::
Home » Verbatim » 2019 » Verbatim Wednesday 17th July, 2019

Verbatim Wednesday 17th July, 2019

NATIONAL ASSEMBLY OF SEYCHELLES

Wednesday 17th July, 2019

The Assembly met at 9am

National Anthem

Moment of Reflection

 Mr Deputy Speaker in the Chair

 

MR DEPUTY SPEAKER

Bon mon ti a kontan dir en bonzour avek tou bann Manm; tou dimoun ki pe swiv Lasanble Nasyonal ozordi Merkredi le 17 Zilyet, bann ki pe ekout nou lo televizyon lo radyo dan lakour lo rezo sosyal, bonzour zot tou.

Bomaten lo nou       Revised Order Paper nou’n fer en pti sanzman  opred yer kot avan nou al lo Public Reading bann Bill, nou’n enkli Prezantasyon en Papye e sa se en rapor ki’n ganny prepare par Komite International Affairs e sa i swivan sa demann par Lasanble Nasyonal; ki Lasanble atraver Komite, i ganny en pe plis lenformasyon lo prosedir e bann deroulman ki’n swiv, ki’n anmenn Gouvernman pour poz atraver LGB sa Mosyon pour apwentman en Anbasader. Alors swivan sa Komite in zwenn e i annan son rapor.  E alor nou’n enkli sa koman en item premye answit nou pour annan Public Reading bann Bill e byensir yer nou’n komans Referendum Bill e nou pour kontiny sa plitar ozordi. Answit dernyerman nou annan bann Mosyon. So vwala en pti pe travay ki devan nou e alor nou ava komans toudswit.  Me mon konnen Onorab Ramkalawan ou ti’n sinyal mon ou ti le laparol.

 

HON WAVEL RAMKALAWAN

Mr Speaker bonzour mersi bokou pour donn mon laparol. Bonzour tou mon bann koleg Onorab e tou dimoun ki pe swiv.

Mr Speaker yer bomaten nou’n annan en long sesyon avek Lapolis, lo kote sekirite e enn bann pwen ki ti ganny fer resorti sete plis kominike, e dezyenmman pour demann zot pou pran aksyon; rode lekel par egzanp sa dimoun ki ti a pe marse, ti a pe teoriz bann madanm.  E yer swar zisteman nou’n war Lapolis pe donn plis lenformasyon, pe kominik plis avek piblik, e dezyenmman zot in anonse ki poudir zot in aret sa dimoun dan apre midi.  Lo non LDS, mon ti ava kontan prezant nou felisitasyon e osi nou parol lankourazman, pour sa travay ki Lapolis in fer.  E nou dir avek zot kontinyen dan sa direksyon.  E sa dan li menm li i aport en pti gin soulazman pour nou pep, spesyalman bann madanm e ankor enn fwa nou re-afirm nou sipor pou tou bon travay ki zot fer. Mersi bokou Mr Speaker.

 

MR DEPUTY SPEAKER

Mersi Onorab Ramkalawan.  Lo mon lapar, lo lapar Lasanble Nasyonal, mwan osi mon krwar sa sesyon ki’n annan yer in montre bokou konsern par piblik an zeneral, e atraver zot MNA zot in eksprim konsern serye lo deteryorasyon sityasyon sekirite dan pei.  E sa devlopman byensir i en keksoz ki nou tou nou kontan antann, e byensir mwan mon swet zot tou le bon dan zot zefor, pour kontinyen lager kont krim e met sa sityasyon anba kontrol.

Bon nou pour kontinyen avek travay lo nou Order Paper. E alor nou pour al direk lo prezantasyon rapor IAC e mon pour donn Onorab Jean- Francois Ferrari laparol.

 

HON JEAN-FRANCOIS FERRARI

Mersi Mr Speaker. E bonzour tou bann Manm Onorab. Mr Speaker i fer mon plezir pour reprezant sa rapor avek Lasanble Nasyonal. Bann Manm Lasanble e ou menm Mr Speaker zot ava rapel ki Merkredi pase Lasanble ti pran desizyon pour sispann deba lo en Mosyon prezante par Leader Of Government Business.  E ki ti pe demann Lasanble pour konsider aprouv lapwentman msye Patrick Victor koman Ambassador-at-Large pour nou pei avek en lanfaz spesyal lo promosyon nou bann valer kiltirel.

Lasanble ti vote pour sa desizyon pour sispann deba lo baz swivan;

Vi ki ti mank klarite dan sa lapwentman ki ti pe ganny propoze, e ki ti neseser rankontre avek bann O Zofisye dan bann Minister konsernen pour rod sa bann leklersisman.

Sa latas ti ganny donnen avek Komite Zafer Etranzer dan Lasanble. An vi ki bann leaders dan Lasanble ti demande ki sa sityasyon i ganny rezourd o pli vit posib, Komite Zafer Etranzer  dan Lasanble, ti envit Sekreter Prensipal pour Zafer Etranzer e osi Sekreter Prensipal pour Departman Kiltir dan sa rankont lesanz e diskisyon. Sa ti ganny fer Vandredi pase. E International Affairs Committee ti envit tou bann Manm Lasanble  ki ti enterese avek sa size, pour zwenn nou dan sa rankont.

Mon oule a sa pwen remersye ou Mr Speaker koman Deputy Speaker, e osi Leader Lopozisyon e Leader Zafer Gouvernman pour trouv sa letan pour asiste sa rankont e sa lesanz. Zot kontribisyon in byen ganny apresye.

Nou konklizyon e rekomandasyon;

1) ki sa bann desizyon, ki sa bann diskisyon ki nou’n fer pa’n konsern a oken moman kapasite sa kandida  Mr Victor pour okip sa pozisyon Anbasader-at-Large, me sa diskisyon in konsantre lo sa kad dan lekel ti pe ganny propoze pour ki sa nominee i travay.

Komite a linanimite ki sa kad i bezwen ganny eklersi e byen determinen, avan ki lapwentman i kapab ganny fer.

2) Lo kestyon saler avek sa lapwentman Komite e tou son Manm in dakor ki anvi ki Constitutional Appointment Emolument Act i define klerman saler benefis e pansyon en Anbasader, ki enn normal ou enn spesyal notaman ‘’at-Large ‘’ dan sa ka sa lapwentman pa pour kapab ganny fer anba Lartik Konstitisyon 64(1) akoz sa i kapab anmenn konplikasyon legal a lavenir.

3) Bann Manm Komite e bann Sekreter Prensipal in tou ansanm konsider bann lezot opsyon pour sa lapwentman ot ki anba Lartik 64(1) notaman en Konseye Kiltirel dan Biro Prezidan Larepiblik oubyen en Anvwaye Spesyal Prezidan Larepiblik pour bann misyon spesifik.

4) Bann Manm in ensiste ki a lavenir konsiltasyon regilye i ganny fer ant Departman Zafer Etranzer e Komite Zafer Etranzer dan Lasanble, a sak fwa ki en lapwentman ki annan konsekans lo bann aktivite diplomatik i ganny fer.

E lo sa MOU ki egziste ant Zafer Etranzer avek Lasanble Nasyonal, Komite in deside pour drafte en lamannman ki pou ganny prezante dan sa direksyon avek Komite, avek Departman Zafer Etranzer.

5) Finalman tou bann partisipan e partener prezan dan sa rankont enkli bann Leaders Lasanble e bann MNA lo tou le de kote latab, ti deklare ki zot tou zot ti ava kontan vwar Mr Victor oubyen a lavenir okenn sitwayen Seselwa ki merite, ki sa dimoun i ganny eleve lo en pos enportan ki montre rekonesans pour son lakonplisman, e permet li promot lentere nou pei dan en an deor nou bann frontier. Komite Zafer Etranzer i alors agree a linanimite, ki bann Sekreter Prensipal pour met sa bann propozisyon Lasanble lo sa size devan bann lotorite Egzekitif avek bi pour trouv en solisyon rapidman.

Sekreter Prensipal pour Zafer Etranzer e Kiltir in agree pour raport progre ki zot fer avek IAC osito ki sa i posib. Mersi Mr Speaker.

 

MR DEPUTY SPEAKER

Mersi Onorab Ferrari. Mon krwar zot rekomandasyon i kler.

 

HON JEAN-FRANCOIS FERRARI

E Mr Speaker avek ou permisyon mon ti a kontan prezant ou avek en kopi sa rapor.  Mersi.

 

MR DEPUTY SPEAKER

Mersi Onorab Ferrari koman Chair IAC rapor i en rapor ofisyel i ava ganny sirkile avek tou bann Manm osi to ki Sekretarya i kapab fer sa e mon mazinen zot a fer li toudswit atraver email e posibleman pli tar lo en hard print. Mersi bokou.

Nou pour kontinyen avek travay lo nou Order Paper e nou pour al direk lo Second Reading Referendum Bill 2019, e mon ti a kontan alor envit, demann Parliamentary Clerk pour envit Vis-Prezidan e son delegasyon ki mon mazinen i parey pou Attorney Zeneral.

Lo speech list mon annan omwen 8 dimoun ki reste pour koze, me mon pare pou pran lezot non.  Zis relev lanmen mon’n war Onorab Aglae apre ou. Bon mon ti a kontan swet labyenveni Vis-Prezidan Vincent Meriton parmi nou e Attorney Zeneral Mr Frank Ally. E nou pour komans toudswit avek bann entervansyon. E mon ti a kontan demann Onorab Johan Loze pour fer son prezantasyon.

 

HON JOHAN LOZE

Bonzour Mr Speaker. Mersi Mr Speaker.  Ozordi bomaten mon ti a kontan re-fas mon lentervansyon avek Lartik 49 nou Konstitisyon ki lir;

‘’Democratic means a pluralistic society, in which there is tolerance proper regards for the fundamental human rights and freedom and the rule of law and where there is balance of power among the executive, legislature and judiciary.’’ Further Lartik 40 anba Fundamental duties i dir ou, ‘’It shall be the duty of every citizen of Seychelles to contribute towards the wellbeing of the community generally to strive towards the fulfillment of the aspirations contained in the preamble of the Constitution. ‘’

I devwar sak sitwayen Seselwa pour partisip dan la demokrasi Sesel! E la demokrasi Sesel anba Lartik 49 i ganny dekrir koman enn ki pluralistic.  I enkli partisipasyon tou sitwayen deza.  E sa i adres lezitimite Referendum dan nou pei pour komanse.  Mr Speaker annou par komans tonm dakor lo en keksoz byen senp – sa se ki lepep Seselwa i le sel sours pouvwar politik Sesel. Sa i premye keksoz.

2enm keksoz annou etablir klerman ki Lartik 50 nou Konstitisyon i dir.  Lartik 50 i dir ou, ’’There shall be a President of Seychelles who shall be the Head of State, Head of Government and Commander-in-Chief of the Defence Forces.’’

Annou dwell en moman lo sa premye bout, Head of State i ganny nonmen an premye avan Head of Government e Commander-in Chief.  Head of State i ganny prominans lo Head of Government ki esansyelman Sef Egzekitif. En definisyon senp pour Head of State se a Head of State or Chief of State is a public persona who officially represents the national unity and legitimacy of the sovereign state.’’ La aprezan mon pour digress zis en pti pe lo size.

Se zisteman la kot Prezidan Faure in lans son prensip ‘’Prezidan pou tou Seselwa!’’ Prensip ki’n donn nesans en Polisi ase kontroversyel, kot in elwanny son lekor avek zesyon son parti politik.

Pour li enkarn son rol koman Sef D’Eta an plen kot in ofisyelman reprezant Linite Nasyonal e lezitimite nou Leta Souvren i bezwen priyoritiz linite Nasyonal pei par lao politik partizan. En Prezidan pour tou Seselwa, Sef D’Eta Larepiblik Sesel.  Letan ki nou pe koz lo separasyon pouvwar ant le 3 brans Gouvernman, L’Egzekitiv, Lezislatif, e Zidisyer, sa menm separasyon pouvwar ki’n ganny mansyonnen yer, la ou a pe koz lo Lartik 66 nou Konstitisyon ‘’The Executive.’’

Lartik 66 i dir ou the executive authority of the republic shall vest in the President and shall be exercise in an accordance with this Constitution, and the laws of Seychelles.’’

Me pli enteresan ankor 66, (2) i dir nou, ‘’The executive authority vested in the President under this article, shall extend under the execution and maintainance of this  Constitution and the Laws of Seychelles, and to all matters with respect to which the National Assembly has power to make laws.

Sa menm separasyon pouvwar Mr Speaker. Lartik 66, (2) nou Konstitisyon i fer en mansyon kler brans Egzekitif. Me par kont Lartik 50 kot in proklanm Sef D’Eta, pa fer okenn mansyon okenn lezot brans Gouvernman. Sa lotorite koman Sef D’Eta i en Lotorite sengilye san okenn ekivalans dan nou Konstitisyon, ki’n ganny vested selman anba Lofis Prezidan. E la mon pe koz lo Lofis Prezidan e non pa lo Prezidan li menm.

La fodre nou kler. Largiman balans pouvwar ant le 3 brans Gouvernman ki Onorab Georges in anmennen yer, pa’n pran kont ditou le fe ki Lotorite Sef D’Eta ki presed Sef Gouvernman anba Lartik 50 napa okenn lot konparab dan nou Konstitisyon. Si nou bezwen ankor laprev ki sa balans delika ant le 3 brans Gouvernman pa sitan delika ki sa, annou pran Lartik 60 nou Konstitisyon.

Mr Speaker Lartik 60 i dir ou, ‘The  President may after obtaining the advice of the advisory Committee appointed under Article 61, grant to any person convicted of any offence a pardon by the free or subject to lawful conditions.’’ E dan son marginal notes i kareman apel sa ‘’power of pardon.’’ Power pa ni menm lotorite me kareman power.

I napa konparatif ant lofis Prezidan e Lasanble Nasyonal. E nou pe fer nou lekor en disservice si nou sey ensiste ki i annan. Lasanble nou annan nou rol Lezislatif pour zwe; nou annan nou rol oversight lo L’Egzekitiv pour zwe, e nou ranpli sa fonksyon koman en kolektif.

Sa ki nou napa se en rol Egzekitif. Me parkont Konstitisyon i konfye Lofis Prezidan avek serten pouvwar sengilye, e non pa kolektif. Alors lo kestyon, eski Prezidan i annan pouvwar pour inisye en Referendum?  Wi i deza annan.  Sa Bill ki devan nou pe zis donn en veikil anba lekel pour fer li legalman. Eski propozisyon Referendum sorti kot Lasanble ouswa sitwayen prive i devret ganny refer kot Lofis Prezidan? Wi mon pa war akoz non. Dan en lemonn normal, dan en sistenm ek kad gouvernans normal, nou prezimen ki tou dimoun pour deservi zot responsabilite dan en fason onnet.  Be dan ka ki en Mussolini ouswa en Hitler i ganny elekte parey Onorab Georges in fer sorti, yer la mon sizere ki nou fer kler dan sa Lalwa ki okenn aksyon pran par prezidan i pour subject to judicial review.  Senp!

Annou fer kler ki Prezidan pour napa en diskresyon absoli lo sa size.  Etablir sa klerman dan Lalwa e nou move on.

Mr Speaker dan en pri resers i montre ki dan Konstitisyon Sri Lanka e Sri Lanka i en pei ki son sistenm i parey pour Sesel ki vedir i annan li en Head of State, Head of Executive, Lartik 86 Konstitisyon Sri Lanka i dir ou,

‘’The President may subject to the provisions of Article 85 submit to the people of by referendum any matter which in the opinion of the President is of national importance. ‘’

Egalman dan Konstitisyon La Roumanie i dir ou, ‘’The President of Romania may after consultation with parliaments asked the people of Romania to express their will as to question of national interest by referendum.’’ Konsiltasyon me pouvwar pour refer kestyon i reste dan lanmen Prezidan.

Mr Speaker dan en dokiman entitile ‘’Guidelines for Constitutional referendum at national level, adopted by the Venice Commission at its 47th plenary meeting Venice le 6 Zilyet 2001, i dir ou klerman Constitutional Referendums are taken as referring to popular votes, in which the question of partially or totally revising a states constitution, is asked irrespective of whether it requires voters to give an opinion on a specific proposal or constitutional change or a question of principle.’’

Sa i kapab take place koman following a popular initiative it can be called by an authority such as parliament itself or a specific number of members of parliament.’’

3) The Head of State.’’

Sa ki mon pe fer resorti se ki la fason ki sa Lalwa ki devan in ganny drafte, e sa 2 Provizyon ladan – enn – ki Prezidan i refer kestyon avek Komisyon Eleksyon, e ki Prezidan li menm i kapab put forward en kestyon lo en issue Konstitisyonnel ouswa of national importance, i annan presedans dan bann lezot Lalwa atraver lemonn e Sri Lanka in kareman met sa dan son Konstitisyon.  In empower son Prezidan pour fer sa atraver en Lartik Konstitisyonnel.

Mr Speaker Onorab George yer in osi refer lo 4(2) (a), dan sa Act ki devan nou koman en premye hurdle. 4(2)(a) i dir, ‘’The National Assembly by the votes of not less than two thirds of the total member of members.’’

Largiman in kontinyen ki Lasanble i deza annan pouvwar pour anmenn en Private Members Bill e aprouv son Private Members Bill par en mazorite senp e donn lefe en Referendum san ki zot pour bezwen two thirds. Mon pour kontre sa lagreman e ensiste ki zot pour bezwen 2 tyer. Dizon ki Lasanble i pas son Private Members Bill e Prezidan i refize assent.

Mr Speaker, ok mon referans ek Konstitisyon Sesel mwan.  Mr Speaker an ka ki zot in pas zot Private Members Bill e Prezidan i refize assent? Konstitisyon Sesel i dir ou, ‘’Where the President has return the Bill to the Speaker under Clause 1(a) the National Assembly may at anytime after a period of 3 months, from the date by which the president should have assented to the Bill under Article 86(2) by a notice approved by the votes of not less than 2/3 of the number of members of the Assembly resolve that the Bill should again be presented for the President’s assent. Where a Bill is presented for the President’s assent under Clause 2, notwithstanding that the President withholds assent to the Bill, the President shall be deemed to have assented to the Bill at the aspiration of the period of 14 days referred to in Article 86 (2).’’  2tyer.

Si Lasanble i pas en Private Members ki pe call pour en Referendum e Prezidan pa assent to the Bill e i fer retourn sa Bill kot Speaker Lasanble Nasyonal, then Lasanble pour bezwen 2tyer. I pour bezwen 2 tyer pour li fer sa retourn kot Prezidan, pour si Prezidan i refize assent en 2enm fwa, dan en lespas 15 zour sa Bill will be deemed to have assented.

E la mon krwar ki AG dan son sazes in azir dan en fason ki fair and balanced.  in antisip ki problenm i kapab leve e in met sa Provizyon 2/3 depi komansman dan sa Bill ki nou pe diskite ozordi. Se pour sa rezon ki sa 2/3 i la e avek tou respe mon pour dezagree avek Onorab Georges ki sa i en hurdle. Mon pe get li plito koman en solisyon.

Lo sa kestyon si Prezidan i devret ou kapab propoz en size Referendum zis lo li menm Lartik 50 Konstitisyon Sesel in deza confer en Lotorite sengilye lo nenport ki, ki ganny elekte koman Prezidan Sesel. Son abilite pour azir lo lotorite son lofis in deza rekonnet anba Konstitisyon.  I pa nenport size ki Prezidan pour propoze lo bann size ki annan en lenportans Nasyonal.  Sa Bill ki la devan nou e tou son bann Provizyon ki ladan i anliny avek Konstitisyon Sesel. I napa okenn Provizyon ilegal ouswa enkonstitisyonel dan sa Bill. Tou keksoz i annord avek Bill li menm.

E si nou annan lavolonte nou ti pour rezourd okenn diferans e aprouv sa Bill lo son merit san bezwen envant okenn leskiz.  Lot pwen Onorab George se ki napa lirzans an se moman pour fer pase sa Bill! Avek tou respe me mon pour dezagree avek li.  Petet pour nou ki pe asiz isi anndan dan sa gro sez, dan nou aircon avek sa bann zafer anpandan dan nou likou, napa irzans.  Pour sa bann group zenn la deor ki pe esper sa …

 

 

(Off-Mic)

 

MR DEPUTY SPEAKER

Kontinyen Onorab.

 

HON JOHAN LOZE

Pour sa bann group zenn la deor ki pe esper sa Lalwa pase, pour zot lans  en Referendum lo dekriminalizasyon Kanabis i annan bokou irzans.  Zot santi ki sa Lalwa egzistan ki reglemant kanabis, pe opres zot drwa koman Seselwa pour viv en lavi normal prodiktiv e sen. Zot mentenir ki akoz sa Lalwa zot santi ki zot, zot santi zot marzinalize dan en sosyete ki par son natir i en sosyete tre toleran.

Sa Kanabis lobby parey ki zot fer lo zot lekor in pare pour organiz zot e aksepte sa challenge tel parey ki i ete. Me zot in osi agree avek Onorab Georges ki Prezidan pa devret kapab sanz pass mark Referendum lo en issue ordiner e ki sa i devret ganny preskri par Lalwa li menm. Alors si Lasanble ti a kapab agree ki posibleman nou kit Constitutional issues lo 60 poursan e pour en propozisyon ordiner si i ganny aksepte nou fer li vin 50 plus 1 parey eleksyon Prezidansyel.

Mr Speaker i napa enn nou la anndan ki pour annan kouraz pour take on sa issue kanabis. Napa personn.  Sa fodre nou onnet avek. Nou ava pase dan distrik nou a koz avek sa bann zenn nou a  lenket zot. Nou a dir zot ki nou pour fer ki nou pa pour fer.  Be mon krwar posibleman solisyon se sa Referendum Bill ki ava permet zot avans sa issue lo zot menm, e non selman sa, i ava permet lanasyon Seselwa pour fer en determinasyon lo sa size. E letan en determinasyon in ganny fer par lanasyon Seselwa, all parties concerned i a bezwen aksepte ki sa se lavwa lepep Seselwa!  Mr Speaker mon konnen akoz ki nou bann politisyen nou annan sa retisans for pour met an plas en striktir legal pour Referendum! Koman politisyen nou tant pour per konpetisyon e sa aktivizm ki vin avek propoz en size pour Referendum depi son staz petisyon ziska zour vote, pour vin en nespes training ground pour bann aktivis, ki pour kapab deside en zour pour challenge nou isi anndan dan eleksyon!  Nou lo sa kote nou pe dir bring it on Onorab Henrie!  Si Sesel i benefisye akoz non?

Plis dimoun ki familye avek en lalis voter; plis dimoun ki familye avek prosesis eleksyon; plis dimoun ki abitye avek masin nou demokrasi akoz non?  Bring it on. Plis demokrasi i pli bon pour nou tou.  Non?

Mr Speaker serten endividi ki’n dir nou ki zot manm Preserve Seychelles in an kontak avek nou depi yer, pour konfirmen si sa Lagreman lo Assomption pa ankor zanmen ganny ratifye par Lasanble.  Zot in anvi konnen si sa size Assomption i ankor a en staz kot i pour kapab ganny propoze koman en ordinary issue of significant national importance dan en Referendum. E natirelman zot oule fer li pli vit ki posib.  Zot in dir nou ki zot anvi lepep Seselwa desid lo sa size, avan ki tou posibilite i evapore.

I vre i size vann Assomption pa lo okenn latab.  I pa en keksoz ki pour arive me sa bann Seselwa i oule ganny en loportinite anba sa Lalwa, pour les lepep Seselwa fer en desizyon final enn fwa pour tou lo sa size.  E zot koman sitwayen Sesel, zot konsider sa size Assomption koman en matter of urgency pour zot.  Pour dir laverite e la pour dir tou laverite zot pa fye nou!

I annan tro bokou vat-e- vyen lo sa size.  Zot dir ki politisyen i dir en keksoz avek ‘’Times of India’’ e en lot avek Seselwa.  Dan tou sa konfizyon ki’n ganny kree par nou menm nou isi anndan, Seselwa i oule fer zot prop determinasyon. Eski nou kapab blanm zot?  E la ankor mon pour repete zot santi ki i annan serten lirzans.

Ozordi nou annan Preserve Seychelles, ou annan CEPS ou annan Mouvman Kreol Seselwa. Sakenn sa bann groupman pe vin avek son prop revantikasyon. CEPS pe ensiste, ensiste ki nou ganny en elected Regional Council!

E zot pe espere…

 

(Interruption)

 

MR DEPUTY SPEAKER

Kontinyen, kontinyen, Onorab Loze.

 

HON JOHAN LOZE

Zot pe espere ki sa Lalwa ava ganny aprouve.  E si i kontinyen annan retisan dan lapar L’Egzektif e Lasanble lo sa size, zot in dir ki zot pour anmenn zot Referendum devan, pour les Seselwa deside si zot prefere annan en Regional Council lekte ki konpri bann community leaders ki pa neseserman debout lo platform parti politik sirtou sa de parti dan sa two party system.

Be nou pa santi nou i annan lirzans.  Nou isi anndan nou pa santi ki Seselwa i bezwen annan letan pour fer son determinasyon, alors nou ava gete.  Mr Speaker fitir en pep pa kapab ganny lock dan lanmen zis politisyen tousel. Linisyativ popiler anba sa Lalwa Referendum i fer en koreksyon senp ki pour permet lepep Seselwa annan plis pouvwar pour determin son prop lavenir.

Politisyen nou pa parfe; nou tou nou fer fot.  Nou pa  Sen!  Mr Speaker zournalizm i ganny konsidere koman enn bann pilye la demokrasi. Journalism.  Atraver lemonn i ganny rekonnet koman ‘’the  Fourth Estate of democracy.’’ Be ki nou vwar isi anndan?  Letan en zournalis i fer en demann lezitim, e legal anba Lalwa ki preskri ‘’akse avek lenformasyon’’ politisyen i fer 2 keksoz.

  • Nou dir avek zournalis pour dir pa print lenformasyon ki pa korek. Pa bezwen fer sa. Ou bezwen travay e fer ou resers e print keksoz ki korek. Ki byen, mon dakor e mon agree avek.

Me ler zournalis i avans devan i ekrir en let i solisit lenformasyon – akoz sa zafer solisit lenformasyon i vin avek en Provizyon sa, en prensip senp, se ki mon apros sa lenstitisyon mon demann li lenformasyon e sa lenformasyon ki mon gannyen i lenformasyon lezitim e korek.

Me politisyen i dir ek zournalis ou napa drwa, pa bezwen ekrir nou.  I pa nou louvraz nou  Sekretarya pour donn ou lenformasyon.  E sa nou servi Syez nou Lasanble Nasyonal pour nou fer li.  Be nou pa termin la. Nou ekrir sa zournalis nou dir li al rod ou lenformasyon lo SEYLI.  Al lo SEYLI laba ou a ganny lenformasyon.  En kler vyolasyon Lalwa ‘’Akse a Lenformasyon.’’ E sa Lalwa akse a lenformasyon la ti pas isi anndan li Mr Speaker.

Nou ki’n pase sa Lalwa. Nou pas sa Lalwa apre nou vyol Lalwa dan en keksoz, ki nou kapab senpleman dekrir koman en very ‘’TRUMPION’’ rant.

Mr Speaker mon pour refer en dernyen fwa lo speech Onorab Georges yer. Onorab Georges yer in dir nou koumsa ki nou devret careful ki nou pa upset balans nou demokrasi e danze se ki en zour listwar in montre nou ki Hitler ti ganny elekte, Mussolini ti ganny elekte, Trump in ganny elekte. Onorab Georges in osi yer dir nou lekel ki pour al ganny prosen eleksyon Sesel.  In dir nou lekel ki i santi pour vin Prezidan apre Prezidan Faure.  Be letan mon’n get sa ki’n pase yer bomaten dan sa Lasanble vizavi sa zournalis, e sa referans lo Trump ki Onorab Georges in fer yer e sa non ki in nonmen pour vin Prezidan, mon pe demann mon lekor si Onorab Georges pe fer lasosyasyon ant sa bann keksoz?

E la mon pe kalkile Onorab Georges i tre profetik! In war kot son Trump pe vini! In  dir nou yer li.  In warn nou kont en Trump e in dir nou lekel! E pour sa mon bezwen remersi Onorab Georges. Dan en demokrasi Mr Speaker politisyen pa kapab browbeat   zournalis. I pa en keksoz pour nou fer sa!  Sa Donald Trump ki fer lo Twitter L’Angleterre! Lanmerik laba kot i ete. Mon demann en leskiz, mon demann en leskiz.

 

(Interruption)

 

HON JOHAN LOZE

Mon demann en leskiz Onorab.  Be …

 

(Interruption)

 

 

MR DEPUTY SPEAKER

Kontinyen.  Order! Order!  Les Onorab Loze.  Onorab Loze i annan laparol.  Kontinyen Onorab Loze.

 

(Interruption)

 

HON JOHAN LOZE

Mr Speaker an terminan mon pour, an terminan mon pour evok en parol ki Onorab Georges i kontan servi e i konnen mon kontan sa sitasyon sa se ki depi katriyenm Lasanble mon tann li pe dir sa; ou pa kapab fer Lalwa pour en dimoun.  En pei ou pa fer Lalwa pour en dimoun. Ou fer Lalwa pour tou ou sitwayen.

Ou fer Lalwa pour ou lefitir ou pei.  E ou fer Lalwa pour byennet ou sosyete an antye.  E mwan senserman mon santi ki sa Referendum Bill ki devan nou ozordi, i pe fer egzakteman sa.  Mon pa vwar danze avek sa Bill. Mon pa vwar vyolasyon Konstitisyonnel dan sa Bill.  E mon pa vwar okenn provizyon ki i ilegal dan sa Bill. E la mon krwar ki Onorab George i ava agree avek mwan lo sa.  Further mon santi ki napa nanryen dan sa Bill ki sa Lasanble Nasyonal Sesel pa kapab iron out, travay lo la e rezourd e bouz de-lavan pour benefis lanasyon Seselwa. I annan bokou dimoun ki pe atann deor. E enn bann keksoz ki mon’n ganny dir bomaten, se ki zot dan Lasanble zot pe zwe game!

Zot annan en bann zwe politik ki zot zwe ek kanmarad sa de parti ki kapab end up pe deny en dimoun an deor, serten benefis ki dimoun i bezwen.  E la mon pa pour bezwen repet sa bann keksoz.                     Mon krwar nou tou nou konnen.

I santiman nou pep ozordi ki zot, zot pe ganny anbrouye dan en bann pti zwe politik, ant sa bann dimoun isi anndan ki pe met kravat.  Seselwa pa santi zot pe ganny korekteman reprezante par zot bann reprezantan.

Pourtan en demokrasi reprezantatif ki nou annan Sesel i sipoze rann la demokrasi pli efikas, kot en gran poursantaz dimoun i ganny reprezante par en personn dan Lasanble e sa personn li i anmenn zot bann lakoz devan e i sanpyon zot.

Be ozordi Seselwa pe komans santi alyene avek zot bann reprezantan.  Zot pa santi ki zot konsern i primer, me se plito se bann zwe politik, bann bouz pyon a dwat, bouz pyon ki pe pran preokipasyon dan sa Lasanble.

Mr Speaker mon swete, mon swete ki nou a kapab ganny en way forward avek sa Lalwa ki devan nou.  Mon swete ki nou a kapab les cooler heads prevail.  Nou ava apros nou louvraz avek rational thinking. Nou ava pare pour fer konpromi e donn lepep Seselwa en Lalwa ki alaoter son lekspektasyon e sonn bann aspirasyon. Mersi Mr Speaker.

