::
Home » Verbatim » 2019 » Verbatim Wednesday 13th March, 2019

Verbatim Wednesday 13th March, 2019

 NATIONAL ASSEMBLY OF SEYCHELLES

Wednesday 13th March, 2019

The Assembly met at 9am

National Anthem

Moment of Reflection

Mr Speaker in the Chair

 

MR SPEAKER

Bonzour tou Manm Onorab e bonzour tou dimoun ki a lekout e pe swiv travay Lasanble Nasyonal. Avan nou repran nou travay kot nou’n kite yer mon anvi zis fer, en pti kominike lo en sityasyon ki’n leve, ki’n devan mwan bomaten. Mon anvi ankor adres sa sityasyon medya sosyal, mon krwar ler en dimoun ordiner i fer bann kritik e menm ensilte sa lenstitisyon oubyen en Manm nou kapab konpran.

Me bokou fwa i osi sa bann keksoz koumsa i ganny fer anba bann fake profile e pour mwan enn bann advise ki mon’n donn bann Manm e ki mon osi mon pran, se ki nou pa entertain bann fake profile. E finalman nou konnen pou dir son bann komanter i zis mor koumsanmenm. Me  ler bann ki dan Lafors Lapolis e ki’n deza travay avek sa lenstitisyon avek Lasanble Nasyonal, e ki sipoze montre respe pou en tel lenstitisyon ek son bann Manm i menm servi bann fek non pour atake e denigre Lasanble e Manm Lasanble, pour mwan sa i deplorab e i pa akseptab.

Mon pran legzanp – mon fer referans avek Konmisyoner Lapolis e mazorite manm Lafors Lapolis ki montre lapopilasyon vre respe e ki montre pou dir dan sa lafors i annan bann bon eleman, ki anvi sanz sa persepsyon lo Lafors Lapolis, me parey mon dir i respte touzour detrwa ki pe esey fer tou pou detri sa ki bon, sa i malere pou dir.

Dan Lasanble nou’n pran en latitid se ki otan posib nou name and shame. Avek en bi ki nou kapab servi sa konman en legzanp e lezot i kapab servi sa konman en legzanp e ki nou fer sir ki nou korize e nou kapab move on.  Sa ensidan bomaten in ganny raporte avek Komisyoner Lapolis e nou swete ki aksyon apropriye i ganny pran avek sa zofisye, ki ava osi servi parey mon’n dir koman en legzanp.

Vwala kominike ki mon ti anvi fer bomaten.  Mon pa pou devwal non sa zofisye, me i en zofisye ki’n deza travay osi avek Lasanble Nasyonal. Ki i malere.  Akoz ki i deza konnen ki valer sa lenstitisyon e ki respe li konman en Zonm Dan Liniform i devret montre.

Vwala alor mon kominikasyon bomaten.  Bon mon’n osi ganny averti par Leader Lopozisyon ki i pou raise en matter of privilege bomaten. Mon ava donn li laparol pour li ekout son matter of privilege, Onorab Ramkalawan.

 

HON WAVEL RAMKALAWAN

Mersi bokou Mr Speaker.  Bonzour Mr Speaker.  Bonzour tou Manm Onorab e tou dimoun ki pe ekout nou dan lakour.  Mr Speaker mon matter of privilege i konsern nou Lasanble li menm, nou konpozisyon nou Lasanble.  Mr Speaker an 2016 nou ti al dan eleksyon e nou pride nou lekor konman en Nasyon ki fer sa legzersis demokratik regilyerman e lepep i ganny sa posibilite pour eksprim li. Letan lepep ti eksprim li an 2016, i ti, apard bann seat direk kot bann Manm ti ganny elekte dan en distrik – dan en constituency – ti osi annan 4 Manm lo sak kote latab ki ti ganny elekte lo baz proporsyonnel.

E baze lo konpozisyon nou lakaz, menm nou bann Komite aprezan i baze lo la. kot en Komite 7 i annan 3 lo en kote 4 lo lot kote.  Me malerezman Mr Speaker nou’n war ki depi ki nou’n konmans zwenn pour sa premye term ki i annan konfizyon. I annan kon fizyon an relasyon avek Onorab Basil Hoareau. Nou’n war ki son non en serten moman ti’n ganny tire koman en Manm Proporsyonnel, lo lot kote latab, pou reprezant lot kote latab.

Apre sa letan mon ti raport sa, son non i re-ganny mete e, me selman Mr Speaker nou’n annan Leta Lanasyon e ozordi i fer 6enm Sitting pour sa term e nou war ki pou dir sa Manm i absan.  I osi asiz lo bann Komite, lo serten Komite e ankor enn fwa i absan. Mon pe war ki nou Lasanble i pa konplet.  E letan Lasanble pa konplet parski pou menm annan kestyon lo en Manm i absante e mon pe demande, eski in anvoy okenn apology kot ou? Pour bann letan ki in absante parey nou demande?

E mon krwar moman in arive pour sort out sa sityasyon parske Lasanble li menm li pa kapab ganny garde otaz, akoz i annan problenm ant mon pa konnen ant en manm avek son parti.

Alor Mr Speaker mwan mon pwen se, i bezwen annan en keksoz kler ki ganny prononse, ki arive pour ki Lasanble i ava retourn 15 Manm ki ganny elekte direkteman lo kote LDS. 10 Manm ki ganny elekte direkteman lo kote US – 4 Manm Proporsyonnel lo kote LDS e 4 Manm Proporsyonnel lo kote US.

Alor mon pe met sa devan Mr Speaker pour ki once and for all, sa sityasyon i ganny rezourd e nou House i ava complete. Akoz mwan mon santi ki konman en Manm mon santi ki pou dir the House itself i annan en dezord la.  Mersi bokou Mr Speaker.

 

MR SPEAKER

Mersi Onorab Ramkalawan.  Bon parey mon, ti’n dir oparavan ler sa size ti leve, mon’n ganny enformen par Party Leader US, ki Mr Vincent Meriton ki zot pe – zot in ganny en lentansyon par Onorab Basil Hoareau pour li step down. E zot pe sort out dan zot parti pour zot nomin en lot Manm pour ranplas li.

Swivan bann lezot levennman ki’n swiv, mon’n konpran – in anvoy mwan en let ki in dir ek mwan poudir byento i ava kapab ekrir mwan pou rezourd sa sityasyon.

Mon pa pou pran en ruling lo la, la toudswit me pandan Break mon kapab refer kontak ankor avek Party Leader pour US.  Amwen ki Onorab Simon Gill petet in annan lenformasyon ki mwan mon pa ankor gannyen, me si non dan Break mon kapab take it up avek Party Leader US. Yes Onorab Simon Gill.

 

HON SIMON GILL

Bonzour Mr Speaker.  Bonzour tou koleg Onorab, bonzour tou manm piblik. Mr Speaker mon’n pran note sa ki Onorab Ramkalawan in fe resorti  with respect.  Enternman nou napa okenn problenm dan nou parti avek Onorab Basil Hoareau. Basil Hoareau i reste en Manm United Seychelles. Basil Hoareau pe deserve lo enn bann lenstans ase enportan dan nou parti.

E son pozisyon i kler.   In fer nou tre kler akoz bann rezon akoz ki i pa kapab kontinyen fer travay konman en Manm Lasanble. Leadership Parti in apresye son soumisyon, e leadership parti in ekrir ou Lofis in dir ou ki nou pe pas atraver bann prosedir entern, donnen provizyon anba nou nouvo Konstitisyon, pour nou kapab met en ranplasan.  Nou konpran bann dele letan ki annan baze lo bann provizyon nou konstitisyon, byensir.

E mon ou le soumet avek ou ki semenn prosen nou pou nonm en ranplasan pour Onorab Basil Hoareau.  E met sa matter to rest.

E antretan nou dir avek Onorab Basil Hoareau kontinyen fokaliz lo son profesyon.  I pe kontribye en kantite dan sa pei.  Nou mank li akoz in kontribye en kantite, lo bann Komite ki in lo la lo nivo sa Lasanble. E mon konnen Onorab Bernard Georges in deza koz bokou lo nivo konpetans e bann kontribisyon tre valab ki Onorab Basil Hoareau in anmennen pour progresyon nou Lasanble Nasyonal.

E nou swet li, mon a profite pou swet Onorab Basil Hoareau tou de bon e sikse son bann travay, dan misyon ki i lo la. E mon swete ki lot kote i konpran nou e semenn prosen nou pou close sa matter.  Mersi bokou Mr Speaker.

 

MR SPEAKER

Mesi Onorab Simon Gill.  Yes Onorab Ramkalawan.

 

HON WAVEL RAMKALAWAN

Mr Speaker, zis pou azoute ki sete Parti SPPF, Parti Lepep Sa letan pe kalkile si zot ti’n fini sanz non, ki ti osi fer amannman dan Lalwa,  pou  ki letan en Manm pa vin Lasanble oubyen i walk out ki son lapey i ganny koupe. E ki mon krwar ki petet sa sityasyon la – sa morso Lalwa osi i bezwen ganny leve parski si en Manm i absante san okenn apology, oubyen leskiz, mon krwar sa – wi mon’n konpran sa ki Onorab Gill in dir. E anyway ou konman Speaker ki mon’n ou ruling alors, mersi bokou Mr Speaker.

 

MR SPEAKER

Mersi Onorab Ramkalawan.  Mersi Onorab Simon Gill. Bon nou pou kontinyen avek – Ou annan en lot matter rising oubyen.

 

HON WAVEL RAMKALAWAN

Mr Speaker si i lo la mon krwar pa.

 

MR SPEAKER

En moman, en moman, si i lo la mon krwar Onorab Simon Gill i fer pozisyon parti kler?  I pa lo la. Ok?  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker mwan mon le raise en matter e mon demann ou loportinite pou fer brief personal explanation. I enn mon privilez dan sa Lasanble pour mwan raise  bann points bann points of order, oubyen kestyonn sa ki in ganny dir, oubyen demann en Manm pour substantiate okenn alegasyon ki in fer dan Lasanble e sa i mon privilez konman en Manm Lasanble.

Yer in annan en serten komanter vizavi ler mon pe fer sa mon pe gat letan Lasanble mon oule dir avek tou Manm Lasanble ki i zot drwa konman Manm Lasanble a tou moman,  pou challenge okenn desizyon ki’n ganny pran oubyen ou demann okenn kestyon lo okenn size. E dan okenn ka Mr Speaker sa pa anpes mwan kontinyen raise sa bann point of order ler i neseser e kontinyen demann substantiation bann largiman e bann alegasyon ki i ganny fer dan Lasanble Nasyonal. Mon remersye ou Mr Speaker.

 

(APPLAUSE)

 

MR SPEAKER

Mersi Onorab.

 

(Off-Mic)

 

MR SPEAKER

Bon non, non. Nou’n, sa matter in fini, in fini depi yer. Bokou bann komanter ki ganny fer ki off the mic mon pa pran sa an konsiderasyon. So i arive.

Semenn pase osi tou i annan en komanter ki apre Onorab De Commarmond in port mon latansyon lo la me i off the mic. Mon’n ale mon’n al sey rod recording pour mwan regarde si mon kapab, si nou kapab substantiate sa ki Onorab De Commarmond ti’n leve, me unfortunately mon pa’n ganny okenn levidans konkret. Se sa le rezon ki mon pa’n take the matter further. Yes Onorab De Commarmond.

 

HON CHARLES DE COMMARMOND

Mersi bonzour Mr Speaker, bonzour tou dimoun. E tou Manm Onorab e tou dimoun ki a lekout. Mr Speaker mon ou le zis fer en pti komanter lo ou komanter ki ou’n fer bomaten lo zafer social media ki mon siport ou 100 poursan lo ki ou’n dir. E mon krwar bezwen met en lord ek sa zafer social media kot zot raport bann keksoz ki pa korek ki vilenn ki sal ki, ki mansonzer ki lalang, ki pa korek.

E baze lo sa ki ou’n dir eski ou pou pran menm mezir menm fason avek lezot lenstans ki fer sa. Par egzanp la ou’n dir la en zofisye Lapolis, be ler i annan lezot, en dimoun ki dan en lot landrwa Gouvernman oubyen ek Lasanble Zidisyer ensidswit?  Konmsi mon ti anvi konnen si ou pou get zis en kote me lo lot kote ou pou les pase? Mersi.

 

MR SPEAKER

Mersi Onorab. Bon bomaten mon’n stop short pour mwan name sa zofisye.  Mon krwar mon konmans fer li. Si i en dimoun dan public service i pe  i pe servi – I mean i en public servant i pe atak en Manm Lasanble i pe denigre en Manm Lasanble and all that, mon krwar we have to take it up. I bezwen annan serten norm.  Si nou ozordi nou annan respe pour en lot kote e nou bezwen kapab osi ganny sa respe de kote.  Ok? Me petet mon pa konnen si dan le fitir nou pou bezwen deside pour nou, ou konnen plizyer fwa Manm i fer li from the floor – ki nou name and shame e nou konnen i marse.  Akoz le moman ki sa dimoun i tann son non ganny mansyonnen e i sorti dan piblik, realize poudir sa ki i pe fer i mal e i retournen.

Me parey mon pe dir i annan bann fake profiles ki nou pa kapab fer nanryen about it. E mon swete ki Prezidan in mansyonnen dan son Ladres Leta Lanasyon; nou ava regarde kwa ki pou vini pour nou kapab deal avek sa bann fake profiles. Ok, nou ava regarde.

Me ankor mon dir Manm antre Manm bann koleg annou montre respe. Nou kapab kritik enn a lot, nou kapab kritik politik en parti a lot me annou fer li touzour dan respe. Akoz se nou osi tou ki dan piblik toulezour nou on air – nou live, nou osi tou nou bezwen montre respe ki pare osi tou nou kapab ganny sa respe. Mersi, Onorab Ramkalawan.

 

HON WAVEL RAMKALAWAN

Mersi bokou Mr Speaker, Mr Speaker mon kontan sa ki Onorab De Commarmond in dir e petet konman 2 koleg mon ti ava dir avek li, petet baze lo sa ki in dir e mon’n koz avek li a plizyer repriz. Petet i ti kapab konmans dan son biro li menm avek son konsiltan ki ganny peye par Lasanble Nasyonal, ki pa ni pe servi en fake profile ki servi sa, ki servi Facebook pour maltreat ‘’mwan’’ an partikilye!

Alor mon ti ava ki kontan ki i konmans dan son biro menm parski Mr Johan Loze ki en konsiltan ki ganny peye par Lasanble, i pe servi sa.  Alor mon ti a kontan met sa.  E avek sa mon krwar Mr Speaker nou ti a kapab bouze.  Mersi bokou Mr Speaker.

 

MR SPEAKER

Mersi.  Sa matter in deza ganny raise . Mon krwar i ti’n – Onorab De Commarmond ou ti’n deza pe deal avek sa issue.  Eski i ankor pe go on?  Mon pa konnen. Ok? Yes Onorab.

 

HON CHARLES DE COMMARMOND

Mr Speaker ou konnen – nou pa le fer en deba lo la, mon swete. Mwan letan en dimoun i vin fran i al anba son non personnelman, e andeor ler travay ki mon napa kontrol lo la mon pa kapab fer much mwan! Ok? Me i pli vilenn – i pli vilenn ler nou Lasanble pe deroule e Manm Lasanble i al lo fake profile e pe denigre son prosen Manm Lasanble oubyen –

 

 

 

(Interruption)

 

HON CHARLES DE COMMARMOND

… ki ou pe sot anler ou, ki ou pe sot anler?  Lotrozour ti tyonbo ou red-handed pa’n fer nanryen ek ou!  So-!

 

 

(Interruption)

 

HON CHARLES DE COMMARMOND

… e ki pe  Prezidan Larepiblik, e tou sa – pour mwan sa i pli denigran! E mwan mon pe dir ou, la zot pe nonm  – clerk – mon pa konnen mwan sa bann zafer. Me bezwen met en lord.   E sanmenm sa ki mon tonm dakor avek ou e Prezidan Larepiblik in mansyonn sa, sa i bezwen vin pli vit ki vit!  Pour nou kapab met en lord avek sa zafer fake profile e met en lord ek sa zafer social media, sa la fason ki tou sa bann keksoz i pase – ok?  So mon pa pou al dan detay lo la, pwen in ganny fer Onorab Lopozisyon in fer son pwen, i konnen ki mon pwennvi lo la me selman mwan mon krwar sa i abati la – i arete.

Lo mon kote Mr Loze mon’n koz avek li, me si i fer li la letan i dan biro isi la, sa mon deswit met kontrol lo la.  Me si i fer li ler i kot li laba ki mannyer mon kapab met kontrol la e fer li fran.  Me prezan, be zot annan case Ankour mon krwar be pourswiv! Mwan mon ti kontan mwan si tou dimoun ti fer omwen parey Johan Loze. Vin fran!  Omwen sa!  Me sa ki’n kasyet e fer bann keksoz lalang, vilenn – pour mwan sa i pli denigran!  E zot konnen ki mon pe koze!  Mersi bokou.

 

MR SPEAKER

Mersi Onorab.  Bon lo mon- from the Chair bomaten mon pou pran en ruling deswit, deswit lo la. Si a nenport moman ki Lasanble i pe seat, i annan en Manm Lasanble ki swa i servi son prop profil, son prop non e i lans en lensilt en keksoz denigran lo en lot koleg mon pou pran aksyon apropriye.  E enn bann aksyon se sa Manm i pou ganny ‘ban’ pou servi okenn IT equipment dan Chamber!  Mon pe pran sa e si mon kapab ganny laprev osi tou, lekel ki deryer sa fake profile menm aksyon pou ganny pran.

Mon fer osi sa lapel avek Manm Sekretarya Lasanble, ki pandan moman – i pas zis pandan moman – mon’n fer li mon devwar in pran en pe letan pou tir politik dan Sekretarya. Politik parey mon’n dir i ganny fer dan Chamber, i annan 2 parti ozordi  dan 6enm Lasanble – politik i ganny fer dan Chamber i pa ganny fer da sekretarya. E okenn Manm Sekretarya menm apre ler, ki pe atak Lasanble Nasyonal – oubyen i pe atak en Manm Lasanble Nasyonal aksyon apropriye pou ganny pran.

Mon krwar mon’n kapab met en lord dan sa bout, me i enportan osi pour nou kapab met en lord isi osi tou anndan.

The use of IT equipments i pa anba bann Rules and Regulation i en keksoz ki nou 6enm Lasanble nou’n dakor, nou’n aksepte nou tou ansanm pour nou allow; akoz i en pa an avan dan nou demokrasi, dan nou travay e nou kot bokou bann Lasanble pe bouz dan sa direksyon. Me i annan bokou Lasanble ki still mentenir serten kontrol,  mon pa anvi ki nou al dan sa direksyon – ok? Alor lapel se ki nou servi medya, nou servi IT anndan dan en fason ki byen.

Bon avek sa mon ava demann parliamentary reporter pour apel Minis pour Finans pour nou kapab kontiny nou travay lo Order Paper.

Mon ti a kontan dir bonzour e welcome Minis responsab pour Finans, Trade Investment and Economic Planning Minis Maurice Loustau-Lalanne. CEO Seychelles Pension Fund Mrs Lekha Nair e Project Manager Seychelles Pension Fund Mr Tommy Marie. Bonzour Minis ek ou delegasyon e welcome.  E mon prezant en pti leskiz pour sa retar ki nou’n ganny bomaten. Nou ti pe fer enn de pti travay housekeeping.

Nou ava prezan al direkteman lo kestyon pour ou Minis e kestyon i sorti kot Onorab Charles De Commarmond, Onorab.

 

HON CHARLES DE COMMARMOND

Mersi Mr Speaker.  Ankor ennf wa bonzour Mr Speaker, bonzour tou Manm, Minis ek ou delegasyon e tou dimoun ki a lekout. Mr Speaker mon kestyon i konmsa;

Eski Minis pour Lenvestisman i kapab donn nou Lasanble en update lo proze re-devlopman ex-Pirates Arms?

Dezyenmman ki difikilte ki Fon Pansyon pe rankontre pou enplimant sa proze?

E trwazyenmman kan ki travay lo sa proze pou rekonmanse?  Mersi.

 

MR SPEAKER

Mersi Onorab.  Mon a donn laparol avek Minis.

 

MINISTER MAURICE LOUSTAU-LALANNE

Mersi Mr Speaker.  Mr Speaker Onorab Leader Zafer Gouvernman tou Manm Onorab Lasanble Nasyonal, tou dimoun a lekout, bonzour. Premyerman mon ou le eksprim mon remersiman pour zot akord mwan sa loportinite pou koz e enform zot lo bann aktivite  ki pe pase lo proze re-devlopman Pirates Arms. Dan en premye lenstans mon pou  adres bann divers levennman ki arive avan louvraz piling e apre mon pou eksplik brefman lo sa sityasyon ki apre sa louvraz piling ti’n konmanse.

Mon ti a osi kontan tou dabor partaz avek zot ki lo sa proze, Fon Pansyon i ekspekte fer en return 11poursan avek en payback peryod 9an – 9 lannen. Vi ki dernyen kontra final, pou kontra pa ankor met lo tender, sa i baze lo in-house estimate ki nou pa kapab donnen a sa moman, akoz i pou konpromi tender ler i ganny fer.

Lannen 2014, architect pour sa proze ti ganny apwente an Me 2014 pour travay lo design konsep proze.

En aplikasyon ti ganny soumet avek Lotorite Planning an Zen 2014.  An prenan kont ki sa proze ti enn pli gro o sant lavil Victoria, Gouvernman ti ou le annan en input lo design sa proze.

Pou fasilit sa prosedir en Komite ti ganny etabli avek reprezantan diferan Departman pou offer gidans architect. Sa Komite ti zwenn an Out 2014 pou premye fwa e en seri rekomandasyon ti ganny fer. Plan proze ti finalman ganny soumet an Novanm 2014 avek Cabinet pour zot aprouvasyon final.

A sa pwen le 01 Novanm 2014, bann tenants batiman ti ganny servi avek en notis pou sorti an batiman dan 1an; savedir avan le 01 Novanm 2015. I enportan pour note Mr Speaker ki an Avril 2015 Lotorite konsernen ti aport a latansyon Fon Pansyon ki sa batiman ti ganny kategorize konman unsafe avek bann risk ki konsern lasante ek safety. Koze prensipalman par spalling of concrete, ki vedir bann beton a plizyer landrwa ti ganny abimen.  E osi desarz kabinen ti pe koule dan bann landrwa piblik ki Fon pansyon ti bezwen ponpe tou le weekend.  Ti annan en lenfestasyon lera e lensidan dife ti pe ogmante.

2015, an Zanvye 2015 Cabinet ti rekomann bann sanzman adisyonnel lo design e sa ti ganny enkli en ti ganny re-soumet kot Cabinet pour laprouvasyon final. An Mars 2015 pandan ki Cabinet ti pe revwar version final en nouvo seri sanzman ti ganny propoze, avek bi pour sa batiman avek en laspe pli Kreol, pou retir dernyen 5enm letaz – re-aranz son fad ki vir ver Laveni Lendepandans e enkli en striktir nouvo avek parking.

En multi-level car park building parey Maison Collette deryer batiman orizinal ex-Pirates Arms. Sa ti fer ki prosesis ti bezwen rekonmans lo zero ankor e architect bezwen refer plan antye pour nobou re-enkli bann rekomandasyon Cabinet. An prenon kont ki sa nouvo striktir parking, ti donn lo stadium car park sa propriyete ti bezwen ganny subdivided, pour kapab ganny vann avek Fon Pansyon. Bann okipan batiman ti ganny notifye an Novanm 2015 ki dat pou sorti dan batiman ti’n ganny bouze an fevriye 2016.

Sa ti an ankor avek zot swe pou sorti apre Nwel. An Desanm 2015 apre ki prosesis survey ti’n ganny konplete, e sa plot ti’n ganny vann avek Fon Pasyon, en nouvo plan pour sa proze ti ganny soumet avek Lotorite Planning en nouvo car park building. A sa pwen Mr Speaker, i enportan pour note ki proze ti’n elarzi an kantite e ti annan de batiman enn pour ex-Pirates Arms e 2enm en batiman pour parking avek en kou estimasyon entern pou en valer R450milyon roupi. Mon met lanfaz ki sa ti en in-house estimate e i ti pou de batiman.

Lannen 2016 an Fevriye bann okipan batiman Pirates Arms ti sorti dan batiman. Prosesis tender pour demolisyon ti ganny lanse an Mars 2016 e travay ti konmanse deswit an Mars menm e konplete an Avril 2016. Pandan sa letan Lotorite Planning ti enform Fon Pasyon pou fer bann sanzman adisyonnel ek plan e bouz batiman 2 met avek Laveni Lendepandans. Bann sanzman ti ganny fer en nouvo plan ti ganny fer an Avril 2016. Lotorite pPanning ti donn son laprouvasyon final an zilyet 2016.

Deswit apre Fon Pasyon ti lans tou bann tender pou bann konsiltan pou proze, ki ti enkli enzenyer striktirel, manager pour proze, quantity surveyor e osi mechanical, electrical and plumbing. Bann dokiman tender ti ganny ouver an Out 2016.  An prenon kont ki ti annan appeal lo serten tender sa ti nesesit tender pou ganny relanse. Finalman tou tender pour plizyer travay konsiltan, ti ganny donnen ver lafen 2016, enkli tender pour geotechnical investigation lo teren sa sit, ki ti ganny lanse an Novanm e ganny donnen an Desanm 2016.

Pour note Mr Speaker ki tender final pour kontra prensipal pour konstriksyon batiman ti pe al lanse li osi. A Desanm 2016 apre diskisyon dan Lasanble Nasyonal lo Bidze Gouvernman ti demann Fon Pansyon pou revwar e redwir kou proze par R150milyon e pou donn sa sonm konman en loan Gouvernman pour proze lakaz.

Lannen 2017, an Zanvye apre appeal avek MLUH pour revwar sa proze e par fer koupe ki pa ti aprouve, plizyer opsyon ti ganny konsidere par Board Fon Pansyon akoz ti napa okenn swa apard pou redwir groser sa proze e son kou. Finalman desizyon ti ganny gran pou retir batiman parking antyerman. Bann lezot sanzman ti ganny enkli e en nouvo plan ti ganny soumet avek Lotorite Planning an Mars 2017.

Fon Pansyon ti osi aprouv loan pour Gouvernman e ti dispers premye trans sa loan R150milyon. Pandan sa moman geotechnical investigation ti ganny lanse e rekomandasyon ti ganny fer par lafen Mars 2017. Ti an zilyet 2017 finalman ki Lotorite Planning ti donn son laprouvasyon pour so nouvo plan e design. Imedyatman Fon Pansyon ti lans tender pou travay piling an Zilyet 2017. Tender ti ganny ouver an Out e kontra ti ganny donnen an Oktob. An total 3 kotasyon ti ganny resevwar pour louvraz tender.  Pli ba ti pou Vijay Construction a en kou R6,314,840 milyon.

I enportan note ki Fon pansyon parey son prosedir entern i demande, ti’n osi fer en estimasyon entern pour sa louvraz. E sa kotasyon ti bokou pli ba ki sa estimasyon, Lakonpannyen Vijay ti ganny rekomande an prenon kont ki zot tender ti pli ba; zot ti en kontrakter kapab eksperyanse avek kapasite pour demar travay. Imedyatman akoz zot masin piling ti free e zot ti kapab konmanse deswit.  Lakonpannyen Frankipile a son tour ti bezwen 16 a 18 semenn pou mobilize, mobiliz zot bann resours e fer vini lekipman sorti Sidafrik e Moris e zot pri ti bokou pli o.

Louvraz piling ti ganny donnen e kontrakter Vijay Construction pour sa sonm R6.3 milyon parey mon’n fer resorti. Dapre kontra louvraz ti pou ganny konplete le 4 Zen 2018.  Louvraz piling ti konmanse le 18 Desanm 2017 apre ki zot ti fer en dilapidation report, ki i en rapor lo kondisyon bann building dan zanmerant sa sit.

Sa rapor pa ti mansyonn defo ou okenn domaz CBS Labank Santral. Pandan sa letan louvraz pou retir vye fondasyon batiman Pirates Arms ti osi ganny donnen.  E an oktob 2017 sa louvraz ti ganny konplete pou fasilit konmansman louvraz piling.

Le 3 Zanvye 2018 Fon pansyon ti resevwar en konplent avek Labank Santral ki zot laport batiman Annex ti’n bloke e ti annan cracks lo floor. A sa pwen kontrakter ti’n enstal 11 pilye  – 11 sa bann pile.  Deswit tim proze Fon pansyon ti vizit sit ek Labank Santral kot bann domaz ti ganny konfirmen.

Lotorite Planning ti osi donn en Stop Notice apre ki zot ti ganny notifye par Labank Santral e fer en vizit.  Pour etablir lakoz domaz lo batiman, en eksper enternasyonal byen eksperyanse e endepandan ti ganny apwente. Rezon pour en enternasyonal, se akoz ti napa okenn personn lokal avek sa lekspertiz. En lakonpannyen Sid Afriken, Ground Africa ti ganny apwente le 09 fevriye 2018 pou etablir vre lakoz sa problenm atraver en lenvestigasyon.  Labank Santral ti donn son laprouvasyon pour fer sa.

Fon Pansyon ti osi met bann sipor dibwa e en tim ti ganny met an plas konzwent avek CBS ek Planning Authority pou mezir mouvman sa Annex, ki ti’n bouze par 8.3 santimet. Monitoring  ti ganny fer pour 3 mwan ziska ler mouvman ti aret.

Ground Africa ti finaliz zot lenvestigasyon preliminer lafen Fevriye 2018 e zot ti demann 1 mwan pou fer zot louvraz. Rezilta sa louvraz ti ganny resevwar le 04 Avril 2018 atraver en rapor ki ti montre ki lakoz domaz ti enkli bann ‘’vibrasyon ansanm avek en teren feb’’ e ‘’water table’’ ki ti o e ‘’unsupported board piling method.’’

Zot rekomandasyon ti montre ki striktir batiman annex Labank Santral, ti ase for pou sibir sa bann domaz e zot i propoz en solisyon pou remedye batiman atraver en prosesis underpinning.

Underpinning ti pou ase pou garanti ki batiman pa ganny plis domaz.  Swit a sa Mr Speaker Ground Africa ti ganny permisyon pou fer design le 26 Avril 2018.  Design e metodolozi ti ganny soumet avek Fon Pansyon ver lafen Me 2018.

Sa propozisyon ti ganny anvoye kot Labank Santral an Zen 2018, avek lentansyon ganny zot laprouvasyon avan en en soumisyon final avek Lotorite Planning. Vijay Construction ti osi ganny enformen e zot ti dakor avek solisyon propoze par Ground Africa. Labank Santral li ti enform Fon Pansyon a sa pwen  ki zot ti’n deside apwent zot prop eksper endepandan – en lakonpannyen nonmen Cundall Johnston & Partners LLP baze Dubai, pour revwar tou rekomandasyon Ground Africa.

Apre en seri konsiltasyon ant Fon Pansyon Ground Africa e Cundall pour 2 mwan Labank Santral ver lafen Oktob 2018, ti enform Fon Pansyon ki zot eksper ti’n enform, zot ki ti annan tro bokou risk asosye avek underpinning. Zot ti rekomann en lot sistenm grout ki pou ganny mete anba fondasyon annex en metod ki ti napa okenn ekspertiz Sesel. Vi ki ti annan 2 solisyon, Fon Pansyon ti  soumet propozisyon Ground Africa avek Lotorite Planning avek lentansyon pou ganny zot pwennvi, e pou nobou re-kontinyen avek travay lo sit si zot ti dakor avek solisyon Ground Africa.

Antretan le 8 Oktob Fon Pansyon ti resevwar en let sorti kot Labank Santral ki ti endike ki Labank Santral, ti swete demoli Batiman Annex e rekonstri en nouvo batiman dan son plas an prenan kont bann risk.  En meeting ti ganny organize le 18 Oktob pandan lekel Fon Pansyon ti demande ki Labank Santral pou revwar son desizyon. Fon Pansyon ti osi organiz en meeting avek kontrakter piling Vijay Construction pou rod en solisyon, inisyalman sa lakonpannyen ti swete asiste avek prosesis underpinning.

Me zot ti toultan refize aksepte, ki zot ti responsab pou domaz lo batiman annex. E ti konfirmen ki zot ti napa okenn lentansyon pour aksepte pour repar batiman e kontribye finansyel man pou re-dres domaz sa batiman annex. Fon Pansyon ti eksplik kontrakter ki i annan en contraction obligation dapre kontra ki’n ganny sinyen e se kontrakter alor ki responsab pour tou keksoz ki arive lo sit enkli domaz lo batiman dan zalantour.

Kontrakter ti fer kler ki zot ti pou responsab selman si ti annan profesional negligence e dan sa ka zot ti dir sa pa ti le ka.  Kontrakter dapre zot ti napa okenn neglizans profesyonnel, e zot pozisyon se ki sel lakoz domaz ki fondasyon batiman annex ki pa ti’n ganny byen fer, e i ti sitie lo en teren fay. Zot ti ensiste ki enzenyer Labank Santral ki ti osi enzenyer Fon Pansyon lo sa proze, ti devret enform zot ki sa fondasyon ti fay, an prenon kont ki i ti okouran sa sityasyon.  Pour zot lakoz ti antyerman lo sa enzenyer ki par lefe pa ti devwal  sa lenformasyon, i koupab pou okazyonn sa domaz.

An Novanm 2018 Fon Pansyon avek bi pour remar proze e anpes plis retar, ti desde apros Labank Santral pou donn konsantman Fon Pansyon pou demolir batiman annex afen ki rekomandasyon Lotorite Planning ti a ganny respekte an prenon kont ki sa Lotorite ti deside ki sel solisyon se pou demolir sa batiman pou elimin tou risk.

Fon Pansyon osi fer en lof R2.5milyon konman konpansasyon pou domaz ek Labank Santral.  En nouvo metodolozi prosesis piling ti osi ganny soumet avek Lotorite Planning. E en demann pou zot retir Stop Notice, vi ki sa Lotorite ti enform Fon Pansyon pou revwar metodolozi piling pou kontinyen avek sa proze. Zot ti osi demann ki solisyon Fon Pansyon ti’n fe vizavi Labank Santral.

Fon Pansyon pour fer en prezantasyon sa nouvo metodolozi le 15 Mars sa Vandredi 2019 avek Lotorite Planning.

An Fevriye 2019 Labank Santral ti fer konnen ki Fon Pansyon fodre pey zot en konpansasyon la valer R10, 228, 509milyon. Fon Pansyon ti reponn le 5 Mars an demann plis detay lo sa sonm e sa bann detay i ankor pe espere pou fer en desizyon final.

