::
Home » Verbatim » 2019 » Verbatim Wednesday 15th May, 2019

Verbatim Wednesday 15th May, 2019

 

NATIONAL ASSEMBLY OF SEYCHELLES

 Wednesday 15th May, 2019

The Assembly met at 9am

National Anthem

Moment of Reflection

Mr Deputy Speaker in the Chair

MR DEPUTY SPEAKER

Bon bonzour tou bann Manm Onorab.  Bonzour tou dimoun ki pe swiv nou lo radyo lo televizyon lo rezo sosyal partou kot zot ete.  E byenveni pour nou travay Lasanble Nasyonal pour ozordi Merkredi le 15 May 2019.  Lo nou Order Paper bomaten, nou pour annan nou pour kontinyen ek travay nou ti komanse yer.  Annefe nou ti fek fini aprouv lamannman pour STB (Amendment) Bill e nou ti’n osi fer Second Reading lo Tourism Development Bill, 2019 ki nou pour kontinyen bomaten.

Answit nou pour annan bann Mosyon ki ti’n ganny deza mete lo Order Paper depi yer.  E zis pour fer rapel tou dimoun a lekout ki dan Order Paper ki nou ti annan e lo bann Mosyon, ki nou ti annan ti annan 3 Mosyon an realite. E nou ti annan en Mosyon irzan ki’n ganny mete par Onorab Gervais Henrie pour the repeal of sa S.I ki nou ti pe diskit lo la yer konsernan egzonerasyon ki pe ganny donnen pour income tax pour bann Ziz.  E sa se S.I 24, 2019.                    Mon’n ganny enformen bomaten par Minister Finans atraver Sekreter D’Eta Mr Patrick Payet ki Gouvernman i annan lentansyon piblir en lot S.I.  E sa lot S.I efektivman pour repeal sa S.I ki la.  Zot ti sipoze fer li bomaten ver 10er – 10.30. Me mon’n deside gard sa Mosyon Onorab Henrie lo Order Paper, an ka ziska ler nou vwar sa S.I ganny delivre kot nou.   Byensir  si i ganny delivre kot nou, sa Mosyon Onorab Henrie i pour nepli neseser e mwan mazinen Onorab Henrie nou ava zis retir sa lo nou Order Paper e nou travay a kontinyen.

Sa se progranm ki nou annan pour bomaten e byensir nou annan sa de lot Mosyon ki’n ganny enkli lo Order Paper. So avek sa mwan ti a kontan demann Parliamentary Reporter pour kriy Minis pour Tourizm e son delegasyon, pour nou kontiny travay lo Tourism Development Bill.      Zis pou dir ki mon ti a kontan ki bann Manm i lev zot lanmen pour endik mwan, lekel ki ti a kontan koze pour Tourism Development Bill parski ti annan detrwa lanmen, me apre nou ti deside fer zis STB (Amendment)  Bill, alors mwan a pran bann non silvouple.        Ok zis pour endik zot ki mwan annan 3 lo sak kote.  Me mon gard lalis ouver si i annan lezot ki oule koze zot a kapab lev zot lanmen.  Mon ti a kontan swet labyenveni dan Lasanble Nasyonal ozordi Minis pour Tourizm, Lavyasyon Sivil, Port Marine e Minis Didier Dogley. Mon swet osi labyenveni Mrs Anne Lafortune Sekreter Prensipal Department Tourizm, e Mrs Levkovic  Direkter Devlopman prodwi.

E nou annan osi mwan mazinen madanm Bernice Senaratne  ki Direkter Policy Research Monitoring and Evaluation. Byenveni dan Lasanble Nasyonal. Bon nou pour kontiny li deba lo merit.  E lo mon lalis mon annan Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun.  Mr Speaker mon lentervansyon mon oule tous an partikilye 2 pwen dan sa Tourism Devlopment Bill 2019 ki devan nou.  Dabor i annan dan 2enm parti ladministrasyon kot lartik 3 i koz lo fonksyon Minister. Mwan oule zis fer sorti de pti pwen lo sa size. Nou tou souvan dir ki tourizm i ‘’nou diber lo nou dipen.’’  Lekspresyon ki mwan rapel tre byen depi mwan letan lanfans mon’n tann bann dirizan pei koz lo la.         E sa i fer mwan realize ki nou tou nou bezwen konsyon poudir ki mannyer nou bezwen donn en koudmen lendistri tourizm, akoz apre tou pli gran sours reveni pour nou pei i sorti dan sa lendistri. E mon kontan ki sa Bill i defini byen rol Minister vizavi lendistri.  E yer Minis in fer nou kler ki dezormen STB i konsantre lo promosyon, e bann keksoz Polisi,   sa i al pour Minister.  Tre byen.  Prezan sa ki mon anvi dir se ki, bann dimoun ki travay avek Minister zot bezwen pran zot responsabilite anmen aker.

I posib ki serten dimoun i regard mon travay dan Minister Tourizm konmsi it’s a glamorous job, e ki alor son bann perks ki vin avek. Me mwan mon santi poudir ki it’s hard work.  E ki pour bann Seselwa sirtou ki dan sa lendistri zot devoue en kantite.  E se sa ki mwan anvi dir ki dezormen bann dimoun dan Minister mon rekonnet zefor ki zot in fer ziska prezan. Me touzour i annan lespas pour nou amelyore. Amelyore dan lesans ki tyonbo lanmen e soutenir bann Seselwa – sirtou ki anvi partisip dan nou lendistri.

Mon pe dir sa akoz, letan bann gran envestiser, i vini pour fer bann gran lotel, nou vwar bann lasistans ki zot gannyen.  Me souvandfwa nou tann en pe konplent lo lapar bann dimoun, bann Seselwa ki anvi fer bann, komans bann pti, pti.   E mwan mon ti ava prefere sa demann ki mon pe fer se ki Minister i vreman zot go out of the way, pour donn en koudmen atrap lanmen bann Seselwa e ed zot dan tou fason posib ki zot kapab.

Si zot pe fer sa, tre byen, me kontinyen fer en pti pe plis. Akoz dan Mont Buxton par egzanp, i en distrik i sel distrik ki pa bord ek lanmer.  So nou annan nou prop dezavantaz.  Me selman mon ti ava kontan vwar koman MNA Mont Buxton ki i annan en pe sa bann loportinite kot pti lotel, malgre i pa neseserman swe serten departman parey Planning ki donn difikilte dimoun, zot dir ou poudir density, i en problenm, me mon ti ava swete lo lapar Mont Buxton, ki nou fer plis pour nou trouv en solisyon e ankouraze.  E ozordi i annan 2 pti guesthouse dan Mont Buxton ki i annan zot license ki mon konn byen mon’n vizite.  I annan enn anler dan Lenn. E i annan enn Grenis sa landrwa kot Mrs Nadia. E nou’n antann dan lepase ki i annan dimoun ki ti pe fer sa biznes underground dan Mont Buxton.

Zot ganny forse en ler bann dimoun pour al dan sa direksyon, akoz sa mank soutyen, sa mank tyonbo lanmen ki mon’n dir kan i ti merit le kontrer.  Konmsi letan sa dimoun i vini ou sey ed li tou fason.  E sa akoz i pour kree loportinite biznes; travay pour nou distrik e i anmenn en lot limaz.

Mwan mon’n zwenn etranze dan distrik Mont Buxton. Mon’n koz ek zot, zot byen kontan. Eski zot war kominote la e letan mwan dir zot lekel mwan konmsi prezan zot enpresyonnen pour dir konmsi be lekel pei ki ou ale ki ou pour zwen en MNA pe pase pe knock on doors dan Sanmdi bomaten?

Zot tre apresye. So mon ti a kontan vwar ki an plis loportinite koumsa dan mon distrik, e sa fonksyon ki mon pe koz lo la dan sa Bill, mon war poudir Minister i kapab alor i annan sa mekanizm pour li kapab ede ki plis distrik non selman Mont Buxton – i annan sa bann pti biznes ki devlope. Sa i mon premye pwen.

2enm pwen i kestyon bann prodwi avek servis touristik e mwan okouran ki an se moman la letan nou pe koze i annan en konversasyon parmi bann stakeholders dan lendistri tourizm, pour diversifye nou prodwi avek servis touristik.  E mwan ankouraz zot pour tap tou, ki vreman nou diversifye nou prodwi ek servis tourizm.

Akoz ankor i pour fer bann etranze ki vin vizit nou, depans zot larzan e sirtou, sirtou met aksan lo ki mannyer bann dimoun i kapab antre dan bann kominote. Ankor la mon pe mazin Mont Buxton. Nou annan nou par egzanp dan Mont Buxton 3 landrwa ki bann touris i kapab ale koman trail.

Nou annan Mont Sinyal, nou annan Ros Gorila ki tonm Beau Vallon – mon pa kapab konpran zeografikman mannyer zot met sa Beau Vallon, me selman ou bezwen pas kot nou Mont Buxton pour ariv laba.  Zoli view enn bann meyer ki dan mon bann hikes ki mon’n ale ki mon’n war.

Apre i annan sa trail pour komans anler Mont Sinyal e ou al fini Beau Vallon, ouswa ou kapab komans Beau Vallon vin fini kot nou.

Sa i bann keksoz ki bann lotorite konsernen. Mon ti ava ankouraz zot devlope.  Pour le moman sa 2 trail Mont Sinyal avek Ros Gorila i pa form parti bann official trails ki par egzanp 3 frer. Donk mwan ti ava kontan ki sa i ganny mete ki alor Mont Buxton plis touris ankor i vini, e apre i annan sa ki nou apel bann cultural walk.

Mwan souvandfwa letan mon pas Mont Buxton mwan get bann dimoun pe asize kot zot, zot in fer zot pti zarden. Mwan ti ava swete ki konmsi ti ava detrwa touris ki pe pase la, ki pe vwar sa bann keksoz; i nou fason viv akoz souvandfwa, akoz zot vini zot reste deryer miray deryer resort, e zot pa war vreman ki mannyer Seselwa pe viv, zot ti ava aret en landrwa bwar en pti kalou, bwar en delo bigarad manz en pti manze dan en kot en lakour.

E parey mon’n dir i annan en konversasyon deza ki pe deroule, e mwan mon ankouraz sa pour tou bann stakeholders kontinyen met lide ansanm ki an fen Mont Buxton e osi lezot distrik i kapab benefisye. Alor sa i de pwen ki mwan ti anvi fer Mr Speaker partikilye lo part 2 sa Bill kot i koz lo rol Minister e mon felisit zot pour travay ki zot in achieve ziska prezan me mwan pledwari ozordi bomaten se kontinyen travay dir e vwar ki mannyer nou kapab fer bann Seselwa partisip plis dan sa lendistri.  An fen ki nou  koman Nasyon sa later i pli benefisye. Larzan i reste isi nou ganny travay.  Olye ki bann gran resort ki own par etranze ki vini e pran sa larzan al avek.  Alor mwan anvi dir sa de mo bomaten. Mersi pour latansyon.

 

MR DEPUTY SPEAKER

Mersi Onorab Henrie.  Onorab Noline Sophola.

 

HON NOLINE SOPHOLA

Mersi Mr Speaker. Bonzour Minis avek ou delegasyon, tou Manm Onorab e tou dimoun ki a lekout.

Mr Speaker Minis yer in elabor en pe plis lo sa Bill, e prezan i en pe pli kler ki vreman sa Bill pe demande.  Mon pour al presizeman dan distrik La Digue.  Dan distrik La Digue parey nou konnen, touristik sa biznes i tre dominan.  I annan diferan grander lotel. Diferan grad e sakenn pe ofer diferan fasilite.  E zot tou ler mwan regarde zot fer zot mye pour zot akey zot kliyan.   E sirtou zot fer zot mye ki sa kliyan se sezour vin inoubliyab e an plis pour zot kapab retournen. E ler mwan fer letour dan La Digue mon remarke i annan bokou kliyan ki retournen e ler mon demande par fwa mwan zwenn dan semen zot dir mwan be la i fer mon katriyenm fwa. Dernyen fwa mon ti dan tel lotel. La mwan mon pe al dan, en lot.

E sa i montre ki vreman Digwa pe leve debrouye e nou pe fer li ase byen.  Me par kont i annan ki bezwen fer serten amelyorasyon. Malgre ki zot annan en license pour fonksyonnen.  Akoz mon krwar ki tou propriyeter ti a kontan ki ler sa travay klasifikasyon ki zot pe fer zot tonm ladan. Me selman nou tou nou konnen nou pa kapab konpar en pti lotel ek en gran lotel.  Mon pe demann Minis pour li regarde ki mannyer zot kapab atrap sa bann pti lotel, donn zot en push pour zot osi kapab kontinyen dan sa biznes.

Annou pa les dimoun ki’n komanse depi son komansman petet li i ti premye pour komanse e ozordi i war li avek pour rezon finansyer e lezot fakter i pa kapab pouse e petet ler vizit i vini i pe ganny dir fermen ou pa meet standar e mwan mon ti a demande lo la Minis annou sey revwar akoz tou dimoun i bezwen viv, tou dimoun i bezwen leve debrouye. Mr Speaker mon krwar i annan 3 pwen klarifikasyon ki mwan anvi demann Minis. Akoz tou letablisman touristik pour fonksyonnen parey ou’n dir anba zot license aktyel. Koriz mwan pli tar. Akoz zot meet zot minimum standar. Pour klasifikasyon sa pour en lot kategori. Minis ou’n dir 16 lasanm ou plis i tonm dan kategori enn a 5Zetwal. Me a kote sa mon’n tann dir en zafer Seychelles Silver, Gold, and Bronze.                                                                            Mon pa tro konpran ki mannyer i pour ale. Mwan demann en pe plis leksplikasyon. Akoz si mwan mon pe al en vizit. Mon’n alo en sit, mon’n regard bann lotel, mwan war i dir 5 Zetwal, 4 Zetwal. Mon fer mon swa. Mon kapab fer mon swa la. Me le moman mon war dir sa lotel i en Silver, i en Gold mon pa konnen vedir petet lekel ki annan. Eski sa i pour aplik zis pour Sesel oubyen i en keksoz, en norm enternasyonal ki pe vini. Silvouple mwan demann en pe klarifikasyon lo la.

E dezyenmman eski sa klasifikasyon ki nou pe fer la. la nou pe debite wi i normal. Me a lavenir eski i pour vin en norm ki tou letablisman touristik i bezwen tonm ladan? E apre dernyerman i annan bann dimoun ki dan letablisman touristik ki anvi bouze parey mon’n dir avan.  Eski dan sa laranzman ki zot pe fer la, eski zot pe mazin petet dir be nou ava sey fer en fason travay avek en labank, travay ek en lot landrwa ki nou kapab, sa bann dimoun i kapab ganny en pti loan pour zot, zot anvi bouze dan sa klasifikasyon. Me selman zot vwar zot lanmen i anmare.  Eski i annan en keksoz ki dan sa Minister ou pe fer pour ed sa bann dimoun?

E apre dernyen mon pwen Minis nou konnen ki La Digue nou anvi leve debrouye. Nou anvi e nou konnen ki i annan sa polisi ki’n ganny mete ki pe dir La Digue 5 lasanm. Sa pe anmar lanmen bokou dimoun ki anvi travay. Minis i vre ki polisi i dir 5 lasanm.

Annou revwar sa polisi. Akoz bokou digwa pa dakor avek sa. Akoz i annan serten laport ki’n ganny ouver la fason ki in fer en dimoun li mwan mon en owner mon annan 5 lasanm la. Mon annan en kare later i pour mwan menm mon met lo mon piti.  Mon ganny ankor 5 lasanm i fer mwan 10 lasanm.

Me kan mon annan zis en kare later, mon ti kapab lo mwan kare later met 10 lasanm, met 6 lasanm, met 8 lasanm. E sa i pe dekouraz dimoun e pe kree fristrasyon dan La Digue!  E mwan osi lo la Minis mwan pa dakor si nou dir i 5 i 5 pour tou. Par 5 pour en pe, en pe i trouv en lot fason ki i pase li i kapab al fer 10 lasanm.  E sa pe ouver en laport ki nou pa pour kapab fermen. E lo la Minis mon pe demande, mwan pe demann zot sipor pour ed bann Digwa lo sa laliny akoz demann touristik La Digue i bokou.  Parfwa tou lotel i plen. Kliyan i anvi vini menm.  E sa i pa bon mon krwar dan biznes touris ki nou pa pe kapab resevwar ler telefonnen mon plen, mon telefonnen mon plen. I montre ki i annan demann.

Mersi Mr Speaker.

 

MR DEPUTY SPEAKER

Mersi Onorab Sophola.  Onorab Jany De Letourdie.

 

HON JANY DE LETOURDIE

Mersi Mr Speaker.   Bonzour tou dimoun. Minis mwan mon rekonnet lenportans sa Bill akoz i a pe osi rod elev standar e osi pour promot sa lendistri. Me mon pwen spesifik ozordi mwan ti ava kontan fer sorti i konsern bann Seselwa sirtou ki pe run bann pti guesthouse avek bann pti letablisman.  Zot pa santi zot konfortab dapre bann pwennvi ki zot in anmenn devan. Zot pa santi zot tro konfortab avek sa sistenm grade avek klasifye.  Akoz zot annan sa lenkyetid ki zot per kekfwa par rod met sa bann standar kekfwa zot kapab pa ganny, zot kapab perdi zot bouse manze.

E mon konnen ki pour dir yer ou ti dir zot in fer vizit 160 bann pti letablisman. Mon konn zis 160 me mon pa konnen konbyen i annan an zeneral tou ansanm, eski Minis ou satisfe ki ou’n fer vreman sag ran konsiltasyon avek zot tou?  Eski sa bann lenformasyon ki ou’n gannyen sa bann pwennvi, eski i vreman reflekte pwennvi tou sa bann dimoun ki dan sa lendistri? Eski zot, zot anvi ganny klasifye? Eski ou annan zot bann lezot konsern zeneral. Pour konklir Minis, mwan mon ti a kontan dir pe enport.  Fer en fason ki tou le de parti i ava satisfe.  E ki pa bliye osi ki zot, zot panse ki zot bann remark lo guest experience, zot santi ki zot osi zot annan zot kalite kliyantel. Alors pa bezwen dekouraz zot e akoz zot osi mon krwar zot pe fer en gran kontribisyon pour zot ede koste viziter avek sa vre fason viv, avek kiltir Kreol. Vwala mon pti kontribisyon Minis.  Mersi.

 

 

MR DEPUTY SPEAKER

Mersi Onorab De Letourdie. Onorab Egbert Aglae.

 

HON EGBERT AGLAE

Mersi Mr Speaker.  Mersi Minis ek ou delegasyon tou bann Manm Onorab e tou dimoun a lekout.  Minis mon krwar nou pe koz lo en size ase vreman enportan. Enn nou  pilye lekonomi.  E sa Bill li menm li i pe anmenn nou lo en nivo kot bokou akter menm enternasyonalman in deza pe komans adopte, kot i konsern bann klasifikasyon bann letablisman touristik.  Sa i osi pour ede pour en kliyan ki sorti lwen ki pa konn ou pei ki pe vin premye fwa ki pe rod en letablisman kapab fer en bon swa. En pli bon swa e an menm tan ganny valer pour son larzan e osi evit serten dezapwentman ki’n arive ki bann kliyan zot menm zot, zot in eksperyanse petet ler zot in ganny dir dan tel letablisman ler zot in arive zot in war pour dir lekspektasyon ouswa zot leksperyans sezour pandan sa landrwa i pa’n neseserman agreab. So sa li menm li sa klasifikasyon i pour envite annan serten sa bann problenm ki kapab arive ler en kliyan i swazir en letablisman.

E mon a dakor Minis ki ou’n fer resorti osi yer sete ki pandan sa prosesis grading menm si i annan letablisman ki annan serten lenkyetid avek sa nouvo sistenm ki pe al ganny met an plas ki pour napa okenn letablisman ki pe al ganny afekte avek sa grading sistenm dan li menm.

Pe dir pa pe ganny afekte akoz zot pa pe bezwen war zot al rod larzan an plis la ozordi, pour zot kapab ganny zot rating ouswa pour zot taye ki ler rating in ganny donnen pour zot al upgrade zot lekor lo en baz deswit mwan kapab dir.

So grading sistenm li menm li i en prosesis ki sa bann letablisman pour bezwen pas atraver. Si ou santi ozordi mwan ganny mwan 2Star or 3Star mwan anvi mont lo 4Star. I ava annan bann lezot amenities ki mon pour bezwen neseserman antre anmenn dan ou letablisman. E byensir i annan son kou ki vin avek.

So i pour en swa li menm li pour sa bann letablisman deside, ki zot anvi si zot anvi upgrade ouswa zot anvi reste parey zot ete.  E  menm mon’n koz ek bann serten bann akter ki dan letablisman touristik, e zot in fer resorti ki pour zot i annan ki deza, akoz i annan ki deza pe servi bann platform enternasyonal, kot zot liste zot letablisman lo la parey i annan Airbnb, Trivago, booking.com, zot deza, i annan ki deza lo la.

So pour zot i pa en move keksoz me selman sa ki zot, zot ti a kontan konnen se ki, ki mannyer sa klasifikasyon pour marse.  Rezon akoz zot dir sa akoz i annan bann pei enternasyonalman bann lasenn, kot i bann body endepandan ki fer klasifikasyon bann letablisman touristik. Parey ok i annan bann en groupman, zot, zot zwenn ansanm, bann akter ki dan sa lendistri pour zot grade bann letablisman tourism. Me dan Bill mannyer mon pe war se la responsabilite se Gouvernman ki pour antre atraver Minister li menm avek Tourism Board pour zot komans sa prosesis.

Me selman mon ti a kontan konnen eski i pour Gouvernman menm ki pour kontinyen reste koman sa akter, ouswa nou pour fer osi antre en groupman otelye bann ki dan trade, dan lotel li menm li, dan sa biznes pour zot zwenn ansanm pour zot osi kapab take over pli tar e fer sa legzersis grading sistenm dan en fason kredib?

Me selman mon santi pour dir given ki nou en pti pei, nou en pti lekonomi, konsern sete i annan vertical integration ki koze dan sa Bill konsern sete son kredibilite, eski ler ou pour war detrwa gro akter in zwenn ansanm eski pa pour defavoriz bann lezot ki petet pe komanse ouswa zot ptipti zot santi zot mwayen zot pa pe kapab petet bouz lo sa nivo.  Eski sa pa pour vin en dezavantaz? Sa i en kestyon ki mwan poze.

Dan sa Bill in fer resorti en part 5 pour annan en Appeals Board.  Mon napa problenm ek sa Appeals Board mwan. Me selman mon annan en pti pe konsern avek son konpozisyon. Mon war i annan zis 3 konpozisyon lo sa Appeals Board i fer mansyon pour annan en Chairperson i fer reprezantan STB, en representative of Fair Trade Commission. E mon santi petet eski nou pa met petet en akter dan sekter prive, ki nou santi i ava form par – parske i annan bann lasosyasyon zot kapab annan en lasosyasyon a lavenir ki group tou otelye i al ladan; Parey Praslin mon konnen i annan son tourism association laba.  Petet Mahe nou fer enn i ava enn, petet i ava annan en reprezantan ki ava vin lo sa Appeals Board i osi pour li sofgard en pe bann desizyon ki kapab ganny pran, e osi anmenn konsern bann otelye.

Akoz zot osi zot bann akter e zot ki konnen neseserman ki bann problenm ki zot fer fas avek.

So petet sa i ava en sizesyon. E mwan anvi tous sa bout kot i konsern compliance osi. Mon ti a kontan vin en pe pli kler petet plis leklersisman ler nou pe koz sa bann inspectors la ki pour pase pour gete.  E pour donn en koudmen pour kapab ede ek sa grading sistenm. Me selman nou konnen poudir i annan detrwa inspectors ki deza pe fer serten travay parey Licensing i kapab donn ou license anvoy zot bann inspectors vin gete si tou keksoz i annord.

I annan sa laspe lasante, lanvironnman ki osi i ava annan son inspector pour fer sir ki nivo lizyenn pe ganny respekte.  Me selman dan sa ka dan sa Bill sa inspectors li i pour annan en lot rol li. I pour annan en lot rol akoz an vi ki sa grading sistenm li i pour valid ouswa pour ganny en review apre 2 an petet mwan ti a kontan konnen ki neseserman son rol li sa inspectors pour zwe li.  Eski zot pour travay avek bann lezot inspectors ki ganny trouve avek bann lezot entity parey Licensing, lasante lanvironnman,  ouswa i annan menm pour fer avek sa lendistri li menm?

