::
Home » Verbatim » 2019 » Verbatim Tuesday 30th July, 2019

Verbatim Tuesday 30th July, 2019

NATIONAL ASSEMBLY OF SEYCHELLES

Tuesday 30th July, 2019

 The Assembly met at 9am

 National Anthem

 Moment of Reflection

Mr Speaker in the Chair

 

MR SPEAKER

Bonzour tou Manm Onorab.  E bonzour tou dimoun ki a lekout.  E pe swiv travay Lasanble Nasyonal.  En bonzour spesyal pou nou bann viziter dan Galeri sa se bann zanfan lekol Bel Ombre ki form par Klib CARE, e zot ganny akonpannyen par zot 2 mis, Ms Rita Dogley e Ms Veronique Lucas.  Byenveni e mon swete ki zot ava pas en bon letan parmi nou.  E parey labitid nou envit zot pandan break pou pran en pti juice – en pti dite avek nou, e ankor mon extend sa lenvitasyon avek tou Manm ki enterese pou join nou pou ganny en pti pe enteraksyon avek bann zanfan.

Bon avan nou pran nou travay bomaten lo Order Paper mon annan de pti kominike pou mwan fer.  Premyerman an se ki konsern 45enm Foronm SADC, mon ti a kontan felisit bann Manm Lasanble Nasyonal ki’n asiste 45enm Plennyer  SADC Parliamentary Forum, ki ti fer semenn pase Mozambique.  Nou lekip in fe en travay formidab e aport bokou keksoz pozitiv pou larezyon atraver zot travay li diferan Komite, zot Mosyon e osi deba ki zot in fer.

Mon ti a kontan remersi Onorab Ramkalawan, Onorab Mondon, Onorab Esparon, Onorab Ghislain e Onorab Aglae.  Mon anvi dir zot mon ti fyer pou mwan diriz sa lekip.  Mersi.

Mon 2enm kominike, se sa ki konsern 10enm Zwe De Zil.  Lo nom Lasanble Nasyonal, e osi lo mon non personnel,  mon felisit Team Seychelles, ki’n fer retournen yer apre ki zot in pran par da 10enm Zwe De Zil.

Felisitasyon tou bann atlet, bann coach, e lezot menm piblik ki’n osi al akonpanny lekip.  Felisitasyon spesyal pou bann ki’n depas tou lekspektasyon  difikilte pou raport meday e fer paviyon Sesel monte a plizyer fwa.

Sa rezilta i montre ki annan bann atlet ki kapab perform alaoter.  E zot in demontre sa klerman, malgre tou bann defi ki zot in pas ladan swa pandan preparasyon oubyen pandan konpetisyon li menm.        Mon osi felisit bann fanmir, bann atlet ki’n debout akote zot e siport zot.  Mon anvi osi remersi bann biznes endividi isi Sesel ki’n raport zot soutyen pou fer ki sa devlopman i vin en sikse.

Ankor enn fwa felisitasyon Team Seychelles! 

 

(APPLAUSE)

 

MR SPEAKER

Mon ava donn le 2 Leaders 2 minit pou dir en pti mo, mon a konmans avek Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker e welcome back.  Nou byen bezwen ou pou ek nou dan Lasanble.

Bonzour tou Manm, e tou dimoun ki a lekout espesyalman nou bann dimoun dan Galeri.

Mr Speaker mon byen kontan ou’n donn mon laparol pou dir de mo zisteman  pou nou bann atlet nou lorganizasyon pou Zwe De Zil Seychelles Team. 

E mon profite pou osi felisit tou bann atlet tou bann managers, coach e lorganizasyon Sesel ki’n deryer nou lekip.

E dir zot ki nou’n note seryezman sa zefor i zot in fer, zefor ekstraordiner.  Menm ki annan serten ti pe dir pa pou ganny ditou meday, me nou’n vwar 28 meday Lor e bann lezot meday ki’n vini.

E nou sagren osi pou vwar ki de sirtou nou ban atlet ekstraordiner Janet Georges e Keddy Agnes ki Lor ti la devan zot me bann injury in arive kot zot pa’n kapab fer li, e nou priye ki zot ava vini next time e zot ava fer le neseser e si non lo nivo L’Afrique li menm zot ava fer zot best. 

E osi nou felisit Nasyon Seselwa ki’n deryer nou lekip a diferan moman, menm bann paran, me osi bann lezot siporter lezot dimoun ki’n monte ki’n don koudmen.   Osi nou profite pou vwar Mr Speaker ki sa sikse ki nou’n fer, i kapab pli byen ankor si next time, e mon krwar dek ki ozordi de ki Zwe De Zil i fini, nou bezwen prepar nou e redouble nou zefor Sesel antye, pa zis Minister Sport, ouswa NSC tousel ek bann Federasyon, me antye Sesel sirtou nou Lasanble Nasyonal kot Bidze i konsernen, pou nou kapab siport ou sportif dan preparasyon pou lot Zwe De Zil ki pe vini dan 4an.  Me selman nou bezwen konmans li konmela pou nou avoid bann pt problenm, e an menm tan nou pou nou prepar nou bokou, bokou pli byen.  E fer sir ki nou pa kit okenn atlet potansyel deor.  Sa mon ensiste.

Me felisitasyon spesyal sa i a pou lekip volleyball ; volleyball Sesel in sa dernyen lekip ki’n pe perform e zot in montre nou sa determinasyon ki nou kapab annan dan nou pei, dan sport dan tou keksoz.

E sa ki zot in fer avek lekip Malgas i ekstraordiner, e mon krwar lepep Seselwa pa pou bliy ditou sa sikse ekstraordiner nou lekip volleyball. 

E nou felisit zot enormeman e nou dir zot sa determinasyon nou demande ki tou atlet i swiv.

Osi i bon note ki nou vwar sikse bann atlet endividyel bann sport endividyel, kot nou bezwen redouble zefor ankor, parey mon pe dir.  Par egzanp kot in annan sa bann mankman konmsi ki nou pickup la konmela nou pa esper dernyen detrwa semenn dernyen detrwa mwan next Zwe De Zil.  E sa bann parol osi nou pe lanse pou organizater, pou nou Minister Spor NSC bann federasyon e mon kontan i lord ki pe al ganny mete dan bann federasyon pou ki sa bann keksoz i ava i ava annan bann progre a lavenir.

Alor ankor enn fwa nou felisit bann atlet, nou kontan sa ki zot in anmennen.  I pa ti fasil nou konnen, nou’n, swiv zot.  Nou’n vwar pou dir in difisil safwasi, me nou konnen pou dir zot in determinen, zot osi zot in fer zot best.  Zot very best e annou prepar nou pou next time.  E prezan nou osi lepep nou popilasyon biznes parey ou pe dir e tou, bann landrwa travay annou siport bann atlet.  Par egzanp letan  i annan bann release, konmsi nou osi nou la ek zot pou nou kapab donn zot sa koudmen pou nou kapab fer Sesel as a country – as en Nasyon monte.

Vwala Mr Speaker, mersi bokou. Mon kontan ou’n donn mwan sa laparol.  Mersi.

 

MR SPEAKER

Mersi Onorab De Commarmond.

 

(APPLAUSE)

 

MR SPEAKER

Mon a donn laparol Onorab Ramkalawan.

 

HON WAVEL RAMKALAWAN

Mersi Mr Speaker.  Bonzour Mr Speaker, bonzour bann koleg Onorab bonzour bann zanfan avek zot ansenyan, ki’n vin ekout nou bomaten pou vwar ki mannyer Lasanble i oule byensir bonzour tou bann dimoun ki a lekout.

Mr Speaker, lo non LDS lo non Lasanble lo mon non personnel, mon osi tou mon pran laparol pou mon felisit nu bann atlet ki’n reprezant nou dan Zwe De Zil ki’n fek terminen Maurice.

Mr Speaker byensir letan nou mazin letan nou regard bann rezilta i kler ki pou dir lo nivo endividyel, se Felicite Passon ki nou Golden Girl li ki’n rekolte plis meday lor, 7 meday Lor an tou, e sa in vreman donn nou en gran lafyerte.  Nou dir li nou dir Felicite felisitasyon.

E mon vreman kontan son non parske la i annan felisitasyon apre avek sa mo Passon i annan pwason, i annan pasyon.  Alor in naz parey en pwason avek pasyon, e sa in fer nou paviyon lev pli o lo – letan in debout lo sa podium.

        E byensir lo kote lekip se nou lekip volleyball dirize par nou atlet vreman kapab Petra Richard, e mon anvi felisit tim volleyball Sesel konman sa sel lekip ki’n raport en meday Lor.

E avan sa konpetisyon, mon ti pe – son zour final mon ti pe exchange serten parol lankourazman avek li laba Maurice, e ansanm avek en lot zwer Maia pou dir zot ale fer monte nou paviyon.  E vreman zot in egzibit sa lespri ‘’Pa zanmen les tonbe !’’ Parske zot ti’n 2-0 e apre sa zot in zot pa’n dekouraze, lebra pa’n kase e zot in raporte par 3 !

Me byensir Mr Speaker parey ou menm ou’n dir se pa zis bann dimoun ki’n ganny meday Lor, Larzan oubyen Bronz ki nou bezwen felisite parski sa set en travay lekip.  E alor nou anvi felisit tou nou bann atlet.

E pou mwan Mr Speaker mn menm profite pou fer en lapel en lapel avek Gouvernman, pou ki zot konsider Janet Georges avek Keddy Agnes dan ran meday Lor letan zot rekonpans bann atlet.  Akoz sa 2 dimoun dan bann spor endividyel zot tou lede zot ti’n pare pou zot ganny zot Lor.

E nou konnen ki pou dir Keddy ti pou met son konpetiter lo tapi e Janet ti pou lev ti pou ganny li 3 meday Lor.

Alor konsider zot konman bann meday dore olye bann meday arzante or lezot letan zot pe konsider sa.

Mr Speaker letan nou pe regard tou sa bann rezilta, byensir nou bezwen neseserman regard sports an zeneral.

Mon krwar ki tou bann dout ki nou ti annan avan zwe li menm li pa dout ki nou vreman ki ti eksprimen, me ki ban atlet zot menm zot, zot ti eksprimen release ensidswit pa pe kapab ganny lekipman neseser, mon konnen ki pou dir tim volleyball par egzanp zot in ganny en kantite problenm pou zot jersey.  Nou konnen ki pou dir nou ban dimoun dan sailing zot ti ganny zot ban lekipman zis de zour avan konpetisyon, judoka ti pe ganny problenm pou train ansanm konman en lekip; dan badminton ti annan; bisiklet tou ti annan problenm.  Konmsi nou anvi dir NSC sa lannen letan zot vin devan Lasanble avek zot Bidze sports, nou anvi nou konman en Lasanble en progranm serye !

E mon pou menm demande ki letan zot vin devan nou pou ganny Bidze ki zot menm met ladan, bann larzan ki pou an preparasyon pou bann zwe ki pou vini !  Parski nou pa anvi lavey pou nou tann nou mank sa nou napa sa, fodre nou.  Alor montre nou, parski nou tou ki la dan sa Lasanble nou anvi ki Sesel i sorti konman sanpyon.  E alor nou anvi vwar sa lankadreman neseser, nou anvi trouv sa lenvestisman.

E Mr Speaker mwan mon anvi termin dan sa fason.  Letan nou pe regard nou bann zenn sa lantouzyazm sa bann ki zot in annan, annou les sports vin sa larout atraver  ki nou donn lazenes Seselwa lespwar.

Atraver ki nou retir zot dan bann gento, nou retir zot lo eroin, dan drog, dan lalkol, dan sa bann move lenfliyans pou nou anmenn zot lo en bon semen kot zot met lanfaz lo zot ledikasyon e pou zot ganny en bon lavenir.  Se sa mon krwar ki mesaz ki nou anvi anvoy zot e mon anvi dir zot pou mwan personnelman Mr Speaker ti vreman en moman lafyerte letan mn ti vwar zot lo sa podium pli o lanmen lo leker pe sant ‘’Fer monte nou paviyon!’’  Mersi bokou Mr Speaker.

 

(APPLAUSE)

 

MR SPEAKER

Mersi Onorab Ramkalawan.  Mon swete bann zanfan ki la, e menm bann ki a lekout i a kapab les sa 3 mesaz ki’n pase bomaten o non Lasanble Nasyonal enspir zot, e ankor parey mesaz in dir ler nou fer sport nou annan nou en lespri ki kler, ki vizilan e nou kapab swete ki nou kapab retir nou zenn dan bann move fleo, e nou kapab diriz zot ver spor ki bon pou zot lasante e bon pou pei a lafen dizour.

Bon nou pou tourn ver nou Order Paper.  Ozordi nou pou annan nou enn de sanzman lo lord dizour lo Order Paper.  Premyerman mon ava zis pas en pti pe lo kwa ki nou annan.  Nou annan Prezantasyon Papye, nou pou annan en rapor Standing Orders Committee sa i annan pou fer avek review, e amannman lo Standing Orders 2009.  Nou pou annan en Private Notice Question, Statement e nou annan 2 First Reading, e osi tou nou annan en Second Reading e sa pou swiv osi tou par bann Mosyon ki’n deza lo Order Paper e ki nou pe kontinyen travay lo la.

Nou ava komans deswit mon  donn laparol Madanm Clerk, i ava lir bann papers ki pe ganny laid bomaten devan nou.  Madanm Clerk.

 

MADAM CLERK

Mersi Mr Speaker, bonzour Mr Speaker, bonzour tou Manm Onorab, e bann zanfan ki dan Galeri, e osi tou dimoun ki a lekout.

Prezantasyon Papye sa semenn nou annan

S.I 44 pou 2019 ki Prevention of Drug Abuse and Rehabilitation Agency Act, of 2017.

S.I 45 pou 2019 ki Seychelles Human Rights Commission (Salary and Allowances of Chairperson, Deputy Chairperson and Commissioners) Regulations, of 2019.

E parey Mr Speaker in anonse nou annan Standing Orders Committee Report – Review of Standing Orders 2009.  E sa pou ganny prezante par Chair Committee Onorab Georges pli tar pandan lazournen.  Mersi Mr Speaker.

 

MR SPEAKER

Mersi.  Yes Onorab Ferrari.

 

HON JEAN-FRANCOIS FERRARI

Bonzour Mr Speaker.  Mr Speaker sa moman la ki sa moman la ki bann papye in ganny prezante pou mwan lev en pwen ki mon krwar i pou demann en pe leklersisman.  E sa i konsern S.I 45 pou 2019, lo saler allowances e pou Chairperson Deputy Chairperson e Commissioners Seychelles Human Rights Commission. 

Mon pwen Mr Speaker i enn ki mon leve, akoz mon’n vwar ki nou pe fer en depar avek lapratik ki nou’n travay lo la depi en pe letan.

Nou pa’n zanmen isi dan sa Lasanble ziska prezan, vwar devan nou ki saler apard saler ki ganny mete dan S.I, i annan osi bann i annan osi provizyon pou en serten – mon pa konnen ki mannyer nou kapab apel sa si i en allowance oubyen overtime.  I annan en kalkilasyon ki pou permet sa bann manm sa bann Commissioners fer en claim pou travay an plis ki 25erdtan par mwan.

Pou sa i e pe enkyetan Mr Speaker.  Kekfwa mon e mal lir li, me selman vi ki i konsern ‘nou e plizyer mon bann koleg osi in eksplik sa e nou vwar li dan Seksyon 2 (2), nou ti a kontan en lesplikasyon avek Minis, pou dir nou ki mannyer zot in ariv lo sa lesplikasyon.

Akoz si, si i neseser si i annan zistifikasyon nou pare pou ekoute.  Me selman si i en deba avek lapratik normal  nou pe al dan en keksoz ki kapab refoul avek nou apre ki kapab anmenn en presedans, e ki kapab konplik travay lezot Board dan pei, nou bezwen get li la konmela.

Alors mon demann ou avek atraver Sekretarya si nou kapab fer en rankont isi dan Lasanble, swa dan Plennyer  swa dan Komite pu nou kapab ganny en zistifikasyon lo la pou nou kapab pran nou desizyon a lavenir.  Mersi Mr Speaker.

 

MR SPEAKER

Mersi Onorab Ferrari.  Mon napa S.I 45 devan mwan la.  Me nou note konsern ki ou’n leve, e nou ava regarde nou ava fer le neseser pou rod plis lenformasyon.

Ok yes Onorab De Commarmond.  Lo la?  Non.  Ok.  Bon wi mon pe vini mon pe kontinyen lo Order Paper. 

        Bon Onorab Ferrari nou’n note ou konsern e nou ava fer le neseser.

Bon parey mon’n dir nou pou sanz en pti pe lord dizour ozordi lo Order Paper, sa pou permet ki Vis-Prezidan i vini pou donn nou pou fer en Statement lo  World Trafficking Persons Day ki ozordi.  Apre sa an vi ki Onorab Georges i osi i annan en komikman la bomaten, mon pe mete ki a prezant son rapor 11er apre break. 

        So apre Statement nou pou pran en pe kestyon, si nu fini avan 10 :30 nou pou al lo PNQ, kot Minis Charrette i ava vin reponn kestyon.

So nou pou zis sanz en pti pe travay.  Yes Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker zis mon pe regarde dan Second Reading nou annan Referendum Bill ki sipoze lo la nou pa ankor fini diskite.  E nou’n ganny en rapor sorti kot bann amannman ki nou ti pe diskite ki Attorney Zeneral in anvoye, e mon vwar ou pa’n met lo Order Paper petet ti bon nou rektifye.  Mersi.

 

MR SPEAKER

Mersi Onorab De Commarmond.  Bon mon pa’n tro okouran desizyon.  Me selman mon konnen ti annan bann amannman ki AG’s office ti pe pran.  Me i en pti mank lo nou par Sekretarya Referendum Bill ti devret kontinyen la continuation of debate, ok ?  Nou ava amann lo Order Paper pli tar pandan lazournen.

Mon okouran ki annan bann amannman ki’n vini e mon swete ki Sekretarya in fini sirkile.

Bon avek sa mon ava demann Parliamentary  Reporter pou apel Vis-Prezidan pou li vin fer son Statement, e mon ti a kontan osi tou fer rapel bann Manm ki ozordi Lasanble Nasyonal, i selebre 26an.  savedir laniverser Lasanble Nasyonal ozordi 26an.  Nou pti baba pe grandi i pe matir.  I ankor frazil mon krwar.

Bon mon ti a kontan dir bonzour e welcome Vis-Prezidan Mr Vincent Meriton ki ganny akonpannyen par Chairperson for the National Coordination Committee – Mrs Linda Melanie, Vice-Chairperson to the National Coordination Committee Mr Alain Volcere, Direkter Zeneral pou Protokol Konseyer Protokol and Maritime Affairs Division, Department of Foreign Affairs Mr Jacques Belle.  VP avek ou lekip bonzour ankor enn fwa, e welcome dan Lasanble Nasyonal.  E toudswit mon ava pas laparol avek ou.

 

THE VICE-PRESIDENT VINCENT MERITON

Bonzour Mr Speaker, bonzour tou Manm Lasanble Nasyonal, bonzour tou dimoun a lekout sirtou bann zenn ki dan Galeri avek zot akonpanyater.

Mr Speaker mon kontan bomaten.  Tou dimoun in koz byen lo Zwe De Zil.  E nou apresye ki spor i dernyen afors inifikater dan lemonn. I mont par lao divizyon ras, kouler, larelizyon e politik.

E nou’n vwar atraver demonstrasyon performans nou ban atlet ki zot in vreman fer sa.

Mr Speaker fodre dir si ou permet mon de minit ki antour Gouvernman in depans R30 milyon dan Zwe De Zil, Gouvernman li in met 20 milyon, sekter prive in met 10 milyon atraver CSR.  I byen zot in anmenn rezilta nou bezwen get lavenir ki mannyer nou kapab fer pli byen.  Mon dakor avek tou sa ki in ganny dir par tou lede kote latab, e osi ou menm Mr Speaker.

La pou All Africa Games, nou pe al envestir apepre en milyon Roupi pou bann manrmay ki pe al partisip Zwe L’Afrique, ankor avek tou lobzektif pou fer nou paviyon monte byen for.

Fodre osi dir en mansyon spesyal pou SBC ki malgre difikilte zot in fer laranzman spesyal pou Seselwa ganny lenformasyon lo ki in pase isi, e osi en mansyon spesyal pou bann atlet an dispor ki’n osi fer nou fyer avek bann meday Lor ki zot in anmennen.  Tou meday bannla in lager pou gannyen.  Tou meday konmsi pa ti fasil pou zot gannyen.

E Felicite Passon nou Golden Girl i pa’n ganny sa ta lor par laverti i e determinasyon feray. Pasyonnen parey in ganny dir par Onorab Leader Lopozisyon, me osi par bann fasilite e lenvestisman.  Lenvestisman par son paran, lenvestisman par Gouvernman e apre pli tar in ganny li en scholarship par Komite Olenpik, so tou le twa ansanm i demontre ki sa ki envestir rezilta pou vini. Ler ou serye, rezilta in vini e in demontre ki nou kapab fer ansanm.

E mon ti a kontan felisit Lasanble, mon dakor pou pas bann Bidze ki vin devan nou pou fer sir ki nou zenn vreman i demontre zot talan pou bouz devan.  Mersi Mr Speaker.

Mr Speaker prezan mon a pran lo mon Deklarasyon lo Lazournen Enternasyonal Kont Trafik Imen.

Ozordi le 30 Zilyet, Sesel pe zwenn larestan lemonn, lemonn antye pou komemor Lazournen Enternasyonal Kont Trafik Imen.

Trafik imen parey zot konnen, i en krim grav kont limanite ek dignité imen, e i en vyolasyon tou nou drwa fondamantal imen.

Selon lestimasyon biro Nasyon-Ini, i annan anviron plis ki 10 milyon dimoun ki viktim sa krim.

Trafik imen i en form lesklavaz modern kot mazorite viktim i ganny eksplwate seksyelman, oubyen a traver forse.

Sa aktivite ilegal i ed kriminel zener anviron 111 Bilyon Ero  par an selon rapor  Lorganizasyon Enternasyonal Travay.

Sa fleo i konsern nou tou, e Sesel, koman en pei konman en destinasyon vakans popiler e kot en kantite travayer etranze pe travay, pa’n ganny eparnyen.

Sa zour enternasyonal kont trafik imen, i devret servi loportinite pou nou retras bann mezir ki nou’n pran depi 2004, e ranforsi nou langazman dan konba kont sa krim ki meprizab.

Premye mezir ki Gouvernman ti pran, ti Ratifikasyon Protokol Parler mon pour anpes, elimin e sanksyonn trafik imen, partikilyerman trafik madanm e trafik zanfan le 22 Zen an 2004.  E etablir en Komite Nasyonal pou kordin bann aksyon

2enm aksyon  ti ladopsyon en Lalwa kont trafik imen an 2014 ki donn Gouvernman sa kad legal pour anpes, elimin e konbat trafik imen e protez bann viktim.

3enm, ti lansman nou stratezi Nasyonal ek plandaksyon kont trafik imen an Novanm 2014.

4enm, nou ti re apwent Komite Kordinasyon Nasyonal pou ranforsi mobilizasyon aksyon kont trafik imen anba direksyon Departman Zafer Sosyal le 5 Zen 2018.

E tou dernyerman, nou ti apwent en taskforce spesyal pou adres kondisyon bann travayer etranze isi, anba direksyon Departman Lanplwa.

I osi enportan pou note ki Gouvernman o kour bann dernyen lannen, in aktivman korpore avek Gouvernman Leta-Ini dan provizyon lenformasyon pour rapor anyel lo trafik imen ki zot pibliye.

Tousala, i montre ki, fas a sa defi sa defi enternasyonal, nou pa’n reste lebra krwaze.  Nou’n pran aksyon kot fodre e nou pou kontinyen pran mezir ki nou bezwen pran.

Defi i gran.  Defi i la.  Akoz i ankor annan en ta travay pou nou fer pou sansibiliz nou popilasyon lo sa size.

Zot ava rapel ki premye ka ki ti ganny raporte ti an 2016, ler 4 travayer Bangladeshi ti konplent lo medya ki zot pe ganny maltrete e ki zot pa ti pe ganny peye par zot anplwayer.

Sa anplwayer konsernen ti ganny kondannen an 2018 pour 4 sarz en lanmann R400 mil.  E depi sa lannen ziska ozordi, nou’n anrezistre en total 45 ka.

Parmi sa 45 ka, i annan 4 ka ki’n al Ankour, e 39 in ganny met akote akoz napa ase levidans.

Dan sa 4 ka ki’n al Ankour, en total 8 dimoun in ganny prosekite anba Lalwa Trafik Imen, e kot i  annan 12 viktim ki tou ki bann travayer etranze.

Nou konnen ki i kapab annan serten viktim potansyel dan nou pei, e mon profit sa lokazyon  pour lans en lapel avek tou dimoun avek tou piblik pou gard zot lizye ouver.

Si i annan viktim i osi annan koupab.  Alor annou reste vizilan e annou met nou zefor ansanm pour anmenn tou trafiker imen devan Lalwa e donn bann viktim lazistis ki zot merite.

I devwar Gouvernman pou fer sir ki Lalwa Trafik Imen I ganny respekte lo nou teritwar.  I osi responsabilite tou bann partenaire sirtou bann Lorganizasyon Sosyete Sivil, bann sendika travayer e tou Seselwa pou alert servis Lapolis kot zot santi i annan soupsyon i annan serten ka trafik imen.

Gouvernman atraver son Komite Kordinasyon Nasyonal pou kontinyen met plis zefor pou ankouraz piblik pour vin devan.

I osi enportan pou note ki si menm laplipar viktim dan nou pei i bann travayer etranze, Gouvernman i osi annan responsabilite pou protez son prop sitwayen.  Gouvernman i annan osi responsabilite pou protez son sitwayen ki travay aletranze, e sa nou fer li atraver nou bann Misyon Diplomatik e Konsiler atraver le monn.

Mon profit sa lokazyon pou remersi travay Komite Nasyonal enkli Biro Prokirer Zeneral, Departman Zafer Etranzer, Lanplwa,    Imigrasyon, Lapolis, Zafer Sosyal, Ladwann anba direksyon Chair PS Linda William Melanie.  En remersiman spesyal i al pou bann Lorganizasyon Sosyete Sivil ki pe travay sanses pou ed nou kapab elimin sa fleo.

Zot zefor in ede pour ki Sesel I prosekit plizyer ka, e bann aksyon in fer ki nou’n ganny upgrade par biro Leta-z-Ini par Leta-Ini dan zot dernyen rapor lo trafik imen.  Kantmenm Sesel pa ankor zwenn tou bann standar minimal pour eliminasyon trafik imen, nou pe fer bann zefor signifiant dan sa direksyon, e se pou sa rezon ki biro Leta-Ini in apresye sa in donn nou upgrade dan zot rapor anyel.

Mon ti a osi voudre remersi bann partenaire enternasyonal par egzanp IOM, UNODC, ILO, COE, SADC, COMESA, INTERPOL, Linyon Eropeen e lezot ankor pou zot lasistans san kondisyon.

Zot pe kontinyelman ed nou avek zot lekspertiz, e train nou bann zofisye lo mezir pou detekte bann ka sispe.

Mon sezi sa lokazyon pou enform Lasanble Nasyonal  ki parmi bann nouvo mezir ki Gouvernman in pran, i enkli: miz-an-plas en Hotline kot piblik i kapab call nenport ler 133 kot Lapolis, 2804041 kot Lanplwa, 4303930 kot Imigrasyon.

Nou pe osi finaliz nou Labour Migration Policy pou adres bann defi trafik imen.  Nou pe miz-a-zour nou plandaksyon Nasyonal kont trafik imen 2019-2021 avek sipor IOM e SADC.  E nou pe organiz en dyalog rezyonal lo migrasyon ki pou fer lafen Out avek siport IOM avek COE.

Mon ti a voudre Mr Speaker, konklir par dir atraver sa konversasyon ozordi, mon donn langazman ki Gouvernman avek sipor Sosyete Sivil la popilasyon, la kominote enternasyonal nou pou kontinyen fer lalit kont trafik imen nou priyorite.

Sa zour Enternasyonal Kont Trafik Imen, i osi en zour pour pep Seselwa reflesir lo sa size e lo ki mannyer nou kapab fer ladiferans.  E mon annan konfyans ki nou pou kapab fer li nou pou reisi fer li akoz mon krwar dan rezilyans lepep Seselwa, dan son responsabilite e dan son solidarite.  Mersi Mr Speaker.

 

MR SPEAKER

Mersi Vis-Prezidan.  Bon nou pou pran detrwa kestyon an vi ki Vis-Prezidan ti’n averti mon ki son schedule i en pe tight bomaten i pa pou kapab reste bomaten antye.  Petet Vis-Prezidan konbyen letan ou pou kapab donn nou bomaten pou pran detrwa kestyon?

 

THE VICE-PRESIDENT VINCENT MERITON

Mr Speaker si ou permet 10.15 koumsa, akoz mon bann aktivite 10.30.

 

MR SPEAKER

Dakor Vis-Prezidan.  Bon nou ava konmans avek Onorab De Commarmond.  E mon ava demann Manm osi tou fer zot kestyon kourt presiz ki nou a kapab permet lezot Manm osi rantre.  Mersi.  Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Vis-Prezidan, ek ou lekip.  E felisitasyon pou sipor ki ou’n donn Zwe De Zil, e nou’n vwar ou e sa determinasyon.

 

(APPLAUSE)

 

MR SPEAKER

Kestyon, kestyon.

 

HON CHARLES DE COMMARMOND

Mr Speaker, eski nou’n eski Minis i kapab Vis-Prezidan i kapab dir nou Lasanble si nou’n ganny okenn ka, oubyen okenn rapor Seselwa ki’n enplike dan trafik imen o nivo enternasyonal?  Savedir an deor Sesel.  Savedir koman e trafiker oubyen konman en viktim.

E dezyenmman ki rol Sosyete Sivil an plis i kapab zwe, e ki mannyer i kapab fer sa pou ki i ede ankor davantaz dan sa lalit kont trafik imen ki zot, zot pe planifye ki Gouvernman pe vizyalize devan?

E dernyerman ki plan Gouvernman pou redwir sa kantite ka ki ou’n dir in ganny raporte depi 2016, e ki nou vwar i annan zis 4 ka ki’n al devan Lakour, e detrwa ka ki ou’n dir napa ase sibstans, me ki mannyer nou pe fer pou nou kapab redwir sa konmsi fodre ki Sesel sa pti Sesel nou pa gannyen sa bann ka. Mersi.

 

MR SPEAKER

Mersi Onorab De Commarmond.  Vis-Prezidan.

 

THE VICE-PRESIDENT VINCENT MERITON

Mersi Mr Speaker.  Mr Speaker annefe nou’n fer en legzersis dan tou nou bann misyon permanan aletranze atraver bann konsil.  Nou napa en ka kot i annan Seselwa ki’n viktim la an se moman.

Me selman en pe let pase mon ti annan en ka kot nou ti kapab atraver nou Lanbasad kapab koz avek sa pei, e ti annan de Seselwa ti kapab evantyelman rapatriye.

Dezyenmman Sosyete Sivil. Mr Speaker wi Sosyete Sivil i annan en rol enportan pou li zwe dan nou travay dan nou lalit kont trafik imen.

