::
Home » Verbatim » 2019 » Verbatim Wednesday 19th June, 2019

Verbatim Wednesday 19th June, 2019

NATIONAL ASSEMBLY OF  SEYCHELLES

Wednesday 19th June, 2019

 The Assembly met at 9am

 National Anthem

 Moment of Reflection

 Mr Speaker in the Chair

 

MR SPEAKER

Bonzour tou Manm Onorab e bonzour tou dimoun ki a lekout, e ki pe swiv travay Lasanble Nasyonal.  Mon annan en bonzour spesyal bomaten pou bann zenn recruits bann zenn etidyan ki pe swiv zot letid kot Seychelles Defence Academy, zot prezan parmi nou bomaten avek zot bann enstrikter, nou dir zot bonzour e nou welcome zot dan Lasanble Nasyonal.  E nou swete ki zot pti parkour avek nou la bomaten an swivan deba ki pou pran plas dan Lasanble, e apre pandan Break nou pou pran en pti dite en pti kafe ansanm.

E ankor mon envit bann Manm Lasanble pou vini ansanm pou nou kapab enterakte, pou nou kapab rann en pti pe zot vizit isi kot sa Lasanble pli resourceful.  So welcome e nou swet zot en bon kontinyasyon sirtou dan zot letid.

Bomaten nou Order Paper bomaten nou Order Paper comme swivan nou pou annan 2 Statements ki pou ganny fer swivan de S.I ki’n ganny pibliye en semenn de semenn pase ; sa se en S.I lo Proteksyon Lanvironnman, ki annan pou fer ek Restriksyon bann Plastic Straws.  E 2enm S.I i annan pou fer avek Licences ek bann Regilasyon ki pe ganny re ranforsi with regards to Liquor and Outdoor Entertainment.  E sa osi tou e sa pe ganny reprezante par Minis pou Finans.

E parey labitid parey zot in tande lo SBC nou kontinyen annan sa de Bills lo nou Order Paper, e mon a profite la osi pou mon dir ki tou lede Bills Lasanble i ankor reste parey. Nou napa okenn nouvo devlopman, e pandan break ankor nou pou sey fer swivi spesyalman Tourism Development Bill ki ti sipoze retourn kot nou menm semenn pase nou ti pe espekte, me nou pa ankor gannyen.

Lo kote Public Service Salary (Amendment) Bill ti annan en kominike ti ganny fer kot  apepre 3 semenn pase ki comme kwa Komite ti pe demann en pe plis letan pou konsider bann proposals me ziska prezan nou napa nanryen nouvo.  Sel keksoz ki mon kapab anonse, se case i kontinyen dan Lakour Konstitisyonnel e Mardi le 25 mon pou aparet ankor devan Lakour.

Apre sa nou pou annan bann Mosyon e nou annan nou 4 Mosyon lo nou Order Paper.  Me nou ava regarde konman lazournen pou ale ki mannyer nou pou tackle sa bann Mosyon.

Avan mon kontinyen al pli lwen, nou annan en prezantasyon en Papye – en Dokiman mon ava donn laparol Madanm Clerk.  Madanm Clerk.

 

MADAM CLERK

Mersi bokou Mr Speaker.  Bonzour Mr Speaker, bonzour tou Manm Onorab.  Bonzour e byenveni dan Galeri bann dimoun bann envite.

Konman Prezantasyon Papye Mr Speaker nou annan The Public Service Appeal Board – Report for the Year Ended 31st December 2018.  Mersi Mr Speaker.

 

MR SPEAKER

Mersi Madanm Clerk.  E sa rapor i ava ganny sirkile avek tou bann Manm,  (fini sirkile tou bann Manm) ok.  Mersi.

En moman mon ava pran Onorab De Commarmond premye.

 

HON CHARLES DE COMMARMOND

Mersi Mr Speaker.  Bonzour Mr Speaker, bonzour tou Manm Onorab isi prezan, nou bann envite bann recruits, bonzour e tou dimoun ki a lekout.

Mr Speaker mon anvi lo non nou Lasanble lo non nou Parti isi pou felisit Sesel e felisit nou de Leaders, Prezidan Faure e Prezidan Michel Ex-Prezidan Michel pou achievement ki zot in al serse pou Sesel ki zot in gannyen koman Leaders nou pei, pou avek National Geographics Society. 

E sa leadership award ki’n ganny prezante an Washington – USA ki zot in al serse mon pe dir sa akoz pou nou i en premye ki arive i dan domenn lanvironnman Sesel in sanpyon lanvironnman pou plizyer lannen plizyer deseni.  E se    success   story sa kestyon lanvironnman e proteksyon lanvironnman nou bann leaders ki’n konpran e zot in travay san ses dan sa direksyon.

E dan sa menm laliny i osi tou sa bann keksoz ki  dan lepase pou aprouv sa travay nou bann leaders in osi pas atraver nou Parlman; 5enm Parlman – 6enm Parlman in fer son rol pou aprouv sa bann Lalwa swa bann Regilasyon ki’n pas devan li in donn sa sipor.  E mon oule alor lo non nou Lasanble e nou Parti, ankor enn fwa felisit senserman nou 2 Leaders Prezidan Michel Prezidan Faure pou sa achievement enkonparab.

Premye fwa i arive pou Sesel dan larezyon.  E lemonn deor i pe get nou dan en fason pozitiv i pe get nou sa bann keksoz bon e byen ki nou’n fer dan nu pei e i sete en laglwar set en fe takonpli e nou ki pli zenn nu bann zanfan ki pe monte leaders demen mon demande ki zot swiv dan sa direksyon pou anmenn nou pei pu ganny plis award ankor.

E ankor enn fwa mon felisit li.  Mon ti a kontan nou Lasanble i donn zot en aklamasyon.

 

(APPLAUSE)

 

HON CHARLES DE COMMARMOND

Mersi Mr Speaker.

 

MR SPEAKER

Mersi Onorab De Commarmond.  Onorab Ramkalawan.

 

HON WAVEL RAMKALAWAN

Bonzour, Mr Speaker mersi bokou.  Bonzour tou bann koleg Onorab, bonzour bann zenn zofisye ki pe fer zot training dan SPDF. 

        Ofet ou Mr Speaker mon ti a kontan dir zot ki semenn prosen ki ti pou bon pou zot la, akoz semenn prosen nou pou annan mon pou demann en kestyon lo bann zafer Gratwite ki bann solda i devret pe gannyen.  Alors petet mon envit zot pou retournen.

Mr Speaker mon osi dir bonzour tou bann dimoun ki pe ekout nou.  Mr Speaker pwen ki mon anvi fer resorti i konsern nou azanda Lezislatif.  Ou’n fer sorti de pwen enportan an relasyon avek sa de Bills, Tourism Development Bill avek Public Service (Amendment) Bill.

        Mr Speaker i resanble ki pou dir Gouvernman a pe pran Lasanble serye.  Letan en Bill i vin devan Lasanble e Lasanble i refer sa Bill pou fer serten travay –  be sa travay i sipoze ganny fer.   E sa ki nou trouve la se par egzanp Tourism Development  Bill zot in zwenn avek bann diferan Konmite, e apre sa nou pa tann naryen ankor.  Public Service Salary Bill parey ou’n dir Komite in sipoze i ganny etablir, e Komite ti donn timeline spesifik.  State House ti dir klerman ki pou dir lafen dimwan Me, sa Komite ti’n sipoze fini fer son travay zot in zwenn avek Onorab De Commarmond, zot in zwenn avek mwan osi tou konman sa de Parti la isi dan Lasanble.  Zot ti’n sipoze fini prezant zot travay !  E ki nou trouve dimoun deor i kontinyen blanm Lasanble parske ti sipoze depi Avril, la nou’n ariv lafen dimwan Zen e napa nanryen ki arive !  So Mr Speaker zot bezwen fer sa.

Anti-Koripsyon Lalwa Anti-Koripsyon.  Mr Speaker ozordi nou annan nou en sityasyon kot       Komisyon Anti-Koripsyon nou tou nou konnen i bezwen fer sa sipor adisyonnel.

Mr Faure in vin dan Lasanble pou son Leta Lanasyon, kot in dir keksoz i bezwen arive.  En Lalwa in ganny fer First Reading.  Komite i zwenn avek ansanm avek Anti-Koripsyon, ansanm avek Attorney Zeneral.  Ankor enn fwa Mr Speaker nou’n desin en timeline.  Ti sipoze – e Onorab De Commarmond tou ti la – mon konnen i pou apiy mwan lo la.  Letan nou ti zwenn ti dir lafen dimwan Me, lafen dimwan Me apre ki zot ti pou’n al L’Angleterre dan en konferans, zot ti pou vin avek bann propozisyon.  E ki dan milye Zen Lalwa ti pou devan nou avek bann lamannman neseser pou nou pase.  Mr Speaker mon pe dir sa akoz apre ankor enn fwa Lasanble ki ganny blanmen!

Nou annan nou en Komisyon Anti-Koripsyon ozordi ki pe kontinyen ganny problenm.  Zot santi ki pou dir zot lanmen i anmare.  E mwan mon pe dir Mr Speaker silvouple, si mon ti a kapab donn en konsey annou anmenn sa Lalwa devan Lasanble.  E si Gouvernman li i pa pare pou li pran desizyon be Lasanble i ava pran desizyon e nou ava empower sa Komisyon Anti-Koripsyon, pou li kapab fer travay ki devret fer akoz ozordi nou a pe kontinyen vir an ron.  E dan milye sa vir an ron, rimer i kontinyen sirkile e nou, nou bezwen ganny keksoz kler.  Egzakteman Mr Speaker parey sa zafer SPDF kot rimer i kontinyen sirkile.  Aprezan nou bezwen vin anmenn kestyon pou rode, parske Lasanble i ganny blanmen pa ankor pey isi, Lasanble pe ser isi pe ser laba pou bann solda.  Kan tousala i fo !

Alor Mr Speaker mon ti ava demande ki o pli vit posib nou ganny Anti-Koripsyon par egzanp nou osi ganny Tourism Development Bill e semenn prosenn nou pran sa de Bills, e nou bouz avek pou nou aforsi sa pei, ek bann lenstitisyon ki bezwen fer zot travay.  Mersi bokou.

 

MR SPEAKER

Mersi Onorab Ramkalawan.  Bon pwen i note e deswit mon ava demann Madanm Clerk pou fer swivi.  E espérons ki ler nou ava antre apre Break mon ava kapab annan en kontrandi pou mon donn Lasanble Nasyonal.

Mon ava aprezan donn laparol Onorab Sylvanne Lemiel.

 

HON SYLVANNE LEMIEL

Bonzour Mr Speaker.  Mersi Mr Speaker.  Bonzour tou mon bann koleg Manm Onorab, tou nou bann zenn ki anler dan Galeri, e tou bann dimoun ki pe ekoute.

Mr Speaker mon demann laparol en pti moman bomaten, akoz mon ti a kontan felisit tou bann atlet ki ti partisip dan 43enm sanpyonna atletik.

E plis spesyalman mon ti a kontan felisit bann atlet sorti dan mon distrik Anse Royale segonder ki fer pou 8enm lannen konsekitiv, ki zot pe sorti best overall school e  osi nou felisit La Digue osi ki’n sorti meyer ankor pou pli pti lekol.  E Mr Speaker nou bann atlet li menm zot deserve en recognition nou bann atlet dan lekol zot deserve en recognition.

E la mon mazin sirtou Sir Jerris Rachel ki li in toultan par deryer nou bann etidyan, ki li in toultan pe pous zot – training pa zanmen arete pou zot.  E mon ti a kontan felisit li osi Sir Jerris  bravo pou sa travay ki ou pe fer e mon espere ki Anse Royale i kontinyen shine, nou kontinyen fer byen e ki lannen prosen osi nou ava fer bokou, bokou pli byen ankor ki nou’n fer sa lannen.  Mersi Mr Speaker.

 

(APPLAUSE)

 

MR SPEAKER

Mersi Onorab Lemiel.  Bon lot Manm ki’n sinyalman bomaten se Onorab Chantal Ghislain.

 

HON CHANTAL GHISLAIN

Mersi Mr Speaker.  Mersi tou bann Manm Onorab, e mersi tou bann dimoun ki dan Galeri e bann dimoun ki a lekout.

Mr Speaker lefe ki Onorab Sophola pa la mon ti oule pran laparol pou felisit lekol La Digue.  Lekol La Digue o kour tou sa 43an ki in fer spor lekol in touzour lekol La Digue in sorti parmi bann meyer lekol in touzour fer sir nou desann avek lakoup ; ki montre pou dir ki malgre nou lwen, malgre nou pti me nou kapab fer keksoz e nou annan talan kot lekol La Digue.

Mr Speaker mon osi o non Komite Madanm mon ti oule dir en pti parol e remersiman bann madanm ki ti partisip dan Miss Seychelles Plus ensi ki Beauty Organisation ki’n organiz sa levennman.  Mr Speaker nou kote kot Komite Madanm tou bann aktivite ki fer Sesel ki annan pou fer avek woman empowerment, nou kontan siporte and mon oule dir  mersi e osi felisitasyon pou Christy Bradburn, Sharon Orphe, Angela Esparon e tou sa bann lezot madanm ki oze pou mont lo stage, pou demontre zot talan ki zot annan ; and i pou ankouraz osi pou kapab fer bann keksoz parey.  E zis montre ki pe enport ki ou été, i pa enportan ki ou ete dan sa pei, ou kapab al fer keksoz pou ou pei pou ou fanmir pou kominote ensi ki pou ou lekor.  Mersi Mr Speaker.

 

(APPLAUSE)

 

MR SPEAKER

Mersi Onorab Ghislain.  Onorab Woodcock, ou pa’n averti mwan nanryen bomaten.  Oule fer en komanter lo ki size?  Ok go ahead. 

 

HON WAVEL WOODCOCK

Mersi Mr Speaker.  Mon osi mon anvi profit sa lokazyon pou felisit lekol Grand Anse Praslin primer ki zot in anmenn 3 lakoup Praslin – mon dir zot felisitasyon.  E ki zot pou toultan e konsyan dan nou sipor.  Mersi bokou Mr Speaker.

 

MR SPEAKER

Mersi Onorab Woodcock.  Zis petet mon ava averti bann Manm fer parey Onorab Ghislain, Onorab Lemiel, Onorab De Commarmond, Onorab Ramkalawan i fer zot averti mwan avan ki zot pou fer sorti serten keksoz, e at least mon konnen kwa en pti pe zot pe vin koz lo la.  Onorab Churchill Gill.

 

HON CHURCHILL GILL

Mersi Mr Speaker.  Pwen note,     kwa ki in dir.  E bonzour tou Manm Onorab e tou bann dimoun anler ki pe asize pe swiv nou.

Mr Speaker mon pa pou long.  Mon ti anvi zis remersye bann atlet Baie Ste Anne pou zot osi zot bon travay ki zot in fer.  E nou espekte ki Inner Island i a kapab kontinyen shine e Baie Ste Anne i a kontinyen shine parey tou lezot lekol.  Mersi.

 

MR SPEAKER

Mersi Onorab Gill.  Bon mn krwar lo mn kote lo non Lasanble mon a remersi tou bann lekol, nou a felisit tou bann lekol ki’n pran par.

 

(APPLAUSE)

 

MR SPEAKER

Mon vwar tro bokou lanmen pe leve, Pointe Larue, lot, lot.  Me vwala e osi tou pou remersye sa lorganizasyon sa lorganizasyon pou sa travay ki zot fer toulezan pou kapab fer bann lekol rankontre pou organiz en tel konpetisyon, e nou konnen pou dir i annan sipor total Minister Ledikasyon osi tou deryer sa.  Ok, vitman Onorab De Commarmond.

 

HON CHARLES DE COMMARMOND

Mr Speaker mersi swivan sa ki Onorab Ramkalawan ti pe koze taler lo kestyon Salary Bill la en Public Service Salary (Amendment) Bill, aparaman mon’n ganny lenformasyon ki  sa Komite in fer son travay in donn son rapor depi an Me kot Prezidan.

Me pa kapab fer nanryen la ou bezwen esper rezilta Lakour.  Ler Court case i fini then prezan bann keksoz a i a pran son prosedir.  So nou bezwen esper Lakour.  Konmsi kantmenm in donn son rapor ou pa kapab fer nanryen la, nou bezwen esper Lakour, si Lakour i tarde then nou napa swa nou.  Mersi.

 

MR SPEAKER

Dakor, mersi.  Annou pa ouver deba.  Yes Onorab.

 

HON WAVEL RAMKALAWAN

Selman Mr Speaker mon forse dir sa ki mon pe al dir.  Parske Onorab De Commarmond in dir Komite etablir par Mr Faure ki ti sipoze rezourd sa sityasyon in fini prezant rapor e la prezan i bezwen esper desizyon Lakour.

Mon senpleman bezwen dir ki Lakour se Mr Faure ki’n met case Ankour !  Alor Mr Faure i setup en Komite apre sa li menm li i anmar son Komite.  Se sa leta nou pei.  Mersi bokou.

 

MR SPEAKER

Mersi.

 

HON CHARLES DE COMMARMOND

Mr Speaker i pa’n anmare li.

 

MR SPEAKER

Nou pa ouver deba.  Me lenformasyon ki nou osi Sekretarya nou’n gannyen se Komite ti  setup pou kapab met avek Manm Lasanble, pou regarde ankor bann propozisyon.  Me zis apre ki Komite in setup ti ganny nonmen mon krwar meeting ti fer Merkredi avek Lasanble, lot somonn pou mwan al devan Lakour Konstitisyonnel ti sorti.

So an menm tan ki ti annan en travay pou sey rod en konsansis, me en lot prosesis ti pe ganny fer.

So vwala en pti pe sa roulman ki’n arive.  Bon nou ava wi, Onorab Georges ou ti le mansyonn keksoz with regards to Bills.  Sa Bill ki pending Tourism?  Any information kekfwa ki share avek Lasanble?

 

HON BERNARD GEORGES

Mersi Mr Speaker.  Mr Speaker wi annefe nou’n annan parey Onorab Leader Lopozisyon in dir en meeting Bills Committee avek Minis Touris en meeting Bills Committee avek Attorney Zeneral lo Anti-Corruption Commission Bill. 

        An sa ki konsern Tourism Bill nou’n tonm dakor lo en lamannman – en seri lamannman ki pou ganny met devan.  E nou pe, atann en hard copy sa bann lamannman, pou nou kapab prezan vin avek en rapor devan Lasanble pou kontinyen Second Reading.  Mersi.

 

MR SPEAKER

Mersi Onorab Georges.  Bon Madanm Clerk in alert mon ki se sa ankor  the beauty  of sa Sekretarya an menm tan ki nou dan Chamber nou fer serten travay.  Me lezot travay i kontinyen.

Madanm Clerk fek enform mon ki PS Tourism in anvoy li bann amannman, in anvoy li draft i ava sirkile ek ou avek bann Manm Komite e petet, eski Bills Committee pe meet ozordi?

 

HON BERNARD GEORGES

Yes Mr Speaker, nou ti pe fer en propozisyon avek Clerk pou annan en pti meeting – sharp midi ozordi.  Mersi.

 

MR SPEAKER

Bon ok sa draft ki Madanm Clerk in gannyen i ava ganny sirkile.  E petet sa osi tou i ava kapab ganny met lo latab dan sa meeting. 

        Ok so i annan serten devlopman e nou ava regarde petet pa apre break 10:30 me ler nou ava antre 2er mon a kapab fer serten kominike avek Lasanble.

Aprezan mon a demann Parliamentary Reporter pou apel Minis pou Lanvironnman Minis Wallace Cosgrow.

Petet osi mon a sinyal bann Manm Assembly Business Committee ki nou pou meet 1:15 dan Speaker’s Conference Room. 

Bon mon ti a kontan dir bonzour e welcome Minis Wallace Cosgrow Minis responsab pou Lanvironnman Lenerzi e Sanzman Klima.  E Minis bomaten i akonpannyen par Ms Sharon Gerry, ki Senior Legal Officer.  Minister ankor enn fwa bonzour avek ou teknisyen.  E welcome dan Lasanble Nasyonal.

Minis parey nou ti’n tonm dakor ou pou donn nou en pti Statement en pti kontrandi lo sa S.I, S.I 31 of 2019, apre nou ava kapab pran en pti pe enteraksyon ek bann Manm.  Minister laparol i pou ou.

 

MINISTER WALLACE COSGROW

Bonzour Mr Speaker, mersi Mr Speaker.   Bonzour tou bann Manm Onorab, bonzour tou bann dimoun ki anler pe ekoute, bonzour tou dimoun ki dan lakour ke pe ekoute ouswa ki pe regarde lo televizyon.  Pe ekout lo radyo ouswa pe regarde lo televizyon.

Mr Speaker san tarde parey in ganny dir apre ki Lasanble ti’n anvoy en request kot nou pou fer en Statement lo sa S.I 31 of 2019 Mr Speaker mon’n prepar en pti Statement pou mwan kapab lir devan Lasanble.

Mon Statement i lir koumsa Mr Speaker ;

An Zen 2018 presizeman le 5 Zen 2018 enn bann lanons ki ti ganny fer alokasyon Lazournen Mondyal pou Lanvironnman, se ki apartir le 01 Zen 2019 en barn total lo enportasyon lavant ek prodiksyon Ban straw plastic – pli presizeman sa bann ki nou refer konman bann single use plastic straws.  Savedir sa ki nou servi en fwa apre nou zete.

Sa i swiv de lezot Regilasyon ki ti ganny fer an 2017 sa i S.I 37 e S.I 38 kot nou kot nou Ban ankor enportasyon prodiksyon lavant sak plastik bann diferan kwiyer, fourset, koute, lasyet, ver plastik e osi bann zartifay ki fer avek polystyrene ; par egzanp bwat takeaway.

Swivan sa mon ti anmenn en dokiman swivan sa desizyon le 5 Zen 2018, zour Lazournen Lanvironnman, mon ti anmenn en dokiman pou konsiderasyon e evantyel aprouvasyon Konsey Minis.  Konsey Minis ti aprouv sa dokiman an Zen 2018, e bann rekomandasyon sete ki nou met an plas en Regilasyon ki pou fer sa Ban vin efektif.  E ki osi annan bann awareness compaign ek diferan avek bann diferan group dan pei.

Alors Mr Speaker sa S.I ouswa Regilasyon ki devan Lasanble i rezilta sa prosesis ki nou’n pas ladan pou sa dernyen 1an.

Sa Regilasyon i enn ki kler e senp i barn tou lenportasyon predikasyon e lavant plastic straws.  Me i osi donn en egzanpsyon pou bann straw an plastik ki vin ant ase avek bwat zi fri.

Mr Speaker lemonn in realize ki si nou pa azir avek bann aksyon konkret pou redwir lakantite plastik ki ganny prodwir e servi nou pou annan nou katastrof mondyal kot polisyon plastik i konsernen.

Sirtou Mr Speaker dan nou bann losean.  Plastik pa degradable me i pli zou mwen dezentegre.  I pran bokou deseni resers in montre avan ki i degrade.

E menm ler i degrade i vin a en lot form ki bann pti morso ki mondyalman i ganny refer konman en microplastic.

        I osi danzere Mr Speaker.  Petet bokou pli danzere i ganny konsonmen par pwason e bann lezot lorganizm lanmer e i antre dan sa ki nou apel nou food chain.  Plastik pe touf nou bann losean; i pe touy nou bann lespes e lavi maren.  I  pe afekte lavi dan lanmer e lo later.

Resaman mon’n swiv e mon asire, tou Manm Lasanble in osi swiv avek lentere debri e an gran mazorite plastik ki’n ariv lo nou bann zil, Aldabra, Farquhar, Desroches, Poivre, Remire eksetera.  Menm Mahé, Praslin ek La Digue i en gro problenm.

Bokou nou ki swiv medya sosyal, mon asire ti a kapab vwar en video ganny sirkile, kot en tortidmer ti annan en straw ki ti’n pri dan son nennen.

Mr Speaker sa in osi kre bokou lapenn mondyalman e kre bokou lobby otour lemonn pou Ban plastik straw.

        Mr Speaker an 2018 Prezidan Faure ti atenn meeting Jeux Sept swivan lenvitasyon Gouvernman Canadian. 

E laba i ti fer resorti konsernan konsern lo marine litre e presizeman polisyon plastik i ti montre leader Jeux Sept sa 7 pei pli    ki dega kiltir plastik disposable pe kree pou lemonn e presizeman bann pti leta zil pare Sesel.  Sa menm size ti osi ganny diskite dan en meeting pou bann Minis Lanvironnman Jeux Sept Canada ki mon ti osi ganny privilez asiste.   Mon annan plezir pou dir ki enn bann aksyon konkret, se ki bann pei swivan sa bann diferan diskisyon zot in sorti dan ek en Marine Plastic Charter.  Zot in demann Sesel pou osi sinyen.

Mr Speaker Nasyon Ini in osi donn en komikman pou redwir polisyon plastik.  Bann gro lakonpannyen ki prodwir mazorite bann keksoz ki nou konsonmen pe osi re aziste zot model biznes pou evantyelman annan en lemonn san plastik.

Sa ki mon oule refer sorti e highlight isi bomaten, se ki polisyon plastik i en problenm mondyal e i pe afekte nou lavi toulezour.

Sesel konman en sanpyon e en leader lanvironnman parey Onorab Leader Gouvernman in fer resorti bomaten, nou pe osi fer nou bout e nou pe kontribye dan en lemonn global.   Sa bann Lalwa i pou nou protez nou lanvironnman e nou pei e nou pep.

Mon pou terminen par remersye e salye zefor tou bann lalit pou ki nou kapab konsanti nou pep lo bann danze polisyon plastik debri maren e bann lezot form polisyon.  I annan bokou bann zenn NGOs ozordi ki vreman aktiv.  Zot menm fer zot lavwa tande enternasyonalman.   Nou bann zenn i pasyonnen e konsyan sa bann problenm.  I devwar Gouvernman Mr Speaker, pou met an plas bann mekanizm pou adres sa bann problenm.  Mersi Mr Speaker.

 

MR SPEAKER

Mersi Minis Cosgrow.  Nou ava konmans pran en pe kestyon en pe enteraksyon Manm.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Bonzour Minis avek Ms Gerry Mr Speaker mon kontan ki Minis in vin devan sa Lasanble swivan sa demann ki nou ti fer.

E petet zis mon ava dir avek Minis rezon ki nou ti fer sa demann, se parski nu trouv serten kontradiksyon dan sa S.I.  E an plis ki sa nou anvi konn plis lo Polisi Gouvernman.  Parske i resanble ki zot pe konmsi i annan en pti kwiyer isi – en pti kwiyer laba e ki konmsi nou pa ankor ganny sa portre konplet.

Mr Speaker Minis in fer kler ki i anvi met en Ban lo plastik lo straw single use.  Me selman dan ou S.I anba sub regulation 3 (2) ‘’prohibition of plastic straws’’ i mete ki pou dir sa Ban i pa pou aplik pou straw i ganny mete lo bann pake juice.  E mon kontan ou’n mansyonn sa torti, akoz sa torti son problenm sete zisteman en straw ki sorti lo en pti pake juice.

Mon anvi konpran si ou pe met en Ban lo straw plastik tou straw ou servi li zis en fwa bann straw plastik.

Akoz eski Gouvernman in sey fer en demars avek bann lakonpannyen, ki fer sa bann lenportasyon, pou regarde si i annan en alternativ ki kapab ganny servi, e pou osi regarde ki mannyer bann lezot pei prensipalman la mon ava konmans mansyonn Rwanda en pei ki annan en ki en leader lo sa size –  ki mannyer eski li in fer pou tackle sa zafer straw ? 

        Parski annou pa bliye ki pou dir sa bann straw avek sa bann pti pake juice, lontan sa pti pake juice pa ti vini avek straw.  Apre sa in vin en evolisyon ki straw in ganny antase avek pti pake juice.  E alor pou nou regarde ki mannyer nou kapab fer sa, e la mon ti ava zis dir Minis ki bann pti pake straw ki bann pti pake juice lontan zot ti annan en pti soz,  ou ti desire e apre sa ou ti bwar li egzakteman parey dimoun ozordi i bwar delo.

Alor si Sesel pe al dan sa direksyon, annou Ban sa bann soz en rod sa bann pake juice ki ou ava zis desire e ou ava konsonmen.  Sa i enn.

Mr Speaker mwan anvi osi demann Minis an relasyon avek a S.I ki zot ti fer pou Ban bann kwiyer plastik, fourset plastik, ensidswit,  mon anvi demann Minis ki’n arive avek sa e ki ou mansyonn sa parski ozordi nou vwar sa partou dan tou takeaway avan zot ti pe konmans vini avek en pti kwiyer avek bann soz an dibwa, me la ou al kot en takeaway la bomaten la Minis ou pou vwar plastik.  Alor ki’n arive avek sa?

E apre sa ankor enn fwa Sesel i anvi vin en sanpyon ; parfwa mwan mon en pe ezite sa zafer Sesel vin en sanpyon akoz nou kontinyen trouv nou doub standar.

Mon ti a kontan demann ou Minis ki Polisi an relasyon avek bann valiz ki letan, non, non plastik parski Minis in mansyonn en kantite keksoz dan son Statement Mr Speaker.  An relasyon avek bann valiz bann viziter letan zot rantre dan pei zot valiz in ganny wrap avek sa plastik pli fen ki zot soz lo sa ?  Parske sansan nou pou annan nou bann en pwa demezir ki nou pe deal avek.  Alor silvouple eklersi nou lo la.  Mersi bokou.

 

MR SPEAKER

Mersi Onorab Ramkalawan.  Annou pa tro deborde akoz sa Regilasyon i spesifikman lo plastic straws – ok?  Minister.

 

MINISTER WALLACE COSGROW

Mersi Mr Speaker.  Mr Speaker, mersi Onorab pou ou bann kestyon.  Mon ava konmans avek plastic straws lo kartron juice. 

Mr Speaker atraver ou Onorab i en diskisyon ki nou’n gannyen internally dan Minister i en diskisyon ki letan nou ti pe konsilte pou enplimant sa bann lo plastic straws.  I en keksoz ki’n sorti fortman.

Pou mwan reasir ou ki poudir dan lefitir nou pe konsider pou Ban sa bann straw ki vin antase avek bann juice bann bwat juice.  Me solman nou’n santi ki a sa moman an vi ki i bezwen plis resers e difikilte pou nou kapab enplimant sa Ban in terms of mazorite nou bann enportater  se bann enportater ki al kot en middleman – kot i pa neseserman al kot al kot sa manufacturer.  E lakantite volim ki nou enporte i pa neseserman lakantite. E nou’n vwar nou dan en sityasyon kot petet sa bann dimoun pou ganny difikilte, in that short term pou zot kapab re aziste zot.  E dan lentere lentere piblik – dan lentere bokou bann paran ki ozordi ki zot zanfan i konsonm sa bann pti juice ; par egzanp pou al lekol, dan lakour,  nou’n vwar li neseser ki nou kontinyen reserse lo la.  E lenplimantasyon Ban 100poursan lo plastic straws single use plastic straws, pou ganny konsidere dan en letan en pe pli tar pou nou kapab ganny en pe plis lenformasyon e resers osi tou sa bann lo bann pti plastik straws ki vin avek bwat juice. 

So nou pa’n bliy li ditou.  I en keksoz ki nou pe kontinyen gete, i e keksoz ki nou osi nou anvi  Ban li.  Me solman nou bezwen mazin popilasyon – mazin zentere popilasyon osi e pa tro inconvenience zot dan bann desizyon ki nou pran.  So dousman, dousman zis parey ou vwar nou fer avek plastik avek styrofoam boxes ki mon pou vin lo la apre –  dousman, dousman nou pe ale.  Nou annan bann exemption list.   Dousman, dousman nou pe ale.  Konmsi nou pa’n anvi fer Ban drastic kot nou dir nou barn tou plastik e vwar difikilte apre pou aziste.

So dousman, dousman nou pe donn comme dir ou menm nou pe donn bann pti doz pou nou kapab fer sir ki dimoun i aziste avek sa ki nou pe sey fer.

Dezyenmman Onorab plastic utensils.  Wi i annan en barn lo bann plastic utensils lo ver, lo lanmok parey mon’n mansyonnen dan mon Statement.  Ozordi nou annan enforcement officers ki pas dan bann landrwa pou fer sir pou gete, zis zot pa pe servi bann plastik ki Ban.  Me selman Lalwa i fer ki zot pa sipoze pe enporte.  E sa i ganny stop at Port level – entry level savedir lo Por ouswa lo Airport pou zot enport sa.  E Lalwa i fer ki zot pa pe enporte.  Si i annan ki pe ganny servi petet pe ganny servi ilegalman, me mon kapab asir ou ki pou dir dan bokou sa bann landrwa i annan bann prodwir ki’n ganny aprouve baze lo standar, ki son standar i standar enternasyonal ki’n ganny aprouve, in ganny teste par SBS, e ki pe ganny aprouve pou zot ganny servi ozordi.

So petet i look plastik, me solman i pa neseserman sa plastik danzere ki nou’n targete dan nou regilasyon.

So me solman nou still nou annan nou bann enforcement officers ki pase, ki gete e si zot vwar dan bann lenstans ki sa dimoun son bann papye pa an konformite zot pou sezi e zot pou apply Lalwa or fine ki vin avek.  So se sa lapros ki nou pe pran Onorab.

Kot i konsern Polisi an relasyon avek valiz ki ganny wrap dan plastik mon ava admet Onorab ki nou, nou napa vreman Polisi. I annan bann landrwa osi ki kontan met plastik lo bann jug i bann cling film e parey cling film; nou napa vreman bann Polisi pou le moman.  Me solman an mezir nou process nou kontinyen dan sa process pou elimin bann diferan form plastik sirtou bann single use plastik, nou ava konsider sa bann wrap ki wrap valiz e osi petet bann cling film ki ganny servi dan lakwizin partou.

So se sa mon repons ou 3enm kestyon.  Nou pa vreman annan en Polisi pou lemoman lo la.  Mersi bokou.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mr Speaker i annan en fraz ki Minis in dir ki konmsi i en pe ki’n tap mwan an term prezan ki zot pe a fer resers.  Konmsi an relasyon ek straw, ok an relasyon avek straw lo bann bwat lo bann pake juice, se la prezan ki zot pe al fer zot resers pou regarde ki mannyer i kapab arive.

