganny gete.

Mr Speaker mon konmans koumsa, akoz  mwan mon pa krwar konmsi okenn zenn i deside, swa atraver son paran ouswa li menm li i fer serten sakrifis i met en pti larzan dekote, i aste en moter pou li monte, i rod son license a laz 16an, son lentansyon se pou li al fer en aksidan ouswa koz  aksidan Ii pa zanmen dan lespri en zenn ouswa en endividi.

E nou tou nou konnen poudir risk atase avek bann enclosed vehicle, parey en moter, i pli o pou koz aksidan ouswa pas atraver aksidan ki en veikil ki enclosed ozordi.  E resers in prouve sa Mr Speaker.  Alor pou mwan ler mon pe get sa Lalwa, mon santi poudir nou merit al en pti pe pli profon, dan plas zis sanz de sif pou vin 16an pou vin 18an, nou bezwen analiz en pti pe pli profon ki mannyer nou pe fer sa.

Mr Speaker bokou pei ozordi laplipar ki mon fer resers mon’n gete zot pe donn laz 16an – 18an.  E lamazorite in koz lo 18an. Menm bann gran pei parey Lenn ki li bann pei ki annan plis moter, ki zot servi bokou moter laba, li osi son laz ki zot in mete, i konmans 16an, me selman zot annan bann diferan grad.

Mr Speaker enn bann pei ki  mwan mon’n fer resers parey Lerop, kot zot in entrodwir en sistenm kategori depi laz 16an, zot apel li en mock category kot ou kapab ganny en mock license pou ou operate en motorbike. Apre zot donn ou en one license 17an kot li i ganny restrikte kot ou kapab servi li ziska 125-cc.  E lo la ou ganny ou en L-plate ki ou mars avek, savedir en Learners plate.

E i annan en 3enm kategori kot ou apel li en  A-2 license, kot zot ganny restrikte pou bann motosiklis i kapab servi li pou ou pa operate en motorbike ki par lao 45 horse power zot.   E zot al en pti pe pli devan ankor kot pou ou ganny en full motorbike license kot ou kapab operate bann motosiklis ki son CC kapasite i pli o e son horse power i pli o ziska akoz nou konnen poudir i annan bann moter ozordi ki very powerful 500-cc ziska menm 600 menm ziska 2000-cc e sa ou ganny li a en laz 24an.  E  mwan mon santi poudir dan sa menm laliny  Mr Speaker avek responsabilite ki nou konnen poudir en zenn laz 16an ki ankor en miner, ki ankor anba responsabilite en guardian ouswa son paran nou pa kapab donn li en free license for all, pou operate nenport kalite masin e la nou pe koz motor.

I annan Manm Onorab ki’n fer resorti Mr Speaker in dir license scooter. Nou pa pe get zis scooter la.  Nou pe get plis ki sa.  Scooter i en tip ladan.  Alors Mr Speaker avek sa Lalwa mon santi nou bezwen enkorpor serten eleman ki fer li pa sitan fasil, pou en zenn kan i ganny 16an ale ganny en license scooter pou li monte.

Ler mon dir pa sitan fasil, nou bezwen annan bann prosedir ki ava ganny satisfe a lafen, ki ler sa zenn ouswa sa endividi in vini, in apply son license, i meet.  I pa kapab vini demen bomaten dan lespas, 1 zour 2 zour, in fini ganny son learners i lo semen, san son permisyon i ale ni menm petet konn bann Kod Trafik ki egziste ozordi.  Akoz i annan bann kod modern ki egziste ;- i annan evolisyon, i annan semen, i annan bann sanzman tanzantan ki arive avek nou semen menm Sesel.

Alors Mr Speaker i dan sa laliny ki nou bezwen get sa sityasyon laz, pou mont moter avek en license ki ou pou donnen.  E si nou pa fer sa nou pa fer zistis sa zenn ki pe espere pou li ganny 16an, pou li ganny son license.  Bokou nou, nou pe koz lo responsabilite.  Mon krwar responsabilite i en kle, pou nou kapab elimin bann tandans aksidan ki pe arive avek moter.  E bokou aksidan moter ki arive Mr Speaker, i annan bann diferan rezon. Parfwa i pa par neglizans sa motoris li menm.  Parfwa i bann kondisyon i bann fakter ki arive lo semen menm.  Par egzanp en dimoun si i pa’n ganny train, i pa’n ganny byen oriyantasyon mont moter, parfwa ou war ou – akoz moter byensir Mr Speaker, i leze e ler ou met en masin ki for i ganny plis speed pou li ale.

E ler ou annan plis speed se speed ki pou koz plis aksidan li menm li.  Bokou aksidan i ariv par akoz speed ekse.  I byen ler ou ankor zenn petet ou anvi ale, ou anvi al sa vites, me se lavites.  Akoz en manrmay en zenn depi laz 5an i kapab konmans mont en bisiklet li ok ziska laz 15an i mont son bisiklet byen me si ou pran en bisiklet ou ogmant son speed i konmans vin en danze pou sa enn ki pe monte e se sa ki moter i fer li moter son danze i vin avek speed ek se ki ou fer ler ou lo semen ou kapab zis pe sanz lane bann fakter ki koz aksidan ou sanz lane san gete i kapab ler lo transpor ki pe vini ou fer aksidan.  I annan bann sirkonstans kot nou war petet dan fim, nou war kot en veikil i kapab park en dimoun zis i ouver laport i trouv nou lo en moter, ou tap ladan i ariv en aksidan.

I annan osi lefe lenfliyans e la mon anvi koz lo serten keksoz, mon si nou pou donn license moter nou bezwen annan en ler osi ki sa bann moter i bezwen pe roule lo semen sirtou ki nou war poudir bokou bann aksidan ki pe ariv apre 12minwi 1er 2er bomaten kot la i vin pli fatal.

E sa i relye akoz i annan nou ki al fer nou serten divertisman parkont divertisman nou lanmizman be selman nou ale e nou apre nou le pran en moter parey i annan bann saying dikton ki dir, ‘’Lontan ler ou bwar de moter osi pe bwar de avek ou i osi i sou parey ou.’’

E pou mon sa i bann pwen ki enportan pou nou kapab met devan la ozordi poudir be si nou rod en moter akoz parey Onorab Loizeau in fer resorti, i annan ki pe servi pe al lekol pe al Politeknik be lekol i konmans 8er by 4er i fini si ou pou al library en pti study ekstra nou konpran, me selman by  6er ou sipoze fini ou sipoze antre kot ou lo ou moter.  Be ki ou pe fer 10er diswar 11er diswar 12minwi konman en zenn lo en moter ki apre ou war ou dan bann lensidan.  Sa pou mon Mr Speaker i bezwen ganny reflekte dan bann regilasyon ki nou pou fer sa ki nou bezwen met devan ki ler ki nou konsidere sirtou si ou ankor 16an ou ankor en miner ou anba 18an ki ou pe fer apre sa bann ler 11er 12minwi 1er bomaten lo en moter ankor pe trafike?  Sa i en konsern ki nou bezwen adrese.

Mr Speaker osi nou annan bann lezot motoris ki kapab koz bann danze bann moter ki lo semen.

 

(Off-Mic)

 

MR SPEAKER

En moman Onorab Aglae en moman.  Onorab Larue annou permet en Manm kapab fer son entervansyon ou pe interject ki pe disturb en Manm dan son flow, son largiman.  Onorab Aglae kontinyen.

 

HON EGBERT AGLAE

Mr Speaker mersi i montre poudir i annan nou annan en serten sans, ki nou bezwen vin en pti pe pli matir dan sa Lasanble.  Mr Speaker en lot fakter ankor enportan, se nou bann kondisyon semen ki nou bezwen get en kou ladan osi pou bann moter ki pe pase.  Ozordi ou pran menm en poto 4 larou ou dray, ou war ou bezwen pe say serten lobstak dan semen ; swa i annan trou swa i annan elevasyon dan semen ki pa neseser e nou konnen PUC pe fer serten travay, be mazin ou lo en moter ki pe vini avek serten vites, ou annan  sa bann sel lobstak e nou tou nou konnen poudir en moter  i pa servi  volan – ou pa vir volan, ou bezwen fer en pti  gin devyasyon kabannen.

E par fer sa li menm li, ou met danze ou lekor,  ou kapab met danze bann lezot veikil ki lo larout.  En lot fakter ki nou bezwen konsidere, i kapab koz aksidan se inexperience – mank leksperyans.  Ler ou 16an lo en moter ou kapab servi bisiklet depi laz 5an ou ziska la be leksperyans i enportan pou ou kapab dir mon’n kalib – mon’n kalifye.

E mank leksperyans i fer ki aksidan i kapab arive, akoz tan letan ki annan serten lobstak ki vini, swa ou panik ou pa konnen ki ou pou fer, e la i ariv ou en aksidan.  Se avek sa Mr Speaker, ki nou, nou bezwen pran serten kont sa eleman.  A laz 16an ou ankor en miner, ou napa leksperyans ou napa tantasyon me selman ou anvi aprann ou bezwen aprann se par aprann ki ou pou ganny leksperyans ki mannyer ou pou manev sa veikil ki ou pe anmennen.  Mr Speaker pou bann zenn ki pe akout nou, e ki Lalwa li menm li pa pou retrospective si ou’n deza ganny ou license 16an, mon pa’n tann Minis poudir pe vin aras ou license, mon pa’n tann dir sa, me selman sa ki enportan, se ki ler ou pe mont lo sa moter annou mazin nou lekor premye, annou mazin sa ki pe pyeton, annou mazin bann lezot veikil bann lezot motoris ki lo semen.

E sa Mr Speaker mon pou al kot sa bout kot Lalwa i bezwen ganny aplike.  Mon santi poudir i annan neglizans total dan laplikasyon Lalwa kot i konsern bann motoris.  Menm si nou annan logmantasyon moter ki pe antre dan pei,  mwan souvandfwa mon ganny arete avek Lapolis.  Byen rar mon war en moter pe ganny spot check  – byen rar.

Nou bezwen etablir en sistenm Mr Speaker, malgre en moter li, pa bezwen aret li petet ou bezwen get son patant son lasirans, i napa sa bann zafer sentir sekirite, me selman nou annan helmet ou bezwen gete nou bezwen aret sa bann moter tanzantan, get en kou.  Get son larou, get sa drayver osi ki pe kondwir sa moter.

Akoz moter li menm li i annan son landrwa osi i annan son storage lo sa moter ; parey zot ouver boot door zot get ladan ouver laport deryer gete, me get en kou moter osi.  I bann keksoz enportan ki nou pe dir.  Akoz parfwa nou krwar poudir keksoz pe pas dan loto keksoz pa neseserman dan loto.  Pou nou al dan sa direksyon Mr Speaker,  mwan mon santi poudir unit Lapolis zot annan moter zot osi.  Zot servi moter.  Nou war pe eskort.  Nou war parfwa pe donn trafik ki parfwa zot osi sa bann Lapolis zot en pti e neglizans lo zot moter.   Mwan mon’n war mwan.

So sa responsabilite i bezwen konmans avek nou tou.  E si fodre en pti unit spesyal dan Lapolis ki pou tackle bann zafer moter ki serye ki ler en zenn i vini i pa en keksoz demen bomaten just handover en license avek zot parfwa i annan bann mezir e osi – bann sirveyans ki vreman eksesiv, ki i pou detekte, ki si ou en zenn ou santi ou lo en moter, ou fer en lofans lo ou moter ou penalti i bezwen mars parey sa enn ki pe drive son 4 larou – son 6 larou.

E sa i ava rann en pti pe konsyan man nou bann zenn pou pli konsyan poudir be si mon pe fer en keksoz mal vwala mon penalti mon konnen ler mon pou en miner, mon pa pou kapab ganny kondannen pou al an Montanny Posée laba, me selman Lakour Miner ozordi, kot nou kapab ganny serten kondannasyon.  E sa pa fer ki ou pli o ki Lalwa pou ki sa enn ki par lao 18an.

 

Mr Speaker an terminan mon santi poudir laz ki nou pe sizere, i pa pou fer zistis.  E i pa pou anmenn plis ouswa i pa pou anmenn mwens aksidan.  Annou revwar Onorab in dir i annan serten amannman ki’n ganny propoze e dan Committee Stage nou a debat lo la, ki an sipor bann zenn ki deor, ki anvi ki deza pe mont zot moter e bann ki pe aspire pou zot ganny laz 16an, pou zot mont zot moter, annou nou donn zot en sans.  Annou donn zot en sans ki zot kapab ansanm avek nou pou zot montre, prouve, poudir ler mon anbark lo mon moter mon bezwen vin pli responsab.

Mon bezwen vin pli responsab, akoz mon lavi premye e lavi lezot ki servi menm semen ki mon pe mont lo la.  Annou pa fer zistis pou nou pini serten ki pe fer byen ki pa’n zanmen koz aksidan ; ki pran zot responsabilite ki swiv regilasyon motoris.

E si fodre Mr Speaker, si fodre revwar sa Kod Kondwit ozordi pou bann motosiklis pou bann motoris, annou revwar li.  Petet i ava annan serten lamannman ki ava neseser pou ganny fer ladan pou rann li pli azour, pli safe annou fer li konman en Lasanble, konman en Gouvernman osi ki mon enplore, fer li dan lentere sa bann zenn.  Annou pa fer sa shortcut ki nou pe fer, akoz i pa pou neseserman anpes aksidan arive.  Parey nou dir aksidan pa averti e napa en dimoun ki leve bomaten ki anvi al pas atraver en aksidan, me konman bann motoris annou pran nou responsabilite.

Annou konsyan e nou ava donn zot sipor kot i neseser.  Mersi Mr Speaker.

 

MR SPEAKER

Mersi Onorab.  Onorab William.

 

HON WAVEN WILLIAM

Mersi Mr Speaker.  Mr Speaker de pti mo.  An relasyon avek sa lamannman ki pe ganny anmennen lo sa Bill.  Mon premye lye mon anvi dir ki mon pa siport sa lamannman.  Akoz mon pa krwar poudir lafason i pe ganny fer, i pe ganny fer avek fitir devlopman – devlopman kot nou’n arive e kot nou anvi ale, letan ou pe regard devlopman bann endividi zot menm zot.

E mon krwar pou anmenn sa kalite amannman, san regard dan son totalite bann lezot keksoz ki osi enportan – mon kapab dir pli enportan ki nou merit pe adrese, parey Onorab ki’n fek koze avan mwan, nou pa pe fer zistis avek sa lamannman.  E mon lot pwen ki mon anvi konnen, se ki eski sa lamannman ki’n ganny anmennen san konsiltasyon?  Akoz mon santi poudir i neseser annan bann konsiltasyon.  E  mwan mon pou propoze ki Licensing avek Departman Lapolis, zot bezwen annan en tre pros lyen travay ansanm, dan lafason ki nou administre sa bann Lalwa.

E petet Kod Kondwit parey in ganny dir  i devret pe revwar e mon look forward pou bann lamannman ki pe vini.  E Mr Speaker parey mon dir mon pa pou siport sa lamannman parey i été.  Mersi.

 

MR SPEAKER

Mersi Onorab William.  Onorab Simon Gill.

 

HON SIMON GILL

Bonzour Mr Speaker.  Bonzour tou koleg Onorab.  Bonzour tou Manm piblik ki pe ekout nou.  Mr Speaker mon pa pou long mon osi lo sa Proze de Lwa ki’n vin devan nou Lasanble, me mon swete ki ler Minis i ava fer son summing- up i ava kapab donn nou bann statistik adisyonnel, kwa ki sa dan li menm li i pa neseserman sanz profonder santimantal, laspe emosyonnel sityasyon otour en zenn ki lo en moter – en zenn anba 18an nou pe dir, ki pa en adilt – byensir baze lo nou bann konsiderasyon legal ki nou annan.  E nou tou nou konnen i en zanfan anba 18an ki posed en moter, zeneralman in ganny posesyon sa moter avek en paran, ek en adilt. E mon pe assume tou an konsideran tou fakter, ki sa adilt ki donn sa zenn anba 18an en moter, in asize in get bokou fakter.  E mon prezimen i ariv lo en konklizyon ki i annan en nesesite – en nesesite pou donn sa zenn en moter pou servi, baze lo parey mon dir – lo bann diferan sirkonstans.

Probableman sa paran li menm li kondisyon dan lakour pa permet li anmenn sa zanfan lekol Liniversite Sesel, ou fer lezot deplasman otour bann diferan responsabilite petet menm pe ed en paran desarz serten responsabilite.   Mon konnen i annan sa.   E dan tou nou rezonnman, si en paran in donn en zanfan en moter pou li servi, pou fer son bann bezwen parey mon dir, si en maler i arive sa zanfan i fer aksidan, e en lanmor i arive, mon konnen poudir sa paran sa adilt i soufer. I soufer en kantite menm.

Akoz son lentansyon inisyal, se pa pou en zenn al fer en aksidan, kwa ki pou annan rezon oubyen non.  E ler nou get li lo sa nivo – lo sa premye nivo la, mon krwar nou bezwen tonm dakor ki nou bezwen met lanfaz lo ledikasyon, tou bann drayver sa drayver ki mars dan loto ki annan 4 larou e lo moter – en ledikasyon – prekosyon lo semen.  Ki mannyer nou antretenir nou lo en semen.  Kwa ki se swa kalite masin ki nou pe servi.

Lo lot nivo Mr Speaker napa personn antre nou isi e deor, ki ti ava voudre fer fas avek en lanmor en zanfan, zis akoz en aksidan.  Personn.  E si personn pa ti ava voudre fer fas avek sa sityasyon, ankor enn fwa nou bezwen met lanfaz lo ledikasyon,  ledikasyon, ledikasyon.

Mon krwar sa i enn bann solisyon debaz.  I pli enportan ki tou keksoz, tou konsiderasyon ki nou pou pran.  Lot aspe Mr Speaker i tenm an 2em pwen, nou pe lager pou nou met an mars bann provizyon adisyonnel dan sa lamannman ki devan nou Lasanble ozordi.  E mon’n swiv bann lentervansyon ki’n ganny fer, se annou met bann diferan kategori cc, an relasyon avek sa bann zenn anba 18an ki pou mont en moter.

Me deza dan Lalwa, mon ganny serten ransennyman ki annan en provizyon diskresyonen dan Lalwa deza, parey mannyer i été, i dir Licensing Authority i devret pe travay ansanm avek Lapolis – sa unit ki responsab pou fer sa travay pou donn license, pou al fer tes eksetera.  Akoz provizyon legal ki mannyer i été i deza donn diskresyon, pou donn en zanfan ki anba 18an en license.  Mon repet ankor i annan diskresyon dan Lalwa mannyer i egziste.  Sa i dapre bann konsey, bann advise legal ki nou’n gannyen.  And I stand to be corrected.

E sa avoka osi ki’n donn sa ransennyman si nou dir lekontrer – sa bann dimoun devan e dir lekontrer, then nou a gete ki mannyer nou fer li byen pou nou kapab modifye sa Lalwa, e donn sa diskresyon atraver sinerzi Lapolis e Licensing Authority tout an respektan bann responsabilite ki sakenn i annan pou desarze.

