::
Home » Verbatim » 2019 » Verbatim Tuesday 19th March, 2019

Verbatim Tuesday 19th March, 2019

NATIONAL ASSEMBLY OF SEYCHELLES

 Tuesday 19th March, 2019

 The Assembly met at 9am

 National Anthem

 Moment of Reflection

  Mr Speaker in the Chair

 

 

MR SPEAKER

Bonzour tou Manm Onorab e bonzour tou manm piblik ki a lekout e ki pe swiv travay Lasanble Nasyonal.  Bomaten mon ti a kontan zis pas lo Order Paper, bann business of the day. Nou pou annan en pti sanzman ki mon pou anonse from the Chair.   Le moman ki nou pou konmans pran kestyon, se Minis pou Lasante ki pou prezan e anvi ki se Minis menm ki pou prezant sa de Bills apre, nou pou pran kestyon pou Oral Answers pou Minis Lasante, apre nou pou sot PNQ pou nou pa fer Minis ale apre pou li retournen pou vin prezant Bills.  Minis i ava pran sa de pti Bills e apre midi 2er, nou ava pran PNQ.  

So zis nou pe sanz en pti pe lord du jour pou fer konvenyans Lasanble e konvenyans osi tou Minis ki pou devan Lasanble.  Nou ava al direkteman –  (en moman Onorab Simon Gill)  lo Presentation of Papers e mon ava pas laparol avek Madanm Clerk.

 

MADAM CLERK

Mersi bokou Mr Speaker.  Bonzour Mr Speaker, bonzour tou bann Manm e tou dimoun ki a lekout.  Konman prezantasyon papye sa semenn nou annan:-

Office Of The Auditor General Special Review Report on Sustainable Development Goals 2030Seychelles Coastal Management.

S.I 9 of 2019 Licenses (Amendment of Schedule) Regulations of 2018.

S.I 10 of 2019 Public Holidays Order of 2019.

S.I 11 of 2019 Land Reclamation (Retrospective Authority) (No. 3) Order of 2019.  Mersi Mr Speaker.

 

MR SPEAKER

Mersi Madanm Clerk.  Mon ava prezan donn la parol Onorab Simon Gill ki ti’n donn mwan notice ki i pe raise en matter of privilege bomaten.  Onorab Simon Gill.

 

HON SIMON GILL

Bonzour Mr Speaker.  Bonzour tou koleg Onorab.  Bonzour tou Manm piblik ki pe ekout nou.  Mr Speaker mersi pou donn mwan laparol.  Mr Speaker, pa souvan ki mon lev matter of privilege dan Lasanble Nasyonal.  Mon’n fer plizyer lannen konman en Manm Lasanble Nasyonal e mon pa rapel byen, byen lo rikord ankor enn fwa ki mon’n lev matter of privilege.

Be Mr Speaker bann devlopman resan dan lemonn e bann devlopman resan dan Sesel, apre ki mon’n fer plizyer refleksyon lo sa bann lensidan, lo sa bann devlopman, kot plizyer zonm, fanm, zanfan pe ganny fizye, pe perdi lavi, atraver bann zonm ki zot reve ki zot annan bann pozisyon oubyen zot in ganny kree pli siperyer ki tou lezot, zot avans bann azanda. Zot avans bann manifesto Mr Speaker ki anmenn zot pou pran fizi pou asasin zot bann frer e ser, bann zanfan.

 

MR SPEAKER

Onorab get to the point.

 

HON SIMON GILL

Levennman resan Mr Speaker i levennman ki’n arive New Zealand kot 49 zonm, fanm, zanfan in mor!

 

MR SPEAKER

Onorab –

 

HON SIMON GILL

E Mr Speaker dan Sesel mon matter of privilege, dan Sesel prezan, ler nou pe analiz bann posting lo nou rezo sosyal, lo Facebook –  bann komanter ki ganny fer ki annan bann karakter rasis, ki annan bann karakter vyolan – Mr Speaker i trakasan.   I trakasan e konman en parti politik – United Seychelles, i kondann sa bann levennman resan, sa bann statements sa bann posting ki’n ganny fer lo rezo sosyal!

 

MR SPEAKER

En moman Onorab Simon Gill. …

 

HON SIMON GILL

… e ler mon – bann tou mon bann lobzervasyon ki mon’n fer, mon annan rezon pou krwar ki serten sa bann posting pe ganny fer par serten aktivis ki siport Lopozisyon !

 

MR SPEAKER

Order!   Order!

 

HON SIMON GILL

E Mr Speaker, mon tann non Johan Loze pe ganny mansyonnen e nou osi nou kapab dir posting resan ki –

 

(Interruption)

 

MR SPEAKER

Order!   Order!  Bon Onorab Simon Gill ou’n vin koz avek mwan, mon’n aksepte ou’n donn mwan notice ki ou pe raise a matter of privilegeGet to the pointRaise your matter of privilege.  Mersi.

 

HON SIMON GILL

Bann posting resan Mr Speaker apre ki mon’n tann plizyer koleg lo lot kote latab dan LDS in mansyonn non Johan Loze, mon pe dir zot egalman – posting ki Bernard Sullivan pe fer pa akseptab dan sa pei!

 

(APPLAUSE)

 

HON SIMON GILL

Mr Speaker …

 

(Interruption)

 

HON SIMON GILL

Mr Speaker sa bann kalite deklarasyon, statement si i les kontinyen, si nou les kontinyen i en danze pou nou pei ! E nou bezwen ozordi mon lapel pa zis nou lo sa kote latab –  mon pe demann nou konman en Lasanble LDS, United Seychelles nou zwenn ansanm e nou e nou kondann nenport qui quoi que ce soit ki fer sa bann kalite posting lo rezo sosyal!

E Mr Speaker – Mr Speaker tou bann lenstitisyon dan nou pei, dan nou pei tou nou bann lenstitisyon nou bezwen met zepol ansanm, met nou zefor ansanm pou nou edik nou pep …

 

(Interruption)

 

HON SIMON GILL

… pou nou edik nou pep, pou nou ansenny zot bann bon fason fer lo nou rezo sosyal e respekte nou pep, respekte nou Nasyon.  Mersi bokou Mr Speaker.

 

(APPLAUSE)

 

MR SPEAKER

Mersi.  Bon.  Annou ganny en pe lord dan sa Chamber la bomaten !   Ler en Manm i annan drwa pou li raise en matter of privilege e ler i pe raise en matter of privilege parey in ganny fer lo tou le de kote latab avan, nou bezwen ekoute.  Se mwan ki pou diriz sa Chamber!  Ok?  E ler mon donn en parol, ler mon donn lord en Manm pou li raise son matter, se mwan ki pou diriz li.  E mon’n diriz Onorab Simon Gill pou pa fer letour, pou vin to the point, in vin to the point.  Ok?  In raise son matter of privilege  – mon pa pe ouver deba lo la – lo mon kote mon dir ankor, mwan mon ganny bonbarde e mon pou ganny bonbarde ankor !

Mon dir annou servi rezo sosyal byen.  Annou pa senm laenn – annou pa senm – mon’n dir avan ankor kot enn mon ser mon apel mon ser Seselwa ti ganny dekrir konman en ‘’zako.’’  Mon ti dir e mon ti fer sa referans dan Lasanble, akoz mon ti pare pou mon debout akote sa madanm.  Mon ti ganny bonbarde apre.  Mon napa problenm me mon’n koze lo la.

E mon pou dir ankor ozordi from the Chair, Lasanble Nasyonal i kondann tou sa bann aksyon negativ lo rezo sosyal vize kont en Manm Lasanble, vize kont en dirizan dan pei, oubyen vize kont nenport dimoun dan sa pei !  Annou ankor enn fwa servi rezo sosyal byen.  I en bon mwayen pou kominike, i en bon mwayen pou pas nouvel, pou pas mesaz and so on –  annou servi li byen.  E lo mon kote mon dir ankor bomaten mon annan en msye ki’n vin kot baro spesyalman pou vwar mwan.  Nicholas Prea pa lo rezo sosyal !  Okenn dimoun ki pe servi mon portre e la resanman portre mon fanmir, manm mon fanmir ki pe demann larzan, ki pe  ofer loan se pa Nicholas Prea sa !  Nicholas Prea i Speaker Lasanble Nasyonal, i pa ofer loan personn!

Mon’n demann SBC pou pas ansanm avek Lapolis me malerezman sa pa’n ganny fer, e mon napa lot landrwa pou mon fer en Statement.  Nasyon in pick up, lezot lapres pa’n pick up, me mon bezwen fer li from here. Akoz i annan bokou dimoun ki pe ganny anbete deor pou transfer larzan atraver Western Union!

Si Nicholas Prea ti pe ofer loan Nicholas Prea i dan Sesel, i pa demande pou transfer larzan dan Western Union.  Mon napa nanryen pou mon fer ek Western Union e mon pa ofer loan.  Sa mon krwar i dernyen fwa ki mon fer sa lapel avek tou dimoun ki pe ekoute deor.  Mon pa lo rezo sosyal e mon napa lentansyon osi tou pou mwan retourn lo rezo sosyal !  Vwala alor statement ki mon anvi fer from the Chair.  Yes Onorab Ramkalawan.

 

HON WAVEL RAMKALAWAN

Mr Speaker mon anvi fer en point of order baze lo sa size matter of privilege.  Mr Speaker Order 36(1)  kler – ‘’ A member who wishes to raise a matter which the member believes affects the privileges of the Assembly, shall do so at the first available sitting of the Assembly by informing the Speaker and stating the matter it is proposed to raise.’’

(2) i dir avek nou – ‘’When called by the Speaker the Member shall briefly, briefly state the grounds on which the member believes that the matter raise affects the privileges of the Assembly.  ‘’The matter raise’’  ….  Mr Speaker point of order dan le sans ki sa ki nou’n vwar bomaten is NOT a matter of privilege!  E ki nou’n ganny nou en diskour

 

(APPLAUSE)

 

HON WAVEL RAMKALAWAN

… e ki mon krwar ki sa kalite nonsense fodre i arete!  Mersi bokou.

 

MR SPEAKER

Bon mon pa pe – non mon ava – non.

 

(Interruption)

 

MR SPEAKER

Order!  Order!  Order!  Bon mon’n diriz Onorab Simon Gill parey i dir i pa abitye raise en matter of privilege.   I son premye fwa ki in raise en matter of privilege.  Mon’n diriz li e mon swete i ava pran bann konsey dan le fitir how to address a matter of privilege – ok?   Bon nou’n fini lo la mon ava welcome Minis avek son delegasyon.  Please Minister.  En moman, Onorab De Commarmond.  Minis.  Onorab De Commarmond briefly.

 

HON CHARLES DE COMMARMOND

Mersi Mr Speaker.  Bonzour Mr Speaker, Minis ek ou delegasyon.  Bonzour tou Manm Onorab e tou dimoun ki a lekout.  Mr Speaker mwan mon pa pe vin koz nonsense parey sa ki’n fek koze, me mwan mon le – nou Lasanble mon oule,

 

(Interruption)

 

HON CHARLES DE COMMARMOND

… mon oule –

 

 

(Interruption)

 

MR SPEAKER

Onorab, ou’n fer referans ki lot koze i koz ‘’nonsense!’’  Li osi in dir i pa vin koz ‘’nonsense.’’  Nou servi sa langaz ek kanmarad !

 

HON CHARLES DE COMMARMOND

Egzakteman.  Mersi.  Mr Speaker mon oule lo nou kote latab e nou Lasanble kondann aksyon ki’n an arive on New Zealand Christ Church over the weekend, kot bann dimoun in ganny touye par bann dimoun ki malad dan latet e ki’n vini ek fizi in zis fiziye bann dimoun dan Mosque e partou.  Mon krwar ki sa bann aksyon i mal e ki nou Lasanble an solidarite avek New Zealand e avek zot Lasanble laba osi  – etandonnen nou ti zwenn zot bann Diplomat lotrozour, e nou oule severman kondann sa bann aksyon!

Menm parey lotrozour ti arive kot bann solda ti ganny touye laba an Pakistan an L’Inde.  La osi bann keksoz ki mal e nou sa bann keksoz koumsa nou pa kontan e mon oule ki nou Lasanble ansanm la nou kondann sa bann keksoz koumsa.  Vwala ki mon ti oule pase dan nou Lasanble ozordi.  Mersi.

 

MR SPEAKER

Mersi Onorab.  Bon mwan avek Clerk, nou ti dan meeting
Standing Committee
pou Commonwealth SISPOC.  Nou’n rankontre avek Speaker Nouvelle Zelande.  Lo kote Sekretarya nou pou fer le neseser pou nou eksprim nou sipor e senpati avek Parlman New Zealand.  Nou pou fer sa.  Mersi.

Bon nou ava al lo Order Paper.  Nou a pran kestyon.  E mon ti a kontan dir bonzour e welcome Minister Jean-Paul Adam,  Minis responsab pou Lasante.  E Minis  i ganny akonpannyen par CEO Health Care Agency Dr Danny Louange.  Son Special Advisor Dr. Loren Reginald.  Public Health Commissioner Dr. Jude Gedeon.  E son Personal Assistant Mr Marthy Vidot.  Minis ek ou delegasyon, bonzour e welcome dan Lasanble Nasyonal.  Nou ava al direkteman lo premye kestyon e mon ava donn laparol Onorab Jean-Francois Ferrari.  Onorab.

 

HON JEAN-FRANCOIS FERRARI

Mersi Mr Speaker.  Bonzour Minis ek ou delegasyon.  Mr Speaker mon ti a kontan demande si eski Minis pou Lasante i kapab donn en leksplikasyon nou Lasanble :-

  1. Lo kantite ka lanmor ki’n anrezistre dan Lopital Sesel depi konmansman sa lannen?
  2. Kantite pti baba ki’n mor pandan lannen 2018 e konmansman sa lannen osi ?
  3. Lakoz sa kantite ka lanmor, mon pe refer to sa bann pti baba dan sa trwazyenm kestyon. Mersi.

 

MR SPEAKER

Mersi Onorab Ferrari.  Mon ava pas laparol avek Minis Adam.

 

MINISTER JEAN-PAUL ADAM

Mersi bokou Mr Speaker.  E bonzour Mr Speaker, bann Onorab Leaders dan Lasanble e tou bann Manm Onorab.   E tou bann dimoun ki pe swiv nou deba parey labitid.  Mon remersye Onorab pou son kestyon.  An se ki konsern bann lanmor ki’n anrezistre dan Lopital Sesel depi konmansman 2019, nou annan 162 ka lanmor lo komansman sa lannen.

Si nou regard istorik dan  bann dernyen 5an, an 2018 nou’n vwar 817 ka lanmor, an 2017 – 748, an 2016 – 747, an 2015 – 703, an 2014 – 725 e an 2013 –  717.  Alor nou kapab vwar ki i annan en logmantasyon dan ka lanmor.

E si nou regard bann lakoz lanmor sa i sirtou pou bann rezon kardyovaskiler, atraver bann kanser e osi konsernan bann maladi respiratwar.

E sa bann eleman logmantasyon dan ka lanmor, i annan, i lye a bann eleman stil lavi dan nou pei e osi bann lezot risk asosye avek bann maladi non-kominikab.  E i enportan ki nou gard sa an kont letan nou pe fer nou bann stratezi lasante, e osi letan nou batir nou resours imen pou nou kapab adres sa bann defi a lavenir.

An se ki konsern la kantite pti baba ki’n mor pandan lannen 2018 e konmansman sa lannen –  an 2018 nou’n annan 31 ka.  E depi konmansman sa lannen depi le 01 Zanvye nou annan 2 ka an 2019.  Letan nou regard sa sif pou 2018, nou kapab note ki sa i en logmantasyon konsekan sorti 2017.  E i annan plizyer rezon pou sa.

E annefe Minister in demann plizyer bann profesyonnel Lasante pou fer en analiz, ki zot in kapab termin sa travay e mon remersye tou sa bann travayer Lasante ki’n fer sa travay, kot zot in analiz bann diferan rezon pou sa bann lanmor bann pti baba.  E sa ki nou’n kapab vwar dan sa sif 31, se ki 32poursan parmi ti lye a bann defo a nesans sa ban pti baba.  Oubyen parey nou dir an Angle bann congenital defects.

Sa i o konpare avek bann norm enternasyonal e Lorganizasyon Mondyal Lasante i estimen ki an zeneral 11.3poursan bann lanmor bann pti baba dan bann diferan pei lemonn an mwayenn, i gras a bann defo a nesans.

Dan ka Sesel nou kapab vwar ki i annan en logmantasyon tre konsekan dan la kantite bann nesans ki ganny afekte avek sa bann defo a nesans.  E sa i lye a plizyer fakter.  An parti i  lye a ankor bann problenm ki nou kapab konstate avek bann stil lavi avek bann maladi non-kominikab.  I lye osi avek parfwa avek bann labi sibstans.  I lye osi parfwa avek lenterferans pandan peryod lansentman.  I lye osi avek pre matirite e i lye osi a bann fakter zenetik.

Alor sa letid ki nou’n fer i montre ki nou bezwen konsernen avek sa logmantasyon ki’n annan.

E sirtou ki si nou regard an 2017, nou ti ganny en rezilta ki ti vreman ankourazan ki ti en – ki ti 10.9poursan par mil.  Akoz letan nou regard sa to lanmor bann nesans pti baba, nou regard li lo en baz par sak mil nesans.  Alor sa 31 an 2018 i ekivalan a 18 par mil nesans, konpare avek 10.9 par mil nesans an 2017.

Alor lot bann eleman ki sa rapor in montre se ki la grann mazorite, bann manman ansent pe ganny swivi atraver bann servis anti-natal, me nou kapab vwar ki i annan en serten poursantaz ki par egzanp anrezistre tar ; savedir apre 20 semenn zot lansentman.  E sa osi i en fakter ki nou bezwen sey adrese letan nou pou amelyor bann rezilta, an se ki konsern bann lanmor, bann pti baba apre ki zot in ne.

Ki nou kapab vwar osi ki kontak ki bann manman in annan avek servis anti-natal i bon plis ki 97poursan bann manman globalman i ganny akse a sa bann servis, me nou pe kontinyen vwar dan serten ka ki en pe a risk, kot bann manman pe vin tar dan sa bann servis.

Mon remersye tou bann travayer Lasante ki pe fer en travay kontinyel pou adres sa bann size e mon asire osi – akoz zisteman an 2017  nou’n ganny en rezilta ki ti preski en rikord, ki mon asire atraver bann zefor ki zot met ansanm, ki nou pou kapab adres sa problenm ki nou  pe vwar atraver sa rezilta an 2018.  Mersi bokou Mr Speaker.  E mersi Onorab.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker nou konnen ki enn bann bon kote lasante piblik dan nou pei, in souvan dan domenn community care e swivi ki bann pasyan i gannyen avek bann community nurses.  Mon ti a kontan demann Minis ki bann mezir ki pe ganny met an plas, swivan sa logmantasyon dan bann lanmor bann pti baba lannen pase –  ki bann mezir ki pe ganny pran o nivo lasante kominoter?  E ki mwayen ekstra ki pe ganny mete a dispozisyon bann ners ki fer zot travay dan lakominote, pou asire ki i annan en meyer swivi bann manman ki ansent, sirtou dan bann landrwa ki kapab ganny konsidere oubyen bann distrik ki kapab, oubyen bann sou distrik ki kapab ganny konsidere konman pli a risk?  Ki bann zefor ki Minister pe fer pou beef up sa servis?  Mersi Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Premyerman, parey mon’n endike dan mon premye larepons, premye eleman se pou nou idantifye bann risk pli boner, akoz nou vwar bann manman a risk se bann ki tant pou vin fer zot parey nou apel sa zot booking avek anti-natal en pe tar dan zot lansentman.

Alor i enportan e sa travay i nesesit pou nou bann travayer lasante pa zis, annefe i pa en keksoz ki konsern zis travayer lasante i konsern kominote dan en fason pli larz. Pou nou idantifye bann dimoun ki par egzanp zot dan laz  petet zot pe al fer pti baba, e pou nou kapab fer kler ki bann servis ki disponib e pou zot konpran poudir zot kapab vin devan e kapab ganny en swivi de pre.

Nou pe osi ofer plis formasyon pou bann fanmsaz pou zot kapab pli byen osi idantifye sa bann risk boner.  E nou ava rapel osi ki resaman atraver bann proze early childhood education nou’n osi entrodwir bann nouvo sistenm pou anmas bann endikater a la nesans, ki permet nou pli boner ganny lenformasyon apropriye pou nou kapab idantifye zisteman parey ou pe dir bann risk dan serten rezyon asosye avek serten kondisyon.

E menm parfwa kot i konsern bann problenm ki kapab lye avek zenetik menm dan serten fanmir.  Akoz si par egzanp en manman in ganny en problenm, nou konnen ki son bann paran letan son zanfan evantyelman i fer zanfan ki li osi i kapab ganny sa bann problenm similer.

Apre osi atraver nou bann progranm dan kominote me osi nou bann progranm prevansyon, se pou nou kapab osi  kontinyen edik dimoun lo bann risk vizavi en lansentman.  Akoz nou vwar osi atraver sa letid ki’n ganny fer ki i annan  bokou – malgre i bokou lenformasyon ki ganny donnen i annan touzour bann konportman a risk parmi nou popilasyon.

Nou pe vwar logmantasyon l’obésité ki annan en lenpak konsekan par egzanp lo viabilité en zanfan.  Si manman i obez i annan en lenpak direk lo viabilité sa lansentman.  Alor bann ranforsman se sirtou pou nou kapab idantifye sa bann risk pli boner e fer bann lentervansyon neseser a en moman pli boner. Mersi Mr Speaker e mersi Onorab.

 

MR SPEAKER

Mersi Minis.  Onorab Clive Roucou.

 

HON CLIVE ROUCOU

Mersi Mr Speaker.  Bonzour tou dimoun.  Mr Speaker de kestyon pou Minis.  Mon premye kestyon.  Se mon anvi demann Minis si i annan okenn statistics spesifik e alarman an konsiderasyon bann logmantasyon dan ka lanmor spesifik?

Par egzanp, bann madanm ki vin konsilte tar e labi sibstans ?  E mon 2enm kestyon se si ou Minister dan son progranm antenatal i annan en target spesifik spesyalman avek bann madanm ki pe fer labi sibstans?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Ok.  Mersi bokou Mr Speaker.  E mersi Onorab.  Nou annan plizyer ka kot nou bezwen konsernen lo bann keksoz ki, bann ka spesifik.  Premyerman preski tou bann ka lanmor ti asosye avek bann nesans prematire.  Alor sa i enn bann fakter kle ki annan lenpak.  Alor i annan en kantite diferan fakter prezan ki enfliyans pre matirite.

Parmi i kapab labi sibstans.  Nou annan dan omwen 2 ka kot i garanti savedir ki i konfirmen ki sa i lye avek labi sibstans.  I kapab annan bokou plis kot petet ou pa’n konfirmen akoz i depan – ou pa pou forseman ganny sa tes pou donn ou en rezilta a sa moman ki sa dimoun i vin konsilte.

Alor i annan probabilite ki i annan ankor ka.  I annan 2 ki nou kapab dir i 100poursan konfirmen.  Nou annan plizyer bann ka osi kot manman ti annan preeclampsia e sa in annan en lenpak direk byensir lo rezilta ki nou gannyen atraver sa nesans.

Nou’n osi annan 2 ka kot manman malerezman in perdi zot lavi.  E sa i en konsern osi vizavi bann tandans ki nou pe vwar, e ankor i annan serten dan sa 2 ka spesifik i annan serten eleman spesifik.  Me dan en fason zeneral nou pe vwar logmantasyon bann risk ki asosye avek tansyon, avek dyabet pandan lansentman e osi bann risk ki ale avek sa.

Alor mon’n  sit en pti pe serten bann statistik spesifik.  Me letan nou pe regard sa eleman pre matirite, apre nou pe regard sa bann defo a nesans plis ki 30poursan parey mon’n dir, konpare avek en norm global ki apepre en 11poursan, nou kapab vwar poudir i zenetik me i annan bokou zefor pou nou fer pou nou redwir bann fakter risk  dan nou popilasyon.  Mersi Mr Speaker e mersi Onorab.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker eski Minis i kapab dir nou dan larepons sa kestyon lo konmansman, in nonm nou serten bann kondisyon oubyen bann si oule bann maladi ki’n koz sa bann lanmor.  Eski Minister Lasante pe travay osi par egzanp an se konsern par egzanp kanser, pou travay lo en progranm depi staz, oubyen tes pou bann dimoun ki annan bann fakter erediter ki kapab fer zot ganny afekte avek seren kalite kanser. E pou ankouraz sa bann dimoun pou konmans teste boner? Sa i mon premye kestyon.

Mon 2enm parti kestyon mon ti a kontan konnen si age group, ki age group ki nou pe vwar pou dir i annan bann dimoun ki pe rankontre sa bann problenm oubyen eski i ase varye?  Akoz i pou enportan pou nou konn  bann tandans, par egzanp tandans kardyovaskiler  e bann tandans  serten kanser dan nou sosyete pou vwar ki mannyer sa pe ale?  Mersi Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker e mersi Onorab.  Annefe an se ki konsern kanser, sa i parmi mon kapab dir bann pli gran konsern ki annan la aktyelman dan nou pei e nou pe vwar en gran logmantasyon dan la lakantite ka kanser.  I annan plizyer eleman ladan.

Premye eleman ki enportan ki tou Seselwa i konpran, se ki dan lamazorite ka kanser i lye a stil lavi.

Savedir bann fakter kle se bann keksoz parey obésité, konsonmasyon an ekse lalkol, bann move ladyet, mank legzersis, konsonmasyon tro bokou bann prodwi sa ki nou apel bann processed food, bann prodwi transformen.

Sa i bann fakter kle risk ki nou pe vwar dan nou sosyete e ki kontribye anver bann kanser.  Neanmwen nou pe vwar osi sa lyen zenetik e nou annan en letid ki nou pe fer aktyelman ki nou pe ankouraz bann dimoun, ki’n deza par egzanp ki annan en paran ki’n ganny afekte ave kanser pou zot kapab fer bann tes e nou vwar ki i annan dan serten kanser par egzanp bann kanser colorectal, nou pe vwar enormeman bann fakter zenetik ki afekte bann dimoun.

E sa par egzanp i premye kanser ki nou annan Sesel. Se  colorectal swivi osi par bann kanser tete, kanser prostat e bann kanser sistenm respiratwar.  E nou kapab vwar ki atraver sa bann tes ki nou pe fer, i annan depi staz ki pe kapab ganny fer baze lo en pwennvi zenetik pou dimoun konn zot risk.

Me i enportan pou nou fer mazin tou
Seselwa poudir premye keksoz ki ou bezwen menm mazinen akoz menm par egzanp si ou a risk, si ou annan sa gene ki kapab fer ou a risk pou kanser, si ou swiv en bon stil lavi ou pe redwir ou risk en kantite.

E si ou napa sa gene i pa vedir ou pa pou ganny kanser si ou annan bann move konportman.  Alor i enportan pou nou tou parey nou dir pran nou lasante konman nou responsabilite.  Me sa letid ki nou pe fer aktyelman e ki Prezidan ti nonmen dan son diskour Leta Lanasyon, i pe permet nou fer bann depi staz dan en fason sistematik, baze lo sa bann eleman zenetik, kot i kapab ed dimoun, me fodre nou kler sa pa pou aplik pou tou dimoun.  I pou aplik bann dimoun kot zot annan kanser dan zot fanmir.

Apre lot eleman vizavi nou stratezi pou adres kanser se pou nou dan en fason pli sistematik, ofer bann tes pou depi staz pou dimoun kapab fer bann – bann dimoun ki konnen zot a risk letan zot ariv en serten laz pou zot kapab fer zot swivi.

An se ki konsern popilasyon ki ganny afekte, i vreman tou laz.  Malerezman nou annan menm bann ka kanser parmi zanfan e letan i parmi zanfan se sirtou byensir lye a bann eleman zenetik.

E nou annan tou laz me bann kanser i kantmenm pli prevalent parmi bann dimoun pli aze, akoz si ou pe regard sirtou bann kanser parey kanser prostat i tant pou afekte dimoun letan zot pli aze.  E ankor i enportan pou tou dimoun pran responsabilite pou kapab redwi zot risk.  Mersi bokou Mr Speaker.  Mersi Onorab.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Bonzour Minis ek tou bann Manm.  Mr Speaker mon ti ava kontan premyerman demann Minis, ki son Minister pe prevwar vi ki nou annan nou en problenm adiksyon dan nou pei –  ki zot pe prevwar spesyalman an relasyon avek bann pti baba kot i annan en tandans pou petet pa al konsilte, bann swivi, ensidswit.  Mon konnen ki poudir be la mon felisit Minister pou sa bon progranm, kot si par egzanp en paran i HIV, konmsi sa tretman boner pou ki sa HIV pa ganny pase avek zanfan.  Mon konnen ki poudir sa i en progranm ki marse avek bann ki vin boner.

Alors ki tandans ki nou kapab – ki zot pe prevwar konman en Minister, an relasyon avek to mortalite bann pti baba, an relasyon avek adiksyon?

Dezyenmman Mr Speaker Minis in mansyonnen ki pou dir deli konmansman lannen i annan 162 dimoun ki’n mor, e letan mon pe regarde si nou pe pran li lo en average 2.5mwan parske la nou dan milye Mars, i vedir en average 64.8 dimoun ki’n mor pou sak mwan – ok?  Eski Minis i kapab donn nou en konparezon avek – si ou annan ?  Avek 2018 par egzanp oubyen 2017 zis konmsi pou nou balanse.

E mon dernyen kestyon Mr Speaker, letan Minis pe koz lo bann diferan ka lanmor, espesyalman kanser.  E eski Minis i kapab dir nou ki zot pe fer dan zot Minister, pour ki sa peryod kot en dimoun i ganny refer avek son dokter dan son distrik, e pou li vwar en spesyalis e pou aksyon ganny pran –  parski la ankor enn fwa nou konnen ki poudir i annan bokou maladi it’s about pli boner ki ou vwar li, pli ou kapab annan enposibilite pou tretman, spesyalman ki par egzanp dan zonm kanser prostat i enn.  Lo kote madanm tou  sa bann kanser ki si ou dekouver li boner, son posibilite ganny en tretman i o, alors ki son Minister pe fer pou ki sa peryod ant en dimoun i ganny refer avek son dokter, pou li vwar en spesyalis pou aksyon kapab ganny pran i ganny redwir?  Parski la pou le moman i tro long.  Mersi bokou.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Premyerman se ki konsern pou nou kapab adres sa size bann manman par egzanp ki dan adiksyon.  E Onorab in mansyonnen ki enn bann pli gran risk byensir se VIH e nou annan en progranm ki pe mars tre byen pou nou redwir e menm elimin, nou pe fer en progranm avek Lorganizasyon Mondyal Lasante pou nou elimin transmisyon VIH sorti kot manman pou al zanfan.

Nou pe dir nou anvi elimin sa e dan la grande mazorite ka akoz nou annan plizyer manman ansent ki par egzanp dan adiksyon kot zot annan VIH.

Me i annan ka kot si zot vin tro tar – malerezman sa pa posib.  E nou annan osi serten ka malerezman, kot parfwa en manman ki pli tar, nou annan en ka ki lannen pase kot manman ki par egzanp ti ganny VIH apre nesans son baba e malerezman atraver son dile tete, i annan sa risk osi.   Alor nou fer en gran zefor lo la.

An se ki konsern idantifye bann dimoun ki annan adiksyon parey mon’n dir, se pou nou travay vreman dan kominote, atraver bann fanmsaz dan kominote, dan distrik, pou nou idantifye bann popilasyon ki a risk boner e sa i lye osi avek bann konsey ki kapab ganny donnen vizavi par egzanp bann provizyon Family Planning, kontrasepsyon ki bann dimoun i kapab servi pou osi redwir bann risk menm avan lansentman.

Apre osi si en dimoun – alor bi se premyerman idantifye bann dimoun ki a risk atraver adiksyon pli boner, e pou donn zot bann servis apropriye atraver konsey, kot i neseser tretman pou zot kapab sorti lo drog pandan zot lansentman.  E alor amelyor zot rezilta e redwir zot risk dan en fason konsekan.  E nou osi travay boner avek Minister Lafanmir e sirtou bann travayer sosyal, pou nou kapab adres sa bann size.

An se ki konsern sa to la kantite lanmor, si nou pou regard konpare avek 2018.  An 2018 si ou pran sa to par mwan i vin 68 par mwan.  Alor 64 wi pou 2018.  Alor konmansman 2019 nou annan  en rediksyon leze.  Ok.  I pa en rediksyon ki nou kapab dir avek konfyans ki i satisfezan.   Nou bezwen kontinyen travay pou nou amelyor sa.  Me ankor ki nou’n vwar, se nou annan bann moman kot to lanmor i monte apre kot i stabilize, akoz nou’n vwar par egzanp an 2016/ 2017 ki la kantite lanmor ti pe ogmante.

Me toultan la kantite lanmor i relye avek ou popilasyon.  E alor menm si to lanmor ti pe ogmante nou ti pe vwar an relatif ek nou popilasyon ki nou ti pe stabiliz li.  Nou’n vwar ankor an 2018 kot in ogmant a en serten ritm, e letan nou pe regard ankor sa bann lakoz lanmor i sirtou lye a sa bann eleman bann maladi non-kominikab, bann problenm kardyovaskiler, bann problenm kanser e bann problenm respiratwar.

E tousala i bann keksoz ki montre nou osi travay ki bezwen ganny fer atraver prevansyon.  E sa i mesaz kle ki nou pe fer atraver nou bann travayer lasante.  Me parey ou’n dir osi Onorab lide se osi kapab donn bann servis spesyalize avek bann dimoun ki’n ganny afekte dan en fason rapid e apropriye.  E mon konnen ki dan la grande mazorite ka, en dimoun i ganny refer avek en spesyalis, dan en letan ki apropriye.

Mon okouran ki i annan serten ka kot parfwa i annan serten retar e nou sey adres sa.  Nou annan serten spesyalite kot i vre nou napa bokou spesyalis, me nou pe asire atraver par egzanp met bann spesyalis menm dan bann klinik rezyonal, pou zot kapab pli pre avek dimoun e alor ofer dimoun sa bann referans dan en fason pli vit.

Nou osi annan amelyorasyon dan lafason ki bann ki bann dokter i kapab pli byen diriz sa bann dimoun, e idantifye bann ka ki pli irzan pou zot kapab met bann ki pli irzan an avan e fer sir ki zot ganny sa tretman  ki apropriye.

Me mon pou dir dan lamazorite bann ka, sertennman atraver bann statistik ki nou annan an term bann konsiltasyon, ki sa referans i ganny fer dan en fason ki ase vit.  Me mon aksepte ki  dan serten ka i annan bann mankman e nou pe fer zefor pou nou kapab adres sa bann size.  Mersi Mr Speaker e mersi Onorab.

 

MR SPEAKER

Mersi Minis.  Nou ava al lo dezyenm kestyon.  Onorab Jean-Francois Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon ti a kontan demann Minis si i kapab dir avek sa Lasanble ki bann kontrol ki i annan lo bann diferan  servis farmasi prive ki pe fonksyonnen dan pei, e ki kontrol i annan an plas pou asire ki bann latizann ki antre pe vann dan Sesel i lo standar enternasyonal?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Premyerman i annan bann formalite ki bezwen ganny swiv pou ouver en farmasi prive dan pei.  Sa i enkli premyerman i bezwen soumet en kopi son plan biznes.  I bezwen donn bann detay fizik, lafason ki son letablisman pou ganny organize e ki bann fasilite i pou ofer ladan.  E i annan osi en norm, i annan en standar minimum ki ganny egzize avek tou sa bann farmasi.

Atraver zot laplikasyon zot bezwen annan en sertifika kalifikasyon bann farmasyen e osi bann teknisyen farmasi ki pou ganny anploye, swa si zot Seselwa oubyen zot etranze.  E fodre nou note ki pou en farmasyen zot bezwen en minimum en degre BSC e 3an oubyen plis leksperyans travay.

Tou bann farmasyen, bann pharmacist ek bann teknisyen zot bezwen anrezistre avek konsey bann allied health professionals.  E osi kot sa biznes par egzanp i pe lwe en landrwa zot bezwen donn avek Lotorite lasante piblik, zot bezwen donn en kopi Kontra sa Kontra lokasyon.