Fon pansyon pe osi eksplor bann posibilite legal dapre provizyon Kontra piling ki annan bann konponan arbitrasyon an ka ki i annan en konfli. Sa i dernyen solisyon pou Fon Pansyon, apre ki in   sey son mye pou idantifye solisyon amikal avek tou bann Lotorite konsernen.

Lo bann Kontra ki’n ganny donnen pour bann konsiltan pour en valer R18.4milyon total Fon Pansyon ozordi in depans R7.9milyon. Kou adisyonnel akoz problenm CBS annex in kout R1.4milyon e reveni perdi lo rent ki Fon Pansyon ti pou anmase pou en lannen si i ti ankor pe lwe sa batiman, i R2.8 milyon pour sa lannen ki’n ganny perdi.  Sa ti dernyen rent ki anmase pour lannen 2015.

Mr Speaker pour konklir, depi Fevriye 2016 kan vye building Pirates Arms ti ganny demolir, ti annan plizyer fakter kin ganny kontribye kot Fon Pansyon ti bezwen rekonmans sa proze a zero.

Akoz delay okazyonnen par;

Premyerman bann sizesyon e sanzman sorti kot Gouvernman.

Retar e ek plizyer demann sorti kot Planning Authority pour aprobasyon bann plan.

Trwazyenmman sanzman signifikan demande par Lasanble Nasyonal pour redwir groser sa proze.

E dernyerman retar ki Fon Pansyon in fer fas avek Labank Santral an relasyon avek domaz ki’n arive lo annex kot in perdi 1an.

Proze i ekspekte rekonmanse osito ki Lotorite Planning i donn son laprouvasyon pou kontinyen avek piling, an servan nouvo metod CFA. Sa i Continuous Flight Auger.  Vi ki en desizyon in ganny pran pour CBS Annex  ganny demolir sa i kapab an Septanm 2019, akoz nou bezwen donn letan sa arbitrator termin son travay. Tender pour konstriksyon i kapab ganny fer avan lannen 2019. E konstriksyon i ava konmanse an 2020 e pou pran 2an edmi pou konplete. Setadir nou pou war sa batiman an operasyon an Desanm 2022. Mersi Mr Speaker.

 

MR SPEAKER

Mersi Minis. Onorab De Commarmond.

 

HON CHARLES DE COMMARMOND

Mersi bokou Mr Speaker e mersi Minis pour sa larepons, tre, tre detaye e byen enformatik. Mr Speaker eski Minis i kapab dir nou premyerman lekel sa enzenyer ki ti enzenyer Fon Pansyon, enzenyer pour Central Bank tou? Eski i kapab donn nou detay sa tender pour piling, konbyen kontrakter ti annan? E konbyen sak kontrakter ti’n mete?

E osi eski i kapab dir nous a geotechnical investigation lekel ki ti, ki mannyer tender ti ganny fer?  Lekel ki ti gannyen?  E konbyen? Eski i kapab dir nou rol Planning dan tou sa roulman la? E an menm tan Central Bank core responsabilite e travay Central Bank se pa lwe building. I kler sa ki in dir nou sa whole annex ti pe ganny lwe, e ki i ti pe ganny lwe si i ti kapab dir nou e pou konbyen?

E eski zot kapab met devan en propozisyon pour Pension Fund pran sa bout ki zot aste sa bout annex la, sa bout later la ek zot akoz zot ki lwe building Pension Fund ki lwe.

So, i ava vin dan Fon Pansyon, Fon Pansyon a re –ganny sa bout later e i a build lo la i a kapab lwe.  E Central Bank i ava fer son louvraz ki i merit fer.  E an menm tan sa bout, sa bout Central Bank annex la ki li in ganny andomaze, eski Minis i kapab dir nou si son Central Bank Building li menm in osi ganny andomaze?  E ki zistans?  E avan mon pas dernyen bout en lot kestyon enportan – sa piling method eski Minis i kapab donn nou detay sa dilapidation survey  – enn – e sa piling method ki ti devret ganny servi? E eski kontrakter ti pe vreman servi sa method ki ti ganny servi?  E ki sipervizyon lo sa kontrakter ler ti pe fer sa piling method ki sipoze ganny fer.

E ki, dernyerman, dernyen keksoz design and build contract ki i vedir li? Dapre zot kot Fon Pansyon – ki i vedir? E ki mannyer alor zot pou kapab rekiper sa larzan ki zot pe perdi ki Central Bank pe dir peye.  Ou prezan Vijay i dir pa li ki responsab, ki mannyer prezan ou pou ganny sa larzan. Eski ou pou bezwen esper arbitrasyon avan ou konmanse oubyen ou annan, avan ou konmans ou building oubyen ou pe mazin en lot keksoz? Mersi Mr Speaker.

 

MR SPEAKER

Mersi Onorab. Minis.

 

MINISTER  MAURICE LOUSTAU-LALANNE

Mersi Mr Speaker e mersi Onorab pour sa seri kestyon.  Lo premye kestyon sa lakonpannyen engineering i F&D Consulting Engineering.  Lo ou 2enm kestyon lo sa piling bann diferan kontrakter ki’n tender ti annan Vijay Construction li menm parey mon’n dir 6.3 milyon, ti annan Frankipile Maurice  li son tender ti 17.8milyon, UCPS 29. milyon. Donk vwala sa 3, e parey mon’n eksplike dan mon larepons i Fon Pansyon li osi i ti’n fer en travay estimasyon konbyen sa proze ti pou koute, e dan Bidze pour piling li i ti estimen i ti pou kout R24.8 milyon.

Geotechnical mon ankor pe rode.  An sa ki konsern annex mon krwar pwen ki ou pe sey fer resorti avek larepons ki mon’n donnen se ki si Fon Pansyon i aksepte pou fer en building pou R10milyon, pou donn Labank Santral nou bezwen regarde osi kan sa annex building ti ganny konstri konbyen ti koute konbyen lannen i annan apre sa apre son valer li osi i kapab son valer i bokou plis i enferyer avek sa pri.  So, si sa bann diskisyon ki nou santi i enportan ki en arbitrer endepandan i regard tou sa bann fakter.

Akoz i pa normal ki ou donn en dimoun oubyen dan sa ka Labank Santral en keksoz ki totalman nef. E lot pwen ki’n fer resorti pli tar se ki lekel ki dan sa annex avan sa? Labank Santral pa ti ladan li, Labank Santral ti pe lwe sa annex. Ti annan 3 lakonpannyen si oule ki ti ladan.  Ti annan Trezor, ti annan Public Ethics Commission apre ti annan DICT.  Donk i ti pe tous en lwaye ant sa 3 lorganizasyon ki pe reste dan, ki ti pe rent sa annex.

So, sa osi i bann konsiderasyon ki nou bezwen tenir an kont. Piling mwan mon pa en eksper, me sa ki mon konpran desizyon ki ti ganny pran se ki ti pou pran en piling system ki, ki ti nepli apropriye pour sa landrwa. E kwa ki ti pli apropriye pour sa landrwa se en metod tou lede. Letan mon dir tou lede sa CFA e CFA li sa ki ou fer ou dril en trou dan later parey ou pe dril en trou dan en beton dan ou lakaz pou ou met en portre, ou dril en trou e letan ou pe fer sa ou pa pe bouz sa later obor.

E sa i ganny fer avek en lekipman spesyal e en fwa ou fini fer sa ou vid siman ladan, siman ki mou -Ki an beton  parlao (eskiz mwan), i desann ladan apre ou met son feray, apre ou retire.  Me an servan sa menm lekipman ou kapab vibrate li en pti gin.  Akoz ler ou vibrate osi i depan lo sa kalite later li osi i pou fer sa trou si oule. E parey ou konnen li sa konpannyen Vijay Patel in fer piling en pe partou in fer piling e i pa’n gannyen sa bann aksidan – letan ou regard zot louvraz ki zot in fer lo Eden Island.

E in fer bann lakaz enn obor lot and so on and so forth alor kestyon se kwa ki in kapab arive?  E  sa osi i en kestyon mon konnen ki ou’n poze kwa ki’n kapab arive? Lenformasyon ki nou, nou annan se ki Desanm 2017 ziska konmansman 2018, mon ti dir le 03 Zanvye 2018.  Kan ti dir vin reget nou annex, annex pe separe.  Pandan sa peryod bann lafet la,  in annan travay ki’n ganny fer e nou konnen konbyen bann pile ki zot in mete pandan en peryod kourt, pandan bann lepok bann vakans Nwel ek Lannen. E ou kapab kekfwa dir ki pou sa kantite pile ki in ganny mete pour sa bann zour, in al en pe vit.

Me mwan mon pa en eksper mon pa pou kapab dir ou kekfwa dan vakans zot travay pli vit pou ganny plis larzan – mon pa konnen mwan. Me  i annan en  sityasyon ki nou bezwen regarde dan son detay la. Akoz se sanmenm sa bann pile ki ti ganny mete pli obor sa annex building dan sa peryod lafet, kot kekfwa ou dir ti annan sipervizyon ti napa.  Kekfwa ti napa sipervizyon – mon pa konnen.  E se sa bann detay ki mon krwar nou bezwen aprofondi pour nou konnen egzakteman kwa ki’n kapab arive.

Letan ou koz sa design and build efektivman ou les sa kontrakter evalye pour li met sa pile ziska i ariv lo bedrock. Ou konpran? Akoz ou kapab kekfwa arive ganny en pti difikilte i nepli le ale, i pa ankor ariv kot i sipoze arive, ou sanz metod slightly e kekfwa sa osi in kapab arive.  Sorti lo sa CFA pou li pran en lot.  Donk mwan mon krwar ki Vijay Construction li i abilite i annan en bon leksperyans in met en kantite pile Sesel e ou pa kapab konmsi dir ki i napa sa leksperyans, i pa ti konnen ki i ti pe fer.

Mon krwar se akoz ki nou’n donn li sa design and build concept, me selman i riske annan en problenm avek supervision at that time. Now, arbitration nou bezwen fer li akoz nou napa lot solisyon kot nou’n arive, e nou annan en clause dan sa Kontra.  E mon krwar ki Fon Pansyon in deza li menm swazir en dimoun endepandan – prezan prosedir i demande ki Vijay Construction i aksepte sa dimoun, si i pa aksepte i annan en lot prosedir nou bezwen servi.

E normalman mon krwar nou demann sa Chartered Institute of Arbitrators pou propose plizyer dimoun e en 3 dimoun koumsa prezan la ou annan en swa prezan si ou pa le sa enn ki la ou get lo tor whatever it is. E i en  negosyasyon me nou bezwen pas par sa prosedir; nou pa kapab pa evite.  E apre sa prosedir se la ki nou kapab al avan. Mersi Mr Speaker.

 

MR SPEAKER

Mersi Minis. Onorab De Commarmond.

 

HON CHARLES DE COMMARMOND

Wi i annan en kestyon ki Minis pa’n reponn – son building Central Bank li menm eski in andomaze e to what extent? E prezan ler ou dir sa CFA sa sistenm piling la sa sistenm piling akoz zot alor zot, zot Pension Fund zot in aksepte sa lot metod?  Konmsi i annan en metod diferan konmsi sa geotechnical investigation ti dir li, li in dir en keksoz prezan dilapidation survey in dir en zafer prezan ou sistenm piling ki originally ti ganny design pou sa, lekel ki’n fer li e eski zot in aksepte akoz ki lot sistenm ki’n ganny servi?Letan mon’n ekout ou, ou pe dir.  E prezan i enportan osi konnen sa geotechnical investigation la sa tender e lekel ki’n gannyen?  Akoz ler ou get sa 3 sonm ki ou’n dir ek zot, zot estimasyon me la i annan en pe kestyon konmsi ki taler nou gete ler ou’n dir mwan sa bann lezot kestyon. Mersi.

 

MR SPEAKER

Mersi Onorab.  Minis.

 

MINISTER MAURICE  LOUSTAU-LALANNE

Wi sa geotechnical survey se Gondwana ki’n ganny Kontra. Me pour mwan klarifye li Fon Pansyon in rod Ground Africa pou fer vin tyeke, kwa ki zot bezwen fer pou repar.   Setadir pour zot aranz sa fondasyon pour zot kontinyen.  E zot, zot in propoz solisyon underpinning.

Solisyon underpinning Labank Santral i pa an faver, akoz li osi in al rod en lot konpannyen  Sa Cundall; Johnston e li in dir non nou bezwen servi en lot sistenm; underpinning pa bon nou bezwen servi en lot sistenm.

E mon kapab dir avek ou ki Planning Authority i pa an faver underpinning non plus.  Ou war? S Donk se  akoz de sa prezan ki Fon Pansyon pe fer sa prezantasyon le 15 Mars avek Planning Authority lo sa nouvo metod – anfen  ki ou a fer i en metod ki ti sipoze fer tou le fason, o konmansman sa CFA, parey mon’n eksplik ou sa CFA premye la.  So sa ki zot pe al, propoze ek Planning pou koriz sa fot.

Be prezan in annan en desizyon  tou le fason pou demoli sa annex so sa annex pou desann tou le fason, Fon Pansyon in dakor pou R2.5 milyon konman domaz, me Labank Santral i le en nouvo Batiman pou R10.3milyon ki nou ankor pe negosye.

E mon pou profite pour mwan donn ou breakdown, akoz mon’n demann breakdown e monn ganny breakdown. So, pou demolir R1milyon; son travay preliminer i R890mil, son travay rekonstri sa annex i R6milyon apre pou  enstal bann elektrik bann air conditon eksetera R1.8milyon.

I annan ankor en pe travay pou an deor batiman – R100mil, e en contingency 5 poursan ki zot in azout lo la ki ariv en sonm R10.3milyon.  So la son detay.

So, vwala kot problenm i ete.  Ou vwar? Donk  -mwan mon pa war okenn lot solisyon ki sa solisyon ki Fon pansyon pe propoze, se invoke sa Clause arbitrasyon dan sa Kontra annou sa travay de pli vit posib. Mersi Mr Speaker.

 

MR SPEAKER

Mersi Minis.  Mon ava donn laparol Onorab Gevais Henrie.

 

HON GERVAIS HENRIE

Mersi Mr Speaker.  Premye kestyon pour Minis mon ti a kontan demann li lefet ki Seychelles Pension Fund in ofer CBS en konpansasyon 2.5 milyon lo ki ground SPF i pe offer CBS sa larzan, 2.5milyon? Premye kestyon.

2enm kestyon, Minis in koz lo sa Geo technical Survey e mon konprenezon geotechnical survey se letan ou fer lenvestigasyon pou konn propriyete fizik en later – en teren.

Savedir apre dan bann negosyasyon lekel ki responsab lekel ki pa responsab lekel Gondwana ki’ fer sa, li pa involve ladan selman li in sipoze fer en survey, en geotechnical survey. So, mon anvi konnen li ki son rol dan lekel ki koupab lekel ki pa koupab? 2enm.

E trwazyenm e dernyerman, Minis in eksplik nou pou dir Fon Pansyon ti bezwen ganny konsantman Cabinet lo detay proze kalite building, ki groser lo lot, lot. Selman apre ler in ariv tou bann problenm nou pa tann Cabinet ni  involve  ankor ditou.

So, mon anvi konn pozisyon Cabinet dan sey trouv en solisyon?  Akoz Labank Santral avek Fon Pansyon i tonm preski dir responsabilite Cabinet.  Kot zot debout prezan dan tirayman ant sa 2 antite Leta.  Mersi bokou.

 

MR SPEAKER

Mersi Onorab.  Minis.

 

MINISTER MAURICE  LOUSTAU-LALANNE

Mersi Mr Speaker, mersi Onorab pour ou 3 kestyon. Bon sa sonm R2.5 milyon i ti en desizyon ki Board Fon Pansyon ti pran e i baze senpleman ki dan zot proze zot annan en 15 poursan contingency dan sa proze, kot zot kapab pey anba sa budget line. Me rezon akoz zot in deside ofer sa konpansasyon  2.5 milyon se pou ariv en solisyon amikal ant sa 2 lorganizasyon, pour ki proze i kapab ale, demare kontinyen  de lavan. Me son Bidze ti deza la anba sa 15 percent contingency sa proze.

So, sa i larepons ki mon pe donn ou. Bon Gondwana li ou konnen apre ki ou’n fer sa e aprezan ou’n allocate kontra avek Vijay Construction pou antre pou fer piling – Vijay Construction in fini pran site li. Ou war?  Donk se li annefe [rezan ki ansarz sa site, e avan ou konmans in fer tyeke tou zafer ti annord ou napa okenn building ki ti pe tonbe ou byen ki ti pe separe.  In konmanse fer son louvraz.  I ti’n mete detrwa pile apre in akselere pandan sa peryod ziska le 03 Zanvye pou met en pe plis pile e in met bokou plis pile e se la kot problenm prezan in arive.  Ou war?  Akoz problenm i la li.

Fodre ki nou konnen kwa ki’n arive la. Mwah mon krwar se sa.  I annan diferan lopinyon –  diferan enzenyer se sa ki nou  ou bezwen – nou pa kapab diskit sa la. nou bezwen rod sa arbitrator pour li regard tou sa bann keksoz.

Bon Cabinet li i vre ki Cabinet lo konmansman ti fer bokou sanzman. Akoz Cabinet ti santi ki letan use sa building li menm, ti pou annan super market eksetera Cabinet ti annan serten lenkyetid kek ti ava anmenn plis trafik ankor dan lavil.

Akoz sa bann aktivite ki ti pou dan sa batiman.  So,  in fer sanze apre ok ti annan sa rekomandasyon sa R150 milyon osi ki’n fer retire e mon krwar ki ozordi sa ki zot pe propoze avek bann servis ki zot  in deza fini tender e zot in fini siny Kontra avek bokou prestater, bokou konpannyen pou vin ladan. E zot pe espere.  E mon krwar sa mix ki zot annan i ava en bon keksoz pou lavil Victoria.  Pour annan en pe parking, pour napa otan parey i ti pou annan, me all along the way pour annan i pa enterferans me in annan bokou dimoun ki’n le input ladan.

I vre, i annan en bon pe letan ki’n pase de ki problenm in arive, akoz ou pa pran 1an pou ou regle sa problenm – pou fer underpinning – pour fer en lot solisyon, pou pran bokou letan. Ou war? Me ou bezwen respekte osi lendepandans sa 2 lenstitisyon. Donk ou annan en Board Pension Fund ki pran en pozisyon, ou annan en Board Central Bank ki’n pran en lo pozisyon e li Cabinet nou pa la pou donn lord ni Central Bank ni sa Board.  E nou’n seye – an konpran – rankontre diskite avek sa 2 personnalite, sa 2 madanm pour nou rod sa konpromi.

So, in annan travay ki Minis endividyel in fer menm Chairman Board Pansyon in fer avek Gouverner Labank Santral pou ariv en solisyon. Me la kot in arive mon krwar nou napa lot swa – parey mon’n eksplike rod sa arbitrator.  Mersi Mr Speaker.

 

MR SPEAKER

Mersi Minis.  Onorab Henrie.

 

HON GERVAIS HENRIE

Vitman Mr Speaker.  So eski Minis i kapab dir nou an ka kot arbitrasyon pa marse. Eski ou war en senaryo ki sa zafer i ava fini devan Lakour?

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi, mersi pour rapel mwan sa, ou annan parfetman rezon, akoz efektivman si letan ou pe sey apwent en arbitrator e ou pa kapab, la se devan Lakour pour apwent sa arbitrator. So, i kapab wi i ariv dan Lakour, e Lakour i ava apwent en arbitrator pou take the case.  Mersi Mr Speaker.

 

MR SPEAKER

Mersi Minis. Onorab Ferrari.

 

HON JEAN-FRANCOIS FERRARI

Mersi Mr Speaker. Mr Speaker mon ti a kontan premyerman demann Minis pou  re-sitye li an 2014. Mon konnen i pa ti Minis dan sa Gouvernman la, me an 2014 se sanmenm sa moman kot pli gro tenant dan Pirates Arms – Dr Ramados i konmans annan enn de disansyon avek Gouvernman ki ti la a sa moman.

I ankor la?  Anfen. In name at least.  E a sa moman, eski Minis ou’n vwar okenn korespondans – okenn literatir ki montre ou ki Gouvernman in kapab a okenn moman, taye avek sa proze, zis akoz zot ti anvi met Dr Ramados deor akoz i ti met problenm avek zot?  Mon ti a kontan zis pou piblik konnen si in annan okenn desizyon ki’n baze lo lefet ki Dr Ramados ti pe ganny enpe difikilte.

Ou’n nonm lasante, lizyenn bann keksoz koumsa, me sa i osi bann desizyon, me eski in annan plis ki sa? Mon dezyenm kestyon Minis se mon’n ase soke, oubyen mon’n ase etonnen  pou vwar ki en proze piling ler ou ganny bann quotes i al depi 6milyon i al en ki 24milyon en ki 29milyon.

Donk ant sa enn ki pli ba i 6 milyon e sa enn ki par lao li i 24milyon. mon ti a kontan demann ou Minis eski ou kapab dir avek sa Lasanble si ler kontrakter pou fer piling in donn son bid, eski in konpran e respekte scope sa proze? Si wi, ki mannyer nou kapab eksplik sa varyasyon enorm eski?

Eski sa, dan ou lenformasyon ki ou annan eski sa metod piling se sanmenm sa enn ki ti merit ganny fer? Akoz i paret i paret ki i annan enn ki bokou pli bon marse e bann ki bokou pli ser.

Eski sanmenm sa metod ki ti devret ganny fer e kekfwa pli enportan Mr Speaker. Ki mon demann Minis, eski ler sa proze parey ou’n dir nou sa bann piling ti pe ganny fer sirtou ti ganny akselere dan en peryod lafet. Eski ou annan okenn lenformasyon si Project Management ki ti an plas ou Pension Fund ti egzers sa sipervizyon ki zot ti pe merit pe fer, pou kapab asire ki pe al dan vites ki devret pe ale. Ki i ganny fer dapre spesifikasyon, eski sa eleman sipervizyon in egziste eski ou annan lenformasyon lo la?  La i la. Mersi Mr Speaker.

 

MR SPEAKER

Mersi Onorab. Minis.

 

MINISTER MAURICE  LOUSTAU-LALANNE

 Mersi Mr Speaker, mersi Onorab pour ou 3 kestyon.  An sa ki konsern Dr Ramados, mwan mon pa’n war nanryen ki montre ki nou ti anvi tir li dan sa batiman vitman, pour nou demolir sa batiman. Me sa ki mon kapab konfirm avek ou, se ki menm letan Pension Fund in demann bann expression of interest pou bann diferan konpannyen pou vin pran biznes dan nouvo Pirates Arms. Lakonpannyen Dr Ramados in osi tender, e se li ki’n ganny en bid lo tender pou fer en restoran , en restoran.    Donk pou annan en restoran la, e li ki’n ganny bid. So, si demen bomaten sa building i up and running ,Dr Ramados ek son konpannyen pou ladan.  Akoz in fini donn tender Dr Ramados, Mon anvi donn ou sa lenformasyon pour montre ou ki la, la kot mon annan bann fe ki egziste. Kotasyon 6.3 mwan osi ler mon’n tann sa mon’n en pe sot anler.

Me parey mon’n eksplike dan mon larepons, mon krwar Vijay Construction i ti annan lekipman isi, i ankor annan lekipman akoz i ti pe fer plizyer louvraz.

Mon krwar UCPS li osi in envestir sa bann lekipman en e apre. Vijay Construction son louvraz piling ti’n fini, i ti’n preski fini kot Eden Island sa lepok. So, in met en pri pour li nobou servi son lekipman servi son travayer, servi son bann lekspertiz ki ti la olye zis asize ek sa lekipman. Frankipile li i ti pran li ant 6 a 8 semenn pour li al rod son lekipman Moris anmenn isi mobilize vin isi e li son pri ti R17 ekek milyon.

17milyon, UCPS ti 29 milyon e estimate Fon Pansyon pour sa proze ti 24 milyon. So, vwala si ou le leksplikasyon ki mon kapab donn ou, an sa ki konsern sa kotasyon Vijay Construction. Mon pe donn sa lenpresyon ki Vijay i fer travay pou nanryen. Me i en pti pe le ka dan sa olye kit sa ater ek son bann dimoun i vin dir be ok mon a vin fer sa louvraz mon a ganny en larzan.

So, me kestyon kekfwa ou osi ou pe seye demann mwan se eski i ti pou fini sa louvraz ek sa 6milyon? Wi en Kontra i en Kontra, e mon kapab konfirm ek ou ozordi, ki Vijay Patel anfen Vijay Patel, Vijay Construction pardon i pa ankor ganny en sou lo sa louvraz. Akoz mannyer kontra in sinyen fodre i delivre sa louvraz apre i ganny peye; konmsi i ganny peye at the end.  So, napa en sou ki in gannyen lo sa travay.

E alor dernyen kestyon sa ki mon lir la se ki dan letan normal zot ti la, zot la pou fer, me dan peryod lafet zot pa’n dir zot ti pou fer alor ti napa.  Zot pa ti okouran ti pe al fer alor zot pa’n la. Mersi Mr Speaker.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Wi, mersi.  Avek ou permisyon Mr Speaker si Minis i kapab atraver CEO Fon Pansyon fer Lasanble ganny tou bann konsiltan ki’n involve lo sa proze ziska prezan.  E zis pou reasir Lasanble, ki tou bann konsiltan ki’n ganny retenir se bann piblik an zeneral oubyen bann spesyalis i konnen pou dir sa bann dimoun, ki kredib. Se pa bann dimoun ki, se pa bann cowboy.  So si nou ti kapab ganny sa lalis mon ti ava vreman apresye.  Mersi.

 

MR SPEAKER

Mersi Onorab.  Minis.

 

MINISTER MAURICE  LOUSTAU-LALANNE

Mersi Mr Speaker.  Mersi Onorab. Wi nou ava partaz lalis avek bann Manm.

 

MR SPEAKER

Mersi Minis. Onorab Herminie.

 

HON WILBERT HERMINIE

Bonzour Mr Speaker bonzour Minis avek ou delegasyon. Minis ou kapab zis konfirmen ki sa apepre 10.3milyon se pou fer sa nouvo batiman antye oubyen zis en part payment lo sa nouvo batiman ki Central Bank pe demande?  Epi mon lot kestyon  ler mon pe get sa in-house estimate pour sa piling i 24 milyon mon krwar si mon pa tronpe si mon’n tann byen – e pri ki Vijay in pran i 6 milyon, sa i apepre 3 fwa mwens ki pri in-house estimate.

Prezan mon kestyon se ki metod ki zot in servi pour zot kapab, ki metod analysis ki zot in servi pour zot kapab donn Vijay sa tender, akoz ler ou pe gete i en pe bon pe mwens kantmenm si zot annan lekipman i 3 fwa mwens ek pri pou fer sa proze li menm.

Mon 3enm kestyon ler en kontrakter i pran site en sit konstriksyon i siny en Kontra e tou bann liabilities ki vin  avek sa konstriksyon  i tonm anba sipervizyon sa kontrakter e any defect ki arive i responsabilite sa kontrakter vi ki sa i en Clause  dan Kontra.

Prezan mon kestyon se ki akoz se ki Fon Pansyon enkli son bann manm nou ki pe bear sa cost 10.3 milyon? Akoz sa i pa tonm direkteman lo sa kontrakter vi ki zot in pran en lasirans. Zot in bezwen pran en lasirans pou en proze sa magnitid.  So akoz ki se Fon Pansyon ek son bann Manm ki pou bear  sa cost 10.3 milyon. Kan sa kontrakter in siny en kontra e li ki liable e i annan en lasirans pou kouver sa? Mersi Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pour ou 3 kestyon.  Wi parey mon’n dir sa 10.3milyon i pou demoli sa annex ki ozordi i pe lean en pti gin – konpletman; cart li away e apre rebuild.  E son rebuild cost parey mon’n donn detay taler i R6 milyon  – son demolisyon i R1milyon, eksetera. So, sa i eksplik sa 10.3 milyon.

Ou annan parfetman rezon, pou reponn ou 2enm kestyon se ki zot in ganny sa atraver tender.

So, sa award of 6.3 i ganny award korekteman, normalman parey mon’n eksplike avek Onorab Ferrari taler, ki mannyer mwan mon krwar ki zot in nobou ganny sa award at 6.3, akoz they were the lowest bidder.

Me ou annan rezon dan tou Kontra e dan sa Kontra spesifik avek Vijay Construction i annan 2 Clause. I annan 1 lasirans, ou’n koz lo lasirans definitivman i bezwen annan en lasirans.

So, sa i enn.  E i annan, si i kree okenn domaz pandan sa Kontra egzers sa Kontra, i annan en sonm ki i bezwen peye ziska R10milyon. i enkli dan sa Kontra.  me pour le moman Vijay Construction i dir se pa li ki responsab pour rezon ki mon’n eksplike dan mon larepons e se akoz de sa ki mon santi sel fason pour mwan sorti dan sa problenm se fer vin sa arbitrator.  Nou a met tou lenformasyon devan li e apre nou a konn lamars a swiv. Mersi Mr Speaker.

 

MR SPEAKER

Mersi Minis.  Onorab Herminie.

 

HON WILBERT HERMINIE

Mersi Mr Speaker.  Pour bann repons kestyon ki in donnen, be Minister savedir fer nou ganny kopi sa tender analysis pour nou ganny en pe konpran akoz i annan sa ladiferans dan 24 pour 6milyon.   Fer Lasanble atraver Speaker.  Epi pou mon lot bout pour mon premye kestyon ou dir mwan 10.3 milyon pour sa apepre pou fer sa building  antye, be sa building i annan pres 18an si mon pe mazinen mon lespri i servi mwan byen.

Eski ou war li i fair pour nou bann Manm Fon Pansyon ki nou tou la, epi tou bann dimoun ki pe ekoute, pou bear Cost en building nef ki annan plis ki 18an? So, mon krwar kekfwa i annan keksoz la ki nou bezwen fer pour nou kapab sakenn i sorti dan en win-win situation.

Epi mon lot kestyon ki mon ti a kontan demande ou’n nonm en pe bann servis ki’n fini ganny tender. Si ou ti kapab donn no en lalis bann servis ki’n ganny tender pour sa nouvo building.  Mersi Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab. Wi Onorab ou annan parfetman rezon mwan mon krwar en building ki annan 18 an, parey mon ti fek eksplike taler dan lesans ki valer sa building?  Ou war?  E mwan osi annan en konfli avek pey 10 milyon pour en nouvo building e letan ou get laz sa lot building ki’n depresye and so on.

So i en pwen ki nou bezwen rekonsilye.  Me Labank Santral i annan en Board son Board in pran en desizyon i le konpansasyon. Pension Fund in pare pou ofer li 2.5milyon i pa oule – so- La, la kot problenm i ete. So mon partaz ou pwennvi. Nou ava regarde ki mannyer nou kapab rezourd sa problenm.

An sa ki konsern bann servis ki pou dan sa batiman, i pou annan en, son dernyen plan i pou annan en basement car park anba  pou apepre 40/ 50 loto.  Pou annan son ground floor e pou annan 4 letaz ek en attic dan sa nouvo batiman Pirates Arms.

E ladan pou annan restoran parey mon’n enform ou; pou annan fast food and take away, pastry shop, cafeteria lo ground floor. E tousala in fini ganny tender e bann biznes in fini konfirmen ki zot pou pran sa.

I annan en letaz pour management en lotel, konmsi son administration sa lotel, i annan casino. Entertainment and gaming ki i osi i pou la dan sa building, e  sa osi in fini ganny donnen.  I annan Minister Finans ki’n pran en floor.  E osi Trezor – ozordi nou dan Capital City, akoz nou ti dan annex, Trezor in sorti in al dan Capital City.

Nou pou retourn la dan ground floor dan en corner e apre i annan 2 floor ki pour le moman i ankor available. Napa kliyan dan sa 2 floor, floor 3 ek floor 4 ki pa ankor allocated.  Me tou lezot in fini ganny allocated on tender, pour sa diferan biznes ki mon’n mansyonn ek ou. A wi i annan en money changer ek en ATM osi la i annan 2, pou annan 6 magazen, 3 bar, restoran pour annan 2 avek en food court, fast food parey mon’n eksplike.  So vwala Mr Speaker larepons.  Mersi.

 

MR SPEAKER

Mersi Minis.  Yes Onorab Herminie.

 

HON WILBERT HERMINIE

Mersi Mr Speaker. Minis pa’n dir nou si nou pou kapab ganny sa tender analysis pour sa award of contract pour piling.

 

MR SPEAKER

Ok, mersi.  Minis.

 

MINISTER MAURICE LOUSTAU-LALANNE

Wi napa problenm mon ava share.  I ok. Mersi.

 

MR SPEAKER

Mersi Minis.  Bon mon sizere nou pran en Break nou ava retournen 11er akoz i reste ankor 6 Manm.  Lalis in fermen mon pa pou entertain okenn lezot nouvo request.  Me i annan 6 Manm ki lo lalis.  nou ava kontinyen 11er avek kestyon pour Minis.

 

                (BREAK)

 

MR SPEAKER

Bon nou ava kontinyen avek nou travay.  Parey mon’n dir mon lalis pour kestyon in fermen. Nou ava, mon pou zis pran sa ki lo lalis la, avan sa mon ava donn laparol Onorab De Commarmond.

 

HON CHARLES DE COMMARMOND

Mersi Mr Speaker. Mr Speaker zis en pti klarifikasyon. Taler letan mon ti koze apre ou lentervansyon la, ler mon’n mansyonn ‘’clerk’’ in annan dimoun ki’n konmans telefonn Clerk pou dir si li ki enplike. Mon le fer kler pa Clerk Lasanble Nasyonal, me nou pe koz constituency clerk. Mon le fer kler, pa sa ki nou vwar la Clerk Lasanble Nasyonal  – nou pe koz serten pito constituency clerk ki nou pe koze.   Mersi.

 

MR SPEAKER

Mersi pour ou klarifikasyon Onorab De Commarmond.  Bon nou ava kontiny nou travay.       E prosennman lo lalis mon annan Onorab Ahmed Afif.

 

HON AHMED AFIF

Mersi Mr Chair, bonzour Minis, bonzour tou dimoun a lekout.  Mon ti a kontan demann Minis Mr Speaker – premyerman si i kapab donn nou en sif konbyen Fon Pansyon ti pe gannyen an term reveni avek building Pirates Arms zis avan i ti demoli? E konbyen in perdi alors, an reveni depi sa letan ziska la ozordi.

Dezyenmman si i kapab dir nou apre tou sa bann evalyasyon, e diskisyon,  negosyasyon avek Labank Santral eksetera, ki zot pe prevwar koman en laranzman final, pour konpansasyon?  E answit kou nou building ki zot pe al fer?  E ler zot donn sa sif zo zot kapab donn son grander e pou sak floor an met kare, pour nou konnen i pe koute finalman.

