::
Home » Verbatim » 2019 » Verbatim Wednesday 22nd May, 2019

Verbatim Wednesday 22nd May, 2019

NATIONAL ASSEMBLY OF SEYCHELLES

Wednesday 22nd May 2019

The Assembly met at 09.04am

National Anthem

Moment of Reflection

Mr Speaker in the Chair

 

MR SPEAKER

Bonzour tou Manm Onorab, e bonzour tou dimoun ki a lekout e pe swiv travay Lasanble Nasyonal.  Nou pou kontinyen bomaten avek nou travay lo Order Paper,  kot nou ti fini yer.  E bomaten parey mon ti’n anonse yer, nou pou pran statement, ki pou ganny fer par Minis Responsab pou Zafer Lafanmir.

Sa se Mrs Minis Mitcy Larue, e apre sa nou pou kontinyen avek bann Mosyon.  E mon’n ganny enformen bomaten par Chair IAC, e ki’n, negosyasyon e an kontak swivan zot miting yer avek Departman Zafer Etranzer, e in, in swiv par en dyalog avek Leader Zafer Gouvernman.

Ki, i pou ok pou nou pran Mosyon – sa Mosyon lo apwentman Anbasader.  So nou pou fini avek statement, apre nou pou al direkteman lo Mosyon.  Mon pe zis averti bann Manm, pou dir swivan statement ki Minis pou fer, mon pou allow 1 kestyon par Manm.  Ok?  1 kestyon par Manm, e i pa en Manm pa pou ganny en 2enm fwa,  oubyen 3enm fwa pou demann kestyon Minis.  Alright?  Vwala en pti pe fason ki nou pou proceed ozordi.

Mwan ava demand Parliamentary Reporter pou apel Minis, pou fer Minis rantre.  Mon ava osi enform bann Manm ki Bills Committee avek nenport bann Manm Parlman osi tou, ki an deor Bills Committee, ki oule attend,  demen nou annan miting avek Departman Touris, pou kontinyen diskit lo Tourism Bill, ki lo Order Paper.  Bills Committee pe meet ozordi pou deal avek Mental Health Bill.  E demen nou pe rankontre Departman Tourizm, bann zofisye pou nou kontinyen sa dyalog avan nou kontinyen avek deba lo Tourism Development Bill.

Wi.  Pli tar mon ava donn en pti pe lenformasyon, apre break, ankor bann lezot committee.  Bon mon ava dir bonzour Minis Mitcy Larue, Minis responsab pou Zafer Lafanmir, avek Sekirite Sosyal, progranm i tonm anba li.  Minis i ganny akonpannyen par, CEO ki responsab pou Lazans Proteksyon Sosyal –  Mr Marcus Simeon.  Minister avek Mr Simeon bonzour e welcome dan Lasanble Nasyonal.  Minis toudswit mon ava donn ou laparol pou prezant ou statement, e apre sa nou ava open the floor ,pou enteraksyon avek bann Manm, pou okenn kestyon ki kapab leve pou ou donn leklersisman.  Minister laparol i pou ou.

 

MINISTER MITCY LARUE

Bonzour Mr Speaker.  Bonzour tou Manm Onorab, e tou dimoun a lekout.  Mon ti a kontan premyerman remersi ou Mr Speaker, e tou Manm Onorab pou donn mwan sa loportinite pou fer en prezantasyon lo 40enm lanniverser depi ki bann Progranm Benefis Sekirite Sosyal i an plas.

Mr Speaker an 1979, anba direksyon Prezidan Rene, Sesel ti anba, lo en Progranm Benefis Sekirite Sosyal.  Ozordi 40an pli tar, nou pou ansanm tras sa parkour lo bann diferan progre ki nou’n arive fer.

Bann benefis ki sa progranm in anmennen pou nou pep, bann defi ki nou pe fer fas avek, e ki mannyer koman en nasyon nou kapab fer plis progre, prenon kont ki nou pa zanmen kit personn deryer.  40 an pase lapopilasyon an zeneral ti mwen eze, e lavi ti pli difisil pou kous nou popilasyon, ki ti pli vilnerab.

Bokou nou bann aze, oubyen dezabilite ti oblize mandyan pou zot kapab sirviv.  Lavi ti tre difisil.  Prezidan Rene son vizyon ti kler, sete pou tir son pep dan sa sityasyon e anmenn legalite, e lazistis sosyal pou zot.  Sete la ki Social Security Fund the Regulations ti vin anfors.

Nou bann dimoun aze ti resevwar zot benefis retret, ki ti enn iniversel.  Tou ti resevwar, san okenn diskriminasyon.
Sa ti enn kot zot pa ti bezwen mandyan, me ti donn zot, zot dinyite.   Sa ti en landmark policy, kot son rezondet ti baze lo prensip solidarite dan sosyete; kot bann ki ti kapab kontribye, ti fer li pou amelyor lavi bann ki mwen fortinen, oubyen pli vilnerab dan sosyete.

I ti kree a sa letan kot ti napa okenn safety net an plas, pou ed bann dimoun ki ti pli vilnerab dan sosyete.  Ler sa Regilasyon ti kree, sa ti met Sesel parmi bann pei Lafrik pli eze dan lemonn kot ki annan en sistenm an plas, pou asir en standar lavi pou byennet son popilasyon.

In osi anmenn kreasyon Seychelles Pension Scheme, ki an 2006 ti vin Seychelles Pension Fund.  Ozordi nou ankor parmi bann tre pe pei ki zot pe donn pansyon retret iniversel, e pansyon dezabilite, san pran kont lezot benefis ki tou, ki nou Sesel koman en pti pei, nou met a laporte nou sitwayen.

Gouvernman in kontinyen mentenir sa policy fondamantal, e menm agrandi, e met bann lezot sipor an plas, avek bi amelyor byennet lafanmir Seselwa, e a tou pri gard sa prensip nob, lazistis sosyal vivan, e pep o sant son devlopman.

40an pli tar Lazans Proteksyon Sosyal i sa antite Gouvernman, ki responsab pou enplimant bann Regilasyon.  Mon anvi rapel Seselwa ki pandan tou sa bann lannen, Gouvernman in kontinyelman amelyor bann benefis, ki in met a laporte sak group vilnerab dan sosyete.

Sa i en policy Gouvernman dizour, pou asir legalite lazistis sosyal, e met son pep o sant son devlopman.  E ki trouve anba Lalwa Social Security Benefit Act 2010.  Seselwa annou reflesir, e pa zanmen oubliy kot nou sorti.  E annou pa pran keksoz a la lezer.

Ti bezwen annan en vizyon, e enn ki ti tre kler pou nou ariv la kot nou ete ozordi dan lannen 2019.  Ozordi nou annan plis ki 16 statutory benefits.  Benefis retret ki iniversel.  Nou annan nou en total 10,783 dimoun ki pe benefisye avek R5,250 par mwan.  E sa i anmenn nou en total R56,610,750 par mwan.

I annan benefis orfelen, vedir bann zanfan ki perdi zot paran.  Nou annan nou 53 zanfan ozordi ki pe benefisye avek R1,540 par mwan, e sa i ariv nou en total R83,160 par mwan.  Benefis semi orfelen, sa savedir en zanfan ki perdi en manm son fanmir, papa oubyen manman.

E nou annan nou en total 643 zanfan ozordi ki pe benefisye avek R1,300 par mwan, e sa i fer nou en total R835,900 par mwan.  Nou annan benefis vev; nou annan benefis maladi R2,500 par mwan, nou annan maternity benefits; nou annan paternity benefits, parey zot konnen, bann papa pa ti gannyen bann benefis paternity, ozordi zot annan 10 zour, kot zot kapab reste avek zot madanm, ek zot zanfan, e bond en pe pli byen avek zot.

Benefis lanmor, R2000 par ka.  Benefis injury; par egzanp pou gannyen aksidan dan travay.  Benefis dezabilite, sa i ganny sertifye par Board Medikal, e ozordi nou annan nou 2,833 dimoun ki pe benefisye avek R5,250 par mwan, ki fer nou en total R14,873,250milyon.

Sa bann benefis ki mon’n mansyonnen i anmenn soulazman finansye pou bann fanmir.  Sak lannen kou pou bann finans bann benefis i ogmante.  An vi logmantasyon dan lakantite dimoun ki pran zot retret, e osi akoz dimoun pe viv bokou pli lontan.

Sa i en fe ki, ki nou’n fer resorti anba nou Ageing Policy ki nou ti prezant ek Lasanble tar lannen pase.  Ozordi Social Security pe resevwar pli gro pansyon Bidze, porsyon Bidze Nasyonal ki a en to, R1.3 bilyon pou 2019.  E ladan R900 milyon i al pou sa bann benefis ki mon’n mansyonnen avan.  R714milyon i zis pou benefis retret.

Nou kapab konstate ki degre sakrifis nou pei pe fer, pou asir en lavi desan avek dinyite pou nou bann retrete, e bann ki pli vilnerab dan pou sosyete.  Sa i osi montre lapresyasyon Gouvernman anver servis ki bann retrete in anmennen pou nou pei, e ki ozordi nou tou nou pe rezouir.

Mon profite pou rapel lapopilasyon, ki pa tou pei ki annan en tel progranm an plas, pou zot bann retrete e dimoun dan bezwen.  Sesel i en leksepsyon.  Kreasyon Social Security Benefits atraver son fon Social Security, in osi anmenn lezot progranm ki annan relevans avek bann benefis.

Nou annan skills acquisition progranm.  Sa i kree en loportinite pou bann zenn ganny skills neseser pou antre dan lemonn travay.  I donn zot en 2enm sans, pou zot devlope e ganny bann skills neseser pou zot ganny en meyer lanplwa.

‘’My First Job’’ i target bann zenn ki konplet pos- segonder e ki napa leksperyans travay, kot zot ganny plase dan bann sekter prive e Gouvernman i kontribye 40 poursan anver zot saler.  Sa an menm tan i a ede pou zot ganny sa leksperyans.

URS i kouver pou tou bann adilt ki pa dan lanplwa, e atraver Minister Lanplwa zot ganny plase dan bann diferan sekter.  Sa Scheme i target plizoumwen bann group vilnerab, tel parey bann ki sorti dan prizon, bann dimoun avek serten dezabilite, e bann ki pa kapab ganny en travay par zot menm.

I annan bann travels subsidies; par egzanp pou bann, pos-segonder ki sorti, bann manrmay ki sorti lo zil Praslin.  sa i en Scheme ki bann etidyan zot paran ki zot, zot gannyen pou zot kapab travel lo zot zil en fwa par mwan, zot ganny zot, zot tiket bato.

I annan medical travels Scheme, sa i aplik pou bann pasyan Praslin ek La Digue, ki ganny en referral par dokter pou zot ganny admit Lopital, oubyen pou zot vwar en spesyalis, e zot ganny zot tiket ale retour lo Cat Cocos, e i annan de fwa menm lo avyon, depandan lo zot sityasyon.

Scheme for repatriation of body; savedir sa i en pasyan ki ganny anvoye par dokter dan lopital Sesel, sa pasyan ki swa i sorti Praslin ou La Digue, e malerezman sa pasyan i arive mor Mahe, alors son ka, son lekor i ganny rapatriye par avyon.

Pansyoner kot Gouvernman i kontribye 25 poursan anver zot air fares oubyen boat fares, si zot pe al voyaz e lo bann zil, lo Praslin ek La Digue.  SPTC travels subsidy, sa i pou tou pansyoner, zot benefisye atraver voyaz lo bis pou nanryen, e sa i aplik pou bann dimoun avek dezabilite, ensi ki bann etidyan lekol.

Dedicated school fund.  Sa progranm i relye spesifikman pou asiste bann zanfan ki dan bezwen; par egzanp avek zot uniform, zot bann materyo skoler, zot manze, sa i pe fer sir pou ki zanfan napa en rezon pou zot mank lekol.

Daycare Scheme, sa i asiste bann fanmir ki pe travay, me zot annan zanfan pou met dan Daycare, e aktyelman zot pe ganny R500.  Vulnerable Repair Scheme, sa savedir bann, bann lakaz, bann dimoun ki pli vilnerab, ek bann aze, kot nou antre pou repar zot lakaz, pou met li dan en, en leta pli conducive.  E mon ava dir ki an 2017 ti annan 108 lakaz ki’n ganny repare a en kou R29 milyon.

2018 nou ti annan nou 61 lakaz a en kou R25milyon.  La i en pe plis akoz i enkli osi bann bedsitters.  2019 nou annan 24 ki’n konplete, e nou annan ankor lezot lo nou lalis, e nou annan nou en bidze R10 milyon

Home Carer, sa se bann dimoun ki travay, ki pran swen avek nou bann dimoun pli aze ek bann dimoun dezabilite kot zot lakour.  E lo full day nou annan nou 2861 carers, e zot ganny peye R6,060.60 par mwan, e sa i fer nou en total R19.64milyon par mwan.

E nou annan nou 763 carer ki lo half day, e zot a en kou R3,835, e sa i kout nou R3.15milyon.  Lasistans Siplemanter, sa i pou asiste bann fanmir ki ganny afekte avek okenn evantyalite, tel ki en dezas natirel, oubyen en dife.

E sa fon i ganny administre par Departman Gouvernman Lokal.  Se zot ki anmenn ka kot nou, e nou ganny, zot ganny ede pou stabilize pandan 72erdtan.  Welfare assistance, sa ] an gro i en lasistans ki mezir ou mwayen an term finansye; savedir larzan ki antre kot lakour i ganny konpare avek bann mezir anba Lalwa, kot income i pli ba lo sa lakour i ganny asiste avek ladiferans.

Foster Care Scheme.  Sa i en lasistans pou fanmir ki pe okip en zanfan, ki ti a risk, oubyen ganny abandonnen, e bann ka parey i ganny refer par travayer sosyal pou laprouvasyon, e ganny peye par Lazans Proteksyon Sosyal.

Allowance li i iniversel pou bann etidyan pos-segonder.  Premye lannen zot ganny zot R850. 2enm lannen zot ganny R950 e 3enm R1050.  Nou annan nou en total 1,455 etidyan ki pe benefisye, e sa i a en kou R1.56milyon par mwan.  Prozeksyon sorti kot Biro Statistik i montre ki proporsyon popilasyon par lao laz retret aktyel, i espekte ogmante dan le fitir.  Sa i akoz sa kous nou popilasyon pe viv bokou pli lontan.

E proporsyon dimoun aze dan nou popilasyon, i espekte double ant ozordi la ziska 2020 sorti 12poursan ozordi pou vin 28poursan an 2080.  Kot nou espekte pou annan zis par anba 29,000 pansyoner.  Savedir i enportan ki nou konmans planifye nou.  Se pou sa rezon ki mon Minister in devlop en Ageing Policy, ki’n deza ganny diskite pli boner, e son Plan D’aksyon pe ganny enplimante par faz.

An plis ki sa, Gouvernman in fini anonse ki laz pou pran retret pou sorti 63an, pou vin 65 an, an 2023.  Sa i a donn dimoun sa sans pou kontribye pli aktivman dan lekonomi pei, e pou byennet zot fanmir.

Gouvernman in osi resaman pran desizyon brav, kot bann dimoun ki ti pe deside pran retret boner ek Fon Pansyon a laz 60an, pou nepli benefisye ek benefis retret, akoz sa ti pou met presyon an plis lo sa progranm, e ti pe osi fer laz retret redwir pou vin 60an.

Bann lezot mezir ki pe ganny pran, pou asir soustenabilite tou sa bann progranm i enkli, reform dan Home Care Scheme, kot pou osi asir en servis pli profesyonnel, e targete.  Training pou nou bann carers.

En seri rankont pou ganny organize, apartir Zen 2019 dan tou distrik.  Nou pou konmans diskisyon avek zot bann Manm Parlman, pou nou kapab sansibiliz, edik, e responsabiliz nou popilasyon lo sa bann defi; pou pran kont zot bann kontribisyon avan ki nou aprouv e enplimant sa reform.

Donk mon profite pou demand tou dimoun, ler nou pe fer nou bann rankont, pou vin partisipe an gran nonm, pou zot annan en par dan sa plan final.  En seri progranm edikatif lo lezot size, pou ganny fer atraver medya dan distrik, dan bann lakour pou ede sansibiliz e responsabiliz lafanmir.

Nou’n osi demann led ek nou bann partner enternasyonal, prensipalman Labank Mondyal, pou lasistans teknik pou reform bann lezot progranm kle.  Nou fek organiz en symposium lo en lapros holistic pou byennet nou bann fanmir semenn pase.  E la nou pou konmans en travay byen targete, pou anmenn bann sipor psikososyal kot nou bann fanmir ki bezwen sa bann led, pou amelyor zot byennet.

Nou pe travay ansanm avek lezot sekter piblik, prive e sosyete sivil.  Antite ki ti annan responsabilite lapovrete i aprezan vin en Departman anba mon Minister, ki adres bann diferan ka lapovrete.  Son lobzektif prensipal se pou promouvwar en pli bon nivo kordinasyon atraver tou sekter.

Sa ledikasyon a lavi ki tre enportan, e ki annan en group determinen dirize par Mrs Adrienne pe fer tre byen e tre friktye.  Alor nou pou bezwen ganny, i pou bezwen ganny anforsi avek nou sipor, atraver diferan progranm dan Minister Ledikasyon ek Departman Sosyal ek Lafanmir.

Me parmi tou sa bann plan ki nou annan lentansyon travay lo la, prensip kle i reste pou asire ki nou pa kit personn deryer.  Se sa prensip ki’n gid sa dernyen seri reform, e ki prezan Prezidan in anonse le 01 Me 2019.

Ogmant pansyon retret par R500, pou nou bann dimoun aze ki ti travay a en lepok kot ti napa en fasilite pou zot kontribye.   Sa i a osi ranforsi sa mesaz ki montre lenportans kontribisyon anver Fon Pansyon.  Gouvernman i fer son bout, e ozordi tou dimoun i annan sa loportinite pou osi azout lo la atraver kontribisyon ki zot fer kot Fon Pansyon Sesel.

Logmantasyon zeneral R500 pou tou pansyoner, sa pou kout R70.91milyon.  Sa, an plis eskiz mwan, sa R500 pou osi kouver bann dimoun ki pe resevwar benefis dezabilite a en kou R18.9milyon an plis.  Etablir en minimum pansyon retret, kot Fon Pansyon pou vin R1000, a en kou R4.2milyon.

Ogmantasyon dan allowance pou Daycare, sorti R500, pou vin R750, an 2019.  Fon Pansyon ozordi i kree sa loportinite pou ki dimoun i kapab kontribye anver zot retret, pou zouir en 2enm pansyon ler zot ariv laz retret.  Lo sa not mwan ti a kontan ankouraz tou Seselwa ki dan travay, dan biznes, self-employed, bann ki travay casual, pou fer zot kontribisyon pou zot byennet e byennet zot fanmir dan lefitir.

I neseser ki nou pran en poz, oubyen refleksyon e analiz sityasyon ozordi, e ki nou anvi pou lavenir – tout antenna kont, legalite, loportinite, e lazistis sosyal.  Nou pep touzour o sant devlopman, kot nou pa kit personn deryer.  An tou sa ki mon’n dir, ankor mon oule azoute nou plan pou lavenir se pou nou responsabiliz nou popilasyon lo zot rol ek responsabilite.

Donn zot zouti neseser atraver plis ledikasyon pou pran zot lavi, lavi zot fanmir dan zot prop lanmen.  Devlop sa kiltir travay dir, pou agrandi lekonomi, e kree plis larises pou pei e nou fanmir.

Travay pli pros avek tou sekter lasosyete, pou kree sa lanvironnman travay ansanm, pou byennet bann fanmir.  Travay pros avek bann fanmir ki bezwen sipor pou built zot rezilyans.  E dernyerman, kontinyen asir e anmenn sipor neseser kot bann dimoun pli vilnerab dan en fason soutenab.  Mersi Mr Speaker.

 

MR SPEAKER

Mersi Minis Larue.  Bon nou ava open up pou kestyon, e nou ava konmans avek Onorab Johan Loze.

 

HON JOHAN LOZE

Bonzour Mr Speaker.  Bonzour tou bann koleg e tou dimoun ki pe ekoute kot lakour.

Minis koriz mwan si mon mal, me ou’n dir ki Bidze Fon Sekirite Sosyal i R1.3milya, milya, ki vedir 1bilyon an Angle.  R1.3 milya.  Minis mon ti a kontan si ou fer nou ganny Bidze konplet Welfare Agency, e ler ou’n tir sa R1.3milya, konbyen i reste?

E mon oule ou eklersi en konfizyon ki’n leve o sen sa Lasanble menm, konmkwa ki sa Bidze Welfare Agency dan son totalite, i la pou adres lapovrete, e ki lapovrete dan sa pei in ariv a en sityasyon irzan e ekstrenm ki fer ki Welfare Agency i ganny pli gro porsyon Bidze dan alokasyon bidzeter.

E mon ti a kontan si Minis ou kapab eksplik sa klerman, kwa ki Bidze bann, ki Bidze pou bann sipor statiter ki vin anba Social Security?  E kwa ki welfare ki adres lapovrete?  Mersi Mr Speaker.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Mersi Onorab.  Onorab parey mon’n dir, nou annan en Bidze R1.3 bilyon.  E dan sa 1.3 nou annan nou R900milyon ki pou sa bann benefis ki mon’n mansyonnen, parey i annan benefis retret, benefis – ti annan 16 ki mon ti mansyonnen o konmansman, sa i tonm anba sa R900milyon.

Apre nou annan sa R400 milyon li i larestan, i pou bann lezot, lezot sipor ki mon’n mansyonnen ankor ki annan Home Care, bann lezot ki mon’n mansyonnen, e i annan selman R40milyon ki pou welfare assistance.  Ok.  Koumsa ki i ganny, ki i ganny partaze.  Mon pa konnen si mon’n kler ladan?

 

MR SPEAKER

Ok.  Mersi Minis, non, mon pa pou donn plis komanter.  En Manm i kapab dan son kestyon, parey Onorab Loze in fini demann 2 par, 3 par, be mon pa pou donn zot sans pou retournen, akoz si non nou pou al lazournen antye.  Ok?

Onorab in reponn, in reponn tou ou bann bout kestyon.  Mersi.  Onorab Ferrari.

 

HON JEAN-FRANCOIS FERRARI

Mr Speaker mon krwar i enportan dan mon kestyon ki premyerman mon koriz bann sityasyon – en sityasyon istorik.

Akoz nou bezwen Minis bomaten in vin, in vin fer en statement kanpanny, mon pa konnen si Eleksyon, in deklare e mon vwar li domaz ki in anmenn –

 

(Interruption)

 

MR SPEAKER

Ok. 

 

HON JEAN-FRANCOIS FERRARI

… mon vwar li domaz ki in trenn CEO ASP dan sa travay politik ki pa – ki CEO i en dimoun ki mon respekte en kantite, ki i pa byen.

 

MR SPEAKER

Kestyon.  Kestyon.  Kestyon.

 

HON JEAN-FRANCOIS FERRARI

Ki i pa byen.  So mwan, mon ti a kontan dir ki koriz en keksoz, ki avan, avan ki Mr Rene ti fer koudeta ti annan National Provident Fund! Ok? Konmsi annou pa konmans keksoz, zis zour Mr Rene ti fer koudeta!  In annan bann sistenm welfare dan nou pei, deza depi avan lendepandans, avek lendepandans, mwan Maxim Ferrari ti Minis Labour, e i ti ansarz National Provident Fund.  dan Gouvernman Koalisyon!  So annou fer li byen kler, annou pa zis fer krwar pou dir tou keksoz in komanse le 5 Zen ‘77, sa i mon kestyon, – ok?

 

(APPLAUSE)

 

HON JEAN-FRANCOIS FERRARI

Akoz mon kapab dir, pou dir i annan plis mandyan ozordi ki ti annan mandyan dan bazar avan!  Ok?

 

(Interruption)

 

HON JEAN-FRANCOIS FERRARI

Alors mon kestyon Mr Speaker, Mon kestyon i vin koumsa.  Mon kestyon i vin koumsa Mr Speaker;  Eski Minis i kapab  eksplik sa Lasanble, ki mannyer avek tou sa bann progranm, sa 16 progranm ki in anmennen, ki bann bon progranm – ki bann bon vizyon, ok?

Ki mannyer ozordi apre tou sa bann lannen, sa bann bon vizyon ki nou’n annan, pou nou kapab sak Seselwa ganny son lakaz, selman nou vwar pocket anler dan Sans Souci, sakenn in pran 3 bout, 4 bout, 5 bout, ok?

Ki mannyer nou pe retrouv nou ozordi avek sitan problenm sosyal, bokou plis ki nou ti annan ler nou Bidze pou lasistans sosyal ti bokou mwens ki sa?  Konmsi kote ki’n al mal?

Se sa mon kestyon ki mwan anvi demande, si Minis, mon pa konnen si i ti la avan, oubyen si i pa ti la avan, me selman mon ti a kontan ki i dir nou, kote ki nou’n al mal, e ki larzan pa zanmen sifi ozordi, pou nou adres tou sa bann problenm sosyal?  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Mersi, mersi Mr Speaker.  Mon ti a kontan zis eklersi ou premye pwen, kot ou’n dir pou dir ti annan Provident Fund.  Wi ti annan, me sa ti, zis en serten group dimoun ki ti partisip ladan.

 

(Interruption)

 

 

MINISTER MITCY LARUE

Tandis ki Social, Socials Security i iniversel, ok.  Tou dimoun ki ganny laz retret i, i ganny son benefis, san menm pran kont si ou annan larzan, si ou napa larzan, si ou blan, si ou nwanr, si ou lavyasyon politik or whatever.

E mwan Mr Speaker, mon pa’n vin la pou vin fer politik, me mon’n vin anmenn sa ki la.

 

(Interruption)

 

MR SPEAKER

Order!  Order!

 

MINISTER MITCY LARUE Mon’n vin anmenn la realite! Akoz nou pa kapab kasyet larealite!  I la, i bann fe, i la, nou pa kapab kasyet, nou bezwen dir e nou popilasyon i bezwen konnen kote nou ti ete, kot nou’n arive ozordi!  Mersi.

2enm pwen Mr Speaker,  pou dir, poudir ozordi nou annan plis lapovrete ki dan lepase,  Mon pa konnen ki mannyer nou pe mezire.  Nou annan lapovrete Sesel, nou pa pou dir napa, nou pa’n zanmen dir napa.  Me lapovrete dan Sesel i pa zis lapovrete kot nou napa larzan!

Lapovrete i pli larz ki sa.  I dan dimansyon milti dimansyon, kot i annan diferan kalite lapovrete ki nou koz lo la.  Nou koz lo lapovrete, bann ki larzan pa sifizan, e sa zot ganny kouver anba welfare assistant, bann dimoun ki travay, ki mank en pe, zot income kot lakour pa ase, zot ganny anba welfare assistant.

Nou annan bann dimoun ki zot lakaz in ariv en leta, zot ganny ede pou rekonstri, pou renovate zot lakaz, pou tir zot, kot zot ete.  Si dimoun in ariv dan serten sityasyon, i annan en kantite keksoz akoz.

Premyerman i annan de fwa i annan dimoun menm ki’n mank sa volonte; ki mank sa volonte avek zot lekor pou zot al pli lwen.  Ok?  Akoz tou keksoz i an plas.  Ledikasyon pou nanryen i la, kot tou zanfan i kapab al lekol, ziska ler i ariv pos-segonder, alor i la pou zot kapab demen annan en travay.

Me si nou deside sa zanfan i aret lekol, i pa kontinyen, e i deside asiz dan lakour, i pa travay, son manman i travay, apre li i pa travay, definitivman lapovrete pou antre.  Akoz i mank larzan, e en zanfan ki pli, pli a laz ki devret travay pe depan lo son paran, ok?  E si sa dimoun, ou’n aranz son lakaz ozordi – 1an pli tar ou vin kot li, se menm dimoun ki ou pou bezwen repar son lakaz ankor.  Savedir i montre ou sa dimoun in, i pa’n konsolid sa ki nou’n fer pou li kontinyen gard li dan en sityasyon kot, kot napa lapovrete, okSo lapovrete i vin atraver en, nou donn ledikasyon pou dimoun kapab al travay, pou zot ganny ledikasyon, pou zot ganny en travay.

Nou met tou keksoz ater.  Si labi sibstans i antre dan en fanmir, ankor i kree lapovrete.  Akoz sa dimoun ki pe abiz sibstans li, i pa anvi travay.  O kontrer i tir sa ki annan dan lakaz, i al vann pou li ganny sibstans.

Ankor i pou kree lapovrete.  Alor petet mon ava dir o nivo, o nivo Minister ki ti napa sa Minister oparavan, me ti annan Lazans Sosyal, ozordi i annan en Minister kot nou pli kapab ankadre, i kapab in annan en gap, kot nou pa’n anmenn sa psychosocial support kot bann fanmir ki ti trouv zot dan en sityasyon.

Sa nou, nou agree, i en gap, ki nou’n manke, e se sa ki nou’n mete dan nou plan a lavenir, pou nou kapab, nou pe anmenn en dezas serten, me nou bezwen anplifye e ranforsi sa, pou anmenn sa psycho social support dan tou sa dimansyon ki nou dir lapovrete, kot i konsern depi son leta – ki mannyer i prepar son Bidze, ki mannyer i – son parental skill vizavi son bann zanfan ki i annan.

Ki mannyer i organiz li kot lakour, pou ki zanfan dan lakour zot osi zot kontribye, akoz ou pa kapab annan en fanmir kot ou annan en kantite zanfan, zanfan i asiz e esper paran pou fer tou pou li.

I annan tousala ki nou, petet nou’n manke, alor nou ava pran sa an-men, pou nou kapab build up sa rezilyans dan nou bann fanmir, anmenn sa responsabilite ki neseser, pou zot kapab repran, e sorti  dan sa lapovrete.

Menm bann ki lo welfare, nou pe, ozordi nou pou dir bann ki lo welfare in diminyen, in diminyen, akoz nou annan zis R40milyon pou welfare.  In diminyen, akoz?  Nou pe konmans tir, met dimoun dan lanplwa, anvoy zot anba URS pou komanse apre bouz ankor pli devan.

Nou pe fer bann paran realize pou dir nou pa kapab depan lo welfare tou dilon ou lavi, oubyen ou fanmir ki vin apre ou i swiv.  Alor nou bezwen sanz sa trend, responsabiliz nou bann fanmir, pou zot kapab pran zot lavi an men.

Me  annou pa dir ki nou annan sitan parey lapovrete, kantmenm nou pe dir 40 poursan lapovrete, nou napa 40 poursan lapovrete, nou annan lapovrete, me nou napa 40 poursan lapovrete.  Si nou pe defini lapovrete – tel ki lapovrete.  Mersi Mr Speaker.

 

MR SPEAKER

Mersi Minis.

 

HON JEAN-FRANCOIS FERRARI

Mr Speaker i pa’n reponn mwan lo mandyan!  Si i annan, akoz i annan plis mandyan ozordi ki ti annan, lontan ti annan zis anba laboutik Moosa, ozordi devan tou laboutik i annan 1 oubyen 2.  Kekfwa …!

 

MR SPEAKER

Ok.  Onorab Noline Sophola.

 

HON NOLINE SOPHOLA

Mersi Mr Speaker.  Bonzour tou Manm, bonzour Minis, CEO e tou Manm Onorab, e tou dimoun ki a lekout.  Minis dan ou prezantasyon ou’n koz lo benefis orfelen, e semi orfelen.

Napa bokou dimoun ki okouran fonksyonnman sa Scheme, e petet ler sa bann benefisyer i fer laplikasyon in fini tro tar, zot ti’n sot laz, zot ti’n vin matir, e zot pa’n benefisye ladan!

Minis eski ou kapab eksplik sa Lasanble bann prosedir ki en dimoun i bezwen swiv si i santi ki i bezwen antre sa, anba sa 2 Scheme, en Scheme,  ki mon’n koz lo la.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Mr Speaker pou benefis orfelen i vre. Mon kapab krwar pou dir i annan dimoun pa pe konnen i annan sa benefis, akoz dernyerman mwan menm mwan, mon ti pas atraver en fanmir ki ti vizit mwan, e ler i ti nonm mwan, mon dir ek li, be ou devret pe benefisye anba semi orfelen parey enn son manman ti’n mor, e li i ti reste zis avek granmanman.

Bon, ozordi mon ti a kontan lans en lapel avek bann paran, par egzanp ki si en manman ek en papa, zot perdi, sa zanfan i perdi son manman oubyen i perdi son papa, i bezwen fer en laplikasyon atraver zofisye Sosyal.

Ok?  Nou al kot zofisye sosyal, e an menm tan nou, nou, nou pa zis dir en, en, en paran pa kapab zis vini dir ou be, sa son papa, son papa ki’n mor.  Nou bezwen montre laprev ki sa i son papa.  Savedir zot bezwen anmenn birth certificate sa zanfan, kot lo la i enskri non son papa.

Ok?  Pou nou kapab dir, pou nou fer keksoz drwat.  Pou ki personn pa zis vini britanblan dir sa ti son papa, sa pa son papa, eksetera.  Alor ler ou’n anmenn ou birth certificate kot social worker, la i annan tranzaksyon i ganny fer atraver Lazans, pou ou kapab ganny ou benefis orfelen, oubyen semi orfelen.

Parey mon’n mansyonnen son amount ki semi R1,300, orfelen R1,500 keksoz.
E sa zanfan i ganny sa, allowance ziska ler i fini lekol.  Ok?  Mersi Mr Speaker.

Be eskiz mon, e petet Mr Speaker sorry.  E petet Onorab an Zilyet nou pou osi annan, annan en, en legzibisyon, pou Minister lafanmir, kot nou pou annan bann diferan stall kot nou montre tou sa bann keksoz ki nou fer; tou bann diferan benefis ki nou donnen, ki mannyer ou bezwen fer.