Unit pou regilasyon latizann sa ki nou dir an Angle the medicine regulatory unit in devlop plizyer gid pou provizyon bann servis farmasi de kalite, e sa i enkli gid pou standar minimum pou etabli en servis farmasi Sesel e sa gid in ganny adopte avek Federasyon Enternasyonal pou farmasi.

I osi annan gid pou vann an detay bann bezwen minim ki fasilite i bezwen annan.   Nou donn zot osi en check list ki servi pou fer lenspeksyon bann nouvo farmasi e osi check list pou lenspeksyon zeneral bann farmasi.  Nou annan kontrent resours imen, parey bokou fwa dan lasante, pou nou kapab fer sa sirveyans konsistan parey nou ti ava voudre fer pou nou kapab fer sir ki sa bann gid pe byen ganny swivi.  Me bann vizit e bann verifikasyon i ganny fer avek bann travayer ki nou annan.  Sa unit napa staff aktyelman a plen tan, me nou pe sey adres sa atraver en post pharmacist a plen tan ki nou pe al rekrite sa lannen e rekritman pou konmanse prosennman.

An se ki konsern kontrol bann latizann ki ganny enporte dan nou pei, tou latizann ki ganny enporte i bezwen en permi lenportasyon pou fer sir ki i annan kontrol.  Servis farmasi i responsab pou donn sa bann permi e lenportasyon.  Fodre dir ki en permi lenportasyon i pa neseserman garanti en kalite latizann ki ganny enporte e distribye, me nou sey fer sir ki sa latizann i annan en verifikasyon omwen ki ganny fer dan en lot pei e apre dan  serten ka byensir nou fer verifikasyon isi.

Lasirans kalite i posib ler i annan  fasilite lanrezistreman latizann.  E lanrezistreman latizann i ganny fer atraver en dokiman ofisyel ki ganny donnen par Lotorite ki regle bann prodwi farmasi ki sertifye ki zot kapab ganny distribye e vann apre evalyasyon lefikasite e kalite sa bann prodwi.  Lanrezistreman latizann i en provizyon legal dan en pei.  Malerezman an se moman sa Lalwa ki nou annan Sesel, i pa fer provizyon spesifik pou sa.  Me nouvo Lalwa ki pe ganny finalize tre byento, pou kouver sa kestyon lanrezistreman isi Sesel menm e sa i sa nouvo Medicines Act ki nou pou vin avek dan Lasanble prosennman.

Sesel in adopte e adapte model ki Linyon Afriken i servi ki armoniz bann regilasyon, bann blok ekonomik rezyonal parey  SADC kot nou osi manm.  E sa i permet bann pei parey Sesel ki napa ase resours, kot bann resours imen sirtou, pou met son prop sistenm anrezistreman an plas pou servi en sistenm komen rezyonal pou aksed sa kapabilite.  Par egzanp si en latizann i anrezistre Sid Afrik Sesel i kapab ganny akse ek bann dokiman pou prouve ki sa prodwi i lo kalite e  standar neseser.  Sesel pe osi partisip dan sa prosesis ZAZIBONA konman en obzervater kot 10 leta manm SADC i rankontre pou tou le 3mwan, pou regard bann dosye bann latizann komen ki ganny anvoye pou lanrezistreman.  E an 2018, 32 nouvo latizann ti ganny rekomande pou lanrezistreman.

Sesel i annan osi en Seychelles National Drug Quality Control Laboratory ki dan staz final akreditasyon ISO IEC 1725.  Sa National Drug Quality Control Laboratory i fer sirveyans latizann, ki Minister Lasante i enporte pou asir kalite e efikasite sa bann latizann.

Avek nouvo previzyon Lalwa, apard latizann ki Minister Lasante i enporte, sa ki dimoun prive i anmennen pou osi ganny kontrole dan menm fason.  E bann demars pou etabli sa unit regilater latizann i dan staz avanse.  I pou travay tre pros avek laboratwar ki teste latizann.  Sa regilater pou osi annan pouvwar legal pou lenspeksyon e pran aksyon kot regilasyon pa pe ganny respekte.  E pou note ki an 2018 nou’n fer 726 bann tes pou kontrol kalite.  Mersi Mr Speaker e mersi Onorab.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker premyerman mon annan en pti pe lenkyetid avek repons ki Minis in donnen akoz lo kestyon ki mon pe demann li si Minister i satisfe avek kalite latizann ki antre e pe vann dan pei ?  Minis kekfwa ou ava korize oubyen ou ava spesifye.  Ou larepons se ki nou sey fer sir, nou fer en kontrol ekstern apre nou sey fer sir.

Be Minis kekfwa lekspresyon ki ou’n servi be nou pa kapab seye, nou bezwen fer sir!  Konmsi mwan mon ti a kontan konmsi ki ou kapab dir nou poudir bann kontrol i la, e eski ou satisfe ki bann latizann ki pe ganny vann dan bann farmasi prive, i lo en nivo akseptab?  Sa i mon premye kestyon.

Mon 2enm kestyon se ki vi ki sistenm lasante Sesel konmans avek British standards.  E nou konnen ki bann premye farmasyen isi Sesel Behrams, Dr. Jivan, Dr. Chetty sa bann dimoun ki annan en formasyon ki lye avek bann standar Britanik.  Eski zot pe ankouraze ki sa standar i ganny respekte?  Eski zot pe travay ver sa standar oubyen eski nou pe pran en standar ki o nivo SADC o nivo rezyonal ki pa lo en nivo osi o?

Mon ti a kontan osi Minis si ou kapab dir mwan ki verifikasyon ki ganny fer o nivo bann sertifika ?  Ler en farmasyen i ganny recruited pou li vin travay Sesel ki verifikasyon ki ganny fer?  Ki standar i ganny mezire vizavi ki standar?  E eski Minister Lasante i satisfe avek 3an leksperyans kan normalman bann standar British standard i demann 5an leksperyans e parfwa menm leksperyans dan en Lopital.  Pa senpleman dan en farmasi me dan en Lopital.  Konmsi i enportan ki Minis i kapab reasir piblik ki sa bann farmasyen ki nou annan e nou konnen nou napa ase nou bezwen enport bann ki pa Seselwa.

Me eski zot lo sa nivo?  Eski zot pe konpran nou Seselwa ?  Eski dokter par egzanp ou bezwen fer en pti tes Kreol.  Be en farmasyen ler en madanm i vini i dir ek li mon ganny en bar.  I pa dan liv farmasi sa.  Fodre ou konpran fodre ou en dokter ki – fodre ou en dimoun ki konpran en pti pe sa ki sa madanm i le dir.  I pa zis nenport dimoun ki vini sorti nenport landrwa zis akoz i annan en sertifika e leksperyans 3an.  So reasir nou Minis ki lo sa nivo bann kontrol pe ganny fer pou asire ki nou annan bann farmasyen ki lo en nivo siperyer.  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker e mersi Onorab.  E eskiz mwan si mon’n servi sa mo ‘’sey’’ akoz mon krwar osi dan mon larepons mon ti kler ki tou lenportasyon e pou reasir piblik – tou lenportasyon i bezwen annan en permi lenportasyon.  Savedir ki tou laplikasyon pou lenportasyon okenn latizann, oubyen medikaman, i pas kot farmasi nou Minister Lasante e ki sa i bezwen ganny verifye avan ki sa lenportasyon i ganny fer.

I pa parey nenport ki keksoz kot zis ou enporte.  Ou bezwen demande avan pou ou kapab enport sa keksoz.  E letan ou pe fer sa demann atraver sa permi lenportasyon ou bezwen montre sertifikasyon sa medikaman ki ou pe al enporte e se la ki nou servi sa ki ou’n dir sa British standardOk.

Me nou pa servi zis British standard akoz napa zis bann latizann ki sorti dan en sertifikasyon Britanik.   I annan standar Europeen osi par egzanp.  I annan osi standar Ameriken ok?  E nou tou nou konnen ki sa bann servis verifikasyon dan sa bann pei i avanse.

Alor an zeneral sa bann latizann si zot annan sa bann sertifikasyon, letan zot pe demann en permi pou antre mon kapab dir i ase straight forward ok san gran konplikasyon, si i kler poudir sa sertifika i korek.  Ok?

Prezan sa prosesis ki monn dekrir avek bann pei SADC, se akoz en pei parey Sesel nou bezwen malgre sa nou bezwen detanzantan teste bann latizann ki nou fer antre dan nou pei.

Menm bann keksoz ki’n ganny en sertifikasyon sorti dan en tel pei nou bezwen, nou pa kapab teste tou lenportasyon me nou pran bann samples, pou nou fer bann tes regilye avek sa bann lenportasyon sorti dan tou diferan pei kot i kapab vini.

E letan sa bann samples i vini, sa tes i permet nou vwar akoz menm parfwa ou annan en lenportasyon ki sorti dan en fourniser ki akredite, ki annan tou son sertifika, me i annan problenm parfwa dan lafason ki sa latizann in ganny garde par egzanp dan en container.  Tousala i bann keksoz ki annan bann lenpak e se pou sa nou bezwen kapab ranforsi nou kapasite pou fer sa bann tes.

E se pour sa letan ou pe fer sa prosesis atraver par egzanp bann pe SADC, ou pe kapab apiy lo bann tes ki’n ganny fer osi dan sa bann pei.  E savedir ki i annan latizann ki petet nou,  nou pa’n deza teste, zot,  zot in deza teste e ki nou konnen ki alor i an konformite.

E pou note ki sa standar ki pou ganny servi osi i en standar ISO.  Savedir malgre ki nou pe servi sa lapros SADC akoz nou en manm dan SADC e dan Linyon Afriken, sa standar i en standar global.

Alor zis pou reasir tou dimoun nou annan sa bann mezir an plas.  Me  avek sa nouvo Lalwa nou pou ankor ranforsi sa enkli lanrezistreman isi Sesel ki aktyelman nou pa pe fer anba sa provizyon legal ki nou annan aktyelman.  Nou pe depan lo bann rezistrasyon ki ganny  fer dan bann lezot pei.

An se ki konsern bann kalifikasyon bann travayer dan farmasi, bann pharmacist, alor diferan pei i kapab met diferan standar an term leksperyans.  Sa 3an i an zeneral i en standar ki ganny swiv osi dan la rezyon, si dan bann pei parey L’Angleterre zot annan 5an i zot swa.

Me fodre nou rapel osi ki sa verifikasyon i ganny er atraver Allied Health Council ki enkli bann verifikasyon sa bann sertifika.  Savedir ou pa pe vin zis avek en sertifika poudir mon’n al tel liniversite.  Sa konsey Allied Health i kapab fer verifikasyon avek sa konsey kot ou sorti.  Savedir si ou pe vini konman en pharmacist par egzanp sorti dan L’Inde i annan sa allied health council ki ekivalan dan L’Inde ki bezwen kapab konfirmen poudir efektivman ou anrezistre.

Savedir i pa zis sa bout papye.  E prezan letan Allied Health Council Sesel pou verifye osi avek sa Konsey laba i pou kapab menm vwar e ganny sertifikasyon bann modil ki’n ganny fer, e osi atraver leksperyans savedir ou pou kapab verifye pou vreman  sa dimoun pe pratike pandan sa minimum 3an ki’n ganny dir.

Byensir an se ki konsern langaz eksetera si i annan etranze ki pe pratike dan nou pei i en konsern akoz zot pa konpran nou langaz.  Me fodre toultan nou rapel ki preskripsyon pa ganny fer par pharmacist.  Preskripsyon i ganny fer par dokter e bann latizann ki ou kapab gannyen lo kontwar i bann latizann kot si ou pe swiv byen bann konsiny, bann risk i kontrole, i minimize.

Osi nou ava note ki Sesel nou annan en lapros ki ase sever, dan le sans ki i annan bokou latizann ki rezerve pou lopital.  Savedir bann latizann pli danzere en nenport ki pharmacist pa kapab fer vini akoz sa risk ki sa i porte pou popilasyon.  E Mr Speaker mon profite pou mon dir avek Lasanble i enportan pou nou gard sa antet konman en pti pei ki nou gard sa kontrol.  Akoz Sesel si ou pe regarde nou annan en bon rezilta vizavi kontrol bann latizann dan nou pei.  Dan lopital pou sa ki konsern bann control drugs i vreman ganny verifye byen.  E i enportan ki nou kapab mentenir sa rikord ki pozitiv.

E ankor pou reasir nou pep ki nou pa pe zis seye nou pe fer li.  Mersi.

 

MR SPEAKER

Mersi Minis.  Onorab Clive Roucou.

 

HON CLIVE ROUCOU

Mersi Mr Speaker.  Mr Speaker Minis in reponn en bout mon kestyon, me selman mon anvi demann Minis lo sa zafer latizann ki spesifikman avek Minister Lasante, si i annan sipervizyon egzakt lo bann farmasi prive ki zot pa pe vann sa bann latizann ki Minister Lasante li menm li ki pe donnen?  Epi en kestyon an pasan mon ti anvi demann Minis si i en pratik ki bann dokter Minister Lasante i ekri preskripsyon bann latizann spesifik ki napa Minister Lasante ki bann pasyan  kapab rode farmasi prive ?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  An se ki konsern bann  verifikasyon, nou fer sa dan en fason o maximum ki posib.  Parey mon’n eksplike nou annan defi resours imen ; savedir nou ti a kontan fer plis verifikasyon me bann verifikasyon pe ganny fer dan en fason sistematik.  Osi tou bann farmasi i bezwen soumet zot rikord.  Alor atraver zot rikord nou kapab verifye pou fer sir ki zot an konformite avek sa bann latizann ki sipoze ganny kontrole.

Dan Lopital osi nou konfyan poudir bann mezir ki nou annan an plas pe permet en kontrol ki neseser e si ou pe regarde konpare avek bokou lezot pei nou napa bann ka kot sa bann latizann i trouve dan nou popilasyon.  Si i annan bann ka kot bann farmasi i pe fer vini par egzanp sa bann latizann dan en fason ilegal, fodre nou note ki sa farmasi i riske perdi son license.  E Lalwa i prevwar ki aksyon pli sever posib i kapab ganny pran avek zot.

Nou annan konfyans ki dan nou pei kontrol i la. I  enportan pou nou ranforsi sa kontrol, akoz demann pou bann latizann ki pli danzere konman latizann ki annan pli lefe segonder alor i esansyel ki nou ranforsi nou kapasite pou nou fer sa bann verifikasyon e sa i anliny avek  nouvo Lalwa ki mon’n koz lo la.

An se ki konsern bann dokter lopital ki fer bann preskripsyon pour bann latizann ki pa disponib dan lopital me ki disponib dan prive ;  I fezab sa dan le sans ki parfwa – akoz byensir konman en Minister Lasante si nou pou fer vini en serten latizann byensir nou pou fer vini en mark.  I pa fer sans pou nou fer vini 10 a 20 mark, akoz i kout nou pli ser pou nou rod en kantite diferan latizann.

Me dan serten ka ou annan en dimoun ki annan son mwayen e ki anvi al rod son latizann ki spesifik ki’n deza gannyen avan me ki bezwen en preskripsyon e nou permet parfwa poudir sa bann dokter i donn en preskripsyon pou zot al pran dan priv,e si sa latizann i disponib dan prive isi Sesel.  Mersi Mr Speaker e mersi Onorab.

 

MR SPEAKER

Mersi Minis.  Onorab Audrey Vidot.

 

HON AUDREY VIDOT

Mersi Mr Speaker.  Minis nou Seselwa ozordi i ankor rekonesan e fyer pou nou servis lasante gratwit Sesel, e bann latizann ki nou ankor pe – bann bon kalite latizann ki nou bann dimoun pe resevwar, eski ou annan en statistik petet, si Minister Lasante i annan en seri konplent an term servis e kalite latizann ki nou bann farmasi be it Gouvernman e osi prive pe ofer piblik, si wi nou ti a kontan konnen kantite?

E nou ti a osi konnen petet ki channel, ki prosedir oubyen ki bor petet dimoun ki santi si i annan en problenm avek bann servis oubyen bann kalite latizann ki serten farmasi prive pe donn nou bann piblik, pe ofer nou bann piblik ki petet, (sorry) ki kapab eklersi pou clear sa channel pou piblik ki laba deor i a tande?  Mersi Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Premyerman pou nou ankor reasir pep Seselwa ki deza avan en keksoz i ganny enporte i annan en verifikasyon ki ganny fer atraver permi lenportasyon.  E si nou regard par egzanp pou 2018 ti annan 5mil 324 laplikasyon pou lenportasyon avek bann diferan farmasi prive e ladan i annan 25 kot nou pa’n aprouve.  Savedir i annan 25 ki pa’n lo kriter, swa i napa sertifikasyon oubyen nou’n santi poudir i pa an konformite avek nou gidans.  Alor i annan en verifikasyon ki’n ganny fer baze lo bann standardizasyon enternasyonal menm avan  lenportasyon.

Sa pa vedir ki sa latizann pou parfe akoz parey mon’n deza eksplike i kapab annan en risk dan transportasyon, dan lafason, dan stokaz eksetera.  Prezan dan sa farmasi si en sitwayen i annan en konsern par egzanp ek sa latizann spesifik, i kapab anmenn kot Minister Lasante kot sa National Drug Quality Laboratory ki dan servis Lotorite Lasante Piblik, zot kapab anmennen pou fer teste si zot annan en konsern ki spesifik.

E osi par egzanp si zot annan en kestyon otour sa zot kapab call sa landrwa donn serten detay e kapab ganny serten verifikasyon.  Si zot annan konsern servis – par egzanp sa farmasi ki pa pe adres zot bezwen sa i kapab ganny fer avek regulatory unit ki dan Lotorite Lasante Piblik ki kapab fer en lenvestigasyon, e si vre i annan en move servis ki’n ganny donnen diferan nivo aksyon i kapab ganny pran, kot par egzanp sa pharmacist menm a nivo ki i kapab perdi son license.  Oubyen sa endividi ki pe servi osi i kapab osi ganny serten restriksyon, oubyen serten aksyon disipliner ki ganny pran atraver Konsey.  Mersi Mr Speaker e mersi Onorab.

 

MR SPEAKER

Mersi Minis. Onorab Regina Esparon.

 

HON REGINA ESPARON

Mersi Mr Speaker.  Mr Speaker Minis in koz lo bann formalite e in osi koz lo bann checklist ki i annan an sa ki konsern farmasi prive.  Mon ti a kontan demann li eski i annan en protocol an plas, pou bann farmasi swiv sirtou an sa ki konsern preskripsyon e bann lezot latizann ki kapab ganny vann lo kontwar?

Parski in dir nou poudir en dokter i kapab donn en preskripsyon sa dimoun i al kot farmasi i aste sa latizann parski i available. Me eski i annan konmsi i annan en lalis ki dir sa kalite latizann dan farmasi kantmenm ou annan ou bezwen en preskripsyon pou vann e sa lo kalite mon kapab vann li over the counter?  Eski i annan en protocol dan sa direksyon Minis ?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab. Annefe wi i annan en protocol dan sa laliny e sa i kouver dan sa checklist.   Savedir pou ou kapab adres sa checklist tou sa bann eleman ki prevwar dan sa protocol i dan sa checklist.  E en dimoun letan i pe fer en  preskripsyon i bezwen gard antet pou dir sa latizann i disponib dan sa farmasi ok.  E si en latizann i over the counter savedir i pa ganny konsidere konman en latizann ki bezwen preskripsyon.

I vre ki parfwa nou ganny kestyon avek manm piblik akoz i annan en kantite latizann.  Sesel nou strik.  I annan en kantite latizann ki Sesel nou demann preskripsyon ki dan pei deor parfwa ou pa bezwen preskripsyon.  Me isi nou gard en standar ki ase strik e mon krwar i enportan pou nou gard sa standar.  Mersi Mr Speaker e mersi Onorab.

 

MR SPEAKER

Mersi Minis.  Kestyon No. 3 Onorab Gervais Henrie.

 

HON GERVAIS HENRIE

Mr Speaker mon pe withdraw sa kestyon.  Mersi.

 

MR SPEAKER

Mersi Onorab Henrie.  Kestyon No.4  Onorab Regina Esparon.

 

HON REGINA ESPARON

Mersi Mr Speaker.  Eski Minis i kapab dir Lasanble ki mezir ki son Minister in met an plas pou fer sir ki kalite e servis manze dan bann lopital e kot Lakaz Dimoun Aze North East Point i touzour lo en nivo satisfezan e ki napa okenn gaspiyaz?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  An se ki konsern previzyon pou prepar manze pou tou nou bann pasyan dan nou bann diferan fasilite parey nou tou nou konnen, sa i ganny fer atraver Kontra ki nou annan aktyelman avek lakonpannyen Skychef.  Prosedir spesifik se Ners Ansarz i prepar sa order lo en baz tou le zour e i ganny fer 10er bomaten son zour avan, e sa i ganny anvoye kot lakwizin Lopital.  Prezan swivan sa, sa order i ganny fer avek Skychef. Parfwa nou kapab annan en gran logmantasyon en pti pe souden avek la kantite dimoun ki antre Lopital, e dan bann ka koumsa sa zour menm Ners Ansarz i fer – i pas mesaz neseser avek lakwizin pou fe sir ki zot okouran ki zot annan pasyan ki adisyonnel.

Dan la grande mazorite ka manze ki ganny delivre i lo standar me i annan serten ka kot nou ganny konplent e kot nou fer lenvestigasyon e kot nou lev sa bann size osi direkteman avek operater savedir Skychef.

Parfwa i annan serten ka kot i annan en pe gaspiyaz manze pou diferan rezon.  Parfwa se byensir nou kapab konpran ki bann dimoun ki vin dan Lopital zot lapeti parfwa i diminyen, e nou bezwen konpran ki letan nou pou fer demann manze nou demann en porsyon normal.

Alor menm si sa dimoun son lapeti i diminyen nou pe donn li en porsyon ki normal dapre sa ki bann eksper nitrisyon i rekomande.  I annan bann ka osi kot parfwa i annan sanzman dan  la kantite pasyan pou bann rezon bann dimoun ki’n sorti Lopital eksetera.

Nou annan osi parfwa dimoun ki vin ek zot prop manze.  Nou esey o maksimonm si zot enform nou,  nou pran mezir neseser, me dan serten ka zot pa enform nou e alor manze i ganny order tou fason.

An se  ki konsern pou redwir gaspiyaz, nou servi sa sistenm son zour avan pou nou kapab konfirm sa bann order e pou bann landrwa parey Home North East Point byensir zot nonm rezidan i ase fix, alor i en pti pe pli fasil pou zot kapab verifye lakantite ki ganny prodwi.

Nou annan osi zefor ki  pe ganny fer par zofisye pou kontrol stok, pou kapab re vwar la kantite manze ki ganny ordonnen vizavi  sa ki ganny konsonmen.  Nou osi fer verifikasyon lo lakantite manze ki ganny prodwi, e osi unit nitrisyon i fer en rapor regilyerman baze lo manze ki ganny prodwir.

Pour lavenir mon’n deza dir ek sa Lasanble ki nou pe fer, pou nou osi kas provizyon manze an diferan group.  Savedir aktyelman nou fer li en sel.  Me a lavenir nou pou fer li dan 5 diferan groupman.

Group No.1 se Lopital Sesel.

Group No.2 se pou rezidans rezyonal pou bann Dimoun Aze North East Point.  Pou Mental Home North East Point, pou Lopital North East Point e osi pou Hospice e osi pou Lopital La Fanmir Perseverance.

Trwazyenm group se pou Lopital Anse Royale pou acute psychiatrist e Detox Center Les Canelles. E osi 4enm group se Lopital Baie St Anne Praslin e 5enm group se Lopital La Digue.  Alor sa bann 5 group son tender pou ganny fer dan premye kar 2019 e nou pe vize pou sa ganny finalize tre prosennman.  Mersi Mr Speaker e mersi Onorab.

 

MR SPEAKER

Mersi Minis. Onorab Esparon.

 

HON REGINA ESPARON

Mersi Mr Speaker.  Mr Speaker eski Minis i kapab dir nou si sa manze ki vin Lopital North East Point i menm manze ki al kot Lopital Victoria oubyen lopital North East Point i ganny en grad manze e Lopital anvil i ganny en lot grad manze?

Parski Minis avek mon lobzervasyon mon pe vwar poudir sa kalite manze ki vin kot Lopital North East Point parfwa – mon pa pe denigre me selman parfwa ou a krwar i bann dernyen grad.

Yer annefe mon’n al kot Lopital North East Point sa manze li menm mon’n goute, sa pwason ti rans !  Konmsi pou mon demande Minis eski zot pe verifye son quality sa manze ki pe ganny donnen? Parski parfwa dimoun i pa pe manze akoz son quality.  Mon pa pe dir i pa bon me selman si zot pe ganny bann dernyen grad, zot pe pran en pwason zot pe kit dan deep pou 6mwan apre zot pe kwi, definitivman son gou pou sanze e sa dimoun pou napa lapeti pou manz sa pwason.  Eski i annan  en verifikasyon pou vwar ki sa quality manze li menm li i pa konmsi en kalite ki fer, ki i al end up dan manze koson dan bokou fwa?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Nou fer bann verifikasyon peryodik lo kalite manze North East Point e pou nou kler i ganny prodwir dan menm lakwizin par menm konpannyen, alor tou bann eleman i parey.  Byensir i annan serten bezwen spesifik pou North East Point i annan plis dimoun par egzanp ki servi kanz, ki servi bann manze spesifik, alor i annan plis sa bann kalite manze ki en pe diferan.

Sak fwa ki nou annan en konsern ki spesifik e mon’n note sa ki ou’n dir Onorab baze lo dat yer e nou  ava fer en verifikasyon pli aprofondi.  E nou osi demann bann dimoun, bann endividi ki si zot annan en konsern spesifik pou met sa devan nou akoz nou pran sa, nou fer sa demars avek sa operater pou adres sa size baze lo kondisyon.  E mwan menm parey ou mon’n al laba plizyer fwa i annan, mon menm ti a dir ki lamazorite fwa manze mon pa pou dir i fantastik me manze i ok.  I annan en fwa ki mon’n ale mon osi mon’n vwar ki i pa ti lo standar e mon ti met sa devan sa operater.

Atraver sa nouvo tender, i pou permet nou osi evantyelman pa neseserman deswit i depan lo kapasite sa operater ki pou ganny sa tender me nide, se pou prodwi sa manze lo sit North East Point.  Akoz enn bann eleman ki mon konnen ki bann pasyan i konplent lo la, petet avek rezon se ki akoz sa manze i bezwen transporte pli lwen, ki parfwa sa manze son tanperatir i pa ase so par egzanp.

E sa i osi en lenpak petet lo persepsyon kalite sa manze ki dimoun i annan e sa i en keksoz ki nou pe sey adrese atraver sa nouvo tender.  Mersi Mr Speaker e mersi Onorab.

 

MR SPEAKER

Mersi Minis.  Onorab Norbert Loizeau.

 

HON NORBERT LOIZEAU

Mersi Mr Speaker.  Bonzour Minis.  Bonzour tou dimoun.  Mr Speaker vi ki Minis in dir ki bann Ners Ansarz dan bomaten ki prepar zot lalis manze, pou anvoy kot Skychef e sa i ganny fer dapre kalite pasyan ek zot maladi ki zot gannyen.  Me souvandfwa ou menm ou dir ki kalite manze ki Skychef i anvoye i pa meet demann ki sorti kot sa bann dimoun ki’n rekomande.

E osi Minis i annan bann pasyan ki zot fanmir i order manze direkteman avek Skychef  pou zot.  E ler ou konpar sa de manze ek en lot dimoun ki ganny menm maladi sa manze ki Skychef in prepare apar pou sa dimoun i diferan.  I diferan.

E kestyon Minis eski ou kapab dir nou si zot kot Minister Lasante, zot annan en nitrisyonnis ki atase avek Skychef pou vwar si sa bann manze pe meet demann ki sorti dan ward parey ou’n dir ki sa bann Ners Ansarz in anvoye ?

E dezyenmman an pasan Mr Speaker, mon anvi demann Minis si Minister Lasante in ganny okenn donasyon avek Parti Lepep, okenn donasyon lasyet, tas avek Parti Lepep akoz aktyelman Minister Lasante pe donn dite bann pasyan dan bann tas ‘’TOGETHER’’, ‘’EN NOUVO SESEL’’, ki ti ganny servi dan letan   eleksyon,

 

(Interruption)

 

HON NORBERT LOIZEAU

… zis an pasan Minis.  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi onorab.  An se ki konsern verifikasyon par bann nitrisyonnis, nou napa ase nitrisyonnis pou verifye sak repa, me dan en fason regilye i annan en komite annefe ki travay avek Skychef lo standar e kalite manze ki ganny ofer.  Osi vizavi sa order ki ganny mete sa zour avan par sa- i ganny konfirmen par Ners Ansarz, me byensir i en travay ki ganny fer atraver tou bann ners ek bann Health Care Assistant ki pe travay sa zour, pou zot konfirm par egzanp zot bann bezwen spesifik, bann dimoun ki dyabetik eksetera.

E alor order i ganny fer baze lo sa bezwen sa pasyan ki la dan Lopital.  Parfwa – akoz i annan serten dimoun ki’n konplent ek mwan, parfwa defayans i arive kot petet sa dimoun ki pe servi li, petet i pa’n realize poudir sa dimoun i annan sa bezwen spesifik e in donn li manze ki zeneral.  Akoz manze pa vin dan son porsyon, manze i vin an gro e apre i ganny tire separeman.

E osi sa kestyon kot ou’n dir ki i annan dimoun ki order direkteman avek Skychef sa mon pa tro kler.  Akoz sa i pa en servis ki nou, nou fer atraver Lopital. Si dimoun i al aste zot manze avek Skychef i pou en lot manze lozikman, akoz i pou en manze ki pa’n ganny prodwi pou lopital dan sa batch.  I pou en lot manze i pou ganny kree dan en lot fason.

Alor mon pa’n tro petet konpran sa kestyon.  Me si en dimoun i anvi aste son prop manze i fer li baze osi ki nou,  nou pa pe kapab sertifye ki sa manze, i an konformite par egzanp avek bann standar nitrisyon ki nou’n met an plas.

E osi si en dimoun pe aste son manze lo li menm i pou a en kou ki pa anliny avek sa ki nou,  nou pe depanse akoz nou pe aste an gro.  An se ki konsern bann tas mon pa ti okouran, mon pa’n vwar mon menm letan mon pas lo ward, mon pa’n vwar okenn lensidan ki parey.

Mon konnen ki en konsern ki’n ganny met devan par egzanp par bann asistan ners e i paret tou dimoun ki travay dan Lopital, la mon profite pou mon mansyonnen dan sa Lasanble.  I regretab Mr Speaker, Onorab ki nou annan en kantite vol dan Lopital.  I annan en kantite dimoun ki pran bann tas – ki pran bann lasyet, ki pran diferan keksoz e ki zot al avek e i en kontrent resours pou nou.

Alor sel keksoz ki mon kapab mazinen, petet si i annan en tas ki annan en LOGO, en parti politik lo la, mon mazinen ki petet en dimoun ki travay dan en lopital pou fer sir ki sa dimoun i ganny son tas dite in pran en tas dite ki i ti annan in donn sa dimoun.

E nou, nou pe kontinyen fer maximum ki nou kapab, pou kapab aste sa bann keksoz dan en fason regilye.  Me nou ava note ki la kantite fwa ki nou bezwen ranplas sa bann keksoz i bokou.  E sa i nesesit pou nou tou pran konsyans e pou nou pas en mesaz kler avek la popilasyon ki letan nou pran en keksoz  ki dan servis Gouvernman, se finalman nou tou ki pe pey li.  Akoz nou tou nou pe kontribye atraver tax e letan nou pe bezwen aste ankor, letan nou bezwen aste ankor keksoz i vedir resours ki ganny gate.

Nou fer en kantite zefor dan sa pei pou nou fer sir ki personn pa ganny bare avek akse pou Lasante, letan ou vin kot lopital ou pa pe bezwen peye pou ganny sa zafer, sa servis lasante e i enportan pou nou kapab mentenir sa prensip.  Mersi bokou Mr Speaker e mersi Onorab.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker.  Bonzour Minis, ou delegasyon.  Bonzour tou Manm.  Minis sa size manze Lopital i en size ki tanzantan i monte from time to time.  Petet mon ti a sizere nou entrodwir en sistenm feedback.  Kot dan sak landrwa be it Lopital  dan bann distrik oubyen klinik dan distrik, lopital, petet nou entrodwir en sistenm  feedback lo bann manze ki antre.  Sa i ava ede pou ou annan en statistik,  koumsa ler bann kestyon parey i vini i ava pli fasil pou adrese.   Mersi.

 

MR SPEAKER

Mersi Onorab.  Mon ava donn Minis laparol.

 

MINISTER JEAN-PAUL ADAM

Mersi bokou Mr Speaker e mersi Onorab.  Mon krwar en tre bon sizesyon ki nou ava pran sa an kont avek operater pou nou kapab met sa an plas.  Mersi.

 

MR SPEAKER

Mersi Minis.  Nou a pran kestyon No.5.  Onorab Clive Roucou.

 

HON CLIVE ROUCOU

Mersi Mr Speaker.  Mr Speaker mon kestyon i lir koumsa.  Eski Minis i kapab dir avek sa Lasanble, ki zistans son Minister in arive avek sa progranm lili spesyal pou bann pasyan ki bedridden, bann pasyan ki bezwen reste lo lili ki reste se zot pour ki ava amelyor zot sityasyon lasante?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Parey zot konnen Gouvernman in pran sa mezir neseser pou met an plas en Polisi, pou nou kapab ofer sa servis kot lakour bann dimoun.  E sa se sirtou pou nou ganny bann lili spesyalize, pou met a dispozisyon bann dimoun ki annan bann problenm mobilite.

E sa i ede pou nou kapab redwir osi lenpak lo Lopital e osi lo par egzanp Lopital rezyonal North East Point e osi pou nou regional home North East Point.   Sa progranm i  baze lo en verifikasyon premyerman, ki ganny fer par en profesyonnel lasante, ki sertifye ki sa dimoun i vreman bezwen en lili spesyalize.  E apre sa nou fer le neseser pou nou fer provizyon pour sa fasilite.

Nou’n ganny plis dimoun ki’n vin devan ki nou ti antisipe, e baze lo bann lili ki nou ti deza annan dan nou sistenm, nou’n kapab asiste pou le moman 9 dimoun. E nou aktyelman annan 25 dimoun lo lalis pe espere pou ganny asiste.  Nou’n  fini met order pou nou kapab enport sa bann lili e nou annan  33 lili ki pe arive ou pli tar mwan Zen sa lannen.

Sa  bann lili  i an konformite avek nou bann spesifikasyon, i bann lili ki ganny servi normalman dan lopital.   Savedir i en standar medikal e sa i vedir ki son kou i konsekan e total pou sa bann lili i pou ariv R1.59milyon.  I fer ki sak lili i kout apepre R48mil.

Avek Lazans Proteksyon Sosyal nou pe fer le neseser pou nou fer en progranm, pou nou kapab asire ki bann dimoun pa pou bezwen pey en larzan ki pa rezonnab, e annefe ki si zot vreman bezwen sa lili ki zot kapab pey zis en deposit e ki zot pou kapab servi sa lili e rann li avek Lopital letan zot nepli bezwen pou nou kapab osi asiste lezot dimoun.

Nou ava note osi ki nou Lopital in vreman plen an 2018 e 2019.  E i vedir ki avek bann lili ki nou ti’n gannyen atraver don L’Inde, nou’n servi zot tou dan nou Lopital e nou napa bokou pou  nou kapab met dan sa progranm.  E se pou sa ki nou annan sa 25 dimoun ki ankor pe espere, me ou pli tar mwan Zen nou pou kapab adres sa backlog. E nou pou osi dan en fason regilye enport sa bann lili pou nou fer sir ki sa progranm i kontinyen.  Mersi Mr Speaker e mersi Onorab.

 

MR SPEAKER

Mersi Minis.  Onorab Roucou.

 

HON CLIVE ROUCOU

Mersi Mr Speaker.  Mr Speaker mon anvi fer en propozisyon. Pou konmanse eski Minis i kapab fer ler sa bann demann i vini, ki i fer li lo en case-to-case basis pou ava asire ki napa okenn labi lo sa bann lili akoz ler mon pe get son pri kwa e konsekans, R48mil?