Eski Minis pa santi ki pou dir parey bokou lezot bokou lezot keksoz, ki sa leksepsyon ki zot pe fer i vin zisteman akoz zot pa’n fer  resers.  E ki this is the easy way out, parski atraver lemonn i ankor annan bann pake juice ki pe ganny vann ki napa en straw antase avek li.

E ofet Mr Speaker i annan bann lezot alternativ pou sa bann pti pake juice.  I annan lezot alternativ pou sa bann pti pake juice.  Parski menm sa pti pake juice anndan li i annan alluminium foil; anndan li i annan bann lezot keksoz ki osi danzere pou lanvironnman.  Konpare avek en pti boutey juice ki totalman diferan.

So eski Minis petet mon pe propoz avek li ki i ava konsider regard sa S.I pou me  en Ban total lo bann straw plastik e krwar mon ki bann boutikye ek bann lezot ki pe servi bann middleman ensidswit zot pou al fer demars egzakteman parey letan nou dir juice – pure juice, be pa zot in al fer demars ?

Parski Mr Speaker mon pe met sa ankor devan Minis, parski Lasanble nou kapab fer de keksoz, swa pou dir ki mannyer ou kapab vin avek en S.I ki en kontradiksyon.  Alor nou  quash li me nou prefere dyalog avek Minis pou dir si ou anvi met en Ban lo plastik straws akoz Sesel i en sanpyon nou met en barn lo plastik straws full stop.  Mersi bokou.

 

MR SPEAKER

Mersi Onorab.  Minis.

 

MINISTER WALLACE COSGROW

Mersi Mr Speaker.  Mersi Onorab.  Onorab mon konpran tre byen largiman ki ou pe vin avek.  Petet si in sorti comme kwa ki nou pa ankor fer resers pa sa ki nou ti pe mean.  Ki mon ti pe sey dir nou kontiny nou resers pou rod bann solisyon pratikab pou bann boutikye pou bann marsan e pou pep an zeneral.

So i annan serten sa bann keksoz ki pran en pti pe plis letan.  Alors pou pa delay sa process pou pa delay sa process nou’n deside met sa barn lo plastic straws ki vin endepandan.

Me i pa anpes nou Onorab i pa anpes nou dan next 6mwan 1an letan nou’n ganny bann bon concrete levidans byen ki mannyer nou kapab fer marsan anmenn bann lezot kalite bwat – fer isi fer laba.  I pa anpes nou revwar nou Lalwa – revwar nou S.I akoz i en S.I, e nou kapab re azout sa bann pti plastik straws ki vin avek bwat.

Mon santi ki letan pa dan nou faver pou mon i enportan ki ozordi nou met en mesaz kler deor, e nou dir plastic straws bann ki nou servi single use i servi bokou par lekol, par bann laboutik bann dimoun ki aste limonnad nou met en mesaz kler deor e nou dir nou Ban  koman en initial step.

        E i pa anpes nou Onorab dan lefitir e kontinyen travay pou nou Ban sa plastic straws ki vin avek bwat juice. 

E mwan mon donn mon komitman avek Lasanble ki nou pe travay e ki nou pou fer sir ki nou rod en solisyon pou bann plastic straws ki vin avek bwat juice. 

        So mon pa krwar nou devret retard en Lalwa, pou nou al azout en keksoz petet ki i riske kree serten difikilte pou marsan pou biblik an zeneral dan kou term.

Mon krwar nou bouze.  Nou annan linisyativ nou bouze lemonn pe  bouze nou bouze e nou aziste anmezir nou pe ale.

E se sa lapros ki nou pe pran.  Bokou lamazorite bann pei ozordi apard enn de zot pe pran en lapros en pti pe pli cautious.  Nou tou nou dakor nou tou nou konnen plastik i en problenm.  But lapros ki nou pran i en pti pe pli cautious, akoz nou bezwen realize i en tout lekonomi ki tou around tousala.  Ou tap li koumsa i tonbe e ou riske dan problenm.

So nou, nou anvi pran en lapros en pti pe pli cautious e mon kapab asir Onorab asir Lasanble ozordi ki nou pe travay pou nou deal avek sa zafer plastic straws lo bwat juice.  Mersi bokou Mr Speaker.

 

MR SPEAKER

Mersi Minis.  Onorab Georges.

 

HON BERNARD GEORGES

Mersi Mr Speaker.  Mr Speaker mon konsyan ki ou sa ki ou’n dir nou bomaten se reste  S.I lo plastic straws, me mon osi konpran ki Minis in dir ki sa se premye pa e pou annan lezot pou annan lezot S.I ki pou swiv.

E mon ti a anvi dan sa konteks demann Minis ki son ki son lopinyon –  mon konpran akoz in servi plastic straws, i sa ki bann Anglais i apel en low-hanging fruit i fasil pou enforce i senp. I fizib e prensipalman napa okenn rezon pou en dimoun servi en straw.  In vin zis en labitid ki nou annan konman en Nasyon ki nou bezwen servi en straw.  E se pou sa rezon ki mon konpran ki akoz se sa premye keksoz pe ganny target. 

        Me si mon annan rezon.  E dan laliny sa ki Onorab Leader Lopozisyon in dir, an sa ki konsern bann lezot keksoz ki nou pa bezwen.  Single use plastic bag par egzanp nou’n fini deal avek.

Me e mon konnen mon pe al mon konnen mon pe al  en kantite dimoun.  Boutey delo? Akoz nou ler nou ti dan Komite Zil ki nou’n al vizit zil partou parey Prezidan i fer, nou pa vwar plastic straw nou,  nou’n vwar savat nou’n vwar boutey delo, nou’n vwar en kantite keksoz ki pa ti devret lo nou bann lans.

Ki Minis i annan antet, pou anmenn en Ban total akoz si nou en sanpyon lanvironnman nou pa kapab en half sanpyon, nou bezwen en sanpyon konplet lo bann keksoz ki nou pe fer ki pa neseser. E ki State House in rekonnet State House pa servi delo dan boutey plastik.  Bokou lotel pa servi delo dan boutey plastik e ou dan sa Lasanble nou pa servi delo dan boutey plastik.

Ki lide e ki lekspektasyon ki nou annan ki Minis i ava elarzi son aksyon,  pa pou zis tous bann keksoz senp parey straw.  Me pou al dan bann keksoz tel parey ; boutey plastik, packaging plastik ki dan tou laboutik nou pe barn en plastic straw, me sak keksoz ki ou aste laboutik i kouver avek  polythène – polystyrene i annan plastik i annan keksoz.

Ki lespwar ki nou annan ki Minis pou sa i zis en premye shot.  E ki pou annan o firanmezir lezot aksyon ki pou ganny pran kont tou bann keksoz ki nou ki annan plastik e ki nou pe vreman bezwen.

2enm keksoz ki mon ti a kontan port a latansyon Minis, se dan son S.I dan Regilasyon 2, dan son definisyon plastik in servi en mo like sub things   ‘’like’’ – pa vreman langaz legal ‘’like’’, ‘’like’’ se langaz ler ou pe  bwar en labyer lo en bar ou servi sa mo, eski Minis i a kapab reasir nou ki dan lefitir zot a pran en pti pe plis swen avek langaz ki langaz legal ki zot servi dan zot S.I.  Mersi Mr Speaker.

 

MR SPEAKER

Mersi Onorab. Minis.

 

MINISTER WALLACE COSGROW

Mersi Mr Speaker.  Mersi Onorab.  Mon ava pran son dernyen komanter, dernyen komanter Onorab avan.  Onorab nou ava fer sir ki nou pas sa mesaz avek nou legal drafter e fer sir ki nou napa bann langaz en pe koumsa dan lefitir.

Premye pwen Onorab me sa plastic straw lo lans lo nou bann zil i pa sitan vizib, akoz i bokou pli pti.  Me mon asir ou i osi en problenm parey plastic bottles e osi savat plastik.

Ki plan Gouvernman mon Minister an term boutey plastik ek bann lezot materyo par egzanp packaging plastic?  Parey mon’n dir – mon  repete nou plan i enn ki nou dousman, dousman nou pe rantre lo bann diferan kalite plastik ki ganny konsonmen isi Sesel ki ganny fer ki ganny seri Sesel.

So boutey plastik i pa en leksepsyon.  Nou’n konmans mon kontan vwar pou dir Lasanble osi in aret servi nou ti konmans par Cabinet of Ministers, State House in aret servi parey ou’n fer sorti, bokou landrwa Gouvernman apre en dokiman mon ti anmenn Cabinet pe ganny ankouraze pou aret servi boutey plastik.

Menm mondyalman bann lakonpannyen ki servi en kantite boutey plastik, par egzanp Coca-Cola zot in donn zot komikman ki mon pa tro asir dat, me selman ankor dan en kantite lannen zot pou annan zot en alternativ ki pli green.  Ler mon dir green meaning ki plito pou lanvironnman.

So nou pe obzerv sa bann demars tre pre, e nou osi nou pou reakte ler nou vwar i neseser pou nou kapab tir sa bann boutey plastik.  Akoz ou annan rezon sa boutey plastik i enn bann gro, gro problenm mon vwar lo bann lans lo bann lakot partou.

        So sa i enn bann keksoz ki nou pe get tre for.  Packaging plastik letan nou ti fer sa Lalwa lo plastik ti annan exemption list.  Mon’n demann bann zofisye dan Minister pou zot revwar sa exemption list.  I annan en kantite ki nou pe al tire lo la.  Akoz apre 2an nou realize ki pu dir marse in aziste in adapte i annan bann lezot alternativ.  Se sa ki ou vwar nou fer li pa par pa.  Akoz nou allow marse pou ganny bann lezot alternativ. E marse nou vwar la i annan bann lot alternativ ki zot kapab vitman sot lo la.

Alors  nou’n  travay avek bann pli gro supermarket.  STC par egzanp nou pe travay avek zot pou kapab switch from plastik from sa bann plastik, ki zot pe servi par egzanp met zonnyon, fri, legim ladan.

E tre byento nou pe al anmenn sa exemption list, e serten sa bann packaging pou sorti pou ki nou pa vwar ditou dan nou pei ankor sa bann packaging. 

So sa i en garanti ankor ki mon donnen ozordi ki, nou pe travay lo revwar sa exemption list pou deal avek boutey, packaging, styrofoam packaging tousala.  Mersi bokou Mr Speaker.

 

MR SPEAKER

Mersi Minis.   Bon mon ti ava averti bann Manm annou pa fer Statement, annou al direkteman lo nou kestyon.  Nou annan Minis Finans ki deza arive pou pran prosen S.I. 

E mon fer zot konnen osi ki lalis pou bann entervenan in fini fermen.  Onorab Waven William.

 

HON WAVEN WILLIAM

Mersi Mr Speaker.  Bonzour tou dimoun ki a lekout.  Mon le swet labyenveni bann etidyan ki dan Gallery. 

Minister well petet Speaker mon konnen poudir lefe ki Minis dan son lentervansyon lo sa S.I in rekonnet li menm li pou dir nou pe tous en keksoz ki vir otour lekonomi e an menm tan Minis ou’n tous lo ki Sesel in form parti en Marine Plastic Charter.

        Minis mon santi ki konman en Lezislater, ouswa nou lenstitisyon, nou pa pe form parti vizavi enplimantasyon sa Charter. 

        Akoz ou annan en ta  stakeholders ki enplike toultour sa ki Egzekitiv i anvi fer, vizavi enplimantasyon  sa Charter. 

        Alors Minis mon pou demann ou e  mon pou met en pti pe lanfaz lo al ki ou pa krwar i ti a bon ki enn sa preparasyon bann diferan stakeholders i enportan pou zot pran ownership?  Alors mon a demann ou Minis lefe ki ou’n dir i annan enta S.I ki sipoze vini otour sa Charter sa plastic charter.  Mwan mon ti ava demann ou pou ou submit avek Lasanble en Plan D’Aksyon e en timeline pou nou kapab konpran egzakteman ki e arive.  Akoz i pou annan en lenpak e sa lenpak parey ou’n dir i vir toultour sa lekonomi. Lekonomi pa zis ki tou sekter prive, me bann household osi pe ganny afekte.

Alor mon ava demande ki enn, ou prezan Lasanble avek en kopi sa Charter an menm tan en roadmap egzakteman ki Gouvernman i anvi fer e dan ki timeline?  Mersi.

 

MR SPEAKER

Mersi Onorab.  Minis.

 

MINISTER WALLACE COSGROW

Mersi Mr Speaker.  Mon ava bref lo la.  Mersi Onorab pou ou lentervansyon bann sizesyon.

Onorab zis pou korize nou’n ganny demande pou form parti sa Charter, nou pa ankor form parti sa Charter lo plastik.  Me solman mon a kapab sirkil sa e fer Lasanble ganny okouran ki sa Charter i mean e ki i pe sey demann nou pou to be part of.  Uhmm.  Sa mon a kapab fer.

So bann lezot konsiderasyon ki Onorab in demann nou, nou a kapab pran an konsiderasyon.  Mersi bokou.

 

MR SPEAKER

Mersi Minis.  Onorab Jean-Francois Ferrari.

 

HON JEAN-FRANCOIS FERRARI

Mersi Mr Speaker.  Bonzour tou dimoun, bonzour bann cadets.

        Mr Speaker mon ti a kontan demann Minis akoz i ti konmans son Statement ozordi avek en fraz tre kler ki Gouvernman pe rod en Ban total lo plastic straws?  Total Minis in servi sa mo.  Me selman apre in eksplik nou en partial Ban.

        Mr Speaker sa i malerezman sityasyon ki nou pei i fonksyonn ladan e mwan mon ti a swete ki nou rod en lot fason pou nou fonksyonnen.  Nou Ban sak plastik selman nou barn en pe, solman i annan en pe nou pa Ban.  Nou Ban kwiyer plastik me selman i annan bann kwazay plastik nou pa Ban.  Toultan nou pe fer bann keksoz halfway. 

E la Minis mon mon’n atann ou pe dir, ou Minister in ekout bann komersan.  Sa i byen pou ekout bann komersan, me bann komersan zot adapte zot.  Zot adapte avek bann sirkonstans.

So mwan mon pou mon anvi met devan Minis, akoz i pa fer rantre dan sa S.I en Ban lo par egzanp lo sub regulation 1 en Ban ‘’… shall not apply to a plastic  straws  …     except shall apply only on the 1st of September on the 1st of October, on the 1st of November but  that it shall apply.’’

          Bann komersan zot pou rode zot fason pase zot a rod zot a rod nenport keksoz sorti L’Egypte, sorti Taiwan, sorti Coree, sorti Agentine. Bann komersan pou rode zot sa.  E nou dan sityasyon la Mr Speaker kot i annan en alternativ to plastic straws.  It’s paper straws.  I egziste.  I egziste i la dan lemonn li Nou pa bezwen al evant li nou pa bezwen fer resers.            So Mr Speaker mon ti a kontan demann Minis konmsi sey convince nou Lasanble ki zot pa pe fer half measures nou dir pou dir nou bann pionye dan lanvironnman let us be bold on environment issues.  Let us be bold let us take measures, ki sa akoz i pa marse. La sak plastik mwan mon pa konnen si Minis re asir nou.  Me mwan mon krwar bann single use sak plastik i plis ki avan.  I plis ki avan.  I vin lo roulo konmela.  Akoz nou pa kapab distenge ant single use, second use, third use konmsi nou’n fer en leksepsyon pou en pe nou pa’n fer pou lot.            Mr Speaker vreman mon ti a kontan si Minis i kapab reasir sa Lasanble, ki nou pe al dan en direksyon  ki kler plito ki konfiz dimoun e pou nou – e menm si nou napa sa straw plastik manrmay i ava bwar zot juice zot, ziske ler nou ganny alternative.  Me se pa – se pa nou pe anvoy the wrong message ler nou fer ler nou fer half measures.  Mersi Mr Speaker.

MR SPEAKER

Mersi Onorab.  Minis.

MINISTER WALLACE COSGROW

Mersi Mr Speaker.  Mersi Onorab pou ou kestyon e kou bann sizesyon.  Onorab an term direksyon mon krwar depi bomaten, mon pe mon pe tap for lo direksyon.  Direksyon sete pou annan en total Ban evantyelman lo singe use plastic.          Ki mannyer nou ariv kot sa Ban me se la kot nou difere.  Ou, ou pe dir mon ozordi annou antre avek en full force Ban tou, tou plastic straws ok ? Kekfwa mon’n mal konpran.  So mwan mon pe dir nou annan en lapros en pti pe pli settle, kot nou allow popilasyon, biznes, komersan, pou adapte avek bann diferan, mezir ki nou met devan.  Mon bi se ki pou annan en eventual total Ban, lo tou single use plastic.  Se sa mon bi, this is sa vizyon, ki nou pe get li devan.  Ki mannyer mon ariv laba.  Mwan mon pwennvi e sirtou pwennvi ki ti avan mwan osi, se ki nou bouz step by step pou ki dimoun i adapte.             E nou vwar dimoun in adapte avek par egzanp sak plastik.  Ozordi i annan en kantite laboutik, pa pe servi sak plastik mon krwar mon pou dakor avek ou ki pou dir annan plis sak plastik, Sesel ozordi ki ti annan avan nou ti met barn.  Mwan mon annan lenformasyon mon vwar.  Mon konnen lo landfill, kantite plastik ki antre, nou konnen kot Custom kantite plastik ki antre.  So mon pa pou dakor avek ou ki annan plis sak plastik Sesel ozordi.            Petet lo sa bann roulo nou bezwen fer sir nou tire.  E sa parey mon’n asir Onorab Georges lo roulo i form par exemption list e nou pe revwar exemption list. Nou pe revwar akoz mon osi mon vwar i annan en kantite sa bann pti plastik lo roulo, i pa neseserman en kantite an zeneral me lo roulo, mon vwar ankor annan en pe.  So nou bezwen fer sir nou tire sa ok.            Parey mon’n dir ou direksyon, direksyon i la li.  Direksyon i la e ki mannyer nou, nou bouze e ki difere.            Lo kote plastic straws lo bwat juice.  Si ozordi mon pou dir ok nou pou al enpoz en Ban i pou annan serten letan ki mon pou bezwen donn bann komersan pou zot kapab aziste pou zot kapab source zot bann product pou zot kapab fini sa bann product ki deza dan zot dan zot bann stores partou ki dan bann diferan landrwa.            So le 01 Septanm ou propozisyon mon krwar i pa fezab.  Petet nou bezwen donn en 6 mwan, pou dimoun asiste adapte.  Ok ?  Mon krwar i pa fezab.  Me si nou fer sa ozordi i pou delay lenplimantasyon swa ki nou pe sey fer la.  E mon kapab rod figure pou dir kantite plastic straws pou kontinyen antre dan pei, bann ki endepandan from bwat juice.  E dir ou ki kantite ki pou tonm dan lanvironnman pandan sa bann letan ki nou pe espere ki sa Lalwa pa pase.            So mwan mon prefere sa Lalwa i bouze e nou aranz li pa aranz li, petet nou entrodwir nouvo anmezir ki nou vwar bann solisyon praticable pou met nouvo keksoz.  Zis parey nou’n fer plastik, zis parey nou fer kwiyer, zis parey nou’n fer avek styrofoam take-away boxes.  So dousman, dousman nou ale.  Sa mon pwennvi Onorab.  E sa mon propozisyon silvouple.

MR SPEAKER

Mersi, Minis.  Onorab Terence Mondon.   HON TERENCE MONDONMersi Mr Speaker.  Bonzour tou dimoun.  Bonzour Minis.  Mon kestyon lo sa S.I pou Ban plastic straws i koumsa.  Minis premyerman in koz lo en lapros pli settle zot pou kontinyen fer resers.            Eski Minis i kapab dir nou, eski zot annan en timeline an term kantite letan zot mete pou zot kapab ariv zot sa pwen final pou zot Ban total plastik kantite letan, kantite lannen zot mete pran Gouvernman pou zot ariv a sa pwen?          Mon 2enm kestyon annefe ki S.I deza fer provizyon pou serten bann plastic straws rantre; parey nou vwar bann straws avek bann pti pake juice.  Kwa ki zot in met an plas pou elimin sa bann plastic ki pou rantre ki pou deza rantre parey zot fer provizyon anba zot S.I sa bann straw plastic, ki pou kontinyen antre, ki provizyon zot in mete an plas pou kapab elimin sa bann plastic bann straws ki pe rantre deza?           E finalman si Minis ti kapab partaz avek nou bann lenformasyon ki li i dir i annan,  ki kantite plastik pe rantre a se moman, eski zot annan en rapor statistik zot kapab partaz avek nou Lasanble pou nou kapab konpran osi ki kantite pe antre ? E si zot annan en rapor revi lo lenplimantasyon sa barn zot ki zot ti fer zot ti met an plas lannen pase, lo bann plastik an zeneral, eski zot annan en rapor revi lo sa size?  Mersi Mr Speaker.

MR SPEAKER

Mersi Onorab.  Minis.

MINISTER WALLACE COSGROW

Mersi Mr Speaker, mersi Onorab pou ou 3 kestyon.  Onorab an term timeline nou napa en timeline an se moman kan  ki nou pou eventual barn.  Akoz, akoz lemonn i bouze bann lorganizasyon i fer bann nouvo komikman nou osi nou bouz avek zot.  So nou bouz en pti pe lo komikman lemonn nou bouz en pti pe lo Sesel koman en pei.  Alors mon donn ou en timeline kan e3gzakteman le 31 Desanm or le premye Zanvye or whatever time ki sa nou napa en timeline.  Whatever ki nou vwar neseser anmezir nou ale ki merit annan latansyon en pe pli irzan then nou adres li.  Me selman parey mon pe dir the total Ban is the goal ok?          An term elimin plastic straws letan i rantre – bann ki antre dan konmsi pou konnen ki mannyer nou pou eliminen letan i antre dan pei.  Lalwa i fer provizyon pou li pa rantre.  So nou’n deza met en Ban lo enportasyon, Ban lo enportasyon e nou annan nou bann enforcement officers ki fer bann tyek, ki gete dan bann laboutik si i annan ki antre.  E nou osi annan kontrol lo nivo Por Ladwann Customs.  So Customs i konnen e sa bann Lalwa i ganny fer an kolaborasyon avek Customs, e Customs i fer rantre dan son bann prohibited restricted goods list e son bann zofisye i konnen kwa ki pou veye lo Por lo Airport ler i rantre.  So se sa bann mezir bann kontrol ki nou annan.            An term statistik sa mon kapab rode, kot Trade nou kapab fer ou konnen kantite bann plastic straws ki antre plastik lo roulo mon kapab fer ou gannyen ganny sa bann lenformasyon.  E mon kapab petet fe ou ganny en kopi konparezon avek avan Ban ti antre.  So nou kapab ganny sa bann lenformasyon.  Mersi Mr Speaker. MR SPEAKERMersi Minis.  Vitman Onorab Mondon.   HON TERENCE MONDONMersi Mr Speaker.  Minis mon krwar i pa’n tro konpran mon kestyon ler mon dir kwa ki zot annan an plas pou elimin sa bann straws ki sa S.I pe fer provizyon pou kontinyen antre ?          Parey sa bann straws avek bann pti pake juice.  Zot bezwen an menm tan annan en fasilite pou kapab elimin akoz nou pe koz en Ban lo nou pe koz lo elimin plastic.            Alor mon krwar zot bezwen annan en fasilite.  Eski zot annan en fasilite an plas?  Mersi. MR SPEAKERMersi Onorab.  Minis.

MINISTER WALLACE COSGROW

Ok mersi Mr Speaker.  Sorry Onorab mon’n mal konpran ou kestyon.  Non nou napa en fasilite spesifik pou bann pti plastic straw ki vin lo bwat juice, i antre i al dan bin, apre i ganny depoze lo landfill.  So nou napa en fasilite spesifik pou deal avek zis plastic straws.  Mersi. MR SPEAKERMersi Minis.  Onorab Simon Gill. HON SIMON GILLBonzour Mr Speaker.  Mersi bokou Mr Speaker.  Bonzour Minis avek ou lekip.  Bonzour tou koleg Onorab, bann cadet ki dan Galeri, tou manm piblik ki pe ekout nou.          Mr Speaker, Sesel wi i en sanpyon dan lanvironnman.  E nou bezwen gard sa kouronn sanpyon.  E pou nou gard nou kouronn sanpyon ki nou’n gannyen i enportan dan konteks sa S.I ki devan nou, nou demann Minis detrwa kestyon pou ki nou kapab met sa sityasyon an perspektiv.          No.(1), eske zot annan en lalis tou bann prodwir plastik ki ankor pe ganny servi isi dan Sesel ki pa konteni dan sa bann restriksyon ki’n deza ganny pibliye?  Sa No.(1).            No.(2) eski Minis i kapab donn nou lenformasyon lo depi e bann restriksyon in vin an fors ki poursantaz satisfaksyon zot in ariv lo la baze lo bann statistik bann evidence ki zot in kolekte par zot bann dimoun ki pe enforce sa bann restricted measures ki an plas ?            No. (3), eski Minis i kapab dir nou ki er tou bann lenformasyon in fini ganny rekonsilye si zot ava pibliy en progranm detaye, pou donn tou bann stakeholders sifizaman letan pou zot respekte sa bann desizyon or ranforsisman Lalwa ki pou ganny met an plas, an term eliminasyon an litilizasyon okenn prodwir plastik dan Sesel.  Ankor enn fwa avek bi pou nou mentenir nou kouronn sanpyon lanvironnman ki nou’n gannyen e ki nou 2 Prezidan Faure avek ex-Prezidan Michel in anmas sa kouronn pou Sesel.            Mr Speaker lot kestyon ki enportan nou demann Minis.  Eske zot deza annan an plas en progranm sansibilizasyon Nasyonal an litilizasyon tou bann medya ki nou annan dan Sesel?            E si zot annan sa progranm medya, eski Lasanble Nasyonal i kapab ganny en kopi sa progranm medya ?  Si napa, kan eski Minis avek son lekip, i kapab pibliy en progranm medya konpreansiv, pou sansibiliz tou bann stakeholders, pou donn zot sifizaman letan pou zot rantre dan komansman e ziska lafen en peryod tranzisyon rezonnab?  Akoz nou konnen ki i annan bann marsan ki’n fini plas zot komann, 1an, e si i annan okenn bann desizyon ki vin abrupt la pou la, i pou kree serten problenm.  Tout an rekonesan ki ozordi dan lemonn, i annan solisyon pou zafer plastik, kot zot pe sorti. Lemonn i annan solisyon pou sorti lo litilizasyon plastik, pou al lo bann prodwir ki biodegradab e ki kapab ganny resikle.            E lo sa pwen resikle.  Mon lot kestyon, eski Minis i kapab dir nou Mr Speaker … MR SPEAKEROnorab, Onorab ou’n deza demann 4 kestyon.   HON SIMON GILLNon mon a demann sa enn dernyen Mr Speaker.  Menm si mon annan ankor enn ki la e mon a demann zis enn dernyen.          Eski Minis i kapab dir nou si or konbyen, konbyen bann dimoun, bann businessman, ki’n vin kot son Minister avek bann proze, bann proze konkret pou resikle bann prodwir plastik ki nou servi or bann sibstitisyon bann prodwir plastik ozordi ki pe ganny servi dan Sesel?   Mon pe koz proze konkret.  E ki sipor ou Minis ou’n donn sa bann dimoun ki’n vin avek zot bann proze devan, pou ki nou enplimante e pou fer sir ki Sesel nou kapab resikle tou sa bann prodwir ki nou pe servi isi dan pei?  Mersi bokou pou donn mwan sa loportinite ou bann kestyon Minis e Speaker.  Mersi. MR SPEAKERMersi Onorab.  Minis.

MINISTER WALLACE COSGROW

Ok mersi bokou Mr Speaker.  Mr Speaker mon pou reponn ou kestyon Onorab dan sa laliny.  List of restriction list of lalis bann prodwir ki nou annan restriksyon lo la, se sa lalis bann lezot prodwir ki evantyelman nou anvi eliminen.          So nou annan en lalis bann prodwir ki fer ek plastik, ki nou annan dezir eliminen dan en dele letan.            Eski nou satisfe avek so far, sa ki sa travay ki nou pe fer, apre ki nou’n met sa bann Ban?  An zeneral mon kapab dir nou satisfe – an zeneral an term bann materyo plastik ki pou ganny servi par piblik, ki pe ganny vann par bann marsan.            Me i touzour annan loportinite pou nou fer pli byen.  Nou bezwen entansifye nou bann zefor, pou patrol bann diferan landrwa, bann etablisman touristik, bann laboutik, bann landrwa kot i annan komers, nou bezwen kontinyen entansifye nou zefor ; nou bezwen kontinyen travay avek sa bann dimoun pou zot konsyantiz zot, pou zot konpran, akoz nou pe met sa Ban.  Nou bezwen pa egzanp nou’n donn permisyon pou servi serten kalite plastik ki biodegradab sa osi nou anvi sorti lo la, nou anvi antre dan bann keksoz ki 100poursan biodegradab, par egzanp papye.  So i annan ankor en pe travay pou bezwen ganny fe.  E me solman an zeneral nou satisfe avek ki mannyer repons piblik in ete, repons komersan e an zeneral ki mannyer sa Ban lo plastik e bann lezot keksoz pe marse.            Eski progranm detaye avek bann stakeholders nou kapab travay lo en plan?  E mon krwar i enportan pou nou travay lo en plan, pou nou kapab met devan bann stakehoklders e enkli en timeline ladan kan ki nou anvi Ban tou bann keksoz plastik Sesel ki nou dir single use plastic.  Nou kapab met en plan devan e ki mon krwar tou dimoun tou stakeholders i a kler.  E parey Lasanble in dir ozordi, i ava annan en timeline pou dir by sa kantite letan tou sa bann prodwir pa devret pe rantre Sesel e pa devret pe ganny servi Sesel.            Onorab nou ava pran sa an konsiderasyon.  Media plan wi media plan  nou annan en media plan.  Nou media plan i konsantre lo lanvironnman an zeneral.  I pa zoom in spesifikman lo plastik, me mon krwar ki enportan ki anvi nou met en kantite lanfaz lo plastik i enportan ki nou annan en specific focus lo plastik.  E nou annan bann par egzanp nou annan bann pti lavertisman lo Facebook page, nou annan bann konsiltasyon lo televizyon lo radyo lo bann progranm kot nou sansibiliz dimoun.            Me selman  dan mon pwennvi i pa ase, i bezwen pli sistematik i bezwen toulezour ou pe tap dimoun ; toulezour ou pe tape ou pe rantre dan lespri konmkwa pou dir sa i en keksoz ki nou bouze e aret servi.  So nou ava met en pe plis lanfaz lo nou plan lo nou media plan, pou konsantre lo plastik me parkont parey mon’n dir nou annan nou bann lavertisman ki annan pou fer prezervasyon, polisyon e lezot.            An ter recycling mon pa pe mazin spesifikman okenn biznes ki’n kot nou pou recycle plastik.  Nou annan par egzanp bann biznes ozordi ki pe eksport pet bottles.   I annan en Scheme pou redeem pet bottles e ou eksport aletranze pou ganny resikle.  Me selman bann lezot kalite plastik. An se moman mon pa pe recall okenn biznes ki’n vin devan, me parkont si biznes ki’n vin devan okenn biznes ki vin devan pou okenn linisyativ recycle, i annan bann incentives ki nou mete par egzanp exemption lo bann lekipman ki zot ki zot enporte pou fer sa biznes ; bann lezot pti incentives ankor ki nou kapab provide lekspertiz an term an term nou bann zofisye ki annan sa plis lekspertiz pou sey eksplike en pti pe ki mannyer bann keksoz i marse.  Nou napa okenn pou lemoman cash incentives me i en keksoz ki nou kapab eksplore.            Nou annan bann lezot keksoz lezot biznes par egzanp ki eksport can, ki eksport feray, me solman pa plastik spesifikman.  Nou annan biznes ki’n vin kot nou ki’n eksprim dezir pou bril salte, ki enkli plastik tou ansanm tir tou pou brile, kre lenerzi.  Sa in annan bann biznes, e nou pe ouver en lapel dof, pou kapab gete ki kantite lentere ankor i annan dan bril bann salte kre lenerzi.            So sa i en pe bann kontak ki nou annan sa i en pe an zeneral larepons pou Onorab.  Me ankor parey recycling mon a zis azoute ki incentives posibilite incentives i annan.  Mersi bokou Mr Speaker.   MR SPEAKERMersi Minis.  Onorab mon donn nou sans 5 kestyon, mon pa pou kapab donn ou siplemanter ankor.  Nou bezwen bouze.  Onorab Flory Larue. HON FLORY LARUEMersi Mr Speaker.  Bonzour Minis, bonzour tou dimoun.  Mr Speaker mon ti a kontan felisit tou bann etidyan ki’n partisip dan sport day yer e dan sa kote lo kote sa weekend ki’n pase lo sa kote mon ti  a kontan felisit zot pou bann ki pe anmenn zot boutey ki ranpli ek delo ki sorti dan lakour, olye bann boutey ki zis nou zete, sa i en gran zefor lo kote bann zenn ki al fer spor.            Mr Speaker mon ti a kontan demann Minis lefe ki 90poursan bann plastik ki nou servi i pa ganny resikle e olye i end up lo bann landfill ouswa dan losean.  E nou isi ki nou napa sa fasilite yet pou nou resikle bann plastik ki plito end up dan landfill ki mannyer nou pe fer diferans ant sa bann straw ki rantre dan pei ki pou ranplas sa bann an plastik ?  I annan bann compostable straw i en pe parey plastik me solman resers i montre ki sa bann compostable straw li osi son letan deteryore i tre long.  E apre nou annan sa alternatiive cardboard ki li i pran 45 a 90 zour.          Kisisa sa ki nou pe donn enportater konman en alternativ lo kote quality ki zot pou anmennen pou ranplas bann straw silvouple ?          E osi mon ti a kontan demann Minis dan Seksyon (71) of the environment tax  2016 nou vwar ki en lakonpannyen i kapab ganny en penalti prizon pa plis ki 6 mwan, ouswa en lanmann larzan pa plis ki R10 mil.            Me parkont dan S.I dan regilasyon (5) nou vwar ki i dir nou a person si li i contravene sa regilasyon i kapab ganny en fine pa plis ki R20 mil.          Eski Minis i kapab dir nou si i annan en kontradiksyon at the main act avek sa S.I?  Mersi. MR SPEAKERMersi Onorab.  Minis.

