::
Home » Verbatim » 2019 » Verbatim Tuesday 2nd April, 2019

Verbatim Tuesday 2nd April, 2019

NATIONAL ASSEMBLY OF SEYCHELLES

Tuesday 2nd April, 2019

 The Assembly met at 9.22am

 National Anthem

 Moment of Reflection

 Mr Speaker in the Chair

 

 

MR SPEAKER

Bonzour tou Manm Onorab.  E bonzour tou Manm a lekout.  E en bonzour spesyal pou bann Constituency Clerk ki isi dan Lasanble ki pe sorti lo kote Lopozisyon lo kote Linyon Demokratik Seselwa, ki prezan isi dan Lasanble e osi tou pou sa group zofisye Lapolis ki bomaten isi dan Galeri e ki pe swiv travay Lasanble Nasyonal – Welcome e mon swete ki zot ava pas en bon moman avek nou.  E parey labitid dan Break 10.30 nou pou organize ki zot kapab pran dite avek nou e an menm tan pou enterak en pti pe avek bann Manm Lasanble.

Bon avan nou konmanse bomaten nou pou al lo nou Order Paper, mon annan zis en pti kominikasyon ki mon anvi fer.  Sa i zis pou mon adres en pti konsern ki’n ganny levé par Praslin Business Association.  Swivan Kestyon Irzan lo redevlopman zil Curieuse Mardi le 26 Mars pou Minis Lanvironnman, Lasosyasyon Biznes Praslin, in ekri mon Lofis pou fer serten koreksyon e klarifikasyon, lo repons ki Minis ti donnen.

An vi ki sa pa tonm anba Lartik 102 (6) Konstitisyon ki konpri Right of Reply, mon’n sirkil en kopi sa let ki’n ekri e sinyen par sekreter sa Lasosyasyon – Mr Adrienne Uzice pou latansyon e konsonmasyon tou Manm Lasanble – ok?  Vwala sa ki mon fer e mon swete ki tou Manm Lasanble in ganny en kopi sa let.  Yes.  Bomaten osi tou lo Order Paper, mon’n fini averti le 2 lofis, ki an vi ki nou annan bokou travay lo nou Order Paper e nou anvi sey bouz otan posib, lo kote kestyon pou Minis,  mon pou restrikte siplemanter pou selman 2 lo sak kote latab.  E apre an mezir nou pe ale nou ava regarde with regards to PNQ, ki mannyer letan i été si nou kapab ouver kestyon en pti pe plis.  Sa parey mon pe dir, pou ede ki nou kapab manage nou letan en pti pe pli byen.

Bon, avan mon al pli lwen mon ava zis donn laparol Madanm Clerk pou fer prezantasyon Papye.  Madanm Clerk.

 

MADAM CLERK

Mersi bokou Mr Speaker.  Bonzour Mr Speaker.  Bonzour tou Manm Onorab mersi bann dimoun dan Galeri e tou dimoun byenveni bann dimoun dan Galeri e tou dimoun ki a lekout.  Mr Speaker mon prezantasyon Papye sa semenn nou annan the ;

Seychelles Qualifications Authority Annual Report, 2018, answit ;

        Central Bank of Seychelles Annual Report and Financial Statements for the ended December 31, 2018. E

Central Bank of Seychelles International Reserves Management Report, 2018.  Mersi Mr Speaker.

 

MR SPEAKER

Mersi Madanm Clerk.  Zis mon pas en pti kou vitman lo Order Paper.  Nou pou annan 6 kestyon pou Minis responsab pou Lapes e Lagrikiltir  -Minis Charles Bastienne ; nou annan osi tou en Urgent Question ki’n levé par Onorab Francois Adelaide.  Ankor i pou ganny reponn par Minis Charles Bastienne akonpannyen par Minis Cosgrow.  Nou annan en Private Notice Question – en PNQ ki pou Minis responsab pou Labita, Lenfrastriktir, Later e Transpor Madanm Pamela Charlette. E apre sa nou annan bann Mosyon nou annan kontinyasyon Mosyon Onorab Ferrari.  E osi tou nou annan 3 lezot Mosyon ki lo Order Paper.  So vwala en pti pe nou travay  pou ozordi.  Mon ava donn laparol Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker.  Bonzour tou Manm Onorab e tou dimoun ki a lekout.  Bonzour osi bann Constituency Clerk e sirtou bann zofisye Lapolis former police officer mon’n travay ek zot e mon swet zot labyenveni dan nou Lasanble.

Mr Speaker 2 keksoz – enn lo sa kestyon siplemanter, eski sa pe eksklir mover kestyon li menm or i enkli ladan?   Sa enn.  Prezan 2enm keksoz mon le en leklersisman from the Chair lo en deklarasyon yer dan medya – dan press conference ki’n fer avek Leader Lopozisyon in ganny dir poudir i annan en Sitting Spesyal Vandredi e ki nou pan diskit sa dan ABC.   Mwan mon pa konnen !  Konmsi mon pe rode konmsi ki mannyer sa in ganny diskite e tonm dakor lo la, san ki nou kote latab nou ganny privy sa lenformasyon?  Mersi bokou.

 

MR SPEAKER

Mersi Onorab De Commarmond.  Bon lo kote kestyon siplemanter, sa Manm ki loter kestyon, i annan son siplemanter ki li i kapab anmennen.   Me Manm an deor loter kestyon 2 Manm lo sak kote latab – ok ?  Manm ki anmenn son kestyon, li i annan son dwa pou li pou li demann son enn oubyen 2 siplemanter pou li rod klarifikasyon lo repons ki Minis i donnen.

Now lo sa sityasyon ki’n sorti dan press conference ki Dirizan Lopozisyon in donnen yer ki’n mansyonn Special Sitting Vandredi, mwan lo mon kote – mon Lofis, mon pa ankor pran okenn desizyon lo la e mon pa’n fer okenn mansyon ofisyel lo la.  Dernyen fwa ki nou ti fer en Special Sitting nou ti fer en Special Assembly Business Committee Miting kot nou ti pran sa desizyon, e si nou pou annan en Sitting an deor Mardi ek Merkredi nou pou fer li ankor menm parey.  Menm parey kot Assembly Business Committee i ava meet e i ava annan sa pou li adrese lo azanda.  Me pou le moman napa okenn desizyon ki’n ganny pran ziska la, pou annan en Sitting Vandredi – ok?  Yes Onorab Ramkalawan.

 

HON WAVEL RAMKALAWAN

Mersi bokou Mr Speaker.  Bonzour e bonzour tou bann koleg MNA, bann Constituency Clerk ek bann zofisye tou dimoun ki a lekout.  Mr Speaker mon anvi repran 2 pwen ki in fact sa premye pwen ki Onorab De Commarmond in levé an relasyon avek supplementary questions.  Mon pe anvi demande si ou pou akord privilez sa de Leaders pou kapab si zot santi zot annan en kestyon ki osi zot kapab levé.

Apre Mr Speaker lo sa kestyon press conference mon kontan sa leksplikasyon ki ou’n donnen.  Ofet si mon ti pou demann ou permisyon Mr Speaker, zis pou met en pti git azour avek dokiman ki nou resevwar, e pou mwan kapab dir akoz mon ti pe dir mon pou fer en propozisyon – nou pou fer en demann.  Nou pa’n dir ki konmsi pou annan.  Ok?  Si ou ekout byen sa ki mon ti dir, parske mon pa kapab dir pou annan Sitting. Se ABC ki deside e prerogativ Speaker.  E se baze lo la mon ti dir mon pou fer en demann.  Mr Speaker briyevman si ou donn mwan permisyon zis pou dir ki … ?

 

MR SPEAKER

Go ahead.

 

HON WAVEL RAMKALAWAN

Mr Speaker konnen ki sa size ki adres nou tou la mon bezwen dir ki i kontinyen annan serten konfizyon.  E mon yer letan mon fer sa mansyon ki nou riske fer en demann, pou ki i annan en Special Sitting se parske letan Bill ti prezante le 20 Mars apre sa son Vandredi nou ti annan en Special Sitting.  E semenn pase ou ava rapel Mr Speaker ou menm ou ti pe demande si konmsi Lasanble i santi Vandredi pase, nou ti ava fer en Special Sitting apre nou ti dir ki bann dokiman pa ankor pare.  Be Mr Speaker mon anvi dir ki ofet keksoz i kontinyen dan konfizyon e mon ava dir Mr Speaker.

Bann figures ki nou’n gannyen ziska aprezan i montre premye chriffre sete 11,500 travayer.  Apre sa ti dir pa ti enkli non-core.  Apre sa chriffre in monte pou vin 15,381.  Apre sa yer bomaten nou resevwar payroll sorti kot Minister Finans avek Departman Ladministrasyon Piblik ; Mr Speaker mon bezwen dir ki sa de chriffre sorti kot Minister Finans avek kot DPA i diferan.   Ok i diferan. Me sa enn sorti kot Minister Finans, ti donn en lendikasyon ki i annan 11,375 travayer.  E parey zot ti dir avek nou i annan anviron 4000 non-core apre sa dan sa chriffes zot in dir ki i annan selman 1127 non-core.

Sa sete sif ki nou ti pe konmans travay lo la.  Me yer swar apre Nouvel Ms Tamatave sorti kot Minister Finans in telefonn Onorab Afif pou dir avek li ki sa chriffre sif ki Minister Finans ti donnen i pa sa chriffre.  E i dir parske dan sa sif zot pa’n enkli bann carers ki non-core.  Aprezan letan nou demande konbyen ki annan i dir i pa konnen egzakteman e ki la bomaten ki i pou sipoze kominike ; parske i kapab 3000 e 4000.

Sa senpleman pou dir Mr Speaker ki bann chriffre i pa ankor nou pa ankor ganny chriffre egzakt.  En lot keksoz ki nou’n demande pou nou kapab lo sa chriffre egzakt se poudir ok ou’n tonm lo konklizyon ki poudir pou annan 62milyon dan sa logmantasyon 5poursan, alors si zis ou donn nou ou bann workings, nou ava kapab ariv lo en chriffre travayer.

Me sa osi tou pa ankor gannyen.  E Mr Speaker sa i fer ki sa demann ki mon ti pou fer bomaten, pou ki i annan en Special Sitting Vandredi, mon pa pou kapab fer sa demann, parske zisteman keksoz i pa ankor kler! Nou pa ankor konnen egzakteman konbyen travayer egzakt, i annan ki pou egal sa 62milyon.

Se sa ki mon ti anvi dir ou Mr Speaker e byensir mon pa pou al antre dan lot eleman. Me Mr Speaker alor mon pa pou fer sa demann pou ABC avek ou Lotorite konsidere pou annan en Special Sitting akoz keksoz i ankor pa kler.  Mersi bokou pou donn mon sa moman pou fer sa leksplikasyon Mr Speaker.  Mersi.

 

MR SPEAKER

Mersi Onorab Ramkalawan.  Bon lo ou premye pwen lo kote kestyon, byensir le 2 Leaders i annan sa privilez ki toultan mon donn zot e zot pou annan dwa lo nenport kestyon pou zot lev siplemanter – ok ?  Avek sa mon ava demann Parliamentary Reporter pou appel Minis Bastienne.  Mon osi anvi sinyal Lasanble ki kestyon No.1 avek No.2 i annan similarite e nou pou pran tou lede kestyon ansanm apre Minis i ava reponn.

Bon mon ti a kontan dir bonzour e welcome Minister Charles Bastienne ki Minis responsab pou Lapes e Lagrikiltir.  Minis i akonpannyen par Mr Antoine Marie Moustache Sekreter Prensipal pou Lagrikiltir, Mr Ronny Renaud Sef Egzekitif pou Lotorite Lapes e Mr Roy Clarisse ki Special Advisor to the Minister.  Minister avek ou delegasyon bonzour e welcome dan Lasanble Nasyonal.

Bon nou ava al direkteman lo kestyon.  Minis anvi ki kestyon No. 1 ek No. 2 i annan similarite, mon ava demann tou lede Manm pou poz zot kestyon e apre ou ava reponn e apre nou ava pran bann siplemanter.  Onorab Regina Esparon kestyon No.  1.  Wi mon pou pran tou lede ansanm.  Onorab Esparon.

 

HON REGINA ESPARON

Mersi Mr Speaker.  Bonzour Minis avek ou delegasyon.  Bonzour tou dimoun a lekout.  Mr Speaker mon kestyon i koumsa:

Eski Minis pou Lapes i kapab dir avek sa Lasanble ki mezir son Minister i annan an plas, pou koup labi dan sistenm konsesyon karbiran pou peser? E akoz ki i pe pran en kantite letan pou bann peser ganny ranbourse zot larzan?  Mersi Mr Speaker.

 

MR SPEAKER

Mersi Onorab Esparon.  Onorab Churchill Gill.

 

HON CHURCHILL GILL

Mersi Mr Speaker.  Bonzour Mr Speaker.   Bonzour Minis ek ou delegasyon.  Bonzour tou Manm prezan.  Kestyon i lir koumsa:

Eski Minis i kapab eksplik sa Lasanble kan eski sa konsesyon R8 lo sak lit karbiran pou bann peser, i devret ganny peye, dan konbyen dele letan apre ki tou dokiman in ganny met a Lotorite Lapes?  Mersi.

 

MR SPEAKER

Mersi Onorab Churchill Gill.  Minister.

 

MINISTER CHARLES BASTIENNE

Mr Speaker, tou Manm Onorab, tou dimoun dan galeri e tou manm piblik ki a lekout bonzour.  Se esansyelman bann bato artizanal ki pe benefisye avek ranboursman konsesyon karbiran.  Zot aste karbiran baze lo pri ki lo laponp e zot ganny rann sa R8 konsesyon letan zot demann pou ranboursman i ganny aprouve.  Prosedir ranboursman i konm swivan:

Sa bato i bezwen annan en license avek Lotorite Lapes Sesel SFA.  Sa propriyeter bato i bezwen soumet en form avek son demann pou ranboursman, e sa form i konpri lenformasyon tel ki zot aktivite lapes e resi pou konfirmen ki zot in aste karbiran.  Zis pou note laplipar peser i soumet zot demann pou ranboursman tou le mwan.

SFA i apre verifye e konfirmen si vreman bato i antreprann okenn aktivite lapes, baze lo lenformasyon ki bann field officers i donnen.  Fodre note ki SFA napa ase mwayen pou sirvey mouvman tou bato ler zot antre, lo bann primary e  bann secondary sites.  Letan ki SFA i aprouv ranboursman sa i ganny soumet avek Komisyon Reveni Sesel SRC pou travay lo sa ranboursman.  Ranboursman par SRC ti ganny entrodwir milye lannen pase.  An 2017 457 peser ti benefisye avek ranboursman konsesyon karbiran e an 2018 – 439 peser ti kalifye.

Zot demann ranboursman ti varye ant R2000 a R22,000 par mwan.  Rezon pou retar  dan prosedir bann bato artizanal sa konsesyon R8, i akoz lafen 3enm kar lannen pase, SFA ti fini servi tou larzan ki i ti gannyen dan Bidze pou konsesyon karbiran.  Alor SFA ti demann larzan adisyonnel avek Minister Finans, sa ti fer an Novanm 2018 ti annan en lalis demann pou ranboursman depi Septanm 2018.

Parey nou dir ti annan en backlog.  Alor SFA pa ti ganny larzan avek Minister Finans atan e ti bezwen fer serten virement R4.2milyon pou li kapab kouver sa depans an plis ki i ti annan lo ranboursman fuel.

SRC li ti konmans entertain bann refund apartir Desanm 2018, malgre ki i ti annan en desizyon depi Avril ki i ti pran, me i ti pran lefe an Desanm 2018, enn fwa ki SFA ti fini servi tou son larzan ki i ti annan dan Bidze.  Lo kote SFA nou espekte eklersi sa 531 claim ver lafen sa mwan e konmansman mwan prosen tou claim i ekspekte ganny process dan o mwen 1 semenn avek SFA apre 2 semenn kot SRC.  Mersi Mr Speaker.

 

MR SPEAKER

Mersi Minis.  Onorab Esparon.

 

HON REGINA ESPARON

Mersi Mr Speaker.  Eski Minis i kapab dir nou, oubyen eksplik nou, ki mannyer i marse sa sistenm quota vizavi kapasite masin?  E ki plan zot annan pou ogmant kapasite stokaz, parske an se moman zot kapasite zis 24mil lit e sa i depi 20an pase?  An vi ki kantite nom bato i kontinyen ogmante, ki plan pou fer ki toultan i annan ase karbiran pou demann?  E akoz ki SFA pa kapab sarz peser lo sa pri rediksyon direkteman lo laponp, sirtou bann lo laponp SFA li menm?  Sa dan li menm ti a redwir sa zafer ranboursman, parske bann bato ki anrezistre zot annan zot license.  Mersi Mr Speaker.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Mon krwar Onorab pe melanz de keksoz la en?  Nou annan sistenm refund ki aplikab pou sa ki nou apel bann bato artizanal apre nou annan fuel concession ki bann bato semi endistriyel i gannyen – ok ?  Lo kote semi endistriyel i napa problenm ranboursman akoz zot, zot pran zot fuel swa kot laponp SFA ki Providence oubyen kot Por Victoria e zot pran li at the concessionary rate.  So napa sistenm ranboursman pou bann bato semi endistriyel.

So ler ou pe nonm mon zafer kapasite SFA sa i konsernan fuel i pirman relye avek semi endistriyel.  I pa ranboursman me SFA li i aste fuel direkteman avek SEYPEC. Ok?  So nou pou napa issue ranboursman kot bann semi endistriyel i konsernen.  Ranboursman i aplik pou sa ki nou apel bann bato artizanal plizoumwen bann mini Mahe, bann schooners avek bann whalers – ok ?  E zot sistenm parey mon fek eksplike sistenm ranboursman i koumsa.  Ou kestyon se ki akoz ki nou pa entrodwir en sistenm, kot zot osi zot ava ganny osi petet parey bann bato semi endistriyel – ok?  Ki mannyer napa sistenm ranboursman ki ava fer keksoz bokou fasil.

Dan nou plan konpreansiv pou lapes nou pe diskite pou nou kapab come up avek en nouvo mekanizm e nou pe al fer plizyer konsiltasyon dan mwan Avril, avek bann peser bann operater bato, e zot tou menm parey mon ti fer avek lagrikiltir pou nou come up avek en nouvo sistenm kot fuel i konsernen.

Me pou le moman SFA i napa fasilite, pou donn bennzin kot swa Providence oubyen kot bann por, e vwala kot laplipar sa bann peser zot aste zot fuel lo laponp ; swa kot Victoria South, Anse Royale oubyen bann lezot landrwa kot i vann fuel.

Se sa kot i fer i pou parey zot al aste kot bann stasyon petrol.  Se sa ki sa diferans ki annan ant sa semi endistriyel avek sa sistenm artizanal.  Lo kote quota ki mon aprann letan mon bann diskisyon avek SFA, zot annan en sistenm ki zot in met an plas baze lo sistenm masin lo maksimonm fuel ki SFA i aprouve pou en serten kalite bato e son masin e mon krwar sa i en sistenm ki pa’n konmanse depi lontan, se pou anmenn en liniformite dan SFA vizavi fuel zis pou fer sir ki poudir si zanmen i annan labi pou fer sir ki napa labi ki enn dizon ki tou lede masin kapasite in parey zot aktivite i parey me selman enn pe claim dizon 500lit tandis ki lot ava claim 1000lit fuel se pou anmenn en kap lo bann masin bato lo bann kapasite bato vizavi zot aktivite.  Se sa kot i annan sa sistenm kot SFA.  Me ki mon kapab dir avek sa Lasanble se ki Minister responsab pou Lapes, apre konsiltasyon ki nou pou fer dan sa mwan Avril ki la, nou pou kapab come up avek en nouvo sistenm kot fuel concession ek ranboursman i konsernen.  Mersi Mr Speaker.

 

MR SPEAKER

Mersi Minis.  Onorab Esparon.

 

HON REGINA ESPARON

Mr Speaker.  Zis pou mon kekfwa eklersi en keksoz.  Minis in dir bann bato mini Mahe  ki pran fuel lo bann laponp an deor laponp SFA ki pe rod ranboursman, me nou annan bann bato semi endistriyel osi ki pe pey fuel la kot laponp SFA R18.89 par lit.  Apre sa ki zot vin rod zot ranboursman.

 

MR SPEAKER

Ok mersi Onorab.  Minis leklersisman.

 

MINISTER CHARLES BASTIENNE

Mr Speaker.  I vre Onorab en parey i annan artizanal apre nou annan semi endistriyel apre osi nou annan sa bann ki nou appel bann whalers ek schooners.  Zis pou klarifye se ki nou annan serten whalers e schooners osi ki pran lo laponp Providence oubyen lo por ki pey the full amount.  Sa se akoz dapre mon pe konpran la se pou kapab gard bann rikord, ki SFA zot bezwen pou letan zot pe fer zot bann tranzaksyon avek Minister Finans e sirtou la avek SRC.  So i annan diferans ant sa de lo kote kot semi endistriyel parey mon dir nou napa okenn problenm lo la.  Me pou reponn ou kestyon whalers ek schooners ki pe pran kot lapons zot pe pey R18 kek sou me pou bann ki semi endistriyel zot pa pe peye – zot pe pey the concessionary rate.  Mersi Mr Speaker.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker.  Minis dapre ou lesplikasyon nou espekte alors ki depi mwan Me nou pou nepli war sa bann backlog?  Me selman i annan en kestyon ki mon oule demann ou pou asire ki nou pa ganny ankor sa bann back log akoz ou’n dir nou pou 2018 ti annan en mankman 3.4milyon.  Eski pou 2019 sa in ganny met an plas Bidze avek Minis Finans i enkli sa 4milyon, pou ki nou pa war nou retourn ankor dan back log kot i annan sa bann peser pou bezwen esper bokou letan ankor parey in arive la?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker parey mon eksplike se ki lafen 2018 e 2019 peyman i ganny fer par SRC.  Mon zwenn avek Komisyoner Reveni e son tim e nou tonm dakor lo modalité pou nou fer sir poudir nou annan en senkronizasyon ki i arive ant SFA avek SRC.  E sistenm parey mon dir nou tonm dakor se ki SFA avek en pe sanzman avek en pe mezir ki zot pe met an plas pa pou pran zot plis ki 1 semenn pou zot process en claim apartir Me internally.

        Enn fwa ki nou eklersi sa back log 531 claimok ? Dezyenmman letan pou al kot SRC nou tonm dakor avek SRC i pa pou pran zot plis ki 2semenn, pou zot osi eklersi okenn claim ki ganny submit avek zot ok?  So issue Bidze i pou nepli en issue la akoz tou claim e tou peyman pou ganny fer par Komisyon Reveni.  Mersi Mr Speaker.

 

MR SPEAKER

Mersi Minis.  Onorab Ahmed Afif.

 

HON AHMED AFIF

Bonzour Mr Speaker.  Bonzour Minis ek ou delegasyon.  Mr Speaker mon ti a kontan demann Minis si i kapab dir nou, si i annan en sif pou aryeraz ki zot annan dan peyman ek bann peser la ozordi swa kot SFA, swa kot SRC, akoz mon konn peser Anse Etoile ki pe dir ek mwan zot annan claim depi Zen lannen pase. Zot in prezant tou dokiman me selman pa ankor peye.  Alors si ou kapab donn nou en sif egzakt lo konbyen aryeraz zot annan.  E si dan Bidze 2019, zot pou annan pou eklersi aryeraz enkli tou bann peyman ki annan pou 2019?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker konsernan en egzakt figure aryeraz, mon pou napa avek mwan en?  Me selman mon kapab fer ou gannyen.  Lo kote Zen lannen pase mon pou war li vreman drol.  Lenformasyon ki mon annan se ki tou bann claim ziska omwen Desanm 2018 in sipoze fini ganny claim oubyen pe fini ganny claim la by this week, dapre lenformasyon ki mon annan avek SRC – ok?

Zis pou met dan zot latansyon, an Desanm 2018 SRC in fer en peyman total R2.3milyon e pou bann claim ki’n submit avek zot pou Zanvye ziska Mars la i R4.8milyon.  Mon krwar si zanmen ou annan okenn ka ki pa ankor ganny refund, akoz SFA in asir mon poudir ziska Desanm nou’n preski fini eklersi tou ziska Desanm si i annan i pou annan detrwa claim Desanm.  Me avan sa pa pou neseserman annan.

E parey mon dir mon eksplik Onorab Mr Onorab Gill lot kote latab, se ki nou pou napa issue Bidze.  Aryeraz ki nou annan e parey mon dir sa ki mon garanti poudir ver lafen sa mwan nou ava kapab eklersi tou sa bann outstanding claim, e nou ava azour pou peyman ranboursman at least by konmansman Me.  Mersi Mr Speaker.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker prenan kont ki sa sistenm ki an plas la, i pe koz pa mal difikilte ek peser akoz zot pe ale vini e la nou war lanmer i kalm peser dan plas pe lapes i pe vin rod claim.  Dir nou relman kote problenm i été?  Akoz plizyer peser ki mon war ki mon koz avek personnelman i dir mon zot in fini submit claim depi 2mwan/ 3mwan pase, me nanryen zot al kot SRC, SRC i dir zot retourn kot SFA, SFA i dir zot kot SRC sa bann peser pe ale vini ant le 2.  So relman kot problenm i été?  Eski lo nivo processing dan SFA oubyen i lo nivo fer peyman dan SRC?

E eski prezan SFA li in regards ek sa bann lenspeksyon i fer i pou revwar modalité ki fer lenspeksyon ki ava permet li pou zisteman address petet konsern ki SRC prezan pou annan si SRC li i remarke ki poudir peyman i pe fer pe konmans al tro?  Mersi Mr Speaker.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker parey mon eksplike, se ki problenm ti konmans lannen pase an Septanm lannen pase ler SFA ti run out of funds e mon rappel letan mon ti vin dan Lasanble isi mon ti dir se otan ki posib, nou pou fer mannyer pou eklersi tou bann claim by Desanm ki ti relye avek bann mwan avan ki laplipar in ganny fer.  Problenm ti konmans lannen pase e ler ti fer sa tranzisyon sa sanzman sistenm kot the full refund i sorti kot SFA, SFA letan i fini i process i pran i anvoy kot Trezor pou fer peyman kot la sistenm i sanze, i sorti kot SFA i al kot SRC evidaman SRC i annan serten verifikasyon ki zot dir mon zot osi zot bezwen fer lo zot kote avan ki peyman i ganny fer.

So me parey mon dir se ki konmansman Me ek sa nouvo sistenm ki nou pe met an plas la 1 semenn kot SFA maksimonm 2 semenn kot SRC, nou pa espekte ki i pou annan okenn retar ok.  Lo kote sistenm lenspeksyon parey mon dir se ki avek sa nouvo plan nou espekte nou kapab revamp the whole sistenm of fuel pou nou fer sir poudir i en sistenm ki vreman alaoter ; ki i annan claim konm kwa ki i annan labi pou nou fer sir si zanmen i annan labi otan ki posib elimin maksimonm labi ki posib.