 

(APPLAUSE)

 

MR DEPUTY SPEAKER

Mersi Onorab.  Mersi Onorab Loze.  Onorab Francois Adelaide, me avan ou ale, Onorab Ghislain ou ti le -?

 

HON CHANTAL GHISLAIN

Yes Mr Speaker mon annan en pti point of order  pour leve silvouple?

 

MR DEPUTY SPEAKER

Anba ki Order ou pe leve?

 

HON CHANTAL GHISLAIN

Anba 56.

 

(Off-Mic)

 

HON CHANTAL GHISLAIN

En matter ki fek leve la lo floor Mr Speaker.

 

 

HON SEBASTIEN PILLAY

(Off-Mic)

 

MR DEPUTY SPEAKER

Onorab Pillay se mon ki chair, se mon ki deside ki mannyer mon demann kestyon.  Se pa ou prerogativ! Proceed Onorab Ghislain.

 

HON CHANTAL GHISLAIN

Yes Mr Speaker.  Mr Speaker okour ki Onorab Loze ti fer son deliberasyon, ti annan bann enterzeksyon dan lasal and Onorab Woodcock in dir avek Onorab Vidot aret gronnyen.  And Onorab Flory Larue ki osi en lot madanm i dir non, i pa gronnyen li i ronfle! Mwan mon krwar i en mank respe pour en madanm parey li! Mersi Mr Speaker.

 

(APPLAUSE)

 

MR DEPUTY SPEAKER

Onorab Ghislain sa zafer ronfle nou’n deza deal avek. Sa bann mirmirasyon ki pase off-mic, ki pase ki pa disturb en lot dimoun ki pe koze, ki pa’n raise sa koman en issue mwan mon pa krwar nou devret fer en issue out of this.  Nou annan en travay devan nou la bomaten. Mon pour les Onorab Adelaide kontinyen. Onorab Adelaide ou annan mic.

 

 

HON FRANCOIS ADELAIDE

Mersi Mr Speaker. Bonzour Mr Speaker, bonzour tou Manm Onorab e tou bann dimoun ki a lekout.

Mr Speaker  mon pour pran en pti letan lo sa Bill mwan osi, akoz mon santi poudir petet i annan enn de bann pti size, ki mon krwar nou devret adrese.  E petet mwan mon ava adres 2 size. Lo komansman deba anmennen par Leader Gouvernman, yer mon’n ekout atantivman laplipar Manm ki’n koze zot in eksplike ki mannyer sa Bill lo Referendum pour donn pouvwar lepep Seselwa pour kapab anmenn bann konsern devan, e osi ki mannyer Lasanble osi i kapab ganny pouvwar pour li osi anmenn bann konsern piblik devan.

Me en keksoz ki petet nou tou nou’n kapab realize, zot pa’n zanmen mansyonn ki pouvwar zot pe donn Prezidan pour li kapab osi anmenn bann prosedir, pour li kapab fer bann Referendum.  Me mwan ler mon’n ekoute e ler mon’n lir sa bann Bill mon’n trouve poudir sa pouvwar ki nou pe donn Prezidan atraver sa Bill, i tro bokou!  E mwan ler mon pe gete, mon pe trouve poudir ou a krwar nou pe donn nesans en Diktater Sesel!

Mr Speaker mon ti a kontan ki VP i fer mwan e lepep Seselwa konnen ki lirzans ki sa Bill i annan, ki’n bezwen pran sa bann presedans lo bann lezot Bill tre enportan, tel ki parey nou annan sa Bill Public Salary (Amendment) Bill.  Nou annan Bill lo 9 Anti-Koripsyon e lezot ankor bann Bill ki pour vreman tous lavi lepep Seselwa.

Me pour mon war en Referendum Bill vini, ki pe demann bokou bann keksoz mwan ler mon’n realize, konmsi mon’n sey evalye ki annan vreman la, ki konsern Seselwa e ki Seselwa i anvi voice out?

Sel fenomenn ki mon’n kapab remarke e mon’n konstate an se moman, ki annan bokou bann dimoun ki pe sorti dan Parti Lepep dan parti US e zot pe asosye avek LDS.  Zot pe donn plis sipor LDS.

E petet ler Msye Faure in vini avek sa Bill nou’n trouve pour dir i ti pe vin enpoze.  Me vi ki i pa’n ganny sa fason fasil pase, in deside pour li formil sa Bill petet pour li ganny sa upper hand pour li kapab petet sey pran kontrol sityasyon.

Me mon kestyon mon demande Mr Speaker, eski Msye Faure i vreman konn lanvi aspirasyon e dezir sa pep Seselwa par ker? Eski Msye Faure i vreman santi e konpran ki sa pep pe pas atraver an se moman? Eski Msye Faure i konn son priyorite koman en Prezidan etandonnen ki partou dan tou koze Seselwa pe kriye fer desann pri lavi, deal avek bann koripsyon e met a dispozisyon Seselwa ordiner pour devlopman, swa lozman, swa later pour biznes pour ki Seselwa i a viv en meyer lavi?

Mr Speaker i annan bann sityasyon ki vreman enportan ki mon krwar ki Msye Faure ti devret kapab donn plis latansyon, dan plas sey debrouye pour li anmenn en Bill pour fer Referendum. La parey mon pe koz parey nou deza annan $50milyon Dolar ki nou dir in perdi e ler nou’n konpran poudir in ale dan kont Baroda L’Angleterre.

Nou’n tande poudir i annan plis ki 60 bout later avek en sel endividi.   Kan Polisi se en bout later par zabitan. Eski sa pa en lirzans pour fer sir ki Msye Faure i adres sa bann keksoz koumsa e amelyor lavi Seselwa!

Mr Speaker skandal later osi partou kote i bann keksoz ki reel dan nou sosyete. Nou’n tann skandal COSPROH, larzan ki’n ganny vole dan Sesel e transfer dan bann kont Irlande, eski sa se pa bann lirzans ki mon krwar Msye Faure petet pe devret atake, pour petet amelyor lavi Seselwa.  Mon ti a panse ki sa bann size ti a pe okip sa Gouvernman e non pa en Referendum. Lasanble in fer son bout e in met plizyer nide devan. Tel ki parey koup middleman dan bann biznes ki a fer ki bann pri komodite olye monte i ava desann.  Nou’n dir petet repran sa bann later avek Parti Lepep. Remet a dispozisyon Seselwa, Seselwa i ava ganny bann i a ganny later; i a ganny bann loportinite pour li fer biznes e amelyor zot lavi. Eski sa bann keksoz nou pe taye pour nou fer sa bann Bill Referendum?

Mr Speaker pri lavi dan tou bann konferans de pres sa size i kontinyelman monte.  Eski Msye Faure pe fer krwar ki pri lavi pa reste en priyorite pour son Gouvernman, pour li sey adrese e fer diferans dan lavi sak Kreol.  Avek sa Bill Referendum anmennen par Leader Zafer Gouvernman, i senpleman montre ki parti ki Msye Faure avek Parti US pa vreman konn zot priyorite.  Eski sa defans pour fer en Referendum, pa ti a pli bon nou ti pran sa larzan – vi ki nou ti pe dir nou pour met en pti larzan an plis lo Seselwa –  eski pa ti a bon nou ti a pran sa pti larzan donn Seselwa e dan plas gaspir sa larzan pour nou fer Referendum avek?

Mr Speaker mwan mon krwar swa Parti Lepep avek Msye Faure zot konnen e zot pe zwe malen; swa zot pe senpleman travay malis pour donn lenpresyon ki LDS ki tor. Swa zot pe sere, swa zot pe donn lenpresyon ki Lasanble avek en mazorite LDS pa efektiv.

Mr Speaker mwan mon panse ki linaksyon i anvair Msye Faure avek son ladministrasyon. Linaksyon pa zanmen en bon leta lespri pour okenn dimoun ki annan bann responsabilite serye – sirtou bann top official tonm ladan. Mon panse bokou Seselwa i konn sa dikton ‘’Joseph Job’’ …

 

(laughter)

 

HON FRANCOIS ADELAIDE

… .kan i annan bokou linaksyon souvandfwa nou bliy nou focus, e nou fer bann lezot keksoz ki pa dezirab e an menm tan i pa pour bon pour nou pei Sesel.

Mr Speaker mon repet ankor en kou ki linaksyon pe anvair Msye Faure. Vis- Prezidan wi – pa get mwan.  Mon war ou pe get dan en fason en pe drol, me sa i mon leksplikasyon.  Ler mon pe gete sa ta problenm ki annan me L’Egzekitiv pa pe adrese.

 

(laughter)

 

HON FRANCOIS ADELAIDE

Mr Speaker nou vwar ki teritwar Sesel pe ganny vann par isi par laba! Zis gous ki pe marse e Kreol pe kontinyen pey lepokase. Eski Msye Faure pa konpran kisisa priyorite pei?  I kler ki sa Gouvernman lontan ti’n fini perdi direksyon e pe esper en mirak, me zot pe sey, me zot pa priy Bondye, o kontrer zot kontinyen soutir koripsyon.  Koz mansonz; soutir bann move fason fer e kontinyelman fer Sesel e Seselwa plere dezour-o-zour. Eski sa Bill Referendum i vreman irzan ouswa i en lot kart ki Msye  Faure i oule servi pour li reste o pouvwar?

Mr Speaker i annan en lot keksoz ankor ki vreman irzan ki dan plas sa Bill Referendum. 2 semenn pase mon ti demann Minis Lasante ki zistans nou ete ek klinik Baie Lazare? Mr Speaker apre ki nou ti’n vizit klinik depi 2017 nou ti met larzan dan Bidze 2018.  E Msye Faure dan son leta Lanasyon ti dir poudir klinik Baie Lazare ti pour al komanse 2018. Mr Speaker eski en klinik pour Baie Lazare i pa en priyorite, mwan mon krwar pour dir Msye Faure ti devret swiv sa lanonsman ki i ti fer e ki ozordi 2019 ler mon ti a demann Minis Adam ki zistans klinik Baie Lazare?  i pa ti a dir mon pour dir nou pa ankor fer plan, nou ankor pe rod en konsiltan, napa nanryen ki’n pare.  E  mwan ler mon al fer resers e sa mon a dir pour dimoun Baie Lazare tande, nou still annan en issue later.

E la i annan langazman avek Minis Charlette pour ki nou a konnen si nou pour gannyen sa bout later parey Minis Adam ti dir klinik pour fer lanmenm, ouswa si nou pour bezwen re rod en lot alokasyon. Mr Speaker eski sa i pa en lirzan ki mon krwar Vis- Prezidan ti devret anmennen, pour nou konn aktyelman ki sityasyon zabitan Baie Lazare avek son klinik. Akfer ki nou bezwen taye pour nou anmenn en Bill pour fer Referendum?

Mr Speaker mwan mon panse ki Ladministrasyon Msye Faure in pran en lot lapros an mezir ki eleksyon pe vini.  Zot oule blok tou keksoz e pe fer krwar pour dir nou LDS ki pa pe bloke.  Premye legzanp zot ti dir napa larzan. Zot ti dir nou pa pour aprouv Bidze. Se bann keksoz ki nou’n fer.  Mwan mon ti aprouv Bidze pour Baie Lazare ganny son klinik! Lekel ki’n bloke? LDS ki’n bloke ouswa se L’Egzekitiv ki’n bloke?

 

(APPLAUSE)

 

HON FRANCOIS ADELAIDE

Eski sa i pa bann lirzans ki nou vwar ki Gouvernman sirtou Msye Faure i devret adrese pour ki zabitan Baie Lazare i a ganny en meyer servis, i a ganny en meyer lavi kot son privacy a ganny maintain e son dinyite a ganny preserve. Mr Speaker akfer lirzans sa Bill Referendum?   Mwan mon krwar ki in plis ki ler ki Msye Faure i bezwen ler i dormi, i reve, e demen toudswit i oule anmenn tou bann kalite keksoz ki i krwar i pour fer Seselwa prospere; kant aktyelman ler i pe anmenn sa bann keksoz i pe anmenn plis diskord e soufrans dan lavi pep Seselwa!

 

(APPLAUSE)

 

HON FRANCOIS ADELAIDE

Eski i pa normal ler nou LDS nou kriy ‘’DANNY OUT!’’ Sa mon krwar ti devret en Referendum o pli vit posib, akoz Danny – Msye Faure pa .. pe  travay e i pa .. pe ..  delivre!  Mr Speaker  mwan an mezir mon pe koze, mon oule eksklir, mon oule tir Attorney Zeneral ladan, akoz mon konnen, mon konn son kapabilite, mon konnen poudir i en boug ki sharp!  Me selman mon konnen poudir sa Bill in ganny demande pour fer e ou konnen ler ou ale, ou al travay i dir ou koumsa poudir i annan ‘’any other duties’’ ki ou sipoze fer!

 

(laughter)

 

HON FRANCOIS ADELAIDE

E Mr Speaker par-ler ou vwar ki mannyer nou pran nou bann profesyonnel, nou oule ansarz li, apre ler nou’n fatige nou’n servi li, li i ale pov dyab i ganny tou sa bann kou me in bezwen, i bezwen respekte, akoz dan son laliny travay i annan sa bout ‘’any other duties.’’

Mr Speaker pran par egzanp nou’n tande poudir nou pa ti oule apwent Minis; nou pa’n oule apwent Anbasader, me selman en keksoz ki nou tou nou bliye se nou ti donn zot en teknokrat! Minis Larose ki i ti ete?  lekel ki ti apwent li?   Pa nou?  Minis Larose ler in vini in met tou son bann zafer ater.  Ler Minis Larose i dir nou pe fer vini forensic investigator Mr Speaker ki i fer?  Pa zot pous li! Akoz zot pa oule!

 

(APPLAUSE)

 

HON FRANCOIS ADELAIDE

Zot pa oule! Zot pa oule! en profesyonnel fer son louvraz byen! E prezan zot oule blanm nou ler nou pa oule aprouv en profesyonnel? Nou pa pe senpleman pa aprouv zot nou. Nou pe protez zot!

 

(APPLAUSE)

 

HON FRANCOIS ADELAIDE

Mr Speaker i kler ki Msye Faure in dezaflize e enkonfortab.  Ler i ti pe fors sa zafer Referendum lo pep Seselwa, lo sa zafer si Seselwa aletranze i merit vote.  E Lasanble atraver nou Leader in kosyonn li ki son aksyon kot i ti le dan en fason diktater pran pouvwar avek Lasanble ouswa sa ki nou ti dir bypass Lasanble Nasyonal, pour demann Komisyoner Eleksyon pour organiz sa Referendum.  Nou tou, nou’n trouve ki Msye Faure pa’n pran sa aksyon ki Lasanble in pran profesyonelman. O kontrer in montre ki i anvi sa lanmen for e pour li proceed avek son desizyon.

I konnen ki sa kad lapay ki i pe vin avek, i kapab enn son dernyen move.  Akoz i kler ki si Seselwa mazorite in fini malen. Seselwa in fini konpran e pour parti US survive sa lot eleksyon, i preski enposib!  E sel fason ki sa Bill in vini se zot anvi enport voter pour vin vote pour ki zot ganny plis dimoun pour zot kapab reste o pouvwar. E sa mwan ki pe dir e mwan ler mon’n konstate, mon’n trouve poudir zot bezwen rod ranfor a leksteryer.  Akoz Seselwa Sesel in malen. Seselwa in aprann son leson parker. Vwala Mr Speaker rezon prensipal deryer sa imansipasyon Msye Faure pour fer en Referendum. Parey Angle i dir ‘’desperate time calls for desperate measures!’’

Msye Faure i annan ase Bill ek Mosyon ki sa Lasanble in anvoy anler State House.  Akoz ki Msye Faure i pa akte lo sa bann Mosyon? Semenn pase i annan en Mosyon fek ale  ‘’Bare boat’’ ki Onorab Gill in anmennen.  Akoz ki Msye Faure pa war sa en lirzans pour li travay lo sa bann Mosyon e fer vin Lalwa?  Akoz se nou pep ki’n dir nou met sa bann Mosyon devan.

Mr Speaker mon annan bokou ankor pour dir me selman mon plito anmas rezervasyon – petet atraver ler Leader Zafer Gouvernman i ava reponn, i ava reponn sa bann kestyon – sa bann dout ki mon annan, petet  a kapab sanz mon nide.  Me selman mwan mon pou dir klerman poudir sa Bill ki la – lirzans Referendum mwan koman Adelaide MNA Baie Lazare, mwan mon pe al zet anba!

E si Msye Faure i trouve poudir nou, mwan mon pe blok li, Msye Faure i senp i deza annan fason pour li egzekit bann lord! I kapab dizourd sa Lasanble e ki mwan mon’n pare, Baie Lazare nou’n pare e si i trouve poudir Lasanble pe blok li, i pa pe kapab fer parey i anvi, i annan tou son pouvwar!  Dizourd sa Lasanble!

VP ler ou pare koz avek Prezidan dizourd sa Lasanble nou a re-antre dan en eleksyon, e mon asire – e mon asire la Seselwa pour dir zot si vreman sa bann fason ki zot anvi vin fer Referendum i ok, ouswa sa bann fason i pa bon. Mwan mon’n trouve poudir Msye Faure zis parey – pa pran mwan mal mon parol – parey ti arive laba kot  Basalasad i ete, ler tou son bann sipor in fini ale avek li, i oule vin kasyet deryer dimoun prezan!  I dir, ‘’Ahr be  ok nou a donn piblik. Nou a donn piblik sans pour li fer Referendum.’’

Io konnen poudir piblik napa pouvwar li!  Akoz?  Akoz tou sa ki piblik pour demande la, i pour bezwen tourn kot li anler, pour li sertifye, pour li aprouve. Be i konnen li! Sak desizyon ki Lasanble Nasyonal pour pran, pou bezwen ariv anler kot li e li ki pour aprouve. Si i dakor i pour aprouve si i pa dakor i pa pour aprouve!

Be oli pouvwar ki zot pe donn nou? Oli pouvwar ki zot pe donn piblik? Zot pe senpleman Msye Faure pe senpleman, kasyet deryer lepep Seselwa, pour li kapab fer son bann demagozi ki li i anvi!  Se sa ki nou apel boukliye imen! se boukliye imen son term Kreol ki Msye Faure i oule fer. Me nou, nou pa pour donn lo sa sans e se pour sa rezon, ki mwan sa Bill koman i ete mon .. pe  al zet  anba!

Mr Speaker mon’n fer mon deliberasyon onnet e fran; Baie Lazare nou pa ti vot pour koabitasyon parey zot pe blanm nou.  2015 nou ti ranport mazorite eleksyon Lopozisyon. 2enm round nou ti ranporte Baie Lazare.  E 2016 Baie Lazare pa ti vot LDS e si Msye Faure pa dakor avek mon desizyon ki mon’n pran bring it on dizourd sa Lasanble e Baie Lazare a montre li ki nou anvi ouswa koabitasyon swa nou anvi en Gouvernman LDS, me selman nou, nou’n dir Bill Referendum  – zet anba!  Mersi Mr Speaker.

 

(APPLAUSE)

 

MR DEPUTY SPEAKER

Mersi Onorab Adelaide.  Onorab Loze.

 

HON JOHAN LOZE

Mr Speaker mon ti a andezir ganny en leklersisman silvouple?  Tou Seselwa parey fek ganny dir i konn sa dikton Joseph Job. Mon ti a zis kontan ou gidans; dan klima vyol ek labi ki lo madanm e zanfan ki nou ladan an se moman, eski nou Lasanble pe promot lensest?  Parey mon’n dir tou Seselwa i konn sa dikton Joseph Zob; nou konnen kwa ki Onorab Adelaide pe sey dir par sa, eski nou Lasanble pe promot lensest?   Akoz sa ki in dir i en keksoz sal!  Mersi.

 

MR DEPUTY SPEAKER

Onorab Loze, sa i ou lopinyon. Mon pa’n santi nanryen ki kont nou Standing Orders, dan la fason Onorab Adelaide in fer son prezantasyon e nou pour kontinyen.  Onorab Pillay ou annan en point of order. Dir mwan ki point of order ou pe raise?

 

HON SEBASTIEN PILLAY

Mon annan 2 point of order. Mon oule raise en point of order sirtou anba ou Lotorite koman Speaker.  Anba Order 8, nou Standing Orders.

 

MR DEPUTY SPEAKER

Anba Order 8?

 

HON SEBASTIEN PILLAY

Yes.  I annan en rezon akoz mon pe raise sa point of order Mr Speaker.  Dan sa Order i dir ou koumsa ou, ou bezwen site;

Premyerman i dir ou, ‘’You shall preserve order in the quorum in the Assembly and decide on points of order and practice.’’

Dezyenmman i dir ou koumsa No. 3, dan ou desizyon lo en point of order ou bezwen donn nou rezon e ou desizyon, e ou desizyon i devret sit en rule of procedure or an applicable authority. Prezan mon retourn lo sa deklarasyon ki ou fek fer Mr Speaker, anba en lot order e sa lot order i kler. I dir ou koumsa poudir en Manm Lasanble pa devret anba okenn ka impute en improper motive kont en dimoun ki en Constitutional Appointee.

Pandan sa lentervansyon ki’n pase oparavan, a plizyer nou’n dekrir Attorney Zeneral koman en bon dimoun; i fer son louvraz, me selman in ganny forse pour fer son louvraz!  Sa i impute, non, non sa i impute en improper motive kont sa dimoun ki Attorney Zeneral i travay pour li!

 

(Interruption)

 

HON SEBASTIEN PILLAY

Now mwan mon ti a kontan demann ou, mon ti a kontan demann ou anba ki rule of procedure ki ou pe dir poudir annou pran par egzanp osi sa ki Onorab Loze fek raise, anba ki rule of procedure ki ou’n determinen poudir sa bann kalite afirmasyon, oubyen diskisyon dan en deba Lasanble Nasyonal i ok?  Mon ti a kontan  ou dir nou sa.

 

MR DEPUTY SPEAKER

Ler mon dan chair mon pa pe al an detay pour al rod ki procedure. Mon fer desizyon parski nou annan en travay pour nou fer isi! Travay ki pli enportan ki tou1 E pour mon deklarasyon ki Onorab Adelaide in fer, son statement ki in fer ler i pe refer, tanzantan in nonm Msye Faure, tanzantan in non Attorney Zeneral, in nonm any other business in nonm, in koz lo en fason ki li i krwar sa travay pe ganny fer.

Petet ou, ou vwar li koman ou dezagree, me sa i son lopinyon! I pa’n fer li dan en fason kot i pe kraz sa dimoun.  I son lopinyon. I pa’n kraz lentegrite sa dimoun.  I pa’n fer sa, e mwan mon pour les pase. So, sa i mon lopinyon, sa i mon desizyon, so we move on.

 

HON SEBASTIEN PILLAY

Zis mon pa pe challenge ou Ruling.  Mon konpran pour dir sa i ou Ruling, me selman mon ti a kontan fer kler – mwan mon largiman avek ou i pa lo si son lopinyon, i pa son lopinyon. Mon respekte son lopinyon.  Sa ki mon pe demann ou koman Speaker, e se ki mwan mon annan drwa eksprim mon lopinyon, tou dimoun i annan drwa eksprim son lopinyon.  Si nou pour annan en barenm deba dan Lasanble, ki permet nou pour nou ader avek bann prosedir ek bann prensip ki nou’n etablir.  Se tou. Ou’n donn mon ou Ruling, ou dir mwan ou dan chair that’s your Ruling. So  mon aksepte ou Ruling.

 

MR DEPUTY SPEAKER

Mon pa’n vwar okenn dokiman – mon pa’n vwar okenn dokiman isi ki montre kan ou pour deside si in desot en serten nivo; okenn landrwa ki ekrir ki poudir sa bann enteraksyon tou le de kote ki off-mic i ariv tel nivo.  Apre Speaker – Speaker i servi son diskresyon.  In toultan lapratik. Mwan mon’n servi mon diskresyon.

 

(Interruption)

 

MR DEPUTY SPEAKER

Mon pa pe al perdi letan, mon pa perdi letan pour argimant lo la. Nou annan en travay pour nou fer.  Prosen Speaker Onorab Wilbert Herminie.

 

HON WILBERT HERMINIE

Mersi Mr Speaker.  Bonzour koleg Manm Onorab e tou dimoun a lekout.  Msye Speaker mon pran laparol bomaten pour dir enn de mo lo merit ek prensip sa Bill.   Mon pou santre mon lentervansyon lo Referendum Bill  – spesifikman.

Sa Lalwa ki’n ganny anmennen par Vis-Prezidan i annan bokou merit ladan.  En Lalwa ki pe met sa lankadreman pour donn plis pouvwar bann frer ser Seselwa. Mr Speaker dan lepase nou’n donn pouvwar L’Egzekitiv, Lezislatif e Zidisyer. Nou’n osi resaman pas Lalwa pour donn plis pouvwar medya.

E la Mr Speaker ek sa nouvo Lalwa nou pe met en pe plis pouvwar dan lanmen pep pour zot annan sa check and balance lo nou bann brans Gouvernman.  E mwan koman reprezantan La Riviere Anglaise, mon pour anmenn mon sipor a sa Lalwa e mon pour vot an faver merit e prensip sa Prozedlwa.  Akoz mon dir sa Mr Speaker?  Nou bann elektora in vot pour nou pour met nou la, me i pa’n donn nou pouvwar pour nou fer sa ki nou oule!  Mr Speaker nou demokrasi i enn ki servi en sistenm reprezantatif, kot nou bann elektora in vot pour nou pour nou reprezant zot pour sa dernyen 5an.

Sa Lalwa pee r ki nou demokrasi i vin enn pli partisipatif, kot nou sitwayen i war li pli annan ownership lo bann size ki annan en lenportans Nasyonal. Mr Speaker en Referendum i ler pep Seselwa i ganny demande pour fer en desizyon lo en size ki annan en lenportans Nasyonal atraver en kestyon ki’n ganny met devan zot, e lepep i pran en desizyon dan en fason direk.

Legzanp i kapab lo en size tel ki baz militer Assomption osi pour entrodwir capital punishment dan Sesel. Mr Speaker Lalwa pe propoz 2 kalite Referendum ki kapab ganny fer lo bann keksoz ki relye avek bann drwa Konstitisyonnel e lot lo bann size ordiner tel ki konstriksyon lotel Lentandans pour nonm en legzanp.

Mr Speaker anba sa Prozedlwa en Referendum i kapab ganny fer dan 3 fason.

Enn – Prezidan i kapab inisye en Referendum lo en size tel ki i krwar i annan en lenportans Nasyonal.

Dezyenmman, Lasanble Nasyonal i kapab dan laform en Mosyon ki’n ganny aprouve 2 tyer bann Manm, inisye en Referendum.

E trwazyenmman dan form en petisyon in ganny sinyen pa par pli mwens ki 35 poursan dimoun, ki lo dernyen lalis voter eleksyon prezidansyel. Pour en kestyon ki’n ganny poze lo en size, ki’n ganny deside atraver en Referendum pour li ganny aprouve Mr Speaker pa mwens ki 60poursan vot ki’n ganny vote i bezwen ganny kalifye.

Mr Speaker kestyon ki’n ganny poze par bann Manm dan Lopozisyon se akoz la?  Akoz sa Lalwa pe ganny anmennen la?  Kan i annan lezot keksoz ki pli enportan pour ganny diskite.  Mr Speaker mwan mon dir akoz pa la?   Eski i annan en keksoz mal pour retourn pouvwar dan lanmen lepep? Mr Speaker nou demokrasi pe evolye e in ariv sa ler pour nou donn plis pouvwar nou bann elektora.

Mr Speaker wi i annan serten rezervasyon ki’n ganny leve lo sa Prozedlwa; tel ki poursantaz 35 poursan sinyatir ki bezwen ganny aprouve lo dernyen lalis voter, ki pour siny sa petisyon. Nou bezwen mazinen eski sa 35 poursan i tro o? e i fer li difisil pour nou kapab fer en Referendum? Or si nou pour bouz sa  landmark e fer li pli ba e kwa ki pour fer?  Eski Referendum pour kapab ganny fer tou lazournen?

En lot konsern ki’n leve Mr Speaker se lo balans pouvwar ant sa 3 brans Gouvernman. Eski sa Prozedlwa pe de-balans sa pouvwar ki egziste konmela? Mr Speaker sa i en kestyon ki kapab ganny diskite dan ler nou zwenn, nou antre dan Staz Komite.

Mr Speaker sa bann konsern ki’n ganny leve par bann lezot Manm i enn ki tre enteresan me eski sa i fer ki sa Bill, merit e prensip sa Bill ki pa valab?  Mwan mon krwar ki sa Bill i annan son valer e ki i enportan pour nou met plis pouvwar dan lanmen nou bann frer e ser Seselwa.  Mr Speaker i enportan pour nou aret met baryer dan semen L’Egzekitiv. Sak fwa ki L’Egzekitiv i vin avek son plan pour li bouze e pour li travay, nou vin avek leskiz tel ki Public Salary Bill, tel ki lapwentman pour bann Anbasader e Minis.  Nou met tou sord leskiz pour anpes Gouvernman travay.  Be  mwan mon dir non, annou donn pouvwar lepep.   Lepep a deside.

Mr Speaker lo prensip e merit zeneral sa Bill, rapor Bills Committee  i montre ki napa bokou size kontansyon  ladan, e ki menm son Chairman in dir ki sa Bill i annan son merit.  Me sel size kontroversyal ki mon’n war Onorab Chair Bills Committee in leve, se lo son kandida pour lot Prezidan. Sa mon war li en size kontroversyal e pa ti devret ganny mansyonnen dan sa Bill.

Mr Speaker avek sa 2 mo, mon pour demann tou Manm koleg Onorab pour nou anmenn sipor a sa Bill e  pou vot an faver sa Bill.  Mersi Mr Speaker.

 

(APPLAUSE)

 

MR DEPUTY SPEAKER

Mersi Onorab Herminie. Onorab Flory Larue.

 

HON FLORY LARUE

Bonzour Mr Speaker.  Mersi Mr Speaker.  Bonzour tou dimoun. Mr Speaker letan Vis-Prezidan ti fer son prezantasyon, ti donn nou sa dat le 27 May 2019. Msye Faure ti adres pep Seselwa e i ti anons son letansyon pour demann Komisyon Elektoral pour organiz en Referendum pour demann tou Seselwa ki kapab vote dapre kriter pour deside si en Seselwa ki viv aletranze i devret vote dan en eleksyon Sesel. Ozordi Zilyet mwens ki de mwan apre nou vwar en Bill vin dan nou Lasanble, pour eklersi bann prosesis pour fasilit en Referendum.  Mon konklizyon ki Msye Faure in amenn sa devan, pour li kapab prosede pour enplimant sa Referendum e fer pep Seselwa ki lo lalis voter desid lo sa kestyon.

Mr Speaker isi nou fer Lezislasyon.  E la mazorite letan nou travay lo en kalandriye avek bann Lalwa propoze par Egzekitif.  Pandan plizyer repriz nou’n tann priyorite travay Gouvernman e son bann lentansyon pour pei. Spesifikman lo Lalwa Imigrasyon, nou ti tann bokou deba an Septanm 2018 isi dan nou Lasanble, e i ti ganny revele klerman par Mr  Basil Hoareau kot i ti Onorab Basil Hoareau avek tou sa bann difikilte ki nou pe resevwar dan sa domenn, ki nou bezwen regard  nou Lalwa. I ti menm devwale ki nou anvi reviz nou Citizenship Act e nou anvi menm reget nou Lartik ki deal avek Citizenship Act dan nou Konstitisyon.  Mr Speaker ou konnen ki Minis Telemaque ti reponn apropo sa bann kestyon?