MINISTER WALLACE COSGROW

Mersi Mr Speaker.  Mersi Onorab pou ou kestyon.  Kestyon an term quality of straws apre bann straw ki resanble plastik or ki plastik me solman ki dezentegre, mon pa kapab dir me i pa neseserman biodegradab me dezentegre.  Lalwa i kler lo la Lalwa i refer to non-plastic straw; savedir okenn form plastik savedir ou kapab anmenn papye, banbou, feray, sugarcane sorry, Lalwa i spesifye banbou, feray, sugarcane, papye, e lezot item, me solman ki pa plastik.  Savedir nou safe lo la lo kote plastik menm bann plastik straw ki biodegradab ki nou pa pe aksepte.            Sel plastik straw ki aksepte se ki vin sa ki vin par egzanp dizon i annan bann lanmok manrmay ki vin avek son straw hard plastic ki vin an package ansanm sa i ganny exempt from there, akoz i pa en single use i ganny servi bokou fwa avan ki i kapab ganny discarded.  So Lalwa i kler lo la Onorab.            An term penalti napa okenn discrepancy an term ok, napa okenn discrepancy ki annan ant Lalwa APA avek sa, regilasyon i ganny fer an relasyon avek Seksyon (80) Lalwa.  E ki Cap an term lo Regilasyon Cap lo penalti i R20 mil.           So in ganny fer an relasyon avek Lalwa APA.  Mersi bokou Mr Speaker.   MR SPEAKERMersi Minis.  Onorab vitman. HON FLORY LARUEMersi Mr Speaker, mersi Minis.  Wi mon pe vwar dan Regilasyon (2) pe donn spesifikasyon ki kalite straw plastic the meaning of plastic me solman sa bann compostable straws zot kapab disintegrate zot similar plastic letan ou regard zot visually, me solman zot annan preske menm lefe dan lanvironnman akoz zot pran en kantite letan pou zot disintegrate dan National environment.  Unless ou ti annan en sistenm recycling ki nou, nou t pe provide.  Koumsa sa bann straw ti pou al ladan e la prezan en compostable ti pou vin recyclable.            Me letan nou pe get mannyer dimoun i zet straw pe anpes sa lenpak dan losean i annan menm lefe letan i pe disintegrate i pran kantite menm letan i pran bokou letan olye ki straw ki fer ek cardboard ek papers, ki nou’n pare pou dir annou al dan zis sa kalite ki li i pran li very litttle time pou disintegrate konpare ek lezot.  Mersi.   MR SPEAKERMersi Onorab.  Minis.

MINISTER WALLACE COSGROW

Mr Speaker mersi bokou.  Mersi Onorab.  Parey mon’n dir Onorab Lalwa i kler plastics sa bann compostable la i plastik i plastik li.  Selman i bezwen serten kondisyon pou li kapab dezentegre.            So nou pa pou anmenn li akoz i plastik so i pa pou antre li.  Savedir si nou napa sa bann fasilite pou li dezentegre, so nou pa pou nou’n fer Lalwa senp zisteman pou nou pa antre dan sa bann zafer compostable pa compostable.  Nou’n dir plastik sa bann compostable plastic in nature selman i kapab ganny dezentegre baze lo serten tanperatir serten masin serten keksoz.            So nou napa isi.  Alors ki nou’ dir se ki okenn zafer ki fer ek plastik full stop deor.  Sa ki pou rantre se bann dibwa bann banbou, bann sugarcane, bann lezot zafer. So Lalwa i kler lo la Mr Speaker.  Mersi bokou. MR SPEAKERMersi Mini.  Onorab De Commarmond. HON CHARLES DE COMMARMONDMersi Mr Speaker.  Mon sey enn kourt.  Mr Speaker i kler pou dir nou Lasanble pa telman anvi al    sa S.I li.            Me selman nou lapel ozordi se lans avek Minis pou dir in feature sa zafer lanvironnman la nou tou nou kontan.  E en lalit sansibilizasyon ek sikse dan domenn lanvironnman konmanse lontan e in eklizib.  Savedir in enkli tou bann dimoun, enkli zanfan ek zenn.  E nou osi nou anvi ki letan ou annan keksoz la si ti annan diskisyon en pe pli a larz ti ava annan petet plis osi sizesyon dan sa laliny.          Eski Minis i kapab dir nou apard sa plastic straw si i annan lezot plastic, single use plastic ki ou pe dir ki ti kapab enkli dan sa lalis ki ou pa’n enkli ?          E an menm tan, esey dur nou si zot pare Minister Lanvironnman pare pou revwar zot plan incentive pou e lans en lapel dof pou kestyon resiklaz plastic ek lezot prodwir dan sa zanmirant pou kapab annan bann substitute pou sa.          E an menm tan eski i kapab osi dir nou pli konkretman, akoz nou dan medya pa pe vwar ase.            Eski Minis i kapab dir nou klerman sa laranzman ki i annan petet pa pou tande     sa laranzman ki i annan ki son Minister i annan avek medya pou sa plan ki in konmans ki’n koz lo la taler ki petet i ti kapab share avek nou Lasanble sa plan pli konkret, me selman dir nou ki mannyer i marse sa plan ek medya ki zot annan.          Par egzanp eski zot bezwen pey bokou medya?  Eski i free ?  Kote petet ki zot bezwen sipor pou kapab fer sir ki sa target ki zot annan i ganny attend e a fer ki nou ava ankor lavantaz lo kestyon lanvironnman extend sa sanpyon ki nou annan dan lemonn pli devan ankor.          Vwala Mr Speaker mon krwar se sa mon pwen pou lemoman.  Mersi. MR SPEAKERMersi Onorab.  Minis.

MINISTER WALLACE COSGROW

Mersi Mr Speaker.  Mersi Onorab pou ou bann pwen valab.  Mon dakor avek ou ki nou bezwen nou bann zefor demars dan lanvironnman in toultan enn ki enklisiv parey ou dir.  E mon krwar going foward dan lefitir i enportan ekstrememan enportan ki nou kontinyen involve bann stakeholders dan bann diferan desizyon Lalwa ki nou pran, e mon kapab konfirm avek ou garanti avek ou ki nou, nou fer li dan en conservative manner e ki nou fer sir ki stakeholders piblik i konnen Lalwa APA i fer ki tou nou bann par egzanp Lalwa nou bezwen annan conservative process dimoun i bezwen konnen, dimoun i bezwen vin asiste ekoute, met zot pwennvi devan.            So, so Lalwa i egziz nou lo en kote.  Me selman i annan serten keksoz Lalwa pa egziz nou e nou osi fer serten konsiltasyon.            So mon kapab garanti ou, ki stakeholders pou kontinyen ganny involve dan bann diferan keksoz ki nou fer.  An term plastik, an term resiklaz plastik.            Onorab mon anvi petet reasir Lasanble plastik i en konponan avek sa ki nou apel en very high calorific value.  Ler ou brile kapab don ou bokou lenerzi.            So mon anvi krwar ki pou dir avek sa plan waste to energy ki nou annan kot nou bril salte pou lenerzi.  Plastik i ava kapab ganny konsidere ladan e i ava kapab ganny deal avek dan nou bann plan waste to energy.           Of course ki teknolozi sa lakonpannyen i vin avek pou minimiz polisyon pou fer sir ki napa  emisyon dan  latmosfer sa i en lot zafer ki nou bezwen get ladan, fer sir ki nou annan the best  standar ler tender i ganny mete.  Me selman mon kapab asir ou ki sa bann zafer plastik pou ganny deal avek si sa i materyalize nou ava vwar bann lezot opsyon mannyer pou recycle plastik.            An term media plan, Onorab nou’n toultan annan en bon lantant avek media houses.  Mon krwar sa zafer lanvironnman i en keksoz ki tou dimoun i kontan, tou dimoun i santi li part of son duty son devwar pou li fer sir ki pou ki i promot nou lanvironnman as much as possible.  Nou annan en bon lantant avek SBC.  Nou annan serten cost saving ki nou fer avek, par egzanp avek SBC.  Nou bann advert pa neseserman advert komersyal, me solman nou bann advert sansibilizasyon kot SBC i ed nou.  Nou annan bann lezot houses osi ki kontan tanzantan nou vin anmenn nou pou vin koz lo bann zafer lanvironnman.          So sipor avek medya nou annan.  Zis nou internally nou bezwen konsolid en pti pe nou plan medya.            Mon’n dir souvandfwa mon annan en pti pe plis ki 1an dan Minister, mon’n dir ki pou dir fodre nou konsolid nou plan medya sirtou lo bann issue polisyon.  Pou mon polisyon, polisyon i enn mon bann target No.(1).  E mon krwar nou devret koz bokou plis lo la.  Koz bokou plis lo la sak fwa mon’n vin Lasanble mon’n koz lo responsabilite pep pou nou redwir polisyon e mon osi mon krwar nou devret pe fer sansibilizasyon lo la.  Mersi bokou Mr Speaker.   MR SPEAKERMersi Minis.  Onorab De Commarmond.   HON CHARLES DE COMMARMONDZis en pti pwen Minis in manke.  Selman i kler Mr Speaker Minis is on top of things, pou mwan  i donn nou en kantite lankourazman, en zenn Minis parey ou pe fer sa kantite byen fantastik.            Mon’n demann en kestyon kot eski i annan lezot single use plastic ki pe ganny servi ki nou pa’n enkli dan okenn ou bann regilasyon avan e dan sa enn la ?  Mersi. MR SPEAKERMersi Onorab.  Minis.

MINISTER WALLACE COSGROW

Mersi Mr Speaker.  Onorab mon’n note mon’n manke dir i annan bann lezot ki ozordi zot ganny trouve dan nou exemption list.  Par egzanp mon a donn enn de legzanp parey bann ziplock reusable bags par egzanp pou pilil pou sandwich.  I annan bann bag ki ganny design pou salte, i annan bann pti sa ki nou apel kabos pou lagrikiltir.  Oli ankor, petet mon pe rod enn ki en pti pe pli relevan bann sak ki ganny manufacture plastik pou eksport pou Airport pou wrap tousala.            So i form parti dan nou exemption list ki nou pe konsider tire dan exemption list e anvoy li dan en barn.  Evantyelman nou anvi annan en Lalwa ki napa vreman exemption list ki nou ariv sa pwen kot nou dir la it’s a total barn on single use plastic.  Mersi bokou Mr Speaker. MR SPEAKERMersi Minis.  Onorab.   HON CHARLES DE COMMARMONDZis dan sa ka mazin tou sa ki nou pe diskite ozordi pou nou pa repet dir ou vini akoz ou’n al fer sa abruptly konmsi annou fer li byen this time better.  Mersi. MR SPEAKERMersi Onorab.  Bon avek sa mon ava remersi Minis avek Ms Gerry pou vin ek nou dan Lasanble bomaten pou donn nou en pe leklersisman lo S.I 31, 2019.  Minis mersi e nou ava eskiz ou dan Lasanble   (MINISTER COSGROW AND HIS DELEGATION WAS EXCUSED FROM THE HOUSE). MR SPEAKERBon nou pou pran en break e nou pou retournen 11er.  Minis pou Finans avek son lekip i deza la pou nou kapab pran S.I 35, 2019.          Mon ava envit bann trainee bann etidyan bann zenn ki pe swiv zot kour kot Defence Academy, e osi bann Manm pou nou pran en dite lo balkon, e an menm tan pou nou kapab enterakte avek sa bann zenn.  Ok Lasanble i Break e nou repran nou travay 11er.   (BREAK) 

MR SPEAKER

Bon nou ava kontinyen nou travay.  Mon- zis avan nou apel Minis pour Finans.  Mon zis prezant en leskiz pour sa pti retar.  Me parey mon ti’n anonse, nou ti pe rankontre avek bann zenn recruits, bann trainee kot Military Academy.  Mon ava demann Parliamentary Reporter pour apel Minis pour-responsab pour Finans avek son lekip.

Bann Manm ki anvi entervenir, i anvi demann kestyon, pa esper dernyen moman.  Akoz i annan en moman kot mon ferm lalis.  E mon pa pour pran okenn lezot kestyon.

Bon mon welcome Minis Maurice Loustau-Lalanne.  Minis responsab pour Finans, Komers, Lenvestisman e Planning Ekonomik.  Minis i akonpannyen par son Special Advisor Ms Sitna Cesar.  E CEO pour Licensing Authority, Mr Andre Pool.  Minister, CEO avek Special Advisor bonzour e welcome dan Lasanble Nasyonal.

Minis parey nou’n fer, nou’n- avek Minis responsab pour Lanvironnman bomaten.  Nou’n envit ou lo demann bann Manm.  Pour donn nou en pti pe plis leksplikasyon.  Zot nide, zot Polisi.  Petet Gouvernman osi, deryer S.I. 35.  E nou ava donn ou en pe letan pour eksplike, pour ou fer en pti statement.  Apre sa bann Manm i ava dan en pozisyon pour kapab demann kestyon, e pour ganny plis leklersisman.  Minister mon ava donn ou la parol.

 

MINISTER MAURICE LOUSTAU-LALANNE

Mersi Mr Speaker.  Mr Speaker, Onorab Leader Lopozisyon, Onorab Leader Zafer Gouvernman, tou Manm Onorab bonzour.

Mr Speaker S.I. 35 pe anmenn Regilasyon konsernan ler ki lalkol i devret ganny vann anba Off-Liquor License, bann diferan License Fees ki i annan pour fer avek serten lavant lalkol.  E osi pour entrodwir ler vann bwar anba Outdoor Entertainment License ki ozordi pa egziste.

Sa bann ler ek nouvo fees i deza dan S.I.  35.  Alor mon pa pour bezwen ki mon repet sa.

Swivan deklarasyon ki Prezidan Larepiblik ti fer lo sa bann size dan son diskour Leta Nou Nasyon pli boner sa lannen 2019.  Kan i ti osi eksplik dega labi lalkol lo nou sosyete, e osi lakantite zanfan anba laz ki pe ganny afekte avek labi lalkol dan tou son dimansyon.

En High Level Komite ti ganny apwente pour konsider sa size e fer bann rekomandasyon neseser.

Lo sa Komite ti annan bann Reprezantan sorti kot Minister Lasante, Lapolis, APDAR, Biro Standar, Biro Attorney Zeneral, Minister Finans, Minister Sosyal ek Lafanmir e Lotorite License Sesel.

Bokou konsiderasyon ti ganny adrese.  E vwala kot sa 3 propozisyon dan sa  S.I.  35 in ganny konsidere.  Sa 3 mezir dan  S.I.  35, i form parti dan sa package parmi lezot mezir ki pour vin dan sa Lasanble byento dan en Prozedlwa pour permet adres sa size labi lalkol.  E osi anpese ki zanfan anba laz i ganny akse fasil ek lalkol dan nou pei.

Mr Speaker fodre note, ki pandan sa dernyen 5an in annan en total 35 marsan ki’n ganny fine pour komet en lofans vann lalkol apre ler.  E osi en ka kont son License in ganny sispann pour vann lalkol anba zanfan, anba laz 18an.

Byensir Mr Speaker.  Sa bann aksyon in ganny pran selman ler in annan levidans kler.

Mr Speaker lo kestyon fees.  Fodre note ki dernyen fwa ki sa fees ti ganny revize, ti an 1998.  E alors sa High Level Komite in deside ki moman in arive pour revwar zot.  Mersi Mr Speaker.

 

MR SPEAKER

Mersi Minis.  Bon nou ava ouver floor pour kestyon.  E premye lo mon lalis, mon annan Onorab Stephen Pillay.

 

HON STEPHEN PILLAY

Mersi Mr Speaker.  Bonzour Minis ek ou delegasyon.  Mr Speaker mon ti a anvi demann Minis lo kote Schedule (a) fees pour bottlers License.  Konbyen nouvo License zot in gannyen depi ler 01 Zanvye ziska la?

Bann- si sa Bottlers License ou a pe koz par bann-parey pti ponm, bann manufacturers of alcohol.  Konmsi konbyen in annan depi zanvye ziska la ki pe benefisye ki pa ganny sarze sa nouvo pri?  E mon pa pe koz renewal.  Mon pe koz new Licenses from 1st of January.  Mersi Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Manm Onorab.  Mon konfirmen depi Zanvye ziska la napa nouvo License.  E parey nou konnen sa nouvo S.I.  i komans le 01 Zen 2019.  Mersi Mr Speaker.

 

MR SPEAKER

Mersi Minis.  Onorab Egbert Aglae.

 

HON EGBERT AGLAE

Mersi Mr Chair.  Mr Speaker.  Bonzour Minis ek ou delegasyon.  Minis, mon kestyon dan sa SI, i annan sa bann fees ki pe ganny entrodwir, nou new fees on the increase. 

Mon ti a kontan konnen, ki rasyonalite ki zot in servi pour zot kapab zis increase sa bann fees?  Akoz i annan ou a dir zis in azout en zero avek.  E i annan letan ou kalkile 10 fwa.  Eski ti pa en fason petet pour konsider en logmantasyon dan fees?  Akoz nou bezwen les marsan.

Lo konsonmater mon konpran.  Me selman pour nou kapab enplimant en fees at en rate parey zot in fer la.  Eski bann konsiltasyon in ganny fer neseser pour fer sir ki sa bann marsan ki retailers ozordi ki pe konplent, zot pa vwar zot pe ganny afekte desito avek sa bann kalite fees parey?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Lo kote konsiltasyon, mannyer mon konpran.  Wi in annan plizyer konsiltasyon ki’n ganny fer.

Annefe APDAR in organiz omwen 2 sa bann konsiltasyon.  Kot menm bann retailer’s ti ganny envite pour partisipe.  So in annan sa diskisyon ki’n ganny fer avek zot.

E mon konpran ou konsern ki fees in ogmante.  Me bi ki fees osi in ogmante.  Si ozordi nou annan nou 400 sote Off-Liquor Licenses ki’n ganny donnen dan pei.  Mon krwar bi a lonterm, se fer sir ki nou redwir, plito ki nou ogmant lavant lalkol atraver sa bann retailers Off-Liquor License.  Mersi Mr Speaker.

 

MR SPEAKER

Mersi Minis.  Onorab Ferrari.

 

HON JEAN-FRANÇOIS FERRARI

Mersi Mr Speaker.  Mr Speaker mon annan 3 kestyon.  Premyerman Mr Speaker mon ti a kontan ki Minis i kapab eksplik nou rational dan redwir ler ki ou kapab vann lakol.  E sirtou mon krwar, pas li an zeneral depi Lendi ziska Sanmdi depi 11er ziska 1er edmi apre midi.

I enportan pour nou konpran ki Minister oubyen Licensing Authority, oubyen Minister Lasante i annan laprev ki sa peryod ki pe ganny determinen koman en- ki pe azoute koman, ou pa ganny drwa vann lalkol dan sa peryod.  I baze lo bann fe reel.

Akoz mon pe dir sa Minis?  I annan 2 kategori, i annan 2 kategori dimoun, tou lede lye avek tourism ki santi poudir i pour afekte zot dan en fason serye.

Premyerman.  Tou bann dimoun ki pe al charter, bann keksoz koumsa.  Zot-letan pour zot pran en pe keksoz, aste en pe keksoz, koste avek La Digue, oubyen koste avek Praslin al rod detrwa boutey diven pour vann avek zot kliyan.  Oubyen pour zot kliyan rod enn de boutey diven pour dezennen, zot pa pour kapab fer li.  E sa kliyan li menm li osi i pa pour kapab fer li.

Nou annan- Minis ou konnen akoz ou annan bokou leksperyans dan touris.  Ki nou annan en kantite self-catering establishments ki’n vini sa bann dernyen lannen.  E sa bann dimoun la, zot ki – sa bann touris se zot ki bezwen akse avek laboutik pour zot aste bann keksoz pour zot kapab servi pour zot manze e bwar.  Donk sa i en group ki nou santi poudir i -zot kapab vreman ganny afekte.  E pei i kapab perdi reveni.

E vi ki nou en pei touristik- konmsi i en pe- dan en pei touristik i en pe pa normal konmsi ki ou dir avek en touris ‘be non tyonbo en kou, ou ava ou labyer oubyen ou boutey diven 1er edmi.  Pour le moman bwar en pe delo, oubyen pran en juice’.

Konmsi mon pe met sa en pti pe an konfizyon devan ou, pour zot kapab dir nou.  Akoz zot in santi – lo ki baz zot in santi poudir i pour fer en diferans par pous ler lavant lalkol dan bann laboutik sorti 11er pour vin 1er edmi apremidi?  Sa i mon kestyon.

Dezyenm kestyon.  Minis fees pour baka, toddy avek lapire.  Sa wikenn mon ti anmenn mon manman lopital Anse Royale e mon ti vwar en ka.  En pasyan ki annan en labonnman dan lopital Anse Royale.  Akoz tou le 2 zour i vini, i en konsonmater lapire.  E tou le 2 zour i vini kas en pe keksoz, i lager ek bann ners, i ganny bann kriz, i sali sa lili avek tou sa ki ou kapab mazinen ler in bwar baka e apre i ganny admit lopital.  E sa i montre klerman ki sa bann lalkol artizanal, se souvan zot ki annan en pe- ki annan plis lenpak lo bann konsonmater.  Bann lenpak fizik lo bann konsonmater.

E finalman.  Nou pe vwar poudir zot License i R50 – R15.  Mon mwan ti ava’n ekspekte ki zot ti’n fer en zefor dan sa bann processing fees – ok.  Pour sey ankouraz bann dimoun pour bouz ver bann lalkol en pe pli bon kalite, dan bann landrwa pli bon pour konsonm sa bann keksoz.

Me la mon krwar poudir- mon pa konnen si i en desizyon Kiltirel.  Me la mon krwar poudir napa en zefor ki’n ganny fer dan sa direksyon la.  I ankor tre bon marse, tre fasil pour konsonm sa bann kalite lalkol artizanal.  Sa i mon premye keksoz.

Mon 2enm kestyon.  Mon 3enm kestyon i konsern transfer of License to other premises.  Mon ti a kontan demann Minis si dan sa zefor ki zot in fer-e nou rekonnet poudir i annan en zefor ki pe ganny fer pour atak sa problenm.  Eski zot pour vin avek en serten Regilasyon ki determinen kote ou kapab pe vann lakol?

Par egzanp 20pye avek en lekol?  Eski i rezonnab pour ou vann lakol?  20met, 200met.  Konmsi- e ler ou transfer, eski sa transfer i otomatik?

Kekfwa i annan en landrwa ki i en pe lwen ki lavant pa tro bon.  Selman nou pe sey anmenn li pli pre kot ou kapab bar manrmay, kot ou kapab bar bann dimoun pli pre lo gran rout.

So ler ou transfer, eski i zis en transfer koumsa?  Zis apply en transfer?  Oubyen i annan bann kondisyon ki atase avek sa transfer?  Pour fer sir ki i pa pe anmenn sa problenm ankor pli pre avek bann dimoun ki pli vilnerab.  Donk la mon 3 kestyon Mr Speaker.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab lo premye kestyon.  Wi ler in ganny redwir par 2erdtan.  Sorti 11er 30 pour vin 1er 30 bann zour lasemenn, inikman.

Parkont vandredi, sanmdi ek dimans ler pa’n sanz ditou.  In reste parey.

Le bi prensipal.  Se fer sir ki lavant lalkol i ganny – dan en serten fason kontrole- akoz tou sa bann zour lasemenn, se bann zour travay.

Nou oule ki dimoun i antre dan travay pa anba lenfliyans lalkol.  So se pour kwa ki sa peryod in ganny redwir.

Me parey mon pe dir ou dan wikenn nou konnen i bezwen annan aktivite, i bezwen annan lezot keksoz neseser.  E nou pa’n sanz ditou sa ler.  Setadir 8er edmi bomaten i kontinyen vandredi, sanmdi, dimans parey.

An sa ki konsern touris.  Zot annan zis sa 2erdtan ki nou pe koz lo la, annefe.  Akoz si zot pe al lo en ekskirsyon, zot pa ti pour kapab aste zot lalkol 7er bomaten, 8er bomaten, 9er bomaten avan zot mont lo zot bato zot al lapes or whatever it is.  Tou le fason.  Amwen ki Enforcement pa bon.

Me zot kapab aste an avans.  Enn fwa ki ou sanze, pour annan en peryod ki ou pour bezwen adapte.  Nou bezwen kominike fer sir ki zot adapte.

E dan en self-catering si ou aste- ou annan en labitid al desann kot magazen pour aste 2 labyer.  Be ou aste en demi crate ou met la dan ou self-catering ou enjoy.  So ou bezwen aziste.  Mon mwan pa krwar ki i pour annan en gran lefe konm tel.  Dimoun pour bezwen sanz zot labitid.  Me se sa bi prensipal.  Se redwir sa konsonmasyon lalkol.

Kot i konsern kalou, baka ek lapire.  Wi processing fee in reste parey, pa’n ganny sanzman.  Me parkont pour ou ganny sa License pour ou tir kalou, vann kalou, baka ek lapire.  Li in ogmante.

In sorti- dan ka kalou R50 in mont R100.  Dan ka baka in sorti 400 in al R1, 000.  E dan ka lapire in sorti R100 pour li osi vin R1, 000 anba sa S.I.

Alor, lo trwazyenm kestyon.  Wi mon krwar ki parey mon dir dan mwan statement.  I pour annan lezot mezir ki pe vini.  Sa SI i zis komansman e i aplikab a parti le 1 zen.

Me pour annan en Polisi ki pe ganny elabore.  E pour annan en Prozedlwa ki pour vin devan Lasanble Alcohol Drinks Policy Bill ki’n deza mon krwar ganny pibliye.  E se li ki pour sa framework pour nou kontinyen angaz nou pour redwir sa lenpak lalkol.

E la nou pour koz lo par egzanp advertising.  E la osi nou santi ki advertising i en problenm ozordi mannyer i ete.

Nou pour koz lo ki mannyer sa lalkol i ganny vann dan bann magazen, dan bann sipermarse, dan bann magazen annou dir Kreol.  Kot nou konnen ki mannyer lavant i pase ozordi.  E tousala pour vin dan bann Regilasyon ki pour swiv.  Me sa pour vin devan Lasanble pli tar.

So pour annan osi en peryod kot- e Minis Lasante mon krwar kan in fer meeting avek Retailers Association par egzanp.  In demann zot pour soumet zot rekomandasyon.  E i ankor pe espere pour li regarde.

E kan i ava- nou ava annan sa draft Regulation lo par egzanp advertising, lo lavant li menm ki mannyer i pour ganny fer fizikman.  Bann propozisyon i ava ganny diskite avek zot avan ler ki desizyon final i ganny pran.  Mersi Mr Speaker.

 

MR SPEAKER

Mersi Minis.  Vitman Onorab Ferrari.

 

HON JEAN-FRANÇOIS FERRARI

Wi zis en pti kestyon Minis.  Ou kapab konfirmen poudir tou sa bann Regilasyon ki devan nou la dan S.I.  35 i pa afekte bann wholesalers?  Bann wholesaler’s zot kapab distribye zot bann prodwir dan bann retail outlets.  Selman se bann retailer’s ki ganny afekte.  Ok.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Wi efektivman i pa afekte wholesalers.  Me zis mon ti a kontan presize, an vi ou’n poz mon sa kestyon ki wholesalers i sipoze vann wholesale.  Ou pa sipoze nobou vin la, aste 2 boutey diven, ale.  Ou sipoze aste ou en kartron diven ale.

Oubyen menm ki premises i kapab the same premises en.  Wholesale ek retail – i annan serten ka kot i pas dan menm premises.

So sa fodre nou ganny en bon Enforcement.  Me solman i pa afekte zot parey ou’n propoze. Wi.  Mersi.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker.  Bonzour Minis ek ou bann zofisye.  Minis sa ler, konsernan sa ler lalkol.  Avan ler nou sanz sa ler nou ti deza annan en ler.  E ki garanti ki ou Minister i krwar sa voyaz sa ler, Enforcement pour pli a la oter ki avan?

Akoz si ou gete.  Si enforcement ti a la oter, posibleman nou pa ti pour bezwen sanz sa ler.  Be la nou’n sanze.  Kwa- ki garanti ou annan ki Enforcement pour pli a la oter ki i ete ozordi?  Sa enn.

Mon dezyenm kestyon.  Se ki opsyon nou pour donn bann marsan ki dan bann commercial complex?  Akoz sa i en bann lespas ki’n deza- zot in deza confine dan en lespas ki zot pa pour kapab ganny en lot bout par egzanp pour zot met sa lalkol separe.

Ki konsiderasyon i annan pour sa bann marsan ki dan sa kalite sityasyon?

Apre pour bann marsan ki zot, zot dan bann stand-alone laboutik ki zot osi zot pa kapab fer sa akoz propriyeter kot lespas i ete zot pa kapab gannyen.  Ki konsiderasyon pour annan pour sa bann dimoun?  Eski zot License i pour an zwe la?  Oubyen i annan serten konsiderasyon akoz i pa zot fot ki zot pa kapab meet sa requirements?  Sa dezyenm.

Apre dernyen.  Bann nouvo marsan ki pour apply pour License apre ki sa S.I.  in ganny aprouve, si i ganny aprouve.  Eski i annan-Gouvernman pe mazin – sa bann marsan pour bezwen annan sa 2 opsyon avan ki License i donnen kot zot annan en landrwa pour lalkol?  Apre en landrwa pour bann lezot prodwir?  Eski License pour ganny donnen lo sa baz?

Akoz i enportan okenn dimoun ki pe mazin fer biznes fitir, i konsyan ki mannyer sa pour marse as far ki License i konsernen.  Mersi.

 

MR SPEAKER

Mersi Onorab Churchill Gill.  Zis pour en pti klarifikasyon.  Mon krwar sa S.I.  in fini pran lefe depi le 01 Zen.  Se sa ki mon pe vwar.

 

HON CHURCHILL GILL

Zisteman, alors Minis ou kapab eklersi pour sa bann dimoun ki pe ekout mon.  Mersi.

 

MR SPEAKER

Nou, nou pe interacte ozordi pour nou ganny plis leksplikasyon.  Me commencement date i 01 Zen.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab lo sa kestyon Enforcement ki ou’n fer resorti i en kestyon kle.  Mon menm letan mwan ti asiste sa High Level Committee kan nou ti pran sa desizyon lo sa bann ler.  Se sa pwen ki mon ti fer resorti.  Akoz san proper Enforcement, pa vo lapenn.

E parey mon’n fer dan mon lentrodiksyon.  Sa 35 ka dan 5an.  Les mon a presize ki sa se travay bann lenspekter Licensing Authority.

I montre ou ki fodre nou pli serye avek Enforcement e nou pour bezwen fer sir.   E mon mwan pour donn ou mon langazman ki si nou oule vwar en diferans dan sa zafer konsonmasyon lalkol an ekse.  Nou tou nou bezwen pran nou responsabilite.  Nou tou.

Parey ou konnen osi ti annan en zenn madanm- non en zanfan lekol ki ti vin dan sa Lasanble en novanm 2017.  Premye fwa i ti adres sa Lasanble.  E o Non bann etidyan dan Sesel, lo son non personnel i ti donn Lasanble, i ti donn nou en picture sityasyon.

I ti menm donn bann legzanp, e se sa ki nou’n ekoute.  Se sa ki nou oule fer en sanzman.  E san fer sir ki nou pa enforce, nou pour les sa fir, nou pour pous sa fir pour perdi lespwar.  E nou tou nou pour perdi lespwar.

Donk mon pe koz koumsa.  Akoz mon osi mwan vreman konvenki ki fodre i annan en diferans.  E fodre ki nou annan laprev.  Ozordi tou dimoun i servi sa mobile.  Nek zot tir portre, zot WhatsApp li, zot sepa ki zot fer avek li.  Be la osi i en ka, ed nou.  Akoz nou bezwen levidans pour nou deal avek sa bann sityasyon proper Enforcement.  E si mon’n wrong lo la, forgive me.

Lo kote premises.  Sa, e sa nouvo Bill, Alcohol Control Bill ki son framework parey mon’n eksplike.  Lentansyon Gouvernman, se fer sir ki sa i ganny aprouve parey nou bezwen swiv prosedir pour li ganny aprouve.  E i ganny met an aplikasyon a parti le 1 Zanvye 2020.

E nou, nou oule ki tou dimoun i ganny konsilte.  Nou oule ki bann Lazans Gouvernman ek bann Departman ki konsernen direkteman avek sa ka, li osi i ganny enplike.  E i servi en sistenm fast track pour fer sir ki enn fwa ki dan Regilasyon, si nou dakor ki fodre annan en separasyon.  Dan tou ka ki mon pa krwar pour koumsa.  Ki Planning Authority, Land Use, SLA, tou sa bann Lazans i travay ansanm pour fast track sa modifikasyon pour donn nouvo License ki pour reflekte nouvo Regilasyon.

Akoz nou pa kapab fer zis en kote.  Tousala ou bezwen travay ansanm.  So mon konfirmen ki sa- si sa Lalwa i pase isi.  Dat lenplimantasyon par Gouvernman i propoze pour le 1 zanvye 2020.  E pour annan konsiltasyon lo sa bann pwen ki mon’n fer resorti.  Mersi Mr Speaker.

 

MR SPEAKER

Mersi Minis.  Onorab Terence Mondon.

 

HON TERENCE MONDON

Mersi Mr Speaker.  Mr Speaker mon anvi demann Minis.  Eski par lefe ki sa ler lavant lalkol ti ganny entrodwir, si mon pa tronpe dan 5enm Lasanble.  Pandan sa letan, eski zot in fer okenn letid pour vwar si in annan sanzman lo nivo konsonmasyon lakol?

Eski i annan sanzman dan konportman sa segment nou popilasyon ki pe consume lalkol?  E si i annan okenn sanzman in annan dan lakantite lensidan ki relye avek lalkol?

Par egzanp ka aksidan, bann ka krim ki relye avek lalkol.  Eski zot in fer en letid apre ki zot entrodwir sa ler lavant lalkol pour zot etablir kot zot ete ozordi avan ki zot met sa nouvo Regilasyon?

E mon anvi vwar, eski zot desizyon i baze lo levidans bann resers ki zot in fer?  Eski Minis i kapab eklersi nou.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pour ou kestyon.  Onorab parey ou konnen, Minis Lasante mon krwar in osi vin dan Lasanble prezant sa rapor lo lalkol.  Sirtou dan lekol, lalkol avek bann zenn ki’n ganny fer pour 2015.

E deza la, sa rapor i montre ki 48poursan manrmay lekol ozordi in deza konsonm lalkol.  So sa sif i alarman.  Ozordi si nou pour fer li pour 2019, mon pa konnen ki i pour ete.  Me nou pe servi levidans ki nou annan.