E nou, nou konnen poudir sa konsesyon pe donnen pou ankouraz bann peser pou zot al lapes pou zot kapab anmenn pwason protein pou nou pep me otan ki posib nou le fer sir zot fer li byen dan laliny  and the spirit by which sa konsesyon in ganny donnen.

So nou espekte avek sa nouvo sistenm met bokou plis laklerte ki nou a vin avek evidaman apre ki nou fer konsiltasyon neseser parey mon dir dan sa mwan Avril.  Mersi Mr Speaker.

 

MR SPEAKER

Vitman Onorab Pillay.

 

HON SEBASTIEN PILLAY

Mr Speaker vitman.  Eski zot pou adres bann claim ki la pou plis letan avan akoz dan plas konmsi travay lo bann nouvo konmsi adres bann ki annan bokou plis letan dan sistenm?

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker petet pou reponn kestyon Onorab, osi petet i annan petet avek sa delay i annan serten claim i pou sanmenm, sa ki mon dir i enportan pou nou konnen lekel sa bann claim ki pandan sa bann letan ki peser pe claim avek zot pa ankor ganny zot refund.  I posib dapre sa ki mon aprann avek SFA se ki sa i bann claim ki anba investigation i posib ok. 

        So si sa i leka akoz dan tou bann soumisyon ki SFA in donn mon figures se ki i annan en poursantaz ladan ki SFA omwen 7, 8poursan ki al anba further investigation akoz bann field officers pa satisfe avek lenformasyon ki zot pe gannyen konm kwa ki sa dimoun i vo fodre gannyen son refund.  Ou  konpran?  So petet i annan sa me otherwise se ki parey mon dir se ki lasirans ki Onorab pe rode avek mwan se ki garanti ki tou sa bann ki’n met zot claim avan ki pou ganny peye avan mon dir poudir by the end of Avril nou pa espekte annan okenn backlog.  Mersi Mr Speaker.

 

MR SPEAKER

Mersi Minis.  Onorab Jean Francois Ferrari.

 

HON JEAN-FRANCOIS FERRARI

Mersi Mr Speaker. Briyevman Mr Speaker mon ti a kontan si Minis i kapab dir avek nou Lasanble si i annan okenn laverite dan lefe ki napa ase larzan pou fer bann refund akoz Lasanble pa’n vot Bidze?  Konmsi mon kestyon se pou Minis fer li kler, akoz i annan zofisye kot SFA ki pe dir poudir Lasanble ki pan vot larzan konmsi fer li kler pou nou konpran byen ki pe arive.

Mon 2enm kestyon briyevman se Minis in dir ki i annan claim ki annan labi e Minis in mansyonnen poudir kekfwa i annan serten ka anba investigation.

Eski Minis i kapab dir nou si i annan okenn ka, okenn dimoun, okenn peser anrezistre ki dan sa bann dernyen mwan, sa bann dernyen lannen ki’n ganny refuse okenn sa akoz zot on war labi e donk eski zot pe fer en proper monitoring en sampling monitoring dan bann dan sa sityasyon?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker parey mon dir se ki SFA son Bidze in run out of Bidze si mon pa tronpe an Out/Septanm lannen pase anvi lakantite claim ki’n annan pou refund fuel.  Me parey mon dir avek nouvo sistenm ki’n ganny met an plas the issue of budget i nepli en size in nepli en issue zisteman se akoz refund i ganny fer par en Revenue Commission.  So i pou nepli tou le lannen i annan en laliny pou al dan Bidze SFA parey zot konnen SFA in vin otononm apartir le 01 Zanvye so i nepli ganny Bidze

        So therefore i pou nepli annan dan Bidze SFA serten sonm larzan ki i pou ganny pou refund fuel.  Akoz SRC ki pe deal avek refund konsernan labi i vre ki longman, ler mon asiz avek SFA i annan plizyer bann case ki zot bezwen plis leklersisman other than sa verifikasyon ki sa field officer in fer kot SFA i bezwen additional information avek sa peser.  Me pou reponn ou kestyon direkteman CEO SFA in dir mon direkteman avek bann dernyen letan, wi in annan bann ka labi kot zot pan process okenn peyman pou serten peser koz zot santi ti annan serten labi.  Mersi Mr Speaker.

 

MR SPEAKER

Mersi Minis.  Vitman Onorab Ferrari.

 

HON JEAN-FRANCOIS FERRARI

Vitman Mr Speaker.  Minis pan reponn mon premye kestyon.  mon ti a zis kontan si Minis i kapab dir nou zot in demann en sonm an 2017 zot in gannyen zot in demande pou 2018, zot in gannyen zot in demande pou 2019 eski a okenn moman sa sonm ki zot in demande zot in ganny refize par Lasanble Nasyonal?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker mon krwar mon ti reponn kestyon Onorab.  Mon dir ou mon donn lasirans ki Bidze from now on annefe SFA pan demann Bidze pou fuel an 2019 nou pe koz 2017/2018.  Bidze ki’n gannyen 2018 pa ti sifizan ok annefe lenformasyon ki mon annan se ki SFA ti ganny li R19.381milyon e i ti bezwen fer en virement omwen R4.3milyon pou anmenn li R24milyon pou li kapab onor bann claim akoz ti annan presyon pou fer peyman.  Kestyon ki ou pe demann mon se ki eski Lasanble ti koup Bidze pou SFA as far as ki mon konnen sa pa ti leka.  I zis ki SFA in run out of larzan from son Bidze.  Mersi Mr Speaker.

 

MR SPEAKER

Mersi Minis.  Onorab Audrey Vidot.

 

HON AUDREY VIDOT

Mersi Mr Speaker.  Bonzour Mr Speaker, tou Manm Onorab, Minis ek ou delegasyon e tou manm a lekout.  Mr Speaker atraver ou mon le profite pou dir mersi nou bann travayer SFA ki deal avek sa bann claim parfwa i pa fasil mon felisit zot da zot louvraz e donn zot lankourazman.  Mon kestyon i vin an referans avek en komanter ki Minis in fer lo sa mankman pou annan field technician petet pou kouver bann site.

Petet ki plan ou Minister petet pou anforsi en pti pe sa lekip?  E osi ki pe arive avek nou bann enforcement officers ki travay apre ler ki fer round pou regarde si sa bann bato ki pe ganny met dan kwen lo lans ki pa pe marse, me selman nou pe war zot pe vin avek resi pe claim fuel si sa i ankor egziste?  En pti pe lo la.  Mersi Mr Speaker.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker pou le moman sistenm ki an plas pou monitoring se ki sa ki nou appel bann primary and secondary sites.  Bann primary site se ki tou bann bato ki antre lo bann site ki ganny dezinyen konman primary i ganny 100poursan verifikasyon.  E bann secondary site i bann landrwa en pe retire sa i ganny fer lo en baz ad hoc parey nou dir ok la kot nou dir i annan en mankman field officers.  Mr parey mon dir anba sa plan konpreansiv nou pe fer sir e nou espekte apre nou fer konsiltasyon pou nou kapab vin ek en sistenm bokou pli robust, kot nou kapab annan preski tou bann site i vin primary sites.

Zis pou nou fer sir ki zot annan verifikasyon proper parey i devret ganny fer par field officers.  E sa definitivman i pou bezwen resours adisyonnel e sa enn fwa ki nou met ater sa plan la SFA i ava fer bann kalkilasyon neseser ki kantite adisyonnel field officers ki nou pou bezwen pou nou fer sa travay.  Mersi Mr Speaker.

 

MR SPEAKER

Mersi Minis.  Vitman Onorab Vidot.

 

HON AUDREY VIDOT

Mr Speaker Minis pan koz lo bann enforcement ki travay apre ler, ki sa bann field technician i lo site mon konnen parfwa zot ti fer bann site vizit pou regarde vreman si bann bato i egziste i la, i aktiv?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker sa travay i ankor ganny fer par bann field officers si non ou konnen parey nou pe dir taler kot i annan bann serten ka kot nou war bann posibilite labi, investigation i ganny dekouver atraver sa bann vizit parey ki Onorab pe fer referans avek.  Mersi Mr Speaker.

 

MR SPEAKER

Mersi Minis.  Onorab Wavel Woodcock.

 

HON WAVEL WOODCOCK

Mersi Minis.  Mersi Mr Speaker.  Bonzour Minis avek ou delegasyon e tou dimoun a lekout.  Mr Speaker mon kestyon i anliny avek Onorab Vidot in demande avek lezot Manm i annan en pe labi lo size konsesyon i annan bann dimoun bann swadizan peser ki’n anrezistre avek SFA me zot pa neseserman peser oubyen peser a plen tan zot annan lezot metye me selman zot pe still benefisye avek sa konsesyon R8.  Alor mon kestyon ki sistenm monitoring ki zot pou met an plas pou deal en pe avek sa bann labi ki deza egziste pou asire ki bann sa bann dimoun ki anrezistre avek SFA zot vreman bann peser?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker nou okouran bann potential grey area bann loophole ki kapab egziste dan sa sistenm konsesyon fuel.  E se pou sa rezon parey mon dir donn nou ziska petet mwan … Me petet plitar nou a vin dan Lasanble nou a donn zot tou detay apre ki nou fini fer konsiltasyon avek nouvo lapros, ki nou pou al pran pou fer sir ki nou annan sistenm robust.  Mersi Mr Speaker.

 

MR SPEAKER

Mersi Minis.  Onorab Churchill Gill dernyen kestyon.

 

HON CHURCHILL GILL

Dernyen wi.  Minis mon pe zis fer en pe refleksyon lo vi ki SRC prezan ki pe fer sa bann peyman SRC in vin de avan kot nou menm FPAC zot in fer sorti zot konsern, kot zot osi lo kote mendev zot annan en pe kontrent la.  E petet i bon SFA i fer en swivi at least pou sa premye 3mwan pou asire ki nou pa retourn deryer.  Akoz zot osi zot kolekte taks i enn zot manda zot ganny serten difikilte avek manpower ki zot annan.  So petet Minister i devret fer en pe swivi pou asire ki nou peser zot gannyen zot bann refund a ler menm si i pe ganny fer par SRC.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker mon kapab dir se ki lantant ki SFA i annan avek SRC e osi swivan miting ki mon fer avek Komisyon Reveni avek son tim keksoz pe mars tre byen.  Annefe ler nou fer en follow-up malgre ti annan bokou claim ki’n ganny anvoy kot SRC lenformasyon ki nou gannyen avek zot se ki tou claim in fini clear kot SRC e zot dir mon whatever backlog ki zot annan la sa semenn zot a kapab espekte fini eklersi.  Prezan la i depan lo SFA prezan pou zot process sa bann claim dan en dele letan parey mon dir maksimonm pandan dan mwan, eklersi tou anvoy kot SRC.  E en fason ki SRC pe travay mon pa krwar ki nou pou annan okenn difikilte malgre petet parey ou’n mansyonnen zot annan serten kontrent resours.  Mersi Mr Speaker.

 

MR SPEAKER

Mersi Minis.  Nou ava al lo kestyon No.3.  Onorab Sandy Arissol.

 

HON SANDY ARISSOL

Mersi Mr Speaker.  Bonzour Minis avek ou delegasyon.  Bonzour tou dimoun ki a lekout.  Mr Speaker mon kestyon i lir koumsa:

An vi konzesyon dan bazar Sir  Selwyn Selwyn Clark e osi rezon lizyenn ki plan redevlopman Minister Lagrikiltir i annan pou sa bazar?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker i vre ki i annan serten defi dan bazar Sir Selwin Selwin Clark anvi son lokasyon e grander an rezilta devlopman dan nou pei.  Parey ou konnen sa bazar i en heritage site e i annan restriksyon lo kwa i kapab ganny fer.  Parkont 1mwan pase ansanm avek zofisye Lazans Lagrikiltir, mon ti fer en vizit pou war tou bann defi ki bazar i ankor annan.

Mon ganny sans koz avek bann vander bann peser bann bazardye bann fermye e osi bouse pou konn zot bann problenm e problenm ki bazar i annan.  Answit ansanm avek mon bann zofisye nou war ki bann mezir imedya ki nou kapab antreprann pou adres bann sityasyon ki pe afekte bann dimoun ki deservi sa fasilite ki bann aksyon ki nou deside pran.

Premyerman i kler kot bouse i sitye eskiz mon Mr Speaker premyerman i kler kot bouse i sitye aktyelman i pa apropriye.  Alor nou deside konstri 5 nouvo outlet ki bann bouse lefe ki zot ki kot zot été parey mon dir i pa konvenab pou zot vann zot prodwir.  Zot in fini ganny konsilte lo sa plan sa fasilite pou ganny konstrir dan larantre Lari Bazar ki vizavi Baroda ki ava fasilit transportasyon zot bann prodwir lavyann.

Plan final sa proze pe ganny finalize e nou espekte ki travay konstriksyon si tou keksoz i al byen demare dan sa prosen 3mwan.  E sa ava ganny finanse anba Lifestock Trust Fund.

Dezyenmman pou ki nou annan plis lespas tou bann vander artizanal pou bouz anler dan letaz dan nouvo fasilite ki’n fini ganny fer pou zot lespas anba antye pou rezerve selman pou fermye pou ki nou a kapab promot pli byen nou bann prodwir lokal.

Nou pou kre en landrwa spesyal dan bazar kot tou bann vander fler pou kapab fer zot biznes.  Lo kote bann vander pwason osi i annan serten travay ki ekspekte ganny fer pou amelyor sanitasyon e SFA pou fer serten konsiltasyon pandan sa dernyen semenn avan ler nou kapab demare.

Nou pou osi amelyor sistenm twalet ki osi en konsern.  I reste pou nou rod en solisyon pou sa problenm lasaler dan bazar.  Lo kote desarz ki en konsern mazer sa osi pe ganny adrese.  Nou fini konstrir de interceptor parey nou dir e enn fwa zot fini fer tou koneksyon, nou espekte ki sa bann problenm loder a redwir.

An plis ki sa nou aranz tou bann slab e dibri ki ti kase nou osi fini fer serten travay pou amelyor sistenm drenaz, e sa pou kontinyen enn fwa ki sa devlopman prive lo lot kote bazar i konplete.  Nou osi annan en laranzman propriyeter prive lo lot kote bazar pou allocate omwen en 20enn slot pou bann bazardye.  Sa bann proze e lorganizasyon bazar pou fer ki nou ava annan en pli bon sirkilasyon e egalman redwir konzesyon dan bazar.  Mersi Mr Speaker.

 

MR SPEAKER

Mersi Minis.  Onorab Arissol.

 

HON SANDY ARISSOL

Mersi Minis pou larepons.  Mr Speaker mon kontan letan Minis in dir i ti ganny sans vizit dan bazar e koz ek bann bazardye ek tou dimoun ki servi bazar.  Parske mon 2enm mon kestyon siplemanter an relasyon avek bazar i zisteman parske rezyon santral 1 e osi Minis mon mazinen ziska prezan ou bezwen konnen nou ti fer en vizit en Sanmdi le 11 Zanvye 2019.

E atraver sa vizit nou ti annan serten rekomandasyon ki nou ti fer avek ou Minister, atraver ou reprezantan ki ou ti la letan nou ti pe fer nou miting konsiltasyon avek tou bann Lazans sa sete Merkredi le 20 Fevriye.  E ou zofisye ki ti la sete Ms Gretel Isaac e ti annan bann rekomandasyon ki nou ti donn li senpleman pou li transfer avek son Minister.

E mon kontan dan tou bann larepons ki ou’n donnen i annan plizyer bann rekomandasyon ki nou ti fer e tousala mon war pe ganny adrese.  Me selman mon ti a kontan demann Minis Mr Speaker an relasyon avek lezot rekomandasyon ki nou anvoy kot ou Minister Minis i annan nou ti pe demande ki par egzanp nou ganny sipor avek Fire Department an relasyon avek en netwayaz tou le semenn anvi ki zot annan en presyon delo en pe pli for power wash nou bazar sa i a ede ek sa sistenm drenaz ki ou’n koz lo la.

Dezyenmman nou pe demande ki i ava annan en vizit ant ou Minister e osi avek Minister Health Officer sa ki nou appel zot bann sanniter.  Kot i ava annan en vizit ase regilye pou fer sir ki lizyenn sirtou avek relasyon twalet ki ou’n koz lo la ki baze anndan dan bazar menm lot kote obor bouse ki i pa neseserman lo en standar apropriye.

Mon 2enm kestyon Mr Speaker mon ti a kontan demann Minis letan in koz lo konstriksyon outlet pou bann bouse ki mon krwar i enportan parske Suma avek lezot bann bazardye zot in pas atraver en kantite difikilte e sirtou zot bann prodwir i ganny vole e parske zot landrwa pa an sekirite.

Mon ti a kontan demann Minis lo sa pwen anvi ki ou pe konstri sa outlet pou bouse e de plis lot kote pou annan nouvo devlopman kot Baroda pe al byento i ava ouver ;  eski ou Minister ansanm avek Minister Later ek Land Transport zot pe travay lo en keksoz konkret pou ki semen lari Bénezet i pa reste en semen ki reste konzeste?  Sirtou letan i konsern dife fasilite pou bann dimoun ki servi sa landrwa pou kapab sorti pou netwaye, eski ou Minister ansanm avek lezot Minister pe travay lo en mekanizm pou ki lari Bénezet i retourn sa lari ki lib an term pasaz?  Kot napa vander depi 4er bomaten e letan Baroda pou ouver e lezot outlet bouse ki nou pou napa sa konzesyon ki egziste ozordi parske si zanmen i ariv en dife kot  Mrs Ahtou anndan personn pa pou Fire Brigade pa pou arive akoz senpleman sa konzesyon ki i annan.  Mersi Mr Speaker.  Mersi Minis.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker in toultan swe Gouvernman pou nou kapab eklersi sa semen Bénezet street pou kit li clear of all transpor e tou at all times.  Mon kapab dir ou se ki i annan serten travay evidaman, i pou bezwen annan serten lezot konsiltasyon kot pou nou vin avek nouvo sistenm pou nou kapab eklersi semen Bénezet.

Me ki nou bezwen fer nou se ki nou bezwen fer li an konsiltasyon avek sa proze sa devlopman prive ki pe arive lo nou kote.  Parey mon’n dir se ki omwen en 20enn slot pou ganny rezerve laba pou bann bazardye anndan avek reorganizasyon ki nou pe al fer dan bazar nou espekte kapab annan en pe plis lespas, kot nou bann fermye i a kapab bouz anndan.  So enn fwa ki nou pe bouze gradyelman nou pe espekte war rediksyon dan lakantite dimoun oubyen bann lezot vander ki plas zot latab la lo sa semen Bénezet.

So i annan sa apre i annan lezot keksoz ankor ki nou ankor pe diskit fezabilite anvi ki mon dir poudir sa bazar Sir Selwyn Selwyn Clark i en heritage site.  So nou bezwen deal avek sa nou a deal avek premye pa se ki kre lespas dan bazar.

Dezyenmman war lenpak ki annan ler sa devlopman i konplete i donn nou additional lespas la apre la nou ava bouz lo lot faz.  Mon konvenki poudir nou pou kapab eklersi sa semen Bénezet street ansanm avek bann lezot devlopman ki arive petet dan bann lezot distrik vizavi bazar kot i konsernen.  Mersi Mr Speaker.

 

MR SPEAKER

Mersi Minis.  Onorab Audrey Vidot.

 

HON AUDREY VIDOT

Mersi Mr Speaker.  Mr Speaker mon le demann avek Minis anvi ki i pe koz lo konsesyon menm si i pou annan sa bann redevlopman dan bazar Sir Selwyn Selwyn Clark mon mazinen poudir demann i annan pou dimoun vin vann zot bann prodwir dan lavil?  Mon 2enm kestyon se ki ki plan ou Minister petet pou desantraliz en pti pe sa servis bazar dan rezyon lavil petet atraver bann distrik ki tonm dan lavil?  Pou ki i ava adres en pti pe sa bann konsern ki Onorab Sandy Arissol pe koz lo la.  Baze lo ou larepons si ou permet mon Mr Speaker mon kapab zis annan en siplemanter.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker responsabilite pou bazar dan bann distrik i tonm anba Local Government si mon pa tronpe en.  E se bann Lotorite Distrik ki zer sa.  Nou otan ki posib nou pou zwe nou rol ansanm avek Lotorite Lapes pou nou kapab desantraliz bazar sirtou avek Plan Konpreansiv Lagrikiltir, evidaman nou panse poudir nou bann prodikter pou bezwen annan plis bann deboursman ok ?  par egzanp nou annan ok nou deza annan bazar Anse Royale i dan plan pou ler bazar i ganny fer Anse Aux Pins ki i ava annan tou lede pwason avek fri ek legim.

I osi dan plan ki letan Cascade i fer sa devlopman ki i pe antreprann pareyman nou ava annan fasilite pou pwason avek fri ek legim.  Mon aprann poudir i annan Council rezyon Plaisance, Mont Fleuri e tou ki pe fer serten rekomandasyon konsernen en bazar kot Roche Caiman, ki mon krwar sa i ava ede pou kapab rezourd kot dimoun i ava desantralize e mon krwar ki pou reponn ou kestyon direkteman i annan en nesesite pou nou desantralize.  Ler nou desantralize anvi konzesyon trafik e tou lezot lenkonvenyans ki annan ki tou sa ki zot bezwen lo nivo distrik.  Mersi Mr Speaker.

 

MR SPEAKER

Mersi Minis.  Onorab Vidot.

 

HON AUDREY VIDOT

Mersi.  Minis eski ou personnelman ou Minister in fer petet serten vizit an referans avek bann pti bazar rezyonal petet pou war ki bor lagrikiltir osi i kapab donn sipor Local Government?  Akoz Council lo li menm i pa pou kapab fer li i pou bezwen atraver Local Government atraver distrik petet anba ‘’Pti Proze.’’  Me baze lo kantite demann ki zot annan petet ou Minister zot ki mannyer zot kapab donn sa sipor anver bann distrik rezyon lavil pou adres sa?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker mon kapab dir avek sa Lasanble poudir ler mon ti war sityasyon anba ki bann bazardye well bann fermye ti pe operate dan rezyon Roche Caiman vizavi avek kot Fresh Cut mon ti pran lo mon menm pou mon al fer vizit ansanm avek CEO Lazans Lagrikiltir e PS Transpor e osi nou ti envit serten fermye ki abitye vin la dan Sanmdi.

Nou ti zwen avek zot nou ti war kwa egzakteman bann kontrent ki zot ti pe rankontre i ti kler premyerman bann landrwa kot zot ti pe vann ti ranpli avek labou e kot mon ti fer demars ansanm avek Minis ki responsab pou Land Transport pou kapab met en pe bann quarry coral –  later la ki’n fasilit landrwa la.

Me swivan sa apre Local Government in take the lead pou kapab proceed pou kapab fer en fasilite laba.  Se mon krwar sanmenm sa ki an diskisyon la right now ant Local Government avek bann lezot dimoun konsernen.  Ki mon krwar i byen, i byen akoz bann fasilite parey pou enporte me nou pe espekte petet at the right time petet Minister Lagrikiltir i ava ganny en konsilte lo sa plan ki annan pou ganny fer lo kote kot Roche Caiman.  E vizit mon’n fer parey mon fer mon fer vizit Cascade ansanm avek Onorab ki responsab pou Cascade apepre 2semenn pase semenn pase ek DA pou nou war egzakteman devlopman ki SFA pe al antreprann laba pou fer sir ki ler nou fer en keksoz nou fer li byen first time.

E se pou sa rezon ki mon ti pe antreprann bann vizit parey.  Menm parey mon’n fer en vizit Anse Aux Pins, mon’n fer vizit Port Glaud pou mon war en kou bann fasilite kot ti annan bann kontrent vizavi lapes.  Mersi Mr Speaker.

 

MR SPEAKER

Mersi Minis.  Onorab Egbert Aglae.

 

HON EGBERT AGLAE

Bonzour Mr Speaker mersi.  Bonzour Minis avek ou delegasyon.  Minis mon pou swiv en pe lo larepons ki ou’n donnen kestyon Onorab Vidot.  Sa size konzesyon dan bazar i en vye size sa e nou tou nou konnen ki bazar i pti i napa lespas pou fer plis expansion.  Alors dan lepase in annan serten diskisyon ki’n ganny fer pou desantraliz sa servis bazar ouswa trouv en alokasyon ki ava annan en proper fish market li menm.  Ki ou Minister eski zot ankor pe etidye sa posibilite pou at least ava annan en bazar dan en alokasyon?

Akoz konzesyon i pa zis dan bazar i vin ek son trafik ek tou son bann eleman ki i ava annan en landrwa ki ava ideal kot nou ava annan sa aktivite i ava deroule e i kapab expand dan son fason pli larz, pou tou bann ki servi sa bann bazar.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker parey mon eksplike avek Onorab Vidot se ki nou krwar poudir desantralizasyon bazar, i lakle pou nou kapab tir sa konzesyon tou son lenkonvenyans ki i vin avek.  Mon konnen dan lepase in annan diskisyon lo posibilite en 2enm bazar.  Me nou pe war nou pou bouz dan lot direksyon kot desantralizasyon olye annan en 2enm bazar.

Nou konnen Bazar Victoria i en site parey mon dir en site leritaz e tou dimoun premye keksoz ki ou pou mazinen pou rod pwason fri ek legim se Bazar Victoria.  Nou pa krwar i pou apropriye a sa moman donnen pou nou zis al fer en 2enm bazar akoz nou konnen ki’n arive avek serten lezot lokasyon kot parfwa Gouvernman in fer serten bazar kot i pa pe neseserman ganny servi parey lekspektasyon ti été.  Me nou osi krwar ki avek nou plan lagrikiltir ki nou vin avek se ki i neseser pou nou annan en wholesale market.

En landrwa kot i annan bann wholesale bann fermye i a kapab anmenn tou son bann keksoz kot bann lotel ek bann lezot letablisman i a kapab vini la dan en landrwa kot i annan tou bann prodwir ki ganny parey nou fermye lokal i dan en sel lokasyon.  Sa i en proze ki nou pe travay lo la e nou pe fer li an kolaborasyon avek STC le moman ki sa i ava finalize then nou ava donn en pe plis detay lo la.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  E bonzour Minis.  Mr Speaker mon anvi demann Minis spesyalman kot pwason i konsernen letan ou’n dir ki lo kote lavyann zot pou fer en nouvo outlet ki mon siport sa antyerman parske definitivman i bezwen annan keksoz la.  E mon mazinen ki i pou annan i pou air condition and everything else.

