::
Home » Press Releases » 2019 » Statement of Hon. Speaker Prea (16th April 2019)

Statement of Hon. Speaker Prea (16th April 2019)

Bonzour tou manm onorab e bonzour tou dimoun ki pe ekoute e pe swiv travay Lasanble Nasyonal.

 

Avan nou pran nou travay mon oule fer en kominike e osi pou esplike akoz ki Lasanble in komans son travay 10er bomaten ozordi.

 

Mon ti antre dan pei zedi le 11 avril apre en misyon Lasanble a letranze. E son aswar mon ti aprann dan nouvel ki Prezidan tin rankontre ek dirizan Lopozisyon pou diskit en ‘way forward’ lo sa ‘Public Service Salary Amendment Bill 2019’. Dirizan lopozisyon ti eksplik lapres ki zot tin ganny en bon miting e plis diskisyon pou swiv.

 

Vandredi bomaten mon sekreter ti enform mwan ki lakour in telefonen pou enform mwan ki i annan en somonn e zot pe rode kote mon ete pou servi lo mwan.

 

Mon ti enform mon sekreter pou al kot lakour e pran bann dokiman pou mwan akoz zot pa pou kapab vin dan “precinct” lasanble pou fer sa.

 

Alor se la ki mon ti aprann ki  Prezidan Danny Faure tin met en petisyon ankour  kont mwan … Nicholas Prea, dan mon kapasite koman ‘Speaker’, pou demann lakour pou anil desizyon Lasanble Nasyonal pou ‘quash’ S.I. 18/2019,  desizyon ki ti ganny fer Zedi le 4 avril.

 

Wi Prezidan in met en kes kont mwan pou en desizyon ki Lasanble – lebra lezislativ gouvernman ti pran.

 

A mon avi, i annan en kantite keksoz ki pann mars byen depi ki sa proze de lwa in devan Lasanble e i enportan pou mwan koman ‘Speaker’, koman sa enn ki ozordi pe ganny tenir ‘accountable’ pou desizyon ki mazorite manm ti pran pou eksplike:

 

  1. Apre ki Lasanble ti deside pou anvoy deba lo sa proze de lwa monn resevwar en let ki Prezidan tin ekrir mon lofis pou eksprim lirzans ki en desizyon i bezwen ganny pran avan le 1er avril. Menm swar sa let ti ganny lir dan nouvel lo SBC,

 

  1. Sa ti swiv son lannmen par ‘statement’ e deklarasyon par ‘Chief Secretary’ Departman Ladministrasyon Piblik, Mme Esparon, lo sa lalwa lo SBC,

 

  1. E sa ti swiv pandan 2 zour swivan kot Kekreter Deta dan biro prezidan, Myse Mohamed Afif e PS Finans, Myse Damien Thesee ti osi al lo SBC pou fer ‘statement’ lo sa lalwa,

 

  1. Le 3 avril S.I. 18/2019 ki ti pe demann menm keksoz ki sa lalwa ti ganny table dan Lasanble. E menm zour Lider lopozisyon ti table mosyon irzan pou anil sa S.I.

 

  1. Le 4 avril deba ti ankor ‘on’ lo size pou anil sa S.I. me Trezor tin fini enform tou department piblik, enkli Lasanble Nasyonal, pou vin kolekte zot ‘updated payroll’ ki ti enkli sa ogmantasyon 5%.

 

E tou sa pandan ki sa lalwa ti ankor vivan devan Lasanble.

 

Sa sekans pankor fini… parey mon fer sorti Zedi pase Prezidan ti zwenn ek dirizan lopozisyon e apre sa son lofis ti anonse ki en komite pe ganny kree pou kontiny diskisyon.

 

Le 2 parti dan Lasanble in osi fer zot kominike lapres, yer Prezidan in rankontre bann manm US e osi son lofis in anons konpozisyon sa komite ki pou diskit sa revizyon saler dan sekter piblik. Leksplikasyon ti ganny donnen lo SBC par Myse Mohamed Afif me la i enportan note ki napa okenn manm Lasanble lo sa komite.

 

Mon osi fer resorti ki apre ki deba lo sa proze de lwa ti ganny anvoye mon ti demann tou le 2 parti dan Lasanble pou prezant zot amannman. Ziska la sekretariat Lasanble in selman resevwar amannman sorti kot LDS ki monn fer sirkile ek tou manm.

 

 

 

I fer premye fwa ki ‘Speaker’ Lasanble i ganny anmenen an kour lo en desizyon ki Lasanble in pran e sa i konsern sa size logmantasyon dan saler sekter piblik ki ankor devan Lasanble. “Case” in ganny prezante devan lakour 9er bomaten ozordi.

 

‘Case’ in ganny anvoye pour le 2 Me.

 

Mon ti a kontan remersi tou Manm onorab e manm sekretariat kin akonpanny mwan ankour bomaten e osi remersi tou dimoun pou zot pasyans e konprenezon … e byensir mon prezant zot en leskiz.

 

Sa bann keksoz i arive dan lavi e koman sa enn ki antet sa lenstitisyon mon bezwen pran mon responsabilite e kontiny sa travay ki 6enm Lasanble pe fer.

 

Lasanble nasyonal pou kontinyen fer son travay avek bi kontinyen rod sa ki bon e meyer pou tou Seselwa.

 

Sesel i pli gran ki mwan e Sesel i pli gran  ki nou tou!!

 

Mersi!

 

 

Bon nou pou pran nou travay lo Order Paper e nou pou komans ek bann “papers laid” …. Mme Clerk