E an 2015 mon repete, ti 48poursan zanfan lekol in deza konsonm lalkol.  Nou tou nou adilt, nou kapab konpran ki mannyer zanfan lekol i ganny akse pour li konsonm lalkol.  Nou konnen.  E se sa ki nou pe sey fer.

Nou pe sey entrodwir o frir a mezir en sistenm pour fer sa redwir.  Nou konnen i annan bann ka aksidan lo semen osi lye a lalkol.

Nou konnen i annan ka labi seksyel ki lye a lalkol.  Konbyen si zis 1, si 2, si 10 mon napa sif avek mwan.  Me mon asire nou kapab fer zot ganny sa bann statistik.  Akoz in annan en Komite ki’n travay lo la.

Sa Komite parey mon’n dir ou avek sa diferan Lazans.  In fer plizyer meeting, plizyer rankont, in fer plizyer rapor avek sa action group lo lalkol.

E wi mon krwar tou levidans ki nou annan i montre en deteryorasyon dan sityasyon plito ki en amelyorasyon.  Mersi Mr Speaker.

 

MR SPEAKER

Mersi Minis.  Onorab Mondon.

 

HON TERENCE MONDON

Zis Mr Speaker.  Si Minis parey in dir, i kapab fer nou ganny sa bann lenformasyon, bann resers ki zot in fer, pour nou Lasanble.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Napa problenm Mr Speaker.  Mon ava fer sir zot gannyen.

 

MR SPEAKER

Mersi Minis.  Onorab Waven William.

 

HON WAVEN WILLIAM

Mersi Mr Speaker.  Mr Speaker mon anvi demann Minis.  Lefe ki ozordi nou vwar nou dan sa sityasyon ozordi.  Eski Minis i kapab dir avek sa Lasanble, si dapre li i krwar poudir bann lezot mezir ki nou ti’n devret petet fer pli byen oparavan vizavi zwenn bann target?

Eski dapre li i krwar nou’n fail lo sa bann mezir pour anpes escalation konsonmasyon lalkol, e lefe ki i annan e lenpak ki i annan lo lafanmir?

Eski i krwar petet i annan- petet sa demann pour revwar lenplikasyon ouswa bann mezir atraver sa SI ki’n ganny anmennen?

Par lefe ki enn.  Sa eleman konsiltasyon.  Minis in dir zot ankor pe esper serten bann prezantasyon sorti bann- kot bann lezot stakeholders.

E Minis mon santi poudir ki sa S.I.  in vin koman en shortcut pour nou achieve sa means ki sa S.I.  i anvi fer.

Me mon santi poudir enn.  Lefe ki konsiltasyon, konsiltasyon i en mo, i en dezir ki tou bann stakeholders pe anvi.  Me i montre poudir sa i ankor enn nou febles.

Epi sa Enforcement.  Eski Minis pa i krwar poudir petet modalité ki nou pe servi- e sa bann diferan Lazans petet i mank en pti pe sa kordinasyon vizavi bann mezir oparavan kot Enforcement pa’n ganny vreman administre byen?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  An zeneral mon ava dakor avek ou Onorab ki efektivman lo Enforcement nou ankor weak pour divers rezon.  Mon pa pour sit zot la.   E fodre ki nou sanz lafason ki nou fer Enforcement.

An sa ki konsern in vin koman en sok.  Mon pa partaz sa pwennvi.  Akoz mon konnen ki nou’n fer bokou konsiltasyon lo sa bann ler.

En keksoz ki nou pa’n koz lo par egzanp, se sa outdoor entertainment ziska ozordi.  Par le pase nou’n lese outdoor entertainment.

E menm lavant lalkol dan sityasyon outdoor entertainment, ozordi Lalwa pa permet strikteman.  Me nou’n kontinyen permet li.  Me ozordi nou anmenn en ler ki nou dir i kapab ganny fer.  Akoz fodre nou komans kontrole.

Akoz par le pase i ti ganny deside par Komisyoner Lapolis, kote ou pour fer ou outdoor entertainment?  Ke ler ou pour komanse?  Ke ler ou pour fini?  E lavant lalkol li ti napa regleman.  Ou ti kapab vann lalkol anytime.  E se akoz sa ou vwar nou’n met en ler ladan.  Pour nou sey kontrol li anba en Lalwa, en Regilasyon.  E fer sir ki prezan dimoun i enforce sa.

Akoz i pa en sok?  Akoz nou’n diskite.  Mannyer mon konpran in annan konsiltasyon avek Lasosyasyon bann entertainers and so on.

Zot, zot ti ou le par egzanp fer zot aktivite ziska 3er bomaten.  Gouvernman in dir zot non, pa pour kapab fer ziska 3er bomaten.  Zot a fer li ziska 2er bomaten.  Me ou ava vann ou lalkol ziska 1er bomaten.       Ou ava arete 1erdtan avan ou entertainment i terminen.  So nou’n met li dan en Regilasyon dan sa S.I.  35.  Pour nou sey annan bann paramet pour nou kapab kontrol en pe sityasyon.

So mon dakor avek ou.  Par le pase i sanble mwan zis nou’n les ale.  Nou’n fer, nou’n donn permisyon menm si ti annan en connotation ki pa ti Legal.  Mersi Mr Speaker.

 

MR SPEAKER

Mersi Minis.  Onorab William.

 

HON WAVEN WILLIAM

Mersi Mr Speaker.  Mr Speaker mon anvi demann Minis.  Lefe ki in tous lo sa outdoor activitySo Minis i vedir ki i pour annan en lefe lo bann kalite aktivite ki ganny fer o nivo distrik?

Par egzanp tou bann distrik ozordi bann- i annan bann diferan progranm.  E nou pe vwar poudir the ease of fer sa bann keksoz i pour vin en pti pe difisil e i pour anmenn en kou avek.

E mon mwan anvi konnen si ou Minister e osi bann lezot Minister pour realize ki enn.  Nou pour bezwen bann –petet kontribisyon bidze adisyonnel.

Akoz enn.  Se ki lo kote Administrasyon Distrik par egzanp, sa resours ki nou pe gannyen ozordi, e sa demann pour fer aktivite i vreman limite.

Alors mon pe santi poudir pour annan en lefe negativ anver bann kalite progranm ki nou pour kapab fer ouswa bann lezot dimoun ki anvi fer serten aktivite pour egey distrik.  Parey zot dir anmenn bann zenn, tir zot o bor semen.  Me i pour annan en lefe negativ lo sa bann kalite aktivite.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mr Speaker zis mon ti a kontan rapel Onorab ki efektivman sa SI i pe deal zis avek lavant lalkol.  So si ou pour annan en aktivite kot ou oule absoliman vann lalkol, nou pe dir ou kan ou kapab vann lalkol, ziska ke ler ou kapab vann lalkol e pour ou ganny en License konbyen i pour kout ou pour ou vann lalkol.  Ou kapab annan aktivite dan distrik, napa problenm.  Me si ou oule lalkol, ou pour bezwen pas atraver sa SI 35.  Mersi Mr Speaker.

 

MR SPEAKER

Mersi Minis.  Onorab Norbert Loizeau.

 

HON NORBERT LOIZEAU

Mersi Mr Speaker.  Bonzour Minis.  Mr Speaker mon konnen Minis mannyer in eksplike.  Sa sanzman ler i pour ede pour koup en pe konsonmasyon lalkol parmi la popilasyon.

Mon anvi demann Minis, vi ki aktyelman dan Sesel an antye i annan en bann group dimoun en pe pli vilnerab ki zot, zot pe konsonm bann lalkol parey pti ponm, energy vodka.  Konmsi mon anvi demann Minis ki Minister – ou Minister Finans ansanm avek Minister Lasante, Bureau of Standards pe fer pour fer sir ki sa bann lalkol lokal ki mon’n koz lo la, la, i meet sa norm enternasyonal kot sa kantite lalkol ki’n ganny propoze i annan dan sa boutey i vreman sa limit ki i annan dan sa boutey, dan sa pti topet?

Apre Minis.  Akoz en keksoz.  I annan en lalkol energy vodka li i annan B16, B18.  Ki mannyer lalkol konmsi ki i annan tou sa bann keksoz ladan?  Lalkol i lalkol.  Li i annan B16, B19, B25 sepa ki zafer lo la.  Sa i mon kestyon Minis.  Mersi.

Apre Minis, en lot pti keksoz an plis ankor.  Parey nou konnen Seybrew nou konnen.  Seybrew li i konnen ki kantite son labyer i fer.  Son volume.  Eski dan sa menm laliny, eski zot pe vwar zot osi sa bann pti bwar, bann pti prodiksyon lokal la – eski zot pe vwar osi ki kantite volume ki pe ganny fer ki pe al dan-konmsi pour anmas sa ki pe al dan konsonmasyon bann dimoun lo market?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pour ou kestyon.  Onorab an sa ki konsern manufacturing.  Lentansyon se efektivman met en moratwar pour nou anpes pour en peryod letan nouvo biznes antre dan fabrikasyon lalkol.

Me an menm tan nou oule annan Regilasyon.  E parey ou konnen Regilasyon pour lalkol i tonm anba Food Act.  E i neseserman Minis ki pour responsab pour sa, se Minis- Minister Lasante.

Donk deza i pe ganny atribye avek Minister Lasante.  E lide se fer sir ki tou fabrikasyon lalkol evantyelman- e la mon pe koz ou menm lo baka, mon pe koz ou menm lo lapire i pour bezwen annan en label e i met son bann zengredyen, son bann konteni, son lalkol eksetera lo la.

Sa, sa ki nou oule fer evantyelman.  Me nou pour fer li dousman o frir a mezir nou ale.  So i pour annan dan sa Alcohol Control Bill ki pour vini.  Bann provizyon pour permet annan Regilasyon pour nou adres sa size o frir e an mezir, so sa se le bi.

E pa bliye osi ki nou annan SBS, ki li osi i annan lekipman ki kapab fer serten tes ozordi e i pour bezwen ekipe pour fer davantaz bann tes pour fer sir ki standar lalkol ki ganny fabrike lokal i lo sa standar ki pour ganny etabli anba sa Alcohol and Drinks Policy.  Mersi Mr Speaker.

 

MR SPEAKER

Mersi Minis.  Onorab Loizeau.

 

HON NORBERT LOIZEAU

Mr Speaker mon anvi demann Minis.  Eski ou konnen ki kantite volume zot koman Minister Finans, vi ki zot pe anmas tax lo sa bann lalkol?  Eski zot konnen apepre bann-ki volume ki pe ganny fer, ki pe ganny met deor?  Parey pour Seybrew en legzanp.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Eskiz mon Onorab mon’n bliye sa dezyenm kestyon.  Avek mon la mwan napa.  Selman mon a kapab rode, mon a fer ou gannyen.

 

MR SPEAKER

Mersi Minis.  Onorab Paul Ernesta.

 

HON PAUL ERNESTA

Mersi Mr Speaker.  Mr Speaker bonzour.  Minis ek ou delegasyon bonzour.  Tou dimoun a lekout, tou nou bann Koleg bonzour.

Mr Speaker mon kestyon i konm swivan.  Mon’n vwar lo dernyen paz kot sa ban, sa Penalti ki zot mete pour bann offender i 20, 000.  First time offender avek 6 mwan prizon e 50, 000 for the second time offender. 

Avek sa sityasyon ki nou annan.  Eski zot pa krwar zot merit revwar sa Penalti ki fer li vin pli strik ki dimoun kapab respekte?

Apre dezyenmman.  Nou’n koz- ou’n koz lo sa Seksyon Enforcement.  Ou’n dir pli boner ki sa i bann case ki’n ganny trouve zis par Seksyon Licensing.  I napa serten travay synchroniser ki ganny fer avek Lapolis pour fer sir ki- akoz 35 ka dan 5an is not sufficient baze lo lakantite License Liquor ki nou annan dan pei.

Eski zot pe vwar sa travay pour fer sir ki sa i ganny ogmante, e vreman ki Lalwa i ganny aplike dan sa demars?  Mersi Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab la mon pe zis rapidman konsilte sa Bill, sa Draft Bill, Alcohol ek Drinks Control Bill 2019.  E wi lofans pe ganny propoze pour ogmante.

Substantiellement sorti 200, 000 pour vin 400, 000.  Son premye lofans pour vin 200, 000.  E subsequent offences pour vin R400, 000.  Sa pour en kategori.

E en lot kategori pour vin 100,000.  E subsequent pour vin 200, 000.  So i annan en propozisyon e zot ava diskite letan Bill i vin devan Lasanble an sa ki konsern fines.

Wi mon – lo Enforcement parey mon’n dir, nou kapab tackle li diferan fason.  E mon krwar ki deplizanpli bann Lazans Gouvernman i bezwen travay an konser pour arsiv le bi.  E nou annan diferan fason pour nou fer li.

Mon menm mon mont La Misère diferan ler.  E mon konnen i annan 7 magazen an montan.  Enn ler mon vwar enn i ouver i ferm on time.  Me sennla par anler li, i pa ferm on time li.  Be ki mon mwan fer?  Mon pran mon telefonn mon telefonn en dimoun mon bezwen raport li sa boug mwan.  Akoz si mon pour antre dan sa magazen mon pa konnen ki riske arive.  Ou ganny mon?  Me mon krwar mon donn sa legzanp akoz se sa ki nou bezwen fer nou tou pour fer sir ki sa boutikye i ferm son magazen a ler.  I respekte ler.

Akoz enn ler i dir ou si 2 in fermen anba, lavant i pli bon pli anler.  E nou ale menm.  So fodre nou sanz sa mantalite.

E mon krwar deplizanpli nou bezwen travay an konsiltasyon an konser ek kanmarad.  I pa normal ki i zis en Lazans i fer tou louvraz, e en lot Lazans kantmenm ou raporte, apre i pa fer nanryen.  Mersi Mr Speaker.

 

MR SPEAKER

Mersi Minis.  Minis petet zis lo sa kestyon.  Eski Licensing ler i issue en License ek en retailer i stipulate ladan ki i annan en ler fermen?  Akoz dizon lalkol i aret vann 9er diswar.  Sa laboutik petet i a dir ou i bezwen reste ouver pour li vann lay, zonnyon, zenzanm, lantir 11er diswar, 1 er bomaten, ki nou konnen i pe vann lalkol.

Eski si i devret- si i aret vann lalkol 9er diswar, son laboutik osi devret fermen 9er diswar.  Minister, dan menm laliny avek kestyon Onorab Ernesta.  Minister.

 

MINISTER MAURICE LOUSTAU-LALANNE

Wi mersi Mr Speaker.  Mr Speaker wi mon krwar si ou vann lalkol, ou annan en kondisyon ki dir ou.  Si zour lasemenn ou bezwen aret vann bwar 9er.  Me ou kapab vann lantir, ou kapab vann diri and so on and so forth akoz napa en ler frenm en magazen ozordi.  Ou konpran?  Letan sa boug i fatige, i fermen i ale.  Me ozordi napa en ler pour en magazen fermen.  I annan en ler pour li aret vann bwar.  Se sa ki S.I. 35 pe met lanfaz lo la.  E wi sa kondisyon pour ganny mete dan son License.  Mersi.

 

MR SPEAKER

Mersi Minis.  Onorab Vidot.

 

HON AUDREY VIDOT

Mersi Mr Speaker.  Minis eski i posib pour ou eklersi byen.  Dan ou statement parey ou ti’n mansyonnen i annan sa 35 fine.  Eski i totalman Zofisye Licensing ki’n kouver sa 35- ki’n lo sa Enforcement pour deal avek sa 35 ka?  Oubyen i annan parmi ki zot in ganny sipor Lapolis?  Eklersi sa.

E dezyenmman.  Zisteman lo sa lentansyon pour met plis lanfaz lo Enforcement.  Eski ou pe dir nou ki nou ekspekte vwar dan bidze en revizyon lo poursantaz ki zot pe met – finansman zot pe mete pour kapab annan plis resours pour sa bann Lotorite petet Licensing kapab fer plis enforcement?

E petet osi baze lo premye larepons konsernan Lapolis, si vreman i pe zwe en rol li osi?  Akoz mon krwar si zot ti pe fer patrol pour vwar en laboutik ouver apre 9er.  Zot ti pour konnen si i ti pe vann diri oubyen i pe vann lalkol.  Mersi Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi mersi Mr Speaker.  Mersi Onorab.  Wi mon konfirmen sa 35 ka i pirman bann Lenspekter SLA ki’n fer sa bann akt disipliner mannyer Lalwa i demande lo sa bann ka ki’n ganny infringe pandan sa dernyen 5an.

An sa ki konsern met plis resours.  Definitivman mon mwan pare pour met plis resours si nou achieve nou bi prensipal.  Alor, par ler i pa tro neseser osi zis met plis larzan or whatever it is. I en fason reorganiz nou pour nou annan sa lefe ki nou pe rode.  E mon krwar i fasil pour nou reorganiz nou, pour nou annan sa lefe ki nou pe rode.  Akoz par ler nou konportman nou menm pa bon.  E i kre konmsi en lese ale.  So si nou koriz sa, i pa demann larzan pour korize sa.  Nou kapab attend sa bi pour konmanse.

E wi mon demande osi ki dan tou ka kot swa en lenspekter SLA oubyen en Zofisye Lapolis nou bezwen annan bann fe, nou bezwen annan levidans ki kler, ki konkret pour nou nobou conclude sa ka.

Akoz ozordi si ou anmenn en ka Ankour, fodre ou annan son levidans, fodre ou protez ou levidans, fodre ou kapab montre ou levidans pour ou nobou ganny en conviction.  So sa se osi bann keksoz ki nou bezwen fer sir ki letan nou fer sa Enforcement, nou fer li korekteman pour nobou kapab ganny sa finalite ki nou pe rode.  Mersi Mr Speaker.

 

MR SPEAKER

Mersi Minis.  Onorab Esparon.

 

HON REGINA ESPARON

Mersi Mr Speaker.  Mr Speaker eski Minis i kapab dir nou dan sa bann- annefe dan sa SI la, kot ki annan bann License pour lapire la ok.  Ler mon pe ekout Minis i pe dir nou poudir lapire osi pour annan label – mon pa konnen si label pour met lo lanmok mwan.  Ok parske lapire i vann par lanmok.  Mannyer nou pour met label lo la?

Epi dezyenmman.  Lo kote donn License pour lapire.  Eski zot pe anvizaze kote Licensing pour annan en cap, pou dir la ok nou’n ganny nou 300 laplikasyon, nou annan 300 outlet ki pe vann lapire dan pei.  E la i – nou annan nou en ka i ase.

Oubyen sak fwa i annan eleksyon, nou pour vwar zot pe donn ankor en pe, pe donn ankor en pe, pe donn ankor en pe parey i le ka.  Premye kestyon.

Dezyenmman:  Dezyenmman letan mon pe regard lo pwen 9 temporary License ki R100.  Epi pli ba nou pe regard outdoor entertainment ki R1, 000.  Mon kestyon se- mon klarifikasyon se, si ou pe fer en levennman outdoor.  Eski ou pour kapab apply pour sa temporary License zis pour ou vann ou lalkol?  Oubyen sa R1, 000 pour the whole aktivite?  Me selman nou pe met li anba License vann lalkol?

En pe leklersisman.  Mon pa konnen Minis si ou’n konpran mon 2enm kestyon.  Nou kapab ganny en temporary License.  Mon konnen parey letan ou pe fer en bar oubyen en keksoz koumsa, R100 pour ou vann lalkol sa zour.  Me selman la letan mon pe regarde anba outdoor entertainment, eski nou pe dir sa R1, 000 pour the whole activity ki enkli son bann-vann lezot keksoz?  Oubyen nou kapab apply en R100 pour temporary License zis pour 1 zour?  Leklersisman silvouple.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab annou pa al tro lwen ek sa lapire la.  sa lapire, mon mwan sa ki mon’n dir se ki dan le fitir nou a ti a kontan ki lapire i ganny vann dan en boutey ek en label lo la.  Sa, sa ki nou anvi fer.  Be i pour annan en kantite keksoz ki nou bezwen pas ladan avan nou ariv laba.

So nou pa pour kapab met en label lo en lanmok pour le moman.  Mersi pour enform mon ki mannyer sa biznes i devlope.  I annan ozordi 26 License lapire, operasyonnel 26.  E i annan 43 License baka, e mannyer mon konpran i annan 3 kalou.  Sa i levanter ozordi.

An sa ki konsern ou kestyon.  wi i pour R1, 000 pour en outdoor entertainment par zour.  So si ou oule fer en aktivite pour 1 zour e ou oule vann lalkol, ou pour bezwen pey R1, 000.  Mersi Mr Speaker.

 

MR SPEAKER

Mersi Minis.  Onorab Esparon.

 

HON REGINA ESPARON

Mersi.  Mr Speaker eski Minis i kapab dir nou sa 26 outlet ki i pe dir nou la, i bann dimoun ki pe prodwir?  Me what about son retail?

Parski ozordi mon mwan prodwir, me solman mon donn Onorab Letourdie pour vann.  Konmsi ler mon pe regarde, mon mwan en producer mon.  Me selman son retail i annan bokou plis ki 26 Minis.  Mon pa krwar i annan zis 26.  Sorry, eskiz mwan.  Bokou plis 400 ekek outlet ki pe fer retail.

 

MR SPEAKER

Mersi Onorab.  Minis.

 

HON REGINA ESPARON

Ok.  Se sa ki mon pe demande.  Eski i pour annan en kontrol a lavenir ki kantite License nou pe donnen?  Oubyen nou pour vwar nou zis pe donnen, donnen, donnen kot napa limit.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi.  Mersi Mr Speaker.  Mersi Onorab.  Onorab mannyer mon konpran ou pa bezwen License pour ou fer lapire.  Sa 26 la, se bann dimoun ki i annan en License pour vann.  Sa mannyer mon konpran.

Me mon toutafe dakor avek ou bi nou travay exhaustive ki nou pe fer lo labi lalkol e nou oule vwar en diferans.  Se si ozordi i annan 400 ekek sote off liquor License ki vann lalkol, par le fitir nou ti a kontan vwar li redwir.  So sa nou bi.

Alor i bezwen aplik menm zafer pour baka ek lapire.  Olye vwar li ogmante, mon ti a plifere ki i desann.  E nou fer sa bann tranzisyon ver sa ki nou pour dir inverted comma’s “bon lalkol”.  Akoz si i annan move lalkol, mon pa konnen.  Mon pe servi en term.  Ou konpran?  Nou bezwen sorti dan move lalkol, al dan bon lalkol.  Bwar enn de ver olye bwar enn de kartron.  Koumsa ki nou pe sey anmenn sa diskisyon, anmenn sa sanzman pour fer sir ki labi lalkol- e sirtou kot i viz bann zanfan pour ganny akse avek.  Nou anvi fer en diferans.  Mersi Mr Speaker.

 

 

MR SPEAKER

Mersi Minis.  Onorab Simon Gill.

 

HON SIMON GILL

Mersi Mr Speaker.  E Minis bonzour.  Bonn apremidi in ariv1210 avek ou lekip.  Mon pe konpran Mr Speaker ki finalman i annan en konsansis pour nou les pase sa S.I.  Amwen ki mon pe ganny keksoz totalman mal.  La leko ki pe pase dan sa Lasanble.

Me i enportan nou mansyonnen ki in annan reprezantasyon par plizyer group, vizavi bann Manm Lasanble Nasyonal ki isi la lo tou lede kote.

Pour revwar sa ki sa S.I. i dir.  E in annan menm en attempt poudir sa S.I. pour ganny quash ozordi Minis.  So la mon pe konpran ki pa pour arive sa.  E bon nouvel.

Now si sa i le ka.  Eski Minis i ava dakor avek mon, ki avek malgre tou zefor ki nou pour fer pour nou redwir konsonmasyon lalkol dan Sesel, lo tou kalite lalkol ki i annan dan sa pei, ki i annan en size enportan ki nou bezwen met lanfaz lo la.  E sa se Ledikasyon, Ledikasyon, Ledikasyon.

 

 

Akoz mon met lanfaz lo la?  Akoz mon trouv i annan serten mankman.  Amwen ki pa tou ki pe pase ki mon ofe avek.  Me mon ankor mwan ensiste en ledikasyon sistematik atraver en progranm konpreansiv lo tou nivo.  Depi dan lakres laba, lo lekol.  Dan tou nivo nou sistenm skoler dan lasosyete an zeneral en servant tou bann form medya ki nou annan televizyon lanfaz lo la pour nou kapab edik sa pep.  Sa i en konponan enportan ki mon mwan ti ava voudre met lanfaz lo la.  Akoz?  Akoz dan nenport ki pei Mr Speaker…

 

MR SPEAKER

Annou.  Ou’n fer en statement.

 

HON SIMON GILL

Wi.

 

MR SPEAKER

Mon krwar ou statement i kouver ou pwen ki ou oule met devan.  Annou demann kestyon Minis prezan.

 

HON SIMON GILL

Ok Mr Speaker.  Si zot pa oule mon al plis ki sa, mon ava demann en kestyon presi prezan, wi.

Kestyon ki mon oule demande.  Se dan sa diferans sanzman lerOk.  Sanzman ler sorti pour ouver pli boner pour al pli tar pour komans vann lalkol.  Ki mekanizm ki zot in met an plas depi le 01 Zen odela, pour rasire ki sa policing la, i marse?  Lo tou nivo kontrol ki zot oule vwar i annan en serten lefe lo la.  ki mekanizm ki pour-ki kapab montre nou, montre nou sa diferans ki nou ekspekte sa sanzman ler pour annan?

Akoz ou pe baz sa sanzman ler, pa neseserman petet lo nivo mekanizm ki ou’n met an plas pour police sa diferans sanzman dan ler.  Me ou pe appeal to the conscience.  Konsyans zonm, konsyans bann komersan, konsyans bann dimoun ki dan sa biznes pour zot vreman respekte sa sanzman ler.  Sa i enn.

Dezyenm kestyon.  Dezyenm kestyon Mr Speaker, ti ava byen ki Minis i fer en presizyon avek nou.  Par egzanp dan ou Schedule ki’n pibliye.  Mon trouv i mansyonn en sanzman dan ler vann sanmdi, dimans kot i komans pli bomaten.

Now.  Par egzanp yer le 18 ti en konze piblik.  Mardi yer.  Dan sa Schedule la ki ou’n pibliye dan sa S.I.  Mon pa trouv en mansyon kot si i en konze piblik i tonm lasemenn, ki mannyer sa i aplike?  Eski i aplik parey pe enport si i en konze piblik or i annan en sanzman.  Mon ti ava voudre ganny sa presizyon osi lo sa size.  Mr Speaker mersi pour donn mwan sa.

 

MR SPEAKER

Mersi.

 

HON SIMON GILL

Parey ou konnen mon ti pe attempt pour mon fer lezot statement ankor.  Me ou’n dir mon pa fer.  alor mon respekte sa, mon’n demann 2 kestyon.

Me mon annan ankor en kantite keksoz mon ti oule dir lo sa size la mwan.  Akoz i serye sa.  Mersi bokou Mr Speaker.

 

MR SPEAKER

Mersi Onorab Gill.  Minis.

 

MINISTER MAURICE LOUSTAU-LALANNE

Mersi Mr Speaker.  Mr Speaker.  Mersi Onorab pour ou 3 kestyon.  Mon toutafe dakor avek ledikasyon.  Mon krwar i enportan e nou konnen ki nou’n annan sikse.  Par egzanp dan en lot Sekter, Sekter Lanvironnman.  In annan en sansibilizasyon tre enportan ki’n marse.  Ozordi nou tou nou konstate sa, nou koz sa, e nou zanfan i konport zot vizavi lanvironnman dan en fason egzanpler.

E se sa ki nou ti a kontan osi vwar avek ledikasyon kan ki konsern labi lalkol, ki konsern nou la bomaten.

Ki mekanizm ki nou’n met an plas?  Nou annan nou sa Komite.  High Level Komite ki’n rankontre, ki’n fer en kantite liberasyon e ki’n abouti avek sa koman en premye lenstriman.

Me li son travay i kontinyen.  E se li ki pe kordin sa aksyon lo kote Enforcement.  E mon mwan kapab dir ou, ki depi in vin Lalwa le 1 zen.  Mon mwan ganny enn de dimoun piblik ki’n kominik avek mon e ki’n dir mwan serten magazen ki pe kas Lalwa.  Sirtou lo bomaten.

Setadir sa lavant lalkol pe kontinyen arive, avan 1er edmi apremidiSo mon remersye sa bann dimoun ki’n fer sa.  Kontinyen vin devan avek sa levidans konkret.  E nou, nou ava pran aksyon.  Mon pa pour dir zot ki nou pour fer ouvertman, piblikman.  Me nou annan en team ki pour reazir.

E sennla ki mon’n gannyen par egzanp bomaten.  Apremidi kan nou sorti la.  Nou pour al deal ek sa magazen.  So se koumsa ki nou pour travay pour fer sir ki nou atak sa problenm right at the beginning.  Akoz la nou serye.

E mwan parey mon’n dir, mwan serye lo sa Enforcement.  E toultan mon’n fer remarke ki nou bezwen annan plis sikse ki sa 34.  Akoz Lalwa i kontinyen ganny kase.

Lo ou dernyen pwen.  I en

bon pwen ki ou’n fer resorti, e mon krwar ki enabling Legislation sa SI, se Licensing Act.  E parey nou konnen dan Licenses Act, letan en konze piblik i en zour lasemenn son- sa zour ki tonm en zour lasemenn, en konze piblik i ganny konsidere koman en sanmdi.

So son ler vann lalkol pour ganny konsidere koman en sanmdi.  Sa se lenterpretasyon anba Licenses Act.  Mersi Mr Speaker.

 

MR SPEAKER

Mersi Minis.  Onorab Bernard Georges.

 

HON BERNARD GEORGES

Mersi Mr Speaker.  Mr Speaker avek ou permisyon mon pe pran sa kestyon ozordi antan ki Vice-Chair APDAR osi.  E mon ti a kontan Minis prefas mon kestyon avek 2 keksoz ki mon krwar nou tou nou konnen.

Enn se ki.  Seselwa pour kontinyen bwar an ekse, whatever we do.

E dezyenmman se ki.  Licensing hours pa’n marse.  Pa marse, e pa pour marse.  Akoz dimoun pour trouv fason pour kontourn zot.  En kestyon se black market.

En legzanp se black market.  Laboutik i fermen, flat anler Mamelles i vann labwason.

Etann donnen sa 2 keksoz ki nou tou isi dan sa Lasanble e tou Seselwa i konnen i le ka.  Eski ou pa krwar ki sa S.I. i la politique du moins reford.  Nou pe fer minimum ki nou kapab pour nou dir ki nou pe fer en keksoz.

Ler nou konnen ki sel fason pour nou rey apard ledikasyon.  Ledikasyon, ledikasyon ek ledikasyon.  Me sel fason pour nou rey keksoz ozordi.  Se pa pour fer keksoz pa par pa parey pe ganny propoze.  Me ki pour fer sa bann keksoz swivan ansanm.

Enn;  Tir lalkol o bor juice dan magazen e met li dan en lot landrwa par deryer magazen.

Dezyenmman:  Tir tou advertising lalkol an deor magazen.

Trwazyenmman:  Aret vann lalkol apre 8er diswar, including Vandredi ek Sanmdi swar.  Si dimoun i anvi bwar, zot ava bwar kot zot oubyen dan restoran oubyen dan en bar.  E pa dan laboutik.

E katriyenmman.  Aret donn License pour fer lapire, ki pe touy dimoun.  E kontrol lavant pti ponm ki li osi pe touy dimoun.

Si nou fer tou sa bann keksoz.  Eski ou dakor avek mon alafwa nou ava fer en pa enorm pour an rey sa problenm.  Fer li pli ptigit par ptigit.  Dimoun pour zis adjust avek sak mezir ki vini.  E nou pa pour arive kontrol li ditou.  Mersi.

 

MR SPEAKER

Mersi Onorab Georges.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Annefe mon kontan ou entervansyon.  Akoz se sa le bi, me ou met li dan en diferan fason pli poetik.

I pa vedir ki S.I. 35 pa pour achieve nanryen.  I pa akoz nou annan en problenm, nou pe sey fer en attempt pour nou regle problenm.  Akoz lanver se nou pa fer nanryen.

Nou reste lo vye ler.  Nou sey Enforcement, e pour menm rezon ki ou’n dir.  Pa vo lapenn fer sa.  Nou bezwen sanze.

 

Me nou santi ki sa nou kapab fer li deswit.  E sa Bill lo Alcohol Control Policy ki nou pe anmennen ek bann Regilasyon ki pour swiv deryer, kot pour annan sa konsiltasyon.  I vin fer zisteman sa.

E nou’n met en limit le 01 Zanvye 2020.  So le 01 Zanvye 2020 fotespere ki tou kontribisyon nou gannyen i al dan menm laliny avek ou propozisyon Onorab.  E mon a dakor ek ou e mon a signoff lo la 100poursan.  Mersi Mr Speaker.

 

MR SPEAKER

Mersi Minis.  Bon mon annan 5 Manm ankor lo mon lalis.  Mon-zis pour nou pa overlap 12 edmi.  Mon pe sizere ki nou pran en break.  E Minis i ava retournen 2er.  Espérons nou ava ale ziska 2er edmi.  Akoz sirtou SBC radyo ki nou bezwen rann lantenn.

Mon krwar Minis i ava ok pour ou retournen 2er?  Ok dakor.  Nou ava pran Break la.  Me zis avan nou Break, mon ti a kontan enform bann Manm Bills Committee  ki toudswit pour annan meeting dan Committee Room 3.  Lo kote ABC nou pour meet Speaker’s Conference Room 1.15.  E apre mon annan en pti lenformasyon ki’n sorti kot PS Volcere ki mon ti a kontan partaz ek bann Manm.  I dir mwan enform bann Manm swivan PNQ mardi le 4 Zen, ki i annan bann lenformasyon.  Par egzanp lakantite paspor Sesel ki valid, lakantite paspor ki avek Non-Seychellois Nationals.  Bann ki’n obtain citizenships pandan dernyen 10an en accord avek Seksyon 4, 5 Lalwa.

Pli tar par semenn prosenn, zot pe met ansanm sa bann lenformasyon.  E pli tar par semenn prosenn i ava fer available to The National Assembly.  Ok zis an ka ki zot ti pe query.  I annan lenformasyon ki nou demande ki outstanding.

Avek sa nou ava Break.  E nou ava repran nou travay 2er apre midi.