Lo kote sa CC mon krwar i vin en konponan enportan pou nou konsidere.  Me pe enport kwa ki nou amande lo baz diferan CC ki nou donn lotorizasyon or en license en zanfan anba 18an  monte, sa i by elimin aksidan li menm li.  I pa elimin aksidan li.  Akoz i annan bann moman en  aksidan personn pa swete ki en aksidan i arive, me i arive.  So ankor enn fwa mon retourn lo mon orizinal prekosyon ler nou pe dray lo semen ; swa en moter swa en loto, oubyen nenport ki transpor lo semen.

3enm eleman ki mon ti ava voudre nou konsidere, sa 3enm eleman si nou pa pou kapab konsider lentansite bann amannman ki devan nou ozordi la, si nou pou al dan Staz Komite, pou nou kapab fer bann amannman e aprofondir dan sa bann lamannman,  mwan mon pe soumet avek nou Lasanble ki nou donn letan Minis, Lotorite konsernen pou ale pou al re-travay lo sa Prozedlwa,  apre ki zot in fini ekout tou bann pwennvi pour e kont sa lamannman, kot tandans mon krwar ki zot la devan zot war kot tandans pe ale, e annou pran letan ale avek bann konsiltasyon ki nou kapab annan an deor Lasanble atraver Bills Committee, nou kapab fer bann lamannman kot sa Prozedlwa i ava kapab pase san okenn difikilte.

Akoz mon war kot tandans kot direksyon bann lentervansyon ki ganny fer pe ale, e finalman mon pa krwar nou poudir nou pou ganny en vot pozitiv lo sa Prozedlwa.  Mr Speaker parey mon dir mon pa pou al an detay a sa moman la me mon met detrwa premiz, e mon konklizyon se en mo de prekosyon pou nou pa war sa Bill pe ganny shoot down pou nou pa touy li, annou bouze apre ki nou’n ekout tou sa bann soumisyon ki’n ganny fer, annou al fer bann amannman – si nou krwar nou pa pou kapab fini entertain tou sa bann amannman letan nou antre dan Staz Komite.

Bon Mr Speaker avek sa detrwa mo ki mon’n dir, mon soumet avek Minis ek son lekip ki la devan, pou konsider dan en fason pozitiv tou bann lentervansyon ki’n ganny fer e mon swete ki nou kapab bouz devan.  Mersi bokou Mr Speaker.

 

MR SPEAKER

Mersi Onorab Simon Gill.  Mon ava donn laparol avek Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker zis avan mon konmans mon lentervansyon mon ti ava kontan demann Minis si i annan sa statistik avek li lo konbyen zanfan ant 16 a 18an ki annan en license moter ozordi?  Mersi.

 

MR SPEAKER

Mersi Onorab.  Minis lenformasyon si ou annan.  Mon konpran Onorab Pillay me zis pou unable  the debateGo ahead Minis.

 

MINISTER PAMELA CHARLETTE

Mersi Mr Speaker.  Lenformasyon ki nou gannyen sorti kot Seychelles Licensing Authority pou 17an aktif la i annan 13.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker efektivman i annan 1707 moter ki anrezistre Sesel kwa ki zot license i valid ou ekspire e i annan 13 dimoun dan sa kategori ki annan en license.  Eski vreman nou serye pou anmenn en Lalwa pou fer laz ogmante, kan i annan 13 dimoun ki annan en license dan en license moter?

Mr Speaker mon aktyelman krwar ki poudir letan Cabinet in zwenn pou zot diskit lo la zot pan regard bann statistik. Cabinet in plito regard sa size moter dan en fason emosyonnel.  Parske si zot ti regard li dan en fason rezonnab, lozik zot ti pou tonm lo en lot konklizyon.

E mwan Mr Speaker mon pa aksepte letan nou sanz en Lalwa zis akoz lemosyon.  Zis akoz i annan de dimoun trwa dimoun detrwa pti men parey nou dir lo moter nou vini nou dir fodre ki laz i sanze.  Akoz Mr Speaker bann statistik si zot ti pe vreman pran zot letan pou zot regard bann statistik e Minis in donn en pe bann statistik bomaten, nou ti pou war ki poudir, sa size ki nou pe koz lo la, depi bomaten i aktyelman mwan mon pou dekrir li konman en gaspiyaz letan.

I en gaspiyaz letan, akoz dan sa pei i annan bokou lezot keksoz bokou pli serye ki nou bezwen adrese.  E Mr Speaker par egzanp olye ki nou al rod zis seksyon 12 dan sa Road Transport Act, mwan mon krwar ti pou fer bokou plis sans si Lotorite konsernen ti ava regard Road Transport Act  an antye.

Akoz ladan i annan en kantite keksoz ki bezwen sanze e non pa zis laz pou kapab mont en moter.  Mr Speaker  mwan pou mwan sa Bill i fatig mwan en kantite, akoz parey mon’n dir nou annan bokou lezot keksoz bokou pli enportan, bokou pli serye pou nou adrese dan sa pei.

E an menm tan osi sa ki mon’n osi trouve atraver sa Bill, e Onorab Arissol in fer sa dan en fason byen – Onorab Loizeau osi tou in met bann pwen valab, Onorab Woodcock li osi tou e son pwen konsernan 2 zanfan i fer dezord dan laklas e laklas antye i ganny met lo detention. I ganny prouve par lefe ki efektivman i annan zis 13 manrmay anba 18an ki annan en license moter.

E Mr Speaker mwan pou mwan, mon war sa ki nou pe pas ladan la, i vreman pa serye.  Akoz i pa serye akoz i annan en kantite lezot areas ki konmsi ou a krwar nou pran lo latet nou met dan disab.  Mr Speaker annou regard bann lezot license – Mr Eddy Westergreen ti ganny li son license pilot a laz 16an Lanmerik.  Ozordi eski i annan en license pou drive en jetski?  En jetski ki son kapasite li?  Zot in fek anmenn en S.I e mon krwar seryezman e mon dir sa avek PS e avek Minis, ki poudir fodre ki sa Departman zot vin bokou pli serye.

Mr Speaker S.I 49. 2019 date le 26 Out 2019, ti vini ti dir, ki en bisiklet elektrik lo La Digue in kapab ganny servi si son moter i mwens ki 300watt.  Eski ti dir nou ke laz ou pou mont en bisiklet avek en moter?  Eski i annan okenn keksoz ant en bisiklet avek en moter 300watt, eski nou kapab realize ki lavites i kapab ale spesyalman dan desant?

Mr Speaker mon pe dir sa se parski zot koz par bann pti bout.  En bout isi i pa zwenn avek lot bout.  Letan nou a pe dir ki en zenn ki annan 16an ki annan 17an, ki anba 18an pa pou kapab mont en scooter be Mr Speaker parey en Manm in dir pli avan, be en manrmay La Digue,  en manrmay 4an i mont en bisiklet.  Kote i mont sa bisiklet? I mont sa bisiklet lo grannrout! I al lekol lo son bisiklet.

En zanfan 6an an montan, i ale lo son bisiklet. Mon war bann touris letan zot vini avek zot zanfan zot pe mont bisiklet, e lekel ki pas obor zot – pickup – gro pickup, gro transpor ensidswit.  Savedir Mr Speaker, ou konnen nou bezwen serye nou.  E letan mon pe dir nou bezwen serye nou, nou bezwen regard keksoz dan en plan normal.  En konparezon, ti annan en fwa mon tande ki pou ou mont en bisiklet ou bezwen met helmet – ou bezwen annan bann protective gear, selman apre i vin en egzanpsyon, egzanpsyon pou bann dimoun La Digue.

Mon napa problenm avek dimoun La Digue mwan! Mwan problenm se avek zot Lalwa.  Be dimoun La Digue si i tonbe i pa pou tap son latet li?  I pa bezwen protective gear li?  Si ou a pe dir protective gear parske La Digue i annan tou kalite transpor ki annan lo Mahe e alor lo Praslin tou i menm parey.

Mr Speaker sa ki mon pe fer resorti, se ki sa morso Lalwa ki nou pe vin anmennen ozordi, parey mon’n pe dir avan i senpleman en gaspiyaz letan.  E annou pa blanm moter.  Annou pa zis blanm moter.  Mr Speaker  mwan mon’n eksperyans lanmor bann zenn mwan.  E i annan en zenn an partikilye, parske mon byen avek son manman avek son papa, e sa se Urna avek Georges letan zot garson Reese ti ganny touye sa zour swar.  Reese ti en zenn ki ti annan plis ki 18an, me i ti en zenn ki ti serye, ki ti konsyansye  i pa ti sou.  I ti en zenn ki ti a pe mont son moter dan en fason responsab, me se en drayver ki ti sou ki ti vin tap li – ki ti touy li.  Alors annou mazin osi parey Onorab Arissol in byen dir, annou mazinen ki poudir i annan bann zenn ki responsab e ki pran zot responsabilite.

E Mr Speaker mwan  mon annan en garson ki kontan moter – Onorab De Commarmond i konn byen, e rezon in mont son moter en fason konsyansye, i pa pou tous lalkol letan i tous son moter, parski i en manrmay konsyansye, me selman mon ava dir ou Mr Speaker  mwan avek bokou retisans parske lazenes sa, mon’n pous li e ziska ozordi letan nou koz size moter, nou annan nou rezerv, mon’n pous li mon dir avek li mon frer, mon garson vann sa moter!  Aret mont moter!

Akoz mon dir li sa pa akoz i en bon moter – i mont byen moter, me se parske pa akoz i mont byen moter ki i pou perdi son lavi, oubyen i pou ganny en aksidan se parske en lot ki neglizan ki pou vin tap li.  E letan ou regard – ti pou enteresan – letan nou regard bann statistik lo la kantite aksidan moter, ti pou enteresan ganny sif bann moter ki ti annan tor e bann moter ki ti napa tor.

E Mr Speaker mon met mon larzan ater, mazorite se pa bann dimoun ki mont moter ki ti annan tor, se sa lot ki’n tap avek son moter ki’n annan tor.  Alor Mr Speaker mon a pe dir fodre ki nou serye! E letan nou pe regard Lalwa li menm, annou regarde ki mannyer nou kapab balans tou keksoz.  Parske Mr Speaker, sa zafer, ‘’Transpor lo Later’’ la i en dezord koumsa menm.

Mon kapab dir en keksoz ankor – ok club car.  Club car ti en veikil ki ordinerman ou servi lo golf course en landrwa prive, apre sa nou’n osi trouv club car dan bann lotel ki transport touris, sorti Resepsyon pou al laba, ensidswit.  Nou’n war bokou club car Eden Island osi tou.

Be club car Road Transport in anmenn club car lo semen.  Be ti ava kontan konnen ki license ou bezwen pou ou drive en club car?  Ki license ou bezwen pou ou drive en club car?  E pourtan club car i lo grannrout La Digue.  Mr Speaker tousala mon pe dir ki montre bann konfizyon.

E Road Transport Act i bezwen ganny revize pou li kapab fer fas avek realite ozordi.  I bezwen vin en Lalwa ki modern.   E problenm  se ki letan i ariv sa bann sityasyon, nou zis blanm Lapolis.  E  mwan mon pa kontan zis blanm Lapolis, parske souvandfwa zot parey Onorab Arissol, in dir i annan en mank kordinasyon e aprezan letan i annan sa mank kordinasyon zis Lapolis ki ganny blanmen.

E sa pou mwan i pa normal, parske menm parey Onorab Adelaide tanzantan i koz lo la, sa pti bout tint anler lo vit 6 sepa 4 pous ki Lapolis i a touy ou, si ou annan sa pti bout tint. Selman lot kote i annan loto, nou tou nou konnen ki poudir i annan loto ozordi ki vini zot deza annan sa tint dan zot vit.  Be si loto modern ki vini i deza annan sa tint dan son vit, e aprezan en dimoun i annan rezon akoz i annan, se parske pou li blok ou, blok soley ensidswit konman en sun shield, me selman si ou vini ou met en pti bout, Lapolis i a dir ou not to use ou ava ganny tou sa bann problenm.

I annan tro bokou sa bann konfizyon.  E Mr Speaker pou sa bann konfizyon e sa Lalwa ki vini li, i aport plis konfizyon ankor.  Nou bezwen realize Mr Speaker, ki poudir letan ou annan ou 16an – 16an i annan de kategori zenn, i annan en kategori zenn ki serye.  Sa fiy ki ti vin adres nou dan sa Lasanble, sepa si i ti annan 16an – i ti annan 15an mon krwar.

Nou’n fek war en zenn fiy adres Nasyon Ini Malala sa fiy Pakistane, osi tou i ti napa sa laz.  Alors menm Sesel i annan serten bann zenn, letan ou regard bann public debates ensidswit, zot vini zot koz dan en fason bokou pli entelizan ki en adilt.  E Onorab Pillay ou pou dakor avek mon konman en ansenyan ki poudir ou annan bann zenn ki vreman mature pou zot laz, me lo lot kote ou annan bann zenn ki bokou an aryer pou zot laz.

Alor nou, nou pa kapab met tou dan en sak, dan en goni e zet zot tou dan menm kannal.  Non.  Parske  mwan mon war bokou bann zenn, spesyalman bann zenn ki’n al ki dan bomaten parfwa, ou war zot pe al dan Politeknik.  E i annan bokou bann fiy – i annan bann fiy ki mon’n osi rankontre  lo zot pti scooter zot pe al lekol.

Be eski alor nou nek zis nou vini nou pas en Lalwa, ki poudir si ou annan 16an soz – senpleman – senpleman akoz i annan – la nou bezwen aksepte, akoz i annan drog ki pe ganny transporte lo scooter.  Akoz scooter ozordi in vin enn bann mwayen ki pli ganny servi pou transport drog sorti point A pou al point B?

E  mwan mon’n war sa bann zenn.  En fwa dan simityer, mon trouv en scooter i mont la kot – i  pe pas la sorti kot Chennard Estate i koup atraver simityer i tonm anler Belvedere.  Be Mr Speaker ou konnen ki keksoz enteresan, sa bann dimoun ki pe fer sa zot par lao 18an, zot par lao 18an.

E alor i bezwen annan en lot fason pou nou tackle sa.  Annou pa pini sa zenn ki ant 16an avek 18an senpleman, akoz i annan bann zenn ki par lao 18an, ki pe fer trafik drog lo moter konman bann kouryer.  Byensir parey in ganny mansyonnen pli boner,  mwan mon’n deza lo roundabout Plaisance, mon pe ale, drwat apre pou mwan koupe, mon war en pti scooter pase 3 zenn lo la ! Napa enn ki ti annan en helmet lo zot latet.

E zot pe ale, zot pe sote, zot pe enjoy, zot JBL pe zwe for ensidswit, zot pe enjoy.  Me eski akoz i annan sa 3 zenn ki fer sa, ki nou pini bann lezot ki pran en latitid serye?  E parey nou pe dir e mon ganny lenformasyon konkret, Lapolis pandan sa bann semenn ki’n fek pase la, in annan 3 aksidan ki’n arive e tou le 3 aksidan sa bann zenn ti napa en license.  Se sa bann kalite keksoz ki nou bezwen.

E mwan pou mwan Mr Speaker letan mon regard sa Lalwa, e se pou sa rezon ki mon kontan ki sa lamannman ki mon pe propoze in ganny sirkile, e mon mazinen nou ava pran li pandan Committee Stage parske  mwan mon pa dakor avek sa ki Onorab Gill in dir, retourn ek sa Bill  pour zot parske, mwan  mon krwar poudir sa Bill nou deal avek li, nou fini avek li e nou kapab bouze lo la avek bann lamannman apropriye.

Mr Speaker sa Lalwa i en Lalwa ki’n ganny mal reflesir.  I en Lalwa ki pa’n regard statistik.  I en Lalwa ki pa regard realite, e i en Lalwa ki pa pou sanz absoliman nanryen.   Mwan mon Mr Speaker sa ki mon dakor ki nou devret fer sa se absoliman parey i annan diferan kategori letan – ou kapab annan license No.2 – license No.2 i permet ou pou drive en transpor, ki annan en serten groser – en loto ensidswit.

Be si ou anvi drive en pickup 4tonn ou bezwen pas en lot tes, la aprezan ou ava ganny en license No.4 si ou anvi drive en bis Tata ou ava pas en lot tes, parske i ava pran an konsiderasyon, ki poudir grander sa veikil son kapasite and everything i diferan.

Alor mwan se pou sa rezon, mwan mon krwar i bezwen senpleman annan zis 2 kategori –  sa bann zafer moter.  En kategori pou mwens ki 125cc, pou ki bann manrmay ant 16an a 18an zot kapab mont en moter, ki mwens ki 125-cc e apre sa par lao 125-cc pou bann ki 18an e plis, pou zot ava pas zot tes zot osi e zot ava kapab mont sa moter.

Mr Speaker avek sa de parol, mon osi demande ki – mon ava demann Minis lefe ki i la, ki poudir regard the whole Road Transport Act pou nou kapab enkli bann keksoz modern.  E an plis ki sa Sesel nou bezwen al dan sa direksyon.  Nou pa pou kapab kontinyen annan Gard dan once in a blue moon – once in a blue moon pou nou annan gard lo highway avek en lekipman ki pou tyek ou lavites.   In ler pou nou sorti lo sa kalite sistenm, pou nou enstal speed cameras ki la 24 lo 24.  Sa i en keksoz ki nou bezwen bouz ladan, bann sleeping policemen parey nou apel zot.  Nou bezwen kapab annan bann cameras ki efektiv.

En lot pwen ankor ki’n ganny fer resorti.  E Mr Speaker mon kapab dir avek ou ki poudir ozordi i annan en gro problenm ek sa bann zafer cameras.  Mazorite sa bann cameras pa marse.  E an plis ki sa, an plis ki sa, e sa i en keksoz ki Lasanble Nasyonal pou bezwen a en serten moman regard byen ladan, ki relasyon sa msye ki enstal sa bann cameras parey nou’n konnen poudir in tonm anba la sa nou senpatiz avek li me son garson in vini i ti napa ni GOP en pti kou in fini ganny tou bann zafer.

E ki mannyer  mwan mon ganny en konpran lenformasyon lo sa bann cameras sa msye ki kontrole.  E i menm annan camera Lapolis ki pe ganny servi pou fer bann Kontra prive.  Annou regarde kot sa bann cameras i été.   Mwan mon konnen ki poudir i annan en camera  – en camera Lapolis ki sipoze pou Lapolis, ki lo Children’s Playground ki pe vey en bato pou en dimoun prive.  E ki an plis ki sa, tou sa bann soz se laplipar direk lo sa camera pou al Lapolis sa msye ki kontrole, i bezwen al kot li avan apre-  So mon krwar ki nou bezwen bouze.  Nou bezwen bouze e nou bezwen al dan en fason serye.

Alor Mr Speaker, nou bezwen fer konfyans nou zenn. E nou konman paran – nou konman paran nou bezwen pran nou responsabilite.  Onorab Afif in koz lo responsabilite.  Responsabilite pou letan i ti pe donn son garson en moter.  Mr Speaker mwan osi tou mon’n koz lo sa responsabilite, akoz parey Onorab Valmont mwan osi mon annan No.1 mon osi mon annan license No.1.  E mon ti mont moter letan ti napa sa kantite trafik, apre sa mon tola tola mon’n met li laba trankil.