Nou pou annan en legzibisyon ki nou pou anmenn sa egzibisyon osi lo bann zil, pou ki dimoun i kapab vreman vin azour avek bann diferan benefis ki Gouvernman i anmennen pou son popilasyon, Mersi.

 

MR SPEAKER

Mersi Minis.  Onorab John Hoareau.

 

HON JOHN HOAREAU

Mersi Mr Speaker.  Bonzour Mr Speaker.  Mr Speaker larealite se ki sa ki Minis in dir, bokou se bann keksoz ki sorti dan Konstitisyon!  I pa akoz Mr Rene ti en bon boug.

Akoz nou annan en Konstitisyon ki, ki bann Lalwa siprenm  pei i dekole ladan, bann fundamental rights dekole ladan.  Mon kestyon Mr Speaker se ki avek lanons ki Home Carers pou vin en job ki formalize, eski sa bann Home Carers pou ganny en benefis per diem pou sanzman lokasyon parey PSO i ganny dir?  Akoz mannyer nou konpran zot kapab ganny louvraz dan 2 diferan lakour, e i kapab konsekaman annan en, en lenplikasyon lo en kou lo zot, lo zot deplasman, lo zot manze.  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Onorab mon kontan letan ou’n dir bann keksoz i dan Konstitisyon.  Konstitisyon i dir ou, ou annan ou drwa, ou drwa a sekirite, parey nou’n dir.

Me annan pa, annou pa oubliye ki Konstitisyon dan lemonn osi zot met sa.  Me Konstitisyon i kapab la, me i depan osi, ki ou Gouvernman ki la, ki mannyer i met sa an aplikasyon.

Konstitisyon i kapab dir ou, ou annan ou drwa laba, ou annan drwa tou keksoz, me i depan lo ki?  Lekel sa Gouvernman ki an plas pou li fer sir ki sa bann progranm i ganny mete pou benefis son pep.

I kapab pa fer, i kapab fer. Parske bokou pei i annan.  Dan pou zot, me zot pa fer.  Mon’n al atraver bokou Konferans ki mon’n ale, mon vwar pou dir sa bann keksoz pa bokou pei ki annan, me  dan zot Konstitisyon i annan an menm tan.  Mersi.

2enm pwen, mon pa pou al an detay lo bann zafer carer, akoz parey mon’n dir nou pe al fer en reform, e sa reform nou bezwen al dan tou distrik, kot nou pou diskite avek tou dimoun konsernen, depi zot menm bann Manm Lasanble, bann dimoun ki, bann carer, bann fanmir, lapopilasyon pou nou met devan sa reform ki nou pe mazinen fer, pou nou ganny zot input, e pou nou kapab drafte en plan final, ki mannyer nou pou ale de la.  Mersi Mr Speaker.

 

MR SPEAKER

Mersi Minis.  Onorab Waven William.

 

HON WAVEN WILLIAM

Mersi Mr Speaker.  Bonzour tou dimoun ki a lekout.  Bonzour Minis avek CEO.  Minis mon’n ekout ou avek bokou latansyon.  I, vre ki sa bann progranm i bann progranm ki bon.

Me mwan mon kestyon se Minis, eski sa zoli progranm ki ou’n prezant devan nou, i en progranm ki i izole avek sa model devlopman ekonomik, ki Sesel i bezwen antre ladan? E eski, letan ou pou al onivo distrik ouswa pou al sansibiliz dimoun, pa i demande ki petet ou osi ou konsider ki sosyete sivil, osi i  donn koudmen, akoz Gouvernman li tousel, dan sa progranm sansibilizasyon, pa pe fer en travay 100poursan byen.

E eski Minis sa progranm sosyal letan mon pe regarde, eski i soutenab?  Mersi.

 

MR SPEAKER

Mersi Onorab.  Minis

 

MINISTER MITCY LARUE

Mersi Mr Speaker.  Mon krwar – mersi Onorab.  Mon krwar pou dir dernyen, lo zafer sosyete sivil, mon krwar mon’n dir pou dir nou ti fek fer nou, nou travay bokou avek sosyete sivil nou, me selman i mank en pti pe parey nou dir sa kordinasyon, akoz sakenn ti pe fer pou li, e nou’n fek fer en symposium, kot nou’n anmenn tou dimoun ansanm, pou nou vwar ki mannyer nou pou ranforsi sa.  Akoz nou bezwen sosyete sivil, nou bezwen sekter prive, nou bezwen piblik, tou nou bann sekter, parey dan lasante, ledikasyon, lot, pou nou travay ansanm, pou nou kapab anmenn sa kordinasyon, ki mannyer nou pou adres bann sityasyon kot bann dimoun.  Ok?

Nou bezwen adres sa.  Akoz nou’n vwar sa i en gap ki nou’n esey adrese.  Akoz i annan fanmir ou kapab donn li tou, ou kapab fer tou, me i pou tourn ankor li.  Akoz i bezwen sa swivi.  I bezwen sa, toultan nou la, pou nou ed li.  Akoz nou bezwen aksepte nou annan fanmir ki pli bezwen led, be i annan ki pa bezwen, zot ok.

Alor nou bezwen toultan pe atrap lanmen sa bann ki pli bezwen.  E sosyete sivil i bezwen antre avek nou, akoz zot lebra ki bezwen fer sa marse.  E …

 

MR SPEAKER

Kestyon soustenabilite.

 

MINISTER MITCY LARUE

Wi, ok.  Wi apre ki, si i soutenab, se sa ki nou’n dir, ki nou bezwen annan bann rankont, kot nou asiz, nou diskite, se sa ki nou annan diferan group pe, pe antre avek nou, pou nou travay lo bann way forward, pou nou konnen, pou nou fer li vin soutenab.

Me an menm tan, nou bezwen met li antet ki nou pa kit personn deryer, spesyalman bann … ki … dan … bezwen!  Alor nou, nou a fer li soutenab, me avek tou dimoun ansanm, nou ava vwar ki mannyer, kwa ki nou bezwen amelyore, kwa ki nou bezwen sanze, kwa ki nou, petet i annan ki nou devret pe donn plis.

I annan lezot servis i devret pe rantre.  E se sa ki nou bezwen fer sa bann, sa bann rankont, sa bann diskisyon avek plizyer dimoun, pou nou ganny zot pwennvi, pou nou apre vwar ki mannyer nou kapab fer sa bann servis vin soutenab.  Mersi Mr Speaker.

 

MR SPEAKER

Mersi Minis.  En bout ou kestyon.  Ale Onorab William.

 

HON WAVEN WILLIAM

An relasyon avek the model devlopman ekonomik, eski nou pou regard sa progranm sosyal an relasyon avek tandans devlopman, nouvo model devlopman ekonomik, nou anvi ale?  Si non nou pou dan problenm.  Mersi.

 

MR SPEAKER

Wi.  Mersi Minis.

 

MINISTER MITCY LARUE

Wi Mr Speaker, be sa i pri mondyal, definitivman.  Nou bezwen get li, akoz lo Plan Nasyonal osi, nou annan nou Plan Stratezi Nasyonal ki tousala nou pe travay ansanm.  Akoz tou, tou bann Departman, tou Minister, tou pe travay ansanm lo la.

Akoz lo plan ekonomik nou pei, nou bezwen konnen kote nou pe ale.  Nou bezwen konnen, ki mannyer nou pou adres sa bann keksoz.  Nou pa pe travay an izolasyon. Mersi.

 

MR SPEAKER

Mersi Minis. Onorab Ahmed Afif.

 

HON AHMED AFIF

Mersi Mr Speaker.  Mr Speaker mon ti, a kontan demann Minis, in koz lo sa ki apel en, son sistenm sosyal, en social safety net, ki mon krwar i en keksoz ki i merite annan sirtou bann dimoun ki dan bezwen.

Me mon ti a kontan demand Minis, ki son Gouvernman pe fer pou redwir labi ki annan dan sa sistenm? Par egzanp, nou konnen dan lepase in annan ki zis avan eleksyon, serten politisyen i pase, zot promet larzan avek dimoun, menm ki zot konnen i pa merite.

I dir ou, ou pou ganny tel benefis pou 1an eksetera, i annan lezot … Kekfwa pa neseserman dan lepok politik, me zis i ganny dir, akoz i konn en dimoun, i pou gannyen.

Ki fer ki sa pwen ki, Onorab Ferrari in leve avan, ki ou vwar ou plis mandyan lo semen, plis lapovrete ki’n ganny, Minis ti dir pa vre, me sa se bann rapor ki’n ganny fer.  Pa par nou, par bann ensitasyon enternasyonal ki dir i annan lapovrete.

Ki fer ki prezan ozordi ou pe vwar bokou lapovrete.  Mwan, mon kapab … Mon rapel ler mwan ti ankor en zanfan, be savedir nou pe koz plis ki 40an pase, kot ou ti vwar, wi ou ti vwar mandyan partou, mwann vwar en evolisyon ladan, in desann en lepok.

Me ozordi i fransman mon pou dir ou Minis i pli move ki avan.  Ozordi deor tou laboutik ou antre, dimoun i vin mandyan ek ou.  Akoz ki sa pe arive si nou annan sitan kantite welfare?  Eski i pa vedir ki disparite ant sa ki annan ek sa ki napa i pe vin pli gran?

Lafason welfare pe ganny donnen, i annan en problenm ladan.  Alokasyon pa pe ganny fer byen, e ou pe ganny anplwayer pe vin kot ou, pe dir ek ou ki travayer i dir ek zot, i pa tro bezwen sa louvraz li, akoz i kapab annan en rekour par en lot keksoz, menm ki i pa vreman bezwen!

Alors sa i en keksoz ki move pou lekonomi Sesel, parske sa sistenm pe ganny abize, alor mwan ti a kontan demann ou Minis, kote ou desin, ou fer sa balans vini?

Ki zot rol pou fer sir ki zot pe ganny sa balans byen, parske san sa, nou lekonomi pou soufer, nou pou kontinyen vwar plis mandyan lo semen, nou pou kontinyen annan lapovrete Sesel, e Sesel pou kontinyen annan plis etranze, e fanmir etranze, ki pe depan lo tou sa ki nou prodwi isi Sesel, e pou annan mwens pou Seselwa!  Alor mwan ti a kontan konnen ki zot pe fer dan sa direksyon, Minis?  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Mr Speaker, ozordi, par egzanp an 2018 nou ti annan nou anviron 3,000 dimoun ki pe, ti lo, lo, lo welfare assistance.  Ozordi sa in ariv selman 1200 la 2019.  Savedir i montre ou poudir i annan en travay enportan ki nou pe fer, pou tir dimoun lo welfare.

E i annan plizyer, plizyer keksoz ki nou pe fer pou tir dimoun lo welfare.  Par egzanp si en dimoun i lo welfare nou met li, i annan de fwa lontan dimoun ti lo welfare i ale ziska 1an, 2an, 3an welfare.

Ozordi nou donn li 3 mwan lo welfare.  E nou ofer li en plas travay.  Nou ofer li en plas travay, 3 mwan i lo welfare apre i al lo son plas travay, e i travay.  E nou dir li poudir ou bezwen travay pou ou kapab kontribye.

Prezan si i annan en mank dan ou kontribisyon, la nou antre nou a donn ou en bout!  Ozordi nou nepli donn dimoun si i, i lo minimum, maximum i 3,009.  Nou pa pe donn li larzan dan lanmen.  Nou pe donn li an term STC card, ki nou donn li, laba i al aste son bann komodite de baz.

Si i annan en elektrik, delo ki dan problenm pou li peye, nou peye, nou pa donn li sa larzan dan lanmen.  Akoz nou ti santi pou dir sa osi ti annan, ti annan serten defayans, kot ler dimoun i ganny larzan an gro, i ale i depans dan nenport ki fason, e zot pa aste sa ki neseser pou lafanmir pou tir lafanmir dan lapovrete, ok?

E sa i pe mars tre, tre byen.  Bann fanmir in aksepte sa byen, e pe mars tre byen.  Nou osi pe donn sa bann ledikasyon parey mon’n dir, nou pe anvoy nou bann dimoun lo teren, pou donn ledikasyon sa bann fanmir pou zot konpran pou dir, travay i enportan.

I annan defwa dan en fanmir, ou ale parey mon’n dir pli boner, ou annan ou en paran, manman pe travay, zanfan 19an, 20an li i pe, i pe, zis la li, i pe asize devan son televizyon i pa pe travay.

Nou ensiste ki sa zanfan i antre anba sa bann diferan Scheme ki nou’n mansyonnen, nou fer zot al anba la, pou zot al travay, pou zot anmenn reveni ekstra dan lafanmir.

Me an menm tan nou bezwen konpran, i annan sa fleo, sa bann diferan fleo ki’n, ki dan nou sosyete lo drog, lalkol, or whatever ki sa osi, menm ki dimoun pe ganny en bon saler, ladan i annan en bon pe sa larzan ki al dan sa bann keksoz, e ki fer an retour, lafanmir i soufer, e lapovrete i vini.  Ou konpran?

E ler ou dir mwan i annan bokou dimoun, plis dimoun dan lepase ki dan, dan lepase nou ti vwar bann dimoun ki pa ti pe ganny okenn, ti napa okenn safety net pou anmas li, alor i ti bezwen al mandyan.

Be ozordi nou annan sa bann safety net, me i tre restrikte.  Si ou pe zis ale, ou al dan drog, e nou pe met ou dan lanplwa, nou pe met ou kot reabilitasyon laba, ou refizye ale, nou met ou dan, dan lanplwa ou refizye ale, otomatikman ou pou vin dan bor semen ou pou vin mandyan.

Be i pa vedir ki nou annan plis, akoz nou pa pe ankadre zot, nou pa pe ed zot.  I annan bann fasilite ki an plas pou ed zot, i annan reabilitasyon, i annan kot APDAR ki zot ale, i annan progranm methadone, i annan bann lezot progranm ki nou, i annan anba kot night shelter, kot nou anmas bann dimoun ki nou anmase lo semen, nou met zot dan night shelter.

Dan night shelter laba zot ganny zot manze, zot dormi, zot breakfast, apre zot al travay selman.  Konmsi tou sa bann keksoz i la, i annan dimoun ki mwan pou dir, zot menm zot anvi reste dan lapovrete, zot menm zot anvi mandyan.

E, me sa pa, pa fer nou bes lebra, nou pou kontinyen travay avek zot.  Parey mon’n mansyonnen, bann diferan keksoz ki nou bezwen fer pou nou adres sa bann gap ki nou annan dan nou sosyete!

E se la nou bezwen fer fanmir vin pli for, fer fanmir vin pli solid pou zot kapab pran responsabilite zot lavi!
E nou, nou antre, nou ede kot fodre ede, pou nou pa les zot tonbe.  Akoz nou pa pou les personn tonbe.  Mersi Mr Speaker.

 

MR SPEAKER

Mersi Minis.  Onorab Sylvanne Lemiel.

 

HON SYLVANNE LEMIEL

Mersi Mr Speaker.  Bonzour tou dimoun.  Minis ou’n koz lo URS, Unemployment Relief Scheme.  Eski ou kapab petet donn en pti pe plis detay, pou lenformasyon bann dimoun, konbyen letan eski en dimoun i reste lo URS?

E ki, ki benefis ki en dimoun i lo URS i gannyen?  Apre petet ou eksplik en pti pe osi lo kote, ki zot kondisyon travay, sa bann URS?  Mersi Minis.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Mr Speaker URS li i, i annan en lankadreman anba, anba Departman Lanplwa, ki ankadre zot.  Me selman zot ale pou 6 mwan.  Usually se pou 6 mwan, e la zot ganny dir anba diferan kad, par egzanp i annan kad casual, i annan ki al formel, e, e benefis ki zot gannyen, se zot ganny minimum wage, sa i minimum wage ki zot gannyen.

Apre i annan, i annan de fwa ki sa dimoun la i, i URS kot en landrwa la, apre sa, sa travay, sa anplwaye, anplwayer i vwar pou dir i pe fer bon travay, zot anploy li apre, en bon pe nou ganny koumsa.

Me i annan serten osi ki, ki, ki zot drop out.  I tou depan ki mannyer, how successful, be selman lanplwa ki sa lorganizasyon ki, ki ankadre sa bann, sa bann travayer.  E plis spesifikman ladan, nou pran bann dimoun ki zot menm zot ler zot al rod en lanplwa zot pa gannyen.

Oubyen bann dimoun ki fek sorti prizon, i difisil pou zot ganny en lanplwa, alor nou sey anmas zot nou met zot anba sa, anba sa, oubyen bann dimoun osi ki annan serten dezabilite, menm zot pe ganny zot benefis, me zot anvi en pti larzan an plis ankor.

Zot al anba la zot devlope, epi i annan ki ganny met dan diferan landrwa.  So mon krwar i en pti pe en fason ki nou kapab donn dimoun, fer zot fer en travay an menm tan zot ganny zot prop larzan.  Mersi.

 

MR SPEAKER

Mersi Minis.  Onorab Stephen Pillay.

 

HON STEPHEN PILLAY

Mersi Mr Speaker.  Mr Speaker mwan kestyon pou Minis lo sa, 40enm lanniverser, so progranm sosyal, vi ki i fer 40an zot pe sey rezourd sa problenm lapovrete avek la, nou annan en Bidze, sote en bilyon oubyen 1milya, parey in dir.

Eski sa bann sa zot pou, i la, zot vwar li zot pou kapab rezourd sa sityasyon, oubyen zot pe zis maintain sa sityasyon?  Ki nou bezwen met responsabilite lo dimoun deor pou pran zot sistenm welfare, pou sorti dan sa raz ki zot ete.

En lot pwen ki Minis in fer sorti, ki i dir ti napa 40 poursan lapovrete Sesel.  Me eski Minis pe dir ki Prezidan Danny Faure ti vin mislead sa Nasyon ler i ti vin dan Lasanble i ti dir i annan 40 poursan lapovrete?

Eski i 40, i 30?  Donn en rezon akoz ki Prezidan i vini i dir nou en parol, ki tou dimoun pe dir 40poursan.  Akoz si zot pa kapab travay, mwan mon sizere zot sed laplas zot les LDS fer sa louvraz pou tir lapovrete Sesel.  Mersi Mr Speaker.

 

(APPLAUSE)

 

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Mr Speaker sa statistik 40 poursan la, ti sorti ler ti fer statistik 2015 – ok.  Ti 2015.  La nou 2019.  Prezan apre 2015 la Prezidan ti  donn sa …  Ti annan een antite ki ti ganny kree lo lapovrete.

E sa antite li, sete pou li vwar dimansyon lapovrete ki nou pe koz lo la.  Regarde e annan en – ki mannyer mon a dir sa, annan en, en term ki nou servi kot nou dir, nou idantite lapovrete.  E depi sa letan an 2016, ‘17, ‘18 i annan en bon pe travay ki’n ganny fer.

Parey mon’n dir i annan en kantite travay ki’n ganny fer lo nivo, lo nivo lapovrete.  E se sa ki mon’n dir, mon pa krwar i annan 40poursan lapovrete ozordi.

Sa ki Prezidan ti anonse, la, ozordi 2019, mon pa pe krwar nou annan.  Akoz mwan personnelman, mon dir zot pou dir lapovrete i dan diferan dimansyon.  Dan ki fason ki ou pe dir lapovrete?

An term finans? An term lozman, an term kwa?  So nou, nou pe dir lapovrete an term milti dimansyon!  Nou bezwen regarde.  E nou, nou annan tou sa bann progranm ki an plas pou nou anpes lapovrete, pou nou tir dimoun.

E i annan en ta travay ki nou’n fer.  Si nou’n koz lapovrete an term lakaz, lenfrastriktir, nou pou vwar pou dir be sa nou’n improve, i annan en kantite keksoz ki’n ganny fer.  Mon fek nonmen kantite nou’n fer pandan renovasyon dan 2016, 2017, 2018.

E bann nouvo lakaz ki pe ganny fer, kot dimoun pe al ganny met dan nouvo lakaz mon krwar.  Definitivman ler nou pou fer lot survey, nou ava vwar poudir sa, sa ki nou pe koz lo la i, i diminyen.  Ou konpran?

Apre i annan lezot sekter ankor, kot nou pe antre pou nou ed lafanmir.  E tousala i bann fason ki nou fer pou nou diminyen sa kous, pou redwir sa kous lapovrete ki nou pe koz lo la.  E an menm tan sa bann fanmir osi, parey mon fek repete, nou bezwen osi pran nou responsabilite.

E nou tou isi anndan, koman politisyen, nou bezwen, nou bann dimoun ki dan distrik.  Nou annan nou distrik, nou bezwen osi kapab fer en pe travay avek nou bann distrik, o nivo nou distrik osi.

Pou, pou donn nou koudmen, akoz nou pa kapab fer li nou tousel, e Gouvernman li tousel i pa pou kapab fer.  Nou bezwen tou dimoun ansanm.  Travay ansanm.  Mersi Mr Speaker.

 

MR SPEAKER

Mersi Minis.
Onorab Audrey Vidot.

 

HON AUDREY VIDOT

Mersi Mr
Speaker.  Bonzour Mr Speaker, Minis avek CEO, tou Manm Onorab avek manm piblik ki a lekout.  Minis apart sa progranm ledikasyon ki ou’n koz lo la, ki ou’n al en pti pe an detay an term, al konekte pov ek kominote, pas bann pti spotter oubyen fer e legzibisyon;

eski Gouvernman pe osi travay lo en progranm ledikasyon, ki pou kontinyelman tras progre Sesel, avek sa bann benefis ki ou’n koz lo la, ou’n mansyonnen ozordi.  Ki zenerasyon ki pe leve i konnen, e pa zanmen bliye ki Gouvernman, anba leadership SPUP/SPPF/ Parti Lepep, e United Seychelles, in fer pou son pep.

E koriz sa bann mansonz, ki serten i ankor pe sey fer krwar pep Seselwa,  ki nanryen pa’n ganny fer pandan sa 40an!  Mersi Mr Speaker.

 

(APPLAUSE)

 

MR SPEAKER

Mersi Onorab.  Mersi.

 

MINISTER MITCY LARUE

Mersi Mr Speaker.  Mersi Onorab.  Onorab petet mwan pa’n mansyonnen, i annan en travay ki nou’n fer, e anytime nou pou, nou pou lo medya, kot nou pou eksplik dimoun lo ki mannyer nou ti komanse, tou sa ki nou’n fer, kote nou anvi ale osi.

Konmsi i annan sa ki nou pou mete li medya, pou ki dimoun, lapopilasyon i konpran, i konpran ki nou oule fer.

E popilasyon i konpran osi ki mannyer zot, zot bezwen zwe en rol pou asire ki nou, nou, nou sustain sa bann benefis ki nou’n mete, an menm tan nou travay, nou kree plis resours, annan plis, anmenn plis benefis ekonomik pou pei.

Akoz pli nou anmenn plis benefis pou pei., pli nou kapab soutenir sa progranm.  So i annan tousala.  Pa trakase pou al lo televizyon tre byento.

 

MR SPEAKER

Mersi Minis.  Onorab Wavel Woodcock.

 

HON WAVEL WOODCOCK

Mersi Mr Speaker.  Minis la ki Eleksyon pe aprose, eski nou pou vwar ankor bann gran laliny sorti kot biro Welfare, Lazans Proteksyon sosyal ziska lo stand bis, parey dan lepase.

E eski Minis i kapab donn, garanti sa Lasanble ki larzan welfare pou ganny donnen, avek bann dimoun ki merite, me non pa pou rezon politik?  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Onorab, fer sir ou pa anvoy enn dan laliny en?

 

(laughter)

 

MINISTER MITCY LARUE

Mr Speaker nou, nou pou swiv prosedir ki annan an plas.  Me zis fer sir ou, ou pa anvoye, apre ou konplent en?  Mersi.

 

MR SPEAKER

Mersi Minis.  Onorab Paul Ernesta.

 

HON PAUL ERNESTA

Mersi Mr Speaker.  Mr Speaker, Minis and ou delegasyon, tou bann kole Onorab, tou bann dimoun a lekout, bonzour.  Mr Speaker part of mwan kestyon, en bout Onorab William in ganny touse.

Mwan ti, ti annan en pwen.  1975 popilasyon ti apepre en 59,300 popilasyon Sesel.  Ozordi nou vwar nou, en popilasyon apepre 95,700 manm popilasyon.  Sa, i montre en popilasyon in a grandi.

E avek sa i vin bokou bann defi.  Sityasyon yer, defi yer i parey avek defi ozordi.  Eski dan sa konteks Minis i kapab eksplik nou, nou Lasanble, ki bann defi ki nou’n vwar, ki nou prolonze ozordi, e ankor parey mon’n dir, ki zot, zot kapab prezan pou fer, pou zot tackle avek sa bann sityasyon.

Sirtou i annan sa poz danm sityasyon parey Onorab Audrey said, sa sityasyon lapovrete ki tou dimoun pe koz lo la, pe dir napa lapovrete.

Akoz si mon a dakor, an 75, par anba, sityasyon lapovrete nou ti vwar kot dimoun ti napa twalet.  Delo ti napa kot lakaz, delo trete, ti napa elektrisite.  Ozordi nou vwar en konteks diferan.  Eski Minis i kapab eksplik nou vreman the real sityasyon? Thank you.

 

MR SPEAKER

Mersi.  Bon mon ava viz bann Manm, annou al lo nou kestyon direk, annou pa fer statement, ki nou letan pa pe, pa pe permet.  Minis osi, mon kontan lo tou dernyerman ou pe donn bann repons presiz e bref.  E annou al dan sa direksyon.  Minis laparol pou ou.  Minister.

 

MINISTER MITCY LARUE

Mersi Mr Speaker.  Mr Speaker, parey taler mwann dir popilasyon i ogmante.  Par egzanp letan nou pe vwar popilasyon ogmante, plis dimoun pe viv pli lontan.  Akoz nou sistenm an plas, lasante i donn zot, zot kapab vreman annan sa sistenm an plas, kot zot pa, zot kapab okip byen zot lasante, e sa i gratwit.

Zot ganny lezot servis ki mwann mansyonnen pou bann dimoun Trwazyenm-Az, ok?  Me nou vwar ki sa bann dimoun pe ogmantasyon i vin plis, e definitivman, nou pou bezwen lis larzan pou pey bann dimoun retret, nou pa kapab kit zot ater.

Dezabilite osi, avek bann diferan, diferan keksoz; par egzanp bann dimoun ki dan sibstans eksetera, bann lezot keksoz, i fer ki nou annan zanfan ki’n ne avek dezabilite an …  Akoz sa bann sityasyon ki annan dan, dan letan pregnancy.

E tousala i annan serten logmantasyon.  E nou vwar popilasyon i agrandi, nou bezwen plis lakaz pou met dimoun.  E nou vwar
Prezidan in met, in met en progranm an plas.  24/24/24 dan tou distrik, pou kapab fer dimoun ganny zot lakaz.  E nou, nou annan nou progranm, kot nou asiste bann dimoun avek bann lakaz ki vreman, in delapide.

Nou aranze nou fer zot vin en pe pli konfortab.  Bann pit latrin ki nou ti annan dan lepase,  nou’n preske pa vwar, me nou annan ankor detrwa, me sa detrwa nou pe vwar ki mannyer pou elimin sa, ti’n deza eliminen.

Ti’n deza eliminen, me i annan dimoun fodre nou konpran, i annan dimoun ki li i deside al anler lo top laba, fer li en pti geto, met en pit latrin avek.  Koumsa i arive.  Oubyen lot laba i dir ou mwan, mon twalet anndan i ok, me mwan bezwen en pti pit latrin osi.

I annan diferan, sa  i en pti pe bann sityasyon.  Me i pa vedir Gouvernman in elimin sa, mwan rapel tre byen, ti annan en lannen ki nou’n preske elimin tou.  So, savedir nou pe vwar avek sit lagrandisman popilasyon, sityasyon ki kapab, e i annan diferan keksoz pe ganny met an plas pou asire, ki i annan sa balans.  Konmsi ki nou kapab okip nou dimoun byen.

 

MR SPEAKER

Mersi Minis.  Onorab Flory Larue.

 

HON FLORY LARUE

Bonzour tou dimoun.  Mersi Mr Speaker.  Minis ou’n dir nou ki ozordi letan nou’n ganny 40an depi ler sistenm sosyal in met an plas, ki nou bokou pli devan.  Mwan ti a kontan met en keksoz devan piblik.  Ki Social Services i ganny sustain par larzan tax.  I pa gratwit, pa en dimoun ki deside donn sa ta milyon, milya.

I larzan tax, e Gouvernman i deside pran sa larzan tax pou met dan social welfare, alor i pa en kado.  I en, en keksoz ki lezot i peye pou sa.  Me solman, Minis letan mon’n tann ou koz lo bann problenm, mon plito vwar ki sa welfare state ki nou ladan, depi ‘’cradle to the grave’’ ki SPPF in toultan preach, in plito fail.

Mon dir sa akoz ou’n koz lo bann diferan eleman ki met dimoun dan lapovrete.  Unemployment, sa i lyen direk avek ledikasyon.  Savedir sistenm ledikasyon in fail.  Lefe ki ou pe dir nou koumsa ki ozordi nou pe met en dimoun dan lanplwa anba URS, URS pou 6 mwan.

Apre 6 mwan si sa dimoun napa bagaz, apre 6 mwan i pou still napa bagaz!  In zis er en pti lanplwa pou 6 mwan la, i pou bouz ankor 6 mwan.  Mwan, mon anvi demann Minis si nou pou sanz sa fason fer?  Akoz apre 40an, sa fason fer, pa pe donn nou en rezilta.

Eski nou plito, eski nou ti a plito, Minis, invest dan nou pep.  Akoz sel fason pou nou sorti dan propriyete, se pou donn li loportinite, pou fer li vin self-sufficient, e ki pou enkli li dan bann devlopman!

1 bann keksoz ki sa gouvernman in fail se donn en dimoun en lakaz pou li reste ladan, akoz sa bann lalis ki zot in fer, mannyer zot in donn bann later, dimoun napa landrwa reste.  Sa i en pli gro problenm.  Nou bann problenm sosyal ozordi Sesel, se landrwa reste.  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Premye keksoz mwan ava zis remind Onorab ki nou dan, dan, dan zafer lafanmir, nou pa deal ek zafer fer lakaz, me nou deal avek bann homes, homes, ki mannyer nou fer dimoun viv dan bann home, ok.

Ler nou dir home, dan bann fanmir.  Mwan pa’n zanmen dan mwan, dan mwan, dan mwan sa, pou dir, pou dir sa larzan i zis ki nou donnen.  Nou konnen poudir in tax payers money.

Me tax payers money ler i donnen, Gouvernman i konnen ki mannyer i re distribye sa bann larzan.  E mon’n dir taler poudir pei pe fer bokou sakrifis, pou kapab donn sa bann, sa bann servis.  Be ler mon dir pei pe fer sa bann sakrifis, mwan dir lapopilasyon ki pe kontribye dan tax.

Mwan, ou, nou tou ki pe kontribye.  Nou pe anmenn nou kontribisyon, e mon ti dir o komansman, kot son – vwala kot mwan ti dir.  Mon a re repet li ankor.  Mon’n dir mwan, mon a dir ou taler, esper en pti moman mon a dir ou.

 

(laughter)

 

MR SPEAKER

Minis petet zis reponn son kestyon.  Si mon krwar.

 

MINISTER MITCY LARUE

Vwala  ki mon ti dir, vwala, vwala ki mon ti dir.  Sa ti en landmark policy kot son rezondet ti baze lo prensip solidarite dan sosyete; kot bann ki ti kapab kontribye, ti fer li, pou amelyor lavi bann ki mwen fortinen, oubyen pli vilnerab.

Sa se sa kontribisyon tax, ok?  E prezan mon pa konnen si zot petet zot annan en lot, en lot prensip.  Sa i en lot zafer.  Me selman nou, nou prensip i koumsa.  Ler nou dir, enema nou’n fail, ledikasyon nou’n fail.

Non nou pa’n fail, akoz ledikasyon i ankor la gratwit.  Tou zanfan i al ledikasyon, si i pa arive ganny en sertifikasyon laba. Sa i en lot zafer.! Me i la, a la porte, pou li ganny son ledikasyon, e pou li al dan lanplwa pli tar.

Me si sa dimoun li, sa fanmir i deside tir son zanfan lekol boner, oubyen dir li ou pa pou al lekol, oubyen kite lekol, oubyen pa bezwen al travay.  Me i, i responsabilite sa fanmir pa kapab respe son linite Gouvernman.

Gouvernman i met la pou li, ledikasyon free, nou’n donn li depi, depi dedicated fund, si i pa kapab ganny manze, pa kapab ganny lenz, tousala nou mete.  Alor ankor, i tourn back lo petet parey taler mwan ti dir, i annan servis, i annan servis psiko sosyal ki annan en gap ki nou pa’n anmennen pou nou kapab kontinyen edik sa dimoun pou li sorti ladan.

Mon krwar sa i kler.  Me i napa ankor lezot, i la.  Sa i en bon progranm, e i en progranm ki bezwen reste, kot fodre aranze nou ava aranze, me i bezwen reste, akoz nou pa kapab kit nou dimoun deryer!  Mersi Mr Speaker.

 

MR SPEAKER

Mersi Minis.  Onorab Jude Valmont.

 

HON JUDE VALMONT

Mersi Mr Speaker.  Bonzour, bonzour Minis e CEO, e lezot dimoun ki pe akonpanny ou, koleg Onorab e tou dimoun ki a lekout.  Minis la ki LDS in dir Eleksyon pe vini, aktyelman ti pe vini depi ler nou’n antre Lasanble le 27 Septanm 2016,  Mon ti a voudre demand ou.  Ki zot sistenm welfare an, an, an partikilye, ki zot fer pou, pou adres sa, aktyelman sa kritik ki, ki zot pa fer pou anmenn en pe fairness.  Mon ti a kontan ou tous en pe lo sa socio economic assessment.

Akoz bokou fwa, souvandfwa, nou, sirtou nou bann leaders dan distrik, nou, nou koz ek  nou dimoun nou enterakte, zot dir nou santi petet, nou santi en meriken pou zot ganny ede ler zot vini, zot eksplik nou.