 

(BREAK)

 

 

MR SPEAKER

Bonn apre midi tou Manm Onorab.  Bonn apre midi tou dimoun ki a lekout e ki pe kontinyen swiv travay Lasanble Nasyonal.  Nou pou kontinyen nou diskisyon ki nou ti’n konmanse bomaten lo S.I 35, ki annan pou fer avek bann ler ki laboutik i vann lalkol e bann  licenses  – bann license fees.  Mon ava demann Parliamentary Reporter pou apel Minis avek son lekip.

Bonn apre midi Minis Loustau-Lalanne, CEO Andre Pool e Special Advisor Ms Sitna Cesar.  Nou pou kontinyen sa diskisyon sa dyalog ki nou ti’n konmanse bomaten lo S.I 35.  E parey mon dir nou annan ankor 5 Manm lo mon lalis.  E nou pou demare toudswit avek Onorab Jany De Letourdie.

 

HON JANY DE LETOURDIE

Mersi Mr Speaker.  Bonn apre midi tou dimoun.  Minis mon ankor annan en difikilte pou mon sey konpran sa de diferan license, sa enn No.9 ki Onorab Esparon ti demande.  Sa enn i dir ou temporary license ki kout R100, apre i annan sa enn outdoor entertainment license li i kout R1000.  Me selman i dir ou en period of one day, ki petet dan mon lespri mon pe konsider li tou le de i tanporer.  Si ou ti a kapab petet donn en legzanp lekel ki kapab apply anba sa enn R100.

Anyway  sa enn outdoor mon ganny en konpran.  Ok?  Prezan mon 2enm pwen Mr Speaker, mon ti a kontan plito fer en komanter lo outdoor entertainment.  Mon ok avek sa. Akoz mon konnen poudir en kantite laplipar nou bann artis, se sa zot landrwa travay.  Ok, apre i annan bann lezot aktivite.  Me selman mon ti a kontan fer remarke Minis ki nou ankor pe vwar bokou nou bann dimoun ki par anba 18an, zot ankor vreman pe ganny akse avek lalkol.  E nou konnen poudir en kantite fwa, en kantite manrmay apre ou tande zot in perdi, pa ankor ariv kot paran.  So mon mazinen nou ankor annan en gro louvraz pou fer la, konsernan sa outdoor entertainment vizavi ek nou bann lazenes avek akse avek lalkol.  Mersi.

 

MR SPEAKER

Mersi Onorab De Letourdie.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pou ou kestyon.  Onorab sa temporary license i ganny donnen normalman kan ou annan en aktivite dan en landrwa swa se ou, dan en sant kominoter somewhere kot ou le vann lalkol.  So sa i pirman si ou le vann lakol pou en lokazyon spesifik, en sel lokazyon, spesifik en zour.  I annan en definisyon an Angle pou sa, ki mon pe regarde la i dir, ‘‘ … means a license to sell liquor on the occasion at the place on the day ensuring the time specified in the license’’.  Sa i sa definisyon temporary license.  Apre prezan parey mon ti dir sa outdoor entertainment license li, i lo kote vann bwar ti napa okenn Regilasyon ki konsernen avek sa outdoor entertainment license.  Prezan la si ou le vann bwar avek en outdoor entertainment license, ou bezwen pey sa bann sonm ki mon’n mansyonnen, pou ou vann lalkol pli tar ziska 1er bomaten si  i dan bann zour weekend.  Mersi Mr Speaker.

 

MR SPEAKER

Mersi Minis.  Onorab.

 

HON JANY DE LETOURDIE

Savedir sa enn R100 i annan en time limit ki ou pe donn li?  Eski i menm time limit ki ou pe donn sa enn sa outdoor pou li vann son lalkol?

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Non i pa pou aplike akoz sa outdoor li i spesifik dan Lalwa – son ler konmanse, son ler fini pou vann lalkol avek en aktivite outdoor entertainment. Tandis ki sa lot pou ganny reglemante par Licensing ansanm si fodre konsilte Lapolis.  Mersi.

 

MR SPEAKER

Mersi Minis.  Onorab Johan Loze.

 

HON JOHAN LOZE

Bonn apre midi Mr Speaker.  Mersi Mr Speaker.  Minis si ou kapab konfirm en keksoz pou mwan – nou pe koz spesifikman lo lentervansyon pou redwir konsonmasyon eksesiv lalkol; ki swa atraver Polisi taxation; ki swa atraver license, ouswa bann diferan lot metod kontrol.  Kestyon ki mwan mon anvi poz ou Minis,  se eski nou isi Sesel nou annan okenn laprev ki sa bann from lentervansyon  in marse dan nou pei?  Ki i fit byen dan nou sosyete?  Akoz mon konpran mwan ki sa bann lentervansyon ki ganny rekomande par Lazans Mondyal pou Lasante, in ganny aksepte Lerop e dan tou bann sosyete oksidan.  Be nou Sesel, eski i marse sa bann form lentervansyon ki vin atraver Lezislasyon?  Mersi Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Mersi pou kestyon.  Parey mon fer referans avek pli boner mon krwar nou annan serten rapor, ki’n ganny fer lokalman par Drug and Alcohol Council par lepase.  Sa rapor letid ki’n fer dan lekol 2015 ki mon’n koz lo la.  Bann keksoz ki Minister Lasante li menm, i vwar dan son travay tou le zour,  i montre ki nou annan sa problenm.  E se akoz sa ki nou’n anvi annan en deba nasyonal pou regle sa problenm.

Me nou konnen osi ki par divers aksyon, ki’n ganny pran par lepase dan diferan pei – pa zis pei Européen ou  autre, sel fason enn bann meyer fason pou nou kontrol sa sityasyon, se parey mon’n dir.  Setadir kontinyen ogmant pri.  Fer li pli difisil osi pou zanfan annan sa akse direk avek swa advertising, oubyen menm sa bwar lalkol letan i pe fer son shopping ek son paran  or whatever it is.  E donk se sa tou sa bann mezir ki pe vini, ki nou le met an plas pou fer sir i pou marse dan nou sosyete.

Donk set en keksoz ki nou bezwen fer e ekspekte sa rezilta dan pli bref dele posib.  Mersi Mr Speaker.

 

MR SPEAKER

Mersi Minis.  Onorab Ahmed Afif.

 

HON AHMED AFIF

Mersi Mr Speaker.  Mr Speaker mon’n ekout atantivman Minis bomaten ler i ti pe fer son Statement.  E i kler poudir i trouve poudir lalkol pe ganny servi an ekse e atraver sa Regilasyon in fer de keksoz.  Enn in sanz bann ler ki zot vann lalkol.  E dezyenmman in fer monte serten bann processing fees ek bann license fees.  Mon kestyon Minis se etandonnen ki nou konnen – e sa i kler atraver bann diskisyon ki nou’n annan avek bann retailers, bann marsan, dimoun ki dan sa biznes.  Se pli gro problenm lalkol.  Se pa bann lalkol ki’n byen kontrole.  Par egzanp Eku oubyen Seybrew eksetera, ki annan bann kontrol tre, tre strik lo la.  Se plito bann lezot lalkol ki’n ganny prodwi lokalman nou’n dir sa Pti Ponm eksetera, kot kontrol lo prodiksyon e kontrol lo distribisyon, e bann tes dan sa bann prodwi nou napa rezilta lo la.

Me selman sa ki nou konnen se ki dan bann sityasyon Lopital, bann sitasyon  lasante e sa ler nou koz ek bann dokter, zot pe dir ek nou poudir se la kot pli gro problenm i ete.  Se sa bann kalite lalkol.

Alors mon ti a kontan ou eksplik mwan etandonnen ki lezot Manm osi in dir poudir lo kote ler ki pe vann i pou annan serten lenpak lo Lendistri Touris.  E nou napa statistik pou montre poudir si ou pou sanz ler, sa kalite konsonmasyon pou arete.  Napa statistik ki montre.  Nou napa statistik ki montre poudir ler ou pou sanz license fees konsonmasyon pou redwir.  E mon a donn ou en  senp legzanp ki zot pe donn, zot in fer sa Producers license – Bottlers license vin R10mil sorti R500.  Me si sa bann dimoun ki prodwi Pti Ponm par egzanp i prodwir 5mil boutey par zour, e zot annan R10 en profi ladan. I deza R50mil dan en zour.  Alor pou pey R10mil dan 1an i pa pe afekte okenn keksoz ki pou annan pou fer avek zot prodiksyon. E sa pou en pti producer.

Pou en dimoun parey Seybrew ki pe mon pa konn son prodiksyon me probableman 15mil boutey labyer par zour.  Be zis R1 lo la in fini pey ou license pou 1an edmi. Dan en zour. Pa dan 1an.

Alor sa bann fees ler ou get li an relevans avek kou prodiksyon pou sa bann producer, i preski nil.  I preski nil – zero.  An term ler ki zot pe mete, nou napa okenn levidans pou dir ler ou pe sanz sa bann ler, i pou fer okenn sanzman.   E napa nanryen dan sa Regilasyon ki pe dir poudir zot pou kolekte plis larzan ki zot devret anmanse lo prodiksyon bann labwason lokal e zot pou annan kontrol lo la.

Alors, ki ou kapab dir mon lo kot ou vwar lefikasite, e kot ou vwar sa zefor pou adres bann problenm ki nou pe vwar ozordi atraver labi lalkol, atraver sa S.I 35 ki pou ganny adrese atraver sa bann mezir ki ladan?  Kot ou vwar sa pe antre?  Mersi.

 

MR SPEAKER

Mersi Onorab Afif.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Parey mon ti mansyonnen bomaten, si nou aksepte ki nou annan en problenm lalkol, e si parey nou’n aksepte nou annan en problenm drog,  nou pa merit fer nanryen, akoz nou konnen nou pa kapab fer enforcement.  Nou pa kapab tyonbo sa escobar and so on and so forth.  Alor nou bezwen komans ek en keksoz.  Nou bezwen fer en keksoz.  En keksoz diferan.  Alor se sa ki nou pe dir dan sa S.I 35, sa i premye keksoz ki nou pe fer parmi en seri lezot keksoz ki pou swiv.  E parey Onorab Georges ti mansyonnen bomaten, tou sa bann keksoz ki in mansyonnen, i form parti sa bann keksoz ki nou pou fer ki pe vini.  Atraver Alcohol Control Drinks Bill fotespere zot pas li i vin en Act, i vin sa enabling Act e apre pou annan bann Regilasyon anba la ki pou deal avek advertising, deal avek  lafason lavant pou ganny fer pou fer sir ki nou zanfan pa ganny kontak direk avek sa bann labwason.  Letan ou pase dan loto ou pa vwar tou sa bann advertising deor sa magazen.  And so on and so forth. 

So i pou annan en seri keksoz ki pou vin konplet sa zefor ki nou pe fer pou nou anlev sa fleo ki pe ronz nou, ronz nou zanfan, ronz nou fanmir ozordi.  Mon konpran ki ou pe sey  dir mwan.  E an fezan sa lenferans pou mwan se ki be annou pa fer nanryen pou le moman, akoz nou pa kapab kontrol sityasyon.  Mersi Mr Speaker.

 

MR SPEAKER

Mersi Minis.  Onorab Afif.

 

HON AHMED AFIF

Mersi Mr Speaker.  Mon pa ti pe zanmen sizere poudir annou pa fer nanryen.  O kontrer mon ti a sizere i annan keksoz tre, tre konkret ki nou kapab fer,  ki par egzanp fer sir poudir nou konnen ki kalite prodiksyon ki pe ganny fer.  I annan tes regilye.  Rapor i ganny soumet ek lasante pou montre poudir sa bann prodiksyon i sepa 16poursan oubyen 10poursan.  E i montre poudir sa i le ka zot monitor kontrol, zot prodiksyon dan tou laboutik tou le zour, e zot fer sir poudir SRC i anmas sa ki sipoze kolekte.  Sa deza pou en gran kontrol.  Nou pa pe dir met taks lo zot mwan.  I deza annan.

Me eski nou pe anmas sa larzan ki nou sipoze anmanse?  Eski i annan sa bann kontrol lo kote prodiksyon an term poursantaz ?  Eski i zwenn sa bann standar lasante ki zot annan?  Sa se bann keksoz imedya ki kapab ganny fer ki pa pou kout nanryen parski nou annan bann enspekter deza.  E sa pou mwan si ti ganny fer, ou pa kapab anpes dimoun bwar, me omwen ou ti ava annan  sa larzan pou ou sonny li ler i tonm malad.  Ki ozordi mon krwar malerezman pa pe anmanse.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi mon partaz sa pwennvi ki Mr Onorab Afif in dir.  Mersi.

 

MR SPEAKER

Mersi Minis.  Onorab de Commarmond.

 

HON CHARLES DE COMMARMOND

Mersi Mr Speaker.  Bonn apre midi Mr Speaker.  Bonn apre midi Minis ek ou delegasyon e tou dimoun ki a lekout.  Mr Speaker il faut dire ki nou tou nou dakor pou annan en serten kontrol e pou minimiz labi ekse lalkol.  E mon konnen i annan plizyer marsan  ki’n diskit ek mwan osi, ek nou kote latab isi osi ki zot pare pou korpere o maksimonm pou siport sa akoz zot osi zot kont.  Sirtou zanfan ki vin aste toultan zot pous sa bann zanfan zot dir non sorry pa pe vann ou lalkol.  Me i annan d’autres ki abize ki sa.

Dan sa lespri la, eski Minis i santi ki sa konsiltasyon vreman in ganny fer to the maximum byen or ti kapab pli byen?  Dezyenmman ti bon osi ki nou Lasanble i ganny plis statistics.  Akoz statistics i enportan.   I ed ou pou ou kapab vwar kote nou pe ale e si vre sa ki nou pe ganny dir.  Plis statistic lo sirtou kot i konsern lasante.  Bomaten mon krwar i annan ki’n demande dan sa direksyon, me selman i enportan pou nou konnen lakantite dimoun ki’n malad e ki kalite lalkol.  Akoz sa osi si dokter i bon i kapab ariv a sa konklizyon pou vwar ki kalite lalkol ki’n koz serten maladi.  Eski lalkol for par egzanp bann hard drinks oubyen lapire, baka oubyen zis labi an ekse, gines oubyen Pti Ponm, Pti Zonn. Konmsi si nou ti ganny sa ti pou ed nou pou être pli rasyonnel e kapab pran serten desizyon, e ed nou dan nou desizyon pou vin pli focus e pli byen.

An menm tan nou vwar, i annan serten magazen ki konmans ouver tar dan lazournen, dan bomaten si ou le –  I ouver tar li e i fini – i annan zis en komi – de komi letan i konmans ouver.  Me i fini tar dan lannwit, menm dan granmaten.  E ou pase ou annan ou 4, 5 komi.  Konmsi mon pe poz mon lekor kestyon, e mon krwar sa kestyon  devret ganny – nou tou nou devret pe evalye li.  Magazen i sipoze vann tou sa bann lezot prodwi, be mon ti pe panse i kapab ouver granmaten pou kapab ed dimoun ki vreman bezwen sa prodwi. E lafason ki ganny fer ki ganny ouver, letan ou pe balanse pa tou magazen, serten.

Byen rar me serten ou vwar poudir ou a krwar focus i lo vann lalkol.  E ki ale ziska tar dan lannwit e menm dan granmaten.  Savedir la mon pe koz ou si ou ler aret vann lalkol i 9er, li i al an deor sa.  E tou dimoun i vwar.  Menm lapolis i pase i aste pou li.  Menm zofisye Licensing i kapab pase i aste pou li.  Tou dimoun i vwar e ou a krwar nanryen ki pase.

Alor ki garanti ou donn nou Lasanble ki sa issue vreman i pou ganny tackle avek sa sanzman ki ou pe donn nou la?  I pa sanzman akoz ou ler vann lalkol son finisyon i pou preske parey.  Me le problenm se sa policing ek monitoring la.  Konmsi mwan sa garanti i enportan akoz ou pa kapab zis larg sa lo Mr Andre Pool laba kot Licensing.  Me i bezwen alor – i bezwen les zot antite osi.

Dan sa konteks ki mekanizm e ki lankourazman ki sa ki zot pe fer, pou ankouraz piblik, piblik ki believe dan sa ki ou pe sey fer, ki anvi partisipe, kote li i kapab zwe en rol pozitiv pou ed, Gouvernman, e Lotorite pou ariv a sa lobzektif ki nou sosyete i anvi arive ?

Eski dernyerman, eski zot pe antisip de keksoz?  Mon krwar osi pou en black market ki pe definitivman pe al ganny kree probableman dan bomaten, pou ganny ou black market bomaten e si zot pe antisip sa ?  E antisip en ogmantasyon dan wholesale outlet ?  Akoz sa ou dir i pa pe sanze.  Li i kapab vann dan bomaten. Eski alor sa laboutik dan kanton i pou prezan demann en license whole sale?  E i pa vann par sopin me i a vann par crate.  Mersi bokou.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab zisteman mon krwar ki sa S.I 35 i zis lo bann ler, e parey nou dir kreasyon outdoor entertainment.  Lalwa pou tackle sa e bann fees.  Parey mon’n mansyonnen lo kote statistik letan Minis Lasante pou vin devan Lasanble pou konsiderasyon Alcohol Drinks Policy and Bill, Drinks Control Bill, (pardon).

Definitivman i pou bezwen anmenn sa bann statistik, donn sa bann legzanp.  E eksplik li plis dan son detay.  Malerezman mwan mon napa sa bann lenformasyon avek mwan la pou konfirmen. Me mon asir ou ki definitivman tou sa ki ou’n dir i annan en laverite ladan.  E akoz menm si ou pou bwar whisky tro bokou, i pou afekte ou.

Akoz i ou bann organ ki pou ganny afekte. I ou lespri mantal pou ganny afekte.  Kote fizik i ganny afekte.  Ou fanmir i ganny afekte.  Mon pa la pou donn en  lecture personn, me nou konnen ki son konsekans.  Zot dir mwan ki  lavant lalkol dan business en retail outlet kot i pe vann lalkol, i reprezant ozordi apepre 65poursan son  chiffre d’affaire.  So i eksesif.  I eksesif.

Nou pa pe dir pa vann.  Nou pe dir vann kasyet ek manrmay.  Vann, pa vann ek manrmay anba laz.  Tousala nou konnen.  Nou pe tir sa tantasyon avek nou zanfan.  Se pou kwa sa de lezot Regilasyon kan i pou vini i pou enportan.  Parey mon’n dir ou Planning Authority i regarde i ede pou kapab konverti, pa pou kapab konverti. I fast track ou i dir non.  Tousala bann keksoz pratik ki nou bezwen fer depi la avan Zanvye 2020, pou nou nobou met lanmen lo sa problenm.

Wi black market nou bezwen antisipe ki i pou vini.  E se pour kwa ki nou bezwen vizilan.  Se pou kwa ki fodre nou demann nou sitwayen pou les nou konnen.  Akoz parey sigaret.  Mon’n ganny en lenformasyon menm lo sigaret konman nou’n konmans enplimant sa pa kapab aste en sigaret one by one.  In annan en black marketSo nou bezwen regard sa konsekans.  Mon pa dir ou i pa pou arive.  In all likelyhood i kapab arive me nou,  nou pe vin ek en senp mezir parey mon’n eksplike. E fotespere avek zefor tou dimoun nou ava nobou reisir dan nou latas.  Mersi Mr Speaker.

 

MR SPEAKER

Mersi Minis.  Onorab De Commarmond

 

HON CHARLES DE COMMARMOND

Mon pa sezi lo wholesale outlet si ou’n fer komanter lo la apre lo sa kestyon mon  krwar lo lezot pwen ou’n dir ou agree ki egziste.  Me ou pa’n donn nou garanti mezir ki ou pe al pran pou fer sir ki ou pe stop sa ki pe kas Lalwa.  Ki mannyer- sa ki pli gro problenm la se sa.  Akoz ou kapab sanz tou sa bann ler.  Ou kapab donn nou pli zoli ler ki ou anvi ou.  Me selman sa ki vin apre ler ki li.  Ki enforcement.  Akoz ou pa kapab fer enforcement.  Pa vo lapenn donn nou tou sa bann keksoz la.  Sa mon pwen.  Konmsi donn nou en konfidans ki vreman an menm tan ki ou pe anmenn sa bann sanzman ou pe osi garanti  enforcement?  Sa ki  nou le vreman,  vreman i marse sansan pa vo lapenn tou sa bann keksoz.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mon toutafe dakor avek ou.  Parey mon’n dir right at the start mon osi mon en dimoun ki pour enforcement e mon pou bezwen fer le neseser pou garanti ki sa lekip ki nou met an plas i efektiv.  Akoz initil nou sanz serten keksoz ki si oule i fer li restren e apre tou dimoun i go underground.  Nou pa pe achieve nanryen.  Nou bezwen fer en zefor pou fer sir renforcement e bann dimoun ki annan sa latas fer enforcement zot osi zot serye e donk look the other way konmdi Angle.

E sa fodre i en sanzman mantalite, en sanzman a fason fer ki nou bezwen rektifye.  E wi Mr Speaker nanryen pa anpes zot apply pou en whole sale license parey prosedir i demande e i ava ganny konsidere.  Mersi.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker i annan bokou keksoz enteresan ki’n ganny dir depi bomaten.   E mon bezwen dir Minis mon santi sa fristrasyon.  Mon santi sa fristrasyon anndan ou ki drwat.  Parski sa bann zafer la en pti bout isi en pti bout laba ou konnen ou menm ou pa pou annan sa lenpak ki nou pe rode.

Mr Speaker mon premye kestyon ki mon ti a kontan demann Minis se sa.  Minis ou’n dir nou ki i annan 35 dimoun, 35 boutikye ki’n ganny fine pou komet lofans vann lalkol apre ler.  Sa ki ou pa’n dir nou se konbyen ki’n ganny fine pou bann lalkol avan ler ki zot devret vann?  Parski mon trouv li i en pe drol ki  sa ki sa Regilasyon i fer ou ou’n atrap 35 ki’n vann apre ler selman ou Regilasyon i a pe redwir par 2erdtan avan ler. Konmsi ou problenm ki mannyer ou’n prezante i apre ler me selman ou atak avan ler.  Sa i premye.

E definitivman Mr Speaker Minis in aksepte ki i annan en problenm enforcement.  E Mr Speaker la mon bezwen dir mon konpran enforcement.  Si Lapolis li menm li letan i dan son transpor i pa met son seat belt ki i bezwen enforce sa lo li menm, ki mannyer ou pe ekspekte li pou vin enforce sa ki an deor li?

Mr Speaker mon dezyenm kestyon.  Sa ki bann Retailer’s Association ki pe sey refer.  E Minis ou’n mansyonn sa sif.  Zot in dir ki 60poursan se sa ki zot in dir nou.  60poursan zot income se lalkol.  E dan sa 60poursan, 80poursan i pti ponm. Savedir 48poursan zot total sales i Pti Ponm.  Sa dan li menm i montre nou dan ki direksyon nou pe ale.  E i donn nou en lendikasyon kote nou problenm i ete.   E la mon pa pe tenir okenn, siport okenn prodikter lalkol me selman deswit la mon vwar ki poudir problenm se pa avek labyer.  Se pa avek gines.  Problenm se avek Pti Ponm.  E tou sa bann problenm lasante ki nou’n koz lo la, e la mwan Minis mon pe koz lo statistik ki sa bann dimoun zot menm zot,   zot in met devan nou.

Savedir i donn nou en lendikasyon ki Gouvernman si i anvi vreman take the bull by the horns, nou konnen ki bor nou pou kapab konmanse.  E me malerezman nou pa pe vwar sa.  Nou’n osi sa bann lalkol 18poursan.  En labyer 18poursan e nou konnen ki 18poursan i kapab fer dan nou lekor dan en fason ase vit.  Ki ankor enn fwa nou vwar en lot direksyon.

E Mr Speaker mwan mon pe demann Minis, akoz ki baze lo bann statistik ki sa bann retailers zot menm zot,  zot in vin met devan nou.  Mon konnen zot in met sa bann sif devan Onorab de Commarmond. Zot in osi met sa bann sif devan nou dan LDS –  bann sif ki e zot menm zot,  zot in dir.  Parey mon krwar en dimoun in dir kot letan zot in koz avek nou, zot in dir ki zot rekonnet ki poudir sa  i en problenm.  E alor zot osi zot anvi ede.  Me si ou konnen ki poudir ou pe vann en prodwi pa ou ki pe bwar me dimoun pou vin aste, obviously biznes se biznes.  Alor Mr Speaker ki Gouvernman pe fer direkteman lo sa size?

Mon lot konsern Mr Speaker se ok bann liquor stores parey nou apel zot e pou nou tou ki al Sid Lafrik nou vwar.  Par egzanp bann gran super market parey Pick & Pay oubyen CheckersPick and Pay li dan son main store kot zanfan i ganny drwa ale napa lalkol.  Me obor li zot annan Pick & Pay Liquor.   Checkers menm zafer.  Dan son main store napa lalkol.  Me i annan liquor shop checkers.  Be Mr Speaker sa i byen pou zanfan pa vwar.  Me eski nou konnen ki, eski Minis ou realize ki Sid Lafrik i premye pei Afriken lo konsonmasyon lalkol.

I 38enm non, non i 30enm mondyal.  Namibie konmsi mon’n pran pou bann Pei SADC, Namibie i 33enm, Botswana 58enm, Sesel 103enm.  Alor letan mon pe balans sa statistik ankor enn fwa, ki nou pe gannyen e nou pe regard bann pratik – konmsi mon sey regarde ki mannyer sa bann lezot regilasyon ki nou pou vin avek, ki mannyer sa vreman pou annan en lenpak.  Parski Minis ozordi atraver ou Mr Speaker ozordi mwan mon’n vwar zanfan letan i batize paran i tranp ledwa dan son champagne i pas en pti git dan son labous i dir mon piti  ou batenm sa ou osi tou fodre ou selebre en pti git.  Se sa nivo ki nou pe koz lo la.  E lalkol i sa 48poursan ki ou’n nonmen laplipar ditan bann zanfan i ganny lalkol dan lakour.

Alor Mr Speaker tousala mon pe dir pou montre mon konsern e  an menm tan pou dir avek Minis ki sa S.I ki la devan nou o fet avek bann statistik ki nou pa tro konnen,   mon pe demann mwan kote i pou anmenn nou.  E Mr Speaker ou avek mwan ou pou konnen ki mon pe koz lo la, me lakantite – konman en Pret mon’n fer lanterman en zenn homme 28an akoz, akoz tou le bomaten ti annan en laboutik ki ti pare pou vann li whisky.  E sa laboutik i ankor ouver li.

E zour mon ti fer son lanterman mon ti demande be oli sa boutikye ki abitye vann li lalkol?  Ni son lanterman sa boutikye pa ti vini.  Letan nou ti pase son laboutik ti ouver i ape kontinyen vann lalkol.

Minis konpran mwan.  Eski pou nou take the bull by the horns, eski ou pa krwar ki olye ki nou annan sa S.I la ki mannyer i ete, kot dimoun pe kontinyen vann lalkol nenport ke ler.  Ki bann laboutik ki ouver 10er diswar pa pe vann ni lay, ni zonnyon, ni dile pti baba me ki zot pe vann zis lalkol.  E ki ou bann dimoun ki sipoze pe enforce sa Regilasyon parey Regilasyon ki  la zot osi tou zot pe rantre dan sa bann laboutik sa bann ler, e apre zot pe sorti avek zot pti ponm e avek zot lalkol.

Eski ou pa krwar Minis pou nou rann sa pei en bon servis nou devret met sa S.I de kote.  Swiv mwan byen.  Pa akoz nou pa anvi fer nanryen.  Nou met sa S.I  de kote e antretan nou travay e nou annan en deba.

E nou dan sa Lasanble nou pare pou nou annan sa deba.  En deba konpreansiv ki ant la avek Desanm, nou vin avek en keksoz konkret, en keksoz ki nou’n byen fer nou resers lo la.  Tou bann partners i involve, SCCI i involve konman private sector, Lasanble Nasyonal, Lasante, retailers, tou bann partners i involve ladan e apre sa nou vin avek en keksoz konkret e apartir le 01 Zanvye nou pas tou bann keksoz ki fodre pase la, letan nou’n fini fer travay e apartir le 01 Zanvye petet sa i a kapab en bon tenm pou lannen prosenn, nou deklar lager lo lalkol e nou tou nou dir nou pou serye.  E parey Onorab Georges in fer serten propozisyon e la kontan pa kontan parski nou pou al deklar lager.  Laboutik ki vann lalkol par egzanp mwens ki 200 met ou pa kapab. Akoz pou eleksyon nou dir ou pa kapab met en poster 100 met avek stasyon vote.  Be lalkol, sa poster li, sa poster i pa pou afekte, i pa pou afekte sa dimoun ki pou al vote li. Selman nou dir Regilasyon nou pa pou kapab.

Be lalkol ki nou annan nou,  nou bann zanfan la nou pa pou kapab met keksoz.   Konmsi nou vini nou dir be tyonbo en kou sa kantite outlet lakol annou regarde.  Dan en distrik Mr Speaker la mon anvi dir ek Minis, ou konnen ant roundabout la Rivére Anglaise letan ou pe al Anse Etoile sanmenm sa landrwa, sa ou kapab apel li super market broad whatever you want to call it. Supermarket mile.

E tousala i vann lalkol.  Be nou konman en pei nou pa kapab fer nanryen ? An plis ki sa Mr speaker menm sa bann zafer mon konnen ki sa ki mon pe dir la dimoun serten pa pou kontan.  Kot ozordi Mr Speaker mon kapab fer letour Mahe e pandan sa letour Mahe dan mon lazanm mon kapab annan mon en Seybrew pli fre ki annan.  Mon kapab annan well Pti Ponm kekfwa pou zet mon letan mon’n ariv Pointe Larue, me selman si mon pe bwar Seybrew mon kapab aste en Seybrew fre dan tou sa laboutik e fer letour.  Me tousala se bann keksoz ki nou bezwen tackle.

E mwan se pou sa rezon ki mon anvi dir – ki mon anvi met devan Minis akoz nou pa tonm dakor Minis pou sa enn, nou met li laba.  Parski apre tou between now ek Desanm konbyen bottlers license ki ou pe al renew ?  Manke zot license i fini la zot.  Ant la avek Desanm ou pa ni pe anmas en sou an plis menm si ou’n increaseOff license, i annan off license?  Bann retailers mon mazinen ki mon pe dir la. Ok i ava annan detrwa ki pe – Public bar licensePublic bar konmela napa preski ditou.  E alors ou pa pe al anmas nanryen.  Members Club License menm si ou’n ogmante ou pa pe anmas gran keksoz.  Toddy Bar License li i R100 menm, alor i pa sanz nanryen.  Baka License la mon vwar in met R1000mil –  Lapire.  Konmsi mon pe sey dir ki nou pa pou sanz nanryen gran keksoz avek sa.  Me si nou fer en keksoz konpreansiv, nou ava kapab be bold e tackle sa sityasyon.  Mersi bokou Mr Speaker.

 

MR SPEAKER

Mersi Onorab.  Minis ou komanter?

 

MINISTER MAURICE LOUSTAU-LALANNE

Mersi Mr Speaker.  Mersi Onorab pou sa kontribisyon ki ou’n fer, sa propozisyon.  Mon a sey repran en pe tou bann keksoz ki ou’n koz lo la.  Premyerman ti annan 35 ka parey mon’n dir be en ka ti vann lalkol avek en zanfan anba laz.   E sa aksyon ti ganny pran. Son license ti ganny sispann.

Donk i reste 34 ka.  Dan 34 ka mazorite ti pe vann lalkol apre ler fermen.  Ti annan enn de avek lalkol avan ler ouver.  Me son tandans se plito vann apre ler.  Mon pou napa sa split.  Me definitivman zot osi zot in ganny fine akoz Lalwa i permet ki SLA i fine zot.

Lo kote enforcement mon pa pou repete.  Mon dakor avek ou.  Mon krwar par ler se nou menm nou ki donn move legzanp e sirtou sa bann ki ganny peye pou fer enforcement zot annan en doub rezon akoz zot merit fer zot travay byen.  Premye fwa ki mon’n ganny sa lenformasyon ki 80poursan i dan Ponm me i en lenformasyon ki byen ki ou’n donn mon.  Sa ki mon kapab enform Lasanble se ki an Me Minis Adam, Minis Lasante ti fer en meeting a la demann Retailers Association ansanm avek SCCI e zot in abord plizyer size.  Enkli sa S.I ki nou pe koz lo la e lezot.  E  a la fen meeting Minis Adam ti dakor pou resevwar zot bann komanter, zot bann sizesyon dan lespas en semenn.

E mannyer mon konpran ziska ozordi sa bann sizesyon, sa bann rekomandasyon sorti kot zot atraver SCCI, e la mon pa kler si SCCI ki pou fer si retailers pou fer pou donn SCCI apre SCCI a konplete.  Me pe enport nou ankor pe espere.  E parey mon’n dir letan nou pou tackle sa Alcohol Control Bill sa bann sizesyon avan ganny tenir an kont.

Mon tre ankouraze letan mon tann ou Onorab konfirmen ki Lasanble i pare pou annan en deba Nasyonal lo sa fleo lalkol.  Annefe se en pti pe sa ki nou’n sey fer dan Egzekitif.  Nou santi kot sityasyon in ariv tel, ki nou bezwen pran serten aksyon.  Se pour kwa ki nou’n propoz sa premye S.I.  Alor ou’n fer en sizesyon avek mon.  Mon ti a kontan zis dir ou ki sa S.I ki mon’n sinyen annefe i en S.I ki pa enkonsistan avek okenn Lalwa pou le moman.  Se en S.I ki anba Licenses Act i donn mwan tou pouvwar mon pou siny en Regilasyon.

E se sa ki mon’n fer.  So pou mwan retir sa i vin en pe difisil.  Me si nou annan enn de rekomandasyon pou amande, nou kapab amande sa S.ISo mon ti a propoze kekfwa nou resevwar en amannman ou plizyer amannman ki zot le fer.  E mon a konsidere.  Mon krwar sa i en  fason nou kapab prosede ki nou tir sa S.I konpletman.  Akoz parey ou dir sa i en premye pa.  Lesansyel se sa ki pe vini.  Se sa lesansyel.  E si nou pou annan en deba lo sa lesansyel par Lasanble Nasyonal mwan mon dir zot bravo.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  E Minis mersi pou la fason ki ou’n resevwar sa ki mon’n met devan ou.

