::
Home » Verbatim » 2019 » Verbatim Wednesday 29th May, 2019

Verbatim Wednesday 29th May, 2019

NATIONAL ASSEMBLY OF SEYCHELLES

Wednesday 29th May, 2019

The Assembly met at 9am

National Anthem

Moment of Reflection

Mr Speaker in the Chair

 

MR SPEAKER

Bonzour tou Manm Onorab e bonzour tou dimoun ki a lekout ki pe swiv travay Lasanble Nasyonal. Bomaten nou pour kontinyen lo deba ki’n komanse yer lo Mosyon ki’n ganny prezante par Onorab Waven William e Mosyon i lir konm swivan. ‘’An vi le fe sanzman klimatik atraver kalite letan ki nou pe eksperyanse e dega apre, sa Lasanble i demann Gouvernman pour revwar la fason ki i distribisyon resours pe ganny fer, pour deal avek bann tel evantyalite, pour redwir risk, permet aksyon vit avan ler zot lezot Lazans konsernen i arive e minimiz lenpak.’’

Bon bomaten parey mon’n dir i annan plizyer Manm ki’n eksprim lentansyon ankor pour koze.  E nou pour al deswit. Wi nou pour al deswit lo deba. Yer mon ti annan Onorab Valmont osi tou. Ou ti’n lev lanmen, ok? Yes Onorab Ramkalawan.

 

HON WAVEL RAMKALAWAN

Mr Speaker zis lo lapar nou Lasanble, mon kapab dir e lo lapar LDS – swivan bann zimaz ki nou’n war yer swar lo televizyon sa dezas e ki nou’n deza mansyonnen, mon krwar ki i toutafe normal pour nou koman en Lasanble, eksprim nou solidarite avek bann zabitan.  E dan distrik Anse Royale an partikilye ki’n pas dan en move karder yer apre midi espesyalman, e nou demande ki bann aksyon neseser i ava ganny pran, pour soulaz zot dan sa detres ki zot in trouv zot ladan.

 

MR SPEAKER

Mersi Onorab Ramkalawan. Onorab De Commarmond.

 

HON CHARLES DE COMMARMOND

Mersi Mr Speaker. Bonzour Mr Speaker, bonzour tou Manm Onorab e tou dimoun ki a lekout.

Mr Speaker mon swiv dan sa ki pe ganny dir la, e pour enform nou Lasanble ki sa solidarite osi nou’n deza pas li avek nou koleg Manm Onorab Lemiel e osi avek Gouvernman. Nou’n telefonnen personnelman.  Nou’n eksprimen le bi ki aksyon i bezwen ganny pran vitman. Nou senpatiz ankor ek sa bann sityasyon.  E nou Mosyon ki nou pe debat dan Lasanble yer e ozordi i tonm byen. I le moman oporten – appropriate e nou lans en lapel pour ranforsi kontenir bann entervansyon e lide Mosyon, pour dir ek Gouvernman silvouple etablir en sistenm aksyonner.

Ou konnen lontan Mr Speaker san ki mon al lwen, lontan nou ti kapab pran aksyon. Ki mannyer ozordi nou sipoze pe avanse, nou retarde dan pran aksyon?  Sa mon pa pe konpran.  Bomaten mon fek dir, letan Minis Pool par egzanp ti ankor kot Local Government, mwan mon rapel tre byen, e deswit keksoz ti bouze!  La ozordi mwan pe war i annan sa retar. Sa keksoz.  Mwan mon krwar nou bezwen, e en keksoz ki mon’n dir toultan donn distrik son Bidze pour li kapab pran son aksyon li menm!  Prezan li Minister fer oversight lo la.  Ou konpran mwan?  So sa ki mon pe demande se aksyon, aksyon e aksyon pour nou anpes e mitigate sa bann domaz.  E fer bann prevansyon.  Mersi.

 

MR SPEAKER

Mersi Onorab. Bon nou pa pe ouver deba lo la. Manm  ki oule entervenir zot kapab entervenir se direkteman lo Mosyon akoz nou pa pour anticipate argiman lo Mosyon. Mon pou donn laparol Onorab Silvanne Lemiel ki son distrik yer in ganny plonze en pe.  Onorab Lemiel.

 

HON SYLVANNE LEMIEL

Mersi Mr Speaker.  Bonzour Mr Speaker, bonzour tou mon bann koleg Manm Onorab.  Mon ti a kontan ozordi – mersi le de Leaders pour zot senpatiz avek nou Anse Royale pour sa ki’n arive.

Mr Speaker nou’n ganny nou apepre en 20enn case yer. I mazorite case flooding ki nou’n gannyen, ros deboule, lateras grennen. E yer mon’n kapab vwar en pe sa solidarite osi kot nou’n vwar bokou dimoun dan kominote ki’n ralye, ki’n vini, ki’n vin a led bann dimoun ki dan bezwen.  E ler mon’n ariv lo teren mwan, i annan serten keksoz ki ti’n ganny fer.  So mon profit sa lokazyon osi pour remersye sa bann dimoun ki’n volonter ki’n vini, Brigad Dirzans ti la.  Zot ti’n vini, menm si pa’n tro byen ekipe, me at least zot ti annan en raincoat, nou’n kapab al sey get bann dimoun en pti pe.  Ziska dan 9er diswar, mon’n lo teren pe pas kot bann dimoun pour sey regard zot.  Me sa ki nou demande Mr Speaker akoz parey yer letan mon’n dan enteraksyon avek DRDM, sa ki zot pe fer mon konpran, i se ki zot napa en vot – en larzan.  Se sa ki zot pe demande.

Zis ler ou pour get bann dezas Zanvye ki ti arive, Anse Royale nou ti ganny tape bokou ladan. Nou annan kantite keksoz ki pe ganny fer – pa ankor ganny fer sa bann dimoun pe ganny afekte ankor. Zot pe esper zot.  Zot bezwen Bidze R26milyon zis pour zot al sort out sa bann issues Zanvye. E la bann issues ki’n arive la i annan ki’n double lo sa ki ti annan avan.  E zis issues la li menm.  Nou get Les  Canelles pour mont kote Michelle Desnousse sa dega ki’n annan rose deboule, i en gro travay ki zot annan pour zot al fer, e i annan bokou plis larzan pour zot al depanse.

E sa ki zot, zot pe dir nou se ki kwa ki demande, se ki en Bidze ki deal avek bann zafer dezas – konmsi  imedyat ki pa bezwen al lo sa Development Committee or whatever pour zot pran en desizyon e se sa ki tarde. Sa ki zot pe demande petet – mwan mon’n dir zot petet dan zot Bidze apre zot a vin diskite zot a vin fight zot case avek nou.

So mon espere ki zot pe ekoute, zot a travay lo la Minister Finans osi pe ekoute mon krwar nou pour donn zot sa sipor. So mersi le 2 Leaders.  Mersi Mr Speaker pour call mwan yer swar ou osi pour donn mwan sa sipor, pour gete si …

 

(Interruption)

 

MR SPEAKER

Kontinyen Onorab Lemiel.

 

HON SYLVANNE LEMIEL

So mersi Mr Speaker.  Wi ou osi pour call pour donn sa sipor pour gete konmsi si tou keksoz pe mars byen.  E mon bann koleg osi lo kote latab osi ki’n call mwan pour donn sa sipor zot osi mersi bokou. Mersi Mr Speaker.

 

Mr SPEAKER

Mersi Onorab Lemiel.  Bon nou ava kontinyen avek deba lo Mosyon. Mon ava donn laparol Reginal Esparon.

 

HON REGINA ESPARON

Mersi Mr Speaker. Bonzour tou dimoun ki a lekout.  Sa Mosyon ki nou pe debat lo la depi yer i enn ki fer en lapel direk ek Gouvernman, pour revwar la fason ki distribisyon resours pe ganny fer an sa ki konsern bann evantyalite ki arive dan distrik.

E la nou pe koz lo bann dezas ki souvandfwa i arive san averti, dan letan movetan parey nou’n war yer, lateras grennen, pye dibwa tonbe, ki bous semen inondasyon, ros ki deboule e osi nou annan bann dezas parey lakaz ki brile.  Dan deba Mr Speaker nou’n war ki sa striktir ki an plas i met bokou retar pour distrik deal avek bann evantyalite ki i arive. E mon totalman dakor ek sa.  I annan tro bokou birokrasi pour bann senp pti keksoz ki ti an kapab ganny rezourd o nivo distrik ki bezwen al nivo santral. Tro bokou trenn lipye parey nou’n tann Onorab Lemiel menm in dir yer; tro bokou pass on the buck

‘’Pa mwan!’’

’Project manager!’’

‘’Vetting committee!’’

‘’PS ki donn dernyen desizyon!’’

Zot tou zot la lo menm planet. Preski dan menm batiman zis miray ek laport ki separ zot ek kanmarad, selman file i bezwen pran tren pour ariv kot zot.  Bokou fwa bann leskiz ki ganny donnen pa akseptab.

Par fwa zot dir ou file fodre retourn dan distrik pour ganny plis lenformasyon adisyonnel. Zot fer bokou letour avan ki sa malere i ganny ede. Selman pour bann ki zot anvi, zot fasttrack e san ki ou mazinen problenm in rezourd. Par lao tousala i annan sa Lazans Dirzans – DRDM ki li osi i annan son prop striktir e fason travay i la zis pour fer assessment.  Parey nou’n tande bomaten zot napa en Bidze e souvandfwa i vin donn latizann apre lanmor!

Akoz malgre ki par ler ou kontakte DRDM ler ou war ki i annan risk, ki en danze i kapab arive, zot pa fer gran keksoz.  Apard note e met dan file. Apre ou pa tann zot!  Petet apre ou pa tann zot, petet sa i zot fason travay ki byensir pa donn gran lespwar. An gro Mr Speaker Mosyon pe demande ki Lotorite Distrik i ganny empower avek plis resours pour kapab deal avek sa bann evantyalite, san ki zot bezwen esper head office pour aprouve; si pour ede si pa pour ede, oubyen esper lezot Lazans.  Sa DA enn ler i dir ou i oule fer keksoz, me son lanmen i anmare, i bezwen al rod 3 kotasyon eksetera; al lo vetting committee ki pran 6mwan e parfwa 9mwan pour donn en desizyon. E si sa problenm i ariv  dan lafen lannen pli move ankor Mr Speaker, akoz Vetting Committee i bezwen fer Nwel, fer Lannen apre i komans travay dan milye Zanvye!  Kote nou’n al mal?

Mr Speaker nou pa pe montre ledwa lo personn, me i normal pour nou kestyonnen.  I kler ki nou bezwen revwar sa ki an plas ozordi,  ki lo tou le de kote latab in dakor ki i pa efikas e i pa pe marse.  Gete kwa ki kapab ganny fer pour ki sa Lotorite Distrik son lanmen pa anmare, me ler i ariv en evantyalite i kapab soulaz sa sityasyon.  Wi bann ki konplike e grav i a fer li atraver santral. Sa napa problenm, me kot i kapab servi resours ki ganny met a son dispozisyon dan distrik, i ava ed sa sitwayen ki’n ganny afekte. Sa ki’n koz avan mon in koz lo Brigad Dirzans. Parey loter Mosyon in dir eski zot efektiv an se moman? Kekfwa dan serten distrik me pa dan tou.

I annan bokou konplent e kekfwa zis ti a pli ankourazan si sa allowance ki zot gannyen, ti a omwen ganny ogmante.  Wi zot pe fer en travay volonter, me pour donn zot sa lankourazman annou get dan sa R500 ki la depi 20an pase, depi 2002.  En kantite keksoz in ganny revize lo size reminerasyon pandan sa bann lannen. Me akoz zanmen Gouvernman Lokal pa’n war li neseser pour reviz sa R500 par an, pa par mwan me par an ki Brigad Dirzans i gannyen. R500 pour en lannen.

Nou dir met a dispozisyon bann materyo detrwa chainsaw pour koup dibwa ki tonm lo semen. Detrwa gran kouto, pyos, lapey eksetera pour debous rigol, pour servi ler i annan bezwen dan distrik. I bon.  Ti koumsa lontan. Selman avek bi ki ler ou bezwen i la a dispozisyon. Wi nou bezwen en bon levanter akoz par fwa sa bann keksoz i pour zis disparet sa ki annan accountability.

Mr Speaker les mon donn zot legzanp ki mannyer bann case i ganny deal avek la konmela. An se moman dan distrik Glacis, i annan 2 ka ki depi gro lapli Desanm lannen pase kot lateras in grennen. En ka Lilot e en ka Machabee.

DA in vini in vizite, portre in ganny tire, zofisye Gouvernman Lokal in vin lo site. File i dan lanmen sa ki konsernen.  Sak fwa ou gete ki pe arive, zot dir ou pe esper laprouvasyon.  En lot fwa zot dir ou pe esper vetting; en lot fwa i dir Vetting Committee pa konnen kan zot pour zwenn. Akoz sak fwa ou demande i dir pou pa ankor zwenn.  Sa 2 ka i ankor pe trennen.  Tir la met la. e si gro lapli i kontinyen tonbe, zot ka pour agrave.  Pandan ki Lotorite konsernen i kontinyen trenn lipye e lekel ki perdi?  Se da viktim. In plis ki ler pour Gouvernman sekwe li e konnen kwa ki son priyorite.

Annou al lo en lot size Mr Speaker. Mon mazin sityasyon semen La Gogue/Glacis an montan kot danm, pour bann ki’n deza pas lo sa semen zot konpran ki mon pe dir.  Ozordi i annan danze ki sa bann gro pye albizya i anmennen pour sa semen. Rasin i gonfle e kantmenm SLTA i met koltar rasin i pet koltar e semen i vin danzere.  Me si ler sa pti pye albizya ti ankor ptipti nou ti’n retir li e anpes li grandi pour fer domaz, ti an minimiz en pe lenpak e osi depans pour koup sa gro pye dibwa ki prezan in matir.

Prezan pa zis sa, pa zis sa zafer pet koltar. An mezir ki i grosi son rasin i kontinyen an kre dan later, i grenn lateras e okazyonn lerozyon, kot i fer li enstab e riske tonbe a nenport ki moman.

Prezan pour fer demann pour retir sa gro pye albizya en lot kosmar. Ou bezwen ranpli milyon papye. Ganny permisyon ek son met later si sa later pa pour Gouvernman. Si son met i pa Sesel en lot latet fermal. Vizit ek Lanvironnman, met lo tender – al lo vetting, si i annan difil elektrisite ki pour ganny afekte, involve PUC. En lot latet fermal.  E mon annan ka dan distrik ki koumsa; kot son met later pa Sesel e dibwa ki pe menas lot propriyete pa kapab ganny koupe. Nou bezwen osi atraver sa Mosyon demann Gouvernman pour revwar son bann pozisyon; par egzanp i zot dir poudir si son met pa la Gouvernman pa kapab mont lo later dimoun pour koupe san permisyon.

Nou bezwen rod en solisyon akoz par fwa i annan sa bann gro, gro pye dibwa ki pe menas propriyete dimoun, ki pe menas lakaz dimoun, e nanryen pa pe ganny fer, akoz son met sa propriyete pa Sesel.  E Gouvernman li i napa okenn Lotorite pour li mont lo sa morso later pour retir sa danze ki pe menas son vwazen.

E ankor si Lotorite Distrik ti annan sa resours finansyel oubyen resours imen, DA ti a kapab pran bann mezir prevansyon parey Mosyon pe demande.  Akoz Mr Speaker parfwa sa bann dezas ki arive, dimoun in averti Lotorite, me parski Lotorite Distrik napa sa lotonomi, tou keksoz i bezwen pas par Minister.  Maler i ganny letan arive  letan ki zot in pri dan papye pe fer vetting pe rode, pe rod laprouvasyon pour rode ki in siporte, apre pour konnen si pour ede e si pa pour ede.

Sa i fer mon mazin ler dezas ti ariv kot mwan.  Erezman mon ti annan kontak e mon ti ganny en dimoun ki ti kas ros pour degaz lasasen deswit.  Brigad Dirzans mon pa ti war ditou, ziska prezan mon pa konnen lekel zot dan sa distrik Glacis. MNA sa lepok nowhere to be found. I pa ti enterese akoz mon pa ti siport Gouvernman e mon ankor pa siport Gouvernman!

DA mon ti bezwen call li 3 fwa pour li vini akoz i ti per ki ler i a ed mwan i a ganny pouse.  Sa lepok!  Granmersi nou’n met en lafen avek sa bann mantalite Mr Speaker. Sa i fer mwan retir sa konklizyon swivan.  Annan sa striktir dan distrik i en keksoz.  E konnen ki mannyer pour servi li i en lot keksoz. Nou pa kapab swazir lekel ki nou ede.  Dezas i dezas, nou bezwen ed sa enn ki dan bezwen.  Napa triyaz pour fer ler maler in arive dan distrik.

Mr Speaker mwan depi ki mon’n ganny elekte, mon’n dir ek DA, ou en civil servant ki travay pour Gouvernman alor montre ou enparsyalite dan sa ki ou fer, akoz mwan ki politisyen, mon met mon politik deryer mwan ler mon pe deal avek dimoun e mon ed dimoun dapre zot merit e non pa dapre zot afilyasyon politik.

E se koumsa ki nou pe travay dan distrik Glacis. Mr Speaker avek sa 2 mo mon pour donn sipor sa Mosyon pour revwar striktir pour benefis lakominote. Mersi Mr Speaker.

 

MR SPEAKER

Mersi Onorab Esparon. Mon a donn laparol Onorab Ernesta.

 

HON PAUL ERNESTA

Mersi Mr Speaker.  Mr Speaker tou nou bann koleg Onorab, tou dimoun a lekout bonzour. Mr Speaker permet mwan avan ler zis mon komans mon lentervansyon zis fer en mansyon spesyal. Bomaten letan mon’n get ‘’Bonzour Sesel’’ mon vwar en zenn fiy Ms Anniella Chetty. Sa zenn fiy i montre devosyon son talan ki i annan, dan son bann kote artistik. In montre, en eksplik osi bann difikilte ki i pe fer fas avek kot bann dimoun pa konpran li e therefore zot pour dekouraz li.  Mon mesaz ki mon annan pour li, i annan bokou bann zenn ankor parey li, ki annan bann bon potansyel pa les zot ganny dekouraze, kontinyen motive, kontinyen tenir for.  Mersi Mr Speaker.

Mr Speaker pour komanse i annan en group entervenan avan mwan in koz lo la e bokou nou, nou’n koz lo la, sa nou’n koz  lo brigad. Mon pour komanse avek lo sa note pour mwan remersye tou bann brigad.  Dan brigad nou annan diferan group dimoun, diferan class dimoun. Mwan menm mon mon’n deza en Manm brigad mon konnen kwa ki bann dimoun i fer fas avek, kwa ki zot fer fas avek letan i ariv dezas zot bann difikilte parey bann ki’n ganny mansyonnen, bann mankman resours ki nou fer fas avek.

So mon a dir zot pa dekouraze.  Annou kontinyen anmenn sa soutyen pour nou bann dimoun dan lakominote ki letan bann letan dezas nou kapab ed zot.

Sa Mosyon ozordi i pe koz lo en keksoz ki vreman enportan dan lakominote; kot i pe demann Gouvernman pour revwar striktir ki anmenn bann soutyen letan dezas pour nou bann fanmir – pour nou bann dimoun.  Ozordi dan lakominote i annan en platform ki’n deza ganny kree – sa zis apre Tsunami kot sak distrik i annan sa ki nou apel en Emergency Contingency Plan e ladan i annan 6 diferan seksyon ki donn en proper guidelines ki mannyer bann keksoz i sipoze marse lo nivo distrik, pandan letan dezas. Adisyonnel avek sa i annan en lot ki nou apel en Disaster Risk Priority Plan. E sa an 2008 en legzersis ti ganny fer zis apre Tsunami en legzersis ti ganny fer dan tou distrik, kot tou bann landrwa ki highly risky ti ganny determinen e bann Plan D’aksyon ti ganny antreprann, pour fer sir ki parey mon koleg yer in mansyonnen, pour kapab mitigate sa bann risk.

Me malerezman ozordi, nou vwar, menm bann landrwa kot in ganny determinen, koman bann highly risk landrwa still bann aksyon pa ankor neseserman fini ganny fer.   E sa Mosyon ozordi i pe ed nou pour nou kapab vwar dan son konteks, pour sey enplor Gouvernman e Minister konsernen, pour nou tou kapab met lanmen ansanm, met zefor ansanm pour nou sey fer keksoz e met keksoz an aplikasyon.

Mr Speaker sa i anmenn mwan osi lo en lot pwen.  Letan mon’n get sa Disaster Contingency Plan, mon vwar i annan en mankman. Ki kalite mankman ki annan?  In koz lo tou sa bann platform, tou bann keksoz ki sipoze ganny fer, me ladan i annan en seksyon, seksyon 5 i koz lo bann loperasyon.  Ozordi nou vwar letan i ariv dan bann ka dezas kot tou distrik, annou pran en distrik spesifik i ariv en dezas parey dan ka yer Anse Royale, lo teren ou pour vwar i annan DRDM, Local Government, Fire Brigade, e tou bann lezot akter konsernen. Prezan letan zot lo sa scene setaki pe donn son direksyon.

Setaki pe pran en desizyon lo ki fason pour fer keksoz. Keksoz ki manke i mank en proper kordinasyon, me an ekspektan ki petet DRDM ti ava sa main body pour kapab anmenn sa direksyon.  Me nou vwar en lot senaryo letan nou ariv lo scene. Mon krwar i ekstrememan enportan – yer mon koleg in dir ki Local Government i ganny gete koman fasilitater.  DRDM li i kontrol. Me selman lezot organigranm lo sa striktir, i montre DRDM, Local Government tou le de i konekte ansanm apre desizyon i ganny fer anba.

Mon krwar i ekstrememan enportan kot nou kapab dir enn fwa pour tou determinen, lekel the end serving body.  Parey letan nou annan en scene, me an realite, nou ava dakor pour dir ki petet letan i ariv en sityasyon dezas se DRDM is the main body pour li pran sa direktiv e pran desizyon ziska ler bann keksoz i fini ganny deal avek.

Me ozordi sityasyon i pa neseserman dan sa konteks. Mon krwar nou bezwen kapab donn en clear desizyon – en clear direction, lekel ki fer lekel e ki fason ki tou dimoun i ava kapab konpran, konnen lekel bann dimoun, bann answer machine, bann body ki pour zot kapab deal avek lo sak lenstans dan ka en lensidan.

Apre i annan fakter osi ki nou kapab remarke.  Ozordi tou DA ki reflekte osi lo sa size resours. Tou DA i sipoze lo scene letan i ariv en dezas.  Me keksoz ki dezapwentan bokou sa bann DA napa en mwayen transportasyon.  Ki mannyer si lo point A i pour kapab ariv lo point B?  Menm si nou a dakor ki i dir ki dan sa operational  guideline i dir i bezwen annan en fason transportasyon. Me avek sa, menm si pour annan sa fason transportasyon, ki mannyer i pour pey sa transpor pour li sorti from point A pour point B ki i napa en mechanism, i napa en resours finansyel dan son porte, pour li kapab fer sa lasistans neseser.

Mon krwar vwala kot sa Mosyon in anmenn son merit; kot nou merit kapab annan dan tou distrik annan en fon.  En fon ki kapab permet sa Lotorite Distrik setadir sa DA, i ava dan diskresyon sa DA pour li kapab fer son bann travay e bouze de la.

Mr Speaker apre en lot keksoz ki nou’n vwar letan i ariv bann letan dezas, son apre pour zot kapab anmenn bann reparasyon.  Lontan si nou a rapel depi an 2003/2004 si mon memwar i servi mwan byen ti annan sa ki nou apel Disaster Relief Fund. Sa ti ganny kree zis apre dezas Felleng. Mon krwar kot nou ti annan bann biznes prive, ki ti enzekte larzan dan en fon, pour nou kapab permet ed bann dimoun e soulaz bann dimoun dan zot bann problenm.

Me oli sa fon ozordi?  Mon krwar i ekstrememan enportan pour nou vwar, ki mannyer sa fon i kapab ede – kot petet ozordi nou napa en body ouswa nou napa en progranm ki kouver sa dan Bidze ki kouver depans bann dezas letan i arive; kot nou vwar sak pti Minister, sak  Departman nou dir parey Local Government ki yer mon’n tann dir i annan 1.5million.  Sa i kouver bann pti dezas miner – MHILT li i pour annan pour li letan i pour kouver petet en lenfrastriktir in kase. Me sa zot, zot napa en Bidze ki allocate spesifikman, poudir sa i al ver dezas. Ozordi nou pe vwar bokou kot nou bann dimoun pe ganny afekte.   I annan case ki’n arive depi lannen pase. Mon pran legzanp parey distrik Takamaka ki’n arive depi lannen pase, me ziska ozordi pa ankor ganny asiste.

Akoz pa ankor ganny asiste Mr Speaker?  Se senpleman akoz sa bann konplikasyon ki’n dir si en case ki annan pour fer ek lakaz, MHILT li i pour asiste sa case baze lo son priyorite ki li i annan.  I pa pour neseserman si sa dezas fek arive, pa pour neseserman vwar sa dezas koman enn son priyorite, kan li i annan bann lezot priyorite pour fer lakaz e asiste bann lezot dimoun.

E sa dimoun li ler la i reste trennen li.  Son lannen an swit dezas i ariv ankor menm dimoun ki ganny afekte, e son problenm i pli ganny agrave.  So mwan a mon’n avi si ti annan en tel fon ki ti ava kapab ede dan Fon Nasyonal e la petet mon a fer en pledwari devan Minister Finans, ki nou, mon mazinen letan sak Minister pe travay lo zot Bidze.

Petet ti ava en moman pour Minister Finans konsider swa relev sa Disaster Relief Fund, enzekte larzan ladan ki sa nou ava konnen sa i pour bann kad dezas, ki letan en dimoun i ganny afekte dan en kominote fasilman son case i marse dan plas trennen e i ganny asiste o pli vit posib.  So Mr Speaker vwala ki mon propozisyon, kontribisyon ki mon annan.  E mon pour demann tou nou bann koleg osi, akoz nou a dakor ki i annan en konprenezon zeneral, ki nou an faver, an ver sa Mosyon ki nou a donn nou sipor anver sa Mosyon.

E Gouvernman zot osi zot ava konsidere ki mannyer i kapab parey mon’n dir bann propozisyon, anmenn relev sa Disaster Relief Fund ki nou kapab ed nou bann dimoun.  E bann platform ki annan pour fer avek bann ka dezas, etablir byen kler rol sak endividi. Annan en answering body ki li parey DRDM ki ava vin the main body e ki nou ava kapab bouze de la e nou a sorti dan sa bann problenm ki nou ladan ozordi. So mersi Mr Speaker.

 

MR SPEAKER

Mersi Onorab Ernesta.  Onorab Phillip Arissol.

 

HON PHILLIP ARISSOL

Mersi Mr Speaker. Bonzour Mr Speaker. Bonzour tou koleg Onorab.

Avek sanzman klima nou pe war deplizanpli Sesel pe ganny afekte plis ek movetan. komansman lannen pase, Anse Boileau in pas atraver enn bann pli move, in ganny bann pli move dezas e nou distrik in sibir en kantite. Nou’n ganny inondasyon lateras grennen e pye dibwa ki’n tonm atraver semen e menm lo lakaz.

Bokou bann fanmir in ganny afekte e perdi bokou bann keksoz ki zot in travay tre dir pour gannyen.  E ziska prezan i annan bokou sa bann fanmir, ki pa ankor ganny lasistans ouswa lasistans i retarde.  Pour bann zabitan e Brigad Dirzans e bann Lazans ki’n travay vreman dir pour ed bann dimoun ki’n ganny afekte, mon ti a kontan sezi sa loportinite pour dir zot mersi.

Mr Speaker nou pa kapab anpese ki i annan dezas, me nou kapab redwir risk par pran bann aksyon prevantif tel ki; letan nou war en pti pye dibwa obor semen, ouswa obor en lakaz ki pe grandi, nou koup li akoz nou konnen i pour poz danze pli tar.  Konstriksyon en pti miray pour anpese ki delo letan lapli i tonbe koul dan lakaz bann dimoun.  E ler en dimoun i soumet en plan pour konstriksyon en lakaz ouswa semen, kot Lotorite Planning i tre enportan ki sa Lotorite i al get teren, ouswa fer en swiv pandan diferan staz kot konstriksyon pe ganny fer.  Sa i merit ganny pli serye.  Akoz topografi teren i difisil, kontrakter i merit ganny edike ki pli bon fason pour li fer son konstriksyon.  Tou sa pour ede minimiz bann risk letan dezas i arive, kot dimoun pa perdi zot lakaz, ouswa semen pa kase ouswa menm annan fatalite.

Alor i tre enportan pour annan bann dimoun dan distrik ki pour travay e war bann sityasyon ki pour kapab poz danze, e fer rapor avan en movetan i arive tel ki; war en lateras ki kapab grennen ouswa en ros ki pa stab, en pye dibwa ki pe grosi vitman.   Tou sa pour ede redwir risk. Ti pour byen alor si Gouvernman ti revwar pour met an plas en striktir byen etablir en Bidze pour siport tou bann distrik, pour prevansyon an ka dezas. Gouvernman i merit revwar travay Brigad Dirzans dan distrik.

Se zot ki lo standby pour donn premye sipor avan ki bann lezot Lazans i arive. Mr Speaker bann Brigad Dirzans i bezwen lekipman proteksyon, zouti apropriye, lantrennman e osi en pli bon sipor finansyel petet sa ti ava ankouraz plis dimoun pour zwenn a aport zot servis kan bezwen i arive.

Nou vreman bezwen sa bann dimoun, akoz nou ptipti nou.  Mr Speaker sa Mosyon pe demann Gouvernman pour empower bann distrik e bann Brigad Dirzans pour ki zot pran aksyon lo sityasyon ki pour ede redwir risk e minimize lenpak dezas.   Olye reakte letan ou apre ki dezas in fini arive an atandan sipor lezot Lazans.  Mr Speaker sa Mosyon i annan son merit e mwan mon pe aport mon sipor pour sa Mosyon.  Mersi.

 

MR SPEAKER

Mersi Onorab Phillip Arissol. Onorab Audrey Vidot.

 

HON AUDREY VIDOT

Mersi Mr Speaker.   Bonzour Mr Speaker, tou Manm Onorab e tou Manm piblik ki a lekout.   Mr Speaker premyerman mon oule dir ki mon siport mon bann kontribisyon konstriktiv ki bann Manm in fer anver sa Mosyon anmennen par Onorab Waven William.  E osi mon solider avek mon bann ansyen koleg DA ki sak fwa letan lapli zot latet i trakase, akoz zot konnen anytime zot telefonn i kapab sonnen kot kominote i bezwen zot sipor.  E byensir bann kontribisyon ki mon bann koleg MNA ki’n deza DA parey mwan menm in deza pas dan sa bann leksperyans e konnen ki zot soufrans zot pas ladan sak fwa i annan en moman dezas dan kominote, oubyen i annan en movetan.

Mr Speaker letan nou dir keksoz i byen, nou bezwen kontinyen anbelir li pour li byen, pour li reste byen.  Letan i mal nou bezwen dir poudir i mal pour nou vwar ki mannyer nou kapab met lespri ansanm, pour nou vwar ki mannyer nou kapab fer keksoz pli byen.

I annan en komanter ki Onorab Wavel Woodcock ti dir yer, letan i ti pe termin son lentervansyon, e sa i ti dir ki ‘’prevansyon i pli bon ki gerizon.’’ Sa i en keksoz ki byen akoz bokou fwa nou parey ou get Sesel ozordi nou en pei ki’n devlope. In devlop telman rapidman kot dimoun ozordi ki ti pe rod lakaz in ganny lakaz, dimoun ki ti anvi later in ganny later in fer konstriksyon son lakaz. Me konstrent kot in vini kot problenm in vini se ki nou’n en pe an retar avek ledikasyon, pour nou kapab anmenn kot nou koz lo prevansyon kot nou koz lo redwir risk e minimize lenpak bann sityasyon ki arive dan bann letan movetan.

Mon dir sa Mr Speaker, akoz ozordi si ou pe reste dan montanny ou traka se ki si ros pa pour grennen, lateras pa grennen, pye dibwa pa tonbe oubyen ou twatir lakaz pa leve.  Si ou pe reste dan plat ou traka i linondasyon.  Si ou pe reste bor lanmer, oubyen obor en larivyer ankor ou annan en lot traka ankor si delo pour vin dan ou lakaz, oubyen ou twatir pour ganny releve avek gro divan.

Mr Speaker ledikasyon i en keksoz ki menm si pa bokou nou’n koz lo la dan sa lentervansyon depi yer, me i en keksoz vreman enportan ki Gouvernman i komans li en pti pe pli entans.  In deza annan dan lepase me i pa’n ase.  I pa’n ase akoz ozordi nou annan dimoun ki pe fer son, i pe extend son lakaz, i ankor pa pe respekte regilasyon pour li liaise avek Planning pour li rod sa sipor pour gid li pour son prop prekosyon an ka i ariv en maler; kot nou war i fer son konstriksyon.

E parey taler Onorab Arissol Anse Boileau in dir se ki nou fer en miray oubyen nou fer en ekstansyon avek nou lakaz, me nou pa mazin sa vwazen lot kote oubyen nou prop lekor letan gro lapli.  E ki arive, nou pa ni met en dalo avek sa bann ekstansyon, kot apre lapli i refoul tou sa delo dan nou lakaz.  Nou bezwen prezan taye pour rod sekour ki mannyer nou pour kapab al tir delo dan lakaz.  Sa i enn.  Ankor in ganny dir, me selman nou bezwen ranforsi lo la. Ti annan ledikasyon en letan lo medya kot SBC ti pas bann pti advert kot si ou’n plant en pye dibwa kot ou, ou bezwen maintain li, ou okip li byen.

