::
Home » Verbatim » 2019 » Verbatim Tuesday 21st May, 2019

Verbatim Tuesday 21st May, 2019

NATIONAL ASSEMBLY OF SEYCHELLES

Tuesday 21st May, 2019

 The Assembly met at 10am

 National Anthem

 Moment of Reflection

 Mr Speaker in the Chair

 

MR SPEAKER

Bonzour tou Manm Onorab.  Bonzour tou dimoun ki a lekout e en bonzour spesyal pou bann zabitan distrik Mont Buxton ki avek nou bomaten e ansanm pou swiv travay Lasanble Nasyonal.  Bon mon ti a kontan konmanse par donn en pti leksplikasyon Manm Lasanble e piblik an zeneral rezon ki Lasanble in konmans travay an retar ozordi.

Swivan Ruling ki Ziz Lakour Siprenm ti donnen le 10 Me lo case ki Prezidan Faure in anmennen kont Speaker Lasanble, swivan desizyon ki Lasanble Nasyonal ti pran lo le 4 Avril pou anil S.I 18, 2019.  Sa Ruling in koz lo 3 pwen.

Sa Ruling premye pwen in koz lo separasyon e balans pouvwar ki dapre Ziz Lakour Siprenm, i en doktrin konstitisyonnel.  2enm pwen in kestyonn si vreman en sel Ziz Lakour Siprenm, i kapab determinen si desizyon Lasanble ti an konformite ek Lalwa dapre Lalwa Lasanble Nasyonal.

E 3enm  Ziz in osi dir ki i ganny pouse par Lartik 130(6) Konstitisyon pou anvoy sa case devan Lakour Konstitisyonnel, kot i pou ganny determinen.  Sa ti Ruling Lakour Siprenm dan premye case ki Prezidan in anmennen kont Speaker Lasanble Nasyonal.  E sa Ruling ti fer Vandredi le 10 Me.

Me apre sa keksoz in pran en lot dimansyon.  Pandan mon labsans dan pei, en lot somonn in ganny servi lo mwan.  E bomaten mon’n al devan Lakour Konstitisyonnel pou reponn sa.  Sa i case Constitutional Court No.8 of 2019, kot Prezidan in mete kont Speaker, me sa enn fwa si devan Lakour Konstitisyonnel.

A sa moman mon pa pou fer gran deklarasyon, me mon ti a zis kontan partaz en refleksyon bomaten.  Ler mon’n analiz e get  bann dat bann levennman  dan sa zafer, e la osi dat ki sa nouvo case ti ganny file, e dat ki somonn in sorti e ganny servi lo mwan, i fer mwan poz bokou kestyon e dout lo rezon par deryer tou sa.  Me parey nou kontan dir mon pou poz sa la.

An konklizyon sityasyon ki devan nou, se ki i annan en determinasyon ki Lakour Konstitisyonnel i bezwen fer lo Ruling Ziz Lakour Siprenm e i osi annan en nouvo case devan Lakour Konstitisyonnel ki abord menm size ki annan pou fer ek desizyon ki Lasanble ti pran le 4 Avril.  Me dan sa 2enm ka Lasanble pe osi ganny akize pou vyol 2 Lartik Konstitisyon.

Tou le de ka in ganny anvoye pou ganny ekoute an Zen; savedir mwan prosen.  Mon kominike i osi kouver nou pozisyon, pozisyon Lasanble lo Public Service Salary (Amendment) Bill 2019 ki ankor devan Lasanble.  E parey nou ti agree, The Chair pou donn en kont randi oubyen en pozisyon lo sa size ki ankor devan Lasanble Nasyonal.

Alor vwala rezon pou sa retar bomaten e byensir lo mon prop non e lo lapar Lasanble Nasyonal mon prezant en leskiz.

Bon nou pou pran nou travay lo Order Paper me zis mon pou gid Lasanble e manm piblik osi tou deor ki pe ekout nou, ki nou pou ale la bomaten avek kestyon ziska midi.  Midi nou pou break e apre nou pou repran pou nou fini kestyon 2er e apre sa ozordi nou pou attempt pou nou pran Statement par 2enm Minis,  e kestyon enteraksyon ki ava swiv apre ki Minis in fer son Statement.  La mon ava donn la parol Madam Clerk pou pas lo Papers Laid.  Madanm Clerk.

 

MADAM CLERK

Mersi bokou Mr Speaker.  Bonzour Mr Speaker.  Bonzour tou Manm, tou dimoun a lekout e nou bann envite dan galeri.  Mr Speaker konman prezantasyon Papye sa semenn nou annan;

S.I. 28 of 2019.  E sa i Income and Non-Monetary Benefits Tax (Amendment of First Schedule) Regulations, 2019.  Mersi Mr Speaker.

 

MR SPEAKER

Mersi Madanm Clerk.  Zis pou lenformasyon piblik, sa S.I ki devan nou la i anil sa S.I ki ti ganny pibliye e ki ti ganny pase e ti ganny en pe deba lo la semenn pase dan Lasanble ki i annan pou fer provizyon avek exempt bann Ziz Lakour lo tax.  So savedir sa S.I semenn pase in ganny repealed.  Yes Onorab Ferrari.

 

HON JEAN-FRANCOIS FERRARI

Mersi Mr Speaker.  Pou fasilit travay ozordi, avek ou permisyon Mr Speaker mon ti a kontan fer en propozisyon lo en item ki lo Order Paper pou lazournen e sa i notaman premye Mosyon ki konsern lapwentman pou en nouvo Anbasader ki pwen 8 lo nou Revised Order Paper.  Mr Speaker bann Manm lo mon kote latab in pran konesans sa Mosyon yer lo Order Paper, e dan mon ka konman Chairman IAC – ti fer premye fwa ki mon ti’n ganny met okouran ki sa demann pe ganny fer par Prezidan, pou apwent en nouvo Anbasader.

Alors lo sa kote latab Mr Speaker, nou santi ki nou bezwen annan en konversasyon en pe detaye lo sa size.  E i annan plizyer kestyon ki nou pe poze notaman, lo kantite Anbasader ki nou pei pe apwente e akoz.  Bokou sa bann kestyon i kapab ganny demande byensir dan Sesyon Plenyer par tou Manm.  Me nou dan IAC nou santi ki i neseser ki sa lesanz lenformasyon i ganny fer an premye avek Komite Zafer Etranzer.

Mon pe demann ou alors Mr Speaker avek permisyon Lasanble ki IAC i ganny sa loportinite pou rankontre avek bann zofisye Departman Zafer Etranzer, avan deba lo sa size i ganny fer dan Lasanble.  E avek sa lide pou nou pa met retar dan Lasanble mon ti ava rekomande ki  ou Mr Speaker ou demann avek Madanm Clerk pou envit en delegasyon o nivo sorti kot Departman Zafer Etranzer pou rankontre avek bann Manm IAC ozordi.  Mon pe propoze ki nou fer li ozordi 1 er apre midi.  E la nou ti ava kapab eklersi enn de sa bann size e enn de sa bann kestyon ki nou pe propoze.  E nou santi ki demen nou pou dan en pli bon pozisyon pou nou debat dan Plenyer e pran en vot lo sa Mosyon ki lo Order Paper.  Alors mon ti a kontan ou konsider sa e si napa obzeksyon pou bann Manm Lasanble mon krwar ti ava en bon fason pou nou avanse lo  sa size. Mersi.

 

MR SPEAKER

Mersi Onorab Ferrari.  Bon mon krwar i en demann ki fer sans.  E en moman Onorab Sophola ou ti annan keksoz ou le dir lo la?  Ok.  Avan mon pran en desizyon mon a pas laparol Onorab Noline Sophola.

 

HON NOLINE SOPHOLA

Mersi Mr Speaker.  Bonzour Mr Speaker.  Bonzour tou dimoun.  Mr Speaker i byen demann ki Chair IAC pe fer.  Selman mon krwar i ti kapab fer li dan en lot fason.  Akoz la i pe dir IAC!  Me etan donnen sa ti’n ariv devan li, nou osi nou Manm i ti’n kapab anvoy en pti not pou dir nou i pe al pran tel desizyon, tel desizyon.  Nou pa vin tann la dan Lasanble!  Mersi Mr Speaker.

 

MR SPEAKER

Ok.  Dakor pou ou pwen ki ou’n fer Onorab Sophola.  Bon mon panse wi petet wi,  wi i en propozisyon, ou pa’n ganny sans kominik avek ou Manm me selman ankor lo kote sekretarya nou’n resevwar let Vandredi.   E sete selman yer ki nou’n ganny Mosyon pou – se sa ki nou’n fer Revised Order Paper yer pou nou met lo la.    Bon mon krwar demann i rezonnab.  Nou ava organize.  Madanm Clerk ou ava fer kominikasyon toudswit avek Departman Zafer Etranzer ki ava annan sa enteraksyon avek Komite IAC isi kot Lasanble.  nou ava sed Committee Room 3 1er apre midi.  E sa i ava bon ki nou pran sa Mosyon demen.  Ok? Mon’n fini – lo sa size – non mon’n fini pran en desizyon.  Mon’n donn laparol -.   Ale Onorab Simon Gill.

 

HON SIMON GILL

Mersi Mr Speaker e bonzour Mr Speaker.  Bonzour tou koleg Onorab, Manm piblik, bann zabitan Mont Buxton, bonzour.  Mr Speaker sa ki mon pe demande napa naryen kont ou Ruling ki ou’n donnen.  Me mon pe soumet parey serten lezot Komite i fer ki IAC i open up pou tou bann lezot Manm Lasanble ki kapab fer letan e vwar letan.  Ki kapab asiste sa meeting, sa lesanz ki pou annan IAC avek bann zofisye sorti dan Minister Foreign Affairs.  Mersi bokou Mr Speaker pou konsider sa pozisyon.

 

MR SPEAKER

Mersi Onorab Simon Gill.  Onorab Ferrari.

 

HON JEAN-FRANCOIS FERRARI

Mr Speaker tou bann parti in nonm bann Manm lo bann komite.  Ou bezwen fer konfyans ou bann Manm.  Ou pa kapab met Manm lo  komite apre ou pa fer zot konfyans. Ou le vini ou menm ou pou ou vin fer deba dan tou komite.  Parti US, eskiz mwan mon pe reponn sa kestyon.  Parti US i annan 3 Manm lo sa Komite.  Ok?  Nou pa anvi fer en meeting Lasanble Nasyonal antye.   I annan 3 Manm lo sa komite e mon mazinen poudir zot kapab fer konfyans zot bann Manm.  Oubyen eski zot pa kapab fer konfyans zot bann Manm,  pou eksprim pozisyon ki parti US pe pran.  E an realite Mr Speaker sa sesyon i zis en Sesyon lenformasyon.   Se tou.  I pa en Sesyon ki pou pran okenn desizyon.  I en Sesyon zis pou nou esanz lenformasyon.  Mersi.

 

MR SPEAKER

Mersi Onorab Ferrari.  Bon nou pa pou ouver deba.  Vitman Onorab Simon Gill.

 

HON SIMON GILL

Mersi Mr Speaker.  Mr Speaker mon krwar i demann en pozisyon lo deklarasyon Onorab Ferrari.  I pe fer nou konpran poudir zot osi zot napa konfyans dan serten bann Komite kot i annan zot reprezantan.  Kot nou open li up.  Par egzanp Bills Committee e lezot Komite – FPAC i envit i open up e i demann bann lezot Manm Lasanble ki kapab fer letan e vwar letan pou vin attend! Mon pa konnen ki sa kalite mesaz ki Onorab Ferrari pe pase bomaten!  Mersi bokou Mr Speaker.

 

MR SPEAKER

Bon ok mon ava pran en desizyon ok?  Mon pa vwar nanryen mal avek son demann.  Komite IAC ava meet avek bann zofisye Departman Foreign Affairs e okenn Manm Lasanble osi tou ki oule attend the meeting i kapab fer li – ok?  Annou fer li koumsa.  Alright.

 

(APPLAUSE)

 

HON JEAN-FRANCOIS FERRARI

Selman Mr Speaker mon’n fer byen kler.

 

MR SPEAKER

Non, non.  Ok bon.

 

(Interruption)

 

Vitman Onorab Simon Gill.

 

HON SIMON GILL

Mersi Mr Speaker.  Mr Speaker mon krwar i demann en pozisyon lo deklarasyon Onorab Ferrari.  I pe fer nou konpran poudir zot osi zot napa konfyans dan serten bann Komite kot i annan zot reprezantan.  Kot nou open li up.  Par egzanp Bills Committee e lezot Komite – FPAC i envit i open up e i demann bann lezot Manm Lasanble ki kapab fer letan e vwar letan pou vin attend! Mon pa konnen ki sa kalite mesaz ki Onorab Ferrari pe pase bomaten!  Mersi bokou Mr Speaker.

 

MR SPEAKER

Bon ok mon ava pran en desizyon ok?  Mon pa vwar nanryen mal avek son demann.  Komite IAC ava meet avek bann zofisye Departman Foreign Affairs e okenn Manm Lasanble osi tou ki oule attend the meeting i kapab fer li – ok?  Annou fer li koumsa.  Alright.

 

(APPLAUSE)

 

HON JEAN-FRANCOIS FERRARI

Selman Mr Speaker mon’n fer byen kler.

 

MR SPEAKER

Order!  Order!  Order!  Onorab

 

 

HON JEAN-FRANCOIS FERRARI

Zis pou dir ki parey dan tou lezot Komite, sa bann dimoun ki pe vin koz dan plas zot kanmarad, zot pa pe ganny drwa koze!   I Manm IAC ki enterakte dan sa bann Komite.  Mersi.

 

MR SPEAKER

Ale mersi.  Bon avek sa nou’n fini klarifye sa?  Mon pe zis osi fer – mon pe remind bann Manm ki ABC osi tou pou meet me – Madanm Clerk nou’n desid lo ler ?  ABC ?  1.15.  Wi ok.  Bon dapre mon konpran COGA osi pe zwenn ozordi ?  Komite COGA ?  Midi en kar Committee Room 3.  E zot a’n fini par 1er pou IAC pran.  Wi bon ABC pou rankontre1.15.  Speaker’s Conference Room.  Ok.  So nou’n fini sa bann pti bout ‘housekeeping.’

Mon ava demann Parliamentary Reporter pou fer antre – pou apel Minis pou nou konmans kestyon.  Mon anvi osi tou averti bann Manm ki i annan serten kestyon ki mon ki straight forward. Mon pou restrikte en pe siplemanter akoz nou annan 10 kestyon pou Minis e nou bi se attend pou pran Statement par 2enm Minis osi tou ozordi e pou fer sa enteraksyon avan nou terminen 5er.  Mersi.

Mon ti a kontan dir en bonzour Minis Pamela Charlette, Minis responsab pour Labita, Lenfrastriktir avek Transpor lo Later.  Minis i akonpannyen par son Sekreter Prensipal pou Lenfrastriktir Mr Yves Choppy, son Principal Secretary pou Later Mrs Fanette Albert, son Sekreter Prensipal pour Lakaz Mr Denis Barber, Special Advisor Mr Gerard Hoareau, Sekreter Prensipal pou Departman Transpor lo later Mr Patrick Andre e son Depite CEO pou Lazans Transpor lo Later Mr Nicholas Hoareau.   Minister avek ou delegasyon bonzour e welcome dan Lasanble Nasyonal. Bon nou ava konmans toudswit avek kestyon e mon ava donn laparol Onorab Jude Valmont.

 

HON JUDE VALMONT

Bonzour Mr Speaker.  Mersi pou laparol.  Bonzour tou koleg Onorab.  Bonzour Minis ek ou delegasyon, tou bann dimoun ki dan Galeri e tou bann dimoun ki pe swiv nou.  Mr Speaker mon kestyon i lir koumsa: – Eski Minis responsab pour Transpor lo Later, i kapab dir avek nou Lasanble, si i dan plan son Minister pou konstrir en trotwar depi kot Airport Cargo Terminal ziska Anse Francois, Pointe Larue?  Mersi.

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker.  Bonzour tou dimoun.  Bonzour tou bann Onorab e bann dimoun ki a lekout ozordi.   Mr Speaker wi i dan nou progranm pou konstri en trotwar ki pou pran kot nouvo ron pwen Airport ziska Anse Francois e osi lo kote bor lanmer apre larantre Anse Francois ziska kot Lakademi Lapolis.

An vi lespas limite ek son lanpler sa proze pou ganny fer an faz.  Premye faz pou pran kot nouvo ron pwen Airport ziska UCPS.  Vi ki nou pou bezwen fer en proze konpreansiv pou sa landrwa, sa proze pou enkli elarzisman bann drenaz egziste e konstriksyon nouvo drenaz.  Konstriksyon en nouvo trotwar lo tou le de kote semen a en larzer 1.5met.  E elarzisman semen ki nou a ganny en lane adisyonnel  e rekonstriksyon nouvo bus shelters.

SLTA pe travay ansanm avek Lotorite Departman Lavyasyon Sivil, Departman Transpor lo Later,  Climate Adaptation  Management (CAMS) kot Minister Lanvironnman e konsey rezyonal pou ki sa proze i kapab ganny materyalize an totalite prenon kont karakteristik sa landrwa.  A sa staz Lotorite Lavyasyon Civil in deza garanti en serten sonm finansman pou sa proze.  Departman Transpor i ankor an diskisyon avek bann propriyeter ki pou ganny afekte avek sa proze.  I osi annan serten travay ki pe ganny antreprann par SCAA ki nou pou bezwen espere pou  ki nou kapab demare avek sa proze.  Mr Speaker vwala mon larepons pou Onorab.

 

MR SPEAKER

Mersi Minis.  Onorab Valmont.

 

HON JUDE VALMONT

Mersi Mr Speaker.  Mersi Minis pou repons.  Minis ou’n dir zot pe fer plan pou fer li en proze konpreansiv pou li konmanse.  Mwan mon ti a voudre konnen akoz sa aparaman in deza ganny tender 3rd lane i bezwen form par third lane, i ganny tender depi 2018.  Alor mon ti a voudre konnen kan ki zot kapab konmans sa proze?  E si zot pa konmanse eski mon ti a voudre dimoun Pointe Larue i tann sa byen, eski i annan okenn posibilite pou konstri sa pavement davans, pou enkli son bann drenaz? Akoz parey ou kapab konnen weekend nou’n pas dan en sityasyon ki imobiliz bann dimoun Pointe Larue e lezot dimoun ki pe pas dan sa landrwa.  E menm mon pe dir sa dan lespri bann zanfan, bann dimoun ki servi sa area i en landrwa ase danzere.  Alor mon pe demande si i annan okenn posibilite, pou konmans sa trotwar ki enkli son drenaz ki pou ed nou solve 2 problenm ki ase kritik pou nou distrik?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Onorab i annan bokou fakter ki pou kekfwa anpes nou konmans sa trotwar pou le moman.   Par egzanp SCAA i annan louvraz ki i ankor pe ganny fer lo son kote, kot Airport e bann proze osi ki i annan dan son plan pou li fer.  E osi lo kote wayleave sa Land Transport ansanm ek SLTA, avek Lotorite Distrik pe travay ansanm pou fer sir nou ganny sa bann wayleave ki neseser pou kapab konmans sa proze.   Negosyasyon ziska konmela pa’n tro fasil me mon krwar avek sipor Konsey Distrik Rezyonal ki i osi involve ladan nou a kapab tre byento bann bout sa proze.  E an menm tan Onorab i bon pou note ki nou osi pe travay lo sa mon konnen i en koleksyon semen ki ou kontan demann lo la.  Nou osi pe konmans travay lo la.  Nou pe fer topo survey detaye pou nou kapab ganny en aliman ki kapab relieve en pe trafik osi parey ou’n dir dan lepase.  So sa i  – sa survey li menm li i dan son faz tender pou nou kapab ganny en bon detay ki mannyer topografi i ete pou fer sa aliman semen.  Mersi.

 

MR SPEAKER

Mersi Minis.  Onorab Valmont.

 

HON JUDE VALMONT

Mersi Mr Speaker.  Minis in  lir mon lespri in pran mon kestyon ki mon ti pe al demande in reponn davans.  Me selman mon a zis fer en pti statement.  Zis en pti remark avan mon terminen.  Mwan mon ti a zis voudre Minis i donn nou en garanti ki omwen, omwen dimoun Pointe Larue i vwar en konmansman enn ant sa de proze by petet finisyon sa lannen.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mr Speaker pou reponn Onorab bann teknisyen i dir i ava garanti, zot a garanti ki at least keksoz ava konmanse.  Mersi.

 

MR SPEAKER

Mersi Minis.  Onorab Stephen Pillay.  Onorab Stephen Pillay.

 

HON STEPHEN PILLAY

Mersi Mr Speaker.  Bonzour a tous.  Mr Speaker menm laliny mon ti le demann Minis konsernan sa trotwar ki zot pou fer la, ki’n konmans vwar reponn kestyon.  Vi ki  Minis i konnen problenm wayleave i enn bann fakter mazer, pou met retar bann proze, eski Minis pe konsidere ki en serten bout later depi kot i pe dir pou fer trotwar a ganny acquire, menm si sa propriyeter pa oule donnen akoz zis en dimoun i ase pou fer proze kennsel pa marse?

E ki lenpak sa trotwar parey Minis pe dir pou trafik, ki lenpak pou annan sa trotwar de ki zot konmanse pou deza sa trafik Pointe Larue ki bloke, kote zot pou – si pou annan okenn lenpak negativ tou sa lannen nou pe sey rezourd sa problenm trafik Pointe Larue Anse Aux Pins?  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mon a pran ou 2 kestyon.  Lo kote acquisition, sa en keksoz ki nou konsidere wi me selman parey mon’n deza dir dan Lasanble oparavan, ler en dimoun i anmenn ou Ankour pou en acquisition ou bezwen fer sir ou’n pas tou bann prosedir neseser.  E ou’n exhaust tou bann, bann  alternativ e ou bezwen annan en bon negosyasyon avek sa dimoun avan ler ki ou al dan sa laliny.  Akoz parey mon’n dir oparavan menm acquisition in deza ganny bann ka kot ler in  ariv Ankour apre nou’n bezwen rann later bann dimoun.  So i en keksoz ki wi nou konsidere me selman sa i en last resort.

Dezyenmman si pou fer sa semen nou pou bezwen pou rezon trafik i pou bezwen annan son 3enm lane avek.  Se sa ki nou pa kapab zis konmanse avek sa trotwar.  E vwala akoz nou pe revwar li konman en proze konpreansiv ki ava relev bokou bann presyon pa zis lo kote trafik, pa zis lo kote pyeton, lo kote drenaz osi.  E osi lo kote trafik pou elarzi sa semen.  Mersi.

 

MR SPEAKER

Mersi Minis.  Onorab Pillay.

 

HON STEPHEN PILLAY

Mersi Minis.  Zis en pti kestyon pou demann Minis.  Eski zot annan en Polisi ki kekfwa lo tou semen piblik zot annan apepre 1met, ki zot restrikte okenn konstriksyon lo la ki prezan parey pe dir Minis ou pa bezwen al Ankour whatever, sa propriyeter i annan en met ki something like that ou kapab fer ou miray but i reste la pou piblik pou Minister kapab servi dan son devlopman.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Access reserve.  Nou apel sa access reserve nou.  Sa i kot sa bout later obor semen kot nou bezwen parler pou fer elarzisman. Oubyen par egzanp PUC si i annan en konstriksyon pou en lenfrastriktir i kapab mete.  Dan nou nouvo Polisi wi nou’n mete byen an ekrir ki nou pa pe vann okenn access reserve.  E oparavan wi me oubyen depandan ki inisyalman si sa later ti prive oubyen pou Gouvernman par ler i pa posib akoz kekfwa later in toultan prive e Gouvernman in fer semen.  Me otan posib wi nou kite en access reserve obor semen pou ki dan le fitir i annan sa bann devlopman ki kapab arive.  Mersi.

 

MR SPEAKER

Mersi Minis.  Onorab Wilbert Herminie.

 

HON WILBERT HERMINIE

Mersi Mr Speaker.  Bonzour Minis avek ou delegasyon.  Minis dan ou larepons mon’n vwar ou dir koumsa pou fer  – dan sa proze pou enkli nouvo drenaz.  Sa i byen.  Me solman pozisyon sa bout semen la kot Pointe Larue vi ki i ganny bloke avek Erport mon pa’n vwar si zot in fer okenn propozisyon pou bann lezot pwen desarz alternativ akoz wi i byen i annan nouvo drenaz me eski pou annan plis landrwa pou kapab discharge port parey nou dir kot delo pou kapab ganny tire lo kote semen pou zet dan lanmer ? Sa i enn.

Epi lo lot kote vi ki sa semen ler lapli i tonm en ta bokou  i vin inonde fasilman, eski zot pe fer lezot opsyon pou anmas sa bann delo ki dan sa rezyon pou li reduce en pe sa kantite linondasyon, tel ki bann fasilite re harvesting?  Mon pa’n tann ou tous en pe dan sa direksyon.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Lo kote drenaz sa se CAMS anba Lanvironnman ki pe fer sa letid o profon.   Parey mon’n dir i pou en letid konpreansiv – pa en letid, me en travay konpreansiv ki nou pou fer. E Lanvironnman i annan bann travay ki i deza i ki in fini konmans met lo papye pou nou konsidere.  E sa i enkli –  i pou bezwen konsider osi bann discharge points, me osi elarzisman sa drainage li menm pou li kapab pran en pti pe plis volim delo.

Lo kote rain harvesting nou pa’n pran konsiderasyon akoz sa i en proze semen me probableman mon pa krwar ki SCAA kekfwa lo son kote akoz i bord avek Erport.  Kekfwa SCAA i ava konsidere ki mannyer i ava kapab fer en pe water harvesting lo son kote.  Mersi.

 

MR SPEAKER

Mersi Minis. Onorab Francois Adelaide.

 

HON FRANCOIS ADELAIDE

Mersi Mr Speaker e bonzour a tous. Minis de pti kestyon. Mon premye kestyon se en attendant ki nou pe esper sa proze pavement, eski ou Minister pou le moman pe anvizaze, fer prosedir pou re allocate sa bus stop ki pre avek sigaret la?  Akoz i koz bokou lenkonvenyan dan bomaten akoz bis i ganny park lo semen.

E mon 2enm pti kestyon se zis lanmenm kot sa Erport la nou’n deza ouver en roundabout.  Eski ou Minister pe mazinen pou ferm sa semen  devan kot sa transpor pe sorti egzakteman pou divert tou transpor ki sorti lo erport pou al lo roundabout ?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Wi i annan  dan sa plan pou rellocate sa bus shelter en pti pe pli ba.  E re travay en pe lo bann lezot bus shelter ki dan zanviron osi.   Enkli enn ki pou en pti pe pli gran.  E osi nou pe esper SCAA fini fer son travay pou nou kapab blok sa semen kot bann transpor i sirkile.  So nou pe esper en pti pe SCAA fini fer son bann devlopman ki in konmanse e from then on nou kapab –

 

MR SPEAKER

Mersi Minis.  Onorab Adelaide.

 

HON FRANCOIS ADELAIDE

Yes mersi Mr Speaker.  Minis ki  dele letan en pe pli kourt sirtou pou sa bus stop ki nou pe koze la, akoz en bon pe letan nou pe koz lo la me napa nanryen ki pe ganny fer?  La ou pe dir mon dan plan.  Nou pa konnen kan sa plan pou kick in.  Me solman sa bus stop li i kree en problenm.  Mon krwar SLTA zot konnen e hopefully avek en keksoz pli vit posib pou redwir  konzesyon trafik.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Sa bus stop ki ou pe dir osi i lo en later prive so i annan en pe osi negosyasyon pou nou fer lo la.  Me i dan plan. I dan plan.  As soon ki nou kapab konmanse then sa plan konpreansiv i pou ganny met an aplikasyon.  Mersi Minis.

 

MR SPEAKER

Mersi Minis.  Onorab Charles De Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker.  Welcome back!  Bonzour Minis ek ou delegasyon e tou Manm Onorab e tou dimoun ki a lekout.  Osi bann zabitan Mont Buxton ki dan Galeri.  Mr Speaker lo sa kestyon eski Minis i kapab dir ek nou Lasanble si son bann zofisye ki ti dan sa vizit resaman avek Konsey Rezyonal e bann lezot antite ki ti annan konsernan sa proze semen antye, si i ti ganny en rapor avek zot eski dan sa rapor in osi ganny met o pwen ki nou bezwen annan en meeting, kot tou bann antite i bezwen vin ansanm depi son SCAA, tou sa bann Minister konsernen depi Later, Land Transport, bann Komisyoner Transpor ensidswit.  E  Ladministrasyon distrik, Konsey Rezyonal plito, ek bann lezot antite ankor ki ava annan. Lanvironnman par egzanp, pour ki  sa proze trotwar la i pa ganny fer, i pa ganny gete dan en fason isolation.  I bezwen ganny fer dan en fason e zot bezwen revwar konsep ki zot annan an relasyon avek devlopman Erport.  Sa proze i bezwen merge, armoniz si ou le avek devlopman erport ek tou bann lezot problenm ki annan asosye. Problenm trafik, problenm drenaz e tou sa.

E mon’n antann koz trwa lane.  E nou’n dir dan sa vizit, Erport i pa oule 3 lane.  Sa si mon pa tronpe i kont ICAO.  ICAO zot bezwen revwar e get posibilite 4 lane de monte 2 desann.  Letan ou pe negosye ou fer en sel negosye pou sa bann later lo kote Erport e lo lot kote diskit ek sa bann dimoun.

I annan dimoun pa ankor ganny diskite avek.

So mon krwar i annan en travay pli konpreansiv ki devret ganny fer kot nou tonm dakor lo en solisyon pli byen ki sa ki pe ganny prezante avek nou isi, Mr Speaker.  E mon ti ava demande alor ki Minis i konsider sa ki Regional Council i pe propoze e ki son bann zofisye i devret averti li korekteman pou ki nou kapab annan en aksyon, pli proper ki konsern tou sa ban keksoz ki nou pe koze dan sa zanmerant.