E pour konklir Minis. Dernyen keksoz ki mwan ti a kontan touse lo la se ki rol petet mon ti a santi anba sa grading sistenm an vi ki nou osi annan Lakademi Touris isi ki pe fer formasyon. Formasyon pour ganny travayer ki demen zot menm zot, zot ava annan bann etidyan ki pour anvi zot menm zot komans en biznes, eski zot pour annan en rol ki zot pour bezwen zwe anver sa sistenm ki pe ganny met an plas?  E avek sa de pti mo mon pour konklir.  Mersi.

 

MR DEPUTY SPEAKER

Mersi Onorab Aglae. Onorab Flory Larue.

 

HON FLORY LARUE

Mersi Mr Speaker bonzour tou dimoun. Mr Speaker dan seksyon 2 sa Bill nou vwar ki i donn nou lalis bann words ek zot meanings. Mon vwar zis en bout la ki atir mon latansyon anba ‘’Island resort.’’ Sa seksyon ‘’island resort.’’ Mon pa war li an kordinasyon avek license regulation akoz sa kategori pa egziste anba kicense regulation. Alors si nou ti kapab armoniz sa de keksoz. Me selman letan nou get sa  Bill an antye, bokou aksan in ganny mete plito lo klasifikasyon ki nou trouve dan seksyon 3.

Bi prensipal sa Bill i pour entrodwir sa sistenm klasifikasyon ki pour en sistenm klasifikasyon nasyonal dapre mon pe konpran e mannyer mwan pe get li i en progranm ki pour enplimante par Gouvernman.  Dan sa ka i pour anmenn en kou siplemanter lo kote Bidze e mon ti a kontan Minis i dir nou konbyen nou krwar sa pour koute, konbyen i pour kout pei dan Bidze? E ki mannyer sa pour anmenn  en retour direk pour lekonomi lo nivo Nasyonal?  Silvouple. Letan nou pe get klasifikasyon tradisyonnelman i annan diferan lobzektif pour annan en klasifikasyon.

I donn kliyan en nide ki kalite letablisman i pe vin reste ladan dan pei.  I form en standar pour bann tour operators, bann lazans ki travay avek lendistri pour zot eternelman.  I en lenstriman ki sa letablisman i kapab servi pour promot son lekor – sa i en form promosyon. E an zeneral i vin en mezir pour sa sekter.

Onorab Sophola in adres sa letan in demann Minis si sa klasifikasyon i anliny avek lezot klasifikasyon enternasyonal. Akoz sa i enportan pour donn sa klasifikasyon en lot meaning. E en lot fason pour konpran li ki plis dimoun i kapab vwar son lekor ladan letan i en keksoz ki nou share avek lezot klasifikasyon ki deza egziste.

Si sa pa anliny i fer li vin useless. Ou pa kapab servi li akoz i pour zis nasyonalman me le fe ki i en zouti ki ou servi pour atir dimoun lo nivo enternasyonal, i bezwen annan en keksoz ki sa market ki li deor i kapab relate avek. I bezwen en keksoz ki zot kapab fasilman war zot lekor ladan.  Si non i vin void.  Savedir i en legzersis ki pour napa bokou lenportans.

I fasil ki nou pour kapab ekrir sa Lalwa e met klasifikasyon koman en sekter ki nou vwar li enportan. Me eski sa i vreman en travay ki’n ganny fer pour montre ki klasifikasyon i sa ki nou bezwen? Letan ou pran klasifikasyon e ou fer li vin en Lalwa savedir ou fer li vin en Lalwa pei, ou pe monopoliz li koman en zouti politik. Sa i fer ki i vin rizid. E nou bezwen regarde si en keksoz ki rizid i pratik dan sa sekter e lo kote ekonomi pour sa lendistri. Letan ou’n servi li koman en Lalwa i kapab met retar lendistri.

Letan ou’n servi li koman en Lalwa  i kapab met retard an evolisyon sa keksoz akoz ou bezwen retourn kot Lasanble. Ou bezwen remet en S.I. ou bezwen redrafte. Savedir i kapab fer ki letan en lendistri ki bouz sitan vit parey tourizm ou kapab afekte progre letan ou fer sa klasifikasyon vin en Lalwa. Savedir sa i en keksoz ki nou bezwen mazin lo la. Mon pa kapab donn en legzanp ki an Frans sa i en lezislasyon e le fe ki i en lezislasyon i ti annan bout ki ti vin void a en serten letan. Apre zot ti dir ki a en pwen dan en lobby en lotel dan en resepsyon ti bezwen annan en phone box kot sa keksoz dimoun ti nepli pe servi phone box. Zot ti’n al lo mobile me ziska en kantite letan ki nou ti pe servi mobile, sa ti en requirement dan Lalwa pour klasifye en lotel i ti bezwen annan en phone box dan son lobby. Alor i montre ki mannyer i kapab vin vitman, vin void letan lezot keksoz i devlope, pa neseserman dan sa sekter li menm me lezot keksoz otour sa sekter ki afekte klasifikasyon parey kominikasyon.

En lot keksoz ankor, i ki koz lo progresyon letan nou ti ganny sistenm enternet. Sa letan dimoun ti travel, dimoun ti vwayaze, zot ti vwar ki i en bezwen  reel pour zot ganny akse avek enternet. Me lefe ki sa pa ti en kriter akoz i en Lezislasyon, i pa ti’n ganny azoute koman en kriter dan klasifikasyon. Ti annan bokou lotel pa ti met bokou lanfaz lo fer sa servis vin en keksoz vreman aksesib pour son kliyan. Alor ou war de keksoz. Enn in evolye, zot pa tir dan klasifikasyon.  Enn evolisyon ki en keksoz ki pe otour sa lendistri i devlope e i vin en bezwen pour sa vwayazer i pa ganny enkli dan sa klasifikasyon.

Alors sa i bann problenm ki nou kapab rankontre letan nou pour sey fer sa keksoz vin fluid akoz sa lendistri li i vreman fluid.

Letan nou pe  en sistenm ki Gouvernmantal alor letan ou pe fer li en Lalwa Gouvernman ki bezwen enplimante. Ou bezwen fer sir ki sa sekter i vreman enkli akoz li ki pour sa Lalwa ki pour afekte li. E si ou pa enkli li i pour vin en gro problenm pour sa lendistri. E mwan pa krwar nou pour anvi met en Lalwa an plas ki pour kree en burden pour lendistri tourizm. Alor mwan ti a kontan ki Minis i dir nou en pee ski tou letablisman, lefe ki STB zot annan tou bann kontak, tou letablisman eski Minister ti fer neseser avan enplimant sa Lalwa pour notifye sak letablisman? Every single one.

Eski zot ti ganny kontakte avek serten notifikasyon, serten kominikasyon pou eksplik zot ki pou annan sa kalite sanzman. Ouswa Minister i annan lentansyon pou anmenn sa sanzman dan sa sekter.  Mon ti a kontan si Minis ti a dir nou si sak, kantite ki ti ganny advise ki sa pe vini, akoz a pou afekte zot license definitivman.

En lot keksoz nou devret get ler nou pe met sa Lalwa nou bezwen regarde si klasifikasyon i en sistenm modern.  Eski nou bezwen li ozordi kot nou ete dan nou lendistri? Parey mon’n dir i en sistenm ki vreman fluid, ki vreman an mouvman. E sanzman klarifikasyon i riske afekte li, akoz nou pa kapab sanz sa klasifikasyon ase vit pou al avek sa mouvman.  Letan nou pe regard nou lendistri direkteman, kot nou isi Sesel nou pe resevwar apepre 300mil touris ouswa plis, nou bezwen regarde lekel ki sa pou afekte.

Zis pou donn en nide, isi Sesel nou annan nou 437 aktiv accommodation. Nou annan 233 lo Mahe, 112 lo Praslin, 74 lo La Digue, 18 lo other islands. Bann kalifikasyon diferan group, nou annan nou 29 lotel, 113 guesthouse e 293 self-catering establishments, fer nou en total 437. Letan nou pe regard sa morso Lalwa dan seksyon 3 ki pe koz lo klasifikasyon, eski i pou deserve sa, ki mannyer i pou deservi sa group dimoun? Sa bann lotel ki dan sa format ki nou, nou annan isi? Parey mon’n dir nou annan nou 300 mil touris pe vizite, kisisa ki zot, zot ep rode ki klasifikasyon pou ede zot?

Alor mon krwar nou pe sey donn pei en kredibilite. Me eski nou konsonmater i pe servi sa kredibilite ozordi?  Eski i pou regard en national rating issued par Gouvernman, koman enn bann kriter ki li i pou servi pou swazir? Ozordi  konsonmater dan sa sekter servi bokou medya sosyal. Parey bokou keksoz zot annan zot en page, sa lotel i annan li en page i annan bann links. Sa page i link li avek son web page, i annan bann blog ki ganny ekri par diferan vwayazer ki vwayaze lo son lotel ki i met sa link lo la.

I fer bann updates konstaman ki annan bann video aktyel ki pe pase lo son lotel atraver en aktivite en devlopman en nouvo ladisyon. Toudswit li kan i met en jacuzzi dan en lasanm i kapab vini fer en video, met sa lo son page, toudswit i kapab sanz persepsyon son lotel up or down depandan lo ki devlopman i mete ouswa tire. Alors sa i fer ki medya sosyal i en gran zouti ki sa vwayazer pe servi pour li swazir Sesel.

Parey Onorab Aglae in dir, i annan en lalis ozordi lo internet ki touris i servi sa kad antye, i servi sa levantay antye pour li fer en desizyon avan i swazir en letablisman dan en pei.  Alors eski sa klasifikasyon Nasyonal pou ed sa vwayazer. I ed lekel kan nou pou met li dan sa Lalwa?  An zeneral resers in montre ki sa pa en gran lenfliyans lo sa vwayazer.  Akoz souvan i difisil pour li enterprete, letan i pe zis get sa klarifikasyon i pa en 4 Star i pa konnen ki i mean. Letan i pou ou al lo rezo sosyal toudswit i pou war sa lotel pou annan parking pou napa parking, i dan bwa, i lo lans sa bann keksoz i pli kler pour li. Alors sa klasifikasyon mon pa krwar i tro ed li.

Apre nou bezwen get klasifikasyon dan lendistri li menm, ki valer i pou anmennen akoz vreman klasifikasyon an zeneral ozordi i en zouti pou lendistri between industry.  Ant bann etablisman zot menm zot mezir zot lekor atraver klasifikasyon.  Me eski 437 lotel Sesel ki enkli 295 guesthouse bann self-catering ki ptipti 2 lasanm, 3 lasanm.  This is  what they are.  Eski klasifikasyon pou ed sa mazorite, i annan 295 zot out of 437.  Sa mon kote mon lanfaz ki mon ti a kontan mete lo klasifikasyon.

Me selman letan nou pou get en Bill direkteman avek devlopman i apel, Tourism Development Bill, mon pa konnen si nou’n vreman think it through. Minis i koz lo valer pour larzan.  I dir an zeneral en touris ki pe vin Sesel bokou nou defi i ki zot pe dir zot pa pe ganny valer pour zot larzan.  Be eski Problenm i akomodasyon? Akoz  sa Bill i pe focus bokou lo klasifikasyon akomodasyon i dir ki i pou anmenn en byennet pour sa vwayazer? Vreman mwan mon pa war sa, me sa pwen ki Minis in fer i vreman enportan dan lendistri. Value for money ki en touris letan i vin Sesel i dir i pa pe ganny valer pou son larzan.

Alor eski Minister pe get bann lezot keksoz ki en touris i met Sesel anba ki fer nou perdi pwen.  Pa nou akomodasyon ki fer nou perdi pwen, pri manze dan restoran, pri taxi, servis transport piblik ki limite. En touris pa kapab vwayaze apre 6er, 7er bis i limite i pa kapab al en restoran dan en bis. Dan konze piblik transportasyon i limite, i bezwen war li depann lo sa taxi ouswa en car hire. Lalimyer dan semen, touris pa kapab marse san en tors, ok?  Bann lenfrastriktir eski Minister pe get bann lenfrastriktir ki ankadre sa lendistri, pou donn sa touris value for money?                        Eski sa value for money i vin atraver sa kantite larzan ki i depanse? Toilet lo lans, bann landrwa stratezik ki pa pe reflekte standar. Ki Minis li menm i dir nou ti a kontan mete, be eski sa standar i zis kot sa dormi kot lili sa kliyan?

Eski sa standar ki nou pe get nou lendistri, sa lizye ki nou pe get nou lendistri avek? Mon vreman krwar ki i mank bokou ki Minister pa pe delivre lo lezot keksoz e i annan tro bokou focus pe ganny mete lo sa sekter zis lo akomodasyon. Mon bezwen donn 3 legzanp ki vreman mon krwar i enportan e i vreman valid letan nou pe get Tourism Development Bill. Beach park Anse Royale i an labandon mon kapab dir i en dump, ok?  Eski nou pe donn valer sa distrik kot ozordi dimoun pe envestir dan letablisman touristik pou devlop sa lendistri?

Letan en keksoz parey sa gran lans Anse Royale napa en beach fun. Pourtan lans i la sa devlopmann i date 10an sote. Ki mannyer nou kapab kontinyen koz value for money letan Minister ek Gouvernman li menm pa pran son responsabilite Mr Speaker pou anmenn sa lendistri pou donn sa touris value for money?  Kote i asize la lo sa lans, dan sa lapay la, dan sa toilet pouri ki pe tonbe? Mon krwar i annan en gran zafer pour li fer la.

Beau Vallon Golden Mile ti ganny entrodwi an Me 2013 ozordi nou 2019 ou le dir mwan 6an. Ok later pa ti pour nou fek aste en pti pe letan pase, be pavement ou le dir mwan pavement, ou get touris dan sa rigol la Beau Vallon ki sant touris Sesel be ou kanmi. Ou kanmi! prezan ou pou al lager ek sa pti guesthouse ki li i pe met de bout ansanm pouli kapab met en pti larzan an plis dan son fanmir, mon krwar i annan en kantite keksoz ki Minister touris pou al gete avek son bann koleg dan MHILT laba ki pe arive!

Nou fer regatta Beau Vallon nou fer Bazar Labrin beau Vallon nou fer Subios Beau Vallon, nou’n azour FINA Beau Vallon, kote touris i kapab pise la letan nou fer sa bann, eskize kekfwa i pa ‘’parliamentary’’ e kote zot pou al fer zot bezwen letan nou pe fer sa bann grogro fanfar ki STB i vann, Ministry Tourism i vann, Eco healing ki fer toulezan. Be vreman mon pa war ki mannyer klasifikasyon ozordi dan sa Bill ki pran tou sa Bill i pou ede?

O kontrer Mr Speaker, apre pa bliy Victoria water front pa ozordi pe vini pe ale sa. Touris i dir lavil i mor, en touris i koumsa, mwan mon’n deza dan sa sekter mon bezwen dir avek sa touris pou al anvil apre 9er akoz avan 9er ou pou bloke dan trafik pou 3erdtan pa ale. Mon a dir li al bazar al war katedral fer en pti letour la kot bann mize, al Botanical Garden avan 3er monte. Akoz ou pou bloke ant 3er ek 6er e si ou ankor anvil apre 6er napa lalimyer pou ou pran bis ziska letan ou pou ariv Anse Royale ouswa dan ki leo ou pe ale pou napa lalimyer.

E an plis ki sa napa nanryen pou fer anvil! Napa bar, napa disco, napa nanryen pou fer. Alor oli sa Victoria waterfront ki sipoze anmenn restoran, lotel, laboutik, lavi dan nou sant dan nou lavil.  Alor lo kote sa Bill Mr Speaker mon krwar i mank en kantite re–thinking; mon krwar i mank en kantite diskisyon avek lendistri, akoz i annan en kantite problenm dan sa lendistri.  Mon pa konnen letan Minis Bastienne ti dir i annan en kantite problem dan lapes ki i pa ti konnen.  Kekfwa i annan en travay ki ti annan pou fer lo kominikasyon kote Minister avek respe Speaker through you.  Kekfwa Minis in ler pou al fer en gran kominikasyon avek tou dimoun dan sekter pour nou kapab anmenn en Lalwa ki kapab siport tourism development dan Sesel!  Mersi Mr Speaker.

 

(APPLAUSE)

 

MR DEPUTY SPEAKER

Mersi Onorab Larue. Onorab Waven William.

 

HON WAVEN WILLIAM

Mersi Mr Speaker Bonzour Minis avek ou lekip, bonzour tou dimoun ki a lekout. Mr Speaker mon’n ekout Minis prezant sa Bill yer.  E avan konmanse Mr Speaker mwan mon ti a kontan ki pou mwan kapab kontiny mon deba mon ti a kontan ki Minis i eklersi sa Lasanble avek piblik deor; avek dimoun ki dan sa lendistri.  Par egzanp si kapab eksplik nou egzakteman ler i pe koz klasifikasyon e an menm tan i pe dir i serten nonm lasanm ki sipoze ganny reserve zis pou Seselwa.

E kot i konsern license mwan mon ti a kontan demann Minis pou eksplik ankor en pti pe kwa ki Seselwa, sa Seselwa ozordi Sesel dan son pei – kwa vreman ki Minis letan in dir sa i ganny reserve zis pou Seselwa? Mr Speaker avek ou permisyon mon ti a kontan aret la Minis i ti kapab donn mwan sa pti leklersisman pour mwan kapab kontiny lo la. Akoz mon annan serten keksoz ki mon anvi dir ki mon anvi montre poudir    – enn – i annan serten de-favorizasyon ki pe arive. Mersi.

 

MR DEPUTY SPEAKER

Ou ti le zis repet sa Onorab William?

 

HON WAVEN WILLIAM

Wi Mr Speaker mon ti a kontan ki Minis i dir e avek sa Lasanble konbyen lasanm ki ganny reserve spesifikman zis pou Seselwa fer biznes dan lendistri touris, pou mwan kapab kontinyen avek mon lentervansyon.  Mersi.

 

MR DEPUTY SPEAKER

Ok. Minis si ou annan sa lenformasyon ou a kapab donnen si non, nou a permet ou kontinyen epi ou a retourn lo la. Eski ou annan Minis?

 

MINISTER DIDIER DOGLEY

Bonzour Mr Deputy Speaker, wi mon annan sa lenformasyon.

 

MR DEPUTY SPEAKER

E ou kapab donn li toudswit?

 

MINISTER DIDIER DOGLEY

Bann pti lotel up to 15 lasanm, normalman i ganny restrikte zis pou Seselwa. I vedir 100 poursan lenvestisman i reste pou Seselwa. Ant 16 a 24 lasanm, Seselwa i bezwen annan at least en partener Seselwa i bezwen annan 20 poursan dan sa lenvestisman.  Mersi Mr Deputy.

 

MR DEPUTY SPEAKER

Mersi Minis.  Bon i pa en pratik ki normalman nou enteronp entervansyon pou demann Minis parski zanmen, nou pou ale/vini.  Be selman konman en one off i kourt, tre spesifik mon permet sa e ou kapab kontinyen Onorab William.

 

HON WAVEN WILLIAM

Mersi Mr Speaker.  Mon kontan ki Minis i kapab donn sa leklersisman.  Minis mon anvi demann avek ou, ki lefe ki ou pe anmenn sa amannman dan sa Bill, e lefe ki ozordi nou konnen sa lendistri, nou pe dir sa lendistri i pilye ekonomik prensipal nou pei.  E ki bokou Seselwa i anvi partisipe, be selman i annan serten aktivite ki pe arive, kot ou war ki annan serten gro lakonpannyen ki pe ganny license pou operate detrwa lasanm. E mwan mon pou demann ou lefe ki pou annan bann inspector, nou pe koz spesifikman Eden Island.

Eden Island i pe promote li 350 lasanm e i annan bann diferan lakonpannyen kot ou vwar ki sa bann lakonpannyen i pa the real owner sa bann chalet.   Me ki sa bann chalet pe ganny donnen avek en lakonpannyen ki li i annan tou sa kapasite pour li fer sa lavertisman aletranze e ki (1) i defavoriz sa pti Seselwa ki napa sa kapasite pou fer li.  E deplis  letan ou donn li en license depi 2017 ziska 2022 pour li fer sa,  mon krwar pou dir war krwar in met Polisi Gouvernman dan bin!

Akoz enn se ki ou pe dir be 5 a 16 lasanm i reserve zis pou Seselwa me i annan en lakonpannyen li dapre Licensing Act, i pa ni the owner, i pa  ni the lessor of the property me selman i ganny sa privilege pour li kapab market sa bann lasanm. E ler ou regard zis sa standar avek sa standar ki sa Seselwa pe struggle pour li kapab arive make  ends meet pour li kapab ganny son dipen, i war li mon kapab dir dan en serten sans defavorize!  E mwan mon ti ava demande ki si sa license ti’n ganny donnen, ki sa license i ganny revoke!  Akoz it’s very unfair Mr Speaker?

 

 (APPLAUSE)

 

 

HON WAVEN WILLIAM

I very unfair Mr Speaker lo sa Seselwa ki pe ganny dir ki – (1) – li i bezwen go in direct competition. E mon siport sa pwen ki Onorab Aglae in dir.  E sa bann keksoz nou bezwen arete nou bezwen aret kontinyen!  E prezan Minis letan ou pe koz lo Tourism Development Bill, mon’n fatige tann lo televizyon dan plizyer meeting ki – (1) – nou bezwen konsiltasyon. Nou bezwen konsiltasyon, me selman i resanble zis sa pe ganny koze be selman ou demann ou lekor, eski konsiltasyon i ganny fer zis for the sake of consultation?  Me selman nou pa’n tande nou pa’n ekoute.

Akoz out there, par egzanp mon pe koz ou bann mizisyen. Bann mizisyen i annan en leokri deor la ki anvi promot zot lanmizik. Nou lar, nou kiltir i malere pour sir be letan touris i vin isi i pa pe depanse. Be eski nou pe vreman ekoute ki sa bann akter dan sa lendistri pe vreman dir? Ouswa nou, nou pe met devan sa ki Gouvernman i anvi.  Me sa i bezwen annan konsiltasyon, konsiltasyon. Parey mon’n dir konsiltasyon – konsiltasyon i enportan!

E si vreman nou pe dir nou annan en partnership ant sekter prive avek Gouvernman be annou montre.  Annou demontre vreman!  E parey mon dir Minis se ki mon santi pou dir i annan serten dekoneksyon. E mwan mon anvi siport tou bann aksyon, tou bann desizyon pou vreman elve nou lendistri touris. Me malerezman mon santi pou dir we  are not touching the core of the problem!

E mwan Minis mon ti ava demande pou dir letan sa Bill i ganny pase ki nou vreman vwar ki ou Minister pe reazir, akoz si non, nou pou zis vir an ron.  Epi Minis i annan sa eleman  travayer, kot nou pe dir pou dir be ou a krwar la dan plizyer bann letablisman nou ganny bann travayer etranze.  I vre nou rekonnet pou dir nou annan serten problenm. Me dan Bill mon war pour dir sipoze annan bann konsiltasyon avek bann plizyer Lazans, ki vreman demars Minister i annan lentansyon fer avek bann Lazans ek sa bann lenvestiser prive, pou fer sir ki  -(1) – zot ankouraze e promote pou kapab permet bann Seselwa ganny en plas travay.

I annan plizyer keksoz la deor pe arive e kot -(1) – nou santi poudir nou bann frer e ser Seselwa, petet nou pa pou kontan sa mo ganny servi, me zot pe ganny abize lo la, dan serten etablisman, pe ganny forse pou kite  akoz lafason ki zot ganny trete pou enn donn sa plas a bann etranze. Mr Speaker lot keksoz mon ti a kontan touse se sa eleman sekirite. E parey mon’n dir mon’n war dan seksyon 2 sa konsiltasyon ki vreman nouvote nou anvi vwar vizavi sekirite akoz mon pa pe al pli lwen mon pe get dan mon distrik.

Mon pe vwar bann keksoz ki arive e prezan mon pe demann mon lekor, nou’n toultan dir pou dir konsiltasyon pe ganny fer, la nou pe dir sa me fotespere – mon dir fotespere, ki sa ki pe ganny mete dan sa Prozedlwa, ki vreman Minister Departman Tourism zot vreman enforce.

Me selman Mr Speaker mon pe retourn lo mon premye pwen, lo kote sa defavorizasyon. Mwan mon santi poudir Minister pou bezwen al koriz serten keksoz.

Akoz mwan mon krwar pou dir s zafer ki pe arive Eden Island la pa byen e nou pe vreman defavoriz nou pti Seselwa ki dan sa lendistri kot i konsern kantite lasanm.  Mersi.

 

(APPLAUSE)

 

 

MR DEPUTY SPEAKER

Mersi Onorab Waven William. Onorab Bernard Georges.