         Be eski ou pe mazin menm fasilite lo kote pwason?  Parske tou lede i enn i lavyann, lot i pwason e lo kote refrizerasyon lo kote letan ki i pran e pwason i pouri pli vit ; alors eski dan sa plan zot pe mazinen kot bann pwason i ava en landrwa anfermen kot e menm kot pwason i ava lo ice so that konmsi i toultan pe reste fre e standar i ava vreman ok.  E dan sa ka osi pou mazin an term photovoltaic pou koup lo elektrisite ki en tel proze i kapab ganny fer?  Mersi bokou.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker sa ki Onorab pe dir i plizoumwen lo menm laliny ki SFA i sipoze fer son konsiltasyon.  Me selman la nou annan en trade-off an tradisyon avek modernite konpran tradisyonnelman sa peser in abitye anmenn zot pwason met lo bazar dimoun in aste.

Me selman i annan sa de laspe ki nou bezwen marye li ansanm.  E sa dan sa konsiltasyon akoz apre tou i pa pou neseserman en keksoz ki Lotorite Lapes i anvi Minister Lapes i anvi i en keksoz konzwent ki nou bezwen diskit ek bann peser, diskit ek Lopital, Lasante pou nou kapab come up avek pli bon fason pou nou kapab bouz de lavan konpran.  E parey mon dir se ki enn fwa ki nou ganny the right lapros then nou ava egzekit li akoz nou krwar ki letan in evolye petet lo ice en landrwa anfermen, en lepok ti annan diskisyon ki ti pe ganny fer pou annan en closed market, fodre aircon e tou bann zafer pwason pe ganny vann ladan whether i ti pou sa lokasyon oubyen en lot i ti bann diskisyon ki ti pe ganny fer.

Me se zisteman sa ki SFA i sipoze pe diskit avek bann peser pou nou konn lapros ki nou pou pran.  E nou ava fer en nou espekte poudir dan sa prosen mwan ki devan nou, nou ava konnen ki direksyon nou pou ale menm parey nou fer avek bouse.  Mersi Mr Speaker.

 

MR SPEAKER

Mersi Minis.  Onorab Clifford Andre.

 

HON CLIFFORD ANDRE

Mersi Mr Speaker.  Mr Speaker an referans avek larepons Minis i fek donnen e sa ki’n donnen an referans avek bann vizit ki in fer Cascade.  E letan i ti al Cascade in dir semenn pase i ti al avek MNA Cascade me mon okouran ki ou’n vin Anse Aux Pins ni peser ni mon pan ganny enformen.  Akoz bazar i pa pou nou i pou nou me osi bann peser pou servi parey ou’n dir an konsiltasyon avek lasante.  Akoz letan ou pe vini ou pa omwen Minis enform bann peser ki zot ava eksplik zot bann spesifisite avek ou epi nou ava annan en keksoz ki konman ki ganny fer pa en keksoz ki Minister oubyen Gouvernman in fer apre peser i dir i pa kapab servi.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker mon krwar ki lo kote Anse Aux Pins konsiltasyon en kantite konsiltasyon in ganny fer annou pa bliye poudir sa proze i en proze ki ti pe ganny antreprann par 2020 Development i pa neseserman en proze ki Minister Lapes atraver SFA i ti pe enplimante.  E mon krwar plizyer miting in ganny fer.  Mwan rezon mon ‘nale mon al vizit Cascade se akoz konblaz is ongoing e nou le mon ti le fer sir poudir ler konblaz i pe ganny fer poudir tou bann fasilite ki konsern mon Minister poudir i pe ganny adrese ok.

E se pou sa rezon mon pa tin ale pou mon al fer konsiltasyon avek peser mon pan al menm parey Anse Aux Pins mon ale pou mon al war lo kote Anse Aux Pins lesplikasyon avek CEO SFA avek son tim ki egzakteman ki ti plan laba lo teren ki plan ki’n fini ganny aprouve laba e pou mon osi kapab met mon input kot Minis.  Akoz tou bann peser dan rezyon Anse Aux Pins ti’n fini ganny konsilte.  Mersi Mr Speaker.

 

MR SPEAKER

Mersi Minis.  Onorab Charles De Commarmond.

 

HON CHARLES DE COMMARMOND

Mersi Mr Speaker.  Bonzour Minis avek ou delegasyon e tou dimoun ki a lekout.  Mr Speaker dan sa ki Minis pe eksplik sa issue Bazar Victoria e ki’n tous lo lezot bazar.  Mon anvi demann Minis zisteman ler ou bezwen al dan en lot distrik kot i annan en bazar ou bezwen vizite mon krwar i annan en lonnekte la ki i bezwen enform sa MNA si i annan 3 MNA tou le 3 i bezwen ganny enformen i ava al ek ou pou war, ki sa ki ou pe vin gete dan sa distrik kot zot la.  Par egzanp Roche Caiman ler ou ti al Roche Caiman Onorab Vidot isi Onorab Jany laba i devret ganny osi apele ou ale, pou akonpanny ou dan sa vizit enportan, pou kapab gete ki pe arive la.  Akoz mwan enn ki pas la kot sa Roche Caiman kot dimoun pe vann zot bann keksoz tou le tan bann dimoun i koz ek mon e zot pa kapab kontinyen reste koumsa konman zot été la.  E i byen ki ou’n vizite mon demande ki pa bezwen ki ou esper Local Government pou inisye bann keksoz ou as the Minister ki bazar i tonm anba ou i pa tonm anba Local Government pou mon mannyer mon gete pa pe vann bann prodwir Local Government bann prodwir kot lagrikiltir, kot lapes!

E pou mon, mon krwar ou devret take the lead ansanm avek Lotorite Distrik ek bann dimoun ki konsernen savedir bann dimoun ki pe vann la ki pe zot aktivite la si oule enkli be Lotorite Distrik, li Local Government i deza ladan si i anvi envit lezot dimoun i envite.  Me you take the lead the Ministry, pou kapab zisteman aranz sa landrwa la fer en keksoz proper dan sa border la kot ou pe dir vizavi Fresh Cut.  Dan sa laliny la nou osi kontrer mon remersi ou ki ou’n vizit Cascade ki nou kapab annan en bon diskisyon e la Mr Speaker annou koz osi lo get dan Victoria, ki enkli zisteman sa Roche Caiman e lezot border parey Perseverance.  Konmsi pa get zis sa pti bout la anvil dan sant get akoz i telman konzeste in fini vin pti pti.

Ou bezwen al de lavan Victoria pe agrandi e nou bezwen pe get dan sa lot kote an menm tan en pwen enportan ou bezwen enkli modernizasyon dan sa bann keksoz ki pe arive la.

Par egzanp ozordi zis mon met sa la Mr Speaker i ava komant lo la ozordi nou pe war en nouvo aktivite ekonomik ki pe devlope kot tou sa bann bazar nou annan nou detrwa dimoun ki pare pou netway ou pwason Cascade i koumsa ou donn zot en pti larzan, me selman i pe fer sa zis koumsa.  Dan devlopman bazar i bezwen annan en landrwa proper pou ki sa aktivite i ganny fer dan en fason ordonn-en pa zis al dan delo sale netwaye koumsa byen.  E ki an menm tan dan sa landrwa si i Cascade ou bezwen ganny en dimoun Cascade ki pare pou fer en pti envestisman ou fer ou pti bout li i ava fer sa ki Onorab Ramkalawan in dir la sa ki konmsi annan son pti bout refrizerasyon ki sa pwason i reste fre i kapab ed li dan en pti pake osi parey Mr Weston Witz ti pe fer kot bazar anvil.  Sa aktivite i vin proper!

         Akoz konmela dimoun i reste dan flat i pa kapab anmenn li en gran pake pwason pou al netway anler dan flat i vin en problenm.  So i aste son 2 pti pwason pou al kwi demen e sa i a kout li pli bon marse.  So i annan tou sa bann keksoz la ki mon krwar dan sa keksoz ou dir i annan dan bazar re devlop bazar legim e pwason sa bann keksoz ler i ganny pran an konsiderasyon avek konsiltasyon.

E nou dan Lasanble nou pe demann ou sirtou lo sa kote latab nou pe demann ou Minis pou al enpe vitman ek sa fer keksoz proper e konsiltasyon mon krwar ou pou lo en bon semen avek sa ki ou pe fer dan lagrikiltir ek lapes.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker Onorab mersi pou sa bann pwen ki ou’n met devan vizavi lapros.  Wi mon krwar i ava pran an konsiderasyon e mon lo mon kote mon ava fer diskisyon pou mwan kapab war egzakteman sa responsabilite konstriksyon bazar.  E son zesyon anfen kont letan konstriksyon i fini evidaman wi otan ki posib modernize nou bezwen fer sir poudir partou kot i annan bazar, fodre annan sa laspe netwaye akoz ozordi i pa izyenik, mannyer nou pe war bann dimoun pou al netway pwason pou aste ek en peser apre i ale i al lav dan lanmer e ki pa neseserman korek.

Sa i bann keksoz ki nou pou bezwen adrese.  Annefe mon krwar ki partou kot nou annan bann fasilite bazar formel nou bezwen entegre sa laspe ladan.  Mersi Mr Speaker.

 

MR SPEAKER

Mersi Minis.  Bon avek sa nou pou pran en Break.  Apre ler nou ava retournen nou a kontinyen avek kestyon pou Minis.  Mon ti a kontan envit bann zofisye Lapolis mon ganny zot non i annan 4 zot Sef Sirentandan Robert Bibi, Sirentandan Benjamin Zarbe, Mr Dick Morin Konsiltan e ASP Danny Mondon osi bann Constituency Clerk pou partaz en pti dite avek nou pandan break e osi tou mon envit bann Manm Lasanble si zot le zwenn nou anler lo balkon pou enterakt ek bann zofisye Lapolis e osi tou bann Constituency Clerk.  Nou ava repran nou travay 11er.

 

 

(BREAK)

 

 

MR SPEAKER

Bon nou ava kontinyen avek nou travay.  E nou ava al lo kestyon No.4.  Onorab Wavel Woodcock.

 

HON WAVEL WOODCOCK

Mersi Mr Speaker.  Eski Minis pou Lagrikiltir i kapab dir avek sa Lasanble kan ki renovasyon lo labatwar lavyann rouz lo Praslin pou demare?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker parey Onorab i okouran sa fasilite ki i pe koz lo la pou Gouvernman i dan lanmen prive an se moman Gouvernman pe fer negosyasyon avek sa propriyeter pou ki nou kapab reganny sa fasilite.  Ler nou fini fer negosyasyon nou pou bouze pou fer renovasyon.  Lekipman pou sa labatwar i sipoze sorti anba 11th TDF savedir Fon Proze EU.  I lentansyon Gouvernman pou fer sa fasilite operasyonnel posibleman sa lannen.  Mersi Mr Speaker.

 

MR SPEAKER

Mersi Minis.  Onorab Woodcock.

 

HON WAVEL WOODCOCK

Kekfwa Minis i kapab dir nou en pti pe ki zistans zot in arive avek negosyasyon avek sa konpanny prive pou reganny sa labatwar, ki avan ti pou Gouvernman apre zot in vann dan prive.  E mon kestyon osi eski zot annan en lot alternativ ankor lo Praslin ki zot kapab konsidere pou fer enlot labatwar?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker plan orizinal ti pou nou fer labatwar Anse Kerlan, me an vi ki i ti annan issue pou nou konble sa landrwa pou fer teren prepar bann teren, Bidze ki nou ti’n gannyen lannen pase annefe ti R2.5milyon.  Me apre ki nou war pou fer plis sans pou nou kapab al re negosye sa landrwa e ou kestyon se ki zistans in arive negosyasyon, negosyasyon pe al tre byen. Annefe sa propriyeter i ase pozitif pou al dan direksyon ki nou anvi sa negosyasyon i ale.  I zis en matter of pou nou as part of negosyasyon pou nou tonm dakor lo serten spesifisite e alternativ e tou pou sa propriyeter.  Mersi Mr Speaker.

 

MR SPEAKER

Mersi Minis.  Onorab Woodcock vitman.

 

HON WAVEL WOODCOCK

Minis kekfwa ou kapab dir nou si sa kou, ki zot ti vann sa labatwar si dan sa negosyasyon zot pe espekte pey bokou pli ser ki zot ti orizinalman vann sa labatwar.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker diskisyon i avek Minister responsab pou Later evidaman pou bann keksoz parey.  Me mon pa krwar akoz as far as ki mon okouran i pou i pa pou neseserman plis ki i ti été orizinalman zis pou reponn kestyon direkteman me selman mon okouran ki diskisyon avek Minister ki responsab pou later.  Mersi.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker.  Minis dan ou larepons ou’n dir ki dan negosyasyon i osi annan posibilite pou swap so mon mazinen sa dan li menm i pou fer desann sa pri ase sibstansyelman si sa swap zot tonm dakor lo sa swap eski i korek sa?

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker mon pan dir i neseserman swap ; ki mon dir se ki dan negosyasyon ki pe ganny fer i annan serten diskisyon konsernan alternativ ki pou ofer avek sa propriyeter prive dan diskisyon.  Me mon espekte ki an mezir ki nou finalize i ava en pti pe pli kler.  Mon panse poudir i pa pou pran tro lontan avan ler nou kapab tir en konklizyon.  Parey mon dir se ki sa fasilite i deza la e zis en matter pou fer serten travay renovasyon apre pou ekip li pou kapab vin operasyonnel.  Mersi Mr Speaker.

 

MR SPEAKER

Mersi Minis, No.5 Onorab Egbert Aglae.

 

HON EGBERT AGLAE

Mersi Mr Speaker.  Eski Minis i kapab donn detay sa Lasanble ki plan son Minister anba master plan, plan lagrikiltir pou rezourd bann problenm lenfrastriktir tel ki pon ek semen pou bann fermye Des Arpents e Port Launay?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker aktyelman i annan de semen ki Gouvernman i annan lentansyon pou konstri dan rezyon Des Arpents.  Premye semen pou dan zanmerant laferm Lascagne sa semen pou mezir 700met longer e pou kout Gouvernman apepre R2milyon.  Sa proze semen pou benefisye 6 fermye.  2enm proze semen pou de arpan pou dan zanmerant laferm  bann Essack sa enn semen i mezir 800met longer e pou kout anviron R2.5milyon e pou benefisye 4 fermye.  Tou lede proze i dan Bidze SAA pou propoze an 2020.

Konsernan semen Port Launay anvi fotografi sa landrwa SAA pe fer en evalyasyon pou konnen si i fezab pou konstrir en tel fasilite semen laba.  Fodre note ki i annan osi en larivyer ki pas atraver e sa evalyasyon pou osi pran kont sa.  Osi dan kad sa evalyasyon nou pou bezwen pran kont ki pou annan 3 fermye ki pou benefisye avek sa tel semen Port Glaud.  Mersi Mr Speaker.

 

MR SPEAKER

Mersi Minis.  Onorab Aglae.

 

HON EGBERT AGLAE

Minis mersi pou ou larepons.  Lo kote Des Arpents Minis kot ou’n nonm kot Lascagne  i konsernen, ti deza annan en semen ki – mon bezwen dir defen Harold Auguste ti kree li menm dan son pos.  Eski sa semen li menm li anvi ki in deza trase ou pou kapab kout mwens larzan zis pou met re-sirfas sa semen akoz i en semen later.  Eski zot pe pran kont sa?

E dezyenmman kot i konsern Port Launay, kot i annan sa 2 fermye ; an diskisyon ki’n ganny fer avek zot swivan bann vizit zot pe fer demann at least ki sa pon, i ganny fer konman priyorite e zot konman bann fermye zot kapab antre apre, kontribye pou tras sa semen osi pou zot kapab servi anvi ki ou’n nonm en kou ase sibstansyel e i annan zis 2 fermye.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker pou premye kestyon konsernan de arpan mon panse sif ki mon gannyen avek Lazans Lagrikiltir nou pe pran kont konm kwa teren i egziste mannyer i été la.  Evidaman avek parey ou’n dir in deza fini ganny trase e sa kou zot in donn mon en sonm R2milyon.  Dezyenmman konsernan Port Glaud mon krwar mon ganny sans vizit sa landrwa laba i en vreman challenging Onorab.  E mon pa pou pronons mon lo la pou le moman ziska ler teknisyen i fini fer evalyasyon pou nou kapab war kou pou fer sa pon.  Parey ou konnen i en long stretch atraver larivyer pou ariv lot kote kot sa bann fermye i été.  So annou les bann teknisyen fini fer serten travay apre nou ava dan en pozisyon petet dan sa mwan ki pe vini pou nou pronons nou lekor lo la.  Mersi Mr Speaker.

 

MR SPEAKER

Mersi Minis.  Nou ava pran kestyon No. 6.  Onorab Egbert Aglae.

 

HON EGBERT AGLAE

Eski Minis i kapab dir ek sa Lasanble anvi ki i napa bokou prodikter livestock dan rezyon Port Glaud parey lontan ki son Minister pe fer pou premyerman ankouraz e relans fermye dan sa sekter?  E dezyenmman ki bann incentive ou Minister pe vin avek pou ankouraz sa bann fermye ki deza antre dan sa sekter?

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker le 18 Septanm 2018 mon Minister ti lans Plan Konpreansiv pou Lagrikiltir.  Sa plan i vize pou redinamiz e relans sekter lagrikiltir.  Bann mezir spesifik ki nou pran pou livestock se ki fasilit loan pou bann ki oule fer renovasyon lo zot kazo poul oubyen lo zot park koson, ofer fermye en konsesyon R4 lo sak kilo poul ki ganny touye labatwar, ofer fermye en konsesyon R300 lo sak koson ki ganny touye labatwar, ofer fermye R2.30 pou sak kilo lavyann poul ki zot prodwir, ofer fermye R60.50 pou sak kilo porc ki zot prodwir.

An plis ki sa zot ganny plizyer lezot konsesyon taks lo bann materyo pou zot laferm.  Lo kote marketing nou pe travay tre pros avek STC e lezot enportater pou ki zot donn priyorite pou prodwir lokal.  Diskisyon avek STC in avanse e tre byento nou ava donn plis detay lo sa laranzman.  Mersi Mr Speaker.

 

MR SPEAKER

Mersi Minis.  Onorab Aglae.

 

HON EGBERT AGLAE

Mersi Minis pou ou larepons.  Minis dan en ka prosedir anvi ki sa bann fermye livestock i annan bokou ki sa bann lenfrastriktir parey bann ki ti pe fer prodiksyon lavyann porc.  Kot sa bann lenfrastriktir i deza la ki’n vin dan labandon, eski alor ou Minister pou zwenn avek sa bann fermye pou gete premyerman si zot ankor enterese pou kontinyen dan sa laliny pou zot fer lelevasyon livestock?  E dezyenmman ki bann lankourazman ki zot pe kapab ganny sipor annefe pou zot kapab relans zot konmsi en pti pe pli vitman posib?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker an prensip laplipar sa bann fermye ki zot fasilite i debout i dan ase bon kondisyon zot in fini rankontre avek Lazans Lagrikiltir pou nou fer en plan pou bann ki ankor enterese pou zot demare.  E pou sa bann nou pe parey mon dir nou pe fasilit loan pou zot fast track zot loan pou ki zot kapab fer renovasyon.  I annan plizyer parey bann ki ti sonny poul zot kazo poul i ok zot striktir i ok zis pou sanz zot fil.  Apre pou zot aste zot drinker zot bann feeders eksetera.  Sa bann keksoz koumsa nou pou fasilit ek zot bann ki enterese pou zot demare.

E mon kapab dir poudir i annan serten ki montre lentere e i menm annan ki pe al demare dan sa prosen pa neseserman Port Glaud me i annan lezot landrwa i annan ki pe al demare dan sa prosen 2 a 3 mwan.  So lankourazman se ki nou travay tre pros avek zot.  Livestock officers i vizit zot regilyerman livestock officers pou asiz ek zot pou fer zot plan pou nou fer sir.  Akoz laplipar sa bann fermye in aret fer prodiksyon se akoz kou prodiksyon ti vreman élevé fer bann kalkilasyon avek zot pou kapab donn zot en lendikasyon baze lo sityasyon aktyel ki profitabilité zot pou tir an retour apre ki zot pou meet tou sa bann depans enn fwa zot in rezwenn sekter lagrikiltir.  Mersi Mr Speaker.

 

MR SPEAKER

Mersi Minis.  Onorab Terence Mondon.

 

HON TERENCE MONDON

Mersi Mr Speaker.  Mon kestyon pou Minis eski dapre konsiltasyon ki Minis i dir nou i fer ek bann fermye la nou pe koz livestock eski i kapab konfirmen si bann fermye i satisfe ek sa bann incentive ki ou’n mansyonnen R4 par kilo R300 par koson.  Eski ou kapab konfirmen si zot satisfe ek sa bann incentive?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker sa i en konmansman ki Gouvernman in vin avek anba sa plan pou nou kapab relans parey mon dir redinamiz sekter lagrikiltir.  Kestyon se ki zot satisfe?  Evidaman zot ti a kontan war plis incentive pe ganny donnen.  Me pou le moman sa ki nou kapab afford avek nou kalkilasyon, pa bliye sa bann incentive ki Gouvernman pe ofer i tou en kalkilasyon ki nou fer vizavi manze zannimo.  E sa nou ti dir letan nou ti lans Plan Konpreansiv poudir sa incentive lo poul avek koson i reprezant at least 15poursan kontribisyon amongst the cost of manze zannimo ki pli gro depans ki fermye i rankontre.  Mon krwar ki apre nou zofisye i asiz avek zot pou fer zot konpran parey mon fek eksplik avek Onorab Aglae.

Konpran poudir ler ou pe al antre ladan tan ki ou pou fer eksetera management i tou ki annan pou fer vizavi lagrikiltir mon panse poudir lentere i la me parey nou konn tre byen i annan ki pas dan vreman dan gran difikilte pou zot retournen zot pe mazin kalkil byen avan zot retournen.

E lot keksoz ankor ki asosye avek sa se laspe marketing ki zot pe atann sistenm vin an plas en fwa ki sistenm marketing ki dan nou pran nou enroll li nou negosyasyon i finalize ki nou espekte dan sa bann prosen mwan i ava fini e la zot pou war deboursman ki zot pou annan pou zot prodwir, e la mon asir ou MNA Onorab se ki bann ki abandonnen mon asire ki bann ki pou annan lafors i annan lentere pou retournen dan sa sekter.  Mersi Mr Speaker.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker.  Minis vi ki sa plan konpreansiv ou’n vin dan Lasanble ou’n eksplik nou eski ou kapab dir nou si ozordi ler nou pe koze la tou sa bann incentive ki ou’n mansyonnen, i annan bann fermye ki deza pe benefisye avek.  E si konmsi nou pe koz tou Praslin/La Digue Baie Ste Anne nou pe benefisye oubyen Mahe oubyen ou a zis fer sa si ou kapab donn nou sa lenformasyon silvouple?  Mersi.

 

MR SPEAKER

Mon osi mon anvi tir latansyon MNA Onorab Gill pou kestyon i konsantre en pti pe lo Port Glaud e mon ava donn Minister pou donn plis leklersisman.  Minis.

 

MINISTER CHARLES BASTIENNE

Mr Speaker mon espekte petet ver Zen, Zilyet kapab fer en stetment detaye lo kot nou été lo sa Plan Konpreansiv lo lagrikiltir.  Me pou reponn kestyon Onorab Gill se ki ou konnen ler nou ti entrodwir sa bann incentive i ti apartir le 01 Oktob 2018 – ok?  Me avek bann sistenm ki nou met an plas in pran en pe letan pou nou kapab pey sa bann incentive e nou espekte la dan tre prosennman nou pou kapab konmans incentive evidaman back dated avek lenformasyon.

Problenm ti tou lede kote lafason ki lenformasyon ti pe ganny submit avek Lazans Lagrikiltir ti annan plizyer mankman pou ki i kapab ganny process.

I en keksoz ki ti nouvo e la vi ki sistenm in fini ganny met an plas nou espekte bann peyman i kapab ganny fer tre byento.  Ler mon dir tre byento annefe PS lo son kote ki ekip sa dosye petet dan sa prosen semenn ou de semenn par la koumsa.  So mon krwar mon reponn ou kestyon Onorab.  Mersi Mr Speaker.

 

MR SPEAKER

Mersi Minis.  Onorab Waven William.

 

HON WAVEN WILLIAM

Mersi Mr Speaker.  Mr Speaker mon ti a kontan demann Minis anvi pou ankouraz sa bann fermye laba Port Glaud, konman bann incentive Minis eski ou Minister pe parmi sa bann package incentive zot pe mazin re annan en diskisyon fran ek bann fermye, avek Departman Lanplwa pou asire ki vreman sa sekter i vreman relanse ?  Akoz i annan ankor problenm vizavi travayer kot nou pe klasifye sa bann travayer parey bann lezot travayer i pa parey.  So mon pe demande si i vreman ou Minister pe mazin revwar en pti pe lafason ki zot pe tret bann fermye vizavi bann travayer?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker kestyon pa tro kler ki Onorab pe demande.  Si ou kapab ekler en pe plis pou mon kapab reponn ou.  Mersi Mr Speaker.

 

MR SPEAKER

Mersi Minis.  Onorab.

 

HON WAVEN WILLIAM

Wi Minis.  Ozordi bann fermye zot pe rankontre problenm avek travayer etranze.  E i annan bann public holidays ki pou zot dan zot pei zot selebre nou annan pou nou.  Me i annan en problenm la epi vizavi bann ler travay kot si par egzanp ou Minister avek Minister Lanplwa avek bann fermye, pa tonm dakor lo serten fason fer i pou bann fermye i pou war li difisil pou zot vreman zot sa kalite prodiktivite ki pei pe espekte avek zot.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker mon krwar sa i en keksoz nouvo pou mwan at least.  Mon krwar sa i en keksoz ki i annan merit pou mon diskit avek mon koleg Minis responsab pou Lanplwa si i annan okenn difikilte vizavi Kontra ant fermye avek bann travayer etranze konsernan konze piblik ek lezot.  Mon krwar sa i a en keksoz ki mon ava adrese.  E petet osi Onorab avek permisyon Mr Speaker petet ou a donn mon plis detay lo la pou nou kapab konn laliny ki nou pou pran avek Minister Lanplwa.  Mersi Mr Speaker.

 

MR SPEAKER

Mersi Minis.  Mon a donn le 2 dernyen kestyon Onorab Aglae.

 

HON EGBERT AGLAE

Mersi Mr Speaker.  Minis enn bann persepsyon ki bann fermye in koz ek mon lo la se ki ler i annan bann incentives ouswa bann Grants se touzour bann gro fermye etabli ki’n benefisye.  Alors kwa ki pou diferan la si ou kapab pran petet donn ou parol ki keksoz pou ganny fer diferaman ki ler i annan sa bann benefis i tou bann pti fermye osi.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker tou sa bann benefis as long ki sa fermye i en fermye anrezistre i pou benefisye ki ou pti ki ou gro me as long ki ou en fermye anrezistre pou benefisye napa leksepsyon.