Ou pa zis les li grandi ou pa koupe, i vin en menas pa zis pour ou lekor, pour ou lakaz, oubyen pour ou vwazen. Nou bezwen edik nou bann dimoun poudir letan nou plant kot nou wi.  Me selman nou bezwen annan en responsabilite pour maintain. Nou bezwen ankouraz zot pour zot fer li akoz a lafen dizour lekel ki bezwen bear the cost?  Se Gouvernman.

Si i en menas pour detrwa lakaz la DA i bezwen ale al vizite, tir portre before and after, met dan file sey demande ki bor kapab ganny en pti finansman pour fer koupe.  E menm parfwa ou bezwen osi i dir ou si i en pye dibwa proteze, ou bezwen al kot Lanvironnman pour Lanvironnman vin vizite pour gete si fodre zis trim oubyen fodre koup net.  Si pour detay li en pti pe pour regarde si pa en menas pour kominote.

Ankor lo ledikasyon, distrik oubyen bann lezot lorganizasyon – plizoumwen i distrik letan i fer bann pti proze dan kominoter, nou bezwen fer sir ki nou kontinyelman rod byen lenformasyon avan nou fer en proze dan en kominote.

Wi nou bann dimoun i demann nou semen, i demann nou drenaz, be letan i demann nou tousala i bezwen dir nou la ti annan en problenm delo, ti annan en problenm lateras grennen, akoz letan proze i ganny fer nou bezwen fer sir ki nou osi nou edik sa bann dimoun ki wi, nou fer fasilite pour zot, me nou osi nou bezwen kontribye pour maintain li.  In donn nou semen, in donn nou peron, me si nou kit li sal, nou kit li bloke, letan i annan gro lapli, i annan linondasyon, nou bezwen rod en fason ki mannyer pour nou kapab fer sir ki sa landrwa i reste byen, prop, annord ki nou pa met presyon pour nou kapab taye pour nou vin tenny dife.

E i fer mon reflesir en pti mon parkour letan mon ti DA La Riviere Anglaise; ou konnen bann senp pti keksoz ki par fwa Lotorite i kapab fer me at times nou pran keksoz a la lezer.  Mon rapel anler vilaz Quincy bann drenaz ki ti ganny fer, wi ti annan problenm delo, napa personn ki maintain, napa kontrakter ki netwaye.  Lontan nou ti annan bann dimoun ki ti netway semen, okipe ki nou ti ganny zot tou lazournen, landrwa ti reste prop.  Me apre ek bann restriktirasyon ki’n ganny fer, nou annan bann dimoun ki’n travay dan distrik, zot bezwen fer latas, e ti responsabilite bann administrater distrik pour anvoy zot fer latas.   E latas pa ti zis otour Ladministrasyon Distrik. Bann landrwa kot i annan demann kot wi napa Gouvernman napa resours petet pour fer kontrakter pour netwaye,                      nou ti bezwen anvoy nou bann dimoun pour al fer latas, netwaye, met li annord pour fer sir ki nou meet demann kominote e nou bann fasilite i ganny byen maintain, pour ki letan lapli nou pa tande pour dir rigol in bouse, personn pa pe netwaye, personn pa oule pran responsabilite pour netwaye. Nou’n koz lo kas lateras, Mr Speaker ou konnen nou bann Lotorite osi i bezwen en pti pe pli serye.

Si nou annan pouvwar, annou servi nou bann pouvwar ki in donn nou. En dimoun i ganny permisyon pour kas lateras.  In donn li en dele letan pour li mont son miray, si i ti konnen i pa pare pour li mont son miray dan sa dele letan i pa kas sa lateras. Akoz apre i vin en lenkonvenyans pour sa bann dimoun, ki swa dan son zalantour kot i war li prezan li i bezwen al pran en loan pour li aranz kot li, akoz entel li i pa’n respekte regilasyon ki in gannyen avek Planning, in kas lateras parti kase, in tarde pour mont miray, ler lapli i tonbe, gro lapli, tou sa later rouz i degrenn kot sa bann vwazen otour e li prezan sa lot dimoun li ki bezwen rod en fason pour li al tir later rouz.  Rod en fason pour al mont miray, pour li kapab bar later rouz avek delo ki vin kot li.

Ankor la mon dir i enportan, sa ledikasyon pour nou kapab koz ek nou bann dimoun, dir zot, zot responsabilite letan ou pe fer devlopman, bann regilasyon ki i donn ou ki ou pour bezwen respekte ki apre i pa vin ankor sa burden lo Gouvernman pour vini taye met presyon pour al tenny dife.

Mr Speaker mon koleg Onorab Ernesta in koz lo bann DAs parfwa bann challenge ki zot gannyen, espesyalman si zot pe reste an deor zot distrik, zot war zot bezwen al fer demars pour rod en transport pour zot kapab al respond to zot distrik, bann dezas ki’n annan.

Mwan mon’n deza pas parmi sa bann sityasyon.  Ti dir ki en letan bann DAs ti met propozisyon at least annan en transpor dan rezyon ki sa DA ki ansarz sa rezyon i ale, i donn sa sipor sa lot koleg DA ki li i napa transpor. I fasilit li en pti pe wi pour li kapab zwenn avek son bann dimoun ki dan bezwen e vwar ki mannyer i kapab respond dan en dele letan ki ou kapab dir i rezonnab.

Me ankor i annan bann scheme ki nou kapab donn sipor nou bann travayer servis piblik, pour ki zot osi zot kapab benefisye e pli efikas dan zot travay, pour respond to sa bann needs pour zot distrik. Mr Speaker nou’n koz lo motivasyon sa bann volonter brigad.  Nou’n koz lo resours sa pti R500 ki zot gannyen tou le en fwa tou le lannen.  Be mwan mon rapel sak fwa letan bann DAs ti anvoy lavwa pour sa bann brigad, ti dir pour dir finans petet pa an faver.

Zot pe pour ki rezon pour donn zot sa kantite.  Me selman sa ki mwan ozordi mon reste ebete ki mannyer Regional Council li in nobou kapab vitman ganny 10mil – R7mil, larzan nou rode ki bor pour gannyen. Me selman brigad nou ankor lo R500, be tou le lannen! Zot, zot ganny tou le mwan.

 

(Interruption)

 

HON AUDREY VIDOT

Wi Gouvernman wi, be lekel ki ti deryer pour lager pour Regional Council pa nou bann politisyen?

 

(Interruption)

 

HON AUDREY VIDOT

Pa nou ki ti’n pouse? Me ki mannyer ozordi zis en bann ki pour benefisye sa bann ki’n toultan la volonterman in kontribye pa ganny get ladan? Euh?

Pour nou, nou pe koz fairness dan distribisyon, be annou mazin en kou sa bann dimoun ki zot osi zot definitivman zot dekouraze. Zot pa anvi vini. Be byensir nou bezwen lager pour zot. Mr Speaker i enportan ki nou kontinyen met sa lanfaz lo resours, lo resours nou’n koz bokou lo la depi yer, lo distribisyon resours dan distrik pour ki bann Administrater Distrik i kapab pli byen respond to bann bezwen zot bann dimoun dan letan ki annan movetan, kot i annan en dezas.

Ozordi i ganny dir ki kot Minister Lanvironnman i annan en sonm pour koup pye dibwa. Tou i bezwen pas laba. Nou, nou pe demande ki komite kot Local Government zot osi dan bann fon pour distrik, parey i annan pour proze tou le lannen i bezwen annan en fon spesifikman pour deal avek bann pye dibwa ki en danze dan kominote.

I bezwen annan en larzan. Si sa distrik pa servi parey in dir Gouvernman a repran. Ava dres ennfwa pour tou sa bann gran pye dibwa ki en menas dan kominote. E DRDM ler nou demann zot pour zot ale fer en assessment dir nou si wi si non e koumsa nou a rod larzan ki bor pour fer fason rezourd sa bann problenm deswit.

Pa anvoy nou demen tanto oubyen wi vini fer case ale e monte desann, me selman problenm pa ganny rezourd. Nou bezwen arete sa. Nou bezwen arete. Onorab Lemiel ti mansyonnen yer ki dir nou ti mars byen nou.  Annou al rode ki bor, kot nou’n al mal.  Annou al war kote nou’n al mal.  Annou aranze.   Si lontan nou ti dir wi, tou keksoz i bezwen napa problenm latransparans, pa nou ki ti dir sepa rod, nou ti donn dalon, donn isi, donn laba pour fer proze, pour rod la prezan nou pe dir nou pa kapab rod 3, 4, 5, 6 invoice.  I pran bokou letan, be nou ki ti dir sa. Zot bliye, i dir nou ti donn zis en serten  group dimoun. Be la nou ava asize ansanm rode ki fason ki nou krwar i pli meyer pour nou kapab rezourd sa bann problenm pli vit posib. Akoz ozordi la tou sa bann ki okipe pa li ki responsab pour li adres sa bann problenm.

Mr Speaker mwan mon pa pour long lo sa Mosyon, akoz bokou bann pwen enportan in ganny dir. Mon swete ki Gouvernman, nou bann Departman laba deor ki responsab, ki konnen ki respond sak fwa i annan en letan dezas, pour zot anmas byen bann kontribisyon ki bann Manm in donnen, espesyalman bann pwen ki konstriktiv ki pour ede fer en diferans pour amelyor nou kominote e pour nou kapab vin en pti pe pli vit reaksyon, aksyon en pti pli vit lo bann problenm ki leve dan nou distrik.

E bann zofisye Planning i enportan ki bann proze ki ganny fer dan distrik zot kontinyelman monitor, pour fer sir ki dimoun pe respekte regilasyon, ki demen nou pa war nou pe vin Fire Brigade pe taye pe al tenny dife.  Akoz nou pa’n edik nou bann dimoun poudir i enportan nou respekte nou bann regilasyon e gidans ki nou donn zot.

Akoz i pa pour zis dibyen Gouvernman sa i pour zot prop dibyen e pour protez zot lakour. E zot zalantour. Mersi pour laparol Mr Speaker.

 

MR SPEAKER

Mersi Onorab Vidot. Onorab Jean-Francois Ferrari.

 

HON JEAN-FRANCOIS FERRARI

Mr Speaker bonzour mon pa pour tro long ozordi selman mon annan enn de pti pwen ki mon bezwen fer, santi an faver bann largiman ki’n ganny met devan lo sa size.  Akoz mon krwar ki tou bann MNA ki’n involve dan travay distrik i rekonnet ki i annan en serten sityasyon blokaz ki ralanti lasistans ki nou kapab donn nou bann dimoun, e ki i en bon lide pour nou diskit e reflesir lo fason pour nou empower, pour nou donn en pe plis pouvwar, en pe plis lefikasite sa striktir ki annan o nivo distrik.

Mr Speaker mon ti a kontan premyerman dir ki, bann zabitan dan distrik souvan zot vin bann viktim, le fe ki napa enforcement bann Lalwa Planning. E mwan mon pa kasyet, mon dir klerman ki o tan ki mon krwar ki i annan bann travayer dan Planning ki bann travayer vreman konpetan, vreman devoue, e ki fer tou sa ki zot kapab pour ki devlopman Sesel i ganny fer dan en fason byen.  Malerezman  Planning i enn sa lorganizasyon ki pa efikas lo enforcement.  E Planning Authority i enn sa lorganizasyon ki pa ankor kekfwa santi sa divan sanzman ki pe soufle lo nou pei.  E pour dir ki nou bezwen fer keksoz dan en fason diferan, e ki nou bezwen entervenir kot i mal. Nou bezwen met politik dekote, e nou bezwen fer an sort ki travay i vreman efektiv.

Mon ava eksplike Mr Speaker.  Bokou bann MNA isi in dir ki i annan bann sityasyon ki ti kapab fasilman ganny evite e annan en lapros prevantif. Mwan osi don mon distrik mon kapab donn en kantite legzanp. E mon krwar i annan en MNA taler ki’n mansyonn en senp pti legzanp. En legzanp en dalo avek en lakaz ki pa’n ganny mete.  Pourtan Planning, Lalwa Planning i dir fodre. Ki arive?  Sa delo prezan i sorti lo tol, i vin en larivyer, i desann kot sa vwazen pli ba.

E ler ou demande ki nou pour fer, personn pa konnen lekel ki annan responsabilite. Sa se premye sityasyon. Avan nou get bann solisyon ki nou kapab anmennen, nou bezwen get bann sityasyon. E ler Planning pa enforce bann Lalwa ki mannyer ou ekspekte ki nou bann frer ek nou bann ser e nou menm nou, nou ganny edike lo ki mannyer nou montre respe pour sa dimoun ki par anba nou.  Sa dimoun ki dan bor nou, sa dimoun ki pas dan sa semen ki mont ki pas lo bor kot nou ki nou bezwen kit li dan en bon leta, ki nou bezwen fer sir ki delo ki sorti kot nou pa al kot en lot, finalman nou retrouv nou dan en sityasyon kot bef dan disab sakenn i vey son lizye.  E ler nou al rode pour entervenir malerezman larepons i pa vini parey mwan mon ti ava espere i vini.

Alors mwan mon’n dir sa avek Minis Charlette e mon’n dir sa avek plizyer lezot dimoun dan Gouvernman, ki si i annan en keksoz ki mon ti a kontan war dan lavenir oubyen prosennman, oubyen osi vit ki posib, se en pe plis lefikasite en pe plis profesyonnalizm e en pe plis, annou met koumsa. Professionalism mon dir zeneralman i annan bann dimoun i konpetan.  Me en pe plis lotorite dan sa Planning Authority.

Pour le moman bokou desizyon i ganny pran lo en baz politik, i ganny pran lo en baz lekel ki ou konnen, si ou pe deal ek dimoun ki annan larzan ou pour ekout li en pe pli byen.  Si ou pe deal ek en malere ou pour anvoy li demen tanto, e la mon kapab partaz avek zot Onorab Adelaide MNA Baie Lazare in demann en pe sipor pour al regard en sityasyon Anse Poule Bleue ki nou pe al fer li Vandredi.

E kekfwa i en lokazyon akoz dernyen fwa zot ti demande pour ganny envite, bann Manm pour ganny envite i en lokasyon pour nou kapab bann ki zot ti a kontan partisipe, pour nou al gete. I annan devlopman ki pe ganny 40 lasanm.  En lakaz prive, mon krwar pour bann msye ek bann madanm sorti Abu Dhabi, 40 lasanm prive.  Ni EIA class one pa’n fer. Miray in ganny fer lo lans, dan disab, miray lev lanmen si enn antre nou in war en boundary wall 6 met oter.

Ler manmzel Meransyenn ki li i napa en kote lipye pov dyab, in sey mont en pti miray zot ti al donn li en final warning pour li kas, tir de blok lo miray akoz sa miray instead of 1.80 met ki regilasyon ti’n mont 2 met. 6met. Sanmenm sa legzanp ki mon ti a kontan donnen ki mannyer bann Lalwa Planning in ganny abize e pa ganny enforce.

Nou dan distrik, nou pe rod bann ptipti keksoz, ki kapab fer nou prezan vin bann ners ler maladi i arive.  Me nou bezwen fer en travay prevantif a en nivo pli avan.  E apre nou ava gete ler sityasyon i arive ki mannyer nou kapab pli efektiv dan zesyon sa bann problenm. E kekfwa mwan mon ava dir en keksoz.  Mwan mon toultan enn bann dimoun ki mazinen pour dir nou pa kapab an fen in pran nou apepre 40 an pour nou ariv la kot nou ete. So napa en dimoun ki kapab, pa kapab dir Mr Ramkalawan ek mwan menm, Mr Prea ki nou napa pasyans. 40an nou pe esey anmenn en pe sa bann sanzman.

Savedir nou annan pasyans. Nou komans pa par pa, pa par pa.  Nou pa fer koudeta Onorab Gill, nou fer li pa par pa.  Alors par egzanp enn bann keksoz ki mon ti ava dir, sa Bidze pour koup pye dibwa dan distrik, sa Bidze pour koup pye dibwa pour fer ki i annan en regilye, sa travay i ganny fer regilye, i tir bann pti kalis ki sa groser ki demen pour ariv sa groser.

Sa Bidze la kekfwa mwan mon ti ava dir komansman lannen prosenn, annou anvoy zis sa enn la nou ava gete ki mannyer keksoz i marse. Akoz si i pa ariv koumsa, si nou pe demann 5 parey Onorab MNA pour Roche Caiman in dir nou, pe demann 5 kotasyon, avan nou ganny en keksoz, be akoz dan lepase chainsaw ti sorti parey ros dan fles. Ti pase devan nou, pa tourn ankor! Lapel pyos ti pas devan nou ti pase dan pickup apre pa ti tourn ankor.

Se sa ki arive. Alors i annan en rezon akoz sa bann keksoz.  Nou bezwen byensir fer li pli efikas. Nou pa kapab pran 5 mwan pour ganny en permisyon pour aste en zouti. Me selman nou bezwen fer li pli efikas e si nou ladan ozordi fodre Onorab Valmont li i tro zenn sanmenm i pe fer tapaz la, i pa konnen sa bann keksoz, fodre bann Manm ki en pe pli vye i fer en mea coulpa. Se ma fot, se ma fot, se ma fot.  E zot in war.

Anyway sa i mon premye pwen Mr Speaker. Mon 2enm pwen ler mon pe siport Mosyon ki Onorab William in fer, mon annan en keksoz ki sagrin mwan en pti pe, Onorab William nou tou nou konnen, menm si nou lo kote latab diferan i annan lontan ki Onorab William pe dir sa. I annan lontan mon krwar depi ler mon’n dan Lasanble avan mon’n tann li pe rod en plis lefikasite dan sistenm.

Finalman ozordi in ganny son sans pour li met son pwen devan, pli kler.  E mon byen satisfe ki mon’n war en bon pe parmi zot lot kote latab ki’n donn zot sipor. Ou a krwar zot in ganny en nespes kouraz konmsi! Onorab William in donn zot sa kouraz in tir en pwa lo zot likou konmsi pe dir be nou kapab montre ledwa kot keksoz in al mal.

Sel keksoz ki zot pa ankor dir be selman i ava vini ‘’Enough is enough!’’ akoz sa ki ti fer Onorab William ganny problenm. Zafer ‘’Enough is enough!’’ Sa zot pa ankor dir. Sa les pour nou sa. Sa a les pour nou, nou ava dir.  Selman mon byen kontan Mr Speaker vwar sa sanzman ki keksoz pe ouver, keksoz i annan en pti divan ki pe soufle.

Malerezman Mr Speaker, malerezman bokou bann MNA lo nou kote, lot kote in fer sa legzersis me mon santi mon en pti pe tris ki bann leaders dan lot kote latab zot, zot pa’n entervenir ditou pour donn en sipor en Mosyon ki Onorab William- Kekfwa taler zot a ganny sans koze.  Mon pa’n war zot lev lanmen.  Mon pa’n war zot lev lanmen e i annan 3 Leaders la. I annan enn pa la. Par kont sa ki mon’n war ler Onorab William ti pe koze –

 

(Off-Mic)

 

HON JEAN-FRANCOIS FERRARI

-mon pe fer mon pwen Mr Speaker, mon ti a kontan permisyon pour mwan fer mon pwen.

Ler Onorab William ti pe koze mon ti war zot leve, sorti parey ros dan fles.  Ok?  

 

(laughter)

 

HON JEAN-FRANCOIS FERRARI

So, non mwan mon anvi akoz ler nou, nou dir ler keksoz i byen fodre nou dir i byen. Ler i mal nou dir i mal.

Se koumsa ki demokrasi i marse. Ou pa kapab akoz nou annan en pti problenm avek Onorab William konmsi nou pa, kantmenm i byen nou pa pour dir i byen? Be kekfwa taler, anyway mwan mon ankouraz zot kekfwa taler pran laparol pour zot ankouraze, akoz si zot, zot pa donn sipor, si zot  bann Leaders zot pa donn sipor, sa Mosyon pa pour al lwen sa.  Zot osi zot Leader of Government Business – lot Depite Sekreter Zeneral tou bann keksoz koumsa.

Fodre zot osi zot step up pour nou fer sa bann keksoz avanse. Mon pa pe rabase Onorab De Commarmond. Mon pa per rabase.  Mon pe dir en keksoz! Mon pe dir laverite! Mon pe dir laverite!

 

MR SPEAKER

Onorab kontinyen lo Mosyon.

 

HON JEAN-FRANCOIS FERRARI

Mon kontinyen lo Mosyon. Akoz Onorab William li i pe demann en keksoz ki pour tous larealite lavi, son bann elektora son bann zabitan. Lo grassroots! Zot, zot pe rod Referendum! 13milyon, 18 milyon? Be annou pran en pe sa larzan nou ava ankouraz sa sipor.

 

(laughter)

 

HON JEAN-FRANCOIS FERRARI

Be la mon pa konnen ki’n arive, lekel ki’n redi sa fles Mr Speaker?

 

(laughter)

 

HON JEAN-FRANCOIS FERRARI

Pa mwan-

 

MR SPEAKER

Kontinyen lo Mosyon Onorab.

 

HON JEAN-FRANCOIS FERRARI

Non Mr Speaker ok.

 

HON WAVEL RAMKALAWAN

Be sa en gro lastik sa.

 

HON JEAN-FRANCOIS FERRARI

Mr Speaker, mon santi ti enportan mon fer sa pwen. Ti enportan mon fer sa pwen.  Mon pa’n fer li pour mwan ofans personn, me selman mon’n fer li pour mwan ankouraz sa divan.  Zis mon’n apir ek sa fles. Mon war en keksoz in arive.

 

MR SPEAKER

Onorab konklir.

 

HON JEAN-FRANCOIS FERRARI

Anyway mwan mon anvi felisit tou bann Manm. Mon anvi felisit tou bann Manm ki’n koz for, ki’n koz kler, ki’n war kote i annan bann blokaz kote keksoz pa pe avanse, e ki’n demande ki nou sanz direksyon, nou sanz gear, nou fer keksoz diferaman. E mwan mon’n donn en posibilite la i la nou a komans koumsa. Nou a komans ek sa Bidze koup pye dibwa bann keksoz koumsa, i a fer li pli efektiv nou a gete ki mannyer i marse.

Mon krwar i en bon sizesyon.  Mon war zot pe balans latet savedir mon krwar i en bon sizesyon. Ok.  Alors mwan mon ti a kontan ki war ki zot tou zot donn zot sipor Onorab William.   E nou avanse pour nou fer nou pei e nou distrik fonksyonn en pe pli byen.  Mersi Mr Speaker.

 

(APPLAUSE)

 

MR SPEAKER

Mersi Onorab Ferrari. Mon a donn laparol Onorab Churchill Gill.

 

HON CHURCHILL GILL

Mersi Mr Speaker.   Bonzour tou Manm, bonzour tou dimoun a lekout.

Mr Speaker donnen nou en zil tropikal, sa topik ki nou pe koz lo la la nou’n ganny en ta leksperyans avek sa. E si nou think back nou’n menm ganny lavalas a en serten pwen. Savedir i montre nou poudir sa bann keksoz la i bann keksoz ki i devret annan bann planning tre serye lo la. E mon pa war rezon akoz ki tou le Desanm ler nou pe diskit Bidze, nou pa war dan Plan D’aksyon, i annan en keksoz ki kouver sa size. E bokou lentervansyon ki’n ganny fer bann Manm in fer sorti bann problenm reel ki arive lo district level, me selman ler nou diskit Bidze nou’n vwar en kantite larzan in ganny donnen, prezan kestyon se ki mannyer in ganny depanse?

Mon a donn legzanp sa ki koz inondasyon se souvandfwa bann lanmar ki bouse oubyen larivyer ki bouse, oubyen bann desarz i bouse. Me selman dan tou distrik nou annan ki pe netway lanmar ki pe netway larivyer. Kestyon alors, eski tou lanmar tou larivyer ki devret ganny netwaye pe ganny netwaye?  Akoz i annan larzan ki’n donnen dan Bidze pour fer sa.  Savedir i montre nou ki poudir in ler pour nou sa Lazans ki responsab pour sa bann keksoz avek sa bann dimoun ki fer lenspeksyon in ler pour nou gete si petet napa keksoz ki nou pe manke.

E ler nou pe koz lateras grennen, nou konnen poudir lateras i grennen souvandfwa ler i annan en lentervansyon imen avek lateras.   Nou konnen poudir nou Minister Lanvironnman i annan de antite ki tonm anba li ki – enn – i posib ki i pe kontribye, ki nou ganny en pe sa bann sityasyon apre i annan en lot antite ki li i Konservasyon sa se Minister Lanvironnman.

Petet in ler pour nou dir avek PUC pour letan i tonm anba menm Minister ler nou pe met bann poto elektrik partou atraver pei lo diferan topografi teren petet pa in ler pour nou dir PUC, gete ler ou netway, ou koup pye dibwa ki fer domaz ou laliny, oubyen ler ou pe plant poto,  eski pa in ler pour nou dir i bezwen osi antre lo en progranm pour li fer rebwazman, e pa neseserman bann kalite plant ki pour grandi oter poto, me selman bann plant ki pous tre ba.  Me selman otomatikman la ou sa gro pye dibwa ki ou pe koupe, ou pe ranplas li avek en keksoz ki pe protez sa later, pour anpes li degrennen.

Apre osi nou annan bann Lazans ki zot deza la ez ot sipoze pe fer bann serten travay. Parey ou konnen bann pye dibwa obor semen, SLTA i sipoze Lazans ki pe deal avek tousala.

E kestyon ki nou bezwen demande eski sa bann keksoz pe ganny fer parey i devret ganny fer?  E sa bann rezilta ki nou pe gannyen ek sa ler i annan movetan, i montre ki poudir pa tou sa keksoz ki pe ganny fer menm si i annan Bidze pour sa bann diferan antite ki mon’n mansyonnen.

E prezan i annan en koleg osi ki’n fer sorti ki dan distrik ozordi, nou annan Regional Council i vre. La ler nou pe koze, nou bann letan ki nou pe fer preparasyon Bidze pe ganny fer, eski petet nou pa devret task sa bann Regional Council pour donn zot sa responsabilite pour fer, pour letan zot deza dan bann rezyon fer letour dan sa bann rezyon, gete ki bann danze potansyel ki la aktyelman i annan, ki nou kapab pase pe vwar pour dir be sa i devret ganny adrese, pour evite ki si i annan en movetan, pour nou ganny war, nou kot nou bezwen rod plis larzan, pour nou al adres en keksoz ki si nou ti’n act lo la, nou pa ti pour bezwen annan sa bann gran depans oubyen larzan i enn.

Me selman i annan lavi dimoun ki an danze. I annan bann lakaz ki an danze. Petet nou devret komans en legzersis la. Nou a komans avek idantifye bann danze potansyel dan distrik. Apre fer sa al kot bann Lazans konsernen e mon krwar a longer ditan, si sa i ganny fer nou pour kapab evit en bon pe bann danze ki nou santi ozordi pe anmar nou lanmen.

E lo Inner Island nou sityasyon i pli konpleks. Ler i annan en dezas lo Inner Island, nou napa en Komite ki pour annan sa premye reaksyon.

Dapre resers ki mon’n fer lo Praslin ti deza annan en Komite, me sa Komite i annan en bon pe letan pa pe marse, e bann dimoun zot nepli aktiv lo la. E sa i fer ki ler i annan en danze i arive on Inner Island, DRDM Mahe i bezwen ganny kontakte apre zot, zot bezwen deside kan zot kapab vini pour evalye, ler in fini evalye asize esper rapor. Ler i esper rapor e la ler nou pe koze Mr Speaker mon annan ka dan distrik Baie  Ste Anne ki date depi 2014, kot en madanm Jeanne Dubignon Anse Lablague de pi 2014 tou keksoz in ganny fer me selman sa sityasyon pa’n ganny adrese.

Mon osi annan kot lafanmir Chantal Rose dep 2009 ki ozordi la ler mon pe koze sa bann dezas ki’n arive pa ankor ganny adrese. Sa i montre ki poudir nou Inner Island ki mannyer i fer li bokou pli difisil ki dimoun ki reste Mahe ler zot fer fas avek sa bann sityasyon.

Alors mon krwar in ler pour nou annan en body, lo Inner Island ki ler i annan sa bann keksoz nou a kapab nou menm fer assessment, nou a kapab nou menm prezan anvoy bann request kot Lotorite konsernen ki pour adres sa bann problenm dan plas ki ler i ariv en sityasyon nou bezwen kontakte Mahe, e Mahe li ler letan i permet kot li i santi i kapab vini e nou dan sa letan nou dimoun ki’n eksperyans move leksperyans son sityasyon i reste parey.

Mon krwar poudir i kler ki tou sa ki nou pe dir a lafen dizour, i bezwen annan en fon dan distrik, menm si i annan koleg ki krwar poudir pour le moman nou komans avek koup dibwa me selman ler i annan en dega, napa zis dibwa, i annan bokou plis keksoz.

Alors mon krwar sa opsyon ki sa Mosyon pe demande, annan sa resours i definitivman annan son merit.  E nou ekspekte pour dir dan Bidze 2020 nou a vwar en keksoz ki ganny mete pour zisteman adres sa problenm.  E mwan mon pour donn Onorab William garanti ki i pour ganny mon sipor pour son Mosyon. Mersi Mr Speaker.

 

(APPLAUSE)

 

MR SPEAKER

Mersi Onorab Churchill Gill. Mon a donn laparol Onorab Jany De Letourdie.

 

HON JANY DE LETOURDIE Mersi Mr Speaker. Mersi pour donn mon laparol.  Bonzour tou dimoun. Mon oule aport mon kontribisyon avek de pti pwen Mr Speaker. Laplipar dimoun ki’n koze in eksplike merit ki Lotorite Distrik i devret annan en Bidze, pour li fer fas avek bann dezas. Akoz apre tou i apel Lotorite Distrik ansanm avek son Administrater, se li ki konm tou son lanvironnman, se li ki konm tou son kominote e ler i annan okenn keksoz li ki pour ariv an premye avan ler tou bann lezot i kapab vini.  Mon toutafe dakor avek sa Mr Speaker, me selman kekfwa mon le fer enn de pti pwen sorti. Par egzanp sa size ledikasyon ki’n leve, mon toutafe dakor avek sa. Akoz mon pe dir parfwa annou gete kekfwa par nou menm nou annou fer problenm akoz nou pa edik nou kominote.

Mon donn en pti legzanp Mr Speaker, par egzanp e kekfwa ler nou fer nou bann, ler nou fer nou bann fason pour nou ganny enn de vot, pour nou ganny nou bann siporter ki i normal. Kekfwa la annou met en pti senaryo, ki nou fer kekfwa nou donn dimoun en pe materyo en pe blok en pe siman ler ou donn li sa kekfwa i napa larzan pou li fer lezot keksoz; kekfwa pour li rod son dalo pour li rod lezot keksoz ki neseser pou li eparnye li kont bann lezot keksoz.

I vre ki nou pa kapab aret lapli tonbe parey Daniel Adrienne me selman nou kapab anpes serten keksoz arive. Ki arive li Mr Speaker ler li in fini fer son konstriksyon, eski nou vini nou vin gete pou dir, nou advise li pou dir ou bezwen la al kot Planning ou bezwen ganny Lotorite Planning pou fer sir ki tou keksoz i an konformite oubyen nou zis les li demerd li la akoz nou’n donn li sa bann materyo, kekfwa apre i pa konn plis ki sa.

Ki mon pe dir i byen nou fer sa, be selman nou bezwen edik nou dimoun osi ki bann le konsekans ki kapab arive si ou kit li la li tousel anpandan. Akoz dimoun i annan tandans pou dir si mon pe siport sa parti o pouvwar i krwar poudir i kapab ganny soutire, alors i krwar i kapab fer nenport kwa.  Sa pti pwen mon’n fer Mr Speaker akoz sa osi sa osi i form parti lo ledikasyon.

Mwan mon pou vreman anmenn fer mon sipor akoz mon krwar poudir Lotorite Distrik i devret annan en Bidze. i pa en devret, i bezwen annan, fodre annan en Bidze pou deal avek sa bann sityasyon.

Malgre mon pe dir sa Mr Speaker, mon pa pou vin emosyonnel pour mwan dir. Mon pou fer en pti alizyon avek ilistre avek en keksoz ki ti pase dan letan Tsunami 2004, le 26 Desanm mon krwar le 26, 2004. Nou ti war pou dir ler ti annan Tsunami dan mon distrik pa bokou dimoun ki ti ganny asiste. Me malgre laplipar dimoun, mon kapab dir tou dimoun nou ti ganny afekte avek delo ki ti antre.

Me selman nou ti war pou dir pa bokou dimoun ki ti ganny asiste parey mon koleg Onorab Regina taler in fer sorti.  Savedir nou bezwen asiste tou dimoun larzan ki Lotorite Distrik i gannyen si i gannyen ki i devret gannyen, fodre fer sir ki tou distrik pe ganny asiste, annou pa bezwen gete ki kouler ou vote, ki larelizyon ki nenport keksoz, ou bezwen asiste tou distrik tou dimoun ki’n ganny afekte.

Akoz si pa Lotorite Distrik ki pe asiste son kominote, lekel ki pou fer li Mr Speaker? E vwala mon pti kontribisyon konsernan ledikasyon e mon ensiste ki Lotorite Distrik, fodre ganny son Bidze pou li asiste son kominote, e fer sir ki tou dimoun ki merite i devret ganny asiste. Vwala Mr Speaker. Mersi.

 

MR SPEAKER

Mersi Onorab De Letourdie.  Bon avan nou pran break  mon anvi zis fer en pti lanons. Konman par son travay oversight, Komite Finans FPAC pe fer en hearing ki pou ankor dan Committee Room 3 apartir 9.30 e sa pou ganny transmet 10er.  Bon apartir 10er e sa pou ganny transmet an direk lo televizyon e radyo.   Sa hearing i annan pou fer avek sa demann ki FPAC ti fer avek Oditer zeneral lo pou fer en odit lo lease STC avek Parti Lepep. Tou Manm i ganny envite pou attend ansanm avek Komite FPAC.  Savedir demen hearing demen 10er Committee Room 3 ok?  Vwala sa pti lanons ki mon ti pe fer e nou pran en break e nou ava retournen 11er.

