::
Home » Verbatim » 2019 » Verbatim Thursday 4th April, 2019

Verbatim Thursday 4th April, 2019

NATIONAL ASSEMBLY OF SEYCHELLES

Thursday 4th April, 2019

The Assembly met at 9am

National Anthem

Moment of Reflection

Mr Speaker in the Chair

 

 

MR SPEAKER

Bonzour tou Manm Onorab e bonzour tou Dimoun ki a lekout e pe swiv travay Lasanble Nasyonal, espesyalman ki i en Zedi ki i en sitting extra.  Bon nou pou kontiny nou travay lo Mosyon ki nou ti’n konmanse yer e ki mon ti dir nou pou dispose of bomaten. Sa se Mosyon kot Lasanble pe demande pou quash S.I 18 2019, e Mosyon ti ganny prezante par Onorab Ramkalawan. Mon pou mentenir mon lalis ki mon’n, ki mon’n fer yer e mon pa pou entertain bann nouvo entervenan.

Nou pe sey avek bi pou nou kapab fini 10.30. Rezon akoz se SBC pe fer en gran travay maintenance ozordi e nou’n ganny averti depi yer ki nou pa pou ganny posibilite televizyon.  Me definitivman nou pa pou ganny radyo AM pou kapab re-transmet. Bon san tarde nou ava al direkteman lo nou travay.  Zis en pti moman – Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker.  Bonzour tou Manm Onorab e tou dimoun ki a lekout.  Mr Speaker, bomaten mon’n vin vwar ou nou de Onorab Gill dan ou biro. E nou’n koz lo kestyon speech list pour ozordi e zisteman akoz yer in annan omisyon ki’n arive. E nou’n tonm dakor lo serten keksoz e ki ozordi la, mon vwar ou pe sanz pozisyon. Mon pa pe konpran.  Mersi.

 

MR SPEAKER

Non Onorab. Ler mon’n dir mentenir lalis, mon’n pran konsiderasyon sa ki nou koze bomaten.

 

HON CHARLES DE COMMARMOND

Mersi Mr Speaker.

 

MR SPEAKER

Ok pa – Mon kontan yer ou ti dir mwan pou dir pa tro eksite, ou osi pa eksite. Wi, mon’n pran konsiderasyon sa ki ou avek Onorab Simon Gill in vwar mwan lo la bomaten, ok? Pa trakase.  Bon mon ava donn laparol Onorab Audrey Vidot.

 

HON AUDREY VIDOT

Mersi Mr Speaker.  Bonzour Mr Speaker, tou Manm Onorab, zabitan Roche Caiman e tou manm piblik ki a lekout. Mr Speaker mersi pou donn mwan laparol.  Mr Speaker yer apre ekout dernyen entervenan, Onorab Clifford Andre koze i fer mwan realize ki petet Onorab pa’n reflesir byen. Ler in fer konmanter lo sa size ‘’konfli lentere.’’ Par kont les mon  a remind lot kote latab ki piblik in toultan kritike ki nou Lasanble i desid lo nou prop saler.

Alors ki nou pe rode lo konfli lentere e zwe avek sif larzan kot nou pe kout, nou pe demann pou koupe e partaz pour nou kanmarad. Mr Speaker yer Onorab Ferrari in dir nou konplent, konplent e zis konplent! Be mon pa rapel nou konplent ‘’lanmans pwalon i so!’’ Apre vin konplent dan Lasanble lekel?  e ki mannyer pou partaz sa ki’n ganny kwi dan lakwizin? Si Gouvernman United Seychelles ki’n kwi sa gato, 5poursan logmantasyon, pou partaz avek tou dimoun dan servis piblik, akoz ki sa ki per pou al dan lakwizin i bezwen vin partaze?

Mr Speaker sanmenm sa ki apel dominer e diktater.  Mr Speaker LDS i kontinyen fer menm fot, sa se annan en vizyon zis lo zot bout nennen. Zot fer tapaz dan sa Lasanble pou kritik Gouvernman pour donn logmantasyon dan milye lannen.

Me ler Gouvernman i pran en desizyon pou donn pli boner, ki LDS i fer ? Zot oule Gouvernman i prolonz sa logmantasyon, pour zot ganny sans koupe. Sa zot bon – zis koupe ! Zot kouto zot ! San annan respe pou sa bann ki ti al marse avek zot pou demann en logmantasyon. Sa bann teachers ek ners i dir zot mersi bokou.  Pa pou fini la, akoz sa 15 lo 10 Kontra pou fini. Sa ki gou, se ki zot ki ti deside e zot ki pou deside ki mannyer pou renouvle nou Kontra.