Me selman ler zot al, zot al rod lasistans, souvandfwa nou vwar ki zot ganny – swa zot pa ganny asiste, swa zot ganny en amount ki zot menm zot, zot santi pa soutenab.  Alor mwan ti a kontan zot elabor en pti gin lo sa socio economic assessment ki fer pou anmenn sa fairness e la transparans.  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Bon, pou nou anmenn sa, sa lasistans kot dimoun.  Par egzanp en dimoun en dimoun i vini, i vin kot son social welfare benefit, dimoun la social welfare agent, i vin la, i vin anmenn son aplikasyon pou dir, pou dir vwala mwan annan en problenm, mwan pe vin rod lasistans.

Ok.  I annan tou bann keksoz ki ganny demande lo son laplikasyon.  I annan diferan keksoz ki ganny demande.  Son bann depans ki i fer, son income ki antre kot lakour, bann dimoun ki reste dan sa lakour.

Apre baze lo, i annan bann weight.  Mon krwar zot ti konnen ti, ti annan bann weight ki, ki ti ganny pibliye, ki bann weight ki nou swiv, konbyen nou donnen, eksetera.  E prezan ler in fer son aplikasyon byen, prezan la i annan de fwa even sa dimoun i bezwen fer vizit kot lakour sa fanmir elsewhere.

Nou bezwen fer vizit, akoz annan de fwa petet sa dimoun i, pa pe kler lo ki i pe dir, oubyen nou santi i annan, i annan keksoz ki nou bezwen vwar pou, pou, pou zot menm, pou zot kapab fer en desizyon.

Me, prezan from there la, zot vwar ler zot in ganny tou sa income lakour, bann weight ki nou pe regard lo la,  aprezan zot balanse, e zot regard avek zot income ki devret ariv kot en lakour, e donn zot ladiferans.  Be souvandfwa ou konnen toultan, toultan dimoun pou dir ou in ganny tro pti gin.

Be nou pa kapab donn ou par lao osi sa ki nou devret donn ou.  Ou konpran, nou bezwen baz li avek sa, akoz i annan, zot menm zot ki pou fer mwan vin la pou vin demand mwan akoz mwann donn sa enn, mwann donn sa enn, non.  So i enportan ki nou swiv osi prosedir ki annan an plas.

Ou konpran?  E nou fer nou bann dimoun konpran sa.  I annan de fwa zot sorti kot laba, kot welfare zot vin kot mwan, mon eksplik zot byen ki mannyer i devret ete, nou pa kapab fer lotreman, akoz sa i bann prosedir ki nou annan an plas.

Be selman ankor, nou pe travay avek nou bann zofisye osi pou fer ankadre zot en pti pe plis, pou fer zot en pti pe pli, ki mannyer nou dir, customer friendly avek nou bann dimoun, eksplike, koze pa zis vitman, vitman.

Epi donn zot larepons si ou pa pe gannyen, me pli, konmsi donn sa bon leksplikasyon, fer nou dimoun konpran byen akoz i pa pe gannyen, e ki i bezwen fer pou li ganny ankor plis larzan.  Vwala en pti pe mannyer i marse.

 

MR SPEAKER

Mersi Minis.  Onorab Francois Adelaide.

 

HON FRANCOIS ADELAIDE

Mersi Mr Speaker.  Bonzour a tous.  Minis etandonnen ki larzan i en eleman mazer ler nou pe koz lapovrete.  E ki LDS, nou’n, nou’n pouse devan atraver sa 62milyon ki annan dan Bidze, pou partaze ekitableman, e ki  Prezidan in anmenn nou an kour.

E, prezan lo kote prove konman Minister Lafanmir.  Eski ou pe donn advice Prezidan, donn en pti gin sa larzan Seselwa, ki ava ede retir nou en pe dan lapovrete.  Eski ou pe fer sa?  Mersi.

 

MINISTER MITCY LARUE

Mr Speaker, sa kestyon mwan pa pe reponn, akoz i pa konsern mwan!  Mersi.

 

(laughter)

 

MR SPEAKER

Mersi Minis.  Non, non, non, mon pa’n, mon pa’n stop Onorab pou poz en kestyon, so mon pa kapab stop Minis osi tou dan son repons ki in donnen, ok?  Kestyon ti en pti pe an deor, me in fini ganny poze, so mon pa pou kapab anpes, Minis osi pou son repons.  Bon, mon a donn laparol Onorab Simon Gill.

 

HON SIMON GILL

Mersi bokou Mr Speaker.  Bonzour tou koleg Onorab.  Minis.  Mr Speaker malerezman ozordi nou pran desizyon pou nou sakenn poz en kestyon.  Me nou, nou pa pou demann plis kestyon ki enn.

Me selman i annan en keksoz ki zanmen nou bezwen perdi de vu.  Ki lapovrete i egziste Lanmerik, L’ Angleterre, La France, wi Cuba, i egziste.  I pa en phenomena inik pou Sesel.  I annan bann pei pli devlope, kot i annan en milya larises.  I noy zis 1, 2 pti dimoun ki gete.  Dapre zot laba kot i annan sa milya larises? Non.  Mr Speaker.

 

MR SPEAKER

Ou kestyon.

 

HON SIMON GILL

I annan larises ki pe noy en pti nwayo popilasyon dan sa bann pei, ki nou vant dir zot, zot bann pei pli devlope dan lemonn, e ki nou ti ava swete al viv kot zot! Al get Lanmerik ankor enn fwa, al get L’ Angleterre, al get La France, al get dan bann lezot pei, nou ava vwar ki kalite lapovrete i egziste dan sa bann pei!

 

MR SPEAKER

Onorab, Onorab.

 

HON SIMON GILL

Me Mr Speaker.

 

MR SPEAKER

Onorab demann Minis ou kestyon.

 

HON SIMON GILL

Mr Speaker, dan nou konteks Sesel, dan nou konteks Sesel, nou, nou pe dir.

 

(Interruption)

 

MR SPEAKER

Order!

 

HON SIMON GILL

I annan en nouvo dinamik, ki in arive dan sa pei! Nou’n fer en kantite devlopman dan sa pei!

 

(Interruption)

 

MR SPEAKER

Order!  Order!  Bon mon ti dir nou pe donn Minis sans pou fer son statement, pou nou enterakte avek li.

Si nou’n ganny en sans demann en kestyon Minis, annou donn sans en lot.  Me ankor mon get bann Manm.  Annou pa fer statement.  Mon pa anvi ki nou pran break, ki Minis i retournen apre, i reste mwan apepre 6 Manm ki lo mon lalis.

Mon anvi ki nou fini avek Minis, Minis i ale, nou eskiz li i ale, e nou kontinyen nou travay.  Annou koup statement, e mon ti a demann Onorab Simon Gill pou al deswit lo son kestyon, poz Minis ou kestyon.  Onorab.

 

HON SIMON GILL

Mr Speaker eski Minis i kapab dir nou, kan ki sa rezim welfare sistenm ti ganny dekrete.  Si apre ‘77, or si apre trwazyenm repiblik?  I enportan ki ou dir nou sa.  Akoz bann ki pa ti ankor ne, i a konpran, ki lesansyel sa sistenm ki in met an plas dan sa pei, avek tou son lenperfeksyon ki i annan.  Mersi bokou.

 

MR SPEAKER

Minis.

 

MINISTER MITCY LARUE

Mr Speaker, mon ti a kontan, mon ti a kontan konfirmen ki sete an 1979 ki social, lasistans social security ti vin an fors.  1979, anba direksyon Prezidan Rene at that time!

 

(APPLAUSE)

 

MR SPEAKER

Mersi.

 

MINISTER MITCY LARUE

Ok.  E i ti an Mars.  Mon mazin byen dat, mwan Mars 1979 anba direksyon Prezidan Rene.

 

MR SPEAKER

Mersi Minis.

 

MINISTER MITCY LARUE

Mersi.

 

MR SPEAKER

Mersi Minis, Onorab Sandy Arissol.

 

HON SANDY ARISSOL

Mersi Mr Speaker.  Bonzour Minis avek Mr Simeon.  Mon ti a kontan demann Minis Mr Speaker, si i kapab dir ek nou Lasanble, si anba sistenm Mr Rene, Mr Michel, e ozordi Mr Faure, si ti napa tou sa bann ka koripsyon, par egzanp $50milyon ki’n perdi.

Bann vol ki’n arive kot SBFA.  Bann larzan ki’n perdi kot FIU.  Ek lezot form koripsyon ki’n egziste dan nou pei.  Si nou pep pa ti a viv san en sistenm welfare ki’n koz la ozordi.

E nou pep ti ava viv byen, parey Mr Rene ti promet nou, letan i ti pran pei atraver en koudeta 1975 dan nou pei, ‘77.  Le 5 Zen ‘77.  Kot i ti promet nou zwenn ki nou pa pou anmas koko ankor, me ozordi nou zenn pe anmas ‘’pet!’’

Kot i ti dir avek nou vyeyar pa pou dormi dan tou kwen laboutik, ozordi nou vyeyar pe ganny vwar parmi, Paster Lannwit’’ pe dormi dan tou kwen Mahe, dan nou pei.

Eski Minis pa krwar pou dir si ti napa sa bann ka koripsyon, kekfwa nou pa ti a bezwen sa kantite striktir welfare ki’n koz lo la ozordi dan nou Lasanble Nasyonal?  Mersi bokou Mr Speaker.

 

(APPLAUSE)

 

MR SPEAKER

Mersi Onorab.  Mersi Onorab. Minis.

 

MINISTER MITCY LARUE

Mr Speaker, mon pou, mon pou repete ki an 1979 Mars ‘79 anba direksyon Prezidan Rene, kot social security ti ganny, ti vin anfors anba Lalwa, ok?  E la ti anmenn parey mon’n dir, tou sa bann benefis ki mon’n mansyonnen avan.

Benefis retret, ki ozordi tou sa bann dimoun ki ganny laz 63an san kont son kouler, son laz, eksetera, ti ganny, i gannyen e zot ankor pe gannyen.   Benefis orfelen, semi orfelen.  Benefis maternite, ki ti 1 mwan, la ozordi in ariv 4 mwan.

Anba direksyon Prezidan Rene nou’n komanse.  E nou’n bouze, anba direksyon Prezidan Michel.  Nou’n bouze anba direksyon Prezidan Faure, e nou pe kontinyen anmenn sa bann benefis kot nou popilasyon ki bezwen gannyen.  Mersi Mr Speaker.

 

MR SPEAKER

Mersi Minis.

 

 

(Interruption)

 

MR SPEAKER

Order!

 

HON SANDY ARISSOL

Mr Speaker i pa’n reponn mon kestyon.

 

(Interruption)

 

MR SPEAKER

Order!  Order!  Order!  Order!

 

 

HON SANDY ARISSOL

Minis pa’n reponn mon kestyon, zis mon pe met dan ou latansyon koman Speaker, konman en Manm, Minis pa’n reponn mon kestyon.  Mersi bokou.

 

MR SPEAKER

Mersi. Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker, i malere ki Minis in prezant nou en very good statement lo en sityasyon serye.  Ki nou, nou bezwen konsidere pou nou pei going forward, e nou ankor pe sant en bann menm zistwar 40an, isi laba.

 

(laughter)

 

 

HON SEBASTIEN PILLAY

San ki nou kapab. …

 

(Interruption)

 

MR SPEAKER

Order!  Order!  Kestyon Onorab.

 

HON SEBASTIEN PILLAY

Mersi Mr Speaker, ou konnen dimoun i sansib lot kote.  Mr Speaker eski Minis i kapab dir nou, sa bann benefis statitwar, e mon krwar Lasanble i bezwen, fodre nou, nou pa konfiz lede, akoz nou pe, nou pa pe fer zistis lenformasyon ki Minis in donn nou dan Lasanble ozordi.

Minis in koz ek nou lo bann benefis statitwar, ki Lalwa i garanti pou en group dimoun.  Bann benefis ki mon rapel, menm pou Mr Speaker ler ou ti ankor en Manm, Onorab Ferrari ler i ti ankor en Manm dan Lasanble, i ti en Manm dan Lasanble oparavan,

nou ti demande pou ki i entrodwi serten benefis.  Par egzanp benefis semi orfelen, bann zanfan ki’n perdi en paran, si ou pa kapab sa; bann benefis pou …

 

(Interruption)

 

MR SPEAKER

Order!

 

HON SEBASTIEN PILLAY

… bann, widow –  in fer ogmante.  Mr Speaker, mon kestyon pou Minis, i se ki prenon kont ki nou, nou demann, demann pou sa bann benefis i kontinyen ogmante.

Eski zot in fer en legzersis pou vwar premyerman, si sa bann dimoun ki sipoze pe ganny sa bann benefis, zot menm ki pe ganny sa bann benefis, oubyen i napa en si oule, en attempt par bann dimoun ki bann care giver, pou zot pa donn sa care, sa bann dimoun ki sipoze pe vreman resevwar sa benefis?  I enportan.

Dezyenmman lo kestyon sekirite sosyal,  eski nou pe anvizaze prezan, regard dan lonterm, ki mannyer nou pou, nou pou revwar konteks travay dan pei, pou fer ki sa demann ki social security pou kontinyelman mete lo pei,

nou a kapab amortize li en pti pe, redwir li en pti pe, masaz li en pti pe, pou ki going forward nou pa a vwar nou dan sa sityasyon.  E mon dernyen pwen dan mwan kestyon Mr Speaker ki mon ti a kontan klarifye ek Minis.

E, e la mwan, mwan, mwan, mwan pou agree pou dir in annan, in annan en labi ki nou bezwen, nou bezwen deal avek, sirtou lo size welfareBut at the same time, at the same time, i annan bann kategori parfwa, bann konteks kot dimoun i trouv zot dan bann sityasyon ki welfare pa kapab asiste.

Anba son Lalwa i pa kapab assist sa bann dimoun, me sa bann dimoun napa en lot rekour.  Sa bann dimoun i kapab annan en case devan Lakour, i kapab annan en sityasyon konpleks devan, devan en case.

Eski Minister, mon pa pe dir al met ankor larzan, me eski nou pa pe vwar en fason pou kapab kree en – pa en, en safety net ki fason, me en lasistans pending, ki sa bann pti keksoz i sort out.  Mr Speaker spesifikman par egzanp, mon kapab annan en case Ankour, ki en dimoun pa kapab travay oubyen sityasyon ki i pe espere. Mersi Mr Speaker.

 

MR SPEAKER

Mersi.  Minis.

 

MINISTER MITCY LARUE

Mersi Mr Speaker.  Mr Speaker mon krwar definitivman parey Onorab in dir, i en bon keksoz pou nou fer en pti pe, koman en pti survey pou nou vwar, ki mannyer, par egzanp bann dimoun ki lo welfare, eski bann dimoun koman en letan zot lo welfare, akoz zot lo welfare.

I bann travay ki nou pe fer aktyelman.  Be an menm tan nou bezwen vwar ki dimoun ki bezwen, i pa kapab pa gannyen.  Nou pa pou fer labi.  Me nou vwar an menm tan, ler nou pe al an, an, kot home carer i konsernen, la avek reform nou bezwen vwar si napa labi la.

Si napa labi, e ki mannyer nou pou tir sa labi.  E mon asir ou si nou kapab tir labi o nivo sa, nou kapab revwar bann lezot.  Parey kot ou’n dir, si en dimoun i bezwen en keksoz la, dan, dan Lalwa ki nou annan, napa sa rekour a sa, nou bezwen rod en fason ki sa i antre, pou nou kapab ed sa dimoun ki trouv li dan en sityasyon difisil a en moman.

Ou konpran? Nou bezwen fer sa osi.  Savedir i annan en travay, en travay byen etale ki nou pe fer, pou nou kapab regard an tou.  E se sa ki bann diskisyon osi ki nou pou fer atraver pei, i bann pti kestyon ki pou tous tou sa bann diferan laspe pou nou kapab ganny pwennvi tou dimoun, pou nou kapab pli met ansanm e fer keksoz, pou nou kapab soutenir sa bann progranm.  Akoz i enportan ki nou soutenir sa bann progranm.  Mersi.

 

MR SPEAKER

Mersi Minis.  Onorab Gervais Henrie.

 

HON GERVAIS HENRIE

Mersi Mr Speaker.  Mr Speaker bokou in ganny dir, me solman mwan ti ava kontan demann Minis de pti keksoz.  Premyerman en larepons wi ou non.  Premyerman Minis i konfirmen ki right to social security i form i Lartik 37, Seychellois Charter o Fundamental Human Rights and Freedoms.

E dezyenmman ki larzan sekirite sosyal, ki 1.3bilyon Bidze pou 2019, i ganny kontribye par tou tax payers Seselwa, atraver tax direk ou endirek.  Sa i 2 premye kestyon, mwan oule Minis i konfirmen par en larepons wi ouswa non?

 

MR SPEAKER

Mersi.

 

HON GERVAIS HENRIE

Dezyenmman Mr Speaker.

 

MR SPEAKER

Onorab ou annan 2, ou’n fini demann 2, nou a adres sa.

 

HON GERVAIS HENRIE

Be en kestyon a Minis, Mr Speaker, en kestyon.

 

MR SPEAKER

En kestyon, me pa ..

 

HON GERVAIS HENRIE

Yes en kestyon.  Dezyenmman atraver lemonn in etablir ki i annan en lyen direk ant koripsyon avek lapovrete.

E semenn pase nou’n aprann par egzanp Parti Lepep i enplike direkteman dan koripsyon, kot zot in rent en propriyete plis ki R38milyon, e zot pan pey en sou tax lo la!

Sa i en akt koripsyon! Kestyon pou Minis,  eski, ki Gouvernman Mr Faure pe fer pou li kont koripsyon e ede redwir lapovrete dan nou pei, ki kapab tir burden lo sistenm sekirite sosyal?  Mersi bokou.

 

MR SPEAKER

Mersi Onorab.  Minis.

 

MINISTER MITCY LARUE

Mr Speaker, Mr Speaker konstitisyon i dir, Konstitisyon i dir “rights to social security” be sa i vast.  I vast sa.  Nou annan ledikasyon gratwit, nou annan lasante gratwit.  Ler nou dir social security, i vast.  Tou sa progranm ki nou’n mete.  i pa vedir ki i antre anba la!

Savedir sa i Polisi e vizyon en Gouvernman, e sa se sa Gouvernman dizour, ok?  Lo kestyon koripsyon, mon pa pou antre ladan mwan, akoz koripsyon i ganny detekte ler en dimoun in ganny met Ankour, pou in arive annan en koripsyon!  Alor mon pa antre ladan! Mersi Mr Speaker.

 

(Interruption)

 

MR SPEAKER

Mersi Minis.  Onorab Norbert Loizeau vitman.

 

HON NORBERT LOIZEAU

Wi.  Mersi Mr Speaker pou donn mwan sa pti sans.  Mr Speaker mon’n tann Minis koz lo tou sa bann keksoz.  I dir ki, i dir ki apre ‘77, Mr Rene ki’n fer tou sa bann keksoz.  Malgre mon ti annan fanmir ki ti siport Mr Rene, mon anvi demann Minis, dir Minis en keksoz vi, apre ki i ti fer koudeta.  Personn pa ti annan drwa dir nanryen dan sa pei.  Si ou ti koz kont son sistenm, ou ti ganny swa, egzile, met en kote …

 

MR SPEAKER

… anmenn kestyon relevan avek. Demann Minis.

 

HON NORBERT LOIZEAU

Alors Minis, mon anvi demann Minis, eski pa i normal ki se li ki bezwen sa bann keksoz?  Akoz personn pa ti ganny sans partisip dan lavi politik son pei – sa letan.  Mersi.

 

MR SPEAKER

Mersi Onorab.  Minis.

 

(Interruption)

 

 

MR SPEAKER

Minis.

 

MINISTER MITCY LARUE

Pwen note Mr Speaker. (laughter)

 

MR SPEAKER

Mersi Minis.  Mersi Minis.  Kestyon i direk, e mersi pou ou repons.  Mon ava donn laparol Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker.  Bonzour Minis ek ou delegasyon.  Tou dimoun, tou Manm Onorab e tou dimoun ki a lekout.

Mr Speaker mwan, mon welcome sa statement ki Minis, lo sa progre Minis in, in fer lo sa progre ekstraordiner, e en mezirab ki nou parti nou Gouvernman in anmennen dan sistenm welfare, ek tou son bann lezot benefis.

Mr Speaker, dan mon konesans mwan, kestyon lapovrete direkteman lye avek travay, lanplwa, ok?  Si en dimoun i dan travay son, son risk, son sans pou li étre dan lapovrete, i, i mwens, bokou mwens.  Now, Minis ki mannyer ou Minister ek Lazans Welfare pou kontinyen fer sistenm welfare evolye?

E pou plas tou dimoun ki kapab travay, e ki pa pe travay, e ki lo welfare, dan en travay e konbyen letan dele sa i kapab ganny fer?  Pou ki tou dimoun ki kapab travay i sorti konpletman lo welfare pli vit posib, e i al dan lanplwa, ou amelyor zot sityasyon lavi.  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Mersi Onorab.  Mwan krwar ou, ou, ou, ou, ou’n, ou’n byen dir, pou dir si nou, si nou pa dan lanplwa definitivman, par egzanp dan en fanmir ou annan ou 3 dimoun ki las travay, ki devret pe travay, ou vwar zis 1, e sa 2 pa pe travay, otomatikman i pou annan en, en, en kou lo sa fanmir kot zot pou tonm dan lapovrete, ok.

So ki nou pe fer atraver nou Minister, se nou, nou travay parey mon’n dir i annan detrwa bann diferan progranm.  Par egzanp URS, lot acquisition skill eksetera, ki nou pe reskilling, ki nou pe fer avek Minister Lanplwa.

Savedir nou, nou bezwen kontinyelman travay avek Minister Lanplwa, pou gete kote, par egzanp menm o nivo, bann travayer etranze petet.  Dan bann domenn kot bann travayer etranze pe travay, petet nou kapab travay ansanm ek Minister Lanplwa.

Regarde ki mannyer nou kapab al redwir sa, e fer antre nou bann, nou bann Seselwa.
Savedir i pou annan en travay tre kordinen ansanm avek Minister Lanplwa, pou nou kapab anmenn dimoun met dimoun dan travay, e parey nou’n vwar, even Minister Lanplwa ozordi pe fer door to door.  Door to door pou zot met dimoun dan lanplwa.

E nou osi lo kote Minister Lafanmir, ek even Departman Lapovrete, ler nou pe fer nou bann vizit, nou pe pran sa bann ka kot dimoun pa travay nou anmenn devan pou nou met zot dan lanplwa.

Vedir i annan en travay deza pe ganny fer, e nou pou bezwen ranforsi sa pou fer sir ki to dimoun kontribye dan lasosyete.  Pli nou travay, nou anmenn lekonomi pei agrandi.  Mersi Mr Speaker.

 

MR SPEAKER

Mersi Minis.  Bon nou a pran dernyen kestyon.  Onorab Bernard George.

 

HON BERNARD GEORGES

Mersi Mr Speaker.  Mr Speaker, mon’n ekout Minis avek bokou latansyon bomaten.  Ler i ti pe dekrir vizyon Mr Rene.

Mon kestyon se Minis, vizyon Mr Rene, eski sete pou envant sekirite sosyal, e donn Sesel sa sistenm konman en premye dan lemonn, oubyen sete pou kopye sekirite sosyal ki lezot pei ti’n evante, ki ti’n mete depi byen avan, e pou anmenn sa isi Sesel?

E dan sa konteks, eski sete vizyon Mr Rene pou fer ki bann dimoun ki ti reste deor, malgre ki zot ti qualify pou sekirite sosyal, apre ki zot tin, en, en bon pe sa bann dimoun ki ti’n bezwen al reste deor.  Akoz li menm li Mr Rene ti’n fer zot al an egzil.

Ki ti ler, ki ler zot in retournen, zot ti bezwen esper 5 an pou zot ganny sekirite sosyal, e dan bokou ka, zot ti mor avan zot ganny zot ganny zot sekirite sosyal, e ti bezwen, e ti bezwen vizyon Onorab Prea, Speaker Lasanble ozordi pou anmenn en Mosyon devan sa Lasanble pou fer redwir oubyen abolir sa period 5an.  Mersi.

 

 

MR SPEAKER

Mersi Onorab Georges.  Minis.

 

MINISTER MITCY LARUE

Mersi Mr Speaker.  Mr Speaker sa residency la, kot nou’n dir ler dimoun i reste deor, letan i vini.  Ou konnen Mr Speaker i annan dimoun in ale pou plis ki, nou pou dir plis ki 50an in ale.

Ozordi i retournen pou li vin reste Sesel.  I normal Sesel son pei.  Me selman, nou bezwen osi rekonnet ki i bezwen annan en, en residency test, ki nou fer.  Nou bezwen regarde konbyen letan sa dimoun in reste Sesel.

E i vre nou ti pran 5an, me la dernyerman nou’n sanze sa.  Nou’n sanze.  Nou’n deside pou dir i annan dimoun ler i vini, nou santi i annan serten landrwa kot zot in ale, sirtou bann ki’n al travay, bann ki’n al dan bann pei Arab, nou dir bann lezot pei, zot in al travay, zot in pas atraver bokou difikilte, e zot napa en pansyon ler zot tourn Sesel.  Zot napa.  Tandis i annan lezot ki sorti bann lezot pei, zot ler zot vini, zot annan en, en pansyon ki zot pe gannyen dan sa pei, kot zot ti pe reste ler zot vin Sesel.  Alor letan nou’n vwar sa difikilte, lanmenm ler nou’n fer, nou’n fer sanzman, nou’n met 1an prezan.

Zis 1an pou ou reste Sesel, me i annan sa 12an aggregate ki sa i en standar enternasyonal.  I pa enn ki nou’n kree, me i en standar enternasyonal, ok?  Kot i konsern sekirite sosyal, kot ou dir Mr Rene –  mon pa konnen si dan, me selman Mr Rene ki ti kree pou Sesel.

Mr Rene ki ti fer.  Se lete son vizyon.  E nou bezwen aksepte silvouple, se la realite Sesel.  Annou aksepte, annou pa met anba tapi, akoz tou dimoun i konnen! Zenes i bezwen konnen.  Alor sete Mr France Albert Rene ki ti met sa.

 

MR SPEAKER

Mersi Minis.

 

MINISTER MITCY LARUE

Mersi Mr Speaker.

 

 

(Interruption)

 

MR SPEAKER

Mersi Minis.  Non, Onorab non, non, non.

 

 

(Interruption)

 

MR SPEAKER

Bon.  Order!  Mon annan, non, non, non.  Mon annan en pti kestyon Minis avan …

 

 

(Interruption)

 

MR SPEAKER

Order!  Minis mon annan zis en pti kestyon avan ou, nou eskiz ou.

Pou en one-off lasistans anba, an welfare, eski en dimoun par egzanp en fanmir, e mwan annan serten ka la ki’n vin devan mwan,  kot en single mother, kot i annan li de zanfan, deza i pe pey housing Scheme pou li ganny en lakaz.  I pe lwe en bedsitter.

E son saler i pe cope avek de pti zanfan osi tou.  I ariv en ka kot en keksoz itil dan lakaz i brile, par egzanp son washing machine.  Eski i kapab vin kot lazans, i pa pe abize, i pa lo sistenm welfare, i pe travay pou soutenir son pti fanmir.  Me i dan en sityasyon vilnerab.

Eski a sa moman i kapab apros ASP, pou li ganny sa led, akoz nou tou nou konnen ozordi en washing machine i en keksoz itil, pou li kapab zis ganny sa led pou li purchase en konponan parey.  En one-off, san ki i vin abiz sistenm?  Mersi.

 

MINISTER MITCY LARUE

Mr Speaker, sa, sa one-off la i dan, i annan policy kler, kot nou pa vreman entertain dimoun pou aste fridge, pou aste lot, lot, lot, ok?  I pa antre anba nou, anba nou striktir ki nou annan.  Dimoun i a vini anba welfare, nou a ed li, prezan li i a kapab pran a larzan al aste sa keksoz ki li i krwar i bezwen.

Nou pa entertain. Akoz sankwa nou pou tande pou dir la kot welfare, laba kot Lazans Proteksyon Sosyal pe konmans donn fridge, pe konmans donn cooker eksetera.  Ou konpran?

Me selman sa dimoun i kapab fer son laplikasyon, san menm dir napa en fridge, apre li son larzan i gete ki mannyer li, ii benefisye avek son larzan.  Ki i fer avek, si i kalifye anba welfare.

Akoz nou, nou pa donnen sa vreman.  Mersi Mr Speaker.

 

MR SPEAKER

Mersi Minis.  Bon, mon pa ti pe al dan sa konteks ki ler ou vin kot Mr Simeon, ou sorti ek en fridge oubyen ek en washing machine.  Me ou ganny sa lasistans ki ava permet ou me son rezon, ki sa dimoun pou vin devan i pou vin onnetman, i pou dir, vwala mwan sityasyon i vilnerab.

Mon washing machine in brile, e mwan pe rod en lasistans pou mwan kapab al purchase a new oneSo i dan, i dan sa direksyon.  Nou pa ti a kontan ki, ki kot Mr Simeon ou kapab sorti ek en washing machine, en flat screen, oubyen en, en fridgeOk?

Bon Minis mon krwar nou, nou konpran sa sityasyon byen.  Bon, Minis nou ti a kontan remersi ou, pou vin spend sa bomaten avek nou dan Lasanble avek Mr Simeon, pou reponn en pti pe bann kestyon.  E avek sa nou ti ava eskiz ou parmi, parmi nou Lasanble.

E nou swet ou bonn kontinyasyon, pandan lazournen.

 

MINISTER MITCY LARUE

Mersi Mr Speaker.

 

(MINISTER MITCY LARUE AND HER DELEGATION WAS EXCUSED FROM THE HOUSE)

 

 

 

MR SPEAKER

Mersi.  Bon nou pou, nou pou pran en break ziska 11.30.  11.30 ler nou pou antre nou pou pran Mosyon lo apwentman Anbasader.

Konman nou a fini pran Mosyon nou pa pou ouver deba.  Nou pou apel nominen, kandida pou sa post.  I ava vin parmi nou.  Nou ava al dan Staz Komite, kot i ava annan sa enteraksyon ant li, avek Manm Lasanble.  E mon swete, nou ava regarde avek SBC, si nou kapab ale ziska petet ver12.30.

Kot nou a fini sa enteraksyon.  E 2er ler nou ava antre, nou ava pran deba lo, lo Mosyon.  Nou ava regarde, merit, e pou nou kapab pran en vot, pou regarde si Lasanble pou aprouv sa nominasyon oubyen non.  OkSo nou ava Break, e nou retournen 11.30.

 

(BREAK)

 

 

 

MR SPEAKER

Bon nou ava kontinyen avek nou travay.  E nou prosen item lo Order Paper, e premye Mosyon ki pour ganny prezante par Onorab Charles De Commarmond.  Onorab De Commarmond la parol i pour ou.

HON CHARLES DE COMMARMOND

Mersi Mr Speaker.  Mr Speaker zis en pti fot tipografi dan Mosyon.  Mon’n ekrir ou, me selman ou’n fer sa koreksyon on the floor.

Alor Mosyon pour lir koumsa:

That this Assembly approves the proposed appointment by the President of Mrs Lalatiana Harisoa Accouche as an Ambassador of the Republic of Seychelles in accordance with Article 64 (1) of the Constitution. 

        Mr Speaker Madanm Accouche i enn sa bann tre pe veteran ki reste kot Maison Quéau de Quincy kot Minister Zafer Etranzer.  En Diplomat en karyer avek 28an leksperyans avek en Degre dan Lasyans Sosyal.  Madanm Accouche ti komans son karyer Diplomatik an Zen 1991, ler i ti zwenn Minister Zafer Etranzer apre son bann diferan interview avek bann diferan  echelons dan sa Minister.   In travay 6an anba gidans e stil travay defen Mrs Danielle de St.Jorre.  E tou Seselwa i konnen ki si en travayer in pas dan lanmen defen Mrs Danielle de St.Jorre, i bezwen sorti koman en bon fri, koman en bon travayer.

Madanm Accouche i koze e ekrir dan 5 Langaz, Angle, Franse, Espanyol, Malgas e Kreol.  An plis ki son bann formasyon akademik, in osi swiv plizyer training, plizyer kour e entansif dan La Diplomasi dan plizyer pei.

Madanm Accouche ti komans son karyer Diplomatik koman en zofisye dan Departman Korperasyon Ekonomik, e in progrese.  E in pran plizyer pozisyon e travay lo en kantite dosye dan Relasyon Enternasyonal, Bilateral, Miltilateral, e Konsiler parmi d’autres.

In osi partisip dan preparasyon e kordinasyon plizyer, gran levennman dan Minister Zafer Etranzer, tel ki; bann vizit Prezidansyel, vizit D’état, vizit Ministeryel, lokal e enternasyonal, bann diferan Komisyon mix, bann meeting o nivo, bann Retret, e Konferans bann Anbasader, bann Konsil Onorer, ensidswit.

 

 

In osi travay dan plizyer Lanbasad e ede train plizyer nou bann zenn Diplomat Seselwa.

Madanm Accouche in alor akimil e annan en gran konesans e en leksperyans tre ris dan La Diplomasi e Relasyon Enternasyonal.

Pandan sa 28an, travay kontinyel dan sa Minister, Madanm Accouche in fer bann kontribisyon significant dan travay Zafer Etranzer dan lenplimantasyon nou Polisi Zafer Etranzer e dan kontinyite.

E an menm tan anrisir relasyon Sesel avek lezot pei e avek bann Lenstitisyon rezyonal e enternasyonal.  E in ede etablir en gran network lokalman e enternasyonalman, e sa i tre enportan Mr Speaker dan La Diplomasi, sirtou ozordi zour.  Savedir lemonn Diplomatik i konn Madanm Accouche tre byen.

