::
Home » Verbatim » 2019 » Verbatim Wednesday 31st July, 2019

Verbatim Wednesday 31st July, 2019

NATIONAL ASSEMBLY OF SEYCHELLES

Wednesday 31st July. 2019

 The Assembly met at 9am

 National Anthem

 Moment of Reflection

 Mr Speaker in the Chair

 

 

MR SPEAKER

Bonzour tou Manm Onorab.  E bonzour tou dimoun ki a lekout e pe swiv travay Lasanble Nasyonal. Byensir avek sa pti glitch IT mon felisit tou bann Manm mon war osi de Manm lo kote US ki’n akonpanny nou dan Lim Nasyonal bomaten o mwen nou konmans nou Lasanble avek en Lim Nasyonal malgre ki lanmizik ti feb dan background.  Mersi bokou bann Manm.  Bon nou pou al direk lo kot nou fini yer mon ava demann Parliamentary Reporter pou ok pou apel Minis avek son delegasyon pou nou kapab kontinyen deba ki nou ti konmanse yer lo Physical Planning Bill 2019.  Yes Onorab John Hoareau.

 

HON JOHN HOAREAU

Mr Speaker mon ti pe dir ler ou pran lalis mon pou ou a met mon en sel.

 

MR SPEAKER

Wi mon pou al fer sa en pti moman la.  Bon mon ava zis nonm non bann ki mon deza annan lo lalis e apre nou ava pran bann nouvo.  Minister ou kapab antre avek ou delegasyon.

Bon mon ava dir bonzour e welcome tou Minister Pamela Charlette Minister ki responsab pou Minis ki responsab pou Bill ki devan nou sa Physical Planning Bill 2019.

Minis i akonpannyen par CEO Planning Authority Mr Joseph Francois Deputy CEO Planning Authority Mr Terry Biscornet mon annan osi Mr Viktor Pool AG’s Office Mr Cyril Bonnelame konman en Chairperson Planning Authority e Mr Gerard Hoareau konman Special Advisor to the Minister.

Minis avek ou delegasyon ankor enn fwa bonzour e welcome dan Lasanble Nasyonal.  Avan nou demare mon ava zis donn bann Manm lalis ki mon deza annan e mon ava envit bann Manm ki pa lo lalis pou lev lanmen pou mon kapab note.

Mon annan Onorab Sebastien Pillay, Onorab Churchill Gill, Onorab Clifford André, yes mon ava pran lezot ok so mon annan apard le de Leaders mon annan Onorab Sebastien Pillay, Onorab Juan Loze, Onorab Simon Gill, Onorab Paul Ernesta, non Onorab Audrey Vidot, Onorab Sophola, Onorab Aglae, Onorab William, wi mon dir Onorab Loze wi.

Ok lo kote LDS mon annan Onorab Afif, Onorab John Hoareau, Onorab Norbert Loizeau, Onorab Clifford Andre, Onorab Flory Larue, Onorab Sandy Arrisol ok le de Leaders osi zot lo la.

Bon nou ava demare toudswit avek Onorab Churchill Gill.

 

HON CHURCHILL GILL

Mersi Mr Speaker.  Bonzour Mr Speaker bonzour Minis ek ou delegasyon bonzour tou koleg Manm Onorab e tou dimoun ki pe ekout nou deor.  Mr Speaker sa Lalwa siprenm nou pei nou Konstitisyon i ganny revize tanzantan pou ki i azour avek realite e evolisyon dan nou pei.  Sa Bill devan nou i pa en leksepsyon li osi legzersis i bezwen ganny fer lo li pou ki i vin azour avek realite ozordi e reflekte la bon pratik ki egziste dan sa letan ki nou été ozordi.

Alor i e toutafe normal ki sa revizyon i ganny fer pou sa Lotorite pli byen deservi son fonksyon pou reponn bezwen e nesesite lapopilasyon an zeneral.  Mr Speaker se pa Lasanble ki’n demande ki sa Bill i ganny revize se Minister e Lotorite Planning zot menm ki’n krwar sa Bill parey i été ozordi i devret ganny revize si sa Bill ti’n ganny drafte pou fer malis dimoun i pa ti pou devan nou ozordi pou nou diskit lo sa bann propozisyon sanzman ki pou ganny fer.

Akoz dan mon distrik Baie Ste Anne mon annan bann ka ki’n ganny anmennen devan Lotorite Planning vizit in ganny fer depi 2017 travay se ti pou zis ganny en laprouvasyon pou evit lerozyon obor en lans Anse Boudin kot lafanmir Pool me pa ankor ganny rezourd eski mon devret fer sa bann dimoun ki pe esper en solisyon krwar sa Lalwa i la pou pini zot?

Mr Speaker konman en Manm Lasanble ki enn parmi nou bann rol se osi edik nou pep, mon pa krwar sa i lapros ki nou devret pran zis pou donn ankor en legzanp Praslin ek La Digue pou bokou letan nou annan en Regilasyon kot nou pa ti kapab fer okenn devlopman par lao 50met e lo Mahe ti napa okenn tel Regilasyon eski tou sa dimoun ki ti ganny afekte ti neseserman annan menm ideolozi politik e zot ti pe ganny pini?

E definitivman pa le ka alors i enportan nou note sa.  Mr Speaker dan pei i annan bokou Lotorite ki’n ganny etablir, kestyon se eski napa sa bann Manm sa bann Lotorite ki afilye avek en parti politik?

Eski sa bann Manm pa fer kanpanny politik?  Tou pep Seselwa dan pei i konnen larepons sa de kestyon alors ler nou pe fer en travay dan sa Lasanble annou focus lo travay devan nou me pa lo bann zofisye Lotorite personnelman.

 

(APPLAUSE)

 

HON CHURCHILL GILL

Me lefe i reste ki case sa bann dimoun pa ankor ganny rezourd alors Lotorite Planning i bezwen war tou bann ka ki pa ankor ganny rezourd dan distrik, pou fer en fason pou adres sa bann ka, pou soulaz sa bann dimoun ki pe espere pou bokou letan.

Mr Speaker sa Bill i annan son merit me mon ti a kontan demann Minis serten presizyon lo bann size ki mon pou al met devan pou li donn leklersisman dan son Right of Reply avan ki nou al dan Staz Komite pou lezot diskisyon.

Mon premye konsern lo Sub-part roman 11 Board Authority clause 9 (1)(i) mon krwar konsiderasyon i devret ganny pran pou ki reprezantan en reprezantan i devret sorti kot Industrial Estate i ganny enkli dan sa lalis reprezantatif dan plas reprezantan Chambers of Commerce.  Akoz Industrial Estate i deal zisteman avek tou bann ka lenfrastriktir. I enportan ki zot ganny reprezante pou evite ki nenport demann i ganny met devan Lotorite ki pa neseser ki pa swetab pou egziste dan estate espesyalman bann change of use ki pa an konformite avek plan devlopman IEA.

Lot se clause 9 (1)(j) i devret enkli dimoun Inner Island dan sa konpozisyon la mon pe koz lo sa 5 dimoun ki ganny apwente apard ki sa bann ki sipoze ganny reprezante lo Board.

I osi annan konsern avek clause 9 (5) akoz lo sa clause i dir ki chairman avek bann Manm zot allowance ek zot reminerasyon i devret ganny deside par Prezidan Larepiblik e mon krwar ki sa i devret ganny deside par sa policy ki gid bann allowance avek bann reminerasyon bann Board dan pei.

Mon lot konsern se part roman 3 devlopman lo land adjacent to sea.  Clause 45 (8) konteni sa clause i kler me clause 45 (11) i dir ou si en dimoun i dezobeir sa clause 45 (8) i pou an defo avek Lalwa alors i pou annan en penalti R1milyon.

Mr Speaker mon ti a kontan Minis ti a donn nou en lesplikasyon pli kler lo la ; akoz si ou’n met en kondisyon pou sa dimoun kapab kas sa kondisyon fodre napa okenn zofisye Lotorite Planning ki pe monitor sa devlopman,  a sa diferan faz.  Si non zot ti pou war si kondisyon Lotorite pa pe ganny respekte e deswit pran aksyon neseser i kler se ranforsi Lalwa ki vin an zwe la se sa ki pou fer sa Bill pli morde. sa penalti ki pe ganny propoze i tre minim akoz sa bann tel devloper pa kapab vin kas nou Lalwa isi Sesel zot fine i devret bokou pli eleve.

Nou bezwen pran an kont ki sa bann dimoun se normalman bann envestiser ki annan kapital. Mon ti a kontan osi si Minis i kapab eksplik sa Lasanble, ki pou arive avek bann devlopman ki’n fini ganny fer e Seselwa pa pe ganny akse avek sa bann lans ozordi.

Mon lot konsern se part Roman iii land use plan and development plan Mr Speaker espesyalman land use plan pou distrik bokou fanmir in war zot dan difikilte pou asiste zot piti oubyen zot pti zanfan, pou zot permisyon pou fer zot lakaz akoz serten restriksyon ki ti annan lo serten housing estate.

E sa i fer ki bokou plis presyon lakaz in ganny met lo Gouvernman pou donn lakaz pli bokou dimoun ; zisteman akoz serten land use plan ki pa dan lavantaz okenn bann fanmir, ki reste lo bann estate.  Mon swete ki dan le fitir okenn revizyon lo bann use plan distrik i annan bokou konsiltasyon, espesyalman avek bann dimoun ki dan sa distrik ki konpran zot bezwen e ki fason zot ganny afekte.

Mr Speaker mon ti a osi kontan lesplikasyon avek Minis, pou ler sa Bill i fini ganny aprouve konbyen letan pou pran ki bann Regilasyon ki pe ganny touse avek sa bann sanzman ki nou pe fer pou vin devan sa Lasanble pou nou kapab fer en travay lo la.  Mersi Mr Speaker.

 

(APPLAUSE)

 

 

MR SPEAKER

Mersi Onorab Churchill Gill.  Mon ava donn laparol Onorab John Hoareau.

 

HON JOHN HOAREAU

Mersi Mr Speaker.  Bonzour Mr Speaker.  Bonzour tou dimoun ki a lekout.  Bonzour Minis ek ou lekip.  Mr Speaker sa Bill i en gran amelyorasyon ler ou konpar li avek Town, Rivers and Country Planning Act.

Mr Speaker mon krwar lafors sa Bill i ganny trouve dan metodolozi ki pou ganny servi pou fer land use plan. I konmans par distrik i al dan zones i al dan groups of islands e finalman Nasyonal.

E sa i kapab ganny update enn fwa tou le 5an.  Mr Speaker fodre ki nou konn potansyel e spesifisite nou bann distrik avan ki menm nou fer en plan litilizasyon later lo nivo Nasyonal.

Me sa pa devret anpes nou annan en vizyon Nasyonal pou mon i parey en jigsaw puzzle kot ou konmans avek bann pli pti morso e plitar ou ganny sa gran portre.  E sa i enportan parske tro souvan nou war ki devlopman Sesel in ariv tro par bout san en bon planifikasyon.

Mr Speaker legzanp tipik yer menm kot nou war stasyon petrol ki’n ganny konstrir zis akote en semen kot i annan en lekol pou Petite Enfance Ile Du Port.  Erezman sa lekol pa tro gran, akoz si ou pou bezwen en evakyasyon pou bann pti zanfan dan en ka emergency i pou en problenm serye.Ii annan plizyer bann lezot legzanp ankor mon a les lezot bann Manm elabor en pe lo la.  Sa i fer mon rapel Mosyon ki Onorab Georges ti anmenn lo sa size devret retir konzesyon dan lavil e anmenn plizyer bann servis gouvernmantal an deor sant lavil.

Mr Speaker napa en konstriksyon Sesel ki pa servis Planning alor sa Lalwa i tous tou dimoun e tou kous popilasyon.  Dan mon distrik bokou fwa mon ganny aprose e ganny demande bokou kestyon lo bann keksoz ki ganny relye avek sa servis. Premyerman sa size dansite sa i toultan en kontrovers. Annan de fwa en dimoun i demann ou akoz ki mon vwazen in ganny permisyon pou fer de lakaz lo menm grander  later  ki mwan mon annan, me selman mon ganny refize pou fer parey?

Oubyen mwan mon menm Mr Speaker mon en viktim dan serten sirkonstans ; mon’n deza demann pou fer en lot lakaz lo mon propriyete, e mon’n ganny dir poudir mon’n servi plis ki 60poursan later ; tandis ki pa tro lwen ek mwan en pti lotel in ganny konstri preski menm letan avek mwan e li in servi preski 100pousan  son later.

Zis mazinen konbyen dimoun konbyen Seselwa ki’n ganny menm larepons avek mwan e pas dan menm difikilte.  Tousala se bann sityasyon en pwa de mezir kot en mezir i aplik pou mwan e en lot i aplik pou enn ki annan kontak politik oubyen ki annan larzan.

E sa se bann lenzistis ki lo sa kote latab nou pou toultan lager kont malgre ki mon dakor ki i devret annan serten kontrol pou serten rezon. Par egzanp pou permet delo abzorbe dan later pou ki i napa inondasyon e bann sistenm larivyer pou kontinyen fonksyonnen.  Me mon krwar akoz mon en dimoun rezonnab mon krwar ki Lalwa i devret aplik pou tou dimoun non pa zis pou en serten – sirtou pou bann mizerab Lalwa i en fason e pou bann gran risar Lalwa i en lot fason.  Bann ki kapab pey gous i kapab pase.

Beau Vallon en batiman ki fer biznes plonze ti brile  tou resaman, me la in ganny konstri in avans preski lo semen piblik, ki mannyer i kapab ganny permisyon pou avans sitan pre avek larout grann rout piblik ki menm i danzere pou pyeton ler trafik i pase ?

En serten dimoun in fer son batiman ki vann manze lo en later prive me son outlet i lo car park Gouvernman ; akoz ki in ganny Planning permission pou fer sa tandis ki lezot pa gannyen?

Akoz ki Gouvernman pe ed en dimoun pou kas Lalwa?  À mon avis sa i moralman mal legzanp Mr Speaker i partou kote kot lenzistis in ganny fer. E mwan mon pou zis kategoriz sa konman en bann akt koronpi par sa lenstitisyon amwen zot dir mon en lot parol ki mon bezwen servi.

Mr Speaker avek sa Bill mon annan en pti rekour me mon donn benefis du doute e mon espere ki sa Board i a pran son responsabilite o serye e ava napa ankor bann enterferans Minis lo bann desizyon ki ganny pran.  Mr Speaker enn de keksoz ki mon ti a kontan Minis eksplik nou dan son summing-up se premyerman dan clause 8 dan parti kot i dir Minis i kapab fer Polisi konman direktiv e donn Lotorite Planning lo size performans son fonksyon e son pouvwar.

Mr Speaker la mon konsernen.  Mon konsernen akoz Polisi i pa legally binding e se pou se la ozordi nou war ki, serten dimoun in abiz Polisi Gouvernman e olye ganny zis en morso later parey tou bann morso dimoun in ganny li 64 morso e i annan ki’n ganny li menm 104 morso ensidswit !

Alor eski Minis ti a konsidere ki sa clause i sanze e dezormen direktiv i ganny fer atraver Regilasyon.  Dezyenmman Mr Speaker mon ti a kontan konnen ki rasyonnel deryer sa prerogativ ki Prezidan i gannyen, pou li determin reminerasyon e fees pou bann Board members.  Ler ou get bokou sa bann Prozedlwa ki’n pas kot nou Board fees pou Chairperson e bann Manm i ganny preskri dan Lalwa ou dan Regilasyon oubyen i ganny determinen par Polisi Minister Finans.

Alor mon ti a kontan serten leklersisman lo la. Mr Speaker mwan osi anvi konnen, akoz ki Prezidan i bezwen apwent bann Manm ki asiz lo Board Appeal ? E akoz pa en lenstitisyon endepandan parey CAA ki ganny sa rol swa en modalité kot CAA i nominen e apre si fo Prezidan i apwente.

E a mon avis petet sa ti ava pli meyer etandonnen ki Prezidan ki apwent bann Manm Board lo Planning li menm e i apwent bann Manm Board of Appeals i montre ki i annan ankor bokou lenfliyans.  Ler ou donn Prezidan lotorite pou li apwent Appeals Board li menm ki pou determin zot lapey i annan en gran sans pou redwir enparsyalite dan sa Board of Appeal.

Mr Speaker ankor en pwen mon ti a kontan sizere ki Minis i donn leklersisman lo la ler i summing-up, se size konversasyon pou bann dimoun ki zot later in ganny mete dan ‘no development zones or forestry reserves.’

Sa size i reste en size tre kontroversyel ziska prezan Mr Speaker plizyer sitwayen ki’n war son later ganny ki ti prodiktif e ki pe donn en rannman in ganny mete dan bann rezerv dan bann lannen 1985 an montan.

Alor a mon avis Gouvernman i devret pran son responsabilite e donn rekonpans sa bann dimoun. Dan Lalwa lafason ki sa i ganny trete ou kapab ganny rekonpans selman si ou demann pou fer en proze lo sa later e Gouvernman i obzekte.

Pou mwan Mr Speaker sa pa fer sans akoz i pli fasil pou Gouvernman en en evalyasyon sa later ki in pran e pey konpansasyon.  La lazistis i ava ganny fer.  Mr Speaker i annan pei ki pran linisyativ pou organiz bann national lottery pou pey pou bann propriyete ki Gouvernman i aste e ki kit konman bann trezor Nasyonal mon mazinen sa i kapab son modalité ki zot kapab konsidere osi.

Mr Speaker an terminan, mon pou dir, ki mon pou esper Minis donn son larepons lo sa bann kestyon ki mon demann li dan son summing-up pou mwan war si mon pou siport son Bill ou non.  Mersi.

 

MR SPEAKER

Mersi Onorab Hoareau.  Mon a donn laparol Onorab Noline Sophola.

 

HON NOLINE SOPHOLA

Mersi Mr Speaker.  Bonzour Mr Speaker, Minis ek ou lekip, tou Manm Onorab e tou dimoun ki a lekout.  Mr Speaker sa Bill i byen ki’n vin devan Lasanble pou ganny aprouve. I ti’n plis ki ler pou ede pou kontrol e sofgard plan devlopman fizik pou Sesel a lavenir. I pou osi ede redwir konfizyon e fristrasyon ki i annan parmi popilasyon.  E an plis pou ede, ki sak endividi i redwir demann kestyon.  Parey akoz ki sa enn i kapab fer e ki  mwan mon pa kapab?

Nou a osi redwir parey nou dir sa bann konparezon.  Lalwa dan en pei i pa devret reste statik. I bezwen bouze i bezwen amelyore pou vin azour pou bezwen pep ek pei.

Fodre ki nou fran ek nou lekor e aksepte ki i annan problenm dan Planning ki bezwen ganny adrese. Pa zis dimoun ki dan Lopozisyon ki rankontre difikilte ek Planning parey en Onorab yer ti dir.   Mwan mon dir ki tou dimoun i ganny difikilte, me dan son prop lanpler.

Mwan konman en Manm US mwan osi mon pas dan difikilte ; mwan osi mon plan ti ganny rezete. Mon pa en Lopozisyon mwan alor fodre nou reflesir avan nou koze.

 

(APPLAUSE)

 

HON NOLINE SOPHOLA

Seselwa pa les nou ganny anbete par serten Manm dan sa Lasanble ki oule fer krwar-

 

HON WAVEL WOODCOCK

(Off-Mic)

 

MR SPEAKER

En moman Onorab Sophola.  Onorab Woodcock annou refrain sa bann kalite komanter.  Kontinyen Onorab Sophola.

 

HON NOLINE SOPHOLA

Me dan son prop lanpler.  Pep Seselwa pa les nou ganny anbete par serten Manm dan sa Lasanble ki oule fer nou krwar ki tou keksoz ki sa Gouvernman i fer i mal akoz zot servi zot iminite poudir nenport kwa pou konfiz dimoun.

Mr Speaker pa bezwen ki nou montre ledwa lo zis 1 dimoun.  Akoz en Minister i parey en lasenn ler ki en mayon i kase fonksyonnman sa lasenn pa konplet.  Mr Speaker alor nou pa kapab met blanm lo Minis, lo PS, lo CEO, parey yer nou ti tande. Nou bezwen aksepte ki sa premye dimoun ki ouver laport batiman bomaten ziska sa enn dernyen ki fermen aswar i annan responsabilite pou fer avek travay Planning.

Mr Speaker apre ki mon’n ekout sa bon prezantasyon par Minis kot in eksplik tre byen sa Bill, mon pou met lanfaz lo bon sipervizyon.  Si napa bon sipervizyon e annan bon standar ki ganny mete e ganny garde, tou sa bon travay pou vin anven.  E se sa ki mon krwar personn pa ti a swete war sa arive.

Mr Speaker i annan plizyer konsern ki piblik in met devan e ki bann MNA dan diferan distrik in anmennen pou ganny diskite. I annan ki travay in bouze me i annan ki travay i ankor la pe trennen e dormi.   Mon krwar ki kan sak zil, oubyen sak distrik pou annan son plan devlopman tou sitwayen pou vin azour lo lafason ki zot kapab fer devlopman lo zot propriyete. Sa pou ede anmenn meyer standar dan lafason fer.

Mr Speaker sa Bill i donn loportinite pou fer rappel parey lamazorite dimoun i dir appeal. Ler en sityasyon ki’n arive ki pa dan zot faver fodre note ki desizyon pou ganny pran par en Board – non pa par en endividi. Akoz ler i ganny pran par endividi sa i kre fristrasyon e nou war ki bokou nou pep in fristre par bann desizyon ki’n ganny pran par en senp endividi, me ki napa rikord ki garde ler sa bann desizyon i ganny pran.

Mr Speaker bann entervenan avan mwan in koz lo serten pwen pertinan me mon pou koz lo pwen ki pe afekte Inner Island e ki fodre byen note swa nou bezwen tire konpletman oubyen revize.

Akse lo lans sa fodre ki i ganny fer o pli vit posib, akoz byento pou napa akse. Lamazorite propriyeter pe konstri miray swa pou bar kote lans ouswa pou separ propriyete.

Nou pa pou kapab anpes zot fer pou le moman, me si mazorite zot i kontinyen fer ki pou arive?  Eski nou pou demann zot pou kase?  Konstriksyon lo rivaz ki nou dir high watermark sa i bezwen ganny revwar, akoz plizyer dimoun La Digue in ganny afekte e i annan ki’n benefisye.  Mwan mon demande ki tou dimoun i tonm dan kategori kot zot tou zot benefisye.

Fodre tenir kont ki later pou fer konstriksyon konmela pe vin tre rar.  Later ki tonm dan rezerv mon kontan ki sa in ganny pran an konsiderasyon, akoz i annan bokou propriyeter ki annan gran teren e pa pe kapab devlope.  E an plis sa i zot sel morso teren ki zot annan.

Me i byen ki sa pou tonm anba serten kondisyon ki sa Lalwa pe fer provizyon. Petet zot a zouir zot propriyete zot osi.  Seksyon Planning i annan en gran rol pou zwe kot konstriksyon lo La Digue i konsernen. Par egzanp nou annan bann beach vendors zot  pe esey levé debourye ; zot fer zot pri kyos pou debourye, zot pe rankontre mil problenm.

Minis mon pe demande ki en standar i ganny mete  ki fason ki zot oule lans i ganny devlope.  Pa les zot fer apre demann zot pou demolir.  Pa les zot al pran loan komet zot lekor dan plizyer difikilte, ki apre zot pa kapab sorti. Oubyen parfwa zot ganny promet serten keksoz par zofisye, ki dir mon pou vin ed zot pou vin donn zot sipor, me anven la ki dezord i arive.

Mr Speaker akoz Minis in dir dan son prezantasyon, ki sa Lalwa pou promet e asir lord, e se sa ki mon swete pou war lord standar dan pei. Standar lo Inner Islands nou pe fer fas avek oter ki nou kapab fer en batiman.  Bokou Diguois in ganny afekte.

Avan Diguois ti kapab fer en batiman ground plus attic apre i vin ground plus one plus attic ; mon krwar avek limitasyon later lo La Digue sa i bezwen ganny revize e osi byen defini lo plan devlopman La Digue kwa ki nou anvi war Diguois fer.

Akoz ki’n afekte la zot in fer zis ground plus one or zis ground ler zot al demande pou fer plus one zot ganny mil problenm.  Pa pou kapab fer, ou landrwa in fini ankonbre, me zis akote landrwa i ankonbre li i pe ganny permisyon pou fer.

Mon krwar tou sa nou bezwen defini e ekri ki tou dimoun i konnen.  Mr Speaker mon demann Minis pou asire ki tou propriyeter later, ler zot van en morso later ki i bezwen asire ki i annan lenfrastriktir enportan parey semen. Tro bokou dimoun napa semen pou ariv se zot mon konnen ki dan Civil Code pe adres sa sityasyon me annou ranforsi dan sa Lalwa, fer li obligatwar ki tou bann lenfrastriktir enportan i ganny mete, avan ki en teren i ganny vann.

Mr Speaker sa i aplik pou land bank osi Minister i bezwen annan en plan devlopman sa porsyon teren ki pe al vann. E ki ganny prezante avek piblik, pou ki zot konnen ki devlopman pou annan demen. E tou dokiman i ganny byen dokimante pou nenport ki vin pran la relev lenformasyon i la pou zot fer swivi.  Akoz fo lenformasyon pe kontinyelman ganny donnen ki pe vyol drwa e privilez bann zabitan.

Mr Speaker par egzanp lo sa laliny ler mon aste en kare later, ou’n dir mwan poudir napa later ankor ki pou vann later pe al tonm dan rezerv me demen bomaten ou deside abor mwan ou vin fer 2 semen ; en semen segonder, en semen primer ou fer blocks of flat oubyen ou deside fer diskotek, ou deside fer parking piblik dan sa area ou pe vyol mon drwa !  Ou ti’n devret dir mon depi premye moman poudir la,la sa ki nou anvizaze fer e mwan mon deside mon annan en swa mon lib eski mon pou aste sa later oubyen mon pa pou aste?

Eski ki mannyer mon pou fer mon lakaz mon bezwen fer?  Pa akoz parfwa mon dan serten Lotorite ki nou bezwen abiz rwa nou kanmarad e vyol drwa nou kanmarad.  E ler bann dimoun i vin rode souvandfwa nou ganny bann repons negativ ki pa zoli.  Mr Speaker fodre pa les zabitan devlope apre dir zot la mon ti pe al fer tel keksoz, akoz ler problenm i arive tou dimoun i lav lanmen, i pa konnen, mon pa ti la napa rikord ki’n garde. e se sa ki mon demande ki rikord i garde tou keksoz i ganny dokimante from day one.

Semen osi i enportan La Digue avek sa devlopman ki pe arive fodre ki dan sa Lalwa i met gran lenportans lo devlopman semen. Napa parking semen i etrwat. Transpor pe kontinyelman antre. Ler Planning i donn ‘’permisyon to build’’ dan bor semen, nou bezwen kalkile sa semen ki La Digue i annan mon pa konnen depi mon nesans mon zwenn li, ti napa transpor ti annan zis saret bisiklet ; la ozordi i ranpli, me nou pe servi menm semen. menm larzer.  Minis sa pwen i tre sansib.  Azir lo la avan i tro tar.

Mr Speaker mon demann Minis pou fer bann sesyon edikasyonnel, pou ki tou nou pep i vin azour avek sa bann sanzman.  Akoz sa i tou, tou popilasyon direkteman.  Parfwa nou ganny dir ki sa i ganny met onsite.  Me nou bezwen demande konbyen nou pep ki al onsite pou lir, e ler nou pep pe lir osi petet i annan serten mo vokabiler Planning ki mwan osi mon pa azour avek, ki bokou nou pa azour avek.  Me annou sey organize ki mannyer nou kapab fer sa bann lenformasyon ariv kot popilasyon.  Mersi Mr Speaker.

 

(APPLAUSE)

 

MR SPEAKER

Mersi Onorab Sophola.  Mon ava donn laparol Onorab Norbert Loizeau.

 

HON NORBERT LOIZEAU

Mersi Mr Speaker.  Bonzour Minis avek ou delegasyon.  Bonzour tou dimoun a lekout.  Mr Speaker mon pou konmans koumsa mon Norbert Loizeau mon pa en enzenyer mon, mon en boug senp.

Si ozordi mon pe asiz la kot mon été, se akoz tou dimoun dan distrik Bel Air ki’n siport mon zot konnen ki mon en boug ki kontan war keksoz ganny fer dan bann fason drwat.  Ki mwan mon en boug mon pa kontan kas kontour. Mwan mon en boug ki krwar dan lazistis e mon kontan ki keksoz i ganny fer dan en fason byen.

Mon en boug ki mon krwar dan sa  vye prensip SPUP mwan !  Sa prensip SPUP ki koz lo egalite lo tou, ki apre Coup D’êta Mr Rene ti pran ti met laba. I ti swiv en  lot prensip.  Mwan mon ankor krwar dan sa bon prensip ki zot laba lot kote zot in kit ater pandan40an  – plis ki 40an Mr Speaker.  Legzanp ki mon pe dir sa Mr Speaker, akoz  mwan mon’n war tou sa bann lenzistis ki sa  vye Lalwa avan in komet, ki’n ganny servi pou fer.  Se pou sa ki ozordi mon osi mon ganny fwete ek sa roten – still mon’n krwar dan egalite pou tou dimoun, ki ozordi mwan Minis i konnen, mwan mon’n fer sir ki mon pa’n pas anba pou al rod later, mon ankor lo point system.

Malgre mon ganny fwete ek sa roten, mwan  mon ankor lo point sistenm parey mon bann dimoun dan distrik ki’n ganny fwete ek sa roten, kan lezot bann dalon zot in ganny tou, zot in byen pase,  mwan mon ankor lo la.

Mr Speaker  mwan mon pa kontan ler mon war bann lenzistis ki pe arive parey Gouvernman pandan 40an in komet. E  mwan ler mon war tou sa bann keksoz Mr Speaker i fatig mwan.  I rann mon nerve ler mon tann mon frer Onorab Adelaide yer, in koze in rakont tou son bann problenm, bann difikilte, bann lenzistis ki’n arive dan Baie Lazare ler mon tann Onorab Woodcock yer osi in koz Onorab Sophola ankor in fek fer sorti bann pwen serye, kot in rankontre Mr Speaker, i fatig mwan.

Me pourtan sa bann menm dimoun parfwa lo lot kote se zot ki vini zot vin koze Prezidan Faure in fer isi, Prezidan Faure in fer laba, kan nanryen pa’n ganny fer nanryen pan ganny fer nou pei pe kontinyen driv isi, driv laba san konnen kote nou pe ale.   E ler mon pe get sa bann keksoz enzis ki’n ganny arive dan sa vye Lalwa Planning pandan sa bann lannen ki’n pase, in montre klerman ki pandan tou sa bann letan in annan en Gouvernman ki’n plito, lesefer. In plito lesefer, akoz in permet pou serten dimoun servi sa bann Lalwa oparavan, pou larg serten zot bann dalon, me pou ser mazorite Seselwa  an menm tan.

E pou mwan Mr Speaker se sa bann lenzistis ki mwan Norbert Loizeau koman  MNA distrik Bel Air,  mwan mon pa kontan ler arive.  Legzanp Sans Soucis anler – dernyen fwa mon ti koz lo la ti annan kestyon ki ti vin avek dan Lasanble, Sans Soucis anler dan Rezerv kot zot in tir bann pocket ti annan en gran lenzistis ki’n arive laba !

Ti annan en group fanmir petet akoz sa bann fanmir zot pa ti eze,  ti ganny tire laba ! Ti ganny tire me selman apre zot ti war larme vini fer lagrikiltir, me zot sa bann dimoun ti ganny tire parey mon ti dir lot fwa – pou rezon ki annan danm ; i annan sours delo pangar zot a kontamin sa bann sours delo.

Me selman i annan laferm ki’n ganny fer.  Sa bann dimoun zot dechet i kontaminan ? Me sa laferm ler zot in fer laferm zot in kontamin nanryen ?  Mr Speaker sa bann dimoun zot in ganny tire ganny mete en lot landrwa zis pou fer plezir serten dalon.  Ozordi dan nou Rezerv Sans Soucis i annan ankor bann lenzistis ki’n arive. An 2005 mon krwar, nou koz Rezerv, proteksyon Rezerv ozordi i annan ki’n fek aste en morso later obor sa trail ki desann Copolia. Li akoz sa ou msye i eze li i kapab, alors li i gannyen.  Me pourtan i annan serten dimoun ki anvi fer en pti keksoz li i pa annan drwa fer.

Ozordi nou pe koz Rezerv bann lenzistis nou dir Sans Soucis i annan en ta Rezerv ozordi dan semen pou mont Trois Freres i annan en building ki’n monte !  Zot in pase zot in war? En building in ganny monte selman i dan Rezerv selman sa Rezerv nou pa kapab tir en pti plot pou donn lezot dimoun, selman serten – serten zot, zot kapab ! Zot  kapab fer.

Mr Speaker tousala se bann lenzistis ki’n arive anba bann vye Lalwa e ozordi mon kontan petet dan sa nouvo Lalwa, serten keksoz in sanze. Ozordi ler mon pas Bel Air Mr Chang Chi Sing zabitan Bel Air zot konnen sa ka devan laba, Mr Chang Chi Sing in fer son lakaz i ganny difikilte apre disko large, kot bann dimoun apre zot sorti dan zot levennman aswar zot antre kot li zot fer tou sort kalite keksoz ; zot vin pike napa ki zot pa fer la, sa msye i anvi fer en miray 2met me kot i été i en pti pe lo bor pou prezerv li zot in dir li non.  La zot le i kas sa baraz tol ki’n mete pou bar son lakour, pou protez son lakour selman Mr Abhaye Valabhji li building ti fini li ti annan en baraz tol toul otour son building menm son building ti’n fini. Zzot pa ti dir li kase fek tire la lot zour.

Li Mr Chang Chi Sing zot pe dir li tire.  E i pa annan drwa fer son miray pou protez li -pourtan an montan dan semen Curio Road ki nou war i annan en madanm byen konekte in fer son lakaz anba an dibwa, in bar son lakour avek en miray plis ki 4met in met dibwa par lo la, zot konnen – zot konnen sa zot !  E dapre serten sarpantye ki travay la zot in al gete sa bann dibwa si i pa’n enfekte dapre serten sarpantye ki ti pe travay laba, in dir mwan ki ti annan serten karya dan sa bann dibwa enporte.

Ki zot in fer ? Nanryen si Mr Chang Chi Sing ki ti mete zot ti pou al dir li kase i annan karya, selman li sa msye li i annan drwa fer li e de plis son lale ki antre kot li i baliz ek semen in fer en bordir i ariv dan milye semen, pou anpes delo antre kot li, prezan nou trafik ler i desann napa landrwa pase, bezwen esper li monte akoz sa msye li ki byen konekte li ek sa madanm li i annan drwa fer sa.

Sa se bann lenzistis ki mon war i pa’n byen in arive me an plis ki sa Mr Speaker Mr Chang Chi Sing i anvi fer en miray li i anvi fer en pti miray ki protez li, Mr Abhaye Valabhji ki pa’n ganny permisyon Mr Valabhji li in fer en building avek en letaz anplis lo la mon krwar ki bar Mr Chang Chi Sing. Be i ok.  Konmela Mr Chang Chi Sing ki ti bare zot ti pou dir li non be ou pa kapab konstri par lao tel soz akoz i pou bar sa msye.

Ou trouve ?  Sa se bann keksoz ki mwan  mon panse i mal i pa’n merit arive.  I annan Mr Speaker ozordi menm ki sa bann nouvo Lalwa pe ganny met devan, i annan menm dimoun ozordi ki pe fer pe kontinyen fer sa ki zot anvi.  Mon a dir zot en keksoz ozordi dan montanny i annan dimoun pe fer lakaz 5 letaz Glacis i annan enn – fotovoltaik.  Pou enstal fotovoltaik ki son prensip?  Zot konnen laba?  Ou bezwen fer ou lakaz antre ladan reste en pe letan ganny ou bill apre la Lotorite konsernen ava asses i ava gete mannyer ou pou mete.

I annan dimoun pa’n swiv sa Lalwa ditou.  Planning i konnen zot kapab pa konnen Glacis lakaz in fer fotovoltaik soz in mete lo la ki zot in fer ? Stop notice in donn li?  Si mwan Norbert Loizeau mwan ale mon al fer sa mwan, ki zot pou fer zot pou dir mwan tire ? Parkont sa madanm li Bel Air ki pe fer son pti bout ki pe azoute i pa tro konn Lalwa Planning in deside fer en pti lasanm akote, zot vini zot dir li kase. Mon panse apre mon’n dir sa zot ava al dir li tire zot ava al tire anler Sorento lo montanny – i annan en lakaz ki anann fotovoltaik – pa ankor – antre 5 letaz.

Mwan mon pa vin nonm non personn.  Zot konnen.  Mon panse zot pou al kase akoz si ti lo lakaz Onorab Woodcock, Onorab Hoareau zot ti pou dir annou al tire !  Mr Speaker  mwan mon distrik i en distrik ki mazorite lavil bout dan lavil, i tonm dan mon distrik. Bel Air se en distrik ki  occupy preski antye lavil ansanm ek St Louis.  Tou bann building enportan i annan.  I annan building ki annan 4 letaz attic, basement zot in ganny drwa fer.  Yer mon tann Onorab Ferrari pe koze, in dir ki i annan en Mr Morin ki li i pe ganny difikilte pou met en letaz an plis lo son building.  Sa i mal  Mr Speaker! I mal!  Ki mannyer Lalwa i annan de pwa de mezir serten i kapab, serten pa kapab ?  E la mon pa dan mon distrik Mr Speaker, i annan ki’n ganny permisyon pou konstri lo en sours delo anler la Bel Eau obor National House zot rappel, sa building ti pe fer i annan en delo ki’n koule tou le mwan pandan mwan lo sa semen Bel Eau eskan dernyenrer tiyo zis pe kase fer rigol pou al laba ;  pou en msye Sinwan mon krwar – i fer li selman sa pti dimoun Bel Air ki reste obor en pti larivyer li i ganny difikilte li, ou pa pou fer.  Si ou’n al fer lo ou menm ou a kase me li sa dimoun in fer lo en sours delo.

E dapre konpran pa sipoze annan servi attic in aranz anler dan attic in ganny permisyon Mr Speaker ! In ganny permisyon !  Dapre konpran ti annan en zak ! Pa zak en msye ti annan en zak ki bannla in partaz son deal ladan, dapre konpran.  Sa ki mon pe ganny dir.

 

(laughter)

 

HON NORBERT LOIZEAU

Ti annan en zak dan sa zafer ok ?