E mon konnen ki plezir, ki gou i annan pou mont moter.  Mr Speaker ant en 225 avek en 250 – demaraz en 250 Mr Speaker  – ohh i gou!  Pa kapab bare demaraz en 250.  Ou overtake tou.  Konpar en demaraz en 250 konpare avek en loto, pa kapab konpare !  The adrenaline ki flow i ekstraordiner.  Son en moter i anmenn en leksitasyon dan li menm.  Me selman nou bezwen konman paran koz avek nou zenn.

Nou bezwen kapab ed zot pou zot pran zot responsabilite.  E alor  mwan mon war ki paran i annan en responsabilite, sa zenn osi tou i annan en responsabilite, me pa koz zis lo moter.   Mwan mon krwar sa responsabilite nou bezwen ozordi kot i été, pou nou koz lo tou drayver – tou drayver dan sa pei, parske souvandfwa en dimoun ki a pe mont en bisiklet ;  en dimoun ki lo en moter, sa dimoun ki dan en transpor 4 larou i tant pou sey pran priyorite lo semen, kan ofet nou tou nou devret annan menm priyorite.  Avek sa de parol Mr Speaker, mon espere ki nou ava kapab dispose of sa Bill e avek bann lamannman nou ava kapab al dan en bon direksyon.  Mersi bokou Mr Speaker.

 

MR SPEAKER

Mersi Onorab.  Mon krwar reaksyon Onorab Valmont i montre nou sa ki ou pe dir the thrill of riding en 250!  Onorab Valmont i dir nou in deza mont moter li osi tou i konnen ki savedir sa.  Bon mon annan  1 entervenan pou donn son reaksyon, si ou pou long nou ava fer li apre midi e plito osi tou an menm tan lapel bann Manm in fer petet sans osi Minis pou pandan dan lunch break pou vwar en pti pe direksyon kot deba pe ale e a donn en pti pe letan pou Minis konsidere dan ki direksyon e sirtou sa amannman osi tou bezwen kapab regarde sa amannman.

E la osi mon ava profite pou demann Chair Bills Committee mon konnen ki Bills Committee i war li konman en senp amannman ki Minis pe anmenn devan nou, se sa ki pa en rapor me Chair Bills i kapab regard sa amannman ki’n ganny sirkile e ki kapab donn en fer en konklizyon, fer en komanter lo la apre midi ler nou tournen.

Ok?  Oubyen  si oule dir keksoz la?  Ou war sa amannman propoze ?  Onorab Georges.

 

HON BERNARD GEORGES

Mersi Mr Speaker.  Mr Speaker malerezman ni mwan ni Deputy Chair Bills Committee pou la apre midi akoz nou annan en lot langazman elsewhere, se sa ki’n gard nou bomaten.  Me nou’n war lamannman e depandan lo sa ki Lasanble i ava deside, set en lamannman ki reponn a legzizans sa pti git keksoz ki mon tande.  Me nou ava revwar sa dan sa break la avek Minis.

 

MR SPEAKER

Dakor Onorab Georges.  Bon zis mon annan en pti housekeeping announcement pou mwan fer.  Komite FPAC pe rankontre dan Committee Room 3  – 1er.  So tou Manm dan Committee Room 3 – 1er.  Avek sa nou ava pran break e nou ava retournen 2er.

 

 

(BREAK)

 

MR SPEAKER

Bonn apre midi tou Manm Onorab. Bonn apre midi Minis avek ou lekip.  E bonn apre midi tou dimoun ki a lekout e pe kontinyen swiv travay Lasanble Nasyonal.

Bon zis avan mon donn laparol Onorab De Commarmond pour nou kontinyen, Mon zis anvi partaz en pti keksoz ki mon’n gannyen se ki, swivan en komanter ki Onorab Ramkalawan in fer dan son entervansyon. Sa case ki involve lanmor  Reese i still in court. Wi e mon annan en dimoun ki’n call mwan ki zizman i kapab pe ganny donnen demen.  Zis pour nou evite pour nou pa antre dan en keksoz ki ankor subjudice. Mon krwar ou’n zis fer en mansyon. Yes Onorab.

 

HON WAVEL RAMKALAWAN

Mr Speaker, mwan mon pa’n antre subjudice. Mon’n senpleman dir in annan en aksidan, which is soz, nothing to do with what is happening in court.  It’s en realite.

 

MR SPEAKER

Wi, Dakor se sa. Zis mon’n- An vi ki mon’n ganny en phone call pandan lunch break. Zis mon anvi met devan latansyon bann Manm Lasanble.

Bon avek sa nou ava kontinyen lo deba sa amannman ki devan nou.  E dernyen pour pran laparol se Onorab De Commarmond.

 

HON CHARLES DE COMMARMOND

Mersi Mr Speaker. Bonn apre midi Mr Speaker, bonn apremidi Minis ek ou delegasyon, tou Manm Onorab e tou dimoun ki a lekout.

Mr Speaker mon note ki en bon pe keksoz in dir depi bomaten lo sa Prozedlwa, menm ki en pti Prozedlwa. Me i konsern en gran group dimoun sa.  I konsern bokou bann zenn sirtou.  Me osi bann dimoun ki kapab, mon kapab dir – par lao 16an menm par lao 18an. So i konsern bokou dimoun. Ou vwar sa kestyon moter, set avek problenm trafik ki nou’n annan en kontinyen annan e pour bann rezon ekonomik, pou bann plizyer lezot rezon, bokou bann zenn sirtou bann ki’n komans travay, bann ki lekol fiy koman garson, in opte osi pour zot kapab rod en moter, aste en moter, pour fasilit zot akse pour zot ariv dan lekol, dan travay a ler. Akoz in annan bann disiplin ki zot in grandi avek ki zot bezwen osi egzerse.  E i fasilit dan zot lantour bann roulman ki zot fer.

Me nou’n note osi ki an mazorite letan se bann paran ki osi aste en moter ouswa kontribye pour donn en zenn en moter.  E mon asire mwan tou paran ki fer sa, i fer li an bonnfwa e i fer li avek responsabilite e zot koze ek zot bann zenn. Zot koze ek zot bann zanfan ki zot siporte an donan en moter. E an menm tan nou bezwen dir ki annan responsabilite ki al avek sa.  Sa osi in ganny note.  E nou ler mon koz responsabilite nou osi nou Lasanble le fe ki sa Prozedlwa i devan nou, nou osi annan responsabilite pour nou met devan nou letan nou pe pran en desizyon vizavi sa Prozedlwa. E se sa rezon ki mon pou partaz santiman ki mazorite bann dimoun dan ki’n entervenir lo sa Prozedlwa dan Lasanble, zot lentervansyon mon pour osi al dan menm direksyon, e siport sa lentervansyon.

Vedir ki nou pe dir ki nou note konsern en sityasyon konsernan laz ki pe koz, ki sa Prozedlwa i adrese me nou, nou pe dir ki pa zis laz ki nou bezwen gete. E nou pa krwar pour dir laz ki vreman en problenm. E letan bomaten mon’n ekout Minis ler in prezant bann statistik, mon vwar pour dir sa bann statistik ki’n ganny met devan, i pa ase. I pa ase for.  I pa ase si oule dir, i pa reprezant le vre sityasyon. Par egzanp letan dir i annan 85 aksidan lo moter ki’n arive an 2019, enn fatal ladan, e mon pe rode mon dir be konbyen dan sa bann aksidan ki involve zanfan or zenn ant 16an a 18an? Konbyen ki involve bann ki’n fek ganny en license?  Konbyen ki involve bann zenn ki nou pe koze 16an a 18an ki an tor dan sa aksidan? Konbyen parmi sa bann aksidan ki sa moter li menm ti napa en road license? Konbyen ti napa en lasirans apropriye?  Konbyen ki sa zenn ki’n ariv aksidan ki’n fer aksidan, li menm li i napa en license moter? Tou sa i bann kestyon ki nou poze, e ki mon krwar mwan bann statistik ki’n ganny donnen, i pa’n ase pour kapab vin eksplisit – ase eksplisit pour kapab fer nou konpran vre kote vre problenm i ete.

Par egzanp nou vwar poudir bann aksidan ki arive, konbyen fwa ki sa bann dimoun kil o moter ouswa ki’n involve ki zot ki annan tor?  Sa i en konsern. E nou’n vwar lakantite license ki’n ganny donnen vizavi lakantite moter ki annan, ki annan license.  Tousala i bann kestyon si oule ki bann statistik ankor, ki mon santi ki pase.  Me selman nou tou nou’n note pour dir wi, i annan an menm tan en konsern.

En konsern dan lesans ki nou pa ti a kontan war ki zenn ki tro zenn i pe anmenn bann moter ki tro gro moter osi.  E ki kapab annan bann risk ki lasosyete li i bezwen regard  en pe pli pres sa bann risk. Mon krwar sa ki nou pe gauge, nou Lasanble pe mezire, e ki mon krwar sa i lentansyon pozitiv Gouvernman atraver Minis ek son bann zofisye in oule anmenn devan nou Lasanble pour vwar koman nou kapab war en middle grounds,  si oule, koman nou kapab vwar en fason kot nou kapab pli byen adres en issue, ki nou panse i annan en issue devan nou.

Alor se la kot bann propozisyon in komans ganny koze e dan break nou’n al pli lwen nou’n vwar koman nou merit pa vin dan lekstremite ; pa vin dan en fason radikal, pour zis sanz sa laz sorti 16an pour vin 18an.

Me nou’n dir olye fer sa annou fer li avek osi, annou get osi si oule CC sa bann moter.  Gete son groser moter son kapasite, vizavi laz, responsabilite e an menm tan son license ki ou bezwen pour kapab, pour ki konmsi en zenn letan i ariv 18an pour li ganny en license pour en pli gro moter, me ler i annan 16 an i kapab mont bann pti moter.  Bann ki son CC i en pti pe pli anba. Par egzanp ou kapab dir akoz letan nou’n koze nou vwar pour dir ziska 50-cc ou pa bezwen license. I ok. Mon krwar i dir sa i pti, pti si mon pa tronpe. Ou bezwen still annan en license ?

Be savedir olye dir 50-cc nou dir anmenn li eskan kekfwa 100-cc.  Sa enn pour 16an, 100-cc i ava ale ziska 18 an. Ler ou ariv, 16an ou pa kapab ganny license pour par lao 100-cc. En legzanp.  Ou konpran?

E prezan pour ou ganny par lao 100-cc  fodre ou annan 18 an la ou ava pas en lot tes pour ou ganny en lot license. Konmsi nou pe esey sizer sa dan bann amannman ki ava vini taler, letan nou ava al dan Committee Stage, pour nou pa touy sa Bill net.  Alor nou ava donn sa Bill sa sipor dan sa fason si Minis i dakor.  E mon krwar mwan i ava fer sans.

Me selman la osi ler nou pe koz lo sa sityasyon laz pour ganny license pour mont moter, nou pe osi lans lapel avek bann dimoun  ki pour servi – bann zenn sirtou, ki pour servi sa bann moter.  Ki letan ou ganny en license ou pran li avek responsabilite, avek seryete – en fason ki ou fer keksoz dapre norm, ki Lalwa i demande.

E an menm tan nou demande osi poudir, me mon krwar sa lapel pour ki Minister transpor i regard Lalwa dan son totalite ; i revwar Lalwa Trafik, Lalwa  Road Transport Act, konmsi ki sa revizyon i ganny fer dan en fason pa par peacemeal, be dan en fason pli gran.  Ki tou bann konsern i ganny anmenn devan, ki nou kapab regard sa kestyon transpor lo semen, dan en fason sirtou la ki en kantite semen pe ganny improve.

Mon war sorti 2 lane pe vin sorti – en monte en desann pe vin 2 monte/desann – 2 lane. I annan en kantite amelyorasyon.  Roundabout isi, roundabout laba ki pe ede improve trafik an menm tan. Mon war i annan en kantite pozitivite, en kantite keksoz ki byen. Me an menm tan i  enportan nou update nou Lalwa, e petet annou pa tarde pour fer sa, pour nou kapab improve sirkilasyon lo semen; improve responsabilite bann dimoun ki servi semen.

E la nou lans lapel i pa zis sa bann moter i tou lezot dimoun, tou lezot veikil ki servi semen. Parfwa bann problenm i arive lo semen pa akoz moter, neseserman zis moter.  Pa akoz neseserman zis moter. Be i annan lezot kalite veikil, bann gro veikil ki al dousman, pran tou semen. Serten drayver ki pa dray apropriyeman, i pran dan milye semen i al dousman.  Tou sa bann keksoz ki koz problenm trafik, problenm aksidan.

E so mon le lans mesaz ki i pa zis moter. Alor annou pa tir lizye zis lo moter. Mon krwar an menm tan nou pe dir selman bann paran koz ek zot zanfan. Annan sa disiplin. Bann zanfan osi, bann zenn annan sa disiplin pour zot menm,  pour vwar kote ki i annan keksoz ki merit pa fer. Alor pour kapab redwir bann risk, redwir bann aksidan ki pa neseser.  E nou’n vwar dan bann aksidan ki’n arive, mon pansan ki pour nonmen parey ou’n dir la, me nou’n vwar i annan bann ka kot dimoun kot sa zenn li menm li i napa license. Sa moter napa license. So kote ou ti soz la?  Ou tir laliny?

Problenm pa laz neseserman. So vwala, avek nou pe dir ki nou devret revwar sa sityasyon dan en fason pli pozitiv, pour ki bann zenn i pa ganny afekte zis akoz la nou oule met tir sa laz 16an, met li 18an.  Akoz aktyelman Lalwa ki mannyer i ete la, Lalwa i annan diskresyon. Lotorite i kapab fer gran diskresyon. E mon krwar si ou’n nonm taler ki napa license ki’n ganny donnen, se zisteman akoz aktyelman Lalwa – Lotorite in pran disreksyon. Mon krwar Road Transport avek Transport Commissioner savedir avek Licensing zot pa’n donn license. Sanmenm sa napa bokou osi. Preski 1an dapre mon aprann zot pa’n donn license, zot in servi zot diskresyon  – pa’n donn license manrmay 16an.

So nou pe dir revwar tousala pa bezwen al dan sa direksyon me nou annou get manrmay 16an a 18an koman en kategori avek zot groser moter ki ava al avek zot.  E leres moter avek pli gro CC i ava al avek dimoun ki i annan en pe plis laz ek en pe plis responsabilite.

E zot in ganny en pe training akoz zot in deza mont moter pour 2an, aprezan zot a kapab mont sa ki pli gro, kekfwa la nou santi keksoz i ava al dan en pli bon direksyon.  Apre nou lans lapel osi pou bann pa tou – i annan serten dimoun ki fer sa neglizans lo semen.  Wi – ki fer en nespes zigzag ; ki overtake nenport ki kote, nou demande, nou lans en lapel ki i annan improvement dan la fason ki nou servi semen piblik, larout piblik.

Avek sa Mr Speaker, nou tonm dakor alor ki nou pour al dan Committee Stage, nou pour amann Bill ki mannyer i été, pour nou kapab ganny enn ki reprezant sa ki nou’n diskite e lanvi e lentere nou Lasanble Nasyonal. Koumsa mon krwar ki Minis i ava tonm dakor ek nou, e si i tonm dakor then nou ava war sa way out.  E nou kapab fer pase sa Prozedlwa kantmenm i pti, pti mon krwar son lanpler i ase gro, akoz nou annan en kantite zenn dan nou pei. Mersi bokou Mr Speaker.

 

MR SPEAKER

Mersi  Onorab De Commarmond.

Bon mon ava donn Minis laparol pour li donn son repons.  Minister.

 

MINISTER PAMELA CHARLETTE

Mersi Mr Speaker.  Mr Speaker mon ti a kontan remersye tou Onorab ki zot dan zot lentervansyon depi bomaten. Nou’n pran byen konsiderasyon zot bann kontribisyon, e i annan bann pwen tre valab ki’n ganny sorti. Zis pour mwan fer rapel mon krwar se nou lobzektif se ki pour fer en pti pe annan plis responsabilite lo semen.

E pour nou sa amannman ki nou’n anmennen, ki nou ti krwar i en pti amannman, me son lenpak osi i gran. I pa zis en lamannman ki nou ti pour anmenn devan.  I konpri bokou bann lezot parey bann lezot Onorab in dir bann lezot fason osi pour nou kapab met en kontrol sirtou lo motorcycling e ki mannyer dimoun i servi li.

Bann lezot fason ki nou ti pe konsidere ki pe ganny konsidere bann par egzanp bann nouvo prosedir pour adopte ler pour fer bann tes teori oubyen pratik.  E nou war poudir nou bezwen bann test ki en pti pe pli vigoureux. E osi ki ler en zenn oubyen dimoun i fini pas en tes, i vreman kalib pour li al lo semen.

Kategori license ti enn bann topik, oubyen enn bann eleman ki nou ti pour tous lo la.  E nou ti pour annan diferan kategori scooter motorcycle,  motorcycle e motorcycle ti pour annan diferan osi kategori masin ki ti pour al avek en license.  Bann standar, standar pour par egzanp pour helmet, standar lekipman e li menm li sa bann kalite motorcycle ki pe antre dan pei. Bann lezot accessories ; par egzanp bann reflective vest, ki osi nou ti pe war i enportan pour bann dimoun sirtou, ki servi motorcycle espesyalman aswar.  Osi fer sir ki sa bann helmet i parey mon’n dir i lo standar.

So se ti annan tout en seri lezot bann prosedir, oubyen bann lezot bann metod ou prekosyon ki nou ti pour met an plas, me pa zis sa Lalwa.

Mr Speaker nou annan en Safety Advisory Committee ki konstitye tou bann partner e sa i lapolis, i SLTA li menm, Seychelles Licensing Authority e  tou sa bann stakeholders  se zot ki advice Minister lo ki bann prekosyon oubyen bann safety mezir ki nou kapab pran.  E sanzman lo laz ti enn, en keksoz ki zot ti met devan Minister oubyen Lotorite pour konsidere. E apre osi tou nou’n war parey mon’n dir dan lepase bokou aksidan in arive e dapre statistik ki nou annan 85 in plis ki double pour sa lannen.  E nou war pour dir nou bezwen lo sa Komite met en pti pe plis lanfaz lo safety e osi lo ledikasyon.

Sa lannen Safety Week ti dedye lo motorcycle – motorbike e ledikasyon ti focus lo ki mannyer nou mont en motorbike ; ki bann safety prosedir oubyen ki bann safety accessories ki available lo market. Sa i en keksoz ki nou’n fer sa lannen e ki nou a kontinyen.

Lo Road Transport Act li menm – Road Transport Act i en gro Act e se osi sa Safety Advisory Committee ki ed nou fer sorti bann pwen, ki nou bezwen amande osi ler nou fer revizyon Road Transport Act. Me nou’n pour dir nou napa sa resours pour le moman.  Both lo nou kote e lo AG’s Office pour nou regard sa Lalwa an antye li menm. En keksoz ki nou ti a voudre me selman nou pa’n, nou pa pe kapab fer li, e se sa ki annan bann lamannman ki advice ki nou’n gannyen, se plito anmenn bann lamannman pour kapab ganny konsidere.  E la nou pe komans bann ki nou konsider koman bann priyorite dan Lalwa pour nou amande.