Mon krwar CEPS i ganny reprezante lo Komisyon Kordinasyon Nasyonal.  Me fodre dir ki i annan de lorganizasyon ki sorti i annan ARID apre i annan office for migrant workers la, ki pe zwe en rol formidab e eksepsyonnel.

E fodre mon fer sorti byen kler, ki Sosyete Sivil i pa lennmi Gouvernman.  I pa nou kont zot, me nou pe travay ansanm pou elimin en fleo ki annan pou bi abes dignité imen.

So sak fwa ki ARID oubyen en lot lorganizasyon i port a latansyon Gouvernman ki i annan en ka ki sispekte i ed Gouvernman kapab met lanmen lo la e pran bann aksyon neseser.

E mon ti a kontan salye zefor ki bann Lorganizasyon Non-Gouvernmantal bann Lorganizasyon Sosyete Sivil pe zwe pa zis kot i konsern lalit kont trafik imen.  Me an zeneral dan gouvernans pei, akoz ozordi gouvernans se tou dimoun ansanm, piblik atraver CEPS atraver bann Lorganizasyon Sosyete Sivil i annan en gran rol pou zwe kot Gouvernman pa arive zot la pou vin zorey e sa koutakouta apre alert Gouvernman alert Lotorite pou nou kapab pran bann aksyon neseser.

E fodre dir ki nou’n santi ki nou bezwen donn sipor bann Lorganizasyon Sosyete Sivil, e deza la tou le Mardi apre midi i annan en zofisye ki ganny dispatch kot sa office of migrant workers Mont Fleuri kot ti fer Family Planning bann    ki konn Mont Fleuri byen.  Pou ed bann dimoun an ka ki vin devan pou kapab channel bann konsern pou donn zot lesplikasyon epi pou kapab gid zot lo ki aksyon pou fer.

Plan pou redwir.  Onorab i annan dan sa 45 ka, 4 ka ki al Ankour i annan ki zot in met de kote akoz napa ase levidans pou kapab fer en case ki solid.

Mon’n koz avek Zidisyer, Zidisyer i dir mwan konman nou annan en case ki solid vini nou’n fini pare, e nou diskite avek biro Prokirer Zeneral konman en case pare, nou anvoy devan e Lakour pou fast track bann case akoz i annan en kantite enplikasyon imen, i annan fanmir ki pe espere laba dan pei kot zot sorti, zot pou kontinyen reste travay.

        So tou sa bann size nou bezwen pran pou asire ki nou deal avek sa bann size ki vin devan nou.

E ki mannyer nou kapab adres bann size ? Se ki annan plis kolaborasyon.  Dan Gouvernman ki menm.  e Gouvernman avek Sosyete Sivil kot nu kapab annan sa bon dyalog kot ler keksoz i arive nou servi sa bann Hotline, e ki nou les kanmarad konnen ki pe pase pou nou kapab apre nou osi a ganny antoure dan en sans ki pozitiv pou anmenn byennet Seselwa, e bann travayer aletranze protez zot dignité.  Mersi Mr Speaker.

 

MR SPEAKER

Mersi Vis-Prezidan.  Onorab De Commarmond.

 

HON CHARLES DE COMMARMOND

Mersi.  En pti pwen Mr Speaker.  dan sa ki ou pe dir Vis-Prezidan eski Gouvernman pe mazinen par egzanp pou name and shame?  E an menm tan bann konpannyen oubyen dimoun endividi ki fer vin s bann travayer pou kapab pa aprouv zot GOP pa aprouv zot konmsi bezwen annan en serten pinisyon, serten aksyon serye ki Gouvernman i pran pou anpes pou dekouraz lezot dimoun fer menm parey.  E ki medya i kapab zwe sa rol montre konmsi pou ki dimoun i konnen e i vin pli alerte e tou dimoun i a donn plis koudmen.  Mersi.

 

MR SPEAKER

Mersi Onorab.  Vis-Prezidan.

 

THE VICE-PRESIDENT VINCENT MERITON

Mersi Mr Speaker.  Onorab mon dakor avek ou name and shame i la.  Zot a rapel ler sa case ti arive nou ti dir dan medya son non, e mn krwar i e keksoz ki nou pou kontinyen.  E Lalwa Kont Trafik Imen, i dir si en dimoun i ganny kordonen santans pli for i 25an avek R800mil.

So mn krwar i for, i en mesaz kler ki nou pase, ki nou nou bezwen fer kontinyen kapab idantifye e pran mezir neseser pou elimin sa fleo.  Mersi Mr Speaker.

 

MR SPEAKER

Mersi Vis-Prezidan.  Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun.  Mr Speaker mon not lalis bann keksoz ki Vis-Prezidan i dir nou Sesel in fer konman en pei, pou esey adres sa size, me in osi dir nou ki malerezman nou pa ankor zwenn standar minimal.

Aprezan mon annan detrwa keksoz la ki mon anvi demann VP, ki pe ganny fer dan sa direksyon ki a kapab ganny ede.  Par egzanp i annan size pou tradwir bann dokiman dan langaz ki bann travayer etranze ki vin isi fer en langazman ki Gouvernman ti’n deza fer.

Nou aprann ki ankor annan bann sityasyon kot en etranze ki met case devan i ganny deporte par son anplwayer avan ki case i fini ki kont bann prosedir legal.

I annan sityasyon Sesel kot travayer pe ganny apele par limero olye non akoz zot dir non sa bann dimoun i tro gran, sa i fer mon rapel lesklav ki ti apel koumsa.  I annan bann alegasyon gous kot zofisye Imigrasyon kont zofisye Lanplwa sa i la deor ziska yer nou ankor pe tann sa.

I annan bann size GOP ki zis sanz lanmen dimoun ki’n vini e apre en sel kou i ariv dan en lot lanplwa.

I annan bann move kondisyon reste, manze ki bann etranze pe sibir.  E nou vwar pou dir i annan en mank piblisite ouswa awareness lo fason pou tret bann travayer etranze.  Akoz dimoun zis pe fer zot vini konmela, me san sa bagaz pou deal avek zot sityasyon.

So mon anvi ki Vis-Prezidan i dir nou en pti en pe an zeneral sa bann pwen.

E dezyenmman mon note ki premye ka serye ti ganny anrezistre an 2016.  Me selman mwan mon konnen pou dir depi an 2011 par egzanp depi lepok ki Savoy Hotel ti pe fer ti annan en demonstrasyon bann travayer Indien ti marse ziska kot Kordgard Beau Vallon.

Savedir i ti pe annan, me solman i paret ki Lotorite pa ti pe port atansyon a sa size. Donk mon anvi ki Vis-Prezidan i dir nou vreman, si tou bann alegasyon ki ganny fer par egzanp dan bann medya tou le semenn ou pou vwar en sityasyon eski sa taskforce i pran o serye investigate merit sa bann stories ki pe ganny pibliye dan local media?  Mersi bokou.

 

MR SPEAKER

Mersi Onorab Henrie.  Vis-Prezidan.

 

THE VICE-PRESIDENT VINCENT MERITON

Mersi Mr Speaker.  Onorab mon dakor avek ou toutafe an 2011 ti i annan sa levennman.  E an 2011 nou pa ti ankor adopte nou Lalwa, me ti annan an 2012 ti konmans diskisyon ki’n abouti apre evantyelman pou nou pas sa Lalwa prezan pou nou kapab met lanmen lo sa bann size.

I bezwen en zefor Nasyonal ant bann partenaire dan Gouvernman e bann partenaire dan Sosyete Sivil pou kapab adres sa size.  I en size ki bann lenstans, depi Komite Kordinasyon Nasyonal bann taskforce lo kote Imigrasyon lo kote Lanplwa i pran en travay o serye.

I annan en Komite spesyal ki Imigrasyon in mete, pou travay avek bann anplwaye, pou dir ou annan en GOP ki’n vini, travayer in antre dan pei, ler son Kontra i fini ou bezwen pe deklans prosedir pou renouvle at least 6 semenn davans, pou permet ki son Kontra son GOP pa terminen apre ou vwar ou pe tay isi tay laba.   E ki sityasyon sa dimoun i legal e prezan ki bann lezot Lalwa i kapab kick-in. 

        So i annan travay ki pe ganny fer e kot Departman Imigrasyon pe ekrir oubyen pe zwenn, oubyen e koz avek bann anplwayer pou fer sir ki tou zot bann ka i annord.  Nou annan nou apepre e bon pe ka kot bann dimoun i an defo avek Lalwa, me solman Imigrasyon pe koz avek zot ler i aplik marto Lalwa lo sa size.

So i en travay ki pe pran plas i en travay ki ongoing, me solman mon satisfe ki i annan en zefor an plis ki pe mete.  E wi i annan lespas pou amelyorasyon se pou sa rezon ki nou’n dir nou bezwen get n kou an term Bidze, akoz anba Lalwa nou kapab pran en Sekretarya ki pou ed Komite anba direksyon PS Linda William Melanie, an konsiltasyon avek Minis pou Home Affairs, pou kapab met en servis ki pou kapab ede, gete ki kantite gravite sa defi i annan, e ed bann lezot Lazans kapab annan en pli byen sistenm rapor, e met lanmen lo sa bann size avan ler i leve lo n baz  prevansyon.

Ou premye kestyon se ki bann standar.  Bann standar i konsern formasyon bann zofisye lo ki mannyer ou pou detekte en ka sispekte lo trafik imen ? Nou bezwen plis training nou santi tou nou bann Lazans ki enplike dan tou sa bann Departman Gouvernman ki mon’n mansyonnen, ensi ki son Sosyete Sivil i devret annan en zefor konzwent par tou sa bann partenaire etranze, pou kapab ed nou kapab adres sa kestyon formasyon.

Dezyenmman i annan kestyon shelter, en shelter apropriye ki devret ganny fer pou kapab ler nou santi ki e dimoun i en viktim  sispe oubyen ki Lakour in dir i en viktim, nou kapab plas li pou son proteksyon, apre kot nou bezwen annan bann lenstriman bann leaflet – bann adds ki koz lo la ki dan bann diferan langaz ki bann dimoun i kapab reste azour.  Apre nesesite pou nou kontinyen travay lo  armoniz  bann Lalwa.

I annan Lalwa Lanplwa ki pou sorti byento, i annan Polisi Imigrasyon ki byento ava sorti ki nou pe armoniz tou bann tou bann zefor ki Gouvernman pe fer pou aire ki keksoz i tonm annord.

Mon dakor avek ou antyerman ki en travayer i bezwen annan en non.  Son non i son premye keksoz.  Ou pa kapab donn li en limero en limero i mank dignité.  Konmsi ou dan prizon.  E mon dakor 100poursan, sa konplent annefe bomaten mon ti annan en diskisyon avek en zofisye ki’n nonm mon sa ki’n arive, e nou bezwen kapab atraver Komite met lanmen lo la.

Kot i konsern GOP, bann gous osi ankor ler i annan bann i bann travay dan diferans lenstans dan Gouvernman ACCS, i kapab osi annan son mekanizm pou li servi.  E osi kot i konsern kestyon GOP, mon krwar depi Committee depi Komite Imigrasyon ek Lanplwa i kapab sible sa bann defi e met keksoz annord.  Mersi Mr Speaker.

 

MR SPEAKER

Mersi Vis-Prezidan.  Onorab Waven William.

 

HON WAVEN WILLIAM

Mersi Mr Speaker.  Bonzour Vis-Prezidan avek ou lekip.  Bonzour tou dimoun a lekou.  Welcome bann student dan Gallery.

        Speaker mon ti a kontan demann Vis-Prezidan si i kapab dir nou lefe ki ozordi nou vwar pou dir Gouvernman pe fer fas avek bokou defi.  E nou’n note osi pou dir Gouvernman in permet kreasyon bann Private Employment Agencies.

        Mon anvi demann Minis si zot santi pou dir petet, pa devret pe angaz zot en pti pe plis avek sa bann Private Employment Agencies, akoz lefe zot pe fer fas avek bokou defi pou zot sirviv.  Sirtou lefe ki mon vwar pou dir dan sa lager kont human trafficking, mon krwar pou dir s bann Lazans i kapab osi parmi bann NGOs donn en koudmen.  Akoz pou lemoman la zot pe fer fas avek bokou difikilte.  E mon krwar poudir Gouvernman i kapab angaz zot dan sa travay.  Mersi.

 

MR SPEAKER

Mersi Onorab William.  Vis-Prezidan.

 

THE VICE-PRESIDENT VINCENT MERITON

Mersi Mr Speaker.  Onorab mon dakor avek ou.  kolaborasyon i pa limite avek zis sa bann Lazans ek lorganizasyon ki mon’n dir. E zisteman bann Private Employment Agencies i annan en rol pou zwe ladan, akoz bokou zot osi kapab annan kontak avek bann Lazans zot omolog dan lezot pei, e kot zot fer vini travayer.  E mon krwar i annan en nesesite ki nou kapab armoniz, etablir bann standar ki pou permet ki okenn dimoun ki pas atraver sa sistenm i kler, e ki son anplwayer potansyel ki e anploye i konn  tou bann kondisyon.

E an menm tan i permet nou kapab permet mon kapab dir ti annan en problenm avek bann travayer Bangladeshi, ki nu ti bezwen anmenn en delegasyon laba Dhaka pou kapab met lanmen lo sa size, e apre ki nou’n tonm dakor i annan en Lagreman ant Gouvernman Bangladesh avek Sesel tonm dakor en Lagreman ki mannyer nou pou fer bann prosedir, ki pou asire ki bann travay ;

– enn ; i annan sa kalifikasyon ki zot annan.

2enm zot meet tou bann standar ki nou bezwen e kapab elimin okenn- Akoz i annan en kantite middleman dan lezot pei ki enplike. En malere ki pe rod en sans pou li travay i bezwen li menm li pran loan  pou li kapab pey en middleman apre ler i vin isi i andete depi lipye ziska latet san bliy son fanmir, ki bezwen anvoy larzan.

So i annan en rol pou nou bann Private Employment Agencies, Departman Lanplwa avek bann omolog lot kote bann pei sours pou nou kapab met lord lo la.  Mersi Mr Speaker.

 

MR SPEAKER

Mersi Vis-Prezidan.  Onorab William.

 

HON WAVEN WILLIAM

Mersi Mr Speaker.  Mr Speaker mon ti a kontan ki Vis-Prezidan i donn nou en langazman.  Akoz nou’n vwar ki de tout an pti sa bann Employment Agencies private parey mon dir Gouvernman pe pran en pti pe tro bann mon kapab dir aktivite ki zot, zot pe perdi zot pa pe kapab sirviv.

So mon ti a kontan ki Vis-Prezidan, i donn nou en langazman ki ava konsilte avek Minister Lanplwa, ki anfen sa bann Private Employment Agencies zot a kapab mon kapab dir donn en koudmen konzwent avek Minister Lanplwa. Akoz Vis-Prezidan i annan dan sa bann Agencies la ki pe vreman zis survive parey zot bezwen lasistans.  Mersi.

 

MR SPEAKER

Mersi Onorab William.  Vis-Prezidan.

 

THE VICE-PRESIDENT VINCENT MERITON

Mersi Mr Speaker.  Onorab mon ankor dakor avek ou.  Annefe mon okouran i annan serten Private Employment Agencies pe trimouse, pe lager pou kapab pey zot rent.  San koz pey zot travayer.

E mon dakor zot evre dan en lanvironnman marse lib ki nou ladan, kapab kree plis lespas pou zot kapab zwe sa rol.  E etablir en modus operandi avek Gouvernman, lo ki mannyer zot kapab ganny zot dipen, e osi kapab fonksyonnen.  Me selman ou konnen parler dimoun i kontan – bann dimoun ki pe rod travay la, zot vin kot Gouvernman pou rod sa servis.  Nou pe dekouraze e fer konmsi ler nou’n outsource sa servis, e bann dimoun i ganny dir.  I annan bann diferan Lazans prive ki pe promouvwar lanplwa i annan en kantite.  I annan bann   teknolozi ; i annan bann ki ankor konmsi bann landrwa fizik.  Me selman i annan en lespas pou zot zwe.

E dan nou Migration Policy sa kestyon i ganny feature pou ganny adrese, me mon santi i annan en nesesite ki annan en pli bon dyalog ant  zot ek Gouvernman, pou gete ki mannyer zot kapab zwe en rol pli for, pou zot kapab ekonomikman kapab vin stab.  Mersi Mr Speaker.

 

MR SPEAKER

Mersi Vis-Prezidan.  Bon mon pe ferm lalis, mon annan ankor 3 Manm ki pou demann kestyon, mon pa pou pran ekstra pou nou kapab release Vis-Prezidan apre.  Onorab Ahmed Afif.

 

HON AHMED AFIF

Mersi Mr Speaker.  Bonzour Vis-Prezidan e ou delegasyon  mon kestyon atraver ou Mr Speaker, se pou Vis-Prezidan donn nou en lendikasyon kler pou dir Gouvernman i azour avek sa sityasyon trafik imen dan Sesel.

Vis-Prezidan poudir ozordi enn bann fason ki trafik-az i pase se en dimoun i rantre lo preteks pe vin travay, me i napa GOP i vin lo en visitors permit i reste an plis letan me antretan i pe travay, e pli tar i ganny en papye kelkonk ki pa ofisyel, me atraver en biro parla, e i kontinyen travay e i ganny eksplwate parske ofisyelman i a en travayer ki anrezistre ki annan en GOP. 

Pou Gouvernman kapab demontre avek nou pou dir zot pe lager kont sa, mon ti a kontan ki Vis-Prezidan i kapab donn nou en statistik kler, par egzanp lafen Zen konbyen etranze ki ti annan GOP anrezistre dan Sesel ?

E konbyen etranze ki’n antre dan pei ki’n overstay son limit, e ki pa ankor kit pei ?

Parske sa i en lendikasyon comme kwa i pe fer keksoz ilegal.  Si ou annan sa statistik pou mon i a donn mon en lendikasyon zot azour avek sa travay.  Mon ti a kontan ganny statistik.  Mersi.

 

MR SPEAKER

Mersi Onorab Afif.  Vis-Prezidan.

 

THE VICE-PRESIDENT VINCENT MERITON

Mersi Mr Speaker.  Mr Speaker mon ti travay Imigrasyon konman en 2enm lanplwa ki mon ti pran ‘79.  E si en dimoun ti napa en tiket retour ek larzan ti pou retourn lo menm avyon.

Pa’n sanze sa.  Ou bezwen montre pou dir ou annan en tiket retour e ou annan kapasite pou reste isi 7 zour eksetera.

E si ou antre lo en visitors permit ou’n overstay pa kapab annan leskiz.  I pa pou tonm dan kategori trafik imen la.  akoz in vi konman en viziter ou.  So ou’n vin konman en viziter ou’n vin avek tou ou konnen. E lo sa stanp i mark well lontan ti marke Airport ki ou napa drwa antre dan travay gainful. 

E si overstay Imigrasyon i annan tou drwa pou li deal avek ou apre anvoy ou se ou.

Now, bann statistik mon napa me selman Imigrasyon i a fer ou gannyen pou ou kapab fer en analiz e apresye sa sityasyon.  Me sa i en kote sa.  Sa en kote ki dimoun in kas lareg.  Me ki nou pe koz lo la, si en dimoun i fer i antre apre ou vwar ti annan serten collusion anmezir ki ou fer bann lanket la, i vin en keksoz trafik imen ki nou bezwen gete dan en diferan perspektiv dan diferan lengths. 

        An menm tan lendikasyon kler ki nou kapab donnen se ler piblik li i santi i annan en keksoz ki pe pase malapropo; en malgol pe pase en mannigans pe pase i telefonn swa Lapolis swa Imigrasyon, swa Lanplwa i raporte, apre ou deklans en prosedir ki entern-man bannla i al verifye e i kapab pran bann aksyon pran bann mezir neseser.

Oubyen ankor kot ou annan en Lorganizasyon Sosyete Sivil i alert bann Lotorite pou kapab ale al met lanmen lo la.

E sa i en barenm ki nou bezwen sak ka ki in gannyen, i ganny rikorde i ganny verifye apre i ganny mete si napa ase lenformasyon i aret la.  Si i annan plis lenformasyon ki ou santi i en ka sispe trafik imen ou deal avek atraver prosedir  legal ki nou’n mete.  Mersi Mr Speaker.

 

MR SPEAKER

Mersi Vis-Prezidan.  Onorab Afif.

 

HON AHMED AFIF

Mersi Mr Speaker.  Mon ti a kontan zis demann Vis-Prezidan, vi ki in dir i pou donn mon sa statistik eski mon kapab ganny sa by Vandredi – premye ?

E 2enm si i annan statistik lo konbyen prohibited immigrants in annan ki zot in dekouver e zot in fer ale an 2018?

 

MR SPEAKER

Mersi Onorab.  Vis-Prezidan.

 

THE VICE-PRESIDENT VINCENT MERITON

Mersi Mr Speaker.  Ozordi le 30 ou a ganny sa Vandredi Onorab.

 

MR SPEAKER

Mersi Vis-Prezidan.  Onorab wi tou, se sa.  Onorab Terence Mondon.

 

HON TERENCE MONDON

Mersi Mr Speaker.  Mr. Speaker Vis-Prezidan in dir nou ki rapor resan Sesel in upgrade, lo sa watch list sa lalis obzervasyon ki bann Lorganizasyon Enternasyonal i servi.

Be dan en rapor ki ganny pibliye par US State Department an Zen 2018, i ti mansyonnen i ti mansyonn en seri keksoz ki Sesel pa pe fer, e i ti dir pou sa rezon ki Sesel ti ganny downgrade, pou vin lo nivo 2 sa lalis.  Si i kapab eklersi si nou ki raport i pe fer referans avek ki’n ganny upgrade akoz mwan mon pe lir enn ki’n ganny downgrade an 2018.

E si i kapab dir nou osi ki sityasyon kot SITZ?  An vi ki annan bokou etranze ki travay kot SITZ ki sityasyon silvouple?  Mersi.

 

MR SPEAKER

Mersi Onorab Mondon.  Vis-Prezidan.

 

THE VICE-PRESIDENT VINCENT MERITON

Mersi Mr Speaker.  Mr Speaker nou ti lo watch list nou’n ganny upgrade to Ta2. Ta2 savedir en nivo ki reflekte kantite zefor ki Gouvernman i fer pou nou kapab monte kot i konsern trafficking in persons e lezot size ankor ki annan pou fer avek protez dignité imen.

I annan en lalis rekomandasyon ki nou ti gannyen e ladan ti parey mon’n dir taler training, shelter, Lalwa armonize, epi bann case Ankour nou pa ti ankor annan prosekisyon ki evantyelman nou’n gannyen la ki nou’n kapab soumet.  E wi sa kestyon SITZ ki nou pe travay pou armonize, akoz i annan serten defi, serten defayans kot SITZ kot i konsern laplikasyon bann Lalwa lanplwa.  Mersi Mr Speaker.

 

MR SPEAKER

Mersi Vis-Prezidan.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker eski Minis i ava konfirmen ki pou dir dan bokou ka sa ki nou ape human trafficking Sesel, in annan en kolizyon ant sa anplwayer avek sa anplwaye?

E ki se selman letan in annan serten keksoz ki pa’n mars byen e aprezan sa bann dimoun ki dir zot pe ganny trafike, zot in tay kot bann lorganizasyon pou zot ankor enn fwa se ganny en larzan an plis, ki letan zot ti pe travay zot tib byen kontan sa dimoun pe travay avek zot letan zot in mete pou dir zot bann enzenyer tou kalite zot pou fer tou kalite keksoz, e apre letan zot in ariv dan garaz kot zot pou travay ni en ni en lakle ni en pens, zot pa kapab travay aprezan in fer zot fer lezot pti keksoz pou zot aprann se la apre kot zot in tay kot bann lorganizasyon tay isi/tay laba pou zot ganny en larzan pou zot ale.

Alor kwa ki Minister pe fer pou nou anpese ki i annan sa bann sityasyon pou ki letan en dimoun i dir i en enzenyer son sertifika i ganny tyeke ki pou dir i vre i en enzenyer e ki si i pa en enzenyer ki GOP pa ganny donnen?   Sa i enn.

Dezyenmman Mr Speaker, eski Minister ozordi zot annan en sistenm kot la, la par egzanp ler nou pe koze 10:04 zot kapab pez en bouton laba kot Imigrasyon, pou vwar konbyen dimoun ki napa GOP zot GOP in ekspire ki dan pei pou zot kapab ale dir avek sa bann dimoun kit Sesel deport zot e ale.

E la mon anvi osi konnen konbyen deportasyon in annan ?  Akoz Mr Speaker mwan mon anvi fer kler Minis wi i annan sa bann travayer ki vini ki konplent trafik, me selman zot osi zot ladan.

Alor eski Gouvernman pa kapab devlop en sistenm kot letan en dimoun in vini, e ki i annan kolizyon ki sa dimoun i ganny deporte deswit parske li osi i koupab.  Parski li osi i pe anmenn en move non pou nou pei Sesel.

Alors ki i ganny fer kler avek tou sa bann dimoun letan zot pe vini si zot overstay zot pou ganny deporte e ki akoz zot in kas Lalwa zot annan posibilite pou zot pa ganny nanryen.

Parski mwan mon krwar ki bokou sa bann dimoun zot vini zot vey letan ou dir avek zot, zot bezwen ale akoz your   soz oubyen kondisyon in sanze zot tonm lo ou lipye mummy papa soz ensidswit don’t do that mon tantin pre pou mor mon tonton mon zanfan, e apre sa se sa dimoun ki’n leker in tonbe akoz ou konn byen nou leker Seselwa letan ou konnen ou dir i fer lapenn e apre fer lapenn la i retonm lo nou e i retonm lo nou pei Sesel !  Mersi bokou.

 

MR SPEAKER

Mersi Onorab Ramkalawan.  Vis-Prezidan.

 

THE VICE-PRESIDENT VINCENT MERITON

Mersi Mr Speaker.  Wi nou kapab dir ki ozordi la i anviron 550 dimoun ki zot GOP in ekspire, sanmenm sa travay ki Imigrasyon pe fer, ki bann dimoun malgre ki Imigrasyon o konmansman ler Kontra ti ganny aprouve ler GOP ti ganny aprouve dele dan sa sis semenn davans ki ou bezwen konmans fer aplikasyon pou renouvle sa.  Sanmenm ki mon’n dir taler ki Imigrasyon pe travay avek bann diferan group, pou asire ki zot met zot case status anplwaye annord.

Mr Speaker toultan ki anplwayer avek anplwaye, zot tonm dakor nou pa pou konnen.  Si enn napa enn ler pe koze in vwar pou dir swa i pa kapab travay, lo kote anplwayer oubyen kot sa anplwaye i santi pou son sertifika ki otantik ki i annan i pe mal ganny peye, si enn pa al lev lavwa Gouvernman pa pou konnen.

Me si nou sistenm koutim verifikasyon atraver labour inspector – factory      inspection e lezot lenspeksyon ki swa Imigrasyon oubyen lezot Lazans Gouvernman i fer, nou kapab fix sa up, then nou pa pou konnen.  Me avek travay ki nou pe fer la konsolidasyon, ranforsi zefor ki Komite Nasyonal Kordinasyon Nasyonal pe fer, nou kapab met lanmen lo sa sistenm.

Ou’n koz lo en dimoun i vin avek son sertifika.  Kot Lasante i annan e ka tipik, i annan en sistenm ki marse.  SMDC Seychelles Medical and Dental Council, avan ler okenn sa bann dimoun dan domenn lasante i vin travay Sesel, fodre i ganny akredite avek SMDC.  Ou vin avek ou sertifika li i kapab verifye dan pei kot ou sorti si ti annan en msye X sorti sa Liniversite oubyen sa lenstitisyon, si son sertifika pa en sertifika aste oubyen en sertifika ki genuine ki otantik.   Me anmezir nou devlope nou santi ki i annan en nesesite ki nou annan en tel sistenm partou.  Nou’n lotrozour avek Bangladesh nou’n bezwen parey mon’n dir taler mont laba etablir en fason travay pou nou kapab verifye.

E menm nou Konsil i bezwen verifye lotantisite, sertifika ek dimoun ki vin isi i bezwen kapab met son tanpon lo la pou fer sir ki i reel.  Avek SQA osi i annan en travay ki nou pe fer pou li osi kapab get deor dan sa pei swa i La Suisse oubyen L’Amerique oubyen     pou fer sir ki sa ki nou pe sa sertifika nou pe gannyen  i byen.

So nou devret kapab pik sa atraver bann sistenm rotin. Me selman ou apresye avek anviron 21mil travayer etranze ki dan pei, avek sa kantite lafors travayer sa bann Lazans ki mon’n dir, ou pa pou kapab kouver tou sa bann dimoun.

Me ki enportan ki ou annan en sistenm ki ou annan en fason sistematik pou verifye dan bann landrwa travay siporte par alert popilasyon i kapab donn ou, siporte par Sosyete Sivil ki’n donn nou lenformasyon, nou devret kapab met sa anba kontrol, e a servi let Lalwa 25an prizon avek R800mil fine pou kapab fer sir ki nou met kontrol lo la e an menm tan protez dignité imen.  Mersi Mr Speaker.

 

MR SPEAKER

Mersi Vis-Prezidan Onorab Ramkalawan.

 

HON WAVEL RAMKALAWAN

Mr Speaker, Minis in dir nou i annan 550 dimoun ki napa GOP.

        Kestyon ki mon anvi demann Minis, kisisa ki anpes Gouvernman deport sa 550 dimoun ki napa GOP ?  Zot ilegal dan nou pei.  Deport zot! Si nou en Seselwa nou ti L’Angleterre oubyen nou ti dan en lot pei nou ti dan zot pei ilegalman, pa nou ti pou ganny deport?  Pa nou ti pou ganny sanksyon.  Si nou al Sud Afrique nou reste plis ki sa letan ki i donn nou, pa nou ganny sanksyon?

Akoz ki Sesel li i prefere ganny en move non lo li, me selman i kit sa bann dimoun la?  Deport zot mon dir.

Mr Speaker mon 2enm morso, ki Minis mon krwar pa’n tro reponn, konsernan sa travayer li osi nou tou nou konnen, ki pou dir bokou sa bann travayer mwan mon la pou lemoman mon konn en dimoun ki pe ganny problenm akoz sa dimoun ti tonm azenou devan li, ti dir avek li leker ti tonbe, e la aprezan i pe ganny problenm.

Minis pa’n dir mwan Mr Speaker, ki aksyon zot pou pran an relasyon avek sa travayer li osi ki konnen ki pou dir son GOP in ekspire, akoz li osi tou i annan en kopi, pa i konnen li pou dir son GOP in ekspire tel dat ?  Pou ki sa travayer ki son GOP in ekspire, parske la in arete bann zafer paspor dimoun ensidswit, zot devret annan zot papye at all times.  Me an plis ki sa zot kart idantite tou ki zot gannyen pa i annan en lendikasyon lo la kan ekspire ?  Zot konnen zot.

Alor Mr Speaker mwan mon pe senpleman dir  Minis annou pa met sa lour lo nou konman en pei.  Annou pran aksyon e mars dapre rule of Law pou lantre Sesel, in donn ou en GOP ki ekspire apre 2an si ou GOP i ekspire ou ankor dan pei ou ganny ranmase ou ganny met lo avyon e ou ganny deporte.

Eski ki sa ki difisil avek sa pou Gouvernman pran Mr Speaker?  Mersi bokou.