 

HON BERNARD GEORGES

Mersi Mr Speaker, bonzour tou dimoun.  Mr Speaker i pa ti mon lentansyon koze  lo merit sa Bill, akoz  taler mon pou koz en pe lo dan Staz Komite. Me an ekoutan  en pti keksoz ki’n ganny dir bomaten e  fer en pti  pe refleksyon, mon mazinen i ava apropriye kekfwa pou met enn de lide, enn de pwen devan. I vre tou sa ki dimoun i dir depi ler  nou pe koz lo sa Bill yer i vre.  E Bill i vini avek en lespri, e sa lespri se anmenn en serten klasifikasyon pour bann letablisman touristik, bann lotel bann ki pe fer accommodation.

Avek en lespri ki nou ava antre dan sa dan en lespri enternasyonal, kot nou ava annan – mon sipoze – en serten nonm standar isi Sesel, ki bann touris i abitye avek dan bann lezot pei.  Mon krwar se sa lespri deryer sa Bill; en nonm standar ki enternasyonal ki ganny aksepte partou e ki ler en nonm dimoun i mazin 5Star ki konnen ki prestasyon i pe ekspekte, ler i mazin 3Star eksetera i ava konnen. An prensip sa dan li menm napa en gran difikilte, sof ki parey tou dimoun in dir, eski – eski sa legzersis i en legzersis ki premyerman i apropriye pour nou?  E dezyenmman eski i devret anglob tou bann letablisman?

Akoz Onorab Sophola in mansyonn en pwen ki mwan osi mon ti pe mazin lo la.  Eski i pou annan en group dimoun ou en group lotel ki pou ganny en serten klasifikasyon 1,2,3,4,5 Zetwal e en bann lezot parey Minis in eksplike bann lezot select hotel ki pou ganny Bronz, Silver ek Gold. E ki mannyer a ki nivo sa cutoff pou vini? Klasifikasyon in anmenn en kantite problenm Mr Speaker dan tou domenn.  Akoz le moman ki ou anmenn klasifikasyon, i annan en serten arbitrariness, ki antre dan sa melanz.  E isi Sesel i pou vin ekstrememan difisil selon mwan. Mon pa en esper,  malgre mon annan en pti lekspertiz dan touris.  Akoz mon manman i dan sa lendistri e ler mwan mon ti retournen sorti etidye, e mon  retourn dan lakour e mon vwar ki mon lasanm dan lakaz ti’n vin en lasanm lotel!  Akoz antretan nou lakaz ti’n vin en pti guesthouse.  E la mon profite si mwan mon pa dir li personn pa dir li pou dir ki mon annan en frer ki dan lotelri.  E depi mwan pase i fek ganny apwente konman en Senior Vice-President Atlantis resort Bahamas – en gran lotel.

 

(APPLAUSE)

 

HON BERNARD GEORGES

Alor i en moman lafyerte pour nou fanmir e mon mazinen pour nou pei osi. Donk nou annan sa pti frotman ek touris ki permet mwan koz lo en size ki personnelman mon napa gran leksperyans ladan. Mr Speaker enn de dimoun ki’n koze sirtou Onorab Flory Larue in, i tous sa lide ki le moman ki ou anmenn sa klasifikasyon ou pou anmenn en serten rigidity olye anmenn en souples e ou pou annan dimoun ki pou en rezon ou en lot pou mank en klasifikasyon en ou pou tonm lo en klasifikasyon pli ba e i pou demann  avek son lekor akoz mon tonm en 2Star mon pa  tonm 3Star?

E mon konpran ki pou annan serten dimoun ki byen kontan zot star rating. Coral Strand par egzanp in toultan fyer pou dir ki li i en lotel 3 Zetwal kekfwa i 4 konmela me se sa market ki i pe rode e i byen kontan. Bird Island mon konnen in toultan reziste anmenn plis prestasyon par anmenn en SPA, par anmenn restoran e gard son nivo, a en nivo ki i santi li i rezonnab.  Ki pou arive avek sa bann letablisman ki swazir zot menm zot lekor dan en serten striktir?

E  ki mannyer – e la kot mon annan en pti konfizyon ki mannyer avek sa range letablisman ki nou annan e ler nou regard Seksyon  Definisyon lanmenm la nou vwar ki i annan en gran range. Guesthouse, hotel, island resorts, self-catering establishment.  E dan self- catering establishment li menm li nou annan converted house, cottage, chalet, bungalow, flat, apartment, villa e nou annan parey in ganny dir Eden Island. Nou annan en range ki sanble mwan nou pou ganny en serten difikilte pour nou fer tousala antre dan en striktir rigid parey i pe ganny propoze.

Lekel ki pli for? Ou lekel ki ,ant sa 2 zil Bird Island avek Denis Island enn i annan akomodasyon ki 5Star standard. Air condition, spa, restoran tou bann prestasyon. En lot i annan nivo bokou pli ba lo nivo akomodasyon e choice me i annan en milyon zwazo ki pe ponn lo son teritwar.  Lekel ki merit ganny en rating pli o parmi sa 2?  E annefe lekel ki meyer dimoun pou donn en rating?  E se sa enn bann pwen ki nou’n fer sorti dan Bills Committee.  Eski se Minister parey i pe ganny propoze? Oubyen se the trade li menm ki devret fer li? Oubyen eski se kliyan ki devret fer li?

Akoz deplizanplis, Se kliyan ki rate bann  letablisman atraver Trip Advisor atraver bann medya sosyal bann keksoz ki online.  E  donk i en size ki ekstrememan konplike, ekstrememan difisil. E an plis ki sa apard mon sipoze  detrwa dimoun ki dir.  Mwan mon pe al Four Seasons Sesel, lamazorite dimoun ki vin Sesel i dir ou mwan mon pe al Sesel. E mon ava trouv en letablisman ki mon anvi oubyen ki mon kapab afford.  E si nou en destinasyon dan nou menm e ki se pa sa lotel ki vin son destinasyon ki mannyer nou pou kapab zistifye sa ki nou pe al fer an term grading?

E si sa destinasyon ki premye priyorite ler en dimoun pe vin isi, ki nou pou fer avek sa bann problenm ki Onorab Sophola in mansyonnen, ler li i anvi en pe plis lasanm lotel La Digue? Oubyen ki nou pou fer avek sa Minister Touris me Minis mon pou bezwen  montre ledwa lo ou akoz se ou ki la ozordi; ki ler i realize  ki Anse Royale kot Fairyland sa pti lans devan sa pti zil, se sa landrwa ki bokou touris i kontan e toultan i plen – sel keksoz ki Gouvernman i fer se met en pti bout parking pou bann loto e pa met en toilet pou bann fasilite, pou bann dimoun ki vin servi sa bout lans.

Oubyen ki toulezour bann dimoun ki servi semen La Misere Onorab Waven William mon konnen i konn sa – e ki i annan en view point ki’n ganny fer akoz i en zoli view ki get anba Grand Anse e ler ou al get dan sa view ozordi sel keksoz ki ou war se bann pye kannel e bann pye albizya ki devan ou e ou konnen i annan en view, me selman ou pa war li akoz antretan i annan dibwa ki’n vin devan nou.  Sa se bann keksoz ki nou war.  Oubyen ou konnen ki ou fer mwan mon konnen akoz in ariv ek mwan defwa. Ler ou al dan en lotel 5Star ou’n manze ou’n bwar ou’n enjoy ou lekor ou’n pas en zoli lazournen.

Apre ou anvi peye e sa letablisman i dir ou i pa aksepte cheque e ou napa cash lo ou.  E la mon pou sit en legzanp Avani.  Name and shame – Avani in fer sa e pour mwan kapab pey zot mon’n bezwen pran en larzan, mon’n bezwen kit en cheque avek zot e dir zot demen mon ava anvoy zot cash e son lannmen mon’n  anvoy zot cash e zot cash mon cheque e zot in pran mon cash an menm tan!

 

(laughter)
HON BERNARD GEORGES

E mon pa’n ganny let sorti kot manager pou dir la mon pe retourn ou tyek, sorry sa ki’n arive pa ti’n devret arive!  E la mon bezwen dir Ephelia kot menm keksoz in ariv avek mwan manager in ekrir mwan personnelman, pou dir mwan sorry sa in arive, next time mon pe vini li menm li i ava vin zwenn mwan dan parking! Those are the things, ki mannyer ou pou grade enn, ki mannyer ou pou donn enn en meyer grade ler, lekel ki pou konn sa? Lekel ki pou define sa?  Ou konnen, mon konnen sa se bann keksoz ki arive konstaman. Alor, e akoz Gold, Silver, Bronze  pour bann pti letablisman? Mon mazinen ki zot in swazir sa, akoz se en standar ki en dimoun i konpran. Olye met coral, ivory parey nou’n sey fer avek Air Seychelles dan le pase. Me sa dimoun ki’n ganny en Gold oubyen sa dimoun ki’n ganny en Silver ki krwar ki i devret, ki merit en Gold, ki mannyer ou pou eksplik li ki li i pa’n ariv a sa nivo?

Mwan personnelman mon krwar dan sey met lord, nou  riske Minis – malgre ki mon pa kont prensip sa ki pe ganny fer, nou riske akoz nou, la fason ki nou ete nou mon krwar nou riske met bokou plis dezord. E ler nou’n ariv 5 Star e ki nou top i 5Star, nou pou war egzakteman sa ki arive dan bann lezot pei.  Bann ki krwar ki zot plis ki 5Star zot pou donn zot lekor en 6Star!  Malgre ki ou napa, e in arive sa partou nou vwar in arive Sengapour nou vwar in arive Atlantis, Dubai eksetera.  E ki mannyer nou pou restrikte sa? Alor mwan mon propozisyon se, akoz ki nou pa fer li optional?  Akoz ki nou pa anvi les bann dimoun ki anvi annan en star rating obtain, e bann ki pa anvi pa obtain?

Oubyen akoz ki nou pa zis dir ki tou bann lotel over en serten nonm lasanm, 100 lasanm dizon zot, zot ava ganny en star rating akoz zot, zot bann lasenn enternasyonal eksetera e kekfwa zot, zot bezwen en star rating.  Me pa bann lezot anba sa?  Sa sete nide ki’n vin dan mon lespri bomaten, anmezir ki mon ti pe ekout bann dimoun ki ti pe koze.  E finalman sa 2 kestyon ki nou demande dan  Bill Committee Report.  Eski Minister is the best Lotorite pour fer sa grading?  Tel parey in ganny propoze?  Oubyen eski se en lot Lotorite swa the trade li menm swa en lot Lotorite ki devret fer li?  Sa se mon kestyon prensipal.  E  lot kestyon mon pa ava retard nou la, nou ava vwar li dan Committee Stage.

Me Mr Speaker tout  an felisitan bann dimoun ki pe vreman travay tre dir, pou anmenn nou lendistri touris devan –  e mon krwar nou kapab fyer konman en Nasyon poudir ki, dan sa dernyen detrwa lannen, nou lendistri in pran en lanpler ki pozitif e ki nou devret siporte. Lotrozour mon’n al Ile Aux Cerf en dezennen dan en landrwa ki en pti beach restaurant. E mon devret dir felisitasyon a sa bann dimoun ki kapab fer sa, akoz zot pe anmenn en nouvo keksoz ou pa, ki en nouvo keksoz pour touris fer.

Mon krwar ki nou devret felisit nou lekor e dir dan sa detrwa dernyen lannen, nou lendistri touris in pran en bon lanpler.  Me annou pa bliye ki nou annan ankor bokou defi parey sa bann ki mon’n mansyonnen bomaten, e ki nou tou nou’n mansyonnen isi.  E annou pa al azout en lot defi, ki kek fwa nou pa bezwen a sa moman, oubyen ki nou pa bezwen li a sa lanpler ki nou pe al fer a sa moman par rod en grading en klasifikasyon bann lotel si nou pa absoliman bezwen fer.  Mersi Mr Speaker.

 

MR DEPUTY SPEAKER

Mersi Onorab Georges.  Onorab Sebastien Pillay.

 

HON SEBASTIEN PILLAY

Mersi Mr Speaker.  Bonzour Minis ek ou delegasyon, bonzour tou koleg Onorab e bonzour tou dimoun ki pe ekout nou e sirtou bonzour tou bann otelye, bann ki involve avek biznes tourizm.  Mon konnen ozordi zot pe ekout sa deba e zot pe pasyonnaman regard bann diferan size ki pe ganny mete. Zot osi zot pe wherever kot zot ete. Swa zot pe regard lo televizyon. Swa dan zot transpor pe drive, swa zot pe ekout lo radyo.  Zot pe donn zot bann lopinyon avek bann dimoun ki asize akote zot.

I malere nou pa kapab tann zot lopinyon la me nou pour sey fer nou mye pour nou kouver lopinyon tou sa bann ki’n koz avek nou, ki’n eksprim zot konsern. Premyerman i enportan pour nou sitye nou lekor kote nou ete ozordi. Sa Lalwa ki’n vin devan nou, mwan krwar in vin apre en long travay ki Minister in komanse apre pandan plizyer lannen ki zot pe fer.

I annan plizyer lannen ki nou’n koz lo la Sesel, ki Sesel i bezwen sistenm klasifikasyon pour bann biznes oubyen bann aktivite ki relate otour lendistri tourizm, zisteman pour anmenn en nivo oubyen en standar ki enn mon koleg lo lot kote latab in koz lo pour anmenn sa value for money ki sa kliyan pe rode ler li i deside pour li vin Sesel.                 E Sesel i ganny marketed si oule aletranze sirtou par egzanp ler nou, nou travel.  Bokou dimoun i dir nou ou sorti Sesel, i dir ou pour dir Sesel pour li en rev pour li kapab en zour vizit Sesel. E kot mwan mon reste Mr Speaker personnelman mon vwar plizyer touris pase pour al bor lanmer.

E souvandfwa ou regarde i annan bann dimoun ki vin koman bann backpackers ek zot pti sak lo ledo pe desann bor lanmer. Zot in aste zot bannann laboutik, zot boutey delo zot pti labyer, zot pe desann avek. Ou annan bann dimoun ki desann dan bann pli gro loto.

I annan dimoun ki desann dan bann pli pti loto. So ou vwar en diferan gard kliyan e le ou pe koz ek sa bann dimoun i annan ki dir ou zot bann Sef Lantrepriz aletranze.  I annan ki dir ou zot en teacher; i annan ki dir ou i en fonksyonner, i annan ki dir ou ki en retrete.  E sa ki enportan se ki sa bann dimoun i vin dan pti etablisman.

I annan ki pe reste kot lotel Savoy la Beau Vallon. I annan ki’n al reste dan  en pti guesthouse. I annan ki atraver Airbnb    in al rod en landrwa i annan ki atraver booking.com in identify en landrwa.  I annan ki atraver Expedia in identify en landrwa. E tou sa bann platform ki sa bann dimoun in servi pour boukte sa bann landrwa kot zot pe ale, in donn en rating sa bann landrwa ki probableman zot in swazir pour zot ale!

So already i deza egziste en koutim donn en rating, donn en review en landrwa, ki ofer akomodasyon oubyen en servis dan domenn tourism. I deza egziste. So i annan en sistenm an plas. Sa ki mwan mon oule konnen, se ki krwar ki sa pour azoute avek sa ki deza egziste, ki pour fer ki nou pour swa elev sa standar, oubyen enn bann krentif ki petet mwan annan ki dan konteks kot ou annan ou en gran lotel, kot ou neseserman bezwen annan rating, en serten klasifikasyon pour fer li maintain sa standar ki dir i pe ofer, ou a kapab annan sa rating.

Me dan konteks par egzanp – e  la kot mon vin kot sa bann kliyan ki mon’n koz avek, mon vwar zot, zot in desann dan bann pti guesthouse; kot sa owner sa guesthouse i al laboutik bomaten i aste zoranz. I aste bann pti keksoz i donn son kliyan.  En pti latous an plis, akoz li sa owner i pa kapab afford pour donn sa kliyan en spa; i pa kapab afford pour donn sa kliyan sa bann servis adisyonnel ki sa gran lasenn lotel, sa gran management company sa gran lotel i annan pour ofer.  So eski dan pe fer sa rating e mwan krwar se sa kestyon fondamantal ki Minister pour bezwen reponn; eski dan amenn sa klasifikasyon e sa rating nou pa riske defavoriz oubyen kree en kondisyon ki defavoriz sa ban pti letablisman sa bann pti dimoun pe fer sa bann aktivite?

Onorab ki’n koz avan mwan, in koz lo en devlopman dan nou Sekter Tourizm. E sa devlopman a mon lopinyon pour mwan i pa’n ariv akoz nou’n annan bann gran lotel ki’n ouver?  Si nou regard otour Mahe ozordi lakantite bann pti guesthouse e bann pti letablisman ki ouver, i enkrwayab.  E laplipar dan en gran mazorite i ganny own par Seselwa ki fer en gran zefor pour gard en standar. E si ou regard par egzanp lo  Expedia ou vwar i annan bann diferan rating ki ganny donnen pour sa bann pti letablisman.

Ou vwar bann diferan non sa bann pti letablisman.  Mon pa oule nonm enn akoz mwan pa oule mwan nonm enn epi mwan pa nonm en lot. Me selman sa ki enportan se ki zefor ki zot pe mete pour zot maintain sa letablisman, eski dan sa rating ki nou pour fer par egzanp si nou pour rate sa bann guesthouse nou pour rate zot according to zot group, e en pti guesthouse, en pti guesthouse i kapab ganny en 5Star rating?

Oubyen eski fodre absoliman pour ou ganny en 5Star rating ou en Savoy, ou en Kempinski, ou en Ephelia? Me selman mwan koman sa kliyan mon santi poudir mon’n ganny en 5Star  servis ler mon’n reste kot  Jules kantmenm mon’n boukte atraver  Airbnb; ler mon’n reste kot De L’eau Beach Chalet  kantmenm mon’n boukte atraver en lot dimoun. Ler mon’n pas kot Top Soleil Beach anba Glacis ki en dimoun ki pe fer son aktivite.

So sa ki mon oule vwar sa ki mwan mon pe rode se ki eski nou annan bann Seselwa ki pe ofer bann leksperyans otantik, san ki nou bezwen envant larou!  En leksperyans otantik! Eski then zot pa pour gannyen 5Star rating malgre si zot pe ofer en 5Star service?  Akoz si mwan pran largiman ki en Onorab in avanse, si nou pran par egzanp Eden Island as a development company, en kondisyon ki’n ganny kree pour li grandi pour li antre dan sa marse.  Eski li alor i pour bezwen osi ganny en rating e avek son abilite finansyel ki pour permet li ganny en rating bokou pli o e alors abilite finansyel pour fer ki mwan mon pour ganny en rating  pli ba?

Mwan ti a kontan contextualize sa, akoz sa ki mwan mon konsernen avek, se ki si par egzanp demen nou dir ok, nou dir en pti guesthouse la Glacis i annan li en 3Star rating. Be selman ler ou regard lo booking.com oubyen lo Expedia  tou dimoun in donn li 8 out of 10.  Ou pe rate li koman en 3Star ou. Now mwan mon en lorganizasyon mon pe anvoy en dimoun Sesel, mon pe rod sa, mon pa pour al gete sa 3Star! Neseserman. Oubyen eski dimoun i ankor gete sa bann zetwal ki ganny ascribe par bann Lotorite Regilatwar oubyen eski dimoun i plito regard bann review ki ganny fer par lezot kliyan, ki’n reste dan sa bann letablisman, oubyen dan sa bann lotel?

So mon siporte annan en klasifikasyon, akoz en klasifikasyon i enportan.  Akoz ou riske annan ou bann sirkonstans kot ou annan en letablisman ki li i pe ofer en servis; ki i  claim poudir i sipoze en servis 5Star.  Me sa kliyan i ganny en servis 3Star e i ale e lanbas Sesel online.  E si i en kliyan enportan.

Me si nou oule target sa kategori kliyan ki annan sa pouvwar pour afekte nou lendistri touris, then annou target sa bann letablisman ki zot pe ofer – ki sipoze pe ofer sa nivo servis e zot pa pe ofer ozordi!             Mwan mon kapab dir par egzanp i annan bokou lotel ki market zot lekor koman 5Star Sesel ki pa pe ofer servis 5Star! As opposed to servis 5Star ki dimoun pe gannyen dan en pti letablisman.  Ki en Seselwa pe run swa La Digue ki en Seselwa pe run swa Glacis, swa Beau Vallon. So mon krwar petet i pour bezwen annan en leksplikasyon lo ki mannyer sa pour marse, pour fer sir ki tou dimoun i azour ek sa!

Kote ki osi enportan dan sa Lalwa pour nou konsidere, se ki sa eleman i pa extend zis avek bann akomodasyon! I osi extend avek bann ki ofer bann servis. So par egzanp nou annan bann  gid, par egzanp e mon amaze letan e travay ki serten nou bann gid, nou bann Seselwa ki’n aste en pti H1 i fer letour  avek bann touris i fer, zot al partou arete anmenn bann pti landrwa.  Se sa bann dimoun ki pe fer sa kliyan dekouver Sesel ki sa kliyan demen i al dan son vilaz, i al dan son kanton i al dan son lavil kot i reste, i dir be mon’n pas en letan agreab Sesel. Kot bann dimoun i friendly.  Akoz se zot ki ofer sa lenteraksyon. Be en kliyan desann dan Hilton Northolme i pran en Chalet i pa sorti ditou Hilton i met li dan en bis i anmenn li marse, kote i eksperyans Sesel?  Ou konpran?

So nou annan de kote sa coin, nou bezwen fer sir ki pour dir nou balans byen akoz nou pe anmenn sa klasifikasyon? E  ki mannyer nou kapab ede pour fer sir ki sa klasifikasyon pa defavoriz personn. Be i annan en lot eleman enportan dan sa Lalwa, ki mon konnen malgre ki bokou nou, nou’n focus en kantite lo sa eleman klasifikasyon, nou pa’n regard sa eleman kot sa Lalwa i en Tourism Development Bill, e enn bann eleman ki i anmennen se sa size vertical integration!  Now akoz i enportan sa eleman, set akoz ozordi nou bezwen be very careful.  E ler kestyon ti ganny demande e Minis ti eksplike pour dir ou annan ou 15 room Seselwa.  Se sa 24 lasanm, 20 poursan Seselwa i bezwen annan.                                         Ou osi annan bann posibilite kot oubyen i egziste konmela en lotel li menm li ki pe fer tou.  I pe ofer tou!  I pe ofer son transfer; i pe ofer son ekskirsyon, i pe ofer isi, i pe ofer laba, e sa pe ferm sa sekter kont lezot akter ki ti a kapab ofer en servis.  Annan pran par egzanp La Digue par egzanp – dernyen fwa ki  mon ti al La Digue bokou bann Digwa ki fer bann charters ti eksprim konsern ki ou annan ou bann gro dimoun ki pe, bann gro konpannyen ki pe anmenn bann bato par egzanp ki pran 20, 25, 30 kliyan – menm plis e ki zot, zot pa pe ganny sans!

So sa Lalwa i fer provizyon pour sa.  So whilst ki nou kapab focus zis lo sa size klasifikasyon i annan bann eleman dan Lalwa ki nou bezwen gete!  Nou bezwen gete akoz sa size lentegrasyon vertikal i vin en problenm i pe ferm laport pour bokou Seselwa ki zot, zot santi ki zot kapab partisipe dan sa aktivite e zot devret ganny en lespas pour partisipe!

Me selman problenm ki reste se ki zot menm zot sa banns a ki pe partisipe i bezwen fer en zefor pour li ofer en servis standar! I pa kapab ofer en servis ki substandard demen ki sa dimoun i prefere al kot sa gro konpannyen akoz i garanti sa nivo servis as opposed ki ganny li avek li.

E en lot eleman enportan ki nou bezwen osi met an perspektiv se ki whilst ki nou lendistri touris in kontinyen evolye, e mon krwar le pwen in ganny fer oparavan mwan pa oule repete – e sa Lalwa i pour bezwen adres sa ler nou pour azout eleman ladan akoz i en Tourism Development Bill i pa en Tourism Classification Bill kot ki bann servi adisyonnel ki nou bezwen azoute?

Nou’n koz lo touris servi tors pour marse aswar mon kapab donn en legzanp i annan touris i sorti par egzanp dan en lotel Glacis i oule al par egzanp Beau Vallon kot i annan laplipar restoran; ou annan Pizzeria ou annan Boat House, bann restoran ki ofer en tre bon servis.  Mon pa dir lezot pa ofer. Mon’n nonm sa de. Tou restoran i ofer sa bon servis dan sa landrwa. Me sa kliyan pe marse 9er, 10er diswar avek en tors! Ou konpran?  Konmsi i bann keksoz ki mon krwar pour dir nou kapab sanze, nou kapab fer en keksoz pour sanze, me i bezwen annan en volonte pour nou koz ek bann dimoun ki neseser pour nou kapab fer li sanze.