E therefore sa kestyon trotwar i a pli byen ganny plan kote nou ete pou ki prezan zot a kapab fer li enn fwa pour tou ki nou pa bezwen re vini.  Ou fer en bout apre re kase re vini re aranze.  So vwala ki mon pe met devan e mon ti le Minis i –

 

MR SPEAKER

Mersi Onorab De Commarmond.   Minis.

 

MINISTER PAMELA CHARLETTE

Mersi Mr Speaker.  Wi mwan mon ti okouran ti annan en vizit, me mon pa’n ganny nanryen lo kote rapor.  Me selman i annan sa plan konpreansiv ki nou pou bezwen konsidere parey ou’n dir.  E parey mon’n dir dan mon ladres nou pou bezwen tou Departman Lavyasyon Civil SCAA CAMS kot Lanvironnman, Departman Transpor SLTA ek son SCAA osi e menm son Konsey Rezyonal osi pou nou kapab vreman diskite ki mannyer nou move forward lo bann stalemate  par egzanp ki nou’n resevwar.

So i pou en zefor antyerman lo tou sa bann stakeholders, akoz i annan bann travay ki enn pe bar lot ki pa kapab ganny fer.  So alors wi nou bezwen evantyelman zwenn tou ansanm pou gete ki bann travay kekfwa ki nou pou kapab konmanse.  Bann ki nou pou bezwen re negosye.  Bann ki pou kapab kekfwa deside parey ou’n dir once and for all si nou pou fer, si nou pa pou fer.  Me selman nou bezwen get sa proze li menm dan son totalite.  Bann plan ki SLTA ti annan e diskit further.  Mersi.

 

MR SPEAKER

Mersi Minis.  Vitman Onorab.

 

HON CHARLES DE COMMARMOND

Vitman Mr Speaker.  Zis pou averti Lasanble e Minis pou ganny zot korperasyon akoz byento mon’n fini koz avek SCAA – Regional Council osi pe pran kontak ofisyelman avek bann antite ki nou pe koze la e ki SCAA i pare pou donn nou landrwa pou nou meet e ki zot osi zot pou la e pou nou kapab vwar sa semen dan sa direksyon ki nou pe koze ki Minis mon dakor sa ki ou pe fer komanter lo la.  E mon dakor ki ou pou on Board osi avek ou full team an sa direksyon pou nou vwar solisyon permanan.  Mersi.

 

MR SPEAKER

Mersi Onorab De Commarmond.  Onorab Valmont ou ti’n sinyal mwan.  Vitman, eski ou annan en dernyen pti kestyon.

 

HON JUDE VALMONT

Yes Mr Speaker.  Zis en klarifikasyon lo sa size bus stop.  Mon pe tir en pe share en pe local knowledge.  Sa later Minis i pa later prive li.  Aktyelman i annan en Mr Khanny,  in deza fer 2 request pou li ganny sa pti bout later me selman Minister konsernen in dir ek li non i annan plan pou fer bus Stop.  Alor si zot annan keksoz pou fer petet pou extend en pti gin pou desarz trafik pou le moman, mon krwar zot kapab met en pti bout koltar la, fer le neseser.  Mersi.

 

MR SPEAKER

Mersi Onorab.  Minis ou le fer komanter ?  Si ou annan lenformasyon ?

 

MINISTER PAMELA CHARLETTE

Non Mr Speaker zis nou a take note.  Apre nou a diskite.

 

MR SPEAKER

Mersi Minis.   Nou ava al lo dezyenm kestyon.  Anvi Onorab Aglae i lo Misyon enternasyonal, lekel Manm ki pe demann kestyon lo son la par?  Yes Onorab Egbert Ernesta. Eskize Onorab Paul Ernesta.

 

HON PAUL ERNESTA

Bonzour bann koleg Onorab.  Bonzour tou bann dimoun anler e tou zabitan e tou dimoun ki pe ekout nou.  Mr Speaker kestyon Onorab Aglae i konm swivan :-

Swivan lanons ki re sirfas e reparasyon semen dan Sesel pou ganny met lo Kontra, eski Minis i kapab eksplik sa Lasanble ki mannyer sa pou marse?

  1. Ki benefis nou ekspekte vwar e gannyen a longer ditan?
  2. Konbyen i ekspekte kout Gouvernman? Mersi Mr Speaker.

 

 

MR SPEAKER

Mersi Onorab Ernesta.  Minis.

 

MINISTER PAMELA CHARLETTE

Mersi Mr Speaker.  Plan pou konmans servi Kontrakter prive pou asiste Lazans Transpor lo later in deza konmanse.  SLTA ti ganny aprouvasyon Procurement Oversight Unit (POU)  ek National Tender Board pou lans en ‘’Expression of interest ‘’ki ti ouver pou bann lakonpannyen konstriksyon ki anrezistre Sesel.

Swivan sa bann legzersis nou’n resevwar 13 Kontrakter lo Mahe e 3 lo Praslin.  I bon note ki letan nou ti advertise sa ‘’Expression of interest’’ nou ti deza fikse son pri e bann Kontrakter ki ti enterese pou  travay ti pou travay dapre sa rate ki nou ti’n donnen.  Pou Mahe ek Praslin bann Kontrakter ti tir o sor pou 3 diferan semen ki zot valer pa depas R150mil e en semen ki pa depas R750mil sakenn.  Sak fwa ki en Kontrakter i termin son bann proze sa legzersis tir o sor, i pou ganny repete.

Bann semen ki’n ganny swazir pou al dan sa tir o sor i dapre bann evalyasyon lo zot kondisyon sirfas ki ganny idantifye par bann teknisyen SLTA e osi atraver demann sorti kot bann distrik fer par bann DA oubyen Manm Onorab zot menm.

Letan sa demann i ganny fer SLTA ansanm ek Lotorite sa distrik i fer en vizit pou etabli merit sa demann e si i zistifye nou enkli li lo nou lalis.  I osi bon note ki SLTA pe kontinyen ek son bann proze re sirfas semen avek son prop mendev sirtou lo semen primer.

Alor Mr Speaker benefis mazer se ki SLTA pou kapab re sirfas plis semen an menm tan.   Konsekaman sa i ogmant prodiktivite e efikasite pou delivre plis dan en dele letan pli kourt.  Pou met sa an perspektiv nou annan 15 Kontrakter lo sa progranm, ki vedir nou pou kapab re sirfas 15 semen dan en dele letan pli kourt, konpare ki SLTA ti pe bezwen fer sa travay li tousel.

Konbyen i ekspekte kout Gouvernman?  SLTA pe servi son larzan Bidze anyel pou finans sa progranm.  E pou sa lannen i pou anviron R33milyon ki pou osi enkli bann travay ki SLTA pe antreprann avek son prop mendev.   Avek lavites ki bann proze pe ganny fer nou anvizaze fini sa Bidze an Out 2019 si tou Kontrakter ki nou’n angaze i korpere.  Mersi Mr Speaker.

 

MR SPEAKER

Mersi Minis.  Onorab Paul Ernesta.

 

HON PAUL ERNETA

Mersi Mr Speaker.  Mr Speaker eski Minis i kapab eksplik nou dan bann klasifikasyon si bann travay pe ganny fer par rezyon, en  ki a permet konnen?  E osi in nonm bann semen primer si i kapab mansyonn nou lekel bann semen primer la ki pe ganny touse konman bann priyorite ki annan e ki mannyer zot pe plan Schedule zot plan travay? Thank you Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker lo kote bann semen primer, mon a konmans bann semen primer avan.  Bann priyorite ki nou annan se parey nou’n vwar Bois de Rose ki pe ganny sirfas pou le moman, ziska Eden Island.  Nou annan osi semen Au Cap Takamaka, ki en priyorite e sa nou pou konmanse an Zen, apre ki PUC in fini donn nou semen ki tou bann travay lo la in fini ganny fer.  E bann lezot litilite osi in fini fer zot travay.

E apre sa nou pou konmans once ki nou fini Takamaka nou pou pran Takamaka pou al Port Launay.  Nou annan enn de semen ki priyorite me selman i osi annan ki PUC pe travay lo la, tel konman Belombre avek Glacis.  Nou pou bezwen esper zot pou nou fini.  Sa i bann priyorite ki bann main road.

Lo kote bann priyorite ki bann Kontrakter prive pe fer e sa i plito semen segonder.  Mon a konmans Praslin par egzanp.  Grand Anse Praslin nou annan Mont Plaisir, Amitie, St Joseph, St Joseph Estate, Karl Tamatave Estate, Count and Read Day Care, Lablache Estate, Amitie, Anse Kerlan, Mont Plaisir, e osi landfill access.  Baie Ste Anne, Hoareau Road Cote D’or, Moulinie Estate, Marie- Jeanne Estate, Au Cap, Joeliff, Village Rose, Zimbabwe ek ex lopital.  Sa zis Praslin bann Kontra ki nou’n donnen avek bann Kontrakter prive.  Mahe i en pti pe pli long.  Mon pa konnen si ou anvi go through the whole list.

 

MR SPEAKER

Oubyen Minis kapab fer bann Manm i ava ganny dokiman.

 

MINISTER PAMELA CHARLETTE

Yes.

 

MR SPEAKER

Onorab Ernesta.

 

HON PAUL ERNESTA

Mr Speaker se sa ki mon ti pe dir.  Petet apre Minis i ava fer nou bann dokiman vi ki lefe ki parey in dir i en pe long.  E mon kontan note osi sirtou lo sa bout rezyon Au Cap, Takamaka, Baie Lazare, Port Launay i en semen ki nesesit travay ase irzan akoz semen i vreman deplorab.  Mersi Mr Speaker.

 

MR SPEAKER

Mersi Onorab Ernesta.  Mon pran Onorab Stephen Pillay ki ou kestyon i tonbe.  Au Cap pe ganny kouver non?  Ok.  Be ale Onorab Stephen Pillay.

 

HON STEPHEN PILLAY

Mersi Mr Speaker.  Kestyon kekfwa wi i pou reste Au Cap me mwan pou kestyon pou demann konsernan Kontrakter. Eski Minis ek SLTA vi ki sa bann Kontrakter pe fer secondary roads, parey lo sa bann semen rezyon sid, eski zot kapab get posibilite osi kekfwa  sa bann Kontrakter i kapab ede ek SLTA lo bann semen primer sakenn kekfwa i a fer en bout, kekfwa enn i fer 10 kilomet en fason ki ou kapab ganny 10 Kontrakter.  Dan en mwan ou fini fer Au Cap, Anse Royale, Takamaka –  Anse Aux Pins nou a fer apre.  Mersi Mr Speaker.

 

MR SPEAKER

Mersi Onorab Pillay.  Minis in dir i annan 15 Kontrakter.  Nou pou met 10 Au Cap mon krwar nou pou dan problenm.  Minis.

 

MINISTER PAMELA CHARLETTE

Mersi Mr Speaker.  Vi ki sa i en keksoz nouvo, nou annan en pti faz tranzisyon ki nou pe monitor en pti pe sa bann Kontrakter.  Nou annan de dimoun kot SLTA ki lo site preski tou le zour, pou vwar zot kalite travay ki zot pe fer.  E evantyelman si tou keksoz i ok nou vwar kalite i bon, nou pe konstate ki kalite i bon.  Eksepte ki enn ki nou’n fer arete akoz nou pa’n satisfe.  Selman nou pou gete a longer ditan e bann lekipman osi ki zot annan, bann investments, si zot pou kapab fer lo bann semen primer osi.  Mersi.

 

MR SPEAKER

Mersi Minis.  Onorab Sebastien Pillay

 

HON SEBASTIEN PILLAY

Mersi Mr Speaker.  Bonzour Mr Speaker e bonzour tou Manm Onorab.  Bonzour tou dimoun dan Galeri e tou dimoun ki pe ekout nou.

Mr Speaker mon ti a kontan demann Minis prenon kont plizyer konsern i ganny eksprimen par motoris e bann dimoun ki servi semen an zeneral. Eski sa bann travay ki pe ganny fer, sa bann fason fer sa bann priyorite in pran kont sa bann konsern ki’n ganny eksprimen?  Oubyen eski sa travay ki zot pe fer i pirman baze lo bann assessment entern ki ganny fer dan bann Departman konsernen ?  E prezan  kot nou vwar apre ki sa proze in fini ganny fer i annan en lot problenm ki arise an se ki konsern sirtou sa size re sirfas semen ki’n vin, nou kapab dir en konsern nasyonal pou en bon pe motoris?  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Pou reponn sa kestyon nou pran konsiderasyon tou le de.   Assessment ki nou fer ki nou vwar poudir i en priyorite pou bann semen ki kekfwa ki pa dan bann bon kondisyon, me osi nou pran konsern piblik e motoris me selman pa toultan ki nou kapab fer plezir tou dimoun.  So as per nou Schedule ler nou ganny sa bann konsern nou fer en fason ki nou reakte si nou krwar nou kapab fer li.

Apre ki bann zofisye, bann teknisyen in diskite e nou konsidere pou enplimant bann keksoz ki nou vwar ki dimoun pe konplent lo la.  Par egzanp mon pou donn en legzanp Bois de Rose me selman la mon krwar ti annan en miss kominikasyon.  Kekfwa nou ti pe fer li en keksoz tanporer ziska ler sa semen li menm li sa round about i kapab ouver.  Me selman apre wi nou’n bezwen, ler in ouver nou’n aranz zebra crossing, nou’n met tou keksoz annord.

So wi nou pran konsiderasyon tou lede.  Nou internal investigation ler nou ganny en konplent osi i annan dimoun ki ale, ki sorti dan lofis i ale i al vizite ansanm ek Lotorite Distrik plizyer fwa pou kapab rod en solisyon pou bann problenm semen.  Mersi.

 

MR SPEAKER

Mersi Minis.  Onorab Pillay.

 

HON SEBASTIEN PILLAY

Mersi Mr Speaker.  Swivan larepons Minis mon oule met 4 eleman devan Minis ki mon ti a kontan i sey adrese atraver bann larepons ki i pe donn nou.

Premye eleman ki mon ti le mete se ki bokou motoris pe konplent ki kondisyon semen i fer ki bann si oule bann wear and tear ki arive lo bann serten parts zot transpor i ogmante e zot vwar zot kou maintenance zot transpor i ogmante.  Eski dan travay ki zot pe fer pou reparasyon semen zot pe asire ki nou pa pou repar semen and then everything pou … pou mars byen for a few months or a year only me apre nou  vwar ki i annan problenm.

E sa i anmenn mwan lo sa dezyenm pwen Mr Speaker.  Vreman vit.  Nou vwar poudir enn bann konsern mazer ki motoris i eksprimen se ki dek ki SLTA i fini repar en semen pa ni menm de zour pli tar PUC ouswa en lot antite, well PUC dan mazorite ka in vini. Semen in re ganny fouye, ganny kase.  E ou vwar en pe coralfill in ganny mete dan sa landrwa.  So eski prezan zot Minister pe fer en travay ki PUC i bezwen annan en infrastructure development plan oubyen en – si oule e Schedule kot  pe rann zot bann proze e ki bann enzenyer SLTA pe fer pou asire ki sa bann Kontrakter ki PUC in pran pou fer sa bann proze, ler zot pe rann sa bann proze sa bann bout proze ki zot pe rann nou pa bezwen al fer en lot travay adisyonnel pou ler nou pe fer en travay re sirfas semen, akoz sa kondisyon ki zot in kit sa semen ladan  i en problenm.

E zis dernyen Mr speaker mon pa kapab fini sa met sa pwen la akoz mon’n raise li.  Ler nou pe re fer semen nou pe provide semen.  Eski par egzanp dan bann rezyon kot i annan bokou dimoun i frekante, nou pa pe osi met lezot keksoz par egzanp ki neseser par egzanp bann street lights sirtou par egzanp dan sa stretch semen ant Glacis ek Beau Vallon, kot i annan bann lotel e kot bokou kliyan.  E mon asire i annan lezot landrwa i pe marse aswar avek en pti tors bann keksoz koumsa? Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mersi Onorab.  Lo kote ou premye kestyon regarding wear and tear of transpor, nou fer sir ki ler nou fer en semen nou met bon kalite prodwi e nou fer li byen.  E nou osi angaze avek nou bann stakeholders PUC.  Tou le lannen SLTA i submit en lalis son bann Schedule travay ki i fer partou lo Mahe/ Praslin. E PUC osi bezwen come on board.

E tou sa bann travay ki ler SLTA i fer i go through en aplikasyon planning ki osi ganny anvoye kot PUC.  E pa toultan ki nou ganny korperasyon PUC me selman nou reste, nou, nou reste strik, nou reste angaze avek PUC, nou travay ek zot.

Me i annan de fwa kot bann emergency oubyen bann fwa kot PUC in vin an retar ki nou bezwen akoz zot osi zot annan bann proze nasyonal par egzanp sa 33KV, sa sewage line ki nou pou bezwen les li fer sa bann proze lo semen.

Me nou reste angaze avek PUC.  Nou  diskite avek zot lo subcommittee planning osi, utilities committee, nou angaze avek PUC avek bann lezot utilities company whether Cable or Airtel.  E nou dir zot byen nou bann proze.  Zot konnen nou bann proze ki nou pe al fer.  Nou’n pran en pozisyon kot pou le moman la nou pa pe donn PUC okenn lotorizasyon until ki nou asire ki tou sa bann travay ki’n ganny fer i ganny fer dan en fason byen apropriye e i bon kalite.

E i annan landrwa kot nou’n fer zot arete.  Nou’n fer zot refer.  Nou fer zot avek advise bann teknisyen, ed zot ki mannyer zot pou kapab e sirtou avek sa bann Kontrakter ki pe fer sa bann proze.   E osi nou annan – PUC in konmanse peye SLTA pou kapab re surface sa bann landrwa.  E wi bann enzenyer i fer bann tes lo sa bann semen e sanmenm sa ki ler zot fer zot tes si zot vwar en keksoz i pa ankor pare nou dir PUC pou zot refer.  Bann enzenyer i fer bann tes bann landrwa kot PUC in fini excavate par egzanp, ki’n remet konkret.  So nou ale nou  fer bann tes pangar i annan bann weakness dan sa bann excavation.  So wi zot fer sa tes e apre zot enform PUC si sa travay ki zot in fer i bon oubyen non.

Lo kote street lights mon’n aprann Bel Ombre nou’n deza mete en pe Street lights be i manke.  E sa i nou osi nou pe esper akoz anba Indian Grant nou ti pou ganny en pe street lights.  So nou osi nou pe espere pou nou ganny en pe street lights pou nou met dan bann lezot distrik Mahe Praslin.  Mersi.

 

MR SPEAKER

Mersi Minis.  Onorab Jany De Letourdie.

 

HON JANY DE LETOURDIE

Mersi Mr Speaker.  Bonzour tou dimoun.  Mr Speaker mon krwar petet mon’n konpran ki Minis i dir dan bann lokazyon ki SLTA in fini aranz bann semen whoever ki kase savedir zot ki bear the cost.  Sa cost i pa tonm lo SLTA.  Eski ou’n sey dir sa Minis?

 

MR SPEAKER

Mersi Onorab.  Minis.

 

MINISTER PAMELA CHARLETTE

Wi nou fer zot pey parti sa re surfacing ki nou pe fer.

 

MR SPEAKER

Mersi Minis.  Onorab Letourdie ou okAlright.  Onorab Francois Adelaide.

 

HON FRANCOIS ADELAIDE

Mersi Mr Speaker.  Pou follow Minis en pti gin lo zafer street light mon’n tann ou dir ou pe esper donasyon –

 

MR SPEAKER

Annou pa deviate from the original question en.

 

HON FRANCOIS ADELAIDE

Wi wi selman zis pou mon – akoz i en konsern dan mon distrik sa enn ler in nonm sa enn la.  Akoz ki Gouvernman pa invest plis dan street lights?  Nou’n fek koz lo Bill Touris nou mank street light.  La ou dir nou ou pe esper Indian Grant, mon krwar poudir Gouvernman i devret pran  size serye. Invest dan plis street light pou Sesel antye.  Wi.

Minis mwan mon lot kestyon i par egzanp ou dir nou poudir ou annan bann seri progranm pou ou re surface bann semen.  Be akoz ki ler zot kas en serten kantite semen ki SLTA pa antre lo la pou met koltar?  Akoz nou bezwen esper kas antye then apre nou pou bezwen met antye ki pran plis letan.  E nou’n ganny plis dimal.  E kote ler nou pou koz value for money Minis e ler nou annan problenm dan pei mon krwar bann Minister i pran bann linisyativ, akoz pou le moman la, nou cc i R2.50 nou pe ganny en semen ki pa bon.  Petet mazinen koz avek Cabinet ki nou kapab tir en pti gin lo kote ‘’CC’’ fer desann en pti gin ziska ler semen i bon.  Then nou ava pey cc plis.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mon pou klarifye sa kestyon lo kote street lights.  Street light nou annan en Bidze pou street lights me i pa sifizan toultan akoz bann Lotorite distrik toultan pe anvoy bann rekomandasyon kot nou met street light lo bann – menm semen segonder.  So nou annan nou Bidze ki nou servi me selman i pa ase pou la kantite demann ki nou annan.  So wi nou pou depan en pti pe lo bann lezot lenvestisman ki  annan.

Lo kote ou lot kestyon i annan par egzanp proze 33KV ki PUC pe fer nou pa kapab fer li fer en pti bout apre re surface akoz i bezwen pas en kab.  Nou bezwen les li pas son kab.  Utilities, bann lezot utilities osi zot bezwen vini pou pas son kab.  Zot bezwen teste ler zot fini apre ki zot re met sa travay ek nou pou nou kapab re sirfas.  So i pa zis en, en keksoz kot ou pou ale monte dir li donn mwan en bout mon fini mon fer.  Li i kontinyen ou donn en bout.  Non.  Vi ki i en proze li menm li ki ou bezwen pas ou kab teste e fer tou sa bann prosedir then we might as well les li fini fer tou apre nou kontinyen.  Mersi.

 

MR SPEAKER

Mersi. Minis i annan en propozisyon lo ‘’CC’’ pou ou koz ek Cabinet.  Minis.

 

MINISTER PAMELA CHARLETTE

Mersi Mr Speaker.  Nou a konsidere Mr Speaker.

 

MR SPEAKER

Mersi Minis.  Mon a donn la parol Onorab Audrey Vidot.  Onorab Vidot.  Non.  Onorab Wilbert Herminie.

 

HON WILBERT HERMINIE

Mersi Mr Speaker.  Minis dan ou larepons ou’n dir koumsa avek sa bann nouvo Kontra ki pe donnen sa i pou ed zot fer en pe plis travay.  Mwan mon kestyon i lo kote prodiksyon.  Quality of work.

Eski la vi ki bann semen segonder pe ganny antreprann par bann pti Kontrakter, eski pa ler zot pe fer sa bann semen bann main road si zot pe vin avek nouvo teknik pou improve quality semen, sirtou lo kote base vi ki konmela zis nou pe lay over met koltar lo menm semen.   Eski dan Bidze ti annan sa milling machine ki tir koltar lo semen?  Eski zot pe mazin al dan sa direksyon pou improve en pe sirtou sa semen Takamaka pou al Port Glaud?  Eski zot annan lide pou dan imedyat pou fer vini sa masin pou zot kapab prouv en pe zot baz lo ki semen i osi ganny en pli bon quality? Mersi.

 

MR SPEAKER

Mersi Onorab Herminie.  Minis.

 

MINISTER PAMELA CHARLETTE

Mersi Mr Speaker.  I pa ti dan Bidze pou nou annan en milling machine me selman i en keksoz long term ki nou pou konsidere ler i annan sa pou nou reabilit bann semen.  So wi i kapab ganny konsidere en keksoz dan long term.  Mersi.

 

MR SPEAKER

Mersi Minis.  Onorab Clive Roucou.

 

HON CLIVE ROUCOU

Mersi Mr Speaker. Mr Speaker mon anvi demann Minis in koz lo 15 Kontrakter, mon ti a demann Minis si i ti kapab fer available lalis sa 15 Kontrakter ki pe travay lo sa proze?  E Minis dan son larepons in koz lo pri ki’n ganny fikse epi kondisyon bann sirfas.  Mon ti a kontan demann Minis si sa pri ki’n ganny fikse i osi depan lo lepeser koltar depi longer semen ki bann Kontrakter pe fer?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Nou a fer Lasanble an zeneral ganny sa bann lalis ki nou’n pas lo la en pe.  Pri ki nou’n fer se i baze lo lepeser koltar par met kare.

 

MR SPEAKER

Mersi Minis.  Onorab Noline Sophola.

 

HON NOLINE SOPHOLA

Mersi Mr Speaker.  Mr Speaker, Minis kestyon i semen dan Sesel.  Me dan ou lentervansyon depi bomaten ou pe konsantre Praslin/ Mahe!  Menm pou lalimyer ou’n konsantre, Praslin/ Mahe!

 

(APPLAUSE)

 

HON NOLINE SOPHOLA

Minis eski ou kapab dir mwan ki plan konkret dan sa Kontra ou Minister i annan pou semen lo La Digue?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker La Digue i annan son Bidze separe pou semen, me sa ki nou pe – sa ki nou lalis ki nou bann Kontrakter prive pou met koltar.  E La Digue napa  bann Kontrakter ki met koltar akoz semen i beton oubyen lot form.  So se sanmenm.  Selman La Digue i annan son Bidze pou semen.  Ek lalimyer.

 

MR SPEAKER

Mersi Minis.  Onorab Sophola.

 

HON NOLINE SOPHOLA

Mersi Minis.  Mon ki La Digue i annan son prop Bidze !

 

(APPLAUSE)

 

HON NOLINE SOPHOLA

Minis me selman annou malgre ki nou annan sa Bidze annou pa met li dormi.   Annou fer li travay.  Annou depans li akoz La Digue nou semen i bezwen repare li osi.  I annan bann trou ki pe formen avek lapli.  Bokou transpor in antre e mon demande ki nou fer li en priyorite osi parey ou pe fer Mahe ek Praslin.  Akoz ler sa ki pe regarde ler i dir Sesel nou pa dir Sesel, Mahe ek Praslin i zoli, me selman pou La Digue nou pa ankor fer.  Mersi Minis.–

 

MR SPEAKER

Mersi Onorab.  Minis. Minis.

 

MINISTER PAMELA CHARLETTE

Mersi Mr Speaker.  Nou – Onorab in fer sorti en pwen pertinan.  Nou pa bliy La Digue me selman zis akoz nou ti pe koz lo re surfacing ki nou fer avek asphalt ki nou apel asphalting sanmenm sa nou pa’n konsider li dan sa kestyon.  Me La Digue i osi en priyorite pou nou fer semen.  Nou a fer sir ki bann proze i mars byen ansanm avek zot korperasyon zot osi.  Mersi.

 

MR SPEAKER

Mersi Minis.  Onorab Clifford Andre.

 

HON CLIFFORD ANDRE

Mersi Mr Speaker.  Mr Speaker anvi kestyon ki pe demann lo zafer semen e Minis in koz lo bann semen segonder kot in donn bann Kontrakter pou fer sa bann travay, eski Minis i kapab dir nou ek sa gro lapli ki nou’n met lo Facebook Dimans e ki Vis-Prezidan in al vizite yer san enform nou.

 

(laughter)

 

HON CLIFFORD ANDRE

Eski Minis i kapab dir nou kan ki re sirfas semen segonder pou ganny fer Anse Aux Pins akoz in annan bokou dega ki’n ganny fer Dimans?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker kot nou kapab nou fer maintenance lo bann semen, e vi ki sa i ti en emergency i annan bann re priyoritizasyon ion ki nou pou bezwen fer pou kapab fer semen Anse Aux Pins.  E osi dan sa lalis ou a vwar bann semen kekfwa ki nou’n met priyorite pou Anse Aux Pins li menm, me solman regarding emergency wi dapre mon konpran i annan en task force ki pe get tousala so dan lasemenn kekfwa i ava annan keksoz ki pou ganny fer.  Mersi.

 

MR SPEAKER

Mersi Minis.  Onorab William.

 

HON WAVEN WILLIAM

Mersi Mr Speaker.  Bonzour Minis avek ou lekip.  Mon swet labyenveni bann zabitan Mont Buxton.  Minis lefe ki sa proze pou met koltar dan sid ziska Port Launay, mon anvi ki ou dir nou par egzanp, si zot pou zis met koltar.  Akoz par egzanp ler ou’n met koltar i annan en tandans pou dimoun drive pli vit.  E mon anvi demande si par egzanp pou met speed bump i pa petet en keksoz ki devret konsidere?  Akoz nou satisfe avek travay ki’n ganny fer la Misere, me mon konnen poudir i annan bann aksidan ki pe arive sirtou dan rezyon Barbarons.  Mon anvi demann ou si ou Minister ava konsidere ki i annan bann landrwa ki mon konnen dan Administrasyon Distrik in ekrir, kot petet olye re vin en dezyenm fwa me lefe ki zot pe al met koltar si pa ti ava annan sa posibilite osi pou met osi bann speed bump kot i neseser, pou le moman?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker speed bump i en keksoz ki nou’n koz lo la bokou.  I annan son lavantaz ek son dezavantaz.  Toultan ler nou ganny en request from distrik oubyen from en endividi i annan en vizit ki ganny fer ansanm avek Road Transport Commissioner, avek SLTA ansanm pou assess merit annan en speed bump.  E sa i pou depan lo plizyer fakter lo kondisyon semen li menm, lo sityasyon dan sa landrwa,  Si i annan lespas.  Osi nou get lakantite aksidan osi ki’n arive dan sa landrwa e then nou pran en desizyon.  Me mon ti a kontan fer sorti ki i annan pei ki pe arete fer speed bump, akoz sertennman i annan bann dezavantaz osi ki arive avek.  Me nou, nou ankor pe servi li alors nou bezwen assess avan ler ki nou deside pou met en speed bump.  Mersi.