 

MR SPEAKER

Mersi Onorab.  Vis-Prezidan.

 

THE VICE-PRESIDENT VINCENT MERITON

Mersi Mr Speaker.  Mr Speaker mon annan statistik me selman sa lannen nou’n deporte dimoun dan kategorik i ou pe dir.  Sa 550 dimoun ki mon’n koz lo la le moman Imigrasyon i detekte sa, zot ekrir sa bann anplwayer i donn li en dele letan pou li kapab rektifye, oubyen ganny deporte.

Ki Lasanble pe dir la, se ki nou azir pli  vit, pou kapab fer sir ki lemoman ki en dimoun i vin en ilegal isi, nou kapab deal ek li dapre let Lalwa.  Mersi Mr Speaker.  Mon krwar i travay dan sa direksyon.  E nou bezwen aplik li pli vigourezman pou fer sir ki keksoz pa escalate e keksoz pa deteryore.  Mersi Mr Speaker.

 

MR SPEAKER

Mersi Vis-Prezidan.  E avek sa nou ava remersi ou Vis-Prezidan avek ou lekip, e nou ava eskiz zot parmi nou.

 

(THE VICE-PRESIDENT AND THE DELEGATION WAS EXCUSED FROM THE HOUSE)

 

MR SPEAKER

Mon ava demann Parliamentary Reporter pou fer rantre Minis Charlette.  Yes Onorab Ramkalawan.

 

HON WAVEL RAMKALAWAN

Zis fer en pti propozisyon.  La i 10:15, akoz nou pa pran en break, la epi nou retournen 11er mwen-zen-kar pou ki then nou al all the way.  Konmsi nou ganny nou pa kas sa momentum letan nou konmanse, nou al en sel?  Mon pe zis met sa konman en propozisyon Mr Speaker.  Mersi.

 

MR SPEAKER

Ok dakor eski i annan en konsansis?  Minis i ok ou kapab zis ekout desizyon ki nou’n pran.  I annan en propozisyon ki’n sorti kot Leader Lopozisyon  e mon krwar i annan en konsansis ki nou pou pran nou break la nou retournen 11er mwen-kar zis pou nou pa kas momentum,  nou ava pran PNQ 11er mwen-kar e nou ava ale dan plas pou nou pran PNQ la, nou pou break apre nou retourn ankor – ok ?

        So nou dakor nou ava pran break e nou a retournen 11er mwen-kar.

 

(BREAK)

 

MR SPEAKER

Bon nou ava kontinyen nou travay.  E parey mon ti’n anonse, se la nou pour pran Private Notice Question.  E mon ti a kontan dir bonzour, e welcome Minis Pamela Charlette.  Minis ki responsab pour Labita, Later e Enfrastriktir, e osi tou Transpor lo Later.

Minis Charlette i ganny akonpannyen par Ms Sabrina Agathine ki Managing Director 2020 Development (Seychelles) LTD.  Mr  Gerard Hoareau ki Special Advisor to the Minister.  E byensir nou figir familye, Mr Victor Pool ki sorti Biro Attorney Zeneral.

Bon nou ava al direkteman lo kestyon.  E mon ava donn la parol Onorab Ramkalawan.

 

HON WAVEL RAMKALAWAN

Mersi bokou Mr Speaker.  Bonzour Minis avek ou delegasyon, ou bann teknisyen.  E petet Mr Speaker zis mon ava preface.  Mon anvi dir Minis nou pe senpleman rod en solisyon.

Mr Speaker swivan bokou domaz ki’n arive avek lakaz bann fanmir Labonte, Pillay, Bonnelame, Constance, Marcel, Morel, Gonzalves ek lezot ankor dan plato Anse Aux Pins swivan travay piling.  Savedir met bann pilye dan lanmer pour proze Ile Soley, anba Lakonpannyen 2020 Development (Seychelles) Ltd,  eski Minis responsab pour Labita, Later, Lenfrastriktir ek Transpor lo Later i kapab dir Lasanble:

  1. Ki Gouvernman i annan lentansyon fer pou rezourd problenm lakaz sa bann fanmir?
  2. Vi ki sa bann problenm pe trennen pandan plizyer lannen, kan eski sa bann dimoun i kapab ekspekte ganny en soulazman?

E finalman.

Etandonnen ki sa bann fanmir pa pe rod konpansasyon monneter, me plito ki zot lakaz i ganny repare.  Eski Gouvernman i ava konsider sa opsyon favorableman e fer sa travay o-pli vit posib?  Mersi bokou Mr Speaker.

 

MR SPEAKER

Mersi Onorab Ramkalawan.  Mon ava donn la parol Minis Pamela Charlette.

 

MINISTER PAMELA CHARLETTE

Mersi Mr Speaker.  Bonzour tou Onorab.  Mr Speaker, pour reponn kestyon Leader Lopozisyon.  Mon a met en pti pe konteks sa proze.

Proze Ile Soleil pe ganny antreprann par Lakonpannyen Gouvernman 2020 Development (Seychelles) Ltd.  E sa Lakonpannyen in donn Kontra lezot kontrakter ki i annan License pour fer travay konstriksyon.

Minister Labita, Lenfrastriktir, e Transpor lo Later- e alor pa direkteman enplike dan bann aktivite konstriksyon pour Ile Soleil.

Mr Speaker zis pour note, 2020 i ganny oversee par PEMC.   E alor i tonm direkteman anba Minister Finans.  Lenformasyon ki Minister in gannyen atraver Lakonpannyen 2020 an sa ki konsern bann domaz ki’n posibleman koze par aktivite piling i konm swivan:-

Lakonpannyen 2020 ti ganny enformen boner an 2017 par detrwa fanmir ki i annan lakaz pres kot pon ki konnekte Ile Soleil ek Anse Aux Pins, ki zot lakaz in ganny andomaze an rezilta bann travay piling ki ti pe ganny fer pandan konstriksyon sa pon.

Sa bann travay piling ti ganny fer ziska lafen 2015.  E proze pon li menm li ti konplete an Oktob 2016.  So lenformasyon, se ki nek an boner an 2017 ki 2020, ti ganny enformen ki ti annan problenm avek bann lakaz.

Deswit apre sa konplent.  Chairman 2020 ti al vizit sa fanmir- sa bann fanmir ansanm avek Reprezantan sorti UCPS ek GIBB ki Konsiltan lo sa proze pour lenfrastriktir.

Swivan sa vizit,  Lakonpannyen 2020 ti ganny konseye pour rod enzenyer endepandan pour fer plis analiz lo sa ka.  Akoz 2020 i deza en Lakonpannyen Gouvernman, i bezwen en dimoun endepandan pour determinen e analiz si sa bann ka i genuine.

Menm si responsabilite pour fer sa travay ti avek kontrakter ki ti ganny apwente pour fer sa pon,  me lefe ki Lakonpannyen 2020 ti’n ganny sa konplent,  2020 ti envit detrwa enzenyer endepandan pour antreprann plis analiz lo domaz ki’n kapab arive an rezilta sa louvraz piling.

Pour asire ki konsern sa bann zabitan i ganny adrese,  An Me 2017, Lakonpannyen 2020 ti deside pour donn sa Kontra avek AQUAPRIS.  E louvraz ti komanse an Zen 2017, e kontinyen an Zilyet pour fer bann analiz sa bann lakaz ki ti’n raport domaz.  E pour donn en rapor lo sa sityasyon avek sa Lakonpannyen 2020.  Sa legzersis analiz ti ganny fer lo fre 2020 li menm.

An Out 2017, zis 2 mwan, bann zabitan ti ganny enformen lo bann findings ki enzenyer ti fer.  En kopi sa rapor ti osi ganny donnen avek Kontrakter sa proze UCPS.

Bann lakaz ki ti ganny kouver dan sa analiz, ti enkli 8 zabitan.  Mazorite bann zabitan ti enform Lakonpannyen ki zot pa satisfe avek rezilta rapor ki zot ti’n gannyen sorti kot enzenyer.

Lakonpannyen 2020 alor ti fasilit en meeting atraver Biro Ladministrasyon Distrik avek bann ki ti dir zot, in ganny afekte.

Sa meeting ti ganny fer le 14 Septanm 2017 1 mwan pli tar, dan Biro Ladministrasyon Distrik.  E bann zabitan ti demande ki zot apwent zot prop enzenyer endepandan e demande ki Lakonpannyen 2020 i ed zot lo bann fre pour fer sa 2enm rapor.  Biro Ladministrasyon Distrik ti pour kordin sa legzersis.

An Avril 2018, Lakonpannyen 2020 ti fer en swivi pour vwar progre.  E ti ganny enformen par sa Lofis Ladministrasyon Distrik, ki bann zabitan pa ti ankor apwent zot enzenyer endepandan.  E sa mon repete, ti an Avril 2018.  Pour fer keksoz bouze, Lakonpannyen 2020, ti propoz avek sa bann dimoun en lalis bann enzenyer, pour zot kapab selekte enn ladan.

Pandan sa letan,  1 parmi sa bann fanmir ti apros Lakonpannyen 2020 pour rezon ki serten ant zot ti annan problenm medikal.  E dir ki zot aksepte rapor enzenyer endepandan, e demande ki Lakonpannyen 2020 i kontinyen prosesis pour ed zot remedye sityasyon.

Sa lakaz ti osi lakaz ki ti manifeste plis domaz.  E an vi leta kritik sa lakaz, Lakonpannyen 2020 ti apwent ek QS an Avril 2018 pour fer en evalyasyon lo valer bann domaz lo zot lakaz.

Lakonpannyen 2020 ti egalman ofisyelman ekrir sak sa bann zabitan pour enform zot ki zot Lofis pa ankor resevwar okenn lenformasyon lo ki zistans zot ete pour apwent zot enzenyer.

An Me 2018, Chairman 2020 ti ekrir sa group zabitan pour osi enform zot lo tou aksyon ki’n ganny pran ziska ler; kopi sa let i osi ganny sirkile avek tou bann ki konnekte ek sa devlopman ki enkli Prezidan Larepiblik, Speaker Lasanble Nasyonal, Leader Lopozisyon, Leader Government Business, MNA Distrik Anse Aux Pins, DA Distrik Anse Aux Pins, UCPS ek GIBB ki Konsiltan.

An Septanm 2018 Lakonpannyen 2020 ti ganny enformen ki bann zabitan ti’n dakor pour apwent en enzenyer endepandan pour fer sa 2enm evalyasyon lo sa bann domaz.  Mon repete sa ti an Septanm 2018.

Sa servis ti osi ganny peye par Lakonpannyen 2020.  Pandan sa 2enm evalyasyon ti osi annan bann lezot ka ki ti’n raporte.  E sa bann ka ti osi ganny analize par sa 2enm enzenyer.

Sa ti swiv avek assessment QS an Zanvye 2019, ankor peye par Lakonpannyen 2020.  Sa QS ti baz son assessment lo rezilta rapor enzenyer- 2enm enzenyer.  Pour met en valer finansyel lo konbyen sa bann domaz lo sak sa bann lakaz pour koute pour repar zot.

Lakonpannyen 2020 ti zwenn ek sa bann zabitan le 25- le 24 Zen 2019, 5 mwan pli tar e partaz avek zot en kopi sa rapor QS ki zot ti’n resevwar ki baze lo rezilta rapor ki zot enzenyer ti’n fer.  I donn en prozeksyon konbyen sak sa bann domaz pour koute pour fer reparasyon.

I enportan note ki 1 kopi sa rapor QS ek sa 2enm enzenyer endepandan ti osi ganny donnen avek UCPS, ki kontrakter.

Lakonpannyen 2020 ti osi averti sa bann zabitan pandan sa rankont, ki zot pour bezwen Ofisyelman fer en konplent Formel avek kontrakter proze, ki UCPS.  An vi anba Kontra ant 2020 ek- avek UCPS, kontrakter i responsab pour domaz ki ganny koze an rezilta travay konstriksyon ki i antreprann.

Sa bann zabitan– well ti annan 6 zabitan dan sa meeting.  E ti osi annan Reprezantan QS, 2020 li menm.  E absan ti enzenyer ki ti ganny apwente par bann zabitan Anse Aux Pins.

En kopi sa 2enm rapor enzenyer, ti osi ganny partaze avek sa bann zabitan.  Lakonpannyen 2020 ti osi zwenn sa fanmir ki ti’n demann lasistans an rezilta bann kondisyon medikal dan zot fanmir an Zilyet sa lannen.  Zot in osi ganny demande pour fer en konplet Formel avek kontrakter sa proze.

Lakonpannyen 2020 in enform Minister ki malgre ki kontrakter UCPS anba Kontra i responsab pour domaz ki ganny okazyonnen pandan konstriksyon.  Lakonpannyen 2020 pe kontinyen donn son soutyen e ekout sa bann zabitan, ede e menm pey serten fre lo la par sa bann zabitan pour zot kapab vwar en solisyon ase vit pour zot problenm.

So Mr Speaker, vwala an bref, an gro bann aksyon ki 2020 li menm in pran regarding sa case Anse Aux Pins.  Mersi.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker mon apresye sa istorik ki Minis in donnen.  Me selman mon pe rod the way forward.  Solisyon.

E mon krwar ki petet lo sa bout la ki Minis pa’n vreman adrese sa dernyen parti kestyon lo ki pozisyon ki- petet la ki’n mansyonn Lakonpannyen 2020.  Konmsi etann donnen ki bann fanmir pa pe rod sa konpansasyon monneter.  Me plito ki zot lakaz i ganny repare.

Ki pozisyon-eski Minis in diskit avek Lakonpannyen 2020 pour regarde ansanm avek kontrakter ek tou bann dimoun pour regarde ki lot staz ki zot kapab fer?  Sa i enn.

Apre.  Konmsi pour osi konfirmen, parski dan tou sa ki Minis in dir.  Mon krwar ki i annan en weakness an term letan sa proze ti pe ganny antreprann.

Nou rapel Mr Speaker letan par egzanp Pension Fund.  Enn bann keksoz ki ti fer, se avan ou fer sa kalite proze.  Ou pase ou fer en survey pour regarde si lakaz i crack.  Si lakaz pa crack pour ki ou annan en before and after.

E mon krwar ki sa dan li menm li i en gro defo.  E mon osi tou mwan annan kopi bann rapor enzenyer kot zis zot pe dir ‘be sa en vye crack, sa isi laba’.  Be i baze lo kwa?  Parski mon krwar ki se sa levidans syantifik ki zot pa’n swiv li byen.  E ki sa bann dimoun zot ki’n reste la dan lakaz ‘zot pe dir be nou lakaz i crack’.  E ou’n fer sa travay lot kote, in annan en lefe.

E Mr Speaker nou 2 Onorab Ferrari e osi Onorab Andre i konn byen sa sityasyon.  Parey nou dir- parey letan ou met disik dan poban.  Letan ou mete apre sa ou tape, disik i desann.  Me set egzakteman sa ki’n arive ek lakaz sa bann dimoun.  Alor, alor mon mwan anvi baze lo tou sa bann keksoz ki nou pe dir- lefe ki napa sa kantite lakaz, me ki dimoun pe plito rod en reparasyon pour sa bann lakaz.  Kwa ki zot annan lentansyon fer?

Parske mon krwar se sa parol lespwar ki bann dimoun pe rode.  Mersi bokou.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker dapre lenformasyon ki nou annan.  Avan okenn louvraz i kapab ganny fer, i annan serten staz ki bezwen pas ladan.  Sirtou ki sa sityasyon i annan en potansyel pour kekfwa 2020 anmenn son kontrakter Ankour.

Premyerman i bezwen annan prev ouswa Lakor lo ki domaz ki’n ganny koze par aktivite pilling.  E si i konfirmen ki sa bann domaz in ganny koze par sa travay.

Dezyenmman rapor enzenyer i bezwen ganny Lakor bann dimoun ki pe claim.  Sa i ava definir ki domaz ki ganny koze, e ki kalite reparasyon ki apropriye.  Si non, okenn louvraz pa kapab ganny antreprann.

Trwazyenmman i enportan pour annan en claim formel an ekrir sorti kot bann ki dir zot lakaz in ganny afekte anver kontrakter ki ti antreprann sa louvraz.   Akoz si napa sa, napa mwayen pour reklanm kou avek kontrakter ki i annan responsabilite.  Mon krwar 2020 li menm i pare pour asiste sa bann zabitan.  Me zot bezwen agree findings sa bann enzenyer.

E apre parey mon’n dir, Ofisyelman lans en claim avek UCPS koumsa ler 2020 i antre pour fer sa bann remedyasyon, i kapab apre reklanm li.  Claim back avek UCPS.

En lot keksoz ou’n koz lo la.  Sa- ti annan en preset condition dan Kontra kontrakter pour li fer en survey.  Me nou’n vwar poudir sa i pa’n ti’n ganny fer.  Mersi.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mr Speaker mon-mon konpran ki Minis pe dir.  Me selman, mon anvi demann Minis.  Akoz ki ou anvi met bann zabitan avek kontrakter, kan zabitan zot, zot pa konn kontrakter zot?  Zabitan i konn sa Lakonpannyen ki responsab.

E mon pa anvi preempt sa Lalwa ki ou pe vin anmennen pli tar.  Me dan ou Lalwa, li menm li i annan sa eleman ki se sa dimoun ki ansarz ki responsab.  E apre sa, li sa dimoun ki ansarz li i ava deal avek kontrakter.  Konmsi mon pe demande akoz ki se bann zabitan ki bezwen al deal ek kontrakter?  E 2020 li dan en serten sans konmsi i lav son lanmen en ptigit.

Eski Minis pa krwar ki poudir se Lakonpannyen 2020 ki devret pe deal avek son kontrakter?  Parski zabitan zot.  Zabitan zot pa konn nanryen dan Kontra.  Kontra ti ganny sinyen ant 2020 avek UCPS.  E bann zabitan zot, zot napa okenn kopi Kontra.

So, eski Minis pa krwar ki se Lakonpannyen 2020 dan Gouvernman- i en Lakonpannyen Gouvernman ki devret pe fer tou sa bann keksoz, e ki zot bann zabitan lo lot kote zot zis trouv en solisyon pour zot problenm?  Mersi bokou.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker mon krwar i pa normal poudir 2020 pe lav son- ladan.  Akoz 2020 in ed sa bann zabitan depi ler sa problenm in komanse ziska aprezan.  E 2020 osi in zwenn avek UCPS son Legal Counselor ki’n advice 2020 pour fer sa bann zabitan fer en Formal claim.  Se Legal Counsellor UCPS ki’n dir 2020 fodre sa i arive.  Mersi.

Me selman mon oule dir poudir 2020 i la.  I pour siporte sa bann zabitan, e i pare pour fer sa remedyasyon si sa bann prosedir i ganny fer byen.  Koumsa ler- si i annan en ka Ankour, then 2020 i kapab claim.  Akoz mon krwar ki sa kontrakter osi i bezwen pran en Lasirans ler i pe fer sa konstriksyon.  So i pour pli fasil pour 2020 al claim sa larzan.  Mersi.

 

MR SPEAKER

Mersi Minis.  Onorab Clifford Andre.

 

HON CLIFFORD ANDRE

Mersi Mr Speaker.  Bonzour tou dimoun.  Minis premye kestyon.  Eski ou pa krwar, oubyen i kler ki 2020 in tarde e i pa’n pran sa bann claim o serye?  Akoz parey ou’n dir, i annan bokou letan depi ler premye konplent ti ganny fer.  Ziska ozordi kot bann dimoun pe claim e zot pe rod remedyasyon lo sa sityasyon.

Minis dan sa sityasyon i annan 2 kategori.  I annan en kategori ki 2020 ti’n aksepte poudir wi, se sa piling ki’n koz domaz.   E alors i pour remedye sa sityasyon.

Apre i annan en kategori ki tonm dan sa ki ou’n dir.  Kot i bezwen annan bann surveyor ki pe al fer evalyasyon in dependent engineer ki pe gete.

So, akoz lo sa bann ki zot in tonm dakor ki poudir wi i an rezilta sa piling, zot pa ankor fer okenn remedyasyon menm si lakseptasyon i bokou pli avan ki sa bann ki la.

E parey ou’n dir nou.  Sa enn lakaz ki i annan sityasyon lasante in ganny afekte bokou.  I ganny drwa tonbe lo dimoun.  Alors akoz letan nou vwar en sityasyon koumsa nou pa- 2020 oubyen Minister, oubyen Gouvernman, vi ki sa i enn son lakonpannyen i pa antre pour li fer remedyasyon lo sa lakaz ki borlanmer ki ganny drwa tonbe.  E i les sa kontinyen an fezan- mon pa oule dir an fezan krwar.  Me an fezan lo sirfas ki i ankor annan enzenyer, i ankor annan sepa lezot keksoz.

E parey Leader Lopozisyon in dir.  Kontra, en Kontra ler i sinyen, i siny an 2 parti.  So okenn enforcement of the Contract i pour ganny fer par enn ant sa 2 parti.  Alors bann zabitan zot.  Menm si zot ankoler.  Mon konnen bokou zot i ankoler, ek mon tou zot ankoler.  Akoz keksoz pa pe marse e sa enforcement pa mon ki’n fer sa Kontra, selman mwan ganny blanmen.  Napa problenm, mon pare pour mwan pran sa akoz mon MNA Anse Aux Pins.  E mon pour reste MNA Anse Aux Pins.

 

MR SPEAKER

Onorab kontinyen avek ou kestyon.

 

HON CLIFFORD ANDRE

Wi ki- zot pa asiste sa bann dimoun e zot drag sa otour bann eksper ki bezwen fer bann rapor.  E mon konpran ki pa ou Minister direkteman ki responsab.  Me zot bezwen fer en keksoz pour sa bann dimoun dan limedya.  Mersi Mr Speaker.

 

MR SPEAKER

Mersi Onorab.  Minis.

 

(Interruption)

 

MR SPEAKER

Order!  Order! 

 

HON WAVEL RAMKALAWAN (Off-Mic)

Look who is talking, look who is talking Mr Speaker.

 

MR SPEAKER

Minis ou annan la parol.

 

 

MINISTER PAMELA CHARLETTE

Mersi Mr Speaker.  Mersi Onorab.  Onorab mon krwar mon’n donn en bon timeline ki mannyer keksoz in arive.

Wi mon rekonnet ki kekfwa bann zabitan pa pe vwar keksoz deswit.  Be parey mon’n dir, prosedir in la e 2020 in swivre prosedir.  E mon pe vwar – par egzanp i annan- in fer keksoz a longer du temps, ler in posib.

Pour ou dezyenm kestyon.  Lenformasyon ki mon annan.  I annan zis 1 ka kot parey ou pe dir borlanmer, kot sa madanm li, 2020 i pe al fer rekonstriksyon.  I pa zis en remedyasyon sa.  Sa i en rekonstriksyon.

Me i annan bann issues later.  Akoz later ti deza lo sa madanm ki’n now deceased.  Zot bezwen apwent en Egzekiter antre zot pour kapab 2020 antre, fer konstriksyon.  Sa larepons Mr Speaker.

 

MR SPEAKER

Mersi Minis.  Onorab Andre.

 

HON CLIFFORD ANDRE

Non Minis.  Sa ki ou pe dir sa lakaz bor lanmer.  Sa ki ou’n dir kekfwa i- I mean definitivman i korek, i annan prosedir i bezwen fer.  Mon mwan pe dir i annan menm lakaz anndan lo lot kote semen, kot 2020 avek zot bann enzenyer, zot in dakor ki poudir sa domaz, i en domaz lo serten sa bann lakaz i attributed tou sa piling!  So ti annan sa 2 kategori ki mon ti pe dir ou.

E ziska ozordi napa okenn remedyasyon ki’n arive lo sa bann propriyete ki zot in tonm dakor.  Se sa ki mon pe dir.  Pa lo sa enn bor lanmer sa enn borlanmer mon konnen- mon mazinen tou lezot dimoun i a konnen.  Be selman nou pa la pour nou devwal sa bann eleman sansib.

Me selman anndan lot kote semen, i annan ki ti’n ganny mark earmark koman responsabilite 2020 oubyen sa piling.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker lenformasyon ki nou annan, se ki tou le 2 – si ou vwar ozordi keksoz pa pe avanse, tou le 2 rapor sa bann dimoun pa’n agree avek.

So 2020 ti’n kapab come in fer son remedyasyon si ti annan en aprouvasyon kot zabitan ti dir sa rapor ok, mon agree avek.  Mon remedyasyon pour kout sepa konbyen.  E 2020 i go ahead i fer li.  Me sa lenformasyon ki nou annan, se ki 2020-sa bann zabitan pa’n agree!   Mersi.

 

MR SPEAKER

Mersi Minis.  Onorab Ferrari.

 

HON JEAN-FRANÇOIS FERRARI

Mersi Mr Speaker.  Mr Speaker mon osi mon’n vizit sa landrwa enn de fwa.  E mon ti a kontan dir avek Minis ki enn bann difikilte se ki, bann zabitan pour en rezon oubyen pour en lot.  Kekfwa pour zot lafot, oubyen pa zot lafot.  Me zot santi ki tou responsabilite i aprezan lo zot pour zot anmenn sa lager pour zot ganny en remedial action, pour zot anmenn burden of proof.  Konmsi tou keksoz i tonm lo zot.  Zot pa santi konmsi zot pe ganny akonpannyen sifizaman.

Me la Minis in eksplik nou rol 2020 ki zot in fer.  So mon mazinen poudir dan en serten sans, Minis i ava konfirmen poudir Gouvernman i totalman angaze, pour rod en solisyon pour sa bann fanmir.  Se sa ki bann i oule tande.  E sirtou mon’n koz ek zot apre ki semenn pase Prezidan in – dan Konsey Minis in dir poudir tou bann dega depi lepok Felleng zot pe al get ladan.  Alors Marianne i byen kontan, Lafanmir Denis, tou sa bann dimoun la zot byen kontan akoz zot osi lontan zot pe espere.  E nou hope ki sa bann dimoun i ganny konsidere osi koman bann rezilta en akt en pe dezas.

Mon kestyon – Minis vi ki ou’n aksepte poudir en survey preliminer avan travay in komanse pa’n ganny fer,  eski Minis ou konnen si in annan en lasirans ki’n ganny pran, oubyen non?

E eski Minis, baze lo bann prozeksyon, oubyen lo bann sif deza ki’n ariv lo latab 2020, oubyen lo ou latab, eski zot pe, zot annan en serten nide deza sa bann travay remedial ki pour ganny fer ki nou pe – ki konbyen i pour koute?

E eski Minis osi finalman ou kapab dir nou ki dyalog? Eski i annan en dyalog permanan ant kontrakter avek 2020 pour ki tou le 2 i angaze pour trouv en solisyon e pa ki zot pe lager antre zot, pe pas blanm lo enn oubyen lo lot, me ki zot annan sa travay konsiltasyon pour anmenn sa solisyon.  Mersi.

 

MR SPEAKER

Mersi Onorab Ferrari.  Minis.

 

MINISTER PAMELA CHARLETTE

Mersi Mr Speaker.  Mr Speaker mon a konfirmen atraver 2020 ki Gouvernman wi, i pe siporte sa demars pour zot kapab fer sa sityasyon pli amikalman posib.  E osi mon kapab remedye sa bann problenm.

Si kontrakter i annan lasirans?  Wi i annan.  Akoz sa i en kondisyon osi dan son Kontra.  So, i annan bann negosyasyon deza ki’n fer avek UCPS, ki zot in agree pour egzamin okenn bann claims ki bann zabitan i anmenn kot zot.  So i annan sa konsiltasyon ant UCPS avek 2020.

 

MR SPEAKER

Mersi Minis.  Onorab Ferrari.

 

HON JEAN-FRANÇOIS FERRARI

Mr Speaker mon ti’n demann Minis pour si i annan en prozeksyon Ankour ki’n deza ganny fer?  Akoz mon ti pe sey etabli si Minis i kapab dir nou si ant sa prozeksyon ki zot kapab zot in fer, e sa lasirans ki’n pran,  si sa lasirans i kapab kouver sa bann fre ki nou pe koz lo la?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mr Speaker, kou i estimen par QS, i R2milyon.  I minus or plus R2million.  E mon asire ki sa lasirans ki kontrakter in pran i kapab kouver tousala.  Mersi.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Minis ek ou delegasyon.  Mr Speaker ler mon’n ekout bann entervenan, mon reste en pe perplex konmsi, en pe sirprann ek sa sityasyon ki devan nou.

Premye pwen; Dapre Onorab Andre i dir ki pa tou domaz ki i an rezilta sa piling.  En pwen pour met devan sa.

Ler mon’n ekout Minis, i dir ki Lakonpannyen 2020, 2020 i pe dir ek sa bann dimoun, fer en claim formel.  Be pour mwan sa larepons ki Minis in donnen, i vedir tou dimoun i konnen poudir i annan claim la!

Savedir Lakonpannyen 2020 i devret – sa dan li menm i en claim formel.  Ki ankor claim formel ki ou pour donn sa bann dimoun, konmsi sa- mon pa oule servi bann mo ki pa fodre servi.  Me selman ou konpran mwan?  Sa i enn.

Prezan lekel ki vreman responsab?  Sa Lakonpannyen 2020, Minis in dir dan son larepons, i akonpannyen ek Gouvernman.  Gouvernman i annan en rol ladan li, li ki’n fer, fer sa akonpannyen.  Ki presyon e Gouvernman li i mete, atraver ou Minister lo sa 2020, Lakonpannyen 2020 pour rezourd sa problenm?  Lefe ki ou konnen i annan problenm la, ou konnen sa bann dimoun.  Anfen kont mon krwar dan sa bann lalis, bann non ki’n ganny mansyonnen i annan ki manke osi.  Mon krwar lafanmir Vidot la.  Mon konnen Vidot i lo bor lanmenm la.

        So ki presyon ki zot pe met lo sa Lakonpannyen 2020 pour rezourd sa problenm?  Prezan lekel ki – i annan 3 soz ladan.  I annan 2020 li menm, sa kontrakter ki pe fer sa piling, apre i annan son Konsiltan.  Ki zot rol dan sa zafer la?  Lekel ki pour pran sa responsabilite?  Eski par egzanp avan sa piling ti fer sa, sa survey – i annan en survey ki bezwen ganny fer parey Onorab in mansyonnen.  E ki lotrozour letan nou ti pe koz lo sa ka Anvil, isi la, Pension Fund.  Sa survey i enportan li.  Eski sa ti ganny fer?  Akoz pa’n ganny fer, si i pa’n ganny fer?  Lekel ki responsab?  E lekel pour pouse ki sa i ganny fer?  Ou trouve?  Sa se bann kestyon ki bezwen ganny reponn.  E alor mon demann Minis pour li dir avek nou Lasanble isi, ki presyon Gouvernman atraver son Minister pe mete pour annan en solisyon reel pour sa bann dimoun?

E e fer nou konnen lekel vreman ki responsab sa domaz.  Par egzanp nou’n nonm zafer lasirans.  Eski-kestyon i bon.  Eski vreman i kouver vreman tou sa domaz?

Sa bann keksoz pa devret- depi 2015 mon krwar in dir la, dapre larepons.  Be ziska la – be konmsi i annan plizyer lannen. Pa 2015, 17- 2017.  Me 2an – be konmsi annou met lavi, rezourd sa bann problenm.  Pa kapab les keksoz tarde koumsa.

