::
Home » Verbatim » 2019 » Verbatim Wednesday 10th July, 2019

Verbatim Wednesday 10th July, 2019

NATIONAL ASSEMBLY OF SEYCHELLES

Wednesday 10th July, 2019

The Assembly met at 9am

National Anthem

Moment of Reflection

      Mr Speaker in the Chair

 

MR SPEAKER

Bonzour tou Manm Onorab. Bonzour tou dimoun a lekout e pe swiv travay Lasanble Nasyonal. E en bonzour spesyal pour bann etidyan laklas P4 lekol primer Bel Ombre, bonzour e byenveni dan Lasanble Nasyonal. Mon swete ki zot a kapab swiv en pe travay ki nou pe fer la bomaten.  E apre pandan break 10.30 nou ava pran en pti rafresisman lo balkon. E mon envit bann Manm Lasanble pour vini pour enterakt avek sa bann etidyan. Pa akoz zot P4 pa krwar ki zot napa kestyon pour bann Manm.  Pa tro lontan nou’n ganny en group ki’n vini, en group tre, tre zenn, me enteraksyon ti’n vreman, vreman enteresan avek sa bann zanfan.  So alor mon swet zot labyenveni ankor enn fwa.  E taler nou ava zwenn dan break.

Bomaten nou travay nou pour al lo bann Mosyon ki lo Order Paper.  E nou annan en nouvo Mosyon ki lo Order Paper, sa se apwentman pour en Anbasader. Apre nou pour kontinyen avek Mosyon ki nou’n komanse semenn pase. Sa i Mosyon ki’n ganny move par Onorab Churchill Gill. So nou ava demare toudswit e mwan ava donn laparol Onorab Leader Zafer Gouvernman, Onorab Charles De Commarmond.

 

HON CHARLES DE COMMARMOND

Mersi Mr Speaker. Bonzour tou Manm Onorab bann zanfan ki la avek nou e tou dimoun ki pe ekout nou. Mr Speaker  mon Mosyon i lir koumsa; that this Assembly approve the Appointment by the President of Mr Patrick Andrea Victor, as an Ambassador-at-Large of the Republic of Seychelles in accordance with Article 64, (1) of the Constitution.

Mr Speaker lapwentman, laprouvasyon lapwentman Mr Victor ki nou pe demande i en keksoz enportan. E pour komanse les mon premyerman pour rezon ledikasyon e latransparans koz enn pti gin lo sa Lartik, Lartik 64(1) nou Konstitisyon ki dir ki the President ‘may’ with the approval of majority Members of the National Assembly appoint a person as Ambassador, high commissioner or any other principle representative of Seychelles, to represent Seychelles abroad.’’

Savedir Mr Speaker e dan sa konteks la se lapwentman, laprouvasyon pour lapwentman en Ambassador-at-Large dan le personn de nou icon kiltirel si oule dir, nou vedet Mr Patrick Andrea Victor.  Akoz Mr Speaker en Ambassador-at-Large?  E akoz Mr Victor? Mr Speaker i enportan pour fer resorti ki Mr Victor i en dimoun ki dan Sesel nou konn li tre byen e ki nou asosye li 100 poursan avek nou kiltir.  E nou war nou pour dir ozordi dan nou pei a sa staz ki nou ete. Nou kiltir i pe tonbe.

Mon diferan konversasyon ki mon’n fer avek bann Lotorite, enkli Mr Victor li menm, nou’n vwar poudir nou kiltir i pe desann e nou bezwen redinamiz li, remont li.  E pour refer sa i enportan ki nou sers tou mwayen posib, e ki msye prezidan in war dan son sazes ki i enportan, ki nou ganny nou en dimoun ki pour flote dan lemonn, ki pour kapab tous landrwa neseser dan nou larezyon. Rezyon Losean Endyen, lo Kontinan Lafrik e ayer avek UNESCO, avek tou sa bann antite enportan pour kapab redonn sa dinamik nou kiltir nou lar, e nou bann artis definitivman enkli ladan.

E dan sa konteks Mr Speaker Mr Victor letan avek si nou Lasanble i aprouv sa Mosyon, ki devan nou, Mr Victor pour sa dimoun ki pour kapab al dan lemonn antye pour kapab kot Prezidan i ava anvoy li, akoz i pour en Anvwaye Spesyal Le Prezidan Larepiblik e ki la pour li kapab tous kot fodre i arive pour kapab ede redinamiz nou kiltir.

Me i annan en lot pwen enportan ki nou bezwen touse, an tenir kont ki sa Mosyon i devan nou.  Se ki tre byento la nou pe al selebre 250enm lannen koman en pei, koman nou premye zabitan ti vin dan Sesel an 1770 lo zil St Anne.  E sa levennman i en levennman byensir tre, tre enportan, istorik enkrwayab, e ki avek sa nou annan bann preparasyon tre spesyal ki bezwen ganny fer. E ki la Mr Victor i pour zwe en rol de kle dan sa preparasyon.  E se sa rezon si ou kalkile komansman sa bann meeting enportan i pour ganny an Out.

Savedir ver le 27 Out, 28 Out sa lannen. E nou sa letan nou Lasanble pour dan recess. E nou pran recess nou depi le 8 Out, alor i enportan ki sa Mosyon la nou fer li ase vit ek sa ki nou pe met sa presyon pour nou kapab diskit e aprouv sa Mosyon ki devan nou, pour nou kapab bouze avek bann landrwa ki Mr Victor i pour bezwen ale – zisteman, pour li kapab prezant son let de kreans e tou kot pour kapab komans e fer bann debrouy eksepsyonnel pour kapab pous devan sa vizyon, e sa preparasyon ki nou annan devan nou.

E sa byensir set osi en preparasyon – osi en fason pour nou kapab tous tou nou bann artis.  La dan nou Lasanble li menm Mr Speaker ler mon pe get Onorab Jany De Letourdie, mwan menm nou pas pa zis dan lanmen, me ansanm ek Mr Victor. Nou’n dan pyes teat ansanm; Onorab De Letourdie in ansanm avek li dan bann koman dir sa show mizikal, dan bann teat mizikal, ki’n ganny fer e sa i form parti sa gran portfey si oule dir aktivite ek Mr Victor.  Mr Victor i pa’n zis en artis li me in plis ki sa!  I pa’n zis dan lanmizik, li me in plis ki sa.

In dan tou kalite si oule dir bout kiltir depi ler mwan mon konn li. Depi li in kree Latroup Kiltirel Nasyonal ki Onorab Jany mwan menm, nou’n form par sa Latroup la e sa in anmenn Sesel, mon rapel dan nou letan la nou pe akt isi dan Lasanble.

Me sa letan ki nou ti lo stage, nou’n war poudir kiltir Seselwa kot nou ti’n arive. I annan en ta preparasyon ki’n ganny fer.  Mon rapel nou bann letan avek Jean Jack Belau avek Marcel Mangua – Vel e ensidswit. E nou’n fer en kantite parkour.

Alor Mr Victor i pa zis en akter li. In osi konn dan lenstriman lanmizik; in konn osi, in en song writer, mizisyen, play writer, recording artist e tou. E osi meter an senn. E tou sa.  Msye oter/konpoziter parey nou dir. E Mr Victor in achieve plizyer award. In annan bann award isi menm Arts Award 2017.  In annan bann award ki in ganny lo nivo kontinantal. Akote i annan bann award ki’n repetitif.

E tou sa i form parti bann keksoz, bann achievement ki in fer, ki’n arive akonpli. Mon rapel Onorab Ramkalawan detrwa zour pase letan nou pe koze, i dir osi – par egzanp Charles i dir en dimoun sa leksperyans ki i annan, i vo en Masters!  E mon rekonnet sa ki in dir e sa i vre. En dimoun ki annan en kantite leksperyans set en dimoun ki annan en kantite konesans osi.

E pour mwan ler mon war pour dir liniversite Sesel in rekonnet Mr Victor pour son achievement e in donn li en Master Onorer – pour mwan mon dir yes!  Onorab ti pe byen dir mwan e mon toutafe dakor avek sa pwen ki nou ti pe koze ansanm, e ki nou’n sa.  E Mr Speaker i enportan ki dan sa konteks ki nou pe koze, ki nou donn sipor Mr Victor.  Sa sipor ki nou pour donn Mr Victor atraver laprouvasyon sa Mosyon, i pour montre osi nou krwayans e nou sipor e nou determinasyon pour nou elev la kiltir Seselwa.

Kiltir se lanmen pep Mr Speaker. E si lanmen pep i tonbe, i pa bon i dan problenm. E la nou oule ki larm, larm nou pep atraver la kiltir atraver lapwentman Mr Victor dan sa pos ki nou pe demann laprouvasyon nou Lasanble, i ariv lo en lot nivo.  E ki i monte e ki fer ki nou kiltir i ava fer ki nou pep i ava pli benefisye atraver nou kiltir.  Kiltir i annan en kantite keksoz ki i ankonbre ladan. E i pa zis lanmizik ek teat parey nou pe dir, me selman i tous tou lezot aspe en pep. Son fason viv, son koutim tradisyon e tou. E dan sa sans la nou ekspekte ki tou bann artis dan Sesel, ki swa mizisyen, ki swa lo stage, ki swa nenport kalite artis i kapab benefisye atraver sa lapwentman,  atraver travay dir parey nou konn Mr Victor toultan in en travayer tre dir e atraver eski i pour fer pour li promot sa kiltir Seselwa e pour li vin osi enklisiv, Mr Speaker, pour li pa kit bann artis deor, pour li fer sir ki tou bann artis i ganny ankonbre; parey dan son lespri letan in kree Latroup Kiltirel, letan in kree SACS, tousala i fer ki i ava ed bann artis.

E  bann artis i ava sa rol pli enportan, sa rol kot zot osi zot pour benefisye. I annan deza travay ki’n komanse dan sa direksyon par Mr Victor li menm.  E ki sa bann travay i ava ganny akonpli atraver sa bann relasyon ki Minister Lakiltir i a osi donn li sipor.  Me i annan en keksoz Mr Speaker petet nou osi bezwen touse. Sa lapwentman Mr Victor ler i ganny aprouve,  Mr Victor pa pour ganny peye li, i pour en Anbasader kot i pour baze Sesel, donn li en biro isi.

E i pa pour ganny en saler tou le mwan li. Me letan i ava annan bann misyon wi son pasaz i ganny peye, i ava annan son bann per diem ensidswit. Me i pour baze isi menm.  Kot i pour met son biro, kot son biro pour ete, mwan mon ti ava demande ki son biro si i pour en Anbasader-at-Large, savedir i pour bezwen annan en relasyon swa avek Minister Zafer Etranzer, swa avek biro Laprezidans, akoz i pe Anvwaye Spesyal Le President, alor swa i pour baze kot State House.

Mon ti a demande ki i pa ganny baze kot Lakiltir menm ki i pour Anbasader pour focus lo kiltir li menm.  Me i pour, mon ti ava kontan ki i tonm anba biro Prezidan pour li kapab reponn a lapel pli gran ki nou, nou anvi i reponn ler sa laprouvasyon i ganny fer.  Mr Speaker avek sa, mon pour demann nou Lasanble, pour nou siport nou artis eksepsyonnel. Nou vedet de lakiltir Seselwaz; nou dimoun ki nou tou nou konnen, nou asosye avek tou bann artis i asosye avek dan le personn de Mr Andrea Victor koman Anbasader-at-Large pour Larepiblik Sesel par le Prezidan Larepiblik.

Mr Speaker mon demann nou Lasanble pour donn son laprouvasyon sa Mosyon ki devan nou. Mersi bokou.

 

MR SPEAKER

Mersi Onorab De Commarmond.  Okenn Manm ki segonn Mosyon? Yes Onorab Simon Gill.

 

HON SIMON GILL

Bonzour Mr Speaker. Bonzour tou koleg Onorab, tou nou bann etidyan anler dan Galeri.  E tou Seselwa ki pe ekout nou. Mr Speaker mon segonn Mosyon parey i ganny prezante par Leader of Government Business. Mersi bokou Mr Speaker.

 

MR SPEAKER

Mersi Onorab Simon Gill.

 

HON SIMON GILL

Plitar mon ava entervenir lo sa Mosyon Mr Speaker.                                                                                             

 

MR SPEAKER

Mosyon in ganny segonde. Okenn Manm ki pour entervenir. Onorab Chantal Ghislain.

 

HON CHANTAL GHISLAIN

Mersi Mr Speaker.  Mr Speaker nou’n dans sega, nou’n dans moutya, e nou’n menm dans maloya. Menm si ti annan konplo pour detri nou,  kot nou ti riske pa ti zanmen ganny sa enn ki pa pour nou. Patrick Victor ki ler nou antann sa sanson dan son lavwa nou konnen nou bezwen annan lafwa. Lafwa pour debout for, e defann nou patri a tou pri. Lafwa pour defann nou lidantite, lafwa pour defann nou kreolite. En zonm Kreol senp ki zis atraver son lanmizik in vin lavwa kiltir Kreol Seselwa.

Senp dan sans ki menm en vey lafontenn ki nepli koule; ou menm en vye pirog ki’n lo kote, i anmenn souvenir pour li. En Seselwa ki’n ganny edike dan lekol lavi!  Patrick i partaz sa santiman profon ki menm dan lazwa ou dan sagren, pe enport kot ou ete ozordi, nou devret reste konekte atraver sa lyen ki nou Kreol e ki nou kiltir kreol i devret ganny partaze atraver lemonn.

Mr Speaker mon’n komans lo sa ton poetik senpleman, akoz mon santi ki meyer fason pour dekrir Patrick Victor set an servan son prop parol. Bann parol ki’n soulaz bokou leker, lo en ler tre dous i dir ou, ‘’Pa plere dan lannwit tronblan.’’ Parol ki’n konsol leker, parol ki’n frisonn ou nanm, parol ki’n met ou dan lakadans e fer nou reviv nou kiltir.

‘’Parol i senpleman parol.’’ 43an depi ki nou’n vin en Nasyon endepandan, me koman en Nasyon nou’n kontinyelman krwar ki en touris ki vin Sesel pour li pli kontan e apresye zot prop lanmizik, e lezot keksoz ki sorti dan zot pei, ki nou lanmizik tradisyonnel parey moutya e sega, ou menm nou manze Kreol. E meyer dimoun pour al vann sa pour nou se pa lot ki en Kreol – en Kreol ki’n viv sa kiltir Kreol; enn nou menm parey nou dir.

Nou sa ki nou ete e non pa sa ki dimoun i krwar nou devret ete. Parol Patrick Victor sa. Senpleman akoz nou bann Seselwa nou kapab ozordi dans avek lafyerte. En fyerte ki parfwa rar parmi bann zennzan konmsi li menm. Lo son mandolin e son gitar klasik tousel parfwa Patrick Victor in fer en parkour eksepsyonnel atraver lemonn avek son lanmizik.  Koman en nouvo pei endepandan konsyan sa bezwen pour etablir nou lidantite koman en Nasyon. Dan soufleman divan, divan en mesaz ti’n desifre. Kreol Seselwa pour ganny stati egal avek Angle, Franse koman nou 3 enm langaz Nasyonal.

Pandan ki soley i kouse trankil deryer lanmer, pour Patrick sa ti parey lanmizik lansiv ki ti’n anons pwason. Avek en leker ki’n tanpi kiltir kreol ti pour ganny valorize atraver formasyon Latroup Kiltirel Nasyonal. Sa ti donn Patrick Victor en loportinite pour propaz sa mesaz kiltir kreol atraver lemonn.

Patrick avek latroup kiltirel Nasyonal, in fer letour Lerop, kot zot in perform dan bann gran lavil. Patrick avek Latroup, in vreman zwe sa lanmizik ki’n fer etranze kontan. In kree en non pour li menm atraver Losean Endyen ki’n fer li sant Lim pour koste pep sa Losean, e envit bann zil Losean Endyen pour vin bwar dan s aver lanmitye. In en vre Anbasader pour promosyon kiltir kreol Seselwa!

E ozordi mon vwar sa legzersis isi dan sa Lasanble koman senpleman pe formaliz sa pos. Patrick Victor pour ofisyelman vin en Anbasader akoz deza okour son parkour in montre son kapasite.  In ranmas ase leksperyans e tiktak koze, mannyer pour aprose ler i ariv ler pour koz pour Sesel!

Mr Speaker parey mon ti dir dernyen fwa rekonpans pour en dimoun ki’n travay dir pa apel kado, me plito i en rekonpans byen merite! Donk annou koman en Lasanble fer sa ki byen ozordi.  Rekonnet sa kelken ki’n tay isi laba, ki’n fer se si se la. la in senpleman ariv ler pour dir koman en pour dir koman en pti mersi.

Mr Speaker tanbour moutya?  Mon asire ki nou zorey pe komans soufle avek rhythm ladans ki fer nou mazinen ki nou gran pye in sibir dominasyon kolonyal.

E ki nou later in konn soufrans e leokri lesklav.  Parey nou dir kiltir i larm en pep. I bann koutim e menm krwayans en kominote e pei partikilye. Tandis ki aktivite kiltirel i bann aktivite ki konekte avek kiltir sa kominote, oubyen pei. Tradisyon li i bann koutim tel ki nou bann reset lakwizin e nou ladans ki nou pase avek kanmarad zenerasyon, zenerasyon.

Me nou lalang Kreol in touzour fer bann melanz tou sa bann definisyon.  Pe enport avek ladans moutya, sega kanmtole ek son sanson, avek son charm Patrick ti’n anbark lo en misyon pour koz lo lapar Seselwa e lo lapar pei son lanfans, pour pozisyonn kiltir e tradisyon Sesel en si ki fer lemonn konn nou rasin, nou lorizin e nou kiltir Kreol, tre vit i ti ganny tit koman li menm Lerwa Sega.

Mr Speaker pli enportan dan tou sa, se ki pli zoli sanson ki in sante dan son parkour, se sa enn sanson ki in vwar dan lizye ‘’Solin’’ e dan lizye bann zanfan; bann zanfan Seselwa. Sa sanson ki in fer Seselwa patriyot, fremir.  En sanson ki’n zis en vre Anbasader ki’n viv sa ki konnen ki’n sante ‘’O Mon Pei Cheri.’’ En pei sitan frazil koman en roz delika parey promes. En Anbasader ki avek fyerte frisonn laser lezot Seselwa ler i dir ou – ‘’Si pa mon Sesel, dir mwan lekel?’’

E ki’n oze dir ler i ferm son lizye, pour la dernyen fwa anter li dan later Seselwa. Patrick Victor in viv sa Sesel. I viv sa kiltir Kreol, in met li an armoni avek lanatir e ozordi i kapab fyerman dir ki wi vre paradi i egziste.

An fen Mr Speaker Patrick Victor in vreman ganny respe tou Seselwa atraver en levantay son bann sanson patriotik, santimantal e kiltirel. E parey tou Seselwa ki annan son pei a ker, e ki annan en dezir pour lape pour sa arive nou bezwen re-senm legren lanmour dan nou konversasyon. Dan nou mesaz toulezour, pour ki kan soley i leve lo sa paradi nou pei i a fleri dan lanmour, lazwa e laliberte e ki sak zour i a ranpli avek lespwar fyer Seselwa.  Akoz apre tou – ‘’Premye Sesel, e Touzour Sesel!’’ Senpleman parol Patrick Victor.  Mersi Mr Speaker.

 

(APPLAUSE)

 

MR SPEAKER

Mersi Onorab Ghislain.  Mon a donn laparol Onorab Sebastien Pillay.

 

HON SEBASTIEN PILLAY

Mersi Mr Speaker.  Bonzour Mr Speaker. Bonzour tou koleg Onorab e bonzour nou bann etidyan ki dan Galeri. Byenveni dan Lasanble Nasyonal. E byensir bonzour tou dimoun ki pe ekout nou Sesel oubyen ayer.

Mr Speaker ozordi i fer mwan en loner e en plezir koman en Seselwa pour mwan debat lo en Mosyon sa ki nou kapab dir i ‘’pli Kreol ki Kreol,’’ ‘’pli patriyot ki patriyot.’’ En zonm ki dan listwar – pa zis kiltir me listwar Sesel, son non in ganny ekrir partou, e mon krwar ozordi sa ki nou pe fer se ki nou pa pe zis rann omaz a sa zonm. Nou pa pe zis valoriz kontribisyon.  Me nou pe montre nenport ki dimoun ki pe enport kote ou sorti, kote ou’n komanse, si ou persevere dan parkour ou lavi ou kapab avans pli devan.  E sa i en mesaz enportan pour sa bann zenn ozordi ki dan Galeri ki ler ou pran ou letid o serye ou persevere dan en keksoz ki ou anvi fer e ki ou pa les personn fer ou retourn deryer – ou avoid bann lefliyans negativ. Ou ekout sa bann ki pour donn ou konsey. Ozordi mon war zot ek zot bann ansenyan. Se sa kot lavi i anmenn ou kot ou kapab avans devan. E mon krwar ozordi Lasanble Nasyonal i annan en loportinite pour li lans en mesaz kler. En mesaz ki koman en Lasanble nou dir ki nou valoriz kontribisyon ki en dimoun i kapab fer. Nou valoriz levolisyon ki en dimoun i kapab annan.

Nou valoriz en Seselwa, en patriyot, en Kreol, en dimoun ki’n dekrir e anmenn nou langaz Kreol, nou kiltir Kreol o dela tou bann frontyer ki’n kapab fer li. E mon ti a kontan demann Lasanble Nasyonal ozordi pour fer en refleksyon. En refleksyon profon e senser; en refleksyon ki ava anmenn nou pour regard pa bann konsiderasyon politik, pa bann konsiderasyon administratif. Me plito bann konsiderasyon anver valoriz e anmenn en rekognisyon pour en kontribisyon ki’n fer nou pei, ki’n fer nou kiltir avans devan. Annou anmenn en sours lenspirasyon dan lespri nou pep akoz se sa osi en rol ki Lasanble Nasyonal i annan pour li zwe.

Mr Speaker Lasanble Nasyonal anba Lartik 63 nou Konstitisyon, si ou a permet mwan Mr Speaker sit sa Lartik devan Lasanble ki donn lavi a lartik 63 nou Konstitisyon. I egzize ki ler en lapwentman pour en lofis kelkonk i ganny mete devan Lasanble, Lasanble i oblize pran en vot e fer en desizyon lo sa lapwentman.

E mon kontan ki ozordi Lasanble pe debat sa Mosyon e ki ou’n swiv sa Lartik Konstitisyon pour les sa Mosyon al ver en vot dan Lasanble Nasyonal pour ki nou an konformite avek sa ki Konstitisyon i dir e pour asire ki nou koman en Lasanble sa Konstitisyon ki la ki anmenn nou pour valoriz, sa ki fer nou Seselwa nou koman Lasanble ozordi nou pe met li an pratik.

So pour souliny mon pwen Mr Speaker, mon pour lir ek lepep Seselwa parey ou kontan dir Mr Speaker Lasanble i en moman pour nou edik nou pep lo kwa ki nou pe fer dan Lasanble lo sa ki Lartik 63 nou Konstitisyon i dir nou.

I di nou sa Mr Speaker, i dir nou ‘’Where under this Constitution an appointment to an office or the designation of a person for any purpose by the President is express to be subject to the approval of the National Assembly …’’ I dir nou ler anba sa Konstitisyon en apwentman pour en lofis oubyen en dezinyasyon en dimoun pour okenn travay par Prezidan, i ganny eksprimen e sa i size en  approval Lasanble Nasyonal; savedir Lasanble Nasyonal ki bezwen pran en vot lo la – bann eleman sa lapwentman a ganny anvoye kot Lasanble Nasyonal parey sa let ki’n fer nou konnen poudir lentansyon pour apwent Mr Patrick Victor koman en Anbasader e i dir ‘’… shall be sent!’’ I devret ganny anvoye kot Lasanble Nasyonal e sa in ganny anvoye kot Lasanble Nasyonal, me i osi i dir ki ‘’… the Speaker and the Speaker shall cause the National Assembly to vote!’’

Savedir Lasanble National i bezwen vote! Dapre Konstitisyon Lasanble Nasyonal i bezwen vote lo lapwentman Mr Patrick Victor koman en Lanbasader Sesel.

Me sa i en reminder pour nou dan tou ka kot L’Egzekitiv pour anvoy en lapwentman kot nou e mon krwar i en Lartik ki nou pa’n realize. Akoz sa i en pouvwar Lezislatif ki nou gannyen anba 85, Lartik 85 nou Konstitisyon, ki donn nou sa pour vwar pour pran bann desizyon atraver en vot mazorite nou bann Manm.

Alors sa ki nou pe fer Mr Speaker ozordi, i an konformite avek nou Konstitisyon, pour nou pran en vot lo lapwentman msye Patrick Victor koman en Anbasader larepiblik Sesel.

Mr Speaker a tou moman dan nou lavi nou fer fas avek bann desizyon, ki nou bezwen pran e sa bann desizyon i pour bann desizyon ki pour reste lo nou konsyans. I bann desizyon kot nou pep an deor pe regarde. I bann desizyon kot nou kapab donn bann sours lenspirasyon nou pep. E ozordi Lasanble Nasyonal i annan sa loportinite pour li zisteman donn sa lenspirasyon nou pep.

Mr Speaker atraver mon parkour koman en ansenyan mon’n ganny loportinite rankontre plizyer travay Mr Patrick Victor e i annan menm son bann travay ki’n size bann liv ki bann zanfan in servi, dan laprantisaz, bann poem, oubyen bann morso son sanson, in size bann travay.  E nou’n vwar atraver Festival Kreol bokou son bann travay, bokou son bann sanson in ganny servi dan bann lenterpretasyon kiltirel, dan bann ladans, dan bann ekspoze teatral.  Sa i fer ki li menm li msye Victor in en dimoun ki’n anmenn en kontribisyon tre enportan pour kiltir Seselwa. Me msye Victor i pa’n li tousel li. I annan lezot akter ki’n kontribye dan kiltir Seselwa.

Mon zanmi Mr  Joe Samy i enn. Nou annan Mer Lavil li menm Mr David Andre li menm ki’n amen kontribisyon as well. E sa ki nou pe dir pour bann artis ki serye ozordi se ki – pa ki mwan pe dir ki i annan artis ki pa serye me mon pe dir ler artis i serye e i perform son lar e i avans son lar pli devan parey mon ti vwar dan en lartik lo zournal Le Seychellois, ki ti dekrir koman travay Mr Victor in en travay ki’n anmenn bokou valer pour kiltir Seselwa. E mwan rapel ti annan en fraz ki ti ganny servi ki msye Victor i annan li en almost en evangelical following. Savedir i annan li en baz dimoun ki swiv li lo en nivo – en fan base ki enportan. I pa zis ganny en lapresyasyon lo en pwennvi curist, dan kiltir ki regard kiltir dan tou son faset me ganny en lapresyasyon lo nivo bann dimoun ki kontan ekout lanmizik.

E sa i enportan Mr Speaker. E atraver mon parkour koman en ansenyan Mr Speaker, i annan bokou bann zenn santer ki’n pas dan mon lanmen. Mon rapel Mr Ricky Sultan in pas dan mon lanmen. Mon rapel Mr Barry Barra ki pe fer lanmizik.

Mon rapel sa garson ki ozordi nou dir li ‘’Mersener’’ ki pe fer en perse ekstraordiner dan lanmizik.  E i malere zot pa konnen ki pour dir ‘’Ras Ricky’’ i apel Ricky Sultan.

 

(laughter)

 

HON SEBASTIEN PILLAY

I fer lapenn. I fer lapenn.

 

(Interruption)

 

HON SEBASTIEN PILLAY

Me sa ki enportan Mr Speaker, sa ki enportan, sa ki enportan Mr Speaker i se ki nou koman en pep, nou bezwen aprann valoriz sa ki enportan. E sa ki nou pa devret fer Mr Speaker, se pa sey vin repet listwar dan Lasanble Nasyonal ozordi! Pa repet listwar akoz mon santi poudir nou, nou bezwen koman en Lasanble bouz o dela sa ki’n arive dan lepase.  E nou bezwen kapab regard fitir.  Sa ki devan nou Mr Speaker. E sa ki devan nou ozordi Mr Speaker se loportinite ki nou annan koman en Lasanble, pour sanz konteks sa ki arive, e pour nou met keksoz dan en fason diferan.

Nou annan devan nou lapwentman en dimoun ki mon ser, mon koleg Onorab Ghislain in servi son prop parol pour dekrir Mr Victor e bokou lezot Manm pour koz lo la. Koz lo travay ki Mr Victor in fer.  E mon krwar loportinite ki nou annan pour koz lo travay Mr Victor se pour nou anmenn devan en mesaz avek nou pep. En mesaz ki nou kapab fer keksoz diferaman ler nou evolye. Nou kapab fer keksoz dan en lot fason. Mon tann serten mirmirasyon lo lot kote latab. Mon pa konnen si zot pa tro dakor avek sa ki mon pe dir lo Mr Victor.  Mon pa konnen si zot annan en problenm avek sa.

Mon pa war rezon akoz sa.

E dayer Mr Speaker mon en pti pe, mon war li en pti pe drol Mr Speaker ki dan bann enteraksyon lepase ki nou’n annan, avan ki nou pran deba lo Mosyon. Nou’n ganny loportinite pour fer lenteraksyon avek sa dimoun ki pe ganny apwente Anbasader.

Me mon vwar pour dir ozordi Lasanble Nasyonal pa pe fer sa. E sa i en depar from en presedans ki nou’n kree. Mon pa konnen si nou’n swazir pour donn en loner Mr Victor pour li pa vini, akoz nou santi poudir son lapwentman i enn ki san kontestasyon.  Oubyen eski nou santi pour dir, oubyen eski i annan lezot keksoz ki ozordi LDS dan Lasanble Nasyonal pe sey dir nou?  Ok? Mr Speaker ou ava klarifye sa pwen ki mannyer prosedir pour marse. Mersi.