I ti dir nou konsernen nou  revi Lalwa Sitwayennte ‘’… sa i an diskisyon dan ou lofis, e nou pour fer provizyon pour nou vin avek nouvo Lalwa kot Lasanble avan Zen lannen prosenn.’’

I ti pe fer referans Mr Speaker avek Zen 2019. Mr Speaker nou Zilyet 2019 nou tann Referendum ki pou prensipalman mon krwar lo sa size si nou ganny enn ki pour enplik Seselwa aletranze, me nou pa vwar bann propozisyon ki aplike avek sa.

Gouvernman eski zot vreman annan en plan travay? Mr Speaker nou ti demande nou dan sa Lasanble konbyen Seselwa i annan? Konbyen Seselwa ki anrezistre?  Menm si annan zanfan paran Seselwa, ki en Seselwa dapre Konstitisyon, zot bezwen fer  zot formalite atraver imigrasyon pour formaliz sa prosesis e ganny sa ID number pour zot vin en Seselwa.  Konbyen ant sa bann Seselwa anrezistre, ki viv Sesel e konbyen viv aletranze? Mr Speaker Minis ti eksplik nou, ki sistenm konpiter an plas, pa kapab dir Minis konbyen ki an deor Sesel e konbyen ki pe viv aletranze. Mr Speaker zot ti dir nou pa retourn dan lepase.  Mr Speaker bokou sa bann Seselwa ki reste aletranze ki mannyer zot ti ariv laba?  Zot ti ganny egzile, pouse dan zot prop pei anba en sistenm diktater ki ti napa okenn demokrasi ladan ditou!

Depi yer Mr Speaker nou pe regard sa nouvo Bill lo Referendum ki pour met en pouvwar demokratik dan lanmen piblik Seselwa; donn zot en opsyon anmenn en Referendum devan Seselwa.  Sa Bill anba Lartik 5(1) ladan i permet en petisyoner pour anmenn en size par petisyon pour prezant koman en size e zot apel en public initiative. Nou tann bann Manm lo lot kote latab pe eksplike ki mannyer sa i met la demokrasi dan lanmen pep Seselwa.

Mr Speaker dan sa Lartik i dir nou, ki zot bezwen annan 35% of the registered voter as per the register of voters used  in a most recent election of the office of the President.  Sa msye Mr Speaker i apepre 20mil Seselwa ki sorti dan rezis voter ki ti ganny servi dan dernyen eleksyon Prezidansyel. 25mil, Mr Speaker en keksoz ki napa dan Bill letan sa public initiative i ganny raise par sa petitioner, i en dele letan pour ki sa prosesis i konplete letan zot pe akey zot bann sinyatir sa 35poursan ki 25 ekek mil Seselwa. Sa demann Referendum i vin koman en request ki ganny fer ek Prezidan.  Apre Prezidan si li konsider sa neseser i prosede. Dan Bill i mete koumsa –‘’ And the President considers it necessary or expedient that such issue or proposal is submitted to the voters for their determination in a referendum.’’ Savedir nou bezwen ganny eksplike ki savedir letan en Prezidan i konsider li neseser ouswa expedient? Akoz ki Prezidan ki deside dan sa ka?

Mr Speaker Manm US in koz lo pouvwar pour bann group tel ki bann ki oule en aksyon pli sir, lo sa topik Assomption. Mr Speaker anba lartik 11(e) i dir nou – dan Bill sa Mr Speaker i dir nou,

‘’An ordinary referendum shall not be held under section 4(1) – 4(2) 4(2)(a) or 5,  in respect of an issue a proposal concerning’’ anba (e) ‘’treaties, agreements or convention in respect of international relations.’’ Mr Speaker ki savedir tousala? I pa kler alor nou ti a kontan konnen. Akoz Mr Speaker enn bann keksoz ki nou’n tann nonmen dan sa Bill, se ki sa Bill i en gran Bill demokratik! En gran Bill demokratik ki ti komans le 27 Me 2019.

Ti napa konsiltasyon piblik pour sa Bill.  Kekfwa Attorney General i kapab dir nou kote White Paper ti ganny pibliye? Ki diskisyon ki ti ganny fer avek piblik?  Mon ti a kontan konnen sa Bill demokratik in ne le 27 (Zilyet), le 27 Me 2019. La nou Zilyet in ariv kot nou.  Mon ti a kontan ganny eksplike son formalite demokratik. Akoz mwan dan mon pwennvi son nesans pa ti demokratik ditou! Nou’n tann ‘’saret avan bef.’’

Mon krwar sa ki aplikab. Si sa Bill ti demokratik sa bann group ki nou’n tann nonmen paret Preserve Seychelles  -en lot group ankor en zenn, en group zenn dimoun ouswa group ki anvi anmenn sa size marijuana kontroversyal devan piblik, zot, zot ti a ganny loportinite dan sa prosesis demokratik, pour eksplik Biro Attorney General’s Office si zot dakor avek sa pti bout dan 5 (1) ki demann zot pour al rod 35 poursan sinyatir sa bann dimoun ki lo lalis voter ki ti ganny servi dan dernyen eleksyon prezidansyel; savedir sa 25 mil ekek Kreol e dan konbyen tan ki zot bezwen met sa bann sinyatir ater e rann Prezidan.

Sa bann ti a dir si zot war sa demokratik Mr Speaker! Me zot pa’n ganny letan akoz sa Bill in ne vitman, in grandi en sel kou, in ariv devan nou in pas dan tou prosesis demokratik avan ariv kot nou.  Alor mon ti a kontan konnen kan? Mr Speaker mon krwar ki sa bann group letan zot ti call msye Loze lot kote laba, zot in bezwen – sa dernyen Onorab ki’n antre dan nou Lasanble, mon asire zot in bezwen met sa bann pwen devan e kekfwa Biro Attorney General i kapab eksplik nou ki bann larepons ki sa bann dimoun in kapab gannyen pour montre zot kantite demokratik sa Bill i demokratik.

Mr Speaker nou Zilyet 2019, nou’n tann en Referendum lo sa size ki enplik Seselwa, ki aletranze. Me selman bann larepons ki vin avek sa topik, nou pa ankor gannyen. Msye Faure i koz souvan lo nou Konstitisyon, e nou isi dan nou Lasanble nou servi sa Lalwa Siprenm pour gid nou dan nou travay. Souvan nou pe fer nou mye pour edik pep Seselwa pour ogmant zot konesans lo sa dokiman Mr Speaker mon pran lokazyon osi pour fer pep Seselwa konnen ki nou Konstitisyon ozordi ian Kreol i vann 150 Roupi e nou kapab ganny li kot Lenstiti Kreol. Mr Speaker (mon pa konnen Onorab Sophola me selman en gran poursantaz nou zenn pa kapab lir Angle, alor i annan en Konstitisyon an Kreol! Demann Minis Ledikasyon i a dir ou!)

Mr Speaker sa dokiman ki ti vin an fors an 1993 e letan i ti vin an fors bann drafter ti dir ki i bezwen ganny revize tou le 15 an. Ok? I ti ganny revize an 2008. Letan i ti ganny 15 an e mwan pase Mr Speaker i ti ganny li 26an.                                         Sa bann revi i ankor pe asize lo en biro par la.  Komite ki ti formen Constitutional review i date le 21 Desanm 2019 download li website State Hous,e ti annan dimoun swivan lo zot Komite Mr Speaker. ti annan  Mr Francis Changsam, ti annan Mrs Marie Louise Potter, ti annan Wavel Ramkalawan, Onorab Wavel Onorab Wavel Ramkalawan, ti annan  Mr Antony Fernando, ti annan Mr Jeremie Bonnelame, ti annan Mr Gustave Dodin, ti annan Mr Albert Payet. Ti annan Mr Phillipe Boulle, ti annan Mr Bernard Elisabeth, ti annan Ms Sheryl Vengadasamy. Rapor ti ganny prezante avek Msye James Michel ki ti Prezidan sa letan Mr Speaker.  Lartik 50 ki ti ganny lir dan Konstitisyon ki’n lir an Angle mwan mon a lir li an Kreol; i dir ki nou ava annan en Prezidan Sesel ki ava Sef Leta, Head of State, Sef Gouvernman e Komandan-an-Sef Lafors Defans.  Mr Speaker sa i dir nou ki bann pouvwar e bann detay pour en Prezidan.  Dan sa revi la Mr Speaker, i annan en pti zafer ladan – i annan en pti bout ladan ki li i koz lo bann spesifikasyon ki nou kapab azoute dan  nou Konstitisyon letan nou pe rod en Prezidan.

Si Msye Faure ti anvi en Referendum, akoz i pa ti anmenn sa devan?  Ladan dan sa revi i dir nou ki zot sizere ki nou met sa mo ‘’Seychelles by birth’’ devan en ‘’citizen of Seychelles’’ ki anvi von Prezidan, e sa mon krwar i en kestyon, i Seselwa ti a kontan konsidere, akoz nou bezwen gete si Msye Faure li i pas sa bar!  Alor li i pa en keksoz ki li i konsidere enportan ki dan revi i pa’n anvi anmenn sa devan Seselwa, devan nou Lasanble. Me selman nou ti a kontan konnen kote nou revi i ete, akoz Konstitisyon i sitan enportan.

Mr Speaker mon’n ganny akize rasis, mon pa konnen si ou’n tande i off-mic?  Me selman mon krwar sa Onorab i bezwen take it back, akoz mon pa pe fer okenn ensinyasyon rasizm. I annan pei dan lemonn ki spesifye bann detay pou ou vin Prezidan.  Sa i bann keksoz ki pepe Seselwa i deside!  Li ki pour deside pa ou!  Mr Speaker mon kontinyen.

 

MR DEPUTY SPEAKER

Kontinyen Onorab Larue.

 

HON FLORY LARUE

Parey mon dir Konstitisyon in ganny 26 an sa lannen. E nanryen pa ankor ganny fer pour enplimant ouswa anmenn sa bann revi devan, pour fer deba.

Mr Speaker letan Komisyon Electoral osi in fer en travay pour revwar Lalwa Eleksyon.   Komisyon ti anmenn en rapor, ti annan enn an 2013, me ti nou vwar en rapor ganny anmennen State House devan Prezidan Danny Faure Vandredi le 26 Zanvye 2018.  Prezidan ti enform sa Komisyon ki sa rapor pour ganny konsidere avek prosen Cabinet meeting ki ti pour ganny fer le 31 Zanvye 2018. Apre i ti pour forward sa kot Biro Attorney Zeneral pour drafte en Bill.  Oli sa Lalwa Mr Speaker? Dan plan Gouvernman pour fer son travay pour anmenn kot nou, eski Prezidan pa ti war li irzan pour anmenn sa Lalwa devan nou, pour ranforsi nou demokrasi?

Mr Speaker le 6 Mars 2018 isi dan nou Lasanble, nou ti revwar Msye Faure e i ti prezant nou avek son SONA. Dan sa Speech Leta Lanasyon Msye Faure ti fer sa deklarasyon swivan;

‘’ Pandan sa lannen i dezir Gouvernman pour egzamin nou Konstitisyon prenan kont bann propozisyon ki ti ganny soumet par Constitutional review Committee, ki annan 10an  e osi byen rapor e rekomandasyon resan sorti kot Komisyon Elektoral, ki ti ganny anmennen le 26 Zanvye 2018. E bann sanzman e devlopman aktyel ki nou pei pe pas atraver. Prozedlwa lo lamannman Konstitisyon pou ganny soumet avek Lasanble Nasyonal avan Septanm sa lannen.’’

Mr Speaker savedir nou pe koz lo Septanm 2018. Oli sa Mr Speaker? Tou le de sa Prozedlwa i sipoze aparet devan sa Lasanble lannen pase.  Avek tou respe Mr Speaker ti napa okenn mansyon Referendum.

Nou ti pour sivre en prosesis kot bann Komite etablir par pei ti delivre bann dokiman byen detaye pour konsiderasyon. Akoz ki Msye Faure pa’n delivre lo son plan travay ki i ti promet pep Seselwa. Dan menm Leta Lanasyon Mr Speaker, i ti dir leta nou Nasyon i osi leta nou la demokrasi. Mr Speaker bann leskiz pour bann retard an delivre sa bann Lezislasyon i ki Biro Attorney General i vreman anba bokou presyon. E zot mank mendev sirtou dan sa domenn drafte en Lalwa.

Me ki nou vwar dan 1mwan edmi nou ganny nou en Lalwa antye ki nou tou nou konnen ki Msye Faure pe espere pour li fer en Referendum ki pour kout pei R20milyon.  Oli priyorite sa Gouvernman Mr Speaker?  Mr Speaker dan sa menm Leta Lanasyon an Mars 2018, Msye Faure ti dir nou bezwen ranforsi nou bann lenstitisyon.

I ti dir nou e mon quote Mr Speaker, ‘’Gouvernman i reste angaze pour lit kont koripsyon. Komisyon Anti-Koripsyon i sa Lotorite endepandan ki’n ganny mandate par Lalwa pour fer lanket e detekte koripsyon.  Nou pour revwar Lalwa Anti-Koripsyon e donn plis resours sa lotorite. Sa pour asire ki i fonksyonnen ki i fonksyon dan en fason pli efektiv e efikas dan lanket deteksyon e anpes koripsyon.

Prozedlwa pour ganny prezante avek Lasanble Nasyonal pour son laprouvasyon avan Septanm sa lannen.’’

Mr Speaker i ti pe koz lo Septanm 2018. Nou Zilyet 2019. Mr Speaker selman devan nou vwar en Lalwa Referendum ki’n ganny prepare dan en mwan edmi e deza nou lo Dezyenm Reading.  En Lalwa konpletman nouvo ki’n ganny ekrir par Biro Attorney General son lofis.

En Lalwa parey mon dir ki nouvo.  Mr Speaker mon vreman enpresyonnen.  Savedir sa biro i kapab delivre Lalwa. Nou pe esper bann Lalwa Mr Speaker pour ranforsi nou demokrasi akoz mazinen lannen pase an Novanm 2018 Attorney General ti dir nou li menm letan i ti pe rod Bidze. mon quote nou ankor still pe ganny bokou difikilte avek bann legislative drafters. I ti kontinyelman dir nou ki i mank staff e i mank staff kalifye pour drafting. Mr Speaker msye Vis Meriton osi ti dir nou en zafer dan nou Bidze lannen pase.

Mr Speaker, nou apresye defi e lour responsabilite lo Biro Attorney Zeneral dan domenn ekrir Lalwa nou konnen deza lo komansman lannen ti annan en 40tenn morso Lalwa ki nou ti’n diskite avek bann leaders ki nou pour bezwen pase. E nou preski ariv lafen lannen. I annan en bon ki reste ankor. E nou bezwen dimoun ki ekrir Lalwa.  Sa ti Novanm lannen pase. Mon pa’n tann Referendum mwan.  Mon war 40 morso Lalwa ki an retar. Avek respe Mr Speaker VP ki ti dir nou, Msye Vis-Prezidan ki ti dir nou. tou sa bann Lalwa ki nou pe koz lo la la, i bann Lalwa ki pour strenghthen nou demokrasi.   Oli zot?  Referendum i en ekstra ki ou anmennen letan ou annan en demokrasi for!

Alor Mr Speaker nou ankor pe espere. Nou bezwen anvoy en mesaz kler Mr Speaker kot Msye Faure ek son Gouvernman.  E mon ti a kontan quote Onorab Lemiel letan i dir atraver ou Mr Speaker,

‘’Napa enn nou ki pli gran ki sa pep. Napa Mr Speaker!  Pep Seselwa i  iltim!’’

Bann promes ki sa Prezidan in fer dan sa Lasanble in bezwen ganny onore Mr Speaker. Tou sa bann Lalwa ansanm ki in dir pour anmennen i ranforsi nou la demokrasi.  Mr Speaker sa Bill pa en priyorite.  I mank bout. I pa’n diskit ek pep.  In sot queue! Alor Mr Speaker mwan mon pa pour vote lo sa Bill.  Mon zet li anba konmsi Onorab Adelaide. Akoz Lalwa, bann lezot Lalwa i primordyal pour met nou pei dan en vre larout la demokrasi. Mersi Mr Speaker.

 

MR DEPUTY SPEAKER

Mersi Onorab Larue. Bon in ariv 10.42. Mon pour adjourn ziska 11er.

 

(BREAK)

 

MR DEPUTY SPEAKER

Bon bonzour ankor tou bann Manm Onorab, tou dimoun ki a lekout. Nou pe kontinyen avek nou travay, deba lo merit zeneral e prensip Bill ki devan nou Referendum Bill 2019. Prosen lo mon lalis se Onorab Egbert Aglae.

 

HON EGBERT AGLAE

Mersi Mr Speaker. Bonzour Minis, Attorney Zeneral, tou Manm e tou dimoun a lekout. Mr Speaker sa Bill pe fer provizyon pour etablir en kad legal e provizyon ki sa size fer en Referendum i annan en prosedir kler. I osi etablir bann baz konteks lo ki bann areas ki akseptab pour anmenn en koz pour fer en Referendum.

Mr Speaker sa Bill osi i fer mansyon bann size ki en referendum pa kapab ganny egzerse pour bann rezon Konstitisyonnel ou menas sekirite nasyonal. Mr Speaker i bon note ki sa Bill ki la devan nou pe etablir en balans pouvwar ki Konstitisyon i permet e nou war plis pouvwar pe donn sa pep osi pour zot osi form par dan desizyon, aport zot pwennvi e kot zot osi kapab zwe en rol pli avangard lo bann size Nasyonal e enportan. Mr Speaker dan en demokrasi kot pouvwar i santre dan lanmen en pep Gouvernman i bezwen war li osi enportan pour etablir bann check and balances.

Mr Speaker an regardan sa Bill i donn preogativ Prezidan pour call in en Referendum. E i osi fer provizyon pour en endividi piblik, groupman prezant en petisyon pour en Referendum lo en size ki zot santi i dan lenportans nasyonal e menm pouvwar pe donn Lasanble Nasyonal.  Mr Speaker baze lo sa Bill i osi met serten safeguard pour protez lentegrite nou Konstitisyon e osi fer ki okenn azanda malapropo ou act malisye pa ganny servi pour pous en Referendum devan!  Mr Speaker dan sa Bill i osi fer provizyon kan ki en Referendum i kapab ganny fer e ki bann rekomandasyon ou Regilasyon atase avek.

Mr Speaker bokou kestyon ki pe ganny demande, se eski sa Referendum Bill i neseser? Bokou largiman in ganny avanse, ki dan nou Konstitisyon aktyel i fer mansyon ki nou kapab annan en Referendum.  Sa i ganny trouve anba nou Election Act. Mr Speaker sa ki sa Bill i oule adrese, se prosedir ki Lartik 91 pa permet sa se en veikil lo ki mannyer sa prosedir i bezwen marse.

Mr Speaker an menm tan Lartik 164 nou Konstitisyon i dir nou, ‘’An Act shall provide for the holding of a referendum.’’ Mr Speaker kestyon ou konsern an zwe, se sa balans pouvwar ki i donnen anba nou Konstitisyon e ki sa Bill osi i oule anmennen. I annan 3 pwen ki’n ganny fer resorti. Premyerman Mr Speaker pwen kontansyan Bills Committee dan son rapor ki’n ganny met devan, se sa poursantaz 60poursan ki ale avek bann constitutional matters.

E 2enm eski Prezidan i merit desid lo sa poursantaz? Mr Speaker tou sa bann keksoz sirtou kot i konsern poursantaz i merit ganny met dan en Lalwa.

Sa i a fer ki pa nenport ki Prezidan ki la ouswa ki pour vin apre ki kapab zis vini sanz sa bann barenm.  Unless li i war ki i deside e i ava propoz en lot Lalwa pour fer ki i ava annan sanzman neseser.

Lot pwen ki nou merit baz lo la se poursantaz pour ou hold en ordinary Referendum Mr Speaker.  Mon santi pour dir ki nou bezwen osi deside lo en poursantaz ki fer ki i ava annan en diferans lo en constitutional matters avek en ordinary affairs ki ava ganny met devan, pour annan en Referendum.

Mr Speaker en lot pwen resorti, se eski tou Referendum i bezwen ganny refer ek Prezidan? Mr Speaker en Referendum pa en zouzou ouswa en zwe. En Referendum pa arive toulezour, nou to le semenn, ni tou le 3 mwan.  Mr Speaker alors annou adres sa Bill parey i ete me annou pa adres lo sa size lirzans.

Se lot kote latab ki ti fer resorti ki ler Prezidan Faure ti anons lentansyon pour annan en Referendum, ki i mank kad legal.  E Prezidan Faure in fer li son devwar pour ki i anmenn en Bill atraver Biro Attorney Zeneral pour kapab reglemant sa kad legal ki ti manke e bous sa trou vid.

Mr Speaker, alors eski ler sa in ganny fer nou komans zwe tiktik dan kwen avek sa Bill?  Mr Speaker si nou serye, si sa ki nou’n dir annou tonm dakor lo en keksoz e annou bouz de-lavan. Mr Speaker sa pep i ankor pe get nou depi yer lo sa Bill.   E zot santi poudir ki zot osi zot bezwen annan par dan sa Bill.   Zot lopinyon osi i merit ganny ekoute e ki zot osi a en pwen zot bezwen kapab anmenn en kontribisyon kot i konsern zot pei.   Mr Speaker en Prezidan ouswa nenport ki oule aspire vin Prezidan dan son sound mind, parey serten in dir nou pa pour kapab leve e mazinen oule fer en Referendum demen bomaten ouswa dizour a lannmen. So en largiman ki pe dir ki Prezidan i kapab servi sa zouti koman en zwe, i pa tenir – i pa realiz. Unless ou en Prezidan ki pa serye ki pa konn ou rol.

Mr Speaker sa barenm 60 poursan ki ou pour bezwen ouswa nenport barenm ki pour ganny preskri anba Lalwa, i pa kapab osi sitan ba, ki fer ki en prosedir Referendum i vin en fars e pa serye.  So en endividi ou en groupman, ou en mouvman i bezwen montre ki i serye dan son demars, depi komansman ziska finisyon dan son lentansyon petisyonn pour en Referendum.

Mr Speaker 3enm pwen ki’n fer resorti se pouvwar pour balans pour vwar Lasanble Nasyonal.  Largiman ki’n ganny avanse se ki pouvwar Lasanble Nasyonal dan sa prosesis e dan sa Bill Referendum i merit ganny elarzi.

Mr Speaker sa Lasanble i deza annan en ta pouvwar dan son lanmen.  E nou bann Manm nou osi nou annan nou bann privilez pour nou kapab anmenn nou bann Private Members Bill, si nou santi nou bezwen aranz serten keksoz ki bon pour Sesel, ki bon pour lanasyon e ki nou ava rod nou 2tyer pour nou kapab avans nou bann lamannman ouswa Lalwa ki nou anvi entrodwir.

Mr Speaker parey Onorab George i kontan fer resorti, annou fer Lalwa ki ler ou o pouvwar i pa fer ou ditor e osi i a benefisye ou ler ou pa o pouvwar.  Mr Speaker sa 6enm Lasanble in servi bokou son pouvwar ki’n ganny donnen anba Konstitisyon.

Zot in sitan ganny pouvwar ki zot in deside osi pour blok serten lapwentman parey Minis, Anbasader, serten Bill ki pa’n pase. Now eski nou oule plis pouvwar ankor pour nou deside si nou pour fer plis Referendum san bann prosedir checks and balances?

Mr Speaker mon pe remark en tandans ki nou per pour met serten pouvwar dan lanmen sa pep.  Se sa menm sa pep ki an 2016 nou ti konpanny pour donn nou zot sipor.  Eski i pa normal pour sa pep lo bann size Nasyonal e enportan ganny loportinite pour zot deside dan plas en pti group dimoun ki pour toultan pe dir kwa, ki bon pour sa pep.

Mr Speaker napa en kou mezirab oubyen sonm larzan ase pour etablir en vre demokrasi.  Alor kot i konsern en Referendum, annou pa koz lo larzan.

Akoz ler nou donn sans sa pep, kwa ki pli bon ki pour pli bon? Sa i vo plis ki de bilyon e de bilyon.  E en demokrasi modern i a ganny kree e i a ne. Mr Speaker pour konklir les sa pep deside e mwan mon pour reste angaze ver en demokrasi modern e partisipativ. E mon pe demande ki sa deba ki nou pe fer ozordi, i ganny fer dan lentere la demokrasi. Annou aret rod leskiz pour bouz devan e donn pep pouvwar ki nou tou nou konnen zot devret annan.             Sa Bill Mr Speaker i protez lendepandans, tou bann lenstans dan Konstitisyon. Lasanble i bezwen aksepte ki pa li ki pe devret desid lo tou size. E avek sa Mr Speaker mon pour donn mon sipor sa Bill.  Mersi.

 

(APPLAUSE)

 

MR DEPUTY SPEAKER

Mersi Onorab Aglae.  Onorab Wavel Woodcock.

 

HON WAVEL WOODCOCK

Mersi Mr Speaker. Bonzour Vis- Prezidan tou Onorab e tou dimoun a lekout.

Mr Speaker yer en Onorab lot kote latab ti dir ki sa Prozedlwa i enn ki’n pran bokou letan pour arive.  Me an realite Mr Speaker sa Referendum Bill Gouvernman US in tay avek pour anmenn devan sa Lasanble pour en sel rezon pour ki Prezidan i kapab fer en Referendum san okenn baryer, san okenn difikilte, san okenn obzeksyon.

Annefe Mr Speaker bi prensipal Msye Faure atraver sa Prozedlwa se pour fer en Referendum ki pour determinen si bann Seselwa ki pe reste aletranze pour kapab vote Sesel. Zisteman Mr Speaker sa Referendum i ganny dekrir dan zournal PL/US  Plus, the People koman en ‘’Master Stroke’’ Msye Faure!  Ki sa Referendum i pour en ‘’Knockout Blow ‘’pour Leader Lopozisyon!  Mr Speaker se sa ki nou apel zwe politik.

E mon pour bezwen dir Onorab Loze boner in dir nou pe fer bann zwe politik lo sa Bill. Me klerman i montre poudir menm dan zot bann zournal, zot bann lartik ki zot pe ekrir, se zot ki pe fer bann zwe politik Mr Speaker!  Tou Seselwa i konn tre bye rezon akoz L’Egzekitiv in fast track sa Bill pour vin devan sa Lasanble.  En Referendum Bill ki’n pas par devan plizyer lezot Prozedlwa bokou pli enportan.

Par egzanp sa Bill in pas par devan Lalwa pour donn plis ledan Komisyon Anti-Koripsyon pour piblir pli vit e pli efektivman, kont bann ka koripsyon dan nou pei.  Sa Bill Referendum in ganny priyorite par lao Prozedlwa pour amann salary grid dan en fason ekitab pour permet, ki pour met plis larzan dan pos Seselwa.

Gouvernman in met retar lo sa Bill pour amann bann salary bands ler zot ti kas kontour pour anmenn en S.I ki kont nou Konstitisyon ki Lasanble ti rezete.  Olye ki L’Egzekitiv ti tonm lo en konpromi avek Lasanble, ki ti pour benefisye plis Seselwa L’Egzekitiv ti pli enterese avek en salary grid ki ti pour benefisye plis bann dimoun dan gro pozisyon. E akoz Lasanble ti quash zot S.I Egzekitif ti deside anmenn nou Speaker Ankour!

Fodre note Mr Speaker ki si sa Bill ti pase parey Gouvernman US ti pe demande pour met plis ki R4mil dan pos bann Minis ek Prezidan ek zis R250 dan pos malere!

Ozordi Gouvernman Msye Faure pe rod en Referendum ki zis li ki oule ki pa en priyorite pour pei.  Annou pa bliye ki ti’n fini anvoy let kot Komisyon Elektoral pour demann sa Komisyon pour organiz en Referendum.  Sa Referendum, se Leader Lopozisyon Mr Speaker ki ti donn li en leson lo nou Konstitisyon ki ti bezwen eksplik atraver Lasanble ki i pe al kont nou Konstitisyon e i ti bezwen retir son demann, son let ki i ti’n fini soumet avek Komisyon Elektoral. Mr Speaker mon war li enteresan ki Msye Faure in swazir en tel Referendum ki konsern drwa vote nou bann frer ek ser Seselwa aletranze kan an se moman dan nou pei i annan keksoz bokou pli pertinan ki fer mon kestyon son vre azanda.

Mr Speaker en keksoz vreman enteresan an 2008, parey Onorab Larue in koz lo la pli boner en revi lo nou Konstitisyon ti ganny fer.  En rapor ti ganny prodwi an Desanm 2009 ki ti ganny soumet avek Prezidan Sesel, sa letan.

Enn bann rekomandasyon dan sa revi Konstitisyonnel, se ki fodre ou en Seselwa ki’n ne Sesel, pour ou kapab vin Prezidan Sesel.

Le kestyon ki mon pe demande Mr Speaker, le kestyon ki mon pe demann mon lekor, se akoz ki Msye Faure pa’n demann en Referendum lo la?  I osi enteresan ki yer Onorab Sebastien Pillay in koz lo drwa lepep Seselwa pour partisip dan en Referendum.  Me sa ki enteresan Mr Speaker i pa’n koz ditou lo drwa lepep Seselwa pour elekte son Prezidan! Pour elekte en Prezidan ki lepep Seselwa i oule.   Me non pa pour ganny en Prezidan ki’n ganny enpoze lo nou pep!

Ozordi nou annan nou en Prezidan ‘’pas baton.’’ E Mr Speaker fodre pa bliye ki ler zot ti pour sanz nou Konstitisyon, pour entrodwir ‘’pas baton’’, zot pa ti enterese avek Referendum. Zot pa ti enterese pour demann lepep Seselwa si zot ti dakor avek ‘’pas baton!’’ La ozordi bann Manm lo lot kote latab pe vin koz lo la demokrasi. Dan aircon ek en kravat anba zot likou konmsi Onorab Loze, zot pa enterese avek la demokrasi! Zot pa enterese pour donn nou pep en Prezidan elekte!

Sa ki nou apel diktatir Mr Speaker. Ler zot ti annan de tyer mazorite absoli dan Lasanble, zot ti fer sa ki zot oule avek nou Konstitisyon.  Zot ti fer 10 amannman dan nou Konstitisyon, san demann lopinyon piblik. Zot pa ti enterese avek okenn Referendum.

Onorab Gill in koz lo separasyon pouvwar. Plizyer Manm PL/US in dir ki sa Bill i vreman demokratik. Me Mr Speaker ler ou get seksyon 3, 4 ek 5 dan sa Bill, i kler ki sa Bill pe donn plis pouvwar Prezidan.

Dan sa Bill seksyon 4, (1) Prezidan i kapab call en Referendum nenport ki ler ki li i anvi.  I son preogatif pour call en Referendum! I pa bezwen laprouvasyon personn. E si i demann Komisyon Elektoral pour organiz en Referendum zot bezwen fer li.  Me selman sa ki enteresan Mr Speaker Onorab Georges ti koz lo la yer. E ki montre en lenzistis dan sa Bill pour Lasanble demann en Referendum anba seksyon 4, (2) (a) ek (b) fodre en Mosyon i ganny aprouve par 2tyer Lasanble ki ok, me i pa aret la.

