::
Home » Verbatim » 2019 » Verbatim Wednesday 17th April, 2019

Verbatim Wednesday 17th April, 2019

NATIONAL ASSEMBLY OF SEYCHELLES

 Wednesday 17th April, 2019

The Assembly met at 9am

National Anthem

Moment of Reflection

Mr Speaker in the Chair

 

MR SPEAKER

Bonzour tou Manm Onorab.  E bonzour tou dimoun ki a lekout e ki pe swiv travay Lasanble Nasyonal.  Mon annan en bonzour spesyal pour bann envite ki ozordi isi parmi nou dan Galeri, e ki pour swiv travay ki Lasanble pour fer bomaten.

E mon dir en bonzour spesyal pour bann zabitan Pointe Larue ki’n vini lo lenvitasyon zot MNA, Onorab Valmont.  E osi tou bann zabitan La Misère, ki’n vini lo lenvitasyon Onorab Waven William.  Bonzour e welcome dan Lasanble Nasyonal.

Zot ava swiv sesyon kestyon bomaten e apre pandan Break mon envit zot ki zot vin avek nou lo balkon dan lobby pour vin pran en tas dite oubyen en tas kafe.

E mon envit bann Manm Lasanble osi tou, pour rankontre bann zabitan ki la parmi nou ozordi.  Pour nou kapab ganny en pti enteraksyon, pour nou kapab ganny en pti konversasyon.

Alor nou pour swiv sa Sesyon e apre parey mon’n dir nou ava rankontre deor.  Mon zis pour sinyal bann Manm lafason ki nou pour travay ozordi.  Mon konnen ki yer mon ti mansyonnen ki bomaten avan nou pran kestyon, mon pour fer en prononsyasyon lo Public Service Salary Bill, 2019.  Me mon pa pour fer li la bomaten.  Mon pa anvi ki nou annan en flow, nou annan en lelan ki Lasanble in pran yer e an vi ki Minis deza la, Minis in fer en long vwayaz yer, in rantre in pare pour li vin reponn kestyon,  mon anvi ki nou pour al direk lo kestyon.  Mon pa pour pran osi Presentation of Papers la bomaten.  Zis nou pour sanz en pti pe nou Lord, nou pour al direk lo kestyon.  Ler nou fini kestyon nou ava pran bann Papers Laid, bann rapor e bann Chairs i ava fer prezantasyon zot rapor ki zot pe table.

E apre sa, apre sa mon ava fer sa kominike lo Public Service Salary Bill, 2019.  So vwala en pti pe lafason ki nou pour travay ozordi.

E avek sa mon ava demann Parliamentary Reporter pour fer rantre Minis avek son delegasyon.  E Minis i annan 2 kestyon pour li.  I annan enn ki sorti kot Onorab Waven William e lot kot Onorab Clifford Andre.

Mon, welcome Minis Maurice Loustau-Lalanne, i Minis responsab pour Finans, Komers, Lenvestisman e Planning Ekonomik pour Sesel.  Minis i akonpannyen par Attorney Zeneral Mr Frank Ally.  Minister bonzour e welcome dan Lasanble Nasyonal.  E mersi pour sa korperasyon ki ou’n montre nou Minis.  Nou konnen ti en long vwayaz, ti en misyon vreman sarze.  E nou apresye ki malgre ou’n rantre tar dan pei, ki ou’n vin parmi nou bomaten pour kapab reponn sa 2 kestyon ki konsern ou Minister.  Alor Minis ankor enn fwa bonzour avek Attorney Zeneral e welcome dan Lasanble Nasyonal.

Nou ava al direkteman lo kestyon.  E mon ava donn la parol Onorab Waven William.

 

HON WAVEN WILLIAM

Mr Speaker bonzour e mersi.  Mon dir bonzour Minis avek Attorney Zeneral.  Bonzour tou manm piblik ki a lekout.  E mon swet la byenveni bann zabitan distrik Grand Anse Mahe e La Misère ki dan Gallery.

Mr Speaker mon kestyon i lir konm swivan.  Eski Minis pour Finans i kapab konfirmen ki i annan R30 milyon dan Fon Contingency pour pey konpansasyon bann zabitan La Misère ki ti ganny afekte ek polisyon delo?  E dir nou –

enn, –  ki staz prosesis pour peye i ete?

Dezyenmman, kan ki sa legzersis i ekspekte konplete?

Trwazyenmman,  ki fason sa peyman par latet pour ganny fer ant zanfan avek adilt?

E katriyenmman,  konfirmen ki bann zabitan ki ti’n komans prosesis claim ki’n mor, zot fanmir pour kapab tous zot larzan?  Mersi.

 

MR SPEAKER

Mersi Onorab William.  Minister. 

 

MINISTER MAURICE LOUSTAU-LALANNE

Mersi Mr Speaker.  Mr Speaker, Onorab Leader Lopozisyon, Onorab Leader Zafer Gouvernman, Manm Onorab Lasanble Nasyonal, tou dimoun ki a lekout bonzour.

Dan Fon Contingency dan Bidze 2019 i annan R50milyon.  E 15milyon pour konpansasyon Libreri Nasyonal, 20milyon pour lezot peyman e en balans R15 ilyon pour konpansasyon La Misère.  Me si an ka i annan nesesite pour donn larzan adisyonnel.  Nou ava fer en demann dan Bidze Siplemanter.

Mr Speaker mon oule fer resorti ki ziska aprezan Minister Finans pa ankor ganny okenn konfirmasyon lo okenn Lagreman konsernan konpansasyon bann rezidan La Misère, oubyen okenn lenstriksyon pour pey sa bann dimoun sorti kot lofis Attorney Zeneral.  Kan Lagreman in gannyen avek sa bann zabitan La Misère, lofis Attorney Zeneral i ava fer nou konnen e nou, nou ava peye.

An sa ki konsern bann claim.  Sa pe ganny deal avek par Attorney Zeneral.  E pour reponn sa kestyon.  mon Minister in kontakte lofis Attorney Zeneral ki les nou konpran ki an prensip i ti’n dakor avek Mr Speaker, Onorab Waven William ek Onorab Bernard Georges pour zot kontinyen ek sa ka dan sa fason.

Premyerman, pey konpansasyon tou bann rezidan La Misère ki ti’n ganny peye lo Household Basis.  Savedir tou bann manm lafanmir, adilt e zanfan dan sa lakour ki ti ganny peye sa letan.       Dezyenmman;  pey tou bann manm fanmir dan bann lakour ki ti ganny afekte dan Petit Barbarons.  Setadir adilt ek zanfan.

Trwazyenmman; pey konpansasyon bann zanfan ki ti pe lekol La Misère, e Seychelles Tourism Academy sa letan.

E katriyenmman pey konpansasyon bann dimoun ki pe travay La Misère sa letan.

Mr Speaker lofis Attorney Zeneral pe konplet lalis tou sa bann dimoun ki ti ganny peye lo Household Basis. 

Tentatively i annan anviron 1, 400 dimoun.  Sa i enkli adilt ek zanfan.  Zot tou zot pour ganny peye par latet.  Lofis Attorney Zeneral pe osi travay lo lalis bann zabitan Petit Barbarons, bann zelev lekol La Misère e bann dimoun ki ti travay dan sa landrwa afekte sa letan.

Mr Speaker sa legzersis pe pran pli bokou letan ki ti’n ekspekte, akoz bann lezot langazman profesyonnel.  Bann zofisye dan lofis Attorney Zeneral.  E nou’n ganny dir ki i difisil pour dir kan sa legzersis pour konplete.  Kan sa lalis in konplete, sa i a ganny diskite avek ou menm Mr Speaker, Onorab William e Onorab Georges pour tonm lo ki sonm ki nou pour peye par latet.  Apre sa lalis i donn Minister Finans pour peye.

Me sa pour bezwen ganny fer dan bann mwan ki pe vini.  Apre sa, lofis Attorney Zeneral i ava travay lo lezot lalis.  Sa i lekol La Misère, STA, e lezot dimoun.

Kan sonm in ganny agree, lofis Attorney Zeneral i ava fer Finans konnen e nou ava fer le neseser pour trouv larzan pour peye.

Mr Speaker lofis Attorney Zeneral in konfirmen ki bann Egzekiter oubyen bann Heirs, bann dimoun ki’n mor ki sipoze ganny peye konpansasyon, zot kapab ganny peye.  Me a kondisyon ki zot annan bann dokiman neseser.  Mersi Mr Speaker.

 

MR SPEAKER

Mersi Minis.  Onorab Waven William.

 

HON WAVEN WILLIAM

Mersi Mr Speaker.  Mr Speaker swivan larepons ki Minis in donnen;  lefe ki sa case la ozordi in pran apepre mon kapab dir pour anmenn closure apepre en 11an a 12an.  E Prezidan ti donn parol, i annan 2an pase.  E swivan bann meeting ki nou’n gannyen, lofis Attorney Zeneral ti ganny dir, ki si i bezwen resours adisyonnel, pour fer konnen Lofis Prezidan.

E Minis mon mwan pa ganny en konpran, mon pa kapab ganny en konpran akoz ki i pe pran tou sa letan.  Well malgre petet Attorney Zeneral i petet i kapab i busy.  Me solman i annan bann lezot dimoun.  E lefe ki parey  Lofis Prezidan in dir pour donn sipor neseser.  E mon mwan ti ava demann lofis Attorney Zeneral pour bouze lo sa case.

E finalman dimoun La Misère i anvi ganny en time frame, i anvi konnen kan zot pour ganny zot larzan?  E sa i pa vedir poudir bann dimoun La Misère zot araze larzan.  Non!

Me lefe ki sa commitment in ganny fer nou, nou ekspekte, nou ekspekte ki – enn – sa travay i ganny fer.  Akoz si ou demann mon mwan lopinyon personnel?  Mon krwar i pe pran tro bokou letan.

E lefe ki in ganny dir si ou bezwen dimoun adisyonnel, fer konnen, sa travay i ava bouz en pti pe vitman.   E please Minister ti a bon nou konnen ozordi, apepre ki time frame?  Akoz dimoun pe espere e dimoun pe fatige espere.

I annan dimoun ki pe mor.  Nou annan apepre en 50tenn dimoun la in mor.  I annan ki pe demande.  Be kan nou pour ganny sa pti zafer la?  Si i annan en kas, donn nou, nou en kas!  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  E mersi Onorab.  Onorab ou annan rezon.  Prezidan Larepiblik dan son SONA 2017, i ti fer mansyon ki Gouvernman pour fasilit demars pour fer sir ki en larzan adisyonnel i ganny peye.

E parey mon’n eksplike dan mon larepons,  i pe pran tro bokou letan.  Mon rekonnet ki biro Attorney Zeneral i annan plizyer kontrent.  Menm dan Bidze 2019 pour son biro nou’n donn li plis larzan pour li rod dimoun pour nobou drafte Lalwa.  Akoz i annan en kantite Lalwa osi ki an retar, ki nou santi i bezwen ganny akseler-e.

Me mon osi an diskisyon avek Attorney Zeneral.  Nou serten ki dan lespas ankor detrwa mwan, sa premye lalis pour La Misère i bezwen ganny finalize, e en sonm ganny agree parey mon’n eksplike avek 3 Manm Parlmanter avek li menm.  Akoz se son biro ki pe antreprann sa travay e soumet avek nou.  Akoz Bidze sa 15 milyon nou bezwen depans li dan lannen 2019.

So pour reponn ou kestyon pli definitivman.  Mon pa oule ki nou pran plis ki 6 mwan retar maximum pour sa bann dimoun ganny – at least sa bann dimoun lo lalis La Misère i ganny peye an premye e apre nou a kontinyen avek lezot.  Mersi Mr Speaker.

 

MR SPEAKER

Mersi Minis.  Onorab William.

 

HON WAVEN WILLIAM

Minis mon konpran ou.  I annan sa mo ‘epi’  – ‘’detrwa mwan.’’  Minis spesifikman, lefe ki bann zabitan La Misère lakaz i ankor la, e zot lo lalis.  Konmsi sa enn pour mon mwan krwar i senp.  Lefe ki nou konnen egzakteman konbyen sa bann dimoun i annan,  letan ou pe dir detrwa mwan Minis, ou pa kapab spesifye?  Koumsa ki nou konnen spesifikman pour nou osi koman Komite travay avek zot pour vwar poudir wi sa target dat ki in donnen, i pe ganny respekte.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU- LALANNE

Mersi Mr Speaker.  Mr Speaker oubyen Onorab.  Ou konpran Minister Finans li, nou oule zis pour fer sir ki letan i annan en Lakor, nou peye.  So sa ki mon mwan kapab dir ou, fodre ki nou peye o pli tar dan 6 mwan pour nou depans R15milyon.  Nou kapab pey li en pe pli tar.

Me mwan deadline ki mon pe donn biro Attorney Zeneral, se dan 6 mwan fodre ki nou’n fini peye.  So vwala si oule sa desizyon ki  mwan mon pe pran la.

I vre i annan en lalis; parey mon’n dir lo Household Basis ki ti ganny fer.  Akoz parey ou’n fer resorti, depi 2011 sa zafer konpansasyon La Misère pe go on, e in ganny peye o frir a mezir.  E finalman 2013 nou ti frenm kont apre ki nou ti’n pey bann dimoun baze lo household.  So nou annan en lalis.

Me parey ou konnen Attorney Zeneral li menm in ale, in fer bann plizyer meeting, in devise bann form neseser pour bann dimoun anpli.  So i annan en prosedir ki nou bezwen swiv, e mon pa kapab enterfer mwan dan sa louvraz ki zot pe fer.

Mon pe esper en Lagreman final pour mwan peye e mon’n donn la 6 mwan pour mwan ganny sa lalis.  E mon’n fini peye dan 6 mwan.  Mersi Mr Speaker.

 

MR SPEAKER

Mersi Minis.  Onorab Phillip Arissol.

 

HON PHILLIP ARISSOL

Mersi Mr Speaker.  Bonzour tou dimoun.  Bonzour Minis.  An vi proksimite Anse Boileau avek La Misère kot serten sours delo ki sorti laba anler, i koul anba Anse Boileau kot nou, e i annan dimoun ki’n ganny afekte.  Eski Minis i kapab konfirm avek sa Lasanble ki dimoun Anse Boileau ki’n ganny afekte pour ganny konpansasyon?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pour ou kestyon.  Onorab nou, nou pe koz La Misère, Petit Barbarons, lekol La Misère avek STA.

Letan nou ti pe fer bann peyman, ti annan bann lezot dimoun ki ti fer aplikasyon.  E parey ou konnen, i annan, ti annan en Komite, e i annan serten ki’n ganny konsidere si zot ti tonm dan sa rezyon.  E i annan en lot bann ki pa’n ganny konsidere.

Me toultan ou bezwen annan sa evantyalite ki lezot dimoun i kapab apply.  Donk dan sa ka ki ou spesifik ki ou’n, kestyon ki ou’n poze, sa group dimoun ki pe travay lo la, i ava regarde.  Akoz fodre efektivman ki nou prouve ki zot in ganny afekte, e si zot pa’n prouv sa dan premye group.  Mon santi i kapab difisil.  Akoz la nou pe koz en fasilite topup si oule.  Mersi Mr Speaker.

 

MR SPEAKER

Mersi Minis.  Onorab Phillip Arissol.

 

HON PHILLIP ARISSOL

Minis i annan en group zabitan Anse Boileau presizeman Caiman,  zot ti vin fer zot claims anler La Misère, e delo in fini koule e sa bann dimoun in ganny afekte.  Zot annan zot bann medical report ki prouve poudir wi zot in ganny afekte.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Dan sa ka, efektivman si zot in ganny afekte, zot in fer en claim.  Zot claim ava ganny asses, e si fodre pey zot, zot ava ganny peye.  Mersi Mr Speaker.

 

MR SPEAKER

Mersi Minis.  Onorab Simon Gill.

 

HON SIMON GILL

Bonzour Mr Speaker.  Bonzour tou Koleg Onorab.  Bonzour Minis avek ou delegasyon.  E bonzour tou bann zabitan Grand Anse Mahe ki dan Galeri e Pointe Larue osi.

Mr Speaker with respect to the Minister –  mon pour dir avek Minis sa dele 6 mwan ki in donnen, pa akseptab!

 

(APPLAUSE)

 

HON SIMON GILL

Nou pe demann Minis ki donnen sirkonstans o tour sa sityasyon ki i met an mars, or i etabli en Komite, or met en tim.   Probableman non Komite pa bon, me en tim  en special taskforce ki ganny tasked pour travay lo tou sa bann dosye e nou pour nou letan ki nou krwar i rezonnab, i 2 mwan, pa 6 mwan!  2 mwan!

Sa ki nou krwar i reasonable e i a kapab ganny aksepte – 2mwan!  En special team, en task force pour get tou sa bann ka e komans peye dan en dele letan 2mwan.  Sa i mon konsiderasyon Mr Speaker donnen mon konesans e sirkonstans o tour sa sityasyon kot bann fanmir e zabitan dan distrik Grand Anse Mahe i konsernen.  Mersi bokou Mr Speaker.

 

MR SPEAKER

Mersi Onorab Simon Gill.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab mon konpran sa ki ou pe demande.  Me les mon a klarifye ki an sa ki konsern mwan menm, mon Minister.  I annan deza en Komite oubyen si oule en task force ki’n ganny constitute, ki pe travay lo la.

E parey mon’n fer resorti,  sa travay pe pran tro bokou letan.  Nou dakor lo la.  Sa ki mon kapab fer e sirtou bann dimoun ki pe ekoute la, zot vwar irzans, se demande ki sa deadline 6 mwan ki mon’n donnen, i rakoursi, i vin pli kourt.  E si zot kapab fer li dan en dele letan 2 mwan parey ou pe demande, nou ava fer li.  Akoz nou bezwen konpran ki nou bezwen fer li par staz.

Setadir annou konsantre lo La Misère dabor, e nou ava peye e apre i a pli fasil enn fwa ki nou’n agree lo sa sonm ki nou peye.  Akoz nou pour pey par latet.  Setadir nou pour annan en sonm pour adilt, nou pour annan en sonm pour zanfan ensidswit, ki sa i ganny fer e nou pey La Misère an premye.

Akoz si sonm ki nou pour peye i depas sa Bidze R15 milyon.  Nou annan en lot demars ki nou pour bezwen fer.  So letan nou dir pey dan 2 mwan.  Mon bezwen zis kalifye ki nou pour nobou kekfwa fer li, e mon pour fer mwan mye posib ki nou fer sa dan 2 mwan, me i pour bann dimoun La Misère an premye.  Mersi Mr Speaker.

 

MR SPEAKER

Mersi Minis.  Onorab Simon Gill.

 

HON SIMON GILL

Mr Speaker mersi bokou.  Mon ti ava voudre demann Minis.  Mon dir li mon’n konpran ki in dir.  Me dan tou bann konsiderasyon ki mon kapab pran.  Mon pa pour al dikte ki mannyer or modalité peyman, lekel group ki zot peye.  Me mon sa ki mwan mon krwar i rezonnab ankor enn fwa mon pour met lanfaz lo la.  Se 2 mwan, peyman i konmans ganny Egzekite.  E mon persyade ki i posib fer li.  Akoz deza i annan en baz lenformasyon ki la ki zot kapab servi li koman en pwen depar.

E mon pa trouv okenn rezon pour nou agree pour dir peyman pour ganny fer dan 6 mwan.  Mon krwar i pa rezonnab.  E ankor enn fwa si fodre pey sa bann dimoun ki pe travay, sa task force ki pe travay, si fodre ranforsi dan sa team.  Si i annan 6, met 8.  Met 8.  Si 8 pa ase, met 10.  Annou negosye avek bann dimoun dan Minister Finans pour nou kapab kas sa task force, reinforce sa task force e nou garanti ki peyman i komanse dan en dele letan 2 mwan.

Si ou pour pey bann dimoun La Misère avan, sa mon mwan pa pour dikte.  Me tou bann konsiderasyon ki i annan pour mete, 2 mwan mon krwar i rezonnab pour nou kapab komans fer peyman pour bann dimoun La Misère pour nou put this matter to rest!

Akoz depi 2017 Prezidan Faure in fer deklarasyon lo sa size.  Mon krwar ankor enn fwa nou pe pran tro bokou letan with due respect to everyone ki dan sa team e ki pe travay dan Gouvernman pour fer sa vin en realite.  Nou respekte zot, nou konnen i annan bann travay ki zot pe fer.  Me mon krwar ranforsi tim and get this matter out of the way.  Mersi bokou Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Mon toutafe dakor avek ou dernyen lentervansyon.  Mersi bokou.

 

MR SPEAKER

Mersi Minis.  Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun.  Mr Speaker pour servi lekspresyon Minis, se en larzan adisyonnel ouswa topup pour bann ansyen etidyan STA, lekol La Misère, rezidan Petit Barbarons avek La Misère ki nou pe koze.

Mon kestyon i se ki –  ki rezondet re eksplik dimoun, Mont Buxton partikilyerman ki mon reprezante, rezon det ki Gouvernman pe donn ankor 15 milyon lo tax payers money pour en problenm ki pa nou ki ti kree?  An premye lye dan Mont Buxton selman nou ki pour bezwen foot the bill kan nou semen pa bon, nou napa lalimyer, nou napa bus stop.

So mon oule konn rezon det pour re pey en larzan adisyonnel – premyerman.

Dezyenmman;  prenon kont kondisyon lasante sa bann dimoun.  Mon anvi konnen lo zot par,  eski enn fwa ki nou’n pey sa adisyonnel 15 milyon, this will be the end of the matter?  Pour napa ankor konpansasyon, e lasante sa bann dimoun zot pour napa nanryen ankor pour zot trakase avek?  Mersi bokou.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pour ou kestyon.  Les mon a pran 2enm parti ek premye.

Konteni ki nou napa, en sif egzakt letan nou ti prepar Bidze 2019, nou ti met 15 milyon koman en estimasyon.  E parey nou’n dir sa 15milyon i en ex gratia payment ki nou pe fer.  Akoz Gouvernman ti dir, Prezidan ti dir an 2017.  Gouvernman a fasilit sa sityasyon, i ti apologize ki sa ti arive.

Parey ou konnen i annan 2 ka polisyon.  I annan en ka polisyon delo, apre i annan en ka delo sal, apre i annan delo ki ti ganny kontaminen ek dyezel.  Sa se sa 2 keksoz.