So donn nou en garanti poudir problenm sa bann dimoun Anse Aux Pins ki konsernen la, i pour ganny en larepons-i pour ganny en solisyon, e en solisyon vitman!  Mersi bokou.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker mon krwar i kler ki kontrakter ler i fer louvraz, i bezwen pran tou son prekosyon.

E parey in dir i bezwen al dan son Kontra ki in mete e enplik sa bann mezir ki’n mete dan son Kontra.  Ankor 2020 i annan en rol pour li zwe.  Akoz li osi i bezwen monitor ki sa kontrakter i fer.  E osi Konsiltan osi ki’n ganny apwente, i osi bezwen monitor ki sa kontrakter pe fer.

So tou le 3 mon krwar i annan en bout pour zwe ladan.  E nou through Minister Finans ki pran sarz 2020, i a fer en deklarasyon si i kapab pour li, oubyen i a zwenn avek 2020 pour met en pe presyon lo 2020.  Mon pa konnen si mon’n reponn tou ou kestyon.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Mr Speaker i byen.  Mon’n ekout Minis, sa larepons.  Eski i kapab donn nou en garanti?  Konmsi en keksoz swa nou Lasanble, oubyen menm piblik atraver medya,  konmsi si Finans, ki dir dimoun, fer dimoun konnen, fer Lotorite konnen, fer lepep konnen ki mannyer sa bann problenm pour rezourd, e dan ki dele?

Eski par egzanp i annan okenn Avoka ki enplike dan sa zafer?  Ouswa zis sa Konsiltan Legal 2020?  Eski i annan lezot dimoun ki en- par egzanp sa bann kontrakter, zot osi zot annan zot Avoka non?  Lekel zot?  Eski zot pe zwe en rol pour donn en koudmen pour rezourd sa problenm?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker bann zabitan zot osi zot in apwent, zot in apwent en Avoka, Mr Bernard Georges dapre sa ki mon konpran, dapre sa ki zot in dir nou.  E UCPS osi i annan en Avoka ki Mr Derjacques.  Mersi.

 

MR SPEAKER

Mersi Minis.

 

HON CHARLES DE COMMARMOND

2020 lekel son Avoka li?

 

MR SPEAKER

Yes Minis.

 

MINISTER PAMELA CHARLETTE

Chetty & Hoareau Chambers.

 

MR SPEAKER

Bon nou’n ganny bann lenformasyon ki zot in demande.  Bon mon ava donn laparol Onorab Waven William.

 

HON WAVEN WILLIAM

Mersi Mr Speaker.  Minis lefe ki ou’n nonm 2 rapor bann enzenyer endepandan.  Mon anvi demann ou Minis.  Lefe ki ou dir sa bann dimoun zot pa’n dakor avek sa 2 rapor ki’n ganny fer.  Eski ou kapab endik avek nou, kwa egzakteman ki sa bann dimoun zot annan dezakor lo la?  Pour nou-konmsi pour sa Lasanble konpran pour manm piblik osi ki pe ekoute konpran, kwa egzakteman ki sa bann dimoun ganny afekte zot dezakor i ete?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Prensipalman bann zabitan pa’n agree avek sa kou ki asosye avek bann reparasyon ki QS in determinen.  Se sa.

 

MR SPEAKER

Mersi Minis.  Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun.  Mr Speaker mon kestyon i découle dan deklarasyon ki Minis in fer.  Menm si sa kontrakter UCPS in pran lasirans.  Me ou’n dir ki i annan bann lezot due diligence ki zot ti’n dwatet fer, ki pa’n fer.

Par egzanp survey otour sa area pour nou ganny before and after ki Leader Lopozisyon in koz lo la.

Now mon kestyon mwan ki mon anvi demande, lefe ki Minis i ansarz lenfrastriktir, la nou’n vwar 2 lensidan resaman.  I annan building CBS, apre la nou pe tann Anse Aux Pins.  Kot bann gro lenfrastriktir pe ganny fer, e ki i annan sa bann size due diligence, lasirans ki pa- ki bann gro Lakonpannyen ki pa pe fer li byen, apre taxpayers Mont Buxton ki napa nanryen pour fer avek sa bann domaz ki pour bezwen foot the bill swa atraver larzan Bidze.

Akoz 2020 pour Gouvernman.  E Fon Pansyon i pour Gouvernman.  So nou annan plizyer proze mazer ki pe al ganny fer byento.  Par egzanp tinel ki lo progranm.  Tinel. Lasose.  Mon anvi demann Minis, etann ki Minis Lenfrastriktir, ki Gouvernman pour asire fer ki dezormen tou sa bann Lakonpannyen ki pe antreprann sa bann gran proze, i fer due diligence pour ki apre sa pti dimoun, sa dimoun –  Sorry mon servi sa lekspresyon, sa dimoun ki reste dan bann distrik pa pe foot the bill. Akoz zot napa nanryen pour fer avek sa bann zafer.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker the only way ki nou, nou pour kapab antre ladan anba sa lenfrastriktir, se through Planning.  Sa i en posibilite.

E mon krwar taler parey Onorab ti dir.  Taler nou pour pas en kou dan Planning Bill.  Me par egzanp sa ka – ler nou get sa ka Central Bank.  Sa ti ganny leve dan letan konstriksyon.  So Planning in ganny involve ladan dan letan konstriksyon.

Me selman pour lo kote Planning ler pe fer bridge.  Planning i ale i get proze.  I monitor sa proze li menm.  Sa bridge ki pe ganny fer.

Me selman lo – si ti kekfwa annan en claim avek Planning through Planning Authority.  Kekfwa i ti pour antre, i ti pour ale i ti pour donn Enforcement Notice or en keksoz.  Me i pa pour kapab donn Enforcement Notice lo sa bridge li menm.

Akoz napa nanryen pe afekte sa bridge ki pe ganny fer, ki i annan en defect whatnot.  I ti pour get kekfwa bann, parey ou dir, si pour annan konplent zabitan, i ti ava al kot zabitan i ti ava go through sa process akoz zabitan in met en claim.

Me selman akoz ti napa sa bann claim pandan konstriksyon.  Mon krwar nou osi nou’n- through Planning i annan- ti annan en approval pour sa proze.  E dan sa proze ti- dan son approval ti napa bann kondisyon.  Akoz sa kondisyon i mete par 2020 ‘ sa kliyan avek son kontrakter’.

So basically 2020 avek Konsiltan osi ti devret annan en lizye lo sa ki kontrakter osi ti pe fer.  Koumsa tou sa bann rapor i vin Formel, i ti kapab vin kot nou.  Mersi.

 

MR SPEAKER

Mersi Minis.  Onorab Johan Loze.

 

HON JOHAN LOZE

Mersi Mr Speaker.  Mr Speaker- Minis mon pour re vizit sa ki Onorab Henrie in leve.  Akoz mon santi petet i pa’n vreman ganny byen adrese.  Minis lo sa size CBS, issue ti ki kontrakter ti’n ganny demande pour pran en lasirans e sonm pour ki lekel ki li i ti’n asire, pa ti alaoter, pa ti sa ki i ti’n ganny demande.

La ozordi kontrakter i annan lasirans, i pa’n fer site dilapidation survey, e okenn enzenyer ki antre, napa domaz ansyen pour konpare avek domaz nouvo.

Issue i paret i contractualSo ki mannyer nou proceed dan sa bann sityasyon koumsa?  Si parey ou’n dir i Planning Authority li menm i pa kapab, i pa en issue Planning, i en issue contractuel ant sa bann Parties.  Ki mannyer eski nou strengthen Lalwa?  Nou strengthen bann Regilasyon ki sa bann Kontra i vin enforceable between sa bann parties? 

Akoz piling li menm, i en nouvo teknolozi.  I ase nouvo teknolozi Sesel, e i annan ankor issues.  I annan landrwa la kot tiles pa’n ganny mete parey i ti devret, tiles pa ase.  Kontrakter ek enzenyer pe desir kanmarad.  So ki mannyer sa bann issues ki contractuel plito ki issues Planning Authority, how do we move forward parey Onorab Ramkalawan in dir?  Mersi Minister.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Lo kote Planning kekfwa i pour vin through parey mon’n dir monitoring.  Nou a bezwen met plis lanfaz lo monitoring bann proze.  E osi lo monitoring bann Konsiltan osi ki pe antreprann sa bann proze.

Apre i annan osi en Lalwa Construction Bill ki sipoze nou pe travay lo la.  E sa i pour regle en pe bann defayans avek bann kontrakter.  Mon krwar sa i en keksoz pour nou kekfwa met en pti pe – ler nou fer lamannman, oubyen ler nou fer sa Lalwa, nou vin avek bann nouvo keksoz pour nou kapab met lanmen lo bann lenpak sirtou kot konstriksyon i konsernen.  E ki bann mezir ki nou mete lo bann kontrakter pour zot kapab zot osi fer sir ki zot pran tou bann mezir an plas.  Mersi.

 

MR SPEAKER

Mersi Minis.  Onorab Loze.

 

HON JOHAN LOZE

Minister zis en follow-up.  Lekel li sa Konsiltan?  I annan 3 Parties involved, nou’n tann nonm 2020, nou tann nonm UCPS, kontrakter.  Be ziska prezan nou pa ankor tann nonm Konsiltan.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mon’n nonm GIBB koman Konsiltan.  Mon’n fer resorti.  Mersi.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker.  Bonzour Minis, delegasyon.  Mr Speaker mon mwan kestyon i tre senp pour Minis.

2020 se li ki pe antreprann tou sa bann devlopman laba lo sa zil.  E tou sa bann dimoun, depi kontrakter, depi konsiltan, zot tou zot pe deal avek 2020.  Ki sa i annan pour fer avek sa bann dimoun ki dan sa sityasyon ozordi kot zot lakaz in crack?

Mon mwan vwar li.  Se 2020 son internal issues ki i annan kontrakter avek lezot, sa i en lot.  Me selman issue sa bann dimoun, 2020 i devret al antreprann sa sityasyon, adrese.

Akoz si in ariv sa, se akoz sa devlopman lo 2020 – lo zil ki 2020 pe responsab.  Alors mon pa vwar akoz ki nou pri dan sa bann internal issues, kan nou ti kapab les 2020 adres sa avek son bann dimoun ki in angaz li avek pour fer sa travay.

E sa bann dimoun zot, 2020 li i al adres issue sa bann dimoun ki zot lakaz in andomaze.  Mersi.

 

MR SPEAKER

Mersi Onorab Churchill Gill.  Minister.

 

MINISTER PAMELA CHARLETTE

Mersi Mr Speaker.  Parey mon’n dir, mon ava pas sa avek Minister Finans, ki i ava kekfwa ava annan en langazman avek 2020 avek UCPS.  Oubyen 2020 direkteman pour fer li kapab fer sa proze demare, e ed sa bann dimoun ki pe espere.  Mersi.

 

MR SPEAKER

Mersi Minis.  Onorab John Hoareau.

 

HON JOHN HOAREAU

Mersi Mr Speaker.  Mr Speaker mon ti ava zis anvi Minis reponn mwan en kestyon lo Environmental and Social Impact Assessment.  Se sa keksoz – en keksoz koumsa in ganny fer lo size lo sa kalite travay piling ki ti pe ganny fer laba.  Ki ti – oubyen ki ti pe al ganny fer laba.

E pour eksplik bann dimoun Anse Aux Pins ki sa lefe ki sa sizmik ki i pour annan lo zot lakaz, oubyen zot propriyete?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Dapre mon konpran wi.  EIA i normal ler ou pe fer en proze- en tel proze.  Me selman nou pa konnen si in konsider son social impact assessment ladan tou.  Sa fodre nou al tyeke.

 

MR SPEAKER

Mersi Minis.  Onorab Hoareau.

 

HON JOHN HOAREAU

Wi Minis.  Eski ou kapab konfirmen si zot in eksplik bann dimoun byen ki lefe piling pour annan lo zot propriyete?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker ti annan bann meeting konsiltativ ki ti fer dan distrik pour nou konnen kwa ki’n mete dan sa.  Fodre kekfwa nou a vwar Minutes bann meetings ki ti fer.  Me selman ti annan bann meeting konsiltasyon dan distrik ki ti ganny fer.

 

MR SPEAKER

Mersi Minis.  Onorab Hoareau.

 

HON JOHN HOAREAU

Eski Minis i kapab dir nou lekel sa dimoun ki ti pe fer sa impact assessment please?

 

MR SPEAKER

Mersi.  Minis.

 

MINISTER PAMELA CHARLETTE

Mersi Mr Speaker.  Mr Speaker nou napa sa lenformasyon.  Me selman Managing Director i dir i ava gete, i ava anvoye si.  Mersi.

 

MR SPEAKER

Mersi.  Mersi Minis.  Onorab Simon Gill.

 

HON SIMON GILL

Mersi Mr Speaker.  Bonzour tou Koleg Onorab e manm piblik.  Minis i fer detrwa ka ki nou- ki vin kot nou Lasanble an sa ki konsern sa teknolozi piling.  E son lenpak or lefe ki pe annan dan legzistans bann lakaz ki tonm dan periferi, sa devlopman or serten bann devlopman ki in fer.

Now, kestyon ki poze,  eski ou Minister avek ou lekip enzenyer, bann teknisyen ki i annan, zot kapab etidye bann alternatif, teknolozi konstriksyon?  Ki pour annan mwens lenpak lo bann building dan lanvironnman oubyen dan periferi okenn proze fitir ki nou kapab pe antreprann dan Sesel.

Mon prezimen sa i tonm anba responsabilite ou Minister pour le moman.  E eski ou ti ava konsidere pour met en lekip spesyal pour fer sa resers e vin avek en solisyon posib pour Sesel donnen nou topografi ki mannyer nou ete?  Mersi bokou.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker wi.  I posib pour nou fer en pe resers pour nou vwar.  Me parey ou’n dir, i pour depan lo topografi sa landrwa.  Akoz i annan diferan kalite piling ki ou kapab fer.  So diferan kalite piling i pour asosye dan diferan tipografi oubyen diferan landrwa.  Me selman wi, nou kapab fer sa resers pour gete ki bann alternativ ki i annan si i annan, si i posib.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi Mr Speaker.  Mr Speaker o komansman mon ti dir ek Minis mwan vin rod solisyon.  E alor mon dernyen kestyon i anliny avek solisyon.

Nou le 30 Zilyet ozordi.  Eski Minis i kapab travay avek 2020 pour nou ganny en timeline?  Parski i annan plizyer keksoz ki’n ganny etablir Mr Speaker.

Lefe ki in annan en lof ki’n ganny fer a en serten pwen.  I montre ki poudir i annan liability ki’n ganny rekonnet.  Bann zabitan pa’n aksepte, parski pa ti pour sifizan pour zot repar zot lakaz.

Donk lefe ki liability in ganny rekonnet.  Lefe ki in annan tou sa bann diferan demars.  Eski nou ti ava kapab ant la komansman Out ziska Desanm vwar en solisyon?  Annou vwar sa solisyon pour ki sa bann dimoun zot ava happy.  Sa problenm i ava ganny met deryer nou.  E tou dimoun i ava happy.  Se sa ki mon pe rode Minis.  Si ou ava pran li koman en commitment pour ou angaz 2020 pour nou kapab – ki letan Desanm i arive, nou’n fini rezourd sa sityasyon e keksoz pe bouze.  Mersi bokou.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker mon pour koz avek mon Koleg Minister Finans.  Ansanm nou ava ganny en laranzman avek 2020 ki mannyer nou pour move ahead avek sa bann remedyasyon ki’n ganny propoze.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Wi Mr Speaker.   Bann dimoun pour demann Onorab Andre ki pe arive?  Ki lot keksoz zot pour fer?  Eski ou kapab ed nou poudir ki larepons ki Onorab Andre pour donn zot?  Mersi bokou.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker dapre mon konpran, bann zabitan in egzize ki 2020 i negosye avek zot direkteman.  So mon krwar 2020 then i a pran sa – i ava negosye avek zot si i annan okenn konsiltasyon pour fer.  I ava al kot zot, zot menm.

 

MR SPEAKER

Mersi.  Yes Onorab Ramkalawan.

 

HON WAVEL RAMKALAWAN

Minis pe dir avek nou, boul i dan kort 2020 avek bann zabitan?

 

MR SPEAKER

Yes. 

 

HON WAVEL RAMKALAWAN

E zot a ekspekte ki pandan mwan Out, 2020 pour call en meeting avek zot pour donn zot the way forward.  Ok.

 

MR SPEAKER

Ok mersi.

 

HON WAVEL RAMKALAWAN

Mersi bokou.  Mon osi mwan ava vini.  Envit mon, mwan osi mon ava vini.

 

 

MR SPEAKER

Ok.  Mersi Onorab.

 

HON WAVEL RAMKALAWAN

Nou 2 Onorab Ferrari, ensi Onorab Andre.  Mersi bokou.

 

MR SPEAKER

Minis.

 

(Interruption)

 

HON WAVEL RAMKALAWAN

Ou, ou pa ladan ou.  Reste trankil.  Ou, ou lo periferi…

 

MR SPEAKER

Order.  Order.  Order.  Minis dernyen parol.

 

MINISTER PAMELA CHARLETTE

Mersi Mr Speaker.  Non Speaker, zis en pti komanter.  Mon krwar 2020 in angaze dan sa prosedir, dan sa proses, prosesis.  Alors se, i pour kontinyen.  Mon mwan a donn li sipor avek ansanm Minister Finans.  Mersi.

 

MR SPEAKER

Mersi Minis Charlette.  Bon mon ti a kontan remersye ou avek ou lekip.  Me mon konnen ou pour retournen apre midi, pour nou pran Physical Planning Bill.

Minis, mersi pour avek nou pour reponn PNQ.  Nou ava eskiz ou avek ou lekip pour nou kapab kontinyen avek nou travay.  E nou ava revwar ou 2er apre midi.

 

(MINISTER PAMELA CHARLETTE AND HER DELEGATION WAS EXCUSED FROM THE HOUSE)

 

 

MR SPEAKER

Bon zis avan nou pran rapor ki pour ganny table par Chair Standing Order Committee, Onorab Bernard Georges.  Nou annan 2 First Reading pour nou fer.  Mon ava donn Madanm Clerk laparol.

 

MADAM CLERK

Mersi bokou Mr Speaker.  Premye First Reading dapre nou Order Paper.

This Act may be cited as the Alcoholic Drinks Control Act of 2019.  And shall come into operation on such date as the Minister may by notice in the Gazette appoint.  And different dates may be appointed for different provisions of the Act. 

 

MR SPEAKER

Mersi Madanm Clerk.  Anba Standing Order 63 (2) as a Bill has been read for the first time, I order it to be read a second time at a date that will be set and so recorded in the record of proceedings.  Ok.  Go ahead Madam Clerk, 2enm

 

MADAM CLERK

Sorry Mr Speaker.  The Second one.  This Act may be cited as the Seychelles Fire and Rescue Services Agency (Amendment) Act of 2019.  Mersi Mr Speaker.

 

MR SPEAKER

Bon menm prosedir pour sa 2enm First Reading, ki en dat i ava ganny set e rikord dan record of proceedings pour nou pran pour Second Reading.

Petet mon a profit sa lokazyon la pour mon anonse ki 1215 Bills Committee pe meet.  E ankor bann lezot Manm osi tou ki enterese pour vini pour pas lo sa 2 Bill pour konsider sa 2 Bill.  The Alcoholic Drinks Control Bill 2019, Bill No. 8 of 2019 avek Seychelles Fire and Rescue Services Agency (Amendment) Bill 2019. 

        Bon avek sa mon ava donn la parol Onorab Bernard Georges pour li prezant son rapor Standing Orders.  Onorab Georges.

 

HON BERNARD GEORGES

Mersi Mr Speaker.  Bonzour tou bann Manm e bonzour tou bann dimoun ki pe ekout nou.  Mr Speaker mon annan gran plezir ozordi pour prezant rapor Standing Orders Committee avek sa Lasanble.

Mon pa pour swiv Protokol.  Me avek ou permisyon, mon ava prezant ou deza avek en kopi sa rapor.  En kopi pour Clerk, 1 kopi pour sakenn ant nou 2 Leaders isi dan Lasanble.  Akoz mon krwar i ava pli fasil pour zot swiv sa ki mon pe al dir ler zot ava annan sa dokiman devan zot.  Wi pran enn pour ou.

Mr Speaker sa i rapor inanim nou Komite.  Koman ou ava vwar i konpri sinyatir tou Manm Komite.  E sa pour benefis bann dimoun ki pe ekout nou.  Se Onorab Clifford Andre, Onorab Regina Esparon, Onorab Simon Gill, Onorab Sebastien Pillay, Onorab Waven William, Onorab Wavel Woodcock e mwan menm.

Komite Standing Orders Lasanble Mr Speaker, i enn parmi 2 Komite ki ganny preskrir par Konstitisyon Sesel.

Depi ki sa Komite in ganny nonmen par sa 6enm Lasanble, Komite in aktiv.  Nou’n konsey ou menm Mr Speaker lo plizyer lokazyon.  E nou’n konsider plizyer keksoz ki ganny relye avek plizyer Orders.

Par egzanp ki mannyer pour fer Readings en Bill, pour definir precincts Lasanble, Drwa Repons ki manm piblik i annan lo statement ki ganny fer dan Lasanble, eksetera.  Sepandan sa se premye rapor sibstansyel ki Komite i fer dan sa Lasanble.

Komite i met lo rikord son lapresyasyon avek staff Komite, ek staff Lasanble pour zot dedikasyon a travay Komite souvan lo wikenn.

Pandan sa dernyen lannen.  Onorab Basil Hoareau in ganny ranplase lo Komite par Onorab Simon Gill.  Komite i akey Onorab Gill e i rikord son lapresyasyon pour travay Onorab Hoareau.

Permet mon Mr Speaker pour rikord mon prop lapresyasyon a tou bann Manm Komite pour zot sipor e zot lasistans.

Tou meeting Komite ti ganny asiste par ou menm Mr Speaker, ouswa Deputy Speaker, nou 2 Leaders, Clerk e Depite Clerk ensi ki parfwa par Manm zot menm.  Komite i remersye zot tou pour zot input ki’n tre itil a nou travay.

Nou rapor Mr Speaker i annan 4 Seksyon.  E 4enm Seksyon i annan li 6 annex.  Premye Seksyon i text rapor li menm.  Apre a lentrodiksyon ki retras desizyon Komite pour profit lo selebrasyon Zibile Larzan Lasanble lannen pase, 10an depi dernyen revizyon Standing Orders.  Sa Kiltir fraternite ek konsansis ant sa 2 parti dan Lasanble.  E ant Lasanble ek Egzekitiv, en si ki en reprezantasyon pli ekilibre lo Komite,  rapor i fer resorti ki sa ti en moman opportun pour reviz Standing Orders an antye.  E sa se desizyon ki Komite ti pran.

Metod travay Komite:  Metod travay, se ki Komite ti pour rankontre plizoumwen regilyerman pour bann long sesyon pandan 1 zournen an antye, souvandfwa Sanmdi.

Komite ti egzamin sak Order, depi premye ziska dernyen dan en fason kronolozik.  Pandan sa legzersis tou bann size ki Komite ti’n note pandan deba isi dan Lasanble, ti ganny konsidere e fer antre kot neseser.

Ler nou ti fini sa legzersis,  nou ti konsider Standing Orders Maurice ek Zambia.  2 pei Commonwealth avek diferan sistenm Gouvernman.  Enn Parlmanter, lot Prezidansyel, e nou’n konpar nou Standing Orders avek sa ki pour zot.  Kot zot ti fer pli byen ki nou, nou’n propoz zot fason fer.

E pandan sa legzersis, nou’n osi konsilte bann louvraz akademik e Parlmanter pour mezir nou avek sa ki arive deor.  Akoz sa relasyon etrwat ki egziste ant Standing Orders ek Lareg Komite Lasanble, Rules of Committees,  Komite in deside pour reviz sa bann Lareg osi dan en nouvo Standing Order Standing Order 87 –  nou pe propoz en lyen ant sa 2 louvraz.

Striktir rapor:

Komite ti deside ki i ti pour pli fasil pour Manm konpran sanzman dan Standing Orders, si nou prezant sa bann sanzman dan laform en latab avek sanzman propoze en kote.  E rezon pour sa sanzman akote.

Additionnelment, nou’n osi fer sa bann sanzman dan en versyon elektronik Standing Orders ek Lareg Komite.  Sa 2 dokiman i annexer a nou rapor, e nou pour fer tou Manm ganny sa 2 dokiman dan laform elektronik.  Pour ki ler nou pour konsider sa bann sanzman koman en Lasanble an antye, Manm pour kapab swiv sa lo screen e lo nou tablet. 

Dan serten landrwa, nou pa ti krwar i ti pour apropriye pour Komite fer amannman avek Standing Orders ek Lareg Komite.  Nou’n prefere fer sizesyon dan en Seksyon separe pour Manm Lasanble konsidere.  Si okenn i ganny aksepte, nou ava fer sa bann lamannman an konsekans.

Dan lezot landrwa, Komite in propoz lamannman direkteman dan text sa 2 dokiman, san pran en desizyon.  Akoz nou ti krwar pour rezon Polisi, ki se Lasanble an antye ki ti pour pli plase pour fer sa bann lamannman.

Dan sa 2 dokiman, nou’n highlight sa an zonn.  Kot nou’n highlight an ver, Manm a konstate ki sa se bann nouvo lentrodiksyon ki nou’n pran dan bann Standing Orders lezot pei e Parlman.  E ki nou krwar Manm i devret konsidere pour entrodwir dan sa ki pour nou.

Konsiltasyon ekstern.  Komite in santi li bon pour konsilte Chair Komite Standing Orders, ler nou Standing Orders ti ganny revize dernyen fwa.  Sa ti an 2009.  E Chair Komite sa letan ti Onorab Wilby Lucas ki ti osi Depite Speaker.

Onorab Lucas ti fer plizyer propozisyon ki nou’n enkorpor dan nou seri lamannman.  Nou remersye li pour son langazman.

Omisyon;  Travay Komite ti en gro travay ki ti pran bokou letan lo plizyer mwan.  Komite in sey kouver tou bann size o pli mye nou posibilite.  Nou rekonnet sepandan ki pour annan size ki nou’n manke, e lerer ki nou’n fer.  Nou apologize an avans pour sa bann lerer e omisyon.  E nou swete ki ler Lasanble an antye pour debat sa rapor an detay, nou pour annan loportinite pour konble sa bann trou avek bi ganny en Standing Orders osi konplet, e osi modern ki nou kapab.  Sa ti premye seksyon nou rapor.

2enm seksyon rapor, i en seri 16 kestyon e refleksyon pour ed bann Manm dan travay deba lo Standing Orders, ler sa i vin devan nou Lasanble.

3enm seksyon:  i konpri tou bann amannman a sak Standing Order avek en leksplikasyon pour sak sa bann lamannman.

4enm seksyon rapor:  I konpri en seri Schedule ek Annex ki mon pour dekrir dan en pti moman.  I osi konpri track version dan laform elektronik Standing Orders Lareg Komite Lasanble e National Assembly Privileges Act. 

Piblikasyon e travay fitir.  Enn fwa ki sa Lasanble i aprouv Standing Orders modifye apre deba.  Komite pour propoze ki sa liv nouvo Standing Orders parey sa enn ki nou annan, i pour osi konpri premyerman, en quick reference guide o komansman Standing Orders dan en fason ki Manm i a kapab trouv sa Standing Orders ki zot pe rode vitman e san gran problenm.

En propozisyon sa quick access guide i ganny trouve dan sa 2 dernyen paz nou rapor.

Dezyenmman;

Annex deryer Standing Orders ki pour reprodwi sa bann keksoz swivan;  Tou provizyon Konstitisyonnel e Legal ki Manm i bezwen konsilte detanzantan.

Lareg Komite Lasanble.  Template bann Mosyon Legal ki Lasanble i bezwen swiv, parey pour ratifye Konvansyon, ouswa pour aprouv lapwent Minis ek Lanbasader.  Sa bann dokiman i ganny trouve dan bann Annex sa rapor ki devan ou Mr Speaker.

E finalman.  Dan sa pti liv nou ti ava swete ki osi annan National Assembly Immunity Privileges and Powers Act.  Komite i espere ki ler tou sa bann dokiman a ganny pibliye ansanm dan sel pti liv.  Tou Manm a ganny en zouti travay ki konpreansiv e fasil pour swiv pour ed zot.  Olye al rod dan plizyer liv.

Komite i swete ki enn fwa ki sa bann Standing Orders i ganny aprouve par Lasanble, e i ganny pibliye, Komite i a kapab retourn dan son fonksyon prensipal.  Setadir ekout problenm ki i arive dan Lasanble lo Standing Orders e propoz solisyon rapid e konpreansiv san esper en lot revizyon Standing Orders an antye.

Additionnelment Komite in donn son lekor en lot latas.  E sa se pour prepar en lot liv pour akonpanny Standing Orders.  Sa se en Manual of Parliamentary Practice and Procedure for the National Assembly.  I annan 3 lide deryer sa louvraz.

Premye; Pandan travay revizyon Standing Orders, en kantite diskisyon in ganny fer, e bokou largiman in ganny avanse lo filozofi deryer serten Standing Orders.

Sa bann lide filozofi napa plas dan Standing Orders zot menm.  Me si nou pa rikord zot, sa se pour en gran pert pour nou Lasanble.

Dezyenmman;  I annan en mas lenformasyon lo Lezislatir an zeneral e bon fonksyonnman en Lasanble dan lezot louvraz.  Dan desizyon Lakour Sesel, dan Ruling nou bann Speaker, e dan presedan ki Lasanble li menm in set. Tousala se en larises pour nou lenstitisyon e zot devret ganny rikorde.

Trwazyenmman;  Bon deroulman e devlopman nou Lasanble, i pour benefisye avek en louvraz ki elarzi scope Standing Orders e ki apporte gidans pour bann ki diriz travay Lasanble ensi ki Manm zot menm.  Travay lo sa liv in byen – i pe byen progrese e nou espere Mr Speaker ki en premye draft sa manual pour kapab ganny sirkile ver lafen lannen.

Mr Speaker sa se rapor Standing Order Committee a Lasanble.  E mon remersye ou pour ou latansyon.

 

(APPLAUSE)

 

MR SPEAKER

Mersi.  Mersi Onorab Georges.  Mon krwar mwan osi ki in form par sa travay.  Mon krwar i en zoli rapor, en bon rapor.  E i ava ed nou Lasanble ler nou pour anmenn sa deba isi dan nou House.  Yes Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker pour mon ozordi i en zour istorik si oule.  Akoz mon’n form parti sa Komite, e nou’n travay ansanm pandan en bon pe letan.  E i annan bann Manm lo sa Komite, nou ankor ase zenn.  E nou’n aprann en kantite pandan sa sesyon travay ki nou’n fer.  E nou remersye Onorab Georges osi pour son leksperyans e son bann leksplikasyon ki in donn nou, ki’n permet nou konpran en kantite ki mannyer nou Lasanble, nou Standing Orders i fonksyonnen.