Mr Speaker eski Minis pou nou ankor enn fwa al dan en lot pa pli devan pou nou vin strik, eski Minis i ava konsidere pou sanz Lalwa?  Sa i sa lager la ki nou pe koz lo la.  Pou sanz Lalwa pou dir ki en boutikye ki ganny atrape pe vann lalkol an deor bann ler ki’n ganny stipile, i pou perdi son license, permanan!  Ok?

I pou perdi son license permanan e ki sa bann zafer en pti fine, letan ou donn li en fine, konbyen ou’n donn li ?  Konbyen ou’n fer li peye ?  R100, R200, R10mil.  Be pa ou avek mwan ki apre re peye sa fine?  Zis konman i fini ganny son fine soz i monte, lot i monte ensidswit.

So premyerman Mr Speaker en aras license permanan pou sa lofans pou nou kapab protez nou bann, nou bann dimoun.  Dezyenmman, dezyenmman ki ankor enn fwa annou ogmant, annou ogmant serten keksoz.  Bann zafer lavant lalkol avek bann zanfan anba laz, eski nou pa kapab pran ankor keksoz imedyat?

Be menm ankor enn fwa si pou vote parey mon’n dir i R100 met. Eski nou pa kapab desin en paramet otour tou nou bann lekol pou dir la i la sa paramet, otour sa paramet lalkol pa pou ganny drwa vann.  E sa ankor enn fwa i en keksoz ki nou kapab fer imedyatman.

Konmsi pou ranforsi.  E petet Mr Speaker mwan mon ti ava dir – en t3enm – olye Minis pe dir avek nou lamannman.  Petet mwan mon ti ava dir olye ki nou al sa 1 er edmi akoz nou pa kit li parey i ete la e fer bann sipervizyon.  Mon pa konnen mon si  Licensing Authority i kapab – Lapolis li be pa i annan son bann informers.  Lapolis i annan son bann informers.  Be si nou nou anvi vreman atak sa be annou osi annan bann informers.

E finalman Mr Speaker pour ki mon pa konnen mon ki mannyer sa i kapab marse, nou tou nou konnen ki poudir laboutik ki ouver – lontan laboutik ti fermen 7er diswar li.  7.30 ou ti tann nou paran i dir ek nou taye avan laboutik i fermen pou al aste sa dernyen pti konmisyon ki ti’n manke pou lannmen. Pa lalkol me sa pti konmisyon.  Eski nou pa kapab anmenn en ler fermen e en ler ouver pou laboutik.  Parski la parfwa letan zanfan pe al lekol laboutik i fermen ; zanfan pa gannyen sa pti keksoz ki zot bezwen.

Me selman 2er bomaten, whatever i ouver.  Eski nou pa kapab ranforsi sa e sa i zis enn de keksoz ki mon pe propoze la pour ki nou kapab pe bouz devan menm Mr Speaker.  Mon espere Minis i ava konsider sa bann keksoz.  E sa Seksyon ler petet sa ou Schedule (a) ek bann fees menm si parey Onorab Afif in mansyonnen, e parey mon’n eksplike i pa pou vreman annan en gran lefe me nou kapab tyeke.

E an plis ki sa Minis bann zafer Pti Ponm parey in ganny dir Gouvernman pa konnen si i pe anmas larzan ki devret pe anmase? Si parey ou pe dir 80poursan zot pe dir avek ou 80poursan zot bann sales i pti ponm ki mannyer eski sa i reflekte avek tax ki ou pe ranmase?  Se parski i pa ankor fer en pti masin ki annan en counter lo la.  Be mwan mon krwar ki deswit la krwar mwan si ou ti’n met en – si dan ou soz ki poudir tou bann ki annan en Bottlers License fodre ki zot annan sa masin ki konte konbyen zot prodwir parey Seybrew be sa osi tou i ava en lot fason.

Pou nou konnen ki poudir nou pe ranmas larzan ki nou devret ranmase an attendant ki pran bann lezot desizyon pou deal avek sa Pti Ponm.  Akoz i pa bon nou pa kapab kontinyen annan en keksoz ki pa bon lo nou soz.  Be imedyatman, imedyatman pti ponm pou bezwen arete, met son masin e apre sa ki son license i ava deroule.  Konmsi Minis pou nou pran bann desizyon ki en pe serye.  Mon konnen ki poudir ou en boug ki serye.  Se pou sa rezon mon kapab koz avek ou koumsa.  Mersi bokou Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab ou ti’n merit ganny sa en pti pe avan.  Sa diskisyon koumsa la ou vwar akoz bann lide pe vin ansanm.  So mon krwar ki si parey mon dir ki Parlman i pare pou annan en deba Nasyonal lo la e propoz serten rekomandasyon mwan mon siport sa 100poursan.  So pou nou avanse Mr Speaker mon partaz antyerman bann propozisyon ki ou fer me mon ti a kontan kantmenm si nou pou fer amannman zot propoz avek mwan e mon retourn avek sa bann amannman.   Si zot ok avek sa mon krwar pou konklir lo sa fason Mr Speaker.  Mersi.

 

MR SPEAKER

Mersi Minis.  Minis petet zis en pti keksoz ki mon ti a kontan partaze mon osi pou met lanfaz lo sa ki Onorab Ramkalawan in dir.  Mon krwar bokou konsern se ki en vilaz i bezwen en landrwa en ler.  En vilaz i bezwen annan en ler dormi pou li kapab reveye lannmen bomaten.  Nou pa kapab annan en vilaz ki ler aret vann lalkol i 9er diswar me son laboutik i ouver ziska 1 er bomaten. Sa vilaz pa pe dormi e nou konnen poudir i pa pe vann zonnyon, lay lantir.  Nou konnen ki i pe vann e petet dan tou sa bann keksoz ki ou pe pran an konsiderasyon avek CEO Licensing mon krwar nou bezwen revwar, ler nou pey due en license i bezwen annan en ler ki laboutik i fermen, ki sa vilaz ki sa kominote i kapab al dormi, resourse pandan lannwit, refer lekor pou zot kapab al travay.  E lo ler konmans vann lalkol mon krwar pous li 1.30 pa fer diferans.  11er, 11.30 i akseptab i pa pou fer gran,  gran diferans me annou pran en fanmir petet ki Dimans son ler manze i midi,  midi edmi.  Ok?

Oubyen menm dan lasemenn dan en zour i anvi bwar en pti boutey diven and all that i bezwen esper 1.30.  Dimans i sa me dan lasemenn i diferan.  Me mon krwar lenportans i vin plis lo ler fermen.  Si nou annan en ler ki bann laboutik i fermen ou pou napa problenm.  Ou fek dir Minis bomaten poudir enforcement i weak, e ler ou annan en ler fermen i touy sa zafer enforcement akoz mon asire SLA osi napa kapasite pou li fer monitoring tou sa vilaz, tou  sa landrwa aswar ki pe vann lalkol.

E ankor petet mon al en pti pe pli lwen, bokou bann aksidan ki’n arive aswar oubyen dan gran maten, i asosye avek bann laboutik i ouver ziska tar e ki pe vann lalkol ziska tar.  Zis en pti propozisyon Minis, petet ou a kapab pran sa osi tou dan ou konsiderasyon.

E mon still – parey mon dir en vilaz i bezwen annan en ler dormi, i bezwen annan en ler reveye.  Mon aret  la Minis.  Onorab De Commarmond in atir mon latansyon i oule dir en pti parol.

 

HON CHARLES DE COMMARMOND

Mersi Mr Speaker.  Mr Speaker baze lo sa ki pe ganny propoze lo nou kote latab nou tonm dakor, e nou menm met en pwen pli devan.  Si Minis i vin ek sa bann, parey letan mon osi mon’n dir bann statistic e ki sa diskisyon i konmans fer depi pli boner, menm avan Desanm petet nou kapab vin ek en keksoz en konklizyon pozitiv lo la.

Mon krwar alor si Gouvernman i anvi sa bann keksoz i al vitman sa ban konsiltasyon i enportan, sa diskisyon i enportan, sa deba i enportan.  Antretan enforcement i bezwen ganny improve e mon krwar mwan si nou kit sa ler parey i ete la mon osi mon tonm dakor lo la.  E enforcement i ganny fer e nou al vitman  dan sa bann deba.  Donn nou statistic i enportan mon krwar nou kapab vwar en laklerte e en konklizyon fantastik dan le shortest delay.  Mersi.

 

MR SPEAKER

Mersi Onorab De Commarmond.  Minis mon a donn ou en dernyen parol, dernyen komanter.

 

MINISTER MAURICE LOUSTAU-LALANNE

Mersi Mr Speaker.  Mr speaker mon ankouraze avek sa konklizyon nou diskisyon lo sa size enportan e mon pe esper avek bokou rapidite bann  amannman e osi lo mon kote mon pou fer sir ki sa action group ki rankontre pou sa size zot met zot pare, pou antre dan sa dyalog e al pli vit si nou kapab fer li sertennman.  Mersi Mr Speaker.

 

MR SPEAKER

Mersi Minis Loustau-Lalanne.  Nou ava remersi ou pou vin pas ankor en pe letan avek nou apre midi pou nou kontinyen sa deba.  Mon ti a kontan osi remersye ou Special Advisor Ms Sitna Cesar e osi CEO Seychelles Licensing Authority Mr Andre Pool.  Minister avek ou lekip mersi e nou ava eskiz ou parmi nou.

 

(MINISTER LOUSTAU-LALANNE AND HIS DELEGATION WAS EXCUSED FROM THE HOUSE)

 

MR SPEAKER

Bon nou ava kontinyen nou travay.  E nou ava al lo Mosyon.  Mon ava demann Onorab Clive Roucou pou move premye Mosyon lo Order Paper.  Onorab Roucou.

 

HON CLIVE ROUCOU

Mersi Mr Speaker.  Bonn apre midi Mr Speaker.  Bonn apre midi tou koleg, Manm Onorab e tou dimoun ki a lekout dan lakour.  Mr Speaker Mosyon i lir koumsa.  Ki sa Lasanble i aprouve ki non Komite ki ozordi i apel ‘HIV/AIDS and Sexual Reproductive Health and Rights (SRHR), i sanze pou vin Committee For Communicable Diseases, HIV AIDS and SRHR, e osi aprouve pou sanz Term of Reference.  Mr Speaker mon demann permisyon pou mwan dir 2 mo lo sa Mosyon  silvouple ?

 

MR SPEAKER

Go ahead Onorab.  Ou pe prezant ou Mosyon, go ahead.

 

HON CLIVE ROUCOU

Mr Speaker, Mosyon ki mon’n prezant devan nou Lasanble dan mon kapasite konman Chairman komite VIH Sida e Drwa Lasante Reprodiktiv, pe efektivman demann nou Lasanble pou aprouve ki non Komite e nou term referans anba ki  nou pe aktyelman fonksyonnen e ganny sanze.  Sa i ava permet nou konman en Komite kapab elarzi nou scope of practice e vin pli relevan avek sityasyon  aktyel, e solidifye nou komitman avek nou bann partner aletranze ; par egzanp nou bann konfrer pei SADC, kot bann demann ki’n ganny met devan i a kapab ganny etabli.

Konman en Komite nou’n realize e deside ki si nou anvi zwen en rol pli enportan konman bann Manm Parlman e fer en travay pli efikas e pli pertinan, an relasyon avek Lezislasyon vize ver lasante e byennet nou pep, sanzman non e term referans anba ki nou pe travay i en keksoz enperativ pou nou kapab akonpli nou travay e fer sa travay ki nou pe fer ki vreman enportan vin pli solid.  Mr Speaker i enportan pou note ki tou Manm komite lo tou le de kote latab in agree pou azout Communicable Diseases avek non nou Komite ki ava fer li pli efektiv.

Mr Speaker avan mon kontinyen, mon anvi zis donn en pti definisyon lo Communicable Diseases, pou nou pli byen konpran, akoz i enportan pou nou met Communicable Diseases avek non nou Komite.

Mr Speaker Communicable Diseases oubyen bann maladi transmisib e enfeksye i ganny koze par bann mikro lorganizm parey  bann bakteri, bann viris, bann parazit  e bann fungi ki kapab ganny transmet direkteman oubyen endirekteman sorti kot en dimoun pou en lot dimoun.

E tousala, tousala avek azout sa Communicable Diseases oubyen bann maladi transmisib i ava sort of kouver en pti git, kouver en pti git sa bann maladi ki pou tonm anba Communicable Diseases.  Mr Speaker i enportan pou note ki sa eleman VIH Sida e Drwa Lasante Reprodiktiv, pa’n ganny retire avek non Komite avan.

Menm si VIH Sida li osi i transmisib nou pa’n retir li.  Sa se akoz nou anvi kontinyen met lanfaz ek laksan lo sa maladi ki reste nou target prensipal konman parti nou proze ki ti ganny adopte dan 35enm Lasanble plenyer ki ti fer Maurice.  Alors nou kontinyen met sa lanfaz lo VIH Sida  e Drwa Lasante Reprodiktiv.  Me par kont Mr Speaker nou’n azout sa mo Communicable Diseases akoz bann pei SADC pe egzize ki nou konman en Lasanble nou azout en bout ek nou komite ki apel en TB Caucus.  Me nou tou nou okouran ki TB pa sitan en tro gro problenm parey kontinan Lafrik li menm.

Be par azout Communicable Diseases nou pou sort of anglob TB e fer li tonm direkteman anba nou komite.  Alor sa osi tou i a permet nou konman en Komite si i annan okenn bann maladi enfeksyez e transmisib, nou Komite i a kapab ganny en pti pe lepa pou nou kapab deal avek sa sitasyon.  Alors konman en Komite nou’n vwar li ki i enportan ki nou sanz nou non e nou term referans.

Alor pou konklir Mr Speaker dan lartik 104 nou Konstitisyon ki gid legzistans nou Komite e donn li sa lankadreman legal pou li fonksyonnen e an plis ki  bann prosedir travay i ganny defini dan nou Standing Order, alor konman en Komite sa 6enm Lasanble i nou devwar pou nou kit nou azour ave bann sanzman e demann neseser pou asire pou fer nou travay efektiv pou byennet lepep Seselwa.

Sa osi i ava ranforsi nou kapasite konman en Komite e donn nou konman en Lasanble sa lenfliyans nou bann demann  Nasyonal.  Alors mon pe demann tou mon bann koleg pou siport sa sanzman dan non e Term Of Reference.  Mersi Mr Speaker.

 

MR SPEAKER

Mersi Onorab Roucou.  Okenn Manm ki segonn Mosyon.  Yes Onorab Egbert Aglae.

 

HON EGBERT AGLAE

Mr Speaker mon pe segonn sa Mosyon dan sanzman dan non Komite e mon ti a kontan dir de mo an sipor sa Mosyon.

 

MR SPEAKER

Go ahead Onorab.

 

HON EGBERT AGLAE

Mr Speaker sa komite ki depi ler nou zwenn konman 6enm Lasanble in fer en travay vreman remarkab kot nou partisipasyon lo nivo lokal e menm enternasyonal, in montre poudir nou kontribisyon ki nou nou’n fer i valab.  E tou Manm ki lo sa Komite lo sa de kote parti, in anmenn bann kontribisyon vreman valab.  E nou tou nou’n ganny sans pou nou pas atraver bann leksperyans ek bann oryantasyon menm lo nivo lokal ouswa enternasyonal avek nou bann partners.

Mr Speaker nou rekonnet poudir avek modernite e bann demann ki parfwa i egzizan sirtou lo nivo enternasyonal; kot i annan bann diferan lenstans kot i annan sa bann komite parey menm lo nivo Lafrik, Europe kot i annan bann Health Committee ki li anglob bann diferan laspe ki lye avek medikal anba sa bann Komite.  Me nou dan nou konteks nou nou’n vwar li relevans pou nou azout sa Communicable Diseases avek pou en fason prevwayan vizyoner a lavenir ki menm si nou pa pe fer fas avek bann maladi pandemik ki ganny trouve parey lo nivo Lafrik, me selman nou bezwen met nou azour e annan en kad osi ki kouver nou si an ka i ariv bann maladi ki kapab tous nou.

E parey anba SADC Mr Speaker i annan bann diferan Caucus.  Parey in nonmen i annan malaria, i annan TB Caucus e nou santi poudir menm si nou Sesel i pa en maladi ki alarman, me selman i egziste.  E osi resaman lo nivo Lafrik i annan  maladi Ebola ki byensir ki pe propaze i pe konmans koz serten lenkyetid.  Be nou santi poudir menm si nou,  nou lwen, nou lwen ek sa bann koz ek sa bann maladi, nou reste vilnerab.

E nou,  nou santi poudir nou Komite i bezwen osi si i arive demen ki annan sa bann keksoz ki sape ki ariv kot nou, nou kapab pare pou nou pran serten aksyon, donn sipor bann Lorganizasyon lasante lokal e menm annan bann Lezislasyon ki pou protez sa pep Seselwa kont bann tel maladi ki arive.  Akoz Mr Speaker en maladi li menm li ler i pou tous nou byensir avek en pti popilasyon parey Sesel i kapab annan en lefe katastrofik sirtou avek bann maladi ki kominikab.

So Mr Speaker mon krwar i enportan pou nou zwe sa rol, vin en pti pe pli prevwayan e an menm tan vin en pti pe pli modern.  Ouver sa scope pou ou kapab donn plis sipor avek bann Lotorite lokal.

Mr Speaker osi i enportan pou rekonnet ki sa komite osi i annan son bann Mosyon ki i pe travay lo la ki pou vin dan sa Lasanble tre byento pou nou kapab dapre bann diskisyon ki nou’n fer avek bann partners, i pa bann Mosyon ki’n zis nou’n asize nou’n dir ti a bon met sa, annou fer li koumsa.

Me in tout en seri konsiltasyon ki’n ganny fer avek Minister Lasante, avek Konsey Nasyonal pou Aids.  Tousala. E nou santi poudir i annan serten soutyen ki nou konman bann Lezislater nou kapab anmennen sirtou kot i konsern bann baryer.

Baryer legal ki egziste ozordi ki anpes serten akse direk a bann dimoun ouswa bann pasyan kot i konsern serten kategori maladi ki zot pe fer fas avek.  E nou osi anvi protez sa group lazenes ki pe monte ki aktiv ki nou santi poudir zot osi zot bezwen en sipor malgre zot anba laz i ava annan en fason.

E sa Komite sa travay ki pe ganny fer i pe ganny akeye avek bann Lotorite, ek  Lazans avek sipor.  Alors Mr Speaker mon krwar nou Komite malgre sa ki enportan la se ki menm si nou pe preski vin a lafen nou mandan, me selman sa ki pou vini, sa ki enportan i bezwen kontinyen sa travay.   I pou bezwen kontinyen akoz in vin en Komite ki en Standing Committees e bann Term Of Reference i pou reste parey, parey i annan ki’n amande la.  E son travay parey mon’n dir Mr Speaker i pou bezwen annan en kontinyite.

Avek sa Mr Speaker mon demann bann Manm pou donn sipor sa Mosyon pou nou kapab sanz sa non pou fer nou vin en pti pe pli relevans dan sa konteks modern ki nou ladan.  Mersi.

 

MR SPEAKER

Mersi Onorab Agale.  Mon a donn laparol Onorab John Hoareau.

 

HON JOHN HOAREAU

Mersi Mr Speaker.  Bonn apre midi Mr Speaker.  Bonn apre midi tou dimoun ki a lekout.  Mr Speaker mon le koz en pti pe lo lakonplisman sa komite HIV Aids avek Communicable Diseases la ki pe al ganny apele.  Avan Komite ti konsantre son travay plizoumwen lo sansibilizasyon, ledikasyon e travay Lezislatif.  Zis pou donn enn de legzanp lo kote sansibilizasyon nou’n vizit bann popilasyon kle, parey prizonnyen kot nou’n enterakte ek bann prizonnyen e osi avek Lotorite Prizon lo bann size parey harm reduction e HIV.

Lo kote ledikasyon nou’n fer plizyer konsiltasyon avek bann zenn etidyan lo Mahe, Praslin ek La Digue, lo size prevansyon HIV e ekout zot konsern lo plizyer bann size lasante reprodiktiv.

Lo kote Lezislatif parey Onorab Aglae in di avan mwan.  Nou pe travay osi lo bann Mosyon ki nou pou anmenn devan Lasanble lo bann size parey universal access to health care an relasyon avek disparite ki annan lo laz konsantman pou sex e drwa lasante enkli en harm reduction.  Nou’n osi angaz nou avek bann sosyete sivil parey HASO e lezot.

An menm tan nou’n etabli en relasyon tre pre avek NAC National Aids Council ki pe  travay osi lo ban Polisi Nasyonal e plan stratezik lo HIV ek Sida.  E ansanm nou pe travay osi pou realiz bann SDG goals pou elimin sida par lannen 2030. E osi nou pe target – nou pe enkli travay pou nou target nou popilasyon  setadir 90poursan nou popilasyon ki’n teste pou HIV.  90poursan ki konn son stati e 90poursan bann ka pozitiv ki pe pran tretman korekteman.  Alor nou tre proaktiv.  Nou’n osi fer prezantasyon dan bann diskisyon lo nivo enternasyonal.

Mr Speaker nou’n vwar li neseser pou nou sanz nou non ek nou TOR nou Terms of Reference akoz nou bezwen adres osi lezot maladi Communicable  ki relye avek Lasante Reprodiktiv e bann maladi oportinistik ki relye avek Sida tel konman TB.  Nou osi bezwen adres size Hepatit C e lezot ankor.  Alor avek sa nouvo TOR i pou donn nou en pli gran levantay pou nou kapab desarz nou responsabilite lo en pli gran lanpler.

Dezyenmman ler nou partisip dan sa bann rankont enternasyonal sirtou lo nivo SADC ki nou sponsor prensipal.  Sa i a permet nou kapab koz lo menm langaz anvi ki sa bann Komite Parlmanter dan bann lezot pei SADC zot osi zot annan size maladi Communicable.  Avek sa Mr Speaker mon remersi ou pou sa loportinite pou koz lo sa size e mon demann tou Manm pou vot an faver.  Mersi.

 

MR SPEAKER

Mersi Onorab Hoareau.  Mon a donn laparol Onorab Audrey Vidot.

 

HON AUDREY VIDOT

Mersi Mr Speaker.  Bonn apre midi tou Manm ankor en fwa e bonn apre midi tou piblik ki a lekout. Mr Speaker sa Mosyon ki devan nou Lasanble i vin avek bokou refleksyon e diskisyon koman en Komite ki mannyer pou nou kapab amelyor nou rol e responsabilite pou vin pli proaktiv e re vwar nou manda dan ki pli bon fason pou edik nou popilasyon ki nou krwar dan en lasante pour tou, en lasante partou e lasante dan tou.

Ki tou dimoun dan sesel i attain en pli o nivo lasante fizik, sosyal, mantal e spirityel e viv byen. Mr Speaker komite VIH Sida e drwa lasante Reprodiktiv in fer li son devwar pou zwenn avek plizyer partener parey mon bann koleg in dir ki enkli Minister Lasante, konsey pou VIH Sida, bann Lorganizasyon non- gouvernmantal, pou pli byen konpran zot rol, responsabilite e manda.

E sa bann dyalog e sesyon travay in fasilit bann Manm komite prepar kestyon pou Minister Lasante dan bann lenstans kot zot in vin dan nou Lasanble pou prezant Statement e menm dan zot Bidze.  Mr Speaker pou lenformasyon Lasanble ankor sa komite pe travay avek son bann partener pou prepar Mosyon ki pou bi partizan.  Zisteman pou montre progre Sesel dan lalit pou elimin VIH Sida san bliy nou bann konstrent e koman ansanm nou kapab travay pou amelyore ki Sesel i ariv son target dan elimin maladi transmisib tel parey VIH Sida.

Mr Speaker Komite i pare pou siport vizyon Gouvernman pou kontribye dan amelyor nivo lasante lapopilasyon Seselwa par ranforsi aksyon, Polisi e atraver bann stratezi pli efektiv, ekstansiv dan bann progranm prevansyon.  E desantraliz servis pou ankouraz piblik akse avek lasante, pou konnen zot stati e resevwar zot tretman neseser.

Mr Speaker sa Komite i en lekip ki valoriz lopinyon kanmarad e determinen  pou kontiny son travay e reprezant Lasanble dan bann konversasyon ki tous maladi transmisib e lasante reprodiktiv ki swa lo nivo Nasyonal e enternasyonal.  Akoz parey Gouvernman nou krwar dan sa Lasanble dan entansifye nou progranm, ledikasyon lasante pou ankouraz bann bon latitid pou viv an pli bonn sante e pou anpes maladi ki kapab ganny evite.

E avek sipor nou Lasanble pou aprouv sa Mosyon, pou osi permet sa komite annan en balans gender dan reprezantasyon manm ki pa zis madanm oubyen pa zis msye me plito annan en melanz.  Ki parey i ete ozordi kot nou annan 4 msye avek 3 madanm.

Avek sa de pti mo Mr Speaker mon a dir ou mersi pou donn mwan laparol e mon a demann lezot koleg pou siport sa Mosyon.  Mersi.

 

MR SPEAKER

Mersi Onorab Vidot.  Bon mon a retourn laparol kot loter – non en moman.  Onorab Georges ou ti oule entervenir?  Go ahead Onorab.

 

HON BERNARD GEORGES

Mersi Mr Speaker.  Mr Speaker i pa ti mon lentansyon entervenir.   Annefe mon pa ankor vreman pare pou entervenir, me ler mon pe lir TOR ki in ganny, fek resevwar par Clerk mon remarke ki i annan en de pti modifikasyon ki nou ti ava kapab aporte, me malerezman mon’n ganny sans lir zis lanmwatye.

Eski Komite i ava dakor ki si nou pou adopte sa TOR pou napa okenn gran sanzman  apard zis enn de sanzman tipografi ki zot ava aksepte apre okenn modifikasyon ki mon ava donn zot direkteman, san ki nou tard deba la ozordi.  Mersi.

 

MR SPEAKER

Dakor mon osi mon ti’n not enn de pti fot ki mon’n vwar bomaten, me selman mon’n mazinen poudir in ganny fer en pe vit pou zot kapab prezante ozordi.  Me parey Onorab Georges in dir nou ava anvoy kot zot apre  zis pou rektifye. Ok.  Onorab Clive Roucou ou ava fer konklizyon.

 

HON CLIVE ROUCOU

Mersi Mr Speaker.  Mr Speaker premyerman mon anvi remersye tou bann Manm ki’n aport kek keksoz pou an relasyon avek Mosyon.  Parey in ganny dir Komite i reste touzour aktiv e nou kontinyen vin pli proaktiv pou asire ki nou travay i vin pli efektiv e pli byen dan nou demars pou improve lasante nou pep.

E mon’n pran an konsiderasyon sa ki Onorab George in dir.  Komite napa okenn problenm avek sa pou sa bann kekfwa bann pti fot ki nou’n fer an relasyon, avek nou travay ki nou ti pe fer en pti pe vitman.  Alor nou a pare konman Komite pou nou zwenn Onorab Georges pou fer sa Ban pti koreksyon ki nou devret fer.   Alors i reste ziz pou mon demann tou Manm pou siport nou TOR avek sanzman nou non.  Mersi.

 

MR SPEAKER

Mersi Onorab Roucou.  Bon nou’n ariv moman kot Lasanble pou pran desizyon lo Mosyon ki devan nou pou komite HIV AIDS and SRHR sanze pou vin Komite pou Communicable Diseases HIV Aids and SRHR.  E osi sanz son TOR.  Mon ava demann tou Manm ki an faver?  Okenn Manm ki kont?  Madanm Clerk?

 

MADAM CLERK

Mersi Mr Speaker.  25 Manm in vot an faver.  Personn kont.  Mersi.

 

MR SPEAKER

Mersi.  Savedir Mosyon in ganny aprouve par Lasanble Nasyonal.   Bon mon sizere nou pran en Break e apre Break nou a pran 2enm Mosyon lo Order Paper.  E sa se Mosyon ki pou ganny move par Onorab Flory Larue.  Nou ava Break e nou retournen 4er.

 

(BREAK)

 

 

MR SPEAKER

Bon nou ava kontinyen avek nou travay, e nou ava pas lo 2enm Mosyon.  Mon ava pas laparol avek mover Onorab Flory Larue.

 

HON FLORY LARUE

Mersi Mr Speaker.  Mr Speaker mon Mosyon i lir koumsa;  Lasanble Nasyonal i demann avek Gouvernman pou enpoz en moratorium lo konsiderasyon tou laplikasyon pou nasyonalite Seselwa, ziska ki sa legzersis Nasyonal pou revizyon Lalwa Sitwayennte anonse par Gouvernman i konplete.’

Mon ti a kontan prosede pou debat lo mon Mosyon silvouple Mr Speaker.

 

MR SPEAKER

Kontinyen Onorab.

 

HON FLORY LARUE

Mersi.  Konstitisyon i Lalwa siprenm e i donn direktiv lo ki mannyer nou pei i ganny gouvernen.  Mon pran en lokazyon pou enform tou piblik Seselwa ki zot kapab aste en Konstitisyon an Kreol kot Lenstiti Kreol, pou R150.

Laranzman pe ganny fer, pou fer li vin disponib, kot Antigone e lezot magazen ki delivre e distribye liv.   Dan sapit 2, Konstitisyon Sesel, i koz lo bann fason ganny sitwayennte Seselwa.

Dan Konstitisyon referans i ganny fer ki bezwen annan en Lalwa ki eklersi bann kriter pou sa arive.  Seychelles Citizenship Act i klarifye an detay ki bann mezir ouswa kriter, ki i annan pou ganny sitwayennte.  Mon oule port latansyon, lo en deba ki ti pase le 25 Septanm 2018, isi dan nou Lasanble.

Topik sa deba sa zour Mr Speaker, ti baze lo de frer Bachmann ki ti pe ganny sitwayennte Seselwa.  Pandan sa deba, ti annan en propozisyon pou anmenn en moratorium avek Minis Telemaque.  Onorab Basil Hoareau ti fer sa propozisyon, baze lo bokou lenkyetid, ki plizyer lezot Manm ti met devan.

E bann fe ki ti ganny devwale pandan sa deba.  Mr Speaker dan deba nou ti ganny bokou leklersisman lo morso Lalwa 5(1) The Seychelles Citizenship Act, ki permet Prezidan donn en dimoun nou sitwayennte.  Deba ti osi en gran legzersis edikasyonnel pou sitwayen, lo enn bann prosesis ganny sitwayennte Seselwa.

Mon oule komans avek Konstitisyon.  Parey mon’n dir topik sitwayennte in ganny vwar dan sapit 2.  Konstitisyon 1993, bann drafter ti donn en rekomandasyon ki fodre fer en revi apre 15an pou gard li azour, e an lir avek lenspirasyon pep Seselwa.

Sa travay Mr Speaker ti ganny fer par en komite, pou revi lo Konstitisyon ki ti ganny etablir an Avril 2008.  Zot ti konplet zot travay e prodwi en rapor an Desanm 2009 ki ti ganny soumet avek Mr James Michel, ki ti Prezidan sa letan.

Sa rapor i fer plizyer rekomandasyon pou revwar Konstitisyon, ki enkli bann sanzman avek sa morso ki adres sitwayennte dan sapit 2.  Ti a bon note ki sa rapor i osi tous la prezidans lo son paz 25.  E ladan i dir nou annou, revwar stati Prezidan apropo son sitwayennte.

Rapor i sizere ki nou regard legzanp lo Lanmerik e nou azout Sesel par nesans, pou met plis lanfaz lo lenportans sa pozisyon.  Sa Mr Speaker ozord,i i vreman neseser dan milye tou sa deba ki pe ganny fer lo sitwayennte.

Eski koman en pep nou oule met restriksyon lo lekel ki vin Prezidan Sesel dan konteks son lidantite?  I annan plizyer pwennvi lo sa topik.   E sa i pou en lot deba, ler fotespere sa bann rekomandasyon i vin devan nou Lasanble.  Nou’n vwar ki osi sa size pou repran nou sitwayennte i bloke, akoz fodre annan serten reform avek Konstitisyon avan nou kapab prosede.

Mr Speaker, an 2010 letan sa revi ti ganny delivre, Biro Prezidan Sesel ti fer sa revi vin piblik lo son sit an Avril 2010.  Mr Michel koman Prezidan ti envit piblik pou pas zot komanter, atraver Attorney General sa letan.  Mr Michel ti demann Attorney General pou konmans travay pou redrafte sa bann Lalwa, e pou kapab donn en nouvo lelan e la souf dan nou Konstitisyon.

Attorney General ti deklare, ‘’konsansis dan bokou sa ki’n ganny idantifye i bezwen ganny update.  E bokou Lalwa i bezwen klarifikasyon pou fer zot pli kler e konform avek bann provizyon konstitisyonnel.’’  Ankor sa letan plis konsiltasyon, e diskisyon ti pou ganny fer,  pou fer sir ki lopinyon tou dimoun i ganny enkli dan sa bann reform.  I ti dir ki sa sanzman pou bezwen 2 tyer mazorite dan Lasanble pou pase –   ou menm en Referendum avek en sipor 60 poursan pou fer sa bann amannman.  Tou sa ti pou ganny finalize depi lannen 2011.

Ozordi Mr Speaker nou an 2019, e nou pa ankor vwar sa bann sanzman dan nou Konstitisyon.  Mr Speaker yer nou Konstitisyon ti ganny 26an.  11an depi ler in ganny revi.  E dan 4an i pou ganny 30an, e okenn revi pa ankor ganny fer lo nou Konstitisyon.

Annou retourn ankor lo sa deba 5(1) dan Lalwa Sitwayennte ki’n vin dan lizye piblik, e in edik bokou dimoun lo sa prosedir.  Sa morso Lalwa 5(1) i dir si, e mo kle ladan i ‘’si’’ en dimoun in fer loner ouswa fer en gran servis pou nou pei,  nou de nou par nou kapab rann li sa loner par ofer li sitwayennte, e i bezwen aksepte avan sa prosedir, sa prosesis i konplete.

Se Prezidan ki annan privilez pou donn sa dimoun sitwayennte.  Mr Speaker a plizyer repriz Onorab Basil Hoareau ti repete ki lenterpretasyon ki Minis ti pe eksplik nou Lasanble dan son lopinyon ti ilegal.  E la kot en opsyon ti ganny met devan Minis ki avek tro bokou iregilarite dan enterpretasyon Lalwa.