Donk sa 15milyon i en sonm ki nou’n mete koman en ex gratia.  Me parey mon dir ou letan sa task force in travay, in vwar, i pour kapab plis ki sa.  Donk si i pli si annan en prosedir ki nou pour swiv pour vin devan Lasanble pour demann plis larzan pour nobou peye.  Me pour le moman an 2019 nou pa kapab disburse plis ki sa 15milyon.  Sa i premye keksoz.

Lo rezondet mon sipoze ki an 2011 letan larzan ti ganny donnen, e larzan ti komans ganny peye R250, 000 par household,  ti sonm ki ti ganny peye.  I annan ki ti pran, i annan serten ki pa ti pran.

Prosedir aktyel ozordi, si ou pa dakor ou contest li Ankour.  E Lakour i a deside konbyen pour donnen.  Alor sa i swiv son kou normal.

Me dan sa ka nou’n deside pour nou fasilit sa sityasyon, akoz bokou dimoun i santi ki sa R250, 000 par household pa ti ase.  E se koumsa ki prezan sa ex gratia pe antre dan sa diskour.

Me konbyen i pour ete?  Sa i ankor pour ganny determinen.  Me sa ki nou’n dakor, nou pour pey sa ex gratia par latet par dimoun.  Akoz en household La Misère, kekfwa i annan zis en dimoun, in ganny li R250, 000 li.  I annan en household i kapab li annan li detrwa dimoun.  Ou bezwen partaz sa 250,000.

I annan adilt, i annan zanfan.  So sa diskisyon ki’n gannyen depi resaman, i pe regarde pour sa additional money as a one off e i pour a one off; setadir letan sa legzersis in terminen, nou pa pour tann ankor nanryen avek sa ka polisyon La Misère.  Mersi Mr Speaker.

 

MR SPEAKER

Mersi Minis.  Vitman Onorab Henrie.

 

HON GERVAIS HENRIE

Mersi pour ou larepons Minis.  Savedir mon konpran enn fwa ki sa 15milyon i fini, napa ankor konpansasyon, se sa ki mon’n konpran?

Be solman kestyon i reste.  Se ki akoz ki Seselwa sa tax payers Mont Buxton ki pa li ki’n kree sa problenm?  Solman li ki pe foot the bill.  Mon pe demann sa lo zot par akoz nou ki pe peye?  Sa ki mon anvi konnen.  Akoz nou ki pe peye?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab wi mon krwar ki dan sa ka polisyon La Misère, se sa dimoun ki’n kree sa polisyon ki responsab, e in donn larzan pour pey sa konpansasyon.  E sa in ganny fer.

Parey mon’n dir ou in terminen an 2013.  Me ozordi i annan en sityasyon kot Gouvernman in deside antretenir sa demann pour top-up  sa konpansasyon ki’n ganny peye par sa pollueur, pa Gouvernman, sa pollueur. Me la Gouvernman in deside antretenir sa top-up.  Donk se en keksoz ki nou pe travay pour nou trouv the amount pour nou peye e eklersi sa sityasyon once and for all.  Mersi Mr Speaker.

 

MR SPEAKER

Mersi Minis.  Onorab Jude Valmont.

 

HON JUDE VALMONT

Mersi Mr Speaker bonzour.  Bonzour tou Koleg Onorab.  Bonzour Minis e delegasyon.  En bonzour spesyal pour bann zabitan Point Larue e osi Grand Anse Mahe.

Mon ti a kontan demann Minis Mr Speaker.  Enn, se ki si i okouran si i annan okenn cutoff date ki ti ganny etabli pour claim pour sa bann konpansasyon pour sa, pour bann dimoun La Misère?

E eski i vwar si i rezonnab pour etabli en cutoff date pour evite ki lezot dimoun ankor i vin devan pour fer bann claim parey nou’n vwar ozordi ankor?  I annan demann ki’n vini.  Eski i vwar sa i rezonnab?

E mon ti a kontan osi demann Minis.  Eski i vwar li osi rezonnab pour petet konsider met en pe larzan an plis dan bidze?

Parey la nou’n vwar dan Bidze ki vini nou’n vwar i annan 50 milyon.  E ler nou pe ekout konversasyon la, i kapab pa ase.

Alor petet i kapab bann eleman ki retard peyman konpansasyon pour bann lezot dimoun.  Si i vwar sa i rezonnab pour met en sonm en pe an plis pour bann prosen claim ki kapab vini?

E dernyen se ki;  eski Minis i vwar li i kapab konsidere si i normal pour kre en Younit permanan pour deal avek bann sityasyon claim pour bann konpansasyon petet dan son Minister oubyen atraver biro Attorney Zeneral avek bi pour ede fasilite?

Petet parey ou’n koz lo kreasyon form and whatnot.  Akoz nou konnen depi ler in ariv sa ka _ zis pour fer resorti, sa ka fungus kot Minister Kiltir, nou konnen i ankor claim ki pour vini demen.

Alor petet si i vwar li normal pour kre en Younit permanan pour deal ek sa bann sityasyon parey pour kree form, pour vwar bann dimoun?  Ki nou evite nou vwar ankor bann ka, bann demann claims ki vin atraver bann MNA, bann reprezantan dan Lasanble, alor ki bann dimoun kapab al direkteman, si zot santi zot ganny aggrieve, zot al direkteman kot sa biro, sa Younit zot fer tou, ki fasilit louvraz Attorney Zeneral demen.  E fer sir ki bann dimoun demen si zot annan okenn claim e konpansasyon, retar pa arive pour zot ganny zot larzan?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU- LALANNE

Mersi Mr Speaker.  Mersi Onorab.  Ou’n poz bokou kestyon.  Les mon a klarifye lo sonm.

Dan Bidze 2019, anba Contingency nou annan nou R50milyon.  Me pour konpansasyon La Misère i 15 milyon selman, 15milyon.  Alor eski i rezonnab pour ogmant sa 15milyon?

Kestyon se ki apre ki sa task force in fer son travay, apre ki zot in diskit avek Mr Speaker, Onorab William e Onorab Georges,  e zot in ariv lo en Lagreman avek Attorney Zeneral lo konbyen nou pour peye.  La Minister Finans a ganny demande pour peye, e nou a peye.  Si i plis, nou pour bezwen vin devan sa Lasanble pour nou demann plis larzan.

Claim ti ganny ouver e claim ti ganny fer lannen pase.  E Attorney Zeneral parey mon’n li menm, in al enn de fwa dan bann distrik kot in eksplike.  E mannyer mon konpran ozordi, sa prosedir claim in fini frenmen.  I pa ouver a lenzirditan nenport kan en dimoun i kapab vini fer en claim.  So sa i pozisyon lo sa claim.  Ou’n koz lo fungus.  Nou leksperyans i montre 2 keksoz;

Enn, fodre ki nou azir pli vit dan bann ka koumsa.  Akoz apre i vin kout nou tro ser.  E sa ka fungus i en ka kler.  Fodre pa nou repet sa ka ankor.

E letan ou met en Bidze pour konpansasyon, ou annan rezon ki ou bezwen osi ekspekte i annan bann eksepsyon, wi en bann nouvo claim ki vini ki ou bezwen konsidere entertain. 

E dan sa ka fungus nou ti’n met nou en sonm larzan an 2019, R15milyon pour nou fini ek sa zafer.  Sa ki mon ki kapab konfirm ek ou, nou’n fini avek sa zafer.  Me in kout nou lezerman plis ki 15milyon.  Akoz nou’n bezwen entertain enn de claim an plis ki pa ti’n prevwar.  Bann claim ki ti zistifye.  Donk nou’n depas sa Bidze lezerman, depas sa Bidze.  Sa se pour ou lenformasyon.

E donk kestyon final se lo serten task force.  Sa bann sirkonstans ki nou’n pas ladan nou annan nou serten dimoun ki konnen dan biro Prokirer Zeneral dan lezot Minister ki i annan sa leksperyans pour deal avek sa.

So i tre fasil pour nou si oule demann sa bann dimoun eksperyanse ozordi, pour zot fer sa travay si i neseser.  Me fotespere ki i pa ariv souvan.  I ariv leksepsyon plito ki Lareg.  Mersi Mr Speaker.

 

MR SPEAKER

Mersi Minis.  Vitman Onorab Valmont.

 

HON JUDE VALMONT

Mersi Mr Speaker.  Mersi Minis pour ou repons.  Minis mon okouran sa 15, i annan zis 15 milyon pour zabitan La Misère pour le moman.

Se dan lespri pour pa retard bann fitir peyman ki mon’n demande ki the lump sum sa 50milyon la, ou Minister i konsider met en pe plis dan Bidze ki pe vini pour evite ki nou retard lezot peyman si i annan claim ki vini dan le fitir.

E mon ti a kontan Minis i konsilte en pti moman ek Attorney Zeneral zis pour konfirm sa cutoff date pour sa bann claims pour sa bann sa.  Mersi bokou.

 

MR SPEAKER

Mersi Onorab.  Minis.

 

MINISTER MAURICE LOUSTAU- LALANNE

Mersi Mr Speaker.  Mersi Onorab.  Ok mon’n sezi ou.  Me ou konnen lontan Bidze Contingency, Gouvernman ti zis 20 milyon.

E an 2019 nou’n ogmant li 50milyon.  So nou’n deza fer sa lazistaz pour pran kont sa bann ka ki nou ti pe prevwar pe vini.

Wi, Attorney Zeneral i konfirm avek mwan ki ti annan en bon pe sansibilizasyon ki ti ganny fer o tour sa, lo radyo, lo televizyon, lo bann meeting ki ti ganny fer.   E in frenmen a parti i krwar Zilyet.

Me solman si i annan enn de ka parey dimoun in al lapes i lo lanmer in manke, or whatever it is.  Zot kapab lodge zot bann claim.  Parey mon’n eksplike, nou bezwen touzour gard en laport ouver pour bann ka eksepsyonnel.

Donk vwala.  Me pour le moman mon krwar pa si zot pe resevwar okenn lezot claim depi le mwan Zilyet lannen pase.  Mersi Mr Speaker.

 

MR SPEAKER

Mersi Minis.  Onorab Norbert Loizeau.

 

HON NORBERT LOIZEAU

Mersi Mr Speaker.  Bonzour Minis ek ou delegasyon.  Bonzour tou dimoun.

Mr Speaker mon anvi demann Minis, vi ki Minis in dir ki sa pollueur, an dot mo sa bann dimoun ki’n fer sa bann malpropte dan nou delo La Misère, zot ti donn en larzan.  I konfirmen ki zot ti donnen larzan.

Minis mon keksoz mwan anvi konnen.  Eski ou kapab dir nou konbyen sa pollueur, ti donnen?  E si zot annan dokimantasyon pour ki i a la porte piblik pour nou konnen konbyen ti donnen par sa bann dimoun ki’n fer malpropte?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pour ou kestyon.  Onorab an me 2011, ASCON ti fer en transfer $1milyon.  E an me 2011 ankor i ti fer en dezyenm transfer $7.582 milyon.

E a sa lepok avek convertibilité Roupi.  An Roupi sa 2 sonm ti ariv R99milyon an total.  Mersi Mr Speaker.

 

MR SPEAKER

Mersi Minis.  Onorab Loizeau.

 

HON NORBERT LOIZEAU

Mr Speaker mon anvi demann Minis.  Be 99milyon, ki zot in fer ek sa 99 milyon ki’n donnen?  I annan dokiman pour montre ki zot in fer avek sa 99milyon ki sa Konpannyen ti donnen?  Aprezan nou, nou bezwen pey ankor 15milyon an plis ankor.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Wi Onorab nou’n gard tou rikord.  Dan Minister Finans nou annan tou bann peyman ki’n ganny fer.  Ti annan en pti balans ki ti reste.  R4, 746.91sou ki nou ti transfer Trezor an Septanm 2013.

E mon kapab dir ou ki plizyer kategori ti ganny peye parey mon’n dir.  La Misère household, sa tou bann dimoun ki ti ganny R250,000, Petit Barbarons, lekol La Misère – bann endividi, Tourism Academy, e i annan menm en listing ki mon vwar i met ghetto.  Mon pa konnen kisisa en ghetto mwan.

Apre 2nd household.  Sa osi tou son bann peyman i ganny byen eksplike.  So mon annan tou sa bann lenformasyon avek mon Mr Speaker e mon satisfe ki sa travay in ganny fer.  E se sa lalis ki at biro Attorney Zeneral avek sa travay ki pe fer, i pour lalis ki pour ganny servi pour finaliz sa travay.  Mersi Mr Speaker.

 

MR SPEAKER

Mersi Minis.  Onorab Loizeau mon’n donn ou 2 siplemanter.

 

HON NORBERT LOIZEAU

Zis mon anvi dir ek Minis si i ti kapab fer nou ganny sa bann dokimantasyon pour nou…

 

MR SPEAKER

Ok.

 

HON NORBERT LOIZEAU

Kapab vwar koman en Lasanble.

 

MR SPEAKER

Yes…

 

HON NORBERT LOIZEAU

Vi ki mon lo COGA Committee. Mon ti a kontan ki sa bann, ki in dir nou i vre.  Mersi.

 

MR SPEAKER

Alright.  Minis.

 

MINISTER MAURICE LOUSTAU-LALANNE

Mersi Mr Speaker.  Mr Speaker mon mwan travay dan latransparans.  So  mwan mon napa okenn obzeksyon pour fer en summary sa ki mon’n eksplike pour mwan partaz avek bann Manm Lasanble.  Mersi Mr Speaker.

 

MR SPEAKER

Mersi Minis.  Bon mon annan en bon pe Manm.  Si pa preski tou Manm Lasanble ki i enterese pour demann kestyon, mon ti ava enplor zot ki nou fer li bref nou al direkteman lo kestyon.

E Minis so far ou osi ou pe reponn byen brièvement to the point.  E annou kontinyen dan sa direksyon pour nou kapab egzos sa lalis ki la devan mwan.  Prosennman lo lalis mon annan Onorab Wilbert Herminie.

 

HON WILBERT HERMINIE

Mersi Mr Speaker.  Bonzour Mr Speaker.  Bonzour Minis avek Attorney General.  Bonzour bann zabitan Grand Anse ek Pointe Larue ki dan Galeri.  E tou dimoun ki a lekout.

Minis kestyon No.1 (d) mon’n ganny en pe lenformasyon ki ou pa’n al ase dan detay pour konsonmasyon piblik.

Eski ou kapab dir ki bann dokiman neseser ler ou’n reponn kestyon 1 (d), ou’n dir koumsa bann.  Zot bezwen bann dokiman neseser.  I annan serten dimoun ki a lekout pe demande ki bann dokiman neseser ki zot pour bezwen pour zot kapab ganny sa, ganny sa, zot konpansasyon anba 1 (d).

Mon 2enm kestyon mon santi ki ou pa’n al ase an detay ankor lo kestyon 1(c) akoz kestyon pe demande, ki fason peyman pour fer par latet ant zanfan e adilt.

Mon krwar Onorab William ti pe sey demann ki formil ki pour ganny servi pour ganny ant zanfan e adilt?  Mon krwar sa ratio ki i pe rode.

E mon 3enm kestyon mon anvi demande, an 2013 Minis in dir par household ti annan 250, 000 ki ti ganny donnen.  Mon mwan oule konnen konbyen household or dimoun ki pa ti aksepte sa konpansasyon ki zot ti anmenn case Ankour?

E eski sa i la pour le moman sa bann dimoun savedir pour ganny 2 konpansasyon. Sa konpansasyon previously plus sa nouvo keksoz ki pe ganny anmennen la.  Zis klarifye sa en pti pe pour Lasanble.  Mersi.

 

MR SPEAKER

Mersi Onorab Herminie.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab bann dokiman, se bann dokiman ki pour etabli lyen sa dimoun avek sa dimoun ki’n mor.  Se sa ki nou bezwen etabli.   Alor i kapab en dokiman ki in apwent li Egzekiter oubyen _ akoz se sa ki nou bezwen fer pour etabli sa lyen ant sa dimoun ki’n mor avek sa dimoun ki pe claim lo son behalf.  Donk se sa annefe bann dokiman ki lye avek sa.

Mon pa kapab donn ou en sif egzakt konbyen household ki pa’n oule pran sa R250, 000, me i annan enn de.  Sa ki mwan  mon’n vwar dan bann dokiman ki mon’n lir, i sanble mwan i annan 2 ka selman.  Me i annan bokou household ki’n aksepte.  I annan plis ki 390 household ki’n aksepte.  Mersi Mr Speaker.

 

MR SPEAKER

Mersi Minis.  Vitman Onorab Herminie.

 

HON WILBERT HERMINIE

Non, Minis pa’n tous kestyon 1 (c) lo formil.  Epi pa’n al dan detay lo sa bann, sa 2 let’s say sa 2 ki pa’n aksepte.  Eski zot konpansasyon la ler i pe al peye, sa final payment la, i pour parey pour across the Board?  Ouswa zot pour ganny en pti pe an plis?  Sa 2 pwen Minis pa’n touse.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi mersi Mr Speaker.  Parey mon’n eksplike Onorab,   mon biro Minister Finans nou napa en _ bokou lenformasyon lo sa bann detay.  Me sa ki mon kapab dir ou se ki sa ki – sa bann ka ki Ankour, Lakour i a zize.

Nou, nou ti’n pare pour donn R250, 000.  E sa lot legzersis ki pe ganny fer, nou dir nou pour donn en ex gratia payment, pour determinen pli tar konbyen nou pour peye.  Adilt en sonm diferan, pour zanfan i vin koman en peyman adisyonnel.

So mon krwar nou bezwen respekte sa prosedir.  So vwala si oule mon larepons ki mon pe donn ou lo sa 2 kestyon.  Mersi Mr Speaker.

 

MR SPEAKER

Mersi Minis.  Onorab François Adelaide.

 

HON FRANÇOIS ADELAIDE

Mersi Mr Speaker.  Bonzour Minis.  Bonzour tou dimoun.  Minis zis pour met a ou latansyon.  Petet ankor dan detrwa letan i kapab annan en ka fungus ki vini sorti kot stasyon tenny dife Anse Boileau.  Akoz nou’n al fer en vizit, i en pe bad laba.

Mon kestyon pour ou Minis, se ki,  vi ki i annan, ti annan sa polisyon e dimoun La Misère parey nou dir in ganny afekte, e sa msye i ankor reste lanmen La Misère i pre li.  Li i annan larzan nou Seselwa nou fay lo larzan.

Eski petet ou Minister _  mon konnen sa msye pa li ki’n fer sa, me se ASCON, me selman ASCON ti pe travay pour li.  So eski petet ou pe mazinen ou atraver ou bann lekip negosyater, sey ale al pik sa Msye ankor, dir li donn ankor en pti larzan pour ki i ava fasilit sa peyman e nou, nou Seselwa nou pa vwar nou pe pey sa gran kantite?   Mersi bokou.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab i sanble mon ki dan bann Lagreman ki’n ganny fer par lepase.  Dan premye ka, nou rapel li 2011 si oule, li ASCON in fini pey tou keksoz.  Prezan se nou ki bezwen pey sa bann household, pey sa bann endividi and so on.  Li in fer sa peyman, e prezan se nou ki pe fer sa bann peyman.  I pa anpese la ki ou’n poz sa kestyon pour regarde si –  a mon nivo mon kapab al fer en demann adisyonnel.  Me nou pa ankor ariv dan sa letap pour le moman.  Mersi Mr Speaker.

 

MR SPEAKER

Mersi Minis.   Onorab Sylvanne Lemiel.

 

HON SYLVANNE LEMIEL

Mersi Mr Speaker.  Bonzour tou dimoun.  Minis.   Mr Speaker mon kestyon i fini ganny pran.  Mersi.

 

MR SPEAKER

Ok mersi Onorab.  Onorab Sebastien Pillay.

 

HON SEBASTIEN PILLAY

Mersi Mr Speaker.   Bonzour tou dimoun Pointe Larue e Grand Anse ki dan Galeri.  E bonzour tou koleg Onorab.  E bonzour Minis.  E bonzour tou dimoun ki a lekout isi Sesel oubyen aryer.

Mr Speaker mon ti a kontan demann Minis.  Prenon kont ki Gouvernman in pran desizyon pour li revwar e top-up sa konpansasyon ki ti ganny peye orizinalman.  Sa i vedir ki prémisse oubyen baz ki sa premye konpansasyon ti ganny negosye avek bann dimoun, ki ti koz sa polisyon in the first place, i tonbe.  So pour pran kestyon ki Minis mon santi ou pa’n neseser al dan son – al  in-depth.

Se eski alors baze lo sa largiman nou pa devret revwar avek bann dimoun ki ti koz sa polisyon ek bann dimoun ki i annan plis mwayen ki nou, poudir be gete la nou, nou pe al tir R15milyon dan nou larzan ki nou annan ou 15, ou 16 ou 20 milyon ki mannyer i pour arive, dan nou larzan ki nou annan;  eski ou pa kapab konsidere, vi ki nou nou’n vwar poudir nou bezwen revwar sa sityasyon?

Nou oule vin kot ou an bonnfwa pour dir ou be revwar sa sityasyon osi, e la nou ava kapab osi ganny en led pour kouver sa bann, peyman ki bezwen ganny fer?

Mon santi poudir sa kestyon in ganny demande.  Me nou pa’n adres sa size akoz prémisse ki nou ti etabli konpansasyon lo la premye lye,  nou pe sanz li la.  Akoz nou pe dir nou bezwen top-up.  Sa i mon premye pwen.

Mon 2enm pwen ki mon oule klarifye avek ou Minis se ki.  Eski ou kapab donn nou an total konbyen dimoun?  Mon pa konnen si ou’n donnen.  Be eski ou kapab donn nou an total konbyen dimoun pour enkli dan sa prosesis konpansasyon ki nou pe al fer la, sa fwasi regarding sa top-up?  Pour ki nou kapab ganny en nide kantite, konbyen dimoun ki involve ladan?  Mersi Mr Speaker.

 

MR SPEAKER

Mersi Onorab Pillay.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pour ou kestyon.  Parey mon’n fer resorti.  Fodre ki mon personnelman mon al fer en letid lo sa bann diskisyon, lo sa bann Lagreman ki ti ganny sinyen avek ASCON.

Akoz sa mon pa ankor fer sa travay.  La ki kestyon in ganny poze pour mon regarde efektivman si nou kapab fer sa demann parey ou’n eksplike.  E mon’n ganny ou kler.