So e osi lo kote Grant mon pa neseserman okouran resaman bann Grant ki annan me selman mon okouran Grant ki nou gannyen kot nou fer proze pou nou ed en kominote fermye dan son totalite.  Me selman zis pou klarifye tou sa bann konsesyon subsidy whatever ki mannyer nou appel li i benefisye tou fermye irrespective of zot size pou vi zot anrezistre konman en fermye avek Lazans Lagrikiltir.  Mersi Mr Speaker.

 

MR SPEAKER

Mersi Minis.  Bon avek sa nou ava koz lo sa Kestyon Irzan ki i devan nou.  Nou ava demann Parliamentary Reporter pou fer antre Minis responsab pou Lanvironnman e bann lezot zofisye.

Minis responsab pou Lanvironnman Minis Wallace Cosgrow akonpannyen par Dr Jude Gedeon ki Public Health Commissioner, Mr Aubrey  Philo Dr Public Health Services e Mrs Nanette Laure ki Director General Waste Management and Permit Division.  Bonzour e welcome dan Lasanble Nasyonal.  Nou pou pran sa kestyon ki anmennen par Onorab Adelaide Minis responsab pou Lagrikiltir ava donn son bout e Minis Cosgrow lo ou kote ou a kapab elabor lo larepons, pou fer sir ki nou ganny klarifikasyon neseser pou sa kestyon.

Avek sa mon ava pas laparol avek Onorab Francois Adelaide pou li poz kestyon Minis.

 

HON FRANCOIS ADELAIDE

Mersi Mr Speaker.  Bonzour Minis Cosgrow.  Bonzour Minis Bastienne avek zot delegasyon.  Bonzour tou Manm Lasanble Nasyonal e tou dimoun ki a lekout.  Mon kestyon se avek sa ka resan kot en desarz ti koul dan semen e dan lanvironnman Baie Lazare presizeman dan rezyon Dezer.  Eski Minis konsernen i kapab donn detay donn sa Lasanble detay lo ki vreman problenm ki nou pe souvandfwa war sa bann desarz pe koule partou lo semen e dan bann sours delo dan sa rezyon spesifik e dir sa Lasanble kisisa vreman sa bann desarz?

2) Vi ki i annan kat Minister ki enplike direkteman avek sa sityasyon, eski zot tou zot kapab donn en kontrandi lo ki zot in fer respektivman pou deal avek sa evantyalite ki vreman inakseptab?

  1. C) Eski i ti annan okenn kondisyon swa Regilasyon spesifik ki sa lenvestiser ti bezwen respekte vizavi sa landrwa vi ki i lo en latet montanny in antoure bann sours delo kontab? E
  2. D) Eski tou le kat Minister i satisfe ki sa lenvestiser i vreman an konformite avek son plan devlopman la dan letan aktyel?

 

MR SPEAKER

Mersi Onorab.  Minis Bastienne oule konmanse oubyen Minis Cosgrow.  Minis Cosgrow laparol i pou ou.

 

MINISTER WALLACE COSGROW

Mersi Mr Speaker.  Bonzour Mr Speaker.  Bonzour tou Manm Onorab.  Bonzour tou Manm Sekretarya.  Bonzour tou manm piblik ki pe ekoute.  Mr Speaker dabor parey nou agree i annan kat Minister ki’n ganny demande pou vin reponn kestyon.  Me nou agree ki nou mon reponn dan plas bann lezot Minis e Minis Bastienne osi i ava ede kot i annan bann bout ki aplikab pou li.  E Mr Speaker mon pou lir kestyon reponn dan plas Minis Bastienne e si i annan okenn keksoz pou azoute i ava kapab azoute plitar.  Mr Speaker mon pou pran tou le kat kestyon parey in ganny demande e mon pou swiv larepons tou le 4kestyon ansanm ok ?

Dabor Mr Speaker dapre lobzervasyon Lotorite Lasanble Piblik ki ti al lo site le 28 Zanvye sa desarz ti en desarz zannimo laferm.  Mr Speaker sa i larepons senp sa kestyon parey in demande, me parkont mon ti a kontan eksplik Lasanble en pti pe pli an detay.  Sa sistenm desarz lo laferm i koumsa:  desarz sorti dan park koson i vin dan premye tenk ki separ an trwa an partisyon, sa i apre al dan en de gran trou, sa delo i ganny servi pou irigasyon zerb lelefan lo laferm.

Dapre vizit ki ti ganny fer lo sa laferm par reprezantan Lasante Piblik ek PUC 2019 sa bann keksoz swivan ti ganny note fodre fer resorti ki sa letan ti dan peryod gro lapli Mr Speaker, akimilasyon sa desarz ki sorti kot park koson, ki ti deborde an deor premye tenk e i ti pe desarz lo sirfas later dan ranpar ki fasilit pli ba dan sekter piblik ki Val d’En D’Or.  Laponp ti ganny mete dan sa open pit pou ponp delo pou aroz plantasyon zerb lelefan.  Ti annan bokou debri ki ti flote dan tenk sa ki nou apel bann separasyon sa ki nou apel scum.

Ti napa drenaz pou diriz delo lapli lwen ek tenk e ta fimyen.  Zofisye Lasante Piblik pa’n war okenn latras desarz fizik dan baraz PUC me ti annan desarz lo semen.  Konman en prekosyon Lasante Lotorite Piblik ti ordon PUC pou pa pran delo pou distribye pou konsonmasyon piblik ziska ler Lotorite Lasante Piblik i redonn zot permisyon.

Mr Speaker 2enm kestyon a sa pwen i bon fer resorti ki rapor ki nou gannyen pa ti enn neseserman ofisyel, me en post lo social media  – Facebook ki ti date le 27 Zanvye.  Le 28 Zanvye ti annan en vizit Lasanble Piblik swivi le 30 par Departman Lanvironnman, Servis Lasanble Piblik ti fer en swivi vizit le 01 Fevriye 2019.  Apre zot lenvestigasyon tretman desarz lo laferm pa ti pe byen administre pa ti pe ganny byen administre.

Delo run-off lapli ti ganny akse dan tenk e filtre dan sa sistenm e fer zot deborde letan gro lapli ti tonbe.  Apre en 2enm vizit ki ti ganny fer par zofisye Lasante Piblik sa fermye ti ganny demande pou vin diskit solisyon sa problenm dan biro kot Departman Lasante Piblik.

En miting ti ganny organize avek sa fermye ek management Lasante Piblik le 4 Fevriye 2019.  Sa bann solisyon swivan ti ganny diskite e agree pou ganny enplimante: pou konstrir en shed ek son sistenm drenaz pou fimyen ; pou konstrir en drenaz lo kote semen pou diriz delo lapli pou anpes al kot fimyen i été, pou bar e filtre sa delo desarz ki dan sa trou desarz ki ouver, pou agrandi grander e kapasite sa tenk delo desarz.  Tou sa bann rekomandasyon ki ti diskite ti ganny met an ekri formelman dan en let date le 27 Fevriye e sa fermye ti ganny en kopi.  Sa fermye ti ganny 21 zour pou rektifye sa bann problenm.

En lot miting ti ganny organize le 26 Fevriye 2019 par mwan menm dan prezans PS ek DG ek Legal Advisor Minister Lanvironnman reprezantan PUC, CEO SAA Lazans Lagrikiltir e zofisye Lasante Piblik pou determinen ki mannyer nou pou bouz devan.

Swivi ek verifikasyon in ganny fer. En transe in ganny fouye anba laferm tou dilon pou konteni delo desarz si i annan okenn desarz ki sal pe koule.  Mon ti ava fer osi kontan fer resorti ki an se moman napa okenn desarz ki pe sorti lo sa laferm, e ariv dan domenn piblik.  Sa i ranforsi lefe ki sa letan lapli ti enn toransyel, kot i annan en kantite lapli ki’n agrav sa sityasyon.

Toudmenm sa fermye in ganny demande pou donn lotorite en commitment letter pou detay bann amelyorasyon ki pou fer pou remedi sa sityasyon.  Vizit in ganny plan sa semenn par bann diferan Lotorite pou monitor progre ; mon konpran vizit pou demen.  La Mr Speaker an se moman ki nou fer e kote nou été lo sa ka.

3enm parti kestyon Mr Speaker kondisyon orizinal ki sa fermye ouswa okenn fermye ki set up en laferm, i se ki en plan devlopman i ganny prezante ek Lazans Lagrikiltir si i en devlopman livestock proze i osi al kot Livestock Production Committee e la laprouvasyon i ganny donnen baze lo bann lenformasyon ki’n ganny lo sa proze e dapre standar ki ganny etabli.

Si i annan okenn lenfrastriktir ki bezwen ganny konstri lotorizasyon i ganny donnen par Lotorite Plan kot i annan bann diferan Lotorite konsernen.  Prezan Mr Speaker ki an kour sa proze i annan lagrandisman laferm e devlopman adisyonnel then Mr Speaker sa fermye i bezwen rod laprouvasyon neseser kot tou bann Lotorite.  Osi diran sa laferm i bezwen byensir swiv tou regilasyon ki an aplikasyon ki konpri Lagrikiltir, Lotorite Lasante Piblik, Lanvironnman, Lotorite Plan eksetera.

Mr Speaker 4enm parti kestyon an term plan devlopman agrikol kot nou konnen ki kantite sa laferm i kontribye an term prodiksyon total prodiksyon lagrikiltir dan Sesel sirtou kot i konsern prodwir livestock mon krwar nou satisfe avek son prodiksyon e kontribisyon.  E ki i an konformite avek son plan devlopman.

Mr Speaker parkont tou bann Lotorite konsernen i santi ki i devret annan amelyorasyon lo serten laspe management kot i ava anpese annan en sityasyon parey sa ki ti arive le 27 Zanvye.  Serten lenfrastriktir i bezwen ganny amelyore e ganny agrandi pou cater pou lakantite aktivite.  Nou konvenki ki okenn mezir demann sa laferm pou pran e vaporiz tou bann problenm ki nou pe rankontre.   Mr Speaker avek sa mon ava remersi ou e mon ava pas laparol avek Lasanble pou okenn kestyon siplemanter.  Mersi.

 

MR SPEAKER

Mersi Minis Cosgrow.  Onorab Adelaide.

 

HON FRANCOIS ADELAIDE

Mersi Mr Speaker.  Mersi Minis pou ou larepons.  Mon annan petet ankor de kestyon siplemanter.  Premyerman sa site kot sa laferm i été avek son fotografi avek bann delo bann potansyel delo ki annan ki bann Minister konsernen ler i ti pe donn permisyon pou devlop sa landrwa, eski zot ti annan en quota lo kote zannimo ki i dwatet sonnyen dan sa landrwa?  E ki kantite zannimo e ki kalite zannimo nou devret war dan sa landrwa?   E mon 2enm kestyon mon pe profite la Komisyoner Public Health i la.  An relasyon avek sa delo kontaminen la annan en bonpe bef ki toulezour i dan semen e eski sa pratik i ganny ankouraze par Minister Lagrikiltir?

E petet ki Komisyoner Lasante i annan poudir lo sa size, vi ki nou konnen ki dan dropping bann bovine parey bann bef, nou annan petet bann parazit e sa ki pli danzere nou kapab annan petet bann protozoa tel ki parey nou pe dir ‘’dyadya,’’ avek petet en lot ankor ki klorin pa spesifikman touye e sa i pe ganny vide dan delo.

So mon ti a kontan en garanti avek Komisyoner Lasante Piblik ki nou zabitan Baie Lazare pe vreman konsonm en delo ki bon pou zot lasante.  Par egzanp si ou les mon azoute poudir ler nou annan sa bann protozoa ki desann dan sa bann delo la nou bezwen entansifye ki met dan delo e sa klorin i pa tro bon pou lasante.  E mon konman MNA pou Baie Lazare mon pe fer sir ki Lasanble mon pep i ganny respekte.  Mersi.

 

MR SPEAKER

Mersi Onorab.  Minis Bastienne.

 

MINISTER CHARLES BASTIENNE

Mr Speaker nou osi dan tou nou demars konman Lotorite, nou priyorite se lasante nou pep.  E ki nou bezwen pran tou mezir apropriye ki nou sofgard sa a tou pri.  Mr Speaker wi sa site anler kot i été i en site ki ganny demarke konman en agricultural site ki nou apel en A1 ki vedir i apropriye pou tou kalite lagrikiltir ki swa i sonny  zannimo, crops, vegetable.

Konsernan quota lenformasyon ki mon annan avek mwan, se ki sa laferm i annan li permisyon pou li sonny 1600 koson pou angrese apre i annan li permisyon pou sonny 225 sa ki nou apel bann breeding sow savedir bann manman pou fer pti koson.  Sa i annan permisyon.

E lo kote pou bef, normalman pou le moman, i en keksoz ki pe ganny travay lo la. I napa neseserman en sistenm quota lo kote kot bef.  Me ler en prodikter i deside, pou li antre dan en tel aktivite, i ganny tou bann gidans neseser pou li fer.

Bon, mon’n aprann poudir sa issue bef konsernan sa issue bef i nepli en problenm. Dapre Komisyoner Lasante i nepli en problenm.  Akoz swivan bann problenm ki ti annan avan kot bef ti pe roam around partou lo sa laferm, sa fermye an partikilye in met bann baraz elektrik ki restrikte mouvman son bef ; an lot mo se ki i annan serten landrwa ki ler in travay avek Lotorite konsernen kot sa bann bef i sipoze mouvmante.

Me mon’n aprann avek ou la, poudir i annan serten bef ankor ki lo semen, e mon krwar sa i en keksoz ki pou nou ansanm avek Lotorite konsernen, pou nou war e pou nou adrese.  Akoz dapre sa ki mon konpran ti annan bann kondisyon ki ti sipoze ganny swiv lo kote bef.  Me nou war poudir swivan nou kestyon ki  ou, ou’n demann avek nou kestyon i link pirman avek desarz, ki ti arive anler laba.  E parey Minis in eksplike i bann desarz ki pou fer avek sorti kot koson.  So vwala mersi Mr Speaker.

 

MR SPEAKER

Mersi Minis.   Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun.  Swivan repons ki Minis Cosgrow in donn nou, mon konpran poudir ti napa vreman en plent ofisyel, me ti annan en post ki ti ganny war lo social media.  Donk mon premye kestyon se ki alor kestyon sipervizyon bann laferm – sirtou pli en laferm i gran e bann issue ki pou kapab kree, mon anvi konnen ki monitoring ki an plas par tou bann Lotorite konsernen sirtou bann ki annan reprezantan isi.

Ki mannyer sa i ganny fer pou asire ki standar, kot i konsern lizyenn e lasante piblik i pe ganny mentenir?  Premye kestyon.

2enm kestyon mon anvi konn lo kestyon korperasyon sa fermye avek bann Lotorite, akoz eski in en prosesis fasil, ouswa in annan – ?  (Ki sa mo mon pe rode ?) Ok.  Eski wi in korpere, in konpran, ouswa in anvoy pronmnen parey nou dir an Kreol?  Mersi.

 

MR SPEAKER

Mersi Onorab Henrie.  Minis Bastienne.

 

MINISTER CHARLES BASTIENNE

Mr Speaker monitoring lo laferm i ganny fer parey anba lagrikiltir i annan sa ki apel farm management – ok?  Se ki extension officer i vizite e war kondisyon lasante bann zannimo ; eski laferm pe byen ganny zere?  Eski son bann desarz pe ganny zere apropriyeman?  Me parey nou dir se ki sa lensidan i en lensidan ki’n ariv – si mon pa tronpe dan en peryod 24er- 48er.  E pou nou kapab ganny sa lenformasyon, fodre absoliman ou ganny en konplent in ariv sa.  akoz extension officers i annan zot routin ki zot swiv pou zot vizit e evidaman sanniter, public health osi i annan zot bann farm hygiène inspection ki zot fer, sa i bann vizit ad hoc ki zot fer.  E therefore se ki ou pa pou konnen i annan sa lensidan, vi ki’n ariv parey in arive e Minis in fer sorti e en pe letan kot ti annan gro lapli – ok?

So sa i lo sa kote sa bout. E lenformasyon ki mon annan osi konsernan korperasyon avek Lotorite konsernen, parey nou’n eksplike vizit in ganny fer, in ganny ekrir en let ; in dir li ki bann mezir ki i bezwen pran, pou fer sir poudir i adres sa bann shortcoming ki annan lo laferm.

E la parey nou ganny dir, ti dan plan, ti donn omwen 14 zour oubyen 21 zour, avan lot vizit i ganny fer ki pe ganny fer la sa semenn.  E la Lotorite konsernen i ava al regarde, eski in compliant avek sa ki ti’n ganny fer,  e si non then Lotorite i ava anba Lalwa, zot ava annan serten keksoz pou zot fer.  Si in fer very good, napa problenm travay avek li pou nou amelyor plis ankor.  Me si i pa’n fer then Lotorite konsernen zot ava war ki mannyer zot ava deal avek sa sityasyon.  Mersi Mr Speaker.

 

MR SPEAKER

Mersi Minis.  Onorab Henrie vitman.

 

HON GERVAIS HENRIE

Wi vitman Mr Speaker.  Lo kestyon Lasirans Lasanble, eski i ti ava posib pou Minister konsernen, fer nou ganny serten dokiman an relasyon avek sa size ki nou pe koz lo la.  Par egzanp bann vizit ki zot in fer ; bann rekomandasyon.  So ki i ava dan nou posesyon pou an ka sirtou pou MNA Baie Lazare si i anvi fer serten follow-up?  Mersi bokou.

 

MR SPEAKER

Mersi Onorab.  Minis.

 

MINISTER CHARLES BASTIENNE

Wi nou napa problenm pou nou, whatever dokiman ki nou annan, ki annan pou fer avek sa size, e mon krwar nou tou nou dakor pou nou kapab submit avek zot.  Mersi Mr Speaker.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker anvi ki Minis in eksplik nou ki sa fermye i en fermye ki prodwir bokou e ki son prodiksyon i enportan dan prodiksyon Nasyonal.  E ki nou anvi ankouraz tou dimoun ki prodwir manze dan Sesel.   Mon ti a kontan konnen ki lasistans Minister Lagrikiltir in kapab provide apard bann konsey, pou fer sir ki sa fermye i kontinyen prodwir, me selman i prodwir dan en fason ki i pa anmenn okenn lenkonvenyans, pou bann zabitan ki viv otour sa laferm.  So eski Minister in proaktiv pou fer sir ki zot anmenn tou lasistans, me osi ki  li  in proaktiv pou fer sir ki bann rekomandasyon i ganny swiv – ok?  Sa i mon kestyon mon pou annan en ptipti apre ankor.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker konsernan rekomandasyon si i ganny swiv?  Nou’n dir poudir pou annan en vizit swivi, pou war si sa bann keksoz ki in dir li fer si in fer sa semenn e la nou ava konnen.  Lo kote Minister Lagrikiltir, evidaman atraver Lazans Lagrikiltir ler vizit miting, i ganny fer zot osi zot form parti sa, e ansanm konman en tim, konman en Lotorite nou annan en sityasyon parey se en kestyon ki Lotorite i reakte lo la – ok?  Pou apard konsey apard konsey ki travay avek zot, mon pa okouran okenn lezot lasistans ki nou’n donn sa fermye an partikilye, akoz sa bann keksoz ki Lotorite Lasante, Lanvironnman pe fer li fer, i bann keksoz ase debaz ki nou espekte of en laferm pou zot kapab fer.  I pa en keksoz bokou, bokou plis an plis pou fer pou li contain sa sityasyon.   Mersi Mr Speaker.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker prezan mon ti a kontan si Minis i ti kapab eklersi sa Lasanble.  Sa fermye i sipoze en plito en gro fermye parey nou dir.  Donk son bann license e son bann permi ki i gannyen, i evolye o fil an mezir ki i grandi.  Akoz i enportan pou bann dimoun konpran, ganny lenformasyon pou konnen si sa fermye ler i pe prodwir, i pe prodwir dapre bann norm e dapre bann license ki’n gannyen.

Konmsi ou konmans dizon par egzanp mon konmans lo 100 koson ou al lo 400 koson ou al lo 600, la in ariv lo 1600 koson.  Konmsi eski sa i en progresyon normal, ki dan levolisyon normal en laferm?  Oubyen eski a okenn moman i annan bann Lalwa, bann Regleman ki ganny kase kot sa fermye i tonm an deor bann Regilasyon Licensing?  Konmsi eksplik nou ki mannyer zot kontrol sa evolisyon, me an menm tan ki zot permet en pti fermye pou li vin en gro fermye en zour ki nou ti a kontan war nou dan nou pei.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker i korek Onorab, se ki nenport fermye ki angaz li dan lagrikiltir nou espekte i annan responsible farming a tou moman.  E i normal ki en fermye ler i konmans ptipti i annan en serten kantite norm zannimo, oubyen en serten kantite later ki i pe prodwir lo la.  An mezir biznes i agrandi i ganny plis dimoun, i ganny plis reveni, i le sonny plis zannimo i le agrandi later, e dayer kot i annan posibilite ki baliz ek sa fermye Lazans Lagrikiltir i depandan lo prodiktivite parfwa i aplik pou tou fermye, i allow sa fermye pou extend son farm, ki en pratik normal.  Dan tou bann ka, sirtou kot zannimo i konsernen, ler ou donn en permi en fermye anrezistre pou li sonny zannimo, i ganny son norm en serten  norm.  Apre ler i pe demann additional pou li sonny plis, i annan sa ki nou apel en Livestock Production Committee – LTC.  Sa LTC lo la i annan Public Health Authority, i annan Minister Lanvironnman, Lazans Lagrikiltir zot fer en vizit konzwent pou etabli eski i fezab pou nou allow sa fermye pou ogmant son prodiksyon, prenan kont son lespas ki okipe, e ki bann konsekans ki i kapab annan si zanmen i ganny permisyon pou li ogmant son prodiksyon.

So i annan en Komite an plas ki ale, ki fer sa vizit e swivan zot fer zot rekomandasyon.   Si  par egzanp sa fermye ti annan li 900 koson ki pe sonnyen e li i pe demande pou li 1600 koson, petet i pa donn 1600 i a fer li gradyel, i a donn li 1200 i a mont 1400, i a mont 1600 zis pou fer sir i pou lenpak e volim dese ki pou sorti lo son laferm, lo lanvironnman petet ki pli enportan i minim, oubyen i pa arive.

So vwala kot i annan sa ki an plas e striktir formel en Komite ki ganny fer avan ler okenn desizyon i ganny fer.   So parey mon’n dir ou se ki son permi ki i annan azour, i reflekte lenformasyon ki mon gannyen boner.  Mersi Mr Speaker.

 

MR SPEAKER

Mersi Minis.  Vitman Onorab Ferrari.

 

HON JEAN-FRANCOIS FERRARI

Zis vitman ou pe dir nou Minis ki dan sa ka Baie Lazare sa bann steps in ganny respekte e ki sa fraz, ‘‘I don’t give a damn’’ pa ti en keksoz ki ti pe dir mon pa pou respekte okenn Lalwa, me selman i ti zis kekfwa en fristrasyon en keksoz koumsa?  Me bann Lalwa ek bann Regleman eski ou konfirmen poudir, zot in ganny respekte, e ki i annan dan sa lespas i annan en assessment ki’n ganny fer ki dan sa lespas i kapab prodwir sa kantite zannimo?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker avek  mwan, mon annan son permi sa fermye, e lo la i kler son permi ki’n gannyen pou li prodwir.  E son permi i pou reflekte permi mon’n ganny avek Lazans Lagrikiltir. I pou reflekte rekomandasyon ki sa Komite ki pou’n fer an vi  an relasyon avek prodiksyon.  Mersi Mr Speaker.

 

MR SPEAKER

Mersi Minis.  Onorab Charles De Commarmond.

 

HON CHARLES DE COMMARMOND

Mersi Mr Speaker.  Bonzour Minis avek ou delegasyon.  Mr Speaker eski petet Minis i kapab enform nou Lasanble, lekel bann lezot fermye ki annan bef – ki sonny bef e ki kantite zot annan?  E kote zot pran zot bef pou donn manze ; konmsi ki mannyer zot manage zot bef otan ki konsern manze?   E eski sa problenm sa fermye an kestyon in rankontre, i en problenm ki lezot sa bann fermye ki annan bef in rankontre ?  E dan zot leksperyans lagrikiltir dan Sesel, sonny zannimo, eski in deza arive bann tel problenm dan Sesel?  Mersi.

 

MR SPEAKER

Mersi Onorab.  Bon annou nou bezwen fer referans avek kestyon orizinal.  I pe koz presizeman sa landrwa Baie Lazare be mon ava permet Minis pou -.

 

HON CHARLES DE COMMARMOND

Wi nou pe focus lo Baie Lazare selman nou pe gete si sa issue in deza arive dan pei, pou ki konmsi nou kapab konnen ki mannyer pou manage e ki best practice ki annan, otan ki konsern sa issue Baie Lazare.  Mersi.

 

MR SPEAKER

Yes dakor.  Minis.

 

MINISTER CHARLES BASTIENNE

Mr Speaker,  sa issue parey nou war petet in arive dan konteks Baie Lazare,  letan mon pe koz avek Public Health la.  I pa pou en keksoz nouvo sa.  Parfwa ou pou war lo bann lezot laferm osi i arive.  Me parfwa osi se ki ler Lotorite i pase me ler sa fermye li menm li, i konsyan potansyel ki kapab arive vizavi si zanmen son bann delo desarz i sap li, zot pran bann mezir apropriye a sa moman donnen, byen vit; ou  kapab  dir preventive measures.

Me parkont osi i arive dapre lasante lanvironnman osi se ki i arive me ou travay avek sa fermye pou nou fer sir i pa repete.

Mon krwar poudir nou tipografi apre kot laplipar later lagrikiltir i sitye, sirtou dan montanny, ou annan bann ranpar en?  Landrwa kot ou kapab fer properly ou bann desarz, parfwa i telman challenging.  Ou espekte sa bann keksoz i pou kapab arive.  Me nou, nou bezwen fer sir konman en Gouvernman konman en Lotorite, tou mezir konsernen, tou mezir apropriye, i ganny pran pou nou kapab sofgard lasante nou pep, e fer sir poudir i pa ariv ditou e si zanmen i arive, pran bann corrective measures pou fer sir pou fer aksidan there and then, pou ki i pa vin en pli gran problenm.  Mersi Mr Speaker.

 

MR SPEAKER

Mersi Minis.   Mon ava donn en dernyen kestyon Loter kestyon.  Onorab Adelaide.

 

HON FRANCOIS ADELAIDE

Mersi Mr Speaker pou permet mwan sa dernyen kestyon.  Minis eski ou kapab konfirmen ki depi ozordi nou pa sipoze war okenn bef lo semen, apard ki dan laferm sa msye?  Enn.

2enm ordinerman ler zot al fer bann vizit i sipoze annan en log book ki zot ranpli apre i annan en rapor ki zot mete lo la, eski sa osi zot kapab fer Lasanble ganny en kopi?  Tou zot bann vizit, bann log book tou bann lenformasyon, pou nou kapab assess sityasyon e pou nou vreman follow sa sityasyon de pre?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker in sap mwan 2enm kestyon, ou kapab repete Onorab silvouple?