E dezyenmman Minis a donn nou en laklerte lo prosedir pou fer sa formalite pou sa bann dimoun ki a lekout dan lakour?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker e mersi Onorab.  Alor premyerman an term prosedir premye faz se idantifikasyon bezwen sa dimoun.  E sa i dan 2 fason.  Nou annan dimoun par egzanp ki’n ganny idantifye direkteman par travayer lasante.  Letan zot in fer home visit zot in vwar poudir sa dimoun i annan en bezwen e zot in ganny en rekomandasyon sorti kot sa travayer lasante.

2enm fason se dan serten ka en manm sa lafanmir oubyen menm sa dimoun li menm dan serten ka in ekrir Minister Lasante pou demann sa led.  Alor letan sa let i ganny resevwar par Minister Lasante e sa i kapab ganny fer atraver en let ki adrese kot Sef Egzekitif Lazans Swen Lasante me i kapab osi en let ki ganny adrese kot Ners Ansarz sa klinik kot sa dimoun i baze.

E alor travayer lasante i fer en verifikasyon lo bezwen sa dimoun e i konfirmen si sa dimoun i annan en bezwen medikal.  Swivan sa, sa i ganny fer an referans avek Lazans pou Proteksyon Sosyal pou kapab vwar si sa dimoun i annan kapasite par egzanp pou li fer en kontribisyon finansyel vizavi sa.

E dan serten ka Minister Lasante zis i fer vini e sa dimoun in dir i pare pou li fer en kontribisyon.  Me dan bokou ka a e mon kapab dir dan lamazorite ka sa i pa konsern bann dimoun ki annan bokou mwayen.

Alor la realite sa progranm se pou siport sa bann dimoun ki annan sa bezwen.  E letan nou pe dir siport sa dimoun ki annan bezwen savedir permet zot viv dan en meyer konfor.  Amelyor zot kalite lavi e osi siport sa bann dimoun, sa bann manm  fanmir ki pe siport sa dimoun.

Akoz souvandfwa i osi en kestyon pou siport sa fanmir dan son globalite.  I permet sa dimoun pli byen kapab okip son paran oubyen sa dimoun ki pe veye par egzanp dan ka en home carer kot i pe vey en dimoun kot son lakour.  Mersi Mr Speaker e mersi Onorab.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker.  Minis mon kestyon, eski provizyon in ganny fer ki pasyan Praslin, La Digue zot osi zot kapab benefisye avek sa bann lili spesyalize?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker e mersi Onorab.  Absoliman sa progranm i kouver tou Seselwa baze isi Sesel.  Mersi.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker mon krwar i enportan ki no soulinyen ki sa i en linisyativ vreman, vreman enportan ki Gouvernman in pran e i montre klerman ki Gouvernman i krwar dan fer tou sa ki posib pou ki bann dimoun ki bezwen annan sa swen. annan sa servis ki zot bezwen gannyen zot kapab kontinyen ganny li dan en fason ki permet zot –

 

 

(Interruption)

 

MR SPEAKER

Onorab, Onorab Order!  Onorab, Onorab – Order!  Mwan ki dan Chair.  Ok?  Bon nou pou bezwen pran desizyon ozordi petet lo ABC ki mannyer kestyon i ganny put to the Minister.  Lo tou le de kote latab nou fer letour, letour.  Par ler nou menm demann kestyon e nou reponn nou lekor, apre nou le Minis i reponn nou!  Ok ?

 

(laughter)

 

MR SPEAKER

Lo tou le de kote latab i mars koumsa e nou bezwen vwar pou nou kapab manage the time. Ok ? Nou pou diskite apre midi lo ABC e la mon’n fer konnen tou le de kote.  Onorab Pillay kontinyen.

 

HON SEBASTIEN PILLAY

Mersi Mr Speaker.  Ou  remarke mon’n reste trankil akoz mon’n recognize poudir i annan zis en Chair dan Lasanble e sa se ou menm.  Mr Speaker parey mon’n dir  e sa i linisyativ ki tre enportan e ki nou – e i pa zis Gouvernman ki devret angaz son lekor ladan. I devret osi angaz sekter prive.  So kestyon ki mon ti a kontan demann Minis, se ki mannyer nou kapab angaz sekter prive pou partisip lo en tel progranm, afen ki nou kapab asire ki nou kapab provide sa la kantite lili ki nou bezwen provide, prenon kont sa kou sibstansyel parey Onorab Roucou in site atraver ou Mr Speaker sa R48mil, pou enn sa bann lili ?  So ki zot pe fer Minister Lasante, ki mannyer nou kapab angaz sekter prive pou osi kontribye anver sa kalite zefor?  Mersi Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  E sa i – mon krwar i en tre bon sizesyon.  Annefe nou’n apros serten dimoun dan prive ki deza pe fer vini lili e i annan lili ki disponib dan sekter prive aktyelman, me letan nou nou’n regarde laplipar bann lili ki pe fer vini i pa sa lili medikal Lopital ki nou, nou pe servi.

Nou’n adopte en nouvo standar dan nou lopital kot sa lili i konpletman par egzanp elektronik, kot ou pa bezwen bouz li okenn baze lo manual.  Pou le moman dan prive sa ki zot pe fer vini i tant pou pete annan en eleman elektronik, me pa petet konpletman elektronik.

Me depandan lo bezwen sa pasyan serten sa bann lili ki pe fer vini, akoz nou’n regard sa, serten sa bann lili i  itil e i annan dimoun ki’n aste lo zot menm avek sa bann farmasi, e sa bann dokter ki pe travay dan prive.

E nou kontinyen ankouraze ki sa i ganny konsidere akoz fodre nou kler ki bann ki pou ganny  konsidere anba sistenm Gouvernman, se bann dimoun ki vreman bezwen sa servis.

Savedir i annan dimoun ki parfwa parey nou dir en pe ayo, ayo.  I annan serten kontrent li me i pa vedir i pou ganny asiste avek sa lili.

Se vreman pou bann dimoun ki vreman annan en problenm mobilite, ki vreman bezwen sa pou rezon medikal.  E ki petet si ou napa sa lili tanzantan ou pou bezwen vwar li Lopital.

Alor bi sa progranm se pou nou anpes bann dimoun ki pa bezwen toultan dan Lopital pou nou redwir la kantite fwa ki zot bezwen vin Lopital e zot konsern medikal.

E mwan mon pou profite pou  ankouraz bann lezot dimoun ki petet i bezwen en lili avek bann eleman medikal, e ki  kout mwen ser akoz nou, nou pe koz en standar lopital ki vreman,  vreman lo en nivo o.  Me i annan lezot lili ki pli bon marse.  Mon konn plizyer operater ki deza pe fer vini isi e zot pe vann li a en pri meyer marse.  Alor bann dimoun ki par egzanp pa ganny asiste  anba progranm Gouvernman ki sa i ganny konsidere ki zot kapab fer li atraver sekter prive.  Mersi Mr Speaker e mersi Onorab.

 

MR SPEAKER

Mersi Minis.  Nou ava pran kestyon No.6 Onorab Jude Valmont.

 

HON JUDE VALMONT

Mersi Mr Speaker.  Bonzour a tous.  Mon kestyon i lir konm swivan ; Swivan  kestyon dan sa menm Lasanble pandan diskisyon Bidze 2018 eski Minis i kapab enform sa Lasanble si okenn  konsiderasyon in ganny pran pou entrodwir en servis lasante de baz dan distrik Pointe Larue?  Mersi.

 

MR SPEAKER

Mersi Onorab.  Mon krwar diskisyon Bidze.  Ok. Yes.  Ale go ahead Minis.  Bidze 2018.

 

MINISTER JEAN-PAUL ADAM

Mersi bokou Mr Speaker e mersi Onorab.  Parey nou tou nou konnen aktyelman bann servis lasante pou dimoun Point Larue i an mazorite ganny kouver anba klinik Anse Aux Pins ki en klinik ki vreman ti pti pou grander landrwa ki i kouver.

Aktyelman annefe klinik Anse Aux Pins i pran sa ki nou apel dan en catchment area kot i annan plis ki 11mil dimoun e sa i enkli byensir dimoun Pointe Larue.  Aktyelman nou ofer serten servis spesifik dan distrik e sa i enkli servis lasante dan lekol pou bann zanfan lekol e sa i tre konpreansif e sa i ganny ofer kot lekol Pointe Larue li menm li.

Nou annan servis danter kot zabitan Pointe Larue i normalman byensir al Anse Aux Pins ek Les Mamelles.  Me zanfan i annan en klinik danter kot lekol.  Nou fer osi bann vizit kot lakour.  Bann pasyan ki ganny kouver anba klinik Anse aux Pins zot kapab ganny akse, bann ki bezwen sa servis zot ganny vizite dan lakour swa par dokter oubyen par ners.

E nou osi demann bann Lotorite distrik detanzantan nou partisip par egzanp dan bann progranm  screening dan distrik e mon profite pou mwan felisit bann Lotorite distrik Pointe Larue enkli Onorab ki souvandfwa i envit lasante pou partisip dan bann aktivite parey letan i ganny fer dan Pointe Larue e sa annefe i en fason pou nou tous dimoun direkteman dan distrik.

A lavenir Mr Speaker e Onorab, plan se pou nou adres bezwen sa rezyon an antye, atraver en klinik, sa ki nou apel en sant lasante rezyonal, ki lo prensip i pou baze Ile Soleil.

Parey nou konnen nou pe fer serten konversasyon aktyelman dan sa bann diferan distrik pou nou kapab finaliz sa laranzman.

Me letan nou pou regard bann servis ki nou anvi met a dispozisyon bann rezidan tou sa bann diferan distrik ki ganny kouver i pou bokou pli fasil pou nou fer li lo Ile Soleil parey in ganny prevwar, kot nou pou kapab ofer tou bann servis spesyalize ki aktyelman ganny ofer dan bann lezot sant rezyonal ki parey Beau Vallon, oubyen Anse Boileau oubyen Anse Royale.

E sa i pou vedir akoz aktyelman par egzanp, malgre ki nou fer bokou konsiltasyon Anse Aux Pins nou’n fer en total 46mil konsiltasyon an 2018 Anse Aux Pins pou en pti sant lasante.  Me nou ti kapab fer bokou plis akoz i annan bann serten spesyalis ki nou napa lespas nou napa ase lasanm dokter pou nou fer bann spesyalis kapab vin laba. Nou annan osi kontrent an se ki konsern par egzanp servis reabilitasyon e physio therapy enkli bann servis Gym ki par egzanp nou annan dan servis lezot sant lasante rezyonal pou bann dimoun ki bezwen reabilitasyon.

E osi serten bann lezot servis pli aprofondi nou anvi annan bi dan nou bann sant lasante rezyonal met plis bann scan a lavenir.  E letan sa pou disponib lo Ile soleil i pou kapab ofer en bokou meyer servis enkli pou dimoun Point Larue.

E osi nou pou fer sir akoz kestyon kle mon krwar ki vini se akse avek sa sant.  E nou pou travay pros avek Departman Transpor lo Later pou asire ki akse i dan en fason apropriye, e ki kouver tou bann distrik ki sipoze ganny servi par sa sant lasante rezyonal.

E pou terminen Mr Speaker Onorab nou pou osi byensir kontinyen avek nou bann progranm dan distrik li menm pou nou kapab tous dimoun direkteman.  Mersi Mr Speaker e mersi Onorab.

 

MR SPEAKER

Mersi Minis. Onorab Valmont.

 

HON JUDE VALMONT

Mersi Mr Speaker.  Mersi Minis pou ou repons.  Mon’n note ki Minis in refer sorti ki nou annan omwen 46mil konsiltasyon pandan sa dernyen lannen.  Alor mon profite pou remersye sa bann ners, tou sa bann staff kot –

 

MR SPEAKER

Kestyon.

 

HON JUDE VALMONT

… sa klinik Anse Aux pins e mon pe vini Mr Speaker.  Kestyon aktyelman zis pou remersye sa bann ners ki’n delivre sa bann servis pou mon bann zabitan.  E kestyon aktyelman Mr Speaker se en sizesyon, mon ti a voudre demann Minis ki an vi ki sa plan pou entrodwir sa sant rezyonal parey in dir Anse Aux Pins, Ile Soleil, mon ti a demande  ki konsiltasyon i konmans ase boner avek nou bann rezidan.  Zot zwenn nou bann dimoun ki zot nobou met zot propozisyon devan, ki demen zot a ganny en servis ki osi i satisfer sa bann dimoun. Mersi Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Annefe se zisteman dan nou stratezi pou nou fer sir ki nou annan  sa konsiltasyon larz.  Nou’n fer en premye konsiltasyon lo komansman  lannen avek bann reprezantan dan Konsey Rezyonal, bann distrik ki’n ganny afekte.

 

E nou pou swiv sa parey ti agree dan sa meeting pou nou fer en konsiltasyon avek tou rezidan atraver en meeting piblik ki pou ganny fer tre prosennman.  Mersi bokou Mr Speaker e mersi onorab.

 

MR SPEAKER

Mersi Minis.  Dernyen kestyon Onorab Audrey Vidot.

 

HON AUDREY VIDOT

Mersi Mr Speaker.  Mr Speaker mon ti a kontan demann Minis dan zot plan pou petet pou anforsi zot bann resours imen dan zot bann sant aktyel ki petet pou kapab – bann dimoun parey Pointe Larue zot santi zot pe demann sa servi s an plis akoz la kantite dimoun ki pe ganny servi dan sa bann regional health centres, petet si – ki zot plan ki zot pe organize la ki petet pou increase en pti pe sa resours imen pou kapab donn sa plis servis ki bann dimoun pa santi zot petet fristre, asiz en kantite letan pou espere pou Family Planning, pou vwar dokter oubyen petet bann nurse ki vwar zot bezwen deplase –  ankor pou redwir la kantite resours imen ki annan dan klinik pou zot al lo site avek dokter?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Annefe Onorab sa kestyon resours imen i fondamantal pou devlopman nou sekter lasante letan nou pe al pli devan.  E zisteman dan bann rezyon i enportan pou nou met sa kapasite dan sa bann rezyon.

Nou annan en kontrent aktyelman.  Anse Aux Pins deza kot nou ete ozordi nou ti kapab fer menm plis konsiltasyon si nou ti annan plis lespas akoz aktyelman nou annan sa kontrent lespas osi byen ki sa kontrent resours imen.

Me dan nou plan a lavenir parey nou konnen nou annan bokou dokter Seselwa ki’n retournen.  Nou annan 17 ki’n retournen tre resaman e parmi zot pou annan ki pou fer bann spesyalizasyon osi dan par egzanp medsin lafanmir, e osi bann spesyalizasyon kot i konsern bann maladi pli komen isi Sesel bann problenm kardyovaskiler.

Nou pe sey osi ankouraz dimoun pou regard kestyon oncology pou adres bann kestyon kanser par egzanp e nou annan osi pli ki 50 dokter an formasyon deor aktyelman ki a diferan moman pou retournen e enkli nou Polisi aktyelman se bann spesyalis i pa fer zot klinik zis kot lopital oubyen kot 3 zonn nou konnen kot SOPD.

Me zot osi fer bann klinik dan bann sant rezyonal.  Alor sa i en lapros avek plis Seselwa ki pe spesyalize.  Nou pou osi kapab ofer plis sa bann servis dan bann sant rezyonal.  Nou pou osi a en serten nivo bezwen rekrit dan serten sekter bann ekspatriye, bann dokter ki pou travay dan sa bann sekter.  Nou pou bezwen osi kontinyen rekrit bann ners e nou plan formasyon pou ners.

E ou’n koz par egzanp lo bann fanmsarz, bann midwife ki nou pou annan plan formasyon osi pou nou kapab met zot a dispozisyon.  A la fwa ranforsi dan Lopital akoz sa i form parti nou stratezi me osi fer sir ki nou annan sa disponibilite dan kominote.

E osi atraver sanzman ki  nou pe propoze dan Lalwa, nou pou osi vin avek sa propozisyon pou bann nurse practitioner, ki vedir ki bokou konsiltasyon pou osi kapab ganny fer par bann ners i direkteman.  E nou ava note deza lo sa 46mil konsiltasyon

Akoz pou kler sa 46mil konsiltasyon i tou.  I kouver physio tou dimoun ladan.  E ladan nou annan 23mil ki ti avek bann dokter par egzanp.  Alor larestan savedir apepre lanmwatye e avek bann lezot servis lasante.  I vedir ki nou kapab fer en kantite osi atraver ranforsman bann servis ki disponib atraver ners e osi atraver bann allied health professionals ki nou kapab met plis dan bann sant rezyonal par egzanp letan nou kapab fer sa nouvo sant Ile Soleil ki pou ouver Anse Aux Pins, Pointe Larue, Cascade e osi Au Cap an parti.  Mersi bokou Mr speaker e mersi Onorab.

 

MR SPEAKER

Mersi Minis.  Nou premye seri kestyon.  E mon ti a kontan  a sa moman remersi Dr. Louange avek Dr. Gedeon ki pa pou ek nou apre Break.  Me apre Break parey mon’n anonse nou pou retournen pou nou pran sa de Bills akoz se Minis Adam ki pou prezant sa de Bills.  Nou ava Break e nou retournen 11.15 kar.

 

(BREAK)

 

 

 

MR SPEAKER

Bon nou pou kontiny nou travay.  E parey mon ti dir nou pou pran sa 2 Bills ava ki nou pran PNQ.  A sa pwen mon ti a kontan dir bonzour e welcome Sekreter D’Eta pour bann zafer Cabinet Mr Mohamed Afif.  E osi Sef Sekreter pour Departman Servis Piblik Mrs Jessie Esparon.

E Minis i touzour akonpannyen par son personal assistant Mr Marthy Vidot e konseye legal from AG’s Office Mr Victor Pool. So, delegasyon ki pe akonpanny Minis mon dir zot bonzour e welcome dan Lasanble e mon ti a kontan ganny en Mosyon pour Second Reading.

 

HON CHARLES DE COMMARMOND

Mersi Mr Speaker.  Bonzour Mr Speaker.  Ankor enn fwa. Bonzour Minis ek ou delegasyon e tou dimoun Manm Lasanble e tou ki a lekout. Mr Speaker anba Order 64 (2) nou Standing Orders, mon le move ki the Public Service Salary (Amendment) 2019 i ganny lir en Dezyenm Fwa.  mersi.

 

MR SPEAKER

Mersi Onorab De Commarmond.  Okenn Manm ki segonde? Yes, Onorab Simon Gill.

 

HON SIMON GILL

Mr Speaker, mersi. Mosyon i ganny segonde. Mersi.

 

MR SPEAKER

Mersi Onorab Simon Gill.  Mon ava donn laparol Mini pou prezant Bill.  Minister.

 

MINISTER JEAN-PAUL ADAM

Mersi bokou Mr Speaker.  E ankor enn fwa bonzour Mr Speaker, tou bann Onorab Leader dan Lasanble, tou bann Manm Onorab e tou dimoun ki pe swiv nou deba.

Mr Speaker sa lamannman Lalwa Public Service Salary Act 2013, i vize sirtou, pou adres dan en fason sistematik lapros ki Gouvernman pe met devan, pou regilyerman fer sir ki i annan en logmantasyon relevan pou bann travayer dan servis piblik. Alors sa Lalwa spesifikman Seksyon 7 ti vin anfors an 2014 i egzize ki latab saler i devret ganny revwar enn fwa tou le 5an.

An Zanvye 2018, Prezidan Larepiblik ti apwent en Komite Nasyonal pou fer rekomandasyon pou revwar saler dan servis piblik. Sa Komite ti rann son rapor avek Prezidan an Zilyet 2018 e Komite ti rekomann en logmantasyon saler de-baz 5 poursan pou travayer dan servis piblik ki zot saler i ganny administre dapre sa Lalwa.

An a-kor avek sa Lalwa Minis Finans ti konfirm sa rekomandasyon dan diskour Bidze pou 2019 e an Desanm 2018 Konsey Minis ti aprouve pou ki sa revizyon dan Lalwa, pou pran lefe le 01 Avril 2019. Dan Prozedlwa ki devan nou ozordi, sa desizyon i ganny reflekte par en nouvo Latab saler ki’n ganny prezante koman sa First Schedule dan sa Prozedlwa.

Sa nouvo latab saler, sa saler endike dan sak step dan sak band in ogmante par 5 poursan konpare avek latab saler dan Lalwa 2013.  Sa i vedir pou en travayer dan servis piblik ki son saler an Mars 2019, i determinen ek sa band ek step ki li i ladan ozordi.  Son saler apartir le 01 Avril pou determinen par sa saler dan sa menm band ek step dan sa nouvo latab saler.

Mr Speaker Gouvernman in osi vwar le neseser pou redefinir bann band ki travayer servis piblik, ki son nivo i par anba bann zofisye Sef Egzekitif oubyen bann CEO par anba sa bann ki zot okipe. Ozordi dapre Seksyon 5 (6) sa Lalwa  zot ganny grad 1 ziska grad 10.  Dan nouvo latab saler zot pos grade depi grad 1 ziska grad 11.

E pou bann pos Sef Egzekitif e serten bann pos konstitisyonnel, saler de baz pou tonm dan band 12 ziska 16.  Sa i endike dan lamannman Seksyon 5 (8) dan Lalwa.

Mr Speaker an plis ki sa bann lamannman ki mon’n koz lo la, nou’n pran loportinite pou fer serten pti koreksyon dan sa Lalwa, kot i konsern vokabiler e osi ponktyasyon, e ki’n servi dan sa loportinite alor pou met sa Lalwa azour.

Mr Speaker mon annan plezir pou rekomann sa Lalwa pou aprobasyon par sa Lasanble e ki mars dan sa direksyon parey Prezidan in dir dan son diskour Leta Lanasyon, pour dan diferan fason adres bann kestyon kou lavi e osi pour nou siport bann travayer Seselwa ki pe travay dan sekter piblik. Mersi Mr Speaker. Mersi tou Manm Onorab.

 

MR SPEAKER

Mersi Minis.  Bon okenn Manm ki pare pou fer entervansyon lo sa ki’n ganny prezante? Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker sa Prozedlwa malgre ptipti ki la devan nou i annan en sinifikasyon enportan – sirtou pour bann travayer dan servis piblik.  E i fo mazinen – i enportan nou konnen kot nou sorti, dan kot i konsern travayer dan servis piblik, travayer dan Sesel, travayer dan nou pei.

Mr Speaker i tonm byen akoz nou vwar pou dir ki se sa kote latab la isi dan United Seychelles ki pouse, pou fer sir ki sa revi i arive, e pa zis en revi ki ariv tou-le-z-an sa 5 poursan ogmantasyon.

Me i en revi osi ki tou le 5an bezwen revwar an tenir kont kondisyon lavi, kou lavi, pri komodite tou, standar lavi dan Sesel i ava ganny fer – si ou le dir i ava ganny pran konsiderasyon letan sa salary review i ganny fer dan 5an. E i enportan nou osi lans en lapel akoz, vre i annan de ka serten dimoun i dir be zis 5 poursan pa ase. Me o fir an mezir ki saler en dimoun i pli o 5 pour san i plis ki sa enn ki pli ba.

I annan en sinifikasyon relativ si oule avek ou saler direkteman.  Par egzanp bann Manm Lasanble osi pou enkli ladan sa.  Zot osi pou gannyen logmantasyon!  So zot si zot saler i en pe pli gro zot pou…

 

(Interruption)

 

HON CHARLES DE COMMARMOND

Mr Speaker eski Onorab Flori Larue laba i kapab les son kanmarad koze, letan nou pe koze silvouple? Mon pa pe konpran ki pe arive mwan Mr Speaker! Mersi.

 

MR SPEAKER

Ok. Onorab De Commarmond kontinyen.

 

HON CHARLES DE COMMARMOND

Mersi Mr Speaker.  So wi mon repete – bann Manm Lasanble i osi pou gannyen sa logmantasyon. E wi zot saler pou ogmant! I enportan fer resorti, i enportan fer resorti sa ki mon pe dir.

 

(Interruption)

 

 

HON CHARLES DE COMMARMOND

Mon pa pe koz lalang….

 

MR SPEAKER

…Onorab Larue mon’n donn laparol Onorab De Commarmond.  Ou annan en drwa pou ou entervenir lo sa Bill ou osi.

 

 

(Interruption)

 

 

HON CHARLES DE COMMARMOND

Mersi Mr Speaker. Napa okenn misleading the House ki mon pe mislead!  Se egzakteman sa bann keksoz ki pe arive.  Pep Seselwa i bezwen konnen kwa ki pe pase dan son Lasanble silvouple! Mersi.

Mr Speaker alor lefe ki mon pe dir sa ganny pran an konsiderasyon, i enportan osi nou lans en lapel avek nou public service.  Ki zot bezwen osi donn sa servis en pe alaoter ki pou fer ki pep Seselwa i kapab pli satisfe avek sa servis ki zot donnen.

Nou osi aklanm e siport la mazorite travayer dan civil service ki pe donn son best. I annan en kantite ki pe travay vreman, vreman dir e vreman egzanpler.  E il faut ki dan sa bann review ki pe ganny fer, an plis keksoz i bezwen ganny rekonsidere pour sa bann ki travay alaoter eksepsyonnel.

Savedir ki, sa bann dimoun ki vin konman en legzanp dan zot landrwa travay, dan servis piblik i devret osi atraver evalyasyon ki ganny fer pandan lannen, ganny trouve konman zot kapab ganny siporte e ganny ogmantasyon an plis.

E ganny pozisyon pli o, pour zot kapab benefisye atraver zot Scheme of travay ki pe ganny fer. Il faut mazinen osi tou ki sa 5 poursan ki nou pe koze – sa review ki pe ganny fer la, i an plis ki sa bann si oule dir Scheme ki bann long service scheme, ki bann travayer i pe gannyen. Diferan landrwa travay i annan diferan Scheme ki’n ganny entrodwir i annan ki pe aranze zot Scheme o fir a mezir.

La nou annan bann long service scheme; tousala i an diferan Scheme e sa  5poursan i pa pou afekte zot Scheme.

I an plis ankor ki zot Scheme ki deza la. So, mon pe dir sa akoz i enportan pour travayer konnen e vin pli konsyan pour zot osi delivre pli byen, e sa bann ki pe fer pli byen ankouraz lezot ki pa pe donn ase, pa pe fer ase, pour zot kapab ogmant zot prodiktivite. Akoz si napa prodiktivite e i pou, i pa pou byen e dan ka la pei pa pou kapab ganny sifizaman larzan, pou kapab soutenir bann proze parey ki nou pe pas devan nou Lasanble ozordi.

E pou fini Mr Speaker, i enportan osi dir ki dan travay nou pe dir osi ki bann landrwa prive; savedir bann biznes prive osi pran legzanp lo sa ki Gouvernman pe fer. Konsider bann tel linisyativ – bann ki pe fer fantastik, be i annan bann kekfwa ki pa pe fer ase, nou demann zot osi pou regard dan bann posibilite, pou zot kapab pran an konsiderasyon sa legzanp ki Gouvernman pe donnen.

E an menm tan, landrwa kot i get dan biznes prive i enportan osi, ki nou aranz kondisyon osi ki biznes prive i travay anba la, pour ki i kapab prodwir plis pour li kapab fer sa ki mon pe sey dir la. Akoz si napa lankourazman dan prodiktivite, si prodiktivite dan biznes prive pa ogmante, pa ganny aranze dan sa ka i pa pou kapab sey swiv sa legzanp ki Gouvernman pe fer, i en keksoz 2 fason.

So, i en sityasyon mon krwar Gouvernman, i bezwen osi pran konsiderasyon e regard seryezman dan bann kondisyon ki permet bann biznes prive devlop plis e fer plis prodiksyon. Mersi bokou Mr Speaker.  Avek sa nou pou siport sa Prozedlwa definitivman e mon demande ki Lasanble antye i siport sa. Akoz i bon pou bann travayer dan servis piblik.  Mersi.

 

MR SPEAKER

Mersi Onorab De Commarmond.  Yes Onorab Ramkalawan.

 

HON WAVEL RAMKALAWAN

Mr Speaker konman Leader group LDS dan Lasanble, mon ti a kontan ki a tou moman Lasanble i montre respe pou NON bann dimoun. Onorab De Commarmond in par ekspre apel Onorab Flory Larue, Onorab ‘’Flori Lari.’’ Mon demande Mr Speaker ki sa i ganny retire e ki Onorab De Commarmond i montre respe pour Onorab Flory Larue.  Mersi bokou.

 

MR SPEAKER

Ok, mersi.  Bon Onorab De Commarmond mon ava pas ou laparol i en, mon konpran dan sa moman ki ou’n fer sa remark e ou’n adres li. Mon ava donn ou laparol pou ou redres sa sityasyon.

 

HON CHARLES DE COMMARMOND

Be Mr Speaker mon pa’n ..,

 

MR SPEAKER

Zis al direk.

 

HON CHARLES DE COMMARMOND

Napa nanryen pou al direk, mon pa’n fer sa mon sa ki i pe dir la i pe envante. Mwan mon pa’n mank respe Onorab Larue be, Flory, be nou bezwen…

 

MR SPEAKER

Onorab Flory Larue…

 

HON CHARLES DE COMMARMOND

Al ekoute gete ki mon’n dir regard si mon’n mal prononse.  Be fodre mon pa konnen ki mannyer mon’n fer.  I annan en fason, ou konnen – parey mon non mwan mon apel Charles, Charles nenport dimoun i kapab dir ou sa . i annan i dir mwan Charles …

 

MR SPEAKER

Ok, Onorab…

 

HON CHARLES DE COMMARMOND

Ou konpran, diferan be Flori, Flory, mon pa konpran mwan! Konmsi … Sey lir, dir en fason nou tou nou a sey kopye pour nou, tou nou konpran pou pa fer fot, Onorab ki mannyer Flory Larou, Larue! Konmsi ou konpran mwan? Sakenn i annan en fason pronons en keksoz, i pa vedir nou ti pe fer li an mal mwan mon’n fer li an byen e napa nanryen pour mwan al redir? Pour redir kwa? Mersi.

 

MR SPEAKER

Ok, ok. Mersi, ou’n dir pou dir ou pa’n mank respe e sa i enportan – ok? Annou ankor mon dir –  mon enplor avek bann Manm. Annou pa vin dan Lasanble avek en bi pour nou atake personnelman e denigre en Manm. Sa i fer osi tou ki i afekte travay ki nou pe fer.  Nou pe fer en travay ki fantastik, me ler fer nou fer bann latak koumsa personnel and all that i afekte osi tou nou travay.  Alright? Onorab Stephen Pillay.

 

HON STEPHEN PILLAY

Mersi Mr Speaker.  Bonzour Minis ek ou delegasyon e a tous.  Mr Speaker lo sa Bill ki’n ganny prezante, mon annan enn de pti konsern ki’n ganny koz lo la mon ti a kontan Minis i adrese.  Mon premye konsern se sa ogmantasyon 5poursan across the board pour band 1 ziska band 20.

Mon ti kontan demande band 1ziska band 11 mon krwar ki zot in dir, konbyen dimoun ki lo la? ki pou benefisye lo sa saler 5 mil ekek pou al 8mil ekek, konbyen dimoun ki pou benefisye lo la? E akoz ki nou pa konsider pou bann paraetatik? Bann parastatal ki tonm anba PMC parey SPTC sa drayver, PUC lezot – 21 apepre antou, bann state entities ki anba PMC.

Akoz zot pa ganny konsidere? Konbyen zot ki pa pou benefisye ek sa 5 poursan bann ki tonm anba PMC parey Lalwa i demande? Sa mon konsern Mr Speaker se ki tou dimoun fodre benefisye en state own entity mwan mon get li personnelman konman en konpannyen Gouvernman. So, travayer i travayer Gouvernman, so si i annan benefis ki sa poursantaz ki lo minimum saler, fodre tou i gannyen.

Me ki mon lenkyetid ankor, se ki le Onorab De Commarmond in dir, nou tou nou pou benefisye dan bann MNA dan Lasanble.  Mr Speaker mwan mon ti a sizere kekfwa konsidere, ki sa rate 5 poursan i ganny en decrease rate. Bann band anba kekfwa i a ganny 10 poursan – band anler 2.5 poursan, bann R80mil ki pe gannyen i a ganny 1 poursan. Pour fer li en pe pli ekitab ki i pa across the board ki la.

Akoz  i annan en bon pe R80mil i pou al ganny R4mil kan en boug ki pe ganny 5,400 pou al ganny zis R200 an plis. Ki nou le se ki i ekitab! Nou set the bar ki demen ki sekter prive pour kapab swiv nou. Me an realite se sa ki mon kontribisyon ki mon ti a kontan fer e Minis i kapab donn mwan sa leksplikasyon kekfwa dan son repons.  Ankor espesyalman sa 5poursan avek sa bann konpannyen paraetatik ki anba PMC.  Mersi Mr Speaker.

 

MR SPEAKER

Mersi Onorab Pillay.  Onorab Churchill Gill.

 

HON CHURCHILL GILL

Mersi Mr Speaker.  Mr Speaker i toutafe normal ki sa bann travayer servis piblik i devret gannyen sa logmantasyon. Akoz i annan bokou travayer ki annan komitman tre remarkab, zis pou asire pou zot kapab konplet travay lo serten bann dosye, pou asire ki sa piblik ki pe esper son dosye i ganny en larepons dan en tre kourt dele. Pour ki sa sitwayen i a kapab bouze dan son demars.

Se sa bann kalite travayer servis piblik, ki nou bezwen dan sa pei. Pour ki sa pei kapab bouz devan i enportan ki tou travayer servis piblik desarz zot responsabilite dan en fason tre efikas.  Pou rann lavi nou bann sitwayen bokou pli fasil.  E la mon le lans en lapel avek sa bann ki pe trenn lipye pou fer li zot devwar pou delivre dapre lekspektasyon piblik.  Fodre pa ki zot per pou fer desizyon espesyalman desizyon ki dan benefis piblik.

Se sa ki piblik i ekspekte de zot, i annan lenstans kot serten manm piblik in esper tro bokou letan pou ganny larepons zot dosye. E sa i kre bokou fristrasyon parmi la popilasyon.  En fenomenn ki okenn piblik pa le war zot ladan. Se sa ki annan en nesesite reel ki servis piblik i elev nivo ki zot delivre bann servis avek son piblik.

I enportan ki servis piblik dan Sesel i pran en dimansyon kot gradyelman i annan en amelyorasyon remarkab pour kit tou piblik a re-annan konfyans dan nou servis piblik e ki nou pei ava bouze e dan lentere tou Seselwa. Fodre pa ki travayer piblik i annan lafreyer pou fer zot travay. Si zot pe fer li byen, napa okenn rezon pou annan okenn lafreyer, I annan bokou ki annan lafreyer ler i tonm nonm FPAC.

Me FPAC i la pou desarz en travay ki merite. Alors i enportan ki zot fer travay byen e ki demen i pou napa sa nesesite pou okenn lafreyer pou okenn travayer ki travay konman civil servant. A lors Mr Speaker mon pou siport sa Prozedlwa pour ki nou bann travayer piblik a benefisye avek sa ogmantasyon 5poursan. Mersi.

 

MR SPEAKER

Mersi Onorab Churchill Gill. Mon ava donn laparol Onorab Noline Sophola.

 

HON NOLINE SOPHOLA

Mersi Mr Speaker.  Bonzour Minis avek ou delegasyon e tou Manm Onorab. Mr Speaker sa Bill ki nou pe koz lo la i anliny avek ladres Bidze pour 2019 ki ti anba tenm ‘’Stabilite e Progresyon’’ prezante par Minis Loustau-Lalanne.

Kot ti annan plizyer mezir revizyon saler e osi sa 5 poursan logmantasyon lo tou saler travayer dan servis piblik apartir le 01 Me. Sa pou ed reveni bann diferan travayer dan lasosyete. Sa 5poursan se gouvernman ki pe donnen, fodre byen note ki tou le 5an pou annan logmantasyon dan saler. Akoz sa latab saler pou ganny revize e sa latab sa latab saler i dan laporte tou piblik kot dimoun i kapab vwar.

Mr Speaker, kan i annan en logmantasyon dan saler, tou dimoun i apresye, akoz mon konnen ki sa pou fer ladiferans dan nou lavi. E osi fodre byen note ki Gouvernman i touzour anvi war son pep, pe fer progre dan diferan kours lasosyete.