So les mon ava fer sa.  Mon pa kapab fer en commitment la.  Les mon ava al regarde lo baz sa diskisyon, e baz sa desizyon ki ti ganny pran.

An sa ki konsern lakantite dimoun.  Baze lo sa bann household ki nou’n deza peye.  Nou estimen, se en sif estimen 1, 400 endividi ki pour ganny peye sa top-up compensation apepre – 1, 400.  Mersi Mr Speaker.

 

MR SPEAKER

Mersi Minis.  Onorab Pillay.

 

HON SEBASTIEN PILLAY

Mersi Mr Speaker.  Mr Speaker prezan mon pour al demann en kestyon ki petet mon oule tou dimoun i konpran mon ler mwan demann sa kestyon.

Dan sa prosesis konpansasyon, i annan bann dimoun ki genuinely deserve sa konpansasyon.  E zot nou bezwen rod en fason pour fer sir ki zot ganny peye zot larzan.

Ki zot Minister pe fer pour ki sa prosesis pa ganny retarde ankor davantaz, par bann claim konpansasyon ki pa neseserman genuine?

E ki fer ki bann dimoun ki pe esper en solisyon ki zot deserve ganny en solisyon,  zot pa pe ganny li akoz zisteman ou annan bann lezot eleman ki pe antre.

So ki mannyer zot pe fer pour ki zot protez claim ki sa bann dimoun ki’n deza ganny fer i, e ki zot kapab ganny peye en konpansasyon?  Mersi Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mr Speaker mon ava fer sir ki mon transmet sa demann, sa task force ki pe finaliz bann claim la aktyelman.  Akoz nou anvi fer sir ki nou disburse sa peyman dan 2 mwan.  Mersi Mr Speaker.

 

MR SPEAKER

Mersi Minis.  Onorab Bernard Georges.

 

HON BERNARD GEORGES

Mersi Mr Speaker.  Mr Speaker mon konsyan ki ou’n demann nou, demann nou kestyon dan en fason bref, e mon ava tante pour fer li.  Me avek ou permisyon, mon ti a kontan donn en pti istorik pour met sa ki, kot nou ete la ozordi an konteks.

Toute en déclarant o komansman ki mon annan en lentere personnel dan sa zafer.  Akoz se parey ou konnen, se mon ki Avoka bann rezidan La Misère dan sa case ki Ankour, pour demann en top-up.

Mr Speaker e avek – pour mon kapab met Minis en pe dan konteks.  I kler ki sa kestyon ozordi in ganny provoke, sa sityasyon kot nou vwar nou lekor ladan in ganny provoke par en seri move desizyon ki’n ganny pran, desizyon pour permet konstriksyon étaler dan sa landrwa, move desizyon pour pa kontrol lafason dan sa ti pe ganny fer, pour met en landrwa rezidansyel par lao en sours delo, pou pa’n monitor bann sewage, spillage, eksetera.  Tousala tou dimoun i konnen.

An fonksyon sa, an fonksyon sa apre ki Gouvernman ti’n deside antre dan en negosyasyon avek ASCON e pey R250, 000 par household,  ti annan bokou dimoun ki ti santi ki pour bann rezon ki Minis in donnen bomaten, sa larzan pa ti sifizan.

Par egzanp en dimoun ki ti reste tousel dan en lakaz, e ki ti annan apepre 1 met rakor ant meter avek son tiyo, in ganny R250, 000.

En lakaz kot i annan 7, 8, 10 dimoun pe reste ti ganny R250, 000.  En lakaz ki’n bezwen pran – e mon konnen i annan plizyer.  Zot bezwen depans tou zot R250, 000 zis pour ranplas tiyo avek tenk, ranplas tiles eksetera.  Zot, zot pa’n ganny nanryen finalman at the end of the day.

E se pour sa rezon ki sa case in ganny fayle Ankour pour rod en top-up.  E sa case in ganny fayle parey bann zabitan La Misère i konnen.  Kont Lerwa Abu Dhabi, ASCON son kontrakter, Gouvernman Sesel e PUC.  Lerwa akoz later pour li, ASCON akoz se li ki ti fer polisyon, PUC akoz se li ki’n anmenn delo polye kot bann dimoun, e Gouvernman akoz i pa’n monitor sa bann keksoz ki pe arive.

Lerwa li in plede ki li i en Lerwa ki ou pa kapab anmenn li Ankour.  In anvoy 2 Avoka sorti L’Angleterre, e li in dir i a depans sa ki i bezwen pour li defann sa zafer.  Bann zabitan La Misère pa ti pour antre dan en lager avek zonm pli ris dan lemonn antye.  Alor nou’n tir Lerwa ladan e case in kontinyen kont ASCON, PUC ek Gouvernman.

E sa case Mr Speaker parey nou konnen, se ou ki premye, premye plennyan ladan.   Akoz se ou, ou pa’n pran ou R250, 000 pour ou gard sa zafer ouver e alive.

E sa ki’n arive.  Olye anmenn 1,400 dimoun Ankour, desizyon in ganny pran avek bann rezidan La Misère, ki nou pour pran 5 dimoun.  1 rezidan ou menm, en dimoun ki pa rezidan, me ki i annan en lakaz La Misère, en reprezantan lekol La Misère, staff ki pa reste ek etidyan ki pa reste, me ki’n servi delo.  Menm zafer pour STA.   Ek en 5enm kategori bann dimoun ki travay La Misère, me ki pa neseserman reste La Misère.  Donk pour kouver tou bann kategori posib.

Case in fini ganny ekoute li.  Case in al Ankour, tou dimoun in donn levidans, in fini ganny ekoute.  Me ler in ariv ler pour Gouvernman anmenn son temwen.  Prezidan in fer sa promes avek nou Lasanble e an bonnfwa nou ti demande aret case.  Akoz Prezidan in donn en langazman e i en case ki nou devret swiv langazman Prezidan an bonnfwa.  E se sa ki’n ganny fer.

Mr Speaker, mon kestyon pour Minis avek sa pti background,  ozordi se,  Minis mon annan nou en problenm.  Akoz anba separasyon pouvwar, bann Ziz Ankour in dir, nou pa kapab esper plis ki sa.  Nou pa kapab antre dan zot negosyasyon avek Prezidan Larepiblik.  Sa i en Brans Egzekitiv.  Si peyman pa pe ganny fer, zot in fikse en dat.  Par sa dat case pour kontinyen.

Mon kestyon bomaten Mr, Minis pour ou,  se eski ou kapab an bonnfwa – bomaten tel parey bonnfwa bann zabitan La Misère ki’n aret zot case, ki ti a’n fini byen lontan by now, si Prezidan pa ti’n donn sa langazman.  Eski nou annan?  Ou’n mansyonn 6 mwan.  Me mon bezwen pous ou en pe plis.  Eski nou annan ou garanti ozordi ki avan ki nou bezwen retourn Ankour pour kontinyen case, ou ava kapab fer en deklarasyon ki i ava satisfer bann zabitan La Misère, e satisfer Zidisyer?  Pour ki nou kapab tir sa case an konesans ki konpansasyon i a’n fini ganny aksepte, menm si i pa’n ganny peye ankor?  Mersi Mr Speaker.

 

MR SPEAKER

Mersi Onorab Georges.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Annefe mon vwar ou fer en statement ki klarifye bokou keksoz.

Me mon annan kantmenm en kestyon pour mon, atraver ou Mr Speaker repoz Onorab Georges.  Pour mwan donn ou en lasirans oubyen en desizyon lo en dat, i enportan ki mon konnen kan sa case pour ganny repran par Lakour.  Ou pa’n mansyonn sa dat.  Alor i enportan ki mon ganny en lendikasyon si dan 6 mwan, mon krwar i ok.

Si dan 1 semenn, mon pa konnen mwan.  Akoz nou osi nou bezwen respekte sa desizyon Lakour.  Nou pa kapab al kont li.  Akoz nou pe koz inikman la lo sa ka polisyon, sa ka konpansasyon pour polisyon delo sal.

So se sa ki mon krwar i enportan.  E Prezidan Larepiblik letan i ti fer son deklarasyon, annefe i ti dir ki, e i ti fer en apology ki Gouvernman ti at fault lo sa ka.  Me kontrakter ti at fault lo sa zafer dyezel.  Mon krwar sa i osi kler e i repran sa lenformasyon ki ou ti pe donnen taler dan ou statement ki ou’n fer.  

        So vwala Mr Speaker, mon krwar i enportan ki Onorab i donn mon en dat pour mwan get a feel ki mannyer mon pour reponn sa kestyon.  Mersi.

 

MR SPEAKER

Mersi Minis.  Onorab Georges.

 

HON BERNARD GEORGES

Mersi Mr Speaker.  Mr Speaker de pti keksoz.  Premyerman avan mon donn en dat.  Minis ka dyezel i, i dan menm sityasyon, me i tre probab ki ka dyezel i ava ganny en laranzman ki nou tonm lo la avan prosen dat Ankour.  Tre probab.

Me sa dat pour case polisyon delo, i pa semenn prosenn, i pa pour avan mwan juillet.  I posib ki pour an Septanm, me i pour avan sa 6 mwan ki ou’n donnen.  E se sa ki anmenn en serten lenkyetid.  Akoz Sef Ziz ki pe ekout sa case, in dir i pour kontinyen ekout case sa zour si napa en laranzman ki ganny met devan li.

 

MR SPEAKER

Mersi Onorab Georges.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Bon, alor sa ki mon kapab konfirmen, nou ava fer tou le neseser e Attorney Zeneral i o bor mwan la, i pe tann ki mwan.  Ki nou bezwen travay avek sa mwan butoir ki pa pli tar ki Septanm 2019.  Mersi Mr Speaker.

 

MR SPEAKER

Mersi Minis.  Mon ava pas la parol avek Onorab Johan Loze.

 

HON JOHAN LOZE

Mersi Mr Speaker.  Bonzour tou dimoun prezan.  E tou dimoun kot lakour.

Mr Speaker si Minis ti kapab reasir Lasanble, ki tou konsern bann zabitan La Misère pour ganny pran an kont dan sa settlement? Premye.

Apre Mr Speaker.  Mon oule ki Minis i donn, i esey donn en lasirans Lasanble ki le moman ki settlement  in fini ganny fer, ki i pour vin kot Lasanble e i ava fer en statement, pour eklersi byen kwa ki’n ganny fer pour bann zabitan La Misère.

Rezon mon pe dir sa Mr Speaker, in annan lenstans dan lepase kot dimoun in resevwar settlement avek Gouvernman.  Zot reste trankil lo la, apre bann sityasyon i kontinyen.

Be mon krwar pour nou fer loner bann zabitan La Misère, e onor sa soufrans ki zot in pas atraver, ki tou bann keksoz lo non latransparans i a ganny deklare klerman.  Pa parey bann sityasyon ki’n arive le pase ki dimoun i kontinyen desann anvil toulezan tir portre, isi laba e apre dimoun i kestyonnen si settlement in ganny fer ou non.  Mersi Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi mersi Mr Speaker.  Mersi Onorab pour ou kestyon.  Parey ou, mon ekspekte ki letan nou’n fini peye, par fotespere Septanm 2019 ki sa i ava full and final settlement.

Menm ki dan premye ka peyman R250, 000.  I ti sipoze full and final settlement.  Me i pa’n le ka parey ou’n fer resorti.

Mwan mon pare pour retourn dan Lasanble Nasyonal pour fer en Statement pour met tou o kler lo sa zafer, once ki tou keksoz in ganny finalize.  E mon ekspekte efektivman ki sa se dernyen and final round sa zafer konpansasyon pour La Misère.  Mersi Mr Speaker.

 

MR SPEAKER

Mersi Minis.  Onorab Ferrari.

 

HON JEAN-FRANÇOIS FERRARI

Mersi Mr Speaker.  Mr Speaker mon ti a kontan demann Minis.  Minis mon mazinen ou pa pour konn tou bann detay sa ki’n pase, avan sa ler bann konpansasyon per household ti ganny deside.  Akoz ou pa ti dan Gouvernman sa lepok.  Me Minis ou kapab krwar mon ki en kantite politik ki ti zwe ladan.  E laprev se ki laplipar peyman dan sa R99milyon ti ganny fer zis avan eleksyon 2011.

Alors eski Minis, eski ou, nou kapab trouv en fason pour nou rekonfort?  E bann zabitan ki’n ganny afekte e dir zot pa bezwen perdi lespwar.  Akoz pa bezwen dekouraze akoz Eleksyon pe vini.  E ki o pli tar mon mazinen, o pli tar lannen prosenn.

E mannyer mon pe gete la i kapab, en pli boner tou.  O pli tar lannen prosenn sa Gouvernman ‘’pour larg dilo!’’  Alors’’ by hook go by crook’’ i pour arive, e mwan – E   sa set en tradisyon ki zot in abitye nou avek.  Alors  mwan mon ti a kontan si nou kapab tonm dakor lo la.

Me 2enm pwen Mr Speaker,  se ki nou tou mon krwar o tour sa, dan sa Lasanble enkli Minis i, nou annan dout si sa R15milyon pour sifizan pour finaliz sa full and final settlement.  Alors mon pe dir sa, san –  anfen avek en pe politik ladan parey mon abitye – pou dir ki, vi ki sa bann lensidan in arive anba lepok ansyen Prezidan Michel;  e ansyen Prezidan Michel ti en bon dalon.  E mon krwar i ankor en bon dalon avek Sheik Khalifa.  Ki Sheik Khalifa li i pa’n donn nanryen, Onorab Georges in dir nou;

Konmsi la kekfwa ki ansyen Prezidan Michel i en pe –  i napa tro bokou keksoz pour li fer;  Konmsi pa ti kapab apwent li koman en Anbasader pour li al vwar en pti pe Sheik Khalifa pour dir, be met en keksoz li osi akoz li osi i ti, in refiz-e mete!  Met en keksoz lo sa 15 milyon, top-up sa 15 milyon, nou a kapab ganny en keksoz en pe plis pour nou kapab soulaz en pe bann soufrans.

Konmsi, eski sa i en opsyon ki ou Gouvernman Msye Minis i kapab konsidere silvouple?  Mersi.

 

MR SPEAKER

Mersi Onorab Ferrari.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pour ou lentervansyon e ou kestyon.  Mon krwar pour rezim en pti pe sa ki nou’n diskite i kler pour mwan ki de tout le fason, nou annan 15 milyon dan Bidze 2019.  Nou pour bezwen peye sa 15 milyon an 2019.  So dat butoir, se septanm 2019 pour nou respekte Lakour.  Me o pli tar, i pour bezwen dan sa 6 mwan ki mon ti dir 2019.

Alor si napa ase –  sa propozisyon ki ou pe fer, i sertennman en propozisyon enteresan.  So parey mon’n dir, les mon a etidye sa dosye mwan osi.  Akoz mon napa eleman sa dosye, pour mwan regarde lo son plan legal, lo son plan contractuel kwa ki i annan e ki posibilite i annan, avan ki nou fer demars pour sezi sa propozisyon ki ou’n fer, ki ase enteresan, e ki nou kapab regarde ki nou pour fer avek.  Mersi Mr Speaker.

 

MR SPEAKER

Mersi, mersi Minis.  Onorab Chantal Ghislain.

 

HON CHANTAL GHISLAIN

Mersi Mr Speaker.   Bonzour tou dimoun.  Mr Speaker mon kestyon pour Minis se;  mon’n aprann osi ki i annan en madanm or, i annan ankor posib i osi annan ki i ti pe fer lekol sa letan kot La Misère kot STA.  And sa letan i ti pregnant sa madanm, and an rezilta sa, i ti perdi son zanfan.  Eski i osi son konpansasyon i pour gannyen?  E sa zanfan, sa unborn child ki i ti perdi sa letan, eski li osi i pour resevwar son konpansasyon?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab parey ou ava konpran e ou ava aksepte, i pa vreman mon desizyon.  Me si sa madanm in fer en claim, donk i ava ganny etidye par sa task force, i ava ganny etidye par sa 3 wise men enkli Mr Prokirer Zeneral.  E zot pour baz zot desizyon lo merit sa claim ki sa madanm in fer ki ou’n met devan nou.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  E bonzour spesyalman bann dimoun La Misère ki mon pe regard zot, zot pe ekout avek bokou latansyon.  E zot annan rezon.

Mr Speaker, eski Minis i kapab dir nou, e enform bann dimoun La Misère ki poudir sa sonm 15milyon ki dan Bidze, si nou pe koz lo 1, 400 dimoun anviron, ki poudir konpansasyon ki zot sipoze gannyen i pour tonm anvironR10, 000.

Parski mon krwar ki sa i bezwen kler.  Parski letan nou pe fer en kalkil direk ki konmsi tou sa letan ki zot pe espere, ki pe monte, desann.  Sa ki Gouvernman in mete, se pour zot ganny R10, 000.  E nou pa konnen ki mannyer sa, konmsi konfirm sa Minis ki i pour tonm R10, 000.

2enm kestyon.  Minis ou’n dir avek nou ki dan sa 90 milyon ki ti peye.  I reste R4, 000.  Ok i reste R4, 000.  Be si i reste R4, 000,  ki mannyer ou pour pey Onorab Speaker son 250, 000?  I pa’n pran li!

Savedir i bezwen annan en keksoz la ki kalkil pa bon.  Mr Speaker, eski Minis i kapab donn Lasanble Nasyonal  letan i ava ganny bann dokiman, en dokiman detaye ki montre lekel bann dimoun ki’n ganny peye dan sa R99milyon!

Detaye, akoz zot ti bezwen sinyen.  Pour nou kapab ganny sa detay akoz i annan tro bokou bann keksoz ki, i annan keksoz la ki pa’n mars byen.  Sa depandan lo ou larepons, mon annan en pti kestyon ankor pour mwan demann ou Minis.  Mersi bokou.

 

MR SPEAKER

Mersi Onorab.  Minis.

 

MINISTER MAURICE LOUSTAU- LALANNE

Mersi Mr Speaker e mersi Onorab pour ou 3 kestyon.  An sa ki konsern sa 15milyon, parey mon’n eksplike.  Letan nou ti pe prepar Bidze 2019, ti en sonm ki nou ti mete.  Me mon re konfirmen ki nou ti napa bann detay.  E ozordi si efektivman sa kalkil ki ou’n servi, i R10, 000.  Me baz sa 15 milyon i pa ti baz lo R10, 000 par latet.  Akoz nou ti napa okenn sa bann sif.  So i zis en provizyon bidzeter 15milyon ki nou ti mete dan Bidze.

So mon krwar i pa tro korek pour dir, nou ti deza pran en desizyon ki nou ti pour donn R10, 000 sak zabitan ki ti ganny afekte atraver sa ka polisyon.

Wi Mr Speaker –  mon annan tou detay.  Par egzanp letan mon pe regard La Misère ‘’Water Pollution.’’  Sa i en lalis No. 1 ki mon annan, e mon annan apepre 15, 18 lalis.  Lo sa lalis Nimero 1, i household No.1.  I annan non en dimoun, e i annan sonm ki i ti gannyen R250, 000.  Nimero 2 household i No. 14.  I annan non sa dimoun, e i annan son R250, 000 e i kontinyen ensidswit.

E lo sa premye paz i ariv 46, son household No  i 55.  I annan non sa dimoun e sa sonm.  Pour en total lo sa premye paz R11.5milyon.  E apre i kontinyen and so on.  So ou ava vwar tou sa bann detay letan mon ava fer sa dokiman paveni kot Lasanble Nasyonal.

Trwazyenm prezan in sap mwan la.    Ah wi, wi.  Ou annan rezon.  Akoz sa R250, 000 pour Mr Speaker i pa dan en Holding Account, i pa dan en Suspense Account, i pa la li.  Akoz nou’n disburse tou sa larzan ki nou’n gannyen e i reste zis R4, 000 ki menm nou’n transfer Trezor.

So sa kont kot nou ti pe pey sa bann konpansasyon, in frenmen ozordi.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Be Mr Speaker mon premye kestyon pour Minis se, si i pa en lenzistis anver Mr Speaker e sa enn de dimoun?  E sa dan li menm li i montre ki poudir zot in mal balans keksoz!  Parski ou pa kapab annan tou bann dimoun laba, e ou annan en rezidan la ki pa’n sinyen, e finalman son larzan pa la.  Mon ti ava kontan ou ava eksplik mwan.  Parski sa i larzan ASCON sa enn.  Savedir larzan ASCON in mal partaze li.  Parski napa pour Mr Speaker.  Sa i premye.

Dezyenmman.  Mr Speaker mon pa ganny en konpran ki mannyer Minis i dir avek Lasanble ki sa 15milyon, se zis en sonm ki zot in mete.  Me selman lo lot kote Minis i annan lalis tou bann household.  Savedir ou annan en lendikasyon.  E la ou’n mansyonn sa chiffres anviron 1, 400.  Savedir ou annan tou sa bann detay ki, Gouvernman in annan tou sa bann detay.

E ki la aprezan si ou pe dir 15milyon,  e kalkil in montre ki poudir zot pour ganny R10, 000 ankor an plis.  E mon’n ganny en text vreman ras ker sorti kot en rezidan La Misère ki pe dir ki son zanfan i ankor malad.

E menm letan mon koz avek Mr Speaker e mon koz avek plizyer bann lezot dimoun La Misère, ki ankor pe soufer depi ki sa problenm in arive.

I annan zot ki ankor pe bezwen anmenn, al aletranze pour al rod tretman ensidswit.  E, savedir zot ankor pe soufer.  E konmsi ziska aprezan mon pa ankor vwar-?  Konmsi vi ki sa bann maladi ki sa bann dimoun i gannyen.  I bezwen sorti Lenn sa bann maladi, parski sete bann Endyen ki ti la.

Eski napa posibilite pour pran – an relasyon avek Lenn pour anmenn en delegasyon medikal.  Parski zot kekfwa zot konnen sa bann bakteri.  Kekfwa nou bann dokter isi ensidswit pa abitye avek sa bann – Konmsi pour ki i annan en klinik spesyal ki ganny fer pour rezourd sa problenm lasante ki bann dimoun pe gannyen – enn fwa pour tou.