Madanm Accouche i osi tre connue pour son travay dir e efisyan, e son stil proactive e pragmatic.  E sa mon garanti Mr Speaker in byen pran avek Defen Madanm De St. Jorre.

Madanm Accouche in osi demontre son kapabilite e potansyel pour manage e diriz en Misyon Sesel aletranze li tousel.  Par egzanp se Cuba kot in Ag Chargé d’affaires pandan – depi Desanm 2017 ziska ozordi – 17 mwan.

Sosyalman Mr Speaker, Madanm Accouche i en Founding Member.  En Komite ki’n ganny etabli depi an 2013 pour rod  fon e finansman pour partisipasyon bann zanfan Seselwa dan bann festival enternasyonal.

Sa Komite in an egzistans pandan sa dernyen 7an e plis ki 100 zanfan in benefisye partisip dan bann pei parey Lanmerik, La France, La Turquie ensidswit.

Avek tou sa Mr Speaker, mon napa dout ki Madanm Accouche i zwenn tou bann kriter e merit pour li vin en Anbasader e kontinyen promot Sesel lo lasenn enternasyonal.  Nou ti pe rod en Anbasader de karyer.  Vwala enn Mr Speaker.

Mr Speaker mon demann nou Lasanble, pour vot pour sa Mosyon e aprouv nominasyon Madanm Lalatiana Harisoa Accouche koman en Lanbasader Larepiblik Sesel.  Mersi Mr Speaker.

 

MR SPEAKER

Mersi Onorab De Commarmond.  Okenn Onorab ki segonde?  Yes Onorab Simon Gill.

 

HON SIMON GILL

Mersi bokou Mr Speaker.  Mr Speaker Mosyon in ganny segonde parey in ganny prezante.  Mersi.

 

MR SPEAKER

Mersi Onorab Simon Gill.  Bon parey mon ti’n averti ki nou pa pour antre dan deba deswit.  Nou pour fer sa legzersis ki i en norm ki 6enm Lasanble in adopte ki nou pour apel nominee  – kandida.

Premyerman nou pour al dan Staz Komite.  Mon ava demann Sergeant pour move Mace, e nou ava fer sa enteraksyon.  Bann Manm ki annan kestyon ki anvi poz nominee, i ava fer.  E apre midi nou ava pran deba lo Mosyon.  Mon ava demann Parliamentary Reporter pour apel Madanm Accouche ki ava vin enterakte avek nou.

Mon ti a kontan osi petet gid bann Manm ki pour interacte, annou tenir en pti pe nou kestyon lo kalifikasyon, lo leksperyans e petet en pti pe osi tou lo bann keksoz ki kapab anmennen pour pei.  Ok, so annou tenir en pti pe nou enteraksyon.

Bon mon ti a kontan dir bonzour e welcome Madanm Lalatiana Harisoa Accouche, nominee pour sa post Anbasader parey Mosyon i pe dir.  Mon ti a kontan welcome li devan Lasanble Nasyonal.  E petet mon a demann Madanm Accouche pour komanse.  Donn nou en pti résume, en pti apersi petet lo ou menm, lo ou travay, pour dizon 5minit.  Apre bann Manm i a kapab interacte avek ou.  Madanm Accouche la parol i pour ou.

 

MRS LALATIANA ACCOUCHE

Mersi Mr Speaker.  Bonzour tou dimoun.  Bonzour Onorab Afif, Deputy Speaker.  Onorab De Commarmond, Leader Zafer Gouvernman.  Bonzour tou dimoun.  Bonzour tou bann Onorab e tou dimoun ki pe ekoute lo radyo, lo televizyon mon bann fanmir e zanmi e lo sa ki swiv lo internet.

Avan tou permet mon prezant mon remersiman pour sa loportinite ki pour mon prezant merit mon nominasyon koman Anbasader Nasyon Seselwa.  I vreman en loner pour mwan.  Mon apel Lalatiana ki byen koni koman Lala.   Mon annan 54an, mon ti ne e ti swiv lekol Madagascar ziska ki mon ti ganny mon Baccalauréate dan Serie C avek en mansyon tre byen.

Apre Servis Nasyonal mon ti komans letid Liniversite ziska ’86 ki mon ti’n ganny anvoye Cuba pour letid  dan lasyans sosyal.  Avan mon ti komanse, mon ti aprann Espanyol.

Ler mon ti fini an ’90 mon ti antre Madagascar, e an desanm sa menm lannen mon ti vin Sesel.  E an ’91 mon ti marye avek Douglas, mon msye ki mon ti’n zwenn pandan ki mon ti lekol Cuba.

An ’91 mon ti’n trouv dan Nasyon en post kot Minister Zafer Etranzer, e mon ti apply.   Sa letan Madanm, defen Madanm De St. Jorres ki ti Minis.  Alors interview ti entans an Angle, an Franse oral e ekrir.  E apre en bokou interview mon ti’n ganny sa post koman Ekonomik Operasyon Zofisye.

Depi sa mon’n kontinyen travay dan sa Minister; savedir 28an.  E mon’n ganny sans travay ek plizyer Minis – plizyer PS e menm lezot Minister, lezot Lorganizasyon.  E bokou Onorab ki prezan ozordi, mon ti’n deza interacte avek zot.

Mon koz 5 Langaz, e sa in permet mwan pour swiv en diferan kour aletranze dan diferan Langaz, dan diferan pei.

Kot Minister mon’n- pandan sa 28an, mon’n okip bokou dosye ki mon’n kapab dir.  Preski tou dosye ki Minister Zafer Etranzer i okipe dan Relasyon Enternasyonal.

An 2010 mon ti’n ganny apwente apre ki mon’n pas dan lezot post koman seconde, deuxième, première Secrétaire.

An 2010 mon ti’n ganny apwente koman Diplomatic Attaché pour ansarz en Seksyon ki asir enteraksyon prodiktiv ant Lanbasad, nou Lanbasad aletranze e Minister, e osi bann Consul Honoraire ki sa letan ti annan apepre 80.

Pandan sa letan mon ti okipe osi, mon ti kontinyen okipe Dosye Bilateral.  Donk dan mon karyer Diplomatik kot Minister, mon’n preski kouver tou pei dan larezyon, okip laplipar Lorganizasyon rezyonal, enternasyonal.  Organiz bann vizit Prezidansyel, Ministeryel, e mon ti al bann advanced team pour prepar tousala, e form parti sa delegasyon, asir son follow-up, e fer sir ki bann projet, bann desizyon ki’n ganny deside i a enplimante.

Mon ti organiz osi bann Konferans isi lokal; bann vizit, bann o personnalite isi Sesel.  Mon’n prepar en ta, – en bokou Komisyon Mixed, asir son follow-up ek tousala.

E mon ti organiz osi pandan ki mon ti Diplomatic attaché en Konferans bann Consul Honoraire. 

E ler mon ti organiz bann Consul Honoraire–  e mon krwar akoz mwan toultan mon ti’n dir lepep Seselwa par egzanp, pa tro konnen ki sa bann Consul i fer.  So mon ti’n donn zot sans pour partisip dan bann proze.  Par egzanp asiste lekol La Musique. Lekol La Musique ti’n ganny tro bokou lenstriman sa letan.  Apre sa, mon ti organize ankor pour zot.  Par egzanp asiste Minister Lasante.  E Minister Lasante sa letan osi ti ganny en ta lenstriman, en ta led.

Apre j’ai assister Madanm – sa letan ti Officier Permanent de Liaison de L’océan Indien.  Donk Dosye Liaison COE osi i parmi bann Dosye ki mon’n deza deal avek.        Apre mon ti reprezant Minister lo National Gender Steering Committee e osi lo Mayors Committee.

An 2013 mon ti’n ganny anvoye Londres koman Konseye Spesyal, savedir 2enm dan Lanbasad e ti act as Chargé d’affaires ler High Commissioner pa ti la.  Mon fer 4an laba e mon ti retourn Sesel.

An 2017, an Oktob mon ti ganny anvoye Cuba e mon ti asiste sa Lanbasader ki ti an post sa letan.  Me mon Lanbasader ti’n retire an Desanm 2017.  E from Desanm 2017 mon ti tousel Cuba, mon’n fer tousel tousala.  E Cuba i enn plas ki tre, tre aktiv.  E i annan preski 130 misyon Diplomatik, e aktivite i entans laba.

Apre sa mon’n kontinyen, mon’n kontinyen.  E mon asire ki sa bann leksperyans ki mon’n akimile, in anrisir mon kapasite.  I donn mon plis konfyans ki mon kapab pran sa sarz en misyon e reprezant Sesel nou pei.

Lo kote sosyal, an 2013 mon ti ganny demande pour etablir en Komite, ki mon ti fer.  E nou ti komans en zero dan nou Fon.  E nou ti’n organize pour ki bann zanfan Seselwa i al aletranze, i partisip avek bann festival enternasyonal pour zanfan.

Donk pour sa 7an de konsekitiv, nou ti anmenn zanfan toulezan pour al dan diferan pei.  Nou ti komanse avek Seattle, Lanmerik, nou ti ale La France.  E dernyen edisyon se lannen dernyen an Avril kot nou ti anmenn 16 zanfan en Turquie e zot ti vizit de Lavil en Samsun e Antalya.  Zot ti meet avek Prezidan Erdoğan, zot ti meet avek Prime Minister, zot ti meet avek bann O Zofisye Turquie.

Mon rol dan sa Komite, se rod kontak, rod Fon pour ki nou kapab kouver depans relative avek tou sa bann deplasman bann manrmay.  E nou tre fyer pour ki nou kapab akonplir sa dernyen 7an.

E mon ava pran sa lokazyon pour remersye tou dimoun, ki dan en fason ou en lot in ed nou pour fer sa progranm vin realite, e sikse ki mon kapab dir.  Akoz sa bann zanfan ki’n ganny sans pour partisipe, zanmen pour bliye zot leksperyans.

E zot in kapab etablir osi amitié avek diferan pei.  Akoz dan sa bann festival, dernyen fwa ki nou ti ale ti annan plis ki 50 pei ki’n partisipe.  Donk bann pti Seselwa ti’n ganny sans etablir kontak avek diferan pei, avek diferan zanfan, aprann Kiltir zanfan diferan pei.

Mon ava terminen pour remersye Gouvernman pour tou loportinite ki’n donn mon pour mwan ganny sa leksperyans e osi sa exposure, e sirtou pour donn mon sa leksperyans pour kontribye dan devlopman Sesel.  Ki pandan sa 28an mon krwar mon’n kapab fer en ladiferans.         Mon osi mon remersye tou bann ki’n ede e in siport mon toute au long sa long parkour 28an.

E set avek imilite ki mon konsider sa nominasyon, pour kontinyen deservi Sesel.  Me dan en kapasite pli o koman Anbasader.

E mon tre fyer e konvenki ki mon annan sa bagaz, mon annan sa leksperyans konpetans, pour mwan kontinyen desarz sa responsabilite e kontinyen kontribye dan devlopman Sesel.

Ankor enn fwa en gran mersi pour sa loportinite ki donn mwan.  Mersi Mr Speaker.  Mersi tou bann Manm Onorab pour zot latansyon.  Mersi.

 

MR SPEAKER

Mersi Madanm Accouche.  Bon nou ava komans enteraksyon.  Ankor mon aviz bann Manm, annou al lo kestyon direk pour Madanm Accouche.  E Madanm Accouche osi otan posib repons direk e kourt, presiz.  Nou a komans avek Onorab Jude Valmont.

 

 

HON JUDE VALMONT

Bonzour Mr Speaker.  Bonzour Madanm Accouche.  Mersi Mr Speaker pour la parol.  Mon mwan ti a voudre – mon’n ganny sans pas dan CV Madanm Accouche.  Mon vwar ki ou annan 28an leksperyans dan Minister Zafer Etranzer koman en Diplomat.

Mwan mon ti a voudre demann ou pandan sa 28an, ou leksperyans, ki pli bon leksperyans ou’n pas ladan?  Ki keksoz ki ou kapab dir en achievementWhat is your biggest achievement up to now dan sa 28an?  E ki mannyer sa i kapab servi pour ou demen koman en Anbasader pour pous Sesel pli devan?  Mersi.

 

MR SPEAKER

Mersi Onorab Valmont.  Madanm Accouche.

 

MRS LALATIANA ACCOUCHE

Mersi Mr Speaker.  Mersi Onorab pour ou kestyon.  28an dan Zafer Etranzer i long.  E dan sa 28an par egzanp mon ti ansarz Dosye Cuba par egzanp pour pres ki 20an, preski 20an.

E si ou gete nou annan en kantite dokter, ki’n sorti Cuba.  Par egzanp mon pour al pa mwens ki 30 manrmay, mon pe dir bann zenn.  Bann zenn dokter ki’n retournen, e sa bann zenn dokter ti’n komanse ler mon ti la.  Savedir mon ti bann ki’n negosye pour ganny scholarships; mon ti’n ganny negosye, mon ti ed zot.  E la zot in vin dokter.

E nou’n ede, osi negosye pour zot al deswit pour fer spesyalizasyon.  E nou annan ki’n deza komanse, fer sa spesyalizasyon.

So toultan mon dir ler mon vye, mon pour napa traka, i annan dokter, ta doker pour sonny mwan.  So mon pour mwan set en achievement.   Akoz kot ou ale ou trouve poudir sa bann dokter i annan lenpak direk lo lepep, i sonny dimoun, they take care of them, not Lala selman.  Thank you Mr Speaker.

 

MR SPEAKER

Mersi Madanm Accouche.  Onorab Jean-François Ferrari.

 

HON JEAN-FRANÇOIS FERRARI

Bonzour Madame e byenveni dan Lasanble.  Mon ti a kontan Mr Speaker komanse par dir ki – enform bann Manm ki yer nou ti annan en sesyon travay avek Sekreter Prensipal pour Minister, pour Departman Zafer Etranzer ki ti donn nou posibilite pour nou demann detrwa leklersisman, detrwa lenformasyon lo e otour sa kandidatir ki devan nou ozordi.  So pour bann Manm Lasanble ki pa’n partisip dan sa sesyon, mon mazinen zot ava annan bann kestyon.

Me lo mon kote koman Chairman Komite Zafer Etranzer dan Lasanble,  mon ti a kontan fer enn de komante;r notaman remersye PS Zafer Etranzer ki’n vini e ki’n échange avek nou, remersye li pour son letan e tou bann lenformasyon ki’n donn nou e bann lenformasyon konsernan the kad, bann kad dan Minister ki annan pour fer avek ran Anbasader ki’n anvoy kot nou bomaten.  Ti en lenformasyon ki nou ti’n demande.

Ceci dit Mr Speaker mon ti a kontan prezan demann enn de kestyon Madanm Accouche.

Premye kestyon, mon’n tann ou Madanm Accouche ou’n nonm Madanm De St. Jorre koman en dimoun ki ou’n travay avek.  Leader of Government Business osi in nonm Madanm De St. Jorre. Me sa i fer en bon pe letan pase.

Apre Madanm De St Jorre, mon en pe sirprann pour vwar ki personn ankor pa  ankor pa ganny nonmen.  Konmsi apre Madanm De St Jorre, eski in annan en vid?  Eski, akoz eski nou bezwen retourn sitan lontan dan listwar pour nou vwar en model?

Oubyen, eski ou kapab dir nou ki, non i annan lezot bann dimoun ki avek ki ou’n travay ki’n ansarz Minister oubyen ki nou siperyer, ki’n kapab mentor ou e donn ou en pe sa formasyon ki ou pe dir nou ou annan?  Sa i mon premye kestyon.

Mon 2enm kestyon.  Se ki mon pa’n direkteman vwar lo ou CV –  e mon ti a kontan ou dir nou ou menm,  ki kalite leksperyans ou annan dan korperasyon Ekonomik Enternasyonal?  Rezyonal e enternasyonal.

Akoz pour nou, o nivo Komite Zafer Etranzer, i enportan ki sa vizyon.  Anfen mon pa kontan servi sa mo.  Akoz sa mo in ganny servi bomaten dan bann fason en pe tro bokou.

Me sa bann plan ki Gouvernman in anonse o kour sa bann dernyen lannen, konm kwa nou bezwen annan en Diplomasi Ekonomik.  E ki i en mo ki – i en lide ki  mwan mon mwan partaze.  E mon ti a kontan ou kapab dir nou ki, – kwa ki pe fer, kwa ki kapab fer ou en bon Diplomat pour promot bann lesanz ekonomik ant bann pei avek Sesel?  Promot devlopman Ekonomik dan Sesel.  Promot bann lesanz Ekonomik enternasyonal ki- eksplik nou en pe ki ou santi dan sa domenn en pe partikilye bann dan relasyon enternasyonal?

Mon ti a kontan osi- kekfwa mon’n note en keksoz, kekfwa ou ti a kontan korize, oubyen ou ava koriz mwan.  Akoz isi lo sa kote latab e dan sa Lasanble an zeneral, nou kontan bann keksoz vreman tre presi.  Me la ou’n dir taler ki Anbasader ki ti Cuba avan, in retire.  Anbasader Nourrice.

Mwan lenformasyon ki mon’n gannyen, se sa ki nou konnen, se ki i pa’n retire, in resign.  Konmsi nou  i enportan ki nou ganny – ou konnen Madanm dan monn Diplomatik sak mo i enportan.  So kekfwa ou ava koriz mwan, oubyen kekfwa ou ava koriz sa ki ou’n dir,  akoz i bon ki nou ganny bann bon lenformasyon.

E finalman mon ti a kontan demann ou, pou dir nou si ou krwar poudir ou en bon Leader?   Ki mannyer ti dir sa msye ki ti met kandida pour eleksyon?  En Leader!  Eski – akoz la ou pe, ou pe prepar ou si ou ganny konfirmen pour ou en sef en lekip, Ofisyelman sef, vin en sef lekip aletranze, ki deza i ase difisil.

E mon ti a kontan ou dir nou en pe keksoz ki convince nou poudir ou kapab lead en lekip, ki mannyer ou kapab lead en lekip avek en serten larmoni avek- san bokou tansyon, avek korperasyon entern dan sa lekip.

Konmsi koz avek nou lo ou sans leadership pour kapab asir nou poudir ler ou pou’n- ler ou kit Sesel.  Si ou kit Sesel, sorry mon bezwen dir sa.  Si ou kit Sesel avek en pozisyon Anbasader nou pour, nou pa pour bezwen enkyet poudir dan sa Lanbasad tou keksoz i anba kontrol akoz nou annan en leader ki pe ansarz en lekip dan en fason profesyonnel.  Mersi Mr Speaker.

 

MR SPEAKER

Mersi Onorab.  Madanm Accouche.

 

MRS LALATIANA ACCOUCHE

Mersi Mr Speaker.  Mersi Onorab pour ou kestyon.  Premye kestyon konsernan pa’n nonm lezot Minis.  Petet mon pa’n nonm non ABC, be solman mon’n dir mon’n ganny sans travay avek lezot Minis osi ek en ta PS.  E sak dimoun i annan son stil e nou nou’n aprann.  Dan sak Leader nou aprann en stil, e nou devret adapter osi selon son stil.

So mon pa kapab dir poudir mon pa’n aprann nanryen avek lezot Minis, ki ti’n vin apre defen Madanm De St Jorre.  Be selman nou tou nou konnen poudir Madanm De St Jorre osi ti en dimoun ki byen drwat, e nou ti aprann.  E Even now nou still parey ou dir, nou pe fer referans ler ou dir Diplomasi, ethics, nou pe dir Madanm De St. Jorre.

Be selman mon asir ou atraver bann Minis ki ti vin apre Madanm, defen Madanm De St Jorre, nou ti aprann, nou ti aprann.  E nou ti’n pran sa ki nou ti’n kapab pran ki nou- ki mon’n kapab fer mon vin mannyer mon ete konmela.

2enm kestyon konsern le korperasyon rezyonal, enternasyonal.  Dan Minister Zafer Etranzer until last year mon krwar, kot ler zot ti’n aboli sa Seksyon ou sa Divizyon ki ti ansarz Korperasyon Rezyonal.  Nou ti annan 2 Divizyon Rezyonal Integration –  Regional Integration avek Korperasyon Enternasyonal.

Bann ki ti al dan rezyonal, Integration Rezyonal- Intégration Rezyonal, se bann Économiste.  Nou, nou ti dan bann desk officer pour bann pei Bilateral e bann Lorganizasyon enternasyonal ki pa Ekonomik.

Me selman nou ti annan sa bann ki ti apel – ki mon ava swete ki nou ava repran Sektoryel Review Meeting.  Savedir kot le de Divizyon a meet selon Sekter avek tou bann Minister Konsernen konsernan en dizon Kiltir, dizon trade.  E la nou ti aprann ki mannyer i ete sa apard sa Senior Officers Meeting ki nou annan sak semenn,  nou aprann ki bann proze i annan.

I donn nou nide osi ki sa bann échange Ekonomik ki kapab donn benefis Sesel.  E tousala in ed nou pou progrese osi kantmenm nou pa ti dan sa Divizyon li menm.

3enm kestyon se konsernan Anbasader Nourrice.  Mon kapab dir poudir sa i Admin issue  ki mwan  mon pa konnen, me sa ki mon konnen se ki retire.  In retire.  Mon ti laba mon ti laba avek Anbasader Nourrice.

 

(Interruption)

 

MR SPEAKER

Order! Order! Order! Order! Order! Mon’n donn la parol Madanm Accouche, annou montre serten respe.  Ok.  Order! Madanm Accouche.

 

MRS LALATIANA ACCOUCHE

Ya.  So pour mon i Admin, mon pa konnen egzakteman ki in mete.  Me mon konnen mon ti laba, se in retire.  In retire, e in retire from Government as well. 

 

MR SPEAKER

Mersi Madanm Accouche.

 

MRS LALATIANA ACCOUCHE

Dernyen kestyon Mr Speaker.  Dernyen kestyon bon  Leader.  Mon krwar depi Desanm 2017 mwan tousel Cuba mon ti gid, diriz Lanbasad.  Savedir mon ti ansarz staff.  E so far napa okenn problenm ki mon kapab dir – poudir mon kapab kontinyen dan menm lannen.  Mersi Mr Speaker.

 

MR SPEAKER

Mersi Madanm Accouche.  Onorab Audrey Vidot.

 

HON AUDREY VIDOT

Mersi Mr Speaker.  Madanm Accouche premyerman mon ti a kontan felisit ou koman en Madanm pour bann lakonplisman ki ou’n fer, dan ou parkour dan Minister, dan nou devlopman dan pei.  Mon kestyon pour ou, baze lo ou bann leksperyans e konesans ki ou’n fer dan Minister Zafer Etranzer –  koman en Madanm prenon kont ki nou napa bokou bann Madanm Anbasadris  Sesel, petet kwa ki ou, ou kapab anmennen an plis si ou ganny aprouve ozordi dan ou lapwentman?  Pour kapab enspir bann lezot fanm, espesyalman bann fanm Seselwa pour zot ganny sa loportinite, devlop plis zot abilite personnel pour petet avans en pti pe pli o ankor dan leadership e kontribye anver devlopman zot pei?  Mersi.

 

MR SPEAKER

Mersi Onorab.   Madanm Accouche.

 

MRS LALATIANA ACCOUCHE

Mersi Mr Speaker.  Mersi Onorab pour ou kestyon.  Wi ziska konmela nou trouve poudir napa bokou madanm dan Diplomasi, sirtou dan post Anbasader.  Me mon trouve poudir i pe sanze.  Pe sanze.

Kantmenm sa nou travay osi se, enspir bann manrmay parey ou dir, bann zenn fir poudir i pa fasil.  Sirtou ler ou ariv en laz ki ou annan fanmir, ou annan zanfan, ou bezwen delier.

Me selman dan tou keksoz ki ou fer dan lavi, ou komans avek disiplin, avek bon lorganizasyon.  So once ou annan disiplin ou organiz ou, enn bon lantantman ek ou partner e bon vizyon ek anbisyonn, ou pour arive.

So nou kapab komans depi dan lakour, enstri dan bann zenn fir poudir sa en bon louvraz.  E mwan mon ti a kontan dir par egzanp Cuba parey mon’n dir.  I annan plis ki 130 Lanbasad.  I annan en gran, gran nonm Anbasader Fanm.  E Anbasader Fanm, me avek Head of Mission in groupe, pa selman an zeneral, me selman i annan osi pour Lafrik.

E sa i enspir plis pour dir manrmay poudir ‘woah nou kapab ferm konmela, nepli pour zonm la.  Nou kapab.  Akoz ler i dir poudir ler i annan lager, donn fanm ek ou parol, pour fer zot fer lape.  So mon krwar nou kapab fer la diferans, e nou bezwen pous manrmay pour fer sa.  Thank you.  Thank you Mr Speaker.

 

MR SPEAKER

Mersi Madanm Accouche.  Onorab John Hoareau.

 

 

HON JOHN HOAREAU

Mersi Mr Speaker.  Bonzour Madanm Accouche.  En tant que Chargé d’affaires ou’n okip sa post Cuba pour 6 mwan, apepre ziska maintenant.  Mon ti ava kontan konnen, an term ou fonksyon ki mannyer ler ou’n vin en Anbasader ou fonksyon pour sanze?  Mersi.

 

MR SPEAKER

Mersi Onorab.  Madanm Accouche.

 

MRS LALATIANA ACCOUCHE

Mersi Mr Speaker.  Mersi Onorab.  Wi mon ti ansarz sa ki, la misyon as Chargé d’affaires pour 17 mwan so far.  17 mwan.

Dan lemonn Diplomatik i annan son ran.  Parey menm dan Minister Zafer Etranzer i annan i dir 2enm Sekreter, 3enm Sekreter i monte.  Premye Sekreter, i vin parey.

Mwan as Chargé d’affaires mon napa sa telman pouvwar pour mwan  demann en Minis resevwar mwan.  Akoz en Chargé d’affaires i en post tanporer.  En post tanporer ki toultan pou ganny ranplase pour en Anbasader pour le Tenm Protokoler.

Ou pa kapab anvoy en pti manrmay pour al – par egzanp al diskite ek en Direkter.  I vin parey apepre sa.  I annan son rol e dan Diplomasi. Protokol i en keksoz ki vreman, vreman fodre respekte.  Se sa la diferans.  Mersi Mr Speaker.

 

MR SPEAKER

Mersi Madanm Accouche.  Onorab Simon Gill.

 

HON SIMON GILL

Mersi bokou Mr Speaker.  Madanm Accouche byenveni dan nou Lasanble.  E de mon par mon krwar mon osi i en loner pour Sesel, e i en loner pour popilasyon fanm Seselwa.

Malgre mon pe enport ki nou konpran ou desandans, e sa i labote ki Sesel i annan.  Sa nivo ospitalite e kot en vas mazorite diferan Nasyonalite nou’n nobou kapab akey zot e fer zot vin par nou fanmir Seselwa.

E ozordi nou pe debat lo ou case, pour evantyelman konsidere si ou kapab ganny donnen sa post Anbasader.  Mon kestyon pour ou, se ki lemonn pe sanze, lemonn Diplomasi i tre dinamik, i annan en kantite fenomenn ozordi ki yer, avantyer lemonn pa ti pe fer fas avek.  E Sesel koman en pti pei, i pe sey tras son direksyon e pe ankor rode ki mannyer nou kapab re sitye nou.

E enn parmi bann eleman ki nou pe sey fer mannyer pour nou ganny sa lavantaz.  Se gete ki mannyer nou kapab tourn sa vast teritwar ki nou apel li nou Lekonomi Ble ganny vreman rekonnet e tir bann gran benefis pour nou pei.

E alor mon pe demann ou, ki mannyer ou santi ou kapab ranforsi sa lavansman ki Sesel in gannyen e anmenn plis lavantaz pour nou?   Sa i premye kestyon.

2enm kestyon.  I annan keksoz pour fer en pe pli spesifik avek kestyon ki Onorab Ferrari in koz lo la.

Dan sa group pei ki tonm, ki nou ekspekte ki ou’n deza fer travay avek, koman Reprezantan Sesel Cuba, e bann lezot pei ki dan sa network.  Ki kantite lavansman ki zot in kapab anmennen?  Me depi dan lepok Mr Nourrice, Lanbasader Nourrice e avek ou, ki kantite bann Lagreman ki in kapab ganny konkretize dan sa network bann pei?

E si pa ankor konkretiz bokou.  Ki plan stratezi ki ou annan pour kapab abouti dan bann Lagreman Ekonomik Bilateral or Miltilateral konkret e ki kapab benefisye plis Sesel?  Mersi.

 

 

MR SPEAKER

Mersi Onorab Simon Gill.  Madanm Accouche.

 

MRS LALATIANA ACCOUCHE

Mersi Mr Speaker, Msye Onorab pour ou kestyon.

Premye kestyon lo Lekonomi Ble.

Nou tou nou konnen poudir Sesel in vin en sanpyon ki tou dimoun, tou pei e Lorganizasyon i rekonnet sa bann lavansman e bann linisyativ ki nou’n pran e ki mannyer nou pe pouse pour pri lezot – sirtou bann pti pei sid.  I a benefisye osi akoz i plis konsantre lo losean.

Dan mon parkour par egzanp Cuba  Blue Economy ti’n vin en issue, pa issue.  Si non en topik so koman  dir, e sirtou ler Kenya in organiz sa Konferans e in lobby bokou par egzanp Cuba, fer bann meeting avek tou bann Diplomats, e toultan ti fer referans lo Sesel.  Sesel ki – Ler son Prezidan ti vini, ti fer referans lo Sesel.

So nou kapab profite sa lavantaz e sirtou bann network ki nou annan.  Nou annan atraver nou bann Lanbasader menm bann MNAs osi zot annan en bann network bokou ler zot ale.  E nou kapab ranforsi sa, pour nou kapab eksplwat maksimonm lo sa size pour benefis Sesel.

Pour 2enm kestyon.  Ki mannyer mon bann Lagreman ouswa i ongoing ouswa future Agreement pour sa bann pei.  Par egzanp mon pour dir- ou pe spesifye poudir Cuba.  Cuba i en nouvo Lanbasad pour nou, 2an.  I annan en moman pour son setting up pour zot adapte met tou zafer.

Vi ki mon ti en Chargé d’affaires –  parey mon fek dir.  mon ti annan sa – napa sa pouvwar pour mwan al negosye avek sa Anbasader an post.  Akoz ti en Chargé d’affaires par enterim, par enterim.

Sa i en lot diferan.  Mon pa ti Chargé d’affaires par enterim.  Me de toute fason ant bann fanm parey mon dir, bann fanm nou ti’n diskite.  E par egzanp Colombia nou dan negosyasyon osi pour en MOU for Technical Korperasyon.

Argentina nou pe negosye pour en Lagreman MOU dan sports.  Dan Cuba, Cuba i byen renonmen.  Par egzanp pour bann disaster, bann prevansyon tou sa.  Nou pe travay lo la e nou ava kontinyen sa ki nou’n deza achieve akoz nou oule leksperyans Cuba.  Me dan sa menm laliny ki dan sa premye kestyon osi,  Cuba osi i enterese avek sa Lekonomi Ble, e zot pe vini pour aprann ek nou.

E Cuba osi i annan en vast network i a kapab ouver nou semen osi.  E se sa osi ki enteresan avek Diplomasi.  Pa kestyon ki nou pour ganny en benefis direk pour- avek sa – en pei direk.  Si non atraver sa pei nou kapab ouver diferan laport.  E se sa lenportans ki nou annan Anbasader ki kapab negosye pour sa.

Pour Mexico.  Mexico osi nou dan prosesis negosye en Lagreman lo ledikasyon ek Korperasyon.  Ki isi Sesel i annan en ta dimoun ki koz Espanyol.  Savedir nou kapab benefisye avek sa.  Mexique osi i kapab vini aprann isi ou train bann dimoun vin isi.

Ecuador sa i en issue en pe enteresan.  Ecuador i dir ‘nou annan en relasyon akoz le ka, Galapagos e Aldabra.  Bann gro torti kapab fer en kolaborasyon ladan.  Savedir sa osi en pwen ki nou kapab échanger avek Ecuador.  Sa bann i bann legzanp.  Me ler nou annan en- ler nou al plis nou kapab eksplwat plis.

So mon kapab asir ou poudir anba sa bann pei ki anba Cuba parey ou’n nonmen, i annan bann ki ongoing discussions and negotiations.  Mersi Mr Speaker.

 

MR SPEAKER

Mersi Madanm Accouche.  Onorab Sandy Arissol.

 

HON SANDY ARISSOL

Mersi Mr Speaker.  Bonn apre midi Madanm Accouche.  Welcome dan nou Lasanble Nasyonal.  Madanm Accouche mon anvi fran, onnet avek ou dan mon lapros dan mon kestyon, parey mon fer avek tou dimoun ki vin dan Lasanble Nasyonal.  Alor santi ou konfortab pour reponn mon kestyon.

Madanm Accouche ozordi Sesel nou annan nou Pret, an term Malgas mon pe dir, nou annan nou bann pret, nou’n annan nou ansennyan, nou annan nou dokter, nou annan bann foutboler ki’n partisip dan bann team dan bann lekip Sesel ki popiler.  Nou annan bann madanm ki travay kot IOT e plizyer lezot dimoun.  Sa i bann kontribisyon ki bann Malgas in fer dan nou lekonomi Sesel.  Zis parey plizyer bann Seselwa i fer aletranze dan lezot pei.

Alor mon kestyon ki mon ti a kontan demann ou.  Kwa ki fer ou krwar poudir Madanm Accouche i parmi enn bann dimoun ki pour pli kapab reprezant nou pei aletranze?  Dan term Anbasader Cuba konpa, konman en Madanm ki i annan – annou dir en doub nasyonalite.  Ou en Malgas par nesans, me ou’n marye avek en Seselwa e ou’n natiralize, ki annan doub paspor.

