::
Home » Verbatim » 2019 » Verbatim Wednesday 12th June, 2019

Verbatim Wednesday 12th June, 2019

 NATIONAL ASSEMBLY OF SEYCHELLES

Wednesday 12th June, 2019

The Assembly met at 9am

National Anthem

Moment of Reflection

Mr Speaker in the Chair

 

MR SPEAKER

Bonzour tou manm Onorab.  Bonzour tou dimoun a lekout ki pe swiv travay Lasanble Nasyonal ozordi Merkredi le 12 Zen.  E en bonzour spesyal pour bann etidyan lekol Independence School, welcome to the National Assembly and I hope you’ll be able to follow the debate. Although the debate will be in Creole, but we will also meet at 10:30 on the balcony to follow us to have refreshments together. Whereby I will invite members of the assembly to join us to interact with you students, so welcome and I wish you all a good day.

Bon nou pou kontiny nou travay kot nou ti’n kite yer e nou pou kontiny avek Mosyon.  Mon ava apel Onorab Churchill Gill e mon a donn li laparol pour li prezant son Mosyon.  Onorab Gill.

 

HON CHURCHILL GILL

Mersi Mr Speaker.  Bonzour Mr Speaker.  Bonzour tou Manm.  Bonzour bann etidyan Lekol  Endepandan, zabitan Zil Pros e Praslin.    Mr Speaker Mosyon i lir koumsa ;

‘’Donnen grander popilasyon Zil Pros e lakantite varyete aktivite ekonomik ki pe kontinyen grandi, enkli bann devlopman gouvernmantal,    sa Lasanble pe demann Gouvernman pou fer li posib pou profesyonnel lo Zil Pros e Praslin i ganny reprezante lo bann diferan Board dan pei, pou asire ki benefis, lentere, lavwa zabitan Zil Pros i ganny ekoute e respekte.’’

Mr Speaker i enportan ki lavwa zabitan Zil Pros e Praslin i ganny pran pli o serye, pour ki zot a santi zot li pli konfortab avek bann diferan desizyon ki ganny pran sirtou sa ki tous zot direkteman dan zot lavi tou le zour.  E ki garanti devlopman soutenab, loportinite pou tou, fasilite e lenfrastriktir adekwat an rezilta en lavi prosper pou tou zabitan.

Mr Speaker ozordi dan pei i annan 104 diferan Board.  Me profesyonnel Zil Pros e Praslin, i ganny reprezante zis lo 8 Board.  Sa se SIB Seychelles Investment Board, Seychelles Heritage Foundation, Seychelles Agricultural Agency, Seychelles Island Foundation, Seychelles Trading Company, Seychelles Tourism Board, Land and Waste Management Agency, avek Linyon Estate lo La Digue.

        Mr Speaker parey tou Manm e zabitan i kapab konstate, reprezantan Zil Pros e Praslin i tre limite.  Dan lespri menm loportinite pou tou reprezantasyon i enkonsistan dan konpozisyon bann Board – Board i devret ganny adrese.  Pou reflekte en reprezantasyon ki profesyonnel Zil Pros e Praslin i pli enkliziv.

Mr Speaker, menm si mon konstate ki zil pros pa neseserman bezwen ganny reprezante lo tou Board, me i annan serten Board ki profesyonnel Zil Pros e Praslin i devret ganny reprezante lo la.   Pou asire ki lentere nou zil i toultan ganny pran kont dan bann desizyon enportan, sirtou dan bann tel Board parey Industrial Estate, Planning Authority, PMC, Seychelles Licensing Authority, SPTC, Seychelles Commercial Bank, Environment Trust Fund, Livestock Trust Fund, National Disaster Relief Fund, Housing Finance Company, Development Bank of Seychelles, Seychelles Port Authority, Seychelles National Park Authority. 

Mr Speaker mon senserman krwar ki profesyonnel Zil Pros e Praslin i devret ganny byen reprezante lo sa bann Board ki mon’n mansyonnen.  Akoz zot tous zabitan direkteman pou devlopman biznes atraver bann loan, pou bann diferan kalite license, pou ganny akse avek diferan  resours lo bann Trust Fund, pou ganny akse avek later, biznes, pou annan kontribisyon dan bann aktivite Lotorite Planning.  Pou kapab defann lentere Zil Pros e Praslin lo bann desizyon ki ganny pran lo nou bann Rezerv Nasyonal.  Pou annan en lavwa lo size por lo Zil Pros e Praslin vi ki ozordi i annan bokou devlopman vizavi aktivite por.

Pou ganny akse avek later biznes, Mr Speaker menm si i annan bokou letan ki zil Eve in fini konble, nou’n vwar selman en pti group dimoun ki’n ganny akse avek later lo sa zil.  E bann lenfrastriktir neseser, pa’n ganny priyorite pou ganny fer.  Menm si i amann bokou zenn e profesyonnel Zil Pros e Praslin, ki’n fer laplikasyon pou bokou lannen e ozordi zot ankor pe espere.  Manm Lasanble zil Praslin, in bezwen fer bokou travay ek Lotorite Endistriyel pou akseler  bann proze lenfrastriktir e travay lo bann tender pour ki zabitan a kapab ganny zot bout later pou kapab debourye.

Mr Speaker mon kontan pou enform bann dimoun ki pe esper zot bout later, ki tender pou lenfrastriktir pe ganny fer, e tre byento finalman tender pou later osi pou ganny donnen.  Mon a profite pou demann Lotorite Endistriyel, pou fer konnen bann aplikan atraver medya ler tender pou later i sorti e konmans donnen.  Sa i a fer ki zabitan a santi ki zot pe aktivman partisip dan devlopman zil parey i devret, pou fer bann kontribisyon tre valab e enportan.

Mr Speaker mon respekte konpetans bann dimoun ki’n ganny swazir pou met lo bann Board ozordi.  Me dezavantaz, se zot pa pe viv lo Zil Pros e sa dan  li menm i en defayans,  akoz zot pa neseserman konpran byen kwa ki priyorite nou bann zabitan e nou bann biznesmenn, e ki kalite proze ki devret ganny priyorite lo en lot, pou plizyer rezon ki zabitan li menm ki konnen.

Mr Speaker, se pou sa rezon, ki en tel Mosyon in ganny anmennen dan sa Lasanble.  Pour ki enn fwa pour tou, profesyonnel Zil Pros e Praslin, a ganny sans partisipe e form par bann gran desizyon pou benefis nou zil e tou nou zabitan.

Mr Speaker, mon a donn sa Lasanble legzanp bann desizyon, ki’n ganny pran ki ozordi pe afekte nou.  Desizyon lo ogmantasyon lo pri fey latannyen.  Ler bann dimoun ki fer sa travay ti’n fini siny zot Kontra lo en pri, apre pri i zis monte san ki zot kapab ganny letan re negosye en nouvo Kontra e zot perdi larzan.  Ozordi tou viziter ki pran Air Seychelles Domestik pou vizit Praslin, i domaz ki ler avyon pe apoze zot lakey se an regardan en land fill ki pa byen ganny zere avek mankman lekipman neseser.

E son lokasyon i obor nou Airport Amitie.   Eski sa land fill pa ti kapab ganny fer en lot landrwa?  Eski sa ki kliyan i devret pe vwar ler avyon i apoze?  Donnen tou sa gran bote ki Praslin i annan.

Menm si Vallee De Mai i lo zil Praslin i regretab ki zabitan sa zil pe kontinyen eksprim zot dezapwentman pou pa vreman benefisye avek en parti reveni, ki ganny fer par sa rezerv.

Nou pa kont pou kontribye pou nou atoll Aldabra.  Kestyon se eski sipor pou Aldabra atoll i en zafer selman resours zil Praslin?  Nou annan bokou lezot zil ki pe anmas reveni atraver biznes tel parey ki IDC, ki mon krwar pou benefis nou atol ti kapab fer en pti kontribisyon zot CSR.  Apard ki IDC i annan lezot bann lotel 5 zetwal ki lo nou bann zil ki’n benefisye avek konsesyon pou bokou lannen.  Zot pe osi benefisye dan konteks market zot lotel lo preteks labote Sesel.  Eski en konversasyon pa kapab ganny fer avek sa bann propriyeter lotel pou fer en kontribisyon pou prezerv nou atoll?  Akoz ki zis zil Praslin ki bezwen fer kontribisyon konsiderab tou reveni ki Vallee De Mai i fer?  Menm si mon ti anmenn en Mosyon lo sa size dan Lasanble, nanryen pa’n ganny fer.

E zabitan Praslin i ankor pe eksprim mekontantman lo sa size.  Akoz zot krwar ki en pti poursantaz sa reveni, ti kapab ganny kontribye e ganny servi pou devlop bann progranm Lanvironnman dan bann diferan klib lekol ki pe fer pa mal aktivite remarkab lo nou zil.  Sa ti ava asir konsistans dan preparasyon neseser bann zenn etidyan pou devlop en lentere partikilye dan domenn konservasyon e proteksyon lanvironnman nou Zil Pros e Praslin an zeneral.

Mr Speaker sa i montre nou bann desizyon ki’n ganny pran ki pa neseserman dan lavantaz oubyen lentere zabitan bann Zil Pros.  E nou vwar nou pe viv avek rezilta sa bann desizyon.

Mr Speaker sa pa kapab kontinyen, akoz nou senserman krwar ki nou bezwen annan en lavwa lo bann devlopman enportan.  Annan en lavwa lo kalite devlopman.  Annan en lavwa lo distribisyon resours ki nou zil i anmase.  Annan en lavwa lo bann devlopman gouvernmantal.

Mr Speaker parey nou tou dan sa Lasanble nou kapab konstate i annan en gran nesesite preski mandatwar pou ki profesyonnel Zil Pros e Praslin i ganny byen reprezante lo bann Board parey Mosyon pe demande.  Akoz i fer en gran diferans dan rezilta travayer Board ler konpozisyon en Board i annan sa bann konbinezon – i annan bann bon konbinezon Manm sirtou ler zot tou zot annan sa bon komitman pou rann kont, e travay dan la transparans pou bon rezilta pozitiv.

Mr Speaker konman en Manm FPAC ti enteresan ekout Minis Finans yer swar ler i ti pe eksprim sa bon travay ki Board Linyon Estate in fer dan zesyon biznes lo La Digue.  E ki mannyer pozisyon finansyel Linyon Estate in amelyore.  Se sa bann kalite rezilta pozitiv ki sa Mosyon pe rode pou Zil Pros e Praslin.  Ler i annan profesyonnel Zil Pros ki ganny reprezante lo bann Board, i toultan annan sa posibilite pou zabitan Praslin ganny en bon deal, akoz sa reprezantan i konpran problenm Praslin e Zil Pros e i konnen ki zabitan i bezwen lo Zil Pros e Praslin.

Pou konklir vi ki bann Board i ganny peye lo Consolidated Fund i devret mandatwar ki tou bann Board i bezwen rann kont e donn en rapor anyel lo bann aktivite an zeneral enkli finansyel.  Mersi Mr Speaker.

 

(APPLAUSE)

MR SPEAKER

Mersi Onorab Churchill Gill, okenn Manm ki segonn Mosyon? Yes Onorab Noline Sophola.

 

HON NOLINE SOPHOLA

Mersi Mr Speaker mon pe segonn sa Mosyon.

 

MR SPEAKER

Mersi, eski ou le entervenir deswit?

 

HON NOLINE SOPHOLA

Wi Mr Speaker.

 

MR SPEAKER

Go ahead Onorab.

 

HON NOLINE SOPHOLA

Tou Manm Onorab, etidyan dan Galeri e tou dimoun a lekout, bonzour. Mr Speaker sa ki Loter Mosyon pe demande i pa en keksoz nouvo dan sa Lasanble. Me plito pe ranforsi demann ki’n deza ganny fer konman en kestyon e osi konman en rekomandasyon.  E si ozordi nou vwar ki sa menm demann in aparet ankor dan sa menm Lasanble, sa  dan li menm i montre lenportans pou sa demann pou Praslin ek sa Zil Pros.

Nou, nou bann reprezantan dan sa de zil nou’n determinen pou fer en rekomandasyon vin en realite. Mr Speaker dan lespri bon gouvernans, latransparans e rann kont dan bann lantrepriz piblik e parastatal lo Praslin ek Zil Pros nou pe demande ki nou bann dimoun eksperyanse profesyonnel dan lansanm nou kapab dir konpetan i ganny reprezante lo maximum Board ki konrsern sa 2 zil. Mr Speaker sa ki fer mon fyer a sa larz ki monn arive se ki nou pei in prodwi e pe kontinyen prodwi en kantite profesyonnel. Fodre nou note ki leksperyans osi i prodwi profesyonnel, pa zis liniversite. E sa in touzour tandans ki ler nou koz profesyonnel fodre nou’n al liniversite. En dimoun ki fek sorti liniversite souvan i bezwen al kot sa travayer eksperyanse lo teren pour aprofondi li plis.

Mr Speaker malgre nou popilasyon i viv lo 3 zil prensipal, nou en sel Nasyon. Lalwa ki pase, devlopman nasyonal ki fer i pour nou tou. Mr Speaker alor ki mon krwar nou bezwen donn tou dimoun sa sans rekonesans. Sa sans apartenans a zot lorizin. Sa sans partisipasyon dan zot rasin. Zot roots parey nou kontan dir. Pour kontribye pour byennet zot prop dimoun.

Mr Speaker fodre byen note ki kontribisyon ki sa de zil i fer atraver diferan aktivite ekonomik lo sa 2 zil i vreman bokou. Si zis nou pran sekter tourizm ki vizit Praslin ek La Digue. E sa i en rezon an plis pour nou ganny reprezante. Akoz sa sekter pe pas atraver plizyer difikilte lo sa de zil. Mr Speaker ler mwan resansman nou bann dimoun kapab parey mon’n dir konpetan lo Praslin ek La Digue i san dout i annan ase zot pour kapab met lo tou sa bann Board e i pour reste ankor.

Zis pour donn enn de legzanp bann domenn kot i annan nou bann dimoun kalifye ki pe viv swa Mahe, Praslin ou La Digue ki kapab reprezant nou lo bann Board. Par egzanp nou annan fermye, ansenyan, dokter, enzenyer, sorry, diploma, enfirmyer, sarz fanm, ekonomis, zournalis, dantis , avoka, pilot, maren kalifye, peser dan domenn finans, komers, kiltir, lalis i long nou annan, i montre ki sa de zil in prodwi bokou. E mon krwar dapre mon resers zis ziz ki nou napa pour le moman. e petet nou pour gannyen.

Mon kapab nonm detrwa Digwa prezan ki swa dan lanvironnman, provizyon delo, tourizm, lagrikiltir, kiltir, konstriksyon, ledikasyon, lasante, ki i annan bokou pour partaze. Mon pa pour mansyonn okenn non an ka mwan oubliy lezot. E byento nou pour ganny nou Pret avek lagras nou gran Met. Petet zot pour dir mwan ki en pret pour fer ladan. Me mazin byen ki nou annan sa lorganizasyon ki nou apel SIFCO. La osi i annan bann desizyon ki ganny pran. E la osi nou bezwen nou dimoun pour defann nou, pour koz pour nou lo sa de zil.

Mr Speaker sa i vreman enteresan. Akoz i montre nou tou sa bann bon keksoz ki’n arive dan sa pei lo kote ledikasyon. Sa Gouvernman in travay in prodwi e la nou’n rekolte e bon pe bann dimoun ki kapab.

Mr Speaker i annan dimoun ki’n pran retret, zot la koman en arsiv vivan. Zot annan zot pei zot kominote aker. Ki nou fer avek zot? Nou pa servi zot. I enportan pour fer en vizit kot sa bann arsiv vivan avan i tro tar. Servi zot lo sa bann Board. Mr Speaker i enportan konpran ki rol sa bann dimoun pour zwe lo sa bann Board. Parey lo Mahe i annan bann dimoun ki protez e defann bann dwa bann zabitan dan bann biznes, lanvironnman, dan diferan domenn e pour siport inovasyon ki Gouvernman i oule anmennen. Lo zil osi ek Praslin i pour parey. Se ganny nou prop dimoun pour reprezant nou.

E zabitan sa de zil pour santi zot pli enkli dan kominote nasyonal. Mon pa pe demann bokou. Me omwen enn bann dimoun lorizin Praslin ek Zil Pros lo sak sa bann Board sirtou kot i konsern devlopman zil. Mr Speaker mon mazin omwen en sel Board kot en dimoun lorizin Digwa zis pour mansyonn en legzanp i chairman.  Eski nou oule dir ki tou sa Board nou napa en dimoun sorti La Digue Praslin posibleman ki kapab pe tenir sa bann board?  E en lot ki en senp manm lo en Board. I enportan pour nou ganny reprezante e partisip dan desizyon ki pour touzour meyer pour protez nou zil. Permet mwan demande lekel ki pli byen pase pour defann e protez nou zil pros si pa nou prop dimoun.

Mr Speaker petet nou demande akoz si ozordi Praslin ek Zil Pros i annan en lasosyasyon biznes i senpleman akoz nou’n santi ki nou lavwa pa ti pe ganny tande dan bann forum ki ti pe ganny organize. E bann business person zot in santi ki in ler zot osi pour zot fer tande zot lavwa e la lasosyasyon ki’n ganny formen. E zot pe fer en bon travay, mon a dir zot kontinyen. I annan proze ki’n ganny fer ki ozordi pe annan lefe negativ lo nou.                     Akoz? Petet ti mank konsiltasyon e ti napa dimoun lo sa de zil, pa ti ganny reprezante pour zot defann nou, pour zot koz lo nou behalf.   Par egzanp nou annan club ki’n ganny anmenn La Digue. La ozordi i pe kree bokou konfizyon. Eski bann dimoun ti ganny ase konsiltasyon. Sa nou bezwen demande. E si sa letan nou ti annan nou dimoun lo Board mon aisre keksoz pa ti pour bouz dan sa direksyon. Bann restriksyon ki pe ganny mete lo La Digue parey annan zis 5 lasanm dan bann guesthouse. Akoz ki restriksyon i ganny mete bokou lo La Digue. Ki sa i pour montre nou, e sa i kout nou tre ser. Eski 5 lasanm vreman i ase?                                Eski 5 lasanm i donn sa bann dimoun ase profi.  Si nou ti annan dimoun letan pour defann nou posibleman keksoz ti posibleman keksoz pour lotreman e osi ler nou pe dir 5 lasanm nou mazinen ki i anmenn en kou en pri ki toultan nou pe koze, pri lavi lo sa de zil ou double. E i annan serten desizyon ki ganny fer, i annan lenpak lo nou. Alor si nou annan nou prop dimoun parey mon’n dir o komansman, swa i pe reste Mahe, swa i pe reste Praslin me li i konn La Digue li, li ki kapab defann.

Si i annan en rezevwar demen pour fer li ki konnen kote bann sours delo i sorti plis. Pa en dimoun ki sorti Mahe ki pour vin dir nou sours delo, met sa resevwar la, me selman ler li i ale apre napa okenn deli ki koul dan resevwar, nou war li i sek. Alors si nou ti annan nou prop dimoun keksoz ti pour lotreman. Mr Speaker parey mon fek dir, nou apresye ki annan en zefor ki pe ganny fer pour fer sa reprezantatif lo bann Board.                          Me nou pe demande ki i ganny fer dan en fason pli enklisiv. Mr Speaker pour terminen mon oule elabor en pe plis pour montre akoz ki sa demann i tre enportan pour nou.  Sa ki nou pe demande i pa zis akoz nou pe koz lentere sa de zil. Me akoz osi bokou resers in prouve ki pli nou ankouraz partisipasyon, pli nou ganny nide.  Pli nou kapab anmenn sikse. Annou pa oubliy sa sans apartenans osi. Ler en dimoun i natif in partisip dan en proze i pour fer sir ki sa proze i mars byen. I santi ki in kontribye e ki i annan en par ladan parey nou kontan dir.

Mr Speaker nou dir ki i enportan pour nou revwar la fason ki bann Board ki tous zil pros i ganny formen. Akoz nou oule ki lavwa zabitan Praslin ek zil pros i ganny tande e ekoute lo maksimonm Komite posib. Nou pe nepli kapab dir nou fer desizyon lala nou’n donn zot. Oubyen nou fer desizyon akoz Praslin ek La Digue i ptipti, nou, nou desid pour zot. Mr Speaker la konmela nou annan ase lavwa. Mwan demande ki sa i ganny ekoute e ganny egzekite. Mersi Mr Speaker.

 

MR SPEAKER

Mersi Onorab Sophola. Okenn lezot Manm i oule entervenir lo Mosyon? Onorab Audrey Vidot.

 

HON AUDREY VIDOT

Mersi Mr Speaker.  Bonzour Mr Speaker e tou Manm Onorab. Bann zanfan avek ansenyan e bann dimoun dan galeri, bann dimoun ki a lekout.

Mr Speaker mwan kontribisyon ver sa Mosyon pour donn sipor. Nou bann Seselwa Sesel pe deplizanpli zwe en rol pli aktif dan krwasans nou lekonomi. Enn bann prensip fondamantal United Seychelles se met bann fanm ek zonm o sant devlopman. Gouvernman in envestir dan bann progranm ki tous lavi sak zonm, fanm e zanfan Seselwa dan tou kwen Sesel. E lentansyon Gouvernman se pour anmenn tou pep ansanm akoz se ansanm ki nou kapab planifye lavenir Sesel.

nMr Speaker devlopman i en vwayaz san fen. Fondasyon nou fitir prosperite i depann lo en devlopman soutenab ki garanti en varyete aktivite ekonomik e kree larises ki nou bezwen pour siport nou bann progranm sosyal. Gouvernman pe kontinyen envestir bokou dan nou pep e se atraver en lekonomi reisir ki nou’n atenn e asir en bon standar lavi konpare avek 22 an pase. Prezan dan prosen letap nou devlopman Gouvernman i bezwen ranforsi son bann progranm. E valoriz bann profesyonnel pa zis lo Mahe me osi byen egalman lo Zil Pros. Par angaz zot dan bann desizyon atraver bann striktir ki’n ganny etablir parey pe demande par Loter Mosyon Onorab Churchill Gill pour ki nou bann profesyonnel lo Zil Pros i kapab ganny sa kouraz dan linite dan zot diversite e partaz zot nide e konesans dan devlopman zot zil. Mr Speaker Gouvernman i bezwen kontinyen angaze pour kree loportinite pour nou bann profesyonnel lo Zil Pros.

E pour batir e lekonomi ki pli rezilyan par met an plas bann mekanizm apropriye pour protez aktivite lekonomi lo zil pros ki ti pe en frazil kont bann sok eksteryer.

Kontinyen asir stabilite e krwasans ekonomik pour reisit bann biznes e zot soustenabilite lo zot zil. E travay an partenarya avek sekter prive pour diversifye lekonomi e pour rod nouvo fason kreativ ek inovativ pour fer biznes. Mr Speaker parey loter Mosyon in dir ki donn en grander popilasyon Zil Pros e lakantite varyete aktivite ekonomik ki pe kontinyen grandi nou bann profesyonnel. zil pros i partaz sa partenans biznes pour Sesel e par Seselwa. Zil pros i senserman krwar ki biznes gro ou pti i devret an premye dan lanmen bann antreprener Seselwa ki travay dir e ki annan prosperite Sesel a ker.   Nou bezwen donn loportinite nou bann profesyonnel pour siport nou bann biznes ki pour Seselwa lo Zil Pros.

Nou bezwen donn responsabilite nou bann profesyonnel lo Zil Pros, partaz zot nide pour gid Gouvernman dan devlopman bann scheme ki siport bann Seselwa dan mwayen e pti biznes lo zil e koz pour zabitan Zil Pros dan bann desizyon Gouvernman letan pe revwar zot Polisi ek Regilasyon tel ki Licensing, Lotorite planning ek koleksyon reveni. Mr Speaker enn bann pilye Polisi devlopman United Seychelles se pour donn en sipor for nou bann frer ek ser Seselwa pour vin bann azan kle dan nou krwasans ekonomik.

Sepandan i annan ankor bokou konstrent tel ki kou akse avek finansman, mank akse avek serten lanplwa apropriye e bann rekomandasyon regilatwar ki okonbran. E ankor nou’n vwar lenportans annan reprezantan profesyonnel sorti lo Zil Pros pour asire ki bann polisi i pli kler dan diver sekter e pouse pour ki otan posib bann propriyeter i ava en Seselwa.

Gouvernman i bezwen kontinyen eksplor nouvo loportinite espesyalman an term lagrikiltir, lapes e tourizm pour nou bann zil pour kapab enplimant bann mezir ki donn konsiderasyon spesyal bann nouvo biznes lo zil pros pour zot pa perdi lespwar dan devlopman zot biznes. E la kot bann profesyonnel Zil Pros i kapab kontribye met an plas bann Polisi Regilasyon e meyer pratik ki kiltiv en bon lanvironnman pour biznes.

Mr Speaker poursantaz reprezantatif profesyonnel zil pros lo bann Board ozordi Sesel i montre ki napa fairness e i annan serten mankman dan zefor pour met plis profesyonnel sorti lo nou bann zil dan bann desizyon ki ganny pran.

Pour konklir mwan ti a dir alor atraver bann pwen kosern ki’n ganny fer resorti par sa de entervenan koze avan mwan dan sa deba nou pe anvoy en mesaz avek Gouvernman ozordi pour donn sans nou bann profesyonnel lo Zil Pros pour kontribye dan bann desizyon ki ganny pran lo zot zil e dan devlopman zot pti zil. Mersi Mr Speaker.

 

MR SPEAKER

Mersi Onorab Vidot. Mwan a donn laparol Onorab Gervais Henrie.

 

HON GERVAIS HENRIE

Mersi Mr Speaker. Bonzour tou dimoun. Mr Speaker sa Mosyon letan mwan pe swiv bann entervenan ki’n vini devan mwan, avan mwan, i anmenn mwan en moman dan mwan lanfans ti annan en zafer mwan ti tande lo radyo, en zafer repiblik Praslin. Mwan krwar mon ti ankor en zanfan, mwan pa ti tro konpran ki ti pe arive. Mon krwar ti annan en bann dimoun ti pe rod lendepandans pour Praslin. I anmenn mwan sa bann letan. Me selman sa ki mwan mon oule dir, i annan en parol  Onorab Sophola in dir. E mwan krwar in ganny repete dan en lot fason par Onorab Vidot. Sesel nou en sel Nasyon e pour mwan mon konpran mwan en pe senpatiz avek Onorab Gill pour anmenn sa Mosyon. Selman mon pa subscribe to sa lide akoz mwan mon enn bann dimoun ki mon krwar nou en sel nasyon. 25 distrik, byento i pour 26 Grand Anse ou Baie Ste Anne Praslin i osi lwen ki Victoria ki Takamaka i ete avek Victoria. E pour mwan mon pa war rezon akoz ki nou bezwen annan esansyel ki zot pe demande se en diskriminasyon pozitiv ver bann Praslinois avek Digwa.

Be sa menm demann mwan ti kapab fer li pour zabitan Mont Buxton ou Onorab Ernesta ti kapab fer pour zabitan Takamaka. Akoz ler nou koz board in dir i annan 104 board, be letan Minis ouswa Prezidan i apwent en Board, nou bezwen konnen ki i servi. Ki bann kriter ki i servi pour li apwent en manm lo en Board, ouswa pa apwente.  Souvandfwa nou get leksperyans, ledikasyon, leksperyans edikasyonnel ouswa profesyonnel. Souvandfwa nou get leksperyans, ledikasyon, leksperyans edikasyonnel, ouswa profesyonnel. Souvandfwa fwa zot met bann dimoun ki annan bann lekspertiz tre teknik. La mwan mazin par egzanp lo Board SBC zot in met en dimoun ki kapab konpran byen bann zafer plan akoz zisteman SBC i pe al dan en faz, en major proze, konstriksyon, donk i bezwen annan en dimoun lo board ki kapab anmenn sa lekspertiz spesyalize. Souvandfwa i annan osi sa kestyon koneksyon personnel e profesyonnel pour permet sa antite fer byen son rol ki i dwatet annan. Entegrite endividyel i ete. Background pase sa dimoun, e bann kestyon konfli lentere osi tou ou bezwen veye.

Donk pour mwan en dimoun i ganny apwente lo en board i napa en set kriter spesifik i varye akoz depandan lo misyon avek rol ki sa Board i annan. E Mr Speaker mon krwar problenm pour fer anmenn sa Mosyon ozordi e parey Onorab Sophola in osi dir in vin atraver kestyon, in vin atraver rekomandasyon Lasanble Nasyonal. Mon krwar pour dir. Mwan pa pour dir Gouvernman mwan a dir nou koman en pei, nou ankor pe war difisil pour nou kapab trouv en model gouvernans pour Praslin, La Digue. Me i annan diferan nide ki’n ganny zwe avek dan sa Lasanble mwan rapel nou’n koz lo par egzanp ou adopte en model Moris, Rodrigue kot i annan en CEO, Rodrigue i annan en CEO ki manage son affairs. Eski nou get sa koman en posibilite? Eski ou apwent en Minis dan Cabinet zis pour deal zis avek Praslin, La Digue e azout bann zil outer islands avek li?

Donk nou sey zwe toultan avek diferan model gouvernans pour Praslin, La Digue. Mazin dan bann lepok ki ti annan Praslin Development Fund, La Digue Development Fund. Be si zot ti’n reste onnet e focus lo zot stratezi inisyal eski ozordi sa Mosyon ti pou’n ariv devan Lasanble.  E enn bann dernyen lide ki mon’n tann koz lo la se Praslin Consultative Committee. E mon pa konnen si sa i ankor egziste e ozordi i annan ladministrasyon distrik lo 3 distrik ki tonm dan Inner Islands. La Digue i enn, Grand Anse e Baie Ste Anne. Nou annan MNA ki reprezant sa bann dimoun, zot annan reprezantasyon pli o nivo dan ladministrasyon politik pei.

E prezan mazinen menm en letan Praslin ek La Digue zot parti i annan sa striktir Central Committee CC Member. E en letan Prezidan pei former President James Michel li ki ti CC member pour Praslin.  E en ansyen MNA Baie St Anne ozordi i dan Cabinet. So mon krwar pour dir ki’n arive se ki bann lannen ki’n pase zot in retourn milti-parti nou pa’n kapab sezi sa meyer model pour manage Praslin avek La Digue. E ler mwan pe asize la mwan pe sey rod en pe lenformasyon pour dir be ok, annou sey dir get grander popilasyon par egzanp pour ou kapab zistifye demann ki Onorab Gill pe fer, ouswa si zis zot ti kapab dir nou vreman ki kantite larzan sa de zil in anmennen dan nou lekonomi. Mon ti La Digue semenn pase letan nou pe monte lo Cat Cocos from Mahe mwan pe get sa kantite ki pe mont lo zot zil konmsi, mon dir wow! Vre alor zot pe anmenn en kantite larzan.

