::
Home » Verbatim » 2019 » Verbatim Tuesday 16th April, 2019

Verbatim Tuesday 16th April, 2019

NATIONAL ASSEMBLY OF SEYCHELLES

Tuesday 16th April, 2019

 The Assembly met at 10am

 National Anthem

 Moment of Reflection

 Mr Speaker in the Chair

 

 

MR SPEAKER

Bonzour tou Manm Onorab e bonzour tou dimoun ki pe ekoute e pe swiv travay Lasanble Nasyonal.  Avan nou pran nou travay bomaten, mon oule fer en kominike e osi pou eksplike  akoz ki Lasanble in konmans son travay 10er bomaten ozordi.

Bon mon ti antre dan pei Zedi le 11 Avril apre en Misyon Lasanble aletranze.  E son aswar mon ti aprann dan nouvel ki Prezidan ti’n rankontre ek dirizan Lopozisyon pou  diskit en way forward lo sa Public Service Salary (Amendment) Bill, 2019 ki devan Lasanble.  Dirizan Lopozisyon ti eksplik lapres ki zot ti’n ganny en bon meeting e plis diskisyon pou swiv.  Vandredi bomaten mon sekreter ti enform mwan ki Lakour in telefonnen pou enform mwan ki i annan en somonn e zot pe rode kote mon ete pou servi lo mwan.  Mon ti enform mon sekreter pou al kot Lakour e pran bann dokiman pou mwan akoz zot pa pou kapab vin dan precint Lasanble pou fer sa.  Alor se la ki mon ti aprann ki Prezidan Danny Faure ti’n met en petisyon Ankour kont mwan – Nicholas Prea dan mon kapasite konman Speaker pou demann Lakour pou anil desizyon Nasyonal pou quash S.I 18/2019 desizyon ki ti ganny fer par Lasanble Nasyonal zedi le 4 Avril.  Wi Prezidan in met en case kont mwan pou en desizyon ki Lasanble lebra Lezislatif Gouvernman ti pran.  A mon avi i annan kantite keksoz ki pa’n mars byen depi ki sa Prozedlwa in vin devan Lasanble, e i enportan pou mwan  konman Speaker, konman sa enn ki ozordi pe ganny tenir accountable pou desizyon ki mazorite Manm ti pran dan sa Lasanble pou mwan eksplike e pou fer konpran manm piblik.

Apre ki Lasanble ti deside pou anvoy deba lo sa Prozedlwa mon ti resevwar en let ki Prezidan ti’n ekri mon lofis pou eksprim lirzans ki en desizyon i bezwen ganny pran avan le 1 Avril.  Menm swar sa let ti ganny lir dan nouvel lo  SBC.  Sa ti swiv son lannmen par Statement e deklarasyon par Chief Secretary Department administrasyon piblik Mrs Esparon lo sa menm Lalwa lo SBC. E sa ti swiv pandan de zour swivan kot Sekreter D’Eta dan biro Prezidan Mr Mohammed Afif e PS Finans Mr Damien Thesee ti osi al lo SBC pou fer Statement lo sa Lalwa.

Le 03 Avril S.I 18 /2019 ki ti pe demann menm keksoz ki sa Lalwa ti ganny table dan Lasanble.  E menm zour Leader Lopozisyon ti table en Mosyon irzan pou anil sa S.I.  Le 4 Avril deba ti ankor on lo sa size pou anil sa S.I.  Me mon ti ganny enformen ki Trezor ti’n fini enform tou Departman piblik enkli Lasanble Nasyonal pou vin kolekte zot updated payroll ki ti enkli sa ogmantasyon 5poursan.

E tou sa pandan ki sa Lalwa ti ankor vivan  devan Lasanble.  Sa sekans pa ankor fini.  Parey mon’n fer sorti Zedi pase Prezidan ti zwenn ek Dirizan Lopozisyon e apre son lofis ti anonse ki en komite pe ganny kree pou kontinyen diskisyon.  Le de parti dan Lasanble in osi fer zot kominike lapres.

Yer Prezidan in rankontre bann Manm US e osi son lofis in anons konpozisyon sa Komite ki pou diskit sa revizyon saler dan sekter piblik.  Leksplikasyon ti ganny donnen lo SBC par Mr Mohammed Afif me la i enportan note ki napa okenn  Manm Lasanble Nasyonal lo sa Komite.  Mon osi fer resorti ki apre ki deba lo sa Prozedlwa ti ganny anvoye mon ti demann tou lede kote, tou lede parti dan Lasanble pou prezant zot amannman.  Ziska la Sekretarya Lasanble in selman resevwar amannman sorti kot LDS ki mon’n fer sirkile ek tou Manm.

I fer premye fwa dan listwar 3enm Repiblik ki Speaker Lasanble i ganny anmennen Ankour lo en desizyon ki Lasanble in pran e sa i konsern sa size logmantasyon dan saler sekter piblik ki ankor devan Lasanble.  Case in ganny prezante devan Lakour 9er bomaten ozordi.

E case in ganny anvoye pou le 2 Me.  La mon ti a kontan remersi tou Manm Onorab e manm Sekretarya ki’n akonpanny mwan Ankour bomaten e osi remersi tou dimoun pou zot pasyans e konprenezon e byensir parey labitid mon prezant en leskiz.  Sa bann keksoz i arive dan lavi.

E konman sa enn ki antet sa Lenstitisyon mon bezwen pran mon responsabilite e kontinyen sa travay ki 6enm Lasanble pe fer.  Lasanble Nasyonal pou kontinyen fer son travay avek bi kontinyen rod sa ki bon e meyer pou tou Seselwa.  Mon repete 6enm Lasanble dan son travay pou kontinyen rod sa ki bon e ki meyer pou tou Seselwa.

 

(APPLAUSE)

 

 

MR SPEAKER

Sesel i pli gran ki mwan.  Sesel i pli gran ki nou tou.  Mersi.

 

(APPLAUSE)

 

MR SPEAKER

Bon nou pou kontinyen nou travay e mon ava demann Madam Clerk, nou ava pran nou Order Paper.  Ozordi nou annan bann Papers Laid e apre sa nou pou al direkteman lo bann kestyon.  E apre nou ava kontinyen avek Mosyon pou sa de zour.  Mon anvi zis averti bann Manm e manm piblik osi tou ki demen dernyen zour, ki demen dernyen zour ki nou pe rankontre e Lasanble pe al dan recess apre.  Mon ava zis demann Madanm Clerk pou lir bann papye ki’n ganny prezante, ki’n ganny table.  Madanm Clerk.

 

MADAM CLERK

Mersi bokou Mr Speaker.  Bonzour Mr Speaker.  Bonzour tou Manm.  Bonzour tou dimoun ki a lekout.  Prezantasyon papye sa semenn nou annan, S.I. 19 Three year 6% Development Bank of Seychelles Bond, Debt Guarantee Order, 2019.  Swivi par S.I. 20 ki Five year 6.5% Development Bank of Seychelles Bond, Debt Guarantee Order, 2019. Mersi Mr Speaker.

 

MR SPEAKER

Mersi Madanm Clerk.  Mon ava –  Yes Onorab Ramkalawan.  Mon ava donn ou laparol.

 

HON WAVEL RAMKALAWAN

Mersi bokou Mr Speaker.  Bonzour Mr Speaker, bonzour tou Manm Onorab e tou bann dimoun ki a lekout. Mr Speaker mon krwar ki nou tou nou’n soke yer swar letan nou’n trouv sa dife ki’n detri Katedral Notres Dame de Paris.  E i en landrwa ki pandan plis ki 850an bann kretyen in adore e in selebre la rezireksyon Zezi Kri e son krisifiksyon. E la ki nou  dan semenn sent  i annan en pli gran signifikans ankor e alor lo – mon ti ava kontan lo lapar Lasanble Nasyonal eksprim nou solidarite avek bann Franse me osi avek Legliz Katolik Romain.  E isi mon ti ava demande ki si Lasanble ti ava anvoy en mesaz solidarite kot Mon Seigneur Denis Weihe pou montre ki poudir nou konsernen e ki nou osi tou nou touse avek sa destriksyon ki’n arive yer swar parski vreman in ras ker e nou tou nou pe partaz dan sa soufrans.  Mersi bokou Mr Speaker.

 

MR SPEAKER

Mersi Onorab Ramkalawan.  Mersi pou ou ki’n alert mwan yer swar lo la.  Mon ti pe fer en pe travay preparasyon pou sitting ozordi e ou’n anvoy mwan en pti Whatsapp e deswit mon’n al regard nouvel e mon krwar nou tou, mon’n partaz en pti pe sa nouvel avek plizyer bann zanmi, avek en Pret ek en Dyak osi tou ki mon vreman pros avek.  E zot osi zot in eksprim sa sok.  Lasanble Nasyonal i debout akote Lasanble Nasyonal Franse, Gouvernman Franse, pep Franse dan sa moman la e osi tou akote Legliz Katolik e byensir nou ava fer sorti en kominike from Lasanble ki nou ava anvoy kot Mon Seigneur Denis ki antet Legliz Katolik Sesel.

Alor nou reste touzour dan panse e lapriyer, spesyalman pou pep Franse.  Mon ava donn la parol Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker.  Bonzour tou Manm Onorab e tou dimoun ki a lekout.  Mr Speaker permet nou lo lot kote latab osi isi pou zwenn avek sa ki Leader Lopozisyon in fer sorti ek mesaz ki ou osi ou’n pase.  E nou senserman nou osi partaz sa senpati avek sa sityasyon ki’n arive avek Notres Dame e nou osi konman mazorite nou nou Katolik Romaine.  E nou vreman,  vreman touse e sa i ariv a en moman – enn bann moman pli for dan nou larelizyon dan la semenn sent e o komansman menm la semenn sent e sa i en sityasyon vreman trazik e nou zwenn avek zot parey mon’n dir pou pas sa senpati e sa sityasyon douloure.

E an menm tan ki nou anvoy mesaz kot levek katolik isi Sesel mon ti ava osi beg Lasanble pou anvoy osi en kopi swa sa menm let ouswa en mesaz osi avek Anbasader Franse pou montre nou senpati osi avek Leta Franse akoz sa i en moniman osi istorik.

Mon dir moniman istorik akoz i telman annan lontan ki i la 850an ou’n dir e bokou Seselwa ki mon konnen in al vizit La France in al fer en pti vizit laba kot sa Katedral.  E ankor enn fwa annou kontinyen priye petet dan semenn sent la pou ki bann keksoz koumsa i pa arive e ki Bondye toultan i servi son pouvwar pou eparny nou, eparny bann danze parey ki kapab tous lo nenport ki kwen dan lemonn.  Mersi.

 

MR SPEAKER

Mersi Onorab De Commarmond.  Pwen in ganny pran pou nou kopi Lanbasad Franse e nou ava demande osi tou ki i ava transmet nou let avek Parlman La France, Larepiblik Franse.  Bon avek sa mon ava demann Parliamentary Reporter pou apel Minis.  E premye lo nou Order Paper nou annan Minis responsab pou Touris Por, Marin e Lavyasyon Sivil Minis Didier Dogley.  Wi nou annan en – zis mon demann en pti leskiz Lasanble, nou annan en First Reading osi pou nou fer.  mon ava demann  Clerk pou nou profite fer sa First Reading.

 

MADAM CLERK

Mersi bokou Mr Speaker.  This Act may be cited as a Mental Health Care Act 2019 and shall come into operation on such date as the Minister may by Notice in the Gazette appoint.  Mersi Mr Speaker.

 

MR SPEAKER

Mersi.  Pou rikord Lasanble nou’n fer First Reading e Second Reading i ava vin lo en dat ki Lasanble i ava prononse.  Mon osi mon anvi zis alert Leader Lopozisyon ki  nou’n ganny en kominike ki Madam Clerk i ava sirkil kot ou with regards, petet i kapab enpakte lo ou PNQ.  Mon demann Madam Clerk pou anvoy kot ou.  I sorti kot Departman Foreign Affairs.  Bon mon ti a kontan welcome Minis Didier Dogley avek son delegasyon ki konpri PS pou Lavyasyon Sivil Por e La Marin Mr Alain Renaud e nouvo CEO kontrer felisitasyon Mr Ronny Brutus.  I nouvo CEO pou Lotorite Por.  Minister bonzour e welcome.  Ankor de lapar Lasanble mon prezant leskiz pou sa retar ki nou’n gannyen ozordi, me mon konnen depi yer swar mon’n fer Clerk averti zot tou.  Minister bonzour e welcome.  Bon nou ava al direkteman lo kestyon.  Mon ava pas laparol avek Onorab Churchill Gill.

 

HON CHURCHILL GILL

Mersi Mr Speaker.  Bonzour Mr Speaker.  Bonzour Minis ek ou delegasyon.  Bonzour tou Manm e tou dimoun a lekout.  Mon osi mon a zwenn ou Mr Speaker pou felisit Mr Brutus dan son nouvo post konman CEO Port Authority.  Kestyon i lir koumsa. Eski Minis i kapab eksplik sa Lasanble:-

(i) Ki kalite mezir Anti-Terrorist ki Gouvernman Sesel ti sipoze met an plas ki pa’n ganny fer?

(ii) Ki kalite defayans ki Lotorite oversight ek mezir akse kontrol i annan?

(iii) Ki kalite defayans ki seksyon mezir kontrol kargo ek mezir fasilite monitoring in annan?

(iv)  E ki Lotorite Por pe fer pou adres sa bann defayans?  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mersi Mr Speaker.  Bonzour tou manm Onorab e bonzour tou bann dimoun ki a lekout dan lakour.  Mr Speaker mon pou reponn sa 4 kestyon atraver en Statement kot mon pou kouver sa bann diferan pwen ki Onorab Churchill Gill in demande.

Premyerman i enportan pou konpran lo ki baz ki sa advisory par bann US  Coast Guard in ganny mete.  Lorizin bann sistenm sekirite kont teroris lo bann bato ek por ti ganny devlope apre ki ti annan bann latak teroris le 11 Septanm 2001 L’Amerique e osi apre latak teroris lo bato USS cole 2001. E tanker Lindbergh an 2002 an Yemen.  ISPS ouswa International Ship and Port Facility Security Code ti ganny adopte an Desanm 2002.  Lobzektif sa code se pou etabli frame work enternasyonal anba ki tou pei ki Manm konvansyon on Safety Of Life At Sea ouswa SOLAS a travay ansanm pou redwir e elimin bann risk sekirite kont bann bato e bann fasilite por atraver lemonn.  Bann keksoz ki bann pei e bann Lotorite Por i bezwen fer enkli Sesel i :

– Anmans e analiz lenformasyon lo kestyon sekirite.

– Met an plas e maintain bann sistenm protocol pou kominikasyon ant bann bato e por.

– Anpes bann dimoun ki napa lotorizasyon ganny akse avek por e bann bato.

– Anpes lentrodiksyon zarm eksplozif e lezot item ki ganny konsidere danzere anba IMO ki napa lotorizasyon dan por e lo bato.

– Annan en sistenm zesyon kler pou bann prodwir danzere dan Por.

– Annan en sistenm pou alert bann zofisye sekirite ler i annan okenn lensidan sekirite.

– Bann por e bato i bezwen annan bann plan sekirite an plas.  Epi zot devret train zot bann staff, fer bann drills ek bann legzersis regilyerman pou fer sir tou keksoz i azour.

Port Authority i deza pe enplimant laplipar sa bann mezir sekirite depi an 2004 ler zot ti prodwir en plan sekirite pou por komersyal.  Sa ki dapre sa rapor i manke se :-

  1. i) Regilasyon pou met an fors sa ISPS code isi Sesel.

– Bann prosedir e protocol sekirite ki’n ganny met an ekri ki kapab ganny verifye a okenn moman.

-Bann mankman dan bann lenfrastriktir e lekipman pou sekirite.

-Bann sistenm back up an ka i annan en dezas pa ti ase.

Training spesifik lo sekirite kont teroris pou staff Lotorite e pou Por ki pa’n ase.  – Tro bokou dimoun pe ganny akse avek por pou al clear zot marsandiz ki reste pli gran defi dan Por.  –

Zot pa’n vwar protocol kominikasyon lo sekirite ant bato e Por.

– Kontrol lo bann photo ID pou bann touris cruise ship pa ti ase.

-Napa ase kontrol lo bann travayer dan por ki pa display zot ID swa  zot badge identification ler sa bann dimoun ti la.  

Clearance dan bann gran kantite marsandiz ek kargo i reste pli gran defi pou sekirite  dan por.  Kargo  e marsandiz i ganny verifye par diferan Lazans  ki ganny trouve dan por.  Bann Lazans ki fer sa travay i Seychelles Revenue Commission,  Lazans Anti Narcotics, Lasante e  Customs dan prezans sa clearing agent e osi reprezantan Land Marine. Grander nou por aktyel e lespas ki nou annan i osi en pwen konsern konsernan klasifikasyon bann container e marsandiz ki pou selman ganny adrese dan son totalite avek nouvo lagrandisman nou por.  SPA osi i bezwen annan plis kontrol e lenformasyon lo cargo ki pas atraver por.  Depi ki US Coast Guard in met sa advisory nou’n etabli en tax force pou etabli sityasyon aktyel sekirite lo Por baze lo sa rapor ki zot in fer.  Apre sa nou’n devlop en matrix ou en latab avek bann diferan aksyon ki bezwen ganny pran e nou’n determinen kan ki tousala pou bezwen ganny fini fer.  Laplipar bann dokiman sirtou bann protocol a kapab ganny fer avan le 31 Me.  Nou osi ekspekte ki sa draft regilasyon ISPS ava pare avan lafen Zen.  Keksoz tel ki parey training ek lekipman pou sekirite ki ti sorti dan sa rapor in fini ganny fer e laplipar bann zofisye sekirite in fini ganny training e sertifye lo ki fason pou servi bann lekipman sekirite.  Sa bann training i pou kontinyen pandan sa lannen.  Annefe bann Ameriken zot menm zot in dakor pou donn training nou bann staff dan bann metod anti teroris.  Sa i sipoze pran plas an Zen sa lannen.  Kot i konsern la kantite dimoun ki pe ganny akse dan Por, sa pou ganny rezourd avek nouvo lagrandisman Por kot tou bann cargo pou ganny delivre dan en nouvo landrwa kontrole an deor sa restricted area dan Por li menm.  Antretan nou pou fer en legzersis pou vwar ki mannyer nou pou kapab redwir nesesite pou dimoun vin clear zot marsandiz dan Por e osi minimiz la kantite fwa petet ki zot antre sorti dan Por.  Nou plan se pou fini avek tou sa bann aktivite le 30 Zen 2019 pou fer sir poudir sa advisory i sorti lo Sesel.  Sel de keksoz apard ki zefor pou minimiz akse dan por ki malerezman pou bezwen plis letan se enportasyon e enstalasyon bann nouvo flood lights e en nouvo backup generator.  Sa nou ekspekte pou fini an Septanm sa lannen.  Mersi Mr Speaker.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker.  Minis donnen sa gro depans ki Gouvernman Sesel pe antre ladan pou agrandi nouvo por, eski ou donn nou garanti ki ler ou fini konplet sa nouvo por e nou pou 100poursan meet standard ISPS akoz mon mazinen sa komitman pou nou grandi sa por i osi fer pou avek nou aktivite ekonomik ki nou anvi annan en dominasyon dan rezyon.  E si nou meet ISPS sa i donn nou en bann lavantaz tre serye kot nou kapab akse nenport ki pei atraver nou bann bato. Alors eski ou pe donn nou garanti ki tou sa bann defayans apard sa bann ki ou’n dir nou by lafen Zen pou konplete, me selman okenn lezot ler nou konplet sa nouvo por tou pou’n fini anba kontrol?  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mr Speaker larepons i wi.  Parey mon’n dir laplipar sa bann defayans ki bann Ameriken Coast Guard in raise nou kapab adres li deza sa lannen.  Nou main defi se ki mannyer nou fer clearance sa gran kantite container ek Cargo ki vin dan Por e ki pe ganny kliyan dan por.  Le moman ki nou pou kapab agrandi nou pou annan lespas pou fer sa bann clearance dan lezot landrwa.  Savedir pou napa rezon akoz ki nou pa pou kapab meet sa ISPS code dan son totalite.  Mersi Mr Speaker.

 

MR SPEAKER

Mersi Minis.  Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun.  Mr Speaker Minis in donn nou en lalis bann mankman, en lalis bann mankman ki in dir anba sa code ISPS, nou bezwen travay pou konplete avan le 30 Zen sa lannen.  Mon anvi konnen ki son konsekans finansyel lo Sesel ant la ziska Zen?  Pou nou kapab akonplir sa checklist.  E dezyenmman lefe ki Coast Guard Ameriken in fer sorti sa advisory, eski in annan en lensidan dan por ki’n fer zot sa bann dimoun fer sa advisory lo Sesel?  Eski i annan en keksoz spesifik ou plis ki’n arive?  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mr Speaker mon a pran sa dezyenm kestyon.  Napa okenn lensidan spesifik ki’n arive dan por ki’n trigger sa  si ou le advisory pou mete lo Sesel.  Bann Ameriken zot annan bann lentere direk Sesel, akoz zot bann bato i vin isi regilyerman.  E depi en pe letan zot pe fer bann odit kot zot vini zot fer Bann assessment akoz i annan en lenpak direkteman lo zot bann bato.

Parey boner mon ti fek eksplike dan mon Statement mon ti fer zot rapel poudir sa ISPS kote i sorti.  I sorti ler ti annan sa bann latak lo USS cole avek sa tenk Lindbergh.  Savedir kot bann Ameriken i annan zot bann bato ki frekante definitivman i annan en lentere direk.  E alor se sa ki pe fer zot fer sir poudir nou por vreman i annan the maximum kapasite pou li deal avek bann Anti-terrorist, pou nou met an plas bann anti- terrorist measures.  Mon krwar sa i enn.

2enm keksoz nou pa ankor quantify akoz la ki nou pe fer nou pe travay lo bann diferan keksoz pou  met li an mars i pli vit posib.  I annan ki nou pou bezwen tender par egzanp i annan serten travay konsernan bann fencing ki nou pou bezwen amelyore.  I annan bann cameras ki nou bezwen met an plis.  I annan deza serten me solman nou pou bezwen met an plis e met bann kekfwa ki pli powerful.  I annan bann flood light ki nou pe anvizaze mete e sa osi pou fer vini e enstale pou annan bann kou.  E nou pa pou kapab donn nou en kou egzakt la ziske ler nou fini tender e nou’n fini ganny bann pri. E osi Kontrakter in fini donn nou konbyen pri pou koute pou enstale eksetera.  Me solman i pou annan bann kou ase eleve ki nou pou bezwen depanse pou fer sir nou meet sa bann demann ki zot  pe fer.  Mersi Mr Speaker.

 

MR SPEAKER

Mersi Minis.  Onorab Jude Valmont.

 

HON JUDE VALMONT

Bonzour Mr Speaker.  Mersi.  Bonzour Minis e ou delegasyon, tou koleg Onorab e tou manm piblik ki a lekout.  Minis swivan ou bann larepons mon ti a kontan demande depi kan  ki bann korvet ameriken pe vin Sesel si ou annan sa knowledge?

E eski Onorab Henrie in refer sorti ki  si resaman nou’n annan okenn lensidan mwan mon ti a voudre anmenn li pli lwen depi ler konmsi nou annan konesans sa bann korvet bato Ameriken pe vin isi si in annan okenn lensidan ki ou kapab dir ki’n prompt pou fer sa arive, sa alert la ?

E osi mon ti a voudre demande si i annan okenn lefe direk, si ou pe vwar okenn lefe direk anvi ki sa advisory in ganny sorti,   ziska la ziska Zen ler nou konplet sa bann zafer eski bato pou aret vini ?  I pou anpes bato vini ?  E mon dernyen kestyon se ki eski sa bann korvet Ameriken la eski zot ankor pe vin dan por aktyelman ?  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mersi Mr Speaker.  Annefe ti annan en bato Ameriken yer dan por e nou ekspekte ki tre byento pou annan plizyer ankor ki pe vini.  Sa advisory li i senpleman direk pou fer avek Ameriken e ki i pe dir se ki bann bato ki’n pas Sesel ler  i pou ariv Lanmerik si i pa’n pas plis ki 5 por, avan ler i ariv Lanmerik, i pou annan bann scrutiny ki pou bokou pli entans lo li savedir i pou bezwen met bann sekirite bokou pli eleve lo sa bato.

I en keksoz ki spesifikman pou Lanmerik i pa en keksoz ki aplik pou lezot pei.  Lenformasyon ki nou annan pandan sa dernyen – depi 2011 ziska 2018 i annan 56 bato ki’n pas Sesel ki’n ariv Lanmerik.  E nou estimen i apepre 3 bato par lannen ki pas isi ki al Lanmerik, so son lenpak si oule  pou minimum.  Me sa ki solman i kapab fer se ki i kapab donn en move limaz lo Sesel kot i kapab annan bann lenpak lo kalite insurance ki bann bato pou demande.

Akoz sak fwa bann bato pou bezwen vin Sesel si zot annan lentansyon pou al Lanmerik zot pou bezwen annan en sistenm sekirite bokou pli eleve lo zot bato pou fer sir poudir ler zot ariv Lanmerik zot kapab montre poudir ler ti pas Sesel zot ti annan tou bann sistenm sekirite an plas pou fer sir nanryen pa’n arive lo zot bato.

Konsernan lensidan well nou pa okouran okenn lensidan i senpleman prevansyon.  I pa en keksoz ki annan pou fer avek – neseserman keksoz in bezwen arive i en keksoz prevantif ki dir ou poudir ou bezwen pran serten mezir sekirite pou fer sir poudir ou dekouraz keksoz pou arive ouswa pou pran maximum  mezir pou fer sir sa bann keksoz ki annan pou fer ek teroris pa arive dan ou por. E depi kan Ameriken i vin Sesel.  Well Ameriken in vin Sesel mon krwar depi ler ti annan bann Whaling dan Sesel bokou lannen pase e mon pa ti ankor ne.  (laughter)  Mon pa pou  kapab donn ou sa bann lenformasyon.  Mon krwar bann dimoun ki travay dan arsiv i kapab dan en pli bon pozisyon.

 

MR SPEAKER

Mersi Minis. Onorab Clifford Andre.

 

HON CLIFFORD ANDRE

Mersi Mr Speaker.  Mr Speaker mon ti a kontan demann Minis anvi ki nou pe aplik ISPS code depi an 2004 akoz nou pa’n kapab fer en S.I pou nou fer sa Regilasyon, ki the main cause ki i lacking dan nou bann prosedir.  Dezyenmman ou’n dir i annan 3 bato so mon prezimen sa kestyon poursantaz i ava tonbe.   3 bato par lannen savedir fer li minim parey ou’n dir.  E ki lenpak Sesel on the black list of ISPS code i fer, konmsi negative impact ki i annan lo nou?  Apard ki trwa bato par lannen ki pas isi ki al direk Lanmerik?  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mr Speaker, premye keksoz mon ti a voudre klarifye pou dir napa blacklist.  Pa egziste blacklist.  IMO napa en sistenm blacklistIMO si i konnen dan en pei i annan en serten defayans i pou apros ou, i pou travay ek ou menm met a dispozisyon serten led teknik atraver bann expert pou vin ed ou pou amelyor ou sistenm.  Me selman blacklist li menm i pa egziste.