Avek sa Mr Speaker mon ti a kontan dir ou, pour move ki anba Order 29 ki nou, nou kapab – mon pe demann ou Notice ki nou pour bezwen move en Mosyon pour nou kapab debat sa rapor Komite Standing Orders.  Me selman pour nou fer sa, nou pour bezwen fer li anba Order 92, e nou ava fer li parey Standing Orders i demande.  Akoz i annan serten legzizans – akoz sa rapor ki nou pe al debat, nou pa pe al zis debat sa rapor.  Me nou pe al efektivman debat en sanzman nou Standing Orders.

E mon krwar Mr Speaker sa laklamasyon ki Chair Komite in gannyen i pa an akord avek zefor ki tou bann Manm, ou menm nou koman en Lasanble nou’n mete pour nou anmenn en revizyon nou Standing Orders.  Akoz i pa en latas fasil.  E nou’n fer li homegrown, san ki nou bezwen al rod okenn konsiltan.  San ki nou bezwen al rod sipor a leksteryer.  E sa i montre kapasite ki nou annan isi Sesel parmi nou bann dimoun.  Mersi Mr Speaker.

 

MR SPEAKER

Mersi Onorab Pillay.  Savedir ou santi poudir nou devret ganny en pli bon aklamasyon avek Lasanble?  Ok, so mon permet ki Lasanble i re aklanm sa rapor.  Sa travay.

 

(APPLAUSE)

 

MR SPEAKER

Petet ler ou ti pe nonm serten bout ki ou devret anmenn ladan par egzanp Immunities and Privileges.  Mon’n fer en pti sourir, mon’n extend en pti parol ek Madanm Clerk.  Mon dir petet IGPA osi  i devret antre anba ladan, pour montre nou ki mannyer i quash en S.I!  So mon pa konnen si petet sa bout anba IGPA ki i annan pour fer avek nou travay koman Manm Lasanble, how to quash an S.I.  Si sa osi petet i devret rantre ladan.  Yes Onorab Ramkalawan.

 

HON WAVEL RAMKALAWAN

Non, Mr Speaker permet mon lo la par nou kote lo LDS pour mon felisit Komite an antye, e byensir spesyalman Onorab Georges koman son Chairperson.  Napa okenn dout ki Onorab Georges in fer en travay ekstraordiner.

Mon ti ganny sa privilez pour mwan travay avek Onorab Georges letan nou ti pe ekrir sennla Standing Orders.  E mon konnen egzakteman ki mannyer sa travay in deroule.  Alor mon felisit Komite pour donn nou en nouvo Standing Orders ki apre ki nou ava’n debat, nou ava’n petet azout serten keksoz ladan, i ava vin sa lot laspe nou travay.

So petet Mr Speaker, mon santi ki premyerman sa pwen ki ou’n fer resorti.  Mon krwar ki san ki mon rantre dan deba, egzakteman parey ki dan sa propozisyon ki mon kontan mon enn parmi bann premye pour ganny en kopi.  Kot i mete- par egzanp zot in donn- zot in donn formil pour apwentman en Anbasader.  Zot in osi met formil pour…

 

MR SPEAKER

Ratifikasyon, ratifikasyon.

 

HON WAVEL RAMKALAWAN

En ratifikasyon.  Petet osi tou i kapab sa zafer quash en S.I i kapab annan son formil lo ki mannyer pour quash en S.I ladan ki- konmsi i ava vin kler pour bann Manm a lavenir.  Parski menm pour nou, bann Manm ki pli vye, letan ti pour anmenn – mon rapel letan sete mwan dan listwar Lasanble Nasyonal ki parey ou’n remind nou i annan 26an,  sete mwan ki ti anmenn premye Mosyon pour quash en S.I depi letan Lasanble ti ankor- ti ankor lot kote kot nou ti ganny bate le 3 Oktob.

Be nou ti pe rode kote pour ale.  E apre finalman, nou’n vwar kote pour ale, e apre sa bann lannen nou’n bliye.  E apre sa la nou’n retrouv li.  Be si nou pa met li somewhere, i for posib ki bann Manm- letan nou, nou pou’n ale, kekfwa bann Manm pour al rode, be ki mannyer pour fer sa.  E alor i bon ki nou met li dan en rikord.

E Mr Speaker zis pour terminen, letan mon pe aplodi sa travay ki Lasanble.  Petet lo sa kote ledikasyon, i enportan pour dimoun realize ki poudir sa travay la, i en gro travay.

E ki sa travay pa’n ganny fer dan Mardi avek dan Merkredi sa.  Sa travay in ganny fer apre ler travay.  In ganny fer dan wikenn kot parfwa Komite in pas en lazournen antye dan Sanmdi.

E mon krwar ki i enportan pour dimoun osi konpran, ki Lasanble i pa zis-pandan Recess tou zot in vin- pandan Recess tou zot in vin travay.  E konmsi pour dimoun konpran ki Lasanble Nasyonal i pa zis anmenn Mosyon pour fer desann pri lavi, ki enportan.

Me selman ki parfwa ou a krwar si nou pa anmenn en Mosyon pour fer desann pri lavi, dimoun deor i oule bat nou.  Be konmsi pour dir ki Lasanble i annan bokou lezot travay ankor pour fer e ki anmezir ki nou pran bann konsern, bann day-to-day concerns of nou popilasyon, i osi annan sa bann travay pour nou fer.  Pour nou lir bann Trete Enternasyonal letan nou pou’n ratifye.

Letan parey pe dir la pour fer sa letan pour fer bann lenvestigasyon atraver FPAC.  Letan pour fer tousala.  Alor i enportan pour nou elarzi lespri nou bann dimoun osi ki Lasanble i osi fer bokou, bokou lezot travay.

E pour zot dan en serten sans Mr Speaker, pa zis bat nou koman politisyen.  Parski nou osi fer bokou lezot travay.

Alor avek sa de parol Mr Speaker mon welcome sa rapor e mwan ankor enn fwa felisit tou bann Manm, ki’n donn tou zot letan pour nou kapab ankor enn fwa fer en lot pa de lavan.  Felisitasyon!

 

(APPLAUSE)

 

MR SPEAKER

Mersi Onorab Ramkalawan.  Mon a donn de parol Onorab De Commarmond.

 

HON CHARLES DE COMMARMOND

Mersi Mr Speaker.  Mon pour ekstrememan bref.  Mr Speaker i istorik ozordi.  Nou pe aprouv oubyen koz lo rapor Standing Order Committee.  E nou pe revwar nou Standing Order.  Savedir, Regleman nou Lasanble a sa lokazyon kot ou menm ou dir bomaten.  E i vre nou 26enm Lanniverser depi 3enm Repiblik, nou nouvo Lasanble.  E sa istorik dan li menm.

E mon fyer ki mwan mon enn sa Manm ki ankor la ziska la.  E i enportan nou pep i konpran poudir sa i en levolisyon nou Lasanble.  Savedir i montre ki nou Lasanble li menm in grandi.  Sa fason fer avan e konmela, e pour pli tar i ganny antre dan sa travay.

E i en travay osi vizyoner mon pour dir.  Akoz ler mon’n swiv bann deba ki’n ganny fer dan sa Komite.  Nou vwar poudir tou Manm Komite enkli ou letan ou’n la osi, zot pa pe get Lasanble zis la.  Zot pe get Lasanble pour pli tar.  E sa i byen.

E sa travay osi, i en travay bi partizan.  En travay ki’n annan sa kolaborasyon, sa understanding.  E nou pa’n zis get politik.  Nou’n get Lasanble dan en pli gran model, dan en pli gran fason, dan en pli gran- en fason pour agrandi.

Akoz en Lasanble i annan en rol enportan dan devlopman demokrasi, dan devlopman nou lekspresyon pour anmenn si oule laspirasyon nou pep nou dimoun ki’n elekte nou pli devan.  E pour sa, detanzaot en Lasanble i bezwen revwar son lekor.  E pran kont osi bann pwen ki dimoun in dir deor, bann kritik pozitiv, negativ.  Be nou nou’n pran li.  Lasanble in ekoute tou sa bann keksoz.  E otan ki posib tou sa bann keksoz in reflekte dan sa travay ki devan nou la.

So i en travay vreman enportan.  I annan en ta nouvo eleman ladan, en ta nouvo keksoz.  E sa ankor i pour dibyen nou Lasanble.  E parey in ganny dir nou, nou pe ale.  Be pour bann ki vini, i enportan.  Parey dan Lakour, mon oule dir Zidisyer.  Kot ou annan bann presedans ki ganny taken note of e i ganny servi dan laplikasyon Lalwa.  I osi dan nou Lasanble, i mars en pe parey.  E ki bann keksoz ki nou’n vwar ansanm ki nou’n merit korize, nou merit aranze, nou merit modernize, modifye.  Tou sa in ganny pran an konsiderasyon pour donn ankor plis lespwar pour nou pep.

E mon krwar alor mwan, koman sa travay ki’n ganny fer.  Mon vwar i en travay ki byen, e i en travay ki nou Lasanble an zeneral an totalite si oule nou devret aprouve letan nou’n ariv ler pour diskit li, pour debat li.  E nou pour fer li pour dibyen nou demokrasi, pour dibyen nou lenstitisyon.  Akoz nou Lenstitisyon, believe it or not, in avanse, e i pe kontinyen avanse.  Set en prosesis dan tou pei. Lasanble, son devlopman i en prosesis, i pa statik.  E i grandi avek devlopman pei, devlopman tou sa ki otour li, bann modernizasyon dan lemonn, bann best practices.  Sa osi i ganny pran an konsiderasyon.

E alor ankor enn fwa mon komann sa travay.  E lo nou kote latab, kote parti United Seychelles nou donn nou blessing e nou sipor sa travay ki devan nou.  Mersi.

 

(APPLAUSE)

 

MR SPEAKER

Mersi Onorab De Commarmond.  Bon mon ti a kontan from the Chair mwan osi remersi nou ex-Onorab, ex- Deputy Speaker Mr Wilby Lucas.  In osi an kontak avek mon Lofis ler nou’n komans sa travay.  E ankor pour montre no matter what, i an deor.  Me ki mannyer i enterese avek devlopman nou demokrasi, devlopman nou Parlman.  I tre byen.

E byensir Onorab Basil Hoareau ki’n komansman dan nou Komite e in vreman aktiv ler nou’n kapab komans debat bann amannman ki’n ganny propoze.  E parey Onorab Sebastien Pillay in dir anba Standing Order 92 nou ava espere prezan ki a motion will be laid before The House.  E i ava ganny pran osito posib.

Me la mon anvi enform Lasanble ki enn nou bann travay mazer ki nou pour pran koman nou pour komanse an Septanm, se Civil Code.

Civil Code in ariv staz kot AG’s Office pour fini travay lo la.  Onorab Bernard Georges ansanm avek led tou nou bann dimoun ki ti lo Panel, Mr Domingue, Professor Angelo, menm Attorney Zeneral.  Nou annan mon krwar deza sa track version ki nou pour swiv isi menm lo screen.  E nou’n fini set dat, dek ki nou rantre le 10 Septanm, i pour sel menu lo nou Order PaperOk?

E nou pe ekspekte ki nou pour pran li depi Mardi.  E mon swete ki par Vandredi nou a’n kapab fini avek.  Bokou travay in ganny fer, preliminer.  Zis en mwayen pour nou repas ladan, fer sir ki bann konsern ki’n ganny leve, ki’n vini sorti kot dimoun deor ki atraver bann Manm ki’n ganny leve, in ganny taken onboard.  So vwala en pti pe ki mannyer nou pour travay, ki mannyer nou pour komanse 3enm Term.

Bon mon ti a kontan a sa moman petet profite la, pour zis donn en update lo Public Service Salary (Amendment) Bill,  2019 ki ankor lo nou Order Paper.

Pandan mon labsans nou konnen poudir case in kontinyen Ankour.  E Legal Counsel Lasanble Nasyonal, in enform mwan ki zizman dan sa case pour ganny donnen le 17 Septanm.  Savedir 2enm Mardi dan nou 3enm Term, 2enm semenn ki nou pour sa.  Be nou ava regarde de la si mon envit tou bann Manm ki nou ava al Ankour.  E mon pa krwar nou pour kapab pran Lasanble sa zour bomaten pour nou kapab al ekout sa zizman ok.

Avan nou break, mon remind ankor bann Manm Bills Committee ki nou pe meet dan Committee Room 3 pour nou konsider sa 2 Bills ki nou’n fer First Reading.

E mon anvi kit lo en pti note pour mwan- mon’n kontan bomaten mon’n ganny en surprise.  Mon vwar ki SBC osi tou in bouze.  E zot bann staff i vreman smart dan zot nouvo liniform ki zot pe servi pour vin kouver nou travay Lasanble.  Alor felisitasyon pour SBC.  Desizyon ki’n ganny pran pli o par CEO, Deputy CEO and so on.  E felisitasyon pour bann staff, zot vreman smart.  Bon avek sa nou ava break e nou repran nou travay 2er apre midi.

 

(BREAK)

 

MR SPEAKER

Bonn apre midi to manm Onorab e bonn apre midi tou dimoun ki a lekout e ki p kontinyen swiv Lasanble Nasyonal.  E ankor bonn apre midi Minis Pamela Charlette, Minis ki responsab pou sa Prozedlwa ki devan nou.  Sa se Physical Planning Bill 2019. E li menm ki pe vin ranplas Town and Country Planning Act.  Minister i akonpannyen par Mr Cyril Bonnelame ki Chairman Planning Authority Board, Mr Joseph Francois ki Sef Egzekitiv Lotorite Planning,  Mr Terry Biscornet Deputy Sef Egzekitiv Lotorite Planning,  Mr Gerard Hoareau Special Advisor to the Minister

E nou pou ganny zwenn apre par reprezantan Biro Attorney Zeneral.  Minister avek ou lekip bonn apre midi ankor, welcome dan Lasanble Nasyonal.

Bon avan nou pran sa Bill mon oule en Mosyon pou Second Reading.  Onorab De Commarmond.

 

HON CHARLES DE COMMARMOND

Mersi Mr Speaker.  Bonn apre midi Mr Speaker.  Bonn apre midi Minis ek ou delegasyon.  e tou Manm e tou dimoun ki a lekout.  Mr Speaker anba Order 64(2) nou Standing Order mon oule move ki Physical Planning Bill 2019, Bill No 7 of 2019 i ganny lir en Dezyenm Fwa.  Mersi.

 

MR SPEAKER

Mersi Onorab De Commarmond.  Okenn Manm ki segonde?  Yes Onorab Lemiel.

 

HON SYLVANNE LEMIEL

Motion seconded Mr Speaker.

 

MR SPEAKER

Mersi Mosyon in segonde.  Mon ava prezan pas la parol avek Minis.  E Minis ava prezant e i ava entrodwir Bill avek nou.  Minister Charlette.

 

MINISTER PAMELA CHARLETTE

Mersi Mr Speaker.  Mersi pou donn mwan sa loportinite pou prezant Physical Planning Bill 2019 ki pou ranplas Town and Country Planning Act ki nou pe travay lo la konmela.

Mr Speaker sa Prozedlwa ki devan nou i en morso Lalwa tre enportan ki pou gid devlopman fizik dan Sesel dan lavenir.  Atraver sa Prozedlwa  mon pe demann Lasanble laprouvasyon pou ranplas sa Town and Country Planning Act 1972 ki Lotorite Plan pe servi par sa nouvo Prozedlwa Physical Planning 2019.

Sa Prozedlwa i baze lo menm prensip ki Town and Country Act 1972 e i pou fer menm fonksyon.  Fodre fer sorti ki Lalwa Town and Country Planning, i en Lalwa model ki pe ganny aplike dan laplipar pei Commonwealth.  E in gard devlopman dan plis ki en senkantenn pei demokratik.  Depi tel ki konman L’Angleterre, Australie, Canada, L’Inde e bann zil tel ki Maurice, New Zealand, Jamaica e plizyer lezot.  I enn parmi bann Lalwa kot sa bann pei in fond zot devlopman sosyo ekonomik lo la, zot prosperite finansyel e sikse zot Nasyon.

Isi Sesel Town and Country Planning Act in gid devlopman nou pei dan domenn lenfrastriktir e devlopman fizik pandan preski 5 deseni.  Pandan sa letan, pei in eksperyans plizyer letap devlopman kot dan bann lannen ‘80 e ‘90 in gid bann devlopman tel ki konstriksyon lekol, lakaz, lopital, bann lofis, semen e bann lenfrastriktir Nasyonal ki pe siport nou lekonomi.  I osi gid bann lenfrastriktir ekonomik sirtou dan domenn touristik, lapes, devlopman por, nou bann konblaz, eksetera.  Ensi byen ki bann devlopman endistriyel e komersyal ki nou pei pe rezouir.

Letan nou get otour nou laprev lenplimantasyon sa Lalwa i vizib kot tou nou bann distrik in vwar devlopman remarkab avek en nivo kordinasyon akseptab, kot standar e dirabilite konstriksyon in ganny aplike. Nou konvenki ki nou bann striktir ki’n ganny konstrir anba sa Lalwa, zot stab menm si par ler nou bann teren topografique e lanvironnman in anmenn bokou defi e bokou konplikasyon anver serten devlopman.

Be akoz nou bezwen re fer sa Lalwa?  Mr Speaker Town and Country Planning Act menm si in servi pei byen pou plizyer lannen, i pa’n osi evolye otan vit ki nou ti a voudre.

E plizyer konponan sa Lalwa i nepli a zour avek nou realite.  Par egzanp dan bon gouvernans, prosedir, teknolozi modern eksetera.  Menm si in annan serten mankman Lotorite Plan pandan plizyer lannen, in modifye son striktir loperasyon, son fason travay e son prosedir, pou adapte avek realite sosyete e evolisyon dan modernite.  Par kont Lalwa pa’n vreman pran sa bann sanzman an konsiderasyon.  Alors nou ankadre tou sa bann laspe.  Gouvernman in vwar li neseser pou reviz sa Lalwa an antye, e fer bann lamannman sibstansyel dan preski tou bann seksyon, pou reflekte nou sosyete modern.  Sa i rezon akoz ki Gouvernman in vin avek sa Prozedlwa, ki la devan nou ozordi.

Sa Prozedlwa in pran en bon pe letan pou prepare e konsilte.  In pran kont e enkorpor plizyer pratik, Polisi e sistenm ki egziste atraver bann lorganizasyon kle ki annan manda pou desid lo devlopman ensi byen ki adopte serten pratik e standar enternasyonal ki pe byen marse.

La fodre fer sorti ki lafason ki Lotorite Plan i fer desizyon, i tout an en konsiltasyon  ase entansif avek lezot Departman Lotorite, e bann lofis DA dan bann distrik.  Nou get zot bann konsey, sizesyon e rekomandasyon avan en desizyon final i ganny fer.  Alors serten Minister ek Lotorite kle tel ki ; lanvironnman, lasante piblik, transpor lo later, tourizm, lendistri zot osi form par sa prose desizyon.

Premye parti sa Prozedlwa seksyon 1 ziska 3 ki devan nou i koz lo bann zafer preliminer tel ki tit sa Lalwa e bann definisyon parey tou Lalwa i fer.

2enm parti sa Prozedlwa,  i etabli manda e fonksyon Lotorite Plan sa se seksyon 4 ziska seksyon 21.  I met provizyon pou kree bann striktir e manda ki pou form sa Lotorite.

Manda Lotorite Plan se pou enn promot e asir lord e litilite soutenab e devlopman later dan pei.  Fasilit korperasyon antre Lazans dan planifikasyon e devlopman later.  Sofgard lentere piblik imedya e long term atraver en prose e realizasyon plan e devlopman tou later dan Sesel.  Kreasyon en rezim Egzekitiv sa Prozedlwa ki devan nou i fer kreasyon en sistenm administrasyon pou son gouvernans e lenplimantasyon endepandan avek Minister ki sa enn oparavan ti napa.  Oparavan Lotorite Plan ti direkteman form par striktir Minister ki responsab pou Later avek Lakaz.  E Minis ti annan responsabilite direk son ladministrasyon.

La, Prozedlwa i fer provizyon pou kreasyon Lotorite Plan.  E fonksyon kler e definitif pou ganny administre par en Board, apwente par Prezidan Larepiblik.   Me anba vye Lalwa TCPA bann fonksyon sa Lotorite pa ti’n ganny klerman defini.  Sa Board anba sa Prozedlwa, i ranplas laplipar pouvwar ek fonksyon Minis.

Minis anba sa nouvo Prozedlwa, i responsab pou fer regilasyon e etabli Polisi pou laplikasyon par Lotorite.  Sel pouvwar aprouv devlopman ki Minis i annan, i ganny restrikte selman dan bann sirkonstans eksepsyonnel kot i ganny defini anba sa Prozedlwa.  Sa i anliny avek bann pratik enternasyonal sirtou dan bann pei Commonwealth enkli L’Angleterre.  Anba sa nouvo Prozedlwa ki devan nou, Minis nepli annan pouvwar konsider rapel ni aprouv okenn plan dan bann sirkonstans normal e ordiner.

Konpozisyon sa Board ki pou diriz travay Lotorite Plan, i byen spesifye dan sa Prozedlwa konpare avek son predeseser.  Sa pou konpri Zofisye Sef Egzekitif konman en Manm ex-officio anliny avek bann lezot Lalwa ki gouvern bann lezot Lotorite e Lazans dan pei.  CEO napa pouvwar vote lo Board.  Pou osi annan bann reprezantan senior, bann Minister kle ki responsab pou devlopman e litilizasyon later.

Sa i Lanvironnman, Departman Later, Lasante piblik, Departman Transpor lo Later, Tourizm, Lendistri e 5 lezot manm ki annan konesans e leksperyans dan plan litilizasyon later e devlopman.  Pou osi annan Mer Lavil ki pou osi prezan lo Board pou bann desizyon ki annan pou fer avek Victoria.

Sa Prozedlwa i osi fer provizyon  pou lapwentman en Zofisye Sef Egzekitiv par Prezidan Larepiblik e en Depite Sef Egzekitif.  Se sa Zofisye Sef Egzekitif e son Depite ki pou responsab administrasyon e fonksyonnman sa Lotorite, en accord avek direksyon sorti kot Board e i pou enplimant tou desizyon Board.  Sa Prozedlwa osi i fer provizyon pou etabli e apwent bann Komite Teknik pou asiste Board e Lotorite.  Sa pou enkli Komite Teknik ki get detay plan ki ganny soumet e fer rekomandasyon avek Board pou aprouvasyon.  Komite ki aprouv bann pti devlopman.  Komite Teknik pou kordin travay bann servis litilite piblik. Komite Teknik pou devlop e revwar bann land use plan.

Parti 3 sa prozedlwa ki konpri seksyon 22 ziska seksyon 32, i koz lo plan litilizasyon later e plan devlopman bann distrik ensi byen ki plan Nasyonal.  Plan litilizasyon later e plan devlopman se ki zot ki lakle zistifikasyon bann desizyon ki ganny pran par Lotorite Plan,  lo sak proze e laplikasyon ki ganny soumet pou en devlopman.  E sa Prozedlwa i donn zot en lenportans konsiderab.

Konpare avek Lalwa oparavan, sa Prozedlwa ki devan nou i met en pli gran lanfaz lo bezwen e prosedir lo preparasyon e laprouvasyon bann plan litilizasyon later, e devlopman plan lo nivo distrik ensi byen ki lo nivo Nasyonal.  Prosedir e prose pou bann plan litilizasyon later e devlopman, i tre rigoure e i pou en size lo regilasyon lo li menm tre byento anba sa nouvo Lalwa.  Bann detay e negosyasyon later e klasifikasyon pou osi ganny mete dan sa regilasyon.

Plan litilizasyon later e plan Nasyonal pou litilizasyon later, i valid pou en peryod 10an.  Prozedlwa i fer provizyon dan serten lenstans, kot i zistifyab pou Minis kapab prolonz sa peryod par 2an.  La i pou bezwen fer sa par en Notis pibliye dan Gazet.  Tou le 10an Prozedlwa i fer provizyon pou en revi konpreansiv sa bann plan.  Enn fwa ki plan litilizasyon later i ganny aprouve e pibliye, en accord avek provizyon dan Lalwa, i ganny legalman aplikab lo tou dimoun e i aplik pou tou devlopman dan lekel sa Lalwa i aplike.

Pandan sa 10an kot plan litilizasyon later i aplikab Lotorite pa pou aprouv okenn aplikasyon ou permisyon pou fer en devlopman ki pa en accord avek sa plan.  Eksepte anba laprouvasyon Minis pou bann rezon sekirite Nasyonal, byennet piblik, lasante e sekirite.

Dan sa bann tel  lenstans Lotorite Plan i soumet en rapor devan Minis e fer en rekomandasyon.  Minis i kapab avek konsey Lotorite a nenport ki moman ki neseser pou sekirite piblik, rezon lasante piblik, dan ka en dezas natirel, deklar nenport ki later koman en zone non-devlopman.  Sa deklarasyon i ganny pibliye dan Gazet e i vin an fors imedyatman e sa zone i ganny endike dan bann plan relevan ki swiv. Byensir son prosedir ou lapros pou byen defini dan regilasyon.

Plan litilizasyon later i ganny met azour tou le 5an dan lekel en evalyasyon tou devlopman i  ganny fer e sa plan later ki’n ganny met azour i endik tou nouvo  devlopman.

Sepandan klasifikasyon litilizasyon later pa ganny sanze pandan sa legzersis, eksepte lo baz si i annan sanzman an relasyon avek sekirite Nasyonal, byennet piblik, lasante e sekirite, sanzman koze par bann koz natirel e dezas e okenn konsiderasyon Polisi e stratezi devlopman Gouvernman ki parey nou konnen i ganny revize oubyen amande de tanzantan.  Par egzanp apre letid carrying capacity pou en lokasyon.

Parti 4, seksyon 33 ziska 49 i koz lo kontrol devlopman later.  Sa parti ki koz lo definisyon devlopman, i koz lo laplikasyon pou en devlopman e bann kondisyon ki Lotorite Plan i kapab enpoze lo bann devlopman.  Seksyon pertinan anba parti 4 se sa bann seksyon swivan.  Seksyon 37 –  anba seksyon 37 selman dan sirkonstans eksepsyonnel e irzans Minis i kapab fer aprouvasyon serten plan, ki annan pou adres sekirite pei, emergency ki konsern lasante piblik, reabilitasyon irzan apre en dezas, bann ka tel ki devlopman ki konsern Misyon Diplomatik kot protocol enternasyonal i aplike.

Fodre fer resorti ki sa i anliny avek pratik enternasyonal partou dan lemonn ki donn Minis pouvwar dan bann sirkonstans byen defini, pou antreprann laprouvasyon plan pou permet pei fonksyonnen e adres serten sityasyon Nasyonal tou an prenon kont transparans, dan gouvernans e rule of lawL’Angleterre, Australie, Canada i fer li  e obor nou Maurice i parey.

Anba sa Prozedlwa sistenm rapel in sanze konpletman anba seksyon 38. Konmela apre ki Lotorite Plan in refiz en aplikasyon en aplikan i annan drwa rapel avek Minis dan en dele 30 zour.  Anba sa Lalwa Minis pou nepli pran desizyon lo rapel.  Rapel pou ganny fer par en Board Rapel e lapwentman sa Board pou ganny fer par Prezidan Larepiblik parey dan bann ka  – (Sorry)  parey dan bann ka dan pei.  Prosedir e fonksyon rapel pou ganny mete dan en regilasyon.  Sa prozedlwa i fer provizyon pou 3 Manm lo sa Board rapel. Zot pa pou nenport ki dimoun me Lalwa i dir ki sa 3 dimoun fodre zot annan lekspertiz, swa lekspertiz legal, Zidisyer, devlopman soutenab oubyen litilizasyon later.  E en manm ladan i bezwen sorti dan Minister ki responsab pou Lanvironnman.

Lanvironnman i esansyel akoz anba Lalwa Lanvironnman sa i EIA Regulations, i egzize ki tou devlopman fizik dan pei i bezwen ganny otorize par Lanvironnman.  Minis osi i pou bezwen aprouvasyon Departman Lanvironnman avan i fer en desizyon anba seksyon 37.

Anliny avek direktiv par Prezidan Larepiblik dan son diskour pou SONA 2017 kot i ti fer lanons ki pou annan en Lalwa ki pou garanti manm piblik akse avek lans a la venir, sa Lalwa ki Prezidan in koz lo la, i trouve anba seksyon 45 sa Prozedlwa ki devan nou.

Mr Speaker parey nou tou nou konnen Seselwa i annan en tradisyon frekant e re zwir lans an gran nonm sirtou dan weekend e nou atas en kantite lenportans avek sa.  Lans in fini form par koutim lavi e laplipar Seselwa i valoriz li o fon nou leker.  Alors i pa drol ki sa size mank akse avek serten lans – sirtou bann lans ki Seselwa ti abitye frekante in vin deplizanpli en konsern.   Sa konsern in devlope sirtou letan devlopman in ganny fer ant bann lans avek semen piblik.

I annan de ka kot sa problenm in ariv avek bann devlopman proze lotel  lo lakot.  E i annan de fwa kot bann propriyeter prive zot in deside anpes akse pou bann preteks personnel, sekirite, privacy oubyen akoz zot in pare pou devlop zot propriyete.

Ziska prezan menm si bann lans dan Sesel i annan en stati legal konman domenn piblik, akse avek serten nou bann lans pou bann rezon ki mon’n fek eksplike i reste touzour en problenm.

Lalwa ziska prezan menm si i donn piblik dwa pou akse ek lans e lanmer i pa dir par ki fason akse i devret ganny donnen. E ziska prezan ki napa Lalwa ki’n fer provizyon pou  fasilit sa.  Dan ka kot akse i ganny bloke Lotorite pa’n kapab entervenir dan labsans provizyon dan Lalwa.

Mr Speaker an 2017 Prezidan Faure ki’n avek en lapros bold e determinen, avek bi pou rezourd sa problenm akse avek lans enn fwa pour tou.  I ti donn lenstriksyon mon Minister ek Lofis Prokirer Zeneral pou drafte en lalwa pou deal ek sa size.  E mon annan plezir pou prezant Seksyon 45 dan sa Prozedlwa Physical Planning ki pe adres sa size.

Sa Lalwa pe donn garanti manm piblik akse avek lans atraver later. Savedir piblik apard opsyon bato, zot pou osi annan garanti ki zot pou kapab ariv lo lans apye, apre ki zot in sorti lo en semen loto.  Sa Prozedlwa pe osi otoriz Lotorite Plan pou pa regilariz okenn striktir ki ilegal ki’n deza vin en lobstak, ki pe konpromi akse lib pou al lo lans.

An sa ki konsern sorti lo semen pou ariv lo lans, sa Prozedlwa i fer provizyon dan ka kot i annan en sel akse pou sorti lo semen piu ariv lo en lans si piblik i tradisyonnelman servi sa akse pou 20an ou plis kontinyelman. Sa Prozedlwa i donn pouvwar Minis ki responsab pou sa Lalwa pou etabli sa semen ofisyelman e egalman konman kase piblik pou al lo lans menm si i en propriyete prive e i annan devlopman lo sa propriyete.

Byensir nou dan en pei demokratik e mekanizm ki Minis i kapab fer sa i spesifye anba sa Prozedlwa. Minis i kapab fer li atraver swa negosyasyon, swa atraver Lalwa Akizisyon Later kot negosyasyon pa’n aboutir, aste oubyen lwe sa later, oubyen konsider en lesanz later, ou si sa propriyeter i dakor atraver en don.