Mr Speaker dan Sesel i annan bokou profesyonnel, bokou dimoun ki annan lentelizans, pou kontribye par pran responsabilite dan plizyer pozisyon. Me ki pe arive? Kote sa bann dimoun i ete? Bokou zot, zot dekouraze.  Akoz zot war lafason ki serten zot bann koleg i ganny trete.  Sirtou ler zot vin devan FPAC kot Lasanble.

I vre ki FPAC pe fer zot travay dapre zot manda pou asire ki bann keksoz pe mars byen dan pei parey nou Prezidan ti dir ki nou bezwen rann kont e se sa ki zot pe fer. Me, i annan parfwa ki zot al en pe tro lwen par demann serten dimoun pou al pran konze! Sa i vreman touy lentere pour bann dimoun. E zot pa anvi vin pran pozisyon kle dan lasosyete.  Mon demann tou travayer pou fer zot travay byen dan latransparans, pou pa reponn kestyon ki pa fodre.

Mr Speaker lo a laliny, mon demann tou travayer vin devan donn lanmen pran desizyon pou fer pei progrese. Ler zot annan potansyel e pa ou le pran responsabilite zot pe retard progre e devlopman pei.  I vre ki bokou dimoun i dir ki sa 5poursan i pa ase, me i pou fer en ladiferans dan zot saler! Sa ki pli enportan note ki plis ki nou delivre e sezi tou loportinite avans pli devan nou saler osi pou ogmante. E bann logmantasyon baze lo poursantaz pou pli o.

Annou valoriz kiltir travay dir pou benefis nou fanmir e nou pep. Mr Speaker mon pou siport sa Mosyon. Mersi. Sa Bill, mersi.

 

MR SPEAKER

Mersi Onorab Sophola. Onorab Sebastien Pillay.

 

HON SEBASTIEN PILLAY

Mersi, mersi Mr Speaker.  Mr Speaker avan mon konmans mon lentervansyon, mon ti pe demann ou gidans. Mon’n ganny rapor Bills Committee, eski mon ti ava fer li la oubyen ler nou pe apros, mon pa krwar nou pe al dan Committee Stage given ki nou bann lamannman sibstansyel.  Eski ou ti a prefere ki mon fer then lir sa rapor?

 

MR SPEAKER

Non.  Mon konnen nou’n mank sa pti bout.  Mon krwar le moman ki nou a fini pran en vot lo merit e prensip zeneral Bill. Avan nou pou al lo sa staz pour nou regarde si nou pou al dan Staz Komite then mon ava permet ou.  Mon konnen nou’n manke o konmansman avek en pti pe bann brouyman ki’n arive ok?  Fer ou lentervasyon.

 

HON SEBASTIEN PILLAY

Mersi Mr Speaker.  Thank you Mr Speaker. Mr Speaker mon krwar sa ki devan nou ozordi i en Prozedlwa ki tre enportan pour tou travayer Seselwa. Mon dir tou travay Seselwa, menm ki dan menm bann ki dan sekter prive malgre ki sa logmantasyon li pou adres pri mondyalman bann travayer ki trouve dan servis piblik.

Rezon mon dir sa se akoz souvandfwa ler servis piblik i entrodwir bann incentive, I fer ki ler i annan mouvman travayer, travayer i santi pou dir si mon an sekter prive ozordi mon pe ganny tan,  eski i pa pli rantab mon retourn travay Gouvernman oubyen pour mwan al travay dan en sekter Gouvernman e sa i a ede atrakte travayer.  So, sa osi i act konman en si ou le en stimulus, konman en keksoz ki stimil sekter prive pour li osi offer bann kondisyon travay en pe pli o nivo.  Oubyen ogmant package ki pe ofer son bann travayer.

So, se sa enn bann rezon akoz sa Lalwa i enportan.  Sa Lalwa osi i enportan akoz i al dan laliny bann commitment ki Gouvernman li menm li in fer anver travayer Seselwa, pou asire ki ler i annan sa revizyon saler in ganny fer dan lannen ki in ganny fer, parey son Lalwa i predir. E sa revizyon ki’n ganny fer i al lo baz ki lekonomi i kapab permet a sa moman.

I enportan Mr Speaker pou note ki baze lo bann diferan mezir ki Gouvernman in met an plas in annan serten lenpak ki sa in annan lo Bidze pei. E i enportan pour nou tras en pti sa parkour ki nou’n pas ladan, avan ki nou ariv kot sa revi saler ki nou ladan ozordi.

Premyerman Mr Speaker nou ti war revizyon dan Lalwa Tax, dan Lalwa Income Tax. Sa i fer ki en pti plis ki 450 milyon mil roupi ki ti pe rantre konman tax dan Bidze pei, ozordi pa pe antre dan Bidze pei, me pe reste dan pos bann travayer ki ganny sa larzan. E sa i enportan pou soulinyen, e sa bann mezir ti ganny pran zisteman akoz i dezir Gouvernman pou kontinyelman sey adres sa size kou lavi ki dimoun ki Seselwa nou nasyon pe fer fas avek.

E sa premye mezir li in en mezir ase sibstansyel, ki’n fer ki ozordi en travayer par egzanp ki lo sa kad saler pe ganny li R5, 599 roupi. Avan sa mezir income tax ti ganny entrodwi i ti pou pey li 15poursan tax lo la. Ozordi lo sa saler i napa tax! So sa i enportan ki nou met sa an perspektiv akoz sa saler i tonm anba sa threshold ki i ganny takse – ki tax i ganny pran lo en saler.

Prezan ler nou vin lo konteks sa revi saler li menm, sa revi saler ti enportan akoz ki gouvernman ti deside fer dan plas ki ou annan sa bann Scheme dan diferan landrwa kot ou kapab annan bann logmantasyon diferan landrwa. Gouvernman ti armoniz tou bann Scheme e ti met bann travayer lo en salary grid.

E prezan ki fer ki ler ou annan en logmantasyon ki ganny entrodwir dan sa salary grid, tou travayer ki son saler ki ganny preskrir anba sa grid i swa benefisye dan en fason sibstansyel, ouswa i benefisye me selman dan en fason en pe pli marzinal, en pe pli an mwens konmsi.

Par egzanp Mr Speaker si nou pran en dimoun ki deza son saler i tre eleve petet dan R40mil malgre i pou ganny sa 5 poursan, i pou still annan sa tax threshold ki li i tonm anba la. Ki fer ki son benefis pou vreman minim konparab avek en dimoun ki li son saler par egzanp i dan 5mil ekek Roupi. E mon’n dir ki en dimoun ki tonm 5 mil ekek roupi son saler pou napa tax, akoz tax i konmans pran lo en saler par lao 8 mil ekek Roupi.

E sa i dan Lalwa ozordi.  E tax mannyer i ganny pran dan en saler ozordi, e sa ti en lenkyetid ki mon ti annan ler mon ti regard logmantasyon lo sa grid, ki ti pour fer ki si par egzanp sa 5poursan, a sa moman ki i vini ou saler par egzanp ti tonm par anba sa threshold kot sa tax ti aplikab. E ou ti ganny, ou ganny sa 5 poursan ou fer li mont en pe pli o, eski par egzanp la ou saler ti pou ganny takse lo menm rate oparavan?

Me i pa le ka akoz mannyer, mannyer i pou ganny pran se premye R10mil i ganny exempt. E si sa premye bout i ganny exempt meton ou’n ou zis R500 an plis ki sa taks pou ganny kalkile, sa taks pou ganny kalkile zis lo sa bout ki, zis sa R500 an plis. So, mon krwar dan sa ki mon pe dir i annan en legzersis sansibilizasyon ki bezwen ganny fer pou ki dimoun i ganny eksplike byen ki mannyer sa logmantasyon i aplike, an relasyon ek son saler e ki bann benefis tanzib ki i pou gannyen.

Mr Speaker Onorab De Commarmond i korek ler i dir poudir, menm i annan, menm dan kad saler nou konman bann MNAs e bann lezot dimoun ki ganny konsidere koman bann public persons anba Lalwa Saler, i osi ganny benefis akoz nou saler nou tou i ganny gide par sa grid. Malgre ki sakenn antre nou, nou benefis pou diferan depandan lo ki mannyer taks i aplikab lo nou.

Par egzanp ozordi taks i still aplikab kontrerman ki sa ki dimoun ti krwar oparavan menm avan eleksyon 2015, en MNA i peye taks, MNA in toultan peye taks. I pa’n annan en letan kot en MNA pa’n pey taks, malgre bokou dimoun ti’n sey fer krwar ki bann MNA ki ti dan 5enm Lasanble, nou pa ti pey taks.  I pa’n zanmen le ka!  Ok Mr Speaker. So, mon krwar ki i enportan ki nou met en kantite keksoz an perspektiv.

3enm pwen enportan ki relevan avek sa logmantasyon ki nou pe koz lo la ozordi se lefe ki i annan en lot keksoz ki konplemant sa logmantasyon e sa se bann long service award. So, si en dimoun in fer 5 an dan en lanplwa dan Gouvernman i ganny li en serten larzan. Si in fer 10an i ganny en serten larzan, si in fer 15an i ganny li en serten larzan.

So, tousala i bann mezir ki ler nou konmans avek sa mezir ki in anmenn sa rediksyon dan taks ki en dimoun i peye – nou pran sa bann long service award, nou pran sa 5 poursan logmantasyon ki en dimoun pe gannyen, sa i fer ki esansyelman Gouvernman in reponn lapel popilasyon, pou ed li ganny plis larzan e pou rod li annan pouvwar depanse ki plis.

Me sa i pe vedir ki dizour ou lannmen pri lavi pou desann. Me i en mezir dan sa direksyon ki nou tou nou le ale, e ki – mon rapel tre byen Lasanble konman en kolektif, ti siport sa mezir ler Minis pou finans ti prezant li pandan diskour Bidze ler ti vin dan Lasanble.

Alors sa i tre enportan ki nou fer referans avek.  Me dan tou keksoz i annan en ‘’me.’’ E la kot mwan mon ti a kontan eksprim serten lopinyon ki mon annan vizavi sa grid.  Sa ki mon santi mon krwar Minis i ava eksplik nou e mon konnen ki Chief Secretary i konpran tre byen sa largiman. E malgre mon krwar Gouvernman ti ava anvi fer plis lo sa kote, nou souvan war nou dan difikilte, Gouvernman pou war li en difikilte. Me, ki mannyer nou kapab sey adres sa? Ki mannyer nou valorize leksperyans ki en dimoun i annan pour ki  i bouze across sa salary grid ouswa i bouz en step lo sa salary grid?

E se sa enn bann konsern fondamantal ki nou gannyen vizavi bann sityasyon, ki bann travayer sirtou bann travayer ki’n travay dan servis piblik pou en kantite letan. As oppose to bann travayer ki dan servis piblik resaman Mr Speaker, bokou zot i ganny sans fer bann professional development, kot zot ganny bann diplonm zot ganny bann sertifika.

Ki fer ki ler sa sertifika i antre apre ki in ganny validate, sa dimoun i ganny en logmantasyon, oubyen i ganny move lo en step lo grid, ouswa en step across the band. I move en band ouswa i move en step baze lo sa sertifika.  So par egzanp, meton ozordi mon napa en Masters Degree e mon ale mon fer en letid mon ganny en Masters Degree.

Sa Masters Degree pou permet mwan move across sa salary grid e i kapab swa permet mwan move en band pli o, depandan lo si mon kontra i ganny re-negosye, pou pran kont mon nouvo marketable skills ki mon annan ouswa mon kapab move en step baze lo mon dan en fonksyon e la prezan mon kapab fer plis dan sa fonksyon.

Me Mr Speaker nou annan bokou travayer ki dan kad travay, sa bann dimoun in fer bokou letan. Me malerezman zot pa’n ganny sans fer Masters, zot pa’n ganny sans fer Degre. Me neanmwen zot leksperyans is as valuable e dan serten sirkonstans menm pli valuable ki en Masters, oubyen ki en degree ki en dimoun in al fer, akoz zot konpran zot annan sa ki ou apel en institutional memory dan sa louvraz ki zot pe fer.

E sa landrwa ki mon krwar mon pe sey rod en fason nou kapab adres sa.  Sa grid li menm i en bon linisyativ, me mon krwar osi i depan lo en kantite landrwa travay pour zot kapab anmenn bann definisyon anmenn bann spesifikasyon, lo ki mannyer nou kapab ede pou bouz bann travayer across the grid, dan en fason ki zot war zot lekor benefisye sibstansyelman e nou kapab valorize sa leksperyans.

Mon konpran ki nou pou dir ki zot leksperyans i ganny valorize apre zot long service allowance ki zot pe gannyen, me eski i annan sa pti bout an plis ki zot ti kapab fer? Akoz mon konpran largiman ki pou vin avek pou dir nou pe donn en long service award pou value sa leksperyans.  Wi be selman (mon war Chief Secretary pe riye.) Me selman i pa ase mon krwar pou valoriz sa leksperyans pou sa dimoun ki in donnen dan sa fonksyon spesifik ki in ladan over 30 years menm over 40 years dan serten ka.

E mon krwar se sa i enn bann eleman ki nou bezwen sey adrese e i en eleman mon krwar ki nou pou arive adres. Akoz nou pa kapab fer tou keksoz alafwa i pa pou onnet lo nou par, pou sey dir dimoun pou dir nou kapab fer tou keksoz ozordi. Nou bezwen aksepte pou dir i annan en limit dan sa ki nou kapab fer e sa i en step dan sa direksyon e mon krwar Gouvernman in gard son parol pou fer anmenn sa revi saler dan sa lannen, ki ti devret anmenn e pou mwan sa i en keksoz enport ki nou bezwen koz lo la.

Mr Speaker en lot pwen fondamantal, ki mon krwar nou konman en Lasanble nou devret sezi.  Souvandfwa nou dir ki Gouvernman pa a lekout, Gouvernman pa respond dan sa ki nou pe dir dan sa Lasanble. Me si ou rapel byen sa logmantasyon ti sipoze vin an Zilyet. E se nou dan sa Lasanble konman Manm Lasanble e la mon pou dir lo tou lede latab mon rapel klerman Onorab Basil Hoareau ti fer en lentervansyon tre pasyonnen lo sa size.

E mwan menm e i annan lezot dimoun lo lot kote latab ki’n koz lo la e ki santi ki nou devret anmenn sa pli boner posib pour ki dimoun konmans benefisye avek li pli boner. Pour ki nou travayer i konmans benefisye avek li pli boner. E mon krwar i en keksoz konman Lasanble i devret donn nou si ou le plis konfidans pou travay e plis – si ou le plis krwayans ki nou kapab travay ansanm konman en kolektif, linite, united – so to speak  -pour nou kapab anmenn rezilta ki a benefisye le pep Seselwa.

E se sa lesansyel akoz le pep Seselwa in met nou dan Lasanble Nasyonal. E pou terminen Mr Speaker mon krwar mon bezwen fer referans avek sa kestyon ki Prezidan Larepiblik ti ganny demanded an son press conference. E sa sete en kantite sa bann logmantasyon i vize ver travayer Gouvernman, ki nou pe fer pour nou bann travayer sekter prive? E mwan menm mwan mon’n deza ganny challenge Mr Speaker par sa bann travayer ki dan sa sekter prive, lo kwa ki nou kapab fer? Kwa ki Gouvernman kapab fer?

Mr Speaker sel keksoz ki gouvernman in kapab fer se ki in met dan Lalwa ki i annan en 13enm mwan saler. E sa tou landrwa travay i bezwen donn en travayer son 13enm mwan saler. I menm annan ki donn bonus as well.  Me Gouvernman Mr Speaker mon pa war li posib pour li kapab anmenn en Lalwa osi ki fors sekter prive pou donn sa logmantasyon parey. Me sa ki Gouvernman pe fer i pe montre sekter prive pou dir li Gouvernman i pe dres son board pour li kapab retenir son travayer ki la.

E pou li kapab atrakte sekter prive pou vin kot li. E la ou en biznes owner en keksoz ki ou bezwen santi pou dir parey mon krwar se Bill Gates ki dir sa, poudir ou resours pli enportan ki ou annan dan lakonpannyen i pa larzan,  i pa bann resours materyel me resours imen. So, sa i a vin konman en keksoz ki ava prompt, ki ava ankouraz sekter prive pour zot osi follow parey a moman apropriye ki zot kapab follow parey si i permet zot.

Pour zot kapab osi donn en logmantasyon parey zot bann travayer ouswa menm donn plis mon pa konnen si zot kapab fer li.

So, Mr Speaker sa Lalwa i enn ki tre enportan ki nou pas li dan nou Lasanble ozordi i enn ki nou montre commitment ki nou annan. Ki montre commitment konman en Gouvernman. E ler mon koz Gouvernman mon pe koz lo tou le 3 brans gouvernans nou pei pour nou asire ki toultan nou donn pep Seselwa.

E se zot ki’n met nou la e se zot ki kapab tir nou e mon krwar nou kapab live up to sa lekspektasyon ki zot in met devan nou.  Prezan sa nou, nou bezwen fer prezan se kontinyen dan bann lezot landrwa met presyon pou kontinyen anmenn en meyer lavi pou zot. Avek sa Mr Speaker mon pou, mon pou donn mon sipor sa Prozedlwa, e mon ankouraz lezot Manm lo sa kote latab e lo lot kote latab parey nou ti fer dan letan Bidze.

Kot nou ti donn nou commitment pou siport sa linisyativ ler i vini pou siport li ozordi ler in ariv dan nou Lasanble e pou donn Gouvernman loportinite, pou zot entrodwir sa logmantasyon saler, pour ki di-si la lafen di-mwan Avril, bann dimoun a konmans benefisye avek sa logmantasyon. Mersi Mr Speaker.

 

MR SPEAKER

Mersi Onorab Pillay.  Bon mon annan 5 Manm ki lo mon lalis pour fer entervansyon. Mon open to suggestions from the Assembly si nou break nou pran 2er.  Mon pa ti pe ekspekte i 2 pti amannman ki ti pou annan sa kantite lentere, me mon pa anvi ki okenn Manm i perdi son sans pou entervenir. Nou kapab – si zot entervansyon pou bref, mon mazinen nou kapab ale petet pros ziske midi edmi.  At least lo sa enn, nou fini sa enn apre 2 er nou ava pran Public Declaration. Alright? zot entervansyon – annou pa al dan repetisyon nou fer entervansyon an bref, nou a kapab omwen fini sa enn e apre midi ler Minis i ava retournen nou a’n kapab eskiz Mr Afif e Madanm Esparon. Alright?  Mon ava donn laparol, wi mon ti’n fini ferm lalis, me si ou bref mon  – wi.  Onorab Henrie.

 

HON GERVAIS HENRIE

Mersi Speaker.  Bonn apre midi tou dimoun.  Mon ava gard li bref parey ou’n demande Mr Speaker.  Dabor mon ti a kontan ki Minis i dir ek nou, zisteman sa logmantasyon ki pe monte sa 5 poursan konbyen Seselwa an total ki pou benefisye? Osi konbyen diferans bidzeter i pou fer pour Gouvernman lo en baz anyel. Ki taxpayers an zeneral enkli bann travayer an prive i kapab apresye ki kalite benefis zot pe anmennen pou zot ser avek frer Seselwa?

Lot pwen ki mon le fer en pti komanter lo la, se ki sa revizyon si nou pe koz 5 poursan logmantasyon across the board, pou bann dimoun ki tonm the band 1 ziska 11. I enkli en seri kad travayer.  Mon’n war li drol ki Leader of Government Business in swazir pou single out MNA. Mon pa konnen i si in fer sa pou senm en pe lanmertim.  Akoz dimoun toultan in annan problenm ek nou saler, zot krwar nou ganny en ta larzan. Mwan mon payslip i dan mon lanmen, mon’n toultan dir mon take home i mwens ki sa ki en Ziz Lakour Siprenm i gannyen konman son housing allowance.

So i enkli en seri dimoun Ziz, Minis tou bann public servant i pa zis MNA ki pou ganny sa.  E lot pwen ki mon oule fer en komanter lo la, Onorab Pillay in konmans mansyonn sa, sa konfizyon  ki annan dan sa Lalwa. With regards to public servant ki travay dan Gouvernman apre bann dimoun ki travay dan bann State owned entities. The more the Act, Public Service Salary Act. Letan nou pou get Clause 2(d) i dir spesifikman ‘’does not include bodies specified in the Schedule to the Public Enterprise Monitoring Enterprise  Act, 2013.

Now ler nou pe koz sa logmantasyon 5poursan nou anvi klarifye, eski i pou enkli sa bann dimoun? Me pli enportan Leader of Government Business in koz lo sa zafer long service award ki pou entrodwir 5an, 10 an, 15an ou pou ganny en rekonpans finansyel. Eski sa i enkli sa bann dimoun? Akoz sa i en bann konfizyon ki enn fwa pour tou nou bezwen eklersi e eksplike ki bann dimoun laba deor letan i zwenn nou konman bann en MNA zot aret demann nou sa kestyon.

E en lot pti pwen vitman Mr Speaker, mon krwar Onorab Pillay in konmans tou lo la. Sa konversasyon ki nou pe fer i kontiny sa konversasyon pour kapab vwar en fason – en linisyativ pou ankouraz sekter prive osi ki mannyer in come on board. Li pour zot i totalman diferan akoz si ou prodwi pa pe vann parey en biznes ki pe vann en prodwi i pa ganny sa reveni, i pa kapab donnen li sa logmantasyon.

So, be selman ki mannyer nou balanse?  Akoz sa Seselwa ki travay dan prive e dan servis piblik i al dan menm laboutik. Nou vwar pou dir i annan bann lakonpannyen ki li kapab afford i pou fer en diferans dan 5poursan pou sa bann ki ganny saler de-baz, apre i carry across sa logmantasyon lo son grid pou li; me pa tou lakonpannyen ki pou fer sa .

  • swa i pa kapab afford,
  • akoz son travayer pa

konsyan pour lobby ki zot ganny sa pti logmantasyon zot osi akoz li i benefisye. Akoz nou bann travayer, zot napa sa konesans sa kapasite pour zot figure out sa bann zafer; zot napa Linyon Travayer ki pe reprezant zot byen pou dir ale demande.

So, nou annan en pe problenm la, be selman lefe ki Lasanble Nasyonal pe koz lo la, i en refleksyon kontinyel ki nou pe fer e dan bann parti politik osi nou kontinyen akoz saler i tous lavi tou dimoun.

E sa Lasanble in siport bokou linisyativ enkli saler minimum, 13enm mwan tousala nou siporte, kou lavi nou’n anmenn bann Mosyon pou adres bann size.

STC par egzanp personnelman mon’n anmenn en Mosyon. Mon krwar nou pe fer otan ki nou kapab Mr Speaker, alors sa i 2 pti pwen ki mon ti anvi fer.  E finalman, finalman, finalman. Ler nou dir 5 poursan kote sa 5poursan i sorti.

Akoz 5 poursan? Akoz pa 3? Akoz pa 6? Akoz 5 poursan? E sa 5poursan ki mannyer i pou marse pour bann pansyoner avek minimum wage?  Akoz mon ti panse krwar ki nou pe tonm dakor ki dezormen minimum wage ek sekirite sosyal ki bann pansyoner i gannyen i pou mars parey. Eski sa dan sa grid sa i parey?  Sa osi i pwen mon ti a kontan zot konfirmen.  Mersi bokou.

 

MR SPEAKER

Mersi Onorab Henrie.  Onorab Audrey Vidot.

 

HON AUDREY VIDOT

Mersi Mr Speaker.  Mr Speaker letan mon’n ekout lentervansyon Onorab De Commarmond lo sa Prozedlwa, mon pa’n vwar li neseserman pe fer politik, lo sa zafer saler. Me plito in fer mwan fer refleksyon.  Lo REGAR mon konnen tanzantan. Ti annan en kantite bann lalis bann saler bann MNAs ki zot tanzantan zot ti mete pou fer politik lo la. Anvway nou a konnen nou menm. Mr Speaker Gouvernman in fer en kantite dan devlopman pei e osi lo lavansman pep Seselwa.

Sa Prozedlwa i en lot pa kot Gouvernman pran ankor pou anmenn plis larzan dan pos nou Seselwa. Nou’n annan plizyer Scheme saler ki’n ganny revwar e ki pe kontinyelman pour aport en lankourazman pour nou bann Seselwa ki pe devoue dan tou zot letan ek lenerzi dan zot travay.

Apard ki vwar nou lafors travayer pe zouir en 13enm mwan saler ozordi atraver sa Prozedlwa parey in dir. Travayer Seselwa a vwar lir pe benefisye ankor avek en logmantasyon 5poursan dan saler de-baz pour tou anplwaye Gouvernman atraver en revizyon dan grid saler, ki parey in dir tou le 5an. Mr Speaker I tre enportan ki benefis pei i kontinyelman ganny re-envestir dan nou lafors travayer.

Me i egalman tre enportan ki nou travayer i delivre dan en fason responsab, e konsistan. Parkont mon ou le fer resorti ki parfwa i tre sagrinan, pou aprann ki nou bann travayer profesyonnel pe kit nou bann pozisyon kle dan Gouvernman ozordi, akoz serten lensertitid pour pran bann desizyon kle dan zot bann lorganizasyon travay, sa i pa devret arive Mr Speaker. En travayer ozordi i merit pare  e pa per pou pran bann desizyon dan son landrwa travay.

Menm si i annan bann striktir ki an plas pou asir sa latransparans, rann kont e bonn gouvernans, travayer i bezwen konfidan e pare a tou moman pou delivre e kapab zistifye pour son aksyon.  Me Mr Speaker sel desizyon parfe ki mwan personnelman mon konnen imen i pran, se letan i met son Gran Met devan son lavi toulezour.

Apard sa tou lezot desizyon ki i annan, i annan en lepok pozitiv oubyen negativ. Me si nou per pou pran desizyon, nou pa pou zanmen konn son benefis, ou son loportinite oubyen son konesans.

I dan nou natir konman imen pou fer fot, napa imen ki parfe.  Me nou bezwen pran par nou fot e nou bezwen anbelir kot nou, nou vwar i annan sans pou anbelir pour nou kapab fer pli byen.

Mr Speaker si nou travayer, nou kontan nou louvraz e nou annan nou, nou ganny lantrennman pour nou pli byen delivre kwa ki nou, kwa ki anpes nou pran bann desizyon pour fer Gouvernman vin pli efikas? Mr Speaker en mesaz kler ki sorti la kot United Seychelles, tou travayer enkli nou menm nou, nou Manm Lasanble nou devret pe fer li le meyer ki nou kapab donn sa landrwa travay e touzour pare pou konsekans kou bann aksyon avek en konsyans kler. E pa bliye nou tenm Nasyonal pa pe dir nou non selman travay dir.

Mon pou repet ankor akoz me plito dir ki i lans en lapel ki nou kre en sosyete ki organiz li otour kiltir travay dir. Dan SONA Mr Speaker mon ti dir e mon pou repet ankor. Travay dir i pa en fardo li! Travay i sa mwayen ki permet nou, nou Seselwa fer viv nou fanmir e pou zouir nou fri ki nou lanmen i kiltive. Granmoun toultan ti kontan dir, ‘’si nou travay prop e onnet nou pou rekolte sa ki bon.’’

Tou travayer Seselwa i bezwen reste for, malgre nou bann defi pour ki Sesel i kontinyen progrese e ki nou lafors travayer i vin pli for e solid, pou konplimant sa bann zefor ki Gouvernman pe fer pou kapab donn nou en pti rekonpans an plis. Mersi Mr Speaker.

 

MR SPEAKER

Mersi Onorab Vidot.  Mon a donn laparol Onorab Jean- Francois Ferrari.

 

HON JEAN-FRANCOIS FERRARI

Ase briyevman Mr Speaker. Mr Speaker mon ti a kontan atraver ou kekfwa demann bann Manm lo lot kote latab, si zot pa per pei pou faid. Akoz dan lepase sak fwa ki nou ti propoz en logmantasyon saler e en sistenm progresif zot ti dir pei pou faid. E ti ava enteresan pou konnen si zot in sanze zot lopinyon e ki zot dakor ki ozordi sa sistenm progresiv ki an plas i en sistenm ki nou’n lager bokou pour nou mete.

E ki dan mon kalkil mwan, mon vwar ki i annan ankor improvement pou fer me ler nou dir ogmantasyon 5 poursan across the board an realite i tradwir par 5poursan par logmantasyon pour sa dimoun ki pli anba e en maximum 3.7poursan pour sa dimoun ki toutafe anler.

Donk sa i sistenm taksyasyon progresiv, be nou ti sipoze faid nou, nou pa dir nanryen ozordi? Ok, taler ou ava reponn Onorab Pillay.

Sa i mon premye pwen, so, mwan mon satisfe ki deza nou pe fer progre. Be selman Mr Speaker mon ase vye, mon ase vye, mon annan ase seve bland an mon latet pour mwan konnen ki 1977 ti annan en diferans 1 a 9. Sa enn ki ti ganny mwens ti ganny 1 sa enn ki ti ganny plis ti ganny 9 – 9 fwa plis!  La avek ozordi avek anba sistenm ki Parti Lepep, SPPF, SPUP la prezan mon pa konnen ki mannyer zot pou apele.  Nou’n ariv apepre 1 lo 15 en diferans 1 lo 15.  So nou, nou ava kontinyen, nou ava kontinyen pour nou kapab close en pe sa gap ant sa ki ganny mwens ek sa ki ganny plis.

Akoz i enportan ki – e sirtou pe rod en fason pour sa ki sa dimoun ki lo mars pli ba lo sa lesel, i kapab ganny soutenir dan diferan fason. E logmantasyon lapey i sertennman, i sertennman, revizyon lapey parey son mo egzakt i devret ete, i enn sa bann zouti.  Me selman mon ti an kontan ki tre byento nou konmans al anbark lo deba fer desann pri lavi. Akoz se sa ki enportan, fer monte lapey i zis en keksoz – i zis en zouti e i annan plizyer lezot keksoz ki nou pou bezwen, nou pou bezwen travay lo la a lavenir.

Mon 2enm pwen Mr Speaker se pou dir ki ou a krwar Onorab De Commarmond li i pa dan Lasanble li. Taler in kriye konmsi, ‘’Onorab Manm Lasanble osi pou gannyen!’’ Konmsi li i pa dan sat a li!  I pa dan sa group!

Me sa Mr Speaker i egzakteman sa kalite latitid ki nou’n gannyen dan le pase. Mon ti pros tante pour mwan dir, pour mwan dir avek Onorab De Commarmond, be si ou pa ou le sa logmantasyon pa bezwen pran!

Be selman pa bezwen fer pare you bann dalon ki ti dir zot pa pou pran dan Cabinet, apre zot in pase par deryer zot in pran! sa ki nou pa ou le! Akoz ler nou koze isi la dan sa Lasanble, konmsi nou, nou napa nanryen! Nou, nou pa oule le nanryen nou!  Mon pa pou nonm okenn non me selman mon konn tre byen lo lot kote latab, ki tou lazournen pe lager pou ganny en pti ogmantasyon isi, pey sa, Lasanble pa kapab pey sa aranz sa? Pa fer mwan nonm non akoz i pa pou  – i pa pou apropriye Mr Speaker e mon pa pou fer li.

 

(Interruption)

 

MR SPEAKER

Kontinyen Onorab.

 

HON JEAN-FRANCOIS FERRARI

E mon pa pou fer li.  E mon pa pou fer li.  Me selman, me selman mon ti a kontan met devan sa Lasanble ki lo en deba koumsa nou bezwen vin onnet. E nou bezwen annan en sel parol.  Ok?  E parol ki nou merit annan se ki, sa Lasanble pe fer tou sa ki i kapab pou kapab ogmant en pe ‘pouvwar aste’ nou sitwayen, ogmant en pe zot konfor e fer ki nou redouble zefor pou nou kapab ogmant bann lapey. E a Onorab Sophola i pas par travay ki pase dan FPAC.

Dan FPAC ….

 

MR SPEAKER

Onorab through the Chair.

 

HON JEAN-FRANCOIS FERRARI

Atraver ou Mr Speaker.   Atraver Mr Speaker.

 

MR SPEAKER

Kontinyen Onorab.

 

HON JEAN-FRANCOIS FERRARI

I pas atraver sa travay ki FPAC pe fer e si i annan Manm ki’n fatige lo FPAC e zot anvi, zot pa anvi vini, be pa bezwen vini! Nou, nou a kontinyen travay! Mwan mon anvi dir Mr Speaker ki sa travay ki nou pe fer, se en travay pour nou fer sir ki nou anpes sa bann larzan ki pe … sa bann fit dan nou rakor; sa bann larzan ki pe disparet ki pe pas par anba, pour nou fer sir ki ler nou pou konte, ler nou pou met li dan sa pannyen pou annan plis pour nou partaze.

Se sa nou travay.  E nou, nou pa en one-track mind, nou pa en tunnel  vision. Nou konnen ki pou dir i annan plizyer lebra ki pe travay an menm tan, pour nou ogmant larises ki leta i kolekte, avan nou kapab partaze. Nou pa pou kapab fer parey sa ki in ganny fer sa dernyen 40an, kot zot in dir, zot in dir avek pep Seselwa gato pe kwi!  Gato pe kwi!  Pe kwi in dir zot.  Pa’n tande? Lakrenm pe mete.  Finalman personn pa’n zanmen war sa gato.

Zot in arive – sa ki’n vini in ale, in pas baton ek lot, in pas ek en lot – finalman gato pa’n war!   Nou  war zis lakourt. Alors nou, nou annan en travay pour nou fer pou nou kapab anmas reveni ki Leta i annan, e nou pou kontinyen fer li. I annan ki pou ankoler, i annan ki pa pou satisfe.  I annan ki pou plennyen.  Me selman nou pou kontinyen fer sa travay! Akoz se sa ki nou bezwen fer. Mr Speaker mon ava termin lo sa pwen.

Dan nou Lasanble nou bezwen onnet e senser dan sa travay ki nou pe fer.  Nou konnen ki tou dimoun i bezwen en saler pou rekonpans li le i pe fer son travay.  E nou, nou napa – mwan personnelman e mon konnen ki mon bann koleg lo lot kote latab nou napa okenn problenm pour nou aksepte en peyman pour nou travay ki nou fer akoz nou pe travay.

Nou pe travay e nou annan en fanmir pour nou sonnyen e nou pe travay. e nou pa travay zis en Mardi bomaten 11erpou nou al kot nou pou al tir petar         Moris!  Nou pe travay  ….

 

 (Interruption)

 

HON JEAN-FRANCOIS FERRARI

… les mwan fini Onorab, ou ti dan sa tim –  Atraver ou Mr Speaker?

 

MR SPEAKER

Onorab kontinyen, kontinyen.

 

HON JEAN-FRANCOIS FERRARI

Wi – non  mon pe  dir Mr Speaker. Wi mon ava terminen,  akoz mon pa anvi ki bann ki dan tim tir petar lontan pou vin donn nou okenn leson. Nou, nou pou kontinyen e nou pou kontinyen persiste avek Gouvernman pour rod tou bann mwayen pour nou close sa gap, pour nou fer sir ki s gato ler in kwi i annan pli ki ganny donnen la kot i merit annan plis.

E se pour sa rezon mwan osi mon ti a kontan ki Chief Secretary ki la i pran kont sa ki Onorab Pillay. Onorab Sebastien Pillay – pa Sebastien – (Onorab Sebastien Pillay pa’n koze li)  Onorab Stephen Pillay.  Onorab Stephen Pillay  in dir pli boner ki i ti a kontan vwar en sistenm ki pli enkliziv a lavenir. Mon pa konnen se ou ki atraver ou Mr Speaker, se ou madanm Chief Secretary ki eksper dan sa domenn e nou rekonnet e nou apresye sa lekspertiz ki ou annan e nou siport ou dan sa travay. Me selman si ou ti kapab vin avek en pe plis enklisivite dan sa travay, nou ava siport ou ankor bokou plis pou fer sir ki annan en pe plis lazistis sosyal! Mon remersye ou Mr Speaker.

 

MR SPEAKER

Mersi Onorab Ferrari.  Mon ava donn laparol Onorab Jude Valmont.