Sa zafer sa advisory parey mon’n koze i spesifikman pou fer ek Lanmerik.  Se Lanmerik li menm li ki anvi protez son pei ki met sa bann advisory si li i krwar dan sa bann landrwa i annan serten lentere.  E dan sa ka Sesel i annan serten lentere alor in deside met nou anler lo sa lalis advisory.  Konsernan S.I lo ISPS mon pa pou kapab dir ou akoz i pa’n ganny fer pandan tou sa letan, sa ki mon kapab dir ou se ki la konmela i annan en draft ki’n fini pare.

Nou pe finaliz li pou fer sir poudir i al kot –  pas dan bann prosedir neseser kot Attorney General’s Office, Cabinet  e ki byento – e nou plan se ki avan le 31 Zen savedir avan  sa 90 zour ki nou’n donn nou lekor pou adres sa bann keksoz mwan mon a’n kapab fini siny sa regilasyon e nou a fini vin compliant avek sa code.  Mersi Mr Speaker.

 

MR SPEAKER

Mersi Minis. Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker mon ti a kontan demann Minis prenon kont ki ou annan ou bann Konpannyen ki operate lo por e ki sa bann Konpannyen i la e pe fer bann aktivite ekonomik, ki langazman ki sa bann Konpannyen in osi donnen pou zot partisip dan zefor pou moderniz Por Victoria e osi fer ki travay ki ganny fer lo Por Victoria, zisteman akoz ou’n mansyonn sa problenm container ki bezwen ganny clear boner.

Ki reelman zot pe fer akoz sa problenm i kontinyelman repete, repete, repete.  E nou ti a kontan konnen ki relman pe ganny fer avek bann dimoun ki la?

Swa eski i bezwen in ler pou les  pou les en trwazyenm operater antre pou donn en pe plis konpetisyon sa de akoz zot tro konfortab kot zot ete.  Mon ti a kontan dir sa akoz mon pa oule ofans personn dan kestyon mon pe demande me selman i enportan pou ki piblik i konpran  akoz ki nou annan sa bann retar e akoz nou pe ganny sa bann difikilte ozordi ?  Mersi Mr Speaker.

 

MR SPEAKER

Mersi Onorab.  Minis.

 

MINISTER DIDIER DOGLEY

Mersi Mr Speaker.  Mersi Onorab pou kestyon.  Mon krwar poudir bann operater akoz i annan plizyer.  I annan bann clearing agents, i annan Land Marine li menm ek Hunt Deltel ki annan prezans dan por. E mon krwar dan lepase ki’n arive se ki nou’n tro konfortab dan lafason ki nou fer keksoz, e nou pa’n neseserman met ase latansyon  lo bann keksoz pou fer keksoz dan en fason byen.  Par egzanp ti annan menm bann aktivite kot keksoz ti pe ganny vann dan por, kot nou’n bezwen fer arete.

Par egzanp zot donn dimoun ziskan 10 zour, 15 zour pou clear keksoz dan por, container.  E nou vwar poudir i annan sa ale vini ankor ki nou bezwen met an plas en tim dimoun, en komite pou kestyon sekirite ki mon krwar poudir sa zafer pa pou kapab ganny fer zis lo nivo por li menm me Gouvernman i bezwen antre ladan.

Me the main thing se ki i bezwen sorti kot por avek SMSA ki nou, nou dir zot direkteman kwa ki zot bezwen fer pou redwir sa bann zafer.  E sa bann lakonpannyen ki direkteman enplike dan bann loperasyon dan por zot osi zot pou bezwen zwe zot rol pou fer sir poudir sa problenm i ganny adrese o pli vit posib.

 

MR SPEAKER

Mersi Minis.  Onorab Pillay.

 

HON SEBASTIEN PILLAY

Mersi Mr Speaker.  Minis mon ti a kontan demann ou vi ki ou’n dir nou i pou depan lo por avek SMSA ki kalite sinerzi travay ki egziste ozordi ant Lotorite por ek SMSA an relasyon avek sa travay ki bezwen ganny fer lo por akoz lenpresyon ki nou pe gannyen se ki i mank serten sinerzi ant le de Lorganizasyon.  

So ki mannyer prezan as sa Lotorite ki pe donn sa gidans Policy, sa gidans administrativ sa de Lotorite kwa ki zot, zot pe fer, ki sa Departman pe fer pou li kapab anmenn plis sinerzi ant sa de akter e fer ki zot a kapab travay lo en nivo korperasyon ki pli signifikan pou ki nou a kapab vwar bann solisyon pou serten bann problenm ki nou pe fer fas avek dan por?  Mersi Mr Speaker.

 

MR SPEAKER

Mersi Onorab.  Minis.

 

MINISTER DIDIER DOGLEY

Mersi Mr Speaker.  Sa kestyon kordinasyon ant SMSA ek SPA i en kestyon ki tre enportan.  I annan en pe letan depi ler nou’n konmans travay atraver Minister, akoz Minister osi i annan en Departman kantmenm napa bokou dimoun ladan, ki li in pran sa leadership rol enkli mwan ki nou zwenn pli souvan avek leadership SMSA avek leadership por.

Mon krwar ki nou bezwen met an plas se ki nou annan nou en national committee ki deal ek bann kestyon sekirite ek safety kot por SMSA avek Departman e lezot Lazans ki direkteman enkli dan por kot nou zwenn en pe pli souvan e kordin bann travay.

Akoz ki mwan mon’n vwar se ki i annan bann let ouswa bann kominikasyon ki pase ant sa de Lorganizasyon ase frekaman.  Me solman i napa vreman en striktir kot zot asiz ansanm e zot diskit ansanm.  E kot zot annan en progranm travay pou fer sir poudir keksoz i bouz dan bonn fwa.

E mon krwar se sa ki nou pou bezwen fer sir poudir ler nou pou al dan le fitir nou fer sir poudir i annan en striktir formel an plas kot bann kestyon pli pertinan i ganny diskite e bann solisyon i ganny trouve.  Mersi Mr Speaker.

 

MR SPEAKER

Mersi Minis.  Onorab Jean Francois Ferrari.

 

HON JEAN-FRANCOIS FERRARI

Mersi Mr Speaker.  Mersi Minis.  Minis parey nou’n tande souvan Por Komersyal i souvan ganny dekrir konman en paswar, kot klerman kontrol akse i feb e ki i pa kler lekel ki annan drwa antre, lekel ki annan drwa sorti, lekel ki annan drwa fer aktivite lo por, lekel ki napa drwa.  Alors mon ti a kontan demann ou Minis sa bann kestyon swivan.  Eski Minis bann aktivite komersyal prive dan compound Por Komersyal in arete?

Dezyenmman vi ki sa dernyen de lannen in vin dan latansyon piblik e menm dan latansyon Lasanble Nasyonal ki in annan bokou tansyon ant Management Port Authority e son lekip sekirite.  Eski Minis i kapab dir nou si in gannyen en lesanz avek nouvo CEO pou gete ki mannyer kapab ranforsi lekip sekirite por avek meyer training, meyer kondisyon travay pou asire ki sa sekirite ki bann Lazans enternasyonal e notaman Lanmerik i demande i ganny ranforsi ?  Eski sa travay pe  ganny fer lo nivo lekip sekirite ?

E finalman mon  ti a kontan si Minis i kapab dir nou vi ki CEO i la, ki porsyon por komersyal i tonm direkteman anba Port Authority ?  Akoz mannyer lenpresyon ki mwan konman en Manm Lasanble mon gannyen se ki zis sa building kot CEO i ete ki tonm anba Lotorite Por.  Lezot bout zot in fini ganny donnen dan lepase, Land Marine pran son bout, lot i pran son bout.

Prezan investment dan sa bann landrwa, Land Marine menm ki fer. Aranz semen li menm ki fer apre i dir ou be mwan ki’n aranz semen, mwan ki’n aranz parking be les mwan travay.  Konmsi kan, Minis ou kapab dir nou ki desizyon ou pe pran pou ki Lotorite Por i vin vreman en Lotorite lo por komersyal an antye?  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mersi Mr Speaker.  Konsernan bann aktivite prive dan por, lenformasyon ki mon’n gannyen avek nouvo CEO i dir mwan poudir tou bann aktivite prive dan por komersyal in arete.

Akoz mon rapel ler mwan mon ti konmanse konman Minis mon ti ganny enformen poudir ti annan siman pe ganny vann dan por.  Mon ti diskit avek Chair sa lepok me mon ti dir li poudir sa pa en keksoz ki  nou pou kapab kontinyen.

E sa bann aktivite mon kapab dir mwan menm mon’n vwar nepli egziste dan por.  Konsernan tansyon ant management avek lekip sekirite, wi mon okouran ti annan serten problenm dan lepase ant  bann heads sekirite ki ti la e avek management.

Mon konpran i annan en case ki Ankour avek Employment Tribunal kot pe ganny diskite ki i annan pou fer avek sa bann dimoun.  Pou le moman parey dan tou Lorganizasyon i annan serten issues ki pe sa- e mon okouran serten ki mon’n anvoy kot Acting CEO sa lepok, akoz Mr Brutus i fek ganny apwente semenn pase, e osi avek Chair e nou’n diskite ki mannyer ki nou pou kapab amelyor bann kondisyon travay bann lekip sekirite akoz nou rekonnet lenportans sa bann  dimoun  e travay ki zot pe fer dan por.

Sirtou lo kestyon training mon krwar i annan en kantite travay pou nou fer pou donn zot sa bann ankadreman ki zot bezwen.  Konsernan si zis en bout building dan por ki pou Port Authority larepons i non.

Se por i ganny atraver Gouvernman se SPA ki ansarz Por an antye dan son entity.  Land Marine li in ganny en lotorizasyon ouswa en Lagreman avek Port Authority pou li manage bann aktivite dan por, vedir load, offload avek clearance bann cargo ki antre dan por epi osi ki antre atraver bann bato ouswa bann ki pe export ouswa enporte dan por.  So alor se zot ki manage bann lekipman eksetera, bann cargo ki antre dan por i pou zot akoz se zot lekipman ki zot servi pou fer sa bann travay.  Mersi Mr Speaker.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRAI

Mersi Mr Speaker.  En pti kestyon siplemanter.  Mon ti a kontan si Minis i eksplik nou lenvestisman avek maintenance bann ground facilities, bann lespas parey container farm, semen, akse avek tou bann bout, langar bann keksoz koumsa.  Lekel ki fer sa bann maintenance avek improvement ?  Akoz mannyer nou ganny lenformasyon se ki Land Marine plito  ki donn Gouvernman dividend i servi son profi i repar bann fasilite.  E ler in fini repar bann fasilite i dir be mwan ki’n repare.  Mon bezwen annan en serten kontrol lo la.  Ki mannyer?  Lekel ki annan sa responsabilite for the investment lo bann  farms dan bann langar e maintenance sa bann fasilite?  Mersi.

 

MR SPEAKER

Mersi Onorab.  Minis. Go ahead Minis.

 

MINISTER DIDIER DOGLEY

Mersi Mr Speaker.  Sorry pou sa pti delay.  Mon ti bezwen konsilte.  Mon konpran wi konsernan maintenance in annan serten maintenance ki Land Marine in fer atraver bann laranzman ki’n annan ant SPA, ki’n ganny otorize par son Board li menm.

E kot zot in demann Land Marine pou fer serten travay lo behalf Port Authority apre zot pa’n bezwen pey sa bann duesGoing forward mon pa krwar personnelman mon pa krwar poudir sa i en laranzman ki devret pe ganny fer akoz mon krwar poudir SPA i devret kapab servi son prop resours pou envestir dan por e si fodre tender sa bann louvraz, gete lekel.  E zot bezwen annan en progranm an plas pou maintenance tou bann fasilite ki annan  dan por.  Mersi Mr Speaker.

 

MR SPEAKER

Mersi Minis.  Onorab Egbert Aglae.

 

HON EGBERT AGLAE

Mersi Mr Speaker.  Bonzour Minis ek ou delegasyon. Minis eski ou kapab dir ek sa Lasanble anvi ki Lanbasader Ameriken in fer resorti ki i pare pou ed Sesel dan sa demars.   E nou konnen poudir Sesel osi pe antreprann li dan son proze pou lagrandisman por, eski dan sa demars la i annan bann diskisyon en pti pe pli konkret kot in diskite lo lagrandisman por avek Lanmerik pou donn en sipor dan sa laliny pou ede sirmont sa defi sekirite ?

Dezyenmman apard ki sa trwa bato ki ou’n mansyonnen on average ki pas dan nou delo pou al Lanmerik, eski ou kapab osi konfirmen,  si la nou’n ganny okenn konsern atraver bann lezot pei ouswa lakonpannyen ki zot osi zot pe petet montre serten siny lenkyetid pou vin dan nou por vi ki nou’n ganny sa nivo alert ?

E dernyerman Minis an vi ki nou konnen poudir i annan diferan aktivite ki pe pase dan por e enn bann konsern se volim sirtou kot i konsern bann bato krwazyer.

Eski Lotorite Port ansanm avek sa nouvo devlopman ki pou vini zot pe konsider ki i annan en separasyon ant sa bann aktivite sirtou avek bato krwazyer pou fer por vin pli an sekirite e minimiz bann retar ?  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mersi Mr Speaker.  Konsernan bann bato krwazyer problenm nou por komersyal i  en multipurpose por.  I ti ava pli bon si nou ti kapab annan en por pou lapes, en por pou komersyal e en por pou bann tranzaksyon pasaze.  Annefe nou annan enn ki fer bann tranzaksyon pasaze me solman i zis pou inter island, savedir sorti Mahe pou al Praslin, Praslin, La Digue i vin la kot Inter Island Quay.  Me si sa quay kekfwa ti pli gran e i ti kapab ganny servi pou bann cruise ship i ti pou dan nou faver akoz nou ti pou kapab separ bann tranzaksyon cargo avek bann aktivite pasaze li menm.  E malerezman nou napa sa.  Alor ki nou bezwen fer e nou’n travay lo en plan ki pou bezwen ganny enplimante dan bann – dan sa 90 zour ki pe vini kot pou annan en clear semen ki pou ganny fer dan por avek sipor bann sekirite gard ki ler i annan bato krwazyer bann pasaze ki pe mars apye zot pou bezwen pas atraver sa landrwa. E sa landrwa li i napa bann containers ouswa bann kargo.  I pou en serten kwen ki  lo kote nor nou por komersyal.  Alor sa i premye pou nou fer sir poudir i annan sa separasyon ant cargo avek pasaze cruise ship poudir zot pa dan menm landrwa.

2enm keksoz eski i annan bann lezot konsern atraver bann lezot pei e lakonpannyen.  Larepons i non.  Parey mon’n eksplike sa i en keksoz ki pirman Ameriken, ki zot,  zot annan zot prop konsern e zot annan zot prop lentere dan Sesel akoz zot anvoy zot bann bato isi.  Alor se zot ki’n deside pou met sa advisory lo Sesel pou zot prop lentere.

Ziska aprezan napa okenn lezot pei ki’n montre okenn lentere dan sa zafer.  E si nou pou ganny sipor avek Gouvernman Ameriken pou le moman sel sipor ki zot in ofer mon krwar nou ava sey apros zot gete si i annan ankor lezot, se pou donn sa  training ki zot pe ofer an Zen sa lannen, kot zot pou anvoy zot bann prop teknisyen ki pou vin isi e zot pou train nou bann dimoun por lo ki mannyer bann anti- teroris mezir i ganny pran e kwa ki mannyer pou bezwen fer pou fer sir sa bann keksoz i ganny er korekteman. Mersi Mr Speaker.

 

MR SPEAKER

Mersi Minis.  Onorab Aglae.

 

HON EGBERT AGLAE

Minis mersi pou larepons.  Mon pou swiv dan laliny sa larepons dernyen kestyon la.  an vi ki se Ameriken ki’n vwar en konsern avek nou por Sesel, an vi ki nou annan bann reprezantan aletranze ki petet lo nivo Lanmerik laba nou annan Anbasader, eski in annan en negosyasyon petet pou zwenn ansanm pou kapab petet gete dan ki fason nou kapab dir akoz pou nou kapab arive lo sa nivo i  annan son kou finansyel.  Eski napa en fason petet konman de pei souveren ki nou kapab ganny en lasistans petet finansyel pou kapab ed nou dan sa demars?  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mersi Mr Speaker.  Nou ava atraver Foreign Affairs fer bann- nou ava vwar avek por egzakteman kwa ki zot bezwen e nou ava fer en demann atraver Foreign Affairs kot Lanbasad Ameriken.   Mersi Mr Speaker.

 

MR SPEAKER

Mersi Minis.  Onorab Flory Larue.

 

HON FLORY LARUE

Bonzour Mr Speaker.  Mersi.  Bonzour tou dimoun.  Mr Speaker mon ti a kontan demann Minis lefe ki in dir nou depi la Avril i pou pran li 2mwan pou konplet mazorite bann defi, e 5mwan pou met bann lalimyer ek en generator, back up generator eski i kapab dir nou akoz letan Sesel ti ganny sa notifikasyon an Me lannen pase ki pei pa ti trigger pou met sa bann sanzman an plas, sa bann rekomandasyon an plas?

Mon ti a kontan osi demann Minis atraver ou Mr Speaker lefe ki nou ti ganny sa advisory an Me 2018 ki by now, nou devret annan en Bidze alor konbyen pou koute sa bann depans parey Onorab Henrie in demande, mon krwar nou devret annan en figure asosye avek sa bann costs.

E lefe ki ISPS code ki annan 146 states ki ti join apre 911 ki en lenstriman pou prevent terorizm dan bann por ki mon krwar i devret en keksoz enportan pou Sesel.  Minis in dir ki nou pa oule annan en move limaz pou Sesel akoz nou’n telman an retar pou met sa bann rekomandasyon an plas?  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mr Speaker sa advisory i pa dir poudir Sesel i pa’n fer nanryen li.  Ki i dir se ki bann mezir ki Sesel i fer i pa adekwa pou anti teroris.  I pa vedir napa sistenm sekirite dan por. Mon asir ou si ou al dan por ozordi i pou pran ou en bon pe letan avan ler ou antre dan por akoz sistenm sekirite i ase serye dan por.  Me pou zot,  zot sistenm anti teroris ki zot  pe demann nou pou fer i en lot nivo ki nou, nou pou bezwen fer sir poudir nou meet sa bann kondisyon.  

Now annefe ler ou pou regarde laplipar sa bann keksoz ki zot pe demande i annan en kantite travay ki’n deza ganny fer.  Sel  keksoz ki pa’n ganny fer i pa’n ganny zwenn kekfwa sa bout kot Ameriken pe demande.

Par egzanp i dir ou poudir nou pa devret annan sa kantite dimoun pe antre dan por.  Be nou napa en lot landrwa pou al met container pou dimoun clear container. Alor nou bezwen antre dan por, dimoun i bezwen antre dan por pou al tir zot bann zafer.  Sa ki nou bezwen  fer se fer sir poudir  nou sistenm sekirite i bokou pli alaoter pou fer sir poudir napa okenn aktivite anti teroris ki pe arive ouswa ki nou sistenm prevansyon i ase bon pou anpes okenn aktivite ki kapab met nou por an danze.  Se sa ki nou bezwen fer

Now depi Me lannen pase mon krwar ti annan bann vizit.  Me mon konpran poudir bann kominikasyon ki i ti  gannyen akoz ler mwan mon ti – an Me mon ti’n fek vin dan Minister akoz mwan premye fwa mon ti tande poudir bann Ameriken ti dan por ti an Out lannen pase, e mon ti pe demann bann lenformasyon konsernan egzakteman ki pe arive akoz mon ti’n tande poudir bann Ameriken i annan  serten konsern konsernan sekirite dan por.

Me mwan mon ti ganny dir poudir ti annan serten diskisyon ki’n pase e mon ti ganny en dokiman ki zot ti anvoye kot zot ti’n raise serten issue depi an 2016.  E sa lepok sa manager ti dir mwan ouswa CEO ti dir mwan poudir sa bann keksoz pe ganny adrese so i pa en big issue.

E vreman i annan bann aktivite ki pe ganny fer akoz mon osi sak fwa mon al dan por mon vwar poudir sekirite i ase entans lo gate.  I pran letan avan ler ou antre. Now konbyen ki pou koute parey mon dir i annan travay ki’n ganny fer me personn pa’n asize ki’n konte ki kantite travay ki pe fer.

Par egzanp sekirite i pa zis lo en baz kot ou met lenfrastriktir.  I annan pou fer avek monitoring ki ou fer lo gate li menm.  I annan bann patrol ki pou bezwen ganny fer.  I annan bann camera ki deza egziste.  I annan lalimyer ki deza egziste.  I annan bann dokiman ki bezwen ganny prepare ki deza an plas.

Par egzanp zot annan en plan sekirite pou por ki’n fini ganny ekri depi an 2004 epi in ganny revwar.  I annan sa Lalwa, sa Regulation ISPS ki’n fini prepare.  I reste zis bann dernyen pti travay ki pou bezwen ganny fer avan ler ki nou finaliz son prosedir.  Alor i annan en kantite travay.

Si ou le nou a kapab asize fer en assessment konbyen in koute pou fer tou sa bann aktivite ki’n fini ganny fer e konbyen i pou koute, en estimate konbyen pou koute pou kontinyen amelyor. Me louvraz pa zanmen fini akoz sekirite i en keksoz ki long term e ou pou toultan vwar keksoz ki pou neseser ki pou bezwen fer dan le fitir.  Mersi Mr Speaker.

 

MR SPEAKER

Mersi Minis.  Onorab Larue.

 

HON FLORY LARUE

Mersi Mr Speaker.  Mersi Minis.  Minis mon krwar en code is en keksoz avek en clear list of requirements.  Prezan ou  bezwen konnen whether you meet it or don’t meet it.  Savedir si en advisory ti ganny fer an Me 2018, Sesel pa kapab dir i meet li partially e one year on prezan ki nou pe taye pou dir we want to do it in the next five months. 

So either nou ti annan en priyorite ouswa nou ti napa.  Ki rezon ki nou pa’n zwenn sa bann requirements e akoz nou an retar avek?  E wi Minis mon krwar i bezwen annan en cost.  Si ou pe implement en plan, its well over a year old, the body should know – the authority should know how much it will cost pei pou nou enplimant sa bann keksoz.

E anti-terrorism aksyon ki nou pe pran i en gran priyorite. I annan en kantite dimoun ki antre dan nou Por e nou bezwen fer li en priyorite.  Kantmenm i Ameriken si nou’n deside pou nou adopte sa nou bezwen konnen konbyen i pou koute e akoz nou’n an retar pou nou enplimant li konman en pei?  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mr Speaker sa code i pa donn nou ki kantite lalimyer ki ou pou mete. I pa donn nou ki kantite camera ki ou pou mete.  Ki kantite dimoun ki ou pou mete lo gate.  I pa dir ou egzakteman sak pti pwen ki ou bezwen fer.  Ki i dir ou i dir ou i annan bann assessments ki ou bezwen ganny fer regilyerman, e baze lo sa bann assessments ki ou fer regilyerman ou bezwen regarde si i annan bann lacking ki ou trouve e ou bezwen adrese.

Par egzanp dan Por i annan lalimyer me solman akoz pli ale nou annan plis container ki pe antre dan nou Por nou’n vwar li poudir sa bann lalimyer 12 met oter  ki nou annan  i pa ase.  Nou pou bezwen al met bann floodlight parey i annan lo laplenn foutbol.

Alor sa i en nouvo devlopman.  E sak letap devlopman en Por i annan bann nouvo defi ki antre.  E menm lo nivo enternasyonal lo nivo IMF, e sa code li menm sak fwa zot zwenn i annan bann nouvo keksoz ki antre.  Alor i en devlopman ki pe kontinyen.  I pa en keksoz ki ou dir poudir parey en batiman ou’n fer en plan ou ale ou build e ou fini.  I pa sa.  I en keksoz ki ou bezwen kontinyelman pe upgrade depandan ki sityasyon ki ou ladan.  Alor pou ki rezon ki tou keksoz pa’n kapab ganny meet mon napa bann lenformasyon.

Sa ki mon kapab dir ou se ki i annan en kantite travay ki’n ganny fer e i ankor annan travay ki pou ganny fer.   E menm detrwa bann keksoz pou ganny fer i pou kontinyelman annan bezwen pou nou kontinyen upgrade.

Now konsernan  bann kou mon a demann Por pou fer en assessment konbyen ki zot in depanse e en estimasyon konbyen i pou koute pou enplimant tou sa bann keksoz ki nou’n vwar i neseser pou zot fer an plis ki zot in deza fer deza.  Mersi Mr Speaker.

 

MR SPEAKER

Mersi Minis.  Onorab Johan Loze.

 

HON JOHAN LOZE

Mersi Mr Speaker.  Mr Speaker Minis dan enn son  repons in mansyonnen ki onus i lo SPA avek SMSA pou enplimant bann neseser.  Dan en lot son larepons Minis in osi mansyonn fencing, cameras avek floodlights.  Be Minis a koriz mwan si mon mal.  Pli gran fenced area ki bord avek Por Komersyal se ant Por li menm avek SEYPEC.  Mon kestyon se pou ki sa fence? Si pou SPA ouswa pou SEYPEC ?  E esansyelman lekel ki responsab pou upgrade li, met floodlights avek cameras lo la, who will bear the cost ant SEYPEC avek SPA pou sa fence area?  Mersi Mr Speaker.

 

MR SPEAKER

Mersi Onorab.  Minis.

 

MINISTER DIDIER DOGLEY

Ok.  Mersi Mr Speaker.  Konsernan Por SMSA li i annan zis oversight. Vedir fer sir akoz li i responsab pou safety.  Savedir okenn keksoz ki annan pou fer avek safety definitivman li i pou fer sir poudir Por pe fer le neseser akoz li ki donn sertifika of compliance pou vedir poudir Por pe fer sa ki i devret ganny fer.  Ownership Por li menm parey mon’n deza dir avek Onorab Ferrari i SPA, se Port Authority ki annan sa ownership Por.  Savedir tou bann fasilite bann striktir eksetera ki fenced sa restricted area Por i basically i en keksoz ki pou Por li menm.  E Por li i bezwen fer sir poudir son bann sistenm i annord.  Mersi Mr Speaker.

 

MR SPEAKER

Mersi Minis.  Onorab John Hoareau.