 

MR SPEAKER

Onorab Adelaide.

 

HON FRANCOIS ADELAIDE

Minis ordinerman ler zot al bann laferm – bann zofisye, zot sipoze annan kek – nou apel sa en log book e bann rapor ki zot ekri.  E mon ti a voudre ki ou Minister, i fer Lasanble a mwen mwan ganny enn oubyen Lasanble, i a vin propriyeter Lasanble ki nou kapab get bann detay lo la, si vreman tou bann Regilasyon in ganny swiv; bann keksoz ki’n marke si zot pe vreman sivre, pour ki nou osi nou konnen ki pe pase, e nou osi nou vin par ler nou pe lager dan la kominote, pou fer sir ki nou respekte lasante dimoun.  E nou, nou konnen poudir sa bann keksoz pe ganny fer normal.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker i pareyman poudir Onorab pa’’ trus’’t nou la i le log book tou.  Me nou annan rapor ki ganny prodwir e rapor i reflekte sa ki dan bann log book ki ganny fer.  E mon krwar parey nou fer resorti pli boner avek Onorab ki responsab Assurance Committee, se ki bann dokiman nou ava fer zot gannyen – bann dokiman ki pa en problenm.  Pou repons ou premye kestyon sa i en diskisyon ki nou ava fer avek sa fermye konsernan pou napa bef lo semen.  I en keksoz ki letan Lotorite konsernen i ava al vizite demen, an vi ki nou, nou’n vin dan Lasanble vizavi sa desarz ki ti pe koule Baie Lazare, ki nou, nou konnen i ti pe link avek son desarz avek koson.

So se sa kot nou’n – well zannimo kot nou koz lo la.  Me pa neseserman pou nou al an detay lo son management vizavi son bann bef lo semen e tou, ki parey mon’n eklersi mon’n dir in deza pran serten mezir, in met bann fil elektrik, bann baraz elektrik pou kontrol moman son bann bef – sa i pe ganny fer.  Me si i annan plis ki sa ankor, parey ou pe dir, mon espekte Lotorite konsernen zot la avek mwan ler vizit i ganny fer zot ava fer sir zot adres sa size osi tou.  Mersi Mr Speaker.

 

MR SPEAKER

Mersi Minis Bastienne.  Bon avek sa nou termin kestyon pou Minis Bastienne e osi Minis Wallace Cosgrow ki parmi nou.  Mon ti a kontan osi tou profite pou dir mersi Minister Lasante, pou anvoy son bann zofisye, ki pou ed le 2 Minis dan reponn sa kestyon Adelaide.  Bon mon ava ankor enn fwa remersye Minis Bastienne, Minis Cosgrow avek zot delegasyon e nou ava eskiz zot parmi nou.

 

(MINISTER COSGROW AND MINISTER BASTIENNE AND THEIR DELEGATION WERE EXCUSED FROM THE HOUSE)

 

MR SPEAKER

Bon avan nou pran Break nou pou kontinyen apre midi 2er avek PNQ ki pe anmennen par Leader Lopozisyon.   Mon annan zis en pti lanons pou mwan fer.  1er ABC pou meet parey labitid dan Speaker’s Conference RoomSo nou ava Break e nou a repran nou travay 2er.

 

 

(BREAK)

 

 

MR SPEAKER

Bonn apre midi tou Manm Onorab. Bonn apre midi tou dimoun ki a lekout e pe kontinyen swiv travay Lasanble Nasyonal.

E mon ti a kontan swet Minis Pamela Charlette en bonn apre midi e byenveni dan Lasanble Nasyonal.  E Minis Charlette i ganny akonpannyen par Sekreter Prensipal pour lenfrastriktir Mr  Yves Choppy e osi tou Special Advisor to the Minister msye Gerard Hoareau. Minister bonn apre midi e welcome.

Onorab Ramkalawan oule lev en …?

 

HON WAVEL RAMKALAWAN

Mr Speaker mon’n sey antre an kontak avek ou pandan Break. Me selman mwan konnen zot ti dan ABC alors mon pa’n kapab. I wish to raise a matter of privilege ki’n arive pandan lunch break.

 

MR SPEAKER

Yes go ahead.

 

HON WAVEL RAMKALAWAN

Mr Speaker pandan ki nou’n dan lunch break, news ki’n sorti se ki Gouvernman in al lo televizyon  e pour enform piblik ki poudir zot in withdraw sa Bill lo Public Service Salary e ki Gouvernman pe go ahead anba lezot prosedir; basically koman anba en S.I. ki’n ganny gazetted pour fer sa.  Lenpresyon ki mon gannyen e mwan koman en Manm Lasanble, mon santi poudir mon privilez i ganny afekte.  Dan ki fason. Premyerman L’Egzekitiv pe donn lenpresyon ki poudir i fer sa ki li i anvi dan sa Lasanble, kan ofet i annan en prosedir pour swiv pour withdraw en Bill e ki sa prosedir, sa prosedir i bezwen ganny swiv klerman e ki se Lasanble.  Se Lasanble ki touzour an kontrol. So mon krwar ki Mr Speaker i enportan pour nou koman en Lasanble mentenir nou souverennte koman en Lasanble.

E ki a okenn moman ki L’Egzekitiv pa krwar ki poudir i kapab fer sa ki li i anvi avek nou Lasanble Nasyonal, parski Lasanble Nasyonal i ganny dirize anba son Standing Orders. Alors mwan ti ava kontan si ou Lofis ti ava enform L’Egzekitiv  e sa i se parski sa i se Mohammed Afif koman – ki travay dan Biro Prezidan li menm li ki’n fer sa lanons, pour dir ki fodre ki zot montre respe pour ou NOU Lasanble Nasyonal. Mersi bokou Mr Speaker.

 

MR SPEAKER

Mersi Onorab Ramkalawan. Nou’n abord en pti pe sa issue dan nou ABC.  E de la nou ava regard the way forward. Nou’n pran serten desizyon dan ABC. Ok?   Bon san tarde mwan ava redonn ou laparol Onorab Ramkalawan, pour poz ou kestyon, Private Notice Question to Minister Charlette. Onorab.

 

HON WAVEL RAMKALAWAN

Mersi bokou Mr Speaker. bonn apre midi Minis avek ou delegasyon.

Mr Speaker mwan PNQ i lir koumsa. Eski Minis responsab pour later i kapab dir sa Lasanble;

  • Ki proze konblaz oubyen stokaz disab ki Gouvernman pe anvizaze fer byento, e konbyen eski zot pour koute?
  • Eski pour annan en prosesis tender ouver, oubyen eski Gouvernman pe negosye avek en lakonpannyen an partikilye?
  • Ki rol IDC dan sa bann proze?
  • Konbyen reveni eski Gouvernman i ekspekte ranmase avek sa bann proze? Mersi bokou Mr Speaker.

 

MR SPEAKER

Mersi Onorab.  Mon ava donn laparol Minis Charlette.

 

MINISTER PAMELA CHARLETTE

Mersi Mr Speaker. Mersi Onorab. E bonn apre midi tou Onorab e tou dimoun a lekout. Pour komanse Mr Speaker parey ti ganny anonse par Prezidan Larepiblik dan son Diskour Leta Lanasyon 2018. E tou resaman lo medya Gouvernman i annan plan pour fer en proze konblaz dan lavenir pros.

Gouvernman in osi demann IDC pour antreprann en proze re-stokaz disab ki sorti dan fon lanmer. Mr Speaker an se ki konsern sa proze konblaz Gouvernman ti anonse ki vi bann lezot proze Nasyonal priyorite ki bezwen ganny enplimante dan sa prosen 2 a 3 an, e anliny avek Polisi makroekonomik pour Gouvernman redwir pre ki i fer a leksteryer ziska 50poursan nou GDP, i pa pour dan en pozisyon pour enplimant sa proze konblaz anba Bidze Nasyonal.

Gouvernman in alor deside pour enplimant sa proze par faz, ouswa entansifye son zefor pour sey ganny finansman atraver en don avek pei zanmi. Si Gouvernman i kapab ganny en don, sa proze pour kapab ganny fer an antye.  Sa proze li menm i konpri konble 5 Zone lo lakot Les Mahe, e en pti zil dan labe Grand Anse Praslin.  Dapre bann estimasyon ki’n ganny fer, nou panse ki sa proze an antye pour kout anviron 48mil Ero ki enkli mobilizasyon, de-mobilizasyon e osi consultancy. Sa se konsey teknik.

Mr Speaker, parey mon’n deza dir an sa ki konsern stokaz disab ki sorti dan fon lanmer, Gouvernman in demann IDC pour antreprann sa proze preferableman, avan lafen sa lannen, vi ki nou estimen ki sa stok ki egziste konmela, i pour fini ver lafen sa lannen.

Pour menm rezon ki Gouvernman pa oule al pret larzan pour antreprann sa proze ouswa pour met presyon lo Bidze Nasyonal, Gouvernman in demann IDC pour antreprann sa proze lo en baz ki komersyalman vyab. IDC pe diskit avek son Bord e pour vin avek en propozisyon konkret. Dan sa propozisyon IDC ava pran en loan pour retir sa disab en anmenn ater e atraver lavant sa materyo i ava rekiper son kou pou re-pey son loan. Si sa i ganny enplimante atraver sa mekanizm Gouvernman pour anmas zis taks set a dir VAT lo lavant disab.

Sa i larepons ou premye kestyon. Si ou ti le mon kontinyen?

 

MR SPEAKER

Kontinyen Minis.

 

MINISTER PAMELA CHARLETTE

Pour dezyenm kestyon Mr Speaker pour sa proze konblaz i lentansyon Gouvernman pour annan en prosesis tender ouver. Me vi ki nou ankor pe rod sours finansman, mekanizm pour tender i kapab sanze, depandan lo kondisyon ki sa sours finansman i demande. Sepandan pour sa nouvo stok disab ki konsidere koman irzan, IDC pour bezwen antre an negosyasyon avek  Jan De Nul ki annan serten eksklisivite lo sa 2 stok disab anba lanmer an akor avek en Lagreman ki ti sinyen ant Gouvernman  e Jan De Nul  ki valid ziska lafen Novanm 2021.

En lot opsyon se IDC i deside fer son prop resers pour rod en lot stok disab anba lanmer. Mr Speaker sa i desizyon ki IDC pour bezwen pran, baze lo opsyon ki pli favorab e osi baze lo laspe finansyel e konstrent letan.

Pour 3enm kestyon. Mr Speaker mon ti a kontan fer byen kler ki IDC pa pe antreprann okenn proze konblaz.

IDC in selman ganny demande par Gouvernman pour antreprann sa proze re-stokaz disab, ki parey mon’n deza dir stok i riske fini ver lafen lannen. IDC pour ganny servi koman sa veikil pour li finans sa proze, akoz Gouvernman pa kapab depans plis ki son debt ceiling.

Mr Speaker pour kestyon No.4. An se ki konsern sa proze konblaz i difisil pour fer en forecast, lo ki kantite reveni Gouvernman pour anmase. Byensir nou tou nou konnen ki sa proze konblaz pour anmenn en kantite benefis ekonomik e sosyal pour pei dan long term. Legzanp i la pour nou war pour nou menm, atraver bann proze konblaz ki’n ganny fer dan lepase.

Lo kote stockpile nou antisipe ki Gouvernman pour kapab anmas R15.6milyon roupi zis ek VAT dan en lespas 7 a 8 an.  Sa asonpsyon i baze lo en stok 750mil tonn ki pour ganny pri se R138. 75 me toudmenm se IDC ki pour desde konbyen i pour vann dan son propozisyon.  Sa R138. 75 i kou ki aktyel konmela Mr Speaker. mersi.

 

MR SPEAKER

Mersi Minis. Onorab Ramkalawan.

 

HON WAVEL RAMKALAWAN

Mersi bokou Mr Speaker.  E  Minis, mersi bokou pour ou larepons. Mr Speaker mon premye kestyon, i an relasyon avek konblaz ki Minis in anonse lo lakot Les Mahe.  Eski Minis pe dir avek nou, ki enn bann proze konblaz se la devan kot PUC i ete, kot Gouvernman detrwa lannen pase letan i ti a pe fer konblaz,  ti pran desizyon pour fouy sa landrwa, pour li vin minus 15 metres, ki bi e plan sa letan sete pour fer en dry dock.

Zot ti fouy li minus 15. E donk eski i pe dir avek nou ki la aprezan zot pe al, zot in sanz zot plan, zot pour al ranpli sa bout la ki deza minus 15 metres e ki apre letan zot in ava azout bout anler pour li vin konblaz.  Sa i mon premye kestyon. Mr Speaker mwan ti ava kontan Minis i eksplik nou byen sa zafer eksklizivite.  Parski mon pa pe tro ganny en konpran ki mannyer IDC i annan en laranzman avek en lakonpannyen Jan De Nul pour li ganny, ki sa lakonpannyen i annan eksklizivite ziska 2020.

Ki mannyer eski sa i marse?  Mon ti ava byen apresye e letan Minis pe dir avek nou ki Gouvernman napa larzan pour fer konblaz, e Gouvernman napa lentansyon pran en loan, me ki Gouvernman, me plito anvi war ki zot ganny en don.  Eski Minis i kapab dir nou ki staz sa, e ki pei zot pe koz avek pour zot nobou ganny en don, ki pour ekivalan 48milyon Ero, e 48 milyon Ero, ero si ou Ero i 10 i deza ariv R480milyon me nou konnen ki poudir Ero i R16 alors nou pe koz an term R640 milyon.

E letan nou pe mazinen ki pour dir, sa dan li menm li i an relasyon avek sa ki nou deza dwa. Lekel sa pei ki pour donn ou sa kantite larzan koman en don?  Mersi  Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker. Pour premye kestyon ler nou pe koz eksklizivite dan sa Lagreman ki nou annan avek Jan De Nul i en Lagreman valid ki pour ale ziska 2021. Senpleman  se ki zot ki’n fer resers, oubyen bann letid pour trouv sa 2 sit kot i annan sa bann disab.  So Lagreman alors i vedir ki zot ki i annan eksklizivite pour kapab tir sa bann disab pour fer bann proze Nasyonal Gouvernman.

So i baze lo sa prensip, akoz zot ki’n invest zot larzan, zot in fer sa letid e alors zot in ganny sa eksklizivite.  Lo ki staz ki nou’n arive? Depi lannen pase ler Prezidan ti anonse i annan 2 Komite ki’n ganny met an plas, en Technical Committee avek en High Level Committee zis pour nou asize diskit bann keksoz teknik ki mannyer nou pour avanse, avek sa bann proze. Parey Prezidan ti osi anonse dan Leta Lanasyon ki sa i  kapab vin koman Grant; i kapab vin koman bann PPP. Tousala i bann keksoz ki nou bezwen eksplore, sa Technical Committee avek sa High Level Committee i bezwen eksplore pour nou kapab fer sa bann konblaz arive.

Pour premye kestyon regarding Queenie Bay. Parey mwan ti anonse i annan 5 landrwa kot nou pour al fer Queenie Bay wi i enn kot pour nou fer reclamation 8 ektar. I pour osi en fitir ekstansyon por ek stasyon zenerater elektrisite. Sa ki pe ganny konsidere dan sa technical Committee. Me parey mon’n dir tou bann keksoz i ankor an diskisyon. I kapab annan sanzman eventually dan le fitir, ki mannyer nou antreprann sa bann proze.  Mersi.

 

MR SPEAKER

Mersi Minis. Onorab Ramkalawan.

 

HON WAVEL RAMKALAWAN

Mersi Mr Speaker.  Mr Speaker mwan anvi premyerman, Minis i ava – mon retourn ankor lo sa eksklizivite.   Eski Minis i kapab dir nou, si dan sa kontra eksklizivite, i vedir ki sa lakonpannyen i sarz sa ki li i anvi? Parski i annan eksklizivite? Oubyen eski i annan en laranzman kot kekfwa dan sa Kontra menm ki deza mete konbyen i pour sarze, pour ranmas sa disab, dan fon lanmer pour stockpile? Parski zis an relasyon avek sa, zot pe demann IDC pour fer antreprann sa proze.

Alor dir nou konbyen eski zot krwar ki sa proze, pour arive zis pour ranmas sa disab?  E ki si IDC pe pran en loan i pour bezwen mwan mazinen pran en garanti Gouvernman. E alor si Minis ti ava kapab dir nou ki lenpak sa pour annan lo det ki Gouvernman Sesel i deza annan?

Dezyenmman Mr Speaker, eski Minis pe dir avek nou ki sa bann proze konblaz, vi ki sa Komite teknik avek sa High Level Committee i ankor pe diskite?   Eski i ankor pe dir avek nou ki a ler aktyel la kot nou pe koze, tou keksoz i ankor zis en konsep e ki napa nanryen konkret, kot nou kapab dir par egzanp konblaz pour komanse Zanvye 2020 – oubyen Zanvye 2021.  Eski Minis pe konfirmen ki pour dir ankor zis en konsep e ki tou sa bann prosesis pour ganny fer an tout transparans? E finalman Mr Speaker mwan tre dezapwente letan mwan tande ki poudir Queenie Bay pe al ganny konble.

Parski letan sa menm Gouvernman ti fer sa konblaz Queenie Bay ti kler ki ti son lentansyon. Sete pour fer en dry dock. E ozordi nou annan Seselwa – nou annan Seselwa e la mon pour nonmen Mr  Prosper en Seselwa ki’n zwenn ansanm avek bann lezot, kot zot in deza prezant en proze avek Gouvernman, pour fer en dry dock e ki Gouvernman li menm li in dir, i bezwen en dry dock, pour devlopman ekonomik. Eski Minis i ava demann son Gouvernman pour reconsider sa konblaz Queenie Bay. E plito envit en antreprener Seselwa, ki’n deza prezant son proze e ki sa landrwar in deza fouye sa profonder pour kapab fer en dry dock, ki aprezan zot bezwen al re-konble pour nobou, pour nou kapab gannyen sa dry dock; spesyalman avek en antreprener Seselwa, olye pour nou zis war etranze ki vin fer tel proze.  Mersi bokou Mr Speaker.

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker. Si mon pa pe ganny ou bann kestyon les mwan konnen. Me selman parey ou pe Queenie Bay priyorite Gouvernman pour le moman se pour fer nou ekstansyon por e apre re osi re relocate stasyon zenerater PUC.

Dan sa 8ektar ki ou’n nonmen ki minus 14 zis en ektar ladan ki minus 14.

Lo kote proze, nou annan en project memorandum ki nou’n fer, parey mon’n dir e pour le moman tou keksoz i ankor an diskisyon. Parey mon’n dir i ankor dan en staz konsep, ki prezan ki pour ganny devlope.  Nou’n fer detrwa kalkilasyon vreman estimasyon, me i annan bokou ankor pour fer lo kote letid, e osi lo bann feasibility pour nou kapab vreman konbyen pour kout nou, pour kout Gouvernman pour al fer.  E osi par egzanp sa bann konblaz parey mon pe dir nou bezwen rod en fason finans li pa dan Bidze. E alor se sa ki nou pe rod osi bann mekanizm ki mannyer nou pour kapab fer li.

E sa stockpile parey mon’n dir i irzan e i premye faz. Alors nou krwar ki Gouvernman pour bezwen fer en, well IDC pour bezwen fer en propozisyon ki mannyer i pour kapab akoz nou’n swazir IDC set akoz IDC konmela i en lakonpannyen finansman ki stab.  E osi i deza pe manage sa stockpile e an 2012 sa desizyon ti pran pour fer zot manage sa stockpile e zot in fer li  avek, nou satisfe mannyer zot a pe fer li akoz i annan plis transparans.  E osi plis rann kont.  E  zot annan bann ekspertiz ki mon kapab dir zot in invest osi dan bann lekipman ki zot pe mete kot sa stockpileSo se bann desizyon ki’n fer nou mazinen ki kekfwa IDC i a en lorganizasyon on behalf of Government.

Akoz disab i osi en asset stratezik. En kantite nou bann proze Nasyonal i ganny servi, i servi sa bann disab pour par egzanp pour konstriksyon.   So se sa fason ki nou anvi kekfwa IDC i donn nou en propozisyon, e zot dir nou ki mannyer zot kapab ed nou pour fer sa.

 

MR SPEAKER

Yes Onorab.

 

HON WAVEL RAMKALAWAN

Non Minis pa’n, mon’n demann li spesifikman lo eleman cost pour nou nobou ganny sa stockpile e se sa, ki i pa’n reponn mwan.  E petet an menm tan osi zis pour mwan demann Minis, petet Mr Speaker avek ou permisyon, si i pe dir zot pour konble sa ektar ki ti sipoze pour vin en dry dock? Eski Minis i kapab dir nou si zot annan en lot landrwa ki zot pour fer en dry dock e si zot ava konsidere pour donn en lakonpannyen Seselwa priyorite, vi ki in Fini fer demars e i annan sa fon available? Mersi bokou.

 

MR SPEAKER

Mersi bokou Onorab.  Minis.

 

HON WAVEL RAMKALAWAN

Petet Mr Speaker letan Minis pe, si i kapab donn nou en kopi sa Lagreman Eksklizivite pour nou koman en Lasanble kapab apresye li.  Pour nou konnen ki i annan ladan egzakteman. Mersi bokou.

 

MINISTER PAMELA CHARLETTE

Mersi Mr Speaker.  Onorab pour ou premye kestyon. Pour kout anviron 4.5milyon Ero pour tir sa disab. Apre parey ou pe dir si i annan en lot landrwa definitivman mon konnen sa proze pour Mr Prosper ti deza pas devan en Komite e ti deza annan en letid ki ti sipoze fer par SIB.  So  wi nou a kapab gete kote sa letid in arive pour nou kapab enform li.

E osi wi nou kapab donn ou en kopi sa Lagreman avek Jan De Nul napa problenm.

 

MR SPEAKER

Ok mersi Minis. Onorab John Hoareau.

 

HON JOHN HOAREAU

Mersi Mr Speaker. Bonn apre midi Mr Speaker. Bonn apre midi Minis ek ou delegasyon. Bonn apre midi tou dimoun ki a lekout.

Mr Speaker apre ki ti ponp disab  an deor labe Beau Vallon, nou ti remarke ki ti annan en degradasyon lo lans. En degradasyon ki pandan 50an mon pe viv Beau Vallon mon pa’n zanmen vwar oparavan. Eski i annan okenn letid lenpak ki pour ganny fer lo sa bann landrwa ki pe al ganny ki disab pe al ponpe?  Dezyenmman kote sa bann landrwa i ete ki disab pe al ponpe. E trezyenmman akoz ki sa letid ki sa lakonpannyen Zapon ti fer lo lerozyon Beau Vallon, pa ti zanmen ganny pibliye?  Mersi.

 

MR SPEAKER

Mersi bokou Onorab John Hoareau.  Minis.

 

MINISTER PAMELA CHARLETTE

Mersi Mr Speaker.  Mersi Onorab.  Lo kote pour al tir disab, se ant Beau Vallon avek Silhouette.  E wi ti annan en EIA ki ti ganny fer avan ki sa loperasyon ti ganny fer.  E parey tou bann proze konblaz, i annan en EIA ki devret ganny fer.  Sa i enkli dan Kontra.  Tou bann letid e tou bann lenpak i ganny (mannyer mon kapab dir sa) i ganny evalye oubyen assess pour pran bann remedyasyon.

Dapre ki mon konpran, sa lerozyon dan sa letan mon krwar ti en radmare pa neseserman lye avek konblaz. Me mon krwar ki Gouvernman in pran bokou swen, avan ki sa bann legzersis in ganny pran, e se sa ki toultan nou’n met en EIA dan bann proze konblaz. Mersi.

 

MR SPEAKER

Mersi Minis. Yes Onorab Hoareau.

 

HON JOHN HOAREAU

Minis in annan bokou radmare tou sa letan pandan sa 50an ki mon pe viv Beau Vallon, be selman zanmen mon’n vwar enn ki’n tir sa kantite disab e ki ti’n nesesit rock armored  semen pour anpes semen – menm semen  degrade.

E dezyenmman ou pa ankor dir nou, akoz ki sa rezilta ki sa lakonpannyen Zapon, ti fer lo kote lerozyon – akoz ki sa rezilta pa’n ganny pibliye?

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker. Sa rapor fodre nou get avek Departman Lanvironnman, akoz kekfwa zot ki’n donn lotorizasyon pour fer sa letid.

 

MR SPEAKER

Mersi Minis. Onorab Wilbert Herminie.

 

HON WILBERT HERMINIE

Mersi Mr Speaker. Bonn apre midi Minis. Bonn apre midi tou bann Manm Onorab.  Minis ou’n dir dan ou larepons ki pour annan 750mil tonn stok coralfill. Me selman ou pa’n donn detay lo kalite fill ki zot ti pe al rode; akoz vi ki ti annan konsern lot fwa ler zot ti fer sa proze dernyen fwa zot ti rod zis sand fill ki sa pa ti en bon materyo pour fer bann back filling e bokou kontrakter ti pe konplent lo la.

So dan sa 750mil donn nou en breakdown kwa ki zot, ki kalite fill ki zot pe al rode sa voyaz si i pour tou sand fill ouswa pour annan en pe coralfill pour bann kontrakter servi. Mersi Mr Speaker.

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker. tou sa 750 mil ton pour offshore sand, akoz ler ou pe dir mwan coral field nou pour bezwen al koup dan koray. So pour nou environmentally wise, i pa fezab pour nou fer sa ankor. So sanmenm sa ki nou pour bezwen servi sa offshore sand plito.

 

MR SPEAKER

Mersi Minis.  Onorab Herminie.

 

HON WILBERT HERMINIE

Wi Minis mon konpran larepons me selman ler nou pe get sa bann materyo pour ganny servi dan bann konstriksyon ki pe ganny servi otour Mahe. E konsern lot fwa nou ti fek pe ganny en sa issue avek kot Labank Santral tou.  Sa bann fill material i pa soutenab pour fer bann sirtou pour tenir sa bann fondasyon lo la.

E bokou konsern i ganny arive, ki bann kontrakter i ganny menm anmennen ankour ki bann lakaz i crack, i pa tenir byen. E mon ti ekspekte ki sa voyaz  ler zot pe al antreprann sa proze, zot pour fer sa proze dan en fason ki met konsern sa ban dimoun ki travay avek sa bann fill materials devan pour ki sa sityasyon pa repet son lekor. Sa ki mwan ti krwar zot pe pran konsiderasyon. Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker. Nou konpran konsern Onorab. Me selman nou, nou’n war pour dir dan konstriksyon lo kote lenfrastriktir i en keksoz ki bann kontrakter in servi bokou dan bann proze Nasyonal.  So si nou pour bezwen rod coral fill then nou pour bezwen fer en lot kalite tir disab.  Parey mon pe dir ou koupe.  So pour le moman se sa ki nou pe konsidere, pour nou kapab fer konstriksyon avek. Selman mon konpran ou konsern. Mersi.