E sa ki enportan se ki nou bezwen vwar ki mannyer par egzanp sa bann lotel ki’n konstri nou kapab angaz sa bann akter dan sa bann aktivite pour, ki dan aktivite pour zot kapab vin onboard e fer keksoz.

Mon krwar sa ki enportan e ki mon kontan prezan, sa i move anba Minister ki zot ki pe deal avek sa size Polisi, se ki zot a kapab angaz en pti pe plis avek bann akter ki dan sa sekter.  E zot pour vin sa one stop shop si oule, si sa sekter i propoz en keksoz, zot a kapab anmenn sa Polisi direkteman as opposed ki STB t i pour bezwen vin kot zot a parent ministry – vwar si i annan negosyasyon ki bezwen ganny fer so i ava annan en laliny kominikasyon direk, ant zot avek bann dimoun ki dan sa sekter.

 

An konklizyon Mr Speaker mwan oule fer note ki i annan bann consequential amendments ki pour neseser an relasyon ek sa Lalwa. Par egzanp i annan sa pwen regarding bann island resort ki li i napa en definisyon anba sa Licensing Act. Me li i ganny license as en lotel avan. E for the purpose of classification i pour ganny klasifye as en island resort. Sa ki enportan.  So ki mon ti a kontan demann Minister pour fer, so sey eksplik nou.

An relasyon ek klasifikasyon, eksplik nou ki mannyer nou pour anpese ki ler mon’n rate – par egzanp mon’n rate en guesthouse Glacis, mon pran Glacis, akoz i distrik kot mon sorti swa Beau Vallon swa dan en lot distrik, ler mon’n rate sa guesthouse par egzanp en 3Star eski sa 3star pour defavoriz li dan okenn fason. Oubyen eski dimoun pour get sa 3Star oubyen eski dimoun pour plito get sa ki pe ganny dir lo Trivago, lo Expedia, lo booking.com?  Akoz senserman menm mwan ozordi par egzanp si mon deside pour al Praslin mon pour al lo Expedia mon pour gete ki bann dimoun in ekrir lo en landrwa avan mon al laba.

So mon ti a kontan konpran sa akoz mwan santi poudir i mank en pe lenformasyon pour nou konpran, akoz me i neseser selman e nou bezwen aksepte pour dir i neseser; akoz si nou bezwen kontinyen evolve nou lendistri touris nou bezwen fer sir pour dir nou kapab protez li from bann akter ki si nou pa fer en fason protez li i kapab anmenn disrepute pour nou bann lendistri touris. E sa i enportan. So avek sa Mr Speaker mwan remersye ou e Lasanble pour zot latansyon e mwan a swete ki Minister i a kapab reponn en pe sa bann kestyon ki mon’n souleve.  Mersi Mr Speaker.

 

MR DEPUTY SPEAKER

Mersi Onorab Pillay. I reste mwan ankor detrwa entervenan. Me in ariv 10.38 nou ava adjourn e nou a retournen 11er.

 

(BREAK)

 

 

MR DEPUTY SPEAKER

Bon bonzour ankor enn fwa tou bann Manm Onorab.  Nou pour e tou dimoun a lekout. Nou kontiny nou travay lo Order Paper.  E sa se deba lo merit Bill Tourism Development Bill 2019. Prosennman lo mon  lalis mwan annan Onorab Norbert Loizeau.

 

HON NORBERT LOIZEAU

Mersi Mr Speaker. Bonzour Minis ek ou delegasyon. Mr Speaker mersi pour permet mwan sa pti moman pour mwan kapab fer sorti de pti pwen lo konsern sa Bill.  Bokou mwan bann koleg dan Lasanble in dir bokou lo la. bokou bann pwen vreman enportan in ganny fer sorti.

Mwan pa en otelye; mon pa dan sa biznes touris me selman mon travay an deor Lasanble i permet mwan ariv bokou kot bann letablisman touristik – plito bann pti letablisman pa bann gran lotel. Me plito bann pti letablisman touristik kot mon’n ganny sans rankontre bann dimoun laba, touris koman propriyeter; kot mon’n kapab enterakte en pe lo sa bann konsern ki dan sa Bill. Mr Speaker mwan le pwen ki mon anvi koz lo la se le pwen klasifikasyon ki annan dan sa Bill. Dapre mon bann enteraksyon ek bann dimoun zot plito krwar ki klasifikasyon i plito fer li antre bann gran lotel;  bann gran lotel 5Star pa bann pti letablisman. Akoz ozordi i annan bokou bann pti letablisman touristik Mr Speaker, ki pe mars byen. Zot pa pe ganny klasifye lo okenn standar 5Star me selman zot pe operate e zot pe fer byen.  E pour mwan ler mon pe koz lo la, i fer mwan mazin bann pti letablisman lo La Digue, lo Praslin, ki malgre zot pa pe ganny klase sitan o me selman zot toultan plen!

E zot pe fer byen! E i annan touris ki vini i ale e zot menm retournen. I osi fer mwan mazin bann lokasyon parey dan mwan distrik nou annan pansyon Bel Air ki pa en gran lotel. Me selman Mr  Rassool i pe fer ase byen.  Mon pas kot li nou koze e son kalite kliyantel ki i gannyen menm si son lotel pa telman lo en klasifikasyon vreman o parey bann gro lotel mon war li i telman fer byen. Nou annan Bon Sejour Guesthouse osi anler kot  Mrs Shroff   ki son lokasyon kot i ete i atrakte bokou dimoun. I pa en landrwa ki ganny klasifye telman a en oter parey lezot lotel. Me selman son kalite kliyantel ki i gannyen – enn – zot apresye landrwa. Sa lanvironnman e zot landrwa i prop.

E pour ozordi Mr Speaker, mwan mon krwar parey Onorab Larue in fer resorti pli boner, se pa klasifikasyon ki nou problenm.  Nou problenm ozordi se bann lezot keksoz ki merit ganny get ladan, pour ed sa touris fer son sezour isi, byen.  Parey nou’n koz lo, zot in koz lo semen. Ozordi si ou get semen Beau Vallon. Beau Vallon i en semen ki desann, i en landrwa touristik. Get leta son semen Beau Vallon. Son pavement. Zis mazinen nivo lekleraz dan semen!

Mwan mon krwar se sa bann keksoz ki nou merit al lo la olye klasifikasyon.  Ozordi i annan en ta lezot problenm ankor ki sa touris ki vin Sesel.  Ozordi nou pe ankouraz kot lakaz. Gouvernman in fer sa pour ankouraz dimoun pour annan de pti lasanm pour akey bann touris, cultural tourism mon krwar i apele pour dimoun kapab vini antre, reste, konn ou mannyer viv.  Nou annan bokou bann pti guesthouse dan Beau Vallon.  Sa bann pti guesthouse laplipar ditan sa bann kliyan zot, zot pa la tou lazournen dan lotel zot.  Zot la pour zot ganny en landrwa dormi. Me selman sa  landrwa dormi i bezwen konvenab.  Laplipar ditan zot lazournen zot pas zot letan lo lans, zot al manz Coral Strand, dan bann pti restoran.  Zot pa manze la zot, zot fer zot keksoz deor me plito zot plifere ganny en landrwa pour zot kapab antre apre ki zot in fer zot bann tranzaksyon.

E mwan mon panse ki sa bann pti letablisman zot pe fer sitan byen, alors mwan pa war kot klasifikasyon pour ed zot plis ankor. Akoz ozordi se touris ki klasifye ou.  Akoz ozordi ou kapab en gro lotel 5Star si en touris in vini in war de kankrela kot ou li ki pour klasifye ou. Bann ki zanmen in deza war kankrela kekfwa i a tir portre sa kankrela i a kontan in war en kankrela. Be bann ki apre in santi sa loder ki sa kankrela i anvoye. Ou konnen ki i pour fer? I pour met lo Facebook. I pour dir mon’n war de kankrela laba. I pe klasifye ou menm li! Me sa lot dimoun ki pour deside pour li vini pour antre pour vin kot ou lotel la, la prezan i pour gete be laba ti annan kankrela, bannla in mete ti annan kankrela alor mon pa pour al laba!  Se touris ki klasifye ou. E la Mr Speaker, nou mwan anvi konnen kote ki nou pe al mal ki nou bezwen antre dan tou sa bann keksoz?

En legzanp nou annan 95 mil dimoun. Mon byen annou met li 100mil nou popilasyon. Nou annan anviron 300mil touris. Mon byen? 300mil touris. Mon byen Minis? Ki pe antre Sesel par an, 3 fwa nou popilasyon.  Savedir nou pe fer progre. Me si nou pe fer progre akoz ki nou bezwen kas en keksoz ki byen?  Pa i pe marse? I zis konmsi nou annan en loto, nou annan en pti loto nou, nou pe mont se nou toulezour nou. Nou arive dousman nou. Selman nou oule met en turbo avek pour nou ariv pli vit kot a lafen nou pa arive pli vit, nou tonm dan en ranpar ni arive nou pa arive! Ok?

Mwan mon panse ki nou merit met lanfaz lo bann keksoz ki pour atir sa touris; bann keksoz ki pour fer sa touris konfortab parey Onorab Pillay in dir.  Touris pa pour bezwen mars ek en tors.  Touris pa pour devir zot lipye an desandan kot Bas pour al Beau Vallon kot Coral Strand. Sa se bann keksoz ki nou merit atak lo la pour fer zot sezour byen!

Mon 2enm pwen Mr Speaker mon anvi koz lo konsiltasyon. Mon anvi dir ki Minis in dir ki zot in konsilte bokou me mwan mon’n ganny dir par bokou bann pti letablisman ki napa konsiltasyon ki’n ganny fer avek zot.  Mon’n menm koz avek Onorab Woodcock, Onorab pour Grand Anse Praslin ki Praslin i annan bokou bann pti letablisman. Yer mon’n koz ek li atraver telefonn akoz i pa la ozordi. E mwan panse si i ti la i ti pour abord sa size konsiltasyon in dir mwan.

In dir mwan ki bann dimoun i dir ki napa gran konsiltasyon ki’n ganny fer! Konsiltasyon in ganny fer avek bann gran letablisman! Bann gran lotel! E zis mazinen sa bann gran lotel zot ler zot pour konsilte zot, zot, zot pa enterese avek sa pti letablisman anba laba zot!  Zot, zot pe mazin zot laba.  Sa pti letablisman demerd zot!  E si ou fer konsiltasyon zis ek en gro group, toultan pour annan en pti group ki pa pour kontan!

E mazinen Minis sa zafer konsiltasyon i serye sa. Yer nou’n war! Konsiltasyon i en keksoz ki enportan. Si nou pour konsilte nou bezwen konsilte tou dimoun. Nou pa kapab pas par anba, anba!  Parey yer Prezidan Faure ti konsilte en pti group anba anba, akoz Zidisyer apre ler keksoz ti ariv isi get ki ti arive, pa tou dimoun ki ti kontan!  Ou war?  Savedir nou bezwen gete fer sir konsiltasyon i ganny fer avek tou dimoun.

E mazinen dan konsiltasyon, nou bezwen konsilte en bann dimoun lokal. Isi bann pti operater lokal zot, zot fer biznes isi sa pti keksoz zot gannyen zot, zot pa al avek deor zot! Zot envestir isi Sesel zot pti larzan. Tandis ki sa bann gro operater la parey Onorab William in dir i annan ki annan en lotel selman lotel in ganny pase lo selman tou zot larzan zot i al deor!  Bann pti operater zot fer zot travay isi. I annan ki menm in vini in fer lotel zot pa vin ek zot larzan zot, zot pran zot larzan ek nou pour zot fer zot lotel. Zot larzan i reste laba zot. Alors Mr Speaker se sa le pwen ki mwan ti anvi fer sorti sa pwen klasifikasyon e le pwen konsiltasyon.  Alors Mr Speaker vwala le de pwen ki mwan ti anvi fer sorti. Mon a remersi ou pour donn mwan sa sans pour fer sorti mon de pwen. Mersi.

 

MR DEPUTY SPEAKER

Mersi Onorab Loizeau. Onorab Paul Ernesta.

 

HON PAUL ERNESTA

Mersi Mr  Speaker. Mr Speaker, Minis e ou delegasyon tou bann koleg Onorab tou dimoun a lekout ekspreseman bann dimoun Takamaka, bonzour.

Mr Speaker mwan rapel en serten moman moto ki tourism ti servi se ‘’Seychelles unique by a thousand miles.’’ E sa si oule i ti sa standar ki ti permet nou pour nou market, vann Sesel aletranze e ganny bann touris.  E avek sa in anmenn pa mal rezilta e evantyelman avek lannen keksoz in sanze.  Ozordi letan mon get distrik Takamaka i en distrik ki annan pa mal letablisman touristik depi son guesthouse, son chalet ziska lotel 5Zetwal.

E i osi en distrik lo Mahe ki annan pa mal lans. Si oule i sa distrik kot i en marse, si oule i annan en marse potansyel pour nou bann touris vizite. E menm son laverdir son lanvironnman i ankor dan en lanvironnman sen ki tousala bann keksoz ki touris i rode.

Me ozordi avek sa propozisyon pour amenn klasifikasyon petet mwan konpran lespri par deryer me an menm tan nou bezwen vwar ki lenpak sa pour annan sirtou lo sa bann pti operater. Mon trakase petet Minis pli tar dan son lentervansyon, i kapab eksplik nou ki mannyer sa pour ganny fer dan en fason byen, si zanmen nou pour al dan sa opsyon mon konnen koleg lo lot kote latab pli boner in donn diferan opsyon, propozisyon ki mannyer sa i kapab ganny fer ki pour anpese ki sa pti operater li i pa ganny afekte.

Mwan mon trakase si nou pe vwar nou pe fer sak lotel annan, sa letablisman annan diferan grad, baze lo zot star e nou kapab vwar en sityasyon kot bann gran lotel, i touy sa bann pti loperater. Sa nou bezwen fer sir ki nou anpese. Mazinen toultan nou met. Nou pe dir Seselwa debrouye. Seselwa leve debrouye.  Annou fer sir ki sa i pa ganny afekte.

E an menm tan letan nou pe koz sa bann klasifikasyon, eski si en lotel en pti operater par egzanp zot, zot pe grade annou dir nou grad 3Zetwal li son nivo ouswa son kapasite finansyel pa permet li pour li upgrade son lekor ziska 3Zetwal. Si i annan en mekanizm lo kote tourism ki pour kapab permet sa letablisman pour li evantyelman upgrade son lekor ziska son 3Zetwal. Si non si napa sa, nou pou vwar ki sa loperater li menm li i pour mor an nesan. Petet sa mwan demann Minis pour kapab eklersi nou lo la.

E apre nou’n vwar ozordi i annan bann letablisman ki menm bokou fwa nou bann koleg in koze ki menm ki dir ki li i en 5Zetwal swa i en 4 Zetwal i advertise lo booking.com, trip advisor whatsoever, bann website ki annan i en 4 Zetwal. Me kan an realite letan ou al dan sa letablisman son servis li menm swa sa ki zot, zot pe ofer i pa san iv ki zot, zot pe met li.

Me an menm tan nou pe vwar ki son pri i deza en pri eleve. I annan bann dimoun, i annan leksperyans kot nou’n vwar kot dimoun i ale i al dan lotel i dezapwente.  Ki mannyer mwan vwar ki zot in mete dan pour annan sa investigation officer ki mannyer pour asire ki sa bann keksoz i ganny marse byen ki pour ki si en dimoun i ganny mete – si en lotel i ganny mete lo en zetwal en serten grad i bezwen pe fer sir ki mentenir sa standar.  E an menm tan n ou bezwen fer sir si zanmen i pour annan sa investigation ki pour al ganny fer, ki napa okenn warning ouswa sa letablisman i konnen  prior ki tel lorganizasyon pe vin investigate zot.

Nou bezwen fer bann investigations spontane.  Akoz letan dimoun i konn sa boner i prepar li ki a lafen letan i arive tou son keksoz i annord li, zis pour sa zour letan sa zofisye pe vini pe vin investigate tou son zafer i annord, me apre i retourn back to normal letan investigation in fini ganny fer.

Sa bann keksoz ki mon krwar ki ekstrememan enportan.  Bann kriter mwan pa konnen si apre Minister pa pe zwenn avek tou sa bann letablisman parey pli boner in dir i annan konsiltasyon ki pa pe ganny fer, pour eksplik zot, sa si nou osi mon krwar nou bezwen ganny tou sa bann seri kriter pour sak sa bann lotel.

Par egzanp si en guesthouse mwan mon mazinen petet son guesthouse son 1 a 5 Zetwal i bezwen ganny dedye pou sa guesthouse i pa kapab menm ran menm nivo avek en lotel en gran lotel, akoz sa pou dezavantaz li. Mon krwar tou sa bann keksoz i enportan pour nou klersi pour nou konnen ki mannyer nou pou go about sa zafer.

E apre Mr Speaker letan mon get lo paz 2 sa Lalwa sa Bill, i annan en keksoz ki zot pe met lanfaz lo promosyon e devlopman kiltirel, plis eco tourism dan bann etablisman. Pli boner mon koleg Onorab William osi in koz lo la. Nou vwar sa i en keksoz ki pe manke ki pe perdi.  Touris i vin Sesel pour li ganny en leksperyans Sesel. Leksperyans inik parey nou ti dir pli boner, inik lo Sesel.

Me bann artis ozordi, bann mizisyen ozordi nou pa vwar zot pe fer bann performance dan bann lotel, pe promouvwar nou kiltir dan bann lotel. La mon santi ki i annan en keksoz ki pe al mal nou bezwen sey vwar en fason ki mannyer pour nou sey deal avek sa bann zafer.  E apre nou koz lo lans, e ankor mon dir Takamaka i en distrik ki antoure avek lans. Bokou pikniker i vin lo lans, ki nou vwar? Nou vwar bokou fwa letan zot vini bann ver dir i ganny koupe.

Ozordi nepli annan lo bann lans, bann dimoun swa zot fer zot pti barbecue, zot pti griyaz. Zot pou fouy trou dan disab, apre ler zot fini zot kouver tou zot bann zafer i mete apre zot ale zot kit la. Mon krwar i ekstrememan enportan nou marye nou lanvironnman bann mezir strik – sever.

Nou fer sir ki nou lanvironnman i pa ganny detri par bann lezot dimoun ki a-la-fen ki letan touris i vini pa pe kapab zouir. Zot bezwen tap zot lipye avek swa bout dibwa brile, bout dibwa anba later. Mon krwar i bann keksoz kot nou bezwen fer sir letan nou pe travay lo sa Bill Mr Speaker. ki nou fer sir  ki bann Lalwa, konmsi i annan en senkronizasyon tou sa bann keksoz. Lapse kiltirel, laspe lanvironnman, bann letablisman touristik tousala bann keksoz i ganny marye ansanm pou fer sir ki letan touris i vini i ganny sa bon leksperyans letan zot vin dan pei.

So, vwala mon krwar mon pou demann Minis pou eklersi nou en pe lo sa bann sityasyon, pou evite ki nou bann pti letablisman i pa perdi. Bann laspe lanvironnman i ganny proteze e laspe kiltirel osi.  Nou vwar ki nou bann laspe kiltirel dan bann letablisman touristik. So avek sa Mr Speaker mon demann Minis pou kapab eklersi nou plitar lo la. Mersi byen.

 

MR DEPUTY SPEAKER

Mersi Onorab Ernesta, Onorab Charles De Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker, bonzour Minis ek ou delegasyon ek tou Manm Onorab ek tou dimoun ki a lekout, spesyalman bann ki dan Sekter Tourizm.  Mr Speaker nou tou nou konnen ki tourizm i reste lendistri mazer dan Sesel. E i bezwen ganny byen administre pour li reste an bonn sante e konpetitiv. Pour sa rezon sa Prozedlwa i fer provizyon pou etablir bann norm debaz pour bann diferan aktivite touristik e osi propoz en progranm pou klasifye bann biznes akomodasyon; setadir bann lotel, island resort, self- catering e guesthouse.

Fodre pa oubliye ki tou viziter ki vin kot nou i annan en lekspektasyon baze lo son bann leksperyans.  E nou, nou annan en devwar pour asire ki sa bann lekspektasyon i ganny satisfe si nou anvi reste relevan dan sa sekter. I en progranm ki Lorganizasyon Mondyal pou Tourizm i ankouraz bann pei pou adopte akoz i ede pou fer sa lendistri vin enn ki soutenab. Savedir en progranm klasifikasyon nou pe koz lo la.

Sa i semen ki nou ti ava kontan nou lendistri mazer i pran lo la Mr Speaker.  Tourizm parey mon dir i en sekter ekonomik nou pei e Departman Tourizm i bezwen reste enformen lo bann diferan sanzman ki pe arive dan sa lendistri, e devlop bann Polisi neseser pou kontinyen gid son devlopman. I enportan alor ki sa bann polisi i baze lo lenformasyon e statistik korek pou sa Prozedlwa ki devan nou arive fer e atenn son lobzektif. E mon krwar i ale dan sa direksyon.

Me Mr Speaker klasifikasyon en letablisman i pa kapab baze zis lo akomodasyon tousel. Mon krwar i bezwen, enkli tou sa ki vir otour sa letablisman e akomodasyon. Nou vwar pour dir sa Prozedlwa pe met devan ki plitar pour annan bann Regilasyon. Par egzanp bann vertical integration ki pou vini plitar sa bann keksoz.  E nou demande la ler mon’n ekout bann entervenan avan mwan i kler ki i annan sa bezwen pou annan en konsiltasyon tre, tre enportan ler sa bann regilasyon pe ganny formile.

E an menm tan Mr Speaker pour mwan siport sa Prozedlwa e pour fer ki Minister i konpran ki nou Lasanble pe sey met devan, i enportan pou tous en pe lezot keksoz ki sa bann dimoun ki dan sa lendistri e piblik an zeneral, i reflesir lo la detanzaot. Otreman dir nou lendistri touris i pa kapab reste zis en zafer avek Minister Tourizm. Mon krwar i bezwen ganny gete pli larz ki sa e avek en lizye pli obzektif. E i bezwen enklisif, i bezwen enkli tou Seselwa dan sa sans la pour nou atenn sa lobzektif ki Prozedlwa i anvi attend i enportan ki nou get bann supporting services e lanvironnman dan lekel letablisman touristik i ladan.

Mon anvi share avek Lasanble enn de sityasyon ki mon’n pas ladan, ki’n arive avek mwan. Par egzanp en zour mon ti Praslin e mon zwenn dan letablisman touristik, en koup Alman. E zot pe ale son lannmen e zot byen ankoler.  Mon dir tyonbo en kou mon koz ek zot. E dan sa fristrasyon mon’n konpran zot in isi 1 semenn, en semenn zot in fer Praslin e zot in anvi al lo en lans, lo lans Anse Georgette kot Lemuria laba.

I dir mwan mon pa konpran mon’n vin dan sa pei, mon pa’n kapab war lans ki mon’n tande en zoli lans e bour lanmen dan son pos i ris en ponnyen Ero. I dir mwan si ti devret peye mon ti ava peye! Mon’n isi pour mwan depans larzan la mon’n pe al avek sa larzan? Mon dir sanmenm tou ou fristrasyon i dir mwan non pa zis sa. Mon’n anvi manz manze Seselwa, i dir be la zis diri ek pwason, konmsi en meni pwason toulezour. I dir mwan ‘’sanmenm tou ki zot manze zot tou isi? Napa lezot manze apard sa diri ek sa pwason?’’ Mon dir ‘’be pa in kwi diferan fason?’’  I dir mwan, ‘’non konmsi i mank keksoz1’’

Mon met en lot senaryo. Detrwa dimoun zot sorti dan cruise ship, nou konnen en kantite cruise ship i vini isi Sesel. E mon zwenn zot anvil i annan zot ti’n perdi direksyon semen pe rod tel landrwa mon’n eksplik zot. E an menm tan zot osi zot anvi depans larzan.

I dir mwan be nou’n vini la nou pe fer zournen mon krwar demen osi nou vini en pti bout lanmwatye lazournen, be mon anvi aste en pe souvenir, mon anvi depans en pe larzan isi. E larzan pour li pa enportan, konmsi nothing e li i anvi ed Seselwa; en zoli pti pei i byen kontan me i anvi depanse. Detrwa semenn pase la ti annan Val Des Pres  en brand. Ti annan en lansman brand Val Des Pres ki leritaz Nasyonal ti pe fer.

E zoli pti package zot in fer e mon demande kot pou ete sa e zot dir mwan la Val Des Pres  la nou pou met la. Prezan mon pe mazin sa touris ki’n vin lo cruise ship.  Mon dir zot pour li ariv la i riske pa zanmen arive prezan mon demande be si ou pou vann sa zis la, mon krwar i annan en problenm. Mon dir pran sa zafer la al lo Airport negosye ek bann dimoun dan duty free met en pe laba. Sa bann lo por dimoun ki vini ale i annan en pti boug laba lo por i vann en pe keksoz al pran en pe sa patatran met laba a vann; konmsi pe promot Sesel.