 

HON JUDE VALMONT

Mersi Mr Speaker, Onorab avan mwan in koz telman ki mon krwar mon annan 10 minit mon a fer li anba 5 apepre. Mr Speaker en keksoz ki nou bezwen mazinen e pran kont. Be se gras a sa Gouvernman SPUP/SPPF/Parti Lepep e United Seychelles ki ozordi lekonomi in permete ki ozordi nou war Gouvernman i anmenn ankor 5 poursan logmantasyon saler.

 

(APPLAUSE)

 

HON JUDE VALMONT

Mr Speaker mon konmans par dir…

 

(Interruption)

 

MR SPEAKER

Bon laparol i pou Onorab Valmont. Onorab kontinyen.

 

HON JUDE VALMONT

Mersi Mr Speaker. Mr Speaker mon’n tann osi dir ki nou pe lager konman en Lasanble, pe lager pou close en gap, pou ed travayer, pou donn plis larzan travayer. Me selman zot in single out mon leader in dir ki li si i pa le give up?  Me mon krwar nou konman en Lasanble nou dir donn larzan, met larzan dan pos travayer. Mon krwar nou bezwen ansanm dakor be sa R1500 logmantasyon ki ou gannyen par mwan – annou give up nou tou annou donn Seselwa!  Annou fer li nou Lasanble – parey nou dir!

Mr Speaker mwan mon dir sa logmantasyon la, sa amannman ki vini, i  pou permete ki ..

 

(Interruption)

 

 

HON JUDE VALMONT

Mr Speaker ….

 

MR SPEAKER

Kontinyen Onorab.  Kontinyen.

 

HON JUDE VALMONT

Yes.  Sa i pou permete Mr Speaker ki nou adres sa konsern pri lavi. Nou konnen ki Gouvernman in fer bokou e sa i zis en lot legzanp ki gouvernman in vin avek pour ede soulaz sa sityasyon.

Mr Speaker dan sa laliny mon profite parey Gouvernman in fer anmenn sa. Mon profite pou remersye bann travayer ki pe travay dir, ki pe donn rannman, ki pe leve granmaten e antre tar, pou fer servis piblik marse.

 

(APPLAUSE)

 

HON JUDE VALMONT

Me lo lot kote Mr Speaker, mon ti a kontan osi lans en lapel avek bann dimoun ki pe donnen me selman ki kapab donn plis, mon dir zot be donn plis. Annou rann sa servis lapopilasyon.  Annou fer li. Annou leve bomaten avek lakontantman dan leker, annou desann, annou delivre.  E koumsa sa, dimoun a nobou zistifye sa 5 poursan ki servis piblik pe ganny sa logmantasyon.

Mr Speaker mwan osi profit sa lokazyon pou ankouraz, mon krwar i keksoz ki nou bezwen met devan. Ankouraz bann anplwayer pour fer Appraisal on time.

Akoz toultan parey sa enn in vini sa 5poursan logmantasyon, i annan 13enm mwan saler, me selman appraisal osi i ed en Seselwa ganny en pti larzan an plis dan pos.  Mon dir sa annou pa get, annou pa fer appraisal vin en keksoz personnel ki mwan mon dalon ek ou alor ou pou ganny en logmantasyon, mon pa’n kontan ou, ou pa gannyen.

Annou get li fransman lo merit bann travayer. Mr Speaker dan sa laliny mon lans en lapel pour, mon donn en legzanp, parey bann drayver, mon bann zanmi kot Foreign Affairs. Zot in toultan benefisye avek logmantasyon saler me selman i annan keksoz ki pa aranze.

Alor mon demande mon servi zot konman en legzanp, pou get osi dan bann low, pour donn bann incentive. Pour ede get fason, si nou pa ede ogmant zot saler ki mannyer saler de-baz annou get zot allowance, annou get kantite letan zot travay. Mon krwar nou kapab fer sa.

Mr Speaker mon osi profit sa lokazyon pou ankouraz sekter prive pour fer parey Gouvernman pe fer.  Mon dir sa akoz zis yer ler nou’n, sa amannman in vini lo Order Paper. Mon’n ganny sans koz ek en waitress ki travay kot en lotel dan sid, in met en konsern devan mwan. parey i annan Onorab in rightly said  – in dir zot al dan menm laboutik avek nou obviously.  Me selman i dir ek mwan be zot osi zot travay dir; zot osi zot Seselwa zot ti a kontan war en fason lankourazman. In donn mwan en legzanp senp i vre i tousan, be i en zenn manman i en zenn fiy.

I dir ou si i pa al 3 zour travay son servis charge i ganny koupe e zot, zot depan lo la.  Alor dan sa laliny mon krwar pour mwan terminen, mwan mon ti a voudre demann, mon konnen sa Lalwa i zis pou servis piblik. Me selman 13enm mwan saler nou’n nobou fer li pou obliz prive fer sa, e alors mon demann Gouvernman be ki Minis, ki Gouvernman pe fer pou ede ankouraz prive pou fer parey? Mon krwar mon termin lo sa e ankouraz nou bann travay pou travay dir e ozordi nou war rekonpans ki zot pe gannyen e alors mon krwar mon termin lo e mon dir zot mersi bokou.

 

MR SPEAKER

Mersi Onorab Valmont.  Bon mon pou bezwen pran en desizyon i reste mwan 2 entervenan, apre mon pa krwar nou pou fer zistis pour son Right of Reply. Mon pa anvi ki nou rush through.  I annan plizyer konsern ki’n leve ki petet Minis li osi tou i a kapab ganny sans diskit en pti pe plis avek Chief Secretary. Mon sizere ki nou Break e nou ava repran 2er mon annan 1 entervenan.

Nou napa gran amannman, nou pou pas ladan apre me fotespere nou kapab donn 30 minit ler nou’n antre 2er pour nou fini sa Bill. Right nou ava adjourn e nou ava repran nou travay 2er. Me  solman avan nou ale ABC pe meet 1er dan Speaker’s Conference Room. Ok nou adjourn nou repran 2er.

 

(BREAK)

 

MR SPEAKER

Bonn apre midi tou Manm Onorab. Bonn apre midi Minis ek ou delegasyon e bonn apre midi tou dimoun ki a lekout e pe kontinyen swiv travay Lasanble Nasyonal.  Bon avan nou repran nou travay mon avi zis fer en pti leklersisman. An vi en size ki pe ganny diskite e Manm piblik i konsernen deor. E sa osi in lev pandan nou meeting ABC  toute a l’heure.

An vi konsern Manm piblik lo sa ki’n arive lo sa ensidan dan kaso Anse au Pins e kestyon ki pe ganny demande akoz Manm Lasanble pa pe demann kestyon, pa pe abord sa size? Larepons lo la e klarifikasyon i konm swivi; nou deza annan Manm Lasanble ki’n soumet kestyon lo la. E sa in sorti kot Onorab Lemiel ki kestyon i an mon posesyon, me ankor nou pe dir e nou fer sa konman en form ledikasyon pou Manm piblik deor; la fason ki Lasanble Nasyonal i travay, se ki ler i annan en lanket ki pe ganny fer, dan en ka parey, nou pa kapab abord sa size dan Lasanble. E sa i vin sa ki nou apel sa sityasyon subjudice, nou pa kapab enterfer ladan. Nou bezwen esper lanket fini akoz petet atraver nou travay kestyon ki nou demande nou kapab enterfer oubyen enfliyans sa lanket. So, pou konsonmasyon manm piblik vwala sa i nou pozisyon Lasanble Nasyonal.

Mon ti a kontan osi avan nou kontinyen, mon prezant leskiz avek tou dimoun pou sa retar ki nou’n gannyen. Me sa i an vi bann komitman ki mon ti annan avek bann Manm Lasanble nou ti annan pandan Break. So, nou ava kontinyen nou travay, nou ti pe debat lo anmannman sa Bill ki devan nou, ki’n ganny prezante par Minis Adam bomaten Public Service Salary  (Amendment) Bill 2019.  E dernyen lo mon lalis ki ti pou entervenir se Onorab Ramkalawan.  Onorab mon a donn laparol.

 

HON WAVEL RAMKALAWAN

Mersi bokou Mr Speaker. Mr Speaker mon mazinen ki Minis pa ti’n vin dan nou Lasanble pour ekout sa kantite politik. Me i ti’n plito vin prezant en larepons ki lo en size enportan, ki Lasanble in diskite pandan bokou letan. E sa lo size lapey an relasyon avek pri lavi. Parski sa de keksoz i mars ansanm.  E Mr Speaker ou ava rapel dan prezantasyon Bidze Minis ti anons sa logmantasyon 5 poursan.

E Gouvernman son plan se pou fer sa logmantasyon apartir le 01 Zilyet e apre sa Onorab Hoareau. En dimoun ki mon annan en kantite respe pou son lespri legal. I ti fer resorti ki ofet ti annan en pti problenm, parski anba Lalwa i ti devret pran lefe an Avril an relasyon avek sa ki Lalwa li menm li ti’n prezante. Mr Speaker sete sa, sa baz ki nou ti sipoze regard sa morso Lezislasyon.

Me malerezman sa deba in pran en tournir pirman politik. E sa in konmans avek US pe dir zot in pouse – zot in pouse pou sa arive.

Mr Speaker  mwan mon anvi konnen ki zot in pouse?  Ki zot in vreman pouse? Nou konnen pou dir ki nou bann dimoun aze par egzanp, ti ganny R100 logmantasyon lo zot sekirite sosyal sak fwa ki Prezidan Rene ti ganny son laniverser. I  ti envit zot anler apre ti dir ek zot, zot pou ganny R100. E tou bann dimoun  ti dir Msye Rene i en bon dimoun.

E parfwa ti donn R50 e sa ti fer ki nou bann vye dimoun, nou bann dimoun ki ti’n fer kontribisyon letan, letan LDS ti pran desizyon dan en konpanny politik, pour nou donn zot, zot dinyite, Kot nou ti dir klerman ki sekirite sosyal li i bezwen ekivalan mínimum salary.

Se la ki Prezidan Michel ti pran sa desizyon e apre Michel, malgre sa pa ti dan son progranm politik, nou ti war li i ti anonse ki poudir dezormen sekirite sosyal pou ekivalan avek saler minimum. Mon pa ti war US pe pous nanryen pour nou bann vye dimoun! E la ozordi Mr Speaker mon bezwen dir ki sa langazman ki ti’n donnen an relasyon avek saler minimum in ganny kase.

E akoz in ganny kase?  Se parski dan sa logmantasyon nou war nou bann vye dimoun, nou bann pansyoner zot, zot in ganny 3poursan logmantasyon!  E ozordi saler minimum i pou pli o ki sekirite sosyal ki nou bann vye dimoun i gannyen. Mon ti ava demann Minis, pou koz ek Gouvernman pour nou rektifye sa. Annou fer li tenir sa menm keksoz ki nou ti’n tonm dakor lo la e taler mon pou dir kote nou pou ganny larzan pou fer sa arive.

Mon krwar ki nou bann dimoun, nou bann pansyoner zot osi tou zot devret ganny R250 logmantasyon e non pa R200 parey lanons in ganny fer.

 

(APPLAUSE)

 

HON WAVEL RAMKALAWAN

Mr Speaker an relasyon avek sa nou koz lo kou lavi, si nou annan en desizyon e nou tou nou kapab koz dan diferan fason an relasyon avek 5 poursan – si nou koz lo la nou pou war ki nou dir ofet sa ki US parey zot in koze, zot in pouse la i la mon ava dir ou kwa ki zot in pouse Mr Speaker, zot in pouse pour ki STC i kontinyen ranmas R800mil lo rent avek STC.  E la aprezan sa in ganny konverti pou vin R17milyon letan zot in vann sa batiman avek STC.

Middlemen       en i kontinyen manz lo benefis ki bann Seselwa ti kapab benefisye avek; $50milyon i ankor kasyet. E la aprezan in grandi pou vin bilyon.  E nou kapab war sa.

Felicite nou’n fek lir  Zil Felicite ki en leasehold in ganny vann pou en sonm $300milyon.  E sa i ganny tradwir an R4 bilyon, e nou konnen ki pou dir reklanmasyon, later reklanmasyon later konblaz ki zot in koz bokou lo la isi dan sa Lasanble pe ganny vann pou milyon!

Zis kot Airtel i ete ozordi advert pe ganny fer pou ganny vann pou $11.5milyon, e sa i ganny tradwir dan en sonm R172milyon!  Eski sanmenm sa ki zot in pouse? Oubyen zot in pous zis pou serten dimoun? Mr Speaker gas ti ganny anonse le 15 mars ki pou dir i pe desann. Fantastik me nou bezwen fer atansyon, parski sa marsan, sa boutikye anler Takamaka ki pe vann gas.

Li i bezwen pey pickup li, se sa, sa pickup li son pri pa pe sanze li. Li i pe sarz ou son kours, me selman letan sa gas i ariv anler Takamaka, konsonmater vre pou pey mwens pou sa gas.  Me kestyon ki nou bezwen demann nou si onnet, se eski en boutikye i pou zis aksepte pour li pey menm kours me apre sa pour li fer mwens larzan? SEYPEC pa anmenn gas li.  SEYPEC se fer distribisyon gas zis avek bann lotel ki aste bann gro boutey 24 kilo.

Me sa bann lezot pti boutey, i pa fer distribisyon.  E alor petet dan sa konteks pri lavi. Nou ti ava bon pou osi regarde si SEYPEC parey bokou bann lezot landrwa li osi tou i ti kapab fer distribisyon.  Parske sorti anvil i al anmenn petrol lo Shell Anse Royale, i anmenn petrol Takamaka, sorry Baie Lazare. I anmenn petrol partou me, eski i pa ti kapab anmenn sa menm servis, pour nou asire pou dir sa larzan ki in annan en rediksyon lo gas, sa marsan i pa met li lo en lot komodite?

E nou tou nou konnen ki mannyer i pou pase. Ou gas parske in ganny advertise ou pou aste ou boutey gas a en pri redwi, me selman pou annan plizyer lezot komodite ki pou met sa R2 isi pou met sa R2 laba e finalman konsonmater ki pou pey plis.

Mr Speaker letan mon pe regard sa Lalwa e parey mon’n dir mon war li, an relasyon avek pri lavi met en pti git plis larzan dan pos le pep Seselwa.

I annan serten kestyon ki mon demande e Onorab Stephen Pillay in konmanse demande sa bann kestyon e apre sa mon’n osi demann Onorab Henrie demann sa kestyon. E sa se an relasyon avek bann lorganizasyon ki tonm anba PMC.  E mon’n ganny serten text, parski i enteres tou bann dimoun pou demande, be nou eski nou pou ganny sa 5poursan logmantasyon? E mon ti ava kontan ganny en larepons.

Me selman la fason ki i ete, akoz zot pa tonm dan sa bann band, ensidswit ki mannyer i pe ganny prezante, i zot pa pou gannyen. La mon ti ava kontan ki Minis i vreman eklersi sa.  Me selman mwan mon ti ava dir si zot pa pou gannyen, mon war sa konman i unfair, e mon krwar ki sa i en keksoz ki Gouvernman aktyel i bezwen regarde pour li koriz en lenzistis.

Parski sa group dimoun la ki travay dan bann parastatals, parfwa zot ganny enkli dan en serten logmantasyon, oubyen dan serten progranm e parfwa zot pa ganny enkli.  Mon a donn en legzanp, 13enm mwan lapey, letan Gouvernman ti anons 13enm mwan lapey zot ti ganny enkli ladan. Zot tou zot ti ganny 13enm mwan lapey. Me la letan pe koz lo sa size la ki sa 5 poursan ou a krwar konmsi zot in ganny ekskli ladan.

E lo lot kote, lo lot kote letan nou koz lo long service allowance – sa si ou travay 5 an ou ganny tan larzan – 10mil, 10 an ou ganny tan larzan ensidswit ou a krwar ankor enn fwa zot ganny ekskli ladan.

E la Mr Speaker mon pou dir avek leksplikasyon ki nou ava gannyen si petet i ava annan en. Si sa ki mon pe dir i pa larealite me sa ki ofet zot devret gannyen sa long service award ensidswit – tou sa bann zafer ki …  Parski i annan dimoun dan bann parastatals ki’n travay en kantite lannen e larzan parey nou konnen tou dimoun ti ava kontan ganny en pti git plis larzan.

Alors eksplik nou akoz si pa le ka, then nou pou war nou dan en sityasyon, kot i annan en lenzistis. E nou osi war petet sa laliny i en pe sonm parski bann CEO, bann CEO sa bann diferan lorganizasyon. Zot ganny trete konman public servants anba Public Officers Ethics Act.

Parski zot osi to zot bezwen fer zot deklarasyon zot asset.  Alor parfwa zot ganny konsidere konman public servant, e si CEO i ganny konsidere konman en  public servant then, alors i swiv ki son bann travayer osi tou, i bezwen osi tou ganny konsidere konman public servants.  Alors mon krwar ki sa osi tou i bezwen ganny klersi.

E Mr Speaker i annan de Manm lo lot kote Onorab Sebastien Pillay avek Onorab Valmont ki malerezman zot pa’n swiv sa ki pe arive dan sekter prive – ofet sekter prive depi le 01 Zanvye zot in fini donn zot travayer  sa 5 poursan logmantasyon.

E sa 5poursan logmantasyon zot in bezwen donnen atraver S.I 93 of 2018 kot national minimum wage ti ganny amande. R33.30sou ti ganny ranplase avek R34.97 sou e R38.38sou ti ganny ranplase avek R40.30sou. E mon konnen ki pou dir apartir le 01 Zanvye tou sekter prive zot in bezwen donn sa ki ekivalan 5 poursan logmantasyon lo bann lapey.  E pa’n zis lo bann pli ba zot in bezwen, zot in bezwen fer li marse akoz sansan lapey ti pou tro kourt oubyen serten ki ti pou ganny mwens pou overtake.  E alor sa in pase.

E mon krwar i enportan pour nou letan nou pran laparol lo sa bann size enportan kwa ki pe pase. Parske zot in pouse, be ou pa konnen kwa ki ou’n pouse? Piti pa’n ne. Mr Speaker, be pouse piti pa’n ne, be ki si sa?

 

(Interruption)

 

 

MR SPEAKER

Non, non, Onorab i en figure of speech.  I en figure of speech – ok? Nou servi plizyer figure of speech dan sa Lasanble.  Nou servi plizyer, ok? Non.  Onorab Ramkalwan kontinyen.

 

HON WAVEL RAMKALAWAN

Mersi bokou Mr Speaker. Mr Speaker petet, mon vreman Lasanble i enteresan depi ki zot pe sey promot US. Parske ou a  krwar konmsi zot vin en pe sansib e fodre pa, fodre pa ki zot sansib! Letan zot koz, zot koz nonsense mazinen ki nonsense ki zot in dir! Parski sa non sense apre pou re-ganny anvoy kot zot!  Ok?

Mr Speaker zafer saler, i pou reste kontorversyel.  E mwan pour mwan mon krwar ki pou dir Sesel e mon’n dir sa lo plizyer repriz. I pou enportan enn ler pou fer en legzersis pou regarde akoz ki sa cleaner i ganny sa lapey ki i gannyen. Sa dimoun ki in ganny en degree liniversite i ganny sa lapey ki i gannyen. Akoz dan lemonn laplipar bann dimoun ki fer bann travay ki danzere oubyen bann travay ki en pe degoutan, zot ganny bokou plis lapey ki en dimoun ki par egzanp ki travay dan biro.

Me tandis ki isi nou bezwen regarde.  Par egzanp toultan ler mon koz avek bann dimoun ki travay PUC dan sewage department, letan zot rakont mwan travay ki zot bezwen fer e lapey ki zot gannyen, zot ganny en allowance wi. Me selman zot basic salary i bokou ba, e ou ti ava ekspekte ki pou dir sa bann kalite travay ki anmenn avek li bann risk lasante ensidswit, zot ti ava pe ganny pli byen rekonpanse.

Letan ou regard bann lapey ki bann dimoun ki letan i travay dan salte i gannyen. Ankor enn fwa i annan bann keksoz.  E mwan mon krwar ki sa size lapey, i pou definitivman en size at some point – si zot, zot pa fer nou, nou pou bezwen fer pou regarde pou analize, e pour nou kapab avanse lo la,  pour ki en lapey vin en rekonpans pou sa travay ki pe ganny fer.

E sa Mr Speaker i ava vreman anmenn nou dan en sityasyon kot nou ava pe koz pour vre lazistis sosyal. Parski parfwa i annan sa bann landrwa ki – par egzanp PUC. Kot se management ki ganny logmantasyon!  Se top management ki ganny gran logmantasyon. Me sa bann ki pe fer sa bann travay pli degoutan pou servi en mo, ki fodre espere ki pa ofans Onorab Pillay, Onorab Sebastien Pillay, sa bann dimoun zot, zot bann lapey i rest parey.

Alor tousala se bann keksoz ki nou pou bezwen balanse.  Mr Speaker mon krwar osi tou, an relasyon avek propozisyon ki mon pou, ki mon pou fer parski nou’n deside pour koz lo plizyer keksoz ki mon pou fer serten propozisyon.

Mon krwar ki i enportan lo sa size lapey pour nou kapab rekonpans nou bann travayer, dan en fason ki byen pour nou atir zot a pour zot anvi vin travay Sesel.  Enn bann size ki parfwa tanzantan i monte se lotrozour ti annan en survey pou demande akoz ki bann graduates Seselwa parfwa olye retourn Sesel zot prefere reste deor.

E annou pa this is not rocket science, me i straight forward kot bokou nou bann etidyan ki’n ganny zot Degre in deside reste deor se parski lapey ki zot ganny laba i bokou pli o avek lapey ki zot gannyen isi. Alors zot deside reste deor travay, fer en savings e apre sa vin isi e sa bokou pli tar dan zot lavi. Oubyen letan zot in santi zot in kapab fer en bon savings pour zot vini pour nobou kapab aste en morso later, pa neseser avek gouvernman, parfwa avek prive oubyen pour zot menm viv dan en pe plis konfor. Alor i enportan pour nou mazin sa.

Me Mr Speaker an relasyon avek tousala, FPAC in ganny atake bomaten. FPAC i sa Komite ki annan 7 Manm lo la. e mwan mon trouv sa latak koman en siny lipokrizi lo lapar US!  E ki mannyer i vin lipokrizi Mr Speaker, FPAC i en Komite ki travay e FPAC i sa komite ki’n prezant plis rapor devan sa Lasanble. E tou lede kote letan nou fer bann rekomandasyon tou lede kote i sinyen.

E Mr Speaker mon’n anmenn plizyer. Rapor lo music stadium –  tou le 7 Manm ti sinyen.  Rapor lo servis lo servis Emodyaliz tou le 7 Manm ti sinyen. Rapor lo bann Bidze ki ti ganny frozen – tou le 7 Manm ti sinyen.  Rapor lo bann tranzaksyon Lasanble Nasyonal avek National Heritage tou le 7 Manm ti sinyen.

Tou le 7 Manm – i vedir Leader Zafer Gouvernman dan Lasanble – Onorab De Commarmond, Onorab Pillay, Onorab Churchill Gill. Avek sa 4 ki lo nou kote Onorab Afif Deputy Chair, Onorab Mondon avek mwan menm. Be ki mannyer sa menm kote latab, ki fer sa travay konman en Komite, apre sa, zot Manm  i vin ensilte FPAC.  I vin dir ‘’FPAC i fer per dimoun! FPAC bokou zot, zot dekouraze akoz zot vwar la fason ki serten zot bann koleg i ganny trete.  Sirtou ler zot vin devan FPAC kot Lasanble!

I vre ki FPAC pe fer zot travay dapre zot manda ki bann keksoz pe mars byen dan pei, parey nou Prezidan ti dir ki nou bezwen …’’

Lanmenm la i annan kontradiksyon. Zot o  be avan nou ouver nou labous annou konnen.  Annou ekoute annou tande ki nou zorey, ki konmsi sa ki sorti dan labous fodre zorey i tande.  Kontradiksyon! ‘’Me i annan ki parfwa ki zot al tro lwen ki pou al pran konze.’’  Wi be Prezidan menm ki dir sa imsye al pran konze!

Pa nou ki ti donn li konze, Prezidan menm ki ti dir li al pran konze!  E nou, nou travay Mr Speaker lo en FPAC.  E letan mon koz pou FPAC mon koz pour tou Manm mwan e Onorab De Commarmond i donn mwan son ‘’thumbs up’’ parski i montre ki poudir son Manm i pa sezi ki travay ki nou pe fer! E ki si nou pe koz lo donn lapey, donn lapey nou bezwen regarde ki mannyer larzan pa zis disparet.       E letan larzan i disparet bann Irish – ki kantite de milyon ki nou pe dekouver, tax pa’n ganny peye.

E Mr Speaker pou donn lapey, pou donn sa nouvo band la, bann steps ensidswit ki i donnen, be fodre tax i ganny ranmase, fodre larzan i ganny ranmase! Be si nou FPAC nou pa fer sa travay pou fer sir ki larzan i ganny ranmase, kote nou pou donn lapey? Zis nou pou dir nou’n pouse, nou’n pouse e nou’n pouse? Be zot pou pouse piti pa pou ne! Pou napa zanfan dan vant!

 

(APPLAUSE)

 

HON WAVEL RAMKALAWAN

Mr Speaker mon krwar ki pou dir, mon krwar ki pou dir sa latak lo FPAC, par en ‘‘Manm Lasanble’’ i en latak ki pa merite e i en latak ki, ki mon krwar Leader of Government Business li menm li i bezwen rantre ladan ki pou dir son Manm in mal koze.

Akoz finalman se ou menm ou Onorab De Commarmond ki ou Manm i atak ou pou travay ki ou pe fer pour nou kapab met larzan dan Kof Gouvernman!

Mr Speaker mon krwar ki fodre nou balanse tou sa bann keksoz. E mwan letan mon vin fer travay dan sa Lasanble, mon pa vin zwe dan sa Lasanble mon vin pran keksoz serye. E mon pa bezwen apre sak parol ki mon dir mansyonn LDS. Nou bezwen balanse pour nou regarde.  E bomaten in annan plizyer kankan.  E Onorab De Commarmond in koze, konmsi dan en zar zis Manm Lasanble ki pe ganny larzan! E malerezman Onorab Valmont parey mon ti dir lot zour bann nouvo Manm la zot bezwen ekout en pe plis.

Sa bann ki’n ne apre ‘77 la, parfwa ti pou pli bon ekout en pe konn en pe listwar avan ki nek zis zot tonm dan bann pyez ki ganny dir e apre zis zot repete, san vreman servi zot lespri.  Mr Speaker,(Mr Speaker Onorab Vidot i kapab repet sa ki in dir silvouple?)

 

MR SPEAKER

Non, mon pa’n tann nanryen.

 

HON WAVEL RAMKALAWAN

Ou pa’n tande?

 

MR SPEAKER

Mon pa’n nanryen.

 

HON WAVEL RAMKALAWAN

Mon ti konnen pou dir i pou per repete.

 

MR SPEAKER

Kontinyen Onorab.

 

HON WAVEL RAMKALAWAN

Mr Speaker,

 

 

(Off-Mic)

 

 

HON WAVEL RAMKALAWAN

… (la Onorab Valmont i apel son lekor en manrmay,) mersi bokou. Mr Speaker sa zafer lapey mwan mon krwar annou enn fwa pour tou ganny li kler! Ozordi atraver sa ki pe ganny propoze, sa travayer ki ganny mwens lapey i pou ganny li en logmantasyon R250.

Anba sa band e la mon pe koz lo step, mon pe koz lo premye step, band menm, mon pa pe koz letan ou fer plizyer steps mon pe koz lo premye band sa travayer ki ganny mwens – ki ganny minimum salary pou ganny li R5, 709 e sa i vedir en logmantasyon R250. lo sa band sa ki pli o savedir Prezidan Larepiblik R 86, 389 e sa pou reprezant e logmantasyon R4mil  lo sa premye band, ok lo sa step 1.

Mr Speaker mwan mon pe dir si Prezidan pe ganny R4 mil konman pli o, fodre ki tou dimoun i ganny R4mil!

 

(APPLAUSE)

 

HON WAVEL RAMKALAWAN

Si nou pa kapab donn R4mil tou dimoun, alors fodre pa ki Prezidan i ganny R4mil!

 

(APPLAUSE)

 

HON WAVEL RAMKALAWAN

Manm Lasanble li dapre sa band la, i pou ganny li R1500. Si Manm Lasanble i kapab ganny li R1500 fodre ki tou dimoun i ganny R1500!

 

(APPLAUSE)

 

HON WAVEL RAMKALAWAN

Si tou dimoun pa kapab ganny R1500, nou pa donn tou dimoun R1500! Mr Speaker alor mon pe propoze, si nou kapab donn sa ki ganny mwens R250,  annou nou tou pran zis R250 logmantasyon!

 

(APPLAUSE)

 

HON WAVEL RAMKALAWAN

Annou sanz sa latab, pour ki tou dimoun i ganny li R250 konman en minimum oubyen R4mil konman en minimum!  E mon pou met sa devan Minis.  E si nou pa kapab donn tou dimoun menm logmantasyon, nou Mr Speaker nou pou dir avek Minis, nou pou vot ‘kont’ son Bill, retourn avek son Bill met devan Gouvernman e fer Gouvernman re-travay lo la. Mersi bokou Mr Speaker.

 

(APPLAUSE)

 

MR SPEAKER

Mersi Onorab Ramkalawan.  Bon mon ava pran Onorab Sophola premye.  Mon ava donn laparol Onorab Sophola.

 

HON NOLINE SOPHOLA

Mersi Mr Speaker.  Mon le raise en point of order anba Lartik 56 silvouple? I vre mon’n koz lo FPAC.  Mon’n dir zot pe travay anba zot manda. I pa sel dimoun ki zot in fer al pran konze! I annan plizyer dimoun ki zot in fer al pran konze e malgre ki ou pe dir msye Prezidan in fer! Mersi.

 

MR SPEAKER

Ok, mersi. Ou’n fer ou lekor pli kler prezan. Mersi.  Onorab Sebastien Pillay.

 

HON SEBASTIEN PILLAY

Mersi, Mr Speaker.  Mon pa pe al fer okenn politik.  Mon pe al zis sey koriz en misapprehension ki’n ganny donnen, akoz manm piblik pe text mwan.  Leader Lopozisyon in dir  poudir nou, nou pa’n get sa ki’n arive dan  bann konpannyen prive an relasyon avek sa logmantasyon 5 poursan.

Sa ki Leader Lopozisyon, sa S.I ki in lir mon krwar fodre ki piblik i konpran i an relasyon selman avek minimum wage. I pa 5poursan across the board pour tou saler dan sekter prive.  Alors ler nou pe fer politik annou fer bon politik!  Silvouple. Mersi Mr Speaker.

 

MR SPEAKER

Mersi.  Onorab Ramkalawan.

 

HON WAVEL RAMKALAWAN

Mr Speaker premyerman Onorab Pillay pa’n konpran ditou sa ki mon’n dir.  Mon’n fer li – be si ou bann dimoun deor i bann dimoun ki frekant ou byensir zot pa pou konpran! Parey …

 

 

(Interruption)

 

MR SPEAKER

Non, non, non.  Annou …

 

HON WAVEL RAMKALAWAN

Mr Speaker …

 

MR SPEAKER

Annou.  En moman.  Mon’n donn ou laparol, annou ekout Onorab Ramkalawan.

 

HON WAVEL RAMKALAWAN

Mr Speaker sa ki mon’n fer kler se ki avek logmantasyon dan minimum salary, i vedir ki in annan en snowball effect lo to bann lezot saler pli o.  Parski si sekter prive, si sekter prive ti donn zis sa logmantasyon, sa bann ki – sa minimum, i ti pou vedir ki sennla ki’n monte i ti pou ganny plis lapey ki sa enn ki ti par lao li!

Alors aprezan in annan en cascading effect!  E mwan mon konn plizyer landrwa e mon pa pou al donn detay. Me mon konn plizyer landrwa, kot zot in bezwen donn zot logmantasyon, e sa cascading effect in ale ziska top management!  E zot in aret li lo top management.  E sa i vedir sa logmantasyon 5 poursan.  Parski sa S.I son increase i 5poursan the minimum wage. Mersi. Ekout byen letan ou koze.

 

MR SPEAKER

Mersi Onorab.  Bon mon ava prezan donn laparol Minis pour li fer son Right of Reply. Minister.

 

MINISTER JEAN-PAUL ADAM

Mersi bokou Mr Speaker e mersi bokou tou bann Onorab pour zot kontribisyon lo sa Bill. Me avan ki mon al pli lwen akoz mon’n note dernyen parol ki sorti kot Leader Lopozisyon, mwan mon pou demann tou bann Manm Lasanble pou konsider sa Prozedlwa avek bokou latansyon.

Akoz i konsern en Lalwa ki afekte tou dimoun dan servis piblik. E malgre ki i annan diferan dimoun, ki annan diferan lopinyon sa prensip atraver en Lalwa ki definir dan en fason atraver en prosesis, i enn bann keksoz ki ankre dan servis piblik. E si nou devret evite ki en keksoz koumsa ki’n fini ganny vote dan Bidze – in fini ganny vote dan Bidze, i zis en kestyon sanzman dan Lalwa, ki fer sa posib ki sa i vin en foutbol politik.

Mon krwar nou bezwen get son konteks pli larz; bann dimoun dan sekter piblik ki sipoze benefisye a diferan nivo e lefe ki Bidze in deza  ganny vote. I en kestyon pou regard sa kad legal. E mwan mon ti pou demann tou bann manm Lasanble pa pou tonm dan sa sityasyon kot pou rezet en keksoz, san ki zot vwar vreman sa ki zot pe rezete dan en fason vreman avek latansyon. Mon konnen ki i annan plizyer dimoun ki pe ekout nou, ki pe anvoy mesaz ki pe dir ki i enportan pour nou adres sa size dan sa Lalwa.

Mon ava tous en pe lo enn de pti pwen spesifik sorti kot bann diferan Manm Lasanble. Mon note ki Leader Zafer Gouvernman in met lanfaz osi lo bann diferan lezot logmantasyon ki pe vini atraver bann progranm ki Gouvernman in met an plas, e avek bi pour nou kontinyen amelyor bann kondisyon servis bann travayer Gouvernman. E ki i enportan ki i annan en amelyorasyon dan kapasite pou delivre en bon servis atraver Gouvernman.

Akoz sa de i devret mars ansanm.  E osi prensip pour, mon krwar plizyer Manm in koz lo la.  Prensip pour enspir sekter prive, pour al dan menm laliny e mon krwar ki i annan serten ki pe regarde  deza dan sa direksyon akoz finalman i vin plis konpetisyon pour resours imen. Onorab Stephen Pillay in osi koz lo serten sizesyon, li in sizer en fason get logmantasyon ki annefe bann ki pli ba i ganny plis e bann ki pli o i ganny mwens.

Me mon ava note ki sa, mon krwar Onorab Ferrari in deza fer sa pwen, me osi Onorab Sebastien Pillay ki nou annan, sa logmantasyon osi i mars ansanm avek lenplimantasyon ki nou’n deza pe fer sa tax lo reveni progresiv – sa progressive income tax.  E sa i vedir ki bann dimoun ki pli i anler ki annan bann pos pli o, zot pou pey plis taks avek sa logmantasyon. Ki fer ki i annan en lefe diferansye de toute fason.

E lot keksoz ki nou’n ganny demande konbyen travayer ki pe benefisye pour annan dan servis piblik i annan 11,0 83 ki pou benefisye avek sa amelyorasyon e sa pou kout plis ki R62milyon  ki in fin ganny prevwar dan Bidze.

An sa ki konsern sa nide pour annan diferan striktir i enportan pour mazinen pou dir ki nou striktir aktyel i baze lo en striktir saler ki’n fini e ki osi liniform dan sekter piblik.

Sa i vedir ki ant en Departman ek en lot i kapab annan en serten konparezon.  E sa i osi enportan pou Gouvernman kapab fonksyonnen dan en fason transparan e avek bonn gouvernans. Mon’n note ki Onorab Churchill Gill in osi koz lo lenportans performans osi.  E mon ava profite pou mansyonnen ki Gouvernman pe osi met, sa in fer sorti par Onorab De Commarmond e osi par plizyer lezot Onorab, ki sa laspe performans i ganny kouver dan performance management system ki Gouvernman pe met devan anba sa bann prensip results-based management ki nou pe met devan.