Selman en senp Seselwa pe ganny difikilte.  Mr Speaker  mwan mon marse dan distrik mon war. Mon war sa bann keksoz ki’n arive avan kot Planning serten Lalwa i mars pou serten, pou lezot pa marse.

Ozordi mon kontan mon ti pe fer resorti sa pwen avek Onorab Larue yer, pou mwan dir li dir – Onorab Sophola in fer sorti.  Get La Digue son plan devlopman ki mannyer i été.  I en dezord.  In dir ozordi nou fer plàn nou pa konnen dan 10an 20an pou annan plis transpor – La Digue pou nepli Onorab Sophola pou nepli al lo saret i pou bezwen son bisiklet elektrik?  I annan pickup. Ozordi semen La Digue ni en pavement ou pa kapab fer an kont Mr Marston la. Tou bann dimoun ki’n fer zot pti letablisman, zot in koste lo semen ozordi pyeton pe mars ansanm ek bisiklet napa ni en pavement, i en dezord total tousala se bann move keksoz ki’n arive dan Planning.

E sa i mal pourtan nou ti anvi La Digue i vin en legzanp pou lemonn. Ozordi touris pe ganny aksidan. Touris pe mor La Digue.  Napa kontrol!  I en dezord!  I en mess!  Sa se bann move Planning ki’n arive dan Sesel.

Mr Speaker mon kontan mon’n kapab ganny sans fer resorti sa bann serten pwen. Me an terminan mon anvi dir ki mon pou ekout vi ki nou pou al dan Committee Stage nou pou ekout pou osi annan serten lamannman ki pou ganny fer, e bann lamannman ek Onorab Ferrari mon panse pe propoze mon toutafe an dakor avek. Mon panse pou vin avek sa bann lamannman ki in koz lo la e an menm tan an mezir ki mon a ekout Minis son larepons, apre sa mon a kapab fer mon desizyon lo ki fason mon pou vote lo sa Bill.  Mr Speaker mersi pou donn mon laparol.

 

(APPLAUSE)

 

MR SPEAKER

Mersi Onorab Loizeau.  Onorab Sebastien Pillay.

 

HON SEBASTIEN PILLAY

Mersi Mr Speaker.  Bonzour Mr Speaker.  Bonzour tou koleg Onorab.  Bonzour Minis e ou delegasyon welcome parmi nou Chairman Board Planning Authority Mr Bonnelame.

E mon dir bonzour osi tou bann oditer oubyen dimoun ki pe swiv nou Lasanble ozordi.  Mr Speaker nou mon pe sey mazinen konmsi ki mannyer pou konmanse apre ki mon ekout detrwa lentervansyon lo sa Lalwa e mon pe sey demann mon lekor si nou fer progre ?

Si konman en Lasanble pandan sa dernyen 3an ki nou la apre ki nou sorti dan bann dan kanpanny politik, nou’n antre dan Lasanble avek lentansyon pou nou travay pou pei, pou lepep Seselwa, pou nou avans keksoz pli devan, si ki kantite progre nou’n fer?

Rezon mon dir sa Mr Speaker, akoz i drol ki mon pa konnen si i annan nou viv dan en serk perpetyel, kot nou krwar  poudir  sel fason pou nou score pwen  politik se par fer en bann lentervansyon akizatwar – mon servi byen sa mo akizatwar – ki inpune improper motive lo bann dimoun ki pa neseserman annan menm proteksyon ki nou annan la anndan, anba bann Lalwa ki prêtez nou.Ee nou bliye totalman pou nou regard sa ki devan nou.  Totalman pou nou regard sa ki devan nou ki en Prozedlwa ki’n ganny travay lo la apre konsiltasyon ; apre plizyer zefor ki’n ganny mete par bann profesyonnel – bann teknisyen ; bann dimoun ki’n pran zot letan zisteman pou zot adres tou sa bann konsern ki nou konman Seselwa nou met devan regarding Lotorite Plan regarding ki mannyer Lotorite Plan i fonksyonnen.

And nou vin dan Lasanble nou oubliye poudir nou annan en travay serye devan nou pou nou fer, pou nou regard en Lalwa ki pou seryezman enpakte lo tou sa ki ganny fer dan nou pei lo en pwennvi devlopman, me dan plas vin fer sa ki nou pe vin fer, nou vin zwe ‘ek nou pa ek nou ;’ nou vin koz lo sa ki ti ganny fer pa ti ganny fer nou vin donn legzanp lo en msye isi en msye laba.

Mon ti a kontan si, eski bann entervenan in aktyelman lir sa Lalwa?  E regard ki annan dan sa Lalwa dan plas zis vin fer bann komanter ki pou mon krwar i neseser ki Lotorite Plan i reponn !

Mon dir sa Mr Speaker akoz par egzanp sa Lalwa i fer provizyon pou annan kreasyon en Lotorite Plan sa Lotorite i ganny kree avek tou son pouvwar ki neseser e son bann pouvwar i ganny confine avek li atraver bann Regilasyon ki i gannyen.  Me yer sa Lotorite in ganny akize konman bann dimoun ki kapab ganny bribe dan  sa Lasanble! Be si sa i leka then nou annan Chairman Lotorite Plan la Lotorite Plan i bezwen donn nou en leksplikasyon serye lo lekel sa bann dimoun ki pe ganny bribe dan Lotorite Plan ouswa sa Manm ki’n fer sa lakizasyon i vin devan vin substantiate sa ki in dir !

I bezwen substantiate sa ki in dir akoz dan Lasanble Mr Speaker whilst ki nou annan liminite, nou bezwen servi li dan en fason respektab dan en fason serye akoz ler nou fer sa lo bann zofisye piblik ki pe fer en louvraz, nou kre en kondisyon ki tou dimoun la deor i santi ki ler i submit son plan, son plan i subject to en scrutiny ki li menm li sa dimoun sa plan pa sipoze pe gannyen.

E sa mon krwar i en vyolasyon i vin en vyolasyon drwa konstitisyonnel sa dimoun, pou li ganny proteksyon egal anba Lalwa.  Sa ki zot pe kree zot pe detri zot pe detri striktir menm Gouvernman ki en zour zot menm zot le vin lead!

Be eski zot anvi vreman vin lead Gouvernman si zot pran sa kalite lapros?  En lot pwen Mr Speaker mon pa konnen si i annan bribery dan Lotorite Plan, me mon ti a kontan sa dimoun ki’n dir sa-

 

(Interruption)

 

MR SPEAKER

Order! Laparol i pou Onorab Pillay.  Kontinyen Onorab.

 

HON SEBASTIEN PILLAY

Mersi Mr Speaker.  Lot pwen ki’n ganny fer yer Mr Speaker se ki nou tann nonm case Mr Morin me alegasyon ki’n ganny fer se ki Mr Morin pe ganny viktimize par Lotorite Plan.

Be mwan  mon demann Lotorite Plan, pou eksplik nou oubyen donn nou en lesplikasyon lo si i annan viktimizasyon pou Mr Morin lo en baz politik !  Akoz si zot pe dir mon i annan viktimizasyon lo en baz politik,  mwan mon konn dimoun ki’n nobou fer en bar lo lans Beau Vallon.

 

HON FLORY LARUE

(Off-Mic)

 

 

HON SEBASTIEN PILLAY

(Anr ou konnen, ou konnen ou) selman i annan baz politik. Mon konn plizyer dimoun ki siport mon parti, ki son plan pa’n devlope ! E zot in vin konplent kot plizyer dimoun i annan ki’n vin kot ou Mr Speaker regarding sa bann keksoz.

So mon ti a kontan konpran alors atraver Lotorite Plan, si ler nou al dan Committee Stage nou a donn zot loportinite pou eksplike, akoz zot annan en Drwa Repons anba Konstitisyon.  Sey eksplik nou akoz case Mr Morin pe pas dan sa sityasyon eski vreman i dan sa sityasyon?  Akoz lenpresyon ki nou pe donnen Mr Speaker ankor enn fwa se lenpresyon ki sa laplikasyon i vini lo la, i tag ki kouler politik ou été.

Be si sa i leka Mr Speaker – si sa i leka – be zot  be i annan gro building la anvil ki pa pou okenn siporter US la.  I annan en pake gro building Providence ki pa pou siporter US.  Kot in pase sa?  Aret sey vin fer nou krwar lizour pou aswar, ler zot in run out of keksoz pou zot dir, pou zot atake.  E pe still score pwen politik avek en  bann elektora ki zot in dezapwente. Akoz zot pa’n kapab delivre sa bann elektora zot le koz politik?  That’s the politics of the game ki pe arive ozordi Sesel !

E nou osi nou fer fas avek menm sityasyon me nou kontrerman a zot nou deside fer keksoz diferan. Sel keksoz ki nou deside pou nou fer diferan se ki nou pa vin lans lakizasyon lo dimoun si nou napa levidans!  Lans lakizasyon lo dimoun si nou napa levidans !

 

(APPLAUSE)

 

HON SEBASTIEN PILLAY

Bann dimoun ki ti sipoze bann pli gran defander la demokrasi e drwa – drwa lasosyasyon dimoun e ozordi i vin dir ou si en CEO i form parti en parti politik, i pa pou kapab fer son louvraz e (detri) – e dekrir en dimoun e kriy sa dimoun konman en dimoun ki basically enkonpetan !  Me selman ler nou ti pe pas Tourism Bill sa bann menm dimoun ti tir en provizyon dan Lalwa, ki ti dir poudir Chairman sa Board ki pou ganny kree Chairman pa sipoze dan en parti politik.

Zot menm ki ti tire lot kote latab !

 

(Off-Mic)

… ki ti dir!

 

HON SEBASTIEN PILLAY

Zot, zot ti tire.  Be sanmenm sa mon pa ganny en konpran eski Seselwa pe ekoute kwa kalite mesaz zot,  zot anvoye lo lot kote latab.  Mr Speaker mon krwar zot en pti pe konfize parler.  Zot vini dan Lasanble zot dir en keksoz, zot dir lot keksoz !  Ou pa kapab vini en zour vin dir koumsa ou pa devret get afilyasyon en dimoun selman ou vini ou pe fer gro stetment dan Lasanble, pou atak afilyasyon politik en lot dimoun !

Be kisisa sa?

 

(Off-Mic)

 

HON SEBASTIEN PILLAY

Mon pa pou dir non mon pa pou servi sa bann term Mr Speaker, akoz  mwan mon respekte lofis ki mon’n gannyen.  Mon ganny en lofis pou mon reprezant lepep Seselwa e mon pou fer li to the best of my ability.  Be mon pa pou impune karakter okenn dimoun Mr Speaker akoz mon pa oule personn i impune mon karakter sa i enportan pou mwan.

 

MR SPEAKER

Bon la lo-

 

HON SEBASTIEN PILLAY

Prezan Mr Speaker,  ler nou vin lo sa Prozedlwa e nou regard sa Prozedlwa e nou regard sanzman ki sa Prozedlwa in anmennen i annan en kantite dimoun pa pou kontan sa Prozedlwa en kantite Seselwa pa pou kontan sa Prozedlwa.

I annan dimoun pa pou kontan sa Prozedlwa tou senpleman par egzanp si nou koz sa seksyon 45 i pou santi poudir seksyon 45 ozordi lafason ki dimoun pe servi akse avek bann lans pe servi bann lans i en nwizans pou zot.

Me i annan lezot dimoun ki pou kontan i annan en gran mazorite dimoun osi ki pou kontan ki pou dir be finalman nou ganny en kad legal ki ava dir poudir si i annan en akse natirel ki al lo lans la. Akoz nou tou nou bezwen al lo la Seselwa i annan en koneksyon inelya avek lanmer, avek al lo en lans pas en letan lo en lans.

Be sa i en provizyon ki dan sa Lalwa sa provizyon pa pe gete si en dimoun i US si sa dimoun i LDS si sa dimoun i Lalyans si sa dimoun i One Seychelles mon pa konnen si i annan lezot ankor ki ava vini.

Sa Prozedlwa pa pe vin get sa i pe get nou ki mannyer nou pou travay e sa ki nou bezwen fer se kre en kad lo tou sa bann Prozedlwa ki nou ava annan fonksyonner piblik ki travay.  Me si nou atak sa bann fonksyonner piblik lekel ki pou enplimant sa Lalwa – robot?  Nou pou napa dimoun pou enplimant sa Lalwa.  E si demen Mr Speaker mon pou fer lot pwen konsernan sa Lalwa ki’n ganny raise, lo bann pouvwar ki nou pe donn Minis, sa Lalwa i reprezant en Lotorite.  En Lotorite,  ki bezwen ganny drwa fer bann desizyon. Zot bann aspiran demen pou lead en Gouvernman, be zot pou lead en Gouvernman ki napa ledan si ou retir tou pouvwar administratif ki ou pe donn en Minis dan en Lalwa.

Ou’n retir pouvwar pli enportan ki mon krwar sa i neseser tire, se ki li i pou fer determinasyon parey seksyon 10 (4) ti pe demann li. Sa in sorti e sa i byen in sorti me an se ki konsern Polisi i bezwen si demen ou vin Prezidan Sesel Onorab Ramkalawan en Polisi ou parti se pou ou par egzanp annan en lopital dan sak distrik e ou demark en landrwa dan land use plan, be that’s the policy of the Government !

Be selman ki ou vin fer, ou vin ek en lamannman pou retir en provizyon – en provizyon  administratif ki permet ou Minister fonksyonnen, be ki mannyer ou pou fonksyonnen?

Tou sa bann lamannman ki zot in anmennen i aktyelman pe atak kad administratif rather than atak, sa ki zot krwar zot pe atake, akoz mon krwar zot war nanm partou !  Kot zot pe atake zot krwar zot pe atak Minis kot Minis i ganny pouvwar.  E zot pe get Gouvernman ki la, zot pe get sa Minis ki la.

Par egzanp Mr Speaker annou pran par egzanp seksyon 37 ok – seksyon 37 i dir ou koumsa poudir i servi sa mo determinasyon. I annan en rezon akoz determinasyon.  Nann dimoun legal i a dir ou ler ou met li an konsiderasyon avek rekomandasyon ki mannyer ou assess sa konsiderasyon.  I 2 diferan keksoz.

En lot keksoz ou dir, nou pou tir delete en subclause konpletman en subclause 24(3) ok nou le delete subclause 24 (3) be ki 2 (3) i dir nou ?  24 (3) c?  24(3) c i dir ou ‘‘policy and development strategies of the Government’’ be Mr Speaker ler nou pe koz ‘development strategies of the Governmen’t sa i an relasyon avek sa land use plan – sa development plan ki’n ganny prepare.  I napa nanryen pou fer avek Gouvernman abritrerman vin enpoz en Polisi. I pa parey sa ki Onorab mon krwar Loizeau in dir atraver ou Mr Speaker ki sa i en Polisi ki pou ganny abize.  Akoz sa i an relasyon ek  sa land use plan.  I napa nanryen pou li fer avek Polisi Planning.  E Polisi Planning pa pou vin binding ; i vin en Regilasyon e Regilasyon in ganny sove anba sa Lalwa si nou ti regard Lartik 79 seksyon 79 (2)(g) dan sa Lalwa. E sa bann Regilasyon se sa ki include SFRSA – ki include tou bann rekomandasyon pou Planning . Sa seksyon i deal prensipalman avek development plan.

Me en lot pwen enportan ankor Mr Speaker dan sa Lalwa, ki enportan pou nou note i se ki kontekstyelman ozordi mannyer striktir Planning Authority i été i ankonbran e sa Lalwa i tir sa lenkonvenyans pou annan.

Me selman Planning Authority li i en Lotorite ki bezwen reste separe avek plan avek Polisi Gouvernman pou li gard son lendepandans. Me ler ou fer li al fer sa determinasyon li menm, ki sipoze ganny fer par Gouvernman, ou fer li anpay son lekor dan en desizyon Gouvernman, ki kapab ganny challenged e impune lo son lendepandans konman en Lotorite!

Me selman mon krwar Mr Speaker at the end of the day se sa ki nou le fer nou le detri en Lotorite avan ler i konmanse annou fer li.  Akoz zot ki annan mazorite pou fer li.  E zot pe regard tou lamannman dan en Lalwa ki lye avek swa Gouvernman swa avek Minis, zot pe regard sa Gouvernman ki la me zot pa pe regard konteks administratif e lenportans annan serten kad administratif ; serten gardfou si oule dan en Lalwa, ki protez serten eleman.

En lot pwen enportan Mr Speaker, annou regard lo sa land use plan e sa derogasyon ki’n ganny kree.  Sa derogasyon in ganny kree an relasyon avek defense, security, lasante eksetera, me nou pe enkli ler nou pe dir ek Minis ler ou fer en desizyon ou bezwen pibliy sa desizyon.  Lekel pei ki fer en desizyon  an relasyon avek defence and security ki pibliy sa  a gran zour ? Napa enn ki fer, me nou le fer nou.

E de plis si nou le al pli lwen nou le fer sa, be kot i pou arete?  Eski nou pou le ki en dimoun i pibliy plan son lakaz met li piblik?  So si dan plan son lakaz sa dimoun in fer design dan son lakaz pou met en keksoz oli son privacy?  Me ou’n fini donn en voler – en dimoun ki  le atak sa dimoun en blue print ki mannyer i pou antre dan lakour sa dimoun.

Ou bezwen vin very careful about lafason ki oule administre – oubyen oule koup pouvwar administratif ki ou annan anba en Lalwa. E ou bezwen get byen, eski sa bann kad ki oule tire, i relye avek senpleman kad administratif oubyen i relye avek en labi pouvwar ki sa Minis i kapab annan?  Me en lot keksoz ki nou bliye ki pli enportan ankor, se ki lefe ki ou annan sa Lotorite – sa Lotorite pa dernyen lenstans ki fer en desizyon li.  Sa Lotorite pa dernyen lenstans ki fer desizyon akoz tou son desizyon ki sa Lotorite i fer i subject to judicial review.  Tou son desizyon ki i fer i kapab ganny challenge par Lakour akoz se Lakour ki annan final say lo en desizyon ki’n ganny pran par en Lotorite atraver judicial review.

Sertennman prosesis en judicial review i pa en keksoz ki fasil, me i en keksoz ki kapab ganny entamer.   E napa  en Lotorite ki anvi al pri dan sa direksyon.  E se pou sa rezon ki sa i en checks and balance ki eternelman administrativman i egziste dan en kad administratif Gouvernman.

 

(Off-Mic)

 

HON SEBASTIEN PILLAY

Me si ou vin avek en lespri ki oule fer sa, oule tir tou kad administratif ou pou met Gouvernman, sa menm Gouvernman ki ou oule lead – lo son zenou.  Apre ou konnen ki pou arive?  Ou pou bezwen ale al sanz tou sa bann keksoz.

This is what the amendments are proposing to do.  Ou konpran?  So mwan mon krwar ki nou bezwen regard sa Lalwa dan kwa ki i pe anmennen nouvo.

What is it bringing new?  Sa ki ti enportan pou nou annan, e i vre.  Ti enportan ki nou ankadre sa development plan, sa bann land use plan.  Ti enportan pou ankadre li.

E ler mon krwar nou pe koz Polisi ki kapab ganny challenged, i enportan ki mon fer, ki nou fer en distenksyon ant en Polisi ki met en lobligasyon, ki apre i kapab ganny challenged,  e en Polisi ki kree en kondisyon.  Polisi ki ou pe tire dan sa Lalwa, i kree zis kondisyon li, i pa en lobligasyon.

 

So i napa en lenstans kot i pou al Ankour pou li ganny challenged.  Me sa ki enportan anba sa Lalwa, ki ou bezwen pe gete, si eski sa bann Regilasyon ki la ozordi ki pe ganny servi anba Town and Country Planning Act ki la depi en bon pe letan, Si zot azour avek bann kondisyon ki la ozordi?  Mon pou donn ou en legzanp Mr Speaker.

Mon osi mon’n ganny en dimoun ki’n vin kot mwan, in dir mon poudir be, i ti’n ganny en plan ki ti’n aprouve, pou li kapab fer en car park anvil kot son building par lao larivyer.

Non, non ekoute.  Mon pe koz lo la, mon pe koz lo la pou en rezon Mr Speaker.  I annan en desizyon ki’n ganny pran vizavi sa.

Sa ki mwan mon bezwen konpran se, akoz zot in pran zot desizyon?  Me i pa mon lentansyon, nor eski i devret vin mon, vin mon louvraz, pou enterfer dan desizyon ki en Lotorite, en competent Authority i sipoze pe fer!

En lot pwen enportan Mr Speaker anba sa Lalwa ki, ki, konmsi ki relevan avek konteks ki nou ladan ozordi.  E ki mon krwar pe poz nou serten problenm koman en Lasanble.

Konstitisyon i prevwar 2 fason ki Prezidan Larepiblik i fonksyonnen.  I prevwar ki i fonksyonnen konman the Head of State avan.  Apre i prevwar konman i fonksyonnen konman the Head of the Executive.

 As the Head of State, se li ki the ultimate dimoun ki pou ganny pourswiv ler i annan judicial review, se li.  Se pou sa rezon ki anba Lalwa, Prezidan i annan pouvwar par egzanp, serten pouvwar pou li apwent bann Manm Board.

Ou bezwen annan finalite.  Me mon’n tann zot dir par egzanp ki nou bezwen entrodwi par egzanp en kad kot CAA i apwent bann Manm lo sa Board, mon napa problenm mon, ok.

Mon’n tann dir, mon napa problenm ek sa.  Me nou bezwen konnen ki kad, ki nivo.  Akoz CAA i annan en rol pou li zwe.

E Prezidan konman the Head of the executive, e konman sefdeta i annan en rol pou li zwe.

Be annou aret get sityasyon ki nou ladan ozordi, e atak tou Lalwa ki ganny prezante devan Lasanble lo en baz sa Gouvernman ki la, e non pa realize poudir sa bann Lalwa i bezwen ganny trete lo zot merit ki zot annan vizavi sityasyon ki zot pe sey adrese.

Se sa ki enportan, olye ki nou fer bann alegasyon, oubyen nou fer bann, bann sipozisyon dan Lalwa ki pa neseserman donn lenpresyon kwa ki pe pase an relasyon avek Lotorite Plan ozordi, e bann keksoz ki pe ganny sanze anba Lotorite Plan.

Mr Speaker ou konnen, i enteresan dan Lasanble, pandan letan ki mon’n dan Lasanble, i annan dimoun ler ou enteronp zot dan Lasanble, zot ankoler en, pa kontan en?

La depi ler mon pe koze, e mon apresye Mr Speaker, lafason ki ou pe, ou pe chair, ou pe les annan sa, sa va et vient.  Mon tann Leader Lopozisyon tanzantan pe, pe, i annan en keksoz pou li dir.

Tasyon taler ler mon dir li i pa kontan.  Tasyon taler mon osi ler mon dir li i pa kontan!  Ou konnen Mr Speaker, mon krwar poudir devan nou, nou annan en Prozedlwa ki finalman met en lord avek sa size planifikasyon.

E mon konnen Mr Biscornet i annan, i en dimoun ki en urban planner.  E mon krwar in en lentansyon toultan Gouvernman, in en lentansyon toultan, nenport dimoun ki’n travay dan piblik service, oubyen ki’n enterakte avek Departman Lenfrastriktir, in toultan lentansyon pou ki i annan en plan, en kad ki etablir sa.  E sa kad i sipoze ede, pou nou kapab manage soustenabilite later ki nou annan pou nou devlope.  Me selman problenm in toultan pou nou pei, se akoz Lartik 26 nou Konstitisyon.

E Lartik 26 nou konstitisyon, nou toultan kree en kondisyon ki tou dimoun i annan en drwa propriyete.  Ou pa kapab anpes en dimoun devlop son propriyete dan serten fason.

E okenn derogasyon ki fer sa, i bezwen ganny fer dan en fason tre, tre, tre drwat.  E i pa sitan fasil pou etablir li.  E se pou sa rezon i n annan bokou challenge an relasyon avek bann desizyon ki ganny fer zisteman avek Lartik 26.

Me sa ki nou Lasanble, nou kapab fer ozordi, se ki nou kapab aprouv en Lalwa, ki donn nou loportinite, pou bouz dan en direksyon pozitif.

Nou kapab regard lepase, dir ok,  tou sa bann keksoz in arive e nou kapab fer 2 keksoz.  Swa nou dir sa bann keksoz in arive annou fer sir i pa ganny repet ankor si in arive.

Swa nou kapab dir, be sa bann keksoz ti arive, ler zot, zot ti la, alor la mon’n arive, mon pou fer egzakteman parey zot, zot ti fer.  Mon pou repet tou sa ki zot ti fer.

Sa ki nou kapab fer.  E mwan deplizanpli dan Lasanble Mr Speaker mon remarke ki nou bann politisyen pe swazir pou pran sa 2enm opsyon.

Pe swazir olye pou nou regard kwa ki nou kapab fer pou nou fer keksoz mars pli byen.  Nou drag nou lekor dan lepase, nou anmenn tou sa lanmertim lepase e nou fer li vin dan leprezan.

E prezan sa i oule gid tou travay ki nou pe fer.  San pran kont ki nou annan en pep la deor, ki li i pe bouze, ki li i oule avans devan.  E sa Lalwa i al dan sa laliny.

Ler nou koz lo seksyon 45 sa Lalwa ki donn akse avek lans,  prepar nou bann politisyen pou nou konnen kote nou pou debout.  Eski tou sa bann bon koze, sa bann gro koze ki nou’n koze la, an se ki konsern akse ek lans.

Ler sa bann gro msye i vin dir nou, zot pa oule donn akse ek lans.  Mon a gete si nou tou nou pou pare pou nou debout deryer sa bann zabitan parey nou pe dir dan Lasanble, olye nou fer krwar ler Lasanble, apre en lot zafer.

Sa i enportan sa Mr Speaker.  Akoz, si nou, si nou konman Manm Lasanble ki’n ganny mete la, pou nou defann lentere lepep e nou bliye defann lentere lepep, e nou pran nou letan plito batonn kanmarad e lager ek kanmarad,  olye regard lentere lepep, pa lepep ki pou benefisye.  Pa pei ki pou benefisye.  Annefe pou napa okenn benefis pou personn.  Mr Speaker mwan mon swe se ki annou relev nivo deba lo sa Lalwa.

Annou retourn lo size ki enportan otour sa Lalwa.  Se eski sa Lalwa reponn legzizans devlopman ozordi dan nou pei?  Eski sa Lalwa i reponn egzizans e demann pou ki nou annan devlopman dan nou pei dan en fason soutenab?

Eski sa Lalwa pe kree bann kad proteksyon pou asire ki napa bann labi ki kapab ganny fer, swa lo nivo lotorite, swa lo nivo endividi?

Eski sa Lalwa i kree kondisyon ki napa kolizyon ki a egziste ant bann dimoun dan lotorite ek bann endividi?  E sa i annan bann safeguards Mr Speaker.

Par egzanp i dir nou koumsa, poudir bann anplwaye sa Lotorite, bann Manm Board sa Lotorite,  zot ganny, zot tonm anba code penal, seksyon 91 mon krwar ziska 92 par egzanp.  Me sa i kler sa.

Akoz i vin en lofans kriminel pou zot pran bribe, pou zot pran okenn keksoz, pou zot fer okenn aksyon.  I annan sa proteksyon anba sa Lalwa.  Yer en Manm ti demande si eski i annan sa proteksyon?  Be i annan sa proteksyon anba sa Lalwa.

Dezyenmman nou’n koz lo kwa ki protez en endividi regarding labi from sa Lotorite?  I annan en proteksyon.  Akoz ler ou set sa Appeals Board,  sa Appeals Board i bezwen donn determinasyon regarding sa ki sa endividi pe fer.   E la ou’n retir lenterferans politik, because the political head, which is the Minister no longer, i nepli annan pouvwar anba seksyon 10(4),  Pou dir, mon aprouv plan Onorab John Hoareau be mon pa pou aprouv plan Onorab Audrey Vidot.  I nepli annan sa pouvwar pou li fer sa.

Tou sa bann keksoz i pas atraver en sel, en sel sistenm.  Prezan sa ki nou bezwen demann nou lekor se, eski Planning Authority ozordi pe kapab reponn sa legzizans ki pe arive?

Eski Planning Authority i annan ase staff pou met sa Lalwa an aplikasyon?  Eski Planning Authority i annan ase, i annan ase sipor teknik pou met an aplikasyon sa Lalwa?

Se sa bann keksoz ki nou, nou bezwen asire ki i annan atraver sa Lalwa.

Nou bi se pa pou rode sa enn ti ganny plan, sa enn pa ti ganny plan, sa enn pa ti ganny plan.  Anfen kont nou, nou anvi ki tou dimoun ki’n ganny son loportinite pou li devlop son devlope, i devlope.

Me ki i fer li byen, ki i fer li dan en fason soutenab.  E ki i fer li dan en fason ki pa nwir lezot dimoun.  Se sa ki nou pe rode, se sa ki nou anvi ki sa Lalwa i donn nou a la fen dizour.

An konklizyon Mr Speaker, sa Lalwa pou bezwen vin avek bann Regilasyon, oubyen pou annan bezwen annan bann lamannman dan son bann Regilasyon.  i pou bezwen annan.

E mon krwar i annan, i annan en keksoz ki nou konman en demokrasi, nou bezwen pran leson avek.

E mwan mon’n aprann sa Mr Speaker, e fotespere ler mon pe sey partaz sa avek tou dimoun, pou ki nou regarde ki nou pa viv dan en sistenm ki dezekilibre.

Toultan i pou annan en lekilib ki ganny anmennen.  Premye challenge pou enn sa bann land use plan, ti pas dan Lakour e sa msye ti ganny son case mon krwar.

E sa ti prompt zot pou bouze, ti prompt Gouvernman pou bouze e revwar kad dan ki i pe fer sa bann development plans.  In osi annan en challenge recently to sa Policy Vertical Integration.

E sa in prompt Gouvernman pou li pran en aksyon.  Se sa bann lekilib ki egziste dan nou sistenm, akoz sistenm Zidisyer i mars akote sistenm Egzekitif, e i mars akote sistenm Lezislatif.

Be sa ki mwan mon pou gid mon bann koleg lo lot kote latab avek; akoz mon’n tann zot dir zot pe siport bann propozisyon lamannman.

E mon’n tann, i annan ki’n dir ki i pou siport sa Lalwa.  E mon konnen zot pou siport sa Lalwa.  Sa ki, sa ki enportan se ki annou pa disregard bann sistenm ki kit keksoz dan en balans.  E de balans sa Lalwa to the point ki apre nou fer li perdi tou son ledan.  E ki demen son lenplimantasyon efektif dan serten konteks, i vin en problenm pou nou.

Annou konsantre lo bann baz ki reste.  E si i annan sanzman ki bezwen ganny fer, sa i en Lalwa, i kapab ganny amande.  E dernyen pwen Mr Speaker, se ki annou pa fer sa fot pou nou al met Polisi anba Regilasyon.

Akoz Polisi sipoze servi dinamik ziskan ler i ganny antre, e la i vin en Lalwa.  Ou pou pran li ou pou met li anba en Regilasyon, ou pou fer ditor sa Lalwa, akoz i perdi son dinamiz.

Ou bezwen kontinyen revwar en policy, ou bezwen fer en assessment lo li.  Ziskan ler ou kapab met li an pratik.

Akoz sa ki nou pe fer Mr Speaker, nou p ape zis pas Lalwa pou en lazans la, nou pe pas Lalwa pou sa Lotorite ki pou desid lo tou, tou planifikasyon ki nou pou fer going forward.

E mon krwar nou bezwen asire ki sa Lotorite i for e i kapab fer sa travay ki i annan pou li fer.  Mr speaker mon oule remersi Lasanble pou son, pou nou latansyon.

E mon ti a kontan ankor enn fwa, demann nou bann koleg nou tou, pou nou ler nou koze, pou nou realize poudir nou tou nou annan drwa nou lapartenans politik.

Nou tou nou annan drwa pou nou epanouir dan nou pei.  E dan okenn ka, fodre nou pa servi nou pozisyon pou nou atak en lot dimoun.  Akoz son lapartenans politik oubyen kestyonn, kestyonn lentegrite profesyonnel en lot dimoun akoz son lapartenans politik.

Akoz si nou fer sa, se sa ki apel ‘ek nou, pa ek nou’.  Mersi Mr Speaker.

 

(APPLAUSE)

 

MR SPEAKER

Mersi Onorab Sebastien Pillay.

Bon nou ava pran en break e nou ava retournen 11er pou nou kontinyen deba lo Physical Planning Bill 2019.  Nou retournen 11er.

 

(BREAK)

 

 

MR SPEAKER

Bon mon anvi re diriz en pti pe nou deba lo Bill ki devan nou.  An vi ki nou annan en bon pe entervenan,  mon pe demande ki nou evit repetisyon.

E nou sey konsantre nou bann argimant, nou entervansyon lo Prozedlwa ki devan nou.   I annan 2 Manm ki, enn lo sak kote latab ki’n pran 30 minit sakenn.  Savedir i balanse.

Mon pe demann lezot Manm pou limit zot deba, mwens ki 30 minit.  Rezon se ki mon anvi ki nou kapab, par apre midi, nou pe pran, nou pe konsider bann amannman, pou nou kapab fini sa Bill ozordi.

E rezon i senp se ki semenn prosen mon pou absante.  E mon’n komans sa, sa Bill, deba lo sa Bill, e mon anvi ki nou kapab fini li.

Alor mon pe, ankor, mon egzize ki nou konsantre nou argimant, nou bann deba lo sa Bill ki devan nou.  E petet osi tou lo prezantasyon ki Minis in fer.  Yes Onorab William.

 

HON WAVEN WILLIAM

Mersi Mr Speaker.  Mr Speaker mon anvi port a ou latansyon poudir i annan manm piblik deor la ki pe dir ki zot pa pe resevwar resepsyon.

E zot anvi konnen si sa bann bout ki zot pe vwar pou kapab ganny repete pli tar?  Akoz pou le moman i sanble, mon pa konnen si problenm i avek SBC.

Me i annan en problenm kot dimoun pa pe resevwar resepsyon Lasanble, mersi.

 

MR SPEAKER

Mersi Onorab William.  Nou ava fer le neseser, nou ava regarde lo nou kote.

E kwa ki pa’n ganny pase?  Nou ava regarde si SBC i kapab fer sa pou nou, kantmenm lo SBC 2.  SBC.  Bon nou ava sort out, nou ava rektifye avek SBC.  Onorab Pillay ou oule repet ou 30 minit ki ou’n koze?

 

HON SEBASTIEN PILLAY

Egzakteman.  Mon ti pe al demande ki mon repet mon lentervansyon, si zot in koupe.

 

MR SPEAKER

Bon mon krwar i annan apepre 5 minit ki ou’n koz lo Bill, nou ava, nou ava fer zot pas sa 5 minit.  Bon, ok.  Nou ava kontinyen avek nou travay.  Avek, avek deba, e mon ava donn laparol Onorab Audrey Vidot.

 

HON AUDREY VIDOT

Mersi Mr Speaker.  Bonzour Mr Speaker.  Tou Manm Onorab e tou, Minis ek ou delegasyon e tou Manm piblik ki a lekout.  Mr Speaker i annan en pti dikton Kreol ki dir, ‘’ler ou reste dan lakaz an vit ou pa anvoy ros kot ou kanmarad.’’

I sagrinan dan nou pti pei Sesel, letan nou tann plen dimoun koz lo viktimizasyon ek koripsyon, selman serten zot pe deza viktimiz nou prosen.  Ki swa, dan son afilyasyon politik oubyen son pti kouler lapo.

E nou tande apre ki zot desann pou sey defann sa bann menm dimoun.  E par azar zot pas deryer baro e zot, zot pran zot prop lanvlop.

Mr Speaker yer dan sa Lasanble en kantite parol in ganny dir.  En kantite lakizasyon in ganny fer.  Nou lo sa kote latab nou enterese konnen;

Ki Lotorite Board Planning i annan pou dir lo sa bann lakizasyon ki pe ganny fer dan nou Lasanble.  E i pa zis nou, i osi manm piblik.

Mon, petet mon ava demande atraver ou Mr Speaker.  Eski petet Lotorite Planning in deza, in fini ekrir en let, oubyen si zot pa ankor.  Si zot pa ankor, nou ti a swete ki zot klarifye, akoz piblik i anvi konnen.

 

MR SPEAKER

Ok, Onorab.  Onorab mon konnen petet zot pe antisipe.  Bomaten zis ler mon pe desann, avan 9er, 2enm laklos in sonnen, I mean 9er –  mon’n resevwar en let sorti kot Lotorite Planning e in ganny sinyen par Mr Bonnelame ki la prezan parmi nou.  Me zot konnen poudir apre ki mwan mon ganny sa let, mon pa zis vin lir from the Chair. 

Mon bezwen regard en pe son konteni.  Ki la i devan mwan la prezan.  Mon regard son konteni e pou mon regarde ki mon pou fer.  Pandan break mon’n ganny sans, mon’n pas lo la, vitman.

E CEO ti’n anvoy mwan en pti mail, avek kopi, the soft copy.  Mon’n ganny sans mon’n regarde.  So far, mon’n, mon osi tou mon konsiltasyon avek mon, avek nou Legal Counsel, Lasanble, pou Lasanble Nasyonal.

Mwan mon pa’n vwar nanryen ki prezidis sa dan nenport.  Me dan mon repons avek CEO, mon’n propoze ki an vi ki Minis i deza dan Lasanble, ki Minis i ava pran sa bann konsern yer.

Either si i oule lir sa Right of Reply ler i pe fer son konklizyon, i pe reponn bann klarifikasyon, bann komanter, i a kapab fer li from The House.

Oubyen si i oule zis pran bann bout ladan, pou zis, met keksoz dan son vre konteks, ok.

So mon pe, mon pe dir sa, pou an ka okenn lezot Manm osi tou i monte, i vin dir poudir be ki Lotorite Planning pe fer an vi serten komanter ki’n ganny fer vizavi Lotorite PlanningOk? ou kapab kontinyen Onorab Vidot.

 

HON AUDREY VIDOT

Mersi Mr Speaker pou sa leklersisman.  Mr Speaker sa Prozedlwa ki devan nou, i annan son merit.  I annan serten konsern dan mon distrik Roche Caiman kot serten dimoun in blok drwa pasaz bann rezidan ki vwar zot lakaz pri dan milye en blok flat.

E ler zot annan zot prop salte lakaz, e menm fer, zot anvi fer renovasyon dan zot lakaz.  Zot vwar zot pe servi zis zot la salamanze pou zot pase avek zot materyo.