E si zot annan en evalyasyon – 3enm en evalyasyon pri ki ti koute pour fer sa annex kot Labank Santral si zot annan konbyen in koute? Konbyen met kare i annan dapre plan ki’n ganny soumet avek Fon Pansyon? Mersi.

 

MR SPEAKER

Mersi Onorab Afif.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pour ou kestyon. Onorab parey nou ava rapel vye Pirates Arms Fon Pansyon ti aste sa building 2008.  E i ti pey R20milyon sa lepok.  E depi 2008 ziske 2015 letan bann tenants ti sorti, tou le lannen i ti fer en profi lo sa loperasyon e son total lo sa peryod 2008– 2015 i R24.3milyon. E i varye son profi ant 2.8milyon.

Par egzanp an 2008 in mont ankor en pti gin an 2009, in mont ankor en pe plis an 2010 pou ariv 3.2milyon e in ariv  menm 3.3milyon an 2014  e apre an 2015 in bese akoz in annan enn de biznes ki’n sorti.

So, pour son lenvestisman 20milyon apre sa peryod in nobou fer en profi 24.3milyon. So sa i repons premye kestyon.

Mon a pran 3enm kestyon mon napa kou ki sa CBS Annex in koute mon ava fer sir mon gannyen mon a donn zot. Selman mon konnen i apepre 5 met larzer lo en long 20met, i annan plizyer floor.  So i apepre- son footprint i 5 par 20 apepre approximately.

Ozordi sa plan nouvo Pirates Arms parey mon’n dir i ground plus  four and a half. Basement car park 2 floor in fini allocate lo tender donk nou konnen ki son rent pou ete.

Donk i annan 2 floor ki i ankor available parey mon’n deza mansyonnen. E son kou sa lenvestisman, i en kou ki’n ganny kalkile entern en, akoz nou pa ankor tender parey mon’n dir. Me nou annan nou serten kou ki nou’n deza siny kontra, parey  bann arsitek ek bann enzenyer bann QS – bann MEP sa bann konsiltan ki mon’n koz lo la deza. So, nou konnen konbyen nou bezwen pey zot e nou’n met en contingency osi e sonm pour enflasyon.

E ozordi en sonm aproksimatif, ki mon kapab donn ou,  i pou apepre  ant 350 a 375 milyon, apepre.  Selman sa parey mon pe dir ou i entern nou pa kapab et pli presi ki sa. E alor letan nou regard bann rent ki nou’n fini tender e larzan ki i pou anmennen pour nou, e lo sa 2 floor ki nou pa ankor allocate, nou’n met en rent ki nou pe rode.  Akoz mon anvi fer resorti se ki rent ki nou’n tender ki’n sinyen ki sa bann biznes ki mon’n mansyonnen i bokou pli o ki sa rent ki nou pe rode. E ozordi letan mon regard bann estimasyon si nou pran on the lower side – Fon Pansyon pou prezan ek nouvo Pirates Arms anmas li minimum R30.8milyon – minimum.

E pour sa nou kapab achieve rate of return  7 poursan lo en peryod en  payback    – pou 15 an pour sa lenvestisman apepre. Me parkont si nou pran rent ki nou’n deza tender ki nou’n konfirmen nou’n sinyen avek sa 2 floor i kapab monte ziska 46milyon, 46.7 annefe milyon. E la nou pe koz 12 percent lo en pay back 8an. So sa ki mon pe sey dir se ki se en biznes ki pou profitab dan sa ka spesifik.  Mersi Mr Speaker.

 

MR SPEAKER

Mersi Minis.  Onorab Afif.

 

HON AHMED AFIF

Mersi Mr Speaker. Mr Speaker zis en komanter pour konmanse.  Baze lo sif ki ou’n donnen zot pe fer anviron R3.5 milyon zot ti pe fer sa lepok par an lo sa building. 24milyon pandan 8an oubyen 7an vwala. Savedir zot in perdi ziska ozordi anviron R13.7milyon, ki $1milyon akoz desizyon ki zot in pran. Ozordi Pansyoner in perdi $1milyon an term reveni.  Sa i en fe,  baze lo zot sif.

Dezyenmman mon trouv li drol ki zot napa grander sa building ki zot pe al fer.  zot bezwen annan. Zot ti’n fini revize mon ti pe rode konbyen met kare presiz i ete, si i ariv 375 nou a konnen konbyen met kare i arive.

Trwazyenmman ou pa’n reponn mwan ki grander sa batiman Labank Santral Annex i ete?

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab. Eskiz mwan mon pa’n donn ou sa bann lenformasyon.  Mon kapab konfirmen ki sa nouvo batiman prezan son built area i 13, 414 met kare. Me son area ki nou kapab rent i 9,064 met kare.  Setadir apepre 68 poursan sa batiman i rentable. Akoz parey nou’n dir osi, ti annan bann input ki Manm Gouvernman serten Manm Cabinet ti pe diskite.

Akoz ti annan en Komite kot serten Manm Cabinet ki ti pe lo sa Komite, mon krwar serten sa bann Manm nepli la ozordi – zot ti fer bann sanzman pour anmenn en arsitektir plito kreol avek bann lavarang bann lespas ki pa kapab rent.  So, se akoz de sa ki ou war i annan sa disparite ant sa 13mil avek sa 9 mil ki mon fek mansyonnen. So, vwala Mr Speaker sa groser batiman dan son met kare.  Mersi.

 

MR SPEAKER

Mersi Minis.  Onorab Afif.

 

HON AHMED AFIF

Zis en dernyen kestyon Mr Speaker mon ti a kontan, baze lo sif ki ou’n donnen mon pe ganny mwan R27mil par met kare pour sa batiman. Eski zot trouv sa normal vi ki dan lavil? Bokou batiman i ganny konstri pour R15mil met kare, sirtou bann batiman komersyal.  Sa i preski 2 fwa.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mr Speaker, Onorab Afif in mansyonn en sif mon pe get detrwa building ki’n konplete resaman avek bann building ki’n fer en pe pli letan pase.  E bann building ki’n fer par Fon Pansyon li menm.  Letan mon regard par egzanp sa building SEYPEC ki ti fer an 2011. Li sa lepok i kout R18,400mil met kare. E Fon Pansyon li i ti fer sa Maison Colette an 2015 e sa lepok ti kout R14, 656 met kare i donn ou zis en marz.

E letan nou get sa building Laxmanbhai an 2017 dan lavil Victoria nou’n sey rode difisil pour lezot donn nou. Me letan nou’n koz ek Nouvobanq war nou’n annan en sif pour Nouvobanq e nou pe estimen avek bokou konfidans ki i pe tourn otour R29mil met kare.

So Pirates Arms li annefe mwan mon kalkil i donn mwan R21mil – R21, 200 par met kare. So, vwala en pti pe mon partaz ankor en pe sif ek ou, zis pour donn ou en perspektiv kote nou ete.  Me i pou subject pour tender, nou a regarde ki nou gannyen.  Mersi Mr Speaker.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker, bonzour Minis ek ou delegasyon, bonzour tou Manm.  Minis, pour benefis bann manm deor, zot pe tonm bann gro sonm ki par egzanp sa 10milyon ki si Fon Pansyon i deside al dan sa direksyon sa gro sonm pou sorti dan kof. E mon ti a kontan ki Minis ou eksplike, ki fason ki sa bann sonm pour retournen pour konfort bann Manm. Pour zot ganny en nide be ki mannyer pour retournen sa bann larzan?  Sa mon premye kestyon.

Mon dezyenm kestyon lo sa kontra ant Fon Pasyon avek Vijay, ou’n nonm en konponan lasirans, me selman nou ti a kontan ki sa Lasanble i ganny sa detay kwa ki detaye dan sa Clause pour sa sonm lasirans si sa sityasyon ki’n arive avek annex i enkli ladan?

Akoz parey nou konnen ler nou koz lasirans a lafen dizour i depan ki kondisyon ki annan dan bann Clause ki pour kapab reponn sa problenm ki arive.

So, la pour nou i pa kler akoz nou pa konnen dan sa Clause lasirans kwa ki kouver ladan ki Vijay ti devret pran responsabilite. Si nou kapab ganny en leksplikasyon lo la silvouple? Mersi.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab. Onorab parey mon’n mansyonnen pour le moman nou pa ankor ariv lo en sonm final – si pou pey konpansasyon. Sel sonm konpansasyon ki Fon Pansyon in pare pou peye se 2.5milyon.  E parey mon’n eksplike sa tou le fason i dan son Bidze contingency pour sa proze.

Alor parey mon’n fek share en pe sif avek Onorab Afif i montre klerman ki lo bann rent ki nou’n deza allocate avek bann biznes on tender, set en lenvestisman ki profitab pour Fon Pansyon e nou kapab dan en lespas 8 an re-pey tou avek sa profi ki nou pe fer.  So, i en keksoz ki bon pour Fon Pansyon envestir ladan. Donk sa proze i demontre i kler.

An sa ki konsern lasirans;

sa lasirans i kler.  I dan Kontra ki’n ganny sinyen e i annan osi en eleman kot si i annan domaz i bezwen peye domaz me ziska en sonm limit R10milyon. E parey ou konnen ou nou pe koz R10.3milyon ki annan sa claim Labank Santral.  So i well within si ou le sonm ki Kontra i determinen.

So, pour le moman anba kontra i sanble mwan ki tou lede sa bann keksoz i ganny covered.  Nou pa expose, akoz i dan Kontra.  E se akoz sa ki nou pe rod sa dimoun eksteryer pour vini pou donn nou en konklizyon final. Mersi Mr Speaker.

 

MR SPEAKER

Mersi Minis.  Onorab Egbert Aglae.

 

HON EGBERT AGLAE

Mersi Mr Speaker.  Minis bonzour ek ou delegasyon, mon ti a kontan konnen – anvi ki Vijay li i pa pare pou pran sat a responsabilite pour sa bann devlopman ki pe arive.  E ou, ou p koz lo arbitrasyon ki bezwen ganny fer pou kapab tonm lo en konklizyon – ok?   E vi ki kontra ki Vijay sa 6milyon pou sa piling project, ki pou arive si demen keksoz i trenn lipye i pran bokou letan kot ou bezwen arbitrasyon pa’n marse.

Ou bezwen al Ankour pour fer settlement e by then Vijay Kontra i kapab ekspire tou nou pa konnen kantite letan. Eski si Vijay i vini li menm li prezan i pou vin serten claim pour ou kapab pey li pour sa bann letan. Sirtou i annan loss of earning ki kapab vin avek, pour sa bann lekipman ki la, lo site, ki mannyer zot pou met zot pare pou deal avek sa bann evantyalite parey?  Mersi.

 

MR SPEAKER

Mersi Onorab.  Minis.

 

MINISTER MAURICE  LOUSTAU-LALANNE

Mersi Mr speaker Mersi Onorab, Onorab mwan mon plito optimis. Nou’n donn en dele letan la par Desanm 2019 fodre ki louvraz in tender e pe al konmanse early 2020. E nou tou dimoun nou pe travay avek sa sel bi pou fer sir ki nou’n nobou fer sa arive. Nou’n deza rod en arbitrer e nou pe al propoz avek Vijay e mon kapab konfirm avek ou ki msye Vijay Construction in ganny son let sorti kot Fon Pansyon in dir li se sa ki nou pe al fer.

E prezan zot pou bezwen rekonsidere si zot pou aksepte sa zaponnen oubyen si zot pa pou aksepte sa zaponnen.  Apre nou ava pran sa bann lezot letap parey nou’n eksplike pou fer sir ki nou annan en konklizyon pour sa zafer.  So, sanmenm tou mon kapab dir ou nou pa ankor regard pli lwen ki sa pour le moman. Ou pwen i valab, ou komanter i valab, me fotespere ki nou pa arive laba. Mersi bokou Mr Speaker.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker mon ti a kontan demann Minis avek bann zofisye Fon Pansyon ki la devan nou. Prenon kont tou sa bann retar ki pe ganny fer avek sa proze, eski zot in met en si ou kapab apel en projected item frame. Pour ki zot kapab fer sa devlopman, akoz la deor i annan en kantite dimoun ki i annan sa devlopman e lakantite bann cruise ship ki pe antre dan Victoria sa landrwa ti en landrwa kot bann dimoun ti kapab frekante.

So, eski zot pe met en projected timeframe pour ki i annan en serten entansite e lenportans i ganny donnen avek rezourd sa sityasyon? E dezyenmman ler sa proze in fini devlope what is the expected return? Pa donn nou poursantaz Minis.  Kanlifye, dir nou konbyen egzakteman nou pou ganny avek sa proze e son benefis si ou le tanzib ki nou pou gannyen an konparezon avek sa ki nou ti pe gannyen avek Pirates Arms oparavan? Mersi Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab pour ou kestyon. Onorab lo ou premye kestyon, idealman nou ti a kontan ki  sa arbitrer ki nou pe propoze i ganny aksepte i kapab konmans son travay. Normalman i pou pran li ziska 3 mwan, me tou le fason si i annan dele nou pe anvizaze pa plis ki 12 mwan. Se pour kwa mon pe dir ou la ki mwan mon anvi ki nou tender sa proze dan Desanm 2019, pou louvraz konmanse dan Mars 2020.  Letan sa arbitrer i donn son desizyon i final, napa desizyon ankor, so tou parti konsernen i bezwen aksepte sa desizyon sa arbitrer letan i donnen.

Konstriksyon pou pran li en pe plis ki 2an pou fer sa proze e nou pe anvizaze tou zafer in plante bann siny in mete, semen i ganny aranze whatever it is. Dimoun i anndan, pou ouver an Desanm 2022.  Donk vwala si oule sa time frame ki mon pe commit ek Lasanble ozordi.  Fotespere apre zot pa dir be la, la manter ankor la. So, sa i enn Mr Speaker.  E parey mon’n mansyonnen, sa proze lo son minimum si zafer pa dan nou faver nou pou fer nou R31 annual gross rent.

Sa on the lower rent, si nou met R5milyon pour nou antretenir nou batiman, nou pou fer nou en net 25.8 milyon. E parey mon’n dir sa pou pran nou i pou en return 7 poursan i pou en return 15an pou pay back. Me parkont nou, nou santi ki nou kapab ganny – avek sa bann tender ki nou’n deza fer, sa expected rent lo sa 2 floor ki nou pa ankor allocate e sinyen – siny Kontra,  I pou varye ant 46.7milyon i i kapab menm ariv ziska 51.7milyon. E dan sa ka nou payback pour dan 8an e nou return i pou 12 poursan. So nou annan sa fourset rent.  Me pour le moman 46.7 i nou hand on heart agreed rent income ki nou pou gannyen.  Mersi Mr Speaker.

 

MR SPEAKER

Mersi Minis. Onorab Pillay.

 

HON SEBASTIEN PILLAY

Mersi Mr Speaker, eski sa i vedir ki zot pou fer bokou plis ki sa ki zot ti pe gannyen actually avek building Pirates Arms.

 

(Off-Mic)

 (Be ou Minis ou…?)

 

MR SPEAKER

Kontinyen Onorab.

 

HON SEBASTIEN PILLAY

Mon lot kestyon  mon  an vi demann Minis, prenon kont ki proze pe prezan ariv ziska 2022, zot in fer bann prozeksyon in-house lo kou ki sa pou arive. Sa kou ki ou’n mansyonn R21mil par met kare, sa i zot prozeksyon in-house, i pa the actual cost of sa proze, ok?  Sa ki mon ti a kontan konnen prenon kont ki zot pe fer sa bann prozeksyon, eski – e osi mazin lenportans stratezik sa landrwa zot pe osi konsider enkli par egzanp lespas pour ki i annan bann artis, craft bann keksoz koumsa dan sa landrwa. Kk ava fer li vin en hub pour ki ler dimoun i vin vizite – etranze, i ava annan en keksoz pou fer dan lavil Victoria e nou ava aret tann sa bann konsern ki apre serten ler lavil Victoria i mor. E sa i ava tie-in avek Mosyon ki’n ganny met lo latab Lasanble la,  se  ki konsern pou move bann lofis Gouvernman isi, e pour fer lavil Victoria vin Commercial Capital of the country parey nou Gouvernman in toultan antisipe pou fer li dan bann plan ki zot in annan oparavan. Mersi Mr Speaker.

 

MR SPEAKER

Mersi Onorab Pillay.  Minis.

 

MINISTER MAURICE  LOUSTAU-LALANNE

Wi, mersi Mr Speaker, Mersi Onorab. Onorab definitivman nou’n osi met en contingency apre nou’n osi met en kou pour lenflasyon. So, nou’n take care of sa de likely cost increases.  E wi i annan 4 stall pour bann artisan dan sa batiman osi,  pour zot vin vann handicraft zot bann zafer sa osi in vin ganny prevwar dan sa batiman.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN  

Mersi bokou Mr Speaker. Mr Speaker mon’n ekout en kantite, en kantite keksoz in ganny dir.  Mon ti ava kontan aprezan si Minis i a dir avek nou serten keksoz. Ki responsabilite dan milye tousala ki Seychelles Pension Fund i pran pour lapenn ki li i pa’n siperviz tou sa bann travay dan la fason ki i ti devret sipervize? Premyerman;

Correct piling, eski Pension Fund in, ti zwe son rol pou asire ki sa kalite piling ki pe ganny fer i vreman apropriye?

Dezyenmman lasirans ki Vijay Construction ti pran, eski Minis i kapab dir avek nou, si i annan en diferan dan Kontra ki Vijay ti sinyen avek Pension Fund pour sa sonm R10milyon? E egzakteman ki lasirans ki iti pran?

E mon ti ava kontan la deswit demande pour nou Lasanble ganny en kopi sa lasirans ki Vijay Construction ti pran. Sa i 2enm.

Mr Speaker eski Pension Fund pou aksepte ki pou dir ki i annan en kantite sa bann defo, sa bann problenm ki nou pe pas ladan ozordi, apre se pa konbyen lannen ki nou ankor pe esper sa batiman fini ki Pension Fund li menm li i ti okouran me zot pa’n pran aksyon kan ti devret pran; Management Pension Fund.

Mr Speaker la mon pou osi lanm Planning Authority, Planning Authority i annan en rol dan sa zafer CBS building akoz la mon’n ganny 2 dimoun ki’n anvoy mwan lenformasyon. 1 se en enzenyer, dezyenmman se en arsitek ki dir ki Planning Authority pa ti devret donn CBS pou konstri sa batiman pou fer zis en raft foundation akoz efektivman sa CBS building set en batiman ki pe flot lo labou!

E alors i ti kler ki pou dir ki i ti pou soz, baze lo la e Minis in mansyonn sa pli boner kot, baze lo la Vijay i pa’n fer sa kalite piling ki ti devret fer, akoz sa lot ki mannyer ti ete.  Ti pou napa problenm si CBS Building ti lo proper piling, me konmsi pour mwan i sad vreman ki nou pe koz 2 batiman ki pou Gouvernman e ki Planning Authority ankor enn fwa i annan en rol pou zwe ladan.  E finalman eski Minis i kapab dir nou Lasanble si in deza annan okenn problenm ant Vijay Construction avek Seychelles Pension Fund lo en  travay piling ki in deza fer oparavan e ki i pa ti lo standar? Konfirm sa avek nou silvouple.  Mersi bokou Mr Speaker.

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab Leader Lopozisyon pour ou bann kestyon.  An sa ki konsern sipervizyon par Pension Fund mon konfirmen ki pandan letan normal, sa supervisory team definitivman in fer son louvraz parey mon ti dir. Me i sanble mwan ki – non les mwan azoute ki osi pandan sa peryod piling ki ti konmans fer la mi Desanm,  ti napa okenn domaz, me domaz in ganny okazyonnen dan sa peryod le 31 Desanm, le 01 Zanvye, le 02 Zanvye. Le 03 Zanvye Labank Santral ti dir nou vin gete laport pa ouver batiman in dekole.

E donk pandan sa peryod mon konfirmen ki Vijay Construction pa ti dir sa tim supervisor Pension Fund ki i ti pe al fer sa travay. Donk ti napa personn ki ti pe siperviz sa louvraz e se la ki domaz ti’n arive.

Osi sa kalite metod ki’n ganny itilize pou fer sa piling ti ganny diskite e ti ganny aprouve par konsiltan Pension Fund e osi par Lotorite Planning. Sa osi mon krwar i en keksoz ki mon bezwen konfirmen akoz sa ti’n ganny aprouve.  An sa ki konsern, e eski i ti apropriye ou pa wi akoz i ti ganny apropriye akoz i ti ganny aprouve. E parey mon eksplike right from the start ti annan 2 fason fer li an menm tan e tou lede i servi menm lekipman.

So, nou pe speculate ki a en moman donnen ant sa 3zour la, kekfwa en lot metod in  kapab ganny servi ki’n a kapab okazyonn sa domaz.

Lo lasirans wi Mrs Nair pe rod sa dokiman akoz i ti anba mon lizye ( ok i la), e mwan mon pare pour mwan partaz sa dokiman pour zot war. I annan 2 eleman lo kote lasirans i dir efektivman ki i bezwen anba sa lasirans ‘’…indemnify the employer against all claims, for injury, damage caused by the Collapse, Subsidence, Heave Vibration, Weakening, Removal and …. ‘’so on it goes on and on. So, i kler.

Mannyer mon konpran in annan en lasirans ki’n ganny pran pour R2milyon.  R2 milyon roupi mannyer mon konpran, e osi i annan domaz ziska en sonm limit R10milyon ki bezwen peye dan en ka koumsa.  Me mon ava fer sa dokiman available pour zot. Mon krwar ki an sa ki konsern si Pension Fund pa’n pran okenn aksyon e osi ki Planning Authority i responsab.

Ou konnen se sa dilenm ki nou ladan, e se pour kwa ki mon prefer ki sa i ganny arbitre endepandaman. Pour nou konnen.   Akoz ler ou get sa sekans apre domaz in ganny sertifye tre vit apre, Planning Authority in donn en Stop Notice. Akoz  in santi ki i annan en keksoz ki’n al mal. E Stop Notice ziska ozordi i ankor in force.  In pran tor bokou letan – 1 an pour 2 Departman Gouvernman, annou apel li koumsa, pou sey ariv lo en solisyon.

E parey mon’n dir tou lede i annan bann Board endepandan ki tre for e sakenn i annan son pozisyon. I montre osi kote nou’n arive dan sa sityasyon, nou devlopman in arive ozordi, me nou kapab lot swa. E konfye sa louvraz a en dimoun endepandan.

Mon krwar Mr Speaker mon’n pli ou mwen fer letour e donn larepons preski tou bann kestyon ki Onorab Ramkalawan in poz mwan. Mersi Mr Speaker.

 

MR SPEAKER

Mersi Minis.  Onorab.

 

HON WAVEL RAMKALAWAN  

Mr Speaker mon anvi Minis i konpran mwan byen. Lo sa zafer lasirans mon anvi Minis i fer en distenksyon, en distenksyon kler ant Kontra ki Vijay Contruction in fer avek Pension Fund dan relasyon avek ki kalite lasirans ki i pou bezwen. E lo en lot kote, kopi lasirans ki Vijay in pran avek sa lakonpannyen lasirans.

Se sa ki mon pe rode mwan.  Parski, se sa ki mon pe rode akoz sa ki Minis pe dir sa i dan Kontra e ki pou kouver ziska 10 milyon ki i pou bezwen rode. Me eski sa lasirans ki in aktyelman peye, i kouver ziska 10milyon? Parski pour mwan mon pa war li i fer sans si i annan tou sa bann problenm. Si kontrakter in pran en lasirans ki pou kouver ziska 10 milyon pour bann domaz ki kapab arive, e efektivman in ariv en domaz e lasirans i kouver.

Akoz i bezwen annan problenm? Pa devret annan problenm nou vini nou dir lasirans get sa mon’ pey lasirans pou tan, in arive tel problem e alor ou pey parski mon lasirans i kouver.

So mon ti ava kontan ganny sa 2 keksoz la kler.  E sa ki Minis in dir konsernan piling, an menm tan i enteresan parski ou’n ki i annan se pa 14, ou’n nonm en chiffre  sepa bann piles ki’n fini mete.

Wi be parski sa bann piles ki’n fini mete se s bann ki pli lwen avek batiman CBS.  Sa en la ki letan mon pase mon war li i anter lanmwatye, sa bann la i pli pre avek batiman CBS.  E Mr Speaker mwan en keksoz ki mon pa ganny en konpran se ki nou pa aprann leson.  Ka ti pe fe batiman Nouvobanq piling works kot Nouvobanq i ete ozordi, ti afekte tou sa batiman kot Lakour. Ti afekte tou sa batiman kot Lakour.  E ozordi sa bann batiman, Lakour Mazistra in bezwen bouze akoz batiman i unsafe.

Be konmsi 50 met pli lwen – 50 met pli lwen nou pa tir okenn leson? E pour mwan Mr Speaker mon retourn lo sa size, lasirans kler pour nou konpran. E i annan en lot kestyon ki Minis pa’n reponn mwan, eski in deza annan okenn problem ant Pension Fund avek Vijay Construction an relasyon avek previous piling works ki sa lakonpannyen in fer pou zot?

E pour mwan Mr Speaker mon trouv li i vreman sad ki ozordi 2 batiman ki pou Gouvernman. Minis pe dir avek nou la nou bezwen al fer zapon, nou bezwen al fer zapon e mon bezwen dir i resanble ki nou annan en gouvernman ki pas tro bokou letan ‘’fer zapon.’’ E se pour sa rezon ki in ler pour nou ganny en keksoz ‘’NEF’’ solid.  Mersi bokou Mr Speaker.

 

 

MR SPEAKER

Mersi Onorab, mon ti krwar ou pe al dir nou annan en Gouvernman ‘’Zaponnen.’’

 

HON WAVEL RAMKALAWAN

Mr Speaker set en zaponnen ki fer zapon.

 

MR SPEAKER

Petet zis pou fer Lasanble sa sityasyon osi ti ariv kot batiman ‘’Sound & Vision’’ ler Teemolji ti pe fer piling. Ler batiman Teemolji osi ti pe fer piling, Minister laparol i pou ou.

 

MINISTER MAURICE LOUSTAU-LALANNE

Mersi Mr Speaker, mersi Onorab pour re-pozisyonn en pe ou bann kestyon. Wi ti annan detrwa bann pti problenm piling avan, ki ti arive lo proze Perseverance apartments.  E sa bann ti plito minor ti ganny dekouver boner. E apre close supervision ti ganny rektifye apre.  Me wi mon konfirmen ki ti annan sa problenm.  Ou annan rezon soulve sa kestyon.

An sa ki konsern, mon ti koz lo sa dilapidation report ki ti ganny fer.  E esansyelman se en boug ek en camera i pase partou in get en pe bann building – in tir portre bann building avan ki sa piling work in konmanse. E apre ki in konmanse, i annan detrwa propriyeter bann batiman dan le zalantour ki’n – pa fer  en claim me ki in apros Fon Pansyon in dir ki ekoute mon batiman pe crack.

In annan 2 ka ki ti vin devan e dan toul ede ka sa bann portre ki ti’n tir avan ki piling work ti komanse in nobou montre ki ti deza annan crack. Alor zot  pa’n pursue.   Enn i Capital City e lot ti la kot Mize i ete la. So nou ti’n nobou deal avek sa e se ankor rezon akoz i enportan nou annan sa dilapidation report avan nou konmanse.

Wi, Vijay Construction dapre sa Kontra i bezwen a rod sa lasirans li menm. Mon napa kopi la, mon ava fer sir ki nou al rode nou al konsilte nou al regarde me mon napa kopi. Kontra i demande ki i annan sa lasirans, me mon napa this available la, pour mwan anmenn en pe plis leklersisman lo sa size.  So, mon ava osi fer sirkil sa kontra ant Vijay ek Fon Pansyon tou le fason, apre kan mon ganny sa lot mon a fer sirkile.

 

MR SPEAKER

Yes, Onorab Ramkalawan.

 

HON WAVEL RAMKALAWAN

Mr Speaker me selman lefe ki in annan tou sa bann problem e Fon Pasyon i reprezante la – lefe ki i annan tou sa bann l problenm negosyasyon ensidswit. Eski nou pa kapab ganny en larepons kler la ki pou dir si sa lasirans ki Vijay in pran, in aktyelman pran by now mon mazinen 1an ou pe negosye.  At some point in  bezwen annan en dimoun ki’n dir avek li be oli sa lasirans ki ou’n pran? Parski Mr Speaker – Mr Speaker, mwan mon anvi dir avek Minis ki sa larepons i en ‘’lelefan dan lasanm!’’ This is the elephant in the room, e Minis letan ou ava regarde ou ava dir that’s the elephant in the room se ki lasirans ki’n ganny pran pour konstriksyon sa batiman, i pa kouver sa bann domaz!  Mersi bokou.

 

MR SPEAKER

Mersi Onorab.  Minis ou le fer komanter, si non nou ava pran lot kestyon.  Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab. Mon’n ekout Onorab atantivman lo sa dernyen pwen Mr Speaker mon fer li mon devwar pour mwan rod sa lasirans, pour mwan konsilte sa lasirans ki in sinyen.  Akoz i pa pou normal ki napa nanryen oubyen si i annan i enferyer.  Mersi bokou Mr Speaker.

 

MR SPEAKER

Mersi Minis.  Bon mon ava zis atir latansyon bann Manm lo letan, letan pa dan nou faver. Mon annan Onorab Simon Gill e apre mon a donn dernyen kestyon Onorab De Commarmond. Onorab Simon Gill.

 

HON SIMON GILL

Mersi bokou, Mr Speaker pour loportinite pour kestyon. Mr Speaker mon osi mon’n ekout byen bann repons ki Minis in donnen depi bomaten e mon annan en konsern. Minis i la e in dir nou pou dir Fon Pasyon avek CBS, sa 2 lenstitisyon si mon kapab servi sa term, zot tou lede zot annan sakenn zot Board.

E zot Board i for, zot tou lede zot ‘’endepandan’’, e zot tou lede zot pe ‘’stand zot ground’’. Enn i dir mon pa ou le underpinning konman solisyon pour sa baskile, ki’n baskile. Enn i dir ‘’non si ou pa pran nou, nou krwar ou devret pran. ’E la si ou pa pran nou ava al rod en refri. E sa refri li i pou en refri endepandan ki a in refri sa match.’’ E ler sa refri in soufflé la in final la tou lede a dakor. Kestyon Minis ou napa konmsi en Lotorite pou ou dir ek a 2 lenstitisyon kantmenm zot 2 Board i for pou dir get sa la annou aret trenn nou lipye nou pe koz pansyon le pep.  Nou bezwen fer sa devlopman annou arete sa bann ale vini? Sa i premye kestyon.

2enm kestyon ki Minis ti ava byen i reponn ki bann konsekans ki bann problem ki kapab arive si atraver ou Minis ou dir avek CBS get sa mon pe assume la letan mon pe poz sa kestyon dan sa CBS Annex napa dimoun ladan, napa personn ki fe fonksyonnen sa bout. Nou dir nou demolir net nou pran tou ban prekosyon neseser tou bann teknolozi neseser nou demoli sa CBS Annex e Gouvernman i dir avek zot napa konpansasyon pou pey personn.

Annou bouze avek sa proze pour ki nou Fon Pasyon, Fon Pansyon lepep Seselwa i ganny garde entak e napa naryen pou peye ladan. Sa bann dimoun ki ti la nou rod lot landrwa nou mete, mon pe dir ankor Mr Speaker atraver ou ki konsekans pou annan? Ki bann lobstak pou annan si nou pran en pozisyon koumsa? Nou demoli e sa lespas ki reste Gouvernman i deside ki pou fer.

Si fodre re-survey landrwa i ganny re-survey, si fodre pran li al join li avek Pirates Arms pou cater pour lezot lespas pour sa devlopman nou fer li!  Ki problenm pou annan?  Mon ou le en repons lo la!  Mwan konman en dimoun ki pey pansyon mon ou le en repons, e mon ou le ki sa proze i bouze e nou aret trenn lipye – CBS Board, avek Board Fon Pansyon – please annou bouze!  Mersi bokou.

 

MR SPEAKER

Mersi Onorab.  Minis.

 

MINISTER MAURICE  LOUSTAU-LALANNE

Mersi Mr Speaker.  Mersi Onorab pou ou kestyon. E avek ou propozisyon pou al de lavan de pli vit posib.  Wi par ler ou bezwen donn en pe letan pou sey trouv en solisyon e letan ou pa ganny sa solisyon akoz tou lede parti pa pare pou der en konpromi,  i bon annan en pti pe en diktater i enportan ou bezwen tir en laliny e donn en Lord.

Anyway mwan mon’n servi’’ diktater’’ si oule servi en lo sa en lot zafer. Non ou konpran ki mon pe sey dir, mwan osi mon dakor ki ou pa kapab esper leternite, pour nou fer marse en proze ki nou konnen pou anmenn nou profi. I bon pour nou, i bon pour nou sosyete pansyon and so on.

So, pour mwan reponn ou kestyon mon pou take onboard the challenge, akoz mwan mon’n koz en kou ek sa 2 madanm, ou konpran. E mon pa ankor vin en diktater sa 2 madanm.  So, san menm tou mon kapab dir ou la. Nou ava fer le maximum pour nou respe sa time frame ki mon ti donn Onorab Pillay akoz la my neck is on the block.  Mersi bokou Mr Speaker.

 

MR SPEAKER

Mersi bokou Minis mon a donn dernyen kestyon Onorab De Commarmond

 

HON CHARLES DE COMMARMOND

Mersi Mr Speaker.  Mon byen kontan ki mannyer sa bann kestyon in deroule. Zis mon ti kontan fer sorti Mr Speaker ki dapre kontra, mon krwar ki sa kestyon lasirans i tre enportan dapre Kontra. Si sa kontrakter ti pran sa indemnity  insurance i pou demann li osi en kopi Kontra. E i pou war lo Kontra ki sa Kontra pe dir pou sa lasirans i ganny fer.

Alors i enportan ki ou donn nou sa bann lenformasyon kot i konsern lasirans en. E Mr Speaker eski Minis i kapab dir nou si ti annan en problenm avek vye building Pirates Arms ki zot ti bezwen kraz li pou fer sa nouvo plan? Sa enn epi lekel Chairman Fon Pansyon pandan letan tou sa bann roulman ki zot pe dir la in arive, ti arive? Lekel ki ti rod sa konpannyen Sid Afriken pou vin fer sa analiz lo bann domaz. Letan ti annan sa claim, letan nou war ki Central Bank Building annex e son lot building i konmans tilt – i konmans annan problenm.

Lekel ki ti rod sa konpannyen Sid Afriken vreman konmsi, par dir nou laverite pou vin fer sa analiz lo la, pou donn sa rapor. E an pasan pou fini mon ti a voudre remersye e felisit Chairman Fon Pansyon Aktyel pou take charge of sa sityasyon.  E ansanm avek ou Minis pou donn en koudmen pou war en solisyon pour nou la de lavan avek sa proze Fon Pansyon ki konsern nou larzan, larzan le pep Seselwa.  Mersi.