Parski si non, R15, 000, R10, 000 e nou pe dir apre sa, reste trankil.  Be nou tou nou konnen ki poudir ou pa kapab reste trankil.  Parski ou pey mwan la, me selman i annan bann lezot keksoz ki i arive.  Mon bezwen kapab fer lezot claim.  Parski-

E  mwan mon krwar ki poudir Minis finalman ki poudir 11an pli tar, 11an pli tar nou ankor pe koz menm keksoz.  Pour mwan sa i vreman fatigan.  I vreman fatigan kan ou vwar bann lezot aksyon ki Gouvernman zis monte Baie Ste Anne, laba Anse Boudin, zis kas bann keksoz.  I annan serten keksoz ki zot fer vit.  Me selman ou krwar pour bann zabitan La Misère keksoz i kontinyelman zis trennen.   Trennen, trennen.  Alors Mr Speaker, vi ki Minis in dir ki sa 15 milyon i pa en sonm ki pour sifizan;  eski mon kapab demann Minis be, – e in donn 6 mwan.  Kan eski zot pour vin devan Lasanble avek en Bidze siplemanter pour fer sir ki bann dimoun La Misère i ganny en larzan, en konpansasyon apropriye pour sa ki zot in pas ladan.  Akoz i fasil pour nou dir, bann dimoun La Misère zis koman zot ganny zot pti mwenza, reste trankil.

Se parski nou, e sennla ki’n koze avan.  Li i pa’n bwar sa delo.  Me sa dimoun La Misère ki’n bwar sa delo, ki toulezour son – I pa konnen kot son lasante i ete.  En zour i santi son latet i fermal, apre midi son lekor antye ki fermal, son landmen son vant ki fermal.  I napa kontrol.

Mon krwar ki nou bezwen montre en pe plis konpasyon e rezourd sa sityasyon enn fwa pour tou.  Alor kan eski nou kapab vwar en bidze siplemanter?  E sa i en keksoz ki nou pe dir ek bann dimoun La Misère.  Deswit koman ou vini Minis, nou pour aprouve pour nou kapab donn sa bann dimoun en keksoz konkret, bann zabitan La Misère.  Mersi bokou.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab rezon akoz ki sa 250, 000 pour household Mr Speaker, i pa la,  se akoz dan Lakor avek ASCON, se nou pey sa konpansasyon avek tou sa bann dimoun ki’n aksepte.  So la, la rezon akoz i pa ladan.  Alor si Lakour demen i donn nou en zizman pour en sonm.  Nou pour bezwen rod sa larzan e pey accordingly.

Sa 15milyon ki dan Bidze 2019 parey mon ti dir.  Se en sonm aproksimatif ki nou ti mete.  Akoz nou ti pour bezwen met en pe konpansasyon pour bann ka bann zabitan La Misère.

Me depi sa letan ziska ozordi, sa task force in fer en serten travay.  E sa travay ki zot in fer ozordi, se la ki i komans montre.  Akoz zot oule pey par latet.  Konbyen dimoun i annan dan sa bann household parey mon’n eksplik ou la?

E sa sif aproksimatif i ariv 1, 400.  Se bann lenformasyon ki pe vin a nou laporte, a nou latansyon maintenant.

E donk parey mon’n dir, e mon re konfirmen, sa sonm 15 milyon pa pour ase.  Akoz sa Komite zot osi zot annan en lendikasyon konbyen zot santi nou kapab propoze avek bann zabitan La Misère pour zot konsidere.  Me sa pa ankor ganny fer.  Se pourquoi dan mon larepons mon ti mansyonnen ki i neseser ki tou sa bann keksoz i ganny finalize e apre ki Minister Finans i ganny enformen.  E enn fwa ki nou ganny enformen, nou a konnen.  E nou pour anmenn sa Bidze siplemanter kot Lasanble le pli vit posib.  Akoz nou osi, parey ou Onorab nou anvi ki sityasyon i ganny regle enn fwa e pour tou.

E mon note ki efektivman zot ava konsider sa demann pour en Bidze siplemanter pour peyman konpansasyon dan ka polisyon La Misère favorableman.  Mersi Mr Speaker.

 

MR SPEAKER

Mersi Minis.  Onorab Ramkalawan

 

HON WAVEL RAMKALAWAN

Mr Speaker, zis de pti kestyon vit.  Pour mwan premyerman dir avek Minis.  Minis, sorry Mr Speaker mon bezwen servi ou koman en legzanp akoz ou, ou enn sa bann dimoun ki pa’n pran.

Mr Speaker ti’n fer laplikasyon!  Parski ti annan 2 staz sa.  Fer laplikasyon e apre sa peyman.  E sa sonm 250 ti baze lo laplikasyon.  Ki vedir letan in fer son laplikasyon, son non ti la pour son 250, 000.  Be letan i pa’n vin rode, son larzan i devret la.  Be kote son larzan in ale?  Ok?

Dezyenmman –  letan ou pe dir ki – parski Minis la mon pa pe tro ganny en konpran letan ou’n premye kou ou’n dir ou pa konnen konbyen dimoun ti annan.  Alors sa chiffres 15 milyon sete en chiffres aproksimatif ki zot in mete.

Me selman la, dan ou dernyen larepons ou’n dir ki, sa Komite i annan en lendikasyon lo konbyen zot anvi donn bann dimoun lo sa konpansasyon.

Eski ou kapab dir avek Lasanble, konbyen anviron?  I pa pour en chiffres egzakt e tou dimoun i bezwen pran li ki pa en chiffres egzakt.  Konbyen anviron zot pe mazinen pour zot donn bann zabitan par tet?  E sa ou’n donn nou en nouvo mo ozordi ‘’date butoir’’ konmsi zot anvi propoze avan sa ‘’date butoir.’’  Mersi bokou.

 

MR SPEAKER

Mersi Onorab.  Minis.

 

MINISTER MAURICE LOUSTAU- LALANNE

Mersi Mr Speaker.  Mersi Onorab.  Onorab ou premye klarifikasyon, mon pour bezwen al verifye.  Akoz mon napa sa lenformasyon at hand.  Les mon al verifye lo ka spesifik Mr Speaker.  Lo ou 2enm pwen.  Letan mon ti prepare pour mwan vin reponn sa kestyon, se la ki mon’n ganny konesans serten dokiman.

E sa,  enn sa bann dokiman efektivman, se en dokiman ki’n ganny transmet a Prezidan Larepiblik, kot i annan serten propozisyon ki ganny fer pour konsiderasyon, apresyasyon Prezidan Larepiblik.

So dan sa propozisyon dan sa let si oule, i annan serten sif ki ganny mansyonnen.  E mon pa santi mwan alez pour mwan dir ou kwa egzakteman i sa sif.  Akoz i annan en sif pour adilt, i annan en sif pour zanfan and so on.  Sa bann propozisyon i ganny detaye koman en footnote dan sa let oubyen sa dokiman.  Me i sertennman plis ki sa sif ki ou, ou’n mansyonnen R10, 000 dan sa R15milyon.  I plis ki sa.  Me mon pa pour.  Mon pa santi mon konfortab e alez pour mon dir piblikman sa propozisyon.  Akoz i en propozisyon serten dimoun ki fer, ki pe sey rod en rezolisyon dan sa problenm.  Mersi Mr Speaker.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Mersi Mr Speaker.   Bonzour Mr Speaker.  Bonzour Minis ek ou delegasyon.  Bonzour tou bann Manm Onorab.  E osi bonzour bann dimoun zabitan Pointe Larue ki la, e bann zabitan La Misère, espesyalman serten mon bann zanmi nou’n zwe dart ansanm.  Mon vwar li la.  E osi tou dimoun ki a lekout.

Mr Speaker it is very sad.  Mon mwan vwar sa sityasyon i sad ki tou letan sa issue i ankor devan nou.

Premye keksoz mon ti ava anvi konnen mwan, lekel ki pe chair sa Komite?  Sa task force la, sa groupman, sa ki pe deal ek sa deal la, lekel ki pe Chair?

E enportan fer sorti osi ki Prezidan in byen fer li.  Li an bonnfwa letan – mon rapel ou menm Mr Speaker, Onorab William, Onorab Georges ti’n vwar Prezidan, zot in diskite, zot in koze avek li.  E dan sa lanbyans, dan sa lespri, pour anmenn en closure avek tou sa ki in donn son commitment.  E prezan, sansan i ti a’n pran li menm li, i ti a’n dir konbyen i pour donnen.  Be i pa kapab fer sa.  I bezwen anvoy sa, donn sa responsabilite, sa task force.  Alor lekel ki Chair sa taskforce?

E ler mon’n ekout Onorab Georges taler.  Mon’n ekout atantivman sa ki, sa summary ki in fer.  Me zot konnen plis ou mwen lekel ki bezwen ganny peye.  Bann dimoun ki’n vin devan, savedir bann adilt, bann zanfan, bann etidyan, bann travayer ki ti an deor La Misère ki’n travay La Misère, e sa i enkli detrwa dimoun Cascade ki mon konnen, mon’n anvoy kot biro pour fer zot claim. 

E nou konnen.  E prezan ou’n nonm en sif.  Savedir zot bezwen kapab deside konbyen sak sa bann dimoun i bezwen ganny peye.  Zot in agree lo en sif.  Dir nou si in agree oubyen non?  Si zot in agree, then mon pa pe vwar kote problenm i ete.  Me si zot pa ankor agree lo en sif konbyen pour pey sak dimoun,  akoz zot pa ankor agree?

E petet la.  zot in nonm taler Onorab Georges Mr Speaker, Onorab William zot osi mon krwar zot lo sa task force la.  Be zot osi zot la dan nou Lasanble ek nou.  Esey dir nou akoz zot pa ankor agree, pa ankor ariv lo en sif?   Konmsi kot sa problenm i ankor ete?  Eski i avek Attorney Zeneral problenm?  Eski i avek sa task force sa Chairman?  Sa task force dir nou osi la, pour nou Lasanble ek bann dimoun ki pe ekout nou, kot sa problenm i ete?

E Mr Speaker en lot pti pwen,  i enportan mon demann sa kestyon.  Akoz mon’n ganny aprose avek bann dimoun.  Bann solda ki ti Barbarons la, eski zot osi zot in ganny peye dan sa bann konpansasyon?  E si wi, eski zot in resevwar zot peyman?

E dernyerman Mr Speaker.  Ler mon’n ekout Minis in pas lo en lalis taler devan li.  In nonm bann bout 35mil 40mil, 45mil ki’n ganny peye en pe partou, partou, an deor sa 250,000.  Eski zot kapab eksplik nou, kwa sa bann bout ankor apard sa 250, 000 ki’n nonmen.  Mersi bokou.

 

MR SPEAKER

Mersi Onorab De Commarmond.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Ankor enn fwa, konmsi i annan bokou kestyon.  Onorab mon dakor avek ou sa sityasyon i vreman sagrinan.  Me nou bezwen, e nou la pour nou trouv en solisyon.  E pour le pli vit posib, mon krwar se sa lentansyon tou dimoun.

Alor premye larepons.  Task force li i strikteman dan biro Attorney Zeneral.  E sa task force ki Attorney Zeneral in apwente, se son Chairman, se sa Principal State Council.  E li i akonpannyen par en lot zofisye.  E o fir a mezir ki keksoz pe ganny travay, Attorney Zeneral i anmenn enn de lezot dimoun pour fer sir ki nou annan progre.

E parey Onorab Gill ti mansyonnen,  si fodre sorti lo 3 pour met 5, 5 met 8.  Se en pe sa konversasyon ki nou pe sey fer.  Alor pour le moman, sa Chairman se Mr Cina Samy.  Se li ki ansarz sa task force ki dan biro Attorney Zeneral.

Alor pour repran en lot kestyon,  se ki bann Manm Onorab ki mon’n mansyonnen dan mon larepons zot, zot pe ede pour fasilit sa demars pour ariv lo en konklizyon.  Zot pa partie prenante sa taskforce zot.  Ok me zot la pour fasilit enkli Mr Speaker.  So koumsa ki mon mwan konpran sa sityasyon.

E alor finalman, mon pour bezwen dir ki  mwan mon pa pe saye mwan.    Me solman mon bezwen met en bon pe blanm lo biro Attorney Zeneral kantmenm Attorney Zeneral i o bor mwan.  Mon bezwen met en pe sa lour en pe lo li.

Mon ti dir dan komansman,  ki dan Bidze, e tou Manm Onorab zot in dakor pour nou annan en pe plis larzan dan Bidze pour Prokirer Zeneral pour li regle detrwa kontrent mazer ki ti annan dan son biro.

Biro Lanrezistreman i enn par egzanp, kot nou konnen par ler biznesmenn i dir, i pran tro bokou letan pour anrezistre biznes eksetera.  Akoz i annan kontrent laba.  Nou’n donn li en pe plis larzan pour li re organize.  I annan nouvo biro, pli gran biro, plis lekipman IT eksetera.  I mank bann legal draftsman pour nou nobou pas nou bann Lalwa mon’n mansyonnen.  Nou’n donn li.

E letan nou’n met sa bann keksoz an plis, i fer son travay difisil.  Me i bezwen aksepte responsabilite, i pa pe sekwe son latet.  Me mon bezwen met tou blanm lo li.  E vwala repons ou kestyon se biro Attorney Zeneral, biro Attorney Zeneral, biro Attorney Zeneral.

 

(laughter)

 

MINISTER MAURICE LOUSTAU- LALANNE

Lo dernyen kestyon.  Les mon a sirkil sa dokiman, apre zot a vwar.  Parey mon dir i annan household 250, 000.  I annan 2nd household.

E 2nd household li in ganny mwens ki dan 250, 000.  Mon pa rapel si mon ti donn sa sif.  Me wi, sa 2nd household zot, zot in ganny zot R44, 355 sakenn sa bann household.  E apre sa i annan lezot, parey mon’n dir osi ki zot ava vwar.  Les mon a sirkile apre nou kapab donn bann leksplikasyon pli detaye.  Mersi Mr Speaker.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker eski Minis- I pa’n dir nanryen lo zafer solda.  Mon ti’n demann li, bann solda ki ti Barbarons.

E anmenmtan, lefe ki Attorney Zeneral i o bor ou zisteman.  Nou konnen son presyon ki i annan, nou konnen enorm task ek bann file, bann travay ki i annan dan son biro, e i pe seye menm.  Eski selman la i kapab donn en priyorite? Lefe ki i o bor ou.  Eski i kapab dir ou en pti keksoz ki en pli short time, pli pti gin dele ki kapab donn sa bann sif?

Akoz si i donn sa bann sif.  I pour fasil pour nou kapab compute e la keksoz i kapab bouz pli vit e Onorab Georges pour happy.  E pa bezwen esper Septanm pour case Ankour.

Mon krwar sa kestyon sif.  Petet dan, menm mwens ki 2 mwan.  Dan detrwa semenn sa mon krwar i kapab donnen si zot anvi.  Eski i kapab donn en commitment lo la lefe ki i o bor ou?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Wi Onorab bann solda zot in fer kler.  Me zot claim i a ganny konsidere.

E lo ou dernyen pwen, efektivman mon krwar nou tou nou dakor ki an deor sa dat butoir Septanm 2019 si nou kapab fer li pli vit?  Nou ava fer li pli vit.  E mon avek Attorney Zeneral nou ava kordin pour fer sir ki nou kapab fer sa travay le pli vit posib.  Mersi Mr Speaker.

 

MR SPEAKER

Mersi Minis.  Mon a retourn kot Loter kestyon, i ti’n relev son lanmen.  Onorab William.

 

HON WAVEN WILLIAM

Mersi Mr Speaker.  Mr Speaker baze lo tou sa bann kestyon ki’n ganny demande, avek larepons ki’n ganny donnen.  Mon ti a kontan met lo rikord ki mon eksprim mon dezapwentman.

Mon dezapwentman akoz letan mon pe regard sa bann kestyon ki mon’n demande,  mon bann kestyon i byen detaye e targete baze lo nivo travay ki nou’n arive.

E mon pe eksprim mon dezapwentman.  Akoz mon santi poudir ozordi nou ti’n devret ganny serten larepons pli konkret.  Me selman prenon kont serten bann lenformasyon ki Minis in fer sorti.

Mr Speaker mon ti a kontan ki enn.  Avan ki nou _ sa Komite i zwenn avek biro Attorney Zeneral.  Premyerman mon ti a kontan konnen si sa Chairman ki pe okip sa Komite Task force la,  Mon pa ganny en konpran mwan.  Se ki si i pa kapab fer sa travay, eski lofis Attorney Zeneral i a konsider donn sa responsabilite avek en lot dimoun?

Akoz letan mon regard sa kantite meeting ki’n nou’n fer, e parfwa ou a krwar poudir lenformasyon i perdi.  Mon pa konnen si vre i perdi ouswa i en zwe.  So si problenm i avek Chairman, mwan mon demande ki biro Attorney Zeneral i pran aksyon lo la.

E dezyenmman.  Nou ti a kontan letan nou zwenn avek biro Attorney Zeneral, nou annan en roadmap.  E parey Minis ou’n dir ou menm, si nou pe dir 6 mwan.  Me letan mon regard nivo travay kot nou’n arive, i pa devret pran 6 mwan Minis.  I pa devret!

E mon mwan tonm dakor avek serten Onorab ki’n dir davans, se ki nou kapab fer sa travay en pti pe pli boner silvouple!  E pa oubliye poudir Midterm Review i an Zen.  E si nou oule plis larzan, nou pour bezwen fer sa travay ase vitman pour kapab anmenn closure lo sa case.

E dezyenmman Mr Speaker, Minis pa’n nonmen.  Me i annan bann zabitan ki ti pe fer biznes osi, ki zot ka in ganny met devan.  E mon ti a kontan ki Minis avek biro Attorney Zeneral, zot pa mank sa bann dimoun.  Akoz in en pert larzan, in en pert reveni pour biznes zot ti pe fer La Misère.

E finalman Mr Speaker, mon ti a vreman kontan si Minis pour bann parol ki in dir nou, i donn nou sa garanti ki vreman, ki vreman bann zabitan La Misère – Akoz letan mon’n kalkile nou pe koz apepre Septanm.  Me parey mon dir.  Nivo travay ki mon koman Manm Elekte distrik Grand Anse Mahe mon okouran, akoz mon lo sa Komite mwan  mon krwar ki poudir sa travay i kapab al pli vit ki sa.

Alors mon pe lans en lapel avek ou Minis.  Akoz travay i byen avanse.  Annou anmenn closure lo sa case, annou fer en fason ki i bouze.  Mersi.

 

MR SPEAKER

Mersi Onorab William.  Minis.

 

MINISTER MAURICE LOUSTAU-LALANNE

Mersi Mr Chairman.  Mersi Onorab.   Onorab mon osi mwan dakor si ou konfye en travay en dimoun, i dormi.  Ou bezwen lev li.

So mon krwar Attorney Zeneral in ekoute.  E si fodre sanze, nou ava sanze.  Akoz nou’n pran en serten langazman ozordi bomaten dan Lasanble.  E nou ava regarde ki mannyer nou pour fer sir ki sa group dimoun dan biro Attorney Zeneral i kapab delivre sa louvraz.  E delivre sa louvraz on time.

E mon ti a kontan zis refer sorti, ki i pa premye fwa ki bann dimoun dan son biro i deal avek bann ka konpansasyon.  Nou’n koz lo fungus taler, li osi in pran en pe letan.  Me zot annan sa leksperyans, in annan lezot ka konpansasyon osi ki zot in bezwen deal avek.  So i pa konmsi en keksoz nouvo, nou pe tatonn, tatonn-en.  So mon ganny ou pwen kler.  E mon krwar si fodre fer sanzman, zot pour bezwen fer sanzman pour fer sir ki sa keksoz i ganny put to rest once and for all konmdir Angle.

Lo ou dezyenm pwen.  Mon ava zis repete ki i enportan ki sa bann claim ki bann biznes in fer, kot zot biznes in ganny afekte.  Zot ava ganny konsidere parey lo merit sa claim.

Donk avek sa Mr Speaker, mon ti a kontan reasir Manm Onorab ki Attorney Zeneral ek mwan, nou pour fer le maksimonm pour nou meet sa timeline ki nou’n dakor ozordi.  Mersi.

 

MR SPEAKER

Mersi Minis.  Yes, Vitman Onorab Ramkalawan.

 

HON WAVEL RAMKALAWAN

Mr Speaker selman mon anvi dir avek Minis ki poudir lo sa zafer konpansasyon i enn bann size ki sa Gouvernman i trenn zot lipye!  Bann zabitan Baie Ste Anne Praslin obor Power Station i annan plis ki 20an zot ankor pe esper en konpansasyon.  Bann dimoun fungus e la in dir – dimoun La Misere in ariv 11an, mon anvi dir ek bann dimoun La Misere pa bliye ki poudir i annan bann lezot ki annan pres 30an.  E ki zot lasante antretan i annan en kantite zot ki’n mor e la pli par zot laba Baie Ste Anne zot annan en masin en nebulizer akoz zot lasante pa bon.  E la mon konnen poudir i annan serten dimoun ki gravman malad.  Alor nou a pe osi dir avek sa Gouvernman be sakouy zot.  Parey Minis in dir zot pe dormi.  Leve!  Mersi.

 

MR SPEAKER

Mersi.  Mon ava donn en pti parol Onorab De Commarmond osi.

 

HON CHARLES DE COMMARMOND

Mersi Mr Speaker.  Mr Speaker dan menm laliny ou vwar i annan osi konpansasyon kot bann zabitan Pti Paris pou tarmak e tou sa letan pe ganny demande Land Transport i dir ou in fini e keksoz i kot biro Attorney Zeneral.  Mon problenm mon napa nanryen personnel kont Attorney Zeneral se en bon garson, en dimoun ki pe fer son best pou pei, me konmsi nou pe beg avek li son lofis pou kapab – dan lespri ki Minis in dir taler pou sey gete ki mannyer tou sa bann keksoz i kapab ganny speed up.  Akoz a lafen dizour letan keksoz pa pe ganny fer la blanm i vin lo Prezidan, Gouvernman ensidswit parey pe ganny dir.  Kan an realite i pa devret pe koumsa, si sakenn pe fer son bout dan en fason pli efikasman, pli korekteman e pli vit.  Mersi.

 

MR SPEAKER

Mersi, mersi Onorab De Commarmond.  Bon parey in ganny eksprimen, mwan osi mon annan lentere direk dan sa zafer.  Mon ti kliyan prensipal ki ti anmenn sa case.  Mon osi lo sa komite.  Mon annan serten konsern me nou a diskit lo sa Komite e nenport lenformasyon ki ava sorti nou ava osi enform bann zabitan La Misere.  Me petet zis mon ti ava dir avek bann zabitan La Misere, annou pa swiv rimer.  Mon reste La Misere, Onorab William i pase La Misere, nou de dimoun, e zot vwar Onorab Georges nou 3 Manm ki lo sa komite e nou,  nou kapab donn zot lenformasyon ki korek.