Mr Speaker, sa profesyonnel ki’n asize 3an – in asize laba deor dan en laklas dan pei son kanmarad lwen ek son fanmir. In pey son extra class, ozordi i pe travay lebra kase pour li pey sa landrwa lwe pour li  ek son fanmir, antretan ki i pe espere pour li ganny en pti bout later, i pe osi espere pour li ganny sa logmantasyon saler 5poursan Mr Speaker. E li i pe pey 15poursan taks li.  Alors ou pe al quash sa S.I, ki pour li ganny sa 5poursan logmantasyon ?

Pa bliye pa United Seychelles ki ti kriye dan sa Lasanble, ‘’Nou tou nou pou ganny R4mil !’’ Apre in desann, ‘’Nou tou nou pou ganny R1500 !’’ In desann ankor lo mon konpran R450!

E la mon pa konnen konbyen ankor zot pe mazinen pou avanse devan si i pou koup ankor. E sa profesyonnel i pe aprann bokou avek sa bann gran koneser.  Pe note Mr Speaker.  LDS pe sey vin fer krwar ki zot in lager pou sa 40an, pour bann ki ganny saler ki pli ba. Pa bliye kote serten zot lo lot kote latab ti sorti, pou ariv kot zot ti ete ozordi dan sa Lasanble!

Akoz nou lo sa kote latab, nou pa’n zanmen bliy nou pase, akoz nou ki’n lager pour sa 40an pour sa bann ki ganny saler ki pli ba.

 

(APPLAUSE)

 

HON AUDREY VIDOT

Annou aret pran kredi nou kanmarad, akoz ler Leader Lopozisyon ti dir nou tou nou pou al avek kakayonyont dan lakour, nou tou nou’n fer sir ki nou pa’n pran kredi lo son kakayonyont! Akoz pa nou ki ti dir.

 

(APPLAUSE)

 

HON AUDREY VIDOT

Alors, ler Gouvernman United Seychelles ti pe travay pou elev larises pei pou partaz avek son pep egalman, zot ti pe zis ‘’konplent’’, ‘’konplent’’ e ‘’konplent’’ ! Pa fer ‘’nanryen’’, ‘’nanryen’’ e ‘’nanryen!’’ Mr Speaker sa Mosyon pour quash sa S.I. ki pe siporte pour donn piblik son 5poursan logmantasyon i vin konman en lensilt! En lensilt pou sa bann Seselwa ki pe travay pou Gouvernman, e i pe demande pou met son pti larzan dan son pos.

Nou dan United Seychelles nou an faver pou Gouvernman donn son 5poursan logmantasyon. Akoz sa larzan nou Lasanble nou ti vote nou !

 

(APPLAUSE)

 

HON AUDREY VIDOT

Menm si i annan nou nou’n abstain, nou’n toultan abstain me selman in pase.  Alors ki sa bann dominer ki LDS pe fer zis pou montre Egzekitiv ki zot ki annan mazorite dan Lasanble? Yer zot ti koz soufer, be la ek sa Mosyon lekel ki zot pe fer soufer Gouvernman United Seychelles oubyen sa bann travayer servis piblik?

Ou vwar sa bann dominer ki zot LDS pe sey fer pou kout zot tre ser!  Ok? Ki zot – I annan deza pe dir ki SPPF (mazinen ekoute zot apre zot a sot aller) i annan deza pe konmans dir ki SPPF ti konnen letan i ti konpoz sanson li, pou dir zot ‘’pa met later dan nou bol diri!’’ Seselwa pe note …

 

(APPLAUSE)

 

HON AUDREY VIDOT

… e reflesir ki pou arive si zanmen, si zanmen zot al fer menm fot ki zot in fer 2016 e al met larises pei dan zot lanmen, Sesel pou dan mal !

Pou pli fermal ki sa 15 lo 10!  Apre zot a vin akiz nou dan United Seychelles nou koronpi! Mon pa ankor war okenn case vin devan Lakour pou dir nou United Seychelles nou koronpi, nou pe espere. Tasyon selman en? Tasyon! Akoz ler i monte tasyon i fonn lo zot.