Me pli gro konsern se an ka i annan en evantyalite dife, sa bann rezidan napa lezot opsyon rod rekour, akoz son vwazen in blok son drwa pasaz.

Alors nou swete ki avek sa Prozedlwa, e byensir avek bann Regilasyon ki pou swiv, i kapab donn rekour bann ki pe ganny afekte. Mr Speaker Roche Caiman i en distrik kot i annan bann proze konstriksyon ilegal ki’n ganny fer.

E sa bann konstriksyon in anmenn bokou problenm kot i annan problenm drenaz, kot bann lakour, kot dimoun in plizyer repriz, met konsern, swa avek Planning, swa atraver distrik akoz ouswa zot, zot ganny afekte.

Atraver ou Mr Speaker, mon’n tann Onorab Loizeau koz lo lenzistis dan distrik Bel Air.  Be Roche Caiman kot serten dimoun in konstri serten lenfrastriktir ilegalman lo later Gouvernman in ganny les pase.

E lezot rezidan ki’n reste dan sa menm landrwa pou plizyer lannen.  E menm kantite lannen, zot, zot in ganny dir ki zot napa, zot pa pou kapab aste sa landrwa.  Wi Onorab, oli lazistis?  Mr Speaker sa bann konsern ki piblik in monte desann pou rod rekour avek Lotorite Planning.  A kapab ganny adrese atraver sa Prozedlwa, e byensir avek bann Regilasyon ki pou swiv.

Mr Speaker Gouvernman fek aprouv bann nouvo plan pou distrik Roche caiman.  Nou swete ki atraver sa Prozedlwa, bann zofisye i edik byen bann aplikan, ki zot drwa?

Kote zot drwa i komanse e kote i fini?  Ki fer ki zot a fer zot devlopman byen e pa afekte lezot zot prosen.  Sa i pou aplik pou bann ki vin fer rapor osi.  Ki swa i fer li dan bon lentansyon ou non.

Mr Speaker nou swete osi ki bann Regilasyon ki swiv apre sa Prozedlwa i a osi tous en pti pe sa bann devlopman kot apre letan in fini ganny fer, i annan bokou konsern lo kote tapaz.

Ki parfwa bokou sa bann devlopman pa neseserman ganny konsiltasyon piblik.  Ki pou donn zot kontribisyon e petet pou met serten konsern devan.

Ki apre i afekte zot.  La mon pe mazin kot bann lafanmir Camille, ki zot osi toultan zot santi zot kwense avek sa bann problenm tapaz dan zot rezyon akoz serten devlopman.

Mr Speaker Minis in koz klerman lo sa Prozedlwa e in al byen an detay.  Alors mwan mon lentervansyon pou tre kourt.

Me mon pou siport Onorab Noline Sophola letan in dir ki nou bezwen fer plis, plis sa ledikasyon anver nou bann Prozedlwa ki nou, ki nou pase.

Espesyalman sa bann Lotorite, pou fer sir ki piblik i respekte e byensir zot azour ki zot drwa?  Kot i konmanse?  Kot i fini?

Pou ki zot a respekte lezot zot prosen letan zot pe fer okenn zot devlopman.  Mersi Mr Speaker.

 

MR SPEAKER

Mersi Onorab Vidot. I byen.  I short. Precise.  Mon kapab donn parol prezan Onorab Flory Larue.

 

HON FLORY LARUE

Mersi Mr Speaker.  Bonzour tou dimoun.  Mr Speaker istorikman later in toultan ganny servi koman en form pouvwar isi Sesel. Sa nou’n eksperyans li dan lepase. E ozordi apre plizyer lannen lo la labi dan distribisyon later, akse avek later i pe fer en gran lefe dan devlopman nou popilasyon. Nou bann zenn sitwayen pe vwar bokou difikilte pour annan en lespwar, pour annan en lakour pour zot menm, e sa i en gran kou finansyer sosyal e ekonomik pour nou pei.

Leta nou fanmir pour touzour reflekte leta nou pei. E lenfrastriktir i mars lanmen dan lanmen avek nivo nou devlopman. Nou bann dokiman istorik ofisyel i pa annord.  E i ankor annan bokou later ki son sours idantite son propriyeter pa trouve Sesel. Sa dan lepase in amen difikilte pou prosed avek serten devlopman ouswa sa bann devlopman in bloke. Ozordi dan pei nou annan de form later.  Later Gouvernman e later prive.  Sa Prozedlwa ki devan nou i reviz Lalwa aktyel e i anmenn ansanm tou Lalwa ki relye avek planifikasyon litilizasyon later e devlopman soutenab.

Dan zis sa premye fraz lo premye paz sa Bill deza nou vwar sa gran responsabilite ki sa group dimoun ki form sa nouvo lotorite ki ganny spesifye anba seksyon 9 pour bezwen gard antet dan tou desizyon ki zot pran.  Zot bezwen fer tou desizyon avek en bi pour gard touzour en priyorite pour soutenabilite zerans e litilizasyon later. Sa mo soutenab i aparet 5 fwa dan sa Bill.  Soutenabilite i mon premye pwen.  E mon’n anmenn bokou lanfaz lo responsabilite direk nou bann zofisye planifikasyon depi pli ba ziska bann ki pli ba ziska bann ki pli o ki fer sa desizyon final.

Nou Konstitisyon dan nou preanbil Mr Speaker i dir nou klerman ki koman sitwayen an zeneral nou annan en responsabilite. E mon ti a kontan lir;

‘’ Deklarasyon SONA anyelman nou lobligasyon ferm dan nou 3enm Repiblik, se pour mentenir Lalwa baze lo bann drwa e laliberte imen fondamantal, ki’n etablir dan sa Konstitisyon e lo respe pour legalite e la dinyite bann et imen.

Pour devlop en sistenm demokratik ki ava siny en striktir sosyal adekwat e progresif, ki ava garanti manze, lenz, lozman, ledikasyon, lasante ek en standar lavi progresif pour tou Seselwa.

E osi Mr Speaker ede prezerv en lanvironnman sen e sof e fonksyonnel pour nou menm e nou posterite.’’

Mr Speaker devlopman ki nou fer ozordi i pour avek nou dan lefitir akoz lenfrastriktir fizik en fwa konstri i reste avek nou lavi ouswa bokou letan.  E lanfaz pa ganny mete, si lanfaz pa ganny mete lo meyer planifikasyon bann konsekans i ganny peye par popilasyon.

E sa nouvo Lotorite zot pour osi enplike dan zerans later Gouvernman. Letan an plan i ganny met devan zot pour devlop later Gouvernman sa Lotorite i bezwen pran an konsiderasyon ansanm avek sa antite Gouvernman ki’n met sa plan devan, sa pwen soutenabilite, sa devlopman ki pe ganny propoze a longer ditan. Zot bezwen konsiderasyon avan finaliz sa devlopman, regard tou lezot devlopman otour.  Mon krwar ki Minis i bezwen konsider en clause an plis pour devlopman lo later Gouvernman pour fasilite ki deservi e piblik e pei.

Enn bann legzanp i nou lavil kot i annan en melanz later prive e Gouvernman ki annan en lenpak ekonomik akoz i annan en kou finansyel pour bann marsan e i limit akse popilasyon avek serten servis. Akoz mon dir sa Mr Speaker? Nou bezwen vwar enn nou bann pli gran defi nou lavil se parking. Lekel ki soufer. An zeneral pei ki soufer, bann komersan ki fer biznes dan lavil i soufer alor bon planifikasyon i anmenn larises dan pos pep Seselwa li menm. Sa propriyeter biznes i benefisye e sa konsonmater i vwar li pli pre avek sa ki li i bezwen.

E pei li i benefisye dan taks avek bann bon loportinite biznes plis dimoun i ouver nouvo biznes e i kree plis lanplwa pour popilasyon. Me nou’n vwar legzanp kot en developer i anvi mont en batiman avek ziska 4 ou 5 letaz me i pe ganny difikilte pour ganny lotorizasyon.  Sa i aplikab dan plizyer ka.  Li i dan en zone ekonomik. Me selman nou vwar en dimoun ki tre, tre o dan Gouvernman konstri en lakaz ziska 5 letaz dan en zone rezidansyel.  Mr Speaker sa dan li menm i anmenn bokou kestyon.

Mr Speaker bann batiman in ganny konstri a plizyer repriz komansan par sa enn La Misère ki’n kas skyline nou zil.  Sa i enn bann premye defi ki’n anmennen pour pep Seselwa antye lo kote planning.  E bokou dimoun in perdi konfyans dan sa Lotorite apre ki sa ti arive.  Mr Speaker nou vwar lo sit Planning – Lotorite planning ozordi en devlopman pour Plan Victoria ziska 2040, ki’n ganny fer par biro Planning.

Dan sa Bill nou war i ganny koz lo District Plan ki osi enkli pour devlopman dan lavil e en Plan Nasyonal pour devlopman nou pei.  Avek bann loportinite pour ganny fer devlopman konpletman nouvo lo bann later nouvo anba Plan Victoria 2040, nou’n vwar bokou defayans dan planifikasyon.

Dan sa Plan 2040 pour lavil i enkli en later konble ki ti konpletman vid pour komanse. Sa bout later dedye pour lapes ti pour soutenir sa lendistri. Nou’n vwar en lot kote nou sekter, en lot kote dan lekonomi enn nou bann sekter ki pe ganny met bokou lanfaz lo la, se lendistri lapes. Nou’n tann nonm Blue Economic, Blue Bond, i en bann konsept ki pe ganny vann dan lemonn o non Sesel e nou bann leaders in ganny rekonnet pour sa.  E nou pe ganny vwar koman en leader dan sa sekter. Me par kont letan nou get nou bann lenfrastriktir eski sa priyorite pe ganny reflekte?  Nou vwar sa later ki spesifikman ganny met an plas pour siport lendistri por nou vwar lekol, nou vwar compound criket, e pli deplorab ankor en batiman pour akomod 500 travyer etranze.

Sa en lo en zone ki dan plan 2040 ki’n ganny mete par Planning pa sipoze annan lotorizasyon pour fer okenn letablisman rezidansyel! Me la nou vwar 500 dimoun pour ganny loze lo Ile Du Port.  Eski zil Ile Du Port ti pour fer sa lo la?  I plat alor i fasil pour met sa lenfrastriktir lo la.  Me pour akoz ki Gouvernman in fer sa vin disponib pour IOT?  Pourtan IOT i en biznes vreman profitab. Gouvernman ti kapab asiste li avek later. Me pa later konble Mr Speaker! Sa later konble i pour devlopman lenfrastriktir lye direkteman avek en sekter kle pour anresir nou pep.  Sa i enn bann drwa kot bann landrwa kot lotorite ti annan en Kart Blan – vid pour zot komans tou nouvo. Me rezilta move planifikasyon in donn nou sa ki nou pe vwar pe monte ozordi me enn lot legzanp ki nou’n vwar in donn nou Providence.

Mon pa krwar zis akoz nou annan en landrwa endistriyel nou bezwen fyer koman en pei. Akoz en landrwa endistriyel ki annan en sel sorti, e en sel antre mon krwar i plito en dezapwentman. I koz bokou blokaz trafik.  Mr Speaker as a saying says time is money.

En legzanp, si en transport tel ki en pickup i antre dan sa zone Providence i riske met en sarz an plis, pour fer en kours lo en kliyan, akoz i plis ki sir i pour pri dan trafik dan sa landrwa. Alor finalman sa i senp kot planifikasyon a longer ditan i ganny peye par sa sitwayen ki pe sey fer de bout zwenn.

Kou lavi i ganny reflekte dan sa Lalwa Mr Speaker. Si nou pour retourn bor kote lavil kot nou annan nou bazaar en landrwa ki’n toultan en landrwa byen frekante par tou dimoun me mon asir ou ki ozordi, i annan bokou dimoun pa ankor pas bazaar pour bokou letan akoz akse.  Sa i afekte sa bann biznes. Konbyen dimoun ki petet ti abitye aste son fler dan bazaar ouswa aste lavyan kot Alone me avek letan i sey ale i pa ganny parking, alor i pa ale. I dir i ava al en lot zour ankor napa parking avek letan i sanz son labitid i aret depans son larzan dan sa landrwa.

Sa i en realite. E se move planifikasyon ki anmenn sa rezilta. Tou keksoz i relye Mr Speaker. Dan bazar nou kapab aste pwason fre e legim lokal. Sa i ede donn nou popilasyon en landrwa pour aste manze ki ede pour gard nou bann fanmir an bonn sante.  Me akoz en mank akse en fanmir i vwar li plito ariv kot en magazen letan i pe rantre kot li apre travay e la son sel swa se lavyann poul enporte.  I pa son premye swa. Me lefe ki landrwa kot i ti a kontan ale i pou kout li bokou letan; ki sa i en kou reel pour en manman ouswa en papa ki pe antre dan en lakour espesyalman si i pe al dan Sid Mahe, i bezwen azout 1 erdtan edmi lo son traze pour ariv kot li pour li Mr Speaker son letan i presye. Sa bann sityasyon i kontribye ver lafors son striktir sosyal e lasante nou pep.

Eski pa ti pour pli meyer si depi lo komansman tousala ti’n ganny pran an kont, e nou ti’n kapab demark en landrwa pour en bazar?  Kot ti pour aksesib direk  pour peser e pa ti pour bezwen pickup pour li anmenn son pwason bazar?  Mr Speaker parey Onorab Ferrari in dir nou yer koripsyon in touzour en rol. Seselwa i vwar e i fermal.  E zot pey konsekans.  Nou’n vwar enn bann premye devlopman lo later konble dan rezyon por ti en batiman apele Espace pour en Fondasyon avek bon koneksyon ki zot, zot ti ganny akse avek en gran morso later obor delo sale.  An plis later konble pa ti sipoze dapre Polisi Planning ganny vann freehold. I sipoze lo en lease, en rent.  I ti sipoze reste toultan pour propriyete Leta. Me sa later kot Espace li i ete i ti ganny vann pour en pri pli ba, ki ti koute pour konble  e i ti ganny vann freehold e li apre en pe letan nou’n war li in ganny semen pour li menm e in ganny en parking pour li menm.

Savedir Mr Speaker sa later in fini ganny transfer dan lanmen prive, e la dapre mon konpran pe sey rod vann. Mr Speaker eski sa landrwa pa ti en landrwa parfe pour fer en gran bazaar pour nou pei e nou popilasyon?  En landrwa kot nou bann peser Nor Mahe vin vann zot pwason?  I pli pre avek lanmer e zot kapab vin la direkteman.  I donn loportinite pour grandi bann biznes pour bann pti peser parey nou apel zot pour zot vin en pli gro peser. E nou bazardye pour vin vann zot bann legim.  Avek depo bis lanmenm obor, pa nou ti’n kapab fer en pon pour vin kot sa landrwa?

Si planifikasyon Ile Du Port i reste koumsa. Stasyon i sipoze vin zis obor nouvo stasyon petrol kot i ete la stasyon petrol Nor Mahe ki fer ki dimoun ti pour pli pre avek sa landrwa obor Espace.

Mr Speaker ankor move planifikasyon i fer ki serten i benefisye me popilasyon i perdi. I en kou sa Mr Speaker. Pep Seselwa antye i pey later konble, me bann servis ki ti pour benefisye pep antye pa ganny mete koman en priyorite. Nou sitwayen a kontinyen lager parking pour al aste en pwason, ouswa trenn sa pwason depi bazaar ziska kot bus stop!

Zis dan sa legzanp Mr Speaker nou vwar ki mannyer en meyer planifikasyon ti pour kapab anmenn nou pep avek akse manze pli fre e pli bon kalite. Si i ti en dan en landrwa bokou pli aksesib plis dimoun ti pour vin dan sa landrwa e plis peser bazardye ti pour annan loportinite fer biznes.

Bon planifikasyon i anmenn larises pour plis dimoun. Bon planifikasyon i fer devlopman lenfrastriktir lo later ki deza limite vin pli ekitab Mr Speaker pour tou dimoun.

Alor planifikasyon avek soutenabilite i vreman enportan. Si nou pour kit lavil Mr Speaker e nou pour al Sid Mahe, spesifikman nou pour al Anse Royale soutenabilite i pran en lot dimansyon. Mr Speaker bokou later Gouvernman i ankor disponib dan sa distrik. Sa distrik in ganny demarke koman dezyenm lavil Mr Speaker depi 15 an pase kot tou kalite plan in ganny anmennen pour devlopman later Gouvernman me nanryen pa ankor arive.

Nou vwar bokou proze ki’n servi gran morso later me pa ganny servi dan nanryen spesifikman Mr Speaker sa dumpsite. Ankor move planifikasyon pa’n ganny vwar dan plan inisyal e la lafen en proze pe ganny donnen – sponsor par etranze avek pep Seselwa pa’n zanmen ganny servi pour sa ki i sipoze fer. Gouvernman in sey fer li vin en landrwa pour resikle bann resipyan an ver. Menm sa Mr Speaker zot pa kapab fer.

Move zerans i osi poze beachfront Anse Royale.  La Mr Speaker i annan de keksoz, tender ki tonm anba Minister Later i annan son bann restriksyon ki al avek sa tender. Tender in ganny fer me plizyer lannen apre devlopman pa ankor ganny fer. Kominote ki perdi Mr Speaker.

Apre sa Lotorite Planning i vin ladan. Sa dimoun li in bezwen submit en plan avek Planning me akoz dan sa nouvo Lalwa nou pa konsidere met restriksyon lo devlopman later Gouvernman ki souvan i tonm anba tender? Bann restriksyon ferm ki letan sa dimoun i ganny donnen son limitasyon par son tender i pa kapab prezan vin sey son sans avek Planning; kot i vini i submit plizyer diferan kalite plan.  Si son tender i donn li limitasyon li olye fer zis son restoran i oule fer flat, i oule fer guesthouse, i oule fer lezot keksoz.  Si i vini i submit sa plan avek Planning plan pa aprouve i devret ganny anvoye back kot Minister Later kot sa later i ganny repran avek li!  Akoz i pa kapab vin zwe Bingo avek later Gouvernman. i donn li en bout, in dir li kwa ki i kapab fer lo la i vini i submit son plan dapre son tender, i pa vin zwe bingo akoz kominote ankor ki perdi!

Alor mon demande nou bezwen fer li plis strict e limitasyon lo tender ki ou sipoze fer, enn fwa ou submit en plan ki al pli lwen ki ou limitasyon ou devret perdi sa later.  Me sa dimoun ki ti pour tender pour sa later ti a fer sir son proze i korek e dapre sa ki i bezwen ganny fer.  Dan tousala kominote i kontinyen perdi e loportinite pour en lot dimoun ki ti a kapab fer devlopman li i ganny bare. An mezir ki sa i tarde, bann servis esansyel ki’n mal ganny planifye tel ki Servis Tenny Dife i prezan aparet lo pan devlopman beachfront Anse Royale Mr Speaker.

Mon dakor, popilasyon in grandi, demann i vin pli o, problenm trafik e ogmantasyon popilasyon dan Sid Mahe i fer lekspektasyon sanze e vin pli o. Me move planifikasyon lenfrastriktir i fer ki i annan en lirzans pour anmenn sa servis tenny dife  pli pre avek popilasyon dan Sid Mahe.  Sa i fer ki Gouvernman i santi li kwense e prese pour delivre e nou vwar ki en morso beachpark in ganny donnen avek Servis Tenny Dife e en lot avek Servis Lapolis.

Enn lo sak kote sa devlopman Mr Speaker ki li menm sa proze in tard ankor.  E lot keksoz, si sa proze i kontinyen tard ankor lezot keksoz pour vin pran plas kot sa beach park i sipoze ete.

Mr Speaker Konstitisyon dan Lartik 38 i dir nou,

‘’Leta i rekonnet drwa tou dimoun pour viv e zouir en lanvironnman prop, sen e ekolozikman balanse e avek bi asir realizasyon efektif sa drwa Leta i antreprann pour pran mezir promouvwar proteksyon e lamelyorasyon dan lanvironnman.

Asir en devlopman sosyo-ekonomik soutenab’’, (ankor Mr Speaker) ‘’pour Sesel pa en lizaz en zesyon konvenab bann resours Sesel.

Promouvwar lentere piblik lo nesesite pour protez prezerv e amelyor lanvironnman.’’ (dan Konstitisyon Mr Speaker.)

‘’Alor bann responsabilite soutenabilite i osi anver nou bann lespas ver. E landrwa ekolozik e balanse.

Soutenabilite i osi vedir ki nou pa bezwen servi tou sa ki vid Mr Speaker. Zis akoz i vid nou pa bezwen ranpli.  Alor dan Anse Royale mon’n donn en propozisyon plizyer fwa menm avek msye Francois ki la devan nou mon redir ankor Mr Speaker kot Ladministrasyon Distrik i ete Gouvernman i annan li en morso later ki mezir 14mil met kare! Alor lo sa morso pran sa 4mil ki lot kote ki nou’n donn fire station, donn li kote kot ladministasyon distrik i ete i pour gannyen son 4mil met kare ki i ete, i pour dan kwen semen la kot Les Canelles i ete zis kit sa kote lans vid, aprey Konstitisyon i demande, promouvwar lentere piblik lo nesesite pour protez prezerv e amelyor nou lanvironnman Mr Speaker!

Mon resiplir ek Lotorite Planning pour reget soutenabilite dan landrwa vid dan Anse Royale.

Mr Speaker ki nou fer letan nou’n ariv dan sa sityasyon? Nou’n fer fot dan lepase eski nou kontinyen al ranpli kot i vid ouswa eski sa lotorite pa war, pa drwa sitwayen pour gard plis landrwa vedir posib pour lwazir pour pep Seselwa?  Sa Mr Speaker i annan en kou lo lasante piblik e bann limitasyon bann landrwa lwazir pour popilasyon dan le fitir.

Alor Mr Speaker ankor nou vwar dan sa Bill mwan mon krwar ki planifikasyon soutenab i volapenn ganny pran byen o serye. Bokou lezot Manm in koz lo lezot pwen; mwan pour mwan sa i en pwen pli serye.

Ozordi Mr Speaker kot i sipoze annan devlopman pour sa rezyon sa ki’n arive i bann later in ganny koupe an morso. Nou’n vwar en bazar ankor ganny konstri me anba en plan ki date 15an? Ozordi Mr Speaker lekel ki benefisye avek en proze ki annan 15an. Ozordi sa bazaar i tro pti. Zis apre son konstriksyon bazardye pe vann an deor. I bon nou fer lenfrastriktir me planifikasyon i bezwen deservi dan lefitir i bezwen deservi popilasyon. Move planifikasyon i fer ki lenfrastriktir i ganny mal planifye pa kapab deservi sa ki i sipoze deservi.

Mr Speaker nou vwar dan menm landrwa dans a rezyon bokou later ankor in ganny koupe. Nou ti annan en Plan Stratezik anba Plan Devlopman Anse Royale. Nou bezwen fer Planning Authority vin plim responsab pour bann plan ki zot menm devan.  Dan sa Bill nou vwar ki nou pe koz lo devlopman bann Plan Devlopman Distrik, Plan Devlopman Nasyonal. Oli komitman anver sa bann plan? Eski sa nouvo Lalwa ki ti egziste dan nou lot Lalwa – eski sa nouvo Lalwa pour anmenn sa bann komitman?

Mr Speaker enn bann legzanp ki nou kapab servi, ki devlopman i kapab estetik e annan en lye antre zot, sa nou kapab vwar i avek devlopman ki’n ganny fer lo Eden Island. En sel devloper ki’n vann diferan morso later avek diferan dimoun, me nou vwar sa lenfrastriktir li i konplemant kanmarad  – ki anmenn en zoli lanvironnman ki en plezir pour regarde. Me si nou pran sa bann dernyen morso later ki ankor vid dan Anse royale, e nou pa regard son soutenabilite lo lonterm, nou pou vwar ki Anse Royale pour vin parey sa Victoria kot Market Street i ete ouswa Providence ki mal planifye. Alor sa mi ki aparet 5 fwa, i pourtan enn bann pli gran responsabilite ki sa group dimoun ki pe ganny formen dan sa nouvo Bill i annan.

Mr Speaker mon ti a kontan atraver ou koz lo sa ki Onorab Sebastien Pillay in dir letan in dir nou pa retourn dan lepase. Nou bezwen retourn dan lepase Mr Speaker, pour nou regarde kote ki nou oule sa Bill anmennen pour nou. Dan lepase sa Bill ki nou ti annan pa ti en move Bill li.  Me selman dan sa enn ki la nou pe sey met lanfaz lo nou bann travayer dan sekter Gouvernman – spesifikman dan sekter Planning.  Annou met valer lo nou travayer Gouvernman. Annou met lanfaz lo zot lenportans pour zot et bann profesyonnel ki onnet, konsistan e enparsyal. Pour met lentere piblik par lao lentere personnel. Pour donn en servis ki apolitical e non-partizan dan bann advise ki zot donn sitwayen pour zot donn latransparans ki fer ki piblik i kapab scrutinize sa travay ki zot fer.

Mr Speaker Onorab Sebastien Pillay atraver ou in koz lo deklar lentere. Mon pa vwar nanryen mal sa ki Onorab Ferrari in koz lo la yer. Eski i mal pour nou demann en zofisye ki dan sekter piblik pour li deklar son lentere letan i annan en konfli? Akoz above all Mr Speaker i en public servant. Alor i nou drwa pour li demann nou, demann li pour deklar nou lentere. Nou per Mr Speaker. Nou’n ganny bate dan lepase, alor nou per.

Mr Speaker labi pouvwar, malpractice i enn bann keksoz ki nou’n vwar souvan dan Planning. Sa bann zak ki Onorab Norbert Loizeau in koz lo la, ki Onorab Sebastien Pillay i dir nou pa egziste.  Mazin byen Mr Speaker dan lepase nou ti annan en ex-Prezidan ki ti dir nou koripsyon i en ‘persepsyon’, me selman nou konnen i la.

Mon ti a kontan met plis lanfaz lo en whistleblower Act ki fer ki dimoun ki konnen letan Lalwa Planning pe ganny abize civil servants ki travay dan Minister i kapab vin devan e ekspoz sa bann keksoz.   Labi in arive akoz zot napa sa loportinite pour zot ekspoz zot bann Sef!  Mr Speaker        o kontrer bann civil servant in war kot Sef, pli gro Sef in pran bokou later pour son lekor Barbarons pour son zanfan e pour son fanmir pour fer biznes.  Nou’n vwar 2enm sef ki’n vini ki’n pran later pocket dan Rezerv e Planning menm ki’n entertain li pour li ganny sa bann later!

Mr Speaker sa bann keksoz i lye – menm si nou kontan menm si nou pa kontan, sa i laverite! Finalman Mr Speaker mon ti ava kontan fer lanfaz dan Committee Stage ki piblik ki ganny afekte bokou par sa Bill –  sa Bill i kouver tou devlopman lenfrastriktir, i dikte ki mannyer ou pour servi ou later.  Silvouple mon fer en plea avek piblik pour fer en zefor pour regarde e bann kontribisyon ki zot annan pour zot fer anvoy kot nou.  Bann dimoun ki annan later obor lans pran ka akoz sa Bill i pour met bokou, bokou baryer lo devlopman ki zot kapab fer avek access to the beach.

Mr Speaker tou dimoun i annan en drwa defann son later dapre Konstitisyon anba Lartik 26 parey Onorab Pillay atraver ou Mr Speaker ti dir nou.  Tou dimoun i bezwen kontribye, ki fer ki nou bann  Manm letan nou desid lo byennet pep Seselwa, nou pa desid lo sa ki en Prezidan ti dir.  Nou pa desid lo sa ki  nou, nou anvi me nou desid lo sa ki pli bon pour pei akoz lenfrastriktir i reste ou pa kapab fer nanryen avek apre. Mersi.

 

(APPLAUSE)

 

MR SPEAKER

Mersi Onorab Larue. Zis mon anvi, mon anvi zis fer en pti komanter.

Mon krwar staz konsiltasyon ek piblik lo sa Prozedlwa in fini. Ozordi Lasanble pe debat sa Bill. So annou fer atansyon ler nou pour dir ek dimoun ale regard sa ki la, pour fer komanter.  Akoz sa staz in fini, ler in ariv dan Lasanble la son sa ki nou apel White Paper in fini. Ok zis annou wi ti annan konsiltasyon. Ok?  Bon mon ava donn laparol prezan Onorab Charles De Commarmond.

 

HON CHARLES DE COMMARMOND

Mersi Mr Speaker. Bonzour Mr Speaker.  Bonzour Minis ek ou delegasyon tou Manm Onorab e tou dimoun ki a lekout.

Mr Speaker mon pa pour long lo sa Bill.  Sa Prozedlwa ki devan nou Mr Speaker i en bon Prozedlwa.  I en progre konpare sa ki ti egziste.  E ler nou regarde ozordi dan nou pei annan bokou konplent lo Planning Authority lo bann devlopman ki ganny fer.  Bokou dimoun i krwar pour dir bann desizyon ki ganny pran parfwa i pa neseserman dan zot lentere e zot krwar petet ki Lotorite Planning toultan i la pour vini pour pini zot, pour anpes devlopman – oubyen i annan serten lenzistis, serten unfairness e move zizman dan bann desizyon ki ganny pran.

E nou menm nou dan nou Lasanble isi a plizyer repriz, nou’n fer en kantite kritik lo Planning Authority e an menm tan nou’n fer osi bann sizesyon bann zizman ki nou’n pase e bann sizesyon souvandfwa bann bon sizesyon osi ki nou’n diskite dan nou Lasanble.

E tou sa nou kapab mazinen i annan akse ek lans nou’n koze tou le de kote latab nou’n koz lo akse ek lans. Nou menm nou lo nou kote nou’n vwar Prezidan personnelman, nou’n met serten issue devan li konsernan sa zafer akse ek lans. Mwan menm mwan mon’n anmenn Mosyon lo density ratio. Lo letan nou pe diviz bann later arpante, subdivide later ki nou pran konsiderasyon par egzanp lo kote dan Sid konpare avek dan lavil i annan diferan ratio ki zot servi; nou’n demande pour revwar tou sa bann keksoz. I annan kestyon later zeritye. Tou.

I annan plizyer issue alor in ganny anmennen dan nou Lasanble. E sa Prozedlwa ki devan nou e mon vwar Lotorite in ekout nou, in ekout nou Lasanble, in ekout bann kritik deor osi.   E alor zot oule depart from sa ki ti egziste pour anmenn amelyorasyon dan la fason keksoz i ganny fer.

Alors sa i en progre.  Sa i en pa dan li menm ki bon, e alor nou pe ekspekte ler nou aprouv sa Prozedlwa avek bann amannman ki ava annan, i ava en progre lo sa ki egziste.  An menm tan nou anvi osi fer resorti;- par egzanp yer, i annan bann kritik ki’n arive lo kestyon en devlopman dan lavil. Me mon krwar osi Planning Authority i bezwen kapab osi diskit ek dimoun.  Pa akoz en dimoun in son agent in fer en plan, in anvoy devan ou konmsi ki napa en relasyon.  I bezwen annan en relasyon.  I bezwen annan en vizit.  Zot bezwen kapab parfwa apel sa dimoun vin fer en ekspoze, osi avek zot lo sa proze ki annan.  E mon krwar parfwa i annan bann diferan negosyasyon.  Apre, nou bezwen osi get si obor sa devlopman i annan en devlopman ki li ou’n donn li sans par egzanp pour fer 3, 4 , 5 letaz, me ou prezan lot ki vin apre i pa ganny menm sans! Byensir tou dimoun pou r annan en rezon pour li kapab push son case, e alor nou demande ki i annan sa fairness.

E mon war poudir i annan let ki ou’n anvoy kot nou Mr Speaker la, e dapre nou Konstitisyon sa ou bezwen lir devan nou Lasanble.  E dimoun i konpran, i konnen, ki mannyer keksoz i ete.  Mon war ou pe esper ou konsey legal i a bon, mon pa pour fer komanter lo la pour le moman, akoz ler i ava ganny ekspoze Lasanble prezan i ava konpran pli byen.

Me selman nou pe lans en lapel. Nou pe dir Planning Authority atraver sa Prozedlwa osi, pa kestyon zis annan konpasyon, me annan donn sans dimoun pour ekout li, pour gete pour vwar ki mannyer sa devlopman petet ki pe ganny fer i blend avek sa ki annan otour li! Mon rapel en fwa Prezidan ti fer sorti en pwen – i dir ki Planning Authority oubyen bann Lotorite – bann Minister, zot pa la pour anpes devlopman dimoun!  Zot la pour diskit ek dimoun pour fer realize bann devlopman ki annan.  Ou konsey ki mannyer pour kapab fer sa ki byen e sa ki akseptab. So i annan sa diskisyon ki nou demande ki i egziste avek Planning Authority.

Lo sa Prozedlwa mon war petet i annan keksoz ki nou ti kapab azoute kekfwa dan Committee Stage, ki a kapab ganny pran an konsiderasyon Mr Speaker.

Mon annan 3 pwen mon oule avanse;- Enn en kestyon timeframe. Souvandfwa nou war bann dimoun ki fer zot laplikasyon apre pa ganny larepons.  E bokou i vin kot nou menm i vin dir poudir i pa’n ganny ditou larepons. I annan i pas 6mwan, 1an ensidswit. Mon krwar mon i bezwen annan en keksoz ki sorti klerman dan Lalwa, ouswa dan Regilasyon letan i ganny fer dan policy, dan Regilasyon plito ki i annan en timeframe.  Ou plan in antre ozordi, i bezwen annan sepa 6 semenn, sepa 8 semenn ki ou bezwen ganny en larepons.

Si ou plan prezan pa’n ganny sa laprouvasyon, ou bezwen ganny dir ok i annan en kominikasyon in writing, ki ganny fer, poudir lala ou pa pe ganny sa kominikasyon, sa laprouvasyon la pour tel rezon, e dan tan letan ekspekte – konmsi ki dimoun i konnen e i reliable en Planning Authority ki pli reliable, pli fer sans pour ki sa i  kapab konmsi fer li swiv son case.

En lot pwen ki mon anvi avans devan sa en pti modernite mon krwar i devret anmennen, parey nou Lasanble nou annan public hearing;- letan serten Komite i zwenn, nou dir dimoun i kapab vini ekoute, nou fer menm SBC, nou fer televizyon – piblik i swiv ki pe arive dan nou Lasanble.  Menm zafer Planning Authority i devret osi ouver laport pour ki en dimoun – Lakour, Lakour i ouver zot Laport – en case Ankour en dimoun – en piblik ki oule al ekoute, i annan en prosedir byensir, i ale i kapab ekoute!

Planning Authority mon krwar osi i devret annan en laport ouver – pa pour en dimoun vin fer dezord – byensir pa pour en dimoun vin enterfer dan zot travay, me pour vin swiv zot, pour vin ekoute, pour gete koman i pase sa bann deroulman laba, pour ki letan dimoun i swiv, i ekoute, i build serten trust la.  I build konfidans osi pour dir la, la sa lotorite i pe fer en keksoz ki byen or i pe fer en keksoz ki pa byen. So i ava ede pour gage travay e valoriz travay enportan ki Planning Authority pe fer.

En 3enm pwen mon anvi avanse, e ki petet osi sa dan Committee Stage i kapab ganny touse, se bann devlopman ilegal.  Plizyer landrwa – i annan dimoun i profite pour fer devlopman ilegal. I annan dimoun li i anvoy tou dimoun pronmnen i fer son devlopman pour li, e Planning Authority pa fer nanryen dan sa sirkonstans. Mon pe demande si nou pa ti kapab vwar dan sa Lalwa, en fason kot nou – i bezwen annan en pwen depar kot nou dir vwala tou bann devlopman ilegal nou donn tan letan, vini regilariz ou bann keksoz.  Pa okenn konmsi en moratorium konmsi ou dir be lala vini fer sa, napa okenn pinisyon, okenn whatever, zis pour legaliz bann keksoz ki ganny fer. Prezan from there nou fer nou komans, nou kontinyen fer sa ki byen prezan. Konmsi ki dimoun i bezwen ganny ankouraze pour fer sa ki byen dan pei.  Dimoun i bezwen ganny ankouraze e koman lotorite parey Planning pour nou kapab swiv sa bann keksoz.

Be ou pour swiv letan i ankouraz ou pour swiv e ki letan i byen osi.  Pa letan ou war sa lotorite konmsi en menas en bebet en keksoz ki pour fer ou per, fer ou enkyet e la mon pour al devan Planning la mon pour al fer sa, konsidere i pa pour aprouve, be i dekouraz ou!  Be i bezwen annan en sa ki nou fer i bezwen annan sa lankourazman, pour nou swiv sa bann lord, sa bann disiplin sa Lotorite pour nou kapab parey mon dir kontinyen fer sa ki byen.  Alor sa i bann sizesyon ki mon pe met devan e mon ti a kontan ki lotorite i pran konsiderasyon dan Lalwa ki devan nou.

akoz souvandfwa Mr Speaker ler nou get Planning Authority sa i ava mon dernyen pwen osi – nou vwar pour dir tou target, i parey dan Lasanble la nou’n fer depi yer, tou target konmsi CEO, pov CEO en bon garson mon konn li tre byen sey son byen, i sey son byen e i sey son mye i fer sa ki neseser. Problenm ek Planning Authority i pa CEO li, be akoz Planning Authority i annan en kantite Lazans – plizyer Lazans ki zwenn ansanm pour fer sa Planning Authority, pour fer li marse. I annan Land Transport, ou annan Lanvironnman, lot, lot, kot Health ensidswit. Depandan ou kalite devlopman ki ou pe fer. Alor sa bann lazans osi i annan en bearing, i annan en relasyon i annan en peze lo desizyon Planning Authority.

CEO oubyen menm dan appeal laba kot Mr Choppy ensidswit be zot,  be zot kapab dir be ok mon dakor ek sa plan, be Land Transport i dir ou non ou parking kote i annan problenm.

Savedir i kapab li pran son problenm kekfwa i pa fer avanse son problenm parking li son devlopman transpor, me i anpes ou devlopman akoz sa i pour annan en problenm pour li.  Ou konpran?  So i annan sa issue, menm zafer ek lanvironnman, mon pa la pour met tou sa problenm la, be mon krwar mon avek sa Prozedlwa ki devan nou, i moman pour nou tou depi Lotorite reflesir ankor davantaz, lo fason ki nou pran desizyon.  Et en pe pli rasyonal et en pe pli reel, e annan en pe common sense. Ou gete ou balanse ou diskite konmsi pour nou pa zis blok devlopman bann, nou sitwayen, nou bann Seselwa, me pour nou kapab ede pour nou pei avanse, pour bann sitwayen ki anvi devlop zot landrwa, zot later, ensidswit kapab fer devlopman, akoz devlopman i pour anmenn dibyen pour sa dimoun, e osi pour pei e pour nou teritwar.