 

MR SPEAKER

Mersi Minis.  Onorab William.

 

HON WAVEN WILLIAM

Mersi Mr Speaker.  Mr Speaker prenon kont larepons Mini in donnen, Minis rezidan i vreman konsernen e letan i annan en demann ki sorti kot piblik ouswa rezidan dan distrik, mon ti ava demande ki Minister i konsidere ansanm avek Lotorite distrik akoz ki arive se ki si nou anvi annan en deterrent e nou konn vreman sityasyon, so mon ava demande ki Minister i konsider sa demann espesyalman bann ki nou fer lo kote serten rezyon dan distrik Grand Anse Mahe.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker, parey mon’n dir i annan en vizit ki ava gannyen fer avek Lotorite distrik enkli e then akoz i kapab osi annan bann lezot solisyon kekfwa ki nou pa’n mazinen then nou kapab diskite rod en solisyon pou sa landrwa spesifik.  Mersi.

 

MR SPEAKER

Mersi Minis.  Onorab Norbert Loizeau.

 

HON NORBERT LOIZEAU

Mersi Mr Speaker. Bonzour Minis.  Bonzour tou dimoun.  Bonzour bann dimoun Mont Buxton ki dan Galeri.  Mr Speaker Minis in koz lo speed bump.  Eski Minis i kapab eksplik nou si i annan standar lo speed bump kot i annan i sa oter parey Lari Hangard, i annan i koumsa, eski zot annan en standar pou ban speed bump dan Sesel? E osi grander roundabout i annan mon vwar i pli gran ki sa Lasanble Nasyonal i annan i sa groser.  Sa premye.

Apre Mr speaker mon anvi demann Minis en pti kestyon konsernan semen Stevenson- Delhomme road si zot annan plan pou re surface li, elarzi li osi parey pe fer Curio Road ki mon byen satisfe pou ki nou a kapab met en servis bis SPTC pou deservi bann dimoun ki reste en pe anler dan leo sirtou bann vye dimoun, bann dimoun aze ki bezwen desann sorti anler laba koup semen pou al St Louis, ki en danze pou zot.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Ou premye kestyon lo kote speed bump i annan diferan kalite speed bump e i annan bokou alternativ ki nou kapab servi pou kalme trafik.  So i well si i en kalite then i bezwen annan son standar evidaman me selman i pa zis en kalite.  Nou annan diferan kalite speed bump.

Lo kote Stevenson Delhomme ti annan en proposal ki on hold pou le moman akoz way eave me selman i pa ti enkli – wi ti enkli elarzisman semen osi me selman parey mon’n dir i on hold pou le moman.

 

MR SPEAKER

Mersi Minis. Onorab Loizeau.

 

HON NORBERT LOIZEAU

Minis vi ki kot lekol Bel Eau la en i annan en danze dan bomaten kot i annan bann dimoun ki pa obzerv trafik zot pas vit, eski zot pe mazin met enn sa bann speed bump pa bann sa oter koumsa, bann en pti pe pli ba pou kapab met en crossing pou sa bann warden kapab servi pou fer bann manrmay koup semen pou al kot lekol Bel Eau.  Silvouple si posib?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Si Onorab ti kapab anvoy en request pou nou, nou ti kapab fer vizit ansanm avek teknisyen apre gete si i annan en need oubyen si napa okenn alternativ nou kapab fer.  Mersi.

 

MR SPEAKER

Mersi Minis.   Nou ava pran dernyen siplemanter lo sa kestyon.  Onorab Jude Valmont.

 

HON JUDE VALMONT

Mersi Mr Speaker.  Mon kestyon i konm swivan.  Minis mon ti ava zis voudre demande si supply akoz zot dir zot annan 13 Kontrakter Mahe,  3 Praslin e mon krwar i enkli zot tim SLTA osi.  Alor eski – e La Digue pa bliye La Digue i annan son Bidze separe.  Onorab Gill in get mwan ler Minis in dir sa.  Eski supply i – zot supply i ase pou sa demann?  Eski zot supply i ase?  Mwan mon ti a voudre konn sa.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Lo kote prodiksyon li menm li, wi nou masin i annan kapasite pou fer sa kalite prodiksyon, me i tou depan osi lo Bidze ki nou annan akoz nou bezwen bann bitumen fer vini.  So i – pou nou prodwi wi nou kapab si nou annan resours finansyel pou nou fer li.  Mersi.

 

MR SPEAKER

Mersi Minis.  Mon ava pran kestyon limero 3.  Onorab Wilbert Herminie.

 

HON WILBERT HERMINIE

Mersi Mr Speaker.  Minis, kestyon No.3.  Eski Minis i kapab dir sa Lasanble ki staz lenplimantasyon proze Ma Joie Mont Buxton link e ki bann retar son Minister pe rankontre avek sa proze?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Sa proze semen ki Onorab pe fer referans avek i pou enkli elarzisman semen, konstriksyon drenaz ek miray. Lo sa morso semen ki pran kot bis vire Ma Joie ziska dan krwaze semen Mont Signal.  Proze li menm ti ganny konsevwar en pe lannen – bokou lannen pase me nou pe ranforsi li e nou’n konmans travay lo la an 2016.

Faz enn pou pran kot bis vire Ma Joie ziska dan premye gran kontour kot bin, kot bin site.  Sa i pou en longer apepre 200 met.  E pou sa 200 met tou dimoun in fini donn wayleaveSo faz enn pou konmanse nenport ler.  E prenon kont bis vire Ma Joie dan premye gran kontour bin site e i annan bokou bann pti kontour so i annan en pe konpleksite osi ki vin avek.

Letan sa proze pou konplete nou ekspekte ki SPTC i a kapab met en servis bis me sa i pou depan osi lo grandient sa semen ki nou pou fer e ki kalite lagrandisman ki nou kapab agrandir sa semen.  Faz enn sa proze in fini ganny tender.  Kontrakter in fini siny Kontra e resevwar son premye bout peyman.  So i ekspekte demare an Zen, son premye faz pou sa 200met.  Parey mon’n dir pou sa 200met nou’n fini ganny tou wayleave.  6 wayleave ti bezwen an tou.  E la nou pe negosye pou way leave lo kote 2enm faz plito.  Wi main kontrent ki nou’n gannyen se lo kote wayleave pou nou konmans sa semen.  Mersi.

 

MR SPEAKER

Mersi Minis.  Onorab Herminie.

 

HON WILBERT HERMINIE

Mersi Mr Speaker.  Mersi Minis pou larepons.  Wi Minis lo menm laliny ou’n koz lo wayleave.  Prenon kont ki wayleave i en issue ki leve dan bokou proze eski zot Minister pe travay lo en nouvo Polisi ki mannyer nou pou kapab fasilit sa process ganny wayleave?  Sa i enn.

2enm mon ti a kontan Minis donn nou son lopinyon ouswa son prediksyon kan ki dezyenm faz pou kapab konmanse?  Kan ki sa proze, akoz the main aim sa proze se pou konekte Mont Buxton ek Ma Joie par en servis bis e bokou zabitan pe esper sa servis vin into effect.  E osi  dan sa proze eski pou annan bann fasilite tel ki bus shelter, street light eksetera, drenaz ?

E mon dernyen pwen vi ki zot pe fer elarzman sa semen e nou konnen i annan bann pocket later ki kapab tonm dan land bank eski zot pe fer sel konekte sa semen avek sa bann pti pocket later pou nou kapab fer en sel alokasyon an menm tan ki ler sa proze i fini ?  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Polisi regarding wayleave nou napa en Polisi regarding wayleave me selman nou Departman Later i toultan avek Departman Land Transport i toultan an negosyasyon avek sa dimoun ki annan son later prive pou nou kapab ganny wayleave.

2enm faz sa proze nou napa Bidze pou sa lannen, me selman nou pou met li dan Bidze 2020 pou nou kapab kontinyen.  E parey ou’n dir nou ekspekte oubyen nou ti a kontan ki dimoun Ma Joie i ganny en servis bis ki kapab servi sa semen.  Lo kote land bank i pa’n dan plan pou konekte bann land bank. E plan ki nou annan i zis pou sa main semen li menm.  Mersi.

 

MR SPEAKER

Mersi Minis.  Onorab Sandy Arissol.

 

HON SANDY ARISSOL

Mersi Mr Speaker.  Bonzour Minis avek ou delegasyon.  Bonzour zabitan Mont Buxton.  Welcome dan nou Lasanble Nasyonal.  Mr Speaker mon pou siport kestyon anmennen par Onorab Wilbert Herminie parski proze ki zot pe koz lo la i tonm dan Rezyon Santral (1).  E mon bezwen dir poudir Rezyon Santral (1) i en rezyon konsey rezyon ki pe fer en travay ekselan.  E mon  ti a kontan profite dir ki bann manm konsey rezyon zot pe travay fantastik e nou annan en bon korperasyon.

Alor kestyon ki Onorab Herminie pe anmennen an relasyon avek sa proze semen mon ti a kontan dir Minis poudir – mon ti a kontan dir ek Mr Speaker poudir ti annan en meeting ki ti ganny fer en meeting piblik ki ti ganny fer e kantite dimoun ti demann kestyon an relasyon avek sa.  Me lo menm kestyon ki Onorab Herminie in demande Minis mwan mon krwar ki mon ti pou al demann Minis an relasyon avek Polisi me Minis in dir zot napa en Polisi.  Be mon ti a kontan demann Minis anvi ki zot napa en Polisi kantite letan i pran par egzanp letan en dimoun, ou zot in negosye avek en propriyeter pou zot kapab rantre lo son later pou zot fer en serten proze e li i ekspekte ganny en keksoz an retour avek Gouvernman.

Par egzanp si in donn en bout son later i ekspekte ganny en miray kot zot in negosye en miray, in negosye en rigol oubyen in negosye en layby.  Kantite letan i pran sa Minis?

Mon pe dir sa parski mon konn en madanm Patricia ki mon konn li byen li in donn en bout son later e Gouvernman ti promet li en miray.  E ziska ozordi madanm Patricia in donn son later semenn pase, me li prezan i pe ganny afekte avek tou delo ki sorti lo semen piblik e tou sa delo i rantre dan son lakour.  Prezan finalman letan ou koz ek bann dimoun zot dir ou get sa, ‘’Plito mon ti’n gard mon later pou mwan, mon ti’n anvoy tou dimoun deryer Ste Anne!  Me la ozordi i santi li afekte parski li i pa’n ganny rigol e tou delo pe rantre dan son lakour.  So ki kantite letan i pran Minis pou bann dimoun ki’n negosye an bonne fwa zot in negosye zot propriyete me an retour zot pa ganny nanryen?  Kantite letan i pran pou sa bann negosyasyon ? Mersi bokou Minis.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Normalman Onorab sa bann keksoz koumsa ler i pe ganny negosye, si i ganny negosye dan sa proze li menm nou fer li dan sa proze.  Si en request ki vin apre then i en keksoz ki pran en pe letan.  Akoz pou rezon bidzeter.  Ou bezwen gete si dan sa proze kekfwa i annan en savings, prezan pou nou kapab enkli sa ladan.  Me si en negosyasyon ki’n fer ki avan proze in konmanse e in ganny enkli dan sa proze i sipoze fer dan sa proze menm.  Mersi.

 

MR SPEAKER

Mersi Minis.  Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun.  Mon premye kestyon i ava al en pe avek sa ki Onorab Arissol in leve kestyon delo lo sa semen.  Dan sa krwaze konmsi lo finisyon sa semen, kot i pran krwaze la avek Mont Signal i annan lafanmir Cesar ki reste par anba.  E la i annan en problenm delo ki pou des années e des années zot in tap laport tou Lotorite konsernen ziska ozordi pa ankor ganny rezourd.  Alor mon ti ava kontan konnen ki sa proze pou pran kont sa  problenm ?

Dezyenmman Mr Speaker Minis in mansyonnen poudir depi 2016 sa proze in ganny konsevwar.  2016.  Me nou a rapel ki an Mars 2017 son predeseser Mr Bastienne ti vin isi an Mars 2017 e dir avek nou si zot ganny larzan an 2018  proze a konmanse. I ti dir nou sa letan ki proze ti pou kout R1.5milon.

Larzan in vini dan Bidze 2018 me solman nou vwar ki tender i pa’n ganny mete e fermen ziska Septanm 2018.  Nou pe koz 9mwan la.  E sa Kontrakter ki ti pou gannyen i annan li 10mwan pou fer sa proze me nou vwar poudir nek an Zen la ki pou konmanse. An Zen i pou konmanse e faz 2 i dir nou poudir be nou pa konnen si nou pou ganny larzan petet nou a met dan 2020.

So mon dezyenm pwen Mr Speaker mon anvi ki Minis i dir ek nou si vreman wayleave, ki problenm?  Ouswa si vreman i zis Gouvernman ki’n dousman lo sa proze?  Parski dimoun e Onorab Herminie in dir sa.  Dimoun i anvi sa proze vini. Me solman nou annan en problenm la.   Akoz ler meeting piblik ti fer ki Onorab Arissol in koz lo la in prensipalman bann dimoun Ma Joie ki’n vin sa meeting.  Bann dimoun ki reste anler dan bout ziska anba kot Minis i reste laplipar zot pa ti la.

So i annan menm si sa proze in ganny konsevwar depi 2016 mon krwar Gouvernman i pa’n vreman fer keksoz pou enplik kominote swa pou anmenn sa meeting pli pre avek zot, swa pou vreman eksplike ki pe arive akoz depi 2016 ziska la mon vwar i annan en problenm lo kote Minister Mr Speaker.  Sa pwen  ki mon anvi fer. Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Lo kote Mont Signal kot la fanmir Cesar, mon ganny enformen ki sa semen i bezwen ganny re fite akoz i reste dan en puddle toultan.  E sa ti form parti sa proze li menm li ankor.  So i pou form parti dan dezyenm faz sa proze.  Me selman i annan en solisyon tanporer ki SLTA pe konsidere pou li kapab enplimante.

E dezyenmman lo kote wi nou’n ganny en pe retar lo wayleave me osi in pran letan osi pou Gouvernman pou design sa proze, fer en pe legzersis lo sa proze li menm pou li kapab met sa proze an plas. E bann dernyen lannen ki nou’n fer sir ki sa proze i demare.  Mersi.

 

MR SPEAKER

Mersi Minis.  Onorab Henrie.

 

HON GERVAIS HENRIE

Vitman akoz Minis in dir i annan en solisyon tanporer pou sa sityasyon la kot la fanmir Cesar, so si nou ti ava kapab konnen ki sa ki en mannyer nou a kapab keep – zet en regar lo la e asire ki sa solisyon tanporer i ganny fer?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi.  Teknisyen i dir mon zot sipoze pe al re fit sa semen avek en pe koltar.  Mersi.

 

MR SPEAKER

Mersi Minis.  Onorab Audrey Vidot.

 

HON AUDREY VIDOT

Mersi Mr Speaker.  Bonzour Mr Speaker, Minis ek ou delegasyon, tou Manm Onorab.  Bann dimoun dan galeri ek bann dimoun ki pe ekout nou.  Minis mon kestyon i premyerman prenon kont bann devlopman pou elarzi semen Ma Joie, eski zot pe kontinyelman annan sa diskisyon avek bann lezot Departman Gouvernman ki responsab pou bann devlopman proze, ki kapab bezwen e bann bon drenaz letan zot e elarzi bann semen, spesyalman Ma Joie, ki en distrik ki bokou fwa i annan sa issue ?

E eski ou Minister oubyen baze lo zot bann konsiltasyon pou sa zafer wayleave, eski i annan bann demann letan bann dimoun i annan bann exchange ki zot anvi pou Lagreman pou sa bann semen pou ganny pran zot bout later pou elarzi.

Eski zot pe fer zot pey en dokiman oubyen ekri zot propozisyon pou fer sir ki i annan rikord, ki demen letan proze i ganny fer zot pa dir mon pa ti demann sa mon ti demann sa?  Pou avoid apre ki ou vwar case i dormi lanmenm oubyen i bezwen al ankor!   Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Pou reponn kestyon Onorab, dan sa proze li menm wi i annan bann diferan konponan parey mon’n dir ki enkli drenaz osi.  E nou travay pros sirtou ler i go through planning application kot tou sa bann proze i ganny share oubyen diskite avek bann lezot stakeholders ki nou annan, par egzanp si drenaz i pou al kot lanvironnman.  E i annan sa sub committee osi utility sub committee ki osi ganny en kopi sa bann aplikasyon e i diskite ansanm avek tou bann stake holders ki pou enkli dan sa proze.  Lo  kote wayleave wi ler nou fer negosyasyon wayleave i annan en dokiman ki no fer sinyen avek bann kondisyon lo la ki sa bann dimoun i oule.

So kot nou ganny tou keksoz an ekri akoz parey ou’n dir vre ki i annan bokou ka dan lepase kot nou’n negosye apre i annan bann dimoun ki come back ki dir ou’n encroach lo son later kan ti annan en Lagreman petet verbal tou ki ti agree pou fer semen.

E nou pe ganny bokou bann ka ki pe retourn kot nou la kot Minister Later so nou ankouraz tou bann stake holders pou ler zot fer negosyasyon zot met to keksoz an ekri e sa dimoun osi ki i sinyen konmkwa i agree avek sa bann kondisyon.  Mersi.

 

MR SPEAKER

Mersi Minis.  Onorab Philip Arissol.

 

HON PHILIP ARISSOL

Mersi Mr Speaker.  Eski Minis i kapab dir sa Lasanble si son Minister i annan drwa divert en semen apre negosyasyon e san permisyon propriyeter?  Mersi.

 

MR SPEAKER

Eski i annan pou fer avek sa semen Ma Joie?  Bon zis nou bezwen realize ki kestyon i spesifik lo sa semen an koneksyon Ma Joie avek Mont Buxton.  Eski  i annan  relevans ek –  Minis.

 

MINISTER PAMELA CHARLETTE

Mr Speaker normalman Gouvernman i pa sipoze divert en semen san permisyon en land owner.  Parey mon’n dir oparavan i annan bann negosyasyon ki nou fer, i annan bann diskisyon ki nou fer e vwala lapros ki nou pran.  Mon pa konnen ki ka spesifik ki Onorab i annan me selman normalman i sipoze nou divert en semen avek lotorizasyon land owner unless ki sa later i pou Gouvernman.  Mersi.

 

MR SPEAKER

Mersi Minis.  Onorab Paul Ernesta.

 

HON PAUL ERNESTA

Mersi Mr Speaker.  Mr Speaker eski Minis i kapab dan son repons kapab eksplike, si pou asire akoz an konesans sa teren laba ou menm ou dir taler son gradient, eski tou bann mezir neseser ki’n ganny fer par egzanp bann survey in ganny fer pou fer sir ki tou bann feature i ganny byen taken into consideration dan son preparasyon sa semen?  E osi ki klas Kontrakter ki zot pe servi akoz nou konnen par ler i annan diferan class Kontrakter i pa vin lo bon kalite apre i anmenn pa mal difikilte, eski Minis i kapab dir nou ki class bann Kontrakter zot pa pe servi dan sa proze?  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Nou’n pran en pozisyon kot tou nou bann proze konstriksyon sirtou lo kote semen nou fer en detay topo survey. Sa i ed nou pou nou kapab fer byen bann aliman semen.  So tousala i ganny konsidere dan sa proze.  E pou d2enm kestyon Kontrakter i en class 1 Contractor.  Mersi.

 

MR SPEAKER

Mersi minis.  Onorab Bernard Georges.

 

HON BERNARD GEORGES

Mersi Mr Speaker.  Mr Speaker mon kestyon napa nanryen pou fer avek Mont Buxton.  Mon ti a kontan Minis eski ou ti a kapab re asir nou ki en zour nou pou ariv en sityasyon kot ler ou reponn en kestyon ki’n ganny demande bomaten ou pa bezwen donn sa de landrwa, dekrir sa de landrwa konman depi gran kontour ziska kot bis i vire kot bin.  Kot nou ava annan en bann fason pou nou kapab dekrir nou pei dan en fason pli apropriye ki sa enn ?  Oubyen dan en fason pli apropriye ki parti US ler ti ankor SPPF ti fer dan mon distrik kot zot ti envit zot bann aktivis en fonksyon anba pye ponm  lo Glacis ?  Mersi.

 

(laughter)

 

MR SPEAKER

Mersi Onorab.  Minis.

 

MINISTER PAMELA CHARLETTE

Mr Speaker malerezman sa semen napa en non.  So se bann keksoz – mon pou bezwen dekrir li par bann keksoz ki egziste la e mon pa oule servi non okenn dimoun pou dir kot ‘’en tel.’’  Mon krwar i pli annan ethical pou mon dir kot ‘’en tel.’’  Akoz la nou pe koz en proze semen Gouvernman.  So vwala mon pe dekrir li dapre sa bann spesifik karakter oubyen spesifik keksoz ki egziste.  Mersi.

 

MR SPEAKER

Mersi Minis.  Onorab Jude Valmont.

 

HON JUDE VALMONT

Mersi Mr Speaker. Mon ti a voudre demann Minis akoz i annan sa size konpansasyon in ganny touse zis pou demande konpansasyon, akoz i pou annan negosyasyon ek sa bann dimoun pou konpansasyon.  Mwan mon ti a voudre konnen kantite, si zot in agree pou compensate en dimoun, kantite letan i pran pou compensate sa bann dimoun? Mon dir sa akoz diferan lenstans in ariv sitasyon ki en dimoun in siny kek wayleave an ekspektasyon kek benefis finansyel zot in agree pou donn konpansasyon me selman mwan – zis en legzanp Mr Speaker.   Dan matata Pointe Larue i annan dimoun in espere omwen 2an, 3an still larzan pa ankor gannyen so mon ti a voudre konnen dan lespri pou fer keksoz bouz devan, bouz pli vit. E pou dimoun annan sa garanti ki at least pou donn zot sa wayleave.  Alor mon demann zot kantite letan i pran pou donn sa konpansasyon lo  –

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Pou konpansasyon i tou depan lo ki kalite konpansasyon sa dimoun in demande.  Si par egzanp in demann en bout later nou bezwen espere  kot i annan en bout later pou  donn li oubyen al rode.

Lo kote finansyel osi nou annan en Bidze, i pou tonm anba land acquisition.  I annan en Bidze ki tonm anba land acquisition e dapre nou Bidze nou gete ki mannyer nou kapab rekonpanse.  E si i en amount ki en pti pe egzorbitan oubyen ki en pti pe gro sa i al direkteman kot Finans.  So i pou depan kote Bidze i sorti.  Mersi.

 

MR SPEAKER

Mersi Minis. Onorab Flory Larue.

 

HON FLORY LARUE

Bonzour tou dimoun mersi Mr Speaker.  Mr Speaker mon ti a kontan demann Minis atraver ou la mon krwar in ganny en loportinite pou li kapab donn sa semen en non.  Mon byen kontan ki Onorab Georges in fer sa monte.  Mon krwar Minis i merit pran loportinite pou donn sa semen en non koumsa i ava annan en lot pwen referans.  Me selman lo  kestyon lefe ki nou pe koz lo wayleave e Minis in aksepte ki wayleave i enn bann pli gran problenm pou devlopman bokou semen dan Sesel antye. E lefe ki i vin vreman difisil konmela pou konvenk dimoun pou donn way leave e Minis in  dir nou napa en Polisi.  Eski i kapab eklersi nou si zot pe travay lo en Polisi pli kler?  E si  i kapab dir nou  dan sa dokiman ki dimoun i sinyen egzakteman kwa ki zot enkli dan sa dokiman akoz mon konpran i ase basic?  So si i ti kapab dir mwan ki si sa ki i enkli ladan?

Eski i enkli valer?  Eski i enkli surveyed area ki  donn point to point ki si sa ki sa dimoun pe give up ?  Eski i kler ki sa valer ki zot in donnen i give up against kwa?  Konmsi ki si sa ki annan dan sa Lagreman wayleave?  An pli ski sa Mr Speaker mon ti a kontan demann Minis letan Gouvernman in fini pran sa bout later pou li fer semen konbyen tan i pran zot avan zot transfer – si zot fer bann transfer pou sa bann later ? Akoz i arive ki dimoun i fer devlopman. Parey nou vwar semen i pran 3 a 4an pou fer.  Sa dimoun i anvi vann son later, i vwar li dan en difikilte akoz en bout later pa pou li in donnen i pe vann.  I pa konnen kote.

E sa bann difikilte i vin en problenm pou en dimoun prive.  Me solman dan semen Bougainville i annan Mrs Mondon ki ankor pe esper zot pou fer son miray e i ti a kontan mon met sa devan. Mon krwar  i en pwen  ki nou bezwen regarde i pas 2an.  Mersi.

 

MR SPEAKER

Mersi Mon krwar zot tou pe sey fer rantre en pti bout dan zot distrik.  Mon ava donn Minis la parol.  Minis.

 

MINISTER PAMELA CHARLETTE

Mersi Mr Speaker.  Mon a pran premye kestyon lo sa Lagreman.  Lagreman i en pe i straight forward.  Nou demann li son permisyon, nou demann sa dimoun son permisyon pou nou akse son propriyete e osi nou dir li met son bann kondisyon. E osi ki i pe ekspekte e osi deskripsyon sa bout semen ki nou pou pran.  Longer, larzer e bann keksoz koumsa.  Avan ki – lo kote ler en konpansasyon, nou bezwen par egzanp si ou pe demann en lot bout later nou pou bezwen al survey.    Nou bezwen survey son later, osi fer en konpansasyon baze lo sa amount ki i pe demande.  Lo kote Mrs Mondon si nou ti kapab ganny plis detay lo sa case akoz i en case spesifik, Mr Speaker.

 

MR SPEAKER

Mersi.  Minis mon krwar en pti bout lo konbyen letan i pran pou transfer?  Si Gouvernman in pran sa bout later oubyen si sa dimoun in donn sa bout later Gouvernman.  Konbyen letan i pran pou transfer ?

 

MINISTER PAMELA CHARLETTE

Mr Speaker apre ki bann, ler i annan bann sityasyon koumsa i pou bezwen pas avek Departman Later kot Minister e la i annan ban negosyasyon ki ganny fer.  I annan bann survey ki pou bezwen ganny fer.  E laplipar letan survey i pou pran ou en detrwa mwan pou kapab fer akoz zot fer propozisyon, i bezwen go through Planning approval.  E i bezwen konplet sa prosedir avan i bezwen anvoy kot Registrar.  I annan en prosedir osi kot Registrar pou anrezistre pou li kapab ganny transfer son later.  Mersi.

 

MR SPEAKER

Mersi Minis.  Onorab Larue.

 

HON FLORY LARUE

Mersi Minis pou larepons.  Mersi Mr Speaker.  Mrs Mondon i premye lakaz an montan letan ou pas sa semen Bougainville son miray ti grennen e Minister i very aware of sa case akoz son miray ti grennen e  son lakaz i an danze.  Me solman lo kote, lo kote – mersi Mr Speaker.  Lo kote sa Lagreman wayleave Minis sanmenm sa bi mon kestyon.  Lefe ki i en dokiman sitan senp e ou Minister pe rankontre sitan bokou difikilte, eski pa’n ankor ler pou zot re regarde ? Akoz pou ou fer semen ou bezwen fer survey.  Si ou fer survey ou bezwen vwar propriyete lekel ki sa semen. E sa dimoun ki  pe fer survey i kapab en sel kou donn en approximation kote sa semen pou pase lo later sa dimoun e demark li.  Si nou sey fer tou an men tan i pa tard sa dimoun e i pa tard Gouvernman.

Straight away  sa dimoun i konnen kwa ki i pe give up pou  benefisye kominote.  Mon santi ki lefe ki sa dokiman i sitan senp nou vwar dimoun pe esper plis sa apre proze letan tou keksoz i kapab ganny fer ansanm letan proze pe bouze.  Mersi.

 

MR SPEAKER

Mersi Onorab.  Minis Komanter.

 

MINISTER PAMELA CHARLETTE

Mersi Mr Speaker.  Onorab kekfwa i krwar poudir i vreman – prosedir i vreman senp me selman legalite keksoz ou bezwen fer li dapre prosedir.  Me mon take note ou konsern me selman mon bezwen re emphasize ki survey i bezwen ganny fer pou nou kapab demarke kote sa – nou pou pran son later.  E sa i en prosedir ki pran pa mal letan.  Pou le moman la ler mon pe gete lo progranm nou survey nou pe pey dimoun pou fer overtime pou nou kapab met sa bann sityasyon. So vre i pran en pe letan, nou rekonnet sa.

E osi lo kote dokiman li menm li nou pe fer fason e sa nou bezwen travay avek AG pou li kapab ranforsi en pti pe sa dokiman ki nou annan.  Kekfwa re vwar son content en pe pou nou kapab fer li en pti pe  pli robust.  Mersi.

 

MR SPEAKER

Mersi Minis.  Vitman Onorab Laure.

 

HON FLORY LARUE

Mersi Mr Speaker.  Mr Speaker eski Minis pe dir nou  ki nou pe ganny sitan retar ek a bann proze akoz Gouvernman i vini i fer en bann promes, me solman napa survey ki’n ganny fer pou back up sa proze letan zot pe fer.  I fer ki in the end Seselwa i ganny promet en keksoz i pas 3/4an zot pa delivre, apre zot vini zot dir i pa ankor fer survey, zot napa proper desen –  Sa ki mwan mon konpran ki Minis pe dir.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker survey i bezwen ganny fer avan ler ki en proze i konmanse. Definitivman, so i pou bezwen ganny fer tou fason.

 

MR SPEAKER

Mersi Minis. Onorab Clifford Andre.  Lo kestyon i spesifik?  Lo Ma Joie Mont Buxton?