Me selman i ti pour byen si nou ti kapab ganny sa bann figures. Me selman letan dernyen census ki’n fer la mon pa’n war sif me selman baze lo resansman 2010 zot ti pe dir popilasyon Praslin i apepre 7, 533 dimoun be sa in ogmante. La Digue zot ti pe dir i 2,008 e mon ava osi dakor pour dir in ogmante. Mahe sa letan zot ti pe dir ki i 77mil – li osi in ogmante. Aprezan parey mon pe dir nou pe koz 25 distrik rezyon administrativ dan Sesel, e Inner Islands ki zot pe rod plis reprezantasyon lo Board i annan zis 3 distrik. Lo Mahe, nou annan 22 e demen bomaten letan Perseverance i vin en distrik ouswa i vin 2, nou ava annan swa 23 ouswa 24. Donk ki mannyer alor nou pour zistifye pour donn plis reprezantasyon lo bann Board?

Ki mannyer nou pour champion sa nide en diskriminasyon pozitiv pour bann inner islanders? Mon pa ankor konvenki dan bann largiman ki’n ganny anmennen selman mon ava dakor avek lo en keksoz. Mon krwar tou bann Board ki’n ganny, tou bann antite ki egziste dan pei, i bezwen be mindful – touzour konsyan spesifisite Praslin/La Digue. Ou vwar ozordi par egzanp SCCI, Seychelles Chamber of Commerce and Industry, zot in vre zot in neglize e prezan ou bezwen war formasyon, Praslin Business Association avek La Digue Business Association. Be si dan zot, parmi zot bann counselors zot apele sa bann dimoun?  Be zot ti’n pran en dimoun pour dir be ok nou pe fer sir ki i annan en dimoun sorti lo Praslin ouswa La Digue, i ti’n ava’n ede. Par egzanp egalman SPTC, mon krwar Onorab Gill pa’n mansyonn SPTC. SPTC i annan en subsidiary operation lo Praslin. Be Gouvernman whoever ki nominate the board of SPTC, ti’n merit mindful of this e asire ki i annan en dimoun Praslin ki lo la.  Akoz letan bann drayver laba ouswa nenport ki, zot pe deal avek en dimoun Mahe dan HR, ki li pa ni konnen ler ou pe dir Anse Kerlan ouswa Amitie. I pa konnen ki bor i ete. So responsabilite ankor i tonm lo bann dimoun ki nou konfye responsabilite pour deservi nou pei.  E ankor mon senpatiz avek zot ki lot kote delo akoz mwan ki la nou marse from Mont Buxton pour al Anvil nou ganny difikilte avek bann antite Gouvernman Santral ki mon’n koz lo la semenn pase. E nou pe koz lo la depi ki Mosyon Onorab Waven William ti vini lo sa size desantralizasyon.

Donk mwan pa krwar mwan ava termin lo sa pwen Mr Speaker an dizan sa. Mon senpatiz avek santiman ki bann MNA ki sorti lo Inner Islands i annan vizavi sa mank repitasyon zot bann konfrer lo bann Board Nasyonal. Me mon pa neseserman siport nide pour nou realiz sa rev ki zot annan, me mon ti a prefere dir ki bann striktir aktyel ki nou annan ozordi, annou re-get li ankor e annou repran rol aker pou asire ki nou pe deservi tou dimoun avek tou fransizm, avek tou senserite, avek tou bonn volonte.

Toultan mazinen ki nou annan tou sa bann dimoun lo Mahe, Praslin La Digue e Silhouette e bann zil elwanye pour ki alor vreman, vreman – permet mwan pret en kou la zot fraz ‘’zonm o sant devlopman,’’ Seselwa o sant devlopman nou gannyen sa servis. Akoz pou neseserman ozordi i pa le ka. Yer par egzanp mon’n fek ekrir en PS en let tre ankoler, pou dir ek li zisteman nou pa pe fer sa parfwa, akoz nou konman reprezantan bann dimoun nou demann, nou siplir avek zot pou asiste bann dimoun e zot pa fer li avek lavites ek viger ki nou ti ava anvi.

Donk mon senpatiz avek demann Onorab Gill Mr Speaker me mon pa neseserman siport sa demann. Se tou ki mon ti annan pou dir.  Mersi bokou.

 

MR SPEAKER

Mersi Onorab Henrie.  Mon a donn laparol Onorab Paul Ernesta.

 

HON PAUL ERNESTA

Bonzour Mr Speaker, bonzour bann koleg Onorab, bann etidyan dan galeri e tou bann dimoun a lekout. Mr Speaker ozordi mon fer mon lentervansyon konman osi rasin sorti La Digue e osi Zil Pros ki mon tante pou mwan koz lo Mosyon anmennen par mon koleg.  Letan mon’n get sa Mosyon ki Onorab pe sey demande i pe anmenn en lot kalite panse si ou le.

Bokou fwa dan le pase nou’n get Praslin avek bann zil pros konman konsonmater servis Leta. Letan mon dir konsonmater servis Leta ki mon pe sey dir?  Kot toultan mon’n vwar bann zofisye sorti Mahe e mont lo zil pou fer travay bann keksoz arive lo nou bann zil. Mon menm konman en premye legzanp.  En lepok mon ti travay dan Seksyon Festival Lazenes. Sa zis en legzanp sa en, toulezan sak fwa letan i ariv festival lazenes nou bezwen pe mont lo zil pour nou fer sa ki nou apel en pre-youth festival.

Kot la ou vwar en delegasyon zofisye sorti dan Departman Lazenes i mont lo zil conceptualize aktivite depi son konmansman ziska son lenplimantasyon, ziska son finisyon. E zot Praslin zot resevwar bann aktivite, e at times ou pou ganny petet bann zabitan ki zot osi zot vini zot donn serten input. Me tou son

depans tou son resours tousala i ganny fer par dimoun Mahe.

Sa ki mon koleg pe demande ozordi, mon pret parol mon lot koleg Onorab William i pe dir enough is enough.  Annou get en kou nou bann zabitan Praslin e La Digue. Sa 2 zil in toultan prodwi profesyonnel ou vwar zot partou dan tou sekter, pli boner mon koleg in mansyonn lo la ou vwar zot dan tou sekter. Me when it comes pour zot donn input dan zot distrik dan zot kominote zot pa ganny touse. Letan nou al Lartik 24 nou Konstitisyon i dir nou koumsa ki dimoun i annan partisip dan Gouvernman.

Egal dan Gouvernman nou pe koz Lezislatif, Egzekitiv e Zidisyer, mon krwar dan Lezislatif nou annan reprezantan Inner Island. Be what about input nou bann dimoun lo kote Egzekitiv? E se sa sa Mosyon ki pe demann nou, e an menm tan sa Mosyon osi anliny avek drwa fondamantal en imen e osi i anliny avek prensip la demokrasi. So, kot i anmenn langazman e i involvement kominote direkteman dan zot kominote.

E se sa ki sa Mosyon i pe demann nou ozordi. I pa pe demann pour zot fer zot repiblik parey mon lot koleg lo lot kote latab i dir. I pe demann sepleman donn zot sa loportinite pou zot angaze dan bann desizyon ki annan pou fer avek zot kominote. Senpleman sa ki zot pe demande. Bonner letan in koze in dir i annan 13 diferan body ki annan lenpak direkteman avek devlopman zot zil ki zot napa. Zot napa en say lo la? So, se sa ki i pe demann lotorite Gouvernman pou konsider anmenn bann reprezantan dan zot bann servis.

Par egzanp, annou get, pli boner nou’n get SPTC ou’n rightly said. Yes, i annan ozordi en board SPTC i annan en seksyon SPTC lo zil. Me napa, i napa en reprezantasyon en zabitan Praslin lo sa Board ki pou ede dan desizyon ki annan pou fer ki enpakte direkteman lo zil Inner Island. Nou koz osi HFC, nou koz PMC ok, i tou sa bann antite sa bann body ki annan pou fer avek desizyon zil ki nou bann dimoun napa nanryen pou zot antre. E an menm tan i enportan ki letan nou pe get sa Mosyon. I enportan ki nou get osi nou bann group ki dezavantaze, letan mon dir nou bann group dezavantaze.

Nou annan nou bann dimoun parey ki nou apel nou bann dezabilite. Zot osi zot kapab ganny konsidere ganny angaze dan bann desizyon akoz lo zil osi i annan bann dimoun avek en dezabilite kot zot kapab zot osi ganny touse dan bann desizyon ki annan pou fer avek zot.

So, Mr Speaker dan sa Mosyon mon vwar li kot i pe ede li osi donn Gouvernman sa sans pou revwar nou bann resours kot i ale. E sa i pou anmenn en benefis enormeman parey pli boner mon’n servi sa legzanp kot mon bezwen sorti Mahe pou al fer progranm aktivite lo zil. I annan en kou ki atase avek, menm si nou pe servi zabitan lo sa zil pou zot angaze e fer bann progranm lo zot zil, e sa pou anmenn en gran rediksyon. En gran benefis dan bann depans ki Gouvernman i bezwen ankre pou fer bann progranm lo nivo distrik.

So, lo li menm i pou annan en lavantaz lo kote resours e osi lo letan ki nou annan pou fer bann progranm. E mwan mon krwar ki i ekstrememan enportan ki therefore ozordi parey nou annan nou’n dir pli boner i annan bann dimoun ki’n kalifye dan diferan domenn e i enportan ki Lotorite konsernen i pran letadelye, si ou pran en labank, tou nou bann dimoun ki annan lo zil. Zot bann kalifikasyon ki annan, ki en fason letan i annan bann Board respektiv ki annan pour fer avek zil sa bann dimoun i kapab ganny rope in dan bann desizyon.

Par egzanp nou pa kapab si nou annan en Board pour fer ek lagrikiltir nou pa kapab pa met en dimoun ki konn, ki annan konesans dan lagrikiltir.  Sa i ekstrememan enportan pour fer sa dimoun ki li i kapab donn bann bon desizyon baze lo lenformasyon lokal son kominote ki kapab ede letan i pran bann, ki bann desizyon i fer ki i ava bann desizyon efektiv e efikas dan sa domenn.

So, Mr Speaker mwan anmenn mon soutyen. Mwan demann tou mwan lezot koleg osi, pa get li koman nou pe sa Mosyon pe anmenn koman en diskriminasyon, swap e segregate zil avek pei. Me pe plito, en pledwaye devan lotorite konsernen pour nou kapab konsider bann profesyonnel letan i annan pour fer lo bann desizyon lo Praslin osi lo bann Zil Pros. So avek sa Mr Speaker mon anmenn mon sipor pour sa Mosyon e mon demann tou mon bann koleg pour siporte. Mersi Mr Speaker.

 

MR SPEAKER

Mersi Onorab Ernesta. Mon a donn laparol Onorab Wavel Woodcock.

 

HON WAVEL WOODCOCK

Mersi Mr Speaker. Bonzour Mr Speaker, tou koleg Onorab, tou dimoun a lekout e bann zanfan Independence School dan galeri.

Mr Speaker ler mwan pe ekout sa Mosyon Onorab Gill e bann entervenan ki pe koze en keksoz enportan in ganny fer resorti atraver son Mosyon e atraver keksoz, bann lentervansyon bann lezot Manm se enklisivite. Mr Speaker Zil Pros i kontribye bokou dan lekonomi Sesel. Sa mwan pour dakor, nou kontribye atraver taks, atraver sirtou lendistri touris, Mr Speaker ki ozordi i annan plizyer lotel Praslin, bann pti letablisman e bann biznes dan sa sekter ki pe generate en kantite income ki anmenn bokou benefis, pour nou pei. E mwan pour dakor avek li ki nou bezwen.

Mon dakor avek Onorab Gill ki vre Praslin nou annan plizyer profesyonnel e dimoun konpetan ki kapab pran plas lo plizyer bann Board Nasyonal. E mon santi ki vre Praslinois, zabitan Praslin, zabitan Zil Pros i annan ki pe santi ki vre kekfwa nou pa pe ganny ase reprezante lo plizyer bann board enportan ki kapab anmenn nou lavwa pli devan kot kekfwa Gouvernman i kapab pran en pti pe plis bann konsiderasyon, konsern e sizesyon ki nou annan sirtou kot i konsern bann desizyon ki ganny pran ki enpakt nou zil, ki enpakt Zil Pros direkteman.

Onorab Gill in mansyonn plizyer Board ki nou ganny reprezante lo la. Bann Board enportan in mansyonnen. Mon krwar in mansyonn 1, 2, 3, 4, 5, 6, 7, 8 Board ki in dir dapre son resers i annan reprezantan bann zabitan zil pros lo la. Sa i SIB, Seychelles Investment Board, SHF, Seychelles Heritage Fund, SAA, Seychelles Agricultural Agency, SIF, Seychelles Island Foundation, mon kapab zis aret la. nou ganny reprezante lo SIF. Me selman enn ler si nou war pour dir zabitan zil pros i ganny reprezante lo serten Board.  Me selman enn ler nou pa war vreman ki pe benefis i pe anmennen pour nou. Enn ler nou bezwen gete lekel bann dimoun ki nou met lo sa bann Board e si sa dimoun pe pouse vreman dan en fason ase for ki anmenn serten retonbe, benefis direk lo nou zil.

En lot Board in mansyonnen, STC. STC nou annan en reprezantan lo bann konsern ki nou annan. STC in ganny en bout later Ile Eve, zot ti sipoze bouz, sorti kot zot ete Amitie e obor kot lekol primer pour fer en warehouse laba pour zot bouz laba. E akoz napa ase presyon pe ganny mete lo STC pour sa vin en realite ozordi nou pe ganny afekte.  Ozordi akoz napa plas pour fer lekol Grand Anse Praslin Primer zot in bezwen fer en lot block kot lekol i ete ki ozordi lespas i ankonbre e sa i kree en lenkonvenyans en problenm pour nou kan ti deza annan en landrwa kot nou ti kapab fer en block ozordi.

So, i enportan osi ki bann dimoun Praslinois or La Digue, Inner Island ki reprezant nou lo bann Board zot pe pouse, zot pe lager, zot pe met nou konsern devan e pouse ki i annan en retonbe direk, i annan serten benefis ki nou zil i benefisye avek.  In mansyonn osi STB, Seychelles Tourism Board.  In mansyonn Seychelles Tourism Board, nou annan en reprezantan lo la, me selman fek vin en Lalwa devan Lasanble grad klasifikasyon, ki nou tou nou sirtou, sirtou en gran kominote bann businessman, bann dimoun ki dan sekter tourizm ki dan bann letablisman, guesthouse e lotel in met zot konsern devan menm Praslin Business Association.  E mwan menm nou’n kont plizyer seksyon dan sa Bill ki nou santi ti pour anmenn en gran dezavantaz e met retar. Plizyer bann pti biznes, bann letablisman touristik lo nou zil.

Be eski nou annan bann dimoun ki vreman pe lager. Eski nou gete?  Ou konnen dan lepase en problenm ki’n arive Mr Speaker la lo bann Board, bann dimoun ki’n ganny met lo bann Board i pa bann dimoun ki’n, ki enparsyal.        I pa bann dimoun ki’n vin get lentere nou zil zot. I bann dimoun ki’n ganny mete, ki’n get zot lentere personnel ouswa ki mete pour bann rezon politik.  Mr Speaker mon kapab mansyonn ou plizyer dan lepase ki ti’n ganny kree ki ti pirman politize ki sete bann desizyon politik ki ti ganny pran. E mon kontan Onorab Gill in mansyonn 3 Board enportan, 3 enportan, pa 3, plizyer Board ki santi i ase enportan ki i annan en reprezantan Praslinois lo la. E mwan dakor, in mansyonn PMC, ladan in mansyonn PMC, in mansyon SNPA e in osi mansyonn IEA. Mr Speaker ler mwan pe get PMC. Vre mon dakor ki nou bezwen annan en reprezantan lo PMC.

Ozordi nou annan plizyer housing estate lo Praslin me eski bann konsern … housing estate pe ganny met devan. Eski Board pe hold accountable bann Minister? Mon a donn ou en legzanp PMC. … sa issue bann tiles lo bann lakaz ki’n ganny fer ki ti ganny vann avek bann zabitan … Minis in vin devan Lasanble ti donn en komitman ki pour ranplas tiles lo sa bann lakaz. La nou fek fer en vizit laba, pa bokou letan pase detrwa nou MNA nou’n al fer en vizit Moulinie, plizyer lakaz tol pe pouri. I annan dimoun ki bezwen evakye, kit lakaz akoz delo pe koul anndan.

En komitman ki Minis Bastienne ti fer devan sa Lasanble Nasyonal ki nanryen pa’n ganny fer ziska prezan e si ou ale la mon challenge Minister e Board al fer en vizit Moulinie nou a get en pe sa bann lakaz ou a war ki mannyer tills pe tonbe, ki mannyer keksoz, sityasyon ki bann dimoun pe reste ladan e mwan mon leker ti fermal ler mon ti war en grannwanr ase aze ki annan problenm leren i dir mwan koumsa i ganny son sekirite sosyal. Tou son bann zanfan in bezwen kit li ale akoz kou pour zot sanz sa i bokou e Minister pa’n fer sa ki ti promet devan sa Lasanble Nasyonal.

So, alor Mr Speaker i vre pour dir i annan bann Board ki mwan santi ki nou bezwen annan serten reprezantasyon lo la.  In mansyonn osi SNPA, en Board ki enportan pour annan Praslinois lo la. Pa bokou letan pase en desizyon ti ganny pran par SNPA pour ogmant disembarkation fee Curieuse. Mon krwar i en logmantasyon par R100 ekek ki ti pour afekte bann bato ekskirsyon ki ti pour afekte bann dimoun ki dan biznes bato plezir a apre ki mwan menm mwan, ti met sa devan Lasanble Nasyonal e presyon ki PBA ti mete zot in agree pour tenir ziska ler zot met bann proper infrastructure laba Curieuse avan ler ki zot konsider ogmant landing disembarkation fee laba Curieuse.

En lot landrwa ki Onorab Gill in mansyonnen ki ti a bon ki nou annan reprezantasyon la ki mwan 100 poursan dakor avek li se Industrial Estate Authority.  I en antite vreman enportan ozordi Sesel par le fe ki ozordi Praslin nou annan en Industrial Estate, me ki nou war dan lepase Mr Speaker. Nou pe koz Board ozordi me dan lepase… Ile Eve lafason ki keksoz ti pe ganny zere ti annan politik ladan.

Nou’n war bann ex-MNA, nou’n war bann dalon, nou’n war bann politisyen ki’n partaz later ek kanmarad, ki’n donn bal, later ki’n ganny donnen san okenn lenfrastriktir ganny mete. Sa ki’n swiv sa land use plan ki ti annan pou sa landrwa la ozordi ki nou pe dir annou met bann Board apropriye. Annou met reprezantan lo sa bann diferan Board. Me selman le pase ti politize e ti ganny fer pou benefisye detrwa endividi ki’n donn bal, ki’n ganny later. Ki’n abize, ki’n re-vann later pou milyon e de-milyon. La ozordi nou pe ganny met retar e Vis-Prezidan i vin devan Lasanble Nasyonal i dir nou pou dir nou Bidze pou sa lannen i forse 5milyon ekek roupi. Kan sa proze total i kout 36milyon.

E an 2020 ki kekfwa later i kapab ganny distribye, kan en proze Ile Eve ti fini konstri depi 2009.  E later ti ganny zis donnen mal apropo, nou bezwen gete. Bann Board ki ganny kree nou bezwen gete lekel bann dimoun ki lo la. fodre bann dimoun enparsyal bann dimoun konpetan. Pa zis met politisyen lo Board, ouswa en boug ki ozordi in perdi. Sorry eskiz mwan, bann dimoun enkonpetan lo Board, annou met bann dimoun konpetan. Pa bann politisyen ouswa bann ex-MNA ki ozordi zot in perdi zot plas dan Lasanble zot bezwen rod en trou met zot ladan.

Mr Speaker annou met, sa Gouvernman fodre i serye lo bann Board nou bezwen fer atansyon. Bann dimoun ki nou mete i bann dimoun konpetan bann dimoun ki kapab travay e bann dimoun ki pou koz pou lentere nou pep. Ki pou koz pou lentere nou distrik. Mon dakor Mr Speaker parey Onorab Gill in dir ki wi, Ile Eve nou bezwen annan en dimoun serye e dimoun konpetan ki sorti lo Zil Pros.

PDF annou pa bliy PDF Mr Speaker lannen pase, ti annan lekel zot la anndan ki mazin PDF?  Bann Manm ki la depi lontan zot mazin PDF lontan. PDF lontan Praslin ti en zouti politik, ti annan detrwa MNA ozordi i annan enn ki en Minis konmela.

Ki’n arive avek PDF? Ti annan zis labi, vol, zot in donn bal, zot in anrisi zot lekor.  Sa ki’n ganny later parti later, Mr Speaker.  Be ti en Board ki ti annan Pralinois lo la.  Be selman sete bann dimoun ki ti pe get zot lentere personnel ki ti pea biz lo lasyer e larzan ki nou ki ti pe kontribye ouswa larzan ki, bann retonbe dan lekonomi touris ki pe antre lo nou zil ki en serten dimoun ti pe benefisye lo la.  Nou le Board wi mon dakor lo la. Nou bezwen reprezantasyon Zil Pros ou mon dakor avek. Me nou bezwen balanse nou bezwen gete lekel sa bann dimoun ki nou mete lo la.

Nou bezwen arete sa bann zafer, ou konnen Mr Speaker ozordi mon kontan. Ozordi mon kontan ki Gouvernman US pe koz lo profesyonnel. Nou bezwen ankouraz profesyonnel donn plas profesyonnel nou pei. Be lontan zot pa ti enterese avek profesyonnel. Zot ti enterese zis avek bann profesyonnel ki ek zot. Akoz pou plizyer lannen in annan en filozofi ek nou, pa ek nou. En boug i kapab entelizan, i kapab pli malen, i kapab pli edike, i kapab annan tou son leksperyans. Me si i ti siport serten parti politik i ti ganny met akote pou favoriz serten politisyen. Ouswa enn de dimoun ki menm si zot pa ti konpetan zot ti dan en pozisyon pou senpleman rezon politik.

Ouswa zot ti met bann dimoun ki zot ti kapab manipile, ouswa bann dimoun ki zot ti kapab dir en fer tel keksoz pour mwan, fer mwan ganny tel later, fer mwan ganny tel loan. L’Union osi, L’Union ozordi, be L’Union Estate ozordi, konbyen letan L’Union Estate pe ganny reprezante avek plizyer zabitan Digwaz? E pa bliy en moman osi, ti annan en moman ki serten Mrs Lise Bastienne ki ti Chairman L’Union Estate, I pa ti en problenm sa letan.

E L’Union ki profi ki retonbe ki L’Union ti pou anmennen La Digue?  Mon dir ou ki retonbe ki L’Union ti pe anmennen La Digue. L’Union pa ti pe fer okenn profi ziska ler FPAC in vin get ladan la dernyerman. En nouvo Board in ganny kree la, mon krwar dan en lespas 1an, in fer en profi R10milyon. Me avan ou konnen ki mannyer L’Union ti ganny zere, L’Union ti ganny servi pou donn later serten dalon, pou donn loan en serten bann ki pa’n zanmen repey zot loan.

E plizyer keksoz in ganny fer asset ti ganny vann san okenn accountability. Ki nou pa ni konnen kot in ale, e lekel ki’n benefisye. Akoz ki en Board ti pe ganny zere, avek en lenfliyans politik par deryer, en azanda politik, kanpanny politik pou soutir dalon e ki dalon i anrisir e benefis zot lekor.  Nou bezwen aksepte nou konnen pou dir sa i larealite. Wi mon dakor, mon dakor 100poursan avek Onorab Gill wi nou bezwen reprezantan bann profesyonnel Zil Pros, Praslin, La Digue lo bann Board.

Me annou tir politik ladan, annou met bann dimoun ki enparsyal, bann dimoun ki pou travay pou zabitan nou zil pou Praslin avek La Digue. I pa bann dimoun ki pou pini lezot dimoun ki pa siport en serten parti politik. Me i pou bann dimoun ki annan Praslin, ki annan La Digue aker. En Mosyon ki bon i pa fer premye fwa mwan menm mon mon’n anmenn plizyer kestyon devan Lasanble.

E menm Mosyon dernyerman lo Baie Ste Anne lo bann size ki konsern nou zil ki nou santi napa, Gouvernman US pa pe met ase lanfaz lo nou zil. Pou konklir Mr Speaker kekfwa mon kapab dir Onorab Waven William ti fer en sizesyon defwa in fer serten keksoz.

So, i dir kekfwa Praslin ki nou bezwen, kekfwa nou bezwen en Minister ouswa en Minis ki pou zer Zil Pros. Kekfwa sel keksoz dan le fitir ki bann Gouvernman i kapab konsidere kot i annan en dimoun. La mon krwar se Vis- Prezidan ki se Minis ki annan en oversight direk lo Zil. Be selman mon pa war ki i fer akoz i vin ennfwa dan rar, me selman kekfwa i annan en dimoun ki pe travay pou nou zil e pe met lanfaz nou zil. Ki kapab pous nou bann lentere nou bann konsern e anmenn nou bann konsern devan Cabinet.

Avek sa 2 parol Mr Speaker parey mon’n dir sa Mosyon i annan serten merit e mon pou donn sipor sa Mosyon. Mersi Mr Speaker.

 

MR SPEAKER

Mersi Onorab Woodcock.  Mon ava donn laparol Onorab Sebastien Pillay, Onorab Pillay.

 

HON SEBASTIEN PILLAY

Mersi Mr Speaker.  Bonzour Mr Speaker bonzour tou koleg Onorab.  Bonzour tou dimoun ki a lekout bonzour spesyal pou bann dimoun Praslin e La Digue ki pe ekout nou. Ki pe debat lo en Mosyon kot nou pe demann pli enklisivite e plis involvement bann dimoun lo sa bann zil dan prosesis desizyon.

Mr Speaker sa Mosyon in vin devan Lasanble, akoz apre plizyer lannen ki sa, ki bann zil pros in evolye e partisipasyon aktiv bann zabitan sa bann zil in vin, in ogmante.  I neseser pour nou annan si oule en re-thinking, lo lafason ki nou enkli bann lo sa 2 zil lo sa bann prosesis desizyon ki ganny fer ki kapab annan en lenpak lo zot, swa en lenpak ekonomik. Swen lenpak lo en pwennvi fizik kot nou pe fer serten proze swa en lenpak lo le fitir ki mannyer sa bann zil pou devlope.

Mon dir sa Mr Speaker akoz nou bezwen sitye nou byen kote e akoz sa largiman pe vini ozordi.  E sa largiman Mr Speaker in vini apre ki nou’n vwar en zefor si ou le en push par bann zabitan lo sa bann zil pou kre bann lasosyasyon pou permet zot, ed zot zer bann eleman bann sekter oubyen ganny en fason pou donn en input an relasyon avek en sekter spesifik.

Par egzanp nou’n vwar kreasyon Praslin Business Association. Akoz in annan kreasyon Praslin Business Association, se akoz bann Pralinwa ki fer biznes i santi pou dir zot bezwen ganny involve, zot bezwen kapab met en input dan bann desizyon ki relye avek biznes.

Akoz nou bezwen admet, malgre ki serten keksoz konteks pou parey nou tou nou Sesel. I annan serten keksoz ki konteks spesifik ki relye avek swa zil Praslin swa avek La Digue, ki dimoun ki pli byen plase ki pou kapab koz lo la se en dimoun ki’n ne oubyen ki’n grandi ou byen ki pe fer sa aktivite lo sa zil.

E i enportan pou nou sitye sa dan sa largiman, akoz fodre pa ki nou al dan en laliny kot nou koz lo nou pe rod positive discrimination oubyen nou pe rod en fason pour nou separ Sesel avek bann Zil Pros avek Mahe. I pa sa lentansyon sa Mosyon, mon krwar si nou get byen lentansyon sa Mosyon se lespri ki sa Mosyon pe anmennen, se ki mannyer nou kapab apriyori asire ki ler nou pe pran en desizyon, vizavi en keksoz ki pou afekte ou enpakte en dimoun ki reste Grand Anse Praslin, oubyen en dimoun ki reste Baie Ste Anne Praslin, oubyen en dimoun ki reste La Digue.

Nou pe fer li dan lentere oubyen nou pe fer li tou an prenon kont bann konsekans oubyen bann keksoz ki kapab arive bann reperkisyon sa desizyon.

Mon pou donn ou en legzanp tipik Mr Speaker, Mr Speaker mwan mon en zabitan Glacis si demen en dimoun i vini i dir mwan par egzanp i pou fer, i pou al fer en miray somewhere kot i bar en akse avek lans kot manrmay, i abitye al zwe oubyen kot manrmay i abitye desann. Definitivman mon pou dir avek sa dimoun, ou pa pe kapab fer li la. I kapab par egzanp from en pwennvi planning kot en proze sa dimoun in meet tou bann kriter neseser i lozik i normal. Me parfwa i annan bann akse kot i annan bann landrwa, kot dimoun i abitye akse natirelman. I abitye pase natirelman, istorikman dimoun i abitye pas la ki petet sa bann dimoun pe fer sa proze pa neseserman konnen.

I kapab par egzanp osi en dimoun i deside fer en proze kot i annan en larivyer kot i abitye pase. Ki sa dimoun pa konnen i abitye pas la, i fer en miray i pou gannyen pou fer en lot proze en drenaz san prenon kont istorikman kote sa larivyer oubyen sa drenaz ki lenpak i pou annan.

So, dan sa laliny mon krwar e lespri si nou al lo en pwennvi lokal kot sa Mosyon i antre.  Sa i en premye pwen ki mon krwar nou bezwen soulinyen.

E i annan plizyer ka kot nou pou vwar kot nou pou eksperyanse kot lo La Digue ek lo Praslin in annan sityasyon kot i annan proze ki’n ganny fer ki pa’n pran kont bann konteks istorik oubyen bann konteks fizik, sa landrwa ki bann dimoun ki’n viv dan sa landrwa i konn pli byen kot i kapab in fer en proze avek tou bon lentansyon pou dil avek en problenm.

Me i kapab avek sa proze ki nou’n fer avek nou bon lentansyon, in kre plis problenm dan long term akoz petet nou pa’n swa konsilte, oubyen nou’n napa sa involvement sa buy-in from sa kominote ki trouve dan sa landrwa, oubyen ki pou ganny afekte avek sa proze. E mon krwar se sa ki nou bezwen konsidere.

E le pwen ki Onorab Gill in fer i en pwen tre pertinan. Akoz ozordi aktivite ekonomik lo Praslin i en aktivite ki’n ogmante.  Aktivite ekonomik lo La Digue i en aktivite ki pe kontinyelman ogmante. E lesansyel ki nou, nou bezwen vwar se ki mannyer nou kapab donn en buy-in en pe pli enportan. Donn en input en pe pli enportan bann dimoun ki pe fer bann aktivite biznes lo sa 2 zil.