 

HON JOHN HOAREAU

Mersi Mr Speaker.  Bonzour Mr Speaker.  Bonzour tou dimoun a lekout.  Mr Speaker mon kestyon i en pti pe dan laliny ki Onorab Pillay ti pe demande taler.  Mon ti oule konnen si Minis in angaz li dan en negosyasyon avek sekter prive pou bann sirtou bann gran lakonpannyen ki operate dan Por, si i annan  en negosyasyon finansyel pou zot partly fund en pe sa bann keksoz ki bezwen ganny fer lo Por an vi ki in koz lo la kantite larzan ki pou kout Gouvernman?  E dezyenmman mon ti  kontan konnen kan dernyerman zot ti fer en full security audit lo Por? Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mr Speaker konsernan bann private operators, nou a kapab sey vwar avek zot mon ava demann Por pou fer le neseser pou koz ek zot pou vwar si i annan okenn si zot enterese pou fer kontribisyon.  Sinon i annan fason pli fasil se ki i annan en lease ki zot peye.   Apre i annan bann cargo fees ki zot bezwen pey Por.  E Por li i bezwen regarde pou fer sir poudir i raise ase larzan pou finans sa ki neseser pou ganny fer dan Por.  Me solman i pa anpes nou pou apros zot pou demann zot pou fer en kontribisyon atraver soz, akoz li osi dan zot lentere si Por i dan en leta ki bon.  Konsernan odit, mon ekspekte ou pe koz lo odit sekirite dan Por.  SMSA li normalman i fer en assessment tou le 5an pou li kapab donn SPA sa ki ou apel en compliance certificate.

Akoz tou Por pou li kapab operate i bezwen annan en compliance certificate anba International Maritime Organisation.  Epi SMSA i kominik sa avek IMO pou zot konnen poudir Por i compliant.  Me solman mon konpran par diskisyon ki mon’n gannyen avek Kaptenn Valmont poudir tanzantan zot fer bann site visit kot zot fer bann rapid assessment zot pase zot regarde si i annan  keksoz ki bezwen ganny adrese e zot dir ek Por poudir tel keksoz i bezwen ganny adrese.  Fer sir poudir zot fer sa zot fer sa akoz 5an parey ou konnen i en kantite letan ant ki ou’n fer en assessment apre ou al fer lot.  Mersi Mr Speaker.

 

MR SPEAKER

Mersi Minis.  Onorab Waven William.

 

HON WAVEN WILLIAM

Mersi Mr Speaker.  Bonzour Minis.  Mr Speaker avan mon poz mon kestyon mon ti a kontan lo non distrik Grand Anse Mahe felisit Mr Brutus pou son apwentman, akoz Mr Brutus i en zanfan distrik Grand Anse Mahe.

 

(APPLAUSE) 

 

 

HON WAVEN WILLIAM

Mr Speaker mon’n ekout Minis avek bokou latansyon.  Mon anvi demann Minis lefe ki akt teroris ozordi mondyalman i en size ki vreman enkyetan e akt teroris ozordi napa balizaz.  Mon anvi ki Minis i donn nou sa garanti ki i pou zwenn son Minister pou zwenn sa bann standar ki ganny demande.  Akoz Minis lafason ou’n reponn nou pe dir nou poudir be sa zis Lanmerik, lekel ki dir ou poudir demen bomaten en lot pei ki pe deservi nou larezyon pa donn nou menm notifikasyon?  Alors mon anvi ou donn nou sa garanti ki enn sa bann standar pou ganny zwenn?

E dezyenmman Minis ou’n koz lo ki zimaz Sesel i kapab ganny Sali.  Mwan mon anvi demann ou eski ou Minister pe travay  avek divizyon Foreign Affairs pou koz avek nou bann Lanbasad deor e an menm tan nou bann lakonpannyen dan sekter prive ki pe travay avek Lazans bato pou ede ki zimaz Sesel pa ganny Sali vizavi sa bann notifikasyon?  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mr Speaker konsernan limaz Sesel i en keksoz ki nou port bokou atansyon.  E pou nou parey mon’n dir nou pe fer o maximum posib ki dan 90 zour nou a’n kapab adres tou sa bann keksoz ki ankor outstanding lo sa lalis ki mon’n mansyonnen bomaten.

I annan serten keksoz parey mon’n dir ki ankor dan – ki pou pran nou apepre 5mwan pou fer par egzanp lalimyer avek en nouvo zenerater.  I pou pran nou apepre 5mwan.  By the time ou’n idantifye, ou’n enporte, enstale i pou pran ou apepre sa kantite letan pou ou kapab fer li akoz sa bann keksoz i pa la Sesel.

I pa en keksoz ki ou kapab ale al aste laboutik epi pran vin mete.  Alor i pou pran en pe plis letan pou fer li akoz i bezwen ganny enporte.  An plis parey mon’n dir i annan en lot bout ki pou pran nou en pe plis letan. E sa i annan ki mannyer ki nou pou bouz laplipar bann aktivite clearance cargo dan sa restricted area dan Por li menm pou met li dan en landrwa ki an deor sa bout kot nou dir i restrikte.

E sak fwa nou pa ganny bann lespas ki ase konsekan ki i pa afekte bann tranzaksyon avek bann businessmen ki bezwen fer zot biznes, nou pou bezwen esper ziske ler ki nou ganny sa kare, sa nouvo area ki nou pou gannyen atraver sa nouvo proze avek Por expansion.

Sa  ki nou kapab fer se ki nou kapab minimiz la kantite aktivite ki annan dan Por ki pa pou fasil akoz tranzaksyon Sesel i pe ogmante.  Pei pe devlope alor ou ekspekte poudir la kantite cargo ki pe antre dan pei pe ogmante.

Alor nou, nou pou bezwen travay avek tou bann akter pou gete ki mannyer ki nou kapab redwir la kantite fwa ki dimoun i antre sorti dan Por.  So wi nou 100poursan deryer sa code e tou travay pou ganny fer pou fer sir poudir sa code i ganny enplimante. E an plis ki sa akoz i pa en keksoz ki ou zis fer e ou ale.

I pa parey ou pe build en batiman.  I en prosesis.  Nou pou bezwen fer sir nou annan en tim avek en komite Nasyonal ki adres sa bann keksoz, ki monitor sa bann keksoz dan Por lo nivo Nasyonal e ki nou pa kit zis Por li tousel ek SMSA pou deal ek sa zafer.  Mersi Mr Speaker.

 

MR SPEAKER

Mersi Minis.  Onorab William.

 

HON WAVEN WILLIAM

Mersi Mr Speaker.  Mr Speaker lefe ki Por avek Airport nou pe koz menm zafer, eski Minis i kapab donn nou sa garanti ki pou Airport osi i parey.  E dezyenmman eski Minis lefe la ki nou’n ganny en nouvo CEO e mon anvi ki Minis i donn nou sa garanti ki letan nouvo CEO i anmenn son bann plan devan pou deal avek sa bann ka parey ki i ganny tou sipor neseser e ki posib.  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mr Speaker mon kapab garanti Onorab poudir CEO pou ganny tou sipor sorti kot nou biro.  Mwan personnelman mon zwenn Chairman avek CEO tou le mwan.  Kot mon ganny sans diskit okenn keksoz ki zot annan ouswa ki mwan mon annan ki mon ti a voudre pas avek zot.   E pou fer sir poudir keksoz i bouz pli vitman ouswa i al dan sa direksyon ki devret ale.

Alor konsernan sipor pou napa okenn kestyon.  Mwan mon pou donn li tou mon sipor ki mon annan pou fer sir poudir bann issues dan por i ganny adrese.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker mwan mon’n ekout tou sa ki Minis in dir bomaten e annou vin lo pwen prensipal akoz ki nou Por i dan sa sitasyon ozordi.  Depi 2004 por i ISPS certified.  Tou le de an US Coast Guards in vin Sesel, in vin lo Por, in fer zot bann keksoz e tou keksoz in ok. Eski problenm dan Por pa’n arive akoz an  2018 Mr Ciseau ansyen CEO ti pous en kantite travayer, ki enkli bann zofisye PFSOS savedir bann Port Facility Security Officers ki lakle dan tousala.

I ti pous zot akoz zot ti siny en petisyon e zot ti ganny pouse boner Me.  Boner 2018 e apre sa letan US Coast Guards in fer zot soz se la kot zot ganny zot premye advisory an Me 2018.  Eski pa sa sityasyon?  Senpleman akoz ansyen CEO ti dir klerman sa zafer la se zis pou Ameriken.

Nou pa enterese avek e i pa ti pe regard bann travayer ki lakle dan sa zafer odit.  Tou sa bann keksoz ki ou’n dir mon konpran mwan, me selman se sa zofisye, sa bann zofisye ki enportan e la zot in taye zot in pran sa manager e zot in fer li, zot in fer li FPSOS zot in fer li vin sa zofisye e nou tou nou konnen ki poudir letan Ameriken i vin fer lodit, i kestyonn sa bann zofisye pou regard zot konpetans e ki se la ki lakle.  I pa en zafer konbyen dimoun ki dan Por. Si zot annan lalimyer.

2004 ti annan menm kantite lalimyer.  2017 ti annan menm kantite lalimyer.  Ti annan tou sa bann keksoz.  O fet an 2018 2019 la nou pe dir komers in arete dan Por.  Be pandan  sa bann letan,  letan nou ti pe ganny sertifye sa bann zafer ti pe arive.  Alor eski sa ankor enn fwa pa montre nou, ki poudir letan nou annan bann dimoun ki pa pe pran zot responsabilite parey zot devret pran, zot azir gro lebra son konsekans pou nou pei i grav.

E apre sa Mr Speaker, letan – I’m sorry letan mon regard website Seychelles Ports Authority e mon konpar li avek sa ki pou Mauritius Ports Authority mon krwar nou annan en gran zistans pou nou ale.

E mon ti ava dir ek Minis ki mon espere ki nouvo CEO ki byensir nou donn tou lankourazman ki nouvo CEO i pran sa bann keksoz an men.  Pou nou kapab arete, arete regard bann zofisye akoz zot in siny en petisyon, akoz zot in detekte en koripsyon, akoz zot pe poz kestyon.  Me pou regard dimoun pou valer ki zot anmennen.  Mersi bokou Mr Speaker.

 

MR SPEAKER

Mersi Onorab.  Minis.

 

MINISTER DIDIER DOGLEY

Mersi Mr Speaker.  Mr Speaker perd mon krwar bann sekirite kle ouswa bann senior sekirite ki ti annan dan Por i kapab in kontribye anver sa bann desizyon Ameriken.  Me solman ler nou regard rapor ki Ameriken i donn nou akoz mwan mon ti ganny sans zwenn enn sa bann zofisye boner sa mwan.

Ler zot ti vini mon ti demann zot ler sa advisory ti sorti e mon ti demann li pou eksplik mwan klerman egzakteman kwa ki’n pous bann Ameriken pou met Sesel lo advisory.  E mon ti demann li pou donn mwan bann fe ouswa bann keksoz ki Gouvernman i bezwen fer pou adres sa bann mankman ki dapre zot i egziste.

Me i pa’n zanmen raise sa zafer personnel avek nou.  Ki in fer in zis senpleman refer avek en rapor ti ganny fer an 2016 e in dir nou poudir sa i bann issues ki dapre zot i enportan pou nou fer. I konpran poudir i annan en bon pe ladan in ganny fer.  Me solman i pa adekwa pou zot as far as ISPS i konsern, e dapre zot bann nivo sekirite ki zot demande pou anti teroris.  I pa’n zanmen a okenn pwen dir mwan poudir akoz sekirite in ganny pouse ouswa soz ki zot in deside pou fer sa.   Mersi Mr Speaker.

 

MR SPEAKER

Mersi Minis.  Onorab.

 

HON WAVEL RAMKALAWAN

Mr Speaker nou pe koz lo sekirite dan Por.  Si ou’n pous ou 4 senior security officers e apre sa ou ale ou koz avek bann lezot ki pa osi ki pa’n pas dan sa training eski pou napa en rezilta?

E mon ti a demann Minis eski Minis pa krwar ki poudir an kolaborasyon avek nouvo CEO zot devret al rod sa bann dimoun ki kalifye ki kapab ede pou remet nou Por lo sa nivo sekirite ki nou ti ete.

Parski petet avek nouvo CEO ava kapab tir sa bann politik ki’n arive dan Por dan lepase e nou ava fer li vin vreman en Lorganizasyon efektiv, non politik.  E sa i ava donn Sesel en bon non.  Mersi bokou.

 

MR SPEAKER

Mersi Onorab.  Minis.

 

MINISTER DIDIER DOGLEY

Mr Speaker mon konnen poudir in annan plizyer diskisyon e mwan menm mwan mon’n diskit plizyer fwa avek Board Port Authority lo sa kestyon.  Me mon konnen poudir i annan en case devan Tribinal Employment ant sa bann dimoun e mon’n asize mon’n koz ek zot pou vwar kwa ki zot enterese avek.  Si i kler poudir sa bann dimoun i enterese pou travay e management Por i pare pou travay ek zot.  Mwan personnelman mon krwar poudir zot devret konsider rod en fason pou zot travay ansanm.  Si non i pou  bezwen en desizyon solman ki pou bezwen ganny pran par Board avek management Port Authority li menm.  Mersi Mr Speaker.

 

HON WAVEL RAMKALAWAN

Pou ed Minis pou dir avek Minis ki sa bann dimoun ti win zot case.  E letan zot ti al laba kot Por Mr Ciseau ti dir i pa pe pran zot. Alor Lotorite en Tribinal ti ganny zete par en CEO!   Se sa nou sityasyon nou pei.  Mersi bokou.

 

MR SPEAKER

Mersi Onorab.  Mon a donn laparol Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker i vre nou devret tir politik dan tou keksoz san,  san pei i pou zis politik, politik, politik!  Mr Speaker kot i konsern Por, Airport bann landrwa parey e kot i konsern sekirite bann aktivite anti teroris, oubyen bann aktivite teroris zisteman i annan serten standar par egzanp Airport ICAO certificates i neseser.

Menm sa screener ki pe screen ou bagaz letan ou pe ale or whatever i bezwen annan serten standar e sertifika koumsa.  Eski Minis i kapab donn nou serten garanti e dir nou Por li avek ki i asosye ?  Lekel sa standar ki i mezir li avek?  Eski son sekirite lo son Por i meet sa bann  standar ki nou pe koze?

E an menm tan problenm sekirite e aktivite teroris lo en Por i ogmante sirtou letan en Por i ankonbre e par egzanp kot clearance i tarde pou bann containers ensidswit ki vini e ki tou sa i ogmant risk.  Ki alor Lotorite Por isi Sesel avek tou bann lezot Lazans konsernen SMSA, Land Marine, Customs, SRC, Hunt Deltel, Coast Guard tou bann lezot latasman ankor ki donn sekirite, garanti sekirite en por, ki alor isi sesel kot tou nou bann Por i konsernen pe ganny fer?

Kwa ki pe ganny fer pou fer ki Por i vin en fason efikas?  Mazinen ou ki Minis ou’n fek dir nou ki Por pe al refer Por e ou annan en pti gin letan ki reste ou pou sa Por konmanse, e an menm  tan letan sa pe fer sa ankonbran ki nou pe dir la i pou ogmante.

Sa kantite aktivite sa dezord si ou le i pou ogmante e sa i pou anmenn plis problenm ankor.  Alor kwa egzakteman ki pe ganny fer ?  E ki road map an relasyon avek sa ki Ameriken pe sey dir nou ki zot in mete pou zot kapab enplimant garanti sekirite.

Eski i annan serten lekipman par egzanp pou ede clearance bann cargo lo Por pou al pli vit akoz nou tande poudir laba osi in en problenm kot cargo i tarde.   E pli i tarde pli ankonbran i vini pli i annan plis keksoz. Menm ou pou anmenn ou en ta lalimyer i pa pou vwar tou sa ki fodre vwar ki bann lezot mezir.

E dernyerman nou vwar poudir Anbasader Ameriken ti la semenn pase.  Kwa konkretman ki Sesel in fer in diskite in tonm dakor avek sa msye kot i konsern sa ki nou pe koze alor ki keksoz konkret ki in ganny tonm dakor lo la?  Eski i annan serten lekipman par egzanp ki nou pou bezwen ki Ameriken in dir ok sa nou kapab donn Sesel nou kapab kontribye ensidswit.

Donn nou en pe garanti ki fer nou vwar en lalimyer kot nou pe ale dan sa kot i konsern sa issue?  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mersi Mr Speaker.  Onorab in koz lo bokou keksoz.  Mon a sey atrap bann ki pli – I mean laplipar mon bezwen sey fer mannyer reponn.  Konsernan Anbasader Ameriken wi ti la, malerezman mwan mon pa’n ganny sans vwar li personnelman akoz mon ti a ganny sans raise sa issue avek li.

Sa i pa anpes nou annan en follow-up mon konnen poudir son bann dimoun a swiv i vini isi e tre byento pou annan bann bato Ameriken ki pou vin isi osi isi Sesel.  Ti fek annan enn yer alor i pa anpes nou pou fer en travay avek Por zot menm pou dir nou kwa ki zot bezwen e nou,  nou ava fer atraver Foreign Affairs pran kontak ek son biro, e nou ava fer en demann ofisyel pou fer sir poudir nou ganny bann sipor sirtou pou zwenn sa bann keksoz ki zot demann nou pou fer.

Dezyenm keksoz konsernan clearance cargo li menm Gouvernman ti met an plas kantmenm i pa tonm direkteman an bann Por i en  clearance i annan pou fer avek customs avek bann clearing agent, avek Land Marine se zot ki devan kot bann zafer clearing cargo i konsernen.  Mon konnen poudir custom ti met an plas ASYCUDA ki sipoze li fasilit bann fason ki keksoz i ganny clear savedir bann dimoun ki zot annan konfyans avek i pa bezwen pas dan bann detail screening kot sak container i ganny tyeke par sak item.  Nou konnen poudir i annan dimoun ki annan problenm menm avek sa ASYCUDA.   Mou konpran ki Minister Finans pe fer en serten travay pou vwar ki mannyer zot kapab ed bann businessman ki annan problenm avek sa sistenm.

Lo Por li menm, normalman sistenm sekirite mon konpran i ganny mete a en nivo pandan letan ki bann dimoun pe antre ki dan en fason i annan en balans ant sekirite avek akse dan Por, ki dan en fason ki i pa blok totalman Por ki dimoun i pran tro bokou letan pou antre dan Por.

Me solman i annan bann check sekirite ki ganny fer en nivo ki akseptab.  An menm tan ankor parey mon pe dir nou pou sey bezwen vwar avek bann Lorganizasyon biznes par egzanp SRC pou vwar ki mannyer ansanm avek Finans, avek SRC ek bann clearing agents zwenn ek zot tre byento e diskite ki mannyer ki nou kapab amelyor sa bann prosesis clearance dan Por ki dan en fason i benefisye tou dimoun. Si ou le i vin parey en win-win situation.

Parey ou’n nonmen le moman ki travay pou konmanse dan Por pou agrandi Por erezman sa bout louvraz ler pou konmanse pa pou konmans kot main commercial Por i ete, i pou konmans sa bout ki kot Coast Guard ti ete.  Savedir at least sa bout kot commercial i ete i pa pou direkteman ganny afekte ler travay pe ganny fer lo sa bout dan sid.

Problenm petet i pou vin ler pli tar nou bouz dan nor apre ki sa bout dan sid in fini fer se la ki nou pou bezwen aziste, fer en planifikasyon pli detaye pou fer sir poudir nou kontinyen operate san ki i annan bann gran disturbance dan loperasyon li menm.  En tax force in fini ganny met an plas ki ganny Chair par mwan menm ki nou zwenn regilyerman pou diskit ki mannyer ki nou pou enplimant sa proze.  E sa nou zwenn preski tou le mwan pou nou diskit bann keksoz ki mannyer pe ale, ki mannyer proze enplimantasyon proze pe ale.  Apre IMO parey ou’n dir mwan Airport i annan ICAO.  Pou Por li menm i annan IMO sa ki nou apel International Maritime Organisation.  Li ki sa Lorganizasyon ki plizoumwen regulate regle bann tranzaksyon Por ek bato, cargo atraver lemonn.  E zot pa fer sa pou tou bato.  Zot fer sa pou bann pli gro bato ki annan en serten groser, en serten kapasite ouswa sa ki zot servi term SOLAS, bann bato ki tonm anba sa konvansyon SOLAS si ou le ki zot, zot deal avek.  E Por li menm li avek SMSA  zot an kontak avek IMO akoz zot bezwen anvoy bann rapor regilyerman kot IMO pou dir ki zot pe fer. Zot bezwen report back avek IMO.  Parey Airport i raport avek ICAO Por avek SMSA li i bezwen raport avek IMO lo lenplimantasyon bann konvansyon lo nivo Sesel.  Mersi Mr Speaker.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker eski Minis i kapab dir nou konbyen scanner machine i annan lo Por?  E pou clear bann marsandiz kot ki annan nesesite e an menm tan sa kestyon standar ki nou pe koze kot i konsern sekirite.    Sa i enportan mon krwar mwan ki sa kestyon standar i enportan ki Minis i garanti ki sa bann sekirite i annan sa standar.  Bezwen regarde avek CEO Port Authority la ki avek ou pou dir sa i pe ganny fer ouswa i en nesesite ouswa si  pa en nesesite dir nou.  Nou konnen poudir sekirite nenport ki i kapab vin fer sekirite lo Por.  Me si ou konnen poudir sa i annan sa standar i ava ankouraz osi petet lezot dimoun pou join zot.

E an menm tan eski Minis i kapab konsidere Maurice pa ni lwen ler ou annan en pti deplasman ouswa ou kapab zis ale vwar en kou sa Anbasader si ou pa ti vwar li lotrozour, ganny en koze seryezman gete kwa ki akoz ou konnen be i vin Sesel tanzantan, be konmsi aranz en progranm konman i vini, vwar li.  Prezidan lotrozour in lans en lapel.

I dir koumsa poudir nou Foreign Affairs la i devret pli proative.  E an menm tan fer ki sa Minister Foreign Affairs la i reponn a bezwen Nasyonal.  Be konmsi pa fodre Prezidan ki desann ki vin fer tousala li menm.  Nou pe lans en lapel Departman, Minister, ensidswit, silvouple bouze e annou sey gete ki mannyer nou kapab enplimant sa ki Prezidan pe sey dir e ki nou kapab fer ki nou arive vwar en laklerte kot nou pe ale.  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mr Speaker dapre nouvo CEO i dir mwan poudir SRC ki screen bann containers li menm.  Port definitivman i devret osi prezan, i devret annan en reprezantan ki dan –ki ler sa bann keksoz pe ganny screen pou fer sir poudir bann keksoz i ganny fer korekteman.  Be in dir mwan poudir in tande – i okouran poudir SRC pe fer le neseser pou enport en masin ki pou kapab screen bann – sa bann cargo bokou pli vit ki i pe fer.  Akoz la konmela zot pe fer li plizoumwen fizikman.  Be le moman ki zot a’n fini mont sa bann masin, nou ekspekte poudir screening i ava al bokou pli vit ki i pe fer la konmela.

E 2enm keksoz konsernan standar, bann training ki annan pou ganny fer, sa bann training i customize sa.   E sa i sorti kot IMO, ki klerman ki si i annan training ki pou bezwen fer, ou bezwen swiv sa bann course ki zot, zot in set ki sa.  Ou pa kapab fer nenport kalite training e dir poudir mon’n train entel pou li sa. I annan serten training ki ou kapab fer lokalman par egzanp ki mannyer pou servi metal detector.

Ki mannyer pou servi bann laglas anba transpor akoz sa Lapolis i konnen.   Zot annan bann dimoun ki sertifye ki kapab fer sa bann pti course lokalman me solman bann training ki annan pou fer ek ISPS i bezwen bann dimoun ki’n sertifye par IMO pou zot kapab fer sa soz.

E nou – sa sekirite ki responsab pou bann fasilite lo Por li i ti fer training lannen pase Italy ansanm avek Kaptenn Valmont.  Zot ti al ansanm Italy zot ti swiv en kour training lo nivo IMO kot zot ti ganny sertifye kapab pou zot enplimant bann provizyon ISPS.

E definitivman sa bann standar parey mon pe dir ou bezwen sertifye.  Sa bann dimoun i bezwen ganny sertifye poudir konmkwa zot in fer sa training, i pa kapab zis ou dir, ‘’Ar entel in ganny train’’, sa pa ganny aksepte.  Mersi Mr Speaker.

 

MR SPEAKER

Mersi Minis.  Vitman Onorab De Commarmond.

 

HON CHARLES DE COMMARMOND

Vitman Mr Speaker.  Eski Minis i kapab dir nou parmi bann sekirite ki ti’n ganny met a laport, ti’n kite la an diskisyon, konbyen zot ki IMO Certificate konmsi in ganny sertifye konman bann sekirite alaoter avek sa grad sa kalite konpetans?  E an menm tan eski i kapab tyeke konbyen actual sekirite ki osi lo sa standar?  E dir nou si Port Authority i konnen konbyen i koute enn sa bann scanner machine ki zot kapab bezwen pou Customs servi?

 

MR SPEAKER

Mersi Onorab.  Minis.

 

MINISTER DIDIER DOGLEY

Mr Speaker Port i dir i ava tyeke gete konbyen i koute.  Me solman sa bann masin i en bann masin ki ser.  I pa bann masin ki bon marse.  So nou ava tyeke avek SRC.  Nou ava ganny bann lenformasyon ki ou pe demande nou ava fer ou gannyen.

2enm keksoz se konsernan training sekirite.  Bann ki’n ale lenformasyon ki mon annan, se ki ti annan de ki ti ganny train Marseille detrwa lannen pase.  E la konmela i annan Mr Alcindor ki’n fini ganny train in ganny sertifye.  E i annan plan pou train – parey mon’n dir ou i annan bann Ameriken pe vin isi.  Savedir pou annan bokou plis ki pou ganny train by June sa lannen.  Mersi Mr Speaker.

 

MR SPEAKER

Mersi Minis.  Yes Onorab de Commarmond

 

HON CHARLES DE COMMARMOND

Permet mwan demann Minis sa ki ti dan Bidze depi 2017  la sa scanner machine.  Oli konmsi?  Zot in rode?  Pa’n rode?  Ki’n arive?  Mersi.

 

MR SPEAKER

Mersi.  Minis.

 

MINISTER DIDIER DOGLEY

Mr Speaker i paret i annan en konfizyon sa zafer bann masin ki screen container.  Normalman pa Por ki screen containers pou bann marsandiz se SRC ki fer sa.  E se zot ki fer sa travay.  Alor Por li menm li pa pou konnen sa bann lenformasyon, unless ki zot vreman direkteman enplike avek.  Mersi.

 

MR SPEAKER

Mersi Minis.  Bon mon ava donn dernyen kestyon loter kestyon, Onorab Churchill Gill.