 

MR SPEAKER

Mersi Minis.  Onorab Stephen Pillay.

 

HON STEPHEN PILLAY

Mersi Mr Speaker.  Mr Speaker mwan ti a kontan demann Minis lo sa concept pour sa plan, son konsep.  Sa 5 sit ki zot pe mazinen pour fer sa reklanmasyon. Eski zot in idantifye sa bann landrwa e si zot kapab fer nou ganny en kopi sa bann omwen sa konsep, nou kapab met nou osi nou input lo ki mannyer nou mazinen i devret, lekel landrwa ki pe al fer sa 5 sit.  E dan sa Lagreman  Jan De Nul (mon pa kapab tro pronons li) konbyen in koute son letid ki’n fer ki nou donn li sa eksklizivite lo parey in demande?  Ler ou pe donn nou sa kopi Lagreman si ou kapab mete konbyen son letid ti koute ki’n fer nou donn li sa eksklizivite lo nou bann disab dan delo sale. Mersi Mr Speaker.

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker. Si mon’n konpran Onorab, Onorab i oule en diagram sa konsep. Se sa? Ok, ok.  Me selman mwan mon annan en lalis ek  mwan la si oule mwan kapab dir ou.  Nou annan 18 ektar pour agrandi Ile Aurore.  Nou annan 5 ektar pour agrandi Ile Hodoul avek Zarden Zanfan. Nou annan 8 ektar kot  Queenie Bay 25 ektar lo Nor Providence, 40 ektar pou agrandi  Providence kot later endistriyel. E 10 ektar Grand Anse Praslin. Se sa ki pour le moman i lo latab pe diskite.

Pour 2enm kestyon dan son kontra i annan kou osi pour son letid. So ler zot a gannyen zot a vwar.

 

MR SPEAKER

Mersi Minis. Onorab De Commarmond.

 

HON CHARLES DE COMMARMOND

Mersi Mr Speaker. Bonzour, bonn apre midi Minis ek ou delegasyon. Mr Speaker premyerman eski Minis i kapab partaz osi lo nou kote en kopi sak Kontra eksklizivite Jan De Nul akoz ordinerman letan zot donn dokiman nou kote latab, enn ler pa gannyen.

2enm pwen donn nou detay.

 

(Off-Mic)

 

HON CHARLES DE COMMARMOND

Onorab Ramkalawan ki no respect for the Chair?   Mon pe dir sa ki egziste.  Sa ki arive!  Ou konpran?  So napa nanryen pour fer ek Chair.  Ler  i donnen nou pa gannyen. I koumsa enn ler i arive!  So mon pe fer mwan pwen sorti.  Donn nou detay sa bann, sa konpannyen  Jan De Nul  la.  Nou ti a kontan detay lekel li. Son bann direkter.  Akoz ki ti napa tender letan ti fer sa Kontra la.  Si ou annan lenformasyon lo la.  Son eksklizivite ki in gannyen.  E eski i annan lezot konpannyen ki asosye avek li, li?  Sa Jan De Nul mon ti ava kontan konn en pti pe.  E ziska ki zistans sa Kontra Eksklizivite i ale?  E an menm tan tender pour sa, ou war mwan kot mon pe vini? I bon si zot pe war mwan kot mon pe vini.

 

 

(laughter)

 

HON CHARLES DE COMMARMOND

Tender pour sa dry dock akoz pa ganny fer?  Si nou annan en proze dry dock Gouvernman annou met lo tender lezot dimoun a kapab partisipe.

E Seselwa nou anvi Seselwa i kapab join lafors ansanm, pour annan en dry dock.  En an menm tan Mr Speaker sa ki Minis in dir lo kote Les Mahe, lo kote Providence, eski EIA in fini ganny fer lo la? Eski pa sanmenm sa morso kot Cascade nou’n deza obzekte zot EIA ki ti ganny propoze, a en letan?  Eski IDC finalman. Eski IDC kot i pe manage sa existing stockpile disab la; ki lenvestisman IDC in fer lo la, dan sa devlopman la. Eski i annan bann lekipman ki IDC zot in depanse – konmsi zot in rode ki fer ki IDC i annan si oule dir en lavantaz ozordi, konmsi eksplik nou en pe akoz IDC dan sa direksyon? Mersi.

 

MR SPEAKER

Mersi Onorab De Commarmond. Si zis avan mwan donn laparol Minis. Onorab mwan oule reasir ou ki tou dokiman ki vin kot mwan lofis oubyen kot Sekretarya. Parfwa i vin kot lofis Clerk i ganny sirkile avek tou le de kopi.  Tou le de kote lofis Lopozisyon avek pour ou.

Me petet par fwa i annan dokiman ki al direkteman kot en Manm. Sa mon napa en kontrol lo la unless ki sa Manm i anmenn li dan mwan latansyon.

Me nou annan osi tou bann dokiman par egzanp bomaten nou’n ganny en dokiman, en financial statement 2018 ki en gro dokiman. Nou’n ganny en kopi. Mon’n fer retourn kot Lofis Clerk. E ordinerman lofis Clerk i enform zot ki sa dokiman in vini.  E si ou lofis i anvi borrow pour zot rod lenformasyon ladan zot still kapab fer li.  Me apre lefe ki nou annan en kopi i retourn dan lofis Clerk. Bon Madam Clerk i dir mwan ki sa dokiman in vin 3 kopi.  In anvoy en kopi kot sak biro.  So nou fer o tan posib nou swiv sa bann prosedir ki nou sirkil tou dokiman ki nou gannyen. Ok?

 

 

HON CHARLES DE COMMARMOND

Mr Speaker napa nanryen pour fer avek ou Lofis sa.  Sa ki ou pe dir mwan i korek.  Mwan mon pe dir ki Minis ki …

 

(Off-Mic)

 

HON CHARLES DE COMMARMOND

Non napa nanryen ek Sekretarya Onorab Ferrari. Sa bann Minister i anvoy li direk. Konmsi request i ganny fer pour Lasanble li.  Me i al direk.  Mwan pe dir ki silvouple si request i ganny fer pou Lasan… Mon pe dir i arive. OkSo mon pe dir li annou fer li byen. That’s all!

 

MR SPEAKER

Mersi. Petet lapel ki mwan devret fer ek tou bann Minis, ek tou bann Minister se ki ler Lasanble i fer en request i kapab sorti lo nenport kote, bann dokiman i vin kot Sekretarya e apre nou sirkile. Bon mwan ava donn laparol Minis pour reponn ou bann kestyon.  Minis Charlette.

 

MINISTER PAMELA CHARLETTE

Mersi Mr Speaker. Mersi Onorab. Onorab detay bann dimoun  dan Jan De Nul oubyen bann lakonpannyen. Parey nou konnen i en privately owned Belgium company.  E i one of the biggest dredging companies dan lemonn.

E ladan mwan, i annan en lakonpannyen ki apel Barbarons Maritime ki enn son direkter.  Mon napa tou detay me selman nou a fer ou ganny sa bann detay si ou bezwen. E osi tender pour dry dock. Wi once ki sa letid a fini fer then i kapab ganny tender out e the best bidder will win.

Lo kote EIA Cascade mon krwar ti annan en EIA ki ti fer ler VJ ti pe fer son reclamation, me selman sa i pour en keksoz separe.  EIA pour le moman pe ganny fer, e nou pa ankor ariv lo sa staz konsiltasyon e sa i a fer avek bann stakeholders eventually.

Lo kote investement ki IDC in fer – parey mon ti mansyonnen IDC in fer en pe investment lo kote lekipman. Me selman nou napa exact the amount value.  Me selman nou konnen par egzanp bann wheel loaders in bezwen fer vini pour dan son biznes. Se sa bann investment lo kote masin ek lekipman sa in fer pour li kapab manage sa stockpile li menm. Mersi.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker eski Minis i kapab eksplik nou Lasanble, ki pour arive si i tender sa ki zot pe al donn IDC la pour fer; ki pour arive si zot tender out sa.  Mersi.

 

Mersi Onorab.  Minis.

 

MINISTER PAMELA CHARLETTE

Well si nou tender out sa ki  IDC pour fer direk an deor, i kapab ganny tender, me selman i pa pour kapab servi stok dan sa 2 sit ki  Jan De Nul li menm li in war disab.  So si pour tender out i pour bezwen tender out pour bann lezot sit.  I pour bezwen al rekomans fer son bann resers li menm.  E sa i en investment dan li menm.  E osi i pa zis investment i osi efikasite, akoz sa ti en proze ki irzan ki nou bezwen fer li deswit, pour nou kapab replenish sa stockpile ki nou annan.  So i osi pour baze lo finansman e osi letan ki pour pran pour fer tousala.

 

MR SPEAKER

Mersi Minis. Onorab De Commarmond.

 

MINISTER PAMELA CHARLETTE

Eski Minis Mr Speaker i kapab dir nou, si avan stockpile disab ki in servi, kan mannyer i ti pe ganny manage avan e la ki IDC in manage eski zot in dekouver, zot in war en diferans?  Eski i fer sans ki mannyer IDC ti pe manage oubyen konpare ek avan oubyen non?  Mersi.

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker mon krwar ler ti pran sa desizyon an 2012 mon krwar ti en bon desizyon pour at least annan en pe plis kontrol, lo bann aktivite ki ti pe arive e kot dimoun ti pe pran, i pran disab.  E sa i ti, i minimize en pe lo kote dimoun ki vini ki zis antre i pran.  E osi in, nou’n kapab kolekte en plis reveni avek sa stock disab ki nou annan. I annan plis parey mon’n dir, plis transparans e osi accountability lo kote nou menm nou Gouvernman. Akoz nou’n osi pran desizyon la Zanvye 2019 ki menm si Gouvernman ki pe rod sa disab me still i annan en kou ki asosye avek.  So nou factor-in tousala.  Mersi.

 

MR SPEAKER

Mersi Minis. Onorab Terence Mondon.

 

HON TERENCE MONDON

Mersi Mr Speaker. Mon premye kestyon eski Minis i kapab dir nou si zot in fini donn kontra pour EIA pour sa bann proze? Si wi lekel sa lakonpannyen oubyen endividi ki’n ganny kontra.

Dezyenmman Minis in dir nou ki sa lakonpannyen ti fer letid lo kote ki annan disab e se sa alors ki zot donn sa Kontra avek eksklizivite. Alors mwan anvi demann Minis eski zot ti demann bann lezot lakonpannyen ki fer konblaz pour donn en expression of interest. Eski zot ti pibliye ki bann lezot konpannyen ti kapab partisip pour eksprim zot lentere pour kapab fer sa letid?        E mwan 3enm kestyon Mr Speaker lekel ki ti sinyen lo kote Gouvernman pour sa Kontra Eksklizivite? Mersi.

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker.  Onorab pour ou bann kestyon. Lo kote EIA, EIA ti form parti premye kontra inisyal ki ti ganny fer an 2006. E se Mr Ian Charlette ki’n gannyen pour sa Kontra. E osi pour Grand Anse Praslin, nou’n fek met en’’ Expression of interest ‘’ e ki ti deadline ti an Mars.  So pour Praslin wi nou’n fini fer, nou’n fini met en ‘’Expression of interest’’ e apre nou pour fer en tender.

E Kontra ler nou pe koz kontra ti annan osi bann addendum ki ti ganny fer avek Kontra. Nou premye kontra lo kote Gouvernman ti ganny sinyen par PS, sa letan PS Herminie. E osi addendum extension ti fer par PS Finans ki  Mr Patrick Payet.

 

MR SPEAKER

Mersi Minis.  Vitman Onorab Mondon.

 

HON TERENCE MONDON

Mersi Mr Speaker, tre vitman. En bout mon kestyon Minis pa’n reponn.  Eski zot in pibliy ‘’Expression of interest pour sa letid li menm, ler zot ti demande pour fer. Eski ti envit bann lezot lakonpannyen ki fer konblaz pour kapab donn zot ‘’Lekspresyon lentere’’ dan sa bann proze? Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Dapre ki nou konpran non ti napa tender ler ti fer pour sa letid.

 

MR SPEAKER

Mersi Minis. Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker Minis in mansyonn bann diferan lakonpannyen involve ek sa proze.  Eski i annan okenn dimoun dan son Minister ki a okenn moman involve avek okenn sa bann lakonpannyen?

E eski dan travay ki pe ganny fer in regards to stockpiling materyo, pour domenn konstriksyon, ki mannyer prosedir management pour ganny fer, baze lo bann konsern ki’n ganny eksprimen dan Lasanble vizavi stockpile, li menm ki’n vin devan FPAC vizavi kestyon ki’n ganny demande avek Departman Labita, Lenfrastriktir.  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker. lo kote Minister nou annan nou konsiltan ki lo sa bann Technical Committee. Nou konsiltan Mr Lablache i osi lo Technical Committee e li ki osi en eksper lo nou kote ansanm avek PS Choppy.

Lo kote management stockpile, mon’n note zot bann konsern, me selman parey mon’n dir nou’n fer bokou progre konpare avek avan ki mannyer nou ti pe manage sa stockpile.  E parey mon’n dir i annan plis accountability e nou pe – Mon war pour dir nou pe ranmas larzan. So nou pour kontinyen travay avek IDC ansanm avek Departman Lenfrastriktir pour nou kapab met en pti pe plis ankor zefor, pour nou fer sir ki reveni ki Gouvernman i anmase i al dan kof Gouvernman. Taler mon’n dir en pe lekipman, me selman IDC osi in invest en pe lo kote sekirite, sekirite kot sit i ete, fer fence, annan bann dimoun ki la ki regilyerman ki veye kwa ki pase.  Mersi.

 

MR SPEAKER

Mersi Minis.  Vitman Onorab Pillay.

 

HON SEBASTIEN PILLAY

Mersi Mr Speaker.  Mr Speaker prenon kont ki sa domenn konblaz i en domenn ase spesifik e teknik, e par lefe ki nou napa bokou dimoun dan Sesel.  In fact nou annan de dimoun dan Sesel ki’n vreman involved ek sa bann proze.  Ki ou Minister pe fer pour aktivman train en understudy pour ki ava annan en dimoun ki ava kapab ranplas zot konsiltan dan long term, akoz nou konnen in travay lo bokou proze konblaz. Me selman nou konsern si demen ou konsiltan i ale lekel ki pour kontinyen louvraz ki i pe fer vizavi bann proze konblaz?

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker. Lo sa Technical Committee nou annan nou annan PS Choppy li osi ki la e nou annan osi en dimoun dan son Departman Ms Dorothy Henriette ki osi partisip ladan.  So mon krwar i annan ase understudy e menm dan Departman kot msye Lablache i ete, i annan dimoun ki la ki travay close avek li, kekfwa nou kapab soz sa leksperyans ki nou kapab share sa leksperyans avek sa bann lezot dimoun lo Komite osi. Mersi.

 

MR SPEAKER

Mersi Minis. Onorab Gervais Henrie.

 

HON GERVAIS HENRIE

Mersi Mr Speaker. Bonn apre midi tou dimoun.  Mon premye kestyon i mwan anvi elabor en pe lo pwen ki Onorab in fer letan in demann kestyon lenpak lo sa tir disab la dan bor Beau Vallon e lefe ki Minis in dir ki rapor i kot Minister Lanvironnman.

Mon  pe anvi demann en kestyon lo kwa ki Gouvernman pe met plis an priyorite? Sa devlopman, akoz mwan pa konnen ki mileage ki pour anmenn Gouvernman ouswa si vreman nou bezwen sa lespas pour devlopman.  Me an menm tan nou en pei ki nou pride ourselves lo proteksyon lanvironnman.  E nou konnen pour dir letan ou tir sa bann disab dan lanmer, i anmenn en kantite lenpak li.  Non selman lo lespes i viv dan sa rezyon, me osi lerozyon, lakot e souvandfwa i inond.  E sa i annan en dokimante dan lemonn antye.  So mwan kestyon aprezan kot zot pour al tire. I annan Beau Vallon en kote, ou annan Silhouette, ou annan Ile Du Nord. Eski Gouvernman vreman pe met, pe balanse ant lanvironnman, devlopman apre nou mileage politik ki nou gannyen?  Sa i mon premye kestyon.

Dezyenmman letan Minis in koz lo lagrandisman Ile Aurore, Providence Industrial Estate.  Be par egzanp Ile Aurore apenn si i annan okenn devlopman ozordi. Ki mannyer nou pe al agrandi zot ankor kan i ti kapab inisyalman fer dan saz sa grander ki nou oule? Mon anvi konn en pe rezondet Gouvernman par deryer sa bann lagrandisman, kan sa bann proze in fek fer lot zour e nou pa ankor devlop to zot maksimonm zot pa ankor, i pour re-pey sa det  deza ki nou’n pran pour fer sa bann proze. Mersi bokou.

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker lo kote lanvironnman, mon krwar nou’n fer bokou pour nou kapab anpese ki nou afekte lanvironnman e as en Gouvernman nou bezwen pran en balans ant lanvironnman. Nou pa pe dir pour dir nou pa pe get lanvironnman. Byensir nou bezwen fer devlopman, me en devlopman ki soutenab e ki osi pran lenpak lo lanvironnman e kwa ki nou kapab mitigate e met bann plan amenazman an plas pour nou kapab minimiz en pe sa lenpak. Dan tou devlopman ki nou pour fer i bezwen annan en lenpak dan en fason ou en lot lanvironnman.

Me nou, nou bezwen fer fason ki nou minimize at least sa lenpak.  So wi nou bezwen sa bann later. Nou bezwen akoz menm Ile Aurore, kantmenm i pa ankor ganny konstri i annan en land use plan ki deza la. E once ki lenfrastriktir i ava komans mete, then nou pour war pour dir i pour parey en, i pour parey Ile Perseverance koman ou fini apre i fini ranpli. Providence i en lot ka me nou krwar nou ava fer li dan en fason sa fwa si dan en fason pli soutenab oubyen pli annord ki’n ganny fer dan lepase.

Me selman pour dir ki nou pa bezwen later sa i pa byen pour nou dir. Akoz nou annan bokou, bokou demann pour later, pour biznes, pour endistriyel, pour bann social, proze sosyal, lakaz, menm par egzanp pour PUC osi i en must ki nou ganny sa bann later pour nou kapab fer bann devlopman e sa i anliny avek nou bann land use plan nou Master Plan ki nou annan.      Onorab ou’n demann mwan en kestyon se akoz nou pa ti fer en sel kou. Kekfwa mon pe mazinen loportinite, finansman osi i zwe en gran rol. E menm par egzanp pour stock disab ou bezwen bokou later. Par egzanp la ler nou pe gete sa 750mil stockpile ki nou pour bezwen, i pour bezwen apepre en 10arpan later. So deza menm si nou pe fer sa stockpile nou pour bezwen later pour nou met sa stockpile lo la.

So nou Gouvernman nou pe balanse ki priyorite, e kote nou anvi nou war Sesel i al devan pour nou pa anpes devlopman. Nou kontan pour war devlopman me nou fer li en devlopman ki soutenab e ki i ed dimoun pour devlope e ariv an avan mersi.

 

MR SPEAKER

Mersi Minis.  Vitman Onorab Henrie.

 

HON SEBASTIEN PILLAY

Vitman Mr Speaker.  Minis dan son larepons in dir zot in pran bann prekosyon pour minimize lenpak, ki sa letan zot pour retir sa disab la dan sa rezyon Beau Vallon e mon anvi Minis i reasir nou kwa bann keksoz ki zot in fer pour ki zot in kapab prevwar kwa ki kapab arive e kwa ki pour kapab anpese? Ozordi letan nou pe koze si i annan letan lanmer i plen nou pas Beau Vallon delo i pres pour ariv lo semen.

Nou war bann dega ki pe arive dan rezyon North East Point. Konmsi pour mwan mon konsyan pour dir nou bezwen sa later be selman son lavenir.

Nou pe reste preski ki dir, get semen Beau Vallon kot i ete, bann Rene i zis lot kote semen. Konmsi delo pour antre ek zot en zour.  Konmsi kwa ki nou pe fer pour koman en pti leta zil. Mon enkyet Mr Speaker sa ki mwan anvi dir.  Mon enkyet.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker mon krwar Gouvernman pe met an plas en Coastal Management Plan avek led World Bank ki ava osi konsider sa bann le fe. Bann lefe klimatik oubyen bann lezot lefe lerozyon lo lakot.

E osi EIA i pour, i deza en metod kot sa bann assessment i ganny fer parey mon’n dir e i kapab met an plas en management plan ki mannyer pour anpes bann keksoz koumsa arive si i arive. Mersi.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker. bonn apre midi Minis ek ou delegasyon.  Vi ki Minis in dir nou ki sa stokaz disab i riske fini lafen lannen eski si sa proze stokaz disab pa ganny fer, eski i pour annan en lenpak direk lo gran devlopman proze lakaz ki Gouvernman in anvizaze fer dan lefitir pour zabitan Seselwa?  Mersi.

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker. Definitivman Mr Speaker si sa stockpile pa ganny replenish, nou pour kapab ganny en … Pour annan en lenpak lo bann devlopman ki pour arive sirtou bann devlopman Nasyonal ki nou pe sey antreprann par Gouvernman.  Mersi.

 

MR SPEAKER

Mersi Minis.  Onorab Woodcock ou ti’n lev lanmen?  Yes Onorab.

 

HON WAVEL WOODCOCK

Minis i annan en pti konfizyon la.  Ou’n mansyonnen ki en pti zil lo Grand Anse Praslin kot proze konblaz pour ganny fer. Mon ti a kontan ki ou donn en pti pe plis detay kote egzakteman sa proze 10 ektar pour ganny fer Grand Anse Praslin?  E eski ou Minister pour konsilte avek manm piblik e Lotorite Distrik avan ler ki zot antreprann sa proze? E ou’n mansyonnen ki EIA pa ankor ganny fer Grand Anse Praslin. Mon ti a kontan konnen lekel sa bann dimoun ki pour fer sa EIA ou eski ou Minister pour met sa lo tender?

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker mon pa pour konnen egzakteman ki mannyer zot dir li sa landrwa, me selman i Grand Anse Praslin i dan lakot Sid Was Grand Anse Praslin.  Praslin.

 

MR SPEAKER

Minis i paret Onorab i vag letan ou dir li Sid Was. Annan en pti pe plis presizyon. Kote, lokasyon.

 

HON WAVEL WOODCOCK

Mr Speaker en pti leklersisman. I annan Mosyon ki’n dir kote Ros Kare selman nou pa asire ki bor. Si i dan sa kontour pour mont Vallee De Mai apre pour al bor Konsolasyon i sa landrwa laba devan kot bann later bann Albert. Ok, lala, zis pour konfirmen akoz Minis ou’n mansyonn en pti zil.  Be la i pa enn pti zil. Sanmenm sa ki i en pti konfizyon – konfizan.

 

MR SPEAKER

Mersi Onorab. Minis.

 

MINISTER PAMELA CHARLETTE

Non mon’n dir en pti zil akoz i pour an deor me selman i pour ganny en bridge oubyen en konzwen ki pour konekte.

Ok pour Grand Anse Praslin EIA parey mon’n dir oparavan, ti annan en ‘’Expression of interest.’’ E sa ti deadline ti 15 Mars e once ki sa bann. Nou pa’n ganny okenn dimoun nouvo ki’n express son interest.  Savedir la nou pour al lo faz tender.

Konsiltasyon wi pour fer ler EIA pour ganny fer – yes. .

 

MR SPEAKER

Ok.  Mersi Minis.  Onorab Johan Loze.

 

HON JOHAN LOZE

Bonn apre midi Minis, Mr Chair, Mr Speaker ek tou bann Onorab koleg. Minis ou ava koriz mwan si mon mal e kot mon mal. Mwan analiz ki mon’n fer la se ki disab i anba nou delo Sesel. Nou, nou’n pran nou’n donn Eropeen, Lerop drwa eksklizif pour eksplwate. E  i paret mwan ki tou dimoun anndan i ok ek sa, napa problenm nou trankil lo la.

Bon sa i le ka mon siport demann Onorab Ramkalawan, pour ki nou ganny akse avek sa Kontra Eksklizivite e mwan pour menm al en pe pli lwen. Minis si ou kapab fourni nou avek tou detay, tou detay sa lakonpannyen Barbarons Maritime, tou sa ki’n involve ladan depi son lensepsyon ziska ozordi, spesyalman dan sa bann letan ki Kontra Eksklizivite ti pe ganny drawn up.  Si ou ti kapab fourni sa bann detay ek Lasanble silvouple, tou bann ki’n involve. Mersi Mr Speaker.

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker.  Mr Speaker nou, nou pare pour donn zot lenformasyon ki zot bezwen.  Zis pour eklersi sa eksklisivite i pour sa disab.  Sa disab i pour Sesel akoz i anba nou lanmer. Me selman son eksklisivite i zis pour li tire.  Nou a donn li bann lenformasyon ki ou’n demande Onorab.  Mersi.

 

MR SPEAKER

Mersi Minis.  Bon mwan a retourn kot loter kestyon. Onorab Ramkalawan. Ok Onorab Ferrari mwan pa ti’n war ou.

 

HON JEAN-FRANCOIS FERRARI

Mersi Mr Speaker.  Mr Speaker mwan krwar ki dan sa bann kestyon ki’n ganny mete lepep Seselwa i zis anvi konnen pour dir i pe ganny, si oubyen non i pe ganny en bon deal.

Now mwan kestyon i koumsa; eski Minis i kapab dir nou ki tou bann konfli lentere in ganny konsidere e in ganny eliminen.  E ki par egzanp IDC ek son bann Direkter napa konfli avek le fe ki zot osi travay serten manm lo Bord IDC i osi travay dan Gouvernman.

Eski tou bann prekosyon neseser in ganny pran pour fer sir ki tou bann Kontra in ganny tender.  Eski Minis i kapab dir nou ki a lavenir pour annan osi tender pour tou bann nouvo Kontra ki EIAs oubyen kontra proper, tou sa bann ki pa ankor ganny fer pour ganny fer pour ganny fer.  Sa i premye kestyon.

Dezyenm kestyon se ki Minis eski ou kapab asir Lasanble ki management sa stockpile ki pour vini, pour ganny fer dan en meyer fason posib?  Akoz ler ou dir nou pour dir IDC i annan  leksperyans ladan nou dakor me selman zis IDC ki’n ganny sans annan  sa leksperyans.  Lezot dimoun pa’n ganny sans annan leksperyans.  Par egzanp zis IDC ki’n ganny sans annan leksperyans dan manage zil! Pourtan i annan lezot dimoun ankor dan prive ki krwar zot kapab manage bann zil.  Me vi ki nou donn en dimoun en eksklizivite pour li manage en keksoz apre nou dir zis li ki annan leksperyans!