So avek sa Mr Speaker mon pour siport sa Bill mon demande – mon kontan ki i annan en lanbyans pozitif la pour siporte sa Prozedlwa.  E apre midi parey ou dir nou ava dan Committee Stage e nou ava davantaz vwar ki mannyer nou pour enrich the Bill, sa Bill pour kapab fer li en keksoz pli reliable, pli byen pour nou pep. Mersi.

 

MR SPEAKER

Mersi Onorab De Commarmond. Mon a donn laparol Onorab Ahmed Afif.

 

HON AHMED AFIF

Mersi Mr Speaker.  Mr Speaker premyerman les mon dir ki isi nou pa vin maltret personn, nou pa vin baton personn, e nou annan respe pou tou dimoun.  Mwan mon annan respe pour Minis, mon annan respe pour son CEO, e son Board, me nou rol koman Manm Lasanble se nou reprezant dimoun ki napa en lavwa.  E nou, nou sa lavwa pour zot e alor nou vin koz lo sa ki dimoun pe dir lo sa size ki devan nou.

Sa Lalwa ki devan nou premye kestyon, eski nou bezwen en tel lankadreman? Larepons i kler wi akoz                                                                      ou ek mwan ki endividi si zanmen nou fer en lakaz, nou bezwen konnen poudir e i bezwen annan en lotorite ki dir poudir ou bezwen fer li dapre en serten norm.  Akoz ou fer sir ki ou viv an sekirite pour fer sir kou ou twatir pa tonm lo ou, pour fer sir ki ou annan en landrwa pour met ou desarz, ou annan en akse pour ariv kot ou.  Tousala i byen.  Si ou en biznes, sa biznes i bezwen dan landrwa ki’n dezinyen pour fer biznes.  I bezwen en landrwa ki pa akoz polisyon; i pa pe larg desarz, i pa pe afekte lezot biznes.

E si ou get lo kote lanvironnman e nou, nou en pei ki nou koz bokou lo lanvironnman Lotorite i bezwen annan en Lotorite ki li son rol se fer sir dan tou sa ki arive endividi oubyen biznes tou sa ki zot fer zot protez lanvironnman. Alor kot sa aktivite pe ganny fer si ou lo en lanmar si ou obor en larivyer, si ou lo lans i ganny fer an konformite avek tou bann standar ki annan, pour fer sir ki nou protez nou lanvironnman.

E nou bezwen osi fer e se pour sa rezon ki annan en lotorite ki drwa tou dimoun i ganny respekte par egzanp e ladan nou koz lo la akse pour ou ariv lo en lans.  Alor i bezwen annan en lankadreman ki fer sir poudir tousala pe marse drwa tou dimoun pe ganny respekte. Kestyon ki nou bezwen demande se eski tousala pe ganny swiv ozordi? Parski Minis in eksplik dan son entervansyon, nou annan en lankadreman ozordi, Town and Country Planning Act ki’n la, i en zouti ki ganny servi par Commonwealth, bokou pei i servi li, eski i pe ganny servi byen?  Larepons dan serten ka wi, me parey bokou entervenan in dir avan mwan dan bokou ka non. Parski i permet lentervansyon par serten dimoun e spesifikman en Minis – en politisyen pour zot kapab donn serten lord, serten direktiv ki kas bann norm ki’n deza etablir.

E legzanp i la pour nou tou vwar. Ou annan sato lo montanny, akoz sa msye li i annan en drwa spesyal. Nou kapab rod tou kalite rezon pour zistifye. I annan polisyon ki’n arive dan larivyer dan delo. E wi tou sa bann sityasyon Gouvernman i kapab korekteman be nou’n deal avek sa.

Me se pa kestyon si ou’n deal avek, se eski Lotorite sete pa son rol pour anpes ariv sa bann problenm? Parski ler problenm i arive se la ki larzan piblik i bezwen ganny verse; sela kot boubou in fini arive; sela  kot nou bezwen rod latizann.  Savedir Lotorite li menm – sa lankadreman ki nou pe rode, ki sipoze anpes sa arive in fail.  Ses a ki mwan mon pe dir.  Alor i annan plizyer legzanp – me mon pa pour al koz lo la, me zis mon anvi fer le pwen.   E mon a donn enn dernyen;- par egzanp, mwan mon rapel ler par egzanp lotel Equator ki ti en lotel ki ti pe ganny antreprann par serten endividi Onorab Ferrari ti enn bann dimoun ki ti en enplike ladan.  E akoz ti annan sa bann endividi ki enplike ladan, e sa landrwa ti en landrwa touristik rezerve pour devlopman touristik, ki nou ti vwar arive – en sel kou?  Gouvernman i deside fer en housing estate dan sa landrwa.  I devlop sa pour fer sir ki sa devlopman ki ti sipoze ariv laba – pa arive. I pa dan son lanvironnman kot i pour kapab fleri.  Zot in menm al ziska en degree kot ti annan  en stasyon resers, li menm zot in touy li, in fermen! Akoz zisteman sanmenm sa bann kalite devlopman ki pe arive tout otour li, kot son aktivite pa kapab kontinyen.

E alor sa ki’n arive dan lepase, sa lankadreman ki ti la, in fail dan plizyer lenstans.  E ankor enn fwa les mwan dir, mwan mon pa pe aporsyonn blanm avek sa bann dimoun ki la, me mon pe dir sistenm, Lalwa, Polisi, Bord, Egzekitif, tou sa bann zafer ki nou pe koz lo la ki sa nouvo Lalwa osi pe al i koz lo la, pa’n marse! E i pa’n marse akoz i annan serten defayans ladan.

Alor 3enm kestyon. Eski sa Lalwa ki la devan nou li i pour marse? E akoz i pour bezwen marse? Be mwan Mr Speaker si pou demann mon mon’n osi pas dan sa Lalwa, mon’n get en pe son striktir, i en pe parey Town and Country Planning Act.   I osi fer provizyon pour en Board i dir ou lekel ki i pour apwente. Mon annan serten kestyon lo la mwan osi. Ki mannyer sa bann – kote sa bann dimoun i sipoze sorti?   Me pli enportan sa bann pouvwar ki ou pe donnen avek Minis, en politisyen, i touzour la.  E la dan seksyon 8 par egzanp, ou vwar kot Minis i ganny pouvwar; ‘’the Minister may issue policy directives in writing to the Authority as to the performance of its function and exercise of its powers.’’

Zot a dir mon be ki annan mal avek sa?  Me nou konnen ki mannyer sa bann keksoz dan lepase dan konteks Sesel, i pa’n marse!  Nou konn tre byen.  Alor si nou pour remet li ankor nou pour met menm lanvironnman otour li, kwa ki ou pe dir mon pour fer mon krwar sa fwasi i pour marse.

Seksyon 32 ‘’Notwithstanding anything in this part, the Minister may if he or she is satisfied at any  time on the advice of the Authority it’s necessary for the national security, public safety or due to the occurrence of a natural disaster, so to do declare any land as no development zone.’’

Ankor i pe donn Minis en serten pouvwar. Seksyon 37 ankor kot i koz lo ‘national interest’.  

‘’The Minister may give directions to the Authority requiring that any application made to the Authority for permission to develop which involves … national interest, national security, health and safety be referred to the Minister for determination.’’

Ankor zot pour dir mon be ki annan mal ek sa?  Minis be nou’n vwar ki pouvwar Minis in fer dan lepase dan konteks Sesel.  Alors eski sa Lalwa pe anmenn en sanzman ki nou pe rode? E mon ti a kontan demann enn de kestyon Mr Speaker, kwa ki’n anpes ozordi, kwa ki’n anpes the Town and Country Planning Act, kwa ki’n anpes zot ki fer sir dan nou pei, nou annan nou bann lenfrastriktir, ki dan en Leta ki pa dan danze mon a donn en legzanp.

Ozordi nou annan nou en por e dan milye sa por, nou annan nou sel – well i pa nou sel me nou pli gran stokaz karbiran, heavy fuel, dyezel, benzene, gas tousala i lanmenm.  Be si ariv en dife e la mon bezwen dir i annan en pouvwar par lao nou ki’n fer sir e nou tou nou kontan ki zanmen in arive sa.  Me pa akoz zanmen in arive, pa akoz SEYPEC pa pe pran tou prekosyon pour anpes li arive ki i pa kapab arive.

Me akoz malgre tousala zis obor li, nou annan nou en por komersyal, kot nou annan tou nou marsandiz ki antre ki lanmenm.  Zis akote li sa boug ki pour al tenny dife zour sa dife i arive i pou’n fini brile li e i ankor lanmenm.  Zis akote li tou nou manze diri, stokaz, ponmdeter, zonnyon ki nou bezwen si i amann en dezas.  I lanmenm li osi, i pour ale li osi. Zot a dir mwan be i pa rol Planning Authority, i pa rol sa bann dimoun ki la pour rezourd sa bann problenm! Me i tonm dan lankadreman planning pour nou pei.

Oli sa planning? Oli sa planning?  E petet zot a dir be ok be zot in vin zwenn sa la.  Por i annan en bann lannen in ganny kree – depi konblaz sa lepok, stasyon petrol en kantite letan i ti la.  Be nou’n konble nouvo later.  Nou annan Ile De Romainville ki zis lot kote ki annan mon krwar 5 lelis lo la, napa nanryen lo la.  Pa ti kapab zis en sizesyon – mon pa ekspert ladan – pa ti kapab   repozisyonn tou nou bann stokaz karbiran laba avek en tiyo konekte anba delo, i anmenn sa lot kote?   Si i ariv en dife omwen i ganny tenir laba.  Byensir i pour annan son kou, me selman eski sa se pa en keksoz ki en Planning Authority – en Gouvernman responsab i devret annan koman en plan? Mwan mon krwar wi.

Akoz ki toulezour si nou annan en Planning Authority. Toulezour nou war partou dan bann semen, semen pe ganny kase.  Semen ki fek ganny konstri.  I pe ganny kase, nou pe pas en tiyo delo, nou pe pas en tiyo sewage, nou pe pas en tiyo elektrik.  Mon pa konnen ankor ki nou pour pase.  Me e ankor mon pa neseserman blanm zis sa bann dimoun ki dan Planning.  Parey Onorab De Commarmond in dir, zot osi zot travay ek lezot Lazans.

Me oli sa kordinasyon, kot zot fer sir poudir ler keksoz i ganny fer, i ganny fer dan en fason ekonomik e kordinen. Ekonomik akoz ou pa bezwen al kas semen 3 fwa pour fer menm louvraz. So mon get dan mon distrik Anse Etoile.

Anse Etoile ou get ki mannyer en Lazans ki pour Gouvernman. Mon mazinen sa letan ti Land Transport, in nobou fer en semen sorti laplenn La Retraite ki mont anler pour al North East Pointe sitan apik in ariv en kantite aksidan laba!  Be sa dimoun ki’n otoriz sa travay sete Gouvernman. Sa dimoun ki’n donn laprouvasyon sete Gouvernman. Zot ti annan en bord zot, parey sa Board ki nou pe al kree. Me semen i mal. Tou dimoun i konnen i mal!  Ankor mon pran Anse Etoile ou al kot sa pti dan kontour zis apre laboutik Naidoo, fek fouye la, ni en rock armoring pa’n mete, zot in fer en nespes pti konblaz la depi mon pe koz lo la! Mwan mon’n al lo site, Minis ti vin ek mwan. Me ki’n arive?  Nou ankor lanmenm!  Oli pantoon ki ti pour mete?  Pa ankor mete.  Oli rock armoring ki ti pour bar sa later? Sa later prezan pe koupe, pe dekol dan sa basen, bann pti bato peser mon fek pe koz enn Sanmdi kot i ti abitye mouye nepli kapab mouye li. Selman louvraz ti ganny fer pour zot kapab mouy zot bato pli byen.  Ti pour fer landrwa pli fon.  Be la kot i ti mouye i pa kapab mouye.  Akoz ros pe degrenn. Oli Planning?

Ki sa Bill ki devan nou pour anmennen ki pour al sanz tou sa bann keksoz. Se sa ki mon pe demande?  Annou pa al tro lwen ek Lasanble Nasyonal, annou al lanmenm Pointe Konan. Mr Speaker Pointe Konan i annan en konblaz ki pe ganny fer la ozordi.  I annan en konblaz ki pe ganny fer la ozordi e ler mon get plan mon war laliny kot in desinen, kot en laliny ver ki’n desinen ki dir ki bor konblaz i devret ganny fer, me aparaman sa dimoun ki pe al konble, i pe al konble an deor sa laliny ver li.

Be tou dimoun tout otour e mon konn en msye ki dan kontour obor kot laboutik Ponwaye obor kot pye kasi lanmenm, pye lafous, li in ganny dir non ptipti bout, me get sa grander ki sa msye ki la li i ganny drwa fer.  Alor oli pa i annan en Board?

Pa i annan en Planning Authority, pa nou pe al set up en nouvo Board?  Be ki diferans pour fer?  Ki mon pour al dir avek sa msye ki pour konvenk li sa nouvo Lalwa ki la pe al sanz keksoz?  Mon pa tro krwar mon. Parske problenm i pa avek neseserman zis sa Lalwa ki la, problenm i pli grav! Problenm i annan tro bokou diskresyon, lenterferans bann pouvwar ki pe ganny egzerse, ki fer tou sa bann Lalwa vin devan nou, vin koman bann Lalwa ki pa enportan, parski se sa enn ki ansarz, se sa direksyon ki zot pe anmennen ki pour vreman fer en diferans dan la fason Planning dan sa pei pour marse.

Alor Mr Speaker mon konnen mon’n pran en pe letan. Mon a konklir mon a dir ki nou koman LDS lo sa kote latab nou ti a kontan vwar?  Me nou, nou ti a kontan premyerman pour ed bann dimoun Planning Authority. Be pour ed zot premye keksoz ki bezwen annan, se ou bezwen annan en Gouvernman ki annan en vizyon!

En vizyon ki dir dan tel kantite lannen nou pour annan tel devlopman. Tel kantite nou later i ganny prezerve pour lanvironnman. Si nou annan en morse konblaz Ile Du Port in ganny reserve pour nou fer lapes, parski nou konnen dan sa prosen 10an pour annan lendistri lapes pe al agrande par tan kantite, e enn bann fason ki nou pe al agrandi li se valer azoute pour lapes. Nou pou permet bann biznes ki konekte ek lapes pour devlop sa landrwa.

Nou pa pou les par egzanp obor Independence School avek en laplenn obor li.  Dan milye ant sa laplenn avek Independence School en lot dimoun i ganny en morso later! Be manrmay pour bezwen pas atraver en lot bout later pour al kot laplenn?  Oli planifikasyon?  Ile Du Port si i sipoze pou valer azoute dan lapes, akoz ou pe vwar en lizin ton pe fer landrwa akomodasyon pour travayer!  Akoz?  Kote plan in al mal?  Oli Planning Authority? Eski zot ti ganny konsilte?

Planning nou pe koz lo enn bann pli gro problenm e Onorab Adelaide in mansyonn sa en kantite fwa dan sa Lasanble, problenm konzesyon trafik sorti dan Sid tou le bomaten e sorti dan lavil pour al dan Sid tou le bomaten. I en problenm Planning sa!

Petet Minis a dir nou dan son larepons eski ler solisyon tinel ti ganny propoze, zot ti konsilte ek Board Planning pour gete si sa pour en solisyon? Minis petet a dir nou wi. Mon pa konnen.  Eski ler zot ti dir pour dir nou annan en problenm – nou oule koup karbiran, nou oule annan en lot sistenm elektrisite, e alor nou pour al fer LNG, e akoz nou pour annan LNG, nou pour bezwen en kantite fasilite lo por pour nou kapab anmenn LNG. Parski i vin ek en gro fasilite stokaz. Lafason fason bato ki pour vini i diferan, eski Planning Authority i okouran oli sa bann plan?  Parski i annan en plan devlopman por la deza Linyon Eropeen pe finanse mon krwar €50 milyon. Eski zot in okouran?  Eski zot in konsilte? Eski tou sa bann plan devlopman i ladan?  Minis a dir nou dan son Right of Reply. Mon pa tro krwar mwan.  Tousala.  Akoz mon pa ankor en letid ki’n ganny fer, pour montre pour dir sa i meyer fason pour nou bouz devan.

Mon pa ankor war en letid pour montre ki mannyer tinel pour ede rezourd konzesyon dan lavil – pa Plaisance oubyen Cascade kot sa pon pour al konekte.  Mon pa ankor war solisyon mwan!  Eski Planning in dakor avek sa? Eski zot in ganny konsilte? Si nou fer nouvo Board eski sa nou Board pour ganny konsilte?

Parski si i pa ganny konsilte ki nou pe kree be nou pe zis kree en lot lorganizasyon. Se tou, i pa pour anmenn nanryen! Alor pour konklir Mr Speaker, pour mwan sa Lalwa i pa tro diferan avek sa ki deza la.

I annan serten merit dan, nou pe koz lo merit e mon war serten merit pour kree li parey i ete, me mon war tro bokou landrwa kot ou pe donn tro bokou pouvwar Minis.  E sa i devret ganny aziste.

Me finalman sa ki mon oule dir se, nanryen pa pour marse, si pei napa en vizyon. Si pei napa en direksyon.  E anba avek tou respe Minis mon konnen ou form parti Konsey de Minis, si nou pour kontinyen anba direksyon ki nou ete ozordi avek L’Egzekitiv, met nouvo Board, met nouvo Lotorite, nanryen pa pour sanze dan Sesel. Nou pour reste parey.  Nou pour leve demen bomaten nou pour tann en nouvo proze ganny anonse tou bann Lotorite pa konn nanryen ladan.

Se sa pli gro malez nou pei.  E sa pour ganny rektifye kan nou annan en Gouvernman avek en vizyon e sel Gouvernman ki pour annan en vizyon se en Gouvernman LDS.

E alor mwan mon ti a kontan zis pour konklir Mr Speaker, mon konpran merit sa Bill, mon konpran merit sa Bill me selman mon pa krwar i pour anmenn nou lwen dan devlopman nou pei.  Mersi Mr Speaker.

 

MR SPEAKER

Mersi Onorab Afif. Bon parey Lartik 102 (6) i stipulate lo kote Right of Reply, Nou’n fini donn go ahead Lofis Clerk pour sirkil kopi ofisyelman pou tou bann Manm. Zot ava war sa Right of Reply. E parey mon’n propoze avek CEO Francois bomaten nou ava regarde ki repons ki petet Minis i ava being in the House i ava take it up sa bann pwen dan Right of Reply dan son repons, ler i pe donn nou konklizyon, pe donn nou bann klarifikasyon pli tar apre midi.

Mon annan de pti lanons pour mon fer. Mon annan Defence and Security Committee ki pe met toudswit la dan Committee Room 3, apre nou annan ABC i pour meet dan Speaker’s Conference Room 1.15.  So vwala en pti pe bann roulman ki nou pour ki bann Manm i angaze ladan pandan lunch break. Yes Onorab Ramkalawan.

 

HON WAVEL RAMKALAWAN

Mr Speaker lo sa lanons ki ou’n fer konsernan let in sirkile e ki Minis pour donn dan son Right of Reply.

 

MR SPEAKER

Mon’n propoze.

 

HON WAVEL RAMKALAWAN

Be lefet ki let in sirkile la aprezan. Eski nou, nou pour ganny drwa fer serten referans avek let dan nou deba?

 

MR SPEAKER

Non sa i en drwa repons. I en drwa repons ki swivan – mon mazinen dan zot deba zot kapab tous ankor en pti pe lo bann pwen ki’n ganny leve, sirtou yer par Onorab Ferrari e lezot Manm. Me annou pa al direkteman lo sa Right of Reply. Annou pa al direkteman lo la eskan ler nou a kapab adres li. Dakor. Mersi. Yes Onorab Pillay.

 

HON SEBASTIEN PILLAY

Mersi Mr Speaker. Mr Speaker annefe Onorab Ramkalawan has got a very valid point. Akoz si dan Right of Reply i vin atraver Minis. Then Minis i napa the immunity factor which is associated with a Right of Reply. A Right of Reply i en Right of Reply.  So I think it is more prudent ki if I may propose it’s from the Chair.  Akoz mon ki point Onorab Ramkalawan pe raise, akoz otomatikman i pour annan – akoz in fini vin en lot fason ki in ganny fer. Unless Minis pour lir sa Right of Reply but in which case then it should be read by the Chair.  Zis annou konsider li. Regarde then we will move forward avek sa. Mersi.

 

MR SPEAKER

Bon mon krwar tou Manm i kapab tenir en pti pe lo la. Mon’n sirkil avek en kopi.  Mon kopi ki ti ek mwan avek Onorab De Commarmond, e mon vwar in montre zot 2 obor. Me Onorab De Commarmond pa’n mansyonn sa dan son entervansyon.  So eska ler mon ava ganny en repons avek CEO avek Minis, si zot pare pour pran sa, pour donn en pti sa bann leksplikasyon lo kwa ki’n arive, dan zot Right of Reply.  Parey mon dir i pa en dimoun an deor ki pa la dan Lasanble ki napa sa drwa ki pe demann lo zot behalf pour fer sa Right of Reply. Me la nou sirkonstans i diferan. Minis avek son delegasyon i devan nou.  E Minis pour donn en repons – i pour fer son repons lo bann entervansyon.  So se sa ki mon pe met devan li mon pe propoze. Me si i pa pare – then mon pour bezwen fer li from the Chair. Ok? So vwala rezon ki mon pe propoz li dan sa fason.  Bon nou ava break e nou ava retournen 2er pour kontinyasyon.

 

(BREAK)

 

MR SPEAKER

Bonn apre midi tou Manm Onorab. Bonn apre midi Minis avek ou delegasyon. E bonn apre midi tou dimoun ki a lekout e pe kontinyen swiv travay Lasanble Nasyonal.  Bon parey mon ti’n dir bomaten avan nou break lo sa kote Right of Reply Minis pour pran li dan son konklizyon ler pe fer konklizyon, koman klarifikasyon; lo bann pwen ki’n ganny leve yer, bann komanter ki’n ganny fer ouswa bann alegasyon ki’n ganny fer. So nou’n fini agree, nou’n agree avek Minis ki i ava pas lo sa let an term koman klarifikasyon, lo sa bann komanter ki’n ganny fer. Yes Onorab Ramkalawan.

 

HON WAVEL RAMKALAWAN

Mr Speaker point of order mon in fact repran sa pwen ki Onorab Pillay in leve bomaten. Mr Speaker si Minis in aksepte sa, savedir la the chairperson of the Planning Authority has got no authority.  The chairperson of the Planning Authority is under the thumb of the Minister! The letter was written by the Chairperson of the Planning Authority.  E sa i fer li dan son kapasite koman Chairperson sa Komite.  This is not an appeal ki nou al kot Minis.  Sa i Chairperson ki’n soz – alors  mwan mon krwar ki si Minis in deza pe dir i pour pran sa dan son Reply, then mwan mon war ki poudir deswit mon ava dir sa i montre nou kote problenm i ete! The power lies with the Minister! I think the Right of Reply –  the Right of Reply anba Konstitisyon in ganny fer par the Chairperson of the Planning Authority it should be read as the reply of the Chairperson e sa de pa kapab melanze! Mersi bokou.

 

MR SPEAKER

Mersi Onorab. Bon mwan mon ti pe pa enplik Minis ladan, akoz mon ki ti pe enplik Minis. So annou met Minis an deor. Mwan mon ti panse the way to do it, the panel is already in the House, the Minister is in the House ki dan son Repons Minis i kapab klarifye sa bann pwen. Se sa rezon ki mon pe, mon pa pe pran li koman Right of Reply. Mon’n agree ki Minis i fer li koman bann klarifikasyon. I ava pas dan sa bann pwen koman klarifikasyon. Me mon napa problenm si Lasanble i pran li koman Right of Reply anba Lartik 102(6) then I will read Right of Reply from the Chair. Ok?  Nou a fer li koumsa.

Bon mon krwar tou bann Manm in ganny kopi, nou’n sirkil kopi.  Ok tou bann Manm in ganny kopi? Alright. So mon pour lir the Right of Reply parey Lartik Konstitisyon 102 (6) i fer provizyon. Let in ganny ekrir lo non Speaker Lasanble Nasyonal National Assembly Ile Du Port. E in ganny date le 31 Zilyet 2019 savedir ozordi e mon’n resevwar sa let bomaten 9 er.                               ‘’Dear Honorable Speaker; Reference the right of reply the case of Mr Jean-Pierre Morin.

 This letter seeks to place on the record of the National Assembly on the facts relating  to the case of Mr Jean-Pierre Morin’s Construction along the market Benezet Street in Victoria and refutes all allegations made by Honorable Ferrari, that Planning Authority has acted in bad faith with regards to his planning application.

Parcel number V3703 (Republic of Seychelles) has been leased to Mr Jean-Pierre Morin on 24th November 2015 for a period of 99years for the construction of a commercial building providing on the ground floor for a meat and fish market in the form of 20 cubicles for rental to market vendors or local farmers and fisherman.

The lease took in consideration the urban design guidelines as stipulated in the report by AROP which the Government adopted for both the Market Street and Benezet Street and reflected same to a street covenant under section 9, 1(a) and (b) of the lease agreement. Same is stated below for the purpose of reference.

        I quote “before the propose development in respect of the permitted use stated in the first schedule, hereto is commenced; submit plan of the proposed development to the Planning Authority and obtain their approval under the Town and Country Planning Act, provided always that the plans of the proposed development meets the urban design guidelines, in terms of architecture and building heights of ground plus 1, plus attic on the sides facing Benezet Street and Market Street and ground plus 2, plus attic on the side facing the Market Street car hire.

        Prior to submission of a detail application the architect of Mr Morin met with the Planning Authority to discuss a proposal of Mr Morin, the urban design guidelines were provided to the architect for his design considerations. A pre planning letter was released to the architect on 16th March 2016, stipulating the provision of the guidelines (see attached).

On 28th July 2016 a formel submission of the development was made to the Planning Authority for decision making ( DC – 1006 – 16). This application as submitted was not in conformity to the urban design guidelines UDG, which was communicated to the agent as the agent submitted a ground plus 5 storey building instead. The agent submitted a basement floor for storage and canteen, a ground floor for market, first floor for offices and shops, second floor for food court and shops. 3rd floor for residential apartments, attic floor for residential.

        It should be noted that the applicant continuously challenged the UDG throughout and resulted into 4 (4) resubmissions before he complied with the UDG.  In other words he had to redesign his proposal 4 times prior to compliance.

As per the current policy for all non-residential development in Victoria, the final submission was submitted to the cabinet for views as a referral.

Subsequently on 8th February 2017, the Cabinet of Ministers pronounced it’s views on the application, and made specific emphasis on the need to respect the urban development guidelines and is hereby quoted, members proposed the need to respect architectural guidelines.

With all views obtained and considered the Planning Authority Board, approved the application of Mr Jean-Pierre Morin on the 29th May  2017. The application was approved, ground plus 1, plus attic, facing the Benezet and market street. And ground plus 2 plus attic facing the car park.

Request to include additional floors. Planning Authority did not consider the possibility to include an additional floor on the L shape building of Mr Jean-Pierre Morin as this will be against the urban design guidelines, which have been well reserved on and carefully guided for.  It should be noted that the urban design guidelines has been approved twice by the Cabinet of Ministers; once as guidelines in 2013, and the other as part of the Victoria Master Plan in 2015. And since its approval in 2013, the Planning Authority has not deviated from these UDG throughout all its approval on the market Benezet and Church Street.

        The Planning Authority Board feels that any major deviation from the approved UDG, will create a bad precedence and will be seen as unfair on other developments, which has been obligated to abide to guidelines in the past five years.  This is line with the spirit of the new law.  Honorable Ferrari listed certain precedence projects in the area and it should be put on record that all these precedence mention were before the adoption of the urban design guidelines.  

 

(Off-Mic)

 

MR SPEAKER

Mon annan laparol silvouple mon ava kontinyen?

However after much consideration through extensive consultations, the Planning Authority has agreed that a compromise of one additional floor on the Market Street and Benezet Street, can still maintain a Creole effect of a traditional building, if the architecture is maintained as per the urban design guidelines.

Thus the Planning Authority Board approved for a ground plus 2, plus attic on the market and Benezet Street as a compromise, and same was communicated to him officially through a letter dated 17th of June 2019.

He was told in the letter that if he accepts this proposal he needs to submit a revised drawing to reflects this for the Board’s consideration. Mr Morin appealed to this letter refused to submit a planning application for the additional floor and instead continues to raise the height of the building under construction and in accordance to the TCPA Stop Notice has been issued on Tuesday 30th July 2019.

Thus the Planning Authority as an Authority mandated under the Act, to uphold the provisions of the Act has not only acted in good faith on the application of Mr Morin, but as conducted its mandate without prejudice and  in impartiality.  

Honorable Speaker I humbly avail myself for any further query regarding this matter.

Your sincerely, Mr Cyril Bonnelame, Chairman of the Board of Planning Authority.’’

        Vwala alor Right of Reply ki sorti kot Chair of the Planning Authority. Yes Onorab Ramkalawan.

 

HON WAVEL RAMKALAWAN

Mr Speaker i annan zis en pti keksoz la lo paz 2 top anler i dir ‘’a pre-planning letter was released to the architect on 16th March 2016, stipulating the provisions of the guidelines. See attached.’ I don’t have it attached with the letter.

 

MR SPEAKER

Non. Mwan osi mon napa.   Mon pa konnen  si en mank ler zot in anvoy kot mwan. Mon napa mwan osi.  Ok?  CEO kapab sort out?   Fer kantmenm Madanm Clerk gannyen.  Nou ava sirkile.

 

HON WAVEL RAMKALAWAN

Yes.  Mr Speaker be i enportan pour nou ganny sa la. Parski i stipulate ‘Urban Design guidelines’ e i sipoze atase avek sa, be nou napa en kopi sa ‘Urban Design guidelines’ ki enportan pour nou, i enportan pour nou gannyen vi ki sa let la in ganny lir, pour nou konnen egzakteman kwa sa. Sanson i pour difisil pour nou anmenn en deba.

 

MR SPEAKER

CEO eski ou annan li petet menm soft copy?  Ou annan ou computer avek ou? Si nou kapab sirkile vitman.  Oubyen si ou annan en hard copy touzour nou kapab fer copy?

 

CEO MR JOSEPH FRANCOIS

(Off-Mic)

Yes

 

MR SPEAKER

Nou kapab eskiz ou en pti moman, ou ava fer le neseser. Eski antretan nou kapab kontinyen avek nou entervansyon lo Bill ki devan nou? Yes Onorab Ramkalawan.

 

HON WAVEL RAMKALAWAN

Mr Speaker selman i enportan ki – Ordinerman letan nou pas lo en Right of Reply, sa dimoun ki letan ou lir apre sa, sa dimoun ki sipoze sa Right of Reply in refer to, li osi tou i ganny en sans pour li fer en komanter.

 

MR SPEAKER

Wi, me-

 

HON WAVEL RAMKALAWAN

Mon konnen ki poudir nou’n fer li Onorab Ferrari pe aktyelman asiste en fineray right now. So eski mon kapab take it ki poudir Onorab Ferrari i ava ganny son drwa pour li refer to sa.  Thank you.

 

MR SPEAKER

Yeah. Me  an menm tan nou ava ganny sa extra bit of information.  Ok?

 

HON WAVEL RAMKALAWAN

Yes, thank you very much.

 

MR SPEAKER

Nou pa pe ouver deba lo la Onorab Pillay.  Ale.  Yes Onorab.

 

HON SEBASTIEN PILLAY

Mersi Mr Speaker on a point of order an relasyon avek sa ki’n ganny dir.  Mon krwar nou bezwen lir byen lartik 102(6). This is a Right of Reply. En komanter in ganny fer dan Lasanble and a reply has been given. If there is going to be reply on a Right of Reply i pour annan ankor en reply on the Right of Reply.

 

MR SPEAKER

Non, non, non.  Presedans ki sa Lasanble in fer-

 

HON SEBASTIEN PILLAY

We are creating a very bad precedence.

 

MR SPEAKER

Non, non, nou’n fer li avan.  I pa premye fwa ki – Aa Manm ki fer serten komanter oubyen alegasyon ki merit en Drwa Repons i ganny en sans zis pour fer komanteri pa pour en deba, i kapab fer komanter. Mwan mon ava veye ki direksyon i ale.  Ok? Mersi.

Nou ava alor kontinyen avek nou travay lo deba lo Physical Planning Bill 2019. Petet zis mon a fer en pti komanter. Minis mon pa konnen si mon pour servi sa term ‘exonerated.’ Mon krwar mon’n ‘exonerate’ ou prezan. Ou pa bezwen per petet en pti pe ki ou napa immunity isi dan Lasanble, pour lir sa bann klarifikasyon sa bann, sa Right of Reply. So mon’n retir sa devan ou Minis ou ava zis konsantre lo ou bann komanter vizavi the debate on the Physical Planning Bill.

Bon prosennman lo mon lalis mon annan Onorab Johan Loze. Onorab Loze.

 

HON JOHAN LOZE

Mersi Mr Speaker. bonn apremidi tou bann Manm Onorab. Bonn apre midi tou dimoun a lekout. Mr Speaker mon oule komanse par ofer en leskiz to the Chair, akoz yer en lenpresyon in ganny kree ki nou ti pe zwe en zwe tranpe pour nou pa koze, e pa lev lanmen. Kan ofet Mr Speaker sa i pa 100 poursan korek. Nou’n pas dan en move karder dan ou labsans letan Deputy Chair was in the chair kot-

 

MR SPEAKER

Non, non, non, non, non. Non, nou Standing Orders i fer kler. Ok? Anything to do with the Speaker the Deputy Speaker i conduct son business i ganny fer atraver en Mosyon. Ok?

 

HON JOHAN LOZE

That’s alright Mr Speaker.

 

MR SPEAKER

So nou kit sa ater annou al lo Bill.

 

HON JOHAN LOZE

Yes Mr Speaker. Mr Speaker mon krwar i bezwen ganny fer kler pour tou dimoun a lekout ki en lakonpannyen ki’n faid, pa pour zanmen kapab devlop en lotel. En lakonpannyen ki’n faid, ki’n martiriz son travayer, in trenn zot sepaman konbyen letan pour zot ganny en bout zot konpansasyon, pa kapab devlop en lotel whether i annan en housing estate la ouswa napa!  Sa bout mon krwar nou bezwen agree lo la, tonm dakor ki sa i napa okenn fot avek Planning Authority la.  Planning Authority pa’n faid lakonpannyen personn li.  Sa ki arive avek mismanagement bann dimoun ki pe zer en lakonpannyen, sa i antyerman zot fot! Ou pa martiriz dimoun pour zot ganny zot pti konpansasyon, apre ental en gran ilizyon ki mannyer pour diriz en pei!  Kan en lotel run into the ground. Mersi Mr Speaker mon ava kontinyen.

Mr Speaker in ganny dir pli boner ki fodre nou retourn dan lepase. Mon’n tann en Onorab koleg in fer sa statement.  Pou met keksoz an konteks en an perspektiv, devan nou ozordi nou annan en morso Lezislasyon ki si ganny aplike parey i devret ganny aplike, i pour ede pour rezourd en kantite lanpayaz difikilte e problenm ki dimoun i fer fas avek dan nou pei. Be si parey in ganny dir fodre nou retourn dan lepase, annou sers en pe   perspektiv e retourn en 40enn lannen an aryer parey zot kontan fer toultan, e nou tous enn bann morso Lezislasyon pli kontrovers ki nou pei in deza donn nesans sa se Tenants Rights Act.

Mon dir i kontrovers akoz en kantite dimoun in benefisye anba  Tenants Rights Act e tou dimoun ki’n benefisye zot kontan, zot satisfe be en kantite dimoun ki’n ale, ki’n kit Sesel ki’n perdi zot propriyete zot, zot annan lanmertim, zot annan en lakoler. En kantite sa bann dimoun i siporter LDS par kont.

Mon pa konnen si Onorab Loizeau i ava rapel en kantite zabitan Bel Air in ganny akse avek en kare later, letan ki Madanm Akba ti ale ti kit pei, e akse ek later ti vin atraver Tenants Rights sa bann dimoun Bel Air ti pe claim akse a Tenants Rights e madanm Akba ti vann sa bann later. Be zabitan Bel Air an gran parti in satisfe ki zot ti ganny en kare later.  Be bann fanmir ki’n santi zot dispossessed – depeize, perdi zot later, e natirelman pa kapab fer en revandikazyon, zot pa santi zot byen e sa se  le kontrovers e sa i kot nou ti ete.

Si nou get Tenants Rights Act i fer son premye laparisyon koman Act 24 of 1981, apre nou vwar li ankor koman Act 7 of 1984. Nou ti osi vwar li koman SI 32 of 1982, apre i annan en SI 95 of 1987 mon pa asire si sa ti en repeal.  Be sa ki nou vwar kontreman ek sa ki nou’n ganny dir, all along ki sa ti en decree Prezidansyel i en Act sponsored by a Minister. En Act me sa ki enteresan la se ki ant ‘78 avek ‘82 nou ti annan Planning and development ki ti en Minister; ant ‘82 a ‘84 nou ti annan Planning and External Relations ki ti en Minister e ant ‘78 a ‘84 Minis pour Planning ti pa dot ki Dr Jean Desire Maksim Ferrari!

E sa morso Lezilasyon la Tenants Rights Act, i annan en kantite dimoun, en kantite Seselwa ki dir ou zot in ganny malisyezman targete e viktimize anba sa morso Lezislasyon. En morso lezislasyon sponsored by a Minister. Minis Jean Desire Maksim Ferrari. Mon anvi poz sa la on the floor of the Assembly.  Mon anvi ki Seselwa i soak it in.  Zot konpran byen kwa sa, sa. Pa mwan ki dir retourn dan lepase. Pa mwan ki koz 40an koripsyon, 40an viktimizasyon, 40an martiriz dimoun. Mwan mon pe zis diriz latansyon lepep Seselwa ver en potential source of en bon pe martir viktimizasyon, koripsyon en soufrans pour zot.  Sa ki’n pas ladan i konnen. Sa ki’n temwannyen in admet poudir li in temwanny en kantite viktimizasyon zis ki in omet pour li fer, se diriz nou anver sours.  E la mon’n tal sours ater kler pour tou dimoun trouve.