E sa pou permet nou osi kapab donn serten benefis pli spesifik dan serten kad travay baze lo rezilta ki’n ganny donnen. An sa ki konsern bann pwen ki’n ganny fer sorti par Onorab Sophola, mon’n note ki in koz lo dat lenplimantasyon e mon krwar plizyer Manm in koz lo la ki ti enportan pour anmenn an Avril pou fer sir nou an konformite.

Me osi pou get dan lavantaz travayer e pa zis dan lefe son lenpak dan Bidze. Apre mon konnen ki Onorab Sophola in fini eksplik en pti git ki annan lo FPAC. Mwan sertennman la fason ki mon’n konpran son lentervansyon, sete pou dir ki i annan serten zofisye piblik ki konsernen letan zot vin devan FPAC.

E sa pa pou dir ki travay FPAC, pa pou enportan mwan mon profite konman en Minis ki toultan pare egzanp mon dir avek mon bann staff; ki FPAC i annan en rol fondamantal dan nou demokrasi e dan nou Lasanble.  E mon krwar ki parfwa i vre ki i annan en serten entimidasyon ki arive. E petet en pe plis travay i bezwen ganny fer, pou eksplik la popilasyon dan en fason pli larz, lo sa louvraz ki bezwen ganny fer, me osi ki parfwa en zofisye piblik i ganny sa sans osi pou li eksplik son lekor.  Akoz parfwa i annan ki santi ki zot pa pe ganny sa sans pour zot defann zot lekor dan en fason apropriye. Mwan mon’n enterpret sa lentervansyon koumsa.

An sa ki konsern lentervansyon Onorab Sebastien Pillay in koz osi sa lefe in kree osi konpetisyon dan nou lekonomi letan nou pou enplimant sa logmantasyon dan PSC son baz par 5 poursan. I vedir ki serten ka petet serten louvraz dan sekter piblik pou pli enteresan.

E sa i kapab kree en sityasyon osi kot sekter prive pou kapab swiv.  E mon krwar parey plizyer in ganny note par plizyer dimoun. I annan serten biznes ki deza pe swiv dan sa laliny.  E i enportan pour nou kapab atir talan dan sekter piblik.  E sa i mars ansanm avek sa prensip long service allowance, ki permet zisteman retenir bann talan ki la dan sekter piblik depi en pe letan.

Onorab Pillay in osi koz lo kestyon tax e i enportan pour nou gard antet sa 5poursan logmantasyon, ki nou pe ganny mete la, i osi gard antet sa bann progresyon, sa bann lavantaz ki dimoun pe gannyen deza atraver tax ki’n ganny tire e mon ava note lo bann ki pe benefisye.

Mon’n sit sa sif 11,0 83 ki pou benefisye, e la dan 54 poursan pa pey tax lo sa saler. E mon ava note osi ki an deor sa 11,083 i annan bann travayer adisyonnel ki dan sa ki nou apel the core services. Savedir i ganny peye atraver Gouvernman, me i an deor.  E zot osi, zot pou benefisye avek sa logmantasyon 5poursan.

I enportan parey Onorab Pillay in dir pour eksplik byen sa bann eleman tax, akoz i posib ki pou annan serten dimoun ki avan pa ti tonm dan sa kad kot zot pour, ou ganny takse me aprezan zot pou gannyen.

Me parey li in eksplike akoz sa tax i progresif, ou pa pour perdi larzan par rapor avek ou logmantasyon.  I vre ki petet avan ou pa ti pe pey tax me la ou pou pey tax, me sa logmantasyon i pou touzour en benefis. Savedir la ou pou ganny en pti pe plis ki ou ti pe gannyen avan.

Parey mon’n dir i enportan pour nou mazin byen ki sa kestyon logmantasyon 5 poursan i mars ansanm avek bann lezot linisyativ ki Gouvernman in met devan.

Kestyon kalifikasyon sa an zeneral sa in ganny leve par Onorab Pillay, an zeneral sa in ganny adrese atraver bann Scheme spesifik. E i osi enportan pour note mon krwar detrwa Manm in koz lo la an sa ki konsern 13enm mwan saler avek sa 5poursan progresyon, 13enm mwan saler osi pou ogmante an konsekans avek sa progresyon.

Mon krwar plizyer Manm in koz lo lefet ki tou travayer Gouvernman in kouver ladan enkli bann MNAs, enkli tou dimoun.  Akoz sa i en prensip Lalwa.

Letan ou’n fer sa Lalwa an 2013 baze lo sa Salary Act i vedir ki’n prevwar tou le 5an ki en revi i ganny fer.  E i enportan ki nou gard antet ki sa fason ki sa i ganny fer.   E in annan en Komisyon ki’n fer en travay ki’n etidye sa size e ki’n regard bann diferan eleman.

I annan en lo Manm ki demann kestyon lo, mon krwar Onorab Henrie li menm ki’n demande lo ki kriter pou servi sa logmantasyon.

Mon napa tou bann detay ki Komisyon in servi, me mon annan bann fakter ki zot in regarde sete lenflasyon, ki aktyelman i apepre en 3 poursan. Me zot in regard osi bann lezot fakter pou determin sa logmantasyon ki’n ganny rekomande.  E byensir i annan osi a konsiderasyon lakantite larzan ki Gouvernman i kapab peye, baze lo larealite ki nou ladan, sityasyon ekonomik.

An sa ki konsern pansyon, plizyer bann Manm Onorab in lev sa size lo pansyon, me nou note ki pansyon i en lot Lalwa.

Mon konnen ki dimoun i mazin poudir – akoz nou pa pe koz minimum wage la, ok? I enportan pour nou note sa.  Nou pa pe koz minimum wage, nou pe koz en logmantasyon dan bann saler sekter piblik. E sa i vedir ki pansyon li menm li i pa ganny touse.  Me ki mon pou dir avek tou bann travayer ki dan Gouvernman, si ou pe ganny en logmantasyon la aktyelman atraver sa 5 poursan – i enportan ou kapab fer en kontribisyon, sa ki nou apel en kontribisyon volonter avek Pension Fund  ki pli o e ou pou benefisye plis.

E osi pou bann ki pou ganny long service allowance i en loportinite pour zot, zot menm zot met en pe plis larzan dan zot Fon Pansyon ki apre zot kapab benefisye an plis ki sa pansyon de-baz ki deza an plas ki nou’n koz lo la.

E Onorab Vidot mon krwar in koz lo prensip ki enportan pour, dan sa logmantasyon ki met lanfaz ek met bokou lenportans lo travay dir e pour nou valoriz sa bann travay dir sirtou dan sekter piblik pour nou ganny en meyer servis.

Onorab Ferrari in koz en pti pe lo sistenm progresif ki an plas, e mon note ki Onorab in dir ki Gouvernman ti kont. Mon bezwen klarifye akoz mon osi mon’n dan Gouvernman en pe letan e nou ava rapel toultan in dir i ti anvi al anver en sistenm progresif.

Me nou ti’n dir ki nou anvi ganny gidans avek FME avek bann diferan partener pour nou fer sir pour nou fer li byen e se sa ki nou’n fer.

E sa mon krwar i en keksoz ki tou dimoun in siporte pour nou enplimant en sistenm taks progresif.  E i enn bann mezir ki’n anmenn plis larzan dan pos Seselwa dan en sel kou, dan petet listwar nou pei. E kot Gouvernman in kapab met plis ki R500milyon, preski R500milyon ki dan pos Seselwa atraver sa bann benefis taks. E byensir nou touzour rod fason rod travayer pour nou pli byen siport travayer, me si nou regard vre lenpak sa reform ki’n ganny fer nou pou war li a lavenir.

Nou napa problem si i annan serten dimoun oubyen serten endividi ki dir sa ti mon nide oubyen mon’n fer sa.  Mon krwar sa ki enportan se Gouvernman in enplimant sa progranm e in fer li pour benefis pep Seselwa.

Onorab Ferrari in osi demann kestyon lo, lo konteks sa, sa diferansyasyon ant premye faz lo latab saler ziska lo dernyen faz. E in note ki an 1979 sa ti 1 lo 9 konpare ki 1 lo 15 konmela.

Bon sa ki, atraver bann diferan reform e bann diferan moman kot sa latab saler in ganny revwar, sa diferansyasyon in neseser pou kree sa bann loportinite pour sa bann dimoun progrese e konman en incentive pour dimoun kontinyen sorti en pos konmela pour al lo en lot. Mon note ki Onorab Ferrari in mansyonn ki sa ti leka an 1979, sa ti lepok SPPF sa ti lepok France Albert Rene.  E mon’n note osi ki tre probableman mon napa sif malerezman, me mon konnen ki sa ratio avan 1977, avan Lendepandans sa ratio ti ankor pli move ki sa.

Alor mon kapab war ki bann lapros sosyal ki Gouvernman in met an plas pou annan plizyer lannen in ede pour kontribye anver progresyon saler dan nou pei. E sa pe ganny kontinyen par Gouvernman aktyel.  E sa i lye avek sa kestyon en sistenm enklisiv ki Onorab Ferrari in koz lo la.  E dan sa sistenm enklisiv, nou kapab war ki an menm tan ki sa, i annan sa progresyon ki kouver tou saler.

Nou annan osi sa long service allowance ki zisteman rekonnet bann dimoun, ki pou en rezon ou en lot petet pa’n kapab fer sa formasyon ki’n permet li progrese.  Me a lafen di-mwan i rekonnet lefet ki sa dimoun in fer 10an, 15 n, 30an dan Gouvernman e ki ganny en rekonesans  konsekan e ki reel atraver larzan ki pou dan son pos.  E sa i sa lapros enklisiv ki Prezidan Faure in met devan e ki Gouvernman pou kontinyen met lanfaz lo la.

E i enportan pou note osi ki zisteman dan sa konteks sa eleman long service allowance pa pou ganny takse. Alor i vreman en lapros ki permet donn siport pour bann dimoun ki’n vreman travay dir dan Gouvernman, pandan en long moman, e pour nou rekonnet zot zefor.

Onorab Ferrari in osi koz lo bann larzan ki bann Minis pa ti pran an 2016, e i pe dir ki sa apre  konmsi in ganny redemande pou repase.  Me mon ti a kontan  klarifye akoz mon konnen Minis Finans in koz lo la. Me sertennman konman en Manm ki dan Konsey Minis – 2016, letan bann Minis pa ti pran zot Gratwite sa larzan ti retourn dan Bidze.

E savedir sa larzan ti ganny servi dan Bidze e sa larzan ti ganny servi – ti ganny depanse lo bann progranm ki benefisye pep Seselwa atraver tou Bidze ki  parey nou abitye fer.

E si zot annan en problema avek sa prensip ki deryer sa, zot lib pour zot kapab sanz sa Lalwa. Akoz se Lalwa ki definir sa bann eleman. E si bann Minis a sa moman ti deside pou pa pran, mon krwar nou pa devret annan okenn problenm avek sa. E mon ti a menm dir a en moman a lavenir, si i annan okenn dimoun ki menm kont sa logmantasyon, oubyen ki zot santi ki sa bann Gratwite pa merite, i annan en swa pou pa sanz Lalwa, oubyen zot osi zot kapab dir ki zot pa pou pran sa bann benefis e nou a remet dan Bidze.

Si nou demann Minis Finans ozordi i pou dir ou en lalis keksoz ki pou kapab servi sa larzan pou li fer avek. E sertennman dan lasante mon kapab donn en lalis ki ase long. An sa ki konsern lentervansyon par Onorab Valmont in met lanfaz lo nesesite pou nou adres bann konsern pri lavi, e zisteman sa  i form parti, akoz  dan sa travay ki’n ganny fer par sa Komite, zot in regard zisteman lenflasyon e osi bann lezot eleman otour sa.

E i form parti osi sa bann mezir pli larz ki nou pe met an plas. E in tous en pti pe lo nide performans ki mon’n deza koz lo la, e osi  pou nou ankouraz sekter prive.

Pour mwan terminen lo bann pwen ki Leader Lopozisyon in fer sorti, mon krwar ki a lafen dan Lasanble parey in dir, parfwa i annan politik ki ganny fer. Lenportans  se pou regard benefis ki nou mete pour le pep Seselwa, e osi  ki nou annan en kad ki kler e ki transparan pour ki tou Seselwa i kapab konpran ki mannyer sa i marse. Sa kad ki  la devan nou ozordi, avek sa logmantasyon 5 poursan, i sa kad ki kler e transparan.  Ki pa en sif ki’n ganny tire dan ler.  I en sif ki’n ganny tire baze lo en analiz ki’n ganny fer.

In koz lo kestyon pou  aliny saler minimum osi  avek pansyon.  Ankor mon pou rapel pou dir sa i bann diferan Lalwa ki devan nou.  In osi koz en pti pe lo bann diferan larzan ki par egzanp i dir, ki’n ganny mal ganny apropriye oubyen ki pa’n ganny rann kont. E mon ava rapel ki Presidan Faure in pas en mesaz ki tre, tre kler.  Ki okenn konsern, oubyen okenn eleman ki konsern sa bann size, i pou pran tre o serye – i pou ganny adrese.  I annan diferan sa bann prosesis parfwa i pran en pe letan e par egzanp in sit sa prosesis $50milyon.

Me nou annan konfyans ki Gouvernman Prezidan Faure in annan rekomandasyon neseser, oubyen si i annan okenn prosekisyon ki bezwen ganny fer. Ki sa pou ganny fer dan transparans total e san okenn konsern pou okenn endividi oubyen okenn lentere. I enportan pou nou dir sa, akoz i annan en tandans pou dir ki, bann dimoun ki dan Gouvernman la aktyelman in enplike – solman mwan mon konn laplipar dimoun dan sa Gouvernman, pa ti la a sa moman.

I enportan pour nou konn laverite sa bann kestyon, pour nou adres zot dan en fason kler. E Prezidan Faure mon krwar in dir avek bokou klarite, ki nou pou adrese sa bann size. Me nou bezwen fer li byen e nou pa kapab zis dir ki nou pou fer sa, oubyen sa.  Nou bezwen konn byen. Nou bezwen esper sa bann envestigasyon fini ki pe ganny fer par Komisyon Anti- Koripsyon, oubyen si i annan lezot lenvestigasyon, ki sa i ganny konplete e aksyon apropriye i  ava ganny pran baze lo rezilta sa bann lenvestigasyon.

An sa ki konsern ki SEYPEC i enplike dan distribisyon sa i en keksoz byensir mon a kapab anmenn en pe pli lwen pou vwar posibilite lo la.

A sa ki konsern lorganizasyon ki tonm anba PMC e akoz zot pa kouver dan sa progranm; se akoz sa Lalwa – sa 5poursan i kouver bann lotorite gouvernmantal, ki depandan lo Bidze.

Bann lorganizasyon ki anba PMC i bann lorganizasyon ki otononm finansyerman. E zot pa bezwen swiv sa grid saler ki la devan nou.  Savedir zot pe ganny oblize pou swiv sa grid saler, Onorab Lopozisyon in mansyonn sa eleman 13enm mwan saler konman en legzanp ki sa ti en keksoz ki ti ganny fer pou zot.

Me nou ava rapel, ki la gran mazorite bann konpannyen ki anba PMC, akoz sa i bann konpannyen komersyal. La grann mazorite zot ti deza pe pey en 13enm mwan saler. E Gouvernman letan in vin avek Lalwa pour 13enm mwan saler, sete pou fer li iniform partou dan servis piblik. E sa ki konsern bann konpannyen paraetatik ki anba PMC akoz Leader lopozisyon in mansyonn sa kestyon, si en CEO i en public servant? Wi i en public servant akoz i dan en lorganizasyon ki etatik.

Savedir i pe bezwen rann kont avek pep Seselwa. Me a lafen i annan bann lorganizasyon pa zis Sesel ki annan sa, i annan bann lorganizasyon ki alafwa ki etatik me ki fonksyon konman bann konpannyen prive. Si nou al dan en pei parey Singapore i annan en kantite sa bann konpannyen, e sa ki kler se sa bann konpannyen ki prive menm si zot bann konpannyen etatik, zot swiv bann lareg sekter prive.

Me i osi annan en verifikasyon par Gouvernman.  E se sa rol PMC. Se pou fer sir ki bann aksyon Gouvernman dan sa bann diferan Gouvernman i ganny defann, e osi ki sa bann lorganizasyon i azir an konformite avek bann Polisi ki Gouvernman in met an plas. Me lo en baz komersyal sa bann lorganizasyon i travay dan en fason lib. E dir zot gouvernans i tonm anba en konsey zesyon oubyen parey nou dir zot Board. E se zot Board ki bezwen regard bann eleman parey egzanp bann progresyon dan saler.

E zot annan responsabilite pou fer sa baze lo sityasyon ekonomik sa bann konpannyen. Savedir i annan serten sa bann konpannyen par egzanp ki’n fer bann progresyon dan saler sa lannen oubyen menm depi lannen pase. I annan ki petet pa pe kapab fer li deswit, me ki annan plan pou fer li a bon moman. Me pour nou met sa dan en Lalwa pour nou kouver osi sa bann konpannyen se pe osi pour nou met plis kontrol lo sa bann konpannyen, e pour nou tir en pti pe sa bann gouvernans anba sa bann board.

Alor bann prensip gouvernans enternasyonal ki’n ganny rekonnet se pou les sa bann konpannyen o maximum posib annan zot lotonomi me pour  osi fer sir ki zot anliny avek prensip, bann prensip ki Gouvernman i met devan.

Mr Leader Lopozisyon osi in koz lo osi ki bann saler i kontroversyal. I kontroversyal dan lesans ki tou saler i afekte lavi en dimoun toulezour. Me i osi loportinite pour nou montre en kad kler avek tou Seselwa, pou dir ki nou krwar dan zot kapasite pour zot amelyore, e osi ki nou krwar dan zot kapasite –  Ki nou krwar i enportan ki zot annan sa kapasite pour zot kontinyen ganny serten benefis a lavenir.

Se pour sa i dan Lalwa sa logmantasyon ki tou le 5an. Lakantite logmantasyon i determinen atraver en prosesis kot Prezidan  i demann en komite pou fer en travay e i fer sa travay endepandaman. E i enportan ki vi dan Lalwa i prevwar ki i annan sa  logmantasy9on tou le 5an – ki i annan sa revi tou le 5an – e dan sa ka ki nou’n war i neseser pour nou fer en logmantasyon 5 poursan, ki sa i ganny adrese ozordi parey nou deza fer provizyon dan Bidze.

Mon konpran petet pwennvi ki bokou dimoun pe dir ki nou devret fer en logmantasyon antye across the board ki parey.  Savedir ki ou fer R4mil pou sa ki anler oubyen si ou pe pran bann nivo bann Minis, oubyen bann nivo bann Leaders dan Lasanble kot i pou vin 2,800 ki sa i ganny aplike partou across the board antye.  Me byensir sa i annan en kou ki adisyonnel.

E osi i pa anliny avek sa prensip ki nou’n oule garde  dan sa latab saler. Akoz  prensip se pou kree en kad progresyon; savedir i annan en faz ki al lo lezot faz.  E ki en travayer letan i antre dan en servis piblik, i annan sa faz si i annan tel kalifikasyon oubyen i fer tel progresyon.

Alors i en kad kler ki tou dimoun i kapab war, si nou en sonm total across the board, zis i vin en logmantasyon koumsanmenm me sa i pa anliny avek bi sa kad ki nou pe met an plas la. E i pou afekte ankor bann striktir saler. Nou’n koz lo lekite e nou’n koz lo sa lapros enklisiv.  E pour nou adres sa kestyon enklisiv, se la kot nou bezwen regard bann fakter, par egzanp tann servis. E se la kot sa long service allowance i antre akoz i permet en dimoun ki’n la en kantite letan kot in ganny son saler de-baz.

Me i osi in ganny en rekonesans pour sa kantite letan ki in annan dan Gouvernman, e ki annan en rekonesans pour sa louvraz ki i fer.

Onorab Leader Lopozisyon in osi koz lo nesesite pour nou kapab, par egzanp ki mannyer nou determin saler endividyel lo en pozisyon. E mon ava note ki Departman Administrasyon regilyerman i fer evalyasyon lo bann diferan pos.

Serten Minister par egzanp mwan mon sorti dan Minister Lasante nou annan osi bann evalyasyon ki ganny fer entern baze lo  travay spesifik ki ganny fer.

Alor i annan sa prensip ki ganny fer.  Byensir nou tou nou pou dir ki serten louvraz plis, serten louvraz ki bezwen, nou pou santi ki i annan serten louvraz ki priyoriter. Me se pour sa zisteman lenportans ki annan dan Lalwa en kad ki kler, ki montre klerman sa ki Gouvernman pe donnen. Si nou, e sa i vedir i ki nenport ki letan ki i antre dan servis piblik i war sa klerman. Fodre pa nou, nou annan sa konfizyon otour lentansyon sa amannman dan Lezislasyon.

Zis pour konklir mon ti a kontan remersi tou bann Manm dan Lasanble, pour zot kontribisyon. E eskiz mwan en dernyen pwen ki ti ganny dir sete pour nou fer sir ki bann graduates i ganny reminere dan en fason ki permet nou retenir zot Sesel.

E sa mon konnen i en keksoz ki ganny regarde pros atraver Gouvernman. I vre ki i difisil dan serten kad akoz i annan serten kad ki vreman an demann.

Me nou pe kontinyen fer zefor pour nou kapab met bann Schemes of Service ki kapab atir sa bann dimoun e osi byen fer sir ki nou ganny sa sipor neseser.

Pour zot kapab etablir zot dan zot lavi Sesel e alor ki zot kapab konfortab. Me nou rekonnet pou dir sa i en defi ki devan nou. E nou bezwen kontinyen sey adres s sityasyon.  E zisteman sa i enn bann rezon osi ki ou bezwen sa kad progresyon dan saler. Akoz ou bezwen rekonnet valer par egzanp en Degre, ou bezwen rekonnet lefet ki si en dokter in al fer letid avanse ki’n bezwen etidye omwen pandan 7an par egzanp.

E sa i enn bann Scheme ki nou bezwen fer sir ki nou kontinyen regarde ki mannyer nou pou amelyor li. Mon remersye tou Manm Onorab pour zot kontribisyon e mon eskize ki mon’n en pe long lo mon larepons.  Me mon krwar ti enportan, pour tous tou bann diferan pwen ki’n ganny leve par bann Manm Onorab. Mersi Mr Speaker e mersi tou Manm Onorab.

 

MR SPEAKER

Mersi Minis. Yes Onorab Ramkalwan.

 

HON WAVEL RAMKALAWAN

Mr Speaker mon ti zis anvi fer sorti en pwen, e ki mon krwar Minis in sezi. Son prensip, nou napa problenm ek son bann prensip.  Se son bann chriffres ki nou annan problenm avek. E sa ki mwan mon pou propoze en vot lo son prensip nou tou nou kapab vot an faver son prensip. Me, pour – apre sa mon pou demande egzakteman parey nou ti pe regard 13enm mwan lapey – ou rapel byen Mr Speaker, mon pou demande ki nou pa l pli lwen ki sa, ki Minis ek son Gouvernman zot rediskit ankor e pour, e menm nou a met en propozisyon ki sa sonm ki dan Bidze – sa sonm ki dan Bidze regarde ki mannyer i kapab redistribye sa sonm pour li vin ekitab e ki tou dimoun i ganny menm keksoz! Se sa ki nou pe demande.  E  mwan mon pou dir  sa – I mean  lot kote i konmans mangonnen –

Mr Speaker nou pou vote lo son prensip, nou pou vot an faver son prensip e apre sa nou pou demande ki Minis i al diskit avek son Gouvernman, pour regarde ki mannyer – E si i bezwen zwenn avek nou pour diskite ensidswit –  nou pare pou fer li, pou fer sir ki i annan vre lazistis sosyal dan sa enn. Mersi bokou Mr Speaker.

 

MR SPEAKER

Mersi Onorab.  Bon nou’n ariv moman pour nou pran en vot lo merit e prensip sa lamannman, sa Bill ki devan nou. Public Service  Salary (Amendment) Bill 2019.  Mon ava demann tou Manm ki an faver? Okenn Manm ki kont? Madanm Clerk.

 

MADAM CLERK

Mersi bokou Mr Speaker 27 Manm in vot an faver e personn kont.  Mersi.

 

MR SPEAKER

Mon kapab ganny en Formal Second Reading.

 

MADAM CLERK

Mersi Mr Speaker.  A Bill of an Act to amend the Public Service Salary Act for 2013. Mersi Mr Speaker.

 

MR SPEAKER

Mersi Madanm Clerk.  Bon, eski nou pou al dan Staz Komite. Mon konnen nou’n mank sa pti bout kot Bills Committee report to the Assembly. E mon ti dir ki Onorab Sebastien Pillay koman Manm Bills Committee dan labsans Chair and Vice-Chair, in ganny otorize pour fer sa rapor.  Mon ava donn Onorab Sebastien Pillay laparol.

 

HON SEBASTIEN PILLAY

Mersi Mr Speaker.  Mr Speaker mon pou prezant rapor Bills Committee.  Parey nou rapor in dir ki in ganny sirkile avek  tou Manm, nou’n konsider 2 provizyon legal – 2 Lalwa; premye ti sa Public Service Salary (Amendment) Bill  e nou’n vwar tou le de Bill i an konformite avek Lalwa.  E nou’n pa’n resevwar okenn propozisyon  lamannman from okenn Manm Bills Committee.

Me parey tou Komite Lasanble Mr Speaker kantmenm en Lalwa, oubyen nenport aktivite ki  en Komite i fer i pa anpes okenn lezot Manm pou annan son prop lopinyon personnel lo travay sa Komite, akoz tou Manm i annan freedom of speech anba  Konstitisyon  dan Lasanble Nasyonal.

E la dan sa konteks sel amannman ki nou ti annan pou sa in regards to sa, sete an relasyon avek en sesyon. As the between’’ cited and public’’ ki ti en amannman kosmetik e nou  ti’n deza diskit avek Biro Attorney Zeneral.

Me mon ti ava kosyonnen Mr Speaker, prenon kont prononsman Leader Lopozisyon e lefe ki nou annan Sef Sekreter dan Departman dan Ladministrasyon Piblik, si pa ti ava pli ideal, pou adres en serten kestyon dan en Staz Komite? Akoz i paret pou dir nou, nou pe move towards – propozisyon se ki nou pe move towards en adjournment. So lo sa kote mon krwar se nou – I beg to, I ask the House pour nou deside how to proceed avek sa. Mersi Mr Chair.

 

MR SPEAKER

Mersi Onorab Sebastien Pillay.  Bon nou prosen letap se nou pou regarde si the House will go into Committee Stage pour nou pran bann amannman – bann sizesyon ki pe ganny met devan.  Ok?  Yes Onorab Ramkalawan.

 

HON WAVEL RAMKALAWAN

Mr Speaker mwan mon krwar ki nou adjourn la.  Mon krwar i meyer nou adjourn e Minis ek Gouvernman, zot pran konsiderasyon sa ki’n ganny mete and then they come back. Zot retourn kot nou, e si zot bezwen nou pour – si zot bezwen nou dan sa deba, nou pare pour nou nenport zour pou zwenn avek zot, pour diskite pou nou kapab ganny en keksoz pli ekitab.  Mersi bokou.

 

MR SPEAKER

Mersi Onorab.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker mwan mon ti ava sizer en lot fason.  Nou antre dan Staz Komite. Nou permet bann profesyonnel ki la – bann zofisye enterakte – akoz dan Staz Komite zot kapab partisipe, e from there nou kapab gete ki mannyer i ete lo bann propozisyon ki’n ganny met devan. E prezan si fodre adjourn at that stage nou ava    adjourn  e i ava vini pli tar.

Me sa bann propozisyon i kapab ganny en leklersisman dan Staz Komite. Or serten amannman si lot kote i annan serten amannman konkret, i ava ganny propoze dan Staz Komite.  E parey mon pe dir en pti deba i ava ganny fer lo la, e si nou pa pe war en laklerte, then nou a kapab desid otherwise.  Mersi.

 

MR SPEAKER

En moman nou ava ekout Onorab Sebastien Pillay.  Yes Onorab, lo propozisyon pour  Motion for adjournment en.

 

HON SEBASTIEN PILLAY

Mersi Mr Speaker. Mr Speaker mon’n note ki lo latab ki nou pa ankor resevwar okenn prepozisyon lamannman sorti kot okenn dimoun, ki parey nou Standing Orders in dir nou i devret ariv 48erdtan avan  ki Lalwa in ganny prezante.

So, nou napa okenn propozisyon amannman.  Me Manm i annan drwa adjourn debate. Be prezan sa i ganny move. Nou bezwen ganny en movement for adjournment.  Nou pa kapab zis dir nou pe adjourn Lasanble, akoz then nou sa ki nou pe fer, pa pou legal an  relasyon  avek nou prosedir. Mersi Mr Speaker.

 

MR SPEAKER

Wi se sa ki mon’n – in fer en propozisyon, mon’n donn zot laparol pou nou elabor en pti pe plis lo la. Prezan mon ava regarde si Onorab Ramkalawan pe move Motion for adjournment.

 

HON WAVEL RAMKALAWAN

Efektivman Mr Speaker mon pe move en motion for adjournment e rezon sa ki Onorab De Commarmond pe dir, nou pa pe kapab fer li la. Se parski nou bezwen la nou napa en Bidze avek nou par egzanp, pour nou kapab al regard sa bann chiffres. Pou regarde ki mannyer keksoz pou bouze.  Sanmenm sa ki mon pe dir se sa adjournment i ava permet ki nou kapab regard tou sa bann keksoz, e apre sa nou retournen – e la nou ankor Mars. Sa Lalwa i sipoze pou pran lefe le 01 Avril, so nou annan nou 2 semenn devan nou.  E pandan sa 2 semenn 1 am sure nou kapab fer sa travay ki neseser.  E apre sa le 01 travay i ganny fer. Mersi bokou.  E alors mon pe move pou en adjournment anba nou Standing Orders. Mersi bokou.

 

MR SPEAKER

Mersi.  Wi i pou proze i pa pou kapab move, nou konnen akoz li ki pe fer sa propozisyon. Ok? So en lot Manm i bezwen …

Bon annou fer nou prosedir byen ok? Nou ankor lo en propozisyon. Ok?  Nou pa ankor ariv lo Mosyon pour nou move pour adjournment.  Mon ava donn laparol Minis pour nou ganny en pe klarifikasyon Minister.

 

MINISTER JEAN-PAUL ADAM

Mersi bokou Mr Speaker.  E mon pou sey donn serten eleman ki mon konnen – i annan serten keksoz ki mon pou bezwen verifye en pe plis.  Mon ava donn serten eleman ki mon konnen.

 

Premyerman enn bann defi ki nou annan akoz nou pe koz en Lalwa devan nou. Mr Speaker mwan mon konpreansyon se ki deba lo Quantum ti sipoze fer moman Bidze in fini agree sa quantum. Baze lo 5 poursan.  Ti’n ganny fini met devan dan Bidze.  E alors sa deba otour quantum i tonm dan Bidze. Mon pe zis eksplike mwan mannyer mon konpran li.  Prezan lot problenm ki vin en problenm drafting e sa mon pa konnen si reprezantan Attorney  Zeneral i kapab dir. Akoz si mon’n konpran konpozisyon se en sonm fix ki across the board.

Me la fason ki Lalwa i ganny drafte, i dir li en poursantaz. E alors si ou fer li en sonm fix son poursantaz i varye.  Savedir i pou vin en senp amannman dan Lalwa – i en ta travay, akoz ou pou bezwen fer plizyer kalite amannman.  Ou kapab fer zis en amannman dan Lalwa.  Annefe i nesesesit  – non sa mon pe dir anba kontrol bann avoka.

Me apre lot eleman Mr Speaker ki enportan ki enportan pour nou gard antet se ki, nou’n vin devan Lasanble avek sa Prozedlwa avek bi pour nou enplimant le 01 Avril e bann payroll in pare lo sa baz. Si nou pou al rekalkile, mon krwar pa si pou posib pou  le 01 Avril.  Akoz sa bann  i annan en travay  defon ki bezwen ganny fer, ki pli laz akoz preparasyon atraver payroll i en keksoz ki enportan. Alor Mr Speaker Lasanble i kapab deside lo sa size, me dan mon konpreansyon en adjournment savedir en delay. Mersi Mr Speaker.

 

MR SPEAKER

Ok.  Mersi.   Onorab Pillay.

 

HON SEBASTIEN PILLAY

Mr Speaker ou a permet mwan en  personal explanation anba nou Standing Orders silvouple? Akoz mon krwar mon bezwen al lo rikord pour state sa la. Ok?

 

MR SPEAKER

Ok. Anba ki Order?

 

HON SEBASTIEN PILLAY

Ok, Mr Speaker anba Order ki relate avek en similar personal explanation at which at anytime en         member i kapab raise en personal explanation. Ok?

Now Mr Speaker toute a l’heure Onorab Lopozisyon ler in fer referans – mon bezwen met sa konteks Mr Speaker.

 

MR SPEAKER

Non. non. Non, non. Non. non. Non, non Nou lo propozisyon for adjournment. Annou stick li propozisyon for adjournment.

 

HON SEBASTIEN PILLAY

Avan ki mon – Mon pe zis beg your leave.

 

MR SPEAKER

Non. Non.  Nou pe al ouver en deba ankor.  Annou – pozisyon ki nou ladan, se i annan en propozisyon pour adjournment.

 

HON SEBASTIEN PILLAY

Ok Mr Speaker an relasyon ek sa Motion for adjournment Mr Speaker.

 

MR SPEAKER

Ale Onorab.

 

HON SEBASTIEN PILLAY

Now Onorab pa ankor move en Motion for adjournment. Now si Onorab pour move a Motion for adjournment, nou’n bezwen ariv dapre nou Order Paper when Motion has been reached on the Order Paper, ki nou pa ankor arive lo Mosyon pour le moman pour li leave a Motion for adjournment.

Dezyenmman Onorab pa kapab move en Motion for adjournment la, unless nou ti’n al dan Committee Stage.  Akoz i kapab zis postpone debate dan Committee Stage. E dapre nou Standing Orders li menm li i pa pour kapab postpone sa debate akoz in deza partisip dan sa deba, alors sa pour bezwen ganny fer par en lot Manm Lasanble. Lo sa Mosyon for adjournment, se sa ki, se pozisyon ki nou ladan Mr Speaker.  Mersi Mr Speaker.

 

MR SPEAKER

Mersi.  Mersi se sa ki mon’n dir in fer en propozisyon, i pa pour kapab move sa Mosyon.  Ok, bon annou … Nou annan lezot travay devan nou.  Annou bouze lo la.  Annou bouze lo la. Mon ava demann the House en Mosyon pour nou al dan Staz Komite, oubyen en Mosyon pour nou skip Komite.  The House.  Onorab Ramakalawan.

 

HON WAVEL RAMKALAWAN

Mr Speaker ki mannyer i ete annou antre dan Komite e zis koman nou ava antre dan Komite, Onorab Afif ki pa’n partisip dan sa deba, i pour move en Motion for adjournment.  Se sa i ava annord. Mersi bokou.

 

MR SPEAKER

Ok. Mersi. Onorab De Commarmond.

 

HON CHARLES DE COMMARMOND

(Napa personn ki derobe Onorab Ferrari.) (laughter)

Mwan pe sizere se sa ki mon pe dir boner.  Ler nou antre dan Staz Komite ti a bon akoz nou annan bann teknisyen la, ti bon – at least – Non  zis en gidans! Mwan mon pe panse zis en gidans. And then  we – Mon  napa problenm apre … Si …

 

MR SPEAKER

Ou’n fer sorti ou pwen taler. Proposer in dir pour dir i pa posib akoz serten. …

 

HON CHARLES DE COMMARMOND

Mwan … Komite i kapab …

 

 

MR SPEAKER

Si Lasanble pa pare pour diskit sa dan Staz Komite i pour en waste of time! Nou annan en lot Bill devan nou. Annou bouz a Staz Komite. Nou bouz a Staz Komite. Ok nou pour bouz a Staz Komite apre nou ava regarde. Motion i ava move e nou ava take it from there. Pa vo lapenn nou pour antre dan en deba, ki finalman i pa pour abouti nanryen.  Ok?

Nou annan ankor de lezot item ki mwan anvi fini ozordi lo Order Paper. Alright? Akoz si nou pour al dan Staz Komite, e finalman i pour al lo adjournment i pa vo lapenn. Plito nou adjourn. Nou pran Mosyon, nou pran Mosyon for adjournment, nou ava regarde ki mannyer the House i vote e nou take it from there. AlrightSo nou annan en Mosyon.