So kekfwa Minis ou bezwen reasir nou pour dir tou bann mezir, tou bann prekosyon neseser in ganny fer e ki  Jan De Nul en konpannyen ou lopinyon dir nou si Jan De Nul konpannyen that is in good standing? Ki annan en repitasyon enternasyonal; ki zot pe gannyen avek Jan De Nul pli bon posib deal ki egziste. Sorry dernyen pti kestyon, se pour once bann konblaz pour ganny fer, mon krwar i enportan pour Minis dir avek nou ki osi la tou bann prekosyon in ganny fer, pour ki alokasyon bann later i ganny fer dan en fason meyer.

Par egzanp i pa kapab en kontrakter i annan en kontrakter li i ganny later lo tou konblaz, tou konblaz i ganny en bout later lo la!  Praslin, lo zil Ile Eve i gannyen! Lo Ile Aurore pa ankor devlope in gannyen! Lo Perseverance in gannyen! Konmsi eski sa larzan ki lepep Seselwa pe prete pour fer sa proze i pour ganny partaze sa proze son benefis pour ganny ofer a tou Seselwa ki anvi travay? Pa zis en sel dimoun konmsi li toultan ki pour vin pli gro li ki pour vin pli enportan. Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker. Mr Speaker parey mon’n eksplike, ler nou pe koz lo konfli lentere wi nou annan en staff kot nou ki IDC Bord. Me parey mon’n dir i annan en Komite ki pa zis li ki pour pran desizyon.  Akoz i annan en Komite an plas ki en High Level Committee avek en Technical Committee avek tou bann lezot expert. E sa i li menm en mezir ki nou’n pran pour met an plas, pour desizyon pa sorti kot en dimoun tousel.

Osi pour EIA parey mon’n dir sa ti en Kontra ki ti’n fini ganny fer depi 2006.  So e nou legal advice se ki, sa Kontra, sa MOU i legal binding, so nou bezwen fer li valid ziska ler i expire 2020. 2021sorry.  E from then on yes, par egzanp nou’n fer lo Praslin nou’n tender out EIA. Nou’n fer ‘’Expression of interest’’ la nou pour al lo tender e si i annan lefitir koumsa menm ki nou bezwen fer. Nou pour tender out.

Lo kote IDC parey mon’n dir, IDC i pour zis en mekanizm ki en veikil ki’n ganny servi par Gouvernman pour manage e osi pour fer sa stockpile, akoz i urgent.  Me pour en dimoun si pour tender, si nou napa problenm pour tender me selman pour en dimoun pour vini pour invest larzan pour fer stockpile li menm li i koute. Alors se sa ki nou’n swazir IDC. Me mon bezwen fer osi konpran ki IDC pa ankor vini avek son propozisyon.  So nou pa konnen ki kalite propozisyon ki i pour anmenn dan Gouvernman si nou pour aksepte oubyen non.

So an gro Onorab nou pour fer sir ki nou met an plas sa bann mezir, pour nou kapab fer li vin transparans byensir. Lo kote land allocation osi, sa nou konnen pour dir in toultan en konsern.  E nou annan bann mezir an plas, entern lo kote nou menm nou, lo kote nou Lease Committee ki nou annan. Osi nou bann allocation Polisi nou pe revwar en allocation policy pour later komersyal e sa nou annan en premye draft ki nou’n fini travay lo la ki nou apre nou ava anonse.

So sa pour fer sir ki bann later i according to land use plan ki nou annan pour sa bann konblaz, e osi ki napa osi bann diversion parey nou’n war dan lepase kot bokou keksoz apre in vini an mezir ki bann estate, i devlope. E sa in met en kantite presyon lo Gouvernman li menm.  So se sa bann mezir ki nou’n mete an gro pour nou kapab rezourd enn de bann problenm lo kote konblaz li menm e later konblaz. Mersi.

 

MR SPEAKER

Mersi Minis. Onorab Ramkalawan.

 

HON WAVEL RAMKALAWAN

Mersi Mr Speaker.  Mr Speaker mon premye kestyon se pour mwan demann Minis akoz ki zot in kit li ziska lo dernyen minit spesyalman sa zafer stockpile. Zot in kit lo dernyen minit e apre sa pour zot vini dir ki i irzan, e apre pour taye zis pour dir sa ki nou’n antann.

Dezyenmman; eski Minis pe konfirmen avek sa Lasanble ki pour dir al er aktyel nou pa konnen oubyen Gouvernman pa konnen, kan konblaz pour komanse e kan konblaz pour fini?  E mon dernyen kestyon Mr Speaker.  I annan en keksoz ki mon trouv i drol dan bann sif ki Minis in donn nou. An 2012 pour konble oubyen pour ranmas 600 mil met kib disab ti kout 4.83milyon Ero. Ki mannyer an 2019 pour ranmas, pour ponp 750mil met kib disab pour kout 4.5milyon Ero. Mon pa konpran sa kalkil. Mersi bokou.

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker, sa ki nou annan se 750mil tonn.  I pour ariv nou 4.5milyon Ero. Yes.  An 2011 nou ti ponp nou 825mil tonn.

Mr Speaker ok. Lenformasyon ki nou annan se an 2011 si ou ti pour ponp 750 mil i ti pour kout ou 3.6milyon Ero, an 2011, non, sa an 2011 sa.   E la 750 mil tonn i pour kout nou 4.5 milyon Ero, estimated sa.

 

MR SPEAKER

Yes mersi Minis. Mon krwar i annan en 2enm kestyon, non?  Onorab go on.

 

HON WAVEL RAMKALAWAN

Mr Speaker mwan mon retourn lo sa.  Mon ti annan 2 lezot kestyon.  Akoz zot in kit li pour dernyen minit? E apre pour konfirmen nou pa konnen kan konblaz pour komanse, kan i pour terminen?

 

MR SPEAKER

Minis.

 

MINISTER PAMELA CHARLETTE

Mr Speaker mon krwar, wi nou’n kit li en pe dernyen minit, me selman ler ti anonse an 2018, i annan bokou travay teknik ki nou’n bezwen fer. In pran en pe letan pour nou ariv lo sa nivo.  E apre lo kote finansman osi ki pa’n vin dan en bon moman. Nou’n bezwen vwar ki mannyer nou kapab separ konblaz avek stockpile pour nou fer sir ki at least nou kapab fer tou le de en pe ansanm, ansanm. Se sa ki kekfwa nou’n pran en pe letan pour nou arive fer li, e osi sa bann laranzman, preparasyon ki nou’n bezwen fer avan ki nou ale nou anons li.

 

MR SPEAKER

Mersi Minis. Onorab Ramkalawan.

 

HON WAVEL RAMKALAWAN

Mr Speaker mon zis anvi, parski mwan trouv en keksoz ankor la. Minis pe dir avek nou ki zot ankor pe esper en propozisyon IDC. In dir nou sa.

An menm tan Minis in dir avek nou ki Jan De Nul i annan eksklizivite e zot in fini demann IDC pour antreprann sa travay e Minis in donn nou en sif 4.5 milyon Ero lo konbyen i pour arive. Mon par war ki mannyer sa bann statement i swiv dan en fason lozik. Ki mannyer ou pe espere kan ou konnen ki i pour ariv 4.5 milyon Ero? Savedir i bezwen annan en landrwa la ki zot in fini koze e ki mon krwar ki se sa keksoz kler la ki nou anvi ganny li.  E ki malerezman la pour le moman i pa sa degre kler.  Amwen ki Minis i kapab vreman eklersi mwan e petet – ok zot in pran en pe letan pour sa bann sif.  E mon realize ki poudir mon’n met sa e petet Minis pa ti’n prepar li pour sa larepons spesifik.  Be konmsi mwan ti ava kontan ki si i annan en keksoz Mr Speaker ki Minis ti ava kapab anvoy kot nou spesifikman lo sa bann kalkilasyon.  E anvoy kot nou e osi fer Onorab De Commarmond tou ganny en kopi.  Mersi bokou.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Sa ki nou’n donnen se bann estimasyon, mon fer sorti ankor en estimasyon lo bann preparasyon e nou’n pran en pe konsiderasyon bann previous stockpile ki’n ganny fer.

Me the real numbers i pour bezwen come avek IDC, ki pour donn nou bann detay e vre kou sa loperasyon.  Akoz li osi i bezwen pran bann fakter parey kou delwil oubyen bann lezot fakter ki eksteryer. E osi son bann kou finansman tousala pour bezwen vin avek, son lentere si pour pran en loan oubyen non, bann keksoz koumsa.  So wi i annan ankor bann keksoz ki nou bezwen ler IDC pour anmenn son propozisyon ki nou pour bezwen vreman ganny en larepons konkret.  Be baze lo son estimasyon, wi nou kapab donn bann lenformasyon  nou estimasyon nou ki mannyer, konbyen pou arive. Sa nou kapab provide ou.

 

MR SPEAKER

Mersi.

 

HON WAVEL RAMKALAWAN

Mr Speaker, baz lo sa ki Minis pe dir,  kan eski nou ava kapab ekspekte Minis retour isi pou fer en statement letan i ganny sa bann sif definitive? E mwan mon ti ava kontan mans avek Minis ki pou dir nou pou al koz dan pli pre avek 10milyon Ero.  Mark mon parol ozordi.

 

MR SPEAKER

Mersi Onorab.  Minis ou ava donn nou en nide apepre kan son Minister pou’n pare?

 

MINISTER PAMELA CHARLETTE

Mersi Mr Speaker.  Mon krwar as soon ki nou kapab ganny en propozisyon nou kapab vini pou dir konbyen vreman i koute. Mersi.

 

MR SPEAKER

Ok mersi, bon avek sa mon ti a kontan remersi Minis avek son delegasyon, PS Choppy ek son advisor msye Gerard Hoareau e nou ava eskiz zot parmi nou.

 

(MINISTER CHARLETTE AND HER DELEGATION WAS EXCUSED FROM THE HOUSE)

 

MR SPEAKER

Bon Onorab Sebatien Pillay.

 

HON SEBASTIEN PILLAY

Mersi bokou Mr Speaker pou akord mwan sa loportinite. Zis mon le fer en klarifikasyon, si par egzanp Minis pe devwal serten sif ki bann in house estimates, eski sa i annan en lenpak lo bann negosyasyon bann Kontra apre kot nou’n fini devwal bann in house estimate and then bann kontrakter, bann prospective contractors?  So, mon ti sanmenm sa demann Minis si sa dinamik pa ganny afekte, akoz petet mon ti pe kosyonnen ki nou bezwen sey careful avek serten lenformasyon ki pa ankor sorti. Akoz mon pa konn sa size an detay, so mon pe zis demande dan sa konteks.

 

MR SPEAKER

Mon krwar dan sat el ka la napa okenn tender ki ongoing ki pou afekte Akoz i plizoumwen pou retir sa disab pou re ponp sa disab.  Definitivman  Jan De Nul  ki pou fer e Gouvernman avek IDC pe deza negosye pou IDC stoke e zer sa stock, zot pe esper en propozisyon avek IDC. So, en estimate mon pa krwar i afekte okenn prosesis kot i annan en prosesis tender ki on going ki pou afekte sa.  Ok, se sa rezon ki mon’n les ale me dan ka, Minis ti ava pe dir nou dan sa process pe tender out, la mon pa krwar ti en pozisyon kot Minis ti pou devwal bann sif – ok?

Me petet mon krwar nou ava fer li le neseser ki nou ava me en mwayen pou Minis  avek son bann teknisyen pou kapab kalkil en pe, fer en kalkil en pe pli vitman pour nou. Me nou ava organize nou ava met  parey en fasilite konman en calculator.  Akoz parfwa i annan bann kestyon ki prompt bann sif vitman.  Me nou ava fer sa bann fasilite available lo desk kot Minis i asize devan; ki si nou bezwen … Nou arive –  nou bezwen sa nesesite pour nou kapab donn serten sif vitman. Ok?  So nou ava Break nou ava retournen 4.15 pour nou kontiny deba lo Mosyon Onorab Ferrari kot nou ti’n arete semenn pase.  Ok, nou Break e … Yes, Onorab Ferrari?

 

HON JEAN-FRANCOIS FERRARI

Mr Speaker avek respe, mon pa konnen si ou, si nou pou tourn 4.15 nou pou pran 2 entervenan e mon konnen i annan enn de dimoun lo lalis apre nou pou Break ankor. Ou le fer sa ou?

 

MR SPEAKER

Wi nou bezwen kontinyen.

 

HON JEAN-FRANCOIS FERRARI

Well si i ou lavolonte.

 

MR SPEAKER

Nou retournen 4.15apre nou ava ale ziska 5er, 5.15 e koumsa.  Ok?

 

(BREAK)

 

MR SPEAKER                                                                                                                                                                                                                                                                      

Bon nou ava kontiny nou travay sa se deba lo Mosyon ki’n ganny move par Onorab Jean- Francois Ferrari ki lir konm swivan;

Sa Lasanble i demann avek Gouvernman plis spesifikman avek Minister Ledikasyon, pour met a dispozisyon tou ansenyan e asistan ansenyan, landrwa e fasilite neseser dan tou bann lenstitisyon edikasyonnel dan pei pour fer leson ekstra ek lasistans devwar lakour apre ler lekol, pour bann zanfan ki eksprim sa demann e ki pare pour fer en kontribisyon finansye,l an faver bann ansenyan e asistan ansenyan pour sa servis.

Lasanble i osi demande ki resours finansyel i ganny debloke pour rekonpans bann ansenyan e asistan ansenyan, ki ofer sa servis pour bann zanfan lekol ki zot paran dapre kriter Lazans Proteksyon Sosyal napa le mwayen pour pey zot menm pour sa servis.  Ok nou pour kontinyen deba lo Mosyon e mon ti a kontan donn laparol Onorab John Hoareau.

 

HON JOHN HOAREAU

Mersi Mr Speaker.  Bonn apre midi a tous.

Mr Speaker sa Mosyon ki devan nou, i en Mosyon ki annan bokou merit.  Sirtou ler ou analiz problenm ki nou sistenm ledikasyon pe fer fas avek.  Mover Mosyon pe solisit en deba pour nou rod serten solisyon bi-partizan atraver tou le de kote latab.

Mr Speaker problenm i lo tou nivo. Serten zanfan ki pa pe pran son letid o serye. Serten paran ki pa pe pran zot responsabilite. E serten ansenyan ki pa pe donn tou oubyen serten ki napa pour donnen akoz zot napa kalifikasyon.

Pour en sistenm ledikasyon marse fodre sa 3 mayon ki zwenn ansanm, ansenyan, zanfan, e paran. Akoz tel Mosyon? Mr Speaker ozordi lelefan dan lasal se ledikasyon e zanfan ki pa pe prodwi rezilta, ki nou pe ekspekte. E la ler mwan pe koz lo lelefan dan lasal mwan pe koz an term en metaphor so ki tou bann Manm i kapab konpran fotespere. Mon ti fer resorti dan mwan diskour, repons Leta Lanasyon ki 80poursan bann ansenyan ki pe fer lekol dan primer napa sertifika.  Sa i en problenm  reel.  Alor akoz tel Mosyon set akoz nou pe rekonnet pour dir i annan en mankaz teacher eksperyanse, teacher ki kapab delivre dan nou sistenm ledikasyon primer.

An menm tan mon ti donn en legzanp par egzanp Glacis, kot dan 15 teachers i annan 11 ki napa okenn sertifikasyon.  Mr Speaker ti annan en entervi ki en konsiltan dan ledikasyon semenn pase ti fer resorti bann rezilta attainment test P6 avek S3. I ti montre ki 50 poursan manrmay ki’n pas, 50 poursan ki’n fail. Alor pour nou, nou vwar sa i en gro problenm i solisit en serten deba lo akoz e ki pe arive.

Mr Speaker gro problenm ankor komansman lannen ler nou ti pe ekout rezilta IGCSE kot nou ti vwar ki preski 50 poursan manrmay pa pe asiz IGCSE apre ki zot in fini S5, avan ki zot fini S5 eskiz mwan.

E ladan, dan sa 50 poursan ki fer sa legzanmen, 28 poursan olye 36 poursan paret ti’n ganny fer rekonnet ofisyelman ki’n pas C ek above. Alor nou vwar ankor under achievement. Mr Speaker dan lekol kantmenm nou annan mix ability classes e bann teachers i fer sa ki nou apel differentiated learning. I vedir fer leson pour sa 3 group manrmay dan en laklas bann ki pli o, bann ki mwayenn e bann ki pli ba. Me pa toultan ki tou zanfan i ganny touse akoz 40 minit dan en laklas pa tou zanfan ki ganny touse. I parey nou dir it’s a hit or miss.

Mr Speaker ler nou get osi sa letan ki laklas i fini 2 er edmi a 4 er i en moman letan ki pa tou lekol an fen mwan konn lekol prive ki annan serten sipervizyon ki annan serten klib, me selman pa tou lekol leta ki donn oubyen ofer serten klib aktivite klib pour bann zanfan.  E nou konnen pour dir ler ki bann paran i kit zot travay se 4 er e pandan sa letan i annan bokou manrmay ki profite pour al dan bann frekantasyon. Drog, Lalkol ensidswit.

E osi pour fer rekonnet ki semenn pase osi en konsiltan Bejamin Vel ti fer resorti ki i annan en logmantasyon 30 poursan zanfan an 2016 ziska 2018 ki’n komans servi drog cocaine, heroin e marijuana.  E sa bann zanfan i lye toultan avek bann zanfan avek problenm dan laklas e bann ka konfli dan lekol.

Alor apre analiz profon e en demann ki egziste parski paran e zanfan osi i demande a tou nivo ki i annan serten extra class, ki kapab ed zot pour bann ki pa ganny touse dan laklas, oubyen bann ki santi i annan serten mankman. Pour bann ki pa’n kapab akimil tou pour zot kapab al fer bann extra classes pour zot kapab catch up parey nou dir.

Nou pe demande ki Minister Ledikasyon i permet bann ansenyan, servi bann fasilite dan lekol pour zot kapab donn sa bann extra classes. I deza annan lekol fodre dir ki pe fer sa bann kalite keksoz gratwitman, menm gratwitman nou kapab dir.

Me mon okouran osi ki i annan serten ansenyan osi ki’n deza menm akoz zot napa landrwa pour zot kapab donn sa bann leson ekstra, zot ti ganny fer sorti kot libreri Nasyonal kot zot ti pe fer sa.

Zot ti menm ekrir Prezidan Larepiblik e demann li permisyon pour zot servi lekol. E sa group teachers en pti group zot, zot ti ganny permisyon pour servi lekol La Riviere  Anglaise pour donn serten extra class ladan. E zot osi mwan konpran ki zot donn serten kontribisyon avek lekol La Riviere  Anglaise.  Alor i deza annan en serten keksoz ki pe komanse me nou, nou ti ava oule ki sa bann keksoz nou tir tou sa bann red tapes ladan, tou sa bann tralilala e ki Minister Ledikasyon  i fasilit sa i vedir ki ekrir dan en Polisi kel par ki zot donn, zot kapab permet bann teachers pour kapab servi bann lekol ki zot travay ladan petet, pour zot kapab donn bann leson ekstra.

Mr Speaker fodre dir ki bokou pei aletranze tel ki koman Moris, Sengapour kot i annan en o nivo ledikasyon bann pratik koumsa i ganny ankouraze. Alor ler nou gete i annan en kantite benefis. Premyerman i pour lev nivo ledikasyon e lentere zanfan dan ledikasyon. Sa bann laklas ekstra, i kapab fer ki parey bann klib apre lekol parey nou’n dir bann extra curricular activities, bann aktivite extra curricular. I kapab pran laform par egzanp bann klib chess, bann laklas pou ed bann zanfan fer homework, laklas pour fer granmer franse.  En laklas pour fer biolozi. Laklas physics, maths ou nenport lezot bezwen.

Benefis osi i pour bann zanfan ler zot al, zot ganny en fasilite koumsa dan zot distrik ki zot pa bezwen deplase pour al dan en lot landrwa ki lwen pour zot al zwenn sa teacher alor zot pre avek kot zot reste ler zot fini zot kapab antre se zot.

I anmenn osi en benefis moniter pour sa teacher pour sa ansenyan ki nou vwar ki laplipar di-tan zot larzan pa sifizan pour sa louvraz ki zot pe fer les mon a dir.   Alors sa i ava petet ogmant zot standar lavi, devlop zot en pti profesyonnelman e osi zot pe ed lakominote. E an dizan sa i en linisyativ ki nou ti kapab fer li pour welcome bann lezot teachers ki’n pran retret be ki santi ki zot kapab donn en pti morso, zot kapab osi ede dan sa kote.  E la mon ti a kontan ki osi nou mazin en pe o laz.

I vre ki loter Mosyon in demann pour ki welfare i kapab ede. Me nou kapab osi get PTA akoz PTA se lorgan dan lekol Parent Teacher Association ki fer laplipar bann fund raising. Alor zot osi zot kapab posed serten funding pour bann zanfan petet ki napa sa larzan pour zot kapab pey sa extra class, petet atraver PTA zot kapab case by case basis zot kapab ganny ede.

E osi petet sa teacher ki pe fer sa aktivite sa larzan ki i pe kolekte i kapab an retour ed PTA dan en serten sans pour ki bann lezot zanfan i kapab ganny asiste. .

Mr Speaker petet kosyon ki nou devret pe kalkil lo la osi i enportan ki nou diskite, ki petet sa bann teacher ki anvi fer sa kalite aktivite pa ganny ankouraze pour fer tro bokou erdtan par semenn petet 1 erdtan, 2 erdtan maksimonm e osi dan en modalite kekfwa ki zot kapab pran en 10 manrmay en 15 manrmay.  Akoz a la fwa zot bezwen donn sa letan pour sak zanfan. akoz si laklas i tant pour vin tro gro i annan en problenm pour zot donn sa letan pour sak zanfan pour zot kapab dyagnoz zot bann problenm e osi ed zot pour zot kapab fer pli byen.

Mr Speaker sa pa pour limit zis pour segonder me i kapab ariv osi lo nivo pos- segonder e osi ler mwan ti pe koz ek Loter Mosyon i ti eksplik mwan byen pour dir ler i pe koz lo bann zafer asistan ansenyan, i a pe anmenn ansanm petet bann lab teknisyen oubyen bann dimoun ki pour kapab asiste en teacher me non pa bann dimoun ki pour pran en laklas lo zot menm akoz zot pa kalifye.

Alor mwan mon pour siport sa Mosyon akoz mwan krwar i annan en gran merit ladan e nou lo nou kote latab nou krwar ki osi tan ki en dimoun i anvi travay i merit ganny rekonpanse, e se pour se la rezon ki nou pe promot sa lide ki sa bann teachers i osi ganny en pti keksoz an retour.

Lavi i dir e avek en pti keksoz an plis kot lakour i pour toultan ede. Mr Speaker avek sa mon pour siport sa Mosyon e mwan ti a kontan ki lezot dimoun osi dan Lasanble lezot Manm i siport sa Mosyon. Mersi.

 

MR SPEAKER

Mersi Onorab Hoareau.  Onorab Wavel Woodcock.

 

HON WAVEL WOODCOCK

Mersi Mr Speaker. Mr Speaker avan sa Mosyon in vin devan Lasanble Nasyonal mon’n koz avek plizyer ansenyan lo sa Mosyon. Plizyer ansenyan ki sorti lo Praslin osi, Mahe. I annan plizyer konsern ki bann ansenyan in met devan konsernan sa size extra class. Sityasyon aktyel la, se ki vre ki Minister pe ankouraz bann ansenyan pour fer extra class zot dir bann ansenyan fer extra class. Me le problenm Mr Speaker dan plizyer lekol, se ki bann ansenyan pa pe ganny permisyon pour fer extra class dan lekol, dan lakour lekol.

Minister in dir avek zot, ki par lefe ki paran ki pe pey zot ki pe pey sa bann ansenyan direkteman zot bezwen fer zot prop debrouy pour rod en landrwa pour ansenny sa bann zanfan, sa bann etidyan. Dan plizyer lekol ki mwan okouran Minister Ledikasyon pa oule ki bann ansenyan i fer sa bann extra class dan lakour lekol. Sa i en le fe. Sa i kree en problenm pour bann teachers.

Zot bezwen zot menm rod en landrwa pour zot kapab ansenny sa bann zanfan.  Mr Speaker mon pa krwar sa i fer okenn sans.  Lekol i la, fasilite i la, latab, sez eksetera akoz ki Minister Ledikasyon pa kapab donn permisyon bann ansenyan pour servi lakour lekol menm si paran ki pe pey sa bann ansenyan?

Plizyer ansenyan Mr Speaker zot pa reste dan sa distrik ki zot pe ansennyen. En ansenyan i kapab reste Cascade, me selman i pe teach Anse Etoile ouswa en ansenyan ki reste Port Glaud i kapab pe fer lekol Anse Aux Pins. E sa i kree en konstrent i en konsern ki plizyer ansenyan in met devan mwan. Me kestyon se kote sa ansenyan i pour ganny landrwa pour teach sa bann zanfan. Pour teach sa bann etidyan i pa fasil. I difisil ganny landrwa pour zot kapab fer sa bann extra class.

Parey mon’n dir Mr Speaker i pa fer sans. Akfer nou annan sa bann fasilite. Akfer nou annan lakour lekol me ansenyan pa pe ganny akse avek pour fer sa bann extra class.  Laklas i la Mr Speaker. i an sekirite e alor mwan pe demande akoz ki nou pa servi resours ki nou annan. Akoz ki Minister pa ankouraz bann teachers ki pe ofer sa bann servis. Parey i ete la Mr Speaker Minister pa pe pey bann ansenyan ki pe fer leson extra, ki fer bann extra class.

Se bann paran ki pey en sonm pour sak extra class normalman zot fer sa peyman tou le lafen di-mwan. I byen ki Mr Speaker ki paran pe kontribye dan laprantisaz zot zanfan me parey Mosyon pe dir pa tou paran ki kapab afford pour pey sa bann extra class.  E se la kot parey Mosyon pe demande kot Lazans Proteksyon Sosyal i kapab antre pour ed bann paran ki pa pe kapab pey sa bann extra class. Nou fek war resaman lo state media statistik ki montre ki 50 poursan etidyan ant P6 ziska S3 in fail legzanp i pe ganny par anba 50poursan. Mr Speaker sa i vreman alarman.

E mwan mon krwar ki leson extra i en nesesite e ki vreman enportan. I en fason pour ede improve amelyor rezilta nasyonal.

Mr Speaker extra class i pa en keksoz ki devret forse. Extra i pour bann zanfan ki anvi leson extra ouswa pour bann zanfan ki en pti pe pli feb ki bezwen sa servis e ki zot paran i anvi envestir dan en fason dan ledikasyon zot zanfan pour improve rezilta la ki zot zanfan pe anmenn kot lakor. Mr Speaker extra class i annan plizyer lavantaz.

Extra i en fason pour ranforsi sa ki’n ganny ansennyen dan lekol. I donn bann zanfan plis practice dan bann size ki zot pe fer mwen byen. Zanfan i ganny plis legzanp ki zot gannyen dan laklas normal. Zanfan pa perform byen akoz par fwa metod ki serten teachers i servi pa konvenab pour zot.