 

(laughter)

 

 

HON AUDREY VIDOT

Mr Speaker nou dan United Seychelles nou napa problenm pou diskit lo revwar konpletman sa saler grid servis piblik. Be annou fer li apre ki nou donn sa bann dimoun zot 5poursan logmantasyon larzan ki dan Bidze!  Nou ki ti vot lo la, donn zot, zot larzan!

3an – Mr Speaker – 3an sa bann dimoun in travay pou fer sir, ki ozordi nou anmenn en logmantasyon 5poursan. Onorab Ferrari yer dan son Mosyon i ti kriye a aotvwa. Mon a remind li.  I ti kriye pou dir nou, nou pa spesyalis nou ! Wi Onorab Ferrari nou pa spesyalis atraver ou Mr Speaker, annou montre respe pour nou bann Spesyalis ki’n travay lo sa bann saler logmantasyon.

Mr Speaker mon pa pou long akoz mon bezwen fer sir ki mesaz i byen ganny pase, pour nou bann dimoun laba deor konnen lekel ki pe lager pou met larzan dan zot pos !

 

(APPLAUSE)

 

HON AUDREY VIDOT

Met sa bann kalkilasyon syantifik – mon repet ankor la, sa bann kalkilasyon syantifik ki zot, zot ki ti dir dan sa bann konsiltasyon la, met laba!  Zet anba sa Mosyon, pour tou servis piblik ganny son 5poursan logmantasyon lafen di-mwan Avril, e annou les zot zouir sa avek zot logmantasyon long service ki zot pou gannyen osi an Zilyet.

Sa bann dimoun i anvi zot larzan Mr Speaker! Logmantasyon – donn zot, zot pti larzan! Annou aret trenn lipye dan sa Lasanble! Donn sa bann dimoun zot larzan ! Mersi Mr Speaker.

 

(APPLAUSE)

 

HON AUDREY VIDOT

 

 

MR SPEAKER

Mersi Onorab Vidot.  Mon kontan – i en lentervansyon ki kourt. Mon pe zis gid bann Manm ki pou entervenir – parey mon’n dir yer annou sey fer nou entervansyon bref, e annou sey konsantre osi tou lo Mosyon.  Mon ava donn laparol Onorab Waven William.

 

HON WAVEN WILLIAM    

Mersi Mr Speaker.  Mr Speaker mon dir ou mersi ki ou’n donn mwan laparol, e mon pe pran laparol akoz mon ti anmenn en Mosyon lannen pase, ki ti pe demande pou koriz bann inegalite e osi pou donn lazistis dan kad saler, allowance e osi tann servis. Mr Speaker mon pa ti isi, me mon’n ganny sans swiv en pti pe lafason ki bann diskisyon in ale vizavi sa Prozedlwa ki in vin dan Lasanble lo sa 5poursan.

E petet si nou ti’n pran en desizyon oparavan menm pou asize, revwar, sey diskite petet nou pa ti pou dan sa lespas ki nou ete ozordi. E letan mon pe koze, mon pa pran ni kredi ni pou en kote ouswa pou lot kote, me mon pe regard mon rol konman en Manm Parlman, ki’n ganny elekte, e an menm tan rekonnet rol en Manm Parlman pour egzers oversight.   E pour sey rod touzour sa ki byen pou pep Seselwa. E mon krwar sa ki mon’n dir la tou le de parti i tonm dakor lo la.

Mr Speaker mwan mon anvi siport sa Mosyon, akoz mon santi pou dir i kree en loportinite ozordi, pour sa 6enm Lasanble pou vreman adres en size ki konsern pep Seselwa, ki konsern son vant. Me nou bezwen regard osi pli larz.  Nou tou nou pe konplent kout lavi, me nou pa pou kapab zis tay ek sa keksoz e epi nou realize ki nou bezwen anmenn bann lezot amannman pli tar ! E parey mon dir se ozordi i prezant sa 6enm Lasanble avek en golden opportunity pour nou fer en keksoz ki byen pou pep Seselwa.

 

(APPLAUSE)

 

HON WAVEN WILLIAM

Mon konnen poudir deor la dan piblik zot pe ekoute, e mon konnen ki poudir sa 6enm Lasanble i fer en keksoz ki byen, ki demen zot ganny en fair deal e ki nou pa fer pei anfonse.

Mon lot pwen Mr Speaker se ki sa propozisyon ki pe ganny anmennen par lot kote parey mon dir mon pou siport sa Mosyon, akoz i pou donn nou sa sans pour nou re-angaze e sorti avek en keksoz ki byen.