 

                (BREAK) 

 

MR SPEAKER

Bon nou ava kontinyen avek travay ki devan nou deba lo Mosyon.  E prosennman lo mon lalis mon annan Onorab Noline Sophola.

 

 

HON NOLINE SOPHOLA

Ki mon’n fer ou.  Mersi Mr Speaker, bonzour tou dimoun prezan. Mr Speaker avek sanzman klimatik detanzantan nou pei i ganny tape par plizyer kalite dezas, parey linondasyon, lateras kase, pye dibwa derasinen, lakaz dekouver e plizyer ankor.

Tou sa i annan lenpak negative lo pei, fanmir e endividi.  Tou dimoun i trakase sirtou si sa menas pe pran plis pour plizyer zour e vreman annan sa lenpak negative lo kominote e zot santi ki zot bezwen zot led la konmela.  Mr Speaker sa Mosyon i vin a en bon moman.

I vin koman en wakeup call pour premyerman sa Minister konsernen e tou dimoun an zeneral, sirtou ler nou war sa ki’n arive yer.  Sa i pour fer nou revwar la fason ki nou fonksyonnen, sirtou ki konmela pei pe ganny tape par bokou dezas.  Parfwa kan nou annan labitid fer serten keksoz dan en fason, e nou krwar i pe byen fonksyonnen nou pa fer letan pour nou evalye son lenpak apre serten letan.  Si sa ti ganny fer peryodikman, Minister konsernen ti pour sirman anmenn serten modifikasyon dan la fason fonksyonnman pour zot zwenn bezwen ozordi.

Konmela i annan en striktir an plas pour anmenn sipor ler sityasyon i arive.  Me sa ki mon konstate ki sa volonte i la. Zot anvi fer me sa striktir pa ase efikas.  Son rol i bezwen ganny revwar. I annan tro bokou ale vini avan ki led i arive.

Mr Speaker nou konnen ki DRDM i sa Lazans ki ganny kontakte an premye lye swiv par Gouvernman lokal. Zot montre zot volonte pour ede akoz se zot ki anmenn sa premye sipor dan moman detres me sa led ki zot anmennen i souvandfwa ariv tar, tro tar e tro bokou letan i gaspiye e domaz in fini ganny fer.

Mr Speaker fodre byen note ki lokasyon DRDM i Mahe. Napa lo Inner Islands. Ler serten dezas i arive parfwa ni mwayen kominikasyon napa. Me ki arive dan sa distrik?  Kote ki sipor i sorti. Lo sa pwen mon pour koz lo Inner Island presizeman la Digue. Se ladministrasyon avek led kominote ki konpri en group dezas ou brigad ki pran kontrol sityasyon. I annan  bokou volonter me travay volonter i al avek son incentive. Kote administrasyon distrik pour gannyen.

Ler bann dimoun responsab i vin La Digue pour evalye ki souvandfwa ki zot vin en zour oubyen de zour pli tar lenpak dega pa parey. Akoz serten travay oubyen led in deza ganny fer. Ki vre evalyasyon ki zot pour fer.  Mr Speaker mon pour koz lo enn de ka lo La Digue.

I annan en ka kot en ros in deboul lo lakaz en madanm, in blok enn son laport. Sa problenm pe ankor ale vini pour plis ki 4an me evalyasyon in ganny fer, file in ganny fer, Lotorite Distrik i ankor pe esper led.  Ler gro lapli i tonbe eski nou kapab konpran dilenm ki sa fanmir pe pas ladan. En Lazans i dir ou pa pour li, lot i dir li pa kot mon.  Me sa ka i ankor pe ale, i ankor pe ganny travay lo la. I annan pye dibwa ki port danze tre grav pour de lakaz.  Ziska prezan evalyasyon in ganny fer, file in ganny prepare, permi in ganny peye, me ki i pe espere pour koupe? Akoz pe esper larzan pour pey kontrakter.

Nou bezwen konpran byen sa konsern ki kontrakter i oule son larzan deswit, zot pa oule esper de ou 3 mwan pli tar. La Digue preske tou lakaz i dan plato.  E tou Seselwa i konnen ki ler lapli, se sa bann landrwa ki inonde. Nou bezwen ed sa bann fanmir fer rigol oubyen transe pour delo desann.  Alor Mr Speaker avek ou permisyon, mon pour dir Onorab Ferrari ki kontan dir mon mon’n fer transe La Digue, la i konn pli byen rezondet, akoz mon’n fer sa bann transe.

Mr Speaker i annan semen Koko Ibrid. La ozordi bann dimoun pe soufer akoz sa semen pa ankor fer sirfas, transpor i pase, trou i ganny fer delo i reste. Ziska prezan Lotorite Distrik pe demande. Mon demann Lazans konsernen al La Digue la pour le moman al fer evalyasyon sa semen e met li koman en priyorite. Koman Lotorite, mon papye pour mwan.

Mr Speaker avek sa lespri pour ed fer striktir pli efikas mon pe demande ki tou distrik i ganny ase resours finansyel ou dan nenport ki form neseser pour li fonksyonnen sirtou pour fer travay prevansyon ki tre enportan pour ede minimiz depans, ler bann sityasyon danzere i arive.  Si nou travay prevansyon i byen organize, dega dan distrik ti pour vin vreman, vreman mwens.

E ler mon’n nonm bann ka, mon’n oubliye nonm en semen ki tre enportan i ganny servi par en bon pe dimoun dan lapas, kot la osi en pon in kase, bann dimoun i ganny difikilte pour traverse.  E la ek sa lapli mon pe zis demande ki mannyer zot pe fer pour zot travers sa landrwa?

Mr Speaker si nou sistenm prevansyon i bon Lotorite Distrik par egzanp ler i a war en pye dibwa danzere, i a war letan vandswet pe vini kot letan i annan gro divan.  E nou annan pye dibwa tou dilon semen ki en gran danze pour tou pyeton. Vedir i bezwen annan sa keksoz dan son lanmen ki apel larzan, pour li kapab fer sa travay.

I a koup sa bann pye dibwa.  I pa pour les dega arive, ki kapab kout lavi plizyer dimoun e plitar depans enormeman pour en aktivite ki nou ti kapab evite. Drenaz parfwa osi i bouse parey taler MNA pour Baie Ste Anne in dir, si nou komans netwaye, nou netway sa bann larivyer, nou netway sa bann drenaz ler lapli i tonbe, nou pour napa tou sa bann keksoz ki pour arive.  E la si Administrasyon Distrik i anvi travay, i napa sa finans dan son lanmen. Alor mon pe demande ki en lekip Disaster Management aktiv i ganny mete dan distrik pour anmenn sipor tou dilon lannen, non pa zis pour donn led ler dezas i arive.  E se sa ki nou apel li prevansyon.

Mr Speaker pour terminen mon demann ankor ki sa Minister konsernen i donn Biro Ladministrasyon son prop resours finansyel pour komans fer travay prevansyon tou dilon lannen ki pli enportan, e anmenn sipor pli vit pour minimiz dega ki pe arive.  E sa Minister i bezwen kontinyen donn gidans administratif e lezot sipor neseser dan distrik.  E osi asire ki travay pe ganny fer a en bon nivo e ki annan valer ki sa kontrakter pe demande.

E osi i tre enportan ki zot komans travay avek Lotorite Distrik. pour fer zot vin pli autonome.  Mr Speaker mon demann tou Minister pour travay ansanm pour konnen ki mannyer sak Minister i kapab fer son bout dan proze distrik, akoz mon krwar ki sa i vin parey bann mayon dek ki nou kas enn i pa pour annan sa mayon konplet. Zot a fer sa bout prevansyon pour minimiz bann dega dan distrik.

Mr Speaker mon profit sa lokazyon pour dir mersi tou Digwa ki ankor annan lespri linite, solidarite antre zot antre nou pour nou kontinyen donn sipor nou vwazen. Nou bann frer ek ser ler dezas i tap nou pti zil.  E DA kontinyen fer ou mye pour ou distrik pandan bann moman difisil. E mersi Mr Speaker.

 

(APPLAUSE)

 

MR SPEAKER

Mersi Onorab Sophola.  Avan mon donn laparol prosen Manm, mon ti a zis kontan fer Lasanble rekonnet prezans Mr Armand Souyave ki dan Galeri, garson Sir  Georges Souyave ki ti servi Sesel koman Sef Ziz, e  Mr Souyave welcome e mon swete ki ou a kapab, i annan keksoz dan sa deba ki a kapab enteres ou. I fer 2emm fwa ki atraver ou pasaz isi Sesel ou vin attend sesyon Lasanble. Welcome petet si ou ankor la ler nou break midi nou a kapab ganny en pti rankont en pti koze. Bon mon ava donn laparol prezan Onorab Ahmed Afif.

 

HON AHMED AFIF

Mersi Mr Speaker. Mr Speaker bokou entervenan in deza koze lo sa size me pour mon en pwen ki tre kler e i pa premye fwa ki dan sa Lasanble nou koz lo la, se ki i annan en problenm administrasyon dan sa pei. E mon krwar dan en Mosyon ki’n deza pase avan – mon rapel ti annan en fraz nou ti repet detrwa fwa; administrasyon pa efektif, striktir let ape deteryore.

Mon krwar nou tou nou dan sa lasal nou dakor avek sa statement parski ler mon’n ekout Onorab Lemiel la fason in koz lo keksoz pa pe marse sak fwa i annan dezas. Ler mon ekout Onorab Vidot, ler mon ekout tou dimoun lo tou le de kote latab i kler poudir sa ki arive dan dezas napa prevansyon ki’n ganny fer.

E apre nou tou nou pe konplent e annefe sa Mosyon i pe dir annou rod fason pour redistribye resours pour evit sa bann problenm ki nou pe vwar devan nou. Me mwan Mr Speaker mon ti ava en pe pli lwen, mon ti ava dir pour dir resours i la li.  E i pa zis redistribisyon resours ki 3pour fer diferans ladan. Mon a donn en senp legzanp kot administrasyon pa efektif, striktir let ape deteryore. Mon pour reserve sa legzanp en petrol station ki in pran ozordi zot in ouver semen me in pran plis ki 1an pour en dimoun deside ki bor larantre pour ete e ki bor exit pour ete! Eski ti annan problenm resours. SEYPEC en lakonpannyen ki pey dividend 200 ekek milyon roupi tou le lannen ek Gouvernman. Mon pa pe dir se li ki devret pe fer semen. Minister Finans ki donn Bidze ki nou, nou aprouve e nou pa’n refize pour fer semen, gro Bidze pour SLTA. Gro Bidze pour Minister Land Use, Habitat and Infrastructure. Later i pour SFA, SFA pa demann larzan dan Bidze li.

Resours i annan ti mank en dimoun pour fer en desizyon sa semen i antre la i sorti la, la i la kontrakter ki nou bezwen. Ou donn permisyon pour servi sa semen e mon donn ou de semenn pour fer sa semen.  Se tou ki ti bezwen. Be oli sa desizyon, i pran 1 an, a bezwen redistribye resours, bezwen en dimoun, en administrasyon efektif ki kriy tou sa bann dimoun i dir ek zot fer en desizyon.

Annou retourn lo sa Mosyon devan nou kot nou pe koz lo bann dezas. Ler mon ekout bann MNA ki’n koze, mon’n ekout Onorab Lemiel par egzanp ki li menm in deza en DA.  Mon’n ekout Onorab Vidot ki li menm in deza en DA, i kler pour dir nou annan dimoun, Onorab Ernesta in deza, pardon Onorab Aglae mon krwar li osi in deza DA, Ernesta tou, Onorab Ernesta tou in deza DA. Be nou annan dimoun e i pa zis zot ki konn egzakteman ki problenm ki annan dan tou distrik. Zot konnen zot. Si ou pran lezot dimoun ki zot in travay avek, dan zot distrik respektif e demann zot ki ou krwar i devret arive pour nou rezourd sa problenm.

I pa pour zis redistribisyon resours, zot pour dir ou nou bezwen desizyon. Desizyon ki ganny fer par en administrasyon ki devret efektif.  Be ozordi ler mon gete si pour fer en senp semen pour en petrol station i pran 1an be eski sanmenm sa administrasyon pour pran en desizyon pour fer en retaining wall, pour netway en larivyer e pour deblok en rigol ki si ou pa fer i pour anmenn tou sa linondasyon ki parey yer nou’n vwar Anse Royale. E si napa sa bann desizyon ki pe ganny pran lo en baz toulezour e sa i kler. Onorab William in anmenn son Mosyon li.  Eski zot pour ekoute. Eski menm ki zot ekoute zot pour pran desizyon pour fer keksoz sanze?  Mon pa tro krwar mwan!

Akoz malerezman nou annan nou en administrasyon ozordi ki ou a dire i paralize. Paralize personn pa fer desizyon.

Mon a donn detrwa legzanp dan mon distrik Anse Etoile. Mon’n al get detrwa landrwa kot i annan problenm. La mon konn lafanmir Asman Ma Constans kot later i annan en later Gouvernman zis par lao zot propriyete. Gro pye dibwa i menas zot, in deza tonbe e deswit mon’n ale mon tir portre ansanm, mon’n get ladministrasyon distrik osi enplike ladan.

Mon’n ekrir DRDM i pa vreman mon louvraz me mon fer li. Mon dir be i annan en problenm la gete ki ou kapab fer.  Zot reponn mwan apre enn de zour zot dir mon wi, wi nou okouran sa problenm me nou pa deal avek sa nou. Me selman  zot Departman i apel Department of Risk and Disaster Management, DRDM.

Be konmsi i sipoze manage disaster. I sipoze deal avek risk be i dir ou ler i war sa risk i pe al refer sa en lot landrwa li. Be dan sa lot landrwa la i pa dir lekel sa lot landrwa osi, i dir ou pe al refer li ek Lazans konsernen. Personn pa konnen lekel sa Lazans. Eski i Local Government, eski i Departman Lenfrastriktir?  Eski SLTA, eski i DA?  Nou pa konnen nou. I annan detrwa ladan napa resours tou fason. Be napa desizyon ki ganny fer. So finalman apre 2an nanryen pa’n ganny fer, selman i sipoze Risk and Disaster Management. Mon pa pe blanm sa bann dimoun ki travay kot DRDM mon parski se pa zot ki determin zot fonksyon, zot, zot la zot annan en Bidze mon krwar i apepre 10milyon pour sa lannen.

Taler mon’n tann bann domaz ki’n ganny arive lannen pase ti 26milyon e sa lannen la zis komansman lannen i annan detrwa milyon in ale klerman sa Bidze ki nou. Nou ti vote pour DRDM i pa pour al deal avek dezas.  Se pour pey zot saler, pour pey zot bann kou loperasyon.

Be alor lekel ki pe kordin sa bann keksoz?  Pour mwan napa kordinasyon. Administrasyon pa efektiv, striktir Leta ler mon’n ekout tou dimoun pe koze, ler mon get dan mon distrik napa zis kot Asman, i annan rigol, delo ki koule ler gro lapli, Maldive kot bann fanmir kado ek Berlouis, ler mon get sa gro delo ki pase dan kwen Daman i pas kot legliz i al tonm dan delo sale. I bezwen divert deryer kot lakaz Mr Agathine pour al kot lakaz Mr Melchi, e bann Joseph. Tousala bann louvraz ki tou dimoun i konnen i devret ganny fer. Tou dimoun i konnen si ou pa fer sa bann louvraz ozordi ou pour koz linondasyon ek dega.

I annan plis ki 2an, la 2019 e 2016 mon’n anmenn sa bann problenm a laporte Gouvernman. Be mon pa la pour mon al kriy kontrakter pour fer sa bann louvraz. I pa louvraz MNA.  Nou en Lezislater, nou tou nou konnen. Be personn pa pran desizyon. Tou le lannen i pour vin dan Bidze, i pour vin dan Bidze.

Be finalman ki ou vwar akoz nou pa depans dizon e R2milyon en fwa dan en distrik tou le lannen, tou le lannen nou riske al depans nou plis ki R1 milyon pour al rezourd bann dega ki ti kapab napa si ou ti’n depans R1milyon dan sa distrik.  Mon pa pe dir al fer tou miray, tou rigol, tou keksoz demen bomaten.  Be ou a fer en pe dan 2019, ou a met en lot pti bout dan 2020, me selman atak bann landrwa ki enportan. Sa Gouvernman pa pe fer sa. Personn pa fer desizyon! Tousala i dir ou zot pe refer kot en lot Lazans e i pa dir ou lekel sa Lazans akoz li osi pov dyab kekfwa i pa konnen. Be administrasyon pa efektiv.

Mon ti a kontan mwan pour mwan sizer detrwa solisyon. Pour mwan solisyon se, si ou serye koman en Gouvernman rod bann dimoun ki konn sa problenm byen. I annan dimoun dan DRDM, i annan dimoun ki’n deza DA, ki MNA, i annan dimoun ki’n dan distrik ki prive i war sa bann dezas. I abitye al deal avek sa bann dezas li menm. Rod zot, dir ek zot annou met an mars detrwa proze, nou napa bokou resours nou.

Onorab William i dir annou redistribye selman annou met detrwa pti proze ki kapab – koman en premye faz evit bann gro dezas.  Pa bezwen al fer bann keksoz, pa bezwen al rod en Plan Konpreansiv parey mon tann koz lo la tou lazournen.  Annou pa esper sa. I annan detrwa keksoz nou kapab fer deswit.

I annan serten larivyer nou kapab debloke.  Dan Bidze lannen pase nou ti pey R3 milyon avek, nou ti aprouv R3 milyon Land Waste & Management pour netway larivyer.  Petet i akoz zot, zot krwar i merit 10, be selman zot napa larzan.  E zot konnen zot si zot demann plis zot pa pour gannyen. Be si i devret 10 annou met li 10 pour netway larivyer parski Sesel Mahe sirtou i en ros li, i en ros avek napa landrwa plat preski ditou. Be byensir si nou tou nou konstri lakaz dan bann landrwa montannye ki nou ekspekte?  I annan e ta delo ki desann toultan e nou napa plato. Nou sitan napa plato nou bezwen konble.

Be problenm pa tro dan ou ganny de problenm enn ler delo pe desann vit dan sa bann montanny i fer dega, e lot ler i ariv dan plati inonde.  Sa i kler sa. Be nou’n viv avek sa pandan nou listwar antye nou.  Nou pa kapab trouv en solisyon ki ekonomik ki si ou envestir ozordi ou pour sov larzan demen. Alors pa dir poudir i vin en problenm bidzeter parski nou pe sov larzan be sa ki nou bezwen en plan efektiv, en administrasyon efektif ki ozordi pour mwan napa.

E se sa ki nou bezwen olye al depans larzan lo bann keksoz ki initil parey pour al fer Referendum, bann keksoz koumsa. Pour mon sa ki enportan ozordi annou rezourd problenm. Problenm ki nou kapab rezourd atraver Lalwa, atraver Lasanble, les Lasanble deal avek. Les Lalwa, les Lezislater deal avek.

Be nou pe gaspir larzan. En lot solisyon pour mwan se servi bann resours dan ou distrik.  Par egzanp si ou annan bann gro biznes dan ou distrik, permet zot kapab servi zot CSR enn fwa ki nou’n ganny tou sa bann dimoun ki nou konnen, i konnen ki mannyer pour rezourd problenm i vin ek plan, en plan pratik ki kapab ganny enplimante pa avek bokou larzan pour komanse, me i pour adres bokou bann problenm. Annou al kot zot annou dir zot ed nou pour met en plan pour anpese ki sa gro lapli ki pe al tonbe an Oktob 2019 la i pa pour fer dega.

Annou fer en plan ki nou dir si nou pa fer sa lannen dan nou distrik, nou pour al depans omwen R1milyon, be annou depans R300mil la nou a sov sa R1milyon sa lannen. Si nou kapab fer sa dan tou distrik.  Pa i pour en komansman?  Lannen prosenn nou a fer ankor en lot plan. Se sa ki nou devret annan. Servi CSR e servi bann lakonpannyen ki san CSR i pare pour li fer en kontribisyon. Kekfwa i a donn ou en keksoz, i a donn ou en masin.

Tousala se bann keksoz ki nou kapab fer. En lot keksoz ki nou kapab fer se koz ek bann labank koman Gouvernman e dir ek bann labank met en larzan dekote, kot bann fanmir ki santi i bezwen en loan pa pour al fer son lakaz. Oubyen repar son lakaz me pour repar en pti lenfrastriktir parey rigol, met dalo, fer en retaining wall, sa bann keksoz koumsa ki si zot kapab ganny resours pour fer sa, sa pa larzan Gouvernman sa.  Sa larzan prive sa dimoun i pare pour peye.

Fer sa disponib avek sa bann dimoun, sa bann dimoun i ava lo zot menm fer zot kontribisyon e sa osi i pour evite ki tou sa bann delo desarz ki pe pas atraver zot propriyete ki pe zis al ganny zete ki pe fer bann, ki pe kas lateras partou, pe fer lateras grennen. Tousala ava evite. Alors mon krwar i mank nou vreman en pe leadership dan sa pei, kot nou adres bann problenm menm avan ki problenm i leve!  Se sa ki manke dan sa pei.  Alors Mr Speaker mon ti a kontan dir senpleman dir mon pour siport sa Mosyon par Onorab William. Mon konnen mannyer in pas dan sa bann kou la i pour napa kouraz pour li petet dir.  I pa zis redistribisyon resours me re-aranz sa ladministrasyon ki pa marse ozordi.

Se pour sa rezon ki nou pe ganny tou sa bann problenm ki nou pe vwar e nou tou nou konn solisyon, me nou pe demann sa Gouvernman pour li ekoute, pour fer desizyon e pour fer keksoz marse pour ki sa bann dezas pa ariv ankor dan nou pei.  Mersi Mr Speaker.

 

MR SPEAKER

Mersi Onorab Afif. Mon a donn laparol Onorab Sandy Arissol.

 

HON SANDY ARISSOL

Mersi Mr Speaker.  Bonzour tou Manm. Bonzour tou dimoun ki a lekout.

Mr Speaker Mosyon Onorab William parey i lir;

‘’An vi lefe sanzman klimatik atraver kalite letan ki nou pe eksperyanse, e dega.  Apre sa Lasanble i demann Gouvernman pour revwar la fason ki distribisyon resours pe ganny fer, pour deal avek bann tel evantyalite pour redwir risk, permet aksyon vit avanler lezot Lazans konsernen i arive, minimize lenpak’’ pour nou oditer osi ki dan Galeri konpran ki Mosyon nou pe koz lo la.

E mon krwar plizyer keksoz in ganny dir an relasyon avek sa Mosyon.  Me selman Mr Speaker Mosyon Onorab William i devret ganny tou sipor neseser.  I devret ganny merit lo sa ki i pe demande.  Me kestyon ki mon pe demann mon lekor mon Mr Speaker si nou lo sa nivo koman Manm Lasanble Nasyonal, bann dimoun ki met kravat, ki nou annan bann Paspor Diplomatik sel group dimoun dan Sesel ki ganny elekte apard Prezidan, si nou lo sa nivo nou ganny sa kalite, nou kapab servi sa term dan leksik i annan ‘lenfirmite’.  Deor laba dan nou distrik kestyon ki mon demann mon lekor alor, sa dimoun ki’n vot pour nou ki li i pa met kravat, li i pa sitan en dimoun enportan ki li i pas atraver dan nou distrik oubyen dan nou pei? Sa i kestyon mon ti a kontan demande Mr Speaker. Parski ozordi dan distrik problenm ki nou, nou fer fas avek koman MNA koman Lotorite Distrik, koman rezyon e ou kapab mazinen ki problenm bann dimoun ki met nou la zot, zot pas atraver.

Letan nou pe koz dezas dan distrik ozordi la bomaten, mon mazin Mrs Desheila Bastienne – en madanm ki son lakour son lakaz in inonde yer en lazournen antye.  Yer swar osi parey e in telefonn tou Lotorite konsernen e ziska ler nou pe koze la personn pa ankor rann li en vizit !  E in anvoy mwan en mesaz.  I dir mwan dir dan Lasanble Nasyonal. Mansyonn son problenm. Kekfwa bann ki pe ekoute, ki konsider nou koman en Lasanble serye, zot a kapab rann li en vizit pour zot rode ki mannyer zot kapab asiste Mrs Desheila Bastienne silvouple lo son non mon enplore !

Mr Speaker letan nou pe koz lo sa Mosyon pour asiste bann dimoun mon mazin osi Patricia, mon redir ankor son non Patricia, en vwazen ki ti donn en bout son later pour zot fer semen pour ki en lot group i kapab benefisye. Ozordi Patricia ti ganny promet en miray pour ki delo pa antre dan son lakour.

Mr Speaker letan gro lapli i tonbe sa madanm ki en trwazyenm-az  son lakour, son lakaz i inonde. Konnen akoz i inonde Mr Speaker parski senpleman li koman en Seselwa, koman en Seselwa in bonker in zenere, in donn en bout son later pour kapab ed lezot frer Seselwa ariv kot zot, li ozordi i pe anmas le po kase, delo ranpli dan son lakour.  I pe esper son miray, in ariv almost mon krwar 15an pe al lo 20an!

Silvouple bann dimoun ki ti promet Patricia son miray pase al get li akoz i fatige tir delo sak fwa lapli i tonbe.  Donn li son miray silvouple!  Mon enplor zot bann ki pe ekout nou laba deor, bann Lotorite konsernen ki sa Mosyon pe adrese Mr Speaker.

Letan mon lo Mosyon Onorab William mon mazin osi Mr Savy en msye ki en gro avoka in fer en gro miray obor li in bar li e prezan li son delo pa al dan rigol.  In telefonn partou. Lanvironnman in monte in vizite. Personn pa kapab fer nanryen.  Akoz sa? Akoz kontak ?  Akoz li i en msye Savy, e li en dimoun ki nou apel dan bracket (Seselwa ordiner) i pa met kravat parey mwan. I napa en tit, alor li i ganny peze, i ganny penalize. Mr Speaker ozordi mwan mon pe fer sa lapel, parski laba deor parey mon’n dir, ler nou koman Manm Lasanble Nasyonal en group dimoun ki ganny konsidere ‘enportan ‘dan sa pei nou, nou pe ganny sa kalite lenfirmite zis mazin bann dimoun dan nou distrik ki zot, zot pas atraver.

Kestyon ki mon demande be lekel ki Lotorite dan sa pei? Lekel ki annan pouvwar pour fer keksoz dan sa pei?  Mon annan en fanmir Curio Road depi mon’n ganny elekte mon’n kriy zot non, tou dimoun i konnen ler zot pas Curio Road ou fer shortcut i annan en fanmir ki zot lakaz, zot lavarang i anpandan, pe al lo 3an zot koumsa zot.

Menm zot pa siport mwan, sa madanm pa tro kontan letan mon koz lo li, be selman i en zabitan St Louis, mon bezwen dir Mr Speaker, parski zot bezwen led. Letan ou koz avek Lotorite Distrik i dire k ou DRDM, letan ou koz ek DRDM i dir ek ou Local Government, letan ou koz ek Local Government i dir ek ou i annan en seksyon dan lanvironnman ki zot deal ek sa.

Sa fanmir zot ankor anpandan letan nou pe koz lo la. Ler nou, nou pe kouver aswar nou tapi nou koste nou fanm en pti pe pli pre zot mon asire zot pran en tors, zot get anba zot lakaz si en lot kopo pa pe tonm anba lo Uranie!

Mr Speaker sa i le ka dan nou distrik, dan nou pei ozordi.  Sa i bann keksoz bann leksperyans ki nou dimoun pe fer fas avek. Be eski Lotorite laba deor i konnen sa ki nou dimoun pe fer fas avek? Mon’n tann koz lo Brigad Dirzans, letan nou pe dir R500 par an. Ler mwan mon’n kalkil li par an.  Ler mon mon’n kalkil li par mwan, zot ganny zot R41 par mwan!

Eski nou anvi kontinyen avek Brigad Dirzans pour nou donn zot R500 toulezan oubyen R41 par mwan?  Eski i fer sans ozordi letan nou’n ’pet an fler’, nou pe rod Referendum, e nou en high income country parmi Lafrik dan lemonn?  Mr Speaker nou bezwen revwar. Si nou anvi bann dimoun ki serye, ki pare pour asiste en lot dimoun pour donn son letan, son lavi, nou bezwen revwar striktir. Eski nou kontinyen rod detrwa zonm baka? Eski nou kontinyen rod detrwa zonm akoz nou anvi donn li en R500 roupi toulezan pour li fer en keksoz.

Oubyen nou met nou distrik ansanm, nou rod sa msye ki travay PUC ki annan en leksperyans dan aranz tiyo. Nou rod sa dimoun ki annan en excavator ki kapab ed nou pour kas lateras. Eski pan ou rod en sarpantye, nou annan Wilton Bacco, Belonie ki’n fer sarpantye tou son lavi, ki kapab donn en koudmen pour li kapab rekouver lakaz sa madanm ki son twatir in tonbe.

E nou kapab ansanm apre donn zot en keksoz pour dir ek li mersi. Be selman zot bann dimoun serye.  Bann dimoun ki kapab vini kont lo la letan ou bezwen li, oubyen letan li in vini, ou’n apel sa enn pour vini, pour vin tir delo, ler li in vini in konsonm plis delo, prezan i pa kapab vin tir delo kot sa madanm, sa osi i annan dan nou distrik.  Sa i bann realite lavi ki nou bezwen fer fas avek Mr Speaker.  E se sa ki Mosyon pe demande ozordi.

La dan bwa blan ki tonm dan mon distrik kot flat Bois Blan, i annan en konpannyen konstriksyon in vini, zot pe swadizan netway rigol pour met bann pavement. Zot in tir sa railing ki konekte main road avek pour al flat Bois Blan. Madanm Leon in call partou, in call Lotorite, nou’n sey call partou pour sa kontrakter si zot in fini avek sa travay ki zot pe fer re-netway nou rigol parey ti ete, remet sa railing pour ki sa Mrs Leon, en madanm a laz i kapab koupe sorti lo main road pour li rantre dan son flat ‘’san kas son vye lazanm’’ parey i dir mwan.

Mr Speaker sa i bann problenm nou pe fer fas avek. Be mon kontan letan Onorab Vidot in koz an relasyon avek bann kotasyon dan distrik. Ozordi sa i fer li difisil pour annan serten travay. Be selman sa ki nou bezwen osi aksepte Mr Speaker, se ki Onorab Lemiel ti remind nou.

Onorab Lemiel ti fer sa byen kler ozordi dan distrik napa bouret, pyos, lapel, bann keksoz pour nou servi –  Onorab Lemiel ti servi sa mo ‘disparet’, in perdi, personn pa konnen oli sa bann zafer la. E Onorab Lemiel ti menm dir i reste zis en tors. Be i enportan pour nou rode ki’n arive ek sa bann keksoz. Letan Onorab Vidot i dir pour dir nou bezwen 3 kotasyon. Se sa ki nou koman en Lasanble serye, nou ti tonm dakor avek Minister Finans pour annan 3 kotasyon!  Ou konnen akoz Mr Speaker, parski anba bann Ladministrater Distrik ; bouret in perdi, boots in perdi, lapel in perdi, pyos in perdi! Gran kouto in perdi!  Larzan in perdi!

Alor Onorab Vidot ansanm ek mwan ek Minis Finans, nou ti tonm dakor pour nou annan en kotasyon, pour ki bann keksoz koumsa i mars byen dan nou pei Mr Speaker. Nou pa ganny ankor sa bann zafer napa bouret, napa !  Annou pa bliye – pa bliye kastrol STA, nou aprann ti perdi anler dan FPAC, servings bowl, tousala Mr Speaker.  Se pour sa rezon nou koman en Lasanble serye, nou ti tonm dakor lo la, pour ki i annan sa kotasyon pour ki keksoz i kapab marse en pe pli byen.

Mr Speaker letan nou pe koz lot ou sa bann zafer. Mon redir ankor nou Seselwa laba deor li i kontinyen ganny tou kalite lenfirmite.  Me kestyon ki mon demann mon lekor be eski nou koman en lenstitisyon. Bomaten mon kontan letan ou koman Speaker e sa de Leaders zot in montre en sipor pour Onorab Lemiel e osi pour Onorab Flory Larue, ki pe fer en travay Anse Royale an relasyon avek sa ki’n pase-

 

(Off-Mic)

 

HON SANDY ARISSOL

Onorab Flory Larue ki pe fer en travay pour distrik Anse Royale lo kote LDS.

 

Mr Speaker mon ti kontan sipor ki ou ti donnen koman Sef nou lenstitisyon e Onorab Ramkalawan e Onorab De Commarmond ti donnen. E mwan mon krwar sa bann sipor i enportan Mr Speaker.  E nou koman en lenstitisyon nou bezwen a en serten moman siport kanmarad oubyen – siport nou prop lenstitisyon.

Nou bezwen sipor. E sirtou ou koman nou speaker letan ou prezant sipor avek en Manm mon krwar sipor i bezwen pa fini la.  I bezwen al bokou pli lwen pour tou Manm.  Mon dir sa parski mon asire Zidisyer, Sef Ziz i siport tou son bann ziz zot.  Zot fer sir ki tou bann ziz zot ganny zot sekirite transpor, zot ok?

Prezidan Larepiblik ki ansarz L’Egzekitif.  Mon asire ki li osi i fer egzakteman parey pour son bann Minis.  E mwan mon swete e mon konnen sa sipor kontinyel ki nou Speaker i donn nou an relasyon avek nou menm nou, travay ki nou fer koman bann Manm Lasanble an sa ki konsern nou voyaz, nou sekirite, nou distrik e enportan mon krwar pour nou kontinyen avek sa sipor.

Be Mr Speaker an menm tan i enportan pour ki nou koman en Lasanble, dimoun ki ekout nou laba deor, oubyen Gouvernman zot pran nou serye.