Mr Speaker, Mr Speaker in ganny mansyonnen an plizyer repriz ki Lotorite Plan i pour ganny dirize par en Board. En keksoz ki Prezidan Faure in reisi fer letan in take over laprezidans se ki in ouver la fason ki i apwent bann manm Board.  In ouver lebra anver sekter prive. In ouver lebra anver bann dimoun ki annan parey Onorab Ramkalawan ti kontan dir a en serten lepok divergent views avek li menm.  E in etal lebra e tou sa bann dimoun in ganny plase lo bann diferan Board.

Ozordi nou annan loner isi dan sa Lasanble pour annan nou enn bann most successful CEOs ki nou pei i annan Mr Cyril Bonnelame pe asize la parmi nou. E i la dan son kapasite koman Chairman, i la one of the most successful CEOs akoz in grandi dan sekter prive. In diriz plizyer lakonpannyen prive. I la dan son  kapasite koman Chairman Planning Authority. E en dimoun parey Mr Bonnelame enn son komodite pli presye ki li i annan se son lentegrite, son lentegrite profesyonnel, son lentegrite koman en imen. En dimoun parey Mr Bonnelame i pa fer parey en Johan Loze li. Johan Loze in fer en ta bandisite dan son lavi!  En dimoun parey Mr Bonnelame par kont li in fer bon swa, in fer bon desizyon, in protez son repitasyon e in defann son lentegrite. E se sa bann dimoun parey li ki nou bezwen lo bann Board. Egzakteman sa. Be i domaz, i regretan ki nou isi dan sa Lasanble letan nou annan en dimoun kalib parey li fas avek nou, nou dir, i kapab ganny dir ki mon pe impute improper motives vizavi Board Planning Authority e mon mon pour dir wi, wi mon pe impute improper motives.

Be letan en dimoun i fer koumsa i dir en keksoz koumsa, eski i pe ankouraz bann lezot profesyonnel an deor ki pe ekoute la fason ki en dimoun avek sa galon leksperyans ki Mr Bonnelame i annan, i ganny trete dan sa fason, eski i pour ankouraz zot demen pour reponn lapel zot pei? Pour met zot kouraz an servis zot pei? Eski en zenn profesyonnel demen li i pour le take up the mantle of en Board, responsabilite Board, chairmanship en Board zis pour kelken dir i pe impute improper motives lo li, lo son Board lo son lorganizasyon san bezwen fer okenn – soumet okenn laprev san bezwen zistifye sa ki in dir; zis nou balans sa dan ler, e tou i byen?  Tou i ok?

Nou osi annan nou CEO Lotorite Plan ki pe asize la avek nou ki son drwa lasosyasyon politik i ganny defann anba Lartik 23 Konstitisyon sa pei ki apel Sesel.

 

(APPLAUSE)

 

HON JOHAN LOZE

I annan li en drwa pour asosye avek okenn parti politik ki li anvi. I annan drwa milite pour sa parti; i annan en drwa et en aktivis pour sa parti si li i anvi. E ki i arive isi?  Nou fouy dan sa Act – nou fouye, nou rode ladan ki bor ki dir ki CEO i kapab et aktivis pour en parti politik.  Be sa Act la i supersede Konstitisyon Sesel li?  I pli o ki Konstitisyon Sesel. I defet Lartik 23 li?

Bon, nou’n osi koz bokou lo gous, koripsyon, wi zot in koz lo zak, domaz – zot in koz lo gous, zot in koz zak antye zot in sot legren, zot in al lo zak. Be letan nou koz lo gous, nou koz lo koripsyon Onorab atraver ou Mr Speaker, annou adopte menm prensip ki nou enskri nou zanfan ler zot pe koup semen.  Get gos, get drwat, get gos ankor, get byen otour, si obor ou napa sa bann keksoz ki ou pe koz lo la! Akoz ozordi nou’n ariv en staz dan sa pei, letan mon kouzen in somehow over son lifetime in acquire 112 morso later – mon pa nonmen mon kouzen mwan! Mon pa nonm mon kouzen, ditou, ditou, ditou, ditou – mon nonm sa Minis ki annan 52 bout. Akoz par zot matematik mon prezimen 52 i plis ki 112, alors i normal pour nonm sa Minis ki annan 52 e pa nonm nou kouzen ki i annan 112.  Sa i posibleman eksplik tou sa bann zafer.  Nou osi koz lo Sef i annan isi, Sef i annan laba, Sef i annan lot, Sef in acquire isi, Sef in acquire laba. I byen.  Sef i annan kontak.

I annan en morso later dan plato Anse Royale ki ti ganny acquire – Sef in acquire pour R35mil.

 

 

(laughter)

 

HON JOHAN LOZE

Sef ti napa

 

MR SPEAKER

Onorab,

 

HON JOHAN LOZE

..ti napa-

 

MR SPEAKER

Onorab en moman. Ankor ou kestyonn, nou tou nou konnen, nou tou nou konnen sa alegasyon anver ki ou pe vize!  E ou selman kapab fer sa anba en Mosyon ki ou anmennen.

 

HON JOHAN LOZE

Mon pa’n nonm non personn mwan Mr Speaker!

MR SPEAKER

Nou tou nou konnen.  Nou tou nou konnen anver ki ou pe anvoy sa.

 

HON JOHAN LOZE

Mr Speaker si dimoun i sansib mon ava kit ater.

 

MR SPEAKER

Onorab, Onorab mon pa kontan bann komanter koumsa. Ok? Zis mon’n dir ou poudir pour ou koz lo okenn Manm Onorab dan sa Lasanble, lo zot bann byen personnel, and so on, lo zot dealings and so on, ou bezwen fer li dapre lareg sa Lasanble. Ok? Annou kontinyen lo sa Bill ki devan nou.

 

HON JOHAN LOZE

Mersi Mr Speaker. Mr Speaker Onorab Noline Sophola nou’n tripot tou son byen lanver bon kote, zanmen personn in anmenn okenn Mosyon.

 

MR SPEAKER

Onorab, Onorab, mon krwar mon pour bezwen call ou to order now!

 

HON JOHAN LOZE

Yes Mr Speaker.

 

MR SPEAKER

Sityasyon avek Onorab Noline Sophola, Onorab Sophola ti demann en Drwa Repons pour li klarifye son pozisyon e mon ti permet li fer sa.  Bomaten i annan serten komanter ki’n komans ganny fer lo kote, lo kote LDS, mon’n aret li byen boner.  Akoz ler Onorab Sophola ti’n komans koze, ti annan en komanter ti ganny fer lot kote e mon’n tande sa komanter!  Pa toultan ki mon tande. Petet mon annan en problenm hearing mwan osi tou.  Me parfwa mon tande.

E bomaten koman sa komanter ti’n komanse mon’n aret li e Onorab Sophola in kapab fer son lentervansyon. Ok?

 

HON JOHAN LOZE

Mersi Mr Speaker.

 

MR SPEAKER

Thank you.

 

HON JOHAN LOZE

Mr Speaker. Pour okenn dimoun ki oule akse avek sa Bill ki devan nou Lasanble ki pe ganny diskite ozordi, mon ti a kontan enform zot ki Bill i lo website Lotorite Plan, e in la pandan en bon moman, nenport dimoun i kapab ganny akse avek. Nenport dimoun i kapab ale vizit byen sa Bill, scrutinize e zot ava konnen egzakteman kwa ki nou pe diskite.

Mr Speaker Bill ki devan nou, i annan koman fonksyon pour asir devlopman dan en fason ki ordonnen, byen kordinen e striktire.  I la pour asir en devlopman pour pei ki armonye e progresiv.  Sa ki nou bezwen set en balans bann diferan eleman dan nou sosyete e  devlopman e progre, ki aport en serten larmoni. Sa Bill atrever son bann diferan konponan, i adres kestyon kalite e osi dansite okenn proze devlopman dan nou pei.

Me egalman Bill i annan provizyon pour adres kestyon prezervasyon labote natirel nou pei.  Mr Speaker Lorganizasyon Nasyon Ini  UN Habitat i ensiste ki move planifikasyon i kontribye ver kreasyon lapovrete.  E sa kestyon kreasyon lapovrete nou pe komans trouv li menm isi Sesel, kot serten kominote in deza ganny marke pour latansyon irzan. Menm si sa bann kominote ti deza la depi lepok kolonyal, sa i devret donn nou bokou leson dan kwa ki nou pa devret pe fer, me pli enportan ankor kwa ki nou devret pe fer.

Imen i bezwen kontak avek lanatir. Imen i bezwen lespas ver pour li resourse e respire.  Ou pa kapab anferm en kominote imen dan beton e ekspekte en rezilta pozitiv. Perseverans par egzanp, i annan en tre zoli lakot. Sa i ideal pour met en bike lane, ki ava osi servi koman en promenad tou dilon son lakot, lespas natirel pour imen enterakt respire e resourse. I retonm lo Lotorite Plan pour asire ki tou bann gran devlopman, ki ganny propoze par Gouvernman, i posed tou bann neseser ki lakominote pour bezwen. E sela kot Lotorite Plan i bezwen asire, ki zot annan ase resours pour travay. Mr Speaker. i pour depann lo Lotorite Plan li menm, pour balanse gete e deside si i annan ase travayer; si i annan ase travayer konpetan e kalifye; si larzan ki i pe gannyen dan Bidze, i ase e i pour depann lo li pour avans devan pour fer son demann pour gete ki mannyer nou, nou pour kapab asiste, ed li.  Sa Bill ki nou pe debat lo la i pa en magic bullet; i pa en baton mazik; i pa pour aport solisyon mazik. Me Lotorite Plan par kont li i kapab take stock entern, kwa ki i bezwen e les nou konnen.

Mr Speaker i annan bann sityasyon ki nou pei pe fer fas avek konmela, ki posibleman nou pa’n zwenn dan lepase, e ki planifikasyon i kapab ede avek.

Enn – adaptasyon avek sanzman klima ki enkli redwir vilnerabilite fas avek dezas natirel.

E en pwen ki Onorab Flory Larue in koz lo la en bon lo la boner se planifikasyon fizik i osi enpakte lanvironnman sosyal en kominote, e menm son soutenabilite ekonomik. Prezan kestyon ki begs itself se eski Lotorite Plan zot annan teknisyen kalifye dan sa bann domenn, tel ki parey mon konnen lo Board i annan bann Zofisye Lanvironnman ki vini; i annan bann zofisye sorti dan bann diferan lezot Lazans ki enterakte lo Board be internally eski zot annan teknisyen kalifye dan sa bann diferan domenn, ki zot pour bezwen pour le fitir? Eski zot annan ase staff pour komanse? Lekipman e larzan? Akoz mon santi ki si zis nou aprouv en Bill, nou donn zot en nouvo Act anba lekel pour travay, san ki nou cater pour zot bann lezot demann e bezwen, nou pour fer zot en gro lenzistis.  E nou pa pour rezourd problenm.  Nou pe zis met en pti pe papye kado lo problenm, fer li klate, fer li zoli, e zot pour walk out avek zot problenm ankor dan zot lanmen.

Mr Speaker mon krwar sa ki Lasanble ti a kontan vwar se en lenstitisyon ki kapab fonksyonnen efektivman, pour garanti prosperite sa pep Seselwa, e asir larmoni ant konstriksyon lanvironnman e nou popilasyon. E si nou kapab atenn sa – si sa i en achievable goal mon pa krwar ki any amount of money ki rezonnab i devret ganny held from Lotorite Plan pour zot attend sa bann bi. So mwan mon ti ava siplir avek zot pour met zot bann demann forward, fer en bon assessment an relasyon avek sa nouvo Act ki zot pe gannyen pour travay avek, e fer en bon travay pour lepep Seselwa. Mersi Mr Speaker.  Thank you.

 

MR SPEAKER

Mersi Onorab Loze. Mon a donn laparol Onorab Aglae.

 

HON EGBERT AGLAE

Bonn apre midi Mr Speaker. Bonn apre midi Minis, CEOs ek ou delegasyon.  Bonn apre midi tou bann Manm e tou dimoun a lekout.

Mr Speaker nou pe debat lo en Bill ki vreman enportan, akoz sa Bill li menm li i sofgard nou bann devlopman ki’n pase e osi bann devlopman ki pour vini a lavenir. Mr Speaker kestyon fondamantal ki nou kapab demande, se eski nou merit annan en tel Bill parey? Eski i annan nesesite pour nou fer bann amannman neseser atase avek sa Bill ozordi ki nou pe diskite?  Mr Speaker larepons byensir se wi. Sa Bill pe met li azour avek modernite e rapidite devlopman ki annan ozordi e legzizans zonm dan son fason fer, pour kapab ki annan serten lord i ganny etablir. Serten oversight ki kapab ganny mete lo aktivite ki zonm i propoze ouswa met devan.

Mr Speaker bokou in ganny dir, ouswa in koz lo la kot i konsern planifikasyon. Mon’n tann nonm dir atraver ou bann move planifikasyon ki’n ganny fer me sa ki mwan mon konnen parey granmoun toultan i dir, dan lavi i bezwen annan bann trials and error pour kapab bouz devan.

E bokou mansyon osi in ganny fer sorti ki ozordi nou pe war serten defi ki atase avek rapidite devlopman, e in ganny dir poudir move planifikasyon. Mr Speaker serten i zistifye, me serten pour mwan pa zistifye. Mr Speaker en legzanp ki mon ava donnen sete, sa pti lavil Victoria ki nou, mon depi ler mon’n, mon’n war li e si nou rapel byen e mon osi ki mon ankor rapel depi lontan, e bann portre ki annan ki egziste dan Larsiv ozordi, nou kapab fer referans se ki par egzanp kot laboutik Tinsamy ti ete ti annan en delo sale ki ti pase ti baliz avek lanmer.

E tousala i ale tou dilon me azordi Mr Speaker apre devlopman bann proze konblaz, nou’n war lagrandisman nou lavil.  Me Mr Speaker menm si i annan lagrandisman nou lavil ki’n ganny arive, nou war poudir i annan serten planifikasyon ki ti kapab ganny amelyore.  Me osi nou konstate poudir sa bann letan ki nou ti dan letan kolonyal letan nou ti ganny nou lendepandans, pour sa ki rapel ouswa i a koriz mwan pa konnen si ler Angle ti ale ti kit en Master Plan pour Sesel. E pour mwan sa Mr Speaker serten mansyon ki’n ganny nonmen sirtou ki’n koz lo parking. I annan serten Onorab ki’n koz lo parking ki dir sa i baze lo bann move planifikasyon.

E mon fer resorti Mr Speaker poudir i annan serten eleman ki ganny dir ladan ki i korek, me i annan ki pa ditou korek. Ler ou pe get lavil sirtou nou pe get Market Street atraver ou Mr Speaker Onorab Arissol, Sandy, Onorab St Louis i son distrik, nou konnen poudir sa bann letan Sir Selwyn Clerk Market, ti ganny konstri dan son 1800 apre in ganny renovate. Mr Speaker son larsitektir son bann semen i ankor preski parey.  E nou imen nou’n devlope nou’n bouze e ler ou pe kalkile Mr Speaker par lannen, nou pour annan nou plis ki 2500 loto ki pe ganny anrezistre dan sa pei.

E nou konnen poudir lavil Victoria in ganny satire napa landrwa pour li ale, i pa kapab mont dan montanny. Sel landrwa pour ale, si nou anvi kontinyen agrandi li, se al ver lanmer e sa se progre konblaz. E nou konnen poudir a sa letan ler konsep Victoria ti ganny kree, petet ti annan en santenn loto ki ti pe roule lo semen.  E ti napa konzesyon. E pour nou ozordi tou bann trou ki nou kapab dir, nou kapab antre pour nou park ozordi, sa ki konn Victoria byen, tousala i annan bann building ki’n ganny monte.  E se sa problenm ki nou pe pas atraver si ou war nou annan bann konzesyon. I pa bad planning sa.  Akoz si ti bad planning nou ti ava dir poudir be ok, si nou pour petet forward thinking, tou building ki dan Victoria ozordi nou dir fer sir zot annan zot parking pour zot operate, akoz sa i en kondisyon ki Planning i egzize ler ou fer ou loperasyon.

Eski dan Victoria ozordi tou sa bann building ki egziste i annan en fasilite parking? Larepons i non.  Alors eski nou pour anpes zot operate?  Ouswa nou pour dir zot be kraze fer en lot?   Met ou parking anba ouswa anler?

Alor Mr Speaker i annan serten largiman ki pa hold waters parey Angle i dir fodre nou konpran ler nou fer serten lakizasyon.

Mr Speaker mon pour retourn lo sa Bill ki mon anvi koz lo la la ki mon pe koze, sa Bill i pe anmenn en nivo latransparans dan bann desizyon ki ganny fer. I pe anmenn bann experts sirtou bann sa technical committee ki pe ganny mete.  I ava annan son board ki ava annan son rol oversight.  E sa Bill pe tir en pe pouvwar ki Minis i pour annan the final say, e menm CEO i pour napa bann gran desizyon efliyansyel kot i konsern sa Bill. E sa i pe anmenn nou dan en direksyon kot sa ki nou kontan dir la anndan politik – tir politik. Mon konnen pour dir Minis i sorti dan parti ki o pouvwar alors sa ki enportan i the ruling party, ruling party ki o pouvwar.

So si nou, nou anvi fer serten keksoz lo sa ki nou prese lo latransparans, lo fairness, lo accountability alors sa i bon direksyon. E mwan mon ankouraze pour dir nou bezwen al ver sa direksyon, kot nou tir politisyen dan sa bann decision-making process.

Lot nivo Mr Speaker letan nou pe koz tir politisyen, nou politisyen ki la anndan osi, nou bezwen at least swiv sa trend ki pe ganny fer ozordi – sa fason fer. Mon dir sa Mr Speaker si demen enn nou dalon, nou zanmi, nou korespondans nenport i annan son plan in vin ek son plan devan i pe pas dan serten difikilte, ouswa i pa ganny aprouve, si nou politisyen nou pour enterfer pour met presyon lo sa Board ouswa lo sa Planning Authority pour fer pase case ouswa sa endividi ki nou byen avek. I pa sipoze koumsa Mr Speaker e nou pa kapab kontinyen dan sa laliny.

Menm sityasyon Mr Speaker mon pour met devan ki i annan serten keksoz ki kapab vin devan Gouvernman li menm. I kapab vin devan Prezidan i kapab vin dan zorey Minis me nou, nou santi pour dir sa i bezwen swiv sa prosedir ki Planning in ganny met an mars vin ek ou plan. I ava annan en land use plan ki nou’n koz lo la la, ki i al mete; si i anliny tou bann teknikalite i ok in ganny obzerve e ou plan i ava ganny aprouve.

Mr Speaker dan sa Bill osi i fer mansyon sa land use plan mon krwar ki bokou nou, nou’n koz lo la e pour mwan mon oule tous li en pti pe pli profon akoz i annan son bout osi ki pour afekte mon distrik Port Glaud atraver sa land use plan.

E mwan dan lespri konsiltasyon e ki mon ensiste ki konsiltasyon i merit ganny fer a tre profon akoz si nou pe dir pour dir ler ou fer land use plan, si i annan en endividi ki son case pa pour ganny aprouve nek apre 10an ki li i kapab vini i vin fer en review – mon santi poudir la 10 an en ta letan pour en dimoun espere, me si nou fer bon konsiltasyon e sak endividi ki pe mazinen ki annan son propriyete, ouswa ki anvi lans li dan okenn devlopman biznes, i ava fer son homework byen davans, e la i ava met son bann soumisyon ase boner pour fer sir ki i pa por bezwen esper 10an.

Mr Speaker en keksoz enportan laliny se ki dan sa Bill, mon’n koz lo latransparans, se ki bann aplikan ki ganny rezete i annan rekour pour li ale. I kapab al devan sa appeal, Appeal Board si li i pa satisfe sa ki Appeal Board in pran desizyon lo la   ler in sorti kot lotorite anba avan i menm annan rekour pour li al Ankour, met en case, ki fer ki avan ou keksoz i ganny dir ou pa pour kapab fer, ou annan sa bann layers ki ou’n pase.  E ou pa pour kapab dir ou’n ganny viktimize si ou’n pas atraver sa 4, 5 steps, ziska si Lakour li menm – petet li i a war pour dir be nou pa pour kapab grant sa permission, la petet ou a dir be la mon’n fini egzos tou.

Petet parey i annan serten dimoun i dir be mon ava al kot Lakour Enternasyonal be selman sa Bill pa fer mansyon ek sa bann keksoz koumsa, i strikteman lokalman.  Me selman Mr Speaker in donn ou bann fason fer bann layers ki ou pour swiv, pour kapab vin avek ou bann plan devan ziska ler tou keksoz i aprouve.

Mr Speaker en lot pwen enportan ankor ki sa Bill pe touse se sirtou dan part 11 sa Bill se sa oversight role ki sa body i annan pour fer. Mon krwar i enportan Mr Speaker ki plis lanfaz resours imen sirtou i ganny mete lo sa oversight role ki sa Lotorite i annan.                        Mr Speaker mon sir sa akoz in arive dan lepase, kot bann devlopman in ganny fer; sipervizyon pa’n adekwat e ler keksoz in al sitan mal e la ki nou war nou bezwen sot devan parey nou dir, nou pe al tenny dife. Me si ti annan depi komansman bann prosedir ki kler, lo oversight ki’n ganny fer byen, nou pa ti pou bezwen pas atraver bann kalite sityasyon e menm Gouvernman li menm li bokou milyon, milyon e milyon.

Mr Speaker sa i pa move planifikasyon sa.  I zis ki swa ou ti napa ase resours imen pour al fer sa travay, ouswa ou’n pran keksoz dan en fason letarzi ou’n asize ou pa’n anvi gete; ouswa li menm li petet i annan serten keksoz petet ki’n arive ki an deor ou kontrol. I arive sa.

E 2enm pwen Mr part 11 Mr Speaker se sa sans disclosure.  I fer referans avek serten nivo konfidansyalite ki sa Board li menm li i bezwen kapab obzerve.

Mr Speaker dan lepase nou’n war souvandfwa dan zournal dan bann lartik  -menm lo rezo sosyal, kot lenformasyon devlopman serten endividi in ganny pibliye.  Ki sipoze pour sa endividi.  Mon dakor i annan access to information, me access to information i rekomande ki en lotorizasyon from sa endividi i ganny donnen avan ki nou kapab disclose son lenformasyon.

Mr Speaker sa mon demande ki i bezwen annan serten protokol serye, ki sa Lazans i bezwen swiv si okenn lenformasyon i ganny donnen malapropo si ganny sa ki responsab, i bezwen ganny deal avek.

Mr Speaker part 111 sa Bill i fer referans avek sa famous land use plan ki nou tou nou komans koz lo la. Mr Speaker Port Glaud mon kapab dir nou kapab servi zis 20 poursan sa later ki nou annan. Malgre nou pli gran distrik 27 kilo met kare, nou kapab servi zis sa low lying area ki tonm apepre 20poursan devlopman ki nou kapab fer.  E mon santi pour dir ankor dan 5an – 10an si nou pe koz bon planifikasyon e la mon a dir ek Gouvernman Minis i la si nou pe koz bon planifikasyon nou bezwen komans travay lo dan sa land use plan ki nou pe etablir, ki mannyer nou pour allow gradyelman mont en pti gin vertikal anler.  Pour fer ki nouvo zabitan – bann ki pe vini bann ki aspire pour ede dan devlopman, ouswa menm bann ki sorti an deor distrik, i kapab vin donn en koudmen devlope.  Akoz nou annan en rezerv ki sitan gran.                                   Nou annan en forestry – F1 ki vreman ba avek bann letablisman ki ete ozordi, e nou pe lans lapel – mwan mon’n deza demande pour rektifye sa at least allow serten soft development  pandan sa prosen detrwa lannen ki pour vini, ki a fer ki nou ava annan serten opsyon dan ou distrik, san detri nou lanvironnman byensir.

Mr Speaker part 1V sa Bill i fer serten referans avek serten Regilasyon prosedir sirtou kot i konsern bann encroachment. E mon demande ki i annan en fason fer ki kler.   Ki ou fer si ou dekouver pour dir parfwa petet in arive ki i annan encroachement lo later ki swa prive, kwa ki pour Gouvernman – e nou konnen poudir ler i ariv prive, i annan serten kozri ki ganny fer, ouswa menm i annan case ki al Ankour e osi i annan encroach lo later prive. Alor Mr Speaker, nou bezwen annan en prosedir kler ki nou kapab remedye en size encroachment san ki petet nou vin gro lebra, zis dir kase nou konnen poudir i annan kou ki atase avek konstriksyon.  Me si sa endividi i pa’n fer li lo en baz malapropo, petet in fer san son, li i pa teknikal, son kontrakter in vini in antre, ouswa i pa’n la dan pei in kit en dimoun pour sey fer son travay devlopman. Tousala in arive, alor i ava annan en fason fer ki nou kapab deal avek sa bann sityasyon parey.

Mr Speaker en bout enportan ankor ki mon santi i kapab tous mon distrik dan sa Bill, se bann landrwa akse leisure area sirtou kot i konsern lans.  E la mon pour fer mansyon avek kot Mahe Beach Mr Speaker, kot pti zil, kot i annan en landrwa kot mon bann piblik menm an deor i zouir.

E part 1V i koz  lo ‘’land and public interest’’ e bann leisure area, beach access ki ganny servi frekaman par bann Manm piblik, touris e nenport. E la mon santi pour dir ki si i dan lentere Nasyonal i dan lentere piblik serten sa bann landrwa, menm si in ganny mete dan prive ouswa prive ki’n aste, nou kapab antre an negosyasyon avek sa propriyeter, pour fer ki si i annan en devlopman – nou pa anpes li fer devlopman nou me si i annan en devlopman, nou bezwen mazinen poudir i bezwen annan en akse ki piblik i kapab servi, pour li kontinyen zouir; – dan plas zis nou pour fer li en total petet – en ban kot i pa kapab vini, ou met en baraz tousala.  Bokou Onorab in koz lo la, ou santi poudir sa landrwa i kapab ganny servi.

E parey kot pti zil mon pe demande – e la mon pour lans en lapel ki i annan prosedir ki nou’n deza – serten demann ki distrik in fer  Lotorite pour nou ganny sa pti bout adisyonnel kot pti zil, pour kapab allow serten bann pti devlopman, ki nou kapab fer dan lentere tou dimoun ki vin lo sa lans servi pour fer son bann aktivite.

En lot pwen Mr Speaker se bann subdivision – subdivision ki ozordi anba Lalwa Planning si i pa anba 400 met zot pa pour donn permisyon; sof si ou bezwen kapab at least zistifye poudir akoz ou bezwen sa subdivision ouswa si i pour meet serten kriter ki zot, zot Planning zot bezwen deside. Mr Speaker bokou lakaz ki’n ganny konstri plis ki 25an, 30an pase e dan port Glaud mon pe dir, mon pe koz lo la ankor baze lo leksperyans. I annan menm later ek lakaz ki 200 ekek met kare sa bann letan. So si en fanmir in war poudir nou konnen ek sa problenm lakaz ki nou annan ozordi lalis i long, espere, nou bezwen esper 2an, 3an pour en proze kontinyen konplete, be si sa fanmir in anvi donn son pti bout, annou sey get en kou en pti pe pli byen.  Mon pour dir pli byen. Mon dir pli byen akoz ler ou refiz sa enn manm fanmir ki anvi konstri son lakaz, nou pa premyerman ogmant sa lalis ki deza long li menm – ouswa i annan serten problenm ki pour leve a lavenir ki pour fer si nou ti’n adres sa sityasyon, dan en fason ase ok mon kapab dir, nou ti’n kapab donn sa fanmir sa permisyon pour li konstri – i ti’n mont son lakaz.

Mon konnen sewage i en problenm.  Avek letan petet bann sewage treatment plant ki pe ganny konstri en pe  partou, partou i ava kapab rezourd e la nou kapab revwar en pti gin sa Polisi la dan sa Lalwa sa Polisi ki fer ki sa 400met i kapab petet redwir dir ok be 200 met i ase rezonnab pour ou met en lakaz 2 lasanm.  Sa Mr Speaker i enportan pour nou take note lo la.

Mr Speaker i annan the famous right of access. Bokou Kankan i leve lo sa bann sityasyon parey e Bill ozordi e mon santi pour dir en proper land use plan, ki pe ganny fer ki pour ganny fer pour sa prosen 10an i bezwen kapab prevwar serten bann akse. Mon dir sa akoz Gouvernman i annan land bank pour devlope e par fwa bann land bank i pli anler anba i annan housing estate ouswa i annan serten semen me i pa pour fini anler. Mon krwar i neseser pour nou komans met byen.  Parey nou’n demark bann larivyer. Annou demark byen bann propozisyon pour annan nouvo semen byen kler, pour ki si demen la i arive ki en dimoun i ganny en kare later, i pa bezwen al lager en batay ankour ouswa en lager koudpwen avek sa; pe demann anba. ‘’donn mon akse pour mon mont anler!’’

E sa i pour elimin sa problenm. Mon konnen Minister i o kouran byen sa.  Bokou case zot pe pas atraver kot en dimoun li in ganny later e i napa landrwa pase e i bezwen vin koman en mandyan semen.

Mr Speaker part V i fer referans avek konpansasyon, kot si ou pa kapab devlope ou kapab petet dir be Gouvernman pran sa later compensate mwan.

Mr Speaker mon ti a kontan petet dan ou Reply osi fer kler ki Minis i fer kler lo ki fason ki nou pour adres sa.  Akoz mon konnen i annan en kou moniter sibstansyel atase avek.  E parey bann later ki tonm dan Rezerv bann endividi – propriyete sirtou parey nou koz Cap Ternay anler, i annan bann later e nou konnen poudir sa kantite dimoun ki annan Gouvernman pa pour kapab compensate zot.  En bout later an retour akoz later i minim, me si nou pour al dan en fason compensate zot monneter, ki mannyer sa i pour marse?  Si nou pour bezwen petet i annan sa Land Tribunal, la si i pour pas atraver en sistenm parey ouswa dan en lot zanr parey.

Mr Speaker pour terminen i annan sa ki nou apel lesanz later osi, lesanz kot endividi i kapab dir be mon pa pe kapab devlop sa bann bout ki la, mon ti a kontan exchange e part V i fer ki sa Regilasyon, me selman mon ti a kontan petet plis leklersisman lo sa size akoz i annan serten dimoun ki’n ganny alokasyon later pour devlope, me i war i pa kapab devlope pour bann rezon nou tou nou konnen pour dir later ozordi preski napa, nou bezwen annan bann later montanny kot i annan en kantite ros, so son mwayen premyerman li menm li i pa permet li pour li al fer tou sa bann eskavasyon, so i demann en lesanz later. E ozordi nou war poudir i annan detrwa bann cases kot pe ganny refer, pour kapab annan serten lesanz. So mon ti a kontan petet ki laliny Minister i pran ki kler, ouswa i pour en case-by-case basis lo sa bann size parey.

Avek sa Mr Speaker mon pour donn mon sipor sa Bill me mon pran kont pour dir i pour annan serten propozisyon lamannman ki ava vini atraver sa e Mr Speaker nou ava debat lo la.  Mersi.

 

MR SPEAKER

Mersi Onorab Aglae. Mon a donn laparol Onorab Sandy Arissol.

 

HON SANDY ARISSOL

Mersi Mr Speaker. bonn apre midi Minis avek ou lekip. Bonn apre midi tou bann Manm Onorab. Mr Speaker mon ti a kontan premyerman dir ki Planning Authority ki nou pe koz lo la apre midi, i kapab nou zanmi.  I vin nou zanmi de lesans letan i aprouv nou plan.  E i kapab osi vin lennmi plizyer dimoun, senpleman letan i pa aprouv nou plan. Alor nou tou nou ankoler avek Planning Authority ki nou pe koz lo la. Me selman an realite nou bezwen pas atraver Planning Mr Speaker. Me selman sa ki nou bezwen osi pran kont, se ki mannyer bann aktivite i ganny deroule lo kote Planning e bomaten i annan en kantite dimoun ki’n dir nou pa bezwen montre ledwa lo CEO; nou pa bezwen atak CEO an relasyon avek sa ki i pe fer, selman i enportan pour nou ganny en keksoz kler Mr Speaker. Si ozordi nou pe koz lo Planning e CEO Planning se pa lot ki Mr  Francois ki asiz devan nou Lasanble. E son Minis se Minis Charlette ki la.

Si nou pe koz i annan keksoz mal lo nivo Planning nou bezwen adres  Mr Francois ki asiz dan Lasanble Nasyonal. E tou responsabilite ki an byen ki an mal i tonm lo Mr  Francois ki asiz la!  Mon pa pour kapab blanm Monsenyer Denis Wiehe kot Legliz Katolik. Mon pour bezwen blanm CEO ki la!

E si i annan keksoz pour fer avek Minis mon pour bezwen adres Minis Pamela Charlette ki responsab kot Planning i tonm anba son Minister. Alor Mr Francois i konn sa tre byen.  Mr Speaker atraver i ti deza dan Lasanble Nasyonal, e i konn tre byen mannyer sa bann zafer i fonksyonnen, alor napa okenn latak personnel – napa nanryen kont  Mr Francois!  Senpleman nou pe koz lo bann keksoz ki mon krwar i byen atraver li koman CEO pour Planning Authority.

Me sa ki osi nou bezwen pran kont, plizyer Manm in aksepte e zot in rekonnet pour dir i annan problenm laba! Onorab Sophola i enn ki’n dir apre ki in mansyonn serten demars ki li in fer, oubyen son dimoun in fer poudir i annan problenm.

Onorab De Commarmond in fer resorti serten problenm an relasyon avek Planning Authority. E tousala nou bezwen met li dan sa konteks ki nou pe koz lo la ozordi an sa ki konsern Planning.  Me kestyon me selman mon’n en pe dezapwente letan Onorab Sebastien Pillay in fer son lentervansyon, e in servi sa mo pou dir Lasanble nou pa’n fer progre.  Sa senpleman ki la fason ki sakenn i fer son deliberasyon. Me mon anvi dir Mr Speaker Lasanble in fer en kantite progre pandan sa 3an! E ou koman speaker Lasanble mon krwar ou pa aksepte avek mwan!

Premye progre ki nou’n fer senp ozordi nou 15 lo 10!  Sa i en gro progre Mr Speaker, ki Lasanble Nasyonal in fer!

 

(APPLAUSE)

 

HON SANDY ARISSOL

Progre ki Lasanble Nasyonal in fer ozordi lasanble in vin ‘NOU Lasanble!’ I pa vedir in vin Lasanble Sandy Arissol Mr Speaker.  In vin Lasanble lepep Seselwa kot tou dimoun ozordi i kapab vin dan Lasanble Nasyonal, vin ekout deliberasyon fer en vizit, vin vizit speaker, vizit sa de Leader; ozordi Lasanble in nepli bann pti group dimoun be in ouver pour lepep Seselwa! Sa osi en zoli progre ki nou’n fer pandan sa 3an. Nou merit en felisitasyon pour sa Mr Speaker!

 

(APPLAUSE)

 

HON SANDY ARISSOL

Letan Mr Speaker – Bills Committee ki Onorab Pillay i lo la; letan FPAC ki Onorab Pillay i lo la koman en Manm i fer bann progre atraver bann hearing; in prezant bann rapor konkret avek Lasanble Nasyonal ek lepep Seselwa, eski sa pa i en progre Mr Speaker?

Wi i en progre nou devret aplodi donn nou lekor en lanmen.  Parski sa i bann progre ki 3enm Lasanble nou’n fer. 6enm Lasanble in fer e mwan mon happy ek sa 3 legzanp ki mon’n donnen an relasyon avek sa.

Me an menm tan Onorab Pillay Mr Speaker dan son deliberasyon in menm dir poudir si nou pour annan lafors pour debout lo kote Seselwa? Be sa i annan en ta lannen nou pe fer Mr Speaker! Debout lo kote Seselwa.

Mon toultan servi legzanp bann ners.  Letan ners i demann dan semen an relasyon avek zot saler, nou avek Onorab Roucou plizyer nou, nou ti desann lo kote bann ners. Siport nou Seselwa! Letan bann ansenyan ti pe ganny problenm sekirite lekel ki ti mars ek zot ziska lavil?  Sete nou dan LDS! Sa sete bann sipor ki nou kontinyen debout lo kote Seselwa.

Letan nou ti pe rod en keksoz rezonnab pour travayer Mr Speaker, an sa ki konsern logmantasyon saler. Nou lo sa kote nou pa ti debout lo kote Seselwa? E nou ankor pe debout! Letan nou pour al siport ou Ankour pour al ekout ou case Mr Speaker pe reprezant Lasanble, sa se bann fason ki nou, nou siport Seselwa  lo kote LDS.  Alor sa i enportan, lo menm laliny ki Onorab Audrey in fer resorti, ‘’Letan ou reste dan en lakaz vit pa bezwen anvoy ros!’’ Akoz ler gale pour vini zot pa pour kapab bare Mr Speaker!

 

APPLAUSE)

 

HON SANDY ARISSOL

Alor mon anvi dir Bill ozordi ki nou pe koz lo la i annan pour fer avek CEO, parey mon’n dir Planning.  Alor i enportan ki tou bann ladres nou bezwen fer nou bezwen fer atraver CEO ki pe reprezant Planning e bann lezot Manm ki la e osi bann Board. Alor Mr Speaker i enportan kestyon pour nou demande se ozordi, nou annan nou en gro Bill – en zoli Bill devan nou, eski i pour anmenn okenn diferans konpare avek sa Bill ki ti la? kestyon ki nou tou nou pe demande, ki nou tou nou pe poze se la fason ki ganny met an pratik.

Ki fason ki i ganny met an pratik?  Kestyon ki nou kapab demande se eski bann plan ki ganny anvoye kot Lotorite Planning, eski i ganny aprouve State House? Eski Minis ki aprouve? Eski en Board ki aprouve?  Eski en kout telefonn ki aprouv ou plan?  Eski kontak ki aprouv ou plan?  Se sa ki nou pe koz lo la ozordi.

Se sa bann difikilte ki nou lo sa kote latab nou’n vwar. Parski i annan plizyer legzanp ki sakenn in donnen ki’n arive dan lepase.  Alor tousala, letan tou sa bann problenm i arive sa i fer mon retourn lo pwen ki Onorab Loze in koz lo la Mr Speaker, letan in fer referans avek Dr Ferrari ki ti dan Gouvernman, me sa ki mon bezwen dir ozordi Dr Maksim Ferrari i nepli dan Gouvernman li!  I nepli en Minis!  I nepli siport sa Gouvernman!