 

(Interruption)

 

HON SEBASTIEN PILLAY

Ok selman sa ki enteresan Mr Speaker ozordi …

 

(Interruption)

 

MR SPEAKER

Order!  Order!  Order! Annou les Onorab Pillay fini, apre mon ava fer serten klarifikasyon. Onorab Pillay.

 

HON SEBASTIEN PILLAY

Mr Speaker mersi. Mon krwar bann zanfan pe note.  Bann Seselwa an deor pe note.  Nou war ozordi poudir ki mannyer kiltir politik i anmenn nou pour regard keksoz dan serten fason, pour nou pa evolye dan nou fason panse.

 

(Interruption)

 

HON SEBASTIEN PILLAY

I anmenn nou …

 

(Interruption)

 

MR SPEAKER

Order! Order! Order! Order! Order!

 

(Interruption)

 

MR SPEAKER

Bon Onorab Pillay mon vwar en pti pe ou direksyon ki ou pe ale. Mon pa konnen si ou pe sey anticipate kwa ki Lopozisyon i kapab vin avek. Napa okenn Manm Lopozisyon ki’n entervenir ziska prezan lo sa Mosyon, pour ou kapab konnen ki direksyon.  Mwan osi mon dan Chair mon pa konnen ki direksyon.  Me mon pou  klarifye  ou pti bout taler ki rezon ki nou’n pran sa Mosyon koumsa ozordi.   Ok?  Me zis fer atansyon. Entervenan i ankor lo ou kote, me napa – Mon pa konnen si ou pe sey provok lo lot kote pour sa. Me zot annan zot tour, zot a ava kapab entervenir apre oubyen dir de mo lo sa Mosyon.  Ok?  Mon vwar en pti direksyon kot ou pe ale me selman petet ou devret retournen entervenir lo Mosyon ki’n ganny prezante devan nou.  Go ahead Onorab.

 

HON SEBASTIEN PILLAY

Mersi Mr Speaker pour ou Ruling mon ava respekte ou Ruling e mon ava kontinyen avek mon lentervansyon Mr Speaker.

Mr Speaker i annan diferan rol ki en Anbasader i kapab zwe. E nou Konstitisyon in donn li bann diferan fason ki i kapab zwe sa rol. Be selman i annan en fason ki nou, nou’n enterakte avek rol bann Anbasader ki bokou lezot pei in fer ki nou, nou pa’n neseserman fer parey. Par egzanp L’Angleterre in entrodwir en menm sistenm kot i annan li sa ki ou apel en ‘’roving Ambassador.’’

Sa dimoun i ganny servi dan diferan konteks akoz i annan en serten mobilite. Ler en dimoun i ganny plase akredite avek en pei sa menm, i napa sa menm mobilite. I annan serten lobligasyon anver sa pei kot i ganny reprezante, e nou vwar pour dir par fwa i constraint dan bann ki kapab fer dan bann lezot landrwa.

E baze sa ki mon mon’n fer resers lo la; par egzanp Lanmerik i en lot pei ki annan sa menm sistenm kot i annan Ambassador-at-Large. I servi sa menm kalite baz kot sa Anbasader li i travay lo en baz pli larz e ganny involve dan bann aktivite pli larz.

Me sa ki enportan se ki pour li kapab antre dan sa bann laport, pour li kapab antre dan sa bann meeting, i bezwen akreditasyon formel oubyen i bezwen en tit formel.  Nou ti kapab go by way of donn Mr Victor en tit onorer.   Be ler ou donn en dimoun en tit onorer nou tou ki la koman Manm Lasanble, nou konn tre byen poudir dan domenn diplomasi.  Dan domenn si oule politik enternasyonal, mon pour apel li koumsa – en tit onorer pa ganny menm recognition parey en tit formel. So i pour fer ki oule en dimoun par egzanp ed ou pour annan en serten travay ki nou kapab fer lo nivo enternasyonal – mon pour donn ou en legzanp Mr Speaker. Resaman bann Manm Lasanble mon krwar bann manrmay IAC ti ganny en meeting avek lo sa ki konsern ARIPO e i konsern bann Intellectual Property Right bann santer. E enn bann dimoun ki’n fer en kantite travay an relasyon avek bann Intellectual Property Rights se zisteman Mr Patrick Victor.  Akoz li en dimoun ki son bann konpozisyon, son bann morso i ganny servi pa zis nasyonalman me i ganny servi bokou dan larezyon.

E pour li kapab achieve sa, i bezwen fer bokou travay. E sa in fer li devlop en serten konpetans, ki petet menm en eksper – menm en eksper ki dan trade ki li i pe regard li plito koman en pwennvi pirman teknik, pa pe kapab regard li menm kalite lizye ki li i kapab annan.  E so ler ou annan en dimoun ki’n pas atraver sa bann prosedir –  oubyen ki’n pas atraver sa traze koman en dimoun ki li son travay in ganny afekte par bann Intellectual Property Rights, i vin pli fasil pour li kapab anmenn en diskisyon – en diskisyon – si oule pli sansib lo pwennvi; par egzanp bann dimoun ki fer  sa lar, ki en teknisyen ki li probableman lo pwennvi teknik oubyen lo en pwennvi plito Polisi. E sa i enportan ki nou annan sa bann dimoun koumsa.

Lo en lot keksoz par egzanp Mr Speaker, mon konnen ki nou annan en dimoun ki’n akredite par egzanp avek UNESCO ozordi.  Me selman sa dimoun ki’n akredite avek UNESCO, i en dimoun ki li menm li i en Anbasader deza. So si nou annan nou par egzanp en Anbasader Kiltir oubyen en dimoun ki pe reprezant Sesel lo en baz kiltirel i vin koman en Cultural Envoy –  i vin koman en dimoun ki pour travay avek bann travay kiltirel. Nou konnen pour dir UNESCO i sa bout lorganizasyon enternasyonal in terms of United Nation ki deal avek ledikasyon, kiltir.

I ava enteresan pour vwar ki mannyer nou kapab servi en dimoun koman Mr Victor, pour anmenn lavwa diferan lo sa ki konsern en valorizasyon kiltir Seselwa. E bokou dimoun par egzanp resaman Mr Speaker – si nou swiv bann deba ki’n annan sirtou lo rezo sosyal ti pe koz lo lekel ki en National Dress of Seychelles par egzanp?  Ou konpran?

So nou annan bokou bann kestyon ki nou’n war ganny demande, ki koman en pep – petet nou pran bokou konsiderasyon lo bokou lezot size.  Nou’n met bokou lanfaz lo bokou size. Nou’n met lanfaz lo en kantite lo bann size sosyal.  Nou’n met lanfaz lo bann size lakaz; nou debat lo bann size par egzanp lo size ekonomik. Me kantite deba ki nou’n deza fer lo bann size kiltir?

Ki kantite deba serye ki nou’n annan ki’n depas zis deba me ki’n al ver pour nou kapab anmenn serten valorizasyon oubyen serten, donn serten lenportans nou kiltir? E nou bezwen aksepte poudir – mwan mon bezwen aksepte poudir petet i pa en size ki mwan menm mwan mon’n anmenn plis deba lo la. E mwan menm mwan, mon pa’n anmenn ase deba lo la!

Me ozordi nou annan nou loportinite pour nou apwent en dimoun koman en Anbasader ki kapab fer sa travay; ki kapab fer sa travay zisteman ki nou, nou santi poudir i devret pe ganny fer.

Mon a donn ou en lot legzanp Mr Speaker nou annan bokou lespas ouver dan Sesel ozordi. Nou ti ava eksepte pour dir sa ti ava en bon landrwa kot parey dan bokou lezot pei ou war bann morso lar, i ganny mete, bann skilptir i ganny mete.

Be nou napa sa bann keksoz, akoz petet nou pa pe donn sa lanpler oubyen sa lenportans nou kiltir. E so sa ki reste pour nou fer se regard sa ki nou, nou kapab fer. So Mr Speaker mwan mon krwar ki sa ki nou bezwen regarde ozordi, se lenportans ki nou kapab donn sa size nou kiltir. Donn loportinite en dimoun pou reprezant nou lo en baz enternasyonal, lo en baz lokal, lo en baz rezyonal. An se ki konsern nou kiltir.  Sertennman lo en baz rezyonal i deza en plus pour nou.  Akoz si nou regard lo nivo rezyonal Mr Victor i en dimoun ki’n deza in fer en perse enportan dan marse larezyon.

Lo nivo Lafrik i deza annan en recognition.  E mon krwar menm lo nivo enternasyonal i annan serten travay e mwan krwar sa ki enportan pour nou se annou regard ki mannyer nou bouz pli devan.

Akoz fodre pa bliye Mr Speaker, ozordi nou annan bokou nou bann santer, nou bann konpoziter talante ki kapab fer bann perse enternasyonal, me selman zisteman zot pa pe ganny loportinite pour fer li.  E mwan mon krwar Mr  Patrick Victor i en dimoun ki si nou met li dan en lankadreman kot i kapab lager pour sa, i ava a kapab permet nou annan komans annan bann diskisyon enportan e serye, lo ki mannyer nou kapab ed nou bann artis lokal fer bann perse enternasyonal ki mon krwar i pour azout bokou valer avek lakiltir ki nou pe gannyen ozordi.

Mr Speaker mwan an konklizyon mon senserman dir ek Lasanble Nasyonal Mr Speaker,  i annan en term ki en Onorab ti servi. Mon krwar ler nou ti pe debat en Mosyon – ti  petet dan en deba lo en Mosyon ‘Ambassador-at-Large.’  Dernyen fraz. E toultan mon’n get sa dernyen fraz. Akoz ler sa Mosyon ‘Ambassador-at-Large’ in monte, mon’n al get sa Mosyon.

Mr Patrick Victor in ganny prezante koman pour li ganny apwente koman en  Anbasader repiblik Sesel.  Nou Lasanble Nasyonal nou annan en desizyon pou fer. E lepep Seselwa ava ziz nou pour sa desizyon ki nou fer. Mersi Mr Speaker.

 

MR SPEAKER

Mersi Onorab Pillay.  Bon zis mon anvi fer enn de pti klarifikasyon. Ou’n – Lartik ki ou’n site i byen i korek, e tou sa bann prosedir in ganny swiv kot mon lofis in ganny averti par en let ki’n sorti lofis Prezidan, e Lasanble in fer le neseser. So tousala nou’n swiv.  E parey ou pe dir Lartik i demande ki Lasanble i pran en desizyon e sa desizyon apre i ganny repase avek lofis Prezidan.

E se sa lentansyon ki Lasanble pour fer ozordi.  Bon l fason ki nou pran nou travay ozordi lo sa Mosyon, in vin apre ki mon kapab dir en konversasyon enformel, e ti deroule Lendi, ant mwan avek le de leaders. E ti ankor annan en pti pe brouyar. Menm lo kote wording, me Onorab De Commarmond in sey klarifye sa dan son prezantasyon. Me mwan mon’n pran li atraver konversasyon, sa lantant ki mon’n gannyen, se ki nou pour sanz prosedir. Nou antre dan deba e apre nou ava regarde sa bout pour nou apel the nominee, kandida pour vin fer sa pti lenteraksyon i still open. Me selman nou pa’n fer li avan. Nou kapab fer li apre.  Avan ki Lasanble i pran en desizyon. Avan ki nou pran en vote.

So nou kapab egzos deba apre pli tar dan apre midi nou ava apel Mr Patrick Victor, i ava fer sa pti enteraksyon avek nou, apre nou ava eskiz li e Lasanble i ava pran en desizyon final. So vwala en pti pe lantant ki mon mon’n gannyen e la fason ki mon’n deside pour mon fer li. Ok Onorab Pillay. Yes, go ahead.

 

HON SEBASTIEN PILLAY Mersi Mr Speaker. mon apresye. I zis ki mon pa ti’n ganny sa notifikasyon.

 

(Interruption)

 

MR SPEAKER

Non laparol i pour Onorab Pillay. Onorab Pillay.

 

HON SEBASTIEN PILLAY Mersi Mr Speaker mon apresye la fason ki ou’n pas sa lenformasyon avek nou, e mon respekte your Ruling e mon remersi ou pour reponn query ki mon’n raise dan mon lentervansyon. Mersi.

 

MR SPEAKER

Mersi, mersi Onorab. Bon zis mon oule fer sorti ki mon konnen Onorab Leader Of Government Business in sey call mon Lendi. Mon’n retourn call de fwa me son telefonn in angaze. Me apre ti annan en pti klarifikasyon ki Deputy Clerk ki’n anvoy kot mwan apre ki -spesyalman the wording ki mentenir parey e ou’n klarifye dan ou prezantasyon bomaten. Ok?  Onorab Ramkalawan.

 

(Interruption)

 

HON WAVEL RAMKALAWAN

Konbyen Speakers i annan   Mr Speaker? Onorab Vidot. Mr Speaker mon point of order se imputing improper motives! Mon anvi fer sa point of order ki Onorab Pillay in impute en improper motive letan in donn lenpresyon ki poudir LDS in sanz fason la fason ki nou abitye regard lapwentman Anbasader!  E sa pirman lo en baz politik bon marse, ki Onorab Pillay in fer sa! I ti’n kapab Mr Speaker fasilman koz avek son Leader!

Parski son Leader avek mwan nou’n koze lo la e Onorab De Commarmond pe acknowledge. Onorab De Commarmond avek mwan nou’n koze lo ki mannyer prosedir pour fer.  E Lendi letan nou’n sorti meeting avek bann zofisye Civil Status officers nou’n koz ankor lo prosedir.

Alor letan en Manm lo en kote latab ki son Leader ki pe anmenn en Mosyon i a pe donn lenpresyon ki pour dir en lot kote ki a pe sanz fason, konmsi as if nou pe hijack this is imputing an improper motive!

E mon krwar ki poudir Onorab Pillay i bezwen retir sa konmsi sa lentansyon ki i ti pe fer, akoz napa nanryen malsen ki pe arive dan sa Lasanble. Me ki tou keksoz in ganny dakor, in ganny dakor e meyer keksoz ki i ti kapab fer se koz avek son Leader olye vin fer sa bann – mon pa konnen kwa.

 

MR SPEAKER

Bon annou pa antre dan deba. Mon krwar mon’n fer kler. Apre ki ou’n fer sa akizasyon oubyen ou’n al ou deba in al dan sa direksyon, mon’n antre e mon’n dir, poudir Lopozisyon pa ankor pronons li. Napa okenn Manm Lopozisyon ki’n koze lo la.  So ou direksyon mon’n se sa ki mon’n re gid ou dan direksyon ki ou’n pran.  Me ankor parey mon’n dir sa klarifikasyon ki mon’n donnen, desizyon se pa LDS ki’n pran.  Desizyon se mon as Speaker apre ki mon’n ekout le de Leaders ki nou ti dan sa meeting ansanm avek bann zofisye Civil Status Lendi. Mon ankor avek konversasyon ki mon’n fer avek Clerk osi avek Deputy Clerk, nou’n pran sa desizyon pour nou move dan sa way forward. So vwala – e mon parey mon pe dir mon pa anvi ki nou al dan en deba lo sa pozisyon.  Yes Onorab Pillay.

 

HON SEBASTIEN PILLAY Mersi Mr Speaker.  2 keksoz Mr Speaker. Premyerman Mr Speaker ler lo mon kote latab nou’n demann Onorab Ramkalawan pour dir nou ki Order?  I akoz dan laliny ki Onorab Afif koman Deputy Speaker – koman Deputy Speaker ler nou raise en point of order, Onorab Afif i egzize ki sa Manm i met sa point of order lo latab. Li in dir pour dir mon’n impute improper motive.

Mr Speaker mon rapel tre byen, ou’n aret mwan dan mon lentervansyon pour dir mwan koumsa poudir sa i en desizyon ki’n ganny pran! Koman en Manm Lasanble Mr Speaker, mwan mon bezwen swiv lord ki the Chair i donnen! Si the Chair ozordi i dir ek mwan koumsa pour dir nou pe fer lenteraksyon diferaman – sa ki enportan!  Akoz at the end of the day, le de Leaders i kapab dakor lo en keksoz Mr Speaker. me the final decision as to the process ki pase dan Lasanble Nasyonal i pa up to le de Leaders. I up to the Chair!  E a sa moman ki mon ti pe fer mon lentervansyon Mr Speaker, a sa moman ki mon ti pe fer mon lentervansyon, the chair pa ti ankor kominike ki that’s the procedure ki nou pour swiv! So mon remersye ou pour sa. Be mon pa santi ki mon’n impute en improper motive. So bann Manm i ava klarifye zot pozisyon. E mon senserman mon pa’n impute okenn improper motive. Me mon ti krwar pour dir that’s the way it was going!  Mersi Mr Speaker.

 

MR SPEAKER

Ok.  Bon, mon, ok, petet lo mon kote mon ti devret averti zot avan. Me mon’n panse ki apre sa pti meeting enformel Lendi ki sa in ganny pase avek zot Manm. Me sa pa’n arive. Me nou pa pour antre dan deba lo sa sityasyon. Nou ava kontinyen avek Mosyon e parey mon’n dir ler nou a fini, nou ava regarde ki mannyer deba i ava ale.  Nou ava annan en ler pour nou apel kandida, the nominee pour nou kapab fer sa pti lenteraksyon. E apre sa se la ki Lasanble pour pran desizyon. Ok?

Bon nou pour kontinyen avek nou deba lo Mosyon. E mon ava donn laparol Onorab Jude Valmont.

 

HON JUDE VALMONT

Mersi Mr Speaker. Bonzour Mr Speaker. Bonzour tou koleg Onorab, tou bann etidyan dan galeri, e tou Manm piblik ki pe swiv nou.

Mr Speaker mon pran laparol pour shed en pe light lo kwa egzakteman en Lanbasader pour donn en pti leksplikasyon. En Lanbasader li i pli o pozisyon ki en Diplomat i kapab tenir. Parey dan le ka Sesel en Anbasader i ganny nominen par Prezidan Larepiblik, parey Onorab De Commarmond in refer sorti anba Lartik 64(1) nou Konstitisyon pour reprezant son pei – son Sef D’Eta aletranze. E dan sa ka en Lanbasader-at-large li osi i en Lanbasader. Parey zot in dir bann lanbasader, bann High Commissioner, zot lo menm ran. E anba Konvansyon Vienna sa ki nou dir an Angle – Vienna Convention i ganny rekonnet koman en Special Envoy. En ‘Anvwaye Spesyal’ an Kreol ki annan en responsabilite spesyal pour reprezant son pei aletranze. E nou lartik dan nou Konstitisyon 64(1) i dir en special representative e se sa Special Envoy. Lokalman Mr Speaker sa kalite anbasader li i ganny rekonnet koman en Ambassador-at-Large.  Alors i pa ganny plase dan okenn misyon diplomatik, rezidans dan en pei. Alor i pa ganny plase dan en pei, dan en misyon spesifik aletranze me i kapab enterakte avek plizyer pei an menm tan a en serten lenstans.

E alor i vedir ki napa okenn restriksyon teritoryal. I osi kapab reprezant Sef D’Eta dan bann forum multilateral.  E osi i kapab reprezant Sef D’Eta lo nivo bilateral lo serten size spesifik ki Gouvernman i santi i neseser. Mr Speaker en anbasader-at-Large i enportan pour note ki sa pozisyon i pa nesesit en Diplomat de karyer ou menm en politisyen.

E parey bokou dimoun i konnen, souvandfwa en Lanbasader ki’n ganny nominen, en dimoun ki’n en politisyen dan lepase in ganny nominen koman Lanbasader in en size kontansye dan sa Lasanble. Alor sa koman en Ambassador-at-Large i pa nesesit -.  I pa restrikt ou si ou en politisyen, si ou en Diplomat de karyer. I pa enportan sa. I enportan ki ou annan serten skill dan serten domenn, serten abilite pour reprezant ou Gouvernman lo serten size ki Sef D’Eta i santi i enportan.

Mr Speaker dapre mon konesans koman en Diplomat mon ti a kontan refer sorti ki sa pozisyon pa vin, i pa vin avek en saler – i vin lo en baz volonter. Me selman pour fasilit son misyon, pour fer sir ki misyon sa Anvwaye Spesyal, sa Ambassador-at-Large i successful, son vwayaz i ganny kouver par Gouvernman.  E dan ka Mr Victor koman en Lanbasader-at-Large pour Kiltir se pli probableman Minister Kiltir ki pour responsab pour asire ki son fonksyon i ganny fasilite.

Alors Mr Speaker i enportan refer sorti.  Mon remet lanfaz lo sa pwen ki sa tit Ambassador-at-Large la ler ou dan ou pei Sesel dan ou pei parey nou isi Sesel or ou dan pou pei lokalman, nou dir sa Ambassador-at-Large. Me selman ler ou anvoy li deor ofisyelman i ganny rekonnet koman en Special Envoy – se sa ki Vienna Convention i fer Provizyon.

I enportan nou kler lo la. Alor Mr Speaker mwan koman en ansyen diplomat, koman en zenn Seselwa byen fyer pour mon leritaz, en leader ki ankouraz promosyon kiltirel, mon pour demann tou MNA pour siport nou konpatriyot. Enn nou Seselwa, enn nou bann artis lokal pour ed nou pei cherie promot e ede prezerv nou kiltir o pli o nivo. Mersi Mr Speaker.

 

(APPLAUSE)

 

MR SPEAKER

Mersi Onorab Valmont. Mon ava donn laparol Onorab Jean-Francois Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon ti a kontan komans mon lentervansyon an dizan koumsa;

‘’Mon cher amis Patrick sa bann dimoun lot kote latab pe servi ou koman en political football!’’

 

 

(APPLAUSE)

 

 

HON JEAN-FRANCOIS FERRARI

E ou pa merite ganny trete koumsa!  Ok.  Se sa ki Onorab Pillay in fer bomaten. Ok?  E i pa – Patrick Victor, pa deserve, i pa merite ganny trete koumsa. Alors mon demann avek zot. Mon demann avek sa Lasanble ki ler nou kontinyen lo sa deba, nou montre en pe respe pour en dimoun ki nou respekte pour son talan, e pour sa ki in fer pour lanmizik e lezot lar dan Sesel! Nou montre li en pe respe.  Nou pa servi li – nou pa servi li …

 

(Interruption)

 

MR SPEAKER

Order!  Order!  Order!

 

HON JEAN-FRANCOIS FERRARI

Nou pa servi li pour zwe politik avek.  Mr Speaker …

 

(Interruption)

 

MR SPEAKER

Kontinyen Onorab. Kontinyen.

 

HON JEAN-FRANCOIS FERRARI

Mon pa kapab kontinyen. I annan en pe … Anyway mon pa ava …

 

MR SPEAKER

Order! Order!  Order! Order! Order!  Onorab Valmont ou’n fer en pti entervansyon kourt, byen.  Ou’n donn tre, tre bon leksplikasyon lo sa lapwentman, lo Vienna Convention, vreman in ganny apresye. Annou ekout, e Onorab Ferrari in ekout ou ler ou’n koze.  Annou ekout li koze prezan.  Mersi.

 

HON JEAN-FRANCOIS FERRARI

Mr Speaker mon a fer de pti, avek sa pti lentrodiksyon, mon ti a kontan dir de keksoz. I enportan premyerman Onorab Pillay in fer referans avek Lartik 85 lo pouvwar Lezislatif sa Lasanble.  Mon ti a kontan ki ler nou sorti, nou fini sa deba ozordi i call Prezidan e i atir latansyon Prezidan lo Lartik 85 Lasanble Nasyonal, ki donn pouvwar Lezislatif, Lasanble Nasyonal e non pa Lakour!   E ki i devret relir sa Lartik e retir sa case Ankour kont Speaker! Akoz pouvwar Lasanble Nasyonal, pouvwar Lezislatif i reste dan Lasanble Nasyonal! Sa i mon premye pwen.

Mon 2enm pwen Mr Speaker, mon pe koz koman Chair International Affairs Committee. Mon krwar ki i esansyel.

 

 

(Interruption)

 

HON JEAN-FRANCOIS FERRARI

Onorab Valmont si ou enteronp ankor en fwa!

 

(Interruption)

 

MR SPEAKER

Onorab Ferrari kontinyen ou entervansyon.

 

HON JEAN-FRANCOIS FERRARI

Mr Speaker Komite Zafer Etranzer dan Lasanble Nasyonal, se sanmenm sa Komite ki’n ganny set up, ki nou ganny peye pour nou travay dan sa Komite, ki sipoze regard lapwentman e deroulman bann reprezantasyon diplomatik an deor Sesel!

Pli boner sa lannen nou’n etablir en serten prosedir, pour nou kapab travay dan en fason efikas, e pour nou kapab asiste Gouvernman dan sa travay. Dernyen lapwentman ki nou ti fer, nou ti demann en enteraksyon, e nou ti demande ki a sak fwa ki i annan sa bann lenteraksyon, sa bann lapwentman i annan en kominikasyon avek Komite Zafer Etranzer!  Malerezman Mr Speaker mon bezwen dir avek Lasanble ki in napa!  Menm si, menm si personnelman e devan ou Mr Speaker, mon ti demann avek Onorab Sebastien Pillay dan labsans, son leader Onorab De Commarmond – ki pa ti dan pei – dan labsans son Depite Sekreter Zeneral ki osi pa ti dan pei, pour nou kapab annan tenir sa deba pour annan en lesanz avek Departman Zafer Etranzer.  E i pa’n arive!  I pa’n arive! Alors annou pa reste lo prosedir e dir pour dir nou’n sanz fason travay.

Mr Speaker sa deba ki nou ladan la ozordi napa nanryen pour fer avek kapasite e kalite Mr Patrick Victor. Mon’n dir pli boner annan respe pour sa msye; annan respe pour li. Si i annan en deba lo Mr Patrick Victor, i ava arive dan son letan e a sa moman ki neseser. La koman en Lasanble, nou pe sey konpran ki lentansyon Mr Faure?   Dan ki framework?  Dan ki kad i pe fer sa propozisyon?  E ki i anvi achieve dan sa nominasyon ki in fer?

Akoz Mr Speaker responsabilite Lasanble Nasyonal se pour operate se pour fer sir ki sa pei i travay dan bann kad administratif ki byen determinen. Nou pa kapab – nou’n dir pandan tou sa letan ki nou’n la dan sa Lasanble ki egziste la konmela nou’n dir ki nou bezwen konstri bann lenstitisyon ki for. Alors nou bezwen travay toultan dan kad bann lenstitisyon, ki egziste oubyen ki nou anvi kree.

Nou pa kapab zis leve bomaten e deside nou anvi fer en Referendum!   En lot zour nou reve nou anvi fer en tinel!  En lot zour nou reve nou anvi apwent en Ambassador-at-Large. Sa bann desizyon i bezwen ganny fer dan en kad ki kler, e ki nou koman en Lasanble nou konpran byen ki mannyer i marse!  Plizyer fwa Mr Speaker dan sa Lasanble mon’n dir ki i domaz ki Egzekitif e Prezidan Faure li menm i bliye ki i ‘Napa’ mazorite dan sa Lasanble! I bliye, ki i bezwen travay avek mazorite dan sa Lasanble akoz nou, nou annan sa responsabilite pour nou anmenn sa balans pouvwar.

Mon ti krwar ki Mr Faure i bliy sa bann keksoz.  Me ozordi avek sa lapwentman Mr Speaker, mon konvenki ki msye Faure pa bliye i konn tre byen ki i napa mazorite!  Me selman i pe sey pran bann desizyon i pe sey fors serten keksoz lo sa Lasanble, akoz i pe rod en konfrontasyon avek sa Lasanble!

I pe rod en konfrontasyon, i pe rod en bloke ki nou pa’n donn li depi lontan!  Akoz avan eleksyon Mr Faure ti dir sa Lasanble pour vin en dancehall, nou pour bloke eksetera. Nou pa’n fer li.  Nou’n travay dan en fason responsab! Responsab! nou’n diskit, nou’n met lo latab e nou’n sey rod bann konpromi lo bann size enportan, pour nou kapab kontinyen fer marse sa pei. Nou ekspekte e mon redir sa ankor Mr Speaker – nou ekspekte koman mazorite dan sa Lasanble ki Mr Faure ‘i konsilte’ avek NOU, si i anvi reisir dan son bann Prozedlwa, dan son bann nominasyon eksetera.

Si i an vi fail  – e mwan mon krwar i anvi fail alors kontinyen fer parey i pe fer. Kontinyen pa konsilte avek nou. Kontinyen sey fors sa bann keksoz dan nou lagorz. Me nou, nou pa pour tonbe dan sa pyez.  Nou pa pour tonbe dan sa pyez, e mwan mon war sa ki pe arive ozordi se malerezman Mr Faure ki pe anvoy en lapo bannann avek nou, pour espere ki nou glise lo la e pour li kapab sanz son semiz ROZ’, ki in komans mete pour li remet son semiz ‘ROUZ’. Se sa ki pe arive. E nou, nou pa pour sa!

Akoz mwan mon pa anvi souzestim – mon pa anvi souzestim kapasite msye Faure koman en Leader e koman en Prezidan. Me sirtou mon pa souzestim son kapasite, son leksperyans e son bann konesans dan politik, e la nou war pour dir vreman i pe sey anvoy en lapo bannann avek nou.  I pe sey zet nou ater, e mwan mon dir avek li pa bezwen tro pran nou pour bet! Nou annan travay pour fer, nou pour fer nou travay e nou pa pour les son ‘AZAN’ dan sa Lasanble Onorab Pillay sey trenn nou dan en domenn politik lo size msye Patrick Victor!

Mr Speaker wi, Mr Faure pe sey kree en konfli ant L’Egzekitiv ek Lezislatif! Me selman sa pa pour arive.  An menm tan nou vwar poudir i annan devan nou en apwentman en nominasyon ki dan mon konesans i fer 3enm fwa ki nou servi sa mo Ambassador-at-Large. Si mon pa tronpe premye fwa sete pour apwentman Mr Siva  Chinnakannan  e apre ti annan avan oubyen apre ti annan apwentman Mr Nirmal Shah koman en Special Envoy. Pa koman en Ambassador-at-Large.  Annou reste lo sa enn ki pli enportan.  Sa ki nou tou nou rapel.  Pa pli enportan ki nou tou nou rapel.