I fer ki bann Lalwa pou enplimant sitwayennte i pa ase kler ozordi.  Minis ti dir ti pou anmenn sa propozisyon moratorium pli devan, pou diskite e pou donn nou en revi.  In pas 9 mwan, ziska prezan nou pa’n tann ankor lo sa topik moratorium.  Sa i en opsyon pou nou kapab met lord dan nou bann Lalwa an zeneral.

Me osi avek topik sitwayennte, depi son sours ki dan Konstitisyon.  Dan deba 5(1)  Onorab Hoareau ti met bokou lanfaz lo lenterpretasyon nou bann Lalwa Sitwayennte.  Mr Speaker nou’n ganny en pe sif avek Minis.  I ti dir nou ki dan sa dernyen 10an, depi 2008 ziska 2018, ki anba Seksyon 4 nou ti ganny 128 nouvo Seselwa, anba Seksyon 5 408, anba Seksyon 6 – 334.

Ki ti fer nou en total 870 nouvo Seselwa, ouswa preske 8 par mwan.  Nou ti osi tande ki ti annan en progranm ekonomik, e anba sa progranm 413 dimoun ki ti’n pey apepre en valer 25 Mil Dolar  Ameriken pou vin Seselwa ti ganny nou sitwayennte.  Mr Speaker nou pa konnen lekel sa bann dimoun.

Zot non pa’n ganny pibliye, alor nou pa konn zot idantite.  Sa i fer ki i anmenn nou en total nouvo sitwayen a 1283 dan sa dernyen 10an.  Letan nou donn sitwayennte tou sa bann nouvo Seselwa, i ganny menm drwa avek nou.  Dan ka bann ki ti ganny anba sa progranm ekonomik, i fer ki napa sanksyon letan zot aste later.

Bann loportinite lenvestisman i ouver pou zot partou, e dan tou sekter.  Zot ganny akse avek serten license business ki ti ganny rezerve zis pou Seselwa.  Avek sa pouvwar larzan e grander nou pei, eski sa bann dimoun pa i kapab, si zot oule kontrol bann lentere politik?

An tou de ka dan sa revizyon Konstitisyon, ti ganny met devan Prezidan depi Desanm 2009 lo paz 8, i rekomande ki nou pa donn sa kalite sitwayennte, me plito konsider regard bann permi rezidans permanan.  Si nou retourn ankor lo 5(1), Mr Faure ti donn 59 sitwayennte ant Desanm 2015 ziska Zen 2018 anba sa morso Lalwa.

Ki fer nou apepre 3 nouvo Seselwa par mwan.  Mr Speaker nou kapab demande.  Konbyen ki’n ganny donnen ant Zen 2018, ek Zen 2019?  Si i ti pe donn 3 par mwan, i fer ki in kapab ziska prezan donn ankor 36 nouvo Seselwa sitwayennte.  Annou pa bliye ki sa i son prerogative.

In servi son prerogative osi koman en Prezidan ki pa’n zanmen ganny elekte.  Etikman eski i devret pe partaz nou sitwayennte an abondans? E klerman par strikteman dapre Lalwa sirtou anba 5(1).  E napa okenn nesesite pou pibliy lalis non sa bann nouvo Seselwa.

Nou’n vwar legzanp kot en dimoun ki ti ganny sa privilez iltim ki i pa ti menm okouran ki i ti pe ganny sa kado.   I ti ganny apele pou raport kot Imigrasyon, e i ti ranpli avek lafreyer akoz i pa ti konnen ki pe pase.  Dan sa ka spesifik, sa group ki ti ganny sitwayennte ti pas lo televizyon, e nou ti kapab konn zot lidantite, akoz i ti ganny envit State House.

Dan sa lalis dimoun ki’n ganny sitwayennte anba 5(1), kot en dimoun bezwen montre bokou merit, nou vwar ki i annan fanmir antye ki’n gannyen.  Msye, madanm e plizyer zanfan dan en sel fanmir.  Eski 5(1)  dan son form ki i ete, i sipoze aplik pou en fanmir antye?

Onorab Ramkalawan ti demande ki i annan latransparans.  Akoz non sa bann dimoun pa ganny devwale anba sa Lalwa.  Se sa i ki nou lo sa kote latab i oule.  Se sa ki popilasyon i oule.  Konbyen etranze ki napa lyen familyal avek Sesel, ki’n vin sitwayen nou pei depi 1977?  Nou bezwen pez en fren Mr Speaker.

Nou bezwen met lord ek sa Lalwa, ki donn privilez iltim en etranze, ki donn li menm privilez ki nou.  I annan drwa vote, dek ki i ganny son bann dokiman sitwayennte.  E si in viv plis ki 3 mwan dan en distrik, i kapab met son non lo lalis voter.

E menm i annan bann ki’n ganny akse pou aste later avek Gouvernman.  E pou le moman mannyer Lalwa i ete, toudswit sa dimoun i kapab met son non e partisip dan eleksyon, e vin Prezidan.  Eski sa pa plis rezon pou pez sa fren, met moratorium e revwar nou Lalwa?  Me ki’n arive avan sa?

Ozordi 5(2) i en pe restrikte avek bann kriter pli spesifik pou dekrir bann sirkonstans spesyal.  Me avan bann lamannman, Desanm 2013 5(2)   ti bokou pli ouver.  Prezidan ti annan tou pouvwar, e preske san limitasyon donn sitwayennte.

Bi mon Mosyon, se pou demande ki tou i arete, e nou seryezman revwar nou Lalwa avan ki nou prosede.  Minis Telemaque ti dir nou, i pou anmenn propozisyon bann amannman Lalwa Sitwayennte avan Juin 2019.  Nou Zen 2019 ozordi Mr Speaker.  Napa lamannman ki’n vin devan nou.

En mwan in pase, me par kont an Avril 2019 en lanons ofisyel ti ganny fer pou lans konsiltasyon piblik.  Ti pou annan en seri konsiltasyon piblik ki ti’n ganny lanse par Departman Limigrasyon, kot zot ti pou ekout bann vi piblik, e ekout bann input ki Seselwa ti anvi donnen lo sanzman pou sa Lalwa.

Cabinet of Ministers ti aprouve, ki sa legzersis i ganny inisye pou revwar lezitasyon nou sitwayennte.  PS sa Departman Limigrasyon ti dir ki zot anvi tann tou bann pwennvi piblik.  Sa legzersis ti pou enkli bokou lazans, e zot ti pou fer sa bann legzersis lo Praslin, La Digue e lo Mahe.

Zot ti menm dir ki zot pou konsilte avek tou le 3 lebra Gouvernman, Lezislatif, Egzekitiv e Zidisyer.  Departman Imigrasyon ti dir ki sa legzersis i vreman enportan, akoz deza i fer 25an depi ler sa Lalwa i egziste, depi ler in ganny update.

Zot ti dir nou ki sa legzersis pou pran 6 mwan.  Mr Speaker, la ki sa in ganny lanse, ou menm ou, ou ti fer en deklarasyon dan Lasanble, letan ou ti dir ki 2 Manm Lasanble Nasyonal pou ganny propoze pou asiz lo sa Komite, pou komans sa travay.  Ti fer sa lanons le 16 Avril 2019.

Dan mon Mosyon Mr Speaker, mon demande ki nou annan vre la transparans.  Se sa fodre nou met en fren.  I annan tro bokou konfizyon Mr Speaker.  Sa in aparan letan ti annan sa Referendum ki Mr Danny Faure ti demande ki pei i konsidere, ki ti ganny fer le 27 Me 2019.

Atraver medya sosyal ti annan bokou lafreyer.  Akoz dimoun ti napa lenformasyon kredib pou zot kapab baz desizyon lo la.  Ti annan plis kestyon ki larepons, e ti annan en mank klarifikasyon dan bann prosedir.  Mr Speaker i paret i annan en defayans entern.

Minis ti dir nou ki i annan 152000 paspor ki’n ganny prodwir depi 2004.  Me i pa kler konbyen ki ankor valib; konbyen ki pe viv sesel, e konbyen ki pe viv aletranze?  Nou bezwen reget nou bann sistenm entern, pou nou gard nou bann kontrol.  Pou kapab delivre bann sif ki piblik i bezwen, pou donn konfyans dan sa sistenm ki an plas.

Permet mwan Mr Speaker pou donn en pe legzanp.  Ki met an dout bann sistenm e kapabilite Lalwa.  An 1984, en Mr Francesco Pazienza ti ganny arete an Lanmerik pe vwayaz anba en fo paspor diplomatik Sesel.

I ti dir ki i ti’n ganny donnen sa paspor par ansyen Prezidan France Albert Rene.  A sa lepok i ti annan lyen avek Mafya Italyen, e i ti pe ganny rode par FBI, Interpol e Lapolis Italyen. Sa ti pas 35an pase.  Kote, eski sa paspor ti ganny prodwir?  Konbyen ankor ti annan pandan sa lepok, e apre?  Eski tousala ti ganny fer dan Biro Imigrasyon?

Dan Leta Lanasyon 2013, Mr James Michel ti dir i annan en persepsyon ki nou pe donn nou sitwayennte san diskresyon.  Sa mo’’ persepsyon’’ i tournen.  Nou’n tande sa parol avan Mr Speaker, apre nou’n vwar persepsyon se an realite.

Dan menm laliny, en menm letan Mr Michel ti dir ki pou annan en nouvo policy lo sitwayennte.  Ki fodre ki bann ki enterese, i konn Sesel, zot bezwen montre ki zot annan merit pou zot kapab vin Seselwa.  Me dan menm lannen an 2013 zot ti ganny en skandal enorm.

Le 9 Avril 2013 Marek Trajter en Slovakian ti ganny sitwayennte Seselwa.  Son laplikasyon ti ganny siporte par 3 Manm Lasanble sa Nasyonal sa letan.  I ankor annan enn ki en Manm Lasanble Nasyonal ozordi.  Sa tranzaksyon ti osi bezwen ganny formalize par Minis ek Prezidan.

1 mwan apre ki Mr Trajter i ganny son sitwayennte, i ti ganny detenir, e osi ti pe ganny deporte.  I ti konteste sa detansyon e deportasyon Ankour. Lakour le 7 Me 2013 ti dir ki Minis pa’n aplik tou bann Lalwa ki devret ganny swiv pou retir sitwayennte Mr Trajter, e ki i pa kapab ganny detenir, e i pa kapab ganny deporte.

1 mwan Mr Speaker, mwen ki 1 mwan apre ki in ganny son sitwayennte.  Toudmenm an Septanm 2013 i paret ki Mr Trajter ti ganny deporte abor en avyon prive anba bann sirkonstans ki pa ti kler e ase drol Mr Trajter, Minis Telemaque i dir nou, ki son sitwayennte in ganny retire.

Me dan en lot sirkonstans nou ti ganny dir ki sitwayennte pa kapab ganny retire, akoz i mank serten keksoz dan Lalwa, ki bezwen ganny revize.  Alor ki ti arive dan son ka, ki sitwayennte ti ganny retire?  En lot ka ki kapab ganny konsidere koman en skandal, i sityasyon Mr Radovan Krejcir.

Nou’n ganny dir ki Mr Krejcir i napa en dokiman vwayaz.  Savedir en paspor Seselwa.  Me par kont i en sitwayen Sesel, e i en Seselwa.  An 2017 Gouvernman atraver Departman Imigrasyon ti konmans prosedir pou repran sitwayennte Seselwa Mr Krejcir.  An 2017 Attorney Zeneral i dir ki i annan limitasyon dan Lalwa, e sa pa kapab arive.

Me par kont, zot ti pran pou Marek Trajter an 2013.  Me nou ti vwar Vis-Prezidan Meriton, ki Minis pou zafer etranze dan Lasanble an Avril 2019, vin dir ki sa demars ti fini konplete, e Mr Krejcir  nepli en Seselwa.  Minis Telemaque ti retourn dan Lasanble en semenn apre, e ti vin rektifye sa pwen.

I ti eksplik nou ki ti annan en mank kominikasyon ant sa 2 Minister lo sa size, ki mwan mon krwar i vreman enportan.  Minis Telemaque in eksplik nou, ki zot pa kapab prosede pou pran sitwayennte sa msye.  Akoz Attorney Zeneral in dir klerman ki fodre en keksoz i arive.

In dir nou tenir Mr Speaker.  Fodre sa morso Lalwa ki relye direkteman avek repran sitwayennte en dimoun i ganny revwar.  Fodre ki sa Lalwa i ganny amande.  Sa sitwayen li dapre Lalwa, i kapab demann en Komisyon pou ganny apwente.  Me dan ka son lot konpatriyot, Mr Trajter, sa bann prosedir pa’n arive.

Mr Speaker mwan annan ruling avek mwan, ki sef ziz i Egonda Ntende, ti donnen dan ka Mr Trajter an  Me 2013.  E dan en morso sa ruling i sit seksyon 11 of the Citizenship Act caption 30.  E i eksplik prosedir pou kapab retir nasyonalite avek en dimoun.

E ladan i ti dir nou ki apre ki Minis in donn sa lord, sa dimoun ki son nasyonalite, pe ganny pran avek li, i kapab, apre ki in ganny notifye an ekrir, i kapab demann pou en enquiry.  Me par kont, nou ti vwar dan zizman, ki sa msye pa ti ganny detenir akoz sa bann prosedir pa ti’n arive.

Pou Mr Radovan Krejcir tou keksoz in sezi.  Me par kont Minister pa pe bouz lo bann amannman ou sanzman dan Lalwa.  Eski sa pa en rezon pou nou pez en fren?  Pou nou regete ki pe arive dan sa sityasyon?  Sa menm Mr Krejcir ankor en Seselwa, me li i pli spesyal ankor.

I ti osi ganny en lot paspor Seselwa avek son portre ladan, anba non Egbert Jules Savy.  Menm dimoun avek 2 paspor Seselwa ki’n ganny prodwi dan biro Imigrasyon Sesel.  Mr Speaker i pa en fo dokiman ki’n ganny fer ilegalman, me en dokiman prodwi par Leta, dan biro Leta.

En dokiman vwayaz otantik.  2 paspor konpletman otantik.  Me sa dimoun Egbert Jules Savy Mr Speaker, pa egziste.  An Zilyet 2015 Mr Krejcir, ki li menm li Egbert Jules Savy ti pas Ankour Sid Lafrik.  Dan son temwannyaz i ti dir ki i ti’n ganny sa paspor avek sa fo non, avek led en ansyen Prezidan Sesel.

Mr Speaker, mon kapab konklir ki i ti pe fer referan s avek Mr Albert Rene.  Mr Speaker sa pa en frod komet par Biro Imigrasyon?  Eski sa pa en aksyon koripsyon?  Ler en Departman i partisip dan fer en dokiman anba fo preteks,  eski en krim pa’n ganny komet?

Ki mannyer i apele letan en Prezidan i diriz sa legzersis?  Me nou vwar ki nanryen pa’n arive.  Oli bann lotorite Mr Speaker?  Minis i dir ki sa ka i ankor anba lenvestigasyon par lapolis.  Me Konbyen tan i pou pran nou lafors lapolis pou deklar e ka dan sa sityasyon?.

Petet la i a vin pli fasil.  Nou’n kapab idantifye enn, de ka.  Me konbyen lezot ankor i annan ki nou pa konnen?  Akoz sa dimoun pa ankor ganny debiste?  Ki kalite dezord i annan dan lenterpretasyon Lalwa nou pei Mr Speaker?

En lot ka, i sizer en lot sitwayen ki’n met Sesel lo lasenn enternasyonal.  Sa size El Materi ki zann Mr Ben Ali en ansyen Prezidan Tunisie.  I en skandal ki ti anmenn en lot nyaz nwanr lo nou repitasyon, e kestyonn efikasite nou Lalwa Sitwayennte.  Minis in deza deklar sa ka dan Lasanble, e i ti eksplike ki sa msye i stateless.

Dan son ka i ti en dimoun k ti wanted lo lasenn enternasyonal, e son pei pa ti oule renouvle son paspor ki Mr Speaker, i selman en dokiman vwayaz.   En legzanp.  Mwan ou en Seselwa; ou fer en aksyon ilegal Sesel.  Ou kit pei avan ki zizman i pase, ou vwayaz dan plizyer pei, letan ou pa pe ganny ekoute lo ou paspor Seselwa.

Ou paspor i ekspire, ou sey renouvle sa dokiman vwayaz ki ou paspor, e Sesel pa permet ou fer sa.  Mr Speaker, ou reste en Seselwa, me ou napa en dokiman valid tel ki en paspor pou vwayaz avek.  Eski i vedir ki ou napa en leta?  Eski i vedir ki ou’n vin stateless?  Zis akoz ou napa en paspor Seselwa?

Ou reste en Seselwa.  Rezon ki Minis Telemaque in donn nou, se ki Mr Materi li i stateless.  Me par kont i ankor annan son pei.  Anba ki Provizyon ki nou Lalwa ti aksepte sa e apre donn li sitwayennte anba 5(1) ek tou lezot 5 manm son fanmir?  Ki loner ki tou sa bann dimoun in fer pou Sesel?

Eski i annan dokimantasyon ki montre ki Sesel ti fer resers pou soutenir son reklanm ki i ti’n fer?  Akoz ki depi Fevriye 2013 sa msye ti ganny en resident permit ki’n kontinyelman ganny prolonze.  Mr Materi in vin Seselwa anba 5 (1).  Sa Lalwa i donn zis en dimoun pouvwar pou fer sa, se Prezidan Larepiblik ki kapab fer sa.   Eski sa dimoun ti merit nou sitwayennte?

Dan sa Lalwa i dir “You have done signal honor or render distinguish service to Seychelles”.  Eski fanmir El Materi ti tonm dan sa kategori?  Minis Telemaque ti dir nou dan sa Lasanble an Septanm 2018, ki sa ti sel Lalwa ki zot ti kapab donn li sitwayennte anba.  Eski Minis ti kas Lalwa letan i ti rekomann sa sitwayennte pou Mr El Materi anba 5 (1)?

Eski Prezidan in kas Lalwa lefe ki i pa’n analiz byen sa desizyon, avan ki in sinyen pou El Materi ek 5 lezot manm son fanmir vin Seselwa?  Eski pou sa dimoun ek tou son fanmir, ouswa eski zis pou li deservi sa merit, letan ou pe donn sitwayennte anba 5 (1)?  Mr Speaker tro bokou kestyon lo en morso Lalwa ki permet en dimoun, ki li an Tunisie  i lo ‘’Wanted List’’ vin en Seselwa.  Pou tenir en paspor ki ganny vwar koman paspor pli pwisan dan Lafrik.

Dan sa menm deliberasyon an Septanm 2018, Onorab Basil Hoareau ti dir ki sa prosesis ki’n ganny servi i ilegal.  Savedir sa sitwayennte Sesel ki ganny delivre a lafen sa prosesis in ganny obtenir ilegalman.

Mr Speaker dan sa zizman Mr Marek Trajter Sef Ziz Egonda Ntende ti dir “The rights contain in the laws of Seychelles and in the constitution cannot be regarded as cosmetic.  They are real, and public official that administers these laws must comply with both the letter and the spirit of the law”.

 Si en prosesis in ganny fer ilegalman, pe enport lekel ki’n fer li, i reste ilegal.  Eski i pa korek pou nou pez sa fren, e met en lord, avan nou kontinyen?  En moratorium i a donn nou letan pou revwar tou bann prosedir, e menm revwar Konstitisyon, e pou fer nou bouz devan dan en fason respektab anver repitasyon nou pei.

Minis Telemaque ti aksepte ki petet Lalwa pa’n touzour aplikab dan tou bann ka, e i annan merit pou revwar sa 59 nouvo sitwayennte.  E pete i aplikab pou revwar lezot osi.  I paret tou sa ki pa zwenn en kriter pou vin Seselwa, ti ganny mete anba 5 (1).    Mr Speaker si zot pa zwenn kriter, zot pa zwenn kriter.  Zot pa devret ganny sitwayennte!  Depi ki nou’n fer sa deba, eski lopinyon legal in ganny pran   pou nou kapab bouz devan?  Sa moratorium a fer bann lamannman Lalwa vin en priyorite pou sa Departman.  Bann limitasyon pou repran sitwayennte i en gro problenm, e i pe kout nou, nou repitasyon lo lasenn enternasyonal.

Mr Speaker Cabinet of Ministers ti sorti avek en lenstriksyon kler an Avril ki lyen direk avek sa size.  Me par kont nou vwar Prezidan i defye son prop desizyon ansanm ek son bann Minis, e anmenn en opsyon Referendum, baze lo size lekel sitwayen ki devret vote dan bann diferan eleksyon?

San annan lenformasyon kredib, eski sa ii en aksyon en Gouvernman e en Prezidan ki responsab anver son pep?  Nou pei i bezwen mye ki bann amannman ki ganny fer par morso, e pa regard tou bann size ki monte dan sa domenn.  Eski se sa valer nou sitwayennte?  Mr Speaker mwan ti demann Minis Telemaque si Prezidan ti’n demann bann diferan statistik sorti dan son biro, pou vwar ki kantite Seselwa ki annan aletranze?

Minis ti reponn ki i pa ti okouran si sa ti’n ganny fer par Biro Prezidan.  Ki nou ekspekte alor letan menm Prezidan pei pa kestyonn abilite son departman, pou delivre lo lenformasyon, ki popilasyon pou bezwen, si zot bezwen fer en desizyon dan en Referendum lo sa size.

Spesyalman letan mwens ki   1 mwan pase sa menm Cabinet ek son Prezidan, ti fer en komitman pou antre an diskisyon ek tou sekter pou reviz Lalwa Sitwayennte ki osi kouver zot drwa vote.  Akoz finalman sa se drwa pli o ki ou gannyen letan ou ganny sitwayennte.  Se sa drwa ki ou gannyen, ler koman en etranze ou vin en Seselwa.  Ou desid lo son Gouvernans, e son fitir.

Mr Speaker, mon pe demann egzekitiv pou ekout mon Mosyon, lo met en moratorium lo sitwayennte.  Nou bezwen koman en pei, eksepte ki nou bezwen travay lo tou laspe nou Lalwa, pou nou ganny klarite lo perspektiv nou Konstitisyon e Lalwa Sitwayennte.  Nou pa kapab annan klarite dan konfizyon.  E i kler ki i annan konfizyon.  Mr Speaker mon demann Egzekitiv pou delivre lo promes bonn gouvernans e revwar nou bann Lalwa, akoz se zabitan pli merite ki soufer.  I annan bokou ka ki dimoun i rankontre difikilte.  Si nou revwar Lalwa, nou pou kapab revwar sa bann difikilte, e anmenn solisyon modern.

Mr Speaker, revi Konstitisyon in asiz lo Biro Prezidan Mr Michel, e osi lo pou Mr Faure.  E nou pe espere komans sa prosesis.  Mr Faure in pran son serman lo sa konstitisyon.  Alor i bezwen defann sa Konstitisyon, e met lord kot i annan dezord.

Se Mr Faure ki’n koz lo bonn gouvernans, rann kont e latransparans.  Alor delivre pou pei, sa Sesel ki pli gran ki nou tou.  Mr Speaker, si depi 2009 en revi sipoze ganny fer lo Konstitisyon akoz ti’n ganny 15an an 2008.  E la in ganny 26an yer –  kan ki Mr Faure pou rann kont lo son devwar anver Konstitisyon, pou gard li azour e vivan?  Sa i ava anmenn en pe latransparans lo en size ki anmenn lafreyer dan popilasyon ki’n evidan letan in deside anmenn en Referendum pou desid lo lekel Seselwa ki annan plis drwa ki en lot.

Annou respekte Lalwa nou pei dan tou son form.  Akoz pou le moman i pa paret ki nou pe respekte li, i annan tro bokou bann trou dan nou Lalwa, e sa ki pli mal, i ki nou konnen ki i egziste, me nou pa pe reakte pou aziste li.

Annou pez en fren e aret donn okenn sitwayennte e met lord dan nou lakaz o pli vit posib.  Mon demann tou dimoun pou siport sa Mosyon.  Mersi Mr Speaker.

 

 

(APPLAUSE)

 

MR SPEAKER

Mersi Onorab Larue.  Mon a demann okenn Manm ki oule segonn Mosyon, ki pou segonn Mosyon.  Onorab John Hoareau.

 

HON JOHN HOAREAU

Mersi Mr Speaker.  Mon oule segonn Mosyon e mon oule ganny sa privilez pou koz en pti pe lo sa Mosyon.

 

MR SPEAKER

Mersi Onorab John Hoareau.  Go ahead Onorab.

 

HON JOHN HOAREAU

Bon apre midi tou dimoun ki a lekout.  Mr Speaker, mon oule pran laparol pou fer en pti analiz lo Lalwa sitwayennte e zistifye lenportans, en demann pou en moratorium lo donn sitwayennte.

Mr Speaker ozordi zour en dimoun ki pa en sitwayen Seselwa, i kapab ganny sitwayennte swa par anrezistreman, ou par natiralizasyon.  Lartik 12, sapit 2 nou Konstitisyon i fer kler ki en dimoun ki’n marye avek en Seselwa, i kapab ganny sitwayennte par natiralizasyon.

I bezwen osi ki in reste legalman dan pei, dan Sesel pou omwen 5an, e in pas en legzanmen ki nou apel Citizenship Qualifying Examination, par plis ki 80 poursan.  I pa’n fer prizon, e i pa’n absan pei pou plis ki 1an.  Mr Speaker tou an rekonesan e respektan ki en dimoun i lib pou marye avek nenport ki nasyonalite ki fer li plezir, e konstrir son fanmir,  nou osi trouve ki i annan serten labi lo sa morso Lalwa.  Nou’n vwar ki i annan plizyer sityasyon kot etranze ki’n vin travay dan nou pei, in vini pou travay, e in abiz sa morso Lalwa.  Kot in marye, apre in ganny nasyonalite, e apre in divorse.

I resanble ki serten etranze ki fer sa pou pran lavantaz nou standar lavi, e benefis sosyal e nou paspor ki tre for.  Alor i toutafe normal, pou demann serten kestyon e port en deba nasyonal lo sa size.  Eski a ler aktyel sa morso Lalwa i ankor relevan?  Eski a lavenir nou pou promouvwar en pei ki pa donn okenn sitwayennte?

Oubyen nou, eski nou bezwen ouver serten laport?  Eski nou pou bezwen annan abonn nou konstitisyon pou retir lartik 12?  Mr Speaker se sa bann kestyon koman en pep, ki nou bezwen vwar ansanm.  Mr Speaker en 2enm fason etranze i kapab ganny sitwayennte, se anba sirkonstans spesyal.

Kot en maryaz in kase, oubyen kot en Seselwa ki’n marye, in mor, e sa etranze ki’n marye avek in reste Sesel pou plis ki 13an.  En etidyan ki’n grandi, e etidye ziska segonder.  E in annan rezidans permanan pou plis ki 5an, oubyen in al Liniversite.

Ankor nou bezwen reflesir tre byen lo sa size.  Eski nou pei i bezwen plis bann graduate a sa staz devlopman dan nou pei?  Mon sir ki i annan serten pei ki annan bann Scheme pou ankouraz brain gain.  Nou bezwen balans pwennvi ki statistician in fer sorti lo nou popilasyon ki pti, e nou to fertilite ki ba.

Alor fodre ki nou analiz tre byen sa size avek en lespri ouver.  Mr Speaker an menm tan mon konsyan ki labi i osi annan lo sa morso Lalwa. Souvandfwa ler etidyan i vin Sesel ou vwar ki son paran ki’n vin Sesel e in etidye Sesel, ou vwar ki son paran osi deryer i ganny sitwayennte.

Mon konn sirkonstans kot en paran ki’n vin travay koman en ansennyan e son zanfan in lekol e grandi.  E menm in ganny scholarship, e apre pou vwar ki sitwayennte osi in ganny donnen a son paran e osi lezot manm son fanmir.  En lot fason pou ganny sitwayennte, se anba kriter travay priyorite e abilite ekstraordiner.

Sa se dan domenn Ledikasyon, Spor, Lasyans, biznes e lekonomi.  Anba menm morso Lalwa nou vwar ki Prezidan i kapab resevwar demann, e servi son pouvwar pou donn sitwayennte anba provizyon 5(1) e 5(2) Dekre Imigrasyon.

La ankor nou vwar ki plizyer etranze ki’n vin sitwayennte, anba kriter Meritograsi.  Plizyer sa bann ka pa zistifye parey nou’n vwar, ler Minis ti vin dan Lasanble, e ganny kestyonnen lo sa size.  Nou’n vwar ki kriminel ki’n benefisye anba sitwayennte, anba sa Provizyon osi.

Dan mon lopinyon, Prezidan in abiz sa Provizyon dan Lalwa.  Nou’n vwar menm ki Misyonner ki pa’n ganny, ki’n ganny sitwayennte, (eskiz mwan)      san zot menm fer okenn demann.   Sa i montre ki dekre Imigrasyon i annan bokou loopholes, e fodre keksoz i ganny fer pou nou ganny en pli bon Lalwa.

Mr Speaker en lenvestiser ki envestir plis ki 1 milyon Dolar, e in reste Sesel pou 11an, i kapab ganny sitwayennte.  E la ankor nou vwar sirkonstans kot serten etranze ki’n ganny sitwayennte anba, pou sa rezon.  Ankor mon oule fer resorti, ki napa okenn follow up ki ganny fer pou vwar si vreman sa bann lenvestiser i ankor dan Sesel?  Eski zot ankor pe envestir?  Ki bor zot ete?  Mon konnen ki lefe nou paspor i for, sa i fer ki dimoun i ganny atrakte par sa lavantaz.  Parey mon’n fer resorti, en deba Nasyonal lo sa size pou pli byen, pou nou kapab pli byen regilariz sa bann keksoz, i devret ganny fer.

Parfwa napa bon diligence ki ganny fer lo bann envestiser, e ki fer ki nou kapab kon promiz repitasyon Sesel pou zis en 1milyon Dólar .  Mr Speaker mon krwar ki i annan bokou konfizyon lo sa Lalwa Imigrasyon, e size sitwayennte.  La en bann fe sa, sa bann konfizyon.  Minis Telemaque, li menm in admet ki difisil pou determinen, kantite dimoun ki annan nasyonalite Seselwa, e ki pe viv aletranze.

San preempt  okenn deba lo sa size, nou’n vwar ki Prezidan for in propoz lide Referendum pou permet Seselwa aletranze vote, apre in tire.  Nou’n ganny dir ki 870 etranze in ganny nasyonalite anba Seksyon 4, 5 ek 6 Citizenship Act pandan sa dernyen 10an.  E menm nou pa konnen ki kantite zanfan sa bann etranze i annan.

Sa bann seselwa ki’n ganny citizenship i annan.  Akoz sa bann zanfan i otomatikman vin bann zanfan Seselwa.  Menm si nou ganny dir ki i annan 413 etranze ki’n aste sitwayennte anba Economic Development Act, nou pa zanmen sir ki si sa i sa vre kont.

Anvi ki Minis pa’n donn en lasirans ki son, tou son statistik i azour.  Nou pa kont etranze vin dan nou pei.  Nou pa kont travayer etranze pou ede dan devlopman Sesel.  Me sa ki nou kont se lafason ki serten i ganny nasyonalite, serten i ganny pini, e serten akoz rezon politik, e tandis ki lezot i ganny vreman vit akoz zot koneksyon, e ou vwar partou i annan en pwa demezir.

Alor Mr Speaker, an konklizyon, mon oule pran kont, mon oule fer pran kont, tou sa bann konfizyon, ki annan dan Lalwa.  E ki legzistans sa bann loopholes i fer.  Prezidan i annan tro bokou pouvwar pou donn sitwayennte dan lafason ki fer le plezir.  Mon pou siport Onorab Larue, pou demann Gouvernman pou met en moratorium lo donn sitwayennte ziska nouvo Lalwa i ganny byen diskite.

E mon repete byen diskite, e ler i ava vin dan Lasanble osi, nou ava kapab fer bann deba ki anmenn bann rezonnman ferm lo sa size.  Mr Speaker avek sa, mon oule remersi ou pou sa loportinite pou adres sa size.  Mersi.

 

MR SPEAKER

Mersi Onorab John Hoareau.  Bon Mosyon in prezante, in ganny segonde, Mosyon i open pou en debate.  Okenn Manm ki oule entervenir?  Onorab Ferrari

 

HON JEAN-FRANCOIS FERRARI

Mr Speaker mon ava, ou’n mazinen pou dir i ok pou nou koze la, oubyen nou ava …?

 

MR SPEAKER

Nou annan 15 minit, nou kapab overlap en pti pe apre 5er.

 

HON JEAN-FRANCOIS FERRARI

Nou kapab overlap en pti pe.  Mr Speaker mon ava fer detrwa pwen.  Akoz mon felisit Onorab Larue pou son Mosyon.

I kler e son prezantasyon in byen detaye.  E mon krwar ki napa okenn parmi nou isi dan sa Lasanble ki pa aksepte konmkwa i annan problenm avek nou nasyonalite, e problenm avek ki mannyer nou donn sa nasyonalite lezot dimoun ki sorti an deor Sesel.

Mon krwar nou tou nou dakor.  An tou ka Prezidan li menm li in montre poudir, in aksepte ki i annan problenm.  Akoz in demande pou dir ki i annan en deba Nasyonal lo sa size.

Difikilte ki nou pe fer fas avek la Mr Speaker, se ki nou pa kapab asire avek leksperyans ki nou’n vwar dernyerman ki sa deba pou ganny fer rapidman, e dan letan ki merit ganny fer.  Nou’n vwar plizyer promes ki bann size pou ganny deal avek rapidman.

Me selman nou vwar ki sa bann keksoz zis i reste zis bann promes, e ki finalman nou pa vwar nanryen konkret avek.  Antretan Mr Speaker, parey lekspresyon Kreol i dir “kabri i kapab pe manz salad”.  E mwan, mon enn sa bann Manm ki e pe per ki sa deba i tarde, sa deba i tarde e ki antretan ankor bann fot i ganny fer.

In annan plizyer sa bann fot ki’n ganny fer dan lepase.  Mr Speaker kantmenm mon vwar Sanders pe riye, pe gognarde, mon krwar Onorab Vidot.

 

MR SPEAKER

Onorab Vidot.

 

HON JEAN-FRANCOIS FERRARI

Mon krwar i bezwen aksepte ki son Gouvernman in vreman tre, tre neglizan, e menm, e menm mon ti ava dir dan en fason kriminelman neglizan lo sa size sitan enportan; lo sa responsabilite sitan enportan ki konstitisyon i donn en Prezidan Larepiblik pou li sofgard e protez nou Nasyonalite.