 

MR SPEAKER

Mersi Onorab. Minis.

 

MINISTER MAURICE LOUSTAU-LALANNE

Mersi Mr Speaker.  Mersi Onorab. Onorab wi sa vye Pirates arms Building ti annan problenm striktirel parey mon’n dir ti annan problenm safety. Ti annan en risk dife ki ti tre enportan e wi ti annan lera, ti annan desarz, ki nou ti bezwen toultan ponpe a en kou enportan. So, nou ti napa lot swa pou tir sa building.  E parey mon’n fer resorti se sa bann dimoun ki ti la osi, zot in ganny letan pou sorti.

In ganny fer en fason sivil, nou pa’n pous personn, nou pa’n target personn pou fer sa. Chairman ki ti la dan sa peryod Mars ziska Septanm ti Mr Palmer, Mr Edwin Palmer ki ti la.  E repons a ou lot kestyon se ki sa Ground Africa ki ti ganny anmennen apre ki problem ki ti’n ganny agrave, se Fon Pansyon ki ti rod sa konpannyen endepandan akoz parey mon’n dir ti napa ekspertiz isi.

Me avan i ti fer sa i ti pran kontak avek Labank Santral pou ganny aprouvasyon Labank Santral pour ki sa konpannyen i kapab osi vini akoz i bezwen al dan sa annex building pour li fer son ekspertiz la osi.   So si ou le i ti en desizyon konzwent ant Fon Pansyon avek Labank Santral pou fer entervenir sa Ground Africa.  E apre li Labank Santral in deside rod son konpannyen Cundall &Johnston Partners LLT sorti Dubai separeman.  Mersi Mr Speaker.

 

MR SPEAKER

Mersi Minis.  Yes onorab De Commarmond.

 

HON CHARLES DE COMMARMOND

Savedir sa konpannyen eski Fon pansyon ki’n peye? Eski Fon Pansyon ki ti devret peye?

 

MR SPEAKER

Mersi Onorab.  Minis.

 

MINISTER MAURICE LOUSTAU-LALANNE

Wi, mon konfirmen, larepons i wi pour tou lede kestyon.

 

MR SPEAKER

Mersi Minis. Onorab Ramkalawan.

 

HON WAVEL RAMKALAWAN

Mr Speaker, mon ti ava kontan Minis fer en klarifikasyon akoz mon krwar i annan en lenformasyon ki’n donnen la ki pa bon.  An relasyon avek Mr Palmer, letan ti pran tou sa bann desizyon sete pa Mr Palmer ki ti Chairman Board sete SS Payet ki ti Chairman Board!  Mersi bokou.

 

MR SPEAKER

Mersi Onorab.  Minis, klarifikasyon.

 

MINISTER MAURICE LOUSTAU-LALANNE

Wi, wi, wi, mersi Mr Speaker.  Mr Speaker sa ki mon ti dir, mwan mon’n tann li koumsa lekel dernyen Chairman letan sa bann zafer ti pe deroule. Mwan mon’n dir depi Mars ziska Septanm se Mr Palmer ki ti Chairman, me si ti avan, be i en lot.  Mr Palmer li i ti la peryod Mars 2018 ziska Septanm 2018.  Mersi Mr Speaker.

 

(Interruption)

 

MR SPEAKER

Order!  Order!  Order!  Order!  Mon asire i annan serten Manm pa ni menm tande ki Minis in dir. Ok?  Mon’n donn laparol Minis alors annan en pti pe sa respe pour li – ok. Minis mon ti a kontan petet pour klarite and all that, ou repet sa dernyen pti bout with regards to dernyen chairman ki ti ansarz pour Pansyon avek letan osi tou sa bann mwan ki ou’n mansyonnen.  Minister.

 

MINISTER MAURICE LOUSTAU-LALANNE

Mersi Mr Speaker mon larepons letan kestyon ti ganny poze ki ti past Chairman Fon Pansyon e mwan mon ti dir ki Mr Edwin Palmer, ti past Chairman pour peryod Mars a Septanm 2018.  Mersi Mr Speaker.

 

MR SPEAKER

Mersi pour sa klarifikasyon.  Bon Minis nou remersi ou pou pas en demi zournen avek nou pour donn nou en pti klarifikasyon ki’n leve avek devlopman Pirates Arms Building – sa site. Mon ti a kontan remersi ou e CEO Mrs  Nair e osi tou Project Officer Mr Marie, nou ava eskiz zot parmi nou.  Mersi bokou.

 

(MINISTER  LOUSTAU-LALANNE AND HIS DELEGATION WAS EXCUSED FROM THE HOUSE)

 

 

MR SPEAKER

Bon avan nou rann lantenn a SBC bomaten ti annan en matter of privilege ki ti ganny raise par Leader Lopozisyon e mon ti dir mon pou donn mon Ruling apre. Me i annan serten devlopman ki’n swiv e mon ti a kontan partaz ek Lasanble e i ava ed mwan dan mon Ruling. Apre ki sa matter of privilege ti ganny leve bomaten e mon ti ekout osi tou Onorab Simon Gill dan son kapasite konman Depite Sekreter Zeneral United Seychelles, pandan break mon’n resevwar e let demisyon ki’n sorti direkteman kot Onorab Basil Hoareau.

Bon son in adrese le 13 Mars 2019 ki’n vin kot mon lofis direkteman lo mon latansyon ki’n mansyonnen ki i pe demisyon nen konman Manm Elekte Proporsyonnel dan Lasanble.  Anba Lartik 81 (1) (b).  Lo mon kote anba Lartik 81 (1) (6) mwan mon pou fer le neseser ki taler menm pandan Break mon ava ekrir son sertifika. Mon bezwen issue li avek en sertifika konman i no longer en Manm Lasanble Nasyonal.

E bomaten Onorab Simon Gil in eksplike ki zot dan sa process – esperons  par semenn Lendi nou ava kapab ganny en nominasyon sorti kot parti US pour nou ranplas seat Onorab Basil Hoareau. Be mon ti ava kontan zis partaz avek Manm Lasanble e osi pep Seselwa lo 2 pti paragraf ki Onorab in mete dan son let  – ok?  Mon ava lir direkteman.

‘’As I resigned I would like to thank you and all members of the National Assembly for the cordial working relationship we have had during my tenure as a member of the National Assembly. I also take this opportunity to thank staff of the National Assembly for all the support provided to me during the last 2 years.’’ Dernyen paragraf.

‘’ It has indeed been an honor to serve my country as a member of the National Assembly.

Yours Faithfully,

Basil Hoareau.

 

 

(APPLAUSE)

 

MR SPEAKER

So, mon’n anvi partaz sa pour montre par ler ki grander zonm nou annan parmi nou. Ki in sorti dan en fason gracefully.  Lo mon kote mwan mon ti a kontan personnelman e petet osi on behalf of the National Assembly, remersi Mr Basil Hoareau pour tou son travay ki in fer dan Lasanble. Tou son bann kontribisyon ki in anmennen vizavi konman en Manm Lasanble.

Kot in vreman aktiv, enterak in ed nou en kantite lo bann Prozedlwa e la mon dir pour dir zot de Onorab Georges zot in travay vreman, vreman pros pour ed nou Lasanble lo sa kote legal. Dan bann Komite e sirtou Bills Committee to start with, apre in sorti, me lo Konmite Truth and Reconciliation i ti vreman aktiv e in vreman fer bann kontribisyon pozitiv.

E mon pa pou bliy nou deba 2 zour ki nou ti fer Civil Code, kot mon kapab dir zot de Onorab Georges zot in vreman excel.  E manm piblik i ankor pe demande ki nou fini sa travay Civil Code ki nou’n konmanse e petet mwan mon pou, mon pou fer li dan mon kote ki zour nou pou plan pour nou fer sa travay, mon pou envit Mr Basil Hoareau pour ed nou konman en avoka an deor ki vreman aliny avek kod sivil pour nou kapab enterak avek li e ganny plis bann leksplikasyon.

Dan mon parkour pour eleksyon dan Bel Ombre nou Mr Basil Hoareau nou ti deza annan en tre, tre bon relasyon, tre bon zanmi. Nou’n osi fer en parkour amikal, napa en moman kot nou’n ensilte kanmarad. E se sa rezon ki ozordi ziska ozordi nou ankor de bon zanmi e mon swete ki nou pou reste de bon zanmi.  E avek sa mon ti a kontan swet li bonn sans dan son travay e ki i ava kontinyen servi son pei.

 

HON WAVEL RAMKALAWAN

Mersi Mr Speaker.  Mr Speaker lo lapar tou Manm LDS mon pran laparol pour swet Onorab Hoareau bonn sans dan son karyer. Pour mwan personnelman mon’n travay avek Mr Hoareau lo en Komite an partikilye sa se Komite pour Laverite e k Rekonsilyasyon Nasyonal e parey in ou konnen Mr Speaker sa sete en size ki to pre avek son leker.

Atraver leksperyans ki i ti pas ladan personnelman e nou rapel ki mannyer Mr Hoareau, Onorab Hoareau ti en dimoun ki ti pare pou koz for lo drwa imen ek lazistis; e isi dan sa Lasanble i pa’n mank en lokazyon pour li fer bann tel deklarasyon. E nou rapel ki mannyer i ti menm vin emosyonnel letan i ti ape koz lo sa size letan sa Lalwa ti pase.

Alors Mr Speaker mon vreman, nou pou vreman mank Mr Hoareau.  Parski son konnesans legal i ti an menm tan i ti son abilite debat i ti vreman entelizan. E  i ti fer sorti bann pwen pertinan.  E nou’n ti osi remarke tou dernyerman i ti menm pare pour li debout lo li menm – pa pou li zis swiv pozisyon parti, me pour li debout lo li menm kot bann pozisyon ti konsern drwat sa ki zis.

Alor lo nou kote nou swet li tou de bon.  E nou konnen ki nou larout pou krwaz ankor e petet nou larout pa ava zis krwaze, me ki nou ava mars ansanm lo menm kote.

 

(laughter)

 

HON WAVEL RAMKALAWAN

Mersi bokou Mr Hoareau, nou tou kontinyen zanmi e nou kontinyen, pour nou rode ki mannyer pour nou lev nou pei Sesel.  Mersi bokou Mr Speaker.

 

(APPLAUSE)

 

MR SPEAKER

Mersi Onorab Ramkalawan.  Mon ava donn laparol Onorab De Commarmond,  ki Leader Parti US dan Lasanble. Onorab.

 

HON CHARLES DE COMMARMOND

Mersi Mr Speaker. Mr Speaker mon osi pare you taler mon’n fek ganny kopi let resignation former Onorab Hoareau. E yer swar zisteman nou ti pe koze dan sa direksyon mwan avek li. E i enportan fer resorti an menm tan ki nou remersye li, pour son travay eksepsyonnel ki in fer pandan sa pti gin letan ki in dan Lasanble avek nou san repet sa ki zot in dir deza, i vre tou sa bann pwen ki’n ganny avanse.

I vre ki Onorab Hoareau ti en Manm Lasanble ekstraordiner en konman – mon kapab dir ou sa en dimoun eksepsyonnel.  E an menm tan en legzanp pou bann zenn mon krwar mwan i montre en determinasyon e lezot zenn i kapab swiv dan son lepa. I pa vedir ki Onorab Hoareau in al net – sa mon dir e  mon redir, pa’n al net, nou pa konnen kan i ava deside pou kapab re-vin ankor.

Non mon pe dir sa senserman akoz  en manm Lasanble

 

(Off-Mic)

 

 

HON CHARLES DE COMMARMOND

… non  be en Manm Lasanble nou a montre ou kote i asize Onorab Flory Larue me selman

en Manm Lasanble i kapab ozordi  dan Lasanble, i kapab sorti, i kapab re antre ankor; i  kapab antre lo menm parti; i kapab antre ‘’endepandan’’ i kapab antre dan en ‘’lalyans.’’  I kapab re-antre dan nenport ki fason! Mwan mon pe dir avek konpetans Onorab Hoareau at any moment ki li i deside!  Akoz la in sorti akoz son karyer – i pe anpes li ganny li ganny sa ki li i gannyen.

E sa dimoun bezwen konpran.  Sa kalite keksoz ki ou sibir letan ou dan Lasanble. So  i annan bann pert ki en Manm  depandan ki  i pe fer – mon asire ki Onorab Georges in tenir en fason.

Me selman mon asire si i pa ti ankor konn organiz li i ti pou santi menm soz. Alor Onorab Hoareau in donn mwan son garanti yer dan nou koze i pe reste avek Parti Lepep ozordi United Seychelles

 

(APPLAUSE)

 

HON CHARLES DE COMMARMOND

… e son responsabilite ki i annan dan parti se en responsabilite tre o. E ki i pou kontinyen travay avek nou caucus  – travay avek nou e i annan lezot keksoz ki nou pe plan ansanm e mon pa pou dir la ozordi – i pa konsern tou.

Mwan mon konnen ki mon pe dir.  E fransman son kapabilite, son lentelizans i pare pou share avek nou. E mwan ki’n travay ek li pandan en pti gin letan, mon’n apresye li enkrwayab leman e mon konnen definitvman isi  dan  sa Lasanble, mon pou mank li,  mwan – e nou dir nou pou mank li wi vre, mon pa pou deny me in dir mwan klerman any moment zis knock son laport pou ouver – i pou kontinyen donn nou sa soutyen donn nous a sipor e partaz avek nou son konesans e leksperyans.

Pour mwan se en legzanp  ankor mon dir e e avek bann tel legzanp ki Sesel i pou alosi  de lavan. Bann  tel dimoun parey Onorab Hoareau en Zanfan Sesel nou bezwen bann dimoun parey. E no matter ki politik – Pour mwan a sa moman, i enportan ki Seselwa i konpran annou war dan en dimoun – en Seselwa ki annan kapabilite sa bout pozitiv – sa ki bon annou al de lavan avek li. Demen Onorab Hoareau i kapab pran bokou responsabilite bokou pli o ki en Manm lasanble annou pa bliye sa osi.

Tousala i kapab arive.  E pou mwan tou sa ki i fer dan sa direksyon si i pou anmenn Sesel pli lwen, sa ki enteres mwan, si i pou kree en Sesel meyer sa ki enteres mwan. E mon lans ankor en pledge avek mon Lasanble se dan sa direksyon ki mon krwar sa Lasanble i devret ale. Dan en direksyon kot nou anmenn nou pep pou apresye, pour annan en lavi meyer, pour annan en lavi pli byen e pou nou pei avans devan.

Avek sa Mr Speaker mon swet former Onorab Hoareau tou de bon dan son travay, dan son metye dan son biznes e nou demann li pou kontinyen ger nou lenstitisyon kot nou kapab, kot nou lenstitisyon i benefisye avek son leksperyans e konesans.  Mersi bokou.

 

(APPLAUSE)

 

MR SPEAKER

Mersi Onorab De Commarmond. Mon krwar mon pour fer dibyen Lasanble si mon donn Onorab Georges sans pou dir de pti parol.

 

HON BERNARD GEORGES

Mersi bokou Mr Speaker. Mr Speaker tou sa ki ti pou ganny dir lo Onorab Hoareau in fini ganny dir, mon remersye ou pou donn mwan sa privilez. Akoz parmi nou tou dan sa Lasanble, se mwan ki’n travay pli pre avek Onorab Hoareau, ki mon ti konnen dan nou profesyon avoka avan, me ki mon’n redekouver atraver sa Lasanble.

E mon partaz lopinyon ki’n ganny dir ki Onorab Hoareau i annan en bright future devan li. I garson tre entelizan ki reflesi tre byen ki pa zanmen mank en pwen ki fodre dir.

E mwan mon’n dir e mon repete ki Bills Committee kot Onorab Hoareau ti en Manm aktif i avek tou respe ki mon annan pou  lezot Manm Komite enkli mwan menm  nou Komite pou pov avek labsans avek Onorab Hoareau. Me mon’n fer tou keksoz ki mon’n kapab pou dir li pa ale reste, akoz Bills Committee nou bezwen akoz ou anmenn bokou, bokou leksperyans lo sa Komite. Nou tris.  Mwan personnelman mon tris nou pou mank li bokou, me mon konnen ki sa desizyon ki in fer in fer avek bokou refleksyon e dan en serten fason mon siport son desizyon.  Akoz mon konnen ki lo nivo Lalwa Onorab Hoareau byen solisite e pou bezwen devoue tou son letan dan sa letan ki pe vini, dan direksyon son profesyon e alor mon zwenn tou mon bann koleg isi pou swet li tou le meyer tou an di-z-an nou pou mank li isi dan sa Lasanble.  Mersi.

 

MR SPEAKER

Mersi Onorab Georges.   Mon’n donn ou laparol.  Bon  mon pou donn 1 minit Onorab  Sebastien Pillay –  depi boner i pe lev lanmen  – me Onorab – Onorab  nou  bezwen rann lantenn.  Mon pa oule kontradiksyon tou keksoz ki’n ganny dir i pozitiv. I minit Onorab Sebastien Pillay.

 

HON SEBASTIEN PILLAY

Mersi Mr Speaker.   Mr Speaker nou parkour nou de Onorab Hoareau in komans byen lontan depi ler nou ti politeknik ansanm.  Li i ti pe fer son A Levels i ti en lannen par devan mwan. E in toultan montre son lentansyon pou li vin en avoka in en pasyon pou li.   Pa zis en profesyon.  E en lanmour ki in annan pou son profesyon e li in toultan konfirmen oubyen confide ki enn bann difikilte ki i pe rankontre se pou e le de akoz i pa oule donn enn plis latansyon ki lot.  E son profesyonnalizm ki  i pe fer ki i i pa oule  ki si i pa kapab a donn tou Lasanble i pa pou osi donn tou son profesyon  e in swazir pou donn tou son profesyon ki mon krwar i en desizyon nob.

E sa ki mon oule dir ek Lasanble Mr Speaker e pran sa from mwan ki konn Onorab Hoareau pou bokou letan i pa the last ki nou pou vwar Onorab Hoareau dan politik Sesel.  Nou pou vwar onorab Hoareau dan politik Sesel.  Nou pou vwar li pe  mars akote nou dan politik Sesel.

 

 

(APPLAUSE)

 

HON SEBASTIEN PILLAY

Nou pou vwar li pe lead – ekout sa byen Mr Speaker mon pe dir sa avek tou senserite – nou pe vwar Onorab Houarea pe lead en movman – en transformasyon parey in komanse dan nou parti e sa transformasyon pou kontinyen e i pou al odela e mon pe enplor tou Seselwa- malgre bann komanter ki’n ganny pase  bomaten pou nou apresye desizyon Onorab Hoareau e pou apresye en grander lespri e limilite  e profesyonnalizm en Seselwa ki’n montre  poudir i annan en pasyon  en determinasyon e en patriyotizm Mr Speaker – enkrwayab pou son pei.  Mersi Mr Speaker

 

 (APPLAUSE)

 

MR SPEAKER

Mersi Onorab Pillay.

Bon nou out nou kaba dir bokou lo         Onorab  Basil Hoareau me letan pa permet.

 

 

(Interruption)

 

MR SPEAKER

Nou pou… Order!  Order!  Mon annan de pti lanons fer avan nou Break. Bills Committee pou rankontre la Midi edmi Komite Room 3 e Komite Madanm pou rankontre la osi midi edmi Committee Room 2. Nou ava break e nou ava repran nou travay 2er apre midi.

 

(BREAK)

 

 

 

MR SPEAKER

Bonn apre midi tou Manm Onorab.  E bonn apre midi tou dimoun ki a lekout e pe kontinyen swiv travay Lasanble pour ozordi.

Bon nou pour kontinyen avek nou travay kot nou ti’n arete yer.  Mosyon ti’n ganny move par Onorab Bernard Georges e i ti’n ganny seconded by Onorab Flory Larue.  Bon Prezan mon ti a kontan demann bann Manm, eski Onorab Larue ou oule entervenir?  Ok okenn Manm osi ki oule entervenir?  Mon vwar en show of hands.  Ok Onorab Larue, laparol i pour ou.

 

HON FLORY LARUE

Mersi Mr Speaker.  Bonn apre midi tou dimoun dan lakour.  Bonn apre midi tou Manm.  Mon ti segonn sa Mosyon yer e mon ti a kontan fer mon entervansyon.

Onorab Georges i met lanfaz lo 4 pwen stratezik dan son Mosyon.  Pour sov larzan Gouvernman lo bann lwaye ki i peye pour son bann biro; santraliz bann biro Gouvernman dan en sel landrwa; bouz Sant Ladministrasyon an deor Lavil e dekonzesyon trafik.

Lefe ki mon byen enterese avek bann devlopman pour planifikasyon e alokasyon later.  Mon souvan frekant sit enternet Seychelles Planning Authority.  Lo sa sit in annan diferan plan devlopman o tour Mahe.  I annan en dokiman lo sa sit ki i annan 10 sapit apele Victoria Master Plan date Septanm 2015 ki donn konteks ki nou ladan konmela e definir en plan pour anmenn nou ziska 2040.

I eksplik bann proze spesifik pour Ile Aurore, Ile Perseverance, distrik finansyel Victoria.  I kouver plis devlopman dan Sports Complex Roche Caiman, ranforsi lenfrastriktir dan Lower Plaisance, met lanfaz lo bann lenfrastriktir Kominoter avek en kalite élevé, re anbelir bann lespas ver sitye dan Lavil e o tour Lavil, prezerv laspe Leritaz Kiltirel dan arsitektir, kre en waterfront e fer li vin en realite, enplimant en plan pour transportasyon ki maksimiz mouvman e met en gran lanfaz lo promot transpor piblik.  E a lafen 50 paz ki zis eksplik ki mannyer tousala i pour ganny enplimante.

An total i en dokiman avek 250 paz ki enkli bokou bann desen plan byen detaye.  Alor zot pa’n zis koze, zot in menm desinen pour nou byen konpran.

Mosyon i koz spesifikman lo Ile du Port.  Sa zil parey son non i dir, in ganny dedye preski antye spesifikman pour devlopman bann lenfrastriktir ki siport tou aktivite pour fer avek Lendistri Lapes.

Trwa kar son later i sipoze pour zis aktivite ki lye direkteman avek lapes.  Bann lezot alokasyon pour Ile du Port, i lenfrastriktir.  Anba sa Tit mon vwar 3 morso later ki demarke zis pour sa.  1 i kot stasyon servis SEYPEC deza i ete, 2 en morso ki vizavi lekol Independence School ki mezir 17, 623 met kare, pour le moman i paret ki se SPTC ki pe servi sa landrwa koman en bus depot.

Trwazyenm sa morso ki letan ou kit sa pon apre Espace, i direkteman lo kote drwat o bor ron pwen.  Me ankor apre bann resers in vin aparaman, i vin aparan ki sa batiman Government House ki Onorab Georges i koz lo la, i byen egziste e i sipoze lo Ile du Port e son plan i fer par, in fer par en Lakonpannyen apele NBCC Limited ki sorti dan Lenn.

Mon’n vwar plan ki’n fini fer avek 5 letaz e son 435 parking e i sipoze sitye lo morso H9228 ki aktyelman pe ganny servi par SPTC koman en Bus depot.

SPTC dapre plan i sipoze annan en nouvo stasyon bis lo sa 3enm morso ki an fas stasyon servis SEYPEC.  Me akoz i pa deza lo son later ki’n ganny rezerve pour li?  Se pa Planning menm ki’n sipoze dir zot kote zot sipoze sitye?

Me si laba i sipoze en stasyon bis pour nor Mahe, kote stasyon depo bis sid i sipoze ete?  Akoz plan i fer kler zot pour ferm sa enn kot Omarion Mall.

Deza devlopman pa pe al dapre plan ki Gouvernman in fer pour Ile du Port.  Nou osi vwar ki tou later ki lo kote gos letan nou kit ron pwen pour vin ver Lasanble, i sipoze pour bann lofis e pour komers.  Me solman nou’n vwar konstriksyon 2 lekol ek son laplenn.  Byento sa laplenn pour byen lwen ek sa lekol akoz Planning in met 2 morso later ki’n fini allocate ek son propriyeter ant laplenn ek lekol.  Ankor ou demande ki mannyer sa i arive dan planifikasyon?

Mon ti a sizere la, ki sa, sa, koman sa in ganny idantifye ki zot fer neseser pour pous sa 2 morso pli lwen e met zot apre laplenn e demann Independence School pour pous son laplenn pli pros avek li, pour anpes lenkonvenyans dan le fitir sirtou lo sekirite zanfan.

Me deza sa 2 lekol i kree lezot problenm.  Semen ki sipoze vin 2 lane dan le fitir, i pas vreman pre ek sa bann lekol.  En fwa ki tou lenfrastriktir in fini vin an plas, pour napa plas pour paran depoz zot zanfan, akoz menm an layby pa’n ganny demarke pour sa.

Deza dan bomaten, sa semen in fini ganny gran konzesyon.  Akoz paran i depoz zanfan.  Menm si pour le moman i ankor annan en lespas pour paran park.  Ki mannyer sa sityasyon pour vini dan le fitir?

I pour vin egzakteman parey sityasyon International School, menm si zot annan en parking, i en gro problenm ki kree konzesyonE la nou vwar ki sa menm sityasyon pe ganny repete avek sa 2 nouvo lekol.

Menm si i annan en bezwen pour lekol.  Fodre ki bann later i dan bann lokasyon pli konvenab, e non pa zis o bor en semen prensipal ki dan plan sirkilasyon e enn bann priyorite.

Fodre ki en devlopman parey en lekol i ganny ase later pour li kapab devlope dan fitir.  Nou’n vwar konzesyon plizyer lekol akoz mank lespas.  Independence School li menm, lekol Franse e la deza sa nouvo primer lo sa semen Ile du Port i anvi agrandi son fasilite, i ekspekte ganny later lanmenm o bor.  Me sa bann devlopman pa sipoze la.  Parkont dan sa menm plan, nou vwar ki apepre 50, 000 met kare later in ganny fer disponib pour lekol piblik e prive lo Ile Aurore.  Alor laba pour annan plizyer opsyon pour bann dan sa sekter.

Mon pran sa loportinite Mr Speaker, pour demann Gouvernman anliny avek plan dekonzesyon Lavil e desantralizasyon pour fer disponib later pour en lekol prive dan sid Mahe.  I annan en gran demann pour sa, e zabitan sid Mahe i ganny defavorize.  Akoz napa later ki’n ganny demarke pour sa devlopman.

Sa 2enm lekol isi Ile du Port pour bann pti zanfan, i zis an fas en stasyon servis ki kapab en danze e montre en planifikasyon ki pa met lenportans ou konsiderasyon lo sekirite zanfan.  Sa stasyon servis dan li menm, i kree bokou konzesyon

Annou mazin stasyon kot Stad Linite ki bloke souvan.  Lefe ki SEYPEC ek Planning in deza ganny en presedans avek bann defayans kler.  Akoz ki zot pa’n met plis zefor pour pa repet menm keksoz avek sa nouvo stasyon?

Sa stasyon li menm i napa sipor striktir semen.  E menm si in konplete depi lannen pase, i pa ankor deservi piblik akoz en konfizyon total ant bann Departman.

Kominikasyon i ganny demarke koman enn bann eleman kle pour fer sa plan devlopman vin en sikse.

Pour le moman, sa stasyon pour tir presyon, me menm dan zot plan. Zot idantifye ki pour annan en logmantasyon dan zabitan d’ici ziska 2040.

Dan zis 21an Mr Speaker.  Zot prevwar ki pour annan en logmantasyon par 6, 500 zabitan zis The  Greater Victoria, san kont bann lezot logmantasyon tel ki tourizm e bann travayer etranze.

Alor eski sa bann solisyon i lonterm ouswa zis imedya?  Eski en lot stasyon servis in fini ganny demarke dan nor Mahe?  Si non, mon sizere ki zot fer li.  Plan i zoli, plan i date septanm 2015 pour anmenn nou 2040 e deza plan in kit ray e pe fer kontour.

Mon’n fer letour lo Ile du Port e deza mon’n vwar bann Lakonpannyen konstriksyon lo plizyer sit, e i annan ki paret permanan avek lozman pour zot travayer.  Dapre plan zesyon Ile du Port e avek lanfaz ki Gouvernman pe mete lo Lekonomi Ble e difikilte pour trouv lespas pour devlop Lendistri Lapes,  mon espere ki Gouvernman i retourn kot zot plan e reviz sa bann sityasyon.

La avan ki keksoz i sorti dan zot kontrol, zot bezwen reget bann lease e fer sir ki tou batiman ki pe ganny konstrir pour deservi Lendistri Lapes, e non pa lezot keksoz.  Akoz nou pour vwar nou dan menm sityasyon ki nou ti komanse.

Toudmenm Mr Speaker, Onorab Georges in devwal en sityasyon ki vreman enkyetan.  En batiman pour lozman ki sipoze lo H13426 ki parkont mon pa vwar lo sistenm GIS.  Alor mon pa kapab donn siperfisi ki dan li menm i en baryer avek akse lenformasyon dan la par Minister konsernen, pe ganny konstrir par IOT.  Sa zone antye napa demarkasyon endividyel pour bann later.

Sa batiman i apele IOT Housing Project.  I en gran sirpriz premyerman dan plan Gouvernman, i pa sipoze annan okenn lozman lo Ile du Port.  Alor ki mannyer sa later in arive ganny akorde pour sa?  E akoz Planning in aprouve?

Dan sa plan pour 2040, zot koz lo kordinasyon e fer devlopman ki pour konplimant kanmarad.  I promot en fason viv ki pli modern ek konvenab.  Me solman Planning i donn lotorizasyon pour konstrir en lenfrastriktir ki parey en kan konsantrasyon dan en zone dedye pour devlopman en pilye nou Lekonomi, kot pa sipoze annan okenn lozman.

IOT pa kapab pey 13enm mwan saler, me i pe fer lozman.  Gouvernman pa kapab delivre fer lakaz emergency ouswa lakaz normal pour Seselwa, me i pe fer lozman pour en Lakonpannyen avek travayer prive.

Mon sizere ki i annan lezot later prive ki IOT ti kapab envestir ladan.  Me non pa later konble ki ganny prioritiser pour en Lendistri ki deza annan en mank lespas pour delivre son bann servis.

En later ki parey Onorab Georges in dir, kapab ganny servi pour bann biro Gouvernman.  Spesifikman Minister pour Lapes ki kapab zer sa Lendistri.

Nou’n deza propoze dan Lasanble ki sa landrwa tou dilon sa semen i vin parey en Government Mile kot tou biro Gouvernman i ganny trouve ansanm.  Me sa sel Government House, i sipoze anmenn anba en sel twa 9 Departman ek 11 Lazans Gouvernman selman.  Me bi kree en batiman Gouvernman, se pour anmenn en Minister antye anba en sel twa.  E mon sirprann pour vwar ki 2 Minister prensipal i pa dan sa batiman dapre lalis.

Minister Finans ek Minister Labita, Lenfrastriktir ek Transpor lo Later i sa 2 Minister ek zot bann Lazans ki kontrol tou propriyete ek gérance larzan Gouvernman, i eparpiye partou dan Lavil.  Se zot ki sipoze ganny priyorite. Par anmenn zot ansanm anba en sel twa.  I a deza elimin bann pli gran defayans kominikasyon ek kordinasyon ki souvan met Gouvernman an retar.

Minister Labita, Lenfrastriktir ek Transpor lo Later i enn bann Minister ki pli ganny frekante par piblik.  Pa retir li dan Lavil, i pour retir bokou konzesyon.  Avek stasyon bis ki sipoze akote e en gran kantite parking disponib si sa 2 Minister ki ganny mete dan sa batiman, i pour ede pour enplimant sa plan zeneral ki nou pe promote.  Me solisyon en sel Government House pour detrwa Minister i vreman vin parey en gato ki’n demi kwi.  I fer nou retourn dan menm sityasyon kot lezot biro Gouvernman i reste deryer e nou pa ganny sa desantralizasyon ouswa en one stop shop pour Ladministrasyon Gouvernman.

Menm si dekonzeste Lavil in toultan en gran laliny Gouvernman, zot pa’n prezant en plan kler lo ki mannyer pour anmenn tou zot Minister ansanm pour kapab vin pli rafinen e pli performan e kot fer desann depans Gouvernman dan bidze, i vin en priyorite.

Mon propoze ki Gouvernman i regard pli lwen, e vreman planifye en solisyon pour bouz Sant Ladministrasyon an deor Lavil.  Avek en gran bezwen pour prioritise sipor pour bann servis spor.  Ile du Port pa kapab anmenn sa solisyon desantraliz Ladministrasyon Gouvernman.  La i reste nou zis zil Aurore ki vreman ankor konpletman vid e i donn nou en loportinite pour fer sa vin en realite.  Nou ankor annan letan.

Nou kapab servi sa planifikasyon Government building ki nou anvizaze fer koman en legzanp e fer en odit tou nou bann Minister avek kou bann lwaye, enkli tou depans lenerzi pour regarde ki mannyer nou pour benefisye dan le fitir.  Sa a ed nou konpar kou avek benefis.  Me benefis pa zis finansyel.  I pour vin atraver en dinamiz pour konstrir en keksoz ki nouvo fasilit lavi sitwayen e fer en lanvironnman travay pli atiran dan servis piblik.

Piblik i riske panse ki Ile Aurore i lwen.  Me en letan piblik ti krwar ki Providence osi ti lwen, me ozordi sa pa le ka.  O kontrer nou vwar li pa ase aksesib e akoz i annan en sel sorti, i souvan byen konzeste.

Ile Aurore i donn nou loportinite pour enplimant bann opsyon transportasyon modern ki prezan i aplikab e osi abordab tel ki monorail.  Menm si i pa pour konstrir imedyatman, me pour ede transport dimoun dan en fason pli trankil e pli sir, fodre ki Gouvernman i demark en plas pour sa.

Gouvernman i bezwen demark bann bus lanes specific pour peak hours, menm en sistenm ki servi delo tel ki ferry i kapab ganny enplimante ki anmenn plizyer loportinite biznes.  En bicycle lane i kapab fer ki dimoun dan sa rezyon i swazir en fason transportasyon pli bon pour lanvironnman e pour zot lasante.

Tou sa bann opsyon i ede dekonzeste trafik letan Sant Ladministrasyon Gouvernman i bouz lo Ile Aurore.  Me planifikasyon trafik an premye, i fer sa devlopman vin atiran, e sel opsyon varyab lonterm.  I garanti ki tou batiman Gouvernman pour ganny trouve dan menm landrwa.  I fer popilasyon pli kapab planifye zot zournen.

Me lefe ki Victoria i reste sa landrwa komersyal, i esansyel ki lanfaz i ganny mete lo akse ant sa desant.