Lapwentman Mr Siva koman Ambassador-at-Large. Lekel antre zot ki kapab dir ozordi ki msye Siva pe fer?  Kot i ete?  Nou pa konnen.  Kot i ete?  Ki i pe fer?

 

(laughter)

 

HON JEAN-FRANCOIS FERRARI

Mannyer mon tande Mr Speaker, nou Anbasader, Ambassador-at-Large avek posibleman – oubyen posibleman nou pa konnen, posibleman avek en paspor diplomatik Sesel, i dan problenm vizavi Lalwa dan Lenn, e i pa kapab sorti dan Lenn ni pran en avyon pour vin Sesel i pa kapab vini!  Pourtan i nou Anbasader. Alors i toutafe normal ki ler nou tann apwentman en lot Ambassador-at-Large nou demann kestyon. I toutafe normal pour nou sey konpran. E la Onorab De Commarmond bomaten in donn nou enn de leklersisman. Me mon pour mwan personnelman mon apresye enn de leklersisman me sa i pa le ka, i pa convince mwan ditou pour dir napa ankor lezot lenformasyon ki nou bezwen gannyen!  Kekfwa msye Onorab De Commarmond i ava dir nou ki i ava reponn enn de bann kestyon ki mon pe poze. Mr Speaker nou annan deza isi Sesel en Anbasader pour zanfan. E nou fek leve la pa tro lontan pour dir kekfwa nou pe komans nou pe komans annan tro bokou Anbasader. Tit Anbasader Mr Speaker i en tit tre o, tre onorifik. E se bann dimoun ki ganny konsidere koman lo en nivo tre elve dan lemonn, e ki kapab reprezant Prezidan Larepiblik e Leta Seselwa. I en nivo tre elve. I menm pli elve ki en nivo en Minis ler sa dimoun i lo en misyon aletranze, akoz i en special representative, oubyen en Special Envoy of the President. Alors i enportan ki nou debat sa size.

Nou pa isi la parey bomaten pour nou ekout eulogy – en  eulogy Patrick Victor fer par Onorab Ghislain!

 

(Interruption)

 

HON JEAN-FRANCOIS FERRARI

Nou pa Mr Speaker ou kapab koz en kou ek sa Onorab laba ki pe konport li koman en pe  malelve?  Onorab Loze silvouple.

 

(Interruption)

 

MR SPEAKER

Kontinyen ek ou lentervansyon Onorab Ferrari.

 

HON JEAN-FRANCOIS FERRARI

Mr Speaker dan sa deba ki nou lo la, mon’n dir ki nou bezwen plis leksplikasyon. Nou’n ganny dir ki sa msye pa pour ganny peye – ki sa msye ki’n ganny apwente pa pour ganny peye.

Kote nou apwent en dimoun apre nou pa pey li?  Nou bezwen – Nou, nou  annan en responsabilite dan sa Lasanble pour nou deside pour nou vey larzan piblik.  Ou ki pe dir nous a Onorab De Commarmond. Nou, nou bezwen ganny sa – (ou en politisyen ou) nou, nou bezwen ganny sa avek bann Lotorite e nou bezwen ganny sa lo papye. nou bezwen konnen ki lenplikasyon lapwentman okenn dimoun dan tel pos. i esansyel sa. Akoz si non, bann dimoun pour dir avek nou be zot ki laba dan Lasanble zot pa demann kestyon?  Zot pa sey gete?  Nou bezwen konpran byen ki lenplikasyon, tou lenplikasyon – lapey si pour annan – biro pour annan, drayver si pour annan – loto si pour annan.  Letan en special Envoy, i vwayaz aletranze, eski i vwayaz first class, business, class, oubyen economy?

Tou sa bann keksoz i enportan pour lepep Seselwa konnen.  Se pour sa Mr Speaker ki mwan koman Chairman International Affairs Committee, mon pe demande ki nou annan sa lesanz avek Minister Zafer Etranzer e Minister Kiltir.  Akoz pour le moman Mr Speaker Minister Zafer Etranzer i dan konfizyon – Departman Zafer Etranzer i dan konfizyon total, total! Tou dimoun lab ape panic, pa konpran ki pe arive!  E dan Departman Kiltir egalman tou dimoun pe panic!

Tou dimoun pe sey konpran be si i annan en desizyon ki pe ganny pran – si i annan en kad ki pe ganny fer, nou ki mannyer nou kapab en zour vin en Anbasader nou osi?  Nou ti a kontan kekfwa en zour vin en Anbasader. I annan plizyer dimoun ki la kiltir isi. I annan plizyer dimoun dan spor ki ti a kontan.  Mon zanmi lekol Joe Samy kekfwa i ti a kontan, demen en zour al reprezant nou pei.   Mon pe mazin Mr  D’Offay i osi i en bon kozer. I en bon Anbasader. Be tou sa bann dimoun zot ti a kontan demen kapab vwar la i la semen ki’n trase. La i la semen ki ou bezwen pran, pour ou en zour ganny sa loner al reprezant Prezidan Larepiblik an deor Sesel! Sa i enn.  E pourtan, byensir mon zanmi parey mon’n dir Joe Samy  kekfwa i ava pe demande, i ava dir be mwan mon’n ganny mwan meday Chevalieur D’honneur  avek La France. Mon’n ganny rekonnet Lanmerik.  Konmsi kot mon’n al mal mwan?  Ton Joe kote mon’n mal pase mwan?  Kote mon’n mank semen?  I ti a kontan konnen li. Alors nou koman en Lasanble nou bezwen tras sa semen. Nou bezwen klersi sa semen!

E nou pa kapab. E mon repet ankor ki mon’n dir pli boner Mr Speaker, nou pa kapab koman en pei, koman en Gouvernman operate lo baz mon rev en keksoz ozordi, demen mon vini mon met sa devan Lasanble! Nou pa kapab travay koumsa. Nou bezwen travay dan en fason ki sistematik, ki annan en lozik ladan e ki anmenn lazistis e en semen e en lespwar e en lavenir pou tou dimoun ki aspire pour li vin en reprezantan, oubyen en Anbasader oubyen en lot; ganny en loner pour reprezant son pei Sesel.

Mr Speaker i enportan a sa moman pour fer konnen.  E mon repet ankor ki bann zofisye e dan Minister Zafer Etranzer e dan Departman Kiltir pe panic akoz zot war bann desizyon ki pe ganny pran san okenn lozik. E sa i en kritik ki kantmenm zot riye, kantmenm zot gognarde ki deor bokou dimoun pe dir be sa Gouvernman i konnen ki i pe fer?  Kantite fwa ki i pour vin avek en keksoz, apre i pour sanze apre i pour kit ater, apre i pour vini, i vin ek en tinel premye lannen, 2enm lannen i vin ek de tinel, 5 konblaz, lot, lot, selman ler nou demande be ki mannyer nou pe fer? Ki plan Grand Anse Praslin nou ti pe koz lo la yer – konmsi in fer sa pour nou fer sa plan pour nou fer sa konblaz?  Non pa ankor fer.  Nou a gete nou ava fer.

Be nou pa kapab operate koumsa Mr Speaker. Nou pa kapab en zour reve e zis kree en sityasyon en pozisyon. Mon asire Chief Secretary i osi i pe panic madanm ki ti la yer.  Mrs Esparon. Li osi i pe panic li akoz finalman en lot pos i ganny kree ankor.

Se pour sa ki mwan mon dir, si i annan fason pour nou fer sa ki pli senp, ki pli apropriye. Par egzanp mwan mon ti ava dir Mr Speaker Anvwaye Spesyal, akoz eski msye Faure in swazir pour vin devan Lasanble avek en nominasyon pour en Anbasader. En Anvwaye Spesyal i pa bezwen vin devan Lasanble. E Anvwaye Spesyal i kapab avek en let deplase pour li al rankontre en zofisye dan en lot Gouvernman atraver lemonn. Tandis ki en Anbasader-at-Large dizon par egzanp, dizon demen Mr Patrick Victor i anvi al UNESCO. Mr Patrick Victor i annan en bon pe son kalifikasyon, son leksperyans i bokou dan kiltir parey nou dir. I bezwen al en kou UNESCO.  Be UNESCO i pa konn en Anbasader-at-Large li, UNESCO i konn Anbasader Larepiblik Sesel Paris. Ki akredite avek UNESCO.  Se li ki zot konnen.  Alors i pou bezwen vwar, i pou bezwen pas atraver nou Anbasader pour li al fer son travay.  Donk nou pa pe fasilit nanryen, ok?  Nou pa pe fasilit nanryen nou pe konplik keksoz. Nou pe konplik keksoz.  O u sa dimoun ki nou pe sey nominen e nou pe konplik keksoz, pou bann dimoun ki dan  pos deza dan bann Lanbasad  aletranze.

Me selman i enportan Mr Speaker pour mwan revin lo bann pwen ki Onorab De Commarmond, Leader of Government Business akoz mon bezwen ekout li akoz li ki reprezant Gouvernman isi dan sa Lasanble.        E akoz ler mon’n ekout son bann lezot kiltir, mon’n konplet, son bann lezot koleg mon’n konpletman konfize!

Onorab De Commarmond in dir avek nou, nou kiltir pe tonbe alors nou bezwen relev nou kiltir!  Mon dakor be nou bezwen relev nou kiltir isi.  Se isi ki nou bezwen lev li! Se pa deor ki nou bezwen lev nou kiltir! Mwan mon ti a’n vreman apresye si par egzanp Prezidan ti’n dir ok la kiltir i en domenn ki mon anvi donn en latansyon partikilye, spesyal dan sa dernyen lannen mon manda. Parey mon annan en konseye diplomatik, oubyen mon ti annan mon krwar i pa’n re-ranplase. Parey mon annan en Konseye Ekonomik, mon ava apwent en Konseye Kiltirel. Ki ava donn en dinamizm, en dinamizm pou li kapab lev lakiltir dan Sesel. E ler sa travay i bezwen ganny fer dan en reprezantasyon aletranze sa dimoun i ava ganny apwente konman Envoy – en Special Envoy Prezidan Larepiblik pour li kapab al fer sa travay aletranze.

Se sa ki mwan mon war.  Se sa ki donn en kad, ki nou pe travay dan en kad ki egziste, ki fonksyonnen e ki kapab anmenn bann rezilta. Akoz ki, eskiz mwan sanmenm sa ki mon’n dir pli boner Mr Speaker ki zot pe servi Mr Patrick Victor konman en political football. Kekfwa zot krwar pou dir nou, nou pa kontan Mr Patrick Victor, kekfwa zot krwar nou pa kontan li akoz in deza, kekfwa nou ankoler avek li; kekfwa nou ankoler avek li akoz in deza in konpoz detrwa sanson pou zot parti!

 

(laughter)

 

HON JEAN-FRANCOIS FERRARI

Non, nou pa kontan, sa i pa fer Mr Patrick Victor en move artis. I pa fer li en move artis. I fer li – o kontrer in fer li ganny rekonnet parey nou, David Andre pa i ekrir sanson pour nou, Ras Ricky, tou sa bann dimoun ki’n kapab annan sa, ki’n ariv lo sa nivo. Nou, nou tou ki la lo sa kote latab nou kontan, nou kontan Patrick Victor.  Demann Ms Jany konbyen fwa in travay avek Patrick Victor pour li fer bann show.  Nou, nou pa vin isi dan Lasanble pour nou fer keksoz akoz nou kontan en dimoun parey zot, zot pe fer!  Nou fer li, nou pran en desizyon akoz sa desizyon i bon pou Sesel! Si Patrick Victor i bon pou Sesel i ava ganny apwente konman en Anbasader oubyen en Special Envoy pou Sesel, si i bon.

Me selman nou bezwen annan en kad ki nou pe travay ladan, nou pa kapab, zot pa kapab vin la devan nou zis dir nou sel keksoz sa, apard Onorab, sa ansyen diplomat la ki’n koze, ki pa’n nonm sa ditou. Zot, zot in nonm zis bann zoli; keksoz konmsi zot le fer leloz, ok?  Be nou pa pe fer leloz, nou pa pe anvoy en dimoun akoz i en bon boug. E se sa kot zot ganny li mal zot!  Nou pe anvoy en dimoun akoz i  pou efikas e akoz i the right man for the right job! E pour le moman nou pe sey rode what is the job?  What is the right job pour nou fer?  Ok?

 

(Interruption)

 

MR SPEAKER

Order! Onorab Ghislain, order! Kontinyen Onorab Ferrari.

 

HON JEAN-FRANCOIS FERRARI

Zot kapab kriye, zot kapab pile, zot kapab ronfle. Nou, nou anvi fer nou travay parey nou’n deza fer. E se pour sa ki mwan Mr Speaker e mon dir pour la 2enm fwa konman Chair IAC mon pare e mon anvi annan sa enteraksyon avek bann zofisye dan Gouvernman, avan nou pran sa desizyon! Akoz se koumsa ki devret marse.  Me selman annou – an konklizyon Mr Speaker, fer byen resorti ki mwan personnelman mon ankoler. Mon ankoler akoz, tou sa kritik ki nou, nou’n gannyen, akoz nou’n sey rod en fason travay, en metod travay avek zot dan lentere nou pei. M Pandan 2an edmi nou’n sey rode ok, nou’n sey rode nou fer tou zefor posib pour nou kapab anmenn solisyon. Demann zis bann ki lo Bills Committee gete kantite travay Onorab Georges, Onorab Andre i fer lo sa Komite. Ki mannyer nou devoue nou letan pou ede, pour nou fer avanse sa bann keksoz.

Se pa nou travay se pa travay Onorab Georges pour li tir defo dan en Bill. Me selman nou fer li. Se bann langazman ki nou, nou’n mete e ozordi 1an avan eleksyon, 1an avan eleksyon nou vwar ki Mr Faure i tir son semiz blan e i konmans met son semiz roz ok, e i antre dan en konba politik.

E la zis i pe anvoy bann keksoz pour nou glis lo la, e sa mon krwar i domaz i pa bon pou Sesel.  Ok, i pa bon pou Sesel i pou anmenn nou dan en direksyon ki nou pa anvi ale. Me Selman nou, nou konnen nou, i pa nou lafot, nou pou kontinyen travay pou Sesel. nou pou kontinyen kapab eklersi sa semen e konstri bann lenstitisyon ki bon ki solid ki for. En lenstitisyon ki pou permet posibleman en lapwentman parey Patrick Victor me osi demen en sportif, en Joe Samy en lot dimoun en kad ki pou marse pa zis pou en zour pa zis pou en zonm me ki pou marse pou Sesel pou plizyer lannen. Me se sa nou misyon, se sa nou travay ki nou’n vin fer dan Sesel e se pour sa ki mon ankoler ler mon war ki pou dir konman Mr Faure i anonse ki pou dir in re-marye, in re-marye avek son parti, i pe konmans anvoy bann makadanm. i pe konmans anvoy bann lapo bannann.            E sa en Prezidan Larepiblik pa fer! En Prezidan Larepiblik pa fer! En Prezidan i met lentere son pei avan, e la i kler par egzanp, nou konnen akoz, nou konnen akoz sa nominasyon ki annan pou fer avek kiltir i vini la konmela. Be mon ava dir zot akoz, akoz dernyen we-le-le ki zot ti’n sey fer dan car park bann artis pa’n vini!

 

(laughter)

 

HON JEAN-FRANCOIS FERRARI

Be nou konn tre byen, bann artis pa’n vini.

 

(laughter)

 

MR SPEAKER

Onorab, Onorab wrap-up.

 

HON JEAN-FRANCOIS FERRARI

Prezan i fer ki zot in pran en desizyon dan en moman panic, dan en moman panic. Ok?  E prezan zot sey anpandan avek tou keksoz pou zot kapab fer sa!          E se pour – se pour sa ki mwan mon redir ankor. Mon cher ami Patrick, zot pe servi Ou konman en political football!  Zot pe sey anvoy ou dan sa larenn, dan sa stage, dan sa arena pou zot servi ou pou fer politik.  Nou, nou pa pou servi ou.  Nou, nou konn ou valer.

 

(Interruption)

 

HON JEAN-FRANCOIS FERRARI

Wi. Wi, wi. …

 

(Interruption)

 

MR SPEAKER

Order!

 

HON JEAN-FRANCOIS FERRARI

Nou konn valer Patrick Victor e la …

 

 

(Interruption)

 

MR SPEAKER

Onorab en moman, Onorab Ghislain dernyen fwa ou bann interjections mon krwar i en pti pe tro for. Ou pe enteronpe.  Mon santi ou pe enteronpe,  Ok?  Onorab Ferrari kontinyen.

 

HON JEAN-FRANCOIS FERRARI

Mersi Mr Speaker.  Laverite i fermal, me selman aksepte, aksepte sa laverite.  Nou, nou anvi e mon dir ankor. Patrick Victor nou konn son valer, me selman nou anvi kree en lenstitisyon ki pou pli gran ankor pou Patrick Victor. Ki pou lezot zenerasyon; ki pou donn en semen bann dimoun ki anvi monte en zour! Ki pou donn zot en laklerte dan sa fernwar ki nou ladan, ki zis en dimoun i leve bomaten i sorti dan fernwar, i fer en gro lanons apre nou pa tann nanryen ankor! Alors mon ava enplor Prezidan Larepiblik pour li retourn lo en metod travay, ki nou’n ti’n adopte e ki ti pe marse. Kot i konsern Lasanble, kot i konsern nou konstitisyon kot i konsern pouvwar Lasanble i esansyel ki Prezidan Faure i reget son metod travay e realize e i aksepte ki i napa mazorite isi dan sa Lasanble.                          I bezwen angaz avek nou pou kapab fer avanse sa bann deba. Alors Mr Speaker mon ava terminen an dizan mon’n donn en travay, mon’n zet en travay lo Onorab Pillay pour li al fer kopi Lartik 85 pour li pas avek Prezidan pour li kapab, pour Prezidan kapab respekte nou Lasanble en pe plis ki sa. E respe nou bann pouvwar, mon’n demann formelman, e la prezan mon demande konman Komite, Chairman Komite Zafer Etranzer formelman mon pe demande ki nou Sekretarya i demann ki nou rankontre avek Departman Zafer Etranzer avek Departman Kiltir, pou nou byen konpran par egzanp. Si Mr Patrick Victor pe al aletranze ki nou Polisi Kiltirel nou annan enn. Nou annan enn, mon war zot tou zot get mwan!  Be zot get mwan, gete! Zot tou! En White Paper pe ganny ekrir Mr Speaker ou war?  tou sa bann keksoz se bann keksoz ki nou bezwen annan Mr Speaker.

Alors mon ava termin la an dizan avek mon bann koleg lo lot kote latab. Re-evalye sa metod travay ki zot in pran, re-evalye zot nepli dan Parti Inik, zot napa sa mazorite. Annou koze annou fer keksoz byen annou kree bann lenstitisyon ki fonksyonnen e bann lenstitisyon ki pou marse pour lavenir e annou aret servi nou bann artis konman bann foutbol politik! Annou fer li dan lentere Sesel silvouple! Mersi Mr Speaker.

 

(APPLAUSE)

 

MR SPEAKER

Mersi Onorab Ferrari.  Bon nou a kontinyen avek bann lentervansyon apre Break. Mon ava envit bann Manm, mon annan bann group etidyan avek nou pour bann ki enterese pou vin enterakte avek bann etidyan pandan break. E Lasanble i break e nou repran nou travay 11er.

 

                (BREAK)                                                                                                                                  

 

MR SPEAKER

Bon nou ava kontinyen nou travay deba lo Mosyon.  Mon ava donn laparol Onorab Bernard Georges apre i ava swiv. Onorab Pillay ou’n fini koze. Ale Onorab.

 

HON SEBASTIEN PILLAY

Mersi, mersi Mr Speaker mon oule fer en klarifikasyon en personal explanation lo en pwen ki’n ganny leve par mon koleg lo lot kote latab.

Mr Speaker ou a rapel pour dir dan avan en meeting ki nou ti pe attend mwan ek Onorab Ferrari ti apros mwan e diskit ek mwan lo size sa lapwentman.  E i ti demann mon pour (regard) rod ka ladministratif. Sa ti gist nou konversasyon.  Nou pa ti koz lo en meeting avek Lotorite. Mon ti kominik ek ou, mon ava met sa demann devan, si mon ganny larepons mon a kominik ek ou e mon ti kominik ek ou ki mon pa’n ganny larepons vizavi sa. So a okenn ka ti annan en diskisyon lo whether ti pour annan en meeting oubyen non. Si sa ti’n kominik ek mwan ki nou oule en meeting, then mon ti ava demann en meeting.

So pa sa ki’n ganny kominik ek mon pour rod en meeting regarding sa size. E deplis mon pa kapab. I pa dan mon pozisyon koman en Manm Lasanble pour demann Egzekitif pour eksplik tou son lapwentman!  So sa i bezwen si IAC mon pa konnen si zot in fer en demann formel avek Foreign Affairs.  Sa i en lot zafer.

Me selman a mon nivo ti napa en demann formel avek mwan pour demann en meeting.  Mon ti a kontan met sa lo record klerman. Mersi Mr Speaker.

 

MR SPEAKER

Wi mersi Onorab Pillay.  Bon i annan en demann ki’n ganny fer anver mwan. Mwan osi, mon ti pe panse ki IAC pe antre an kontak avek Departman Zafer Etranzer, e la mon’n aprann Departman Kiltir osi tou. Me i vin en pti pe dan sa lespri ki nou’n pran nou travay. Par egzanp pour apwentman Mrs Accouche ki nou ti vwar apre i annan sa bezwen, ki nou ti bezwen ganny en meeting pour nou konpran en pti pe apre lespri deryer lapwentman Mrs Acouche. E mon krwar sa ti klarifye bokou keksoz. Se sa mon krwar ki Lasanble pe rode atraver IAC. Be nou ava regarde.

Mon ava pran ankor de oubyen 3 entervenan apre n0ou ava regarde ki direksyon nou pour ale.  Onorab Simon Gill ou lo la.  Mon ava pran an mezir mon ale. Ok?  mon ava donn laparol Onorab Bernard Georges.

 

HON BERNARD GEORGES

Mersi Mr Speaker.  Bonzour tou dimoun ki pe ekout mwan isi e ayer. Mr Speaker i annan detrwa lannen pase, apre ki mon ti’n propoz en Mosyon dan sa Lasanble, lo size kiltir ki mannyer nou ti bezwen ranforsi e devlop nou kiltir ankor.

Zis apre sa Mosyon, mon ti Anvil e mon’n tap avek mon zanmi Patrick Victor. E premye parol Patrick i dir mwan, Bernard ou pa devret en Manm Lasanble, ou devret Minis Kiltir. E taler mon ava eksplik zot akoz Patrick in santi in kapab dir mwan sa keksoz. E ozordi Mr Speaker mon anvi retourn sa konpliman e dir avek Patrick pa Anbasader ki ou devret, se Minis Kiltir ki ou devret isi Sesel!

 

(APPLAUSE)

 

HON BERNARD GEORGES

Akoz napa en lot dimoun Mr Speaker. Napa en lot dimoun.  I annan en kantite dimoun ki dan kiltir pe napa en lot i konn parey sa dimoun ki nou pe koz lo la ozordi. Annefe mon krwar i pa tro for pour nou dir ki Patrick Victor i dan menm ran avek Paul McCartney, avek Neil Diamond avek Brasens e avek Georges Mustaki.  I dan sa kategori dimoun ki bann poet, ki bann mizisyen, ki bann meter an senn, ki bann dimoun ki koz en langaz ki nou isi ba nou kapab zis reve.

Nou annan nou serten parmi nou ki’n esey ekrir poem. Mwan mon enn ki’n esey ekrir liv, mwan mon enn. Me ler ou regard sa ki sorti dan lespri Patrick, ou realize ki mannyer ou en nen obor en zean, e ki zanmen ou pour kapab ariv laba.

 

(APPLAUSE)

 

HON BERNARD GEORGES

E Patrick mon napa nanryen ki ti pour fer mon plis kontan, ki war ou pe asize, dan en pozisyon tre o dan nou pei, e pe fer sa ki ou’n fer tou ou lavi e sa ki ou annan talan pour fer – setadir devlop nou kiltir e met li la kot nou tou nou ti a kontan met li. Mr Speaker Patrick Victor ek mwan nou annan en long, long lanmitye.

Mon pa kapab dir ki mon’n sa dimoun ki pli pros avek li isi dan sa Lasanble, me mon enn parmi sa bann dimoun ki pli pros avek li dan sa Lasanble.  Akoz Patrick ler i ti komans, ler i ti komans frot gitar e zwe sanson enn bann premye landrwa kot i ti zwe sete dan en pti guesthouse ki mon manman ti annan, e se la kot Patrick in komanse.  E i fer mon mazin sa toultan.  E depi sa letan mon pe koz mon ti annan 18 an li i ti annan 19an oubyen 20 an.

Depi sa letan nou lanmitye in pros e a tel pwen ki i annan detrwa an pase in fer mon en loner eksepsyonnel ler i ti lans son Fondasyon i ti demann mon vin en trustee Patrick Victor Foundation. E Mr Speaker i ti mon gran loner pour mon aksepte kolabor avek li dan sa demars ki i anvi fer, pou promouvwar kiltir isi Sesel.

E donk zot ava rapel ki 2 semenn pase dan Mosyon Onorab Ghislain lo sports e sportsman, mon ti dir ki i annan bokou plis dimoun ki sportsman ki devret ganny rekonnet dan sa pei e enn bann dimoun dan sa pei e enn bann dimoun ki natirelman mon ti annan antet sete sa dimoun ki nou pe koz lo la ozordi.

E mon kontan ki ozordi nou’n ganny en sans zis de semenn apre pour nou fer en parkour otour ki mannyer Patrick Victor i devret ganny rekonnet dan nou pei pour son lakonplisman, pour son bann keksoz ki in fer.  E si mon dir i ti devret vin Minis oubyen dan en kad osi enportan ki Minis, ansarz kiltir dan whatever fason, se akoz i even premye. Bann nou ki’n swiv parkour plizyer artis dan lemonn, nou’n remarke ki ariv a en serten staz ,artis i ganny rekonnet dan en serten fason.  E Melina Mercury ki ti en gran aktres Grek ti vin Minis Kiltir Grek.  E donk i annan en presedan pour onor bann dimoun tel parey Patrick.

E mon, mon napa okenn dout e mon konnen ki napa okenn dimoun isi dan sa Lasanble lo tou le de kote latab ki annan okenn dout ki Patrick i devret ganny rekonnet e aplodi e elve pour sa ki in fer e pour sa ki i kapab fer ankor pour kiltir dan nou pei.

Sel keksoz ki diviz nou kekfwa se ki form sa rekonesans ki i devret pran. E mon krwar se la, kot nou annan en larivyer antre nou kot nou bezwen konstri en pon ki ler nou’n fini avek sa diskisyon, nou tou nou ava tonm dakor lo lekel meyer fason pour kapab rekonnet sa merit ek talan sa zonm.

Ou vwar Mr Speaker Onorab Ferrari in dir en keksoz taler ki tre profon e set en refleksyon ki mwan menm mon ti pe fer an mezir ki nou mon’n war sa Mosyon lo Order Paper e mon’n lir ki sa i pour arive e sa se ki mannyer nou pour manage sa swe ki nou annan ek sa dezir ki nou annan, avek sa lankadreman apropriye ki sa dimoun i bezwen gannyen. E mwan mon war li i malere ki dan sa ka, i pa’n annan diskisyon avan ki sa Mosyon i vin lo latab. Anbasader i en keksoz san

sib akoz en Gouvernman ki pour sikse dan en lot Gouvernman, i pou’n pri avek en Anbasader ki’n ganny apwente. Akoz enn fwa ki ou’n ganny apwente that’s it. Ou pa kapab retire sa tit Anbasader.

Ou kapab retir tit Minis, ou kapab retir tit Special Advisor, ou kapab tir nenport ki tit me ou pa kapab tir en tit Anbasader. E se sa ki fer ki konstitisyon i demann nou koman en Lasanble avan ki Prezidan i nonm en Anbasader i demann nou laprobasyon. I pa li i nonmen apre nou, nou siporte, me nou, nou bezwen donn li permisyon pour nonmen.

E obviously dan tou demokrasi ki marse ler en dimoun i anvi, ler en Prezidan i anvi apwent en Anbasader son premye refleksyon se apard ki tou sa bann ki Onorab Ferrari in dir ki mon pa pour repas lo la akoz i pa mon lentansyon. Me son premye refleksyon se engage avek Lopozisyon dan son pei. E dir vwala ki mon annan antet – pa dan en fason enformel parey nou pe fer ozordi me dan en fason enformel avan nou pas a sa letap formel. E dir vwala sa ki mon annan antet. Eski mon kapab kont lo ou sipor? Dan en fason ki atraver sa diskisyon enformel en solisyon a ganny trouve, pour ki nou napa en deba ouver lo merit oubyen demerit en dimoun ki vin devan Lasanble.  Akoz nou pei i pti, pti e nou pa kapab avoid dan tou sa ki nou dir ki dimoun pour tir en refleksyon a li in siport mon. i pa’n siport mwan whatever. Pour evit sa ti pou’n fasil. Tou sa ki Prezidan ti devret fer se tyonbo telefonn call Leader Lopozisyon e dir gete Onorab Ramkalawan vwala ki mon annan lentansyon fer mon kapab ganny ou sipor.

Oubyen pran kontak avek IAC isi dan sa Lasanble e dir gete nou pour anvoy sa Mosyon devan zot eski nou kapab ganny zot sipor?  Si sa ti’n ganny fer ozordi nou tou nou ti pour pran en diskisyon lo en lot lanpler. Nou ti pe koz lo merit en lapwentman e non pa lo lankadreman sa kote nou anvi met sa dimoun ki merit ganny en lapwentman.  E donk Mr Speaker mon ti anvi fer sa refleksyon bomaten akoz mon parey mon’n dir. Mon osi mon trouv mon dan sanmenm sa landrwa kot bokou nou mon konnen Onorab Jany De Letourdie ki bokou pli pros avek Patrick i trouv li dan sa sityasyon.