Apre ki Lasanble in aprouv sa Mosyon pour fer Referendum, se Prezidan ki annan final say – si sa Referendum pour ganny fer ouswa non.   Se Prezidan ki pour determinen si i neseser ouswa konvenab, pour okenn Referendum ki Lasanble i propoze pour ganny fer.  Me Mr Speaker oli balance of power la? Sa Bill pe donn Prezidan pouvwar absoli! Tou Referendum se Prezidan ki pour deside si i pour ganny fer.  Sa i diktatir Msye Prezidan! Sa Bill pe retourn 40an an aryer.

I pa aret la Mr Speaker. parey pour lepep Seselwa anba seksyon 5(1) si 35poursan registered voters i siny en petisyon pour demann en Referendum lo en size ki zot konsider i dan lentere Nasyonal, ankor Mr Speaker laprouvasyon Prezidan i neseser pour sa Referendum ganny fer.  Apre bann Manm lot kote latab, bann Manm US i ava vin koze lo pouvwar pour lepep Seselwa.

Pouvwar pa pour lepep Seselwa. Pouvwar pour Msye Faure! Lekel ki pour hold Prezidan accountable?  Oli check and balance dan sa Bill? Mr Speaker sa Prozedlwa ki devan nou, i enzis e pe donn Prezidan tro bokou pouvwar.  I neseser ki i annan en Provizyon dan sa Bill kot ler Prezidan i oule fer en Referendum i bezwen vin devan Lasanble Nasyonal pour determinen si sa referendum ki pe ganny propoze i neseser, i konvenab e ki dan lentere lepep Seselwa.  Zis parey Lasanble Nasyonal ek bann petisyoner i bezwen laprouvasyon Prezidan pour fer en Referendum. Mr Speaker sa Bill parey i ete, mon pa vwar separasyon pouvwar ladan.

Mr Speaker en lot kestyon ki nou bezwen demann nou lekor, eski an se moman nou bezwen en Referendum? Ki kapab kout nou pei plizyer milyon Roupi. Onorab in koze boner i kapab kout anviron R20 milyon pour fer en tel Referendum.

Ozordi nou pep pe soufer. Seselwa pe trimouse pour fer de bout zwenn. Plizyer Lalwa ki Gouvernman in anmenn devan Lasanble Nasyonal, se pour benefisye bann ki deza dan gro pozisyon. Parey mon’n mansyonnen pli boner lamannman dan salary grid ki pour met zis R250 dan pos malere e plis ki R4mil an montan dan pos Minis avek Prezidan.   Eski nou oule gaspir plizyer milyon?  R20milyon lo en Referendum kan sa larzan i kapab ganny servi dan en fason pli meyer ki pour benefisye lepep Seselwa? Sa larzan i kapab ganny servi pour donn Long Service Allowance bann staff ki travay dan bann lakonpannyen anba PMC parey Air Seychelles, SCAA, ek STC ek lezot ankor ki pa pe benefisye avek sa Long Service Allowance. Sa larzan ki zot pe gaspiye ki zot oule gaspiye lo en Referendum. Yer zisteman nou’n koz lo sekirite nasyonal. Kriminalite ki pe ogmante dan nou pei.  Akoz nou pa servi nou resours byen e kot i neseser? Envestir dan plis Zofisye Lapolis training e lezot fasilite ki pour anmenn en retonbe pozitiv dan nou pei.

Kwa ki priyorite dan nou pei? Parey mon’n dir pli boner nou tou nou konnen le vre rezon akoz Gouvernman pe taye pour pas sa Referendum Bill!  Mr Speaker se senpleman pour rezon politik.   Me nou koman en Lasanble responsab, nou bezwen gete kwa ki priyorite dan nou pei.   Ozordi nou annan en Prezidan ki sak fwa i rev en kou, i vin avek en bann proze, ouswa propozisyon, ki pour met plis fardo lo nou pep. Parey fantezi tinel ki pa pour neseserman benefisye nou pep me plito andet nou pei. Plizyer desizyon ki pe ganny pran dan L’Egzekitiv, i dan zot lentere politik me pa dan lentere lepep Seselwa.

Zis parey en Referendum ki pep Seselwa pa enterese avek, ki pa en priyorite pour nou pei.  Pour plis ki 40an Mr Speaker nou’n annan en gro nyaz nwanr lo nou pei.  En Gouvernman ki pa konn son priyorite.  En Gouvernman ki pa pe pou son pep!

Pour plizyer lannen lavwa sa pep pa ti pe ganny ekoute. Me lepep Seselwa pe dir parey Onorab William ti dir ‘’enough is enough!’’  Avek bann retar ki zot pe met nou pei. En soley i a pe leve lo nou pei pou tir sa gro nyaz nwanr ki’n met nou pei retar pour plis ki 40an.  Sa ki pli enportan pour nou pep se zot vant e vant zot zanfan.

Se sekirite e lasante nou zanfan ki pli enportan!  Pa en Referendum. Lanfaz ki nou Gouvernman i merit mete, se pour byennet nou pep. Se pou fer desann pri lavi.  Se pour vin avek bann Lalwa ki pour ankouraz Biznes dan nou pei. Tir en pe taks lo bann pti biznes ki pe trimouse e al rod larzan kot bann gro biznes lakonpannyen ki pe evade taks ozordi. Ankouraz prodiksyon e met lanfaz lo devlopman bann sekter enportan dan nou pei sirtou nou lendistri tourizm, lagrikiltir avek lapes.

Tir bann middleman ki pe ganny soutire par Gouvernman dan lenportasyon bann komodite parey STC pour ede redwir kou lavi.  Anmenn Lalwa pour elimin koripsyon ek bann pratik ki pe tir manze dan labous Seselwa e larzan dan Kof  Leta!

Mr Speaker nou annan en Gouvernman ki pa konnen kwa ki bon pour Sesel.  Kwa ki nou pep pe demande.  Zis parey Mosyon ki Onorab Larue ti anmennen pour met en moratorium lo donn nou sitwayennte, kot i ti fer resorti ki dan dernyen 10an plis ki 1,283 etranze in ganny sitwayennte Seselwa.  413 ladan ti aste paspor sitwayennte Seselwa anba Scheme Economic Passport. E 408 dimoun, etranze ti ganny citizenship anba Lartik 5, anba preogativ Prezidan. Plizyer dimoun ki pa’n fer nanryen spesyal pour merit nou nasyonalite e fer nanryen pour Sesel in ganny sitwayennte ozordi. Sa i bann keksoz ki nou pep i enterese avek; ki nou Gouvernman i merit port latansyon lo la.

L’Egzekitiv pe rod Referendum lo size dwa vote bann Seselwa ki pe reste aletranze, me zanmen en resansman in ganny fer pour konnen kantite Seselwa i annan vreman, ki pe reste aletranze.

E Gouvernman zanmen in fer okenn zefor, zanmen in fer okenn legzersis pour ankouraz bann Seselwa – sirtou bann profesyonnel ki pe reste aletranze pour retourn Sesel e donn en koudmen dan nou pei olye ki nou kontinyen depann lo etranze.

Mr Speaker, lalis i long lo bann keksoz priyoriter ki nou pei i bezwen; ki L’Egzekitiv pe merit met plis lanfaz lo la.  Sertennman Mr Speaker pa en Referendum ki priyorite ki pe gaspir or ki pour gaspir larzan lepep Seselwa.  Mr Speaker avek sa de mo sirtou ler mon pe get sa kalite ‘’pouvwar absoli,’’ ki sa Bill pe donn Prezidan Larepiblik mon pa pour kapab siport sa Bill!  Mersi Mr Speaker.

 

(APPLAUSE)

 

MR DEPUTY SPEAKER

Mersi, mersi Onorab Woodcock. Onorab Noline Sophola.

 

HON NOLINE SOPHOLA

Bonzour, e mersi Mr Speaker. Bonzour Minis e Attorney Zeneral tou Manm Onorab e tou dimoun ki a lekout.

Mr Speaker sa Bill ki’n ganny anmennen devan nou ozordi pe koz lo Referendum. En mo ki konmela i tre popiler parmi nou popilasyon.  En mo ki trouve dan nou Konstitisyon dan Lartik 164, (1) ek (2). Me mon anvi ansanm avek nou bann elektora, revwar lenportans en Referendum e akoz ki en pei i bezwen fer Referendum.

Mr Speaker en Referendum i en vote direk kot tou bann elektora – vedir tou bann dimoun apartir laz 18an ki annan laz vote, zot ganny envite pour egzers zot dwa par senpleman en wi ou  en non zour ki Referendum i ganny fer. Fodre byen note ki en Referendum i ganny fer anba bann Provizyon spesifik, Referendum Konstitisyonnel. Referendum lo en size ordiner ki annan en gran lenportans signifikans Nasyonal.

Vedir ki i pour dan lentere tou kous popilasyon dan pei.  Mr Speaker anba Lartik 24(1)( a) ziska (b) dan nou Konstitisyon i dir, ki tou sitwayen Seselwa ki annan laz 18an, i annan dwa pour partisip dan Gouvernman. vedir ki zot annan drwa partisip dan bann zafer piblik, anrezistre zot koman en voter pour zot kapab partisip   dan bann eleksyon pour partisip lo laspe egalite dan servis piblik.

Alor Mr Speaker dan en lot mo sa lartik i donn lepep sa pouvwar pou partisip dan bann desizyon ki pei i pran. Non pa les zis L’Egzekitiv, Lezislatif ek Zidisyer fer tou desizyon, be zot konman lepep kan ki zot pou partisipe?

Mr Speaker en referendum i enportan akoz i ogmant partisipasyon politik parmi popilasyon.  I pe vin moman dan pei, kot eleksyon pou nepli ariv tou le 5an. Nou’n fek war dan distrik Anse Boileau, kot pei ti bezwen swazir en nouvo kandida pou Lasanble.

Dan sa konteks ozordi, sityasyon politik in sanze.  Alor nou popilasyon osi i bezwen vin azour avek sanzman.  Si nou pep pa vin aktiv ozordi, demen i pou bokou tro tar. Nou popilasyon in evolye, zot konmans kestyonnen, par form bann diferan group oubyen lasosyasyon. Pou zot annan plis lafors avek bi anmenn plis enteraksyon dan bann desizyon ki pei i pran e osi pli enportan defann zot drwa ozordi e pou zot zenerasyon a lavenir. Mr Speaker sa Bill i ou le retourn pouvwar kot lepep.  Donn zot plis liberte pou eksprim zot.  Alor lepep profite pou pran desizyon ler loportinite i prezante.

Fodre pa ki nou per pou donn lepep pouvwar pou eksprim zot.  Akoz nou per? Donn lepep loportinite pou zot donn zot lopinyon, partisipasyon e lopinyon tou dimoun i enport, pa selman en pti group. Prezidan osi i pou ganny serten pouvwar pou sanz serten bann size kot i demann amelyorasyon pou reponn bezwen nou pep ek nou pei.  Mr Speaker i enportan ki tou dimoun i pran sa tre serye. Sa pouvwar i pa zis pou prezidan dizour, oubyen parey nou dir Prezidan ozordi. Vedir pou Prezidan Faure, me i aplikab pou nenport ki dimoun ki pe aspire pou vin Prezidan Sesel.

Mr Speaker fodre ki nou pep i konpran byen ki Prezidan napa diskresyon ‘’absoli’’ lo Referendum ki vin devan li.   Son aksyon i subject to judicial review. I enportan ki lepep i konpran byen ki sa zafer Referendum pa prezidan ki’n envante.  Lontan i dan vokabiler kouran. Me posib pou bokou zenn zenerasyon i nouvo zot pa tro azour avek. Zis pou donn enn de legzanp Referendum, i annan 11 Referendum atraver UK depi 1973. An 1975 en Referendum ti ganny fer pou deside, si zot pou reste konman en Manm kominote eropeen e rezilta ti 67poursan an faver.

Si nou swiv medya sosyal nou pou war ki ankor fek ariv sa zafer Brexit. E ki reperkisyon ki Referendum in anmennen. Dan Sesel premye Referendum konstitisyonnel ti ganny fer an Novanm 1992, 2enm ti le 18 Zen 1993.

 

(Off-Mic)

3enm?

 

HON NOLINE SOPHOLA

(3enm ou a vin fer) Me en Referendum i bezwen ganny byen ganny organize anba direksyon Komisyon Elektoral, ki si i form parti dan zot manda, ki tou keksoz i pas dan norm ki’n ganny adopte. Mon demann tou dimoun pou ganny en kopi Konstitisyon, pour nou vin pli azour avek bann Lalwa pei.

Sa Konstitisyon i byen ki  tou dimoun ki pe ekoute, i konnen ki i dan 3 langaz ziska prezan. Angle, Kreol fer zot swa! Pa personn ki pou dir zot dan ki langaz ki zot bezwen lir!

 

 

(APPLAUSE)

 

 

HON NOLINE SOPHOLA

Fer zot swa lir dan sa langaz ki zot pli alez ladan.  Sa ki enportan se ki zot konpran son konteni.  Mr Speaker e si demen i ariv en sanzman ler nou get nou Konstitisyon – e si demen i annan en sanzman ki arive, zot ava konnen lo kwa ki pe arive e ki mannyer ki zot pou partisip antyerman dan deroulman pou anmenn sipor. Sirtou si i bezwen ganny fer atraver Referendum.

Mr Speaker mon pou termin par fermeman dir, ki mon pou donn tou mon sipor total sa Bill.  Akoz pep Seselwa pe ganny pouvwar pou eksprim zot libreman, lo en size Nasyonal ki posed en lenportans  signifikan.  Mersi Mr Speaker.

 

(APPLAUSE)

 

 

MR DEPUTY SPEAKER

Mersi Onorab Sophola.  Onorab Sandy Arissol.

 

HON SANDY ARISSOL

Mersi Mr Speaker.  Bonzour tou manm, bonzour Vis-Prezidan avek AG e bonzour tou bann dimoun ki pe ekoute. Mr Speaker in enteresan lo sa Bill letan tou bann Manm lo kote US in koze zot in fer referans avek lepep Seselwa. Kestyon ki mwan mon ti a kontan demande, eski lepep Seselwa in ganny konsilte avek sa Bill ki zot pe koz lo la?  Larepons i non.

Dan preanbil nou Konstitisyon, i dir ek nou ‘’We are the people of Seychelles!  An Kreol ‘’Nou pep Sesel! Alors Konstitisyon ki nou pe koz lo la ki nou pe sermante lo la i fer referans avek ‘’lepep Seselwa.’’ Eski ‘’lepep Seselwa’’ in ganny konsilte letan nou pe koz lo la. letan nou pe koz lo non ‘’lepep Seselwa?’’ Larepons i reste non. Mr Speaker Letan Onorab Johan Rifned Jumeau in refer nou avek Lartik 50 nou Konstitisyon – Loze pardon. Onorab Johan Rifned Loze (eskiz mwan) in fer referans avek Lartik 50 nou Konstitisyon.

Dan Lartik 50 nou Konstitisyon i dir nou, ‘’I ava annan en Prezidan Sesel ki ava Sef Leta, Sef Gouvernman e komandan-an-Sef Lafors Defans. Lartik 50 nou Konstitisyon pa dir nou pou dir Prezidan i devret annan ‘’pouvwar absoli!’’ Mr Speaker Lartik 164 nou Konstitisyon, i dir avek nou, en Lalwa i ava fer provizyon, pour ki i ava annan en Referendum pou bann lobzektif sa Konstitisyon, ouswa okenn lezot bi, ouswa okenn sirkonstans pou preskri par sa Lalwa – parey Onorab Sophola in remind nou anba sa Lartik.  Sa Lartik napa en landrwa ki mansyonn Prezidan Larepiblik Mr Speaker.

Me parkont sa Bill ki zot in anmennen devan Lasanble i pe koz lo sa menm Lartik 164 selman li ladan i pe fer referans avek Prezidan. Se la kot mon santi i annan en problenm Mr Speaker, parske nou pe donn parey lezot mon bann Manm in dir – nou pe donn tro bokou pouvwar Prezidan Larepiblik. En keksoz ki Konstitisyon pa fer referans avek Mr Speaker. E mon’n vwar drol akoz lezot Manm pa’n eksplik sa – bann Manm US i senp mwan mon war sa Bill konman en labwet.

Mon a eksplik mon lekor Mr Speaker.  Senpleman letan zot, zot konn lopinyon Seselwa laba deor an referans avek bann Seselwa ki pe viv aletranze pou vote; e annou pa bliye Mr Speaker, se sa menm Seselwa ki la aletranze parey Onorab Larue in fer resorti se zot ki responsab pour fer sa bann Seselwa reste aletranze. Zot konnen ki mon pe koz lo la. Zot anmenn en Bill ki ganny refer koman Referendum Bill.

Leave in koman sa labwet akoz sa senpleman sa ki zot, zot tou zot in koz lo la se donn loportinite sa Seselwa laba aletranze vote.  Alor sa i vin lo en kote emosyonnel.  Alor nou a dir be ok vre nou annan nou bann frer ek ser aletranze zot devret ganny sa sans pour zot vote.  Me lanmson kote i vini li Mr Speaker?

Lanmson se pouvwar atraver sa Bill ki pe anmenn bann Seselwa vote pouvwar ki zot pe donn Prezidan! Sa i ladan dan sa Bill.  Se sa ki nou bezwen veye ozordi.

I enportan ki bann Seselwa ki pe ekoute laba deor nou swiv sa tre byen. Nou pe envit bann Seselwa vote atraver en Bill ki zot in prezante ozordi me ladan an menm tan i pe donn Prezidan Larepiblik bokou plis pouvwar ki i deza annan. Sa nou bezwen fer tre byen atansyon.

Mr Speaker akoz mon dir sa. Parski dan sa menm Bill ki zot pe prezante anba 4.1 letan Lasanble Nasyonal in diskit lo en keksoz son dernyen laliny i dir ek ou ‘’refers the ordinary issue or proposal to the President.’’ Sa i enn.

2enm 5.1 letan bann voter laba deor zot desid en keksoz atraver en petisyon ki 35 poursan parey Onorab Georges in dir anviron 25mil dimoun e ler ou get 25mil dimoun i fer en petisyon i deza en vote dan li menm. 25mil dimoun i fer petisyon i donn son reaksyon son desizyon lo en keksoz, tousala i bezwen refer kot Prezidan.

Se Prezidan menm ki pour deal avek sa.  Alors sa i danzere Mr Speaker!  Pour mwan i danzere.  Akoz mon dir i danzere? Mon’n tann group Preserve Seychelles ganny mansyonnen. Si demen bomaten sa Bill i pase avek Lasanble ki la ozordi, 6enm Lasanble, demen bomaten Gouvernman i deside reouver sa file Assomption ki ti la depi Prezidan Michel ti la. Zot, zot krwar sa file fek ouver la zot.  Sa file ti la depi Prezidan Michel!  Si Gouvernman ki la Msye Faure i deside reouver sa file i dir ok nou deal Assomption i reste parey i ete. sa Bill i pase, Preserve Seychelles i kapab rod son 35poursan dimoun laba deor, fer en petisyon, vin devan Lasanble Nasyonal e nou, nou zete, still i retourn kot Prezidan Larepiblik. E li i dir ek zot la Assomption lo en plato lor mon bann zanmi. E sa menm pep Seselwa ki zot in koz lo la, pour napa en say letan mwan mon pe get Lalwa parey i ete Mr Speaker!

Sanmenm sa ki mon pe dir i danzere ozordi sa travay ki nou pe fer la. I enportan pour nou swiv li byen.  Letan ou donn pouvwar tro bokou pouvwar en Prezidan sa i fer ki i de-balans separasyon pouvwar. En keksoz ki danzere pour en pti pei parey nou Mr Speaker. Se la kot mon problenm i vini.

Me 2enm pwen kestyon ki mon anvi demann mon lekor, se akoz letan zot ti annan en pouvwar absoli dan Lasanble Nasyonal zot pa ti anvi fer serten lamannman sirtou lo sa 164? Akoz Mr Speaker. Larepons i senp.  Ou konnen akoz? Parski sa letan zot ti annan en pouvwar absoli zot. Zot ti annan Egzekitif ti pour zot. Lasanble ti pour zot, Speaker ti pour zot, Lakour ti pour zot. Travayer ti pour zot. Alors zot ti konfortab parey Onorab Johan Loze in fer nou mazinen.

Zot ti konfortab. Zot ti dan zot aircon.  Zot ti dan zot kravat. Alor zot pa ti bezwen mansyonn non lepep Seselwa.  Ozordi mon kontan letan Onorab Sophola i vini i dir ek nou bezwen konsilte lepep annou pa per pour koz ek lepep. Annou pa per pour adres lepep. Ti annan en letan dan sa pei lepep ti ganny kit ater dan son prop pei!

 

(APPLAUSE)

 

HON SANDY ARISSOL

La ozordi Onorab Sophola ki’n ganny elekte atraver lepep, i vini i dir ek nou fodre  get lepep!

Nou lo sa kote latab lontan nou pran lenportans pour lepep!  Se pour sa rezon LEPEP in met nou en mazorite dan sa Lasanble pour fer sir ki lepep Seselwa i kontinyen ganny ekoute e ganny lenportans dan son pei!  Se pour sa rezon nou la ozordi koman en mazorite Mr Speaker.

 

(APPLAUSE)

 

HON SANDY ARISSOL

Me par kont letan zot ti annan en pouvwar absoli Mr Speaker Onorab Sophola atraver ou zot ti’n bliy lepep Seselwa!.

Se pour sa rezon ozordi score i 15 lo 10.  Alor ler zot vini avek en Bill sa i montre en problenm. Letan zot pe rod pouvwar pour donn Prezidan la i vin en problenm.  Parski zot in fini vwar pour dir zot nepli annan sipor partou zot, zot nepli annan sipor Lezislatif. Nou, nou en mazorite Lasanble, Sekretarya pour nou.  Zot in fini realize pour dir Zidisyer pa neseserman dan zot faver.  Zot in fini realize pour dir deor bann travayer pa pe siport zot, zot in fini realize Mr Speaker lo Zidisyer mon ava eksplik mon lekor Mr Speaker depandan mannyer bann zizman i vini, mannyer bann rapor i vini, Sekretarya, pa bann Ziz – endividi.

Mr Speaker dir Onorab Pillay konport li i pa kapab raise en point of order lo tou keksoz ki dimoun i dir! Annan en konportman dan Lasanble! Alor letan zot realize poudir bann travayer laba deor, nepli siport zot – e pa bliye Mr Speaker i enportan pour Onorab Pillay koman Sekreter Parti konnen sa Sekreter Kominikasyon – menm santer nepli siport zot!

 

(APPLAUSE)

 

HON SANDY ARISSOL

Alor zot napa sipor.  Prezan ou konnen ki zot pe fer zot pe anmenn en Bill pour nou dan Lasanble Nasyonal servan nou bann frer ek ser ki reste aletranze, pour zot donn pouvwar Msye Danny Faure. Mon bann zanmi pa pour marse sa! Nou’n vwar zot e nou’n debiste zot byen boner. E nou pe dir zot la.

Mr Speaker alor i enportan pour tou bann ki’n koze, letan zot in koz lo non lepep mazin preanbil nou Konstitisyon. Nou’n ganny elekte pour reprezant nou dimoun laba deor. Nou pa’n ganny elekte dan Lasanble Nasyonal pour nou fer marse rev en dimoun.  Akoz in reve an Me alor nou bezwen fer son rev an Zilyet vin en sikse! Pa marse e pa pour marse ankor!

 

(APPLAUSE)

 

HON SANDY ARISSOL

Mr Speaker mon lot pwen. Letan nou’n koz lirzans Onorab Johan loze in koz nou lirzans sa Bill. ozordi dan nou pei i annan en kantite lirzans. Seselwa deor ozordi pe kriy lasasen an sa ki konsern pri lavi dan sa pei.  Nou sa Lasanble nou anmenn bann Mosyon, nou’n demann kestyon, nou’n rod leklersisman, nou’n fer tousala. Ki Gouvernman Msye Faure in fer. Nanryen. Konmdir mon koleg, nanryen, nanryen, nanryen, i pa’n fer! Zot in reste trankil. Letan Seselwa pe rod en logmantasyon saler ou konnen ki nou, nou’n fer lo kote LDS nou’n anmenn en pri rezonnab. Sa ki nou ti pe demande pou tou dimoun sete R450 omwen. Enn fwa dan 40an nou’n demande Mr Speaker. An vi ki parey zot pe dir ek nou larises pei pa pe byen fer pe soz isi laba, annou dir enn fwa dan 40 an donn sa pep en R450. ou konnen ki administrasyon Msye Faure in fer in met sa case ankour sa ki lepep pe rode ozordi laba deor.

Lepep pa enterese ek Referendum li. Li i anvi konnen kwa ki anmenn pour son zanfan dan lakour ki mannyer i pey son Bill delo ek son Bill elektrik ki nou fek tande depandan lo delwil i riske mont ankor. Li i anvi konnen ki mannyer i pey son lakaz. I anvi konnen ki mannyer i soutenir son zanfan. Sa ki lepep Seselwa i anvi nou fer dan sa Lasanble Nasyonal. Pa vin pas letan koz Referendum, rode kantite pouvwar nou pour donn en sel dimoun dan sa pei. Nou pour ganny gete koman pa bann responsab.                             Alor Mr Speaker, lirzans kantite lirzans nou anmenn en kestyon dan Lasanble Nasyonal atraver Leader Lopozisyon pour demann sekirite dan sa pei. Ozordi sendika i ankor pe deter koksis mon pa konnen lekel pe met en pe partou lo peron Legliz. Be pa in ler ozordi pour ladministrasyon Msye Faure vin devan dir nou en keksoz, anons en keksoz donn en lespwar lepep Seselwa pour dir sekirite sa pei dezormen apartir tel zour i bezwen mars drwat.

Se sa ki lepep Seselwa pe rode. I pa pe rod Referendum li! R18 milyon pour Referendum. Nou ti kapab ed Lapolis pour li kapab fer travay konkret, pli spesifik detekte bann dimoun ki pe donn lenfirmite dan nou kominote Mr Speaker.

Sa bann irzans ki nou pe rode. Sa ki lepep Seselwa pe rode laba deor.  I enportan pour nou tou, nou tou la anndan nou sipoze ganny reprezante, nou’n vin lo non lepep Mr Speaker.  Me par kont letan ou annan en Gouvernman ki pe fer bann refleksyon tinel.  I anvi fer tinel pour sorti Providence pour al tonm Nouvelle Vallee, kestyon ki lepep i demande eski semen ki Angle in kit ek nou, nou kapab maintain? Non nou pa maintain.

Rigol nou pa kapab debouse, nou pavement napa oter.  Nou bann  crash barriers napa standar, roundabout enn i pli gro enn i medium enn i small!  Sa ki lepep pe rode laba deor. Mannyer Gouvernman i diriz en pei. Pa anmenn en Bill Referendum ozordi dan nou Lasanble nasyonal, fer li sot queue, fer li ganny presedans lo tou keksoz akoz zot bann US zot anvi donn pouvwar zot Prezidan ki’n perdi tou pouvwar!

Sel Referendum ki lepep Seselwa i devret pe vote ozordi Mr Speaker se pour deside si Msye Faure i ankor dan son kapasite pour li diriz nou pei koman en Prezidan ki’n ganny elekte atraver en baton!

 

(APPLAUSE)

 

HON SANDY ARISSOL

Sa Referendum ki nou devret annan dan sa pei, apard perdi nou letan pour anmenn enn ki pe donn pouvwar en sel dimoun.  Lirzans dan sa pei Mr Speaker kantite i annan letan nou annan bann travayer deor ki pe demande si i pour ganny son Long Service Awards parey tou lezot travayer! Letan mon  koz avek Brenda kot NISA mon koz avek Rose, zot ki’n fer 30an kot NISA, e sote zanmen zot in tous 25 sou larzan Nasyon pour zot sonny zot zanfan avek!

Zot in travay faithfully, onnet pour sa pei. Me zot ler pour donn en pti mwenza zot ganny kite ater.  Selman nou pe mazin rod R18milyon pour fer Referendum ki pa initil pour donn pouvwar en sel dimoun! Letan mon koz avek Vivianne kot STC parey mon ti mansyonnen dernyen fwa, en madanm ki’n travay plis ki 10 an san tous en bout dibwa Vis- Prezidan kot SMB – sa madanm zanmen in deza touse, me selman ler pour donn li en pti mwenza nou bat isi, nou kategoriz zot, nou klasifye zot pour donn zot en rekonpans?

E ozordi zot, zot oule nou dan LDS nou vini nou vot lo en Bill, Referendum R18milyon roupi la ozordi kot nou pei i ete, zis pour donn pouvwar Msye Faure?  Mwan mon krwar sa pour vin iresponsab Mr Speaker.  Mon ti a kontan dir poudir lepep Seselwa ki pe ekout nou laba deor zot bezwen balans byen, realize pour dir sa Gouvernman ki la zot nepli annan vizyon, zot nepli annan plan, zot nepli konnen ki zot pe fer.

Alor i enportan pour zot swiv byen ki pe arive. Ekout byen diskisyon e fer zot analiz pour zot.  Me selman pran kont pour dir si Referendum ti ganny fer, i ganny fer anba sa menm parti ki la, parski letan ou koz ek bann Seselwa laba deor, zot dir ek ou, zot atansyon, annou veye, pa fye sa bann dimoun. Se sa reaksyon ki nou gannyen. Alor i ava enportan pour nou konsider tousala.

Mwan mon Mr Speaker mon pe dir sa Bill ki la pa kapab ganny konsidere dan Lasanble Nasyonal. Nou bezwen ‘’zet li anba,’’ parski i pe donn pouvwar en sel dimoun dan sa pei.

E sa se pa lot ki pe Msye Danny Faure koman Prezidan Larepiblik Sesel e pour depans R18milyon ki ozordi i pa en lirzans pour nou pei me i annan plizyer lezot keksoz ki devret ganny adrese o pli vit posib dan en pti pei parey Sesel, ki nou tou nou kontan.  E pa bliye preanbil nou Konstitisyon i dir nou ‘’We are the people of Seychelles!’’  I pa dir nou ‘’We are US!  Mersi bokou Mr Speaker.

 

(APPLAUSE)

 

MR DEPUTY SPEAKER

Mersi bokou Onorab Arissol. Onorab Loze ou annan en point of order?

 

HON JOHAN LOZE

Mersi Mr Speaker mon oule zis koriz en mis-apreansyon ki’n ganny leve. Letan Onorab Arissol in mansyonn mon lentervansyon an relasyon avek Lartik 50, Mon pa’n zanmen ensinye direkteman, ni endirekteman ki Prezidan i devret annan ouswa i annan pouvwar absoli. Ofet dan mon lentervansyon, mon’n dir klerman annou azout dan sa Bill en Provizyon ki fer kler ki tou desizyon Prezidan letan en propozisyon i vin devan son lofis, i pour subject to judicial review.

E met dan sa Bill.  Sa i ava asire ki Prezidan napa okenn form diskresyon absoli.  E ofet Mr Speaker i pour go as far ki si Prezidan i aksepte pour fer en Referendum en dimoun deor ki santi i pa kontan sa li osi i kapab take President to task akoz in aksepte pou fer sa Referendum.  Mersi Mr Speaker.

 

MR DEPUTY SPEAKER

Mersi ou pwen in ganny note. Point of order Onorab Pillay.

 

HON SEBASTIEN PILLAY

Mersi Mr Speaker mon le raise en point of order pour mwan sey demann en klarifikasyon.  Dan en statement ki’n ganny fer dan en lentervansyon, in ganny dir Sekretarya pour nou, so mon ti anba lenpresyon Sekretarya Lasanble i a political i pa.