Plizyer fwa mon krwar pour dir bann Mosyon ki anmenn dan Lasanble Nasyonal i fini lanmenm la oubyen pa ganny ekoute, oubyen pa al okenn par. E parey Onorab Ferrari in dir pli boner, Onorab William in deza kriye lo la.  Kriye lo sa Mosyon, kriye pour distrik e ozordi nou bezwen sipor Mr Speaker an relasyon avek sa.  Me par kont letan nou pe koz dezas nou pe koz nou distrik i enportan osi pour nou mazin nou responsabilite nou dimoun laba deor.  Ozordi par egzanp letan nou pe koze, annou get en zenn. Eski bann zenn la ozordi ki’n ganny 18an, zot okouran e zot konnen poudir zot bezwen zot menm zot al anrezistre zot non lo rezis voter.

La in kriye byento pour annan Referendum, eski bann zenn laba deor zot konnen poudir se zot endividyelman, zot bezwen al anrezistre zot non lo rezis voter, akoz i nepli antre otomatik lo rezis voter?  Eski sa zenn i konnen laba deor an term responsabilite. Eski sa zenn i konnen poudir li letan i fini lekol i bezwen komans demars en travay pour li kapab soutenir son paran, soutenir son pti frer, soutenir son lekor koman en adilt Mr Speaker. Eski nou zenn i konnen sa laba deor an sa ki konsern responsabilite. Nou zabitan dan distrik ki nou lager pour zot, ki nou lager lebra kase pour zot, be eski letan Sandy Arissol i ganny, i aste en bout later avek Gouvernman ki i pa ankor gannyen ziska aprezan, kekfwa mon pa konnen kapab ganny en bout. Mon osi parey tou dimoun, mon a dir mersi davans. Mr Speaker letan sa dimoun li in aste en bout later avek Gouvernman, eski pa i son responsabilite li osi pour li fer sir ler pe konstri son lakaz, i annan sa gro ros anler ki get li la. Eski i kontinyen konstri son lakaz, san kas sa gro ros?

Eski i kontinyen les sa pti pye dibwa ki vin pli gro ki son lakaz  grosi deryer son lakaz ? Sa i bann responsabilite ki nou koman en Lasanble serye – Lotorite nou bezwen osi edik nou dimoun Mr Speaker.  Akoz souvandfwa letan ou vizit en dimoun, premye keksoz ki i montre ou, se sa gro ros deryer son lakaz.  Selman li i annan 25an  i reste la li, 25an sa ros i get li.  Be nou bezwen rod en fason ki mannyer nou koman bann sitwayen nou pei, koman bann lokater nou lakaz oubyen nou later, nou bezwen osi zwe en rol.

Maler pa averti, sa nou tou nou konnen. Me parfwa Mr Speaker mwan mon rapel en lensidan kot en landrwa ti ganny inonde, ranpli partou, en group dimoun ti al donn en koudmen pour netwaye tir delo.  Ou konnen ki fanmir ti fer Mr Speaker, fanmir ti debout lot kote semen laba i get ou pe tir delo pe netwaye. Se sa problenm.                    Nou koman en Lasanble serye, koman bann lenstitisyon for laba deor, nou bezwen osi edik nou dimoun ki mannyer keksoz pour ale, ki mannyer keksoz i evolye, ki mannyer keksoz i fer.  Nou bezwen arete ek sa zafer lesefer, kot ou ganny okipe depi ou nesans, ou pa ankor travay, selman ou annan en mil roupi lo savings bank ki’n ganny mete lo ou non, menm i pa la available, selman in ganny mete lo ou non.  Ou pa ankor komans travay ou, apre ou ganny dir pour dir pou take care avek ou ziska ler ou mor.

Nou bezwen dir ek ou pep osi, pour dir responsabilite parey granmoun i dir ledikasyon responsabilite i komans dan lakour.  I komans dan lakour.  Kot nou, nou kapab enstri mon zanfan poudir la delo in ranpli dan lakaz.  Premye keksoz ki nou. Nou bezwen fer avan mon telefonn DRDM, rode kot DA i ete, kot MNA i ete.

Mwan mon bezwen komans rod mon mop, komans rod seo, komans rod laponp annou netway nou lakaz.  Nou bezwen koman fer sa Mr Speaker.  Nou fer sa, me parfwa letan dimoun i fer, letan en keksoz in agrave, letan lateras in deboule i napa en excavator ; letan i napa en laponp delo parey Desheila Bastienne pour li tir delo i tap en laport, i rod en led, e sa i normal sa (Onorab Valmont kantmenm ou pour sot anler.)  I normal sa Mr Speaker.  La i bann keksoz ki an deor nou kontrol.  E se pour sa rezon ki nou koman en Lasanble, nou vote pour ki DRDM i ganny larzan Mr Speaker, pa pour li asize avek sa larzan ki nou vote!  Se pour sa rezon ki nou, nou donn li en Bidze pour li kapab asiste bann dimoun ki dan problenm.

I annan dimoun ki kapab asiste zot lekor, be letan keksoz i vin pli gro ki ou ti pe ekspekte, ou pa kapab deal avek, alor i enportan nou rod lasistans avek bann Lazans konsernen parey DRDM. Mr Speaker letan mon lo DRDM, letan mon lo DRDM, mon anvi demann en kestyon.  Be DRDM ki vreman son rol, mon’n tann Onorab Afif koz lo la, DRDM ki vreman son rol li? Son rol se gete? Analize? Rekomande? Fer rapor?  Sa son rol DRDM?

Mon krwar nou bezwen ganny li kler pour nou konnen, si sa larzan ki pe donn DRDM, nou koup li par lanmwatye ?  E parey loter Mosyon pe demande sa lot lanmwatye, nou anvoy dan distrik parske nou kapab deswit ganny en larzan la pour nou koup sa pye dibwa ki’n tonm lo lakaz, sa madanm oubyen sa msye.  Olye esper DRDM, telefonn li e parey nou’n tande poudir li menm 4 prela i napa! So i pour enportan pour nou balans tousala Mr Speaker.  Rol DRDM ok? E letan ozordi dimoun in sitan perdi konfyans dan tou sa bann lorganizasyon ki nou’n koz lo la DRDM, lezot ki ede, ozordi Mr Speaker, nou annan sa ki appel ki nou, nou ti tonm dakor, ki mon’n tann Onorab Vidot in koz lo la se rezyon, Konsey Rezyon.

E pa bliye Konsey Rezyon ti pas dan 5enm Lasanble li. Ok, ti dan 5enm Lasanble sa Mr Speaker pou Onorab Vidot konnen. Alor mwan mon anvi konnen Mr Speaker, Konsey Distrik, Konsey Rezyon parey nou’n fer li vini ozordi, i menm zafer.  I menm zafer e tousala ti ganny agree par tou lede kote latab isi anndan ! Taler lenpresyon ki ti’n ganny donnen sete zis en sel kote ki ti agree sa.  Alor sa Mr Speaker mwan mon anvi-

 

(Interruption)

 

HON SANDY ARISSOL

Mr Speaker mon annan en fles obor mwan la en, mon annan en biy avek en makadanm.  Mon pa konnen si zot le mon servi sa makadanm ouswa sa biy?  Me selman mon pa servi pou le moman – ok?

 

(laughter)

 

MR SPEAKER

Kontinyen.  Kontinyen.

 

HON SANDY ARRISOL

Mr Speaker mon kapab kontinyen. Mr Speaker mwan mon anvi fer en mansyon lo Konsey Rezyon Santral (1). Ozordi mwan mon bezwen dir menm zot 1an pe arive, enportan pour mwan dir pour mwan mansyonnen,  poudir i annan en travay ekselan ki’n arive.  Mon bezwen koz lo mon rezyon, parske mwan mon konn sa ki pou mwan, e lezot a fer mansyon lo sa ki pou zot. Mwan mon bezwen dir Mr Speaker i annan en travay ekselan ki’n arive lo nou kote. I annan plizyer bann vizit ki’n arive ; i annan plizyer bann latant ki’n nou ganny avek bann lorganizasyon kot nou’n ganny sans zwenn. Nou’n fer bann miting piblik an relasyon avek plizyer size.

E se pou la rezon ki mwan mon krwar Konsey bezwen ganny plis sipor.  Anba  -letan i la pe fer travay i bezwen ganny sipor. Parske i annan bann keksoz ki nou vwar ler nou rann vizit i annan serten rekomandasyon ki nou fer i annan serten rapor ki nou bezwen anvoy devan, ki bezwen annan swivi, kot nou konman en Konsey nou kapab asiste. Oubyen antreprann serten proze, serten aktivite dan distrik ki pou fer ki, sa i vin mwens presyon lo Local Government and i anmenn mwens birokrasi, an term prosedir, papye oubyen tousala. E mon krwar i enportan pour mwan fer mansyon  e pour mwan dir  poudir mon Chairman avek tou son bann manm ;- e Mr Speaker i enportan pour nou fer sorti lo sa Konsey napa zis LDS lo sa Konsey pour mwan. I annan  sa 4 DA ki reprezant zot distrik, Mr Speaker i enportan sa.  E travay  ki nou pe fer pour lakominote, mon krwar i enportan.  E mon swete ki lezot rezyon, e lezot sa bann Chairman avek zot bann konseye, zot osi zot pe fer sa kalite travay ki dimoun pe ekspekte avek nou dan nou distrik.

Mr Speaker pou prezant sipor pou Mosyon ki Onorab William pe anmennen, mon krwar i ekstrememan enportan, parske zis St Louis depi lannen pase nou’n ganny permisyon pour nou koup en pye mang lo en later prive, kot i an danze pou plizyer lezot lakaz e sa ki ti responsab in vini in tir zis 2 brans.

E letan mon’n koz avek Lotorite Distrik i dir ek mwan, la ou konnen finans pou koup sa 2 brans, nou’n fini met li anba proze lannen pase. Be la mon’n dir ek li non, nou bezwen koup li antye sa pye mang.  I dir mwan, be la si nou koup antye nou bezwen- I annan en mo ki in servi, nou bezwen re-submit, re al rod larzan remet li dan en lot proze ; zis pour nou koup en pye mang ki pe prezant danze pou 3, 4 lakour ki la obor.

E se pour sa rezon ki mon krwar poudir nou bezwen annan serten finansman ; nou bezwen annan serten finansman, pour ki bann proze dan distrik, bann keksoz dan distrik i kapab bouze an term sa ki nou, nou krwar ladan. E taler mon kontan letan Onorab Sophola in remind Onorab Ferrari an relasyon avek son bann transe ki’n fouye La Digue Mr Speaker! Mon dakor ek sa mwan?  Be selman sa ki Onorab Ferrari ti’n toultan remind Onorab Noline Sophola, se ki transe i byen ou fouye, napa problenm ou fouy transe, be selman transe bezwen fini.  Parske ler transe pa fini se la ki ma soeur pou noye Mr Speaker.

Alor i enportan ki bann proze ki nou konmanse dan distrik i bezwen fini i pa kapab aret dan milye semen Mr Speaker. Alor mwan mon krwar poudir letan mon retourn lo mon premye pwen an relasyon avek bann konstrent ki nou dimoun pe fer fas avek dan nou distrik, i enportan pour nou toultan fer met sa dan nou lespri,   poudir dir lo sa nivo nou, nou’n rankontre en kantite difikilte.

Mr Speaker, letan nou pe koze la plizyer paran pe call nou ki dan lakominote, plizyer pe  call an relasyon avek fungus kot lekol Perseverans. Kantite paran pe call.  I annan paran ki’n al fer tes medikal pe ganny papye.  Zot, zot pe kriy lasasen zot pe rod en dimoun, zot pe rod ki Lotorite konsernen pe fer.  Sa i bann problenm ki nou dimoun i rankontre Mr Speaker. Kot i annan en madanm ti telefonnen, letan nou, nou ti pas Lalwa an relasyon avek 13enm mwan saler. I annan en madanm in dir avek mwan, Mr Arissol nou Sef in dir ek nou i pa pe donn personn 13enm mwan saler anmenn li Ankour si nou le, i fermen si fodre. Me letan nou annan bann travayer Seselwa zot leve bomaten, zot pe donn zot letan dan sa lakonpannyen pou zot travay eski zot pa merit zot byen zot osi?  Eski pa i annan bann prosedir dan sa Prozedlwa ki dir okenn lorganizasyon i annan, ki bezwen led pou premye lannen sepa 2enm lannen kapab vini, e apre pou zot menm sey rode ki mannyer zot kapab ed zot lekor?

Nou annan travayer, so ki Minister Finans pe fer? Sa madanm i dir mwan in telefonn partou! Partou Mr Speaker. E ziska prezan zot konman bann travayer sa lorganizasyon, zot pa ankor ganny zot 13enm mwan Mr Speaker, parski zot santi zot pe travay e zot vwar lezot pe ganny pou zot.

 

MR SPEAKER

Onorab wrap-up.

 

HON SANDY ARISSOL

Mr Speaker mon ti a kontan, mon pou terminen lo mon Mosyon, selman mon ti a kontan dir pou dir, mon pou prezant sipor, mon ava terminen akoz ou’n dir mwan terminen. Mon ti a kontan prezant sipor lo Mosyon Onorab William, e mon ti a kontan dir ankor ki sa sipor ki ou, ou’n donn Onorab Lemiel bomaten an relasyon avek Anse Royale, sa sipor i kontinyen pou tou Manm an relasyon avek travay ki nou fer.  Pa neseserman zis ler nou annan dezas, e mon swete ki Lasanble i kontinyen get tou son bann Manm parey Egzekitiv i get son bann Minis, parey Sef Ziz i get son bann Ziz. So, i enportan pour nou anvoy en mesaz laba deor, pou dir wi travay ki Lasanble pe fer i serye, bann Mosyon ki nou vin lo la i enportan.

I pa zis en Mosyon ki nou vin la dan Lasanble Nasyonal nou koze en nanryen pa arive.  Mon swete ki Mosyon Onorab William i ganny lekout ; i ganny sipor osi  Lasanble Nasyonal, pou ki i ganny swivi, pour nou konnen ki zistans in arive kot bann Lotorite konsernen ki pe get nou laba deor.

E mon swete Mr Speaker tou sa bann dimoun ki en fason ou en lot, in ganny afekte atraver sa dezas ki nou’n pas atraver sa 2 zour ki zot ganny bann sipor neseser.  E ki bann Lazans konsernen i get byen dan zot welfare parey Mosyon pe demande Mr Speaker. Me pou le moman mon ava aret la, akoz ou’n dir mwan arete, me mon ti annan plizyer lezot pwen 15, 20 pwen parey Onorab Gill toultan i annan e toultan ou les li.  E mwan ou’n mwan aretemon ava aret la.  Mersi bokou Mr Speaker.

 

 

MR SPEAKER

Mersi Onorab Sandy Arissol. Bon petet zis pou lenformasyon, Lasanble depi 6enm Lasanble in konmans travay tou Mosyon Sekretarya i fer en rapor e nou anvoy kot Cabinet Secretary.  Sa i en pratik ki nou’n konmanse e nou pe kontinyen.  E sa Mosyon tou nou pou fer en rapor nou pou anvoy kot Cabinet Secretary, kot bann konsern ki Manm in leve in ganny met devan. Bon si sa bann konsern i ganny deal avek sa nou pa konnen  be selman nou, nou fer nou par e sa bann rapor i ale e i al tonm dan biro kot  Mr Mohamed Afif.

Mon ti anvi zis fer en pti komanter Onorab Sandy Arissol in mansyonn Mrs Patricia e sa i en zabitan dan distrik Bel Ombre ki reste Beau Bel. Mwan avek DA nou konn son sityasyon, e nou’n fer sa demann e nou pe kontinyen fer sa demann e nou pe kontinyen swiv sa demann. I zis malere pour mwan dir from the Chair la pour mwan dir sorry parey tou lezot manm in fer sorti.  Ou fer demann, ou ekrir, ou fer tou, keksoz pa marse.  Keksoz pa marse, me sa madanm in fer en zes saritab, kot Lotorite ti bezwen access, pou kapab devlop dan lot later pou bann dimoun kapab ganny en mortorable access pou ariv kot zot lakaz.  Grannker in donnen, me i ti demann zot zis en pti retaining wall pou anpes delo antre dan son lakour.  Me ziska prezan i ankor pe espere.  Mwan avek DA Bel Ombre nou pou kontinyen persiste avek Lotorite pou sa.  I annan plizyer pti keksoz ki mwan osi mon’n note mon pou petet anmenn  en kontribisyon zis avan nou fini lo sa Mosyon.

Akoz i annan bokou keksoz ki pa pe marse.  Lakaz an Out lannen pase Bel Ombre ki ti ganny detri konpletman, e erezman pa ti ariv okenn fatalite. Sa koup ki ti pe reste ladan lakaz ti  ganny kraze avek en ros depi Out 2018.  Sa gro ros i ankor pe asize anba lavarang e sa de dimoun pe reste dan en guesthouse ziska prezan.  Nanryen pa ankor ganny fer, nou tande pe fer plan, pe fer isi laba. E ankor i bann keksoz ki mwan avek Lotorite Distrik nou pe fer swivi  nanryen pa pe ganny fer. Lo mon kote mon pou san okenn leksepsyon mon pou fer mon mye pou enable bann Manm pour zot kapab fonksyonnen, pour zot kapab fer zot travay, se pour sa rezon dan Bidze ki nou pe travay lo la tou nou pe sey rod en pti plis sipor, bann resours ki a  kapab permet bann Manm petet desarz zot responsabilite en pe pli byen.

I mean – I pa vedir ki la konmela zot pa pe fer, me avek resours adisyonnel i pa permet zot pou fer sa pli byen.

Avan nou pran break petet mon pou zis anonse i annan en Komite ki pe meet  pamdan break 12 .05.  HIV Aids SRHR Committee ki pe meet dan Committe Room 2 – ok?  Avek sa nou ava pran en break e  nou ava retournen 2er, kot mon pou donn laparol Onorab Jude Valmont, ok? Nou break nou retournen 2er.

 

(BREAK)    

 

                                                                                                                                                                               MR SPEAKER

Bonn apre midi tou Manm Onorab.  E bon apre midi tou dimoun ki a lekout e ki pe swiv travay Lasanble Nasyonal.  Nou pou kontinyen avek deba lo Mosyon e toudswit mon ava donn laparol Onorab Jude Valmont.

 

HON JUDE VALMONT

Bonn apre midi Mr Speaker.  Mersi bokou. Bonn apre midi tou koleg Onorab e tou Manm piblik ki pe swiv nou.  Mr Speaker depi yer bokou bann bon pwen in ganny refer sorti, alor mon pa war gran nesesite pou dwell lo sa bann pwen, me selman i annan serten pti ki mon ti a voudre zis met lanfaz lo la.  Alor mon pa pou tarde.

Mwan mon ti a voudre dir ki mon pou koz an faver sa Mosyon, akoz mon sorti dan en distrik – mon reprezant en distrik ki son problenm ou kapab dir i preski unique.

Mon distrik Pointe Larue i en distrik ki i ganny borde avek Erport e nou trouv nou en pti pe par anba sa runway.  E parey zot konnen nou annan en kantite bann problenm drenaz.  Bokou delo i sorti anler i desann e ler i ariv anba si sirtou mare  o, delo i refoule i antre dan lakaz bokou nou bann dimoun dan plato.  Alor si ou gete tou lede kote nou pe ganny bokou problenm delo.

Mr Speaker se pou sa rezon ki ou war bokou lakaz dan lepase e menm konmela dan Pointe Larue, bokou in ganny fer lo pilye e sa i en keksoz ki toultan Lotorite Distrik ler i annan en request ki vin kot li parey pou Planning permission nou advise ki lakaz i ganny fer lo pilye, akoz souvandfwa ou war delo ki sorti anler nou pa kapab anpese desann pa kapab kontrole alor meyer ki ler i lo pilye i pas anba lakaz i desann i al anba.

E sa eleman Erport i fer ki lefe ki Erport i annan zis de outlet delo alor sa volim delo ki akimile la i annan letan i pa ganny letan sorti ase vitman.  Let’s say lapli i tonm apepre 1erdtan delo i monte i mont lo semen i koz bokou kontrent i koz problenm trafik anniz bann dimoun e laplipar ditan delo i monte e i koz en bon pe lenkonvenyans e nou annan en loss of propriyete property osi pake – tousala.

Mr Speaker mon leksperyans pou sa letan ki mon dan mon distrik, i enn ki ou kapab dir i en keksoz ki’n la depi avan mon eksperyans sa e bann plizyer lezot MNA oparavan in fas avek bann tel problenm.  I pa en keksoz ki ou’n fer ozordi pou demen pou rezourd sa bann problenm malgre i annan serten louvraz serten keksoz ki’n ganny fer.  Me toultan nou war ki uniqueness sa distrik la son pozisyonnman avek sa Erport i koz bokou problenm pou nou.  E Mr Speaker ler mon koz lo la mon ti a voudre koz lo en leksperyans ki mon pas ladan de Dimans pase lapli in tonbe kontinyelman pou 2erdtan nou war ki anler dan Nageon Estate, la in annan devlopman anler lo montanny ; prezan ki in fer delo lefe ki devlopman in ganny fer ros i ganny kase, pye dibwa i ganny koupe, alor ou war ki tou sa bann delo i kal en landrwa zot swiv en path.

In arive ki i annan 2 peron, i sel 2 akse ki bokou dimoun dan kominote i ganny akse avek e delo in vin la in vin parey en larivyer dimoun i mobilize. E dan sa ka ki ti arive se premye bann dimoun ki ti ganny alerte, se nou DA Lotorite Distrik e mon osi mon laba mon eksperyans sa, e nou nobou ganny led CAMS osi pou vini bann exper dan drenaz – CEO Planning lefe ki li osi i reste la li osi in la e serten endividi osi.

Me problenm ki nou gannyen se pou mobiliz dimoun, nou’n nobou ganny lasistans nou brigad. Nou annan nou brigad ki vreman aktiv dan Pointe Larue e zot in la.  Ki  bann pti keksoz in kapab ganny fer, malgre kontrent lekipman – wi mon rekonnet i annan, me i problenm se ki nou deal ek sityasyon la, me ki nou fer pou annan sa follow-up?  Ou konnen ler nou get sa sityasyon la, in arive ki petet demen ou pou bezwen fer monte en miray, fer drenaz e la kot problenm i vini la kot i vin sityasyon ki mon konnen ou tir portre pou montre sityasyon, me selman ou bezwen anvoy en email – ou bezwen espere.  E i ariv ler nou fer sa la letan i pase, e sa bann menm dimoun zot ganny afekte ankor zot parey yer osi zot in pas dan sa bann problenm.

Alor dan sa laliny Mr Speaker, mon ti a kontan zis point out limitasyon en administrater distrik ler nou pe deal dan bann sityasyon koumsa.  Parey in ganny byen fer sorti lekipman i en kontrent, i en problenm, e zis yer ler mon Pointe Larue erezman mon nou annan bann laboutik parey Home Nouvo nou ale nou ti war fernwar pe fer nou ti Orange Alert mon ale ansanm ek DA nou nobou ganny detrwa tors, tors ti napa tousala, e nou’n bezwen al fer.

Alors sa i montre nou wi i reel sa problenm lekipman, me selman nou pa kapab – sa ki mon anvi dir nou bann koleg Onorab annou pa blanm ni DA, ni sistenm, ni Gouvernman poudir sa in perdi al rode lekel ki’n pran ? Mon krwar nou bezwen en keksoz ki zot bezwen realize zot nou annan en Tim Brigad Emergency la i normal pou ou perdi 2 tors oubyen 2 pyos oubyen whatnot.  Ki nou gete la ? La ki nou fer nou gete si i annan keksoz ki manke mon krwar la i en lapel pou Minister konsernen, pou fer le neseser. Ou konpran ?  Pou met sa la alor nou bouz devan e nou pa fer plis politik lo la. Akoz nou tou ler nou distrik i dan problenm nou antre nou al ede.

Alors nou ti a voudre at least nou annan the basic lekipman, se sa ki mon ti ava anvi dir lo sa bout.  E apre Mr Speaker i annan sa issue ki Mosyon in point out sa se resours ok e resours se resours mon pe dir sa finansye mon war sityasyon ki ou pe sey mobiliz ou brigad me selman laplipar dimoun dan brigad se bann volonter petet zot napa pa tou ki annan transpor, alor ki ou bezwen fer konman en DA sirtou li ki dan sa rol prensipal pou distrik i war li pe bezwen rod pirat.

Me yer ki nou war i annan serten i annan bann action plan ki zot in met ater wi, me selman i annan sirkonstans ki ou bezwen en pickup – ou bezwen en dimoun pou koup pye dibwa petet ki en pti pe pli gro ; ou bezwen transpor pou bouz ou bann dimoun.  Si ou DA napa en transpor li sa lalis ki in fer laplipar ditan ou kapab pa ganny sa bann dimoun.  E nou Pointe Larue nou annan, en keksoz ki petet zot pe war i pa i petty me selman mon krwar i en problenm nou napa bokou operator bann pickup – kanmiyon.

Alor ler nou call i annan letan ki ou pa gannyen, e i annan letan sirtou ler ou annan pou call la ou bezwen sa dimoun la pou la akoz i annan serten keksoz ki pou i pou bezwen al fer.

Alor se nou war ki akoz laplipar ditan nou pa ganny sa bann dimoun, se sa issue peyman.  Ou pou fer la ou pou bezwen al rod permisyon pou ou mazinen pou ou rod en pirat petet ou bezwen rod permisyon ou bezwen anvoy en email e si sa DA i tir sa larzan dan son pos la i annan letan i pran li letan pou li gannyen. I annan letan petet i napa osi.

E sa dimoun ki i fer e ozordi i dir ou in ed ou i ekspekte son larzan and whatnot, alor i mars en pe koumsa Mr Speaker.  Dan sa laliny mon ti a kontan tous en pwen osi se nou bann staff – nou bann dimoun brigad, e osi staff Administrasyon Distrik mon’n war ki zot in fer e zot zwe sa rol pivotal dan premye first response.  E se zot ki ganny mobilize apre ler zot war zot biro la zot pe standby alor dan sa laliny mon ti a kontan mon osi apiy sa lapel pou ogmant sa pti larzan ki bann dimoun brigad ki zot gannyen ; akoz once zot kriy zot mon pa konn lezot distrik me selman dan mon distrik zot pou desann e zot fer louvraz fantastik.

Sa bann dimoun malgre distrik i ase gran lo longer i annan letan ki nou napa transpor zot pare pou marse, zot pou al ede. I annan sirkonstans ki sa bann menm dimoun zot lakaz ti pe flood me selman zot ti kot lot dimoun pe ede. E i annan bann staff Administrasyon Distrik parey mon dir zot la zot standby, alor mon profite pou remersi zot e korperasyon ki nou gannyen i vreman ekselan.

Mr Speaker parey mon’n refer sorti oparavan problenm ki mon war se avek serten prosedir ; petet letan ki i pran. Nou konnen ozordi kot nou stand depi ler nou antre dan Lasanble, ler ou dir be ok annou pran aksyon la annou build en keksoz fer monte en miray mon a dir en pti kontrakter ki dan distrik, ki lanmenm la en miray i kapab kout R10mil.  Ler DA i call i dir i pou fer sa souvandfwa ki bokou public servant pe dir ozordi ?  Zot per FPAC, FPAC pou deal ek zot isi laba.

Alor i pa zis en matter dan Gouvernman sa letarzi me i sa issue ou konnen zot per.  Zot dir ou FPAC pou deal ek zot isi laba alor personn parey serten MNA in fer sorti lot kote personn pa kapab fer sa desizyon, alor se sa osi i kontribye pou met retar.

Mr Speaker mon ti a kontan met lanfaz lo en keksoz osi ou konnen kwa ki ennler i tard keksoz dan distrik osi, se sa konfizyon rol. Mon’n war sityasyon kot ou konnen lanvironnman i dir ou pou li konmans la i fini la SLTA i dir ou i fer sa bout e osi CAMS osi i fer sa bout pou li e nou annan eleman Erport osi i dir ou osi sa bout pou li.

Me ki arive ler nou dir ou kapab dir pou anpese ki sa bann keksoz i arive – parey lapli i tonbe delo i monte nou dir annou fer en plan regilye pou debous sa bann dren tou le mwan, tou le 2 mwan ou ti sa bann zafer ladan, be ki arive SLTA i fer pou li lanvironnman petet i fer kot lanmar i pase and whatnot.

Be ennler petet SCAA i arive ki li i pa fer sa bout, prezan tou sa ki bann Lotorite in fer la, i pa ganny konplimante ; i vin en problenm akoz tou sa delo i vini i bouse i kot Erport alor tousala mon krwar i bann keksoz ki nou bezwen asize e ganny li kler, ler nou dir nou pou fer sa tou bann partner i pare pou fer.

Mon krwar sa en keksoz ki ede kre problenm osi alor Mr Speaker mon pa pou long pou terminen mon ti a zis siport mon ti a voudre siport sa Mosyon akoz mon santi ki distrik vre i merit annan en vot en larzan ki ozordi i ariv en problenm i kapab sa Administrater Distrik i kapab annan sa konfidans ki i tir sa larzan i peye pou fer koup en pye dibwa ki en danze, oubyen i ede pou fer en mon pa konnen petet en lakaz in dekouver fer rod de fey tol ki i pa bezwen fer sa prosedir.

E  mwan mon believe ki i annan fason accounting.  Zot annan zofisye accounts zot ale zot rann kont e si zot in fer keksoz ki pa dapre i pa lo lanniy sa zot kapab ganny fer they will be accountable to it, me selman mon krwar ki nou annan bann DA partou dan bann distrik ki kapab gard rikord, e i enportan ki zot annan sa resours finansyel pou deal avek sityasyon now kot nou bezwen deal avek.

Mr Speaker mon terminen par dir lans en lapel pou tou bann dimoun dan bann distrik poudir ek zot ki nou bezwen annan sa lespri volontarya ; nou bezwen pare pou ede.  Mon dir sa akoz mon Mr Speaker si de Dimans pase mannyer lapli in tonbe si ti annan en Gouvernman lo Facebook ozordi nou pa ti pou annan problenm delo dan Pointe Larue.  Tou dimoun in fer en komanter negativ pozitif me selman komanter in ganny fer.  Me selman ou konnen ki mon war?  I malere ler DA brigad sa bann volonter pe monte la dimoun pe personn pa pare pou vin donn en koudmen.

Alors mon lans en lapel dan plas nou asize dan konfor nou lakaz Facebook kritike desann vin donn nou en koudmen.  Mersi Mr Speaker.

 

(APPLAUSE)

 

MR SPEAKER

Mersi Onorab Valmont.  Onorab Flory Larue.

 

HON FLORY LARUE

Mersi Mr Speaker.  Bonn apre midi tou dimoun.  Mr Speaker i annan en Onorab ki’n dir nou leta mannyer nou pe gete avek sa sityasyon dezas dan distrik, i parey konmsi nou pe anmenn latizann apre lanmor.

Nou’n tann nonm operational guidelines pou bann distrik ; nou’n tann Emergency Management Plan ki pei i annan, me letan ou get son baz sa bann plan, i annan 4 faz kle ;  i annan mitigasyon ; i annan preparasyon i annan response pou sa sityasyon apre i annan recovery apre sa sityasyon in arive, e sa serk i kontinyen pou re assess pou mitigate pou prepare pou li arive pou respond.

Bokou Onorab lo lot kote latab Mr Speaker, in dir met plis larzan, enzekte larzan, sa ki pou fer pli bon solisyon.  Mosyon i demande ki nou mete plis akse avek finans dan distrik, pou nou redwir risk pou nou permet aksyon vit avan ler ki lezot Lazans konsernen i arive pou minimiz lenpak.  Sa ki Mosyon i demande.

Mon krwar i annan merit ladan, me eski sa enzekte larzan i solisyon final pou bann konsekans bann dezas, ki bann piblik i pas atraver letan i annan bann lensidan?  Eski si nou ti annan plis aksyon avan bann sityasyon i arive, eski nou ti pou annan pli bon rezilta?  Eski nou ti pou ganny menm rezilta ki nou pe war ozordi dan distrik?

Konbyen nou letan nou al fer bann vizit dan distrik, nou’n war bann semen ki napa rigol ; nou’n war en rigol dan en desant, me i zis 5santimet oter 5santimet larzer. I pa kontinyen – i par bout – i en 1met, 3met napa – i 1met – 2met napa, ouswa i annan landrwa napa ditou rigol.

Dan bann distrik souvan nou war bann peron ki ganny fer dan bann teren ase difisil. I byen i deservi bann kominote me letan i ganny fer eski nou mazinen letan i annan gro lapli, ki sa peron i vin en larivyer.  I pe vin en larivyer i vreman en danze pou bann dimoun ki pou deservi li.  E osi i fasilit sa delo pou vin en gro delo letan i desann.  Letan nou pe regard sa nou pa war ki lenfrastriktir, ouswa bann planifikasyon ki pas deryer bann lenfrastriktir ki pe ganny konstrir i pe ede pou fer ki dan sa bann rezilta dezas i pli pir.

Alor letan nou pe get sa serk bann faz – eski pa mitigasyon i pa en fason pou nou kapab fer sir ki rezilta ki nou gannyen letan i annan en dezas i pli bon?  Letan bann konstriksyon swa bann pti proze i ganny fer dan distrik, wi i byen i ganny fer vitman i ganny fer pou ed en dimoun nouvo en pti kontrakter souvan nou koz lo la, me eski planifikasyon ki al deryer sa bann proze i osi pran konsiderasyon bann risk ki ganny asosye dan bann dezas?

Letan nou koz lo napa planifikasyon – en legzanp kler i sa enn ki Onorab Ferrari in donnen pou sa bann transe La Digue akoz fodre fouy transe La Digue?  Mon pa pe blanm Onorab Sophola, me drenaz La Digue pou bann semen pou plato La Digue i en problenm pou lannen – bokou lannen ki apre i bezwen war i fouy transe, me apre ki fouy transe i ganny fouye, problenm inondasyon dan plato La Digue i kontinyen arive sak fwa i annan en lapli. Oli sa plan pou anmenn en solisyon?  Sa mon krwar ki i en legzanp kler ki nou konnen i annan problenm nou koz lo la me selman piblik li i kontinyen anmas sa rezilta sa dega, kot nanryen pa ganny fer.

Mon apresye letan Onorab Churchill Gill in mansyonnen, ki nou deza konn lavalas wi dan nou listwar nou konn lavalas i en dezas en dega ki ti vini apre en dezas.