E i regretab ki nou’n ariv a sa nivo. Me mwan ti a kontan dir nou en Lasanble entelizan, nou en Lasanble ki konnen ki sa ki nou devret pe fer. Alor mon anvoy sa detrwa refleksyon bomaten lo en tit personnel akoz Patrick ek mon nou annan en gran lanmitye parey mon’n eksplike.  E annou pa bliye ki ler i ti fer son dernyen show detrwa mwan pase Onorab Ferrari ek son madanm, mon ek mon madanm nou ti bann premye pour al aste tiket pour nou al regarde e nou’n annan, nou’n pas en sware merveye. E parey nou ti pe ekspekte. Alor i pa, nou. Nou kontan Patrick e nou siport li. E i en parti integrante nou lavi.

Alor akoz tou sa bann rezon personnel me osi an regardan lentere Nasyonal e lentere Patrick Victor li menm sirtou akoz nou pa kapab fer en fot avek en dimoun osi enportan ki li. Nou bezwen fer sa ki byen pour nou nasyon e pour sa dimoun.

Avek sa mon ti a kontan anvoy en mesaz a tou nou Lasanble pour ki nou pran en souf e nou reflesir tre byen lo sa ki nou pe fer e trouv en solisyon pour sa merit ki sa dimoun devan nou i devret annan. Mersi Mr Speaker.

 

(APPLAUSE)

 

MR SPEAKER

Mersi Onorab Georges. Mon ti a swete ki toultan nou ganny en Lasanble atantif koumsa ler Manm pe entervenir. Mersi, mersi Onorab. Onorab Audrey Vidot.

 

HON AUDREY VIDOT

Mersi Mr Speaker. Bonzour Mr Speaker, tou Manm Onorab, tou Manm piblik ki a lekout. Mr Speaker mersi pour donn mon laparol. Mr Speaker atraver ou mon oule zis dir entervenan ki’n koze avan nou pran break ki ‘’lannen 2000 zanmen’’ pour LDS ranport eleksyon’ i a kree son prop striktir administratif ki li i krwar i pli bon pour li personnelman!  Pa zwe bliye ki zot ki ti dir LDS ki koabitasyon in mor. Alors ki konsiltasyon deryer ledo piblik ki zot pe rode?

Alors les L’Egzekitiv travay! Les Prezidan travay, travay parey zot le L’Egzekitiv i les nou Lasanble travay.

 

(APPLAUSE)

 

HON AUDREY VIDOT

Mr Speaker Onorab in dir ki tou dimoun pe panic kot Foreign Affairs be akoz ki Onorab pa ti fer li son resers par demann sa bann dimoun ki panic, pour donn li detay lo pos Anbasader-at-Large! Onorab in dir ki Onorab Pillay pe fer politik bonmarse, be li ki in fek fer avan nou ler in pran laparol? I pa’n dir nanryen, nanryen pozitiv e konstriktif lo son personas Mr Patrick Victor e son bann abilite ki kapab pran en tel responsabilite. Par kont mon a felisit Onorab Georges ki’n koze avan mon akoz li in fer sat re byen. A lafen nou kapab konpran sa fernwanr ki Onorab ti pe koz lo la. I konfize apre ki son parti in pran en desizyon panic parey in dir pour pa donn li sa tyak VP, me prezan tenir son plas Chairman!

Mr Speaker Mr Patrick Victor i parmi enn nou bann Kreol Seselwa Sesel ki’n demontre sans patriyotik, linite ek solidarite dan son travay e devlopman Sesel. In ed Sesel grandi e prezant bann bon kalite artis Seselwa, par partaz son konesans e leksperyans ki in benefisye lokalman e enternasyonal.

Mr Speaker nominasyon msye Patrick Victor in vin dan en tre bon moman kot nou pe dir valoriz travay dir. E Mr Patrick Victor i parmi enn nou bann Seselwa ki’n montre ki in travay dir e ozordi loportinite i vini atraver sa Mosyon pour nomin e pouvwar i dan nou lanmen dan Lasanble Nasyonal pour siport son nominasyon, e donn li sa sans pour kree lezot loportinite pour elev nou sans patriyotik, linite ek solidarite parmi nou bann zenes Seselwa ki pe valoriz nou Kreolite lokalman e enternasyonal.

Mr Speaker atraver zot parkour artistik ek leksperyans lavi Mr Patrick in demontre ki i annan sa abilite pour delivre en bon travay menm dan bann latas difisil e anba presyon. Tou an respektan bann kriter ki’n ganny pran pour son nominasyon Mr Patrick Victor e son responsabilite ki atase avek. En tel nominasyon parey, pour en Seselwa Sesel, i donn lespwar lezot Seselwa ki pe travay dir pour kontribye dan lekonomi Sesel, pa zis finansyerman me par promot leritaz, tradisyon e kiltir Sesel.

Mr Speaker bokou Seselwa otour lemonn enkli Sesel, i santi zot ganny touse atraver bann parol eksprimen dan son sanson, dan bann sanson konpoze par msye Patrick Victor, akoz in fer zot reviv zot lanfans e valoriz nou tradisyon. I pa pour zis pour mon dir ki Mr Patrick Victor i merit sa pozisyon zis akoz son sikse koman en artis. Me i merite akoz in montre i kapab travay avek nenport ki group dimoun e annan sa pasyon pour kree loportinite pour son bann frer ek ser Kreol Seselwa.  E sa ki mon personnelman apresye avek sa artis se ki dan mazorite son bann lesanz e travay ki in fer aletranze i pa’n profit pour zis son byennet personnel, me plito in ouver bokou laport loportinite pour son bann frer e ser koleg artis dan diferan domenn.

Mr Speaker en kantite nou bann zenn artis ki’n pas dan lanmen Mr Patrick Victor in aprann ki mannyer pour organiz en show mizikal, ki mannyer pour prepar zot dan en show, prepar zot dan tou pour fer sir ki zot show i vin en sikse. E bann osi ki egalman in siport bann ki pa neseserman en artis. Me zot travay pros ek bann artis, pour ed zot elev zot karyer e benefisye dan lasenn lanmizik. Alors sa i rezon ki nou devret valoriz travay Mr Patrick Victor pour sa pos Anbasader At  Large pour Sesel.

E mon pour konklir par remersye Patrick Victor pour son kontribisyon dan promot leritaz, tradisyon e kiltir Sesel. Sa remersiman osi i al pour tou lezot artis e endividi ki pe demontre travay dir pour fer Sesel fyer. E mon asire ki bokou Seselwa ki pe swiv i fyer pour tann en tel nominasyon e pasyante pour vwar si nominasyon Mr Patrick Victor pour ganny aprouve par en vote inanim par nou Lasanble Nasyonal!  Mersi Mr Speaker.

 

(APPLAUSE)

 

MR SPEAKER

Mersi Onorab Vidot. Onorab Paul Ernesta.

 

HON PAUL ERNESTA

Mersi Mr Speaker. Mr Speaker ozordi mon santi mon fyer si oule. Kiltir in toultan mon pasyon e parey zot tou zot konnen mon papa in zwe, i en artis i en santer, e menm bokou zot la dan Lasanble zot apresye son bann sanson ki i fer.

Mon papa i enn sa dimoun ki’n ganny sans travay avek Mr Victor. Son parkour avek Mr Victor ti al letan Mr Victor ti al perform, mon krwar i ti al dan en konferans aletranze lo bann size kiltir. I ti anmenn papa avek li an menm tan pour fer en performans kiltirel. E pour promot nou kiltir.

 

MR SPEAKER

Order!  I pe vin lo la, espere.

 

HON PAUL ERNESTA

Tenir byensir Mr Speaker i enportan tenir ekoute. Letan retournen mwan menm mon parey mon konnen mon koleg lot kote Onorab De Letourdie. Li annefe i konn msye Victor byen, byen lontan, byen avan mon, mon rapel li letan pe sante ankor zenn, zenn pti fiy dan latroup kiltirel manman dir mon e sa ti ganny enspire par Patrick e mwan, mon osi mon’n ganny sans travay ek Patrick letan mon get son CV i fer mon mazin bann letan, letan mon ti kot lazenes mon’n ganny sans son bann travay e mon’n ganny enspire avek li par bokou bann travay ki’n fer.

Mon parkour mon leksperyans ki mon’n annan avek Mr Victor mon’n kapab dedwir ok Mr Victor i en zonm disiplinen. I en zonm ki pour pous ou e an menm tan i en zonm ki persevere e i en zonm ki krwar dan lazenes, i krwar dan son kiltir, i krwar dan kreolite Seselwa. Napa en pli bon fason pour nou kapab onor en tel aki ki Sesel i annan. Mon a dakor petet ou pour annan bokou kestyon taler Onorab George in donn serten mansyon ki mannyer nou kapab rekonnet apresye en dimoun parey Mr Victor. Me dan son lentervansyon letan in dir i merit plis ki en Anbasader i ti merit en Minis i kit mwan en kestyon. Si zanmen en tel propozisyon pour Mr Victor ganny apwente koman Minis dan sa Lasanble, si nou ti pour apwent li?

Eski zot ti pour vot pour li? Mwan mon ti pour vote li pour li mon. LDS ti pour vote pour li?  Sa en kestyon ki nou pe dir. Sa en kestyon ki nou pe dir. I montre ki parfwa nou bann dimoun lo lot kote latab zot dir en keksoz zot donn bann zoli parol. Me letan pour ariv dan son lenplimantasyon zot zot fer lanver.

E an menm tan Mr Speaker i anmenn mon pour reflesir letan mon vwar ki en zonm parey Mr Victor in deside pran en challenge lo sa nivo, e nou mon apresye par kont dayer mon apresye lentervansyon Onorab Georgse. Me son koleg ki’n koze avan li i sad kot letan Prezidan i anvoy nominasyon Mr Faure, Mr Victor koman kandida pour Anbasader dan Lasanble i ganny tournen i ganny gete koman en zes politik. Me malerezman i napa lot landrwa pour li kapab anmennen.

I bezwen anmenn sa bann kandida, bann nominasyon isi menm dan sa Lasanble. E entervenan Onorab Ferrari in dir koumsa ki i napa nanryen mal kont Mr Victor, me avek tou son bann zistifikasyon, leksplikasyon ki in donnen i donn mon en lot lekspresyon en lot lopinyon. Ou napa nanryen mal kont en dimoun selman ou rod tou rezon pour ou pa vot pour sa dimoun pour fer li pase pour donn li sa lapwentman?

Ki mannyer i apele sa. Sa pour mon i lipokrizi dan son totalite. So nou bezwen et onnet, nou bezwen et fran letan nou dir en keksoz. Nou’n dir koumsa me an menm tan ki nou bezwen en kad. Nou bezwen en kad pour fer sir ki L’Egzekitiv i konnen ki i pe fer.  Me mon ki mon pour demann avek nou Lasanble pour nou konsider son lapwentman me an menm tan si zot santi i annan konsern lo sa kad nou kapab anmenn en Private Members Bill, remet sa kad byen ki from there on bann keksoz ava ganny fer baze sa ki zot, zot pe demande pour fer. Mon krwar i en keksoz ki nou bezwen mazin lo la seryezman. Nou pa kapab zis vini rod diferan leskiz, pour nou pa siport lapwentman en dimoun parey zot ti fer ek sa 3 kandida. Dayer pa ni ti bann kandida politik parey zot ti dir. I ti 3 kandida teknikal. E zot ti zet anba parey zot menm zot dir, zot ti bloke! Ki mannyer nou kapab ekspekte therefore ki sa ki zot, zot anvi les pase zot les pase. Mon rapel mon pa ti dan Lasanble, mon’n swiv e mon rapel i annan, dan mon resers mon’n vwar, i annan sa Anbasader menm ka ki nou pe koz lo la dayer pa ti en Seselwa Mr Siva kot sa bann letan Lopozisyon ti les pase. Zot ti les pase e zot pa bi ti menm vot kont e zot ti abstain. E zot pa ti dir nanryen! Me ki mannyer ozordi la zot an mazorite. Onorab Henrie i dir zot an minorite, be la zot an mazorite nou annan en Seselwa ki nou pe demande …

 

(APPLAUSE)

 

HON PAUL ERNESTA

… pour nou vot an faver en Seselwa, nou dimoun enn nou menm, nou pe refize? En Seselwa ki’n ne Sesel nou pe refize pour fer li.

Annou aret rod leskiz. Dan dernyen Mosyon Onorab Ghislain, letan ti anmennen lo sa laspe sport, zot ti dir ouver levantay, ouver pour plis pour kiltir enkli bann lezot personnaz.  Me, an menm tan ki nou war  la ozordi son 2 semenn apre ki nou vwar loportinite i donnen, pour nou rekonnet en artis ki’n kontribye imansman, imansyelman dan pei, nou vwar zot refize.

Mr Speaker mwan mon apresye, mon apresye, ankor mon dir, mon apresye tou sa kontribisyon.

 

 

 

(Off-Mic)

 

HON PAUL ERNESTA

(Onorab Ferrari ou tenir ou, ou’n fini koze ou, prezan mwan ki pe koze) Mersi.

E Mr Speaker en lo keksoz ki nou bezwen tir en bon konprenezon, letan mon pe koz taler mon entervenan in koz lo Anvwaye Spesyal, koz lo petet annan en Anvwaye Spesyal, i enportan pour nou klarifye sa 2 zafer. En Anvwaye Spesyal dapre lenformasyon ki mon’n kapab tire, gannyen wi atraver mon koleg la ki eksper dan la diplomasi, in les mwan konpran ki en Anvwaye Spesyal i en lapwentman ki Prezidan i fer pou deal lo en size spesifik. Par egzanp annou dir si i annan en negosyasyon ouswa i annan en konfli ki arive,          kot li sa Anvwaye Spesyal i ganny anvoye, i ganny apwente pou deal avek sa sityasyon. E letan sityasyon i klersi, si i annan en solisyon i kler i calm in fini rezourd la i retournen e la sa pozisyon i fini.

Me parkont avek en Anbasader-at-Large parey ki’n ganny dir son diferans li. Li i ganny akredite Anbasader, e li son travay i pli a lonterm li, i pli permanan. E avek li i ganny atase en portfolio spesifik, kot la i al defann e al promot sa size spesifik ki li i gannyen pour li deal avek.  E mon konnen avek sa lespri, Mr Victor dan son kalite ki i annan konman en zonm i sa dimoun ki pou kapab deserve sa rol tre byen e i pou fer sat re byen e nou konnen i pa pou fail Sesel dan nenport kwa ki i fer dan sa direksyon.

So Mr Speaker mon pou demann tou  mon bann koleg e mon pou konsider tou bann lezot Manm ki pa pe konsider vot an faver Mr Victor, si zanmen  i amann  zot parmi zot ki pe mazin sa, pou zot refer konsiderasyon.  Kad nou a kapab travay lo la parey nou’n dir i ganny ankadre byen i ganny fer keksoz byen. E sa i louvraz Egzekitiv.

E nou Lezislatif annou pa la pou nou anmar lanmen Egzekitiv pou anpes Egzekitiv travay e apre pou nou pou dir Egzekitiv in fail.   Sa i ekskreman enportan. So mon pou demann zot pou rekonsider zot pozisyon. Tou nou bann Manm boul i dan nou kare la, annou fer sa bon swa, annou pa met retar. Annou ankouraz enn  nou menm – enn nou dimoun. Mersi         Mr Speaker.

 

(APPLAUSE)

 

MR SPEAKER

Mersi Onorab Ernesta. Mon  a donn laparol Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker an 1983 mon ti pe fer mon letid Maurice mon letid Teolizi e dan sa menm lannen ti annan en konpetisyon, ki sa lannen ti tre popiler ki ti apel ‘’Decouverte’’ e mon ankor rapel koman en zenn etidyan, mon ti al dan Plaza Maurice kot Mr Patrick Victor  ti pe ranport en pri pou son sanson ‘‘Koste Pep L’ocean Indien.’’   Mon ti probableman sa sel Seselwa dan sa lasal ki ti pe aplodi pli for posib spesyalman  letan ti annan sa pri ki ti pou  ganny determinen  atraver lekel artis ki ti ganny pli gran laplodisman . Apre sa Mr  Speaker mon parkour avek mon frer Patrick in en parkour ki’n am enn nou dan diferan direksyon. E mon bezwen dir ziska ozordi nou annan en relasyon spesyal. Letan Legliz St Luke 2an pase ti ape selebre Dimans Rameau sete kot Patrick ki nou ti al rod bann Rameau pou nou dekor legliz.  E Patrick i konnen ki poudir mwan mon enn sa bann dimoun ki apresye son lanmizik en kantite. I konnen ki partou kot mon pase mon vwayaze, mon ekout son lanmizik, parski nou’n koz lo la. E li menm li i ti etonnen lean mon ti montre li  ki poudir a tou moman, lo mon telefonn i annan son lanmizik.  E nou’n osi lo nivo personnel  mwan koman en Pret li koman en fidel, nou’n antreprann bokou konversasyon.

Mr Speaker mon  pe dir sa pour ki nou pa fer, pour ki nou pa fer sa fot dan sa Lasanble.   Nou pa fer sa fot pou sey met sa personnalite – sa gran personnalite anba en mikroskop ki i pa devret ete.  Talan Mr Patrick Victor, son abilite; sa zwa de viv ki permet nou ki pa konn  tir en tune lo en gitar; bann poezi ki’n konverti dan son bann ballad;  sa bann son mandolin ki zwe ki’n fer nou bouz en pti git tousala nou apresye.  Tou Seselwa i apareye!

Tou Seselwa, i kontan Patrick Victor. E mon anvi dir avek li Patrick konman en dimoun ki’n sorti lo zil Praslin parey mon zanset, parey mon papa, nou fyer ki ou konman en Praslinois, egzakteman parey Jean Ally ek bokou lezot, nou’n nobou aport lazwa. Nou’n nobou fer kontribisyon sibstansyel dan devlopman nou pei dan nenport ki fason. Alor Mr Speaker fodre pa ki nou met Mr Patrick Victor dan sa sityasyon.

E mon konnen ki Patrick avek sa lespri ki, ki i annan sa grander lespri i konnen ki pou dir ki malgre ki serten ti a kontan fer sa ki li i pa pou rantre dan sa pyez.

E mon konnen Mr Speaker, ou konman MNA pour Bel Ombre ou annan en gran lanmitye pou Mr Patrick Victor.  Mon konnen parski nou koz lo la. Alor Mr Speaker mwan ozordi se pa sa, nou ti kapab dan sa Lasanble sant leloz Patrick Victor e letan pa ti pou ase. Nou ti kapab al dan en lemonn ki ekstraordiner avek li; bann parol son bann sanson e mon konnen ki mon ser Onorab De Letourdie; ki’n partisip avek li ki’n konmans en pe son parkour avek Mr Victor avek Patrick i bezwen ki in pas dan bann leksperyans vreman profon.

Konmsi kot parfwa letan sa bann sanson pe ganny sante lespri i kapab vwayaze. Vwayaz dan letan, vwayaze dan refleksyon e vwayaze dan bann refleksyon swa ki koste ou pli pre avek larealite lavi pli pre avek ou kreater e pli pre avek bann dimoun ki ou atase avek, bann dimoun ki ou pre avek. Me Mr Speaker parey ki Onorab Ferrari e Onorab Georges in fer byen resorti, se pa zis pou regard Patrick Victor ki nou Lasanble pe ganny demande pou fer en travay ozordi. Mr Speaker nou travay i tonm anba Konstitisyon. E sa i en keksoz ki fodre ki Seselwa i konpran.  E petet Seselwa in deza konpran sa, petet ozordi fodre ki sa bann Manm Lasanble spesyalman sa bann ki’n sey fer politik avek sa Mosyon zot konpran.

Mr Speaker Konstitisyon Sesel i annan separasyon pouvwar ladan. L’Egzekitiv. Lezislatif, Zidisyer.  Me selman i annan serten lokazyon kot nou prop Konstitisyon i dir fodre i annan korperasyon.  I donn L’Egzekitiv reprezante par Prezidan Larepiblik en serten responsabilite. Me selman i dir avek li ou pa kapab pran sa responsabilite koman L’Egzekitiv ou tousel! Fodre ki ou pran sa responsabilite ansanm avek Lasanble Nasyonal. En dimoun i ganny elekte Prezidan Larepiblik me selman pour li swazir son Minis Konstitisyon i dir avek li malgre ki ou’n ganny elekte ou pa kapab fer sa ou tousel. Fodre ki Lasanble i donn sa stanp.

Sanmenm sa ki mon pe dir kot i bezwen annan koze, kot i bezwen annan dyalog. Sa dyalog Mr Speaker se pa dyalog koabitasyon sa, sa dyalog napa nanryen pou fer avek 15 lo 10. Sa dyalog napa nanryen pou fer avek lekel ki dan Lasanble, sa dyalog i en dyalog Konstitisyonnel! I bezwen fer li e sa Lasanble ki aprouve. Lapwentman en Anbasader anba 64(1), ankor en fwa se bann demann ki nou konstitisyon i met lo L’Egzekitiv e lo Lezislatif.  Nou bezwen fer li. I pa en kestyon kapris; i pa en kestyon si Prezidan i anvi; i pa en kestyon les sa prezidan travay; napa tousala Mr Speaker.  Konstitisyon i dir avek ou, ou bezwen fer li.  E letan nou regard byen sa Lartik 64, i dir avek ou klerman ‘’the President may – ‘MAY’ with the approval of a majority of members, of the the National Assembly appoint a person.

I napa sa Lotorite Absoli.  I bezwen vin isi.  E alor letan i annan bann sityasyon kot i bezwen vin isi, nou konman en Lasanble nou bezwen, nou annan sa lobligasyon pour nou egzers nou responsabilite! E pour nou fer li dan en fason pli bon posib e Lasanble i annan li tou liberte pour li pran desizyon. Donk se sa responsabilite ki ozordi nou pe ganny demande pou fer. Mr Speaker en lot lokazyon kot L’Egzekitiv i bezwen koz avek Lasanble Nasyonal se letan pou pas Lalwa.

Prezidan pa kapab pas en Lalwa li tousel; Lasanble Nasyonal pa kapab pas en Lalwa li tousel. Me pli enteresan ankor dan sa lenstans lo nou responsabilite konman en Lasanble e koman Gouvernman ki konpri sa 3 brans Gouvernman, Konstitisyon dan sa lenstans i dir tou le Mtrwa brans fodre travay ansanm dan ki fason. Si L’Egzekitiv i prezant en Lalwa i bezwen vin devan sa Lasanble i pas sa Lalwa par egzanp. Apre sa i bezwen retourn kot Prezidan pour li assent sa Lalwa e aprezan Mr Speaker si Prezidan i ascent en Lalwa ki pa normal Lakour Konstitisyonnel sa brans Zidisyer i rantre an zwe. I kapab li sa brans Zidisyer annul, cancel sa ki sa de lezot brans in fer.  Mon pe dir sa Mr Speaker ki pou montre ki poudir an mezir ki nou koz separasyon pouvwar, i osi annan responsabilite kolektiv.                       E sa i dan nou Konstitisyon; sa dokiman ki nou tou ki la dan sa Lasanble nou ti lev nou lanmen e nou ti fer serman. Be zisteman Mr Speaker, si nou pei Sesel malgre ki L’Egzekitiv i siny okenn dokiman, okenn Lagreman parey ki L’Egzekitiv ti fer avek Lenn pour siny en Lagreman lo Assumption, L’Egzekitiv in kapab fer sa li, Lasanble in dir ‘’non, nou kont!’’ E alor pour napa okenn devlopman parey i annan dan sa Lagreman. Tousala i form parti nou responsabilite.

E nou ozordi koman en Lasanble baze lo sa ki Onorab Ferrari ek Onorab Georges in eksplik sitan byen nou annan nou sa responsabilite pour nou poz kestyon.

Nou annan nou sa responsabilite pour nou regarde dan ki direksyon nou pe ale.  E letan mon pe koze la Mr Speaker mon pa war sa direksyon dan ki nou pe ale. E alor letan nou pa war direksyon kler dan ki nou pe ale, koman bann Manm responsab nou bezwen poz kestyon. Akoz mon dir nou pa war direksyon dan ki nou pe ale? Mr Speaker le 28 May mon ti demann en kestyon an relasyon avek bann Anbasader; pozisyon Anbasader, e se Minis Jean Paul Adam ki ti vin reponn kestyon.  E enn bann kestyon ki mon ti demann li, sete ‘’ki bann prosedir pour en dimoun vin Anbasader?’’ Mr Speaker la i la larepons ki Gouvernman reprezante par Minis Jean-Paul Adam ti dir – ‘’Dan nou Scheme’’ – e mon pe lir verbatim, ‘’dan nou Scheme of Service pour en zofisye vin en Lanbasader fodre in konplet 4 an servis koman en Konseye Prensipal, oubyen in ansarz en Divizyon dan departman Zafer Etranzer.

Byensir lapwentman en Anbasader i toultan a diskresyon Prezidan. Akoz rol sa Lanbasader se pour reprezant nou pei e nou Sef D’Eta dan en lot pei e anver en lot lorganizasyon.

Dan kad Scheme of Service i annan en semen kler pour bann zenn ki pe komans zot karyer dan servis diplomatik, pour zot kapab ariv lo en moman kot zot kapab ganny apwente koman en Anbasader. E sa progresyon i byensir ganny fer depandan lo kalifikasyon ek leksperyans.

Alor en zenn par egzanp ki antre dan Zafer Etranzer, i antre avek en premye Degre i kapab komans koman en Trwazyenm Sekreter.  Si i annan en Masters i kapab antre koman en Dezyenm Sekreter. Avek en pe leksperyans i kapab ganny promosyon pour vin Premye Sekreter apre sa i annan pos Sekreter, Direkter zeneral ouswa Konseye Prensipal. A sa nivo e baze byensir lo meritokrasi, e bann loportinite ganny kordonen bann diferan staff dan Minister e ki sa dimoun i annan en serten lannen servis i kapab ganny sa loportinite pour li ganny poste dan misyon aletranze. E osi si lo sa nivo pli o, savedir lo nivo direkter Zeneral, Konseye Prensipal i kapab ganny konsidere koman Lanbasader.

Mr Speaker pa mwan ki’n dir sa!  Gouvernman ki’n dir sa. Be la ozordi nou vin avek Ambassador-at-Large. Mon menm Mr Speaker seryezman pour mon dir ou, mon pa ni konnen ki mannyer pour tradwir sa an Kreol.  Mon’n seye dan diferan fason mon pa konnen. Mon ti a kontan en dimoun i dir mon ki mannyer ou tradwir san Kreol. Alor Mr Speaker sa ki mon pe dir nou pe, i annan en kad la, en Mosyon ki nou pe ganny demande pour nou aprouve, aprouv nominasyon Mr Patrick Victor. Me selman i annan en kantite kestyon, alor tou sa bann kestyon i bezwen ganny eklersir.

E ki mannyer sa bann kestyon i kapab ganny eklersi Mr Speaker, se pour ki i annan en dyalog ant Gouvernman Zafer Etranzer parski Anbasader i sipoze tonm anba Minister Zafer Etranzer parski se Minister Zafer Etranzer ki regard tou sa bann eleman pour prezant bann let apropriye, pour apwent sa dimoun si i pour en anbasader, parski nou bann anbasader ziska prezan ki nou apwente Mr Speaker se bann anbasader lini potansyer parey nou dir e ekstraordiner. Savedir ki zot annan sa posibilite pour zot siny bann Trete lo lapar Sesel e osi ganny anvoye lo bann misyon spesyal. Alor nou bezwen eklersi sa. Letan nou ganny dir, i pa pour ganny en lapey, me pour annan en biro. Tousala Mr Speaker sa ki nou a pe dir lo sa kote LDS se ki i bezwen kler.

Onorab in osi demande. Parski nou’n tande bann zafer kiltir ki Polisi Kiltir? E Mr Speakler mon ava dir si i annan en Minister kot letan nou’n vin dan sa Lasanble nou’n demann en kantite kestyon ki i ankor annan kestyon ki pa kler se Minister Kiltir. Nou tande i annan en group la ki li i ansarz promosyon bann artis aletranze.  Nou tande i annan en lo group ki ansarz en lot kalite devlopman kiltirel. Mr Speaker nou tann tou kalite. E alor mon krwar ki i enportan parey Onorab Ferrari in demande be kwa ki nou Polisi kiltirel? Parski mwan mon tro byen avek Mr Victor – avek Patrick pour mwan war li pe antre dan en kales kase, pour li pa konnen vreman ki i pour fer. Eski nou pe zis anvoy li, nou pe donn li sa tit pour li al organiz show kiltirel? Eski nou pe donn li sa tit pour li vin en attaché avek UNESCO, avek bann lezot lorganizasyon.

Lotrozour nou’n war sa ti ariv Maurice kot Reggae ti ganny konsidere ansanm ek Bob Marley ti ganny konsidere koman en lanmizik mondyal, en lanmizik enportan e nou ti war serten zot bann dimoun ki ti la pe konmsi kwa egzakteman ki nou pe rode? E Mr Speaker, se sa ki pour le moman pa kler.  E se sa ki tou dimoun i bezwen konpran. I pa kler; ki pe arive dan sa zafer kiltir. Nou tann e i annan bokou bann lezot areas osi tou kot nou bezwen demann kestyon. Anvwaye Spesyal, nou’n tann nonm Anvwaye Spesyal, nou’n tann nonm 250 an koman en pei. Be kwa ki tousala i annan pour fer avek lapwentman Mr Patrick Victor koman en Anbasader?