 

MR DEPUTY SPEAKER

Lekel ki’n dir poudir Sekretarya pour nou?

 

HON SEBASTIEN PILLAY

Non dan lentervansyon.  Mon ti a kontan petet nou klarifye sa statement.

 

MR DEPUTY SPEAKER

Lekel ki’n dir pou dir Sekretarya pour nou?

 

HON SEBASTIEN PILLAY

Onorab Arissol in fer en statement, mon krwar pa sa ki i pe sey dir – so

 

MR DEPUTY SPEAKER

Mon pa’n tann sa.  Mon pa’n tann sa.

 

(Off-Mic)

Ahr!

 

HON SEBASTIEN PILLAY

Mr Speaker.

 

MR DEPUTY SPEAKER

Mon pa krwar ki sa i en statement ki’n ganny fer so, I’m ruling this out.  Non.

 

(Interruption)

 

MR DEPUTY SPEAKER

Prosen Speaker Onorab Waven William.

 

HON WAVEN WILLIAM

Mersi Mr Speaker.  Bonzour tou dimoun ki a lekout.  Mr Speaker, mon pou konmans mon lentervansyon baze lo lefe ki annan en Komite Prozedlwa dan Lasanble Nasyonal, e devan mwan i annan en rapor.  Mr Speaker lo sa Komite i asiz tou lede parti politik ki reprezante dan Lasanble Nasyonal.

Mr Speaker sa rapor i al konm swivan, i dir ki an akordans ek Konstitisyon e  Lezislasyon Komite i vwar ki Prozedlwa i  konstitisyonnelman sen e an akor e pa kont laplikasyon Lalwa.

Mr Speaker dezyenmman i koz lo amannman propoze e i dir ki en kopi Bill propozisyon amannman – propoze par Komite pour konsiderasyon Minis e avek bann Manm Lasanble.

Mr Speaker rapor i kontinyen e i eksplik ki kalite Referendum ki sa Prozedlwa pe koz lo la. i dir ki Prozedlwa pe fer provizyon pour fer referendum zeneralman. I fer en distengsyon ant de kalite Referendum.  Mr Speaker i koz lo Referendum Konstitisyonnel ki Konstitisyon i fer provizyon anba Lartik 91 par amann Konstitisyon ki refer ek Chart drwa imen, disolisyon Lasanble.  Konstitisyon i silans sa rapor i dir lo mekanizm pour deklans en Referendum  ki lartik 3 dapre sa rapor, sa Prozedlwa i pe adrese, e pe klarifye.

Mr Speaker rapor i kontinyen an dizan ki Referendum ordiner ouswa linisyativ popiler se i en nouvo provizyon. En size ordiner ouswa en propozisyon signifikan dan lentere Nasyonal pour al dan en Referendum Mr Speaker.

Mr Speaker pwen 4 i demande lekel ki demann Referendum Konstitisyonnel. En Referendum sa i kapab ganny inisye par enn Prezidan, dezyenmman Lasanble ki vote par 2 tyer mazorite.

Mr Speaker Referendum ordiner i azoute ki Prezidan i kapab demann  en, a nenport ler, Prezidan i kapab demann enn, si Lasanble i vote kont mezir propoze par Gouvernman. I osi azoute ki Lasanble par 2 tyer vote i kapab demann en Referendum.

I kontinyen an dizan ki en petisyon sinyen par 35 poursan voter lo en lalis voter baze lo dernyen eleksyon Prezidansyel i kapab demann en Referendum. Prezidan i kapab konsidere si i neseser fer enn baze lo en rezondet sa petisyon.

Mr Speaker dan tou le 3 ka sa demann i bezwen ganny refer ek Prezidan e anba Lartik 7 Prezidan i bezwen i ganny oblize pour demann Komisyon Elektoral pour konsidere.

Mr Speaker mon’n pas lo sa rapor pour mwan endike ki  -enn – nou annan en Komite Lasanble ki’n pas lo sa Bill ki’n fer rapor e propozisyon avek Lasanble pour konsidere. E mon krwar Mr Speaker ki nou focus malgre tou sa ki pe ganny dir, i bezwen ganny mete lo sa rapor e lo ki bann rekomandasyon ouswa amannman ki sa rapor baze lo diskisyon ki sa Komite in fer, e ki i devan Lasanble.

Mr Speaker malgre tou sa mon anvi osi rekonnet ki i annan serten bann propozisyon ki pe sorti – par egzanp kot eski tou desizyon i devret ganny lese avek Prezidan?  Letan ou pe mazin sa balans pouvwar dan en sosyete demokratik. Mr Speaker sa size osi konsiltasyon mon rapel ki in annan diskisyon kot nou’n tonm dakor serten prensip ki en White Paper stage i enportan ki i vin devan Lasanble e osi ki nou donn sans bann diferan stakeholders osi pour donn zot lopinyon.

Mr Speaker size Referendum kot nou demokrasi in arive, i en size ki enportan.  E a sa pwen la mon a dir ki i en size ki baze lo devlopman nou demokrasi, evolisyon nou demokrasi i enportan ki serten degre konsiltasyon i ganny fer.

Mr Speaker mwan mon anvi propoze ki – enn – ki sa Lasanble i konsider parey nou’n fer Tourism Development Bill, ki nou annan serten konsiltasyon.  Akoz mon santi ki sa size i sitan enportan pour lavenir devlopman Sesel, e pour nou demokrasi.  Nou pe koz en zenn demokrasi. Mon krwar i enportan ki nou ganny – pa zis nou isi la anndan malgre nou’n ganny elekte koman reprezantan lepep, mon krwar poudir i annan plizyer bann stakeholders enportan deor la, ki ti a kontan eksprim zot lo serten lartik sa Prozedlwa. Mr Speaker mon pe poz sa la devan.  Mr Speaker lot keksoz ki mon santi i enportan. I enportan ki sa osi i ganny fer sorti.  Mon vwar ki sa Prozedlwa pe anmenn nou en pa pli devan.

Akoz enn in kree en mekanizm ki Seselwa i kapab anmenn serten size enportan dan lentere Nasyonal devan.  E i enportan ki nou donn sa posibilite sa pep a sa pwen kot nou’n arive.  Akoz Mr Speaker dan sa pei ozordi i annan en ta keksoz ki pe preokip pep Seselwa. Par egzanp resaman yer sa size Sekirite Nasyonal Mr Speaker i en size ki mon osi i enteres mon bokou parey bokou lezot Seselwa e mon anvi demann avek Vis-Prezidan petet kan, petet ler i donn son reply lo sa Bill Seselwa pe espere e ti a kontan konnen kan ki lamannman dan Misuse of Drug Act pour vin devan akoz sa i pe anmar lanmen nou Lafors Lapolis.

E i annan bann lezot keksoz enportan ki mon pa pour al ladan in ganny nonmen me nou ti a kontan konnen.  Mr Speaker parey mon dir se ki sa Prozedlwa i annan son merit.  E mon’n koz lo rapor sa Komite e mon krwar pour dir dan Staz Komite sa deba pour enportan e mon ti ava demande ki tou Manm i vreman regard li avek tou son lanpler, pour nou asire ki – enn – letan nou pas Lalwa dan sa Lasanble, nou donn Seselwa en fair deal!

Mr Speaker malerezman sa Prozedlwa i devan nou.  Akoz nou ti’n dir be napa okenn Prozedlwa ouswa napa okenn Lalwa ki diriz en Referendum.

In vini ozordi e i devan nou koman reprezantan lepep, koman bann Manm Lasanble, nou napa swa e nou bezwen deliber lo la, malgre tou nou bann lezot konsern i devan nou.  E parey mon’n dir Bills Committee in zwenn e mon’n apresye sa prezantasyon ki Chairman Bills Committee ti fer yer e mon krwar nou focus i devret lo la.  E ki nou bann Manm Lasanble nou tonm dakor avek bann lamannman, bann propozisyon ki nou santi i dan lentere pep Seselwa.

Mr Speaker avek sa de pti mo mon pour termin lanmenm e mon pe atann avek lentere, diskisyon dan Staz Komite avan ki mon deside pronons mwan lo ki fason ki mon pour vote atraver sa Prozedlwa.  Mersi bokou.

 

(APPLAUSE)

 

MR DEPUTY SPEAKER

Mersi Onorab William. Bon in ariv nou 5 minit apre midi.  In ariv ler pour nou adjourn.  Nou pour adjourn e nou pour kontiny deba 2er apre midi.

 

(BREAK)

 

MR DEPUTY SPEAKER

Bonn apre midi tou bann Manm Onorab.  Bon apre midi Vis- Prezidan.  Bon apre midi tou dimoun ki pe swiv nou lo radyo sosyal kot zot été.  Nou pe kontiny travay Lasanble Nasyonal e devan nou, nou annan Second Reading Referendum Bill, 2019 nou ganny plizyer entervenan e prosennman lo mon lalis mon annan Onorab Jean-Francois Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon pou e mon lentansyon pou ase bref lo sa dan mon lentervansyon, akoz bokou keksoz in ganny dir ziska aprezan e bokou keksoz avek mon bann koleg lo lot kote latab ki fer bokou sans e mon ava sey pa repet bann keksoz ki’n ganny dir.

Mon ti a kontan selman avan mon koze fer de pti pwen.   Enn ki zis an pasan akoz mon krwar i enportan pou nou note ler Onorab Simon Gill ti pran laparol in koz zis de laliny e premye fwa Onorab Simon Gill i koz sitan pti gin ! Mon pa konnen si akoz personn isi pa ti ankor koze e akoz normalman Onorab Gill i koz lo sa ki nou dir i pa koz lo sa ki li i annan pou dir.

So mon krwar i enportan pou nou fer sa pwen, akoz piblik deor i bezwen konpran sa. sa i en pwen teknik Mr Speaker.  Mon 2enm pwen ki mon ti a kontan fer se demann avek bann Manm isi dan sa Lasanble ozordi ki zot reflesir byen avan zot vot lo sa Bill.

Sa Prozedlwa ki devan nou mon krwar zot merit konnen e zot devret fer li mon devwar pou mon annan plizyer erdtan, sey rode ki bann konplikasyon e bann danze e bann sibtilite  bann keksoz ki nou pa neseserman war dan sa zafer Referendum.

Referendum i en zouti ki paret senp me i vreman konplike e son bann rezilta ki i kapab anmennen i bann rezilta ki kapab sanz natir en demokrasi e sanz natir ki mannyer en pei i ganny dirize.

Alors annou silvouple ler nou pran nou vot pa pran li a la lezer.   Mon fer sa bann pwen Mr Speaker akoz nou war e Onorab Georges in eksplik nou en premye danze, ki’n arive dan listwar e lekel sa bann dirizan lemonn ki’n servi Referendum pou bann rezon ki pa ti demokratik ditou.  E akoz sa bann e pourtan sa bann Leaders ti ganny elekte normalman konman bann bon sitwayen, me ler zot in retrouv zot avek sitan kantite pouvwar dan zot lanmen, zot pa’n konn servi sa bann pouvwar e zot in abiz pouvwar.

Alors mon totalman dakor avek Onorab Georges, se ki nou bann politisyen dan sa Lasanble, nou bezwen toultan mefye nou prop lekor.  Mefye nou prop lekor, akoz i annan en lekspresyon ki dir en koze ki dir toultan ‘’Power corrupts.’’ – ‘’Absolute power corrupts absolutely !’’ E nou’n war pandan sa bann dernyen lannen absolute power anba Msye France Albert Rene koripsyon rife.  Absolute power; anba Prezidan Michel otan koripsyon e napa personn ki kapab  niye sa bann keksoz.

La nou pe sey met an plas en sistenm – en pratik Gouvernman ki fer en depar avek sa bann sityasyon.  En Referendum souvan son danze i vin ki son konsekans, nou pa konnen.  E  mwan enn bann keksoz ki mon pli per dan sa Bill ki devan se ki napa nanryen ki dir, ki i neseser toultan pou eksplik konsekans en desizyon, atraver en Referendum.  Ki i fer? Ki i anmennen?  Nou’n war Brexit bann Angle pa’n konnen.  Zot ti ganny dir bann ki ti le ale bann ki ti le leave, ti dir akoz nou bezwen anpes bann etranze antre L’Angleterre bann ki ti le reste ti dir akoz nou anvi reste dan Linyon Eropeen, akoz sa i pou bon pou  lekonomi.  de pwennvi diferan de group dimoun ki ti pe vot lo de konpletman diferan keksoz, me selman ti annan en sel kestyon lo papye do you want to leave the Eropean Union?   2 keksoz diferan.   Lanmwatye popilasyon in konpran li dan en fason lot in konpran li.  Alors se pou sa ki mon dir ki i vreman enportan.  Annou pran en lot legzanp ki’n arive, pou montre ou poudir dimoun i vot ek zot leker pa avek zot lespri ler i dan en Referendum, akoz ler ou donn en dimoun en senp kestyon pou li reponn ‘’yes or no’’, souvan son zizman i focus zis lo en pti bout e i pa war lezot laspe sa problenm.

Get Thailand ki ti arive? Lekel ki ti al war ki dan 20enm syek ki nou ladan lannen 2018, bann Thaïlande, ti pou vot pou en Gouvernman militer otoriter, pou vin ansarz zot pei?  E pourtan zot in vote akoz zot ti anvi en pe lape.

Be zot ti anvi en pe lape i pa neseser pou ou anmenn en Gouvernman otoriter! En Gouvernman militer! I annan bann diferan fason pou nou fer me se sa son konsekans.  E mwan mon anvi dir avek zot ankor enn fwa annou fer atansyon sa konsekans !   E mon ti a kontan dernyerman ankor pou mon dir en lot pwen ki tro souvan en Referendum i reflekte lopinyon bann Leaders.  I pa reflekte lopinyon lepep!

Akoz lepep li i annan en melanz e i annan en serten kantite issues, ki zot desid lo la ler zot pe vote, tandis ki se lepep se Leaders ki propoz en kestyon e lepep li i bezwen dir wi oubyen non.  Napa sa bann grey areas sa bann pti litilite ki devret annan ladan.

E mwan dan sa ka, mon ava ler mon pe demann zot pou fer atansyon ler zot vote, mon ava repran parol toultan ki Onorab William in dir dernyerman, ‘’Nou’n ganny elekte pou nou reprezant nou distrik, nou elektora, se la kot nou ganny elekte.  Se pou zot ki nou pe travay !’’ Se pa pou en Prezidan se pa akoz en Prezidan i met en kestyon ki nou devret fer li konfyans.  Mon’n tande taler poudir en Gouvernman en Prezidan i devret servi sa Lalwa avek bonn volonte.  Be bonn volonte pa antre dan Lalwa.  Bonn volonte, i en keksoz ki nou dan Legliz, nou priye pou ki en dimoun i ganny bonn volonte.  Apard sa, napa sa nou pa kapab fors en dimoun annan bonn volonte.  Si nou anvi fer en travay byen, nou fer li byen dapre sa ki’n ekri dan Lalwa.

Se pou tou sa bann rezon parey mon’n dir ki nou bezwen pran fer byen atansyon, ler nou pou pran en vot.  Prezan Mr Speaker mon vin lo sa Bill li menm.  E mon ava poz detrwa kestyon ; – premyerman mon ti a kontan demande, eski nou bezwen en Bill oubyen en Lalwa ki pou diriz lafason ki en Referendum i ganny deroule?

Larepons se wi.  Eski nou bezwen sa Bill pou nou diriz lafason ki eleksyon i ganny deroule?  Klerman non.  Sa i mon pwen depar.  Akoz kestyon ki mon’n poz mon lekor ler mon lir sa Bill e mon’n ekout zot tou, mon demann mon lekor ki Prezidan Faure pe rode atraver sa Bill?

Eski premyerman Prezidan Faure i ti a kontan nou vot an faver?  Oubyen i ti a kontan nou vot kont?  I enportan pou mwan konnen konman en politisyen pou mwan poz sa kestyon.  Eski Prezidan Faure i ti a kontan ki sa Bill i pase oubyen non?

Mon larepons ki mon’n ariv lo la, kekfwa zot ava annan en lot larepons se ki finalman Prezidan Faure pa anvi ki sa Bill i pase!  Li osi i pa anvi ki sa Bill i pase, me selman i anvi ki nou, nou ki vin dan sa Lasanble ki dir fodre pa ki sa Bill i pase!  Me Mr Speaker si sa i leka mon ti a kontan dir avek Prezidan Faure pa bezwen esper taler.  I kler ki sa Bill pa pou pase.  Donk i ava kontan.  Kekfwa i kontan.  E  mwan mon problenm se ki ler Prezidan Faure i anvoy en Bill, oubyen i fer en demann ek sa Lasanble, avek en lentansyon kler pou li ganny en larepons non! E sa i en problenm pou mwan.

Akoz  mwan mon pa’n vin dir non dan sa Lasanble.  Mon’n vin dir wi pou pep Seselwa.  Mon’n vin rod bann keksoz ki bon pou pep Seselwa.  Pou nou fer bann Lalwa ki bon.  Tandis ki Prezidan Faure – e i pa fer premye depi ler in konmans kit son semiz blan ater in konmans met son semiz Roz, tou bann demann ki pe demann sa Lasanble, i pe fer fason rod en konfli avek nou !

Akoz si Prezidan Faure ti anvi ki nou ganny en bon Lalwa lo Referendum i ti ava konsilte, parey in fer tou sa bann letan.  I ti ava konsilte e i ti ava se sa semen pou pase, pou ariv laba, i ti ava – me byensir ler mon get sa ozordi koabitasyon in mor !  Wi be Prezidan i annan en devwar pou li diriz sa pei whether or not koabitasyon in mor!  Li i napa swa.

Sa problenm ki zot pa ganny en konpran Prezidan i napa mazo- Konbyen fwa mon pou dir dan sa Lasanble ?  Prezidan napa mazorite dan sa Lasanble !  Si i anvi en keksoz i reisir i bezwen – kontan pa kontan, i bezwen vin kot nou, oubyen apel nou pou dir la i la sa ki mon ti a kontan fer, eski zot krwar dan sa manda kot mon napa mazorite, nou kapab ganny en teren pou nou kapab avanse !

Si Prezidan Faure pa anvi antre lo sa semen, i kler ki i anvi pa reisir.  E ler bloke i vini, nou, nou pa’n blok nanryen nou e nou pa pe blok nanryen nou !  Msye Faure ki pe blok son prop lekor!  Akoz si se sa ki i anvi fer e an menm tan i pe blok pei!  Si se sa ki i anvi fer mon krwar i en pwen ki vreman enportan pou nou kontinyen stress – nou dan en sityasyon Mr Speaker ki spesifik kot Egzekitif napa mazorite i pa ariv toulezour me lepep Seselwa in deside ki se sa ki pou arive, alors nou bezwen fer li.

E nou konbyen fwa en Bill in ganny anmennen devan nou, nou pa neseserman dakor avek nou.   Nou pa dir annou bloke.  Nou asize, nou diskite ler i annan bann minor amendments nou dir be ok, nou bezwen en Tourism Development Bill.  Nou bezwen Bill.  Annou asize nou ava gete.

Me selman in fini pase !

 

(Off-Mic)

Ou pa konnen?

 

HON JEAN-FRANCOIS FERRARI

Anr be ok.

 

(Off-Mic)

In fini pase.

 

 (Interruption)

 

HON JEAN-FRANCOIS FERRARI

Anyway i  lo biro – mon krwar i dan biro Prezidan !

 

(Interruption)

 

HON JEAN-FRANCOIS FERRARI

Be anyway alors mon ti a kontan ok les tenir zot flex !

 

(laughter)

 

HON JEAN-FRANCOIS FERRARI

Tenir zot flex  zot ava ganny sans koze taler ! So Mr Speaker se sa sityasyon ki nou ladan e sa sityasyon mon deplore sa sityasyon ! Mon deplore, mon anvi dir avek pep Seselwa, bann ki’n vot e ki ankor siport Prezidan Faure koz avek li, dir li ki listwar pou rapel li ki pandan en serten letan ler i ti Prezidan tou Seselwa, i ti dir  Ii Prezidan tou Seselwa, i ti divorse avek en parti ;  ti annan en metod travay.

La ki’n remarye avek son parti i annan  en lot metod travay la. La prezan i pe vin fer nou per, oubyen i pe vin bouldoz nou.  I pa pou marse !  I osi senp ki sa.  I pa pou marse e nou anvi ki pei i avanse e nou demann Msye Faure – silvouple Prezidan Faure aret blok sa pei!  Aret blok sa pei !  I annan metod travay pou nou travay, annou fer sa travay pou nou avanse.

Alors Mr Speaker dan tou liv lasyans politik e dan tou leksperyans lemonn i montre nou ki ler en Gouvernman pe tay deryer keksoz ki appel en Referendum se akoz sa Gouvernman i fay.  Sa i kler ! Akoz La Swiss se striktir sa Gouvernman ki fer li souvan e touzour depi de syek e de syek, en Gouvernman koalisyon – setadir en Gouvernman ki napa en mazorite pou en parti politik ?  Ok i bezwen konpoze dan Parlman – Israël parey.

Alors dan bokou sa bann pei zot tay lo Referendum pou zot kapab ganny en keksoz vote, akoz zot pa neseserman agree dan Parlman. Alors nou pa pe blanm personn nou !  Selman nou pe dir ki la i la sityasyon ki mannyer i été Prezidan Faure i pa dan en pozisyon for i dan en pozisyon fay.

Be ler ou dan en pozisyon fay ou bezwen aksepte poudir ou fay, apre ou a re aranz ou lekor, ou ava retourn dan ou corner parey en  boxer, ou ava gete i annan en lot round pe vini ou a gete ki mannyer ou kapab fer en parad !  Be ou pa kapab dan milye en travay, kot ou pou ensiste ou pou ganny en knockout si ou kontinyen koumsa !  Alors annou al dan sa direksyon koumsa.

Striktir nou Konstitisyon i fer ki Referendum apard lo bann kestyon Konstitisyonnel, i pa devret pe arive.  Akoz si nou le en Lalwa – si sa Prezidan i la e son Lasanble i le sanz en keksoz ki pa Konstitisyonnel nou pas en Lalwa?  Nou pas en Lalwa? En Prezidan i assent la ki pe arive se ki Prezidan i le pas en Lalwa, kontrerman avek konfrontasyon avek Lasanble, e se pou sa ki i pa marse.

Dan bann sityasyon normal, nou pa devret pe rod bokou plis ki sa – ok?  Mwan mon pa anvi ozordi antre dan bann deba legal oubyen Konstitisyonnel mon kit sa pou Onorab Georges ki’n fer li tre byen, apre mon war poudir i annan en Manm laba ki’n sey krwar ki i kapab debout ek Onorab Georges, me selman i ankor en pe fay !

 

(laughter)

 

HON JEAN-FRANCOIS FERRARI

E i kler Mr Speaker ki bann rezon akoz sa Referendum in vin devan nou, se pa pou bann rezon legal. Sertennman se pa pou bann rezon legal.

Son rezon ki’n vin devan nou se ki Prezidan Faure in sey fer pase en Referendum, Electoral Commission in dir li non i pa pou kapab, prezan i pe sey fer li pas en lot fason.  Se tou!   Napa lot rezon.  Alors nou bezwen kalme nou, e nou bezwen sey gete ki mannyer nou kapab avanse.  Tou le de parti, annou pran sa legzanp Mr Speaker –  tou le de parti dan sa Lasanble pa an faver ki bann Seselwa aletranze, i ganny drwa vote a sa moman !  A sa moman i enposib !  Nou lo nou kote a sa moman – a sa moman nou pe al donn Seselwa aletranze annan drwa vote avek zot dan Egzekitif?

Kan nou pa ni konnen konbyen dimoun i annan deor laba?  Be fodre nou fou !  E Vis- Prezidan li osi in fer son stetment e in dir poudir li osi son parti pa an faver.   So si nou tou lede nou pa an faver ki nou pe rode la ?  Ki nou pe rode?  Akfer nou pe rod sa?

Annou met li ziska en zour kekfwa nou a war poudir i annan en litilite.  Pou le moman, nou pa war okenn litilite ladan.  Alors akoz nou pe al dan sa direksyon? Malerezman i annan nou tou nou annan menm refleksyon, me selman pou diferan rezon ! LDS akoz nou pa konnen konbyen dimoun i annan deor.  E nou annan en Mosyon lo Order Paper ki demande ki i annan en resansman akoz nou bezwen konnen.

E pli boner mon koz lo konsekans – si zot pa’n tande mon repete konsekans, ler ou fer en Referendum.  E nou i enportan pou nou konnen kwa son konsekans.  Nou bezwen konnen.  So nou annan en rezon, akoz nou pe pran sa pozisyon a sa moman.  Zot rezon US akoz zot in anvi zwe zot joker, pa mwan ki’n dir – zot ki’n dir lo zot zournal poudir zot i annan en master joker pou zot bat ek nou ! Se zot ki’n dir !  Apard sa mon pan tann zot al lot rezon akoz zot le fer sa!  Zis zot in dir akoz Prezidan i en bon boug.  I pou ok.  Pa trakase nou bezwen donn en demokrasi.  I byen nice pou donn la demokrasi, apre 40an ki zot in zot pan anvi donnen, la konmsi ou a krwar konmsi zot in rebatize !  Zot in born again !

So de diferan rezon – ok?  Me selman si nou dir non, nou pe trair nou bann dimoun laba deor.  Si nou, nou dir non, nou pe trair zot – ok?  Si zot dir non, si sa Bill pa pase, tou dimoun pou ok, nou pou fer Referendum lo la, i pa pou pase – Prezidan Faure poudir la, la pa’n gannyen – ok?  Li ki pou deside si pou met 60poursan.  Li ki pou met desid tou keksoz selman nou donn demokrasi la nou en ?  Nou pe donn pouvwar lepep ! Sanmenm sa ki mon tande ozordi lot kote.  E sa se mon pwen.  Zot in argimante ki poudir pou balans pouvwar. i annan en lekilib pouvwar.

Be mon ser koleg sa i en joke!   Sa i en joke!  Akoz si mon get lakantite fwa dan sa Bill ki pouvwar i ganny e remete dan lanmen Prezidan, apre ki nou Konstitisyon pa’n nonm li 1fwa.  ‘‘The President may if he or she considers it necessary or expedient, he may agree’’.

Sa dan paragraf 4 non dan clause 4(1) ; dan clause 4(2)(b) dan clause 5(1).  Zot be tou keksoz nou bezwen retourn kot sa Msye?  Mwan normalman mon tourn kot Senyer pou mwan fer ler mon bezwen en led.  Mon pa  kapab retourn kot en dimoun  mon pou met tou pouvwar dan son lanmen.  E se egzakteman sa ki zot pe fer.  Zot pe dir nou poudir zot pe donn demokrasi, e parey zot abitye fer mon bann koleg – annou aksepte. Koumsa zot  été.  I en listwar.  I en labitid.  Zot donn ek en lanmen, zot repran avek lot lanmen!

La   zot fek donnen zot dir la mon pou donn lepep la donn 35poursan, selman ler lepep poudir 35poursan pou anmenn son papye, i dir la 35poursan voter la, la ou bezwen anmenn kot msye kot Prezidan li ki ava dir ou si i krwar i ok pou fer Referendum.  Si i krwar i ok ‘‘… whether it is necessary or expedient’’.

Ek mon bann dimoun isi dan sa Lasanble mon mazinen nou tou nou konnen nou rankontre sa mo plizyer fwa ler ou war mo ‘’expedient’’ or ‘’expediency’’ toultan fodre ou lir li avek sa mo political. What is politically expedient or what is political expediency ?  Toultan mwan mon lir li koumsa.  Kekfwa bann draftsperson pa pou lir li koumsa.  Mwan mon lir li expedient, political.  So repran pouvwar remet dan lanmen Prezidan.

Alors Mr Speaker i kler ki dan sa sityasyon ki nou ladan i pe vin en distraksyon e napa en re balans pouvwar.  O kontrer i en attempt – i en lesey dezespere par en Gouvernman ki napa mazorite.  Mon pa tro anvi reservi sa mo fay, fay, fay toultan.  Mon a servi en mo ki en pti pe pli mwens fermal ; ki napa sa mazorite ki en pe dan difikilte ki pe sey rod en fason pou fer en distraksyon.  E sa Mr Speaker i pa devret.

Nou pa devret e mon ti’n fer en not pli boner ; pa zis dan bann keksoz.  Menm ler anba 7(2) ler Electoral Commission lo kestyon konbyen dimoun ki pou bezwen vote par konbyen ki ou bezwen gannyen si 50poursan 60poursan ‘’Unless the President by regulation prescribes that the issues should be approved by a majority.’’ Just a majority – ok of votes cast – valid vote.   Konmsi tousala i bezwen retourn kot Prezidan?  Non, non, non.

Mon dakor avek sa ki Mr Georges in dir pli boner, e nou tou dan LDS se sa nou travay ki nou’n fer e si nou’n lite pandan 30an – pres 40an, se pou nou kree parey Mr Georges in dir bann lenstitisyon ki for – ok ; en bann lenstitisyon ki viv endepandaman lekel dimoun ki dan sa Sez !  Se pou sa ki bann lenstitisyon ki zot ti kree Msye Michel pa’n kapab viv ladan.  I pa’n kapab viv.  Dan koabitasyon i pa pou kapab viv.  So i pa’n sanz Konstitisyon, in ale.

So Lalwa pou reste.  Fason travay pou reste, bann lenstitisyon pou reste e bann dimoun pou vini e bann dimoun pou ale, se sa bann keksoz ki enportan.  Prezan mon ti a kontan fer en pti referans a bann pwen ki Onorab William in fer dan Bills Committee. Mr Deputy Speaker ou osi ou dan Bills Committee e mon asire ou pou dakor avek mwan.  Onorab William ler in fer referans avek bann rapor Bills Committee malerezman Onorab William in ariv lo pwen 4 e in aret lanmenm i annan pwen 5 pwen 6 pwen 7 e se sa bann la i enportan

        Bills Committee in fer son determinasyon lo legalite Konstitisyonalite sa i ok – diferan travay.  Bills Committee pa fer okenn komanter lo lezot laspe politik or otherwise.  Me pourtan pou premye fwa dan nou Lasanble Bills Committee in met lo son rapor ‘’discussions points. ’’ Akoz Bills Committee in realize poudir i annan bann pwen ki sibstansyel, ki merit ganny diskite – notaman – notaman sa kestyon lekel ki pou fikse sa 60poursan.  Akoz dan en Referendum i pou kapab 50.1 50+1 e en lot i pou 60poursan?  Eski Prezidan i devret kapab determin sa sif?

Eski sa i ganny fer par Lalwa ?  Eski sa i devret ganny fer par Electoral Commission?  Akoz eski tou bann Referendum i bezwen ganny referred back to the President?

Mon krwar si Bills Committee in met sa, se akoz i annan en rezon.  Se bann kestyon fondamantal e sibstansyel, ki  merit ganny reponn.  E finalman lo sa pwen kot Bills Committee i dir,’’ Why is the issue first referred to the President, ki oblize anba clause 7 pou pas li avek Electoral Commission? 

Me se zisteman sa bann pwen ki montre nou ki, i pa kont Konstitisyon, me i kont lespri nou Konstitisyon! Akoz lespri nou Konstitisyon, in met an plas en balans pouvwar.  E mon bann koleg,  mwan mon ti a vreman apresye si zot aret dir ki sa i balans pouvwar !  Sa i donn pouvwar plis ki an fo a en zonm.  Ozordi i Prezidan Faure. Demen i Wavel Ramkalawan – zis mazinen si nou ti pe donn sa pouvwar Msye Rene?