Bann dezas i include bann Tsunami bann siklonn bann gro radmare ki monte, bann sa i en dezas ok. Letan ler lapli i tonbe ou ganny en rezilta kot lakaz dimoun kot propriyete i ganny andomaze nou klas li konman en dezas me eski en lapli ki tonm 3, 4, 6erdtan ki fer inondasyon dan plizyer distrik, i en dezas?  Me si nou ganny en dezas mazer Mr Speaker si lapli i tonbe pou detrwa zour?  Si i annan gro divan?  Si nou annan en major dezas ki mannyer nou bann distrik pou été?

Mon krwar ki letan nou koz dezas e nou koz lo planifikasyon, e nou pe koz responsabilite anver nou dimoun annou mazin byen si i ariv en gro dezas ki mannyer nou pou deal avek?

Eski nou’ n pare? Eski nou bann lenfrastriktir i ede ki pou annan mwens difikilte pou piblik?  Sa bann keksoz i ganny planifye otomatikman lo nivo Nasyonal. Lenplimantasyon i bezwen ganny fer dan distrik, me se sa lenplimantasyon ki nou bezwen regarde. Letan sa bann keksoz i arive, se sa bann zabitan Anse Royale, zabitan plato Pointe Larue, dimoun ki reste La Digue sa bann dimoun ki santi sa.

Alor nou bezwen met bokou lanfaz lo planifikasyon, akoz i enn bann faz dan risk management ki apel mitigation ki nou bezwen pran kont.  Nou pa kapab zis levé fer sa dezas nou kriye prezan nou dir nou annan en kantite problenm.  So mon krwar ki nou pe mank en bout dan solisyon pou evite annan sa dan le fitir.

Letan nou koz lo prevansyon, nou bezwen regarde ki arive apre en lensidan. Plizyer fwa pti lapli i tonbe dimoun i soufer avek inondasyon ki arive apre.  Eski i annan en evalyasyon?  Eski i annan en rapor?  Eski i annan en plan aksyon ki poudir toudswit ki pou arive dan sa distrik eski sa distrik i ganny kek finansman pou deal direkteman avek rezilta avek sa dezas si zot in idantifye 5 rigol, 2 semen, detrwa lateras ki an risk, eski sa i ganny mete dan en en rapor ki dir sa i en priyorite pou mitigate en lot dezas ki kapab arive?

Mon pa krwar sa i leka.  Si nou pa fer sa ki arive ?  Nou pou kontinyen war nou pe deal avek menm sityasyon pli souvan.  Mr Speaker dan kominote Anse Royale i annan dimoun ki’n war zot pe deal avek serten sityasyon plis ki 20an.  Mon a pran en legzanp la kot i inonde i annan en estate i apel Bamboo Estate.

Sa bann rezidan sak fwa lapli i tonbe zot anmas tou sa delo ki sorti Mont Plaisir.  I annan lakaz la anler! Tousala i pas lanmenm la obor sa estate. Zot in fer bouz dan larivyer zot in divert li sa bann dimoun zot santi tou sa delo letan i tonbe, i antre direkteman dan zot lavarang deryer ziska dan zot lakaz.

I annan 20an serten zabitan pe dir sa nouvo diversion i tro narrow; sa pon i tro pti. Letan ou get li lizour letan napa gro lapli delo i koule byen napa problenm zot annan en larivyer la.

Be letan sa dezas i arive kot pe taye pe rod prela, eski i annan en dimoun ki vin mezir sa kantite delo ki pe desann dan sa debousman pou war ki i tro pti?  Akoz letan i pa kapab divert pou vir a drwat pou sorti kot Bamboo Estate pou li ale i mont la ek zot i mont kot Liniversite Sesel i mont kot Hostel i mont kot A Level e tousala ki arive i afekte lekel?

I afekte sa bann sa zabitan, sa area li menm, akoz sa ki’n bezwen kas son miray la prezan i bezwen al repar son miray i afekte sa bann etidyan ki swa zot pou mank lekol, swa zot pou bezwen mars dan labou. Letan nou pe get sa Hostel son septic tank i lanmenm la ater Mr Speaker, letan sa kantite delo in monte eski i annan malpropte dan sa bann delo ek sa bann zanfan prezan pou mars ladan?

Si lekol i fermen ozordi/ demen kanmenm i sek sa malpropte i la – konmsi i annan en kantite reperkisyon baze lo en diversion en larivyer e sa bann zabitan dan sa kominote in dir plizyer fwa, me lekel ki ekoute?  Personn.

Ou mont pli o zis par deryer Bamboo Estate i annan Bradley Road i annan en kominote antye, ki annan en semen en pe apik ki reste la anler letan lapli i tonbe sa semen i vin en larivyer Mr Speaker.

Tou sa delo i fini kot en zabitan.  Sa semen napa ditou rigol. Yer in pase in vini in war sa bann dimoun dan sa area i dir zot pou travay lo la.  Bon ou pou travay lo la, me selman i annan lannen de lannen kan ki zot pou travay lo la kan ki zot pou anmenn bann plan final ater poudir sa enn problenm i pou kout tan e nou pou fer li dan tel lespas letan?

Met en priyorite, me si ti annan sa ki mon koz lo la oparavan en report ki ti donn priyorite bann landrwa ki napa nanryen pou fer avek fer miray lo kote plan pou distrik me direkteman lye avek Plan Dezas e Risk Nasyonal, akoz ler ou pran tousala ou met ansanm pei pou annan li en lide kote bann landrwa ki pli a risk e pou kapab met en larzan separe pou deal ek li ki apre i pa pou vin en risk pou rezidan dan lefitir.

Mr Speaker mon ti a kontan re mansyonn en Mrs Mondon ki reste dan distrik Takamaka dan semen Bougainville Mrs Mondon in donn lotorizasyon pou pran son later pou elarzi semen Bougainville. In fer gran ker parey nou tann lezot Onorab donn legzanp sa madanm i annan li 81an Mr Speaker i annan 2an depi ler zot in koup sa lateras zot in fer semen.

Ti fer miray pa ti met koltar lo semen miray in grennen – antye – en gro miray ros ti fer wi in grennen akoz lapli in tonbe in manz anba la in grennen.  In grennen zot in pase zot in met tarmak lo semen me zot pa’n refer miray son lateras i anpandan.  I annan 81an Mr Speaker konnen ki sa madanm in dir mon i dir mon i pou met ros lo sa bout semen ki lo mon bout later akoz pa pou zot sa pou mwan!

Ou konnen lekel ki pou ganny afekte Mr Speaker?  Tou sa kominote ki reste la ki sa semen in en problenm pou zot in demande pou elarzi la ozordi in elarzi, sa dimoun in donn later pou en miray pou en retaining wall ki lo son lateras, i deside pou li bloke. I dir ki en kantite dimoun in dir li ou’n fer en fot ou pa ti devret donn zot ou bout later, la get ou!

Mr Speaker eski tousala i lye avek risk.  I en risk pou sa madanm !  I afekte en proze!  I afekte distrik eski en dimoun i met sa antet ki i annan en kou? I annan en kou pou en kominote antye, pa zis sa madanm letan i perdi sa lateras?

Mr Speaker mon kontan ki mon kapab mansyonn sa detrwa lensidan, me pli pir ankor letan nou pe get en plan prevansyon pou le fitir.  An Zanvye ti annan en gro lapli ki ti tonbe ti annan en ros ki ti deroule dan distrik Anse Royale, ki ti tonm dan avek en lakaz pou en Mr Danny Hoareau.

Mr Hoareau mon demann li son lotorizasyon in dir mwan mansyonn son ka akoz lo son propriyete i annan lakaz son fiy, son fiy Molly i annan 4 zanfan ; Molly in trouv li depi Zanvye pe dormi lo lestik salon kot son manman ek son papa avek son 4 zanfan.

Depi ler sa in arive zot in pase zot in dir li zot pou asses sa lateras – i annan en kantite ros zot pe travay lo la.  I dir mwan napa problenm mon konpran i pran letan.  Me sa lensertitid kan ki zot pou pran en aksyon?  Ki deadline zot pou donn zot lekor ?  Eski son ka i en ka normal letan pou al fer en assessment?

Si assessment i abitye pran 3mwan eski i normal ki en dimoun pe pas dan en sityasyon koumsa ki li sa irzans letan in fini depi Zanvye ros in fini deroule lateras in tonbe, zot in vini zot in netwaye prezan i napa lakaz, eski sa irzans i kontinyen?

Poudir ki en assessment i pran 3mwan eski napa en fason i fer ki sa enn i ganny fasttrack akoz i pe afekte lavi sa fanmir?  Mr Speaker dan sa lensidan i annan dimoun ki’n vin koup pye dibwa kot sa propriyete, la nou an Me, zot pa ankor ganny peye.  Nou pas kot Mr Hoareau poudir li nou pe rod nou larzan poudir nou koup pye dibwa, kot ou i dir ‘’msye pa mwan sa mon pa konnen – pa mon ki pou peye pa prive sa pa mwan ki’n demande.’’

Sa msye i war ankor dan difikilte i pe fer fas avek dimoun ki pe rod larzan avek li akoz zot pa ankor ganny peye. Tou sa bann keksoz i pa montre ki i annan en mank planifikasyon?

I pa montre ki administrasyon distrik i napa ase power pou li fer aksyon lo sa bann keksoz?  Mr Speaker bokou nou in mansyonn bann dimoun ki ede, mon krwar konman en kominote konman en pei an zeneral Seselwa i vin a led son prosen letan sa keksoz pe arive sa maler pe arive dimoun i vini i ede me lefe ki nou annan deza sa dimoun pa en sou profesyonnel ki sorti avek zot JCB ki sorti avek zot masin pou vin koup pye dibwa zot fer li a sa letan ki sa keksoz pe arive.

Me letan sa i fini i pa zot responsabilite Mr Speaker i bezwen en responsabilite en Lotorite and I would imagine sa Lotorite i Gouvernman.  Me en kantite dimoun i dir koumsa akoz nou reprezant distrik, i dir nou zis nou koze. Sa i nou rol Mr Speaker.  Parlman nou parler me aksyon kote i sorti?

Nou parler ek lekel avek zis sa bann dimoun ki pe ekout nou lo SBC?  Nou en lebra Gouvernman nou sipoze pe parler avek Egzekitif ou menm ou’n dir Mr Speaker ki i byen ki nou pe seye fer en nouvo pa nou anvoy en rapor letan Mosyon i fini ganny fer nou anvoy en rapor kot Egzekitif. Nou pe sey montre proactiveness pou donn zot en summary at least pou zot konnen ki’n pase dan Lasanble, pou zot konnen ki piblik pe demande.  Akoz sa ki nou fer.  Nou vin anmenn problenm nou zabitan devan Egzekitif akoz pouvwar aksyon i ek zot!  Be selman ki nou war Mr Speaker letan nou, nou pe parler nou pe sey fer oversight dimoun i dir nou pa pe travay apre ou tann en bann i dir ou koze si zot le ‘’parey delo lo fey sonz !’’ 

Alor mon’n tann lot kote en Onorab in dir koumsa nou pou blanm lekel?  Annou pa blanm- Be nou bezwen blanm en dimoun!  Sa zafer ler ou pa blanm personn isi nou pa kapab blanm personn nou pou kontinyen annan sa menm problenm.  Akoz si nou menm nou pa kapab dir be desizyon ou ki pran responsabilite i pou ou si ou pa’n pran nou bezwen fer en keksoz about it.

E si nou kontinyen nou pa blanm personn, nou pa get bann heads bann dimoun ki bezwen pous sa keksoz pli lwen, then nou pou toultan annan sa bann dezas!   Nou pou toultan annan sa bann problenm! Nou pou toultan annan sa semen ki napa rigol! Nou pou toultan annan sa bann inondasyon, toultan nou pou annan si nou pa kestyonnen kote Lotorite i été, lekel ki devret fer.  Nou bezwen fer kler, Egzekitif i bezwen fer kler lekel ki annan sa pouvwar pou fer sa bann keksoz arive.

Mr Speaker Onorab Sandy Arissol osi in montre ki i annan bokou defayans in donn en gran lalis bokou Onorab in donn en gran lalis defayans.  Mon krwar ki ladministrasyon Gouvernman Sesel ki pou 40an Onorab Gill i a kontan atraver ou Mr Speaker depi SPUP/SPPF, Parti Lepep ozordi US 40an sa letani problenm ki nou tande la sa letan nou dir koumsa lekel annou pa blanm personn sa i zot latitid sa administrasyon in fail!  Letan in fail se piblik Seselwa ki pe anmas lepokase.

Sa Gouvernman i annan labitid servi Administrasyon Distrik konman kwa?  Konman kwa? Eski piblik Seselwa i annan konfyans dan sa biro?  Biro Administrasyon Distrik i en ekstansyon Gouvernman Lokal – en Minister dan Egzekitif i en Minister i annan son Minis, alor pa Parti Lepep ki responsab?  Pa sa Gouvernman ki la ki responsab pa sa Cabinet of Ministers ki la ki responsab kot ou anvoy sa rapor Mosyon ki letan nou fini diskit ki ‘’pa binding lo zot Mr Speaker’’ pa ou anvoy kot Cabinet of Ministers?  Pa zot ki responsab?

Lekel ki ansarz zot  pa Msye Danny Faure ki ansarz zot?  Be lekel ki’n fail Mr  Speaker?  En?

 

(laughter)

 

HON FLORY LARUE

Mon kontan ki Onorab Sophola i dir mwan ki’n fail akoz La Digue i en distrik ki’n toultan vot US Mr Speaker.  In bezwen fouy transe!  I napa rigol li! I napa desarz li!

 

(APPLAUSE)

 

HON FLORY LARUE

Piblik La Digue i fatige dir li zot in fatige avek sa kalite sityasyon!  Mwan ki’n fail Mr Speaker?

Mwan ki’n fail?  Mon krwar nou bezwen la lo sa Mosyon.

 

(Off-Mic)

 

HON FLORY LARUE

Mr Speaker,  mon pa ankor ganny elekte okenn par mwan !  Mon’n ganny en pti plas proporsyonnel.  Mon pe sey koz pou piblik Seselwa.  Sa ki’n ganny elekte, in war mwan ki’n fail.  Mon krwar lala problenm!  Nou pa konnen kote responsabilite i été! Nou  pran nou responsabilite nou pas lo lezot, annou debout parey bann adilt ki nou été – bann MNA ki’n ganny elekte – ki pa elekte parey mwan proporsyonnel zot fatige dir mwan, mon pa elekte, annou pran nou responsabilite pou nou idantifye lekel ki responsab.

E dan sa ka la spesifikman lo sa Mosyon ki Onorab Waven William – ou a krwar en bon konmansman letan i pe demande pou annou seye gete mannyer pou redwir risk ; mannyer pou permet bann aksyon ki dimoun apre i kapab deal avek ; mannyer pou minimiz lenpak.  Lenpak pou ki?

Pou piblik Seselwa!  Si ozordi en MNA Elekte sorti La Digue i annan en ta failure,  mwan ki’n fail be Mr Speaker, mon krwar deza i fini eksplik nou dan ki sityasyon nou été !

 

(Interruption)

 

HON FLORY LARUE

Mr Speaker pou mon kontinyen lo mon pwen ‘’failure’’ e ‘’responsabilite’’ Administrasyon Distrik in ganny servi konman en biro ‘’manipilasyon’’, e non pa donn li son respe ki i devret dan Gouvernman Lokal konman en Minister.  Zot in servi bann DA pou swazir dimoun ; pou get lalis ; pou  al mars kot dimoun ; pou gete ki lenformasyon ki dimoun in anmennen, zot in servi DA!  Zot pa’n empower DA.

Ozordi ou tann DA isi ; DA laba!  Bann ki’n deza DA zot konn byen ki ti rol DA!   Nou tou nou konnen ki ti rol DA!  Dimoun pa oule pase Administrasyon Distrik.  Mon annan en problenm mon pou al laba.  Non!  Zanmen! La zot pe plennyen zot ti DA?  Be Mr Speaker zot in les zot lekor ganny servi, ganny abize.  Si ou’n les en parti politik servi ou, pou fer pou entel, pa pou entel, poudir’ ek nou pa ek nou’ dan Administrasyon Distrik Mr Speaker, i en failure!  Alor nou bezwen aksepte ki nou fer nou failure.

Mr Speaker mwan mon ti a kontan siport Mosyon Onorab Waven William.  E mon krwar parey dan Minister Lasante i dir ‘’prevansyon i pli bon ki gerizon.’’ Alor annou asize, annou regete. Annou regete  kote problenm i été.  Annou pran nou responsabilite, e koumsa kekfwa nou a kapab deservi piblik Seselwa pli byen.  Mersi Mr Speaker.

 

(APPLAUSE)

 

MR SPEAKER

Mersi Onorab Larue.  Mon a donn laparol Onorab Sebastien Pillay.

 

HON SEBASTIEN PILLAY

Mersi Mr Speaker bonn apre midi.  Bonn apre midi tou koleg Onorab.  E bonn apre midi tou dimoun ki pe ekout nou.  Mon oule konmans mon lentervansyon par dir mersi pou bann travayer dezas ki levé granmaten ki al attend bann sityasyon dezas dan bann distrik.

Mersi pou bann linesman PUC ki ler bann poto i kase bann pye dibwa i tonm lo laliny mon war zot vini 2.50 bomaten. E la mon pou servi en legzanp Mr Speaker.  Sanmdi la ki’n fek pase en pye dibwa ti tonm lo en laliny PUC apepre 2.50 bomaten. Bann zabitan ti apre Dimans akoz Dimans ti pe tournen selman Sanmdi ti apepre Sanmdi lo tar, linesman sa garson ki ansarz sa rezyon ki ariv lo scene apepre en 10minit a 20minit apre, ki sa lensidan ti arive ; kit son fanmir kit son lakour, pou li desann nou remersye ou Collin en louvraz formidab ; profesyonnel ki ou’n fer.  E nou ti war lezot travayer arive.  Lapolis ti vini pou bar sa semen, akoz bann drayver i dray vit e sa pye dibwa ki ti tonbe ti kapab kout lavi bann motoris.  Mon ti osi war firemen ki ti vini pou retir sa pye dibwa lo laliny.

Mr Speaker sa ki mon fer lo konmansman mon lentervansyon la, se pou nou mon krwar enportan annan en dyalog balanse.  E si nou le anmenn en solisyon fodre nou balans sa ki nou dir vizavi sa ki relman sa ki pe pase.

E si nou pran en lapros negativ lo en size pou nou kapab krwar nou pou anmenn solisyon lo  lapros negativ, nou pa pou anmenn nanryen an plis.  Akoz ler mon’n ekout plizyer entervenan koze, mon’n – soke pou war ki nou melanz plizyer size dan en Mosyon, ki pou mwan i kler ki i pe demande ; –  mon krwar ki i enportan e mon kontan Onorab Henrie i dakor avek sa ki mon dir Mr Speaker mon kontan i eksprim son lagreman ek sa.

Nou remersi ou Onorab Henrie pou dakor pou felisit bann travayer ki devoue pou zot louvraz.  Mon krwar ki enportan Mr Speaker ki nou tou nou sey pran nou sey fer analiz.  Ozordi i annan plizyer dimoun ki pe ekout nou ; i annan drayver ki pe dray.  Mon ti a kontan demann zot – par egzanp si kot zot pe pase la apre deskripsyon, ki zot in gannyen dan Lasanble Nasyonal, zot pe pas – mon pa konnen mwan – en pei zot pe divert semen ki pa egziste ; zot pe pas dan en landrwa kot i annan isi inondasyon, zot pe rankontre plizyer problenm.

Oubyen eski sa bann problenm i pa arete avek bann sityasyon ki leve detanzantan.  Akoz zisteman Mosyon, i koz lo sanzman klimatik e ki fer ki parey yer mon ti pe ekout sa zournalis SBC ki ti pe koz ek mon pa konnen mon krwar en eksper – ki ti dir poudir i abnormal, ki nou pe ganny lapli pandan sa letan akoz nou sipoze pe apros dan vandswet e konmans ganny lapli detanzantan, me pa en gro lapli koumsa.

Tousala Mr Speaker i bann keksoz ki fodre fer nou fer refleksyon lo ki mannyer nou apros sa deba.  Mon’n menm antann mix dan sa deba, par egzanp akoz nou bezwen fer Referendum?  Mon tro konnen akoz LDS i per Referendum?  Akoz zot per pou Seselwa deside en Referendum ki zot menm zot en size ki zot in koz lo la plizyer fwa!  Mon en pti pe baffled.

Mwan mon dir non. Mon dir non ki si ou reste aletranze ou pou vote aletranze pou desid mon lavi Sesel, sa i mon pozisyon Mr Speaker, e mon pozisyon personnel ; tou dimoun i annan son pozisyon.  E  mwan mon krwar nou devret les dimoun deside.  Pa vin fer pa vin servi en Mosyon  – en Mosyon ki le sey amelyor lafason travay dan en distrik, lafason travay ek bann MNA pou nou vin fer politik bonmarse avek!

 

(APPLAUSE)

 

HON SEBASTIEN PILLAY

Akoz i pa marse Mr Speaker Seselwa in wise lenformasyon pe sirkile partou, e tou dimoun pe war ki pe arive.

E mon osi konsernen Mr Speaker, kot mon war bokou MNA pa sezi loportinite pou koz lo zot distrik.  Par egzanp mon tann MNA in koz lo semen obor petrol station, be petet nou ti devret koz lo bann eleman ki pe arive dan nou distrik, e war ki mannyer nou ti distrik pa’n kapab ganny asiste dan bann letan dezas !

E mon krwar i kler osi –

 

(Off-Mic)

 

HON SEBASTIEN PILLAY

Mr Speaker mon’n ekout bann entervenan – trankil.   Ok mersi Mr Speaker mon konnen Onorab Ferrari ti anvi met son kandida pou VP, me nou ava gete.

 

(laughter)

 

HON SEBASTIEN PILLAY

Mr Speaker mon krwar i pa pou pran mwan an mal, akoz sa en pti keksoz ki mon dir an pasan.  Thank you Mr Speaker.  Mr Speaker mon krwar i enportan ki nou analiz byen kwa ki nou pe dir e kwa ki sa Mosyon pe demande.  Kot mon dakor avek ki sa Mosyon pe demande Mr Speaker, se akoz nou pe ganny plizyer resours ki relye avek sanzman klimatik.  E sanzman klimatik i ariv dan bann distrik ki zot reprezante konman bann MNAs. E ozordi Mr Speaker mon respekte swa konstitisyonnel ki dimoun Glacis i fer dan Lasanble e mon pa vin antre lo teritwar Onorab Esparon mwan.

 

(APPLAUSE)

 

HON SEBASTIEN PILLAY

Mon asiste li kot mon kapab mon pa vin rod problenm avek son travay ki i pe fer dan distrik.  Mon asiste li kot mon kapab.  Akoz nou tou lede nou de zabitan Glacis, e sa ki nou anvi at the end of the day se meyer pou nou distrik.

 

(APPLAUSE)

 

HON SEBASTIEN PILLAY

E mon respekte sa drwa.  E likewise mon ti a kontan ki tou dimoun i respekte drwa konstitisyonnel swa ki en dimoun dan en distrik in fer, swa Anse Royale, swa elsewhere pou swazir sa kandida ki’n elekte, e sa kandida pe travay.

E nou bezwen les sa kandida travay, dan en fason ki nou pa kre kondisyon pou li pa kapab fer son travay.  Sa i zis an pasan Mr Speaker pou montre ki dan sa deba nou bezwen apport – apport en diskisyon lo sa eleman ki enportan pou nou dan sa Lasanble ozordi.

E sa eleman ki enportan se ki mannyer nou re pozisyonn resours ki distrik i bezwen, pou li atenn avek bann sityasyon ki arive.  E mon kontan ki mannyer Loter Mosyon in met sa: ‘‘permet aksyon vit avan ler lezot Lazans konsernen i bezwen arive’’.

E sa mon krwar i en problenm.  E i al en pe dan laliny Mr Speaker kot mon krwar kot ler nou annan sa sityasyon kot nou delink e mon krwar petet entervenan ki’n pas avan mon i bezwen gete ki mannyer Administrasyon Distrik i marse mon a servi loportinite la pou mon sey donn li sa ki mon konnen.

In annan en delinking konplet ant bann Administrasyon Distrik e parti politik e mon krwar Mr Speaker konman MNA ou’n konpran sa tre byen nou war.  E nou war atraver bann konsey travay ki bann DA pe fer, langazman ki bann DA pe mete, e mon pa pou zanmen Mr Speaker – mon pa pou zanmen Mr Speaker denigre oubyen atak okenn Administrater Distrik akoz mon konnen ki i pa en travay fasil ki zot fer.  Tou dimoun i anvi ki zot donn zot en solisyon ; tou dimoun i anvi ki nou donn zot en larepons zot pa kapab donnen e zisteman nou bezwen respekte sa.

Me sa sityasyon Mr Speaker se nou ki kree, atraver bann deba ki nou avanse ! Ler nou ti pe debout konman kandida dan bann eleksyon, ki nou dir ek dimoun?  Nou dir ek dimoun koumsa poudir sa MNA ki pa’n fer ou peron sa MNA ki pa’n koup pye dibwa.

Mon koleg atraver ou Mr Speaker sorti Grand Anse Praslin, in koz lo bann pye dibwa ki pa’n ganny koupe.  Mon rapel li tre byen pe koz lo bann proze lo mon distrik ki MNA pa ti fer ler li i ti la.   Ki sa MNA ki ti la pa ti’n fer.  E nou servi sa largiman pou blanm sa MNA.  E nou anmenn en politik koumsa ki fer ki apre ler nou ganny elekte, nou bezwen rod en lot sityasyon pou nou blanmen e nou vin blanm prezan nou blanm Gouvernman ki la.

Me kestyon fondamantal ki dimoun pe demann ou ler in ’ fini ganny elekte ou, se ki ou’n fer ? Akoz mon elekte ou pou fer! Mon pa ti elekte Gouvernman pou fer. Ou konpran?

 

 

(APPLAUSE)

 

HON SEBASTIEN PILLAY

Mon krwar Mr Speaker se fodre nou apresye lefe ki ozordi nou dan en konteks politik diferan e Seselwa nou konpran kwa ki pe pase otour li. Seselwa i annan serten keksoz ki i anvi war e ki i ti a kontan war.

Kwa ki nou ti a kontan war pou an relasyon avek sa Mosyon ?  Premyerman mon krwar i enportan ki nou bezwen donn serten lendepandans e serten fleksibilite pou ki bann DA i kapab travay ; pou ki bann Administrasyon Distrik kapab travay.

Mr Speaker mon pa neseserman dakor avek sa pwen ki si ou fer keksoz FPAC oubyen lezot Lazans pou vin get ou.       Mwan mon krwar de pwen se ki, ou a sa moman, konman sa dimoun ki annan sa fonksyon ki ou pe fer, ou bezwen konnen kwa ki ou bezwen fer pou achieve en solisyon.  Ou bezwen konnen ki ou bezwen fer pou kapab donn en solisyon.

E se la kot problenm i été ! Se eski sa bann dimoun ki parfwa i angaze zot tou zot pare pou donn sa solisyon, dan sa dele letan ki zot devret pe donnen, oubyen eski i annan tro bokou ?  Oubyen eski i annan serten mankman somewhere? Se sa ki nou pe sey adrese.

Si nou fer sa Mosyon vin en assessment lo Gouvernman an zeneral, nou pou miss the point e le pwen se ki mannyer mon kapab aforsi distrik pou donn zot resours, pou nou ganny sa resours pou zot kapab travay avek, pou nou kapab attend bann problenm dimoun?  Se sa lesansyel ki nou pe rode.

Par egzanp nou konnen par egzanp en distrik parey Anse Boileau pou annan problenm lanbousir ; en distrik parey Pointe Larue kot ou pou ganny parey inondasyon ; distrik  parey Grand Anse Mahe kot ou pou ganny problenm lanbousir, ki sa bann distrik i kapab fer, a sa moman ki sa dezas ti arive, san ki li i bezwen al rod entel, entel, entel, i kapab annan serten resours la ki kapab mobilize a sa moman ki sa dezas in arive, pou li deal ek sa sityasyon; deal avek sa problenm!  Se sa mon krwar lesansyel sa Mosyon ki pe demann nou pou fer.  E se sa ki konman en Lasanble ler nou pe koz sa Mosyon nou pe lans en lapel anver Gouvernman.

Nou pe lans en lapel pou Gouvernman i kapab dan en fason tre striktire, anmenn serten resours a laporte Lotorite Distrik, pou li kapab fer serten travay.  Nou’n koz bokou lo brigad distrik, e mon ti kontan legzanp atraver ou Mr Speaker ki Onorab Georges ti donnen, lo brigad ki ti pe sey lev staff.  Be  mwan mon’n war en lot brigad distrik par egzanp pandan dezas, pandan siklonn Felleng Anse Aux Pins me ti enkrwayab kot sa brigad ti pe al dan tou sa landrwa, tou sa trou dan tou sa labou pe marse travay ki zot ti pe sey fer.

E i ti demann plizyer mobilizasyon resours pou kontinyen sey ede.  E sa ki reste esansyel la Mr Speaker se, sa in donn nou en leson lo nou abilite pou nou deal ek en dezas sa grander.  Me Mosyon li i pe koz lo bann eleman ki arive ; bann sityasyon ki arive zisteman, akoz sanzman klimatik.  Parey nou  pe war sa i en pe abnormal.  Par egzanp nou kapab war dan distrik Baie Lazare par egzanp, en pye dibwa i tonbe dan semen.  Ki pouvwar?  Ki mezir nou kapab fer sir ki sa DA  avek Administrasyon Distrik atraver son MNA, atraver Lotorite Distrik i kapab fer, pou mobiliz en resours, pou tir sa pye dibwa lo semen e clear sa semen pou motoris kapab  pase.  Se sa ki sa Mosyon pe rode.

Nou pa pou esper en 3erdtan/4erdtan/5erdtan/ 12erdtan pou nou kapab ganny bann Lazans konsernen pou vini, pou vin tir sa pye dibwa.  E se sa mon krwar mesaz ki nou pe sey anvoye avek Lotorite.  Eski striktirasyon ozordi i permet nou annan en response sistenm, ki efektiv ler nou annan bann problenm dezas?

Eski bann MNAs – bann Lotorite Distrik i santi poudir nou bezwen annan lezot kalite resours?  E se pou sa rezon ki  mwan mon krwar enn bann rekomandasyon sa Mosyon i devret vin annan en deba, en deba Nasyonal, me en diskisyon ki ganny fer tre striktire, avek bann Lotorite Distrik pou zot war ki bann areas nou pe rankontre.  Akoz ou’n gannyen atraver bann diferan legzanp ki bann areas ki zot pe rankontre, ki zot pou kapab deal avek dan distrik?

Prezan mon annan en lot nivo bann problenm ki antre ; par egzanp sa en problenm lo nivo bann Lazans ki sipoze ganny fer ?  Nou pran legzanp sa bann miray ki nou ganny dir pa’n ganny fer.  Be i bezwen annan en Lazans konsernen, ki responsab pou sa proze.  Sa Lazans konsernen akoz i pa pe fer sa proze?  Mon krwar tou MNA i a dakor ek mwan la anndan, plizyer fwa zot in angaz zot lekor avek serten Lazans konsernen ; i annan Lazans ki respond vitman ; i annan Lazans ki pran letan pou respond.  So eski nou pou dir tou Lazans i parey?

Nou pa kapab fer sa.  Me dan sa bann Lazans ki pa pe respond, la si par egzanp nou konnen poudir tel Lazans pa kapab respond regarding tel problenm, alors ki me si nou kapab pran pou nou adres sa vizavi sa Lazans, pou ki Lotorite Distrik dan ka ki i annan en problenm, i ava annan sa resours pou li kapab deal ek sa sityasyon.

Akoz mon krwar Mr Speaker, si par egzanp nou annan nou en Climate Change Mitigation Fund e nou kit li lo nivo Nasyonal selman, nou kit sa sours finansman lo nivo Nasyonal selman, me selman bann problenm sanzman klimatik i ganny santi par bann dimoun, bann endividi bann sitwayen, ki reste dan bann distrik, mon krwar then osi war nesesite pou bouz serten porsyon sa fon, lo nivo sa bann landrwa, lo nivo sa bann distrik pou ki nou kapab annan akse avek, me i pa zis sa fon ki nou bezwen ganny akse avek, nou bezwen osi annan akse avek resours neseser pou kapab fer li.

Akoz si nou pa fer sa e nou kontinyen travay lo en pwennvi santralize vizavi serten problenm nou pa pou kapab anmenn solisyon ki nou anvi anmennen.  E mon krwar tou dimoun i dakor avek sa la anndan se sa lesansyel ki sa Mosyon pe anmennen.

E  mwan mon ki mon ti a kontan war, mon ti sa kontan vwar  en pe plis lendepandans pou Lotorite Distrik. Malgre ki i annan bann checks and balances ki zot pe swiv, i annan bann mekanizm ki zot kapab met an plas.  E mon krwar se sa ki zot bezwen fer.  Rod bann mekanizm ki zot bezwen met an plas, pou ki si zot anvi mon pa konnen increase accountability, i ava annan ki ava ganny mete, pou ki nou kapab fer sir poudir  si  de kontrakter ki’n travay – de kontrakter ki’n ganny peye si en kontrakter in koup sa pye  -sa kontrakter in koup sa pye dibwa, ou met ou sistenm an plas pou monitor.  Me ou met sa resours pou ki sa travay i kapab ganny fer.

Dan labsans fer sa e la sa mesaz mon anvoy pou Lotorite dan labsans ki ou fer sa ou kit tou keksoz pou spekilasyon.  E la tou dimoun i sot anler, i konplent, i dispit, i pa kontan – i mekontan, akoz i annan en lapse dan lafason ki nou pe apros deal avek en sityasyon.  Mr Speaker pou mwan sa ki mon remarke, se ki i pa pou dernyen bann dezas ki nou bann distrik pou rankontre.  I annan bann distrik ki pou rankontre bann lezot problenm akoz pli klima i sanze pli i annan bann lezot keksoz ki afekte nou.