 

HON CLIFFORD ANDRE

Wi, wi. Prenon konsiderasyon ki sa kestyon i koz lo semen Mont Buxton e ki Minis in dir bann Lagreman in ganny mete an ekri, bann Lagreman i ganny mete an ekrir e ki depandan lo sityasyon, si en bout  later oubyen konpansasyon, eski Minis i kapab dir nou si Gouvernman dan le fitir letan i fer Lagreman i pou met sa plot number ki pe fer exchange akoz i pou’n fini konnen akoz si i  pa mete; savedir i pe fer en Lagreman ki null and void akoz sa dimoun pa konnen ki i pe gannyen e sa ki fer ki bezwen esper 2an 3an?  E si i konsern larzan,  larzan i deza la pou ki sa dimoun letan sa proze in fini fer i  pa pe espere pou li ganny sa larzan konpansasyon?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr speaker.  Lo kote later si later i available then i fasil pou nou met en plot number.  Me parey mon’n dir dan sityasyon kot nou bezwen rod later, akoz par ler dimoun li menm li ki dir ou kote i anvi par egzanp.  So bann kondisyon ki zot mete so ou pe dir mwan kote ou anvi then nou bezwen ale kot Minister ale rod en bout later dan sa rezyon pou nou kapab donn ou e i annan letan kot later pa ankor ganny survey nou bezwen fer sa bann prosedir avan ki nou met en plot number lo la.

 

MR SPEAKER

Mersi Minis.  Onorab Andre.

 

HON CLIFFORD ANDRE

Wi be se sanmenm sa ki mon pe dir.  Pa fer en dimoun siny en Lagreman ki vid, ki null and void.  Letan i negosye i dir mon le en bout later Au Cap, al fer sa resers, al fer sa survey, rod sa plot number oubyen dir ek sa dimoun napa Au Cap i annan Anse Royale.  Koumsa letan zot pe fer sa Lagreman sa Lagreman i ava annan sa bann kondisyon spesifik ki si pa ganny respekte par enn oubyen par lot parti Lalwa i kapab pran son course oubyen pa ganny sinyen parey Onorab pe dir.  So annou fer sa travay ki i pa vin difisil demen lo – definitivman nou konnen pou annan en lot Gouvernman ki pou vini prezan sa lot Gouvernman i pa ava ganny difikilte ki’n ganny kite pou li. Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr speaker.  Mon konpran largiman Onorab Andre, me selman i pou fer nou louvraz en pti pe pli long, pli difisil e i riske sa proze pa demare osi.  Mersi.

 

MR SPEAKER

Mersi Minis.  Dernyen kestyon lo la.  Onorab Herminie osi ou le anmenn … ok Onorab Egbert Aglae.  Onorab Paul Ernesta.

 

(Interruption)

 

HON PAUL ERNESTA

Mr Speaker mwan mon ti anvi anba Order 56 koriz en misapprehension, kot Onorab Larue ti mansyonn taler case Mrs Mondon ki en zabitan Bougainvile Takamaka.  Annefe son sityasyon li son case in fini take up avek zofisye SLTA ki zot deza annan kontrol lo la zot pe travay lo la.  Mersi Mr Speaker.

 

MR SPEAKER

Ok mersi.  Bon petet bann sityasyon parey, mon ankouraz bann Manm pou nou pa overlap kestyon annou ekrir Minis.  Dan mon sityasyon mon fer sa e mon pe zis partaz avek zot.  Minis i enn bann Minis dan sa Cabinet ki reponn promptly ok?  So pa ezite ekrir Minis e zot a kapab klarifye zot sityasyon.  Mon a donn la parol dernyen kestyon loter kestyon orizinal, Onorab Herminie.

 

HON WILBERT HERMINIE

Mersi Mr Speaker.  Kestyon dernyen lo kestyon orizinal, lo Ma Joie menm, Minis mon kontan ki ou’n dir ki sa semen pou konmanse an Zen.  Bokou zabitan pe esper sa avek pasyans.  Nou ti a zis kontan pou lenformasyon bann zabitan Ma Joie, pou kapab donn nou non sa Kontrakter pou zot kapab konnen lekel sa dimoun ki pe vin fer sa proze dan nou distrik?  E osi mon a pran sa lokazyon pou dir bann dimoun zabitan Ma Joie, pou pran en pe pasyans, vi ki pou annan serten lenteripsyon dan trafik dan sa bann letan, so ki proze i a kapab ganny fer dan en fason efektiv e vit.  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker non Kontrakter se Dubai Civil Engineering.  Mersi.

 

MR SPEAKER

Mersi Minis.  Bon nou’n ariv midi.  Mon sizere ki nou ava Break la e nou ava retournen 2er.  Minis nou ava re vwar ou 2er avek ou lekip pou nou kapab kontinyen kestyon. I reste nou ankor 7 kestyon e mon swete ki nou a kapab fini par 3.30.  Nou ava pran en break e yes Onorab Ferrari.

 

HON JEAN-FRANCOIS FERRARI

Mon ti a kontan demann Lasanble si meeting Departman Foreign Affairs in confirm pou attend?

 

MR SPEAKER

Yes Madanm Clerk in dir mwan ki in fini fer tou kontak e in confirm sa meeting Departman Foreign Affairs avek IAC avek bann Manm ki osi anvi attend.  Ok? Nou ava Break e nou retournen 2er pou kontinyasyon.  ABC pou fer 1 er en kar dan Speaker’s Conference Room.  Wi COGA osi tou, COGA i la midi en kar dan Committee Room 3.  Nou Break, nou retournen 2er.

 

(BREAK)

 

 

MR SPEAKER

Bonn apre midi tou Manm Onorab.  Bonn apre midi tou Minis avek ou delegasyon.  Bon apre midi tou dimoun ki a lekout.  Mon prezant en leskiz pou sa pti retar sa an vi bann Komite ki ti ankor dan miting.  Nou pou kontinyen avek kot nou’n kite bomaten avek kestyon pou Minis Pamela Charlette.  E Minis prezan pe ganny asiste par son lekip ki responsab pou lenfrastriktir avek later e sa se Mr Yves Choppy ki Sekreter Prensipal Striktir, Mrs Fanette Albert Sekreter Prensipal pour Later e Mr Denis Barbe Sekreter Prensipal pou Housing.  E touzour an asistan Minis i Special Advisor Mr Gerard Hoareau.  Minister ankor bonn apre midi avek ou delegasyon e nou ava kontinyen nou travay lo Order Paper.  Mon ava pas laparol avek Onorab Jany Letourdie pou li pran son kestyon.   Onorab Letourdie.

 

HON JANY DE LETOURDIE

Mersi Mr Speaker.  Bonn apre midi tou dimoun.  Kestyon i al koumsa.  Eski Minis pou Lakaz, Later, Lenfrastriktir e Transpor lo Later i kapab dir avek sa Lasanble ki prosedir son Minister i annan an plas, pou siperviz bann sit konstriksyon, pou asire ki i napa tapaz ki pou disturb dimoun dan vwazinaz, sirtou pandan ler ki pa sipoze annan okenn travay tel ki Dimans e apre ler dan lasemenn?   Mersi.

 

MR SPEAKER

Mersi Onorab.   Minis.

 

MINISTER PAMELA CHARLETTE

Mersi Mr Speaker.  Mersi Onorab pou ou kestyon.  Mr Speaker Lotorite Plan, i travay kot a kot avek Minister Lanvironnman, kot i konsern bann kontrakter ki travay apre ler oubyen Dimans ek konze piblik.  Laprouvasyon pou konstriksyon i ganny donnen ansanm avek lotorizasyon lanvironnman pou tou proze vi ki plan i ganny soumet avek Lotorite Plan e answit i ganny sirkile kot lezot Lazans konsernen.  kondisyon ler travay lo okenn devlopman i ganny mete par Minister ki responsab pou Lanvironnman.  Apre ki plan in ganny sirkil kot sa Minister en letid lenpak pou Lanvironnman i ganny fer.  Apre ki sa letid i ganny fer e sa lotorizasyon lanvironnman i ganny donnen e i annan bann kondisyon spesifik ki ganny atase avek.  Enn parmi sa bann kondisyon i annan pou fer avek ler travay.

Sa kondisyon i spesifye ler travay pandan bann zour lasemenn 8er ziska 4er e Sanmdi 8er ziska 1er apre midi.  Fodre fer remarke ki dapre sa kondisyon sa devloper ouswa Lakonpannyen Konstriksyon pa sipoze antreprann okenn louvraz dan Dimans, ouswa pandan bann zour konze piblik oubyen an deor sa bann ler ki’n ganny donnen.  Sa bann kondisyon i ganny mete anliny avek Lalwa Proteksyon Lanvironnman date 2016.  I annan lokazyon kot travay i bezwen ganny fer an deor sa bann ler, pou rezon teknik tel ki met beton.

Sa louvraz i bezwen ganny fer en sel kou ziska i fini la bann kontrakter oubyen devloper i bezwen demann lotorizasyon kot Departman Lanvironnman pou en tel travay e osi responsabilite i lo zot pou avertir vwazen omwen 2 zour davans pou ki sa bann vwazen zot kapab fer zot laranzman pou minimiz lenkonvenyans.

I osi annan 2 ka kot Minister Lanvironnman avek Lotorite Plan i ganny demann dan bann site i pa neseserman rezidansyel pou travay kontinyen ziska plitar e la Departman Lanvironnman i pran konsiderasyon sa bann demann e lo en baz ka par ka baze lo merit.  E apre ki in satisfe ki sa bann travay pa pou koz lenkonvenyans dan zalantour.  Kot sa bann ka ki egziste bann dimoun dan zalantour zot ganny konsilte avan ki desizyon i ganny pran.  Bann zofisye i esey zot mye pou siperviz bann sit konstriksyon pou fer sir ki travay i ganny fer dapre bann kondisyon ki ganny donnen.  Lotorite Plan ek Lanvironnman, i osi annan zofisye ki lo standby oubyen ki fer patrol lo bann site konstriksyon detanzantan pou get compliance.

Me i sitan annan devlopman partou ki nou pa kapab pas partou an menm tan.  Alors nou depan lo bann zabitan zot menm enkli Ladministrasyon Distrik pou alert nou letan i ler travay pa pe ganny respekte e dimoun pe ganny afekte sirtou nou war sa i komen dan wikenn.  I osi annan laliny direk Greenline ki a dispozisyon manm piblik pou fer rapor letan bann tel lenkonvenyans i ganny obzerve.

Fodre fer ganny resorti ki i devwar sa devloper e osi sa Lakonpannyen Konstriksyon pou fer sir ki sa kondisyon i ganny swiv a tou moman.  Dan bokou lenstans Lotorite Plan e  Departman Lanvironnman, i resevwar konplent atraver telefonn, let, email oubyen atraver laliny Greenline. Ler sa konplent i ganny resevwar sa zofisye ki sa konstrir i tonm dan son rezyon oubyen sa enn ki lo standby i al lo sa sit konstriksyon e pran aksyon.

Sa konplent i osi ganny e apre ganny transfer dan seksyon ki fer bann letid lenpak lo lanvironnman pou Minister pou lenvestigasyon.  Souvandfwa en kosyon verbal i ganny donnen, si travay vre pe ganny fer an deor kondisyon ler travay ki’n ganny donnen, e la dan laplipar letan bann travayer i ganny demande pou arete travay imedyatman.  Parfwa Lapolis i ganny demande pou asiste ler i neseser.

Lotorite Plan e Departman Lanvironnman i osi kriy sa bann ki swadizan pe kre sa lofans kot son lofis, kot sa sityasyon i ganny diskite avek swa sa devloper, ouswa sa Lakonpannyen Konstriksyon.  Si sa sityasyon i ganny repete Departman Lanvironnman i fer sorti en enforcement notice lo sa developer oubyen sa lenvestiser.

I bon fer remarke ki avan ki okenn notis i ganny servi parfwa i neseser pou ki en lenvestigasyon endepandan i ganny fer lo sa sityasyon.  Si apre ki sa enforcement notice i ganny donnen keksoz pa amelyore e sa sityasyon i persiste,  Departman Lanvironnman atraver son Lalwa i kapab fer en ka pou anmenn Ankour.  Mersi Mr Speaker.

 

MR SPEAKER

Mersi Minis.  Onorab Letourdie.

 

HON JANY DE LETOURDIE

Mersi Minis pou ou bann larepons.  Minis ou’n nonm bann ler lasemenn ou’n dir 8er 4er, apre Sanmdi 8er – 1er be mon pan tann ou nonm Dimans.  Eski ler sa bann dimoun i demande ki zot bann travay ekstra, eski zot demann ou Dimans osi?  Akoz laplipar letan bann konplent ki pe ganny fer i plito dan Dimans.  E ki rekour sa bann dimoun ki pe fer sa konplent ki kontinyelman repete zot annan?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Dan Dimans i parey dan Public Holiday so savedir pa bezwen pa sipoze pe travay.  E ki rekour bann dimoun i annan i senpleman i call i kapab call Greenline akoz parey mon dir nou osi kot Planning Authority nou annan en tim ki nou met standby dan rezyon an ka i annan bann sityasyon, kot si zot ganny en phone call zot kapab vini vin regarde e then fer le neseser pou pran aksyon parey mon dir.  Mersi.

 

MR SPEAKER

Mersi Minis.  Onorab Stephen Pillay.

 

HON STEPHEN PILLAY

Mersi Mr Speaker.  Bonn apre mdi a tous.  Mr Speaker mon ti a kontan demann Minis en klarifikasyon kot zot pe koz konstriksyon.  Nou pe koz bann gro proze e byensir sa bann provizyon i apply osi pou bann konstriksyon prive.  Parey si ou pe fer en lakaz kot mon eski ou pe met en restriksyon parey lo mon parey drile kot mon fer tapaz Sanmdi/Dimans oubyen i annan 2 kalite grad ki nou pe koz lo la lo zafer disturbance dan lanvironnman?  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  I napa okenn diferans. Menm si prive osi i annan en kondisyon ler Planning i anmenn son planning approval i annan en kondisyon ki i met avek.  Mersi.

 

MR SPEAKER

Mersi Minis.  Onorab Paul Ernesta.

 

HON PAUL ERNESTA

Mersi Mr Speaker.  Mr Speaker, Minis, delegasyon, tou bann koleg Onorab bon apre mdii.  Mr Speaker Minis dan son repons in dir ki bann dimoun i aksyonn lo bann case konman zot ganny bann call.  Ki kantite letan ki zot pran par egzanp si sityasyon i ariv Dimans, eski deswit menm zot mont on site swa zot vin apre son lanmen ki petet by then keksoz in fini pase?  Apre ou’n nonm Greenline dir nou ki limero ki bann dimoun i kapab call pou kapab ganny kontak?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Parey mon’n dir sa dimoun i lo standby nou met zot dan rezyon.  So i pran enpe letan pou zot kapab deplase me selman zot annan transpor ek zot so zot sipoze menm zour arive pou get sa sityasyon.  Lo kote nou green line i 272..21..11.  Mersi.

 

MR SPEAKER

Mersi Minis.  Onorab Audrey Vidot.

 

HON AUDREY VIDOT

Mersi Mr Speaker.  Minis letan ou’n mansyonn zot bann zofisye i on call par egzanp i annan diferan konstriksyon parey Onorab Pillay ti pe mansyonnen.  I annan de ka kot petet i annan bann proze mazer ki swa lo kote Minister menm pe fer, eski i posib pou petet pou revwar avek zot  bann project officer ki siperviz bann proze dan bann distrik, espesyalman si i bann proze Gouvernman, pou ensure ki letan bann distrik i met bann keksoz devan zot fer sir zot kontinyelman annan sa konsistan pou monitoring sa bann kontrakter si zot in respekte bann konplent ki’n vin devan zot?

Apre i annan sa bann konstriksyon ki dan bann housing estate petet i annan serten dimoun ki pe fer serten devlopman kot son lakour, e parfwa bokou fwa i annan ki pa pe respekte sa Lagreman ki zot ti sinyen avek sa letan SHTC enkli ki la prezan i tonm anba PMC.

Petet atraver ou Minister, si i ti a byen zot donn sipor PMC pou annan plis sa ledikasyon avek kominote, pou ensure ki bann dimoun i respekte bann Lagreman ki zot ti sinyen avek sa Lazans.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Lo kote bann housing estate wi nou gannyen detrwa konplent ki nou fer PMC li menm li al investigate e laplipar letan sa bann dimoun pe fer en pti konstriksyon menm kot zot so PMC i asize ek zot i dir diriz zot ki mannyer pou fer sa.  Nou reste angaze planning avek PMC i reste angaze pou zot edik dimoun sirtou bann kontrakter ler zot pe fer bann devlopman dan housing estate sirtou.

Lo kote bann proze kot nou met responsabilite avek liability lo bann kontrakter e dan zot dan landrwa fizik Fidic i annan en dan zot red book i annan sa bann kondisyon e i en keksoz ki zot sipoze pe comply avek.  So anba sa nou kapab servi sa Lalwa pou nou aksyonnen.  Me mon rekonnet ou sizesyon pou nou sirtou bann project managers ki travay avek nou, pou met en pti pe plis koudey lo la.  Akoz pa toultan ki project managers osi i lo site ; si petet nou pou fer zot travay en pti pe dan wikenn osi me sa nou pe les avek Planning Authority vi ki deza i annan en setup dan plas.  So me selman nou ankouraze si zot annan okenn konsern zot call nou e nou fer Planning par egzanp al tyeke.

E toultan fer sir ki bann zofisye i deplase pou tyeke si vreman investigate en pe si vreman sa bann keksoz pe arive.  Mersi.

 

MR SPEAKER

Mersi Minis.  Nou a pran prosen kestyon.  Onorab Gervais Henrie.

 

HON GERVAIS HENRIE

Mersi Mr Speaker.  Bonn apre midi tou dimoun.  Eski Minis pou Labita, Later ek Lenfrastriktir avek Transpor lo later i kapab dir avek sa Lasanble konbyen bann pti lakaz sosyal ki’n ganny konstrir dan pei dan lannen 2017 e 2018? Kote sa bann lakaz i été?  Ki kantite larzan in kout Leta pou fer sa bann lakaz e lekel bann kontrakter ki’n ganny Kontra pou fer sa bann lakaz?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  An vi ki kestyon pa defini klerman kwa ‘’pti lakaz sosyal’’, bann detay dan repons i baze lo bann proze ki’n ganny antreprann anba nou laliny Bidze Special Housing.  Special Housing Mont Plaisir Special Housing Project e serten proze rekonstriksyon ki Lazans Proteksyon Sosyal oubyen ASP i refer avek nou Minister pou antreprann.

Pou kestyon (a) ek (b) pou lannen 2017 Minister ti konplent konstriksyon 5 unit lakaz.  Sa 5 lakaz ti 1 Anse Aux Pins, 3 Mont Buxton, 1 Port Glaud.  Ti annan 12 lot proze pou konstrir nouvo lakaz ki ti aktiv.  Sa bann proze ki ti aktiv ti 3 Les Mamelles 1 Anse Royale, 4 Baie Ste Anne Praslin e 4 Grand Anse Praslin.  Pou lannen 2018 Minister ti konplet konstriksyon 8 unit lakaz. Sa 8 lakaz, ti 2 Les Mamelles, 1 Anse Royale, 3 Grand Anse Praslin, 1 Anse Etoile, 1 Baie Ste Anne.

Ti annan 16 lot proze pou konstrir nouvo lakaz ki ti aktiv. Sa bann proze ki ti aktiv ti 1 Plaisance, 1 Anse Royale, 5 Pointe Larue, 1 Grand Anse Praslin, 1 Les Mamelles, 4 Baie Ste Anne Praslin, 1 Cascade, 1 Rivière Anglaise e 1 La Digue.

Pou kestyon (c) sa 17 proze  ki ti aktiv an 2017 se a dir sa 5 lakaz ki ti konplete ek sa 12 ki ti an mars Gouvernman in depans R2.3milyon an 2017.  Kou total sa 17 proze i estimen a R8.49milyon.  Kou total proze pou sa 5 lakaz ki ti konplete an 2017 ti R3.2milyon.  Dan ki Gouvernman in kontribye R1.64milyon an vi serten sa bann proze ti annan konponan co-financing sorti kot bann kliyan zot menm.  Pou sa 24 proze ki ti ariv an 2018 ; setadir sa 8 lakaz ki ti konplete, e sa 16 ki ti an mars, Gouvernman in depans 6.66milyon an 2018.  Kou total sa proze i estimen a 15.65milyon.

Kou total proze pou sa 8 lakaz ki ti konplete an 2018, ti 6.9milyon, dan ki Gouvernman in kontribye 5.66milyon an vi serten parey mon’n dir oparavan sa bann proze ti annan konponan co financing sorti kot bann kliyan.  Pou kestyon (2) kontrakter pou bann proze i ganny selekte par prosesis tender.

Pou sa 17 proze konstriksyon sa lakaz pou 2017 sa bann kontrakter swivan ki’n ganny Kontra pou diferan proze ; Delcom Builders, Al Alim Limited, Keven Andrade, Southern Builders, Furi Construction, Phillip Herminie, Edley Enterprise, J & C Contractor, Felix Mathiot.

Pou sa 24 proze konstriksyon lakaz 2017 sa bann kontrakter ki’n ganny Kontra pou diferan proze Charles Builders, Southern Builders, ARB Construction, Ronford Construction, J & C Construction, Edley Enterprise, O Nivo Construction, Azemia Construction, Basil Construction, Mountain Delight, Neddy Radegonde, Green Team Construction, Leslie Ally, Rhodes Construction, Premium Design and Build, Palm Construction.  Mersi Mr Speaker.

 

MR SPEAKER

Mersi Minis.  Onorab Henrie.

 

HON GERVAIS HENRIE

Mersi Mr Speaker.  An vi ki i annan en long lalis distrik in benefisye,  mon anvi ki Minis i dir avek nou, ki mannyer seleksyon i ganny fer e par ki pou swazir lekel ki benefisye anba sa progranm special housing?  E dezyenmman anvi ki i deza annan en progranm par egzanp si nou pran 24/24/24 pou mon sa i still form parti progranm social housing Gouvernman.  Donk ki diferans vreman i annan dan sa ki ou’n fek donn nou lesplikasyon lo la avek par egzanp progranm 24/24/24 Gouvernman ki diferans prensipal ki i annan dan sa de progranm?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mon a konmans avek ou dernyen kestyon.  Bann proze ki’n kalifye pou sa bann lasistans i plito bann proze konstriksyon nouvo lakaz ouswa ekstansyon pou bann fanmir, ki apre means test nou war zot pa kapab finans zot proze an antye.  Zot bezwen lakaz i tel ki sa form lasistans i meyer fason asiste zot, apard ki lezot progranm lakaz ki Gouvernman i annan.  Lasistans pou rekonstrir bann lakaz ki’n ganny detri par dife, kot finansman bann viktim pa kouver kou total zot proze.

Minister i osi fer rekonstriksyon ouswa reparasyon serten lakaz ki annan problenm striktirel.  Lakaz ki ti ganny konstrir par Gouvernman dan lepase.  Anba sa vot pou 2017 ti annan 4 proze dan sa kategori.  Pou 2018 ti napa proze.  Fodre note ki Minister ti napa Polisi detaye previously pou sa bann special housing. 

Me an Oktob 2018 nou ti aprouv en nouvo Polisi pou gid bann proze ki ganny finanse anba sa laliny Bidze avek bi pou mye zer e kontrol depans ek lekspektasyon kliyan.  E sa prosedir ki’n ranplas se ki i ganny rekomandasyon i sorti kot distrik osi Poverty Alleviation.  E osi la pou le moman ki nou pe fer se i go through en vetting process e through sa vetting process, then apre through Local Government apre i vin kot nou pou lenplimantasyon.  Apre main diferans se ki sa bann proze i lo later prive i pa lo later Gouvernman parey en proze 24/24/24 ki i en proze Gouvernman an total.  Mersi.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker mon ti a kontan demann Minis ki son Minister pe fer, pou ki nou kapab sirtou sa kategori, ki zot pe sey fer pou zot akseler devlopman bann proze lakaz, sirtou dan bann rezyon kot ou annan  o dansite dimoun, sirtou parey par egzanp si nou pran bann landrwa parey English River nou pran bann landrwa parey Bel Air, nou pran bann landrwa parey Roche Caiman, bann landrwa parey Belvédère Kan Per en kantite letan pe ongoing.  Ki son Minister pe fer pou target sa bann pocket sa bann landrwa spesifik, pou fer ki nou kapab sey donn solisyon pou bann dimoun ki bezwen sa kalite lasistans?  As oppose pou nou rely lo bann major – bann gro housing projects ki li i pran bokou plis letan pou li kapab terminen?  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Apard ki nou taler nou pou war dan kestyon ki Onorab Ernesta in anmennen osi nou pou pas en pe lo sa bann prodwir ki Minister i annan avek son bann stakeholders.  Nouvo enn nouvo ki ti koz lo la dan State of the Nation Address  kot nou konstrir lakaz pou bann dimoun lo son later prive apre nou osi pran sa loportinite pou konstrir en lot lakaz oubyen de ki lot dimoun.

En lot keksoz ki nou annan dan nou schedule se bann re devlopman parey nou pe fer Corgate, sa i osi par egzanp Société du Logement Belvédère i en proze ki dan nou schedule pou nou kapab amelyor lavi bann dimoun laba.  I annan Société du Logement osi Paskal Vilaz ki li pou byento osi konmanse, ler nou fini relocate en pe sa bann zabitan ki lo sa site dan nouvo proze ki nou annan.

So bann keksoz koumsa ki nou pe ankouraze pou nou kapab reach sa bann dimoun dan kominote, e osi Property Alleviation osi pe zwe en gran rol akoz zot i idantifye sa bann dimoun.  E prezan through nou process ki nou annan avek ASP e Local Government nou kapab idantifye bann dimoun case by case e donn li en solisyon dapre son bezwen.  Mersi.

 

MR SPEAKER

Mersi Minis.  Vitman Onorab Pillay.

 

HON SEBASTIEN PILLAY

Mersi Mr Speaker.  Mr Speaker mon ti a kontan Minis si i ti petet kapab si ou annan sa lenformasyon pou donn nou, petet en pti pe plis presizyon ; par egzanp pou son bann proze ki ou’n nonm nou parey Société du Logement e sirtou bann koumsa ki nou konnen en pe letan i lo azanda.  Kan eski nou kapab nou anvizaze war li konmanse?  E ki kalite langazman pe annan oubyen enteraksyon pe annan ant ou Minister, avek bann Ladministrasyon Distrik sirtou dan bann ka kot ou dir nou zot pe sey servi Poverty alleviation pou deal avek, kot nou kapab annan bann ka ; par egzanp ou annan ou en dimoun aze ki pe reste dan en lakaz ki sityasyon sa lakaz pa konvenab.  So ki mannyer nou kapab reach sa bann dimoun e ki kalite enteraksyon?  Eski i annan sa sinerzi e sa lesanz lenformasyon a sa nivo oubyen eski nou devret revwar modalité?

Malgre ki nou annan en servis an plas, me petet nou pa pe kapab an menm li kot dimoun i bezwen ganny li, akoz petet nou annan en breakdown oubyen nou napa en sistenm kominikasyon ki efektiv, an se ki konsern bann problenm ki bann dimoun i annan? Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker nou Minister nou an faver sa ki ou pe dir nou annan en prosedir an plas deza.  Par egzanp mon dir through Poverty Allevation e mon krwar sa i mars tre byen e osi nou kot Minister nou travay close an kolaborasyon ek bann DAs e bann cases i ganny idantifye dan bann distrik apre i partaz avek nou.

Me malerezman pa toultan ki nou kapab donn en solisyon imedya.  Me selman nou konmans at least fer nou prosedir nou met sa dimoun lo nou lalis, e ler i annan bann proze dan distrik zot ganny osi mete lo nou lalis pou nou kapab ganny konsidere dan bann allocation meeting.  Ler konsernan bann later prive parfwa i en pti pe difisil taler nou pou koz en pe dan – en pe lo bann problenm mazer ki nou gannyen sirtou lo bann heirs property par egzanp, kot i difisil pou nou konman Gouvernman antre pou nou refer en devlopman, oubyen en lakaz ,sirtou ler i annan bokou bann heirs ki involve.

E pa toultan ki nou ganny korperasyon.  Me pou bann redevlopman, sa nou kapab donn ou en schedule bann redevlopman ki nou annan nou pan anmennen ozordi, me selman nou kapab donn ou en schedule tou bann redevlopman ki nou annan.  Mersi.

 

MR SPEAKER

Mersi Minis.  Onorab Sandy Arissol.

 

HON SANDY ARISSOL

Mersi Mr Speaker.  Bon apre mdi ankor enn fwa tou dimoun.  Mr Speaker mon ti a kontan demann Minis anvi nou pe koz lo bann proze pti lakaz sosyal ki kestyon pe demande, mon ti a kontan demann Minis si letan nou pe koz lo sa bann konstriksyon ki ou pe mansyonnen si lafanmir Adela ki reste dan Ladministrasyon Distrik St Louis i tonm ladan ki nou ti vizite avek Mr Choppy avek Prezidan?  E ki zistans in arive avek zot demars silvouple pou zot kapab konnen an relasyon avek sa kestyon ki Onorab Henrie in demande?

Dezyenmman mon ti a kontan demann Minis anvi dan nasyon sa semenn i annan en paz, kot i montre detrwa bann konstriksyon sa ki nou pe koz lo la Mr Speaker e dan distrik St Louis i annan enn renovation of house Belonie St Louis ki nou sipoze zwenn kot ladministrasyon distrik Zedi le 28 2019 – 11.30, e son project officer i sipoze Mr Guillio Pool, en dimoun ki mon sey call depi yer me malerezman pa’n anmas mon telefonn.

Eski Minis ou kapab dir mwan egzakteman kote sa Belonie, pou mwan osi kapab konnen.  E mon dernyen kestyon final Mr Speaker, an relasyon avek bann proze ki fer dan distrik konstriksyon, eski i pa e norm kot i annan en Board ki ganny mete Minis an relasyon avek Sandy Construction Company, ki pe fer sa travay, i pou ale tel pou tel dat tel proze, eski i en norm sa dan ou Minister, pou ki sa bann striktir i ganny met an plas ,pou bann proze parey nou pe koz lo la e lezot proze ki Gouvernman i fer?  Mersi bokou Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mon pan ganny non sa project manager ki ou’n dir.