Mr Speaker nou bezwen konn tousala. E nou, nou pran nou responsabilite e msye Victor i konnen ki pour dir si nou pe koz dan sa direksyon, se pa akoz i annan okenn dimoun ki annan keksoz kont li. E artis Mr Speaker i en et spesyal. En artis i annan en fason panse spesyal e en artis i kapab promot diferan keksoz ki ou avek mon koman bann dimoun ki pa artis, nou pa pour zanmen kapab promote. E la mon mazin nou frer Achille Luc, regard li ou ti dir dan en monn pour li me li i ti konnen kwa ki i ti pe promote. E letan in mor nou’n onor li pour sa ki i ti pe prezant, sa ki i ti pe promote, sa ki i ti pe prezante e nou tou nou’n vreman atase avek li dan en nouvo fason. Alor Mr Speaker baze lo sa ki mon’n dir le fe ki anba 22(5) mon annan laparol, mon anvi move Mr Speaker anba 22, (1) pour ki, pour ki sa Mosyon sa deba, (Mr Speaker avan nou kontinyen, mon ti ava kontan si ou dir sa Manm pour li retir sa ki in dir.)

 

(Interruption)

 

MR SPEAKER

Non mon pa’n tann …

 

HON WAVEL RAMKALAWAN

Mr Speaker pour ou lenformasyon, akoz mon pe move sa koman mon dwa koman en Manm Lasanble, sa Onorab, dernyen Onorab pour vin dan Lasanble in apel mwan en diktater!  Silvouple mon anvi ki i retir sa. Parski mon pe egzers mon drwa koman en Manm Lasanble. E sa i montre total disrespect for the House!

 

(Interruption)

 

MR SPEAKER

Bon, mon pa’n antann, mon pa’n antann sa remark. Mon’n tann.  En moman mon ki annan parol. Mon’n tann en riye for wi, sa mon’n tande, mon pa’n tann sa remark. Me Onorab si ou’n fer sa remark e lezot Manm in tann ou mon ti ava demann ou pour retract. Yes Onorab Loze.

 

HON JOHAN LOZE

Bonzour Mr Speaker. Mr Speaker nou annan Manm dan sa Lasanble ozordi ki…

 

(Interruption)

 

MR SPEAKER

Order!  Order!  Onorab.

 

HON JOHAN LOZE

I annan Manm dan sa Lasanble ki nou single out, nou koleg Manm ki nou konnen i asmatik e on mic, pa off-mic, nou dir i ronfle! Nou konnen i asmatik, nou konnen i soufer avek chronic asma, nou dir li i pe ronfle dan Lasanble. Ki kalite nivo bullying i annan dan sa Lasanble?

 

MR SPEAKER

Order, Onorab, Onorab.  Order!

 

HON JOHAN LOZE

Ozordi i ofanse pour sa ki mon’n dir off-mic!

 

MR SPEAKER

Onorab order! Ok? Parey, parey mon’n dir bomaten,  i annan serten entersepsyon ki nou allow. I annan ki nou pa kapab allow. Ok? Ler en Manm i annan parol e i annan son dwa, i pe egzers son dwa anba Standing Order, nou pa kapab apel sa Manm tou sord kalite. Ok? Si ou’n dir sa mon ronfle, ronfle nou tou. Ex-speaker Herminie ti kontan servi sa mo waffle, Onorab aret waffle. Term ki ganny servi. Ronfle osi tou ou kapab servi.

 

HON JOHAN LOZE

Nanryen a fer ek kanmarad. Mon konpran ou pe sey tir li dan sa trou.  Selman ….

 

MR SPEAKER

Onorab. Onorab annan respe for the Chair! Mon pa pe sey tir personn dan okenn trou, ok? Annou ganny sa kler. Sel keksoz ki mon’n demann ou si ou’n apel sa Manm diktater ki ti annan parol e ki pe egzers son drwa i pe refer to en Standing Order mon pe rode sa Standing Order i pe fer en referans si ou’n fer sa komanter, i senp mon pe demann ou pour retract, se tou.

 

HON JOHAN LOZE

Mr Speaker si Onorab i ofanse mon a retract!

 

MR SPEAKER

Mersi, mersi. Ok.  Mersi Onorab Loze. Mon a redonn laparol Onorab Ramkalawan.

 

HON WAVEL RAMKALAWAN

Mr Speaker anba 22 (5) le fe ki mon annan laparol pour le moman, mon anvi move anba 22(1) pou tou bann rezon ki mon’n donnen pour ki i annan leklersisman ant Foreign Affairs avek spesyalman Komite International Affairs Committee e kot nenport Manm ki ava oule asiste zot ava kapab zot osi tou asiste, pour nou ganny tou leklersisman lo ki bann lenplikasyon sa lofis Ambassador-at-Large, mon pe move ki the debate be adjourned pour nou kapab ganny sa letan pour nou fer sa.  E once ki bann leklersisman in ganny donnen ki sa debate i ava kapab kontinyen. Mersi bokou Mr Speaker.

 

MR SPEAKER

Ok.  Zis en moman avan mon demann en Manm pour segonde. Mon ava zis donn laparol loter Mosyon. Onorab De Commarmond.

 

HON CHARLES DE COMMARMOND

Mersi Mr Speaker. Mr Speaker mon’n ekout atantivman sa ki pe pase dan nou Lasanble ozordi e sirtou entervenan, dernyen entervenan lo sa Mosyon enportan. Mon osi anvi dir ki direksyon ki pe ganny propoze, i bann pwen ki mwan ek li nou ti’n deza koze osi, e ki mon ti’n pase avek L’Egzekitiv.

Me L’Egzekitiv i dir mwan 2 keksoz e mon anvi share ek Lasanble sa 2 pwen. Enn se ki formelman zanmen okenn request in vini from IAC pour demann en tel diskisyon.  Sa enn. E dezyenmman, mon’n demann avek mon bann Manm ki lo IAC si i annan okenn meeting IAC ki’n ganny fer dan sa direksyon lo sa issue, e zot in klarifye avek mwan osi zanmen meeting in ganny fer lo sa issue par IAC.  Me selman mwan avek Leader Lopozisyon nou’n koze lo la e mon’n pase sa parey mon dir avek L’Egzekitiv e zot in santi osi ki a sa moman – sirtou le fe ki ti annan o tan koze dan Lasanble ki sa kestyon koabitasyon in kase, pa pe marse and whatnot e zot in mor, lala mo ki’n ganny servi e ki anba Lartik nou Konstitisyon L’Egzekitiv i fer son bout travay in anvoy sa Mosyon dan Lasanble; e la prezan i prerogativ Lasanble pour deal lo sa Mosyon.  Me selman letan ki mon’n ekout sa de entervenan avan Onorab George sirtou e Onorab Leader Lopozisyon mon pare akoz nou, nou pe koz la.

 

MR SPEAKER

Onorab, Onorab Pillay. En moman, en moman. Onorab Stephen Pillay. Retract. Retract mon’n tande ki ou’n dir, retract, met ou mic on.

 

(Off-Mic)

 

MR SPEAKER

Met ou mic, met ou mic on, retract. Mon fek demann en Manm pour retract Onorab De Commarmond, met ou mic, met ou mic off.

 

HON STEPHEN PILLAY

Be Mr Speaker si mon pour retract mon pour retract yes mon dakor ek li. Mon dir mon dakor ek li ki i pe dir zafer Mr Ramkalawan avek Mr Bernard Georges.

 

MR SPEAKER

Mon’n antann en lot.

 

HON STEPHEN PILLAY

Non be ou pa’n antann mon Mr Speaker … yes mon dakor avek li. Mon pa pe ankoler mwan, si oule mon retract yes mon dakor, yes mon dakor, mon pa dakor ek ou. Mersi Mr Speaker.

 

MR SPEAKER

Bon petet i annan tro bokou ki pe go on. Akoz mon’n antann en lot parol. Se sa rezon ki mon’n adres ou. Ok. Kontinyen Onorab De Commarmond.

 

HON CHARLES DE COMMARMOND

Mersi Mr Speaker. Mwan mon pa pran lofans pour bann pti zafer koumsa. Akoz nou be selman konmsi annou fer nou Lasanble al lo sa lot nivo ki Onorab Georges ek mwan menm nou anvi i ale.

Mr Speaker ou vwar alor sa ki mon ti pe dir se ki dan sa lantant la i enportan mon konpran kot Onorab Ramkalawan i oule vini. Me petet ti bon en konsey, pa bezwen ki nou anmenn okenn Mosyon pour adjourn. Le fe ki midi in sonnen e ki tou fason ou pe al adjourn, mwan ki mon ti demande, mon ti ava demande pandan sa letan les mon vwar ankor enn fwa avek Lotorite etandonnen ki la nou live. In kler ki bann parol in ganny sorti e ki L’Egzekitiv in tande davantaz sa ki nou pe dir; dan mwan pandan sa letan ki nou pour adjourn pour lunch time pour mon rediskite. Mon ava kominik avek Leader Lopozisyon e nou a vwar koman nou kontinyen avek sa deba akoz nou annan lot dimoun ki’n lev lanmen pour koze. Sa osi nou bezwen pran konsiderasyon. E mwan mon kontan ki nou diskite. Mon kontan diskisyon ki nou kapab war en way forward e pour nou zanmi Patrick –  Mr Victor nou, nou anvi ki keksoz i pas byen. E mwan mon ti ava kontan ki tou fason ki ou pe break dan sa letan ki ou adjourn mon a fer le neseser mon ava kominik avek Lasanble lo la.     Mersi.

 

MR SPEAKER

Mersi, mersi Onorab De Commarmond.

Bon Mosyon pour adjournment of debate, i pa vedir ki bann Manm ki lo lalis pa pour ganny drwa koze. Nou pe zis demann en adjournment of debate pour nou kapab ganny plis klarifikasyon parey Lasanble pe demande. Savedir nou pe dir annou defer pour nou pran en desizyon plizoumwen.

Be nou annan en Mosyon ki’n move la, eski nou kapab segonn Mosyon, me mon kapab aret la nou pa pran en vot ziska ler nou retournen 2er. Oubyen nou kapab pran en Mosyon, pran en vote e ler ou retournen ou ava regarde si demann in ganny aksepte.

 

MR SPEAKER

En moman. Ale Onorab Ramkalawan.

 

HON WAVEL RAMKALAWAN

Mr Speaker mon’n move, sa Mosyon in ganny segonde.

 

MR SPEAKER

Pa ankor ganny segonde.

 

HON WAVEL RAMKALAWAN

In ganny segonde.

 

(Off-Mic)

 

MR SPEAKER

Wi mon ti’n donn laparol…

 

(Off-Mic)

 

HON WAVEL RAMKALAWAN

Ok?   

 

MR SPEAKER

Wi.

 

HON WAVEL RAMKALAWAN

In gannyen segonde. Mwan mon move ki nou pran sa Mosyon la, nou pran en vote. Nou pran en vote e apre sa nou ava regarde ki mannyer keksoz i ete.

Me parey mon’n eksplike. Mwan mon pe parey serten keksoz letan nou pe diskite dan Lasanble, i ganny refer to FPAC oubyen en keksoz koumsa. Se pour sa bann pwen ki mon’n fer resorti i ganny refer avek IAC pour zot nobou asize avek L’Egzekitiv pour koze.  Alor mwan mon ti ava move parski se nou rol koman en Lasanble, e donk mwan mon move pour sa adjournment Mr Speaker,  e parey ou pe dir, Mosyon in ganny segonde.  Let’s take a vote, e apre sa nou ava …

 

MR SPEAKER

Ok.  En moman.  Pa ankor formelman segonde.  Bon Onorab Sophola ou non i lo lalis.

Ou drwa pou ou koze, pou entervenir lo sa Mosyon i reste.  Ok?  E parey mon’n dir, i annan en Mosyon pou adjourn the debate, pou plis klarifikasyon.  Annou pa, annou pa antre dan deba.

Onorab Simon Gill i alright pou en entervenir ou’n fer sorti bomaten, ou’n segonde.  Ou’n demande pou ou kapab entervenir pli tar.  Ou drwa i la, i lo mon lalis.  Ok.

I annan en Mosyon devan nou.  Ok ?  Mon ava demande estim lekel ki pou segonn Mosyon.  Byen, Onorab Ferrari

 

HON JEAN-FRANCOIS FERRARI

Mosyon in ganny segonde Mr Speaker.  Mersi.

 

MR SPEAKER

Ok.  Mosyon i ganny segonde, we will put the motion to a vote.  Ok?

Tou Manm ki an faver?  Mosyon se i demande ki deba lo sa Mosyon ki devan nou ki’n prezante bomaten, i ganny adjourn, pou ganny plis klarifikasyon.  E at a later date ki nou ava set, debate will continue, e mon zis fer zot konn poudir parey mon ti’n met, bomaten mon’n dir zot.

Mon ti’n mete lo mon Order PaperWill debate the Motion.   En moman, en moman.  Mon pa ankor fini demann Lasanble pou pran en desizyon.  Nou pa pe pran en vot, nou pou annan enteraksyon avek kandida, and then will take the final vote.  Ok? 

So nou pou al dan sa direksyon, nou pou pran en vot pou adjournment la, until klarifikasyon i antre, nou pou retourn dan deba, at a date set.  Me, petet a sa moman la, mon partaz avek zot bann Manm poudir, mon pe absante pou 10 zour.

Ok.  Si i annan en irzans, si i annan en irzans, Deputy Speaker i ava pran ki menm ki i normal ki ler mon’n konmans en Mosyon, mon kontinyen.  Me si non, mon retournen le 26 apre nou ava, son following Tuesday nou kapab fer li.

Me Mosyon in ganny segonde.  Nou pran en vot pou nou adjourn debate.  All in favor?  Tou Manm ki an faver?  Okenn Manm ki kont?  Ok, Madanm Clerk.

 

MADAM CLERK

Mersi bokou Mr Speaker.  Mon’n rikord 17 Manm ki’n vot an faver, e 12 Manm ki’n vot kont.  Mersi.

 

MR SPEAKER

Mersi Madanm Clerk.  Savedir Mosyon ki ganny move par Leader Lopozisyon anba 22(1).  In ganny aprouve par Lasanble Nasyonal.  The debate in adjourn.  Mon pou still ler nou rantre 2er, Onorab De Commarmond si oule zis atraver si non, si non nou ava –

 

HON CHARLES DE COMMARMOND

Mr speaker, mwan mon. Ti’n ofer mon soz – e prezan nou ava fer li –

 

MR SPEAKER

 

MR SPEAKER

Non, be i annan en prosedir ki’n ganny set in motion, e nou ti bezwen dispose of.  Ok?  Bon, ki nou ava fer, Sekretarya i ava rantre an kontak avek bann Departman konsernen.  E nou ava organiz, in fini? Madanm Clerk i dir mwan in fini organize, nou ava organiz en dat.

E nou pa pou les sa restrikte zis pou Manm Komite Zafer Etranzer.  Nou ava ouver li osi tou, parey nou pe fer bann extended Committee Meetings avek bann lezot Manm osi tou ki enterese.  Ok   Madanm Clerk i dir mon, miting in ganny Schedule pou Merkredi le 17, 1er apre midi, isi menm kot Lasanble.  OkSo nou kapab bouze avek.   E parey mon dir, si zot anvi, zot santi zot anvi pran li son following week, savedir i a vin Mardi le 21, oubyen Merkredi le 22, menm dan mon labsans i ok avek mwan.  Zot kapab konklir deba e pran en vot.  Me si zot oule espere mon retourn le 26.  E le 29 mon dan lofis.  Akoz le 26 i en Vandredi.  Ok, mon ava zis fer de pti lanons.  Komite COGA pe rankontre dan Committee Room 3, 1.15.

ABC nou pe, nou pe rankontre dan Speaker’s Conference Room,1.15.  E petet osi la mon ava enform bann Manm ki ti pou annan en miting AML demen.  Mon’n ganny enformen ki sa miting in ganny postpone.

Nou pou kontinyen avek sa miting ankor, i pa neseserman Bills Committee me i Manm Lasanble.  Swivan the quashing of S.I.35,  nou ti pe demande ki nou ganny plis enteraksyon.  E nou pe anmenn Minis Finans, Licensing Authority, Retailers Association ek SCCI demen.

Keler Madanm Clerk?  Demen 10er bomaten dan

Committee Room 3, e ankor nou ouver avek tou bann Manm.  Pou nou revwar en pti pe bann regilasyon ki ti dan S.I.35, savedir lo ler ouver pou vann lalkol e ler frenmen.

Ok ?  Tou Manm i ganny envite.  Yes Onorab De Commarmond.

 

HON CHARLES DE COMMARMOND

Mr Speaker lo, lo zisteman sa.  Savedir ki bann propozisyon ki nou ti pe prepare nou pou anmenn li, at that moment?  Tou le de kote latab?

 

MR SPEAKER

Wi se sa. Se sa. Bon mon pa, mon pa ekspekte.

Akoz sa S.I i vreman, konman dir, direk lo sa zafer ler ouver e frenmen.  E mon mazinen bann pwennvi ki’n sorti lo tou le de kote, i ava ganny met devan Lotorite konsernen e nou ava kapab bouze, pou nou kapab ganny en new S.I ki tou dimoun i ava dakor avek, e Lasanble i ava osi dakor avek.  Ok.  So nou pou adjourn e nou repran nou travay 2er.

 

(BREAK)

 

MR SPEAKER

Bonn apre midi tou Manm Onorab e bonn apre midi tou dimoun ki a lekout ki pe kontinyen swiv travay Lasanble Nasyonal.  Bon parey kot nou ti fini bomaten, nou pou kontinyen avek nou travay avek Mosyon lo Order Paper.  Zis pou mwan  – met bann Manm okouran poudir enn fwa ki nou konfirmen zour e ler ki nou pou rankontre avek Foreign Affairs avek Kiltir, parey in ganny demande bomaten, nou ava kapab pas sa lenformasyon avek zot.   Me i pa paret ki pou Merkredi le 17 i pou posib.  So nou pe sey regarde si nou kapab fer li avan.  E mon mazinen kekfwa avan nou adjourn – avan nou rise, ki Madanm Clerk i a kapab ganny lenformasyon e nou a kapab pas avek zot.

Nou pou kontinyen lo nou travay, e sa se kontinyasyon deba – Mosyon ki’n ganny prezante semenn pase Mosyon Onorab Churchill Gill ki lir konm swivan:

‘‘Sa Lasanble pe demann Gouvernman ek bann Lotorite konsernen pou met an plas bann mezir neseser e pli strik, pou anpes sa polisyon ki ganny kree prensipalman par bann bato lwazir, tel parey ki bare boat bann bato lavwal e osi bann yacht dan nou lanvironnman maren pli partikilyerman otour Mahe, Praslin, La Digue e tou bann pti zil satelit ki ganny frekante bokou par sa bann bato’.  Ok deba ti deza konmanse lo la, e mon annan ankor detrwa Manm lo mon lalis.  E toudswit la, mon pou donn laparol Onorab Audrey Vidot.

 

HON AUDREY VIDOT

Mersi Mr Speaker.  Mr Speaker mersi pou donn mon laparol pou mwan ganny sans dir detrwa mo lo Mosyon Onorab Churchill Gill.  Mr Speaker nou rekonesan avek nou kreater ki nou erit enn bann pli zoli pei dan lemonn.

En pei avek 115 zil antoure, avek bann zoli lans ek son lanmer ble, e san bliy nou bann zoli koray ki en latraksyon pa zis pou nou bann lavi maritim, me pou touris ki sorti partou otour lemonn pou vin regarde.

Tou sa i montre ki nou a tou natirel e resours pli presye i nou lanmer, nou bann zil e zeneralman nou lanvironnman.  Mr Speaker rekognisyon ki Sesel in resevwar konman en pti pei, ki sanpyon Lekonomi Ble e menm pou lanvironnman i montre ki konman en pei nou pe fer le mye posib pou prezerv nou lanvironnman ki swa lo later e dan lanmer.

Me i tre tris Mr Speaker, ler en group nou popilasyon, pe fer tou pou protez e prezerv nou lanvironnman, e lo lot kote i annan pe detri.  Mr Speaker souvandfwa nou koz lo bann size tel parey; sipor aktivite lapes atraver bann progranm spesyal; ankouraz lantreprener Seselwa ek peser pou envestir dan bann aktivite lapes e endistriyel e semi endistriyel e eksplor potansyel akwakiltir e menm ankouraz Seselwa pou partisipe e envestir plis dan prodiksyon fridmer ki son valer.

Me pou Sesel kapab war bon rezilta dan sa bann progranm ki mon’n mansyonnen Mr Speaker, i enportan ki nou ranforsi nou sistenm sirveyans, pou aplik bann Regilasyon, pou anpes annan polisyon ki ganny kree prensipalman par bann bato lwazir ki Loter Mosyon in mansyonnen.

E si nou pa prezerv nou lanmer kont bann polisyon par sa bann bato, nou pa pou garanti loportinite lenvestisman dan bann aktivite lapes endistriyel e semi endistriyel, e potansyel akwakiltir.

Mr Speaker in stipile dan nou Konstitisyon pei, ki i devwar sak Seselwa pou ede prezerv en lanvironnman sen, e an bon sante e ki fonksyonn byen pou nou.  I nou devwar konman en Nasyon pou kontinyen protez nou lanvironnman e promouvwar devlopman soutenab atraver met an plas bann mezir neseser e pli strik ki soutenab e ki’n pran kont lanatir.   E se sa ki Onorab Churchill Gill avek bann entervenan ki’n koz lo son Mosyon, pe sey demontre lenportans sa Mosyon.

Parkont, nou bezwen annan zefor kontinyel pou donn legzanp par nou prop aksyon.  Nou osi nou kapab donn koudmen Mr Speaker, letan nou’n war nou pase dan en bato nou pe al lo en lot zil sorti enn pou al lo en lot, nou war bann tel aksyon, nou bezwen raporte e nou pa gard silans.

Nou bann enforcement officers i bezwen annan resours neseser, pou pli byen sirvey nou lanmer e pran aksyon imedya, avek bann ki pe mank respe pou labote nou bann zil, e nou lavi maritim, par zet zot bann salte e desarz ki pe polye nou lanvironnman maritim.

En Lotorite konsernen i bezwen revwar bann lezot fason pou konplimant travay ki enforcement pe fer, pou donn koudmen dan sa lalit pou protez nou resours maritim.

Mr Speaker mon pou apport mon sipor pou sa Mosyon, akoz mon senserman krwar dan zefor pou kontinyen inisye e diriz diskisyon an sa ki konsern proteksyon nou lavi maritim e menm lo later.

E mon pa pou kapab termin mon lentervansyon san zwenn mon koleg Onorab Sophola kot i ti felisit bann diferan lorganizasyon ek endividi ki pe kontinyen lite pou prezerv nou lanvironnman maritim e menm lo nou bann zil.  Mersi Mr Speaker.

 

MR SPEAKER

Mersi Onorab Vidot.  Onorab John Hoareau.

 

HON JOHN HOAREAU

Mersi Mr Speaker.  Bonn apre midi Mr Speaker.  Bonn apre midi tou dimoun ki a lekout.  Mr Speaker mon’n ekout Loter Mosyon semenn pase avek bokou lentere e loter Mosyon in met lanfaz lo ki fason holding tank lo bann yacht  i ganny zere.  E kestyon ki in demande e ki i annan rezon demande, se kote bann delo ize i ganny zete, anvi ki napa bann fasilite lo nou bann por lo tou nou bann por Praslin, Mahe ek La Digue ki kapab ponp sa bann desarz e zet zot dan landrwa apropriye ; vedir en landrwa kot i annan STP vedir kot sewage i ganny trete.

Alor larepons sa kestyon i evidan, set akoz sa bann dimoun an vi ki zot napa sa bann fasilite pou fer ponpe sa bann salte pou al zet li dan bann landrwa apropriye, alor zot zet li dan delo sale.  Mwan mon ti le anmenn en propozisyon ozordi kot mon oule demann Gouvernman, pou lans en tender pou sa servis ponpe ponp delo ize dan bann holding tank.  Sa i kapab ganny fer lo Mahe lo Praslin e lo La Digue.

Dezyenmman mon ti a kontan si, Gouvernman ti ava fer li fer en kad legal lo sa size ; petet kot tou bann yacht ki servi nou lanmer swa pou charter swa pou plezir, ler zot rod clearance avek Ports Authority zot devret ganny osi sa loportinite, oubyen ganny advice pou zot anrezistre avek enn sa bann lakonpannyen ki i ava ganny sa bann tender pou ofer sa bann servis.

La dan li menm i a kre en loportinite pou louvraz ; en loportinite pou donn en dimoun lo Praslin lo Mahe lo La Digue en biznes.  Sa bann dimoun i kapab provide sa servis, akoz sa servis pa neseserman ou bezwen en fasilite ki stasyonnen lo por – i bezwen ganny fer osi konman en servis mobil.

Mr Speaker sa size polisyon i en size ki nou bezwen get li en pti pe pli larz ki menm Loter Mosyon in koz lo la.  Sa size polisyon i osi annan pou fer avek sa bann kalite gas ki sorti atraver zot fuel ler zot brile, parey nitrogen dioxide, sulphur dioxide ki pa ganny trete.  Me si ou get fason ki bann exhaust bann yacht i été i lo sirfas delo sale, alor an menm tan ki pe ponp delo pou refrwadir son masin, i osi larg sa bann gas atraver dan lanmer.  E la sa bann fumes parey nou apel sa i kapab osi en danze ki koz Asma ; i kapab bann koz danze kanser osi, e i afekte quality delo, klarite delo e i obskir vizibilite dan delo sale dan sa bann landrwa kot sa bann bato i ganny mete.

Mr Speaker i annan osi problenm bann metal lour parey nou apel sa, ki ganny azoute avek fuel e ler i ganny brile, i sorti konman bann heavy metals ki bann pti partikil heavy metals ki akimil dan food chain.  E li i ganny abzorbe par bann pti pwason e bann pti pwason answit bann gro pwason i manz zot, e answit i retrouv son lekor dan imen e tousala i annan potansyel pou donn kanser dimoun.

Mr Speaker an dizan sa, mon pa pe dir ki nou bezwen annan en Polisi ki anpes bato move partou kote oubyen anpes zot fer zot aktivite, me sa ki mon pe dir ki Minister Lanvironnman sirtou park Lotorite Park Nasyonal, zot annan sa duty of care pou annan police nou lanvironnman.

Alor zot devret pli proaktiv pou monitor bann sityasyon e war en pe ki pe arive.  Si i annan sa bann keksoz ki ganny large eksesivman oubyen ki ganny konsantre dan serten landrwa, zot devret ankouraz bann bato pou petet mouy en pti pe pli o larz ; ki a fer ki sa bann desarz pa a tonm tro bokou lo lakot, kot i annan bann pti pwason ki pe rod en pti proteksyon akoz i annan sa shallow water.

Anfen Mr Speaker, se sa de pti pwen, ki mon ti ava anvi ozordi met devan, e i konsern senpleman ki Minister Lanvironnman i vin en pti pe pli proaktiv ; i police en pti pe plis bann sityasyon polisyon ki arive.  E osi mon ti a kontan ki Gouvernman i act deswit pou lans en tender pou rode lekel bann dimoun ki kapab provide sa bann servis, e donn zot sa loportinite biznes.  Mersi.

 

MR SPEAKER

Mersi Onorab Hoareau.  Mon a donn laparol Onorab Waven William.

 

HON WAVEN WILLIAM

Mersi Mr Speaker.  Mr Speaker lo sa Mosyon anmennen par Onorab Churchill Gill, mon pou donn mon sipor.  Mr Speaker an menm tan, an rekonesan size ki sa Mosyon pe trete, mon ti a kontan dir ki mon’n ganny sans koz avek detrwa bann sitwayen ki enplike dan serten sa bann aktivite maritim.

E  mwan mon pa eksper dan sa domenn, me selman mon’n ganny dir ki sa Mosyon i byen ki in vin dan Lasanble.  E sa Mosyon osi i donn sans pou koz lo lezot size ki annan pou fer avek sa bann aktivite polisyon.

Mr Speaker en pwennvi ki sorti for se ki, petet ki Gouvernman i devret enpoz en moratorium lo bann aktivite bann bare boats.  E mon’n ganny dir ki se sa bann kalite bato ki responsab an gran parti, pou desarz zot bann waste dan lanmer.

E mon’n ganny dir osi ki sa bann bato i annan en bon pe zot ki zot bann operater – zot bann etranze, e lo sa bann bato ou napa Seselwa an gran parti.   E letan ou napa Seselwa, sa bann etranze lo sa bann bato zot vin isi pou plezir, e zot pas plizyer zour lo lanmer e nou pa konnen vreman kwa ki arive ; sirtou kot i konsern ladministrasyon zot bann desarz.

E mon’n ganny dir poudir sa bann bato zot pa pe donn osi rannman parey nou ti ava swete Gouvernman i anmas reveni avek zot.  Mr Speaker e mon ganny dir osi poudir ki i annan apepre 125 skipper Seselwa me ler ou regarde sa bann bato etranze oubyen bann etranze ki lwe sa bann kalite bato zot pa donn bokou sans nou bann Seselwa.

Mr Speaker ki mon anvi montre se ki sa nou pe koz en pti pe lo kote sirveyans si sa bann etranze ki vin isi pou zot mon kapab dir enjoy zot lekor e zot pe lwe bann bato avek skipper etranze avek lekipaz etranze kot napa Seselwa definitivman petet sa laspe prezervasyon nou delo maritim i pa pou ganny pran an priyorite.

E parey mon dir i annan en demann ki pe dir be petet i bon petet pou enpoz en moratorium lo sa kalite bato ki Gouvernman i a revwar en pti pe lot fason fer.  Akoz la osi Mr Speaker mon’n ganny dir  poudir sa sirveyans, i annan plizyer Lazans ki annan pou fer avek sirveyans, me ou war ki parfwa sa bann bato, pa ni enformen letan zot pe vini, zis letan zot in mouye ki zot enformen. Me parey mon dir dan sa dekalaz letan avan ler ki bann Lotorite konsernen i kapab vini pou fer vizit, ouswa war en pti pe ki kalite aktivite zot in respekte bann kondisyon dan Lalwa bokou domaz in kapab ganny fer.