E  mwan mon krwar sa diskisyon ki bezwen ganny fer sirtou lo sa size spesifik, se adres bann problenm ki relye avek bann problenm klimatik, e mon krwar i ava annan resours neseser ki a kapab ganny mete akote pou fer sa.   Sa en keksoz ki nou devret al ladan e pou nou konsidere seryezman.

En lot pwen enportan Mr Speaker ki mon souleve, se lefe ki nou bezwen osi train bann dimoun pou deal avek disaster preparedness.  Nou bezwen train dimoun pou disaster preparedness.  E mon krwar sa ki enteresan se ki nou annan nou konmanse fer serten zefor e nou ariv en serten nivo me mon krwar prezan nou bezwen anmenn sa lo nivo lokal lo nivo distrik.  E ki mannyer nou kapab fer sa?

Mon konnen ki annan serten travay ki’n fer me nou bezwen met lavantaz lo la.  E en lot pwen enportan Mr Speaker se ki mannyer nou annan sinerzi ant si nou pe koz lo nivo bann dezas DRDM, Lotorite Distrik, Local Government e Departman dan finans ki zer okenn fon, ki i a relate avek bann contingences bann problenm ki arive ki mannyer ou kapab annan en sinerzi pou ou deal avek sa bann problenm.

Mr Speaker la mon pou dakor avek mon bann koleg kot i vre, kot ou annan de problenm ki pran ou en pake letan pou sey rezourd, akoz i ale vini ant bann Lazans, ki ou difisil kapab ganny solisyon.  E se pou sa rezon ki mon dir poudir si – si sa ti deza lo nivo distrik ou ti a sey sort of so to speak, cut out the middlemen pou rezourd sa problenm.  Mon krwar se sa lesansyel ki nou bezwen rode dan sa Mosyon Mr Speaker.

An konklizyon Mr Speaker mon krwar ki malgre ki mon santi poudir, sa i mon lopinyon personnel, me mon krwar persepsyon ki’n reste se ki deba dan Lasanble Nasyonal i free i envit plizyer diskisyon, e nou kritike e lot kritike i normal, me sa ki enportan annou reste focus lo sak sa bann dimoun ki nou le en solisyon pou zot.  Annou pa fer zot vin collateral damage pou nou bann deba politik.  Annou konsantre lo akoz nou le rod en solisyon pou sa madanm i inonde Anse Royale, akoz nou le rod en solisyon pou sa msye ki pye dibwa in tonm lo son lakaz swa Grand Anse Praslin swa Baie Ste Anne Praslin ; swa Pointe Larue swa wherever.  Annou konsantre lo la.  E ki mannyer nou kapab fer sir poudir ler zot in fini ganny asiste, si nou le fer politik nou a fer politik about it.  Me selman annou fer sir ki i ganny asiste avan apre nou ava fer politik about it. 

        This is what mon krwar lesansyel ki sa Mosyon pe sey anmennen devan nou ozordi, se ki mannyer nou anmenn resours kot resours i pli byen bezwen, e kapab ganny servi dan en fason pli vit a sa moman ki nou bezwen servi li tou an metan bann checks and balances ki neseser, pou nou kapab zer sa bann resours.

Avek sa mon remersi Lasanble Nasyonal pou son latansyon e mon remersi ou pou letan ki ou’n donn mwan Mr Speaker.

 

MR SPEAKER

Mersi Onorab Pillay.  Mon a donn laparol Onorab Clifford Andre.

 

HON CLIFFORD ANDRE

Mersi Mr Speaker.  Mr Speaker Anse Aux Pins i en distrik ki a ler aktyel i en preokipasyon pou tou parti politik ; ki swa US, ki swa in the making One Seychelles ; ki swa i pou LDS li menm.

Nou selman pou le moman LDS ki an kontrol Anse Aux Pins.  Pole position parey nou dir.  Mr Speaker wikenn pase pa sa enn ki’n fek pase sa de wikenn pase, letan ti annan gro lapli an rezilta sanzman klimatik, mon ti fer li mon devwar pou mwan pas dan mon distrik parey mon labitid dan wikenn mon fer.

E pandan sa letan mon ti ganny bokou call – bokou calls e i annan serten ki’n ganny repete konmsi menm dimoun ki’n call a plizyer repriz, akoz i pa pe ganny kontak avek Lotorite konsernen. Annefe DRDM pa ti pe respond e mwan ti fer li mon devwar anvi ki mon annan limero telefonn PS – konmela Mr Paul Labaleine, mon ti telefonn li e parey i ti dir mwan i ti fek sorti en landrwa e i ti ariv kot li – sa ti dan apre midi e pou eksplik li en pti pe bann dega ki pe arive Anse Aux Pins, e ki bann dimoun i bezwen lasistans dan imedyat.  Vi ki mwan konman MNA Onorab Pillay in dir, nou bezwen demande ki nou, nou’ fer.

Mon’n fer mon bout mon marse dan semen – be mon napa resours pou mwan atenn sa bann dimoun.  Resours i avek Egzekitif.  Fodre nou admet e Onorab William i e mon kontan in anmenn en Mosyon parey, akoz i montre poudir i annan ladmisyon, ki poudir L’Egzekitif pa pe fer son travay parey i devret fer, an referans avek sityasyon sanzman klimatik e bann aksyon ki bezwen ganny pran dan bann distrik.

So alors sa resours mon sir Onorab William pa pe zis dir sa resours i reste dan biro DA, kot DA i swazir ki pou fer e letan i ganny direktiv ki pou fer, akoz koumsa i marse Anse Aux Pins.

Letan i ganny direktiv lo ki pou fer.  Alors mon krwar letan nou pe dir resours i devret ganny met available.  I bezwen bann resours i ganny tape deswit, e i osi bezwen bann resours ki bann dimoun i annan akse.  Pou fer sa pou adres sa sityasyon dan imedyat.

Mr Speaker enn bann lorganizasyon dan Egzekitif ki mwan mon poudir parey Onorab Jean-Francois Ferrari in dir pa pe fonksyonnen se Planning Authority.   Mon pa pe dir bann dimoun ki travay anba ki pe fer li pa marse be mon pe dir son head, ki pe fer li pa fonksyonnen.

Akoz Anse Aux Pins mon ti pran CEO Mr Joseph Francois, mon ti anmenn li get en sityasyon ki ti ganny dir pou koz problenm, e sa sityasyon i zis avan 24/24/24 kot nou met 24/24/24 selman nou ganny 18 kot i annan sa proze lakaz ki pe ganny fer, e ti ganny dir poudir sa bann dimoun – sa msye lorizin Endyen, kot i pe fer sa bann devlopman la anba, e mon krwar i annan serten koneksyon avek serten dimoun en pe o- parey zot dir mwan, ki letan Planning i donn en serten direktiv i ganny revoke imedyatman, e i fer.  I kontinyen fer sa ki i annan pou fer.   Me prezan mon krwar dan sa sityasyon kot mwan menm personnelman mon’n poste lo Facebook, e Facebook i en zouti enportan mon ti a kontan Onorab Valmont i konpran sa byen, i en zouti ki’n fer Vis-Prezidan sorti dan son biro Lendi bomaten, mont Anse Aux Pins san i enform mwan.  Sa mon ti met lo Facebook.

Mon pa ti pe asize kot mwan, mon ti lo teren pe gete sa bann keksoz ki pe arive e rode ki mannyer pou adres sa bann sityasyon.

 

(Interruption)

 

HON CLIFFORD ANDRE

Mon a kontinyen Mr Speaker?

 

MR SPEAKER

Kontinyen Onorab.

 

HON CLIFFORD ANDRE

Wi mon ti lo teren pe adres serten sityasyon e pe poste lo Facebook, pou fer sir ki pep Seselwa enkli Onorab Valmont i ganny sans pou li war, e pou li realize enkli Vis-Prezidan i ganny sans war pou pran aksyon, menm si ler in pran aksyon in mont Anse Aux Pins i pa’n enform mwan, me selman mon kontan ki bann keksoz ki mon poste in annan en lefe pozitif, omwen mon kapab dir parey Onorab Pillay in dir, mon postings in fer keksoz arive.  Me en keksoz ki enportan pou fer resorti Mr Speaker, nou annan depi ler Felleng ti tap Sesel e Anse Aux Pins ti ankor en landrwa kot ti sibir konsekans en pe grav.

I annan zot, in vin gete.  Mwan depi ler mon ganny elekte MNA pou LDS Anse Aux Pins, mon’n al war en msye a plizyer repriz, kot lateras ti grennen deryer son lakaz, e Lotorite ti dir li zot pou asiste li.

Me ziska ozordi zot pa ankor fer nanryen Mr Speaker!  Mon pa pou kontinyelman repet sa mo, akoz sa bann soz ki fer zot pa ankor fer sa ki zot ti dir zot pou fer.  I annan apepre en 2mwan pase zot in vini zot in re mezir ankor, me still pa ankor fer sa bann aktivite ki zot dir zot pou fer – ok?

Mr Speaker i annan ankor kot nou al gete i annan en lakaz anler Bodanmyen kot Mr Gibert i reste, sa enn avan ti kot Mr Normal – kot Mr Gilbert i reste e ti vin Lanvironnman, Gouvernman Lokal e ankor enn fwa zot ti mezire ziska ozordi sa ki zot ti dir zot pou fer, zot pa ankor fer.

E la letan lapli in tonbe lateras i grennen.  So mon krwar i enportan i annan en lot anler kot Marshall dan Karyol dan Capucin, kot miray ki ti’n fer in tonbe in tap ek lakaz in kas vit e sa i afekte en lot madanm ki mon pa pou nonm son non, ki reste obor.  Mon’n al gete e Gouvernman Lokal letan mon’n telefonn – mon pou nonm son non, Mr Estico, Mr Estico i dir mwan poudir DA pa ankor compile file ; pa ankor compile file  pou fer sa aktivite.         Pour fer sa ki devret ganny fer pou rektifye sa bann sityasyon.

Mr Speaker ou konnen asize anndan koze dir poudir nou bezwen gete ki mannyer nou fer?  Nou, nou bezwen gete ki mannyer nou adres sa bann sityasyon, be mon poudir se linefikasite bann lenstitisyon oubyen bann departman ki fer keksoz pa marse – ok?

E i pa pou marse akoz nou pa pe pran sa bann sityasyon o serye, e kot dimoun apre i santi li fristre e fristre.  Si ozordi kot nou pe dir lakaz 18 nou pe war i pe fer flooding e i pa ankor konplete – pa ankor konplete, se akoz en mank sipervizyon e efikasite Planning Authority ki sa bann keksoz pe arive.

So si i koumsa la, nou tou nou konnen i annan en prediksyon ki poudir sanzman klimatik pou vin pli worse.  It will not get better si nou, nou pa fer bann mitigating circumstances la.  E se selman sa Sesel pa kapab fer li akoz nou pa kre bann sityasyon ki afekte klima, alor se bann gran pei.

E nou war Lanmerik in pull out bann gran comparison agreement, alors li i enn bann kontribiter, so nou kapab espekte ki poudir it will get worse.  Probably before it gets better.   If it gets better.  Alors nou, nou bezwen fer sir ki nou fer bann keksoz ki neseser e ki enportan pou nou fer.

Mr Speaker i ariv bann sityasyon dan bann distrik – ok ti annan en madanm ki ti DA avan, letan mon pran kontak avek li pou li fer serten travay, i vre sa bann travay in ganny fer, me selman sa kontrakter ki ti fer sa travay letan i koup pye dibwa, akoz i danzere, i kit sa bann dibwa ater.

Prezan lekel ki sipoze gete sa?   Be sa dimoun i ganny peye eski zot bezwen gete si ler ou pe fer tree felling ou osi fer netwayaz, akoz sa dibwa i reste la e i koz lezot problenm.  E sa ki’n arive dan semen Capucin pandan sa 2 wikenn ki’n pase.

Akoz letan lapli i desann larivyer i overflow i tap ek sa bann dibwa, sa bann dibwa i koz i re route sa bann delo ki fer ki i tonm dan semen.  E en keksoz ankor ki enportan pou gete letan PUC ti pe fer laranzman pou li met bann nouvo tiyo dan semen Capucin pou mont anler, bann fason ki zot in re aranz semen, lekel ki’n re aranze i pa tro kler, zot pa’n re aranz li pou fer sir ki i reste for.

Me ki zot in fer letan sa lapli in tonbe, nou war bann trou – konmsi sa delo ler i pase anba i ponp sa semen anler.  Alors semen i annan trou ki ganny koze dan semen, e sa i akoz lafason ki sa bann semen in ganny fer, e i pa’n ganny met weldmesh ladan pou fer sir ki i tenir e ki i ase for.

So i enportan osi ki letan nou pe fer bann travay pou evit bann lezot keksoz ki kapab arive an rezilta movetan e gro lapli, ki nou osi nou fer keksoz byen, e nou siperviz sa bann sityasyon, tre, tre byen.

Mr Speaker Onorab Pillay ki’n koz avan mwan in dir ki li i anvi eksplik Onorab Larue, byen sa filozofi delinking ki poudir delinking in arive e bann DAs Administrasyon Distrik napa nanryen pou fer avek eleman politik.  Me Anse Aux Pins sa i diferan totalman diferan mon ti a kontan anmenn sa a latansyon Onorab Pillay kekfwa i ava al get sa pli byen vi ki i annan en pozisyon enportan dan son parti.

Ki mannyer mon ava eksplik li ki mannyer letan pou penn lekol DA i form par en group ki poste lo Facebook US Youth Anse Aux Pins!  Mon mazinen US United Seychelles i pa pe dir United States America i pe dir United Seychelles! 

So i enportan e sa portre kekfwa zot in fer li pa avek lentansyon pou zot montre DA ladan.  Me selman i ladan.  E prezan sa post i koumsa alors mon krwar i enportan ki letan nou dir en keksoz nou reflekte li lo teren.  Mon tout an faver ki nou bezwen annan delinking mon tou an faver ki nou annan sa, me selman nou bezwen fer li arive.  Nou bezwen fer li seen to be done ok?

 So, Mr Speaker letan nou pe koz delinking mon krwar Onorab Larue i annan plis pwen si mon pou score ki Onorab Pillay, akoz sa ki li i pe dir i pe fer cheap politics ki i pa reel.

Mr Speaker parey Onorab Pillay in dir letan nou demande ki nou nou’n fer e si nou’n delivre avek resours finansyel mon krwar en MNA letan son bann constituents i tap son laport, i pou kapab delivre.  I pa pou bezwen esper VP vini pou vin gete.

E depi ler in vini Mr Speaker, nanryen pa ankor ganny fer ! Depi ler in vini nanryen pa ankor ganny fer.  Ti annan bann lakaz anler Bodanmyen ki delo ti antre sa pye bodanmyen in zet ater, delo ti antre e in koz labou dan lakaz sa bann dimoun me sa bann dimoun pa’n gannyen sa vizit zot, zot pa’n gannyen sa vizit.

Devan kot Reef Hotel Mr Speaker i annan letan Felleng ti arive ti annan problenm kot ti aranz pon, ti agrandi sa pasaz pou delo desann, be 2 semenn pase, annefe yer ki mon ti ganny sa call sa zenn zonm in telefonn mwan i dir mwan 2 semenn pase, apre ki in fer lagrandisman zot vini zot in bous sa drenaz. Lotorite ki’n fer bouse. In fer zet bann ros la pou bouse.

Yer prezan letan lapli i tonbe, delo pe monte, in fer re debouse. Mr Speaker sa i montre nou ki mannyer parti US pe gat larzan taks!  I pe gaspiy larzan tax payers.  Akoz afekte ou ava bous en keksoz ki’n ganny fer pou  – konmsi travay in ganny fer pou elarzi li, apre ou pey en dimoun – mon pa konnen si kekfwa sa larzan pou ganny resikle plitar, pey en dimoun pou vin bous sanmenm  ki ou’n fer elarzi.  E yer ou pey ankor mon pa konnen si sanmenm sa dimoun si en lot dimoun – mon ava klarifye sa.  Ou peye pou vin fer debouse.  I montre ki nou pa serye e mon pou felisit Onorab William menm si i pe pas atraver bann difikilte, zot pe anpes li koze – zot le fer li parey ros dan fles, be konmsi mon pou felisit li ek kouraz mon koleg, mon konnen ki ou pe santi.

‘’Been there, done that,’’ parey nou dir.

 

HON FLORY LARUE

Yes.

 

(APPLAUSE)

 

HON CLIFFORD ANDRE

E i fermal.  Kekfwa i reste sa dernyen pti kouraz, ki mon  a  – Mwan mon pou kontinyen donn ou sa sipor, kouraz pou ou dir ‘’enough is enough!  E mon pe ale – ok?  Avek sa Mr Speaker mon le donn mon garanti zabitan Anse Aux Pins, ki mon pou touzour la dan letan difisil, dan movetan.  Kont lo mwan.  Zot kapab telefonn mon parey zot ti fer e mon ti fer kontak avek DRDM e VP  ti monte, prezan mon pou kontinyen met presyon – mon pou kontinyen met presyon pou ki VP i delivre!

Lenstriksyon ki mon ti gannyen Mr Speaker sete sa Lendi ki i ti al vizite, ti sipoze annan en rapor pou donnen Merkredi.  Mon pa ankor war sa rapor.  Mon pa ankor tande si sa rapor in ganny fer.  So i ti’n donn 2 zour pou fer sa rapor, be mwan  mon pe dir li rod sa rapor VP anmenn kot mon nou ava gete ki mannyer nou a travay ansanm.  Mersi.

 

MR SPEAKER

Mersi Onorab Andre.  Bon i reste 10minit pou 3.30 mon pa krwar i pou ase pou donn sa letan Onorab Simon Gill.  Mon sizere nou pran en break akoz apre i a reste ankor 3 Manm ; savedir i annan 4 Manm avek Loter Mosyon pou konklir e nou anvi fini sa Mosyon ozordi.

Onorab Loizeau ou pare pou 10minit – ok? Annou evit repetisyon – ok?  Onorab Loizeau.

 

HON NORBERT LOIZEAU

Mon koz dousman mwan –

 

MR SPEAKER

10minit annou make use of sa 10minit avan nou pran break.

 

HON NORBERT LOIZEAU

Si i deborde ou ava les.

 

MR SPEAKER

Wi si i deborde mon ava aret ou wi.

 

HON NORBERT LOIZEAU

Mon a pran apre.

 

MR SPEAKER

Wi go ahead Onorab.  Pa fer repetisyon anmenn bann nouvo eleman dan sa deba.

 

HON NORBERT LOIZEAU

Ale.  Mersi Mr Speaker.  Bonzour tou dimoun.  Mr Speaker mersi pou donn sa privilez pou koz lo Mosyon Onorab William.  E avan mon al direk lo Mosyon, mon ti a voudre fer enn de pti komanter lo serten keksoz ki mwan mon’n pas ladan dan sa bann letan ki ler mon ti fek antre dan politik.

Avan konmanse Mr Speaker, yer apre ki ou ti adjourn ler mon ti dan transpor pe ale, ti zwe en sanson Joseph Louise lo radyo ki mon ti pe ekoute.  Sa sanson i dir ‘’lontan nou bann granmoun ti plenny zot douler dan moutya’’ Ozordi, ozordi se sa ki mon pe tande ozordi. Apre ki Onorab William, sa Manm ki zot ti anvi pouse – ki zot ti anvi bate – fer tou keksoz avek, i vin ek en Mosyon ozordi zot tou zot kontan son Mosyon malgre zot ti le pous li!

Mr Speaker ler sa i fer mon mazin ler zot ti an mazorite, ler zot ti pe donn bal dan tou keksoz tou keksoz ti ok. Zot pa ti dir nanryen apard zot petet bann ki nouvo pa ti la bann Onorab De Commarmond ek lezot zot pa ti dir nanryen.

E menm zot ti an mazorite dan 5enm Lasanble, tou sa bann problenm ki annan still zot pa ti adrese Mr Speaker.

 

(Interruption)

 

MR SPEAKER

Kontinyen Onorab Loizeau.

 

HON NORBERT LOIZEAU

Mr Speaker ozordi Mr Speaker mon pa konnen lekel ki’n donn li en kout fles la ki’n fer li ale.  Mr Speaker be konmsi depi ler mon pe ekoute, vreman mon tann zot zis pe plennyen lo sa size ki en size ki lontan in la.  I fer mwan lapenn ler mon war bann DA – bokou zot dan lot kote, ki ti bann DA –  sa bann letan Mr Speaker zot ti kapab koze, me selman zot pa ti fer nanryen.  Zot pa ti dir nanryen akoz keksoz ti dan zot lavantaz.

E la ler mon pe koz lo DA Mr Speaker, i fer mwan mazin en zour, en zour en dimoun ti vin apros mwan pou mwan vin DA Bel Air i ti vini i ti dir mon be ou konnen Komite Santral pe mazinen si ou vin DA ki ou panse lo la?  Prezan keksoz ki mon ti dir ek sa garson – ek sa msye mon dir li koumsa: ‘‘Be mwan sa bann zafer ‘ek nou pa ek nou’ mon pa ladan.   Sa bann zafer zot pou dir mwan ki pou fer, mon pa ladan.   Mwan mon en boug drwat sa ki bezwen tel keksoz pou gannyen.  Pa akoz ou entel ou siport entel ou pou gannyen’’.

E depi sa zour mon pa’n tann nanryen ziska aprezan lo la sa bann zafer DA. Mr Speaker mon pe koz koumsa akoz depi 2007, ler mon ti antre dan Lasanble, sa ti bann keksoz ki mwan personnelman mon’n toultan demande.

Me laplipar letan i ti tonm dan zorey vid zot rapel sa bann letan nou ti dan Lopozisyon, nou ti an minorite nanryen, sa ki nou ti dir pa ti tande.  Zot pa ti tande.  Me selman ozordi sa menm keksoz ki nou ti pe koz lo la Mr Speaker, ozordi Onorab William in vin avek sa Mosyon, e mon panse Onorab William mon pa tro sir Onorab William i ankor ek zot – akoz ler mon get sa gap ek li ant Onorab Loze, i dir mwan i koz en gran keksoz Mr Speaker!

 

(Interruption)

 

HON NORBERT LOIZEAU

Mon pe get sa gap antre zot laba i annan en problenm Mr Speaker ler mon pe gete.

 

(laughter)

 

HON NORBERT LOIZEAU

E Mr Speaker sa i fer mon mazin lontan ler nou ti pe vin avek bann issues ki ti afekte nou, sa i fer mwan rapel ler mon ti, ti annan enn fwa ler mon ti pe koz lo lapovrete Mr Speaker nou ti pe koz lo lamizer nwar – zot ti dir nou napa.

I fer mon rapel Onorab Gamatis Mr Speaker, ki ti koze aotvwa ler mon ti pe koz lo lapovrete.  I ti dir mwan ‘’Ki lapovrete ou pe koz lo la?  Ou konn lapovrete?’’ I ti vin koz lo al aras lera mang pou manze …

 

(laughter)

 

HON NORBERT LOIZEAU

… sa letan ki ti annan lapovrete.  Tousala ti arive.  E ozordi Mr Speaker menm zot vini zot dir lapovrete i 40poursan.

Me selman sa bann letan, ler nou lo sa kote nou ti dir, nou ti ganny dir manti !  E mon pou tourn lo Mosyon Mr Speaker.  Mr Speaker nou isi lo sa kote latab Mr Speaker sa ki Onorab William in vin avek, nou lontan nou’n vin avek – lontan nou dir ok ?  Lontan nou’n dir me selman zot pa’n ekoute ozordi mon kontan Onorab William in vin avek sa.

Nou ti vin ek sa Mr Speaker, akoz nou konnen sa ti pou en gran led pou bann DA, pou zot kapab fer serten keksoz sirtou si i annan en urgency kot zot pa pou bezwen anvoy let isi – fer – mon krwar bann rekomandasyon ; konmsi zot kapab fer bann pti keksoz zot menm.

Me selman mon konpran ki bann proze ki en pe pli gro, sa nou ava anvoy pou bann lorganizasyon ki pou kapab deal avek.  Me bann pti keksoz mon krwar nou DA ti merit kapab annan sa pouvwar sa le mwayen pou li kapab fer li menm.

Mr Speaker ozordi dan tou bann distrik ok, i annan en ta pti proze – enta keksoz ki Administrasyon Distrik li menm, ki distrik ti kapab take care avek.  Mon pe koz bann keksoz bann proze bann pti travay ki pa ni kout R5mil – ok meton R25mil, mon krwar ki DA ti kapab deal avek.   La i fer mon mazin en proze Mr Speaker i annan kot Madanm Cupidon deryer kot Soudee bann ki konnen i annan en lateras pe grennen.

Anler i annan Madanm Jean-Louis akote i annan son garson i annan 4 fanmir la, i annan plis ki 2an proze in ganny mete en pti proze manke sa miray konmela pa ni bezwen fer ek ros Mr Speaker konmela ou kapab fer li beton met feray i pa ni pou kout ni menm R25mil – ziska ozordi nanryen pa ankor ganny fer.

DA in fer papye in anvoy partou i ankor lo proze i ankor pe esper vizite, mon pa konnen si zot pe espere ki sa lateras i grenn lo sa madanm anba, apre taye pou zot vini fer keksoz.

E dan tousala Mr Speaker, keksoz ki  mwan mon trouv i mal se ki DA ki ganny blanmen.  Laplipar bann dimoun zot pa konnen sa bann prosedir anvoy anba laba kot Gouvernman Lokal fer vizite tender, bann pti kontrakter bokou dimoun i vin kot waon i dir be DA pa pe fer naryen alors mon bezwen eksplike.

E li DA li i pas konman sa move dimoun li.  Li ki pa pe fer e Gouvernman li i get away avek sa li.  Li i ganny gete konman pli bon.  E sa manev Mr Speaker – sa pratik lontan i la!  Lontan i la!  I dir  MNA pa pe fer nanryen, selman se Gouvernman ki pe donn lenfirm.  Sa se bann taktik ki ti servi lontan Mr Speaker.  Sirtou ler nou ti dan Lopozisyon.

Laplipar ditan ler Lopozisyon ti an minorite Mr Speaker – (mersi Onorab Valmont ou’n fer mwan mazin sa) ozordi nou an mazorite.  Mr Speaker zot ti servi sa Mr Speaker poudir ki akoz bann MNA LDS – bann MNA SNP sa bann letan ti an minorite, zot ti met sa blanm lo nou ou trouve war zot vot pou zot la i la gete zot pa pe fer nanryen.  Kan saler pa nou ki fer sa, se zot ki pa pe met resours ek distrik pou distrik kapab bouze, Mr Speaker – ok?

Dernyen fwa Mr speaker, Regional Council Central (1) ti fer en progranm netwayaz dan distrik Bel Air ok?  Nou ti vini Administrasyon Distrik ti partisipe.  Me sa bann keksoz netwayaz koumsa ki Council i vin, me sa Administrasyon Distrik i ti merit fer, si i ti annan le mwayen si i ti annan sa resours pou li kapab fer, me i napa resours.  I napa.  Alors sanmenm sa la ozordi zot pe koz volontarya, volontarya i ankor egziste?

Sa dan bann lepok kominis/marksis/sosyalis bann letan lontan ki ti annan bann zafer soz volonter, konmela napa.  Mon rapel Klib Bel Air ti fer volonter sa bann letan Msye Rene ti la zot ti ankor for. Konmela dimoun i le larzan!  Ennitil ou vin avek sa bann zafer volontarya.

Mr Speaker en lot zafer ankor, mon pe koz Onorab Pillay ti dir nou pa pe koz lo nou distrik – profit sa sans ?  Mwan mon pou profit sa sans pou koz bann keksoz dan mon distrik Mr Speaker.  Dernyen fwa pou koup de pye fiyapen obor Biro Brans lo later Mrs Underwood, zot in donn en bann lenfirm Mr Speaker.  Sa madanm i en dimoun aze i reste la.  I vye sa pye friyapen tonbe kraz son lakaz, i napa le mwayen.  Martir avan zot vin koupe!  E sa ki gou Mr Speaker sa ki’n vin koupe depi lannen pase, konmdi Onorab Larue pa ankor ganny peye.

En proze konbyen? Mon krwar i ariv R14mil.  R14mil.  sa bann dimoun depi lannen pase, pa ankor ganny peye zot pe vin kot mon zot dir mwan DA pa ankor pey zot.  Mon dir zot be pa DA ki pey zot.  Papye in al laba, retar i laba kot Gouvernman Lokal – ou konpran mwan?

Be si DA – si DA ti annan sa resours i pa en gran zafer R14mil, be DA pa ti ava fer? Akfer sa ta retar?  En lot zafer ankor Mr Speaker anba kot larivyer i annan en larivyer Dan Koko, ki desann, i annan en Mrs Savy i reste la – en bon laz madanm i ti en ansenyan, in pran retret.  I annan bann lalyann anvaisan ki pe pous dan larivyer  in monte – larivyer i sal i tou sa bann lalyann anvaisan, pe antre dan lakaz sa madanm.  Mon’n ale mon vizite sa madanm in call mwan detrwa fwa, DA in ganny enformen ; DA in sey kontakte serten Lazans kot Lanvironnman.

In fer son mye eskan aprezan Mr Speaker zis pou fer sa netwayaz ki sorti lo later Gouvernman dan larivyer, pou vin tir sa pou anpes antre anndan ek sa madanm, akoz lera pe antre i kapab annan koulev ki kapab marse.  Ou konnen landrwa i en pe fre eskan ozordi nanryen pa pe ganny fer.  Sa madanm i ankor zis la pe espere menm.

Sanmenm sa Mr Speaker mwan mon pe dir mon pou sipor Onorab William lo sa kote, akoz mon krwar Administrasyon Distrik. i bezwen ganny serten keksoz finansman, pou li kapab fer serten keksoz dan imedya ; bann keksoz ki annan bann pti urgency pou fer.  Vi ki la prezan Mr Speaker nou annan i annan bann manrmay URS bann ki lo drog ki pe detox ki ganny allocate avek distrik pou fer sa bann travay, zot osi zot a partisipe, an menm tan bann lot dimoun ki annan en masin ki pe fer bann pti biznes netwayaz, zot osi zot kapab antre ladan e fer sa bann travay san okenn gran konplikasyon.

Mr Speaker mon anvi siport – mon pou donn mon sipor Onorab William, akoz sa Mosyon ki i pe demande, i byen, menm si mon konnen ou annan problenm avek ou parti mon konnen zot tou zot pou siport ou lo sa Mosyon Mr Speaker akoz sa Mosyon i en Mosyon ki byen.

E la mon mazinen dan sa moman ki zot met sa Mosyon, mon santi ki i byen, akoz pandan letan ki bannla ti an mazorite, mon pa ti pou kapab met en Mosyon koumsa Onorab William!  Ou pa ti pou kapab vin ek sa Mosyon akoz ozordi parey i sante ozordi nou bezwen  esper sa gro nyaz nwar. I annan sa sanson Mr Speaker  ou ‘n tande ki i sante li, en gro nyaz nwar in ale prezan nou pou kapab war laklerte.

 

MR SPEAKER

Onorab 2minit.

 

HON NORBERT LOIZEAU

Ozordi ou pou kapab war laklerte pou ou war sa semen ki ou anvi trase Onorab William !

 

(APPLAUSE)

 

HON NORBERT LOIZEAU

E mon siport ou e mon anvi dir ou ki Onorab Lemiel in dir, ki sel keksoz ki ti reste parmi bann zouti, se en gran tors.

 

(laughter)

 

HON NORBERT LOIZEAU

E mwan mon kontan ti reste sa gran tors mwan Mr Speaker.

Sanmenm sa ki pe kler ou semen gran tors se LDS ! E mon ti a kontan ki ou bann koleg laba lot kote swiv laklerte sa gran tors ki ti reste dan store kot Onorab Lemiel Anse Royale, pou kler zot semen pou zot war, ki ou, ou anvi e ki nou LDS nou anvi anmennen pou sa pei.

Mr Speaker i annan bokou keksoz mon ti anvi dir me selman ou’n donn mon zis 10minit mon a termin la, me selman mon panse ki Onorab Gill osi i ava ganny 10minit.  Mersi.

 

(APPLAUSE)

 

MR SPEAKER

Mersi Onorab Loizeau.  Bon mon anvi zis anonse ki Komite Madanm pe rankontre pandan break – ok – dan Committee Room 2 deswit la e nou ava break nou ava retournen 4er pou nou kontinyen deba lo Mosyon.

 

(BREAK)

 

 

MR SPEAKER

Bon zis avan mon donn parol Onorab Simon Gill, mon pa pou donn gran detay me zis mon ava fer konnen bann Manm Lasanble poudir nou’n commission nou PV system, e nou a kapab petet fer lanons en pti pe pli detaye, me in fini ganny commission – the  system; savedir i pou annan i kapab annan bann lefe pozitiv tou lo nou bill lenerzi e nou pe monitor.  E apre osi nou konnen sa pti bout ki nou fer dan proteksyon nou klima, e klima lemonn osi tou pti bout ki ou fer, parler i kont bokou i al lwen.

Mon swete ki petet par next week, nou ava ganny en pti pe plis detay, petet mon a partaz avek bann Manm. Me ankor i en lot milestone ki 6enm Lasanble i kapab achieve.  Bon avan mon donn laparol, mon ti a zis averti – i annan 3 entervenan ki lo lalis mon averti zot ler  and so on.  E mon monitor osi tou en pti pe ; tou bann entervenan ki’n pran par dan sa deba, zot pa’n al plis ki 20minit.  Alor mon pe warn tou le 3 entervenan pou tenir zot deba dan apepre 15 a 20minit, pou nou kapab donn Loter Mosyon sans pou li wrap-up e nou a pran en desizyon lo sa Mosyon.  Bon mon a donn laparol Onorab Simon Gill.

 

HON SIMON GILL

Bonn apre midi Mr Speaker mersi bokou pou donn mon laparol bon apre midi tou koleg Onorab e Manm piblik ki pe ekout nou.  Mr Speaker bokou in ganny dir lo Mosyon prezante par Onorab Waven William – Manm elekte pou distrik Grand Anse Mahe.