 

MR SPEAKER

Yes Onorab Arissol.

 

HON SANDY ARRISOL

Project manager se Mr Guillio Pool pou anba project officer i mete lo latab.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  I pa en project manager kot nou sa, petet i Local Government.  Lo kote Board mon krwar Board i standar.  Si en well nou, nou  bann konstriksyon ki nou fer i devret annan en Board ki’n afikse, ki dir lekel ki pe konstrir tou bann dimoun ki konsiltan lo sa proze.  Mersi Mr Speaker.  3enm kestyon well annefe ou premye kestyon ti lo kote lafanmir Adela ; lafanmir Adela i pa tonm dan proze Special Housing akoz i en major project 5 unit so i pa pou tonm ladan, me selman li nou konnen nou ti pe esper nou 42 unit pou nou kapab fer lokasyon.  Nou 42 unit Barbarons akoz sa i en temporary, nou temporary housing pou nou kapab relocate zot avan ki nou fer konstrir zot lakaz.  Mersi.

 

MR SPEAKER

Mersi Minis.  Onorab Ahmed Afif.

 

HON AHMED AFIF

Mersi Mr Speaker.  Mon ti a kontan demann Minis vi ki nou pe koz lo ban pti lakaz sosyal, e nou konnen ki bann metod konstriksyon in sanze pou sa bann tel kalite lakaz.  Si Minis i kapab donn nou en lide, lo konbyen i pe koute ozordi par met kare, pou fer sa bann pti lakaz sosyal?  E ki mannyer sa in sanze o pre dizon 5an pase kan zot ti pe fer menm kalite konstriksyon?

E dezyenmman lo kote ki laranzman zot annan ant ou Minister avek PMC ki souvandfwa i propriyeter sa bann lakaz e i osi i pe zer serten sa bann proze?  Ki kordinasyon i annan ant ou Minister avek PMC lo sa bann tel proze?  Mersi.

 

MR SPEAKER

Mersi Onorab Afif.  Minis.

 

MINISTER PAMELA CHARLETTE

Mersi Mr Speaker.  Mr Speaker pou premye kestyon diferans ant pri nou kont 750 a 8000 avan ki nou ti konmans nou nouvo standar ki konmela i cement board e sa i 5000 a 6000.  Apre osi pou nou travay an close kolaborasyon avek PMC, me selman pou sa bann lakaz sirtou bann lakaz ki dan prive sa PMC pa kapab antre ladan akoz bann later prive e bann dimoun prive.  So zis bann lakaz Gouvernman si i annan redevlopman PMC i antre apre pou li manage.  Zis en lot lenformasyon la, si i annan bann repeyman ki zot bezwen fer, sa repeyman i fer avek PMC.

 

MR SPEAKER

Mersi Minis.   Onorab Charles De Commarmond.

 

HON CHARLES DE COMMARMOND

Mersi Mr Speaker.  Bonn apre midi ankor tou dimoun.  Mr Speaker sa bann pti lakaz sosyal ki nou pe koz lo la, ki mover Mosyon in met devan, ki annan 3 ki’n ganny fer Mont Buxton e enn Cascade, i souvandfwa parey in dir, fek ganny dir  ankor, i ganny fer lo bann later prive.

E pou bann dimoun ki vilnerab swa en manm lafanmir ki aze oubyen deza avek dezabilite e dan problenm.  Ki arive ler bann dimoun i vin devan e lakaz i ganny fer lo en propriyete prive pou en dimoun spesifik antre dan sa lakaz, e ou war ki en lot manm lafanmir ki ganny met ladan?  Dizon li sa vye tonton msye oubyen en fiy ou en garson ki en lot manm lafanmir oubyen son met sa propriyete sa lakaz i lwe.  Ki kontrol ki Gouvernman i annan lo la?  E ki zot fer – si ou kapab fer en keksoz dan sa bann ka koumsa?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Sa i en kestyon pertinan, me selman ki en pti pe kont mon pa pou dir kontrovers, me nou bezwen mazin byen.   Normalman si ou pou fer en lakaz lo en landrwa prive, sa dimoun i pe par egzanp i pe pey ou Minister osi i kapab pey ou i kapab re-peye par egzanp si i annan en co-financing, nou kapab kekfwa si nou kapab kekfwa enforce.  Akoz si nou donn ou en lakaz e ou, ou pran ou lwe then nou kapab enforce poudir ou pa’n kit ou Lagreman parey nou ti demann ou.

Me selman si i en landrwa ki prive land owner in donn son konsantman, then mon krwar i en pti pe difisil pou nou enforce.  Me selman i en keksoz ki nou kapab mazin lo la pou gete ki mannyer nou petet met en kontrol an plas.  Mon pa ankor napa en ka deza ki’n vin kot mwan dan mon latansyon pou dir i annan en dimoun.

I annan bann landrwa Gouvernman wi – ki dimoun pe lwe ki PMC li i deal avek, ki li i handle, me selman kot ou pe dir en landrwa lwe nou pa ankor ganny en keksoz pou dir ki’n vin dan nou latansyon.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker 2 kalite senaryo ou’n fer sa lakaz sosyal ki sa dimoun pa’n pey nanryen Gouvernman in fer i donn sa dimoun si sa dimoun pe antre ladan i mor, byensir son met later i owner sa lakaz ki lo la.  Onorab Georges i la in met tou sa bann zafer si mon pa korek i ava dir mwan.  Me sa i kler – sa dimoun in mor, owner later i benefisye ek sa.  Me la mon pe koz si sa dimoun pa ankor mor li, sa lakaz in ganny fer pou madanm (x)  e ler i fini fer madanm (x)  kekfwa i reste ladan 2 semenn – 1mwan – 3mwan, apre son met later i tir madanm (x)  ladan, i met son fiy – i met en lot dimoun.  Oubyen i lwe!  Ou  konpran mwan?  Sa ki mon pe koz lo la eski probableman eski pa kapab fer nanryen.  E dan sa ka mon zis poz sa la pou reflesir lo la si nou kontinyen fer aret kontrol san kontrol ensidswit.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Dan sa ka ki ou pe mansyonnen, then mon kwari enportan ki Lagreman i byen robust avan ki nou fer nou ale nou konstri sa lakaz.

 

MR SPEAKER

Yes Onorab De Commarmond.

 

HON CHARLES DE COMMARMOND

Eskize Mr Speaker.  Me most of the time napa Lagreman lo la zis Gouvernman i vini i fer, sa dimoun i antre ou take it for granted.   Mon anvi Mr Speaker lefe ki Onorab Georges i la, mon konnen i master dan sa bann zafer, si i ti donn nou en lopinyon ti ava enteresan.  Mersi.

 

MR SPEAKER

Mersi Onorab.  Onorab Georges ou le partaz en lopinyon petet sa i a ede en pti pe.  Minis.

 

HON BERNARD GEORGES

Mersi Mr Speaker.  Mr Speaker, annefe Minis mon krwar in reponn kestyon otan ki i kapab e i annan rezon.  Ou vwar,  anba Lartik 553 nou Kod Sivil, en konstriksyon i ganny fer lo en later i ganny prezimen pou propriyeter sa later – i annan en prezonpsyon.  Me i pa neseser ki i koumsa.  I kapab ki propriyeter later e propriyeter lakaz, i 2 diferan dimoun akoz drwa aksesyon – drwa aksesyon, ki en vye konsep Romen kot sa ki ganny fer lo sa later, i atas avek sa later i kapab ganny dan serten ka pa arive.  E pou ou fer ki sa pa arive, fodre ou annan en agreement poudir ki sa pa pou arive ; pa akoz mon pe fer lakaz lo ou later ki sa lakaz pou vin pou ou.  Sa lakaz pou vin pou reste pou mon dan lokirans Gouvernman.  E mon konnen zot fer sa dan pti payot kot zot vini zot fer lakaz pou en dimoun lo later e zot anvi gard propriyete sa lakaz pou zot kapab donn en lot dimoun ler sa enn in ale.

Me pou ou kapab fer sa fodre ou fer en agreement.  Akoz si ou pa fer en agreement sa prezonpsyon ki lakaz i atas avek sa later pou arive otomatikman.  Mersi.

 

MR SPEAKER

Mersi Onorab Georges.  Yes Onorab De Commarmond.

 

HON CHARLES DE COMMARMOND

Wi then the question begs itself se, eski dan tou ka kot tou sa bann pti lakaz sosyal i ganny fer, i annan en Lagreman ki ganny fer e ganny sinyen par sa bann parti?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Si i pou sa dimoun nou pa bezwen en Lagreman.  Si li menm li ki pe reste ladan.  Me si en lot dimoun ou bezwen at least en permission to build.  Si i pa en – par egzanp si mon pe fer en lakaz pou en dimoun ki pa sa land owner, mon pou bezwen en permission to build avek sa from sa land owner, ki donn ou sa permisyon pou ou build.  E sa permission to build i kapab ganny anrezistre kot Registrar pou fer li en pti pe pli mon kapab dir stand.  Me selman still i nou kapab annan en Lagreman nou kapab devlop en lagreman ki fer li en pti pe pli robust pou nou kapab cushion en pe Gouvernman oubyen sa dimoun ki dan sa lakaz.  Mersi.

 

MR SPEAKER

Mersi Minis.  Dernyen kestyon Onorab Henrie loter kestyon orizinal.

 

HON GERVAIS HENRIE

Mersi Mr Speaker.  Mon ava annan de pti pwen vitman.  Minis in dir ek nou ki total larzan ki i ti depanse dan sa bann proze special housing pou 2017 ti 8.49milyon si mon ganny mon sif byen.

Apre 2018 prozeksyon total pou ariv 15.65milyon.  Si sa sif pa korek zot ava korize.  Me sa ki mon anvi konnen se dan sa 2 sif 2017 e 2018 ki poursantaz larzan e kontribisyon bann fanmir ver rekonstriksyon?  Ouswa dan lakantite lakaz ki Minis in mansyonnen par distrik, konbyen ki’n co-financing e konbyen ki Gouvernman in foot the bill antyerman?

Mon anvi konn sa.  Mon osi anvi konnen lekel lakaz pli bonmarse ki zot in fer e lakaz pli ser ki zot in fer?  Finalman si lavi Gouvernman ziska 2020 prosen eleksyon prezidansyel, mon anvi konnen ki prozeksyon bidzeter ki zot pe fer pou 2019/ 2020 kot i konsern special housing ki nou pe koz lo la ozordi?  Mersi bokou.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mon reget en kou mon stats la.  An 2017 ti annan 5 lakaz – 12 ki ti pe on ongoing. Gouvernman in depans 2.3milyon.  Kou total sa 17 proze i 8.49milyon – ok.  So i kler pou ou – ok?  Pou 2018 prezan?  Ok an 2018 nou ti depans 6.6milyon ; kou total pou 24 proze antye ti 15.65milyon.  Pou financing pou 2018 Gouvernman in kontribye 5.66milyon.  Mon pou donn ou an poursantaz co financing 2018 ti 77poursan e an 2017 ti 78poursan.

 

MR SPEAKER

Mersi Minis.  Onorab Henrie vitman.

 

HON GERVAIS HENRIE

Sa ki mon anvi konnen, se  – 2017 – 78poursan ; 2018 – 77poursan, sa i poursantaz ki Gouvernman ki’n kontribye ok, sa i kler.  Apre mon’n demande lakaz pli bonmarse e pli ser.  Apre si zot annan prozeksyon pou 2019-2020, dan kad special housing.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mon a reponn ou touzour lo seksyon prozeksyon.  Sa lannen nou met lannen pase nou ti met 20milyon sa lannen, osi nou pou met 20milyon so nou pou kit sa Bidze parey.  Pou lowest nou annan 154mil e pou highest i 1.4milyon.

 

MR SPEAKER

Mersi Minis.  Bon nou ava bouz lo prosen kestyon.  Mon ava donn laparol Onorab Afif ki pou demann kestyon lo lapar Onorab Regina Esparon ki lo misyon aletranze.  Onorab Afif.

 

HON AHMED AFIF

Mersi Mr Speaker.  Kestyon i lit konm swivan:  Eski Minis i kapab dir sa Lasanble, ki son Minister pe fer, pou rezourd problenm lenfrastriktir lo bann flat North East Point, kot plafon ki an beton e railing i kontinyen grennen, ki ti en promes fer par Prezidan an Me 2017, apre son vizit dan distrik Glacis?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Pou reponn kestyon Onorab, nou teknisyen in deza vizit sa bann lakaz dan sa estate, pou evalye e vin avek propozisyon pou repar sa bann problenm.  En rapor ti sorti an Septanm 2018 apre ki enzenyer ti konplet bann evalyasyon, sa bann problenm konkret spolling i an rezilta laz sa batiman kalite beton e osi kalite beton ki fer feray i ganny korozyon e expand.  Se sa ki fer beton dekoke ek bann pilye lavarang ki grennen.

Akoz ki kantite louvraz ki Departman Lenfrastriktir i annan pou enplimante e lakantite proze ki pe ganny enplimante an menm tan, Minister pan kapab finaliz kou e estimasyon kou pou fer reparasyon ziska prezan.  Sa travay i lo progranm 3enm sa travay i lo progranm Departman Lenfrastriktir pou vin avek en estimasyon kou avan 3enm kar 2019 osito ki sa in konplete en propozisyon lo en mekanizm finansman ava ganny propoze pou permet sa proze enplimante.

Fodre ki nou osi pran konsyan ki mazorite sa bann lakaz bann zabitan in ti’n fini aste se sa larepons Mr Speaker.

 

MR SPEAKER

Mersi Minis.  Onorab Afif.

 

HON AHMED AFIF

Mersi Mr Speaker.  Minis mon’n pran an kont sa ki ou’n dir me selman ti en promes ki ti ganny fer par Prezidan an Me 2017.  E si zot in fer bann vizit an Septanm 2018 e la mon pe mazin bann dimoun parey Letimie kot bann bout beton pe sorti kot li ki pe tonm lo zot, kot i pe koz en danze pou sa bann fanmir.  Eski Minis i kapab donn lasirans sa bann zabitan, ki menm avan 3enm kar 2019, zot pou kapab fer en bann laranzman, ki menm lo en baz emergency pou omwen adres sa bann landrwa ki en pti pe pli riske?  Antretan ki zot pe prepar bann plan pou fer reparasyon a lon term.  Parske i poz danze pou lavi dimoun e lasante dimoun.  Alor mon ti a kontan demann Minis si zot kapab vin avek en plan, pou zot kapab asir sa bann dimoun ki dan lenterim, zot pou fer keksoz imedya pou zot kapab rezourd sa problenm?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mon ava dir ki nou ava get bann mezir tanporer ki nou kapab pran, antretan ki nou finaliz en pe bann costing ek bann scope of work lo sa proze.  Nou a zwenn ansanm, nou a gete ki nou kapab fer tanporerman lo sa bann plan.  Mersi.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker prenan kont sa bann kestyon ki dan size sa kestyon devan nou ozordi, i bann flat kot sa spolling pe occur lamazorite ka par anba sa shower tray par anba kot sa shower tray i été ou war ki annan sa spolling zisteman par anba.  Eski zot pa’n konsidere par egzanp pou fer serten travay avek bann shower tray dan sa bann flat, ki ava limit probableman lakantite limidite ki pe ale dan sa beton?

Akoz mon konnen i annan flat ki’n fer travay lo la ki e ki konman en mezir tanporer in ede pou rezourd sa problenm.  E mon’n note Minis ki ou’n dir ki wi sa bann zabitan in aste sa flat me selman i annan bann problenm ki sa bann zabitan pa pou kapab rezourd zot menm.

Par egzanp i annan bann common roofs par egzanp ; zabitan pa pou kapab tir tol lo son lakaz akoz i pou otomatikman afekte son vwazen.  E sa i common, i parey dan Nageon Estate, bann flat ki ou war i annan en gran etandi roofing.

So eski ou Minister pa pe – mon krwar la i en pe imedyatman revwar zot Polisi vizavi bann reparasyon ki kapab ganny fer lo bann flat.  Bann ki dimoun i kapab accomodate.  I ava fer.  Me bann ki neseserman bezwen en travay pli konpreansiv ki Minister i zwenn avek sa bann zabitan, e i war ki mannyer zot ava asiste sa bann zabitan e kapab repar sa bann morso flat.  E mon note an pasan mon annan bann flat i annan bann water tank ki ankor ki ti ankor anler dan bann plafon.  Sa osi bann mezir ki bezwen ganny pran.  So prenan kont sa assessment ki’n ganny fer, mon krwar ou’n ofer en plan and then pou al fer bann mezir tanporer nou pe zis repet menm keksoz.

Mon krwar sa ki demande, se en lapros – en lentervansyon kot nou regard sa flat ki annan plis problenm e konmans avek li, konmans reparasyon lo li and then move on to the next one gradually.  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mon pran konsern Onorab nou pe get sak proze on a case to case basis akoz zot lanpler i diferan se sa ki nou fer nou bann assessment apre nou met an plas the mechanism pou nou kapab tret sak zot.  I annan ki nou konmanse osi e nou rekonnet ki nou dan en staz kot i annan bokou bann vye estate la an se moman, ki pou bezwen evantyelman ganny re devlope, oubyen revamp ; menm si bann dimoun in fini aste zot landrwa.  Akoz parey nou pe dir wi nou remarke ki fodre en dimoun parey en lorganizasyon parey PMC ki kapab fer sa oubyen Minister. E osi nou koz en pe lo afordabilite nou remarke ki sa bann dimoun kekfwa pa pou kapab afford pou the full extent sa bann renovasyon ki bezwen fer.  So wi i en keksoz ki nou pe koz avek PMC pou nou revwar ki mannyer i enterfer e nou bezwen met en prosedir an plas pou nou kapab fer li.

Pou ou kestyon lo sa, mon kapab dir ki wi nou a revwar ki fason nou kapab enkorpor li dan en Polisi me pou le moman nou pe pran li lo en case to case basis par estate ler nou annan bann problenm parey.  Mersi.

 

MR SPEAKER

Mersi Minis.  Vitman Onorab Pillay.

 

HON SEBASTIEN PILLAY

Mersi Mr Speaker.  Mr Speaker enn bann keksoz ki mon remarke petet ou ava dir mon oubyen Minis i ava anvoy lenformasyon lo Lasanble –  ki mon’n remarke ki sa bann vye estate i en bon pe pe rankontre sa problenm spolling, par lefe ki si ou realiz sa letan ti napa crusher dust pou fer lakaz dimoun ti servi disab.  Me disab sorti bor lanmer e parfwa i annan salen ki se bann korozyon sa bann sa.  E sa i bokou bann enzenyer in koz lo la i dir sa problenm.  So eski mon pa kapab demande ki Minister i fer en legzersis konpreansiv, pou war sirtou bann estate ki en pe pli aze, ki letan bann konstriksyon i en fason, pou war si zot osi zot pa pe rankontre menm problenm e ki nou a kapab sey rod en solisyon dan kour term pou bann problenm relye avek sa.  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Nou ava pran li an konsiderasyon Onorab nou a gete ki mannyer nou a kapab met li dan nou schedule pou nou kapab spare en pe bann enzenyer pou al fer sa bann assessment.  Mersi.

 

MR SPEAKER

Mersi Minis.  Onorab John Hoareau.

 

HON JOHN HOAREAU

Mersi Mr Speaker.  Bonn apre midi Mr Speaker.  Bonn apre midi tou dimoun.  Annefe Onorab Pillay in pas en pti pe dan mon lasyet.  Mon ti pe enterese pou konnen, si Minis ti pou kapab fer en legzersis, pou konnen egzakteman konbyen sa bann lakaz ki bann dimoun in fini peye, ok sirtou bann – konmsi duplex, kot par egzanp zot annan bann twill, ki’n sorti oubyen ki’n zis son quality of building, i pa’n up to standard, zot in annan bokou bann crack apre ki bann dimoun in peye ,zot pe dekouver bann  crack – bann gran, crack ladan.  Si zot kapab fer en en legzersis pou war sa e ed sa bann dimoun pou zot kapab adres sa bann sityasyon, an vi ki zot in pey pran bokou zot larzan pou zot pey sa lakaz, apre ki zot pe …

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Nou’n deza fini fer en legzersis lo kote bann twill  – PMC in fini fer e in fini annan en mechanism. Selman zis nou pe esper Bidze pou nou kapab met li ladan.  Me pou bann lezot defayans parey lo kote management flat sa nou ava konsidere.  Mersi.

 

MR SPEAKER

Mersi Minis.  Annou reste lo kestyon.  Kestyon i bann flat North East Point  ki trouve dan distrik Glacis.  Onorab Clifford Andre.

 

HON CLIFFORD ANDRE

Mersi Mr Speaker.  Mr Speaker an vi ki Minis in dir ki zot pe travay lo bann progranm, pou asiste ki pou repar fer bann renovasyon lo sa bann flat, e bann ki akoz zot in remarke ki napa bann mwayen pou zot kapab fer.  Eski Minis osi i kapab dir nou si zot a pran sa konman en progranm Nasyonal, pou ki si i annan dimoun ki  dan sa bann sityasyon, e zot in pran sa bann pre avek Gouvernman e zot tonm malad ;  mon prezimen zot war zot dan sa bann menm sityasyon si Gouvernman i ava asiste zot pou renovate zot bann landrwa e revwar en pti git zot bann repeyman.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.   Si nou pou ouver li Nasyonal nou pou bezwen met en framework an plas through en par egzanp en means test, pou nou gete vreman si zot kapab afford oubyen non.  Apre par egzanp nou pou kapab fer li lo bann kot Gouvernman menm in konstrir, me pa bann landrwa prive.  Mersi.

 

MR SPEAKER

Ok.  Mersi Minis.  Onorab Sandy Arissol.

 

HON SANDY ARRISOL

Mersi Mr Speaker.  Mr Speaker mon tann Minis koz lo laz sa bann housing estate, e avek bann difikilte ki zot pe gannyen.  Be mon osi demande Mr Speaker kan Domus – Leveche anvil i date en pe lannen pase li. Mon pa ankor war son bann twatir tonm lo latet Mon Seigneur  oubyen son bann pilye i tonbe, konpare avek bann lakaz bann housing estate ki tonm anba ou Minister Minis.

Mwan osi mon believe ki i annan pou fer avek kalite.  E letan Minis in koz an relasyon avek bann dimoun mazorite zot sa bann lakaz i pou zot, zot in fini aste, me i annan en keksoz ki Minis i bezwen okouran.  Mon ti a kontan demann Minis, alor si ou okouran poudir plizyer sa bann lokater zot ganny difikilte pou ganny loan labank Minis, parske senpleman zot napa en dokiman, ki prouve sa ki nou apel en lavant dan term Kreol, pou ou konpran ki mon e dir en lavant ki prouve ki poudir sa propriyete, sa building ki li i anvi renovate atraver labank i pou li zis parey bann landrwa estate nou ganny sa problenm e osi ‘’Dan Koko’’ kot Rollex Ventigadoo St Louis.  Mersi bokou.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Parey mon’n dir oparavan ofordabilite i en keksoz ki mon mansyonnen ki dimoun pa kapab afford.  Me nou konnen ki poudir PMC osi pe ganny en pe problenm lo kote lavant.  E sa zot pe travay ansanm avek Registrar pou zot kapab fer sir.  Me selman si i annan – parler i annan bann rezon akoz.   Me si i annan bann case spesifik nou kapab tyeke avek PMC lekel sa bann dimoun kekfwa ki pa ankor ganny lavant me selman ki anvi al pran en loan pou al fer son konstriksyon oubyen renovasyon.  Mersi.

 

MR SPEAKER

Nou ava al lo ou prosen kestyon.  Onorab Paul Ernesta.

 

HON PAUL ERNESTA

Mersi Mr Speaker.  Mr Speaker swivan bann lanons ki Prezidan in fer dan son ladres Leta Lanasyon, pou lannen 2019 konsernan later e lakaz,  eski Minis i kapab dir avek sa Lasanble ki bann prodwir ouswa bann progranm, ki son Minister i annan an plas pou siport endividi ki anvi konstrir en lakaz, me ki annan serten limitasyon?  Lo sak sa bann progranm ki kantite dimoun ki pe aktyelman benefisye atraver tou sa bann servis ?  Ki bann rezon mazer ki pe diskalifye sa bann dimoun pou sa bann benefis?  E dernyen, konbyen tou sa bann progranm pe kout Gouvernman?  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  swivan lanons dan SONA 2019 rapor lo bann Scheme ki a dispozisyon bann piblik pou ed pou konstri zot lakaz i konm swivan:  Prezidan premyerman ti anonse dan SONA ki kriter finansyel ki mezir bann aplikan pou later in ganny redwir e kriter pou net income osi ti ganny revize pou sorti 15 a 12mil.  E ler nou ti run nou lalis aplikan, nou konnen kapab idantifye ki pou annan dimoun adisyonnel ki pou kalifye sorti 206 pou 408 succesful applicants.  Bann rezon mazer ki pe diskalifye bann aplikan anba sa progranm, se abilite finansye e osi lannen ki zot annan zot aplikasyon ; normalman ki 3an e en kantite dimoun i pe fail akoz zot aplikasyon i mwens ki 3an.  Konsernan lakaz parey i ti anonse dan SONA R20milyon ti ganny allocate dan Bidze, pou asiste dan konstriksyon lakaz lo later prive.

Pou bann sitwayen ki dan sityasyon lapovrete, ouswa pa kapab ganny sifizaman larzan atraver en loan.  E pou zot konstrir zot lakaz oubyen fer bann renovasyon ; anba sa Scheme i annan 4 kategori kot dimoun i kapab ganny asiste e sa se rekonstriksyon reparasyon swivan dezas natirel, konstriksyon reparasyon lakaz ki dan move kondisyon e fanmir ki reste ladan i dan sityasyon lapovrete, konstriksyon en 2nd house lo later paran oubyen lo later fanmir si zot pa kapab ganny en loan pou rezon sityasyon ownership later, ouswa afordabilite. Pou sa kategori fodre aplikan i kalifye pou tou kriter ki aplik pou progranm sosyal.  Konstriksyon en ekstansyon ouswa en bedsitter pou en pansyoner, en dimoun avek dezabilite obor en manm fanmir pros.  Pou tou sa 4 kategori, i annan evalyasyon means test finansyel, pou war si e ki kalite kontribisyon bann dimoun ki pe benefisye i kapab kontribye.  Nou osi bezwen etabli lobzeksyon pou konstri lo sa later ; etabli si napa okenn lobzeksyon pou konstri lo sa later.  Pou sa Scheme i osi annan bann grander lakaz ki standar ki bann kliyan i bezwen dakor lo la e metod konstriksyon i avek cement board.

Grander standar e kalite konstriksyon in ganny mete pou zer kou sa bann proze e osi pou diferansye avek nou bann prodwir lakaz standar.  Pou sa Scheme ki Polisi ti aprouve an Oktob 2018, e ki avek sa Bidze, nou fek konmans enplimante sa lannen,  ziska ozordi i annan 44 ka ki’n ganny refer avek nou Minister – 3 anba konstriksyon – 6 pe esper aprouvasyon pou award Kontra. 5 i dan prosesis tender e larestan i ankor dan faz dan staz evalyasyon.

Anvi sa progranm in fek konmanse, nou pa ankor fer okenn evalyasyon pou determin rezon, ki serten aplikan pa pe kalifye.  Lobzervasyon zeneral se permisyon pou konstrir ; lakseptasyon kalite metod konstriksyon, i bann keksoz ki nou war pe fer serten aplikasyon ganny serten retar.

Konstriksyon lakaz an lesanz pou litilizasyon later prive pou asiste lezot fanmir, sa i lezot Scheme ki fek entrodwir.  Parey Prezidan ti anonse Gouvernman pou vin avek en Scheme kot i ava ed bann dimoun ki propriyeter later me ki napa mwayen finansyel, pou finans zot lakaz personnel.  E an lesanz depandan lo grander later Gouvernman, ava konstrir 1 ou 2 unit an plis pou lezot dimoun benefisye.  Sa Scheme i ava ede avek bann dimoun ki napa mwayen konstri, me osi an vi nou limitasyon lo later sa i ava ed plis dimoun ki annan bezwen lakaz benefisye.

Minister pe prepar Polisi ek mekanizm lenplimantasyon, pou ganny konsiltasyon bann partiprenan e apre soumet avek Gouvernman pou laprouvasyon.  Ler sa i fini i ava ganny prezante avek piblik, e Minister i ava kapab konmans resevwar e process bann aplikasyon.

Apard sa bann Scheme ek progranm ki’n mansyonnen avan, i osi annan lezot fasilite atraver bann lakonpannyen Gouvernman HFC pou bann dimoun pran loan pou konstri zot lakaz.  Malgre ki HFC i anba portfolio Departman Finans, i relevan pou mwan mansyonn zot kontribisyon dan sekter lakaz.

Apartir Zilyet HFC pou ogmant son term repeyman pou sorti 23an pou vin 30an, sa i a permet plis dimoun kalifye.  HFC pou met en nouvo fasilite spesyal, pou reparasyon lakaz, pou kliyan ki’n ek HFC, ki en kliyan fidel avek HFC pou plis ki 12an.

I annan en nouvo service Scheme pou dimoun kapab service zot later sa i pou pran lefe efektiv Zilyet 2019.  HFC pou anons bann detay dan bann mwan ki pe vini.  Nou annan osi housing subsidy Scheme ki ganny zere par Minister Finans kot nenport first home owner i ganny en cash Grant ek Gouvernman pou ede dan konstriksyon zot lakaz, si zot mwayen pa permet zot kouver kou konstriksyon  an antye.  Sa i varye ant 50mil ziska 200mil depandan lo income sa aplikan.