Annou aret swiv rimer.  E tou sa bann keksoz ki’n fannen menm semenn pase ki ti pou annan en meeting, nou de Onorab William nou pa ti dan pei.  Pa nou ki’n propoz okenn meeting.  Okenn meeting ki pou ganny fer i pou enkli nou 3 Manm avek biro Attorney Zeneral.  Se sa la fason  ki nou pe travay.  Aret mars ek rimer.  Aret propaz bann keksoz ki pa vre.  Annou sey enn fwa pou tou dan nou pti pei, nou pti pei mon krwar i viv tro bokou lo rimer.  Annou sey fer mannyer nou pran laverite e nou travay avek laverite.

E mon – dan sa menm konteks mon felisit Minis pou –   I nouvo dan sa dosye.  Me pou kapab donn nou otan lenformasyon bomaten isi dan sa Lasanble.  E la mon ti a kontan dir nou pou pran en break akoz mon krwar Minis i bezwen en pti tas kafe parey nou tou.  Nou ava les li pran en tas kafe.  I annan en 2enm kestyon ki nou ava retournen 11er edmi pou nou pran.  E mon lans lenvitasyon ankor avek tou bann envite ki dan galeri, bann zabitan ki’n sorti Pointe Larue e bann zabitan La Misere pou join nou deor pou kapab pran en pti tas kafe ansanm.

Minis mersi pou la avek nou sa preski 2 erdtan depi bomaten pou reponn sa kestyon pou eklersi sa sityasyon lo konpansasyon pou delo polye La Misere.  E mersi osi tou Attorney Zeneral.  Minis nou ava vwar ou.  Nou pou pran en Break e nou pou retournen 11.30 e nou ava re vwar ou.  Mersi.

 

(BREAK)

 

MR SPEAKER

Bon nou ava kontinyen nou travay.  Mon  prezant en pti leskiz pou sa retar ki nou’n gannyen.  Mon ti a kontan an menm tan rekonnet prezans e welcome PS Damian Thesee ki PS pou Finans parmi nou.  Mr Thesee bonzour e welcome.  Ou la pou akonpanny Minis ansanm avek Attorney Zeneral.  Nou ava al direkteman lo kestyon e mon ava pas la parol avek Onorab Clifford Andre.

 

HON CLIFFORD ANDRE

Mersi Mr Speaker.  Bonzour tou dimoun ki a lekout, Minis ek ou delegasyon.  Minis mon kestyon i lir koumsa :-

Swivan lanons fer tar lannen pase ki tou loperasyon Lazans ki finans bann pti biznes, SBFA, pou aprezan transfer avek Labank Devlopman Sesel, DBS, eski Minis pour Finans i kapab dir avek sa Lasanble:

1)    Anba ki provizyon sa transfer in ganny fer

2)    Ki mannyer Lapolis pe fer lanket dan loperasyon sa lazans, ler ki DBS in fini antre pou fer sa transfer

3)     Akoz ki bann dimoun

ki enplike pa pe rimann pandan ki lanket pe ganny fer?

Mersi.

 

MR SPEAKER

Mersi Onorab Andre.  Minis.

 

MINISTER MAURICE LOUSTAU-LALANNE

Mersi Mr Speaker.  Mr Speaker transfer fonksyon SBFA in ganny fer atraver en Vesting Order S.I 12 /2019.  Sa Vesting Order i donn lotorizasyon SBFA pou egzers pouvwar anba Seksyon 6(1) (b) dan SBFA Act 2013 pou li antre dan en Lagreman avek bann lezot labank.  Sa ti ganny sinyen le 13 Mars 2019.  Mr Speaker lanket dan loperasyon sa Lazans pe ganny fer par Komisyon Anti- Koripsyon.  Par kont Minister responsab pou Finans pa dan en pozisyon pou li donn okenn detay lo sa lenvestigasyon.  Sa i akoz parey nou konnen dan en lanket pe ganny fer par en Lorganizasyon ki responsab pou anfors bann Lalwa, pa sipoze annan okenn lenterferans ki kapab konpromi travay sa Lorganizasyon.

Bann avoka pou konn sa koman subjudice.  Par kont ki nou kapab dir sa Lasanble se ki Lazans Anti-Koripsyon in antre dan en Lagreman avek DBS lo ki mannyer son louvraz pou ganny organize otour sa lanket.

Mr Speaker sa ki nou okouran se lanket pe ganny fer.  Lo sa ki konser rimann, sa i form par bann prosedir dan lanket e se lanket ki pou determinen kan e si fodre rimann bann sispe.

Alor nou pa pou dan en pozisyon pou reponn sa kestyon anvi ki i  kapab prezidis sa lanket ki pe ganny fer par en Komisyon endepandan anba son prop Act.

Alor Mr Speaker nou rekomande ki nou permet Komisyon Anti-Koripsyon pou fer son travay anba son manda par swiv bann prosedir legal e teknikal ki pa  pou afekte rezilta son lanket a lafen di zour.  Mersi Mr Speaker.

 

MR SPEAKER

Mersi Minis. Onorab Andre.

 

HON CLIFFORD ANDRE

Mersi Mr Speaker.  Mr Speaker mon ti a kontan met a latansyon Minis ki Seksyon 6(1)(b) SBFA Act pa donn Minis pouvwar pou li transfer responsabilite SBFA avek DBS.  Premyerman, e son larepons an referans avek sa Minis ti a bezwen klarifye akoz sa Seksyon i senpleman donn SBFA kontrer pouvwar pou li antre dan en Lagreman avek en labank.  Me non pa pou en labank pran son responsabilite.

Dezyenmman Minis dan son deklarasyon i ti dir avek sa Lasanble ki poudir in transfer file avek lapolis pou fer lanket.  E la ozordi in donn nou en lot versyon ki pe dir poudir lanket pe ganny fer par Anti- Koripsyon.  Nou okouran ki – Attorney Zeneral i obor ou i annan bann sityasyon ki Anti- Koripsyon in fer bann investigation. Apre letan in ariv kot Attorney Zeneral, Attorney Zeneral i dir pa dan proper format, alor prosekisyon pa pe kapab ganny fer.  Eski sa pe ganny fer avek bi ki prosekisyon pa pou ganny fer menm si en lanket in ganny fer?  Mersi.

 

MR SPEAKER

Mersi Onorab.  Zis nou bear in mind mon krwar ou’n zis lo border.  An vi repons Minis ki lenvestigasyon.  Mon krwar ou kestyon i ok.  I akseptab.  Me pou bann ki pou demann okenn kestyon zis bear in mind parey Minis in deklare, i annan investigation e nou pa demann kestyon ki pou prezidis sa lenvestigasyon.  Minis.

 

MINISTER MAURICE LOUSTAU-LALANNE

Mersi Mr Speaker e mersi Onorab. Onorab parey mon’n fer resorti se ki se SBFA ki ti fer sa.  Pa Minis ki ti fer sa.  E prezan li Prezidan se li ki ti otoriz parey Lalwa i demande, sa Vesting Order anba Lalwa DBS.  So SBFA ki ti fer sa demars, sa rezolisyon, se pa mwan.  Se pa Minis.  Ou annan rezon Minis napa pouvwar anba Lalwa.  Me SBFA i annan.   Donk se sa ki’n arive.  E en fwa ki sa fon in ganny kree prezan li Prezidan in fer en Vesting Order pou donn DBS pouvwar manage sa fon.  Vwala.  Mr Speaker, lo lot pwen se ki wi nou, nou ti ekrir Lapolis e soumet avek Lapolis tou bann dokimantasyon neseser.  Me apre ki Lapolis in fer son travay, lapolis in transfer sa dosye avek Anti-Corruption Commission.  Mersi Mr Speaker.

 

MR SPEAKER

Mersi Minis.  Onorab Andre.

 

HON CLIFFORD ANDRE

Pou le moman mon ava demann sa dernyen kestyon.  Eski Minis i kapab dir nou vi ki i annan bann dimoun ki pe  re pey zot loan e zot ti pe peye pandan letan.  E ozordi letan zot pe demann en kont randi ki normal lo kote zot ete,  konbyen i reste, zot pa pe kapab ganny sa.  E ni en Statement of accounts zot pa pe gannyen.  Zot pe pey R3600, R3700 e zot pa pe kapab konnen ki zistans zot ete e ki kantite i reste pou zot peye.   Eski Minis i kapab dir nou ki son Minister oubyen Gouvernman dan sa konteks akoz SBFA pa egziste, i pe fer pou kapab met sa bann dimoun azour avek zot peyman, e bann osi ki annan pledge, ki ti’n pledge zot bann transpor, zot bann bato, later, zot pa pe kapab tire sa pledge akoz zot pa pe ganny okenn dokiman.  So zot vwar zot kwense zot le devlop zot propriyete oubyen pran en lot loan.  Zot vwar zot kwense zot in fini peye zot.  Pa pe kapab ganny …  Ki son Minister pe fer pou tir sa bann dimoun dan sa lenpas ki zot vwar zot ladan?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Wi Onorab ou’n tous lo en pwen ki efektivman nou okouran.  I annan en serten kantite fristrasyon me sa ki mon kapab eksplike se ki ziska ver lafen Zanvye 2019 nou ti ankor kapab donn bann Statement.  E osi serten discharge notices.  Me a en moman donnen, an vi ki lenvestigasyon ti pe go on ti annan en hold lo la.  E nou osi nou ti bezwen respekte Lalwa pou nou fer sa tranzisyon ant SBFA avek DBS.  E in annan en moman apartir donk Fevriye kot in annan  serten sa fristrasyon en nou aksepte sa.

Me ozordi mon kapab dir ou ki tou keksoz in antre dan lord e nou kapab prezan rekonmans donn bann Statement e osi bann discharge note.  Me pli enportan ki sa, depi ki nou ti sispann bann loperasyon SBFA nou pa’n nobou disburse okenn loan, nouvo loan.  E parey ou konnen SBFA se sa Lazans ki donn loan bann pti biznes a en to lentere ki pli ba.  Se la kot ou konmanse si ou le.  E mon kapab konfirmen ki la osi nou kapab prezan rekonmans donn bann nouvo loan avek sa laranzman ki nou’n fer ant SBFA ek DBS.  Mersi Mr Speaker.

 

MR SPEAKER

Mersi Minis.  Onorab Jean- Francois Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon ti a kontan si Minis i kapab eklersi en pti pe plis si SBFA i aktyelman ankor egziste e ki DBS pe zis manage sa loperasyon?  E si sa i le ka eski son bann kont pe ganny tenir separeman konman en unit oubyen eski in fini merge dan bann kont DBS ?  E alors, si larepons i non, mon pou annan en kestyon apre.  Me selman mon ti a kontan konn status bann larzan SBFA?

Mon 2enm kestyon se i konsern bann staff SBFA Minis,  eski zot transfer avek DBS in ganny fer dapre tou bann regilasyon normal, fason transfer par egzanp eski tou travayer in ganny peye tou zot benefis?  Oubyen eski zot ankor bann anplwaye SBFA si SBFA i egziste ?  Eski:-

(2)  tou bann  travayer ki pa’n ganny transfer eski zot in ofer en  lanplwa?

Eski Minis i konnen si zot dan lanplwa?  E eski bann travayer ki’n ganny aksepte dan en post kot DBS eski Minis i konnen oubyen kekfwa PS i kapab gid li lo la si zot in antre lo en post ekivalan.  Akoz i annan ki mazinen poudir zot in dan sa bann transfer zot in ganny downgraded e zot in ganny forse pou aksepte en pozisyon ki pa ti egzakteman sa ki  zot ti annan kot SBFA. So mon ti a kontan si Minis i kapab reasir sa Lasanble ki poudir tretman ki bann travayer in gannyen dan sa transfer in ganny fer dan en fason korek?

E finalman Minis e avek ou permisyon si ou kapab dir sa Lasanble leta bann loans ki SBFA in donnen?  Esey donn nou en lide how performing sa bann loans i ete?  Akoz nou konnen poudir e Minis i konnen mon krwar Minis in aksepte avan sa ki in annan en pe politik ladan.  Bann dimoun in ganny donnen.  I annan ki pe dir mwan mon ti’n ganny dir mon pa pou bezwen peye.  Eksetera, eksetera.  So ki mannyer eski DBS pe cope avek sa sityasyon pou li manage e fer sir ki sa larzan i ganny accounted for ? Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Wi mon konfirmen ki SBFA i ankor egziste.  Parey ou konnen i en body corporate so son Board i ankor pe fonksyonnen.  E se li parey mon’n eksplike taler ki’n kree sa fon pou apre atraver Vesting Order ganny transfer kot DBS pou DBS manageSo i annan en Lagreman ant DBS ek Gouvernman ant DBS ek SBFA lo sa.

So bann travayer ti annan 15 travayer ki nou ti pe deal avek.  Dan sa 15 travayer i annan 8 travayer ki’n ganny transfer dan lezot landrwa e sertennman lentansyon a lepok ti pou transfer zot akoz zot annan bann konpetans esansyel.  Pa lo en down grade me transfer zot avek en pos ekivalan ou menm atraver interview si zot kapab ganny en pe plis zot ganny en pe plis.

I annan 5 ki ti ganny fer redundant akoz atraver prosedir ki nou ti’n met an plas pou zot soumet zot CV pou nou regarde kote nou kapab transfer zot eksetera, zot pa ti anvi, zot pa ti soumet.  So zot in ganny fer redundant.

I annan enn apre pli tar en dezyenm travayer ki zot in rod zot prop lanplwa en lot landrwa.  So vwala an sa ki konsern bann stati bann travayer.  E bann par egzanp ki’n transfer, i annan ki’n transfer dan Minister Finans menm, dan Minister MHILT kot lasante.  Dan Departman Det, dan Trezor, kot SINEA, ensidswit.  An sa ki konsern kont (DBS) pardon SBFA, la apartir le 16 Avril 2019 mon kapab konfirmen ki i annan R48milyon dan en kont dan son kont labank e ladan nou pou fer en transfer 17milyon ki nou pou tire pou nou transfer kot Agricultural Development Fund.  E sa 31milyon ki pou reste sa i larzan ki nou kapab prezan atraver Labank Devlopman DBS, konmans re disburse bann loan parey ou konnen loan SBFA i sa premye loan R75mil a en to lentere 4poursan ki vreman ba.  Pli ba ki annan.  E par lao R75mil ziska R100mil i 4.2poursan.  Donk DBS i pou kapab avek son striktir ki bokou pli efikas mon asire ki sa ki ti pe ganny fer kot SBFA par lepase, i ava nobou konmans re donn sa bann loan e nou kapab ekspekte 130 biznes endividi i kapab profite avek sa nouvo laranzman ki prezan i an plas.

E parey zot konnen menm osi mon konnen Manm Lasanble ti’n demann nou  par lepase regarde kot nou kapab tir bann diplikasyon  bann servis ki nou pe donnen.  Donk sa i en ka si ou le kot nou pe ranforsi li nou pe met li dan en labank pou manageSo vwala en pti pe istorik sa transfer Mr Speaker.

Nou ti’n annan bann deadline ki nou ti le meet me malerezman sa bann deadline in slip en pe.  Me la tou zafer i legalman teknikman annord e fotespere nou kapab kontinyen lo en meyer semen.  Mersi.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Yes Minis mon ti ava apresye si ou ti donn mwan en larepons lo kestyon how the performing status of sa bann loans?  Eski i annan okenn lenkyetid pou nou annan, ki bann dimoun ki ti deza annan loan avek SBFA ki prezan atraver sa sistenm kot in al kot DBS? I annan serten plizyer aktyelman dimoun ki pe dir be mwan mon pa sipoze rann zot sa larzan sa mon ti ganny donnen lepok eleksyon keksoz koumsa.  Konmsi eski i en major issue the performance of sa bann loan?  Sa i en kestyon ki mon ti’n demann ou boner.

Me additionally mon ti a kontan demann ou pou sey eksplik avek nou Lasanble, ou’n site ki anba seksyon 6(1) (b) anba sa formulation ki dir for the purpose of entering into a financial agreement avek en lot institution.  Eski Minis i kapab dir nou akoz zot in swazir pou antre dan en financial agreement avek DBS plito ki al atraver the repeal of the SBFA Act e subsequently vest interest into DBS.  Akoz zot in swazir pou zot pa fer en lamannman ou en repeal of the SBFA Act?  Mersi.

 

MR SPEAKER

Mersi Onorab Ferrari.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab parey mon’n eksplike premye letap se ki SBFA in kree en fon e apre in rantre dan en Lagreman avek DBS pou manage sa fon.  Me pou sa kapab arive anba Decree DBS, se Prezidan ki bezwen issue en Vesting Order pou DBS  anba son Lalwa pou li manage sa fon.

Rezon akoz nou pa’n repeal SBFA Act se senpleman akoz i annan en ongoing investigation lo SBFASo nou pa kapab fer sa.  E Lalwa e bann provizyon teknik si ou le i permet nou fer sa ki nou’n fer.  E se akoz de sa ki nou’n plifere fer li koumsa anba bann Lalwa ki egziste, pou permet nou legalman transfer sa fon.  Sa i enn.

Lo sa performing loan ki ou pe koze parey mwan mon’n dir i annan en lenvestigasyon e nou ti dir ki tou loan pou bezwen ganny manage. So sa bann ki dimoun pe peye normalman nou’n ankouraz zot peye e clear  zot loan e mon kapab dir ki menm kan i annan sa fristrasyon, i annan bokou ki mon konnen zot in  kontinyen pey zot loanSo nou remersye zot.

Sa bann ki dir ki zot in ganny dir zot pa pou pey zot loan nou e sertennman dan sa nouvo sistenm nou pou kontinyen pou nou servi bann,  pa bann kondisyon bann mwayen ki annan anba Lalwa pou nou fer recovery sa loan.

E parey ou konnen i annan DBS e la kot nou pe tir bann diplikasyon i annan bann Departman ki spesyalize dan recovery.  So sa pou an mars.  Nou pou al rode sa bann larzan.  Akoz tou sa larzan ki nou’n prete nou pou bezwen fer sir ki nou ganny li back.  Me sinon nou pou servi bann kondisyon ki permet nou servi lezot teknik pou nou ganny sa loan.

So nanryen pa sanze.  Envestigasyon i ganny fer sa li i bezwen fer me tou sa bann loan DBS pou kontinyen pursue sirtou bann non performing loans ki i merite si oule.  Mersi Mr Speaker.

 

MR SPEAKER

Mersi Minis. Onorab Egbert Aglae.

 

HON EGBERT AGLAE

Mersi Mr Speaker.  Bonzour Minis, PS ek Attorney Zeneral.  Minis mon premye kestyon, ou’n fer resorti ki i annan bann case ki devan biro Anti- Koripsyon.  Mon ti a kontan zis donn nou petet pa an detay konbyen case ki devan biro Anti-Koripsyon?

E dezyenmman Minis mon ti a kontan konnen bann loan ki deza egziste ki atraver sa … ki konbyen ki pending, bann loan ki pending konmsi lo balans, ki pa ankor fini rann as at now?

E dernyerman Minis i annan serten lensertitid avek bann kliyan kot zot santi zot en pe dan nyaz zot pa konnen. Eski pa ti pou normal parey ler labank i fer monte son lentere ouswa i fer desann, kot i ekrir son kliyan sa kliyan pou dir ou loan pe desann la la ou balans konbyen ou sipoze peye.

Eski pa ti a byen si tou kliyan ti a ganny en let ouswa en korespondans ki  donn zot serten leksplikasyon e osi a mete ladan ki zot pou fer an ka okenn bann leklersisman adisyonnel ki zot bezwen?  Mersi.

 

MR SPEAKER

Mersi Onorab.  Ler ou pe dir konbyen case ki avek ACC ou pe dir SBFA.  Ok?  Akoz nou pa pou al an deor kestyon.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab si ou’n vwar dan mon larepons mon’n reste en pe bref se senpleman  ki nou pa oule prezidis sa lenvestigasyon ki pe ganny fer par Anti-CorruptionSo pou reponn ou premye kestyon mon pa pou kapab share sa lenformasyon avek ou  -malerezman.  E mon pa ni konnen kwa ki lapolis in transfer ave Anti-Corruption e mon pa le konnen osi.  So mon pa pou kapab reponn ou kestyon.  Me sa ki mwan mon konnen se ki lenvestigasyon pe pursue e fotespere nou a ganny en rezilta desito.

Lo pending loans mon pa pou annan sa lenformasyon la avek mwan.  Parey mon’n dir DBS fek take over e DBS pou bezwen fer tou le neseser e pran tou sa bann pending loans ki non performing transfer avek son recovery unit pou konmans travay deswit.

E mon krwar ou trwazyenm pwen i en pwen tre valab dan le sans ki wi ti a byen ki en fwa DBS in enstal li, fer sir ki zot repet bann guidelines kot nou pret larzan anba SBFA.  Akoz i pou bezwen respekte sa bann guidelines akoz nou, nou annan nou  en negosyasyon ki nou’n fer avek DBS kot nou pou pey zot en management fee pou zot manage sa aktivite.

Parey ou konnen SBFA li dan Bidze Gouvernman nou ti  donn li sote R12milyon par lannen pou li manage SBFA e nou’n negosye avek DBS pou li manage sa loperasyon SBFA prezan en sonm enferyer sa 12milyon.  So i enportan zot osi zot respekte sa landing guidelines ki’n ganny met an plas pou SBFA akoz zot premye Lazans ki pe donn kredi a bann to lentere pli enteresan.  Mersi Mr Speaker.

 

MR SPEAKER

Mersi Minis.  Vitman Onorab Aglae.

 

HON EGBERT AGLAE

Mersi Minis pou larepons.  Mon konpran sityasyon.  Minis eski apre ki pou annan sa … premyerman sa ki nou ekspekte sa … i konplete?  E dezyenmman bann konsern ki bann kliyan menm i met devan eski zot riske vwar en to lentere ki riske ogmante  a la venir?  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Non parey mon’n dir i pou bezwen 4poursan, 75mil an desandan, 4.25poursan, 75mil ziska 300mil ki maximum.  Mersi Mr Speaker.

 

MR SPEAKER

Mersi Minis.  Onorab Sandy Arissol.