Mosyon i dir – ‘’An vi lefe sanzman klima, atraver kalite letan ki nou pe eksperyanse, e dega apre, sa Lasanble i demann Gouvernman pou revwar lafason ki distribisyon resours pe ganny fer pou deal avek bann tel evantyalite, pou redwir risk; permet aksyon vit avan ler lezot Lazans konsernen i arive, minimiz lenpak.’’

Mr Speaker sa Mosyon parey bann lezot entervenan avan mon in dir i en Mosyon ki’n ariv dan en moman ki oporten.  Akoz yer nou menm nou ti bezwen aret lo Lasanble e permet nou bann Manm elekte bann lezot dimoun isi dan nou Lasanble retourn kot zot, pou kapab al etablir sityasyon lo zot lokalite respektif.

Sa Mosyon i anmenn nou pou war plizyer keksoz.  Me mon pou kit mon pwen santre lo solisyon.  Parmi bann solisyon Mr Speaker No.1 i konmans isi menm dan nou Lasanble Nasyonal.  Ki mon oule dir par solisyon No.1 i konmans isi dan nou Lasanble Nasyonal, i senp, nou Lasanble Mr Speaker sa i enkli bann Manm LDS e i enkli bann Manm United Seychelles ki isi dan sa Lasanble.

Nou bezwen nou tou fer en zefor ekstra, pou nou koz avek tou bann dimoun, ki dan servis piblik e fer zot konpran ki Lasanble Nasyonal i enn parmi bann stakeholders dan tou sa ki pase isi dan Sesel.

Ler ou en stakeholder Mr Speaker, ou pran kont byensir bann febles ou pran kont bann pwen for bann kote for bann dimoun ki dan ou lantouraz e ki ou bezwen travay avek e ki ou pou bezwen zot dan bann diferan moman donnen legzizans ki nou sosyete byensir i fer fas avek.

E pli presizeman Mr Speaker, tou bann dimoun dan servis piblik i bezwen byensir ganny nou respe e zot osi zot bezwen resiprok.  Dan lot mo ler i annan problenm ler i annan bann defi, Lasanble Nasyonal pa kapab dedye en zournen, pou talonnen oubyen pil lo bann travayer dan servis piblik – pe enport lo ki nivo ki zot pe travay.  Nou devret pran zot konman bann alye – konman bann stakeholders ki nou tou ansanm nou pe viz ver adres solisyon bann defi ki devan nou konman en sosyete.  Mr Speaker Prezidan Faure depi ler in ariv State House, in fer en kantite pou li sey os nou servis piblik pou donn zot plas ki zot merite.  Avek tou bann lenperfeksyon ki kapab annan ozordi nou tou nou bezwen realize ki nou bezwen depan lo ansanm servis piblik pou fer avanse bann defi atraver bann solisyon ki nou bezwen lo tou nivo nou sosyete.

Mon pa bezwen tro vin spesifik Mr Speaker, akoz mon oule evite mansyonn non nou bann dimoun dan servis piblik.  E Mr Speaker i regretab parfwa ki non serten bann zofisye i ganny mansyonnen hors de contexte.  E bann dimoun i santi zot pe ganny talonnen mon pou servi sa mo, malgre zot pe fer zot mye pou anmenn solisyon pou nou – pou nou pep pou nou sosyete pou nou bann kot dimoun dan lakominote. Mr Speaker sa i mon premye pwen.

Mon 2enm pwen se ki nou bann dimoun dan servis piblik, nenport ki nivo ki zot été mon mesaz pou zot, avek tou liminite nou ava dir zot ki lapros Prezidan Faure ler in sit transparency, accountability, good governance sa pa devret ganny pran konman en lobstak dan li menm.  Me i devret ganny pran dan en konteks ki demontre en nouvo fason fer, or en depar lo sa mannyer nou ti abitye fer pou nou bouz lo en lot fason fer.  Me Mr Speaker ki’n arive?  Sa ki’n arive se ki ler nou koz lo transparency, accountability, good governance, nou krwar poudir nou bezwen met mil prosedir an plas pou nou kapab attain transparency, accountability, good governance.

E par laswit en senp problenm ki arive, nou krwar nou bezwen mil letab – mil step pou nou pran en desizyon e egzekite.  Or avan nou pran en desizyon pou nou al egzekite e si i annan en keksoz ki mon pe pou demande ozordi Mr Speaker se pou nou elimin tou sa bann step ki pa neseser, e ki kre lobstak dan decision- making process and implementation or execution stage.

(APPLAUSE)

 

 

HON SIMON GILL

Akoz ankor enn fwa transparency, accountability, good governance pa vedir met mil step avan ler nou pran en desizyon e avan ler nou al fer aksyon or egzekisyon.  E lot pwen ki ekstrememan enportan Mr Speaker ki nou bezwen sezi sa loportinite ozordi pou nou dir, avek nou bann Chief Executive, nou bann CEO, nou bann PS dan bann Minister, dan bann Departman, dan bann lenstitisyon kot zot été, pa per pou pran desizyon !  Ozordi Mr Speaker mon konnen e en kantite nou i konnen, ki ozordi i annan en kantite dimoun ki pe per pou pran desizyon.

Swa ki i vre swa ki i pa vre ki zot per, swa ki i en manifestasyon libere pou retard lenplimantasyon or egzekisyon, baz se ki nou per pangar nou ava ganny apele par Lasanble Nasyonal e pou nou vin ganny pil lo la !

 

(Interruption)

 

HON SIMON GILL

Mr Speaker, nou, nou pe dir avek tou nou bann Chief Executive, pa per pou pran desizyon.  Pa retard lenplimantasyon okenn desizyon, anba aparan lafreyer ki Lasanble pou apel zot e ki zot pou bezwen rann kont.   Si zot pe pran bann bon desizyon e si zot annan kapasite abilite pou pran bann bon desizyon, e pou reponn legzizans nou letan ozordi, pa bezwen per pou pran desizyon!

 

(APPLAUSE)

 

HON SIMON GILL

Sel lakizasyon ki ou pou gannyen Mr Speaker, se zisteman ler ou per pou fail pou pran desizyon.  Si demen bomaten ou’n pran en desizyon Mr Speaker, kot i annan en fo pa dan sa desizyon or en kalkilasyon or en mank bann konponan, nou sans rezonnen – nou sense of resonableness konman bann Manm Parlman, nou bezwen konpran sa e dir nou felisit ou pou pran desizyon e pou bouz ver aksyon.  Se sa ki devret nou repons e se sa ki nou devret nou latitid.

E Mr Speaker mon santi en pe grinotman lot kote laba, me sa ki mon pe koze i reel. Mr Speaker lot eleman ki ekstrememan enportan ki nou bouz lo la se empowerment bann distrik.

Mr Speaker tou bann entervenan ki mon’n ekoute avan mon i annan en mesaz ki’n sorti konmansman par Loter Mosyon.  E mesaz e konklizyon se ki nou le ki tou bann konsiderasyon i ganny pran pou nou empower nou bann Administrasyon Distrik.

Empower zot dan ki fason?  Empower zot No.1 avek finansyel No.2 empower zot avek resours imen.  E byensir resours imen bann lekipman bann lezot lozistik ki zot bezwen pou azir dan bann moman ki dezas i tap dan sak nou bann distrik, dan sak nou kominote.

Sa i en konklizyon enportan Mr Speaker, ki  mwan mon’n tire e i en mesaz ki nou bezwen konsider li dan en fason serye, serye e serye empower nou bann Administrasyon Distrik nou bann DA avek son tim, pou zot azir.  Annou pa trangle zot avek mankman resours espesyalman resours finansyel pou zot kapab pran desizyon e bouz ver aksyon.  Byensir i annan eleman preparasyon ; i annan capacity building sak nou bann District Administration offices, ki nou bezwen fer.

E sa i enportan Mr Speaker lot eleman ki enportan Mr Speaker, nou pou dezagree byensir or nou kapab tonm dakor pou nou pa dakor; an menm tan, se ki annou bouz lo en nivo, kot dezas i konsernen.  Annou zwenn tou bann Manm Lasanble Nasyonal, ansanm avek tou bann Administrater Distrik avek Minis Gouvernman Lokal avek bann key player or key players dan bann players ki azir dan bann moman dezas, annou tonm dakor lo en prosedir – lo en prosedir ki mannyer nou tou nou enterakte dan bann moman ki dezas in arive.

Mon pa rapel en moman ki bann Manm Lasanble menm lepase e la, in kapab antre dan en sesyon, petet en demi zournen travay or en zournen travay fokaliz lo sa size.  Enteraksyon tou bann Manm Elekte avek zot Administrasyon Distrik probableman DRDM Minis Gouvernman Lokal, annou met ater bann steps, pou ki ler Onorab Anse Aux Pins DRDM pe monte Anse Aux Pins, i ava konnen poudir swa li kontakte DRDM pou DRDM  monte or dan en fason otomatik i ekspekte ki DRDM i monte, e i fer letour partou dan Anse Aux Pins, akoz zot pou konnen egzakteman kote ki annan problenm.

Mr Speaker sa i pa pou zanmen leka e si pa pou leka Mr Speaker nou bezwen alor tonm dakor lafason ki mannyer nou enterakte e ki mannyer nou network nou link up dan bann moman ki bann dezas i arive dan nou kominote konman en Manm elekte.

E byensir sa i anmenn mon lo en lot nivo Mr Speaker avek bann presizyon ki mon pe entervenir, pou mwan kapab anmenn bann solisyon sa lot pwen ki nou pe al lo la, i dizon yer in ariv en problenm dan distrik Anse Royale ki nou fer Mr Speaker?

Byensir si DRDM i reakte administrater distrik in reakte avek son tim i pa sifi sa ki enportan i pli enportan tonm dakor lo en Plan D’aksyon konkret ganny met ater kot tou sa bann stakeholder i tonm dakor lo sa i bann priyorite ki mannyer nou bezwen bouz devan.  E Mr Speaker nou pa sanz nou focus ziska ler nou satisfe ki sa problenm sa defi dan Anse Royale in ganny adrese dan satisfaksyon lakominote e tou bann major stakeholder dan distrik Anse Royale.

Ki sa pou evite Mr Speaker?  I pou evite ki nou donn an ki mon ekout en litani bann issues ki i annan in anmenn li ziska ler Felleng ti tap nou isi Sesel.  Akoz ?  Probableman akoz nou’n perdi focus.  Or lezot keksoz in antre e in kre en problenm dan definisyon or etabli nou priyorite dizour dan tel kominote or dan tel distrik.

So se sa ki mon pe dir nou pa devret perdi focus.  Ler inondasyon in tap en landrwa nou konnen in inonde, nou fini evalye nou bouz vit nou action nou reste fokalize e donn solisyon ziska ler nou satisfe ki sa problenm ankor enn fwa in adrese dan son totalite.

Mr Speaker sa i fason ki mon krwar e mon konvenki ladan ki tou sa bann problenm depi 2004, 2005, 2006 tin devret kapab ganny adrese.  Byensir i annan bann challenge resours finansyel ; byensir mon konnen sa.  Me nou ava satisfer nou lekor ki nou pa’n perdi de vi nou pa’n perdi problenm lo nou lekran, e nou pe touzour dan en fason sistematik pe rode e gard sa bann dimoun konsernen okouran ki bann kontrent ki nou annan, e ki mannyer nou pe kontinyelman reste azour ver enplimantasyon or donn solisyon sa bann konsern ki zot annan.

Mr Speaker lot pwen ki ekstrememan enportan, e sa i anmenn mwan, (mon trouve mon pe fer sir poudir mon letan pe fini) me Mr Speaker keksoz ki ekstrememan enportan, ki nou bezwen koz lo la ozordi, se dir tou nou bann dimoun dan Sesel Mr Speaker, ki pe donn zot letan konman – bann dimoun – bann zonm/fanm volonter ; bann zonm fanm dan zot 30an dan zot 40an an montan ; bann zenn dan 18an an montan e menm i annan 60anan montan fanm konman zonm, ki volonterman pe kontinyen donn sipor bann dimoun dan kominote dan zot kominote respektif or lo nivo Nasyonal atraver bann NGO presizeman.

Mr Speaker a sa pwen i enportan ki mon dir mersi lo lapar nou Lasanble Nasyonal, pou tou sa bann volonter ki nou annan dan Sesel …

 

(APPLAUSE)

 

HON SIMON GILL

… ki pe donn zot letan ; kot zot pa pe ganny en saler ni menm mazinen rod en allowance avek Gouvernman.  Zot pe pran li volonter e pe donn zot letan zot lenerzi zot kapasite fizik ek entelektyel pou ede anmenn soulazman lo diferan form ki zot pe travay lo la.  Nou dir zot mersi.

 

MR SPEAKER

1minit Onorab.

 

HON SIMON GILL

Mr Speaker sa bann zonm fanm ki pe travay volonter dan sa pei zot pa bann kominis zot pa bann sosyalis, me zot bann dimoun ki annan en dezir e en kapasite abilite ekstraordiner eksepsyonnel ki probableman debord nou isi dan sa Lasanble e zot pe donnen.  Egalman Mr Speaker i enportan ki malgre tou bann kritik ki’n ganny fer, lo nou bann dimoun dan bann brigad kot nou pe dir isi in perdi, isi lot, sa i en fe sa i en fe.  Mon pa pou deny sa, me nou bezwen egalman dir mersi gran mersi tou nou bann dimoun dan brigad volonter tou kwen Sesel kot zot été.

 

 

(APPLAUSE)

 

HON SIMON GILL

Mersi bokou ! Akoz se zot menm zot ki’n anmenn en kantite soulazman dan lakour, dan vwazinaz en kantite fanmir, ki’n dan detres, dan bann moman ki zot in santi zot ganny afekte – dan bann moman kot en bon pe probableman nou isi anndan ti pe dormi.  E sa bann dimoun in sorti zot in al reponn lapel akoz sa kalite lenerzi e kapasite ki sa bann dimoun in arive, probableman mon pe dir lo serten laspe zot debord nou tou isi anndan.  Mr Speaker –

 

MR SPEAKER

Mersi Onorab.

 

HON SIMON GILL

Egalman dernyen pwen Mr Speaker.  Egalman Mr Speaker nou bann Administrater Distrik nou bezwen anvoy nou bann felisitasyon e nou remersiman pou tou nou bann DA pe enport zot bann limitasyon ki zot annan ; pe enport zot bann lenperfeksyon ki zot annan.  Me nou realize ki travay ki zot pe fer ki zot in fer depi byen lontan i en travay ki bokou nou isi anndan dan sa Lasanble in dir mwan non mon pa pou fer !  E nou remersi zot pou sa travay ekstraordiner ki zot pe fer avek tou zot bann limitasyon, tou zot bann mankman ki zot annan.  Mersi.

Mersi pou open up en reach out pou nou kominote.  Zot travay zot lenerzi i ganny rekonnet.

 

MR SPEAKER

Onorab, Onorab.

 

HON SIMON GILL

Mr Speaker lo sa de trwa mo ki mon’n dir ti annan ankor senk konklizyon mon pe gete ki mon le elabore, mon pou donn Onorab Flory Larue pou met lo Facebook!  

 

(laughter)

 

HON SIMON GILL

E Mr Speaker ler i ava pibliye, Onorab William i ava kapab kontinyen dan son demars, pou kapab ede – ed nou kominote – ed nou Sesel – ed tou nou bann dimoun dan sa pei ki bezwen nou soutyen ankor bezwen nou sipor.  Annou siport tou sa bann dimoun.  Dan servis piblik ki bezwen nou e ki nou bezwen zot.  Mersi bokou Mr Speaker.

 

MR SPEAKER

Mersi Onorab Gill.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker taler letan Onorab Gill ti dir servi sa lekspresyon ki dan Lasanble nou vin ’pil ‘lo bann civil servants ou rapel mon ti pe sey lev mon lanmen poudir ki i mal pou servi sa mo.

Ofet sa ki mon ti pe sey fer se pou mwan anpes Onorab servi sa lekspresyon akoz sel Manm Lasanble ki’n’pil’ lo en civil servant dan sa Lasanble se byen Onorab Simon Gill.

 

(APPLAUSE)

 

HON WAVEL RAMKALAWAN

Mr Speaker sel Manm Onorab ki letan en PS Anbasader Michelle Murray in asiz la Onorab Gill ti regard li e ti kriy avek li e ti dir avek li ‘’Resign !’’

 

APPLAUSE)

 

HON WAVEL RAMKALAWAN

Sa ki ou apel bann latitid negativ !  Se sa ki ou rapel mank respe pou bann endividi.  E mon ti a pe sey ed li, me malerezman i pa’n konpran mwan.

Mr Speaker Onorab Valmont in koz lo FPAC.  Li premye Manm pou koz lo FPAC.  Ou  konnen Mr Speaker mon ti ava swete – mon ti ava swete ki Onorab Valmont ansanm avek Onorab Gill osi tou, mon ti ava kontan si en zour par egzanp nou ti a pe fer en hearing demen, vini vin ekoute e zot ava war ki mannyer dan FPAC Onorab Churchill Gill, Onorab Pillay, Onorab De Commarmond, Onorab Mondon Onorab Ferrari e mwan menm nou pa ‘pil’ lo okenn civil servants!   Sa ki nou fer nou rode nou demann kestyon, letan nou war i annan problenm nou fouy ankor pli fon, me letan nou war ki poudir i annan progre, enn bann keksoz ki nou tou nou fer konman FPAC se pou felisit sa bann dimoun e pou donn zot lankourazman.

E Mr Speaker atraver sa nou’n trouv – nou’n note pandan sa dernyen 3an, ki mannyer in annan en gran progre.  Me non selman sa nou pa zis fer sa.  E se la ankor enn fwa i enportan pou letan ou pe koz lo en Komite – son travay pou ou konnen li osi i fer sa.

E konmansman lannen Mr Speaker, nou ti regard rapor Oditer Zeneral par egzanp ; ti annan en kantite bann defi e bann kantite dimoun ki ti vin devan nou ti eksprim zot bann problenm ek Procurement sete bann problenm ki zot ti koz lo la mon kontan ki Onorab De Commarmond i acknowledge sa.  E ki nou ti fer? Ki nou ti fer ?  Nou ti donn zot konsey lo kwa e lo ki mannyer zot pou fer li.

Par egzanp ler SPDF ti vin devan nou, zot ti pe koz lo Procurement pou zot bato, nou ti dir avek zot pa bezwen esper dernyen minit, pou zot taye e apre pou zot al rod sepa 3quotation ensidswit ; fer li depi pli avan.  Ou konnen ki poudir la i la bann keksoz ki zot bezwen procure. Ou pou bezwen gannyen pou ou kapab pou ou bato kapab kite deza rod bann kotasyon avek 3bann marsan konnen ki poudir la i la mon’n fini fer sa prosedir, pou ki ler ou bezwen la aprezan ou ale e ou’n fini swiv prosedir.

Problenm Mr Speaker se ki, e sa i en keksoz ki nou dan FPAC nou dekouver e ki nou espere pou ki letan Oditer Zeneral i ava prezant nou son rapor, e ler nou ava enterakte avek bann dimoun ankor nou ava war i annan en sanzman, se ki i annan forward thinking.  E se sa ki pou sanze se pa sa ki Onorab Vidot pe dir pe sant en litani – bezwen isi bezwen laba – Onorab Gill pe rod sepa transparans, bezwen konplik tou keksoz.

Non !  Napa nanryen ki konplike. Si ou konnen ki poudir dan ou biro ou pou bezwen kreyon, bolpenn, lareg ek papye, e ki ou bezwen poudir ou bezwen pas dan en procurement process be regard pli devan ki kantite ki ou pou bezwen regard – ou konnen poudir i annan 4 laboutik ki vann stationery, be depi konmansman lannen, kontakte sa bann dimoun regarde ganny en kotasyon, e apre sa ler in ariv ler, tou bann keksoz i annord.

E mwan Mr Speaker mon krwar ki poudir se sa ki problenm.   E letan mon regard Mosyon Onorab William i annan 3 mo ki mwan mon krwar konman forward thinking konman enportan dan son premye – dan son paragraf ki entrodwir son Mosyon mon war sa mo ‘’evantyalite’’.

Evantyalite i vedir en keksoz ki kapab arive.  ‘’Redwir risk’’ i en lot mo redwir risk i vedir ou anpes maler arive, ‘’Avan ler’’ ankor enn fwa i pe koz lo avan ki en sityasyon i arive.   Sa 3 mo pou mwan Mr Speaker i 3 mo kle dan mon lopinyon lo Mosyon Onorab William bokou bann legzanp ki’n konmans donnen dan sa Lasanble, e depi ki nou konmans sa deba i koz lo bann keksoz ki’n arive e souvandfwa i bann keksoz ki’n arive dan ki in annan planifikasyon.

E mon krwar ki ozordi dan nou deba nou bezwen koz lo silvouple annou mazin demen.  Annou pa mazin  zis ozordi sa ki bann Manm Onorab in mansyonnen bann keksoz ki depi 20an, i annan en papye i annan en problenm ki pe arive be 20an i ankor la be zot pa’n fer okenn plan pou regarde ki mannyer pou tackle bann keksoz ki kapab arive?  Mr Speaker mwan personnelman mon fatige tann Pointe Larue mwan.  Seryezman mon fatige tann nonm semen Pointe Larue in flood be mon ti ava kontan demann Onorab Valmont letan semen Pointe Larue in flood eski runway i flood li?

I dir mon non runway pa flood li selman semen Pointe Larue i flood ou bann speed bumps ki lo ou semen i flood li?  Ar i pran bokou plis letan pou li flood se parske li i o ki ou semen.  Be mwan mon pa en rocket ou pou bezwen fer siyans roket pou ou konn sa. Semen Pointe Larue zot vini zot koz ek ou ar i annan zis en landrwa ki i sorti ; i annan en lot landrwa ki i sorti, be si en konparezon zot ti sey fer sa semen pli o?  Si par egzanp zot ti mont sa semen pli o, eski i pa ti pou konmans vin en solisyon.

Si zot fouy son rigol dan en lot fason – elarzi li, regard bann diferan fason, be tousala i apel en plan – en plan ki serye en plan ki normal.  Parfwa ou a krwar isi Sesel, zot kontan maler e apre sa letan maler in pase – parey Onorab Andre dan Anse Aux Pins ti bezwen vin kriy Vis-Prezidan e apre sa ki nou ti war la aprezan zot kontan pas devan televizyon pas lo televizyon trouv Vis- Prezidan avek en  delegasyon parske sa aprezan la Mr Speaker i vin nouvel !

’Vis-Prezidan ozordi in al vizit distrik Anse Aux Pins, kot maler in pase.’’

Ou trouv Mr Labaleine dan son sapo fet ; nou trouv enn de bann dimoun e apre sa letan zot in interview bann dimoun ki nou tande?  Sa bann viktim i dir be sa problenm i annan plis ki 10an nou ape dir zot, be ki zot in fer?  Plis ki 10an sa dimoun pe annan problenm delo pe antre anndan kot li sa lanmar la obor e fer sa remark Mr Speaker partou sa bann landrwa kot nou koz go problenm i annan en keksoz ki an komen lanmar.  Remiz?

Remiz se en lanmar Anse Aux Pins menm zafer sa bout la ki’n pase.  Alor eski parey Onorab Larue in dir eski nou pa asize dir be tyonbo en kou, annou regard sa sityasyon la letan gro lapli.  E apre sa nou ava regarde ki mannyer nou pou tackle sa problenm kwa ki nou santi i vreman bon e letan napa movetan annou elarzi.

Ou war Mr Speaker lontan dan Sesel, ti annan en group dimoun ki ti apel kantonnyen.  Nou ti apel zot bann kantonnyen petet bann ki pli zenn zot pa pou tro konnen sa.  Bann kantonnyen sete bann dimoun ki ti travay ki ti ganny anploye e toulezour zot ti netway lanmar, zot ti balye semen, zot ti debous rigol!  Sa Mr Speaker ti enportan ki zot ti pe fer zot ti pe regard bann evantyalite parey Onorab William in dir avek nou, letan ou debous en rigol ou a pe prepar ou pou evantyalite lapli, pou ki letan delo i ava pase delo i ava ganny en landrwa pou li ale i pa ava bezwen mont anler.

Mr Speaker, be mon ava dir ou en keksoz  –ok nou’n aboli sa bann dimoun, apre sa ti annan bann travayer R20, be sa bann travayer R20 sete en fason modern – en fason pli avanse pou bann kantonnyen. Me apre sa zis sa menm Gouvernman zis zot abandonn sa e aprezan ozordi letan nou regard nou bann distrik ki nou annan?

Nou annan zis bann pti kontrakter ki ganny demande pou koup zerb 1met avek semen e apre sa zot balye zot pase ek zot bann blower zot pe tir salte ensidswit, be Mr Speaker lekel dan nou bann ki annan distrik la bann dimoun ki pe netway rigol?

Bann dimoun ki pe deblok rigol dan zot distrik?  Preski non-existent ozordi letan nou regard bann larivyer, eski nou pa etonnen ler en lapli i tonbe ki kalite salte ki annan dan larivyer ki kalite salte ki i monte?  Be byensir i annan eleman piblik li menm li rezidan ki zet zot salte dan larivyer e apre sa letan i bloke tou dimoun i sot anler!  Be nou bezwen osi tou koz lo en responsabilite e mon ti vreman soke letan mon ti tann en dimoun dan enn bann progranm SBC ki dir, a nou al lo lans nou kit nou salte la, i annan dimoun pou netway nou salte!

Sa se en reaksyon iresponsab ki nou pa kapab aksepte dan nou sosyete.  Mr Speaker parfwa i annan lespri malis e mon ava donn ou en legzanp lespri malis dan Lari Bazar.  Mr Speaker 3mwan pase i annan Mr Jean-Pierre Morin ki pe fer son batiman apre ki zot in ser li isi, ser li laba, finalman zot in larg li.  I a pe fer son batiman.  Planning ti deside ansanm avek Lanvironnman pou ekri li en let pou li mazinen apre ki in fini met son bann scaffolding pou li fer son premye flooring pou met son beton malis, ou konnen ki zot ti fer ?  Zot dir li fodre ou tir sa scaffolding e akoz?

Se parske sa i pou defann nou lev bann pavement pou nou disilt bann pavement. Mr Speaker planning ti vin fer en vizit nou de Onorab Ferrari osi tou nou ti dir nou anvi war.  Ti vin Mr Joseph Francois – ti vin lot laba dan Lanvironnman ti vin tou sa bann dimoun e nou ti montre avan zot vini ti dir regarde ki mannyer sa scaffolding pa pou afekte zot, zot pou kapab fer sa travay pou deblok sa rigol ki’n ganny kouver avek bann-  Mr Speaker 3mwan plitar pa’n annan okenn travay pou tir okenn labou pou netway okenn rigol ! Malis !  Senpleman malis! Zot anvi zis donn sa boug lenfirmite parey nou dir.

E letan nou donn zot tou pozisyon pou montre ki mannyer pou kapab fer sa louvraz zot in ale trankil e zanmen be sa bann keksoz koumsa Mr Speaker ki arete dan sa pei!  Fodre ki i annan plan konkret.

Mr Speaker lontan dimoun ti kapab tir gravye dan larivyer e letan dimoun ti tir gravye dan larivyer zot pa ti pe abiz en larivyer zot ti a pe ed en larivyer.  Ed en larivyer pou li pa bloke.

E i annan bann landrwa,  mon rapel la obor laboutik MC problenm ti annan en gro lapli, problenm!  Kwa ki ti problenm? Gravye dir ek ou kit tou gravye la selman gravye li sa ki enteresan letan nou pas Anse Etoile letan nou debout la nou war kot sa msye ti fer blok ou pa ganny drwa tir gravye dan larivyer selman sa gravye i ariv dan delo sale la aprezan ou ganny drwa ale dan en bato anmas sa gravye.

I gravye menm, me nou pa war ki mannyer bann keksoz annou sey fer bann plan ki rezonnab, pou nou regarde ki mannyer sa bann larivyer – E mon  demann mwan Mr Speaker, eski ozordi i annan en Lotorite ki eski i annan en Lotorite ki egzamin bann larivyer, pou regarde si en larivyer i napa bann lobstak ki kapab fer bann problenm?

Mwan se sa bann keksoz ki mon pe rode.  Se sa ki mon war dan Mosyon Onorab William i a pe dir distribye resours ,pou ki i ava kapab annan en dimoun la dizon dan en distrik dizon distrik Cascade, sa dimoun i ava kapab ok i ava annan resours la be nou konnen ki poudir i annan de larivyer oubyen 3gran larivyer ki kapab fer problenm enkli larivyer Cascade ki lot zour in deborde al regarde pou sa boug monte ziska son sours larivyer, pou regarde ki problenm pou ki i redwir risk letan lapli i tonbe tou keksoz i deroule.

Parske nou tou nou fer sa Mr Speaker nou lakaz eski dan nou lakaz, nou pa regarde ennler pa nou mont lo twa pou nou regarde si dalo i bloke? Akoz nou fer  sa?  Pou nou netway dalo se parske nou konnen si dalo i bloke letan lapli pou tonbe nou pou dan problenm akoz delo pou antre delo i kapab atraver bann lafason ki i bloke i kapab deranz nou konfor.  Alor tousala se bann pti keksoz Mr Speaker.

E mwan mon krwar ki ozordi i enportan atraver sa Mosyon, pou nou regarde lekel sa bann Lotorite ki pe vreman pran sa letan pou zot regard sa bann danze, tir gravye, kot fodre tir gravye, elarzi bann larivyer kot fodre elarzi, met bann ros dan sa larivyer ki pou permet li par soz son banks ensidswit.  E an menm tan osi fer Seselwa pran son responsabilite, pou li fer sir ki son lanvironnman i reste prop.

E Mr Speaker i vre letan nou koz lo bann brigad ensidswit nou konnen ki poudir sa bann dimoun, parfwa ler i annan bann movetan, e Anse Aux Pins mon ti war zot sa parske letan ti annan Anse Aux Pins, ti rod bann dimoun dan brigad ki ti sorti en pe partou, zot ti al laba zot ti donn en koudmen ensidswit.

Me selman parey en Manm in propoze, annou sey regarde ki mannyer nou kapab ganny bann dimoun bokou pli serye !  Annou osi sey regarde ki mannyer dan distrik, mon krwar ki si i annan pli bon lorganizasyon, i ava kapab annan bann Manm sa kominote, ki annan serten fasilite ; bann Manm kominote ki annan serten konesans. Parey mon pe dir ou bann dimoun in mansyonnen ki ava kapab vin ansanm letan i annan bann problenm.

Alor Mr Speaker  mwan mon krwar ki in ler pou nou shift – pou nou annan en shift from letan i annan en dezas, pou nou zis kontan vin lo televizyon.  Akoz la Prezidan pe vizit tel landrwa apre dezas e i dan son raincoat lot televizyon pe swiv, me pou nou plito bouze pou sorti dan en pei ki reaktif pou vin dan en pei ki proaktif! Pou ki letan lapli i tonbe letan i annan gro lapli i annan gro dezas ; semen Pointe Larue i ava annord loto pa bezwen drive 2kilomet a ler, akoz son oter i bon e i ava pe ale.

I ava annan sa eleman kot letan lapli i tonbe kot nou ti ava prefere war bann zofisye pe vin lo televizyon – wi nou bann plan in marse malgre ki in annan sepa 17pous lapli ki’n in tonbe, me tou keksoz in mars byen nou pa’n annan okenn aksidan nou pa’n annan 1, 2, 3, 4 problenm.

E ankor enn fwa mon kontan letan zot ti met sa bann pti mark from Erport ziska Anse Aux Pins, rapel sa bann pti pilye ki zot ti mete obor – ti annan bann pti pilye avek rouz ek blan lalimyer konmsi ki ou lalimyer i tap lo la i reflekte, e zot ti dir pangar letan i annan inondasyon konmsi ou ava konnen kot rigol i été.

Mr Speaker mon ti a kontan konnen konbyen sa proze ti koute?  E ozordi konbyen sa bann pilye ki la?  E letan – ou  war ankor enn fwa e letan sa bann pilye loto in tap avek, zot in tonm la ater zot be i annan en dimoun ki’n pase ki’n dir be sa bann pilye in tonbe la, annou remet li debout.  En pe parey letan ou pas la devan School Meal Center zot ti met tou sa bann ki en pe pli long la an plastik.

Be la ozordi zot ti sa oter ler zot ti konmanse ozordi zot lo dernyen bout e i annan serten ki’n fini ale, be eski i annan – si zot ti krwar ki poudir sa i en bon lide, be letan enn i kase en loto i pase i tap avek, be apre sa ou vini ou ranplas li – ou sanz li.  Me letan ou pa fer savedir i pa ti vreman enportan.

Mr Speaker mon dernyen pwen ki mon anvi fer se letan mon pe koz lo bann fon ki annan pou climate change bann climate change mitigation measures ki Onorab Pillay tou in mansyonnen mon krwar ki se dan sa direksyon ki nou devret annou rode apre sa annou pran aksyon.

Let us be proactive ! E mon ti a krwar ki poudir Gouvernman ti ava pran sa konman enn son priyorite.  Letan nou pe koz avek bann pei parske climate change e tou sa bann i bann size ki konsern tou dimoun.  Alors annou al dan sa direksyon, pou ki aprezan sa larzan i ava la available pou bann distrik, e bann lo nivo rezyonal, pou nou kapab bouz devan.

Avek sa de parol Mr Speaker mon pou siport Mosyon Onorab Waven William, selman mon pa kapab terminen san sound  a note of warning parey nou dir an Angle.

Sorry Onorab Valmont me ozordi mon krwar i annan serten keksoz ki ou’n dir ki mon pa konnen si ou’n reflesir avan.  Ou’n dir letan ou dir be i normal pou en pyos ale pou en lapel ale konmsi i normal ou’n dir i normal konmsi, i ok ou ekspekte sa.  Be letan ou’n dir li dan en fason pozitiv, i pa byen !  Parske zisteman enn bann pwen ki Onorab Lemiel ti fer yer Onorab Lemiel ti prezant sa konman en konsern en realite.  Letan ou dir sa la ou fer mon mazin nou bann gran paran ki ti dir si ou zanfan i vol en dizef, fodre ou koriz li akoz i pou vol en bef apre !