Mr Speaker lot keksoz se ki Sesel in form parti sa Marpol Treaty.  E  mwan mon demande ki, Lotorite konsernen i osi war ki fason nou kapab amann Lalwa an plis, pou fer sir ki bann mezir ki dan Mosyon pe demande – an menm tan pa zis bann mezir Mr Speaker, osi training.  Akoz  anba Marpol, si ou form parti sa Trete i annan bann training osi ki ganny donnen.  E mwan mon demande ki bann Lotorite zot regarde an plis, pou bann training pou nou bann zofisye.

Mr Speaker be la ankor letan nou pe koz lo resours imen, mon santi poudir Lotorite i devret angaz avek bann plizyer lasosyasyon, ki trouve dan baz aktivite lo lanmer pou osi donn en koudmen.

Mon konnen i annan plizyer Seselwa parfwa ki pas bann lenformasyon.   E i annan ki menm fer li en pe souvan, me ki pa ganny zanmen rekonnet.  Petet Lotorite i devret regarde ki fason sa bann dimoun osi i devret kapab ganny rekonpanse.

Mr Speaker nou Konstitisyon Lartik 38 i lir konm swivan :  ‘The State recognises the right of every person to live in and enjoy a clean and healthy ecological balance environment and with a view to ensuring an effective realisation of this right, the State undertakes to take  (a)  to take measures to promote the protection and preservation and improvement of the environment.  To ensure a sustainable socioeconomic development of Seychelles, by a judicious use and management of the resources of Seychelles.  To promote public awareness of the need to protect, preserve and improve the environment’. 

        Mr Speaker letan ou get sa Lartik vreman – letan ou regard bann aktivite maritim e bann posibilite aktivite polisyon ki arive,  mwan konman en Manm mon pe demann mon lekor,  konmsi si i annan sa sansibilizasyon ase, e otan, parmi sa bann akter ki pe enplimant sa bann Lalwa ?

E an menm tan osi pa zis nou bann dimoun lokal me osi nou bann viziter ki vin vizit nou pei.  Bann viziter ki al enjoy lo nou lanmer.  Bann viziter ki pe viv lo sa bann bato obor nou lakot.

Mr Speaker pa oubliye osi ki nou form parti sa Trete lo SDG.  SDG 14 osi i donn bokou bann lenformasyon e promosyon lo ki nou devret pe fer pou nou protez nou lanvironnman – enkli nou bann lavi maritim, me Mr Speaker parey mon dir nou problenm se mankman resours.  Me mwan  mon pou demande ki Lotorite i regarde otan posib, kwa ki kapab ganny fer, pou enkli akoz nou koz lo en devlopman soutenab enklisiv, ki plizyer bann dimoun i get involve e pran ownership pou vreman donn sa sirveyans ki nou pe swete.

E avek sa de pti pwen Mr Speaker, mon anvi dir ki i enportan ; i enportan akoz resours maritim, nou 2enm pilye lekonomi se pwason.  E polisyon nou lakot e nou lanmer i kapab afekte en kantite,  si vreman – si vreman nou pa donn sa latansyon parey nou pe ‘champion’ konservasyon proteksyon lanvironnman.  E pou soutenabilité nou lekonomi dan lavenir, i enportan ki tou dimoun, tou Seselwa nou ini ver proteksyon nou lanvironnman.

Alors Mr Speaker mon napa problenm donn sipor sa Mosyon.  Akoz mon krwar i en Mosyon ki annan son merit, e an menm tan mon ti ava demande ki sa sansibilizasyon i pran plas o nivo lekol.

Mon konnen ki i annan keksoz pe ganny fer.  Mon pa dir poudir Gouvernman pa pe fer nanryen, me dan sa domenn, nou bezwen donn en gran priyorite.  Avek sa de mo Mr Speaker mon a dir ou mersi e mon pou siport sa Mosyon.

 

MR SPEAKER

Mersi Onorab William.  Onorab Letourdie.

 

HON JANY DE LETOURDIE

Bonn apre midi tou dimoun.  Mersi Mr Speaker.  Mr Speaker de pti pwen, mon apresye ki mon war ki i annan en gran zefor depi sa mwan Zen ki’n pase dan sa Lasanble.  In annan en zefor pou donn en koudmen pou proteksyon nou lanvironnman parey dan Mosyon ti fer resorti.  E mon apresye ki nou bann MNA nou pe vreman ede par anmenn bann Mosyon.  E parfwa mon ti pe menm panse ki mon dir si ti posib pou nou kapab fer li, nou konnen poudir le 5 Zen mon krwar ti Lazournen Lanvironnman, si ennler nou annan kestyon ek nou bann Mosyon si ti kapab koensid osi, avek sa bann dat, sa bann levennman i ti pou donn en pti pe pwa plis nou travay.

Mon pe dir  mon pou dir de pti parol Mr Speaker, akoz parey kot mon reste Roche Caiman, ler mon ouver mon lafnet toulezour mon war telman kantite bato, kantite yacht menm bann bato peser ki’n mouye an deor la – kot sa mon krwar Roche Caiman i pli gro yacht marina ki annan Sesel si mon kapab dir e mon pe zis demann mon lekor parey nou dir an Angle mon wonder kote zot fer zot bann desarz,  kote zot met tou sa bann keksoz.

E mon mazinen poudir ler Mosyon pe dir annan en pe plis zefor, kekfwa nou bann Lotorite konsernen i ti a kapab konmans kekfwa fer patrol, verifye, oubyen gete, si sa bann desarz pe ganny fer dan fason konvenab.

Akoz Mr Speaker ou konnen poudir ler ou pase tou le swar lo pon, sirtou en pe dan wikenn, ou pou war en kantite dimoun kekfwa pe zet en pti laliny dan delo akoz lo sa de kote pon la – kot pon ti kase  la, ou pou war en kantite dimoun souvandfwa kekfwa pe admir bann pwason ouswa pe zet en pti laliny.  So ou war poudir i annan en kantite lavi ; i annan reken, i annan zegwir, i annan lezot pti pwason menm ennler ou war bann pti karang osi.

So i annan en kantite lavi partou la.  Alors  mwan mon ti a kontan donn sipor sa Mosyon. E apre osi mon konnen poudir byen lontan anfen kanmenm konmela osi, nou annan tou bann bato peser, ki zot osi zot devret santi zot konsernen, akoz i annan ki al toulezour ; i annan ki al lapes tou le wikenn lapes konzele parey nou dir, i ti pou osi enportan pou zot osi pou zot en pe konsyan, pou zot gete ki mannyer zot fer zot bann desarz, kote zot zet zot bann keksoz.

E alors Mr Speaker mon anmenn mon sipor pou sa Mosyon akoz nou bezwen konman en landrwa e annou konmans par deza konmans kontrole konmans fer patrol demann zot e gete.

E pa bliye nou konnen poudir i annan en rapor ki mon ti a pe gete lot fwa, toulezan ki kantite yacht i antre, mon krwar mon ti war enn pou sa lannen, mon ti war i ti annan 114 depi Zanvye ziska la.         Mon’n war i annan 114 me selman byensir i kapab annan lezot ankor ki nou pa konnen, akoz kekfwa ki pa ganny rikorde me tousala Mr Speaker mon krwar i enportan pou nou pran kont, akoz an fezan sa, ki nou pou kapab konmans en landrwa, avan ler bann lezot Lalwa i vini, me selman i annan en keksoz.           Akoz Lalwa parey nou konnen ennler, i pran en kantite letan pou li arive letan ou pe ekri – pas isi, pas laba –  Polisi.

Me i annan keksoz ki nou kapab konmanse dan limedyat la. Alors Mr Speaker mon pou anmenn mon sipor, akoz mon war poudir sa Mosyon i annan en gran lenportans.  Mersi.

 

MR SPEAKER

Mersi Onorab Letourdie.  Onorab Francois Adelaide.

 

HON FRANCOIS ADELAIDE

Mersi Mr Speaker.  Bonn apre midi tou dimoun.  Mr Speaker mon osi konman reprezantan Baie Lazare, kot nou annan en gran sirkonferans delo dan nou distrik.  Mon krwar mon pa pou fer Onorab Gill mon krwar mon bezwen donn li sipor sirtou lo la Mosyon.

Akoz i en Mosyon ki vreman enportan, e si nou pa konsyan nou lanvironnman pou nou zanfan demen, e pou nou bann pti zanfan, mon krwar ki nou konman bann lezislater dan sa Lasanble enn nou rol pou nou prezerv nou teritwar an menm tan nou lanvironnman.  Mon pou koz spesifikman Mr Speaker, lo en senaryo dan mon distrik, i pa vedir ki mon annan okenn problenm ek personn, me selman mon krwar bann Lotorite parey Mosyon pe demande ek Gouvernman – Lotorite konsernen, avek petet bann lezot group.  La mon pe mazin petet ; mon pe mazin SNPA pou zot vin en pe pli proaktiv e pran bokou plis aksyon , kont sirtou bann senaryo ki devan nou, ki reel devan  nou.

E mon krwar si zot tackle sa bann problenm, ki la kot nou trouve, mon krwar poudir bann problenm ki en pe pli lwen petet kanmenm i ava pran plis letan, me atak bann ki nou trouve devan nou.

Pran par egzanp lo lans Anse Poule Bleue i fer detrwa letan ki mon demann kestyon dan sa Lasanble, nou annan nou en gro bato – I don’t know si i en bare boat  -si whatsoever, me selman i en bato ki mouye dan labe Anse Poule Bleue.

Mon bann plonzer, mon bann peser zot deza koz avek mwan, e si zot pa tann mwan pe koz lo la ozordi, petet zot poudir be Onorab in ganny peye ; in pran gous prezan i pa kapab koz lo la.

E mon pou fer sir ki mon pou met ankor en kou Lotorite okouran poudir Baie Lazare nou annan en problenm.      Nou annan en bato – mon pa konnen ki zour in sorti lo sa mouyaz kot i été ; nou menm nou pa konnen kot son desarz i ale ; nou menm nou pa konnen -. Lot fwa mon ti demann en kestyon Minis Dogley i ti pran pre 3semenn pou reponn mwan.  Mon ti demann sa kestyon ansarz SMSA Kaptenn Valmont ; li osi i pa ti tro, tro kapab koz lo la.  Mon pa konnen ki i per ki nou per Sesel, ki ler problenm i devan nou, nou gete lekel sa dimoun nou pa kapab adres li.

Mr Speaker parey tou kou mon dir i pa sipoze annan personn ki par lao Lalwa isi Sesel!  Si ou kapab vini aret mwan – kosyonn mwan pou en keksoz mon pe fer i mal, mon krwar tou Nasyon – nenport ki Nasyon – nenport ki ou afilyasyon, mon krwar poudir  Lotorite konsernen Sesel i bezwen reakte e kot i pe fer mal i bezwen dir ou.

Mon ti deza koz avek O Komiser Britanik lo sa size en pe letan pase, e li osi in seye.  I dir mwan Onorab i a sey rod fason li osi ki mannyer i kapab ed Baie Lazare pou anmenn sa problenm devan Gouvernman e petet ed nou, sey demann Gouvernman apiy nou pou ki Gouvernman i a pran en lentere avek sa topik e i ava adrese.

Mr Speaker depi ozordi nanryen nou pa ankor war ganny fer.  E nou konman bann sitwayen Baie Lazare nou vreman konsyan avek nou bann koray.  Nou vreman konsyan avek nou bann labe, akoz nou osi nou ganny pa mal touris ; nou annan pa mal letablisman touristik dan nou distrik.  E si nou pe detri nou bann labe nou bann koray definitivman, nou osi nou pou ganny afekte.

Mr Speaker les mwan met lo rikord Lasanble poudir mon pa pe zis dir akoz mon anvi dir, me mon annan bann dimoun ki fer snorkling – i al rod zourit, zot dir mwan, ‘’Onorab en zour mon a anmenn ou koule laba, batri bann gro batri, zot zet anba bato Mr Speaker, mazinen en dimoun pe zet batri anba bato ?

I ti’n fer en landrwa pou zot mouye – Mr Speaker sa grander lasenn ki zot annan ler sa bato i fer letour, i kraz tou sa koray !  En sou Lotorite ni vin pran en mas avek en flippers pou al koule, pou al gete ki problenm i annan laba Mr Speaker, nou pa ankor war personn !

Nou bezwen demande eski Gouvernman i enterese?  I enterese avek labe Baie Lazare?  Ouswa i enterese petet mon pa konnen – pa ganny mon mal silvouple, mon pa kontan target personn, ouswa i annan ki pe ganny gous, e ki pa pe delivre ki pa pe donn nou, nou merit konman bann sitwayen Baie Lazare.

Mr Speaker mon pou demann Onorab Gill atraver sa Mosyon, vi ki ou ki annan zorey Prezidan, i dan ou parti laba, konbyen Mosyon nou anmennen dan sa Lasanble depi ler nou’n konmanse?  Eski sa Mosyon ki vreman enportan ? Eski sa Mosyon parey Onorab William ti dir i pa pou al ganny zis lapousyer dan kek biro State House?

E zis nou pou ganny trouve konman en Lasanble ki zis koze ki pa fer nanryen?  Byensir si nou ti annan power si zot ti donn sa LDS  mwan mon dir ou ler LDS i pran sa pei, be nou pa pou trouve sa bann keksoz!  Nou pou mars dapre Lalwa!  Napa dalon!  Nou napa lekel ki nou kontan – lekel ki nou pa kontan!

En Lalwa pou tou !  Nou pa kapab annan Lalwa pou mizerab.  En Lalwa pou ris.  En Lalwa pou ‘ek nou’ en Lalwa pou bann ‘pa ek nou.’  So nou, nou pe senpleman dir ki si i annan en Lalwa, nou tou nou tonm dakor nou egzekite !  E konpran mwan byen Mr Speaker, mon napa nanryen mal kont okenn Nasyon kont okenn  zot larzan ki zot annan mwan !  Mwan mon anvi en keksoz ki drwat.  E si nou pe koz lo ladrwatir  – nou pe koz nou anvi ki Sesel i bouze, be mon krwar i enportan ki tou dimoun i ganny dirize anba en sel Lalwa !

E mwan mon ti a demann Onorab Gill pou ler ou pran sa Mosyon, sivre sa Mosyon depi ler i sorti kot Lasanble la, akoz mon pou aprouve mon akoz i pe fer problenm dan Baie Lazare si ou war mon dimoun pe konplent i bezwen annan en problenm.

So mon ti a kontan dan ou summing-up ou dir poudir wi Mr Speaker mon pa dir ou sa ki ou pou dir mwan, me selman lo laliny koumsa, ki ou a fer mwan kontan.  Ou  pe note.  Mon kontan ou pe note.

Dir nou ou pou pran sa Mosyon sorti la, ou pou fer sir nou pou koz avek ou Sef – non, non, non, non – avek Leader of Government Business ki ou’n fer sir sa Mosyon i ariv kot State House, ler nou’n fini sinyen taler e nou war keksoz dan 2mwan 3mwan.  Akoz si nou tarde lakot Baie Lazare pou kontinyen ganny afekte.

E byensir bann peser pou kontinyen vini, vin dir mwan ‘’Onorab ou pa pe travay.  Sa bato i ankor la tou sa letan !’’ Mr Speaker mon pa konnen ki dernyen fwa sa bato in sorti lo mouyaz.  E mon pou osi demande si bann dimoun bann Lazans konsernen ki ansarz, Onorab Valmont pa pran mon mal, mon konnen poudir ou Dadi ki ansarz sa.

Me Mr Speaker in ariv en ler pou -.  Non –  be si ou pa kapab fer en travay ou bezwen ale !  Les en dimoun ki kapab fer en travay – ki kapab al koze be dir tir sa bato la, akoz i pe afekte nou labe !  Mon krwar i senp.  Sanmenm sa ki nou, nou dir nou, nou le dimoun ki kapab travay – ki kapab delivre.  Akoz tan ki nou tarde la,  se nou zanfan demen ki pou ganny afekte.

So mon pa pou tard plis ki sa Onorab Gill.  Parey mon dir ou mon pou siport ou Mosyon, me selman mon le tann ou pou dir,  poudir i pou annan en kontinyasyon, ou pou sivre sa Mosyon, akoz mon krwar i fer 3 Mosyon sa  ou’n anmennen la. Mwan mon oule ki ou sivre sa Mosyon en fason pou fer Gouvernman – ‘ou’ Gouvernman reakte lo la, e byento nou war sa bato sorti dan Anse Poule Bleue  –  nou pou konnen si ou Mosyon in efektiv!  So si ou war sa zafer pa ganny fer mon pou dir ou, savedir lot fwa ler ou koze dir bann dimoun Baie Ste Anne apir dimoun Baie Lazare dimoun LDS !  Mersi Mr Speaker.

 

(APPLAUSE)

 

MR SPEAKER

Mersi Onorab Adelaide.  Mon a donn laparol Onorab Johan  Loze.

 

HON JOHAN LOZE

Mersi Mr Speaker.  Bonn apre tou dimoun.  Zis pou note Mosyon i pa pou tir en bato.  Selman nou ava ofer nou sipor lo kestyon proteksyon e prezervasyon lakot Baie Lazare pou Onorab Francois Adelaide.  E egalman nou ofer nou sipor pou Madanm Clerk ki fer somer tou bann Mosyon i fer summary i anvoy State House, e mon krwar pa si sa ki i anvoy State House i zis lir Motion Approved avek Motion titleSo sa ki Onorab Francois Adelaide pe demande Madanm Clerk mon asire i pe deza fer.

Mr Speaker resaman magazin National Geographic in piblir en lartik entitile ‘Plastic or Planet.’ Ladan zot in sit en resers ki’n dekouver sa ki zot in dekrir konman wild corals – ki wild corals pe konsonm micro plastics.  E zot pa pe zis konsonm micro plastics konman zot lanouritir zot tant pou prefer li over zot lanouritir natirel ki zot sipoze pe konsonmen.

Now zot in egalman dekouver ki sa bann micro plastics i konteni bakteri ki harmful pou sa bann koray. Rezon mon pe lev sa Mr Speaker, se ki semenn pase dan sa deba depi in konmanse, nou’n ganny dir ki pwason pe konsonm plastik, me i bokou pli grav ki pwason ki pe konsonm plastik.

La sa ki National Geographic in étale se ki menm at the very base of food chain dan lanmer, pe ganny polye par plasticsmicro plastics.  So Mosyon pe pous nou dan en direksyon pou prezerv nou lanmer malgre i vre ki lasyans in osi dekouver ki lanmer i plen avek micro plastics an se moman, e sa i wash i sorti dan en losean pou al dan en lot.

Be i enportan ki Mosyon pe pous nou dan direksyon pou fer nou bout nou osi isi Sesel, e pou sey ed nou lanvironnman.  Mr Speaker bout ki mon anvi konsantre lo la dan sa Mosyon, se sa kestyon bare boats la.

Enn bann keksoz ki’n sorti kler over and over se ki propriyeter sa bann bare boats an gran parti se bann etranze.

Pa ganny mwan mal en kantite bann etranze i konsernen avek nou lanvironnman. Zot prezerv bann keksoz ki otour nou e zot donn nou lanmen konserve kot nou bezwen konserve.

Be mon vwazen pa kontan pli kontan se mwan, ki mwan mon kontan se mwan.  Mwan mon bezwen kontan se mwan en pti pe plis ki mon vwazen ki pas kot mwan detanzaot.  Alors i lozik ki Seselwa i pou prezerv son lanmer, son losean, son lanvironnman, son lans plis ki en etranze pou fer, malgre ki zis dan Dimans i ofer en pe dega lo lans de fwa.

Me sa ki nou pe trouve se ki napa ownership Seselwa byen, byen dan sa biznes bare boats la.  Napa lapartenans Seselwa.  E la in go even further ki napa skipper Seselwa – napa  crew ler sa bann dimoun i pran bato.  Me mon retourn lo sa kestyon ownership la mwan.  In ler –.  In ler – in plis ki ler, ki nou met en lord dan sa zafer.  E mwan mon pou sizer en formil tre senp mwan.  Nou met en moratwar lo sa biznes pou le moman, e nou met an plas en formil finansman, pou ki nou bann Seselwa, i a kapab antre dan ownership sa bann bato.

Kre en penetrasyon pou Seselwa dan sa lendistri, ki ase signifikan – ase konsekan an se moman ; lenvestisman up front i en pe o.  Resaman mon’n koz avek en dimoun i dir mwan son katamaran in ariv li anviron en R3milyon second hand mon pa vreman konnen – mon pa konn sa bann konte ziska sa bann sif – sa bann sonm, me selman mon krwar nou kapab fer pli byen konman en pei.  Nou kapab fer bokou pli byen ki sa.

I annan en lendistri la ki pe raport fri.  Nou konnen i pe raport fri, akoz dimoun ki annan larzan, zot pe kontinyelman antre ladan.  E si i annan en keksoz ki mwan mon’n aprann konsernan larzan, se ki dimoun ki annan larzan zot pa zet zot larzan dan bann loss making enterprises.

Si dimoun ki annan larzan pe antre dan sa bann zafer bare boats, there’s money to be made!  E si there’s money to be made, larzan i ale ek Seselwa !  I ale avek nou bann zenn Seselwa.  Boner letan nou ti pe koz lo Mosyon Mr Patrick Victor, mon ti tann serten dimoun ti pe kriy ‘Ras Ricky’ – ‘Ras Ricky’ me Mr Sultan i en skipper, i deserve ownership !

I devret ganny anmennen. Nou pei i bezwen annan en mechanism pou bann zenn parey li, ganny ownership dan sa lendistri.  Pa zis vann zot servis vitam aeternam dan en lendistri ki prezan nou’n realize nou napa kontrol lo la as such !

E nou pe rod prezan bann mekanizm kontrol.  Be mon krwar a la baz mekanizm kontrol pli senp, se pou met sa lendistri dan lanmen Seselwa, ki li ava konsernen avek son pei, avek son lanvironnman.  E i a fer an sort ki sa lendistri i deroul pli byen, ki i pe deroule an se moman!  Mersi Mr Speaker.

 

MR SPEAKER

Mersi Onorab Loze.  Mon a donn laparol Onorab Norbert Loizeau.

 

HON NORBERT LOIZEAU

Mersi Mr Speaker.  Bonzour tou dimoun.  Mr Speaker mon anvi fer sorti de pti pwen.  En pti pwen ki vreman enportan lo Mosyon pa pti be de gro pwen mon krwar.  Mr Speaker ler mon’n ekout Loter Mosyon nou koz plito lo bann bato ki pe sirkil lo nou lakot dan nou lanmer.  Mon konpran lide Onorab Gill, akoz  – enn – ler ou pe sirkil dan lanmer, ler ou pe zet ou bann déchets  – ou bann salte, i kre polisyon e osi atrakte bann gro pwason ki manz nenport ki kalite kosonnyen.  Ou ti trouve – mon konpran lide loter Mosyon akoz  nou ti trouve ki ti arive Anse Lazio.  Senpleman akoz bann aktivite bato ki’n ganny deroule an deor, ki’n fer ki sa bann pli gro pwason – akoz i sanz zot food chain sa.  Zot war li fasil pou zot ganny zot manze, alors zot tant pou antre lanmenm ler kot ou trouve touris ti ganny manze, ti ganny manze morde Anse Lazio.

Mr Speaker sa en pwen ki mon anvi pase konsernan bann bato, me mwan mon anvi al en pti pe pli lwen, sorti lo delo sale, me plito vin lo lakot lo nou lakot.  I annan bann peser lo ros Mr Speaker – bann peser ater.  Mwan mon enn mon en dimoun, akoz bann zafer bato pa mon zafer.  Mon donn manze pwason maldemer bag mwan.  Mwan mon kontan al lo ros ek mon fanmir.

E mwan ler mon al lo ros, nou enjoy, me selman nou pa lapes nenport kwa.  Si i arive mon lapes en pti zekler sa grander – mon larg li mon les li ale.  Pour mwan al avek en pwason se mwan fodre vreman mon lapes en bon mannyer pwason pou mwan al avek.

E pandan mon parkour Mr Speaker, lo lakot mon’n konn tou sa lakot Mahe mwan.  Zot war – mon krwar i annan ki’n war portre lo Facebook – nou’n mete ’’Anita Baba.’’ Nou kontan  al lapes.  Mon enjoy.  Me selman ler nou fini nou anmas nou salte.

Ozordi si nou al lo nou bann ros kot nou abitye ale – nou nepli ale akoz ou pa ganny nanryen !  Salte i enkrwayab.  E mon pti garson i dan Eco Warriors, zot al fer bann netwayaz lakot parfwa, sak fwa nou ale nou al ek en bin liner nou.  Nou fer sir i dir mon gete papa i sal akoz nou fer sir ki dan Eco Warriors nou anmas sa bann salte.  Nou pran nou desann avek.  Pa salte ki mwan ki’n zete !  Ki lezot dimoun in zete.  E ozordi – lontan ti annan en pti group Seselwa ki ti al fer sa bann lapes lo ros, e nou, nou ti konsyan sa bann keksoz ozordi i annan bann expat, bann etranze, ki pe sirkil lo nou lakot Mr Speaker enkrwayab!  Bannla pe lapes – pa zis polisyon – zot kit tou zot salte lanmenm!  Tou zot salte lanmenm zot kite.

Sa i fer polisyon, e osi Mr Speaker zot pe detri nou lakot !  Zot pa swazir nanryen sa bann dimoun! I annan en garson Bel Ombre in dir mwan dir ou Mr Speaker, i annan en landrwa Bel Ombre kot zot  ti a kontan al lapes, ozordi i annan bann expat – mon pa pou nonm zot lorizin – ki frekant sa landrwa.  Ozordi ou al laba ni en pti kakamatlo ou pa pou gannyen.  Zot grat depi tou Mr Speaker!  Zot kre polisyon lanmenm, zot zet salte apre zot fer netway depi bernik, karkasay – napa nanryen !

Lontan nou ti sot la, mon rapel lontan mon ti ankor pe reste i annan en landrwa La Retraite, nou ti sot  la La Retraite kot lapas – kot  bann bato La Retraite i sorti, nou ti al rod -.  Fer en pti lapes lwazir – si nou ganny en bon mannyer pwason, nou pran, apre nou ti kontan ganny en pti bernik.  Al lo sa ros konmela !  Sa bann expatriate in antre la, in grat tou !  I reste zis sa ros pou zot al avek konmdi Onorab Arissol – napa nanryen !

Ler nou pe get an deor lanmer,  mwan mon krwar Onorab Gill, ou merit adres sa. Nou bezwen get osi ater !  I annan bann keksoz ki pe arive ki pe kre bokou lannwi pou nou.

Dernyen fwa mon ti pe get en progranm, nou fek pe koz sa ansanm avek Onorab Arissol – Australie progranm Border Control.  I annan bann marine police ki zot la deor zot ; bann ki al lapes lo ros, ler ou sorti ou pas la ou!  Si ler ou antre nou get dan ou ice box  ki mannyer ou apele – lekel ki’n lapes?    Mwan ki’n lapes.  Bann la i gete. Si i annan e pwason ki son size pa soz, bannla i mezire ;  zot  annan zot lareg – mezire.  Sa non so zot in fer en lofans, sa nou pou sarz ou, ou pa annan drwa lapes sa groser.  Sa enn la -.  E si i annan okenn keksoz ki ou’n tire lo ros, ki nou war ou sipoze tir tan kilo, si ou sipoze tir en kilo  ou ou’n tir 5/ 6kilo sa lot 4/ 5kilo sa ou a peye, sa enn. Nou merit annan sa.

Mon krwar Onorab Gill i  merit adres sa taler dan son Mosyon.  I merit annan sa, akoz i annan dezord.  Be mon a dir zot en keksoz, mannyer serten bann expatriate ki’n vini, pe detri nou lakot e menm nou larivyer ki  al dan delo. Kot Victoria Gymnasium mon’n deza vini, ti annan en bato cargo, bann dimoun lorizin Sinwan ti la, zot desann la kot sa larivyer Gymnasium zot lapes zot en bal talafya.

Mr Speaker mon swear en bal!  Kordgard i la.  Nou, nou pa manz talafya nou, be akoz nou pa pe manz nou talafya, eski nou permet zot vini sorti manze pou nou?  En bal?  Kordgard i la – obor.  Zis ou cross en pon, ou antre anndan ou war !  Konpran mwan?

Aprezan, ou konn sa bann dimoun zot pran tou e ler zot ale la, zot kit tou zot bann labwet sal, tou zot bann zot kit lanmenm la lo bor.  Napa personn ki fer zot nanryen.  Sa se bann keksoz ki nou bezwen adrese si nou anvi protez sa ki nou pe koz lo la.

Ozordi i annan en keksoz ki nou bezwen gete Mr Speaker.  Bann dimoun ki grat pwason ozordi ou aste en pwason en boug i dir ou ‘’Chief mon a grate pou ou?’’ Kot ou zet sa bann trip?  Kote zot zete?  Be pa zot zet dan ros, i pouri lanmenm partou?  Mon pa pe dir aras bannla zot pti bourse manze. Me selman si ou pou fer sa, ou pou bezwen fer li byen.  Ou zet dan ros ?  Sa trip i pouse la, i pouri – apre ki nou war ?  Bann lezot pti zannimo i sirkil la, i vini i mor lanmenm, ou war li in gonfle pe flote.  Tousala se bann keksoz Mr Speaker ki mon krwar nou merit adrese dan sa Mosyon.

Nou pa bezwen get zis an deor bann bato ki pe sirkil an deor.  Nou bezwen get en pe lo lakot osi, bann aktivite ki pe ganny deroule.  Akoz sa osi pe kre polisyon e pa zis polisyon i pe osi anmenn destriksyon lo nou bann pti pwason lakot, ki sirkil lo lakot.

Mr Speaker la le pwen ki mon ti anvi fer sorti mon pou siport Onorab Gill e mersi.

 

MR SPEAKER

Mersi Onorab Loizeau.  Mon a donn laparol Onorab Egbert Aglae.