 

 

(laughter)

 

HON JEAN-FRANCOIS FERRARI

Be nou pa ti pou marse dan semen!  Nou ti pou fer zis fore !

 

(Interruption)

 

HON JEAN-FRANCOIS FERRARI

Ou konpran?  Mazinen si nou ti donn sa pouvwar Prezidan Simon Gill ?  Me nou ti pou mars zis apre 6er – lizour nou pa ti pou marse !  I annan plizyer-

 

(Interruption)

 

 

HON JEAN-FRANCOIS FERRARI

Mr Speaker be …

 

(Interruption)

 

MR DEPUTY SPEAKER

Order!  Order!  Order !

 

(Interruption)

 

HON JEAN-FRANCOIS FERRARI

Mr Speaker,

 

MR DEPUTY SPEAKER

Order ! Order !  Annou kalme nou Onorab Ferrari kontiny ou .

 

HON JEAN-FRANCOIS FERRARI

Mr Speaker, okenn Manm pa devret ankoler !  Nou tou nou dan politik e nou desten nou pa konnen.  Nou pa konnen ki nou desten.  Onorab Gill pa enterese pou pran sa job en zour be i ok.  Kekfwa i ava annan lezot dimoun ki dan  ou parti ki enterese, me selman napa problenm.  Me selman mon pe zis dir poudir i annan en lespri nou Konstitisyon e nou bezwen respekte li.

Zis avan mon al lo mon dernyen pwen, mon ava zis dir pou Onorab ti annan en Onorab mon krwar ki posibleman, me selman mon kapab ganny korize Onorab Aglae ki’n koz non – ki’n koz lo Assomption non pa Onorab Aglae. me selman anyway en Manm ki’n koz lo Assomption e lo Preserve Seychelles.

E alors mon ti a zis kontan dir ki la devan mon annan en text ki’n dir ki sa msye ki’n koz lo Preserve Seychelles  -en Manm Komite Preserve Seychelles in dir mwan premye fraz mon pa pou kapab lir Mr Speaker akoz ou pou met mwan deor, me selman senpleman poudir ki personn pa’n apros Preserve Seychelles !  ‘’Please ask him  to stop using Preserve Seychelles so he gains support  for this Bill !’’ Se sa.

Alors sa ki arive,  se ki anba clause Onorab – ou Vis- Prezidan i ava koriz mwan anba clause 11(1) ki pe ganny propoze, menm bann boug Preserve Seychelles pa pou war en semen pase ! Zot pa pou war en semen pase.

E piblik an zeneral ler ou anvoy ou rod 35poursan, zis mazinen La Swiss i annan 4400milyon voter La Swiss fodre 50mil pou fer en popular Referendum pou lepep demann en – konbyen i fer sa ?  I fer apepre 1poursan non ?  1.5pouran lapopilasyon.  Isi nou le dan bann 35poursan popilasyon.  Annou serye nou.

Nou pa anvi ki lepep 35poursan popilasyon, i preski lekivalan ki en parti politik pou ganny – ki pros 50poursan dan vote.  Ler ou vote in ariv pros 50poursan.  So annou serye nou.

Nou pa anvi ki sa bann dimoun i fer sa alors sa i en lot pwen ankor ki mon krwar Mr Speaker i devret ganny fer.  Alors mwan Mr Speaker mon ava dir sa.  Lirzans e sa i mon pwen ki mon vreman ensiste lo la.  Nou pe demande kwa ki pep pe demann nou ?  Kwa ki pep pe demann son MNA?  Kwa ki pep pe demann sa Lasanble mon antouka dan mon distrik Mont Fleuri, mon bann ser koleg napa personn ki pe demann mon en Referendum.  Napa personn.  Ou  konnen ki zot pe demann mwan?  sa pti kayas la – sa pti grapo ki Prezidan in met Ankour i pa oule donn nou.  Se sa ki mon dimoun pe demann mon.

Annou rod bann pti zafer – mon a ganny en fason, mon a pey en pti mon a pey en Bill kouran, se sa ki mon dimoun pe demann mwan.  Bann pa enterese avek Referendum a sa moman.  I enterese ki mannyer pou anvoy son zanfan lekol ; ki mannyer i pou aste de kaye.  La nwel pe vini i pe enterese pou konnen si li i travay STC i pou gannyen en pti zafer pou son tan servis ki’n fer 22an STC ?  I anvi konnen sa bann keksoz.  I pa pe rod en Referendum.  I pe e alors zot pe demande be kote Prezidan in ganny sa eliminasyon ler i ti sorti Maputo in debarke in anonse i anvi en Referendum ! Konmsi kot i vini dan zwe sa?  Mon’n pas lo législative agenda ki Prezidan in anvoy kot Lasanble Mr Speaker pa mwan ki’n anvoye – Prezidan ki’n anvoye –  la, la Gouvernman ki i anvi fer, i pa ladan. I pa ladan.   Zis in vini koumsa menm, e parey Onorab William in dir nou bezwen toultan pe get nou distrik.

Ki bann dimoun i bezwen dan nou distrik ? Sekirite, lanplwa, en pti larzan an plis, en travay pou sa enn ki napa ; lasante pou sa enn ki napa ; lekol en pti pe pli meyer pou nou zanfan kapab reisi en pe, la i la sa bann keksoz ki imedyatman lo nou lalis, pou Per Noel Desanm pe vini.  Lo lalis Per Noel napa Referendum !

Se pou sa ki mon ankoler.  Me selman mwan ler sa Referendum in vini mon diskit avek Speaker Prea e mon’n dir li mon fer li konnen ki poudir mon ankoler, ki Prezidan i pe sey met dekote bann size enportan, ki relevan avek lavi Seselwa, pou met sa size  Referendum.

Selman nou’n tonm dakor poudir i enportan ki kekfwa nou diskit lo la pou nou montre nou dimoun poudir i annan en fason travay ; nou pa kapab kontinyen travay koumsa. Dan sa sityasyon ki nou ladan Mr Speaker nou pe war Msye Faure in anmenn en defet lo li menm. In reve, in anons en Referendum, in al kot Electoral Commission, Electoral Commission in dir li non, e la prezan i pe rod en face saving measure.  Nou konpran – nou osi nou dan politik.  Parler nou fer fot.  Omwen nou aksepte ler nou fer fot ! Zot, zot pa aksepte.  E se pou sa zot pe sey defons sa miray pou zot ale !

I senp aksepte poudir zot in fer en fot e zot priyorite i pa priyorite – i pa kwensid avek priyorite pep Seselwa.  Ler zot pe koz sa semenn, zot pe koz ki Prezidan Faure in ganny swazir, li menm li sel kandida pou li al debout sepa kwa, me lepep Seselwa i annan lot preokipasyon – de lannen prosenn.  Konmsi nou pa ni konnen akoz zot pe taye ek tousala !  Konmsi ou a krwar zot in dekonekte avek lepep Seselwa e avek son bezwen!

 So sa bann keksoz ki enportan pou nou fer sorti.  E mwan Mr Speaker mon’n dir pli boner, mon konmanse e mon termin parey mon’n konmanse. Mon’n dir, eski nou bezwen en Lalwa ki gid Referendum?  Wi nou bezwen en  Lalwa.  Si sa Lalwa pa bon parey mon’n dir ki mon krwar pa bon e ki merit ganny fer sibstansyelman, mon ava ankouraz bann Lotorite pou zot pran zot responsabilite.  Selman pa vin met li dan nou lagorz ! Pa vin fors nou.  Nou annan lezot priyorite.

La semenn prosenn nou pe get sa zafer Lakour ki pou donnen.  Nou annan sa pti larzan ki lepep Seselwa pe espere, Bidze in fini vote.  Nou le konnen.  Nou le konnen. Anti-Corruption Commission annou fer li nou 50milyon i la deor li, nou konnen kot i été ! Prezidan in dir nou.  Prezidan Faure in dir nou poudir i ti pas Labank Santral i ti al dan Labank Baroda !

Be zis donn nou sa papye pou nou al rode.  Nou ava al rode nou ava anmennen nou ava desann avek.  E se sa Mr Speaker ki mon anvi dir.  E mwan pirman lo sa baz, lirzans mon pa aksepte, ki zot vin kas nou travay, pou zot met en keksoz koumsa ki pa relevan avek  nesesite e bezwen lepep Seselwa.

Sa – sa  pwen lo lirzans e avek tou bann lezot pwen ki mon’n fer, lo lefe ki zot pe sanz balans Konstitisyon, sanz balans pouvwar, sey fer antre bann keksoz e zot pe sey dir nou, e sa i en pe malonnet – zot pe sey dir nou ki zot pe donn pouvwar – remet pouvwar dan lanmen lepep, kan mon bann koleg, napa en moman ki zot pe met pouvwar dan lanmen lepep.  Zot pe donn avek lanmen gos, zot pe pran avek lanmen drwat.  Parey zot in fer pandan 40an e lepep Seselwa in war e lepep Seselwa pa pe aksepte sa bann keksoz.

Alors mwan mon ava ankouraz zot pou zot vote down sa Bill.  Vote it down.  Akoz i en move Bill e i pou en kosmar pou zot e zot pa pou al lwen avek.  Kontinyen si zot anvi al dan sa semen al dan miray, zot ava al dan miray zot menm, zot pa pou anmenn nou avek zot.  Akoz nou annan en travay pou nou fer, e nou anvi fer li dan lentere lepep Seselwa, e se sa nou manda e se sa ki nou pou fer.  Mersi Mr Speaker.

 

(APPLAUSE)

 

MR DEPUTY SPEAKER

Mersi Onorab Ferrari.  Onorab Charles De Commarmond.

 

HON CHARLES DE COMMARMOND

Mersi Mr Speaker.  Bon apre midi Mr Speaker.  Bon apre midi Vis-Prezidan, AG, tou Manm Onorab e tou dimoun ki a lekout.  Mr Speaker mon kontan poudir de mo lo sa Prozedlwa ki devan nou e nou pe diskit lo son Second Reading.

Mr Speaker sa Prozedlwa i en Prozedlwa enportan e enteresan.  Se en Prozedlwa donn pouvwar lepep Seselwa.  Power to the people, by the people, for the people !

Mr Speaker Referendum i enportan li.  E se sa ki nou Konstitisyon in adrese dan size de Referendum.  E sel keksoz ki sa Bill an plis en keksoz enportan ki i pe anmenn, se ki i pe dir nou bann mekanizm ki sa Referendum pou fonksyonn ladan.  Taler mon ava tous lo la baze lo rapor Bills Committee.  Selman pou konmanse i enportan fer resorti detrwa pwen ki’n ganny touse par plizyer dimoun ki’n koz lo sa Prozedlwa, menm si oule zot in koz an deor sa Prozedlwa me tou an referans dapre zot sa size ki devan nou.

Par egzanp ler nou pe koz lo bann diferan Mosyon e annou mazinen Mosyon ki Onorab Basil Hoareau a sa letan ti met devan nou Lasanble.  Me prezan i annan en kestyon lirzans Mr Speaker se lo Referendum kestyon Basil Hoareau a sa letan annou get lo kestyon lirzans ki sa nou pe koze akfer sa Prozedlwa i irzan in ariv lo nou Lasanble ensidswit ki Msye Faure pe rode.

Msye Faure Mr Speaker nou Prezidan Faure i pa ansarz Lasanble li !  I laba State House li.  E mwan mon rapel tre byen ou menm Mr Speaker, ou ti pe ansarz delegasyon Leader Lopozisyon ek mwan menm, nou, nou ti ansanm nou ti dan en diskisyon en Konferans tre enportan.  E nou ler nou laba dan nou labsans si oule ki sa Bill in vin lo Order Paper.  Savedir i enportan ki dimoun konnen deor la, poudir ler en matter i vin lo Order Paper i ganny diskite dan en miting ki apel (ABC )- Assembly Business Committee miting.  E ladan letan nou pa ti la e Onorab Gill osi pa ti la se Onorab Ferrari Onorab Sebastien Pillay ki ti pe reprezant le de parti, ki ti la avek Speaker Prea. Be mwan  mon pa konnen. Mwan osi mon war li in antre lo Order Paper . Zot in bezwen konn sa lirzans ki zot in aksepte i vin lo Order Paper. Akoz si zot pa ti anvi e zot pa ti war en lirzans, then zot ti kapab met zot lipye ater poudir non nou pa dakor pou sa vin lo Order Paper – napa lirzans – napa isi napa laba.  Sa i en pwen ok kot mon anvi zis met la.

Savedir Lasanble ki ansarz par Lopozisyon si zot ti war poudir sa Prozedlwa pa irzan zot ti kapab met zot lipye ater si vreman zot ti anvi.  2enm keksoz ki mon anvi avanse lo kestyon sa Prozedlwa i enportan e la mon pou dakor avek Onorab William lo nou kote Onorab William i fer sorti en pwen ki valab e mon pou pran dan sa direksyon pou mwan kapab avans bann pwen osi lo sa Prozedlwa ki devan nou.

Nou Lasanble i annan plizyer Komite e parmi bann Komite i enportan e bann Komite i for mon kapab menm dir lo bann Komite ozordi i pli for ki avan mon kapab dir sa akoz nou war bann presyon ki bann Komite i mete lo Egzekitif.  Nou war COGA – FPAC li pa nonmen pli move ankor ; travay ki nou fer rapor ki’n ganny mete devan e Bills Committee.

E Bills Committee mon pa lo la direkteman konman en Manm me selman mon fer mon mye otan ki posib mon asiste Bills Committee e Bills Committee i ansarz par Onorab Georges, ki en Manm lo lot kote latab en Manm Lopozisyon.  E travay sa bann Komite i en travay enportan.  E nou, nou’n levé a plizyer moman. Mwan letan mon’n asiste Bills Committee, mon’n dir ki Egzekitif pa kapab zis vini bulldoze nou avek Bill! Nou’n dir e la Onorab Georges ou la konman temwen sa ki mon pe dir ozordi, poudir i enportan ki nou ganny bann Bill as a White Paper stage e nou diskit lo la, epi apre nou ava war si nou annan amelyorasyon pou fer konmsi ki donn en letan pou nou kapab osi expedite plis refleksyon plis aprofondi bann keksoz.

Now eski sa in ganny fer ?  Akoz si Bills Committee in aksepte e in donn en rapor, savedir tou sa bann keksoz in ganny aksepte ? Nou pa kapab prezan la nou vin dan Lasanble as a whole, pou vin dir sa bann keksoz ! Sa ti devret ganny dir depi then dan Bills Committee, Bills Committee pa ti devret dir ni rapor ni nanryen pa ti ni devret diskit sa Bill !  E zot ti devret met zot lipye ater zot osi !

E mon demande in future seryezman dan sa laliny Bills Committee i bezwen met sa presyon lo Gouvernman si nou krwar poudir Gouvernman i pe zis vini e pe bulldoze nou Lasanble atraver Bills Committee ler bann Bills i vini.

Alor si sa in pase savedir Bills Committee in war son lenportans e ler mon get rapor ki Bills Committee in fer set en rapor fair.  I enportan.  I en rapor ki Onorab William in lir taler mon pa bezwen relir ankor i kler e sa rapor i devret ganny pran an konsiderasyon by the House. 

E se sa travay Lasanble. Akoz mon pe koz koumsa lo de pwen i vre mon Leader of Government Business, e an menm tan mwan osi Manm Lasanble elekte dan en distrik.  E se la kot mon dakor avek Onorab William.  Lenportans lopinyon distrik, pwennvi ou elektora i osi konte.

E dan sa sans la, nou’n pas atraver sa bann staz, e la Bills Committee in donn nou en tre bon rapor.  E Bills Committee i fer kler li poudir sa Bill ki devan nou, i ok.  Se sa ki i dir ale dan Lasanble, in donn the House en kopi of son rapor.  I dir i pa le kont Konstitisyon, i byen e ler nou pe gete types of Referendum lo pwen 3 (1) i koz lo the Constitutional Referendum.  E la i dir lo laliny 3enm laliny i dir, ‘’The Constitiution was silent as to the mechanism for the launching of the Referundum.  Class 3 of  the appeal now clarifies the matter.’’ 

        I eksplike e Onorab Georges nou’n koze i dir klerman la i la, sa ki nou pei i bezwen ; sa ki lepep i bezwen.  Me i enportan pwen 7 ki Onorab Ferrari in touse.  Wi ‘’discussion point’’ i enportan Bills Committee in met sa. E i enportan sa i ganny diskite ‘[‘discussion point.’’ E nou bezwen nou konman en Lasanble diskit sa.  Me nou bezwen diskit li, ler nou tonm dakor.  Si savedir Bills Committee.  Si zot pe dir zot pa dakor avek sa Bill zot, savedir sa rapor Bills Committee zot pa dakor avek.

Now sa pwen 7 ki dir ‘’discussion point’’ sa ler nou’n tonm dakor lo pwen lo prensip e merit sa Bill, prezan Bill i al dan Committee Stage ; dan Committee Stage sa bann pwen ki dir nou bezwen diskite, nou,  nou ava diskit li.  Nou ava amande.  Sa Bill ki devan nou la i pa statik li.  I en Bill ki nou Lasanble – si nou krwar i annan keksoz ki fodre aranze ladan, nou bezwen amande, nou amande.  I annan serten propozisyon lamannman ki nou met devan ki ti ganny diskite ankor dan Bills Committee, ler bann pwen in sorti.  Be si further to that, i annan ankor bann pwen ki zot le amande pou anbelir sa Bill pou li reflekte lo sa ki vreman nou anvi, ki si i nonm en serten mankman, let us do it dan nou parliament! As a National Assembly annou fer sa bann amannman.

Sa ki mwan  mon propoze avek nou Lasanble.  E fodre pa nou per konman Manm Parlman.  Fodre pa ki nou ganny mete anba okenn presyon – par nenport okenn dimoun swa dan nou Lasanble swa aryer!  Nou devret free.  Nou devret lib konman en Manm Parlman pou nou diskite bann Prozedlwa ki vin devan nou, pou nou met sa bann propozisyon e pou nou diskite lo non lepep.  E an plis ki sa, sa ki nou pe diskite pe donn ankor plis pouvwar lepep Seselwa.

Sa Prozedlwa ki devan nou Mr Speaker i anbelir nou demokrasi. I anrisir li. I fer li avanse lo en lot nivo. Pandan sa 42an ki nou’n o pouvwar nou parti in kontinyelman, kontinyelman e kontinyelman devlop e anbelir nou demokrasi dan sa pei !

E ozordi sa ki devan nou se ankor lavantaz.  Nou le  ankor plis ankor pli devan, met sa pouvwar ankor ; fer lepep la ki lepep in devlope i annan plis responsabilite, kapab tenir lo sa kote Referendum. E la Referendum pe al pli lwen ki zis sa ki petet nou pe panse.  I pe al menm lo kestyon piblik, akoz la ler mon gete i annan 4 area kot i dir Prezidan li menm i kapab call Referendum. National Assembly i kapab call Referendum.

E petisyon – deor dimoun i kapab fer petisyon.  Me selman la osi wi se sa ki mon dir si i annan keksoz ki petet zot pa tro, tro dakor 100poursan nou  amann li me  nou pa kapab vote this Bill down ! Si nou vote li down, ou konnen   pros pou mwan dir zot en parol la – se vote maler ! Pa vote maler menm lo sa Bill la.

 

(laughter)

 

HON CHARLES DE COMMARMOND

Sa Prozedlwa Mr Speaker i en bon propozisyon  – i en bon Prozedlwa e nou, nou bezwen si nou krwar nou bezwen fer li pli byen, annou fer li la dan nou Lasanble. E nou ganny peye dan sa Lasanble, pou fer sa kalite travay – parmi lot travay !  Enn nou travay se sa.  E annou fer li ozordi.  Nou pep i a war ler nou pe ki mannyer nou pe aranz bann Prozedlwa pou zot menm zot.

Mr Speaker zot in kler mersi bokou ler mon tande ki Onorab lot kote latab i dir zot in kler lo la, me la i byen.  E anplis mon le fer sorti de pwen, ki bann lezot Manm in touse lo la. Par egzanp zot dir nou fer bann Mosyon dan sa Lasanble e nou anvoy kot Egzekitif Prezidan oubyen Egzekitif i les sa bann Mosyon la pa fer nanryen lo la. Mon anvi dir en keksoz lo la.

E mon letan zot in dir sa, mon’n ale mon al rode ki pe arive. Akoz mon’n fer sa Mr Speaker, se akoz dan Leaders Forum  – then akoz la nou pa pe zwenn be la mon krwar pe al zwenn lafen dimwan, me i annan en moman nou pa’n tro zwenn, me avan ler nou ti pe zwenn, nou’n diskite lo kestyon Mosyon ki Lasanble in pase.  Sa mon rapel Leaders Forum fortman.  Nou tou tou lede kote latab Mr Speaker nou koze nou met presyon, nou’n ensiste ki Mosyon letan i pase, nou le Egzekitif i ekoute, i tande – sirtou bann Mosyon parfwa ki pase unanimously – tou dimoun i siporte.

E Egzekitif i dir nou  en keksoz.  I dir Lasanble, napa problenm.  Ler zot pas en Mosyon – sirtou si zot pas li unanimously, fer sinopsis. Ekri nou en summary sa Mosyon, dir nou bann pwen enportan ki sa Mosyon in touse ensidswit, akoz nou,  nou pa pou perdi nou letan laba – konmsi pa an mal me konmsi, Egzekitif i annan lezot travay pou fer, pa pou zis ekout Lasanble.

Me i dir Lasanble li fer li son responsabilite, fer en summary, anvoye avek tou sa ki’n ganny touse enportan, ki zot in letan Mosyon zot in fini son rezime, anvoye pou nou kapab evalye gete pou nou kapab war kote nou kapab met an pratik.

Me Egzekitif i dir mwan depi then ki’n dir ziska ozordi Lasanble pa’n anvoye sa ki in demande !  Lasanble ki i fer li, sak fwa Mosyon i pase i anvoy en pti not i dir Egzekitif la sa tel Mosyon in pase.  E i manke –  i mank keksoz.

Alors la Mr Speaker mon pe lans lapel nou Lasanble, pou ki sa travay ki Egzekitif i demande i ganny fer e anvoy en kopi kot mon e Onorab Ramkalawan kot le de Leaders, pou nou war vreman ki dan sa lespri sa travay i a pe ganny fer, pou nou follow-up pou nou osi fer sir ki sa ki nou koze i ganny met an pratik.

Mr Speaker sa bann issue ki devan nou lo sa size Referendum, alor i kler.  E si i annan pwen ankor parey mon pe dir nou krwar nou merit retouse e alor la annou vot dan lo merit sa Prozedlwa, e ler nou fini vote, nou ava pas lo Committee Stage.  E dan Committee Stage byensir nou  i ava lo rapor sa Bill ; i ava lo lamannman ki devan nou, plus sa bann lezot pwen ki nou anvi amande, pou anbelir nou demokrasi pou anbelir pouvwar nou pei.  E mon asire tou dimoun i pou dakor e i pou kontan ki zot annan en rol enportan – en rol serye – en rol determinan dan lavansman e devlopman nou demokrasi dan nou pti pei isi Sesel.

Mr Speaker avek sa mon a demande ki nou siport merit sa Bill sa Prozedlwa e annou met nou pare pou nou kapab diskit an detay fran lo letan nou ariv dan Committee Stage sa Prozedlwa.  Mersi.

 

(APPLAUSE)

 

MR DEPUTY SPEAKER

Mersi Onorab De Commarmond.  Vi ki ou’n mansyonn serten keksoz ki konsern Bills Committee, e sa i en Komite dan Lasanble Nasyonal e ou’n donn serten lenformasyon fason i fonksyonnen, mon krwar i enportan pou mon klarifye pou piblik ki pe ekoute egzakteman rol Bills Committee. 

        Anba Order 62 ler en Manm i soumet en Bill e sa Manm i kapab LGB i kapab en lot Manm, sa Bill i devret ganny anmennen kot Clerk certified e i annan tou son objects ; i annan tou son clause nimerote. Me selman avan Speaker i donn leave ki sa Bill i kapab ganny enprimen, i bezwen fer sir poudir anba 62(4)(a),

‘’The Bill accords with the requirements of the Law, the Bill is divided into successive clauses consecutively numbered.  To every clause there is annexe in the margin a short indication of its contents.  The Bill does not contain anything foreign to what the title of the Bill imports.’’

Savedir, pou Speaker kapab fer sir poudir sa Bill i an akord avek Lalwa ; in ganny divize korekteman dan bann clause ; i annan en pti leksplikasyon pou sak clause e napa nanryen ki dan sa Bill ki diferan avek son objects, i refer sa avek Bills Committee.

Dan en pti mo Angle ki mannyer zot eksplik sa ‘’dot the i’s and cross the t’s.’’  Se sa rol Bills Committee.  Se pa Bills Committee pou fer desizyon si Bill i bon lo en kestyon Polisi ou non.  Se pa rol Bills Committee.  Alor rapor Bills Committee ki’n anvoye, i kler.  In dir poudir premyerman sa Bill from a Contitutional basis, i napa problenm avek.  I sound e i pa kapab fer rekomandasyon si Manm oubyen Lasanble i vot wi ou non.

Parske sa i pa son rol.  Sa se rol Lasanble Nasyonal.  Alor i pa korek pou donn lenpresyon ki le moman ki Bills Committee i dir zot in ’dot the i’s and cross the t’s’’ savedir i ok.  Napa nanryen mal avek.  Non. i kapab annan pou bann Manm kestyonnen i napa nanryen mal ek sa.  Alor annou fer sa tre kler.

Dezyenmman anba 63(1) Order 63 (1) e sa mon pe fer referans avek sa komanter ki Bill ti pas devan en lot Komite Assembly Business Committee e korekteman dan nou labsans.

Be 63 (1) i dir ou klerman, ‘’The short title of every Bill presented and published’’ e akoz i ti ganny prezante ganny pibliye with Order 61 and 62 ki nou fek pas lo 62 ‘’shall’’ – mon repete ‘’shall be placed on the Order Paper for  First  Reading by the Clerk. ‘’ Se pou sa rezon ki in ariv lo Order Paper.  Se pou sa rezon.  Akoz anba 63(1) in ganny mete lo Order Paper.

So mon krwar i enportan ki piblik i konnen lafason ki Lasanble Nasyonal i fonksyonnen, e lafason ki Sekretarya i fonksyonnen. E lo sa pwen ki ler bann Mosyon – e mon pa pe fer deba lo sa ki ou pe dir, me mon pe donn bann fe pou montre pep Seselwa lafason ki nou Lasanble – e mon dir nou Lasanble, se pou nou,  nou Lasanble i fonksyonnen.

Ler en Mosyon i ganny pase e in fek ariv en Mosyon ki’n ganny pase, a sak fwa ki i ganny pase pou piblik ki pe ekout nou deor, ki nou fer se i annan en let ki ganny ekri par Clerk of the Assembly.

I ekri kot Secretary to the Cabinet i dir ek li tel zour ti annan en deba lo Mosyon swivan ; e i donn detay sa Mosyon e answit i atase avek sa bann gran liny diskisyon ki’n monte dan sa Mosyon.  E sa se vreman lafason ki nou fer so ler Secretary to the Cabinet i ganny sa Mosyon, i konn tre kler ki mannyer i marse.

Mon pou donn en legzanp 15 Zilyet 2019 ; ‘’Motions approved by the National Assembly.

        Secretary of State National Affairs Office of the President.  The above refers :

 This is to inform your good offices that the National Assembly approved the following Motion at its sittings on Wednesday 5th of June, 2019 ; Honorable Wavel Woodcock Member for Grand Anse Praslin ;

Lasanble Nasyonal in demann Gouvernman pou met an plas e ranforsi bann servis avek tou lenfrastriktir lekipman neseser, kot Lopital Baie Ste Anne Praslin pou tretman reabilitasyon pou bann pasyan Praslin e Zil Pros.

Kindly find attached recommendations made by Members during the deliberations.

 La i la attachment.

The National Assembly of Seychelles Research Unit recommendation of Motion 5th of June 2019. – Introduction.

E mon pa pou al lir tousala Members ki ti la ; interventions lekel ki’n entervenir. The Motio i mete  Summary of debate ; considering seriousness of the ability of the available facility on Praslin, the Members debate on the Motion through identification of issues, that are posing unpleasant contraints, eksetera.  I ale –

Recommendations 1, 2, 3, 4.

  • That the Government puts in place and implement an urgent strategic plan to improve and reinforce the facilities of Praslin and Inner Islands.
  • Identify priority medical facilities rehab centers occupational health.

I detaye.  I kler.  La en legzanp enn ki fek pase.  Alor pou dir ki ler nou fer Mosyon napa swivi sorti kot sa Lasanble e ki Gouvernman pa fer pa ganny keksoz ki kler, i pa korek, la legzanp –  i pa korek.

Alor  mwan mon bezwen defann Sekretarya, parske sa se la pratik ; sa se fason ki sa 2Komite pe fer zot deliberasyon e zot travay e nou swiv e nou ganny gide par Standing Orders rien d’autre e se koumsa ki i marse.  Mon a permet ou en klarifikasyon.

 

HON CHARLES DE COMMARMOND

Mr Speaker mwan sa ki ou pe dir, lotrozour mon’n dir  – la mon repet ankor, nou osi mon krwar le de Leaders nou ti’n tonm dakor ki nou ganny en kopi sa rapor ki ganny anvoye kot la.

 

(Interruption)

 

HON CHARLES DE COMMARMOND

Ekoute mon pe koze!  Be ki zot pe sot anler? Ki zot pe sot anler? E mwan konman Leader Government Business, sa ki ou pe dir, mwan mon’n tyeke e mon pou re tyek ankor.  Ou dir akoz ler mon pe koze la, mon ganny mon lenformasyon poudir zot pa pe gannyen sa detay.  Mon pa’n dir ou pa fer mwan !  Mon’n dir ou Egzekitif i  ki dir i pa pe gannyen.  Mon pou al re tyek ankor.  I will liaise with you si i annan en dimoun ki letan i gannyen, i pa pe donn sa Lotorite, si kwa – mon pa konnen me selman mon pou rode.  Me selman an menm tan, mon re ensiste, ki nou le en kopi.  I enportan mon biro i ganny en kopi sa ki ou pe dir la.

I normal.  Sa ki mon pe demande i normal.  Pa kapab  enterfer dan mon travay laba ou !   Mwan i normal. I normal ki nou ganny en kopi, pou war si sa Lasanble sa ki i pe dir i pe fer osi dan sa direksyon.  Mersi.

 

MR DEPUTY SPEAKER

Onorab De Commarmond mersi bokou.  Mon’n tann ou kler selman sa ki mon santi li mon devwar pou fer se met bann fe deor.  Ler en keksoz i aparet lo Order Paper, i ganny pibliye i bezwen aparet lo Order Paper.  Ler Bills Committee i fer son travay i pa pe dir ek Lasanble i bon pou vot wi i pe dir poudir i meet bann bezwen Lezislatif.  sS sa ki pe dir.  E Onorab Georges i fer kler dan son rapor ki in met serten pwen pou diskisyon.

E ler nou fer Mosyon si Egzekitif i dir poudir zot pa ganny lenformasyon korek swivan bann Mosyon, sa mon pa krwar, parske zot bezwen.  Mon war Vis Prezidan i nod.  Zot gannyen lenformasyon ki korek.