E i annan plizyer report ki’n sorti WHO in toultan pe fer bann road safety report, e la in dir poudir laz bann dimoun i osi en fakter, akoz ki annan bokou aksidan e aksidan fatal lo semen.  Sa i pa en keksoz ki nou, nou pe  dir se WHO ki dan son bann report ki’n mansyonn sa.

Me osi nou rekonnet ki nou pwen feb se monitoring oubyen enforcement. Mon pa pour koz lapar lapolis, me selman nou vwar ki annan bokou pour fer lo kote monitoring e osi enforcement lo kote Road Transport Commission. E osi lo kote lapolis.

Alors an gro Mr Speaker nou lo kote Departman Transpor e osi Minister, nou anvi get sa lamannman ki Onorab Lopozisyon in anmennen.  E si nou annan okenn bann pti sanzman ankor nou pour met devan avek Lasanble ozordi, pour nou kapab at least ariv li en konpromi pour nou kapab fer sa Bill, aprouv sa Bill.  Mersi.

 

MR SPEAKER

Mersi Minis.  Bon nou ava pran en vote lo merit e prensip sa Bill prenan kont lantant ki annan pour anmenn lamannman.  Mon ava demann tou Manm ki an faver?  Okenn Manm ki kont? Madanm Deputy Clerk.

 

MADAM CLERK

Mersi Mr Speaker. Mon’n rikord 12 Manm ki’n vote an faver e personn kont.  Mersi.

 

MR SPEAKER

Mersi Madanm Deputy Clerk. Mon kapab ganny en Formal Second Reading.

 

MADAM CLERK

Mersi Mr Speaker. A Bill of an Act to amend the Road Transport Act Cap 206. Thank you.

 

MR SPEAKER

Mersi Madanm Deputy Clerk. Bon i annan en lantant ki nou pour al dan Staz Komite pour nou konsider propozisyon amannman.  Mon ava demann Sergeant pour li move Mace.

Lekel Manm ki pour move lamannman?  Yes Onorab Sebastien Pillay.

 

HON SEBASTIEN PILLAY

Mersi Mr Chair. Mr Chair propozisyon lamannman ki nou ti’n ganny sans diskite, e nou ava gete si Lasanble i tonm dakor lo la, se pour nou fer en insertation after’’ section 2(b)’’ dan lamannman ki devan nou ozordi pour entrodwir en new section (c).  E sa nouvo section (c) i pour lir koumsa ‘’by inserting after subsection 3 the following subsection.’’ E sa nouvo following subsection nou pour number li as 4 e i pour lir koumsa; ‘’notwithstanding subsection three a person above the age of 16 years and below the age of 18years may be granted a license to drive a motorcycle or scooter having the motor capacity of 100-cc or below.’’

Rezon prezan zis pour mon eksplik sa en pti pe Mr Speaker pour bann Manm, se ki pour nou pa bezwen fer en bann pli gran sanzman.  Nou gard sa lamannman parey i été, me nou reentrodwir sa derogasyon ki ti ladan oparavan.   Dan sa lamannman ki in fer in tir sa derogasyon anler akoz i ti en sel fraz dan seksyon 12(3) kot i ti dir poudir okenn dimoun pa ganny drwa ganny en license a leksepsyon en dimoun ki kapab ganny en license pour rann en moter. Ok?

Ki nou pe fer prezan nou pe kit sa parey i ete be nou pe zis entrodwir en nouvo seksyon, ki prezan dan laliny lamannman ki Leader Lopozisyon ti pe propoze i kouver sa pwen ki Leader lopozisyon ti pe propoze. Me sel sanzman ki nou’n fer se lo kapasite sa motor vehicle, akoz 125-cc apre ki nou ti’n ganny sans diskite avek bann ekspert ki la, i annan bann moter 125-cc ki vreman powerfull.

E lentansyon ki nou pe sey fer se pour annan en kategori motorcycle ki kapab si oule tonm dan laliny bann diskisyon, bann largirman ki nou pe gannyen.

Adisyonnelman prezan following sa lamannman Mr Speaker, nou pour annan en lot lamannman ki pour ganny propoze, e sa i pour vin letter D mon war in met 2 la, i pour vin letter (d) ; savedir sa lamannman orizinal i pour annan en 2 (a)(b)(c) e pour annan en (d), e sa (d), i pour dir ‘’in section 2 the definition of motor vehicle’’ by inserting after the word ‘‘motorcycle’’ the word ‘’scooter’’. Pour mwan eksplik sa Mr Chair si nou war regard lalwa orizinal, Lalwa orizinal ti ganny entrodwir an 1935.  E son dernyen lamannman kil o rikord dapre consolidated se an 2000. Savedir from 2000 ziska ozordi i annan apepre 19an.  E sa letan an 2000 sa size scooter pa ti en size prevalent, e menm mon krwar an 1935 i pa ti en size prevalent. Mon pa krwar in annan gran sanzman dan son seksyon lenterpretasyon.

So ki nou’n fer prezan, pour li fer li en pti pli modern nou’n entrodwir dan definisyon motorcycle – obor motorcycle dan son seksyon lenterpretasyon, nou’n entrodwir sa mo ‘’scooter’’ ki match avek lisaz ki ozordi dimoun pe servi pour apel sa bann kalite veikil. So si Lasanble i permet mwan mon ava go through sa definisyon motor vehicle pour ki tou dimoun i azour avek.  So ozordi ‘’motor vehicle means a vehicle propelled by any form of mechanical power, and includes a motorbicycle.’’ Nou, nou konn li koman en ‘motorcycle’ me i en ‘motorbicycle’ par le fe ki i annan de larou – ‘’With or without  sidecar or trailer.’’ E nou kapab konpran savedir sa ti en lalwa ki ti pe fer en definisyon pour ler moter ti annan en sidecar e mon pa krwar ozordi Sesel i annan okenn moter ki annan ki annan en sidecar.

E apre i annan en motortricycle ki ozordi pe komans vin prevalent ;  bann la pe komans entrodwir.  Me napa en definisyon pour sa kategori moter ki parey en scooter.  Akoz nou ti oule target sa seksyon spesifik, akoz son kapasite i tie-in avek sa kapasite ki nou pe entrodwir dan Lalwa.  Avek sa lamannman, mon santi ki nou pe plizoumwen zwenn laplipar bann konsern ki bann Manm in eksprimen.  Prezan ti annan en lot propozisyon – mon krwar Leader Lopozisyon ti pe move en propozisyon. Me si nou regard pli anler dan sa seksyon 12 li menm, i deza fer ki i bezwen annan serten konpetans pour li kapab operate sa veikil. Savedir sa test i vin part and parcel of pour li kapab ganny sa license. Me si parey nou dir as an abundance of caution nou oule enkli en seksyon ki dir spesifikman ki i bezwen pas en test, it would not do any harm ; i pour zis pe accentuate lo en fe ki deza la.

Me le fe ki in deza dir pour dir i bezwen annan sa konpetans, konpetans i vedir ki i bezwen pas en tes pour li kapab operate sa motor vehicle, par egzanp sa moter oubyen sa scooter.  So dan sa konteks nou pou’n take of bann konsern ki ti pe annan vizavi bann zenn ki annan 17 an, ki pe servi son scooter pour al kot lekol.

Akoz la i pour still annan sa posibilite. E nou’n osi take care of bann zenn ki pa neseserman pe servi son scooter pour al kot lekol, me parey nou’n dir ki pe fer en pti louvraz oubyen keksoz koumsa an servan son scooter. Delivery par egzanp ki i kapab pe fer.  So nou’n enkli tou le de provizyon. E ler en dimoun i ariv 18an i ganny personalite legal.  E Lalwa i preski ki 18 an sa dimoun i kapab ganny license pour nenport ki kalite transpor, ki i anvi drive.  Si i anvi drive en moter Kawasaki 250-cc i kapab fer li.  So sa i take care of itself. Mersi Mr Chair. I beg to move.

 

MR SPEAKER

Bon amannman in ganny propoze.  Mon en pti pe konfize akoz ou pe dir anba seksyon 12 – 12 (3), 12 subsection 3.

Akoz apre 3 i annan en 4 e ou pe insert en 4 ankor.

 

HON SEBASTIEN PILLAY

Mr Chair zis si ou ti’n – mon ti pe esper reaksyon lo sa provizyon. Akoz lot bout ki mon’n mete, se ki prezan nou pour renumber subsection 12, (4) prezan as subsection 12 (5) e nou pour renumber subsection 12(5) as subsection 12 (6) respectively, ki pour fer ki prezan nou pour adjust the whole section, par entrodwir en nouvo section 12(4) ki fer derogasyon pour kapab annan sa license, pour en dimoun ant 16an a 18an annan en scooter or en motorcycle. Mersi Mr Chair.

 

MR SPEAKER

Ok, mersi Onorab Pillay.  Bon amannman in ganny propoze, e deba i ouver lo amannman. Okenn Manm ki oule entervenir. Onorab Ramkalawan eski nou, i en propozisyon eski nou segonde, nou bezwen en Manm pour segonde. Onorab? Onorab Ramkalawan oule segonn amannman. Oule debat lo amannman?  Onorab Vidot.

 

HON AUDREY VIDOT

Amannman segonde Mr Speaker.

 

MR SPEAKER

Mersi Onorab Vidot. Bon amannman in ganny segonde. Nou ouver deba. Onorab Ramkalawan.

 

HON WAVEL RAMKALAWAN

Mr Chairman mon kontan ki zot in pran an konsiderasyon sa ki mon ti a pe propoze.

Ok, i annan dan sa nouvo seksyon 4 ki apre i ava ganny renumbered, mon pe war i annan serten keksoz an relasyon avek ki kot i kapab annan serten konfizyon an relasyon avek seksyon 2, dan definisyon. Parski definitivman se pour sa rezon ki par egzanp mon ti propoze ki the whole Road Transport Act i bezwen ganny amande. Parski dan definisyon motor vehicle, sa mo motorcycle pa egziste deza. I senpleman pa egziste. Ok?  E sa petet ti pour bon pour amann  sa seksyon, parski la deza the mother Act i an konfli avek son lekor.

Dan seksyon 12 of the Road Transport Act 12(3) i aktyelman use the word ‘’motorcycle’’ ok? E letan ou regard seksyon 2 dan definisyon, the word ‘’motorcycle’’ does not exist. Ok?  Motor vehicle i pe dekri li koman ‘’motorbicycle’’. I pe koz lo ou ‘’motortricycle’’  bicycle, tricycle.  Napa en landrwa dan definisyon, ki nonm motorcycle.  So motorcycle i bezwen ganny rantre dan definition. In the definition section, we need to insert the word ‘’motorcycle.’’ Because we don’t use the  word ‘’motorcycle – ensidswit motortricycle, tou sa bann zafer, but the word ‘’motorcycle’’ needs to be in inserted in there.  Sa i enn.  Ok. Si nou kapab premyerman amannman sa definition ‘’motorvehicle’’ pour include ‘’motorcycle’’ then sa definisyon, apre sa nou a bezwen parey lamannman ki’n ganny drafte par draftsman in mete, ki pour nou osi use the word ‘’scooter.’’ Konmsi i ava osi include ‘a scooter.’ So section 2 needs to be amended e draftsman i ava met sa.  E apre sa si nou retourn lo, si nou retourn lo 12. mon pa war akoz in met (c).  Akoz?  Ok, so si sa 4 the new subsection 4 si i pe dir ‘’notwithstandng subsection 3, as amended’’ mon mazinen yes of course. Full stop after 18 years.

‘’A person above the age of 18 years and below the age and…’’ Onorab Sebastien Pillay ti’n fer,’’ below the age of 18 years may be granted a license to drive a motorcycle or scooter having the motor capacity of 100-cc.’’ Eski nou devret pe servi sa   word ‘’may?’’ Because mwan mon santi an menm tan ki pour dir sa ki Onorab De Commarmond in dekrir koman en diskresyon, is actually illegal.

        It’s actually illegal. Illegal akoz in ganny servi capricioulsy. Si i annan dimoun ki’n ganny zot license ant 16an avek 18an ou pa kapab capriciously nek zis vini dir be la mon pe servi sa mo ‘’may’’ la aprezan ou pa pe gannyen lot pour gannyen.  I  ti’n devret annan en lot fason.  So mwan mon krwar ki poudir  the lentansyon ki nou a pe dir la, annou eksprim sa letansyon klerman!  Parski letan ou pe regard 12, i dir ou ok, i annan sa mo ‘’shall’’ ki ganny servi.   Mwan mon krwar ki nou pa devret servi ‘’may ‘’la an ka i kapab annan parey in arive la, kot pe servi diskresyon.

Mwan mon krwar nou lentansyon se, sa ki ant 16an a 18an i kapab ganny en license pour li drive en pour li mont en moter ki mwens ki 100-cc. So mon krwar ki i devret, ‘’A person above the age of 16years and below the age of 18years shall be granted a license, to drive a motorcycle or scooter, having the motor capacity of 100-cc or below or less.’’ Should be or less.  So se sa ki mon pe war e mon krwar ki si nou fer sa de pti keksoz ki mon’n koz lo la, mon pa war akoz i pa kapab, pa below or less. ‘’100-cc or less.’’ Mersi bokou Mr Chairman.

 

MR SPEAKER

Mersi Onorab Ramkalawan. Mon a donn laparol Onorab De Commarmond.

 

HON CHARLES DE COMMARMOND

Mersi Mr Chair.  Non zis mon ti pe mazin lo la.  I bezwen annan en rezon akoz dan Lalwa zot in met li koumsa.  Si i ilegal I dont know but panel i la, petet zot ti kapab eksplike akoz.  E an menm tan ki nou pe dir nou se ki sa license la each moment 16an. Avan i pour ganny license i pour bezwen pas atraver en test.  I pour bezwen fer en tes e pas sa tes pour li ganny license.

Letan pour al lo pli gro moter osi apre 100-cc la osi a 18an i bezwen fer en tes, i bezwen pas en tes ankor. Sa i bezwen kler, be selman i enportan eksplik rasyonnel deryer sa zafer ‘’may’’ san ki zisteman i vin en zafer kot konmsi ou kapab pa donn en dimoun.  Konmsi nou pe dir ki be selman kestyon i beg itself. Si i arive en manrmay – en zenn 16an a 18an.  E in apply pour ganny license pour mont moter pa anba 100-cc, 100- cc ou pa anba, e prezan ou war son enkapasite pour li kapab. Then ou konpran i pa vin otomatik.

Se petet that’s why zot in servi ‘‘may’’, mon panse.  So si petet legal advisor ti kapab eksplik en pe, oubyen Mr Andre ti kapab dir keksoz si zot konnen dan direksyon ki nou, nou pa konnen.  Mersi.

 

MR SPEAKER

Ok.  Yes Onorab.

 

HON WAVEL RAMKALAWAN

Mr Chairman lo sa ki Onorab De Commarmond pe dir competence. Seksyon 12(2) i dir avek ou ‘’The Licensing Authority, may grant such license on being satisfied that the applicant (a), is competent to drive the vehicle in respect of which application is made, and is not disqualified under the provision of this Act.’’ So sa dan li menm li, letan pe dir ou is competent. I bezwen annan en test of competency.

E the test of competency i pour tonm anba zot pour ou al pas en tes.  E si ou annan 16an an a 18an, ou al pas en tes e letan ou annan 16 an a 18an Lalwa pour tyeke ok ou ganny drwa mwens ki 100-cc. Alors i pour fer ou pas en tes mwens ki 100-cc.

E aprezan i ava montre ki pour dir ou competent pour ou mont ziska 100-cc scooter. Letan ou depas 18an pour regarde si ou competent pour ou mont par lao 100-cc?  Parski la ou annan kapasite pour ou mont 100-cc. Ou bezwen ankor enn fwa al pas en tes.  E letan ou pas ou tes sa Gard i a dir ‘’ok ou’n pas ou tes.’’ E sa Gard ki pour donn ou the competency.  So sa ki ou pe dir i ganny kouver anba 12  (2) parski zot kapab only issue a license.  Licensing Authority can only issue a license, letan i annan sa sertifika competency.  Pa lapolis ki pour donn ou license, lapolis pour donn ou certificate of competency.  Mersi.

 

MR SPEAKER

Mersi Onorab. Petet zot ava mazinen kote Onorab Ramkalawan pe ganny bann lenformasyon parey nou dir toultan ler en amannman en Act i vin kot Lasanble. Lasanble i fer le neseser pour pran the mother Act osi tou pour sirkil avek bann Manm. So mwan osi tou mon pe swiv en pti pe lo mother Act kote sa amannman i antre e kote sa bann referans pe ganny fer.

Les mon ava donn laparol mover lamannman Onorab Sebastien Pillay.

 

HON SEBASTIEN PILLAY

Mersi Mr Chairman. Mr Chairman mon konpran tre byen lentansyon tou bann dimoun ki’n koz avan. E mon krwar nou’n fer progre from bomaten ler nou’n annan deba.  Nou pe ariv a en pozisyon kot nou pe ganny, nou pe ariv a en serten solisyon.

Me petet ki mon krwar ki mon bezwen point latansyon nou bann Manm, se le fe ki rezon in servi ‘’may’’ la se akoz nou pe koz en endividi ant 16 an a 18an. E en endividi a 16 an a 18an i napa kapasite legal li.

I pa ganny konsidere koman i annan en kapasite legal.  I annan en lot dimoun ki annan en kapasite legal lo li. E sa se son paran. Par egzanp ou kapab annan ou scooter ou, deside ou anvi al rod en license scooter e ou paran i ganny drwa dir ou non.  I kapab met lobzeksyon pour dir ou non.

For any purpose i kapab dir ou non.  Be si ou annan en Lalwa ki kree, ki donn ou en kapasite legal kan ou napa sa kapasite legal, sa Lalwa li menm pour an kontrovansyon avek en lot Lalwa.  So par le fe ki sa in ganny mete sa ‘’may’’ i ganny mete, sa i enn bann rezon. Mon konpran tre byen rezon ki’n ganny donnen vizavi determin konpetans sa dimoun sa laz, pour annan sa scooter. Me si nou fer li en lobligasyon anba Lalwa.  Akoz tou lobligasyon i ganny kree ler en dimoun i annan kapasite legal e sa se 18an. E se pour sa rezon kot nou vwar oparavan en dimoun ki annan 18an shall basically kapab ganny en license i vin preski en drwa, unless sa dimoun i ganny diskalifye lo en baz enkapasite oubyen lezot baz.

Be dan sa ka spesifik, i annan en lot eleman ki vin lo la. E sa eleman se le fe ki sa dimoun for all internal proposes parey Civil Code i dir, i ankor en miner.  E sa miner ankor anba responsabilite son paran. E sanmenm sa rezon ki i annan sa diskresyon ki’n ganny kree. Sa diskresyon i pa’n ganny kree – e mon konpran akoz Leader Lopozisyon pe raise sa pwen – i pa’n ganny kree pour annan en capricious approach to its implementation. Ou dir mwan mon donn ou en license be sa lot in vini, i pa’n ganny en license. I pa sipoze pe ganny kree to sa.