 

HON EGBERT AGLAE

Mersi Mr Speaker.  Bonn apre midi tou Manm e avek tou piblik an zeneral.  Mr Speaker Mosyon pe met lanfaz lo mezir pli strik, pou anpes polisyon atraver bann aktivite ki bann bato i fer lo nou lakot e otour nou bann zil.  Mr Speaker nou lanvironnman Sesel, i enn ki ganny rekonnet lo nivo Nasyonal e enternasyonal.  E bokou viziter ki vin isi i rekonnet sa zefor ki’n ganny fer par lasosyete li menm Gouvernman e nou kominote an zeneral pou sofgard sa lanvironnman pou fer sir ki nou pilye lendistri – sa i touris e osi lapes i reste an bon sante.

Mr Speaker ler mon’n ekout bann entervenan ki’n koze mon krwar i esansyel pou nou adres serten pwen an mezir ki pei pe devlope e lendistri lapes i pe agrandi, e bann lendistri charter osi parey nou war i annan bokou plis bato ozordi ; bokou plis bato lwazir ozordi e bokou Seselwa pe antre dan sa biznes, ki i byen.  An mezir ki lekonomi i agrandi e zot war potansyel pou zot bouz pli devan.  Me Mr Speaker nou war poudir i osi annan serten defayans ki a vin avek ouswa mon kapab dir defi, ki atase avek ban aktivite ki ganny fer lo lanmer.

Mr Speaker mon distrik Port Glaud, i annan 2 Park Maren Nasyonal – sa i  Bay Ternay avek Port Launay ki tou lede i ganny frekante par bokou bann touris Seselwa zot menm e osi bann bato lwazir ki vizit sa 2 park ki mon’n site.  E souvandfwa nou pe war bann konsern ki pe ganny adrese, e an se moman nou dan distrik nou annan en tim ki nou pe travay etrwatman avek bann Lazans parey,  SMSA – SNPA e menm Lotorite Por avek Coast Guard pou fer sir ki sa bann aktivite ki pe ganny fer ki dan en fason ki byen, ki pa andomaz nou lanvironnman e osi pa met a risk nou bann endividi ouswa bann dimoun ki frekant sa landrwa.

Mr Speaker bann problenm ki nou pe war ler sa bann bato i koste premyerman, se ki i annan ki vini ki zot larg zot lank partou san en landrwa byen demarke e sa pe koz restriksyon sirtou avek nou bann koray.

Dezyenmman, zot annan bann aktivite vi ki zot reste la preski en lazournen ; ki zot la lo bato ki parfwa petet enkonsyanman mon kapab dir ou war bann déchets  ki ganny zete swa bann pti debri ki ganny zete sorti avek sa bann bato.

E ler nou war sa i arive Mr Speaker e tou sa bann debri sa bann déchets li menm li i end up lo lans.  In ariv bann lenstans osi kot bann etranze, bann touris ki’n frekant lans, dan sa landrwa, in menm tir portre e menm fer serten konplent, poudir i annan serten keksoz ki pa pe mars byen, e nou bezwen annan Regilasyon ouswa ranforsi Lalwa ki deza egziste, pou fer sir ki sa bann kalite pratik pa kontinyen.

Mr Speaker sa i en pti pe limaz bann defi ki nou  bezwen pe fer fas avek an fil a mezir.  Me Mr Speaker malgre nou annan nou en Lalwa Lanvironnman ki annan bann regilasyon ladan ki fer ki i kouver en pe bann aktivite ouswa pou deter serten bann pratik move pratik ki ganny arive dan sa lendistri ki nou pe koz lo la, i fer ki a en pwen pou anpese ki bann polisyon i ganny koze, me souvandfwa malgre nou dir nou annan Lalwa nou annan Regilasyon nou war poudir bann pratik i kontinyen.

Mr Speaker mon’n fer en pti resers mon gete i annan bann pei parey Lanmerik dan bann early 1900 kot zot ti entrodwir anba en Lalwa sa ki nou apel en Refuse Act e sa Act li menm li ti kouver bann larivyer bann harbors pou fer ki anpese ki i annan bann aktivite polisyon.

Mr Speaker sa ti ganny mete akoz dan endistralizasyon dan sa bann letan dan bann 1900 ler bann pei ti pe endistriyalize, ti annan bokou bann trafik pou transportasyon sirtou bann mineral parey nou dir bann haul – bann mineral, pou ganny transporte, i annan delwil osi ; sa ti pe ganny fer dan en fason ki i pa ti pe ganny regle e ti pe koz polisyon.  Alor zot ti war li neseser pou zot entrodwir dan en Lalwa en Refuse Act ki gouvern bann aktivite, ki mannyer sa bann keksoz i pou bezwen ganny transporte, e ki mannyer zot ti police sa bann keksoz osi.

E sa Act li in marye avek zot Act lanvironnman ki ozordi zot apel li en Environmental Agency Pollution and Prevention Guidelines, pou bann marines avek bann craft ki ganny servi bann rivers bann harbors avek bann lanmer an zeneral.

E ladan zot etabli pli lwen Mr Speaker, zot in met bann Regilasyon ki mannyer pou maintain e minimiz bann polisyon ki kapab ganny koze dan delo li menm, me zot in al pli lwen osi avek latmosfer.

Mr Speaker malgre nou Sesel nou annan en Environmental Act, mon santi poudir ki nou osi nou kapab al en pti pe pli devan, ki mannyer nou kapab entrodwir serten Regilasyon pou adres sa ki Mosyon pe demande, e fer sir ki regilasyon i ganny respekte dan li menm.

Mr Speaker anba sa menm Lalwa, sirtou kot i konsern bann bato, i annan bann lenspeksyon ki ganny fer lo en baz regilye mon kapab dir.  Parey ozordi nou annan car hire ki egziste, e ki zot bezwen al en tes mon krwar tou le 6mwan, sa bann bato zot bezwen ganny survey dan en fason ki pou rann zot seaworthiness e ki zot pa pe koz en danze, ouswa okenn koz lanvironnman.  So sa bann lenspeksyon ki ganny fer dan  en baz regilye e pou zot annan en departman ki tonm anba Coast Guard,  ki fer sa travay pou zot al verifye sa bann bato lo en baz konstaman.

Pa bezwen esper 1an, me selman zot fer li dan en fason regilye, e zot menm war bann fason proteksyon, ki ou stok ou fuel ok ?  Ki mannyer ou fuel osi ou bato kote ou pou ale pou fuel osi  – ou bato e zot menm rekomande ki sak bato i annan bann solisyon abor, ki ganny mete parey zot apel sa bann oil absorber material.  E si i ariv en spillage ou kapab mitigate deswit, an menm tan ou esper lasistans par bann lezot Lazans vin donn ou koudmen.

Mr Speaker osi sa Lalwa i fer mansyon lo kote sewage ; ki mannyer ki ou pou dispose ou sewage.  Mon konnen anba SMSA zot Regilasyon, zot annan serten mansyon ladan, i fer ki kote ki bann bato i al desarze – outside ports limits ; ki zistans ki zot mete.  E li ladan i fer mansyonnman lo storage, kote pou store bann déchets.  Ou sewage osi si i arive akoz nou konnen ki poudir i annan bato ki ler i kit en por, i al tan zistans, e i pran li mwan semenn.  E osi nou annan bann charter isi ki ler i sorti i pe al 1semenn – i annan ki al 2semenn, e nou, nou konsyan poudir pandan sa bann letan, sa bann aktivite – sa bann kliyan ki abor, i bezwen pe servi bann fasilite twalet ladan. E a en pwen i pou bezwen plen li osi e ou pou bezwen desarz li dan en landrwa konvenab so tousala i fer mansyon anba sa bann Regilasyon.

E Mr Speaker i osi fer mansyon ki mannyer pou netway ou bato. Ozordi parey nou nonm Eden Island nou war poudir bann bato ler i antre ok, zot fer serten netwayaz lo bann bato e menm zot servi serten kemikal pou fer serten netwayaz avek delo ki zot servi tousala i desann dan lanmer.

Sa osi i fer mansyon lo la. E osi i annan ki mannyer i netway parey anba bato, akoz nou konnen bato avek letan i akimil serten bann – mon pa kapab dir parey korozyon – sa  i bann keksoz ki atas avek zot bato, i kapab annan koray pouse tousala.

Tousala i fer mansyon lo bato ki mannyer ou pou fer li e kote ki ou fer li e ozordi ki nou war sa bann keksoz mon kapab war en dimoun i vini lev son bato ater i fer serten travay ; i kapab met lo lans osi la i mete i redi nou war sa i arive.  E osi sa i en pratik ki i pa sipoze pe fer koumsa, me selman i pe ganny fer.

Parfwa osi i annan bann bato si ou napa larzan pou al met lo en slip – lo en yard byensir akoz i koute, bann dimoun i annan tandans pou fer li kot zot war i pratik.  Me tousala san ouswa enkonsyanman i polye lanvironnman i anmenn serten bann salte.  Akoz nou konnen poudir bann bato i servi parey bann lapentir bann lapentir bann anti-fouling tousala – fiber glass tousala, i en danze pou nou lanvironnman parey in ganny dir nou konsonm bokou pwason tousala demen i al end up ki en pwason i manz sa bann keksoz.

Mr Speaker e menm anba sa Regilasyon i fer mansyon lo bann rapor ki ou bezwen fer, si an ka in ariv en lensidan e menm i donn pouvwar bann lendividi pou fer bann rapor si zot war poudir i annan serten malpractice ki pe ganny arive pou zot raporte si zot in war en polisyon e zot osi zot kapab vin bann witness osi pou zot vin devan demen si i annan en ka kot i bezwen entervenir par Lalwa ouswa par bann Lazans konsernen.

Mr Speaker dan sa menm laliny sa ki sa Mosyon pe demande, nou santi poudir i annan bann mezir ki nou, nou santi in kapab ganny pran. Premyerman Mr Speaker konzwentman avek bann Lazans ki deal avek bann bato.

Parey nou annan Port Authority.  Nou annan SNPA – SMSA nou annan Minister Lanvironnman i osi annan en rol pou li zwe.  Nou annan en lasosyasyon bann bato bann boat charterer nou annan lasosyasyon bann peser.

Mr Speaker mon santi poudir a en pwen kot sa bann akter i bezwen zwenn ansanm.  Zot bezwen zwenn ansanm avek bann boat operators bann lakonpannyen ki pe zer sa bann bato pou ki i ava annan en norm akseptab lo ki fason bann aktivite kot i konsern desarz – premyerman, tir sa de tir sa bann sewage i ganny antreprann isi dan pei.

I annan bann mansyon kot in dir poudir petet bann lakonpannyen prive i kapab zwenn ansanm – premyerman akoz isi nou napa en pwen kot ler en bato i antre, si par egzanp ou pou napa en fasilite ouswa en kontak pou ou ganny enn sa bann lakonpannyen ki pomp ou sewage ou dir be vini mon a pomp sa ki dan mon bato, ler mon’n koste ater, me i sipoze annan en hub stasyonnen somewhere lo en por par la, kot sa bann bato i koste zot kapab fer.

Zis parey ler ou pe al pran ou fuel  pou ou al lo en trip, i ava annan en fasilite ki ler ou, ou koste, mon konnen i pou kote me se sa bokou bato i prefere zet son keksoz an deor, pou li minimiz son operational cost.  I normal.

Me selman i pa sipoze en pratik, akoz nou lanvironnman avek sa lakantite bato ki deza ozordi egziste – sa 100enn ki annan, si nou tou nou pratik en tel parey, nou pou war poudir nou pou annan plis polisyon.

So sa fasilite pe al ganny mete dan detrwa landrwa menm lo kote Zil Pros parey pe demande, lo kote Mahe i ava annan enn a de landrwa, kot sa bann bato i kapab koste – sa aktivite sa bann déchets sa bann sewage, zot salte ki zot in anmase, zot a kapab ganny eparnye bann tire met li dan zot landrwa konvenab.

Mr Speaker pou terminen, mon pou felisit bann skipper Seselwa ki pe fer en bon travay ozordi pou sofgard lanvironnman.

E  mwan mon enn bann  dimoun ki’n ganny sans pou mwan al lo bann charter e ler mwan mon’n ale, mon konnen ki mannyer pou fer boat boy ; mon konn fer lakwizin lo bato, mon’n ale mon’n partisipe mon war poudir i annan en fason prosedir pou salte ganny mete – ganny anmase.  Ler ou fini plen i ale ou met ou plastik i ganny mete dan lakav – ok ?  Pou refuel osi – ou bann tenk adisyonnel – akoz parler ou al lwen, ou bezwen additional fuel kot ou store li dan ou  bann barik i osi ganny tire dan en fason e i ganny store dan en fason, ki ou minimiz lenpak, ou napa bann waste, bann spillage ki ganny arive.

Be mwan mon santi poudir nou bann skipper Seselwa i konsyan ;  konsyan lanvironnman e zot konport zot ase byen mon kapab dir kot i konsern management zot bato zot loperasyon, e pou minimiz lenpak.

Me parfwa ou war ki vre i annan serten etranze, ki zot pa pe swiv serten bann Regilasyon ouswa bann pratik pou gard nou lanvironnman prop – anpes polisyon e pou mwan sa i domaz e i pa sipoze leka.

Alors Mr Speaker, an sipor sa Mosyon Mr Speaker mon pou siport Onorab Gill.  E mon santi poudir nou kapab al pli lwen e nou anvi ki sa ki pe ekout nou byensir Mosyon i ava al kot Egzekitiv e i ava annan en dyalog otour sa Mosyon, pou fer ki keksoz i sanze, e ki nou lanvironnman menm si nou pare nou pe protez li ozordi, nou santi ki nou kapab fer plis e i ava annan plis mezir proteksyon.

E pou terminen mon ti a demann Onorab Loizeau osi ki’n koz lo son aktivite ki i al fer lo ros laba, petet pou kapab protez sa ki li i pe demande osi, petet demen i kapab vin avek en lot Mosyon pou li kapab anmenn en sipor ankor adisyonnel, pou anbelir sa Mosyon ki’n ganny mete devan, pou ki bann aktivite ki ganny fer ; ki swa lo lanmer, ki swa lo lakot, i bezwen ganny fer dan en fason proteksyon lanvironnman e soutenab.  E avek sa Mr Speaker mon pou dir.  Mersi.

 

MR SPEAKER

Mersi Onorab Aglae.  Mon a donn laparol Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon ava al ase vit lo sa Mosyon e mon a konmanse poudir ki Mosyon i ok  – napa nanryen mal avek.  Me selman mon krwar nou pe mon as mon war lentere ki Onorab Gill i annan ; i pe met devan.  Akoz Praslin kot i reste i en landrwa kot i annan bokou sa bann bato ki pe sirkile eksetera.  Mon konpran byen sa konsern ki annan. Me selman mon krwar – mon napa en meyer lekspresyon –       mwan mon krwar ki Onorab Gill pe get saret, me selman i pa ankor – i pa pe get sa ki vin devan saret.

E ki i annan bann problenm fondamantal dan sa lendistri.  Kekfwa Onorab Gill i war me selman in swazir pou li konsantre son lentervansyon lo en laspe yacht charter industry.

Akoz i en lendistri konpleks.  I en lendistri tre konsekan dan nou lendistri touris.  E sa bann risk ki vin avek sa lendistri i notaman bann salte ki zot generate – tou bann keksoz ki zot bezwen anpese ariv dan lanvironnman maren, se neseserman en konsern.

Me i pa pli gro konsern.  Mwan mon krwar ki nou devret pran de pa an aryer pou nou kapab sot en pe pli lwen.  Nou problenm isi Sesel se ki nou annan en lendistri charter boats – en bonpe ladan i bare boats e en bon pe ladan i bann bato bann yacht avek crew –  e set en lendistri ki nou menm nou bann Lotorite pa konnen ki pe pase dan sa lendistri.

Mon krwar si nou onnet e nou ekout bann dimoun ki travay dan sa lendistri, bann dimoun ki kontan Sesel, ki kontan zot pei ki kontan war en lendistri pe grandi, ki anvi war Seselwa profite ganny larzan, nou bezwen ekout zot.  Akoz zot dir nou poudir problenm i konmans bokou pli boner ki sa.

E kestyon fondamantal ki zot poze se, ki mannyer ou pou al police en yacht pou gete si in desarz son bann salte o moman apropriye, dan landrwa apropriye kan nou pa ni konnen lekel ki pe fer sa biznes Sesel ?  Mwan mon ti a kontan met devan Onorab Gill ki sa biznes charter bato i parey en landrwa ki ‘free for all ‘kot napa Lalwa ; kot sakenn sa bann dimoun i vini i fer pou li.

E tousala i vin lo detriman bann operater Seselwa, ki pe sey ganny en lavi.  Premyerman Mr Speaker ler en dimoun i debarke lo erport e i dir avek Customs officer, mon pe al reste Eden Island.  Sa zofisye – pa Custom Imigrasyon, sa zofisye Imigrasyon pa ni konnen si i pe al reste dan en lakaz, si i pe al reste lo en bato.

I pa ni konnen si i pe al reste dan son lakaz, oubyen lo son bato.  Oubyen i pe al reste dan lakaz son dalon ki in lwe e in peye Sid Lafrik oubyen Lafrans oubyen dan en lot pei.  In pey son vakans dan sa kont laba deor e in desann – in vin pas 2semenn – 1semenn dan lakaz oubyen lo yacht sa msye ki anmare devan son lakaz.

Tro bokou zistwar ki nou gannyen e i pa fer premye fwa ki mon koz lo la e i pa fer premye fwa ki mon’n enterpel Minis Finans – Mr Loustau- Lalanne lo sa size, sirtou ler mon ti pe dir li,  ki li konman en profesyonnel dan lendistri touris, i konnen ; sirtou ki li ki’n involve bokou dan yatchting i konnen poudir i annan en kantite labi, e en kantite manboulouk ki pase.

Mr Speaker mon anvi met devan sa Lasanble, ki si nou pa rod en fason pou nou regle e fer marse sa lendistri yachting e fer sir ki nou pei i ganny sa ki i merite sorti dan sa lendistri annou bliye ki nou pe al fer en sistenm pou nou kapab fer sir ki sa bann bato pa sorti dan nou delo sale.

Nou pa ni konnen nou war pase en yacht lo delo sale, nou pa ni konnen si sa yacht in ganny charter – si i en prive si i en komersyal, si i pou Seselwa si i pou etranze – napa !  I annan Lalwa isi Sesel ki dir ki tou yacht ki antre dan por i bezwen sinyale ler i antre dan por, konbyen yacht ki antre direkteman Eden Island?

Eskiz mwan mon servi sa legzanp Eden Island Mr Speaker, me selman i pli gran yacht marina dan Sesel.  So i normal ki mon servi li konman legzanp.  Me selman i normal osi, akoz se laba ki ganny raporte pli gran kantite labi.  Konbyen fwa – konbyen fwa bann operater Seselwa – bann skipper e bann lezot travayer lo bato, in raport sa bann dimoun ki pe travay san GOP – san permi reste – san okenn lotorizasyon e ki pe fer charter?

Ou konnen ki zot dir?  Zot ava  gete!  SMSA parey Onorab Adelaide in dir, kekfwa son lentansyon i bon ; kekfwa konman en striktir i bon, me si en striktir napa mwayen pou fer enforcement pou anforsi, e pou fer aplik Lalwa akfer nou annan en striktir?

Sa detrwa dimoun ki travay kot (SFA) – kot SMSA zot depan lo rapor ki dimoun i fer, poudir entel pe fer charter ilegal.  Entel pe travay la lo bato ilegal.  Entel in ganny anmennen i annan de travayer in ganny anmennen pou zot travay lo bato, e zot dormi lanmenm la, lo sa yacht.  Ler yacht i al charter lizour zot sorti ler yacht i tournen aswar zot  bezwen vin  dormi lo la.

Zot vini zot travay konman mekanisyen.  Zot menm zot ki netway bato.  Zot menm zot ki tir graban lo lakok.  Zot menm zot ki fer sekirite aswar.  Tou sa bann keksoz ki finalman i paret mwan personn napa kontrol lo la.  Nou’n perdi kontrol lo sa lendistri.  E mon regrete poudir ki tan ki nou pa sey pran kontrol nou pa pou kapab fer en travay efikas, dan kontrol polisyon lo nou lanmer.

Mr Speaker dapre mon resers – e mon napa okenn problenm si i annan ki le koriz mwan.  Dernyen yachting policy ki Gouvernman in fer, i date depi 2008.  I annan en 20enn headings ladan, en 20enn Polisi ki Gouvernman in mete, pou ankouraz devlopman sa sekter, e i annan en Polisi No.16 ki konsern ‘’Onboard treatment of sewage.’’  E i ganny dir, ‘That this issue should be taken up.’’  

        Nou pe koz 11an pase 2008.  Nou pe koz 11an pase.  ‘‘… should be taken up’ ozordi 11an pase Onorab Gill pe take up sa issue.  Mon kontan i pe take up sa issue.  Selman mon dout for.  Mon pa konnen kekfwa i annan i kapab ale en mirak ki arive.  Nou tou ki krwar, i en mirak ki arive.  Kekfwa – par en mirak en dimoun i ava tann Onorab Gill i a dir, ‘’Be wi i annan en problenm la !’’

Akoz si Onorab Gill in koz lo sa size, se ki i annan en lenkyetid.  E nou pa kapab esper 11an to take up the issue !   E sa i preski parey pou tou lezot policies ki’n ganny elabore, dan sa Yachting Policy 2008.

E la mon ava zis dir an pasan, ki Lakour yer in dir ki sa  bann Polisi ki Gouvernman in fer, Lakour in pran sa in met dan en gran dustbin; in dir avek zot arete.  Pa vin ek Polisi, akoz Polisi pa bon.  Vin ek Lalwa!  La en lot problenm  ankor !  En lot latet fermal, pou Onorab Gill, pou Onorab Woodcock.  En lot latet fermal.  Onorab Sophola osi pou ganny en bon pe latet fermal ek sa.  Ok?  Akoz Polisi i dan bin !  Nou bezwen serye nou Mr Speaker.  Nou bezwen serye nou.  Akoz  mwan mon krwar poudir avan nou konmans rod bann pri, bann zoli trophy bann keksoz koumsa, nou bezwen get lendistri ki pou anmenn nou reveni.

La yer i annan en msye ki’n ganny en trophy, pou en reken ki in dekouver.  Mon konpran en nouvo lespes reken hammer shark.  Si nou polye nou delo vre i pou afekte nou reken.  I annan ‘’200 lespes’’ dan lagon – laba in koz lo la, apre nou pa fer nanryen ankor !

La nou ganny en pri ankor yer la.  ‘’So cool’’ –’so cool’’ sa pri!

 

(laughter) 

 

 

 

HON JEAN-FRANCOIS FERRARI

Nou bezwen serye nou!  Se pa sa ki nou devret pe konsantre lo la, nou devret pe konsantre pou fer bann keksoz vreman a long term e bann keksoz ki i benefisye vreman lepep Seselwa.

E mon ava dir Mr Speaker.  I annan dapre Gouvernman 14mil viziter e sa en pe lannen pase ki vin Sesel zis pou yachting.  Mon pe sey rode prezan si dan reveni Gouvernman nou kapab war en breakdown ki kantite larzan sa bout, i anmennen.  Mon pa’n kapab war.  Mon pa’n war mon’n demande pou gete konmsi ki zot kapab break li down pou dir  mwan sa.  Akoz i enportan.   I en lendistri ki enportan.

E i en lendistri ki sipoze li osi parey tou lezot bann lasanm lotel ek lezot servis e prodwir ki nou vann i sipoze anmenn 15poursan GST as a minimum.  Me 15poursan – si nou pran 15poursan lo zis sa bann ki peye, e bann lezot ki sipoze peye pa deklare, nou pa pou zanmen gannyen en benefis lo la.  Si nou pa konnen lekel ki sipoze peye nou pa pou gannyen benefis.

E depi mon krwar zis 1semenn apre – non,  non annefe mon krwar se  dan Hearing Lasanble, ler nou ti pe kestyonn Minis Loustau- Lalanne lo son vizyon, mon ti demann li spesifikman, pou li zet en lizye lo sa lendistri, me malerezman mon pa ankor war nanryen.

Lannen pase dan sa Polisi ki mon pe koz lo la ankor 2008 – 11an pase, pou en etranze vin fer en biznes yachting Sesel i bezwen annan li plis ki 3 bato – plis ki 3 bato la i a fer konpannyen i ava anrezistre e i ava fer yachting.

Si 3 bato oubyen mwens i bezwen 100poursan Seselwa.  Mon ti ava envit zot mon bann koleg Onorab pou zot al rod lenformasyon dan bann marina e zot a war konbyen dimoun ki vin Sesel – non?  I annan zot yacht zot  ki’n anmare.  I pou zot sa.  Tanzantan zot fer en pti charter avek, zot ganny zot larzan trankil, oubyen bann ki pran plis prekosyon, zot pran 3/4 zot, zot met ansanm, zot dir ok la nou ansanm,  la nou en pti konpannyen la, nou pe fer  nou sa – nou pe fer nou biznes ansanm.  Me sa pa pou kapab kontinyen koumsa.  Nou bezwen – mon dir Mr Speaker annan tou sa kontrol ki neseser.  E  mwan mon ankouraz bann dimoun parey mon zanmi Gilbert Victor.  Gilbert i partou i osi i dan sa lorganizasyon Preserve Seychelles, akoz i anvi.  Akoz li son lentere se pou prezerv sa lendistri yachting ; prezerv nou zil.

E i dir avek mwan, ou kapab ale lo en bato.  I annan en Polisi ki dir bann zil i bezwen akeyir  – i bezwen akeyir bann – mon ava dir zot kot i mete, ki mannyer i bezwen akeyir, ‘‘While maintaining the need to preserve the exclusivity of the island resorts, appropriate access to islands shall be retained for the yachts’’.

Be ler ou, ou sorti Mahe ou pe desann, ou’n ariv deryer Poivre e vann nor wa i konmans soufle, ou pe rod en landrwa pou ou maske, be pa tou zil  konmsi ki nou gannyen -. Sa msye i ganny dir fodre ekri en let.  Ekri en let demann permisyon !  Ou, ou lo kannal ou, ekri en let demann permisyon !  Oubyen anvoy en fax – oubyen anvoy en mail gete si ou kapab ganny en permisyon.  Ler ou ariv Cosmoledo la dernyerman la, i dir ek ou pa koste la pa borde la, akoz i annan lezot i annan bann konpannyen ki pe fer zot biznes la – pa vin disturb zot!  Be ki mannyer nou pou -?  Mon krwar Onorab Gill, ou war mon pwen  mannyer mon pe dir  –  mwan mon siport ou mwan !   Mon siport ou parey en frer ki pe sey rod en keksoz, pou son bann frer lo zil.  Me selman le problenm i pli grav ki nou sa!  I pli gran ki nou.  Nou bezwen gete laba anler, ki mannyer nou kapab fer reglemantasyon pli efektiv sa lendistri, pou fer sir ki nou konnen. Nou konnen par egzanp nou ganny promet bwe.  La ou menm Anse Lazio, Cote D’Or  laba,  ou – en pe bwe.

Ou pe dir avek sa kliyan, pa bezwen zet son salte tel landrwa.  Ou pe dir li, pa bezwen larg son lank tel landrwa i pou detri sa resif.  Me selman ou bezwen donn li en bwe pou li anmar lo la!  Laplipar ditan napa. Sanmenm sa mon dir nou bezwen retourn lo fondamantal sa lendistri, pou nou gete ki mannyer nou kapab improve li.  Alors sa i en konponan sa ki ou pe dir, me selman  mwan mon ti a zis kontan – mon a zis servi sa lekspresyon Mr Speaker, annou serye nou! Gouvernman i bezwen serye li!

Tou sa bann lannen – (wi Onorab Valmont Gouvernman i bezwen serye li ; serye li! Akoz yer son Polisi in al dan en bin !) Konmsi mwan konman -.  Nou en bout sa Gouvernman nou.  Akoz nou Lezislatif.  Mon latet i bel !  Ki mannyer mon pou kapab – ? Be kot ou pou tande sa bann keksoz koumsa – Lakour i pran en Polisi i pran i met dan bin?  Be i pa posib!  Nou bezwen aranz nou, nou bezwen al pli lwen fer keksoz ki konsekan – ok?  Nou bezwen reflesir pli lwen.  E mwan  mon dakor avek Onorab Adelaide. Parey Onorab Gill i kontan dir – Onorab Gill, Simon – i kontan dir – si ou pa kapab ‘sed laplas!’

 

(laughter)

 

HON JEAN-FRANCOIS FERRARI

Ok?  Sa lendistri i bezwen ganny regle – reglemante.  Si bann ki la o pouvwar pa kapab sed laplas!  Ok?  E les bann ki kapab travay, travay la nou ava fer sir ki poudir nou prop frer, nou prop ser, nou bann manrmay ki sorti Lekol Maritim a ganny en travay.  Nou bann manrmay sorti Lekol Maritim sa bann dimoun ki annan yacht la ki annan bann konpannyen yacht la i dir ou zot pa pou anploy Seselwa li.  I  pou fer vini 2 Filipino ; i pou fer vin lot ; i pou fer vin 1 Sidafriken – 1 Kenyan en Malgas, en lot, selman i pa pe vin rod Seselwa li.

Akoz ? Akoz  i bezwen sa dimoun pou dormi lo son yacht aswar !  I pa bezwen en skipper – en skipper ki osi en sekirite, be en Seselwa pa pou fer sa.  Seselwa si ou en skipper ou en skipper.  Ler ou en sekirite ou en sekirite – ok ?

Alors nou bezwen regle sa lendistri byen. Ler nou ava’n regle la.  Nou pou konnen akoz sa msye –  e mon termin lo la Mr Speaker, sa msye ek sa madanm ki pe gete, ki pe mazinen be nou annan en pe salte nou bezwen – ki mannyer ou kapab dir sa nou bezwen larg lo tenk delo sal nou bezwen large, be la get en kou partou ou pa pou war personn, be kekfwa nou kapab larg la.  Be tou fason be – i annan dimoun ki kontrol keksoz isi?