Alor extra class i ekspoz zot avek lezot ansenyan ki annan en metod diferan e menm pli apropriye pour sa bann zanfan. extra class i osi donn en loportinite zanfan pour zwenn ek bann lezot zanfan dan lezot lekol e lezot landrwa e sa i donn zot leksperyans koman pour sosyaliz avek lezot dimoun ki zot pa kon nen e pour ede devlop zot bann social skills.

Ankor Mr Speaker extra class i kapab ed zanfan ek homework espesyalman bann ki zot paran i travay ziska tar e antre tar dan lakour.  Konmela i annan plizyer paran ki bezwen akoz pri lavi ki pe kontinyen ogmante i annan plizyer paran ki bezwen travay shift menm de shift, menm par fwa zot bezwen travay 3 shift e alor sa i en fason pour ed bann zanfan avek zot homework apre ler.

Extra i osi ed bann zanfan avek bann size ki paran napa gran konesans ladan.  E i osi permet zanfan pour aprann dan en pli pti group en group en pti pe pli pti. Resers in prouve, resers in montre ki zanfan i fer pli byen ler laklas i pli pti. E on average most bann laklas primer ek segonder i pran apepre en 3enn manrmay si mwan pa tronpe sak zanfan i diferan.

I annan ki aprann pli vit ki lezot.  Extra class i ed bann ki pli feb pour catch up avek bann ki pli avanse, dan en lanvironnman mwen konpetitiv. E kekfwa pli enportan Mr Speaker se ki extra class i ed zanfan ganny led pour zot legzanmen, ki ou ankor enn fwa ava ede pour improve nou rezilta Nasyonal.

Mr Speaker i annan konsern ki plizyer ansenyan sirtou bann ansenyan etranze pa pe montre etidyan leson dan laklas par ekspre, pour ki zot ava kapab anmas plis larzan avek bann laklas extra apre ler alor pandan laklas normal zot pa pe neseserman ansenny sa bann manrmay byen pour ki zot kapab ganny plis manrmay dan extra class ki zot kapab akimile fer bokou plis larzan.

Sa i en konsern ki Minister in realize. Annefe mon fek aprann ki Minister in come up avek en Polisi kot in dir ki en ansenyan i pa kapab fer extra class ouswa ansenny en size avek en etidyan ki dan son laklas ki sa etidyan pour bezwen pran bann lezot etidyan dan bann lezot laklas pour anpes sa sityasyon arive, kot sa bann ansenyan i ava, i kapab servi sa dan en fason pour pa ansenny par ekspre pour zot kapab ganny plis zanfan ki annefe ki par lefe i fer zot anmas en pti pe plis larzan.

Me selman sa Polisi i annan en konsern ki vin avek. I annan bann ansenyan ki dir be get sa mwan mon annan en etidyan ki mwan ansenny en size ouswa Angle swa matematik e mon konn son pwen feb mon konn son forte, mwan konn son weakness alor mwan konnen ki bann topik ki bann size kote son pwen feb i ete ki mon kapab ed sa zanfan improve lo la ki mon krwar sa teacher i kapab annan sa follow pour sa zanfan.

Me avek sa Polisi sa teacher i war li prezan ki i pa pe kapab fer extra class avek en zanfan dan son laklas ki en konsern. Alor ki i annan en pti pe difikilte ki mannyer pour deal avek sa sityasyon. Oule deal avek sa issue sa bann teachers ki pa pe pran zot responsabilite serye pour teach manrmay dan zot laklas pour zot ganny sa extra class e an menm tan i annan bann teachers ki vreman annan son bann etidyan a ker ki anvi vreman ed son bann etidyan improve e devlope dan bann size akademik.

Mr Speaker extra i enportan. I en servis neseser pour ed sirtou bann etidyan ki zot nivo i en pti pe pli ba me osi i kapab ed bann etidyan ki anvi amelyor zot rezilta e aprofondi zot konesans dan bann diferan size e menm dan bann topik ki kekfwa pa neseserman pe ganny ansennyen dan lekol i kapab ogmant zot konesans.

Mr Speaker laklas extra i pa pour zis ed nou zanfan me i osi en mwayen pour ed nou bann ansenyan ganny extra income pour anmenn se zot. Alor Mr Speaker mon pour demann, annefe mon pour fer en lapel avek Minister pour ankouraz bann teachers, bann ansenyan par donn zot permisyon dan bann lekol ki zot pa pe fer li, par donn zot permisyon pour servi lakour lekol apre ler pour servi bann laklas apre ler, pour fer zot extra class. Menm si paran ki pe pey zot, zot pe kontribye dan laprantisaz nou zanfan e ede elev standar nou ledikasyon. Avek sa Mr Speaker mwan pour donn mwan sipor total sa Mosyon ki Onorab Jean Francois Ferrari in met devan Lasanble mersi.

 

MR SPEAKER

Mersi Onorab Woodcock. Onorab William ou’n pare pour entervenir.  Go ahead Onorab.

 

 

HON WAVEN WILLIAM

Mersi Mr Speaker. Bonn apre midi tou dimoun ki a lekout. Mr Speaker mwan pour aport mon sipor pour sa Mosyon.

Mr Speaker mwan pour aport mon sipor pour sa Mosyon akoz mon santi i annan en merit. I annan en merit e mwan pa pour al pli lwen akoz mon pe sivre devlopman dan lekol, dan mwan distrik. E mon asire ki laplipar bann Onorab ki sorti dan en distrik ki in ganny elekte pe fer menm parey. I annan sa nesesite pour nou adres serten size kot i konsern laprantisaz nou bann zanfan.

Mr Speaker i bon ki nou rekonnet ki sa Mosyon i donn nou sans osi, pour regard lezot keksoz, akoz nou bezwen regard sours bann problenm e mwan mon a dir ki i annan paran ki merit ganny serten sipor, akoz letan ou pe pran en pti pe bann demografi mon distrik ou vwar poudir i annan serten paran ki bezwen ganny serten sipor, vizavi ki fason zot bann zanfan i ganny ankadre pour zot kapab ganny sa nivo akademik ki merite pour zot kapab devlope pli tar.

E mon pour fer en rekomandasyon la avek Minister Ledikasyon ki baze lo sa Mosyon ki District Team ki tonm anba Gouvernman Lokal zot osi pran sa size o serye e anmenn en diskisyon a la baz ki a fer ki tou bann akter konsernen akoz laprantisaz nou bann zanfan parey i annan en dikton i dir i pran en vilaz pour elev en zanfan.  Mon pa santi sa i devret ganny zis avek lekol akoz i annan bann serten keksoz ki Minister Ledikasyon pour kapab fer. I annan serten bann aksyon ki lezot bann akter bezwen vin onboard pour kapab delivre.

E mwan mon a demande ki Departman Gouvernman Lokal atraver District Team akoz mwan konnen pour dir bann Headteachers. Mon konnen pour dir i annan bann Chairperson School Council. I annan PTAs ensidswit zot, zot bezwen vin onboard pour donn en koudmen. E ler mon get sa Mosyon mon krwar wi le fe ki nou annan sa fasilite o nivo distrik bann lekol apre ler mon santi pour dir wi sa ti devret kapab ganny fer.

An menm tan mon tonm dakor osi ki bann zanfan ki pa kapab ki, wi welfare i devret antre akoz letan mwan get fason ki ou bezwen apply pour ganny sa lasistans ou bezwen spesifik, e par fwa i pran bokou letan e si i annan sa nesesite i annan en scheme mon pa konnen si i egziste.  Me nou bezwen fer rekonnet pour dir i annan sa problenm e bann zanfan ki merite mon krwar zot bezwen ganny, zot merit ganny sa sipor.

Mr Speaker alor mon pa pour tro long me mwan ti ava demande le fe ki nou pe koz lo bann fitir zenerasyon e mwan nivo distrik, mon tann bokou nou bann gran paran, nou bann paran dan koze i dir zot nou vreman konsernen avek bann zenerasyon ki pe vini.

Mr Speaker si nou pa atak sa problenm la vizavi laprantisaz dan lekol swivan bann rezilta ki pe ganny met devan nou alors i nesesit ki nou adres li. E parey mon dir sa Mosyon i donn nou en loportinite, en loportinite pour regard sa problenm en pti pe pli larz. An menm tan parey mon’n dir se ki mwan ti ava demann Minister Ledikasyon ankor enn fwa lo en baz mikro o nivo distrik fer District Team zoom in lo sa problenm. Annou anmenn nide ansanm pour vwar ki fason nou kapab ed nou bann zanfan. Pa zis nou bann zanfan me bann paran ki dan bezwen akoz sa i en problenm reel. Mersi Mr Speaker.

 

MR SPEAKER

Mersi Onorab William. Mon ava donn laparol Onorab Arissol.

 

HON SANDY ARISSOL

Mersi Mr Speaker, bonn apre midi a tous. Mr Speaker letan nou lo Mosyon ki annan pou fer avek ledikasyon permet mon pour mwan senpatiz avek lafanmir Hertel. Parske ozordi gran maten nou’n perdi en ansenyan sa se Ms Magda Hertel. En madanm ki ti dedye son lavi pou bann zanfan e in kit nou ozordi gran maten, atraver en kourt maladi. E mon ti a kontan lo non Lasanble mon prezant nou senpati avek son Mr Jefrey Larue, son bann zanfan e osi son manman Elise Hertel, letan nou lo Mosyon ledikasyon.

E tou bann Mosyon ki pase dan Lasanble i enportan parey nou’n dir, e toultan nou pe rod sa ki meyer pour nou dimoun, sa ki meyer pour nou distrik, sa ki meyer pour nou pei.  Mon ti a kontan Mr Speaker letan mon lo sa pwen, demann ou permisyon zis pour mwan fer en pti mansyon lo en Mosyon Onorab Gill ki nou ti koz lo la semenn pase an relasyon avek en lensidan ki ti arive dan mon distrik, zis pou montre lenportans bann Mosyon ki parfwa nou, nou pase ki nou koz lo la ki nou vot lo la dan Lasanble Nasyonal.

Mosyon Onorab Gill semenn pase ti pe koz an relasyon avek fire hydrant dan bann landrwa rezidansyel.  Me li spesifikman ti lo bann housing estate, e Dimans parey zot tou zot in temwannyen ti annan en dife dan distrik St Louis. Spesifikman dan ‘’Semen Kato’’ me letan tou bann Lazans konsernen ti’n arive, sa ki enteresan Mr Speaker se ki dan ‘’Semen Kato’’ ti annan fire hydrant parey nou dir. Nou ti bezwen rod pik pou tir li anba later anba semen kot i ti ete. Me malerezman apre tou sa travay letan nou ti bat ek li i ti sek parey nou dir, ti napa delo ladan!

E sa i montre nou ankor ennf wa parfwa letan nou anmenn bann Mosyon, parski nou menm nou, nou konn bann defayans ki arive dan nou distrik e ki arive nou lakominote parey mon pe dir. Me selman parkont letan in ariv sa bann servis, bann Lazans ki ti la, Lapolis, Servis Tenny Dife ek tou bann dimoun. Set a ki in fer son bout pou fer sir ki tou keksoz i reste, i vin anba kontrol.  E pour sa mon ti a kontan remersi tou bann Lazans ki ti la e tou bann dimoun dan en fason ou en lot ki’n ed lafanmir Debra Dufrene. Pour zot kapab soutenir zot dan sa moman difisil.

Me lo menm Mosyon ki Onorab Ferrari pe anmennen Mr Speaker an relasyon avek Minister Ledikasyon pour bann ansenyan, mon krwar i enportan pour nou tou konpran sa size. Ou konnen i annan diferan pwennvi lo sa ki konsern extra class apre ler.  Me selman i enportan pour nou konnen poudir konman en staff Minister Ledikasyon pour 10 an in annan plizyer lekol ki’n annan extra class apre ler. Ziska ozordi ler mon pe koze la konman en paran, nou annan lekol, e mon dir nou annan lekol par egzanp lekol Bel Ombre primer i enn. Lekol Beau Vallon segonder i en 2enm kot bann ansenyan i donn extra class pour nanryen.

I annan extra class ki ti ganny fer lannen pase mon rapel parske mon garson ti attend ki ti ganny fer sanmdi. E bann paran ou ganny en let sinyen, si ou dakor pou ou zanfan vin asiste ou sinyen. Ou zanfan i ale, pour nanryen ou paran pa pey nanryen ou ale ou asiste sa bann laklas e ou kapab ganny en keksoz.  Primer osi parey i annan bann extra class ki donnen an relasyon avek bann size spesifik; par egzanp pou matematik. Kot mazorite bann zanfan ozordi zot ganny problenm avek matematik.

Alor i annan bann ansenyan ki santi pou dir be get sa 40 minit ki mon gannyen avek matematik pa neseserman ase, be mon pou pran ankor 1erdtan apre 2.30 ziska 3.30 pou ganny sa group zanfan spesifik kekfwa dan laklas, ki annan serten problenm lo matematik, pou donn zot en extra keksoz apre ler. E tousala Mr Speaker mon bezwen dir pour nanryen, paran pa peye senpleman ou siny en papye konmkwa ou otorize pou ou zanfan reste kot lekol anba responsabilite, sa ansenyan depi keler ziska keler.

Me parkont Onorab Woodcock in lev en pwen ki mon krwar i enportan pour nou pran kont dan sa deba.  Si i annan lekol ki otorize e i annan lekol pa otorize, si i annan lekol ki lese, i annan lekol ki pa lese. Mon krwar i pou enportan pour nou balanse parske  standar i enportan.  Nou pa kapab annan de fason fer keksoz Sesel, nou pa kapab annan  2 standar nou bezwen en sel standar.  Sa i pou enportan dan sa mosyon ki nou pe koz lo la Mr Speaker.

Be selman letan nou lo ledikasyon, toultan nou bezwen mazinen ki ledikasyon parey granmoun i dir i konmans dan lakour. E nou, nou kapab dir tou zoli parol lo sa Mosyon ki nou pe diskite rod tou sa ki meyer pour nou zanfan rod teachers  kalifye pour nou zanfan si nou konman paran, mwan konman paran nou pa montre lentere napa nanryen ki pou arive Mr Speaker.  Mon dir sa parske senpleman ler mon koz extra class kot bann lekol i annan i pa neseserman ki tou paran ki anvoy son zanfan extra class.

Sa i montre pou dir paran osi i bezwen li met presyon lo son zanfan letan i ganny en keksoz pour nanryen, available a son dispozisyon pour li servi. Parske ozordi letan mon pe koze, letan mon’n tann Onorab Woodcock in koz an relasyon avek Onorab John Hoareau ki’n koz lo la Mr Speaker. An relasyon avek aktivite apre ler, i annan plizyer lekol ozordi kot i annan bann klib apre ler par egzanp lekol Bel Ombre mon konnen.  I annan Young Citizen ki ganny fer par Ms Rita Dogley, i en lo aktivite ki ganny fer apre ler. I annan group Leritaz ki ganny fer par Ms Mirin Mousbe, i en lot groupman ki bann zanfan i kapab join bann klib apre ler, pour zot vizit bann landrwa aprann bann keksoz edikasyonnel. Tousala i annan an dispozisyon bann manrmay ozordi ki bann paran i bezwen sezi bann loportinite, pour donn zot zanfan en keksoz an plis, olye zis sorti lekol i tonm dan bann move lenfliyans parey nou nou’n tann koz lo la.

E dan Sanmdi Mr Speaker, i annan en group ansennyan ki pran bann zanfan senpleman pour en groupman katesis, an preparasyon pou Premyer Konminyon oubyen lakonfirmasyon. Ki mazorite letan i ganny fer kot Legliz.  Sa i konmans depi 9er ziska ver dan 10.30. Tousala i annan.  Me parfwa tou sa bann keksoz ki bon pour nou zanfan paran pa enterese. Mazorite letan sa bann katesis i ganny fer paran pa anvoy son zanfan, swa zanfan pa vin ditou.  Me selman sa ki enteresan letan Premyer Konmiyon parey tou dimoun i dir, se sa menm paran ki ou pou war li lo premye ban devan byen sanze in suit up, sa zour selman son piti pa’n vin katesis parey tou lezot zanfan.

Mr Speaker ozordi nou annan nou en sistenm child minding apre ler kot ansennyan i vey bann zanfan apartir 2.30 – 3er ziska 5er pour permet bann paran ki fini travay 4er kapab vin kolekte zot zanfan e zot zanfan i dan en landrwa responsab.  Be sa osi nou ganny problenm Mr Speaker letan nou koz responsabilite sa paran.

I annan paran i kit son zanfan kot lekol akoz i konnen i annan en dimoun responsab pe vey son zanfan.  Ou konnen kote li i ete Mr Speaker, li i Amusement Centre!  Toultan i pa ganny en jackpot i bliye pour dir i annan son zanfan laba kot kot lekol ki’n kite depi 7er bomaten e sa ansennyan i bezwen asiz avek son zanfan. Se sa ki mon pe dir responsabilite paran. Nou konman paran nou bezwen konnen nou annan nou zanfan e sak fwa i annan bann meeting paran se sa bann pwen ki ganny fer resorti pou dir paran nou bezwen pran nou responsabilite parske nou osi bezwen mazinen  sa ansennyan ki nou’n kit nou zanfan avek li osi annan en fanmir.

Li osi i annan son zanfan i bezwen anmase li pour li anmenn kot li. Alor ou, ou’n kit ou zanfan avek li e ou, ou Amusement Centre oubyen ou parla dan kek trou, pe bwar ou 2 Guinness oubyen ou 2 Labyer. Letan mon’n tann koz lo bann zanfan ki pa kapab finansyerman. I annan sa ki nou ki apel dedicated fund dan lekol oubyen parey Mosyon pe demande avek Lazans Proteksyon Sosyal pour ede.  Be i annan en keksoz ki nou bezwen pran kont Mr Speaker pour nou bann paran.   Mwan mon refer lanfaz lo paran.

I annan plizyer paran ki vini i tap laport lekol i dir ek ou son zanfan pa kapab, alor i ti a kontan ganny en pti lasistans. Me selman apre letan ou ki lo PTA ou ki form parti lorganizasyon lekol, sa paran li menm li ki voyaz plis ki tou teachers; se sanmenm sa paran ki voyaz plis ki tou lezot paran. Sanmenm sa paran ki li sak fwa i annan meeting i vin sou; sanmenm sa paran ki li sak fwa i vini i poste i pe voyaze. So sa osi nou bezwen balanse.  Nou bezwen al rode kote nou pou al amelyor bann fasilite ki nou annan e pou nou kapab servi li byen Mr Speaker.

Sanmenm sa mon dir pour dir nou konman paran nou bezwen pran nou responsabilite. Parske Mosyon nou kapab koz lo la dir tou lezot keksoz ki byen. Me si nou paran nou pa met nou lipye ater pour nou zanfan i pa vedir okenn sans.

Letan nou ti koz lo Mosyon, nou kontan koz lo bann size housing estate parey Mosyon ti pe adrese semenn pase ou konnen letan nou koz avek bann ansenyan ki’n pran zot retret.  Par egzanp i annan Ms Judy Delpeche anler Roche Boie ki’n travay kot lekol La Rosiere pour plizyer lannen i dir ek ou pour plizyer lannen zot bann housing estate i devret annan bann fasilite ki nou apel bann common area. Kot bann zanfan apre ler, i annan bann ansenyan dan distrik ki pare, parey Ms Judy Delpeche i enn ki’n eksprim sa avek mwan.

Pour li donn bann zanfan en extra class ofer zot bann ekstra laklas apre lekol parske pa neseserman tou zanfan ki kontan reste dan latmosfer lekol depi ki’n laba depi 7er bomaten ziska 3er pour li reste ankor apre ler. Alors Ms Judy in fer en propozisyon ki Mr Speaker dan bann housing estate, i bezwen annan bann common area kot bann zanfan i kapab asize avek bann ansenyan ki la pour donn zot serten leson apre ler ed zot avek homework par egzanp.  Ed zot avek zot lektir, ed zot avek ekrir.

Tousala i bann keksoz ki avek Mosyon ki Onorab  Ferrari pe anmennen, nou kapab rode ki mannyer nou tou konman en kominote nou kapab fer ki nou zanfan i ganny eleve byen, e ki dan laprantisaz ki nou pe rode. Mon krwar Mr Speaker tou bann pwen ki’n ganny fer sorti atraver sa Mosyon,  mon krwar i esansyel pour nou ekoute, e parey mon’n dir i enportan ki tou bann Mosyon ki nou anmennen parfwa dan Lasanble senpleman ki nou menm nou dan lakominote, nou konn nou dimoun pli byen.  Me nou osi parfwa parey mon’n dir i retourn lo paran.

En keksoz ki mon toultan fer komanter lo la, se letan i annan bann meeting.  Ou konnen letan ou fer letour dan bann lekol parfwa, letan ou zanfan ou swiv ou zanfan depi lakres ziska segonder,  ou’n fini konn tou bann paran par ker, an relasyon avek ledikasyon zot zanfan.  Parske se menm paran ki vin meeting – toultan.  E mwan letan mon’n dan ledikasyon i annan zanfan ki’n lekol depi S1, zanmen son paran in vin sers son report ziska ler in exit S5. Zanmen!  I annan paran ki pa enterese avek laprantisaz son zanfan ni menm pou vin get son report oubyen son ROA pandan letan ki i  permete.

Tousala nou bezwen balanse, letan nou konman en Lasanble nou pe rod sa ki meyer pour nou zanfan, nou pe rod sa ki meyer pour nou lekol. Me i retourn lo sa paran pour li met lanfaz lo ledikasyon son zanfan.  Mr Speaker mon pa ava al pli lwen ki sa.  Mon’n fer zis sa pti pwen parski mon krwar i enportan pour nou retourn sa boul dan kare paran. Parske parfwa paran letan konman vakans i anonse premye keksoz ki i fer i dir, ‘’Ar wi vakans in arive ki i pou fer ek son piti?’’ Be ou zanfan i apel pou ou, ou ki konnen ki ou pou fer avek ou zanfan. Ok?

Ou byen kan i rode ki i pou fer avek son prop zanfan akoz vakans in arive.  E oubyen dan bann meeting parfwa ou tann bann paran i vini i dispit avek Headteacher, zot pe demande keler bann ansenyan i antre lekol parske li i vin depi 6er bomaten i pa war e ki i pou kit son zanfan avek!  Sa osi nou bezwen balanse, sa paran pe al travay boner, be sa ansenyan li i osi annan son lakour, i annan son zanfan i bezwen anmenn lekol parey en paran. E en ansenyan son travay i konmans 7.30! I annan tou sa bann pti keksoz, tou sa bann pti detay ki nou bezwen met ansanm, fer sir ki sa bann lankadreman ki nou zanfan i ladan ki fasil, pou nou zanfan an sekirite premyerman e i fasil pou nou zanfan kapab aprann.

E mon retourn parey mon ti konmanse, an relasyon avek Onorab, Mosyon Onorab Gill Mr Speaker, zis letan nou lo ledikasyon.  Letan nou ti pe koz lo fire hydrant an fason avek sekirite dife. Ozordi lekol lakres Beau Vallon i en legzanp kler. Lakres Beau Vallon li i annan en sel larantre.  Mr Speaker, mon krwar ou konnen, Onorab John Hoareau osi i konnen, Onorab Sebastien Pillay osi i konnen, i annan en sel larantre pou antre dan lakres Beau Vallon.

Apre i antoure antye i fermen ek bann fil.  E la lo son larantre i konmans lo en parking kot tou dimoun i park. So, prezan sak fwa ou koz avek Ms Francine, Mis Ansarz kot lakres, i dir ou si zanmen i ariv en evantyalite en dife,  i annan en loto dan larantre, kote zot zanfan i sorti pour li pa respir tou sa bann lafimen, letan pe ariv tou sa bann leksplozyon – kote? Parske lekol Beau Vallon i annan zis en antre e sanmenm sa zot sorti.

So, letan nou pe koz tousala an relasyon avek Onorab Gill semenn pase ek Mosyon ki Onorab Ferrari pe anmennen sa semenn, mon krwar i enportan pour nou konman en Lasanble serye, met tousala devan Gouvernman pou nou vwar ki latmosfer nou zanfan i an sekirite e i ‘’condusive to learning,’’ parey nou kontan dir. Mr Speaker mon ti a dir ou mersi pou permet mwan dir sa 2 pti parol.

 

MR SPEAKER

Mersi Onorab Sandy Arissol, bon mon a sizere ki nou ava adjourn deba lo sa Mosyon pour demen.  I reste ankor 5 Manm lo lalis, me omwen nou’n kapab ekout 4 entervenan.  Mon ti a zis osi enform bann Manm ki nou pou annan en Revised Order Paper, ki sipoze pe ganny sirkile la prezan avek bann Manm pour demain matin. Anyway zot a war zot menm sa i swiv diskisyon ki nou’n fer dan ABC apre midi – ok? Yes Onorab Sebastien Pillay

 

HON SEBASTIEN PILLAY

Mersi Speaker. Mr Speaker prenon kont bann lentervansyon ki mon’n tande apre midi e pozisyon ki nou’n sey anmennen, se ki nou kapab ganny sipor Lasanble antye lo sa Mosyon.  Akoz parey mon’n dir dan mon entervansyon pour mwan tou dimoun i dir i annan merit ladan, mon ti pe regarde. vi ki nou annan  bann propozisyon serten lamannman ki nou ti le sey anmennen, pour ki  nou  fer li  vin en pe pli binding,  si oule, kot nou kapab vwar bann aksyon  tanzib kapab ganny pran. Ki prenon kont ki mood the House pe fini avek ozordi, ki nou met sa devan mover Mosyon, pou son konsiderasyon; ki petet nou kapab bouz lo sa direksyon.   E petet nou kapab ganny lasanble antye pou kapab siport son Mosyon, as is the case ki nou war bann Manm pe i annan merit dan sa Mosyon.  Mersi Mr Speaker.

 

MR SPEAKER

Ok mersi Onorab Pillay.  Ou’n fer serten propozisyon amannman, ler nou a repran Mosyon demen mon ava demann mover Mosyon, si i aksepte sa bann amannman, e konman nou pou pran li. Si i aksepte e nou war i pa vreman sibstansyel i pa sanz sans son Mosyon, nou ava kontiny nou deba lo Mosyon as amendedOk? Nou ava fer sa demen.   Me anyway avek sa mon a zis remersye tou dimoun, mon a remersye osi tou SBC.  Parfwa mon oubliy bann teknisyen, ki pas en lazournen avek nou isi, e lezot osi ki pa selman dan Chamber pe fer sir ki travay Lasanble pe ganny difize e pe ariv kot bann dimoun deor. Alor mon ti a kontan remersi zot tou e Lasanble i adjourn.  E nou repran nou travay demen bomaten 9er.

 

 

(ADJOURNMENT)