Me selman nou bezwen les sa lespas given the sensitivity sa kategori pour allow sa arive.  E mon konpran konsern ki kapab annan, eski par egzanp sa i donn lapolis loportinite pour dir be non annan tro bokou scooter dan pei, alors nou met en moratorium.

Yes i donn zot posibilite pour fer sa.  Me i pa vedir pour dir pour fer sa san ki i ganny challenge lo validite son aksyon ki i pe pran.  I bezwen montre gain cause  ler i pe fer en keksoz.  Si i deside pour dir i pa pour donn okenn manrmay 16an – 16an -1mwan license pour mont en scoote,r then i pour bezwen kapab montre akoz. Rezon mon dir sa set akoz sa ki nou bezwen mazinen, ler nou dir above the age of 16, i 16an, 1 zour i above the age of 16. 16 one hour, i above the age of 16.

So whatever way nou get li sa zanfan fer internal purposes, sa zenn adilt i ankor en miner. E sa i en konsiderasyon ki nou bezwen pran.

Prezan Mr Speaker vi ki mon annan laparol mon oule raise en lot issue.  Ki pe anmenn mon back to lamannman ki ou’n propoze pli boner.  Nou pe ganny serten lenformasyon from bann aficionado ou kapab apel sa bann dimoun ki konpran sa, pe dir nou pour dir power en scooter ozordi given ki Sesel i hilly, eski 100-CC, i adekwat?  Ou konpran?  Eski 100-cc, adekwat, akoz sa i en lamannman ki mon bezwen dir, nou’n ganny sans diskite avek AG’s office e nou’n met li from sa perspektif.

So nou ti a kontan ki bann eksper, akoz for internal purposes mon krwar petet mon pa konnen i annan Onorab Valmont, Onorab Ramkalawan i de dimoun ki’n deza annan license No.1 ki kapab ed nou Lasanble from zot leksperyans, eski 100-cc, pou adekwat par egzanp pour mont en montanny St Louis oubyen en lot montanny ki i en dimoun i servi en scooter oubyen eski i 125?

So sa i en konsiderasyon ki nou bezwen fer.  Nou annan Onorab Adelaide i en eksper ladan akoz i en mekansiyen, so i kapab ed nou.  So petet nou ava kapab osi ganny en direksyon lo la.  Me selman mon ti ava kontan ki annou pa retir sa diskresyon, akoz sa diskresyon i kapab en gardfou, ki neseser a sa moman. Akoz nou pa pe retire sa sans.  Avan sa ti pe retir net.  Me nou pe gard li me annou gard en gardfou just for, pour proteksyon petet.  Mersi.

 

MR SPEAKER

Mersi Onorab Pillay.  Onorab Adelaide oule fer en komanter?

 

HON FRANCOIS ADELAIDE

Mersi Mr Speaker. Non Mr Chair. Mr Chair sanmenm sa ki bon par ler ou en Parlman ou annan diferan background akoz enn ler nou krwar zis Lalwa ki ede pour fer Parlman marse, be diferan leksperyans.  E vi ki mon’n deza en pe letan, mon’n deza dan field, mon panse a ler Onorab Ramkalawan ti met 125-cc, nou ti’n fini konsider sa bann montanny ki soz. Si ti en landrwa plato ti pour ok 100-cc. Be selman 125-cc mon krwar i konsiderab pour nou dan plas 100-cc.  Mersi.

 

MR SPEAKER

Mersi Onorab Adelaide. Onorab Valmont.

 

HON JUDE VALMONT

Speaker, mersi bonn apre midi.  Mon dakor mwan osi 125-cc i konsider sa bann montanny ki annan – konsider groser dimoun osi nou annan. 125-cc mon krwar i-

 

(Interruption)

 

MR SPEAKER

Non, non, non akoz en garson, picture en garson 25an pwa 90 kilo, i annan semen ki  i pa pour monte.  125-cc i adekwat. E maksimonm laplipar bann scooter isi ki pe antre aktyelman i deza 125.

 

MR SPEAKER

Mersi Onorab Valmont.  Bon mover amannman – okenn komanter avan mon donn laparol panel?

 

Mr Chair mwan si – mwan mon krwar si Lasanble i deside pour dir nou devret ogmant sa kapasite fer li 125, it’s just a matter ki mon demann Lasanble permisyon pour sanz sa sif 100 e fer li vin 125 e AG’s office i ava fer le neseser.   Akoz nou deza en kad pour sa lamannman, i pa pour konplike pour nou enkli li dan bann lamannman final.

 

MR SPEAKER

Mersi Onorab. Bon mon ava donn laparol panel, Minister oubyen PS – si oule fer komanter, PS Andre.

 

PS PATRICK ANDRE

Mersi Mr Speaker. Mersi tou Onorab ki la.  Bonn apre midi. Well lo en pwennvi teknik ozordi sa bann scooter ki pe annan i pa arive par lao 100 CC.  Ok i bokou pli ba ki sa.  I 60, 75, 80  e zot pe ariv partou kote dan tou kwen.

En masin 125-cc, i parey en scrambler si zot mazin byen i parey en scrambler.   E i sitan powerfull e i kapab annan lenplikasyon lo la.  So mon demann zot pour zot rekonsider byen sa issue CC  ok, akoz i kapab annan en lenplikasyon vreman serye, etandonnen nou pe met en manrmay 16an an montan anba 18an, pour pran en responsabilite avek en scrambler from the word go. Mazin sa byen avan ki nou pran en desizyon, oubyen letan ki nou pe pran en desizyon lo en tel sityasyon, ki nou tou nou annan konsern, me ki mannyer nou aplik i enportan.  Mersi Mr Speaker.

 

MR SPEAKER

Mersi PS.  Okenn Manm ki oule-  Non?  Onorab Pillay ou ok.  So nou mentenir-  Onorab Ramkalawan.

 

HON WAVEL RAMKALAWAN

Yes si sa bann pti scooter zot parey Mr Andre pe dir avek nou, zot i pas partou. I mwens ki sa i 80-cc ensidswit – mon pa war akoz nou bezwen ogmante. Mon osi tou mon ti pe mazin an term en scrambler. Parski en Honda 125-cc i soz I mean nou bezwen zis regard bann progranm, bann progranm ki zot fer of bann off-road 125-cc, i annan en kantite power ladan. So lo sa mon personnelman mon napa problenm.  Me 2enm bout ki mwan mon anvi ki sa lamannman dan seksyon 2 sa i bezwen ganny fer dan definition section.

 

MR SPEAKER

Mersi Onorab. Onorab Adelaide.

 

HON FRANCOIS ADELAIDE

Mersi Mr Chair.  Mr Chair mon pe dir zot out of leksperyans en scooter 80-cc, kantmenm nou pe dir 50-cc, ok, nou pe kondwir en scooter.   Ok nou pe dir nou pour manrmay sepa i danzere.  Be kantmenm en 50-cc i danzere. Enn 125-cc mon pa war li tro danzere bel er mon pe get, nou pe get montanny, nou pe get ok, nou pe koz en dimoun ki pe montre en scooter. Si i annan de dimoun ki pe mont en scooter, i pe mont an montan, wear and tear ou bezwen mazin tousala. Mwan mon krwar ki 125-cc i ase rezonnab.  Lontan ki ti annan ? Ti annan bann pti moter konbyen ti arive, 125-cc. So ou konpran ou? Si nou pe fer en Lalwa annou fer en Lalwa i pa pour afekte ki apre nou bezwen vin ankor en kou vin amann en Lalwa.

So 125-cc, 100-cc i preski parey.  Zis 25-cc. Vre i annan en pti pe plis tiraz. Be nou bezwen edik nou zenn lo responsabilite.  Ok?  Pa akoz i annan 125-cc ki ou bezwen fer li al sepa konbyen mil aler. So sanmenm sa ki nou dir Gard lo semen i devret gete si i pe fer speed. Definitivman i aret li. So dan sa laliny mon pe konsidere. Mersi.

 

MR SPEAKER

Mersi Onorab. Onorab Ferrari.

 

HON JEAN-FRANCOIS FERRARI

Zis pour mon dir pour mon anmenn mon bout ladan se ki i vre ki i pa, i pli gou ler ou annan en masin ki pli powerfull. Me selman la mon krwar nou dan en sityasyon kot nou pe mazin sirtou parey Onorab Loizeau in dir, bann zenn ki al lekol, oubyen ki fer delivery, oubyen ki fer keksoz koumsa.                                    Nou pe war zot pe sirkil anti si avek Anse Royale – a pe fer bann gran, gran zistans e mon krwar i pour mwan i ok, ki zot ganny peze en pti sa 2 an akoz apre laz 18an zot a kekfwa en pti pe pli eksperyanse la, zot kapab mannye masin en pti pe pli gro apre.  So sa i mon lopinyon. Mersi.

 

MR SPEAKER

Mersi Onorab Ferrari.  Onorab William.

 

HON WAVEN WILLIAM

Mersi Mr Speaker.  Mr Speaker mon demann en leskiz. Mon ti a kontan konnen si lo propozisyon par Onorab Lopozisyon, si nou’n fini adres tou bann pwen, akoz mon annan en konsern avek 12(2) kot i konsern akoz mwan mon krwar pour dir en certificate of competency issued from the traffic police. Mon pa konnen sa in ganny diskite mon krwar i devret antre dan 12(a). I deza ladan.

 

MR SPEAKER

Competency. I deza ladan, i deza dan Lalwa. Anba 12(2) (a. Onorab Valmont.

 

HON JUDE VALMONT

Mr Speaker mersi bokou zis pour azout en pti bout pour siport Onorab Adelaide. Mon osi mon krwar 125-cc i volapenn. Akoz  kantmenm bann zenn – nou napa en zenn dan plato, en bon pe dimoun i reste dan montanny. 125-cc i 2 zenn lo la i pa pour monte. Apre petet Mr Denis in lapolis donn nou ou pwennvi ki ou panse, ou konn byen moter. Mersi.

 

MR SPEAKER

Bon nou bezwen konsidere pour dir pour en moter en increase par 25-cc i en kantite power. Sa ki nou bezwen realize – ok?  Onorab Aglae.

 

HON EGBERT AGLAE

Mr Speaker mon krwar nou bezwen annan en distengsyon akoz mwan mon pour siport en pe sa ki Mr Andre pe sizere akoz ou fek ganny en license ou pa kapab vin avek direkteman al lo en 125-cc, ki nou, nou konnen ozordi teknolozi en 125-cc ek en teknolozi 125-cc 10an pase performans  pa parey. Ok?

Menm si CC i kapab CC  wi, be displacement, akoz i dir ou koumsa ekout byen, mon pa en mekanik mwan, me selman displacement speed ki fer lefe. Kot ou bouze pour sorti zero pour al 10 sepa i pran ou konbyen, en loto modern ozordi i fer sa pli byen ki en loto. Me nou, nou konnen pour dir ou osi malgre ou pe koz 125-cc zot fer sa bann lekipman, sa bann pli leze ankor i annan less pwa. Mwens e byensir i kapab deplas ankor pli bokou. So mwan mon pe sizere ki 125-cc pour ou komans avek 16an mon krwar  pour dir i annan bann propozisyon kot nou kapab parey bann pei in adopte  60, 70, 75 a en laz apre zot monte an mezir si ler pu 16 an ou pe komans anba 100, ou’n ganny ou pti leksperyans ou a mont lo en 125 petet ankor 1an, 2an koumsa. Mwan mon sizere sa. Annou pa zis met en keksoz la deor dir tou pour tonm parey ki apre demen nou menm nou pour konplent.

 

MR SPEAKER

Mersi mon ava pran ankor en komanter. Onorab De Commarmond.

 

HON CHARLES DE COMMARMOND

Mersi Mr Speaker mon ti pe zis dir ki mon’n ekout byen bann pwen ki’n ganny avanse, e mon krwar mwan, mon ti dir boner zot pe osi dir responsabilite. Nou pe met responsabilite lo bann zenn a laz 16an an montan. Me nou ti dir osi ki nou Lasanble osi i bezwen pran en responsabilite serye vizavi sa issue. Nou tou nou konsernen avek sa ki nou’n vwar nou konnen, nou’n eksperyanse konsernen moter.

E alor mon dakor avek bann pwen ki’n avanse lo kestyon 100-cc ki i vin koman en pasaz pour sa zenn la ant 16 an a 18an en pti kou i pour pase sa 2an e apre avek sa leksperyans ki in gannyen i a kapab fer ek plis responsabilite. I kapab mannye sa ki pli gro, sa ki pli avek kapasite pli for ki sa.

Mon krwar mon sa ki nou pe diskite annou tonm dakor, annou nou osi pran nou responsabilite byen pour nou kapab vin en legzanp donn sa gid sa bann zenn e nou pa pe mazinen ki nou’n fer la propozisyon Lalwa ti dir 18an ti pe bloke 16an e la nou’n ariv a sa konpromi annou al dan sa direksyon koumsa.  Mon krwar mon i ava enn nou bann. Dimoun i ava konpran nou ki nou pe fer dan sa fason pozitiv e let’s move pour nou vote. Mersi.

 

MR SPEAKER

Mersi Onorab. Mwan a donn dernyen parol Minis pour regarde si zot in aksepte lamannman ki ganny propoze ki’n ganny met devan. Minister.

 

MINISTER PAMELA CHARLETTE

Mersi Mr Speaker. Mr Speaker nou napa problenm avek lamannman ki anmenn devan nou. Me selman nou bezwen konfirmen si nou pour kit ‘’may be granted’’,

 

MR SPEAKER

May.

 

MINISTER PAMELA CHARLETTE

‘’May’’ ‘’granted’’, mon ok sa. Mersi.

 

MR SPEAKER

Nou prenan kont dan definisyon os itou sa ki nou’n fer sorti. Yes Onorab Pillay.

 

MR SPEAKER

Mr Chair, with your indulgence mon pe demande ki ler ou put the question ou put the question ou put the question lo mon lamannman ‘’as amended.’’ So that we include the definition for motorcycle.

 

MR SPEAKER

Dakor.  Eski panel osi in ganny the gist of the amendments? Panel in gannyen – ok?  Bon nou pour pran en vote lo propozisyon amannman as amended from the floor.  Mon ava demann tou Manm ki an faver?

 

(Off-Mic)

 

MR SPEAKER

Nou’n fini aksepte. E mover Mosyon in aksepte tou. Non, non, Minister in aksepte, the definition, motorcycle. Wi panel in aksepte. E mover amannman  in aksepte. Ok.

 

HON WAVEL RAMKALAWAN

Ok. Be Mr Chairman avan nou pran en vote.  Mwan  i annan en konsern ki anyway i pa direkteman dan sa lamannman, be selman ki mon ti ava kontan sa bann zafer modifikasyon.

Sa mon krwar i enn ban konsern dimoun. Sa bann silencer ki ganny modified e kot i fer tapaz ou tann li depi kot i vini sensanlye deryer soley.  Eski i dan sa Lalwa kot nou kapab-? Menm parey ki nou pe- ?

 

MR SPEAKER

VTS ki bezwen ganny ekipe Vehicle testing station ki bezwen ganny ekipe ki fer sir ki zot kapab detekte sa bann modifikasyon ler en motor vehicle pe ganny teste.

 

HON WAVEL RAMKALAWAN

Be Mr Chairman I am sure i tonm anba sa menm Lalwa somewhere. E mwan mon ti a pe dir ki le fe ki la nou’n komans avek 12 apre sa nou’n al dan seksyon 2.  Eski zot pa kapab montre nou kote si fodre ki nou amann okenn seksyon en lot seksyon ki met en ban lo sa bann zafer modifye silencer parski lepep Seselwa i anvi dormi an pe. Mont ou moter ou be selman les sa boug osi tou dormi an pe pour li travay. Eski i annan okenn par ladan ki nou kapab fer sa?  Mersi.

 

MR SPEAKER

Bon mon panse ki bann lezot amannman parey Minis in fer sorti, i en Lalwa ki ase aze. In ganny amande fir an mezir. I ankor annan room for improvement.

Mwan mon deza war enn la ki mon pa konfortab avek. Dernyen laliny dan 3. ‘’In case of doubt the licensing Authority shall be the judge of the age of the applicant.’’ Come on la osi tou nou annan tou mwayen ozordi pour depict the age of the applicant. Ou les the authority pour decide on the age e ki kriter ki i pour servi tou decide on the age?  Me i annan bokou bann amannman ki kapab vini ankor.  E ankor nou konnen poudir Manm osi tou i kapab anmenn Private Members Bill. Ok?

Me la pour ozordi nou pour konsantre lo amannman ki’n vin devan nou e ki’n reganny amande. Minister.

 

MINISTER PAMELA CHARLETTE

Non Mr Speaker zis pour mon asir Onorab ki i annan en keksoz ki nou pe travay lo la, kekfwa i a vin dan Regilasyon osi, pour nou met tou bann standar avek lo kote modifikasyon osi, kwa ki nou pe aksepte kwa ki pa akseptab.  Mersi.

 

MR SPEAKER

Mersi Minis mon ava pran en dernyen entervenan. Onorab Sandy Arissol.

 

HON SANDY ARISSOL

Mersi Mr Speaker. Mon oule siport largiman ki Onorab Ramkalawan e la mon’n tann Minis dir pour dir pour annan en lot Regilasyon. Me selman sa ki nou bezwen osi pran kont se ki tou sa bann bout modifikasyon ki nou pe koz lo la Mr Speaker i antre dan pei li. I ganny vann dan en laboutik ki ganny en license par Lotorite Licensing. E sa bann zenn zot pa aste sa ilegal zot, zot aste li dan en laboutik license e zot aste zot prodwir zot modifye zot transpor, sa osi nou bezwen pran kont.  Alors si en keksoz ki ilegal ki pa devret pran kont Sesel i pa devret menm antre dan nou pei pour li ganny vann apre sa zenn li i ganny targete pour dir la i a pe disturb en kominote akoz mon konnen ou koman Speaker ou kontan letan lakominote i ganny sans dormi aswar.  Mersi.

 

MR SPEAKER

Bon nou, mon krwar nou’n ariv pozisyon pour nou pran en desizyon, en vote lo amannman ankor parey in reganny amande.  E ki’n ganny aksepte. Mon ava demann tou Manm ki an faver?  Tou Manm ki an faver?

 

(Off-Mic)

 

MR SPEAKER

Nou’n fer sorti, nou’n fer kler bann amannman Onorab, Onorab Aglae. Bann Manm i konnen ki zot pe vin vote lo la. Ok. Ale annou remontre en show of hands. Tou Manm ki an faver?

Okenn Manm ki kont? Madanm Deputy Clerk.

 

MADAM DEPUTY CLERK

Mersi Mr Chair. Mon’n rikord 23 Manm ki’n vote an faver e personn kont.  Mersi Mr Chair.

 

MR SPEAKER

Mersi Madanm Deputy Clerk. Savedir bann amannman in pase. Mon ava demann Sergeant pour move Mace.

Bon mon ava pran en Motion for Third Reading. Onorab De Commarmond.