En planifikasyon trafik i bezwen komans avan, e fodre ase lespas i ganny garde pour enplimant tou form transportasyon piblik ki ankouraz dimoun kit zot transpor aryer.

Fodre pa ki Gouvernman i komet menm fot ki zot in fer dan sid.  Zot in promet pour fer Anse Royale vin en dezyenm Lavil, par komans avek desantralizasyon bann servis Gouvernman.

Fodre ki sa i ganny revize e abiz later ki vid, i pa en opsyon.  Akoz ki Gouvernman pa oule fer en bon planifikasyon pour sa later kot Ladministrasyon Distrik Anse Royale i ete ki mezir 14, 000 met kare?

Sa batiman Ladministrasyon Distrik i deza vye.  Zot oule sanz son twatir son hall, fer renovasyon e azout biro ek son kote administratif.  Konbyen tan i pour deservi piblik?

Piblik dan sid i oule desantraliz servis.  Me akoz ki Gouvernman pa oule ekoute?   Avek sa plan Government building ki’n propoze pour Ile du Port, nou kapab annan menm kalite legzanp pour en batiman dan Anse Royale.  Zis ranpli lespas vid, par en opsyon soutenab pour piblik.

Deza en lespas dedye pour detann, i plen avek stasyon lapolis ek stasyon tenny dife.  Pourtan i annan ase later disponib kot Ladministrasyon Distrik, si nou kraze e met lenfrastriktir ki modern.

Sa stasyon tenny dife pour lo menm kote kot aktivite i ganny fer.  Eski zot in mazin sa kantite dimoun ek zot transpor letan i annan aktivite?  I pa tro tar pour regard en vizyon pli lwen e kit sa bann later vid pour zenerasyon fitir pour kontinyen grandi sa dezyenm Lavil dan en fason byen planifye e soutenab.

Letan nou fer en vizyon ki pour anmenn en solisyon pour piblik, fodre i pa reste en vizyon.  Fodre nou konvenki lo nou rezon pour fer sa bann aksyon, tou sa bann loportinite manke dan bann lezot devlopman i bezwen en leson pour sa devlopman ki pe arive an se moman lo Ile du Port.  E avek bokou lavites, si non nou pe fer en de-servis nou pei.

Legzanp Espace par ex-Prezidan, i montre en priyorite lanver.  En landrwa ki ti kapab ganny servi koman en bazar ouswa premye batiman pour en Government House.  Me olye, i ti aste sa later e a en kou pli bon marse ki nou’n peye pour konble e aste sa later konpletman, olye lo lease parey Regilasyon i demande.

Pei in mank en loportinite e se endividyel ek son Lorganizasyon ki benefisye avek loportinite finansyel.  Sa i en ka ki fodre ganny rektifye e pa repete.

Mon propoze ki Gouvernman i donn nou rezon, akoz zot fer development plans?  I pran bokou letan, i tir dimoun dan zot travay, angiz Stakeholders pour kontribye.  Kontribisyon i ganny fer.  Plan i ganny finalize, plan i ganny met lo zot sit, me apre letan pour ganny enplimante, sa ki ganny delivre pa parey sa ki lo papye.

Alor Mr Speaker mon demande ki nou tou nou fer en kontribisyon pour kapab ede annan en bon plan devlopman pour Greater Victoria.  Mersi.

 

MR SPEAKER

Mersi Onorab Larue.  Mon ava donn la parol Onorab Wavel Woodcock.

 

HON WAVEL WOODCOCK

Mersi Mr Speaker.  Bonn apre midi tou dimoun.  Mr Speaker sa ki Onorab, sa Mosyon ki Onorab Georges pe propoze –  annefe sa Mosyon i en bon Mosyon, i en bon nide.  I en Mosyon ki annan bokou merit pour fer en Government Miles Ile du Port, angiz pour santraliz bann servis gouvernmantal Mr Speaker i en keksoz ki bon, i en bon nide.  Ki nou pour annan en one stop shop dan en sel landrwa santralize kot tou lofis ouswa laplipar lofis Gouvernman i ete.

Mr Speaker i annan plizyer lavantaz pour antreprann en tel proze.  Bann kliyan Seselwa, pa pour bezwen fer bann gran deplasman pour sorti dan en lofis pour al en lot lofis.  En senp legzanp, en legzanp ki mon pour donnen, annou pran an konparezon bann dimoun ki anvi komans en biznes ki zot bezwen al anrezistre en biznes kot Lofis Lanrezistreman kot Registration, Independence House, apre zot bezwen mars tou sa zistans pour zot al Orion Mall kot Licensing pour zot apply pour en license.  E i annan plizyer legzanp ankor.

Annefe bomaten Minis Finans fek vin devan sa Lasanble e in dir ki son Minister i eparpiye en pe partou, Liberty House, Capital City, e dan lezot batiman.

E Mr Speaker sa i en konsern dan plizyer Minister annefe, ki ou vwar poudir kekfwa anba en Minister, en Departman i trouve en landrwa, lot Departman i trouve dan en lot landrwa.  E si nou annan en Government mile i pour ede pour tir en pe sa bann, sa problenm.

E Mr Speaker par lefe ki ozordi dan plizyer Minister i annan sa problenm landrwa, en sel landrwa pour zot fer zot travay.  I fer ki i kre en problenm ki i mank sa synergy e i annan en problenm networking ant bann plizyer Departman dan en Minister e menm ant plizyer Minister akoz zot lwen avek kanmarad.

Mr Speaker par santraliz bann Departman e Minister Gouvernman, i pour osi ede koup kou transportasyon.  I pour kout bokou pli mwens pour deplase.  Non selman manm piblik, ki parfwa i bezwen vwar li pe liaise avek plizyer Minister ouswa plizyer Departman kot i bezwen sorti nor pour al sid, kot i vwar li pe ganny difikilte en zournen pey taxi pour sorti en landrwa pour al dan en lot landrwa.  Ouswa marse fer letour Lavil pour li kapab sorti kot en lofis pour al kot en lot.  E osi i pour menm ed bann travayer dan Gouvernman.  Ki enn ler zot bezwen kolabor, zot bezwen travay avek kanmarad, zot bezwen annan sa networking pour bann travay ki zot pe fer.  Parey Planning i bezwen liaise avek Lanvironnman pour kekfwa kek proze konstriksyon.

So i annan sa lenportans pour annan en landrwa ki fer li fasil pour bann diferan Minister annan sa kontak avek kanmarad pour zot pli pre, pour zot kapab liaise avek kanmarad olye ki i annan tou sa bann konfizyon ouswa sa bann difikilte deplasman.

En lot fason ki sa Government Miles pour santraliz servis Gouvernman dan en sel landrwa Ile du Port pour annan, se ki i pour pran mwens letan pour konplet en tranzaksyon.

Ozordi enn ler pour en dimoun kapab fini en tranzaksyon, i vwar li i pe gaspiy bokou letan.  I vwar li pe gaspiy bokou letan, akoz i bezwen sorti.  Parey mon’n dir boner sa, sorti one office to the next i vreman, vreman en problenm, en kontrent e en gaspiyaz letan pour manm piblik.

En lot lavantaz ek Government miles Mr Speaker.  Pour santraliz bann Departman, se i pour ede parey Onorab Georges in dir osi, Onorab Larue in tous lo la, koup depans lo rent bann lofis, rent of office space pour lwe bann batiman prive.  E in the long-term i pour save Gouvernman bokou plis larzan.

Ok inisyalman pour fer sa proze i pour kout en pe larzan.  Be in the long-term sa bann larzan ki zot ti pour depanse pour rent sa bann lofis, sa bann building dan prive, i pour bokou mwens.  Akoz sa larzan pour reste dan pos Gouvernman, dan Kof Gouvernman.

Mr Speaker me sa ki sagrinan en pti pe lo laliny ki Onorab Gill, Onorab Larue in koz lo la.  Sa ki malere Mr Speaker se ki, in toultan annan move planifikasyon dan sa Gouvernman PL/US kot i konsern land use.

Kot i konsern land use, sa Gouvernman in fel.  Annou pran legzanp zisteman, sa petrol station ki Ile du Port pa lwen avek Lasanble Nasyonal, sa stasyon petrol in ganny fer san semen.  E non selman, se ki i ti napa semen ler zot ti’n plan zot in fer sa batiman, me in ganny fer o bor en lekol.  Konmsi mon trouv en pti pe poudir i annan en problenm lo kote land use plan.

Eski vreman zot in asize zot in think avan ler ki zot in fer sa bann proze, sa bann devlopman lo Ile du Port.

Napa Mr Speaker vreman en proper land use plan pour Ile du Port.  In ganny fer dan en fason dezord.  Mr Speaker planifikasyon pour Ile du Port mon bezwen dir, e nou tou nou bezwen admet pa bon.

Olye servi Ile du Port dan en fason ki pour anmenn plis benefis pour Seselwa.   Gouvernman in pran bann desizyon ki’n plito defavoriz pep Seselwa.

Annou zis mazinen, pran kont Mr Speaker ki Gouvernman in lease 20, 000 met kare later pour fer en cricket field kan napa preski okenn Seselwa ki zwe cricket Sesel.

Sa landrwa Mr Speaker ti pour ideal pour fer en food court parey Onorab Georges ti mansyonnen, ler i ti prezant son Mosyon, ki non selman ti pour deservi bann travayer dan sa biro Gouvernman, dan sa bann biro Gouvernman ki i ape propoze.  Me ti pour osi deservi bann zabitan zil Perseverance.

Mr Speaker mon senserman krwar ki Gouvernman pa, ki Gouvernman pe mal servi Ile du Port.  Gouvernman pe lwe Espace dan bann batiman prive ki kout de milye e de milyon Roupi tou le lannen.

Nou pep osi Mr Speaker pe rod lakaz.  Anviron 8, 000 Seselwa in apply pour lakaz.  Plis ki 2, 000 Seselwa in apply pour later, me ki Gouvernman i fer Mr Speaker?  I ankor enn fwa fer kado prime land Ile du Port – IOT.  Pour fer en housing project pour 500 expatriate.

Mr Speaker 500, 500 expatriate.  Akomodasyon pour 500 expatriate IOT.  E mazinen IOT pe deza benefisye avek bann konsesyon anba ITZ.  La IOT pe ganny prime land pour fer en batiman pour accommodate 500 son bann staff.  Oli Seselwa dan sa bann proze?  Ki mannyer eski nou pep i benefisye ek sa bann proze Mr Speaker?

En Government miles ouswa lakaz pour nou pep i bokou pli enportan.  IOT pe fer ase larzan pour aste later dan sekter prive.  Zis mazinen tou sa larzan ki zot pe fer par eksplwat ton dan nou lanmer.

Mr Speaker sa Gouvernman i bezwen think outside the box!  Vin avek bann plan, bann linisyativ ki pour benefisye nou pep e fer keksoz pli fasil e abordab pour lepep Seselwa.  Sa Mosyon par Onorab Georges pour desantraliz bann servis Gouvernman, i en bon Mosyon.

Annefe pour Praslin osi santraliz bann servis Gouvernman i neseser.  Pour annan en one stop shop pour tou bann lofis Gouvernman.  Vi ki lamazorite bann lofis Gouvernman i deza Grand Anse Praslin, alor Grand Anse i ava vin sa landrwa santral pour tou bann lofis Gouvernman e Baie Ste Anne i annan konblaz.  I ava vin plito sa landrwa, sa sant Endistriyel e komersyal pour Praslin.

Mr Speaker sa Gouvernman pa plan pour lonterm.  Zot vin avek bann gran, gran proze.  Bann gran, gran proze ki nou napa kapital pour fer ki pour andet nou pei parey tinel ek lezot gro proze.

Me bann proze ki pour benefisye nou pei, dan mwens dele letan, e ki pour save nou pei plis larzan parey Mosyon pe demande.  Gouvernman US pa montre lentere ladan.

Sa Gouvernman parey mon dir Mr Speaker, fodre zot think outside the box.  Fodre ki zot sorti dan sa bwat!

Avek sa Mr Speaker mon pour siport sa Mosyon Onorab Georges ki pe demann Gouvernman pour konstrir plizyer batiman Ile du Port, bann Minister e Departman Gouvernman avek bi santraliz bann servis Gouvernman.  Mersi Mr Speaker.

 

MR SPEAKER

Mersi Onorab Woodcock.  Mon ava pas la parol avek Onorab Jany Letourdie.

 

HON JANY DE LETOURDIE

Mersi Mr Speaker.  Bonn apre midi tou dimoun.  Mr Speaker etandonnen ki yer apre midi, apepre en pti pe 2erdtan pli tar ki la, Onorab Georges ti envit nou pour vin rev dan son rev.  Me mon pa’n ezit-e pour fer li, e la, la ki mon ti reve.

Mon ti reve ki dezormen lavi e mouvman dan Letablisman apre 240an in pran en lot dimansyon.

Mon’n vreman fer en zoli rev Mr Speaker.  E parey François Havelock i dir ‘si mon ti en arsitek, mon ti pou’n definitivman met li lo en portre’.

Mr Speaker i annan dimoun ki i ava dir Ile du Port pour napa ase lespas, i pour sere, i pour an dezord, oubyen lezot landrwa i a kapab ganny konsidere.  Pe enport, lenportans i reste ki santralizasyon bann Minister e Departman Gouvernman i merit en lanbisyon ki nou pti pei Sesel ansanm avek tou son eksper i vwar li koman en sel goal an komen e fer sir ki i abouti.

Mon krwar ki benefis pour akonpli en sel plas administratif i bokou Mr Speaker.  Sirtou ler ou a mazin sa kantite lannwiyman ki ou gannyen pour le moman.  Akoz bann lofis i eparpiye en pe partou depi osi lwen ki Mont Fleuri.  Ki swa ou dan en transpor oubyen ou apye.

Onorab Georges ou’n vreman rev en bon portre parfe ki’n donn nou en kantite rezon pour krwar e vwar akoz sa proze i merit ganny materyalize.

Avek en tel proze Mr Speaker, i annan 4 pti pwen ki’n tous mwan e ki mon mwan ti a kontan mansyonn lo la.

Premye mon mazin nou bann dimoun aze parey mon manman, ki li i kontan pour li al fer tou son bann keksoz li menm a son prop ritm.

Alors zot transpor i a depoz zot la e ler i anmas zot, direk dan lakour.  Pa pour bezwen al triy borbabor komedi zot menm.

Dezyenm, group dimoun ki a kapab benefisye.  Mon panse bann dimoun avek bann dezabilite.  E mon demande ki letan pe fer planifikasyon sa bann batiman, nou bann dimoun avek dezabilite i ganny pran an konsiderasyon pour ki zot osi zot a kapab ed zot lekor atraver bann fasilite ki a’n ganny mete an plas pour fasilit zot deplasman.

Trwazyenm pwen Mr Speaker.  Mon akey avek en gran lentere ek lazwa, sa posibilite ganny bann lespas dan Victoria pour bann artis serye.  Mon dir serye avek zot bann diferan form lar ki swa en plas pour egzibit, resite, oubyen fer teat ek lanmizik.

Mr Speaker i annan tro bokou letan artis Seselwa pe kriye pour ganny lespas pour ekspoz zot travay.  E sa byensir i ava anmenn serten reveni e animasyon dan nou Lavil Victoria.

Mr Speaker mon apresye sa nide ki bann Departman ki ankor pe lwe lofis i a kapab fer saving lo larzan ki zot pe deza peye pour bann lokasyon bann lofis pour le moman.

E i annan bokou antre zot osi zot pour kapab fer bokou saving lo bann fuel ki zot pour servi.  Akoz zot pa pour bezwen al fer tro gran deplasman.

Letan en Departman oubyen en Minister i annan son prop lespas, i ede kree en meyer kondisyon travay pour son bann anplwaye osi.

Napa nanryen ki enposib avek bon planifikasyon Mr Speaker.  Be bonn planifikasyon i osi pran an konsiderasyon en meyer lanvironnman par rapor a sanzman klima, laspe estetik e Kiltirel, koup depans, kreasyon lanplwa, promot kreativite, adopte senplisite e reste soutenab.

Me Speaker tou in ganny dir.  Kot i annan lanvi, i osi annan commitment.  Mon mwan dir tou dimoun ozordi la anndan ‘les deryer sa Kiltir move planifikasyon ki’n envit son lekor parmi nou e la pe port nou bann laginy’.  Nou tou annou dir wi fodre ki lavi Seselwa i dekonzeste.

Mon anmenn mwan soutyen pour ou Mosyon Onorab Georges.  Mersi Mr Speaker.

 

MR SPEAKER

Mersi Onorab Letourdie.  Mon ava donn laparol Onorab Simon Gill.  Onorab.

 

HON SIMON GILL

Bonn apre midi Mr Speaker.  Mersi bokou Mr Speaker.  Bonn apre midi tou koleg Onorab.

Mr Speaker ozordi nou le 13 mars 2019, 2.58 apre midi.  E mon pe entervenir lo sa Mosyon Mr Speaker avek en lespri soulaze, avek en leker leze.  E mon demann tou mon bann Koleg isi lo sa kote latab, ki letan zot in pran letan pour entervenir, siport Mosyon Onorab Bernard Georges.

Nou pour siport sa Mosyon Mr Speaker.  Akoz dan Mosyon Onorab Georges, mon vwar en vizyon ki byen lontan in plante dan later Sesel.  Mon rapel dan bann lannen 1975 letan nou koz New Port, i debout lo en later konble.

E ler mon get bann lannen ki’n swiv Mr Speaker.  Mon get moman ki Prezidan France Albert Rene in étale sa nouvo vizyon pour Sesel.  Ladan in osi enkli kre lespas Mr Speaker.

Kree lespas pour nou kapab donn Seselwa, swa bann ki oule lespas pour biznes, bann ki oule lespas pour fer bann lezot batiman, bann lezot lenfrastriktir pour bouz ansanm avek vizyon nouvo lelan devlopman, i sa ki’n pous Gouvernman.

Parey zot kontan dir ‘nou’n la plis ki 40an wi’ Gouvernman ki’n komans depi pour sa plis ki 40an enplimant en vizyon lonterm.

Sa vizyon lonterm Mr Speaker, i ankre dan en serten nivo planifikasyon.  En prozeksyon devlopman lonterm.  Se pour sa rezon ki Gouvernman SPPF, Gouvernman Parti Lepep e Gouvernman United Seychelles Mr Speaker, nou’n kontinyen enplimant sa vizyon.

E Mr Speaker mon kontan Onorab Georges i dir in reve.  Me dan sa rev, in rev sa vizyon ki nou pe enplimante.  E si, si in pran, wi Onorab Lepathy, Onorab Adelaide.  Bann fanmir Lepathy, Adelaide nou pour rebatiz li akoz i rebatiz tou dimoun dan Lasanble.

Mr Speaker Onorab Adelaide i dir nou 40an.  Wi nou la depi 40an, e nou la nou’n fer en kantite devlopman.  Nou’n fer en kantite keksoz ki bon pour sa pep.

Mr Speaker nou rapel letan Onorab Ramkalawan Mr Speaker, anba Leadership nou Gouvernman, e li i ti pe lead SNP – ler i ti pe anmenn en lalit pour lager kont konblaz dan sa pei Mr Speaker.  Nou rapel sa nou.

 

HON SEBASTIEN PILLAY

(Off-Mic)

Vre sa?  Non!! Ah…

 

 

HON SIMON GILL

E nou rapel ler pa zis Onorab Ramkalawan Mr Speaker.  Ler Leadership SNP ti pe lager kont nou, e dir nou sa later konblaz pa bon.

 

HON WAVEL RAMKALAWAN 

(Off-Mic)

Be Msye Rene avek SPUP ou pa dir?

 

HON SEBASTIEN PILLAY

(Off-Mic)

Ah!! Relax pa fer sa.  Pa lager, non pa byen.

 

HON SIMON GILL

Mr Speaker nou, nou ti’n rev 40an pli tar ler SNP ti pe dir konblaz pa bon.  Si, si zot ti dan mazorite dan Lasanble Nasyonal a lepok, ti riske Mr Speaker napa en sou later konblaz dan sa pei Mr Speaker.

 

HON SEBASTIEN PILLAY

(Off-Mic)

Ah come on.

 

HON WAVEL RAMKALAWAN

(Off-Mic)

Zot 2 Sarah.

 

HON SEBASTIEN PILLAY

(Off-Mic)

Think outside the box laba en.

 

 

HON SIMON GILL

Tou, mon demann mon lekor kestyon Mr Speaker.  Ki kote tou sa lenfrastriktir ki nou’n mete dan sa pei ti pour ete?  10an, 15an, 20an pli tar, ki kote i ti pour ete?

Ki kote tou sa biznes, tou sa lenfrastriktir dan Providence ti pour ete?  Ki kote tou sa lenfrastriktir ki nou’n mete ki nou pe kontinyen mete e nou pour kontinyen mete lo Perseverance ti pour ete?  Or i pour ete.

Mr Speaker sa ki nou’n manke Mr Speaker.  Sa ki nou’n manke, ki ler serten politisyen pa’n oule angaz zot totalman dan en prosesis devlopman dinamik ki ti pe pran plas dan nou pei anba Leadership, ankor enn fwa Msye Rene, Msye Michel, e la ozordi Prezidan Danny Faure.  Se sa bann konpleksite ki nou gannyen parfwa.

Mr Speaker ler mon dir nou pa’n angaz nou ase,  nou’n rod letan pour nou kritike, olye rod letan pour nou angaz nou, pour nou partisipe, pour nou kontribye dan en fason pozitiv lo bann diferan plan lo bann diferan proze ki Gouvernman in deside pour anbark lo la.

E Mr Speaker ler mon ekout Onorab Larue koze, e mon’n ekout Onorab Woodcock koze,  mon annan en keksoz pour mwan dir pa zis avek le 2 Onorab.  Me pour dir avek tou bann zenn Onorab lo lot kote latab Mr Speaker ‘al antre dan listwar sa parti politik ozordi ki apele LDS ki’n evolye atraver lannen.

Al rantre dan son listwar.  E zot ava vwar ki kantite kontradiksyon ek konfli ki’n annan an sa ki konsern lakseptasyon nesesite pour nou kree konblaz, pour nou fer reklanmasyon later, pour nou kre plis lespas Mr Speaker.  Zot ava vwar kantite konfi, kantite kontradiksyon ki i annan a diferan moman lo sa bann diferan proze ki nou’n anmennen dan sa pei!

Mr Speaker ler mon’n konmanse.  Mon’n sit dat le 13 Mars 2019.  Me Mr Speaker i lo rikord ki le 14 Mars 2018, Prezidan Danny Faure ti komans fer bann diskisyon serye avek bann dosye ki ti’n prepare.  E i ti diskit avek plizyer Gouvernman, e finalman in abouti ki an zen 2018 Gouvernman Lenn ti donn son konsantman pour finans en batiman Gouvernman pour abrit tou bann lofis bann Minister.

E dan sa Lagreman, ti osi annan lantant pour kree or pour batir Headquarter Lapolis.  Ti osi annan dan sa menm moman, en lantant pour kre or pour batir biro Attorney Zeneral.  Nou pe koz zen 2018 Mr Speaker.

Ozordi nou 2019.  E i byen ki Onorab Georges in reve 2019 ki sa i pe koz lo la, i en rev ki’n ganny reve byen avan 2018 e ki finalman in pran en laform an 2018 le 14 mars.  E son Loter, son larsitek se pa lot ki Prezidan Danny Faure.

E ankor enn fwa, ler mon ekout Onorab Larue koze Mr Speaker,  ler mon ekout son konteni son lentervansyon, i fer mwan konpran ki si Onorab Georges in reve, in prezant sa Mosyon la an 2019, ki sa kantite lenformasyon ki Onorab Larue in donnen apre midi, i pa kapab en rev ki zanmen fek reve yer.  Akoz i annan tro bokou devlopman, tro bokou staz ki Onorab Larue li menm in aksepte progre kot nou’n arive Mr Speaker.

E si i annan okenn retar dan lenplimantasyon bann rev resan,   nou, nou dir lo sa kote latab ‘lontan nou pe reve’ avek tou nou lenperfeksyon Mr Speaker, nou’n reve, me nou pa’n zis reste dan rev –  en kantite nou rev nou’n enplimante, nou’n egzekite e en kantite nou bann rev in benefisye en kantite nou bann Onorab lo lot kote latab laba Mr Speaker.

E nou kontan.  Nou kontan ki nou bann rev in kapab tous zot dan en fason reel, dan en fason tanzib.  Me sa ki manke Mr Speaker, sa ki i manke se pour nou koman en Lasanble annou kontinyen rev ansanm.  Annou kontinyen rev ansanm.

E avan ler nou al break Mr Speaker, avan ler nou al pran nou dezennen.  Mon fer referans avek remark ki Onorab Ramkalawan ti fer, ler i ti pe entervenir lo let ki Onorab Basil Hoareau in prezante.  E i ti dir ki nou pour mars ansanm.

Mr Speaker beautiful.  Beautiful, beautiful statement Mr Speaker.  Me annou pa fer li reste zis en statement.  Annou nou tou mars ansanm, pour nou fer sa ki meyer pour Sesel!

E Mr Speaker ler mon ti pe fer mon lentervansyon lo diskour Leta Lanasyon, ler mon ti sit ki Prezidan Rene ti dir mwan defen le 20.  Sa ki in dir mwan Mr Speaker in mark mwan e i pour mark nou tou.  Take it as a lesson, a positive lesson. 

Me sa leson pozitiv ki nou bezwen tire ladan.  Nou tou bann Leaders bann parti politik, bann dimoun ki dan bann pozisyon influencielle dan sa pei, ki mazinen, pa zis nou ki konte.

Mazinen ki nou la pour deservi sa pep Mr Speaker.  Pa mazin nou avan.  E Mr Speaker si i annan en keksoz ki nou’n enskrir dan nouvo Konstitisyon United Seychelles Mr Speaker.  Se Sesel i avan nou tou!  Sesel i pas avan tou.  Lanasyon Seselwa ki nou pe deservi, i pas avan tou.  Nou bann serviter lepep Mr Speaker!  Sa i mesaz ki Prezidan Rene avan ler i ti kit nou, in dir mwan.  E se sa ki mon’n pran li koman mon devwar pour mwan pas avek Lanasyon Seselwa.

Mon pa’n fer li zis akoz mon’n anvi fer li.  Akoz mon’n santi ki i en leson pour nou tou!  I en leson pour nou tou, enkli mwan ladan.  Mon pa pe eksklir mon ladan.  En leson pour nou tou.

Annou aret mazin zis nou.  Sa pep ki’n met nou la, ki’n elekte nou dan sak nou bann distrik Mr Speaker.  I pas avan nou Mr Speaker.  E fodre zanmen Mr Speaker ler en dimoun i bezwen en led, i bezwen en sipor ki nou dir li non nou pa pour donn li.  Ki nou dir li la nou napa letan, parey en bon pe nou pe fer isi dan sa Lasanble Mr Speaker.

Mr Speaker, Mr Speaker.

 

(Interruption)

 

MR SPEAKER

Retourn lo sa Mosyon.  Onorab.

 

HON SIMON GILL

Lo Mosyon Mr Speaker.  Mon pe retourn lo Mosyon depi ler mon ti komanse Mr Speaker mon’n lo Mosyon.  E mon lo konteni esansyel Mosyon Mr Speaker.

Ou konnen Mr Speaker, dir nou pa planifye.  Nou pa planifye.  Mon mwan a dir zot dan sa pa planifye ki zot pe dir, nou bezwen koz avek nou bann profesyonnel.  Annou pa zis dir nou pa planifye.  Annou koz avek nou bann profesyonnel ki’n ganny train.  Bann profesyonnel ki i annan en kantite kapasite, ki i annan en kantite abilite ki ozordi i la dan Gouvernman, i la dan sistenm.

Dir zot, annou fer sir ki dan bann responsabilite ki nou’n gannyen, nou montre nou nivo konpetans, nou montre nou nivo profesyonnalizm.  Nou retir okenn baryer partizan politik Mr Speaker.  E nou mazin Sesel.  Nou mazin byennet Seselwa, nou mazin devlopman sa pei.

En devlopman entegral, en devlopman ki napa konfli avek bann diferan striktir, ki nou menm nou bann profesyonnel i design e advise bann diferan Minister, Gouvernman e Lenstitisyon ki sa i bon pour nou enplimante.  Sa i mesaz ki nou devret profite atraver Mosyon Onorab Georges pour nou pase.

Mr Speaker mon’n tann koz lo mank planifikasyon.  Zot in link sa avek konzesyon trafik.  Be Mr Speaker si i annan en laverite ki parfwa i difisil pour aksepte.  Akoz parfwa i trangle nou laverite.  Se ki ozordi dan sa pei, si i annan en konzesyon trafik.  Sa nou pa devret get li zis koman en fenomenn negativ akoz en mank planifikasyon.

Mr Speaker lavites ki sa pei, son pep, son popilasyon pe monte lo enselon sosyal.  I fer ki ozordi nou annan nou en popilasyon kot bokou fanmir Seselwa i annan 1 ou 2 transpor e menm i annan 3 transpor.  E lavites devlopman bann lenfrastriktir ler nou balans bann priyorite Nasyonal, i fer ki parfwa nou pa’n kapab al avek sa menm lelan pour larzi tou sa bann semen pour les tou sa bann dimoun ki i annan 3, 4 transpor.  Manman i annan transpor, papa i annan transpor, sa returning graduate ki’n al deor in al etidye, i dan en plas travay.  I ganny en loto avek son landrwa travay avek Gouvernman, i annan transpor!  Mr Speaker be sa i en labote, i montre nou ki mannyer devlopman Seselwa in arive.  I pa neseserman negativ.  I pa neseserman negativ.  Annou pli bon planifikasyon ki oule, annou pli bon planifikasyon ki oule, i annan serten moman kot lezot priyorite in pas avan, zis larzi tou semen ki i annan.  Se sa ki’n arive.

I annan serten moman kot i annan bann lezot priyorite Nasyonal Mr Speaker, mon repete in pas avan larzi tou sa semen dan tou nou bann teritwar.  Me si i annan en laverite ankor ki nou bezwen aksepte Mr Speaker, se sa kantite kilomet semen ki sa Gouvernman SPPF/Parti Lepep/United Seychelles in fer dan sa pei!

 

(APPLAUSE)

 

HON SIMON GILL

Preski partou dan bann diferan kwen nou teritwar Mr Speaker, nou annan semen, me wi.  E si i annan en laverite ki nou bezwen aksepte, malgre tou sa bann semen ki nou’n konstrir, nou pa ankor fini kapab met semen dan tou nou bann teritwar ki nou bezwen mete.  Sa i en laverite, ki nou bezwen aksepte.

Me Mr Speaker, the beauty, the beauty of it all, se ki nou reste determinen, nou reste avek pli gran lanbisyon pour nou kontinyen amelyor kondisyon nou pep Mr Speaker.

Mr Speaker parti United Seychelles i annan en vizyon pour sa pep, i annan en vizyon pour sa pei avek tou nou lenperfeksyon ki nou annan, nou pour kontinyen.  Nou pour kontinyen Mr Speaker, nou pour kontinyen!

Osi lontan ki nou annan Msye Danny Faure anler la State House, e nou annan bann lezot Leaders dan nou parti, dan nou Lorganizasyon ki optimistic, ki anbisye pour fer sa ki meyer pour sa pep Mr Speaker.

Mon mwan pour dir avek Lanasyon Seselwa, annan konfyans dan nou.  Met konfyans dan nou, trust United Seychelles Mr Speaker.  Trust us Mr Speaker.

Onorab Georges atraver ou Mr Speaker.  Wi mersi, mersi ki depi ler ou’n swiv Parti Seselwa dan bann ’90 ziska ozordi nou 2019.  Mon kontan sa bold step forward ki ou’n pran e pa zis ou reve.  Pa zis ou reve Onorab Georges.  Partaz sa rev ki ou’n reve e anmenn tou Manm Onorab LDS pour kontinyen partaz nou rev, partaz sa vizyon ki nou’n annan!  This is the way forward Mr Speaker pour en United Seychelles pour nou mars ansanm.  Mars ansanm pour boner e prosperite lepep Seselwa.  E avek zot partisipasyon Mr Speaker, avek tou nou bann lenperfeksyon ki nou annan, nou ava met ansanm and we will do something perfect for our people, for Seychelles!  Mr Speaker mersi bokou.

 

(APPLAUSE)

 

MR SPEAKER

Mersi Onorab Simon Gill.  Bon i reste nou ankor 5 minit.  Mon prosen entervenan, se Onorab John Hoareau.  Eski ou kapab fer ou entervansyon dan 5minit?  Yes go ahead Onorab.

 

HON JOHN HOAREAU

Mersi Mr Speaker.  Bonn apre midi Mr Speaker.  Bonn apre midi tou dimoun ki a lekout.

Loter Mosyon pe demann Gouvernman pour etidye posibilite pour konstrir plizyer batiman Ile du Port pour abrit bann lofis Gouvernman.  Dan en lot mo, se pour konstrir en Kapital Administratif. ,

Sa Mosyon Mr Speaker i enn ki i annan bokou merit.  I annan bokou merit parski ler nou get o tour nou, par egzanp si nou menm get Sidafrik, pa tro lwen ek nou.  Nou kapab vwar poudir li osi i annan son Kapital Administratif ki Pretoria e son Kapital Komersyal ki Johannesburg.

Me sa, nou vwar sa fenomenn dan plizyer pei.  I pa’n vin par koensidans, me i vin akoz petet akoz nesesite.

Si nou get par egzanp dan nou pei menm Sesel, dan en laspe istorik, ler bann Kolon ti vin Sesel, bann dimoun, bann lesklav ensidswit lo o komansman menm, zot ti settle dan Victoria.  E sa bann lepok ti petet annan saret ek seval pli tar e ensidswit.  Semen ti ptipti e in nesesit pour agrandi.

Me plas prensipal ti dan sant Lavil.  Ki nou apel en Central Business District ozordi, en CBD.  E vi ki devlopman in fer o tour sa pwen focal dan Lavil, in fer ki i nesesit bokou plis lespas pour lofis, pour bann lezot keksoz ensidswit.

Me ler nou pe gete osi, nou kapab konstate poudir pri lofis i toultan en fakter ki pe monte akoz konpetisyon dan sant Lavil.

Si nou pour get ozordi zour, pri par met kare pour lwe en lofis dan lavil i ant 400 a R500.  Alor, i pa en pri ki pour kontinyelman desann, me i en pri ki pour kontinyelman monte, ki montre ki pli anpli Gouvernman pour bezwen vwar plis larzan dan bidze pour li lwe bann lofis dan Lavil.

Alor Mr Speaker an vi ki Gouvernman i provide en servis ki pa neseserman biznes ou komersyal, alor i vin en fason ki vin en pe difisil pour zer sa larzan pour li kapab pey sa lokasyon dan Lavil.  Se sa ki mon pe dir vin par nesesite ki nou bouz en pe an deor.