Si en devlopman i ganny propoze lo en propriyete prive kot pou bar en akse piblik pou al lo lans, sa Prozedlwa i donn Lotorite Planning pouvwar pou donn en kondisyon ki en akse i devret ganny donnen pou al lo lans gratwitman e a tou ler.  Touzour anba sa Seksyon, ki koz lo akse pou al bor lanmer, si en dimoun i refize pou comply avek sa bann provizyon, e ki ganny trouve koupab i komet en lofans e en lanmann R1milyon pou ganny aplike.

Mr Speaker bokou nou pou plizyer lannen menm isi dan Victoria, nou’n obzerv bann batiman ki annan serten leritaz istorik ou kiltirel ki nou santi i bezwen ganny prezerve a tou pri, me parfwa son propriyeter pa oule prezerv sa bann batiman.  Zot swa kit li dan labandon, oubyen zot kraze e fer nouvo konstriksyon  modern.

Seksyon 46 dan sa Prozedlwa i donn Lotorite Plan manda pou issue en Preservation Order pou anpes bann tel batiman ganny demoli, oubyen ganny modifye ou agrandi pou prezerv son laspe leritaz oubyen larsitektir.  Lalwa i al pli lwen ki sa.  I osi donn Lotorite Plan manda pou osi prezerv bann eleman natirel dan nou lanvironnman, ki pa neseserman batiman tel ki ; lafore e menm bann ros ki annan serten formasyon enteresan parey plizyer landrwa lo nou lakot e partou.

Dan en lot sirkonstans dan bann ka kot i annan batiman ki’n avarye, pou rezon safety pou protez piblik oubyen lasante piblik sa landrwa i osi fer provizyon pou Lotorite Plan, konsider pran bann mezir pou adres sa sityasyon par swa ordonn reparasyon oubyen demolisyon.

Dan ka kot demolisyon i ganny fer, e bann debri pa ganny tire, sa Prozedlwa i osi donn Lotorite Plan manda pou fors sa propriyeter retir e reabilit sa landrwa.  E si i pa fer, Lotorite plan i kapab antre e fer sa bann aksyon e apre fer sa propriyeter peye oubyen rekiper kou atraver det sivil.

Atraver sa menm seksyon, sa Prozedlwa i donn manda Lotorite Plan pou regle lavertisman osi.  Sa i pou ganny fer atraver en regilasyon ki Minis pou fer tre byento.

Parti 5 sa Lalwa, i  konsern konpansasyon.  Konpansasyon i en size ki tou dimoun i konsernen avek e i lev bokou kestyon pandan bann rankont konsiltasyon, e osi meeting ek ban dirizan distrik en pe partou.  Kestyon ki zot demande se dan ki sirkonstans ki Lotorite Plan i devret donn konpansasyon  en endividi oubyen en propriyeter e dan ki sirkonstans ki konpansasyon pa aplike.  Mr Speaker sa Prozedlwa ki devan nou, seksyon 50 ziska 54 i fer li tre kler dan ki sirkonstans kot konpansasyon pa aplike.

E sa, e dan bann lenstans swivan;

Dan ka kot dimoun in fer sanzman avek zot batiman e pli tar letan zot in fer aplikasyon pou permisyon Planning, e i ganny refize.

Ler en plan in ganny refize akoz i pa annakor avek land use plan oubyen development plan sa landrwa.  Letan en plan i ganny refize akoz i pa’n ganny lotorizasyon Departman Lanvironnman.

Letan en plan in ganny refize akoz i en problenm lasante piblik, oubyen i pa zwenn kriter Lalwa lasante Piblik.  Letan en plan i ganny refize akoz i al kont provizyon Lalwa Fondasyon Leritaz Nasyonal.

Letan en plan i montre ki i pou ganny difikilte pou ganny akse avek bann litilite prensipal tel ki; delo trete, elektrisite, eksetera, sirtou lo staz divizyon later.

Letan i annan en mankman semen oubyen akse dan vizinite.  Letan sa later pa kapab konstri lo la, akoz natir son teren.  Par egzanp kot later i tre anpant, oubyen kot i annan en problenm linondasyon.

Letan en plan i ganny refize akoz sa later pe ganny servi pou rezon lagrikiltir.  Letan Lotorite Plan i santi ki i annan lezot opsyon later ki pli bon pou fer sa devlopman ki pe ganny propoze atraver land use plan. 

Letan i annan en desizyon pou scale down grander e groser building, oubyen redwir kantite building ki pe ganny propoze lo sa teren.

Letan plan i ganny refiz-e akoz son larsitektir, laparans oubyen akoz sa materyo ki pe ganny sizere pou konstriksyon.  Letan plan pa zwenn demann kriter pou parking oubyen loading ek unloading.

Change of use en batiman ki pa zwenn kriter sa nouvo use ki pe ganny propoze.  Lokasyon semen dan bann landrwa ki pa ideal, oubyen materyo konstriksyon ki pa konvenab, ki pe ganny propoze pou fer en semen.

Si en plan pou en lansenny, lavertisman i pa anliny avek regilasyon ki diviz lavertisman, oubyen kot Lotorite Plan i refiz devlopman lo zis en parti en later e i annan lezot lokasyon lo sa menm later kot konstriksyon i posib.

Kot Lotorite plan i refiz en aplikasyon lo sa teren ki deza annan, oubyen annan plan aprouve pou aktivite komersyal, apartman rezidansyel, lendistri, warehouse e lezot ki kapab poz en problenm konpatibilite.

Oubyen nwizans pou sa devlopman ki pe ganny propoze.  Sa Lalwa i osi gid fason pou tret bann konpansasyon dan bann lenstans kot i merite.

To claim pou konpansasyon anba sa seksyon Lalwa, i pou ganny determinen par en lagreman ant Gouvernman e sa Parti konsernen, oubyen ganny deside dan en Lakour.

Sa Prozedlwa dan seksyon 55 ziska seksyon 68, i koz lo bann mezir ki Lotorite Plan pou servi pou enforce bann provizyon anba sa Lalwa.

Sanzman anba sa bann seksyon ki nouvo konpare avek Lalwa avan i comme swivan;  stop notice dan ranforsi Lalwa dan domenn konstriksyon.

En stop notice i en zouti tre enportan pou anpes en devlopman ki annan en problenm avek, oubyen ki pe kree serten nwizans pou aret, pou arete e rektifye sa problenm avan i vin pli grav.

Atraver en stop notice, en devloper i kapab adres bann problenm ki’n ganny idantifye e si i neseser fer amannman lo son plan, pou reflekte nouvo sityasyon byen boner.

Sa ki nou rapel retrospective application.  Anba sa Prozedlwa en stop notice i kapab ganny donnen dan bann sirkonstans swivan;

Kot i annan devlopman ilegal.  Savedir ki napa lotorizasyon Planning.  Kot devlopman pa pe al dapre plan oubyen permisyon, oubyen kondisyon.

Oubyen dan bann sirkonstans kot serten devlopman i pe konpromiz serten provizyon lezot Lalwa e nouvo lenformasyon pe endike ki sa devlopman i bezwen arete ziska en desizyon i ganny pran lo la.

Seksyon ki koz lo enforcement notice, i reste parey ansyen Lalwa lo son aplikasyon.  Eksepte i annan en nouvo adisyon e detrwa pti amannman.

Sa nouvo adisyon i donn pouvwar Lotorite Plan issue en enforcement notice, pou pran lefe imedyatman dan plas esper 30 zour parey dan Lalwa konmela.  Sa i permet pou remedye sa sityasyon imedyatman.

Tout an prenon kont drwa konstitisyonnel bann endividi, sa provizyon immediate enforcement notice i devret selman ganny servi dan bann ka kot sekirite Nasyonal i ganny menase, lasante piblik, safety oubyen sa devlopman i poz lefe advers lo laspe lanvironnman sa zalantour.

Par egzanp kot ka en lateras pe met an risk bann lezot propriyete, oubyen en drenaz ou akse legal pe ganny bloke avek en striktir ki an konstriksyon, eksetera.

Konstriksyon dan domenn piblik, sa endividi i toultan annan rekour met en ka Ankour si i santi ki son drwa in ganny vyole an aplikan sa mezir.

Sa notis enforcement with immediate effect, i kapab ganny servi lo swa sa propriyeter, devloper oubyen son reprezantan, oubyen lo sa kontrakter kot i aplike.

Larestan provizyon enforcement notice, i reste parey kot i donn en dele 14 zour pou devloper oubyen propriyeter, donn zistifikasyon akoz i krwar ki en enforcement notice pa devret ganny servi lo li, letan in fail pou comply avek stop notice oubyen dan lezot lenstans.

Si en kontrakter ki fail pou comply avek en enforcement notice, sa Lalwa i fer provizyon pou li ganny pran aksyon avek.

Sa i kouver seksyon 69 ziska part 7 lo lofans ek penalti i ganny kouver dan seksyon 69 ziska 76.  E se la kot lamannman pli sibstansyel sa Prozedlwa i sitye.

Lafors okenn Lalwa oubyen son ledan parey nou kontan dir, i ganny sitye dan 2 seksyon prensipal en Lalwa.  Dan seksyon enforcement e dan seksyon lofans e penalti.

Dan Lalwa Town and Country Planning Act menm si i ti annan plizyer provizyon pou ranforsi sa Lalwa, son penalti ki asosye avek bann lofans ki vreman ba.

E la mon pe koz zis R4mil lanmann pou en dimoun ki komet lofans, kas Lalwa e fer devlopman ilegal.  Sa provizyon dan pti TCPA in afeblir sa Lalwa en kantite   ki’n fer li tre rar kot Lotorite Plan in anmenn en dimoun oubyen en lakonpannyen Ankour, akoz i pa’n comply avek provizyon sa Lalwa.  Planning in plito rod solisyon alternatif.

Avek sa nouvo Prozedlwa, sa in ogmante sibstansyel man pou vin en maksimonm R250mil.  E ou en term lanprizonnman pou pa plis ki 6 mwan pou laplipar lofans kont provizyon anba sa Lalwa.

R250mil oubyen 6 mwan dan prizon i aplike an relasyon avek lofans kot en devlopman i ganny fer san permisyon Lotorite Plan, oubyen i pa’n swiv serten kondisyon ki, ki in donn li.

Oubyen letan in ganny en re vokasyon e i pa’n swiv.  Dan ka kot en stop notice i ganny issue e sa dimoun pa respekte lord sa notice la i annan en lanmann R50mil lo sa dimoun.

E sa i ganny determinen par Lakour.  An plis ki sa, pou sak zour kot sa stop notice pa’n ganny respekte,  en fine R5mil i ganny enpoze par zour.

Dan ka kot en enforcement notice pa ganny respekte, li son lanmann i de fwa plis.  Savedir R500mil e en santans 12 mwan prizon.  Menm sonm i aplike si en Preservation Order pa’n ganny respekte.

An plis ki sa, pou sak zour kot en enforcement notice pa ganny respekte, en sonm R5mil i aplikab pou sak zour.

Si dan en ka kot en notice i ganny serve e son met landrwa oubyen devloper, oubyen kontrakter pa la, sa dimoun ki resevwar sa notice lo son behalf, i devret delivre sa notice kot son met.  Si i pa fer li e ganny trouve koupab, en lanmann R5mil i aplikab, oubyen 2 mwan prizon.

Sa lanmann i osi aplik pou bann propriyeter ou devloper, ki refiz akse zofisye avek sit travay san en bon lakoz.  E si zot obstruct en zofisye pou anpes li fer son travay, la lanmann i double, i vin R10mil oubyen 3mwan prizon.

Kot sa dimoun i rekonnet son malfer e i deklar son lekor koupab pou sa bann aksyon ki mon’n nonmen anler.

Sa Prozedlwa i fer provizyon pou Lotorite Plan an konsiltasyon avek Lofis Prokirer Zeneral pou compound sa lofans par aksepte pa mwens ki 2tyer sa fine ki Lalwa in dir i aplikab.

Sa laranzman i ganny fer atraver Lakour, e sa zafer pa bezwen ganny met Ankour.   Parti 8 sa Prozedlwa, i fer provizyon pou Minis fer bann regilasyon.  Sa bann regilasyon swivan i mandatwar e pe ganny prepare;

Lalwa lo standar ki diriz konstriksyon.  Regilasyon lo prosedir rapel.  Regilasyon pou diviz later.  Regilasyon pou plan litilizasyon later.  Regilasyon lo pri Planning.  Regilasyon pou lavertisman.

Regilasyon pou use classes.  Pou konklir Mr Speaker, sa Prozedlwa ki devan, ki devan nou, i enn ki i annan son merit dan sosyete modern.

I pran kont nou bann defi kot Lalwa avan swa pa ti aplike, oubyen kot i ti annan mankman.  Bokou sizesyon letan Lotorite Plan ti pe konsilte dan bann distrik avek bann stakeholders lo staz white paper sa Lalwa in pran an konsiderasyon.

Sa Lalwa pa vedir ki tou keksoz pou mars parfe, me in donn provizyon pou adres plizyer nou bann lerer dan lepase e met provizyon pou li pa repete.

Sa Lalwa pa pe get okenn dimoun an partikilye, ni sirkonstans e kouler politik.  Me i en Lalwa annavans e progresis pou nou pei enport ki Gouvernman ki o pouvwar.

Mon pe demann bann Manm pou get li dan en fason pozitiv e pou viz ver lavan tout an koriz bann lerer e defayans lepase.  Mon demann bann Manm pou raport zot sipor pou sa Prozedlwa.  Mersi Mr Speaker.

 

(APPLAUSE)

 

MR SPEAKER

Mersi, mersi Minis Charlette.  Bon debat i ouver lo merit zeneral e prensip sa Bill, e Bill i Physical Planning Bill 2019.  Okenn Manm ki oule entervenir?  Bon si napa, mon mazinen savedir i kler, nou ava- I annan?  Ok, Onorab Lemiel.

 

HON SYLVANNE LEMIEL

Mersi Mr Speaker.  Bonn apre midi Mr Speaker.  Bonn apre midi Minis avek ou delegasyon e tou mon bann koleg Manm Onorab.

Mr Speaker sa Prozedlwa ki devan nou Lasanble ozordi i annan son merit.  A mon avis en tel Prozedlwa ti devret ariv dan nou Lasanble bokou letan avan.  Me pli to tar ki zanmen.

Sa nouvo Lalwa ki pou ranplas sa enn an 1972, ki detanzantan ti annan bann lenstriman statutaire savedir bann S.I,  ki ti ganny fer par Minis pou asire ki sa Lezislasyon ti ganny met azour pe anmenn bokou sanzman,  e i pe osi regilariz bann plan litilizasyon later, pou fer ki zot siport devlopman ki soutenab.

Sa Lalwa pe osi fer provizyon, pou ki bann plan litilizasyon later i ganny met azour tou le 5an, kot en evalyasyon i a ganny fer lo tou bann devlopman, e sa nouvo versyon plan litilizasyon later, i ava endik tou bann nouvo devlopman.

Parkont sa nouvo Lalwa i fer resorti ki klasifikasyon litilizasyon later, pa pou sanze, eksepte dan serten ka parey sekirite Nasyonal, byennet piblik, lasante e sekirite, bann lakoz natirel e dezas.

E osi konsiderasyon Polisi lo stratezi devlopman Gouvernman.  I byen note ki bann plan litilizasyon later i valid pou 10an.  Parkont Minis i kapab prolonz sa peryod pou ankor 2an.

Par fer piblikasyon dan Gazet Ofisyel.  Mr Speaker ler mon lo sa size plan litilizasyon later, mon ti a kontan fer resorti ki distrik Anse Royale i dan prosesis konplet son plan, e in ariv a en konklizyon,  lo ki kote ki bann devlopman ki pou kapab ganny fer dan diferan rezyon nou distrik.  Nou pou apre vwar nou plan devlopman ki li osi i a ganny met devan zabitan.

Mon rekomande ki avan ki sa plan devlopman i ganny met ater, tou bann partner konsernen i vin dan distrik e fer konsiltasyon aprofondi avek bann zabitan.

Mr Speaker ler nou regard sa plan litilizasyon later pou distrik Anse Royale, mon vwar ki bann dimoun ki reste dan zone Mont Plaisir.  Sirtou dan zanmirant sa water catchment ki zot pou fer an term devlopman lo zot propriyete.

Si i arive ki zot pa pou kapab fer okenn devlopman dan sa landrwa, sa Bill pe fer provizyon ki zot ganny en konpansasyon, apre bann konsiltasyon neseser.

E la Mr Speaker, mon panse ki konpansasyon i a vin swa an term lesanz later, oubyen konpansasyon finansyel dan bann ka ki Lotorite Planning i dir ki sa bann dimoun pa pou kapab fer okenn devlopman lo zot later, ki trouve dan sa zanmirant.

En lot pwen pertinan Mr Speaker, ziska tou dernyerman i annan en leokri kot piblik pe konplent sa zafer annan akse lo bann lans.  Zot in fer resorti ki serten propriyeter lotel in anpes zot travers propriyete pou al lo lans.

Sa Lalwa pe fer provizyon dan seksyon 45 pou ki piblik i ganny akse pou al lo lans e dan, e dan son        Ladres pou SONA 2019 Prezidan Faure ti donn son langazman ki pou annan en Lalwa ki pou vin anfors, ki pou adres sa problenm enn fwa pou tou.

Dek ki sa Lalwa i vin an fors, okenn propriyeter later ki reste o bor lans, pou devret donn en akse apropriye pou piblik ganny akse avek lans.

Me par kont Mr Speaker mon ti a kontan lans en lapel osi avek sa bann dimoun, ki servi lans pou okenn aktivite.  Pou silvouple servi sa bann landrwa avek respe.

Si i annan okenn lakaz, oubyen letablisman touristik o bor sa lans ki zot pe servi, silvouple pa fer tro tapaz, e pa kit zot salte lo lans ler zot fini zot aktivite.  Nou devret annan respe pou propriyete lezot dimoun.

Mazin byen, sa ki ou pa kontan dimoun fer avek sa ki pou ou, ou pa fer avek sa ki pou ou prosen.  Mr Speaker konmela nou pe ganny bokou problenm avek bann dimoun ki pe konstri san permisyon, oubyen aprouvasyon Lotorite Plan.

Kote ki ou al dekouver tousala?  Ler i annan en gro lapli, miray in grennen, lakaz pe tonbe, lateras osi pe grennen.  E se la kot ou konnen ki sa dimoun pa’n zanmen annan en plan aprouve par Lotorite Planning pou son proze.

I osi annan bokou dimoun ki’n konstri zot lakaz san en plan lo bann later, sirtou ki trouve dan land bank.  E la ou vwar kot Lotorite Distrik i ganny bokou konplent lo sa bann konstriksyon ilegal ki anmenn serten lenpak dan distrik.

Mr Speaker nou pe vwar ki sa Bill pe fer provizyon pou fine bann dimoun ki fer bann devlopman san permisyon Lotorite Plan, e osi sa bann kontrakter ki pe fer sa konstriksyon, ki pa’n ganny okenn aprouvasyon sa Lotorite.

Dan ka kot bann dimoun i deside pou kontinyen zot devlopman menm si in ganny dir arete, zot osi zot pou ganny fine en sonm R50mil oubyen 6 mwan prizon.  Oubyen zot pou ganny fine R50mil pou sak zour ki sa lofans i kontinyen apre ki sa dimoun in ganny dir arete avek son proze.  E la mon lans en lapel avek tou dimoun ki pe al fer okenn devlopman byento, pou fer sir ki zot in ganny permisyon avek Lotorite Plan pou evit okenn problenm legal.  Mr Speaker sa Bill pe osi fer provizyon pou adres sa problenm, kot dimoun i blok akse pase lezot dimoun.

La nou pe koz bann right of way.  Par konstri bann striktir dan milye semen.  I byen note ki tou dimoun i devret annan en drwa pasaz pou li kapab ariv kot i reste.

Me par kont nou vwar, ki i annan bokou problenm ki leve dan vwazinaz, akoz sa problenm drwa pasaz, kot menm serten dimoun pa oule donn wayleave pou fer serten proze parey semen, ki Lotorite Distrik i ganny bokou demann sorti kot zabitan.

Nou ganny bokou difikilte pou kapab fer sa bann proze, akoz bokou propriyeter pa oule ki ou pas lo zot propriyete, menm si i annan demarkasyon right of way ki’n ganny idantifye lo zot plan later.

Sa i kree bokou konplikasyon e fristrasyon, par bann zabitan akoz bann tel problenm.  Tou dernyerman i osi annan PUC Mr Speaker ki met poto e meter dan milye later ki ganny rezerve, pou en akse, e sa dimoun i ganny bokou difikilte pou zot fer PUC vin retire.

Avek en tel Lalwa, mon panse ki keksoz i ava ganny pli byen kordinen.  Ler nou lo sa size Mr Speaker, petet mon pou demann en kestyon, eski ler plan litilizasyon later i demark en semen, oubyen rezerv pou fer en semen, eski wayleave pa sipoze otomatik?

Mr Speaker ler nou pe diskit lo devlopman, nou konnen ki i osi annan bann propriyete zeritye.  Kot bokou devlopman oubyen renovasyon lo zot lakaz pa kapab ganny fer akoz problenm later zeritye.

Mon konnen ki napa Lalwa pou adres sa problenm.  E ki sa i en size Kod Sivil.  Me Mr Speaker mon ti a voudre ki prosesis pou sa bann dimoun ki pe ganny sa bann difikilte parey, ti a vin pli fasil.

Akoz ler ou pe gete, bokou dimoun ki vilnerab e zot lakaz i dan move leta.  Zot dan bann sityasyon ki zot pa pe ganny permisyon pou aranz sa lakaz.

E dan bann ka parey, ni menm Lotorite Distrik pa kapab fer nanryen pou zot.  Mon pe osi konstate ki sa Lalwa in revwar pouvwar Minis konsiderableman, konpare avek Lalwa avan.

Minis anba sa Lalwa, i pou napa drwa pou revwar desizyon Lotorite Plan, ni menm lo appeal.  Sel pouvwar ki Minis i annan se en pouvwar kontrol, kontrole dan bann sirkonstans ki sa Lalwa in definir koman sekirite Nasyonal, lentere Nasyonal.  Dan bann ka ki konsern lasante piblik, en dezas, kot i annan en sityasyon emergency.  Mr Speaker, sa provizyon i la a mon avi, pou fer sir ki dan en sityasyon kalamite pei i kapab pran en desizyon enstantaneman dan lentere Nasyonal.

Akoz dan sa bann sirkonstans, letan i limite pou adres danze, oubyen rekiperasyon.  Mon osi konpran nesesite letan i annan en proze kot sekirite Nasyonal i konsernen.

Par egzanp konstriksyon serten fasilite militer, tel ki en armory petet.  Oubyen en lot keksoz.  Dan sa konteks mon krwar lentere pei i pas avan tou.

Apard sa dan sa Lalwa tou pouvwar Minis in ganny restrikte pou fer Polisi e regilasyon.  Mr Speaker avan mon terminen, mon annan detrwa pwen refleksyon.   Ki rol ki distrik i devret zwe vizavi Lotorite Plan?

Eski distrik i devret vin landrwa kot Planning i anvoy bann aplikasyon pou distrik fer komanter lo sa bann plan?  Eski distrik i devret zis ganny enformen?

Eski en plan avan i aprouve, i devret ganny display pou distrik, espesyalman bann affected Parties, vin partisipe e fer zot komanter?  Oubyen eski DA ki pou fer sa pou zot?  Eski MNA i devret ganny konsilte?

Ki pou rol Konsey Distrik oubyen Konsey Rezyonal lo sa size plan?  Petet ti a bon nou konnen ki mannyer i marse dan lezot pei.  Eski Sesel i annan ase lekspertiz pou desantraliz serten fonksyon Planning?

Eski i devret annan serten pti devlopman ki pa devret Planning permission?  Ki rol bann kontrakter dan sa Lalwa?  Eski zot performans i ganny regle zot osi?  Ki pou bann nivo standar e etik?

Mon krwar ti a byen angaz en, dan en deba lo sa size, akoz Lalwa i silans lo la.  Mr Speaker an zeneral mon vwar ki sa Bill pou anmenn bokou sanzman significant an se ki, an sa ki pou konsern litilizasyon later e bann devlopman dan pei.

Alors mon pou donn mon sipor sa Prozedlwa.  Fodre note, nou pei pe kontinyen devlope, nou bezwen bann Lalwa ki pou reponn bann nouvo defi.

Annou kontinyen fer tou sa ki posib pou anmenn devlopman ki reflekte nouvo konteks sosyoekonomik Sesel.  Ansanm nou kapab kontinyen anbelir e batir nou pei.  Mersi Mr Speaker.

 

MR SPEAKER

Mersi Onorab Lemiel.  Onorab Wavel Woodcock.

 

HON WAVEL WOODCOCK

Mersi Mr Speaker.  Bonn apre midi Minis ek ou delegasyon, tou Manm e tou dimoun a lekout.  Mr Speaker sa Physical Planning Bill 2019 i en Bill vreman enportan pou nou pei.

Annefe i en Prozedlwa vreman, vreman konpreansiv.  Dan mon lentervansyon lo sa Bill, mon pou met lanfaz plizoumwen lo en seksyon.  En seksyon spesifik ki dan mon lopinyon i en laviktwar pou pep Praslinois.

Mr Speaker depi ki mon’n antre dan sa Lasanble, i annan detrwa keksoz prensipal ki mon’n koz lo la a plizyer repriz.

Dan deba lo leta nou
Nasyon, dan deba Bidze, e atraver bann Mosyon e kestyon ki mon’n demande, ouswa mon’n entervenir lo la dan sa Lasanble Nasyonal.

Mr Speaker mon pou mansyonn 1 ou 2 konsern, e keksoz ki parey mon’n dir, mon’n met bokou lanfaz lo la.  Ki sa Physical Planning Bill pou annan en lenpak direk li lo la.

Premyerman a plizyer repriz dan lepase, mon’n demann Gouvernman pou retir Polisi ki ti anpes bann propriyeter pou konstri lo zot propriyete ki par lao 50 met contour line.

Ki annefe in met retar dan devlopman nou zil Praslin.  Fodre note ki sa Polisi ti aplik zis pou Praslin.  Dan sa Bill drwa konstitisyonnel bann zabitan Zil Pros pou rezoui-r zot propriyete, in ganny prezerve.

Dezormen bann zabitan zil pros pou kapab batir par lao 50 met.  Me legzersis sa drwa i vin avek bann limitasyon preski par Lalwa ki neseser dan nenport ki sosyete demokratik.

Mr Speaker sa Prozedlwa i dil avek land use plan pou bann distrik.  Bann rezyon zil e pei an zeneral.  Plizyer meeting ti ganny fer dan bann distrik pou diskit sa Bill e land use plan par distrik.

I annan plizyer propozisyon ki mon’n fer dan lepase, ki konsern land use plan dan mon distrik e lo mon zil Praslin.  Ki mon’n debat san ses pou sa bann keksoz vin en realite.

Par egzanp Mr Speaker, semen laplenn Olandez ek Pasker ki’n ganny bidzete pou sa lannen, ki malerezman PUC in met serten retar avek sa proze.  Par lefe ki prezan ki zot in anvi vin fer proze danm.

Me annefe en tel proze semen i en keksoz ki mon konnen i pou enkli dan land use plan pou tou le de distrik Grand Anse avek Baie Ste Anne Praslin ki pou donn en lot alternative or alternativ an ka i annan dezas ki blok bann semen parey nou’n eksperyanse lo nou zil dan lepase.

Mr Speaker mon’n osi annan en pase koz lo redevlopman lasose Grand Anse Praslin, ki en Komite in ganny etablir.  Ki malerezman Gouvernman pe trenn, lipye lo bann propozisyon ki sa Komite ki mon vwar en Manm lo la in fer.

En tel proze ki pou anmenn en retonbe ekonomik direk pou nou distrik.  Mr Speaker sa Bill i adres bann devlopman lo Later Leta, e osi later prive.  I tous you kours nou popilasyon.

Konman MNA pou Grand Anse Praslin, mon’n propoz plizyer proze dan mon distrik, ki pou ganny gide par sa Prozedlwa.  Mon’n demann Gouvernman pou met an plas bann lenfrastriktir pou devlopman nou bann zenn, nou bann zanfan.

Parey bann sport complex, multipurpose gym, devlopman bann lenfrastriktir ki pou anmenn nou sport, e devlop nou bann zenn, parey playground.  Bann nouvo blok lekol.

Bann fasilite Sportif e edikasyonnel.  Pou osi bann dimoun avek dezabilite, sant endistriyel pou bann pti biznes.  Enterprise center e plizyer bann lezot keksoz ankor ki mon santi i pou benefisye zabitan nou zil.

Mon bezwen admet ki i annan serten proze ki’n konmanse.  Me plizyer sa bann proze i ankor dan limbo.  E mon pou kontinyen demande, ensiste ki sa bann proze i ganny fer pou mon distrik e pou Praslin an zeneral.

Ki pou benefisye zabitan tou le distrik Praslin, Baie Saint Anne avek Grand Anse.  En lot keksoz ki mon souvan met lanfaz lo la se problenm lerozyon lakot.

Sirtou dan mon distrik Grand Anse Praslin, dan kestyon ki mon ti demande lo sa size, e mon’n deza anmenn sa kestyon 2an pase.  En Urgent Question.  I kot i konsern size lerozyon.

E ler mon ti demann sa kestyon, Minis ti prezant en Master Plan pou tackle sa problenm lerozyon lakot.  Dan sa Master Plan, pou konbat kont coastal erosion, Minis apre kestyon ki mon ti demande, i ti osi fer mon ganny en kopi sa master plan, pou dil avek sa problenm lerozyon lakot.

E dan sa Master Plan i fer sorti ki i annan bann landrwa priyoriter ki sa issue i merit ganny adrese.  Parey Anse Kerlan, Amitie, Ros Korbizo, ki sa bann landrwa i ganny, i mark konman priyorite pou Minister dil avek.

E dan sa land use plan nou distrik, fodre ki Lotorite Planning i pran konsiderasyon lenpak lerozyon lakot dan nou distrik.

Finalman Mr Speaker, sa ki mwan mon anvi al an detay lo la, ki ganny depaye dan sa Bill se en keksoz ki mon’n lager lebra kase, e mon’n tre vokal lo la.  Sa se akse san restriksyon avek tou bann lans Sesel, sirtou lo mon zil Praslin.

Sirtou lo nou zil Praslin.  Mr Speaker lepep Praslinois in fristre pou plizyer lannen kot plizyer lotel si mon pou etre fran e spesifik.

Lotel Lemuria in anpes zabitan Grand Anse avek Baie Ste Anne Praslin ganny akse avek Anse Zorzet ek Petite Anse.  Menm si avek presyon ki manm piblik in mete, e menm atraver Lasanble, atraver mon menm dan Lasanble.

Resaman pa tro bokou letan pase, sa lotel in konmans donn akse san restriksyon avek sa lans, avek bann Seselwa.  Mr Speaker fodre note ki i ankor annan restriksyon lo bann etranze ki anvi ganny akse avek Anse Zorzet ek Petit Anse.

Sirtou ler lotel i plen, plizyer touris, etranze ki’n vin Sesel, ki’n sey al Anse Zorzet sekirite kot baro in anpes zot rantre e fer zot retourn menm bor.  E sa i pa akseptab par lefe ki bokou etranze i vin Sesel pou vizit enn bann pli zoli lans dan lemonn, e sa se Anse Zorzet.