Konmsi ki mon pe sey dir atraver ki mon pe sey prezante i annan plizyer zistwar, i annan plizyer keksoz ki mon krwar plizyer sakenn de nou ki la i kapab rakonte dan sa direksyon.  Ki mon le dir se ki lendistri touris pa kapab get li izolaman, litousel. E Gouvernman an zeneral i bezwen donn koudmen. Pa kapab Gouvernman diferan antite Gouvernman Minister Departman you name it zot pou al H Hotel pou al fer en cocktail isi laba. Mon war en group mizisyen sorti Cuba, sorti sepa Lespanny – sepa kote ki pe zwe! Gouvernman devret bann okenn son bann departman e Minister al fer en aktivite dan en landrwa kot i annan bann dimoun etranze ki pe vin perform!

Oli Patrick Victor? Oli nou bann artis lokal?  Sa ki nou devret pe siporte.  E mwan mon anvi war en sanzman; en sanzman radikal Mr Speaker dan lapros Gouvernman vizavi sa lendistri pli enportan i lendistri touris! I bezwen pran en desizyon i bezwen vin dan Cabinet e zot deside met piblik konnen. Par egzanp dan tou bann lotel e bann gran lotel pa kapab war bann portre bann tablo tousala nou’n enporte. Oli pour Nigel Henrie ki’n mon’n train li pou vin en artis ti mon etidyan letan i ti Cascade? Oli pou Christine? Oli pou lezot ankor, Jude Barallon e leres? Kantite artis ki nou annan dan Sesel nou bezwen pe promot sa bann keksoz Mr Speaker.

E sa i devret enklisif dan whatever  ki zot pe fer dan Minister Tourizm. Mwan se sa direksyon ki mon krwar, whatever rating ki devret ganny fer whatever nivo ki zot oule anmenn akomodasyon dan lendistri touris i bezwen ganny fer.  E sa body ki mon war dan Bill ki pou al gete dan bann landrwa kot sa letablisman pou ete i bezwen get tousala. Minister Tourizm i bezwen met presyon lo lezot antite Gouvernman. Pour dir si i annan en landrwa par egzanp si i annan problem semen e ki  vreman sa touris, vreman mon’n ekoute – en bann lensekirite.

Se ki si i annan problenm lensekirite nou bezwen adrese – e adres li vit! Bann antite zot bezwen zwenn ansanm e diskite kwa ki priyorite pour nou. E mon krwar nou devret al dan sa direksyon pa kapab annan en landrwa kot touris li i le al bor lanmer swa i le al en serten aktivite, e ki i santi li dan lensekirite.  Alor i bezwen annan en lapros pli korek, pli entegral pli ansanm ki nou bezwen fer pour nou kapab si ou le atenn en pli bon rannman en ganny plis benefis.

Seselwa sirtou ki dan lendistri touris i bezwen pe rip the benefit of sa lendistri. Pour li kapab li osi epanouir e al devan e al pli lwen ankor. Mr Speaker sa ki mon pe dir ou pa kapab, ozordi i annan landrwa ou ale lotel, restoran etranze i pe kwi manze Kreol la! Mon’n war lotrozour, i pe kwi manze kreol, be mon goute be napa gou Kreol ladan! I annan gou etranze ladan. Nou bezwen pe fer en zefor an plis pour ki nou kapab ganny sa kwizinyen Seselwa a latous Kreol ki fer nou sakouy son partikilye ler i vin Sesel i vin gout nou kiltir nou manze pour li kapab vin ankor, e pour li kapab vreman depans larzan ki Seselwa i kapab benefisye.

Mr Speaker nou kapab koz longman lo tousala.  Mon krwar lesansyel in ganny dir. Pa kapab dir mwan napa kwizinyen, bezwen travay avek Mr Flavien Joubert laba. Rod fason annou al dan lekol, ou konnen konbyen manrmay lekol i pa ganny gide propreman apre i perdi sans pour li al fer lekol avanse. Ok, so mon krwar mwan i annan en zefor pli koeran ki nou devret pe fer si vreman nou le tou sa lendistri dan en fason pli profon e dan en fason kot nou kapab parey mon’n dir ganny plis benefis.

E sa rating ki pe ganny fer mon pa kont li konpletman mwan.  Me  selman mon le ki i en rating ki ganny fer ki Seselwa i benefisye sa bann pti letablisman sirtou i bezwen li pa pe santi li perdi ladan. Sa bann rating ki i pe fer konmsi i zis pou gran lotel apre bann pti pti letablisman li ou war li pa kapab, ou suffocate i e i bezwen mor an nesan ouswa i bezwen ferm son pti biznes ki i annan.

Alors mon ou le aret la me selman sa bann pwen ki nou’n mete mon ti a kontan Minis i pran sa seryezman i anmenn li lo lot nivo i anmenn li kot nou Lasanble. Me petet i a pe gid sa Gouvernman pou dir be ale al fer sa bann keksoz met li an pratik akoz i fer sans, akoz nou konnen pou dir Seselwa pou benefisye ladan. I bezwen annan serten Polisi kler lo serten keksoz ki vreman si nou anvi Seselwa i benefisye dan sa direksyon la. Mersi bokou Mr Speaker.

 

MR DEPUTY SPEAKER

Mersi Onorab De Commarmond, zis en pti lanons ki nou pou annan Bills Committee midi. I reste mwan zis 2 dimoun pou koze apre Minis pou fer son summing-up. Be mon ti a kontan ki nou sey fini at least bann entervansyon by midi e si fodre apre midi nou a kontinyen avek Right of rRply Minis. I reste 2 entervenan Onorab Churchill Gill.

 

HON CHURCHILL GILL

Mersi Mr Speaker. Bonzour Minis.  bonzour tou Manm.  Mr Speaker sa Bill i en Bill ki tre, tre enportan. E mon krwar i enportan ki nou sezi lesansyel ki nou bann keksoz ki devret antre dan sa Bill, pour nou asire ki sa lendistri i bouz bokou pli devan.

Akoz pa oubliye pour dir lendistri se bann akter ki fer li marse. E i annan 3 kestyon fondamantal ki mon’n demann mon lekor ler mon pe get sa Bill.

Premye: se eski sa Bill pe

kontribye pour fer sa lendistri fonksyonn lo en laplenn nivo pour tou sa bann dimoun ozordi pe travay, pou fer sa lendistri bouze pou Seselwa?

2enm  refleksyon eski tou sa bann akter ki dan sa lendistri sa ki zot pe eksperyanse, eski i pe ganny adrese dan sa Bill.

E 3enm refleksyon, eski sa Bill i annan bann eleman ki pou asire ki okenn aktivite oubyen pratik ki viz ver sali limaz sa lendistri, oubyen nou pei, eski i pe ganny adrese ladan?

E sa i montre nou ler nou koz lo en Tourism Development Bill ki kantite lenportans, i annan ki nou fer sir son konteni i pe kouver bann keksoz ki tre enportan pou asire ki sa lendistri i a kapab ariv lo en lot nivo. Lo part   1                          dan lenterpretasyon ‘’tourism enterprise’’ in donn en lalis detay pou eksplike son lenterpretasyon.

Me selman Minis i a kapab eksplik nou anba compliance sa bann training ki sa bann lenspekter in fer si in osi kouver parey sa lenterpretasyon pe donnen pour sa tourism enterprise?  Akoz dan sa tourism enterprise i osi koz lo bann aktivite maritim.                   E dan prezantasyon nou pa’n tann kouver sa bout, me nou’n plito tann kouver lo bann etablisman. So Minis i ava eksplik nou ki mannyer sa pou ganny adrese.

Apre lo administrasyon nou’n war osi ki sa fame size vertical integration in ganny nonmen e ladan in dir ki Minis pou kapab come up avek en Polisi lo la. Sa size i en size ki tre complex, akoz endirekteman se li ki kapab vreman anmenn en kontrol, oubyen anmenn en fason fer dan sa lendistri, kot personn pa ganny kit deryer tou dimoun i kapab benefisye avek touris ki vin vizit Sesel.                E ler ou get li dan li menm sa i ti a pliferab ki i vin lo en Act li tousel.  Akoz ler konsiltasyon pou konmanse, nou pou vwar ki bokou plis keksoz pou sorti ki dan sa Polisi ki nou annan egzistan.  Akoz pli ale dimoun pe pli konpran poudir be si nou tou nou le ganny en bout dan sa gato touris, nou bezwen annan serten Regilasyon ki nou pa les en bann ganny plis privilez ki kanmarad.  Alors se i enportan ki petet i demann refleksyon si sa pa devret  lo en Act li tousel. Me si Lasanble i war ki dan sa Act i byen si i la, alors en lot keksoz ki mon a demann Minis se ki ler sa Act i pase – si tou keksoz i pas byen dan konbyen dele ki konsiltasyon pou al konmanse lo sa polisi vertical integración ki’n ganny enkli ladan?

Anba klasifikasyon ek grading ek bann kriter i dir ki Minister ki pou fer sa legzersis. Me pour nou asire ki i annan sa transparans petet ti a pli bon si sa legzersis ti fer par bann assessors endepandan.  Akoz Minister in deza konmans sa pratik kot zot les bann serten keksoz fer par bann akter endepandan. Akoz sa i deza pe ganny fer par bann substainable tourism labor. So petet ti a bon nou fer en menm formil pour fer sa klasifikasyon pou asire ki i annan transparans dan tou sa bann keksoz pe ganny fer.

E an menm tan sa bann lenspekter pour ganny plis letan pour zot kapab focus lo bann travay ki plis spesifik baze lo zot responsabilite.

En lot keksoz ankor mwan a demann Minis, petet si i pa krwar ti a bon fer antre ladan i annan sa eleman kot toultan nou pe ganny konsern ki akse lo lans, swa par serten touris ki pa reste dan menm letablisman oubyen Seselwa li menm. Petet ti a bon nou komans mazinen si pa ti a bon tou bann akse ki pour al lo lans  – petet dan fitir si nous anti nou pa kapab go back lo bann ki’n fini ganny fer ki sa porsyon Gouvernman i acquire e aprezan nou pa pour bezwen lager ek sa bann lotel pour dir zot, ‘’be gete fodre ou donn semen touris, fodre ou donn semen Seselwa.’’ Otomatikman sa i anba Gouvernman e nou rezourd sa problenm enn fwa pour tou.

 

(APPLAUSE)

 

HON CHURCHILL GILL

Anba Appeals Board mon ki STB i reprezante lo la. Ou konnen nou lendistri i eparpiye li, i pa zis Mahe parey nou tou nou konnen, i eparpiye. Petet dan plas STB i reganny reprezante lo la, pour letan zot rol in redefinir zot pe focus zot plis lo marketing;  petet sa plas i devret sed pour en dimoun petet ki kapab reprezant Zil Pros. Akoz aktivite touristik parey nou tou nou konnen lo Zil Pros i telman bokou. E bann lezot dimoun ki reprezante lo la tou bann dimoun zot basically baze Mahe. Alors nide se akoz nou pa ouver li, les zil pros osi ganny reprezante, given sa kantite aktivite touristik ki annan dan Inner Island.

Apre lo, yer Minis ti dir poudir i annan en form ki bann dimoun pour gannyen. Eski sa form li menm li pour sa kriter konteni sa form se sa ki-  Oubyen sa i enn?  Apre i annan sa lot bann kriter. Minis ou a zis eksplik nou e si i diferan kan ki sa bann dimoun pour ganny sa bann lalis kriter pour zot kapab komans analize pour vwar kwa ki bann areas ki i annan serten lasistans oubyen otherwise ki zot pour bezwen.

Apre mon dernyen pwen vi ki letan i pa trod an nou faver. Se public meeting mon krwar, bann konsiltasyon ki nou devret fer. Mwan krwar petet pour letan sa i en Regilasyon i devret ganny fer antre ladan ki compulsory. Bann keksoz ki pour ganny enplimante i devret annan bann konsiltasyon dan tou kous kot bann dimoun ki form par dan sa aktivite touristik. Ti a bon nou fer li antre ladan e vin koman en keksoz ki form par dan Lalwa. Mersi.

 

MR DEPUTY SPEAKER

Mersi Onorab Gill.  I reste zis en entervenan. Onorab Ramkalawan. Mwan ti a kontan fini by midi. Mwan pa konnen si ou entervansyon i pour desote. Senpleman akoz nou ti annan Bills Committee.  Eski si non nou ti kapab adjourn en pti pe pli boner e nou kontiny avek ou lentervansyon e Right of Reply ler nou tournen. Nou ti ava fer sa?  Koumsa nou ava fer lazistis pour Bills Committee, sirtou ki mon konnen kwense avek letan avek bann lakantite travay ki zot annan.  E avek sa mwan ti a kontan remersi zot. Nou ava adjourn pour le moman. Me nou a repran 2er apre midi.

 

(BREAK)

 

 

MR DEPUTY SPEAKER

Bonn apre midi tou bann Manm Onorab – tou dimoun ki pe swiv Lasanble Nasyonal – nou 2enm parti nou Sitting pou ozordi le 15 May 2019.  Zis en pti lanons from the Chair an se ki konsern Order Paper ozordi. Parey zot konnen nou ti annan lo Order Paper  en Mosyon ki ti’n ganny mete avek lirzans par Onorab Gervais Henrie ki i ti pe demann pou quash S.I 24,  2019. Parey mon ti  anonse bomaten mon ti’n ganny lenformasyon avek Minister Finans bomaten konmkwa zot pe prepar en  S.I zisteman – pou zot  repeal sa   S.I. E si zot repeal sa  S.I  zisteman i pa neseser ki nou enkli sa  Mosyon   S.I lo Order Paper. Zot in fer mwan ganny en kopi e i en kopi pa orizinal  sa ki zot in deza soumet  avek printers.  E sa  ti sa kopi ki zot in fer Lasanble gannyen i dir konm swivan :

‘’These regulations may be cited as  an Income NonMonnetary Benefits Tax amendment of First Schedule Regulations 2019.

The Income  and Non-Monnetary Benefits Tax  Act  is amended   in the  First Schedule by repealing paragraph 2(a).’’

E zo a rappel dan sa S.I 24 li menm li ki ti entrodwir paragraph 2(a), ki ti donn exemption sa 4 kategori lo items  1 and 2 the  First Schedule Income         Tax Act. Alor lefe ki 2(a) in ganny retire atraver sa S.I. i vedir ki exemption i nepli valid.

Apre son 3enm laliny i dir,  ‘’the      Income and  Non-Monnetary Benefits Tax Amendment of First Schedule Regulations 2019 is hereby repealed.’’

E dan kwen i met’’ repealed of S.I 24 of 2019.’’ 

        Savedir sa S.I lafason mwan mon lir li S.1 24, 2019 i mor, atraver sa nouvo S.I ki zot pe pibliye. E alor mon pa trouv nesesite pou nou enkli lo Order Paper sa Mosyon par Onorab Gervais Henrie. E accordingly mon’n demann Clerk pou revize Order Paper retir li. So vwala lanons ki nou annan.  Aprezan nou pou kontinyen – Onorab Ramkalawan?

 

HON WAVEL RAMKALAWAN 

Mersi bokou Mr Speaker. Mr Speaker mon krwar pou –  si ou permet pou dan lentere Lasanble  Nasyonal e osi  pou piblik  pou konpran  akoz ki yer letan nou’n koze, lo tou kote latab nou’n koz dan sa direksyon.  E lafason ki  ozordi nou kot  nou été.   Nou krwar ki letan Minis in prezant sa S.I, e   nou tou nou ava rapel ki i ti  spesifikman mansyonn Lartik 132(2) dan Konstitisyon ki dir ofet pou 132(2) – non non 133(2)  ki dir,

’’Subject to article 134 the salary allowances  Or gratuity to  – and the  term and other  conditions of service of a justice of appeal or a judge shall not be altered to the disadvantage of the justice of appeal or a judge after appointment. ‘’

Sa i dan Konstitisyon.  Me sa ki Minis in osi manke, se ki sa menm Provizyon parey i mete pou Zis in osi ganny fer pou Prezidan Larepiblik par egzanp.

Lartik 58(3) i menm egzakteman sa ki mon‘n lir.  Pou Attorney Zeneral, Lartik 76(13). Pou CAA, Lartik 142(5).  Pou Ombudsman Lartik 144(5). Pou PSAB, Lartik 150(5). Pou Oditer Zeneral, Lartik 158(11). Alor sa S.I dan  li menm li i   ti pou annan serten mankman ; Parski i a pe fer en pozisyon zis pou en kategori, me non pa pou  bann lezot ki Konstitisyon li menm li i osi demande.

Me solman Mr Speaker mon krwar ki  i annan en keksoz ki nou  pou bezwen rezourd koman en Lasanble Nasyonal, parski i pou vin atraver en Lalwa,  se sa lyen ki annan ant bann constitutional appointees avek public service salary gridsalary table.  I pou bezwen retourn ankor parey i ti été avan, pou ki sak sa bann lenstitisyon anba Konstitisyon zot saler i ganny kontrole par zot Lalwa e non pa par public service salary grid.

Parske le moman  dan sa konneksyon i été e la nou’n vwar, nou menm nou sa deba ki pe annan,  i anmenn son konplikasyon.  Alor petet nou ape ofer e petet sa  en keksoz ki nou avan met devan Gouvernman atraver Lasanble Nasyonal, pou ki nou ava anmenn bann lamannman apropriye, dan tou sa bann diferan Lalwa, pou ki i pa ava tous lo public service salary grid.  E la Mr Speaker mon bezwen dir ki i kler ki pou  sa ban pos Konstitisyon i bezwen annan zot Lalwa ki kontrol zot, e non pa fer bann constitutional appointees vin bann civil servants.

Mon krwar ki nou pou nou bezwen fer sa. E onorab Georges yer in mansyonn konsernan  bann kalifikasyon ki bann Ziz i bezwen ensidswit   ki pli  o  be lemoman ki ou pe met li dan public service salary grid be i posib ki pou annan serten dimoun – parski la Prezidan ki pli o dan sa public service salary grid.  Me i posib ki ou pou bezwen en dimoun ki son saler i pou pli o ki  pou Prezidan. Me la kot i ete la ozordi i pou pri.

Alor tousala se bann keksoz ki  nou pou bezwen e regarde, spesyalman dan sa moman kot nou été.  Alor mon krwar ki poudir i  enportan zis pou fer sa pti tour lorizon – en pti klarifikasyon e pou montre ki i  poudir annan keksoz la ki nou pou bezwen met lord, e ki sa ki nou’n pas ladan, i ava ed nou pou  nou avans devan.

Me an menm tan mon anvi  osi dir ki petet i annan serten konfizyon ant  lapey aktyel ki bann Ziz i gannyen  avek sa ki dan nou Budget Book.  E mon’n gannyen en konversasyon avek Sef Zis apre midi, e i  kler ki poudir i annan en discrepancy.   E ki tousala se bann keksoz ki pou bezwen  balanse – ki pou bezwen regarde, pou nou avan devan. Mersi bokou.

 

 

MR DEPUTY SPEAKER

Mersi Onorab Ramkalawan. I enportan ki mon krwar tou bann dimoun ki pe ekout nou, i konn en pti pe lo Lalwa ki egziste, e sa klarifikasyon ki ou’n  anmennen ozordi i enportan parske i montre vreman pou dir si nou pou al dan en serten direksyon, an term proteksyon saler i bezwen ganny fer  dan en fason ki anglob tou bann diferan apwentman konstitisyonnel pou  fer li dan en fason ki zis e normal.   E alor mon kontan ki sa S.I ki’n sorti.  Sa i a permet  petet plis letan pou kapab annan en meyer solisyon pou kapab trouve  pou  bann difikilte pou okenn sa bann apwentman  zot trouv zot ladan ozordi.

E zot pou zot lenformasyon, en kopi sa S.1 i ganny sirkile – so  zot a vwar li pou zot menm. In ariv atan.

Onorab Pillay ou ti le dir en keksoz ? Mon a permet ou.

 

HON SEBASTIEN PILLAY

Wi Mr Speaker.  Mr Speaker i enportan soulinyen sa ki nou’n vwar avek sa S.I akoz nou bezwen aksepte ki sa Lalwa PIT li menm la, i Lalwa siprenm an ski konsern Lalwa Income Tax dan pei.  E a okenn  moman nou pa devret pe kree bann subset anba sa Lalwa.  Akoz i  vin si oule i kree en move zimaz ki en dimoun i bezwen peye.  Ou konnen i pa sa lentansyon. Malgre ki  lentansyon i bon me  i pou defeat son whole purpose si nou fer li koumsa.  

So mon krwar the best approach as proposed  se ki nou bezwen revwar sa bann respective acts, ki deal  avek sa bann emoluments   bann constitutional appointees e why not osi regard klasifikasyon lo lekel ki bann constitutional appointees?

Akoz par egzanp Esansyelman bann MNAs i ganny elekte zot.  They are elected repesentatives.  E i annan zis 2 kategori si oule public  officers ki ganny elekte.  I annan zis 2.   I annan Prezidan li menm ek bann MNAs.

So tousala mon krwar i bann kestyon ki nou bezwen demande, akoz apre ki nou’n entrodwir sa bann reform ki nou’n entrodwir, nou bezwen kapab osi take stock e vwar ki mannyer sa bann reform in marse e ki  bann problenm   petet zot pe poz nou dan lonterm.  Mersi Mr Speaker.

 

HON DEPUTY SPEAKER

Mersi Onorab Pillay.  Mon antyerman dakor avek sa pozisyon.  Bon  me nou a kontinyen diskisyon lo  Tourism Development Bill e mon ti  ava envit Parliamentary  Reporter pou envit Minis Dogley avek son delegasyon. 

Bonn apre midi ankor Minis Dogley, Mrs Lafortune, Mrs Levkovic, Mrs Senaratne Mr Verghese e Mr Rao, Welcome parmi nou.  E nou kontiny deba lo  Tourism Development Bill. E prosen lo mon lalis mon annan Onorab Ramkalawan. 

 

HON WAVEL RAMKALAWAN

Mersi bokou Mr Speaker.  E bonn apre midi tou dimoun.  Mr Speaker letan nou koz lo Sesel, nou dekrir li koman en destinasyon 5Zetwal.

E tou dimoun Seselwa koman etranze nou aksepte ki poudir Sesel vreman i en bote.  Letan ou pas dan bann pei kot ki konn byen Sesel –   par egzanp Sid Lafrik,  le moman ki ou dir zot ki ou sorti Sesel set en rev ki vin dan zot lespri.  Zot mazin bann zoli lans, zot mazin bote dan sa lanvironnman.  E alor zot anvi vini.  Me kestyon mon krwar ki nou bezwen poze, e mon remarke ki poudir pandan deba in deza konmans ganny poze sa bann kestyon,  se, eski vreman sa destinasyon 5Zetwal ki nou koz lo la i balanse avek sa ki lekspektasyon nou kliyan letan zot vini  an term zot akomodasyon.

Onorab De Commarmond in mansyonnen ki sa touris ti demann kestyon.  I anvi aste en curio, ki napa, i anvi manz en manze Kreol, i pa konnen kot i pou fer, kot i pou ale.

I anvi enjoy sa destinasyon, me i pa vreman konnen ki mannyer pou li kapab fer sa.  Onorab Gill osi tou in mansyonn sa.  Sa 2 keksoz spesifik.

Alor Mr Speaker dan en serten sans, mwan mon pou dir ki nou pa’n vreman pran swen avek sa destinasyon 5Zetwal.  E letan mon pe dir sa, mon pa anvi met okenn dimoun ki responsab, ki dan Minister Tourizm oubyen dan STB.

Mon pa pe met personn on the spot.  Mon anvi plito vwar li koman en refleksyon ki nou fer pou nou kapab finalman ariv kot sa Bill, e pou nou regarde ki mannyer sa Bill i ed nou pou nou avans devan.

E si finalman nou dekouver ki poudir be i annan serten keksoz la ki nou bezwen refer.  Mwan mon ti ava dir annou pa ezite pou nou refer, pou nou repran en pa an aryer afen ki nou kapab avans bokou pli devan.

Mr Speaker mwan mon krwar ki poudir lanfaz in souvandfwa lo anmenn plis kliyan.  E depi letan Minis Loustau-Lalanne ti Sekreter Prensipal oubyen ti ansarz STB, enn sa bann lorganizasyon.

Mon rapel son largiman sete, e sa ki i ti pe met lanfaz lo la, se ki mannyer nou pou increase lakantite kliyan, lakantite touris ki vin
Sesel?

E Minis Touris, apre Minis Touris zot in kontan.  E sa in enn bann keksoz ki sa Minister in pride son lekor letan in ariv ver Novanm poudir lakantite touris ki nou pe ekspekte i en nouvo rikord ! En nouvo rikord.