Donk in annan bokou neglizans, e mon ti a kontan ki bann Manm lo lot kote latab i pran sa o serye.  E ki sa i pa zis ganny konsidere koman en joke!  Mr Speaker mon ti a kontan sa moman la, zis rapel bann dimoun en parol ki Mr Phillipe Boulle in deza dir dan lepase.

Ler in dir ki lontan Seselwa ti reve pou vin Ziz.  Me selman anba sa Gouvernman se Ziz ki ti reve pou vin Seselwa.  Akoz nou’n telman partaz nou nasyonalite bonnavini, ki finalman i ti, i ti vin en preski en sport Nasyonal pou bann etranze sey vin Seselwa.

E nou, nou’n distribye sa an brit an bann, e nou’n kontinyen fer li ziska tre dernyerman.  Mwan personnelman mon krwar mon konsistan dan mon pozisyon lo sa size, akoz mwan, mon ti pran laparol dan sa Lasanble, pou mwan denons en group, en serten kantite nasyonalite ki ti ganny donnen.  Mon krwar lannen pase, a group pret e en lezot personnaz relizye.  Mon ti denons sa, mon ti dir mon pa dakor.  E mon still reste pa dakor.  E akoz mon santi pou dir sa privilez i sa pouvwar ki Prezidan i annan pa pe ganny servi avek son diskresyon, e son discernment, pou servi en lot mo relizye, son discernment ki neseser pou ler ou pe aplik sa prerogative ki Konstitisyon i donn ou.

1983 dimoun ki’n ganny donnen, oubyen ki’n ganny vann nou nasyonalite, pandan sa dernyen 10an, i senpleman tro bokou.   Parey Onorab Larue in fer nou konpran, 3 par mwan i definitivman tro bokou, e i en labi.  Mon osi dir malgre sa, mon mentenir ki nou, nou en pei imigran.  I annan dimoun ki pa kontan ler mon dir sa.

Me selman nou tou nou en imigran, nou en desandans imigran lo sa later Sesel!  E alors i pa neseser, e i pa en bon keksoz, ki nou vir nou ledo avek nou listwar, e ki nou bliye, ki nou osi en zour nou fanmir, nou bann zanset ti debark lo sa later.  Me selman i neseser ki nou servi sa pouvwar e sa diskresyon dan en fason responsab.

Malerezman bann Prezidans siksesif ki’n diriz sa pei apre koudeta an 1977, zot in montre ki zot pa pe servi sa pouvwar avek responsabilite e avek discernment.  Depi lepok Prezidan, ansyen Prezidan Rene kot bann mafya ti gannyen, anba Prezidan Rene menm, i lye ki lemonn antye ti kondannen, e sa i kontinyen anba Prezidan Michel e malerezman nou vwar i kontinyen anba Prezidan Faure.

Sa provizyon 5(1) dan nou Konstitisyon, i en privilez, i en prerogative ki devret ganny servi avek bokou refleksyon.  Malerezman lannen pase Prezidan Faure in admet poudir i ti’n servi sa dan en fason en pe leze.  Sa ki nou pe rode atraver sa Mosyon, se la kot mon felisit Onorab Larue pou son detay ki in donnen.

Se ki nou pe demann avek sa Lasanble pou permet ki i annan klarite e ki i annan konsistans dan bann desizyon konsernan nasyonalite.  Prezidan Faure in promet en deba nasyonal lo sa size.  Me selman mon krwar zot ava dakor avek mwan.  Parey mon’n dir pli boner ki nou pa konnen kan sa pou vini.

Akoz Prezidan Faure i annan tandans pran en pe son letan lo sa bann keksoz koumsa.  E nou napa letan.  Nou napa letan akoz nou nasyonalite i presye, e i en size ki bezwen ganny adrese dan en fason, dan en fason irzan.

E pou nou annan konsistans dan sa ki nou dir, si nou vwar pou dir i annan en problenm, si nou aksepte pou dir nou bezwen reget sa size nasyonalite, alors i toutafe rezonnab, e i toutafe onorab ki Onorab Larue i vini i dir antretan ki nou’n tonm dakor, antretan ki nou’n re vizit sa size konplike e difisil.

Antretan annou annan en pozman.  Annou annan en moratorium.  Annou annan, annou pez sa fren.  Annou pez sa fren e annou dir, nou pe met on hold sa bann nasyonalite ki tonm anba 5(1), e osi nou regard avek bokou lentere.

Ek bokou discernment sa bann nasyonalite ki bann demann, ki dan prose pe ganny konsidere, pou nou fer sir ki nou pa kontinyen fer sa bann fot ki’n arive dan lepase.  Mr Speaker i annan osi sa size klarite, laklarte.  Nou bezwen annan laklarte dan bann keksoz ki nou fer.

E mwan mon enn sa bann dimoun, mon’n souvan partaz avek mwan bann koleg, ki parfwa ler Lalwa i restrikte.  Nou mouvman koman bann dirizan i en pe fristran, me selman par ler i en bon keksoz.  I en pe fristran akoz nou mazinen pou dir en Prezidan Larepiblik i bezwen ganny sa, i bezwen annan, sorti kot son pep en konfyans.

Son pep i bezwen annan konfyans dan li, konmkwa i pou servi sa bann zouti ki devan li avek bokou prekosyon.  Me malerezman listwar in montre nou ki sa pa’n arive.  Alors i neseser ki prezan nou reget sa, sa prerogative anba 5(1) e nou gete ki mannyer nou kapab ankadre li dan en fason ki i pou ed nou pei a lavenir.

Me osi i pou ed bann dirizan, enkli sa Prezidan Larepiblik ki la dan Biro Prezidan, ki mannyer sa i marse?  Nou konnen Mr Speaker ki konman en pti pei ki pa tro ris, ki napa en tro gran pwa enternasyonal, i annan, e an plis ki sa en pei tre zoli parey, tre inik parey nou Sesel i ete.

Pou annan bokou demann par bann dimoun sorti an deor pou diferan rezon.  Bann ki annan bokou larzan, ki oule vin reste dan en fason tre onnet.  Oubyen bann ki annan bokou larzan, ki zot larzan pa tro, tro prop, zot pe vin sey vin kasyet.

Oubyen, oubyen diferan rezon, diferan rezon sa bann dimoun ozordi e demen, e a lavenir zot pou kontinyen, zot pou kontinyen sey ganny nou nasyonalite.  Alors i pa akseptab dapre mwan, pou ki sa desizyon pou donnen, oubyen pa pou donnen, i repoz senpleman dan lanmen en dimoun.

E inikman dan lanmen Prezidan Larepiblik.  Mwan mon enn sa bann dimoun ki a faver, ki annan en serten, en serten group dimoun, oubyen serten, en serten group bann dimoun en pe sarz, bann dimoun ki, ki’n, ki annan bokou lasazes, ki kapab advice Prezidan lo bann keksoz koumsa.

E sa i bann keksoz ki enportan, akoz i permet s Prezidan prezan pou li servi son pouvwar avek bokou discernment.  Pou li dir, par egzanp se pa mwan ki desid tousel.  Akoz mon bezwen konsilte, e konsilte avek bann dimoun ki annan leksperyans, e ki annan lasazes.

Donk kekfwa sa deba ki nou pou annan i pou permet nou kapab ankadre sa pouvwar ki ti, pou bokou dimoun ti normal dan sistenm Parti Inik.  Akoz dan sistenm Parti Inik zot rapel sa ki Msye i dir, sanmenm, ok?

Be kekfwa nou, nou devret mazinen ki mannyer nou kapab, nou kapab bouz dan en direksyon kot nou ankadre sa pouvwar dan en fason ki napa kritik, e tou dimoun i kapab fer li dan en fason, e ki nou mars pli pre avek Lalwa, e pli pre avek moral, e pli pre avek lasazes dan nou pei.

Donk se sa rezon akoz sa size i merit ganny re vizite.  Me mon dir alors ki, e mon repran sa pwen santral Mosyon Onorab Larue, ki antretan annou fer sa poz, annou vote koman en Lasanble, pou nou dir ok.  Nou pa konnen konbyen letan i pou pran, si i pou pran 6 mwan, si i pou pran 1an, si i pa pou ariv zanmen anba Prezidan Faure, akoz nou pa konnen si i pou arive.

I annan telman keksoz ki nou fek pe diskite bomaten Mr Speaker i ava dakor avek mwan,  ki lo nou azanda.  Nou azanda Lezislatif.  Oubyen plito lo azanda Lezislatif Prezidan Larepiblik, en telman kantite keksoz ki’n pran ki nou, ki sipoze al ase vit, me selman ki pe pran retar, ok?

Alors nou pa konnen san sa revi pou ganny fer.  Antretan Mr Speaker sa Mosyon i ava permet nou anvoy en mesaz kler kot Prezidan, kot L’Egzekitiv, pou dir ok, pou le moman nou pe tenir en kou.  Alors Mr Speaker mon ava terminen an diran sa demann ki pe ganny fer devan Lasanble, i en demann ki bon.

I en demann ki zis.  I en demann ki pou ed nou pei dan sa moman kot nou tou nou pe enkyet lo sa size nasyonalite.  E nou tou nou pa tro asire kwa ki pe ganny fer? Kwa ki pa ganny fer? Eski bann Lalwa pe ganny swiv?  Eski tou keksoz pe ganny fer dan en fason drwat?

Nou pa konnen.  Nou tou nou dan dout.  Alors mwan, nou, nou anvi lev sa dout.  Nou anvi kapab konsantre lo lezot keksoz ki enportan.  Annou annan sa deba, annou konmans li deza dan Lasanble Nasyonal parey nou pe fer li ozordi.

Antretan nou tenir lo sa bann donnen, nou tenir a bann laplikasyon la.  Nou pa dir personn akoz i annan, i annan en mon met lanfaz lo la.  I annan bann demann ki lezitim, i annan bann demann ki lezitim.  E i pou toultan annan bann demann ki lezitim.

Ok?  Nou pa kapab vwar sa keksoz zis konman en keksoz ki nou devret dir non, non, non, non, non, non, non.  Me selman i bezwen lezitim.  E si en meyer fason pou li lezitim se ki Lasanble i ganny sa posibilite pou li re vizit sa Lalwa, lepep Seselwa i ganny posibilite pou li, li osi konpran sa, e L’Egzekitiv i ganny posibilite pou li konpran ki son pouvwar i pa  ilimite.

Alors Mr Speaker mon donn tou mon sipor Onorab Larue, e mon swete ki L’Egzekitiv i pran sa demann avek tou son merit.  Mersi Mr Speaker.

 

(APPLAUSE)

 

MR SPEAKER

Mersi Onorab Ferrari petet mon ti a demande si mon ganny en lendikasyon, konbyen Manm ki oule entervenir lo sa Mosyon.

Akoz mon napa okenn Manm ankor lo mon lalis.  Konbyen Manm ki, ki ti a kontan entervenir lo sa Mosyon?  Ok.  Onorab Ramkalawan.  Ok.  Zis ou avek -?  Ou entervansyon pou long?

 

HON WAVEL RAMKALAWAN

Mon kapab fer li kourt pou fini.  Parske si letan pe fini, la nou ava fini.

 

MR SPEAKER

Ok. Mon a donn laparol Onorab Ramkalawan, apre nou ava donn mover Mosyon son Drwa de Repons.  Onorab.

 

HON WAVEL RAMKALAWAN

Mersi bokou Mr Speaker.  Mr Speaker mon bezwen premyerman eksprim mon dezapwentman avek lo kote Parti US, akoz napa personn ki enterese pou koz lo en size sitan enportan parey nasyonalite, parey nasyonalite Seselwa.

 

(Interruption)

 

HON WAVEL RAMKALAWAN

Ou’n fini?

 

 

(Interruption)

 

MR SPEAKER

Order!  Order!  Order!  Onorab Georges leave is granted to youOk.

 

HON WAVEL RAMKALAWAN

Onorab Gill in fini?

 

MR SPEAKER

Wi.  Kontinyen Onorab.

 

HON WAVEL RAMKALAWAN

Ok.  Si Onorab Gill in fini mon ava kontinyen.

Wi Mr Speaker.  I vreman tris ki en size sitan enportan parey nasyonalite Seselwa, i pa enteres lo kote US.  Parski personn pa’n montre lentere pou zot koz lo sa size.  Me selman zot Prezidan i enteres pou fer en Referendum lo size Seselwa si pou ganny drwa vote oubyen non!

Sa, sa Mr Speaker se bann keksoz ki tou le zour i montre nou bann kontradiksyon!   Bann keksoz ki konmsi ennler zot pa konnen dan ki direksyon zot pe ale.  Me ou tann zis Onorab Vidot ki ronfle, ki pas son letan ronfle letan lot dimoun pe koze.

E i senpleman, i senpleman Mr Speaker, letan mon pe dir ronfle, parski letan ou a pe koze, ou kontinyen zis tann en dimoun i ape fer bann komanter, i a pe fer sa.  Mon pe koz bon Kreol la.

 

 

(Interruption)

 

MR SPEAKER

Ok.  En moman – en moman – en moman, en moman Onorab.  En moman Onorab.  Bon mon krwar ronfle ki Onorab Ramkalawan pe fer referans avek, se sa interjection.  I pa normal pou lezot Manm gognard Onorab Vidot, e dir pou dir i pe ronfle.  Ok?

Onorab mon krwar nou konpran sa konteks.  Onorab ler zot ti pe, ler Onorab Ferrari ti pe entervenir.

 

HON WAVEL RAMKALAWAN

Yes.

 

MR SPEAKER

Wi ti annan interjection lo zot kote ki mon’n allow, e se sa referans ki Onorab Ramkalawan pe fer.

I pa pe fer li dan en move konteks.  Ok?  Ou still oule laparol? Ok.

 

 

(Off-Mic)

 

MR SPEAKER

Non, non, non, non, ok.  Onorab Ramkalawan.

 

HON RAMKALAWAN

Yes Mr Speaker.

 

MR SPEAKER

Met off mic mon ava ekout li en pti moman, zis met off mic mon ava ekout li.

 

HON WAVEL RAMKALAWAN

Speaker be mon anvi koze, zot in.

 

MR SPEAKER

Mon pou donn ou laparol.

 

HON WAVEL RAMKALAWAN

Personn lo zot kote pa oule koze, letan mon koze zot oule disturb mwan!

 

MR SPEAKER

Wi.  En moman mon a donn li laparol, i ava fer sorti son pwen.

 

HON WAVEL RAMKALAWAN

Me non Mr Speaker ou annan drwa koze.

 

MR SPEAKER

Ok.  

 

(Interruption)

 

MR SPEAKER

Order!  Onorab Vidot.

 

HON AUDREY VIDOT

Mersi Mr Speaker.  Mr Speaker avek tou respe, si Onorab Ramkalawan ti anvi dir mwan, mon pe fer komanter i en lot zafer.

Ronfle ek komanter i de keksoz.  Mon krwar i byen matir, pli koneser ki mwan, i ti devret retract sa mo ronfle silvouple!  Mersi.

 

(Interruption)

 

MR SPEAKER

Ok.  Bon mon’n koze lo sa term, mon’n koze lo sa term.

Mon pa’n pran li dan en move konteks, ok?  Me –

 

(Interruption)

 

MR SPEAKER

Order!   Order!   Mon ki annan laparol.  Me mon’n fer referans avek lezot Manm ki pe gognarde, kwa savedir ronfle.  Me mon pa krwar Onorab Ramkalawan in mean li dan en move konteks. E mwan mon’n pran li dan sa konteks.  Kot i pe koze, ou pe interject oubyen kot Onorab Ferrari ti pe koze, i ti pe interject, ok? 

So son fason servi sa parol i pa dan en move konteks en?  Onorab Ramkalawan annou kontinyen.

 

HON WAVEL RAMKALAWAN

Mersi bokou Mr Speaker.  Mr Speaker mon pa konnen si mon pou rekomanse oubyen si mon pou … (laughter)

 

MR SPEAKER

Kontinyen.

 

HON WAVEL RAMKALAWAN

Mr Speaker sa size nasyonalite i enportan.  E nou koman en pei, i enportan pou nou balans keksoz.

Parske i menm annan, ozordi la letan nou pe koze, sa deba i pran tou kalite dimansyon.  E si nou pa fer atansyon, nasyonalite, sitwayennte, i kapab vin en size ki diviz nou pep.   Parski i annan serten dimoun ki dir avek ou, i annan en diferans ant sitwayennte avek nasyonalite.

E ki zot oule dir par sa, se ki ou kapab annan sitwayennte Seselwa, me selman ou napa nasyonalite Seselwa.  E sa i enportan pou, i enportan pou balanse e pou nou regarde.  E ki zot oule dir par sa se ki, par egzanp en Endyen, en Angle, en Ameriken, en Palestinyen whatever sa lalis.

Mr Speaker mon pou demann ou pou la dernyen fwa pou ou dir avek Onorab Vidot letan mon pe koze, les mwan koze silvouple!

 

MR SPEAKER

Bon.  Annou sey montre en pe respe.  Me selman mon konnen i ariv tou lede kote.

Tou lede kote, me nou fer li.

 

(Interruption)

 

MR SPEAKER

Order!  Nou fer li en nivo ki akseptab.  Wi, okOrderOrder!  Ok.  Onorab, Onorab Ramkalawan kontinyen.

 

HON WAVEL RAMKALAWAN

Mersi bokou Mr Speaker.  Mr Speaker par nasyonalite avek sitwayennte sa ki zot pe sey, zot pe sey balanse se ki si en etranze ki napa, ki napa zanset Seselwa i swiv bann prosedir.

Par egzanp i kapab ganny, i kapab ganny citizenship, sitwayennte anba 5(1), oubyen anba tou sa bann provizyon.  Sa ki’n gannyen se sitwayennte Seselwa.  Me selman zot pou fer diferans pou dir – be i napa nasyonalite Seselwa.

Mon krwar ki bann refleksyon parey i kapab annan li, menm si ou’n konpran sa rezonnman, i kapab annan en danze pou nou pei.   Akoz?   Se parski nou pe evantyelman si nou pa balans li byen, kree de klas Seselwa.   Pou dir ou, ou, ou napa nasyonalite Seselwa.

Ou lonbri dan en serten sans i pa’n ganny antere Sesel.  Ou lonbri, ou zanset pa’n ganny anter Sesel.  Ou ou’n ganny ou en bout papye, se en papye ki’n sinyen par nenport lekel, si Prezidan ensidswit, ki’n fer ou vin, annan sa sitwayennte Seselwa.

Tandis ki en dimoun ki’n ne Sesel, oubyen son zanset in ne Sesel, li konmsi i annan li both nasyonalite Seselwa ek sitwayennte Seselwa.  Mon krwar ki se pou sa rezon ki sa deba lo sa size i tre enportan, parey Onorab Larue dan son Mosyon in mansyonnen.

E an menm tan osi Onorab Ferrari osi tou in mansyonn sa, e Onorab Hoareau.  Tousala se, se parski bann keksoz ki enportan sa Mr Speaker.  E ou vwar i vin pli enportan osi, lefe ki Sesel in pas dan bann diferan faz kot nasyonalite in ganny vann.

Se Minis, Minis in dir sa li menm li isi, anba Economic Citizenship Program, kot nasyonalite in ganny vann.  I annan serten bann Seselwa ki letan sa ti ganny ofer, zot ti aste nasyonalite, e apre sa zot in etablir zot Sesel.

E mon bezwen dir, mon konn, mon konn plizyer sa bann dimoun, kot zot in adapte byen, zot koz Kreol, zot zwe en rol dan nou, dan sosyete, zot pe fer serten lantrennman avek nou bann dimoun.  E alors i fasil pou konsider zot koman enn antre nou.

Tandis ki Mr Speaker malerezman mazorite sa bann dimoun ki’n aste nasyonalite Seselwa, nou pa ni konn zot.  Kekfwa zot pann deza ni met lipye isi Sesel.  Bann, bann ki ti aste sa Hong Kong, e la ozordi i kontinyen annan sa msye ki dan nou, dan nou Lanbasad, dan enn nou bann Lanbasad laba La Chine in ki ti en zwer prensipal dan, dan sa zafer.

Kot nou pa konnen egzakteman lekel bann dimoun.  Ou tande ki pou dir 2 Ikrenyen avek paspor Seselwa in ganny arete pou kek aksyon kriminel.  Nou pa konnen lekel zot.  E definitivman nou pou konsider zot koman bann dimoun ki’n zis in profit dan en staz – dan en Scheme of some sort e alor zot ganny nou nasyonalite.

Donk Mosyon pe dir, kot nou ete ozordi avek tou sa bann keksoz ki nou’n tande, e Onorab Larue in detaye, in detay sa en pe bann ki zot anvi repran nasyonalite, savedir i annan dout lo si due diligence ti ganny fer vreman lo zot, bann ki’n ganny nasyonalite, apre sa in ganny kennsel, bann ki nenk zot in gannyen anba 5(1), zis pou ganny en meday kelkonk.

Parske nou krwar zot pou kapab ganny en meday dan 30 zour letan Zwe de Zil i komanse.  Tou sa bann diferan keksoz Mr Speaker i fer ki ozordi i annan en dezord.  E mwan se sa ki mon pa ganny en konpran akoz, Parti US, sa Parti ki son, well son dirizan Mr Vincent Meriton ki Vis-Prezidan – letan nou tande ki pou dir pa li ki pou debout koman kandida Prezidansyel sa Parti, me ki en lot ki pou debout – mon krwar ki, konmsi mon trouv li sokan ki zot pa trouv sa koman en size enportan, en size Nasyonal!  E mon krwar ki lepe Seselwa i bezwen rekonnet sa.

Ki pou dir nasyonalite Seselwa, i en keksoz ki pa enteres zot.  Alors dan en serten sans, mon anvi dir avek lepep Seselwa, be eski zot trouv li drol ki in annan tou sa bann dimoun ki’n ganny nasyonalite pandan sa bann lannen?  Eski zot trouv li drol ki nou nasyonalite zis pe ganny donnen?

E la petet, petet i pous mwan, pou mwan dir avek sa Mouvman dirize par Mr Cyril Lau Tee, pou note, note ki poudir Part US pa enterese avek nasyonalite Seselwa!

 

(APPLAUSE)

 

HON WAVEL RAMKALAWAN

Zot pa enterese ki arive avek sa sitwayennte Seselwa.  E alor letan ou pa enterese, savedir ou a pe dir, fer nenport keksoz ki ou anvi!

E sa Mr Speaker i en aksyon, i en reaksyon ki vreman negativ.  E mwan mon krwar pou sa desizyon ki zot in pran, pou montre Seselwa ki poudir nou nasyonalite pa, pa vreman enteres zot.  Mwan, mon krwar Seselwa i devret montre zot, ki pou dir sa ki zot pe fer i mal e alor pran sanksyon avek zot!

Mr Speaker parey zot in komanse an 2016, pran sa 2enm sanksyon avek zot, akoz zot pa enterese avek sitwayennte Seselwa.  Kwa ki nou fer avek?  Lekel ki gannyen?  Lekel ki pa gannyen? Ensidswit.  E pourtan Mr Speaker Onorab Valmont i devret konnen ki pou dir sa sitwayennte i enportan en kantite.

E li i enn bann dimoun ki, ki devret konn sa tre byen.  E parske i devret konsernen avek sa.  E mon pa pou dir ki rezon i devret konsernen avek sa, me li i devret konnen.

 

HON  JUDE VALMONT

(Off-Mic)

 

HON WAVEL RAMKALAWAN

Mwan ki per!

 

(laughter)

 

HON WAVEL RAMKALAWAN

Ou konnen sa.   Mr Speaker me nou tou nou konnen.  Nou tou nou konnen ki poudir Onorab Valmont pa per.  Wi, tou dimoun i konnen, i pa per, mwan ki per.

 

MR SPEAKER

Kontinyen Onorab.

 

HON WAVEL RAMKALAWAN

Alors i ok sa, i ok sa, pa bezwen; ganny labitid pou ou pa state ‘’the obvious.’’ 

Dan lavi i dir ek ou, do not state ‘’the obvious.’’  Parski ‘’the obvious’’ tou dimoun i konnen sa.  Pa bezwen dir dimoun keksoz ki zot konnen.  Alor Mr Speaker, sa ki mon pe dir i vreman serye.  I vreman serye.  E si sa menm dimoun ki pe diriz pei ozordi, i a pe dir i anvi fer en Referendum  lo sa size Seselwa.

E an plis ki sa nou osi ganny lenformasyon ki pou dir sa Gouvernman ki’n la 11mwan apre Lendepandans ziska ozordi, zot pa’n kapab fer en resansman pou konnen konbyen Seselwa i annan –  sa ankor enn fwa i en deklarasyon ki vreman fer nou enkyet.

E in ler pou Gouvernman pran sa size serye, pou li kapab, partou kot nou annan bann Lanbasad, ozordi nou annan nou internet, lans en, lans en progranm pou dir, eski ou en Seselwa?  Eski ou krwar ou en Seselwa?

Ranpli en form ensidswit, dir nou kote ou reste, dir nou lekel ou granpapa, dir nou kote ou ti aste ou sitwayennte, dir nou ki bann prosedir ki ou’n fer pou nou kapab konnen konbyen Seselwa i vreman annan dan lemonn an antye.

Mon krwar i enportan pou nou fer sa.  E i annan, mon rapel letan, letan Air Seychelles par egzanp ti konmans sa larout sorti L’ Angleterre pou li al the Falkland islands –  zot ti al Falklands oubyen en lot o bor?  Falklands ya Falklands Zot ti dekouver par egzanp Mr Speaker ki pou dir lo Falkland Islands ti annan en seselwa ki ti pe travay laba.

E partou kot ou ale ozordi, i annan Seselwa en pe partou.  Be eski pa i enportan pou nou konnen kote nou bann Seselwa i ete?  Parfwa letan ou vizit serten pei, mon rapel, mon rapel letan mon ti vizit Botswana pou la premye fwa, ti dekouver ki poudir ti annan Seselwa ki pe travay laba, e ki dan bann pozisyon, bann pozisyon tre enportan.

Letan Afghanistan ti pe, apre tou bann lager ensidswit ankor enn fwa, nou ti dekouver ki pou dir i annan en Seselwa ki pe travay avek Nasyon Ini laba Afghanistan.  So Mr Speaker, mwan mon krwar ki pou tou sa bann, pou tou sa bann rezon, pou tou sa bann sityasyon, ozordi i enportan pou nou annan en moratorium.

E sa moratorium, letan mon’n ekout Onorab Larue koze, se zisteman pou ki sa deba i komanse o pli vit posib.  Parey taler nou’n koz lo lalkol.  En deba dan sa legzersis Nasyonal pou reviz Lalwa Sitwayennte anonse par Gouvernman i komanse, i ganny fer, pou nou kapab avans devan.

Alor Mr Speaker avek sa, avek sa detrwa mo, mon anvi dir ki definitivman mon siport sa Mosyon, e mon demande ki nou tou dan sa Lasanble, nou pran nou responsabilite; nou sitwayennte, sa paspor ki nou mars avek.  Se sa ki osi montre nou, ki donn nou en pe nou idantite.  Nou idantite Seselwa.

E konbyen fwa, mon plis ki sir ou osi ou’n pas ladan.  Letan sa zofisye Imigrasyon dan en lot pei pe stanp ou paspor, i vwar Sesel, i dir avek ou, ‘’Wow.  Sa i en landrwa ki mon ti ava kontan vizite.  Mon’n tann sitan bon keksoz lo la.  Mon ti ava kontan kapab vin dan sa paradi, pou mwan kapab vizite!’’

Alor avek sa de parol Mr Speaker, mon konnen ki pou dir mon, mon dernyen dimoun pou koz lo sa Mosyon, akoz lot kote personn pa’n enterese.  Mon pou dir mwan mon pou siport sa Mosyon e mon espere ki sa moratorium i ava ganny mete.

E ki letan sa deba pli larz i ava ganny inisye, la aprezan tou bann dimoun ki pa’n koze parey Onorab Vidot i ava koze.  Mersi bokou Mr Speaker.

 

MR SPEAKER

Mersi Onorab Ramkalawan.  Mon a donn laparol mover Mosyon pou fer son konklizyon.  Onorab Larue.

 

HON FLORY LARUE

Mersi Mr Speaker.  Mr Speaker mon ti a kontan remersi sa enn, de Manm ki’n koze.  Mon osi annan en gran dezapwentman letan mon get mon bann koleg lo lot kote latab, ki deside riye, lefe ki zot pa’n partisip dan sa deba, zot napa okenn kontribisyon pou anmennen, pou sizere, pou met lo latab.  Ki nou kapab konsidere pou nou pei kapab bouz devan lo en topik ki afekte nou tou.  Nou en pti pei Mr Speaker.  Sitwayennte i afekte nou dinamiz; i afekte nou make up sosyal.

Letan mon bann koleg ivwar ki sa pa pwen ki zot, zot anvi anmenn zot kontribisyon ladan, i vreman, vreman dezapwentan.  Mr Speaker mon bezwen remind mon bann koleg ki nou fer en serman pou defann nou Konstitisyon.  E sitwayennte i enn bann sapit dan Konstitisyon.

E i annan bokou Seselwa ki viv deor.  Ouswa dimoun ki annan afilyasyon ki kapab vin Seselwa, ki annan en morso dan Konstitisyon ki afekte zot, ki zot pa kapab fer bann prosedir akoz i annan bann problenm ek nou Lalwa.

Alor kekfwa mon ti kapab demann mon bann koleg pou mazin sa bann dimoun ki zot, zot pe demande ki annan serten sanzman ki ganny fer, pou fer li vin pli fasil, pou zot kapab aksed zot nasyonalite.  Akoz zot, zot annan desandans, me selman serten mankman i fer ki zot pa kapab prosede.

Mr Speaker sa topik i en topik Nasyonal e i date bokou letan.  I annan gran lenportans e en keksoz ki sa Gouvernman i bezwen pran o serye.  Ozordi Prezidan in demann nou pou konsider Referendum.  En Referendum pou desid lo en drwa fondamantal Seselwa.  Lekel ki pou vote, e lekel ki pa pou vote.

Sa in ouver sa deba, pou nou demande konbyen Seselwa egzakteman i annan?  Akoz sa i drwa ki ou gannyen letan ou vin en Seselwa ou annan drwa vote.  E avek sa bann kestyon, deza nou vwar ki nou’n bite.  Nou pa’n kapab ganny bann sif, nou pa’n kapab ganny bann repons kler.

In montre ki i annan en konfizyon, e i bezwen annan klarite ki ganny anmennen lo sa topik.  Nou pa kapab kontinyen asize, dir nou pei i annan problenm pou kapab fer sa Lalwa vin efikas, me selman nou pa pare pou nou travay lo la. Mr Speaker mon demann The House pou pran byen zot konsiderasyon, letan zot pou vote.

E mon demann zot pou siport mon Mosyon, pou demann Gouvernman pou anmenn en moratorium, ki kapab donn nou en letan pou nou  re regard nou Lalwa, e sa travay pou ganny fer par nou menm bann Manm Lasanble Nasyonal ansanm avek bann lezot bodies dan nou lasosyete.  Mersi.

 

MR SPEAKER

Mersi Onorab Larue.  Bon, moman in arive pou Lasanble pran en desizyon lo Mosyon ki’n ganny anmennen par Onorab Larue.  E Mosyon ki pe demande ki Lasanble Nasyonal i demann avek Gouvernman pou enpoz en moratorium lo konsiderasyon tou laplikasyon pou nasyonalite Seselwa, ziska ki sa legzersis nasyonal pou revizyon Lalwa Sitwayennte anonse par Gouvernman i konplete.

Mon a demann tou Manm ki an faver?  Okenn Manm ki kont?  Madanm Clerk.

 

MADAM CLERK

Mersi bokou Mr Speaker.  16 Manm in vot an faver e personn kont.  Mersi.

 

MR SPEAKER

Mersi Madanm Clerk.  Savedir Mosyon in ganny aprouve par Lasanble Nasyonal.

Bon zis avan nou, zis avan nou adjourn – mon annan en pti kominike pou mon fer avek tou bann Manm e osi avek manm piblik.  Komite Lasirans dan Lasanble Nasyonal COGA pou fer en         Public Hearing Vandredi le 21 Zen avek zofisye sorti dan Minister Lakaz, Later, Lenfrastriktir e Transpor lo Later.

Sa, sa Hearing i pou, i pou annan pou bi regard progre lo lenplimantasyon proze 24 lakaz dan 24 distrik dan 24 mwan.  E sa i pou komans 9er bomaten dan Committee Room 3. E Hearing pou pas live li SBC 2 televizyon, radyo AM, e i pou live stream lo channel YouTube Lasanble Nasyonal.

So bann Manm osi tou i ganny demande, bann Manm ki an deor COGA si zot oule asiste, zot ganny envite.  Yes Onorab Ramkalawan?

 

HON WAVEL RAMKALAWAN

Non Mr Speaker, mwan, vi ki Onorab Waven William in siport sa Mosyon, mon ti pe dir ki pli boner dan mon prezantasyon mon’n koz lo US.

Mon ti ava kontan ekskli Onorab William dan mon, dan mon statement ki mon’n fer, akoz li i en Manm US ki’n konpran sa Mosyon e ki’n siport sa Mosyon, e ki’n vot an faver avek nou.  Mersi bokou Mr Speaker.

 

(APPLAUSE)

 

 

MR SPEAKER

Mersi.  Mon’n note.  Mersi.

Bon zis avan nou adjourn, mon ti a kontan remersi tou bann Manm pou, spesyalman semenn pase, pou travay ki nou’n fer lo Civil Code.  E ankor mon remersi SBC pou coverage ki zot in donn nou, e ki zot kontinyen donn nou.  E ozordi petet mon ti a demann bann Manm pou felisit SBC, nou annan nou de zenn madanm ki deryer camera.

 

(APPLAUSE)

 

 

MR SPEAKER

E nou’n note e nou rekonnet sa, e montre en pti pe empowerment bann madanm dan Sesel.  Felisitasyon SBC da sa direksyon kot i kapab konfye 2 madanm en tel responsabilite.

Bon avek sa nou ava adjourn e nou repran nou travay Mardi.  Me Mardi mon pa kapab dir egzakteman keler, akoz 9er bomaten mon pou Ankour.  Me mon ava anonse petet par Lendi, ki ler nou pou komanse, ok?  Lasanble i adjourn.

 

(ADJOURNMENT)