Mr Speaker nou bezwen nou konman en Lasanble regard sa Mosyon avek lespri pour nou re-think lafason ki nou manage resours. Me re-think lafason ki nou anmenn kominote pli pre dan prosesis fer desizyon. E se sa lespri sa Mosyon, se sa rezon akoz sa Lasanble ozordi i devret pe siport en tel Mosyon. I fasil Mr Speaker pou ou al dan le pase e dir pou dir ki tou Board ki’n ganny kree Praslin ti ganny kree lo en pwennvi politik. I fasil pou ou dir ozordi akoz ou ler ou pa’n dan Gouvernman pa ou ki’n bezwen fer desizyon. Pou ou kritik lefe ki tou dimoun ki’n ganny later, e bann dimoun ki’n ganny alter akoz faver politik.

I fasil pou ou dir ozordi pou ou kritike pou dir tou dimoun ki’n ganny biznes akoz faver politik.  Me mwan sa ki fason mwan Mr Speaker ozordi mon vwar plizyer dimoun, bann gro, gro dimoun dan Lopozisyon ki’n epanouir. Dan plizyer gro, gro biznes lo Praslin, La Digue be ou a le dir mwan ki mannyer zot in pase zot alors.

Mon krwar in ler dan sa Lasanble pou nou serye nou en pe, e aret fer sa kalite politik ek nou pa ek nou. Akoz si nou konmans koz koumsa sa i ek nou, sa pa ek nou se sa ki savedir ek nou pa ek nou. Sesel pe evolye nou kontinyen drag nou dan le pase anmenn nou, benny nou dan sa le pase. Be kan ki nou pou bouze? Kan ki nou pou avans devan? Nou anmenn en Mosyon dan Lasanble en Mosyon kot en MNA in asize in mazinen in koz lo la, e sa i pa premye fwa Onorab Gill. E mwan mon felisit Onorab Gill en tre bon Mosyon ki Onorab Gill in anmennen dan Lasanble ozordi.

I ti en Mosyon mon krwar ki ti’n devret vin lo en pwennvi tou bann MNA Zil Pros me i, mon kontan Mr Speaker.   Mon kontan ki Onorab, Onorab ki reprezant Grand Anse Praslin dan Lasanble,  Onorab in dir i pe siport sa Mosyon.   E mon ti a kontan i koz avek lezot son koleg ki’n koz lo sa Mosyon avan pou pa vwar sa Mosyon konman en Mosyon US e zot konman LDS.  Vwar sa Mosyon konman en Mosyon ki pe anmenn en re-thinking lo lafason ki nou zere ki nou manage.  E ki nou allow bann Praslinois ek bann Digwa pou annan en buy-in dan decision making process dan sa pei. Les Digwa kapab osi deside.

Mr Speaker ozordi dan nou pei nou bezwen aksepte, nou bezwen aksepte. I annan plizyer dimoun ki’n avanse dan son biznes pa akoz i US, akoz in travay. In travay, be ki mannyer nou kapab vini akoz ozordi prezan ou pou fer sa boug per siport US akoz ou pe dir pou dir ou’n ganny sa biznes akoz US.  Be sa ou, mwan mon war sa konman en vyolasyon nou Konstitisyon. Sa boug napa drwa asosye li, e ler i pou asosye li ou pou pran en stigma ou pou met lo li.

Be Mr Speaker, sanmenm sa sa parti ki preach freedom of expression, freedom of speech, freedom of association lo sa lot kote latab sa. Be i fer mwan lapenn Mr Speaker, nou pe retourn dan en diktatir. Kot ou pa ganny drwa siport en lot parti apard ki LDS e si ou siport en lot parti apard ki LDS alors ou en voler, ou en koronpi.

Be Mr Speaker, be eski zot ekout zot lekor lo sa lot kote latab ler zot koz? Zot ekout zot lekor? Mr Speaker lesansyel sa Mosyon e ou konnen mon pa ti pou bezwen koz koumsa Mr Speaker. Mon pa ti pou bezwen koz koumsa, akoz mon bezwen koz koumsa akoz nou pa kapab kontinyen les LDS kontinyen bat latet Seselwa e fer siporter United Seychelles per akoz zot siport zot parti politik.

Mr Speaker nou lo sa kote latab nou pa’n zanmen kritik ni One Seychelles ki fek formen. Lekel ki kritike? Zot ki kritike, nou pa’n zanmen kritik Mr Pillay, zot ki kritike, nou pa’n zanmen kritik en lot dimoun konmans en lot parti, zot ki kritike. Ozordi Mr Speaker, ozordi nou lizye pe ouver pa lefe ki sa bann ki’n toultan preach ki zot, zot standby laliberte lekspresyon. Ozordi zot menm ki pe kritik laliberte lekspresyon, zot pe atak zot prop dimoun ki sanz zot nide akoz, akoz, akoz sa dimoun pa fall into line avek ou. Be les ou dimoun eksprim son lekor. Be definitivman e mon kontan ou nonm sa Onorab si ou le permet mwan mon ava al ladan.

Permet mwan, non, non nou pa’n gat Mosyon. Gat Mosyon Mr Speaker

 

MR SPEAKER

Onorab nou tourn lo Mosyon.

 

HON SEBASTIEN PILLAY

Gat Mosyon Mr Speaker, in gate le komanter in ganny fer ler ki tou bann Board ki’n ganny kree.

 

MR SPEAKER

Order!

 

HON SEBASTIEN PILLAY

Tou bann Board ki’n ganny kree lo bann Zil Pros in ganny kree lo en baz politik. Mr Speaker tou parti, tou Gouvernman e mon ti a kontan, listwar pou prouv mwan byen si en zour zot vin dan Gouvernman.  Si zot, zot pa pou konsolid zot pouvwar par kree bann mechanism pou zot konsolid zot manifesto. Non, non hold-on Onorab, hold-on … i enportan pour zot realize pou dir sa bann board, sa bann dimoun ki lo sa bann board, sa bann devlopman ki’n arive lo Praslin ek La Digue pa’n ariv par averti.

In arive akoz bann dimoun in vini in travay, bann profesyonnel ki’n involve in vini in travay. E se sa ki mon krwar Onorab Gill pe rode, Onorab Gill pe rod en lot step prezan. I pe rod en lot step kot nou kapab …

 

MR SPEAKER

Bon  …

 

(Interruption)

 

HON SEBASTIEN PILLAY

Order! Onorab Pillay kontinyen.

 

HON SEBASTIEN PILLAY

Mersi Mr Speaker, sa ki Onorab Gill pe rode, i pe rod en lot step kot nou kapab anmenn enklisivite dan prosesis fer desizyon. E ki mannyer nou kapab anmenn sa lenklisivite lo en nivo kot zabitan Praslin ki ou US ki ou LDS, keksoz ki devret ini, ini tou sa bann dimoun Mr Speaker. Keksoz ki nou devret ini tou sa bann dimoun se lefe ki zot bann zabitan sa zil, e tou desizyon ki ganny fer ki konsern sa zil i afekte zot. Tou desizyon ki ganny fer lo La Digue i afekte zot se sa mon krwar zot ti pe rode dan Lasanble.

E mon krwar Onorab Henrie ti dir sa lot fwa Mr Speaker. I pe rod, e ozordi mon war i drol in koz lafason ki in koze be i ti pe rod involvement kominote dan sa ki pe pase lo en nivo pli larz. Pou zot annan en pli gran buy-in dan sa ki pe pase. E se sa Mr Speaker ki mwan mon pou go back to. Mr Speaker konman en Lasanble nou’n travay pour nou akonpli en kantite keksoz. Konman en Lasanble nou pa kapab deny ki nou’n travay konman en Lasanble. Akoz mon osi mon form parti sa Lasanble, me lefe i reste ki ozordi nou annan loportinite konman en Lasanble pour nou ankor enfwa solider donn sa sipor.

Recently lo Praslin Mr Speaker LDS ti fer son rally, lo La Digue osi zot ti fer en rally. Ti en rally lo La Digue mon pa tro sir si ti en meeting oubyen en rally zot ti dir en rally. So, sa ki mon krwar i enportan zot osi zot anvi war en involvement en buy-in bann kominote parey nou anvi war. E la Onorab Gill in anmenn en tre bon Mosyon e mon pou termin lo sa note Mr Speaker. Mon felisit Onorab Gill lo sa Mosyon ki in anmennen, mon felisit pou annan sa foresight, pou annan sa lespri kanmaradri avek kominote Praslin.

E lapros ki Onorab Gill pe pran i pa en lapros pou li diviz dimoun an ou, ou la, ou, ou la. Se en lapros ki mannyer nou kapab anmenn sa bann kominote ansanm e fer ki bann konsern ki Zil Pros i annan i kapab ganny adrese e en input konsiderab bann dimoun lo Zil Pros i kapab ganny mete pour ki nou kapab rezourd sa bann konsern. Avek sa Mr Speaker mon ti a kontan demann Lasanble antye pou siport sa Mosyon mersi.

 

MR SPEAKER

Mersi Onorab Pillay, bon nou ava pran en Break nou ava retournen 11er.

 

                (BREAK)

 

MR SPEAKER

Bon mon prezant en leskiz pour sa pti retar, me sa i vin apre en pti pe enteraksyon avek bann zanfan lekol Independence School. E enteraksyon vreman enteresan, bann kestyon ki bann zanfan i poze, i montre ou pour dir menm bann zanfan zot enterese avek pei, ki direksyon pei pe ale e politik osi tou an zeneral.  Se sa rezon par ler ki mwan demann bann Manm pour vin enterak avek sa bann zanfan.

Bon nou ava kontinyen nou travay deba lo Mosyon ki’n ganny move par Onorab Churchill Gill e mwan ava donn laparol Onorab Egbert Aglae.

 

HON EGBERT AGLAE

Mersi Mr Speaker, bonzour tou Manm a lekout pep Seselwa, espesyalman bann zilwa ki pe ekout nou.

Mr Speaker nou pe koz lo en Mosyon, kot i pe demann annan reprezantasyon bann profesyonnel lo bann Board kot bann desizyon ki ganny pran zot bann problenm bann defi zot bann konsern ava ganny pran kont.

Mr Speaker nou bezwen sezi sa loportinite ozordi ki nou pe gannyen atraver sa Mosyon anmennen par Onorab Churchill Gill ki li i en reprezantan direk ki pe pran soutyen e baz son constituent e anmenn pli devan. Mr Speaker mon dir en loportinite enportan, akoz bokou fwa dan lepase nou’n tande pour dir nou bezwen fer lavwa sa pep tande.  E enn bann moto sirtou moto Lopozisyon se fer tande ou lavwa.

E Mr Speaker se sa ki Mosyon pe adrese se pran lavwa bann zilwa e anmenn li pli devan. Mr Speaker dan prezantasyon Mosyon in touse bann diferan lenstans kot bann Board in ganny kree ki mwan pa pour al dan tou sa detay in mank reprezantasyon.

E ler bann reprezantasyon i manke Mr Speaker i kree serten lack, i kree osi retar pour ki ler i annan bann desizyon ki afekte zilwa bann prosedir pour kapab ganny bann konklizyon ouswa bann remed i tarde.  Mr Speaker en lot konponan kle dan sa Mosyon ki i touse se bann profesyonnel. E ozordi mwan rekonnet pour dir atraver e anba sa sistenm ki in agree bokou profesyonnel ozordi i annan bokou zilwa ki pe travay lo Mahe dan diferan Minister.

Nou menm nou dan sa Lasanble nou war sa Mr Speaker ler nou annan bann reprezantasyon bann lenstitisyon Minister i vin devan sa Lasanble e nou war bokou bann zenn profesyonnel ki vini pour vin reponn bann kestyon ouswa donn klarifikasyon.

Sa i montre ou pour dir zenn in ganny loportinite e anba sa sistenm bokou profesyonnel in ganny kree. Mr Speaker fodre ki nou pa aveg osi kontribisyon ki en profesyonnel i kapab anmennen akoz zot ki larelev. I domaz Mr Speaker ki serten entervenan avan mwan sirtou lot kote kot zot in pran sa Mosyon e sezi en loportinite ladan pour zot retourn nou dan en lepase ki nou, nou bann zenn nou pa anvi fer fas avek ozordi. I vre ki i annan serten keksoz ki’n pase me mwan Mr Speaker e bann zenn ki mazin parey mwan nou, nou anvi bouz de lavan.

Nou oule war solisyon pour nou problenm. Nou oule war lavansman progre e nou osi war modernizasyon ganny arive. E Mr Speaker se sa lespri deryer sa Mosyon se pour etablir e veikil pli pros avek zilwa. E ou pe met zot en board ou pe anmenn zot pli pre avek bann lotorite konsernen. E kot desizyon ki ganny pran byensir zot pour annan en lavwa imedyat.

Me selman Mr Speaker malgre dan lepase nou’n dir pour dir i annan bann Board ki’n ganny kree. Petet la fason ki in ganny striktire i pa’n rann li sitan efikasite. I annan ki’n dir pour dir politik in zwe en rol ladan me Mr Speaker en Gouvernman i ganny dirize par politisyen, byensir i annan son manifesto, i annan son azanda, i pour son devwar pour li kapab protez sa ki li in mete dan son manifesto, son azanda. Me nou bezwen fer li dan en fason eksklisiv ki minimize labi kot napa labi. Mr Speaker zilwa sirtou Praslin, La Digue bann zil obor li parey Kouzen, Arid, Curieuse, zot kontribye en kantite dan lekonomi pei. E dan Bidze anyel nou war pour dir sirtou dan tourism zot kontribye en bon pe pour fer sa Bidze 8 bilyon ki’n tou le lannen ki sa lannen pase nou’n vot lo la.

E sa Mr Speaker Loter Mosyon i annan son rezon dan lepase osi in anmenn bann Mosyon pour demann bann, demande ki resours, in fer resorti taler, resours ki zil pe fer i kapab osi repatriye e met dan devlopman zilwa. E mwan mon subscribe tou sa e mwan siport sa demann Mr Speaker. nou pa pe demande pour ki zil parey Praslin, nou pa pe demann zot lotonomi dan serten sans, zot pa pe demande pour dir zot prop antite dan zot menm zot zer tou zot keksoz zot menm.

Sa ki zot pe demande se ki i annan en fairness dan distribisyon kot zot lavwa lo zil i ganny tande e ki zot progre e lepanouisman i ganny pran kont e ler zot ganny dir zot konsern pour ganny adrese Mr Speaker, par egzanp dan lepase i annan bann sityasyon ki’n arive avek bann zilwa lo zil.

Nou annan sa fame problenm PUC ki lo Praslin, ki ankor pe negosye pour deal avek pour kapab ganny soutyen. Nou annan bann problenm lanvironnman. Nou annan bann problenm devlopman ki atase avek touristik, bann proze lotel. Nou annan bann kontrakter osi ki pe anvoy lavwa. Mr Speaker tousala i bann defi ki zilwa i fer fas avek.

E pour nou konnen pour dir tou keksoz ki ariv lo zil sirtou bann servis i komans Mahe. Minister Santral i Mahe e i lozik pour nou annan zot partisipasyon letan nou pe kree bann servis, bann pti lasosyasyon, bann Board pour ki zot ganny reprezante. Mr Speaker dan lepase osi i annan mansyon e mon krwar se Vis-Prezidan ki responsab lo bann size bann zil dan son departman. In annan serten mansyon dan lepase pour annan en Minis ki kapab ganny atase.

Mr Speaker me selman sa keksoz pa ankor ganny materyalize e petet i ava annan plis konsiltasyon pour vwar si an mezir ki lekonomi i agrandi resours i ogmante petet nou ava war dan posibilite pour annan en Minis ki kapab direkteman responsab sa group zil.

Mr Speaker ler mwan pe koz group zil mwan mon ti a prefere la lans en lapel ki sa bann group zil inner islands zot vin ansanm, vin ansanm parey nou dir kree en blok kot zot ava annan bann diferan partners, bann diferan profesyonnel ki ava pran diferan portfolio dan bann domenn enportan ki relye avek zot zil. Mr Speaker bann departman parey nou kapab dir dan biznes, lendistri kot i konsern ledikasyon, lasante, sport tourism, lenformasyon teknolozi, transpor, i bann diferan servis ki zil i bezwen pour zot kapab reste operasyonnel anvi zot proksimite avek Mahe e  kot tou keksoz parey mon’n dir i ganny trouve Mahe e sorti Mahe pour mont lo zil.

So Mr Speaker an fe sa koman en blok zot ava annan en pli gran lafors ankor. Akoz nou vwar pour dir souvandfwa  nou konport nou dan bann fason endividyalis e sakenn i kriy leokri dan en kote ler i annan serten problenm e nou war pour dir i annan gran retar pour nou adres bann defi ki zot fer fas avek. E koman en groupman koman en blok parey i annan Praslin Tourism Association ki la ki sak fwa en keksoz i monte, nou annan Tourism Bill ki nou pe diskit lo la, msye Gill in mont, Christopher Gill in monte in donn son lopinyon atraver Praslin Association.

Se sa bann fason fer ki pour anmenn lavwa zilwa pli devan. Me nou pa pour arive kapab fer sa si bann zil i get together koman en groupman e zot adres zot bann konsern.

E ler sa bann konsern i ganny adrese e zot in ganny zot bann reprezantan dan bann diferan sekter, ki mon’n nonmen la, i ava annan bann mekanizm ki bezwen ganny met an plas. Ou pa pour kapab zis al Board swa ou desann Mahe ou al partisip dan en meeting, dan en konferans san rann kont ki ou’n al fer, san rann kont ki ou kontribisyon.

Nou rekonnet pour dir sa de zil prensipal Praslin, La Digue zot annan en distrik, zot annan en ladministrasyon ki i annan bann servis osi atraver desantralizasyon.

Gouvernman ki rann zot travay en pti pe plis efektiv e ed bann zilwa.  Zot osi zot ava annan en par kot sa ki prezante i bezwen pass on sa bann lenformasyon. I ava annan en way kot zot anmas lenformasyon konsern, anmennen, met devan Board, board i met devan Gouvernman apre i bezwen retournen, retourn kot i ti sorti pour kapab fer zot bann zilwa konnen kwa ki pe ganny fer avek sa bann issue ki ganny mete.

Mr Speaker souvandfwa bokou meeting i ganny fer. E ler ou war pour dir dan menm meeting si ou fer menm meeting 3 fwa dan en lannen parfwa ou pe war menm sityasyon konsern ki ganny met devan.

E ou demann ou lekor akoz se ki bann channel kominikasyon petet pa pe marse ouswa bann channel, ki i pran en bor i al dan en bor i bloke ki i fer ki ozordi problenm, pa ganny adrese direkteman from sa ki zot ganny konsernen pour ganny adrese avek.

Sa i enn bann defi e atraver sa Mosyon reprezantasyon ki i a ganny mete, bann profesyonnel ki a tenir sa bann pti portfolio dan bann diferan domenn i ava kapab kot i merit ale direkteman tous sa Minister, tous sa Minis, tous sa lazans, tous sa departman e ki i ava annan en feedback ki a ganny donnen e la i a retourn kot zilwa.

Mr Speaker avek sa de mo mwan ti a demann tou Manm pour nou get sa Mosyon dan en fason forward thinking. Annou get li outside the box. Annou pa get li koman en politik pour fer politik avek. Annou mazin zilwa ki zot malgre zot laba zot osi zot merit annan en lavwa. E nou, nou la pour nou fer tande zot lavwa. Mr Speaker avek sa mwan pour dir ou.  Mersi.

 

MR SPEAKER

Mersi Onorab Aglae. Onorab Jude Valmont.

 

HON JUDE VALMONT

Mersi. Bonzour Mr Speaker.  Bonzour tou koleg Onorab e tou manm piblik ki pe swiv nou.

Mr Speaker mon Mosyon i kler i pe demande pour fer tou – mon repete – tou posib pour profesyonnel Zil Pros e Praslin i ganny reprezantan lo bann diferan Board ki i annan en lenpak direk lo devlopman sa bann zil.  Mr Speaker mwan pour koz an faver akoz mon war merit dan sa Mosyon, e mon vwar ki i annan lide, demann enportan ki mannyer fason Mosyon i lir.  Mon war de lide prensipal deryer sa Mosyon Mr Speaker; enn i se ki Onorab Gill koman en reprezantan elekte, reprezantan direk bann zabitan Praslin, Baie Ste Anne Praslin e koman en Praslinois e osi en zilwa i pe demann pour anmenn loportinite e rekonnet bann profesyonnel bann Zil Pros e Praslin pour fer ki zot benefisye atraver bann diferan lekspertiz ki zot pe anmennen.  Sa i enn Mr Speaker.

E 2enm se Mosyon osi ler mwan asize mwan analize mon santi ki Onorab pe al devan osi pe demande pour rod fason pour garanti ki desizyon ki annan pour fer avek devlopman sa bann zil, ki ganny fer nenport swa ki par Gouvernman ou bann Board zot menm i fer ki zabitan bann zil i ganny maksimonm benefis, swa direk ou a long term.

Alor Mr Speaker ki mwan vwar la se sa demars, sa lanvi par Onorab e par sa Lasanble pour met, pour rod fason met larzan dan pos Seselwa. E ankor enn fwa ou war Mr Speaker nou pe rod fason amelyor zot lavi sa bann dimoun. Ki mannyer nou war sa? Dan sa 2 legzanp ki mon’n donnen ou vwar ki atraver enklizyon sa bann profesyonnel lo sa bann Board natirelman zot pour benefisye finansyerman – zot pour ganny en pti allowance.  Alor i pour rekonnet bann letid ki zot in fer bann kalkilasyon ki zot annan zot a ganny en pti larzan an plis dan pos alors sa ki la i a kontribye pour met larzan dan zot pos.

Yes Mr Speaker mon kontinyen mon fer remark dan sa ki Onorab in refer sorti i annan 104 Board, me selman zis 8 ladan ki annan reprezantan bann zil lo la. Mon demande akoz i enportan annan zil lo serten sa bann Board Mr Speaker.  E nou vwar i enportan akoz en keksoz kle ki nou bezwen konsidere, se sa ki nou dir nou kontan dir bokou dimoun i servi sa mo Angle se local knowledge.  Desizyon ki ganny pran lo bann, lo serten Board i enpakte direkteman sa bann dimoun.

Alor Onorab in refer sorti serten Board ki li menm li koman en zabitan lo sa bann zil parey Praslin, La Digue  i en enpakte sa bann zil.  Alor Mr Speaker se sa bann Board ki’n refer sorti mwan a zis tous detrwa se IEA, Industrial Estate Authority, Planning, PMC, Licensing ek sa de labank Leta. Alor Mr Speaker tousala sa bann Board ki Onorab in refer sorti ki santi ki sa bann zil i merit ganny reprezante direkteman, Mr Speaker i fer ki osi i montre ou i enportan ki i montre ou le fe ki bann desizyon ki ganny pran ou bann Polisi ki ganny formile i fer ki sa parey mon’n dir sa local knowledge sa bann rezidan i ganny rekonnet; desizyon ki pour enpakte lavi toulezour sa bann dimoun Mr Speaker.

Mr Speaker ler mon’n asize mon’n fer serten resers lo Mosyon li menm, in anmenm mwan pour get 2 pei an partikilye.  Mon mazin en pei dan rezyon, se Moris pli pres ek nou e byensir Lasin parey serten koleg in refer sorti.  Mon koz lo la akoz mon’n laba; mon’n viv en pe letan laba alor i normal pour mwan fer en referans e nou fer referans ek en pei vwazen ki Moris. Mr Speaker ler nou, nou pran Moris premyerman i egziste bann Konsey, zot dir sa bann Konsey Minisipal e bann Konsey Distrik. Ki vreman zot rol sa bann Konsey? Zot la pour zer serten keksoz pour zot distrik parey semen.  Zot fer sir ki semen i ganny byen maintain. Lalimyer lo la i adekwat e osi zot responsab pour devlopman kiltir e spor, promosyon tousala. E i annan lezot keksoz me selman zot responsab pour sa bann serten keksoz.

Me en keksoz ki enportan se ki zot responsab pour raise fon pour zot distrik.  Alor sa i al dan laliny ki i al dan sa chain of thought ki Onorab i anmennen. Sa Mosyon ki i pe prezante se pour zot nobou zot osi petet zer, en pe plis larzan atraver bann aktivite ki zot menm zot pe fer lo sa bann zil.

Onorab pa bliye oparavan in prezant Mosyon pour demande ki serten larzan ki pe ganny anmase atraver Vallee De Mai i ganny mete direkteman dan fon devlopman zot bann zil. E Onorab ki prezante Grand Anse Praslin osi in met lanfaz lo la. Malgre serten eleman negativ ki’n sorti, me selman i en keksoz pozitiv ki’n ganny fer sorti.  E i enportan dir ki ler zot koz annan armoni ou vwar ki bokou keksoz i kapab ganny fer e la nou’n war en follow up sa Mosyon ki Onorab Gill ti prezante pour demande ki sa bann larzan i ganny mete en pe dan devlopman Praslin e la i pe demande ki bann Board i ganny reprezante ek bann reprezantan Praslin e bann zil pros lo i osi prezan.

Mr Speaker mwan tous sa dezyenm legzanp ki mon’n donnen se Lasin. Malgre en gran pei me selman i annan bann special administrative regions. Nou’n war ki bann landrwa parey Hong Kong, Singsam, zot bann landrwa ki zot osi annan son fason administre. Wi Mr Speaker nou refer sorti ki Lasin i dir ou zot, zot believe dan en sel Lasin me selman zot in separ sa bann rezyon akoz par serten spesifisite ki zot annan. Bann eknisite  ki zot annan. En legzanp se Sin Chang. Ou pour vwar en konsantrasyon aktyelman – pli gran konsantrasyon Mizilman i baze Sin Chang alor zot lekonomi i baze lo serten keksoz parey ou kapab dir Mr Speaker.  Ki i annan pour fer ek zot larelizyon.  Zot tant pour fer prodiksyon dile, zot pa konsonm pork, tousala i economic base e  alor bann desizyon ki ganny pran i annan pour fer avek zot eknisite. (Mr Speaker Onorab Ferrari silvouple dir li annan en pe respe esper son tour)

(Interruption)

 

MR SPEAKER

Ok.  Order!  Order!   Bon laparol i pour Onorab Valmont. Annou donn li sans pour li koze.  Onorab Valmont.

 

HON JUDE VALMONT

Mersi Mr Speaker. Mersi bokou.  Wi Mr Speaker mon a zis repran kot mon ti’n arete. Mon ti pe donn en legzanp lo Lasin li menm, ek son bann special administrative regions. E mon ti pe dir ki en landrwa parey Sin Chang ki annan en konsantrasyon bann Mizilman zot lekonomi i ganny focus lo zot larelizyon li menm, ek bann aktivite ki zot fer.

Alor ki i montre ou Mr Speaker, zot osi zot in rod fason malgre zot annan diferan fason fonksyonnen la zot annan keksoz an komen. Zot en sel pei, me selman en keksoz ki ler ou get sa de pei la –  en keksoz ki ou remarke se ki, i annan serten keksoz Mr Speaker, ki kapab ou kapab dir ki kapab sa landrwa i kapab zere.  Parey si ou get Praslin, La Digue sa bann lezot zil, zot kapab fer serten keksoz, parey promot e devlop kiltir sport.  Petet mon pa konnen kantite kontrakter e lezot i annan lo sa bann zil, me selman maintain semen.  Parey I annan serten keksoz ki zot kapab fer, zot kapab raise funds.  E Onorab Gill in refer sorti oparavan ki zot osi zot kapab raise funds, alor zot a bezwen rod fason.  Me selman en keksoz ki ou fer remark ek Lasin Mr Speaker, se ki i annan keksoz ki pa ganny fer osi.  Praslin malgre Onorab in refer sorti oparavan, ki in tande ler i ti ptipti en zafer repiblik Praslin, be natirelman Praslin pa pour kapab annan son prop Minister Zafer Etranzer or larme, tousala.

Alor se sa ki mon anvi refer sorti Mr Speaker.  I posib.

 

MR SPEAKER

Kontinyen Onorab.

 

HON JUDE VALMONT

Mersi Mr Speaker. Mr Speaker mon reasir Lasanble ki mwan pe koz sa ki mon konnen; pa pizza, pa okenn nanryen dan bwat, mwan pa vin koz sa akoz mwan kwi manze mwan.

Mr Speaker permet mwan mon a kontinyen mwan pa pour tarde osi lo sa Mosyon mon’n fer sorti detrwa pwen ki mwan santi i siport lespri Mosyon. E mon a zis kontinyen Mr Speaker.  Mon war demann ki loter Mosyon in fer pour met sa bann dimoun lo zil, bann dimoun Praslin, La Digue lo sa bann Board.  Ler i dir sa i fer mwan kestyonn en pe. Mon ti a voudre demann li Mr Speaker be kote i war plasman Konsey Rezyonal dan tou sa demars ki li i pe fer akoz in dir pour zer, pour zot nobou raise funds. Tousala in nonmen pour met bann profesyonnel Praslin La Digue lo sa bann Board alor mwan demande Loter Mosyon mwan ti a kontan i reponn mwan sa kote ki i vwar Konsey Rezyonal i antre dan tousala?

Mr Speaker dan sa laliny osi mwan ti a kontan get koz lo en keksoz. Mon’n tann enn mwan oparavan in fer sorti Onorab Aglae ler in koz en kou lo bann petet mazin konsider Minister li menm proper ki responsab pour bann zafer zil. Nou konnen ozordi i annan en portfolio.  Sa i tonm anba Vis- Prezidan, me selman ki ou vwar? Nou Vis-Prezidan i osi dan L’Egzekitiv e ou war L’Egzekitiv i santralize lo Mahe. Alor petet mon ti a kontan loter Mosyon osi i donn mwan son perspektiv lo la.  Ki i panse lo en Minister pour bann zafer zil, ki baze swa lo Praslin oubyen lo La Digue ki zwe en rol ou kapab dir – parey nou’n nonmen oparavan parey sa bann special administrative region, parey Hong-Kong Sin Chang  ki baze lo Praslin i zwe sa rol administrative.  Ki ou pour war en Minister ki pour regroup serten lezot Minister kle, bann parey nou dir bann desk officers SLTA, Licensing and whatnot.

 

Me selman ler i reponn mwan sa Mr Speaker, mon ti a kontan i konsider i mazin byen ki i pa bliye aktyelman ki nou annan zot annan en Ladministrasyon Distrik e ki mannyer sa i kapab antre an konfli avek sa.

Alor Mr Speaker mwan a terminen par demann tou koleg Onorab pour vwar sa Mosyon dan en lespri pozitiv. Annou aret pri dan lepase pe dir Board isi,  Board laba, mon koleg in refer sorti oparavan, nou, nou en nouvo zenerasyon politisyen mon pa konn zot kote me nou, nou zenn lo sa kote e nou anvi bouz devan. Mon pe lans en lapel pour apel zot zwenn nou bann MNA ki la, bann MNA lo lot kote latab, zwenn nou pour get ver lavenir pour nou siport bann profesyonnel, devlope, bann zabitan lo bann zil Praslin, La Digue pour zot bouz devan, e pour ed zot parey zot in toultan mon bann koleg Lopozisyon zot in fer konpanny toultan. Malgre ziska prezan nou pa ankor war mannyer zot in met larzan dan pos Seselwa,

 

(APPLAUSE)

 

HON JUDE VALMONT

… me selman pour nou ‘’ansanm’’ met larzan dan pos Seselwa. Mersi Mr Speaker.