Eski nou annan en Mosyon pour al dan Staz Komite? Okenn Manm ki move Mosyon pour al dan Staz Komite? Onorab Ferrari. Yes Onorab.

 

HON JEAN-FRANCOIS FERRARI

Mr Speaker mon ti a kontan formelman move ki nou antre dan Staz Komite silvouple. Mon ti a demann Onorab De Commarmond pour segonn sa Mosyon.

 

(Interruption)

 

MR SPEAKER

Non.  ou’n entervenir lo sa Bil ou. Ou’n entervenir lo sa Bill.

 

(Interruption)

 

MR SPEAKER

 

Non! Non! Non! Eski – non mon  pa krwar nou Standing Orders i kler lo lekel ki devret move sa Mosyon pour al, oubyen pour skip Staz Komite.  En moman.

 

HON WAVEL RAMKALAWAN

Mr Speaker.  Mr Speaker, ki mannyer keksoz pe ale la i pour senp. Annou fer keksoz senp. Nou’n fini dir ki nou anvi fer! Si zot deside pour zot pa move dan Staz Komite e apre sa pran en vot, nou pour vot kont!  Eski se sa ki nou anvi?  Non!

Alor nou anvi ….

 

(Interruption)

 

MR SPEAKER

Order!  Order!  Bon anba 22 mon krwar i kler. En Manm ki anvi postpone the debate i kapab move en Mosyon.  Ok?

So – me selman i bezwen anba 22 (5)  i kouver osi tou ki en Manm ki’n entervenir i pa kapab move sa Mosyon.  Alright?  So question ki devan Lasanble, ki devan  the House la, eski i annan en Manm ki pour move Mosyon, pour al dan Staz Komite, oubyen pour skip? Wi en Manm pour adjourn debate. Ok? Sorry, sorry.

 

 

 

 

(Interruption)

 

MR SPEAKER

Wi be dan Staz Komite dan Bill i pa fer kler. We have to refer back to 22 ki allow en Manm to adjourn debate for future occasion. Ok? Yes, yes.  Ok? So eski i annan en Manm ki pe move pour adjourn debate? Onorab Simon Gill.

 

HON SIMON GILL

Mr Speaker mersi. Mon trouv i annan en sityasyon – nou dan lenpas.  E mon’n les zot tou koze pa i vre?

Mr Speaker mwan mon annan en senp keksoz pour dir lo sa move ki Leader Lopozisyon in fer. Annou tonm dakor ki LDS ki dan Lasanble Nasyonal, i vin avek en alternative Bill! No. 1.

No. 2. Ki zot fer zot bann propozisyon konkret, lo bann sanzman ki zot anvi fer  dan sa dynamics salary grid, ki devan nou ki kontenir sa Prozedlwa. Si zot fer sa, i pour rezourd en kantite nou problenm e Onorab Ahmed Afif ki en teknisyen tre eksperyanse dan finans, i konnen ki mannyer pour diriz sa loperasyon.

Nou ava ganny en Prozedlwa, ki kontenir tou sa bann keksoz  ki zot anvi i ganny trouve arive avek sa zafer saler dan Sesel1

Mr Speaker, 3enm pwen lo nou kote latab isi Mr Speaker, si i annan en keksoz ki mwan, mon oule anmenn mon partisipasyon ladan, dan sa letap kot nou ete pour annan en lazistis dan kote saler dan sa pei, pour narrow the gap ant sa ki pli o avek sa ki pli ba, I am all for it! 500 percent for it!  Let’s go forward osi lontan ki nou kapab zistifye ki mannyer nou fund  sa Prozedlwa atraver kestyon saler dan sa pei. I am all for it. Mersi bokou Mr Speaker.

 

 

(APPLAUSE)

 

HON SEBASTIEN PILLAY

Annou pa perdi letan ankor. Okenn Manm pe move Mosyon for adjournment? Yes Onorab Pillay, oule move Mosyon?

 

 

HON SEBASTIEN PILLAY

Mr Speaker  ou konnen, zot pas zot letan zis gognard zot kanmarad, zot pa gete ki pe pase kot zot.

Mr Speaker – Mr Speaker,  ou menm ou kapab with your leave, move the House to the Committee Stage.  E then zot ava move zot Mosyon for adjournment si zot anvi. Thank you Mr Speaker.

 

MR SPEAKER

Wi, ok?  Bon ok, si personn pa kapab pran desizyon, mon pa war personn pe lev lanmen to move pour nou al dan Staz Komite. Ok?

 

(Interruption)

 

MR SPEAKER

En moman – en moman, ti annan sa propozisyon pour adjourn ler nou pe dir pour dir en Manm ki –  en Manm e nou bezwen al dan Staz Komite avan. Alright? Mon oule en Mosyon. Annou fer li letap par letap.

En Mosyon pour nou move dan Staz Komite. Alright Onorab Afif.

 

HON AHMED AFIF

Mersi Mr Speaker. Mr Speaker mwan ti a kontan move ki nou al dan en Staz Komite.

 

MR SPEAKER

Okenn Manm ki segonde.  Yes Onorab Ferrari.  Ok.

 

(Off-Mic)

 

 

MR SPEAKER

Koman i mal Onorab!  Mwan mon kapab, me selman  mon pe permet zot akoz en Manm …

 

HON SEBASTIEN PILLAY

Be ou  zis move the House into Committee Stage.  You don’t need a Motion!

 

MR SPEAKER

Wi, wi, wi me prosedir mon kapab. Me the House also i kapab fer. Ok? Sarge annou move Mace nou ava al dan Staz Komite. Wi.

Prosedir i permet ki en Manm i move, oubyen i skip, i move pour skip the Committee Stage. Ok. Nou’n ariv dan Staz Komite. Eski i annan okenn Manm ki pe move Motion for adjournment? Yes Onorab Pillay. Onorab Stephen Pillay.

 

HON STEPHEN PILLAY

Yes Mr Speaker.  Mon move pour nou adjourn lo Komite.

 

MR SPEAKER

Non en moman, en moman. Ou’n koze.  Ou’n pran par dan sa. Wi ou’n pran par dan sa Mosyon.  Ou pa kapab.

Onorab Afif, ou’n lev lanmen. Onorab Afif.

 

HON AHMED AFIF

Mersi Mr Speaker. Anba Order 22,(1) mon ti a kontan move ki the debate in Committee Stage be now adjourn.

 

MR SPEAKER

Ok. Mosyon in ganny move. Okenn Manm ki segonde. Yes Onorab Woodcock.

 

HON WAVEL WOODCOCK

Mwan segonn sa Mosyon Mr Speaker.

 

MR SPEAKER

Ok nou kapab pran en vot. Tou Manm ki an faver Mosyon?

Okenn Manm ki kont? Alright Madam Clerk.

 

MADAM CLERK

Mersi Mr Speaker, 15 Manm an faver, e personn kont. Mersi.

 

MR SPEAKER

Bon mon krwar the ayes have it.  Ok? Savedir Mosyon in ganny aprouve e deba i lo sa Bill i ganny adjourn e Lasanble i ava fer le neseser pour antre an diskisyon avek Minister konsernen. E nou ava retournen. Petet eski nou kapab donn en dele letan pour nou retournen akoz sa Bill ti pe propoze ki pran le fe le 01 Avril. Yes Onorab Ramkalawan.

 

HON WAVEL RAMKALAWAN

Mr Speaker premyerman nou pa pour anmenn okenn Private Members Bill because this will be a financial Bill. Nou ti pou bezwen premyerman ganny permisyon, lotorizasyon Minis Finans retournen. E Minis li menm li in dir – mon mazinen pour dir in fer en fot pour li dir payroll in pare, parski payroll Mars ki’n pare  -non pa payroll Avril ki pou pran konsiderasyon sa bann logmantasyon.  So there will be no Private Members Bill lo nou kote. Parske en Private Members Bill dan sa zar i pour al tonm dan Avril pandan recess by the time nou swiv tou bann prosedir. Mwan mon ti ava dir ki before the end of the week – nenport ler ki lo kote Gouvernman i pare. Nenport ler nou pare pour nou zwenn pour nou diskite avek zot.

So boul i antyerman dan zot kort e nou, nou’n fini, nou’n fini travay lo serten propozisyon ki nou ava kapab met devan. Sanmenm sa ki apel nonsense.

 

MR SPEAKER

Eski diskisyon pour fer avek en Komite Lasanble oubyen the whole House? Ok eski tou le Manm i oule asiste. Napa problenm. Ok.

 

HON WAVEL RAMKALAWAN

Nou kapab parey nou fer pour plizyer. Donn en dat e aprezan nenport Manm ki le vin asiste i vin asiste.  E nou, nou ava -mon plis ki sir lo kote laba zot pour annan en group dimoun.  E lo nou kote osi tou nou annan nou bann dimoun pa nou tou ki pour vini. Mersi. Be selman donn dat avek ler.  E  we will do the work. E nou ava fer sir ki le 01 Avril parey in ganny propoze – le 01 Avril Lalwa i ava vin an aplikasyon.  Mersi bokou.

 

 

MR SPEAKER

Bon Zedi pa pou posib.   Me nou ava organize Vandredi.  Tou Manm ki oule attend.  Vandredi. Prezan nou ava regard Minister Finans osi, bann zofisye Minister Finans avek Minis Adam, Madam Esparon, Mr Afif and so on.

Nou ava fer meeting isi 9er bomaten. Ok. E ankor i pour depan lo lespas. Nou annan Committee Room 3 ki en pti pe pli gran. Me nou ava organize. Si fodre nou set up dan Member’s Lounge akoz nou annan en problenm avek lespas. Ok?

Non dan Chamber nou bezwen fer li en normal sitting. Nou bezwen fer li en normal sitting pour nou kapab meet dan Chamber. Ok, mwan ava. So i end lo sa Bill. Deba in ganny adjourn e nou ava fer le neseser. E mon ti a kontan demann bann Manm Lasanble ki annan bann propozisyon, bann sizesyon, met pare pour nou met devan e nou ava kapab diskit dan sa rankont pour nou kapab next week omwen, nou kapab repran sa Bill.   Ok?  Mon ava demann Sergeant pour retourn Mace pour nou retourn dan Committee of the whole House. Yes Onorab Pillay.

 

HON STEPHEN PILLAY

Mr Speaker prenan kont ki nou’n fer en desizyon lo sa size mwan ti pe propoz avek ou prenan lenportans sa Lalwa pour tou salarye Seselwa, why don’t we go into a special sitting ki nou diskit sa Prozedlwa dan Lasanble e finaliz devan piblik Seselwa, ki personn pa ava ganny akize avek lipokrizi e nou tou nou ava la e piblik i ava tande kwa ki nou pe diskite.  Sa i en propozisyon ki mon oule met devan before the House. Mersi Mr Chair.

 

MR SPEAKER

Ok. Mon krwar en tel propozisyon i bezwen vin atraver si nou anvi debat li koumsa atraver en Mosyon.  Ok? La nou pe diskit en Bill spesifik.  Me si nou pe koz pour nou tous saler, pour nou koz, saler an zeneral, en Manm i bezwen move en Mosyon.

 

HON SEBASTIEN PILLAY

Mr Speaker mon oule move en Mosyon pour ki Lasanble i fer en Special Sitting Vandredi pour nou diskit sa Prozedlwa ki konsern Public Service Salary (Amendment) Bill Mr Speaker.

 

MR SPEAKER

Ok. Bon i annan en Mosyon ki’n ganny move la from the floor.

I pe…

 

HON WAVEL RAMKALAWAN

Wi Onorab Pillay i kontan koz Standing Orders. Dir nou anba ki Order ki in move sa silvouple?  Ed nou.

 

MR SPEAKER

Gid nou Onorab Pillay.

 

HON SEBASTIEN PILLAY

Mersi Mr Speaker. Zisteman parey taler nou’n vwar pour dir nou Standing Orders i silence lo serten keksoz, zisteman lo sa enn osi i silence.

E mon pour servi menm provizyon ki nou’n servi taler, sa silans dan nou Standing Orders pour move en Mosyon ki pour nou fer Special Sitting. Mersi Mr Speaker.

 

MR SPEAKER

Ok. Yes Onorab Ramkalawan.

 

HON WAVEL RAMKALAWAN

Mr Speaker mon’n demann sa se parski this is not the procedure! In deza annan presedans pour Special Sitting of the Assembly. E fodre ki well letan sa ti ganny fer ki nou annan koman presedans.

E parey nou konnen ki pour dir presedans i ganny swiv dan Lasanble. Sete the two leaders ki ekrir Speaker e ki demann Speaker pour en Special Sitting. E prosedir ki ti ganny swiv Onorab, sa letan Onorab Potter avek mwan ti annan bann problenm pirat, alors nou ti demande pour ki i annan en Special Sitting. Sa ki Onorab Pillay pe dir malgre ki Standing Orders i silans lo la i pa pe swiv en presedans ki’n deza arive.

 

MR SPEAKER

Ok. Mwan mon ruling lo la met – put the Motion down in writing e fer le prosedir through your leader, through Leader of Government Business pour ekrir Lofis Speaker.  Mwan mon ava pran en ruling lo la. Ok? Annou put the subject aside. Nou annan lezot keksoz devan nou, lezot travay.

Mon ava remersi Mrs Esparon e Mr Afif pour nou kapab pran – Bon an vi letan ozordi  mon krwar ki nou pour bezwen ale san pran en break ok? Akoz mon anvi ki nou pran deza Minis ek son delegasyon pour Tourizm in ganny alerte, bann zofisye in komans arive. Mwan anvi pran sa PNQ osi tou.

So nou pour pran 2enm Bill – nou ava eskiz Mrs Esparon avek Mr Afif parmi nou. E nou ava pran 2enm Bill  ki devan nou.

 

(MRS ESPARON AND MR AFIF WAS EXCUSED FROM THE H0USE)

 

 

MR SPEAKER

Bon mon krwar nou ok akoz Attorney Zeneral pa la me nou annan son reprezantan –  Mr Victor Pool. Yes Onorab Pillay.

 

HON SEBASTIEN PILLAY

Mr Speaker mon ti’n sinyal ou anba Order 35 mon ti le fer en personal explanation 35(2) apre serten komanter ki’n ganny fer?

 

MR SPEAKER

Ki Standing Order?

 

HON SEBASTIEN PILLAY

35(2) Mr Speaker.  35(3) i dir mon koumsa not withstanding in the arrangement mentioned in Standing Order 24(2), ok.  ‘The Speaker may at any time allow Member to offer an explanation’.  Mon pe al anba sa Lord Mr Speaker.  Si ou dir mon pa pou kapab ofer mon leksplikasyon then mon ava defer to  ou ruling e mon pa ava ofer mon leksplikasyon.  Be ou’n deza kree presedans avan-

 

MR SPEAKER

Ki Order ankor?

 

HON SEBASTIEN PILLAY

35(3) Mr Speaker.

 

MR SPEAKER

35(3).  The Speaker ‘’may.’’

 

HON SEBASTIEN PILLAY

Mon’n met li at your

 

MR SPEAKER

Wi be nou’n fini deside.  Nou pe pran the next Business. Ok?  I pa the Speaker ‘’shall.’’  Si ‘’shall ‘’mon ti pou oblize.

 

HON SEBASTIEN PILLAY

Mon’n defer to your ruling mwan.  Si ou dir mwan non mon pa pou fer.

 

MR SPEAKER

Non nou pou kontinyen avek Business.  E the next item lo Order Paper i sa 2enm Bill, Public Persons Declaration of Assets Liabilities and Business Interest.  Bill 2019, Bill No. 3 of 2019.  Mon ava ganny en Mosyon pou Second Reading?

 

HON CHARLES DE COMMARMOND 

Mersi Mr Speaker.  Mr Speaker anba Order 64(2) nou Standing Order mon oule move ki the Public Persons Declaration of Assets Liabilities and Business Interest Bill, 2019 i ganny lir en Dezyenm Fwa.

 

MR SPEAKER

Mersi Onorab De Commarmond.  Okenn Manm ki segonde?  Onorab Simon Gill.

 

HON SIMON GILL

Mersi Mr Speaker.  Mosyon i ganny segonde.  Mersi.

 

MR SPEAKER

Mersi Onorab Simon Gill.  Bon mon ava envit Minis pou entrodwir Bill ki devan nou.  Minis.

 

MINISTER JEAN-PAUL ADAM

Mersi bokou Mr Speaker e bonn apre midi Mr Speaker, tou bann Onorab Leaders dan Lasanble, bann Manm Onorab e tou dimoun ki pe swiv nou deba.

Mon annan plezir pou entrodwir sa lamannman dan Lalwa Public Persons Declaration of Assets Liabilities and Business Interest Act 2016.  Sa Lalwa ti ganny entrodwir an Desanm 2016, pou met an plas en sistenm kot Prezidan, Vis- Prezidan, Speaker Lasanble Nasyonal, Minis Dezinyen, Minis, Dirizan Lopozisyon dan Lasanble Nasyonal, Dirizan Zafer Gouvernman dan Lasanble Nasyonal, Depite Speaker bann Manm Lasanble Nasyonal, Mer Lavil Victoria e bann Konseye Distrik zot ti pou fer deklarasyon zot byen, zot det e zot lentere biznes avek en Komisyoner apwente anba sa Lalwa.

En tel Lalwa ti egziste depi avan.  Me dan sa nouvo Lalwa ti permet akse par piblik  an zeneral.  An 2016 Lalwa ti egzize ki sa Komisyoner ki ti pou ganny apwente, ti devret en dimoun ki’n deza travay konman en Ziz Lakour Siprenm oubyen en Ziz Lakour D’Apel, oubyen en dimoun ki ti annan kalifikasyon pou  ganny apwente konman en Ziz.  Ler sa pos Komisyoner ti ganny pibliye malerezman nou pa’n resevwar okenn laplikasyon.  Alor an Zilyet 2017 Gouvernman ti propoze, ki sa  fonksyon Komisyoner Deklarasyon ti kapab ganny fer par Chairman POEC oubyen ki nou dir an Kreol, Komisyon Etik pour Zofisye Piblik.

Me apre deliberasyon dan sa  Lasanble a sa moman Lalwa ti ganny amande, pou ki sa Komisyoner ti kapab en dimoun ki ti’n deza travay avek entegrite e enparsyalite dan en o pos dan Gouvernman Sesel oubyen anba Konstitisyon, oubyen dan en profesyon ou en vokasyon.

Ankor enn fwa malerezman nou pa’n resevwar laplikasyon neseser e alor ozordi nou pe propoz ankor ki sa fonksyon Komisyoner i ganny donnen avek Komisyon Etik bann Zofisye Piblik.

Alor sa Lamannman ki Gouvernman pe propoze ozordi, i konsern retir Seksyon 3 (4) dan Lalwa e ranplas li avek en nouvo Seksyon 3(4) ki pou lir comme swivan e mon pou lir li an Angle ;  ‘‘In the absence of the availability of a suitable person under subsection 4 the Chairperson, the Public Officer Ethics Commission, may be appointed as the Commissioner ex-officio.  And on  such appointment he or she shall  be eligible to receive such allowances as may be determined by the President’’.

Mr Speaker Gouvernman i panse ki sa fonksyon Deklarasyon fer par bann dimoun ki okip pozisyon politik pli o dan larepiblik i en fonksyon ki tre enportan dan konteks la demokrasi, latransparans, prensip rann kont e bonn gouvernans e mon rekomann avek sa Lasanble  ki i aprouv sa lamannman dan Lalwa pou ki nou kapab konmans enplimant sa lalwa o pli vit posib.

Enn bann provizyon kle sa Lalwa se pou kapab verifye par bann Manm piblik an zeneral, bann byen ki en zofisye piblik i annan e asire ki sa dimoun pe azir an konformite avek meyer standar etik e bonn gouvernans posib.  Mersi Mr Speaker e mersi tou bann Manm Onorab pou siport sa propozisyon pragmatique, ki pou permet nou met an aplikasyon sa Lalwa.  Mersi Mr Speaker.  Mersi Onorab.

 

MR SPEAKER

Mersi Minis.  Bon deba i ouver lo Merit e Prensip zeneral lo sa Bill ki devan nou, Public Persons Declaration of Assets Liabilities and Business Interests Bill, 2019.  Okenn Manm i oule entervenir?  Bon nou zis welcome back Mr Afif.  Mon prezant mon leskiz Mr Afif me ou pa’n lo mon  lalis ou pa’n feature alors mon’n fer ou ale.  Me welcome back.  Okenn Manm i oule entervenir?  Yes Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker nou bezwen, bezwen zis dir petet sa Bill li menm in enn sa bann Bill, ki ozordi i pe fer ki piblik tanzantan i pe demann kestyon.  E mon krwar ki i enportan pou dir ek piblik ki sa zafer Public Declaration Of Assets, sa i en keksoz ki nou’n pase depi 2016.  Depi 2016 nou’n pas sa Lalwa, me i zis ki letan in advertise napa personn ki’n pare pou vin devan pou zwe sa rol Komisyoner.  E pour sa, nou politisyen nou’n ganny bate.  Nou’n ganny koud roten !  E konmsi pou dir avek dimoun ki in annan serten Lamannman osi tou ki’n sey fer, pou sey redwir ensidswit be la pe sey ankor dan en lot fason.

 

E ki nou lo nou kote nou napa okenn problenm pou deklar, pou fer deklarasyon assets e tousala me mon ti ava demande ki letan parski se CAA ki zot bezwen fer laplikasyon avek pou zot vin devan, ki CAA ti ava bon konmsi si zot fer en lot round of – konmsi appeal pou dimoun vin devan.

Avan ki menm si la i dir klerman lekel ki kapab ranplase, me just in case fer en dernyen appeal pou dimoun ki anvi en vacancy, pou dimoun vin devan.  E ki nou konnen ki  poudir si personn pa vini la aprezan sa i tonm, nou kapab pran sa provizyon ki’n ganny fer.

Zis en pti keksoz letan Minis in mansyonn – parski mon krwar i enportan pou nou konmans ganny tou bann keksoz drwat – kler.  Sa tit ki ou donn mwan la i pa mon titI’m not the Leader of the Opposition in the National Assembly.  Anba Konstitisyon I am the Leader of the Opposition. Full Stop. 

Alors petet si dan son mon ti pe sey rod son mother act.  Si dan son mother Act in met Leader of the Opposition of the National Assembly petet ti ava bon pou nou fer sa koreksyon once and for all.  E apre sa an menm tan osi pou petet dan son Schedule, petet dan son Schedule pou swiv son the current Order of precedence.  Pou ki tou dimoun i ganny mete parey zot ete.  Mon krwar sa de pti amannman i kapab ganny fer san ki nou al  dan gran Committee Stage.

Avek sa Mr Speaker, nou pare pou nou pran en vot pou nou siport sa Bill e nou pa ni pou demande pou al dan Committee Stage, ni pou al fer adjournment nanryen e nou kapab larg Minis apre sa.  Mersi bokou.

 

MR SPEAKER

Mersi Onorab.  Mon krwar ou sizesyon ki CAA i fer lot round i pa  sanz  nanryen ladan.  I kapab fer round, i kapab ganny en dimoun.  Be dan labsans availability – en suitable person parey i pe dir ladan sa dimoun, sa Chairperson i ganny – i vin sa CEO.  Ok?  Okenn lezot Manm ki oule -?  Yes Onorab Simon Gill.

 

HON SIMON GILL

Mersi Mr Speaker.  Mr Speaker mon pou ekstrememan bref.  Lo sa Prozedlwa ki devan nou, lo sa kote latab nou napa okenn obzeksyon e nou swete ki safwasi nou ava kapab bouze e enplimant konteni sa Prozedlwa parey in ganny defini.

E si pli tar i annan bann lamannman ki ava vini nou ava fer bann lamannman, me mon demande mwan osi ki konman par sa legzersis pou ganny bann dimoun pou vin devan; ki Lenstitisyon konsernen probableman i servi televizyon, i servi radyo, i servi bann lezot mwayen kominikasyon, pou donn en serten form ledikasyon, leksplikasyon lo kwa egzakteman ki zot pe rode.  Probableman sa i ava pli enteres bann manm piblik, i ava vin devan e ki pou finalman sa lenstitisyon i ganny formen, formalize e nou kapab bouz devan.  Mon soumet ki lo nou kote latab isi nou pou vot an faver sa Prozedlwa Mr Speaker.  Mersi bokou.

 

MR SPEAKER

Mersi Onorab Simon Gill.  Bon mon ava envit Minis pou fer son konklizyon, klarifikasyon.  Minis.

 

MINISTER JEAN-PAUL ADAM

Mersi bokou Mr Speaker.  E mersi Manm Onorab pou zot sipor pou sa Prozedlwa.  Mon krwar se ki konsern sizesyon ki CAA i kapab fer ankor en round pou ganny en aplikasyon ki petet bann dimoun ki kapab enterese i pa en problenm.

E nou devret ankouraz dimoun atraver nou Lasanble ozordi, pou nou rekomande ki bann dimoun ki enterese i met zot laplikasyon devan, akoz sa i meyer lapros ki nou ti kapab pran.  Me lamannman dan Lalwa i permet ki Lalwa i kapab vin operasyonnel, si nou pa ganny en dimoun.  Alor nou pou al dan sa direksyon.

E osi zis lo pwen ki’n leve lo tit Leader Lopozisyon, mon pou klarifye ki dan Lalwa li menm li mon krwar i korek.  E mon eskiz mwan si dan mon ladres, mon’n mal servi sa terminolozi.  Mersi Mr Speaker.  Mersi Onorab.

 

MR SPEAKER

Mersi Minis.  Bon nou pou pran en vot lo Merit e Prensip sa Bill ki devan nou.  Mon ti ava demann tou Manm ki an faver?

Okenn Manm ki kont?  Madanm Clerk?

 

MADAM CLERK

Mr Speaker 23 Manm in vot an faver e personn kont.  Mersi.

 

MR SPEAKER

Mersi Madanm Clerk.  Nou kapab ganny en Formal Second Reading? 

 

MADAM CLERK

A Bill of an Act to Amend the Public Persons Declaration of Assets Liabilities and Business Interests Act of 2016.  Mersi Mr Speaker.

 

MR SPEAKER

Mersi Madanm Clerk.  Parey Onorab Sebastien Pillay in fer sorti Bills Committee pa’n vwar nanryen mal avek sa amannman e napa okenn amannman osi tou – even minor amendments ki’n ganny sizere.  Eski bon Leader Lopozisyon in mansyonnen ki i pa bezwen al dan Staz Komite.  Be eski nou kapab ganny en Mosyon pou skip Staz Komite?  Onorab Simon Gill.

 

HON SIMON GILL

Mr Speaker.

 

MR SPEAKER

Non MotionMotion for Committee.  Wi mon osi mon’n konfiz en pti pe taler.  Motion to skip Committee Stage.

 

HON SIMON GILL

Korek Mr Speaker. Mon pe move ki sot Staz Komite e nou soumet Bill pou nou bouze.  Mersi.

 

MR SPEAKER

Mersi Onorab.  Okenn manm ki segonde?

 

HON SEBASTIEN PILLAY

Mersi Mr Speaker.  Mon segonde ki nou sot Staz Komite.

 

MR SPEAKER

Mersi Onorab Sebastien Pillay.  Nou pran en vot.  Motion to skip Committee Stage.  Tou Manm ki  an faver?  Okenn Manm ki kont?  Re fer kont. Ok?  Tou Manm ki an faver pou sot Staz Komite?  Show of hands?

Okenn Manm ki kont?

Madanm Clerk?

 

MADAM CLERK

18 Manm Mr Speaker ki’n vot an faver e personn kont.  Mersi.

 

MR SPEAKER

Motion approved.  Bon nou ava – yes Onorab Ramkalawan.

 

HON WAVEL RAMKALAWAN

Mr Speaker zis mon pa konnen Minis pa’n respond lo la ki son Order of precedence dan son Schedule ,vi ki nou pe ki konmsi i ava vin 4 – Designated Minister; 5 Leader of the Opposition – 6 Leader of Government Business in the National Assembly apre Ministers ensidswit.

 

MR SPEAKER

Mon krwar lo i annan en updated NOP ki nou’n gannyen from Foreign Affairs ki Lasanble osi pe swiv.  Petet ki – mon ava demann ek Sekretarya pou sirkil en kopi le de lofis.  Mon krwar in aranze sa Onorab Ramkalawan en?  In aranze.  Mon ava demann lofis Clerk i ava sirkil sa NOP list kot le de lofis.  Ok?  Bon an vi ki nou napa okenn amannman nou’n sot Staz Komite mon ava demann en Mosyon for Third Reading.

 

HON CHARLES DE COMMARMOND

Mersi Mr Speaker.  Anba Order 71(1) Standing Order mon oule move ki the Public Persons Declaration of Assets Liabilities and Business Interest  Bill, 2019 i ganny lir en Trwazyenm Fwa.

 

MR SPEAKER

Mersi Onorab De Commarmond.  Nou kapab ganny en Manm pou segonde?  Onorab Simon Gill.

 

HON SIMON GILL

Mosyon i ganny segonde Mr Speaker.  Mersi.

 

MR SPEAKER

Mersi Onorab Simon Gill.  Nou pran en vot.  Motion for Third Reading.  Tou Manm ki an faver? Okenn Manm ki kont?

Madanm Clerk?

 

MADAM CLERK

Mr Speaker 17 Manm an faver e personn kont.  Mersi.

 

MR SPEAKER

Mersi Madanm Clerk.  Nou kapab ganny en Formal Third Reading?

 

MADAM CLERK

Mersi Mr Speaker.  This Act may be cited as the Public Persons Declaration of Assets Liabilities and Business Interests (Amendment) Act of  2019.  Mersi Mr Speaker.

 

MR SPEAKER

Mersi Madanm Clerk.  Savedir Bill in ganny aprouve par Lasanble Nasyonal.  Bill in pase.

Bon avek sa mon ti a kontan remersi Minis Adam ki’n avek nou depi bomaten dan Lasanble e Mr Mohammed Afif e osi tou Konseye Legal dan Biro Attorney Zeneral Mr Victor Pool.  Mersi bokou e nou ava eskiz zot parmi nou.

 

 

(MINISTER ADAM AND HIS DELEGATION WAS EXCUSED FROM THE HOUSE)

 

MR SPEAKER

Mon a osi demann Parliamentary Reporter pou apel Minis responsab pour Tourizm, Sivil Lavyasyon,  Por La Marin avek son delegasyon.  Bon nou pou pran sa PNQ e nou pou fer nou mye pou nou kapab fini pli tar 5.30. Mon anvi nou al sa staz ki nou fini PNQ, akoz otan posib nou osi tou nou evite ki nou disrupt Cabinet meeting.

I en keksoz ki nou’n sey swiv dan lepase.  I annan moman ki nou pa’n kapab me nou pou sey fer nou mye pou nou pa disrupt Cabinet meeting e demen i annan en Cabinet meeting.  E demen i annan  en Cabinet meeting.

Petet osi mon ava averti bann Manm pou ki Sekretarya pou fer sorti  en Revised Order Paper pou demen bomaten, an vi ki Lasanble in fini ganny enformen ki lo kote US son nouvo Manm ki pou ranplas Mr Basil Hoareau ki nepli en Manm Lasanble, pou pran son Oath of Allegiance demen bomaten e i pou pran son plas dan6 Lasanble Nasyonal.

Bon mon ti a kontan dir bonzour e welcome Minis Didier, Minis ki responsab pou Tourizm, Lavyasyon, Sivil Por e La Marin.  Minister i ganny akonpannyen par Mr Allen Renaud ki Sekreter Prensipal pou Lavyasyon Sivil Por e La Marin.  E osi akonpannyen par Mr Michael Berlouis ki Chief Financial Officer CFO kot Air Seychelles.  Minister avek ou delegasyon bonn apre midi e welcome dan Lasanble Nasyonal.  Prezan mon ava donn laparol Onorab Ramkalawan pou son Private Notice Question.  Onorab.

 

HON WAVEL RAMKALAWAN

Mersi bokou Mr Speaker.  Bonn apre midi Minis ek ou delegasyon.  Mr Speaker eski Minis responsab pou Lavyasyon Sivil i kapab dir sa Lasanble :

  1. Ki pozisyon finansyel egzakt Air Seychelles baze lo dernyen Rapor Odite sa lakonpannyen ?
  2. Vi ki Air Seychelles ti ganny restriktire pou fer li pli byen an 2018, akoz ki Gouvernman prezan i bezwen donn Air Seychelles en pli gro sibvansyon ziska R100milyon par an sa prosen 5an?  Eski Minis i kapab donn detay lo ki mannyer sa larzan i ekspekte ganny partaze e itilize?
  3. E finalman ki kontribisyon ki Etihad konman en aksyonner 40poursan dan lakonpannyen pe fer pou redres sa sityasyon ?

Mersi bokou Mr Speaker.

 

MR SPEAKER

Mersi Onorab. Zis avan mon donn Minis la parol mon ti a kontan rekonnet prezans CEO Air Seychelles Mr Remco  Althius ki dan Galeri e ki’n vin asiste sa Sesyon PNQ. Welcome Mr Remco and the National Assembly welcomes you here. Thank you.  Minis.

 

MINISTER DIDIER DOGLEY

Mersi Mr Speaker.  Bonn apre midi tou bann Onorab e tou bann dimoun ki pe ekoute dan lakour.  Mr Speaker Air Seychelles depi liberalizasyon nou lespas aeryen, in pas li dan bann sityasyon finansyel ase difisil.  Konpetisyon avek bann lezot gran lakonpannyen aeryen ki annan plis resours in vreman feros.   Gouvernman in fer e i ankor pe fer tou sa ki i kapab pou ki nou airline Nasyonal i reste dan lezer.

Rezon prensipal akoz Gouvernman i pe met sitan zefor, sete ki akoz i konnen ki san Air Seychelles nou pei ki depan bokou ekonomikman lo touris, i pou tre vilnerab.  Zistwar in montre nou, ki ler nou depann lo bann Lakonpannyen Aeryen etranze nou napa garanti ki zot pa pou kit nou, ler i annan problenm.

An plis menm ozordi ler nou regard statistik 2018 sorti kot SCAA, nou airline Nasyonal i ankor pe anmenn 17poursan ou 52, 155 viziter.  Sa i fer ki i 2enm apre Emirates ki li i anmenn anviron 32poursan bann pasaze ki debark isi.  Alors i kler ki nou pei i bezwen sa kontribisyon enorm ki Air Seychelles pe fer e pe kontinyen fer dan nou lekonomi.

Konsernan premye kestyon Onorab Wavel Ramkalawan, baze lo dernyen Rapor Odit Air Seychelles ki pou lannen 2017, reveni total pou sa lakonpannyen ti $131milyon.   I ti fer en pert operasyonnel $8.2milyon ek en pert net ki $14.3milyon.  Sa i apre ki sa $34milyon ki Etihad ti’n kontribye ti’n ganny enkli dan son Bidze.

Mr Speaker pou reponn 2enm kestyon Onorab, i enportan pou konpran ki menm  si bann transformasyon Air Seychelles ti konmanse an 2018,  son plan pou ganny enplimante pandan en peryod 5an.  Alors an 2018 nou’n vwar selman konmansman sa plan 5an, e i normal ki nou pa pou vwar bann benefis e rezilta a sa pwen ki.  I osi enportan pou fer resorti ki Air Seychelles i ankor annan bann kou ki in akimile pandan sa bann dernyen lannen, ki osi la ki i pou bezwen fini peye.  Sa i bann penalities lo lease sa bann A330 e loan ki in pran.

Aprezan mon ti a voudre koz lo sa plan 5an.  Sa plan son lobzektif prensipal, se pou transform Air Seychelles pou fer li vin en Lakonpannyen Aeryen rezyonal olye enn enternasyonal.  Sa i ava redwir bann risk finansyel, akoz bann kou operasyonnel, pou bokou pli ba.  Me Air Seychelles atraver son bann partner, a kapab kontinyen deservi Sesel dan son rol konman nou Lakonpannyen Aeryen.

Premye faz sa plan ki’n fini enplimante, pandan peryod 2018 ziska Zilyet 2018 i koumsa :

-Retir sa de Air Bus A330 -200 ki ti pe fer bann vol enternasyonal e transfer zot avek Fiji Airways.