Kwa ki fer ou krwar ki poudir ou pour pli kapab reprezant nou pei lo sa nivo pli byen ki en Seselwa ti pour fer dan ou plas?  Zis parey la mon aprann poudir Mr Esparon pe al, ki pe al Sri Lanka e Mr Mederic ki pe desann Sesel kekfwa li i ti pour fer pli byen.  Zis en kestyon an relasyon avek sa.  Mon premye kestyon Madanm Accouche.

Mon 2enm kestyon.  Mon ti a kontan demann ou, se an relasyon avek ou bann travayer ki ou’n travay avek.  Swa dan Lanbasad Cuba, swa isi menm dan Foreign Affairs.  Si zanmen mon ti pour demann bann travayer ki’n konn ou, en pe an relasyon avek Madanm Accouche, ki mon ekspekte zot dir mwan?  Oubyen ki ou ekspekte ou krwar zot pour dir mwan?

Mon a donn ou detrwa legzanp.  Par egzanp zot a dir ek mon, zot a dir ek mon Madanm Accouche i en madanm ki serye, dinamik dan son lapros, i kalm, i kapab kontribye en kantite keksoz.  Oubyen zot pour dir ek mon non Madanm Accouche non, non!  Madanm Accouche i en madanm pares, i pa kontan travay, i vin tar li men li.  I pa kontribye nanryen.

Konmsi dir mwan en pe kwa ki si zanmen mon demann bann dimoun an deor ki ou’n travay avek, lo ou karakter koman Madanm Accouche ki ki pe ekspekte al reprezant nou aletranze, ki ou ekspekte larepons zot pour donn mwan?  Mersi Mr Speaker.  Mersi Madanm Accouche.

 

MR SPEAKER

Mersi Onorab.  Madanm Accouche.

 

MRS LALATIANA ACCOUCHE

Mersi Mr Speaker.  E mersi Onorab pour sa 2 kestyon.  Premye kestyon ou’n dir, akoz mon krwar ki mon pli kapab reprezant Sesel aletranze ki en lot Seselwa?

Premye kou mon santi mon Seselwa e mon Seselwa.  E tou sa kontribisyon ki mon’n fer, mon’n fer akoz mon kontan Sesel e mon’n montre poudir mon’n kontribye non pa akoz mon desandans Malgas, si non mon en Seselwa.

        So ler mon ale, mon pa santi poudir mon repet zot en Malgas.  Si non mon reprezant Sesel. E si i aksepte mon kandidatir, mon nomination, zot aksepte mon nomination.  Be akoz mon’n kontribye e ler mon ale mon annan sa kalite, mon annan sa leksperyans, mon annan tou sa bagaz ki merite en dimoun pour okip sa post.

Pour sa 2enm kestyon;  mon krwar si ou demann dimoun ki’n travay en moi, dan, en Foreign Affairs poudir Lala i poudir ou ‘ oh, Lala i- fodre ou travay avek li proactive. Atan,  i disiplin i – mon krwar dan bann zar Madanm De St Jorre menm, malgre ki Onorab in -.  Poudir nou’n ganny sa baz poudir fodre ou proactive, ou pragmatic.  Ou efficient as well.

So petet mon kapab donn ou en legzanp poudir mon garson in follow mon path.  So mon toultan mon dir li, fodre ou proactive, pa esper dimoun pour dir ou i annan sa.  Ou konnen pe vini, prepar touzour.  Ler i demann ou, ou’n fini pare.

Si i annan en pti keksoz pour aranze, ou la.  So ou toultan ou prevwar keksoz pour ki pa – akoz Foreign Affairs i very busy.  I annan moman ki i dir ou sa i urgent, now kit sa.  En lot urgent.  Me selman ler ou proactive ler ou kapab – parey repete ankor disiplin e planifikasyon i pa pour difisil pour ou.  So si ou demann dimoun, i pour dir ou wi.  Ou pa bezwen demann Accouche, in fini pare toultan. E toultan i atan.  Mersi Mr Speaker.

 

MR SPEAKER

Mersi Madanm Accouche.  Onorab Churchill Gill.

 

HON CHURCHILL GILL

Mersi Mr Speaker.  Bonzour Madanm Accouche.  Madanm Accouche donn en kantite letan ki ou’n fer dan Foreign Affairs of Ministry.  E sa letan ki ou’n fer Cuba.

Eski ou santi i annan nesesite pour en Lanbasad, pour Sesel annan en Lanbasad Cuba?  Ou santi poudir i annan benefis ladan?

Apre 2enm kestyon.  Nou konnen dan Diplomasi i annan en dinamik ase aktiv.  Eski bann letan ki ou’n Cuba ou’n santi poudir i annan novo avenue ki ou kapab eksplore?  Ki Sesel kapab benefisye plis ki i pe benefisye ozordi.  Mersi.

 

MR SPEAKER

Mersi Onorab.  Madanm Accouche.

 

MRS LALATIANA ACCOUCHE

Mersi Mr Speaker.  Mersi Onorab.  Premye kestyon se nesesite pour avwar en Lanbasad Cuba.  Mon pwennvi se ki nou’n deza an retar pour ouver Cuba en Lanbasad Cuba, pour senp rezon.

La i annan en laliny pei – parey mon dir plis ki 130 pei deza reprezante Cuba, e preski tou Lerop, preski tou Lazi.  Lafrik i annan 27.  Preski tou le mwan i annan en nouvo pei ki vini.

So mon pe demande, nou pe fer Relasyon Enternasyonal ki mon fek dir poudir Relasyon Enternasyonal pa selman pour dir en benefis avek sa pei, kot sa Lanbasad i ete.  Si non en laport pour nou pour diferan laspe ki kot nou kapab benefisye.

So mon pour maintain  poudir wi i annan en nesesite, e nou pa pou les dimoun depas nou ankor.  Akoz nou deza an retar.  E atraver sa mon pour liaise sa avek ou 2enm kestyon ki new avenue?

Once, avek Lanbasad Cuba mon’n fek nonmen detrwa Lagreman ki nou pe benefisye.  I vin pour mon i vin parey toultan poudir ou annan en dalon.  Ler ou al kot li, ou pour trouve poudir, ahnr i annan sa ki mon kapab negosye avek, i annan sa.

E sa dalon osi i vin kot ou osi.  La i annan plis akoz dan Diplomasi relasyon imen fas a fas i pli enportan – relasyon imen.  Les Diplomasi, be relasyon imen, relasyon -.  Pour sa rezon i annan dimoun, bann Lanbasader i baze Nairobi, i bezwen vin Sesel.  Akoz i trouve poudir i enportan pour zot keep sa kontak direk.  So pour mon wi, pour annan nouvo avenue, nouvo benefis pour Sesel kot tou bann Lanbasad.  Mersi Mr Speaker.

 

MR SPEAKER

Mersi Madanm Accouche.  Nou a pran dernyen kestyon Onorab Bernard Georges.

 

HON BERNARD GEORGES

Mersi Mr Speaker.  Bonzour Madanm Accouche.  Madanm Accouche mon kestyon i – mon vwar devan mon en dimoun konpetan, koz byen, metriz plizyer Langaz.  Me mon vwar en dimoun plis ou mwen sob.  Alor ki mon mwan ti a kontan ki- mon vwar en Birokrat, mon pa vwar en dimoun ki i annan en verve, ki i annan en kick. 

        Mon vwar en dimoun- eskiz mon pour servi sa mo ki’n ganny tro servi resaman “cool”.  Alor ki en Anbasader dan mon lespri, set en dimoun ki kapab travay en lasal, ki kapab sorti an deor son bagaz imen e personnel.  Mon pa vwar sa dan ou.  Mon pa dir ki ou pa.  Me sa lenpresyon ki ou pe donn nou, set en dimoun ki egzakteman lenvers.

Dan sa konteks.  Dan sa konteks kestyon ki vin a mon lespri se- akoz mon’n tann mansyonn Cuba.  Ou’n etidye laba, ou metriz Lalang Espanyol e i tre probab ki se sa landrwa kot ou pe al ganny anvoye.

Eski sa se sel, eskiz mwan pour demann sa kestyon.  Eski sa se sel rezon ki ou pe ganny nonmen pour vin Anbasader?  Akoz i annan en vacancy Cuba e ou fit sa vacancy.  Akoz si se sa rezon, mon krwar ki sa i poz mwan en pe problenm.

Oubyen eski sa set en – ankor enn fwa eskiz mwan pour dir sa –  oubyen sa set en pti, en laranzman ant Prezidan ki pe al nonm ou ki li osi i annan en lyen avek Cuba e i pe fer en faver enn son zanmi ki sorti dan menm serk.

E dan sa konteks,  ki ou bann koleg dan Minister Zafer Etranzer i mazinen ler zot vwar ou, pe ganny sa nominasyon e kekfwa zot, zot in ganny passed over?   Mersi.

 

MR SPEAKER

Mersi Onorab Georges.  Madanm Accouche.

 

MRS LALATIANA ACCOUCHE

Mersi Mr Speaker.  Mersi Onorab.  Sa mo “cool” mon krwar pa egzakteman.  E mon pour donn ou en legzanp.  Sa 17 mwan ki mon ti, mon Cuba.  Parey mon’n dir, mon ti Chargé d’affaires par enterim.

So ler ou gete sa Chargé d’affaires par enterim, lo lord Protokol, ou devret toultan deryer.

Me mwan si ou 100poursan ki si ou nonm Sesel avek sa        Kor Diplomatik laba, i pour dir ou ‘’Lala en dimoun ki dinamik.’’ Zot in  konn mwan poudir un cas infatigable, pa zanmen fatige.  Parey mon’n dir Cuba i vreman, vreman aktif e mon duty se reprezant Sesel.  So pa’n mank okenn aktivite e interacte avek tou sa bann.

La nou la isi, bann Diplomat, Anbasader pe rod mwan akoz?  Mon dinamizm ki pour prepar par egzanp Africa Day.  Zot in donn mwan en.  So sa i montre poudir mon pa, parey ou dir “cool.” Petet “cool” ler pour negosye.  Akoz anbasader osi bezwen, annan letan ou “cool” non?  Ou pa kapab lev lavwa pour negosye.  Sa premye kestyon.

Pour lo 2enm kestyon, eski i annan lyen?  Eski in aranze?  Mon’n dan post Konsey Prensipal, Chargé d’Affaires pour plis ki 5an. Savedir mon due for promotion.  E pas zis due for promotion, si non i annan sa post e ou konnen poudir dan PSO ek tousala, ler en dimoun i dues, i son Drwa pour avek tou respe ki ou annan, ou en avoka.   en dimoun i annan son drwa e mon pa krwar si i annan en lyen.  Akoz si ti annan en lyen, mon krwar depi 2an pase ler Anbasader Nourrice in retire, ti a’n leve, dir mwan, be annou profite a donn ou.  Me mon krwar pa.  Mersi Mr Speaker.

 

MR SPEAKER

Mersi Madanm Accouche.   Mon krwar nou’n ariv lo nou ler ki nou ti’n prevwar pour fer sa enteraksyon, sa interview.

Madanm Accouche mon ti a kontan remersi ou e – avan nou eskiz ou nou ava zis fer ou konnen poudir apre midi nou pour debat lo Mosyon.

E apre sa ou pa neseserman bezwen ki ou la kot Lasanble.  So ou kapab ale, apre midi nou a debat lo Mosyon.  E Lasanble pour pran en desizyon lo ou nominasyon, lo ou apwentman, e apre sa Sekretarya atraver Madanm Clerk nou ava kominik desizyon dan en fason Formel avek ou.

So Madanm Accouche ankor enn fwa mersi pour vin pas sa letan avek nou pour fer sa enteraksyon avek bann Manm.  Mersi bokou.

 

(MRS LALATIANA ACCOUCHE WAS EXCUSED FROM THE HOUSE)

 

 

MR SPEAKER

Bon nou ava- zis pour mon fer de pti lanons avan nou rann lantenn SBC vitman.  Nou annan Standing Orders Committee ki pour meet toudswit la koman nou pran break, e Bills –  wi, mon ava zis demann Sarge pour move Mace ki nou ava retourn dan Committee of the Whole House. Thank you.

Standing Orders Committee pour meet e swivi par Bills Committee.  So i annan bokou Manm ki – i annan Manm ki lo sa- wi enn lo lot.  Wi.  Bills avan?   Wi nou pran Bills Committee avan dan Committee Room 3 i ava swiv par Standing Orders Committee.  E ankor lo kote Bills Committee nou pe koz, mon krwar nou pe al regard Mental Health si i annan lezot Manm osi tou ki enterese, i kapab vini.

IAC pe meet 1er dan Speaker’s Conference Room.  Mon pa konnen si zot oule sanz en pti pe ler, oubyen si i ok, 1 er?  1er i ok, Speaker’s Conference Room.  E la mon’n ganny ler pour demen Bills Committee plus Manm ki enterese i annan sa further discussion lo Tourism Development Bill.  Sa pour ganny fer demen 9.30 dan Committee Room 3.   Ok so vwala en pti bann lanons.  Mon a remersi SBC.  Nou’n overlap en pti pe.  E nou retournen 2er pour nou kontinyen deba lo Mosyon.  So nou a Break ziska 2er.

 

(BREAK)

 

 

MR SPEAKER

Bonn apre midi tou Manm Onorab.  E bonn apre midi tou dimoun ki a lekout e pe kontinyen swiv travay Lasanble Nasyonal.  Bon nou pou kontinyen nou travay apre midi e parey mon ti dir bomaten, nou pou pran deba lo Mosyon pou aprouv sa nominée ki’n pas devan nou pou aprouv Madanm Accouche konman Anbasader ki pou reprezant Sesel aletranze.

Mon ava pran bann non Manm ki pou entervenir.  Ok mon annan zis en Manm ki pare pou entervenir, eski i annan ankor lezot Manm?  Ok lo kote LDS ok.

I pou annan en moman mon konnen kekfwa de Manm pe espere pou sa pou annan en moman kot mon pou ferm lalis pou entervansyon me petet 15 a 30minit de la ok.

Nou ava konmanse mon a donn laparol Onorab Jean-Francois Ferrari.

 

HON JEAN-FRANCOIS FERRARI

Mersi Mr Speaker.  E bonn apre tou bann dimoun ki a lekout.  Mr Speaker mon pran laparol ozordi lo apwentman Madanm Accouche ki’n ganny depoze devan Lasanble par Prezidan Larepiblik pou nou konsiderasyon.

Mr Speaker an plis ki bann pwen ki mon’n fer sorti bomaten bann kestyon ki mon demande lo avek Madanm Accouche li menm e an plis ki bann deba ki nou annan bann lesanz ki nou annan yer avek Sekreter Prensipal pou Finans, pou Zafer Etranzer, mon annan serten lezot pwen pou azoute.

Premyerman parmi bann manm piblik deor e bann dimoun ki mon rankontre, i annan en kantite kestyon – en kantite kestyon e parler sa bann kestyon i en pe en lakoler, en dezapwentman pou war ki nou pe apwent en lot Anbasader e bokou dimoun pa ganny en konpran akoz sa i neseser.

E serten lezot pa ganny en konpran akoz se sa madanm ki devret ganny konsidere pou sa pos, e zot pe demande si napa lezot zot pe demande akfer nou bezwen fer sa la, eksetera.  Tou sa bann kestyon i bann kestyon ki vreman valab, e mon annan lentansyon pran zot enn par enn.

Premyerman Mr Speaker mon ti a kontan selman konmans avek sa konsern ki serten     manm piblik in levé konmkwa akoz nou bezwen en Anbasader Cuba dan lavil Havana Cuba.

E i annan bokou dimoun e bokou dimoun i siport – plito sa kote latab, ki dir ou poudir Cuba i en landrwa kominis akfer ki nou pe al rode laba ; sa bann landrwa ki Parti Lepep/ US i vin avek nou napa nanryen pou fer avek Cuba eksetera,  eksetera.

Mon ti a kontan donn mon reaksyon lo la.  Mon konpran akoz bann dimoun i dir sa.  Akoz pandan 40an in annan telman politik lo sa size, ki i normal ozordi ki konman en dimoun i tann Cuba i fer en koneksyon avek sa 40an Parti Inik anfen pa 40an, me preski 40an Parti Inik e nou pep in pas anba la.

Me selman mon ti a kontan dir ek sa bann dimoun, annou sey regarde ki nou gannyen? Ki nou benefis dan sa relasyon avek Cuba?  Mwan personnelman mon konnen, mon konvenki ki benefis avek Larepiblik Cuba i enorm pou Sesel.

E se pa en keksoz ki lo en nivo ideolozik, ki nou pa dakor avek en prensip politik avek Gouvernman ki pe fer, ki nou devret pa get sa bann benefis ekonomik.

Pandan plizyer lannen e i pe kontinyen, korperasyon dan domenn medikal avek Cuba in en korperasyon tre enportan mwan menm  mwan, mon’n pas anba kouto bann  dokter Cuban detrwa fwa e mon kapab dir ki mon’n byen satisfe.

E mon bann zanmi, mon bann koleg ki konn sa bann dokter ki konn zot kapasite travay i vre ki zot pa the most hightech dokter dan lemonn, me selman dan en sityasyon kot ou pe debourye, akoz ou napa tou kalite lekipman – ou napa tou kalite fasilite medikal se bann dimoun ki ganny rekonnet pou ki zot skills zot konesans zot kapasite zot leksperyans i ase ekstraordiner, dan sa domenn medikal.

Alors pou met en sif lo valer sa Korperasyon, i difisil me selman mon ava dir ki i sibstansyel! I  sibstansyel e nou bezwen rekonnet sa.  E mwan konman Chairman Komite Zafer Etranzer plizyer fwa mon angaze ek bann reprezantan Kiben e mon respekte zot pou zot determinasyon, pou zot lendirans e mon war valer dan sa Korperasyon.

Alors wi nou bezwen, met nou nivo reprezantasyon diplomatik o nivo Cuba lo en nivo Anbasader.  Parey  zot konnen, nou’n dir bomaten ti deza en nivo Anbasader me Anbasader Nourrice ti resign apre i ti pran son retret, e depi sa nou annan en Chargé d’affaires e sa se Madanm Accouche ki ti la devan nou bomaten.

Mon note ki kontrerman a lezot demann ki Minister Zafer Etranzer e ki Prezidan in fer devan sa Lasanble, kot in toultan ganny dir, ki nou pe apwent en Anbasader i pa enportan konnen kot son post i été ; kot i pou ale.

Dan sa ka nou’n ganny dir plizoumwen klerman ki son posting i pou Cuba.  E nou’n koz lo son kapasite pou annan mannye lalang Espagnol eksetera, donk napa okenn napa bokou anbigite lo sa size.

E si li sa madanm pa ganny apwente konman Anbasader en lot dimoun i ava bezwen pran sa post, akoz i enportan ki nou annan en reprezantasyon o nivo Anbasader dan sa pei parey Larepiblik Cuba i annan dan Sesel.  Donk sa i premye pwen lo akoz Cuba.

Mon 2enm pwen se akoz e sa i en keksoz ki’n ganny levé par plizyer dimoun, e bokou dimoun pe dir akoz nou bezwen apwent en dimoun ki’n natiralize Seselwa?

Parey zot in tande bomaten Madanm Accouche in marye Accouche, me selman orizinalman i ti en sitwayen Madagascar ki’n marye ek en Seselwa.

Nou pozisyon nou dan LDS lo sa size i kler.  E kekfwa ozordi mon a ganny lokazyon pou fer li ankor pli kler.  Nou annan en problenm avek sa Gouvernman, ki pandan tou sa bann lannen, in servi natiralizasyon, in servi sitwayennte pou bann rezon politik.

Nou annan en gro problenm avek sa e nou ensiste e nou pou toultan dir ki in annan en kantite labi dan sa tranzaksyon nasyonalite avek sitwayennte.

Nou pe viv dan en pei kot nou Lalwa Limigrasyon e nou Lalwa Sitwayennte i en Lalwa ki’n kase.  En Lalwa ki pa efektiv – en Lalwa ki pe ganny abize kot nou tou nou konnen isi e dan pei nou tou nou konnen ki mannyer bann paspor in ganny vann, nasyonalite in ganny vann dan bann lannen e finalman nou retrouv nou avek bann kriminel ki annan nou nasyonalite ki fer nou onte atraver lemonn !

E  mwan mon pou kontinyen dir ki lo kestyon sitwayennte e nasyonalite, nou Gouvernman e sa Gouvernman ki la pandan plizyer lannen in vreman fer nou onte!

Ler mon fini dir sa mon ti a kontan dir ki problenm byensir i pa avek sa dimoun ki ganny nasyonalite. I avek sa Gouvernman ki napa en kontrol lo sitwayennte Sesel.

Mon ti dir dernyerman ki mon dan mon fanmir i annan 5 nou zanfan, e i annan 4 ladan ki’n imigre e ki dan lezot  pei.  I annan 3 dan sa 4 ki’n ganny nasyonalite sa pei ki zot reste ladan, e zot pe viv depi plis ki 25an – plis ki 30an i annan e ki zot pe servi sa pei mon sipoze dan en fason onorab.

Me tou le 3 sa bann dimoun, si sa Gouvernman pa ti donn zot nasyonalite, zot ti pou ok. Zot ti pou viv zot ti pou travay e zot ti pou retire anba en lot rezim.

Me selman isi Sesel, nou swazir pou nou distribye nasyonalite ‘an brit an bann !’  E ozordi nou retrouv nou avek en kandida ki orizinalman pa ti Seselwa me in travay in marye in travay Sesel depi 28an e i pe ganny konsidere pou en pos siperyer dan Gouvernman.

Mon napa problenm ek sa madanm mwan.  Mon napa problenm ek li akoz parey tou lezot dimoun, parey mwan menm mwan e pou bann ki pa konnen dan Ferrari i annan en bout Ramaling sorti Madagascar.

Menm mon annan en ser ki kontan met Ramaling dan son non.  E mon dir sa akoz nou tou nou bann imigre lo sa later Sesel.  Nou tou nou bann imigre.

Nou tou nou ganny en sans pou nou akoste lo enn sa bann lans pou nou ariv isi, e pou nou travay e pou nou devlope.  Sa ki nou pe demande ozordi se ki, nou nasyonalite i ganny proteze.  E mon krwar sa i tou lede kote latab prezan nou konmans dakor lo la.

Nou pa anvi sa.  Me selman sa ki ganny fer 28an pase, nou pa kapab refer li ozordi.  Nou pa kapab refer listwar.  Si en dimoun in vin Seselwa 28an pase nou pa kapab refer listwar!

Nou pa kapab ale, akoz si nou ale nou pou retourn dan 50an pase, nou pou dir entel ti ne Uganda, ki mannyer i kapab vin en kandida ozordi pou li vin Prezidan?  I pa fer sans.

Nou pou dir en lot in ne Moris oubyen in ne dan Lenn, alors i pa kapab pretann pou li – ki konmkwa in vin Seselwa e ki la, akoz in ne dan en lot pei i pa pou kapab son potansyel pa pou kapab ganny realize.

Mon pa dakor avek sa.  Mwan mon dakor avek lefe ki nou respekte tou dimoun, ki’n ganny nasyonalite Seselwa, provided zot bann dimoun onnet ki travay byen e ki travay i dan benefis pei.

Nou bezwen respekte zot. Nou bezwen kontinyen dir avek sa bann dimoun ki pe donn nasyonalite arete parey mon espere ki nou pou fer, de ki sa Gouvernman pou sanze, e kekfwa menm avan ;- mon konnen i annan en Mosyon ki pe ganny propoze la, pou nou met en moratoryonm lo sa bann keksoz, pou nou arete enn fwa pou tou pou nou vann nou nasyonalite.

Alors mon mesaz, i al osi pou bann dimoun ki’n vin Seselwa. Par egzanp la ozordi mon ava profite pou pran sa legzanp, ler mon ti war i annan en msye lo Facebook Mr Speaker kekfwa ou’n deza war li ki zot dir li ‘’Gro Lanmok.’’

Now msye ’’Gro Lanmok’’  ki reste Praslin, pli boner sa lannen i ti ensilte en Mr Mo photographer, mon krwar i reste Takamaka, pou dir li i pa en vre Seselwa.  MO fotografer ok?

E nou konnen lekel Mo fotografer, nou konnen lekel ’’Gro Lanmok’’  e bokou dimoun, bokou dimoun ti leve ti ankoler ti dir ou pa kapab fer sa.  Akoz sa dimoun pa son lafot li in demande in la laport in ouver in antre e ozordi ou pou bat li akoz i dan lakaz? 

Be laport in ouver si ou pa ti le i antre ou ti a kit laport fermen.  Alors sa largiman Mr Speaker, ki en largiman ki mon konpran.  Mon konpran akoz Seselwa i ankoler. Mon konpran e mwan mon anvi dir avek Seselwa, avek nou tou nou pep, mon anvi dir avek mon zanmi Peter, par egzanp Anse Aux Pins, mon konpran li – mon konpran sa laraz ki anndan li, me selman pa trakase nou pe al aranze sa keksoz.

Pou le moman pouvwar i dan lanmen L’Egzekitiv e nou annan lentansyon pou tyonbo en kou sa L’Egzekitiv e fer sir ki nou met en pe lord dan sa sityasyon.  Sa i mon 2enm pwen.

Mon 3enm pwen Mr Speaker i sa konsern ki bokou dimoun i annan, lo akoz pa en lot ?  Akoz pa en lot zofisye dan Departman Zafer Etranzer?  Mr Speaker Departman Zafer Etranzer ou konnen e nou Lasanble osi i konnen i zis anfen mon pa le dir zis i vreman en landrwa ki’n soufer enormeman, depi sa 2 dernyen lannen avek lakantite dimoun ki’n kite, ki’n ale akoz bann dezord administratif ; bann problenm management.  En Departman antye Departman Enteraksyon Rezyonal en Departman antye avek en 20enn travayer in kite in ale !

Nou’n sey fer mannyer nou kapab, me selman pou en rezon oubyen pou en lot, sa Departman in pas dan bann tirbilans enorm.  E la ozordi mon kapab dir zot akoz se sa ki mon gannyen se bann lenformasyon ki mon’n gannyen an diskitan avek bann senior staff dan Minister Departman Zafer Etranzer, se ki i annan en kantite pos ki vid, ki vacant, ki zot pe rode dimoun pou vin travay me zot pa pe gannyen sa bann dimoun.

So i en slow rebuilding process. E ler en dimoun i dir mwan i annan dimoun en kantite dan Minister, dan Departman, ki ti kapab vin Anbasader mwan mon anvi reponn zot non.  Napa sa kantite ki zot krwar i annan dan sa Departman.  Napa sa kantite.

In fact sa Departman pe struggle.  Mon a donn zot en legzanp Mr Speaker Prezidan Larepiblik i Mozambique ozordi, napa ‘en’ staff Departman Etranzer avek li ek son delegasyon.  Napa enn !

Akoz in bezwen pran Minis Finans ; in bezwen pran PS Lekonomi Ble ; in bezwen pran Attorney Zeneral, Komisyoner Lapolis, mon krwar i dan  sa delegasyon.  Napa.

E  mwan mon ti a kontan dir avek dimoun ki pe ekout mwan, krwar mwan sa ki mon pe dir zot.   Mwan mon get en pe bann keksoz Zafer Etranzer e mon ale dan sa Minister. E mon ale mon war poudir bann dimoun ki pe travay overtime overwork akoz napa ase !

Lafot i pa sa bann dimoun. Lafot se ki nou mal manage sa sityasyon. Sa i lefet.  Annou pa argimant lo la.  E alors lo sa size konbyen, si i annan dimoun ki ti kapab al dan sa pos, les mon dir avek zot 2 keksoz ; wi i annan 2 dimoun ki ti kapab vin Anbasader Havana san ki nou apwent en nouvo Anbasader.

Premye se Anbasader Dick Esparon ki ti ganny apwente lannen pase, e ki pe espere pou pran en pos Colombo, Sri Lanka. 2enm se Anbasader Urna Anthanasius ki pou le moman i Anbasader for Women and Children of the Republic of Seychelles i en Ambassador not posted overseas, e 3enm se Anbasader Barry Faure ki SS li menm – ok?

Alors Anbasader Dick Esparon i sipoze al Colombo e Mr Conrad Mederic ki laba Colombo i, dapre lenformasyon sipoze desann pou li vin Anbasader rezyonal pou rezyon Losean Endyen, me la i paret ki tousala in ganny delay.

E i vre i annan en problenm. I annan en problenm akoz nou pe pey Anbasader Dick Esparon e i  pe – i pe asize e i pa pe fer sa i ti sipoze pe fer.  Si i  son lafot oubyen pa son lafot sa mon pa konnen.

2enm problenm se ki anbasader Urna Athanasius sa sel 2 Anbasader ki pe ganny peye. I annan lezot ki’n retire.  I annan lezot ki zis hold title ; parey nou dir Onorab Waven William Anbasader Waven William – Anbasader Michelle Murray Anbasader Maurice Loustau-Lalanne.

Sa bann i tenir title. Me selman bann ki ganny peye, Mr Barry Faure – SS, Mr Dick Esparon, Madanm Athanasius alors mon demande akoz Dr Athanasius pa al Havana?

Akoz i pa al Havana?  In lekol laba ; i koz sa – Larepons ki mon gannyen se ki, son lasante pa tro favorab.  Se sa larepons ki mon gannyen.  E i vre,  ler nou war li pase  nou vwar ki i pa 100poursan.  Donk mon ti a kontan reponn bann dimoun, mon ti a kontan zis eksplike poudir, finalman dan sa lalis ki mon’n donnen, napa! Apard anbasader Athanasius napa ki idle, e ki napa okenn plan pou zot – ok?

Alors Minister Zafer Etranzer, i bezwen fonksyonnen.  I bezwen fonksyonnen e Msye Danny Faure, in met sa kandidatir devan nou, e nou pou bezwen konsider li dan sa lide, dan sa lespri ki mon vin avek.

I annan en lot 4enm pwen Mr Speaker e mon eskize ki mon pe pran en  pti pe letan, me selman bokou dimoun pe dir konbyen i pou kout nou ankor?

Sa osi mon’n ale, mon al gete konbyen i pou kout nou ankor e mon ti a kontan reponn ki an realite i pa pe kout nou bokou an plis.  Akoz en increment from Chargé d’affaires  ad interim  oubyen whatever to Anbasader is one stepIs one step.

E parey zot konnen – both – tou dimoun i ganny pansyon. Anbasader – sa madanm i annan 55an, i pou kalifye 60an 63an oubyen 65an zot in dir la, 60 e li osi i pou ganny pansyon parey i ti pou ganny en pansyon 63an.

Mon krwar ki si la diferans se ki i posib si i retire pli boner, si i retire 60an, i posib i benefisye pandan sa 3an – en pansyon ki otherwise i pa ti pou gannyen si i pa ti Anbasader – ok?

Mr Speaker vwala 4 pwen ki mon fer e mon anvi fer sa 4 pwen akoz, mwan ler mon regard keksoz, mon regard li toultan dan en fason obzektif.  Mon sey gete kwa ki bon pou Sesel. Mon’n remarke ki poudir mon fer sorti la enn de problenm ki mon krwar nou pou bezwen a lavenir met lanfaz lo la, pou nou rezourd sa bann problenm.

Nou pou bezwen met nou problenm, si i annan okenn Anbasader ki pe asize isi e ki pa pe ganny en pos e ki pe ganny peye.  Nou bezwen mete, akoz Gouvernman i bezwen plan son travay bokou pli byen ki sa.

E nou pou bezwen kontinyen ensiste, ki bann resours Leta i ganny servi bokou pli efektiv.  Me selman mon anvi fer konpran tou dimoun ki travay Gouvernman i bezwen kontinyen.

Alors an fas sa 4 lesplikasyon ki mon’n donnen mon ti a kontan dir ki mwan personnelman, mon napa en problenm pou mwan vot pou Madanm Accouche pou li vin Anbasader. Mon ok avek sa.  Si Msye Faure ti donn nou en pe plis swa atraver Minister Zafer Etranzer, me nou war poudir napa swa.  Napa!

So mon pa pe dir ; mon pa pe downgrade oubyen pe dir Madanm Accouche napa sa nivo, me mon pe dir ki napa swa. I annan enn, e ler mon demande oli lezot kandida, me napa lezot kandida.

I annan bann lezot ki pou vini, posibleman a lavenir, me mon konnen ki dan bann Lanbasad parey Brussel parey L’Angleterre i annan bann Seselwa, vreman tre konpetan, avek bokou skills ki pe travay e ki pou byento en zour arive pe vin bann reprezantan o nivo Anbasader ou Komiser pou nou pei Sesel.

So nou dan en prosesis pou nou rekonstrir sa Kor Diplomatik.  e mon anvi donn en koudmen pou nou rekonstrir sa travay.  Alors Mr Speaker mon krwar ki mon’n ase koze e mon ti a kontan ankouraz mon bann koleg.  E parey mon’n dir zot mon konnen ki isi lo sa kote latab mon konnen ki i annan Manm ki war li en pe difisil – ki ti a kontan ki keksoz i diferan.

Ki ti a kontan ki sa swa ki ganny mete devan zot, i pli senp, i pli obvious, me selman la i la larealite nou pei ozordi.  E san ofans bann lezot Manm lo lot kote latab, la i la larealite ki zot in kit ek nou, e nou bezwen travay pou nou re batir sa pei.

Alors nou ava gete ki mannyer i été.  E mon ti a kontan remersi ou Mr Speaker e demann bann Manm pou siport otan ki zot kapab sa apwentman.  Mersi.

 

MR SPEAKER

Mersi Onorab Ferrari.  Mon a donn laparol Onorab Jude Valmont.

 

HON JUDE VALMONT

Bon apre midi.  Mersi Mr Speaker.  Mr Speaker  mwan mon ti a kontan zis kontiny – pick up lo sa ki Onorab Ferrari in dir dernyen la  sityasyon ki Foreign Affairs in kit Lasanble ozordi pou vote.