Nou’n ariv 200mil, fantastik.  Nou’n ariv 300mil, la nou pe ariv lo 350mil!  Nou’n toultan kontan.  E byensir, i en lafyerte ki lezitim.  Parski plis touris i vedir en devlopman dan sa lendistri.  I vedir plis larzan.  E a lafen dizour nou redir ankor touris i reste sa Lendistri prensipal dan nou lekonomi.  E non selman bann touris ki debark Pointe Larue, apre sa ki al dan en lotel.

Me an menm tan osi, la tou resaman nou pe koz bokou lo cruise ship.  Nou pe dir ki lakantite touris ki’n vini dan bann cruise ship i ogmante.

E mwan mon osi tou, tou le bomaten mon kapab, mon kapab donn zot bann ler ki bann cruise ship i rantre dan Por.

Parski dan lakour mon vwar zot depi letan zot pas deryer, deryer Ile Au
Cerf laba, mon swiv sa bato e mon regarde parfwa ki mannyer lo Por. Si i annan en pti bato, dan 30 minit zot in tir li.

Pou ki letan sa cruise ship i kas kontour, i fer letour Ste
Anne, letan i arive sa 2 remorker in fini stasyonnen pou anmenn sa cruise ship dan Por.

Me Mr Speaker, letan nou regard anmenn lakantite, anmenn plis touris.   Mon krwar ki nou bezwen osi demann nou, an relasyon avek bann fasilite ki nou provide pou sa bann touris.

E sa ankor enn fwa in en size ki’n leve bomaten.  Me mwan mon anvi, e Onorab Larue in fer sa byen pou demande.  Be letan Touris i annan bann bezwen, kote zot ale?

E mon, en kestyon ki mon ti ava kontan demande, se depi ki Sesel i ganny li, dizon 100 mil touris par an,  ziska ozordi kot i pe ganny li 300mil e plis ;  konbyen fasilite twalet an plis ki nou’n konstri pou sa bann kliyan?

Anse Source D’Argent.  Nou mansyonn li konman pli zoli lans dan lemonn.  Grand Anse, Anse Source La Digue.  Anse Lazio Praslin.  Grande Anse La Digue.  Fairyland, Beau Vallon, tousala se bann landrwa prensipal, en lentandan.

Tousala se bann landrwa prensipal kot nou bann touris i ale.  Eski nou’n devlop bann fasilite apropriye pou zot kapab debourye.  Kestyon onnetman se non!  Pa’n devlope tousala.

E Mr Speaker mon’n servi sa konman en legzanp, parski sa i en keksoz debaz.  Me aprezan annou met touris de kote.  Parski Minister Touris in kapab dir be, be sa i pa nou responsabilite.

Sa i plis lo devlopman kominoter.  Sa distrik, sa distrik, sa distrik Takamaka kot L’ Intendance i tonm ladan.  Sa distrik Beau-Vallon, sa distrik Anse Royale.

Zot, zot devret met sa dan zot devlopman, dan zot plan, pou ki zot devlop sa bann, sa bann fasilite ki i ava available non selman pou bann touris, me osi pou nou Seselwa.

Nou Seselwa tou i enportan.  E sa bann fasilite i pou tou dimoun.  Alor la nou vwar ki poudir nou pa’n vreman pran swen avek sa ki keksoz.  Me Onorab Larue bomaten in nonm Anse Royale Beach Park.

E se la parfwa kot mon kapab konpran, e mwan mon konpran rezondet deryer sa Bill. E mon krwar ki poudir Minis avek son delegasyon ki ansarz zisteman sa pli gran Lendistri dan nou pei, the mainstay of our economy !

Ki met plis larzan dan, dan lekonomi Sesel.  Mon siny zot trouv zot parfwa an konfli.  Zot trouv zot pe sey lager en fason, me sa lager pa abouti dan nanryen.  Letan touris ti pe rod fasilite pou li al lo en lans.

Zot, zot pa kapab donn fasilite zot.  Parski i depan lo Minister Later ki pou fer sa fasilite.  Letan zot pe ganny sa bann konplent pou kree, pou kree bann pti souvenir Sesel.

Zot, zot rol se pa pou kree souvenir Sesel.  I annan SENPA, lot, lot, lot zot ki sipoze.  E sa i tonm anba en lot Minister.  Be si sa lot Minister pa donn zot sa koudmen, zot, zot pou zis anmas konplent zot.

Akoz letan dimoun i ekrir.  I ekrir Minis Touris, i ekrir, i Sekreter Prensipal touris.  I ekrir Board STB poudir mon dezapwente avek sa ki mon’n rankontre.

Alor mon konpran sa ki zot pe rod fer, pou ki nou kapab ganny plis larzan.  Me annou en segonn retourn en pti gin ankor lo sa size bann twalet.  Ozordi par egzanp tou dimoun i konnen ki poudir Anse Soleil i annan en problenm ; tou dimoun i konnen.

Anse Soleil i annan en gro problenm.  Kot i annan en zoli lans, bokou touris i kontan al laba, me napa fasilite twalet piblik.  Aprezan tou bann touris ki al laba, letan zot bezwen servi en fasilite, zot vwar en restoran la.

Sa msye li son restoran i prive li, aprezan zot al dan restoran sa msye, e sa msye souvandfwa i tre ankoler, i tre ankoler.  E i annan bann, I am sure Minister Touris in bezwen ganny serten konplent.

Be letan nou ganny sa bann konplent, ki nou fer avek?  E mon pou mwan se la kot mon krwar ki sa distrik an kolaborasyon avek  Minis -Minister ek Board STB, zot anmenn en solisyon, zot rod en fasilite, pou regarde si i annan en bout later.

E si napa bout later ki pou Gouvernman, then parey Onorab Gill in mansyonnen, acquire en bout pou donn sa fasilite pou ki sa kliyantel ki nou vreman apresye zot gannyen sa bann fasilite.

E an pli s ki sa, letan Seselwa i ava servi sa bann fasilite, zot osi tou zot ava, ok.  E la Mr Speaker mon anvi, mon anvi vreman servi legzanp en pti zil dan Losean Endyen ki apel Rodrigues.

Rodrigues, mon’n al vizit Rodrigues lannen pase.  E mon kapab dir avek zot ki si nou pa fer atansyon Rodrigues, lafason ki i pe devlope, i pe regard nou, i pe regard Maurice, i pe regard partou kote.

E son planifikasyon i pou fer ki i riske depas nou.  E mwan mon ti vreman enpresyonnen letan mon’n ariv Pointe Cotton ki zot zil, ki zot lans prensipal.  Zot annan fasilite twalet e zot bann touris ki vin la, ek zot bann lokal ki vini, zot ok.

Letan ou regard lo zot kote lapropte ki zot pe met lanfaz lo la, ankor enn fwa i depas nou.  E mon pe, mon pe zis ankor enn fwa servi en senp pti legzanp lo ki mannyer nou take care of nou bann kliyan.

Ou konnen si ou al Sid Lafrik oubyen serten pei Lafrik, zot ankouraz bann ekskirsyon kot zot dir avek ou, walk with the lions.  Kot i annan bann trainers la ou ale, ou mars avek lyon, mars ek lyon i en gran keksoz.

Rodrigues li in devlop en park ki ankouraz touris pou mars avek torti.  E sa ki gou, se ki bann touris pe mars ek tortidter Sesel !  Nou tortidter ki zot mars avek.  Me en touris ki vin Sesel, napa okenn tortidter ki i kapab mars avek.

I al Botanic, i vwar 4 torti dan en park.  I al Linyon La Digue, i trouv 50 torti pe bennyen dan zot labou laba, ok.  Be akoz par egzanp, konmsi bann ptipti keksoz.

Eski nou pa krwar ki si dan Botanic nou ti organiz li dan en serten fason, i annan, i annan sekirite e tou.  Si dan Botanic nou ti larg 25 torti, letan bann pti zanfan, letan tou sa bann touris ki sorti lo bann, lo bann cruise ship, letan zot ti ava rantre Botanic.

Zot ti ava kontan, en pti zanfan pe tous latet en torti, pe tous en torti, pe tir portre ek torti.  Tousala se bann keksoz ki mon vwar mwan.  Rodrigues mon vwar, tortidter Seselwa.

Maurice letan mon al La Vanille, Crocodile Farm, ankor enn fwa mon vwar tortidter Sesel.  Isi sesel sel landrwa ki en touris i kapab tir en portre avek en torti.  E i am sure Minis, Minis Dogley ek nou tou ki la anndan nou konn byen, se Curieuse.

E regard Curieuse letan sa touris i vwar sa torti, i ape tir portre avek.  Se donk Mr Speaker mon pe zis koz en ptigin lo sa kote la.  Pou mon regarde ki mannyer nou pou valoriz nou kliyan letan zot vin Sesel.

Pou nou kapab ganny maksimonm, pou nou kapab ganny sa ki meyer.  Pou ki nou destinasyon i ganny pouse konman, non pa en 5Star destination, me en 10Star destination !

Akoz Sesel se sa nou zetwal ki nou devret, ki nou devret pe annan.  Se sa klasifikasyon ki nou devret donn nou pei Sesel.  Alor Mr Speaker, mwan letan mon regard sa Bill, parey mon pe dir, mon konpran mwan.

E i fer premye Bill mon mazinen ki Lasanble in pase, kot zot pe rod donn en rol Minister.  I premye Bill seryezman kot mon vwar, kot pe dir ‘’the Ministry shall.’’  E apre sa zot detaye kwa ki sa Minister pou fer.

E letan mwan mon vwar sa, mon pa’n dan zot, lo zot latab pe diskit tousala.  Letan mwan mon’n vwar sa, mon’n dir dan mwan menm, sa ki sa Minister i anvi fer se pou li sezi, se pou li own sa Tourism, sa Tourism Industry.

E alor met li lo en nivo, met li lo en standar kot zot ava konnen kwa ki zot bann target.  E rezon, mon mazinen se parske, e la mon vreman anvi dir avek Minis Dogley, ki mon vwar sa latas enorm ki ou annan.

Akoz i annan bokou bann koleg ki’n vin avan ou, ki petet in kree sa montanny ki ozordi ou, ou ape grenpe.  Se ou ki pe anmas sa ki an Kreol nou apel sa lepokase.

Ozordi letan bann taxi drivers i konplent, i tonm kot ou.  Be mwan mon konnen ki poudir i annan en long zistwar par deryer tousala.

Letan bann mizisyen i konplent, e letan Onorab De Commarmond i dir fodre pa ki sa bann etranze i ganny sans pou zot vin zwe isi, me fodre nou ankouraz nou bann dimoun.

Mon ava, mon dakor antyerman avek sa.  An menm tan osi selman,   ou konnen kiltir i bon, enn ler ou annan en melanz, me non pa pou en band vin the in-house band kot i ape.

Me selman lo lot kote osi i demande ki Seselwa i pran li serye.  Parski letan in dir nou pou konmans 6er edmi ozordi, fodre ki sa bann dimoun zot la 6er edmi.

E mwan, i annan 2 landrwa ki mon’n ale, ki mon’n trouv bann Seselwa pe zwe e mon’n vreman touse.  Enn, Dimans apre midi, en Dimans apre midi anler Anse à la Mouche, sa Seafood restaurant ki’n fek ouver –  Lobster Bay.  Kot ou pe asize pe manze, e en zoli pti lanmizik.  Letan mon regarde, mon trouv 2 mon frer pe sante, tou dimoun byen happyLa Plage anler Takamaka, anler Port Glaud, pou mon lanniverser maryaz le 4 Me, 34enm lanniverser maryaz.  Zanfan i dir be dad ek mum annou ale, nou pou treat zot.

Letan nou ale, nou trouv Dave Sinon avek Ms Esparon, zot pe zwe, pe sant zoli lanmizik.  E prezan letan mon’n regard sa, mon dir, be regarde 2 dimoun Lobster Bay, 2 dimoun La Plage- Delplace.

E la HHotel be se 2 Kiben!  Be akoz ki Seselwa pa kapab pran sa.  E mon krwar ki poudir nou annan sa potansyel e se la bann keksoz ki nou devret pe ankouraze.

E la mon, letan mon pe vin lo the core of mon lentervansyon, kot poudir la i la sa bann kalite keksoz ki nou devret pe ankouraze.  E Mr Speaker se la kot mwan mon vini, mon dir petet sa Bill li menm, lafason ki i ete, zot pe al konplik zot lavi.

Pa bezwen rod konplik zot lavi.  Rod fer en keksoz ki pou larg lanmen Seselwa !  Rod keksoz ki pou ede pou ranforsi Lendistri Touris.  E klasifikasyon pa fer nanryen dan, dan fer devlope sa lendistri.

E la mon dakor avek sa ki enn mon bann koleg dan Lasanble in dir.  Ki si nou’n ariv 300mil, savedir zot pe fer en bon keksoz.  Si zot in ariv plis ki 300 mil, san klasifikasyon savedir i annan en keksoz bon ki pe marse la.

E letan en keksoz i bon, parey onorab Loizeau in dir, letan en keksoz i byen, pa repar sa ki pe marseDon’t repair what’s functioning.  Repair what is not functioning !

Klasifikasyon pou le moman, mwan mon krwar seryezman i pa en gran konsern.  Mon pa, letan mon koz ek bann dimoun dan Lendistri Touris, mon pa pe tann zot dir, e be fodre nou annan klasifikasyon, klasifikasyon pe anpes mwan ganny kliyan.

Non, pa sa ki mon tande.  Mwan mon plito tann bann dimoun dan Lendistri Touris pe dir, mon pe ganny problenm avek en kwizinyen.  Mon bezwen fer vini en kwizinyen etranze.  Mon pe ganny problenm avek staf.

La ozordi i annan 2 mon staf pa’n vini.  Mon pe ganny problenm ek mon zardinyen.  Mon pe ganny isi, mon pe ganny laba.  Se sa bann kalite keksoz ki mon tande.  E an plis ki sa, mon tann zot pe dir mwan, mon kliyan pe konplent.

Akoz ou kliyan pe konplent?  Mon kliyan pe konplent akoz mon annan en lotel ki mon bezwen pey touy sa travayer, mon annan mon wage bill pou mon peye, e tou pre avek mon la lo lans, in vin en fanmir Seselwa ki ape zwe lanmizik for.

Mon kliyan pa’n kapab dormi 11er diswar.  Akoz zot in zwe, zot in fer piknik ziska minwi, ziska 2er bomaten.  Se sa bann keksoz ki mon tann konplent dan Lendistri Touris par bann dimoun ki annan bann lenstitisyon.

Alor mwan mon plito krwar ki se sa ki nou bezwen pe repare pou nou donn nou kliyan ki vin lo sa 10Star destination, pou nou donn li en 5Star experience, and why not a 10Star experience.

Se sa ki mwan mon krwar nou devret pe al lo la.   E se pou sa rezon ki sa zafer klasifikasyon, mwan mon krwar seryezman.  E mon konnen ki poudir i annan bann lezot ki’n koz avan mwan.

Ki’n osi koz dan sa direksyon ki pe dir, this is not sa konsern prensipal ki nou devret pe met lanfaz lo la.  Nou devret pe met lanfaz lo ki mannyer pou nou devlop sa Lendistri plis pou nou fer sir ki nou bann kliyan i bon, i byen.

Letan zot vin isi zot konfortab.  Letan en koup pe fer zot honeymoon, e zot in lwe en pti guesthouse pou zot honeymoon, and they are having a good time, ki aswar zot kapab dormi.

E non pa pe tann tou sa bann kalite tapaz.  E yer letan mon’n koz an term, an term par egzanp Anse kerlan, pou dekrir serten landrwa konman, dan sa land use plan.  Pou dir this is a tourism area.

E dan sa tourism area la i la bann keksoz ki nou pou, ki nou pou fer.  E bann seselwa zot bezwen realize ki poudir Seselwa i bezwen li osi tou partisip ladan.  Alor annou, mwan mon ti ava dir zot, annou met en pause avek sa zafer klasifikasyon.

Met en pause e si bann gran letablisman, bann gro lotel zot santi ki poudir zot, zot anvi annan en –  parski sa i ava ed zot pou zot atir bann kliyan avek plis larzan,  les sa bann gro lotel al dan klasifikasyon.

Me nou bann, nou bann pti lenstitisyon, pause en kou la.  E ofet Praslin Business Association in koz lo la.  Zot in, zot in dir ki zot santi ki sa 210 letablisman pou kapab ganny afekte.

E zot, zot pe dir, ok zot koz lo konsiltasyon.  Zot in dir ki zot pa’n tro ganny konsilte, e napa sa konsiltasyon parey zot ti ava ekspekte sa.  Mwan mon pa lo Praslin Business Association mwan.

Se sa ki mwan mon’n gannyen, e alor zot pe dir tenir sa lanmenm la, larg zot lanmen, regarde ki mannyer pou kapab fasilite biznes, ed zot e met sa klasifikasyon laba lo kote.

Krwar Mr Speaker, pli boner letan mon’n dir ki sa Minister Tourizm i pas dan bokou problenm li.  Parski li i ape lager avek bokou bann lezot Minister.

Ou vwar letan par egzanp ou pran Anse Royale, sa fun park ki Onorab Larue in koz lo la.  Son concept i fantastik.  E ofet parfwa letan, letan en dimoun i al Brighton L’ Angleterre par egzanp, Brighton L’ Angleterre ok.  I petet lans pli pre avek Lonn, i fasil pou ale.  E, me selman apre sa i annan  bann aktivite, i annan bann aktivite lo sa lans kot ou al zwe tou kalite zwe, bann zanfan i annan tou kalite keksoz, i annan aktivite.

E petet i annan en pti landrwa kot i annan bann pti show ki zot fer ensidswit.  Be Anse Royale, mon konnen mwan ki poudir Lendistri Touris ti pe osi regard sa koumsa.  Pa zis en fun park pou Seselwa.  Me en fun park pou nou bann viziter, melanze avek Seselwa.  Parey Onorab De Commarmond in dir, pou zot kapab manz en bout friyapen, vwar kot pe kwi en kari zourit.  Met ansanm manze kot en band kanmtole pe zwe lo en stage, moutya.

Regard letan zot ti fer sa moutya, sa levennman moutya, ti plen.  Egzakteman, ti plen, pa zis avek Seselwa me avek touris osi tou.  Me regarde ki mannyer in deteryore, ok ?

I annan tou fasilite li.  Letan zot ti konstri li i ti annan tou fasilite twalet.  Ti annan fasilite pou barbeque tou.  Me dousman, dousman pa’n okipe, Seselwa in vin pran dalo.

Letan in fini pran dalo, in antre in pran kabinen, in al avek kabinen, in pran in al avek lavabo.  Apre sa zot in vin tir tiles e ozordi i zis son striktir debaz.

Me aprezan pou fer li pli pir, dan en landrwa ki ti sipoze en fun park, la aprezan nou tande, Fire Brigade pe pran en bout, Fire Brigade pe pran en bout dan en fun park.

Pli devan PUC i pran en lot bout pou li fer en substation.  La aprezan landrwa kot pou fer en pti entertainment i vin preski, i vin raptisi.  E mon ti riye lotrozour letan, ordinerman letan ou demande pou servi sa landrwa, ou demann Ladministrasyon Distrik.

Dernyen fwa mon’n ganny lenformasyon ki pou dir ozordi si ou anvi servi sa stage avek sa pti bout laplenn, ou demann Fire Brigade !  Fodre ou demann Fire Brigade Latanier Road permisyon pou ou kapab servi sa landrwa !

Be obviously nou bezwen, i annan en keksoz ki mal somewhere la.
There is something wrong somewhere e se sa ki nou bezwen repare.  Mr Speaker lenspekter pou al vizite pou klasifye, mwan mon dir gaspiyaz letan.

Akoz?  En lenspekter pou vin vizit ozordi, kekfwa i a vin vizite dan 3 mwan oubyen dan 6 mwan, bann pouvwar ki bann inspectors i gannyen.  Me ou konnen lekel ki enspekte ou lotel toulezour?

Me se ou kliyan, sa kliyan ki vin reste dan sa guesthouse, li ki pe enspekte sa lotel toulezour.  E sa ki enteresan.  Parey ankor enn fwa in ganny dir – sa assessment ki sa kliyan i fer, i deza pe ganny, i deza pe klasifye lotel.

Ou antre dan tou bann lenstitisyon konmela, ou vwar zot e bann lenstitisyon i met sa anler byen, byen, parski zot vantar letan zot ganny sa Trip Advisor 7 pwen lo 10, 9.1 lo 10, 9.9 lo 10.

Zis konman ou rantre kot resepsyon, sanmenm sa premye keksoz ki ou vwar.  Alors sa klasifikasyon li, i a pe ganny fer deza.

Letan sa kliyan i anvi vin Sesel ozordi, plis ki 70 poursan parey zot konn byen, 70 poursan kliyan ki vini dan sa 300mil ekek touris ki nou gannyen, zot pa vin atraver en Lazans.

I annan zis mwens ki 30 poursan ki pe vin atraver en lazans kot zot.  Larestan zot fer zot prop, zot fer zot prop booking.  Zot fer zot prop fason pou zot ariv isi.

Be si 30poursan pe vin atraver lazans e 70poursan pe vin lo zot menm, la deza ou kapab dir i annan 70poursan touris ki ava tonm 70, 140, 270.  270mil lenspekter nou’n fini gannyen.

Fini ganny 270mil lenspekter.  Ki letan zot retournen, swa zot pou met en pti soz lo Trip Advisor.  Ti fantastik sa sezour, mon pou rekomande ki son landlord ti very nice, very helpful.

Mon pti zanfan ti tonbe ti tap son zenou, ti anmenn li lopital, ti pran tou swen avek li, tousala.  Be ou’n fini ganny sa assessment.  Ou’n fini klasifye.  Alor nou, annou pa duplicate sa travay.

E se sa ki mon pe, se sa ki mwan mon pe dir.  Inspectors dan zot, dan Minister Tourizm, wi i annan en rol, inspectors al regard bann failures !  Al fer sir ki sa bann, sa bann lenstitisyon la, sa bann lotel, sa bann letablisman zot safety procedures, zot bann safety facilities i ok.

Ki poudir napa en trou ki en touris i kapab pase tap son lipye, pas kot en, pas kot en letablisman aswar pou regarde ki poudir i annan ase, i annan ase lalimyer.  Regarde osi tou lo semen.

Parey Onorab Pillay in mansyonnen, sorti Glacis pou al lot landrwa laba.  Fer sir ki bann street lights i marse, pou ki bann lenspekter aprezan i kapab telefonn PUC.

Parey ki bann lezot dimoun osi tou i fer.  Telefonn PUC pou dir isi se Minister Tourizm, isi lenspekter tel dimoun, nou vwar ki poudir lalimyer Mare Anglaise pa marse.

E touris ki sorti tel landrwa pou al tel landrwa i annan problenm.  Oubyen ki pou dir nou bezwen plis lalimyer akoz i annan 2 kliyan ki’n ganny atake la, lo bann trails.

Lenspekter i kapab regarde pou fer sir ki touris pa pe ganny atake Copolia: touris pa pe ganny vyole letan i pe al Anse Mazor.  Sa bann keksoz koumsa, sorry, sa bann keksoz koumsa, mwan mon vwar ki sa i ava bann rol pou bann lenspekter.

Pou fer sir ki nou pe take care of sa, of sa destinasyon e nou a pe donn safety.  Mr Speaker se la osi tou kot bann dimoun pe dir, double standards.  Par egzanp letan, letan mon ganny call sorti.

Well pa la ozordi an Me.  Me letan mon ti ganny en call sorti kot bann garson ki pe vann fri ek, pe vann fri lo lans La Digue, e ki ti’n fer bann pti shelters avek brans koko.

Nou tou nou konnen, si ou lo lans Grand Anse La Digue, ou en touris, i annan zis soley, napa pye dibwa pou ou al kasyet anba la.  Alor zot ti’n pran en linisyativ pou zot fer bann pti shelters.

E bann touris ti pare pou vini, pou donn en pti €5, met zot servyet anba sa pti soz koko, pou zot letan zot sorti lo lans, zot vini zot ganny en pe lonbraz.  Parske mon krwar lo lans, lo sa lans laba La Digue i annan zis en pye sed.

I annan zis en gro pye sed ki pa donn lonbraz.  Me ki ti arive?  Lapolis ti vini ti demont tou sa bann zafer, zete e dir avek zot, pa fer sa bann keksoz koumsa.  Zot pe vann en pti fri.

Ok, lapolis apre i dir ‘’Arh ou konnen in ganny konplent, touris i ganny harassed ensidswit e tou.  Me selman nou tou nou konnen osi ki poudir, bokou sa bann zenn fiy touris ki vin Sesel zot ki kontan zot Rasta men! 