Nou’n debarke Erport, nou vini, nou dir  zot nou pe al Eden Island personn pa’n fatig li.  Ler  nou vin Eden Island nou mont lo yacht personn pa fatig nou ; nou’n kit por, la nou ariv an deor Curieuse, mon pa ankor zwenn personn ; personn pa  ni konnen  si nou la – si nou pa la.  Si nou’n kit pei – si nou  pa’n -. Be ouver sa tenk la fini enn fwa.  Se sa ki arive! Akoz napa enforcement – ok?

Alors se sa ki nou bezwen fer Mr Speaker.  E mwan mon ankouraz Onorab Gill, pou take up sa challenge.  Pou take up sa challenge e pou anmenn li pli lwen.  E  mwan mon ava siport li e mon konnen poudir Onorab Adelaide pou siport li, nou tou isi lo sa kote latab nou ava siport ou!  Yes Onorab Gill!  Mersi bokou Mr Speaker.

 

MR SPEAKER

Mersi Onorab Ferrari.  Onorab Ahmed Afif.

 

HON AHMED AFIF

Mersi Mr Speaker.  Mr Speaker de pti pwen lo sa Mosyon.  Mon’n lir sa Mosyon, mon’n ekout bann entervansyon, e sa ki kler pou mwan, se ki si ozordi Onorab Gill i trouv li neseser ; parske in sorti lo kote Gouvernman, dan parti US me li i trouv li neseser pou dir avek sa Gouvernman, met an plas en sistenm ki strik, i vedir ki i annan en gro problenm deza.  E li atraver Lasanble, parske i pa pe ganny zot zorey direkteman, i bezwen servi sa zouti pou sakouy zot, pou fer zot war poudir keksoz pa pe marse !  Alors pou mwan mon premye pwen Mr Speaker, se ki sa sistenm regilatwar ki an plas ozordi, en pti pe parey Onorab Ferrari in dir – en pti pe parey Onorab Francois Adelaide in dir – i en sistenm ki ozordi  i fay.  Akoz mon dir i fay mon?

Mon dir i fay Mr Speaker, akoz ozordi ler ou regard – pa zis polisyon, me ou regard sa lendistri charter, bare boat water sports, lapes, ozordi ou war trafikaz dan sa delo Sesel, in monte.  Sa i kler.

Nou atrap bato ilegal, zot al Ankour.  I annan bato ki – mon konnen sa – i – mon repete me i enportan pou repete pou ilistre ki napa kontrol!  En bato Diamond Ace i mont 3mil notik avek Coast Guard, sistenm regilatwar i fay. Marine Park, mon ti La Digue resaman, kot nou ti  pe rankontre bann dimoun laba.  E enn bann problenm ankor ki relye avek bato, zot dir ou poudir bann ki al bann zil parey Felicite, serten i peye bann viziter ki debark lo zil, serten i ganny demande pou peye, me i annan serten ki pa peye.

E zot ti fer konplent avek nou e mwan direkteman swivan sa, mon ti ekri Seychelles  National Park Authority pou mwan demann zot, me akoz en bann i peye e en bann touris pa peye?

E zot ti dir mwan – e sa korespondans an ekri, zot dir ek mwan rezon en bann i peye en bann pa peye, se parske i annan viziter ki dan letablisman lo Felicite, alors li i pe reste la konmsi konbyen fwa ou pou sarz li sak fwa i ariv lo lans?  Be alors 1000 fwa ou pa sarz li ditou.

Tandis en boug i reste La Digue, sorti Praslin i vini, li konman i met son lipye lo disab li i bezwen peye!  Prezan mon dir, be konman en senp lozik me sa boug osi i pe reste lo zil i bezwen pey keksoz! Parske li osi i lo zil! Prezan zot dir ou wi be nou ankor pe negosye !  Nou pe negosye avek Lotorite ek Gouvernman, pou nou konnen konbyen pou sarz zot, me selman sa pe ale pandan de lannen de lannen, personn pa fer okenn desizyon.  E ankor en fwa i montre sistenm regilatwar i fay.

Lo kote ankor lo lanmer mon ti a kontan dir, safety ki nou tou nou sen e sof kot lanmer ; ankor la osi i annan problenm e la mon ava rakont en lensidan kot mwan mon menm mon’n deza vini sorti lo en zil nou pe koste Bel Ombre lo en bato, masin i fail e sa bato napa ni longer lakord pou anvoy ater, pou en dimoun ater kapab redi sa bato.

E ti bezwen manivre – manivre e vreman zot in rod tou lakord ki annan, e nou nobou redi sa bato pou nou ariv ater sistenm regilatwar i fay.  Oli bann spotcheck ki ganny fer lo en bato poudir zot annan omwen en 50met lakord abor oubyen 100met lakord abor an ka, ler i pe antre lasose en keksoz i fail i anmenm en lank ki kapab anvoye, ki kapab mouy li.  Sistenm regilatwar i fail.

I annan en lot ankor dan mon distrik, kot en garson i ti en teacher, in al lapes pa ni tro lwen – dapre son fanmir zot dir ek mwan dapre en 2000mil avek far lanmenm  la an deor por. Mr Speaker sa garson i ale bomaten.  Dan 2er – 3er apre midi, i telefonn i son – i ti’n al lapes avek son koleg, i telefonn son fanmir, akoz zot ti pe rod li i dir mon la nou lanmenm la deor far, en  pti pe obor Ste Anne,  be lanmer pa bon, nou pe al antre.  Lanmenm abor nou pe al antre.  Sa dernyen fwa  zot tann – sorti kot li.

E dapre sa ki mon konpran, apepre 1erdtan pli tar en bato – mon krwar ti en bato Lotorite – sertennman Lotorite me mon pa asire si SMSA – si Coast Guard zot dir zot ti war en bato pe drive, dan sanmenm apepre sa ler ki zis apre ki sa dimoun ti  telefonnen.  Zot in war en pti bato pe drive, me zot in ale menm, akoz i paret son masin ti on e i ti pe fer letour, me zot ti annan en lot misyon mon pa’n kapab arete.

Me ler zot tournen zot in vini, zot in pran sa bato zot in tenny son masin, zot in trenn li zot in al ater, me sa de dimoun ki ti ladan pa ti la.  Lanmen zot trouv sa de dimoun malerezman zot ti’n perdi zot lavi.

Sistenm regilatwar i fay.  Sa ti zis an deor por, personn pa konnen ki pe pase ; zis an deor por.  E en bato ki de dimoun i lo la, in perdi.  Mr Speaker mon ganny bokou konplent ek bann dimoun Eden Island sirtou, kot zot dir ek ou zot bann licensed skipper zot.   Zot annan en license pou fer charter me zot war bokou bann bato ki vini, koste Eden, i al kot en lakaz en apartman Eden apre ou war sa boug i sorti.  Sa bato i sipoze en bato prive, i sorti avek detrwa kliyan lo la.

E si ou aret li, i dir ou be non sa i bann zanmi sa.  Be selman detanzaot i pe sorti ek diferan dimoun li.  Alors se la reveni Leta pe disparet.  Sistenm Regilatwar i fay.  Napa personn ki pe gete, si sa skipper i en boug license.  Napa personn ki pe gete si zot annan en license pa pou skipper me pou fer en aktivite komersyal.  E trwazyenmman si zot pe anmas taks ki pou vin pou Lotorite pou li kapab fer sir i pe administre sa pei parey i devret été.

Alor sa ki kler pou mwan se Onorab Gill – Onorab Churchill Gill li i war enn sa bann problenm ki pe afekte li, e mwan mon siport li parske i kler poudir ou pa kapab les dimoun vin dan delo Sesel, polye nou delo e personn pa dir zot nanryen.

Parske nou pe ganny pri pou Lekonomi Ble; pou prezerv lanvironnman, me selman en Mosyon koumsa i neseser, parske i annan keksoz ki pa marye la.  Si nou ti pe fer sa sitan byen, sa Mosyon pa ni ti pou menm bezwen neseser.

Alors Mr Speaker mwan mon krwar i byen ki en Mosyon parey sa i  ganny anmennen, me pli enportan ankor mon krwar nou bezwen trouv solisyon.  E se la kot  mwan mon krwar, solisyon se nou, nou bezwen trouve lekel ki fer sa louvraz pli byen.  E taler mon’n tann en entervenan – mon pa rapel si Onorab Aglae ki’n dir poudir oubyen Onorab Ferrari ki’n dir Australie – Australie ou pa zwe avek Lotorite – Onorab Loizeau (eskiz mwan) ou pa zwe avek Lotorite Coast Guard.  Laba pourtan – se pourtan get lakot Australie sa longer ki i été !  Australian great barrier reef, ki longer !  Mon krwar pli long barrier reef dan lemonn!  Me selman ou pa zwe avek zot !  Ou pa polye zot delo, Ou pa  fer lapes ilegal!  Zot a dir mon be wi, be  li i en gro pei i pli endistriyalize.  I annan plis resours.

Wi mon dakor avek sa, e nou napa sa kantite resours.  Me nou bokou pli pti !  Pa dir mwan nou bezwen sa kantite resours pou al lanmenm la deor far, pou nou rescue en bato.  Kantite resours ou bezwen?

So nou, nou bezwen premyerman trouve, ki nou problenm e annan dimoun serye ki kapab rezourd sa bann problenm.  Rod sa ki konn fer li tre byen dan en gran landrwa, anmenn li isi, koz avek e trouv en solisyon ansanm avek ou bann dimoun lokal. Parske ou bann dimoun lokal, mwan mon krwar napa dimoun ki konn pli byen nou lanmer ; ki konn pli byen bann pratik ki zot.

Alors mwan mon konsey finalman Mr Speaker mon konsey mon ti a kontan donn Onorab Churchill Gill, se ou Mosyon i annan merit.  Me sa ki mon le dir ou konman en konsey, se sa Gouvernman ki la ozordi, mwan mon pa asire si pou li sa i en priyorite !  Akoz mwan mon dir sa ?  Akoz ozordi sa ki mon tann  zot trouve konman priyorite, se tine,l ki nou, nou konnen pa pou rezourd problenm!  Problenm i dan lavil kot trafik i bloke tou le bomaten  – tou le swar ler dimoun pe ale.  Fer ou tinel – pa fer tinel, ariv Plaisance kot sa tinel pou perse ler ou pou arive –  ou pou blok ankor !

Zot koz lo LNG en proze PUC  -$200milyon napa en letid ki mon’n war !  Napa en landrwa ki mon rekomande parmi 3/ 4 opsyon sa i pli bon.  Napa en landrwa kot mon lir konbyen pri elektrisite konbyen i koute Sesel, me pou zot sa i en priyorite.  Sa i en priyorite. Pa pou al gete ki mannyer pou deal avek polisyon.

Zot anvi fer Referendum pou gete si Seselwa i devret vote,  me zot pa konnen Seselwa i an deor !  Ni sa zot pa konnen ! Be ki mannyer ou pou al konvenk  mwan poudir be i bon oubyen i pa bon pou les bann Seselwa vote.  Me selman nou pa ni konnen konbyen zot i annan, ki mannyer mon pou konnen si i bon  – si pa bon?

So i annan en konfizyon.  I annan en mank priyorite.  Trwazyenmman mon konklizyon, mon konsey Onorab Churchill Gill se, ek sa Gouvernman ki ou pe anvoy sa Mosyon mon pa war ou pe al tro lwen.  Mon’n tann avan – mon’n tann en avan poudir i pou al lo en shelf ; i pou al laba e mon krwar i pou al laba.  Akoz dan sa queue lo sa shelf i annan lezot priyorite.  Sa i pou vin parmi bann dernyen.  E sertennman pandan sa lannen ki pe vini, mon pa war li pou vin en priyorite, malgre ki mon krwar i annan en priyorite.

Alors  mwan mon pou dir ek ou, parey ou travay tre byen dan FPAC – dan bann Komite kot  mwan mon travay avek ou, travay avek nou.  Anmenn en sanzman dan sa pei !  Sel fason pou nou sanz sa bann keksoz, anmenn en sanzman !

 

(APPLAUSE)

 

HON AHMED AFIF

Nou annan en pe letan.  Reflesir lo la.   Mwan mon pou siport ou Mosyon  mwan! Sel fason pou nou sanz sa bann keksoz ki mal, pa pou vin atraver  en Mosyon.

I pou vin atraver en sanzman fondamantal dan sistenm panse – dan sistenm dirize – dan sistenm administrasyon sa pei, e sa pou mwan se LDS ki pou anmennen !  Mersi Mr Speaker.

 

 

(APPLAUSE)

 

MR SPEAKER

Mersi Onorab Afif.  Mon ava donn loter Mosyon laparol pou li fer son konklizyon.  Onorab Churchill Gill.

 

HON CHURCHILL GILL

Mersi Mr Speaker.  Premyerman mon le remersi tou bann Manm ki’n fer bann kontribisyon tre pozitiv lo sa Mosyon, ki sirman in ede pou sansibiliz piblik lenportans protez nou ekosistenm maren.  Me selman i annan serten size ki an deor Mosyon.  Lo sa size ‘’Sed Laplas’’ ki mon annan poudir lo la se 2020 pe vini. Seselwa i a deside.  Pou le moman annou tenir ziska ler i vini !

 

(laughter)

 

HON CHURCHILL GILL

Mr Speaker rezon ki Mosyon in konsantre lo lakot, se akoz olaz – olaz dan term maritim se dan okre.  I tre difisil pou kapab kontrole ; tre, tre difisil.  E parey nou tou nou konnen, nou resours pa permet nou, pou al fer bann kontrol tanzib sa zistans.  Se pou sa rezon ki lakot ki Mosyon in santre lo lakot, akoz sa i pli fasil pou nou kapab entrodwir okenn kontrol ki nou santi i devret ganny fer.

I annan Manm ki’n fer sorti ki Gouvernman i devret fer tender bann Kontra pou bann bato ler zot antre pou kapab fer bann desarz pli annord, me sa bann kontrakter zot deza la zot ; zot deza la.  Problenm se sa bann bato, napa en kominikasyon ant sa bann kontrakter ek sa bann bato apre Lotorite.

Se pou sa rezon ki,  mwan

mon pe propoze ki tou sa bann bato zot annan en license.  E mwan mon krwar dan nou demars pou nou kapab regle en pe sa keksoz, se nou fer li mandatwar lo zot license. Avan ler nou issue zot, nou fer zot konpran poudir lo ou license, i osi mandatwar pou ou avan ler ou konmans ou aktivite, antre dan Kontra avek en kontrakter e ava annan en landrwa lo bann por dezinyen, kot ler ou fini fer ou aktivite ou vini ou antre, e sa bann kontrakter – sa bann transpor ki ponp sa bann keksoz i ava la, i a ponpe sa bann lezot ki pran bann salte i ava pran.  E mon krwar deza nou pou’n war en pe laklerte lo la.

Akoz i enportan ki nou annan striktir.  Menm si nou pe koz lo sa size, i enportan note ki nou bezwen annan en kad legal ki en pe pli kler e pli morde.  Nou osi annan Manm ki’n koz lo posibilite met moratorium.  Vi ki nou kad legal ozordi i pa kler e an menm tan i pa sa bann bato, i fasil i annan serten zot pou get away avek sa bann aktivite petet i ti a ideal akoz rikord ki mon annan toulezan depi 2016 mon annan rikord depi 2016 ziska 2019, bann nouvo bato ki antre apard bann ki deza la ;  2016 ti annan 48.  2017 ti annan 56.  2018 – 41 e sa premye 6mwan 2019, i annan 32.  So i montre ki i annan en logmantasyon ase sibstansyel toulezan dan sa aktivite ki pe ganny fer.

Mon note osi i annan en Manm ki’n dir si petet nou pa pe met saret devan bef?  Be si nou asize nou mazinen si nou pe met saret devan bef, nou war i annan en sityasyon, petet ti a pli bon nou koz lo sa bann keksoz.  E i ava ed nou pou nou ganny solisyon, akoz si nou asize petet lakantite saret pou annan, nou pou napa sa kantite bef pou trenn sa bann saret.    Alors i pli bon ki si nou annan en problenm, nou vin devan, nou koz lo la e ansanm nou sey rod en solisyon.

Lo i annan en legzanp osi ki’n ganny donnen lo Bel Ombre ; en legzanp ase enteresan, akoz mon krwar petet nou dan sa Lasanble, petet pa sa mesaz ki nou devret pe anvoy dan pou konsonmasyon piblik, ler nou dir ki dan en bato ler i pou koste i napa ase lakord pou menm anvoy lo lasose pou koste.

E nou’n ganny dir ki akoz regilater pa bon.  Be eski en dimoun ler i annan en bato i pou esper regilater vini pou fer li konpran i bezwen en lakord pou li koste avek ?  Mon krwar petet la pa sa bon mesaz ki nou pe anmennen.  Petet nou ti ava ankouraz sa bann dimoun, zot safety, zot pou deza lo lanmer e zot safety an mer i devret pran priyorite.  La sa legzanp ki nou’n gannyen, i en legzanp lo lasose, me si ti en keksoz an mer nou kapab konpran petet i ti kapab bokou pli serye.

I annan en lot Manm osi ki’n fer sorti ki eski i annan ase sansibilizasyon?  Mon toutafe dakor avek sa Manm akoz Sesel nou konnen nou depan bokou lo touris e lo nou lanmer ; petet dan nou lapros marketing ki nou fer ozordi ti a bon nou enkli sansibilizasyon konman en topik ki form par dan sa kad marketing ki nou pe fer pou nou pei, zisteman akoz parey bokou Manm in fer sorti, lo kote lanvironnman, Sesel pe ‘champion’ sa keksoz ozordi.

Alors i ti pou normal si sansibilizasyon ti osi form par dan tou demars marketing ki nou pe fer pou vann Sesel.  I annan en Manm osi ki’n fer sorti ki eski nou konnen ki kantite larzan Gouvernman pe anmase avek sa bann aktivite ? Zis pou met lo rikord mon deza anvoy kestyon dan sa Lasanble e ti pou pase sa semenn annefe, semenn prosen, me Minis Finans pa’n vini, me i la – mon’n fini submit ek Lasanble e Minis Finans tre byento i ava vini, e nou a kapab annan sa lenformasyon.  Akoz sa parey Licensing in fer sorti ek son statistik, i annan kantite bato ki pe fer sa aktivite.

E nou ava ganny en sans konman en Lasanble, pou nou konnen ki kantite nou pe anmase e nou a kapab fer en rekonsilyasyon ant kantite bato ki pey license, e kantite bato ki SRC li i pe fer pey sa bann taks ki devret fer peye.

Mr Speaker i osi enportan ki ler tou bann kad legal in ganny met an plas, nou bezwen enkli en fine.  Akoz menm si ou annan kad legal parfwa i annan bann dimoun ki toultan pou sey rod en fason pou zot bat sistenm, alors i enportan ki dan sa kad legal nou enkli en fine ase konsekan pou ki a ede pou deter okenn dimoun ki esey bat sistenm, e an menm tan fer nou perdi bann reveni dan sa process.

E Mr Speaker si ou a permet mwan, mon a zis lir Mosyon ankor enn fwa pou al lo rikord pou ki, sa deba ki nou fer pandan sa 2 zour, nou a kapab war rezondet akoz ki nou bezwen fer sa deba, dan lespas 2zour.  Mosyon i lir koumsa:

‘Sa Lasanble pe demann Gouvernman ek bann Lotorite konsernen, pou met an plas bann mezir neseser e pli strik, pou anpes annan polisyon ki ganny kree prensipalman par serten bann bato lwazir tel parey ki bare boat, bato lavwal e osi bann yacht dan nou lanvironnman maren pli partikilyerman otour Mahe, Praslin e La Digue e tou bann pti zil satelit ki ganny frekante bokou par sa bann bato’.

E avek sa mon a demann bann Manm pou donn zot sipor sa Mosyon, pou ede protez nou lakot maren pou nou fitir zenerasyon, e pou tou sa ki depan lo la, pou ganny zot lavi toulezour.  Mersi Mr Speaker.

 

(APPLAUSE)

 

 

MR SPEAKER

Mersi Onorab Churchill Gill.  Bon nou ava pran en desizyon – en vot lo Mosyon ki’n ganny anmennen par Onorab Churchill Gill.  Mon ava demann tou Manm ki an faver?  Okenn Manm ki kont?  Madanm Clerk.

 

MADAM CLERK

Mersi Mr Speaker.  Mon’n rikord 22 Manm ki’n vot an faver.   E personn kont.  Mersi.

 

MR SPEAKER

Mersi Madanm Clerk.  Savedir Mosyon in ganny aprouve par Lasanble Nasyonal.

 

(APPLAUSE)

 

 

MR SPEAKER

Bon parey labitid Sekretarya i fer en summary e nou anvoy lo kot Sekreter Cabinet.  Bon nou pou aret la pou ozordi.  Mon annan enn de pti lenformasyon pou pas avek bann Manm.

Mosyon No.4 premyerman in ganny withdrawn.  Mon’n resevwar let sorti kot Onorab Wavel Woodcock bomaten.  Sa Mosyon in ganny withdrawn.

Dezyenmman mon pa’n ganny sans bomaten pou fer okenn pti lanons – update lo Public Service (Amendment) Bill. Parey zot konnen i annan 2 case Ankour.  E rezon mon labsans yer, se mon’n al sirtou bomaten, mon al Ankour pou ti annan serten soumisyon oral ki ti pou ganny fer – enn sa case devan Lakour Konstitisyonnel.  Me lefe ki bench pa ti konplet, i annan 3 Ziz ki pe seat ; en Ziz ti deza okipe dan lezot case Lakour pa’n kapab kontinyen avek case pou ekoute,  alor Lakour in adjourn zot in postpone li pou en lot dat.

2enm case i sipoze kontinyen le 16, me mon avoka in prezant en Mosyon pou demande osi ki sa i ganny postpone an vi mon labsans.  Me le 16 Lakour pou pran en desizyon lo sa Mosyon.

Bomaten mon’n mansyonn S.I. 35, in konfirmen la ki miting pou ganny fer demen.  Nou’n ganny tou bann Lotorite konsernen Licensing, Finans, Lapolis, Retailers Association, Chamber of Commerce, ki pou vini e ki pou meet avek bann Manm Lasanble.  Parey nou pe dir i pa neseserman  Bills Committee – i en extended Committee miting.  Bann Manm i ganny envite pou pran par e pou zot a kapab anmenn en pti pe zot bann propozisyon devan.

E miting pe ganny 10.30 Committee Room 3.   Osi sa ki’n konfirmen la, se sa miting atraver Mosyon bomaten  pou Anbasader – miting ant IAC e Lasanble, ankor i en extended Committee miting avek Departman Zafer Etranzer e Departman Kiltir pou ganny fer Vandredi le 12 ; savedir sa Vandredi 10er bomaten isi – ok?  10er bomaten isi me sa ki mon gannyen e tou sa de Departman in konfirmen.

E petet zis la mon ava anonse ki mon pou absante – mon pou pe asiste Komite Egzekitiv SADC-PF ki pe meet depi le 16 ziska le 19 e sa apre i pou swiv par 40enm Plenyer SADC-PF.  Savedir mon pou absante depi Zedi le 15 e mon retourn dan pei Vandredi le 26. Antretan dan mon labsans Deputy Speaker ki pou ansarz tou bann deroulman.  I pou ansarz Lasanble.

Mon pou osi ganny akonpannyen par Deputy Clerk e i annan lezot Manm osi ki pou akonpanny  nou plitar dan  Plenyer, me nou de Deputy Clerk nou pe bouz boner pou ECO miting – ok?

Yes Onorab Arissol.  Non Onorab Adelaide.

 

HON FRANCOIS ADELAIDE

Mersi Mr Speaker.  Zis en pti klarifikasyon.  Mon tann ou dir demen ou annan sa miting avek bann stakeholders lo kote lalkol, be nou osi nou annan en Primary Health Care Conference demen.

 

MR SPEAKER

Wi nou’n ganny envite louvertir.  Aparaman i fer pli granmaten se sa rezon ki nou move sa miting dan plas 10er pou 10.30 pou donn sans bann Manm antre ok ?  Mwan osi mon ganny envite sa louvertir – mon’n konfirmen ki mon pe ale, apre mon pou vin isi pou nou pran par dan sa miting – ok?

Onorab Sophola ou ti koz avek mwan taler, mon konnen mon’n mank ou, mon ava donn ou laparol.

 

HON NOLINE SOPHOLA

Mersi Mr Speaker.  Mr Speaker konman en Manm IAC mon le eklersi enn de pti pwen ki Onorab Ferrari konman Chairperson Komite in fer bomaten.  I vre ki Onorab Ferrari i Chairperson Komite IAC – me selman fodre ki i tenir kont ki Chairperson i pa fer Komite.  Akoz?  Se ki i annan plizyer fwa, ki i annan bann desizyon ki ganny pran i vin la dan Lasanble, i dir IAC!  I pa IAC,  i li ki pe anmenn sa devan!  So se sa ki ozordi mon anvi met li la, ki tou dimoun i war.  En Komite petet kan mannyer i marse.  Kan i annan en desizyon pou ganny pran, se ki Chairperson i bezwen zwenn tou son Manm nou desid lo la, e apre i anmenn devan.  La  ou kapab dir poudir – wi IAC !  Akoz sa pa premye fwa ki sa i ganny fer !

Parey bomaten in dir in koz avek Onorab Pillay – Onorab Pillay pa ni en Manm lo Komite IAC!  I vedir ki ou pe montre nou?  Ou pa diskit ek nou me ou al diskit ek lezot?  Alor  mwan Mr Speaker sa ki mon pe demande, ki apartir ozordi, sa bann keksoz i pa ariv ankor! Se ki nenport ki Deklarasyon – nenport ki pozisyon i pran lo non IAC, nou bann Manm nou bezwen konnen!

E osi la in dir – mon ti a kontan konnen si i annan en let formel, ki in anvoy kot Foreign Affairs?  Si ou’n anvoye, anvoy li dan nou mail nou tou konman Manm nou ava war kisisa ki ou anvoy Foreign Affairs !  Mersi Mr Speaker.

 

(APPLAUSE)

 

MR SPEAKER

Ok mersi.  Nou pa pou fer deba en ok Onorab Ferrari ?

 

HON JEAN-FRANCOIS FERRARI

Mon ti a zis kontan eksplik Onorab Sophola ki en Chairman i travay toultan  li. I pe sey organiz bann miting bann keksoz koumsa, me les li.    Li i pa abitye lo bann Komite napa problenm.  Me selman mon ti a kontan dir avek Lasanble semenn pase an labsans Leader Lopozisyon Deputy Speaker, Leader of Government Business Chief Whip LDS, sel dimoun Senior ki mon ti krwar i en dimoun Senior akoz mwan mon ti pe okip lo kote LDS mon’n apros sa Onorab, ki sipoze ki pli Senior – pou  mwan fer serten propozisyon avek li, pou nou kapab bouze sa zafer.

Se koumsa ki en Lasanble i marse !  Se koumsa.  Mon pa’n apros li konman Chair IAC mwan!  E mon pa’n dir bomaten poudir mon’n apros personn koman Chair IAC.  Mon’n apros li konman en dimoun ki ti pe reprezant Leader Lopozisyon, ki pa ti dan pei, e mon’n sey fer li fer en kontak pou nou kapab gete ki mannyer nou pou bouze.

In dir devan Speaker, i ava seye – i pa’n reisi.  Ki mon kapab fer?   Mon pa pou kapab bat li.  Mon pa pou kapab raport li.  So la i la ki mannyer i été sityasyon.  E nou pa – mon konnen poudir en Komite i annan Manm Mr Speaker.  Wi annou pa antre ladan -.

 

MR SPEAKER

 Non.   Annou pa antre dan deba, me selman otan posib bann Komite – mon konnen tou dernyerman menm ti annan –

 

(Interruption)

 

MR SPEAKER

Order!  Order!  Order!  Mon konnen menm dernyerman ti annan en Mosyon ki ti’n menm ariv lo Order Paper e apre nou’n aprann ki Komite pa ti ganny konsilte e mover in pull out sa Mosyon.

Annou sey annan sa lantant.  Se sa lafason ki bann Komite pou marse.  Me ankor dan sa konteks kot Onorab Pillay -. Nou ti sorti ABC e Onorab Pillay ti ganny dezinyen par Onorab De Commarmond pou lead – menm pou pran Mosyon – sirtou ratifikasyon ; ti annan 2 ratifikasyon dan son labsans.

So wi, i ti the Senior Member.  I ti the Designated Member lo kote US e in annan en lapel in ganny fer atraver li.  Me selman mon konpran ou pozisyon Onorab Sophola.  E  nenport Manm Komite osi tou, ki annou pa act alone, me annou sey konsilte nou bann Manm – ok?

So ler nou fer bann desizyon annou fer sir ki nou ganny konsansis nou Komite antye – ok?

 

HON JEAN-FRANCOIS FERRARI

Laprosenn fwa Mr Speaker mon a demann Onorab Sophola permisyon pou mwan koz avek enn son Leader !  Mersi.

 

MR SPEAKER

Non, non, non.  Mon krwar bann desizyon ki  lo kote IAC i bon pou annan konsiltasyon.  Parey tou lezot Komite osi tou i fer.  Ok so mon krwar pa si i annan okenn issues ankor.  Zis mon ava fer bann Manm mon a met bann Manm okouran ki nou pe bouze en pti pe avek bann Bills.  Nou’n fini travay lo Physical Planning Bill in annan zis pou AG’s Office fer bann lamannman pou retourn kot nou.  Nou pou fer First Reading next week avek en bi ki nou kapab pran li avan nou al dan Recess an Out.  Me semenn prosenn nou pou pran Referendum Bill ki Bills Committee in fini aprouve yer, e rapor i ava ganny prezante par Chair. 

        So nou pou adjourn e Lasanble i repran son travay Mardi le 16 Zilyet 9er bomaten.

 

 

(ADJOURNMENT)