Ant parantez ou kapab dir, bann sekter komersyal vi ki zot, zot annan en vokasyon biznes.  Zot, zot kapab fer biznes e retir sa larzan pour zot kapab pey zot rent dan Lavil.

An plis an plis nou pe vwar labank, nou pe vwar plis laboutik, plis lofis komersyal, par egzanp pour lofis avoka ensidswit.  Se sa bann biznes koumsa ki kapab afford pour kapab tenir rent dan Lavil.

Ler mon’n get en pti pe an revi lo bidze lannen pase, mon’n vwar, mon’n konstate ki ozordi Departman Touris pe lwe, pe pey office rent pour apepre 11.5 milyon.  Nou konnen i pe occupy en gran lespas dan Botanic, Botanical HouseTourism Board i osi pe depans apepre 4.2, Minister Lanvironnman apepre 4 milyon.  E nou konnen i pe occupy serten lespas dan Chantier Mall.

Alor Mosyon ki Onorab Georges pe demann nou.  Parey in ganny dir avan, pour think outside the boxThink outside the box pour reve, e reve ki nou pe, nou annan sans pour nou fer en planifikasyon pour long term.  Nou annan en sans pour nou fer keksoz ki byen, annou fer li byen depi son lanfans, depi son konsepsyon.

Me en rev pa pour zanmen vin an realite par mazik.  I pour vin par lasyer, par determinasyon e par travay dir.  Ozordi zour nou bezwen asize met nou lespri ansanm e vwar ki mannyer nou kapab realiz sa rev.  Par travay dir, par met lespri ansanm e determinen pour nou kapab vwar en keksoz ki pli byen pour nou Nasyon, pour nou bann dimoun ki pe viv, la ozordi e pour bann ki pour vini demen.  Akoz sa i en vizyon a long term.

Mr Speaker Onorab Georges in koz lo en konsep enteresan, Green and smart city.  Ozordi nou Sesel, nou pe koz lo bann SDGs, bann millennium goals ki’n, ki ozordi nou apel li bann SDGs Strategic Development Goals.  E enn parmi sa bann goals, se pour target 30poursan servi lenerzi renouvlab par 2030.

Alor ki nou dan en pei tropik.  E sa paret mon’n dir, sa proze ki, sa rev ki Onorab Georges in demann nou pour rev ansanm avek li.  Se pour get a long term ki fason nou kapab servi sa bann keksoz ki nou annan deza a labondans, nou soley ensidswit, lezot mwayen lenerzi renouvlab pour nou kapab fer green, en green e smart city.

Sa i a ed nou pour depans mwens, e redwir nou depans, nou depandans lo petrol, e nou pour larg mwens polisyon e respir ler pli fre.  Redwir osi lenpak lo sanzman klima.

E ler Onorab Georges ti pe konsevwar sa bann lide, mon ti pe osi mazin Caudan par egzanp.  Kot ler ou annan en devlopman entegral, ou kapab met osi bann laspe kot en dimoun i kapab asize petet annan en waterfront development kot i pe vwar bann keksoz, bann tranzaksyon bato, bann bato ki pe rantre, sorti.  E sa dan li menm i anmenn en lot laspe biznes dan sa landrwa, menm ki i pour annan plis en volonte pour servi koman bann biznes, bann office spaces.

Mr Speaker sa i anmenn mwan lo en trwazyenm pwen.  En dernyen pwen ki mon ti a ava kontan petet koz en pti pe lo la, sa se konzesyon trafik.

Bomaten mon’n fer li mwan devwar pour mon sey telefonn enn bann mekanisyen dan mon distrik.  Esey demann li en pti pe ransennyman.  Mon’n demann li, be si ou met en loto on, e ou les li vire san pe, san dray li pour 1erdtan.  En loto apre 2,000CC.  Konbyen lit bennzin apepre i pour manze?  Sa msye i dir mon, vreman difisil, i depan lo si ou pe met aircon, groser ou masin, ensidswit, laz ou masin.

Me i ti dir mon, i 1 ant a 2 lit bennzin par erdtan.  E ler mon’n fer en pti kalkil, en lit bennzin i kout apepre R18 par lit.  Mon’n miltipliye li par 2, petet mon’n, R18 par lit.  E mon’n miltipliye li par 2, pour la senp rezon ki souvandfwa nou reste 2erdtan dan trafik pour bann ki reste en pe pli dan sid.  1erdtan bomaten, 1erdtan apre midi.  So i fer ou deza R36 par zour ou pe perdi, zis ler ou pe asiz dan trafik e ou pe osi perdi ou 2erdtan dan ou ler lazournen.

Sa kont sa kantite lafimen ki pe brile, ki pe anvoy dan latmosfer, ki i annan lefe greenhouse effect lo nou klima osi.  Me ler ou pran sa R36 ou miltipliye li par 300 zour on the average pour en dimoun ki pe travay 300 zour dizon dan en lannen.  Komans fer li vin enteresan akoz ou pe komans depans ou R10, 800 dan 1an zis lo bennzin ki ou’n gate.  E ler ou miltipliye sa ankor par 2.  Akoz bomaten ek aswar, i fer ou R21, 600.  Pran sa R21, 800 Mr Speaker miltipliye li par en 5, 000 dimoun ki servi transpor, i fer ou deza apepre 108 milyon par lannen.

So sa i apepre more, i kapab en pti pe plis, i kapab en pe mwens.  Me sa i apepre kantite larzan ki nou zis zete.  Akoz nou pe bril dan bennzin san okenn mouvman.

Mr Speaker san kont wear and tear lo ou masin.  I vreman en gro sonm gaspiyaz ki nou pe fer.  Sa lakantite polisyon osi ki i pe large dan ler, ensidswit.

Enteresan 108 milyon Mr Speaker, dan nou Lekonomi nou ti kapab afford monorail pour fer lo bann landrwa plat dan les Lavil, dan les pei.

Nou ti kapab servi sa 108 milyon pour amelyor nou sistenm bis e semen.  Nou ti kapab konstrir 54 lakaz avek 108 milyon a en kou R500 par lakaz.  E sa i kout nou $7.7 milyon Dolar dan nou Lekonomi ki nou pe aste petrol e nou pe zis zete.

Mr Speaker an konklizyon mon pour dir poudir mwan pour siport sa Mosyon Onorab Georges akoz i annan bokou merit.  I pour ede avek lespas pour bann lofis, i pour anmenn en nouvo dimansyon en green city, en smart and green city.  I pour ede osi lo kote Lekonomi pour nou ekonomiz en kantite larzan lo rent e osi lo lakantite gaspiyaz an term bennzin ki nou gaspiye.

Mr Speaker dan Sesel nou annan nou bokou bann arsitek.  Nou annan osi en zenn garson ki mon konnen.  Mon’n fer li lekol e i enn mon zanmi personnel, Paul Lesperance.  Sa i ava donn li petet parey Onorab Georges i dir, anmenn lide sa bann arsitek devan e ava donn zot sa fason pour epanouir, pour sey anmenn en keksoz ki kapab demen fer nou byen fyer.  Akoz i ava en Lavil ki nou’n design par nou menm Seselwa e nou’n met an valer en larsitektir Seselwa, an menm tan avek inovasyon avek en rezonnman ki montre poudir nou konsyan laverdir, nou konsyan nou Lekonomi, nou konsyan polisyon, nou konsyan tou bann keksoz koumsa.

Sa i ava anmenn lafyerte osi parey in dir dan nou Civil Service e donn valer nou bann dimoun ki pour servi e pour benefisye avek sa bann nouvo lofis.

Mr Speaker bokou in ganny dir lo sa size.  Mon pa la pour mwan repet plis ankor.  Me mon ti a kontan demann tou dimoun pour siport sa Mosyon akoz i en Mosyon ki vwar bokou a lavan.  Kontrerman parey Msye Gill in dir poudir zot.

 

Onorab Gill in dir, ki zot ki’n reve.  Mon krwar tou Seselwa i kapab konstate poudir Onorab Georges in vin avek en lide ki orizinal.

Zot tou zot in asize, zot in mazin pour fer en lofis, nou nou’n pe get li bokou pli devan ki sa.  nou pe get en green and smart city, nou pe get pour anmenn bann keksoz ki inovativ, en konstriksyon ki i ava donn nou valer nou pep, valer nou larsitektir e valer nou bann dimoun.  Mersi bokou.

 

MR SPEAKER

Mersi Onorab Hoareau.  Bon nou pour Break.  Nou pour retournen 4.10.  Mon ti a demann tou Manm pour attends.  Mon annan apepre 6 lezot Manm ki lo mon lalis.  Nou pour esey pour nou fini, nou ava regarde avek SBC petet si nou kapab ganny latest kan 5er edmi ki nou a kapab fini delibere lo Mosyon Onorab Georges.  Akoz semenn prosenn i pour absante, i pour lo en misyon.  Ok so nou ava Break.  Nou retournen 4.10.

 

(BREAK)

 

MR SPEAKER

Bon nou ava kontinyen nou travay.  Mon ava pas laparol avek Onorab François Adelaide.   Onorab.

 

HON FRANÇOIS ADELAIDE

Mersi Mr Speaker.  Mr Speaker en tel Mosyon ki pe demande pour Gouvernman konsider fer en tel devlopman, i tre enportan.

Prenon kont ki pour fer en tel devlopman parey  i demann en lokasyon ki byen konvenab e apropriye.

Mon panse ki Onorab Georges koman en klervwayan, in vreman annan sa sazes pour li trouv li.  Eskiz mwan, mon panse ki Onorab Georges koman en kler vwayan in vreman annan sa sazes pour li trouv pli lwen, vi ki sa landrwa pe ganny devlop e petet si i tarde anmenn sa Mosyon, tou sa bann later i riske fini ganny partaze.   E sa landrwa ki nou pe konsider koman ideal, pour vreman sap nou pour nou kapab realiz en tel proze.

Mr Speaker nou bann sitwayen, sirtou bann ki sorti Baie Lazare, nou pa vwar vreman rezon akoz ki nou bezwen kontinyelman kontribye dan bann proze konblaz.  Akoz laplipar du temps ler sa proze in fini, se bann gro biznes etranze ki premyerman benefisye,  e nou, nou ganny kit ater.

Mon’n ganny bokou kestyonnen lo lepase lo sa size lespas lo konblaz.  Bokou zabitan in eksprim dezir pour ganny en bout lo sa konblaz pour fer en pti biznes.  Me larepons i vreman dekourazan.  Akoz zot ganny dir ki napa later.  Sepourtan nou pe kontinyelman kontribye tou le mwan pour pey det ki Gouvernman in pran pour fer sa konblaz.

Me ler en Gouvernman i ava antreprann en tel proze, petet sa i a retir en pe fristrasyon ki anfen nou ava kapab ganny en pti valer pour nou larzan.  Vi ki nou pe kontribye tou le mwan dan bann proze konblaz, me ki zis en pti group Seselwa privilezye avek zis etranze ki pe profite.  E nou bann Seselwa nou pe kontinyen ganny trangle, ser sang eksetera pour fer sir ki nou bann det i ganny peye.

Avek sa nouvo devwalman ki en lakonpannyen in fini ganny permisyon pour fe 500 flat pour son travayer, byensir sa dan li menm i montre ou ki Seselwa ordiner i kontinyelman pey det e se pa Seselwa ki benefisye premyerman, me plito etranze.

Zis sa Mr Speaker dan li menm i ankor defavoriz Seselwa dan bann biznes lwe apartman.  Gouvernman aktyel avek mank sa vizyon pour sirman afekte nou bann frer ek ser Seselwa, pour ganny en pti pe plis reveni.  Ler nou pe les en konpannyen etranze antre an konpetisyon avek nou prop Seselwa.   Sirman sa i pa akseptab.

Eski sa Gouvernman i serye ler i pe koz Seselwa lo sant devlopman?  Sirman parey zot dir ‘the answer is blowing in the wind’.  En building Gouvernman ki a kapab abrit tou sa bann servis gouvernmantal, i ava en gran lavantaz.  Sirtou pour bann sitwayen ki bezwen deplas lwen pour vin fer bann tranzaksyon kot sa bann biro.

Konmela bokou letan i ganny gate, byensir.  Akoz bann biro Gouvernman i eparpiye en pe partou.  E byensir en sitwayen i bezwen gaspiy plis letan, menm pey pli bokou lo transpor pour kapab fini tou zot tranzaksyon dan 1 zour.  Me ki souvandfwa, zot pa kapab fer li.  Letan gate Mr Speaker i egal larzan perdi.  E ler ou pe perdi plis letan dan ou tranzaksyon, byensir sa i ede abes ou Bidze, resours e menm rannman.

En tel proze parey, osi pour ede koup Bidze Gouvernman ki an se moman pe pey bokou larzan dan bann servis litilite tel ki kouran avek delo.

En tel lenvestisman, sirman pour anmenn en benefis financière, prenon kont ki nou kapab entansifye lo bann proze fer lenerzi renouvlab, tel ki lenerzi soler e menm anmas delo.  Sa i ava konplimant, sa i ava konplimant sa ki Onorab Georges in dir lo size fer bann lofis pli konfortab pour travayer avek kliyan.

Dan Bidze Nasyonal bokou larzan i ganny mete i ganny mete pour bann tel depans, enkli rental osi.  Si sa bann depans i ganny koupe, bokou larzan pour ganny anmase,  byensir transfer dan bann lezot advenir.  Plis saving par Gouvernman, se plis larzan dan pos Seselwa.  Eski sa pa pour ede fer desann pri lavi?

Mr Speaker ozordi nou vwar nou dan en problenm

anbouteyaz sorti dan sid e les Mahe dan bomaten avek aswar.  Akoz bokou dimoun pe desann Anvil, swa pour vin travay, swa pour vin fer bann tranzaksyon dan bann biro Gouvernman.

Sa i fer ki plis trafik dan Lavil ki ede pour fer plis konzesyon, e sa i ede retard bann tranzaksyon osi.

Avek bann biro Gouvernman lo Ile du Port, vi ki i sitye pre avek lanmer, byensir sa i en lot lavantaz.  Akoz sa i a fasilman tant bann envestiser pour petet tant en biznes dan bann ferry service ki a konnekte Anse Royale avek Ile du Port.  Sa byensir i ava en lot fason ariv Anvil e visversa, ki a vreman redwir sa zafer trafik blokaz dan bomaten ek aswar.

Sa pour vreman atrakte bokou sitwayen.  Akoz premyerman en ferry ki pe pran apepre 200 dimoun, i sirman redwir trafik lo semen vi ki an mwayenn bann loto ki sorti dan sid, zot pe desann avek swa 2 ou 3 pasaze.  Me si nou annan en ferry service ki pe petet i pe deservi en 200 dimoun, sa i a vedir ki 100 loto an mwens i ava dan sirkilasyon trafik.  Pli bon solisyon ki tinel e ki napa gran lenpak lo nou lanvironnman.

Lot lavantaz se ki bann biro dan sant Lavil, i ava lib e plis Seselwa i a ganny sans ganny lokasyon pour fer bann aktivite komersyal e rekreasyonnel.  Sa i a ede kit Lavil Victoria vivan ziska tar dan lannwit.

Ler mon pe dir sa Mr Speaker,  i fer mwan rapel ler mon ti ankor zenn kot ti annan bann landrwa detant tel ki Café Royale.  Lasanble fek fer en komanter lo lalkol ki ganny vann dan Victoria.  Sa bann building vid i osi i ava ganny devlope dan bann bar, pub, restoran ouswa diskotek ki a ede met entertainment dan Lavil e sa i a ede reviv nou Lavil.

Mr Speaker bon planifikasyon i vreman enportan pour devlopman en pei.  Zis en pti pran refleksyon, zis lo sa bout later ki an kestyon.  Eski i normal pour fer en lekol vizavi en petrol station?  Kot bann etidyan pour bezwen respir tou sa carbon emission avek bann lavaper toksik, ki pour sorti lot kote stasyon petrol e osi bann emisyon avek bann transpor lo semen depi bomaten ler zot vini ziska apre midi ler zot kit lekol.

Eski nou pe vreman protez nou bann zanfan?  Swa nou pe enkonsyanman met zot a risk bokou bann kondisyon medikal ki sa bann emisyon i raporter.

Onorab Georges pa pe zis reve.  Me in leve vin kot Lasanble e servi son privilez koman en Manm Lezislatif pour demann sipor pour son nide afen vin en realite ki pour sirman amelyor lavi nou Nasyon.  En nouvo lespwar pour Sesel, akoz LDS pe kontinyen lead the way avek bann bon nide ki sirman amelyor lavi Seselwa.

Mon koman en Manm dan sa Lasanble ki anvi vwar en meyer Sesel, kot son pep i ava ganny mwens lanbara ler i pe fer en tranzaksyon avek sa propozisyon pour fasilit Seselwa.  Byensir Onorab ou kapab kont lo mon sipor e ede realiz sa rev pour en nouvo Sesel ki LDS i anvi vwar.

Mr Speaker parey Angle i dir ou ‘a good beginning is half the job’.  Si Gouvernman i kapab sekiriz sa later, sa i ava vreman en good beginning.  Fodre zot konpran ki nou, nou pa pe dir al fer building deswit.  Me nou, nou pe rod ki nou kapab sekiriz sa later.  Akoz si nou pa fer li la boner, definitivman nou pour vwar poudir sa landrwa ki ideal, nou pour fini perdi.  E ler nou pour kalkile pour nou met nou Government mile, petet nou napa landrwa.

Mr Speaker Onorab Georges parey mon abitye dir ou ‘no dream is too big, and no dreamer too small’.  So kont lo mwan pour donn ou sa sipor pour fer sa Mosyon ariv kot Msye Faure swa demen, swa apredmen.  Me o pli vit posib.  Mersi Mr Speaker.

 

MR SPEAKER

Mersi Onorab Adelaide.  Mon ava donn laparol Onorab Audrey Vidot.

 

HON AUDREY VIDOT

Bonn apre midi Mr Speaker.  Tou Manm Onorab, zabitan Roche Caiman e tou manm piblik ki a lekout.  Mr Speaker mon pa pour tro long.  Me mersi pour donn mwan laparol.

Mr Speaker yer letan mon’n ekout lentervansyon Onorab Georges, mon’n apresye serten komanter ki in fer resorti.  Mon zis swete ki son bann Koleg lo son kote latab in note pour refleksyon.  Si non.  Pa trakase, mon pour remind zot kwa ki’n ganny dir.

Mr Speaker Onorab Georges son lentervansyon yer apre midi, in konfirmen ki in parmi bann dan Lopozisyon ki’n kont proze devlopman konblaz.  Menm si i annan ki pa tro, tro kontan, letan nou dan United Seychelles nou remind zot ki devlopman konblaz in osi benefisye zot.

Letan Onorab Ghislain ti mansyonnen dan SONA ki LDS son vizyon i fini lo son bout nennen,  i ti konnen kwa ki i ti pe koz lo la Mr Speaker.  Nou bezwen rekonnet osi ki vizyon Msye France Albert Rene parey Onorab Gill in dir pli boner, pa ti enn ki ti short term, me enn ki ti long-term.

Si ozordi i annan nou ki pe reste dan en lakaz lo later konble, annan en biro lo later konble, annan biznes lo later konble e asize dan konfor isi Ile du Port lo later konble,  gras a sa Gouvernman ki’n la plis ki 40an.

(APPLAUSE)

 

HON AUDREY VIDOT

Pa zwe bliye akoz pep Seselwa pa ti donn zot State House, me plito 15 lo 10.  Seselwa i pli rekonesan ki zot.

Mr Speaker i enportan note ki dan plan Gouvernman pour konstrir en Government House Ile du Port, i pa en Breaking News.  Menm si i pa ankor ganny enplimante, i enn parmi bann vizyon ki Gouvernman in pronons son lekor lo la.  Me i pour ganny fer parey bann lezot devlopman ki zot ti krwar nou ti pe zis reve pour fer.

Mr Speaker par son aksyon nou’n trouve, ki Prezidan Faure i atas gran valer avek travayer sak Seselwa.  Mon pour repet ankor parey mon’n dir, dan SONA – akoz i fer letan pour al vizit son bann travayer Seselwa dan zot landrwa travay pour vwar zot bann kondisyon pour li menm.  Sa pour permet li fer serten lazisteman kot i neseser pour bann ki pe enplimant sa proze Government House isi menm Ile du Port.

Mr Speaker Breaking News?   Breaking News i ler Onorab Georges tir fer resorti ki napa problenm si nou servi nou bann pei zanmi pour ed nou fer en tel devlopman, e ki sa bann pei i devret pe ede.  Pa ti mon parol sa Mr Speaker.  E les mon a remind LDS, mon mazin zot bann komanter negativ ki zot ti fer resorti isi menm dan sa Lasanble, letan Prezidan Faure ti prononse ki nou bann pei zanmi Lenn e lezot pei i pare pour ed Sesel avek nou bann plan devlopman.

Si mon mazin byen,  i annan lot kote latab ki ti koz for ki Minis Finans in prezant bidze Government pour Lenn, ‘’Made in India’’ ti zot parol.

Mr Speaker atraver ou, mon oule osi remind mon bann koleg lot kote latab, ki LDS napa monopoli lo lide.  Pa bliye dan SONA zot ti donn lenpresyon ki tou nide i sorti kot LDS.  Me Onorab Georges in avoue dan son lentervansyon, ki i napa monopoli lo lide.  E pour sa bann ki nouvo dan politik, pa bliye ki Onorab Georges i en Manm pli saz dan zot lekip.  Aprann e zot a konn bokou.

Mr Speaker mon annan gran respe pour Onorab Georges.  E koman en Manm lo Komite ki group bann distrik Lavil ansanm, mon pour siport son komanter lo sa size dekonzeste Lavil Victoria e bouz serten Ladministrasyon Gouvernman pour pli byen santraliz bann lofis, ki piblik pa bezwen al dan bann kwen Lavil partou, zis pour fer serten tranzaksyon dan bann diferan Departman ki i annan serten koneksyon ek kanmarad.

Mr Speaker, nou dan United Seychelles, nou demann Gouvernman pour transform sa Government House koman en proze ki soutenab pour nou lanvironnman, pour gard nou Kiltir dan design sa proze e byensir ki disable friendly.  Ki permet nou bann travayer Seselwa travay dan konfor parey nou menm e pli byen delivre sa bon servis ki nou pe ekspekte de zot.

I enportan ki bann Departman ki pour bouz dan sa bann batiman, i ganny sans met zot kontribisyon.  Akoz a lafen zot ki pour bezwen mentenir standar sa fasilite.

Mr Speaker Minister Lanvironnman ek Kiltir i annan en gro rol osi pour zwe dan devlopman sa proze.  Nou swete ki zot pa’n ganny kit ater.  Si wi, i ankor annan letan pour fer zot donn zot kontribisyon pour fer sa devlopman vin enn ki soutenab.

Parey mon’n dir Mr Speaker, mon pa pour long.  Akoz mon krwar mon’n byen pas mon mesaz.

Pour konklir Mr Speaker. Atraver ou –  mon oule dir Onorab Georges ki parfwa i vo lapenn fer en regar an aryer, pour nou pa zanmen bliye kote nou pase ti ete.  Me parkont nou merit retourn, nou merit pa, nou pa merit retourn an aryer pour glorifye lo problenm lepase.

Alors nou bezwen kritik dan en fason konstriktiv, pour nou vwar fri progre nou devlopman.  Mersi Mr Speaker.

 

 

(APPLAUSE)

 

MR SPEAKER

Mersi Onorab Vidot.  Mon ava pas la parol avek Onorab Ahmed Afif.

 

HON AHMED AFIF

Mersi Mr Speaker.  Mr Speaker sa Mosyon ki devan nou, i enn ki tre senp par Onorab Georges.

E mon komans tou dabor en dissent ki mon mwan pour siport li, ki kot i pe demande ki demann Gouvernman pour etidye posibilite konstrir plizyer batiman Ile du Port pour bann Minister e Departman Gouvernman.

Mr Speaker, Mahe e bann zil pre, i parmi bann zil dan lemonn ki inik.  Dan lesanz ki tou zil ki océanique i swa i lo la baz koray oubyen i ti en volkan, me nou, nou en ros dan milye losean – diferan.

E akoz nou en ros dan milye losean, napa bokou lespas.  E tou devlopman Sesel in komans atraver Erport, i vin atraver konblaz ki’n arive.  E ozordi kot nou pe koze ozordi, nou lo en konblaz.

E lo en konblaz ki tou dimoun pe peye.  Tou Seselwa pe peye, enkli nou lo sa kote latab.  Tou dimoun pe peye pour sa konblaz.  Nou ankor det lo la.

Me i enportan akoz nou napa later.  Se sa rezon sa Mosyon par Onorab Georges i enportan.  Akoz ler ou napa later, e ou’n deside sa pti gin ki ou ti annan, ou’n prezerv li pour lanvironnman e pour lanatir, me sa pti gin ki ou kapab servi ater o bor lanmer,  ou bezwen servi li byen.

E Onorab Georges pe met en propozisyon, pe dir be annou dekonzeste Lavil, annou anmenn Gouvernman anndan dan sa landrwa, koumsa i ava vin pli efikas.

Mon mwan siporte.  Parske ler nou pe koz lo konbyen in koute pour sa konblaz?  E mon mwan konnen son pri ti anviron $75milyon sa letan, me sa bout ki li i pe koz lo la, i probableman 20poursan.  Alor nou pe koz $15milyon ki sa pep in envestir.  Nou bezwen servi li byen.

E bann rezon ki li in donnen,  i bann rezon ki valab.  E sa ki mon’n tann tou dimoun pe koz lo la ozordi, se bann fason pour rekiper $15milyon.

Par egzanp Onorab Hoareau in koz lo annan en sistenm transpor e highway ki efikas.  In kalkil apepre R100 milyon par lannen.  Ou konnen $7milyon deza lanmenm.  Nou’n komans rekipere,  si nou ti annan en highway ki efektiv.

Onorab Georges in dir bann biro Gouvernman, i devret santralize isi.  Sa osi mon dakor.  E la mon pe mazin sirtou bann biro tel ki Liberty House, SRC i lo en kote.  Tou le mwan dimoun i vin pey tax, en ler zot pey income tax.  Zot bezwen pey business tax, zot bezwen pey pansyon.  E tou le mwan i annan en queue, dimoun i al partou, partou pour peye.  E se sa bann kalite keksoz kot ou annan Tender Board, Procurement Oversight Unit, Minister Finans in fann fannen partou.  Sa se zis en Lorganizasyon dan Gouvernman,  kot si ou ti met li dan en sel landrwa, mon mwan krwar ti pour annan gran benefis.

Ler ou pe, apre tou sa zefor, ou’n resi met Gouvernman dan en sel landrwa, byensir ou pour larg en kantite landrwa e batiman dan Lavil.

Mon pa konnen ki pour arive ek Fon Pansyon,  parske li in envestir.  Bomaten nou’n koz lo la, dan bann batiman a bann pri, eskize me i en pe fou, ki in pey lo la.  Me sa bann batiman omwen i a ganny servi a en pri rezonnab kot biznes Seselwa, mon ekspekte, pour kapab antre ladan e sirtou dan retail oubyen dan lezot kalite biznes e nou tou nou konnen ozordi dan biznes, enn bann gro kou ki ou annan, se rental.  E si pri rental dan Victoria kot zot pe vann manze, kot zot pe donn aktivite i tonbe, kou lavi li menm pour tonbe.  Alors sa se en benefis ankor.

Mon krwar ler nou pe koz bouz bann fasilite – la mon pe mazin en fasilite parey Fire Brigade, mon krwar li osi i devret ganny bouze.  Parske zis mazinen ki ou annan SEYPEC ki li i annan bann gro tenk fuel.  Mon pa konnen konbyen zot pe stoke, 40, 000 tonn fuel petet, si pa plis,  dan milye Lavil e si par azar i ariv en aksidan ki zot, zot pa kapab kontenir.  Mon mwan krwar sa aksidan i kapab pran depi antye kot Fire Brigade i ete.  Be lekel ki pour al tenny dife?

I ti pli move en lepok, ler ou ti annan en depo aminisyon zis akote li.  Zot rapel ler Coastguard ti ankor zis akote SEYPEC?  Zis en bal i pas dan 1 sa bann tenk, i pete.  Ou perdi depi ou Coast Guard, depi ou tenk fuel, depi ou manze SMB, depi ou Fire Brigade, ni menm sa ou pa pour kapab tennyen.

Zis get sa dife ki ti arive o bor SPTC dernyen.  I ti o bor Fire Brigade.  E si i ti arive ziska laba i bril li tou.  Nou ti pour dan problenm.  Alor en nouvo konblaz ki nou annan ozordi, nou devret profite parmi bann Government building ki i pe koz lo la,  nou devret osi enkli Fire Brigade e bann emergency services pour zot bouze.

Mr Speaker mon bezwen koz lo lafason ki nou servi sa later e mon’n tann dan bann entervansyon, ki i annan en propozisyon ki IOT i devret kapab fer son batiman pour li met 500 dimoun ladan.  Pour mwan, i sagrin mon pour mwan tann en propozisyon koumsa.  Parske si Gouvernman in aprouve mon mazinen, i bezwen aprouve en keksoz koumsa.

I pe bliye poudir sa Lakonpannyen, son bi prensipal Sesel, se pa pour donn akomodasyon.  Son bi prensipal Sesel, se pour ton dan en bwat apre eksporte.

E dan pe fer sa, nou donn li fasilite, i anploy Seselwa,  son bann bato i servi nou por, i servi elektrik, i servi delo.  E i annan bokou benefis pour Sesel enkli son bann travayer etranze i ganny landrwa pour reste e biznesmenn Seselwa i kapab ganny benefis atraver sa aktivite, pour zot kapab lwe lakaz avek etranze.

Se sa enn bann benefis annan foreign direct investment.  Akoz ou partaz larises ki sa foreign direct investment i anmennen dan sa pei avek ou bann dimoun lokal.  Be la ozordi, ou les li antre dan en domenn ki pa son biznes.  Anba ki zistifikasyon ou pe permet li vin met akomodasyon?  Sa pa son louvraz sa.  Sa i louvraz ki lekonomi Sesel, antreprener Seselwa i devret gannyen.  Mon pa konnen konbyen i koute pour zot met en twatir par lao en travayer etranze.  Petet R2, 000 par mwan pour sak travayer?  Parske zot, zot lwe en lakaz pour en ler 15 dimoun.

Mon pa konnen konbyen i koute.  Me si ou pran R3, 000 par mwan e ou dir i annan 500 e zot reste pour 12 mwan,  dan en lannen ou ganny ou R18 milyon, £1milyon Liv Sterlen.

Be sa £1milyon. Me sa milyon Liv Sterlen, i devret larzan pour Seselwa.  Pa pour sorti ankor pour al kot sa bann etranze ki pe deza fer gro profi lo met ton dan bwat Sesel.  Apre en gran batay ki nou’n fer, ozordi Gouvernman in ekoute, apre 3an mon mwan mon’n koz lo la, ki bwat ton pa devret vann R22.  Mon fek aste en bwat ton R17.  Mon kontan.  Mon krwar i devret pli ba ki sa ankor.

Be sa bann keksoz koumsa, i efas tou sa bann benefis.  Parske la R18 milyon tou le lannen pe al disparet dan nou lekonomi!  Nou pe efas tou sa benefis ki nou ti pe al fer ek bwat ton.  So oli plan?  Oli vizyon?  Mon pa vwar.

Mon ti a kontan osi Onorab Georges zis azoute, an plis ki sa ki ou’n mete ki mon ti a rekomande ki Gouvernman, se ki ozordi avek nou lenfrastriktir ek nou rezo internet e IT ki nou annan.  Annou servi li bokou plis.  Ki nou pa bezwen tou keksoz bezwen al fer meeting sorti dan en biro pour al dan en biro, tou dimoun pour vini.  Annou servi Skype e bann metod elektronik pour nou koz ek kanmarad.  Annou servi email.  Byensir ou a ganny en hard copy.  Sa a ganny anvoye.  Me selman annou servi plis sa bann keksoz ki pour redwir en kantite nesesite pour dimoun deplase fizikman.

Annou redwir sa bann posibilite.  Sa osi pour ede pour anmenn en rediksyon dan kou tranzaksyon Gouvernman.

E parey Onorab Georges in dir.  Lo tou sa bann batiman, annou plan li byen.  Akoz la nou annan letan pour nou plan li.  Par egzanp ler lapli i tonbe.  Isi kot Lasanble nou’n fer en sistenm kot nou pe anmas en pe sa delo ki tonbe.  Me building pa’n ganny design pour anmas otan delo.  Me si ou pe design en building depi la konmela.  Fer sir poudir anba la ou annan stokaz en kantite.

Par egzanp isi nou pe stok probableman 15 tonn delo Mr Speaker, petet ou a konnen.  Be nou pa devret pe stok zis 15 tonn delo si nou pe planifye li la ozordi.  Petet nou devret pe kapab stok ziska 1,000 tonn delo, oubyen 2, 000 tonn delo.  E sa, nou a kapab servi, pa pour nou bwar.  Me pour lav loto, pour bann toilet Gouvernman, pour tou bann keksoz ki pa bezwen delo trete.        Tousala se bann lide ki ozordi nou annan letan pour nou fer li.  E si nou pe al fer tou sa bann plan rekonstriksyon, mon mwan krwar se bann lide ki nou devret servi li pour benefis Sesel.

Ler mon’n ekout bann entervenan e sirtou Onorab Gill,  mon rapel i ti pe dir ‘i byen pour nou reve’.  E i kontan Onorab Georges in fer en bon rev.

Me mon mwan krwar rev i pa devret reste zis en rev.  Nou pa devret annan zis plan ki nou koz lo la.  Nou bezwen annan plan ki ganny realize.  I ok pour dir nou pe al fer en Government mile.  I ok pour dir nou pe fer en stasyon petrol.  E la mon bezwen mansyonn sa.  Parske  mwan mon konnen sa stasyon petrol son plan, i annan plis ki 10an pe koz lo la sa.  Plis ki 10an i lo plan sa.

I annan plis ki 2an ki stasyon petrol son plan in ganny tender ti pe al komanse.  Be larestan Lazans Gouvernman pa konnen fodre fer en semen?  Ziska ozordi zot pa ankor organize sa semen.  E mon krwar ler Prezidan in vin dan Leta Lanasyon in koz lo ki i pe fer.  La mon konpran i annan demars pour al fini semen.  Ankor lo sanmenm sa bout later ki nou sipoze pe servi li byen.

I montre poudir i mank planifikasyon dan Gouvernman e i montre, menm ki nou annan rev, nou pa pe konn realiz sa bann rev.