Mr Speaker mon’n zwen avek CEO Planning.  Mr Joseph Francois ki la ozordi, regard an sa size a plizyer repriz.  E nou fer plizyer vizit e al detrwa miting avek GM Lemuria pou diskit lo sa size akse avek Anse Zorzet.

Nou de vizit ki nou ti fer se pou esey sa nouvo trail, ki Lemuria in fer Anse Zorzet.  Mr Speaker sa trail i deplorab.  E zanfan ek bann dimoun trwazyenm az pa ti pou zanmen kapab servi sa trail.

Mon ti eksprim mon fristrasyon e dezapwentman lo sa size avek GM sa lotel.  E CEO ti dakor avek mwan, ki sa trail pa akseptab, e ki i bezwen annan akse pli konvenab.

En semen pli adekwat pou piblik kapab ariv kot sa lans.  CEO ek mwan menm nou ti tonm dakor ki fodre annan unlimited and unrestricted access avek sa 2 lans ki ganny enclave par lotel Lemuria.

Tou lans i piblik.  Me ti napa en Lalwa ki, ti napa en Lalwa ki dir ki bann propriyeter ki zot later i enclave en lans i merit donn akse avek lans.

Avek demann lepep Praslinois e son reprezantan dan Lasanble, mon kontan Mr Speaker ki ozordi Gouvernman in ekout nou lavwa.

Nou ti ganny promet ki dan sa Physical Planning Bill en provizyon pou ganny fer pou ki tou manm piblik, ki enkli bann etranze ki lo nou later pou ganny akse san restriksyon avek tou nou bann lans.

Sa bann Lalwa parey Minis in mansyonnen, i ganny trouve dan seksyon 5 lo development of land adjacent to sea.

Dan seksyon 45(5) i dir, ‘’Where there is no alternative public access to a beach, traditional public use of a private land what access through an existing private development land shall be sufficient grounds for establishing a public right of way over that access. 

Or another access of similar convenience for the purpose of access to the beach by the public. 

Traditional public use i ganny define dan seksyon 45(9) as ki savedir peaceful, open, continuous and uninterrupted enjoyment of access by the public for a period in excess of 20 years. 

Savedir Mr Speaker si i annan en semen ki manm piblik in servi pou ganny akse avek lans san lenteripsyon pou en peryod 20an, sa Lalwa i fer provizyon pou etablir en public right of way, kot sa semen access i ete.

Annefe Bills Committee in propoz en lamannman pou azout ‘’or another access of similar convenience for the purpose of access to the beach by the public,’’ pou fer provizyon pou en lot semen alternativ.

Malerezman ler Lemuria ti ganny fer, devlopman ti ganny fer lo sa semen ki piblik ti pe servi.  Me sa lamannman ki Bills Committee in propoze dan seksyon 45(5) i dil avek sa osi dan, i dil avek sa.

E osi dan seksyon 45(6) i annan en provizyon pou donn akse piblik avek lans.  Dan 45(6) i dir,

‘’Where the only landward access to the beach is through an existing private development, where traditional public use pursuant to subsection (5), has not been established. 

The Minister may acquire the right to vote public use of that beach access, by gift, negotiation contract, purchase or lease compulsory acquisition exchange for other property interest or monetary exemption, or by such other means as the Minister may recommend, as a condition of issuance, of any permit or license required under the provisions of this Act, or any other Act. ‘’

An dot mo, Mr Speaker Minis pou annan plizyer lopsyon pou ganny akse ouswa semen pou manm piblik.

E lafason ki pou fer sa, se atraver negosyasyon acquisition, lesanz later, e atraver lezot mwayen ki Minis i rekomande, dan bann kondisyon, pou bann propriyeter ouswa devloper ganny permit ouswa license pou fer okenn konstriksyon.

Seksyon 45(8) i dir, ‘’Where a proposed development is likely to adversely  affect. 

The public’s ability to access a beach from the landward side, any development permit shall require as a condition, a landward public access through the development at all times, free of charge. 

An lot mo Mr Speaker, propriyeter ouswa bann devloper, pou oblize donn en akse avek lans.  Permi ki Lotorite Planning pou donnen, pou egzize ki i annan en landward public access.

Mr Speaker sa Prozedlwa pa fini la.   I annan en fine pou bann propriyeter ouswa devloper ki pa comply avek sa bann Lalwa.  Sirtou pou donn piblik akse avek lans.

Seksyon 45(11) i dir,

‘’A person who fails to comply with a provision of this section, commits an offence and shall be liable on conviction for a fine of SCR1,000,000.’’ 

R1milyon fine ki dan mon lopinyon i pou met presyon lo tou bann propriyeter pou comply to this Act.  Mr Speaker avek sa de mo, mon satisfe avek sa seksyon dan sa Prozedlwa, e bann lamannman ki Bills Committee in propoze.

Sa Lalwa pou enn fwa pourtan bann propriyeter, bann devloper lotel, ouswa lezot proze, pou fer si ki i annan en semen pou Manm piblik, Seselwa e etranze, bann touris ki vin Sesel, pou zot kapab ganny akse san restriksyon avek tou nou bann lans Sesel.

Avek sa Mr Speaker, parey mon’n dir boner, sa Prozedlwa, i en Prozedlwa vreman konpreansiv, i annan bokou bann keksoz dan sa Lalwa ki bon pou nou pei.  Mersi Mr Speaker.

 

MR SPEAKER

Mersi Onorab Woodcock.  Mon adonn laparol Onorab Chantal Ghislain.

 

HON CHANTAL GHISLAIN

Mersi Mr Speaker.  Bonn apre midi tou dimoun.  Mr Speaker avan mon fer mon lentervansyon, mon oule en leklersisman, lo sa Physical Planning Bill. 

Mon pe zis demann Minis ki kote Physical Planning pou bann building, ouswa lenfrastriktir i antre dan sa Bill, avan mon fer mon lentervansyon.

 

MR SPEAKER

Mersi Onorab.  Minis, leklersisman.

 

MINISTER PAMELA CHARLETTE

Si  Onorab pe koz lo standar konstriksyon, sa i annan en regilasyon ki pou vin anba sa Planning Bill.  I apel Lalwa i en regilasyon lo standar konstriksyon.  Mersi.

 

MR SPEAKER

Mersi Minis.  Onorab Ghislain.

 

HON CHANTAL GHISLAIN

Mersi Mr Speaker.  Mr Speaker mersi pou ou leklersisman Minis.  Nou pe koz lo Physical Planning.  Mr Speaker nou’n tann koz lo lanvironnman, ki enportan dan okenn plan devlopman, dan okenn landrwa.

Me i annan en pwen enportan ki nou pa’n koz ditou lo la, nou pa’n tann nonm ditou lo la.  Sa se fire, rescue and safety.  Mr Speaker mon santi ki sa Lalwa, malgre i pe anglob kantite keksoz ladan, me sa bout napa ditou.

Par egzanp Mr Speaker nou koz lo Board, lo Board Planning lo konpozisyon sa Board Planning, napa sa konpozisyon safety.  Akoz demen i arive ou’n konstri dan, mete nou pran lavil Victoria.

Nou’n konstri, fini konstri tou,  i ariv en lensidan, pe enport ki lensidan.  Nou pa pou vwar ni Planning, nou pa pou vwar ni Mer Lavil la, se Fire and rescue ki pou vin la.

So zot enn bann konponan enportan ki mon a dir menm tre, pli enportan pou kapab form parti Lotorite Board Planning e osi pou form parti dan sa Bill, zot bezwen annan en konponan ladan.

Mr Speaker zot in nonm, menm zot in mansyonn bann diferan regilasyon ki pou fer, ki pou annan, regilasyon lo lanvironnman, regilasyon tou sort regilasyon.

Me napa sa regilasyon fire and rescue pou dan fason ki en building ouswa en lenfrastriktir i ganny, i devret ganny konstri, ki devret safe, ki devret, ki menm bann fireman i kapab ganny akse avek, san ki zot bann dimoun i ganny, zot lavi i ganny an danze, i ganny met an danze.  Mr Speaker mon vwar sa i enportan, and sa i bezwen ganny enkli dan sa Bill.

Mr Speaker mwan mon pe koz koumsa, akoz dan tou sa bann, tou sa bann Departman ki nou’n koz lo la, la,  napa enn ladan ki annan lekspertiz lo safety fire avek rescue, apard ki Fire and Rescue Services Agency.

Zot ki annan e se zot ki bezwen donn laprouvasyon pou nenport ki keksoz.  Mr Speaker nou’n koz osi lo so, alors dan seksyon 9.  Mon pe demande ki SFRSA i ganny enkli lo Board Planning. 

Mr Speaker nou’n vwar osi ki lavil Victoria dapre konpran, i dapre en reser ki ti’n ganny fer, Lavil Victoria i en lavil avek pli gro risk an se moman.

Depi kot son Por an desandans partou.  Sanmenm sa ki nou vwar poudir, so Planning Authority i bezwen, SFRSA i bezwen lo Board e i bezwen pran desizyon li osi ladan.

Mr Speaker nou’n koz osi lo, lo bann building ki deza aktyelman.  Ler i annan change of use, zot lenportans akoz zot bezwen lo la, akoz mon pe donn lenportans akoz zot bezwen lo la.  Ler i fer change of use.

Zot pe, sa lazans i a pe eksprim konsern ki aparaman zis dan lavil Victoria zot in kapab vwar, i annan omwen apepre sa ki zot in dir mwan.

I annan apepre 3 spa dan lavil, ki zot, zot servis i anler lo 3enm or katriyenm letaz, e zot annan an servis dan zot, dan zot building, dan zot landrwa bann boutey gas.

And zot tou zot konnen poudir boutey gas i sipoze de anba.  Ariv en lensidan, sa bann dimoun zot ava sorti, what about sa bann zofisye ki bezwen al tenny sa dife, ki bezwen al tir dimoun anler? Pe enport.  I pa kapab zis dife, pe enport tou keksoz ki pe arive.  Mon pe donn lenportans, akoz Fire and Rescue i devret lo la.  Mr Speaker nou’n koz  osi akse avek lans.

Dizon par egzanp, wi ou dir donn akse, i donn sa landrwa la.  Me sa dimoun ki ansarz safety i bezwen konnen poudir sa landrwa kot pe, ki sa envestiser in donnen, i bezwen safe pou tou dimoun!  So zot bezwen lo la.

Mr Speaker i annan bann building anvil an se moman ki i pe fer renovasyon.  And mon vwar zot pe servi en, en sirfas ki apel cladding.  I paret mwan en nouvo, en nouvo fason pou fer bann building pou sa, apart met tiles lo la.  Be eski nou ti konnen ki kantite flammable sa, sa materyo i flammable?

L’Angleterre, Lonn ti annan dife dan enn sa bann building.  Enn son cladding ti brile.  Eski ler building i ganny met sa bann nouvo, nouvo akseswar ouswa nouvo keksoz lo la, la, nouvo teknolozi lo la.

Eski Fire and Rescue Service i ganny enkli pou konnen, poudir this is not to be used?  Napa?  So nou bezwen revwar sa.  Mr Speaker building ki pe azout letaz lo la.

Bann nouvo building ki pe azout bann vye building, ki pe azout letaz lo la.  How safe it is?  Eski Fire and Rescue Services i konnen?  Ouswa eski zot in ganny konsilte?  Apre zot in nonm tou bann regilasyon ki devret annan.

Zot pa’n nonm regilasyon pou sa fire and safety services pou building.  Lafason ki en laport i devret ganny mete.  Lafason ki sa laport, ouswa sa staircase pou mont anler i bezwen ete.

Si sa enn ki spiral ki grander i devret ete.  So Mr Speaker nou bezwen rod en fason pou kapab fer antre sa, sa ladan.  And Minis i bezwen dir nou kote regilasyon Fire and Rescue Services pou antre an se ki konsern bann building.  Mersi Mr Speaker.

 

MR SPEAKER

Mersi Onorab Ghislain.  Mon ava donn laparol Onorab Francois Adelaide.

 

HON FRANCOIS ADELAIDE

Mersi Mr Speaker.  Bonn apre midi tou dimoun.  Avan mon konmanse, mon ti a kontan Minis avek son lekip pa pran nanryen personnel.

So nou pe diskite.  So nou dan en dyalog.  Mr Speaker, avek en tel Bill parey ki ariv dan sa Lasanble, mon pa pou kapab mank sa lokazyon, pou dir de pti mo.  Vi ki de pi ler mon’n antre an Lasanble, parey mon koleg;  Onorab Woodcock in dir, mon pa’n zanmen mank a en lokazyon pou mon kapab adres sa size later, sa size lakaz.  E tou bann devlopman pou distrik Baie Lazare.

E ozordi mon krwar zabitan Baie Lazare i devret santi zot fyer.  Akoz i annan en seksyon, seksyon 45,  ki mon ti fer li personnelman.  Mon ti ekrir en let, en open letter pou Prezidan, ki mon ti adres sa problenm.

E mon kontan ki ozordi nou’n anba seksyon 45.  Nou’n vwar poudir sa zafer akse lo lans in ganny adrese.  E ler nou pe gete, i pa mwan, me i lekip LDS ki mwan mon tonm ladan.

E savedir vreman nou’n anmenn en lot sanzman dan Sesel, kot tou sa bann letan, nou bann lans ti a pe ganny anklave, nou bann lans ti a pe ganny pran par, mon kapab dir etranze, me tou bann dimoun ki ti annan bann lentere personnel.

E ozordi nou pe vwar poudir i pe retournen, e Seselwa pou dezormen kapab al lo son lans, e rezouir son bann drwa.  Parey nou dir son bann aki.

E nou bann zanfan, mon kontan parske nou bann zanfan pou kapab ler zot grandi, kapab dir sa nou lans, e nou pou al ler nou anvi, kan nou anvi e napa personn ki pou fer nou per pou nou mont lo nou lans.

E sa mon krwar, mon krwar poudir i en gran reisi pou tou Seselwa an zeneral.  Mr Speaker Baie Lazare i enn parmi bann distrik parey mon’n dir, ki i annan bokou bann bout, bann bout later.

Swa rezidansyel, swa pou nou kapab fer bann biznes komersyal lo la.  Me nou trouve ki mon personnelman, mon pa’n zanmen vwar en plan distrik pou Baie Lazare, mon pa konnen si i annan.

E si i ti annan enn mon ti a kontan ki Minis petet a.  Akoz mon’n sey demande mwan.  Me selman zanmen mon’n kapab gannyen.  Petet ki Minis ti a kapab fer Lotorite Baie Lazare ganny en Plan.

Pou ki nou kapab asize avek nou bann dimoun.  Akoz Baie Lazare nou annan bann dimoun ki vreman konpran, bann devlopman later.

E ki petet zot ti a kapab kontribye pozitivman, e fer Baie Lazare vin sa distrik ki kapab prospere, kot nou tou nou a santi nou, nou a santi zot ere dan nou distrik.  Mr Speaker parey mon dir, Baie Lazare nou annan en ta later.

E Minis pou dakor avek mwan, ki ordinerman si ou dormi dan disab, ou espekte ler ou leve ou annan en, ou kapab annan de pti gren disab lo ou.  E sa i toutafe normal.

Be nou Baie Lazare ki nou pe trouve nou.  Nou annan later, nou annan propriyete, me zabitan Baie Lazare pa pe ganny sans pou zot akse zot, zot later.  Pou zot ganny en lakaz.

Nou annan sa point sistenm ki’n antre, e i pe fer li difisil pou nou bann zabitan, sirtou nou zenes konmans batir en fanmir, konmans batir zot lakaz.

Akoz i annan tro bokou konplikasyon ladan.  Me si nou ti annan nou, si nou ti annan nou en bon plan distrik, nou ti a konnen poudir, be ok, sa bann later la i pou ganny allocate pou fer en lakaz.

Sa bout la i pou ganny allocate pou vann later.  Sa bout la i a ganny allocate pou fer bann devlopman biznes.

E nou tou nou ti kapab petet donn nou lide e swazir kote nou ti anvi ale, e nou ti ava osi kapab ganny en bout later.  Me pou le moman sa i ankor difisil.

E mon ti a kontan, e mon ti a kontan ki sa Bill i a kapab fer sa, i a kapab fasilit nou lavi, sirtou pou nou bann dimoun dan Baie Lazare.  Mr Speaker, mon pou kontinyen ensiste lo sa, lo sa plan ki nou devret annan nou, en plan pou nou distrik.

Pran par egzanp, tou dernyerman Minis, atraver ou Mr Speaker.  Mon ti anmenn en kestyon dan Lasanble konsernan klinik Baie Lazare, nouvo klinik Baie Lazare.

E parey mon ti dir oparavan, ki Minis, ki Minis Adam in vini in dir nou poudir klinik pou fer lanmenm la.  Be atraver bann resers ki nou’n fer, nou’n trouve poudir sa later i riske, Gouvernman i riske perdi sa later, avek bann later ki pe ganny retournen.

So vwala akoz i enportan.  E nou, nou zabitan Baie Lazare nou ti a kontan konnen.  Kote nou klinik pou ete, nou ankor pe demande.  E toulezour dimoun pe demann mwan sa kestyon.

E vwala akoz mon krwar ki sa Bill ki la, i enn ki mon pou siporte.  E mon pou donn mon, mon pou vot an faver akoz i vreman donn lespwar zabitan Baie Lazare pou ki a fen, avek sa bann Lalwa, petet nou ava vwar plis, plis laklerte.

Mon 2enm pti pwen, mon pou tous lo la Mr Speaker.  I bann devlopman, bann later ki baliz avek lans.  Dan Baie Lazare, la yer mon’n vwar en garson ki’n telefonn mwan.

Li i reste Anse Gouvernman, Anse Gouvernman nou konnen i sa lans, i annan, in annan bokou konplent lo la.  E i mon dan Lasanble, mon’n konplent bokou lo la.

Akoz nou’n vann en propriyeter sa, sa bout landrwa.  Kot i ti deza annan en akse.  E avek sa Lalwa, i pa ti permet li pou li kit sa akse.  E Planning pa’n kapab fer nanryen.

E Planning pa’n kapab fer nanryen, akoz ti napa Lalwa.  E sa landrwa in ganny bare.  E mazinen nou, nou en kominote ki reste Anse Gouvernman.  Nou dir be ok, nou ava donn zot en akse.

Zot fer sa bann dimoun fer letour, sepa konbyen kilomet.  Kan zot ti kapab pran 5 minit, 10 minit pou ariv kot zot.  E sa in ganny arive anba ler Parti Lepep ti’n la.

E napa personn ki’n koz pou sa bann dimoun.  E atraver sa Bill ki la, parey mon dir mon kontan.  Se ki sa bann dimoun la ozordi zot pe tann mwan.  E Alex mon asire pe ekout mwan.

Akoz yer swar dan bann 8er, in fek al rod pampers pou son piti, i pa kapab tourn la, i bezwen al fer sa gran letour.  So akoz?  Se akoz nou’n mal fer nou plan, e napa semen pou dimoun pase.

Mwan mon pa blanm sa propriyeter mwan.  Mon pe blanm Lotorite, mon pe blanm Gouvernman.  Akoz ler sa bann devlopman ti pe fer, Gouvernman ti devret la, Gouvernman ti devret gete, sa ki responsab i ti devret la, i ti devret gete.

I ti merit mazinen poudir nou annan fanmir Seselwa laba.  Provided avek, avek en akse.  Mr Speaker, ler relative sa bann, ok.  Fer krwar sa bann dimoun zot ganny permisyon pou pase.

Ler relatives sa bann dimoun pou al vizit zot, kantite problenm.  So nou pa kapab kontinyen avek sa.  E mwan byen kontan ki sa pti bout in, in ganny adrese.

Mon ensiste lo sa zafer lans.  Akoz nou, nou distrik i balize avek bokou lans.  PS Jean Francois i konnen konbyen fwa mon’n telefonn li.

Nou napa zis sa 2 lans, e nou ankor plizyer lans, laplipar nou bann bout lans, si nou pa fer sir, si sa Lalwa pa vini, Baie Lazare dan detrwa zour nou pou annan nou at least 2 lans.  Akoz partou nou distrik i vreman zoli, ki bann etranze i kontan nou distrik.

Zot tou zot oule aste en bout pou fer en devlopman.  E byensir nou bann lans pou, pou ganny bare.  E atraver sa, mon kontan poudir amwen Baie Lazare i ava reganny ankor en souf,  pou dir nou bann lans i ava vin piblik.

E mwan mon ensiste konman sa Lalwa pe vini, mon ti a voudre ki bann Lotorite konsernen i fer li konman zot, konman zot priyorite.  Pou mont Baie Lazare.

Annou vini nou ava vin gete.  Mon’n deza poste lo Facebook kantite fwa.  Me mon pa’n kapab al plis ki sa, akoz ti napa Lalwa.  E la kan Lalwa pe vini, mon ti a voudre ki tou Lotorite konsernen i vini e donn Baie Lazare sa souf, ankor enn fwa.

Mr Speaker anba sa Bill osi mon kontan i annan sa bout akizasyon later pou lentere piblik.  Akizisyon later pou lentere piblik.  Mr Speaker, kot nou’n trouve ankor.  Nou ti annan en bout later ki Gouvernman ti acquire pou zabitan Baie Lazare.

Ki nou’n vwar dan 2000 an montan?  Anba gouvernans Parti Lepep, ki nou’n trouve?  Ler Mr Lucas ti pe fer son plan pou li devlop sa landrwa,  en sel kou i dir i pa pou kapab akoz later in vann.  Ki mannyer ou kapab pran en later ki dan lentere piblik, ou kapab pas anba vann!

Eski i korek?  Minis mon ti a kontan petet, mon’n trouve enn de bann Prozedlwa, enn de bann soz ki nou pou kapab dil avek sa.  Be nou, nou bout later Baie Lazare la Anse Poule Bleue la, ki nou pou fer avek?

Zot donn nou, zot pran avek en prive, zot dir zot donn dimoun Baie Lazare.  Apre zot vol nou, zot vann avek en boug prive.  Akoz larzan.  Be eski i byen.  Oli sa dimoun la ki sipoze veye, pou dir sa later pa sipoze ganny vann?

Mr Speaker, mon dakor nou reste en pe dan, en pe anler laba, me pa vol nou koumsa.  Ou konpran?  E mwan mon ti a voudre, mon i a kontan ankor ki Lotorite konsernen i adres sa sityasyon akoz nou pa kapab tou lazournen nou pey lepokase.

Biznesmenn sa ki annan kontak, zis i ganny larzan.  Nou, nou ganny frenmen, nou ganny, nou pa kapab.  Ou konpran? Mr Speaker mwan mon vreman believe, mwan moon vreman believe ki si sa Lalwa ler nou pou fini, nou pou debat lo la ozordi,  mon konnen i pou ganny laprouvasyon mazorite.  E sa Bill i pe al anler direkteman kot Msye Faure.  Mon ti a kontan Minis, vi ki ou asiz dan Cabinet of Ministers.  Fer sir ki sa i vin en priyorite.

Fer li vin en priyorite ki Msye Faure i pa pran sa Lalwa, i a pran i a met ankor dan tirwar parey larestan.  E ki i ava desid lo la, e i ava sinyen, i ava fer li vin Lalwa.  E apre nou ava vwar rezilta.

Mr Speaker anba sa Lotorite, anba sa Lalwa, mon kontan i annan sa bout pouvwar ki sa Lotorite i annan.  Mr Speaker napa okenn landrwa ki mon’n vwar anba sa Lalwa, ki dil avek bann zafer gous.

Pa pran mwan mal personn.  Akoz sa i en keksoz ki monte partou kot ou pase.  I dir ou kot Planning, fodre gous marse!  Pou ou ganny en bout later, fodre gous marse!

Pou ou kapab fer en building monte fodre.  Mr Speaker nou pa kapab.  Mwan ti a voudre ki Minis avek tou son bann zofisye i pran sa largiman ki mon’n mete o serye.

Akoz bokou Seselwa, sirtou bann seselwa ordiner.  Pa pe ganny sans far devlopman. Akoz i napa ase larzan pou pey gous!  E mon krwar sa nou devret arete, Mwan mon pe koz pou mwan piblik.  Akoz mon piblik ki’n dir mwan!  E mwan mon ti a voudre ki sa, enn fwa pour tou, nou adapte en fason travay ki byen.  E kot tou Seselwa i a benefisye.  Mr Speaker, ankor enn fwa mon pe get sa Lalwa.  En Lalwa ki pou tou Seselwa.

Mon ti a voudre ki Minis, avek son delegasyon, i fer sir ki sa Lalwa i pa zis pou bann parey mwan!
Me pou bann Mr osi ki annan ase larzan.  Ki ler i annan en landrwa nou dir li, ou pa pou kapab devlope.

I pa pas deryer i a peye apre nou a vwar devlopman.  I konmanse.  Mon ti a kontan si en Lalwa i aplik pou mwan, i aplik pou tou dimoun.  En sel Lalwa pou tou Seselwa e pou tou etranze e pou lemonn antye!

 

(APPLAUSE)

 

HON FRANCOIS ADELAIDE

Mr Speaker parey Onorab Lemiel in dir, mwan osi mon ti a kontan petet trouve kote, i annan en bout pou bann later zeritye.  Akoz dan mon distrik osi nou annan bokou bann later.

Me ki pe ganny anpese devlope akoz i bann zeritye pa pe tonm dakor ek kanmarad.  Be mon krwar si nou ti kapab adres sa,  i ti pou fer ki bokou plis dimoun ti pou ganny bokou plis later.

E petet Seselwa ti ava viv en meyer lavi.  Mr Speaker mon byen kontan ki Minis i pa’n mank lokazyon pou li dir poudir sa Bill ki’n vin dan Lasanble, set en Bill ki pa pou pran okenn faver politik, okenn ras larelizyon.  E mon ti a kontan fer kler avek bann zabitan Baie Lazare ozordi,  ki zot kapab kontinyen, siport LDS.  Akoz anba sa Bill ki nou pe anmennen la, napa nanryen ki pou anpes zot ganny en bout later, si zot LDS.  Konparab avek US, nou tou nou egal.

Ou dan Katolik, ou dan Protestan.  Nou tou nou egal anba sa Lalwa.  So napa en Lalwa pou LDS, en Lalwa pou, pou US.  E mon ti a kontan ki tou MNA ozordi i koz ek zot DA.  Dir li napa sa zafer ou pa ti vot pou mwan!  Mon pa pou kapab fer sa.  Akoz i ankor pe persiste.  E mwan i annan dimoun ki call mwan, i dir mwan, nou pa pe ganny asiste.  Akoz MNA i dir ou pa’n vot pou nou, DA i pe negliz nou!

Mon krwar in ler pou nou arete e nou viv konman frer, konman Seselwa.  Mr Speaker mon pou finalman.  Finalman mon pou enplor avek Minis.  Avek tou son delegasyon ki in vin avek.

Pou nou bouze, e pou nou pran en lepa ki pou vreman benefisye nou popilasyon.  Ki pou vreman benefisye nou Nasyon.  Ozordi nou’n ganny nou en zoli bout travay.

Malgre pou annan en pe amannman nou pou fer, me enn ki i annan lespwar.  Me annou kontinyen donn dimoun sa lespwar.  Ler nou telefonn zot, pran zot telefonn, pa fer nou espere pou nou kapab konnen kote nou stand, kote plan later i ete.

Pa fer nou espere ziskan ler nou nepli kapab.  Zis telefonn pe sonnen, me personn pa pran.  E Mr Speaker mon pou dir Minis poudir mon pou donn li mon laprouvasyon, mon pou vot an faver sa Bill.

E mon pou ed li, pou li kapab fer, realiz sa rev ki Seselwa depi lontan ti pe rode.  Mersi Mr Speaker.

 

(APPLAUSE)

 

 

MR SPEAKER

Mersi Onorab Adelaide.

Bon avek sa nou ava pran en break, nou ava retournen 4.15, pou nou kontinyen deba lo Physical Planning Bill 2019.

 

(BREAK)

 

 

MR SPEAKER

Bon nou ava kontiny nou travay entervansyon lo Physical Planning Bill ki’n ganny prezante par Minis Charlette e mon ava donn laparol Onorab Wilbert Herminie.

 

HON WILBERT HERMINIE

Mersi Mr Speaker.  Bonn apre midi Mr Speaker, koleg Onorab e tou dimoun a lekout.  Mr Speaker mon pran laparol lo sa Bill ozordi mon pou apport mon kontribisyon Mr Speaker sa Bill Physical Planning i en Lalwa tre modern ki pe met nou azour avek kominote enternasyonal.

En Lalwa ki pa pe fer faver okenn personn ki pou gid travay Lotorite Plan e gid devlopman dan Sesel an zeneral.  Sa Lalwa li menm in ganny fer bokou konsiltasyon lo la sirtou sa bout lo plan devlopman later or land use plan.  Mon pou santre mon lentervansyon lo bann pwen kle ki’n ganny sanze dan sa Lalwa pou notifye Manm piblik kwa ki sa Lalwa pe anmennen.

Mr Speaker enn bann sanzman mazer ki’n arive anba sa Lalwa se ki pouvwar Minis in ganny redwir dan vye Lalwa Minis ti annan drwa aprouv plan e osi bann appeals bann plan ki pa ti aprouve ti al kot li pou li kapab pran desizyon lo la.

Me anba sa nouvo Lalwa sa pouvwar i nepli ek Minis me sa pouvwar i pou al avek en Board ki pou appel Appeals Board ki pou ganny kree par Prezidan Larepiblik.  Tou bann konsern ou rezeksyon bann plan ki pa’n aprouve pou direkteman ganny adrese par sa Board e sa pou anmenn plis latransparans dan ki mannyer bann desizyon i ganny fer.

Sa osi pou ede tir sa persepsyon ki i annan politik dan tou keksoz e sa Board i ava en bon lide pou tir sa bann persepsyon e pou anmenn plis laklerte dan travay Board Planning Authority. 

        Mr Speaker en lot pwen valab ki’n ganny levek in ganny pouse anba sa Lalwa ki nou pe diskite ozordi, se lo kote kantite lannen ki en plan i valid?  Anba sa Lalwa i pe fer provizyon pou ki en plan ler in ganny aprouve u ganny i valid pou en letan 5an ki sa i anliny avek plan osi ki Gouvernman i donn bann piblik an zeneral pou zot devlop zot later.

Sa i a fer li pli fasil pou zot pa bezwen al rod en lot kot Planning pou rod en lot renouvle zot plan so pandan ki zot pe fer zot devlopman sa peryod 5an ki ler zot in ganny zot later, sa bout Lalwa i osi i a fer sir ki zot plan i valid pou 5an. E sa i a ed nou bann dimoun ler zot pe fer zot devlopman pou zot konnen ki konmela sa letan validite i pou 2an e avek sa nouvo Lalwa sa pou fer li valid pou 5an.  Sa i a benefis ki bokou dimoun ti a pe espere.  Mr Speaker en lot pwen ankor ki annan bokou ki’n anmenn bokou deba dan sa Lasanble lo sirtou lo kote planning li menm i sa bout akse lo lans.

Sa bout akse ek lans, i en size ki’n ganny nou debate plizyer fwa dan sa Lasanble e Gouvernman in ekoute e in met sa provizyon dan Lalwa kot in fer sir ki pa zis ganny akse ek lans me osi ganny li lo kote later pa lo kote lakot sa i en provizyon ki mon krwar i primordyal i bout pli bon dan sa Bill akoz sa ti annan bokou deba e deba nasyonal lo sa size pou donn akse lepep Seselwa avek zot lans.