Mon dakor avek ou poudir ou biro i devret ganny an kopi, si sa i leka nou a fer ou ganny en kopi san okenn difikilte ; parske mon pa war problenm avek sa.  Me selman mon pa krwar mon pa rapel si sa demann ti ganny mete avek Sekretarya – ou’n fer li ofisyelman la ou a ganny en kopi korespondans ki al kot Egzekitif lo la.  So annou pa fer plis deba lo la.

Nou dernyen entervenan Onorab Ramkalawan.  En moman Onorab Ramkalawan Onorab Pillay.

 

HON SEBASTIEN PILLAY

Mersi Mr Speaker.  Mon ti le zis fer en quick personal explanation as a Member of this Committee e petet demann Chair this Committee pou siport mwan lo la avek ou permisyon.  I annan mansyon de Bill ki enn ki nou pe esper feedback from sa Komite regarding sa Public Service Salary Bill e 2enm i konsern Anti-Corruption Commission Bill ki devan Bills Committee e  i annan konsiderasyon.

Mon krwar dan deba i annan bann Manm ki’n fer referans avek sa de Bill konmsi se en kote ki pe retir sa, fer sa bann Bill bouz devan, e mon ti ava demann ou pou donn en klarifikasyon akoz ou’n attend bann miting Bills Committee e nou pe konsidere bann lamannman, e i annan bann diskisyon lo sa bann Lalwa pou fer li pli for.  So mon ti a kontan zis parey ou’n servi pou Mosyon nou kapab fer en klarifikasyon akoz nou pa le misrepresent sa ki pe arive an relasyon avek sa de Bill, e piblik an deor pa konnen e zot krwar poudir i annan en lentansyon pou kasyet keksoz.

Mon ti le zis met sa devan ou Mr Speaker.

 

MR DEPUTY SPEAKER

Bon mon krwar nou pe al an deor sa ki lo la mon dakor avek ou poudir i bon pou donn piblik lesplikasyon.  Mon pa konnen si Chair of Bills Committee oule donn zis 1minit en lesplikasyon ki pozisyon lo sa de Bill just in fairness zis en lesplikasyon kot nou été lo Anti-Corruption Bill epi lekel sa lot Bill Onorab Pillay?

 

HON SEBASTIEN PILLAY

Lot i Public Service Salary Bill me sa nou deza konnen nou deza donn –

 

MR SPEAKER

Anti-Corruption Bill petet zis ou kapab si Onorab Georges konman Chair of Bills Committee i kapab zis dir nou pozisyon lo la.

 

HON BERNARD GEORGES

Mersi Mr Speaker.  Anti-Corruption Bill in vin devan Bills Committee e in annan en seri propozisyon ki nou’n etidye.  Premye ti annan en seri lamannman ki ti ganny table pou met dan sa Bill e Bills Committee in santi ki i pa ti apropriye pou pran sa bann lamannman dan en amending Bill akoz bann amannman ki tro sibstansyel selon nou.

Alor nou ganny diskisyon avek premyerman avek CEO Anti-Corruption Commission apre sa nou ganny en 2enm rankont avek Board Anti-Corruption Commission e nou annan apre sa en 3enm rankont avek Biro Attorney Zeneral kot nou’n ganny dir pou annan en konsiltasyon L’Angleterre dan kouran mwan Zen oubyen kekfwa lafen Me, mon pa rappel me sertennman Zen.

E kot Biro Attorney Zeneral Gouvernman ti pou al resevwar en seri benchmark pou sa bann kalite Lalwa, e nou dir ok fine, annou espere nou ava gete si sa bann benchmark pou ede pou fer antre dan nou Lalwa.

Finalman nou’n deside konman en short term measure Attorney Zeneral in propoze konman en short term  measure pou nou amann sa amended Bill pa upwards, me downwards.  Setadir koup en bon pe e fe r pase zis 2 propozisyon oubyen 2 mezir, ki Anti-Corruption Commission ti pe demande, pou ed zot dan zot investigatory powers.  E sela kot Bill i été konmela.   Nou bezwen zis si i annan lakseptasyon e nou sinifye avek Biro Attorney Zeneral ki sa i en posibilite.  Si nou annan lakseptasyon move forward avek sa, sa  Bill i ava aret dan Lasanble dan en amended form downwards.  Setadir mwens ki sa propozisyon lamannman ki devan nou Lasanble.

E avek e  si Lasanble i dakor, nou ava pas sa lamannman restrikte, pou ed Anti-Corruption Commission fer son travay envestigasyon la, an atandan ki swa en comprehensive Bill i ava ganny anmennen lo sa bann benchmark enternasyonal, par Attorney Zeneral ouswa en Private Members Bill i ava ganny anmennen, pou sa bann lamannman ki ti pe ganny sizere pou amann sa Bill.

Donk i la nou travay bokou la e a nenport ki moman Bills Committee i pare pou met sa lo Order Paper pou kontinyen osito ki sa dernyen preakizisyon i ganny fer avek Attorney Zeneral.  Mersi Mr Speaker.

 

MR DEPUTY SPEAKER

Mersi Onorab Georges.   Savedir i kler poudir nou pa ankor resevwar sa amended Bill sorti kot Biro Attorney Zeneral, so enn fwa ki sa i arive ankor vwala status sa louvraz.  Mersi bokou Onorab Georges.  Nou pou kontiny avek nou diskisyon.  Mon permet Onorab Ramkalawan pou fer ou entervansyon.

 

HON WAVEL RAMKALAWAN

Mersi bokou Mr Speaker.  Mr Speaker mon’n ekout tou bann entervenan lo sa Bill.   E i annan bokou keksoz ki petet mon vwar ti’n devret ganny regarde avek bokou plis atansyon, olye ki zis fer serten statement.

Mon santi ki petet serten bann entervenan lo lot kote latab, pa’n vreman regard sa Bill a-fon.  Par egzanp, letan en statement ki’n ganny fer ase souvan i ganny, sa statement ki’n ganny fer se Prezidan Faure pe dilute son pouvwar.

Mr Speaker mon krwar ki poudir sa i statement pli fo ki i annan an relasyon avek sa Bill.  Ofet parey Bills Committee in dir klerman, napa nanryen ki donn Prezidan dan Konstitisyon okenn pouvwar an relasyon avek en Referendum.

Les mon vin plis spesifik Mr Spesifik Mr Speaker.  Letan nou regard Lartik 164, kwa ki nou lir?  I dir avek nou klerman, 164(1) –  ‘’en Lalwa i ava fer en provizyon pou ki i annan en Referendum pou bann lobzektif sa Konstitisyon –  ouswa okenn lezot bi, ouswa okenn sirkonstans preskrir par sa Lalwa.

20 en Lalwa ki ganny refere dan clause 1, i kapab fer provizyon pou tou keksoz neseser avek bi asir en Referendum efektiv e zis.

Mr Speaker letan mon lir sa Lartik, mon pa vwar okenn par kot sa mon Prezidan i aparet.   E malerezman letan zot in ekrir Elections Act, e sa letan se Mr Renu ki ti Prezidan.

Letan zot in ekrir Elections Act zot in fer rantre Prezidan.  Se la kot Prezidan i ganny fer rantre, e sa se dan seksyon 54.  E dan seksyon 54 Elections Act i dir kot i annan en size ki sipoze ganny determinen dan en Referendum.

Prezidan i ava refer sa size avek Electoral Commission pou organiz en Referendum.  Alor Mr Speaker sa ki nou vwar se ki Konstitisyon li i kit sa size ase ouver, me Elections Act i frenm li pou limit li lo Prezidan.

Be Mr Speaker, mwan mon krwar ki si Konstitisyon pa donn Prezidan parey Konstitisyon i ase kler ;  kot Prezidan i devret ganny en pouvwar, i, Konstitisyon i mete, par egzanp taler mon pou vin lo la.

Prezidan i annan lotorite pou li dizourd Lasanble dan serten sirkonstans.  Prezidan i annan Lotorite L’Egzekitiv.  Prezidan i annan sa rol Sef D’Eta ensidswit.  Tousala sa Konstitisyon i vin kler lo la.

Me nou vwar ki pou dir nou Konstitisyon letan i pa spesifik an relasyon avek pouvwar ki Prezidan i annan, i osi fer li kler.   Donk Mr Speaker, zot in donn sa pouvwar Prezidan, e se la kot Prezidan – MrsyeFaure in fer son premye fot.

E letan, si ozordi nou pe diskit sa Lalwa.  Se parski an Me, apre ki i ti’n sorti Maputo.  An Me i ti fer en ladres, e apre ki in, dan son ladres i ti dir ki i pou bezwen demann Komisyon Elektoral pou organiz en Referendum.

E li in pran sa pouvwar lo li menm, pouvwar ki i ti napa, in pran sa pouvwar lo li menm, pou li menm dikte par ki poursantaz sa Referendum pou ganny pase.

Alor Mr Speaker se sa kot problenm in vini.  Msye Faure in ekrir, in pran lotorite ki i napa !  Ki Konstitisyon pa donn li !  E se nou ki’n bezwen, mwan mon ti premye dimoun dan sa Lasanble pou raise en matter of privilege, parske mon ti dir ki, nou privilez konman Manm Lasanble pe ganny pran !

E apre sa in annan diferan deba, e swivan sa bann diferan deba, sa ki nou’n vwar se le 3 Zen, apre ki Komisyon Elektoral ti’n fini pran en desizyon parey Mr Lucas ti’n anonse.  Letan zournalis ti demann li si sa lot desizyon ki Msye Faure ti pran pou ekrir li, si se sa ki i pe fer, ki pou napa Referendum.

Mr Lucas ti dir klerman – non !  Tout fason nou ti’n fini drafte nou let, nou pa ti pou kapab organiz en Referendum parey Msye Faure ti’n demande.

Alor aprezan le 3 Zen Mr Faure i dir ki i pe al demann, in fini donn  direksyon Attorney Zeneral pou prepar en Lalwa kler e ki pou napa okenn lanbigite lo ki mannyer Referendum pou ganny fer dan nou pei.

Mr Speaker se sa ki ozordi nou annan devan nou.   E parey plizyer Manm in dir avan, mon pa anvi repete.  Parey plizyer Manm in dir avan, souden se sa ki’n vin priyorite Msye Faure.

I ti anvi en Referendum, i pa’n kapab fer li, in sey inisye li, e alor aprezan i pe rod en lot fason.  Alor annou tir dan nou lespri sa zafer ki Msye Faure i en bon boug, i pe donn pouvwar lepep ensidswit.

E Mr Speaker fodre nou, fodre pa ki nou tonm danm sa pyez.  E fodre pa ki nou, nou servi lemosyon pou nou anbet sa pep.  Akoz mon dir sa?  Mr Speaker dan en fason kler, Onorab Georges e lezot Manm lo nou kote in fer kler ki poudir Sesel i en demokrasi dan en Konstitisyon ki respekte en Gouvernman ki annan 3 brans.

E sa demokrasi i elekte 2 brans dan sa Gouvernman.  E dan nou pei Sesel i annan zis, anba Konstitisyon i annan zis Prezidan Larepiblik ki ganny elekte e dezyenmman i annan Manm Lasanble Nasyonal.

E nou Konstitisyon i fer kler ki poudir se sa lafason ki demokrasi pou ganny pratike dan nou pei.  En Prezidan pou ganny pouvwar Egzekitif.
E i donn li tou son bann responsabilite ziska pou li Mr Speaker call en state of emergency. 

I kapab deklar en state of emergency.  Me selman ankor enn fwa dan sa sistenm balans pouvwar, i dir avek li 7 zour, within 7 days i bezwen annan, i bezwen vin devan Lasanble Nasyonal, e Lasanble Nasyonal i determinen si sa state of emergency, i kontinyen oubyen i arete.

Alor nou Konstitisyon e lepep Seselwa i bezwen ganny sa byen kler.  Pa krwar ki akoz i annan bann groupman ki pe formen ozordi, ki poudir pouvwar i dan lanmen sa bann groupman.

Non!  E mon anvi ki sa i ganny fer sorti klerman.  Pouvwar demokratik dan nou pei i ganny egzerse atraver en Prezidan ki ganny elekte, e atraver en Lasanble Nasyonal ki ganny elekte li osi.  E atraver sa i annan sa Komisyon.  E regarde ankor enn fwa Mr Speaker, ziska ki zistans ki sa aksyon demokratik i kontinyen.

Sa aksyon demokratik ki lepep Seselwa i fer atraver son desizyon aprezan i al lo lapwentman Ziz.  Ki mannyer i al lo lapwentman Ziz?  Ki mannyer i al lo lapwentman Attorney Zeneral?

Ki mannyer i al lo lapwentman bann Constitutional Appointees?  Konstitisyon prezan i dir avek ou, i pou annan en Constitutional Appointments Authority.  E ki mannyer sa lotorite i ganny apwente?

Prezidan Larepiblik ki’n ganny elekte ek Leader Lopozisyon ki li i osi tou by virtue of being dan Lasanble in ganny elekte.  Sa 2 dimoun se zot, enn pou swazir de, lot pou nonm 2.

E sa 2 dimoun, sa 4 dimoun an tou, zot aprezan zot ava swazir en Chairperson.   E se zot ki pou apwent bann Ziz dan Lakour anba sistenm Zidisyer.  Alor Mr Speaker i enportan pou nou konn sa.  I enportan pou nou sezi sa.

E pou nou pa anbet sa pep.  E pou nou dir avek sa pep, si zot anvi sanz sa sistenm demokrasi ki Sesel in adopte,  la nou ava bezwen al dan en fason bokou pli profon.  Nou pou bezwen reekrir dan en serten sans nou Konstitisyon,  swa pou nou tir li konman en sistenm prezidansyel, pou nou met li konman en sistenm Parlmanter.  Oubyen pou nou annan en sistenm demokrasi direk, parey La Swiss.  Me sa i pou vedir reekrir nou Konstitisyon.

E alor annou pa anbet nou pep avek sa zafer Referendum, ki poudir nou pe donn li pouvwar.  E la Mr Speaker, pou elabor lo sa pwen, mon anvi ki nou vin lo en lot Lartik dan Konstitisyon.  E sa se Lartik 110(4)(a) avek (b).

Se la dan sa Lartik i mansyonn sa mo Referendum.  E sa Lartik i koz lo ki mannyer Prezidan i kapab dizourd Lasanble.   Prezidan Mr Speaker i pa kapab zis deside pou li dizourd Lasanble zis koumsa!

I annan sa pouvwar, me anba Lartik 110 ki i vreman enportan,  i dir avek ou ki premyerman –  parski i annan 6 letap ladan.  Premyerman si Lasanble i vot kont en mezir, oubyen en  propozisyon Gouvernman, Gouvernman i kapab call en Referendum.

E la se
Prezidan, parski se li ki ansarz L’ Egzekitiv.  Prezidan i kapab demann en Referendum spesifikman lo sa mezir ki Lasanble in rezete.

Aprezan si sa Referendum li ki’n ganny mete devan lepep, i siport sa mezir Gouvernman, e aprezan sa mezir ki lepep Seselwa in aprouve, i revin devan Lasanble.  E Lasanble i vot ankor kont sa mezir, la Prezidan i annan drwa anba Lartik 110(4)(a) pou li dizourd Lasanble.

Ki sa i montre nou Mr Speaker?  In pas serten letap.  E atraver sa bann letap wi nou vwar demokrasi direk.   E se pou sa rezon ki Konstitisyon in donn Prezidan sa pouvwar pou li dizourd Lasanble, si i annan en mezir Gouvernman ki Lasanble i rezete e ki’n al devan lepep Seselwa.

Parski i pe montre ki poudir sa Lasanble Nasyonal pa pe ekout sa ki lepep Seselwa, pa pe ekout sa ki lepep Seselwa pe dir.  Savedir lepep Seselwa i dakor ek sa mezir.  E ou koman en Lasanble avek en maksimonm 35 Manm, ou, ou pa kapab dezobeir sa ki lepep Seselwa i anvi.

Be Mr Speaker se la kot mwan dan sa Konstitisyon, se sel lenstans kot mon vwar demokrasi direk i ganny mete, i ganny rantre.  E dan menm fason anba Lartik 110(4)(b,.  Li osi tou i koz dan sa direksyon.

Me avan ki Prezidan i dizourd Lasanble, i bezwen donn notis Speaker, 7 zour notis e apre sa i ava fer en proklamasyon dan Gazette e i ava dizourd Lasanble within 30 zour apre ki sa mezir ensidswit ki Lasanble pa’n deside pou li fer.

Alor Mr Speaker, annou pa anbet lepep Seselwa.  E pou mwan, letan mon regard sa bann Lartik dan Konstitisyon, e letan mon regard sa Lalwa ki’n ganny anmennen devan nou, mon vwar ki pou dir i en Lalwa ki pe senpleman donn Prezidan tro bokou pouvwar.  Tro bokou pouvwar.

E letan mon demann, letan mon demann sa kestyon, eski se sa ki Konstitisyon i anvi?  Mwan pou mwan, mon larepons se non.  Konstitisyon kot i konsern Referendum i pa’n anvi donn Prezidan sa kalite pouvwar, sansan i ti ava’n dir ki poudir nou pou donn ou sa kalite pouvwar.

E alor Mr Speaker, mwan enn bann kestyon ki mon poze se, akoz ki sa Lalwa dan tou le 3 lenstans, sa Lalwa ki nou pe regarde, dan tou le 3 lenstans ki en lamannman Konstitisyonnel, ki i en lamannman fer par atraver Lasanble Nasyonal,  ki i en amannman fer par Piblik Seselwa, akoz ki zot bezwen retourn kot Prezidan pou li annan sa lotorite final?  Sa pou mwan, mon pa dakor avek, e mon krwar ki al kont lespri sa sistenm demokrasi ki nou annan !

E alor mon demande, be akoz ki sepa en lot lorganizasyon ki kapab regard, regard Referendum ?  Par egzanp Mr Speaker, akoz ki sepa Humans Rights Commission?

Parski apre tou, eski Human Rights Commission, son non li menm li pa i dir avek nou i koz lo drwa?  Letan nou pe koz en Referendum,  eski i pa 99.9 poursan fwa an relasyon avek drwa?

Si nou pe koz lo par egzanp ‘’Gay rights,’’  eski i pa about drwa bann endividi an relasyon avek sosyete?  Si nou pe koz lo kanabis.  Eski ankor enn fwa i pa an relasyon avek drwa en endividi pou li si i anvi fim kanabis oubyen non ?

Tou bann keksoz ordinerman ki i annan pou fer avek Referendum, i annan pou fer avek drwa.  Menm letan nou ti aprouv Konstitisyon, se i annan pou fer avek drwa, parski lepep Seselwa ti a pe pran en desizyon lo ki mannyer i anvi ganny dirize.

Lo ki mannyer son drwa pou ganny aplike.  Alor Mr Speaker sa ki mon pe dir la, mon ti a kontan ki Vis Prezidan i pran li byen an konsiderasyon.  Parski mwan mon krwar ki an relasyon avek en Referendum spesyalman ki seksyon 4 avek 5 i met klerman.

Parski i donn li tro bokou pouvwar pou li determinen, si i neseser oubyen si i expedient.   Be la mon krwar Mr Speaker kot volonte politik oubyen panse politik, lentere politik i kapab rantre ladan.  E ozordi mon krwar ki nou bezwen move away from sa.

Annou sorti dan sa sityasyon kot nou al donn Prezidan plis pouvwar.  Par egzanp Mr Speaker letan nou regard sa Lalwa, e Onorab Georges in fer sa sorti byen kler.

Letan ou regarde ki poudir sa zafer poursantaz, sa zafer poursantaz, Prezidan i ava determinen.  E sa i lo seksyon 7, 7(2).  7(2) i dir avek ou, en kestyon pou en Referendum lo en size ordiner i ava pase avek vot, pa mwens ki 60poursan.

Amwen ki Prezidan par regilasyon i deside pou li sanz sa vot.  Be la mon krwar ki poudir i pa bon.  Alors ki nou pou vwar Mr Speaker.  Si Prezidan i anvi en mezir ganny pase, i ava met li lo 50poursan.  Parski i pou pli fasil pou li pase.

Me si i pa anvi en mezir i pase i ava met li lo 60poursan, akoz i pou pli o, bar i vin pli o.  E Mr Speaker nou tou nou konnen ki poudir sa desizyon ki Msye Faure ti pran an Me letan i ti anons Referendum, pou li met 60poursan.

Parey nou pe dir, nou pa konnen kote i ti pran sa Lotorite, me selman i ti met li 60 poursan, akoz i pa ti anvi pase.  E ki mannyer nou konnen i pa ti anvi sa i pase?  Se parski zis apre ki Msye Faure ti’n koze lo televizyon 8er diswar,  Vis-Prezidan Meriton ti lo Tele Sesel 9er diswar.

 

(laughter)

 

 

HON WAVEL RAMKALAWAN

Relax Vis-Prezidan, wi mon ti ganny envite mon pa ti vini.  Mon ti refiz-e pou mwan vini.  Mon ti anvi ekout ou !  Parski zis konman soz li Vis-Prezidan i ti al lo Tele Sesel.

E ou konnen, mon ava remind ou serten keksoz ki ou ti dir.  Deswit Vis-Prezidan ki Leader Parti Lepep, US, i ti dir klerman Mr Speaker, ki poudir ki mannyer eski en dimoun ki pa kontribye dan nou lavi toulezour i kapab deside lo en size si enportan?

Ki mannyer i kapab partisip dan eleksyon, konmsi pou desid lo bann size enportan?  E i ti al pli lwen, pou dir ki si en dimoun pa kontribye dan lakour, ki mannyer i kapab deside kwa ki ganny met dan kastrol?  Alor i ti kler sa ki, kwa ki ti lentansyon.

E se pou sa rezon Mr Speaker ki poudir nou pa kapab.  Prezidan Larepiblik pa kapab gannyen sa pouvwar pou li determin kan en Referendum pou ganny fer, par ki poursantaz en Referendum pou ganny fer.

Sa i bezwen ganny fer atraver en lot lorganizasyon.  E mon’n mansyonn Human Rights Commission.  Parski mon krwar ki poudir Human Rights Commission li si i annan en demann, si Prezidan i annan en demann pou en Referendum.

Zot, zot ava regarde e zot ava balanse, zot ava regarde si vreman i annan merit.  Parski Prezidan Larepiblik i pa en superhuman being li!  Prezidan Larepiblik i en sitwayen Sesel.  Tou sa ki en Seselwa i annan, Prezidan Larepiblik osi tou i annan.

E alor, Human Rights Commission oubyen whatever body i ava balanse si i fer sans ensidswit, e zot aprezan zot ava, manage tousala.  Mr Speaker mwan mon anvi, letan mon pe koze, mon koz bann keksoz ki kler.

E la Mr Speaker, mon anvi an menm tan osi dir, eski nou pa vwar i drol, ki poudir an 2019, an 2019 ozordi US, Parti Lepep/SPUP/SPPF zot vin koz Lotorite lepep!  Nou pe al donn lepep pouvwar.

Be mon ava dir zot ki zot ti fer avek Lotorite lepep !  Mr Speaker le 18 Zen 1993 lepep Seselwa dan en Referendum, ti donn zot lekor en Konstitisyon !  Ti donn zot lekor en Konstitisyon.   Sanmenm sa nou selebre Constitution Day.  Be ki SPPF sa letan ti fer?

Mr Speaker le 14 Zilyet 1994 egzakteman 1an apre ki lepep Seselwa, sa ki, sa lepep ki ozordi zot pe koz lo la, ti’n donn son lekor en Konstitisyon avek zot mazorite 2tyer, zot ti pas premye Lalwa Act 7 of 1994 kot zot ti sanz plis ki 64 Lartik dan sa Konstitisyon !

Mr Speaker, Mr Speaker ‘’pas baton’’ lepep Seselwa pa ti donn son lekor le 18 Zen 1993.  ‘’Pas baton’’ se SPPF ki ti enpoz lo lepep Seselwa le 14 Zilyet 1994.  Apre sa Mr Speaker zot ti pas 2enm lamannman 2an pli tar le 27 Mars 1995 dan Act 5 of 1995.  Ki zot ti fer sa fwa?

Mr Speaker zot ti sanz sistenm proporsyonnel.  Lepep Seselwa le 18 Zen 1993 ti dir ki fodre tou vot i ganny konte !  Zot, zot ti sanz sa akoz ti vwar ki poudir parti UO sa letan ti pou ogmant son score, zot ti sanz proporsyonnel pou fer li fodre ki ou ganny 10poursan.

Eski lepep Seselwa ki ti vote sa?  Oubyen eski zot ki ti enpoz lo lepep Seselwa?  Zot in ale Mr Speaker, sa dan sa premye Lasanble sa.  Dan sa premye Lasanble !

E petet Mr Speaker, mon ti ava kontan ki Minis, Vis- Prezidan i dir avek nou, lekel ki ti MNA pou Plaisance sa letan?  E i ava dir avek nou, sete pa lot ki Onorab Vincent Meriton.

 

 

 

(Interruption)

 

HON WAVEL RAMKALAWAN

Sa letan, wi, wi Mr Speaker.  Li ki ti MNA pou Plaisance.

Plaisance ti ankor ansanm avek Les Mamelles.  Mamelles pa ti ankor separe avek Plaisance.  Dan premye Lasanble ankor Mr Speaker, le 20 Novanm 1995, Act 19 of 1995 zot ti fer plis sanzman.  14 Out 1996 Act 14 of 1996 zot ti fer plis sanzman.

Eski ozordi Parti US ki pou vin koz avek nou lo donn pouvwar lepep Seselwa, kan zot, zot in enpoz lo lepep Seselwa?  Zot annou serye nou!  Annou serye nou.

Alor Mr Speaker Lartik 164 pa’n zanmen ganny envoke pou fer Referendum.  Me ozordi zot pe vin tay avek sa, senpleman akoz Msye Faure i anvi en Referendum an relasyon avek sa, i pe sey ankor.   In seye premye kou, in ganny Referen-Boom, la i pe sey ankor atraver en lot fason.

Be Mr Speaker, tou sa bann keksoz ki zot in koz lo la, eski zot realize ki poudir an menm tan Lasanble Nasyonal, tan ki zot ti annan en bon mazorite.   Zot ti pas bann Lalwa ki, ki ase enportan, bann Lalwa ki petet ti devret al devan lepep Seselwa !

Si zot pe koz lo donn pouvwar lepep.  Onorab, Onorab Waven William pa ti dan 5enm Lasanble.  Me dan 5enm Lasanble, eski zot pa ti pas Lalwa pou amann, pou fer lamannman avek Lartik 151 Penal Code lo sodomi?

Eski zot pa ti krwar ki poudir sa ti en keksoz enportan pou lepep Seselwa pronons son lekor lo la?  Mr Speaker, annou, annou serye nou.  Me an plis ki sa, Mr Speaker, ozordi, nou tann dir 35poursan, e mon bann, mon bann koleg avan in koz lo la.

Me eski Msye Faure li menm li, pandan son letan dan lofis,  eski i pa’n montre nou ki poudir en petisyon i pare pou li aksepte avek mwens ki 25mil dimoun?  Letan bann dimoun dirize par Ms Sabianna Mancienne ti anmenn en petisyon sinyen par, sinyen par mwens ki 25mil dimoun.

Ti prezant li avek sa petisyon,  eski pa i ti pran aksyon?  Alor akoz ki ozordi nou bezwen 25mil dimoun?  E la mon anvi fer kler Mr Speaker, parey mon’n dir o komansman, ki poudir i annan en kantite bann largiman ki’n ganny servi par lot kote.

Mwan mon apel zot ‘’Made in China.’’  Because they are cheap and they do not last long !  Mr Speaker letan nou pe sey rod Preserve Seychelles, la i la, nou pe siport Preserve Seychelles, nou pa kapab anmenn en petisyon e apre sa i ava annan en
Referendum lo Assomption.

Mr Speaker annou aret anbet dimoun !  Mr Speaker seksyon 11(1)(e) i dir avek ou klerman ki poudir en Referendum pa kapab ganny fer lo size, bann Trete, bann Lagreman oubyen bann Konvansyon.

Alor, alor kote Preserve Seychelles i pou ale?  Si en konparezon i annan en Lagreman ant Sesel avek Lenn lo Assomption.  I vin dan Lasanble, ok –  i vin dan Lasanble.  E menm si dizon i ganny pase, si dizon i ganny pase.

E zot Preserve Seychelles zot anvi fer, met, rod petisyon, rod sinyatir pou zot fer en Referendum lo la sa size.  Lalwa pa les zot fer li !  Annou ganny li kler.

Lalwa i defann zot fer li.  E alor Mr Speaker annou aret vin zwe avek sa bann politik cheap, e ki pa last lontan.  Mr Speaker Minis in koz avek nou lo konsiltasyon piblik.  Konsiltasyon avek lepep.

Mon ti ava kontan si Minis dan son larepons, i dir avek nou ant letan sa Bill in ganny pibliye le 28 Zen, oubyen ant letan Prezidan Larepiblik, ti anonse ki poudir en nouvo Lalwa lo Referendum, savedir le 3 Zen.  Dir nou ki kalite konsiltasyon in annan ant le 3 Zen 2019 avek le 28 Zen 2019, avek lepep Seselwa? Annou aret zwe avek lepep Seselwa.  I pa’n annan okenn konsiltasyon.

E sa Gouvernman i kontan zis koze lo konsiltasyon, menm parey ki ziska prezan in dir, i pou fer konsiltasyon piblik lo size sitwayennte, e ziska aprezan napa okenn konsiltasyon ki pe ganny fer.

Alor Mr Speaker, mwan mon krwar ki poudir ozordi kot nou ete, nou bezwen serye nou.  E plizyer mon bann koleg in koz lo sa progranm Lezislatif.  Ok, nou’n koz lo progranm Lezislatif.  E Onorab De Commarmond mon kontan letan i nonm Leaders Forum.  Be dan Leaders forum la i la, mon annan avek mwan.

Mon annan Legislative Program ki ti ganny donnen dan Leaders Forum le 7 Septanm 2018.

Immigration Bill, pending. 

Civil Code of Seychelles, pending. 

Seychelles Maritime Safety Authority Bill, pending, not Gazetted. 

Beach Control Act, not Gazetted. 

Hire Craft Act, not Gazetted. 

Mental Health Act, pending. 

Health Record Bill, not Gazetted. 

Nature Conservancy and Protection Bill, not Gazetted. 

POEC Act, en kestyon.  Physical Planning Bill, pending, pe al, la in ganny pibliye.

Prompt Payment Bill, not Gazetted. 

Scholarships Scheme Bill, not Gazetted. 

ANHRD Bill, not Gazetted. 

Domestic Violence Bill, not Gazetted. 

Private Public Partnership Bill, not Gazetted. 

SFRSA Act, not Gazetted.  SFA Establishment Act, mon krwar in annan en pti keksoz.  Mr Speaker but this is the queue ki Msye Faure ti donn nou.

Se sa ki i ti donn avek Onorab De Commarmond, Onorab Leader, Onorab Speaker, avek mwan.  Be ki mannyer eski Referendum Bill in pas par devan ?  Sa mon krwar i en vilen manni, i en vilen manni, e sa vilen manni i fer ki, zot pas keksoz par devan.

Be mwan Mr Speaker, mwan mon en politisyen.  Msye Faure i en politisyen.  Msye Meriton VP i en politisyen.  Nou tou ki dan sa Lasanble nou bann politisyen.   Alor pa vin zwe avek nou.  Parey ki zot annan zot taktik politik, Onorab Ferrari in mansyonn sa tre byen.