 

(laughter)

 

HON WAVEL RAMKALAWAN

Zot kontan zot Rasta men!  Sa bann boug konmsi parfwa enn ler, zot pa pe harass touris zot.  Se touris ki vin rod zot Rasta men. Pa i vre Onorab Gill?  Zot vin rod zot Rasta men – zot kontan.

E selman li akoz i en Rasta men letan i pas lo lans gard i tay ek li, i rod fer tou kalite keksoz ek li, i harass li.  So be letan nou regard sa ki pase La Digue, me apre sa letan nou vwar lo bann brochure lo Alphonse, Blue Safari, be mon vwar egzakteman sa ki zot pe fer laba.

Kot zot in met zot bann parasol lo lans, dan delo, zot in met zot bann latab.  Touris pe manze lo lans, anba zot parasol.  Be ki diferans i annan ant en parasol lo zil Alphonse avek en pti kouvertir fey koko lo La Digue ?

Mon krwar nou bezwen balanse.  Letan Ras Ricky in sey, in regarde, in vwar ki poudir i annan bokou touris ki petet zot pa anvi dormi lo zot servyet lo lans.  Me ki i annan nesesite e i en bon market pou li annan sa bann sofa, bann sofa, loungers, bann beach beds.  Pou li met detrwa beach beds avek en pti keksoz.  Be in ganny problenm !  In gannyen problenm.  Mwan mon annan levidans ki poudir apre zot ti fer en miting, ti anvoy let kot Licensing Authority, apre sa
SRC ti ekrir li osi tou.

E son sel lavantaz ki zot pa’n kapab tous li ziska prezan, se parske sa aktivite is not a licensable activity !  Alors mon pa bezwen en license pou mon vin lwe 4 beach beds.

E Mr Speaker tousala mon pe dir, pou nou pa osi annan double standards.  E mon frer anba L’ Intendance, lo lans L’ Intendance, regarde ki mannyer li konman en Seselwa, ki’n met en pti stall kot i a pe vann en pe fri, i fer en pti cocktail tou.

Ki mannyer in nobou partisip dan fer sa Lendistri monte.  E nou osi, mon konnen poudir Lendistri Touris in praise li.  Parski in dir avek mon, “ zot in vin kot mon, zot in praise mwan”.  Akoz?

In osi met en, in osi rod en, enn sa bann life ring.  Ki mannyer i apele? Life ring, in met enn la.  E ziska aprezan i dir avek nou, in sov plis ki 5 touris ki ti ape noye ! Fantastik !  E sa sete en linisyativ lo li menm.

Parey lotrozour mon ti mansyonnen osi, mon frer anba Anse Forban, ki ti ganny en bon, en bon aklamasyon, i ti menm al State House.  Kot i ti ganny felisite, akoz i ti sov detrwa touris ki ti a pe, ki ti dan difikilte noye.

Alor Mr Speaker mwan mon krwar ki sa Bill i devret pran en lot dimansyon.  E mon krwar ki Lendistri Tourizm li menm li, Minister Touris, i bezwen regard bann keksoz ki pou ede, ki pou ed travayer, ki pou ed sa Lendistri.

E nou konman en Lasanble, nou pou donn zot full sipor.  Parey zot konnen, ki poudir letan Minister Touris pe vin isi pou nou diskit lo zot Bidze.

Nou enterese pou nou regarde ki mannyer nou pou donn zot lankourazman pou zot kapab fer pli byen.  Par egzanp en lot keksoz ankor ki zot bezwen sort out.  Service charge.  Boner nou’n koze lo travayer.

E service charge i kapab enn bann keksoz ki ankouraz dimoun pou reste dan sa Lendistri, oubyen pou rantre dan sa Lendistri.  Me ozordi i annan dezord.  Casino Liberte bann travayer i dir zot pa ganny larzan ki zot devret gannyen.

Dan bann tips, service charge, whatever i ganny partaze dan en fason ki pa normal.  Savoy mon koz ek bann travayer, zot dir avek mwan zot ganny problenm.  Preski dan tou, H-Hotel menm zafer.

Preski dan bokou bann lenstitisyon i annan bann problenm, akoz?  Se parske napa en standar.  E mwan mon krwar ki poudir olye al rod klasifye bann lotel, serten standard pou service chargeTake it onboard. 

Pou ki sa travayer i konnen ki poudir i donn tou, i travay byen, letan i ariv la fen di mwan kliyan in donn bokou plis tips.  Kliyan in satisfe avek zot servis, sa, i ava azout avek sa service charge whatever, dapre ki mannyer zot normaliz li.

I al kot li kekfwa avek 2 fwa son lapey.  Be pa i gou.  Be sa boug pou ganny lanvi retournen.  E si an menm tan nou ankouraz li pou vin pli serye dan son travay, e vwar kot i annan bann posibilite promosyon, e letan mon swiv, letan mon swiv sa progranm lo Lendistri tourizm, nou’n vwar.

Lotrozour ti annan en zenn garson, mon pa mazin son non.  En zenn garson ki’n ganny promosyon.  I travay Allamanda, Allamanda Hotel.  In ganny promosyon, i travay dan lakwizin, in ganny promosyon, be bougla happy, napa personn ki pou bouz li !

E letan bann Seselwa i vwar ki poudir zot pe monte, parey Doreen De Suza, ankor enn fwa
GM Allamanda, kot, be sa i vin en lankourazman pou lot ki pe, ki par anba.

I dir be mon osi tou mon kapab monte.  Alor Mr Speaker mwan mon krwar ki ozordi sa ki nou pe koz lo la dan sa Lendistri se pa klasifikasyon ki nou bezwen.  Mwan mon krwar ki letan mon vwar Tourism Development Bill,  e son part 2 letan i pe koz lo rol Minister.  Mwan kekfwa mon ti ava kontan si sa bout la ti ganny pli devlope pou, pou nobou mete ki mannyer The Ministry i pou vreman take care of sa Lendistri.

Ki mannyer i pou kapab, i pou kapab fer bann kliyan letan zot in isi, kontan pou retournen.  E an menm tan osi, atraver sa, ki mannyer i kapab osi fer desann pri.  Konmsi pou en kliyan pa vini pou dir i tro ser.

En SeyBrew ki kout, en SeyBrew ki kout, sa mon krwar i en krim sa.  En SeyBrew ki laboutik i kout R25, ou al dan en lotel, serten ou a pe pey R110, R110 en SeyBrew?  Be pou mwan konman en seselwa, pou mwan konman en Seselwa mon trouv li i tough.

Parske ou pa kapab dir, mwan mon en Seselwa mwan, vann mon R35 epi mon rann ou sopin, ok ?  Mon ava fer sir ou reganny ou sopin.  Tousala se bann keksoz ki nou bezwen adrese pou nou regarde.  Ki mannyer nou pou ankouraze?

Pou nou par egzanp regard nou bann, nou bann pli pti, pti letablisman lo nivo tax.  Ozordi sa Seselwa ki, sa kestyon ki Onorab William ti demande.

Sa Seselwa ki li i annan mwens ki 15 lasanm, i a pe pey menm tax avek, avek Four Seasons.  Eski i pa ler pou nou regarde, pou nou kapab ed sa Seselwa li osi tou,  pou li kapab pey mwens taks.  Annou, annou annan en konsesyon, en konsesyon pli reel pou nou bann Seselwa.  Afen ki
Seselwa i ava kapab kontinyen donn sa bon servis.

E ou konnen, Mr Speaker, letan parfwa ou regard en dimoun ki’n met ansanm en keksoz, ou konnen, i reste vizavi en zoli lans, e touris i kontan vin lo lans letan zot vin
Sesel.  Aprezan in konmans fer son pti biznes li.

E apre zis i vini, i dir ek li, non, non, non, non, non, non, non, non kennsel.  Pourtan touris ti a pe vini, touris ti kontan vin reste dan son pti lotel, me apre sa zis i bezwen arete.

E la mon pe koz lo enn mon ser Chanty Lepere i reste vizavi Marie Laure.  Ti annan li son pti lenstitisyon 4 lasanm, ti pe ganny son touris, ti a pe vini normal.  Zot in dir li non, non i pa kapab.

E ozordi ki i bezwen fer, parske i bezwen viv, i bezwen ferm son lotel, la prezan i pe lwe sa avek en lakonpannyen konstriksyon, ki’n met 4 mason ladan.  Pa normal, i annan tro bokou kontrol.

Annou devlop sa Lendistri Touris, annou ganny en Bill ki kot nou ava kapab met mwens kontrol, me mentenir standar.  Mentenir standar avek mwens sa bann kontrol ki olye ankouraz Seselwa, ganny en larzan dan son pos, i plito detri li.

E an plis ki sa, Mr Speaker, pou nou donn plis lankourazman.  Lankourazman Seselwa prensipalman pou rantre dan sa Lendistri, pou nobou debourye.

Alor mwan mon krwar ki seryezman Mr Speaker, pou mwan personnelman, e mon’n koz avek plizyer dimoun lo tou le de kote latab.  Sa Bill li menm li ki mannyer i ete, mon ti ava dir mon anvi donn zot tou lankourazman.

Me eski i pa ti pou posib pou nou petet koz en pe plis.  Pou nou regarde kwa ki nou kapab tir dan sa Bill.  E ki, kwa ki nou kapab defer pou nou ganny en keksoz ki pou vreman vin sa Tourism Development Bill;  ki letan, letan nou sorti avek sa dan Lasanble, Minis i konnen ki poudir i annan li en zouti ekstraordiner.  E kot, e non selman en zouti, me kot i osi annan ledan pou li kapab ede pou fer sa destinasyon, ek son servis ki bann touris i gannyen vin enn ki vreman, vreman solid.

Mr Speaker mon’n koz, mon pe regard ler, prezan mon realize ki poudir ou’n vreman zenere avek mwan, ou’n vreman, vreman zenere avek mwan.  Me selman lafason ki zot in reste trankil, mon krwar mon pa’n tro fer zot dormi, mon pa vwar personn pe dormi.

E lafason osi ki mon’n resevwar serten, serten reaksyon, mon krwar ki zot in, mon’n nobou eksprim sa ki bokou nou pe panse.  Alor mwan Mr Speaker mon, mon pa kapab fer li akoz mwan ki pe, akoz mwan ki pe koze.

Mon ti ava demande ki i annan en keksoz plis ki ganny fer.  E parske i pou annan osi serten, i annan bann lezot pwen teknik kot pou al kot bann, lo bann pwen spesifik ki mon’n osi fer son travay, e mon’n osi travay lo la, pou fer serten propozisyon.

Me Mon krwar ki klasifikasyon pa sa ki nou bezwen la, i annan bokou lezot keksoz ki nou bezwen.  E mon ti ava demande ki nou pran sa bann keksoz an konsiderasyon.

E mwan avek tou, tou respe pou Minis avek son lekip, mon krwar ki mon anvi etann sa lanmen, poudir ki nou tou dan sa Lasanble, pa zis lo kote LDS, pa zis lo kote US, me nou tou.

Akoz sa Lendistri i konsern Sesel an antye ;   i konsern lopital, servis ki mon pou gannyen.  Akoz vi ki i anmenn larzan i konsern semen ki pou ganny konstri, akoz i anmenn larzan, we want to see the best.

E nou ti ava kontan vwar zot ganny the best possible Lalwa.  E krwar ki nou pou kapab, nou kapab donn zot lankourazman e fer li.  Mersi bokou Mr Speaker.

 

MR DEPUTY SPEAKER

Mersi Onorab Ramkalawan pou ou diskour byen pasyonnen lo en size ki, ki mon krwar i enteres tou dimoun.  Mon napa ankor entervenan.

I annan Minis ki mon a donn li son, son Right of Reply.  E mon mazinen apre nou ava ekout son
Right of Reply, nou a konnen ki direksyon nou anvi ale.  Alor mon ava les, mon a les Minis fer son Right of Reply.  Minister.

 

 

MINISTER DIDIER DOGLEY

Mersi Mr Speaker.  Bonn apre midi tou dimoun, bann Onorab e tou dimoun ki pe ekoute dan lakour.  Mr Speaker mon’n ekoute tre atantivman pandan bomaten e menm ozordi apre midi tou bann kontribisyon, bann deba ki bann Onorab in fer.  I annan en gran levantay issues ki’n ganny leve.  Mon ava sey tous en pe lo bann ki key akoz si mon pas lo to mon pou depas Onorab Leader Lopozisyon lo la kantite koze ki mon pou bezwen fer.

Pour konmanse mon ti a voudre dir laplipar bann kontribisyon avek bann diskisyon in plizoumwen baze lo sa bout ki annan pou fer avek klasifikasyon.  E i paret poudir mon konstate ki i paret poudir bann lezot konponan sa Bill ki nou’n anmenn devan Lasanble i pa paret i annan bann gran kontestasyon lo sa bann lezot konponan.  I annan ki’n demann klarifikasyon konsernan travay bann lenspekter, me osi bann lezot keksoz ki pa neseserman dan sa Bill me ki petet endirekteman pou ganny touse atraver sa Bill ler i vin anfors, e si i vin anfors.

Parmi bann zouti ki normalman okenn Minister i annan pou li travay avek se normalman parey mon’n dir i annan son Master Plan, i annan son bann stratezi.  I annan son bann policy.  Me osi i annan bann Lalwa ki donn li sa ledan si ou le pou li kapab fer keksoz bouze.  E nou ki responsab pou promosyon e devlopman touris nou’n met an plas nou Master Plan lannen pase.  Stratezi ek action plan nou’n fini fer.  Nou sipoze lans li mwan prosen.  E la nou avek sa bout ankor ki kle pou nou kapab annan tou nou zouti pou fer keksoz bouze.  Se sa bout Lalwa.  E se pou sa ki nou’n anmenn li isi pou nou kapab ganny zot kontribisyon e petet osi eventually ganny zot aprouvasyon.

Ler nou fer bann keksoz parey klasifikasyon i ed nou pou nou annan plizoumwen sa ki nou apel en consistency dan la fason fer keksoz.  I ed nou osi pou nou annan en pli bon entegrasyon dan sistenm. E pou bouz devan dan en fason pli organize.  E Leader Lopozisyon in koz lo posibilite ki en pei i kapab slide behind.  I kapab retourn an aryer ki sifo al an avan.   In pran legzanp Rodrigue ki dapre li i pe fer bann gran lepa an avan.  E pou ou kapab fer bann lepa an avan se sanmenm sa ki mon pe dir ou bezwen annan bann planifikasyon.  E nou bezwen annan ou bann stratezi.  Me osi ou bezwen annan  bann zouti kle pou fer ou kapab bouz devan.

E petet nou  ler nou pe krwar nou e al an avan, akoz nou annan en kantite touris ki pe kontinyen vini.  Sa lannen nou’n ariv – lannen pase nou’n ariv 362mil touris ki’n vini e sa lannen nou ekspekte poudir nou pou tous dan 380 ekek mil ki pou ariv Sesel.  E ankor kekfwa dan 2an, 3an nou pou tous 400mil.

Me la diferans ant promosyon avek ler dimoun in ariv Sesel, lo zot ekspektasyon  avek realite i en keksoz ki bezwen balanse.  Akoz si i pa balanse ler sa bann dimoun i vin isi rev ki zot vin avek, avek leksperyans ki zot retourn avek se zot i kapab koz domaz pou dan le fitir.

Par egzanp nou’n vwar poudir ler ou konpar Sesel avek bann lezot zil destination dan la rezyon, nou bann repeated visitors i bokou pli ba konpare ek Maurice e konpare avek Maldives.  E enn bann rezon prensipal ki no ganny sa bann problenm zot dir nou, akoz touris ki dir nou.  Pa nou ki pe dir.  I dir nou poudir kalite servis ki zot in gannyen Sesel avek value for money ; savedir valer ki zot depanse Sesel pa balanse.  I vedir endirekteman i pe dir nou poudir nou annan en kantite travay pou fer pou tackle sa de problenm grav.

Ler nou regard en touris ouswa en viziter ki sorti aletranze ki pe vin Sesel e laplipar nou bann viziter i sorti lerop.  Ler nou break zot depans dan konponan par egzanp flight ki zot bezwen peye, tiket avyon, akomodasyon, manze apre kekfwa bann aktivite lwazir lamazorite zot larzan i al dan pey biye avyon.  E 2enm i al dan akomodasyon avek si zot in pran half board ouswa full board laplipar larzan i pou roul kot sa lotel li menm.

Alor si nou pa fer sir poudir kot sa bann akomodasyon kot sa bann lotel, kot sa bann landrwa ki resevwar sa bann touris kalite servis ki zot gannyen e sa rev ki zot in aste, sa ekspektasyon ki zot in vin avek i pa ganny meet ler zot i ariv kot sa bann landrwa, nou pou toultan vwar nou dan menm problenm.

E nou’n koze nou’ n dir poudir be ozordi i annan Trip Advisors i annan tou sort kalite platform, ki i posib e menm bann tour operater ki kapab klasifye bann lotel e ki bann dimoun an zeneral zot satisfe.  E ler zot vini zot vwar Trip Advisor in ganny 8 lo 10, 9 lo 10.  I vedir ki poudir tou keksoz i ok.

Be an prensip parey Onorab Loizeau in dir kekfwa zis ler en visiter in vini in vwar en kankrela pase dan  en lasanm e si li sa dimoun i annan en fobya avek en kankrela i ase pou li donn ou en zero lo 10!

Me ki normalman ou lotel i prop i pa neseserman annan kankrela me malerezman sa zour in annan en kankrela ki’n pase.  Alor sa i vedir poudir parler depandan kantite reviews ki ou gannyen i posib poudir ou ganny bann reviews ki subjective, baze lo bann kondisyon ouswa bann levennman malere kekfwa ki’n arive sa zour.  Ouswa ti annan en boug ti pe zwe lanmizik sa zour ouswa ti pe fer tapaz ase pou donn ou en move review.

Sa ki mon le dir se ki sa bann reviews i tre subjective i pa neseserman enn ki balanse ki obzektif e ki transparan.  E ki donn si ou le bann viziter sa garanti poudir bann keksoz ki pe ganny evalye i ganny evalye across the board e i pa pe ganny evalye pirman anler lo leksperyans en dimoun pandan en serten letan ki ti laba.

Nou sa ki nou ti a voudre fer se ki kontinyen travay avek Lendistri akoz se Lendistri ki drive sa bann partners bann actors dan lendistri ki vreman konn sa Lendistri.  E nou dan Minister nou fully committed pou nou kontinyen travay ek bann dimoun dan Lendistri pou nou kapab fer monte nou standar.  E adres egzakteman sa de problenm fondamantal ki mwan a plizyer repriz mon’n koz lo la.

I annan Onorab ki’n dir klasifikasyon petet pou anmenn plis konplikasyon.  Petet nou Seselwa nou pa ankor pare.  Nou pa ankor annan sa kapasite pou nou fer li.  Baze lo resers ki mwan mon’n fer klasifikasyon i paret i egziste depi 1950.  Savedir ozordi ouswa lannen prosenn i pou annan 70an depi ler i egziste.  E si pandan 70an in marse pandan plizyer pei.  E mwan mon pran en legzanp parey pei Ireland – Irlann ki i depan en kantite lo touris parey Sesel akoz i napa bann lezot resours pou li depan anler lo la.  Ki’n fer li met li an plas ki pe marse e si zot kapab fer li mon pa vwar pour ki rezon ki nou Seselwa konman en pep nou napa kapasite pou nou fer parey.

Nou’n koz osi lo konsiltasyon.  Mon ti a voudre fer rapel Lasanble poudir konsiltasyon lo klasifikasyon ti konmanse depi an 2015.   E in annan plizyer workshop.  In annan bann diskisyon 1 lo 1.  In annan bann vizit ki’n ganny fer.  In annan bann lenformasyon ki’n ganny mete dan lapres, lo medya eksetera.  Alor pou nou, nou vwar li drol poudir i annan dimoun ki dir ziska prezan zot pa’n ganny konsilte.

Me solman sa i pa en problenm akoz Minister i believe dan konsiltasyon e nou, nou pou kontinyen annan bann konsiltasyon lo bann aspe sirtou ki en problenm pou bann dimoun.  Now, ki bann benefis mon’n ganny demande ki en keksoz parey klasifikasyon pou anmennen si pa pou anmenn nou plis konplikasyon eksetera.  Bann benefis ki mwan mon okouran se ki enn i pou donn en pli bon garanti e standar e profesyonnalizm bann dan tourism an zeneral a e menm pou bann viziter ki oule vini at least, i pou annan en garanti poudir i annan en sistenm ki konsistan, ki’n ganny evalye par en body ki endepandan, ki napa lentere direkteman dan sa keksoz.

Epi i kapab ganny servi osi konman en marketing tool, parey sa enn ki nou’n dir ki Trip Advisor i donnen ki bann dimoun i pran i met anler lo zot larantre ler touris i vini.  E an menm tan nou ti sey promot sa brand Seychelles, Seychelles Secret ki’n egziste depi an 2005.  I en keksoz ki ganny byen resevwar.  E nou krwar poudir ozordi in byen etabli apre 14an.  E ki nou ti kapab servi li konman en baz pou nou kapab promot bann pti biznes pou donn zot osi sa abilite pou zot al pli devan e grenpe dan la kalite prodwi ki zot donn bann touris.

Akoz pandan tou sa bann lannen, sa bann lannen ki’n pase Gouvernman in toultan promot ki Seselwa i bezwen own sa biznes touris ouswa sa Lendistri Touris.  E ozordi nou vwar poudir a plis ki 60poursan bann lasanm lotel i dan lanmen Seselwa.  Alor i kler poudir i en keksoz ki’n fer en kantite sikse.  Seselwa in tann sa lapel e dan 600mil ekek lasanm ki nou annan plis ki 60poursan i dan lanmen Seselwa.  E Seselwa ki pe fer plizoumwen marse sa Lendistri Touris.  Alor nou,  nou ti a voudre ki dan le fitir ki nou al pli devan.  Ki pa zis Seselwa i own business me Seselwa i drive sa kalite servis e varyete soz ki nou donn bann touris.

Nou’n koz lo  diversification.   E diversification i en keksoz ki pou nou i tre enportan.  Sa cultural tourism ki nou’n koze e nou krwar avek vertical integration sa i pou donn nou plis lafors pou nou kapab dir ek bann lotel ki bann sityasyon parey Onorab Hoareau ti fer resorti yer kot serten lotel pe pran bis e ki pe bypass bann operater taxi.  Ouswa kot serten lotel pe fer vini mizisyen etranze pou vin zwe dan zot lotel.  Ouswa pou servi bann art work ki’n ganny fer par bann artis etranze, nou pa vwar ki mannyer sa i pou vreman anmenn lavantaz pou nou dimoun.

E atraver vertical integration nou krwar poudir nou kapab ler nou’n met li dan Lalwa enplimant li e fer sir poudir sa bann lotel i donn plis loportinite pou donn servis atraver bann operater lokal e Seselwa pou zot osi kapab benefisye e ganny en bout dan sa gato.

Konsernan horizontal integration, sa i deza dan Lalwa Fair Trading Commission.  Alor nou pa vwar li neseser pou re met dan en lot Lalwa akoz i deza annan en lorganizasyon ki pe deal avek.  Me vertical intergration nou’n ganny dir par Fair Trading Commission i pa dan zot Lalwa e zot napa lentansyon byento pou zot sanz zot Lalwa  pou fer sa antre.  Alor nou’n vwar li neseser ki nou,  nou pran sa konman en nesesite ki pou nou fer antre dan nou prop Lalwa.

Konsernan bann lenspekter, i annan bann kestyon ki’n leve.  Akoz ki i annan par egzanp i annan serten vizit ki pou ganny fer avek notice.    I annan ki pou ganny fer san notice. I annan ki pou ganny fer a nenport ler.   Me solman si nou regard sa Lalwa anba seksyon 8 nou pou krwar poudir i ape koz lo diferan keksoz.  Par egzanp i annan bann monitoring ki sipoze ganny fer regilyerman.  Apre i annan bann vizit ki sipoze ganny fer pou donn license.

Apre i annan 3enm ler pou evalye pou klasifikasyon.  Me apre osi i annan bann sityasyon ki kekfwa i annan bann  pratik ilegal ki pe arive kot en lotel ouswa kot en letablisman.

Now ler nou pe koz lo paragraf 5 i koz lo ki bann lenspekter i bezwen donn bann reasonable notice.  Sa i vedir poudir dan bann ka kot i  bezwen al donn license ouswa i bezwen al evalye pou klasifikasyon, i bezwen donn notice sa dimoun at least 7 zour pou sa dimoun konnen i pe vini pou fer evalyasyon.