Dan sa Bill i fer provizyon pou Gouvernman antre an negosyasyon, avek bann propriyeter sa bann landrwa ki baze avek lans swa pou

(1) fer exchange lwe ouswa pou aste sa propriyete pou donn en bout akse a lans pou nou bann pep Seselwa.

Sa i en tre bon lide e i en tre bon mezir ki mon krwar tou bann Manm pou dakor avek.  I en mezir ki avangard ki protez nou bann Seselwa dan lavenir kontinyen ganny akse avek lans.

Mr Speaker en lot pwen ankor ki’n ganny tous lo la, se lo kote bann building ki nou dilapilated building ; bann building ki’n ganny abandonnen ki zis la an se moman ki mannyer nou konnen bokou bann akt vandalizm i ganny fer dan sa bann lokasyon.  E dan sa Lalwa i enkli sa osi tou kot bann building ki’n ganny abandonnen Lotorite Planning i annan sa pouvwar prezan pou either premyerman ekri sa propriyeter pou dir zot, ki ou pa kapab kit sa building dan sa leta koumsa.

Ou si nanryen pa ganny fer, zot kapab annan sa pouvwar pou demoli sa building e netway sa landrwa fer li vin prop ; ki nou elimin sa bann aktivite dan sa bann landrwa e sa i pou protez nou fitir zenerasyon demen.

Mr Speaker en regilasyon i bezwen annan ledan e sa en keksoz ankor ki sa Bill in touse akoz en drwa in fer sir ki’n donn ledan Lotorite Planning pou fer son louvraz.  Bokou mezir in antre ladan nou war refizyon si sa propriyeter i refize donn akse ek lans, Planning i annan sa pouvwar la pou ziska fine ziska R1milyon.  I annan ankor lezot fines ki’n antre lo la ki’n fer li vin signifikan pou bann dimoun ki’n kas Lalwa ki fer bann building ilegal ki refize rod planning approval pou zot fer sa bann building e zot pa pe les bann zofisye Planning antre lo sa propriyete pou zot kapab vin get sa bann devlopman.

Tousala in ganny kouver anba sa Prozedlwa e sa i en bon siny ki Planning pe donn son bann zofisye ledan pou morde pou fer sir ki Lalwa i ganny respekte e sa i en bon pwen ki nou war Planning Authority in met dan son Lalwa ki’n vini.

Osi keksoz ankor ki ase remarkab ki Planning in met dan son Lalwa se bann sou komite ki pou deal avek bann diferan kalite devlopman, bann Komite Teknik sa parey nou war bomaten pou fer sir ki i annan bann keksoz ki ler konstriksyon pe ganny bann prosedir ki ler konstriksyon pe ganny fer, ki sa i ganny sa bann Komite Teknik zot osi zot a sivre sa bann konstriksyon pou fer sir ki,

(1) survey in ganny fer e ki fondasyon i fer a la standar bann keksoz koumsa.  E sa i primordyal dan any devlopman ki ganny fer.  E sa nou kapab dir chapeau a Planning Authority pou sa travay, pou met sa bann sou Komite, pou deal avek sa bann sityasyon, ki kapab leve pandan bann konstriksyon.

E osi in detay bann lanniy kler pou bann konsern ki dimoun i kapab leve lo kote avil in met tou sa bann sityasyon sa bann evantyalite dan Lalwa.  E osi lo kote fines e stop notice sorry in met sa bann detay dan Lalwa pou eklersi e fer sir ki tou dimoun i konnen kan zot pou kapab kan i pou ganny stop notice e kwa ki zot bezwen fer.

Mr Speaker mon kontan pou war ki dan sa Lalwa bann regilasyon ki ti la avan in ganny mete dan sa Lalwa ki la, me selman kekfwa nou bezwen annan en konversasyon ler Minis pou reviz sa bann regilasyon ; tel ki regilasyon lo devlopman pou dansite later dansite devlopman.  Konmela nou war ki bann devlopman i pe dir ou zis apepre 50poursan ki lo ou later, me sa i en keksoz ki zot kapab pran pou met dan regilasyon ; vi ki nou war ki later i limite e bokou paran i kapab donn en permission to build enn zot Manm fanmir or zot zanfan pou devlop sa later.

E sa bann keksoz ki mon krwar i devret ganny pran dan regilasyon.  Sa size dansite lo devlopman pou ed dimoun kapab rezouir zot bout later plis ki i été konmela, vi ki 50poursan devlopman lo ou bout later i vreman en keksoz ki en pe limite.

Lot pwen ankor anba regilasyon ki mon pe sizere ki Planning Authority i get ladan se lo encroachment la nou pe koz vertical encroachment ler dimoun pe fer en devlopman pres obor son vwazen, kot i annan encroachment vertically ki bar sa view sa dimoun.  Sa osi mon krwar i devret annan en konversasyon lo la, pou kapab met li klerman dan regilasyon, ki mannyer bann prosedir bann dimoun i bezwen pran pou si sa bann evantyalite i arive e kote zot pou bezwen ale.

E mon koleg osi in tous en bout ankor ki ase enportan lo kote fire e sekiriz lakaz kont dife, mon krwar sa osi tou i en konversasyon ki bezwen ganny fer. Anba regilasyon i devret klerman state ki mannyer sa bann mezir pou ganny pran e kwa ki dimoun pou fer e ki rol Fire Agency.

Mr Speaker osi en lot keksoz ki mon krwar i devret ler Lalwa Kod Sivil i pase, en lot keksoz ki zot devret bezwen mete dan regilasyon se ki mannyer pou deal avek sa issue later zeritye.  Sa mon konnen i pou ganny pouse dan Sivil Kod me selman i pou directly afekte zot regilasyon lo devlopman.  E sa osi mon krwar ki Planning Authority ler pe fer zot regilasyon i devret take sa into account.

Sa osi ler nou pe koze nou pe koz osi lo wayleave and right of way, ki apre ki sa Sivil Kod i ava ganny pase, i ava ganny diskisyon i ava ganny fer Planning osi tou ler i pe fer sa regilasyon i devret pran sa an konsiderasyon lo fer regilasyon lo ki mannyer pou egaliz permission to build and right of way.

Mr Speaker ler nou gete sa Bill vre i en Bill ki modern ki pe anmenn bokou pou devlopman pei, me ankor i devret pli pike sirtou dan regilasyon, akoz bokou keksoz i ganny dir akoz sa i an gro prezan sa bann regilasyon mon krwar avan ki i vin into effect nou kapab ganny sa konversasyon ek Lasanble.  Akoz i annan en bon pe keksoz parey mon koleg Onorab Lemiel in dir lo kote kontrakter, nou war sa bout lo la mon osi tou mon konnen sa i vin anba regilasyon, me selman i enportan pou nou kapab moderniz nou fason ki konstriksyon i ganny fer dan pei.

E osi lo kote en pwen ki mon krwar zot ti pe tous lo la mon krwar zot in fer konversasyon ek CEO Planning, lo kote online submission, ki mannyer zot pou regilariz sa online submission vi ki konmela nou pa kapab siny elektronikman.  E osi i en konversasyon mon krwar ki nou bezwen ganny fer ki mannyer sa bann submission pou ganny egalize ki sa i ava kout letan pou al lo counter pou fer submission. E i ava speed up sa process planning application and submission and approval, ki fer li pli fasil pou mouvmante dan sa letan modern.  E osi tou sa fasilit bann prosedir appel vi ki i annan bokou kontansyon ennler sirtou ler i annan bann refusal. So sa i en lide ki nou kapab diskite sirtou anba regilasyon.

Mr Speaker sa Bill li menm i en Bill ki mon krwar i pou tous i pou amelyor lafason ki devlopman i fer e i tous en pe lefitir.  Mon krwar nou pe al dan bon direksyon e mon felisit bann teknisyen bann zofisye ki’n travay lo sa Bill e mon pou demann tou bann Manm koleg e tou lede kote latab pou apport sipor a sa Bill e pou sa Bill.  Mersi Mr Speaker.

 

(APPLAUSE)

 

MR SPEAKER

Mersi Onorab Herminie.  Onorab Ferrari laparol i pou ou.

 

HON JEAN-FRANCOIS FERRARI

Mersi Mr Speaker.  Mr Speaker mon pran laparol ozordi lo en Bill ki mon vreman enterese avek e bann Manm Bills Committee zot ava remarke ki mon’n otan ki mon kapab mon asiste zot rankont.  Akoz mon ti anvi edik mon lekor lo sa Lalwa e konpran byen ki mannyer ki mannyer nou pe propoze ki sa Lalwa i ganny aplike, i ganny fonksyonnen a lavenir.

Mr Speaker prensip pli enportan ki mon ti pe sey dekouver e ki mon ti a kontan war dan sa Lalwa se sa prensip lazistis. Lazistis,  lekite e tretman legal pou tou dimoun.  Se sa ki’n gid mwan, akoz pandan plizyer lannen Mr Speaker, mon pran parol Minis ki Minis in dir poudir annan ou pa tro retourn lo sa ki pa’n marse dan lepase.  Me selman zis pou lo rikord mon krwar i enportan ki nou mete ki Lalwa Planning pandan sa bann dernyen 30 – preski 40an ti sanmenm sa enn bann Lalwa ki ti ganny servi pou fer plis malis dimoun.

Sanmenm sa enn bann Lalwa ki ti pli politik! E sanmenm sa enn bann Lalwa ki ti permet plis labi bann propriyete leta e koz bokou domaz pou nou pei.   Enn bann rezon akoz sa i leka, se ki sa Lalwa ki normalman i ganny servi dan bann pei demokratik, in ganny osi servi dan en pei ki pan respekte la demokrasi.  E mon ti a zis kontan dir ki enn bann keksoz ase ekstraordiner ki nou pe sanze kekfwa ek bann Manm ki pa konnen, se ki ozordi nou pe propoze pou nou sanz – en aboli en clause dan Lalwa Town and Country Planning Act e sa ti clause 10 (4) ki lir koumsa: ‘The decision the Minister on any application referred under this section shall be final and shall not be questioned in any court’’.

E sa i konsern tou bann aplikasyon. ‘‘for permission to develop land or all such applications of any class specified in the direction so any such application shall be subjected decision of the Minister’’.  E pandan tou sa bann lannen se egzakteman sa ki’n arive.

Mwan on personnelman mon sorti e mon’n war telman labi pouvwar e telman lenzistis ki ozordi mon welcome sa deba ki nou pe fer.  E mon ti a kontan dir ki menm si bann dimoun ki pe promot sa Lalwa menm si mon mazinen Minister ki ansarz lenfrastriktir lozman, menm si kot in fer en gran zefor mon santi poudir i annan telman landrwa pou labi ki finalman i annan de bout, ki zot in kit ankor ladan.  Me sa mon ava vin lo la taler akoz i enportan ki ler nou fer sa travay nou netway sa Lalwa e nou fer li osi bon ki posib.

Lo kestyon lazistis Mr Speaker, mon ti a kontan dir ki  mwan mon’n verifye mon ganny sans viv sa bann lenzistis personnelman e pa ki zot in afekte mwan me zot in afekte bokou dimoun otour mon e zot in fer soufer en kantite dimoun.

Ou konnen Mr Speaker ler ou mon ava akont ou sa.  Ler nou pa ti dan Lasanble dan 5enm Lasanble mon ti pran en travay akoz mon pa ti ganny anploye konman en special advisor dan en Minister, mon ti pran en louvraz pou mwan al okip en building anvil.  E ti en lager permanan avek Planning konnen ler ou dir avek Planning poudir ou ti a kontan konstri en pon oubyen larzi en pon lo en pti larivyer, Planning i dir ek ou, ou pa kapab konstrir lo sa larivyer.  Prezan ou vire ou dir ek li be tyonbo en kou,

‘’Capital City ki la lo biro Planning i pa dan larivyer son parking?’’

‘’Wi be sa ou konnen.’’  ‘’Butchers Grill i pa lo larivyer li?’’

‘’Wi be sa ou konnen. ‘’

De pwa de mezir.  E i en lager permanan ki mon menm mon bezwen a serten moman demann leskiz Minis, akoz mon’n antre dan son Minister avek telman lakoler, pou mwan kapab sey ganny- sey rezourd enn de difikilte, ki finalman Mr Speaker pa’n ganny rezourd dan Minister!  In ganny rezourd State House! Konmsi ki mon pe met sa devan zot pou mon eksplik zot ki mannyer sa zouti politik!  E mwan ozordi mon dir dan sa Lasanble sa zouti politik i ankor la ozordi devan nou !  De pwa de mezir!

I annan desizyon ki ganny pran dan Independence House. I annan desizyon ki ganny pran State House. I annan desizyon ki ganny pran mon krwar Maison Du Peuple.  I annan desizyon ki ganny pran lezot landrwa, me selman sakenn i ganny trete diferaman ! Si ou koneksyon i bon ou kapab fer si ou koneksyon pa bon ou pa kapab fer.

 

(Interruption)

 

HON JEAN-FRANCOIS FERRARI

Ozordi Mr Speaker les mon a dir zot en keksoz dan sa Lalwa ki nou annan devan nou la, i annan seksyon 20, sa propozisyon Lalwa sa 2 ki koz lo ‘good faith.’ Sa propozisyon Lalwa i dir: ‘‘ki bann Manm Planning Authority pou ganny proteze dan bann desizyon ki zot fer in good faith’’.

Mon kontan akoz mwan dan Bills Committee mon ti pe demande, kote nou kapab met sa Lalwa en pinisyon pou bann zofisye ki fer keksoz in bad faith !  Akoz mon war tro bokou bad faiths!   Mon’n war tro bokou movez foi.

Napa tro lontan enn mon zanmi ki pe fer en building Lari Bazar mon zanmi Jean-Pierre Morin ti apel mon en zour bomaten akoz zot ti dir li fodre zot tir tou son scaffolding akoz zot anvi get dan rigol, pou zot netway sa rigol.  E ler i tir enn sa slab pou montre zot poudir sa rigol i ti’n fini netwaye, zot pa ti konnen ki zot ti pou fer zot ti bezwen ale.  Sa msye depi sa zour i pe anmenn en konba ensesan, pou li kapab konplet son building!

Zot in pran later son papa, zot in sezi !  Zot in fer batar lo la !  Zot in lager !  Keksoz in al Ankour.  Zot in lager pandan de dizenn e de dizenn lannen zis pou rezon politik !  Finalman par persiste sa msye i ganny drwa fer building.  Selman zot dir avek li i pou fer 2 letaz, oubyen 1 letaz edmi, selman akote Mr Ramu i ganny drwa fer 4 letaz !  En pe pli o Mr Mukesh Valabhji i ganny drwa fer 4 letaz !  Sa se bann malis ki terib dan sa pei !  Zot ava dir ek li fer larsitektir Kreol. mon pa konnen si bann dimoun ki pas anba Barrel in war sa building ki Mr Mukesh Valabhji in fer Mr Anil Valabhji in fer.

Ki annan Kreol ladan ? Ki annan Kreol dan building dan building ki Mr Ramu in fer?  Zot servi sa Lalwa zis pou zot fer malis dimoun ! Zis pou anpes Seselwa devlope, zot anmar son lanmen.  E se sa ki nou pe war ozordi.

Ozordi konman nou pe koze la Mr Morin fek ganny en stop notice!  La, la apre midi.  Ok anmennen par en dimoun ki’n dir li,

’Mr Morin mon’n ganny Lord!’’

Ok, koumsa i marse sa. Koumsa ki marse.  Ou a dir ou menm lord ek lekel !  Se koumsa ki marse.  Napa problenm. Mr Morin depi 40an i pe lager – i pou kontinyen lager.  Mon pa konnen ki pou son outcome, me mwan mon pou lager dan bor li !

Me selman mon anvi dir avek zot, si sa desizyon pe ganny fer in bad faith, mwan mon anvi konnen dan sa Lalwa kote i annan sanksyon pou sa zofisye ki pe fer en pwa pou en dimoun, e en pwa pou en lot akote!  This is bad faith! 

 

(APPLAUSE)

 

HON JEAN-FRANCOIS FERRARI

Mon  anvi ou dir mwan dan sa Lalwa, kote ki mete ki sa zofisye pou ganny sanksyonnen?  Akoz Prezidan Faure li menm in dir in ler pou bann Direkter responsab pou bann desizyon ki zot pran ! Zot bezwen asim sa desizyon ki zot pran.  Zot pa pou kapab dir mon ti la mon pa’n konnen oubyen mon ti lo en trip aletranze.  Parey lot zour mon’n tande,

’Letan ti sinyen Assomption mon pa ti dan pei mon ti aletranze !’’

Ou ava pran ou responsabilite e mon anvi konnen dan sa Lalwa, kote nou pe met sa responsabilite.  Sa i mon premye pwen.

Mon 2enm pwen Mr Speaker nou pe met en Lalwa e nou konnen ki Sesel i toultan difisil pou administre en  Lalwa.  I toultan difisil, akoz politik i antre dan tou keksoz.  Kanmenm ou sey tir li i antre dan tou keksoz.

Nou annan isi dan sa Lalwa ki devan nou en sub-5 clause 19 ‘’disclosure of interest.’’ Planning i en keksoz ki tous tou dimoun dan pei antye ki nou pou fer dan ka kot nou annan si nou annan en CEO Planning ki li menm li i en Manm aktif en parti politik, ki pe fer konpanny dan en distrik, ler i pou bezwen pran en desizyon Planning dan sa distrik, mon anvi konnen dan sa Lalwa kote sa i deal avek?  Sa i enportan pou mwan!  Ok?

Akoz mon’n war tro bokou labi e mon pa kapab trust! Mwan mon pa pe azir lo trust, mon anvi war dan sa Lalwa, kote sa keksoz pou ganny fer.  Akoz i annan tro bokou labi.  Alors mon ti a kontan apard lefe ki en Manm i bezwen deklar son lentere, Lalwa i preskri byen kote e konman sa travay pou ganny fer, pou dan lendepandans e dan latransparans e dan lazistis.

Si ozordi Mr Speaker, si ozordi nou pe reget en Lalwa ki dan Commonwealth sa Lalwa Town and Country Planning  Act 1972, ti marse sa lepok, se akoz nou ti annan en Gouvernman.  Nou ti annan en civil service ki ti annan lafyerte pou zot azir endepandaman ! Nou’n perdi sa lafyerte!  Nou’n perdi sa lafyerte.

 

 

(Interruption)

 

HON JEAN-FRANCOIS FERRARI

E wi Onorab Pillay se pou sa rezon, ki mon papa in ale ! E se pou sa rezon ki bokou dimoun in ale dan sa Gouvernman !  ok?

 

(APPLAUSE)

 

MR SPEAKER

Order ! Order ! Order !

 

HON JEAN-FRANCOIS FERRARI

Alors mon papa  in kit byen trankil.

 

MR SPEAKER

Order ! Order ! Onorab.  Order !  Onorab Ferrari address the Chair.

 

HON JEAN-FRANCOIS FERRARI

Yes mersi Mr Speaker. Mon ti a kontan dir li atraver ou Mr Speaker mon papa i annan 90an byento, les li trankil!

Lot pwen Mr Speaker ; The powers of the Minister.

        Mr Speaker clause 37 i ankor donn en kantite pouvwar Minis. Tro bokou pouvwar Minis, e sa i en keksoz ki nou bezwen ankor fer en zefor lo la pou nou gete.  Akoz se atraver sa bann clause ki finalman bann zabitan La Misère, pa’n kapab ganny en dimoun ki’n responsab pou desizyon sa ki’n arive e polisyon zot delo laba anler.

Finalman tou responsabilite ti tonm lo Ascon. Akoz Minis sa lepok pa ti fer nanryen mal. Minis ti annan diskresyon pou li fer sa ki i anvi !  E i pa ti responsab devan okenn Lakour.

Alors Mr Speaker dan sa Lalwa deza ankor lo la dan seksyon 37 i annan seksyon 37 (2) ‘Minister may give directions. Minister may exercise powers conferred by this section, the Minister may decide as to the grant or refusal of the permission.’’ 37 (6).  Tro bokou pouvwar.

Mwan mon pe dir ki la dan sa 37(6) mon ti a kontan war ki Lotorite Plan i annan son Lotorite.  E Lotorite Plan pa vin subject to en pouvwar politik.  Se sa ki nou pe demande.  E mwan mon lapresyasyon e mon annan bann sizesyon ki mon pou fer dan Committee Stage, me selman mon ti a kontan met an notis, bann Manm isi, ki sa i en pwen enportan, ki nou gete ki mannyer a tou staz – a tou staz nou limit pouvwar Minis to the minimum. E mon dir ankor pa akoz mon pa fye enn mon konpatriyot – enn mon frer oubyen mon ser ki Minis.  Se akoz dan lepase in..tro.. ganny..abize ! 

Mr Speaker mon krwar la i al en pe tro lwen la.  En mon krwar Onorab Loze pe al en pe tro lwen e …

 

MR SPEAKER

Order ! Order !  Onorab, Order ! Bon en Manm pe entervenir annou sey fer nou mye pou nou pa enteronp li.  E sa bout kot nou anmenn fanmir nou anmenn papa en lot Onorab ladan, silvouple annou kit ater.  Ok ?  Onorab Ferrari kontinyen.

 

HON JEAN-FRANCOIS FERRARI

Mr Speaker be  mwan avek ou permisyon Mr Speaker –

 

(Off-Mic)

 

MR SPEAKER

Non kontinyen Onorab.

 

HON JEAN-FRANCOIS FERRARI

-avek ou permisyon mon ti a kontan ki o mwen i ganny reprimann pou sa bann keksoz ki i fer ! Akoz i en malelve !

 

(laughter)

 

HON JEAN-FRANCOIS FERRARI

Akoz i en malelve ! I en mank respe sa Lasanble !

 

 

MR SPEAKER

Kontinyen Onorab.

 

 

(Interruption)

 

HON JEAN-FRANCOIS FERRARI

Onorab Ferrari laparol i pou ou. Kontinyen.

 

HON JEAN-FRANCOIS FERRARI

Zot in fini?  Zot annan ankor komanter ? Onorab Pillay ou annan komanter?

 

(Interruption)

 

HON JEAN-FRANCOIS FERRARI

Non?  Ok.

 

(Interruption)

 

HON JEAN-FRANCOIS FERRARI

Mr Speaker avan mon fer mon konklizyon, mon annan en lot landrwa kot i montre mank lazistis.

 

(Off-Mic)

 

HON JEAN-FRANCOIS FERRARI

Les li i en malelve i pa konnen ki i pe fer les li !

 

 

 

(Off-Mic)

 

HON JEAN-FRANCOIS FERRARI

Les li Mr Speaker pa gat ou letan avek li.  Ok.  Mersi mon ava kontinyen Mr Speaker.

 

MR SPEAKER

Kontinyen Onorab.

 

HON JEAN-FRANCOIS FERRARI

Mon lot pwen se lo ki montre kot i annan lenzistis se lo sa pwen ki’n ganny levé deza, lo bann building ki ganny abandonnen, lo bann propriyete ki ganny abandonnen.  Nou konnen poudir si ou koneksyon i bon, ou kapab kit en building abandonnen sonny lera mannyer oule ; nou kapab koze dan Lasanble mannyer oule napa personn ki pou fer ou nanryen !

Get Mr Ramu Praslin kot Maison de Palme, ou konn byen mon fanmir i reste lanmenm la dan bor. Be i en laferm lera.  I annan en lotel dan bor.  Nou pa in koze dan sa Lasanble?  Napa en dimoun la lev en ledwa pou dir en keksoz avek Mr Ramu, ki i bezwen fer sa devlopman ! Selman nou ti pran later Lutta!  Nou ti pran later Khashoggi!  Tousala se bann keksoz konmsi i aplik pou serten dimoun selman pou lezot i pa aplike?

Nou kapab les tou sa bann keksoz abandonnen, vin en hazard pou nou dimoun, lo bor lans – dan bwa partou nou kapab lese sa bann keksoz, me selman ler nou anvi vin fer malis en dimoun, nou servi sanmenm sa Lalwa pou fer malis en dimoun.

Alors Mr Speaker mwan  mon lapel ozordi, avek bann Manm lo sa kote latab, akoz mon fini perdi lespwar ki lot kote zot kapab apard Onorab William ki mon konnen poudir li osi i konsernen par sa bann keksoz i konsernen par sa bann desizyon, ki pa zis.

Mon pe demann bann Manm ler nou konsider sa Lalwa annou sey gete ladan ki mannyer annou get li avek en lizye lo ki mannyer nou kapab elimin malis, elimin lenzistis.  E annan en Lalwa Planning ki promot devlopman.  Ki ankouraz en dimoun envestir son larzan e fer larzan pey son taks ; anploy dimoun.  Se sa ki nou ti a kontan war!  Dan en pei kot later i pa sifizan ; kot nou pe dir nou bezwen konble ankor.  Ler en dimoun i dir ou – enzenyer i dir ou, be la nou kapab met 3 letaz oubyen nou kapab met 4 letaz, be ankouraz sa msye pou li fer son devlopman !  Sa larzan i pa ni pou ou, i pa ni sorti dan ou pos i pa ni fermal i pa ni fer ou soufer be ankouraz li.  Parey ou ankouraz Mr Laxmanbhai pou met 4 letaz  danbor parking lo stadium ankouraz enn ou frer Seselwa! Parey ou ankouraz en labank pou met son 4 letaz dan bor ankouraz ou frer Seselwa !

Pa akoz i pa mazin parey ou pa akoz ou krwar i lo lot kote politik ki ou bezwen pini li!

 

(Interruption)

 

MR SPEAKER

Onorab Johan Loze dernyen fwa ou enteronp sa Lasanble ok?  Dernyen fwa ozordi ou pou enteronp sa Lasanble – si ou kontinyen mon pou bezwen call you to order e mon ava fer Sergeant pran aksyon met ou deor – ok?

 

(laughter)

 

MR SPEAKER

Mon pa pe koz ankor.  Onorab Ferrari ou kapab kontinyen.

 

HON JEAN-FRANCOIS FERRARI

Mersi Mr Speaker.  Mr Speaker ki ou’n dir ou laniverser ou pe al ganny 26an?  Pa tou bann Manm ki’n grandi Mr Speaker, i annan en bann Manm ki ankor zanfan.

Anyway Mr Speaker mon ti pe dir ki sa Lalwa i bezwen ankouraz devlopman.  E sirtou i bezwen ankouraz nou bann frer Seselwa.  Nou pa kapab zis pini dimoun! Nou pa kapab pran bann desizyon baze lo bann rezon politik, oubyen lo bann rezon -mwan mon ti ganny dir ki dan lavil Abu Dhabi in fer Plan Konpreansiv lo ki mannyer pou devlop lavil.

Mon ti ganny montre par Minis Lionnet en video dan son biro, ki montre ou poudir ou konmans la, la ou pou met 3 letaz – la ou pou met 4 letaz la.  Mon ti ganny montre sa.  Dan bor simityer Bel Air pa ti sipoze annan 4 letaz. Ti sipoze annan 4 letaz mon krwar – sa ki Mr Lionnet Minis Lionnet ti appel (CBD) – Central Business District. Laba  ki ti sipoze annan 4 letaz. Ler mon al dan bor simityer Bel Air ma mon war 4 letaz.  Ler mon get lot kote Lari Bazar mon war 4 letaz.  Konmsi kwa dan sa Lalwa ki ler zot dir nou pou fer National Development Plan pou fer plan land use plan kwa ki fer mon krwar poudir zot pou fer li e poudir zot respekte li?  Kwa ki – ?

Premye dimoun ki ti fer plan devlopman land use plan Sesel ki apel Hulge.  Mon asire Mr Biscornet i konn li byen akoz Mr Biscornet i en boug ki Mr Hulge i en Vyetnamyen – in fer plan land use plan.  Nou’n pran nou’n  met dan ti war nou pan fer nanryen ankor.  Akoz ? Nou anvi toultan gard sa pouvwar pou nou deside ki nou pou permet Onorab Gill fer, me selman ki nou pa pou permet Onorab Georges fer. Ki nou pou permet Onorab Henri me selman nou pa pou permet Onorab De Commarmond, akoz sa i enn nou zouti.

Alors annou profite la ki nou la e ki nou la e ki nou pe sey met lord dan en Lalwa.  Annou met en lord ladan ! Annou fer sir poudir nou met sa lazistis! E mwan mon pou debout parey mon’n dir pli boner dan bor nenport dimoun – land use plan ki ganny peze .Nou’n ganny peze avek bann Polisi Mr Speaker.  Polisi in ganny servi pou pez nou. Granmersi Lakour in dir avek zot, poudir sa Polisi sa zot ava al get en lot landrwa.

E menm parey isi, e la kot mon war en pe malonnekte, ler mon war ladan poudir, zot sey fer li re antre anba seksyon 24 ‘‘The land use plan shall be, is updated and shall not be changed except on the gounds of policy and developments strategies’’.

Minis mon ti a kontan enpe plis presizyon lo la, akoz Polisi and development strategies ; – premyerman Polisi Lakour pa oule.  Development strategies i politik akoz nou napa en national strategy akoz nou pa fer en keksoz konmsi  ki pou benefisye tou Seselwa ?  Se sa ki mon pe demande.  Alors annou met nou latet ansanm.  Annou fer fason pou nou ;

1) annan en bon Lalwa

2) ler nou anploy bann dimoun pou aplik sa Lalwa nou pa al an deor sa ki sa Lalwa i permet nou fer.

Nou ankadre li byen dan en mannyer ki demen si en dimoun i demann en change of use ou konnen akoz ou pe donn li oubyen akoz ou pa pe donn li.

Ou pa bezwen fer en phone call pou ou gete kote si i pou gannyen oubyen si i pa pou gannyen.

Alors Mr Speaker mon zot kapab dir sa ki zot anvi si zot krwar mon imput improper motives, pou serten travay ki’n ganny fer dan Planning, mon repons se – wi Mr Speaker !  Mon pe imput improper motives.  I annan labi e i annan en kantite labi ki’n ganny challenge devan Lakour e i annan ankor ki pou ganny challenge dan ki sa bann prosedir ki i kontinyen ganny fer koumsa.  Mersi Mr Speaker.

 

        (APPLAUSE)

 

MR SPEAKER

Mersi Onorab Ferrari.  Bon i reste mon apepre 5 Manm lo mon lalis ki pa ankor koze.  Mon krwar ki depi ler nou konmans Lasanble, depi ler mon pran sa Chair mon ti dir la i en serten moman kot mon lalis entervenan pou fermen.  La ler mon anonse i reste zis 5 Manm, mon war ankor 4 lanmen ki levé –

 

(laughter)

 

MR SPEAKER

-ok ?  Bon i annan sa zwe tranpe.  Mon krwar nou pou bezwen deal avek sa zafer zwe tranpe.  Ok ?

Be anyway bann nouvo ki’n lev lanmen, mon ava demen bomaten mon ava repran zot non mon ava met lo lalis e apre mon ava ferm lalis ok ?  Nou pou aret la pou ozordi 5er – e nou ava repran nou travay kontinyasyon deba lo Physical Planning Bill 2019 demen bomaten 9er.

So Lasanble i adjourn e nou repran nou travay demen bomaten 9er.

 

(ADJOURNMENT)