 

HON SANDY ARISSOL

Mersi Mr Speaker.  Bonzour Minis ankor enn fwa avek ou lekip e tou dimoun ki a lekout.  Mr Speaker mon kestyon i retourn ver kot Onorab Ferrari in kite an relasyon avek travayer.  Minis parey ou konnen letan i annan transfer i annan pou fer ek travayer so mon ti a kontan demann Minis an relasyon avek bann travayer ki ti travay kot SBFA me ki’n ganny transfer lezot landrwa parey ou’n mansyonnen Minis.  I annan  travayer ki letan ou koz avek li i fer ou konpran poudir i pa ti ganny sans pran son konze.  Oubyen i annan serten allowance ki i ti devret gannyen letan i ti pe travay kot SBFA ki la in dekouver dan sa landrwa kot zot in transfer li ki i ti devret pe gannyen.

So ki laranzman i annan ant Minister Finans pour ki sa bann travayer par egzanp letan zot in transfer i annan serten zot ki pa’n ganny zot pti dues ki vin avek par egzanp zot konze, zot pa’n ganny zot konze swa zot ganny peye zot konze.  Swa serten allowance ki zot sipoze gannyen dan sa travay respektif ki zot ti pe fer e la zot in aprann dan sa lot laba kot zot in ale ki zot ti devret pe ganny sa allowance an relasyon avek travay ki zot ti pe fer.  Sa i mon premye kestyon.

E an relasyon avek travayer Minis mon aprann i annan enn zot travayer Praslin ki pa ankor ganny plase dan en metye.  So eski i pe ganny peye?  Ki pe arive avek li?  E mon 2enm e dernyen kestyon mon ti a kontan demann Minis, i en pti pe an relasyon avek sa ki Onorab Aglae in dir.  I annan bann kliyan ki’n pran loan Minis e zot in fini peye zot loan zot, be selman sa loan ankor pe ganny tire lo zot saler tou le mwan.

Prezan zot in pran kontak avek DBS e DBS in fer zot konpran poudir pou le moman zot in take over SBFA, me selman zot pa kapab provide okenn Statement, zot pa kapab fer nanryen a sa pwen la.  Zot bezwen esper en pe pli tar.

Me parey ou konnen letan en dimoun i balans son Bidze e ou tou le mwan ou pe tir en larzan lo li ki pa devret tire so i annan en pe lenkonvenyans.  So mon pe rode ki mannyer ansanm nou kapab rezourd sa e ed bann  dimoun move pli devan?  Mersi bokou.

 

MR SPEAKER

Mersi Onorab.   Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pou sa bann kestyon ki ou’n poze.  Wi parey mon’n dir an zeneral nou nou ti sipoze pey tou sa ki Lalwa i demande an sa ki konsern bann ki’n ganny fer redundant e osi lezot.

An sa ki konsern konze wi nou ti’n sipoze pey tou konze ki ti due.  An sa ki konsern sa anplwaye lo Praslin wi mon okouran osi ki sa ki nou ti ofer, nou’n ofer li enn de post, diferan pos.  Me pou diferan rezon i pa’n aksepte. So finalman nou’n bezwen fer li redundant li osi.  Me ankor la tou sa ki nou bezwen peye nou ava peye.  Si nou pa’n fer sa nou ava fer sir ki nou fer sa.  Lo bann biznes normal SBFA wi parey mon’n eksplike, ou annan rezon ;  in annan en peryod apre le 31 Zanvye kot nou ti annan difikilte pou nou nobou partaz lenformasyon.

Premye kontrent ki ti annan se ki Komisyon Anti-Corruption pa ti oule ki bann travayer i antre dan computer pou konmans tir Statement dimoun eksetera, eksetera, pou rezon ki zot ti  pe fer zot travay.  Be la in annan en laranzman ki mannyer DBS pou travay e nou’n siny Lagreman.  Donk a mon avi apartir sa semenn pli tar sa semenn, semenn prosenn sertennman tou sa bann problenm fristrasyon ki ti annan lo Statement ; kote loan i ete, pou pran nouvo loan e tousala i merit rantre dan lord.

So fotespere sa i en keksoz of the past.  Annou dir konmansman semenn prosenn si pa sa semenn menm, Mardi letan nou retourn travay dapre mwan tou zafer in antre annord.  Mersi Mr Speaker.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker.  Bonzour Minis.  Minis vi ki ou’n dir tou keksoz in retourn annord aprezan eski sa kriter ki SBFA ti pe servi ler i ti pe run tou son keksoz li menm, an term pou donn loan, i reste parey?  Mon konnen ou’n dir poudir poursantaz in reste parey be la mon pe koz lo lezot kriter apard ki poursantaz lentere.

Apre 2enm wi nou ti annan sa konsern osi lo Praslin kot i annan bann dimoun ki zot pledge in pri zot pe sey fer mannyer pou sort out.  Be la ou dir nou poudir Mardi pli tar zot kapab al kot biro Praslin, so zot pe ekout nou. Zot ava ale.

Apre dernyen pou sa travayer Praslin, vi ki sa desizyon ki’n ganny pran i pa ti son desizyon.  Basically in vin casualty en desizyon ki’n ganny pran.  Eski nou pa kapab kontinyen sey rod en fason pou  nou kapab ed sa dimoun kapab ganny en lanplwa ?  Akoz nou tou konnen si en dimoun pa dan lanplwa, i napa en reveni lafen-di-mwan.  Alors en desizyon ki pa son fot – petet nou devret kontinyen rod fason pou nou ed li, pou li kapab ganny en lanplwa.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab an sa ki konsern sa lending policy SBFA, i pa pe sanze li akoz nou dan Minister Finans nou’n siny en Lagreman avek DBS.  Annefe se Sekreter Prensipal Finans ki ansarz, pou fer sir ki sa menm lending policy i ganny respekte.  Me pwen ki mon anvi fer se ki, nou bezwen respekte Lalwa.  Donk la DBS i bezwen pret larzan dapre Lalwa.  Nou pa kapab al kas kontour.

So sa i enportan ki – e sa in sinyen sa par tou le de parti so nou pou pret larzan lo menm lending policy SBFA.  An sa ki konsern sa anplwaye nou ti ofer li mon krwar 3 diferan landrwa dan DBS li menm. Nou ti ofer li Minister Finans e osi kot Lazans Proteksyon Sosyal.  Me pou divers rezon parey mon’n dir ou nou pa’n nobou plas li.  E mwan mon pare pou  mwan re vwar li ankor enn fwa si neseser, pou mwan regarde ki mannyer  kekfwa mon kapab kekfwa ed li rod en louvraz. Mersi.

 

MR SPEAKER

Mersi Minis.  Onorab Terence Mondon.

 

HON TERENCE MONDON

Mr Speaker mon oule demann Minis prenon kont ki sa fonksyon donn loan pti biznes ti deza a serten moman sorti kot Lazans kredi CCA, e ti met anba responsabilite DBS dan bann lannen 2011/2012.  Sa laranzman pa ti vreman marse akoz ti pli tar retourn avek SBFA.  Alor eski Minis pa krwar ki Gouvernman pe tro tourn an ron ek sa zafer donn biznes, donn loan pti biznes ?  Tir la met la –  tir la met la ? E ki garanti ki zot annan ki sa laranzman pou marse anba DBS sa voyaz?  Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab.  Onorab parey mon’n fer resorti mon krwar ki sa SBFA la i en bon keksoz li akoz se la ki nou tou nou konmanse.  Me e i en landrwa kot ou kapab vin pret larzan a en to lentere pli ba ki egziste.  So se sa konmansman.  Alor i en bon keksoz.  Mwan mon krwar i en bon keksoz.  Prezan annou get son zistwar.  Lentansyon Gouvernman a lepok ti kree en unit parey ou’n fer resorti me sa unit li ti dan Minister Finans, e nou ti santi ki i pa ti apropriye.  E se la sa moman ki SBFA ti ganny kree.  Prezan si ou get sa SBFA Act tou i annord pou li fer sa loperasyon, pret larzan bann pti biznes.

Me fotespere ki ozordi nou pe koz ek en labank prezan.  Donk se en labank ki pe antreprann management sa fon.  Fotespere ki i pou mars pli byen e nou tou nou bezwen e sertennman Minister Finans fer sir ki sa voyaz we get it right.

Akoz mon pa krwar i en bon keksoz pou nou aboli sa.  Akoz si nou aboli sa access to credit pou bokou pli ser e i enportan ki nou mentenir sa loperasyon, sa Lazans kredi a sa nivo.  Mersi Mr Speaker.

 

MR SPEAKER

Mersi Minis.  Vitman Onorab Mondon.

 

HON TERENCE MONDON

Mersi Mr Speaker.  Zis en pti klarifikasyon.  Minis in dir ti en unit. Ler nou pe koz CCA e ti en agency pou Concessionary  Credit.  E mon dakor Minis ki sa to lentere i enportan nou donnen.  Me selman ki mon pe dir se ki zot kontinyen.  Ler keksoz i arive zot tire zot cancel ka la enn zot re anvoy kot DBS apre zot refer lot – konmsi zot kontinyelman tir la met la pou  menm fonksyon.  E sa ki zot bezwen adrese.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi.  Mersi Mr Speaker mon konpran sa ki ou pe dir Onorab.  E zis osi pou enform Lasanble ki nou osi nou’n demann en lodit en pe pli konpreansiv, atraver Labank Mondyal pou regard tou sa bann Lazans ki pret larzan, akoz i annan plizyer.  Mon pa pou al ziska dir i annan en proliferasyon, me sertennman i annan plis ki 5 ki pret larzan dan diferan kategori, diferan to lentere pou preski menm keksoz.  E sa i atraver bann Lazans Gouvernman.  So sa osi mon krwar fodre nou rationalism li atraver sa tenm tir diplikasyon fer li pli senp.  Mersi Mr Speaker.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker mon premye kestyon se pou demann Minis ki’n arive avek sa lasirans, sa commitment ki i ti donnen letan mon ti demann li rapor odit SBFA?  E sa sete byen avan ki case ti ganny anvoy kot Lapolis.  Sete e ou ti promet nou, pou donnen.  Mon ti demann sa epi konman Chair FPAC.  Ou ti promet pou donnen me ziska aprezan ou pa’n zanmen donnen.

Mon ti ava kontan demann Minis ki pe arive avek lofis Praslin ?  Lofis SBFA Praslin parski i resanble ki i annan serten dimoun ki pe call laba pou regarde konmsi ki pozisyon.  E zot pa pe ganny en bon rezilta.  E finalman mon anvi demann Minis zis konman en kestyon zeneral Mr Speaker.  Depi ki sa size in leve dan Lasanble Nasyonal anmennen par Onorab Andre Manm LDS,  e sa in swiv bokou aksyon.  Mon ti a kontan demann Minis si dapre zot bann rikord konmsi la kantite repeyman in ogmante e ki bann defaulters la ozordi, zot annan kek omwen zot annan kek laranzman e ki konmsi i satisfe avek la fason ki sa fon pe rekiper at least rekipere.

Mon pa pe koz lo donn bann loan.  Me at least rekiper bann larzan ki ti’n donnen.  Mon krwar ti annan en sif 80milyon ki pa ti’n ganny ranmase.  Konmsi ki mannyer zot pe fer?  Mersi bokou.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pou kestyon.  Alor lo premye kestyon, wi efektivman mon ti donn zot en garanti ki mon ti pou anmenn anvoy sa rapor oditer entern Minister Finans lo SBFA.  Annefe i ti avek mwan, ti ase gro parey mon ti montre zot.  E mwan menm mon ti’n fek ganny sa detrwa zour avan, e mon ti demande ki mwan osi mon etidye li afon.  E apre transfer avek zot.

Me malerezman sa ki’n arive se ki kan mon’n fini pas ladan i ti kler ki i ti neseser pou mwan imedyatman anvoy sa kot Lapolis e se sa ki nou’n fer atraver biro Sekreter Prensipal, nou’n ekrir lapolis e nou’n anvoy sa gro rapor laba kot lapolis.

E annefe mon gro rapor mon nepli annan mon gro rapor.  In ale li osi.  So tou fason in al dan en landrwa pou en bonne causeSo mon regrete ziska ozordi mon pa ankor soumet menm ki biro Lasanble Nasyonal atraver Clerk in kontinyelman  rapel mwan ki sa i outstanding e mon’n donn enn de leksplikasyon o fir e an mezir ki nou ti pe fer sa bann travay avek sa rapor Mr Speaker.

An sa ki konsern biro lo Praslin, DBS li dan laranzman ki nou  annan – annefe in pran tou bann biro.  Bann biro ki SBFA ti annan Mahe, DBS in pran sa bann biro pou li fer son travay avek.  Pa neseserman tou biro pou SBFA, me fer son travay.  E se menm laranzman ki pou arive lo Praslin.  Zot pou merge sa biro avek zot biro, e fotespere nou a ganny en pe plis klarite ki pou pase, la ki tou bann laranzman in ganny sinyen.

Sel keksoz ki mwan mon kapab dir lo trwazyenm kestyon se ki mon osi bann feedback ki mwan mon’n gannyen – bann  call ki mon’n gannyen, i donn mwan lenpresyon ki wi in annan en improvement.  Me konbyen e koman sa mon pa pou kapab dir la pou le moman.  Me letan mon regard en pe bann kont ki’n ganny soumet – an Fevriye balans dan kont SBFA ti R41milyon.  E an Avril, le 16 Avril i ti’n ariv R48milyon.  So i montre ki in  monte me mon napa son detay ou konpran.  Me la de sif ki mwan mon kapab quote ki donn mwan en lendikasyon ki efektivman larzan pe antre.  Ok i vre osi ki nou pa’n disburse, me sa i montre ou en lendikasyon ki i annan en pti improvement.  Tou de fason nou dir i annan en improvement.  Mersi Mr Speaker.

 

MR SPEAKER

Mersi Minis.  Vitman Onorab.

 

HON WAVEL RAMKALAWAN

Mr Speaker zis –  i annan en size back pay ki bann travayer SBFA ti sipoze gannyen by the 31st of December.  E mon ti a kontan demann Minis ki pe arive parski, bann travayer pe dir ki Minister Finans pe dir ek zot annan pasyans pe vini, e lo lot kote DPA i dir Finans pa ankor anvoy okenn dokiman.  Ki mannyer eski alor zot annan lentansyon pou rezourd sa sityasyon pou ki, bann travayer i ganny zot larzan ki zot merite.

I bezwen annan en Lorganizasyon la ki pa pe bouz dapre lavites ki zot devret.  E Mr Speaker mon ti a kontan demann Minis sa bann MNA parti lepep ki US ozordi ki pa ti pe re pey zot bann loan eski i annan okenn laranzman – ok Mr Speaker mon konnen ki ou pe al dir mwan.  Ok, mon withdraw sennla.  Mersi bokou.  Mersi.

 

(Interruption)

 

MR SPEAKER

Mersi Onorab.  Minis premye kestyon.

 

HON WAVEL RAMKALAWAN

Mon’n withdraw ki zot pe mantoun?  Konmsi zot le mon demande menm?

 

(Interruption)

 

 

MR SPEAKER

Mersi.  Order!  Minis premye kestyon.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pou sa kestyon.  Annefe stratezi sete ki DPA ti pou travay lo tou sa bann redundancy, sa bann zafer, get it out of the way.  E Minister Finans ti ekrir Fevriye 2018, DPA pou nou demann zot regarde si sa Scheme of Service SBFA ti pe ganny byen enplimante.   E nou’n ekrir en let depi Fevriye lafen Fevriye 2018, 19 pardon, 2019.  Le 28 Fevriye 2019 pou demann zot pou regard dan lenplimantasyon Scheme of Service SBFA si ti korek pou efektivman tous lo sa pwen ki ou’n fer resorti.  Mersi Mr Speaker.

 

MR SPEAKER

Mersi Minis.   Mon a retourn kot loter kestyon.  Vitman Onorab.  Nou pe depas letan.

 

HON CLIFFORD ANDRE

Mr Speaker mon pou pas dan sa Seksyon ki Minis in quote 6(1) (b) i dir ‘‘in the performance of its function’’ savedir sa SBFA ki pe fer sa fonksyon, ‘‘the agency shall have the power’’ (b) ki dir ‘‘enter into financial arrangements with other banks’’.  Mon oule dir avek Minis ki poudir parey i  annan lo Order Paper to quash sa S.I 12 of 2019,  pou dir sa i pa an konformite avek Lalwa akoz SBFA pa pe perform okenn fonksyon ki anba Seksyon 4 dan son Act ler ou pran son larzan; ou donn tou son larzan avek DBS.  Savedir ou pa pe perform okenn fonksyon.  Savedir i deza an vyolasyon avek sa Lalwa li menm Minis!  Sa i enn.

Dezyenmman Minis ou’n dir ki poudir sa fiy Praslin, sa fiy Praslin i pou ganny fer redundant akoz konmsi ki mannyer i kapab ganny fer redundant selman SBFA i ankor la?  Pou ki rezon ki ou pe fer li redundant?  Eski Minis i kapab eksplik nou?

3enm; i annan bann sityasyon kot bann lenvestigasyon pe ganny fer an referans avek Minister Lanplwa be Minister Lanplwa pa’n fermen li.  Akoz nou ferm SBFA letan nou ti’n kapab pran sa bann dimoun met zot dan rimann.  Kontinyen les lezot travay.  Apwent en lot CEO – en lot Chairman Board whatever pou kapab fer SBFA kontinyen marse?  Se sa mon trwa kestyon ki  mon annan pou mon poz Minis.  Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker, mersi Onorab.  Onorab mon krwar ki nou bezwen tonm dakor ki SBFA i ankor la li.  E nanryen pa anpes li fer redundant staff si i oule fer redundant staff.  Dezyenmman SBFA parey mon’n eksplike, in kree en fon.  E apre in transfer sa fon kot DBS, pou DBS manage sa fon.  So an sa ki mwan mon konsernen, se ki SBFA anba son Lalwa, i annan drwa kree sa fon e atraver sa Vesting Order parey mon’n eksplike Prezidan in vest sa fon dan DBS avek Lalwa DBS.  So mon vwar ki mannyer sa i kont Lalwa.  Me mwan mon ganny gide par bann l’homme de loi.  E mannyer mon vwar li from en regar finansyel teknikman nou ankor dan Lareg.  Mersi Mr Speaker.

 

MR SPEAKER

Mersi Minis.  Onorab vitman.

 

HON CLIFFORD ANDRE

Dernyen, dernyen.  Minis in dir ki poudir SBFA i en annan drwa kree en fon e transfer sa fon.  Sa pa korek.  Dapre Lalwa i pa kapab fer sa.  I antre  dan en Lagreman avek en labank pou ed li desarz son responsabilite.  So SBFA ki konmela napa en staff, napa responsabilite ki pe desarze anba seksyon 5 son Act!  Alors i pa kapab Mr Speaker.  Avek Minis, Attorney Zeneral, i pa kapab antre dan en okenn Lagreman, letan li i pa pe perform okenn son fonksyon!

So SBFA i devret pe egzite.  Son Lalwa i ankor la.  E son Lalwa i dir ou wi i devret annan en CEO, annan en Board annan tou son bann dimoun ki pe travay e sa pa egziste. So Minis pa kapab dir nou poudir i pe fer son fonksyon, akoz i pa korek Minis i an vyolasyon avek son Lalwa SBFA Act! Mersi.

 

MR SPEAKER

Mersi Onorab.  Minis.

 

MINISTER MAURICE  LOUSTAU-LALANNE

Mersi Mr Speaker.  Mr Speaker mon pa konnen kot nou pe ale la.  Mon repete ki SBFA finalman in deleg son pouvwar.  E i annan en kantite kliyan tou le fason kot SBFA ozordi.  E sa  loperasyon SBFA i bezwen kontinyen.  Nou’n dakor ki SBFA i en Lazans enportan, ki pe re pret larzan a en to ki pli enteresan.  Nou pa kapab annan en sistenm kot nou pou vin fristre tou sa bann kliyan, ozordi.  E nou deza pe dir i annan en pe fristrasyon ki egziste ozordi.  Donk nou’n trouv en solisyon legal e teknik an servi bann Lalwa pou nou fer sa arive e mwan mon tenir lo mon pwen e lo mon pozisyon !  Mersi Mr Speaker.

 

MR SPEAKER

Mersi Minis.  Bon avek sa nou’n ariv lafen sa kestyon pou Minis Loustau-Lalanne.

Minis responsab pour Finans. E Minis nou ti a kontan remersye ou pou pas en demi zournen avek nou.  E mon osi remersi Mr Ally Attorney Zeneral e Mr Thesee Sekreter Prensipal.  Mon ti a kontan osi remersi SBC.  Mon konnen nou’n overlap en pe apepre 10 minit.  Remersi SBC pou donn nou sa pti letan e san tarde nou ava retourn lantenn ek SBC.  E Lasanble nou pran Break nou retournen nou  repran nou travay apre midi 2er.

 

(BREAK)

 

MR SPEAKER

Bonn apre midi tou Manm Onorab, e bonn apre midi tou dimoun ki a lekout e ki pe kontinyen swiv travay Lasanble Nasyonal.  Nou pou retourn en pti pe lo Lord nou Order Paper.  E parey mon ti’n anonse bomaten nou ti’n skip pou nou kapab pran sa 2 kestyon pou Minis Finans.  Nou pou retourn lo la lo pwen 4 kot i annan prezantasyon bann papye. Sa i prezantasyon bann rapor.  E mon ava demann Madam Clerk pou fer le neseser.

 

MADAM CLERK

Mersi bokou Mr Speaker.  Bonn apre midi Mr Speaker.  Bonn apre midi tou Manm.  Konman prezantasyon papye ozordi nou annan 3 rapor ki pou ganny soumet par bann komite.  So,

(1) Annual Report by Committee of Government Assurances COGA.

(2) Annual Report by Committee on HIV Aids and SRHR.

(3)  FPAC Report of Review of the Auditor General 2017 Report.  Mersi.

 

MR SPEAKER

Mersi Madanm Clerk.  Bon parey labitid nou permet bann Chair pou fer en prezantasyon.  Apre ki ofisyelman sa rapor i ganny Laid i ganny table dan Lasanble.  Nou ava konman avek Chair pou Komite lo Government Assurance COGA, Onorab Gervais Henrie.