Sirkonstans kot i pa pou bezwen donn notice se ki si i konnen ki i annan en keksoz ki pe ganny fer ki pa korek kot en lotel, ouswa i pe fer monitoring pou gete si sa lotel pe abide ek bann kondisyon son license.  I pa pou kapab donn sa lotel notice.  Akoz si i donn li  notice definitivman i pa pou vwar nanryen.

E lot sirkonstans kot nou dir i bezwen vin avek en lot dimoun par egzanp ek Lapolis sa se bann letan ler i annan bann ilegal practices ki kapab in ganny raporte avek Minister e li i pe fer en investigation kot i bezwen ale san donn notice e an menm tan al avek en zofisye probableman Licensing ouswa Lapolis.  Alor sa Lalwa i fer provizyon pou tou sa bann diferan sirkonstans kot bann lenspekter  pou bezwen al kot sa bann lotel.

I annan bann Onorab ki’n raise bann zafer konsernan Appeals Board.  Akoz ki napa bann dimoun prive lo Appeals Board.  Sa i en keksoz ki nou’n regarde ki nou krwar definitivman i annan en dimoun ki pou sorti dan sa Lalwa i annan en dimoun ki asiz lo Appeals Board. Enn i pou sorti kot STB Seychelles Tourism Board.  E dezyenm pou sorti kot Fair Trading.  Me trwazyenm i kapab sorti dan private sector.  I pa en problenm sa.  Sel problenm se ki si i annan en dimoun ki sorti direkteman dan sa sekter tourism li menm kot la i kapab annan en conflict of interest akoz si sa dimoun par egzanp i annan son prop biznes ki – ouswa en biznes ki en dimoun ki asosye avek pe ganny konsidere alors sa i kapab koz serten problenm.

Me an prensip  annefe ki nou nou’n fer se ki ler en evalyasyon pou ganny fer, sa dimoun i pou ganny sans vwar sa evalyasyon.  I pou ganny sans pou li regarde e si i annan okenn keksoz ki i pa dakor avek i pou ganny sans re anvoy kot Minister e dir  poudir mon pa dakor ek tel, tel keksoz, alor silvouple si sa i kapab ganny revwar.

Konsernan Island Resort Onorab Flory Larue in koz lo kestyon akoz i annan en klasifikasyon li menm anba Licensing.  Sa i senpleman pou sa kestyon klasifikasyon akoz bann lotel lo bann zil, ler mon pe koz zil mon pa pe koz Mahe, Praslin e La Digue. Mon pe koz par egzanp North Island, Fregate.  Nou krwar poudir akoz ki zot sitasyon i diferan i annan en kantite diferan dan lafason operate ki zot bezwen annan en kategori pou zot menm.  Me sa i pirman pou klasifikasyon.  I pa pou kestyon Licensing e i totalman an deor Licensing li menm.  I pirman annan pou fer avek sa clasification exercise ki nou ti pe propoze. Konbyen ki i pou koute ?  Bann lenspekter i deza an plas.  Nou pa pe plan pou pran lezot lenspekter.  Sa bann dimoun i deza pe travay e sanmenm sa ki nou bann lenspeksyon pou ganny fer tou-le 2an.  Pou re vwar tou le 2an dan en fason pou donn zot ase letan pou kapab vwar sa 600 ekek lotel pandan sa 2an peryod kot sa grading ti pou’n fini an aplikasyon.

Konsernan bann Small Island Secret. Parey mon’n dir sa i deza an plas.  I en brand ki’n deza ganny aksepte.  I en brand ki deza enternasyonalman koni.  I pa en keksoz ki nou pe envante.  I en keksoz ki deza la.  Alor nou,  nou krwar ki i en  baz ki nou kapab kontinyen itilize e promot li e servi li dan sa ka par egzanp pou klasifikasyon.  Me osi pou lezot keksoz akoz in deza etabli konman en brand enternasyonalman.

Konsernan Eden Island, wi Eden Island i annan en Lakonpannyen ki Island Luxury Company ki annan 350 lasanm ki tonm anba li.  Me sa bann lasanm i ganny vwar konman bann luxury lasanm ouswa akomodasyon.  E i pa neseserman direkteman an konpetisyon avek bann pti guesthouse avek self-catering akoz son kalite, son kalite kliyantel ki li i pe rode i bokou bann ki annan plis larzan ki neseserman ki bann kliyan ki nou pe rode.  Akoz sa pri ki zot,  zot sarz bann lasanm i bokou pli o.

I en pe si ou le parey ler nou regard nou Polisi villa kot nou allow serten villa pou ganny vann dan bann gran lotel ler ot devlope, e apre sa bann villa kantmenm in ganny aste par en endividi me solman i kapab ganny lwe konman part and parcel ek konmsi sa lotel.  E si ou le konman Eden Island olye kit tou sa bann lakaz vid Gouvernman ti dakor poudir 350 lasanm i ganny met anba en Lakonpannyen e  i ganny lwe konman en aktivite e zot pey tax parey tou bann lezot biznes isi Sesel.

Pou konklir mon ti kapab dir poudir konsernan klasifikasyon se ki nou bezwen realize se ki i annan kliyan pou tou kalite level grad ki annan.  Pa tou dimoun ki anvi al dan en 5Star hotel.  Pa tou dimoun ki anvi al dan en 1Star hotel.  I annan dimoun ki anvi al reste dan son pti guesthouse, dan son pti self-catering kantmenm i annan larzan pou al reste dan en 4Star akoz dapre li i anvi eksperyans sa kiltir.  I anvi konn Seselwa konman en pep.  E pou li si i al dan en gran lotel i pa pou gannyen sa leksperyans.  Alor pou nou panse poudir i annan en nesesite pou en dimoun absoliman annan en 4Star ouswa en 3Star pou li ganny kliyan i totalman fo.

Akoz pou sak tip kalite akomodasyon i annan son kalite kliyan ki li i enterese pou li al reste dan sa kalite keksoz.  Sa ki enportan se ki sa bann landrwa i meet minimum standar ki Licensing i demande dan  en fason ki sa kliyan ler i al reste laba i safe, landrwa i prop e i pa  vwar li dan en sityasyon kot li menm li i pe demann son lekor ki mon pe fer dan sa landrwa.

Pou fini mon ti a voudre remersi tou bann Onorab pou zot kontribisyon.  Nou’n fer letour mon krwar avek tou bann dimoun.  Mon’n ekout tou le de kote.  I kler poudir i annan serten konsern konsernan sa klasifikasyon.  E nou, nou pare pou asize ekout zot e re diskit avek zot e vwar egzakteman kote zot konsern i ete konsernan sa Bill an zeneral.

E mon a propoze ki Mr Speaker ki petet nou prolonz diskisyon lo sa Bill li menm e ki nou retournen pli tar apre ki nou’n ganny sans diskit bann diferan konponan Bill avek bann diferan konsern ki bann Manm i annan.  E ki nou a kapab retournen avek bann amannman ki neseser ki dan en fason ki nou tou nou konfortab avek sa zouti ki Minister i byen bezwen, pou li kapab fer son louvraz e fer son louvraz bokou pli byen ki i pe fer la konmela.  Mersi Mr Speaker.

 

MR DEPUTY SPEAKER

Mersi Minis.  I kler poudir i annan en lantant ant Lasanble avek Minister pou revwar en pe konteni sa Bill pou reflekte en pti pe bann diskisyon ki’n pase bomaten.  E Minis in fer sa sizesyon ki petet nou devret prolonz sa deba.  E petet meyer fason pou fer sa se ki nou annan en Mosyon ki nou pa pran en vot lo merit sa Bill la ozordi.  Alor si i annan en dimoun ki kapab propoz – Onorab Arissol ou le propoz en Mosyon ki nou pa pran en vot lo Bill ozordi.

 

HON PHILIP ARISSOL

Mersi Mr Speaker.  An vi sa ki Minis fek dir anba Order 22 Standing Orders mon pe move ki nou adjourn deba lo sa Bill a sa moman pou permet plis diskisyon ant Minis e Bills Committee.  Koumsa apre nou ava retourn dan Lasanble.  Mersi.

 

MR DEPUTY SPEAKER

Mersi Onorab Arissol. Eski Mosyon i ganny segonde?

 

HON JOHN HOAREAU

Mr Speaker mon segonn sa Mosyon.

 

MR DEPUTY SPEAKER

Mersi Onorab Hoareau.  Eski nou ava pran en vot lo sa Mosyon.  Tou bann ki an faver?

Madanm Clerk ou a donn nou count ?

Okenn Manm ki kont?

Madanm Clerk ou a donn nou rezilta?

 

MADAM CLERK

Mersi bokou Mr Speaker.  Mon’n rikord 24 manm ki’n vot an faver e personn kont.   Mersi.

 

MR DEPUTY SPEAKER

Ok savedir Mosyon in pase ki nou pa move pou nou al en vot lo merit.  Savedir nou postpone sa deba ziska en prosen ler ki ava apropriye ki nou ava an diskisyon avek Minister Tourizm.  Onorab De Commarmond.

 

HON CHARLES DE COMMARMOND

Mr Speaker mon dakor direksyon ki nou pe pran.  E an menm tan mon ti anvi fer en lapel akoz pangar nou bann Manm i a krwar zis Minister ek Bills Committee tousel, ki pou zwenn.  Ki sa lenvitasyon i ganny extended to other members ki zot kapab osi vini e sort of partisipe si neseser.  E mon krwar Bills Committee Chair Bills Committee i la i kapab osi gid ou lo la.  Mersi.

 

MR DEPUTY SPEAKER

Mersi Onorab de Commarmond.  I en bon sizesyon.  Onorab Waven William.

 

HON WAVEN WILLIAM

Mersi Mr Speaker.  Mr Speaker zis pou konman en pwen klarifikasyon, lefe ki sa i annan en Mosyon pou move pou deba pli tar e mon konnen poudir sa i tonm avek Bills Committee.  Eski nou pe delimit en timeline akoz lefe ki sa Bill i tre enportan pou Sekter Tourism parey nou dir e nou lekonomi, mon krwar the soonest nou kapab deal avek pou kapab permet bann akter e menm Minister pou fer son travay pli byen.  I bon mon ti ava demande ki the soonest ki nou kapab fer sa travay pli bon.  Mersi.

 

MR DEPUTY SPEAKER

Mersi Onorab William.  Mon krwar i en sizesyon tre valab.  Byensir lo mon kote mon ouver lo sizesyon.  I tou depan lo ki lavites bann Manm, Minister Tourizm e lezot akter prensipal i kapab met ansanm. , konbyen letan zot pran, ki dele letan.  Mon mazinen dan en semenn de semenn.  Mon pa konnen ki Minis i krwar.  Minis si petet ou kapab donn en reaksyon mon krwar lo nou kote, lo kote Lasanble mon pe koze, mon krwar bann Manm i kapab fer letan.  E si bann Manm i kapab fer letan, si Minister i annan letan zot kapab zwenn ansanm avek bann akter dan bann etablisman sirtou dan lendistri, nou kapab fer li o sito posib e Minis si ou kapab donn en reaksyon?

 

MINISTER DIDIER DOGLEY

Mersi Mr Speaker.  Mon dakor avek propozisyon ki Onorab William in fer.  Akoz nou osi nou ti a voudre vwar poudir sa keksoz i pa al met parla lo e shelf i pran lapousyer.  Nou ti a voudre poudir keksoz i bouze.  Me pou nou kapab bouze nou bezwen konpran egzakteman ki bann issues ki bann Manm i annan avek sa Bill.

E le moman ki nou’n konpran sa nou a kapab dan en sityasyon pou nou kapab bouz devan.  E pou mwan nou available konmansman demen pou nou kapab konmans travay lo sa bann issues.  Alors si bann Manm i kapab les nou konnen an writing or mon pa konnen posibleman demen pli tar kwa ki vreman i bann main issues, i ava deza ed no pou nou kapab antre dan sa frame of mind, pou nou gete ki mannyer nou pou kapab adres sa bann issues.  Mersi Mr Speaker.

 

MR DEPUTY SPEAKER

Mersi Minister.  Mon ti a demann petet Chair Bills Committee mon mazinen i meyer forum pou nou antre an diskisyon avek Minister, si ou kapab donn nou en gidans.

 

HON BERNARD GEORGES

Mersi Mr Speaker.  Mr Speaker, mersi Minis pou konpran sa ki nou tou nou ti ava swete annan.  Bills Committee parey ou’n dir Mr Speaker mon krwar se veikil ki pou fer sa framework.  Me mon dakor ki sa i en size Nasyonal e otan manm ki kapab vin sa meeting i devret fer en fason pou vini.  En pti pe parey nou ti fer avek Civil Code.  Alor mwan mon pe propoze ki nou annan en premye meeting avek Minis. Olye nou fer en lalis keksoz, kekfwa sa i devret sorti dan en premye meeting.

En pti pe parey nou’n fer la me en pe pli kourt kot sa bann pwen ki bann Manm i annan i ava kapab sorti vin devan e an fonksyon sa nou ava annan prezan en agenda travay e fer li dan en fason vit ki dan enn de semenn nou kapab retourn dan Lasanble avek en prozedlwa ki nou kapab zis fer pase vitman.  Alor kekfwa atraver nou a demann Clerk ek Biro Minis liaise fikse en moman travay e nou ava sirkil sa avek bann Manm pour ki otan Manm ki kapab vini konmansman kekfwa vandredi ki pe vini la.  En sesyon travay mon mazinen 2erdtan dan en premye letan i ava donn nou letan pou nou kapab fer en lalis bann keksoz ki nou a kapab diskite.

 

MR DEPUTY SPEAKER

Mersi Onorab Georges.  I annan en propozisyon pou Vandredi.  Minis pa pou la.  Minister.

 

MINISTER DIDIER DOGELY

Well mon pa pou la ziska Lendi.  Mon retourn Lendi bomaten.  Me solman Mardi pou mwan i ok.  ouswa Lendi apre midi i ok pou mwan.

 

MR DEPUTY SPEAKER

Lendi apre midi i riske en problenm pou serten Manm. Mardi ek Merkredi definitivman i en problenm.  Mon pa konnen si petet Zedi prosen ?

 

MINISTER DIDIER DOGLEY

Ouswa mon pa konnen zot kapab konmans avek PS si sa i ok avek zot.  Akoz pou mwan i mon annan konfyans ki PS i kapab handle it.  Epi i ava pas lenformasyon pou nou pa delay bann diskisyon.

 

MR DEPUTY SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker.  Mr Speaker Vandredi Praslin Tourism i deza annan en meeting Praslin e sa Vandredi i pa pou neseserman apropriye akoz mwan osi mon pou bezwen dan sa meeting Praslin.  Petet Zedi prosen i ava ideal si tou Manmi krwar i ok pou zot.

 

MR DEPUTY SPEAKER

Ok konman en tentative date nou a pran Zedi prosen, me mon a kit sa dan lanmen biro Madanm Clerk pou zot trouv en zour e ler apropriye. Onorab Larue.

 

HON FLORY LARUE

Mersi Mr Speaker.  Lefe ki Minis in dir osi ki sa konsiltasyon lontan in konmanse.  Kekfwa ti a byen pou anmenn en summary of bann rezilta ouswa bann feedback ki bann dimoun ki’n partisipe dan zot bann meeting, kwa ki’n ganny dir pou nou annan en lide koman Lezislater.  Nou pa kapab kidnap lendistri akoz sa Bill i pou lendistri e bokou nou pa dan lendistri.  E pou nou byen konpran kisisa ki dimoun dan sa sekter pe rode ti a bon nou ganny en bon summary of sa bann dimoun ki zot, zot in zwenn avek. Ki feedback ki dimoun in donnen.  Mersi.

 

MR DEPUTY SPEAKER

Mersi Onorab Larue.  Mon krwar in sizesyon rezonnab ki sa bann feedback i ganny anmennen dan sa prosen renyon ki pou ganny fer.  Bon be avek sa nou ava eskiz Minis e son delegasyon parmi nou.  E nou remersye zot pou letan depi yer ki zot in reste avek nou e pran par dan sa bann deliberasyon.  Mersi bokou Minis e ou delegasyon.

 

 

(MINISTER DIDIER DOGLEY AND HIS DELEGATION WAS EXCUSED FROM THE HOUSE)

 

MR DEPUTY SPEAKER

Bon in ariv 3.43 e i reste nou detrwa Mosyon e sertennman en update lo en Bill ki ti pe diskite.  I annan detrwa item lo nou Order Paper pou nou fini avek. Mon pe zis mazinen ki  mannyer  nou anvi pran li – eski nou adjourn nou pran en tea break nou tournen e nou kontinyen avek larestan  travay?  Oubyen  – parske  vreman sa ki annan se en update lo en Bill ki ti deza pending ; answit nou annan bann Mosyon e mon pa krwar i pou fer zistis ou pran en Mosyon apre 4er? Onorab Ramkalawan?

 

HON WAVEL RAMKALAWAN 

Mr Speaker mersi bokou. Mon krwar – ofet lo sa update napa gran keksoz pou dir parske tou le de kote in zwenn avek sa Komite.  E Komite ti’n fini donn nou en  keksoz lafen di-mwan e la nou’n fini ariv dan milye Me ;  egzakteman dan milye – le 15  e ki nou napa nanryen. Alors basically tou keksoz i ankor pending.

Alors mon  dakor avek ou ki  pou nou komans en Mosyon la i pa pou fer zistis, akoz zis koman prezantater Onorab William pou’n fini prezant son Mosyon nou pou adjourn pou nou ler.  So mwan osi tou mon krwar ki nou pe kominik dan en serten fason. Mon krwar plito  mon ti ava propoze ki nou adjourn la e nou repran travay semenn prosen.  Mersi bokou.

 

MR DEPUTY SPEAKER

Ok.  Onorab ou ti’n lev lanmen.

 

HON SEBASTIEN PILLAY

Mersi Mr Speaker.  Wi regarding sa update parey mon koleg lot kote in koz  lo la, nou osi  nou ti’n zwenn avek sa Komite.  Mon krwar la mannyer keksoz pe fonksyonnen, se sa Komite ki pou bezwen retourn kot nou pou nou move to the next step.

So lo sa kote sa  update nou napa gran keksoz pou dir. Si Lasanble mon santi i pa pou fer zistis mover en Mosyon pou zis 15 minit pou li move son Mosyon and then pou nou rush  the debate, so mon krwar  nou dan lanmen Lasanble –  i dan ou lanmen  pou nou deside si nou ava adjourn and then carry on fresh demen.

 

MR DEPUTY SPEAKER

Ok.  Alor i paret ki nou annan en konsansis ki – Onorab William?

 

HON WAVEN WILLIAM

Mersi Mr Speaker.  Mr Speaker zis lo sa travay sa Komite la,  lefe ki nou pe ganny dir la, ki Komite in zwenn avek sa 2 parti, me eski i annan en timeline defini ki sa dokiman ki  Leader Lopozisyon pe dir ki Lasanble i sipoze gannyen: konmsi eski i annan en timeline kan sa dokiman pou vin devan?

Epi mon lot konsern ki mon ti a kontan met lo rikord, se ki lefe ki sa  diskisyon letan ti ganny fer, tou lede parti ti zwenn ansanm pou fer  bann proporsyon. E konmsi mon trouve ki poudir la i annan sa separasyon. E i ti a byen konmsi si petet  Komite i konsider ki olye ki i zwenn separeman ki lo en baz latransparans, i  zwenn tou lede ansanm nou regard bann propozisyon.  Mersi.

 

MR DEPUTY SPEAKER

Mersi Onorab William.  Well i en sizesyon  sertennman ki ou’n fer.  Desizyon pou zwenn separeman sete en sizesyon sa Komite li menm, ki zot ti pou zwenn ek  bann diferan – sa 2 parti Lasanble.  Mon pa konnen  ki tou lede kote latab i panse.  Mon konnen sa diskisyon ki’n arive lo kote LDS,  sete zot pa’n vwar si ti pou annan en litilite pou kontiny diskisyon, vi ki ti annan en ka Ankour.

E sa ka Ankour ti pou konpletman sanz baz okenn kalkilasyon  – okenn opsyon ki zot ti kapab pe fer.  Alors olye ( les mwan servi sa mo) gaspiy letan travay lo bann opsyon ki ou pa konnen  ki bor ou pou komanse, zot ti prefere esper sa ka fini, avan zot deside komans sa travay.

Me  sa sizesyon ki tou lede  kote i zwenn ansanm i annan en fason pli kler pou travay, pli fasil mon krwar i en sizesyon ki  mon mazinen tou lede kote i kapab.   Me  mon a envit Leader Lopozisyon pou li fer son komanter lo la.

 

HON WAVEL RAMKALAWAN 

Mr Speaker mon konpran sa ki Onorab William pe dir e mwan mon ti ava – parski la sa court case la in ariv lo en lot nivo ankor la. La i lot nivo Lakour Konstitisyonnel e napa en dat ki’n ganny donnen pou Lakour Konstitisyonnel. Mwan mon ti ava petet propoze ki Sekretarya – vi ki sa Komite li in koresponn  atraver Sekretarya – Lasanble ki Sekretarya i rantre an kontak ek sa Komite pou demann zot ki staz ki staz ki  zot in arive e  pou ki nou ti ava kapab bouz lo la.  Me mon krwar nou ava plito  – pa nou  koman Manm, me Sekretarya – ya Sekretarya, avek komite.  Zis pou nou kapab ganny en lendikasyon.  Mersi.

 

MR DEPUTY SPEAKER

Mersi Onorab Ramkalawan.   Mon krwar i en sizesyon valab. Avan nou adjourn mon ti a kontan zis koz lo en size ki  pour mwan i afekte privilez Lasanble Nasyonal.    E sa se en Press Release ki mon’n vwar yer, ki’n ganny fer par US ki’n koz lo sa lensidan ki ti arive yer, me pli partikilyerman  kot i konsern Lasanble Nasyonal, kot i mansyonnen pou dir ;

’United Seychelles also condemns the bias and unethical conduct of the Deputy Speaker today, who chose to play cheap politics and conveniently forgets that in parliamentary democracies,  there are certain universal disciplinary standards and codes that gouvern the internal conduct of the Members of  a polititical party in Parliament.’’

Sa set en statement en parti politik.

Mwan mon’n lir zot statement – mon pa krwar ladan.  Me selman nou dan en demokrasi e  i zot drwa pou zot  dir sa ki zot, zot krwar i byen/ i mal.  Mon mazinen i zot drwa osi pou zot ensilte.   E dir ek en dimoun i pe  fer cheap politics oubyen i bias, oubyen i unethical.  Sa osi i zot drwa pou zot fer li.   Me sa ki mwan mon oule fer zot konnen sa menm drwa ki zot annan, pou lekspresyon tou Manm dan sa Lasanble i annan menm drwa pou sa lekspresyon. Enkli Speaker e Deputy Speaker.

E personn pa pou fer nou per pou nou eksprim nou lekor lafason ki nou, nou krwar i byen  e lafason ki i reflekte Standing Orders e lafason ki reflekte Konstitisyon nou pei !  Se sa Lalwa siprenm nou pei!

E yer sa size annefe in leve akoz  Onorab William ti anmenn – ti fer en matter of privilege poudir zot ti pe sey met presyon lo li!  Mon demann mon lekor eski sa Statement  set  en fason pou met presyon lo mwan?   Akoz mon pe asiz la koman Speaker? Me les mon a dir zot mwan me pa zis mwan – zot tou ki la  mwan mon  koz tou bann Manm personn dan sa lasal pa pou ganny entimide par US!  Personn dan sa lasal pa pou ganny entimide par US!

Sa bann teknik !  Set en bann teknik lepase e in fini!  Pa pou ariv ankor.

 

(APPLAUSE)

 

MR DEPUTY SPEAKER

Alor mwan mon pe dir ek zot sa bann letan in fini.  Annou bouz dan en direksyon kot nou respe lekspresyon tou dimoun !

Tou dimoun i annan en drwa pou eksprim son lekor dan en fason lib, san ensilte. Kanmenm nou ganny ensilte mon pa pou ensilte zot !  Parski mon krwar  laliberte lekspresyon me mon anvi fer zot konnen ki personn pa pou ganny entimide!

E sa Lasanble Nasyonal pa pou ganny entimide!   Nou pou kontinyen fer nou travay oversight. Nou pou kontinyen fer nou travay pou amelyor sa pei.  Nou pou kontinyen fer nou travay pou fer lepep seselwa zouir dan en meyer pei,  kot keksoz i mars byen.  Zot Lalwa i an konformite avek sa ki zot ekspektasyon i ete e pei i bouz devan zeneralman. Alor sete sa mon komanter.

E mon espere zot pran li dan en  bon fason parski mon pa oule vin la pou mwan vin ensilte personn, e mon pa pe ekspekte ki nou kontinyen ganny ensilte.   E avek sa nou pou adjourn nou Sesyon ziska Mardi le 21Me 2019.

 

 

(ADJOURNMENT)