 

MR SPEAKER

Mersi Onorab Valmont. Mon ava donn laparol Onorab William.

 

HON WAVEN WILLIAM

Mersi Mr Speaker.  Mr Speaker mon oule aport mon sipor pour sa Mosyon.

Mr Speaker mon sipor i swivre en pti pe lo filozofi ki sa Lasanble pe rode, vizavi bann eleman ki annan pour fer avek desantralizasyon resours, servis letan nou pe koz empowerment distrik. Letan nou pe koz pran ownership. Mr Speaker i bon ki nou osi rekonnet sa transformasyon, sa sanzman ki pe arive globalman. Mr Speaker i annan bokou bann gro pe ganny servi.

Par egzanp en mo ki lontan Sesel nou pa ti koz lo la se valer azoute. Demokrasi i napa limit. Nou pe koz soustenabilite, nou pe koz rezilyans. Mr Speaker sa nouvo zenerasyon ozordi i pa anvi dwell bokou dan lepase.

I pa vedir ki nou anvi blir lepase me selman sa nouvo zenerasyon i anvi plis, i anvi lespas pour li epanouir. Mr Speaker sa Mosyon i en demann par letan ou pe regard dan sa Lasanble i annan 4 Onorab ki sorti lo bann zil pros. Atraver plizyer bann Mosyon, kestyon ki zot anmenn devan Mr Speaker ozordi i annan en lot demann lo en pli gran lanpler.

Mr Speaker ti dir pour annan be pa ti dir ke ler. Me sa demann sorti kot bann zil pros ti pour vini parmi lezot demann ki i inevitab ver en devlopman soutenab. Mwan note ki loter Mosyon pe sivre byen pros realite e egzizans ki lelan devlopman lo bann zil pros pe pran. Pep Zil Pros dan tou kous e sekter devlopman socio-economic ekspektasyon ozordi i tre o e zot anvi en pli gran partisipasyon dan bann desizyon ki Gouvernman Santral i pran lo zot par.

Sa i en demann lezitim Mr Speaker. Piblik Seselwa in antann Loter Mosyon pe demann plizyer kestyon e prezant Mosyon kot i pe rod plis lotonomi pour zil pros. Sa demann osi in sorti kot Onorab Sophola e Onorab Woodcock. Si sa Lasanble i go back i mazinen. Mr Speaker mon’n osi al pli lwen dan mon entervansyon lo serten Mosyon e kestyon lo bezwen zil pros kot mon’n dir e al pli lwen ki moman in arive ouswa pour arive kot dan prosen eleksyon e demann zil pros i bezwen se ki en Minister i ganny kree spesyalman pour zil pros swa Mr Speaker nou kree en pos Sekreter D’Eta parey in ganny fer ouswa  en pos Sekreter Prensipal kot sa latansyon fokalize ava ganny donnen avek devlopman socio-economic Zil Pros.

Mr Speaker la mwan pa pe dir ki nanryen pa’n ganny fer. Mon senserman krwar ki nou pour donn sa latansyon pli fokalize. Sa sipor pli direk e asire ki let zil pros i ava al direkteman kot lapos me pa ganny poste lo lans.  Se kree en striktir ki pour okip bann zil pros.

Ozordi portfolio zil i anba lofis Vis-Prezidan Mr Speaker. nou konnen ki anba sa lofis i annan bann plizyer portfolio e konsern bann Zil Pros mwan kapab dir i ganny toufe. I pa ganny tou sa latansyon posib pour zot kapab epanouir. Mosyon pe demann enklisivite bann profesyonnel lo bann Board enportan Mr Speaker. Si zil pros i anvi sa demann i devret pli direk san kas kontour sa demann devret ki sa Lasanble i demann Gouvernman pour enkli bann profesyonnel Zil Pros.

Mr Speaker sa petet Loter Mosyon ava konsidere. Mon krwar i devret en demann direk. Mr Speaker ek en balans reprezantasyon 15 lo 10 in vin ek en nouvo souf. En dezir pour eksplor pli lwen kwa ki posib e kwa ki merit ganny fer atraver plizyer opsyon. Plizyer kous popilasyon pe reve e pe swete trouv bann sanzman ek nouvo lide. Lapros e fason fer. Lekspresyon pli lib, pli divers e pli lib pe kas vye koutim e baryer ki pep ti pe, ti anvi sirmonte.

Sesel e Seselwa i pli konvenki ki dan posib ki pa ki dan enposibilite Mr Speaker. Zil Pros ozordi nou bezwen rekonnet ki demann in vini baze lo bann inegalite rotin fason fer, en Gouvernman ki’n la pour en bon pe letan ki merit evalye e koriz sa bann inegalite.

Sa Mosyon pe anvi kas vye mindset desizyon souvandfwa ki pa tenir kont spesifisite lenpak lo lavi pep lo Zil Pros. Mon pa pe dir ki nanryen pa’n ganny fer parey mon’n dir oparavan. Me sa zenerasyon i anvi en nouvo souf Mr Speaker. Sa reprezantasyon a permet en serten lenpak pli direk atraver ki resours i ganny zere ki zabitan zil pros i vwar zot annan vreman par ladan. A en nivo akseptab Mr Speaker an mezir ki devlopman i ale. Mon pour siport sa Mosyon osi akoz i sivre menm filozofi demann ki mwan pe kontinyelman fer pour ki sa eleman desantralizasyon servis, resours e ki sitwayen i santi ki son swe pe ganny valorize pour fer li pli motive, pour for parti sa transformasyon plan sosyo ekonomik dan son pei. Kominote pe ganny enpakte dan en fason pozitiv lo son fanmir dan en fason signifikan Mr Speaker.

Zil Pros pa pe rod en lendepandans. Zil pros pe rod en pe plis reprezantasyon, partisipasyon e enklizivite dan desizyon annan pour fer avek direkteman ek zot.

Vi ki sa i en pa pozitiv ver plis sa lespri empowerment e pran ownership ki sa Lasanble pa pe zis koz lo la, me pe rod li dan tou sord direksyon posib ki pep Seselwa dan son mazorite i vin e reste parti prenan son desten atraver en partisipasyon motive e pa kontrole Mr Speaker parey Mosyon Onorab Gill pour zil pros pe rode. Avek sa de mo Mr Speaker parey mon dir mwan pe regard sa Mosyon avek en lespri ouver e mwan krwar ki sa moman pour arive Mr Speaker. Petet ozordi nou pa pou war li me mon krwar ki sa demann ki sa Mosyon pe fer, i pour ganny realize dan nenport ki fason a lavenir. Mersi bokou Mr Speaker.

 

MR SPEAKER

Mersi Onorab William. Mon a donn laparol Wilbert Herminie.

 

HON WILBERT HERMINIE

Mersi Mr Speaker. bonn apre midi, bonzour tou dimoun alekout. Bonzour tou bann Manm koleg Onorab.

Mr Speaker mon pour aport mon sipor lo sa Mosyon pour de rezon sa Mosyon anmennen par Onorab Gill. Premyerman mon pour anmenn mwan sipor pour sa Mosyon akoz en Mosyon ki pe tous lepep Seselwa e dezyenmman sa Mosyon osi tou pe aport sipor pour bann profesyonnel. Nou bann zenn profesyonnel sirtou nou bann profesyonnel sorti lo zil. Mosyon li menm pe demande ki i annan plis reprezantasyon bann zilwa lo bann Board ki fer bann desizyon ki pran bann desizyon ki afekte bann keksoz ki arive lo bann zil.

Mosyon pe demande vi ki avek lakantite devlopman ekonomik ki pe arive lo zil.  Mosyon pe demande ki bann dimoun ki sorti lo zil i vin pli apartenan a sa bann desizyon. Annou pran legzanp Mr Speaker ler nou Planning Authority ki to bann devlopman ki ganny fer lo bann zil lo Sesel an zeneral. I sa body prensipal ki deal avek sa bann devlopman, nou vwar ki napa reprezantasyon bann dimoun sorti lo zil e sa i vin en gran konsern.

Sirtou la avek sa Mosyon ki nou ti koze 2 semenn pase anmennen par Onorab William. Ki pe demann en pe desantralizasyon dan resours e nou war ki Planning authority son main body i lo Mahe e pour zot ennfwa par semenn e sa i dan li menm i kree serten problenm pour bann proze ki bann zil pe fer li menm. E vi ki zot napa okenn reprezantasyon pou defann reprezantan pou defann zot lentere i fer li difisil pou bann proze li menm devlope. Bann proze li menm pase e sa i met serten retar dan serten sans pou bann proze lo bann zil li menm konmanse.

E nou konnen ki sa i en konsern ki Onorab Churchill Gill in toultan koz lo la, ki devlopman lo Praslin sirtou i annan serten retar. Akoz serten prosedir ki retarde ki dimoun bezwen ale vini sorti lo zil li menm, menm lo La Digue pou vin lo Mahe pour li kapab fer bann laplikasyon e zot serten tranzaksyon epi retournen e sa i kapab ariv detrwa fwa e i pran bokou letan. E dan sa menm sa laliny si i annan en reprezantan lo sa Board i ti pou fer li pli fasil pou konsey sa bann dimoun laba dwat dan distrik, dan bann sou distrik lo Praslin, La Digue e Silhouette e lezot Zil Pros.

Mr Speaker en lot pwen ler Onorab Churchill i koze i ti toultan koz lo SLTA. Spesifikman lo VTS, ler nou pe koz VTS nou pe dir Vehicle Testing Station. Tou lazournen in koz lo la ki dir vi ki zot bezwen monte tou le semenn pou kapab, bann dimoun lo zil vin teste zot transpor e sa i ankor serten lentervenyans sirtou pou bann dimoun ki annan carhire. Ki zot anmenn zot loto ki i annan defwa ki dimoun pa monte pou vin teste transpor.

E en dimoun lo Board sorti Praslin ti pou garanti zot lentere fer sir ki i protez zot bann lentere e fer sir ki bann dimoun i toultan pe monte. E osi siport sa proze ki fer annan en vehicle testing station lo Praslin.

E mon war sa i en bon nide akoz mon war plis reprezantasyon par bann profesyonnel sirtou sorti Praslin pou ed retenir en pe nou bann dimoun. Sirtou konmela ler tou nou bann profesyonnel i sorti lo zil zot pa sirtou ganny lanplwa lo zil. Zot desann Mahe pour zot kapab  fer en debrouy pour zot kapab ganny louvraz.

E plis loportinite pou mont lo bann Board i pou osi retenir nou bann profesyonnel lo zil. E sa pou valoriz zot e pou donn zot lankourazman pou zot travay lo zot zil ki zot ti ne, e mon war i en bon nide. E osi en lot pwen ki mon le koz lo la Mr Speaker ler nou pe koz lo Eve Island avek sa bokou issue ki’n ganny leve e mon war i malere ki Onorab lot kote latab in swazir sa moman pou fer politik lo la. Be i ti ava en bon loportinite pou apir sa Mosyon pou demande ki plis Manm i al lo board IEA i sorti lo zil. I ti a pran sa loportinite pour li apiye ganny en pe mileage lo la pou siport sa mosyon dan totalite. Non pa fer politik bon marse avek.

E an retourn lo la, Mr Speaker ler nou pe get IEA, i annan bokou keksoz in ganny dir lo la. Mon krwar menm in ariv lo FPAC e si ti annan en pli bon reprezantasyon bann ki sorti lo bann zil. Ti ava en pli bon fason pou bann lentere bann zil ganny pran an konsern. Akoz zot in dir ki dimoun Mahe menm in ganny porsyon later lo la, be la ti ava en fason ki si ti annan reprezantasyon direk lo zil. Sa ti ava fer sir ki sa bann devlopman ki zot ti ava pe demande parey fire station ensidswit ki zot ti pe rode ti a ganny son landrwa apropriye.

E ti ava fer en bon urban planning ki sa zil, tou bann fasilite ki zot pe rode semen, delo, elektrisite tou keksoz ti ava an plas. E proze ti ava pe  bouze e Eve Island ti ava pe shine.  Mr Speaker en lot pwen ki mon anvi tous lo la e osi kote, nou konnen bokou bann biznes lo zil zot bezwen – sa finans pour zot kapab konmanse, i pa fasil pou antre dan biznes, sirtou lo zil zot annan en lot starter cost ki en ti pe pli o. E parey ankor preski tou biznes ou bezwen pran en loan avek DBS ouswa en labank komersyal.

E dan sa rezon osi dan sa reprezantasyon lo zil, ti pou direkteman get bann konsern sorti kot Praslin Business Association. E sa ti pou en bon nide akoz sa lasosyasyon i en lasosyasyon vreman vokal lo Praslin.  E i en interest group ki i annan bokou follower e mon kontan ki mon koleg Onorab Gill i toultan prezan dan zot meeting. E i fer sir i siport zot dan fason ki i kapab, dan diferan fason ki i kapab. E sa i en bon fason si i ti kapab 1 sa bann dimoun ki zot in swazir endepandaman pou antre lo sa Board DBS.

Sa ti pou ede pou fasilit credit line pou bann biznes lo Praslin e pa zis lo Praslin mon pe koz lo Zil Pros enkli La Digue. Ki nou konnen lo La Digue i annan bokou Business Guest House e bann lezot devlopman touristik. So, sa ti ava fasilit zot ganny zot finans pou zot kapab leve debrouye e fer zot proze. E lot pwen Mr Speaker ler nou pe get en lot keksoz ki met retar lo devlopman bann zil se pou ganny akse avek en licence. E i annan bann outlet sa bann extension sa bann Minister lo bann zil.

Me ankor en reprezantan ti pou ede fasilit, fasilit sa laplikasyon vi ki ou annan sa koneksyon imen avek sa dimoun ki ou konnen. Vi ki nou zil i deza pti, pti e sa i pou tous, tous nou bann zilwa dan en fason direk. Mr Speaker reprezantasyon lo Board li menm i pou ede pou bann zilwa kapab fer bann Polisi ki ganny mete par Gouvernman li menm. Zot, zot pou fer sir ki sa CEO e sa bann dimoun ki pe act lo sa policy i fer sir ki sa polisi i direkteman tous bann zilwa. Akoz si zot napa reprezantasyon nou tou nou imen nou pou get dan lo kote ki nou, nou sorti.

Parey si ou, si en dimoun i sorti kekfwa lo Mahe li i pou get en pe plis son bann zentere. Parey sanmenm sa ki i enportan ki nou met partisipasyon bann dimoun sorti lo zil pou get lentere bann zilwa. En lot keksoz ankor Mr Speaker, nou’n kree bokou profesyonnel nou’n fer liniversite Sesel. Nou’n anvoy dimoun study deor depi 1977 mon krwar nou pe anvoy dimoun deor menm plis avan. Me selman depi 1977 nou’n anvoy bokou plis e sa Gouvernman in peye e bokou bann profesyonnel in tournen e pe war zot dan en pe difikilte ki napa ase loportinite pou zot kapab partaz sa ki zot in aprann.

E sa i aplik espesyalman pou bann zilwa. Akoz bokou zot in war zot in bezwen bouze pou zot kapab kit zot zil pou zot fer en lot kalite bousman dan zot lavi. Nou, bezwen enportan ki nou kontinyen siport zot fer sir ki sak Board nouvo Board ler pe, bann Board pe dissolve e nouvo Manm pe vini mon ti a kontan demann loter Mosyon, pou dir en pe dan son bann larepons ki bann mekanizm ki li i ti anvi met an plas  – i sizere met an plas pou fer sir ki tou bann zenn profesyonnel  – ler nou pe koz zenn profesyonnel nou pa pe koz zis  graduate ki kapab ganny reprezante lo sa bann Board. Kekfwa i kapab donn n nou en legzanp, kwa ki i  pe sizere i merit ganny fer pou fer sir ki lo en Board 7 dimoun ki mannyer i ti a kontan sa reprezantasyon sa Board i ganny fer.  E eski sa Board kote pou  baze  – pou baze lo Praslin?  Konmsi donn nou en pe detay kwa ki ou pe an plis – kwa  ki pou pe prezimen ou ti a kontan vwar ler nou pas sa Mosyon e an realite ler sa bann keksoz i ariv an aksyon kwa ki ou ti a kontan vwar arive avek sa bann Board? Avek sa 2 mo mon ti ava kontan ki tou mon bann koleg i pou siport sa  Mosyon e mwan osi mon pou siport sa Mosyon.  Mersi Mr Speaker.

 

MR SPEAKER

Mersi Onorab Herminie.  Bon nou pou aret la lo deba lo Mosyon.   Nou ava repran 2er. Mon annan 2 pti lanons. Komite Anti-Viktimizasyon pe rankontre 1er dan Committee Room 2 e HIV AID pe rankontre 12.15 Committee Room 2. Se tou ki mon annan. Ok nou ava Break e nou ava repran nou travay 2er apre midi.

 

(BREAK)

 

 

MR SPEAKER

Bonn apre midi tou dimoun ki a lekout e pe kontinyen swiv deba Lasanble Nasyonal. Nou pou kontinyen apre midi avek deba lo Mosyon ki’n ganny move par Onorab Churchill Gill e mon ava donn laparol Onorab Johan Loze.

 

HON JOHAN LOZE

Mersi Mr Speaker. Bonn apre midi Mr Speaker. Bonn apre midi tou Manm koleg Onorab. E tou bann oditer ki pe swiv lo radyo e lo televizyon.  Mr Speaker bokou konversasyon ki nou’n fer resaman i tourn otour nou bann distrik; nou bann kolektivite lokal. Deza sa dan li menm, pe montre ou en tandans pou retourn ver  nou pep avek plis empowerment, plis diskisyon e plis pouvwar desizyon.

Onorab Churchill Gill depi ki in dan sa Lasanble, in focus tou son Mosyon,   kestyon e lentervansyon lo son distrik, son zil Praslin e osi Zil Pros ansanm avek Praslin. In anmenn li en konba sistematik, pou ki bann diferans  Lebra Gouvernman i delivre dan  fason pli efikas posib anver byennet  bann zabitan son distrik, son zil   Praslin e Zil Pros osi. 

Sa Mosyon ki devan nou, Lasanble i pa’n vin la an izolasyon.  Me in plito en akimilasyon travay etale dan en peryod 3an  ki Onorab Churchill Gill in fer.

Resaman i ti angaz Minis dan en kestyon lo aproporsyonnman Bidze pou Praslin e Zil Pros.  Lozik Onorab Gill se ki alokasyon Bidze  pou devlopman Praslin e Zil Pros, i deproposhyonnen vizavi kontribisyon tax ki sa 2 zil pe fer dan  lekonomi pei.

Bidze i ganny donnen avek sak Minster, e anba vot sa bann Minister, i annan bann proze ki’n ganny earmarked pou Praslin avek Zil Pros.  Me souvan i arive ki proze sa 2 zil pa materyalize diran sa lannen bidzeter.  Largiman ki Onorab Gill pe avanse depi en pe letan, se ki porsyon Bidze ki ganny reelman depanse lo Praslin e Zil Pros, i bokou mwens ki i devret ete.

Mosyon ki devan Lasanble, pe sers pou remedye plizyer sityasyon irzan, ki bann reprezantan Praslin avek Zil Pros in leve pandan sa dernyen 3 lannen.

Onorab Gill pe propoz en zouti efektiv, pou sey adres plizyer sityasyon tre diferan, ki li in idantifye dan son bann travay koman en MNA.   Permet nou bann zilwa, Praslin avek Zil Pros pou fer reprezantasyon zot zil lo bann diferan Boards dan pei, ki enpakte direkteman lo  zot lavi toulezour.

Donn sa dimoun ki annan lapartenans lokal,  avek sa  proze ki pe al fer lo sa 2 zil, loportinite pou zot avans devan e defann zot proze.  Me non selman  sa, permet zot loportinite pou aport zot kontribisyon  lo bann proze  ki pe ganny fer  lo Mahe osi.  E sa ki mon ti pe propoze, i en veikil tre senp ki kapab ganny servi pou aport bokou solisyon.

Gouvernans en pei ki swa lo nivo Nasyonal ou lokal, i pa domenn eksklizif Gouvernman avek son bann fonksyonner, me i  konsern n nou tou.  Egalman gouvernans bann striktir Leta ki ganny egzerse par bann diferan Board, i devret konsern nou tou.  Se zisteman pour sa rezon, ki Mosyon pe propoz demokratizasyon akse avek sa bann striktir gouvernans, pou bann zabitan Praslin ek Zil Pros.  Seselwa nou en sel Nasyon parey in ganny dir.  Me lefe ki nou en sel Nasyon, pa devret ganny servi koman en lekskiz pou anpes evolisyon demokrasi.  Konversasyon ki devan nou, se gouverans.  Me pa zis gouvernans Praslin avek Zil Pros, me egalman bann gouvernans diferan lentans Leta.  Lekel lo Board Lazans Proteksyon Sosyal,  ki pe viv pou lavi pou Praslin avek Zil Pros le en baz toulezour?   Si i annan enn I will stand to be corrrected.

Pourtan Lazans Proteksyon Sosyal i enpakte direkteman lo lavi bann zabitan Praslin ek Zil Pros, toulezour.   Sesel in plis ki ler pou nou aret per Seselwa Sesel, e donn zot akse avek masin gouvernans.  I annan en vizyon Sesel ozordi. Sa vizyon se levolisyon nou demokrasi. Sa vizyon se pou angaz nou sitwayen  a labaz  direkteman, e pou  donn zot pouvwar desizyon.

Sa Mosyon ki devan nou i anliny avek vizyon ki pe ganny etale pou nou pep desid lo la.  Sesel nou  fonksyonn dan en klima politik ki ganny dominer par the two party system.   E se an gran parti sa 2 parti mazer, ki pe sey kontrol tou bann striktir gouvernans Leta e sa nou’n vwar levidans atraver Regional Council.

        An 2015 a 2016 enn bann parol ki nou ti tann plis koz lo la Sesel sete ‘’divergence views.’’ Ozordi ou pa tann koz lo la ditou. Sa ki nou bezwen ozordi se plis konversasyon lo sa size ‘’divergence views.’’   Nou pei i bezwen plis diverzans lopinyon e meyer fason pou fer sa se retourn a labaz;– retourn kot nou pep e rann zot pouvwar desizyon. Les nou pep koz pou zot menm; les nou pep debout e defann zot lentere zot menm.

Mon fermeman konvenki, ki si nou donn nou pep, plis pouvwar desizyon nou pa ti pou vwar en Praslinois  pe tret bann  Digwa ki’n donn zot servis  lo Board Linyon Estate koman ‘’voler!’’ Nou pa kapab tret demokratizasyon gouvernans Praslin avek Zil Pros koman positive discrimination, selman nou oule ki dimoun ki reste L’Angleterre I desann i vote e fer desizyon pou bann zabitan Praslin e Zil Pros. Ki kalite diskriminasyon sa enn i ete?

Mr Speaker labaz en demokrasi se la Nasyon.  Se sa pep li menm.   Pouvwar, determinasyon fitir en Nasyon, se sa Nasyon li menm.   Li ki tenir kontrol lo son desten. E si ozordi en Mosyon i vini pou enkli bann profesyonnel  Praslin ek Zil Pros dan bann Board, ki fer gouvernans bann sistenm leta set en modalite pou donn pouvwar sa pep; pou donn pouvwar  bann zabitan Praslin e Zil Pros, pou zot kontribye anver masin desizyon Leta.

Nou  bezwen empower nou dimoun a labaz. Nou bezwen retourn kot nou pep e rann zot en pe sa pouvwar ki nou pe konsantre e santralize.

Politisyen i nepli tan pou nou hoard pouvwar!  I nepli tan pou nou krwar ki nou pou kapab  kontinyen asiz lo en bal tan pouvwar e dikte  ki nou pep pou fer e pa pou fer.  Sa bann keksoz i pa son letan – i pa son moman.  E nou dan en staz politik nou pei, kot se sa pep Seselwa, Sesel ki pou desid tou sa bann keksoz la.  E si nou krwar zot pa pou deside, nou tou we are in for a shock! S i nou panse ki nou annan en free ride nou napa! Seselwa, Sesel pou met nou tou – nou tou dan nou plas e sa i enkli nou tou ki la anndan!  Evolisyon demokratik nou pei, in ariv  a sa staz kot nou retourn (mersi pou ou engagement Onorab Manm Proporsyonnel parey mwan menm Onorab  – mon’n bliy son non Mr speaker)

Mr Speaker nou osi a en staz kot  e i annan serten rikord renye ki posibleman fodre nou aret zwe.  Fodre  nou aret retourn ver bann menm vye retorik lepase.  Posibleman fodre  nou prepar nou en pe pli byen  letan nou vin dan Lasanble.  Fodre nou vin avek sibstans e non pa avek fantezi.

E la Mr Speaker mon swete ki Mrs Lise Bastienne ki pa’n zanmen e zanmen chair Board Linyon Estate I  ava anvoy son let kot Lasanble Nasyonal, pou rektifye sa sityasyon. Nou pa kapab selekte dimoun pou nou viktimize: pou nou bafwe; pou nou maltrete e servi nou Syez dan Lasanble pou nou  kree en sityasyon ek nou pa avek nou, fas a zis serten dimoun.   Nou pa kapab nonm non dimoun, fer bann fo lakizasyon lo dimoun; donn dimoun lenformasyon ki pa konplet; ( non Onorab  i pa en Sen.  Ni mwan mon pa en Sen –  e sertennman ni ou, ou pa Sen)

 

(Off-Mic)

 

HON JOHAN LOZE

Nou pa kapab fer sa bann keksoz! Nou pa kapab servi …

 

(Interruption)

 

MR SPEAKER

Order!  Order!  Order!  Onorab Loze en moman! Onorab Woodcock ou retract! Retract!  Retract!

 

 

HON WAVEL WOODCOCK

Mr Speaker mon retract mon’n mansyonn ‘’Sen.’’ ‘’Sen Kakayonyont ‘’ Sorry.

 

 

MR SPEAKER

Mersi.  Onorab Loze kontinyen.

 

 

HON JOHAN LOZE

Mr Speaker, i regretan ki  Onorab Woodcock pe ensilte Onorab Ramkalawan ‘’kakayonyont’’, apre ki Ramkalawan ti dir ki i pou donn nou …

 

(Interruption)

 

 

MR SPEAKER

Non, non, non, non.  Non, non.

 

(Interruption)

 

MR SPEAKER

… Kakayonyont.

 

 

MR SPEAKER

Ok.  Order! Order!  Onorab Loze ou osi ou retract sa bout. Ok?  Napa …!

 

 HON JOHAN LOZE

 I ti pe ensilte lekel Mr Speaker?  Mon pa’n konpran?

 

MR SPEAKER

Retract sa dernyen bout.

 

HON JOHAN LOZE

Mon retract sa dernyen out Mr Speaker.

 

 

MR SPEAKER

Tou Onorab I annan son non. Si zot pa anvi refer ek sa Onorab par son non.  Annou kit li ater.  Annou pa …

 

 

HON JOHAN LOZE

Mon’n apel li   Onorab Ramkalawan Mr Speaker.

 

MR SPEAKER

Wi be in fact sa – retract sa pti bout.

 

HON JOHAN LOZE

Non mon’n retract sa. Mon’n fini retract.

 

MR SPEAKER

Wi  go ahead.  Kontinyen.

 

HON JOHAN LOZE

Mon respe li.  I en Manm Proporsyonnel parey mwan menm, apre ki Onorab Herminie ti bat li dan Eleksyon English River.

 

(Interruption)

 

 

MR SPEAKER

Ok.  Kontinyen.

 

HON JOHAN LOZE

Mr Speaker Onorab Woodcock bomaten, in vini in koz mansonz lo Mrs Lise Bastienne, ki en tandans sa dan LDS.  I en tandans pou zot koz mansonz; koz half truths, viktimiz serten dimoun e kasyet serten keksoz kot zot anvi kasyet. I enteresan ki Onorab Ferrari pe lev sa kestyon; sa kestyon Persepsyon, akoz nou vwar bann lensidan dan nou Lasanble kot dimoun i koz zis serten bout laverite.  Mon a donn en legzanp ki in arive resaman Mr Speaker.

Ti annan en kestyon – mon ti tann zot pe rode pocket laten Sans Souci. Zot in rod sepaman i annan en landrwa kot i annan en gro crane; i annan – pe fer batiman 2 letaz; i annan lezot pe demande kot in ganny pocket later be napa personn la anndan ki annan kouraz  pou lev lanmen pou dir lafanmir Savy in aste pocket ek lafanmir FERRARI! Nou swazir lafanmir Savy pou nou batonnen.  Me solman nou napa kouraz pou dir lekel ki’n aste ek li.

 

MR SPEAKER

Onorab.

 

HON JOHAN LOZE

Yes, Mr Speaker.    

 

MR SPEAKER

Retourn lo Mosyon.   Mon  pa vwar relevans avek Mosyon Onorab Churchill Gill. Annou retourn lo Mosyon.

 

HON JOHAN LOZE

Mr Speaker boner in annan en bon pe lakizasyon ki’n ganny balanse lo tou kalite dimoun dan sa Lasanble! Mwan osi mon pa ti vwar relevans boner!

 

MR SPEAKER

Non, non Onorab.

 

HON JOHAN LOZE

Selman …

 

MR SPEAKER

Onorab. Onorab.  Bann lakizisyon in vini lo  truss of the Motion.  Lo bann Boards; lo kwa ki mover Mosyon pe demande. Ler nou al pou….

 

HON JOHAN LOZE

I normal pou …

 

MR SPEAKER

En moman! Order silvouple mwan ki annan laparol! Ler nou al tro an deor kontenir Mosyon mon bezwen fer zot retournen.  Ok?  Annou kontyen annou al lo Mosyon.

 

HON JOHAN LOZE

Yes Mr Speaker.  Lo konteni Mosyon nou vini nou pa prepar nou lekor, nou koz en ta mansonz; nou fer en ta fo alegasyon kont dimoun e it is expected ki lezot dimoun i asize, i ekoute e nou krwaz lebra e nou pa dir nanryen! It is expected, ki nou pa dir zot ler zot koz lalang!  Nou pa dir zot!  Nou les zot slide!  Be non,  in fini sa letan! Nou pou dir zot!  E i annan bokou plis ankor nou pou dir zot!

 

(APPLAUSE)

 

HON JOHAN LOZE

Sa ki zot in tande la i zis en pti avan gou la!  Mwan zot ava anvoy warning pou mwan mannyer zot anvi, mon pa pe tann zot mwan! Sa ki annan pou dir mon pou dir!  I defer only to the Chair letan mon dan sa Lasanble!