 

HON CHURCHILL GILL

Mersi Mr Speaker.  Minis vi ki mentenir standar ISPS i primordyal pou zimaz Sesel, e i konman en serten garanti osi pou bann pei ki zot bato i pas dan nou Por .  Eski ozordi SPA i annan en provizyon en poursantaz son reveni ki i met dan son balance sheet, ki sa i fer ki  ler i annan assessment ki annan defayans, kot zot ava deza annan sa larzan pou zot kapab dres sa pli vit e ki pa koz okenn lenkonvenyans pou nou ganny bann advisory ankor.  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mr Speaker nou pe al bokou pli lwen ki sa.  Nou pa zis pou demann zot parey ou pe dir pou fer sir i annan ase finansman.  Nou pou fer sir poudir i annan en Komite Nasyonal ki regard tou sa bann kestyon sekirite, ki zot zwenn regilyerman pou fer sir poudir sa bann keksoz ki dan sa code ISPS pe ganny enplimante parey i devret ganny enplimante.

Nou annan en plan parey mon pe dir pou sa lannen, pou fer sir poudir dan sa 9 – 3 mwan ouswa dan sa 80 zour tou bann dokiman ki deza an plas,  bann enportasyon ki bezwen ganny fer, tou keksoz i devret ganny fer.  E anba nouvo plan pou Por, devlopman Nouvo Por, deza nou pe met an plas bann provizyon pou fer sir nou zwenn ISPS an antye.  E an plis nou pe met Lalwa an plas, sa Regilasyon ki mon’n koz lo la pli boner.

Alor le moman ki Lalwa pou an plas, si Por  pa fer son travay i pou pe kas Lalwa ki egziste.  E sa i annan son bann konsekans.  Sa bann CEO avek son tim i pou bezwen fer sa ki nou nou’n sinyen e ki dan nou Lalwa.  Alor nou pe pran plizyer mezir, pou fer sir keksoz i ganny fer dapre ki mannyer i devret ganny fer Mr Speaker.  Mersi.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Dernyen Mr Speaker.  Minis zisteman mon pe koz ou ler in ariv sa staz kot ou Por  in fini ganny fer, me selman prezan avan ler nou ganny bann assessment  nou konnen ki peryod nou ganny assessment.  Mwan ki mon pe dir nou prezan ler nou’n fini nou fer li mandatwar, nou met en provizyon dan   nou balance sheet –  dan  balance sheet SPA pou asire ki zour ki nou ganny sa lot assessment, si i annan defayans nou deza annan sa larzan la e nou kapab dres sa defayans there and then.  Konmsi prezan nou reste toultan lo standar ki demande.  Mersi.

 

MR SPEAKER

Mersi Onorab. Minis.

 

MINISTER DIDIER DOGLEY

Mr Speaker mon 100poursan dakor avek sa propozisyon Onorab.  Mersi.

 

MR SPEAKER

Mersi Minis.  Yes Onorab Sandy Arissol.

 

HON SANDY ARISSOL

Mr Speaker mon ti a kontan rod en pti klarifikasyon avek ou permisyon, an relasyon avek larepons ki Minis in donnen lo kestyon Onorab De Commarmond.  Mon krwar konman en Manm ki asiz lo komite COGA, i enportan  pou nou konpran en keksoz.  Parski plizyer fwa bann Minis i vin dan Lasanble Nasyonal, sakenn i donn nou en versyon lo bann lenformasyon ki nou, nou rode konman bann Manm Lasanble Nasyonal.

Ozordi mon’n tann Minis dir poudir scanner i sipoze pou SRC, e i pa kapab baze Lasose.  Minis Larose an 2017 si mon pa tronpe Komite COGA nou ti zwenn li e i ti dir avek nou poudir pou annan en scanner ki pou ganny mete Lasose.  Si pou SRC servi, si pou Customs servi, selman i bezwen ganny baze Lasose kot bann containers  i kapab ganny screen.  La mon’n tann Minis i vini i dir nou en lot keksoz.

E Onorab De Commarmond in demann en kestyon avek si ti annan larzan ki’n ganny bidzete pou sa proze. Eski larzan in ganny bidzete –  larzan pa’n ganny servi ?   Larzan in ganny servi dan en lot keksoz ?  Nou konman en Lasanble nou bezwen konnen.  Parski tro  bokou Minis, sakenn i vini sakenn i donn nou en  larepons.  E mwan koman en Manm COGA mon santi mon konsernen avek sa.  Mersi bokou.

 

MR SPEAKER

Mersi Onorab.  Minis leklersisman.

 

MINISTER DIDIER DOGLEY

Mr Speaker mon pa’n reponn Onorab De Commarmond lo kote sa keksoz pou ganny lokalize.  Sa ki mon’n dir li se ki Port Authority ki en Lorganizasyon pa li ki screen bann marsandiz ki antre dan Por.  Se sa ki mwan mon’n dir li.  Mon’n dir li se SRC, mon’n dir li se SRC ki screen bann marsandiz ler i antre dan Por.  Mon pe koz lo fonksyon, mon pa pe koz lo lokalizasyon en lekipman.  Alor i annan sa gran diferans ant sa de keksoz Mr Speaker.

 

MR SPEAKER

Mersi Minis pou leklersisman.  Bon avek sa Minis mon a dir ou mersi e mon ava remersi ou ki’n pas plis ki  1 erdtan pou reponn sa kestyon.  I en kestyon vreman enportan.  E mon ti a kontan remersi ou PS Mr Allain Renaud.  E CEO Mr Brutus.  Mersi e nou ava eskiz zot parmi nou.

 

(PORT AUTHORITY DELEGATION WAS EXCUSED FROM THE HOUSE)

 

 

MR SPEAKER

Mon ava osi demann Parliamentary Reporter pou apel Minis Pamela Charlette.   Nou pou pran trwazyenm kestyon lo nou Order Paper anvi ki – mon ava fini avek.  An vi ki 2enm kestyon  i annan pou fer ek Minis Finans, Minis Finans aparaman i fek antre dan pei bomaten sorti lo Misyon aletranze e Attorney Zeneral osi tou i pa prezan i pe attend en sityasyon lafanmir – lafanmir.

Me zot pou prezan demen, e se sa rezon ki nou pou pran sa 2 kestyon pou Minis Finans demen bomaten.  Bon mon ti a kontan welcome e dir bonzour Minis Pamela Charlette.

E an menm tan Minis mon ti a kontan prezant leskiz pou sa retar mon konnen depi apepre 1ertan ou la ou’n arive pou reponn ou kestyon.  Minis i ganny akonpannyen par son Special Advisor Mr Gerard Hoareau.  Son Sekreter Prensipal pou Departman Transpor lo Later Mr Patrick Andre.  CEO pou Departman Transport lo Later Mr Parinda Herath.  E Road Transport Commissioner Mr Wilson Denis.  Minister avek ou lekip bonzour e ankor enn fwa welcome dan Lasanble.  Nou ava al direkteman lo kestyon.  Mon ava donn laparol Loter kestyon Onorab Paul Ernesta.

 

HON PAUL ERNESTA

Mersi Mr Speaker.  Mr Speaker, Minis e ou delegasyon, bann koleg Onorab, tou dimoun a lekout e osi bann zabitan Takamaka.  Mr Speaker mon kestyon i lir konm swivan.  Prenon kont ki semen Maravi e Kap Mason i semen prensipal lo lakot Sid Mahe ki fasilit koneksyon servis bis SPTC dan sa rezyon espesyalman distrik Takamaka. E osi travay ki PUC in fer pou pas kab lo sa de semen, ki pe rann sirkilasyon bann motoris ek bann gro transpor parey bis SPTC ase riske.

 

  1. Eski Minis i kapab eksplik sa Lasanble ki plan SPTC konsernan son servis e groser bis ki pou deservi lo sa de larout?
  2. Eksplike dan ki fason sa plan pou ganny enplimante pou limit lenpak ki sa pou annan lo bann dimoun ki deservi sa larout?
  3. Ki langazman  SLTA  ek Departman Transpor-lo-Later pou fer sir ki letan sa bann semen i ganny repare i dan en bon leta pou deservi sa bann gro transpor sirtou bis SPTC?
  4. Ki plan Minister pou elarzi e elimin bann danze lo sa 2 larout prensipal?

MR SPEAKER

Mersi Onorab Ernesta.  Minis laparol  i pou ou.

 

MINISTER PAMELA CHARLETTE

Mersi Mr Speaker.  Mersi Onorab.  Bonzour tou dimoun e tou Onorab dan Lasanble.  pou met en pe perspektiv Mr Speaker SPTC i fer larout swivan pou al Baie Lazare via Takamaka ek Lentandans toulezour.   I annan bis Baie Lazare via Takamaka sorti pou al lavil e sa i fer 26 trips par zour.  E sorti Victoria pou al Baie lazare via Takamaka i fer li 23 trips par zour.  Lentandans osi from Lentandans pou al Victoria i fer 6 e from Victoria pou li an Lentandans i fer 9.  Mazorite tou sa bann servis i ganny fer dan bann gran bis ki nou apel tren.  E sa bann bis i bann bis ki annan 60 plus seat kapasite.  Lo semen Maravi SPTC pe – anvi ki travay ki bann itilite piblik pa ankor fini, SPTC pe konsider sispann tanporerman sa servis bis lo sa semen.

An menm tan i enportan pou note ki SLTA pe fer topo survey e osi en letid pou determin striktir sa semen e sa bann travay ki annan pou fer pou annan en lenpak lo servis bis.  Sa bann letid ki pou ganny fer pou determin nouvo design pou sa seksyon semen e si i annan nesesite sispann sa servis bis, bann laranzman konm swivan pou ganny met an plas ;

Pou minimiz lenpak pou bann dimoun ki servi sa larout, SPTC pe konsider met bann servis pli gran maten ki konmans Takamaka e sa i konmans bor lanmer Takamaka pou al Victoria.

Tou bann servis sorti Baie Lazare via Takamaka pou fini bor lanmer Takamaka dan zanviron Chez Baptista apre retournen. Bann dimoun ki reste ziska Lazare Picault zot ganny ankouraze pou servi larout Baie Lazare via Les Canelles oubyen servis Baie Lazare via La Misere.

Bann dimoun ki pe konekte pou al Baie lazare oubyen Takamaka zot bezwen gard zot tiket ki zot in gannyen lo premye bis pou zot konekte pou zot destinasyon final, savedir menm si ou pe pran de bis ou pou pey zis en tiket.  SPTC pe osi eksplor posibilite pou met servis adisyonnel pou deservi Val D’en Dor depandan lo resours li osi lakantite dimoun ki deservi sa larout.  Nou a fer remarke ki boner sa lannen SPTC ti entrodwir menm larout e servis bis pandan ki travay ti pe ganny fer lo semen Maravi.

Si desizyon i ganny pran pou tanporerman sispann sa servis lo larout Maravi, SPTC pou fer sansibilizasyon piblik an servan medya normal, medya sosyal, son website e sistenm lanons piblik dan Terminal.  Departman Transpor SLTA Planning Authority spesifikman Utilities Committee ek RTC pe travay  etrwat kolaborasyon avek bann lakonpannyen Utilities pou fer sir ki bann travay i ganny fer dan en letan akseptab, e ki zot pran an konsiderasyon tou bann kondisyon i ganny mete pou asire ki sa bann semen i  ganny met dan bann standar apropriye.

Nou rekonnet ki i annan serten defayans an sa ki konsern sipervizyon, relye avek kontrent resours imen. Me nou’n pran desizyon anba Utilities Committee pou aprouv travay ki bann partner pe fer selman apre ki en vizit in ganny fer avek tou Lotorite konsernen, e nou pe osi ensiste ki enplimantasyon i ganny fer par faz pou asire ki i annan mwens lenkonvenyans pou piblik e bann motoris.

Apre ki Lotorite konsernen in satisfer son lekor dapre standar ki’n ganny met an plas, SLTA pou kapab re sirfas sa bann semen konpletman.  Me i pou fer li osi par faz.  E sa i a fer ki ler travay i fini SLTA, i ava annan en pe plis kontrol lo quality re sirfas ki pou ganny mete lo semen.

In toultan plan Minister ek Lotorite konsernen kot i neseser pou elimin bann danze ki kapab annan lo semen.  Parey mon’n fer resorti oparavan, SLTA pe fer en survey an se moman lo sa semen ki’n ariv halfway, sorti Chez Baptista pou al Lazare Picault pou kapab idantifye landrwa kot pou kapab elarzi semen e osi konstri bann  laybys kot i apropriye. E sa in toultan en size diskisyon ant Lotorite Distrik avek SLTA.  Mersi Mr Speaker.

 

MR SPEAKER

Mersi Minis.  Onorab Ernesta.

 

HON PAUL ERNESTA

Thank you Mr Speaker.  Mr Speaker Minis in dan son lentervansyon in mansyonnen bann seri mezir ki pou pran pou enform bann piblik,  mon pa’n tann li mansyonn lenportans swa si zot pou zwenn  avek bann zabitan Takamaka itself pou kapab eksplik zot lo sa bann sanzman ki pou annan.  Eski zot kapab konsider sa?  E dezyenmman bann diferan sanzman mon konnen i kapab anmenn en lenpak.  En lenpak sirtou bann dimoun ki commute lo sa semen ki sorti Maravi pou Baie Lazare.

Ou’n dir pli boner ki sa osi in ganny fer sa legzersis letan ti pe pas kab, me nou ti vwar en seri mezir ki ti arive swa bis pa ti ariv a ler, ouswa dimoun ti konmsi ti annan en ta problenm.  Eski zot kapab konsider osi, mon konnen ou’n dir ki zot pe servi bann gro bis, eski zot pa kapab konsider osi bann pli pti bis konman en navet ki kapab sorti from point A pou al point B, ki kapab osi fasilit, akoz nou bezwen osi pran kont ki si en dimoun petet parey ou’n dir pou pran koneksyon bis avek son tiket pou al Anse Royale whatever pou fer tou sa letour, si en dimoun pe travay dan nenport ki bout distrik i pou en problenm pou li.  Eski zot pa kapab konsider sa ?  Thank you.

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker.  Mr Speaker i en keksoz ki nou’n diskite avek SPTC.  Pou le moman zot pou kapab fer ki once ki zot revwar zot overall network, akoz i kapab afekte, si zot pran bann pti bis pou mete i kapab afekte osi bann lezot servis oubyen bann lezot landrwa.  So i en konsiderasyon ki zot pe pran e zot ava enform nou ki zot pou fer avan zot anonse.

 

MR SPEAKER

Mersi Minis. Onorab Ernesta.

 

HON PAUL ERNESTA

Mon krwar en dernyen lo kote sekirite Mr Speaker.  Sa de semen Maravi, Kap Mason in toultan en size ki dimoun i konsernen lo la son nivo sekirite son safety.  E bokou fwa ou vwar leta bann de gro transpor – mon pran legzanp de gro  bis i zwenn ansanm i toultan very risky pou sa menm sa drayver e pasaze pou zot manœuvre dan sa semen.  Eski zot pa  kapab parey ou’n dir zot pe mansyonn zis sa bout survey Maravi, osi Kap Mason met en komite teknik pou vwar bann posibilite reel ki nou kapab fer.  Petet elarz semen ouswa fer li vin pli fasil swa si ou vwar i annan en lot semen alternatif kot nou kapab – akoz nou bezwen vin pli proaktiv.  Annou pa les keksoz arive apre pou nou vin reaktiv.  E i vreman riske dan sa de semen.  Mon demande pou zot kapab pran en konsiderasyon lo la?  Mersi.

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker.  Zis pou dir avek Onorab wi i annan par egzanp Kap Mason i annan en plan long term pou kapab re eksplor posibilite pou re ouver sa ansyen semen ki ti konekte Anse Panel avek Anse Forbans.  So sa i en keksoz ki nou pou re diskite e vwar en lot alternatif pou nou kapab pran sa semen akoz nou konnen menm si nou pou fer survey i annan vreman sa landrwa kot – napa landrwa vreman kot pou kapab elarzi semen dapre bann teknisyen.  E alor nou pe osi eksplor sa alternatif sirtou pou Kap Mason.   Mersi.

 

MR SPEAKER

Mersi Minis.   Onorab Francois Adelaide.

 

HON FRANCOIS ADELAIDE

Mersi Mr Speaker.   Bonzour a tous.  Minis zis pou  repran en pti gin lo kestyon Onorab Ernesta, mon krwar i enportan ki ler nou pe fer sa nou pran kont ki bokou dimoun i ganny afekte.  So mon krwar en meeting piblik ant Takamaka ek Baie Lazare po ekout pwennvi dimoun, mon krwar i pou vreman,  vreman enportan.   Me mon lot pti kestyon se ki Minis detrwa fwa mon’n telefonn CEO Herath konsernan ler zot kas semen.  Nou’n tonm dakor poudir zot kas apepre en 100met zot ranpli pou redwir lenkonvenyan.  Me nou pe trouve ki sipervizyon pa pe ase e nou pe trouve ki semen pe ganny zis kase e zot napa – zot pa pe rebous sa bann semen pou remet sa beton lo la pou fer semen konfortab.  Eski Minis ou kapab donn nou en lasirans pou ki sipervizyon dezormen pou ganny fer pou ki lenkonvenyan i ganny redwir e nou pa ganny bokou ban konplent avek bann motoris ki  pe servi semen?  Mersi.

 

MR SPEAKER

Mersi Onorab.   Minis.

 

MINISTER PAMELA CHARLETTE

Mersi Mr Speaker.  Mr Onorab.  Mon a konfirmen ki pozisyon ki Utilities Committee in pran lately se ki nou pa pe les okenn dimoun kontinyen parey nou pe dir nou pou fer li par faz.  E once ki nou vwar poudir ou’n fini fer sa ki ou devret fer dapre kondisyon e dapre bann kondisyon ki bann Lotorite in mete, then nou p[ou allow ou nou pou donn ou aprouvasyon pou ou fer lot staz semen.  Sa ki direksyon e sa i en ultimatum sirtou ki nou’n mete avek PUC.  Mon konnen zot pa tro kontan, me selman nou pe ranforsi li pou nou kapab sa Utilities Committee annan en monitoring, en sipervizyon pli pros lo sa bann proze ki pe ganny fer.  Mersi.

 

MR SPEAKER

Mersi Minis.  Onorab Regina Esparon.

 

HON REGINA ESPARON

Mersi Mr Speaker.  Mr Speaker mon ti a kontan demann Minis lye avek sa kestyon Onorab Ernesta, lo sityasyon Maravi ek Kap Mason eski i kapab dir nou si i annan oubyen ki kalite planifikasyon ek konsiltasyon ki ganny fer avan sa bann louvraz i konmanse pou prevwar lo lenkonvenyans ki kapab arive?  Oubyen si nou zis konmans louvraz apre letan problenm i arive nou taye nou rod solisyon?   En pe parey lo semen North East Point osi kot bis pa kapab monte.  Eski konmsi i annan sa planifikasyon, sa konsiltasyon ek bann Lazans tel parey SPTC, SLTA, PUC avan ki proze i konmanse pou nou regarde ki mannyer pou deal avek bann lenpak ki annan avan ki lenpak i arive?  Mersi.

 

MR SPEAKER

Minis ou a kit sa bout North East Point ater, ou a reponn lo Kap Mason /Maravi.  Minister.

 

MINISTER PAMELA CHARLETTE

Mersi Mr Speaker.  Normalman sa ki arive se ki avan ou konmans en travay PUC i met son plan, oubyen okenn Lakonpannyen oubyen okenn dimoun ki fer son – pe al fer en proze i met son plan avek Planning Authority.  E sa i diskite lo Board Planning kot i annan tou bann stakeholders ki  pe asize ki fer desizyon, ki met bann kondisyon.  E osi sa plan osi i ganny sirkile avek tou bann Lazans, tou bann Lotorite pou zot fer zot komanter.  Parfwa wi nou ganny problenm, akoz bann Lazans zot menm zot pa reakte vitman.

Parey ou konnen Planning Authority i annan en dele letan ki i bezwen donn en larepons en kliyan, alors nou demann bann lezot Lazans pou fer li a en letan pli vit, pou nou kapab donn en larepons.  Me wi Planning Authority i la pou li kapab vwar sa bann proze, e apre diskit avek tou bann stakeholders.

E konman sirveyans osi Planning Authority i la, parey mon’n dir ou, i annan sa sub committee – Utilities sub committee ki’n met an plas zis pou get bann  lenplimantasyon sa bann proze. E bann proze sirtou relye avek utilities kot PUC oubyen lezot partners parey bann ki pou servi Cable, parey Airtel, Intelvision or Cable & Wireless li menm.  So i annan sa monitoring me selman parey mon’n dir nou defayans i toultan lo resours imen, pou nou kapab monitor an plen tan.

E sanmenm sa ki nou’n met bann ultimatum ek bann Utilities sirtou pou bann Kontrakter oubyen bann konsiltan ki sirvey osi – ki donn nou lanmen sirvey sa bann proze, pou nou kapab met en pti pe plis kontrol lo lafason ki sa bann proze pe ganny enplimante.  Mersi.

 

MR SPEAKER

Mersi Minis.  Onorab Terence Mondon.

 

HON TERENCE MONDON

Mersi Mr Speaker.  Mr Speaker mon anvi demann Minis an vi ki sa size sekirite lo sa de morso semen Kap Mason avek Maravi, i en vye size.  I annan plis ki 10an sa Lasanble pe raise sa konsern.  Eski Gouvernman tou sa letan zot pa’n kapab etablir ki nivo risk ki asosye ek sa de morso semen?  E ki kantite letan i pou pran, pou zot kapab vin avek en solisyon ki i a retir en pe sa danze lo sa de morso semen?  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker Gouvernman i fer survey tou le 2an lo sa bann semen e dernyen ti fer an 2018.  E dapre teknisyen survey pa ti vwar okenn major issues regarding striktir sa semen.  Me i annan enn ankor ki pe ganny fer la parey mon’n dir e tre byento nou pou ganny en rezilta e from there on nou pou kapab gete ki bann solisyon ki pou bezwen ganny pran oubyen bann remedyasyon ki pou kapab ganny fer.  Mersi.

 

MR SPEAKER

Mersi Minis.  Onorab Mondon.

 

HON TERENCE MONDON

Mon zis anvi demann Minis Minis ou  per ler ou pas Kap Mason?  En kantite dimoun ler i pas sa landrwa i per.  Sa landrwa mannyer i été, i devret fer en travay pou anmenn en pe plis sekirite.  Mon pa satisfe ek sa larepons ki napa danze ek sa semen.  Fodre pa ki en lanmor i arive pou nou taye pou nou fer keksoz.  Mersi.

 

MR SPEAKER

Mersi Onorab Mondon.  Avan mon donn laparol Minis Onorab Henrie ou ti oule azout keksoz lo repons Minis?

 

HON GERVAIS HENRIE

Wi mersi Mr Speaker.  Anfet konman nou lo sa pwen akoz mon rapel poudir letan Minis in mansyonn dernyen evalyasyon rapor ki ti fer 2018, zot ti promet Lasanble zisteman lannen pase kopi sa rapor.  Be nou pa’n wi nou pa’n resevwar.  So nou ti ava apresye si sa i bann lasirans ki zot donn nou.  Mersi bokou.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Nou a fer zot gannyen Mr Speaker.

 

MR SPEAKER

Ok.  Mersi.  Bon mon ava retourn – Onorab Ernesta ou annan okenn lezot kestyon pou Minis?  Go ahead.

 

HON PAUL ERNESTA

Mersi Mr Speaker.  Enn vitman.  Mr Speaker Minis in dir zis pou ranforsi lo pwen ki Onorab in mansyonnen pli boner.  Ou’n dir tre byento reasir nou kan sa byento.  Donn nou en deadline kan ki nou ekspekte ki zot fini fer sa legzersis e travay i ganny fer pou nou kapab remedye sa bann sityasyon?  Enn.   E dezyenmman si zot annan en hotline pou SPTC e Land Transport pou si zanmen i annan bann evantyalite pou bann dimoun kapab pran kontak avek zot?  Mersi.

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker.  Mr speaker sa survey ki’n konmanse nou’n ariv half way.  Pou pran nou ankor 3 semenn kekfwa pou fini konplete.  E once ki nou fini sa survey then nou pou annan en pli bon pozisyon pou gete kote kekfwa ki annan bann defayans ouswa bann weakness lo sa semen li menm.  E la nou ava fer li lo kote urgency lekel ki nou pou atak avan.  Mersi.

 

MR SPEAKER

Mersi Minis. Hotline.  Pou SPTCLand transport.

 

MINISTER PAMELA CHARLETTE

SPTC mon pa tro konnen.  Nou a rode nou a donn ou.  Me selman pou SLTA i 272..62..62.

 

MR SPEAKER

Ok.  Mersi bokou.  Bon avek sa Minis nou ava remersi ou avek ou lekip.  E nou ava eskiz zot dan Lasanble.  E mon ti ava zis kontan remersi ou bann dimoun, Mr Hoareau, Mr Andre, Mr Herath e Mr Denis.  Mersi e bonn kontinyasyon.

 

(MINISTER CHARLETTE AND HER DELEGATION WAS EXCUSED FROM THE HOUSE)

 

 

MR SPEAKER

Bon nou pou aret nou travay la.  Nou pou pran Break pou nou retournen 2er kot nou ava pran Private Notice Question ki pe ganny anmennen par Leader Lopozisyon.  Nou pou annan en ABC 1er  zis pou nou kapab regard en pti pe the way forward avek travay ki nou annan lo Order Paper pou lafen lazournen avek demen.  So ABC nou rankontre 1er dan Speakers Conference Room.  Nou ava Break e nou retournen 2er apre midi.

 

(BREAK)

 

 

MOTION RADOVAN Krejčíř

 

MR SPEAKER

Bonn apre midi tou Manm Onorab.  Bonn apre midi Minis Telemaque avek ou delegasyon.  E bonn apre midi tou dimoun ki pe swiv travay Lasanble Nasyonal.

Mon zis fer en pti kominike lo fason ki nou pour travay apre midi.  Sa i swivan meeting ABC ki’n ganny fer pandan Break.  Pour apre midi Lasanble pour pran PNQ e apre nou pour al lo Mosyon pour Lasanble ratifye sa 4 Annex MARPOL.

Lo size sa Bill ki ankor lo Order Paper, Public Service Salary Bill 2019, mon pour fer en prononsyasyon demain matin avan nou pran kestyon pour Minis Finans.  Ok?  So vwala the way forward lo nou travay pour larestan lazournen.