 

HON CHARLES DE COMMARMOND

Mersi Mr Speaker. Mr Speaker anba order 71(1) Standing Order mon oule move ki Road Transport (Amendment) Bill 2019, Bill No. 14 2019 as amended i ganny lir en Trwazyenm Fwa. Mersi.

 

MR SPEAKER

Mersi Onorab. Okenn Manm ki segonde. Yes Onorab Sebastien Pillay.

 

HON SEBASTIEN PILLAY

Mr Chair Motion seconded.

 

MR SPEAKER

Mersi bon nou a kapab pran en desizyon nou pran en vote lo Third Reading.  Tou Manm ki an faver? Okenn Manm ki kont? Madanm Deputy Clerk.

 

MADAM DEPUTY CLERK

Mersi Mr Speaker mon’n rikord 22 Manm ki’n vote an faver e personn kont. Mersi.

 

MR SPEAKER

Mersi Madanm Deputy Clerk. Mon kapab ganny en Formal Third Reading.

 

MADAM DEPUTY CLERK

Mersi Mr Speaker. This Act may be cited as a Road Transport (Amendment) Act 2019.  Mersi.

 

MR SPEAKER

Mersi Madanm Deputy Clerk. Savedir Bill as amended in ganny aprouvasyon Lasanble Nasyonal.  Avek sa mon ti a kontan remersi Minis avek son lekip, PS Andre, Road Commissioner Mr Denis and Mr Verghese from the AG’s office. Thank you very much and we would excuse you from the House.

 

(THE MINISTER AND HER DELEGATION WAS EXCUSED FROM THE HOUSE)

 

 

MR SPEAKER

Bon nou ava. Mon sizere nou pran en break e nou a ava retournen 4 er. Ok. 4er nou a retourn 4er. 10 minit i pa en gran sa, en gran letan. Nou retournen 4er pour nou kontinyen avek nou travay. Sa nou ava pran premye Mosyon ki lo Order Paper. Ok? Nou break nou retournen 4er.

 

(BREAK)

 

MR SPEAKER

Bon nou ava kontinyen avek nou travay. E nou pour pran Mosyon lo Order Paper. Nou ava pran premye Mosyon ki pe ganny move par Onorab Regina Esparon. Onorab Esparon.  Laparol i pour ou.

 

HON REGINA ESPARON

Mersi Mr Speaker. Bonn apre midi tou koleg Onorab ek tou dimoun a lekout. Mosyon ki mon pe prezant avek sa Lasanble i lir koumsa ;

Lasanble Nasyonal i fer en demann serye pour ki ladministrasyon bann Minister e Lazans Gouvernman i pey bann kontrakter atan letan zot termin en Kontra avek satisfaksyon san bezwen atann en kantite letan, en kantite mwan pour ganny zot larzan.

Akoz en tel Mosyon Mr Speaker ? Ozordi i annan en leokri sorti kot bann pti kontrakter ki ler zot fini en travay pour bann Minister oubyen Lazans Gouvernman, zot pas dan en kantite difikilte pour zot ganny zot peyman ki par fwa met zot dan en kantite problenm zot fristre e zot fer fas avek bokou dezapwentman dan bann prosesis.

Sa i aplik pour preski tou Minister e pour Gouvernman Lokal li i annan pli bokou konplent e pli bokou ka ki akimile e kot plis bokou peyman i an retar. E mon panse sa i akoz lakantite travay ki bann pti kontrakter i annan pour fer lo nivo distrik pour bann pti proze lokal. Kestyon ki souvan ganny demande kote sa retar i ete? Oubyen akoz i pran sa kantite letan pour fer sa prosedir peyman?

Dan mon resers pour anmenn sa Mosyon, mon ti ganny antretyen ek zofisye Minister Gouvernman Lokal dan Minister Finans e kot Project Oversight Unit – POU, pour met en pe laklerte e pour konpran ki mannyer prosedir i marse. Sa i sa 3 landrwa kle kot bann inisyasyon i ganny pran pour avans peyman.

E mon ti a kontan remersye zot pour zot korperasyon. Mon’n ganny fer konpran ki annan en kantite prosedir letap ki en proze i pas ladan, swa avan, e osi apre ki en travay in konplete.

Mr Speaker i osi bon note malgre ki Mosyon i kon lo peyman apre ki louvraz in konplete me sa prosedir avan ki louvraz i ganny tender, i osi primordyal e tre enportan.  Akoz si sa prosedir avan pa’n byen ganny swiv i pa montre sa transparans dan la fason ki keksoz i ganny fer i pour osi met retar ek prosedir pour fer peyman. Akoz zofisye toultan retourn lo sa dokiman an mezir ki louvraz i progrese. E ler louvraz i konplete, e avan peyman i ganny inisye pour fer sa konparezon.

E lo lot kote Procurement zot bezwen detay avan pour zot met tender e evalye travay e final pour bann gro proze. E sa prosedir avan i osi bezwen kler avan ki Kontra i ganny sinyen. Alor li osi i bezwen ganny byen ganny fer pour pa met retar dan prosesis peyman.

E sa bann prosedir ki pran bokou letan e osi met retar.  Bokou travay papye ki zot bezwen deal avek. E souvandfwa bann zofisye i monte, desann, swa pour ganny en sinyatir, swa pour ganny en leklersisman. Pandan sa letan ki li sa kliyan in fini e pe esper son pti mwenza parey Kreol i kontan dir.  Pour pey son det e pour li kontinyen son biznes. Mr Speaker sirtou pandan sa letan kot tou dimoun pe lager ek pri lavi ki monte e pa pe montre okenn siny amelyorasyon li sa pti kontrakter i bezwen esper demen tanto pour regle son det.

A mon avi malgre ki i annan diferan prosedir pour fer avan peyman, tousala i ganny fer isi menm Mahe, dan bann biro ki sitye parfwa dan menm batiman ouswa dan lavil obor kanmarad. Napa okenn prosedir ki bezwen sot kannal oubyen pran avyon pour al rod laprouvasyon dan en lot kontinan. E pour mwan sa i pa donn okenn Minister ou Departman rezon pour retenir fsyl en kliyan ki’n fini konplet en louvraz avek satisfaksyon pour plis ki 6 a 9mwan e menm parfwa 1an avan i ganny son larzan. Sa i totalman pa akseptab akoz tou Minister i annan en sel prosedir ki zot bezwen swiv, pour anvoy kot Finans pour peyman, ki apel Accounts Section Procedure for CAPEX Payment.  Sa i sa checklist ki bezwen ganny soumet pour prosedir peyman. Mon senplifye sa, ki prosedir pour peyman anba capital expenditure kot tou Minister, oubyen Departman i oblize swiv pour anvoy kot Finans e ki mon annan en kopi avek mwan la.

Menm prosedir dan tou Minister Mr Speaker. Mr Speaker a ler aktyel la ki mon pe koze i annan kontrakter ki’n fini rann louvraz depi mwan Desann pour Gouvernman Lokal, e lezot ki ozordi ankor pe esper peyman.

Lo kote Gouvernman Lokal i plis ki 6mwan pour kontrakter ki’n koup pye dibwa e lo kote Minister Lagrikiltir pe al lo 1 an ki en kontrakter ki’n fini louvraz e i ankor pe esper son peyman. Zot fer sa bann dimoun monte, desann e zot donn tro bokou leskiz ki pa akseptab.

Annou get en kou son prosedir normal ki sipoze ganny swiv letan en travay i ganny konplete Mr Speaker.

Obtenir fayl sorti kot zofisye, Project Planning and Implementation ki pe demann peyman.

Verifye ki tou dokiman ki zot bezwen i la e i annord. Enkli portre ki ti ganny tire avan ki louvraz ti ganny fer kot i posib e la i spesifye if applicable.

Saevdir pa dan tou sirkonstans ki zot bezwen sa. Atas laprouvasyon sorti kot POU – Procurement Oversight Unit ki dir ki louvraz i byen. E in ganny fer dapre scope e plan ki kontrakter ti agree lo la.  E si sa proze pa’n pas kot POU avan ki kontrakter ti ganny laprouvasyon pour komanse, la kot sa kliyan i komans ganny retar. E dan ka kot sa proze i par lao sa threshold 150mil i pran plis letan e la i bezwen pas atraver 3 Board Evalyasyon.

Enn, Procurement Civil Work Committee e National Tender Board.

Dezyenmman sa louvraz i annan 6 louvraz i annan additional cost i bezwen pas kot Consultancy Committee e osi Goods and Services Committee pour approval. E byensir kot sa Minister konsernen.

E lo lot kote Procurement Oversight Unit e dan mazorite ka pour bann par lao 150mil sa Board i demande pour annan en retention ki en sonm 5 poursan ki ganny retenir pour en peryod 6mwan apre ki louvraz in ganny konplete.  E dan ka kot proze par lao 750 mil la sa 5 poursan retention i ganny retained pour 1an.  E sa i devret reflekte e ganny eksplike ler sa kontrakter i siny son Kontra.

En kopi Kontra ki ti ganny sinyen i bezwen ganny atase ek sa form ki pe demann peyman. Zot osi bezwen dokiman kot en bout peyman in ganny donnen kot i le ka sa osi i bezwen ganny soumet ek sa dokiman ek sa endorsement form.

Rapor evalyasyon par project officer, dokiman ki montre ki scope travay in an akor avek evalyasyon e kopi plan ki ti ganny aprouve par Planning kot i le ka. En portre final apre e ki travay in konplete, ki’n ganny tire lo ou menm pozisyon e la zot egzize on the same angle ek sa enn avan ki louvraz ti fer e rapor site vizit ki’n ganny fer.

E en kontrakter in dir mwan ki parfwa ler zofisye i retourn lo site pour tir portre pa toultan ki zot  ganny menm angle, akoz ler debwazman sirtou in ganny fer angle i sanze e la zot komans ganny retar ek sa bann keksoz ki pa zistifye.

Zot bezwen osi form ki endike ki travay in konplete ki ganny sinyen par zofisye proze ek DA dan distrik dan ka proze Gouvernman Lokal.  Sa ki apel certificate completion form. E osi en rapor vizit ki quantity surveyor in fer, pour fer sir ki louvraz i 100poursan byen.

E QS i bezwen osi prodwir en validation certificate pour atas ek sa bann dokiman. Invoice ki kontrakter in fini ganny aprouve par sa Departman oubyen Minister. Dokiman taks sa kontrakter e kopi son kont labank.

Mr Speaker si tou sa bann dokiman i annord prosedir peyman i demare. E dapre Minister Finans sa i pran 3 a 5 zour e pli bokou letan se 2 a 3 semenn e sa bann dokiman e si bann dokiman pa annord fayl pour retourn kor Project Planning and Implementation section pour ratifikasyon. E kot Minister Finans zot gete si kontrakter i liste dan sistenm e si non i pran 2 a 3 zour pour met li dan sistenm e ganny son detay labank. Sa kliyan i bezwen anmenn en let pour demann peyman ki ganny sinyen par financial controler dan sa Departman kot in fer sa louvraz.

E sa let i devret ganny atase ek tou lezot dokiman avan ki i ganny anvoye kot Minister Finans.

E si napa, la fayl i retournen kot seksyon proze pour met en kopi let avek.  E li Minister Finans i dir ki si tou dokiman final i ariv kot zot dan 3 zour travay zot fini peye.

E kot i annan en batch i pran 5 zour pli tar pour zot peye.

Ki bann difikilte ki bann kliyan i rankontre? Premyerman i afekte zot cash flow.  Akoz zot menm ki fourni materyo debaz pour fer sa louvraz dan ka konstriksyon, e bokou zot napa sa Kapital dan rezerv.  E sa i met zot retar pour zot ganny en lot louvraz akoz konmdir zot menm, ler zot larzan in pri dan Kof Gouvernman, zot napa sa larzan dan lanmen pour aste materyo pour konplet en lot louvraz. Tandis ki bann gro lakonpannyen ki biznes in fleri, zot, zot cashflow i annord e i pa ganny afekte. E zot annan lavantaz.

Mr Hoareau i dir mon kantmenm i oule al rod en kredi avek sa lavi konmela pa toultan ki i fasil pour li ganny materyo kredi.

En lot difikilte ki zot rankontre se ki mazorite sa bann dimoun i annan en fanmir. E zot bezwen kontribye kot lakour. E i vin pli difisil pour zot si zot annan zot prop proze sa osi i ganny met retar. Sa ki annan taks pour peye, i war li pe ganny sirsaz. Si zot annan de lezot travayer pour peye, sa en lot problenm, zot war zot bezwen al prete.  Sa ki annan travayer etranze i war li difisil pour transfer zot larzan.  I annan ki  dir ou ler zot check i retournen. Parfwa zot tyek i retournen akoz larzan in fini dan zot kont e la zot ganny problenm ek labank.

Sa ki annan standing order ek labank swa pour lasirans, swa pour CSR, i war zot pe bezwen pe fer lot demars pour evit penalty late payment.  Sa ki annan alimoni i war zot fer fas avek problenm kot Tribinal lafanmir.

Mr Speaker bokou sa bann dimoun i fristre e ou kapab konpran ler zonm pa pe anmenn larzan kot lakour ki bann lezot problenm domestik ki i fer fas avek.  I annan en zenn kontrakter i dir mwan ki la i napa swa, i bezwen war li al fer zournen kot en lot lakonpannyen, in perdi tou son travayer ki’n kite al rod lot lanplwa, e si pour al rekomanse i bezwen al rod en lot.

Mr Speaker enn sa bann kontrakter i dir mon ki li i war li byen drol ki zot bann pti kontrakter zot bezwen pas dan tou kalite difikilte pour zot ganny zot larzan, tandis ki bann gro lakonpannyen zot, zot peyman i ganny fer vitman e sa i montre ki i toultan annan sa zafer de pwa de mezir ki ankor pe ganny servi dan Gouvernman pour pini lezot.

Ler ou koz ek bann dimoun dan Finans zot dir ou prosedir i konplike. I annan tro bokou birokrasi dan sa bann prosedir. Tro bokou travay papye ki met retar prosedir, tro bokou pas, isi pas laba ki lakoz sa retar, zot osi fer mwan konpran ki ler dokiman i ariv kot zot si i pa annord, zot pa kapab peye.

E zot definitivman fer fayl retournen e parfwa fayl i retourn 2 a 4 fwa selman ler zot satisfe ki wi la i ok, la ki zot kapab avans peyman.  E se la ki pran sa de a trwa zour pour sa kliyan ganny notifye pour peyman.

Mr Speaker avan mon kontinyen mon ti a zs anvi fer resorti pour dir, pour en dokiman sorti kot Minister Finans pour 2018 dan 129 ka, zis 7 ka ki’n pran 3 semenn apre ki Minister Finans in ganny sa bann dokiman konplet.

Zis 5 ka ki’n pran 3 semenn pour zot ganny pour avans peyman e set ka in pran 2 semenn.  apart sa tou lezot in regilye.

En pour 2019 ziska 30 Zen dan 64, 65 case zis 4 case ki’n pran par lao 21 zour pour fer peyman.  Apre ki Minister in ganny dokiman ki tou keksoz i annord. Ozordi kot teknolozi i byen avanse mon pa war akoz bann Minister i ankor pri dan papye pour fer bouze bann prosedi ki ti ann kapab fer par email pour bouz en pe pli vit, olye fayl i bezwen bouze sorti dan en biro pour al dan en lot, par fwa zis pour ganny en sinyatir otorizasyon.   E en kantite fwa zofisye i dir ki fayl i perdi dan semen. Dokiman i manke, oubyen ganny misplace dan pe ale vini.

Sa i osi fer zot fristre e fer zot louvraz pli difisil. Mr Speaker lontan nou ti dir kankrela i manz papye. Be ozordi nou pe bouz ver en sistenm e-government. Mon krwar ki dan sa prosedir peyman, nou devret pe osi bouz dan sa direksyon e minimiz lakantite papye kot pa neseser. e sa ava akseler bann prosedir e i a vin mwens lenkonvenyans pour bann zofisye  proze e a lafen defen sa kliyan ki ava annan satisfaskyon.

Mon konpran ki i bezwen annan prosedir pour fer sir ki napa koripsyon.  Be enn ler Mr Speaker ou a krwar ki sa bann prosedir i vin en lot baryer oubyen pinisyon, ki sa bann kontrakter i sibir pour ganny zot peyman. Akoz sak  fwa ki zot demande ki pe arive ek zot peyman, zot ganny dir fayl i ankor pe process e parfwa zofisye li osi i koz manti ek sa bann kliyan e sel fason fer sa bann dimoun aret fatig zot se dir ki son case pe ganny process. I bezwen espere kantmenm fayl pe asize lo son latab e i konnen ki nanryen pa pe bouze.

Mr Speaker mon ti koz ek en pti kontrakter, ki li i ti’n fini konplet en louvraz pour Minister Lagrikiltir depi Novanm 2018. E se selman mwan pase ki in ganny son larzan.  Sa msye i dir ki i ti’n fatige monte desann dan biro pour li rod son larzan. La en lot keksoz ki fer bann kontrakter fristre ; zot ganny anvoye parey lavant later an term kreol.

Parfwa zot ganny dir louvraz pan ganny fer dapre scope. Oubyen scope pa’n an akor avek sa ki ti ganny agree lo la. Kontrakter i argimante pour pey zot dapre Kontra e de lot kote Minister li i refize. Se sa bann kontrakter ki perdi e en msye i dir mwan parfwa nou bezwen zis sede akoz zot kouto nou lavyann. I bezwen aksepte sa ki zot in propoze malgre pa li ki’n sanz scope sa louvraz.  Akoz se zot ki perdi tou si i pa aksepte. E in pran plis ki 8 a 9 mwan pour li ganny son larzan.

Mr Speaker sa bann kontrakter i dir ki souvandfwa ler louvraz in komanse zot sanz keksoz o-fir a mezir parfwa pour aziste ek topografi landrwa e sa devret sa Departman pour fer prosedir e notifye POU ki scope louvraz in sanze e non pa esper ler louvraz in fini ki zot notifye oubyen ler quantity surveyor i vizite pour donn son rapor ki pa an akor ek dokiman dan fayl e la sa problenm ale, vini i komanse. En lot i dir mwan s aki fer li pli ankoler, se ler i al kot sa zofisye i war son fayl ek son check lo latab me i ganny dir i pa ankor pare.  ‘’Ler i a pare mon a call ou,’’ e se selman 3 mwan apre ki zot call li.

Dan en lot ka Mr Speaker i annan bann pti kontrakter ki koup dibwa dan distrik. Zot, zot peyman i tonm direkteman anba Gouvernman Lokal. I annan ki sub contract ek lezot kontrakter ki ler i met tender i pa gannyen.  Zot, zot kategori ki pe ganny plis pini.  E mon asir ou ki preski nou tou dan nou distrik nou annan sa bann dimoun ki pe rankontre difikilte. Sa bann pti kontrakter ki koup dibwa, zot ganny bann leskiz parey ;- ‘’PS dan pei, e sa ki pe ranplas PS pa oule siny okenn dokiman.’’ E 3 kar ditan i pas son letan out of office.  E bokou fayl i akimile lo latab tandis ki sa bann pti kontrakter zot, zot pe gob divan.