 

(APPLAUSE)

 

HON JOHAN LOZE

 So zot bann menas ek zot bann warning, anvoye mannyer zot anvi!  Selman sa ki mon’n dir la, i annan ankor pou mwan  dir!   Zot pou arete fer menas, fo laksyon,  trenn dimoun dan labou, an servan Mosyon – en Mosyon prop, kler, e net ki Onorab Churchill Gill in anmennen pou benefis sitwayen Praslin ek Zil Pros prop, e pou avans  lentere son zil e son bann sitwayen.  E si i annan en keksoz ki’n kler ozordi, se ki Onorab Churchill Gill i kapab avans devan ek en fason travay e ki pou aport kler benefis pou son zil.  E lo lot kote latab, osi i annan reprezantasyon zil.  Li i pou prefere fer fo lakizasyon koz mansonz dan Lasanble.  Sa diferans ant nou avek zot.  Sa diferans ant United Seychelles avek LDS!

Mr Speaker Mosyon pe tret en size lo lekel nou napa en swa.  Nou napa okenn swa lo sa zize ki pe ganny trete ozordi. Akoz menm si nou  koman politisyen nou   kontan ou non, Seselwa li i pou pran son pouvwar desizyon dan son lanmen!  E nou napa swa lo sa!

Seselwa pa pou les nou desid pou li!  Nou, nou’n cosy la anndan dan nou bwat koton; dan nou two party system,  nou pou  koudpye tou lezot dimoun ki oule sey koze; tou sa ki oule sey fer en lot parti politik; tou dimoun lo baz distrik, ki ti sey fer okenn form reprezantasyon, nou pou kontrole, nou ki pou dir lekel ki pou met ki Board ki bor, me non! Non, non, non, non, non i pa pou koumsa li! I pa pou koumsa li Mr Speaker!

In ariv en staz dan nou pei la, kot Seselwa pou desid son fitir by the power of the ballot!

 

(APPLAUSE)

 

HON JOHAN LOZE

Vot dan bwat ki pou deside! Vot dan bwat!  I pou nepli annan en sityasyon koabitasyon, kot zot apre zot pou montre ledwa kot poudir  sa entel ek  entel ki ti deside.  Non! Donn bann Praslinois avek zabitan Zil Pros, loportinite pou desid pou zot menm!

Donn bann Praslinois avek zabitan Zil Pros akse avek gouvernans sa pei.  Se sa ki sa pei i bezwen.  Sa pei i bezwen son pep pe avans devan, pe fer desizyon!  Pa pe ganny manipile par politisyen. Sa pep i a fer sa ki li i deside fer, li menm! Pa zot ki ou dir Seselwa ki pou fer!  Seselwa pa tann zot right now li!  I pa ni menm enterese ek zot legzistans!

Les Seselwa desid sa ki li i annan pou deside. Ki nou kontan ou non, nou demokrasi pe evolye e i ou pou kontinyen evolye. Ozordi nou pe komans par sed enn de seat lo Board pou zabitan Praslin e zil Pros demen nou pou retourn pouvwar desizyon plen  dan zot lanmen atraver la demokrasi direk ki apel Referéndum.

Sa ki nou pou fer la i zis en legren ki nou pe semenn sa.  Nou pe senm en legren for the furtherance of  nou demokrasi. Sa ki sirprann mwan selman, se ki sanpyon la demokrasi dan nou pei –  so called self-proclaimed sanpyon LDS, in vwar li anpaye   ozordi li dan en sityasyon kot li i per donn pouvwar Seselwa!  Zot per!  Zis pou donn en pti seat lo en Board, nou apel sa positive discrimination. Be zot lafreyer ki kalite diskriminasyon sa?  Zot pe diskrimin kont zot prop lekor?

Mr Speaker mwan mon krwar politisyen i bezwen larg en pe sa pei! Larg lanmen Seselwa parey Onorab Waven William i kontan dir! Larg lanmen Seselwa, les li fer son bann desizyon li menm! Annou arete anpay li. Les sa Nasyon epanouir. Les li avanse.  E nou komans avek Praslin ek Zil Pros. Praslin avek Zil Pros i annan dimoun konpetan; i annan dimoun kapab laba.   Sa bann dimoun  zot kapab fer zot prop desizyon.  Zanmen mon’n deza tande poudir Praslin nou’n fek fer en Mosyon lo Lopital, personn pa’n dir poudir i annan tapi lili  pe ganny vole kot Lopital Praslin – zis senpleman pa arive Praslin. Mahe kot Casualty i arive.

Mr Speaker, mon oule terminen an dizan ki potansyel nou pep, i devret servi koman en sours lenspirasyon pou tou politisyen.  Akoz i paret mwan ki  lo tou lede kote latab, i annan en kantite keksoz ki nou pa pe konpran nou. Nou pa pe  vreman konpran laspirasyon sa pep Seselwa! Tanzantan mon tann: ‘’Depi 15 lo 10’’ – ’Depi 15 lo 10’’-’Depi 15 lo 10’’ – be 15 lo 10 la Seselwa ki’n met li la!  Seselwa menm ki pou tir li!

 

(APPLAUSE)

 

 

HON JOHAN LOZE

Zot krwar mwan ki pou tire! Mersi Mr Speaker.

 

(APPLAUSE)

 

MR SPEAKER

Mersi Onorab Loze. Mon a donn laparol Onorab Chantal Ghislain

 

HON CHANTAL GHISLAIN

Mersi Mr Speaker. Mr Speaker bonn apre midi tou dimoun.  Mon pou koz an faver Mosyon Onorab Churchill Gill pa neseserman akoz mon zis en Manm Lasanble, me  mon osi mon  en dimoun en zabitan ki’n ne lo zil ki’n grandi lo zil mon‘n al travay Mahe pou 24an e mon’n retourn  lo mon zil.  Mr Speaker, nou tou nou konsider nou landrwa reste koman nou lakour. E dan okenn lakour, se sa fanmir ki reste dan sa lakour ki pran desizyon.

E ler i ariv dan en kominote ouswa dan sa pei, zabitan sa kominote oubyen sa pei ki pran desizyon.   Mon’n dir reste  senpleman akoz se sa ki reste la ki konnen.  Parey Angle i dir ‘’Who  feels it knows it. ‘’

Mr Speaker, nou bezwen apresye  ki bann dimoun ki pe viv avek en desizyon ler in ganny pran i osi devret form parti prosesis pou pran desizyon.  Mwan mon apresye travay nou bann profesyonnel dan tou sekter lekonomi. E mon dir zot mersi pou tou bann travay ki zot pe fer e zot in fer. Me nou bezwen aksepte osi ki sa ki sa 2 zil pa neseserman annan tou lekspertiz dan tou domenn.

Me koman en dimoun ki reste dan sa landrwa,  ki konn sa landrwa ki konn listwar sa landrwa pe enport si i en layman ouswa o en eksper, Sonm leksperyans i kont bokou, e son leksperyans  i kapab ede enfliyans okenn desizyon ki kapab ganny pran  dan en fason pozitiv.

Mr Speaker annou pran par egzanp Planing Authority se zot ki donn laprouvasyon tou devlopman dan pei.  I annan bokou expert lo la, pran devlopman lo plato La Digue. Mon pa pe dir ki bann dimoun ki pe deservi lo sa Board pa kapab pran desizyon. Me i enportan k kanmenm ki desizyon i osi ganny pran an rezilta konsiltasyon.  E konsiltasyon i bezwen ganny fer.  Sa ki enportan.  Avek en dimoun Praslin ouswa La Digue lo sa Board, desizyon ti a vin pli lokalize.  An dot mon lekspertiz lokal i tre enportan san okenn desizyon ki ganny fer. Sa dimoun i kapab met  an konteks spefisite sa 2 zil anmenn konsern istorik sa landrwa par egzanp. Zot pli byen pase pou konnen kote tel larivyer ti pase; kote lanmar i ete ouswa ti ete; kote delo i akimile plis ler lapli i tonbe;  e kote ki kote dren ti pase.

E byensir avek sa lekspertiz, ki ava anmennen letan en desizyon i ganny pran.  Sa desizyon  se sa dimoun ler i retourn lo son zil i  konnen li osi tou in form parti.   E i pou viv avek.

Nou pran sports par egzanp ankor Mr Speaker. Nou annan sportsmen tou le de zil, ki travers kannal tanzantan; botan – move tan nou bezwen travers kannal.  So en Digwa ouswa en Praslinois lo Board ki swa  – ki ou swa lo en Komite ki diskit ouswa  pran en desizyon  si i konsern sports Sesel an zeneral, i a osi form parti prosesis pou pran okenn desizyon final.  I pou osi en fason pli fasil pou rekonnet n ou bann profesyonnel, eksper ouswa okenn lekspertiz lokal okenn endividi ki li menm pou viv avek sa desizyon final. I pou pli fasil pou konsiltasyon avek zabitan zot menm sa Digwa ouswa sa Praslinois i vin la li.  I konn deroulman i konn listwar; i konn kalite sa landrwa donk i paran son lekspertiz i ava met ansanm avek lezot.  And finalman ler en desizyon final i a ganny pran, i konnen li sa Digwa ouswa sa Praslinois in form parti sa desizyon.   And i pou vin pli fasil Mr Speaker, pou li osi avan i al diskit okenn keksoz   ki annan pou fer avek devlopman, ouswa okenn desizyon ki annan pou fer pou enpakte lo lavi son zabitan, i a vin pli fasil pou li fer bann konsiltasyon avek son landrwa – son bann dimoun;- i ava’n fer meeting avan i ale, dan en fason ler in ale i ava’n anmenn desizyon – pa son desizyon pou li personnelman, me desizyon son zil, son bann zabitan e son kominote.

Mr Speaker bokou in ganny dir mon pa pou long vreman lo la.  Mon konklizyon mon pou dir out nou bann dimoun ki lo tou sa bann Board – bann Seselwa Mr Speaker.    I enportan zot la akoz zot konnen zot! Zot in lekol zot annan lekspertiz dan sa bann domenn.   Me en sel dimoun ki pou manke set akoz li i annan sa lekspertiz lokal  al lo la. Li ki konnen poudir be tel ou tel fason lo sa zil si ou fer sa,  i pou enpakte lo zabitan.  Donk alors i enportan tou bann Board – mon dir tou mwan en – tou bann Board ki pe pran  desizyon ki pou lenfliyans lavi bann dimoun Praslin ouswa La Digue, i annan omwen  en Digwa ouswa en Praslinois lo la. Mersi Mr Speaker.

 

(APPLAUSE)

 

MR SPEAKER

Mersi Onorab Ghislain.   Wi Onorab Woodcock.

 

HON WAVEL WOODCOCK

Mr Speaker mon anvi raise en point of order anba 56(1)(d) pour mwan raise en misapprehension ki Onorab  Johan Loze in mansyonnen.  Mr Speaker La Digue ti annan 3 Board Linyon Este la  different Board avek La Digue Trust Board. Mon’n fer en pti mistake – Mrs Lise Bastienne ti Chairperson of La Digue Trust Fund pa Linyon Estate. E i ti involve dan tou sa bann demagozi ki’n arive.   I ti Chairperson of La Digue Trust Fund.  Mersi. 

 

 

MR SPEAKER

Mersi.

 

(Interruption)

 

MR SPEAKER

Order! Order!  Order. Mon krwar i zis fer en klarifikasyon. 

 

 

(Interruption)

 

 

 

MR SPEAKER

Non mon pa’n konpran sa.  Ok. Onorab, Onorab Woodcock si ou’n servi sa term ‘’ki in involve dan demagozi and all that’’ mon donn ou sans retire. Akoz sinon  non pou vwar nou avek en Right of Reply ankor.  Retire e …

 

HON WAVEL WOODCOCK

 Ok – ‘’mismanagement’’ plito.   Dan plas demagozi mon a servi sa term ‘’mismanagement.’’

 

MR SPEAKER

Ok?  Mersi.  Ok nou kontinyen mon annan annakor 4  Manm ki pou entervenir avan mon rann laparol avek loter Mosyon.  Onorab Sandy Arissol.

 

HON SANDY ARISSOL.

Mersi Mr Speaker.  Bonn apre midi tou bann Manm Onorab. Bonn apre midi tou bann dimoun ki pe ekout nou.   Mr Speaker, Mosyon anmennen par Onorab Gill, son lentansyon letan mon pe gete i bon.  Lentansyon i bon parey Onorab Woodcock, in dir bomaten, parski senpleman zot pe rod sa ki meyer pou dimoun Praslin e osi La Digue, parey Onorab Sophola e Onorab Chantal Ghislain in koz lo la.

Me selman lefe i reste parey Onorab Woodcock in fer mansyon bomaten, an relasyon avek bann mismanagement ki’n pase a plizyer repriz lo bann Board ki’n deza egziste.  Sa i en keksoz ki nou  bezwen toultan pran kont.

E se pou sa rezon ki nou toultan nou bezwen al retourn dan listwar.  Sa i kler sa.  Nou pa kapab kasyet listwar.  Nou bezwen toultan retourn dan listwar.  Mon war en pe drol parfwa akoz letan zot kontinyen dir ek nou, nou kontinyen zwe bann vye itorik; nou kontinyen baz keksoz lo listwar!

E pa bliye Onorab Simon Gill ki asiz obor zot i toultan sak fwa i fer son lentervansyon toultan i retourn ek nou dan listwar e i fer nou mazin listwar kot nou sorti e kot nou’n arive ozordi.  E mwan osi mon krwar dan listwar. Parske letan, zot lot kote parti zot ankor pe selebre lo 5 Zen par egzanp en levennman en dat ki amenn divizyon pou plizyer dimoun, sa osi Mr Speaker i ede pou retourn dan listwar.  E Mosyon pe base lo Board ki Onorab Gill in anmennen ki Onorab Audrey in koz lo la Mr Speaker – la i demann mwan si sa i lo Mosyon?

Sa i bann pwen ki’n leve dan Mosyon! Nou bezwen pa bliye poudir listwar –  e par egzanp Mr Speaker sa pwen in leve letan Onorab Pillay in fer mansyon avek nou  dan LDS kot nou koz lo ‘’Drwa lekspresyon,’’ lo ‘’Drwa tou dimoun’’ me solman letan  bann dimoun i sorti avek nou, nou kritik zot dan en fason.

        E Onorab Pillay i fer sa byen Mr Speaker, kot ou’n les li letan in mansyonn Mr Pat Pillay ki’n ale avek nou e nou nou’n fer serten kritik lo li!  Me selman sa ki enportan Mr Speaker dan listwar, pou nou revwar listwar ki nou’n koz lo la boner, pa bliye sa menm Pat Pillay ki Onorab Pillay in koz lo la,  ti form parti sa parti ki apel Parti Lepep.

E pa bliye letan Pat Pillay ti sorti ek Parti Lepep, lekel ki ti anmenn en kanpanny sal lo li – en kanpanny ‘’labi?’’ Parske senpleman i ti’n sorti ek Parti Lepep!

 

 

(APPLAUSE)

 

HON SANDY ARISSOL

Sa   i listwar sa Mr Speaker!

Nou bezwen pa bliye sa!  Sa i listwar!  Letan Onorab Hoareau – Basil Hoareau i vot dan nou faver e i vot kont zot e ozordi in bezwen resign – i listwar sa Mr Speaker!

 

(laughter)

 

HON SANDY ARISSOL

Letan       Onorab William ki asize la dan nou Lasanble i deside pou li balans lavi  ozordi, zeneral  avek son distrik  mannyer li  in vwar keksoz koman en  Manm Elekte, be lekel ki servi Lartik 26 zot nouvo Konstitisyon avek li – pou apel li,  met li asize, dir li fer sa?

Mr Speaker sa i bann listwar ki nou pa kapab bliye sa! Ki Onorab Rifnel Jumeau ki’n koz avan mwan pa konnen!  Sa i bann listwar ….

 

MR SPEAKER

 Non, non, non. Onorab? Onorab?

 

HON SANDY ARISSOL

Yes Mr Speaker?

 

MR SPEAKER

Onorab?

 

HON SANDY ARISSOL

Mr Speaker i  apel  …

 

MR SPEAKER

Non, non, non.

 

HON SANDY ARISSOL

… Johan Rifnel Jumeau. Mwan mon apel Sandy John Arissol.  La la lo son plak i marke la,  mon  vwar la.

 

MR SPEAKER

Onorab. Onorab.    Order!  Mon annan laparol.

 

HON SANDY ARISSOL

Yes Mr Speaker?

 

 

MR SPEAKER

Onorab Loze son non ki nou  servi dan Lasanble, se  Onorab Johan Loze.   Ler ou pe nonm Onorab Rifnel Jumeau mon asire dimoun laba pe fer referans avek Mr Rifnel Jumeau.  Ok?  Annou …

 

HON SANDY ARISSOL

Mr Speaker mwan mon dakor avek sa ki ou’n dir …

 

MR SPEAKER

Attends, attends!  Ok?  Mon  pa anvi servi term ki Onorab Woodcock in servi.  Annou pa al dan sa direksyon.  Ok, mon pou aret la annou adres li par son non.  Annou adres li par son non, oubyen annou adres li par son sinyatir – Onorab Loze senpleman.

 

HON SANDY ARISSOL

Savedir sa ki ou pe dir mwan, mwan mon 2enm non  napa valer dan Lasanble Nasyonal? Mon kontinyen Mr Speaker.  Onorab ki’n koz lo ‘’ballot’’ avan mwan  ….

 

(laughter)

 

HON SANDY ARISSOL

in dir – li osi i paret  i pa tro konpran Lartik 26 SON Konstitisyon.  Mr Speaker, tousala se listwar ki nou’n tann koz lo la.  Prezan lo Mosyon ki mon pe   koz lo la ki Onorab Audrey i kontinyen demann mwan Mr Speaker, nou’n fer referans avek bann Komite ki annan dan bann distrik, me selman sa ki nou bezwen pa bliye Mr Speaker, dan lepase nou’n annan sa ki Gouvernman – sa ki dimoun ti met konfyans ladan,  apard bann Board ki annan se bann Administrater Distrik.  Ki Onorab Audrey ki pe interject letan mon pe koze Mr Speaker li i ti en DA.  E annou pa bliye dan sa menm Lasanble Nasyonal nou, nou ti ganny dir poudir anba bann DA a en peryod letan, ti annan mismanagement. Ki nou ti ganny dir Mr Speaker.  Nou ti ganny dir poudir pyos in perdi! Lapel in perdi!  Bouret in perdi!  Bogi in perdi!  Ti reste zis en tors nou ti ganny dir. Ok? Sa se ban letan ki plizyer zot  la anndan ti DA enkli Onorab Audrey ki pe enteronp mwan letan mon pe koze!

Mr Speaker me parkont letan  nou pe balans tousala, kestyon ki nou demann nou lekor – ki  nou, nou demande, se, eski nou kontinyen met konfyans dan bann lezot keksoz apard ki DA ki Zot ti etabli. Si zot ti’n servi  li byen ozordi kekfwa nou pa ti a bezwen pe rod – nou pa ti a bezwen pe fer  rod lezot keksoz  parey bann Board, Mr Speaker

        Letan Onorab Valmont in monte in fer lentervansyon in dir ek nou poudir, nou, nou ti promet bann dimoun plis larzan dan pos.   Nou lo sa Mosyon la Mr Speaker!

Nou nou’n promet plis dimoun larzan dan zot pos  e  nou pa’n fer nanryen. Mr Speaker mwan mon anvi dir ozordi, e mon avi dir avek lafyerte – mwan pou lemoman mon fyer pou travay ki mon pe fer.  Akoz? Parske letan nou, nou ti demande ki bann Trwazyenm-Az zot sorti R3100 pou vin kot zot ete ozordi mwan mon happy parske i a pe met larzan dan pos bann Trwazyenm-Az!  Be annou pa bliye nou ki ti demande sa!   E annou pa bliye zot, zot, zot konnen poudir ki zot ti dir Mr Speaker?  Lo sa Mosyon sa ki ti pase sa – zot ti dir ek nou ‘’Kot pou ganny larzan pou donn bann Trwazyenm-Az? Ozordi nou’n vwar sa larzan. 

        Mr Speaker, mon happy letan nou lo sa kote latab, mwan koman LDS nou ti demande ki bann saler pli ba zot pa pey tax. Sa i fer ki sa dimoun i ava anmenn plis larzan dan lakour, olye tir larzan pou al kot tax.

Mr Speaker letan nou dan Lasanble Nasyonal nou ti pas en Bill  pou ki bann benefis ki bann dimoun i gannyen pa tir tax lo la eski  pa i anmenn plis larzan dan pos  sa Seselwa?

        Letan   zot ti anmenn salary grid dan sa Lasanble Nasyonal nou, nou ti a pe rod en keksoz rezonnab, pou nou bann dimoun laba doer, zot ki zot ti fer zot?   Pa zot in aksepte pou anmenn Bill devan Lakour pou Lakour desid lo la?

Mr Speaker i lo Mosyon parske sa ti ganny aksepte ganny otorize par Speaker, pou Onorab Valmont koz lo la, ki la mon vwar Onorab Pillay lev son lanmen anler sak fwa nou, nou koze ‘’I pa an akor avek Mosyon!’’

Mr Speaker ti les pase la mwan mon osi mon pe koz lo la, akoz ou Onorab Valmont ki ti anmenn sa Mr Speaker! 

        E pa bliye,  Mr Speaker nou ti pou annan plis larzan pou nou met dan pos Seselwa, si Gouvernman Parti Lepep – ozordi ki US, pa ti’n otoriz tou sa bann trik mardaz ki’n pase dan nou  pei!

        Milyon in perdi!  Nou ti pou ganny plis larzan Onorab Valmont!

 

 

(APPLAUSE)

 

HON SANDY ARISSOL

Pou nou met dan pos nou bann Seselwa!  Sa bann letan  Mr Speaker, kot Onorab Valmont ti ete? I ti Lasin pe negosye avek Cheng –  ChouchangPoulee!  Analize balanse avek Pointe Larue Nageon Estate ki in koz lo la.    

Alor letan Mosyon pe demande ki  nou rod bann dimoun Praslin ek La Digue pou met lo Board Mr Speaker, tousala i enportan pou monte, parske nou annan en mefyans.  E mefyans ozordi laprev i la. Nou’n koz lo Linyon Estate; lot in koz lo lezot Board.  E Ladministrasyon Distrik i enn ki  nou nou’n koz lo la.  Sa i bann keksoz ki’n ganny etabli dan distrik, kot bann striktir ki ti kapab deservi nou distrik byen; ki ti kapab anmenn lavwa bann  dimoun byen. 

        Par egzanp lo La Digue letan ou koz avek bann dimoun lo La Digue, zot koz ek ou an term Lopital. Par egzanp zot dir ek ou Lopital La Digue si9 mon pa tronpe li i ganny zere – i ganny  – annou dir sa permisyon oubyen i ganny manage par Lopital Baie Ste Anne.  Si i annan okenn desizyon ki ganny pran, zot bezwen tap laport Baie Ste Anne. Si i mank en dokter zot bezwen liaise ek Baie Ste Anne  be eski sa bann desizyon koumsa eski lekel ki pran bann desizyon koumsa?

Eski i ganny konsilte avek bann dimoun La Digue? Eski i ganny konsilte ek Ners Ansarz La Digue? Eski i ganny konsilte avek bann Lotorite ki deza la, La Digue?

Par egzanp letan ou koz ek bann Digwa, zot dir ek ou  poudir  i annan sel landrwa La Digue ki i vann boutey gas. Ler sa landrwa La Digue i fermen, ou boutey gas – zot pa gannyen boutey gas zot! Zot bezwen esper zour li i ouver! Me eski sa diskisyon eski pa ti devret vwar bann Lotorite la Digue par egzanp demann zot, zot lopinyon; koz ek bann dimoun – rode.  en fason ki  ti a mars parey Mahe avek Praslin kot ti ava annan desantralizasyon, kot bann outlet laboutik.  Zot osi zot ti ava kapab annan 2 – 5 boutey se pa annan bokou plis kekfwa rezon sekirite, me sa dimoun si zot gas i fini Dimans 2er apre midi, i sorti lanmes in vini in kwi son manze – son manze  gas  in fini ki i fer?  Pa bliye Mr Rene ti aras nou pti stov petrol, in donn nou gas! Alor sa i en konsern Mr Speaker. Savedir tousala i bann konsiltasyon;- i bann konsiltasyon ki ti kapab  ganny fer avek bann Lotorite ki deza la –  isi,  ki deza egziste Mr Speaker.

Sanmenm sa ki mon pe dir  pou dir prezan letan ou ganny Onorab Churchill, en homme byen inosan, ki’n vin dan en letan kot i annan en pe dezord, be prezan i pe  sey met en lord ki mon apresye, e sa Mosyon i pe montre  poudir i enterese avek son distrik, i pe rod sa ki meyer pou son distrik. Prezan ou annan tou sa bann mefyans parske letan nou re go back i annan tou sa bann keksoz.

Par egzanp lo Praslin;  annou get en kou Praslin.  Praslin letan Gouvernman i deside pou fer konblaz, par egzanp, eski i annan konsiltasyon ki ganny fer avek – annou dir  i annan MNA, nou annan Lotorite Distrik ki la, nou annan  bann lezot Board  Praslin, eski i  annan en konsiltasyon avek sa bann dimoun? Oubyen zis Gouvernman i deside fer konblaz, alor i fer konblaz, san konsilte pou konnen kantite dimoun ki bezwen? Lekel ki deza pe espere  apre en kantite letan? Ki kalite biznes ki nou pou donn priyorite? Eski i annan sa konsiltasyon Mr Speaker? I napa konsiltasyon.   Zis zot deside apre nou tann tou sord kalite – lot – dalon in gannyen – lot in revann pou milyon, e tousala i   bann listwar ki nou bezwen repas lo la, parske i bann keksoz ki egziste la, letan nou pe koze.

Par egzanp letan mon vizit anler Salazie, kot mon bann fanmir i reste, Mr Speaker ozordi Salazie i en landrwa ki pli sal ki egziste dan Praslin.  In vin en fore; i en dezord enorm, pye dibwa in depase, larivyer in kouver, me parkont Salazie i reste sa semen ki konekte bann touris pou zot al lot kote; swa pou zot al Grand Anse; swa pou zot desann lot kote pou al Anse Boudin, kot sa bann semen i konekte. Me par kont eski i annan en konsiltasyon avek Board ki deza egziste la, pou vwar avek MNA, pou vwar avek DA, pou vwar avek bann lezot stakeholders Lanvironnman pou gete ki mannyer nou kapab ed zabitan Salazie,  enkli bann touris ki deservi sa semen.  Alor mwan mon kestyon se  –   mon kontinyen demann mon lekor, eski nou kontinyen etabli plizyer Board – plizyer Komite – plizyer lezot keksoz kan deza ofet la dan bann distrik nou deza annan nou MNA?

Mazinen MNA nou, nou bann Manm Elekte nou.  Sel 2 group dimoun ki ganny elekte dan sa pei, se Prezidan avek MNA.  Ok? Nou ganny elekte nou  – MNA avek MNA, Sela  kot bann ‘’ballot’’ i rantre.

 

        (laughter) 

 

HON SANDY ARISSOL 

E Mr Speaker, so alor i annan MNA! E nou koman MNA nou bezwen en lavwa pou nou dimoun. Nou bezwen en lavwa pou nou dimoun.  Si Lotorite pa tann nou koman MNA, alor ou espekte Lotorite pou ekout sa detrwa dimoun? E nou, nou’n vin la atraver en ‘’ballot!’’   Alor Mr Speaker lezot kestyon  mon ti ava kontan demande, eski  lo lezot bann Board ki nou pe rode, eski  bann ki deza la, eski zot pe rann en servis lakominote? Eski i annan sa konsiltasyon avek zot zabitan, zil oubyen bann dimoun? Eski i annan rapor ki ganny donnen zis parey nou bann Komite Lasanble nou fer? Eski i annan swivi? Eski bann dimoun i ganny konsilte a plizyer repriz, an relasyon avek devlopman dan nou distrik; bann lezot keksoz ki Gouvernman … ?  Eski i annan sa pou le moman la?  Eski si napa Mr Speaker, si nou pe al  -nou pe al kree lezot Board  oubyen senpleman nou pe azout en dimoun Praslin, oubyen en dimoun La Digue lo sa Board me selman still lavwa pa pou ganny tande.

        Mwan mon santi i annan en problenm.  Akoz deza la, zot deza annan en MNA for – Onorab Gill – Onorab Gill mon krwar i sel Manm Lasanble ki anmenn pli gro poursantaz an term vot, pou sa pei! Me si Onorab Gill ki en Manm Elekte pou son parti atraver ‘’ballot’’  e li son lavwa pa ganny tande, Mr Speaker mwan mon krwar nou annan en problenm.  Mwan mon santi nou bezwen servi sa ki nou annan la.  E pa bliye ozordi nou annan bann Konsey Rezyon – Rezyonal ki nou’n tonm dakor lo la, e mwan mon bezwen mwan mon toultan dir, mon dir  fyerman  Mr  Speaker, mwan mon  Konsey Rezyonal Santral 1 nou pe fer en travay fantastik. Tou dimoun lo la i korpere. Mon redir  poudir lo nou Konsey Rezyon nou annan  4 DA nou. E bann DA nou pa konnen ki zot afilyasyon politik nou.  Nou pa konnen kot zot sorti, be lenportans la nou pe travay ansanm pou benefis nou rezyon enkli MNA ki atase ek sa distrik enkli bann dimoun ki’n ganny mete la pou Konsey.

E pou le moman nou annan sa bann striktir e mwan mon krwar  nou bezwen donn sipor sa bann  striktir. Parey zot kontan dir, ‘’met lezel anba lavwal!’’ Annou servi sa bann ki la.  La pou le moman annou met divan anba zot lavwal pou ki  – annou met divan anba zot lavwal Mr Speaker.

 

(Interruption)

 

HON SANDY ARISSOL

Mr Speaker mon kapab dir son 2enm non oubyen mon a dir zis son premye non?

 

(Interruption)

 

MR SPEAKER

Non, non, non. Onorab …

 

HON SANDY ARISSOL

Mon pa ava al ladan?

 

(Interruption)

 

HON SANDY ARISSOL

Mr Speaker, mon pa ava al ladan?

 

MR SPEAKER

Non.

 

HON SANDY ARISSOL

Dir li pa disturb mwan ler mon pe koze. Mon’n ekout li trankilman letan in dir son ‘’ballot’’ mon pa’n disturb li! Mersi Mr Speaker.

 

MR SPEAKER

Kontinyen Onorab.

 

HON SANDY ARISSOL

Mersi Mr Speaker.  So mwan mon krwar Mr Speaker mwan mon krwar ki bann striktir ki nou annan en plas la, mon krwar ki i enportan pou nou kontinyen donn zot siport. Nou bezwen  kontinyen rode ansanm koman en Lasanble – ansanm koman en striktir ki deza annan an plas Mr Speaker, pou nou rode ki mannyer nou kapab ed nou dimoun.  Me parey mon’n dir  Mosyon Onorab  Gill, i en Mosyon ki annan merit me selman  an menm tan  Onorab Gill, ou, ou pou bezwen eksplik nou, pou ki rezon ou pe rod sa? Kwa ki ou santi pa pe marse  lo sa 2 zil parey Praslin, Baie Ste Anne, Grand Anse enkli La Digue ki Onorab Sophola avek Onorab Chantal in koz lo la. Konmsi eksplik nou.  Met devan nou kwa bann konsern ki ou santi pa pe la devan e kote ou santi  poudir i  annan retar an sa ki konsern ou distrik; an sa ki konsern bann zil pou o osi analize dan sa lapros ki nou pe pran Mr Speaker.