Bon ankor enn fwa Minis, bonn apre midi.  E Minis Myriam Telemaque i Minis responsab pour Lanplwa, Imigrasyon, e Civil Status.  I ganny akonpannyen par son Sekreter Prensipal pour Imigrasyon ek Civil Status Mr Alain Volcere.  Son Special Advisor Mr Michel Marie.  Reprezantan AG’s Mr David Esparon.  E Direkter pour Zafer Consulaire, Departman Foreign Affairs Mr Christian Faure.  Minis ek ou delegasyon bonn apre midi e welcome dan Lasanble Nasyonal.  Nou ava al toudswit lo kestyon.  E mon ava donn la parol Onorab Wavel Ramkalawan pour son kestyon.  Onorab.

 

HON WAVEL RAMKALAWAN

Mersi bokou Mr Speaker.  Bonn apre midi avek ou delegasyon.  Mr Speaker swivan deklarasyon Minis Zafer Etranzer ki Sesel in repran nasyonalite Msye Radovan Krejčíř,  eski Minis responsab pour Imigrasyon i kapab dir Lasanble.

  1. Ki bann Lalwa ek prosedir an egzistans ki’n permet zot repran Nasyonalite Seselwa avek sa msye?
  2. Ki dat eski sa bann prosedir ti komanse? E kan eski son nasyonalite ti ganny repran?
  3. Eski sa desizyon pour repran Nasyonalite Seselwa avek sa msye pa fer li stateless? Mersi bokou.

 

MR SPEAKER

Mersi Onorab Ramkalawan.  Minis.

 

MINISTER MYRIAM TELEMAQUE

Bonn apre midi Mr Speaker.  Bonn apre midi tou lede Leader dan Lasanble.  E bonn apre midi bann Manm Onorab prezan.  Mon a komans nou larepons Mr Speaker.

Mr Speaker premyerman, mon ti a kontan fer en klarifikasyon,  an relasyon avek larepons Minis pour Zafer Etranzer, lo en Kestyon Siplemanter par sa Lasanble semenn pase.  Ki mon mazinen in provok sa kestyon demande par Onorab Leader Lopozisyon, e an menm tan reponn sa PNQ ki Onorab Leader Lopozisyon in demande.

Mr Speaker permet mwan klarifye ki ziskan ozordi Gouvernman Sesel pa ankor repran nasyonalite Seselwa Mr Radovan Krejčíř.  Mon krwar ki sa Lasanble i okouran ki sa Msye ti ganny zize an Sidafrik dan en case Leta Sidafriken kont Radovan Krejčíř e plizyer lezot akize.

Dan sa zafer sa Msye ti ganny kondannen pour lofans; attempt to trafficking drugs, kidnapping, e attempted murder.  E ganny kondannen 35an prizon.

Apre ki Gouvernman Sesel ti ganny enformen ki sa msye ti ganny kondannen e anprizonnen pour sa bann lofans.  Gouvernman Sesel ti komans en demars pour repran son nasyonalite Seselwa.  Sa demars ti ganny fer par Departman Zafer Etranzer e mon Minister.  Le 10 Avril 2017 2 zofisye dan mon Minister ti al Sidafrik kot zot ti delivre en Notis date le 7 avril 2017 an personn ek sa msye pour enform li lentansyon Gouvernman Sesel pour repran son sitwayennte Seselwa lo baz ki in ganny kondannen Sidafrik pour sa bann lofans ki mon’n mansyonnen.

Apre ki sa Msye ti resevwar e siny sa Notis.  Mon Minister ti resevwar 2 let.  Enn sa let ki ti date le 8 Me 2017 ti sorti kot en Reprezantan sa msye Sidafrik.

Sa lot let ki ti date le 10 Me 2017 ti sorti kot en Avoka Seselwa.  Atraver sa 2 let, sa msye ti pe egzers son Drwa anba Sou-Seksyon 3, Seksyon 11 (a) Lalwa Sitwayennte.  Pour li demande ki en lanket i ganny ouver lo sa saisissions pour repran son nasyonalite Seselwa.

Apre sa, nou ti konsilte Attorney Zeneral ki ti konsey Minister, pour sispann sa bann demars, an vi serten limitasyon dan nou Lalwa.

Swivan konsey Attorney Zeneral, nou’n zwenn li detrwa fwa pour nou pran bann mezir apropriye an relasyon avek sa demars ek son konsey.  E nou ti’n fini deside lo bann aksyon ki nou’n bezwen pran e donn fidelite sa kestyon repran son nasyonalite Seselwa.

Mr Speaker pour revin lo larepons Minis pour Zafer Etranzer,  mon ti a kontan dir ki Departman Zafer Etranzer in toultan okouran sa demars.  Parkont apre ki nou ti’n resevwar konsey sorti kot Attorney Zeneral,  i pa paret ki nou ti enform Departman Zafer Etranzer lo sa konsey.  Ki ti fer nou sispann sa demars, e okenn zofisye Departman Zafer Etranzer pa ti partisip dan sa bann meeting, ki nou ti fer avek Attorney Zeneral lo sa size.  Mon Minister i pran responsabilite pour sa oversight.

Mr Speaker mon krwar ki larepons Minis Zafer Etranzer, in baze lo sa demars inisyal pour repran sitwayennte sa msye.

An sa ki konsern provizyon Lalwa,  sa demars ti pe ganny fer anba Seksyon 11 (a) Lalwa Sitwayennte apre lamannman ki ti fer par Act 11 2013.

An sa ki konsern si desizyon pour repran Nasyonalite Seselwa avek sa msye, par fer li stateless?  Mon ti a kontan dir ki dapre nou lenformasyon, avan ki sa msye ti resevwar nasyonalite Seselwa, i ti annan Nasyonalite Repiblik Czech, ki dapre nou lenformasyon i ankor pe tenir.  Akoz Minister napa okenn rikord ki in renons son nasyonalite Czech.  Mersi Mr Speaker.

 

MR SPEAKER

Mersi Minis.  San pour mwan preempt anything.  Mon’n resevwar Minis pour Lenformasyon e dapre repons mon’n resevwar en let bomaten ki’n sorti kot SS Faure,  ki i pe dir i pe anplifye sa ki ou pe dir, ki Vis-Prezidan koman Minis responsab pour Zafer Etranzer, i prezant son leskiz Lasanble lo en kestyon ki Onorab Ramkalawan ti leve semenn pase;  ki i prezant leskiz Onorab Leader Lopozisyon e tou Manm Onorab Lasanble, an vi son repons ki i ti gannyen there and then avek bann zofisye ki ti la.  E i pe dir ki i pa ti son lentansyon pour mislead the House.  Me i ti lenformasyon ki i ti gannyen la.  Be alor Minis ou osi ou’n klarifye sa.  E nou pour go by that.  Nou aksepte sa let ki in sorti kot SS Faure e leskiz ki in prezante de la par Vis-Prezidan Meriton.  Nou ava kontinyen, Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker ofet Minis i byen letan i pe dir ki se sa deklarasyon ki’n ganny fer par Vis-Prezidan nou pei, ki’n provok sa kestyon.

Eski Minis i kapab dir avek nou,  ki mannyer eski en Gouvernman i kapab enn son Minister pe dir pa’n gannyen, lot ki okipe par Vis-Prezidan nou pei vin dir avek Lasanble ki, vin dir avek Lasanble keksoz totalman diferan?

Konmsi mon pa pe ganny en konpran ki mannyer nou kapab annan en sityasyon parey?  E mon ti ava kontan Minis i re eksplik sa byen.  Akoz Mr Speaker sa ki sok mwan, e mon ti ava kontan dir Minis sa.

Sa let sorti kot Msye Barry Faure, i date le 16 Out.  Ozordi ki le 16 Out.

 

MR SPEAKER

Le 16 Avril.

 

HON WAVEL RAMKALAWAN

Le 16 Avril sorry.  Let Msye Barry Faure i date le 16 Avril.  Ozordi.  Ki vedir eski si mon pa ti’n demann sa PNQ ki’n sorti yer, ti pour napa okenn deklarasyon lo sa size?  Parski i plis, i 1 semenn la.  E i pa’n annan okenn zefor lo la par Gouvernman pour koriz en tel fot! Alor eski si mon pa ti’n demann sa PNQ ti pour napa, nou pa ti pour ganny okenn lenformasyon?   E nou ti ava pe mars avek sa lide ki sa Nasyonalite in ganny retire?

Dezyenmman Mr Speaker,  mon ti ava kontan Minis i eksplik mon byen.  Minis Mr Speaker in dir klerman ki poudir dan pour repons mon dernyen kestyon, lo sa zafer statelessness ki poudir si Sesel i repran sa nasyonalite Seselwa, sa Msye pa pour vini stateless akoz avan ki i ti vin Seselwa, i ti en Czech, i ti en sitwayen Czech Republic.

Eski Minis i kapab alor dir avek nou –  parski dan sa Lasanble e dan bann Konferans de Pres, nou’n ganny dir ki Mr Materi ti ganny nasyonalite Seselwa pour rezon imaniter.  Akoz i ti stateless.  Eski sa i pa en sityasyon de pwa en mezir?

Parski avan ki sa msye ti ganny Nasyonalite Seselwa.  Eski i pa ti en Tunisien?  Alors eski Minis i kapab dir avek nou, sa Gouvernman ki la o pouvwar ki mannyer i balans keksoz?  En Minis i dir nasyonalite in ganny tire, lot i dir pa’n ganny tire, enn i dir i pa pour vin stateless akoz i ti en, i ti annan en nasyonalite avan.  Me solman lo lot kote zot donn nasyonalite parski sa pov msye i stateless!  Eski mon ti a kapab ganny en leksplikasyon Mr Speaker akoz mon dan en leta konfizyon total.  Mersi bokou.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mr Speaker mersi, Onorab pour ou kestyon.  Pour ou premye kestyon konsernan nasyonalite ki’n ganny retire;

Mr Speaker ler nou’n fer bann rankont avek Attorney Zeneral, nou bann rankont ti plito teknik ek legal.  E nou pa ti vwar li nesesite pour anmenn en zofisye sorti kot Minister Zafer Etranze.

Letan ti pour apropriye, nou ti pour fer zot okouran ki pe pase ler nou ti a’n kapab ariv pli devan dan sa prose.

Lo size statelessness;  mon krwar i 2 diferan sirkonstans.  E parey ou’n fer resorti, sa msye Sidafrik i ti annan son paspor, e i pa’n renonse.

E sa lot case ki ou’n mansyonnen,  mon krwar dan Konferans de Pres, Prezidan in deza fer resorti poudir in pran, dapre konpasyon ki in donn sa msye Nasyonalite.  Mersi Mr Speaker.

 

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mr Speaker.  Sorry mon pa’n konpran larepons Minis.  In konfiz mwan en pe plis.  Minis in aktyelman konfiz mwan en pe plis; spesyalman lo sa 2enm larepons.  Ki diferans i annan?

Enn ou pe dir i ti annan en nasyonalite avan.  Be tou lede ti annan nasyonalite avan.  Enn ti en Tunisien, lot ti en sitwayen Repiblik Czech.

Enn ou donn li lo baz konpasyon.  Akoz i stateless.  Lot ou pran e ou dir i pa pour vin stateless akoz i ti annan en Nasyonalite.  Mon pa konpran Mr Speaker!

E dezyenmman mon ti ava kontan demann Minis, be ki staz ki zot in arive a ler aktyel dan sa demars pour repran nasyonalite?  Msye, mon pa konnen si mon apel li Mr Savy, oubyen Mr Krejčíř.  Parski i annan 2 paspor ki’n ganny issued by Sesel, enn i lo Mr Savy lot i lo Krejčíř.  Alors ki staz ki zot in arive dan sa bann demars?  E eski – enn – ki sa Sidafrik i ganny pran nasyonalite, akoz in ganny kondannen prizon?  Be lot eski nou donn li nasyonalite?  Be pa in ganny kondannen dan son pei li?  Eski ki diferans ki i fer?  Eski i annan diferan grad?  Mersi bokou Mr Speaker.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mr Speaker mersi bokou.  Sirkonstans se ki sa msye Sidafrik i annan son paspor e i kapab renouvle son paspor.  Selman nou konnen i dan prizon.

Sa lot ka, sa msye napa paspor.  I statelessness – i napa.  E dan ka staz ki nou’n arive, i reste pour Minis apwent en Komisyoner pour sa Komisyoner fer enquiry e fer en lanket baze lo son findings.  I a prezant avek Minis si desizyon pour ganny pran pour repran son findings ki in vwar.

Baze lo la, Minis a pran desizyon si pour repran son nasyonalite oubyen non.  Sa dapre Lalwa mon pe dir, Lalwa ki dir.  Mersi.

 

MR SPEAKER

Mersi Minis.

 

HON WAVEL RAMKALAWAN

Mr Speaker ki mannyer, e mon anvi demande, eski Gouvernman pa pe mal enterpret sa mo ‘statelessness’?  ‘Stateless’.  Ki mannyer en dimoun i kapab stateless, me i annan en State ki pe rod li?  E sa State, se sa State ki in antre dan pei avek son paspor.  Pour li rantre Sesel in the first place, pour li ariv lo Erport, pour rantre Sesel ou bezwen en paspor ki valid, e ou bezwen montre kote ou pe al reste.

Savedir ou bezwen annan en, ou bezwen annan en state ki’n issue en paspor.  Eski zot pa pe melanz napa paspor oubyen en paspor ki’n ekspire avek napa en Leta ‘stateless’?

E eski zot pa pe fer en gro fot dan sa konfizyon letan zot pe enterpret sa bann sityasyon?

E petet Minis avek tou respe,  eski sa sityasyon kot lanmen gos pa konnen ki lanmen drwat pe fer?  I pa sanmenm sa sityasyon ki pe renye ozordi dan sa Minister kot ou ete?  Kot Lanplwa pa konnen lekel bann zafer GOP kot en bout pa konnen ki lot bout pe fer, e ki aprezan nou trouv sa bann dimoun ki napa GOP isi, e bann lezot kalite keksoz ki pe arive.  Eski tousala pa montre nou sa konfizyon ki pe renye ozordi dan nou sityasyon?  Mersi bokou.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mr Speaker mersi.  Mon krwar lo kote nou Minister, Departman Lanplwa i annan son manda, Departman Imigrasyon i annan son manda.  E mon Minister i okouran tou lede sa Departman ki zot pe fer!

Si nou annan nou challenges, nou annan nou challenges parey lezot Minister e nou a sirmont sa.  Me selman mon pa krwar ki sa i en rezon ki pe fer nou sityasyon ki bann GOP expired ki nou, nou pa konnen, Lanplwa pa konnen ki Imigrasyon pe fer, Imigrasyon pa konnen ki Lanplwa-!  Mon krwar i pa en –  kekfwa i en fo konsep.  Mersi Mr Speaker.

Lo size statelessness;  dan ka sa msye ki Sesel, wi i ti annan en paspor, be Lotorite kot son pei i ete, i refiz-e renouvle son paspor e an konsekans de sa i fer li napa en dokiman.  E sa msye laba Sidafrik si mon ti a kapab eklersi, i annan son dokiman, i pa oule renouvle akoz i pa ankor renonse.  Mersi.

 

MR SPEAKER

Mersi Minis.  Onorab Jean-François Ferrari.

 

HON JEAN-FRANÇOIS FERRARI

Mersi Mr Speaker.  Mr Speaker mon ti a kontan si Minis i kapab avek lasistans Depite Attorney Zeneral, eksplik nou ki sa bann limitasyon dan Lalwa ki pe anpes nou sispann en paspor ki’n deza ganny issue?  Ki sa bann limitasyon ki i annan dan Lalwa ki anpes sa arive?  Sirtou ki ler nou konnen poudir ka sa msye Sidafrik i en ka fraudulent.  Akoz i Mr Egbert Jules Savy ki pa egziste ki’n ganny donnen paspor e ki ziska ozordi, mon pa pe dir sa Minis.  Minis pa ti la sa lepok.  Ziska ozordi sa dimoun ki’n donn sa paspor pa ankor ganny pini, pa ankor, personn pa ankor ganny hold to account.

Sa msye i annan en paspor ki fraudulent!  Alors i ganny repran.  Konmsi kwa ki bann limitasyon dan Lalwa ki anpese, kekfwa i annan.  Mon mwan pa tro konnen, mon pa en Avoka,  me kekfwa i annan sa bann limitasyon e mon ti a kontan ki Minis avek Depite Attorney Zeneral i eksplik mwan kwa ki pe anpes zot fer sa travay.

E mon ti a osi kontan demann Minis, e bann zofisye ki la, kekfwa zot annan en pe leksperyans dan sa biro.  Eski in deza annan okenn ka, dapre zot memwar kot en paspor in ganny donnen avek en etranze ki’n vin Seselwa, e ki sa paspor finalman in ganny repran pour serten rezon quelconque, eski in deza arive sa?  Oubyen Zanmen in deza arive dan sa pei?  Mersi.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mersi Mr Speaker.  Mersi Onorab.  An vi ki ou pe anmenn non sa lot dimoun dan sa case ki nou pe koz lo la, la,  sa paspor ki’n ganny fer anba sa non ki ou’n mansyonnen, in fini ganny cancel.  Nou’n aviz sa msye Sidafrik poudir sa paspor in ganny cancel anba Passport Act Seksyon 6 (1) (b).

E parey mon’n dir ler lanket pour fer, tousala pour ganny sorti – ok?  E dapre mon leksperyans, sa sityasyon ki nou annan la, mon pa okouran si in deza arive.  I petet in arive avan, oubyen ki mon mwan pa’n okouran, selman nou pa’n vwar case ki paspor in ganny pran la pour le moman.  Mon pa ankor vwar.

Selman nou bezwen fer diferans ant nasyonalite avek paspor.  Paspor i en Titre De Voyage.  Nasyonalite i nasyonalite en pei, sa nou bezwen fer atansyon.  Mersi.

 

MR SPEAKER

Mersi Minis.  Mon krwar i annan en bout kestyon non?  Lo bann limitasyon ou pa le?  Onorab Ferrari.

 

HON JEAN-FRANÇOIS FERRARI

Well mon ti a’n kontan, me selman mon pa anvi pens Minis lo la.  Akoz i en pwen teknik, i en pwen legal, me selman mon ti ava apresye si Depite Attorney Zeneral i kapab subsequently anvoy nou en pti dokiman oubyen.  Akoz nou pa pe donn li la parol mon mazinen isi.  So subsequently si Minis i kapab dir nou akoz nou pe al antre lo en deba Nasyonal lo Imigrasyon e lo sitwayennte.  So ti ava vreman enportan pour nou konnen la, en legzanp kot nou bezwen sanz en keksoz akoz i annan bann limitasyon ki pa permet nou pran en desizyon dan en ka ki nou vwar poudir pa tro sa.

So avek ou sipor Mr Speaker, mon ti a kontan si Attorney, Depite Attorney Zeneral evantyelman i anvoy nou en papye pour eksplik nou sa pti bout la.  Mersi.

 

MR SPEAKER

Yes.  Mersi Onorab.  Bon mon ava donn laparol Onorab Sebastien Pillay.

 

HON SEBASTIEN PILLAY

Mersi Mr Speaker.  Bonn apre midi Mr Speaker.  Bonn apre midi Minis.  Bonn apre midi tou Manm Onorab e tou dimoun ki a lekout e ki pe swiv nou.

Mr Speaker mon ti a kontan demann Minis.  Sa size repran paspor in en size ki’n deza vin devan Lasanble oparavan, e nou’n annan menm deba lo la.

E provizyon Lalwa li i fer kler ki ou kapab repran sa paspor.  Sa nou’n, sa osi in deza ganny diskite devan Lasanble.

Me ti annan en lot size ki ti ganny diskite la devan Lasanble, sa se partikilyerman Lartik 13 nou Konstitisyon.  E mon krwar sela kot problenm i ete Mr Speaker.

So eski in annan okenn demars pour nou fer okenn lamannman avek Lartik 13 nou Konstitisyon, pour ki i ava fer ki i ava vin anliny avek si nou annan en sityasyon kot nou oule repran en paspor dan sirkonstans kot en dimoun in komet bann lofans ki nou santi pour anmenn disrepute pour nou pei.  Eski sa i en eleman ki’n ganny konsidere par Minister konsernen?

Akoz anba Konstitisyon pour ou repran en paspor fodre ou etabli poudir sa, pour ou repran en sitwayennte that is, pa en paspor.  Pour repran en sitwayennte fodre ou kapab etabli poudir in ganny illegally acquiredunlawfully acquired.

So si zot pe, eski zot in etabli sa baz dan sa ka spesifik?  E si non, eski nou pe konsidere fer en lamannman avek nou Konstitisyon, ki ava permet nou pour nou kapab fer zisteman sa ki ozordi devan Lasanble nou vwar nou avek en sityasyon pe diskite.  Mersi Mr Speaker.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mersi Mr Speaker.  Mersi Onorab.  Dapre advise ki mon’n gannyen avek Biro Attorney Zeneral, se pei pe fer en review lo Konstitisyon.  E sa bann pwen pour ganny pran an konsiderasyon.   Mersi Mr Speaker.

 

MR SPEAKER

Mersi Minis.  Onorab Pillay.

 

HON SEBASTIEN PILLAY

Mersi Mr Speaker.   Be baze lo kestyon ki ganny raise devan Lasanble ozordi.  Sa ti en lenformasyon ki Lasanble nou ti annan oparavan.  Akoz ti en size ki ti ganny raise par former Onorab Hoareau dan Lasanble si nou rapel byen lo sa size sitwayennte.

Si nou al vwar nou ankor dan en menm sityasyon.  Nou pour still pri dan menm lenpas akoz zisteman sa dimoun anba nou Konstitisyon i reste en Seselwa e nou pour, nou pour vwar nou dan difikilte pour nou kapab retir son sitwayennte.

So ki Biro Attorney Zeneral avek ou Minister pe konsidere fer?  Pour ki nou a kapab ganny en, si oule en pozisyon kot ler i annan bann sityasyon koumsa, nou a kapab deal avek, san ki nou vwar nou dan en sityasyon kot en dimoun ki’n ganny nou sitwayennte i al komet mon pa konnen en lofans dan en lot pei, dizon Lanmerik i end up lo en krim ki, en keksoz ki i fer ki vreman anmenn nou pei dan disrepute.

E nou santi poudir a sa moman nou koman en pei nou pa condone sa bann kalite keksoz e nou pa ti a kontan sa dimoun gard nou sitwayennte.

So ki nou pe sey fer egzakteman?  Mon’n ganny dir nou pe diskite, me kwa egzakteman?  Akoz sa, si non nou pa pour kapab fer nanryen until ki sa i ganny amande.  Mersi Mr Speaker.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Bon mersi Mr Speaker.  Eskize pour nou pran en pti pe letan, nou ti pe diskite ansanm ek Depite AG.

Mon krwar the best, pli bon solisyon, se petet Lasanble i devret fer en demann e apre Gouvernman ek Attorney Zeneral i a komans sa demars pour amann sa provizyon dan Konstitisyon.  Mersi.

 

MR SPEAKER

Mersi Minis.  Vitman Onorab Pillay.

 

HON SEBASTIEN PILLAY

Mersi.  Thank you for your indulgence Mr Speaker, mon apresye.  Mr Speaker mon krwar ki pour nou ganny en way forward, se sa i devret vin en, probableman i devret vin Cabinet proposition ki devret sorti kot Gouvernman, Minister konsernen kot Minis, kot sa Departman e anvoy kot Cabinet e demande.  Akoz i en demann ki in deza ganny eksprimen dan Lasanble.  Akoz mon krwar ki ler sa kestyon i vin lo Order Paper, enn bann konsiderasyon ki petet nou pa’n ganny sans pran.  Se lefe ki sa kestyon li menm ki Konstitisyon li menm pa permet ou kapab donn nou en larepons lo sa kestyon.  Akoz zisteman ou pour always, ou pour toultan pri la.

So i sa i neseserman bezwen ganny amande malgre ki Lalwa, son provizyon Lalwa i fer kler.  Lalwa i fer kler poudir si en dimoun in komet en lofans ou devret kapab fer li sa.  Akoz sa, mon’n ekout ou, mon’n lir.  Me sa ki reste pour fer, se ki i bezwen annan en demann, mon konsider li en demann administratif i bezwen ganny fer atraver sistenm ki al laba e ki apre i ava vin devan Lasanble.

E mon mazinen ki unless ki ou bezwen Referendum dan serten sirkonstans sa enn ou a kapab enkli serten lamannman oubyen azout en Clause an plis ki fer kler sa derogasyon ki nou anvi mete ozordi Mr Speaker.  Mersi.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mr Speaker nou’n note propozisyon met devan par Onorab Pillay.  Mersi.

 

MR SPEAKER

Mersi.  Petet zis, i annan en kominike pe ganny fer ant Sekretarya avek PS Volcere lo sa size ki Onorab Ferrari in, petet in catch, word of, se ki i annan en legzersis ki pe fer.  I pa lo en nivo Nasyonal.  Komite pa ankor ganny met ansanm e nou, nou pe negosye.

I annan en demann ki Imigrasyon in fer avek Lasanble pour nou nominate en dimoun lo sa Komite – en Manm.  Me nou, nou pe al pli lwen, mon pe kominike avek PS Volcere pour nou regarde pour nou nominate 2 Manm.  Enn lo sak kote latab, pour al lo la pour rantre dan sa diskisyon.  E en Manm Lasanble i annan drwa – pa zis Minis, pa zis Egzekitiv ki annan drwa fer propozisyon.  Me Manm Lasanble osi tou i ava annan drwa koman, parey en manm piblik.  Akoz sa Konstitisyon se nou Konstitisyon pour fer propozisyon osi tou pour sanzman.

So mon pe zis esper desizyon final pour sorti kot PS Volcere, pour nou kapab anvoy sa let tou lede kote pour kapab nominate en Manm pour al sa Komite Nasyonal.  Ok?  So petet sa i ed ou en pti pe Onorab Pillay.  Mon ava donn la parol Onorab Henrie.

 

HON GERVAIS HENRIE

Mersi Mr Speaker.  Bonn apre midi tou dimoun.  Mr Speaker pwen ki Onorab Pillay in leve, apre mon krwar Onorab Ferrari in tous lo la.  Mon mwan anvi ki Minis i dir nou, akoz pour sa dimoun laba deor konnen.  Kwa sa pwen?  Dan Press Conference Statehouse Prezidan ti dir lo en pwen Konstitisyon, Konstitisyonnel.

Minis in dir la i annan bann limitasyon legal.  Dir nou lekel sa pwen or lekel sa bann pwen ki Radovan pe konteste ki nou pa kapab pran son nasyonalite?  I enportan pour sa dimoun Mont Buxton konnen lekel sa pwen, or si Gouvernman i kler ouswa si i pa en leskiz ki nou pe zis servi en teknikalite legal.  Mon anvi zot dir nou, Gouvernman i dir nou. Sa i enn.