 

HON GERVAIS HENRIE

Mersi Mr Speaker.  Bonn apre midi tou dimoun.  Mon annan plezir prezant Lasanble Nasyonal avek rapor Committee on Government Assurances oubyen COGA pou lannen 2018.  Sa Komite i annan manda pou swiv bann promes ki bann Minis i fer dan Lasanble, pandan bann Sesyon Demann Kestyon, ladres Bidze e son deba ki swiv dan Staz Komite e osi mesaz Prezidan Larepiblik lo Leta Lanasyon.

An vi enormite volim bann lasirans ki ganny fer isi dan Lasanble, Komite ti tonm dakor pou adres bann size ki nou santi i bann konsern priyoriter pou Nasyon Seselwa.  Sa bann konsern i enkli later avek lakaz,  drog avek lalkol,  kou lavi e proze distrik.  Mon rapor pou souliny bann travay lo kalandriye COGA lannen pase ki’n target sa 4 size.

Sa Komite 7 Manm i konpri lo kote parti US – Onorab Sylvanne Lemiel, Onorab Wilbert Herminie e Onorab Simon Gill.  Lo kote LDS i annan Onorab Clive Roucou konman Vis-Chairman, Onorab Norbert Loizeau, Onorab Sandy Arissol e mwan menm Gervais konman Chairman.

An tou pandan lannen 2018 Mr Speaker nou’n konsider 72 lasirans pou diferan Minister, Departman avek Lazans.  E ladan i annan 29 oubyen 40poursan ki COGA in evalye konman in ganny onore, ouswa konplete.

Tandis ki 43 oubyen 59poursan nou pe klasifye zot konman ankor an progre.  Sa i akoz bann retar oubyen difikilte ki’n annan pou enplimant target ki ti’n prevwar.  Rezon ki bokou promes pa’n ganny enplimante akoz serten plan i tro anbisye, swa pou sa dele letan ki’n planifye, mank resours sirtou finansyel e imen e serten i senpleman bann plan long term.

Bann Minister ki nou’n enterakte avek, setadir ki nou’n ekrir zot e demande ki zot donn nou en larepons an ekri i konm swivan ;

Minister Finans Komers Lenvestisman avek Planifikasyon Ekonomik, Minister Lagrikiltir avek Lapes, Minister Labita Later Lenfrastriktir avek Transpor lo Later, Minister Zafer Lafanmir, Minister ledikasyon avek Devlopman Resours Imen.  Lofis Vis-Prezidan ki reprezant diferan Departman avek Lazans.  Minister Lanvironnman Lenerzi avek Sanzman Klima.  Minister Lanplwa Imigrasyon avek Civil Status, Departman Zafer Entern, Minister Tourizm, Lavyasyon Civil, Por avek La Marine e Minister Lasante.

Si nou get en pe pli an detay statistik sa bann Minister rezilta i konm swivan.

  • Minister Finans i annan en total 10 lasirans 5 in konplete e 5 i ankor an progre.
  • Minister Lagrikiltir avek Lapes i annan selman enn ki ankor an progre.
  • Minister Labita ek bann zafer Later li i annan 6 lasirans e tou le 6 pa ankor konplete.
  • Minister Lafanmir enn in konplete e 3 i an progre.
  • Minister Ledikasyon i annan en sel lasirans ki ankor an progre.
  • Lofis Vis-Prezidan 6 in konplete e enn i an progre.
  • Minister Lanvironnman i annan en sel ki’n konplete.
  • Departman Zafer Entern i annan en sel ki ankor an progre.
  • Lanplwa 9 in terminen e 3 i ankor an progre.
  • Minister Tourizm 7 promes e tou in akonpli.  E kot defayans dan statistik i ete se Minister Lasante, 22 promes e tou le 22 pa ankor abouti dan nanryen.

Mr Speaker Komite i rekonnet ki i annan pou fer avek Master Plan Lopital ki en plan long term.  E COGA in fini fer lasirans ek son prop lekor ki nou pou sirvey sa bann proze de pre ziska ki nou termin nou manda konman 6enm Lasanble.   Fodre fer remarke ki i ankor annan serten difikilte vizavi serten Minister pou ganny lenformasyon, menm apre ki Komite in demann zot en leksplikasyon an ekri ofisyelman.

Sa in anmenn serten retar dan nou travay e sa lannen nou pou vwar nou pe oblize retourn kot detrwa sa bann MDAs pou rod serten larepons atraver hearings isi kot Lasanble e pou nou raport lo la pli tar.  Alor dan sa 72 lasirans ki nou’n donn statistik, sa i selman pou bann ki nou’n ganny en larepons avek bann MDAs ki mon’n mansyonnen.

I annan bann lasirans ki pending kot Minister Ledikasyon, Minister Finans, Minister Lanplwa.  Lofis Vis-Prezidan, Minister Lagrikiltir avek Lapes, Minister Labita Later avek Lenfrastriktir ek Land Transport, Minister Lafanmir avek Zafer Entern e Minister Tourizm.  Sa lalis ki mon’n fek pa lo la Mr Speaker, i dapre rikord ki nou annan e ki larepons pa’n ariv atann pou nou kapab konplet nou rapor 2018.

Mon konnen i annan Minister ki pou telefonnen e mantoun e akoz zot in ganny mansyonnen.  Se pou sa rezon ki enn bann rekomandasyon, i en rekomandasyon ki nou pe repete ki nou ti fer lannen pase, ki sak sa bann MDAs i idantifye en zofisye spesifik pou liaise avek nou Komite.

Konpare avek bann lannen presedan COGA in fer plizyer site visit an 2018, avek bi vwar lenplimantasyon bann proze pou nou menm e konpran bann defi bann MDAs pe fer fas avek.  Bann tel vizit in osi permet nou ganny sans enterakte avek bann diferan o zofisye Gouvernman, avek zot bann teknisyen.  Swivan sak sa bann vizit Komite in fer plizyer rekomandasyon avek bi esanz lide e fer detrwa propozisyon e menm ofer serten solisyon avek bann parti konsernen.

Nou bann vizit in anmenn nou kot STC, Wellness Centre, vwar bann proze lakaz dan distrik Riviere Anglaise, Bel Air, Mont Fleuri e St  Louis.  Nou’n osi vizit en seri proze kominoter lo Praslin avek La Digue.  Par egzanp swivan nou vizit kot Wellness Centre Les Canelles Anse Royale nou ti  propoze ki sa de fasilite, enn pou bann dimoun ki adikt avek drog e lot pou pasyan ki annan problenm lasante mantal, pa kapab dan menm batiman.

Propozisyon COGA  i se ki a lavenir, Gouvernman i idantifye en landrwa pou konstriksyon en sant spesyalize pou tret e ofer lezot servis bann pasyan avek maladi mantal.  Nou ti osi lev konsern lo lapar en miner ki ti pe reste dan Lopital Psikyatrik e demann Minister Lafanmir pou rod en solisyon permanan pou sa pti garson.

Swivan nou vizit kot STC antretan ki nou siport swe management swa paraetatik dan zot demars pou annan zot green field, nou osi demande pou demars i konmanse pou STC vin propriyeter Hypermarket avek bi koup son kou loperasyon e demande ki Board avek management i kontinyen etidye tou posibilite enkli re vizit son manda afen ki nou a vwar en bes dan kout lavi dan Sesel.

Swivan nou vizit kot bann konstriksyon lakaz dan rezyon santral 1 avek 2, COGA pe rekomande ki Sistenm Pwen i ganny aplike dan en fason transparan e zis dan alokasyon sa bann apartman.  Ki Lotorite Distrik setadir MNA avek DA, i ganny sans fer reprezantasyon pou bann ka priyoriter dan zot distrik akote, alokasyon baze lo pwen.  E ki bann pti Kontrakter ki baze dan sa distrik kot bann nouvo housing estate, i konstri i ganny bann priyorite lo bann pti Kontra netwayaz avek maintenance ki PEMC i donnen dan sa bann landrwa rezidansyel ki i zere.

Swivan nou vizit lo Praslin avek La Digue COGA ti met lanfaz ankor lo nesesite donn priyorite donn bann Kontrakter baze lo sa de zil, pou zot antreprann bann proze lo zot zil ouswa ganny lezot subcontract.  Parey lenportasyon.  sirtou dan bann ka kot lartik 92 Procurement Act i ganny aplike.  Nou ti osi met lanfaz lo verifikasyon bann dokiman tender pou asire ki Kontrakter pa egzazer pri.

E finalman desantralizasyon bann servis Gouvernman dan rezyon zil pros.  Nou rekomandasyon zeneral Mr Speaker i se ki Gouvernman i gard son parol letan i donn okenn lasirans.  Dan bann lenstans kot pe annan okenn retar pou en rezon ou en lot i responsabilite pou kominik sa lenformasyon avek piblik i tonm lo Gouvernman menm.

Serten legzanp ki a pli konsern nou konman en Lasanble Nasyonal se bann Prozedlwa ki’n ganny promet tel ki revizyon dan  Lalwa Lanplwa, Lalwa relasyon endistriyel, Lalwa Imigrasyon, Lalwa Sitwayennte, letablisman Small Claim Tribunal, e osi Sovereign Wealth Fund.

Mr Speaker lo non Komite mon oule remersi tou bann MDAs ki’n kolabor avek nou lannen pase.  Mon rekonnet sipor ki Lasanble in donn nou sirtou atraver lasistans Sekretarya kot 3 staff pli senior i atase avek nou komite, sa i Madanm Clerk, Deputy Clerk e Zofisye Finans Mrs Thelermont.  Lo lapar Komite mon dir en gro mersi pou zot sipor.  Mon a profite osi pou remersi ou personnelman Mr Speaker, pou rol direk ki ou’n zwe pou asire ki premye deplasman nou Komite pou en vizit lesanz, en vizit travay Botswana semenn prosen.  Nou osi annan  en not rekonesan pou bann MNA ki pa manm nou Komite me ki angaze avek nou dan en fason ouswa en lot.  I annan LGB, Chief Whip LDS, bann MNA sorti dan  bann distrik ki lo zil pros, manm Komite HIV e osi bann manm Komite Medya.

An konklizyon Mr Speaker mon a dir ki nou pa’n zis travay.   Nou’n osi ed la kominote.  An kolaborasyon avek Komite Medya bann manm ti kotize pou fer en donasyon avek Lopital Psychiatric e Wellness Centre.  Sa i en keksoz ki mon priye nou kontinyen fer a lavenir akoz konman bann dirizan nou bezwen trouv fason pou ede elev lezot parey nou pe fer dan nou rol oversight, pou asire ki Gouvernman i delivre lo son promes.  Avek sa de mo mon prezant ou en kopi rapor COGA pou lannen  2018, Mr Speaker.  Mersi bokou.

 

(APPLAUSE)

 

MR SPEAKER

Mersi Onorab Henrie.  Bon mon ava – mon krwar sa laplodisman i vedir ki Lasanble i dakor, i aksepte sa rapor.  Mon ava esper en kopi.  Ok mersi.  Lasanble i aksepte sa rapor par Komite COGA.  Nou ava al lo 2enm rapor, ki rapor par Komite HIV Aids avek SRHR.  Mon a demann Chairman Onorab Clive Roucou pou prezant son rapor.

 

HON CLIVE ROUCOU

Mersi Mr Speaker.  Bonn apre midi Mr Speaker.  Bonn apre midi tou bann Manm Onorab.  Mr Speaker mon annan  plezir pou mon prezant rapor Komite HIV Aids and Sexual Reproductive Health and Rights, ki an Kreol nou tradwir li an Drwa Lasante Reprodiktiv e VIH Sida pou lannen 2018.

Pou konmanse Mr Speaker, nou Komite i annan 7 Manm ki kontyen Onorab Francois Adelaide, Onorab Audrey Vidot, Onorab Regina Esparon, Onorab Noline Sophola, Onorab Egbert Aglae, Onorab John Hoareau ki osi Vis-Chairman e mwan menm konman Chairman.  Mr Speaker mon anvi met lo rikord osi ki tou Manm lo komite in siny nou rapor.  En pti background lo nou Komite.  Sa sete en proze ki ti ganny devlope par SADC PF pou ogmant kapasite bann Komite bann Parlman dan zot pei respektiv, pou enfliyans tou sa ki konsern VIH Sida e Drwa Lasante Reprodiktiv.  Sa proze ti ganny aprouve dan  35enm Sesyon Plennyer ki ti fer Maurice.  Sa  ti depi 2014 e in ale pou 4an ziska 2018.   Alors nou rapor i baze lo tou nou bann aktivite pou 2018.  Mr Speaker pou ankor en lannen komite in ankor enn fwa vreman aktiv, kot nou pa’n zanmen mank lokazyon pou travay e asosye nou  avek bann lezot partner par egzanp NAC, National Aids Council, Minister Lasante e lezot dan zot demars pou lit kont VIH Sida e Drwa Lasante Reprodiktiv isi Sesel.  Sa i mars egzakteman avek nou manda ki nou term of reference i refer avek.  I donn nou koman en Komite pou zwe en rol oversight lo ki mannyer Drwa Lasante Reprodiktiv e VIH Sida i ganny antreprann isi Sesel. E i osi zwe en rol enportan lo bann rekomandasyon Lalwa relye avek Drwa Lasante Reprodiktiv e VIH Sida.  Mr Speaker pou 2018 nou’n involve dan 17 aktivite an total.  Alor sa rapor i dekrir bann progre e ki nou konman en komite nou’n fer.  E bann aktivite ki nou’n antreprann pandan sa lannen 2018, an relasyon avek Drwa Lasante Reprodiktiv e VIH Sida.  Enn de legzanp bann aktivite konman en Komite ki nou’n antreprann.

Premyerman nou’n involve dan Steering Committee National Action Plan pou retir bann legal barriers an relasyon avek VIH Sida. Kot enn nou Manm Onorab Audrey Vidot in ganny elekte lo sa Komite.  Nou’n kontinyen lo sa devlopman plan stratezi pou VIH Sida e lezot maladi relye ek sex avek Minister Lasante kot nou’n osi zwe en rol vreman enportan.

Nou’n osi attend en special Sitting Lasanble Lazenes kot nou ti annan osi nou kontribisyon ki ti vreman enportan.  Nou’n kontinyen avek bann dyalog avek bann key population, savedir bann dimoun ki at risk par egzanp bann sex worker, LGBTI group, bann lazenes e bann prizonnyen both sexes male and female anler kot prizon pou nou vwar bann risk ki zot ladan an relasyon avek VIH Sida avek zot Drwa Lasante Reprodiktiv.  Nou’n fer bann public hearing avek bann zenn kot tou bann lenformasyon ki nou’n anmase pe ed nou as en komite pou formil nou bann Mosyon e nou bann kestyon ki nou pou prezante devan Lasanble.

Plizyer nou bann manm Komite in osi ganny sans attend bann meeting ek work shop isi lokal e  aletranze dan en form kapasite building ankor ki’n nouri nou pou nou pli byen konpran Drwa Lasante Reprodiktiv e bann Lalwa an relasyon avek  VIH Sida, dan bann pei SADC an zeneral e Sesel konman en pei li menm.  Pour konklir an preparasyon pou lannen 2019 nou pe kontinyen avek nou bann meeting ki nou fer tou le mwan kot nou konman en komite nou kalandriye meeting pou 2019, in fini ganny adopte par tou manm komite.  E nou’n fini drafte nou progranm travay e aktivite pou ganny enplimante ziska ler tou bann lozistik i tonm an plas.

E nou’n menm pe fer plan pou nou sanz non nou Komite e nou term referans pou fer li azour avek sa ki pe arive aktyelman.  Mr Speaker pou terminen nou’n remersye Sekretarya SADC PF.  Nou anvi remersye Sekretarya Lasanble Nasyonal pou zot reste touzour angaze avek nou komite pou nou bann progranm ki nou pe enplimante.

Me Mr Speaker en pli gro remersiman mon anvi remersye nou Sekreter ki Ms Genevieve Morel e son asistan ki Ms Samia Lebon ki nou lanmen drwat pou nou komite ki san zot nou pa ti pou kapab ariv sa zistans.  E mon anvi osi remersye tou Manm Onorab lo tou le de kote latab, pou nou travay for ki nou’n kontinyen fer throughout lannen 2018.  E finalman Mr Speaker permet mwan prezant nou rapor avek Lasanble Nasyonal.  Mersi.

 

MR SPEAKER

Mersi Onorab Roucou.  Bon petet zis avan mon ganny sa kopi rapor mon ava fer tou Manm konnen ki Sekretarya pou anvoy en eCopy, en e report pou zot tou an zot mailAlright.  Mon krwar osi mon kapab dir poudir sa de prezantasyon, sa de rapor i montre ankor travay dir, travay eksepsyonnel ki sa de komite in fer.

E sa mon anvi felisit Manm lo sa de komite ki sorti lo tou lede kote latab, lo kote US e lo kote LDS.  Ok ?  E mon pran li ki Lasanble i adopte sa rapor ki komite HIV Aids avek SRHR in prezante.  Nou ava la lo 3enm rapor e sa se rapor en revi lo rapor Oditer Zeneral 2017.  E mon ava pas laparol avek Chair FPAC, Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker i vreman en plezir pou mon prezant rapor FPAC ki baze lo rapor Oditer Zeneral pou lannen 2017.  Parey nou tou nou konnen  FPAC petet i sa Komite ki ganny mansyonnen en pe pli souvan.  I ganny kritike dan Lasanble Nasyonal.  I ganny kritike en pe partou, me dimoun i osi ganny sa plezir, pou swiv nou bann deliberasyon.  E atraver sa ki nou delibere nou toultan met lanfaz ki nou pe senpleman rod en fason pou ki bann Lalwa Finansyel dan nou pei i byen ganny obzerve e  ki larzan lepep Seselwa i byen ganny depanse.

Mr Speaker sa rapor ki mon pe prezante lo lapar FPAC in en rapor ki dan ki konmsi dan nou travay nou’n egzamin plis bann antite Gouvernman.  Petet zis avan mon antre ladan mon anvi zis dir ankor enn fwa Mr Speaker ki Komite FPAC i pa zis en komite en kote parti politik.  FPAC i en komite Lasanble.  Lo sa Komite i annan Manm sorti dan LDS parey ki i annan Manm sorti dan parti US.  E bann Manm se Onorab Afif konman Vis-Chairperson, Onorab De Commarmond, Onorab Sebastien Pillay, Onorab Jean-Francois Ferrari, Onorab Churchill Gill, Onorab Terence Mondon, e mwan menm konman Chair.  Mr Speaker i enportan pou mon dir ki sa rapor in ganny sinyen par tou bann Manm, par tou bann Manm.  Alors i en rapor inanim.  E petet i enportan pou montre sa parski si FPAC i fer son travay e tou bann Manm i siny son rapor petet mon ti ava demande ki Manm Lasanble Nasyonal zot menm, ki swa i dan en kote swa i dan en lot letan zot pe kritik travay FPAC, petet fer li dan en fason konstriktiv.  Ed nou pou nou kapab met plis lord, pou nou kapab met plis kontrol, olye sey prezant nou konman en mons ki fer bann travayer Gouvernman per.

Mr Speaker FPAC ti egzamin 30 Lorganizasyon ki ganny mansyonnen dan rapor Oditer Zeneral 2017.  E mon pou al direk lo serten bann dekouver ki nou’n fer.  Mon pa pou al dan rapor antye, i annan 60 ekek paz me konman en rezimen.

FPAC in dekouver sa bann febles prensipal.   I annan en mank konesans e obzervasyon Lalwa Polisi prosedir ek Regilasyon ki devret ganny swiv letan pe fer bann gran prokirman.  Nou santi poudir i annan ankor en febles la.  En kantite keksoz i ganny aste e plizyer servis i ganny donnen san pran kont bann Lalwa ek prosedir e alor valer pou larzan i kapab ganny konpromi.

In annan en mank rikord ek dokiman ki ganny garde pou siport bann tranzaksyon finansyel dan bann diferan Lazans piblik, pou donn en  leksplikasyon kler lo bann tranzaksyon.

Plizyer bann Lazans Gouvernman i annan en sistenm kontrol ki ranpli avek fot e alor i rann zot inefektiv pou asire ki selman bann tranzaksyon otorize ki pase avek bann sonm egzakt.

Bann bon sistenm pou kontrol byen savedir bann assets i osi manke.  Bann ka kot i annan bann rapor pert oubyen kot i annan soupson pert larzan piblik, oubyen bann byen, pa pe ganny bon swivi dan en fason efektiv e satisfezan.

I annan en gro nesesite pou  donn lantrennman neseser tou bann accounting officers e zofisye kontabilite dan bann Lorganizasyon piblik lo zot rol e responsabilite dan lenplimantasyon Lalwa Finans piblik ek son bann Regilasyon.

Kont labank pou en valer R134milyon date le 31 Desanm 2016 pa ti ganny enkli dan kont Trezor me ti selman ganny devwale konman notes to the accounts e nou trouv sa en pwen ki nou bezwen note.

Lavant oubyen bann lease serten byen Leta, pa’n ganny byen kalkile pou donn reveni finansyel ki Leta i sipoze ranmase.  E son rezilta se en pert dan reveni.

E dizyenmman i annan serten Minister Departman ek Lazans ki pe fer en gran zefor pou amelyor ban mankman lepase.  E la Mr Speaker nou bezwen lo lapar FPAC, nou bezwen salye bann accounting officers ki kot nou vwar  i annan en gran progre ; kot zot bokou pli konsyansye e serten fot ki nou’n – oubyen serten mankman ki nou’n pas atraver nou vwar ki poudir sa bann mankman  in ganny korize e ki zot pe vreman fer zot travay dan en fason vreman serye.

Bann rekomandasyon ;  FPAC i fer sa bann rekomandasyon swivan avek bi remedye bann febles ki’n ganny idantifye partou kot zot egziste.

Premyerman.  Nou rekomande ki tou Lorganizasyon i devret annan ase staff kalifye afen ki zot kapab akonpli zot manda efektivman.

Pou zot kapab akonpli sa DPA i devret travay an kolaborasyon avek bann Lorganizasyon piblik lo bezwen zot letablisman.

Minister Finans i devret konsider finansman pou bann Lorganizasyon piblik lo zot bezwen endividyel an prenon konsiderasyon zot bezwen spesifik.

Dezyenmman.  Ladministrasyon bann Lorganizasyon piblik i bezwen asire ki zot sistenm kontrol entern pe fonksyonn byen, e ki bann lenspeksyon regilye i ganny fer efektivman, pou fer sir ki tou reveni i ganny kolekte a ler, e ki depans i ganny kontrole.