E lo sa 2 pwen Mr Speaker mon ti a kontan  remersye ou, pou donn mwan sa pti loportinite e mon  asire ki mon‘n fini dir tou bann pwen ki mon ti’n prepare.  Akoz mwan mon ti’n prepar mon Mosyon e mwan mon santi poudir i ava enportan pou nou ekout Onorab Gill dan son entervansyon letan i pe fer son summing-up pou nou kapab ansanm balanse gete ki mannyer, pou nou vwar ki nou 2 zil Praslin avek La Digue, i ava bouz devan.  E mwan   letan i konsern Praslin avek La Digue parey mon kontan mon ‘’ma soeur’’ Onorab Sophola Mr Speaker en kantite, avek  Onorab Ghislain osi, en kantite menm, e mon pou siport mon frer Onorab Gill kantite, pou nou fer sir ki sa bann zil  – nou bann zil i avanse Mr Speaker.   Mersi bokou.

 

(APPLAUSE)

 

MR SPEAKER

Mersi  Onorab Arissol.  Onorab Sylvanne Lemiel.

 

HON SYLVANNE LEMIEL

Mersi Mr Speaker.  Bonn apre  midi  tou dimoun.  Mon koleg Onorab Sandy Arissol in fer resorti  li i kontan tou dimoun mon krwar Bondye  i dir nou aimons nous les uns les antres  – sa i byen, Onorab Sandy Arissol.

Mr Speaker, i annan en pti pwen mon krwar avan mon tous lo Mosyon ki nou merit fer sorti ki mon koleg Onorab Sandy Arissol in fer resorti.   Kot letan nou pe koz distrik li menm. Petet i pa sorti byen – wi  nou ti dir petet dan lepase in annan bann keksoz ki’n perdi, me solman letan ou pe nonm  – ou pe pik lo en dimoun ki ti en DA petet i pe mazin dan sa letan. Ou konnen?  A lavenir ki kekfwa keksoz in deteryore – petet nou merit set the record straight – a lavenir.  Ou pe dir ou letan ti annan sa bann keksoz, me a lavenir ozordi letan nou pe gete kote in ale?  Sa ki ou’n demande.

So to the Motion now, Mr Speaker, mon pou vreman bref lo sa Mosyon akoz mon krwar i annan vreman bokou keksoz ki’n ganny dir lo la.   I annan bokou pwen i pou zis repetititiv kekfwa si mon kontinyen elabore.  Me mwan mon santi ki sa Mosyon i annan son merit.  Akoz i annan bann size enportan ki ganny anmennen dan nou Lasanble.

Sa Mosyon i enn koman bann size enportan, ki ganny anmennen dan nou Lasanble e ki mon krwar, nou tou nou merit pe ganny debat lo la, pou nou vwar pou anmenn bann solisyon kot i annan bann problenm ozordi.  Akoz ozordi  nou sosyete, nou bann distrik, nou bann kominote, pe fer fas avek bokou problenm.  Petet wi nou santi i mank annan sa konsiltasyon; i mank annan sa dyalog; i mank annan sa enteraksyon avek kanmarad.

I mank annan kot nou partaz lopinyon kanmarad, anmenn ansanm pou nou kapab aranz keksoz.  I kapab  in deranze wi dan lepase.   Me ozordi nou ki la, sirtou dan sa 6enm Lasanble, mwan mon en nouvo Manm Lasanble mwan!   Mon anvi vwar keksoz i mars pli byen, pou nou kominote, pou nou pei an zeneral.

So nou bezwen vin avek sa bann Mosyon, ki pou fer ki i aranz keksoz dan nou kominote; i aranz keksoz dan nou distrik.  E se la kot parey Onorab Churchill Gill in  dir, in anmenn sa Mosyon, kot i pe demann pli reprezantasyon lo bann Board, sirtou profesyonnel enkli zot, lo sa bann Board. Nou pa pe demann pou kree nouvo Board ankor.  Akoz Board i deza egziste. Me i mank reprezantasyon lo serten sa bann Board.   Pa lo sa 100 ekek.   Lo serten sa bann Board ki li menm li in nonmen, in mank serten reprezantasyon bann profesyonnel e menm bann lezot dimoun ki trouve dan kominote Praslin e menm lo kominote Zil Pros.

Mr Speaker mon santi ki – parey in ganny dir, Praslin e Zil Pros, i bann zil e bann dimoun  – bann businessmen ki pe kontribye signifikaman dan lekonomi nou pei.   Zot pe kontribye bokou e mon krwar i annan bokou dividend – bokou larzan ki rantre dan kof Gouvernman atraver bann biznes atraver bann keksoz ki pe pase lo sa 2 zil.

So alors mon krwar ki nou merit pe ekout lavwa Onorab Churchill Gill.   Gouvernman i merit pe ekoute pou vwar.  E  Lasanble osi nou merit pe donn sa sipor, pour ki nou ede pou ki Praslin i ganny pli byen reprezante lo sa bann Board –  Praslin ek Zil Pros i ganny reprezante lo sa bann Board, pou ki zot a kapab anmenn en kontribisyon, en pe  plis ki sa ki pe ganny anmenn la ozordi.  Akoz sa bann dimoun zot konn zot zil; zot konn zot landrwa.

I fer mwan mazinen dan le pase Mr Speaker, letan mon tourn lo distrik, mon toultan kontan fer referans. Distrik ti annan li  bann dimoun kot ti travay, pe enport ou lopinyon, ou ti sorti dan diferan sou- distrik kot i ti parey bann Komite.   Ou kapab dir en pti Board.  I ti apel DCC sa letan.  Kot sa bann dimoun ti vini, ti zwenn tou le mwan, kot zot ti vin anmenn problenm ki  pe pase dan zot Zone.

E nou, nou ti pran sa  bann problenm.  Koman mwan koman Administrater  Distrik – sak distrik ti annan enn sa.   District Community Counsel.  So sa DA li ti chair  sa li.  E ou koman sa pti Board la kot distrik  – pa ti ankor egziste District Team. District Team in  vin apre.  Kot la DCC ti diskit son  bann issues – son bann problenm ki pase lo  nivo son kominote.  Akoz sa bann dimoun ki ti lo sa DCC, zot konn zot Zone zot.  Zot konnen ki pe pase. Zot pli pre ek zabitan  laba.  Zabitan i dir zot ki problenm.  Zot vin anmenm la kot Ladministrater Distrik,  akoz  Administrater Distrik ou pa ti kapab partou.          Ok?

So once a month nou meet.  Si ti fodre fer bann Extraordinary Meeting, nou ti fer, kot nou ti diskit sa bann diferan issues.

E Mr Speaker fransman  pou mwan dir ou problenm ti ganny rezourd! Ou konnen?  Letan apre sa in ganny prodwi District Team, sa DCC ti ankor la,  i pa pti ankor phase out.  So DA ler in chair  son district dan son DCC  i pran son bann issues, i anmenn lo sa a District Team e District Team li ki  ankor i ankor la, i en action oriented body,  ki li i ti fer sir i deal avek sa bann issues vitman.  E i en legzanp.

I en pti pe parey ki Onorab Churchill Gill pe demande, kot i ava annan reprezantan bann Board ki ava anmenn bann issues, bann problenm, avan ki okenn desizyon i ganny pran pou fer okenn – la nou vwar okenn – mon pa konnen ki desizyon zot annan pou zot pran.  Akoz ler ou gete, la parey la, zis en legzanp nou’n vin ek Lalwa – Lalwa ler ki pou ouver ler laboutik pou vann bwar – bann keksoz koumsa.  Me avan nou’n fer sa Lalwa in napa konsiltasyon avek bann retailers.  I vin parey lo kote Praslin ki si arive ki  nou pa’n met dimoun Praslin oubyen Zil Pros lo ankor serten sa bann Board i kapab annan serten desizyon ki nou, nou pe asiz Mahe, nou, nou pe pran san konsilte sa bann dimoun Praslin, me  i annan enn sa bann dimoun lo sa bann Board ki kle ki pou tous zot distrik, so zot lavwa e lavwa bann lezot dimoun – li sa dimoun lo sa Board i pa pe konsilte laba i ava anmenn bann konsern devan ki sa bann keksoz i ganny diskite e ki ler  avan Board i pran en desizyon nou’n kapab  tonm an akor e ki bann desizyon ki nou kapab dir, desizyon  pou korek.

Akoz ozordi i annan plen desizyon ki’n ganny pran Mr Speaker. Get ozordi ou vwar Onorab Mr Gill ex-MNA dan Baie Ste Anne osi i mont lo televizyon kot in i vini in vin dir ou poudir sa bann tees – ti MNA Bel Ombre (sorry) – in vin dir ou poudir i annan serten desizyon ki’n ganny pran, i fer ki pe afekte bann businessmen lo Praslin.  So me si sa bann desizyon avan ti’n ganny pran, ti’n ganny konsilte oubyen ti annan en Manm lo sa Board ki’n pran sa bann desizyon ti’n konsilte sa businessmen Praslin e lezot dimoun, petet en desizyon parey pa ti’n ganny pran ozordi.  Akoz enn ler ou vwar nou vin avek serten desizyon apre nou bezwen repran nou bezwen retire ki vin serten lanbarasman

So Mr Speaker mon krwar ki sa  demann  – sa Mosyon ki  onorab Churchill Gill in anmennen i annan son merit e mon pou anmenn mon krwar nou bezwen donn li sa sipor pou ki mon espere ki Gouvernman i ekoute; parey toultan mon kontan dir – toultan nou dir Mosyon pa binding me selman i annan serten  keksoz – i annan serten Mosyon ki nou anmennen isi dan sa Lasanble, mon krwar Gouvernman i merit vreman – vreman look into it, pran konsiderasyon zis pou kapab amelyor lavi zabitan dan nou distrik zabitan nou zil Praslin – zabitan nou Zil Pros e ki  mon krwar i ava fer li vin en better communitybetter place e tou dimoun i ava happy e tou dimoun i ava kontan.  So mon siport Mosyon ki Onorab Gill e  mersi Mr Speaker.

 

(APPLAUSE)

 

MR SPEAKER

Mersi Onorab Lemiel.  Ou’n ganny en sipor osi avek ou koleg Onorab Sandy Arissol.  Mon a donn la parol Onorab Afif.

 

HON AHMED AFIF

Mersi Mr Speaker.  Mr Speaker zis de pti pwen poudir ki mwan mon konpran tre byen sa konsern ki pe ganny anmennen par Onorab Churchill Gill.  Son konsern se ki bann dimoun dan Inner Islands e li kot i sorti Baie Ste Anne Praslin, zot konsern pa pe ganny tande par Lotorite.  Me pli enportan bann keksoz enportan ki devret ganny fer dan sa distrik, pa pe ganny fer a ler e bann priyorite ki zot,  zot krwar i devret priyorite pou zot pa pe ganny vwar konman priyorite, par bann dimoun ki fer desizyon dan pei.

E alor etandonnen sa sityasyon, Onorab Gill in trouv li petet in trouv sa lozik dapre  li, pou li dir be i bezwen soulev sa pwen.  E pou li solisyon se pou annan plis reprezantasyon lo bann Board.   Mwan mon konpran sa konsern mwan.  Sa mon dakor avek, me mwan mon pe dir  pou rezourd problenm i pa zis en kestyon annan reprezantasyon lo en Board.

Nou tou nou konpran problenm zil. E Sesel petet konman en pei, nou ki koz sa souvan.  Ler nou al lo nivo Nasyon Ini, nou Anbasader laba i koz poudir Sesel i en pti pei, ensiler, izole e alor tou keksoz i pli ser.  Ler nou al kot European Union zot dir nou – nou ti pti nou, me selman zot get nou GDP apre zot dir ek nou be led pou en pe difisil.

Zot konpran poudir tou keksoz isi i pli ser.  Pareyman ler nou al fer nou case avek IMF oubyen Labank Mondyal, menm largiman ki monte.  E nou ki la, nou, nou konnen poudir si nou pou anmenn en container sorti Dubai pou vin Sesel, i pou kout nou pou ariv ziska Por Victoria apepre 2500 Dolar.  Me si sa container pe al Praslin oubyen pe al La Digue ou pou bezwen met 700 Dolar par lao sa. Savedir pou sorti Dubai pou Sesel ki 4mil kilomet i kout 2500 Dolar. E pou sorti Mahe pou ariv Praslin i zis 40 kilomet, i kout 700 Dolar.  Ou pa ekspekte i devret sa pri.  Ou ti a dir be i pou 100fwa mwens me, i pa kapab 100fwa mwens akoz i annan kou pou sorti Mahe pou al Praslin.

E alor tou keksoz ki al Praslin e la Digue, ki bezwen pas atraver nou por, i pou vin pli ser otomatikman, akoz nou annan pou tir li Mahe pou anmenn Praslin e La Digue.  E alor sa i zis en legzanp ; akoz bann zil parey Praslin e La Digue e Inner Islands i diferan e tou sa ki ganny fer laba i devret diferan.

Me par kont ler nou get larealite ozordi  dan sa 2 zil, nou vwar i annan serten landrwa kot desizyon in ganny pran e mwan mon krwar korekteman pou fer serten keksoz byen.  Me ler ou get lo lot kote i annan serten keksoz ki montre ou poudir lafason desizyon in ganny fer, bann dimoun dan Inner Islands i trouv zot lo en dezavantaz konpare ek Mahe.

Mon a donn en legzanp.  Telefonn.  Si ou reste Praslin oubyen si ou reste La Digue oubyen Mahe, i parey.  Ou en sel package.  Tousala i kout parey.  Si ou aste en labyer Praslin ou aste en labyer Mahe i kout menm pri.  Si ou aste limonnad i parey.  Si ou aste bennzin Praslin ou La Digue ou Mahe, malgre ki’n ganny transporte sorti Mahe pou ariv laba i menm pri li.  Gas i parey.  Akoz?  Akoz en desizyon in ganny pran – pa par en Board. Par en Gouvernman ki zot vwar sa konsern sa zil, zot in adres problenm sa zil, e zot in nobou ariv pou zot ganny en solisyon ki fer ki tou dimoun i pey menm pri.

Me par kont e legzanp kot ou vwar poudir zot dan en dezavantaz – zis pou en blok.  En blok ki pe bann R11 Mahe, borde ariv La Digue R24.  E mon pa pe blanm personn ladan parski, byensir i annan kou transportasyon.  Byensir i annan lozistik ki difisil.  Me i en konsern pou Pralinwa, i en konsern pou dimoun La Digue akoz personn pa ankor arive trouv en solisyon parey zot in fer pou telefonn, boutey gas, bennzin, labyer ek limonnad, personn pa’n arive get lo kote konstriksyon.  E sa se en konsern ki devret konsern Gouvernman.  Pou li koz ek bann operater, an menn zot ansanm e rod en fason ki parey pou lezot prodwi, zot osi zot a kapab fer sir ki pri borde i ariv La Digue e i ariv Praslin se en pri abordab.  E laplipar sa bann lezot pri kot i pa parey Mahe, e Praslin La Digue i bann pri ki ganny etabli dan sekter prive.

Alor Gouvernman konman en fasilitater, se la kot Gouvernman i antre ladan.  Napa okenn Board ki pou rezourd sa lo kote nivo paraetatik.  Ou kapab met otan dimoun lo Board.  I pa pou rezourd sa problenm.  Se la kot mwan mon krwar pou adres sa konsern ki Onorab Gill in met devan, se nou, nou bezwen annan en fason kot nou pa bezwen re envant Lotorite.  Nou pa bezwen al met en presyon lo Bidze Gouvernman avek ankor en lot Lenstitisyon.

Si ou demann dimoun Praslin, La Digue ki zot problenm, zot pou dir ou zot problenm.  E Gouvernman Mahe i konnen ki zot problenm.  Onorab Gill mon asire i konn bann problenm Praslin bokou plis ki mwan.  Selman sa ki mon konnen se Praslin par egzanp Baie Ste Anne i annan 15an sepa 20an, ki zot pe koz lo tranbleman ki zot pe gannyen avek en zenerater.  Pa akoz ou pou annan en dimoun sorti   Praslin ki asiz lo Board PUC ki sa pou arete.  Akoz zis pareyman kan ou get Lopital Baie Ste Anne oubyen servis lasante Praslin, ki mon asire zot annan bokou pou demande.  Me zot ti deza annan en Minis ki ti asiz Mahe ki ti Minis Lasante.  Eski i ti rezourd tou problenm?  Pa neseserman.  I pa ni ti lo en Board.

Alor kote solisyon i vini?  Solisyon i vin kot ou bezwen annan en desizyon par Gouvernman.  En volonte politik par Gouvernman, pou fer keksoz arive e arive vit.  Fodre ou annan dimoun  dan Gouvernman ki konsyan bann problenm ki pe pase Praslin e La Digue sirtou. Mwan mon krwar, si ou deza annan bann striktir an plas.  Par egzanp ozordi ou annan 3 DA ki reprezant Inner Islands.  Enn pou Grand Anse Praslin, enn pou Baie Ste Anne, enn pou La digue.

Ou deza annan en Regional Council ki pou sa bann Inner islands.  Akoz nou pa servi sa menm sa striktir, dizon the Chair of zot Konsey ki li i  devret vin en lavwa tre for.  Kekfwa i devret vin en pozisyon pli permanan olye ki zis i en non executive, en dimoun non executive.  Ou devret annan en dimoun ki ler lasose in bloke Baie Ste Anne, e i bloke tou le zour akoz en problenm reel ki personn pa pe rezourd.  Se pa neseserman Board Authority ki pou al rezourd sa.  Se  management por.  Se en dimoun Praslin ki dir be la, la kot problenm i vini kargo pe antre ansanm ek pasaze, nou deblok sa nou anvoy laba.  I fer bann desizyon tou le zour.  Se koumsa ki keksoz pou debloke.  Zour en koudvan i pase akoz sanzman klima ou lezot rezon, e dan 5 minit ou vwar 20 poto elektrik i ater, lateras in grennen, dimoun napa delo avek elektrisite – se pa en reprezantan lo Board PUC ki pou rezourd problenm.  Se en dimoun Praslin ki pou telefonn Mr Morin  – PUC i pou dir li larg tou sa bann boug breakdown, anvoy 3 enzenyer sorti Mahe desann deswit annou al met sa bann poto anler, annou aranz sa bann transformer.

E Minister Later anmenn tou ou bann JCB annou al deblok sa bann semen ki’n bloke avek lateras grennen.  Se  sa bann kalite desizyon ki pou sanz keksoz.  Ler ou al La Digue fodre en dimoun ki pe reprezant La Digue ki son lavwa i for.  I kapab dir zot ou pa kapab zis fouy e dren selman delo i kontinyen bloke i pa ariv dan delo sale.  Kontiny sa bout pou fer li ariv dan delo sale.

Ou bezwen annan dimoun ki fer keksoz arive.  I pa zis koze.

Parski ler zot lo en Board pa bliye en Board, Gouvernman in defini ki rol Board li.  I annan en dokiman ki Minister Finans ti pibliye pa tro lontan ki dir ou ki savedir Corporate Governance.  Ki zot rol Board.  Board zot zwenn petet enn fwa tou le mwan.  Zot desid lo bann keksoz parey Polisi.  Zot pa antre dan bann keksoz tou le zour zot.  Se pa zot rol sa.  Sa se rol management sa bann lorganizasyon.  Be alor si Praslin i annan problenm, La Digue i annan problenm, i bezwen lo en Board.  Be Anse Etoile osi i annan problenm.  Tou distrik i annan problenm. Alor lo tou Board ou pou bezwen annan 25 reprezantan sorti dan sak distrik.  E alor pou mwan, mwan mon konpran Onorab Gill kot i pe sorti.  I pe dir bann zil zot diferan, bann zil i annan bann spesifisite diferan avek Mahe.  E nou konpran tousala.  Be mwan pou mwan ki mon pe dir –  dimoun Mahe, decision makers Mahe i bezwen konsyan sa.  E si zot konsyan sa, keksoz pou bouze.

Mon a donn en senp legzanp.  Yer, Anse Aux Pins kestyon i ganny anmennen en miray otour en lekol Anse Aux Pins ki pe tarde fer.  Be personn pa fer desizyon.  Ou demann zot ki’n arive akoz miray pa pe bouze, i annan 9mwan Bidze in aprouve, plan in aprouve, Procurement in donn laprouvasyon.  Proze pa marse menm.  Akoz?  En dimoun in  met en lobzeksyon, lobzeksyon pe trennen pou 9mwan akoz birokrasi.  Si nou serye, en dimoun i antre ladan e nou yer nou’n fer sa travay nou.  I pa nou louvraz ki nou devret fer.  Nou louvraz i oversight.  Be selman dan sa ka spesifik nou pa’n met okenn nou reprezantan lo Minister Ledikasyon, nou napa.  Me selman ki nou’n fer, nou entervenir akoz nou annan sa volonte pou fer keksoz marse.  Nou’n kontakte atraver Leader Lopozisyon, nou’n kontakte Procurement Unit nou’n demann zot ki pe arive en leksplikasyon, zot in eksplik nou.  Zot dir nou zot annan pouvwar pou donn dispensation pou proze kontinyen.  E si zanmen appeal i ganny rann an faver sa dimoun ki’n fer sa lapel, la zot a koz lo en diskisyon, en laranzman ek sa dimoun.  Me en desizyon in ganny pran.  Miray pe al konmanse.

Pou Praslin ek La Digue i parey.  Ou bezwen annan – parey an Angle nou dir en Champion pou sa bann zil.  E pou Praslin ou bezwen annan en dimoun ki for.  E mwan pou mwan se Regional cCuncil.  Se la kot zot,  zot pe regroup bann MNA, parey i annan 3 zot ki reprezant Inner Islands  –   4 zot ki reprezant Inner Islands dan Lasanble.  Ou annan 3 DA i fer 7 dimoun e zot annan 7 konseye an plis ki sa.  Be sa i deza en kantite dimoun ki konn problenm Inner Islands.  I deza la.

Zot konn tou sa problenm dan tou sa bann sou seksyon distrik, zot konn tou.  Zot in al fer vizit, zot in fer meeting, me desizyon pa pe ganny fer.  Pou fer Lopital La Digue par egzanp.  Pou konmanse e fini li.  Desizyon pa pe ganny fer pou fini bann semen ki annan pou fer La Digue.  Desizyon pa pe ganny fer.

Mwan mon’n pas La Digue kot en tantin ki i annan 89 son msye i 89 li i 88, zot napa en carer.  Be eski reprezantasyon lo en Board, lo Lazans pou Proteksyon Sosyal  ki pou fer zot ganny en carer ?  Ler dimoun La Digue i konnen zot bezwen?  E mwan kot mon’n kapab nou’n fer le neseser pou enform Lotorite, pou zot kapab fer sa dimoun gannyen.  Se volonte politik pou konnen sa ki pe pase lo ou zil, pou anmenn sa latansyon Lotorite e pou fer keksoz marse.

E se sel fason keksoz pou marse.  Sel fason keksoz pou marse.

 

(APPLAUSE)

 

HON AHMED AFIF

Mwan mon pa pe blanm personn.  Mon pa la pou mon vin blanm okenn dimoun, me sa ki mon pe blanmen, se en sistenm, en sistenm dirize par Mr Faure kot napa desizyon ki pe ganny fer dan sa pei.  E si lo Mahe desizyon pa pe ganny fer dan en fason vit, dan en fason efikas, be ki ou kapab mazinen pe pase lo Praslin e La Digue ?  Si lo Mahe in pran nou 2an pou nou fer en pti semen lo petrol station kot ti annan larzan, ti annan planning– ki en kilomet ek sa semen ki zot pe al fer, zot pa’n kapab fer en desizyon,  me konbyen letan pou pran zot pou fer en pti semen dan Marie Jeanne oubyen dan Consolation?  Se sa problenm ki nou annan.  E met dimoun lo Board pa pe rezourd problenm.

Ou problenm pou ganny rezourd kan ou annan en Gouvernman ki annan en zorey pou problenm sa bann zil.  Pa zis en zorey.  I annan volonte pou fer keksoz marse e pou pran desizyon lo en baz tou le zour.  Se tou le zour ler zot fer en desizyon ki keksoz pou marse.  E otan ki nou pa fer sa bann desizyon sa problenm ki Onorab Gill pe rankontre tou le zour zanmen pou ganny rezourd.  Met 25 dimoun lo zot Board pa pou rezourd parski Board i zwenn petet en fwa par mwan.   Board i ganny rapor; Board i fer revi rapor.  Board pa pe pran desizyon tou le zour pou rezourd problenm li.  Pa sa son rol.  Se management ki fer sa bann keksoz.

Alor pou konklir Mr speaker, mwan mon ti  a demann Onorab Gill, mon ti a dir ek Onorab Gill, mwan mon konpran ou konsern mwan.  Me mwan mon pa krwar poudir lafason ki ou pe propoze, i meyer fason pou adres sa problenm.  Petet ou a ganny serten rekour si serten dimoun i asiz lo Board.  En pti bout ou solisyon i kapab vini.  Me pli gran parti ou solisyon pou vin ler ou annan bann dimoun lo Praslin, lo La Digue.  E sirtou lo Mahe.

Akoz laplipar desizyon i ganny fer isi.  Zot konpran problenm sa 2 zil.  Zot anvi rezourd problenm sa 2 zil.  E zot pran aksyon pou rezourd sa bann problenm.  Sa pa egziste ozordi.  Sa i kler poudir pa egziste ozordi.  Mwan mon’n pas lo tou sa bann zil.  Monn koz ek  bokou dimoun laba.  Mwan mon konn mon distrik.  Zot tou ki la zot konn zot distrik.  E nou tou nou konnen desizyon pa ganny fer dan en fason vit, dan en fason efikas.  E sa i trakasan.

E mon a pran dan mon  distrik par egzanp, Anse Etoile kot bann proze, bann pti proze pa ankor konmanse.  Fini ganny aprouve.  Zot pe esper Procurement.  Zot pe esper en lot.  Zot pe esper en divizyon pou fer keksoz marse. Toultan i annan en leskiz. Toultan i annan en leskiz.  Be eski mon pou al asiz lo en Board laba dan Minister?  Eski sa ki pou fer keksoz marse?  Se pa sa.  Se volonte politik! Volonte Egzekitiv pou fer keksoz marse e pou pran desizyon lo en baz tou le zour.  Si napa sa zanmen keksoz pou marse !

E avek sa Mr Speaker mon ou le dir Onorab Gill pou dir mon konpran son konsern. Mon ti a sizer avek li ki i osi dir ek Gouvernman annan sa volonte politik, pou kapab rezourd problenm.  Pran desizyon pou kapab rezourd problenm.  Me mwan mon krwar seryezman Onorab Gill, sel fason pou ou sanz sa, se ki ou bezwen annan en sanzman dan mindset.  E sanzman dan mindset politik, i pou vin atraver en nouvo Gouvernman.  Sel fason pou sa arive.  E en Gouvernman LDS mon promet ou, i kapab fer en keksoz koumsa arive.  Mersi Mr Speaker.

 

 

MR SPEAKER

Mersi Onorab Afif.

 

(interruption)

 

MR SPEAKER

Order!  Order!  Onorab De Commarmond. 

 

HON CHARLES DE COMMARMOND

Mersi Mr Speaker. Mr Speaker zis en leklersisman, nou pou kontinyen ek Mosyon apre nou fini el Lasanble ouswa nou pran en Break ?

 

MR SPEAKER

Nou pou fini sa Mosyon. I reste 2 entervenan apre loter Mosyon i ava wrap-up.  Apre  si fodre nou ava komans lot Mosyon e i ava carry forward  pou next week.

 

 

HON CHARLES DE COMMARMOND

Savedir nou pa pou pran Break?

 

MR SPEAKER

Non nou ava regard koman  i ale.  Konbyen letan ou … ?

 

HON CHARLES DE COMMARMOND

Mon pou en pe long mwan

 

MR SPEAKER

Ok annou ale nou ava overlap en pti pe. Nou ava e regarde.  I depan si zot oule an vi ki demen osi sirtou nou annan travay nou annan Civil Code si zot oule, nou fer en sel ale nou fini sa Mosyon, apre nou adjourn pou nou pran nou travay Civil Code demen matin.   Si zot dakor ek sa.   Onorab ?

 

HON WAVEL RAMKALAWAN

Mr Speaker, petet mon lir lespri Onorab De Commarmond.   Sa ki pete Onorab De Commarmond pe met devan ou se akoz nou pa pran en Break la e pare sa nou retourn dizon mwen en kar whatever it is sa Break e apartir la nou ale ziska 5er ziska ki nou fini?  Si nou pran en Break la, mon krwar i pou pli apropriye e apre sa nou ale.   Onorab mon krwar mon’n byen konpran ou non ?

 

MR SPEAKER

Onorab De Commarmond?

 

HON CHARLES DE COMMARMOND

Se sa ki mon pe propoze e sinon si ou pou al en sel nou ale ziska nou fini e nou ale.  So nou pran Break apre nou  ….

 

MR SPEAKER

Bon i annan en konsansis e nou ava pran Break e nou retourn wi 15.45. Ok?  Nou ava Break.

 

(BREAK)

 

 

MR SPEAKER

Bon nou ava kontinyen avek nou travay.  Mon a donn laparol Onorab Charles De Commarmond.

 

HON CHARLES DE COMMARMOND

Mersi Mr Speaker.  Bonzour bonn apre midi Mr Speaker.  Bonn apre midi tou Manm e tou dimoun ki a lekout.  Mr Speaker avan mon koz lo sa Mosyon direkteman mon le zis rod de leklersisman en pti pe, lo enn de keksoz ki’n ganny dir dan Lasanble koumsa.  Par egzanp i annan sa kestyon ki Onorab Leader Lopozisyon yer ti mansyonnen dan Lasanble ozordi la osi taler Onorab Afif in tous lo la.  Sa kestyon en dimoun ki sipoze ekri Minis Finans pou sa proze Anse Aux Pins ensidswit – ekri Minister Ledikasyon (eskize) pou sa proze Anse Aux Pins.

Mon annan kontak ek Minister Ledikasyon.  Depi yer la ozordi ankor, be zot dir mon zot pa ankor ganny okenn let e personn pa ankor koz ek zot !  Eski ti ava kapab eklersi dir ek nou Lasanble lekel sa dimoun ki zot in koz avek?

 

 

(Off-Mic)

 

HON CHARLES DE COMMARMOND

… wi ekoute mon a koze epi ou  ava eksplike, dir nou lekel sa dimoun ki zot in koz avek?  Lekel ki sipoze ekri sa let?  Akoz?  Akoz i annan en lot issue kot Minister Ledikasyon, ki pe drag preski 1an.  I annan sa kestyon appeal pou zafer  uniform ; en fason sa dimoun ki pe ki sipoze ekri sa let la, ki zot pe mansyonnen, nou ti  a fer li osi ekri, menm zafer pou bouz sa zafer uniform.  Ou konpran mwan?