Dezyenmman,  eski dan lepase nou’n pran Nasyonalite dimoun?  Kwa ki’n fer dan lepase si nou’n pran in osi fasil ki sa voyaz i en leksepsyon?  Mersi bokou.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mersi Mr Speaker.  Mersi Onorab.  Onorab msye, sa msye la i pa pe konteste li.  I pe demande ki en enquiry i ganny fer.  Sa ki li in ekrir dapre Lalwa.  I pe swiv dapre Lalwa li.  In dir fer en enquiry akoz son sitwayennte pe ganny repran.  Ok sa premye kestyon.

2enm kestyon.  Ou konnen mon mwan pa okouran si i annan okenn case avan.  I posib i annan mon pa okouran.  Selman mon pa okouran.  Ok?  Mersi.

 

MR SPEAKER

Ok mersi Minis.  Onorab Henrie.

 

HON GERVAIS HENRIE

Ok mersi Mr Speaker.  Alor, be dan sa dele letan ki in, depi ki in demande, what is the latest pour ki Gouvernman i fer sa lanket?  Ki dernyen demars pour fer sa lanket?  Mersi.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mersi Mr Speaker.  Mersi Onorab.  Se pour Minis apwent en Komisyoner.  Sa the next step.  Sa limitasyon se i pa donn ou en letan konbyen pandan sa letan, pour ou apwent en Komisyoner.  I napa en time frame.  Se sa bann limitasyon ki nou annan.  Mersi Mr Speaker.

 

MR SPEAKER

Mersi Minis.  Vitman Onorab Henrie.

 

HON GERVAIS HENRIE

Wi vitman Mr Speaker.  Letan Minis i dir nou ki Minis i apwente.  Mon mazinen i pe refer lo son lekor si sa depi 2017, konmsi kwa ki…?

 

MINISTER MYRIAM TELEMAQUE

(Off-Mic)

2an…

 

HON GERVAIS HENRIE

2an, pe al lo 2an mersi.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mr Speaker mersi.  Konsiltasyon in ganny fer avek AG.   E parey mon’n fer resorti i ti en bann, ti en konsiltasyon Legal e teknik.  E apre nou’n ekout son advice, se pour sispann sa prose pour le moman.  Mersi Mr Speaker.

 

MR SPEAKER

Mersi Minis.  Onorab Flory Larue.

 

HON FLORY LARUE

Bonn apre midi Mr Speaker.  Mersi Mr Speaker.  Bonn apre midi Minis.

Minis mon osi konfize ki Onorab Ramkalawan, e mon krwar bokou dimoun osi parey.  Nou pe demann en kestyon spesifik dan kestyon, i refer avek en Mr Radovan Krejčíř.

Mon kestyon i, eski Radovan Krejčíř i en Seselwa?  Akoz Minis in dir byen ki citizenship ek en travel document en paspor i 2 keksoz separe.

Akoz sa Egbert Jules Savy li son paspor in ganny sispann.  Selman dapre mon konpran i pa egziste sa dimoun.  Savedir i en fo paspor ki’n ganny issue par Leta Sesel, par Minister pour Imigrasyon.  Eski Mr  Krejčíř i annan 2 paspor?  1 pour li lo son non ek son portre?  1 Egbert Jules Savy ek son portre ladan?  E si sa paspor i fo, e in ganny cancel, eski i annan en internal enquiry dan Minister, pour vwar ki mannyer en fo paspor in ganny issue?  Sa kestyon No. 1.

No. 2; Minis in dir nou pour annan en enquiry, ki la in dir koumsa avek advice Attorney General’s Office in ganny suspend.  Kote sa i met Leta dan sa kestyon?  Si Attorney General in dir suspend, where’s the – oli sa rezon ki pei in sispann sa ka?

Me lo 3enm kestyon, mon ti a kontan demande.  Lefe ki in fer sa diferans ant citizenship ek travel document pour Mr Materi nou dir ti antre ek en paspor ki ti expire upon entry in Seychelles.  Ki fer ki ti ankor annan en state, me pa en travel document.  Kisisa ki fer ki nou ti bezwen donn li citizenship pour li ganny en travel document si se tou ki ti mank li?  Mersi.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mersi Mr Speaker.  Mersi Onorab.  Onorab teknikman sa msye i ankor en Seselwa.  Akoz ou pa ankor pran Nasyonalite avek li.  Savedir i en Seselwa – ok?

Lo sa lot case ki ou’n mansyonnen, Egbert Jules Savy,   sa i en investigation ki pe ganny fer par lapolis.  Akoz ler nou ti dekouver sa sityasyon nou ti fer Lapolis fer investigation – ok.  I ankor ek Lapolis.

Lo size.  Si ou kapab recap sa 3enm kestyon silvouple?

 

MR SPEAKER

Onorab Larue.

 

HON FLORY LARUE

Mersi Minis.  Mon premye kestyon osi i parey mwan ou pa’n ganny li kler.  Eski Krejčíř i en Seselwa?  E Mr Savy osi i en Seselwa?  Eski tou lede i annan travel document?

E sa enn li ki’n ganny cancel, li i fo.  What is happening internally?  Savedir sa kestyon ou pa ankor dir nou ki pe arive internally.

Me sa enn pour MrKrejčíř, eski li i annan en paspor?   Akoz, i napa, i paret mwan ou pe dir i napa en paspor, me selman nou pe sey revoke son citizenship.  So ki mannyer i annan 2 paspor?  Sa kestyon.

Lo kote dezyenm kestyon ti sa enquiry, Commission of Enquiry, si AG in dir sispann?  Has there been an explanation ki’n ganny donnen ek ou biro akoz i annan sa sispansyon?

Apre pour citizenship sa trwazyenm kestyon.  Lefe ki non El Materi ti monte, e in ganny State la upon entry, ti annan en travel document, e nou dir ki statelessness i lefe ki i pa’n, i ti, ou dir i napa en travel document pour li travel avek akoz son pei pa ti oule issue li ek enn.  Akoz nou pa ti zis issue li ek en travel document?  Akoz ki nou ti bezwen donn li citizenship apre en paspor?  Mersi.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mersi Mr Speaker.  Mersi Onorab.  Onorab sa Msye Krejčíř i annan en paspor Seselwa li avek son portre lo la.  E parey ou dir, i annan en lot paspor Egbert Jules Savy.  E ler Minister ti dekouver poudir i annan sa dokiman i pa bon,  en investigation ti ganny fer, Lapolis ti ganny alerte pour fer en investigation.  E ziska prezan lapolis i ankor pe regard ladan.

Sa paspor li menm li ki mon’n mansyonnen oparavan ki dapre Passport Act 6 (1) (b) nou’n cancel.  In fini cancel sa paspor.  Paspor Mr Krejčíř in expire nou pa’n renouvle son paspor – ok?

E parey mon’n fer resorti i reste pour apwent en Komisyoner e Komisyoner i a fer en lanket.

AG in dir nou dapre son advice pour tenir lo sa prose.  Akoz nou bann Lalwa i pa armonize avek Konstitisyon Sesel – ok.

Ok yeah, Onorab oubyen i annan?

 

MR SPEAKER

Mersi Minis.  Wi mon krwar i annan en bout kestyon ankor.  Onorab Larue.

 

HON FLORY LARUE

Mon t3enm kestyon ti apropo Msye El Materi.  Referans in ganny fer dan diskisyon la apre midi ki El Materi ti antre lo en travel documents Sesel.  Son travel document ti expire.  Ki fer ki i pa ti stateless, i ti zis napa en travel document from son original State.  Akoz ki nou prezan, nou ti bezwen donn li citizenship avek en paspor, which is a travel document pour li kapab travel e non pa zis en travel document ki Imigrasyon i kapab issue?

Me solman mon ti anvi demann en lot kestyon apre, baze lo sa ki in reponn avan Speaker.  May I please?  2 pti kestyon please.

 

MR SPEAKER

Non.  Bon mon konnen i annan overlap ant en ka avek en lot.  Me annou reste focus lo kestyon.  Annou pa tro al dan case sa lot ki’n vini, ki’n ganny overlap ki’n ganny anmennen ladan.  Nou kapab fer referans, me annou reste lo kestyon as is.

 

HON FLORY LARUE

Mersi Mr Speaker.  Mon ti annan zis en pti kestyon.  Mon ti kapab demande silvouple.

 

MR SPEAKER

As is.  Yes Onorab.

 

HON FLORY LARUE

Minis in dir ki Lapolis in pran sa ka.  Eski i kapab dir nou depi kan, ki dat?  E sa Enquiry Commission, kan li i pour ganny set up silvouple?  Mersi.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mersi Mr Speaker.  Mersi Onorab.   Onorab sa case, mon konnen in ariv apepre dan lannen 2000.  Mon pa pour kapab konfirmen egzakteman ki dat akoz i ti ariv en bon pe letan pase.

Mon kapab kekfwa rod lannen oubyen fer available avek ou sa dat egzakt.  Akoz la antet i pa vini ki dat ki ti arive sa lensidan.

Lo size pour apwent en Komisyoner,  nou ava fer diskisyon avek AG e nou a kapab diskite kan ki nou pour kapab apwent en Komisyoner.  Mersi Mr Speaker.

 

MR SPEAKER

Mersi Minis.  Onorab Johan Loze.

 

HON JOHAN LOZE

Mersi Mr Speaker.  Mr Speaker dan, pour kontribye ver sa deba Nasyonal lo Imigrasyon e Sitwayennte, me osi pour ede eklersi en pe bann konfizyon.

Eski Minis i okouran ki ansyen Speaker Lasanble Nasyonal, Mr Patrick Pillay in ofer pour reponn tou kestyon Lasanble Nasyonal lo sa size paspor Mr Al Materi e in menm ofer pou vin akonpannyen par Mr Al Materi?  Mersi.

 

MR SPEAKER

Mersi Onorab.

 

(Interruption)

 

MR SPEAKER

Annou, non, non.  Nou a les Minis reponn.  Order!  Order!  Kestyon, kestyon i pour Minis.  Nou a les Minis donn en repons.  Minis.

 

MINISTER MYRIAM TELEMAQUE

Mersi Mr Speaker.  Mersi Onorab.  Non mon pa okouran.  Mersi.

 

(laughter)

 

 

MR SPEAKER

Mersi Minis.  Onorab Ahmed Afif.

 

HON AHMED AFIF

Mersi Mr Speaker.  Mr Speaker mon ti a kontan si Minis i eklersi sa ki mon vwar koman en kontradiksyon.

Premyerman lo kote Mr Krejčíř zot in retir son paspor avek li, me zot konsider li i reste en sitwayen, malgre ki ou’n tir son paspor.  I reste en sitwayen, i pa stateless.

Me dan ka El Materi ki li son paspor in expire, savedir i napa en paspor valid li osi, me li i vin stateless.

Sa lot li i retenir sitwayennte, i pa stateless li.  Me menm sityasyon, pour mwan en kontradiksyon.

E dezyenmman si Minis i kapab donn mwan si i annan avek li, limero paspor Egbert Jules Savy, son date of issue, son date of expiry, limero paspor Radovan Krejčíř date of issue, date of expiry.  Mersi.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mersi Mr Speaker.  Mersi Onorab.  Onorab sa msye Sidafrik sa prosedir pa ankor fini.  Savedir i ankor en Seselwa, ou pa ankor pran nanryen avek li.  Akoz fodre ou apwent en Komisyoner, Komisyoner i ava fer enquiry. Baze lo sa findings ki li i vwar,   la ki desizyon a ganny pran – ok?  Sa enn.

Konsernan sa msye El Materi dapre nou konpran,  e son paspor pa pe ganny renouvle, e sa i fer li dan en sityasyon ki i napa en paspor ki tonm dan en sityasyon statelessnessok.

 

Lo size Egbert Jules Savy.  En pti moman Onorab mon a fer ou ganny tou ou dokiman.  Dernyen paspor ki Mr Radovan ti annan i enn ‘N’ for capital (N) N0006554.  Ti ganny issue le 22 Avril 2005.  Ou’n demann mwan zis passport number avek son-?

Mr Speaker mon a kapab fer ganny passport No. pour Egbert Jules Savy.  Akoz sa dokiman ki mon annan lo la, i pa mansyonnen son non, son passport number ek date issue.  I zis mansyonn son non apre anba ki Seksyon nou’n repran sa paspor.  Mersi.  Selman mon kapab fer ou gannyen.  Mersi.

 

MR SPEAKER

Mersi Minis.  Onorab Afif.

 

HON AHMED AFIF

Mersi Mr Speaker.  I zis pour konfirm ek Minis, Minis in konfirm egzakteman sa kontradiksyon dan son larepons lo premye bout, en dissent ki zafer retir sitwayennte pa ankor fini.  Savedir i ankor en sitwayen malgre ki zot in pran paspor avek li.

Me dan ka Mr El Materi son paspor in expire, son paspor Tunisien in expire, ki vedir i ankor en Tunisien, i pa stateless.  Alors mon pa konpran sa largiman ki mannyer i vin stateless.  Me mon kit li la.  Zis mon pou dir ki mon pa’n ganny en larepons satisfezan.  Mersi Mr Speaker.

 

MR SPEAKER

Mersi Onorab.  Mon ava donn la parol prosen kestyon Onorab Sandy Arissol.

 

HON SANDY ARISSOL

Mersi Mr Speaker.  Bonn apre midi Minis avek ou delegasyon.  Mr Speaker premyerman mon ti a kontan dir avek Lasanble poudir mon koman en Seselwa mwan en pe dezapwente, mon dezapwente ki nou Gouvernman, Gouvernman US ki la, zot kontinyen fer bann deal avek bann kriminel, bann dimoun ki annan Red Alert lo zot non, bann dimoun ki wanted dan zot pei, e zot kontinyen donn sa bann dimoun nou paspor e nou nasyonalite.  Alor mon lo mwan kote mon dezapwente avek Gouvernman US.

        Mon kestyon mon ti a kontan demann Minis;  an vi ki mon’n tann li pe kontinyelman dir refer lo sa msye, lo msye.  Minis menm en ler ou a krwar i per pour mansyonn El Materi avek Krejčíř.  Mon ti a kontan demann Minis, an vi ki in dir poudir Mr Savy i ankor reste en Seselwa.  Semenn pase Onorab Henrie ti demann en kestyon dan Lasanble Nasyonal Mr Speaker, ou rapel byen avek Vis-Prezidan bann Lagreman ki nou kapab fer, pour fer ki nou bann Seselwa ki’n ganny kondannen aletranze pour zot vin fer zot santans isi.

Alor lo la, mon ti a kontan demann Minis si i annan okenn laranzman, vi ki Minis Imigrasyon i la ozordi an relasyon ek bann dokiman ki ganny fer pour ki i osi koman en Seselwa, akoz i ankor en Seselwa dapre sa ki Minis in dir pour li vin fer son santans isi.

Dezyenmman mon ti a kontan demann Minis,  akoz ki Gouvernman enkli Minis pour Imigrasyon avek Lanplwa, zot kontinyen antre dan bann deal pour donn bann kriminel, mon redir bann dimoun ki annan Red Alert, bann dimoun ki ‘’wanted ‘’ aletranze pour zot rantre Sesel pour vin kasyet anba nou nasyonalite avek nou paspor.  Akoz zot kontinyen fer sa Minis?  Mersi bokou.

 

(APPLAUSE)

 

MR SPEAKER

Mersi Onorab.  Minis.

 

 

MINISTER MYRIAM TELEMAQUE

Mersi Mr Speaker.  Mersi Onorab.  Onorab mon krwar i, sa Mr Egbert Jules Savy i pa li, i pa-  Mon krwar, i konsern sa Mr Krejčíř probableman.  Akoz sa Egbert Jules Savy nou’n fini koze poudir paspor ti ganny donnen e investigation Lapolis pe fer envestigasyon.

Lo size transfer pour li vin fer son santans isi.  Sa mon krwar nou a bezwen fer an diskisyon avek Foreign Affairs.   Akoz i pa tonm direkteman anba mon Minister.  E mon pa okouran ki Gouvernman Sesel in fer okenn Lagreman pour donn paspor okenn dimoun ki lo Red Alert.  Mersi Mr Speaker.

 

MR SPEAKER

Mersi Minis.  Onorab Arissol.

 

HON SANDY ARISSOL

Mr Speaker, mersi Minis pour  ou larepons.  Zis pour remind Minis poudir Mr El Materi, Tunisien i ti lo en Red Alert, i ti wanted, ti lo medya enternasyonal e nou tou nou ti koz lo la, e alor li sa enn ki mon pe refer ki zot in donn li nou paspor e i pe reste dan nou pei i annan plis ki 2an edmi.  Mersi bokou Mr Speaker.

 

 

MR SPEAKER

Mersi pour klarifikasyon Onorab.  Mon a demann loter kestyon si i annan okenn lot kestyon avan nou dismiss Minis.  Onorab Ramkalawan.

 

HON WAVEL RAMKALAWAN

Yes mersi bokou Mr Speaker.  Mr Speaker premyerman mon anvi demann Minis ki, ok i byen ki i annan sa bann lanons la pour bann konsiltasyon.  Eski letan nou’n fini konsilte, eski sa Lalwa ki pour ganny ekrir, Minis i krwar ki son Gouvernman pour vreman abide to sa Lalwa?

Parski letan mon pe regard Lalwa ozordi –  Ok par egzanp lo paspor;  lo issue paspor i donn ou bann rezon akoz en dimoun son paspor i kapab pa ganny renouvle.  Seksyon 3 (c) i dir avek ou ‘‘Where the applicant has been convicted of a criminal offence and the sentence of the Court has not been satisfied or set aside.’’

Si en dimoun i dan sa sityasyon ou pa kapab, sa zofisye i kapab pa donn li en paspor.  Be si sa i le ka, ki mannyer eski Gouvernman Sesel i kapab non selman issue en paspor, me donn nasyonalite?  Parski annou pa bliye ki poudir Mr Materi in ganny kondannen dan son pei, criminal case No. 34491.

 

HON JEAN-FRANCOIS FERRARI

  (Off-Mic)

16an…

 

HON WAVEL RAMKALAWAN

Ok.  Kot in ganny kondannen, they were sentenced li avek son madanm to 10 years in prison and each of them has to pay (TND) 2 billion and 262 million Tunisien Dinars based on Article 99 of the Criminal Code. 

En lot criminal case 32158, ok le 23 fevriye 2017.  Ok, e ler i ti ganny kondannen 6an and each of them has to pay (TND) 1 billion and 86 million Tunisien Dinars. 

Ok so, dan en serten sans nou, nou pe dir ki en Seselwa ou pa pour renouvle son paspor, dan bann sirkonstans kot si in ganny kondannen e son santans i pa ankor servi.  Me selman Gouvernman Sesel, konmsi eksplike ki dimoun i ganny kondannen dan zot pei e zot vin isi e nou, nou donn zot nasyonalite e an plis ki sa, nou donn zot paspor.  So se pour sa rezon ki mon demande si sa Gouvernman ki la pour vreman pran li serye.

Mr Speaker petet an menm tan osi.  Petet i enportan pou dir ki mwan personnelman, parey toultan Onorab Gill i konn sa byen.  Mwan mon napa problenm avek non en dimoun mor lo Rezis Voter mwan.  Mon problenm se si sa dimoun mor i vin vote.

Menm parey mwan  mon napa problenm avek en etranze dan nou pei.  Mon problenm se, letan sa etranze i ganny mon nasyonalite!  Letan i ganny nasyonalite Seselwa dan sa bann sirkonstans misterye, drol e apre sa nou tande ki poudir enn in fer isi, lot in fer laba.

Be Mr Speaker,   mon anvi demann Minis en dernyen kestyon.  Eski i annan en pinisyon pour dimoun ki sey fer en etranzeze ganny nasyonalite anba bann preteks ki fo?  Eski i annan okenn-?  E letan i ava reponn mon sa, mon ava annan en kestyon final.  Eski en, e Attorney Zeneral byensirir i ava kapab ede la.  Eski i annan okenn pinisyon pour bann dimoun ki fer lezot ganny, fer en etranze ganny nasyonalite anba bann fo preteks?  Mersi bokou.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

En pti moman Mr Speaker.  Mr Speaker mersi bokou.  Lofans i annan anba sitwayennte, be nou pa’n vin avek nou Passport Act.  Alors nou pa pour kapab konfirmen.  Mon pa oule fer en deklarasyon ki apre mon bezwen retract!  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Minis in dir ki i annan lofans selman ou Lalwa pa avek ou?   Se sa?  Citizen, sorry?

 

MINISTER MYRIAM TELEMAQUE

Sitwayennte, Passport Act mon pour bezwen verifye.

 

HON WAVEL RAMKALAWAN

Mr Speaker, eski Minis i kapab dir avek nou 2 keksoz?  (1)  -eski son Minister pe pran okenn aksyon avek sa 3 Manm Lasanble, ki ti siny form pour en serten Mr Marek ganny nasyonalite e apre sa pour ki sa ti ganny renonse?  Parski zafer nasyonalite menm sa Mr Speaker.

 

(Interruption)

 

MR SPEAKER

Non, non.

 

(Interruption)

 

HON WAVEL RAMKALAWAN

Be konbyen Speaker i annan la?

 

MR SPEAKER

Onorab.  Order!  Order!  Onorab mon krwar i annan en 2enm  non ki’n rantre dan sa kestyon.

 

HON WAVEL RAMKALAWAN

Wi, wi.

 

MR SPEAKER

La i pe rantre en 3enm.

 

HON WAVEL RAMKALAWAN

Wi, wi.

 

MR SPEAKER

Mon krwar i kapab vin koman en kestyon separe dan le fitir lo li menm – ok.?

 

HON WAVEL RAMKALAWAN

Wi, wi.  Non Mr Speaker be selman ou konpran mwan?  Parski sa Gouvernman in fer tousala ki i posib i annan ankor 10 non dan pour swiv dyalog Onorab Gill, i annan 10 non ankor ki mon kapab, ki mon annan ki mon kapab mansyonnen.  Me selman mon pa pour fer sa.  Ok?

 

(Interruption)

 

 

HON WAVEL RAMKALAWAN

So Mr Speaker – Mr Speaker, Mr Speaker.

 

(Interruption)

 

HON WAVEL RAMKALAWAN

Non, non zis en legzanp sa Onorab Gill relax.

 

MR SPEAKER

Order, order.

 

HON WAVEL RAMKALAWAN

Mr Speaker vi ki Minis in mansyonnen ki poudir zot pe esper lapwentman en Komisyoner pour regarde si lo baz kriminalite paspor Mr, non, non Nasyonalite Mr Radovan Krejčíř pour ganny retire.  Eski Minis i ava osi konsidere, vi ki i annan eleman kriminalite dan Nasyonalite Mr Materi.  Eski letan zot apwent sa Komisyoner, sa Komisyoner i ava ganny sa responsabilite pour li konsider tou lede ka?  Me pa zis sa 2 ka, me osi tou bann lezot ka bann etranze ki zis in ganny nasyonalite e ki annan bann eleman kriminalite dan zot!  Mersi bokou.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mersi Mr Speaker.  Mersi Onorab.  Onorab sa Komisyoner la i pour ganny apwente pour sa specific case ki nou pe diskite la ozordi apre midi.  Ou pa pour kapab anmenn li dan sa bann lezot case ki ou, ou pe mansyonnen.  Mersi Mr Speaker.

 

MR SPEAKER

Mersi.

 

HON WAVEL RAMKALAWAN

Be Mr Speaker napa posibilite pour apwent bann lezot Komisyoner pour sa bann specific case ki nou pe koze?  Akoz i annan kriminalite involve ladan!  E nou, nou pa kontan sa bann zafer!  Mersi bokou.

 

MR SPEAKER

Bon mersi Onorab.  Mon krwar i bezwen annan bann prosedir ki pour vin devan.  E parey ler en dimoun etranze i apply citizenship ki ganny Gazetted, i annan bann prosedir ki ganny swiv ki dimoun i kapab met bann plent, mon krwar ‘plent’ menm ki dir ki rezon ki sa dimoun pa kapab ganny citizenship and so on.

Me petet avek gidans travay ki sa Komisyon Nasyonal i ava fer, i ava etabli bann prosedir kler ki en Manm piblik oubyen en Manm Lasanble, i kapab demande atraver bann prosedir ki lanket i ganny ouver, ki serten dimoun ki’n ganny citizenship, en lanket i ganny ouver e zot citizenship i ganny posibilite pour ganny revoke.  Mon mazinen i ava al, sa travay ki sa Komisyon i ava fer, i ava al dan sa direksyon.  Ok?

So anyway avan mon dismiss Minis ek son delegasyon, PS Volcere nou deza an kontak, nou pe, Lasanble Nasyonal pe esper ou pour sa desizyon.  E nou pare pour nou ganny konsantman tou lede kote pour nonm en Manm pour ki sa Komisyon i a kapab komans fonksyonnen.

Minis, Minis Telemaque avek ou delegasyon, nou remersi ou pour vin avek nou dan Lasanble apre midi pour reponn sa PNQ e nou ava eskiz ou parmi nou e nou swet ou bonn kontinyasyon pour lazournen.

 

MINISTER MYRIAM TELEMAQUE

Mersi Mr Speaker.

 

 

(MINISTER TELEMAQUE AND HER DELEGATION WAS EXCUSED FROM THE HOUSE)

 

MR SPEAKER

Bon mon’n aprann ki bann, nou annan bann zofisye standby.  Nou pou regarde atraver prezantasyon Mosyon.  Mon pa konnen si zot oule nou pran en Break la, nou retournen, oubyen si nou bouze nou pran Mosyon?  Nou pran en Break, alright?  Apre ler nou pou antre Onorab De Commarmond i a prezant son Mosyon pour ratifye sa 4 Annex e nou ava regarde si Lasanble i bezwen ki nou apel bann teknisyen, nou ava al dan en Staz Komite, pour nou kapab enterakte en pti pe pour nou regarde petet ki lenpak ratifikasyon i kapab annan lo nou e apre nou ava bouz devan pour nou pran en – yes.  Wi nou pou, nou a retournen retournen 4er mwen kar.

 

(BREAK)

 

MR SPEAKER

Bon nou ava kontinyen nou travay.  Mon krwar nou, wi.  Mon ava zis demann en leskiz bann zofisye si zot pa mind nou pa ankor bouz dan sa staz, si zot ava pran side table, si zot pa mind zis lev, zot kapab kit zot bann dokiman devan, zis pran side table, nou ava les Mosyon, les Mover Mosyon i ava move Mosyon e apre ler nou ava al dan Staz Komite, zot ava vin pran plas devan.  Ok zis prezant en leskiz pour sa.

Nou fer keksoz byen dapre nou bann prosedir.  Mersi.  Mon konnen zot eksite la, zot anvi pran par dan deba Lasanble, pa problenm.  Bon mon ava demann mover Mosyon pour li move son Mosyon.  Onorab Charles De Commarmond.

 

 

HON CHARLES DE COMMARMOND

Thank you Mr Speaker, Sir.  Bonn apre midi Mr Speaker.  Bonn apre midi tou Manm Onorab.  Kaptenn Valmont ek son lekip bonn apre midi.  E tou dimoun ki pe ekout nou.         Mr Speaker mon Mosyon i lir koumsa

Pursuant to Article 64 (4) of the Constitution, I move that this Assembly resolves to ratify the:-

Accession to the Regulations for the Prevention of Pollution by Harmful Substances carried by Sea in Packaged Form ottoman dir (MARPOL ANNEX III).