Mr Speaker en keksoz ki nou bezwen pran kont en Anbasader pa ganny formen ozordi pou demen. I en dimoun ki konman en Diplomat ou pas dan serten formasyon. Sesel nou pa sitan gran pou ganny doue avek Liniversite Diplomatik and whatnot.  Alor ki Zafer Etranzer i fer, baze lo leksperyans, nou ti annan en sistenm training e rotasyon.

Alor ou vini, ou fer 2an Foreign Affairs konman en Diplomat ou konmanse parey i tou depan lo ou kalifikasyon pou konmans lo – si ou annan en degre ou konmans lo 2enm Sekreter ou monte ou vin premye Sekreter ou monte counsellor, principal counsellor ziska ler ou ariv sa nivo ki ou due parey in dir swa ou ganny swazir pou vin Anbasader.

Be ki’n arive dan lepase? Wi in ariv en moman kot Foreign Affairs in pas dan serten difikilte.   Bokou,  mwan mon konnen mon’n Foreign Affairs en pe letan, mon konnen en bon pe zenn – en bon pe prospective candidate ki petet nou ti a dir tin kapab la devan ozordi tin kapab ganny swazir me in arive ki bokou i move on.

Alor Mr Speaker mon dir i pran letan pou form en Diplomat. It is not just en matter ou vini ou war enta dimoun avek en bon pe kalifikasyon zis ou vini, ou pike.

I pran letan ek leksperyans e osi posting.  E i dan sa laliny Mr Speaker mon war ki Madanm Accouche, mon konnen ki in ganny poste L’Angleterre – in ganny mete Cuba alor in over the 28 years in anmas – apard leksperyans lokal, in ganny ekspoze internationally.

Alor li menm li, konman en endividi, in ganny sans – ki mannyer nou dir an Angle rub son zepol avek bann lezot Diplomat.  Alor dan lemonn diplomatik, i pa nouvo.

E son sa 28an ki in fer Mr Speaker, si mon pou al en pti pe pli devan, mwan bann letan ki mon’n antre mon’n zwenn li konman 2enm Sekreter.  E sa bann letan i ti parey i ti dir i ti pe run i ti siporte aktyelman, Consular Affairs ki pe deal avek bann Konsil.

Mr Speaker  alor ki nou war sa leksperyans ki in anmas, i ou kapab dir,  i fer li sa personn ideal.  Akoz si nou get – nou al en pti pe pli devan ankor  – nou gete i annan ler mon antre bann letan ki li i ti Second Secretary msye – aktyelman nou bann Anbasader Selby Pillay, Conrad Mederic sa letan zot ti bann nivo Direkter – Direkter Zeneral Bilateral ek Miltilateral pareyman.

Alor in pandan sa bann letan Jean-Claude Adrienne mon ki ti ansarz Consular Affairs li i ti Second Secretary. Alor ou’n war sa ban Diplomat

d’affaires.

Ordinerman i dir ek ou en pei nou pran Cuba konman en pei ki nou annan en relasyon bilateral fantastik avek, alor nou bezwen ankouraz toultan ankouraz sa o nivo reprezantasyon. I dir ou i resipokal.

Resipokal savedir, ki si  mwan mon met en Anbasader kot ou, ou osi ou bezwen met en Anbasader kot mwan.  I montre sign of good faith e trust.  Alor ki nou’n fer?  Nou santi petet mon santi Chair IAC yer dan miting ki mwan osi mon en Manm lo la, nou in dir – nou’n ganny sans tous lo sa bann pwen e nou’n tous lo sa bout akoz Anbasader Cuba?

E i montre.  In ganny dir ki sa Madanm Accouche gran posibilite e mannyer Chair in dir li, petet i pou the next Anbasader Cuba.  Alor ki lavantaz ladan?  Sa madanm – mon pa pe get li konman sa madanm endividyelman, me selman mon get li sa pozisyon ki in tenir.

In la in deza dan sa Lanbasad. In deza pe angaz li konman in dir Chargé d’Affaires par enterim. Alor Ag Chargé d’affaires parey nou dir an Angle.

Alor in pran sa responsabilite Lanbasader pandan 6mwan. Alor in deza laba konn sa kominote diplomatik.  Alor nou –  e lavantaz se ki koz Espanyol e en pei parey Cuba pou nou ankouraz relasyon – bon relasyon, i enportan ki ou annan ou mannye ou pa zis mannye kiltir, dimoun, me selman ou mannye langaz.

Akoz i annan pei mon krwar nou bezwen konfese Lasin bann pei parey Lasin, Cuba i dir ou si ou koz zot langaz ou earn their trust, e sa i enportan refer sorti.

E sa madanm i la. Alor ki nou fer mon krwar i pou le moman la kot nou été nou bezwen get sirkonstans kot nou été la, mon krwar en dimoun pli ideal pou plase pou ou met dan en Lanbasad parey Cuba, pou annan sa kontinite, sa Korperasyon ki nou annan.

E pou fer sir ki napa okenn – mannyer nou kapab dir kasman dan kominikasyon. Alor lo sa merit mon war ki i personn ideal.  Mr Speaker i annan keksoz mon ti a kontan dir osi, vizavi sa apwentman ; alor la ki nou get sa savedir nou get dan en Lanbasad. Toultan nou dir Foreign Affairs nou bezwen e i bezwen ankouraz son bann dimoun son bann Diplomat monte.

Alor ler nou get sa madanm in Ag Chargé d’affaires la ozordi avek approval Lasanble, nou a promot li pou vin Anbasader i donn prospect en lot zenn – en lot dimoun en lot staff Foreign Affairs ki’n la ki’n travay tou sa letan, i donn li sa loportinite pou al segonn li.

Alor avek sa lespri ankouraz nou bann dimoun monte, mon krwar nou merit war sa dan en fason pozitiv.  I kre loportinite pou ganny lot dimoun dan plas parey nou’n dir Onorab Ferrari in refer sorti ki i annan lezot Anbasader ki ti kapab pran sa plas me zot deza deor.

Alor si nou pran en dimoun ki Foreign Affairs ki’n monte, i a kree loportinite pou en lot dimoun dan sa Minister monte.  Mr Speaker mon ti a kontan ki lezot Diplomat dan sa Minister i get sa apwentman konman en loportinite, i ganny lespwar ki zot osi demen zot kapab ganny apwente.

E rightly said, i annan lezot i annan Diplomat dan lanbasad Brussel e lezot e mon konnen zot osi zot annan leksperyans petet pa 28an leksperyans, me selman zot  doue, zot annan lezot eksperyans ; i annan ki master langaz osi alor mon krwar sa i bann qualities ki pou ed zot demen.

Mr Speaker mon krwar mon pa pou long. Zis mon a terminen par lans en lapel ek nou frer ek nou ser, pou nou gard en lespri pozitiv.  Pou nou pa met sa lespri zenofobik dan la.

Akoz ki nou fer, ozordi nou pran nou get sa madanm ki’n asize  la devan nou, ki’n vini ki’n asize ki’n koz lo son karyer, ki’n koz lo akoz i krwar i merit ganny apwente Anbasader – in donn nou son leksperyans, kote i sorti, kote in arive, mon krwar nou pa merit get li en zafer,’’ Ar sa madanm in en Malgas.  I ne Malgas.  Par lo la i en Seselwa ki’n natiralize, alor i pou get lentere Madagascar ki lentere Sesel !’’

Mon krwar si i ti koumsa sa madanm i pa ti pou Sesel ozordi  petet i ti a Madagascar. Alor nou war 28an in dedye son lavi, son letan, pou servi nou pei dan Minister Zafer Etranzer, alor mon krwar nou merit retir tou lespri négativité, get li pozitiv. Annou gete ki Madanm Accouche i kapab ofer pou nou konman en Diplomat ; parey Onorab Ferrari Chair IAC in refer sorti oparavan.  Mon krwar annou get li koumsa.

Annou get son kalifikasyon.  E nou’n ekout li bomaten in dir ki i kapab anmennen deplis pou nou, alor annou get li dan sa lespri pozitiv.  Mersi bokou Mr Speaker.

 

MR SPEAKER

Mersi Onorab Valmont.  Bon mon zis avertir bann Manm osi ki mon fini ferm lalis bann entervenan. Mon ava donn laparol Onorab Ahmed Afif.

 

HON AHMED AFIF

Mersi Mr Speaker.  Mr Speaker 3 pti pwen lo sa Mosyon.  Premyerman se sa ki devan nou, se pou nou aprouve ; Mosyon pe lir koumsa. Alor mon mazinen kriter ki Lasanble i devret aplike, konm i form parti rol oversight dan Lasanble Nasyonal, pou mon sa ki enportan pou mwan regarde se kapasite sa dimoun pou li reprezant Sesel.  Sa i enn.

E alor pou mon ler mon regard kapasite sa dimoun,  mon ti a kontan konn son konesans, pou li al deor e reprezant Sesel.  Mon ti a kontan konn son leksperyans ; savedir konbyen lannen in travay nou gannyen sa bann lenformasyon.

Son abilite pou li kominike ; parske konman en Anbasader i pou bezwen reprezant nou dan bann fonksyon etranze ;  i pou bezwen al plizyer renyon, kot i bezwen kominike.  Alor tousala i enportan.  Byensir i en dimoun ki onnet, e mon mazinen si i fer 28an dan sa servis, i bezwen en dimoun ki annan en repitasyon, ki’n travay dir.

Alor sa se enn bann rol oversight ki mon krwar, nou, nou devret pe fer.  E  mwan mon an regardan sa bann kriter, mon’n ekout li bomaten, lafason in prezant son lekor isi, mon war li konman en dimoun ki konn son dosye.  Mon war li ki i ti alez, i kapab kominike.  E mon pa konn bokou lo li apard mon konn enn de dimoun dan son fanmir, me selman li personnelman mon pa konn li osi byen.  Me mon ganny en lenpresyon si ou’n laba pou 28an ou’n bezwen onnet dan ou lavi.

Lot entervenan avan Onorab Ferrari an realite, in koz lo en lot sa bann kriter, se eski nou annan tro bokou Anbasader dan pei ?  E eski sa apwent en lot Anbasader ki pou vin en fardo lo Bidze e lo lekonomi.

Lafason mwan mon regard li, Anbasader nou annan en kantite. Me pa tou ki pe ganny peye.  Zot ganny sa tit, me i annan serten ki pe travay aletranze konman Anbasader, me zot dan en fonksyon ofisyel zot pe ganny peye.

Me nou napa bokou ki la ki pa pe dan en rol itil.  Nou napa bokou.  Me sa madanm, Madanm Accouche ti deza an pot an Cuba.  I ti deza pe desarz en fonksyon ki mon osi mon krwar i enportan, parske nou ganny konsiderableman led teknik avek Cuba malgre ki mon pa krwar dan zot sistenm politik mwan osi.

Me dan la diplomasi enternasyonal, ou kolabore ek tou dimoun, menm ki ou pa dakor avek zot krwayans e zot sistenm ki zot enplimante.  Me nou annan en bon kolaborasyon.  Zot annan dokter.  Zot annan lezot dimoun ki pe ed nou Sesel, me kote eski i pou met en fardo lo nou lekonomi ?  Non mon pa tro krwar.  Parske i deza pe ganny en saler – mon mazinen i a ogmante pou vin Anbasader me eski pou en logmantasyon ki pou vin en fardo? Personnelman mon pa krwar.  Parske nou pa pe ganny bokou nominasyon konman Anbasader ki pe vin kot nou.

Alor pou mwan mon war sa konman en fakter ki mon kapab aksepte.  Lo kot nasyonalite, sa madanm i en Seselwa. I  pa ti en Seselwa ler i ti ne, me i en dimoun ki ozordi i en Seselwa. In viv pandan 28an isi.  I annan zanfan ne Seselwa.

E alor mon krwar sa, i pa devret en fakter, ki nou devret fer distenksyon dan son lapwentman. Parske parey Onorab Ferrari in eksplike mon annan en sel kategori Seselwa.  Ou pa kapab annan plizyer, me  mwan osi mon pou repet son pwen, ki si laport ti ouver e en dimoun in antre, pa blanm sa dimoun, me blanm sa ki’n kit laport ouver.

Mon pou repet sa pwen.  E mon  pou dir poudir ki sa madanm in demontre son kapabilite pou li reprezant nou. In montre son kapabilite pou li travay pou Sesel.  I annan sa leksperyans.  I ti pe deza fer louvraz diplomatik dan sa landrwa ki nou anvi anvoy li.

E alor pou mwan i pa pe met en fardo lo sa pei.  Konman mon rol oversight pou mwan, mon pou napa okenn problenm pou mon dir poudir i ok, pou donn li en vot pou nou kapab aprouv sa.

Vwala Mr Speaker mon sit en pe bann kriter ki mon krwar i enportan dan sa konsiderasyon.  Mon espere si zanmen i ganny nominen, ki i kapab fer en travay ki pou lev paviyon Sesel byen o, kote i pou reprezante.  Mersi Mr Speaker.

 

MR SPEAKER

Mersi Onorab Afif.  Mon a donn laparol Onorab Audrey Vidot.

 

HON AUDREY VIDOT

Mersi Mr Speaker.  Bonn apre tou dimoun.  Mr Speaker  mwan mon pou dir ki mon annan en gran respe pou Madanm Accouche, konman en fanm Seselwa.  Parey in dir.  Menm si in ne Madagascar me in marye avek en Seselwa ; in form son fanmir e in travay in kontribye dan lekonomi Sesel, pou montre  nou poudir wi, i sa dimoun ki annan lanmour pou sa pei.  28an son servis in donnen avek pep Seselwa.  In montre ki i en fanm, ki kapab.  Tou sa lannen ki in devoue, in ganny en bon pe responsabilite, me in travay avek nou lezot frer, ser Seselwa dan Minister Zafer Etranzer.

Mon kapab dir mon’n apresye ekout li, letan in donn en pti pe detay son parkour, son letan, letan in isi, in travay dan Gouvernman.  Mon enn bann folio ki mon pli enterese letan in koz lo sa lesanz ki i ti form par dan Komite ki’n anmenn bann zenn – bann zanfan Seselwa, ganny sa exchange avek bann lezot pei aletranze.

I montre ou ki son parkour, son konesans ki i annan, byensir parey Onorab Valmont in dir, in pas atraver bokou staz training, pou ozordi kapab ganny nominen pou vin en Anbasadris.  E nou, nou bezwen valoriz zefor ek travay dir, ki en dimoun i fer dan son lorganizasyon travay.

Mon dir sa akoz dan lepase, parti United Seychelles bokou fwa ti ganny kritike, ki i annan dimoun ki’n vin dernyen, me selman i ganny promosyon i pas premye.

E ozordi mon kapab fyer pou dir ki wi, nou pe koriz serten fot lepase.  Nou pa parfe.  United Seychelles bokou dimoun dernyerman ki pe ganny valorize pou zot travay dir, e pe ganny rekonnet pou zot servis ki zot pe donnen, me i malere ki i annan dan lezot parti pa neseserman pe swiv sa parkour, konpare avek zot prefere viv lepase parey – viv lo fot lepase ki nou dan letan nou Parti Lepep  nou ti fer – kot la mon dir ki en dimoun i merit – i deserve en pos i pa gannyen.

Letan mon pe regard statistik bann Anbasader ozordi Sesel, dan 31 ki hold sa title ozordi ,nou annan nou zis 10 ki madanm.  E mon enn bann zenn fanm Seselwa ki kontan pouse.  Si i annan en fanm Seselwa ki’n travay dir e i merit pou li kapab ganny son merit kot i merite, nou bezwen donn li.

E mon santi ki wi, nou bezwen kontinyelman ankouraz bann fanm, pou pran bann pos leadership.  E si sa madanm pou sa 28an servis ki in donnen pe enport sa ki annan son lopinyon personnel lo li, me selman in travay in donn sa ki i kapab e si ozordi i merit son dues nou bezwen donn li son dues.

So  mwan mon pou siport sa nominasyon, akoz parey mon dir i en fanm ki’n travay en kantite letan, e petet i a motiv lezot bann madanm, menm dan sa lenstitisyon, pou zot osi kapab devoue, donn tou kot zot kapab, e montre sa lanmour ki zot annan pou zot louvraz ; sa long servis e zot osi zot ava ganny zot sans pou zot kapab mont o pli o nivo.  Parey nou toultan dir an Angle ‘’the sky is the limit.’’

So mon pa pou long la  Mr Speaker, me selman mon pou dir, mon pou aport mon sipor lo sa nominasyon.  Mersi.

 

MR SPEAKER

Mersi Onorab Vidot.  Mon ava pas laparol avek Onorab Sandy Arissol.

 

HON SANDY ARISSOL

Mersi Mr Speaker.  Bonn apre midi tou dimoun ankor enn fwa.  Mr Speaker bomaten nou ganny sans enterakte avek Madanm Accouche, ki’n vin dan nou Lasanble Nasyonal senpleman pou li eksplik nou en pe travay ki’n fer pou Sesel.  Me kestyon ki reste laba deor, ki tou dimoun pe demande, dimoun pe kestyonnen, se an relasyon ek sa ki nou tou nou koz lo la se son nasyonalite – ok?  Me selman sa ki reste en fe se ki Madanm Accouche i en Seselwa sa i dan i en Seselwa dapre nou Lalwa ki egziste ; dapre en keksoz ki annan dan nou Konstitisyon, alor i en Seselwa dan en fason i annan pa kontan, i annan pou kontan, me selman nou bezwen aksepte poudir i en Seselwa.

Letan en dimoun in donn 28an son lavi, pou en pei, i montre poudir i annan serten kontribisyon ki i kapab fer.  E parey Onorab Afif in fer kler, e lezot Manm ki’n koz avan mwan poudir nou pa kapab kontinyelman annan de klas Seselwa dan nou pei, si i ganny konsidere konman Seselwa.

Me parkont pwen ki Onorab Valmont sa ki’n fer resorti an sa ki konsern zenofobik, i enportan osi pou nou reflesir byen.  Ou konnen Seselwa ozordi, nou sitan per bann etranze, oubyen bann etranze ki’n natiralize dan nou pei, parske lafason ki sistenm in permet sa bann dimoun parfwa pou fer serten keksoz dan nou pei.

Sa in fer ki ozordi i annan sa lafreyer e i normal pou annan sa lafreyer.  Nou pa kapab pran li konman bann keksoz drol.  Par egzanp ler Gilbert Victor i kriy lasasen nou bezwen ekout son lasasen ki i kriye. Parske Gilbert Victor konman Seselwa li i war en kategori etranze, pe fer serten keksoz ki li i krwar pa normal dan sa pei.

Alor tou sa bann leokri ki nou tande laba deor, i enportan pou nou met ansanm konman en pti pei.  I enportan pou nou analiz li byen.  E i enportan pou nou anvoy en mesaz kler laba deor.  Parey Onorab Afif in dir nou bezwen annan en sel kalite Seselwa dan nou pei.  E mon osi bezwen rekonnet Mr Speaker, poudir St Louis dan mon distrik, e mon asire dan tou lezot distrik, nou annan plizyer etranze ki’n marye avek nou bann frer/ser Seselwa.

E pa bliye nou konman bann Seselwa, i annan plizyer nou ki annan nou zanfan, nou annan nou frer, nou ser ki’n ganny loportinite pou li marye avek en etranze dan en lot pei, parey nou kontan dir dan en term Kreol dan’’ pei deor!’’ Nou bezwen rekonnet sa nou bezwen aksepte.

Me parkont letan sa etranze in marye ek sa Seselwa, eski nou pini li an term travay?  Ki i fer?  Kot i ale?  Eski nou gete sa bann zafer?  Eski sa etranze ki’n marye anek sa Seselwa dan mon distrik nou bezwen penaliz li an term travay ki i kapab fer? Larzan ki i gannyen?  Oubyen lafason ki i sonny son fanmir?

Set egzakteman sa size ki nou pe koz lo la e ozordi size se lo Madanm Accouche en madanm ki’n natiralize pou 28an in donn son letan Sesel i annan zanfan Seselwa dan nou pei zis parey nou annan Seselwa ozordi ki’n marye ki en Seselwa, me i annan diferan 2 paspor.

Swa i annan en paspor apre i annan paspor en lot nasyonalite.  Oubyen nou annan nou ozordi dan Sesel bann papa ek bann manman ki annan zanfan, selman li akoz son abilite oubyen son koneksyon, li in kapab fer ki son zanfan i annan en paspor etranze.

Tousala i egziste dan nou pei e nou bezwen anvoy en sel mesaz kler laba deor – Seselwa Sesel i bezwen tou son zanfan pou fer son pei avanse.  Me nou bezwen annan en sel kategori Seselwa.

Mr Speaker sa i mon premye pwen.  E Madanm Accouche ozordi i sa madanm ki nou pe koz lo la an relasyon.  Me selman i enportan pou nou parey mon ti dir bomaten Mr Speaker Madanm Accouche letan in vin dan Lasanble i annan en kantite dimoun ki’n telefonnen, i annan en kantite dimoun ki’n anvoy mesaz, i annan en kantite dimoun ki’n teks an relasyon avek li konman en imen.

I annan dimoun i dir ek ou, ou pa pou kapab fer sa louvraz.  I annan dimoun i dir ek ou i en problenm sa madanm dan sa travay ki i fer?  Sakenn in donn son perspektiv lo li.

E nou bezwen pe proteze sa.  Parske se sa bann dimoun ki travay avek li, e sa bann dimoun ki konn li pli byen.  Alor sa i anmenn mon lo mon 2enm pwen – eski apard Madanm Accouche nou annan en lot dimoun dan Foreign Affairs oubyen lo sa kalib, ki kapab fer sa louvraz oubyen reprezant nou Cuba?

Mon ti a kontan kekfwa Onorab De Commarmond konman loter Mosyon, kekfwa i annan lenformasyon ki i ti ava partaz avek nou, eski la Foreign Affairs nou annan en lot dimoun la, si demen taler nou dir non Madanm Accouche eski demen bomaten nou annan en lot dimoun ki kapab pran plas sa madanm, pou al fer sa travay pou nou?

Mon dir sa Mr Speaker, parske i enportan.  Taler mon’n tann Onorab Valmont dir poudir i pran en pe letan pou ou kapab vin en Anbasader oubyen pou nou train nou bann zenn ki la pou zot kapab ganny sa nivo Anbasader.

Me i en keksoz enportan nou bezwen mazinen, dan lepase bann post Anbasader in ganny servi konman bann pos politik.  Ozordi nou annan David Pierre pe asize Ethopie! Kantite letan in pran pou li vin Anbasader li?

Me eski i ti napa en zenn, ki ti kapab pran son plas kot i été Ethopie ki’n donn son letan ; in donn son lavi; ki’n fer son letid zis parey nou pe koz lo la ozordi.  Tousala i bann keksoz Mr Speaker ki nou pou bezwen analize konman en pei.  Nou pou bezwen met li kler ater an relasyon avek sa ki annan pou fer avek nou bann Seselwa, letan nou kestyonnen lekel ki kapab fer? Lekel ki devret fer? Ki mannyer pou fer?

Mon krwar tousala bann keksoz ki nou bezwen analize, e fer sir ki sa perspektiv kot nou annan en sel kategori Seselwa, i marse Mr Speaker.  Mon lot pwen se, eski i normal pou nou – la ozordi kot nou arive konman en pti pei, annan diferan nasyonalite ?

Annou pa bliye letan nou napa ase mwayen travayer dan nou pei, ozordi dan ledikasyon nou napa ase ansenyan Seselwa, pou gid nou zanfan dan ledikasyon.  Me parkont ozordi dan ledikasyon, nou annan Morisyen ; nou annan Kenyan; nou annan teacher ki sorti Botswana; nou annan Endyen, me eski nou otoriz nou zanfan pou etidye avek en etranze dan lekol?

Oubyen nou dir ek nou zanfan non, sa mon pa kontan ou lekol avek sa Endyen, oubyen sa etidyan ki sorti Botswana akoz li i pa en Seselwa?  Nou bezwen arete sa latitid Mr Speaker.  Lenportans se nou pe rod ledikasyon pou nou zanfan, me parkont nou napa ase Seselwa.  Parske mazorite zot in ariv lo laz retirement, e ledikasyon ozordi i en size, i en topik travay ki en pe difisil pou plizyer dimoun, me nou bezwen sa bann ekspertiz etranze pou gid nou zanfan, pou ki li osi i kapab ganny en bon ledikasyon, pou li pran plas Madanm Accouche demen, letan Madanm Accouche, pou li retire pou li kapab osi ganny sa pozisyon.

Dan lasante ozordi nou napa ase ners Seselwa oubyen dokter Seselwa pou pran sa profesyon, me parkont ki nou annan ozordi dan Lasante, nou annan nou bann Sri Lankan nou annan nou bann Endyen, nou annan bann dokter Cubain ki pe rann nou en servis ozordi.

Eski letan mon anmenn mon zanfan Lopital Casualty mon dir ek sa dokter anvi ou Cubain pa met lanmen lo mon zanfan ! Mon ti a kontan sa dokter Seselwa ki lo konze i vini apre 21 zour i a pans mon zanfan?

Pa sa ki nou dir Mr Speaker. Me parkont nou dir mersi sa dokter parske lafason ki in pran ka avek nou zanfan, lafason ki in eksplik nou, lafason ki in gid nou, dan sa demars letan nou ale nou happy.

E ozordi nou bezwen rekonnet ki bann dokter Cubain bann ki dan Lasante ki konn sa pli byen ki mwan –  nou bezwen rekonnet pou bann profesyonnel Lasante ki nou annan ozordi depandan zot nasyonalite, zot pe rann Minister Lasante en servis ekselan.

E nou bezwen rekonnet e dir mersi sa. E ozordi pou mon fini lo sa pwen Mr Speaker annou pa bliye bann Prêt dan Legliz.  Si ozordi mon Legliz ki mon frekante Katolik nou pa sanz nou fason fer an relasyon ek sa bann Prêt parey pou Anglikann kot bann Prêt i kapab marye  annan zot madanm, zot zanfan, byento nou pou napa Prêt.

Parske ozordi mazorite bann Prêt se bann etranze ki antre dan pei. Nou annan bann Kongole ; nou annan bann Malgas ki vin Prêt. Eski letan Dimans mon met laliny pou al pran ‘’le corps du christ’’ mon get sa Prêt dan son lizye, mon dir ek li, non mon frer ozordi ou pa pou donn mon ‘’le corps du christ’’ akoz ou en Malgas?

Mon ale mon ouver mon lanmen.  I dir mwan ‘’le corps du christ’’ e mon dir li, ‘’Amen.’’ E mon retourn dan mon ban mon asize.  Mr Speaker mon al lo sa laliny, akoz mon krwar i enportan ozordi kot nou arive dan nou pei Sesel, i pou enportan pou nou enkorpor tou keksoz ki bon pou nou pei.  I pou enportan pou nou  rode kwa ki meyer pou nou pei.

Par egzanp nou bezwen led etranze, pou vin dan nou pei, e annou pa bliye poudir nou annan lezot Seselwa, ki pe reste aletranze, kot bann lezot pei e kot zot osi zot pe serten kontribisyon.

Mon rapel tre byen Onorab Georges ti remind nou semenn pase, poudir li i annan en frer en Georges – en Seselwa, ki’n ganny selekte oubyen elekte, pou vin Prezidan dan en gran lotel aletranze, zis mon pa tronpe ler Mr Georges ti dir sa ok ?

Alor tousala i montre poudir lemonn ozordi avek nou konman ptipti, nou pe sey rode ki mannyer pou nou kapab anmenn nou pei pli devan.  Me selman mon retourn ankor lo mon premye pwen Mr Speaker avan nou fini, i enportan pou nou pa bliy sa pwen zenofobik akoz Seselwa in per etranze? Se lafason ki sistenm in anmennen, kot etranze in pas devan nou, etranze in bouskil nou, etranze in sey fer fason pou li pran pli gro bout toultan e nou, nou’n reste trankil.

Alor la kot in arive Seselwa pe veye, Seselwa pe veye, Seselwa, Seselwa pe get partou e pe fer sir ki sa pa ariv ankor dan son pei.  Alor Mr Speaker Madanm Accouche ki en Seselwa par Lalwa Sesel ki egziste ozordi in donn nou 28an son letan e parey mon dir si Onorab De Commarmond i kapab konvenk nou, poudir napa en lot dimoun ki pou kapab ranplas sa Madanm Accouche ; parske taler mon tann Onorab Ferrari in koz lo Mr Selby Pillay ki mon’n aprann i osi ti pou li ki ti ganny akreditasyon parey nou dir oubyen tou bann dokiman ti’n pare, pou li al Cuba be apre mon pa konnen ki’n arive i annan en kas anba ki zot dir in pase.

Mon pa konnen lekel ki konnen ki kapab koz lo la taler a sey eksplik mwan en pe sa.  la Mr Mederic osi mon aprann ki li osi in extend son stay Sri Lanka alor son stay in ganny aprouve e nou annan Mr Dick Esparon ki la.

Par egzanp si Mr Dick Esparon ti la li ki ti deza laba, i annan sa en Seselwa parey nou dir ankor, eski sa wi ti ava fer ki nou pa ti ava bezwen annan Madanm Accouche.  Me selman parey mon dir, si pei i bezwen tou son zanfan -0 tou son Seselwa pou fer son pei avans devan an term Bilateral Enternasyonal e Diplomatik ki nou pe koz lo la, mon krwar i ava enportan pou nou donn Madanm Accouche – sa Seselwa en lavans pou li kapab al reprezant nou pei aletranze Mr Speaker.

E alor mwan i enportan pou mwan dir, poudir la kot nou été, si nou bezwen en reprezantan Cuba pou nou ganny plis led an term medikal, lezot keksoz zot kapab ed nou, zis parey lezot pei pe fer pou ed nou konman en pti pei, mon napa okenn problenm ek sa Mr Speaker. I toultan reste – mazinen poudir nou ki aprouv bann Anbasader e konman en Lasanble, oubyen konman en pei, oubyen konman en Gouvernman, nou kapab osi recall zot back si zanmen i annan okenn keksoz ki nou santi, oubyen nou pa kontan oubyen nou pa kapab, oubyen nou pa pe tro happy avek, alor i touzour i responsabilite en pei Gouvernman e Lasanble pou nou kapab fer serten keksoz.

Avek sa Mr Speaker  mwan mon napa okenn  dout, mon napa okenn  sa pou mwan siport nominasyon Madanm Accouche ki’n la devan, e ki’n en Seselwa e ki’n servi pei pandan tou sa bann letan.  Avek sa detrwa Mr Speaker mon ti a kontan remersi ou.

 

MR SPEAKER

Mersi Onorab Sandy Arissol.  Mon a donn laparol Onorab Waven William.

 

HON WAVEN WILLIAM

Mersi Mr Speaker.  Mr Speaker mon vreman apresye lafason ki deba pe ale lo sa Mosyon e mon a dir ki i annan bann pwen vreman enportan ki’n sorti.  E bann pwen ki mon kapab dir ki Seselwa li menm li deor la, ki pe analize, ki zot apresye lafason ki bann Manm Parlman pe koze vizavi sa apwentman.

E mon a dir ki lo mon kote, baze lo leksperyans ki Madanm Accouche i annan mon napa okenn problenm pou donn sipor. Me Mr Speaker bomaten mon mazinen akoz letan pa ti permet, mon pa ti ganny sans demann mon kestyon, selman mon ti annan de kestyon ki pertinan vizavi bann diferan pwen ki’n levé sirtou par Chairman IAC Onorab Ferrari.

Ki  mwan mon ti anvi demande demann Madanm Accouche, se ki eski ozordi dan Departman Zafer Etranzer, i annan bann zenn potansyel ki kalifye ozordi pou kapab vin ganny nominen konman Anbasader oubyen Anbasadris?

E mon lot kestyon sete, eski konman en dimoun ki pe pratik dan pozisyon konman Chargé d’affaires, eski i satisfe avek sipor e sa Scheme of Service ki nou bann Misyon pe gannyen deor?  E eski li konman sa dimoun ki pe ganny nominen i ti annan bann propozisyon ki’n met devan?

Mr Speaker sa pwen malgre nou pou war li en pti pe an deor, i en pwen pou mon ki konman en dimoun ki’n dan sa pozisyon konman Anbasader dan lepase, mon ti ava demande e swete ki sa eleman sipor pou bann Anbasader lo sa bann Misyon an deor i ganny regard ladan.

I annan landrwa kot nou pou bezwen regard ladan.  Parey mon’n dir mon pan ganny sa sans pou konn son pwennvi bomaten lo la, me mon a dir ki i annan sa nesesite.  Par egzanp letan en dimoun in ganny nominen, i aprouve pou li al Anbasader, ouswa en lot Diplomat – dizon en lot  Premyer Sekreter ouswa 2enm ouswa 3enm, ouswa en counsellor me sa sipor ki i gannyen Mr Speaker, mon krwar i bezwen ganny revwar.

E mon a dir ki i annan nesesite pou serten, petet ganny revwar vitman.   Petet mon ti ava demande ki Departman Foreign Affairs dan son Midterm Review zot pran an konteks sa.

Par egzanp Mr Speaker en dimoun i ganny apwente Anbasader si mon a dir ek son madanm an term Ero pe tous li zis R1500 par mwan Mr Speaker.  R1500 par mwan Mr Speaker letan ou konpar avek lavi Sesel, kot welfare zot menm zot pli o zot pe ganny 5,250 ouswa the basic salary.

Me pou sa dimoun kapab cope, i pa fasil.  Prezan sa i lo kote Anbasader, me si ou pe pran en Diplomat ki pli anba i vreman dan problenm Mr Speaker.  I vreman dan problenm akoz li i pe tous zis R935 pou li kapab fer fas avek lavi dan en mwan.

E si ou annan detrwa zanfan – 1 zanfan pe tous li zis R510 Mr Speaker.  E la dizon ou annan ou, ou bezwen pey lekol ou bezwen pey legzanmen ensidswit, zot war zot lavi i difisil.

E ozordi mon konnen i annan serten Diplomat ki zot mont avek msye – son msye pa travay e li son saler i bezwen take care of tou lede, ki vin en presyon lo li.  Me i pa refize travay akoz i anvi aprann e i anvi kontinyen son karyer dan diplomasi.