E ler PS i retournen i bezwen vin deal ek bokou fayl ki’n akimile e peyman i ganny retar. Mr Speaker a sa pwen mon poz mon lekor en kestyon.  Si les dir demande sa PS i absan pour 6 mwan, sa dimoun ki’n travay i pour bezwen esper pey lakonsekans e met li lo lalis espere?  Eski ler PS oubyen lot zofisye i absan tou keksoz i ganny met lo en poz?  Sa i pa akseptab. E i montre klerman ki mannyer ladministrasyon Mr Faure i kontinyen fail sa pep.

Lot i dir mwan tou papye in fini process ler in ariv kot trezor pour fer peyman final i ganny dir ki papye i mal. e i esper 3 semenn pour koriz papye e se selman semenn pase ki in ganny son larzan.

Mr Speaker i annan zofisye ki telman visye dan pe pini sa bann pti kontrakter ki zot menm dir ki Lasanble pa ankor vot lo larzan. I annan ki dir ki zot bezwen fer sir ki tou i annord, pour zot pa al rann kestyon devan, reponn kestyon devan FPAC.  E sa i pran pli bokou zot letan.

A sa pwen mon ti a kontan reasir bann kontrakter ki ankor pe esper, fer resorti ki Lasanble Nasyonal in fini vote lo Bidze depi Desanm 2018.  E napa okenn Bidze Siplemanter ki’n vin devan Lasanble depi sa lannen ziska prezan. Aret servi Lasanble koman leskiz pour pa pran zot responsabilite!   Mon krwar Mr Speaker i annan tro bokou leskiz ki ganny servi pour pa pey sa bann pti kontrakter e zot kontinyen pas blanm partou kote.  Ler lannen pe fini souvan zot servi sa leskiz larzan in fini freeze, e zot bezwen esper lannen prosenn – lannen swivan.

E ler i ariv komansman lannen zot servi leskiz ki Minister Finans pa ankor donn alokasyon Bidze, e peyman pa kapab ganny fer dan sa 3 premye mwan.  Me sa dokiman ki mon’n gannyen sorti kot Minister Finans, i endik klerman ki ti napa en standstill lo peyman.  Parski le 29 Zanvye 2019, bann Minister Finans pour bann dokiman ki ti annord in komans fer peyman.  Alor aret servi sa bann leskiz silvouple!

Akoz pour mwan i pa akseptab pour en Minister ou Departman Gouvernman, pour fer en dimoun esper plis ki 3 mwan pour zot ganny peyman ler zot in fini konplet en travay, e ki sa Minister i satisfe ki louvraz in konplete e i lo standar.  E mon bezwen dir Mr Speaker i annan kontrakter ki dir zofisye parfwa i dir zot, fodre donn en pti kasaz pour fer peyman pas pli vit.  E akseler prosedir peyman.  Sa i apel koripsyon.

Detrwa lannen pase Parti US ti vin avek en motto pour dir dimoun ‘’Leve Debrouye’’. In menm annan en batiman ki apel batiman leve debrouye. Be ozordi nou war kot sa menm Gouvernman ki ti dir ek  dimoun leve debrouye zot menm ki pe fer sa bann pti kontrakter vin parey bann mandyan pour ganny zot larzan apre ki zot in fini konplet en louvraz pour sa Gouvernman.

Mr Speaker atraver sa Mosyon nou pe dir ek Gouvernman, annou larg lanmen nou bann pri kontrakter e les zot debrouye. An terminan Mr Speaker les mon a dir ki sa bann pt kontrakter pe esper zot larzan, zot pa enterese ek Referendum zot!   Zot pa enterese ek license moter zot! Me zot pe dir ek Lasanble rod zot larzan pour zot kapab met en pe manze lo lasyet zot fanmir, e pour zot kapab konbat ek sa pri lavi.

Se sa ki zot preokipasyon Mr Speaker.  E se pour sa ki Mosyon pe demann Gouvernman pour ekout zot lavwa! E nou koman en Lasanble annou siport sa Mosyon dan lentere bann pti kontrakter, ki ozordi pe pas dan en kantite problenm.

Mr Speaker avek sa I beg to move.

 

(APPLAUSE)

 

MR SPEAKER

Mersi Onorab Esparon.  Okenn Manm k ioule segonn Mosyon. Yes Onorab John Hoareau.

 

HON JOHN HOAREAU

Bonn apre midi Mr Speaker, bonn apre midi tou dimoun a lekout. Mon oule segonn Mosyon Onorab Esparon, mon oule sa lokazyon pour mwan dir enn de pti mo osi.

 

MR SPEAKER

Mersi Onorab. Mosyon i segonde, ou kapab proceed avek ou lentervansyon.

 

HON JOHN HOAREAU

Mersi Mr Speaker.  Mr Speaker mon oule kontribye enn de pwen lo sa Mosyon Onorab Esparon ki pe demann Gouvernman pour onor son komitman e pey bann kontrakter atan apre ki zot in termin zot kontra.  Sa Mosyon i annan bokou merit akoz mon osi mon ganny call an plizyer repriz sorti kot plizyer kontrakter ki pe demande pour call bann Lazans konsernen oubyen bann Departman Gouvernman, e demande ki zot ganny peye apre plizyer semenn ki zot pe esper zot larzan apre ki zot in konplet en proze.

Mr Speaker parfwa i pran plis ki 6 mwan, ou menm plis ki 1an pour en dimoun ganny son larzan.  Parfwa zot zis ganny en bout larzan e en lot bout larzan pli tar.  Par ler zot ganny demande pour fer zot invoice pour en interim payment.  Me ler zot al fer li, zot pa ganny sa larzan ki proporsyon avek lakantite travay ki zot in fer.  Annan de ler menm si sa invoice i ganny anvoye Desanm, prosedir ki fer zot pa ganny zot peyman, zot ganny li selman lannen answit.

E mon mazinen sa i baze oubyen i relye en pti pe avek sistenm cash basis accounting ki Gouvernman pe servi.  Mr Speaker i annan bokou lenzistis  e double standard dan sa travay. Parfwa kontrakter i dir ou ki gous ki bezwen marse.  Oubyen menm serten zofisye servis piblik, i fer zot krwar ki zot pour koz avek Minis pour fer sa bann prosedir vin pli vit, kan nou konnen ki sa i zis bann zwe politik.

Tandis ki i annan serten lakonpannyen etranze parey SIFU en lakonpannyen Sinwan ki li son larzan i toultan ganny fast track li. Mr Speaker sa sityasyon i fer ki nou pe kontinyelman viv dan pei ki striktir servis piblik pa pe fonksyonn normal. I pa normal dan lesans ki ou pa kapab kontinyelman pe siplir avek en zofisye Gouvernman pour fer en servis ki swadizan gratwit me ki ou menm ou, ou pe peye atraver taks.  Sa sityasyon i artifisyel e inefektif ki fer menm pour en bus shelter annan de ler ou bezwen vin demann devan Lasanble. Pour met detrwa bin osi dan landrwa piblik ou bezwen vin demann devan Lasanble. Pour met streetlights ou bezwen fer menm zafer. E sa pa neseserman louvraz en Lasanble! Lepep i fristre akoz napa nanryen ki pe fonksyonnen e L’Egzekitiv pa pe delivre!

En Lasanble i annan louvraz Lezislatif ki pli serye pour avans sa pei pli devan. Mr Speaker mon konsyan ki i annan serten prosedir ki Minister Finans i bezwen aplike anliny avek bann prosedir accounting pour bann proze anba capital expences. Par egzanp verifikasyon levidans parey portre avan e apre.

Verifikasyon procurement approval, verifikasyon bann dokiman Kontra, verifikasyon si annan okenn peyman devan davans, ki’n ganny peye, rapor evalyasyon, sertifika konplisyon, dediksyon taks e lezot ankor.

Mr Speaker ler i annan sitan bokou prosedir ki sitan long avan en desizyon i ganny pran, e sitan bokou paper work kot papye i bezwen pas dan plizyer lanmen i ogmant birokrasi.  Sa i fer mwan mazin parol ansyen Minis Finans ki ti dir ki gaspiyaz letan i kree lenflasyon.

Mon krwar ki menm si Minister Finans i bezwen a tou pri annan bann mezir ki anmenn latransparans, rann kont e bonn gouvernans, me napa okenn rezon ki sa bann prosedir pa kapab ganny fer, dan en fason pli senp e pli vitman e en desizyon ganny pran dan en dele letan pli kourt posib.

Dizon en semenn sirtou pour bann proze ki pa anba en valer R150mil. Mr Speaker souvan fwa an plis ki bann prosedir accounting, nou vwar ki i annan bokou trenn lipye, bokou lenkonpetans, mank linisyativ e bokou vir an ron dan servis piblik.  San dout sa i enn bann kareteristik classic ladministrasyon Mr Faure.  Ler ou analiz sa problenm o fon ou vwar ki serten problenm i problenm ladministratif osi, e an menm tan en problenm performans dan travay, par serten travayer. Ankor mon repete serten travayer.

Fodre dir ki i annan bokou travayer ki montre bonn konpetans e bonn bon eleman dan servis piblik. Les mwan eksplike akoz mon pe dir sa. Annan de fwa ler ou demann Lotorite pour entervenir pour ou konnen ki pe arive avek peyman en dimoun,  ler ou telefonnen dan bann lofis konsernen, rezon ki zot donn ou pour bann retar par fwa pa zistifye, pa fer sans. Annou analiz bann rezon ki pli popiler ki ganny donnen pour bann retar ;

(1)   Sa zofisye pe travay lo dosye in al konze e sa papye i dan son biro.

(2)  Zot annan tro bokou louvraz.

(3) Serten dokiman i manke.

Mr Speaker si en zofisye in pran konze ordinerman son louvraz i ganny delegate avek bann lezot travayer ki la.  Si zot vwar ki i annan tro bokou louvraz sa supervisor i bezwen ed son travayer pour reorganiz son letan.  E esey vwar avek li ki kantite letan posibleman pe gate dan en lazournen, san fer okenn travay prodiktif.  Answit kas sa bann latitid kill time ki souvandfwa i annan e entrodwir management by objectives kot bann target i ganny set pour konplet bann travay.  Sa i a fer ki son travay i a vin pli efektiv.  Ou kapab osi get dan posibilite travay apre ler normal pour en pti pe plis lapey. Oubyen menm anploy en pe plis dimoun si i neseser.

Mr Speaker sa se bann size performance management e i enportan ki nou pran kont. Mon rapel tre byen Onorab Simon Gill ti deza demande dan Lasanble apre ki nou ti pe koz lo sa size performance avek seksyon DPA, ki zot fer en lodit lo servis piblik zisteman pour adres sa size performance ek prodiktivite.  Mr Speaker si i annan en dokiman ki manke, en zofisye i devret pran linisyativ pour zis pran telefonn e enform sa kliyan, non pa les son papye dormi lo latab pour plizyer semenn, tandis ki sa kontrakter li i pe esper son larzan vitam aeternam. Ankor dan sa ka nou vwar, nou kapab konstate ki mank training lo bann size relasyon piblik e ki bann fason ki nou kapab fer nou lofis vin pli efikas.

Nou lo sa kote latab, nou’n toultan lager lebra kase pour pli bon kondisyon travay sirtou dan bann letan Bidze, i ganny prezante, nou’n toultan demande ki Minister i fer provizyon pour plis devlopman profesyonnel pour zot staff.

An menm tan nou konstate e nou osi konstaman pe lager pour travayer ganny en pli bon Scheme of Service kot ler en travayer i ganny son lapey i ganny sa ki i merite. E non pa, i pa ganny gete si i ek nou, oubyen si i pa ek nou pour li ganny okenn promosyon.  Oubyen gete si i en aktivis en parti pour li ganny promosyon oubyen demosyon. Nou’n toultan demande ki sa zafer ‘ek nou pa ek nou’ i ganny met dan bin listwar. E bann travayer i ganny sa lepanouisman pour zot debrouye e ganny zot lavi. Sa set akoz LDS i krwar dan meritokrasi kot sa ki travay dir e montre responsabilite, i ganny byen rekonpanse.  A mon avi se sa konbinasyon ki pour rann nou servis piblik pli efektif.

Mr Speaker en lot pwen ankor ki mon oule met lanfaz lo la se dan lepok modern ki nou pe viv ladan, nou bezwen et realis. San en progranm sistematik pour plis e-governance nou pour reste deryer. Set atraver digitalization, intraneting, internet banking, bann biro Gouvernman pour kapab redwir bokou birokrasi, e vin pli konpetitiv par rapor avek bann pei dan larezyon. Sirtou ler nou pe get ‘the ease of making business.’ Ler mon pe koz lo intraneting mon pe koz lanfaz lo bann platform telekominikasyon ki lyez bann diferan Departman e ki fer serten prosedir otomatikman.

Mr Speaker nou’n vwar ki SRC in fer serten zefor pour al dan sa direksyon avek son progranm ASYCUDA world. Minister Lasante pe osi al dan sa direksyon avek son sistenm lasante enformatik, Health Information System. Dabor kestyon ki mon pe anvi demann Minister Finans akoz ki zot osi zot pa al dan menm direksyon e get dan posibilite modernize dan sa lepok ki nou pe viv.  E ranmas tou bann lenformasyon lo bann proze sorti dan bann diferan Minister dan la menm fason. Sa i a redwir letan ki nou pey kontrakter e donn lezot servis olye zis asize e trenn lipye lo bann papye kot nanryen pa bouze.

Mr Speaker ler kontrakter pa ganny son larzan, dan en dele letan rezonnab, i annan bokou reperkisyon lo son cashflow, lo son abilite pour li pran en lot kontra akoz son overheads ki i bezwen peye.  Son travayer pa konnen ki son boss pa’n ganny peye. Li i pe mazin li osi ki mannyer i pour met en pe manze lo lasyet dan lakour. Alor dan sa ka i sorti ek son kontrakter e i al rod en lot travay.  Li sa kontrakter i perdi son travayer akoz retar peyman. Alor Gouvernman i devret sezi sa loportinite pour get en pe o pli o profon lo sa size.

Mr Speaker parfwa en kontrakter i osi annan loan ek taks pour li peye. E sa i fer ki i tonm dan aryeraz.  La zot ankor bezwen, zot ganny ankor pini parski zot bezwen pey sirsaz. Finalman ou vwar ki sa i touy sa pti biznes.

Mon’n vwar sa ariv tro souvan e nou lekonomi i sa pa fer byen pour nou lekonomi akoz i fer li aptisi. Ler sa bann kontrakter i ganny trete koumsa i fer zot fristre e menm degoute pran travay Gouvernman. Mr Speaker parey mon’n fer resorti sa sityasyon osi i kapab osi annan en lenpak lekonomi kot i ede redwir krwasans. Alor ex- Minister Larose ti annan tout afe rezon pour li dir li ki lenflasyon i fer monte kou lavi.

Mr Speaker mon oule osi sezi sa loportinite pour pas en mesaz avek tou sa bann kontrakter e dir zot ki nou lo nou kote LDS nou konpran tre byen zot problenm e nou senpatiz avek zot.  Nou la zot kote se pour se la ki nou’n anmenn, ki Onorab Esparon in anmenn sa tel Mosyon.

Me fodre zot konpran ki nou pa dan L’Egzekitiv e se US ki an kontrol L’Egzekitiv. Si lannen prosenn zot met nou a latet L’Egzekitiv nou pour fer sir ki nou kas tou sa bann baryer biznes e ki nou pa les, e ki nou fer zot al an avan e fleri. Nou pa les zot dan labandon. Nou valoriz zot kontribisyon dan lekonomi pei, sirtou ki laplipar bann pti kontrakter i rod travayer Seselwa e nou donn zot tou nou sipor.

Mr Speaker an konklizyon, mon oule met an somer sa detrwa pwen ki mon’n fer resorti.  Mon krwar i enportan pour Minis  Finans, Departman Procurement e lezot Minister i konsidere met zefor pour met plis teknolozi dan ladministrasyon servis piblik.

Met lanfaz lo e-governance. Dezyenmman met lanfaz lo devlopman profesyonnel, amelyor bann kondisyon travay e anmenn plis monitoring lo performance e training dan travay, koup la birokrasi e fer servis piblik vin pli efektiv. Avek sa Mr Speaker, mon pour donn sipor sa Mosyon.  Mersi.

 

MR SPEAKER

Mersi Onorab Hoareau. Onorab William.

 

HON WAVEN WILLIAM

Mersi Mr Speaker. Mr Speaker mon ti a kontan aport mon sipor pour sa Mosyon le fe ki mon vwar ki sa Mosyon i annan merit. Mr Speaker me letan mon pe koz lo sa Mosyon mon ti a kontan tous serten bann size ki mon santi i ase enportan.  Akoz baze lo leksperyans mon’n gannyen dan distrik. Mon vwar pour dir i annan bokou dimoun ki bann pti kontrakter, ki pe pas atraver bann soufrans.  Parfwa zot vin viktim petet pa akoz i lezot dimoun me petet mank serten konesans osi tou. Mr Speaker sa lespri ‘’Leve Debrouye’’ nou bezwen regard li dan son fason pli laz. Enn ki fek komanse avek enn ki lontan in komanse in etablir li, i annan pli lavantaz ki sa enn ki fek komanse.

Mr Speaker ozordi en sarpantye in vin en kontrakter, en mason in vin en kontrakter e ou annan dimoun osi petet ki pa annan sa metye me selman in fer vin travayer ki annan konesans dan bann diferan fason pour osi vin en kontrakter. E Mr Speaker mon pour partaz en leksperyans. Mon rapel premye fwa ki mon ti vizit Moris letan mon al laboutik ou ti demann en limonnad so, i ti annan en pri, en limonnad fre ti annan en lot pri. Sa ti sokan me epi ou realize pour dir be regarde be sa limonnad so avek sa limonnad fre ki ou bezwen met ou deep on i annan en kou adisyonnel, ki fer ki sa limonnad fre otomatikman i pour pli ser  ki sa limonnad so. Me kestyon ki mon anvi demande se ki eski tou nou bann dimoun ki nou pe dir zot pti kontrakter, eski zot pe vreman fer bon kalkilasyon letan zot pe donn zot kotasyon?

Mr Speaker mon pour dir sa akoz sa i en keksoz ki tre enportan, san leksperyans nou kapab mank bann lenformasyon ki fer ki enn letan nou prezant nou kotasyon i pa neseserman i sa vre pri ki nou merit pe sarze.  E at the end of the day letan nou vwar pour dir nou kapab perdi profi, nou taye nou donn en kase roule, me finalman se nou menm nou ki ganny pini akoz Lotorite pe dir be regarde tel keksoz ou pa’n sivre byen.

Me an menm tan Mr Speaker mon santi pour dir i annan en pti pe mank konpasyon osi tou akoz mon krwar sa dyalog ant kontrakter avek sa dimoun ki pe donn Kontra, mon krwar nou devret pe verifye plizyer keksoz ki an fen kont ki nou napa bann dimoun ki pas dan bann difikilte.  E mon lot pwen se ki dan distrik mwan sirtou mon kontan demann detay travay – the scope of work.

Akoz Mr Speaker i enteresan pour vwar, la fason ki serten sa bann scope of work i ganny detaye ki finalman ou vwar pour dir be vre petet sa kontrakter li menm li, san ki i demann kestyon, san ki i al rod leklersisman avek bann dimoun ki eksperyanse i pa vreman delivre parey.