Ou konnen akoz Mr Speaker?  Akoz sa bann letan i ti vwar poudir lepep Seselwa pe pas martir. Tou bann plan ti ganny aprouve State House par Prezidan, apre ti al the People’s Assembly pour ganny laprouvasyon! Alor msye Ferrari, Dr Ferrari i nepli siport sa parti! Alor la parey Onorab Ferrari in dir nou bomaten in pran son retret, alor nou donn li serten respe e trankilite pour travay ki i ti fer.  Lo menm prensip ki Onorab Loizeau ti dir, sa prensip ki msye Rene ti vin avek apre souden nou pa ti vwar!  Ti’n perdi!  Alor i enportan pou letan ou pe koz lo sa Bill pour met tousala an aplikasyon Mr Speaker.

Me par kont letan Onorab Loze i vini i dir ek nou, poudir en lotel pa’n kapab fonksyonnen, in fait an relasyon –  napa nanryen pour fer ek Planning.  I ok!

Be li osi i parey Mr Speaker.  Letan en Gouvernman in la pour 40an! Zot in gaspir nou larzan!  Zot in fer faid nou pei!  Zot in anmenn nou pep lo son zenou avek 40 poursan lapovrete – prezan ou ava vin konpar pei avek en lotel?

Zot konpran prezan akoz nou paran ti dir ek nou, avan nou koup semen annou get gos drwat avan nou koupe?  La i la! Akoz  parske si ou pa gete loto pour tir ou, pour zet ou dan rigol!  Sa i enportan.  Loto pour tap ou!

Alor i enportan pour ki tou sa ki nou pe fer Mr Speaker nou bezwen fer li byen. Be mon a retourn lo sa bann ros ki mon ti pe koz lo la taler, ki Onorab Audrey ti pe adres nou letan, li i ti dan son lakaz vit. Mr Speaker mon a donn en legzanp senp. Mon a komans St Louis dan mon distrik.  Mon’n kontan mon’n tann Onorab Aglae mansyonn St Louis an relasyon avek bazar – sa zoli bazar ki nou annan la. Be mon pa’n tann li koz lo EIA ki ti fer Port Glaud la, kot i annan en pe dimoun ti fann kler laba dan sa meeting la! Mon pa’n tann li koz lo la. Mon pa konnen si Minis ava adres sa taler, me selman mwan mon kontan in koz lo bazar St Louis. Felisitasyon! Mersi Onorab!

Annou komans anler kot Naidoo kot nou dir Biznak lontan St Louis lot kote semen ti laboutik Lemoor, nou annan Batman ki nou konn li koman Mr Naidoo. Mr  Naidoo in fer en building nef, nef zot les li fer apre i pa ganny occupancy,  parske zot dir ek li napa fasilite parking. Napa problenm Mr Speaker. I kontinyen servi son vye laboutik lot kote semen. Annou pran sa vye laboutik lot kote semen, annou desann avek pas obor lekol Belonie ziska Barrel Trading. Barrel Trading i annan biznes i annan en license pour li operate, li osi i napa en fasilite parking. Dimoun i koup semen sorti dan son biznes, i antre ziska kot Mason lot kote semen.

Kestyon ki nou demande i annan balans dan sa ki nou pe koze. Sanmenm sa gale ki Onorab Audrey ti pe rode taler dan son lakaz vit Mr Speaker.  Si nou sorti la dan Barrel Trading nou koup semen Land Transport in met 2 zebra crossing la. I annan enn pli o, enn anba laba. Annou pran sa zebra crossing pli o ki lanmenm la obor Barrel Trading, nou koup semen, nou a desann dan dokiman ki zot fek donn nou la i annan en parking ki’n ganny dezinyen koman car park Pirat. Nou a pas lo car park pirat nou a desann kot Melghi, nou pour koup semen kot Baroda Mr Speaker – Trinity House nou pour al kot Space 95.

Space 95 i annan en dimoun la ki’n ganny license pour li run en biznes.  Swa en pti restoran, swa en takeaway lo en fasilite parking! Mon pa ganny en konpran mwan! Naidoo pa gannyen akoz i napa parking, en dimoun i gannyen akoz li osi i napa parking, en dimoun i ganny en fasilite pour li run en biznes lo en parking!  Me problenm i vin ek ki? CEO? Minis?  Board?  Mon pa konpran?  Taler Minis a rann mwan mon larepons.

 

 

(laughter)

 

HON SANDY ARISSOL

2enm annou get en kou Lari Bazar. Lari bazar i annan en dezord enorm! Napa parking e sanson i sante si ou pase dan Lari Bazar si ou dir bonzour ou bezwen pey 10roupi!  Sa i en lot problenm dan li menm be selman la ozordi nou reste lo parking. Lari Bazar parking i en problenm; sekirite i en problenm; konzesyon i en problenm, me selman bann dimoun dan Lari Bazar zot kontinyen ganny permisyon pour zot build, selman napa fasilite parking.  La Pagoda pe al ouver byento la. Zis mazin Lari Benezet Minis atraver ou Mr Speaker, ler tou sa bazardye in antre 1er bomaten pour sakenn ganny en stasyon pour zot vann zot prodwir, letan Pagoda li i pour ouver i pour annan son pti fonksyon ki ou pour fer en pti pe granmaten nou kapab konpran ki kalite konzesyon i pour annan.

Problenm kote i vini CEO Planning, Minis oubyen Board? Taler Minis ou a dir nou.

Mon desann pli ba Ile Du Port, ki mon’n tann koz lo la – ok? Ile Du Port eski Minis oubyen Board oubyen CEO zot ti annan en plan lonterm lo Ile Du Port?  Nou ti ganny dir parey in dir pli boner ti pour annan plan pour por.  Apre nou’n vwar en pti lekol Petite Enfance in vini; nou’n vwar Shell ki ti napa semen in aparet. Nou’n vwar SPTC lanmenm.  Annou pa bliye SPTC ti deza lot kote laba, kot ti annan en dife, ki ziska prezan Planning napa kouraz pour fer demoli sa building ki ankor laba.  Eski pa anmenn okenn sekirite parey Bill pe dir nou Mr Speaker?  Ozordi la Ile Du Port obor nou  parey Onorab Larue in dir bomaten, en lakonpannyen in ganny permisyon pour li fer en landrwa rezidansyel! Problenm kote i vin Mr Speaker Minis?  CEO? Board oubyen Chairman? Minis taler ou a dir nou!

I annan sa ki nou apel stop notice. I annan dimoun i ganny stop notice pour li pa fer son proze, letan i annan in gannyen ziska 1an. Mon’n ganny en mesaz taler i annan dimoun i gannyen ziska 1an stop notice. Apre zot vini zot tire zot menm. Letan zot fer zot resers, zot realize poudir sa dimoun li i napa okenn problenm ek son proze li, problenm se zot ti pe rode kote taso i ete.  Taso ti ganny vwar kouver anba tarmac lo semen laba.  E sa dimoun li son proze in ganny retarde pandan 1an! In pran son pti loan. I ti annan en plan devan li.  Alor problenm kote i vini. Eski i CEO?  I Minis?  I Board?  Oubyen i Chairman? Minis taler ou a dir mwan.

Lot legzanp ki mon ti a kontan donnen. I annan en landrwa laba obor Maison Du Peuple ki mon apel li Vilaz Kartron. Zot rapel Vilaz Kartron? I annan en bann pti kyos ti ganny fer laba an plywood. La si nou pase nou tou nou sorti dan Lasanble nou al laba i en dezord enorm! Pour mwan in vin en Vilaz Lera!

Alor zot kapab dir ek mon pour dir be sa bann dimoun ti ganny zot permisyon Planning. Be kestyon ki mon demann mon lekor, eski letan ou pe fer en keksoz komersyal pour ou lwe e mon aprann ti pe lwe, eski ou ganny permisyon avek Planning pour fer li avek plywood?

I en pe drol. Parski ozordi letan dimoun, en endividi i anvi fer en biznes i vwar Planning, i vwar Fireman, i vwar Licensing, i annan en kantite prosedir an plas i annan. Me mon pe demann mon ki mannyer sa endividi li in ganny permisyon atraver Planning pour li kapab fer sa.  Eski Fire Brigade zot, zot ti donn laprouvasyon?  Ok? E tousala Mr Speaker kestyon i bezwen retourn kot CEO ki asiz la!  Si pa CEO i bezwen Minis ki la. Nouvo Minis! Si pa Minis i bezwen Board! Si pa Board i bezwen Chairman!

Se sa nou problenm! Problenm se pa avek endividi nou pa kontan zot akoz zot siport Parti Lepep. Nou, nou pa pey zot pour siport Parti Lepep nou Mr Speaker, zot lib pour zot siport zot parti. Nou, nou pey zot pour zot rann nou en servis efikas e profesyonnel!

 

(APPLAUSE)

 

HON SANDY ARISSOL

Se tou  ki nou pe rode nou. Nou, nou pa enterese avek ki zot siporte, oubyen ki zot anvi siporte! Nou, nou anvi letan nou pey zot se pour sa rezon ki nou demann kestyon pour zot dir ek nou sa travay ki zot in anvi fer, si zot pe fer li byen Mr Speaker! Mon anvi al lo en lot legzanp.

Nou annan bann dimoun ki nou ganny permisyon ki nou tann koz lo la pour fer 2 letaz. I annan i ganny permisyon 3 letaz, i annan i ganny permisyon basement. I annan i ganny permisyon anler.  Diferan leskiz pour diferan dimoun pour diferan proze.  Alor kestyon nou bezwen demann nou lekor eski planning zot annan en Regilasyon kler an relasyon avek sa?  Eski i annan dimoun dan Lari Bazar pa egzanp dan mon distrik ki annan drwa annan 3 mont anler pour get son kanmarad anba e   i annan bann ki bezwen reste anba toultan get son kanmarad anler?  Eski Planning ki annan sa Polisi. Si zot annan sa Polisi dir nou, si zot napa sa Polisi i bezwen problenm avek CEO Mr Speaker, i bezwen avek Minis Charlette, i bezwen avek Board e i bezwen ek Chairman. Zot bezwen dir nou! Zot pour bezwen vin kler, fer nou konpran avan nou aprouv sa Lalwa.  Akoz si nou kontinyen zis aprouv bann Lalwa, apre bann endividi sakenn i fer sa ki zot anvi, Lalwa pa pour fer okenn sans Mr Speaker!

En lot keksoz mon ti a kontan koz lo la i annan bann pti proze dan distrik Mr Speaker. Sak fwa eleksyon i annan en seri peron ki ganny fer. I annan en seri miray ki ganny fer.  Be sa bann peron sa bann miray la, eski i ganny permission i ganny permisyon Planning sa? Oubyen zis akoz MNA i dir get sa donn sa madanm 3 mars peron laba fer son miray, alor i ganny fer.  Eski i annan permisyon sa? Tousala nou bezwen tyeke.

Eski sa bann permisyon la i aplik pour bann endividi. Me selman Ladministrasyon Distrik oubyen bann MNA serten MNA i donn lord bann CC member i donn lord, alors sa bann keksoz i bezwen bypass Lotorite Planning?

Si sa i arive Mr Speaker i bezwen annan en problenm avek CEO ki asiz la devan. Oubyen Minis! Oubyen Board oubyen Chairman!  Sa ki nou pe dir.

Mon annan en lot legzanp ankor Mr Speaker nou’n tann koz bokou lo proze tinel. Be letan mon’n get Bill mon pa’n vwar en seksyon ki dir underground digging mwan! Kote i antre underground digging pour tinel ladan. Mon pa’n vwar?  Kekfwa i pour annan en lot Bill ki pour vini spesifikman pou tinel? Eski Gouvernman zot konnen ki zot pe fer?  Eski Planning i koz ek Gouvernman, Gouvernman i koz ek Planning?  Mon pa’n vwar mwan sa!   Kekfwa mwan ki pa’n vwar.  Minis taler ou ava eksplik nou, sey dir nou kote tinel i antre anba sa nouvo Bill ki la. Parski pour le moman mon pa tro krwar, zot pe tro konnen ki zot pe fer.

Mr Speaker tou sa bann legzanp ki mon’n donnen legzanp lalis i long, letan nou pe donn legzanp i pa vedir ki nou annan problenm endividyel avek bann dimoun endividyel! Kot Planning Authority Mr Speaker i annan bann profesyonnel – bann Seselwa ki travay laba. Nou bezwen aksepte e rekonnet.  Me selman parfwa zot pri!  Zot pri dan sa bann diskisyon zis parmi sa bann legzanp ki mon’n donnen. Se la kot nou bann profesyonnel i pri.  Zot pri letan bann desizyon i ganny pran endividyelman!  Letan desizyon i ganny pran State House! Letan desizyon i ganny pran atraver kout telefonn! Letan desizyon i ganny pran atraver kontak! Oubyen desizyon i ganny pran letan mon zwenn ou mon dir ou fer sa pour mwan!   Se la kot nou bann profesyonnel i pri.  E nou bezwen rekonnet travay ki zot pe fer e nou bezwen aksepte travay ki zot pe fer.

Mon  pa’n vwar tinel dan Bill. Mr Speaker me selman i annan lezot keksoz ki mon’n vwar ki mon ti a kontan zisteman koz lo la.  Letan nou pe koz lo bann konstriksyon dan distrik, mon ti a kontan demande eski i annan bann vizit?  Onorab De Commarmond in fer en pwen enportan bomaten an relasyon avek bann vizit ki ganny fer dan distrik.  Eski letan nou vizit sa dimoun pe fer son proze oubyen in soumet son plan, eski i annan bann konsiltasyon, pour ou dir ek li get sa laport kot ou’n fer la pa pour bon, ou bezwen tir sa laport apre retourn ek nou plan nou aprouve? Oubyen senpleman cancel son plan akoz i ti annan zis en problenm laport?  Konsiltasyon ki nou pe demande. Alor i pour enportan dan tou sa deba ki nou pe fer pour nou mazin nou dimoun laba deor.

Mr Speaker seksyon 9 dan Lalwa i fer referans avek Mer Lavil pour ganny co-opted lo sa Board Planning. Mon napa problenm avek sa mwan, be selman nou bezwen pran kont pour dir i annan plizyer lavil, i annan plizyer bout dan lavil ki baliz avek distrik.

Letan Onorab Lemiel ti fer dan son lentervansyon i ti sir pour dir konsiltasyon, konsiltasyon avek Lotorite. Be mwan mon baliz St Louis, i baliz ek lavil li. Mon pa ti pour kontan konnen kwa ki pe pase? Ki bann konstriksyon ki pe ganny fer dan lavil?  Kot bout St Louis i tonbe? Mer Lavil i a vini  koman Mer Lavil, me mwan koman MNA elekte pour sa distrik, mon napa en say dan devlopman mon lavil ki tonm mon distrik Mr Speaker?

Mwan mon santi poudir i mal e nou Rezyon Santral 1 ki mazorite nou, nou tonm dan lavil, mwan mon krwar nou devret ganny enkli nou osi dan sa bann devlopman e desizyon ki annan pour fer avek nou lavil.

Seksyon 41 Mr Speaker i koz lo ‘’register of application.’’ Mwan mon pa mine annan en register i ok.  Be selman sa ki mwan mon santi poudir par fwa Lotorite Distrik pa konnen bann devlopman ki pe arive dan son distrik.  Alor ki mwan mon pe demande senpleman nou ganny en site plan. Pa bezwen donn nou detay kot son banker i ete, kot i pour met son kof, konbyen lafnet, konbyen laport, konbyen koridor. Nou sa ki nou, nou pe rode sa mwan mon pe rode pour mon Rezyon Santral 1, letan nou anvi i annan en konstriksyon pe fer dan nou distrik nou ava al gete. Sa konstriksyon i pour msye Sandy Arissol. Son later i V0277 alor i pe fer en lakaz 2 lasanm.  Se tou – lo sepa konbyen met kare later se tou ki ou bezwen donn li ou.

Ler mon ganny demann kestyon be mon a dir be non be sa pour msye entel sa, i pe fer en lakaz de lasanm.  Dir, pa dir parey Onorab Pillay i remind nou bomaten pour fer voler antre kot ou. Voler li i pa ni bezwen esper ou; fer ou site plan pour li antre kot ou.  I les ou byen konstri, gete konbyen laport ou annan, konbyen lafnet ou annan, si i anvi dir bonzour, i dir bonzour. Savedir sa pa en leskiz. Mwan sa mon pe propoze pour lenformasyon Manm Lasanble Lotorite Distrik, Konsey Rezyon Santral 1 ki pe fer en bon travay Mr Speaker nou pe demande ki nou ganny bann site plan pour nou konnen ki pe pase dan nou distrik nou osi. Seksyon 45/ 46 ek 8 Mr Speaker, i koz ki nou tou nou’n koz lo la sa i pe koz akse avek lans piblik, ki’n en leokrir enorm ki Wavel Woodcock avek Onorab Adelaide in anmennen Mr Speaker. Ozordi i dan Lalwa. Mon happy – napa problenm. Me selman mwan koman en Manm Lasanble mon ti a kontan anvoy en mesaz kler laba deor.  Ozordi sa bann akse la, prezan mwan mon bezwen vire dir avek mon bann frer ek mon bann ser Seselwa, pour ganny akse avek pour al lo lans obor en propriyete prive prezan nou koman bann endividi nou pour bezwen konport nou lekor.

Nou pour bezwen pran nou responsabilite.  An mazinan pour dir i annan en letablisman touristik obor nou. Nou pour bezwen konnen ki mannyer nou konport nou.  Si nou ti ganny en semen pase letan nou ti pe al bor lanmer ler ou retournen ou bezwen retourn lo menm semen pase ki ou ti donn ou.  Ou pa kapab pas atraver salon sa dimoun pour ou kapab fer sa ki ou anvi.  Nou koman bann Seselwa nou bezwen  montre nou sans responsabilite. Nou pa kapab zis lesefer.  Oubyen ou tann en komanter ki dir mon’n vin lo lans, alor mon kit mon salte la akoz demen bomaten pour annen en dimoun ki pour anmase.  Sa i iresponsab.

Alor lo sa pwen Mr Speaker mon happy ki sa in ouver, be an menm tan mon pe pas en mesaz kler ek mon bann frer ek ser Seselwa, pour nou koman bann Seselwa vin responsab dan nou lapros, responsab dan nou aksyon akoz nou pe rod sa ki nou anvi. Mr Speaker.  Seksyon 47 i koz lo bann vye batiman ki nou annan dan distrik. E St Louis pa en leksepsyon.

Nou annan plizyer bann vye batiman.  Nou annan plizyer bann Seselwa ki reste aletranze zot.  Zot viv aletranze nou napa problenm ek zot viv aletranze. Me letan zot viv aletranze zot ekspekte pour dir sa vwazen ki reste obor li, ki bezwen netway son propriyete oubyen sa vwazen ki reste obor li i bezwen anmas tou lera parski li son propriyete i prop e ou propriyete i reste abandonnen alor li i ganny afekte.

E ozordi St Louis mon anvi dir Mr Speaker, plizyer sa bann propriyete pe ganny servi par bann Seselwa ki lo drog. Zot reste dan sa bann landrwa  zot servi sa bann landrwa koman bann landrwa kasyet e bann dimoun ki reste lo bor zot santi zot vin en problenm.  Letan mon pe koz lo la, la mon bezwen fer mansyon obor flat Bwa Blan. I annan sa lakaz obor Honey Pot anler kot bann Malgas ti reste ki ti travay IOT, la pour le moman napa personn, napa personn la, sa landrwa i vid. Be bann dimoun pe sot baro pe sot fil e zot pe servi sa landrwa pour zot reste e bann zabitan Bois Blan i santi zot konsernen parski bann dimoun souvandfwa i debout la e i get dan zot propriyete e get dan zot flat.

Alor mon pe lans en lapel avek propriyeter sa landrwa si i pe ekoute Mr Speaker e atraver Minis e bann lotorite konsernen pour nou fer le neseser pour ki nou kapab met nou distrik, met tou nou keksoz annord avek sa ki nou pe koz lo la.  E i annan en seksyon 77 ki koz lo ‘’akizisyon later’’;  kot Gouvernman atraver Minis i kapab servi son pouvwar pour li pran serten bout pour li kapab fer semen pour kapab deservi lezot zabitan distrik e letan mon pe koz lo la Mr Speaker mon pe mazin en semen anler Belonie kot nou’n fini zwenn zabitan nou’n koze.

Nou’n fini zwenn avek Land Transport kot pour pase ki kantite met kare pour komanse, ki kantite longer ki nou pour fer.  Nou annan zis en sel problenm. Nou annan zis en dimoun ki pa reste la e mon krwar Gouvernman i ankor pe negosye an relasyon avek ki pou fer.  Sa i vin bann retar ki egziste e zabitan St, Belonie anler laba i annan en kantite dimoun ki a laz. I annan en kantite dimoun ki bezwen semen ki’n reste laba pour plizyer lannen zanmen zot transport in ariv devan zot laport, alors senpleman zot pe demande ki sa negosyasyon i al pi vit e sa lokater ki pe ekoute silvouple balanse parski napa personn pe reste la, e li menm li i pa reste la Mr Speaker pour ki bann zabitan ki reste la zot a kapab konstri zot lakour. Amelyor zot lakour, secure zot lakour zis parey lafanmir Finesse anler zot annan en problenm avek zot lakaz, me problenm se materyo pa arive alor dan tou sa negosyasyon nou pe sey anmenn semen pli pre avek zot Mr Speaker pour fer sir ki tou keksoz i al ase byen.

Mr Speaker i annan seksyon 36(1)(e)(1), letan i koz lo bann lavant an relasyon avek semen ki mon krwar Onorab Aglae mon krwar in koz lo la. Ou konnen ozordi i annan plizyer dimoun ki pe aste bann propriyete ki pe fer bann konstriksyon apre realize pour dir sa later ki ti pe pas lo la se later en dimoun prive ki’n les li pase, parey nou’n aprann dan Civil Code kot in les pase be apre letan sa dimoun in revann son landrwa sa nouvo propriyeter ki vini i bar son landrwa. E ou, ou perdi akse. Mon krwar i pour enportan pour Planning Authority atraver Minis, pour zot letan sa bann dimoun pe demann permisyon pour build, pour zot osi donn sa bann kalite advice pour zot vwar ki mannyer ansanm pour ki letan sa dimoun in fini son depans in konstri apre i pa ganny en konstrent pas lo semen.

Letan mon la sa pwen Mr Speaker i annan plizyer dimoun ki’n donn semen an bonn fwa. Zot in donn zot semen an bonn fwa.  I annan dimoun kekfwa pe rod en serten negosyasyon finans. I annan dimoun senpleman in demann miray. En par fwa bann dimoun ki ou koz avek i annan en madanm bomaten in call mwan in dir ek mwan poudir li i annan 1 an edmi depi i an kontak avek biro Minis ek bann dimoun an relasyon avek son negosyasyon an relasyon ek sa ki zot ti koze. Kekfwa i ava bon pour nou akseler en pe sa bann zafer, pa kit dimoun lo sispans pour ki bann dimoun zot konnen pour dir sa ki zot in negosye an bonn fwa zot osi zot ganny en rekonpans.

Mr Speaker mon ti a kontan demann Minis letan i fer son summing-up ek seksyon 40. I annan bann konstriksyon ki kekfwa ki nou, nou apel ban pti konstriksyon. Eski mon ti a kontan Minis i dir ek nou eski i annan sa ki nou apel bann pti konstriksyon kot ou pa bezwen permisyon Planning oubyen letan ou atrap tourel, siman lapel, makadanm nou bezwen annan permisyon Planning. Eski si mon pe fer en basen par egzanp kot mon lakour si mon pe lev en keksoz, mon pe agrandi lasanm, eski Minis ou kapab eksplik nous a pour lenformasyon piblik laba deor, pour nou konpran poudir i annan serten keksoz ki ou bezwen Planning, laprouvasyon planning oubyen ou pa bezwen oubyen s tou nou bezwen fer sir nou demann permisyon atraver ou biro.

Dernyen pwen Mr Speaker mon ti a kontan koz lo la se topografi distrik St Louis. Ti annan en diskisyon ki ti ganny fer pour Santral 1 Rezyon Santral 1 avek bann zofisye planning zot ti dir nou pour dir Rezyon Santral i annan en keksoz ki arive tou bann zenn i sorti i al imigre dan lezot distrik.  Problenm se parski zot napa landrwa kot zot paran mannyer nou topografi i ete St Louis zot konnen poudir napa later. Nou menm nou, nou ganny flat tou le 40milan. E i en pe difisil pour nou bann zenn ki anvi bouze. E alor mon ti a kontan demann Minis eski zot annan en plan pour Santral 1 Rezyon Santral 1 par egzanp an relasyon avek konstriksyon?           Par egzanp ou annan bann plan available kot bann zenn bann graduate ki tournen konnen poudir si i pour al kot biro Minis Charlette i pour annan bann plan available, kot i kapab met en letaz par egzanp par lao lakaz son manman, an vi ki ater napa, parski nou’n ganny dir poudir avek letan bann distrik Santral 1 nou pour annan zis bann dimoun aze parski nou bann zenn zot tant pour al imigre dan bann lezot distrik kot zot ganny fasilite later, zot ganny fasilite flat, oubyen zot ganny fasilite azout en bout kot zot bo paran kot zot al reste.

Alor mon ti a kontan si Minis dan tou sa ki nou pe koz lo la ou kapab donn ou en pti kontrandi lo Rezyon Santral 1 an relasyon avek nou oipografi, e an relasyon avek konstriksyon ki nou kapab fer letan nou pe koz Planning, laprouvasyon e tou.  E mwan mon ti a kontan fini Mr Speaker dir par nou ava ekout repons Minis, nou ava gete ki Minis pe propoze e an menm tan parey mon’n dir annan nouvo Lalwa avek sa nouvo Lalwa i pa fer okenn gran diferans, me selman i pour enportan pour nou gete ki mannyer mindset nou bann zofisye ki travay laba i fonksyonnen Mr Speaker.

Alor mon ti a kontan dir ki mon ti a kontan esper Minis avek son repons, pour li donn mon sa detrwa pti leklersisman ki mon’n demande e mon ti a kontan remersye ou Mr Speaker pour sa pti letan ki ou’n donn mon. mersi bokou.

 

MR SPEAKER

Mersi Onorab Arissol. Bon zis mon ti anvi pran en pti pwen ki ou’n leve lo sa size progre Lasanble.  Mon ti pour osi rezerv en pti komanter lo dernyen moman me selman mon krwar ou’n reponn. E mon swete ki sa komanter i pa ti dan ou pa ti pe viz li ver the Chair ver progre ki sa Lasanble 6 enm Lasanble in fer. Me mon konpran. Mon konpran mon a kit sa lo floor.  Akoz mon krwar nou tou nou kapab, nou tou nou kapab ozordi mezir progre ki nou tou nou tou dan sa 6enm Lasanble nou’n kapab reisir fer e i annan ankor bokou keksoz ankor pour nou akonplir dan sa pti letan ki reste nou. Ok? Mon pa pe ouver deba lo la se sa rezon mon pe-

 

(Off-Mic)

 

MR SPEAKER

-non, non, non mon’n konpran, mon’n konpran sa. Nou pa pour ouver deba lo la.

Bon i reste mon ankor 5 Manm pour koze, non, 4, 4 Manm pour koze 2 sak kote. Me nou ava break nou a retournen 4 er nou ava regarde koman nou pour ale. Me i annan posibilite kekfwa nou ava zis fini avek deba lo merit e prensip zeneral Bill ozordi. E semenn prosenn nou a kapab pran bann nou ava al lo   Staz Komite nou ava pran bann amannman. Ok? Nou ava break e nou repran nou travay 4.20.

 

(BREAK)

 

MR SPEAKER

Bon avan nou kontinyen nou deba Onorab Ferrari.

 

HON JEAN-FRANCOIS FERRARI

Mersi Mr Speaker. En pti leklersisman silvouple lo baz sa let. Very short lo baz sa let ki Chairman in fer. Mon ti a zis kontan dir pour bann e pour bann dimoun ki pe ekout nou ki finalman sa let in konfirmen pour dir sa laplikasyon Mr Morin ti ganny diskite dan Cabinet!  E napa nanryen dan sa Lalwa, dan Lalwa Planning ki dir ki okenn, okenn desizyon Planning i devret ganny deside dan Cabinet.

Alor ler mon ti dir poudir serten desizyon i ganny pran State House. I was absolutely right!  E dan sa let i konfirmen pour dir it was taken to the Cabinet and it was discuss at the Cabinet level. So si sa pa politik mon pa konnen ki i ete alors!

Lezot pwen mon pa pour reponn, akoz mon krwar lo sa pwen menm la, i sifizan pour nou dir poudir we need a complete review of the procedures, pour donn en dimoun en approval or refusal. Mersi Mr Speaker.

 

MR SPEAKER

Mersi Onorab Ferrari pour ou komanter. E mon krwar an zeneral sa let osi in vin zis klarifye en pti bann komanter.

Bon nou ava kontinyen avek nou deba. Mon anvi zis averti bann Manm. Mwan annan ankor 4 Manm. De Manm lo sak kote. Annou evit repetisyon. Nou pour sey fer mannyer pour nou termin deba lo Bill ozordi. Omwen deba e apre mon krwar bann amannman, bokou bann amannman i straight forward i bann tipo. Me nou annan enn de bann amannman petet ki pour ki pour kapab lev en pti deba nou ava regarde.  Si nou pa kapab komans li ozordi nou ava fer li semenn prosenn. Nou ava toudswit, mon ava donn laparol avek Onorab Waven William.

 

HON WAVEN WILLIAM

Mersi Mr Speaker. Bonn apre midi Minis avek ou lekip e tou ban dimoun ki a lekout.

Mr Speaker mon ti a kontan komanse par met devan Lasanble sa pwen baze lo en deklarasyon ki ou ti fer yer lo lefe ki apre recess nou pour al komans diskit lo Code Civil. Mr Speaker mon anvi met sa devan Lasanble pour Lasanble konstate eski par debat lo sa Prozedlwa eski i pa devret, nou devret pridan san ver nou lapros petet annou konsidere petet diskit, fini diskit, fini diskisyon lo Code Civil akoz i annan bokou keksoz ki kapab afekte sa Prozedlwa dan son laplikasyon.  So mon pe poz sa devan Lasanble, akoz mon krwar poudir i en demann ki ase pridan. Eski nou devret proceed pour aprouv ouswa fini deba lo sa Prozedlwa? Lefe ki apre recess nou pour al dan en bann diskisyon ki konsern Code Civil parey mon dir ki annan relasyon pour fer avek sa Prozedlwa ki nou pe diskit lo la?

Mr Speaker mon lot pwen se ki, mon anvi dir ki sitwayen Seselwa i anvi ki letan Lalwa i ganny pase, i pe tenir kont son konsern e pe ganny fer pour aport solisyon Mr Speaker.  Akoz bokou fwa isi dan Lasanble  e dan distrik pep Seselwa i anvi solisyon. Mr Speaker kestyon ki mon anvi demann Minis atraver ou, se letan nou’n koz lo konsiltasyon mon anvi demande ki kalite konsiltasyon  ki’n annan – ki sa Minister in annan. Mon konnen ki poudir Minis sa lepok petet pa ti la – ki kalite konsiltasyon in annan ek sitwayen Grand Anse Mahe? Kan e konbyen zabitan e kategori propriyeter ki ti prezan?  Mr Speaker mon pe demann sa kestyon akoz mwan i enportan pour vwar e evalye si vreman letan nou pe koz konsiltasyon, ki sa konsiltasyon in vreman ganny fer dan en fason ki byen e enklisiv.

Mr Speaker tenir kont leksperyans ki distrik Grand Anse Mahe in fer fas avek. E malgre ki nou pa pour oule, nou pa anvi koz lo lepase. Mon anvi fer mansyon sityasyon polisyon La Misère e Barbarons.

Mr Speaker in demontre ki ti annan lack of supervision vizavi sa devlopman.  Mr Speaker mon anvi osi tous resaman lo sa sit ki’n ganny swazir pour fer bann lakaz en emergency. Mr Speaker mon pour dir ki zabitan land bank zot konsernen, malgre ki sa vilaz in ofisyelman ganny ouver, me zot santi poudir sa proze son magnitid avek prensip devlopman land bank, zot santi poudir ozordi san ki mon anvi dir ki nou pa ti anvi sa proze ouswa anvi ki sa bann dimoun ki’n tonm dan sa bann sityasyon ganny en lasistans; me zot santi pour dir  valer zot propriyete in ganny afekte.

Mr Speaker e zot pa’n ganny sa loportinite pour kapab met devan zot bann konsern.

Mr Speaker mon anvi tous le fe ki sa Bill pa pe fer gran sanzman mon anvi tous osi lo konsern bann zabitan La Misère espesyalman Beauvoir kot dezane in annan sa problenm right of way; kot malgre later in ganny vann par Lanmisyon e i prive, me sa problenm ozordi drwa pasaz, e dimoun ozordi pe devlope pe avanse i anvi motorable access way, me nou’n vwar poudir detanzaot letan nou pe vin devan sa problenm prosesis ki nou ti ava swete ganny servi, pa pe ganny servi Mr Speaker. E mon santi poudir sa bann dimoun zot merit en larepons. E n ou ankor pe pouse pour vwar ki solisyon nou kapab gannyen.        Mr Speaker mon a dir ki i annan solisyon.  E mon krwar ki sa konsiltasyon ankor, pour mwan mon santi pour dir sa vre konsiltasyon pa pe ganny fer ase byen. Mr Speaker nou’n antann bokou koze lo desantralizasyon resours, pouvwar o nivo lokal. Mon ekspekte ki avek sa bann lamannman, dan lenplimantasyon serten pouvwar ava ganny donnen avek distrik.

Mr Speaker letan mon regard propozisyon Bidze dan zot plan avek stratezi sa Minister mon pe koz osi kot lotorite Planning. Mon pe demann mon lekor si le fe ki tou sa letan zot pa ankor kapab rezourd serten bann problenm kot i konsern resours avek ekspertiz eski letan nou pe aprouv sa Prozedlwa zot pour kapab delivre parey ekspektasyon pep i ete Mr Speaker? Parey ekspektasyon pep pe demande?

Mr Speaker dan sa Bill i pa kler par egzanp zot dir ki letan sa Bill i ganny aprouve as far as is practicable zot pour fer bann plan devlopman distrik – bann zil.  E Mr Speaker ‘’as far as is practicable’’ i kapab endefini! E mon ti a kontan ki petet dan sa Bill nou ti kapab donn serten timeframe. Akoz sa i enportan.

Mr Speaker lot keksoz ki mon anvi dir se ki o nivo konsiltasyon letan bann Regilasyon prosesis pe ganny preskri mon pa vreman vwar dan sa Bill sa eleman enklisivite distrik, vizavi bann reprezantasyon ki nou kapab donnen. Par egzanp mon pa vwar poudir i annan reprezantasyon Gouvernman Lokal, Minister Gouvernman Lokal.  Mon pa konnen ki bor sa pour antre mwan e mon rekonnet ki poudir Onorab Lemiel ti poz serten bann kestyon ki ase enportan.  E mon ekspekte ki Minis pli tar ler i donn son konklizyon i ava donn en pti pe lo la.

Mr Speaker kot i konsern akse avek lans.  Ler mon pe fer en kout revizyon la mon pe get Grand Anse, Barbarons – Pti Barbarons Mr Speaker mon pe vwar ki Barbarons tousel i annan zis en akse ki ganny rekonnet. Mr Speaker pour rezon sekirite e sov lavi dimoun mwan mon ava demann Minis ki leta sa Lalwa pe ganny enplimante ki zot ava annan en konsiltasyon enklisiv; akoz i annan serten group dimoun Mr Speaker ki zot lavi i depann lo lakot e osi lo lanmer.  Me la fason ki akse i ete ozordi si i annan en problenm i pa motorable access way. Motorable access way i ariv pour serten zistans me epi Mr Speaker ou bezwen marse en ta zistans e ou kapab mazinen si ou ti kapab sov lavi dimoun avek sa kalite sityasyon lo teren ozordi i fer li difisil.

Alors mwan mon a demande ki menm si later i prive, mon vwar dan Bill ki i annan propozisyon pour bann negosyasyon. Me ki sa negosyasyon i pa arive zis ant Minister avek propriyeter, me ki zot ava osi pran konsiderasyon kontribisyon sa bann dimoun ki depann lo lakot avek lanmer Mr Speaker.

Mr Speaker mon anvi tous lo en lot pwen mon distrik sa se Pti Barbarons. Pti Barbarons i annan en vilaz la kot nou dir ex Army Village. Mr Speaker i annan en ta problenm ki’n arive, en ta konplent ki’n al devan e mon asire in bezwen al kot Planning Authority osi tou. Me ozordi Mr Speaker i konmsi sa bann zabitan la i pe ganny teorize akoz napa bann lendikasyon pour dir bann dimoun be regarde apre en serten ler ou pa kapab vin lo sa vilaz akoz ou disturb bann dimoun.

I annan en ta transport ki antre i park e zabitan li menm li dan sa rezyon, i pa kapab rezouir son propriyete trankilman parey i ti a voudre. E mon espere ki letan sa Bill i pase, sa sityasyon parey mon dir si Lotorite pa antre an etrwat konsiltasyon avek Lotorite Distrik e annan en pathway a way forward pour nou kapab sey rezourd sa bann problenm ki la en bon pe letan.

Mr Speaker mon pa pour koz bokou me mon pour retourn ankor lo pwen depar lo le fe ki nou pe al diskit lo Code Civil apre recess eski i pour pridan eski i pridan pour Lasanble la pran en desizyon final lo sa Bill?  Avek sa de pti mo Mr Speaker mon remersi ou.

 

MR SPEAKER

Mersi Onorab William. Mon a donn laparol Onorab Clifford Andre.

 

HON CLIFFORD ANDRE

Mersi Mr Speaker. bonn apre midi tou Manm Onorab e tou dimoun ki a lekout.

Mr Speaker ozordi dan Sesel nou annan en town and Country Planning Act. Nou problenm se, eski bann dimoun ki sipoze pe fer sir ki sa Lalwa i ganny met an aplikasyon comme il faut pe fer zot travay? se sa ki problenm ozordi Sesel.

Nou pe vin avek en lesey kosmetik mon apel li pour nou sey fer krwar ki keksoz pa pe ganny fer senpleman akoz Lalwa ki pe anpes serten keksoz arive. Mr Speaker mon a donn ou en legzanp tre kler. Anse Aux Pins lo Chetty Flat, dan milye sa landrwa kot bokou dimoun i reste nou annan en STP. I pa normal en lakaz ki anviron 5 a 10 met avek en STP. Son la salamanze i pratikman obor en STP.  Eski sa i korek?  Eski letan nou ti pe fer plan pour ganny aprouve sa pa ti ganny pran an konsiderasyon?