Mon ti ava kontan sa leklersisman.   Apre i annan en garson Cascade la ki’n teks mon i dir mon Onorab De Commarmond please demann ek Onorab Afif – atraver ou Mr Speaker byensir, si Prezidan Faure ki pou bezwen pran desizyon si in fer en bout semen kot Shell oli sa ki responsab Land Transport ek SEYPEC ki zot responsabilite?

Savedir eski Prezidan Faure pou vin ansarz tou sa bann Minister li menm?  E letan si demen zot ganny pouvwar e Onorab Afif i vin Vis- Prezidan e eski zot pou al micro manage tou sa bann zafer?

Konmsi annou en pti pe pli responsab nou Lasanble Mr Speaker, pangar ou konpran i annan bann mo ki zot pe servi deor, mon pa anvi servi sa la.  Nou, nou Lasanble i bezwen lo en oter.

An menm tan dimoun pe dir laba zot pe koz lo L’Union Estate en bann zafer i pe arive L’Union Estate nou sa zafer in pas devan nou Lasanble, devan nou FPAC.  Be zot pe dir dan sa bann letan ki tou  sa bann keksoz ki pe arive L’Union Estate, ki zot pe dir bann alegasyon la, eski ti napa dimoun Finans ki ti lo Board?  Lekel sa dimoun finans ki ti lo Board L’Union Estate?  E ki in fer pandan sa bann letan?

Konmsi i annan tou sa bann keksoz, ki nou zis dir dan Lasanble, me napa baz.  Ouswa napa – nou pa pe substantiate.  Konmsi i demann nou Lasanble al lo en lot oter – lo en lot nivo, ki taler letan nou adres lo Mosyon, ki osi nou pou koz lo la.  Mon ti a kontan en leklersisman lo sa issue premye ki mon mansyonnen.  Mersi.

 

MR SPEAKER

Bon zis annou fer sir nou pa antre dan en lot deba an deor Mosyon.  Onorab Afif.

 

HON AHMED AFIF

Mersi Mr Speaker.  Mon ti a kontan zis donn sa leklersisman.  Sa leklersisman ti vin swivan Question Time dan Lasanble, kot nou ti dir e Onorab Leader Lopozisyon ti dir poudir i menm ti a kontan demande lo nivo FPAC ki nou demann Procurement Unit egzakteman ki problenm pe arive kot i konsern sa miray.   E mwan 12.30 yer, zis apre Lasanble ti fini mon ti ekri Ms Dugasse ki mon krwar i CEO kot Procurement Unit.  Mon ti dir li: ‘‘In the Assembly today the Minister for Education said the above project was delayed because of an appeal by one of the bidders.

Apparently this has been dragging since October 2018.  Do you have details of how this process has  spanned out since October 2018, as a project is delayed pending the outcome of this appeal.  Thanks for the feedback. It would be  most appreciated if you could let me know by 1400 today, when Question Time resumes.’’  Thanks.  Kind regards.

5 minit plitar 12.35 mon’n call li e i dir mon in resevwar mon email  zisteman. E wi in annan en delay depi Oktob, me zot annan dispensation ki i pe al donnen toudswit pou zot carry on avek zot proze.

E mon mazinen sa ti’n arive.  Mersi.  Se lo kote zis en pti klarifikasyon mon tann li pe koz lo micro manage.  Mwan mon krwar ou bezwen micro manage si nanryen pa marse e ou bann dimoun i enkonpetan!  Mon pa krwar dan LDS, ou pou annan en Gouvernman ki enkonpetan !  Mersi.

 

(APPLAUSE)

 

MR SPEAKER

Mersi.

 

(Off-Mic)

 

MR SPEAKER

Non, nou pa pou ouver deba.  Non, non Onorab Pillay.  Order! Order! Order! Onorab De Commarmond in demann en leklersisman, mon’n donnen.  E mon dir nou pa pe ouver deba an deor en deba ki deza devan nou.  Onorab De Commarmond mon a redonn ou laparol ou ava kontinyen avek ou entervansyon. Onorab.

 

HON CHARLES DE COMMARMOND

Mersi Mr Speaker.  Mr Speaker i kler ki Ms Dugasse i pa li ki ansarz Review Panel e sa issue  se Review Panel ki pe ekri.  E la mon war petet en enterferans.  Me  an tou leka si li Ms Dugasse kin fer sa mon a demann li pou li intervene pou zisteman sa problenm uniform – ok?  Mon poz sa la.  E an menm tan, mwan mon asire Onorab avek sa ki’n ganny dir dan Lasanble ,Speaker avan mwan, mon asire mwan ki tou dimoun deor pe reflesir bokou lo lekel ki zot pou met o pouvwar dan pei dan next election !

 

(APPLAUSE)

 

HON CHARLES DE COMMARMOND

Mr Speaker sa Mosyon ki devan nou, i en Mosyon ki senp.  I en Mosyon ki pa ni konplike, e i en Mosyon ki pe demann en senp keksoz.  I pe demande ki Praslin ek bann Zil Pros dan bann Board ki annan pou fer avek zot, ki annan zot bann profesyonnel, zot bann graduates, zot bann dimoun ki konn keksoz, lo zot bann zil, lo sa rezyon la – nou teritwar ki zot ganny reprezante e reprezante korekteman.  Se tou.

Nou, nou’n anmenn sa deba – nou’n al demann ki mannyer pou administre sa bann landrwa ; kalite keksoz – zot met en dimoun dan Cabinet lot, lot. Nou  mwan mon krwar loter Mosyon i pa pe ale dan sa direksyon, sansan son Mosyon ti a’n ganny refer e i ti a reflekte sa ki nou pe dir dan Lasanble.  Alor so sa Mosyon, i pa ankor arive lo sa nivo.

E alor mwan mon krwar nou devret stick lo lespri sa Mosyon.  Stick lo sa ki Mosyon pe demande, pou ki bann profesyonnel lo Zil Pros e Praslin e La Digue, savedir i ganny reprezante lo bann Board ki annan dan pei, e sirtou sa bann Board ki annan pou fer avek zot.

Mon krwar sa i en tre bon Mosyon.  E ki Lotorite ki apwent bann Board – si i annan detrwa Lotorite, si i annan enn sa bann Lotorite ki apwent bann Board i bezwen ekout nou Mosyon, ekout bann entervenan,  ekout bann sizesyon pozitiv e byen ki’n ganny dir lo sa Mosyon, pou ki zot met an pratik. Akoz  mwan mon krwar poudir sa Mosyon i fer sans e ki Praslin e bann zil pros La Digue i bezwen korekteman – reprezante zisteman pou anmenn en pli gro zefor – en pli gro lavwa – en pli gran pouvwar si oule, pou pous bann issues ki annan pou fer ki sa bann Board i reprezante.

I annan plizyer Board, e loter Mosyon in mansyonn plizyer Board e i annan ankor parmi sa 104 Board ki i dir i ti ava byen si alor sa bann dimoun, bann profesyonnel Praslin e La Digue, bann Zil Pros i ganny korekteman reprezante lo la.  E mwan, mon krwar mon sa lespri sa Mosyon i devret al osi en pti pe pli lwen, letan ki bann dimoun ki pe desid bann dimoun pou met lo Board, mon krwar zot devret pe reflesir pli lwen, akoz i annan bann landrwa lentere ; i annan bann rezyon lentere kot ler Board i ganny fer, sa bann lentere i bezwen ganny reprezante ki parfwa nou war lo bann Board i pa ganny korekteman reprezante.

Mon donn en legzanp mon sorti en pti gin lo Praslin pou vin  lo Mahe  li menm, ou pran ou dan bann rezyon lagrikiltir.  Me dan bann rezyon lagrikiltir sa Board ki zer bann later lagrikiltir souvandfwa ou pou war ni en fermye lo la.  Ou pa war ni en dimoun strong agrikilter lo sa Board.

Sa osi nou anvi ki sa bann dimoun ki desid bann Board – desid bann Manm lo bann Board, i pran sa konesans sa ; i pran sa lentere ; i be mindful of met dimoun ki annan sa bann lentere osi dan sa bann Board.  En legzanp ou pran ou tourizm.  Menm zafer.  Petet dan nor – dizon dan nor, i landrwa touristik en pe pli enportan, e therefore  laba ou bezwen war dimoun ki pe reprezant sa lentere lo STB.

Konmsi nou bezwen kot nou pe ale  servi sa bann keksoz dan en fason pli efektiv.  Ou war Mr Speaker letan en pei pe devlope – pli i devlope e i pe devlop byen, ou pou war nesesite pou enrich sa bann diferan Board, avek sa bann lentere ki nou pe koze.  E ki mon krwar bann dimoun ki’n entervenir, i pe osi pans keksoz dan sa bann direksyon.   Byensir i pou lead pou plitar ariv lo sa ki petet nou pe anticipate deza dan Lasanble.  Mon konnen nou’n debord sa Mosyon, me petet sa  i ava en  konversasyon pou en lot moman, mon panse.  Me la nou pe dir efektivman, annou al pa par pa, e konsider sa ki loter Mosyon pe dir, e annan sa nesesite pou ki lo bann Board i annan sa zerans ki pran an konsiderasyon lentere Praslin e bann Zil Pros.

Nou war Mr Speaker ki si sa i ganny fer i pou fer ki bann Board ki annan pou fer avek sa rezyon i pou pli konplet, e lentere sa rezyon i pou ganny plis ganny  pran an konsiderasyon e byensir an letan nou pe apwent sa bann dimoun, nou bezwen fer sir ki nou pe met bann dimoun ki konpetan, bann dimoun ki kapab byen koze e byen reprezant lentere sa bann group.  E lentere sa rezyon dan sa ka la, nou pe koz lentere Praslin ek bann Zil Pros.

I annan en kantite dimoun ki pou rezyon istorik rezon de konesans, zot la zot konn landrwa, zot konn sa teritwar, zot konn sa premis sa ki nou pe koze, e zot kapab definitivman zwe en rol bokou pli byen, e gid lezot i kapab gid bann ki pli zwenn, menm ki zot annan en serten konesans teknik osi syantifik plis, me zot annan osi lezot konesans.

E mon krwar mwan ler ou met dimoun ki annan lentere sa rezyon a ker, ki sorti dan sa landrwa spesifik, ler la osi lentere sa landrwa byensir i pou ganny regarde avek plis lentere ; pli focus lo bezwen e dinamik sa landrwa.  E la nou pou war poudir pei li menm sa rezyon li menm i pou avans bokou pli vit e bokou pli byen.

Akoz nou remarke nou poudir i parfwa dimoun ki napa lentere dan sa area – i pa tro pran konsiderasyon.  I pa tro santi sa ki pe pase dan sa area.  Si ou pe pran ou, ou met dimoun dan lagrikiltir me i pa sorti dan rezyon lagrikiltir mon pe mazin la Baie Lazare, Anse Boileau ensidswit, me zot pa pe konpran listwar sa landrwa.

Ou met en dimoun Cascade ki pa konn nanryen laba, me i pa pou konpran ! So se sa rezon ki mon pe sey dir ki nou bezwen o fil a mezir ki nou pe avanse, e nou pe avans dan sa bon direksyon, nou bezwen pe fer keksoz ki include.  E la mon tous sa ki Prezidan in dir.  Prezidan i pe kontinyen fer nou mazinen poudir e i enn son Polisi anfen kont – inclusivity.  I bezwen fer sir i enkli tou dimoun.  I pa pe gete san menm sa i dir ou Prezidan Lanasyon i pe get Sesel avan tou.  E kot i pe fer sir ki i enkli tou lanasyon tou pep Seselwa pou sakenn zot ganny sans pou kapab zer pei e non pa zis get zis en group dimoun en kote.

Me i get keksoz dan son totalite e gete kote nou potansyel i été, pou nou kapab servi e fer ki Lanasyon i devlop dan en fason pli inclusive e sa i en bon konklizyon ki Prezidan i annan.  E se sa ki mon pe dir dan sa Mosyon nou pe dir sa vizyon Prezidan i devret ganny egzekite to the maximum ler nou pe koz osi dan bann rezyon.  Be inclusive dan sa fason.

Mon sir Mr Speaker ki tou sa bann pwen ki’n ganny avanse, i bann pwen ki pou anmenn pei pli devan.  E tousala i tonm byen, avek Mosyon ki’n ganny avanse avan dan Lasanble.  Semenn pase letan nou pe koz lo empowerment local community, tousala i form par en pti pe dan sa direksyon.

E nou war poudir alor, sa Mosyon parey senpleman i pe dir enkli potansyel dan sa rezyon lo bann Board ki annan pou fer avek larezyon.  Mr Speaker mon ti ava demande ki nou fer okenn gro issue avek sa Mosyon. Parske Mosyon parey mon dir i en Mosyon ki senp, selman nou koz preski en zournen lo la, me petet i bon, i a fer li vin pli ris.  E alor annou nou tou nou Manm nou krwar ladan.  Si nou krwar ladan alor annou siport sa Mosyon.  I en Mosyon ki bon. I en Mosyon ki pou avans pa zis rezyon Praslin, La Digue ek bann Zil Pros li, me i en Mosyon ki mon panse mwan i pou tous lezot rezyon ; i pou tous lezot groupman lentere ; i pou tous lezot area kot nou kapab santi nou kapab avanse, e lentere bann dimoun i ava pli enklisiv ; pli konpreansiv e pli byen.

Me selman nou lans en lapel – en lapel strong avek bann dimoun ki ganny reprezante lo sa bann Board.  Pou zot osi pa zis vin lo Board e pou krwaz lebra, me pou kapab lite kapab kontinyen persevere kontinyen pouse pou lentere sa area, i ganny promouvwar, ki ganny avanse i ganny ekoute e ganny fer marse dan lentere kominote dan sa area.

E ler la nou Lasanble i ava osi la pou soutenir zot. Ler i ava annan problenm bann diferan striktir ki ava annan, i enportan fer nou konnen. Diferan Komite ki Lasanble i annan, i enportan ki zot liaise osi avek sa bann diferan Komite, pou nou donn zot sa sipor.  Akoz ler mon pe gete, fason ki nou pe bouze, pa kapab sakenn dan son izolman ; pa kapab sakenn dan son silo.  Nou bezwen pe bouz ansanm.

E mon krwar mwan poudir i annan en lavantaz ; i annan en benefis, letan sakenn pe korpere, letan enn pe siport lot.  Letan i annan en mankman dan en kote, nou fer konnen kot i annan problenm, pou ki lezot area i donn koudmen, pou fer avanse lentere nou diferan kominote, e lentere alor lepep Seselwa e nou tou ansanm konman sa Nasyon, ki pe avanse dan en  linite – dan en fason, pou nou prospere nou tou.  Mersi bokou. Mon a demann tou dimoun pou siport sa Mosyon.  Mersi.

 

MR SPEAKER

Mersi Onorab De Commarmond.  Mon a donn laparol dernyen entervenan avan nou al lo konklizyon.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker konnen parfwa dan lavi parey nou mansyonn sa mo listwar, parfwa i enportan pou nou konn en pti git listwar avan ki nou fer serten deklarasyon.  E petet mon ti ava zis kontan Mr Speaker premyerman poudir ki mon vreman fyer sa lekip LDS sa lekip LDS Mr Speaker konman par ou e nou tou se tou bann dimoun ki konn teren dan eleksyon 2016 nou tou ki la konman dan Lasanble nou elekte direkteman oubyen lo baz proporsyonnel nou tou nou konnen ki savedir teren.  Tandis ki lot kote latab i annan 10 ki konn teren e ki’n partisip dan sa dernyen eleksyon me i annan 4 ki pa konnen ki savedir teren dan sa dernyen eleksyon.

E malerezman parfwa sa mon ava dir sa 4 mon a dir 3 i annan 3 zot koz pli for – zot koz lo menm nivo poudir Manm proporsyonnel ensidswit.  Be Mr Speaker mon anvi fer kler ki dan sa Lasanble la mon ganny elekte 2 fwa St Louis mon ganny elekte 1 fwa Anse Etoile e dernyen eleksyon mon perdi par 53 vot La Riviere Anglaise.  Be Mr Speaker mon ti ava kontan konmsi pou montre sa bann ki koze pou montre ki mon pa dan menm league avek zot mwan.

 

(APPLAUSE)

 

HON WAVEL RAMKALAWAN

E mon ti ava kontan si okenn dimoun lot kote latab ki’n deza ganny li 31,19mil vot dan en eleksyon lev son lanmen anler silvouple!

 

(APPLAUSE)

 

HON WAVEL RAMKALAWAN

 

 

Mon a donn zot letan.

 

(Interruption)

 

HON WAVEL RAMKALAWAN

Mon pe donn letan Mr Speaker.

 

(Interruption)

 

HON WAVEL RAMKALAWAN

Mr Speaker napa personn ? Napa personn, alor Mr Speaker letan zot pe koz politik pa met Ramkalawan dan zot equation, akoz Ramkalawan i pa zwe Sunday league parey zot!

 

(laughter)

 

HON WAVEL RAMKALAWAN

Mr Speaker aprezan mon ti ava menm dir avek zot,  pran tou zot vot sa bann ki la dan  sa Lasanble, azout ansanm e Ramkalawan i still par lao zot tou !

 

(APPLAUSE)

 

 

HON WAVEL RAMKALAWAN

Alor letan pa konnen ki poudir reste trankil akoz …

 

(Interruption)

 

HON WAVEL RAMKALAWAN

Mr Speaker.

 

MR SPEAKER

Kontinyen Onorab.

 

HON WAVEL RAMKALAWAN

Mr Speaker avan mon konmanse mon ti a kontan ki Onorab Gill i donn mwan en pti leklersisman.  Onorab Gill in mansyonnen poudir i annan 8 Board ki annan en dimoun ki sorti Inner Islands reprezante.  Mon ti ava kontan si Onorab Gill i ti ava kapab donn mwan pou fasilit  mon travay dan mon prezantasyon, lekel sa bann dimoun ki lo sa bann Board?

 

MR SPEAKER

Ou annan lenformasyon Onorab?

 

HON CHURCHILL GILL

I annan mon mazinen, mon kapab dir li me selman mon annan lo mon laptop mon kapab gete.  Sa ki mon mazinen mon kapab dir li ;  SIB, Marc Volcere, Seychelles Agricultural Agency Hensley Constance, Seychelles Trading Commission anyway STB i Sybil Cardan.  Ou kapab fer ou lentervansyon touzour akoz mon annan lalis tou sa Board mon ava donn ou pou Heritage Foundation Trading Leritaz apre Linyon.  Linyon i preski tou Manm espekte mon krwar zis en dimoun sorti kot Minister Finans.

 

MR SPEAKER

Mersi Onorab.

 

HON CHURCHILL GILL

Selman mon a fer ou lentervansyon mon a donn ou en pti kou.

 

HON WAVEL RAMKALAWAN

Mr Speaker rezon ki mon demann Onorab Churchill Gill sa kestyon se pou senpleman montre en senp pti legzersis.  Se pou senpleman montre Onorab Gill ki li konman MNA probableman, zanmen sa bann dimoun in konsilte avek li.  Zot lo Board zot, zot sorti Inner Island. Me zot pan zanmen konsilte avek li, se pou sa rezon ki i pa kapab mansyonn zot non off hand.  Si sa bann dimoun ki lo sa bann Board, zot ti a pe konstaman koz avek li, i ti pou dan en pli bon pozisyon pou li par egzanp konnen kwa ki pe pase dan lo nivo Leritaz ; kwa ki pe pase lo STC lo LMWA ensidswit.

E rezon ki mon anvi – ki mon’n konmans koumsa se pou montre ki poudir  mwan mon krwar i pa en kestyon met Praslinois lo Board  Praslinois oubyen Diguois lo Board ki solisyon pou sa size ki Onorab Gill in anmenn devan.  Akoz? Ou pou met en dimoun sorti lo Inner Islands lo tou sa bann Board – sa 4 Board e si ou bi se pou ki i annan konsiltasyon avek bann dimoun Praslin, avek bann dimoun La Digue, pou pli byen konpran zot bann issues ensidswit, pou pli byen koz avek bann dimoun, mon krwar ki se en lot keksoz ki ou bezwen.   Parske dan lafason ki i été la, pa sa ki ou pou gannyen. Annou pa bliye parey Onorab Afif in fer nou mazinen.  E letan nou get definisyon en Board – en Board se prensipalman son rol, se pou etabli bann Polisi pou regard bann pou li regard sa corperate management, pou li annan en oversight e pou li pran desizyon bann desizyon enportan.  Parey nou pe dir Board SRC par egzanp – Board SRC i pa al lo Erport pou li anmas reveni li.  Board SRC i pa fer sa bann travay.  Board SRC letan Komisyoner ek son lorganizasyon i pe pas dan bann issues ki zot bezwen tackle, la aprezan zot anmenn devan Board.

Par egzanp letan ou annan ou bann dimoun ki pa pe pey zot bann taks ki bezwen g peye e zot pe anmas sa reveni ki zot devret anmase, la aprezan petet zot ava anmenn sa devan Board e poudir be regarde i annan tou sa bann dimoun la ki drwa e alor nou anvi stamp Board pou nou anmenn zot Ankour.

Se sa en pe rol en Board.  E mwan letan mon’n asize mon’n ekout Onorab Gill e mon bezwen admet Mr Speaker, i annan serten dimoun ki mon pa’n ekoute ler zot ti pe koze, akoz mon’n konmans ekoute, e apre mon’n war ki poudir ou pa pou ganny nanryen ladan.  Konmsi menm parey ou war – konmsi ou konnen ki poudir napa nanryen ki ou pou gannyen ladan, parske i zis pa fer sans, i zis e alor ou rapor e ou kontiny ou larout e ou pa reste anba sa pye mang.  E letan ou regarde koko ki pe tonbe, akoz ou konnen poudir ou anvi mang me koko ki pe tonbe lo en e kekfwa menm konpra ki pe tonbe lo sa pye koko.

Mr Speaker dan sa direksyon,  mwan mon krwar ki sa ki Onorab Gill pe rode se en ladministrasyon efektiv.  Mon krwar ki i anvi en ladministrasyon efektiv, ki pou annan sa oversight rule lo sa ki arive Praslin ; sa ki arive La Digue ek bann zil satelit.  E mon krwar ki i vreman byen ki i pe rode, me selman la an menm tan mon bezwen dir Mr Speaker, ki letan mon kalkile depi 9er bomaten la byento 5er pe al sonnen depi dan 9.30 mon kapab menm bomaten depi 9er bomaten nou konmans koz lo en Mosyon ki annan pou fer avek gouvernans – gouvernans  mwan mon vreman soke.

Spesyal nou annan nou en Prezidan ki koz tanzantan lo bonn gouvernans !  E sa dan li menm pou mwan i montre failure, parske sa ki zot Prezidan ki’n fek retourn dan zot parti, i dir e sa ki arive i totalman diferan !  E la dan Lasanble nou annan Manm Elekte pou Baie Ste Anne Praslin, ki pe dir i annan problenm gouvernans.  Bann dimoun dan sa bann zil, zot pa pe kapab konnen egzakteman kwa ki pe pase.  Bann desizyon i ganny pran e alor Onorab Gill li i pe dir met lo Board pou ki i kapab annan en bon reprezantasyon, e zot ava vreman konnen kwa ki pe pase.

Alor Mr Speaker sa Mosyon dan li menm li e sa kantite letan ki nou’n pran i montre en failure.  I montre en Gouvernman ki pe al dan tou direksyon, e finalman i pa pe ariv okenn par, e sa pou mon Mr Speaker – e la mon bezwen fer li akoz Prezidan in dir ki  mwan mon fer politik dan Mardi e dan Merkredi, alors sa i ava permet mwan –  i ava kontan pou tande ki avek sa kalite sityasyon, mwan  mon pou dir Mr Faure e parey nou slogan i dir ‘’DANNY OUT !’’  Parske i montre nou klerman ki nou annan nou en Gouvernman ki pa efikas – en Gouvernman ki i pa konnen ki i pe fer – en Gouvernman e menm son Manm Elekte pa konnen ki i pe fer !

Alor Mr Speaker sa i mon premye pwen.  Me ou konnen an menm tan osi Mr Speaker, letan mon ekout Onorab Gill e nou koz byen nou de Onorab Gill, mon kapab konpran en i annan en serten fristrasyon. I annan en serten fristrasyon.   Akoz?

Be se parske tou bann keksoz ki’n sipoze fini fer, zot pa ankor fer.  Lot zour nou koz lo stasyon PUC – be stasyon PUC tou ban dimoun otour stasyon PUC i ankor menm zafer.

Mon’n obzerv ladministrasyon rezyonal Regional Council pou Inner Islands sa semenn pe fer vizit mon war zot in desann Praslin e zot in vizit lopital Baie Ste Anne e mon’n en pe soke bann keksoz ki zot in dir. Letan zot in ariv La Digue  mwan mon’n vreman felisit – mon ti a kontan felisit Mr Constance pou son deklarasyon ki in fer.

Letan i dir Minister Ledikasyon li i met lanfaz avek bann etidyan pou li meet  zot targets.  Me letan i regard lekol La Digue, li i anvi dir avek Minister Ledikasyon se zot ki pa pe meet zot targets!  Pourtan – pourtan Mr Speaker  e sa ki fer li grav sa msye i sel MNA Parti Lepep, parske li i pa ti dan US – i sel parti i sel MNA Parti Lepep pou La Digue ek bann Zil Pros ki’n dan Lasanble pandan 2 manda.  Ordinerman La Digue zot vin zis pou 1 manda.  Me li sa msye in la pou 10an e letan i koze demande be ou’n la 10an, be ou pa’n kapab met presyon? E la mon dakor – mon vreman dakor avek Onorab William letan in dir kontrerman parey zot in dir lo kote zot dir Onorab William, in admet ki poudir ki 15 lo 10 in anmenn en nouvo latmosfer kot nou santi nou lib pou nou koze !

 

(APPLAUSE)

 

HON WAVEL RAMKALAWAN

E Onorab Constance kapab dir sa ki in dir e probableman i pa ti ganny drwa dir sa ki in dir dan sa 10an ki i ti dan Lasanble!  E nou pe dir Mr Speaker wi nou pou kontinyen larg – konm dir Kreol – nou pou kontinyen koup zot file pou zot koz byen, pou zot koz for, akoz finalman letan nou pou koz for, letan nou pou koz fran, se nou pei Sesel ki pou avans devan.

E Mr Speaker mon’n osi apresye sa ki Onorab Pillay en parol ki in dir – parske mon pa’n ekout  bokou sa ki in dir – i annan en parol ki’n dir ki mon vreman kontan.  I dir e letan in dir sa, mon’n aktyelman ekri i dir ‘’nou lizye pe ouver !’’

Ar! Mr Speaker pa ou fyer ou osi ou dan sa lekip ki ouver lizye Onorab Sebastien Pillay?  E wi nou pou kontinyen ouver zot lizye pou nou kapab anmenn sa pei pli devan.  Alor Mr Speaker, parey mon pe dir mon konpran Onorab Gill, e Onorab Gill parey nou konnen letan i lo FPAC i enn bann dimoun ki demann bokou bann kestyon ki valab, ki fer en gran kontribisyon lo FPAC.  E byensir sa bann dimoun ki pa oule nonm listwar, se pa Onorab Gill akoz Onorab Gill li osi tou sa listwar parfwa i may li zanbek, oubyen i delarg son lase soulye, apre i met lipye lo la.  Mon konnen ki poudir Onorab Gill malgre ki i MNA Baie Ste Anne Praslin, wi i annan serten ki dan son menm parti ki sey fer en fason tanzantan pou may li zanbek!

E alor Onorab Gill i a pe dir be ki mannyer nou pou bouze dan sa sityasyon?  E Ile Eve – e byensir Mr Speaker Onorab Gill menm si serten parmi zot i le sot lo Onorab Woodcock, be Onorab Gill pa konnen ki poudir malgre ki Mr Luc Grandcourt i enn sa bann Praslinois ki’n anmenn preski en keksoz pou  tou dimoun Praslin ki annan bato pandan tou sa bann lannen, ki poudir Mr Luc Grandcourt, li letan i ti pe partaz later lo Ile Eve i pa ti ganny en morso.  Akoz i pa ti ganny en morso?  Akoz i siport Lopozisyon e Mr Luc Grandcourt pou kontinyen siport Lopozisyon.

E Mr Speaker pou Mr Luc Grandcourt kapab ganny en bout later, mwan personnelman mon ti bezwen entervenir.  Wi mon ti bezwen entervenir, akoz se parske parey Onorab Churchill Gill e Onorab Woodcock i konnen, i annan en lenzistis.  Letan pe koz lo bann ki’n ganny bout later wi i annan ki’n ganny de bout later zot in vann pou milyon.  E la Mr Speaker letan nou pe koze, i annan dimoun ki pe sey rod vann ankor bout later, tandis ki i annan lezot dimoun ki serye, ki anvi ganny en bout later,  zot, zot pa pe gannyen.  Alor Mr Speaker  mwan mon krwar ki poudir lazenes bann zenn parey Onorab Valmont, zot bezwen konnen sa listwar.  Zot bezwen konn sa listwar pou zot fer sir ki zot pa tonm dan sa menm trou.  Ki zot pa tonm dan sa menm trou

E mon enn sa bann dimoun e Onorab Valmont i konn byen ki mon letan mon regard bann zenn MNA – letan mon regard bann zenn MNA mon anvi ki bann zenn MNA lo nenport ki kote latab zot ede pou lev nivo deba dan nou Lasanble pou aport en kontribisyon konstriktiv pou nou pei pou nou kapab avans devan.

E dan sa lenstans malgre ki Onorab Gill laz nou pa pou met li dan kategori lazenes, me selman in vin dan Lasanble e in la pou premye fwa, mon ti ava kontan dir avek li Onorab mon krwar ki ou Mosyon pou konpran ou lentansyon e menm annan enn ou Manm lot kote ki’n dir i siport lespri ou Mosyon, me selman mon pa konnen si i siport lekor ou Mosyon.

E  mwan mon krwar ki sa ki ou pe rode pa Board ki pou donn ou.  E mon’n sey koz en pti git avek ou, mon pa konnen si ou pou dakor avek sa ki mon pe dir, me  mwan mon ti ava kontan dir avek ou –  si ou anvi aksepte ou aksepte,  mwan mon ti ava dir avek ou Onorab Gill, pou nou kapab bouz devan, pou ki Praslin avek La Digue i pa santi zot toultan ganny neglize ; e la ankor enn fwa mon konpran sa neglizans ki zot santi – e nou’n koze dan sa Lasanble pou nou tou ki la dan sa 6enm Lasanble.  Pran par egzanp La Digue.  La Digue Bidze pou Lopital i la me selman i étale lo 4an, be nou pa demann nou en kestyon be akoz ki Lopital La Digue i bezwen ganny étale lo 4an? Akoz ki sa Gouvernman i pa dir nou pe pran en desizyon sa lannen nou pou fer Lopital La Digue e nou pou fini avek sa.