E Mr Speaker lot keksoz ki zot met devan se ki, en staff lokal deor ki  anploye i ganny apepre plis ki sa Diplomat Seselwa ki pe Anbasader.  E sa i ganny revwar toulezan.   E  mwan mon pe demann Departman Etranzer, pou vreman dan sa Midterm Review met keksoz ki Lasanble kapab prouve, akoz Mr Speaker pou mon war li pa normal.

Mr Speaker lo pwennvi en Chargé d’affaires konpare son stati avek en  Anbasader, mon krwar i enportan ki letan nou pe regard sa apwentman Madanm Accouche, akoz i vre ki stati en Chargé d’affaires pa ganny byen regarde parey nivo Anbasader.

E zot tretman osi pa parey e tandis ki ler ou en Anbasader sa pei, sa Gouvernman i donn ou plis lenportans vizavi diskisyon e negosyasyon ki pase.  Alor parey mon’     n dir mon pa pran okenn problenm ou a kapab donn sa sipor, akoz baze lo karyer Madanm Accouche – mon krwar 28an, mon krwar poudir i merite. Malgre ki nou annan bann diferan pwennvi an deor, me selman nou bezwen regard kapasite e kwa ki sa madanm in kontribye ziska aprezan.

Mr Speaker avek sa de pti mo, ankor enn fwa mon réitère ki mon pou apport mon sipor pou sa Mosyon.  Mersi.

 

MR SPEAKER

Mersi Onorab Waven William.  Mon ava donn laparol Onorab Bernard Georges.

 

HON BERNARD GEORGES

Mersi Mr Speaker.  Mr Speaker mon osi mon pa pou long tou sa ki merit ganny dir in ganny dir bokou pli byen ki mwan mon ti ava kapab fer li.  Me mon ti a kontan kantmenm sa fer de pti pwen apre midi.

Premye pwen, se fodre nou realize ki nou pe fer ozordi dan Lasanble.  Akoz ki Lasanble i bezwen aprouv Anbasader oubyen Minis?  E sa kestyon mon krwar i al labaz en pe nou deba ozordi.  Nou pa aprouv sa de dimoun oubyen sa kategori dimoun akoz Konstitisyon i dir nou fer.  I annan en rezon akoz Konstitisyon i demann met Lasanble pou aprouv Minis e pou aprouv anbasader.

E sa se pou fer ki i annan a sa nivo en dyalog ant Egzekitiv avek Lezislatif.  Akoz si ti zis otomatik Prezidan i deside en tel i devret vin Anbasader i anvoy non dan Lasanble, Lasanble i aprouv sa non otomatikman, pa ti pou bezwen annan sa prosedir.  Vo mye zis les li apwent son bann Minis ek son bann Anbasader parey i arive L’Angleterre e Moris ; par egzanp dan bann pei kot i annan en sistenm parlmanter.

Me nou napa en sistenm parlmanter se egzakteman sa.  Sa ki nou pe fer ozordi i fors en dyalog.  E sa dyalog ozordi sa ki nou pe fer nou pe fer li dan en fason transparan, parey nou ganny demande pou fer, dan en fason ki e nou ek Egzekitif e osi lepep Seselwa i ava kapab swiv en pti pe sa prosesis aprouvasyon, e war ki sa dimoun ki pe ganny aprouve, oubyen ki pa pe ganny aprouve akoz kisisa bann rezon deryer aprouve oubyen pa aprouve.

E tel parey mon’n dir aprouvasyon pa otomatik. Refiz aprouv en nominasyon  i osi pa otomatik. I pa akoz ou pa dan parti ki ou pou war ki otomatikman ou pou refiz tou sa ki i anvoy isi.

I annan en balancing act.  I annan en prosesis give and take ki bezwen ganny fer, e  mwan mon krwar ki ozordi sa ki nou’n fer sirtou akoz nasyonalite nesans sa madanm ki’n vin devan nou, i en prosesis enportan, me i en prosesis ki neseser pou ki tou Seselwa i konpran egzakteman sa ki nou pe fer.

Mr Speaker mon premye regre – ou plito mon premye pwen ki mon’n demann mon lekor bomaten, ler mon’n realize ki rezon atraver bann kestyon ki mon’n demann Madanm Accouche, rezon ki li i pe ganny apwente, se akoz i annan en lyen avek Cuba en konesans lalang Espanyol e akoz i pe ganny anvoy dan sa pei.

Pou mwan sa okenn sa bann largiman pa valab, akoz nou ti a kapab mon sir, si nou rode trouv en lot dimoun, si nou ti anvi rod en lot dimoun, ki pa neseserman dan Minister, e ki ti a kapab e ki ti annan tou sa bann koneksyon e ki kapab koz Espanyol pou li al anbasader Cuba.

E Gouvernman US a lepok i ti Lepep, in fer e  in donn nou en presedan kot olye swazir en dimoun ki dan Minister Zafer Etranzer, ki parey Onorab Valmont in fer nou rapel ki in ganny son training – in evolye dan sa Minister pou li vin Anbasader  en zour – en pe parey sa madanm in fer nou konpran ki i son ka.  Nou pran Mr David Pierre e otomatikman fer li vin Anbasader san ki’n pas en zournen – anfen  pas detrwa zour kekfwa dan Minister Zafer Etranzer, me i pa ti en career diplomat e i pa ti en career Foreign Ministry employee.

Donk i annan e lezot pei i fer li, nou osi nou ti a kapab fer li. Me mon kontan ki nou pa’n – akoz mon krwar ka Mr Pierre ti en aberasyon e enn ki nou pa anvi revwar ankor dan nou pei.  Ti en ka kot ti annan lezot dimoun ki ti devret ganny sa pozisyon, e zot pa’n gannyen akoz ti annan en serten friendship ant en Prezidan avek enn son sitwayen.

Sa mon krwar nou devret kondannen e dir i pa devret ariv ankor.  E donk mon annan en serten lespwar ki apre sa ki nou tande ozordi, se ki nou’n retourn dan sistenm normal, e nou apwent bann dimoun ki next in line dan sa Minister.

Mwan mon pa konn Madanm Accouche  me parey nou tou dan sa Lasanble, e parey bokou dimoun deor, nou bezwen rekonnet ki nasyonalite, nesans sa madanm, in soulev serten problenm ki nou pe fer fas avek ozordi.

E mon kontan ki dan sa Lasanble, nou’n pran sa loportinite ozordi, pou nou anvoy da deba en pe pli lwen ki Madanm Accouche, e vin lo sa size sitwayennte, lo sa size nasyonalite, lo sa size de kalite Seselwa.

Akoz nou pa ti pou fer sa devwar ki Konstitisyon i demann nou fer ler nou aprouv en Anbasader, si nou pa tin pas atraver sa deba osi difisil ki sa deba i été.  I en deba difisil.  I en deba difisil.  Mon sir ki i annan en kantite kestyon, ki nou ti a kontan demann sa madanm, me ki par respe pou nou Lasanble, par respe pou sa madanm, e par fason ki nou’n ganny elve dan nou fanmir, nou pa’n fer li.

Me nou pa kapab met sa bann problenm anba tapi ; mon krwar ki konman en pei nou devret fer fas a sa bann sirkonstans, sirmont zot e bouz devan.  Ou war Mr Speaker, dan lavi la, sak keksoz ki nou fer, nou bezwen fer en swa.  Si ozordi sa madanm i next in line dan Minister  Zafer Etranzer pou li vin Anbasader, se akoz in fer en swa.

E an konsekans, i annan serten dimoun ki pa’n fer en swa.  Akoz si ti annan pou mwan servi en lekspresyon, ki mon pa kontan, Seselwa ki’n ne isi Sesel, ki ti dan sa Minister, kekfwa se zot ki ti pou’n dan sa pozisyon.

Me ou fer swa, me ou pa kapab apre konplent, ki ou swa, oubyen ou pe ganny ekarte akoz en lot dimoun in pas devan.   Mwan mon pa konpran e mon pa aksepte, ki nou dir ki nou Seselwa nou ferm nou laboutik boner, apre nou konplent ki ler nou anvi en labyer 11er diswar, zis laboutik Endyen ki ouver!

.   Mwan mon’n fer en swa Mr Speaker. La  -la  dan sa deba ki pe ki nou pe gannyen lo Truth and Reconciliation Commission, annou pran sa konman en legzanp.  Nou tou nou tann dir ki lo Truth and Reconciliation Commission, i annan zis 2 Seselwa ki’n ne isi Sesel.  What is the problem? What is the problem? Si se bann dimoun valab – si se bann dimoun ki’n vin devan – si se bann dimoun ki meyer, ki diferans i fer si zot in ne isi oubyen si zot pa ne isi?

Mwan Mr Speaker, mon ava être fran avek zot isi dan sa Lasanble.  Pandan sa dernyen 30an, mwan mon ti konnen ki en zour nou ti pou annan en Truth and Reconciliation Commission isi Sesel. Akoz i normal ki sa prosesis ti pou arive.  Question was when? 

E mon pa pou kasyet ki dan mon for lenteryer  mon ti dir ek mon lekor, mwan mon ti a kontan en zour al lo sa Komisyon.  E why not prezid sa Komisyon?  Me mon’n fer en swa ! Mon’n fer en swa mon’n al dan politik oubyen mon’n fer en swa mon’n vin en avoka, e mon’n pran case plizyer dimoun – plizyer viktim e mon disqualify mon lekor.  Senp! Senp! Mon pa pou al lager.  I en swa ki mon’n fer.  ou pa krwar mon ti a kontan vin en ziz Lakour Siprenm Mr Speaker?  

        Of course mon ti a kontan vin en Ziz.  Mon konnen mon kapab fer.  Mon konnen mon ti a kontan fer li, be mon’n fer en swa mon’n vin dan politik.  E Msye Rene ti’n dir mwan an 1993 ler mon ti stand.   I dir mwan pa stand.  ‘’  Ou en zour ou pou  vin en Ziz ou !  Mon bezwen ou. Mon bezwen ou  dan … !’’  Mon dir li,’’ Non sorry ! Sorry  mon’n fer mon … !

Ou war?  E nou pa kapab dir nou pa kapab dir akoz serten dimoun in vin Ziz e zot pa’n ne Sesel, dan plas ki nou, nou’n vin Ziz, ki i annan en problenm avek zot. Mon pa aksepte sa propozisyon ditou.

Parkont – parkont i annan en keksoz ki mon pa aksepte ler en  dimoun ki pa’n ne Sesel i dir nou –  Ler  en dimoun i vini e i dir nou, ‘’Dakor mon pa’n ne Sesel, mon’n natiralize Sesel, me tou sa ki mon’n fer pou sa pei, mon bezwen ganny en respe, oubyen mon bezwen ganny en pozisyon !’’ Sa mon pa dakor.

Akoz amwens ki ou’n fer li konman en volonter; pou Red Cross pou Lakrwa Rouz, me si ou’n travay dan en job kot ou’n ganny peye, ou pa kapab vini dir, ‘’En tou sa ki mon’n fer ozordi mon bezwen ganny  rekonpanse !’’

Sa mon pa aksepte akoz i pa normal.  Ou ava ganny ou drwa tel parey okenn lezot dimoun ava ganny son drwa.  E mon vin donk Mr Speaker, avek ou permisyon briyevman lo sa size imigran.

A mon drwat Onorab Afif, napa en bout disan Seselwa dan son lavenn, me i annan en boug ki pli Seselwa ki nou?  Eski nou demann nou lekor eski Onorab Afif i en Seselwa natiralize – oubyen – in ne isi dakor, me mon pe donn zot en legzanp.

Kote gos avek mwan Onorab Phillip Arissol ekout byen sa ki mon pe dir zot la, ekout byen sa ki mon pe dir zot la.  Lafanmir Arissol zot gran pye i Malgas, e konnen kote sa non Arissol i sorti? Regard nou  madanm Accouche Lala Harisoa ou konnen kote sa Harisoa in vini, ler Harisoa sorti laba ou konnen ki’n arive Sesel in ariv Arissol!

That is exact.  Sepa si pa en pti kouzen Mrs Arissol li oubyen son …  Sa se larealite nou pei.  E  mwan mon riye ler – zot nepli dir prezan.  Zot nepli dir, akoz zot konnen, me ler mon ti ganny akize ‘’Gran Blan’’ mon lapo i kler – wi mon dakor mon lapo i kler – me mon a dir zot en keksoz, la lotrozour mon’n fer en test DNA pa pou – pa akoz mon annan en piti deor, or anything like that.

 

(laughter)

 

HON BERNARD GEORGES

mon fer kler.  Annefe mon fer en test ki mon frer ki’n anvoy mwan.  I pa dir ou –  i pa dir ou.   I dir ou kot ou sorti apepre.  E enn mon bann zanset li i sorti – Onorab Ferrari son zanset i sorti Madagascar Mr Speaker,  mwan i annan enn mon zanset ki lo mon test DNA i dir mwan  i annan enn mon zanset ki hunter gatherer – i sorti Congo.

Mon fyer ! Obviously dan lepase, in annan en metisaz.  E sa ki gou avek nou. E sa ti gou avek nou Nasyon, me nou pa kapab aret metisaz parey Trump – parey Prezidan Trump i anvi fer, e i dir, ‘’Nou pei in plen !  ’Nou pei in plen.  Nou pa kapab pran ankor dimoun !’’  Oubyen Brexit.

Non Mr Speaker.   Mwan mon krwar dan larises ki imigran i anmennen dan en pei.  Nou tou nou en Nasyon imigran Onorab Ferrari in fer nou rapel taler, me limigrasyon kontrole e kontini i en keksoz ki byen, e ki nou devret ankouraze olye dekouraze.

La kot mon dakor avek Onorab Ferrari, ek tou sa bann lezot dimoun ki’n koze, se ki nou pa’n annan en limigrasyon kontrole dan lepase.  Dan sa dernyen detrwa z-an nou’n annan en imigrasyon  ki plito pa kontrole, kot nou’n les tro o dimoun antre bonnavini.

Me Mr Speaker malgre tousala, nou bezwen viv avek sa ki nou annan.  Tan ki en etranze pa tir manze dan nou labous, nou napa ni drwa ni rezon, pou nou dir ki sa dimoun pa devret bouze e improve dan son lavi.

E mon le dir avek bann dimoun deor, ki fristr,e ki nou konpran.  Nou osi nou fristre, e i toutafe normal ki ou pou fristre ler ou war en dimoun ki pa parey ou, ki pe ganny en pozisyon.

I toutafe normal – nou imen. Nou imen – nou pa parfe.  Nou’n ne avek pese nou, nou bezwen viv avek pese.  I toutafe normal, me sa ki nou pa devret fer, se reste lo sa pwen.  E la mon vin lo sa mo zenofobi.  Mon regrete ki sa mo in sorti ozordi dan nou Lasanble.  Akoz napa nanryen ki zenofobik ler ou mefye en dimoun ki pa parey ou.

I pa en problenm sa.  I toutafe normal.  Sa ki pa devret fer – sa ki pa devret fer, se fer en distenksyon ant dimoun.  E kontan ki tou dimoun ki’n koze dan sa Lasanble apre midi, in dir fodre pa nou fer en distenksyon ant Seselwa ki’n ne ek Seselwa ki pa’n ne.

Fodre nou regard en dimoun pou son valer ki i anmennen.  Si i en dimoun ki pa’n ne isi, ki pli byen kapab fer mon travay ki mwan, sa travay i devret al pou li e non pa pou mwan.  Zenofobi si i egziste Sesel, i pa’n vin akoz Seselwa i zenofob.  In vin akoz e mon regrete poudir fason ki Gouvernman in anmenn limigrasyon konman en size ki’n fer dimoun vin parey zot in vini.

Ler nou kritik Polisi en Gouvernman, e Polisi sa Gouvernman aktyel, nou pa zenofob.  Nou pe kritik en Polisi ki ti mal, ki ankor mal, e ki’n anmenn fristrasyon dan nou pei, atraver sa move Polisi ki’n ganny aplike.

Alor nou pa pran – annou sa, pou nou fwet Madanm Accouche avek, akoz Madanm Accouche pa responsab pou sa li.  Parey in ganny dir e mon pa pe repete, laport in ouver in antre – i toutafe normal.

Alor Mr Speaker parey mon dir, mon pa konn sa madanm, me, me fas a sa serman, ki nou’n pran – ki mon’n pran dan sa Lasanble, pou mwan uphold Konstitisyon, fas a sa devwar ki mon annan devan mwan ozordi, pou mwan aprouv en nominasyon, ki’n vin devan nou, e fas a en mank rezon, pou mwan dir, ‘’Non sa madanm pa kalifye’’ mon bezwen ozordi apport mon sipor e vot pou li ganny aprouve.  Mersi Mr Speaker.

 

MR SPEAKER

Mersi Onorab Georges.  Bon i reste mon ankor 3 Manm lo lalis plus loter Mosyon pou fer son konklizyon.  Eski nou pran en Break apre nou retournen?  Ok dakor be nou ava Break e apre nou pou retournen 4.15.

 

 

(BREAK)

 

 

MR SPEAKER

Bon nou ava kontinyen nou travay parey mon ti anonse i reste 3 Manm avek loter Mosyon.  E i annan bokou ki’n ganny dir –   Mon krwar keksoz pe al dan en bon direksyon.  Petet mon a demann sa 3 Manm ki reste, pou annou pa al dan repetisyon.  Annou fer nou entervansyon pli kourt pou nou kapab pran en vot lo Mosyon ki devan nou – ok?

Mon ava pas laparol avek Onorab Sebastien Pillay.

 

HON SEBASTIEN PILLAY

Mersi Mr Speaker.  Premyerman mon a swet ou bonn apre midi.  Bonn apre midi tou koleg Onorab dan Lasanble.  En bonn apre midi osi pou tou dimoun ki pe ekout nou Sesel oubyen aryer.  Mr Speaker sa enteraksyon ki nou gannyen depi bomaten si ou kapab dir sa, apre midi kot in de-koul dan sa deba lo sa Mosyon, in relev en bann pwen tre enteresan. Tre enteresan ki parfwa konman en Manm Parlman ler ou regard bann diferan keksoz ki’n ganny ekri lo en Parlman i dir ou koumsa – you ‘’read the mood of the House. ‘’

And when you read the mood of the House ou kapab fer 2 keksoz.  Ou kapab support the mood of the House or ou kapab spoil the mood of the House.  Sa ki mon pou fer apre midi la Mr Speaker, se ki mon pou servi sa ki’n ganny dir pou retourn nou  lo serten baz fondamantal ki reinforce dan sa Lasanble.

E ki mon apresye Mr Speaker ou’n allow sa deba pou al lo sa laliny kot in pas zis stick to the subject at hand ki appointment of, sa madanm ki en propozisyon apwentman konman Anbasader – pou sa mon felisit ou.

Me ki’n ou’n allow lezot size ganny trete, ki ti pertinan ganny trete.  Akoz sa bann size pe ganny souleve e konman en Lasanble, nou pa ti pou fer zistis sa size ki devan nou Lasanble, san ki bann Manm – e la  mon dir mon apresye ki mannyer tou Manm ki’n koze –  in koze ler nou pe tret sa bann size.

I pa vedir sa ki bann Manm in koze, in dir, me mon apresye ton, mon apresye lanfaz ; mon apresye bann pwen referans ki’n ganny fer par lezot Manm, e i pa mon lentansyon pou repet sa.  E kot en keksoz i byen ou bezwen aksepte, i byen.

Mr Speaker mwan mon regard sa ki nou pe fer ozordi, baze lo sa ki entervenan in dir avan, nou’n al dan sa pti Break in koz lo la, e sa se nou rol e nou lobligasyon anba Konstitisyon.  Mon dir sa Mr Speaker, akoz dan mon karyer konman en Parlmanter, mon’n konn the good e mon’n konn the bad of this process, kot ou bezwen met Konstitisyon premye toultan.

E ler nou regard Konstitisyon Mr Speaker, e nou regard Lartik 62 ek Lartik 63 sa 2 Lartik i gid nou dan en fason tre kler, kot Egzekitif i annan drwa kree bann lofis e fer bann lapwentman anba 62.  E anba 63 i dir ou kan sa lapwentman i subject to the approval of the National Assembly, sa approval i bezwen baze lo merit sa lapwentman.

E mon kontan Onorab Georges, akoz mon bezwen donn credit Onorab Georges lo sa ki in dir, an relasyon avek bann apwentman ki met devan Lasanble, e lapros ki nou bezwen pran.  E sa i enportan.  I enportan, akoz nou bezwen regard valer ki sa dimoun ki pe pran sa lapwentman pou anmennen, pou sa  lofis ki i pe pran.

E in ganny prouve apre midi la, ki i pou annan en valer azoute avek sa pos ki Madanm Accouche pou pran si nou Lasanble nou aprouv propozisyon son lapwentman.  E sa i enpotan e sa ki fondamantal. E sa i fer Mr Speaker ki mon prezimen ki moving forward, nou pou pran bann konsiderasyon parey, pou tou bann lapwentman ki vin devan Lasanble Nasyonal.

I neseser Mr Speaker pou nou fer sa, akoz nou bezwen regard lenportans e lanfaz ki nou mete, lo kapasite, abilite latitid ki en dimoun i anmennen anver louvraz ki i anvi fer, ki’n ganny propoze pou li ganny apwente pou li fer.

E dan mon lanaliz pou mwan baze lo son enteraksyon ki’n fer avek nou dan  Lasanble mon krwar ki sa madanm pou kapab deservi sa fonksyon, ki i pe ganny propoze pou fer.  E pou sa mon pou siport propozisyon pou son lapwentman.

Me Mr Speaker ler mon koz lo son size, ki an faver –  atraver sa klervwayans pou allow sa deba al ladan, in osi permet nou pou adres serten lezot eleman ki’n levé, atraver serten reaksyon ki nou’n tande.  Nou’n tann osi bann reaksyon ; nou’n tann reaksyon ki annan dimoun petet kestyonn sa swa.

Me in osi annan dimoun ki’n kontan pour  sa madanm.  Ki’n apresye pou sa madanm.  I annan plizyer public servant ki pou santi poudir, si lo son merit i kapab avanse, then this is a step in the right direction pou tou lezot public servant.  Pe enport si nou dan la diplomasi, oubyen nou dan lezot fonksyon dan Gouvernman.

E ler nou koz lo sa lot eleman ki’n antre dan sa deba, in annan en term ki’n ganny servi, ki mon krwar nou i enportan ki nou konman en Lasanble, nou sey kalifye sa term, pou ki nou pa an akseptan e an tonm dakor avek sa propozisyon lapwentman, nou pa kree en lot deba otour sa lapwentman.

E sa se sa laport ouver ki mon’n tann serten Manm dir sa madanm, in war en laport ouver ; sa dimoun in war en laport ouver.  Mon krwar i pa en laport ki’n ouver, si nou demen nenport ki nou la i annan zanfan nou zanfan i zwenn en dimoun i marye avek, e si nou Konstitisyon i prevwar ki sa dimoun i kapab vin en sitwayen Sesel atraver maryaz, sa i en pratik ki egziste pa zis Sesel me i egziste dan lezot pei.

I osi prevwar ki nou bezwen regard sa size sitwayennte e mon osi mon dakor avek en fason tre ferm, dan en fason tre rigoureux pou fer sir ki nou sitwayennte, i en keksoz ki nou gard li presye, me ki nou pa osi kre bann baryer dan sirkonstans kot i neseser, pou en dimoun ganny son sitwayennte.

E sa i enportan.  E pou mwan sa ki pli relevan pou mon e mon kontan ki Lasanble i nobou separ sa de eleman ozordi apre midi, e nou fer sa tre byen laplipar Manm ki’n koze pou fer sa tre byen, pou separ le de size ; pou regard  sa size ki devan nou Lasanble dan en fason obzektif, e non pa konfonn sa de size e met li ansanm.  E pou sa konman en Lasanble nou montre en o nivo matirite ozordi apre midi, pe enport ki kalite latab nou asize.

Mr Speaker i pou reste toultan en size kontansye ler en Gouvernman i prezant en lapwentman devan Lasanble Nasyonal.  i pou reste toultan en size kontansye, akozou pou reste toultan annan bann diferan fonksyon – ozordi i annan 2dan Lasanble Nasyonal demen nou kapab annan 3 – dan le fitir nou kapab annan plis.

Ki pou fer ki i enpotan ki nou konmans serten standar, oubyen serten pratik, ki nou pran an konsiderasyon sa fonksyon e abilite sa dimoun avan ki nou regard lezot eleman ki tournen otour sa lapwentman.

E mon krwar si nou konmans fer sa ozordi, e ki demen nou ranforsi lo la nou pou kre en lot kalite diskour dan domenn piblik.  Mon rapel tre byen Mr Speaker mon koleg Onorab Gill ti deza fer en lentervansyon tre for lo diskour ki nou konman Manm nou fer, e lenpak ki nou parol i annan lo popilasyon.

E i enportan ki tou Seselwa i sezi sa tre byen.  E Mr Speaker nou bezwen Seselwa sezi lenportans ki, nou ler nou dir sa pei i pou nou  ki nou osi nou bezwen fer tou, pou nou gard sa pei e zouir li e protez li e fer tou sa ki kapab.

Mr Speaker i pa akseptab ki nou konman Seselwa, e ou permet mon Mr Speaker pou zis tous sa kan nou Seselwa nou al lo en lans ,nou kit tou nou salte e nou war en group etranze ki vini pe fer beach cleaning pou nou.  I pa akseptab.

I pa akseptab kan nou Seselwa nou konplent ki etranze pe fer bokou biznes, kan se nou menm Seselwa nou ki partner ek sa bann etranze pou permet zot kapab ganny sa poursantaz aki pou zot kapab fer sa bann biznes.

Nou bezwen premyerman  avan ki nou regard tou sa ki pe pase otour nou, e pe regard lezot keksoz, regard ki bann aksyon ki nou pe fer nou, pou asire ki nou pran e nou sezi loportinite ki devan nou ozordi dan nou pei, pou nou kapab fer nou pei kontinyen avanse kontinyen marse.

E mon santi poudir ozordi Lasanble Nasyonal in lans en mesaz kler en mesaz kler ki nou konman Seselwa nou bezwen kontinyen travay, pou ki nou kapab fer ki sa pei demen ki nou zanfan i erite i enn ki pli meyer e  pli bon, ki sa enn ki nou ti zwenn, e li a fer parey pou son zenerasyon ki fer apre li.  E se sa ki nou bezwen met dan nou zenerasyon fitir.

Mr Speaker mon pa le dwell lo sa size bokou, akoz mon konnen i annan en Mosyon ki pou vin devan Lasanble byento e kot nou pou kapab pran sa deba dan en fason pli larz.   Mwan mon konn mon desandans tre byen. Mon konsider mon lekor koman en Seselwa avan tou ; mon krwar ki nou bezwen fer sir ki loportinite avan tou i devret al pou Seselwa.  Mon krwar ki avan tou ki mon devret asire ki dan nou pei, si ou en dimoun ki vin travay, ou a travay, me nou sitwayennte pa en keksoz, ki ou pou gannyen sitan fasil.  I bann keksoz ki mon krwar ladan.  E ki nou tou nou annan nou krwayans, fer lo serten size a en moman donnen come to en compromise lo lafason ki nou achieve sa ki le fer. Lo lafason ki nou kapab arive ver sa destinasyon ki nou anvi arive.

So prenan kont tou sa ki’n ganny dir Mr Speaker mon krwar ki sa ki nou bezwen fer e mon pran konsern ki’n ganny raise vizavi Departman Zafer Etranzer, i en konsern ki mon pa konn tou keksoz sa Departman, me  mon sey swiv sa bann devlopman ki’n arive, e bann pwen ki’n ganny souleve par mon frer isi lo kote latab vizavi bann package ki’n ganny ofer parmi bann dimoun ki al reprezant nou aletranze.

Petet i annan en serious thinking lo lafason ki nou tret sa  group dimoun, lo bann demann ki nou met lo zot pou bann travay ki zot bezwen fer.  E lo ki arive ler zot in fini dan sa fonksyon ki zot pe fer ?  Akoz la nou trouve ki en Anbasader ki apre son retirement oubyen si i napa en pos i pa ganny en saler.

E anba Konstitisyon nou pe confer en title lo en dimoun ki apre sa, si nou pa poste li kote i stand?  Konmsi lo en pwennvi fairness, nou bezwen regard whether sa i en keksoz ki fair oubyen si i annan en lot keksoz ki nou bezwen fer, pou asire ki ler ou pe confer sa  title Anbasader lo en dimoun, i  pa part of  a reward system,  non, me i en parti konsolidasyon ou diplomasi – ou relasyon enternasyonal.

E mon pou osi apresye e siport konsern, ki nou bezwen kontinyen promot bann zenn ki travay dan sa Departman pou fer ki zot napa akse sa bann pozisyon ; e ki mon krwar ki sa madanm i prezant son lekor devan nou, i osi annan en latas pou li fer ki zwe en rol pou kapab groom ankor bann zenn, ki a kapab vin bann ‘’diplomate de carrière’’ parey nou dir, ki a kapab pran sa bann pozisyon.

So i annan plizyer eleman ki’n sorti dan sa deba ki’n fer nou fer en refleksyon pli profon, lo kote nou pe ale e ki mannyer nou kapab kontinyen angaz sa ki nou annan pou nou fer.  Me i osi annan en lot eleman e mon le termin lo la Mr Speaker ki la diplomasi i pa devret reste zis purview Departman Foreign Affairs.

Bann diskisyon ki egziste lo bann pwennvi bilateral oubyen lo bann pwennvi bann Lakor Enternasyonal i pa devret reste purview zis Foreign Affairs dorénavant, akoz nou’n war poudir i annan en lepanouisman involvement bann Parlman Nasyonal dan sa bann diskisyon.

Par egzanp nou koz lo bann Lakor Lapes ; nou koz lo bann lezot Lakor sa i bann eleman kot nou devret kapab fer antre input bann parlmanter akoz se zot ki eventually i bezwen ratifye aprouv ratifikasyon sa Lagreman ler i pou vin bann dokiman ki ganny enstisyonalize oubyen  i ganny  domesticated.

So sa i bann eleman ki reste pou nou kapab deal avek.  E se sa bann keksoz ki mon ti a kontan impress lo Madanm Accouche, pou donn nou en koudmen, pou kapab fer arive sa ki nou le war, sa involvement diferan brans gouvernans dan nou pei, dan bann aktivite ki konsern bann relasyon oubyen bann keksoz ki relye avek nou relasyon enternasyonal, oubyen nou diplomasi.

An terminan Mr Speaker mon apresye sa loportinite ki sa madanm in gannyen, pou prezant son lekor devan nou.  E nou war ki ler nou donn en dimoun en sans pou li vin devan nou, i kapab montre poudir i kapab demontre son kapasite i kapab demontre son abilite pou li reponn bann kestyon pou li fer fas.

Fodre nou eksepte Mr Speaker nou konman Manm Parlman nou vin la toulezour, nou pa santi nou anba presyon ler pou nou met on nou micro pou nou koze.  Me nou kapab dir ou Mr Speaker, ki annan plizyer dimoun – plizyer zofisye plizyer dimoun ki’n vin la, e mon konnen mon bann koleg osi i pou siport mwan lo tou lede kote latab, ki  i annan plizyer dimoun ki vin la i pa en landrwa fasil pou vini, e i pa en landrwa kot ou pou santi ou dan serten presyon ler ou arive.

I pa ou lentansyon pou met okenn dimoun anba presyon.  I nou lentansyon pou rod lenformasyon pou fer ki sa dimoun i pas dan Litmus test si oule.  E mon krwar sa i en lapros ki nou pran byen e ki ler nou fer li byen i en keksoz ki anmenn bann rezilta tre pozitiv.

Avek sa Mr Speaker mon pou terminen, e mon pou demann lezot koleg, kot sa kote latab, e lo lezot kote latab pou siport sa propozisyon lapwentman Madanm Accouche konman en Anbasader Repiblik Sesel.  Mon remersi ou Mr Speaker.

 

MR SPEAKER

Mersi Onorab Sebastien Pillay.  Mon a donn laparol Onorab Clive Roucou.

 

HON CLIVE ROUCOU

Mersi Mr Speaker.  Bonn apre midi Onorab.  Mr Speaker mon osi bomaten mon’n ekout prezantasyon Madanm Accouche tre atantivman e mon’n ganny sans lir son CV.  Mon’n realize ki en madanm avek bokou leksperyans e abilite e kalite pou li kapab reprezant Sesel.

Me mon’n fer li mon devwar apre mdi pandan lunch time kot mon’n ganny sans koz ek enn de dimoun.  Kot mon’n ganny lopinyon divers lo son apwentman.  E mon’n realize ki’n in annan bokou plis kestyon ki larepons.

Premye kestyon ki’n monte, ki laplipar dimoun ki mon’n koz avek in demande, akoz ki nou bezwen en Lanbasad Cuba?  E akoz ki Sesel i ankor pe asosye li avek Cuba?  Mr Speaker prenan kont ki zot ideolozi politik, e nou listwar politik, nou osi konman pei, me mon pwennvi personnel, mon krwar lapwentman Madanm Accouche Cuba i ava dan en gran benefis pou Sesel, espesyalman lo kote Lasante, kot mwan konman en ners pou en kantite lannen, mon’n travay akote bann dokter Cubain e nou tou nou konnen Sesel, nou napa sa bann lekspertiz, pou met an plas dan nou sistenm lasante, pou ed nou bann dimoun, nou bann pasyan ki pe servi nou servis lasante.

Alors lapwentman Madanm Accouche Cuba i ava konkretiz sa Korperasyon ki annan ant Gouvernman Sesel e Cuba li menm.  Alors mon krwar ki dan en gran benefis, si nou annan sa dimoun laba, ki ava permet sa relasyon kontinyen.