        And Accession to the Regulations for the Prevention of Pollution by Sewage from Ships (MARPOL ANNEX IV).

        Accession to the Regulations for the Prevention of Pollution by Garbage from Ships (MARPOL ANNEX V).

And Accession to the Regulations for the Prevention of Air Pollution from Ships (MARPOL Annex VI).

Mr Speaker ozordi mon pe prezant devan Lasanble en Konvansyon pou ede prezerv lanvironnman lamarin Sesel kont bann diferan polisyon ki ganny koze par bato.  E la nou pe koz bann bato ase gro, 500 tonn ou plis.  An term maritim 500 gross tonnage ou plis.

Parey nou bann tanker, nou bann bato kargo ki sorti, ouswa ki ariv Sesel, par bann voyaz enternasyonal.

Sa Konvansyon i apel an kourt MARPOL 73/78 – ouswa The International Convention for the Prevention of Pollution from Ships.

Sa Konvansyon Mr Speaker i enn parmi bann Konvansyon tre enportan ki nou Lasanble i devret ratifye li.  Sa ki esansyel se ki nou konpran ki natir sa Konvansyon, ki tonm anba parasol IMO ‘International Maritime Organization’.  I pa parey tou lezot Konvansyon kot nou siny sa Konvansyon e apre otomatikman tou son bann konponan i enkli.

MARPOL i en Konvansyon ki i annan li 6 Annexes.  Savedir pour nou konsider nou lekor koman en pei ki konpletman azour avek MARPOL,  nou bezwen accède savedir prezant en dokiman aksesyon pour tou sa bann Annex.  Sa i enkli Annex 1, 2, 3, 4, 5 ek 6.

Mon ti ava kontan fer resorti a sa pwen, ki IMO pa demann en pei pour adopte sa bann Annex en sel kou.  I posib pour nou fer Annex par Annex.  Parey Sesel ti komans par Annex 1 ek 2 ki nou’n fini accéder lo la.  E la ozordi nou oule konplet sa Konvansyon avek larestan Annex.  Savedir Annex 3, 4, 5 ek 6.

Akoz fer sa?  Akoz nou oule fer sa pa devan Mr Speaker?  Sesel nou bezwen asire ki bann bato ki pas par Por Sesel, savedir Por Victoria e lezot Por ki Sesel i annan, e al dan lezot Por osi, e osi bann bato ki anba nou paviyon i azour avek bann lobligasyon dan son totalite.  Savedir bann lobligasyon ki annan anba sa Konvansyon.

I tre enportan ki ler sa bann bato i ganny enspekte anba Ports States Control ki swa ler zot antre, ouswa ler zot antre Sesel dan nou bann Por, ouswa ler zot antre dan lezot Por Enternasyonal tou dokiman i montre ki Sesel i azour avek sa Konvansyon dan son totalite.         Espesyalman pour Sesel vi ki nou lanvironnman i tre enportan pour tourizm e sa konsep Blue Economy ki nou pe met devan.  I enportan alor ki nou met keksoz annord e azour.

Sesel i dan sa moman kot sa Konvansyon pe ganny sa latansyon ki i merite.  E la mon krwar alor ki i a benefisye nou menm nou pou konplet sa bann prosedir.  Si nou konplet sa bann prosedir Mr Speaker.

Permet mwan Mr Speaker, permet, mwan Mr Speaker brièvement mon a donn en pti leksplikasyon lo sak sa bann Annex vi ki nou’n fini accède lo Annex 1 ek 2.  Nou lanfaz alor i ava lo Annex 3, 4, 5 ek 6.  Me selman i a meyer si nou donn en leksplikasyon ase konpreansiv konmsi pour nou konpran byen.

Annex 1 Mr Speaker;  savedir Regulations for the Prevention of pollution by oil. Sa Annex li menm Mr Speaker i tous lo bann mezir neseser pour minimiz polisyon ki ganny koze par delwil ki ganny prodwir dan loperasyon bato oubyen delwil ki sorti lo bann bato par aksidan.

Sa enn Annex i ava ed nou par donn nou bann lenstriksyon, donn nou bann lenstriksyon ki pour enkli lafason ki bato i ganny konstrir pour minimiz sa bann lenstans, kot delwil i polye lanmer.  Sa i ava fer lenplimantasyon en pe pli fasil.  Sa Annex Mr Speaker nou’n fini accède tou.

Annex 2;  savedir Regulations for the controls of pollution by noxious liquids substances in bulk.  Li i ti antre an fors le 2 Oktob 1983 parey Annex 1.

Li i plito lo bann mezir neseser pour desarz bann noxious liquid substances.  Sa Annex i ed bann pei par donn zot en lalis anviron 250 sibstans ki i annan lo sa lalis.  E la sa bann sibstans i bann ki bezwen ganny en pe plis latansyon.

An plis ki sa,  sa enn Annex i asire ki okenn desarz sa bann sibstans pa ariv plis ki 12, 000 notik; savedir anviron 20kilomet avek later pli pre.  Savedir Sesel i osi sa Annex in fini accède tou, e la nou pe koz bann sibstans parey ethanol ensidswit, tou sa bann keksoz ki i kapab.  I anba sa Annex la.

Annex 3, li i –  nou pe koz lo prevention of pollution by harmful substances carried by sea in package form.

Sa enn Annex i konsantre lo etabli standar ki neseser pour package bann dangerous goods.  I donn detay lo lafason pour store sa bann dangerous goods lo bann bato eksetera.

Lalis pour sa bann dangerous goods i ganny trouve dan IMDG Code.  Sa i en code pour ‘International Maritime Dangerous Goods’.  E Sesel i deza pe swiv bann detay sa code lo bann bato ki al voyaz enternasyonal.

Mon ti a kontan osi note a sa pwen, ki ansanm avek Lekol Maritim Sesel, i deza annan bann course ki pe ganny fer pour eksplik sa bann standar e sa i ava fasilit lenplimantasyon sa enn Annex lo, isi lokalman.

Nou pour osi profite pour enplimant sa bann pwen esansyel sa Annex lokal, lokalman e non pa selman enternasyonalman.  Savedir ki bann bato dan ka lokal i osi swiv sa lord la, sa fason ki nou sarz bato.

Les mon a eksplike alors ki sa enn.  Les mon eksplik sa si oule Mr Speaker en pti pe pli kler.  Menm si sa Annex alor i pour bann bato ki al fer voyaz enternasyonal selman, me nou pou swiv zot bann gidans pour met en pe lord lo bann bato lokal.

Me lokal nou ava fer li avek ase fasil si oule pour enplimant sa bann lord.  E la nou pe koz bann goods parey ler bann bato pe anmenn bann kemikal pour swimming pool – par egzanp.  Dizon ou pe anmenn sa bann kemikal sorti pou al Mahe pou al Praslin sepa La Digue, bann zafer klorin ensidswit in package form – ok? 

Alors sa i lafason si ou pe sorti isi pour al lo nou bann zil, ou pe anmenn sa bann keksoz; savedir i annan en lord, en fason ki ganny fer.  So sa i pa zis pour bann bato lo voyaz enternasyonal, me osi lokalman nou pe sezi sa lokazyon pou nou kapab enplimant en pe sa bann fason sarz bato, e anmenn sa bann prodwir ki nou pe dir an package form.

Annex 4 Mr Speaker;  prevention of pollution by sewage from ships.  La li sa Annex i konsern desarz sewage ki ganny large par sa bann bato.  I donn ou spesifikasyon lo ki mannyer ou pou tret e desarz sewage lo bato.

La Mr Speaker Egzekitiv i note ki Sesel i bezwen monitor sa aktivite en pe pli pre e met a dispozisyon bann fasilite ki pour asir bon lenplimantasyon pour sa aktivite.  Byensir kit antet spesifikasyon nou pei.

Annex 5 li nou pe koz lo prevention of pollution by garbage from ships.  Annex 5 li i relye avek tou bann garbage ki sorti lo bato e sa i enkli food waste, cargo residues, cooking oil, fishing gears, plastik ensidswit sa bann zafer koumsa.

Sa enn Annex i detay standar e gidans pour kapab dispose sa bann salte san ki zot detri nou lanmer, nou lanvironnman lanmer.

Sa ki enportan la, se pour konpran ki sa Annex i ban ki plastik i ganny zete dan lanmer.  Mon krwar ki Departman Lanvironnman i ava dakor avek sa letan nou ratifye letan nou met bann prekosyon lo la pour anpes plastik ganny large an bonnavini partou dan nou lanvironnman.  Sirtou lanvironnman lanmer.

Annex 6, la nou pe koz prevention of air pollution from ships.  Sa dernyen Annex Mr Speaker i met limit lo emisyon sulfur oxide ek nitrogen oxide ki ganny large par bann masin bato.

Sa enn Annex i plito enn vize lo prevansyon.  Kot la nou pei i ava kapab asire ki bann bato i larg pli ptigit posib sa bann emisyon ler zot apros e kit nou Teritwar.

Mr Speaker a sa pwen les mon met Stati MARPOL ’73 -’78 devan nou Lasanble.  Dan lesanz kote nou’n arive avek sa Konvansyon.

Annex 1.  Li parey nou’n dir in ti ganny met, antre an fors le 2 Oktob 1983.  Son aksesyon le 28 Fevriye 1991 e son domestication, savedir domestication of the content la, i ankor pending.

Annex 2.  Li sa Konvansyon in antre an fors, li osi le 2 Oktob 1983 e nou nou’n accede to that Convention le 28 Fevriye 1991 e i osi son domestication i ankor pending.

Annex 3 son entered into force le 01 juillet 1992.  Aksesyon i ankor pending e domestication i ankor pending.

E tou lezot Annex ki swiv, savedir Annex 4 li son Konvansyon in entered into force le 27 Septanm 2003.  E son aksesyon e domestication i ankor pending. 

Annex 5 li osi li i ti antre an fors le 31 Desanm 1998 e son aksesyon e domestication i ankor pending.

E Annex 6, li in antre an fors le 19 Me 2005.  E son aksesyon e domestication i osi ankor pending.

Pandan bann lannen ki Sesel pa ti ankor form parti sa bann Annex 3, 4, 5 ek 6.  In annan bann amannman Mr Speaker ki’n ganny fer ki ler nou ava met li dan nou Regilasyon, savedir nou ava domesticate li.  Tou sa bann amannman i pour ganny konsidere.

Lasanble i ekspekte ki Egzekitiv i pran prekosyon pour asire ki Annex 1 ziska 6 sa Konvansyon i byen ganny mete dan nou Lalwa pour asire son, pour asir son lefikasite Mr Speaker.  Akoz nou okouran plizyer problenm ki nou gannyen ek zafer bato.  Bomaten nou’n koze, lot semenn pase nou’n koze, plizyer.

Lotrozour ti annan Mosyon ek kestyon dan Lasanble lo sa bann zafer kontrol lo bato e tou bann polisyon ki konsern bato.  Alor sa osi i enportan ki nou note.

Mr Speaker sa ki nou pe demande i senp.  Sesel i anvi etablir lord dan lafason ki keksoz i ganny fer par bann bato spesifikman lafason ki zot degaz zot bann wastage, bann keksoz ki zot pe transporte e ensi bann emisyon ki ganny prodwir dan zot loperasyon.

MARPOL i ava ede pour ganny bann standar e aplik sa bann standar.  Nou anvi etablir lord e prosedir dan lafason ki nou protez nou lanvironnman lamarin avek, e annou konplet si oule nou bann misyon par donn nou laprouvasyon Annex 2,3,4, 5 ek 6 ki devan nou Lasanble ozordi.

Mr Speaker mon remersye ou e mon demann nou Lasanble pour ratifye sa Konvansyon.  Mersi.

 

MR SPEAKER

Mersi Onorab De Commarmond.  Okenn Manm ki segonn Mosyon?  Onorab Simon Gill.

 

HON SIMON GILL

Mersi Mr Speaker e bonn apre midi Mr Speaker.  E tou Koleg Onorab bonn apre midi.  E tou Manm piblik bonn apre midi.  Mr Speaker mon segonn Mosyon par reprezante par LGB.  Mersi bokou.

 

MR SPEAKER

Mersi Onorab Simon Gill.  Bon Mosyon in segonde.  Onorab De Commarmond, ou ti oule?

 

HON CHARLES DE COMMARMOND

Non mon ti oule petet demande si i neseser ki nou ganny leksplikasyon an plis ki sa ki’n ganny prezante e ki petet nou annan serten konsern e kestyon.  Nou annan bann zofisye sorti kot bann Departman Minister Konsernen ki la dan nou Lasanble e therefore si i neseser mon ti ava met en Mosyon pour pas dan Committee Stage pour zot kapab enterakte avek nou.  Mersi.

 

MR SPEAKER

Mersi Onorab De Commarmond.  Mon krwar i en size ki nou ti diskite dan ABC.  Ou oule entervenir Onorab?  Ou oule entervenir direkteman, oubyen ou oule interacte avek bann zofisye?  Oule entervenir apre?  Ok go ahead Onorab Andre.

 

HON CLIFFORD ANDRE

Mersi Mr Speaker.  Mr Speaker pandan ki mon ti fer mon letid, sa Konvansyon ti enn ki mon ti tous lo la.

I sagrinan pour vwar ki sa Konvansyon in an egzistans bokou letan.  E vre letan mon mwan ti pe fer mon letid, ti annan sa 2 Annex ki ti an egzistans e lezot Annex ki vini  fir a mezir ki keksoz i devlope,  i ganny pran an konsiderasyon e amande pour ki bann pei i domesticate parey Onorab Leader Zafer Gouvernman in dir.

I sagrinan.  Akoz letan nou get Annex 1 ki depi 2001 in ganny met anfors, in vin an fors e nou koman en pei, nou pa ankor kapab domesticate li.  Akoz ki nou pour an retar lo bann keksoz ki annan lenportans?  Sesel i en pti Leta Zil, e keksoz i vin kot nou atraver lanmer.  Bokou nou bann prodwir ki nou servi i vin atraver lanmer akoz i pli bon marse.  E alors ki fer ki nou oblize – si oule – pour nou comply avek bann Konvansyon Enternasyonal dan lesans pour nou fer sir ki nou, nou azour avek, bomaten nou’n ganny sa leksplikasyon lo ISPC Code kot prezan ki nou pe sey fer serten keksoz.  

So i montre ki nou par ler pa proactive dan bann domenn ki afekte nou e ki mon konnen ki Kaptenn Valmont pour dakor ek mon ki nou bezwen pli proactive.  E sa i bann rekomandasyon ki mon letan mon ti retournen mon ti met devan, me selman nanryen pa’n ganny fer.

Mon kontan ozordi mon form par sa Lasanble ki pe, ki pour lev mon lanmen pour fer ratifikasyon sa bann Annex.

Mr Speaker i vreman sagrinan ankor – parey mon dir ki, i annan bokou ankor lezot Konvansyon konsernan domenn lamarin, maritim Sesel ki pa ankor ganny anmenn devan Lasanble pour fer ratifikasyon.  Menm si Sesel in sinyen, me i ankor annan sa prosesis e mon pa konpran akoz ki sa i pran tou sa kantite letan pour li ariv kot Lasanble.

En lot pwen osi ki mon ti a kontan fer sorti Mr Speaker.  I ki bokou Konvansyon i met serten lobligasyon pour raporte, pour report.  E nou koman en pti pei nou devret pli aktiv – pli serye lo nou lobligasyon pour nou fer nou bann rapor pour ki sa bann Lorganizasyon Enternasyonal i ava vwar ki poudir nou osi nou alaoter.

Akoz Sesel ozordi letan mon mwan ti al etidye mon Masters Mr Speaker, mon ti dezyenm.  Ozordi mon sir ki i annan apepre en 7 a 8 dimoun ki’n spesyalize dan sa domenn.  Nou menm annan Ziz ki’n spesyalize dan sa domenn.  So si okenn keksoz i vin dan nou Lakour, nou annan bann dimoun ki kapab enterpret sa bann sityasyon pour fer sir ki nou, nou gard nou standar alaoter.

Mr Speaker nou annan nou 4 Annex ki devan nou ki pa ankor ratifye e pa ankor ganny domesticated.  Annefe  tou pa ankor ganny domesticated, bann ki’n sinyen e sa i montre – it speaks volumes. 

        Nou bezwen servi nou zenes ki mon konnen i annan ki’n al etidye, nou bezwen servi zot pour fer sir ki nou met nou bann Lalwa Maritim azour e fer sir ki nou koman en pep nou annan sa pride pour nou kapab get IMO dan en meeting pour nou kapab dir zot wi, Sesel nou’n ratifye, nou’n domesticate nou Lalwa.

Parkont i annan bann Lalwa ki i IMO i donn ou bann Model Laws.  Parey bokou nou’n tann dir dan lepase lo bann Model Laws.   E i pa pour pran nou bokou letan pour nou kapab met sa an aplikasyon.

So nou kapab servi adapte li dan nou konteks lokal e fer sir ki Sesel i sorti venker e Champion dan sa domenn.

Mr Speaker Onorab Leader Zafer Gouvernman in koz lo bann Tit ki sak sa bann Annex i annan, e sakenn i annan son rol spesifik ki i bezwen fer.

Me en keksoz ki enportan ki mon pour demann SMSA osi ek Port Authority ki’n vini, PS i la.  I enportan pour nou annan bann fasilite.  Nou koz garbage, me nou napa incinerator lo Por.  By the time i sorti lo Por, zour i ariv kot pour li fer sa, pour li ganny brile, sa pest, sa zensek, sa maladi avek in fini ganny transmet e in fini ariv dan nou pei.  So i enportan ki nou annan bann fasilite lo bann pozisyon ki pour minimiz sa bann enteripsyon dan nou pei.

Letan nou pe get Annex 4 Mr Speaker.  I dir ou sewage.  Nou bezwen osi annan bann fasilite adekwa ki pour asiste bann bato pour zot kapab fer sir ki letan zot pe met sa fasilite kot nou, nou, nou pe kapab fer sa ki fodre fer avek pour ki nou pa vwar nou avek bann difikilte par lefe ki nou’n siny en Konvansyon apre nou vwar nou ek serten difikilte ki pa, it’s not desirable dan nou pei.

Osi letan nou pe get air pollution ki Annex 6.  Si i annan en defo lo en bato avek son sistenm kot i pe emit bann ler ki toksik oubyen bann ler ki depas sa ki rekomande.  Ki nou fer?

Nou bezwen kapab annan bann fasilite ki pour asiste li pour repar sa lekipman e ki pour fer ki i kapab ale, e nou kapab dir ki poudir wi sa reparasyon in ganny fer kot nou akoz letan i ti antre si i ti, i pa ti an konformite avek sa 6, Annex 6 me nou nou’n donn li sa posibilite pour li fer sa rektifikasyon lo son bann lekipman e ki i fer letan i pe sorti i an konformite avek sa.

Akoz letan i pe sorti dan sa Por i pour al dan en lot Por, e i pour annan en Sertifika ki sorti kot nou, alors sa i kapab koz ankor serten defayans, serten difikilte lo nou menm.

Avek sa detrwa mon Mr Speaker.  Mon ti a kontan reasir Onorab De Commarmond ki mon koman en Profesyonnel dan sa domenn, mon pour donn tou mon sipor.  Akoz mon krwar ki nou bezwen fer sir ki nou, nou azour dan nou domenn kot nou spesyalize.  Nou en maritime Nation e nou bezwen azour dan sa domenn.  Mersi.

 

MR SPEAKER

Mersi Onorab Andre.   Bon eski i annan en bezwen ki nou still, lefe ki zot in ariv la, bann zofisye si petet nou donn zot en pti sans pour dir de pti mo.  Zis pour en pti pe plis leklersisman?  Mon konnen zot in fer, zot in fer serten preparasyon pour zot vin dan Lasanble.

 

HON WAVEL RAMKALAWAN

Yes Mr Speaker.

 

MR SPEAKER

Oubyen PS ek Kaptenn Valmont i dir en de pti mo.

 

HON WAVEL RAMKALAWAN

Mr Speaker mersi bokou.  Mr Speaker pour nou tou ki’n pran letan pour regard sa MARPOL ek son bann Annexes i ase straight forward.  I ase straight forward parski sak Annex i deal avek en keksoz spesifik.

Mon pa, avek tou respe pour bann zofisye, mon konpran.  Me selman mon krwar ki i en Konvansyon, mon pa konnen konbyen lezot dimoun ki pour koze.   Me mon krwar i annan zis bann pwen spesifik ki petet serten Manm i ava kontan fer.  Parski Onorab De Commarmond in pas lo, basically in detay sa ki, sak Annex i fer.  E zot Tit li menm li i montre ki zot pe kontrole.

Mon krwar the issue, the issue is domestication.  Nou koz lo Konvansyon, ratifye Konvansyon isi, ratifye Konvansyon laba.  E letan nou’n fini ratifye, nou bezwen domesticate sa bann Konvansyon.  E se la kot nou fail. 

E petet, mon mwan ti ava kontan.  Mon kontan ki Onorab Andre in mansyonn Model Laws, yes tou sa bann Lorganizasyon zot donn nou sa bann Model Laws, SADC/PF i fer Model Laws, Pan African Parliament i fer Model Laws, tou bann soz.

Me aprezan se kwa ki’n nou pei i fer ek sa bann Model Laws pour nou kapab domesticate zot.  Parski si nou pa domesticate zot pour nou met bann lofans.  This is one area kot soz.  Parski si ou.

 

Ok letan nou fini ratifye sa, aprezan i annan Lalwa pe ganny kase.  Letan Lalwa pe ganny kase, i bezwen dan ou Lalwa Lokal i mete offences, si ou ganny atrape pe zet delwil, ou ganny atrape pe zet raw sewage, this is offence, you’ve committed an offence, e sa offence ki ou’n commit, what is the sentence?  Pour kapab anmenn Ankour.

Be la ou fini ratifye sa.  Apre sa bato i pase la, be ou pour anmenn li Ankour akoz ou’n ratifye en Konvansyon?  Ou pa kapab.  So it’s to do with the domestication of the Conventions ki nou ratifye e mon krwar ki poudir this is the main point la.

E mwan Mr Speaker personnelman mon mwan krwar ki nou’n regarde e tou bann soz.  Parski sa bann zafer la zot la depi parey in ganny dir, mon pa oule repete.  Me 1992, 1973 nou pa ti ankor ni menm vin en pei endepandan.  2003, 1988, 2005 ensidswit.

So, i annan en kantite lannen depi ki zot pe, sa bann Annexes i la.  E petet mon ava dir nou’n osi ti’n devret, nou ti’n devret al en pe pli vit pour bouz ek sa bann zafer e ki,  mwan ti ava pli kontan si la 2019 nou ti’n fini ganny en Lalwa, petet nou ti pe anmenn en dezyenm lamannman, en trwazyenm lamannman lo sa Lalwa li menm li ki pe soz.  Be tandis ki sa dernyen, dan sa batch la ki devan nou, dernyen ti ganny, son accession ti ganny fer an 2000, Annex 6 an 2005.  E ozordi nou 2019 – 14an pli tar.

14an pli tar nou ti’n devret annan en Lalwa ki pe deal avek air pollution from ships.  E ’98 nou ti’n devret pe fini pe deal ek garbage from ships.  E garbage nou’n fek pe regard bann netwayaz lo bann zil e tousala.  I posib i annan en ta sa bann zafer sorti dan bato.  Me selman pour le moman la napa.  Napa gran keksoz.

Alors Mr Speaker mwan mon ti ava dir si mon ti pour, pour nou pa.  mon krwar sa ki sa 2 Manm in dir i ase kler.  Bann Conventions i la pour nou regarde.  Mon mwan ti ava dir annou bouze pour nou pran en vot pour nou ratifye sa bann diferan Annex e nou kit sa dan lanmen bann Lotorite konsernen.  E nou dir avek zot, nou donn zot randevou avan desanm 2019 pour vin ek bann Lalwa pour nou kapab annan en deba pli enteresan, pli eksitan, e nou fer sa travay.  Mersi bokou Mr Speaker.

 

MR SPEAKER

Mersi Onorab Ramkalawan.  Mon a donn la parol, mon krwar, ou pour bref?  Ou’n sinyal mon ou pour bref, Onorab Pillay.  Avan mon ava retourn kot Loter Mosyon.

 

HON SEBASTIEN PILLAY

Mersi Mr Speaker. Bonn apre midi.  Bonn apre midi tou dimoun.  Mr Speaker wi mon pour tre bref.

Swiv, parey ler mon swiv largiman ki entervenan avan mwan in dir, in koze.  Mon krwar i kler ki i pour enportan ki nou ganny serten presizyon avek bann zofisye ki la lo ki mannyer zot pour, zisteman anmenn sa domestication sa Lalwa.

Akoz dan labsans, dan labsans ganny zot metodolozi travay, prosedir ki zot pe pran.  Piblik an deor pa konnen kwa ki pour ganny fer la ki nou pe ratifye en Konvansyon.

Mon dir sa akoz Mr Speaker?  Se akoz i kapab i pa, i sa size paret pa en size pour bokou dimoun ki pe ekout nou Mr Speaker.  Mon, I stand to be corrected, i pa paret en size ki sitan eksitan, me selman i en size ki enportan.  Akoz ler nou regard lenpak, lenpak ki sa i kapab annan par lefe ki nou, nou en pei ki annan en listwar maritim tre, tre long.  Nou en pei ki nou depan en kantite lo bann aktivite ki pas lo nou lanmer, e lenpak ki bann aktivite Ekonomik ouswa Endistriyel lo en nivo, lo en gran lesel i kapab annan lo nou lanmer.  I enportan pour nou konsidere.

Zis pour donn ou en legzanp Mr Speaker.  En bato ki annan sa groser tonaz i kapab pe antre dan delo Teritoryal Sesel, personn pa vwar li, avan i ariv dan sa ki nou apel ziridiksyon Port Authority.  Sa bato i deside pour li larg tou son bann salte dan lanmer, i koule, personn pa pour vwar.

Akoz nou kapasite par egzanp pour nou police sa gran Zone sosyoekonomik pa la.  Ok sa salte i desann dan lanmer.  Si ladan i annan serten keksoz ki kapab afekte lavi maren la anba, i afekte sa lavi maren then se peser ki perdi zot livelihood.  I al lapes lo sa koray, napa pwason akoz probableman dan sa landrwa in annan en polisyon ki’n arive, nou pa konnen.

So i en, mon krwar i annan en eleman neseser ki nou kapab petet reasir, donn serten réassurance nou pep ki i annan en travay kontinyel ki ganny fer toultan pour asire ki sa pa arive.  E fodre pa bliye poudir Lasanble nou menm nou, nou menm 6enm Lasanble nou’n pas bann SI ki’n fer ki nou’n agrandi ziridiksyon Por Victoria.