Rezon mazer ki dimoun i souvandfwa pa kalifye pou sa bann Scheme se prensipalman afordabilite ; design bann lakaz ki i pa according to their means ; kotasyon bann kontrakter ki kontrakter i donnen, osi permission to build parler ler zot ganny ‘’Permission to build’’, apre zot paran pa le met charge lo zot later, heirs property i osi annan konplikasyon lo kote heirs property.

Apre lo kote carers, zot pou bezwen annan en ko- aplikan.  Mr Speaker mon pa konnen si ou ti anvi mon pas en pe lo bann prodwir ki HFC i annan pou latansyon bann Manm oubyen loter kestyon.

 

MR SPEAKER

Go ahead Minis.

 

MINISTER PAMELA CHARLETTE

Lo kote HFC i annan housing loan normal, i annan 2nd housing loan, i annan land loan, sa i pou bann dimoun ki oule aste later ; i annan house extension loan, i annan house improvement loan, e apre house improvement loan pou bann pansyoner.  Sa i en kontrandi bann prodwir ki HFC i annan pou lo kote lakaz.

 

MR SPEAKER

Mersi Minis.  Onorab Ernesta.

 

HON PAUL ERNESTA

Mersi Mr Speaker.  Mr Speaker eski Minis i kapab eksplik nou lo size 2nd housing loan.  Nou konnen sa bokou nou bann dimoun pe fer fas avek sa difikilte bokou fwa zot pa fini konstri, zot lakaz mon krwar i donn 450,000mil oubyen 500,000mil en keksoz koumsa.  Zot pa arive fini konplet zot lakaz, eski zot dan prosedir pou zot kapab revwar sa Scheme pou permet sa bann dimoun kapab konstrir zot lakaz?  Me osi mon pa konnen sa i dan ou preview pou kapab reponn lo kote sa extension loan.  Nou konnen i donn ziska R100,000mil, me i pa ase sa e nou war bokou fwa kot nou dimoun i stuck lanmenm.  Ki son Minister pe anvizaze pou kapab re aziste sa 2 progranm?  Mersi Mr Chair.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Pou 2nd housing loan pou kalifye ou bezwen annan en lapey mwens ki R30,000mil, son maximum i R400,000mil son lentere i 7poursan e term repeyman i aktyelman 23an.  Aplikan i bezwen kontribye 7.5poursan loan avan i kalifye.  Pou housing extension loan pou kalifye i osi lapey i bezwen mwens ki 30,000mil maximum parey ou dir i R100,000mil lentere i 10poursan e term repeyman i 5an.  Mon krwar kekfwa in ler nou annan diskisyon deza avek HFC.  Nou meet avek zot.

I annan bann prodwir ki zot pe revwar e ansanm nou pou form en technical team pou nou kapab met bann challenge devan ki nou pe rankontre kot housing.

E zot in pare pou revwar enpe zot bann prodwir pou fer li affordable pou piblik.  Me an prenan an konsiderasyon ki HFC osi pou bezwen vin sustainable, i pou bezwen bann prodwir ki i pou kapab sustainable e ki zot pou kapab maintain sa bann prodwir.

Parey ou konnen HFC i ganny oversight avek Minister Finans, so i en diskisyon ki nou bezwen osi fer avek Minister Finans.  Mersi.

 

MR SPEAKER

Mersi Minis. Bon, omon sizere ki nou pran en Break e petet zis mon ava partaz avek Lasanble lo fason ki nou pou fini ozordi. Nou pa pou pran stetment par Minis Larue akoz stetment pou swivi avek enteraksyon.  i pou long nou pou pran li demen maten 9er e mon ava demann Madanm Clerk pou enform Minis lo la.  E petet osi nou pou regarde dan ABC, lo retourn en pti pe lo  norm lakantite kestyon ki nou mete, e la mon refer sorti ankor nou pe war en tandans osi kot Manm i anmenn en kestyon avek 4 part.

E i vin kat e mon war plizyer sa bann kestyon la lo Order Paper i fer ki kestyon i long repons osi i long, akoz Minis osi i bezwen adres sak part e sa osi tou i fer ki i ouver laport lo sak repons Minis pou Manm enterese pou demann siplemanter.

So sa i bann pri keksoz ki nou bezwen regarde dan lavenir e dan konteks bann tek kestyon petet nou devret redwir la kantite kestyon pou Minis akoz deza nou war la ki Minis pe fer en lazournen avek nou depi bomaten.

So ki nou parey mon dir nou pa pou pran sa stetment me nou pou sey aim ler nou ava antre 4.10 pou nou kapab fini sa detrwa kestyon pou Minis, e nou a kapab relieve li.  E petet osi tou mon ti ava demann Chair IAC pou nou rankontre en pti kou briyevman dan break pou nou kapab ganny en lide diskisyon ki zot in fer avek zofisye Foreign Affairs, lo sa Mosyon demann pou Anbasader.  Ok so nou ava Break e nou ava repran nou travay 4.10.

 

 

(BREAK)

 

 

MR SPEAKER

Bon nou ava kontinyen nou travay.  Mon anvi ankor gid bann Manm annou pa fer gran stetment. Nou annan sa kestyon ki devan nou, plus ankor 3, annou al direkteman ankor lo nou kestyon e ankor mon pou redwir en pti pe lakantite siplemanter.  Me mon fer resorti ankor sa ki mon dir avan Break, kot nou bezwen revwar format kestyon, si la mon pran zis kestyon 5, 7, 8 ek 10 i vin 40 kestyon – i vin anfen i vin 20 kestyon i vin 4x 4 kestyon dan en kestyon. E i annan 5 kestyon la oubyen 4 kestyon la ki annan 4 part alor nou miltiplir par 4.  E si nou fer sa nou met 10 kestyon lo Order Paper e 10 kestyon i annan 4 part i pou fer 40 kestyon pou Minis – ok?  So nou pou bezwen gid bann Manm lafason ki kestyon pou ganny pran lo Order Paper.  Bon nou ava kontinyen e mon ava donn laparol Onorab Churchill Gill e parey mon dir annou al direkteman lo kestyon.

 

HON CHURCHILL GILL

Mersi Mr Speaker.  Bonn apre mdi tou Manm.  Bon apre midi Minis.  Minis mon kestyon se donnen sa lalis bann dimoun ki’n kalifye, prezan bann lezot dimoun ki pa ankor kalifye ki zot dosye pa ankor travay lo la me selman zot bann kliyan potansyel pou kalifye.  Eski Minis i kapab dir nou, eski bann ler ki piblir tou later dan sak distrik ki available ozordi as we speak?  Akoz si non nou pou annan dan serten distrik kot i annan 100 dimoun me selman i annan zis 40 bout later e sa i zis dan plizyer distrik akoz lakantite laplikasyon i vreman bokou.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Si mon konpran kestyon Onorab se piblir konbyen later i annan dan sak distrik – ok?  Nou bezwen fer en framework anba ki nou kapab fer sa nou kapab met dan Nasyon akoz nou kapab share avek bann dimoun dan par egzanp DAs pou zot konnen konbyen dan son distrik.  Me si ou anvi fer li Nasyonal avek piblik then nou kapab fer li.

 

MR SPEAKER

Mersi Minis.  Onorab Gill.

 

HON CHURCHILL GILL

Minister akoz ki arive, tou bann dimoun ki’n vin devan kot Minister i fer laplikasyon zot annan en lekspektasyon zot.  Zot pe espekte zot pou ganny en bout later demen, pou zot kapab fer zot egzekit zot plan.  Me ler ki nou tou nou dan dark, nou pa konnen ki kantite i annan e sa bann dimoun osi dan zot lespri, zot krwar petet dan 1an zot a gannyen. Me selman saler napa later dan sa lespri, ti a bon piblik Seselwa antye i konnen dan sak distrik kantite bout later i annan, koumsa i ava fer travay ou zofisye osi bokou pli fasil.  Akoz ler dimoun i a vini i pa a met en dimoun dan dout, poudir be apre ou a gannyen kan saler napa.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Nou kapab fer li tou le lannen akoz nou alokasyon i koumsa.

 

MR SPEAKER

Ok mersi Minis.  Onorab Sandy Arissol – ok?  Onorab Wilbert Herminie.

 

HON WILBERT HERMINIE

Mersi Mr Speaker.  Bon apre midi Minis.  Minis ler ou pe koz lo diferan prodwir e bann lanons ki Prezidan in fer i annan bann sanzman ki Prezidan in anonse dan son diskour Leta Lanasyon e mon pou nonm detrwa enn se sanzman lo lakantite la nou pe koz lo later sanzman lo larzan ki en dimoun i kapab raise from 850 to 950, parey ou’n dir lakantite ou saler R15,000mil pou R12,000mil.

Eski sa bann sanzman ki’n arive i pe pran ka or i pe antre dan sa premye batch alokasyon ki zot pe fer la dan sa premye batch alokasyon later nou pe koze akoz i annan bokou dimoun pe appeal e pe vin kot nou, pe demande si sa bann sanzman i pran in context la dan sa premye alokasyon ouswa pe vin dan lot batch?  Sa i enkli osi tou kantite letan ou lo lalis, so nou ti ava kontan Minis eksplik en pe sa pou benefis piblik pou tir sa bann konfizyon dan sa direksyon.

Mon lot pwen i en lot prodwir ki zot donnen dan zot Minister, lo kote amalgamasyon later.  I annan en serten konfizyon osi la eski amalgamasyon i tonm anba point system or i en lot prosedir separe li menm?  Eski Minis i kapab donn en leklersisman lo la.  Mersi.

 

MR SPEAKER

Mersi Onorab.  Annou pa tant pou nou deborde pou nou ok kestyon in al en pti lo kantite later ki ti annan ; ki annan dan bann distrik la nou pe al en pti pe lo point system lo bann dimoun, me annou regard kestyon sirtou lo son premye bout kestyon kot i fer resorti bann dimoun ki annan limitasyon ki Gouvernman pe ede e Minis in adres sa dan son repons dan son premye repons – ok?  Annou pa tro deborde, sinon nou pa pou kapab fini avek.  Minis.

 

MINISTER PAMELA CHARLETTE

Mersi Mr Speaker.  Pou eklersi Onorab parey mon ti anonse dan mon press conference ki mon ti fer, ler sa nouvo sanzman ti arive.  Nou ti osi dir ki sa nouvo sanzman pou fer dan 2enm legzersis.  Akoz nou krwar ki nou bezwen be fair avek bann lezot dimoun ki’n partisip dan legzersis, ki nou tou nou’n ganny mezire dan menm lo menm nivo.

Me dan 2enm legzersis, nou pou pran konsiderasyon sa rediksyon e tou dimoun pou reganny mete lo sa baze lo sa nouvo kriter.  Se sa mon larepons.  Pou amalgamasyon land parcel, pou amalgamasyon i nou Polisi i kler i annan en minimum size ki dimoun i kapab demann nou, pou amalgamate en bout later obor son plot ki  i annan e amalgamasyon lo sa kote i pa tonbe dan land point system.  Me i annan kekfwa ki dimoun pe dir nou i anvi amalgamate en plot plis ki par egzanp 400met kare, ki nou pa pou kapab fer li akoz i en amount sibstansyel.

So bann bout up to 200met kare, sa nou kapab fer li e i pa pou pas dan point system.  E nou fer li pou en dimoun par egzanp ki pe oule fer en extension son lakaz oubyen i anvi amalgamate pou annan en 2nd house lo la.  Mersi.

 

MR SPEAKER

Mersi Minis.  Onorab Stephen Pillay.

 

HON STEPHEN PILLAY

Mersi Mr Speaker.  Mr Speaker Minis in dir lo avek sa rediksyon R12,000mil in sorti 206 zot in ganny 408 aplikasyon ki fer en 202 diferans.  Eski Minis pe pran kont osi poudir ki i pou annan plis ki 408, vi ki sa nouvo grid saler ki LDS pe anmennen pou dimoun, dan lapey, vi ki nou pe demande pou Public Service Salary, i pa realize ki i pou annan bokou plis dimoun ki pou kalifye avek sa 450 avek sa R500 ki nou pou gannyen, dan servis la ki sa 202 diferan i pou vin pli o.  Ki Minister pe fer e si i kapab enkli sa 40 bout Au Cap ladan pou partaz ladan.  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mon ava adres son kestyon orizinal.  Wi sa ti en model – sa ti en run through, ki nou ti fer ler ti annan sa nouvo adisyon, me parey ou’n dir, si i annan sa increase dan salary ki pe vini, then i pou bezwen sanze evantyelman – wi.

 

MR SPEAKER

Mersi Minis.  Yes Onorab Pillay.

 

HON STEPHEN PILLAY

Non Mr Speaker.  Parey son bout sa posibilite pou annan 40 bout Au Cap ki later i available si i pe get ladan pou nou kapab partaz ek sa bann aplikasyon ki pe vini, sa kantite later Gouvernman i annan ki zis pou survey pou donn dimoun.  Mersi Mr Speaker.

 

MR SPEAKER

Mersi.  Minis.

 

MINISTER PAMELA CHARLETTE

Mersi Mr Speaker.  Nou annan en schedule land bank ki nou pe enplimante. E si Au Cap i annan loportinite yes i ava tonm dan sa schedule, me nou pa tro asire si i pou tonm dan sa alokasyon sa lannen.  Akoz ou konnen i deza annan lenfrastriktir tousala pou mete.   So si i annan i dan nou schedule then nou ava enplimante.

 

MR SPEAKER

Mersi Minis.  Onorab Audrey Vidot.

 

HON AUDREY VIDOT

Mersi Mr Speaker.  Minis mon kestyon i pou al konm swivan:  Ki plan ou Minister pou redevlopman bann low income house lo later Leta dan bann distrik, kot sa bann Scheme ki ou’n mansyonnen pa kouver, pou asiste zot pou zot kapab aranz zot landrwa?

Eski Minister pe pran plis prekosyon lo bann nouvo devlopman proze lakaz pou ki dan bann defayans lepase tel ki problenm parey tenk delo, i ganny bann tenk delo dan plafon e kot delo, i sorti dan bann lasanmben e de-koul dan lakwizin, kot bann lezot unit.  

        E bann lokater pe ganny difikilte pou zot repare menm, si i annan serten finansman pou zot kapab kouver, me i kout zot plis e zot ganny en bon pe challenge ki sa bann problenm pa ganny repete?

E finalman mon ti a kontan ki mon pou ranforsi lo pwen Onorab Ernesta lo sa demann pou Gouvernman revwar alokasyon finansman 2nd housing loan, pou ki i konplemant nouvo polisi Gouvernman dan revizyon plan lakaz ekstansyon pou distrik Roche Caiman.  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mon ti a demann ou Onorab pou repet son premye kestyon mon pa’n tro gannyen,  please.

 

MR SPEAKER

Onorab Vidot.

 

HON AUDREY VIDOT

Sorry eskize Minis en.  Mon premye kestyon i ok ki plan Minister pou redevlopman bann low income house lo later Leta dan bann distrik, kot bann Scheme ki egziste ozordi, ki ou’n mansyonnen, pa pou kapab ed zot kapab fer petet amelyor zot sityasyon kondisyon ozordi.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Pou premye kestyon si mon pe konpran ou byen ou pe dir mon par egzanp mon pe pran en legzanp Corgate, kot i annan low housing?

 

HON AUDREY VIDOT

Minis mon pou donn ou en senp legzanp.  Dan mon rezyon, mon pou siport mon bann koleg i annan Les Mamelles, landrwa pa ankor fer redevlopman sityasyon sewage, i vin en problenm.  Mon koleg ankor i annan distrik Plaisance anler Belvédère, i enn bann Société du Logement Gouvernman, in pran en pe dan sa laliny.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mon krwar mon reponn sa kestyon previously, ler mon dir nou annan en schedule redevlopman ki nou pou fer lo bann landrwa ki bezwen fer li, mon ti nonm Société du Logement menm Belvédère e osi sa enn Pascal Village kot nou preski konmanse nou bezwen zis relocate dimoun.  So i annan bann i annan en progranm ki nou pou nou travay lo la zis pou nou fer bann redevlopman parey mon dir, i annan bokou lakaz Gouvernman ki’n ariv son letan pou nou re devlope.  E nou pe fer li en pe sa lannen apre dan bann lannen ki pe vini osi.

Pou revizyon housing loan parey mon dir nou pou travay ansanm avek PMC osi HFC sirtou ek Minister Finans pou nou kapab war, ki bann challenges ki nou pe gannyen avek bann dimoun sirtou bann ki pa kapab afford e osi ki mannyer nou kapab ed zot ; en keksoz osi ki ler mon ti vin dan Lasanble ti en pwen ki ti ganny levé se, ler bann dimoun i annan en konstriksyon souvan, zot pa kapab afford pou zot fer miray avan ler zot fer en konstriksyon.  Sa i en keksoz ki deza nou pe inisye pou nou war ki mannyer HFC i kapab ede dan sa fason parey i pe fer avek survey sa survey Scheme ki’n fek ganny entrodwir.

So sa osi nou pou travay lo la e HFC osi parey mon dir nou pou ganny diskisyon ki zot pou revwar en pe zot bann prodwir ki zot pe donnen currently.  Me tout an prenon kont ki zot en lenstitisyon parey mon dir ki nou bezwen fer sir ki zot sustainable zot osi.

 

HON AUDREY VIDOT

Mr Speaker Minis pa ankor reponn 3enm.

 

MR SPEAKER

Yes Minis pa ankor fini.  Go ahead Minis.

 

MR SPEAKER

Go ahead Minis.

 

MINISTER PAMELA CHARLETTE

Lo kote prekosyon ki Minister pe pran bann nouvo proze ; bann nouvo proze nou pe sanz en pe nou bann design ki nou annan, sa i pe pran kont en pti pe lo kote grander lo kote tenk delo osi sa in pran konsiderasyon.  Lo kote fire safety sa i en keksoz ki nou diskit bokou avek fire security e zot pe ed nou, pou nou kapab amelyor en pe bann design lakaz ki nou pe fer.  Mersi.

 

MR SPEAKER

Mersi Minis.  Onorab Norbert Loizeau.

 

HON NORBERT LOIZEAU

Mersi Mr Speaker.  Mon ti krwar ou’n bliy mwan.  Mr Speaker mon kestyon i baze lo premye parti kestyon.  Zot koz lo bann ki annan serten limitasyon.  Ler mon ekout Minis koz lo limitasyon in koz plito lo bann finansman pou lakaz whatever, me i pa’n koz lo bann later ki napa akse semen me sa i en limitasyon pou konstri bann later ki Gouvernman.  Parey anler kot Grann Kwa mon sezour kot Mr Gilbert Pool zis par anba li i annan plizyer plot ki’n ganny donnen par Gouvernman avek bann dimoun.  Me selman zot limite akoz zot pa kapab konstri akoz napa semen, me dan tousala i annan semen ki sipoze ganny fer.  I annan son right of way, mon annan sa plan ek mwan, me selman ziska aprezan semen pa ankor ganny fer.  E sa i limit sa bann dimoun ki reste la anba pou zot fer zot lakaz.

Mon anvi demann Minis kan eski sa proze semen ki en limitasyon ozordi, pou sa bann dimoun ganny fer – kan sa proze semen pou ganny fer pou sa bann dimoun kapab fer zot konstriksyon?

Zot pa le finansman larzan avek ou Minister, zot anvi sa semen pou zot finans zot lakaz zot menm.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Oparavan ler land bank ti entrodwir en kantite bann plot ki ti vann ti vann without access e en kondisyon dan zot lavant, se pou zot build their own motorable access sa ti ladan.  Me nou sanze avek sa se ka ki nou fer sir ki tou bann land bank avan ler ki nou vann later dan en land bank, fodre nou met semen nou met lenfrastriktir nou met utilities osi.

So now pou nou go back pou nou al fer sa bann semen i pou put Gouvernman, en pe larzan.   Me pou le moman nou pe konsantre en pe lo sa bann land bank fulfill en pe sa bann land bank ki nou dir nou pou delivre, unless ki i annan fon i annan larzan ki nou kapab retourn dan sa bann landrwa kot sa bann napa sa bann akse pou nou fer.  Mersi.

 

MR SPEAKER

Mersi Minis.  Wi Onorab Loizeau.

 

HON NORBERT LOIZEAU

Mr Speaker ki mon anvi.  Mon anvi demann Minis an atan dan i sa bann i annan anviron mon pe gete la i annan anviron 5, 6 plot ki baliz antye anba laba ki sa bann dimoun pou fer sa bann dimoun i anvi konstri zot?  Zot le en semen sansan presyon pou vin lo zot bezwen donn sa dimoun, en lakaz sa dimoun i anvi konstri zot lakaz.  Eski zot pa pe mazin fer en semen sa bann dimoun pa pou gannyen sa semen mannyer Minis pe dir?  Akoz i annan lannen zot pe espere.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Onorab i bezwen get sa bann dimoun ler zot ti annan sale of plot ki kondisyon ladan ti mete.  E osi sa larzan ki ti pou fer semen nou offset dan pri son later so i ti fini ganny konsidere.

Parey mon dir si prezan Gouvernman i pou deside pou al fer pou revwar sa bann land bank, kot nou pa’n met semen, nou bezwen al fer en plan ki mannyer nou pou finans sa e pou le moman larzan ki nou annan, nou pe finans bann land bank, kot nou fini idantifye e kot nou fini fer provizyon pou nou fer en semen e met utilities sa se fon ki nou gannyen e tousala pou depan lo larzan ki nou ganny Bidze ki nou gannyen.  Mersi.

 

MR SPEAKER

Mersi Minis.  Onorab Waven William.

 

HON WAVEN WILLIAM

Mersi Mr Speaker.  Mr Speaker mon ti a kontan demann Minis lefe ki nou pe koz limitasyon e bann diferan scheme ki i pe nonmen.  Mon anvi fer rapel Minis ki poudir i annan ka kot in vin apepre 3 Minis la ki bann ka pa’n ganny deal avek.  Mon anvi konnen avek sa lanons ki Prezidan in fer eski bann ka ki ti la oparavan pou ganny donnen serten priyorite, par egzanp bann ka kot dimoun i annan son bout later me selman zot pa kapab manage sa loan zot pe rod en rekour ek Gouvernman pou kapab fer zot lakaz?  Eski sa bann ka vreman lontan avek Minister pou ganny donnen en serten priyorite?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Onorab zis pou mon senplifye ou kestyon, tou bann cases i pou menm si i annan bann case oparavan i pou bezwen swiv en pe nou bann prosedir ki nou met an plas pou le moman me sa bann keksoz nou bezwen get li case to case basis e gete ki mannyer nou kapab rod en solisyon pou sa bann cases.  Mon pa konnen mon pa pe konnen, si ou pe koz later oubyen lakaz kekfwa.  ou ti ava idantifye en pti pe pou nou kapab.

 

HON WAVEN WILLIAM

Minis mersi.  Mon annan ka par egzanp mon pe koz lo kote souvenir La Misere i annan en ka kot bann fanmir Figaro, ki depi lepok Minis Lionnet, Minis Bastienne la in vin ou, e nou pe konstaman pe diskit lo sa case.  E mon konnen ki poudir detanzaot, nou dir letan lakaz pe ganny fer, me mon pe demande konmsi ki bann retar ki annan?  Letan ou regarde konmsi sa case konmsi e i annan lezot ankor ki pe pran tro bokou letan.  Konmsi letan ou pou dir mwan be la i bezwen al swivre serten nouvo prosedir, konmsi pou mon war li en pti pe unfair akoz sa case ti deza devan e ti devret move on.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker mon krwar nou a pran sa tou sa bann case on a case to case basis, nou ava revwar e ofer en sort of solisyon pou zot.  I annan bann travay osi ki nou pe fer within Ministry, pou nou revwar tou sa bann old cases kekfwa ki nou emark, ki apre bann nouvo prosedir in vini, ki prezan zot dan en lenpas parey nou kapab dir.  So nou pe fer en legzersis internally, pou nou kapab war lekel sa bann cases e apre nou a pran en desizyon oubyen en solisyon ki mannyer nou pou travay avek zot.  Mersi.

 

MR SPEAKER

Mersi Minis.  Onorab Francois Adelaide.

 

HON FRANCOIS ADELAIDE

Mersi Mr Speaker.  Minis mon ti a kontan ou dir mwan e ou konfirm ek sa Lasanble, eski pou tou sa bann progranm sa bann Scheme ki ou pe koz lo la.  Eski ou pe garanti ki zot annan ase larzan pou soutenir sa bann progranm tel parey ki larzan pansyoner pou kouver zot bann lakaz?  Akoz dan mon distrik mon trouve ki i a lannen de lannen zot pa ganny asiste avek larzan.  Apre mon pou demann ou ki kantite dele letan apre ki en dimoun in fini konfirmen, konmsi tou son bann prosedir in fini annord ki i kapab ganny asiste ek finans?

Dernyen pti bout Mr Speaker, Minis mon pou plenny avek ou, silvouple avek ou staff dan ou Departman, ler dimoun i vini i vin rod en konsey, konmsi pou fasilit zot lavi, sirtou bann ki sorti Baie Lazare, eski i kapab ganny bann larepons konkret i pa bezwen fer letour, fer letour apre ganny trouve poudir i pa pe meet kriter?

E la i annan 1 semenn depi mon pe rod email PS pou Later mon pa’n ganny ditou, telefonn zis i sonnen, sonnen mon pa’n zanmen ariv kot li.  Silvouple Minis?  Mersi.

 

MR SPEAKER

Mersi mon krwar i en loportinite PS i la avek ou taler ou ava ganny son bann detay kontak.  Minis.

 

MINISTER PAMELA CHARLETTE

Mersi Mr Speaker.  Mr Speaker pou premye kestyon Onorab lo kote finansman pou sa bann Scheme ler nou pe koz lo kote loan sa HFC mon krwar i bezwen fer fason pou li annan son Bidze.  Parey nou osi nou annan en Bidze, ki nou travay avek.  E dan sa Bidze then nou fer sir ki bann ka ki priyorite i ganny kouver, me selman i pa toultan en budget constraint osi i en pe resours imen ki nou annan parey ou konnen lenfrastriktir Departman Lenfrastriktir dan Minister i fer bokou louvraz i pa zis fer bann lakaz sosyal, me i annan osi bann lezot Lazans ki depan lo nou, Lazans Gouvernman.  So nou seye pou ed tou dimoun, me i pa toultan depan lo Bidze, i osi lafors imen ek prodiktivite.

Me selman Gouvernman in met a in met en bon porsyon son Bidze dan lakaz, e mon war poudir HFC osi i annan e se sa ki mon dir taler nou bezwen fer sir ki osi i remain sustainable e i kapab ofer sa bann servis ki i dir i pou donnen.  Mersi.

 

MR SPEAKER

Mersi Minis.  Bon nou ava bouz lo prosen kestyon.  Onorab Audrey Vidot.

 

HON AUDREY VIDOT

Mersi Mr Speaker.  Eski Minis i kapab dir nou Lasanble kan ki Minister pou fer en bon netwayaz lo sa morso later kot ex-Kazern dan distrik Roche Caiman?

2) Ki plan son Minister pou devlop sa morso bout later?  Eski i annan konsiltasyon ant Minister ansanm avek Lotorite Distrik Roche Caiman pou diskit detay okenn proze devlopman?  E si i annan konsiltasyon, kan ki sa ti arive e si non kan ki zot annan plan fer li?  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker pou mon al direk lo ou kestyon enn Minister pou organize pou fer en netwayaz lo sa plot later ki ou’n mansyonnen avan lafen Zen.

I napa en progranm regilye pou netway sa teren regilyerman ziska prezan anvi kontrent bidzeter e osi parey nou konnen sa later i deza en i annan en court case lo la so pou le moman wi nou kapab antre pou nou ale pou nou al netwaye.

Pou ou 2enm kestyon, eski in annan konsiltasyon Minister an 2014, in annan bann diskisyon lo bann propozisyon me napa nanryen konkret ki’n ganny deside, oubyen ki’n konkretize pou kapab annan en devlopman sa landrwa.

Me tou bann propozisyon ki’n vin ver nou in vize ver akomodasyon rezidansyel.  Premye propozisyon se pou fer 45 unit lo sa site dan 7 blok flat sa proze pa ti ganny devlope plis ki sa, sa proze pa ti devlope vi ki ti annan bann kontrent legal parey mon dir lo re posesyon sa lease ki nou ti donnen.

Me nou osi konmans inisye konsiltasyon avek Lotorite Distrik atraver DA e nou pe esper en larepons pou nou kapab konsiltasyon avek distrik antye oubyen avek piblik.  Mersi.

 

MR SPEAKER

Mersi Minis.  Onorab Vidot.

 

HON AUDREY VIDOT

Mersi Mr Speaker.  Minis prenon kont lo bann propozisyon ki ti ganny met

devan Minister pou rezidansyel, nou konnen poudir i annan gran demann osi pou bann profesyonnel dan distrik, oubyen dan nivo rezyon ki pe ganny pa mal difikilte, ankor pe espere ki swa en morso bout later oubyen pou en proze lozman pou condominium oubyen pou sa rezidansyel.

Eski zot annan lentansyon petet pou konsider bann sa bann propozisyon ki’n ganny met devan zot petet pou letan zot donn priyorite bann alokasyon petet dan sa lide pou fer sa 47 unit pou konsider dimoun dan sa rezyon santral 2 ki enkli mon distrik Roche Caiman.

Prenon kont ki i en landrwa dan lavil e osi i pros avek distrik prenon kont nou limitasyon, pou redevlopman ki nou osi nou pa perdi an term pou nou bann dimoun benefisye dan sa bann proze.  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  I en keksoz ki nou kapab konsidere ansanm avek distrik ler nou fer nou konsiltasyon.  Mersi.

 

MR SPEAKER

Mersi Minis.  Onorab Clive Roucou.

 

HON CLIVE ROUCOU

Mersi Mr Speaker.  Mr Speaker pou konmanse mon anvi zis en pwen klarifikasyon avek Minis, si sa later ki an kestyon si i en later prive oubyen si i en later Gouvernman?