Lot pwen ki mon anvi avanse Mr Speaker ozordi letan nou pe regard sa bann dokiman Kontra eski sa bann dokiman Kontra i one sided only?  Par egzanp dizon sa pti kontrakter in fini satisfer tou bann bann demann ki neseser, louvraz i ok, me sa dele letan, e sa perd par en zour ki sa pti kontrakter i gannyen lekel ki refund li?  Eski petet nou pa devret revwar prosedir ouswa Lalwa ki an plas, pour dir be regarde, mon’n fini fer tou si ti annan en dele letan pour mwan ganny peye ou’n depas sa kantite letan then pour mwan i en pert.  Akoz petet si mon pe depann zis lo sa Kontra ki mon’n gannyen mon napa detrwa eski mon pa vwar mon dan difikilte? Lekel vreman ki antre pour ranbours mwan pour sa letan perdi Mr Speaker?

De lot kote Mr Speaker letan pour al, ou pe al partisip dan tender, swa ou bezwen pey en larzan pour sa bann dokiman. Ou pey en larzan pour sa bann dokiman. Dizon ou pour al fer en vizit sa landrwa me pour ou deplase i annan en kou atase avek.  Pour ou al lo sa site visit. Me dizon ou pa gannyen sa Kontra? Me ou pa gannyen en refund, me selman ou’n pey en larzan pour ou ganny en dokiman. La mon vwar pour dir i annan en pti pe lenzistis petet nou devret revwar sa lapros.

Mr Speaker mon santi pour dir sa size i byen ki in vin devan Lasanble, mon santi pour dir i annan sa merit pour nou vwar, revwar la fason ki sa bann pti kontrakter zot pe ganny trete. E mwan mon ti ava advice, donn en konsey bann pti kontrakter. Le fe ki mon konn sa lanvironnman difisil, si ou pa’n manbre en byen kale, leve debourye i kapab vin en tourman tou. avek mankman konesans.

So mwan mon pe dir zot se ki petet ti a bon ki zot konsider avek zot labank annan en fasilite kredi pour kapab kal zot.  Akoz mon pe vwar pour dir bann konplikasyon ki zot gannyen, i pour arive, akoz parfwa ki zot bezwen kit en louvraz pour zot al fer lot. Nou sey konpran sa, me a lafen dimwan se zot bann travayer ouswa zot menm ki soufer akoz zot napa mwayen pour zot kapab donn sa saler akoz zot pe esper sa larzan ki zot in konplet zot travay lo la. Alors avek sa 2 pti konsey Mr Speaker mon santi enn poudir bann pti kontrakter zot bezwen konsyan pour dir ki letan zot antre dan sa bann biznes.  I annan bann serten keksoz ki zot menm zot, zot bezwen pe fer.  Parey mon’n dir en fasilite kredi avek en labank pour en mwan ouswa detrwa mwan i enportan pour kal zot, avek bann retar ki kapab vini.

An menm tan mon santi pour dir sa Kontra – mon dezyenm rekomandasyon se ki lo sa Kontra si tou bann kriter in ganny zwenn louvraz in konplete mon krwar pour dir si se lotorite ki responsab pour retar.  Mwan mon pe demande atraver sa Mosyon ki en serten porsyon larzan i ganny refund avek sa kontrakter, pour fer ki i pa santi li mwen fortinen. Avek sa de pti mo Mr Speaker parey mon’n dir,  sa Mosyon i annan son merit e mon pour donn li sipor. Mersi.

 

MR SPEAKER

Mersi Onorab William. Onorab Clifford Andre.

 

HON CLIFFORD ANDRE

Mersi Mr Speaker.  Mr Speaker sa Mosyon in vin dan nou Lasanble a en letan ki vreman enportan.  En letan kot tou dimoun  pe komans evalye son pozisyon, tou dimoun pe komans gete kote ki i krwar Sesel i merit ale, ki direksyon i krwar ki son pei i merit ale e lekel sa parti politik ki li i krwar i bezwen diriz son pei pour ki i ava annan en sityasyon ki favorab pour li, e ki son pei ava pe bouz devan. E mwan mon pe dir avek bann dimoun ki pe ekout nou ozordi, ki sa desizyon ki zot bezwen fer, se pa lot ki met LDS dan Gouvernman lannen prosenn!

 

(APPLAUSE)

 

HON CLIFFORD ANDRE

Mon pa pe ekspekte diferan avek lot kote, alors mon pour aksepte zot bann gognard ki zot pe fer akoz se sa zot bon lo la!  Me mwan mon pour dir ki letan ou’n ekout Onorab William fer son prezantasyon, ki bann kontrakter i konn byen zot drwa. Zot merit demann avek Gouvernman siny en Kontra avek mwan e dan sa Kontra i bezwen ganny mete letan i ariv lo son payment clause – akoz letan de endividi i fer en Kontra i annan en term  (Mr Speaker Onorab  mon pa konnen, Onorab  mannyer zot dir li? Onorab – avan William la, Onorab Loze, dir li letan mon pe koze ekoute.

 

MR SPEAKER

Onorab Andre tou Manm Lasanble Nasyonal 6enm Lasanble i annan en non.  Ok.

 

(Interruption)

 

MR SPEAKER

Sa i aplik pour zot tou, tou Manm nou adres nou bann koleg, en kote latab oubyen lot kote latab par zot non.

 

HON CLIFFORD ANDRE

Wi, wi mon ti pe adres li menm Mr Speaker selman mon ti ankor pe rod son non, akoz mon’n bliye ou konnen, i annan keksoz ki pa tro familye.  Alors i annan en non mon adres li, me selman si ou kapab dir li letan en lot Manm pe koze, i son devwar pour li ekoute apre i a ganny son sans pour li koze.

 

MR SPEAKER

Kontinyen Onorab.

 

HON CLIFFORD ANDRE

Wi i zot devwar pour demann avek Gouvernman, met dan sa clause peyman.  E akoz oubyen si ou pa pey mon apre en serten letan ki mon’n konplet ou travay i bezwen en penalti.  Akoz dan tou Kontra ki ganny fer ant de endividi, bann antre nou la anndan ki kapab dan biznes konstriksyon, i kapab konnen. Mwan koman en avoka mon’n war en kantite sa.

Mon koman en avoka mon’n fer Kontra dan sa zanr. Alors i enportan ki Gouvernman ki sipoze pe ankouraz bann Seselwa pour travay, pour devlope, e pour kontribye dan lekonomi zot osi there are subjected to sa bann kalite kondisyon.

Mr Speaker me kwa ki enportan ankor letan nou gete Gouvernman i sipoze pe uphold the Constitution. Konstitisyon letan nou get Lartik 32, i lir koumsa, Lartik 32 Mr Speaker i dir, ‘’the state recognises that the family is the natural and fundamental element of society and the right of everyone to form a family and undertakes to promote the legal economic and social protection of the family.’’

Lartik nou Konstitisyon i kler. Letan nou pe dir economic protection savedir sa msye oubyen sa madanm oubyen sa msye ansanm zot form en konpannyen, zot ale zot travay e se zot devwar dan Konstitisyon pour annan en proteksyon ekonomik. Alors zot bezwen fer sa. E letan zot travay i drwa Gouvernman pour pey zot. Pa fer zot soufer epi zot ale landmen demen tanto zot retournen.

Mr Speaker mwan koman en avoka mon’n vwar bokou dimoun ki vin kot mwan, in dir in fer en cheque oubyen in ganny sarze akoz in fer en cheque without provision.  Be letan i eksplik ou i en kontrakter ki’n travay ek Gouvernman.  E i sipoze dapre letan li i gete in fini travay, 3 semenn i ganny sa larzan dan son kont, e li in fer en cheque lo sa premis  – ennler i en post dated cheque Mr Speaker lo premis ki Gouvernman pour pey li. Gouvernman pa pey li, apre Attorney Zeneral oubyen sa lot dimoun i al aport kot CID, e li i ganny anmennen Ankour. Me selman letan ou gete per se se pa son fot, son fot sa landrwa kot in al travay.

Alors PS Thesee ti dir lotrozour ki Gouvernman i annan en prosedir letan ou’n konplet en travay i ti donn 10 zour, ki ou bezwen effect payment.  E sa nou kapab dir ozordi pa pe marse.  Alors Mr Speaker si nou fer en lareg, en polisi parey nou dir mon krwar premye landrwa ki bezwen enplimant sa Polisi se sa departman li menm pour li kapab desarz sa devwar ki sa bann pti kontrakter demen, i ava kapab zot osi desarz zot bann responsabilite pour zot kapab vin bann sitwayen enportan.

Mr Speaker letan nou pe get ankor dan Konstitisyon nou get lartik 35(a) ; 35 li i lir ‘’the state recognises the right of every citizen to work and to just and favorable conditions of work, and with the view to ensure the effective exercise of these rights, the state undertakes,’’ i mete en lobligasyon lo Leta e i dir ou to take necessary measures to achieve and maintain a high and stable level of employment as is practicable with the view to obtaining full employment.’’ Savedir i osi annan en devwar. En kontrakter i vin kot li pour fer en travay i son devwar pour li fer sir ki sa dimoun pe attain a highest level ki posib. Alors pa akoz nou pa pey li. Sa kontrakter i le attend en level ki pli o. i sorti lo en class 3i a mont lo en class 2, i a mont lo en class 1. Class 1 i rezerve pour selected few ?

Akoz ou pa pey li savedir i pa pour kapab devlope. I enportan ki zot konnen zot annan en bann dwa konstitisyonel bann kontrakter. 35 (b) Mr Speaker i dir, ‘’subject to such restrictions as are necessary in a democratic society to protect effectively the rights of a citizen to earn a dignified living in a freely chosen occupation proffesion or trade.’’ Sa kontrakter ki’n swazir pour li al fer, pour li al dan sa domenn konstriksyon, oubyen dan sa domenn ki i ete irespektiv cleaning oubyen whatever. Me  Leta i oblize pour li fer bann kondisyon pour li protez e i dir ou ‘’protect effectively the rights of a citizen to earn-’’ Mwan mon dir avek bann kontrakter met Gouvernman Ankour.  I pe vyol nou Konstitisyon.

Gouvernman i bezwen ganny taken to task.  I pe vyol Konstitisyon.  Alors akoz zot annan bann rekour konstitisyonel.  Akoz i zot drwa pour zot ganny peye, i zot drwa pour zot travay e Leta i bezwen garanti sa drwa li. Lartik 40 Mr Speaker i dir koumsa, ‘’it shall be the duty of every citizens of Seychelles.’’ C i dir ‘’to work conscientiously…’’

 

(Off-Mic)

 

MR SPEAKER

Kontinyen Onorab.

 

HON CLIFFORD ANDRE

‘’Conscientiously in a chosen profession, occupation or trade. ‘’ Mr Speaker letan mwan mon pe lir Konstitisyon mon war ki Gouvernman i en drwa ou sa sitwayen i annan son drwa pour li swazir avek son konsyans en profesyon ki li i anvi. E sa ki i anvi fer son enterpretasyon oubyen eksplike, i ava lir Konstitisyon letan i ariv son tour pour li lir, akoz mwan pa pour lir pour li, mwan mon pour li dan mon fason e a ma fason ! That’s my way of reading and I will read the way I want !

Sa ki anvi lir dan son fason i a free to do so Mr Speaker.  Mr Speaker mon ava kontinyen akoz mon  annan laparol. Letan Lasanble i aprouv Bidze pour sak Minister zot vin la devan nou Mr Speaker zot dir nou i annan tan milyon, pour tel proze, tel proze, tel proze.  Be akoz sa larzan pa la letan pour peye?  Kote i ale?  In servi pour fer miray? In servi pour fer en lot keksoz?  Aprezan napa pour pey sa dimoun i dir ou i pe esper lot quarter Budget pour li donnen.  Be eski sa en Gouvernman ki serye Mr Speaker?  Non! Mwan mon krwar lannen prosenn apart sa ki la dan Lasanble lot kote, tou lezot dimoun i bezwen donn sa lotorite LDS pour li fer diferaman ! Leksepsyon Onorab William. Konmsi zot bezwen serye.  Donn LDS anba direksyon Onorab Ramkalawan, pour nou kapab fer sa pei bouze devan e pour fer sir ki nou, nou onor nou lobligasyon.  E Seselwa (Mr Speaker Onorab Loze pe kontinyelman gognard mwan. dir li arete)

 

(Interruption)

 

MR SPEAKER

Onorab kontinyen.

 

HON CLIFFORD ANDRE

Ok mon pour kontinyen. Seselwa i bezwen kapab fer en swa kot dimoun pour ganny respekte e L’Egzekitiv sa letan e Lezislativ akoz tou lede pour LDS an mazorite, nou pour kapab respekte zot e fer sir ki Sesel i mars de-lavan.

Mr Speaker i enportan pour note ki i annan serten kontrakter ki li i ganny dir bid pour fer en travay bus stop, sa bus stop i kout R200mil pour fer me li i mete 1milyon, i gannyen tou li.  Me selman i annan bann tranzaksyon ki pase apre. Me selman li son peyman i ganny fer vitman li.  I ganny peye vreman, vreman vit, be akoz ki sa lot dimoun ki’n fer preski menm travay i pa ganny peye parey?  Akoz nou bezwen konpran ki pour dir en dimoun ki annan en class 2, i napa sa Kapital parey sa enn ki annan en class 1 Mr Speaker. Alors i bezwen sa larzan pour li kontinyelman fer marse. I annan bokou ka ki ozordi i vin Ankour e ladan zot dir ki sa bann dimoun pe fer human trafficking. Par le fe ki landrwa kot sa travayer etranze pe reste i pa konvenab.  Me si ou pa pey sa dimoun atan pour li kapab desarz son responsabilite. Ki mannyer ou ekspekte li kapab donn en landrwa ki conducive pour sa travayer reste ladan? I pa pour kapab.  I pa pour kapab akoz ozordi pour li lwe en landrwa i koute e sa dimoun ki pe lwe sa landrwa i dir li i pe ale e si i napa mwayen pour li pey a ler i dir li i met li deor alors i bezwen juggle avek sa bann keksoz ki annan.

Mr Speaker Onorab Esparon in fer en bon Mosyon e avan mon terminen mon oule dir sa ;- Onorab Hoareau in dir e-government. Ozordi Mr Speaker mon lo mon lili dan mon lasanm. Mon pey mon bill telefonn ek Cable & Wireless. Akoz ki Gouvernman i fer ou anrezistre li Mr Speaker avek Trezor pour en kont. Pou li kapab vwar ki tranzaksyon ki’n ganny fer.  Akoz i pa kapab fer sa e sa bann kontrakter i ganny peye atan? I koup lo sa bann sistenm papye ki egziste. Alors silvouple annou pa bezwen zis pran bann keksoz elektronik pour nou ekoute ki nou kanmarad i dir, oubyen pour veye ki senn la ki pe text ki senn la. Annou servi sa bann gadget, sa bann striktir, sa bann sistenm, sa bann devlopman lemonn, dan lavantaz pour nou kapab fer keksoz byen.

E tou sa bann kontrakter ozordi Mr Speaker zot annan en smart phone.  Zot annan en kont labank.  Alors i enportan ki Gouvernman i bouz dan sa direksyon.  E mon kapab donn zot garanti, bann ki pe ekout mon, bann kontrakter ki pe ekout waon, mon kapab donn zot garanti ki lannen prosenn ler LDS i vin o pouvwar sa bann keksoz pour ganny fer ! Mersi Mr Speaker.

 

(APPLAUSE)

 

MR SPEAKER

Mersi Onorab Andre. Yes Onorab Andre.

 

HON CLIFFORD ANDRE

Mr Speaker Onorab Loze in fer en akizasyon lot kote.  In fer en akizasyon lot kote.

 

(Interruption)

 

MR SPEAKER

Order! Order!

 

HON CLIFFORD ANDRE

E ki mon pe koze la?

 

MR SPEAKER

Order! Address the Chair Onorab.

 

HON CLIFFORD ANDRE

Wi Mr Speaker. Onorab Loze in fer alegasyon laba lot kote mon ti a kontan i retract sa alegasyon, oubyen at least eksplik son lekor la devan Lasanble.  Mersi.

 

MR SPEAKER

Bon Onorab mon pa’n port latansyon, mon pa’n tande kwa ki’n ganny dir, me parey mon’n dir depi bomaten i annan interjections ki ti pe ganny fer tou lede kote. Mon pa kapab port latansyon lo  tou keksoz. In fer li off-mic, mon pa’n konpran.  E nou pour kit li koumsa menm. Yes Onorab Vidot.

 

(Interruption)

 

HON AUDREY VIDOT

Mr Speaker mon le zis avek ou permisyon zis remind nou Lasanble ki nou live. I enportan letan nou koze la apre nou fer lekspresyon lo nou figir menm si nou’n tenny nou mic, annou veye kwa ki sorti dan nou labous.  Akoz Onorab Andre kantmenm i pa’n dir lo mic la, vizavi la lo screen la mon war son parol ki in dir – i pa zoli! Silvouple. Mersi.

 

MR SPEAKER

Mersi Onorab. Ankor,

 

(Interruption)

 

MR SPEAKER

Order! Order! Ankor parey mon’n dir mon pa kapab port latansyon lot ou keksoz e pa tou interjections ki mwan mon tande isi anler.  So mon pour bezwen zis kit sa.  Zis zot bezwen parey mon pe dir aport respe pour kanmarad.

Bon nou pour aret deba lo sa Mosyon la pour ozordi. Me parey mon ti dir bomaten mon annan en ruling pour mwan donnen. Ok.  Mon Ruling i al koumsa, swivan reaksyon Onorab Loze apre ki mon’n lir sa Right of Reply bomaten mon Ruling i koumsa. Onorab Loze ou reaksyon lo sa Right of Reply i pa permet ou rekomande pour etablir en Komite pour fer lanket.

Sa i ti selman ou reaksyon ki mon’n permet ou fer. Si ou anvi koman en Manm ki en Komite pour fer lanket lo sa bann alegasyon i ganny etablir, ou pour bezwen swiv Standing Orders e ‘’rules of procedure for  committees. ‘’Savedir ou pour bezwen amenn en Mosyon pour set up en Select Committee e osi propoz son bann terms of reference. Son TOR.

Mon ti a kontan zis fer referans ek Mosyon ki ti ganny move par Onorab Afif le 12 Desanm 2017 pour demann en Komite Lasanble pour regard dan lensidan an lyen ek en Manm Onorab ek en Manm Lafors Defans, e apre sa Komite ti prezant en rapor ek Lasanble.

So vwala direksyon ki mon pe donnen. Bomaten ler nou fer, ler the chair i pran en Right of Reply i normal ki nou les sa Manm kapab fer serten klarifikasyon, e oubyen prezant serten leskiz. I pa sa moman kot sa Manm demann Lasanble pour fer en lanket and all that. I annan bann prosedir normal ki nou swiv anba nou lareg travay pour nou fer  sa arive.  So vwala sa i mon Ruling. Mersi. Avek sa nou ava adjourn e nou repran nou travay demen 9er bomaten.

 

(ADJOURNMENT)