Kordgard Baie Ste Anne li osi tou en pe parey kordgard La Digue parey lekol La Digue e mon kontan servi sa legzanp Mr Speaker letan nou pase nou war Pangea Apartments.  Mr Speaker Pangea Apartments i annan 4 blok – 4 letaz – 4 floors se bann luxury apartments.  I annan en marina, in ganny fer dan lespas 1an. 1an in ganny fer.  Be kisisa ki anpese ki en Lopital pou La Digue i ganny étale lo 4an?  Be sa pou en luxury – konmsi nou pe al fer en Lopital en nouvo Lopital Victoria?  Nou pe al fer ki nou pe al fer?  Be en Lopital son standar i mwens i pli ba ki en luxury apartment alor kisisa ki anpese pou nou fer?

E alor Onorab Gill mon krwar ki mon ti ava kontan fer en propozisyon avek ou. Parey mon pe dir ou kapab dakor avek sa propozisyon mon pe senpleman ed ou. Distrik Baie Ste Anne avan ki ou ti ne mon tin deza konmans marse lo son later akoz mon fanmir sorti Baie Ste Anne parey ou konnen.  E mwan mon ti ava dir si ou Mosyon ti lir koumsa: ‘‘Etandonnen’’ ok ou met en ‘etan’ avan ‘‘Etandonnen grander popilasyon Zil Pros e lakantite varyete ekonomik ki pe kontinyen grandi, enkli bann devlopman gouvernmantal, sa Lasanble pe demann Gouvernman, pou etabli en bon sistenm administratif, pou asire ki benefis e lentere e lavwa zabitan Zil Pros i ganny ekoute e respekte.’’ Ki nou tir sa mo ‘’fer li posib pou profesyonnel ziska Board dan pei’’ ou tir sa e ou ranplas li avek ‘’etabli en bon sistenm administratif’’.

E sa sistenm administratif i kapab byensir nou pa kapab dir Gouvernman ki i pou fer egzakteman. Me Gouvernman li, letan i ava lir sa Mosyon, i ava santi ki poudir i pou bezwen en bon sistenm administratif.  E once ki’n ganny li sa bon sistenm administratif, Ou konnen ki pou arive Onorab ? Atraver ou Mr Speaker letan LWMA i annan pou i annan keksoz pou li vin fer Praslin i ava bezwen konsilte sa sistenm administratif.  Ki konmsi finalman tou sa bann zafer ki ou pe koz lo la lo Board, sa sistenm administratif, ki byensir mon mazinen i pou enkli konsiltasyon avek MNA zot pou toultan okouran.

Prezidan avan ki i pran en desizyon par egzanp pou anonse, ki poudir pou al fer en konblaz i ava bezwen dir be mon bezwen konsilte avek sa ladministrasyon nou ava koze e zot ki viv lo sa zil toulezour zot ava dir avek li par egzanp ; Mr Prezidan kot ou pe dir ou pe al fer sa konblaz kekfwa ou bann teknisyen ki’n dir ek ou fer konblaz la.  Be Mr Prezidan be la sa bout ki ou dir ou pe al fer en konblaz, se sel landrwa kot touris avek Praslinois letan nou pe desann sorti Vallee De Mai se sel landrwa kot nou trouv Cousin ek Cousine dan en line of symmetry. 

Kot nou war zot enn in vir en fason lot in vir lot fason zot in war kanmarad. La i sel landrwa ki touris e Praslinois nou kapab trouv en zoli sunset over Cousin ek Cousine.  E pa zis regarde ki akoz la i en bout ki en pe sek, sek ki alor nou pou vin fer konblaz akoz letan nou pou fer konblaz la i annan en bout lo nou zil ki pa pou marse ! Letan ou Konsey administratif i ava pe fer son travay par egzanp i ava kapab dir avek PUC, ‘PUC kot ou’n met ou poto elektrik anler Zimbabwe pa bon, akoz ozordi letan en touris pe sey rod en zoli pozisyon pou li tir portre Ile Aride, Ile Curieuse avek bout kot La Reserve i été dan son portre, i pou ganny bann difil elektrik.

Mr Speaker ou konpran ki mon pe sey dir?   E Onorab Gill osi tou mon konnen ki i konpran ki mon pe sey dir.  Letan Board Touris i vini pou li fer serten keksoz ankor enn fwa sa bon sistenm administratif ladministrasyon ki i ava ganny etabli Onorab atraver ou Mr Speaker i pou depas sa bann zafer Board Planning osi tou i pou bezwen pas atraver sa administrasyon, e se la kot ou pou ganny kontrol.

E sa ladministrasyon i ava osi kouver La Digue, e La Digue osi tou i a kapab fer son lavwa tande !  I ava kapab met devan son bann konsern.  E ki pou arive ?  Ou konman MNA ou pou annan en pli gran say ; ou pou kapab met presyon kot fodre met presyon.  Ou pou kapab letan in ariv ler sa sistenm ladministrasyon ou pou ganny drwa dir avek sa Board nenport ki Board, nou le war zot en kou Praslin.  Bann Praslinois i bezwen war zot en kou, akoz nou annan en size la ki nou anvi diskit avek zot.

Empowerment annou pa mazinen ki poudir anvoy en dimoun lo sa 104 Board oubyen menm si pa 104, pa mazinen ki poudir anvoy en dimoun lo Board i pou empower dimoun Praslin avek dimoun La Digue.  I pa pou arive.  Akoz?  I senp. Be letan sa boug ziska aprezan ou annan ou 8 Board ki ou lo la.  Eski a okenn moman sa bann dimoun ki lo sa bann Board in dir be regarde, nou pou fer en miting dan sant kominoter Baie Ste Anne Praslin, oubyen Grand Anse Praslin, oubyen La Digue pou nou diskit tel size ki konsern nou.

Non.  Parske sa boug li i sorti Praslin oubyen La Digue i desann Mahe pou asiste son Board miting, eksepte si i L’Union Estate ki i al Linyon ok ;  i al asiste son Board miting apre sa i retourn Praslin li.  I pa telefonn Onorab Gill li pou li dir Onorab la ozordi nou sorti miting Board e i annan tel size ki nou diskit lo la.  Non.  Akoz se parske sa dimoun i ganny mete lo Board konman en endividi.  I en endividi lo Board e konman en endividi lo Board si li i anvi konsilte avek ou, i konsilte be si ou ladministrasyon pou Zil Pros i solid sa Board ki pou bezwen konsilte avek ou.

E letan sa Board i konsilte avek ou la i annan empowerment ; la ki ou for la ki Praslin avek La Digue pou kapab met zot lipye ater la ki nou pou kapab osi deal avek bann size ki zot koz lo la toultan.  Paspor lizour letan mon kouzin ti mor sa dimoun ki ansarz sa dimoun ki ansarz Civil Status i desann Mahe avek lakle.

Pou deklarasyon lanmor ti bezwen enta erdtan avan.  Lo apre midi bann fanmir in asize la lo apre midi ki zot in kapab finalman deklar lanmor.  Se sa bann keksoz ki – aprezan bann servis bann dimoun Praslin i ava ganny pli bon servis sa ladministrasyon i ava kapab met presyon lo Gouvernman pou ki dimoun i ganny servis pli efikas ; dimoun La Digue osi tou zot depans i ava koupe e zot ava kapab pran.

Par egzanp Air Seychelles la ozordi keksoz in improve enpe me avan en dimoun La Digue ki ti bezwen en tiket pou li desann Mahe lo avyon, i ti pas lo en kantite problenm.  Be la dan sa ki mon pe dir zot ladministrasyon i ava koz ek Air Seychelles i ava dir avek Air Seychelles zot Board la nou anvi ki zot annan swa en laranzman avek enn bann travel agents pou kapab pey tiket laba oubyen en pti biro Air Seychelles.  Se sa lespri e mon parey mon pe dir Mr Speaker mon konpran egzakteman sa ki Onorab Gill pe anmennen me selman mon zis anvi dir li ki sa ki ou pe dir dan ou Mosyon nou kapab zis fer sa pti tweeking e an menm tan osi i pa defann ki letan Gouvernman i swiv sa Mosyon ki Gouvernman osi i an plis ki son sistenm ladministrasyon i mazinen ki poudir i annan enn de Praslinois i annan sa abilite, pou zot kapab reprezant pou zot vin bann Manm Board atraver zot abilite zot kontribisyon ki zot kapab fer e pou met zot osi tou ki zot Praslinois ki zot Diguois pou kapab mete.

Alor Mr Speaker mon met sa la lo latab, mon pa konnen ki mannyer Onorab Gill i ava pran sa, me parey mwan mon la zis pou sey ede pou nou kapab trouv en serten solisyon parske Praslin La Digue i form parti Sesel.  E letan nou war ki poudir i annan problenm lo Praslin oubyen lo La Digue i devret konsern nou tou akoz nou en Lasanble Nasyonal.  alor Mr Speaker avek sa de mo mon anvi dir ki mon ava regarde ki mannyer Onorab i respond, me selman mon krwar ki si nou pe al zis lo Board la nou pou al pas dan serten problenm e zot pe riye letan nou pe soz en pti git nou de Onorab De Commarmond i dir be Erport Mahe i tonm dan distrik Cascade avek Pointe Larue be alor i bezwen annan de dimoun konmsi bann reprezantasyon Pointe Larue avek Cascade lo Board SCAA.

Ou war ?  I sa kalite so Mr Speaker mon kit sa avek Onorab Gill mon pa pe rod nanryen mon pe senpleman rode ki mannyer pou ki Praslin avek La Digue e zot bann MNA mon konnen parfwa zot fatige repet menm keksoz.  Mon anvi ki zot aret repet menm keksoz parske konnen osi parfwa letan zot repete, bann zabitan i le bat zot me sa letan petet zot in anmennen sa zafer pli devan be mon anvi ki zot aret ganny menase.  Avek sa de parol Mr Speaker mon ava esper Onorab Gill pou mon determinen ki mannyer mon pou vote.  Mersi bokou.

 

MR SPEAKER

Mersi Onorab Ramkalawan.  bon mon a donn parol Onorab Churchill Gill pou fer son konklizyon.  Onorab.

 

HON CHURCHILL GILL

Mersi Mr Speaker.  Mon note ki deba lo sa Mosyon in tre enteresan.  Mwan mon konman loter Mosyon mon tre apresye sa bann diferan lentervansyon.  Akoz konman en Lasanble, tou Manm i lib pou fer kontribisyon dan fason ki zot santi zot devret fer lo sa Mosyon.  E Mr Speaker avan ler mon donn detay lo mon Mosyon, vi ki bann lentervansyon ki’n ganny fer  avan Leader  Lopozisyon in fer pou li, zot tou zot ti pe donn zot kontribisyon, ki mannyer zot ti ganny ekri.  Eksepte Onorab Afif apre Leader Lopozisyon ki’n pran en lot lapros, alor mon a adres problenm sa bann dimoun ki ti adres Mosyon parey in ganny ekri, apre mon ava bouz lo sa lot nivo lo sa de lezot entervenan.

E pou konmanse ou a zis permet mon Mr Speaker pou relir Mosyon ; vi ki parey in ganny dir depi bomaten 9er nou pe koze e bann lentervansyon i ganny war kekfwa dimoun ki pe ekout nou, i kapab perdi dan milye semen pou konpran ki sa Mosyon pe dir.  E Mosyon i lir koumsa pou benefis dimoun ki pe ekoute ; ‘’Donnen grander popilasyon  Zil Pros lapros e lakantite  varyete  aktivite ekonomik ki pe kontinyen grandi, enkli bann devlopman gouvernmantal, sa Lasanble pe demann Gouvernman pou fer li  posib pou profesyonnel  Zil Pros  ganny reprezante lo bann diferan Board dan pei, pou asire ki benefis lentere e lavwa zabitan Zil Pros  i ganny ekoute e respekte.’’

Parey nou kapab konstate napa mansyon dan Mosyon konmkwa mon pe demande ki annan nouvo Board i ganny formen pou Zil Pros  e i kler ki Board i pa pou adres keksoz ki pa dan zot manda.  Alors pou bann lentervansyon ki’n nonm bann size parey ; size por, pou lenformasyon piblik Praslin por pasaze i deza pe ganny fer e dan ankor 4mwan disi nou pe espekte ki sa por i ganny commission e sa pou adres konzesyon lo lasose ozordi, ki nou pe eksperyanse Baie Ste Anne.  E nou pa’n bezwen al atraver Board pou sa ganny fer.

Sa i montre ki wi Board pa pou adrese keksoz ki pa dan zot manda, e  mwan mon konn sa tre byen.  Se sa rezon ki sa bann keksoz pe ganny fer san ki nou bezwen al kot Board.  I annan osi size ki’n mansyonnen zenerater PUC nou pe ganny problenm tou sa letan, me sa osi pe ganny adrese.  Me nou pan ale kot Board PUC, akoz nou konnen sa kalite keksoz ki bor nou devret ale, pou ganny adrese e nou konn tre byen nou pa devret al kot Board pou keksoz ki pa dan zot manda.  E dan Mosyon osi, i annan koleg ki’n fer sorti ki i annan landrwa dan Praslin ki sal.  Dan Mosyon ozordi nou pa pe deal avek landrwa, si i prop, si i sal nou’n bouze lo la.  Nou pe deal avek bann desizyon ki annan keksoz pou fer avek Zil Pros  avek Praslin.

Akoz mon koleg Onorab William 2 semenn pase in anmenn Mosyon, ki nou tou nou siport li lo la, kot in demann pou desantralize e sa ti fer avek bann keksoz fizik apre bann keksoz sipor.  E ozordi Mosyon i pe mont pli o, i a pe koz lo desizyon ki pou ganny pran, ki pou tous Zil Pros  avek Praslin.  Nou premye entervenan in fer sorti ki ler i lir sa Mosyon i fer li rapel ler ki en group dimoun Praslin ti pe demann larepiblik. Mr Speaker sa Mosyon i very far from that akoz nou, nou pa krwar Praslin nou bezwen larepiblik nou selman krwar ki nou bezwen benefisye avek tou keksoz ki nou devret benefisye koman zabitan e Seselwa.

 

(APPLAUSE)

 

 

HON CHURCHILL GILL

Onorab mon koleg Onorab Grand Anse Praslin, in fer sorti ki menm si i siporte sa Mosyon, me selman i krwar poudir i annan bann serten Board dan lepase, ki zot performans pa’n neseserman adekwat.  E dan mon Mosyon ler mon ti pe donn mon prezantasyon mon’n fer sorti e mon a repete – mon a relir Mr Speaker, mon ti dir ki vi ki sa bann Board i ganny peye dan Consolidated Fund i devret mandatwar ki tou bann Board i bezwen rann kont, e donn en rapor anyel, lo sa bann lo zot bann aktivite an zeneral enkli finansyel.  Savedir dan mon Mosyon mon’n rekonnet sa e mon mete ki sa i devret ganny adrese akoz Mosyon se nou pe bouz devan.

E prezan tou sa bann mankman ki annan, mon’n mete bann landrwa kot sa bann mankman pou ganny adrese, si sa Mosyon i ganny assented par Egzekitiv.  I annan Onorab ki’n demann mon ki’n dir ki nou annan District Regional Council e ki mon annan poudir lo la, an relasyon avek sa Mosyon?  Mon senpleman an vi dir ki Regional Council i selman kapab propoz avek Gouvernman Lokal, oubyen bann lezot Lazans, ki i santi sa ki zot in al vizite – sa ki zot in diskite i tonm kot sa Lazans.  Kontrerman avek en Board – en Board i pran desizyon.  Se sa Mosyon i pe tous lo Board.  Nou pe koz kot desizyon i ganny pran, pa lo en group ki zot bezwen al propoze zot osi. Se sa diferans ki annan ant sa de, an relasyon avek sa Mosyon.

E nou annan Onorab osi ki’n mansyonn Planning Authority ki i vre i enportan ki devlopman ki ganny fer lo Zil Pros  e Praslin i enkli dimoun Praslin dan diskisyon ler i pe pran plas, se pou sa rezon ki dan mon prezantasyon, mon’n mansyonn bann Board ki mon santi profesyonnel Zil Pros  ek Praslin i devret ganny reprezante.

E Planning Authority osi in ganny mansyonnen ladan.  Me parkont i annan bann Onorab osi ki’n konpran tre byen ki sa Mosyon pe demande.  I annan ki pou letan zot in konpran byen, zot in fer bann kontribisyon ki tre valab, akoz zot realize ki dan en pei demokratik nou evolye.

E ler ou pe evolye ou bezwen evolye dan tou sans, e pou sa rezon ki dan diferan laspe en pei, i annan letan kot dan ou grassroot ou bann dimoun osi i bezwen santi ki zot form par dan desizyon ki ganny pran ki tous zot.  Se sa lide sa Mosyon. E prezan Mr Speaker si ou permet mwan, mon a vin lo propozisyon amannman ki’n ganny met devan.  Mr Speaker ozordi nou dan en letan kot tou Seselwa deor i annan bokou lekspektasyon lo sa group dimoun ki zot in met dan Lasanble.  E ler nou pe asiz dan Lasanble nou en group menm si nou pe reprezant de diferan ideolozi oubyen pratik.

E  mwan mon krwar toultan ler i annan bann kontribisyon enportan ki pou ede amelyor sityasyon dan nenport distrik, dan nenport rezyon, nou devret kapab aksepte e bouz devan.  E depi ler 6enm Lasanble in vin in sermante, in annan bokou propozisyon ki’n ganny fer swa pou Egzekitiv swa pou bann Lazans atraver bann diferan Komite ki Lasanble i annan ki’n zwenn avek diferan Lazans e bann propozisyon in ganny pran konman en Lasanble.

E  mwan mon pa pou ezite pou mon aksepte en amannman ki mon santi i pou ede amelyor sa Mosyon dan fason ki in ganny ekri e an menm tan Mr Speaker pou letan sa lide i en keksoz ki mon deza koz lo la avek bann dimoun konsernen, ki annan keksoz pou fer avek sa kalite desizyon.  Mon pou osi fer propozisyon ki fason ki i kapab ganny marse.

Me selman avan i nou fer sa, sa propozisyon ki Leader Lopozisyon in propoze i pa en keksoz ki pou ariv dizour a lannmen.  Nou bezwen konpran sa.  E whereas bann Board ki nou pe koz lo la zot deza la e ziska ler sa propozisyon i arive nou bezwen pran sa bout ki konsern sa Board, pou akoz i annan bann Board ki pe al expire ki zot manda pe al ekspire tre byento, e nou a swete ki sa demann i ava pran an kont.

Alors sa amannman i pou ganny pran me selman mon pou azout li si propozisyon amannman i kapab ganny relir, pou mwan kapab akoz mon le azout li apre ki sa Mosyon apre respekte dernyen mo sa Mosyon prezan an menm tan mon le ki Gouvernman i osi konsider apre mon mars ek sa apre i ava al avek sa propozisyon.   Mon a relir.

 

MR SPEAKER

Ok mersi Onorab Gill.  Onorab Ramkalawan.

 

HON WAVEL RAMKALAWAN

Mr Speaker mon vreman apresye lespri Onorab Gill.  Dan sa ka mon ti ava dir nou pa bezwen met nanryen apre ‘respekte’ sa apartir sa: ‘‘Sa Lasanble pe demann Gouvernman pou etablir en bon sistenm administratif, e osi fer li posib pou profesyonnel lo Zil Pros  ganny reprezante lo bann diferan Board dan pei pou asire ki benefis’.’  Konpran  mwan?  Mr Speaker so Mosyon si Onorab Gill i swiv mon oubyen i ava lir koumsa: ‘‘Etan donnen grander popilasyon Zil Pros  e lakantite varyete aktivite ekonomik ki pe kontinyen grandi, enkli bann devlopman gouvernmantal, sa Lasanble pe demann Gouvernman pou etabli en bon sistenm administratif e fer li posib pou profesyonnel lo Zil Pros  ganny reprezante lo bann diferan Board dan pei pou asire ki benefis, lentere e lavwa zabitan Zil Pros  i ganny ekoute e respekte’’.  Ok mersi.

 

HON CHURCHILL GILL

Ok Mr Speaker mon’n gannyen.

 

MR SPEAKER

Mersi.  Kontinyen Onorab.

 

HON WAVEL RAMKALAWAN

Apre nou ava fer koreksyon pou donn ou sa proper wording pou Mosyon antye.

 

MR SPEAKER

Ok nou’n fini anmase. Madanm Clerk in fini anmase.

 

HON CHURCHILL GILL

Ganny li?  Ok.

 

MR SPEAKER

So i en …  En moman i en propozisyon?  En moman i en amannman ase sibstansyel.  Non i zis sa bout etabli en bon sistenm administratif e …

 

HON CHURCHILL GILL

Se sa ki’n antre.

 

MR SPEAKER

Apre larestan i reste parey.  Ok kontinyen Onorab.  I pa en gran lamannman eski nou bezwen ..

 

HON WAVEL RAMKALAWAN

Loter Mosyon in aksepte.

 

MR SPEAKER

Oun aksepte sa lamannman?  Ok bon annou okenn Manm ki segonn sa lamannman?  Yes Onorab De Commarmond.

 

HON CHARLES DE COMMARMOND

Mr Speaker mon pa konnen si merit segonde si kwa, me mon war li i osi senp, akoz i dan lespri parey mon ti pe dir dan mon lentervansyon i dan lespri  sa Mosyon li.  Ler nou’n koz lo la in depas zis sa bout Board, i ti pe anmenn sa lot bout, me selman si nou anvi fer li pwen amannman. Mon krwar i dan lespri Mosyon, nou zis petet les li ale si Mover Mosyon in dakor.  Me selman si nou le formelman pangar en dimoun i krwar nou pe kas prosedir Lasanble, me nou kapab segonn sa Mosyon e vote ensidswit, napa problenm ek sa, mon ti a propoze therefore mon segonn sa Mosyon pou sa lamannman.  Mersi.

 

MR SPEAKER

Ok. Dakor.  Savedir in ganny propoze in ganny segonde, me lefe ki i pe fer konklizyon ki in aksepte sa mon pa pe al ouver deba ankor lo Motion as amended ok ?  Onorab Churchill Gill.  Wi ok lets take a vote.  Annou pran en vot lo lamannman ki’n ganny propoze.  Tou Manm ki an faver? Ok mon krwar i inanim.  Madanm Clerk.  Okenn Manm ki kont?  Madanm Clerk.

 

MADAM CLERK

Mr Speaker.  28 Manm an faver.  Personn kont.  Mersi.

 

MR SPEAKER

Ok amannman in ganny aprouve.  Kontinyen Onorab Churchill Gill.

 

HON CHURCHILL GILL

Mersi Mr Speaker.  E mersi pou sa kontribisyon.  I enportan ki nou dimoun war dimoun deor i war ki Lasanble ler i met lespri ansanm i kapab sorti avek bon rezilta.

 

 

(APPLAUSE)

 

HON CHURCHILL GILL

Mr Speaker i reste mon pou mon remersi tou bann Manm ki’n donn zot kontribisyon, e ki’n fer bann kontribisyon tre valab lo sa Mosyon, enkli amannman ki’n ganny fer.  I kler ki letan in arive pou Gouvernman fer en refleksyon serye, lo tou lo sa Mosyon an zeneral, pou ki nou a kapab war en keksoz pli benefisye pou bann dimoun Zil Pros e Praslin.  E lo sa amannman vi ki mon dir ki i en lide ki mon ti pe deza pe koz lo la mon a zis brefman sizere ki mannyer mon krwar i devret ganny fer pou li marse e sa i a ed Gouvernman ler i pe pran son desizyon.

Mr Speaker en blok administratif dan distrik i neseser e i bezwen annan rezon ki i bezwen annan akoz dan pou Praslin avek Zil Pros bann dimoun ki ganny minimum saler i ganny parey dimoun Mahe.  Me selman ler zot annan bann biznes pou vin fer Mahe konsernan bann servis ki napa Praslin, zot war zot bezwen bour lanmen dan zot pos dan sa ki zot gannyen ki dimoun Mahe napa sa fardo, parey sa bann dimoun Praslin akoz zot zis pran en bis zot desann anvil e zot al dan bann biro e fer sa ki zot annan pou fer.  E dan sa sans i montre poudir i annan en nesesite en biro administratif e Praslin e Zil Pros i annan bokou zenn ki vin lekol Mahe.

E la ler nou pe koze i annan bann ki pe fer letid Mahe e si Gouvernman i serye e i krwar dan sa ki nou pe dir nou kapab ozordi konmans idantifye sa bann etidyan potansyel ki pe fini lekol atas zot ek bann Minister konsernen, ki nou santi i devret ganny reprezante lo Praslin, dan sa biro administratif.  e ler ki sa biro pe ganny fer ki nou konnen i pa pou vin ozordi, sa bann dimoun ki’n ganny idantifye i a kapab pe fer zot training e ler sa building i fini, sa bann dimoun osi ki sorti Praslin ek La Digue, zot a fini ganny formen dan bann diferan responsabilite ki zabitan zil pros e Praslin i bezwen e zot kapab ganny anploye dan sa blok administratif.

E sirman nou le nou bann nivo ki kapab pran bann desizyon akoz si non i pou menm parey ki été ozordi tou keksoz i bezwen desann Mahe e apre nou bezwen esper bokou letan pou serten desizyon.

E an menm tan i annan propozisyon osi ki’n mansyonnen ki i bezwen al lo nivo PS e si fodre Minis nou a les sa avek Gouvernman me selman parey mon dir nou le nivo ki kapab pran desizyon si en dimoun Baie Ste Anne, Grand Anse, La Digue i santi i bezwen al vizit sa biro administratif i devret kapab ganny asiste pou son biznes ki’n in vin fer.

E an menm tan ganny en desizyon deswit e i a tourn kot li satisfe e Gouvernman i a osi satisfe ki zabitan Praslin, La Digue zot pe ganny sa servi a zot porte e pe koup sa bann depans ki pa neseser lo zot saler ki ozordi zot war zot pe fer sa.  E avek sa Mr Speaker mon ava demann tou Manm pou donn zot sipor pou sa Mosyon pou ki Zil Pros e Praslin i a kapab bouz lo sa lot nivo.  Akoz fodre pa nou bliye poudir Praslin ek zil pros i en konponan enportan dan aktivite ekonomik Sesel e nou kontribye bokou dan Kof Leta ki fer ki ede fer bann devlopman dan Sesel bouze.  Mersi Mr Speaker.

 

MR SPEAKER

Mersi Onorab Churchill Gill.  Bon in ariv ler pou Lasanble pran en desizyon lo Mosyon ki’n ganny prezante départe depi bomaten.  Nou a demann tou Manm ki an faver Mosyon ki’n ganny amande osi.  Okenn Manm ki kont?  Madanm Clerk.

 

MADAM CLERK

Mersi bokou Mr Speaker.  Mon rikord vot inanim 29 Manm an faver.  Personn kont.  Mersi.

 

MR SPEAKER

Mersi Madanm Clerk.  Savedir Mosyon in ganny aprouvasyon Lasanble Nasyonal.  Bon mon annan de pti lanons pou mon fer.  Yes Onorab Pillay.

 

HON SEBASTIEN PILLAY

Mersi Mr Speaker.  Mr Speaker mon le raise en matter of privilege en konsern baze lo en issue ki Onorab De Commarmond in raise taler larepons ki nou gannyen.  Mr Speaker konman en Manm FPAC nou plizyer fwa ganny enformen ki anba Lalwa Procurement i annan en dispansasyon ki ganny donnen dan ka kot bann procuring entity par egzanp Minister Ledikasyon dan sa ka pe rankontre difikilte avek en tender ki Tender Board i kapab revoke.  Me selman ler sa desizyon i al kot Review Panel, Review Panel i bezwen donn son desizyon lo la.

Akoz si Review Panel pa ankor donn son desizyon e sa nou ti ganny eksplike lo FPAC e mon krwar mon rapel tre byen, si pa ankor donn zot desizyon e ou fer sa dispansasyon e sa proze i konmanse, sa kontrakter ki pa’n ganny sa Kontra si demen Review Panel i overturn desizyon Tender Board i kapab met Gouvernman Ankour.  Mon ti le zis fer kler ki nou asire ki Lasanble pa ganny pri dan okenn keksoz ki – e ou konpran tre byen dan ki laliny Mr Speaker kot nou pan over step nou boundary konman Manm Lasanble konman Lasanble, pou nou al enterfer dan travay, oubyen  dan aktivite en Komite ki endepandan.

Mon pe zis met sa pou ki nou i en disclaimer si oule lo lapar nou Lasanble.  Mersi Mr Speaker.

 

MR SPEAKER

Mersi Onorab.  Yes Onorab Ramkalawan.

 

HON WAVEL RAMKALAWAN

Mr Speaker.  Konman Chairperson FPAC mon anvi dir ki sa ki Onorab Pillay in dir pa fer okenn sans, akoz sel keksoz ki nou, nou’n fer nou ekri Procurement Oversight Unit pou met sa devan li ; Procurement Oversight Unit in donn nou larepons e zot in dir nou sa.  Nou, nou pa’n enterfer dan okenn fason.  Nou’n rod lenformasyon e alor sa ki Onorab Pillay pe dir pa fer okenn sans.

 

MR SPEAKER

Dakor.  Ok bon annou …  Yes Onorab Henrie.

 

HON GERVAIS HENRIE

Mersi Mr Speaker.  Konman chairman COGA mon anvi port ou latansyon e latansyon Lasanble ki dernyen fwa ki Minis pou Imigrasyon Madanm Thelemaque ti vini, i ti annan serten lenformasyon ki ti promet Lasanble.  E an vi ki lot Mosyon ki i pe vin dan Lasanble, i pou lo sa size imigrasyon mon krwar sa lenformasyon i enportan si i pou ariv kot nou avan Vandredi 4er apre midi.   I deza an retar so si  Sekretarya ti kapab fer anvoy en reminder kot zot silvouple.  Mersi.

 

MR SPEAKER

Dakor.  Mersi.  Sekretarya i ava fer sa swivi.  Bon mon anvi met Manm okouran poudir nou pa pe pran kestyon semenn prosenn, an vi ki nou annan zis en sel Sitting sa se Merkredi. Me apard sa 3 Mosyon ki reste lo Order Paper ki pou carry forward, nou pou pran 1 Mosyon ki deza annan pou fer avek en Komite HIV AIDS Committee, ki pe sanz son non plis son TOR osi tou i bezwen sanze. So i pou en keksoz ase bref parey Komite Madanm in fer yer e apre nou av kontinyen lezot Mosyon.  2enm item se pou remind bann Manm ki demen nou pou meet 9er bomaten dan Members Lounge pou nou kontinyen sa deba lo Civil Code.

Ok?  E nou swete ki kekfwa par Vandredi nou a kapab fini avek.  Ok?  Vwala e nou Lasanble i adjourn e nou repran travay Merkredi le 19 Zen 9er bomaten.

 

 

(ADJOURNMENT)