Epi mon 2enm kestyon, an vi ki Minis in koz lo konsiltasyon mon anvi demann Minis, si sa konsiltasyon ki i pe dir pou fer avek distrik Roche Caiman si i en Polisi son Minister ki i pou fer avek tou lezot distrik?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker sa later i Gouvernman e nou ti pe lease li oparavan.   Lo kote nou Polisi konsiltasyon wi mon krwar i devret en polisi me bokou bann proze ki nou fer nou osi konsilte distrik through DA pou donn son bann propozisyon.  Mersi.

 

MR SPEAKER

Mersi Minis.  Onorab Jany De Letourdie.

 

HON JANY DE LETOURDIE

Mersi Mr Speaker.  Minis ou’n dir poudir sa later ti pe ganny lease, me selman in vin pou Gouvernman me eski sa lease in ganny kas tonbe pou konbyen letan i ti pe ale sa lease?

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Sa lease i ti pou en peryod 75an, me apre ki sa lakonpannyen in breach en pe bann kondisyon dan son lease, nou’n fer li surrender lease pou nou kapab ganny nou later back.

 

MR SPEAKER

Mersi Minis.  Onorab Letourdie.

 

HON JANY DE LETOURDIE

Savedir Gouvernman i napa nanryen pou li peye la vi ki in kas sa lease?

 

MR SPEAKER

Ok mersi.  Minis.

 

HON JANY DE LETOURDIE

Non menm si sa dimoun in breach?

 

MR SPEAKER

I annan okenn kou ki Gouvernman in peye pou repran sa lease?

 

MINISTER PAMELA CHARLETTE

Wi i annan en amount ki Gouvernman i bezwen peye, me selman sa ti pas dan en prosedir legal in court.  E wi i annan en amount ki nou ti bezwen peye.

 

MR SPEAKER

Minis petet si ou annan mon krwar Manm pe demande ki sa amount.

 

MINISTER PAMELA CHARLETTE

$47,339.05.

 

MR SPEAKER

Ok bon nou ava bouze Onorab Audrey Vidot.

 

HON AUDREY VIDOT

Mersi Mr Chair.  Minis mon ganny lenformasyon atraver administrater distrik Roche Caiman si ti a byen o pli vit posib prenon kont ki nou apresye ki Gouvernman in aquire sa bout landrwa si zot ti kapab premyerman fer netwayaz rod finansman pou fer netwayaz.

Problenm se ki distrik i ankor pe kontinyelman ganny rapor, ki pe annan plizyer aktivite anti-sosyal ki pe arive dan sa landrwa.  E dezyenmman an referans avek sa plan pou zot kapab byensir annan sa konsiltasyon plitar avek kominote Roche Caiman baze lo sa devlopman.  Mersi.

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker.  Nou ava fer le neseser me selman nou bezwen al through Procurement kekfwa i pou pran en pe letan, pou nou kapab fer netwayaz.

 

MR SPEAKER

Mersi Minis.  Bon nou ava al lo kestyon No.9.  Onorab Clifford Andre.

 

HON CLIFFORD ANDRE

Mersi Mr Speaker.  Bon apre midi tou dimoun.  Mr Speaker kestyon i lir koumsa:

Eski Minis pou Lakaz, Later e Lenfrastriktir e Transpor lo later i kapab dir avek sa Lasanble lekel ki’n ganny sa morso later ki ti ganny idantifye pou devlopman touristik lo Ile Soleil?

E ki prosedir kriter ki’n ganny swiv pou sa alokasyon?

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  parey nou konnen 2020 Development ti ganny etabli konman en veikil pou manage, apre allocate oubyen devlop bann later oubyen lenfrastriktir lo Ile Soleil.  E alor Minister in formelman transfer mon Minister pou mwan in formelman transfer bann later lo Ile Soleil anba 2020 Development pou sa purpose.

Pou reponn kestyon ki Onorab i demande, lenformasyon ki nou, nou’n gannyen se Crystal Properties Limited ki’n ganny sa later, pou devlopman touristik, lo Ile Soleil.

Ki prosedir kriter ki’n ganny servi?  Mr Speaker an Novanm 2012, 2020 Development ti lans tender pou sa later ki konpri 38,159sqm e kantmenm ti annan 10 dosye ki ti vann ti napa okenn dimoun ki ti montre lentere.

Baze lo feedback sorti kot bann envestiser, 2020 Development ti bezwen retourn kot Cabinet avek lamannman lo Ile Soleil Master Plan.  E sa pou kapab retir semi industrial Zone ki ti pe ganny dir pa ti konpatib avek devlopman touristik.

So akoz sa, sa Master Plan ti bezwen ganny resoumet kot Lotorite Planning pou aprouvasyon.  An Septanm 2013 SIB ti ganny angaze pou vann sa later lo tender – le 31 Zanvye 2014 ti ganny donnen konman deadline ki ti enterese pou aste sa bann dosye tender.

2020 Development Limited ti pey SIB R150,000mil pou fer sa louvraz me SIB pa ti ganny okenn aster pou sa later ki zot idantifye li konman T(1).

An vi ki sa metod tender pa ti apport okenn fri, an Mars 2014 2020 Development ti deside pou fer Kontra avek bann azan pou fasilitater pou trouv aster pou sa bout later, e zot ti ganny zot ti pou ganny peye en komisyon depandan lo sa sonm ki ‘’2020’’ ti pou anmase.

En let ki ti donn tou sa bann azan ou fasilitater en manda pou vann ti ganny sinyen avek zot.  Fodre fer resorti ki Lakonpannyen ‘’2020’’ ti oule vann sa morso later lo maximum pri posib parmi sa bann e parmi sa bann azan fasilitater ti annan Seselwa e osi etranze.

So sa bann prosedir ki ti ganny met an plas sa letan, pou kapab rod en lenvestiser pou invest dan sa propriyete.  Mersi.

 

MR SPEAKER

Mersi Minis.  Onorab Andre.

 

HON CLIFFORD ANDRE

Mersi Mr Speaker.  Mr Speaker mon ti a kontan dir Minis ki, mon annan dokiman lo Crystal Properties Limited e son Direkter se en Allen Harsan avek Maria Dubignon.

E de la mon ti a kontan demann Minis, si enn sa bann azan ki ti ganny recruited par ‘’2020’’ se par sa menm Mr Harsan ki apre li menm li ki’n aste ki’n ganny sa lease ‘’2020 ?’’  So Mr Harsan in komet serten akt ki pa an konformite avek Lalwa Sesel. Sa i enn.

Dezyenmman mon ti a kontan demann Minis dan sa lease ki ‘’2020’’ in donn avek Crystal Properties Limited ki en valer $8milyon ki apepre R45milyon mwens ki orizinalman valer ti’n ganny mete e ki lo sa $8milyon si sa $8milyon in ganny peye e kan dernyen peyman ti ganny fer?

Akoz dapre son Lagreman i sipoze fer dernyen peyman le 31 Desanm 2017, e akoz lo sa lease sa $400,000mil ki stamp duty ti kapab gannyen in ganny waive?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mon a konmans pou ou kestyon konman en azan.  Lenformasyon ki mon gannyen through Minister Finans ler mon pe get lalis bann azan mon pa pe war en non parey ou’n dir Allen Harsan.

 

 (Off-Mic)

 

MINISTER PAMELA CHARLETTE

Pardon ?

 

MR SPEAKER

Kontinyen Minis.

 

MINISTER PAMELA CHARLETTE

Mr Speaker mon pe gete si mon pou lir lalis?  Ok lalis ki mon annan se Riyad, Cheriahkia eskize mwan akoz  i annan  en bann non etranze ki mon pa pou kapab prononse.

Andre Joel De Boc, Mohamed Saba, Wendy Beverly, Kevin Laurence, Dave Francourt, Victoria Contoret, Otman Abdul, Praninda Rad, Mamud Alkayam, Marivonne Pool, Marsha Marie Parcou, Kersley Ezra Naidoo, Jean Claude Pool, Ina Laporte, Linda Cockshun, France Anacoura, Emmanuel De Stephanie, Gerard Canaya, Nigel Henrie, Clifford Andre Law Chambers,

 

(Interruption)

 

 

MINISTER PAMELA CHARLETTE

Jean Claud Woodcock ek Muriel Blanc.

 

(Interruption)

 

MR SPEAKER

Ok.  Order! Order! I annan lezot – Order! Order! Order! Minis kontinyen i annan lezot part kestyon.

 

MINISTER PAMELA CHARLETTE

Lo kote peyman Mr Speaker T1 S1940 in ganny lease pou $8milyonTotal ki’n ganny peye an 2016 i $6milyon balans ki i pa ankor peye ziska ozordi i $2milyon.

Rezon ki mon gannyen se retar avek peyman se baze avek sa bann lakoz retar konpilsyon sa Anse Aux Pins junction ki sipoze konplete depi Desanm 2016 e sa junction ti sipoze ganny finansman avek Gouvernman.

E osi ti ganny kree an tou lede ti ganny agree an tou lede parti ; savedir 2020 Development avek developer ki peyman final i ganny fer 12mwan apre ki tou lenfrastriktir in konplete.

So mon krwar mon pa konnen si mon reponn tou ou kestyon.

 

MR SPEAKER

Mersi Minis.  Onorab Andre.  Wi i annan sa bout stamp duty eski stamp duty in ganny peye?  Minis.

 

MINISTER PAMELA CHARLETTE

Mr Speaker stamp duty mon napa okenn lenformasyon lo la, mon kapab demann Minister Finans akoz stamp duty ti ganny exempt.

 

MR SPEAKER

Ok mersi Minis.  Onorab Clifford Andre.

 

HON CLIFFORD ANDRE

Bon, eski Minis i kapab konfirm ek sa Lasanble ki i annan en consultancy agreement service agreement date le 3 Zen 2013, ki’n ganny sinyen ant Elipse Consultancy Limited reprezante par Mr Allen Harsan, ki li menm li in ganny lease e sa Lagreman ki date le 3 si Minis i kapab konfirmen ki poudir lefe sa Lagreman i konmans le 27 Novanm 2012 – en Lagreman ki’n ganny sinyen le 3 Zen 2013 i pran lefe plito le 27 Novanm 2012?

Sa i montre ki poudir i annan serten eleman, ki pa an konformite avek Lalwa Sesel.  E Minis i kapab konfirm avek nou ki se sanmenm sa Allen Harsan ki’n ganny contracted – ki ti ganny contracted, ( ti a bon si nou kapab fer enpe tapaz lot kote) ki’n ganny contracted pou li rod en aster e negosye.

Annefe dan 2) i dir koumsa:  the company hereby appoints the consultant to provide the services and the consultant accepts the appointment, the consultant shall be appointed as technical advisor and negotiator of 2020.’’

So, sa msye ti ganny apwente konman en konsiltan, pou li negosye en aster, apre li menm li i form en konpannyen an 2015 e i pran sa lease.  Eski sa Minis i kapab konfirmen ki poudir i en pratik corrupt?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mr Speaker.  Mon kapab konfirmen ki en  Elypse Consultancy i feature lo lalis konsiltan ki ganny anploye avek 2020 Development.  Sorry Mr Speaker mon pe gete si mon annan kopi sa Lagreman ki Onorab pe dir.

Mr Speaker nou ti pe rod si nou annan sa dokiman, me mon napa avek mwan, so nou a bezwen get avek Minister Finans si kekfwa i annan oubyen ‘’2020’’ menm li menm.

 

MR SPEAKER

Ok.  Minis lo 2enm par son kestyon.  Kestyon lo pratik ki’n ganny aplike.

 

MINISTER PAMELA CHARLETTE

Mon pa pou kapab dir lo kote koripsyon, me selman kekfwa i annan en konfli lentere.

 

 

(Interruption)

 

MINISTER PAMELA CHARLETTE

Me selman si i annan en koripsyon mon krwar i annan en Lazans – en lenstitisyon ki deza investigate.

 

(Interruption)

 

 

MR SPEAKER

Ok mersi Minis.  Onorab Andre.

 

HON CLIFFORD ANDRE

Mersi Mr Speaker.  Mr Speaker Minis dan son repons in dir nou ki ti annan konfli ki Cabinet ti fer removal of semi industrial Zone ki ti pou lo Ile Soleil ki sa ti premyerman ganny konsevwar pou fer sa.  E prezan kote ki sa bann dimoun pou ganny mete akoz sa i en konsern Anse Aux Pins, zot in ganny dir ki zot pou ganny la ; kote zot pou ganny mete?

E mon lot kestyon se, eski Minis pa krwar ki par lefe ki nou annan bann anomali serye dan sa dosye, sa later i bezwen re rann avek Gouvernman parey sa enn ki’n ganny fer Roche Caiman?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Pou sa kestyon lo kote, semi industrial orizinalman semi industrial ti pou sorti ti pou al dan plas lekol Pointe Larue ki ti pou move Ile Soleil.

Me apre sanzman dan plan, technical school in ranplase, alor nou bezwen ansanm avek IEA kekfwa revwar enlot landrwa kote nou kapab accomodate semi industrial.

I annan en proze ki IEA osi in met devan konman bann micro enterprise dan sak distrik e nou’n diskite e i annan bann propozisyon ki nou fer lo kote alokasyon later pou sa kekfwa sa i kapab kouver en pe sa bann semi industrial businesses.  Mersi.

 

MR SPEAKER

Mersi.  Onorab Andre avan mon retourn kot ou mon ava donn en lot Manm kestyon, apre mon a retourn kot ou.  Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon ti a zis kontan en pti pe leklersisman, akoz sa i paret en size ki annan problenm avek.  Mon ti a kontan zis demann Minis, premyerman eski ou kapab konfirmen poudir Ile Soleil plizyer Seselwa in aste direkteman, oubyen atraver zot avoka oubyen atraver zot noter, bann bout prive pou fer bann devlopman prive?

Eski ou kapab konfirmen osi ki i annan en gro kare later ki ti ganny emark pou en devlopman touristik, e ki sa bout later in ganny vann a en konsiltan ki ti pe ede pou fer marketing e devlop sa proze li menm li ki’n aste sa a en pri pli ba ki Gouvernman ti’n mete?

E trwazyenmman pou lenformasyon Lasanble, mon ti a kontan si Minis i kapab dir avek nou lekel ‘’2020’’ ki zot rol ki zot fer lekel sa bann msye oubyen bann madanm ki lo la, e ki zot pe anmennen dan sa proze?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Parey Onorab in dir wi i annan Seselwa ki’n gannyen ; i annan etranze ki’n gannyen e sa later touristik in gannyen par en Mr Allen Harsan parey mon’n fek dir.

Me selman mon ti a kontan fer resorti osi ki bann lof ki ‘’2020’’ ti gannyen ti annan 5 lof e ladan ‘’2020’’ sorry well ti annan 1 from Seselwa e 4 from etranze.

E mon war ki premye of 2milyon ti tro ba – 2.5milyon i annan lof ki ti 6milyon ; i annan lof 9.2milyon, me selman apre sa dimoun ti tir son lof akoz i pa ti ganny finansman lot lof nou ti gannyen ti 4milyon, e Crystal Properties ti offer 8milyon ki ti pli o sa letan, e osi se sa larzan ki’n servi pou met lenfrastriktir lo Ile Soleil.

Savedir sa 8milyon li menm ki’n kontribye pou 60poursan lenfrastriktir lo sa zil.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Wi an atandan ki Minis i kapab donn nou kekfwa detay lo ‘’2020.’’  Minis dir mon byen si mon byen tande?  En konpannyen oubyen en group dimoun ki pe organiz tender ki pe organiz lavant zot menm zot ki aste?

Konmsi mon pe zis sey ganny en konpran si sa i vre si mon byen tande akoz si sa i vre i vreman en problenm ; donk sa i premye problenm.  2enm problenm, eski Minis i kapab konfirmen ki sa prosedir tender in ganny swiv par National Tender Board?

E si tou keksoz in ganny fer konpletman above board?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker lenformasyon ki mon annan en Elypse consultancy i en konsiltan.  Mon pa tro asire ki li ki ti pe organiz tender me selman mon konnen i en konsiltan avek ‘’2020.’’

E lof ki ti vini ti vin apre bann prosedir tender, akoz pa ti ganny nanryen pa ti ganny okenn bids lo lof ti vin apre sa tender process ti fini.  ‘’2020’’….

 

MR SPEAKER

Ok kestyon lo ‘’2020.’’

 

MINISTER PAMELA CHARLETTE

Sorry mon krwar lazournen in long, pres pou mwan pa war tou.  Ok Board members Mr Barry Faure ki Chairperson, Mr Yves Choppy Vice- Chairman, Ms Sabrina Agathine ki member apre Mr Bertrand Belle member up to June 2017.

 

(Interruption)

 

MR SPEAKER

Mersi Minis.  Onorab Flory Larue.

 

HON FLORY LARUE

Mersi Mr Speaker.  Bonn apre midi Minis.  Letan nou donn bann dat ki 2020 ti ganny lanse e dapre sa consultancy agreement ki date 2013, ofisyelman 2020 ti ganny lanse an 2020 e dan bann research i montre ki pardon an 2014.

Me parkont …

 

 

(Interruption)

 

HON FLORY LARUE

Eskize zot napa okenn research lot kote zot, me parkont sa tourism development project i sipoze ganny promote par SIB.  Eski Minis i kapab donn nou en klarifikasyon keler ki SIB in sorti dan sa, ouswa  si all along SIB ti reste onboard pou donn lanmen vann sa propriyete, ouswa zis sa consultancy ki ti annan drwa?

Akoz dan son Kontra i ase strik! E osi zot annan en rémunération ki zot sipoze gannyen, me eski Minis i kapab klarifye si sa rémunération ki ladan ki plis ki R20milyon in ganny honor ouswa si i annan en lot amount ki zot in gannyen?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mr Speaker.  Prosedir tender ti ganny fer parey mon dir oparavan dan bann lannen 2013 – 2012/2013 mon krwar  an 2014.  Le 31 Zanvye ti ganny donnen konman deadline.  Hmm?

E apre sa ti napa okenn tender ki ti ganny resevwar napa okenn bidders se alor ki zot ti lot metod ki ti servi se angaz sa bann azan oubyen fasilitater, kot sa ti an Mars 2014, kot ti annan en dokiman ki ti ganny sinyen avek sa bann azan, oubyen fasilitater.

Dapre sa ki mon’n ganny enformen, napa okenn komisyon ki’n ganny donnen avek Mr Harsan, pou sa lenvestisman.

 

MR SPEAKER

Mersi Minis.  Onorab Larue vitman.

 

HON FLORY LARUE

Mersi Mr Speaker.  Minis pa’n reponn mon kestyon atraver ou Mr Speaker.  SIB i ganny mansyonnen as en partner pou market ok? Seychelles Investment Board e la nou annan en proze lokal ki pou Sesel Ile Soleil 2020, ki rol ki SIB in zwe ladan?

Akoz si nou war en 3rd  party pe antre e – konmsi ki rol SIB letan Gouvernman in engage sa body pou vann?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  SIB ti ganny pran pou li market sa proze parey mon dir dan sa bann letan ki mon’n mansyonnen ziska 2014!

 

MR SPEAKER

Mersi Minis.  Onorab Gervais Henrie.

 

HON GERVAIS HENRIE

Mersi Mr Speaker.  Vitman en pti kestyon.  So Minis in konfirmen ki sa Mr Harsan, i ti en konsiltan lo sa proze e apre in ganny sa tender.  Prezan sa ki mon anvi demande se, eski i pa sa ki zot apel insider trading?

Setadir  mwan mon’n form parti en process, mon annan inside knowledge.  E whether Gouvernman i toler bann keksoz koumsa, si in pas Ile Soleil konbyen ankor bann tranzaksyon parey i annan, letan bann gro proze Nasyonal pe ganny fer kot dimoun ki annan insider knowledge, i ganny sa bann proze?  Mersi.

 

MR SPEAKER

Mersi Onorab.  Mon krwar nou pe al en pti pe an deor la ou pe al demande ki kantite ki dan knowledge Minis ki’n kapab arive ankor – ok?   Me petet zis pou gidans Lasanble, mon konnen lo Standing Orders osi tou i gid nou osi tou atraver kestyon ki nou pa allow osi tou pou nou prompt lopinyon Minis atraver kestyon.

Me i annan sa konklizyon ki petet en pratik koronpi, in ganny pratike, me i annan bann lezot aveni ki nou kapab – en manm piblik oubyen en Manm Lasanble i kapab ale pou fer serten investigation.

So nou pa dapre nou Standing Orders nou pa kapab la  pou nou demann lopinyon pou nou kapab fer en Minis prezant son lopinyon – ok?  Mon’n war 2 oubyen 3 kestyon ki pe al dan sa direksyon ok?  Zis mon pe gid zot dapre Standing Orders.

Alright?  Onorab Henrie? Ok?   Mon ava donn dernyen kestyon Onorab Clifford Andre.

 

HON CLIFFORD ANDRE

Mersi Mr Speaker.  Mr Speaker atraver ou mon ti a kontan demann Minis, pou konfirm avek sa Lasanble ki poudir sa Mr Harsan i osi Chairperson lo Architechural Review Committee pou Ile Soleil e ki TOU, TOU san eksepsyon proze Ile Soleil i pas atraver li, pou ki i ganny aprouve avan ki i ganny anvoy kot Planning, alor si sa i pa ganny konsidere konman en konfli lentere serye?

       

(laughter)

 

HON CLIFFORD ANDRE

2enm mon ti a kontan dir avek Minis ki poudir dan Clause 6.2 lagreman ki mon annan avek mon date le 3 Zen 2013 i dir koumsa:  

        ‘’In addition to Clause 6.1 above the consultant will be paid a fix remuneration of Seychelles Rupees 35,000 per month which may be reviewed by the parties.’’

Alors sa msye ti pe ganny peye avek 2020 e Mr Choppy ki ou’n dir nou i en direkter i kapab konfirm sa avek nou.  3enm se ki dan plan orizinal STP ti sipoze ganny provided by the hotel developer, e ki letan Mr Harsan in pran e sa ti en valer R15milyon e ki letan Mr Harsan in pran STP in ganny provided par 2020 e non pa the hotel developer?

So in negosye, in tire in benefisye e in ganny peye  tou ankor.  4 keksoz in fer.  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker wi Mr Harsan i lo Review Committee for Architectural.  E son lapey ki i pe gannyen si mon pa tronpe i as en konsiltan lo 2020.

E mon pa pou parey Mr Speaker in dir, mon pa pou donn mon lopinyon whether si i en koripsyon. Mon krwar i annan bann laveni ki kekfwa Minister Finans i kapab swiv pou li etabli sa.  Mersi.

 

MR SPEAKER

Mersi.

 

HON CLIFFORD ANDRE

STP  i pa’n reponn.

 

MR SPEAKER

Pardon?

 

HON CLIFFORD ANDRE

STP i pa ankor reponn R1milyon.

 

MR SPEAKER

STP Minis.

 

MINISTER PAMELA CHARLETTE

Mr Speaker.  Mon krwar fodre nou get detay en pe bann Lagreman ki annan, e Minister Finans  a fer konnen kwa ki annan dan sa bann Lagreman ki ti involve STP regarding STP.  Mersi.

 

MR SPEAKER

Mersi Minis.  Bon nou ava bann konsern ki’n levé ki annan pou fer avek Minister Finans Onorab Andre ou ava liaise avek Sekretarya, kot nou ava anvoy sa bann konsern kot Minister Finans pou nou kapab ganny en klarifikasyon.

Bon nou ava pran dernyen kestyon, Onorab Norbert Loizeau.

 

HON NORBERT LOIZEAU

Mersi Mr Speaker.  Mr Speaker mon kestyon i lir koumsa:

Eski Minis pou Lenfrastriktir ek Later i kapab dir avek Lasanble, konbyen kare later ki’n ganny vann avek bann dimoun prive dan Morne Seychellois National Park depi sa dernyen 20an?  Enn.

2) Lekel sa bann dimoun ki’n aste sa bann later ?  Ki grander sa bann kare e konbyen zot in peye pou sak kare?  Eski okenn endividi in ganny permet pou aste plis ki 1 kare bout later dan sa landrwa?

Eski okenn later leta dan sa National Park in ganny vann avek dimoun ki ti deza annan later lo son non?

Dernyen eski i annan okenn restriksyon lo kalite e grander devlopman ki sa bann dimoun ki’n aste later dan sa landrwa i ganny drwa fer?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker sa bann kestyon i konsern nou avek Departman Lanvironnman.  Dapre lenformasyon ki mon Minister in resevwar Park Nasyonal Morne Seychellois ti ganny kree an 1979 letan i ti ganny konsevwar dan Lalwa National Parks Designation Order. 

Ti napa son siperfisi ki ti ganny dekrir par bann taso. Serten limero later e osi sa ki an Angle ki apel bann cordinates ki ti ganny idantifye.

An Novanm 1995 bann zofisye sorti dan Lotorite Plan Forestry and Land Use Planning, ti fer en legzersis re lokasyon balizaz kot sa park spesifikman dan rezyon Sans Soucis, pou retir bann siperfisi ki ti annan deza lo la under National Park.

Dan National Park i deza bann later endividyel pou bann propriyeter prive ki ti deza fini annan konstriksyon lo la.  Zot ti dekrir ki laplipar propriyete i an izolasyon avek kanmarad, ki ti fer li difisil pou retir bann gro porsyon later dan sa Park Nasyonal.

Dapre zot lobzervasyon, letan zot ti fer bann vizit zofisye Planning ti dekrir detrwa landrwa.  Dan sa menm rapor zofisye Planning ti mansyonnen ki vizinite Dam Rochon ek lofis Forestry sa letan, i ti idantifye ki sa landrwa in fini entansifye avek gran group devlopman rezidansyel, e tou sa bann lakaz ti bann ki ti fek konstri dan bon kondisyon e laplipar pou bann propriyeter prive.

I ti fer rekomandasyon pou retir sa landrwa dan Park Nasyonal.  Dapre lenformasyon an Zilyet 1996 direkter forestry ti ekri Departman Kominoter, an de repriz i pou demann permisyon i pou retir sub division rezidansyel Copolia dan Park Nasyonal Morne Seychellois.

Dapre li sa siperfisi i mwens 1ektar e osi pou retir sa ki ti ganny apele konman Forestry Village e bann morso later tou otour Fiba Estate, pou diviz sa bann morso later e vann avek bann forestry staff ki ti pran retret.

I ti site ki sa bann landrwa i devret ganny ekskli dan Park Nasyonal.  Dapre lenformasyon an 1997 Direkter Zeneral pou Later e Survey ti ekri let a 2 repriz atase ek enskripsyon re designation.  Sa de landrwa dan park nasyonal ki ti konpri Sans Soucis e Copolia, e demann konsiderasyon Direkter Zeneral dan Minister a sa letan pou zafer etranzer plan ek lanvironnman.

Le 7 Avril 1999, en papye ti ganny soumet e aprouve par Cabinet par bann Minis, pou re désignation Park Nasyonal.  Dapre rikord en letid ti ganny fer an 2015, par Minister Lanvironnman an kolaborasyon avek nou Minister pou idantifye bann later ki tonm dan balizaz Park Nasyonal Morne Seychellois.

Resers in montre ki i annan bann later ki tonm konpletman dan sa park, e osi i annan bann later ki tonm en bout anndan park e en bout an deor park.

An tou i annan 123 bout later ki ganny rikorde avek lenformasyon lo limero sa bann later ; zot siperfisi e pou ki sa bann later e sa letan ki sa resers ti ganny fer en total 123 bout later i kouver en siperfisi 61,375,423.04sqm oubyen 6137.54 ektar.

Analiz preliminer sa letid in montre ki sa legzersis i enn ki bokou konpleksite, e pou demann bokou letan resers, an vi ki apepre 40poursan later i pou propriyete prive pandan sa letan ki letid ti konmans fer.

Sa konpleksite ki mon pe koz lo la, i dan lesans ki Gouvernman napa kontrol lo tranzaksyon ki ganny fer, ek bann later prive, kantmenm Park Nasyonal i ganny dedye konman en landrwa proteze.

Savedir en dimoun ki annan later prive ki tonm dan Park Nasyonal, i annan drwa vann sa later avek en lot dimoun.  Sel kontrol ki Gouvernman i annan se pou anpes li antreprann devlopman ler plan i soumet kot Lotorite Plan.

Tranzaksyon later i prive i dinamik dapre mon konesans napa okenn Lalwa ki anpes en endividi ki anvi aste plis ki en bout later prive.  Si en dimoun ki deza annan later lo son non e i anvi aste en later prive napa nanryen ki pou anpes li.

Mr Speaker an 2018 Departman Lanvironnman ti re inisye sa resers e demann led pou ganny lenformasyon ownership avek Departman Later e  sa resers i ankor pe ganny fer.

Vi ki sa bann kare later, i pou bann ki prive, pou sa mon ava advise ki plis resers i ganny fer, ansanm avek Lanrezistreman pou nou kapab met annord nou lalis ki nou annan baze lo lenformasyon nou annan 2015.

Pou reponn kestyon Onorab avek lenformasyon azour dan son totalite, an prenan kont siperfisi sa later e bann konpleksite ki vin avek i demann en resers pli profon ki date depi letan kolonyal ki pou nou en listwar lo ki mannyer bann later dan sa park in sanz lanmen.

En tel resers pou pran bokou letan e alokasyon resours imen sorti kot Rezistrar nou Minister e Minister Lanvironnman e Lotorite Park.

I bon fer sorti e pou note i reste touzour polisi Gouvernman pou pa vann later ki tonm dan Park Nasyonal e i reste touzour polisi Gouvernman pou pa otoriz devlopman ki pa relye avek park.

Parey nou konnen restriksyon dan pou devlopman National Park in ganny stipulate dan National Park and Nature Conservancy 1979. 