2enm kestyon ki ler mon’n koze mon’n anmase se lapwentman se Madanm Accouche koman en Seselwa – en Seselwa me ki’n ne Madagascar; konman nou parey nou dir konman en Seselwa ki’n natiralize.  E kestyon ki’n ganny demande se akoz li?

Mr Speaker fransman mon napa en larepons pou sa kestyon.  Mon napa en larepons pou sa kestyon akoz li? Me kestyon ki mon demann mon lekor, eski – eski  i annan Seselwa ne Sesel, ki ti kapab pran sa pozisyon.  Se pou sela ki mon ti a kontan, ler Onorab De Commarmond ler i ti a fer son summing-up kekfwa i annan sa tel lenformasyon, i ava kapab pas avek nou.

Mr Speaker ler sa bann kestyon i levé, parey Onorab Arissol in dir, mon pa blanm pep Seselwa ne Sesel.  Mon pa blanmen.  Mon’n toultan dir en keksoz ler mon la dan sa Lasanble.  Si ozordi nou dan en tel sityasyon kot nou war nou frer ek nou ser Seselwa i annan en pe lakoler en pe lanmertim tousala se gras a Gouvernman SPUP/ SPPF ozordi US.

Si ozordi nou koumsa pa akoz sa madanm in ne Madagascar, kot nou war i annan en pe sa lanmertim dan lespri Seselwa, se akoz sa kalite politik, kot nou’n war kot etranze in toultan pas premye; kot Seselwa dan en fason ou en lot in vin 2enm klas dan son prop pei.

Si ti napa sa, ozordi tou dimoun ti pou ok.  E nou’n war kot napa parey nou’n anmase pandan deliberasyon – swadizan ki napa en Seselwa ki napa sa kalifikasyon, oubyen sa lekspertiz.  Tro bokou fwa isi Sesel pandan sa dernyen 40an, kot nou war nou frer ek ser Seselwa in ganny anpese pou progrese.

Kot nou war espesyalman kot Minis Zafer Etranzer konman plas ki Madanm Accouche in toultan en rol politik.  Par egzanp mon bann koleg osi in koz lo Anbasader David Pierre, ki li osi tou in zis ganny apwente, kot son leksperyans ti été?  Nou tou nou konnen in ganny apwente pou son bon travay politik ki i ti fer. Se tou!

Son bon travay politik ki i ti fer ansanm avek US.  Alor Mr Speaker,  mwan mon annan zis en keksoz pou mwan dir sa madanm i en Seselwa par sitwayennte, akoz in marye ek en Seselwa.  I annan en kantite etranze Sesel kot nou bezwen lezot lekspertiz, nou bezwen zot savwar fer, e mon met en laksan for lo kote medikal, kot nou bezwen sa bann dimoun.  E pou mwan ozordi ler mon war sa madanm ek son bann leksperyans, ek son abilite, ek son know-how mon napa okenn problenm avek sa madanm.

Me sel keksoz pou ki mon anvi ki ler Onorab De Commarmond ankor i fer son summing-up i koz en pti pe lo Seselwa ki pa pe bouze from Minister Zafer Etranzer.  Ki zot osi zot kapab pran tel pozisyon.  Me zis en keksoz ki sa Madanm Accouche in koz lo la bomaten, in site se ki in dir ki i bezwen ki i krwar i devret ganny son promosyon, akoz according to PSO tou le 5an, en dimoun i devret ganny promosyon.

Me mon kestyon ki mon demande, konbyen Seselwa ki 5an i pase, ki i pa’n ganny promosyon?  Eski sa i en fason zis pou adousi son leker?  Kwa?  Alors Mr Speaker mon ava esper summing-up Onorab De Commarmond, pou mwan desid lo mon vot.  Mersi.

 

MR SPEAKER

Mersi Onorab Roucou.  Mon ava prezan donn laparol avek Onorab Simon Gill.  Onorab Gill.

 

HON SIMON GILL

Mersi bokou Mr Speaker.  Bonn apre midi tou koleg Onorab, e Manm piblik ki pe ekout nou.  Mr Speaker ozordi i en zour ki wi Onorab Ferrari in donn mwan sa mo istorik.   Istorik par lafason ki bann entervenan – mazorite bann entervenan in koze lo sa size konsiderasyon lapwentman Madanm Accouche konman en Anbasader repiblik Sesel.

Mon annan en mansyon spesyal pou Onorab Ferrari, Onorab Georges, Onorab Arissol e lezot ankor ki’n koze lo nou kote latab isi.  I ekstrememan – mon kapab dir sa bann si mon kapab servi en mo kouler tre fantastik – bann mo ki’n ganny servi dan bann zot bann speech.   It’s beautiful !  E Annou Mr Speaker servi sa bann speech – mon pe sizere ki nou fer en koleksyon spesyal, akoz i montre en depar sibstansyel, lo bann lezot lentervansyon ki’n ganny fer par bann Onorab lo menm size.

E bann lezot konteni size ki’n annan dan zot lentervansyon.  Mon pa pou zanmen bliy sa zour sa dat Mr Speaker.  Mr Speaker lemonn dan bokou koulwar entelektyel, bann ekonomis dan lemonn finansyer i dir ou lemonn in vin en vilaz – en vilaz global.

Lemonn in ganny redwir a en vilaz, kot enteraksyon imen i san limit.  Bann lesanz kiltirel komersyal teknolozi i enfini – son potansyel.  Mr Speaker mon pe koze la, preski dan tou kwen lemonn mon kapab pe ganny ekoute, la konman mon pe koze isi Sesel, dan en pti kwen lemonn avek en popilasyon 95mil zabitan.

Mr Speaker it’s beautiful sa lemonn mannyer in transformen ; mannyer lemonn in sanze.  E Mr Speaker sa menm sanzman ki lemonn in travers ladan, in kree en kondisyon enportan.  Kot nou pe elimin bann baryer kominikasyon, enteraksyon bann diferan sosyete kot zonm/ fanm byensir i reste travay, i enterakte.

E sa i fondamantal sa transformasyon ki lemonn ozordi, kot nou pe koz en 4enm staz revolisyon syantifik e teknik dan lemonn ozordi.  E Mr Speaker mon pa bezwen al tro lwen dan listwar parey nou bann koleg in site, Sesel enn bann eleman enportan ki nou annan se ki, nou pa ti egziste parey bann sosyete lo kontinan Lafrik.

Si nou listwar i anmenn nou pou aprann byen nou dir bann premye popilasyon bann premye dimoun in konmans 1770.  E mon kontan sa stetment ki nou tou nou sorti kekpar dan en kwen lemonn, e nou en melanz bann diferan desandans.

E mon tann en stetment Onorab Georges vreman in sok mon in dir dan son DNA test in dir li poudir i annan desandans Kongole.  Kote ou ti pou kapab mazin sa?  Kote ou ti pou kapab al mazin sa?  Me Mr Speaker mon’n tann lezot in dir Onorab Georges menm in dir Onorab Arissol obor li son desandans i sorti Madagascar.

E sa i fantastik.  E Onorab Ferrari osi in ganny dir i annan son desandans Madagascar.  Onorab Ramkalawan ki pa la ozordi la avek nou, i osi in dir nou poudir i annan desandans ziska Bihar.

E vwala Mr Speaker  mwan mon konpran mon annan desandans – mon tande zot in dir – mon pa konnen si vre mon bezwen pran letid – pran en letid pli serye lo la e rod afon ki mon desandans i été.  Me sa ki mon konnen se ki mon desandans i sorti kekpar. Ee alor Mr Speaker Mr Douglas Accouche ki son Madanm Lalatiana in vin la bomaten, pou prezant li devan nou Douglas in anmoure avek Lala e zot in marye.

E zot in vin isi Sesel byensir e zot annan en zanfan ki’n pas atraver sa sistenm ledikasyon Mr Speaker. In ne Sesel e ozordi i en university graduate e i pe pourswiv en karyer dan la diplomasi in ganny en kalifikasyon konman en avoka.

E sa i ekstrememan enportan.  I byen. Me Mr Speaker Lalatiana – Madanm Accouche i reprezant en model.  E i prezant en model en dimoun ki’n natiralize, ki en Seselwa desandans Malgas i reprezant en model ;- en etranze ki’n donnen dan Sesel e pou 28an in pourswiv en karyer sistematik dan  la diplomasi.

I en akimil en kantite leksperyans.  In pourswiv en kantite bann kour – en kantite formasyon. E mwan  dan mon bann analiz, e bann refleksyon e ki mon’n fer, mon santi ki in ariv en nivo akimilasyon bann kapasite leksperyans, ki kapab desarz sa responsabilite konman en Anbasader – konman en reprezantan Larepiblik Sesel nenport ki landrwa i ganny poste.

Me in ganny sizere e nou pe mazinen ki par lefe ki i Cuba in pran relev, apre ki Anbasader Nourrice in ale,   nou pe prezimen ki i ava ganny poste Cuba.  E sa i anmenn mon lo pwen ki Onorab Ferrari Mr Speaker in koz lo la.

Kot ler in demande in reponn kestyon, akoz Sesel i ankor pe mentenir en relasyon avek Cuba ?  Mr Speaker i en kestyon profon e i en repons tre profon, ki Onorab Ferrari in donnen.  E ankor enn fwa mon felisit li pou sa.

Mon apresye en kantite pa akoz in dir ki i dakor avek sistenm Cuba – in dir sa tre klerman e Mr Speaker si i annan en konsiderasyon ozordi ki nou tou nou bezwen pran, ki lemonn antye i bezwen pran, se pa get sistenm politik okenn pei, pou nou kapab devlop en relasyon swa kiltirel swa komersyal, swa syantifik,  e teknik avek, me gete how do we stand to gain avek sa pei.

E Mr Speaker si nou komemor plis ki 40an relasyon diplomatik avek Cuba, se in annan en bon rezon, akoz nou bezwen mentenir sa lekivalans apwent en Anbasader Cuba parey i annan en reprezantan lo kapasite en Anbasader isi dan Sesel.

Me mon al pli lwen Mr Speaker  – ozordi nou annan nou dan Sesel plis ki 70 Korperan oubyen Cubain  ki isi dan Sesel e pe deservi dan diferan pozisyon, dan diferan sekter sosyete Seselwa.  E enn bann sekter enportan tre enportan se nou sekter lasante kot nou annan nou plis ki 70 Kiben pe donn servis sitwayen Seselwa avek zot profesyonnalizm ki zot annan,  dan sa bann diferan domenn spesyalizasyon medikal, ki zot ladan.

Me Speaker  pou en pei parey Cuba avek tou son bann problenm ekonomik ki i annan avek son bann problenm politik ki i annan, ki pe fer fas avek en blokaz ekonomik depi 1959 enpoze lo li par en pei dan Lanmerik Nor.

Mr Speaker sa servis ki Cuba malgre bann blokaz ekonomik ki in donnen, pe donn bann pei ki a en serten moman ki nou appel bann pei an vwa devlopman bann pei tyermonn  pou en  kategori pli larz, i eksepsyonnel ekstra ordiner.

Si nou pran nou ti pou dir nou ganny sarze pou lekivalans sa plis ki 60 profesyonnel lasante dan nou Minister Lasante, or dan nou servis lasante isi  dan sa pei Mr Speaker, Sesel probableman ti pou napa sa sifizaman kapasite pou pey sa.

Me i en fre oubyen i en gou  tre modes ki nou pe pey sa bann profesyonnel lasante.  E Mr Speaker lo mon lot pwen ki probableman  nou ava fer li ki en lot moman, mon pa pou met li la, me annou tonm dakor dan en fason tre serye, lo nivo nou Lasanble, pou nou prepare, pou nou prezant en rezolisyon lo sa Lasanble or dan sa Lasanble.

Pou nou dir ankor enn fwa non a blokaz ekonomik lo Cuba.  Espesyalman Mr Speaker le 2 Me sa lannen, nou annan nou kot in antre an viger sa ki nou apel Health Button Act kot in ranforsi sanksyon ekonomik lo Cuba pou trangle li plis ekonomikman.

E nou swete ki si Madanm Accouche i ganny aksepte pou pran sa pozisyon konman Anbasader ki i ava zwe sa rol akse aktiv pou ralye tou lafors ki kapab ralye, e dir non a blokaz ekonomik lo Cuba.

Akoz ankor enn fwa kontribisyon ki Cuba in fer atraver Lafrik, e atraver lemonn i eksepsyonnel e i en model ki malgre pe enport son sistenm politik, napa presedan dan listwar Mr Speaker.  Sa ki mon pe dir i en laverite.  Pep Cubain i aksepte zot sistenm Mr Speaker pou zot sa ki matter, se zot pep.

E le 01 Me sa lanmen Mr Speaker, i annan plis ki 6 milyon Cubain ki mars dan en landrwa ki nou appel Plaza De La  Revolucion zot in selebre, komemor lafet le 01 Me.  E nou tou nou konnen ki ti en lafet eksepsyonnel ; en kantite bann reprezantan Mouvman  Travayer dan lemonn ti ralye dan Plaza De La  Revolucion pou mars e demann par dan bann demann se pou fer sir ki anler bann pwisans i konsidere pou tir sa blokaz ki zot in mete lo Cuba e pou les sa pep sa pep swazir zot sistenm ki zot anvi viv anba la.

Mr Speaker ozordi nou aksepte nou tou ki napa en sistenm politik ki pli parfe, e isi dan Sesel nou pa kapab dir ki nou annan en sistenm ki parfe.  Me avek tou nou bann lenperfeksyon ki nou annan, nou pe kapab tonm dakor ki nou bezwen fer keksoz dapre nou kapasite e abilite e kit sa Sesel pli meyer ki nou vin zwenn li.

E se sa ki pe ini nou tou e se sa ki devret nou langaz ki nou devret kontinyen prese dan sa Lasanble. Kit sa Sesel pli meyer ki nou, nou’n vin zwenn li ki nou bann zanset ti vin zwenn li kit li pli meyer pou fitir zenerasyon.  E alor Mr Speaker ler nou dir ‘’Welcome to the Seychelles’’ nou pe dir osi welcome tou bann etranze isi Sesel dan kapasite konman bann touris dan nenport ki kapasite.

Me an menm tan mon tonm dakor ki nou nasyonalite nou bezwen veye nou nasyonalite nou bezwen sofgarde Mr Speaker.  Se sa ki mon tonm dakor lo la e se sa ki mon pou tonm dakor nou tou lo la nou bezwen rasire ki an menm tan ki nou dir ‘’Welcome to the Seychelles’’ an menm tan nou dir ki nou nasyonalite nou sitwayennte nou bezwen sofgard li.

Napa okenn manifestasyon kot nou dir ou pa welcome dan sa pei, akoz nou en pei touristik e nou bezwen touris pou ede e donn soutyen nou zefor dan domenn ekonomik pou nou anmenn plis deviz etranzer dan sa pei.  E se pou sa rezon Mr Speake,r dan mon kestyon bomaten pou nou prospective Anbasader Madanm Accouche mon’n demann li ki mannyer i kapab rasire ki nou elarzi nou Korperasyon ekonomik – nou bann lyen avek sa bann pei, ki si i laba Cuba nou konpran i annan apepre 26 pei ki pou tonm anba dan son portfolio, ki mannyer i kapab ranforsi davantaz sa lyen komersyal finansyel, e envestisman sa bann pei isi dan Sesel.  Mr Speaker i enportan.

Mon dernyen pwen Mr Speaker, mon dernyen pwen, se nou Minister Foreign Affairs.  Mr Speaker si mon pou koz lo Minister Foreign Affairs, en mesaz ki mon annan pou bann leaders ki ozordi i a latet dan Foreign Affairs, nou pou dir zot annou prepar nou Seselwa.

Annou idantifye nou bann Seselwa avek potansyel, pou nou fer sir ki nou annan en lekip solid – en lekip dinamik ki pou ede pou propel further relasyon bilateral, miltilateral Sesel avek lemonn.  Nou bezwen fer sir Mr Speaker ki Sesel pa ganny kit deryer ; ki Sesel i mars azour e i reste azour avek dinamik devlopman ekonomik finansyel syantifik e teknik.

Nou pa kapab annan en sekter enportan dan Minister Zafer Eksteryer ki in al lo extinction.  Nou pa kapab annan sa i pa akseptab.  Nou bezwen pe form nou bann kad probableman get dan Liniversite Sesel Mr Speaker si pa kapab avek bann lezot kour ki annan entrodwir en module, ki ava donn en formasyon dan la diplomasi spesifik, dan en dimansyon aprofondi, dan en lannen konbinen avek en konponan legal, oubyen konbinen avek en lot konponan size, pou nou kapab form en lekip dinamik dan la diplomasi.

E annan en posibilite reel devan nou, pou ki ozordi e demen, nou annan en swivi enportan dan Minister Zafer Eksteryer ki kapab ankor pran davantaz tou sa loportinite ki egziste dan lemonn ozordi.  E ki mon konnen Mr Speaker dan bann lenformasyon ki mon annan, nou mank en kantite loportinite dan zis akoz mankman kapasite anler dan Minister Relasyon Eksteryer.

Me an menm tan Mr Speaker dan mon konklizyon, nou bezwen dir mersi – mersi tou sa bann staff dan Minister Foreign Affairs, ki pe donn tou.  Malgre i en kantite ki redwir me ki pe donn tou pou fer sir ki sa pti gin ki nou kapab kapte, dan bann loportinite dan lemonn, ki nou kapab kapte li e anmenn ankor en fwa en lavantaz pou nou pei Sesel.

Mr Speaker ler mon get Madanm Accouche ki’n prezant isi devan nou avek sa bann kontribisyon ki mon fer e avek son lentervansyon Mr Speaker, mon pou napa okenn problenm e ki mon pe demann tou nou bann koleg isi dan Lasanble lo isi lo sa kote latab e lo lot kote dan LDS pou donn en sipor inanim Lalatiana Accouche dan sa parkour e sa leksperyans ki in akimile pou 28an.

E mon krwar ki nou kapab donn li sa sans, pou li prouv ankor plis ki i kapab fer pou Sesel.  Mr Speaker napa personn ki parfe dan en sosyete ; dan nenport ki sosyete napa personn ki parfe.  Nou tou nou annan nou kote for, e nou tou nou annan nou febles, e le zour ki nou avanse, nou epwiz bann leksperyans, i fer nou vin pli mir, i devlop plis nou kapasite pou nou fer meyer.

E annou donn en sans Lalatiana Accouche pou li vin kontribye dan en fason pli prodiktiv, e efektiv dan la diplomasi Seselwa Mr Speaker.  E lo sa not Mr Speaker mon pou donn en sipor enkondisyonnel propozisyon devan sa Lasanble pou konsiderasyon apwentman konman Anbasadris pou Sesel.  Mersi  bokou Mr Speaker.

 

MR SPEAKER

Mersi Onorab Simon Gill.  Mon ava donn laparol loter Mosyon pou fer son konklizyon Onorab De Commarmond.

 

HON CHARLES DE COMMARMOND

Mersi Mr Speaker.  Ler ki’n arive mon serye mon pa long.  Mr Speaker bokou in ganny dir mon premyerman remersi tou bann entervenan.  tou bann entervenan in fer kontribisyon tre valab kont bann kontribisyon pertinan e bann kontribisyon ki swa direkteman i lye a Mosyon ki devan nou swa si i debord en pti pe me ki mon asire Lotorite Seselwa in anmas li byen e in ekout li byen e in sezi tou bann pwen enportan.

Lo sa not Mr Speaker mon ti konmanse bomaten letan mon ti pe koz lo Madanm Accouche e mon ti dir ki premye fraz i enn sa bann tre pe veteran ki reste kot Quéau Maison de Quincy kot Minister Zafer Etranzer.  Savedir mon pa dir ki i en madanm eksepsyonnel mwan , me selman in la pou en bon pe letan e in akimil en kantite leksperyans e konesans e formasyon dan son parkour, ki fer li si oule ki Prezidan in war nesesite pou swazir li konman en Anbasader pou Sesel, pou nou Repiblik.

E ki sa ki pe pas devan nou la devan nou Lasanble, set en prosedir pou aprouv sa nominasyon.  E dapre nou Konstitisyon, nou Standing Order nou bezwen pas sa prosedir devan nou Lasanble, akoz pou fer sir ki se en dimoun kredib – en dimoun kalifye, konpetan ki nou pe selekte konman en Anbasader Anbasadris  for that matter pou Larepiblik Sesel.

Set en dimoun avek bagaz – bokou bagaz e leksperyans, so vwala bann rezon akoz nou’n swazir li.  E an menm tan Madanm Accouche letan nou ekout li bomaten dan son bann enteraksyon ki nou fer avek li, nou war dan en fason tre lokan e konpetan, ki mannyer in reponn ki mannyer in enterakt avek nou ek nou Lasanble, e ki mannyer e nou napa dout dan sa ka ki i kapab desarz sa responsabilite avek bokou lefikasite.

E nou war par egzanp ki i annan en vizyon.  Ek son lapros par egzanp nou war sa lapros pragmatik e ki i en step. Ler mon get li mwan i pe war bokou pli devan ki nou kapab mazinen.  E pou mwan, mon war set en dimoun parey nou dir an Angle ‘’sharp’’ devan nou.

E mon krwar mon i ler in reponn kestyon Onorab Georges par egzanp ler Onorab Georges i dir ou en dimoun konmsi cool.  In dir ou poudir parey nou dir an Kreol ‘’tou delo trankil i profon’’ savedir ki i cool wi, me selman sa dinamik i la.  Se parey nou Prezidan i ‘’cool’’ kot ou war li, me selman sa pou dinamik i la e i reste ‘’for’’.

E pou mwan Mr Speaker sa ki nou dir war dan Foreign Affairs, mon kontan ki mannyer Onorab Gill in fer son entervansyon, sirtou lo sa bout kot Foreign Affairs i bezwen ganny beef up ankor.  E  mwan mon salye ankor defen Madanm De St Jorre i ti’n set bar tre o.  Mwan mon pou dir mwan, mon santi sa bar in desann e menm enpe tro ba.

Mon pe redemande ki bar i ganny mete pli o, pou ki nou kapab kit sa bann rikord e fer ki Foreign Affairs i al dan sa direksyon ki pep Seselwa i vreman anvi.  Lo sa not Mr Speaker nou note, ki  kot Foreign Affairs i annan plizyer dimoun ki pa’n ne Sesel.  Lot fwa mon ti al dan Lenn mon’n zwenn avek ler mon al fer mon check up mon’n zwenn avek Anbasader Phillipe Legal me mon krwar pa si in ne Sesel li.  Anbasader Phillipe Legal pou Sesel dan Lenn.

E an menm tan mon pe mazin Madanm Michel, i pa en Anbasadris me selman i travay laba i fer kontribisyon tre valab.  Parey Madanm Accouche.  E taler mon’n war li sorti kot Lasanble ki in vin petet fer en prezantasyon avek kek Komite.  E se bann dimoun ki pe grandi dan sa lenstitisyon, dan sa Minister e ki demen fasilman i kapab osi ganny sa bann promosyon ki nou pe koz lo la.

Me an menm tan i enportan fer resorti, kote Madanm Accouche pe al ganny poste ?  Mon pa konnen.  Me mwan etandonnen son leksperyans, e son konnesans, e letan mon get sa kantite langaz ki i master, ki i metrize e mon dir be sa e deza nou konnen ki i pe travay dan lanbasad Cuba laba konman Chargé d’affaires par enterim me in deza konmans en travay.

E mon panse si ti poste li laba, i ti pou al fer en travay pli formidab, e i ti ava fer en kontinite sa travay ki i pe fer.  E lo la nou demann li en keksoz, nou dir Sesel vre nou pe benefisye en kantite avek sa korperasyon Cuba – sirtou dan domenn medikal.  Me mon konnen letan pase osi, nou ti benefisye avek bann Korperan dan sports.  E ki ozordi mon santi nou bezwen e mon ti ava demann li pou li letan i laba – si i ganny poste laba pou li beef up sa Korperasyon dan sa domenn ki nou ganny osi bann trainer  – bann dimoun ki kapab ed nou dan laboks, dan atletik.

Nou konnen i annan bann soter enportan laba Soto Carvajal and so on ki i kapab ed nou dan atletik.   Ou konnen i annan son bann potansyel dan Cuba e ki nou ti kapab benefisye si i fer travay pragmatik parey in dir nou, e ki nou remarke, e alor pou ogmant sa kalite Korperasyon e agrandi sa kalite Korperasyon ki nou annan avek Cuba.

Il faux osi pa bliye bann gran pei dan lemonn Mr Speaker.  Mr Speaker il faux pas oubliye ki dan bann gran pei dan lemonn antye, zot pe anvoy zot dimoun, zot etidyan train Cuba pou dan domenn medikal, e ki nou annan en relasyon osi avek Cuba ki mon war osi sa in desann, ki petet lefe ki nou ava ganny en Lanbasad laba ki nou a ganny nouvo Anbasader i a kapab re os sa lesanz edikasyonnel, kot nou ava ganny plis nou bann dimoun al train Cuba.

Nou konnen ki poudir menm depi Canada menm Ameriken kanmenm embargo lo Cuba ki’n mete, me dan serten domenn, zot anvoy zot dimoun al train pou medikal Cuba,  akoz zot bon.  E nou, nou demande ki nou annan plis korperan –  Korperasyon avek Cuba dan sa bann domenn ki mon pe dir.

Avan mon fini i annan en lot pwen enportan parmi bann pwen ki’n ganny levé i annan zis en kestyon sipor, ki Onorab William in tous lo la, e mon krwar sa in dir par leksperyans ki remarke, ki dan bann Lanbasad ki nou annan, i mank serten sipor.  E se la osi ki nou pe lans en lapel avek Minister Zafer Etranzer, pou revwar sa lapros ki zot annan avek sa lyen, e sa sipor ki zot devret donnen avek bann Lanbasad Sesel aletranze dan bann pei kot sirtou, nou bezwen beef up sa sipor pou nou kapab reap plis benefis.

E annou pa bliye lot zour nou’n antann nou Prezidan, Danny Faure ki’n tous lo en pwen enportan e mon kontan relev sa pwen detanzaot Mr Speaker kot in dir ki nou relasyon enternasyonal, nou relasyon nou bann Anbasader i bezwen anmenn benefis pou pei.

Ou pa kapab zis Anbasader ou laba dan pei apre pa war ou pa konnen ki ou pe fer, me i bezwen annan bann benefis konkret ki pei i bezwen gannyen.  Pou nou konn sa e pou nou santi ki poudir vreman i annan sa bann benefis ki pe ganny transcended – translate to the people of Seychelles i enportan ki i annan plis transparans.

E la nou demann Minister Zafer Etranzer, pou tanzantan vin dir pep Seselwa atraver konmsi, i devret annan plis piblisite medyatik, pou zot vin dir, kwa ki pe ganny fer dan plizyer pei – nou bann Lanbasad ki bann keksoz konkret ki zot pe achieve; ki bann keksoz ki nou pei pe benefisye atraver sa bann Lanbasad.

Akoz sansan nou pa kapab zis fer depans avek bann Lanbasad epi napa nanryen ki vini.  I bezwen sa depans i envestisman osi an menm tan si nou pe depanse ek nou bann Lanbasad.  Nou pe donn plis sipor.  E sa request sa demann pou plis sipor i en envestisman, i bezwen reap sa bann benefis. Sa bann benefis  i bezwen ganny eksplike, ganny montre avek nou pep.

So mon demande mwan, sa i enportan, pou ki – akoz nou sa rol nou pe zwe rol oversight.  Be dan rol oversight nou bezwen konnen ki pe arive – ki pe fer!  Ozordi nou apwent nou bann sipor sa kandidatir ki devan nou, dakor – me nou pa vin zis siport li koumsa.  Nou pe siporte avek bi ki pep Seselwa i benefisye. Me nou bezwen war sa benefis. Nou bezwen ganny eksplike.  Nou bezwen ganny montre ki mannyer sa benefis i vini.

Vwala Mr Speaker avek tou sa ankor enn fwa mon remersi tou Manm ki’n partisipe.  Mon asire bann lezot ki pan koze osi dan zot leker, dan zot fason zot pe santi bann pwen avanse, i bann pwen enportan e ki zot osi zot ava donn sipor ler nou pe pran desizyon pou vote lo sa Mosyon enportan ki devan nou.

Mr Speaker avek sa mon a demande alor,  ki nou Lasanble dan en fason inanim, i siport sa Mosyon ki devan nou – lapwentman Madanm Accouche konman anbasader Larepiblik Sesel.  Avek sa Mr Speaker mon a remersi ou.  Mersi.

 

MR SPEAKER

Mersi Onorab De Commarmond.  Bon moman in arive pou Lasanble pran en desizyon lo Mosyon parey in ganny slightly amended.  Mosyon i lir koumsa: That this Assembly approves the proposed appointment by the President of Mrs Lalatiana Harisoa Accouche as an Ambassador of the Republic of Seychelles in accordance with Article 64 (1) of the Constitution. 

Mon ava demann tou Manm ki an faver?  Okenn Manm ki kont?  Madanm Clerk.

 

MADAM CLERK

Mersi Mr Speaker.  Mon rikord 19 Manm ki’n vot an faver.  E 4 Manm ki’n vot kont.  Mersi Mr Speaker.

 

MR SPEAKER

Mersi Madanm Clerk.  Bon Lalwa anba Konstitisyon i dir 64 (1) mazorite Manm Lasanble.  Nou ganny 19 Manm ki an faver.   Savedir mazorite Manm Lasanble in aprouv sa Mosyon pou Madanm Accouche ganny apwente konman Anbasader.

Bon avan nou adjourn mon anvi zis fer enn 2 pti pwen.  Mon kontan bann entervansyon ki’n ganny fer depi an premye depi nou’n konmans travay.  E mon krwar ankor enn fwa parey mon’n deza dir sa Lasanble i la osi tou pou edik nou pep.  I annan bokou keksoz ki nou pep pa konnen.  Nou’n war kot bann Manm in tous en pti pe Konstitisyon tousala e se sa rezon ki nou’n demande e menm atraver Mosyon ki 6enm Lasanble ti aprouve, nou pa ankor war nanryen dan sa laliny pou sey teach nou pep en pti pe bann gran laliny – bann gran prensip nou Konstitisyon.

E mon kontan bann Manm i profit bann lokazyon parey, pou kapab edik en pti pe nou pep.  E mon apresye osi tou bann konteni bann speech e mon krwar Onorab Georges lo kote Standing Orders Committee nou kapab regarde parey Onorab Gill in dir, konman nou pou kapab anmas tou sa bann speeches e met zot par la  kot bann Manm fitir Lasanble osi tou i kapab fer referans avek.

Mon fer referans osi tou lo sa sityasyon kot Madanm Accouche in e nou pran legzanp Madanm Accouche ki devan nou bomaten in vin Seselwa atraver natiralizasyon, me atraver maryaz ki nou Konstitisyon i permet.

E in en maryaz ki solid i pa en maryaz ki fake e en fanmir in ganny fonde ladan.  E ler mon regard son dat nesans, avek lakantite letan ki in travay  pou Sesel, i menm plis letan ki in fer pou son pei.  E mon krwar sa ankor i montre en pti pe sa fondman kot bann Manm in koz lo la dan en fason pozitiv.

Me an menm tan nou konnen, i annan napa bokou me i annan detrwa etranze ki’n marye ek Seselwa i ankor pe ganny e zot in fer bokou letan maryaz zot in fond fanmir i ankor pe ganny en pe problenm pou zot vin Seselwa malgre plizyer attempt ki zot in fer aplikasyon.

E mon ti a swete osi tou ki Lotorite Gouvernman i kapab osi regard ladan si napa okenn problenm mazer.  Me mon kontan osi tou akoz mon osi mon ganny plizyer mesaz dan laliny en pti pe parey sa term ki mon osi mon tro kontan servi zenofobik ki plizyer bann Manm osi tou in adres sa.

E mon pa krwar nou devret les sa kontinyen ganny propaze dan nou sosyete.  I annan bokou keksoz ki nou bezwen pran kont e tanzantan mon retourn lo en quote ki Mr Robert Mugabe ti fer e nou bezwen realize malgre tou move keksoz ki nou kapab dir lo li ler ou regard son bann quote ti annan bokou ki fer sans.

Bokou nou Seselwa menm ki’n al etidye dan bann pei aletranze,  sirtou Lerop lafason ki Eropeen i regard nou bann Seselwa ki finalman apre in ale in antre pou rod en plas reste bokou fwa Eropeen i apel zot bann imigran, bann refizye.  Me ler Eropeen i vin dan ou pei zot appel zot lekor expatriates – ok ?

E se sa ki mon mazin parol Mr Robert Mugabe nou ki sorti lo kontinan Lafrik ler nou al Lerop nou ganny term imigran refizye, me ler li Eropeen i vin kot ou i apel son lekor expatriates – ok?   So sa i bann keksoz ki nou bezwen pas ek nou pep pou nou montre poudir an menm tan ki nou pe resevwar etranze dan nou pei i pa neseserman ki nou ganny resevwar pareyman dan zot pei.

Me parey Onorab Simon Gill in dir nou toultan welcome tou dimoun isi Sesel ou vin travay ou vin vizit me ankor sa ki reste avek pre ek nou leker se nou sitwayennte.  E sa mon krwar tou dimoun i veye e tou dimoun i garde.  So vwala de pti mesaz ki mon ti anvi pase mon pan anvi fer li avan nou pran en vot mon pa’n anvi lenfliyans okenn Manm me zis mon anvi fer enn de pti komanter.

Bon mon avek sa mon zis pou remind bann Manm ki demen nou confirm Bills Committee pou meet avek bann zofisye Departman Tourizm 9.30 dan Committee Room 3 pou nou kapab kontinyen en pti pe sa dyalog avan nou repran kontinyasyon deba.

Mon napa okenn lanons pou fer.  Mon ti a zis kontan remersi tou Manm remersi tou ban dimoun ki a ekout e ankor enn fwa remersi SBC osi tou.  Avek sa Lasanble i adjourn e nou repran nou travay Mardi prosen 9er bomaten.

 

 

(ADJOURNMENT)