Ladministrasyon bann Lorganizasyon piblik, i devret aste bann marsandiz a en pri konpetitiv.  Pa zis akoz se sa ki Lalwa i demande, me osi avek bi depans larzan piblik dan fason pli bon posib.

Katriyenmman ; Minister Finans i devret reviz lalis bann kont labank ki pa ganny enkli  dan bann kont Trezor avek bi entegre zot dan sistenm Trezor oubyen prodwi en lalis ki bon e fer sans.

Senkyenmman ;  Nou rekomande ki Minister Finans i devret vann oubyen lwe bann byen Leta dan en dele pli kourt posib.  Tro souvan keksoz i trennen e se sa ki bann Lazans Minister i dir avek nou.  E finalman Mr Speaker FPAC i rekomande ki Gouvernman i bezwen asire ki bann Minister, Departman ek Lazans ki swiv, zot swiv byen bann Regilasyon finansyel, i kontinyen fer li e kot i posib ranforsi sa lankadreman rann kont ki an plas pou anpese ki zot deteryore.

Konklizyon Mr Speaker;

Mr Speaker i kler ki in annan en amelyorasyon dan lafason ki finans Gouvernman pe ganny administre konpare avek bann lannen avan 2017.  Sepandan i annan en gran mankman dan lafason ki resours Gouvernman i ganny administre, an relasyon avek bann aktivite pou ki zot in ganny bidzete.  Rezilta dan sa rapor lodit in montre bann menm febles ki egziste dan tou Minister, Departman ek Lazans.  Notaman,

  1. Zot pa swiv bann regilasyon finansyel.

2.Zot kas Lalwa prokirman.

  1. Zot pa gard byen zot liv ek rikord.

I osi tre alarman pou dir ki Brans Gouvernman ki kolekte reveni pe ranmas bokou mwens ki zot devret dan tou seksyon tax.   Sa bann konsern i serye e i merit annan aksyon imedya, pou asire ki progre enportan i ganny fer pou kolekte tou reveni ki devret ganny kolekte anba Lalwa, e osi pou fer sir ki rikord tou larzan Leta ki ganny depanse i ganny byen garde.

En tel pozisyon i vin pli konsernan etandonnen ki rezilta Bidze 2017 ti negativ e ki sa ti osi ganny ekspekte an 2018.

FPAC i rekonnet ki en gran zefor pe ganny fer pou koriz bann lerer, me nivo lefikasite ki’n ganny obzerve pa akseptab.  Linefikasite pa akseptab.  Finalman Mr Speaker FPAC i ensiste avek Gouvernman, pou mentenir  en nivo resours apropriye pou tou bann kad  kontabilite e an partikilye, pou ranforsi abilite SRC pou fer zot travay lo en nivo profesyonnel ki piblik i ekspekte, e ki kapab ganny en bon revi lodit.

Avek sa detrwa parol Mr Speaker, mon anvi osi dir ki FPAC in fini akonpli son rol anba Konstitisyon pou li regard rapor Oditer Zeneral.  Devan nou i napa okenn rapor Oditer Zeneral ki overdue.

Alors letan Oditer Zeneral i ava prezant son lot rapor pli tar dan lannen nou ava fer li.  Nou ava fer li me an menm tan osi Mr Speaker permet mwan pou dir ki se nou lentansyon pou nou byento dan 2enm trimes prezant rapor lo lenvestigasyon FIU avek NDEA.  E parey nou’n dir ki malerezman sa travay in trennen, parski sak fwa ou krwar ou pe ariv a lafen i annan nouvo keksoz ki monte.

Me selman nou espere ki poudir pou napa nanryen nouvo.  Mr Speaker byensir konman en Komite nou eksprim nou remersiman pou tou bann Lazans Gouvernman parski nou deal avek tou bann Lazans Gouvernman pou bann dimoun dan zot seksyon Finans kot zot toultan pare pou zot travay avek nou, pou Minister Finans li menm, parski nou ganny bon korperasyon avek Minister Finans, e byensir pou Oditer Zeneral avek son lekip ki pare toultan pou korpere.

E la mon anvi dir osi  – azoute Mr Speaker ki i annan enn de bann lodit spesyal ki nou’n demann Oditer Zeneral pou antreprann e nou pe atann ki zot ganny prezante avek nou.  Me finalman Mr Speaker i enportan, i tre enportan pou mwan azout en mo remersiman pou SBC ek bann lezot medya, me spesyalman SBC parski SBC zot donn nou zot letan e sak fwa nou annan  bann Sesyon, zot la pou zot transmet tou keksoz an direk.  E sa mon krwar in en legzersis edikasyonnel e tre enportan ki’n permet nou pep pou zot pli byen konpran bann Lalwa Prokirman e se sa osi ki fer petet ki ozordi letan i annan Question Time, nou annan  en pli gran enteraksyon avek bann dimoun spesyalman kot i konsern bann size finansyel.

Mr Speaker mon pa anvi terminen san ki  serten Lorganizasyon i santi mon’n bliy zot, alor si mon kapab dir en remersiman zeneral, global pou tou bann Lorganizasyon ki’n ed nou.  Avek sa Mr Speaker mon pou prezant ou 3 kopi rapor.  Enn pou Lasanble li menm.  Enn pou Prezidan Larepiblik, avek enn pou Oditer Zeneral.  Mersi bokou.

 

(APPLAUSE)

 

MR SPEAKER

Mersi Onorab Ramkalawan.  Ankor mon take it ki Lasanble i adopte sa rapor FPAC lo revi lo rapor Oditer Zeneral 2017.  Mersi Onorab Ramkalawan.  Bon nou pou kontinyen nou travay e parey mon ti’n dir bomaten nou prosen item i Public Bills e sak moman ki sa i arive, i ankor devan Lasanble sa matter i ankor vivan.  E sak Sitting sa ki Chair si i Deputy Speaker oubyen si mwan nou bezwen fer en prononsyasyon lo la, pou kit bann Manm enformen lo ki zistans nou ete, kwa ki nou pe al fer e osi ankor sa ki pli enportan pou les manm piblik deor sirtou bann ki touse par sa travay okouran kwa ki nou pe fer.

Bon lo sa size savedir sa Public Service Salary (Amendment) Bill, 2019 ki devan nou, an vi ki lofis Prezidan in anons en Komite e pou osi montre bonnfwa lo lapar Lasanble Nasyonal,  koman Speaker, mon’n deside ki nou pa pou pran deba lo sa Bill.  Nou pa pou kontinyen deba lo sa Bill, malgre ki lo kote LDS zot in fini prezant serten amannman.  Me nou pou plito esper rezilta travay sa Komite.  E nou swete ki ler nou a retournen an Me Lasanble i a’n ganny enformen lo rezilta sa travay.

E parey mon’n dir mon anvi asir tou dimoun deor ki pe telefonn mwan e osi anvoy mon mesaz, ki Lasanble pe fer tou sa ki posib pou ariv a en solisyon.  E parey plizyer Manm in dir e ki osi lo kote Gouvernman in konfirmen zot pa bezwen trakase akoz zot pou ganny back payBackpay i posib e sa in ganny konfirmen lo tou kote. So vwala mon pozisyon ki mon ti anvi fer lo Public Service Salary (Amendment) Bill, 2019Ok.

Avek sa nou ava kontinyen nou travay e nou ava bouz lo lot item lo Order Paper e sa se Mosyon.  Mon ava call lo Onorab Clifford Andre pou move son premye Mosyon.  Premye Mosyon lo Order Paper.  Onorab Clifford Andre.

 

HON CLIFFORD ANDRE

Mersi Mr Speaker.  Bonn apre midi tou dimoun ki a lekout.  Bonn apre midi bann Manm Onorab.  Mr Speaker Mosyon i lir koumsa;

‘’The National Assembly resolves to quash S.I 12 of 2019 in accordance with the interpretation and general provisions Act, Section 64(2). ‘’

Mr Speaker le 18 Desanm 2013 5enm Lasanble Nasyonal ti aprouv en Bill ki entitile,  ‘’A Small Business Financing Agency Act 2013. ‘’ Bann fonksyon sa Bill Mr Speaker i ganny vwar dan Seksyon 5  sa Bill.  Sa Act apre ki in pase.  I lir koumsa:-

‘’The functions of the Agency are to process and approve applications for concessionary loans. 

  1. b) Appraise and evaluate small business projects.
  2. c) Prepare and enter into loan agreements with small businesses.
  3. d) Evaluate grant and monitor loans
  4. e) Maintain proper accounting records of all transactions and
  5. f) Encourage and facilitate enterpreneurship in small business enterprise. ‘’

Mr Speaker a sa pwen bokou bann pti biznes ti aprose.  Bokou bann sitwayen ti aprose avek bi pou zot fer en laplikasyon formel e ganny en pti loan, ki pou permet zot konmans en pti biznes ki a fer ki zot osi zot ava kapab vwar en sours reveni adisyonnel, par ler e i annan serten ki pou agrandi.  An tout fwa bokou zot in fer laplikasyon.  Lannen pase Mr Speaker ti annan en kestyon ki ti ganny anmenn dan Lasanble nou’n koz lo la bomaten, ankor avek bi pou vwar en pti pe bann iregilarite ki pe pase kot sa Lazans.  E nou’n vwar depi sa kot in annan bokou turns kot CEO in ganny sispann apre terminated.  Minis in vin dan Lasanble le 5 Novanm lannen pase, in dir nou poudir fon pe ganny transfer.  En fon pe ganny kree e pe ganny transfer avek DBS e bann travayer pe bouze pe al dan bann diferan landrwa.

Lenformasyon ki mon’n gannyen Mr Speaker  i montre ki poudir i annan travayer ki ti’n ganny ofer bann pozisyon dan bann lezot landrwa, kot zot ti pou ganny en saler en pti pe pli meyer me a ler aktyel zot pe ganny notis, ki zot saler annefe i pli ba ki sa ki zot ti pe gannyen kot SBFA.

Mr Speaker nou’n vwar apre tou sa bann devlopman, dan envestigasyon parey Minis in dir nou in annan Anti- Koripsyon in ganny enplike.  So i bezwen annan en serten eleman pratik koripsyon ki zot pe get ladan.  Alor nou ava espere pou nou kapab vwar ki zot vin avek Mr Speaker.

Me i enportan pou note Mr Speaker le 15 Mars 2019 i annan en S.I 2012 – S.I 12 of 2019 ki son tit i apel Development Bank of Seychelles Decree e in donn son tit par anba i Development Bank of Seychelles Small Business Financing Agency Fund Vesting Order 2019.  Mr Speaker letan nou pe get sa S.I son premye paragraf i lir koumsa.  ‘’Whereas the Small Business Financing Agency has in exercise of the powers conferred under section 6(1) (b) of the Small Business Financing Agency Act 2013.’’  I sit sa limero Act 20 of 2013.

‘’… created a fund for the purpose of entering into financial arrangements with other banks.’’

Mr Speaker se a sa pwen ki mwan konman en avoka mon vwar i annan serten eleman legal ki pa pe pran an konsiderasyon.  Me mon oule fer kler avan mon al lo sa pwen ki poudir mon lentansyon se pa ditou pou anpes Jean ki’n fer son laplikasyon menm avan ki CEO ti ganny sispann, menm avan ki kestyon ti ganny met dan Lasanble pou reponn pou anpes li ganny son loan.  Non!  Ditou!  O kontrer Mr Speaker, mwan mon pe dir ki sa fonksyon ti devret reste avek SBFA.

SBFA pa ti devret enteronp pou li donn bann pti loan avek bann dimoun.  I ti’n devret met en caretaker CEO oubyen revwar ki mannyer administrativman i pou carry on e kontinyen donn loan bann dimoun ki’n fer zot laplikasyon pou ki nou pa ti ava vwar nou dan sa lenpas ozordi kot bann pti biznes pa pe ganny zot loan menm si zot in ganny dir.  Bokou in vin kot mwan Mr Speaker akoz mwan mon dan menm batiman, mon zis ouver mon laport mon sorti mon tonm kot zot.

So zis en koridor ki separ nou alor nou dan menm batiman e mon konn bokou ki pase laba.  Alors e ki enportan e se sa ki nou’n anmenn latansyon pep Seselwa ki ozordi nou annan en case kot Anti Koripsyon.  I enportan ki nou enform Seselwa ki annan en mal practice ki ti pe pase laba e sa i enportan ki Seselwa i konnen  e ki ozordi se pa LDS ki pou dir ki Jean/Paul/ Joseph/ Maryline pa devret ganny son loan me se Gouvernman US ki ti’n devret fer sir ki letan i tir en lot i remet en lot e sa prosesis i kontinyen e sa dimoun i vwar remed dan son sityasyon ki li i pe demande.

Mr Speaker letan nou pe gete sa S.I son lartik seksyon 6(1)(b) i lir koumsa.  ‘’In the performance of its functions the Agency shall have the power to:-

  1. b) enter into financial arrangements with other banks. ‘’

Mr Speaker i bezwen annan en fonksyon ki pe fer.  E sa fonksyon i ganny mete dan seksyon 5 sa Act.  So si i pa pe perform enn sa bann fonksyon ki dan seksyon 5 i pa kapab tonm dan seksyon 6 pou li fer nenport kwa.

So SBFA bezwen pe operate e pe desarz sa fonksyon pou li kapab invoke lartik 6(1) (b).  I kapab antre an Lagreman avek en labank pou dir ok ou pou hold mon account, mon larzan e pou donn mwan en check book.  Mon pou issue sa check book sa dimoun pou sinyen kot mwan me selman i pou vin kas sa larzan kot ou.  E letan i re peye i pou re pey kot ou.  Sa i kapab fer.  I kapab antre dan en Lagreman e sa spesifikman ki seksyon 6 i dir.

Mr Speaker tousala i bann anomali.  I vre.  I vre.  Nou bezwen admet ki anba seksyon 40 DBS Decree Prezidan, Prezidan i annan drwa fer en Vesting Order.  I enportan pou nou note sa i korek.  Sa Vesting Order i kapab fer, me i bezwen fer sa an referans avek en fon, en Departman Gouvernman oubyen en Statutory body parey i dir.

Me parey nou’n vwar SBFA Minis bomaten in dir nou i ankor anba envestigasyon me menm si en Lorganizasyon i anba lenvestigasyon pa vedir ki i bezwen fermen.  Pa vedir ki son fonksyon i ganny transfer.  E dan son Act, dan son Act napa, napa provizyon pou transfer son fonksyon avek en lot labank.  I napa sa.  I kapab antre en Lagreman pou fer en keksoz letan li i pe perform sa fonksyon.  I enportan ki nou ganny sa kler akoz lentansyon sete pa pou dir  poudir i mal, oubyen i annan koreksyon ki bezwen ganny fer me se pou montre kote serten koreksyon i bezwen ganny fer, akoz la ki mannyer i ete i pa an konformite avek son Act li menm.

Alors Mr Speaker i dan sa konteks ki mon krwar e bomaten Minis in dir ki poudir SBFA in delegate son fonksyon.  I napa drwa fer sa.  Napa en Seksyon – napa en Seksyon dan sa Act SBFA ki dir avek ou poudir the Agency shall delegate powers a,b,c,d.  O kontrer i dir ou antre en Lagreman.  I pa kapab delegate.

E sa ki Minis in dir nou i pa korek, akoz son Lalwa pa permet li Mr Speaker pou li fer en delegasyon son pouvwar anba Lalwa.  Lalwa i ava ganny amande i ava ganny mete dan en lot Act, pou fer sir ki kekfwa sa travay i ganny fer.  I enportan pou note parey Minis in sey eksplike bomaten ki SBFA prezan – I mean DBS prezan pou konmans fer disbursement.  Me selman letan nou gete, sa parti kot i dir 4poursan, alors i pou bezwen al kree en Seksyon anba DBS pou li fer en interest rate ki more favourable.  Akoz si mwan mon pou vin pran R150mil avek DBS, mon pou pey 9poursan oubyen 7 poursan oubyen 10poursan.  Me selman si mon pou pran oubyen en lot dimoun pou pran 150mil anba sa fund li i pou ganny 4poursan.  Eski sa i pa pou fer travay DBS en pe konplike Mr Speaker?

Akoz definitivman tou dimoun pou le al pran enn kot son rate of interest i lower.  I pli ba e alors li osi i pou benefisye e son profi i kapab vin en pe pli vit.  So dan sa laliny Mr Speaker mon krwar ki Gouvernman i bezwen revwar sa S.I.  Remet li an perspektiv.

Mon konpran ki i annan  en investigation e nou tou nou ti a kontan vwar en lafen avek en investigation e si pou annan prosekisyon, pou annan prosekisyon e case osi i vin a son lafen.

Se dan sa konteks Mr Speaker ki mwan mon krwar i enportan.  I vreman primordyal ki Gouvernman avek biro Attorney Zeneral, i reget en pti kou sa S.I e travay lo la, vwar ki mannyer i kapab vreman,  vreman vin an konformite avek nou bann Lalwa ki nou annan.

E an dizan sa Mr Speaker, mon ti a kontan ki tou bann dimoun ki’n fer zot laplikasyon, i ganny zot larzan.  E Minis in donn  nou sa lasirans ki Mardi prosen tou keksoz pou an plas.  E mon Mazinen Mardi prosen zot ava kapab konmans desann kot DBS i ete Unity House konmela, in pran lofis ki SBFA ti pe okipe, antretan ki son batiman mon’n ganny fer konpran i renovate.

So Mr Speaker mon ti a kontan donn Gouvernman en pe letan pou li travay e vwar ki mannyer i kapab met sa S.I azour.  Si li menm li i santi i bezwen remet en lot akoz i kapab remet en lot ki ranplas sa enn ki pli an konformite avek nou lareg.

E dan sa konteks Mr Speaker avek swe ki tou bann aplikan ki’n fer zot laplikasyon in ganny zot loan semenn prosen, pa pli tar ki semenn prosen mon pa pou move ki sa Mosyon i ganny segonde Mr Speaker. E mon pou dir avek Gouvernman ki nou ava gete kwa ki pase e apre pli tar mon ava pran en desizyon pou nou kapab deside ki nou pou fer.  Avek sa Mr speaker mon ti a kontan konklir mon entervansyon.  Mersi.

 

MR SPEAKER

Mersi Onorab Andre.  Bon si ou request se ou pa pe move savedir Mosyon pa kapab ganny segonde e nou pa pou kapab debat lo la.  Savedir i dan en form ou pe retir sa Mosyon apre ou leksplikasyon ki ou’n donnen.

Me anfen i pa en quashing ozordi.  Nou ava fer sa kler, pangar mon ava ganny en lot somonn pou mwan al Ankour.

 

(laughter)

 

MR SPEAKER

Enn i bokou deza.  Enn i bokou deza e zis pou lenformasyon bann Manm Lendi swar,  ler ou annan en somonn pe hang lo ou latet son lavey pou ou al Ankour ou pa dormi.  E premye fwa parey mon’n dir dan nou listwar in fatig mwan en pe sa.  Ok?  Be mon swete ki nou kapab ganny en konklizyon ki byen.  So vwala alor Mosyon i fini koumsa menm.  Bon nou annan de lot Mosyon ki swiv me mon fini vwar ki sa de lot Mosyon i pou rantre dan bokou deba akoz sirtou sa enn 2enm par Onorab Waven William mon krwar i pou tous tou distrik.  Mon anvi demann le de Manm eski nou defer anvi ki nou pe al Recess ozordi, eski nou defer pou 2nd Term, e i ava ganny priyorite e i ava retourn lo Order Paper dan plas nou konmanse la e i hang there nou al dan Recess e nou retournen apre kot nou perdi en pti pe.  Manm piblik osi tou i perdi sa.  E petet – ok parey i annan en Manm Onorab pe dir i a fer en pli bon preparasyon osi tou pou zot deba.  Eski mon kapab ganny sa avek Onorab William e Onorab Wavel Woodcock?  Onorab William ou dakor?  Onorab Wavel Woodcock?   Dakor.  Bon si sa i ok savedir nou travay pou fini la ozordi.  E mon ti a zis kontan anons bann Manm Lasanble ki nou pou annan de meeting ki devan mwan la ki’n konfirmen pou semenn prosenn.  Sa se Bills Committee ki pou rankontre Mardi le 23 – 9er bomaten ziska midi.  E ankor Komite Chair by menm Manm Onorab Standing Orders Committee sa pou Merkredi le 24 – 9er ziska midi e tou lede meeting pou fer dan Committee Room 3.  Korek.  Alright.

Bon avan nou al dan Recess mon ti a kontan mon osi lo mon kote, remersi tou Manm Lasanble pou sa travay.  Mon konnen in en ler mon pe regard en pti pe dan konteks letan ki nou’n konmanse e la kot nou pe al dan Recess, i paret kourt me kantite Sittings ki nou’n fer, kantite travay ki bann komite in fer i vreman bokou e i montre ankor lelan ki sa 6enm Lasanble in pran.  E mon apresye e parey rapor sa 3 Chair in sorti langazman ki bann Manm i annan.  Mon ti a kontan osi remersi tou bann Minis bann zofisye Gouvernman e tou bann Departman Gouvernman, bann zofisye ki’n vin isi devan nou, bann Departman ki’n korpore dan en fason ou en lot pou travay pou nou kapab fer nou travay isi dan Lasanble.  E byensir en remersiman spesyal pou sa Sekretarya ki Lasanble Nasyonal i annan.

Mon pa pou zanmen aret dir mersi, mersi.  I annan  serten manm Sekretarya i ganny en pti mersi endividi, me sak fwa ki nou zwenn an group osi tou, mon pa ezit-e pou mon remersi lekip antye.

E byensir san bliye mon ti a kontan remersi SBC e malgre parler pa tou nou bann press release ki ganny air ki ganny pase, me nou konpran zot servi zot prop diskresyon.  Me pou air deba, pou pas nou deba Lasanble, pou pas travay ekstra ki sirtou FPAC i fer nou apresye sa korperasyon e nou dir zot mersi.

E bann figir familye ki nou vwar bann teknisyen ki la avek nou preski tou le Mardi ek tou le Merkredi nou vreman apresye zot travay e zot pasyans.  Mersi bokou.

Bon i reste pou mon swet tou bann Manm en bonn fen Semenn Sent e en zwayez Pak.  Lasanble pou al dan Recess.  Nou pou repran nou travay Mardi 14 Me 9er bomaten, right?  Lasanble i antre dan Recess.

 

ADJOURNMENT