Alors lesansyel i reste parey Onorab William in dir i annan serten keksoz ki’n arive anler La Misère, lesansyel i reste eski sa bann dimoun ki pour aplik sa Lalwa i senser dan laplikasyon sa Lalwa? Mon a donn ou en lot Mr Speaker. I annan en car park anvil, i annan en batiman, e dan sa car park i annan en stage.  E sa se kot Headquarters Parti US, napa Planning permission Mr Speaker. Napa Planning permission e anba Lalwa ki aktyel CEO i devret al fer demoli sa stage! Anba Lalwa aktyel. E prezan si en dimoun pe fer en miray kot li i pa’n demann permisyon zot dir ek li msye madanm ou bezwen demoli ou miray akoz napa ou napa permisyon!  Oubyen i donn li en stop notice ki mannyer i apele. E bannla i ganny drwa monte avek gard tou dir li ‘’you have to stop your work!’’

Mon a donn ou en lot legzanp akoz mon pe dir sa Mr Speaker se pour montre ki pour dir i pa Lalwa par ler ki fer keksoz pa marse, se dimoun!

Mon a donn ou en lot legzanp Anse Aux Pins anler kot Mr Alone ki bouse i annan en msye li in ganny permisyon pour li fer en lakaz, en langar si oule. E sa msye in pran son permisyon i annan koneksyon li en, i fer sa pti lakaz apre i komans met building material dan sa landrwa, feray, weld mech, you name it Mr Speaker i mete e 5er bomaten i vin tire obviously i pe al travay, i en kontrakter i vini i tire e letan i fer sa i fer tapaz lantouraz i ganny problenm. Alors e sa msye i kontinyen fer serten devlopman li e sa devlopman ou konnen kot i tonbe dan larivyer. Mon ti bezwen en zour Sanmdi summon CEO Planning Authority avek enn de son zofisye pour li mont anler laba pour vin gete.  E i ti vini, i ti gete i ti vwar poudir i annan problenm. Be mon kestyon ki mon demande Mr Speaker, se akoz zot pa ti al gete avan mwan mon dir zot vin gete! Mon pa travay kot Planning Authority mwan!

Mon enforcement officer mon. me selman mon fer sir ki enforcement officer avek CEO i fer zot louvraz.  Sa pti bout anler laba kot i konsern mwan.  E konm de maler Mr Speaker mwan mon ti dir li ki zour lapli i tonbe nou pour war son konsekans. E letan lapli ti tonbe Vis-Prezidan ti taye i ti al gete sa zour Lendi ti’n overflow, ti’n flood kot pe fer lakaz 24/ 24/24 Anse Aux Pins. Pe fer 18 selman i sipoze 24. Selman lo board i met 18, ti’n flood sa landrwa.

Prezan ou demann ou lekor ki mannyer bann dimoun ki pour vin reste la e sa problenm pa’n ganny konmsi Planning Authority ziska ozordi pa ankor dir ek sa msye ‘’undo sa ki ou’n fer’’ akoz i pour koz problenm demen pour bann dimoun letan zot pour ganny zot lakaz anba kot 18/ 24/ 24, kot ex-Onezime, i pour koz problenm pour zot epi problenm pour refoul lo nou tou. Nou tou nou pour bezwen ale pour al esey tir delo, rode kote nou pour ganny laponp, kriy DRDM, si i pour vini si i pa pour vini. I transfer son telefonn.

So sa bann problenm ki mwan mon pe dir, eski Planning Authority as it is today i pe fonksyonnen? Lot keksoz ankor Mr Speaker Mass Spor i fer anler dan Karyol lo laplenn, Pickup Planning Authority nou annan Lalwa, eski i dir dan Lalwa. Fodre nou mete dan Lalwa pour dir ou pickup pa kapab ganny servi pour al anler laba? Irespektiv lekel ki pe fer sa; irespektiv e si lo ou lavertisman, si lo ou lavertisman sete Local Government ki ti pe fer, i ti a mete lo son lavertisman akoz i pa met nanryen? Lotrozour pa ti fer lanmizik dan car park. Mon krwar sa weekend fer lanmizik dan car park ti mete; ‘’Parti US, pe fer son za… .’’ I normal sa. Zot bezwen mete lekel ki pe fer. Nou pa mete letan loto Planning Authority i ganny war pe anmenn latant lo laplenn Karyol i ganny dir poudir dir i pe asiste Local Government ki pa korek. Pa korek! Annou aret zwe ek keksoz Leta.  I annan Lalwa.  se sa ki mon pe dir, i annan Lalwa ozordi.

Eski nou pe krwar nou pe pran de pti seksyon nou pour sanze nou pe dir poudir menm dimoun ki pour reste la eski sa Lalwa pour ganny aplike? Mon napa nanryen kont bann dimoun mwan! Mon pe dir zot bann endividi. Mon pe dir ki nou bezwen fer keksoz byen e korek. E se sa ki enportan. Ok? Nou bezwen kler lo nesesite pour nou fer en Lalwa, ki demen i kapab ganny aplike. E si i ganny kase par sa dimoun ki sipoze aplik li, i ganny anmennen Ankour.

Mr Speaker kot – mon focus Anse Aux Pins akoz mwan mon MNA Anse Aux Pins – dan lale kot bann Pillay anba bor lanmer, semen in ganny fer. Letan lapli i tonbe problenm!  I annan pa kapab ale pa kapab sorti kot zot  letan lapli i tonbe akoz zot pa  kapab desann, zot pe desann dan en basen delo. Napa swimming pool kot zot pourtan, selman zot pe desann dan en basen delo!  Be lekel ki’n donn permisyon pour fer tousala?  Anba ki Lalwa? Lalwa i egzistan. A lors nou annan en problenm avek laplikasyon Lalwa.

Bomaten Onorab Gill in dir ki poudir napa nanryen ki in fer par malis, oubyen pour annan malis; be par ler ou gete ou war poudir i annan malis! Akoz sa Lalwa in ganny servi pour donn serten, pour favoriz serten, pour defavoriz serten.

Mr Speaker i enportan ki letan nou annan en Lalwa, irespektiv si i Clifford Andre koman MNA oubyen i madanm Andre Mont Fleuri koman madanm Andre i ganny trete parey! I pa kapab annan en diferans dan tretman lo Lalwa Planning!

Prezan Mr Speaker mon pour al lo sa Lalwa li menm. seksyon 22 dan sa Lalwa ki pe ganny propoze i dir koumsa Mr Speaker; ‘’The Authority shall as soon as practicable’’.  I en pwen ki mon ti’n mete parey Onorab William in dir – mwan mon pa an faver nou met keksoz ‘’as soon as practicable.’’ Akoz par ler letan nou dir as soon as practicable’’ zanmen i arive!

E nou toultan dir pour dir dan Lalwa i met ‘’as soon as practicable.’’ Napa en definisyon as soon as practicable! Menm ou pour al Ankour, menm mon pour pran en kes mon pour anmenn Ankour si ladan in met ‘’as soon as practicable’’ sorry pa ankor practicable i ankor unpracticable! Konstitisyon pour anmenn en case i donn ou 3 mwan. Si ou santi ou drwa Konstitisyonnel in ganny vyole ou annan 3 mwan.   Si ou desot en zour, ou bezwen al fer Mosyon, demann permisyon, demann extension e tousala. Alors kwa ki pe anpes nou, kwa ki pe anpes nou annan en definisyon kler; en paramet kler ki pour donn en direksyon nenport ki la?  Nenport ki ki la pour li kapab fer serten travay.

Mwan mon dir ki nou bezwen met en time limit an referans avek sa.  Akoz mon dir sa Mr Speaker?  Letan nou al lo seksyon 24 selman i dir ou koumsa, ‘’The authority shall once in every 5 years after the date, which the land use plan for any district zone or group of islands, come into operation update the land use plan.’’ I donn li en time limit la.

Be sa 5 an i kapab apre 30 an ki ou pe aplik sa 5an seksyon 24.  Be akoz avan ou’n dir li ‘’as soon as practicable.’’ Practicability ki nou bezwen gete.  E si ou kapab donn li en timeframe – Minis mon ti a kontan kekfwa ou adres sa. Si nou donn li en timeframe an referans avek ki mannyer i pour review sa plan, nou bezwen osi kapab donn en timeframe pour li fer sa plan!

Mr Speaker seksyon 25, 1 i dir ki;’’The authority shall once every 10 years after the date at which the national land use plan comes into operation and thereafter once every 10years or at such time as the Minister may by notice in the official Gazette.’’

Be nou pe fer en Lalwa ki pe dir poudir apre 10an – tou le 10 an oubyen si Minis i deside. Be nou pa kapab donn ‘or’.  Nou pa kapab fer en Lalwa ki annan en fleksibilite. Demen i vin en CEO ki li i dir ok mwan mon pe stick ek sa 10an me si Minis i dir non ou pour bezwen, pa neseserman Minis ki la lot Minis, i dir be non mwan mon oule fer li dan 3an.

Me akfer nou pe kree anbigite dan Lalwa li menm! Nou bezwen serye annou pa kree anbigite annou met keksoz ki kler demen letan en – parey nou dir – en layperson i get Lalwa, i konnen ki i pe gete menm si pour li pran en aksyon legal i pour bezwen al kot en avoka, me selman i a osi edik don lekor e konnen kote son drwa e kote son responsabilite – parey nou kontan dir i fer – i arive.

27 Mr Speaker i dir koumsa; ‘’The Authority may as soon as practicable after this Act comes into operation prepare a development plan for the whole or part of Seychelles indicating the manner in which the Authority proposes that land is developed and the stages in which any such development may be carried out.’’

Mr Speaker si nou pour dir poudir nou pour fer en development plan pour Sesel – annou dir, nou pa kapab dir ‘for whole or part.’ Ankor enn fwa nou pe kree anbigite dan Lalwa kot nou pe dir ‘for whole’ apre nou pe dir ‘or part’. Savedir toultan nou pour ganny part. toultan nou pour ganny part akoznapa lobligasyon lo Lotorite pour li fer sa travay enn fwa pour tou. Toultan ki nou pour vini i pour dir nou me seksyon 27 pa dir mwan fer antye.  Seksyon 27 i dir mwan ‘or part’ alors mon’n fer sa ‘or part.’ Mon pa ankor fini mon ankor lo ‘or part.’

Mr Speaker 27 (4) ankor i kree pour mwan bann konfizyon dan time limit. 27 (4) i dir; The Authority shall once every 10 years after the date on which a development plan comes into operation, thereafter once every 5years or at such period as the Minister may by notice.’’

 I annan ki donn ou 10an, i annan i donn ou 5an. Or ki mannyer Minis pour determinen. Diferan staz wi i annan ki pour distrik. Selman menm sa ki pou distrik letan ou’n ganny Nasyonal, i dir ou apre 10an mem selman sa development plan ki pa neseserman the national plan i dir ou li premye kou i 10an apre i desann 5an ouswa ki mannyer Minis i deside dan Gazette ofisyel pibliye dan gazet ofisyel. Mon kwar nou bezwen annan en keksoz ki pli coherent, ki pli understandable ki dimoun i pli kapab konpran e prezan ki kler.

Mr Speaker, (seksyon 38), seksyon 37 i koz koumsa, i lir koumsa plito;

‘’For the purpose of this section national interest means’’ Mr Speaker pour mwan definisyon okenn term ki ganny servi dan en Act i al dan ‘definition section’. Nou pa kapab pran en seksyon ki nou fer en definisyon an referans avek sa spesifisite ki li i pe koz avek. Wi it is national interest; national interest ki definir anba sa Lalwa pa neseserman national interest ki Lafors Defans pour pran. Oubyen ki Prezidan Larepiblik koman Komandan-an-Sef pour deside ki i pe fer.  I pe pran serten aksyon oubyen i pe donn lenstriksyon avek Lafors Defans ou Lapolis pour pran serten aksyon an referans avek national interest. I pa parey alors akoz si nou pe dir nou pe fer en Lalwa, annou fer li byen.

Definisyon i ganny mete dan ‘definition section’. Akoz i annan lezot laba. Akoz sa enn nou oule kasyet li oubyen donn li en definisyon dan son seksyon. Pour mwan i pa konsistan avek drafting. Seksyon 38 Mr Speaker, 38(4) ki lir koumsa;

‘’A member of the Appeals Board shall be appointed on such terms and condition as the President may determine.’’

Mr Speaker i pa kapab. Ki mannyer Prezidan i determinen? Akoz ou pe donn pouvwar Prezidan pour li determin kondisyon. Demen i apwent Clifford Andre i dir Clifford Andre ou pour ganny R75mil. Son kondisyon ki in determinen sa. I pa ni mete ‘as prescribed.’ Alors mwan mon negosye mon deal – sa ki al Chairman i monte i negosye son deal.  Is this right e prezan nou pe legaliz sa dan Lalwa nou.

Demen ni Anti-Koripsyon pa kapab dir mon nanryen. Mon’n act legally dapre Lalwa. Napa nanryen pour li dir mwan. Mr Speaker sa i mal! I devret ganny rektifye. Devret ganny aranze. Keksoz koumsa pa devret aparet dan en Lalwa ozordi an 2019. This should be a thing of the past, if at all nou dakor ki en keksoz ki korek.

 

Mr Speaker seksyon 46 i dir ki 46 (1)(c) i dir koumsa Mr Speaker;

‘’The Authority may where it considers it to be necessary that any building of special architectural or historic interest should be preserved, make a building preservation order, restricting the demolition alteration or extension of that building.’’

Ki i pa fer Mr Speaker i pa dir ki sennla ki pour bear the cost of preserving that building. Mon building i lo mon later. I byen Gouvernman i dir mwan i en building of outstanding beauty, oubyen i devret ganny preserve.  Fine.  Normal.  Lekel ki pour ede pour prezerve? Lekel ki i pour peye pour prezerve? I koumsa. Prezan mwan mon dir ok karya pe antre ladan.  Mon pour met ater. I dir mwan non mon napa drwa met, lekel ki pour tir karya ladan? I bezwen annan serten keksoz ki ganny dir dan Lalwa ki sa dimoun ki annan sa lo son propriyete, si pour Gouvernman les li Gouvernman a fer son debrouy. Ou konpran ou.  Me si i pour en endividi kot Gouvernman, i annan le ka in arive alors lekel ki pour ed sa dimoun pour li kapab prezerv sa outstanding beauty? Ou pour zis fer en preservation order ou donn mwan. Be ki mon pour fer ek ou preservation order mwan. Ok Lalwa i bezwen kler e kler pour benefis Seselwa e Sesel Mr Speaker.

Mr Speaker avek sa de mo mon pour ekout larepons Minis, mon pour ekout diskisyon ki annan dan Komite avan ki mon fer mon desizyon lo si mon pour donn mon sipor en Bill parey oubyen mon pour rezerv, oubyen mon pa pour donn sipor en Bill parey. Mersi Mr Speaker.

 

MR SPEAKER

Mersi Onorab Andre. Mon a pas laparol avek Onorab Simon Gill.

 

HON SIMON GILL

Bonn apre midi Mr Speaker. mersi bokou Mr Speaker. Tou koleg Onorab bonn apre midi, bonn apre midi tou Manm piblik ki pe ekout nou.

Mr Speaker mersi ankor enn fwa pour donn mon laparol. Mon remarke i zis 5er nou Lasanble i sipoze fini son travay. Me Onorab Ramkalawan in dir ki nou en Lasanble ki travay. So mon krwar ozordi kantmenm 7er diswar nou ava fini nou bann deba lo sa Bill ozordi;  e an tenir kont Mr Speaker ki ou osi ou’n dir ou annan lentere pour fini deba lo merit zeneral sa Bill. So mon krwar pour napa en problenm si nou ava ale ziska  7er diswar.

Mr Speaker sa Bill devan nou Lasanble, i en Bill ki annan en dimansyon tre profon.  Sa Bill devan nou Lasanble i annan bann provizyon ladan ki anmenn nou bokou zistans pour adres plizyer bann defi ki bokou Manm piblik e bann Manm Onorab dan sa Lasanble in koz lo la pandan plizyer letan. Sa Bill dan mon lanaliz mon vwar li i etablir en sans direksyon tre korek pour ki Lotorite Planning avek tou son lantouraz – bann azan bann teknisyen e bann lezot dimoun konsernen avek son lenplimantasyon pour annan zot en pli gran sans direksyon e lankadreman pour zot kapab adres bann konsern devlopman dan Sesel.

Mr Speaker i domaz ki Sesel koman en pei ki’n ganny kolonize pour plis ki 200an nou bann kolonizater pa’n kit nou avek en bon plan devlopman apre ki nou’n ganny nou lendepandans an ‘76, le 29 Zen, malerezman e i regretab Mr Speaker. Akoz se zot laba Lerop zot in fer bann gran, gran semen, bann semen byen larz ki kapab pas 4, 6, 8, masin a lafwa. Me isi Sesel zot in kit nou avek bann santye e zot fer nou krwar pour dir zot in devlop semen, zot in devlop lenfrastriktir dan Sesel.

Mr Speaker mon kapab dir ki i pa korek. Devlopman lenfrastriktir dan sa pei Mr Speaker, espesyalman bann semen par nou bann ansyen kolonizater in selman konsantre lo lakot. E bann semen byen etrwat dan montanny kot mon bann paran ti bezwen kiltiv later ti annan bann santye. Zot ti bezwen mars apye pour zot ariv lavil.  Ti napa semen.  E pa ti dan lentere sa bann kolonizater pour fer semen. Minimonm lenvestisman ki zot ti kapab fer zot ti fer e maksimonm leksplwatasyon nou resours zot ti fer.

E nou, nou apel sa devlopman. Nou apel sa pour dir Angle in kit nou avek en bon devlopman! Mr Speaker pa korek. Annou pa fer nou krwar pour dir Angle ni menm Franse in kit nou avek en bon lenfrastriktir dan sa pei.  E Mr Speaker byensir se apre nou lendepandans ‘77 e o dela ki Gouvernman in pran li koman son responsabilite pour anmenn en vre devlopman lenfrastriktir dan Sesel.

 

(APPLAUSE)

 

 

HON SIMON GILL

E byensir Onorab Ferrari ti ganny en sans sorti dan lavil mont anler dan bwa – wi.  E sorti dan bwa desann dan lavil. Me Mr Speaker mon pe koz dan distrik kot Onorab Gervais Henrie in ganny elekte koman Manm Lasanble. Kot mwan mon ti reste anler dan Lenn se nek an 1986 ki nou ti komans trouv laklerte semen en transpor ariv en pe pre kot mazorite bann zabitan dan Lenn ti reste.  Oli Angle?  Zot pa ti war nou annan dimoun anler dan Lenn pour fer semen pour nou? Oli plan devlopman ki Angle ti kit ek nou pour devlop lenfrastriktir dan Lenn. Anse Aux Pins, Kapisen, oli Onorab Andre?  Ki plan devlopman zot ti kite isi dan sa pei?  Oli plan devlopman ki in kite?

Baie Lazare Onorab Adelaide oli plan devlopman ki zot ti kite pour Baie Lazare? Anse Aux Pins partou, Takamaka, oli plan ki zot in kite pour nou?  Epi nou koz Angle, nou koz dan lepok kolonyal in kit nou avek devlopman.

Mr Speaker wi, serten sa bann devlopman ki’n arive dan Sesel, byensir i pa en bann devlopman ki parfe.  Byensir bann Bill lankadreman, devlopman lenfrastriktir Sesel e letablisman en Lotorite Planning pa tro bokou lannen in ganny etablir dan sa pei. Me nou rekonnet nesesite pour annan en lankadreman devlopman dan nou pei. En lankadreman devlopman ki tenir kont pa zis ozordi me i tenir kont nou fitir. Me Mr Speaker eski sa lankadreman legal ki egziste ozordi i en lankadreman legal ki parfe? Byensir non.

E Mr Speaker eski nou annan bann zonm fanm ki pe travay pour fer sir ki bann lankadreman legal an sa ki konsern devlopman i bann zonm parfe ki nou annan. Byensir non, nou napa bann zonm parfe dan nenport ki landrwa dan nenport ki sosyete, nou napa bann zonm parfe. E zot bann zonm, fanm ki kapab fer lerer e ki komet lerer dan lenplimantasyon zot bann responsabilite ki zot annan.

E se pour sa rezon Mr Speaker ki bokou bann entervenan lo sa Bill, in koz lo serten bann defayans ki zot in kapab obzerve dan lenplimantasyon bann provizyon ki kontenir dan Planning Authorityy Bill or Planning Authority Ac pou et pli presi.

Me Mr Speaker ki nou bezwen, nou bezwen en konsistan. Nou bezwen konsistan dan nou bann zizman. E sa Prozedlwa devan nou Lasanble Mr Speaker i donn nou sa lankadreman pour nou kapab egzers serten konsistans letan nou pran bann desizyon.

E sa i ava fer sir i ava asire ki nou pa annan bann mankman dan donn respe sa bann provizyon ki kontenir dan sa Prozedlwa, ler in fini vin Lalwa pour nou enplimant li. Me Mr Speaker Onorab Gervais Henrie mon pe esper li entervenir mon ava gete ki kantite lir in lir sa Bill.  Akoz si lo en kote Onorab Arrisol i dir nou i pa vwar ki kote definisyon ‘tunnel’ i ete, i ti pe ekspekte trouv en definisyon ‘tunnel,’ mwan mon ava dir atraver ou Mr Speaker ki Onorab Arrisol i bezwen fer referans dan sa Bill e i a vwar anba definisyon devlopman ki kote i annan ‘tunnel.’

Anba definisyon devlopman dan sa Bill i ava vwar ki kote nou kapab vwar devlopman ‘tunnel’. Sa i a fer ki Onorab Gervais Henrie i a konpran ki nou’n lir sa Bill!

 

(laughter)

 

HON SIMON GILL

E Mr Speaker de lot kote mon kontan, mon kontan ki Onorab Arissol in rezet kategorikman bann soumisyon ki                                                                                                                              Onorab Ferrari in fer!

 

(APPLAUSE)

 

HON SIMON GILL

Ler Onorab Ferrari i fer bann soumisyon ki met an koz  repitasyon lentegrite CEO Planning e bann lezot zofisye dan Planning Authority Onorab Arissol dan son lentervansyon i i dir Onorab Ferrari ou pa korek! Akoz li i krwar dan lentegrite sa bann dimoun ki asiz lo Planning Authority! E i krwar dan lentegrite bann zofisye, bann experts ziska serten degree dan zot domenn respektif ki nou bezwen donn zot sa respe. Me problenm Onorab Arissol i dir nou bezwen fer sir ki nou bezwen respekte tou sa bann provizyon e ki nou tret tou dimoun egal. E sa nou donn sipor 100poursan e nou krwar tou dimoun i devret ganny trete egal!

 

(APPLAUSE)

 

HON SIMON GILL

Mr Speaker lo sa note e tout an tenir kont kontribisyon enportan ki Onorab Arissol in fer mon kondann soumisyon Onorab Ferrari atraver latak direk lo CEO Planning Authority!

 

(APPLAUSE)

 

HON SIMON GILL

Si lo nou kote zot akiz nou ki nou’n pratik ‘’ek nou pa ek nou’’ e nou pe kosyonn Onorab Ferrari Mr Speaker atraver ou aret pratik ‘’ek nou pa ek nou!’’

 

 

(APPLAUSE)

 

HON SIMON GILL

Les nou CEO Planning Authority desarz son responsabilite akoz nou krwar koman en profesyonnel i kapab fer son travay.  E si i annan okenn ka, si i annan okenn ka, ki ou annan sifizaman ground pour challenge son desizyon, fer li atraver bann prosedir ki’n ganny etablir. Me aret servi sa platform Lasanble Nasyonal pour kontinyelman atak nou CEO Planning Authority …

 

(APPLAUSE)

 

HON SIMON GILL

zis akoz i campaign pour United Seychelles!

 

(APPLAUSE)

 

HON SIMON GILL

Mr Speaker pour kontinyen avek lo merit zeneral nou provizyon de Lwa ki devan nou Lasanble i anmenn pour koz lo sa dernyen soumisyon, ki ou’n koz lo la ki ou’n lir, e ki mon krwar apre ki ou’n lir i donn nou en posibilite pour koz lo la. E sa i an referans avek en stop notice ki’n ganny donnen. Lo sa pwen Mr Speaker mon soumet ki nou bezwen fer sir dan lenplimantasyon provizyon legal ki zer legzistans e loperasyon Planning Authority, ki nou gard ankor enn fwa mon repete konsistans dan bann desizyon ki nou pran. Tre enportan! Konsistans. E sa i elimin premiz pour okenn endividi fer bann soumisyon lekontrer avek bann desizyon ki Lotorite Planning i pran, e i donn sa posibilite reel pour piblik annan trust dan zot desizyon ki zot pran!

I tre enportan sa Mr Speaker. E i regretab, mon pe dir i regretab ki sa lensidan in arive avek Mr Morin. E mon krwar dan let ki in ekrir i pe ekspekte en repons apre ki in soumet en quote proposal si mon kapab dir – lo zot dernyen korespondan ki zot pe fer pe anvoy kot li. Dernyen korespondan ki zot in fer ki zot in anvoy kot li. In anvoy en lot let e i pe ekspekte en repons.  Sa pa vedir ki zot pa pour mentenir zot pozisyon me i etablir sa premiz pour zot rantre e reakte kominike avek li pour ki nou kapab ganny en solisyon.

E sa i anmenn mon lo en lot pwen Mr Speaker lo pwen PR an sa ki konsern Planning Authority, avek tou son bann provizyon ki egziste or ki zot pour ganny donnen anba sa nouvo Prozedlwa. Mon pe soumet Mr Speaker avek Minis e si nou lekip Planning Authority, pour zot antre dan en plan, dan en progranm pour donn lenformasyon detaye lo provizyon sa nouvo Lalwa, ki pour vin an viger byento apre ki Lasanble in fini fer bann prosedir neseser.

Annou edik nou pep. Annou fer zot konpran kwa ki nouvo dan kontenir sa Prozedlwa ki’n byensir i ava vin Lalwa e zot ava konpran pour dir, bon vwala bann paramet ki mwan mon annan e vwala bann lot paramet ki mwan mon annan.  I en kestyon ledikasyon,   ledikasyon, ledikasyon nou pep.

Mr Speaker i anmenn mon lo mon lot pwen e mon lot pwen i relevan avek beach access ki konteni dan bann provizyon ki sa Prozedlwa in fer ki la devan nou Lasanble.

Mr Speaker lo sa pwen i annan en Onorab ki’n koze e mon pour mansyonn son non ankor Onorab Arissol.  In fer en pwen tre enportan Mr Speaker – tre enportan; kot in dir ler Lalwa pour fer provizyon pour donn nou Seselwa en drwa ki nou ti annan nou. En drwa ki nou ti annan pour nou akse lans pour nou ganny akse avek lans. Sa i en drwa natirel e Onorab Georges i kapab dir ou sa malgre in sorti la in ale en pti moman i kapab dir ou sa. En drwa natirel akse lo lans. Atraver later, me Mr Speaker lo la ki mon oule dir nou respekte tou drwa propriyeter later ki annan son later ki baliz avek lans. Nou respekte tou zot drwa.

Noyu respekte zot drwa me an menm tan nou mesaz se ki akse lo lans  atraver later i osi bezwen ganny rekonnet akoz nou kreol Seselwa nou kontan nou lans malgre depi ler zot in koloniz zot, zot in pous nou tou dan bwa zot in rezerv lans pour zot!

 

(laughter)

 

HON SIMON GILL

Mr Speaker bann dimoun ozordi, nou bann frer ser Kreol Seselwa ki annan later lo lans pa zot pa zot ki’n pous nou bann Kreol Seselwa dan plantasyon dan bwa.  Pa zot, zot finalman apre sa apre ki tou nou bann Kreol Seselwa ti’n enstal zot lekor dan bwa akoz zot ti bezwen al plante pour fourni letablisman, tou lans, tou lakot lans ti ganny pran par bann  gran, gran zans. E ozordi bann ki’n aste son later obor lans ozordi ki’n annan le mwayen, nou napa okenn problenm avek zot. Be nou pe dir zot gard nou akse pour nou osi al lo lans.

 

MR SPEAKER

Onorab ou annan 10 minit.

 

HON SIMON GILL

Mr Speaker mon realize pour dir mon pe ganny en pti gin letan me mon annan ankor detrwa pwen ki mon anvi koz lo la. E mon pa ankor fini lo sa pwen akse lo lans.

Mon pwen lo akse lo lans  ki konteni dan sa Lalwa ki devan nou Lasanble, i anmenn mon pour dir en keksoz ki annan en lyen tre pros avek nou bann devlopman, nou bann fasilite touristik; nou bann lotel; nou bann guesthouse ki preski ranpli lo nou bann lakot lans. Mr Speaker wi i annan Seselwa ladan. Me nou annan en group dimoun ki permet nou en bon pe nou dan sa pei soutenir nou biznes Mr Speaker; soutenir nou lenvestisman. E sa group dimoun lekel zot. E sa se bann touris ki sorti deor ki vini ki vin pas vakans isi kot nou e nou dir zot welcome.

E ler nou dir zot welcome byenveni, byenveni Mr Speaker nou pe dir avek nou bann frer, ser Seselwa, ler nou donn zot akse lo lans ki nou bezwen osi konport nou e azir nou dan en fason kot nou pa deranz trankilite bokou sa bann touris ki sorti tre lwen, byen lwen ki vin rod sa trankilite ki Sesel, ki Sesel Mr Speaker i ofer. E ki bokou pei dan lemonn pa kapab ofer sa trankilite ki Sesel i ofer e sa lospitalite ki Sesel i ofer nou bann touris.

E si nou egzazere Mr Speaker ler nou donn zot akse lo lans nou dir zot atansyon akoz nou kapab kree en serten dezekilib, dan sa lendistri touris ki soutenir en bon pe nou biznes e ki soutenir en bon pe poursantaz.  E Onorab Afif i konn sa byen, ki soutenir nou Bidze ki nou prezante toulezan, nou Bidze konpran mwan byen pa i vre Onorab Afif. Ou fer mwan thumbs up, mon krwar ou konpran sa tre byen.

E dan Committee Stage nou pour kapab debat lo la e argye pour gete ki mannyer e atraver zot bann zofisye ki la, Minister nou anmenn en legzersis en kanpanny Minister touris i bezwen antre e kontinyen sa ledikasyon, ki nou bezwen prezerv nou lendistri touris.  Annou pa al tro an ekse avek bann tapaz lo nou bann lans.

Mr Speaker i anmenn mon lo en lot pwen mon pa tro konnen ki kantite letan ki ou’n rezerve ankor pour mwan. Me mon ti annan ankor 5 mwen mon ti oule aborde.  Lot pwen ki i ekstrememan enportan ki nou koz lo la Mr Speaker, e sa i relasyonnen avek sa kestyon ‘gous’ ki mon’n tann koz lo la ozordi e dan loperasyon e dan legzersis bann responsabilite e fonksyon bann zofisye dan Planning Authority.

Mr Speaker mwan mon ava dir en keksoz. Si Onorab ki’n koz lo sa size e mon kapab mansyonnen akoz mon recall lekel ki’n koz lo la, Onorab Loizeau – si i annan okenn levidans – okenn bann dimoun dan sa biro in pran gous silvouple fer le neseser e anmenn bann levidans, pour ki sa bann dimoun respektif i ganny deal avek Lotorite konsernen. Annou pa zis dir me annou azir. Annou azir.  Annou anmenn bann levidans pour ki bann dimoun lo Lotorite Planning sa lekip ki laba, anba direksyon Mr Bonnelame zot santi zot alez dan egzekisyon zot bann responsabilite ki zot in ganny donnen pour desarze.

E Mr Speaker mon lot pwen ki mon oule touse, i an referans avek nou provizyon de Lwa ankor e lespas ki’n paret en konfli ki Onorab in souleve pli boner.

E Onorab in koz lo en aparan konfli ki i annan dan kantite letan ki ganny donnen pour fer revizyon lo bann plan devlopman bann distrik.  E sa se pa lot ki Onorab Clifford Andre, Onorab ki’n ganny elekte pour distrik Anse Aux Pins.  Mr Speaker lo sa note mon krwar i enportan ki Minis dan son summing-up i eklersi sa pwen.

Dan mon lenterpretasyon, dan mon analiz e mon soumet ki nou bezwen annan fleksibilite. Nou bezwen annan fleksibilite e pa ser bou avek en lankadreman legal ki epi toultan nou pour bezwen amen Lalwa dan Lasanble pour nou al revize. Si nou oule etablir en fleksibilite en lespas letan 5an or 10an e donn diskresyon en dimoun dan lotorite pour deside pour dir la wi baze lo bann legzizans ki ava sorti byensir, dan sak sa bann distrik electoral, byensir fleksibilite legal i ava la, pour ki nou bouz ver en revizyon or en amannman sa plan devlopman pour bann distrik respektif.

E lo sa note Mr Speaker. lo sa note mon ava demande, mon a soumet avek Lotorite ki la ozordi annou rasire ki nou angaz mazorite bann sitwayen dan bann distrik e bann leaders politik dan bann distrik e bann lezot  stakeholders, bann NGO dan tou sa bann legzersis revizyon bann plan devlopman pour bann distrik.

E byensir mon soumet ki nou bezwen met en lafen avek sa legzersis e pibliy rezilta sa bann legzersis e envit piblik pour vwar sa dokiman final ki konteni plan devlopman pour sak nou bann distrik elektoral. Mon krwar moman in arive, e mon krwar nou pe debord en pe dan lespas letan pour nou kapab fini avek plan devlopman sa bann distrik.

E byensir malgre ki nou pe dir ki nou devret fleksib avek konteni bann plan devlopman pour sak bann distrik Mr Speaker, nou pe dir osi ki nou bezwen enplimant li, nou bezwen enplimante.

Ki mannyer nou pour enplimante nou bezwen angaz nou bann stakeholders dan sak sa bann distrik, pour ki ansanm nou met latet ansanm pour ki nou annan en sans direksyon ki mannyer sa bann plan i kapab ganny enplimante. E byensir si nou pran nou 10an 15an ler nou’n fer en plan devlopman pour en distrik nou pa enplimant li apre 10an/15an probableman sityasyon dinamik devlopman in sanze e nou bezwen bouze al demann al refer en konsiltasyon avan ler nou komans enplimante.

E sa i bann largiman ki’n souleve e mon’n tann en Onorab lo lot kote latab ki’n lev sa size. E mon krwar i annan rezon ki in leve. Nou kapab fer plan apre 15an nou pa ankor enplimante. Byensir i call for probableman en revizyon en regete avan ler nou bouze akoz ankor enn fwa bann dinamik lokal, bann dinamik dan sak sirkonskripsyon in sanze. Mr Speaker mon pour al konklir lo detrwa note. Mr Speaker.

 

MR SPEAKER

Wrap-up Onorab.

 

HON SIMON GILL

Wrapping-up.  Konklizyon No.1 Mr Speaker konklizyon nimero 1 se ki sa Gouvernman Mr Speaker e sa parti ki mon reprezante isi dan sa Lasanble Mr Speaker is not about the past! Mr Speaker United Seychelles is about the future of Seychelles!

 

(APPLAUSE)

 

HON SIMON GILL

E the future of Seychelles Mr Speaker i anmenn nou pour nou al vwar ki kalite proze devlopman, tout an respektan bann lankadreman legal ki nou kapab fer, pour anmenn Sesel de lavan Mr Speaker.  E pour li mentenir son stati koman enn bann pei ki lemonn bokou sitwayen dan lemonn i reve pour ne e viv.  Mr Speaker sa i sa filozofi ki mon parti i siporte! We about the future and the future is about the United Seychelles Mr Speaker!

 

(APPLAUSE)

 

HON SIMON GILL

E sa Prozedlwa Mr Speaker, Mr Speaker, sa Prozedlwa avek tou son lenperfeksyon mon krwar i annan premiz pour anmenn nou odela sa 10an, 15an, 20an.

E dernyen pwen konklizyon Mr Speaker, mon ava dir avek bann koleg Onorab dan sa Lasanble – lo tou le de kote latab anmenn bann provizyon nouvo. Annou anbelir sa Prozedlwa ki devan nou Lasanble ozordi. We have an unique opportunity Mr Speaker pour nou anbelir sa Prozedlwa e fer li enn bann Prozedlwa meyer pour ki Sesel i devlope. E nou demann avek bann dimoun dan Lotorite Planning to give your best shot e fer sir ki nou et fair and just dan bann desizyon ki nou pran. E i sel fason ki zot kapab build up public trust e respect pour zot.  E ki Sesel i reste en Sesel kot nou tou napa ‘ek nou pa ek nou’ and TOGETHER avek United Seychelles we move forward! Mersi bokou Mr Speaker.

 

(APPLAUSE)

 

MR SPEAKER

Mersi Onorab Simon Gill. Mon a donn laparol avek Onorab Wavel Ramkalawan. En moman, en moman Onorab, en moman. Yes Onorab Norbert Loizeau.

 

HON NORBET LOIZEAU

Mr Speaker mon anvi klarifye en keksoz ki Onorab Gill in dir.

 

MR SPEAKER

Go ahead.

 

HON NORBERT LOIZEAU

Ki order, Mr Speaker anba 56, (1) (d), (Onorab Sebastien Pillay mwan annan Standing Order avan ou vin dan Lasanble!)

 

(laughter)

 

 

HON NORBERT LOIZEAU

Depi 2007 mon dan Lasanble …

 

MR SPEAKER

Onorab, Onorab, mon’n donn ou laparol. Adres the Chair.

 

HON NORBERT LOIZEAU

Ok, mersi. Mr Speaker mon anvi dir ek Onorab Gill, mon pa’n dir personn in pran okenn gous, mon’n dir dapre konpran ti annan en zak.

 

(Interruption)

 

MR SPEAKER

Mersi Onorab. Onorab Ramkalawan laparol i pour ou.

 

HON WAVEL RAMKALAWAN

Mersi bokou Mr Speaker. Mr Speaker byensir mon’n ekout tou bann deba avek bokou pasyans e avek bokou atansyon. E vreman mon anvi dir avek Minis avek son delegasyon mersi bokou la fason ki zot osi zot in ekoute.  E mon mazinen sa dernyen entervenan i fermal parfwa be zot omwen zot ganny sa en fwa rar, be nou, nou ganny sa ase souvan.

So alor mon senpatiz avek sa e mon promet zot ki poudir  mwan mon pe vin regard sa Bill avek en lespri pour nou ganny solisyon.  Parski i pa volapenn pour nou regard en Lalwa ki konsern nou tou ki pour tous nou tou Seselwa dan nenport ki fason san ki nou anmenn serten kontribisyon pour fer li vin pli bon.