E avek lagrandisman ziridiksyon Por Victoria, i fer ki i annan en bato pe antre dan rezyon.  As soon ki i antre dan sa Zone, i tonm dan Por Victoria, okenn aktivite ki i fer, i sipoze ganny regle par Lotorite Por.

So mon krwar si mwan swiv byen bann largiman ki’n ganny avanse avan, i annan en eleman enportan pour nou konnen ki bann travay neseser ki zot pe fer pour zot anmenn bann provizyon legal ki siport sa Lalwa.

Akoz si nou pa kler lo la, nou pou pe fer en ratifikasyon e piblik pa pour pe ganny lenformasyon ki neseser.  Malgre ki piblik pa pour santi parey mon’n dir ki sa size eksitan, me i en size ki enportan.  Akoz dan lonterm i annan en lenpak Ekonomik si nou pa fer bann keksoz ki devret ganny fer anba sa.  Se sa lesansyel kot nou annan.

Wi nou annan par egzanp Lalwa Proteksyon Lanvironnman ki nou kapab servi.   Me la nou pe al dan en domenn kot sa bann Regilasyon i en Regilasyon ki tou, tou bann pei maren, tou bann dimoun ki fer aktivite maritim lo sa lesel, lo sa groser, i sipoze kapab swiv.

So i enportan pour nou konnen kwa ki SMSA pe vin fer.  Akoz se sa enn bann eleman ki nou ti met devan SMSA ler nou ti aprouv son Bidze.  Se pour nou vwar tangiblement kwa ki pe ganny fer par SMSA.  E zot in dir nou poudir i annan nouvo Lalwa pe vini.

So eski zot in enkorpor dan sa nouvo Lalwa bann eleman ki neseser ek sa Lalwa?  E se pour sa rezon ki mon mwan santi, mon santi poudir ti ava enportan ozordi osi pour pro-for education purposes pour ki nou bann Manm nou ganny en pti leksplikasyon lo la, ki demen ler nou pour regard menm bidze SMSA, nou konpran akoz bann provizyon finansyel par egzanp i al ver en Konsiltan pour travay lo bann Regilasyon lo bann eleman ki neseser.

Se pour sa rezon ki mon pour enplor ek Lasanble pour nou al dan sa Committee Stage.  In an lapros ki nou’n pran, e si nou santi nou pa neseser fer sa Committee Stage long, nou pa ava fer li long.  Me at least sa bann eksper i ava ganny sans dir nou, ki bann eleman ki zot, zot in konsidere vizavi sa Protokol ki nou pe ratifye.  Mersi Mr Speaker.

 

MR SPEAKER

Mersi Onorab Pillay.  Bon mon’n osi sinyal PS avek Kaptenn, zot dir mon vreman pa neseser.  E lapros ki Onorab Ramkalawan in pran, se ki ler domestication i ganny fer, i annan bann Lalwa ki pour vini e sela kot bann teknisyen i a kapab debat.  E nou ava konn en pti pe plis ki bann Lareg ki pour ganny enplimante e ki bann lofans, bann penalties and so on. 

Si zot dakor koumsa, mon krwar i pour annan en dele letan e mon konnen PS i nouvo.  Me i zenn, i sa batch zenes ki Onorab Andre in koz lo la, e obor li i annan 2 zenn mademoiselle osi avek gidans Kaptenn Valmont ki i annan tou leksperyans.  Mon krwar zot a kapab meet deadline before the end of the year, oubyen early next year nou ava vwar bann Lalwa koman sa liv dan Lasanble.  Ok.  Yes mon a donn en pti moman parol Onorab De Commarmond.

 

 

HON CHARLES DE COMMARMOND

Non, mon ti pe zis dir petet mon’n antann tou lede kote ki pe dir e selman petet ti a bon pa pour fer en dyalog as such.  Vi ki zot la…Zis pour dir nou lo sa kestyon domestication, ki zot pe anticipate?  Se tou pa, annou pa fer okenn deba, me zis sa.

 

MR SPEAKER

Bon annou, wi annou pa gat plis letan.

 

HON CHARLES DE COMMARMOND

En sizesyon – 2 minit.

 

MR SPEAKER

Mon mwan kapab, mon kapab servi mon diskresyon Standing Orders.  Yes, Onorab.

 

HON WAVEL RAMKALAWAN

Mr Speaker, mwan dan mwan responsabilite lo SADC/PF, mon annan responsabilite pour pa pour ansarz en Model Law.  Mon’n fer li ou konnen avek travay ek bann eksper ensidswit.  We know the processI mean, e mon pour sa rezon ki konmsi mon pa pe trouv li neseser pour la.

Anmenn Lalwa e se pour sa rezon i annan diferan staz.  Nou koman en Lasanble letan nou pe diskit lo en ratifikasyon, nou ratifye apre sa zot bezwen domestike.  Letan zot domestike, la aprezan vot vin la prezant sa Lalwa, teknisyen i koze, letan nou antre dan Committee Stage, se pour sa rezon ki dan nou Standing Orders i annan letan en Bill i vini pour antre dan Committee Stage tousala.

Se la.  Be annou pa melanz keksoz.  Annou al lo the Motion is for ratification, yes nou ratify, vin avek Lalwa, pandan Lalwa i vini nou rantre dan Committee Stage, tou bann eksper i ganny sa sans pour zot koze, enterakte avek nou, e Lalwa i pase.

 

MR SPEAKER

Ok.

 

HON WAVEL RAMKALAWAN

Mon krwar ki se la.  Parski Mr Speaker mon mwan ava dir ou.  Si bann eksper i vin la, ou konnen ki pour arive?  Nou tou nou pour annan, nou tou nou pour annan kestyon.  E mwan par egzanp deswit mon pour komans demande be, 4enm, 5enm Annex i dir garbage from bato.  Eski ou kapab dir avek nou kote zot incinerator i ete?  E zis koman mon pou al ladan nou pou komans tann, ou konnen sa ti ganny donnen, nou pe soz, nou pe get ladan, nou pe.  Do we want this?   No!  We do not want this.

Annou ratifye, les sa bann dimoun al fer zot travay apre fer, anmenn ek zot Lalwa e la nou ava enterakte.   Parski sansan i pou on and on, i annan 33 Manm la dan Lasanble, sak Manm pour demann en kestyon.   Taler ou menm ou Mr Speaker letan i pour ariv 5er ou pou dir mon ankor annan 19 Manm lo mon lalis, mon pa konnen ki nou pour fer.  Mersi.

 

MR SPEAKER

Bon ok.  Nou’n, zis mon ava pran en desizyon.  Mon krwar rezon ki nou’n anmenn bann teknisyen e nou fer li.  Akoz nou ti panse poudir an ka i annan, ki napa en konsansis ki Manm Lasanble pe rod plis leksplikasyon lo sa bann Annexes.  Nou ti pou al dan Staz Komite pou nou interacte avek zot.

An vi ki i annan en konsansis e ki nou pa anvi al dan bann detay dan bann kestyon with regards to sa 4 Annex, ok nou rekonnet prezans bann zofisye e mon pour mansyonn zot non en pti moman e zot in vini an ka ki nou ti pour bezwen zot, alright.       Me si nou pa ti pour bezwen zot, e mon’n vwar, mon’n fer en pti exchange avek PS avek Kaptenn Valmont.  In dir poudir, be si i annan en konsansis, sa ki mon pe konpran zot ok avek sa.   Me ler Lalwa i ava vini, i ava kapab annan enteraksyon.  Wi mon ava donn laparol en pti moman Onorab Ernesta.

 

HON PAUL ERNESTA

Mersi Mr Speaker.  Mr Speaker mon’n vwar ki direksyon ou pe ale dan ou pti lentervansyon.  E an menm tan koman en Manm ki mon mwan pa azour avek sa Lalwa, e mon ti a kontan ganny plis leklersisman lo sa, lo la ki pour kapab permet mon pran en desizyon letan pour vote.  Akoz mon pa kapab zis vot lo en keksoz ki mon pa konnen.

E mon pour demann nou tou respe pour kapab akord mwan sa loportinite pour kapab bouz lo Staz Komite pour at least nou kapab ganny leklersisman e vote koman en Manm.  Mersi.

 

 

MR SPEAKER

Ok.  Bon nou pa pour perdi plis letan ankor.  Mon ava demann bann zofisye pour vin devan.  Mon ava demann Sergeant pour move Mace.  E mon ava donn la parol petet PS avek Kaptenn Valmont si pour SMSA, i ava donn en pti leksplikasyon kantmenm 5 minit e apre nou ava pran en vot.  

Ok mon ava demann zot vin devan e bann zofisye ki prezan ki’n vin devan nou pour klarifye sa ratifikasyon ki devan nou.  I annan PS pour Por, Marin e Lavyasyon Sivil Mr Alain Renaud.  I annan, sorry mon’n dir CEO.  Direkter Zeneral pour SMSA Kaptenn Joachim Valmont.  Mon annan Direkter pour Polisi, Policy and Strategy in the Department of Civil Aviation Ports and Marine Miss Valentina Barra, e Senior Legal Officer the SMSA, Mrs Aaishah Molle.  Bonzour, welcome.  Nou dan Staz Komite, mon ava petet komans avek PS Renaud pour donn en pti bref lo sa ki devan nou e desizyon ki Lasanble pe al pran.  PS Renaud.

 

PS ALAIN RENAUD

Mersi Mr Speaker.  E mersi tou zot bann Manm Onorab.  Wi Seychelles Party to IMO ‘International Maritime Organization.  E dan sa IMO i annan 4 category pour Convention.

I annan en bout pour Maritime Safety and Security.  En lot bout Prevention of Marine Pollution.  E osi Liability and Compensation.  

Me osi there is Key Conventions and anba sa Key Convention there is SOLAS.   Safety of Life at Sea from 1974.  STCW which is the Standards of Training Certification and Watchkeeping for seafarers. 

        And one of the most important is, MARPOL.  The ‘International Convention for the Prevention of Pollution from ships. 

        Parey tou dimoun in fini dir, Seychelles as a party.  We have to ratify theseAnd yes it’s true we have to domesticate.

IMO publishes guidelines for domestication.  There are Model Laws.  Absolutely we heard very well what all the Members said and we will follow those guidelines and we will consult with all the people who will be affected.  And we will meet the deadline.  We will be here before the of 2019 with Model Laws and how we intend to domesticate. 

For every Country you have to do it uniquely.  Because you have a unique Ports, you have unique island, you have unique constraints.  And so there is a bit of work to do.  For me it’s a bit early to tell you exactly how we gonna do everything. 

But one thing i can assure you exactly as we are putting order now with all those Annexes which as we say have been decades past.  We will take the same level of rigour and systematic approach to make sure that the Laws, the Regulations and the Standards that we apply are exactly as IMO expects and as is appropriate for Seychelles. 

        And this we give our Bond in our word to the people of Seychelles and to the Assembly.  This is our mission and we will not fail in that. 

 

MR SPEAKER

Mersi PS Renaud.  Kaptenn Valmont ou oule azout keksoz avan nou.  Yes go ahead.

 

CAPTAIN JOACHIM VALMONT

Mersi bokou Mr Speaker.  Bonn apre midi tou Manm Onorab.  Kekfwa zis pour azoute parey Onorab Andre in dir.  SMSA son lafors i ptipti.  E nou byensir depan en pti pe lo Konsiltan, sirtou kot i konsern Lalwa parey nou pe koze Konvansyon, ensidswit.  E i annan en sizesyon ki mon krwar in sorti.  Si nou ti kapab parey ou menm Onorab ou’n refer, si nou ti kapab ganny sipor tou sa bann Lawyer ki’n kalifye dan sa field pour asiste SMSA.          Akoz menm nou ptipti, pei i ptipti, me solman parey ou konnen Lalwa letan ou pe travay lo la, i demann en kantite konsantrasyon; i demann en kantite resers e SMSA son groser ki i ete an se moman, nou vwar li en pti pe difisil avek sa 2 dimoun, sa 2 Legal Officer ki SMSA i annan pour le moman.

So kekfwa mon ti ava profite pour lans en lapel pour nou kekfwa ganny sa sipor, sipor nou bann ansyen, ansyen Lawyer ki’n pas atraver sa field pour apporte soutyen pour SMSA kapab vin ankor devan sa Lasanble kekfwa lafen lannen.  Mersi bokou.

 

MR SPEAKER

Mersi Kaptenn Valmont.  Bon nou ti dir nou pour ganny en pti leksplikasyon, nou pa pour pran kestyon.  Ok nou pa’n dir nou pour pran kestyon.  Ou annan en kestyon, en pti kestyon?  Ok.  Onorab Ernesta osi ou annan.  Ok nou ava pran enn dan sak kote apre mon ava donn mover Mosyon Right of reply.  Onorab Adelaide.

 

HON FRANÇOIS ADELAIDE

Mersi Mr Speaker.  Mersi pour akord mon sa pti kestyon akoz i enn ki vreman enportan.

Vi ki nou pe ratifye sa Konvansyon la en, prezan mon sirtou dan Baie Lazare mon bann dimoun pe kontinyen demann mwan.  Eski ler nou ratifye sa, anba Annex 5 pollution by sewage avek pollution by garbage.

Nou deza annan en gro bato.  Eski i pour tonm ladan li sa gro bato ki dan labe Anse Poules Bleues, Anse La Mouche ki tou lazournen nou koz lo la?  Eski nou pour ganny en solisyon?  Akoz nou osi nou pa konnen kote i desarz son bann desarz, kote i desarz sa bann sewage. 

        E la mon pour demann sa kestyon, petet Kaptenn Valmont i kapab asir mwan poudir zabitan Baie Lazare enn fwa pour tou pour ganny en leklersisman e petet nou pa pour vwar sa bato akoz i pour bezwen bouze, sanz plas.  Mersi.

 

MR SPEAKER

Mersi Onorab Adelaide.  Kaptenn Valmont.  Mon krwar ou konnen sa bato ki i pe koz lo la.

 

CAPTAIN JOACHIM VALMONT

Mersi Onorab pour ou kestyon.  E sa bato an kestyon si mon pa tronpe i en bato Militer.  E akoz, akoz mon dir sa?  Se ki SMSA napa okenn ziridiksyon lo la.  E sa bato obviously mon ti poz kestyon avek Lotorite Por.  Akoz obviously si i la dan nou delo, i bezwen pe pey Port dues, i bezwen pe abide by nou Law of the Land.

So dapre sa ki mon konpran, yes zot pe obzerve.  Zot pe obzerve.  Sel konsern ki SMSA ti annan, se oparavan zot ti pe mouye.  Zot ti pe mouye savedir ki zot ti pe fer?  Kraz koray.  E nou, nou ti sizere ki zot met en kormor e zot anmar kormor avek bwe e anmar zot bato lo la.  E sa mon krwar ou kapab konfirmen poudir sa in ganny fer.

E sa ti responsabilite, ki ti tonm lo ledo SMSA pour fer sir poudir sa bato i met son kormor, i anmare, instead of drag lank kraz koray kot peser dan ou ziridiksyon ti pe konplent.  Mersi.

 

MR SPEAKER

Mersi.  Non, nou mon konnen Kaptenn Valmont in ouver en laport.  Me, non, non nou pour kit li fermen.   Sa i a kapab vin en lot kestyon ki ava, ki en Manm i ava leveOk.  Mon ava donn la parol.  A mwen Onorab Ernesta ou pe al dan sa menm direksyon.  Non.  Onorab Ernesta.

 

HON PAUL ERNESTA

Mersi Mr Speaker.  Zis vitman.  Mr Speaker demann Kaptenn pour li kapab sey eksplik nou.  Ki bann mezir zot pe pran, pour zot kapab met an plas bann Lalwa pour tackle bann lofans ki kapab arive anba sa tel protokol ki nou pe koze?

 

MR SPEAKER

Ok.  Bon les.  Kaptenn Valmont, go ahead.

 

CAPTAIN JOACHIM VALMONT

Mersi bokou Onorab pour ou kestyon.  Byensir parey in refer sorti dan sa Lasanble la apre midi.  E letan nou fer nou bann prosedir domestication, obviously i pour annan Regilasyon e Regilasyon i pour annan tou son bann finds, son bann everything ki vin avek.

Obviously parey in refer sorti.  Letan nou vini, hopefully avan lannen nou pour met nou pare pour nou kapab prezant tousala devan zot.  Mersi bokou.

 

MR SPEAKER

Mersi Kaptenn Valmont.  Bon mon ava demann.

 

(Interruption)

 

MR SPEAKER

Ou pa pour long?  Wi in segonn Mosyon nou a donn li en sans koze, pa ankor koze depi bomaten.  Onorab Simon Gill.

 

HON SIMON GILL

Mr Speaker tre senp.

 

MR SPEAKER

Wi.

 

HON SIMON GILL

Mon pa pe al fer en speech mwan.  Zis mon oule demann Mr Valmont, Kaptenn si apre sa sesyon la, zot ale diskite, anvoy en lapel lo televizyon, radyo, met dan Nasyon, pour kapab ganny bann profesyonnel pour vin ansanm fer en pe travay pro bono.

Nou annan Onorab Clifford Andre ki’n volonter pour ede e nou ava ganny larestan bann dimoun osi, zot ava partisipe pour ki avan lafen lannen nou kapab ganny tou sa bann Regilasyon, bann lezot keksoz vin devan Lasanble, pour nou kapab bouze e ranforsi tou sa ki annan pour nou ranforsi.  E nou ava kapab adres konsern Onorab nou frer laba anler Baie Lazare.  Mersi bokou Mr Speaker.   Se sa mon’n tre bref.  Mersi bokou.

 

(Interruption)

 

MR SPEAKER

Mersi.  Mon krwar ou’n fer en statement.  Mon pa krwar i bezwen, ou merit en repons sa.  I en statement ki ou’n fer.  Ok, in vin, wi, wi ale.  Mon ava donn la parol Kaptenn Valmont.  Kaptenn Valmont.  Si oule reakte lo sa statement.

 

CAPTAIN JOACHIM VALMONT

Mersi bokou Mr Speaker.  Mon krwar parey in fer resorti dan Lasanble la.  Atraver sipor Minister, nou pour fer egzakteman sa ki nou’n ganny demande pour fer.  Se apros kekfwa se pa par radyo, me ekrir sa bann dimoun, sa bann profesyonnel ekrir zot Ofisyelman pour zot kapab kekfwa create en Komite pour kapab asiste SMSA.  Mersi bokou.

 

MR SPEAKER

Mersi Kaptenn Valmont.  Bon mon a demann Sergeant pour retourn Mace Committee of the whole House.  Mon ava donn mover Mosyon Right of Reply avan nou pran vot.

Petet mon pour sinyal zot osi tou, nou pour pran en vot separe lo sak Annex.  Nou pa pour met tou ansanm, nou ava pran enn lo sak.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker mon kontan latmosfer dan Lasanble la pour sa Mosyon.  Latmosfer i ‘’so cool’’ Mr Speaker.

 

(laughter)

 

 

HON CHARLES DE COMMARMOND

E, e se sa, se sa the beauty nou Lasanble.  E mon mwan krwar se sa kalite Lasanble kekfwa.

 

(Interruption)

 

HON CHARLES DE COMMARMOND

Vwala nou merit kontinyen avek en Lasanble so cool.  Mr Speaker mon remersye tou bann entervenan lo sa Mosyon.  En Mosyon enportan nou’n annan en latmosfer parey mon dir ‘’so cool’’, nou’n sourir, nou’n pran li lightly.  Me set en Mosyon vreman, vreman enportan.  Mon panse mwan ki sa bann pwen, kantite pwen, malgre tou en kantite pwen in sorti enportan.  E sa bann pwen i byen ki bann dimoun konsernen, savedir bann teknisyen ek Lotorite in la avek nou.  E zot in tande, e mon swete ki alor sa bann pwen enportan ki zot in tande i ganny taken notes seriously dan domestication of sa konteni sa Konvansyon.

E ou vwar an menm tan i annan serten pratik ki nou pe fer isi Sesel or ki bann bato of sak lete tonaz ki nou pe dir, 500 gross ton an montan.  E ler ou pour domesticate konteni sa Konvansyon, i pour tous osi lezot bato mon asire ki pli pti e ki enkli serten bato ki an kestyon ki nou’n mansyonnen.  I kapab osi Militer.

Akoz ler pour zet zot bann garbage oubyen sewage e lezot polyan ki i annan lo bato, i bezwen annan en fason korek e rezonnab pour fer li.  Letan nou’n gete taler mon ti pe koze, nou pe dir i annan serten salte ki bezwen ganny zete 20 kilomet avek later.

E nou, nou konn tre byen nou Sesel lontan, e mon krwar konmela pe arive osi.  I dir ou bann garbage tire ek bann bato i ganny zete an deor Ste Anne ouswa an deor Grand Rocher dan bann zanmirant.  La mon pa konnen kote i zete ensidswit.  Be tou sa i bezwen, wi i vizavi Cascade, be tou sa i bann keksoz ki bezwen ganny pran an konsiderasyon.

E letan Onorab Adelaide pe dir zafer Baie Lazare, be i en konsern.  No matter ki sa bato si i la, napa problenm i la.  Me selman sa bann keksoz i bezwen anba kontrol.

E nou demande osi san ki nou al fer bay ensidswit.  Mon krwar i annan en fason apros Lotorite sa bato pou vwar ki mannyer pe dispose sa bann keksoz.  Sa bann keksoz koumsa i bezwen ganny fer.

Me an menm tan nou pe koz lo Model Laws.  I byen.  E nou konnen nou dan Lalwa  – Law of the Sea e tou sa bann keksoz ki pour annan pour fer avek maritim, se bann keksoz vreman technical. 

E ler nou pe koz lo Model Laws.  Wi IMO i kapab ed nou.  be IMO i kapab osi ed nou avek teknisyen.  Lo kote teknik osi, pour ki – nou’n lans lapel lokalman, korek.  Me osi i kapab ed ou ek dimoun pour ed ou pour domesticate pour bann Lalwa.  E mon krwar mwan ki i annan keksoz ki pozitiv dan sa ki nou’n diskite ozordi.

E ou vwar Mr Speaker, nou annan en gran Teritwar lanmer.  Nou EZ, i vreman gran nou, 1.4 almost ki milyon kilomet kare.

E alor i enportan ki nou kapab, e en kantite bato i servi nou Teritwar lanmer pour pase a diferan moman.  E sa i enportan ki nou annan kontrol lo kwa ki zot fer letan zot pase.  Sansan, e nou bezwen kapasite savedir pour nou kapab police sa konteni sa Konvansyon.

So avek tou sa Mr Speaker, mon krwar ki, kestyon fasilite e akseswar de sipor pour sa bann, pour lenplimantasyon sa bann Konvansyon i osi enportan.

Akoz nou pa pour kapab nou adopte en Konvansyon, nou’n ratifye li, nou domesticate li, apre nou pa kapab enplimant nanryen, nou pa kapab police nanryen ladan.  E letan bato in vini i annan problenm e prezan ou, ou napa ni incinerator, ou napa ni en mekaniz pour ou pran son garbage.  Si in dir ou sorry mon’n bite or whatever, ouswa masin in kase ki ou fer ou?  Ki mannyer ou ed li?  I a pey ou wi, me ou, ou napa lekipman pour ou kapab assist ou.

E an menm tan annou gete ki sa bann keksoz i kapab vin dan en loportinite, pour bann biznes lokal.  Bann dimoun lokalman i kapab vwar en lenvestisman ladan.  So les Seselwa devlope, epanouir atraver sa bann keksoz, deza i annan ki pe fer li.  Me i a kapab osi ler nou’n fully fledged sa keksoz, sa konteni sa Konvansyon lo nivo lokal, domestication of the content.  I ava osi bon pour lepep Seselwa.

Avek sa Mr Speaker mon a demann tou bann Manm Onorab pour siport e ratifikasyon sa bann, sa Konvansyon ek son bann Annexes.  Mersi bokou Mr Speaker.

 

MR SPEAKER

Mersi Onorab De Commarmond.  Parey mon’n dir Mosyon i pe demann pour ratifye 4 Annex e nou pour pran en vot lo sak Annex.  Nou ava pran en vot lo MARPOL Annex III, sa ki demande Accession to the Regulations for the Prevention of Pollution by Harmful Substances carried by Sea in Packaged Form.  Tou Manm ki an faver?  Okenn Manm ki kont?  Madanm Clerk ou a donn nou pour sa enn.

 

MADAM CLERK

Mr Speaker 26 Manm.  Mon’n rikord 26 Manm ki’n vot an faver e personn kont.  Mersi.

 

MR SPEAKER

Mersi Madanm Clerk.  Nou ava pran vot lo 2enm ki MARPOL Annex IV Accession to the Regulations for the Prevention of Pollution by Sewage from Ships.  Tou Manm ki an faver? Okenn Manm ki kont?  Madanm Clerk.

 

MADAM CLERK

Mersi Mr Speaker.  Ankor enn fwa 26 Manm in vot an faver, e personn kont.  Mersi.

 

MR SPEAKER

Mersi Madanm Clerk.  Nou ava pran vot lo MARPOL Annex V, Accession to the Regulations for the Prevention of Pollution by Garbage from Ships.  Tou Manm ki an faver? Okenn Manm ki kont?  Madanm Clerk.

 

MR SPEAKER

Mersi Mr Speaker.  26 Manm in vot an faver e personn kont.  Mersi.

 

MR SPEAKER

Mersi Madanm Clerk.  Nou ava pran dernyen.  MARPOL Annex VI.  Accession to the Regulations for the Prevention of Air Pollution from Ships.  Tou Manm ki an faver? Okenn Manm ki kont?  Onorab Ferrari ou kont?  Non, ok.  Madanm Clerk.

 

 

MADAM CLERK

Mersi Mr Speaker.  Ankor enn fwa 26 Manm in vot an faver e personn kont.  Mersi.

 

MR SPEAKER

Bon mersi.  Savedir Mosyon pour ratifye sa 4 Annex, MARPOL Annex in ganny pase par Lasanble Nasyonal.

Bon avek sa mon ti a kontan remersi PS Alain Renaud, Kaptenn Joachim Valmont, Ms Valentina Barra e Madanm Aisha Molle.  Mersi e nou ava eskiz zot parmi nou dan Lasanble.

 

(CAPTAIN VALMONT AND HIS DELEGATION WAS EXCUSED FROM THE HOUSE)

 

MR SPEAKER

Bon nou pour aret nou travay la ozordi.  E demen bomaten nou ava kontinyen avek Order Paper.  E parey mon’n dir demain matin nou pour komans avek sa 2 kestyon pour Minis Finans e apre nou ava kontinyen avek larestan travay lo Order Paper.  So Lasanble i adjourn e nou repran nou travay demen 9er bomaten.

 

ADJOURNMENT