-Siny en nouvo lease pou en avyon A3320neo avek CBD Aviation pou ranplas sa bann avyon A330 – 200 ki pe ganny servi lo larout  rezyonal.

– Konplet sa legzersis pou revwar bann Saler e Scheme travay bann anplwaye, pou asire ki bann staff Air Seychelles i byen ganny rekonpanse e zot vin prodiktiv.

-Redwir la kantite twin otters pou fer li sorti 6 pou vin 5 e konklir lavant enn sa bann twin otters.

-Entrodwir en nouvo baggage Policy pou ogmant reveni.

-Revwar e asiste pri bann servis vol domestik e re negosye pri catering.

-Lokaliz bann post e donn training bann staff pou siport sa transformasyon.

Dan son 2enm faz ki in konmanse an Zilyet 2018, e pou ale ziska Zen 2019, Air Seychelles pou konsantre lo team building efikasite, redwir kou e otomizasyon.  La nou pou vwar bann sanzman dan lafason ground handling i ganny fer.  Plis lanfaz pou ganny mete lo team work,  efikasite e prodiktivite.

I pou osi finaliz Lagreman pou lease sa 2enm avyon A320neo.  E plis lanfaz pou ganny mete lo otomatiz bann prosesis e servis.

Plis bann prosesis travay ki annan pou fer avek technical, avek flight operations, crew e flight planning, pou ganny fer entern par Air Seychelles staff.  In osi anons bann sanzman lo bann larout kot i pe aret fer vol par egzanp Abu Dhabi, kot i ti pe perdi larzan.  E fer plis vol lo bann larout ki profitab.

Apre Zen 2019 la Air Seychelles i ekspekte, antre dan son dernyen faz, kot la nou pou vwar plis latansyon pe ganny mete lo ogmant reveni e redwir loperasyon.

Kapasite seat lo bann A320neo i pou plis ki 36poursan e plis ki bann avyon ki nou pe servi konmela, e i pou kapab anmenn plis kargo.  Alor sa ki mon pe fer resorti se ki travay avek Air Seychelles i kontinyen, pou li kapab enplimant sa plan e pou bezwen sipor finansyel bann aksyonner ki Gouvernman Sesel e Etihad.

Sa kontribisyon Gouvernman Sesel 6milyon Dolar Ameriken, pandan  5an pou ganny servi pou siport Air Seychelles pou li annan ase cash-flow, pou li kapab kontinyen fonksyonnen.

Pandan sa 5an, sa larzan pou ganny servi pou pey bann penalties lo lease  A330 ki nou’n rann avan ler e sa i apepre $222mil par mwan – par avyon, ziska Zilyet 2020 e en lot ziska Fevriye 2021, ki fer en total $10milyon.  E $3.75milyon pou ganny peye ki bann lentere lo avyon ki Air Seychelles in pran –  lo bann loan ki Air Seychelles in pran e ler ou add li an tou i pou ariv apepre 18.7milyon.

Etihad konman en aksyonner in deza kontribye $35milyon an 2017 e $30milyon an 2018,  a bann moman ki ti pli kritik ki Air Seychelles ti bezwen sa lentervansyon.  Nou, nou pa’n kapab fer li akoz nou pa – ti napa sa bann sonm larzan pou peye a sa moman.  Se sa rezon akoz ki nou aprezan nou pou fer kontribisyon atraver $6milyon par lannen, pou sa 5an ki pe vini.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker mon ti ava kontan premyerman demann Minis in mansyonn ground handling.  Zot pou sanze.  Eski i kapab dir avek nou egzakteman kwa ki pou sanze dan lafason ki zot pe fer ground handling?  Eski Air Seychelles ki pou kontinyen kontrol ground handling oubyen eski zot pe mazin donn ground handling en lot lakonpannyen?

Dezyenmman eski Minis i kapab dir avek nou ki  sonm total ki Air Seychelles i drwa Etihad la a ler- la konmsi kot nou pe koze?  Ki kantite ki i drwa?  E finalman Mr Speaker be mon ti panse ki poudir depi 2018 Air Seychelles letan Minis avan ou ti vin fer deklarasyon dan Lasanble ki poudir depi sa letan zot ti’n fini re-strategize e tou bann zafer letan zot in met bann travayer deor, pou zot koup lo bann etranze ki reste Eden Island, pou zot kou tousala ki poudir zot ti’n fini pozisyonn zot konman en regional Airline e ki Air Seychelles ti sipoze pe fer byen!

Parski se sa ki nou’n tande sak fwa ki zot in vin lo televizyon.  Me sa ki Minis in dir eski Minis i kapab eksplik nou en pe kwa egzakteman ki pa’n ki pa’n mars byen?  Oubyen kwa ki zot pa ti pe dir nou ki souden zot bezwen R100milyon pa an?  Mersi bokou.

 

MR SPEAKER

Mersi Onorab.  Minis.

 

MINISTER DIDIER DOGLEY

Mersi Mr Speaker.  Mr Speaker sa ki mon ti pe koz lo la ler mon ti pe koz ground handling, i basically ti annan en restriktirasyon ki ti pe ganny fer dan Air Seychelles pou restriktir lafason ki zot operate ground handling lo Airport.

Apre osi ti annan serten difikilte avek bann travayer eksetera, akoz i annan, ki pa ti pe turn up pou travay e Air Seychelles ti come up avek en new Scheme avek incentive, pou donn bann travayer, pou fer sir par egzanp si zot pa vin – si zot vin travay parey i devret zot ganny zot en bonus lafen-di-mwan.  E si zot pa vini definitivman zot pa ganny sa bonus.   I basically se sa ki mon ti pe koz lo la.

Now  ou kestyon mon konnen poudir ou pe fer referans avek ground handling, poudir nou annan plan ki Air Seychelles pe devlop sa ki nou apel en subsidiary –  Airport engineering services – equipment services ki pou en subsidiary Air Seychelles.  Me sa lakonpannyen i pa pou hold sa license pou fer ground handling.  Se Air Seychelles ki pou kontinyen fer ground handling.  Akoz se Air Seychelles ki’n meet bann minimum requirements pou li fer ground handling.

2enm keksoz konsernan konbyen larzan ki Air Seychelles i dwa Etihad, mon napa sa soz, mon’n demann Mr Berlouis pou li crunch the numbers i a donn mwan bann figures.

Konsernan Air Seychelles 2017, wi an Desanm si oule sa 2enm half 2017, ti annan bann travay ki ti ganny fer akoz Air Seychelles management ti’n vwar poudir sa bann flight, ki zot ti pe fer pe al bann long haul, savedir bann gran zistans enternasyonal, poudir ti nepli soutenab pou Air Seychelles  -zot ti perdi bokou larzan.

E pandan sa peryod ti annan bann diskisyon ki ti’n ganny fer pou fer Air Seychelles vin en regional airline.  Sa i bann desizyon ki ti ganny pran an 2017.  E se sa ki mon predeseser, mon krwar Minis Loustau-Lalanne ti vin eksplike isi dan Lasanble.

Me solman ler ou pran bann desizyon parey bann keksoz ler ou annan en laliny aeryen, i pa bann keksoz ki ou kapab sanze overnight.  I pran letan pou ou kapab enplimant sa plan.

E se sa ki mwan mon’n eksplike, poudir Air Seychelles wi i annan son plan me i an trwa faz ki i pe enplimant sa bann plan.  E senpleman se apre ki i pou’n at least enplimant en bon pe  dan sa bann diferan aksyon ki in – ek bann aktivite ki mon’n mansyonnen, ki la ki ou pou konmans vwar bann rezilta – ki sa bann  – target si ou le ki’n ganny set pou ganny achieve.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mr Speaker, mon anvi reste lo ground handling.  Mon pa pe ganny en konpran egzakteman ki Minis pe dir nou la.  Parski i kler ki poudir i annan en zafer ki pe sorti dan lanmen Air Seychelles.  Ou pe koz – Minis pe koz lo en subsidiary ki pou tonm anba Air Seychelles  – ki pou – eski ou ti ava kapab eksplik nou byen sa?

Parski ground handling i enn bann landrwa kot Air Seychelles i fer larzan.  E alor si i enn bann landrwa kot Air Seychelles i fer larzan, akoz ki e zot in fer byen ziska aprezan akoz ki zot pe mazin donn en subsidiary?  Lekel sa lakonpannyen ki pou vin konman sa subsidairy?

Konbyen i pou koute e konbyen Air Seychelles finalman pou perdi ladan?  Eski napa en zwe ki pe arive la, pou zot pey alor zot pe fer en lot keksoz ?  Lekel sa lakonpannyen mon ti ava kontan ganny li kler akoz sa i enn bann konsern ki nou pe eksprimen?  Mersi bokou.

 

MR SPEAKER

Mersi Onorab.  Minis.

 

MINISTER DIDIER DOGLEY

Mersi Mr Speaker.  Mr Speaker Air Seychelles i pou kontinyen se li – basically la pou le moman ki mannyer Air Seychelles pe operate se ki i napa en license.

I pa’n ganny donnen en license pou li operate ki basically i pe operate si ou le san en dokiman legal pou li kapab operate.  Alor ki nou pe fer, nou pe fer sir poudir Air Seychelles i ganny donnen en license ofisyel, pou li operate. 

Now dan le ka ki Air Seychelles i ariv li en  problenm ki i pa kapab operate, nou pe kree sa ki apel AES which is Airport Equipment Services, ki en  subsidiary Air Seychelles; ki Air Seychelles pou own 99poursan lo la e PS Finance pou own 1poursan shares ladan lo behalf, wi lo behalf Gouvernman.  E sa i senpleman i en holding company ki si i ariv en keksoz avek Air Seychelles ,then sa Lakonpannyen pou take over pou kontinyen operate ground handling.  Mersi Mr Speaker.

 

MR SPEAKER

Mersi.  Mon – nou ava retourn lo ou apre Onorab Ramkalawan.  Onorab Sebastien Pillay.

 

HON SEBASTIEN PILLAY

Mr Speaker mon pe sey konpran sa larepons.  Mon krwar nou bezwen tenir en pti kou lo la la pou nou ganny en konpran byen.  Be si Air Seychelles i ganny son license akfer ki i bezwen fer en Konpannyen?  The whole point se i kontinyen operate, akoz dapre lenformasyon ki Air Seychelles menm in provide nou dan Lasanble, ground handling e zot domestic operation i de landrwa ki zot ti pe fer pli byen.

E pou mwan tann zot pou dir zot pe menm redwir avyon lo domestic operation mon pa tro ganny en konpran.  So ki rezon det ki nou bezwen fer en subsidiary company me sa larzan then pa pou bezwen retourn pou son parent company ki Air Seychelles?  Pa i zis the same thing?  Sey eksplik nou son rasyonnal deryer s en pti pe pli kler Mr Speaker.  Mersi.

 

MR SPEAKER

Mersi Onorab Pillay.  Minis.

 

MINISTER DIDIER DOGLEY

Mersi Mr Speaker.  Mon a sey eksplik plis an detay.  Air Seychelles i pou kontinyen operate ground handlingGround handling pa pe al okenn par li, i reste avek Air Seychelles.  Solman nou pe fer bann formalite ki enn fwa pour tou, Air Seychelles ava annan li en license pou li operate under.  Ok?  Ki nou fer bann formalite.

Now in case ki Air Seychelles i ariv li en problenm ki i pa kapab operate, nou pe kree en subsidiary ki dan en fason ki bann lekipman avek soz ki nou Airport i a kapab kontinyen operate dan ka ki i ariv en problenm avek Air Seychelles.  Se sa ki nou pe sey fer.  Mersi Mr Speaker.

 

MR SPEAKER

Mersi Minis.  Onorab Pillay.

 

HON SEBASTIEN PILLAY

Mersi Mr Speaker.  Mr Speaker be si Air Seychelles i ariv li en problenm, be then it holds true ki son subsidiary osi pou ariv en problenm, akoz Air Seychelles ki own the subsidiarySo therefore ki mannyer tou le de pou operate si i ariv en problenm avek Air Seychelles?  

So mon pa vwar rezon akoz nou pe bezwen tir the most lucrative aspect of Air Seychelles operation avek li, pou met li anba okenn fason.

So si zot pe met en license pou li operate pou li annan bann konformite legal, that’s fair.  Be selman Mr Speaker petet if I may ask e begging the indulgence of the House, eski nou kapab al dan en Committee Stage e sa bann teknisyen ki’n come up ek sa bann lide i kapab eksplik nou why zot pe move ek sa bann lide?  Mon pa konnen ki lot kote i panse lo la?  Pou nou kapab ganny en leksplikasyon en pe pli kler lo la?  Mersi Mr Chair.

 

MR SPEAKER

Mersi Onorab.  Bon nou ava – i annan en demann pou mon pa konnen si zot pou, the House will go that far.  Onorab Ramkalawan.

 

HON WAVEL RAMKALAWAN

Mr Speaker letan Onorab Pillay i koze mon tandans se pou demann li ki Order, parski li i ti pou fer sa.  Be mon pa pou fer sa avek li, akoz napa Order pandan Question Time ki donn ou soz pou al dan Komite.

Me selman Mr Speaker, mon pe- si mon pe swiv. Parski la nou dan en konfizyon.  E petet parfwa letan Prezidan i dir ki Minis i vini i pran bokou letan, se parski i annan konfizyon.  E Minis i konnen li menm li in pas dan sa dernyen problenm lotrozour si ti final si pa ti final e la nou pe koz subsidiary pa subsidiary, license napa, lot i annan. Pa konnen konbyen i dwa.

Mwan mon krwar seryezman malgre ki FPAC, malgre ki FPAC i ganny kritike ki petet, ki petet sa i en keksoz ki nou ti ava kapab – mon krwar i tonm dan manda FPAC ki mannyer nou pe regarde pour ki FPAC i kapab – Air Seychelles i kapab aparet devan FPAC pou nou kapab rod tou sa bann keksoz, e apre nou ava fer en rapor pou Lasanble !

Me selman la pou le moman, mon anvi dir ki definitivman sa zafer ground handling enn bann sours kot zot pe fer larzan, i en problenm e nou bezwen al pli dan fon.  Parski i dan konfizyon la Mr Speaker.

 

MR SPEAKER

Bon eski, mon pran ki FPAC a fer en special hearing e koumsa zot a kapab, anvi – non an vi. Anfen ou’n fer en demann pou al dan Staz Komite me ankor Standing Orders i silans lo la pandan Question Time.  Nou’n deza fer avan.  Nou’n deza fer avan ki ti annan Lagreman le de Leaders.  Me eski le de Leaders i annan Lagreman lo la ?  Oubyen – lo lot kote i pe demande. Onorab Ramkalawan.

 

HON WAVEL RAMKALAWAN

Mon dakor avek sa, selman mon krwar ki i annan kestyon ankor.  Nou pa, nou pa aret li la.  Mon krwar ki ok en referans avek FPAC me selman mon krwar ki i annan bann lezot kestyon la ki Manm i anvi demande.  E otan ki nou kapab ganny leksplikasyon i ava ede.  Mersi.

 

MR SPEAKER

Mersi Onorab.  Onorab Pillay.

 

HON SEBASTIEN PILLAY

Mr Speaker pou ed Lasanble petet mon a propoze anba Order 79(1) ki nou resolves the House into a committee pou nou kapab ekout bann Zofisye Air Seychelles ki la.  OkAlright.

 

HON WAVEL RAMKALAWAN

Be la nou pe deza demann kestyon.

 

MR SPEAKER

Wi. Wi.  Onorab i oule ki bann teknisyen osi i kapab reponn.

 

HON WAVEL RAMKALAWAN

Mr Speaker be la i fer mwan ki sa konmsi zot pa krwar ki Minis i reprezantan Prezidan?  Be Minis – wi Prezidan in dir ki Minis pa son reprezantan, me selman annou demann kestyon e apre sa nou ava – non mwan mon krwar nou kontinyen Mr Speaker pou le moman.  Byen.

 

MR SPEAKER

Annou kontinyen.  Nou annan lezot Manm ki anvi demann kestyon.  Petet bann pozisyon petet ki Minis pa kapab pronons li lo la, se la kot FPAC i a kapab fer en hearing e kot lezot menm CEO Air Seychelles a kapab vini i a kapab reponn.  Ok ?  Mon ava – annou kontinyen.  Mon krwar pa vo lapenn met ou Mosyon to the vote.  Ou pou perdi.  Mon pe save ou sa.  Ok?  Onorab Churchill Gill.

 

HON CHURCHILL GILL

Mersi Mr Chair.  Mwan mon annan detrwa kestyon separe me selman la zis en follow-up question lo sa ki Onorab Pillay ti pe dir.  Petet Minis i a dir nou akoz nou pa pe ganny sa license?  Konmsi kwa ki pe anpes nou ganny sa license ?  Ki nou bezwen prezan al fer sa subsidiary pou si an ka en keksoz i arive avek Air Seychelles?  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mr Speaker license i senpleman en formalite.  In view pou dir en lakonpannyen pe operate i pe fer en serten aktivite, e pandan tou bann letan ki in operate, in operate without en license spesifik pou li fer sa louvraz.  Alor ki nou pe fer, nou pe formaliz sa prosesi, pou li kapab operate anba en license.  E sa i deza pe ganny fer pou issue li avek sa license.  Mersi Mr Speaker.

 

MR SPEAKER

Minister lo mon kote mon pe sey konpran en pti pe, kwa ki ou pe dir e kwa ki Manm osi pe rode.  Si pandan plizyer lannen en tel konpannyen groser Air Seychelles, son ground handling i pe operate san en license, sa i grav e i kapab annan menm konsekans osi tou ki ti kapab grav.  Egzakteman.  Egzakteman.

Ariv en lensidan ki mannyer Air Seychelles pou reponn kestyon? I pe operate san en license!  Se sa mon krwar ki Manm pe sey demande klarifikasyon.  Sa i grav.  Ok mon ava si i annan kestyon dan sa menm direksyon mon annan plizyer Manm lo mon lalis.  Onorab De Commarmond ou dan menm direksyon ?  Si i en lot kestyon pou fer avek lezot avek larepons Minis. Me si dan menm direksyon ki pe kestyonn license pou ground handling.  Onorab.

 

HON CHARLES DE COMMARMOND

Dan menm direksyon Mr Speaker.  Mersi bokou.  Si nou re pran sa kestyon konmsi?  E la Minis i enportan nou kosyonn li.  Konmsi kosyonn li dan le sans ki nou dir li donn nou sa ki korek konmsi.  Cross check avek sa de dimoun lo bor ou la, si – akoz zot pa’n dakor pou nou al dan  Committee Stage pou zot partisipe. Me crosscheck e dir nou vreman korek akoz sansan si pa  korek sa ki ou pe dir ou en konparezon bann Teknisyen savedir pou met ou dan en sityasyon ki ou pa devret al ladan ou!  

Now i kler ki sa konponan Air Seychelles parey in ganny dir i enn ki fer profi.  Sa tou dimoun i konnen lotrozour nou ti ganny dir par Air Seychelles menm.

E prezan eski i vre ki sa konponan ground handling, i enn ki ti ganny met konman en garanti konman en pledge, pou loan, oubyen pou larzan ki Etihad in envesti dan Air Seychelles, e ki prezan sa i bezwen pas avek Etihad or Etihad annan en serten kontrol lo ground handling, pou ki si i annan pert dan Air Seychelles ki omwen sa i en life saver pou li.

Konfirm ek nou si sa ki mon pe dir la sa lenformasyon i annan en relasyon ek sa ki pe ganny dir si i korek ?  Otherwise akoz, akoz ki Air Seychelles parey ou’n dir pandan tou sa letan sa ground handling Air Seychelles la, ki mannyer ki i napa en license ?  Akoz konmsi?  Sey demann sa bann dimoun obor ou e dir nou akoz ? Eski – pou mwan mon vwar li en problenm e mon pa krwar mon pa kapab anvale sa mwan !  Poudir i pe fonksyonn tou sa letan san en license?  Be konmsi tou sa tranzaksyon i pe fer avek bann lezot avyon e tou sa i napa en license?  Konmsi konfirm ek nou sa e akoz alor ou bezwen sanz li fer subsidiary?  Be rod son license avan.  Fer fonksyonn anba- fer li fonksyonn normal si ou dir napa en license.  Konmsi eklersi sa byen avek nou Minis e konsilte ou bann dimoun obor ou.  E apre nou a gete ki mannyer ki  pou al de lavan avek sa.

 

MR SPEAKER

Mersi Onorab.  Minis.

 

MINISTER DIDIER DOGLEY

Right. Mr Speaker konsernan license Air Seychelles konman en lakonpannyen i annan son bann dokiman neseser ki anba IOSA avek IATA i ganny – i annan bann standar ki i bezwen meet; i annan bann audit ki ganny fer e i zwenn bann minimum standar pou li operate.  

Now lo kote ground handling, Sesel li menm pa’n zanmen annan en framework kot i si ou le anba Licensing li menm ki donn license, pou bann lakonpannyen fer bann aktivite parey.

I  pa egziste sa.  E sa i rezon akoz ki Air Seychelles pa’n zanmen annan en dokiman spesifik pou sa.  Now pou nou bouz devan, nou’n vwar li neseser ki pou ground handling, Air Seychelles i annan li sa ki mwan mon ti pe refer avek li konman en license, ki ekivalan – ki nou apel en permi ki pou ganny issue avek Air Seychelles, dan en fason ki atraver sa permi, i pou kapab ganny odit.

I pou kapab ganny swiv e si ou le i pou annan sa oversight ki pou ganny fer par SCAASo basically ki nou pe fer nou pe formalise en sistenm ki ti avan – i pa ti an ekrir.  So instead of a license se en permi, me solman ki annan preski fonksyon similer, ki i pe ganny issue avek Air Seychelles.

Sa, sa bout kot license ouswa permi i konsernen.  Alor i en formalisation en sistenm ki bezwen  ganny fer pou li kapab fonksyonnen.  Avek bann sistenm oversight kot i annan bann Lagreman i kler ki mannyer sa bann keksoz pou fonksyonnen.

2enm keksoz konsernan ground handling, i korek sa ki Onorab in dir, i annan sa garanti ki Etihad parey mon’n dir in met en kantite larzan dan Air Seychelles e sa dernyen $30milyon ki ti mete an 2018, in pret nou akoz nou, nou ti napa sa larzan pou peye ; alor zot, zot ti’n mete e zot ti a voudre ki nou donn zot en garanti  ki ler Air Seychellesback lo son lipye, ki nou pe rann zot larzan.  E alor ki nou pe fer nou pe donn zot plizoumwen, en garanti ki nou pou rann zot sa larzan ler Air Seychelles i dan pozisyon pou rann sa larzan.  Mersi Mr Speaker.

 

MR SPEAKER

Mersi Minis.  Ok mon ava – Onorab De Commarmond i a zis fer en swivi lo son kestyon apre nou ava bouz kot ou.  Onorab De Commarmond.

 

HON CHARLES DE COMMARMOND

Mersi Mr Speaker.  Sa ki Minis in dir boner, pou annan sa nouvo Konpannyen ki ou dir pe fer sa subsidiary la, eski Minis i kapab dir nou la, lekel bann direkter lo sa Board sa nouvo Konpannyen?  E an menm tan Financial Controller i obor ou la, demann li kestyon ki Onorab Ramkalawan taler in demande konbyen Air Seychelles i vreman dwa sa loan ensidswit, demann li konbyen i bezwen kapab dir – pa kapab pa konnen sa ! Zot in vin la dan Lasanble avek kestyon lo Air Seychelles, groser kestyon sa bann lenformasyon i bezwen dan zot laporte !  Silvouple si i kapab dir nou sa.  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mersi Mr Speaker.  Konsernan bann Board of Directors i annan CEO Air Seychelles Remco.  I annan Mr Berlouis ki la obor mwan.  I annan Sitna ki travay kot Finance e i annan en dimoun ki sorti kot Etihad ki reprezant Etihad lo sa Board me zot – akoz sa Lakonpannyen ki Airport Equipment Services i en subsidiary Air Seychelles, zot raport avek Board of Directors of Air Seychelles. 

Aprezan konsernan konbyen Air Seychelles i dwa.  I annan $30milyon ki pe ganny convert into preferential shares.  Apre i annan 15milyon savedir an tou i fer 45milyon.  Ki pou sa 15milyon Air Seychelles li i pou fer laranzman, pou re pey sa larzan dan bann letan ki pe vini.  Mersi Mr Speaker.

 

HON CHARLES DE COMMARMOND

E finalman –  si Air Seychelles pou sorti dan sa (mon pa konnen –  apele si maryaz si kwa) avek Etihad demen bomaten, si i sorti konbyen i pou kout Air Seychelles la?  Konmsi demen bomaten nou pran en desizyon akoz apre FPAC manke sanmenm sa ki pou al arive.  Konbyen nou pou bezwen pey Etihad si i annan peye pou peye, e ki deal konmsi  ki kapab arive ek Air Seychelles?  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mersi Mr Speaker.  Mr Speaker si Air Seychelles ek Gouvernman i le pull out of the partnership avek Air Seychelles, i pou bezwen pey premyerman i annan 30milyon ki mon dir ou i ti mete an 2018, pou pey bann det.  I annan 15milyon ki in pret Air Seychelles ki i pou bezwen rann.  I annan 20milyon son share ki i ti met ladan, ki borde i ti aste share dan Air Seychelles.

I annan 9milyon shareholder loan ki li osi in pret Air Seychelles.  Ler nou kalkil tou ansanm i vin $74milyon an gro.  74, 75 an zeneral.  Be sa nou pe kont dan latet.  Nou napa sa bann egzakt, be solman dapre bann figures ki Mr Berlouis in donn mwan i apepre 75milyon.  Mersi Mr Speaker.

 

MR SPEAKER

Mersi Minis.  Onorab Ferrari.  Yes Onorab.

 

HON JEAN-FRANCOIS FERRARI

Mr Speaker mon ti a kontan raise en point of order la.  Akoz Minis Loustau-Lalanne ler i ti vini i ti ankor, non i ti deza Minis Finans.  Mwan personnelman mon ti poz li sa kestyon.  Onorab Afif ti repoz li menm kestyon, an sa ki konsern en sonm $30 oubyen $35milyon ki Minis Lalane ti dir avek sa Lasanble e rikord Lasanble i ava montre ki sa ti en write-off anba en credit e sa i korek Mr Berlouis pe konfirm sa.  Eski i ti en write-off ?  Eski nou’n gannyen en credit note pou sa?  Oubyen eski in vin lo nou liv konman – prezan konman en det?

I enportan pou nou konn sa moving forward akoz i enkyetan!  Lenformasyon i conflicting.  Mersi.

 

MR SPEAKER

Bon, mon anvi fer en sizesyon avek Lasanble, akoz mon pa krwar ki nou pe ganny plis laklerte lo la.  Me zis mon point  latansyon Manm ki nou petet probableman envok Standing Order 22 ki petet i ava annan en special hearing, mon pa konnen si i a vin en extended committee FPAC avek lezot Manm Lasanble, oubyen si a vin en special Committee of the House ki ava zwenn avek Minis ek bann Teknisyen pou kapab ganny en pti pe plis lenformasyon.  Mon pe sizere.  Akoz i annan kantite Manm osi la ki lo lalis.  Mon pa vwar nou fini menm ziska 5.30 akoz nou pa pe ganny repons.  Yes Onorab Ferrari.

 

HON JEAN-FRANCOIS FERRARI

Mon kapab fer en sizesyon ?  Mon ti a kontan fer en sizesyon ki Motions napa nanryen ki tro irzan, si ou ti kapab re organiz nou travay pou demen, ti ava enportan.  Akoz nou annan lafen lasemenn ankor en travay avek Minister Finans lo Salary lo bann Saler.  So mwan mon ti ava sizere ki demen plito ki pran Motions nou kontinyen sa travay.  E la avan nou adjourn kekfwa bann Manm i ava met enn de kestyon avek Minis, i pa bezwen reponn la, me selman at least demen bomaten oubyen demen dan lazournen me selman provided ki Minis pa pe al dan Cabinet akoz demen Merkredi.  Donk. (Be Prezidan pa la.)  Pardon?  Ou dan Cabinet demen?

 

MR SPEAKER

Wi i annan Cabinet meeting demen.

 

HON JEAN-FRANCOIS FERRARI

(Be lekel ki pilot dan avyon dan Cabinet?)  Be sa ti mon sizesyon Mr Speaker.

 

MR SPEAKER

Wi mon ava ekout lot kote.  Onorab Simon Gill.

 

HON SIMON GILL

Mr Speaker mon dakor avek sizesyon pou Minis retournen demen.  Me an menm tan mon ti ava voudre kosyonn en keksoz.  Bann teknisyen i ganny en loportinite pou koze pou dir bann lenformasyon direk, pour ki piblik i tann zot.  Sa sif 30milyon – 35million ki ti dir in write-off?  This was clearly said hereNow zot donn Minis en bulk figure.  Minis i anvoy en lot sif lo floor, ki kontredir lezot lenformasyon ki’n deza la!  Ler bann teknisyen i al fer bann entervenir direkteman pou ede eklersi sityasyon mon krwar sa nou pe fer zistis pou sa manm piblik la deor ki pe swiv deba.  Ki pe ekout nou e ki le trouv en laklerte, an menm tan ki nou pe deal avek sa bann size sitan sansib ki ou annan en kantite fanmir, dimoun ki enplike dan sirvivan e loperasyon Air Seychelles.

Annou fer sa pou lanmour Sesel e pou nou kapab donn bon lenformasyon sa piblik ki la deor pe swiv e pe ekout nou deba!  Mersi bokou Mr Speaker.  Si nou kapab tonm dakor lo la mwan mon pou dakor ki Minis i retournen demen, demann en clearance avek VP ki pou Chair Cabinet.  Ou retournen ou donn leklersisman!

Otreman ki sa si napa bann teknisyen, mwan mon pou demann ou Mr Speaker, ki demen mon pou pran mon leave mon pou ale mwan.  Mon pa pou reste.  Mersi bokou.

 

MR SPEAKER

Mesi Onorab Simon Gill.  Mon konpran ou pozisyon.  Mon krwar nou’n deza baze lo presedans nou’n deza al dan sa nivo.  Ok? Me parey tou le de kote latab pe fer sorti for the sake of clarity, for the sake of pass the right information out there, sa mon krwar i ava direksyon ki nou ava pran.  Be prezan nou bezwen regarde demen availability of the Minister, si Minister i santi ki i kapab ganny eskize from Cabinet meeting demen bomaten, then nou a kapab sanz nou lord du jour e nou ava kontinyen avek Minis.  Akoz Minister kantite Manm ki mon annan lo mon lalis la, mon pa vwar nou fini 5.30.  Ok? So petet lo ou kote si ou santi si ou kapab ganny eskize from Cabinet meeting, nou ava kontinyen demen  bomaten.  Yes Onorab Ramkalawan.

 

HON WAVEL RAMKALAWAN

Yes Mr Speaker.  Mon konpran ki ou pe dir.  E nou pa konnen, nou pa konnen si Minis pou ganny eskize, e mon napa problenm avek en adjournment  – pou vin en Komite.   En komite of the whole House.  Me selman the only thing ki mwan mon ti ava kontan dir – e la mon retourn avek FPAC, sel keksoz se ki letan nou zis dan – konmsi ou napa en rapor.

Mwan toultan mon kontan letan i annan en rapor baze lo tou bann keksoz ki nou fer pour ki,  i la konman en levidans konkret.  Tandis ki, tandis ki la i annan serten keksoz ki’n ganny dir dan Lasanble, par lot Minis e la ozordi nou pe tann lot keksoz.  S

o mon napa problenm ek sa.  Me selman Mr Speaker mwan mon krwar ki, avan nou ale, mon ti pou kontan demann Minis direkteman eski Air Seychelles ozordi in  fini faid?

Eski Air Seychelles in fini faid e ki sa laranzman ki zot pe fer se en laranzman kot Etihad pou antre pou pran ground handling pou kontrol Airport an antye?  Eski nou pa vwar ki poudir se sa direksyon kot nou pe ale?  Parske omwen i kler se sa ki pe arive la !

E mon ti ava kontan si nou ganny en – si nou fini lo sa pwen – parski ground handling, Mr Speaker ki mannyer ou kapab napa en license pou ground handling?  Ou a pe service tou sa bann avyon enternasyonal, British Airways, Etihad, Air France, Emirates.  E si enn ou pti masin i tap avek enn sa lezel avyon – be si napa license ou napa lasirans!  Si ou napa license savedir ou napa lasirans.  Ki mannyer ICAO in les zot operate san  en license ?  Mon pa ganny en konpran mwan!  E i bezwen annan en keksoz be – e – non be nou’n fini faid parski si nou drwa 74milyon, 74 milyon miltipliy li par R15 i plis ki, i plis ki  R1bilyon.  1.2 bilyon!  Be Mr Speaker ler ou drwa 1.2bilyon mon krwar ou’n faid non?

 

MR SPEAKER

Bon, annou ganny en, annou ganny en konsansis.  I annan de propozisyon.  Nou pa konnen demen- pou premye propozisyon nou pa konnen demen si Minis pou available.  Dezyenm propozisyon se ki Onorab Ramkalawan in fer sorti ki dan en tel komite par egzanp FPAC zot a kapab annan en rapor ki ava sorti e nou a kapab annan keksoz konkret.  Ok ?  Annou pran en desizyon avan 5.30, akoz mwan menm mwan mon pou bezwen adjourn Lasanble 5.30.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker etandonnen lenportans sa kestyon, the issue of Air Seychelles VP – Vis-Prezidan i pou release the Minister pou vin dan nou Lasanble.  E nou, nou pe ensiste ki i vini dan nou Lasanble demen bomaten.  E verbatim Lasanble i la konman bann levidans, konman bann …!  An plis ki sa Sesyon Kestyon demen kot tou Manm i kapab partisipe, si nou le apre anmenn the issue to the FPAC napa problenm.  I a ganny fer e son lot bout travay pli detaye i a ganny fer e rapor i a ganny fer napa problenm ditou ek sa lo nou kote.

Be mon ensiste mwan, ki Minis demen bomaten i retourn dan nou Lasanble, e ki nou kapab parey Onorab Gill in dir, kapab permet nou al dan en Staz Komite ki’n deza ganny fer avan.  Pou permet bann Teknisyen enterakte as well!  Mersi Mr Speaker

 

MR SPEAKER

Ok.  Bon dakor mon ava pran desizyon.  Mon ava fer sa Ruling lo mon kote.  Mon pou adjourn deba lo kestyon ki devan nou, lo deba ki devan nou, e nou ava rankontre demen bomaten pou nou kapab ganny plis klarite e osi ava permet lezot Manm ki lo  mon lalis, pou kapab demann kestyon.

E mon ti  ava demann Minis si i santi ki i annan lezot dimoun i bezwen anmennen silvouple pa ezit-e ou a zis les Sekretarya konnen bann zofisye ki pe vin avek ou.  Yes Onorab Ferrari.

 

HON JEAN-FRANCOIS FERRARI

Mr Speaker mon ti a zis kontan si Minis demen ler i vini i kapab annan the latest audited report, latest financial statements, latest debt figures and all the financials ki enportan pou nou kapab fer en bon analiz lo sa sityasyon. Mersi Mr Speaker.

 

MR SPEAKER

Mersi.  Bon avek – yes Onorab Ramkalawan.

 

HON WAVEL RAMKALAWAN

Mr Speaker mwan konman en frer, mon ti a kontan zis dir Minis, demen letan ou vini pa bezwen pran Air Seychelles met lo ou ledo mon frer!  Koz ek nou parey i été.  Pa pran sa lour pou met lo ou.  Mon pe dir ou sa konman en frer.  Mersi bokou.

 

MR SPEAKER

Mersi Onorab.  Bon mon ava – avek sa mon ava remersi Minis, Minis Dogley, PS Renaud e CFO Berlouis.  And also like to thank the CEO of Air Seychelles.  E parey nou’n deside nou adjourn deba ziska demen bomaten.  E mon’n dir demen bomaten nou pou pran en, nou pou pran en Oath of Allegiance avek a new Member.  E deswit konman nou ava fini mon swete par 9er en kar nou’n fini,  nou ava ganny latansyon Minis avek son lekip e nou a kapab kontinyen avek nou sesyon kestyon.  So avek sa nou adjourn Lasanble e repran nou travay demen bomaten.

 

(ADJOURNMENT)