Petet i annan serten parol ki’n ganny dir ki kapab ganny enterprete diferan fason. Par egzanp sa mo koripsyon.  Sa mo ‘koripsyon’ i pa neseserman vedir i annan dimoun lo board oubyen lo Planning Authority ki pe pran larzan. Sa mo koripsyon ou kapab regard li dan diferan fason e mon ava don en legzanp ki Planning Authority menm ti donn nou bann dokiman e ki pour montre ki i annan serten keksoz ki pa’n mars dapre lafason ki bann Regilasyon i devret marse. Annou regard proze Cosmoledo, bann containers ki’n ganny mete laba pour fer sa pti lotel.  I kler ki poudir letan nou’n regard bann dokiman commencement notice avek son date of completion i menm dat. Savedir sa dimoun, sa lakonpannyen IDC dan sa ka, ki ti pe promot sa devlopman i pa’n swiv Regilasyon Planning pour li donn son commencement notice letan i pe komans proze e son completion notice letan in fini proze.

E nou osi konnen ki poudir Planning Authority pa ti ganny sans pour zot vizit Cosmoledo parey zot abitye fer, letan avan ki en proze i komanse pour zot vizit sa site, fer sir ki tou keksoz i annord oubyen anvoy serten bann zofisye pour regarde.

E sa i pa sorti kot nou sa. sa sete Planning Authority li menm li letan kestyon ti ganny demande dan Lasanble, e atraver bann dokiman ki zot in donn nou i montre klerman ki keksoz pa’n mars parey i devret marse. E sa i kapab ganny enterprete koman en koripsyon. Alor mon krwar ki fodre ki nou balans tou keksoz. Ou konnen i annan serten dimoun letan nou pe koze, letan nou pe koze zot krwar ki petet nou annan problenm personnel.

`       Letan nou dan en deba nou pa pe vin koz lo problenm personnel, letan nou dan en deba nou sipoze rise above personnalite.  Nou sipoze kapab desann lo prensip pour nou letan nou regard sa bann prensip, regarde kote keksoz pe mars byen premyerman me lo lot kote regarde kote keksoz pa pe mars osi byen e atraver letan nou fer sa sentez nou tonm lo serten konklizyon ki pour donn nou en way forward.

Mwan Mr Speaker se sa la fason ki mon ki mon apros nenport deba dan sa Lasanble. E apre midi ankor enn fwa mon pour fer li dan menm fason. Ou konnen Mr Speaker i vre ki letan nou regard Town and Country Planning Act ki dapre letan ou pe regarde ki ti vin an aplikasyon 1972 parey Minis ti remind nou, nou ti ankor en koloni. E byensir koman en koloni dan en pti git letan apre nou ti pour pran lendepandans ti annan serten realite sa letan, ki diferan avek realite ozordi.  E alor nou bezwen absoliman transfer sa prensip, transfer son lesans sa Bill an sa Lalwa 1972, pour nou fer li fas avek realite ozordi. E letan nou pe fer sa byensir nou pour bezwen regard bann defayans.

E pour mwan Mr Speaker definitivman mon war ki malerezman nou pei in mank bokou loportinite. Petet letan nou pour koz ‘72, letan nou mazin nou bann paran ki ti travay dan tarmac parey nou ti apel zot, travay dan tarmac pour fer bann semen nenport ki landrwa kot ou pase Port Glaud, Takamaka ensidswit e ki apre nou ti bezwen donn zot en konpansasyon spesyal e mwan menm mon Mr Speaker ou rapel mon ti anmen en Mosyon dan Lasanble pour ki zot ganny rekonpanse.  Sa ki nou war se nou ti annan en network semen.  Basic network e byensir ‘72 nou pa ti ekspekte war en highway. Nou pa ti pour kapab war en highway akoz lakantite transport ki ti annan. I pa ti pour nesesit en highway.

Menm parey avek ozordi letan nou pou regard lakantite  transport ki annan Sesel se zis dan sa dernyen 5an – sa dernyen 5an a 10an ki nou’n ganny sa kantite transpor dan pei e ki ozordi pe donn nou problenm konsesyon e alor i demande ki nou kapab fer bann nouvo lenfrastriktir. Alor toultan nou bezwen bouz dapre nou bann letan me selman nou bezwen fer sir ki nou detrwa lannen osi tou dan nou planning ahead. E mwan letan mon pe regarde ozordi definitivman i annan serten landrwa kot mon dir Planning i devret vin pli serye. akoz zot devret pli serye se pour zot regarde letan ou donn permisyon en dimoun pour fer en miray, be regarde ki posibilite pour nobou elarzi sa semen. Parski si ou’n donn li sa permisyon pour li fer en miray ki pas drwat kot son balizaz i fini borde avek semen apre sa i vin difisil pour nobou elarzi sa semen. Par egzanp letan mon regard, letan ou pe al bor kote Cap Ternay i annan en miray omwen ki lo balizaz sa propriyete e alor aprezan i fer li difisil pour ou elarzi en semen.  Parey espesyalman ki parey nou’n tande tou dernyerman bann proze devlopman Cap Ternay ensidswit, ki pour annan en Master Plan ki pou ganny devlope alor sa bann keksoz koumsa i kapab fer li en pe difisil. Donk mon pe servi sa zis koman en legzanp.

So Mr Speaker i vre ki nou bezwen regard pli devan. E pour mon enn bann keksoz ki’n vreman, ki’n vreman evidan dan sa deba ki nou’n gannyen se ki tou le de kote latab in dir napa problenm avek Lalwa li menm. Tou le de kote latab e mwan mon enn mon osi tou mon dakor avek sa ki pour dir dan sa Lalwa i annan serten bann nouvo provizyon. Nou’n koz lo beach access ki tre byen. Nou’n koz lo bann zafer bann lavertisman ki definitivman nou bezwen annan en lord ladan e nou’n osi koz i annan diferan bann lezot keksoz ki nouvo dan sa Lalwa.  Fantastik. Tou le de kote latab in dir sa. Me i annan osi en keksoz ki tou le de kote latan in dakor avek.

Tou le de kote latab in dir nou bezwen regard la fason ki sa lotorite li menm li i travay e nou’n koz lo dan en serten sans en fason avek kapris, la fason ki permisyon pour fer serten batiman in ganny donnen. Par egzanp letan mon regard Mont Fleuri kot laboutik – ant laboutik Chung-Faye  lontan ansanm avek Mr Bonnelame nou ti Kolez ti annan laboutik Chung-Faye  ansanm ek Onorab De Commarmond ek plizyer mon  bann zanmi ti annan laboutik Chung-Faye  avek laboutik Hiseng.  E la dan sa plasman i annan 2 laboutik ki’n ganny fer. Me ki mannyer mon pa ganny en konpran enn i annan mwens letaz ki lot. E pourtan tou le de ti’n demen menm oter me enn in gannyen lot pa’n gannyen.  E enn i pli pre avek grande rout.  Lot in ganny demande pou ant en set back.  Alor deswit la mon dir be ki arive ? I annan en keksoz la !  I annan en keksoz ki pa normal.

So e nou kapab donn plizyer lezot legzanp kot Planning li menm li i donn serten dimoun par egzanp lanmar.  Lanmar – konble lanmar i en lot size ankor ki tanzantan nou’n koz lo la.  Kot ou tande poudir tel dimoun in ganny permisyon pou li konble lanmar.  North East Point par egzanp i en tipik legzanp.  Ok.  Mare Anglaise Mrs Sarah Rene in konble sa lanmar ki donn Mare Anglaise son non !  E in fer serten keksoz ladan e sa lanmar ozordi e la mon vwar ki i pe fer bann lezot keksoz ladan.  Sa i kont Prensip Lanvironnman pou konble. Be letan dan kontour North East Point Mr Despilly William letan i ti pe fer son batiman i ti ganny drwa konble sa lanmar.  Apre sa in annan en lenpak lanvironnman.  Parski deryer i annan sa gran lanbousir e ki konmans bor la, kot sa laboutik i konmanse ki al fini kot deryer lopital North East Point i ale ziska Soleil D’Or.

Alor set en pe sa bann keksoz koumsa la ki  letan nou pe fer refleksyon nou dir  be tyonbo en kou be tel keksoz i pa pe mars normal.  Alors nou bezwen lev nou nivo.  E taler mon pou vin lo sa size Jean- Pierre Morin.  Parski mon krwar ki poudir sa osi tou.   E mon pou montre zot ki mannyer Planning zot annan serten defayans, serten defayans ki evidan, ki kler.   E aprezan letan i annan sa bann defayans i annan ki kler ki i vini? I vin en lenzistis!  E mwan parey bokou mon bann lezot  zanmi ki’n koze lo sa kote latab mwan mon enn ki mon’n antre dan politik lo sa tiket lazistis!  Keksoz ki pa ti zis e depi ziska ozordi mon ankor pe lager lo sa nivo.

Alor Mr Speaker tou le de kote in dir i annan en problenm ek lafason ki Planning i pran desizyon.  E mwan mon vwar ki sa nouvo Lalwa ti’n devret donn nou sa loportinite pou nou regard de nouvo ki mannyer sa Board i ganny apwente.  E mon a dir zot akoz.  Anba Lalwa aktyel se Minis anba Schedule 1, se Minis ki annan sa Lotorite pou li apwent en minimum 5 manm.  Minis i fer sa e sa bann dimoun i vin lo Board.  E sa Lalwa li menm li i fer provizyon ki letan en dimoun i pa satisfe avek desizyon ki Board in donnen i kapab fer rapel avek Minis.  Minis ki sa appeals body.  E mon konn sa byen akoz mwan mon’n deza fer en rapel avek Minis lo en desizyon ki Planning Authority ti donnen.

Alor mwan mon krwar ki pli gran defayans dan sa Bill e sa i osi pli gran problenm pou mwan vot pou sa Bill akoz i en kontinyasyon.

Mwan mon krwar ki poudir moman in arive dan modernite pou nou ranplas en Board ki son konpozisyon i prensipalman civil servants avek en Board ki pli profesyonnel.  Annou al an deor sa eleman civil service.

E mon a donn zot en legzanp Singapore from sa ki mon’n regarde Singapore in pran sa model, kot se prensipalman bann businessman ki – well letan mon pe dir businessman bann profesyonnel ki pa dan Gouvernman ki form parti zot Planning Authority.

E an plis ki sa non selman ki zot in fer sa me zot in osi met serten Singapore pourtan nou konn Singapore konman en landrwa ki strik, en landrwa ki son devlopman i mars byen kot dan Lalwa Planning Singapore, si apre ki ou’n fer ou laplikasyon ou pa ganny en repons apre tan kantite letan, ou go ahead e ou konstri.  Parski i met lanfaz lo sa Lotorite pou li pran tou bann ka deal avek e donn en larepons parski zot dir avek ou time is money.  Me nou Sesel petet sa konsep ‘’Time is money’’ i ankor en konsep ki pa ankor vreman  vin konman en priyorite.

E sanmenm sa ki Planning i trennen, lot, lot, lot.  E me zis en dimoun ki kekfwa i ganny e let i pa ganny en larepons.  Keksoz i tarde ensidswit.  Be antretan time is money.  Sa envestiser, sa dimoun ki pe fer son lakaz i kout li bokou pli ser apre.  Alors Mr Speaker mwan mon krwar ki poudir sa Board lo seksyon 9 e mwan mon pou lo sa pwen la prensipalman  mon pou dir ek Minis ki nou pa pou kapab pas sa Bill akoz nou bezwen regard sa.  Kot la ozordi ki nou vwar lo la.  Ok.

Chief Executive Officer nou bezwen annan en Chief Executive Officer ki pou ex-officio e li i ganny nonmen par Prezidan e ki mannyer i ete la i osi ganny drwa vote.  Nou ganny ‘’reprezantan Minister.’’  ‘‘Reprezantan Minister’’, ‘‘reprezantan Minister’’, ‘‘reprezantan Minister’’ ‘‘reprezantan Minister’’ ‘‘reprezantan Minister.’’  Apre sa i dir avek nou reprezantan Chamber of Commerce. E apre sa 5 members having experience and knowledge in matters of land use planning and development.  E nou konnen ki poudir in osi parmi sa bann annan bann lezot civil servants.  E i fer ki ozordi lo sa Board ki mannyer i ete la ou pou ganny ou 8 reprezantan Gouvernman, kont en posibilite maximum 6 dimoun ki pa dan Gouvernman.

Mr Speaker mon krwar ki sa i landrwa prensipal kot nou bezwen annan en sanzman.  En civil servant san ki nou kritik li. En civil servant, se pou sa rezon i apel en servant.  E lontan bann civil servant letan zot ti siny zot let zot ti siny, ‘’Your obedient servant.’’  E dan bann pei kot civil service i for that’s the way it is.  E alors en civil servant par natir i pou ekout son Minis.  Par natir i pou osi ekout Polisi Gouvernman e i pou panse ki poudir son desizyon ki i pran i bezwen al anliny ek Polisi Gouvernman.

Be en Planning Authority wi i pou ekout gran liny Gouvernman ki mannyer i pe panse ensidswit letan – me selman i annan en lot eleman. I annan sa eleman enparsyalite.  I annan sa eleman endepandan e i annan sa eleman ki mon krwar i al bokou pli for ki en civil servant pou annan.

Konbyen fwa mon’n tann en civil servant ki dir avek mwan ‘’wi mon konpran ki ou pe dir me selman ou konnen mon pa kapab fer sa akoz – ou konnen taler ou a fer mwan ganny problenm !’’

Nou tou nou tann sa.  Alor Mr Speaker mwan mon krwar ki nou bezwen move dan modernite.  Mon krwar ki kot nou ete ozordi nou bezwen kapab enkli bann zenn, bann zenn ki dan zenerasyon Sim City. Bann zenn ki’n zwe Sim City ki mannyer pou devlop lavil.  Nou bezwen kapab move dan en direksyon kot nou bann zenn Seselwa ki nou’n peye pou zot al fer letid deor oubyen ki’n pran zot letid lo zot menm ki mannyer pou al dan urban planning, dan rural planning, dan ki mannyer pou transform en vilaz dan en pti lavil ensidswit.  Mon krwar ki in ler pou nou al dan sa direksyon pour ki zot osi tou zot kapab santi ki zot annan sa posibilite pou zot vin lo Planning Authority.  E atraver sa zot ava kapab donn zot lide, fer en kontribisyon.

So mwan mon krwar ki sa seksyon lo lafason ki – lo seksyon Board of Authority nou bezwen regard li e la mon ti ava demande ki letan mon pou ekout larepons Minis mwan mon ti ava zis dir ek Minis mon ti ava kontan ki nou ganny en bon desizyon lo ki direksyon ki ou pe anvi ale.  Ou pa pou fer ou larepons ozordi.  Ou pou fer ou larepons semenn prosenn.  Ou pou fer ou larepons ozordi?  Be Minis be si ou pou fer ou larepons ozordi mon anvi dir avek ou fer en gran atansyon.  Akoz mwan personnelman e  mon’n koz osi ek mon bann lezot koleg si, …

 

(Interruption)

 

HON WAVEL RAMKALAWAN

… si mwan Mr Speaker mon pe reprezant, mwan mon Leader sa group ki isi dan Lasanble e letan mon Leader sa group li la, la mon diskit avek sa group e nou tonm dakor lo ki mannyer keksoz pou deroule.

E pou lenformasyon Onorab Pillay letan, letan enn nou Manm – letan enn nou Manm i koze, zanmen nou’n kriy li lo kote pou nou sispann li lo okenn Komite! 

 

(APPLAUSE)

 

HON WAVEL RAMKALAWAN

E pou nou dir avek li fer atansyon!  Napa okenn nou Manm ki’n ganny kriye lo okenn Komite Disiplin ki’n bezwen ganny raporte pou li – ki’n ganny demande pou raporte anba Maison Du Peuple pou li ganny disiplinen!  Alor Onorab, Onorab konport ou en pe en?

Alor Mr Speaker mon senpleman, mon senpleman anvi dir avek Minis annou al en pe dousman lo la.  Annou al en pe dousman lo la.  Nou anvi en keksoz konkret parski nou lo nou kote nou pa pou siport en Board Planning Authority ki ranpli avek civil servants !  Nou anvi ki sa Lotorite a sa moman kot nou ete.  E Onorab Gill in dir annou al dan modernite, tatati tatata.  Be si i ape dir sa, nou, nou pe dir nou dakor avek Onorab Gill e nou konnen ki poudir nou pou ganny ou sipor.

Alor Mr Speaker lo sa pwen la mon anvi ki Minis i –  e mon ti a kontan Mr Speaker, petet letan mon pe dir sa mon ti ava kontan vwar ki poudir Planning Authority olye ki bann dimoun i zis ganny nonmen par bann diferan Minister ;  par egzanp si nou tonm dakor ki poudir lo Planning Authority pou annan 12 dimoun ki bann dimoun ki pe vin lo la i kapab annan de PS lo la.  Mon pa dir ki i pa devret annan de reprezantan Gouvernman spesyalman Minister ki konsernen avek Land Use and Habitat oubyen apre kekfwa en lot Minister.  Nou met lanfaz lo lanvironnman kekfwa sa.  Me selman ki mazorite bann Manm zot kapab pas dan en prosesis interview kot tou dimoun ki santi i annan en posibilite e kot i annan en kontribisyon i ava kapab ganny interviewed e apre sa baze lo son – baze lo son abilite, baze lo son konesans ekspertiz i kapab vin lo la.  Se sa ki mon pe met devan ou Minis e si ou dakor pou al dan sa direksyon, nou kapab asir ou ki ou pou ganny nou sipor an antye.

Mr Speaker lo sa si Minis i anvi koz ankor nou ava kapab koze.  Me aprezan Mr Speaker zis pou mwan retourn lo sa size ki’n rezilta en larepons sorti kot Minis.  Mr Speaker premyerman mon anvi dir ki mwan pou mwan e mon bezwen dir sa klerman Mr Jean Pierre Morin i en zanmi personnel e mwan mon’n swiv tou sa, tou sa mon pa konnen si mon pa konnen si mon pou apel li  saga.  Mwan mon’n swiv tou e Mr Speaker mon ava dir ou mon’n vreman soke parski letan mon regard listwar sa later premyerman e Mr Bisconet ki la i konn byen  zistwar sa later akoz i annan serten dokiman la ki kot mon vwar son sinyatir.

Parski sete Mr Biscornet li menm li ki ti konman sa letan Direkter Zeneral pou Land and Territories ki ti siny let pou Sekreter Prensipal le 24 Septanm 2003 kot zot ti dir anvoy premye let ki zot ti anvi aste sa later e apre sa pa ti aste apre sa ti annan en acquisition ki ti arive.

Mr Speaker, zis sa en dimoun i annan en later lari bazar.  E letan ou regard sa later lari bazar en dimoun ti annan en later be ti annan bokou zot later Lari Bazar ki bord avek bazar.  An plis ki sa later Mr Cherubin Morin i annan semen Benezet ki ant li avek bazar.  Tandis ki lo lot kote i annan la fanmir Lailam ki zot, zot later i  baliz avek bazar.  Be kestyon se, be akoz Gouvernman in pik lo sa enn la ki’ separe avek en semen pou li extend bazar?  E non pa avek later Mr Lailam.  Mon kontan ki la fanmir Lailam pa’n pas dan sa enferno.  Be Mr Speaker se parski ti annan en konsekans politik.  Tou dimoun i konnen sa e depi sa moman sa fanmir in pas dan en persekisyon.

Pourtan letan zot ti dir zot pou ankouraz sa later zot i’n fek fini fer renovasyon lo bazar.  E ti napa nanryen ki ti – dan let ki Onorab Georges sa letan ki ti pe azir pou la fanmir Morin ti ekrir ti dir be i drol ki poudir zot in fek fer extension bazar i dir, ‘‘While the issue of extension of the market has been explained, we are unable to accept that our client’s land, should have been singled out for this when other adjoining owners of land have been spared and have even been allowed to re develop their sites in the recent past.  Similarly the market itself was recently re developed and we cannot accept that space constraints would have escaped notice at the time’’.

Mr Speaker sa i montre ou son konmansman me pou nou al dan sa saga.  Mr Speaker dan let ki CEO Planning in dir i montre nou ki poudir ki Chairman, sorry ki Chairman Planning Authority i ekrir i dir klerman ki poudir permisyon oubyen plan Mr Morin li pou li, in al ziska State House.  E la Mr Speaker mon pou dir Vis-Prezidan ti pran en lentere personnel ladan.  Vis-Prezidan in fer Mr Morin mont anler State House Sanmdi bomaten pou diskit son plan!  Petet bann Minis pa konnen mon pou dir zot ozordi.  Devan Mr Morin i ti appel – Vis-Prezidan ti call tou bann Minis e ti met zot lo speaker phone pou demann zot,  zot lopinyon, pou demann zot en commitment, akoz li i ti ape siport sa devlopman.

Mr Speaker plan Mr Morin in ariv ziska devan Cabinet e tousala zis pou montre ou ki mannyer in annan tou sa bann kalite keksoz.  Me an plis ki sa Mr Speaker letan mon regard desizyon Planning li menm e tanzantan mon’n vwar sa mo ‘’urban design guidelines’’.  Mon’n sey rode lo website, mon pa’n kapab ganny en kopi e mon ti ava kontan si zot ti donn nou en kopi sa ‘’urban design guidelines.’’  Mon ti ava kontan gannyen.  Me selman Mr Speaker letan zot ti ganny let pou nobou refer sa devlopman e parey Chairman Planning Authority i dir ti mete ki poudir dan en fason strik dapre ‘’urban design guidelines’’ ki ti pou dir ‘’ground plus attic, ground plus 1 plus attic on the sides facing Benezet street and Market Street.  And ground plus 2 plus attic on the side facing Market Street car park.’’  Me selman sa menm strict guidelines ki sipoze strict guidelines, dan sa let ki madanm Angela Servina i ekrir le 17 Zen 2019 e sa let i swiv apre ki Mr Morin ti’n ganny sa meeting avek VP anler State House ou konnen ki i dir avek li, i sanze.  Sa strict guideline ki dan en let lot i dir ki dan sa urban development zafer la i dir ‘‘In respect of the above please note that the authority has resolve to allow that the building to be increased, to be increased’’. In fini kas, zot in fini kas zot prop Lalwa ki sipoze strict.  ‘’To be increased to a minimum of ground plus 2 plus attic floors all throughout.’’  Nepli en oter lo Benezet, en oter lo taxi pirat.  ‘‘However the initially approved traditional architecture which is in line with the urban design guideline for Market Street should be maintained’’.

Mr Speaker mwan mon pa ganny en konpran letan zot koz lo traditional architecture.  Mr Speaker mwan mon ti ava kontan si en dimoun i dir avek mwan apard laboutik Mr Shah kot Mr Nirmal Shah ozordi dir mwan en batiman dan lari bazar ozordi ki annan larsitektir kreol?  Sa batiman 4 letaz pou Mr Ramu.  Sa batiman pou OJ kot laboutik Julien Parcou ti ete ? Sa batiman St Claire building?  Kote?  Kote ki annan?  Sey dir mwan.

Letan mon get bazar e i enteresan osi tou ki dan zot – dan sa let guidelines i dir avek ou ‘‘the variety of colours for roofs is accepted but not blue roofs’’.  Mr Speaker en batiman ki zot pe dir i annan larsitektir kreol se bazar.  Ou konnen ki kouler roof bazar i ete?  I ble!

 

(laughter)

 

HON WAVEL RAMKALAWAN

Be annou serye nou!

Be se sa Mr Speaker ki mwan personnelman mon pa ganny en konpran.  2016 zot dir avek li fodre ki son roof pa ble me selman bazar son roof i ble!  E mwan mon ti lo batiman letan pe met beton Dimans.  Letan  ti pe met lot floor e mon get bazar, Mr Speaker napa en batiman dan lari bazar e mon ti a ankouraz Planning Authority pou mont lo batiman Mr Morin, regard en kou toultour sa bazar i en batiman parey dan Lalwa i dir la ou a krwar i en batiman dilapidated!  Tou son bann pilye anler lo la ki sipoze larsitektir kreol in tonbe.  I annan son bann shelters in grennen.  I dan en leta enpitwayab !

E Mr Speaker mwan mon vreman, vreman mon vin emosyonnel letan mon koz lo sa.  Ou konnen akoz Mr Speaker ?  Nou annan nou la en fanmir Seselwa. Ok.  I en Seselwa.  Mr Morin Cherubin Morin in sorti Baie St Anne Praslin kot mon papa i sorti.  I sorti Baie Ste Anne Praslin in vin plante.  Se atraver bann leti, atraver sonny koson ki sa msye in kapab devlope. I pa’n zanmen vol personn.  In fer ‘sa’ pou li ganny tou sa ki i annan.  Ozordi apre ki in fer sa i aste en bout later Lari Bazar.  Zot ser li.

Mr Speaker ozordi nou annan nou en zenn Seselwa, en zenn Seselwa Jean-Pierre Morin ki Chamber of Commerce in rekonnet li konman ‘’The Best Entrepreuneur’’ lannen pase.  Lannen pase li ki ti ganny pri ‘’Meyer Antreprener Seselwa.’’  Mr Speaker sa msye in debourye.

Sa msye dan son bann demars ki i pe fer i pou osi annan en kontribisyon.  Pou osi annan en kontribisyon atraver sa batiman pou lavil, pou bazar.  Mr Speaker sa msye pou annan public toilets.   E ou konnen ki i anvi fer?  I anvi anploy de etranze pou fer sir ki sa public toilets i reste prop 24 lo 24 pou Seselwa kapab servi.  Ladan pou annan en bout ki pou vin pou bazar tou. I pou rann en servis.  Sa msye in pran loan.  I annan lentansyon Mr Speaker depans plis ki R60milyon, plis ki R60milyon e aprezan ou ser li?  Ou ser li anba tou sa bann kalite keksoz.

Minis i fer li tay isi.  Lot i fer li tay laba dir avek li e Mr Speaker.  I anvoy en let.  Ok i anvoy en let i fer en appeal ok.  I fer en appeal date le 27 Zen lo sa size.  Mr Speaker ozordi nou le 31 Zilyet.  Ou konnen ki in gannyen?  Zis en aknowledgement.  Zot pa ankor konmsi pou koze.  E letan mon vwar dan sa let ki dir ki i pa’n – Mr Morin ‘‘appeal to this letter refuse to submit a planning application for the additional floor’’.  Mr Speaker be si Minis ti’n avek ki in fer rapel Lotorite ti’n dir avek li ok Mr Morin nou kapab pran an konsiderasyon sa.  Anvoy en plan.  La i ti ava fer li.  Be i pa ankor – i pou al depans R50mil avek en arsitek pou anvoy en lot plan parey zot pe demande zis apre pou zot refize?  Mr Speaker se sa bann keksoz koumsa ki fodre nou sanze dan nou pei.  Fodre ki nou sanze dan sa pei.  E mon ava dir zot Mr Speaker Mr Morin letan i pe rod son bann demars zis pou montre zot ki mannyer bann keksoz i marse parey serten in dir swa par telefonn swa par, ti menm dir avek li relax aksepte sa.  Ou konnen ki nou ava fer, aksepte sa nou ava donn nou car park taxi pirat pou ou fer en parking ?  Pou ou fer en multi storey parking.  Wi mon pe koz koumsa akoz in annan tro bokou enterferans e pou dimoun konnen ki poudir nou a pe koz  lo en lenzistis!

Ramu lot kote wi  i vre ki in dir ki anba sa nouvo soz pa – be pa i annan en building kat letaz vizavi avek li?  Mr Speaker mwens ki 50 met avek li i annan enn kat letaz.  E sa ki mon osi trouv enteresan se ki sa menm Minister, sa Minister li,  li i annan batiman pli o dan lavil.  Pli o ki JICC in fer pou li.  Li i ground plus 5.  Lo lot kote nou vwar SACOS.  SACOS Tower li osi tou mon krwar i annan 5.  Abhaye Valabhji i annan 4 avek attic.   Lanmenm la zis avan Creole Spirit ant Mason’s avek soz i annan en batiman ki pe fer la ki li osi tou i pou annan 3 plus attic.  Alor Mr Speaker letan mon pe al terminen, mwan mon anvi dir ek nou tou dan Lasanble i annan en lenzistis la.  E nou konan bann Manm Lasanble mon krwar nou bezwen anvoy en mesaz pou dir be larg lanmen Seselwa !  Pa sanmenm sa ki nou dir?  Larg lanmen Seselwa !

 

(APPLAUSE)

 

HON WAVEL RAMKALAWAN

Sa msye i pe al envestir plis ki R60mil.  Be en letaz ki i pou fer Mr Speaker, i pou permet li, i pou permet li kapab re pey son loan dan en fason pli vit.  Akoz i ava annan en pe plis income.  Be nou pa tande sa?  E mwan Mr Speaker letan mon regard tousala konmsi i vreman fer mon – i afekte mwan.  I afekte mwan akoz letan dimoun i anvi debrouye e krwar mwan Mr Speaker, egzakteman parey ti pase Praslin.  Praslin Anse Lazio letan zot ti refize donn Mr Talma permisyon pou li build ou konnen ki zot ti dir avek li.  Sa sete avan letan Mr Bonnelame ?  Zot ti dir avek li mon frer nou donn ou en konsey vann sa later i annan envestiser ki anvi aste.  E zot sa bann lenvestiser zot, zot pou ganny permisyon.  Be eski koumsa ki i marse sa ?  And I’m sure i annan nou ki konn ankor sa bann diferan legzanp.

Alor Mr Speaker an mezir ki nou regard sa Lalwa nou pe osi koz lo lazistis.  Nou pe osi koz lo donn nou Seselwa sa posibilite pou li debrouye.  E mwan mon pou fer ankor en lapel.  Premyerman reponn let sa msye silvouple.  Envit sa msye, koz avek li.  Annou regarde ki nou kapab fer e sa stop notice.  E mwan mon konnen mon, Mr Speaker mon pou dir ek Planning Authority sa msye in kontinyen travay ozordi.  Sa zafer pou fini dan prizon sa.

Parey son papa avek son frer ti al dan prizon sa msye mon pe dir zot i determinen e mon pa konnen ki mannyer pou ale, ki mannyer sa zafer pou fini me selman sa ki i pe demande i pa pe demann personn en sou !  I pa pe demann Gouvernman en sou li.  I pe senpleman dir larg mon lanmen, les mon travay.  E mwan Mr Speaker mon debout lo kote sa msye akoz mon krwar ki poudir letan en Seselwa en zenn Seselwa get son laz ki i annan.  En zenn Seselwa i deside debourye mwan mon krwar nou devret larg son lanmen e donn li posibilite.

E menm sa zafer bazar mwan mon krwar ki bazar osi tou nou bezwen regard an mezir ki nou gard en pe sa ki tradisyonnel me selman nou bezwen regarde ki mannyer nou kapab improve pou nou avans devan.  Alor Mr Speaker mon krwar mon’n fer, mon krwar mon’n fer mon lekor tre kler lo la.  E mon espere ki poudir nou ava kontinyen ganny bann dyalog e ki sa va et vient ant State House, Planning Authority Minis tou sa bann lezot, mon krwar nou pe rod en solisyon.  E mon’n anmenn sa case mon krwar dan en fason kler.

Alor Mr Speaker mon krwar ki nou pe rod en solisyon pou sa Bill e mon terminen an dizan ki tou lede kote in dir son konteni i bon, me son ladministrasyon kot nou’n annan problenm.  Alor Minis ankor enn fwa mon pe fer en lapel avek ou regard ankor sa seksyon 9.  Donn nou en parol ki kler akoz si ou pa donn nou e parol ki kler nou, nou pa pe aprouv en Bill, ki pou fer nou kontinyen fer menm keksoz e nou pou ganny menm rezilta !

E i zis en enbesil ki fer menm keksoz de fwa, en dezyenm fwa an ekspektan ki i pou ganny en diferan rezilta.  Avek sa de parol mon dir ou mersi bokou Mr Speaker.

 

(APPLAUSE)

 

MR SPEAKER

Mersi Onorab Ramkalawan.  Bon Minis in enform mon ki i pa dan en pozisyon pour li donn en larepons ozordi.  Pour li donn sa-son Droit de Réponse, son konklizyon lo bann komanter.  I bezwen en pti pe plis letan an vi ki serten konsern ki’n ganny leve and all that.

Minis mon-parey mon’n get back to you, mon agree lo la.  E nou ava- nou pa pour al pli lwen.  Mardi prosen ou ava vini, ou ava vini, ou ava donn ou repons.  E from there, nou ava pran en vot, and nou ava bouze.  Nou ava al dan Staz Komite.  Yes Onorab De Commarmond.

 

HON CHARLES DE COMMARMOND

Mersi.  Mr Speaker mon pa pour long.  Zis mon oule dir en parol, lo sa issue Mr Morin, lari bazar la.  E se sa, ler mon ti entervenir, sa let pa ti ankor ganny lir.  Mon ti limit kwa ki mon ti kapab dir lo la.  Be lefe ki sa let in ganny lir, e ki diskisyon lo la i an plen form.

Mon lans en lapel avek Lotorite pour zot sort out sa issue o pli vit posib.  Mon krwar mwan ki nou lavil osi, i bezwen ganny gete dan en fason pli gran.  Akoz i annan lezot landrwa ki mon krwar mon pour apre sa meeting, mwan pour met devan latansyon- apre sa sesyon Lasanble, mon met devan latansyon Lotorite osi kot i bezwen annan si oule dir, sa fairness partou.  Ou pa kapab enn i koumsa.  I bezwen konsistan.  I pa kapab pour enn i koumsa, pour lot i koumsa- bezwen fer.

An plis- an plis mon yer mwan ti an konversasyon avek Msye Morin.  Nou’n ganny en konversasyon ase detaye.  E i annan lezot sipor ki i pe fer volonterman at his own cost pour donn sipor bazar.  Pour lev standar, pour kestyon cleanliness e tou sa.

Lo son cost, li ki pour peye.  Li ki pour kontinyen maintain en laranzman.  Konmsi i en Seselwa li osi, i pe donn en sipor bann propriyete ki pour Leta ki i santi i kapab ede.

So mon santi mwan ki nou devret met en lafen avek sa, konmsi anmenn en solisyon pli vit posib, en closure avek sa case en supportent son- sa sityasyon.  Mersi.

 

MR SPEAKER

Mersi Onorab De Commarmond pour ou komanter.  Bon parey mon’n dir, nou’n agree.  Minis nou’n agree ki ou ava retournen Mardi prosen.  E ou ava donn ou Reply.  E de la nou ava bouze pour nou al dan Staz Komite pour nou pran- pour nou konsider bann amannman.  E mon swete ki tou bann Manm in ganny en kopi bann lamannman ki’n an sirkilasyon.

So, Minis mon pa konnen si ou oule dir zis en-si ou oule dir en pti mo.  Mon ava permet ou.  Si non, mon ava dir ou mersi avek ou delegasyon.  Nou ava eskiz ou parmi nou.  Mon pa konnen si ou oule dir en pti mo Minis.  Mon donn ou la parol.

 

MINISTER PAMELA CHARLETTE

Mersi Mr Speaker.  Mr Speaker zis pour mon dir, mon’n ekout atantivman zot bann pwen.  E ler mon a retournen Mardi, mwan a donn zot en larepons ki hopefully i ava satisfer zot.  Mersi.

 

MR SPEAKER

Mersi Minis Charlette.  Bon avek sa nou ava eskiz ou avek ou delegasyon.  Mersi Mr Bonnelame, Mr Biscornet, Mr François, Mr Pool e Mr Hoareau.

 

(MINISTER PAMELA CHARLETTE AND HER DELEGATION WAS EXCUSED FROM THE HOUSE)

 

 

MINISTER PAMELA CHARLETTE

Bon zis mon annan- mon annan de pti lanons.  Demen mon pe rankontre bann Manm ki form lekip IPU.  E meeting pour fer 10er bomaten dan Speaker’s Conference Room. 

Mon osi anonse ki mon pour absante semenn prosenn.  Le 6 ek le 7, mon pa pour dan pei.  Akoz mon pe attend Pan-African Parliament Speakers Conference.

I premye fwa ki Speaker Lasanble- 6enm Lasanble in ganny lenvitasyon pour attend.  E mon pe osi tou ganny en bilateral meeting avek, son President.  President of the Pan-African Parliament.

So mon anvi partaz sa avek zot.  E dan mon labsans parey labitid, Deputy Speaker will be in charge of The HouseOk.

Bon zis en pti sa-parey mon’n anonse yer.  Annou prepar nou pour 3rd Term.  E semenn osi tou nou por al dan Recess, so Deputy Speaker i ava anvoy Lasanble dan Recess.  E mon mazinen, i ava remind zot ek enn de bann pti lanons.  Yes mon a donn ou la parol Onorab Ghislain.  Mon pa pe konpran.  Ale Onorab.

 

HON CHANTAL GHISLAIN

Sorry Mr Speaker.  Nou osi annan Komite Madanm, i annan meeting demen.  Avek Cancer Concern, Lasante and detrwa pour nou aktivite Oktob.

 

MR SPEAKER

Dakor.  Ok Caucus Madanm osi, pe meet demen.  Yes Onorab Afif.

 

HON AHMED AFIF

Mersi Mr Speaker.  Mr Speaker ozordi nou ti’n schedule en meeting Defense Committee zis apre nou fini.  Me vi ki i en pe tar, mon ti pe propoz demen.  Mon pa tro konnen keler i pour konvenab ek bann Manm.  Mon pe propoz 8.15, si i posib.  Akoz 9er i annan en lot meeting ki mwan mon sipoze ale.  Me si nou kapab, mwan pa krwar i pour long, 8.15.  Then nou a fini a tan, si bann Manm i ok.

 

MR SPEAKER

Ok.  Be ou’n deza kominik avek zot, oubyen la se la-?

 

HON AHMED AFIF

Mon pe kominik la, nou ti pe al zwenn la ozordi.

 

MR SPEAKER

Yes.  Ok napa problenm.  Bon parey mon ti’n dir, annou prepar nou pour 3rd Term.  Nou pour- mon’n anonse taler dan ABC, nou pour riske vwar nou pe increase nou number of Sittings per week.  Akoz nou annan bokou, bokou travay devan nou.  Deza nou’n commit nou lekor pour premye semenn koman ler nou rantre, le 10, lasemenn antye pour nou tackle Kod Sivil.

E lot gran travay ki nou annan ankor ki petet i riske pran 1 semenn, se Standing Orders.  Me apre nou ava regarde anmezir nou ale, si fodre nou increase nou Sittings sorti 2 zour pour 3 zour.  Nou ava fer li.  Ok so Lasanble i adjourn.  Nou ava repran Mardi prosen anba the Chairmanship of Deputy Speaker, Onorab Ahmed Afif.

 

(ADJOURNMENT)