Si ou dir in vol en lapel disparet en pyos disparet i ok ou pou ariv sa pwen kot ou pou dir $50milyon disparet’’ ar be $50milyon disparet be i ok !’’ Konmsi ou espekte sa bann zafer.  Fodre ki nou tenir lo la nou met disiplin e se pou sa rezon ki mon konman Chairperson FPAC avek tou bann Manm ki lo FPAC, nou sey fer travay ki drwat ; nou sey fer travay ki pou fer sir ki sak sou ki en tax payer i kontribye dan fon Gouvernman i ganny byen servi.  Mersi bokou Mr Speaker.

 

(APPLAUSE)

 

MR SPEAKER

Mersi Onorab Ramkalawan.  Ok letan pa dan nou faver.  Non, non mon ava donn laparol mon konnen ou pe vin lo sa size Onorab Valmont mon a donn li laparol.  Yes Onorab Valmont klarifikasyon.

 

HON JUDE VALMONT

Mersi Mr Speaker.  Zis en pwen klarifikasyon pou met lo rikord mon pa’n dir ler i perdi mon dir selman i arive ki serten i perdi ler mon dir perdi pou eksplik mon lekor, se ki petet dan pe fer sa bann louvraz i annan ki kase ; i annan ki sa apre i pa ganny ranplase se tou.  Mersi.

 

MR SPEAKER

Mersi Onorab Valmont mersi.  Mon a donn laparol Onorab – wi ale Onorab Simon Gill.  Ale go ahead.

 

HON SIMON GILL

Mr Speaker mersi bokou.  Anba 35 (3) zis en bref atraver ou poudir avek Onorab Ramkalawan, zanmen mon pou pil lo okenn dimoun dan servis piblik.  E si i annan dimoun ki’n fer sa se zisteman i lo kote LDS!  Mersi bokou.

 

(Interruption)

 

MR SPEAKER

Mersi mon a donn – Order! Order! Mon a donn laparol Onorab De Commarmond.

 

HON CHARLES DE COMMARMOND

Mersi Mr Speaker.  Bonn apre midi Mr Speaker.  Bonn apre midi tou Manm e tou dimoun ki a lekout Mr Speaker lo sa Mosyon bokou in ganny dir mon pou bref e kourt.  E zis dan mon Mosyon, en Mosyon ki mon ler mon regard li, mon war poudir i dir nou en keksoz se ki lefe sanzman klima i vre i et.  E ki nou bezwen nou tou, tou dimoun konsernen bann lenstitisyon tou bann lenstans revwar lafason ki nou pe reflesir ki nou pe think, vizavi sanzman klima.

E nou bezwen e Mosyon pe dir revwar lafason ki nou distribye bann resours ; revwar lafason ki nou pe mitigate redwir bann risk savedir kestyon prevansyon e nou devret osi anmenn aksyon pli vit.

Savedir Mr Speaker i kler ki nou lapros ki vizavi lafason ki nou manage lafason ki nou administre bann lefe sanzman klima, i bezwen nouvo. I bezwen en fason pli nouvo pli reel e en fason ki tou dimoun i bezwen pe sanz son fason panse.

Savedir Mr Speaker i bezwen en bann aksyon ki demann nou tou – ankor enn fwa mon dir, regard lafason ki nou par egzanp fasilit e senplifye bann prosedir ler bann problenm i arive.  E sa Mosyon i pa pe koz zis bann problenm dan distrik li. Konmsi ler mon pe dir dan distrik bann problenm zis Administrasyon Distrik ki bezwen deal avek.  Mon krwar i debord sa me selman wi tou bann problenm i arive dan en lokalite.

E la annou profite osi pou felisit bann e remersi bann ki deza pe fer en kantite.  Mwan mon salye bann DA bann DA i fer en kantite keksoz ki parfwa nou take it for granted, me DA ek son tim sa bann dimoun dan brigad e tou, e tou bann lezot lenstans ki annan.  Menm mon poudir dan Fire Brigade bann zans kot PUC, Larme kot zot sey donn en koudmen pou nou kapab anpes e rezourd sa bann problenm ler i arive.

Be Mr Speaker an menm tan nou pe dir ler nou pe revwar nou fason azir vizavi sa bann problenm, nou, nou pe dir ki i annan serten Minister ki bezwen sakouy li.  I annan serten Minister  ki bezwen pran pli byen zot responsabilite. I bezwen pe travay pli gro e pli byen avek distrik.  E la  mwan mon i annan trwa Minister mon pou mansyonn zot non la, i annan Minister Finans Minister Lanvironnman ek Local Government; pou mwan zot direkteman link avek sa bann issues ek sa bann problenm letan in arive.  E souvandfwa ou war sa bann problenm in arive akoz i annan enn ant zot, ki pe may kanmarad ouswa ki pa pe pran zot responsabilite korekteman.  Swa sa dimoun i en travay ki’n ganny fer kot peyman pa ganny fer ditou, or i tarde ziska leternite, oubyen ki nou pa pe pran lapros korekteman.

Mon a donn zot en legzanp konkret in pran mwan en bann letan pou kapab met dan lespri bann dimoun kot Lanvironnman, poudir sa larivyer Cascade son lagel la, son river mouth i bezwen ganny disilt! Ou konnen konbyen lannen in pran pou met dan zot lespri poudir sa i en travay ki bezwen ganny fer?

La dernyen kou zot in fer avek martir, be i byen in fer mwan dir zot mersi.  Be i annan lot keksoz ki pou arive nou konble.  Fantastik! Nou’n fer bann konblaz prezan nou annan bann lagon.  Sa bann lagon ek sa bann pti diferan stream ki annan diferan pti larivyer, i anmenn tou sa bann silt ladan, i pou monte! Deza i annan serten landrwa i kre bann pti zil ensidswit,  be i pou monte! Be letan i monte ki pou arive?  Pa nou pe rod flooding?   Be prezan ler ou annan dimoun –  i annan dimoun ki pare pou vin donn koudmen.  Be dan lespri serten dimoun, i difisil pou zot konpran e korpere ek dimoun e travay ansanm ek bann dimoun ki kapab donn en koudmen, rod en fason pou nou kapab war ki mannyer nou kapab manage.  Pou mwan i kestyon manage sa bann landrwa ler ou pe disilt.  E sa bann keksoz letan ou tire dan sa bann lagon, i annan son lefe li.  Ou kapab anvoy sa kot lagrikiltir, lagrikiltir i annan son fason ki travay ek sa bann keksoz la.

So i annan sanzman mantalite – mindset la  i bezwen sanze vizavi sa bann problenm ki nou pe rankontre.  E pou mon, mon krwar nou bezwen pas a aksyon e nou Lasanble in annan en rol pou zwe ladan pou siport mover Mosyon e pou siport nou bann distrik.

E  mwan mon kontan ki nou pe koz lo la, akoz mwan mon enn ki’n koz lo sa bann problenm, lo sa bann issues, lo kestyon empowerment of district en kantite fwa dan nou Lasanble.  E sak fwa mon’n ganny sans koze mon’n dir e mon kontinyen dir.

E la mon pe met en keksoz konkret Mr Speaker mon kontan lot zour letan nou annan en enteraksyon avek Minister Local Government zot in omwen revwar bann package bann DA ; pou kapab donn DA en fason lankourazman pou zot deliver pli byen.   Me la nou bezwen pa kapab donn sa bann dan brigad R500 1an ?   That is wrong ! E nou,  nou bezwen veye dan Bidze ki vini devan nou, poudir si zot kontinyen fer sa, nou pa siport sa Bidze.  Sa Bidze pou Local Government ki pou al ladan, si pou donn R500 brigad, nou, nou bezwen dir non.  Nou bezwen nou met nou lipye ater!  La nou pe anvoy deza en mesaz pou ki Local Government i revwar.  I donn omwen bann brigad laba R3mil par an, ki en R500 i vin par mwan, pou ki prezan fer training pou bann brigad, empower zot plis pou zot kapab deliver pli byen.

Sa i ava vin en lankourazman a mon avi pou zot kapab e i ava ankouraz lezot dimoun pou vini, pou kapab donn koudmen plis.  Sa en sizesyon ki mon mete mon krwar i ti devret ganny fer dan sa fason.  E annou pouse pou ki sa i kapab vin en realite, pou sa bann dimoun ki travay en kantite, ler sirtou i ariv bann problenm ouswa pou anpes problenm arive e fatig nou bann dimoun dan distrik.

2enm keksoz se ki sa bann kestyon Bidze ki nou pe koze, i annan diferan vole sa.  I  annan Bidze ki li i pou kapab tonm avek distrik direkteman.   E la nou, nou bezwen reflesir dan sa detrwa letan, ki vini pou nou kapab met konpletman devan Local Government, avek Minister Lanvironnman, e nou, nou bezwen fer prezan Minister Finans konpran poudir sa i bezwen ganny fer pou li kapab siport sa Bidze, pou ki i annan serten keksoz ki larzan i bezwen al direk dan kont Bidze distrik.  Pou ki distrik i kapab al vitman pou li kapab deal avek sa.

Prezan li Local Government ouswa sa lot Minister, i fer son oversight  – i fer son oversight.  Si i annan problenm i Oditer Zeneral i pou war li.  I a vin kot nou laba kot FPAC.  E FPAC i pa telman sa bebet ki nou le krwar.  FPAC parfwa i souvandfwa i travay an kolaborasyon serten ek bann dimoun ki vin devan li.

Nou, nou’n felisit plizyer civil servant osi, ki pe fer byen nou dir keep it up sa i en legzanp – share sa legzanp avek lezot.  La mon met en challenge lo Minister Finans, akoz li souvandfwa i la, ki sa  i en Minister ki li i take up sa bann rekomandasyon ki nou fer.  E nou pe demann li pou li action plis.

Share sa bann success stories avek lezot landrwa dan Gouvernman, pou ki Gouvernman i vin pli efektiv pli efikas. E prezan nou pa a met blanm lo Prezidan Faure !  Sa bann landrwa i a pran zot responsabilite sa ki nou pe demande osi.

E an menm tan Mr Speaker, Minister Finans li i bezwen osi donn sa sipor finansyel.  Par egzanp i annan serten Bidze ki mon dir, sa i al direk kot distrik me i annan lot ki pli gro li i ava al kot sa bann Minister.

E kot Minister i bezwen fer rapor avek bann problenm ki annan dan distrik i pa kapab Minister li i desid li menm li dan son fason, pou li ki i krwar poudir la kot problenm i été.  I bezwen annan en kolaborasyon ki ganny fer, pou war kwa ki matter pou sa distrik, pou sa kominote, pou sa landrwa.  E mon krwar la i annan en mankman e ki bezwen ganny cemented. I bezwen ganny improve sa relasyon, pou kapab war ki nou ler nou pe deal avek problenm, sa bann problenm i pli reel e i matter.  Ki si i afekte sa kominote sa kominote i a santi poudir ler i pe rezourd i pe benefisye.

Mon pa pou al lo bann problenm dimoun ki’n ganny bann issues dan bann dezas parey Felleng ensidswit.  Nou tou distrik mon krwar i annan bann scar lo sa bann zafer.  Pou le moman mon pa pou tous sa.  Me selman korekteman.  Alor mon krwar ki nou Lasanble li i annan sa rol pou li zwe poudir al revwar sa bann Bidze e ler Bidze i vin devan nou, nou ki vot sa Bidze.  

        So annou be mindful lo sa ki nou pe koze.  La ozordi byensir Mr Speaker ou pou anvoy konteni sa Mosyon kot Gouvernman, e nou, nou pe demann Gouvernman take serious note of content sa ki nou pou anvoy kot li.  E nou pa pe fors li fer keksoz, selman nou pe sizere ki i annan keksoz pozitiv dan sa Mosyon, ki devan nou  ki nou pe dir li pran konsiderasyon e seryezman met bann egzekisyon dan Bidze.  Pou ki sa bann Bidze pa kapab DRDM sepa lekel i disaster soz la li i vini zis i gete sa i fodre aranze be lekel pou aranze?

I bezwen annan en fason konkret reel pou nou tackle.  Si zis pou vini pou dir nou sa i danzere sa fodre tire be apre i annan ki son prevention.   Mwan mon salye par egzanp distrik Cascade, nou pa pe ganny bokou ozordi sa bann problenm, akoz nou annan en plan prevention.  Depi ler mon DA District Council plito – e pandan sa letan ki mon la osi la konman MNA, mon believe dan prevention.  E nou’n fer bann plan bann travay pou anpes bann problenm arive.  In marse be selman i al dousman akoz nou ti kapab al pli vit.

Zisteman sa Mosyon si i ganny enplimante ler nou pe dir ki pou al pli vit.  E i ava al pli vit pou tou distrik, pou nou anpes en kantite keksoz arive ou pa i war sa ros kot i tonbe, be si nou kas li avan ler, ouswa ou bar li avan ler konmsi pou anpes li tonbe pa ou’n depans mwens?  Ler i tonbe be konmela ou konnen ki arive ennler ou le priye poudir be les li akoz ou pe tarde pou rezourd li, les li tonbe, les dimoun – ou priye ki dimoun pa mor.  Akoz ou konnen letan i vini i kraz tou la, taler tou dimoun i taye pou aranze.  Be ou pa kapab ale ek sa mantalite koumsa –  sa lespri koumsa.  Ou konpran?

Me si nou ti kapab konpran poudir ler dan distrik nou pe koze, nou pe kriye poudir look la i annan en danze, annou met zepol ansanm pou nou eparnye, pou nou prevent dega ki pou arive.  So nou’n kapab rezourd en kantite keksoz e at a lesser cost – ou konpran?  Pa bezwen depans tou sa bann keksoz.  So i annan fason fer e en kantite sizesyon in ganny met devan lo kestyon bann Bidze ; lo sa kestyon sanzman klimatik e i annan bann fon enternasyonal la.

So annou servi sa bann fon pa kit zis avek bann Minister share li avek bann distrik parmi bann proze.  Alor e tou distrik i devret pe kapab benefisye avek sa bann fon parey.  Alor vwala Mr Speaker mon krwar dan sa ki mon pe sey sizere.  E mon krwar mwan sa kestyon Bidze i enportan e nou bezwen nou zwe nou bout rol nou osi dan Lasanble pou fer sir ki dan letan Bidze i vin devan nou, nou pe pey sa bann keksoz pou fer sir si serten keksoz pa pe arive nou poudir tyonbo en kou al revwar sa Bidze la pou fer sa ki nou ti pe dir ki nou krwar i enportan e i matter arive.

E avek sa mon pou donn mon sipor sa Mosyon e nou demande ki Lotorite konsernen i donn nou koudmen dan sa sityasyon e get sa bann pwen ki nou pe avans devan.  Mersi.

 

MR SPEAKER

Mersi Onorab De Commarmond.  Bon avan mon donn laparol Loter Mosyon pou fer son konklizyon mon anvi zis dir de pti mo an menm tan nou de pti mo lo kote konman Speaker apre mon ava al konman MNA distrik.

Konman Speaker mon en pti pe enkyet akoz mon ti anvi al share avek bann pei Manm SADC PF en pti pe nou plan, nou preparedness nou Disaster Risk Management Plan.  Akoz pandan 45enm plenyer ki pou fer an juillet, zot in deza anvoy bann Manm Lasanble Nasyonal sa demann pou nou soumet Mosyon e Climate Change preparasyon i enn ladan, ki zot pe rod ekspertiz  -sirtou avek bann Pti Leta Zil.  E sa zot pe koz lo Sesel avek Maurice.

E mon’n ti deza konmans fer serten preparasyon.  Be ler mon pe ekout sa deba, mon pe zis wonder si mon annan keksoz ki mon kapab al share avek sa bann pei.  Sirtou la sa ki Mozanbik in pas ladan e zot pe santi prezan la realite sanzman klima.  Me selman mon pa dekouraze.

Nou pe sey regarde ansanm pou si pou sid nou kapab anmenn en Mosyon petet pa pou nou share nou plan, akoz mon krwar nou bezwen retourn ankor lo drawing board parey i annan enn de Onorab in dir, annou meet tou bann stakeholders pou nou kapab annan en proper national plan, pou nou redwir risk e osi pou nou prepare pou bann dezas risk.

Petet atraver sa Mosyon si nou anmenn sa Mosyon menm laba, i ava ede pou nou kapab partaz en pti pe bann eksperyans ki nou pas ladan.  E petet SADC PF li menm li i ava come up avek en plan, parey nou pe war bann diferan Komite pe travay lo bann model laws pou bann diferan sityasyon.

 

HON NICHOLAS PREA

Lo kote mon vin lo kote distrik konman MNA pou distrik ler nou pe koz redwir risk, enn bann keksoz ki mon war par egzanp ler ou pe al Bel Ombre pe al Beau Vallon pe al Glacis ou war danze ki la, parey bann Onorab in fer resorti – bann evantyalite ki pou arive.  Me eski zis nou Onorab ki pas dan sa semen?  Bann zofisye diferan Departman pa pase dan sa semen pa war?

Ozordi en pye albizia i sa groser dan 2an, 3an in vin gro koumsa in fini poz en risk eski ler i sa groser nou pa pase nou pa koupe?  Lo larout pou al Grand Anse Mahe Sanmdi mon fer sa larout dan gro lapli e zis anba STA kot ti annan gro deboulir later kot pye albizia ti tonbe, zot pa’n fer plan rebwazman pou met bann plan – parey bann latannyen, bann palm, ki tenir son rasin ek son fey osi i ede pou tenir later e volim delo ki tonm lo later.

Me mon war pye albizia ki’n remonte ankor pti e ozordi in ariv masiv e pou annan en dezas ankor ki pou arive si nou pa fer prevansyon. Dan gran kontour kot semen in elarzi La Misere, ok dan gran kontour ler sa bout later in ganny netwaye pou fer sa travay, ki nou’n war la i annan apepre en 100enn pti pye albizia ki pe monte e pe profite.  Dan ankor 1an 2an si nou pa deal avek nou, pou bezwen ferm semen televizyon SBC pou vin filme kot nou pe koup dibwa nou tir danze.

E la mon fer lapel mon pa konnen lekel ki responsab deryer klinik Beau Vallon ki trouve dan distrik Bel Ombre, zis lo lateras deryer klinik, en zoli batiman ki’n kout milyon i annan.  Mon pa konnen si en 10enn pye albizia ki pe poz danze pou sa klinik.  Li  osi tou son bann fey i ede pou ranpli dalo e koz lezot problenm maintenance avek sa.

So alor annou fer bann prevansyon ki demen i pa kout nou ser.  Nou’n koz lo empowerment DA taler mon ganny mwan DA ki’n copy mwan en keksoz ki pe fer swivi e deswit en zofisye dan Gouvernman in fini reponn li, i dir li sa pa’n pas devan mwan!  Pa mon zafer sa, mon ava pas ek en lot!

‘’Pass in the buck’’ nou dir sa. Nou koze dan nou entervansyon nou bezwen pran nou responsabilite. Si in vin tonm dan ou Departman devan ou, ou’n bezwen annan en keksoz pou fer avek ou ; bezwen donn en swivi donn en repons pou sa DA, ou sa MNA kapab al kot sa dimoun ki’n dir e donn li en repons ki i ava kontan pou li tande.

En dezas i arive annou antre DA i fer odit DA/MNA mon pas dan plizyer ka Bel Ombre kot nou fer sa premye odit, nou ale nou tir en portre e nou donn en lide apepre menm konbyen i kapab koute nou anvoye nou rapor, nou sityasyon ki’n arive depi Zanvye, ros ki’n deboule semen Honorer anler, bann Lazans Dezas in vini in regarde zanmen zot in ariv anler pou regarde si sa i annan ankor ros.

Sa pti madanm ki son lakaz in ganny afekte in bezwen evakye son lakaz, i pe reste kot son manman. I  pa ankor kapab tourn kot sa lakaz.  E nou pe koz nou Me, la 5mwan plitar.  Mon’n koze bomaten miray ki’n grennen Beau Belle an Zanvye, mon’n fer le neseser ansanm avek mon DA, nou’n vizite, nou’n tir portre, nou’n fer rapor.  Sa madanm toulezour tou le semenn i call mon oubyen i anvoy mon en pti teks ‘‘MNA ki pe arive dan mon sityasyon?’’.

So i annan en kantite keksoz ki mon krwar nou kapab fer lo sa zafer redwir risk, koup bann pye dibwa danzere apre Leta Lanasyon mon ti koz avek PS pou DRDM Mr Labaleine, i ti dir mwan in war sa.  In fer.  In soumet en keksoz avek Minister Finans in demann lavaler R5milyon pou tir bann pye dibwa danzere lo Mahe/Praslin ek La Digue.  E apre i ava fasil pou zot mentenir.  Nou Me Leta Lanasyon ti fer depi Fevriye nou Me e Mr Labaleine DRDM pa ankor kapab gannyen sa larzan, ankor pou fer prevansyon pou redwir risk.

Vwala en pti pe kwa ki mon ti anvi partaz avek zot mwan osi lo mon kote.

 

 

MR SPEAKER

E avek sa mon ava donn laparol Loter Mosyon Onorab Waven William pou li fer son konklizyon.  Onorab.

 

HON WAVEN WILLIAM

Mersi Mr Speaker.  Mr Speaker tou dabor mon ti a kontan remersi e felisit tou bann Manm tou lede kote latab ki’n pran laparol pou entervenir lo sa Mosyon.  E mon krwar lefe ki nou pran en zour edmi, pou nou diskit lo sa Mosyon mon krwar i demontre ki degre lenportans ki Lasanble Nasyonal konman en lenstitisyon, i atase avek sa size ki sa Mosyon pe koz lo la.

Mr Speaker i annan en bon pe bann sizesyon, e kontribisyon pozitiv ki’n ganny sorti.  E mon ti a kontan lans en lapel ki bann zofisye dan sekter piblik zot pa ava santi ki Manm Lasanble, zot entervansyon in atak zot direkteman, me letan ou pe koze avek lemosyon – avek bann realite reel ki konman en Manm Elekte ou pe fer fas avek, pou bann ki’n la en bon pe letan pou bann ki’n fek ganny elekte, nou bezwen koz dan sa fason Mr Speaker.

Mr Speaker mon a konmanse par dir, ki yer an mezir ki Mosyon ti pe ganny diskite ti en moman kot letan lapli kantite dan en moman kourt in inond serten parti kwen Mahe e osi Praslin La Digue mon panse koze e koz bokou dega.

In ankor montre nou ki fason nou sistenm e striktir an plas i merit ganny revwar, e evalye lo en baz kontinyel pou deal ek bann ka dirzans.  Mr Speaker mon ti osi al lo teren pou evalye lenpak sa letan dan Grand Anse Mahe, pou war ki menm keksoz ki Lotorite Distrik.  E mwan dan sa Lasanble mon souvan koz lo la pou demann en sanzman dan fason fer o nivo lokal dan distrik.

Mr Speaker sa bann problenm i akoz mank swivi par plizyer Lazans Gouvernman mank proaktivite Gouvernman Kominoter mank resours neseser, e sa pouvwar pou pran desizyon vit ki ozordi Lotorite Distrik bezwen pas atraver mayon apre mayon, en lasenn administrasyon ki pa merit leka Mr Speaker – dan serten sirkonstans irzans.

Sa ki nou fer routin se bokou vizit anvoy rapor e i pran en leternite pou ganny repons – en repons fatige e tou sort leskiz Mr Speaker.  Mon lot pwen Mr Speaker se sa bann serten zofisye Gouvernman, se sa mindset e mantalite ki zot vin avek dan distrik, letan i annan sa bann problenm.

Mr Speaker letan sa zabitan ouswa Lotorite Distrik pe donn serten solisyon ki fonde lo zot leksperyans reste dan sa distrik, e konman viktim zot pa ekoute ouswa konpran vre problenm.  E zot vin ek bann propozisyon ki fer ou demande si vreman zot as a fasilitater pou adres problenm, ouswa zot pe vin anmenn plis konplikasyon pou nou Mr Speaker?  En legzanp tipik se kot sit Pti Barbarons kot Minister pou lakaz, in swazir pou li fer sa ranplasman pou bann Lakaz Irzans, Mr Speaker ozordi lefe ki i annan mank konsiltasyon ; lefe ki bann drenaz apropriye dan land bank pa’n fer byen, e la en lot pti vilaz in ganny azoute, nou war lenpak lakantite volim delo ki desann ki al inond bann rezidan pli ba.

Mr Speaker pa fini, zis pou montre en pti pe sa kalite mindset Lendi mon’n al vizit avek en zofisye kot Land Transport kot i annan pou fer avek road safety.  Dan miting piblik zabitan in dir ki enn nou ganny bokou aksidan dan sa rezyon Barbarons depi kot bis vire ziska kot sa laboutik Endyen. Mr Speaker in annan 2 ka lanmor.  E semenn pase letan mon ti pe demann kestyon Minis Charlette, son aswar en madanm in bezwen sot dan lanmar, zis pou evit en aksidan e petet i ti kapab mor.

Mr Speaker be sa zofisye nou’n monte mwan ek DA, mon dir li be msye ki nou bezwen nou se ‘‘2 ou 3speed bump.  Nou pa bezwen 3 montanny bernika nou, nou bezwen 2 ou 3 pti speed bump’’.  Mr Speaker mon ti reste etonnen pou 25minit pou mwan sey konvenk sa msye poudir be nou problenm la se tro bokou vites e sa speed bump pou redwir speed motoris e petet bann aksidan!

Mr Speaker i dir mwan sa se en dernyen solisyon.  Me selman mon dir li, eski fodre mon al met ankor en keksoz dan Lasanble?  Mr Speaker si mon montre ou en pti pe kalite mindset ki serten bann zofisye zot vin avek dan distrik.  Pa fini Mr Speaker zot in met de bus stop nouvo kot sa vilaz la.  Vilaz Orchid Mr Speaker la enn sezour i pou kapab ariv en gro aksidan fatal!  Ou konnen ki dir mwan?  I dir mwan be lekel ki’n otoriz met sa 2 bus stop la?  Selman i travay dan sa Departman li.  Mon dir be nou dir, be bis pa ti kapab antre i annan landrwa vire desann pa tro lwen la?

Mr Speaker  mwan mon zis pa ganny en konpran!  Mr Speaker dan miting piblik zabitan i propoz bokou solisyon, e mon konnen baze lo leksperyans i annan bokou solisyon ki zabitan distrik i kapab met devan pou rezourd bann problenm.

Mr Speaker parfwa ou sey rod bann miting avek Minis, be zot anvoy ou demen tanto.  Dan sa bann moman ki ou pe rod sa miting i annan bann size irzans, be la ankor ou a trenn lipye pou ou ganny en miting, ki finalman letan i annan gro problenm zot vin rod ou Mr Speaker.  Me selman ler ou ti pe rod zot poudir regarde i annan problenm pe vini la Mr Speaker, me ou pa ganny zot.

Mr Speaker menm zafer dan sa rezyon, se ki travay in ganny fer pou debous lanmar, i annan en gran dren ki’n ganny fer e nou de DA nou dir be regarde akoz ki Departman konsernen pa anvoy detrwa dimoun zis pou deblok sa pasaz delo, pou li pa bloke net ki delo i kapab sirkile? Me ozordi ki nou war se ki i bloke delo pa sirkile e la i kre inondasyon.

Mr Speaker letan mon ti pe retournen pou mwan vin debout dan eleksyon, mon soke pou aprann ki Manm brigad i ankor pe tous zis R500 par an – ki fer R42 par mwan Mr Speaker!  Mr Speaker mon menm koz ek Minis konsernen ek zofisye senior pou revwar sa.  Mon ti ganny dir ki en revizyon pou ganny fer e ki wi sa R500 pou ganny met ladan e ki distrik pou reganny en alokasyon dan Bidze 2018.  Granmoun i dir Mr Speaker ‘’Yes tande me pa pe ganny en konpran!’’ Sa vre nesesite pou larg lanmen distrik Mr Speaker.

Be la Mr Speaker ler nou dir, ‘’Enough is enough’’ R500 avek en sertifika lafen lannen, i pa ase i pa ase Mr Speaker.  E si ou permet mon Mr Speaker la mon annan devan mon en lagreman ki sak sa bann Manm brigad zot sinyen e angaz zot pou vin lo sa brigad emergency dan distrik.

Mr Speaker la i dir ki zot pou ganny tou sipor, zot pou ganny training, zot bann propozisyon pou ganny get ladan. Mr Speaker mon pe demande ki kantite get ladan ki zot pa trouve ?  Ki ozordi zot ankor pe ganny R500!  E bann training e bann sipor neseser laba zot sipoze gannyen zot pe ankor pe espere.  E mon ganny dir ki miting i ganny fer tou le an e demann i ganny anvoye !  Be mon pa konnen si sa bann demann la i ganny met lo en file – lo en shelf par la.

Mr Speaker be pou mwan sa pa akseptab akoz letan mon get sa bout kot sa Manm brigad li sa ki li i bezwen onore ladan Mr Speaker, mon pou dir poudir  i pa akseptab.  E napa motivasyon pou bann zenn pou pran larelev akoz sa ki zot pe gannyen Mr Speaker sa lankourazman i pa ase.

E mon pe demann avek Minister konsernen si ou pa kapab donn zot larzan an plis be akoz pa donn zot en special pass, zot kapab al kot STC ganny serten poursantaz konmisyon par mwan ouswa en special pass bis?  I annan bann Manm ki’n propoz bann lezot lide Mr Speaker, be bann ki’n fer plis 5an/10an akoz petet Prezidan Larepiblik pa rankontre zot e donn zot serten rekonpans akoz ozordi parey in ganny dir ou pa pou ganny zenn pou sa kalite incentive ki zot pe gannyen!

Mr Speaker mon anvi kontinyen par dir ki mon ti vini pou vin fer en diferans Mr Speaker.  Mon pe koz parey mon pe koze pa akoz mon kont Prezidan Faure e son administrasyon.   Non!  Mon pe pran serten pozisyon isi dan sa Lasanble, ouswa kot i konsernen pou pouse pou anmenn sa diferans Mr Speaker.  Pa akoz  mwan mon krwar mon pli konnen ouswa akoz mon pa trouv repons e solisyon.

Mon pe desarz sa responsabilite ki pep Grand Anse Mahe in donn mwan ! Mr Speaker mon pa dan biznes les bato marse mwan!  Si bato pe al lo brizan nou bezwen dir be tyonbo en kou annou sanz direksyon!

 

(APPLAUSE)

 

HON WAVEN WILLIAM

Mr Speaker lafason mon pe koze i fer mon pa pe santi ki mon pe kraz sa lanmen, ki’n fer mwan dibyen Mr Speaker ! Ouswa pe batonn nou Gouvernman.  Non  Mr Speaker! Mon pe senpleman dir ek lanmen ki letan i mal menm si ou’n fer dibyen mon pe dir ou ki fodre aranze, ki fodre sanze, si non pep pou sanz sa lanmen Mr Speaker!

 

(APPLAUSE)

 

HON WAVEN WILLIAM

Mr Speaker si zot ekout zis mon tonasyon, me pa ekout sa realite ki mon pe avanse devan, dan lentere Nasyonal e distrik, mon pa pe dir ki naryen pa’n ganny fer nou leokri se pou sa ta lannen leksperyans, nou kapab fer pli byen e amelyor lo sa ki nou fer Mr Speaker dan lentere pep Seselwa!

Mr Speaker nou rol konman Manm Elekte se koze demande e pouse pou Gouvernman reazir pou devan pep pou amelyor sityasyon Mr Speaker.  Mr Speaker pou konklir mon remersi tou Manm ki’n koze don zot sipor donn zot sizesyon pou ed solisyon posib.

Mon swete e nou swete konman en Lasanble ki Gouvernman ki pe ekoute ki i fer le neseser, pou amelyor prosedir e larg lanmen distrik Mr Speaker.  Larepons i avek nou Mr Speaker.  Nou pa bezwen al rod li aletranze, nou konnen nou problenm annou adres nou problenm avan i agrave.  Letan nou koz lo desantralizasyon ; letan nou koz empowerment pa anvoy zis zofisye avek bolpenn dan distrik Mr Speaker pou fer vizit. Desantraliz larzan ; donn lekipman apropriye, liber plis lespas Lotorite Distrik pou pran serten desizyon mazer pou anmenn rekour dan moman dezas.  Mersi Mr Speaker.

 

(APPLAUSE)

 

MR SPEAKER

Mersi Onorab William.  Bon moman in arive pou Lasanble pran desizyon lo Mosyon ki devan nou e ki lir konm swivan:

‘‘An vi lefe sanzman klimatik atraver kalite letan ki nou pe eksperyanse, e dega apre, sa Lasanble i demann Gouvernman pou revwar lafason ki distribisyon son resours pe ganny fer pou deal avek bann tel evantyalite pou redwir risk, permet aksyon vit avan ler lezot Lazans konsernen i arive, minimiz lenpak.’’

Mon ava demann tou Manm ki an faver?  Okenn Manm ki kont?  Madanm Clerk.

 

MADAM CLERK

Mersi bokou Mr Speaker.  Mon rikord rezilta inanim 27 Manm an faver.  E personn kont.  Mersi.

 

MR SPEAKER

Mersi.  Savedir Mosyon anmennen par Onorab William in ganny sipor Lasanble antye inanim parey nou dir e Mosyon in pase.  Bon avan nou konklir mon ava zis en reminder pou tou bann Manm ki demen i annan sa FPAC hearing dan Committee Room 3 ki pou konmans 10er bomaten e mon ava demann bann Manm piblik osi tou ki anvi swiv sa i pou live lo televizyon e lo radyo apartir 10er bomaten.

Avek sa nou ava adjourn e nou repran nou travay Mardi prosen ki vin Mardi le 4 Zen e 9er bomaten – ok?  Lasanble i adjourn.

 

 

(ADJOURNMENT)