E sela kot mon mwan krwar e mon konvenki Onorab Georges poudir ou lide i en fantastik lide.  Me mon krwar pour enplimant li, se pa en Gouvernman US ki pour fer li.  Se en Gouvernman LDS ki pour vini pour al enplimant en plan, kot non selman sa bout konblaz pour marse, me Sesel antye i pour annan en plan ki non selman nou pour reve – me ki nou pour realiz li dan benefis pep Seselwa.

E avek sa mon ti a kontan dir ki mon pour siport sa Mosyon e mon krwar i en bon nide e mon demann tou Manm pour siport li.  Mersi Mr Speaker.

 

MR SPEAKER

Mersi Onorab Afif.  Mon a donn laparol Onorab Jean-François Ferrari.

 

 

HON JEAN-FRANÇOIS FERRARI

Mr Speaker mersi.  Mon pa pour tro long.  I annan bokou keksoz ki’n ganny dir.  Me mon krwar i enportan ki mon pran laparol pour mwan sitye en pe ki mannyer nou’n ariv lo sa size ozordi.  Setadir lo size isi lo Ile Du Port pour fer en propozisyon avek Gouvernman ki nou annan en plan pour devlop en seri batiman ki pour ofer bann servis Gouvernman.

Mon premye pwen Mr Speaker se, mon ti a kontan partaz avek bann Manm ki pa, ki pa konnen,  akoz nou Lasanble Nasyonal nou isi la kot nou ete ozordi lo Ile du Port.

I pa akoz in annan planifikasyon, i pa’n annan, akoz i annan, i pa akoz i annan en vizyon.  Me nou la isi lo por, lo Ile du Port akoz en reaksyon ki Msye France Albert Rene ti annan kan Onorab Ramkalawan, mwan menm, Onorab Georges, Onorab Alcindor nou ti sorti dan Lasanble Nasyonal kot library e nou ti fer en demonstrasyon an deor Lasanble Nasyonal.  Onorab Prea, Mr Speaker ti la.  E Onorab De Commarmond li i ti anndan pe get nou kot nou ti pe ganny bate avek gard, e sa ti le 3 Oktob.

E an rezilta Mr Speaker.  Msye France Albert Rene in dir, tir sa bann zans dan Lavil, met zot lo en zil!  La i la rezon akoz nou la ozordi.  In deside i pa oule demonstrasyon dan Lavil, tir zot, anvoy zot en landrwa.  E zot in dir zot ava kriy, e i ti dir ‘’Zot ava kriy avek pye sed!’’  Egzakteman son parol.  Ok?

Alors Mr Speaker,  mon pe met sa akoz mon anvi ki tou dimoun ki pe ekout nou, i konpran byen, ki tou sa bann zistwar ki Onorab Gill in donn nou bomaten, e la.  E malerezman, e mon pa kontan sa ditou Mr Speaker.  Mon ti a kontan ki kekfwa nou annan en desizyon nou pran ki ler en Manm i koze, i reste asize, i esper son repons.

Onorab Gill li i koze, apre i ale.  Onorab Gill bomaten in vin zwe enn sa bann lanmizik klasik Endyen parey i abitye zwe,  ki napa ni en komansman, ni en finisyon; in komans lo en –  lo Mosyon Onorab Georges, in al fini lo Msye Rene, lo son, lo bann prensip sosyalis, lo tou sa bann keksoz koumsa.  Ni en devan, ni en deryer, ni en komansman, ni en finisyon in napa.  E mwan mon anvi lepep Seselwa ki pe ekoute, i konpran byen.  E i konpran dan en fason lozik akoz nou pe anmenn sa Mosyon ozordi!

Akoz ler mon tann Onorab Gill pe dir ki bann ki pa ti kontan konblaz, mon’n tann Onorab Audrey, Onorab Audrey Roche Caiman pe, Audrey Vidot pe koz lo konblaz.  Mon krwar ki lepep Seselwa i bezwen byen konpran ki parti US/ Parti Lepep/ SPPF zot, zot problenm se ki zot pa kontan kritik.  Ler nou, nou kritike, se ki nou anvi keksoz meyer e nou anvi kritik.  E se pour sa ki ozordi nou pe kritik sa Plan Devlopman nou Lavil ki pa egziste, ki en dezord total.  Oubyen parey Onorab Larue in dir, i annan en plan ki egziste, me selman nou pa pe swiv sa plan.

Se sa ki nou kritike.  Nou, nou pa pe kritik konblaz parey Msye Rene ti kritik, Nouvo Por i pa ti oule, Erport i pa ti oule.  Mwan menm mwan mon ti ankor en manrmay ki ti kriy mwan, ti kriy mwan pour al dan laplenn, mon krwar Onorab Loizeau ti la, li osi i kriy nou pour nou osi fer nou bann manrmay 10an al kriye nou pa oule konblaz.  Ou konpran?  Se sa ki zot fer zot, apre zot vire, zot sey anvoy sa boul kot nou!  Me sa i egzakteman parey ler zot manz bannann apre zot anvoy lapo ek nou.  Me selman sa zot bezwen arete akoz nou, nou pa pe aksepte sa bann keksoz ankor.

Nou anvi dir zot ki nou, nou anvi reflesir dan en fason pozitiv lo en bon planifikasyon pour devlopman Sesel.  Akoz ler nou pa reflesir, e ler nou pa kritike nou retrouv nou avek en sityasyon parey Roche Caiman kot i annan en vilaz kot napa landrwa pour bann zenn detann, pour fer en sport.  La sa bout anler laba napa nanryen, i annan en laboutik ki pa, ki pa ni sifizan, napa okenn servis.  La i la sa kalite devlopman ki finalman nou’n gannyen Roche CaimanOk?

Tandis ki si nou ti kapab fer sa bokou pli byen ok, ozordi ou vwar en bout servis i dan en lot landrwa, klinik i Les Mamelles, legliz i Plaisance.  Mank planifikasyon.  E nou, nou rol se pour demann sa ki meyer pour Sese!

E la ozordi Mr Speaker, nou devan en sityasyon kot i annan en irzans.  Akoz Msye Rene pa ti kontan donn, nou ti demonstre devan Lasanble Nasyonal dan Lavil Victoria, in anvoy nou lo en zil.  Nou’n arive lo sa zil.  In fer Lasanble Nasyonal apre in fer Lakour.  In anvoy Lakour isi, Lakour Siprenm, in fer en annex la, pe fer en Lakour Mazistra.  Nou bezwen prezan regard otour nou e gete ki mannyer nou kapab anmenn bann servis Gouvernman ki kapab annan en sinerzi avek sa ki egziste.

E ler nou regarde, nou vwar sa laveni ki sorti depi kot roundabout anba kot stasyon SEYPEC ki nou espere byento i ava kapab komans operate, e i anmenn isi ziska kot Lasanble Nasyonal.  Napa bokou later ki reste la.

Akoz en kote nou’n fer 2 lekol, en lot kote nou met en stasyon bis.  E la nou’n tande nou’n met en batiman pour met 500 dimoun travayer IOT ladan.  Deza landrwa pe vin pli pti.

E an plis ki sa Mr Speaker,  malerezman mon pa’n ganny lenformasyon a tan.  Me mwan an kontak avek Biro Rezistrar pour kapab ganny propriyeter en 12enn parsel later, en 12enn plot later ki le long  ki tou dilon sa laveni.

Dapre lenformasyon, en bon pe sa bann plot later in fini ganny vann oubyen donnen, oubyen transfer avek enn de bann dimoun ki’n ase byen konnekte.  Ok?

E la taler, ler mon pe vini, mon krwar i annan enn sa propriyeter, mon pa konnen lekel.  Me selman mon kapab dir zot ler zot ava sorti la, zot ava obzerve zot osi zis apre Lakour annex, premye plot i annan lo la en masin ki’n park, i pa ti la yer, la i la ozordi ki pe fer soil investigation.  Savedir sa se probableman pour en dimoun ki’n ganny donnen en bout later.  Ki’n tande dan Lasanble ki nou pe dir tyonbo en kou!  Kekfwa la nou devret kontinyen, la nou annan Lakour, nou annan Lasanble nou devret kontinyen fer en pe bann keksoz administratif.  Li sa dimoun in taye in anmenn son masin i pe fouye pour li kapab met son plan vitman kot Planning pour li kapab conquer sa bout later.

Ler mon dir nou dan en sityasyon irzans Mr Speaker,  mon pe lans en lapel lo la par Onorab Georges, e kekfwa Onorab Georges i ava dakor pour siport sa lapel pour dir avek Gouvernman kot pa ankor servi sa bann later la, tenir.  Tenir sa bann later parey zot kontan dir ‘tenir pa large!’.  Akoz nou bezwen sa bann bout later pour nou kapab sey gete ki mannyer nou kapab konstrir sa bann batiman administratif.

I enportan ki nou fer li.  Akoz i enportan ki nou tir sa konzesyon dan Lavil.  I enportan ki nou annan en pli bon Lorganizasyon nou servis piblik.  E mon krwar ki zot tou lot kote latab ki’n koze, zot dakor avek sa.  Me selman zot dakor avek bokou keksoz zot.  Zot dakor avek plan.

Fer mon mazin mon zanmi, akoz i ti vreman en zanmi e in toultan en zanmi ziske son lanmor in en zanmi.  Se Mr Guy Sinon ki ti kontan dir ‘‘be in mete lo plan, pa in dir, i lo plan?’’  Plan i la li, plan i la li.  Ti annan plan pour tou sa ki nou ti pour fer lo later Providence pour ale depi Roche Caiman pour ale, apre ki’n arive?  Bann pti bout in ganny tire, en pti bout la, en pti bout, 2 pti bout ankor.  Fini ziske ler napa en bout … ni en lapel later dimoun pa kapab gannyen lo sa bout, lo sa landrwa ki dan distrik Onorab Audrey Vidot kot ti kapab annan bann servis bokou pli enteresan; bann biznes, bann keksoz ki kapab deroule pour kapab anmenn prosperite pour zabitan Roche Caiman in al dan lanmen e dan pos serten dimoun ki zis annan bon koneksyon!

Plan i annan Mr Speaker.  Me selman plan pa ganny respekte!  Akoz ler dimoun i vini i met en pti presyon par isi, met en pti presyon par laba.  Zot larg li oubyen zot rekonpans li avek en bout later.  Zot rekonpans li avek en plan e apre nou vwar ki tou sa bann keksoz i ganny, i disparet e i sorti dan lanmen lepep Seselwa, i al dan lanmen prive, bann dimoun ki’n byen konnekte e se nou ki nou devlopman pa avanse Mr Speaker.

Alors mon ti a zis kontan terminen en dissent Mr Speaker,  ki vreman mon pa kapab aksepte sa bann largiman ki Onorab Gill in anmennen apre midi, konmkwa si i annan konzesyon trafik, savedir devlopman.  Devlopman in arive dan pei, trafik partou!

Mr Speaker demen Onorab Gill ler, si nou napa ase delo dan tiyo, si PUC pa kapab supply delo, mon ekspekte Onorab Gill i ava dir devlopman sa!  Nou dan lakaz, nou annan shower, nou annan 2 shower nou ti napa shower, nou annan 2 toilet, nou ti napa toilet!  Savedir nou napa delo, selman nou annan devlopman.  Nou napa delo, nou napa devlopman!  Nou napa semen, nou napa devlopman!  Fodre nou arete sa bann largiman kot nou ti annan twalet trou, ok.  Akoz sa ti dan lemonn antye ti koumsa.  Pa vin dir nou poudir demen ler kouran, si PUC pa kapab supply kouran, Onorab Gill pour vini pour dir nou devlopman sa!  Nou pe donn zot kouran, napa ase kouran pour donn tou dimoun!

En Gouvernman ki serye i annan ase kouran pour donnen; i annan ase delo pour li donnen, pour li supply.  I annan ase semen pour transpor pas lo la!

 

(APPLAUSE)

 

HON JEAN-FRANCOIS FERRARI

Se sa en Gouvernman serye.

E nou, nou rol nou.  E se sa nou vizyon, se pour kapab anmenn en pe disiplin dan planifikasyon devlopman Sesel.  Pa fer li akoz en tel, msye i anvi al pas, i anvi al Rémire, i anvi en zil pour li menm.  Alors Rémire nou pa pour devlope nou a, sa nou a kit sa pour msye – ok.

Ste Anne i annan sa, son garson la, son garson sonnyen ki anvi vin en biznes, donn li Ste Anne.  Silhouette pran Grande Barbe donn en lot son lot frer nou ava fer.  Be devlopman pa fer koumsa!  Devlopman i fer lo en plan.  E se pour sa ki Msye Rene in dir avek Onorab Gill ki tro souvan son Gouvernman in mazin zot avan.  I pa’n mazin lepep Seselwa avan.

Nou bezwen kapab ofer sa bann servis dan en fason ki’n byen planifye.  E  mwan mon pa ezit-e pour mon dir Mr Speaker, ki si i annan en Departman, si i annan en Departman ki mank serye, ki mank direksyon, ki mank vizyon,  Ss Departman Planning – ki la, e mon repete ankor, mon’n dir sepa konbyen fwa ki la, pa pour ed devlopman, me ki la pour li kas kontour dan devlopman pour li ed sa ki i kontan,’’ sa ki ek nou,’’ ‘’sa ki pa ek nou’’ pa pour ede.

Alors, mon lapel Mr Speaker, mon termin lo la,  se pour ki Gouvernman Msye Faure i ekout nou.  Tou sa bann bout later ki pa ankor allocate.

E la mon annan 1, 2, 4, 7, 8, 9, 10.  Mon annan 10 plot ki mon pa konnen pour lekel.  Sa 10 plot omwen, omwen nou tenir sa bann.  Si i annan enn de ladan –  akoz lenformasyon mon annan, se ki i annan omwen, omwen 1 si pa 2 ladan ki’n ganny donnen avek bann ex MNA, Parti Lepep.

Omwen 2 ladan ki bann la pe tranpe pour zot al fer devlopman en desandan la lo kote kot Independence School i ete la.  ExMNA, koriz mwan si mwan mal.  Pa dir mwan mon’n, mon mwan pe rod lenformasyon, mon pe rod latransparans.  Parey mon ti rod latransparans Onorab Pillay dernyen fwa ler mon ti demande pour ki ‘’Pti Ponm’’?  Mon ti pe demann latransparans e sa i en prensip ki Prezidan Faure i kontan.  So in reponn.

La mon pe dir ki nou a ganny latransparans, nou a gete lekel ki i annan sa bann bout later, nou a dir zot tenir, nou a sey gete premyerman avan ki mannyer zot in gannyen sa?  Kote zot in pase?  Par ki trou ki zot in pase pour zot kapab ganny en bout later konble?  Ok?  Akoz Seselwa antye, lepep Seselwa li pe viv lo Sistenm Pwen.  Land point system i pe espere li.

La in ganny dir poudir i annan zis mon krwar 200 ki’n kalifye.  Selman bann ex-MNA zot, zot in kalifye pour ganny later konblaz?  Se sa bann keksoz ki nou pa kontan e ki nou vwar i mal.

Alors mon siport Onorab Georges, e mon konnen, e mon konnen akoz mon’n la ler serten kontak in ganny fer, e mon konnen ki Leader Lopozisyon i enn bann dimoun ki’n reflesir lo sa proze Government mile byen avan.  Byen avan ki Msye Faure ti pe komans envestir lo la e kontak in fini ganny fer e i annan led pour ed Sesel dan sa devlopman.  Akoz i en devlopman ki fer sans, ki bon pour lavenir Sesel e ki bon pour devlopman Sesel.

Alors mon mwan ava donn, mon ava anmenn mon sipor pour sa Mosyon e mon dir avek Prezidan Faure tenir tou sa bann keksoz ki pa ankor, kot pa ankor gate, tenir nou pe vin avek en plan, annou asiz o tour en latab, met sa bann keksoz lo latab e annou ale, annou anmenn sa pei ‘’beyond 2,000 ‘’parey nou ti sipoze ale e ki nou pa’n arive.

So vwala Mr Speaker.  Mon anmenn mwan sipor pour sa Mosyon.  Mersi bokou.

 

(APPLAUSE)

 

MR SPEAKER

Mersi Onorab Ferrari.  Yes Onorab Vidot.

 

HON AUDREY VIDOT

Mersi Mr Speaker.  Mon oule raise en point of order under 56 (1).

 

MR SPEAKER

Ok. 

 

HON AUDREY VIDOT

Mon ti ava demann ou avek, si ou kapab dir avek Onorab Ferrari retract sa bout kot in dir i pe mislead the House ek li piblik laba deor ki Roche Caiman zenn napa landrwa rekreasyonnel.  Pour son lenformasyon i konn tre byen lo sa laplenn ki i abitye vin pile, i annan en laplenn.  Tou le 5er manrmay i zwe.  E i annan en nouvo stage osi ki’n ganny fer pour bann zenn fer zot aktivite kiltirel.

E pour son lenformasyon, Roche Caiman i annan devlopman, pe travay dimoun.  Roche Caiman anler Eden Village i annan teren ki’n fini komans plati, pour fer devlopman ankor pour zenn Roche Caiman anler gannyen.  Mon ti ava voudre i retract sa bout silvouple.  Mersi Mr Speaker.

 

MR SPEAKER

Ok mersi.  Mersi Onorab.  Non mon krwar, mon pa pour pran li konmkwa- Manm avek Manm i fer sa bann exchange poudir dan ou distrik napa devlopman and so on.  Me ou’n ganny sa sans pour ou klarifye poudir i annan fasilite sportif and all that.  Zis in fer referans ki poudir napa fasilite sportif.  Ok? Nou tou nou konnen i annan en court, i annan laplenn.  I annan enn de fasilite ki available.  Ok so, i vin koumsa exchange.

 

HON AUDREY VIDOT

Mr Speaker-

 

MR SPEAKER

Yes, Onorab.

 

HON AUDREY VIDOT

Avek respe en Manm i pa kapab koz manti dan Lasanble kot piblik laba deor i konnen poudir Roche Caiman i annan sa bann keksoz.  I pa byen!

 

MR SPEAKER

Ok.  Bon annou pa ouver sa plis.  Mon pa krwar i ti lentansyon Onorab Ferrari pour koz manti.  Onorab.  Ok? Mon,

 

 

(Off-Mic)

 

MR SPEAKER

-non, non.  Nou pa pour ouver sa plis.  Non, non!  Onorab Vidot in klarifye avek bann zabitan Roche Caiman e nou tou nou konnen kwa ki pas laba.  I annan fasilite.  Me sa zis i en fason ki en Manm i kapab enterpret keksoz, oubyen i kapab dir keksoz.  Parey tou lezot Manm i kapab servi sa – i, e i lans en lot keksoz lo en lot Manm lo lot kote latab.  Ok annou pa pran li.  Mon’n pa’n pran li dan sa.  Mon’n ekout li, e mon ti dan en pozisyon pour mon kapab fer li retournen.  Me mon pa vwar ki i pe mean any harm.  I son fason ki i pe sey reponn petet en pti pe ou deliberasyon ki ou’n fer lo sa MosyonAlright?  Bon mon ava donn laparol prezan Onorab Sebastien Pillay.

 

HON SEBASTIEN PILLAY

Mersi Mr Speaker.  Mersi Mr Speaker.  Bonn apre midi Mr Speaker.  Bonn apre midi tou Manm Onorab.  Bonn apre midi tou Seselwa ki pe ekout nou isi Sesel oubyen aryer.

Mr Speaker mon’n fer en profon refleksyon depi ki mon’n ekout Onorab Georges prezant sa Mosyon devan Lasanble.  E i paret poudir i annan en kantite parantez ki nou kapab fer avek deliberasyon Onorab Georges ek sa ki’n ganny dir apre sa.  Ki i enportan ki nou met keksoz an konteks Sesel ozordi Mr Speaker.

An konteks Sesel ozordi san ki nou bliy listwar, listwar nou pei, e san ki nou sey fer krwar ki serten antre nou Mr Speaker, nou bann Sen.  E ki nou bann aksyon lepase nou pran nou pour met anba karpet, me pour lezot nou pour tire, nou pour met deor.

Mon dir ou sa Mr Speaker senserman.  Akoz mwan dapre leksperyans personnel ki mon’n ganny rakonte par mwan paran, sirtou mon papa, i rapel tre byen en serten Onorab dan sa Lasanble, ki a tre zennaz ti montre li ledwa anba son nennen Mr Speaker.

E sa i en keksoz ki’n toultan mark mwan.  Akoz mon’n tann sa Onorab dan Lasanble plizyer fwa koze.  E tou dernyerman sa ki’n enteres, sa ki’n sok mwan, sa ki’n sok mwan Mr Speaker, sa ki’n sok mwan se ki atraver ou Mr Speaker Onorab Ferrari o komansman son lentervansyon lo son ladres Leta Lanasyon, ti dir ek mwan personnelman ki i pe single mwan out, sirtou mwan mon pa pour ganny drwa koze! Ler li i pe fer son lentervansyon, mon pa pour ganny drwa enteronp li.  Mon fer sa pour draw en parantez ant sa ki zot dan LDS zot pe dir ozordi, avek sa ki zot ti prese dan lepase!  Mr Speaker diverzans lopinyon in mor dan LDS!

 

(APPLAUSE)

 

HON SEBASTIEN PILLAY

Zot bezwen koz en sel Langaz dan en sel fason.  E mon dir sa Mr Speaker, mon dir sa Mr Speaker, mon dir sa –

 

(Interruption)

 

MR SPEAKER

En moman, en moman, en moman.

 

HON SEBASTIEN PILLAY

Be la ki mannyer Mr Speaker i ganny drwa enteronp mwan ..?.

 

MR SPEAKER

Onorab. Onorab donn mwan la parol.

 

HON SEBASTIEN PILLAY

Mersi Mr Speaker.

 

MR SPEAKER

Bon mon fek dir i mars de kote.  I mars de kote!  Se sa rezon ki atraver entervansyon Onorab Vidot mon’n dir poudir mon pa vwar rezon ki mon devret fer li retract.  I mars de kote sa bann lakizasyon.  Me mwan mon regarde ki zistans i ale.  How far i ale, pour mowa regarde poudir si vreman i pe impute, si i pa pe impute.

Onorab Pillay ou’n menm dir taler.  Ou’n fer komanter, mon’n tande.  Mon’n tande sa enn.  I fer 2 fwa.  Mon konnen ki ou pour fer lot referans.  E mon ti santi poudir ler Onorab Ferrari ti pe fer sa komanter dan son lentervansyon lo SONA,  mon ti pe vey li.  Si i ti’n al pli lwen pour kestyonn kondwit Prezidan Faure, mon ti pour aret li!

Me an pasan in fer en referans e parey mon dir, lanons in sorti kot Lofis Prezidan e in met tou keksoz an perspektiv.  Ok?  So lo tou lede kote i annan sa bann lakizasyon e mon pour le moman, Onorab Pillay ou kontinyen, me zis vey.  Ou’n ariv lo borderline.  Zis veye akoz pour nou pa bouz lo sa bout impute.  Me so far ou ok.  Kontinyen.

 

MR SPEAKER

Mersi Mr Speaker.  E mon remersye mon bann koleg lo lot kote latab pour akord mwan sa loportinite pour reponn Mosyon Onorab Georges.

En Mosyon ki mon pe, mon pour siporte akoz i al dan laliny bann nide ki mon krwar i reprezant en Sesel modern, en Sesel ki oule bouz devan, en Sesel ki oule avanse ansanm avek tou son pep pour ki nou kapab vwar bann solisyon pour bann problenm ki nou fer fas avek – ansanm.  E sa i reste, i reste mon krwar sa holy grail si oule ki koman en Nasyon nou pe sey arive pour nou kapab gannyen.

Me i enportan Mr Speaker, dan sa bann deliberasyon ki nou pa send – nou pa anvoy bann mix messages avek popilasyon.

Par egzanp Mr Speaker, ler mon tann koz lo santralizasyon servis Gouvernman.  Mon krwar i enportan ki bann Manm, sirtou bann Manm lo kote latab ki’n koz lo la, mon’n tann Onorab Woodcock koz lo la.  Santralizasyon Mr Speaker i pa sa lesansyel sa ki propozisyon Onorab Georges pe anmennen.

Lesansyel ki Onorab Georges pe anmennen, se pour nou kapab cost time, pour nou fer sir ki letan ki en dimoun i bezwen servi pour li al from en biro to en lot, i ganny koupe.

Me nou bezwen kontinyen rod fason pour desantraliz bann servis Gouvernman pour anmenn li dan bann distrik pour fer ki par egzanp en dimoun ki reste Baie Lazare,  si i annan en keksoz ki kapab ganny fer, dan sa rezyon pli pre avek li,  i kapab fer li e retourn dan son aktivite ki i pe fer, san ki i perdi sa letan pour li vin Anvil.

Mon krwar i annan sa 2 ki nou bezwen met byen an perspektiv.  Akoz si nou pa fer sa, nou pe anvoy en mesaz en pe mix la deor.  Sa i en pwen ki mon ti oule fer sorti Mr Speaker.

En lot pwen enportan mon krwar kot nou pa devret konfiz Seselwa.  Se ki IOT Mr Speaker, IOT i en Konpannyen ki nou annan par ladan nou Seselwa.  Nou annan par ladan.  E nou ganny reveni atraver IOT.  Mon en pti pe konsernen Mr Speaker.  Akoz Onorab Afif parey mon menm, nou’n travay dan Gouvernman.  Li koman en PS, in la li dan Gouvernman.  I pa fek vini li.  En kantite sa bann problenm ki i pe koz lo la, i ti la li.  I pa’n ede pour rezourd.  Sa bann problenm i pa’n ede pour rezourd, pa akoz i pa’n kapab rezourd li.  Me akoz bann problenm ki i annan en serten difikilte pour rezourd.  Akoz menm si ou annan planifikasyon, i pran ou letan pour ou kapab realiz en proze e met li an plas.

E lo size IOT Mr Speaker, in toultan en konsern, sirtou en konsern Lopozisyon dan lepase ki’n ganny eksprimen ki sa rental ki IOT pe fer.  Pe retir loportinite pour Seselwa ganny akse avek lakaz lwe a en pri pli abordab.

E ozordi Mr Speaker,  mon challenge okenn Onorab lo lot kote latab pour dir mon ki en, napa en dimoun dan zot distrik ki’n vin kot zot ki’n demann zot i pe rod en lakaz lwe e ed li ganny en lakaz lwe.

E si zot dir non Mr Speaker.  Zot pour pe koz lalang avek sa pep ki’n donn zot sa 15 lo 10.  Sa i en realite Mr Speaker.  Mon dakor poudir ki.  Ok eski IOT i devret pe al dan en direksyon pour li konstrir en housing pour son bann travayer?  Be annou regard, annou regard benefis ki sa pour arive pour IOT.

Par egzanp son kou i redwir.  Si kou IOT i redwir, sa kou i bezwen ganny pase a en lot landrwa.  Sa ki nou bezwen asire ki sa kou i ganny pase avek son bann travayer.

Se ki atraver prodiksyon ki ganny fer Mr Speake,  sa bann travayer ki travay IOT ki ede pour prodwir sa larises pour IOT.  I benefisye avek sa kou ki IOT pa ti pour peye additionnelment akoz dan lonterm pour zot, i pour en cost cutting mechanism ki ava ed zot.  Sa i en pwen ki nou bezwen aksepte Mr Speaker.

Dezyenmman.  Dezyenmman Mr Speaker, Leader Lopozisyon in fer en propozisyon ki Gouvernman osi in koz lo la.  Mon’n tann SFA koz lo la, mon’n tann plizyer dimoun koz lo la e sirtou bann dimoun ki travay dan domenn lanvironnman an se ki konsern bann fad.

Be bann, en akter prensipal ladan ki nou bezwen fer sir ki toultan i annan en rol pour li zwe.  IOT i pour enn bann akter ki pour ed nou zisteman anmenn sa ban ki nou oule vwar lo fad.  E sa i en keksoz ki’n arive dan lezot pei kot bann konservri, bann Konpannyen, se zot in refiz-e aste ton avek bann Konpannyen lapes ki servi bann fad.  So se sa en lavantaz

So si mon retourn lo Mosyon Mr Speaker.  Lesansyel ki IOT i annan en landrwa pour li house son bann travayer,  i enn ki enportan pour nou gard, regard abilite IOT pour li reste koman en akter kle, en akter ki pe kontinyen kontribye dan sa sekter ki pe travay, tout an prenon kont ki nou bezwen asire ki IOT i kontinyen pey sa dividends pour nou.

Me kestyon ki mon pour aksepte Mr Speaker.  Se eski landrwa ki’n ganny propoze pour IOT met sa housing, i ideal vizavi plan lonterm ki nou annan pour sa landrwa.  Se sa kestyon ki nou bezwen demande.

Me pour nou kapab reponn sa kestyon.  I pa sifi pour nou pran IOT e atak IOT.  Pour nou kapab reponn sa kestyon, nou pour bezwen regard bann planners ki’n plan sa Mr Speaker pour nou regarde ki lideal zot ti pe mazinen dan sa landrwa.  E si i annan alternatif pour sa ki la?  Se koumsa ki nou rod en solisyon.

Malerezman Mr Speaker sa ki mon’n vwar dan lepase,  sa ki mon kontinyen vwar, se ki i fasil pour ou kritik en plan, kan pa ou ki’n fer sa plan.  I fasil pour ou kritik sa plan.

E sa atraver ou Mr Speaker, i en keksoz ki ou’n fer en tre byen Onorab Ferrari pandan en kour long karyer politik.  Me i paret poudir whilst ki ou kritik sa plan, mon pa ankor vwar ou avans solisyon lo sa bann plan.  Mon’n vwar en kantite kritik ou’n fer, me mon pa’n vwar solisyon.  E se pour sa rezon ki mon mwan pe demann zot lo lot kote latab.  Annou regard sa dan en fason vwar solisyon pour pei.

E ozordi nou annan loportinite atraver sa Mosyon pour zisteman kapab vwar solisyon ki nou oule avanse.

Mr Speaker nou pa pour kapab kontinyen deny poudir nou pei in fer progre.  E nou, nou pa devret lo sa kote latab reste complacent e dir ‘ah nou ki’n fer sa pandan sa dernyen lannen’.  Wi nou’n fer.  Me pa vedir poudir nou aret la.  Nou bezwen kontinyen fer.

Si dimoun i santi poudir nou pa’n fer ase.  I a tir nou, i a met nou deor.  Se sa ki pour arive.  Desizyon se lepep Seselwa ki pour fer.  ler in ariv ler pour li vote.  E zot osi pa krwar poudir zot pour asiz lo sa 15 lo 10 e sa 15 lo 10 pour repet son lekor.  Se sa lesansyel!  Si zot santi zot pour ganny plis, fair enough.

Be mon sa ki mwan pe dir zot, se ki la, an deor la.  Lepep pe ziz nou koman Lasanble Nasyonal.  Sa Mosyon ler pour ganny aprouve, pour ganny pase par Lasanble Nasyonal.  I pour en Mosyon Lasanble Nasyonal ki pour anmenn en mesaz kot Gouvernman pour demann Gouvernman pour akseler travay ki i pe fer lo en proze ki’n deza ganny komanse e pour vwar dan son lenplimantasyon ki mannyer nou kapab improve li pour ki i benefisye lamazorite dimoun ki pour vin atraver sa proze.  E ki mannyer sa i kapab anmenn en benefis pli gran par fer ki Lavil Victoria i a vin sa Kapital komersyal ki nou anvi vwar avek lefe ki nou annan plis cruise ship ki pe antre dan pei.  I a provide plis servis e i ava anmenn plis reveni pour bann biznes ki kapab fer li.  Se sa ki nou bezwen pe rode Mr Speaker.

Mr Speaker i toultan reste en defi pour nou kapab kontinyen donn loportinite dimoun ki pe devlop zot later.

Mon ekout largiman kot nou dir poudir ex MNA Lepep in ganny later, later konble.  Be i annan plizyer siporter LDS ki’n ganny later konble.  Eski ozordi mon pour distingue en biznesmenn ant si i siport Lepep oubyen i siport LDS ler i vin kot mwan.  Non Mr Speaker!  Si sa biznesmenn pe prodwir, i pe kontribye e i anvi extend.  Mon pa vin practice ek nou pa ek nou.  Mon pour siport li.  E dayer Mr Speaker plizyer dimoun ki vin vwar mwan, mon pa get ou kouler politik mon.  Si ou annan en pwen kot ou pa pe al abiz lo en keksoz, mon pour fer mon mye pour ed ou.  Sa i lesansyel Mr Speaker.

Me mon krwar dan pri dan sa largiman ek nou, pa ek nou.  se zot ki pe pri, e zot pe met zot lekor dan sa latrap pour komans pratik sa ‘’ek nou, pa ek nou ‘’dan en fason kler, dan en fason vizib devan lepep Seselwa an antye.  E mes amis sa i danzere akoz zot pour retourn listwar parey zot in dir.  Se sa ki zot pe fer.

Mon krwar letan pour nou komans kontinyen koz lo sa bann keksoz la dan sa fason in sanze Mr Speaker.  Ozordi Mr Speaker larealite se ki nou annan biznesmenn ki’n sezi loportinite pe enport si LDS ou non ki’n avanse, ki ozordi i pri.  I pri.   E ki nou pe vwar?  Nou pe vwar poudir i pa pe kapab ganny sa servis ki bann Departman ti a kapab donn li pour li kapab avans devan.

E la, e la kot nou annan en problenm Mr Speaker.  Mon mwan pa pe blanm sa bann, nou bann travayer, nou bann fonksyonner.  Me zot osi zot annan en rol pour zwe dan fer sir poudir sa ki zot pe prezante, dan sa ki zot pe fer, si i pa bon.  Zot bezwen dir poudir ‘be ekoute, la sef, sa enn pa bon la.’

Nou bezwen annan sa kouraz pour dir.  Akoz se pour sa rezon ki nou’n al train, se pour sa rezon ki taxpayers ti pey tax pour anvoy nou aletranze pour al fer nou Degre dan enzenyer, nou Degre dan lezot domenn pour nou zisteman vini fer nou kontribisyon anver nou pei.

Mr Speaker i pa ase pour nou dir poudir sa i akoz en parti politik o pouvwar tou lafot keksoz ki arive.  Be Mr Speaker dan tou sa bann domenn i annan en bann fonksyonner ki pe travay.  I annan en bann planners ki pe travay.  Sak dimoun i bezwen pran son responsabilite e asire sa ki i pe fer, i alaoter.

Si ou santi poudir i annan dimoun in fer ou fer en keksoz ki pa devret fer, then ou pa fer li!   Se sa klima ki nou oule kree.  Nou pa oule kre en klima ozordi ki MNA i santi poudir li i kapab act lo behalf en dimoun, threaten en lot, en lenstitisyon eksetera dan okenn fason.  Akoz si nou pran sa lapros.  Si nou pran sa lapros, nou pa pour fer loner sa letap devlopman ki nou pei in arive ozordi.