Kot in koz lo ki mannyer tanzantan nou pou ganny pous en keksoz avek nou, pou nou rezete e apre pou zot ganny zoli Lartik.  Zoli Lartik.  Par egzanp, letan in anmenn nominasyon Mr Patrick Victor devan Lasanble –  pourtan Mr Speaker nou’n koze.

E apre sa en Komite, Komite IAC ti pou zwenn pou koz lo la.  Ki nou ti vwar?  Apre sa nou’n vwar Lartik Vandredi pase aparet dan, dan People.  Ki poudir nou, LDS i kont en Seselwa.

Nou’n menm tann en politisyen aspiran ki son parti pa ankor anrezistre, aswar lo Tele Sesel, pe dir, pe lager ki mannyer nou pa’n aksepte en Seselwa.  Pourtan li i ti Minis Kiltir, zanmen in met Patrick Victor konman en Anbasader Kiltirel!

Ki in mete?  In met Endyen.  In met Alman.  In met Norvezyen.  In met tou bann lezot nasyonalite koman Anbasader Kiltirel, me Mr Patrick Victor in kit ater trankilman.

Selman ankor enn fwa Mr Speaker, sa bann politik ‘’Made in China,’’ cheap e ki pa last lontan i vin defann Mr Patrick Victor!  Mr Speaker, nou, nou annan lespri lelefan.  Zanmen nou bliye !

E annou pa bliye ki poudir sa parti politik ki Vis-Prezidan ki la ozordi devan nou, ki poudir sa parti politik, letan Mr Faure ti anons son Referendum, mon demann mwan si i rapel ki ti zot headlines.

Mr Speaker, a Master Stroke – a Master Stroke.  Prezidan Faure ti’n met nou dan en serzwen.

‘’One bold decision from President Danny Faure has knocked the opposition click out of its illusion, that the road to the next presidential election was going to be an easy ride for them.’’

Nou anvi dir avek li ozordi, Mr Speaker.  Si i krwar ki poudir sa Referendum Bill pou en easy ride pou li, nou dan LDS nou dir li – non!

 

(APPLAUSE)

 

HON WAVEL RAMKALAWAN

Pa vin zwe politik avek nou.  Pa vin zwe politik avek sa pep Seselwa.

Annou pa zis mansyonn non lepep Seselwa, e apre sa nou ava kapab, si nou aret zwe politik, la apre sa nou ava kapab fer bann sanzman.

Mr Speaker, mon pa kapab terminen san remind bann Manm lot kote egzakteman parey, mon’n remind Vis-Prezidan ki poudir sete li dan Lasanble, ti Manm Lasanble.  Mon pa kapab pa remind zot ki petet zot in oubliye.

Ki poudir Leader of Government Business, ki ti anmenn tou sa bann lamannman Konstitisyonnel dan premye Lasanble Nasyonal, sete pa lot ki Msye Danny Faure !  Se li ki ti Leader of Government Business.

E se li pli gran koupab pou anmenn sa bann lamannman, pou propoz sa bann lamannman, pou repran sa ki lepep Seselwa ti’n donnen, ti’n met lo li koman bann drwa.  E alor Mr Speaker, ok, mon’n ganny en pti mersi bokou pou remind mwan.

E mwan parey nou dir, si mon fer en fot mon dir.  Vis- Prezidan mon’n mazinen aprezan.  ‘93 ou pa ti dan Lasanble ou.  Sete an ‘98 ki ou ti vini.  Alor pou sa Vis- Prezidan ou ava ekskiz mwan!  Ekskiz mwan.  Me selman sa bann apre, sa bann apre, apartir, apartir 5enm, 5enm ou ti la, 5enm ou ti la.  E i annan en bann an montan ki ou ti la osi tou.  Alor Mr Speaker mwan mon’n koze.

Vis-Prezidan koman sa enn ki’n anmenn sa Bill, ou’n tann tou sa ki nou’n dir.  Nou pe kit sa dan ou lanmen.  Ou pran en desizyon.   Boul i dan ou Kort.  Eski ou anvi kontinyen avek ou Bill parey i ete?  Ki ou anvi fer?

Ou ki konnen ki ou pou fer.  Selman mon anvi zis remind ou, sa ki enn ou Manm ti dir yer.  Onorab Ghislain ti dir avek ou, ek nou, sa bann parol swivan.

“Mon lapel final, i avek nou Lasanble, pou ki personn pa rod lekskiz e rezon pou vot kont donn pouvwar lepep Seselwa !

Oubyen servi delaying tactic pou defer sa size pou leternite.  Oubyen vote pou aret deba lo sa size, akoz tousala Mr Speaker, lepep pe kontinyen note.”

Boul Vis-Prezidan i dan ou Kort.  Baze lo sa ki ou dir nou, nou, nou ava fer sa ki nou devret fer.

Nou atann ou, mersi bokou Mr Speaker.

 

(APPLAUSE)

 

 

 

 

MR DEPUTY SPEAKER

Mersi Onorab Ramkalawan.  Vi ki tou bann Manm in fini entervenir. I reste pou Vis-Prezidan fer son Right of Reply.  Me vi ki i osi 4er mwen 5, e normalman nou pran nou break 4.30, mon propoze ki nou, nou pran en Break, petet ziska 4.15.

Nou a tournen 4.15, Vis- Prezidan i a kapab donn son Right of Reply.  Nou tonm dakor?  Tre byen.  Savedir nou adjourn ziska 4.15.

 

(BREAK)

 

MR DEPUTY SPEAKER

Bonn apre midi tou bann Manm Onorab, tou dimoun a lekout.  Bonn apre midi ankor enn fwa Vis-Prezidan, Attorney Zeneral.  Nou pe kontiny nou deba lo Second Reading Referendum Bill, 2019.

E nou’n ariv sa staz kot mon pou envit Vis-Prezidan pou fer son Right of Reply.  Vis- Prezidan.

 

THE VICE-PRESIDENT MR VINCENT MERITON

Mersi Mr Speaker.  Mr Speaker malgre persepsyon par serten Manm Lasanble, koabitasyon pe marse e nou annan tou lentansyon gard li.  Akoz nou krwar ki lepep Seselwa i rezon det nou prezans nou diskisyon, e tou nou deliberasyon.

Mr Speaker mon akey bann rekomandasyon, bann diskisyon, bann alokisyon fer par Manm lo tou lede kote latab.   Mr Speaker annou focus lo sa ki nou tonm dakor lo la nou tonm dakor lo la ki nou bezwen en platform pou nou fer en Referendum.

Mr Speaker nou bezwen apresye ki nou Konstitisyon ki ti ganny selebre le 18 Zen 1993 demen e mwan pase i pou ganny li 26an – in ganny li 26an e i pa statik.  I en keksoz ki dinamik e ki evolye dan letan.  Si pandan tou sa bann lannen nou pa’n santi li neseser pou nou annan en Lalwa lo Referendum, e fodre dir ki bann arsitek nou Konstitisyon ti apros sa size avek bokou tact, bokou sazes e mon krwar in ariv ler pou nou fer fas ek defi nou letan; meet the challenge of our time.

E mon pa oule ki mon donn lenpresyon ki pou vin isi, ki nou pe anmenn en morso en Prozedlwa, ki pou rezilta dan en labi en pouvwar Konstitisyon ki donn nou.  Lekontrer, si i annan en platform ki a permet osi dan sa nouvo platform sa Lalwa, a permet ki lepep i kapab detanzaot san labi, i kapab eksprim li dan en fason net kler lo en size atraver sistenm Referendum direk.

Mr Speaker bokou nou in pran laparol, e permet mwan avan ler mon ariv lo konklizyon, pas lo detrwa pwen ki mon ti anvi souleve.  Mr Speaker premye pwen mon ti a kontan met devan, i annan en Onorab ki’n koz lo letan limit petisyon ki Lalwa pa koz lo la.  Zisteman, sa i enn bann size ki mon krwar ki dan sa Prozedlwa pa kontyen e ki ti kapab ganny ensere dan en Lalwa si zanmen nou pou pas li.

Mr Speaker an menm tan i annan en Onorab in koz lo Constitutional Review Committee, i annan en kantite rekomandasyon ki’n ganny fer e sirman bokou sa bann rekomandasyon i bann size ki annan gran lenportans Nasyonal.

E ki sa Lalwa pe propoze bann size gran lenportans Nasyonal i kapab vin en size en Referendum.  So ou pe konpran konmsi seval avek chariot lekel?  Annou fer en konmansman e sa Lalwa dan en fason ki nou a kapab netway li i kapab en konmansman sa prosesis.

Mr Speaker i annan en kantite promes i annan en Onorab ki’n fer sorti ki Prezidan in fer dan Lasanble.  I pou lentansyon Prezidan e lentansyon Gouvernman pou asire ki bann promes ki’n fer i bann promes ki ganny delivre.

Mr Speaker en lot Manm Onorab in koz lo en kantite defi ki nou pe fer fas avek, e ki sa i pa en priyorite ki Lalwa lo Referendum – sa Prozedlwa en Referendum pa en priyorite.  in nonm $50milyon; in nonm 60 bout later in nonm COSPROH in nonm Koripsyon, vann later eksetera, Me se zisteman mon krwar dan en fason direk ki en Lalwa lo Referendum i a permet serten size ki si Gouvernman pa pe touse, ki piblik li menm atraver en petisyon, i ti kapab tous lo la.

Mr Speaker nou koz lo disolisyon Lasanble.  Les mwan fer kler ki i pa’n e i pa lentansyon Prezidan pou dizourd Lasanble Nasyonal. Prezidan parey in dir kot i konsern son manda e i le fini son manda e Prezidan i le Lasanble fini son manda – a mwen ki Lasanble li menm i le dizourd son prop lekor Mr Speaker.

Mr Speaker i annan lot Manm Onorab in fer sorti ki Prezidan i ganny enpoze lo lepep.  Mon le zisteman remind Lasanble ki Prezidan lezitimman, in asim pozisyon Prezidan anba Konstitisyon – sa menm Konstitisyon ki nou respekte ki nou pe fer referans avek, ki nou dir ki nou bezwen protez li, ki si nou le fer okenn lamannman lo serten kondisyon spesifik ki nou bezwen al atraver Referendum e Prezidan i ti ganny elekte, in ganny aksesyon a prezidans atraver sa Konstitisyon.

E mon krwar in fer sorti detrwa fwa, poudir Prezidan napa pouvwar absoli.  Sak pa ki Prezidan i pran, i annan son balans.  E mon krwar in ganny fer sorti tre kler, si zanmen i annan en group dimoun parey in ganny dir parey sa Prozedlwa i été, ki en group dimoun in kapab atraver en petisyon, in pas son barenm 35poursan, e ki ler in ariv kot Prezidan – en size ki annan gran lenportans Nasyonal, ler i ariv kot Prezidan e Prezidan i santi i pa neseser –  e i oporten, sa bann group dimoun i kapab toultan met  o defi sa atraver Lakour Siprenm e siperviz e revwar desizyon ki Gouvernman oubyen lezot nenport Lotorite in kapab pran.

Lekel ki tenir Prezidan accountable ?  E byensir se lepep. Bann checks and balances, sa ki pran laparol  in koz lo la. Lefe ki i prezan e lefe ki neseser ki nou protez li e lefe ki i neseser pou nou anbelir li.

Mr Speaker mon ti a kontan remersi Onorab Georges, ki ler i ti pran laparol yer, in tal bann pwen enportan, me malerezman apre i annan serten Manm Onorab ki’n kontradir li e bomaten ler mon war Onorab in ale 2fwa, mon ti krwar in ale akoz i pa dakor avek sa ki pe dir i annan bann kontradiksyon.

Mon krwar i enportan ki nou koz en sel langaz, me apre en lazournen mon pe trouve ki nou tou nou dakor ki i annan en nesesite en Lalwa pou permet bann Referendum pran plas, me selman i annan bann size kontrovers. I annan  serten size ki nou ki kote latab pa dakor avek, e nou bezwen rod en fason a lafen pou mon vin avek en propozisyon.

Mr Speaker mon a fer kler ankor en kou, nou pa pe serse atraver sa Prozedlwa pou ganny plis pouvwar Prezidan.  Lekontrer Prezidan ti kapab swivan Lartik 64 Konstitisyon,  se donn zis son lekor sa pouvwar atraver en Lalwa pou fer Referendum.  Me in santi avek letan ki evolye avek bokou plis emansipasyon Lasosyete Sivil ki zot osi i annan en rol pou zot zwe dan gouvernans direk nou pei, ki akoz pa met sa avek serten barenm – serten kontrol, met sa posibilite osi avek lepep pou zot deside atraver en petisyon, parey in ganny mete dan Lalwa, e dan schedule bann egzizans ki bezwen ganny fer dan Lalwa.

Mr Speaker mon pa kapab pa dir ki nou pa devret anba okenn ilizyon ki Gouvernman SPPF/Parti Lepep avek US pandan sa 42an ki lo pouvwar (Onorab Adelaide) nou pa’n kit personn ater.  I pa nou lentansyon kit personn ater. Annefe ziska konsepsyon ziska lanmor, lannen apre lannen, deseni apre deseni, nou’n trimouse, nou’n travay – nou’n transpire, pou ki lepep Seselwa ozordi i fyer ki i annan en paspor Seselwa.

I fyer ki i en Seselwa e ki Sesel i en pei en gro pei lo map  dan lemonn.   Vre Mr Speaker nou pa parfe e nou dir bann lerer ki’n ganny komet nou bezwen aprann ek nou lerer kot nou pran en pa an aryer i dir eskize parey Onorab Ramkalawan in dir eskize, mon pou eskiz li, osi akoz i annan bann lezot pozisyon ki’n pran mon a vin lo la taler, ki mon osi nou ava touse.  So ler nou santi ki en erer ki ganny fer nou kapab dir eskize e nou bouze – nou move on.

Mr Speaker nou ganny demande pou reflesir e pa pran sa Bill alalezer, akoz i en mekanizm ki tel ki  Referendum i danzere.  Mr Speaker nou pa pe le pran legzanp Italy oubyen L’Alemany oubyen lezot pei.  Annou isi Sesel an Zilyet 1992 ti annan en Referendum pa i ti ganny fer dan en latmosfer pezib?  Kot nou pa ti ganny 60poursan sa barenm ki ti neseser pou pas premye Konstitisyon ’93. 58poursan nou ti gannyen.

Me apre an Novanm nou ti ganny 70poursan, ki ti permet lannen apre le 18 Zen selebre 3enm Repiblik atraver lazournen sa ki ozordi nou marke konman Konstitisyon.  Wi Prezidan ti a kontan sa Bill i pase, me en demokrasi i nesesit ki parey sa legzersis ki nou’n fer ozordi, nou gete kisisa ki en kote, pa dakor e vin devan avek en keksoz ki nou krwar i akseptab, pou tou lede kote latab e akseptab pou lepep Seselwa.

Mr Speaker Referendum i pa en lenvansyon ki nou ki fer.  Belize i annan ; Kenya i annan Sri Lanka i annan ; Namibia i annan e bokou bann konteni bann clause ki nou mete par egzanp bann size gran lenportans Nasyonal oubyen petisyon linisyativ popiler i annan dan Konstitisyon e dan Lalwa sa bann pei.

So i en keksoz ki nou pe adopte avek lentansyon, e sel lentansyon pou anbelir nou demokrasi e pa pou donn okenn pouvwar an plis dan Prezidan.  Mr Speaker nou bezwen osi war lekel ki deklans en Referendum? I bezwen annan en lofis. I bezwen annan en responsabilite ki ganny mete dan en lofis.  E pou kwa pa ki lofis Prezidan?  Me selman dan deba i annan bann diskisyon ki ganny fer sorti, ki i annan tro bokou pouvwar.   Annou rekapil en pti git.

I annan 2 kalite Referendum.  Enn lo bann size Konstitisyonnel ; savedir Sapit 1 – Sapit 3 Lartik 91 e Lartik 110 e Lartik 111.  Sa Prezidan i kapab li – limenm li kapab deklans en Referendum. Lasanble Nasyonal atraver en vot 2tyer oubyen en petisyon atraver en vot 35poursan baz.  E sa Prezidan i oblize otomatikman i en prosedir.  Me kote Prezidan i annan sa diskresyon?

Se ler ou annan en Referendum ordiner, kot li menm Prezidan Lasanble avek en petisyon, kot Prezidan i annan sa bout an plis, kot i bezwen deside si i neseser e oporten. E nou a gete, eski par egzanp nou le fer li Prezidan avek en lot lenstans? Taler in ganny propoze Human Rights  Commission, oubyen avek Electoral Commission, i bann posibilite ki nou kapab diskite pou ki en keksoz i akseptab, me selman finalite se ki nou bezwen en  platform pou nou kapab egzers e donn lepep i kapab egzers zot drwa.

Mr Speaker parey mon dir taler Konstitisyon i pa statik.  I dinamik, e malgre tou sa bann sanzman Onorab ki ou’n dir Onorab Ramkalawan taler in dir apre ki Konstitisyon ti ganny adopte an ’93 – wi in annan bann sanzman.  E bann sanzman ti neseser dan letan.  E pa bezwen bliye e sa ti ganny fer ant’ 93 e ’98.  E an ‘98 ler SPPF ti prezant son lekor dan eleksyon Prezidan Rene ti ganny elekte avek 70poursan elektora e mwan dan distrik Plaisance mon ti ganny elekte 69.5poursan.

So par sa rezilta ti endorse sa bann lamannman, e nesesite ki nou fer sir ki nou Konstitisyon e nou demokrasi i evolye.  Me nou’n evolye dan letan.          Ozordi nou’n ariv en lot letan e parey mon dir taler i neseser ki nou meet the challenge of our time, pou nou kapab fer sir nou kit en mark deryer pou ankor dan 26an, nou’n dir an ‘93 ti premye ledifis ki nou appel Sesel atraver son 3enm Repiblik e 26an plitar nou pe met en nouvo keksoz an plis, dan nou demokrasi dan nou pei Mr Speaker.

Mr Speaker i annan referans in osi ganny fer ‘’Made in China.’’ Eski zot konnen poudir dan bann prodwir Zaponnen ki ou war ‘’Made in Japan’’ ladan i annan bann pti components parts ki ganny made in China? 

        Iphone made in China nou pe servi.  Huawei i made in China.  I sistenm wireless network pe avanse dan lemonn.  So ‘’Made in China’’ en keksoz enportan fodre nou konnen ki sa ki nou le fodre nou annan kapasite pou kapab annan bann sistenm detekte sa ki bon, pou nou kapab fer sir ki sa lepep Seselwa i gannyen i bon.

Mr Speaker, mon pa kapab pa dir ki nou napa okenn Lagreman avek Lenn konsernan Assomption ; konmsi make no mistake about it.  E Prezidan Faure in dir e mon vin isi dan sa Lasanble nou met devan.

Mr Speaker nou lobzektif se annan en platform annan en lankadreman legal, pou nou kapab fer en Referendum.  Nou’n vin isi ozordi e bokou Manm ki’n koze, in dakor lo nesesite annan sa Lalwa, annan sa platform.  Me selman bann konteni bann Manm parler ki annan ki’n pran laparol, nou lavenn likou i le pete.  I annan ki’n pli kalm e mon konpran bann pwennvi ki pe ganny eksprimen, e se pou sa rezon Mr Speaker ki nou kapab asize, get bann barenm ; get bann egzizans ki Lalwa pe propoze, e anmenn sa.

Mr Speaker mon le propoze ki i ganny anmennen avek Bills Committee ki nou kapab vin ansanm lo nivo nou 2 parti, rod en solisyon ki pou reponn bezwen e sa kote e lot kote latab e ultimately lepep Seselwa – lapopilasyon ki nou kapab sorti avek en keksoz ki pou akseptab pou tou dimoun.  Mersi Mr Speaker.

 

(APPLAUSE)

 

MR DEPUTY SPEAKER

Mersi Vis-Prezidan.  Bon nou ariv en staz kot nou bezwen deside ki direksyon nou pou ale.  Mon krwar the Bill has been proposed by LGB.  So mon demann ou LGB, mon donn ou laparol pou ou propoz lafason nou bouze.

 

HON CHARLES DE COMMARMOND

Mersi Mr Speaker.  Mr Speaker letan nou ekout Vis-Prezidan ki’n dir dan son Right of Reply mon krwar i kler, nou al dan vot lo merit.  E dan Committee Stage i annan bann sizesyon ki’n mete an plis bann keksoz ki nou oule sanze – nou le amande, nou le diskite, nou kapab dan Committee Stage vot lo la.

E Committee Stage pa pou fer ozordi.  E zot a ganny letan pou propoz sa bann amannman.  Oubyen son lot solisyon sa i en propozisyon ki mon pe mete – en lot propozisyon se nou vot lo merit e apre si avan nou pran Bill avan nou al dan Committee Stage, nou kapab Bills Committee zwenn.

3enm solisyon se nou pa vot lo merit la ozordi, nou adjourn debate, nou zwenn dan Bills Committee, nou diskite lo bann amannman posib, apre nou retournen semenn prosen pou nou kapab fine tune bann keksoz.

Mon pe met sa san fors sityasyon, akoz  mwan mon anvi ki sa Prozedlwa i ale devan, e mon krwar ki tou dimoun ki dan Lasanble ozordi i anvi sa, me nou pe rod sa mwayen – sa mekanizm pou nou kapab fer sa bato avans -e koste por byen.  Mersi.

 

MR DEPUTY SPEAKER

Mersi Onorab De Commarmond.  Onorab Ramkalawan.

 

HON WAVEL RAMKALAWAN

Mr Speaker mon pa dakor avek okenn keksoz ki Onorab De Commarmond in dir.  Sa ki Minis VP sorry sa ki Vis- Prezidan in dir dan son diskour the only way forward, se pou nou pa pran en vot, pou li demande ki sa deba i ganny adjourn sine die pou li fer bann keksoz neseser e at some other point i retournen.

Parske si nou pran en vot la mon pe dir ou Vis-Prezidan si ou pa ti si ou pa fer nanryen konmsi pou retir en pe, nou pe vot kont.  E si nou vote si nou vot kont, nou touy ou Bill konpletman.  Mersi bokou.

 

MR DEPUTY SPEAKER

Mersi Onorab Ramkalawan.  Bon i annan 2 swa.  Mon a les Vis-Prezidan.  Mon a donn ou laparol avan.

 

THE VICE PRESIDENT MR VINCENT MERITON

Mersi Mr Speaker.  Mr Speaker annou pa touy sa Bill.  Annou pa touy sa zoli travay ki annan pou fer.  Mon propoze annou adjourn, pou permet ki bann diskisyon i pran plas pou vin en keksoz ki akseptab – silvouple.  Thank you.

 

MR DEPUTY SPEAKER

Mersi Onorab.  Mersi Vis- Prezidan.  Pou nou adjourn debate lo la e koriz mwan Chair Bills Committee anba 22(1) i devret en Manm ki ganny floor parske nou dan en deba i kapab propose, me i pa ankor koze anba 22 (5) i propose that the debate be now adjourn.  I ganny segonde e nou pran en vot lo la.  Onorab Henrie.

 

HON WAVEL RAMKALAWAN

Mr Speaker napa personn lo kote LDS ki kapab move sa akoz Onorab Ghislain in donn nou warning depi yer!  Alors nou lo nou kote napa personn ki kapab fer sa.

 

MR DEPUTY SPEAKER

Ok. Onorab De Commarmond.

 

HON WAVEL RAMKALAWAN

Sanmenm sa ki apel koz avan ler.  I danzere dan lavi !

 

HON CHARLES DE COMMARMOND

Mr Speaker nou bezwen swiv nou Standing Order byen. Sa i kler.  Lo nou kote tou in koze nou pa pou kapab lev sa Mosyon pou nou adjourn debate.  E zot pe pran sa wording lo lot kote tre seryezman,  mwan mon sizere nou anvoy boul dan ou kort, pou ou konman Speaker la desid lo sa adjournment anba Regilasyon ki nou annan anba Standing Order.  Mersi bokou.

 

MR DEPUTY SPEAKER

Onorab Ramkalawan.

 

HON WAVEL RAMKALAWAN

Petet Onorab Ghislain i kapab ed nou?  (laughter) 

 

HON CHANTAL GHISLAIN

(Off-Mic)

 

HON WAVEL RAMKALAWAN

Mr Speaker si Onorab Ghislain i retract, tou sa ki in dir yer

 

        (laughter) 

 

HON WAVEL RAMKALAWAN

– si i retract sa ki in dir yer, nou ava fer sa travay !  Be si i pa retract nou lo warning, alors nou tenir lanmenm.

 

HON CHANTAL GHISLAIN

(Off-Mic)

 

 

MR DEPUTY SPEAKER

Onorab Pillay.

 

HON SEBASTIEN PILLAY

Mr Speaker mon kapab donn en solisyon mon kapab move en Mosyon la ki nou sispann Order 22 (1) e ki nou allow en Manm ki’n menm fer en deba lo sa size pou vot en adjournment lo la.  So  I will move that we suspend anba Order 21 (1) mon move ki nou suspend Order 22 Order 21 (1). 

        So anyway i pou subject to a vote of the House anyway Mr Speaker.  So anba Order 91 (1) Mr Speaker mon move ki nou sispann Order 21 (1) ok  so that ou  kapab permet en Manm pou – bezwen fer li mon fer li byen ki mon pe sispann en ok ?  21 (5) Mr Speaker so that en Manm ki’n deza koze lo sa deba i kapab move en Mosyon for adjournment e nou kapab kontinyen avek sa deba, sa enteraksyon.  Akoz nou, nou anvi ki nou kapab donn sa Bill  lepep Seselwa.  Mersi Mr Speaker.

 

MR DEPUTY SPEAKER

Eski Onorab Pillay ou’n propoz sispann anba Order 91 ki nou sispann Order 22(5) 21 (5) pardon 22 (5) e ki nou pran en vot pou adjourn debate on the matter?  Eski i Mosyon i ganny segonde?

 

HON SIMON GILL

Mr Speaker mersi.  Mosyon in ganny segonde parlman in ganny reprezante.  Mersi.

 

MR DEPUTY SPEAKER

Ok be nou ava pran en vot ki anba Order 91 Order 22 (5) i ganny sispann pou permet ki en Manm that the debate is now adjourn.  Tou Manm ki an faver?

 

HON WAVEL RAMKALAWAN

Avan nou pran en vot konmsi nou bezwen konnen eski sa deba pe ganny deferred pou ‘’leternite’’ sa?

 

MR DEPUTY SPEAKER

I pe ganny adjourn, ziska ler nou kapab ganny en proposal – en propozisyon sorti kot the mover of the Bill, lo bann lamannman ki zot santi i reflekte sa ki’n ganny diskite ozordi.

 

HON WAVEL RAMKALAWAN

Non Mr Speaker.  Mon pe demande akoz mon pe ankor enn fwa refer  to sa Onorab Ghislain in dir.  Konmsi ki eski  i en delaying tactic?  Konmsi mon anvi konnen, parske  zot in move en Mosy… Konmsi mon anvi ganny li kler – eski i pe ganny servi konman en delaying tactic, pou defer sa size pou leternite, oubyen vote pou aret deba lo sa size?  Konmsi ki egzakteman zot pe rode?

 

(laughter) 

 

MR DEPUTY SPEAKER

Onorab Pillay.

 

HON SEBASTIEN PILLAY

Mersi Mr Speaker.  Mr Speaker pandan deba e baze lo sa ki Vis- Prezidan in dir in annan plizyer point of views, oubyen bann largiman ki’n ganny avanse. Ou a rapel ou menm mon ti menm soumet serten propozisyon lamannman me mon konpran parey ou’n dir mon i pa’n meet the time requirement 72hrs.  E serten sa bann lamannman ti pou zisteman adres serten sa bann kestyon kot i curtail serten pouvwar ki Prezidan ti annan, vizavi son determinasyon lo en Referendum ki’n fini ganny vote swa par Lasanble, swa par sa 35poursan dimoun.  E i annan lezot pwen ki’n ganny souleve par bann Manm.  So that is why ki  mwan mon pe demann  ou as we move for an adjournment atraver ou Lofis e Sekretarya Lasanble, nou kapab annan en konsiltasyon – pa en konsiltasyon me en referans i ganny fer avek proponent of the Bill – dan sa ka se Minis Meriton – VP Meriton.

E nou ava ganny en timeframe lo  bann miting si  i kapab ganny set, parey nou’n fer dan bann lezot, lezot  sirkonstans.

Akoz parey mon’n dir nou i pa nou lentansyon pou  ni delay pou ni bouz sa Bill pli devan, me nou war nou dan en sityasyon, kot nou bezwen pran sa larout, so nou pe rod en solisyon pou sa sityasyon ki nou ladan.  Mersi Mr Speaker.

 

MR DEPUTY SPEAKER

Mersi Onorab Pillay.   Bon i kler nou napa en timeframe presi, me enn fwa ki nou adjourn debate si zot vot an faver pou adjourn debate, then Gouvernman i ava zwenn avek atraver Lasanble Nasyonal, avek lot kote latab pou zot trouv en konpromi ansanm avek Attorney Zeneral lo en amannman enkli bann amannman ki pe ganny propoze par Onorab Pillay pou sa matter kapab bouz devan e kapab kontiny deba.

Alors si sa i leka tou Manm ki an faver ki nou sispann anba Order 91 Order 22 (5) ki deba i ganny adjourn lo la,  tou bann ki an faver lev zot lanmen?  Madanm Clerk ou a donn mwan count?  Okenn Manm ki kont?  Madanm Clerk ou a donn nou rezilta.

 

MADAM CLERK

Mr Speaker 12 Manm in vot an faver.   E personn kont.  Mersi.

 

MR DEPUTY SPEAKER

Ok 12 Manm in vot an faver.  Savedir Mosyon pou adjourn deba in pase.  Alor nou pou adjourn deba lo sa Bill ziska en ler ki nou pa ankor spesifye me ki i ava swiv travay le de kote, an deor Lasanble ziska ler nou ganny en Bill ki akseptab.  Bon i 4.43 e mon pa krwar nou pou kapab kontiny lo-

 

(Off-Mic)

 

HON CHARLES DE COMMARMOND

Mr Chair.

 

MR DEPUTY SPEAKER

Nou fini vote si 12 si 13 pa pou fer okenn diferans, parske ti napa personn kont.  So annou pa perdi letan Lasanble lo la.  La ki i 4.44 mon pa krwar ki i fair pou nou al lo en lot Mosyon so mon propoze ki nou adjourn ozordi, me avan nou fer sa zis 2 pti lanons.

Premye ki byensir zot konnen Speaker i pa dan pei, me an se ki konsern son ka ki i ti devan Lakour, yer ti antann en mansyon ankour me byensir dan son labsans parske i ti bezwen i ti aletranze e sa ka in ganny anvoye pou le 23 Zilyet kan ka pou ganny mansyonnen ankor alor sa se mon premye lanons.

2enm se demen i antann en miting ki’n ganny organize par Minister Finans lo Anti- Money Laundering son ler sete 9er bomaten kot ICCS, me vi ki annan en levennman 9er an menm tan demen i ganny postpone pou 10er ICCS si mon pa tronpe Room 1 alor tou bann Manm i ganny envite kordyalman pou zot attend sa.

Me avek sa nou pou nou ariv a lafen travay lo nou Order Paper ki nou kapab pran pandan sa 2zour e alor nou pou adjourn ziska le 23 Zilyet – Mardi prosen e alor nou pou adjourn ziska Mardi.

 

 

(ADJOURNMENT)