        E mon ganny enformen avek Minister Lanvironnman, ki i annan en nouvo Lezislasyon ki apel Nature Reserve and Nature Conservancy Act ki pou ranplas sa Lezislasyon.

E sa Bill i deza dan en White Paper Stage e pe ganny finalize pou soumisyon avek Cabinet.  E provizyon pou pe ganny mete pou allow serten devlopman baze lo kategori sa bann protected areas, e osi provizyon anba bann lezot kondisyon pou ganny mete through Planning e Environmental Protection pou restrikte en pe kalite devlopman ki kapab ganny fer.  Zis pou zot lenformasyon parey mon dir baze lo sa resers ki’n konmanse 2015 e osi 2018, nou annan lalis bann later ki tonm dan sa 123 ki tonm dan National Park ek nou.

Mon pa konnen si Onorab i le nou pas ladan, one by one akoz i vreman en pti pe …

 

MR SPEAKER

Non.  Minis ou a kapab fer Manm Lasanble gannyen.  Bon konsey bann Manm mon annan 4 Manm lo mon lalis pou siplemanter nou fer li direk bann kestyon direk.

Onorab Loizeau oule antre la oubyen ou ava pran li pou konklizyon final ?  Ok Onorab Ferrari.

 

HON JEAN-FRANCOIS FERRARI

Ok mersi Mr Speaker.  Mon krwar kekfwa Minis i pan oubyen kestyon i pan ganny byen worded, akoz  mwan mon ti konpran ki kestyon i about later ki Gouvernman in vann avek bann dimoun prive.

E ou’n reponn nou lo later ki’n sanz lanmen from prive to prive, eksetera.  Donk kestyon ti mon ti war li koumsa.   Me selman i annan en keksoz ki Minis in dir ki enportan pou mwan akoz i annan pou fer avek pwen 4.

Minis mon fek war dan Morne Seychellois National Park i en landrwa ki mon konn byen, akoz mon ti reste laba anler Sans Soucis.  En tower crane, ki pe build en striktir ki mannyer mon ganny en konpran i ground plus 2  -mannyer mon ganny en konpran.

E mon en pe per, mon en pe per  ki nou ganny nou en lot Sheikh Kalifa dan Sans Soucis ok?  Akoz sa msye mon pa pou met son non la i en nespes Sheikh Kalifa menm li. Donk  mon oule konnen si zot otoriz nenport ki grander konstriksyon dan National Park ziska ki oter?  Sa i premye.

2enm kestyon mon ti a kontan si PS pou Later i kapab dir avek nou, eski i annan en dansite pou ou konstri?  Eski ou kapab kouver – eski lo en plot ou kapab  met 3/4/5 diferan lakaz ?  Akoz mon’n war en plot kot i annan deza 3edmi – 4 lakaz ; konmsi mon le konpran ki restriksyon i annan lo dansite konstriksyon dan sa National Park?

Apre kekfwa Minis i kapab dir nou lo sa tower crane la ki pe fer louvraz.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mon krwar sa devlopman ki ou pe koz lo la, i pa tonm dan National Park.  Ou pou war ladan i annan bann pocket, dan sa legzersis parey mon’n dir 2015 i annan bann pocket ladan ki pa National Park.

So ler nou fer bann assessment depi avan i annan bann parcel ki’n ganny eksklir dan bann legzersis.  So ou pou war lo lalis ki mon pou donnen, i pa pou kekfwa tonm ladan.  E osi bann devlopman ki nou otorize kot Planning i sirtou bann devlopman ki relye avek park li menm, oubyen avek PUC ki ti pe fer, si sa plot i tonm dan National Park. 

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Nou ava re verifye si anba nouvo balizaz, pou donn nou si i tonm ladan oubyen deor me selman en pti kestyon.  Ou konnen bokou touris i vizit National Park pou zot kapab war view, pou zot kapab tir en portre lavil tou pou zot kapab fer zot cruise ship.

I annan enn de msye ki zot pa oule ki dimoun i get anndan kot zot. Zot  pe mont miray partou otour e la i annan en msye ki zot fek vann li pa tro lontan sa – Gouvernman ki vann li en bout later ziska dan larantre semen ki al Copolia – sa trail ki al Copolia.

Konmsi mannyer mon war keksoz pe ale ziska sa trail Copolia i pou pran sa msye.  E la bout in fini build en miray – en lot bout ou a krwar pa pou tarde pou build en miray.

Be touris pa pou ganny okenn landrwa pou ganny view point !  I mean nou viv nou viv dan en pei kot dimoun i pas anndan dan nou miray akoz i annan dimoun ki li i bezwen bar tou landrwa, ou pa pou kapab get ou pa pou kapab gete e sa.  So?

Eski Minis i kapab fer en komanter lo la silvouple?

 

MR SPEAKER

Mersi Onorab.  Minis.

 

MINISTER PAMELA CHARLETTE

Mr Speaker,  pou pran kestyon Onorab dan sa lalis ki i annan nou napa okenn aplikasyon ki nou donnen pou fer miray.  Sanmenm sa ki mon pe dir kekfwa i tonm an deor sa pocket i tonm deor balizaz National Park.

I annan aplikasyon ki nou aprouve ou pou war lo la lo lalis menm me plito bann proze avek National Park oubyen PUC.

 

MR SPEAKER

Mersi Minis.  Onorab Bernard Georges.

 

HON BERNARD GEORGES

Mersi Mr Speaker.  Mon kestyon pou Minis se sa enn eski Minis pe dir nou ki dan sa National Park ki nou annan Trois Frère National Park, Morne Seychellois National Park ladan enn pti pe parey en fromaz Swiss i annan detrwa pocket ki Park Nasyonal kantmenm toultour li i annan Park Nasyonal ; eski mon konpran Minis byen ler i dir mon ler i koz pocket?

2enm kestyon ki mannyer i arive ki dan en Park Nasyonal Planning i donn permisyon pou fer en konstriksyon?  Sa – akoz dan Park Nasyonal si ou pou donn Planning permission pou fer konstriksyon dan in  any event dan sa ka pa apel li en Park Nasyonal!

E trwazyenmman eski Minis, an vi sa 2 keksoz ki mon’n demande i parey pou aksepte ki Gouvernman i bezwen konpans bann propriyeter prive ki zot later i ganny designated dan National Park, akoz zot, zot pa kapab fer nanryen avek.  Mersi.

 

MR SPEAKER

Mersi Onorab Georges.  Minis.

 

MINISTER PAMELA CHARLETTE

Mersi Mr Speaker.  Pou mwan reponn kestyon Onorab, ler ti fer legzersis an 2015 – parey mon ti dir, ti annan landrwa kot i ti deza annan rezidansyel e bann dimoun ti pe si zot ti pou renovate zot lakaz zot pa ti pou kapab fer.

Sanmenm sa ti bezwen tir zot sa bann dan sa demarkasyon, pou zot kapab.  Akoz zot in la tou sa letan pou zot kapab kekfwa devlope fer zot bann renovasyon whatnot ti bezwen tir zot dan sa National Park.

Dan sa Polisi ki lanvironnman pou vin avek, i pou adres zisteman bann issues devlopman e whether pou annan konpansasyon si i pou annan, pou bann dimoun ki dan sa National Park, oubyen lezot National Park.  E ki mannyer nou pou zot pou adres sa bann sityasyon, e ki kalite konpansasyon ki nou kapab donnen.

Se sa ki Minister Lanvironnman i pe travay lo la pou le moman.  Mersi.

 

MR SPEAKER

Mersi Minis.  Onorab Georges.

 

HON BERNARD GEORGES

Mersi Minis.  Mon en pti pe konfize avek sa dat 2015.   Mwan mon rappel National Park in ganny fer mon ti ankor lekol.  Mon ti ankor lekol dan kannson kaki kourt – kannson kourt kaki avek en semiz blan sa i pa 2015 apre mon kit lekol en bon pe letan pase.

Kisisa ki fer ki 2015 in vin enportan ?  Eski Minis pa pe dir nou ki annefe sa ki’n arive an 2015, se zot in fer en legzersis pou eskiz dimoun, ki ti’n ganny en priyorite pou fer konstriksyon dan National Park e prezan zot bezwen rod en fason pou eskiz zot pou sa keksoz ki zot in fer?

E dan sa konteks, eski i pa swetab,  korek e konstitisyonnel, pou ki bann dimoun ki zot later i tonm dan National Park e ki pa’n ganny sa lavantaz pou zot devlop zot later, e o kontrer dir zot pa kapab, pou ki zot ganny en konpansasyon, pou lefe ki zot in perdi valer zot later?  Mersi.

 

MR SPEAKER

Mersi Onorab.  Minis petet mon pou enkli en pe kestyon mon pou profit sa moman pou mon amalgamate li avek pou Onorab Georges.  Nou konnen Morne Seychellois National Park i extend all the way Bel Ombre par lao Bel Ombre, Anse Major partou.

I annan de fanmir ki  pe deza ekri e negosye ek Gouvernman – dan menm laliny ki Onorab Georges zot war zot dezavantaze mon krwar laliny boundary National Park in ganny re dezinyen.

I annan Mrs David Louise, ki ti’n menm vann en bout son later e la i war ki sa devlopman i bezwen rann larzan sa aster, akoz sa aster in dekouver poudir i pa pou kapab devlop sa later, akoz sa later i tonm dan National Park.

E i annan Mr Michel Napoleon osi i pe ganny menm problenm. Zot baliz ek kanmarad zot pe demann Gouvernman pou antre swa pou resanze oubyen compensate zot dan serten fason, akoz zot drwa konstitisyon led in ganny afekte, avek re dezinyasyon balizaz National Park.

En pti pe dan menm laliny ki Onorab Georges pe demande.  Minis.

 

MINISTER PAMELA CHARLETTE

Mersi M Speaker.  Mr Speaker i annan diferan legzersis ki’n ganny fer parey mon dir 1999, me selman i pan permet nou avek letan pou nou kapab al really go back.

Si nou ti pou go back nou ti bezwen go back, vreman depi konmansman menm, depi dan letan Kolonyal pou nou konnen kwa ki’n arive.  Me selman nou rekonnet wi ki i annan bann devlopman ki’n ganny fer par bann endividi, ki lo later prive, e kekfwa se la fason ki Gouvernman in deside pou li( ki mannyer mon kapab dir sa) tir en pe burden, akoz i annan osi bann housing estate par egzanp ki nou bezwen tire pou nou kapab fer sa housing estate.

Lo kote Mrs Louise par egzanp nou pe regete akoz ler ti ler ti fer en legzersis i ti aranz balizaz National Park nou ti re klasifye li, konman en F1.  Savedir en Forest Reserve.  E la nou pe konsiderasyon avek Planning pou nou kapab sanz ankor sa land use pou ki kapab kekfwa kapab enjoy son bout later.

Sa i an konsiderasyon.   E pou konpansasyon mon krwar sa Polisi pou fer kler ki kalite konpansasyon ki nou pou kapab donn sa bann dimoun.  E si i annan en negosyasyon ki nou bezwen, i annan bann dimoun ki nou bezwen asize fer negosyasyon ek zot, e sa i depan zot demann ki zot pe demande.  Me sa Polisi i pou kler, e i zot pou adres tou sa bann kontrent ki mon mansyonnen.  Mersi.

 

MR SPEAKER

Mersi Minis.  Onorab Georges ou ankor dan vag.  Onorab Georges.

 

HON BERNARD GEORGES

Non Mr Speaker, lazournen in long Minis in la en bon pe letan, e mon konpran son retisans  vi sa problenm ki sa kestyon i met lo Gouvernman. Akoz i en kestyon lour pou reponn.

Minis annou vin direk lo size, eski i annan 2 ansyen Prezidan ki zot later i tonm dan National Park – ki zot lakaz i tonm dan National Park?

 

MR SPEAKER

Mersi Onorab.  Minis.  Kestyon direk.  Minis.

 

MINISTER PAMELA CHARLETTE

Mr Speaker lo mon lalis i zot pa tonm ladan.  Wi zot pa tonm dan National Park.

 

MR SPEAKER

Mersi pou repons Minis.  Onorab John Hoareau.

 

HON JOHN HOAREAU

Mersi Mr Speaker.  Mr Speaker mon ti ava kontan konnen, eski si Minis i kapab donn nou en dele letan kan sa Polisi pou ariv devan nou oubyen pou ganny pibliye?

Anvi ki sa bann propriyeter i deza vye i annan ki’n mor osi, e sa bann propriyeter ki reste ki annan later dan park, ti a kontan konnen kan apepre zot kapab ganny en rekour?

Dezyenmman Mr Speaker, mon ti a kontan konnen si Minis dan son revi ki zot in fer 2015, zot in war nesesite dan bann landrwa ki annan en low biodiversity sirtou bann landrwa ki borde ver Port Launay – Port Glaud/ Port Launay laba si zot pou annan lide pou retir sa dan Park Nasyonal?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mr Speaker mersi.  Mon pou demann Onorab pou repet son premye kestyon ; selman mon ava al lo 2enm kestyon.  i annan en legzersis ki nou pe fer ansanm avek Lanvironnman kot nou pe revwar bann sirtou bann Forest Reserve ki zot in mete akoz li i bann napa kekfwa bio diversite parey en National ParkSo wi i annan en legzersis ki nou pe fer ki’n Lanvironnman in fini fer en bon pe nou bann demann e prezan nou dan sa prosedir al ver Planning Authority, kot li i re klasifye bann land use.

Nou pe fer sa legzersis anvi ki nou anvi nou osi release  en pebann later ki nou klasifye as F1 pou nou kapab osi devlopman e osi land bank pou  plas Nasyonal.

 

MR SPEAKER

Mersi.  Minis son bout premye kestyon kan eski sa nouvo Polisi pou vin devan pou pare?

 

MINISTER PAMELA CHARLETTE

Mersi Mr Speaker.  Lenformasyon ki mon gannyen avek Lanvironnman zot in fini White Paper Stage ; zot sipoze pe anvoy sa Polisi kot Cabinet tre byento.  So me selman mon a follow up avek zot kan zot kapab, me selman i looks like en keksoz ki  pe vinik dan very near future.  Mersi.

 

MR SPEAKER

Mersi Minis.  Onorab Flory Larue.

 

HON FLORY LARUE

Mersi Mr Speaker.  Mr Speaker mon pe regard layout National Park right now,  Morne Seychellois, e mon pe war sa bann pocket.  En pocket ki mon war i enkli 3 bout later enn i mezir 10,000met kare enn 7,000met kare, enn 1,000met kare pou fer en sel propriyete plis ki  19,000met kare e sa i en propriyete ki en pocket ki really i pa ver, parey larestan i separe. Me  i pou Msye James Michel.  Alor mon ti a kontan konnen  i ti aste son later an 2001, lefe ki bann travay ti ganny fer an ’95 – an ‘96 e an ‘97 e li i ti aste son later avek Gouvernman, pou R500,000mil sa 20,000met later.

Eski i sa bout rezerv ti vin pocket apre ‘95 oubyen avan 95 ou’n ti fini demark sa  3 pocket?  Akoz mon war en lot pocket la i Legzil apre mon war en lot pocket kot bann fanmir Savy antye i reste.

E lefe ki demarkasyon ti ganny fer an ‘95, ‘96, ‘97 pou zot reget bann later, mon konn en dimoun ki li in ganny en bout later zis kot larantre Copolia i été, i ti aste pou li an 2011 pou R226mil, en bout later ki mezir 2,000met kare – Mr Dupuis ti ganny son later an 2011, eski ou kapab dir nou kan ki sa pocket i ti vini silvouple?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Lenformasyon ki nou annan ti 2015 – dan legzersis 2015.  Pou Mr Dupuis ti annan en subdivision 2009 ti annan en subdivision 2009.

 

MR SPEAKER

Mersi Minis.  Onorab Larue.

 

HON FLORY LARUE

Mersi Mr Speaker.  Mr Speaker i pa kler ditou, si i ti en rezerv apre ki in vin en pocket 2015, me lavant ti pas an 2001 ek 2011, ki prosedir ki zot, zot in mean pocket akoz sa later Gouvernman mon pa pe koz prive la.

Lezot Onorab avan mon in koz lo later prive ki pou dimoun ki gran ki National Park ki zot later ki belong pou zot pa’n aste ek Gouvernman zot.

Zot pa pe ganny ley way me sa bann later ki’n vin pocket ti rezerv, prezan in vin later Gouvernman, apre Gouvernman in vann sa avek Msye James Michel ek Mr Dupuis avek lezot dimoun ankor.

Konmsi ki mannyer sa i marse?  Eski i annan later ki pou vin disponib pou dimoun al aste ankor?  Akoz nou anvi en pocket nou osi.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mr Speaker parey mon’n dir oparavan ti annan diferan legzersis ki ti ganny fer dan diferan dat, depi 1999 an montan.  So i bezwen annan bann tranzaksyon ki’n arive between sa bann letan, ki apre National Park dernyen legzersis ki i ti fer 2015, i osi in ganny enkli dan sa legzersis pou tir sa bann later dan National Park.

 

MR SPEAKER

Mersi Minis.  Onorab Simon Gill.

 

HON SIMON GILL

Mersi Mr Speaker.  Bonn apre midi tou koleg Onorab, Minis avek ou lekip.  Minis atraver ou Mr Speaker, mon’n ekout bann kestyon repons probableman en kestyon ki mon krwar i enportan nou demande, i senp met avek ou Minister, ki nou ganny en pe detay dan sa revizyon nouvo Lalwa, ki pran an konsiderasyon, nouvo lapros ki zot pe mazinen  pou defini an term devlopman dan lo bann later dan National Park.

Ou konnen zafer later i en zafer tre sansasyonnel, e nou bezwen fer tre atansyon ek sa bann kestyon later.  E ti ava byen nou konnen.  Mon’n tann ou nonm bann owner later depi en pe letan. Lekel zot sa bann dimoun petet sa premye 10 dimoun ki annan pli gro porsyon later dan National Park – lekel zot?

Konmsi – mon prezimen zot bann Seselwa byensir ok? me donn nou en pe detay.  Eski dan sa revizyon i annan en lapros kot zot pe mazinen pou les annan en devlopman ki kontrole – mon repet ankor ‘’en devlopman ki kontrole !’’ Par lefe deza ki i annan en pti pe devlopman ki zot deza les ganny fer ladan dan National Park? 

Ou Konpran mwan?  So i annan bann presedans byensir ki’n ganny kree ki mon konpran la.  Me si ou pran en lapros dan nouvo Polisi ou annan serten bout, ou agrandi lespas pou bout ki ou donnen pou allow, ankor enn fwa mon repete sa control development.

E nou re antre dan en konsiltasyon, dan en dyalog avek bann parti prenan dan sa zafer, pou nou ankor enn fwa ariv lo en meyer solisyon, pou elimin sa bann tansyon, sa bann problenm ki mon pe santi pe arise lo sa size.

So mon pou aret la e mon demande, mon pe enplore ki zot pran en konsiderasyon tre favorab, vizavi sa size.  E mon ti ava voudre ganny ou propozisyon Madanm Minis.  Mersi bokou.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mersi Onorab.   Onorab ler nou pe get later dan sa National Park li menm, laplipar sa later i lo Gouvernman e nou annan en pti porsyon ki pe ganny ki prive.

Lo kote Polisi wi mon krwar se sa ki Minister Lanvironnman i anvi fer i anvi met bann diferan kategori e ki kalite devlopman ki kapab ganny fer.

Ou bann pwen i kapab i  – mannyer mon kapab dir sa i apropriye e nou ava fer pase avek Lanvironnman pou li revwar en pti pe an totalite bann spesyalman, lo kote devlopman ki ganny fer, akoz nou osi nou ganny pa mal request avek bann dimoun ki deza annan later prive, sirtou dan Marine Park e zot anvi devlope e ki Gouvernman oubyen through Planning, Lanvironnman pa kapab les zot devlope.

E nou konnen poudir sa i en keksoz ki depi ler mon’n vini mon toultan angaze ek Lanvironnman pou dir ki nou bezwen annan en Polisi.  E mon kontan ki ti deza en keksoz ki zot ti pe diskite e i reste zis prezan pou fini finalize e nou a konnen ki vreman sa polisi i entails.  E I hope ki dimoun at least i a ganny en rekour lo kote zot later.

Akoz nou osi lo kote later Minister i kout nou bokou larzan, i kout nou bokou resours, akoz ler ou pe al donn konpansasyon, ou donn konpansasyon depans en kantite larzan wi – definitivman.  E nou bezwen either donn zot larzan oubyen compensate zot avek en lot bout later.

E plizyer fwa se finansyel ki zot demande, ki Gouvernman li menm, pou napa ase larzan pou peye.  So se sa ki nou osi nou pe pouse kot Later pou nou kapab ganny en konpromi avek Lanvironnman pou nou kapab anpes dimoun.  e se sa ki lanvironnman i travay bokou lo pou tir bann pocket kot devlopman i kapab permet.

E sa bann bout later zot allow fleksibilite, me selman zot gid through Planning, zot gid sa bann devloper, kwa ki zot kapab mete.  E sa i fer zot lavi en pti pe pli fasil.  E i fer nou lavi en pti pe pli fasil osi kot Biro Later akoz nou bezwen nou latet i fermal ler nou mazin bann konpansasyon ki nou pou bezwen pey sa bann dimoun.

E nou annan bann lawyers ki lo nou back, pou pe rod konpansasyon  pou zot bann dimoun.  Mersi.

 

MR SPEAKER

Mersi Minis.  Minis wi –  mwan mon pou zis antre en pti moman.  Minis ou’n mansyonnen ki Polisi byento pou al devan Cabinet, eski i tro tar pou retourn ver konsiltasyon?  E sirtou sa bann dimoun ki pe demann konpansasyon e nou konnen sa bann konpansasyon demann i ase o i pou sibstansyel pou Gouvernman pou retournen pou rekonsilye avek zot petet pou regarde.

Eski zot osi par egzanp sa de fanmir ki mon mansyonnen taler lafanmir Louise ek Napoleon, eski zot osi zot kapab ganny tire konman bann pockets?

Ki zot a kapab ganny zot later a ganny vann, devlopman i ava ganny gide par Minister Lanvironnman avek Planning e zot pa ava annan sa fardo konpansasyon.

Eski i tro tar pou go back?  Napa sa bokou sa bann dimoun prive ki annan sa bann later ki pe baliz dan National Park, me eski zot in ganny ase konsilte ?  Eski zot in ganny eksplike sa nouvo polisi e ki mannyer i pou enpakte lo zot?

En pti pe dan sa laliny Minis.

 

MINISTER PAMELA CHARLETTE

Mersi Mr Speaker.  Sa ki mon konpran sa Polisi in fini reach White Paper Stage ; savedir i annan en pe konsiltasyon ki’n ganny fer.  Me selman mon a met sa devan latansyon Minister Lanvironnman, si i annan adisyonnel ki zot kapab fer.  Mersi.

 

MR SPEAKER

Mersi Minis.  Onorab Simon Gill.

 

HON SIMON GILL

Mersi Mr Speaker.  Mr Speaker zisteman pa ankor ganny gazete sa nouvo Prozedlwa or sa revizyon.  Si i ankor dan White Paper Stage nou pe enbleman demande ki nou antre dan en faz re konsiltasyon, si i annan serten konsiltasyon ki a ganny fer rekonsilye.

Annou diskite, annou engage.  angaz bann parti prenan dan sa legzersis, pou ki nou minimiz tansyon, presyon lo Gouvernman, e lo tou bann avoka ki pe rod en pe larzan tou !

 

(laughter)

 

 

HON SIMON GILL

Ou konpran? So ler  fer sa, avoka i a ganny mwens e sa bann propriyeter, i a ganny en posibilite pou ganny zot later, e annan en devlopman ki kontrole, dirize par bann Lotorite konsernen.

E finalman tou dimoun i happy malgre avoka pou ganny en pti pe mwens.  Me sa bann dimoun i ava kontan ki’n ganny zot later e posibilite pou zot zouir zot later.

So vwala mon krwar en pti pe ki nou pe seryezman rekomande Minis, ki nou bouz dan sa direksyon.  Mersi bokou Madanm Minis.

 

MR SPEAKER

Mersi Onorab Simon Gill.  Minis oule dir en mo lo sizesyon?

 

MINISTER PAMELA CHARLETTE

Well parey mon dir nou pou met sa devan Minister Lanvironnman pou zot konsidere e a fer zot konnen.

 

MR SPEAKER

Mersi Minis.  Mon a retourn lo Loter kestyon.  Onorab Norbert Loizeau.

 

HON NORBERT LOIZEAU

Mersi Mr Speaker.  Pou dir ou mon fer en fot pou aksepte pou mwan demann kestyon – mon bann dernyen kestyon les lezot Manm, akoz alafwa pa’n reste mwan nanryen.

 

(laughter)

 

 

HON NORBERT LOIZEAU

Me selman i annan enn ki mon krwar ki mon bezwen demande, mon anvi ki Minis i eksplik mwan en pti gin, bann zafer pocket la.  Kot i annan i ganny retire dan pocket, me selman i annan i reste!  Mon dir sa Minis, akoz i annan en pocket anler laba dan National Park Morne Seychellois kot ti annan detrwa fanmir ki ti reste.

La i fer mwan  mazin lafanmir Henrie, Benoit e plizyer lezot ozordi zot in ganny tire zot in ganny mete lo blok Sans Soucis.  Rezon ki zot ti ganny tire, se ki i annan sours delo ki desann ; danm i par anba, alors pou rezon polisyon dan danm, alors sa bann dimoun ti ganny retire la.

Alors Minis mon ti a kontan demann ou, akoz ki serten zot reste dan pocket i annan i ganny tire dan pocket?  E Onorab Georges in koz lo konpansasyon, mon anvi demande osi si sa bann fanmir osi pou ganny en pti konpansasyon pou lapenn ki zot in ganny tire dan sa pocket?  Mersi.

 

MR SPEAKER

Mersi Onorab Loizeau.  Minis.

 

MINISTER PAMELA CHARLETTE

Mersi Mr Speaker.  Mr Speaker kekfwa mon krwar sa bann kestyon i devret ganny met an latansyon Lanvironnman.  Me mon pa konn vreman sa bann parcel number kekfwa pou sa bann fanmir. Nou ti a gete si i lo nou lalis vreman parey nou pe dir e vreman si i tonm an deor or anndan National Park.

 

MR SPEAKER

Mersi Minis.  Onorab Loizeau.

 

HON NORBERT LOIZEAU

Les mon dir ou Minis i annan sa morso ki sa bann dimoun ti ganny tire dan pocket.

 

MR SPEAKER

Ou annan parcel number?

 

HON NORBERT LOIZEAU

Mon napa, me selman mon kapab rode mon a donn ou.

 

MR SPEAKER

Wi petet ale Onorab Loizeau.

 

HON NORBERT LOIZEAU

Apre ki sa bann dimoun ti ganny tire Larme  Legzil ti vin fer laferm la.  E ozordi sa bann dimoun ti ganny demande konm kwa pou rezon polisyon, danm i par anba, ti ganny tire, me selman apre laferm ti ganny fer la, e ozordi i annan dimoun ki pe reste la.

Ti annan en msye ti pe sonny poul, e ozordi i annan en lot dimoun ki pe fer delo mineral, me selman zot sa bann dimoun zot in ganny tire la dan sa pocket zot!  Mon krwar ou pou bezwen konnen kote apepre.

 

MR SPEAKER

Minis.

 

HON NORBERT LOIZEAU

Mr Speaker mon anvi demande si zot polisyon i diferan osi ek sa bann lezot dimoun, ki sa bann dimoun ki ankor pe reste laba dan bann pocket.

 

MR SPEAKER

Wi.  Mon krwar i menm laliny ki Onorab Georges pe demande akoz en bann i ganny serten lavantaz e lezot pa ganny sa lavantaz?  Minis.

 

MINISTER PAMELA CHARLETTE

Mersi Mr Speaker.  Pou le moman, mon pa pou kapab reponn sa kestyon akoz nou bezwen ganny plis lenformasyon avek lanvironnman, pou ki purpose kekfwa ki sa bann dimoun ti ganny tire e en pti pe history lo sa bann spesifik cases.  Mersi.

 

MR SPEAKER

Mersi Minis.  E Onorab Loizeau si ou annan lenformasyon ou a kapab fer Minis gannyen pou ed Minis pou klarifye sa sityasyon pou ou.

Bon avek sa mon ti a kontan remersi Minis avek son lekip Mr Choppy. Mr Barbe, Mr Hoareau e osi tou  Mrs Albert.  Minis mersi pou pas sa lazournen avek nou.  Mon’n fer Madanm Clerk fer en pti legzersis i dir mon finalman ou’n reponn 25 kestyon from nou Order Paper – san kont sa kantite siplemanter.

Nou remersi ou pou ou pasyans e nou vreman apresye sa lazournen ki nou’n pase ansanm.  Avek sa Minis mon a remersi ou avek ou lekip e nou ava eskiz ou parmi nou.

 

(MINISTER CHARLETTE AND HER DELEGATION WAS EXCUSED FROM THE  HOUSE)

 

 

MR SPEAKER

Bon avan nou adjourn pou ozordi, mon ti ava zis mon konnen i annan en negosyasyon ant Chair IAC avek Leader Government Business. Nou ava adres sa demen bomaten?  Akoz demen bomaten tou fwa premye keksoz se stetment – Minis pe vini pou stetment, apre nou ava -.  Si nou le adres li premye keksoz bomaten akoz nou annan en dimoun ki lo latant, e nou pou bezwen enform li – ok?

So nou ava fer li demen bomaten alrightSo nou ava adjourn pou ozordi e mon ti a kontan profite pou remersi SBC osi tou sirtou nou pran en pti pe letan avek radyo AM e ankor bann teknisyen osi tou nou dir zot mersi, e tou bann dimoun osi ki pe travay par deryer dan stasyon SBC, nou dir zot mersi e nou prezant sa leskiz pou lazournen ozordi.

Nou ava adjourn e nou repran nou travay demen 9er bomaten.

 

 

(ADJOURNMENT)