Mr Speaker mon mwan kapab retourn dan lepase koz lo plizyer keksoz.  Sak dimoun i annan son pase.  Me lepase in pase Mr Speaker.  I pa vedir ki nou pa bezwen aprann from lepase.  Me sa ki nou bezwen fer ozordi, se asire ki sa ki nou pe fer i dan lentere lepep Seselwa e dan lentere nou pei!

E i annan plizyer keksoz ki pe arive lo sa morso teren Mr Speaker, ki ankourazan.  Me i annan keksoz osi ki nou bezwen kontinyen demann kestyon e kontinyen met presyon.  Nou annan par egzanp sa por lapes, SAPMER par egzanp.  Nou bezwen asire ki sa proze i kontinyen bouze, ki sa devloper i kapab kontinyen fer son proze, i annan.  Konmsi sa ki nou bezwen fer, se travay ansanm pour asire ki the best deal lekel ki gannyen?  Se lepep Seselwa ki gannyen.

Mon kapab vin la dan Lasanble Mr Speaker koz lo plizyer keksoz.  E nou pa kapab deny Onorab Gill loportinite oubyen sa pasyon ki in koz avek pour en keksoz ki in kontribye pour arive.

Si nou la dan sa pei ozordi, se gras a bann pioneer ki’n pas avan nou pe enport ki parti politik ki zot ladan ki’n nobou kontribye pour anmenn nou la.  Me zenerasyon ozordi eski, nou bezwen at least demann nou lekor en kestyon.  Eski nou, nou pour kit nou lekor fikse lo lepase?  Oubyen nou pour regard sa fitir ki devan nou e ki mannyer nou kapab fer sa fitir vin pli briyan pour bann zanfan ki’n ne, pour nou pti zanfan ki pour ne demen?  Se sa ki reste pour nou fer Mr Speaker.

Me si i annan nou ki oule reste stuck dan nou pase?  E se pour rezon ki mon’n kontan sa parol ki Onorab Georges in servi, ler in dir.  Basically in dir ‘dare to dream’.

E ler Onorab Adelaide, atraver ou Mr Speaker in dir ‘no dream is too big, no dreamer too small’.  Mon remind Lasanble, reaksyon Lopozisyon ler Prezidan Faure in prezant serten nide ki i ti annan.

Par egzanp in regards to LNG.  Nou pa’n get sa rev dan en fason son lenplimantasyon.  Be nou’n get sa rev dan zar pour nou atak sa dimoun.  We shoot the messenger Mr Speaker.

Sa ki mon mwan pa pour fer ozordi, se shoot the messenger.  Akoz mesaz ki the messenger pe anmennen i resonate avek mesaz ki mon krwar ladan.

I en mesaz ki mon krwar tou Seselwa i believe ladan ki nou kapab annan en fason diferan dan fer keksoz e ki pour nou kapab ariv a en konklizyon, nou bezwen travay ansanm pour nou kapab achieve li.  Se sa lesansyel Mr Speaker ki nou pe koz lo la ozordi.

An se ki konsern tou sa bann devlopman ki pe ganny fer Mr Speaker.  Mon kapab osi al dan lapros pour dir be nou’n menm, nou’n menm tande atraver ou Mr Speaker Onorab Woodcock ti dir nou Bidze 2018 ti en Bidze ti en Bidze made in India.

Ozordi Onorab Woodcock i dir nou poudir wi i enportan nou al kot nou bann pei zanmi pour nou rod led pour nou fer sa bann proze.  Be Mr Speaker ou vwar, se sa ki mon krwar poudir nou koman nouvo zenerasyon, nou bezwen fer sir poudir nou pa get caught dan sa kalite politik get keksoz zis a sa moman.  Pour en zenn politisyen parey mon menm, e sa ki nou bezwen pe fer nou de, se pour nou anmenn sa pei pli devan.  Ou kapab annan ou krwayans, mon kapab annan pour mwan, be sa ki nou bezwen pa zanmen bliye.  Se ki sa ki pli enportan pour nou, se lepep Seselwa, se bann zenn Seselwa ki pe grandi.

E laspirasyon ki nou kapab donn bann zenn Seselwa ki demen nou kapab annan en pei kot ou kouler politik, ou Larelizyon, ou kouler lapo i pa konte.  E nou’n travay pour nou ariv kot nou’n arive ozordi.  E fodre zanmen Mr Speaker, zanmen dan sa pei nou komans menm fer en komanter lo Larelizyon lo politik en dimoun e pli enportan ankor Mr Speaker lo kouler lapo en dimoun.

Me i malere Mr Speaker.  I malere poudir si nou pa dream parey Onorab Georges in dir nou dream, ansanm koman en Nasyon nou pour tonm nou dan sa pyez pour al fer sa.

Mr Speaker pa tou keksoz ki’n arive dan lepase ki nou kapab koz lo la avek menm pasyon.  Me sa ki i annan devan nou ozordi, se loportinite pour nou vwar keksoz dan en fason diferan e bouz devan ansanm ki nou ava donn sa pep en keksoz ki in pli meyer pour zot.

E an konklizyon Mr Speaker.  Annan sa ki nou apel en Government mile, i anmenn nou lo nivo bokou lezot Lavil dan lemonn.  Ozordi par egzanp si ou pran Lavil New York, Canberra Australie, bann landrwa kot bokou Seselwa in ale, Lonn.  Ou vwar poudir se sa bann, se sa ki bann planners in antisipe ler zot in design sa bann landrwa.

The costing of time Mr Speaker an konklizyon.  The costing of time.  En dimoun i sorti kot Rezistrar i anvi al kot Biro Attorney Zeneral.  I ale i al kot Biro Attorney Zeneral, i pa bezwen pran son loto pas 1erdtan dan trafik avan i ariv laba.

En dimoun i sorti kot MLUH i anvi al kot Biro Rezistrar, i al lanmenm la.  Ozordi nou’n sey achieve sa dan Independence House.  Se sa ki nou’n sey achieve.  Me i annan ankor ki nou kapab fer.  Nou’n vwar ki nou’n sey santraliz serten lofis dan par egzanp dan Annex building Independence House, Independence House li menm, kot i annan Imigrasyon, Civil Status eksetera.  Tousala i la ansanm.

So the one stop shop idea in la li.  Se pour sa rezon ki ler nou dir, nou pe siport sa nide.  Nou pa pe dir ki napa orizinalite dan nide Onorab Georges.  Pa sa ki nou pe dir.  Far from it.

Nou pe zis dir ki nou siport propozisyon ki’n met devan akoz i align avek pozisyon ki nou, nou annan.  E se pour sa rezon.  E mon si en keksoz i bon pour Sesel, pe enport si i ganny propoze par okenn Manm Lopozisyon, pe enport i ganny propoze par en lot dimoun ki dan en lot parti politik, mon pour siporte.  Akoz si i bon pour Sesel Mr Speaker, i bon pour United Seychelles.  E si i bon pour United Seychelles, i bon pour nou tou.

Se pour sa rezon ki mon swazir Mr Speaker apre midi pour mon siport Mosyon Onorab Georges e mon swete e mon konnen Mr Speaker lo sa kote latab nou pour donn son Mosyon sipor.  Mersi Mr Speaker.

 

 

(APPLAUSE)

 

MR SPEAKER

Mersi Onorab Pillay.  Mon ava donn laparol Onorab Ramkalawan apre mover Mosyon i ava fer konklizyon.  Onorab.

 

HON WAVEL RAMKALAWAN

Mersi bokou Mr Speaker.  Mr Speaker mon osi tou, mon pour adres enn de bann size ki’n ganny mansyonnen e mon pour definitivman donn sipor sa Mosyon ki Onorab Georges in prezante.

Mr Speaker mon krwar enn bann problenm dan nou Lasanble, se parfwa sa eleman listwar.  E ou a, pran par egzanp Onorab Gill.  Onorab Gill i konn byen listwar Sesel li.  Akoz se sa en pe son rol dan parti ki kot in grandi e alors i konn tou sa ki SPUP in fer.

E Onorab Gill parey mwan menm, nou’n ne avan ki parti SPUP ti formen.  E aprezan an plis ki sa, malerezman i annan serten Manm lot kote ki letan zot pe enterpret listwar, zot pa konn enterpret li.

Par egzanp Onorab Vidot in koz lo konblaz.  Me i pa konn listwar konblaz.  Sa ki i konnen se bann konblaz resan.  Me i pa konnen par egzanp – e Onorab Gill pa ed li dan sa listwar pour li konnen ki poudir premye msye e premye parti politik ki ti kont konblaz –  sete Msye Rene ki ti pe diriz parti SPUP!  I pa konnen sa.

Li i zis vin koz lo konblaz Roche Caiman.  Me ankor enn fwa la konblaz Roche Caiman, son laz ki i ete –  letan ti pe fer konblaz Roche Caiman, i ti ankor en zenn fir li.  I ti ankor en zenn fir e son MNA ti Madanm Jovana Charles probableman e son DA i ankor sa enn ki la.  Li i reste dan vilaz.  E sa ki i pa realize, se ki bann ki ti, bann ki nou ti pe koz en pe kont ensidswit, letan nou pe koz konblaz.  Se sanmenm sa bann ki zot, zot, zot pa ti pe vin reste dan vilaz zot.

Zot, zot ti pe al reste borlanmer.  Sa ki i pa osi konnen, se ki letan nou ti pe, letan nou ti pe met serten lobzeksyon.  Sete parski the cost.  The cost element.

E Mr Speaker mon ava dir avek bann ki sey fer propagann konblaz ki, letan, e pa bliye ki poudir sa konblaz la, in annan koripsyon dan sa zafer konblaz.  In annan en ta koripsyon dan sa zafer konstriksyon konblaz lo rock armoring, lo tou bann lezot landrwa.  Onorab De Commarmond i konn byen li.   Onorab De Commarmond i konn byen enn de bann problenm ki ti arive avek sa bann zafer konblaz, bann zafer larzan!  E, e tou sa bann zafer, egzakteman ou konn byen ou!

E apre sa Mr Speaker, sa ki bokou pa ti realize.  Konblaz, nou ti konnen ki poudir i annan serten dimoun ti’n fini met gro lizye lo la pour zot vin pran bann gro kopo.

E vi ki ozordi.  Ozordi mon kapab dir avek sa Lasanble, parski i annan bann dokiman ki mon kapab montre ki poudir sa bann ki ti ganny pti bout.  Ou konnen konbyen pe vann bann pti bout?  Bann pti bout kot Airtel i ete, kot batiman Airtel pe ganny advertise Mr Speaker –  pe ganny vann $6milyon.

Bann lezot bout batiman an montan, pe ganny vann $5.5milyon.  Pe rod en fason pour ganny vann vitman.

Alor, e letan ou azout tou bann bout, letan ou azout tou bann bout konblaz parey ti ganny fer sorti dan Mosyon.  Zis en dimoun, zis en dimoun, 10 arpan.  10 arpan konblaz, ozordi letan en biznesmenn Seselwa pe sey rod en pti bout, pe sey donn li 800 met kare, 600 met kare.  I annan ki annan 10 arpan e nou’n koz lo la.

Se sa ki nou bezwen balanse.  E apre ki konblaz ti’n fer avek tou son bann koripsyon.  Se la ki Sesel ti rantre dan en depresyon ekonomik.  Se apre konblaz, se apre konblaz ki dimoun ti komans fer laliny pour ganny $400 pour vwayaze.  Se apre konblaz ki nou ti ganny pipeline, se apre konblaz ki nou ti ganny foreign exchange control.

E alor?  Se sa bann keksoz osi ki nou bezwen konpran.  E mon mwan anvi letan mon koze toultan dir be, ok si ou ankor zenn, si ou ankor zenn ou pa konn sa listwar pa tro al sot ladan!  Pa tro al sot ladan.  Ekout sa bann ki’n viv sa, ki’n koze.

Par egzanp.  Letan nou dan sa Lasanble, letan pe koz ledikasyon.  Bann ki pli zenn ki pe zis repet sa retorik poudir ‘ah ti napa soz ensidswit’.  Be Onorab De Commarmond ti lekol Kolez li.  VP Belmont ti pas entrance sorti Grand Anse pour li vin lekol Kolez.  VP Belmont, VP Belmont akoz i ti entelizan, i ti pass son bann legzanmen e apre sa i ti ganny en Scholarship pour li etidye lagrikiltir Liniversite.

Alor.  Mr Speaker mon pe zis met sa an konteks parski i annan bokou keksoz ki kekfwa letan nou koze, nou zis koze, nou zis repete e apre sa, apre sa sanmenm sa kot dimoun i vini i dir avek ou, se gras a en msye ki mon annan lentelizans, ki mon annan ledikasyon ensidswit.

Konmsi in ler pour nou fer Seselwa konpran ki poudir se ou entelizan e baz sa an relasyon avek responsabilite en Gouvernman.  Konmsi pour nou kapab bouze.  Ki poudir i responsabilite en Gouvernman pour li fer sir ki son pep i annan en bon sistenm Ledikasyon!  Ki poudir i annan en bon sistenm lasante, ki poudir i annan sa, tousala la, la en Gouvernman.  Si en Gouvernman i vin o pouvwar e i pa donn son pep lasante, i pa donn son pep ledikasyon, i pa.  Be savedir i pa pe fer.

Be Mr Speaker.  Be ankor enn fwa ou vwar.  Ou vwar Onorab Pillay.  Be mwan mon manman ek mon papa ti ris mon?  Mon manman ti en teacher, mon manman ti en teacher, mon papa ti en ferblantye.  Be pa mon ti al lekol Kolez?  Be pa mon ti pas entrance.  Be pa mon’n al lekol ziska Form6 Kolez.  Mon a pe sey dir ou.  E an plis ki sa, pa bliye ki poudir letan Koudeta i fer, mon dan Form V.

Savedir, savedir letan Koudeta i fer, mon dan Form5.  Be pa Msye Rene ki ti Prezidan.  Pa Msye Rene ki ti fer.  Parski pa li ki ti dan Gouvernman.  E letan nou ti Kolez.  Onorab De Commarmond i rapel byen.  Be pa nou ti regard lot kote Regina Mundi.  Be ti annan zis blan laba?  Ti annan zis sa ki annan larzan?  Be Onorab De Commarmond li son papa ti en milyonner?  Son manman ti en milyonner?  Non!

E lakantite dimoun.  Ou vwar Mr Speaker ki konmsi nou bezwen, nou bezwen epanouir sa pep.  Pour konmsi pour tir sa mindset pour fer dimoun konpran ki poudir in annan bokou keksoz e ki ofet.  Ofet ozordi nou menm kapab dir ki sistenm ledikasyon.  Sistenm ledikasyon nou’n fer serten pa an retar, an aryer.

Nou’n fer serten pa an aryer.  Letan ou kalkile, be Onorab Georges pa ti al Cambridge.  Onorab Georges ti al Cambridge.  Be letan ’77 i fer Koudeta, Onorab Georges i Cambridge.

 

HON JEAN-FRANÇOIS FERRARI

( Off-Mic)

Msye Rene ki’n anvoy li…

 

(laughter)

 

HON WAVEL RAMKALAWAN

Alor Mr Speaker.  Mon pe zis dir sa pour bann ki pli zenn.  Bann ki pli zenn.  Akoz nou bann ki pli vye la, nou a pe bouze nou.  Zot ki pour, zot ki pour take over e alor pa vin donn dimoun move soz.

Mr Speaker, ofet Onorab Gill e parfwa.  Ou konnen mon osi mwan annan serten responsabilite e dan sa pei.  E parey zot konnen ek sa zafer 15 lo 10, i annan bokou keksoz ki’n ganny diskite.

E apre midi, e ordinerman mon pa toultan revel bann keksoz ki mon’n diskite ensidswit avek Msye Faure.

Be mon ava dir zot.  Parski mon’n koz avek Msye Faure pour mwan dir avek li mon pe al dir sa.  Letan Onorab Georges ti anmenn sa lide devan nou caucus, mwan mon ti dir avek li, be sa i en keksoz vreman enportan lo kote Nasyonal.

E mon ti demann Onorab Georges son permisyon.  Parske sete son lide, pour mon diskit sa avek Msye Faure.

Dan enn bann meeting ki mon ti fer State House avek Msye Faure,  mon ti met sa lide devan li.  An 2018, an 2018 e letan mon ti met sa lide devan Msye Faure,  Msye Faure ti dir avek mon, sa i en tre bon lide.  I en tre bon nide, e nou’n koz lo la.  E apre sa letan nou’n komans koz lo, apre sa in koz lo finansman e letan in al Lenn, letan in zwenn Msye Modi, in met sa koman en proze.

E alor, letan ou tann Onorab Gill pe vini, pe sant en bann tra la-li-la-la.  Konmsi mon anvi dir avek zot lo sa lot kote latab, i annan en kantite keksoz.  I annan en kantite keksoz ki malerezman zot koman bann Manm zot pa konnen.  E alor letan zot pa konnen, zot vin koz dan linyorans.  Zot vin koz dan linyorans.  E mon pa blanm zot!

Mon pa pe blanm zot mwan Mr Speaker.  Zot zis zot pa konnen.  E alor letan zot pa konnen, zot vini zot, swa zot repet sa ki zot in ganny dir, swa zot repet sa ki zot in ganny dir oubyen zis zot dir parski zot anvi dir keksoz.

E alor se lide ki Onorab Georges in met devan ozordi atraver son Mosyon,  parey mon pe dir sa.  E petet ti a kapab, demen i annan Konferans De Pres, be dir enn zot zournalis dan People demann Msye Faure.  ‘Msye Faure sa lide Government mile la, eski sete en lide ki ou ti diskit avek Leader Lopozisyon avan ki i ganny, avan ki ou a Lenn, avan ki ou al Lenn pour al rod finansman?  Dir zot zournalis Davidson Barra, kekfwa olye al demann bann kestyon enbesil.  Donn li sa kestyon.

 

(APPLAUSE)

 

HON WAVEL RAMKALAWAN

Be of course!! Of course bann kestyon enbesil!  Les li i ava, les li i ava ganny bann larepons.  Alor Mr Speaker.  Mr Speaker

 

(Interruption)

 

HON JEAN-FRANÇOIS FERRARI

(Off-Mic)

Zis zot bat zournalis, zot pouse dan lanterman.

 

 

HON WAVEL RAMKALAWAN

Sa ki, sa ki, sa ki Onorab…

 

HON JEAN-FRANÇOIS FERRARI

(Off-Mic)

Dan lanterman trankil…

 

 

MR SPEAKER

Order!  Order!  Kontinyen.

 

HON WAVEL RAMKALAWAN

Sa ki Onorab Ferrari in dir konsernan Parlman i vre.  Sete met zot lo en zil, met zot lo en zil, Lakour osi tou.  Lakour ti pe komans vin en problenm.  Ou konnen akoz Lakour ti pe komans vin en problenm?  Akoz ti pe annan bann keksoz, e la mon ava dir zot.  Enn bann soz sete letan, letan zot ti aret Mr Ralph Volcere ki mon mwan ti al defann, menm si ozordi i maltret mwan, napa problenm sa!  Napa problenm.  Mon ki ti organiz letan, letan i ti ganny arete, mon ki ti organiz lafoul pour vin defann Mr Ralph Volcere pour li pa al dan, zot a rapel?  Nou ti desann Anvil tousala.

E apre sa, ti ganny dir tir Lakour osi tou laba!  Tir Lakour dan milye Lavil akoz kekfwa bann zafer politik i kapab vin en pe plis.  E prezan nou trouv nou isi.  E letan nou ti lager.  E Onorab De Commarmond i rapel.  Be byensir Onorab De Commarmond i rapel letan premye plan, letan plan pour fer Lasanble isi.  Mon ti Leader Lopozisyon mwan, e mwan ti kont sa plan, mon ti anmenn Mosyon tou dan Lasanble.

E mon ti dir fodre Lakour, fodre Lasanble i dan milye Lavil.  E landrwa ki nou ti pe propoze Mr Speaker, sete kot ozordi zot in fer nouvo batiman Nouvobanq.  Sa letan pour bann ki ankor pli zenn, la ti en petrol station.  Ti  en petrol station e pandan en bon pe letan petrol station ti’n fermen e sa later ti zis vag la.

Ou konnen ki leskiz nou ti gannyen Mr Speaker?  Ti dir i pa ase gran!  Zot be get sa batiman Nouvobanq ozordi!  Oule dir mwan nou pa ti pou’n kapab fer en Lasanble Nasyonal la?  E pa ni ti bezwen azout ek bout Laxmanbhai.  Zis regard grander sa batiman, sa batiman Nouvobanq, nou ti’n kapab ganny Lasanble Nasyonal la.

E letan ou regard kot Lakour i ete, menm la konmela, avek bann bout la ki piling in kraze laba.  Ou ti’n kapab fer en nouvo batiman Lakour avek detrwa letaz e refer li pour ki la dan milye Victoria i ti ava annan Lasanble Nasyonal, Lakour, e State House anler e sa 3 Brans Gouvernman ti ava omwen senbolikman la dan milye.

Letan ou al dan tou bann Kapital lemonn, letan ou al Lonn, ou al tir portre avek Houses of Parliament, House of Lords, Commons.  I dan milye Lonn, ou pa bezwen al lo Isles of Man pour ou al kot Parlman.  Letan ou La France dan milye Paris ou trouv Sena ensidswit, letan ou Lanmerik, menm parey.

Alor Mr Speaker tousala annou regarde.  Me planifikasyon nou bezwen dir ki sa Gouvernman in vreman pa bon.  Ozordi nou’n ariv en staz kot Legliz Plaisance i Les Mamelles, Simityer Mont Fleuri i Plaisance, Shell Beau-Vallon i Bel Ombre.  Sa i reprezant en pe planifikasyon sa Gouvernman ki vreman ekstraordiner.

E letan nou regard Providence, Providence Industrial Estate, zot in fini met batiman.  La ozordi i dir, la nou bezwen regarde ki mannyer nou pe al fer semen.  E pourtan ou ti ava mazinen ki poudir be ou fer semen avan, konmsi fasilit keksoz.  Sa ki apel planifikasyon.  SimCity bann ki, kekfwa dan Gouvernman nou bezwen annan plis dimoun ki zwe SimCity ki mannyer pour konstrir en Lavil kot ou konnen poudir la i la ou bezwen met Fire Brigade la, ou bezwen fer bann green areas, ou bezwen Housing ki bor i ete.

Mr Speaker Ile du Port menm zafer.  Ile du Port menm zafer!  Ozordi i en sel mess!  Se sa ki nou pe trouve.  Mess, e la en pwen ki Onorab Sebastien Pillay in dir malgre in sey defann Thai Union ensidswit, tou sa bann zafer, sa met de kote.  Me selman i annan en keksoz ki in dir ki fer sans.

Ou pa kapab annan en residential area, en residential batiman complex ki pour pran 500 dimoun dan milye en landrwa kot ou sipoze devlop Lekonomi Ble!  La i sipoze sant Lekonomi Ble sa Mr Speaker.

E menm dan en serten sans nou kapab dir menm sa petrol station, menm sa petrol station i pa devret la.  La, la sa bout laba devret Lekonomi Ble an antye.  Lekol lanmenm la, archives lanmenm la, bis lanmenm la ki it is a mess!

        E Perseverance.  Perseverance letan fini fer lopital madanm ek zanfan, se la apre sa ki zot ti rod fer semen.  E ankor enn fwa the planning i pa vreman byen.

Mr Speaker mon mwan vreman siport sa Mosyon e mon krwar ki poudir Onorab Georges dan son prezantasyon letan in koz pour sov, konmsi bann lespas, bann batiman dan Lavil kot i ava annan office rental e sa hopefully i ava fer pri desann pour santraliz bann servis Gouvernman pour dekonzeste Victoria.  E apre sa pour nou bouz sa Ladministrasyon, nou Kapital Ladministrasyon, mon krwar ki sa bann pwen i vreman, i vreman, vreman, vreman enportan.  E mon krwar pei li menm li i pour fer en kantite Lekonomi atraver sa.

Alor Mr Speaker annou kontinyen, annou kontinyen met byen sa eleman nou listwar dan son konteks, annou pa anbet dimoun ki poudir se, parey Onorab Gill i kontan fer.  Konmsi ki ou a krwar ki a parti ’77 ki in annan ledikasyon, in annan tou sa bann zafer.

Me annou met li dan nou konteks e pour en landrwa koman Roche Caiman mon mwan ava dir ki bann zenn ozordi pa ti’n devret annan zis en gran bout laplenn ki ni en 2 poto gol napa, napa ni en marking pour zot bann poto gol i bezwen bouze.  Bann poto gol i bouze akoz napa proper marking.

Mwan mon ti ava ekspekte ki en landrwa koman Roche Caiman ti ava’n devlope, ti ava’n annan en proper tennis court pour fer nou bann zanfan devlope, ti ava soz.  (Non, non pa rod laba ou!)  E ki.  E ki, mwan mon krwar ki Onorab Vidot koman sa MNA i bezwen, i bezwen met en pe plis lavi, pour devlop nou bann zenn pour donn zot bann fasilite, e non pa zis sa ki nou pe vwar ozordi.

E mon ti ava ankouraz li, mon pour siport li.  E Mr Speaker letan nou pe koz lo plan.  Letan nou pe koz lo plan, Onorab Ferrari in dir i annan en kantite plan.  Ti annan konpetisyon pour 2enm Lavil Anse Royale; ti annan konpetisyon, dimoun ti ganny premye pri, dezyenm pri, trwazyenm pri.

Oli plan?  Ozordi nou pe fer Fire Brigade kot i sipoze annan soz, Fire Brigade kot sipoze annan fun park.  E pa bliye Mr Speaker la konmela menm le 01 pour Lafet St Joseph letan i annan en gran aktivite.  Zot bezwen frenm la kot Legliz St Sauveur e lot kote fer trafik pas Sweet Escott.  E kot nou pe al met Fire Brigade?  Demann mwan!  Mersi bokou Mr Speaker.  Mon pe siport Onorab Georges.  Mersi.

 

(APPLAUSE)

 

 

MR SPEAKER

Mersi Onorab Ramkalawan.  Mon ava donn la parol mover Mosyon pour li fer son konklizyon.  Onorab Bernard Georges.

 

HON BERNARD GEORGES

Mersi bokou Mr Speaker.  Mon ti ava kontan dir zis detrwa pti parol an konklizyon ozordi apre sa deba for enteresan.

Premyerman parey i nou koutim dan sa Lasanble.  Mon ti a kontan remersye tou dimoun ki’n entervenir lo sa Mosyon.  Bokou bon nide in sorti.  Mon ti’n ofer zot en fondasyon pour zot konstrir lo la.  E mon kontan konstate ki detrwa zot.  Malerezman pa tou, detrwa zot in anmenn detrwa blok e in debout 4 par 2 pour vin azout avek mon Mosyon.

I tris, me nou politisyen Mr Speaker.  Sa se nou travay ki serten dimoun in servi sa Mosyon pour fer en pe politik avek.

Parey mon dir, sa i nou travay.  Nou pa ofanse ler sa i arive, me nou regrete ki en loportinite i ganny manke pour konstrir en keksoz olye pas letan zis koze.

Mon ti a kontan Mr Speaker azout en lot legzanp move planifikasyon avek sa pti lalis ki Onorab Ramkalawan fek donnen.  Annefe planifikasyon sa Gouvernman in osi anmennen ki Lakres Les Mamelles avek son court basketball, tou lede i tonm Roche Caiman.

E sa set en pti pe bann keksoz ki nou anvi evite.  E mon krwar mon laklos alarm i, tou dimoun in tande, tou dimoun in konpran.  Akoz parey mon fer, parey ou konnen ki mon fer.  Nou fer keksoz dan lentere Nasyonal.  Nou fer keksoz pour bouz nou pei devan.  E non pa pour retard devlopman.  Akoz ozordi i zot ki pe administre sa pei.  Demen i kler ki i pour nou, me i nou pei.  E nou pei pour bezwen ganny administre pour benefis tou dimoun.

Mon Mosyon Mr Speaker parey Onorab Ramkalawan in dir.  I en Mosyon ki la depi en bon pe letan.  Nou pa’n anmenn li akoz parey Onorab Ramkalawan in dir, nou ti prefere pas sa lide direkteman atraver Leaders Forum pour ki Gouvernman i sezi sa lide e i tay avek.

I pa ti en kestyon points scoring.  I ti en kestyon annou sey regarde ki mannyer dan lespri travay dan en fason konkret depi dernyen eleksyon, nou ti a kapab fer sa lide bouze.

Rezon ki mon’n demande pour met li lo Order Paper vitman sa lannen.  Se presizeman akoz mon’n ganny per, e bokou dimoun ki mon’n koz avek in ganny per ki nou later pe fini, i pe ganny allocate isi dan, lo Ile du Port dan en fason ki pa planifye e sa in sorti tre klerman atraver bann entervenan.  Dan en fason ki sa ki reste i kapab ganny proteze avan ki i kapab, i ganny donnen ankor.

E mon’n annan devan mwan en plan GIS Ile du Port ki mon pe regarde.  Si ti napa, si ti napa sa devlopman IOT ki malerezman i tre avanse.  Nou pa ti pour annan okenn problenm.

Ti ava annan sifizaman lespas.  Avek sa devlopman IOT, nou pour kwense.  E i posib ki si sa lide i ganny sezi.  E sa lide Mr Speaker, se par fer en Government House.  Se par fer en Government building parey i pe ganny propoze pour le moman ki Lenn pour fer pour nou.

I pa ditou mon nide, i pa ditou mon lespri ki i annan en gro batiman dan lekel tou Departman Gouvernman i pour antre.  Akoz mon per ki si nou fer sa, nou pour end up ankor avek en massive structure ki pour bezwen air-condition, ki pour bezwen lift, ki pour bezwen en kantite keksoz ki pa al dan direksyon ki mon krwar koman en pei avek en target environnementale nou devret pe ale.

I plito parey mon’n sey eksplike, en sit ver.  En landrwa kot bann, i annan plizyer building, me osi en landrwa kot i pour vin agreab pour travay e non pa zis en gro batiman ki pour vin en moniman.

Mr Speaker mon pa ti anvi, me mwan krwar mon bezwen tous 2 minit lo sa size konblaz.  Bokou in ganny dir lo la.  E mon krwar ki nou bezwen fer en meakoulpa nou de kote latab.

Nou bezwen realize ki i annan konblaz ki neseser, e i annan konblaz ki pa neseser.  E sa ki nou lo sa kote latab nou’n toultan an faver.  Se en konblaz ki neseser.  E si ou bezwen fer en erport oubyen si ou bezwen fer en por, si ou bezwen fer en keksoz ki ou bezwen, annou fer li.

Me en konblaz ki o moman kot i ganny fer, napa en plan pour fer e i pa neseser.  Se sa kot nou, nou ti annan serten recalcitrant.  E la ozordi tou sa ki nou bezwen dir, se regard Ile Aurore.

Ile Aurore in ganny konble depi plizyer lannen, ki ti son vokasyon?  Ti napa.  Zis nou’n fer en zil, ti pour vin en upmarket development avek en 18 hole golf course Pinnacle Point Sidafrik ki ti pour vin fer li.  Apre sa in vin en landrwa kot pour annan bann tower blocks pour bann batiman plizyer letaz pour lozman pour Seselwa.  E la ozordi i pa ni enn, ni lot.  Se sa mon krwar ki fodre nou realize.

I annan serten keksoz ki annan de fwa nou overreach.  E si nou, nou ti kritik e mon mwan ti kritik an partikilye progranm konblaz.  Se akoz a sa moman mon mwan ti krwar ki i pa ti soutenab Ekonomikman e listwar in montre ki i ti vre e i ti ava, i ti en keksoz ki nou pa ti bezwen fer then.  Nou ti a kapab fer li pli tar ler nou ti annan en rezon.  Me in fer e nou kontan in fer.

Eden Island konblaz pa ti ganny fer pour Eden IslandEden Island in vin apre in sezi lo lefe ki ti annan en konblaz.  Me parey mon’n dir annou met tousala deryer nou, si fodre konble ankor en bout isi pour fer sa proze realize.  Annou konble e annou fer.

Mr Speaker mon ti pe koze pli boner avek en dimoun ki dan Gouvernman.  En dimoun tre o dan Gouvernman, e li in donn mwan en nide eksepsyonnel.  In dir mon ou konnen mon kontan ou lide.  Annefe Ile du Port i devret the Manhattan of Victoria.

        E annefe i annan absoliman rezon.  E se sa landrwa ki devret son.  Sa landrwa administratif ki vin parey Manhattan i ete dan New York, i vin sa pour nou isi Sesel.  Kot nou ava annan park, kot nou ava annan biro kot i ava bon pour travay e pour viv.

Finalman Mr Speaker.  Prezidan in promet avek sa Lasanble ki i pour ekout tou bann Mosyon ki pase e i pour met zot an aplikasyon.  Alor ozordi mannyer mon konpran Sekreter Zeneral Parti United Seychelles ki ti koze pli boner in dir ki zot pour siport sa Mosyon.

E mannyer mon vwar sa Mosyon pour ganny sipor ozordi,  mon pe demann avek Prezidan, silvouple met an aplikasyon sa ki nou fek, sa ki nou fek, sa ki nou pour al pase la taler.   Blok okenn devlopman ki pa ankor ganny fer isi lo Ile du Port.  Blok later ki reste pour ki nou kapab angaz nou lekor e fer sa Kapital Administratif vin isi.

Sa Gouvernman ki pour met li an egzekisyon, be sa nou ava regarde apre prosen eleksyon.  Me pour le moman annou blok li e fer sir ki nou tou kapab regard en lavenir briyan lo nou Ile du Port.  Mersi bokou.

 

(APPLAUSE)

 

MR SPEAKER

Mersi Onorab Georges.  Bon moman in arive pour nou pran en desizyon, pour nou pran en vot lo Mosyon ki devan nou.  Mon ava demann tou Manm ki an faver?  Okenn Manm ki kont?  Madanm Clerk.

 

MADAM CLERK

Mersi Mr Speaker.  Mr Speaker vot inanim 21 Manm an faver e personn kont.  Mersi.

 

MR SPEAKER

Mersi Madanm Clerk.  Mosyon in pase e nou remersi Onorab Georges e tou Manm osi ki’n entervenir.  Mon krwar parey Mover Mosyon in dir, i annan bann keksoz pozitiv ki’n sorti ladan.  Wi politik in ganny fer.  Me parey mon’n dir bomaten se sa landrwa ki politik i ganny fer.

Bon avek sa mon ti a kontan remersi SBC.  Nou ti demann ziskan 5.30, me nou’n overlap en bon pe.  Nou ava dir SBC mersi ankor enn fwa pour kontinyen vin sa partner ki siport nou.  E Lasanble i adjourn e nou repran nou travay Mardi 19 Mars 9er bomaten.

 

(ADJOURNMENT)