Mr Speaker nou pe dir annou get bann dimoun ki anba sa latab.  E letan mon pe regarde wi i annan sa propozisyon 5poursan ki’n sorti kot Egzekitif, me i en propozisyon.

Prezan in vin devan sa Lasanble konman sa Prozedlwa pour ganny amande, me rol Lasanble se pou vwar, pou kestyonnen e pou demande eski nou pa kapab fer pli byen?

E mon lot pwen se ki, si nou kapab fer en legzersis ki byen, nou pe dir poudir i  annan lespas pour lekonomi agrandi,  sa demann pou donn tou dimoun menm parey mon krwar i fair ozordi !  Ki pli tar nou kapab vwar an mezir  lekonomi i grandi pou nou aziste.

(APPLAUSE)

 

 

HON WAVEN WILLIAM

E lot pwen ki mon anvi avanse se ki, petet anler nou pa bezwen sa! E mwan lo en baz moral mon pare pou forego sa logmantasyon an solidarite avek sa bann dimoun ki anba.

 

(APPLAUSE)

 

HON WAVEN WILLIAM

Mr Speaker mon pa pou dir tro bokou e an menm tan mon a dir poudir i annan serten kestyon vizavi legalite sa S.I. Akoz mon’n konsilte osi avek serten bann eksper legal – mon pa en eksper legal mwan, me selman parey mon dir se rol Lasanble to conduct oversight. E mon rol se pou asire ki :-

  • Nou bann dimoun ki nou toultan pe dir dan pozisyon vilnerab zot osi zot kapab ganny sans ganny en pti pe plis, pour zot kapab fer fas avek sa lavi ozordi.

Mersi Mr Speaker.  Parey mon’n dir ou mon pa pou tro long e mon pou donn sipor sa Mosyon.

 

(APPLAUSE)

 

MR SPEAKER

Mersi Onorab William, mon ava donn laparol Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun espesyalman bonzour bann dimoun Mont Buxton. Mon pran laparol ozordi bomaten akoz mon anvi anmenn mon kontribisyon pour ki dimoun deor, e sirtou dimoun ki mon reprezante dan distrik Mont Buxton ki ou’n vot pour mwan ki ou pa’n vot pour mwan me ou bezwen konpran ki nou pe diskite la anndan e met li byen dan son konteks.

Premyerman nou dan LDS, nou pa pe dir ki nou pa an faver logmantasyon pour bann dimoun ki travay dan servis piblik e ki nou’n vote pour zot kapab ganny sa logmantasyon total 62milyon.

Letan, mon’n deza eksplike ki letan Bidze i vini – wi letan nou vot an zeneral nou’n abstain, me letan Bidze i ganny kase par alokasyon, lo wages and salaries ki pou Gouvernman nou ti vote an faver. Akoz nou konsyan nou rol konman Manm Lasanble.

Premyerman LDS in lager yer, pour dir ki sa Mosyon ki Leader of Government Business ti anmennen pour retir sa Lalwa, nou ti vot kont !

Pour la senp rezon ki nou ti anvi nou kontinyen debat lo sa Lalwa e envit brans Egzekitiv Gouvernman, pour nou annan en konversasyon, en negosyasyon, pour nou trouv en pozisyon komen e anmenn en keksoz meyer pou tou nou frer Seselwa.

 

(APPLAUSE)

 

HON GERVAIS HENRIE

E nou’n osi pran sa pozisyon pou quash sa S.I. Mosyon ki nou pe debat lo la, la akoz nou konnen ki sa S.I. ki Msye Faure dan son kapasite koman Sef Egzekitiv e osi Minis Ladministrasyon in sinyen i ilegal! E nou konnen poudir pouvwar Lezislasyon i avek nou, e nou ki ti merit ansanm letan zot vin la zot asiz lo sa bann sez la devan, ansanm nou fer sa travay pou benefis pep Seselwa.

Mr Speaker mon vwar li en afron, mon vwar en afron e mon vwar konman en – mon privilez koman Manm Lasanble in ganny afekte letan keksoz pe deroul dan sa fason kot Egzekitiv i zis kapab siny en Lalwa, sa S.I. letan ki en Lalwa i ankor devan Lasanble, annou koz dominer, annou koz diktater. E nou tou ki la anndan annou mazin byen i en afron pour mwan, i en afron pou ou lo lot kote latab sirtou ki en Manm Elekte !

Ou annan en rol oversight, ou annan en rol reprezantativ be Gouvernman ki mannyer i kapab oubliy sa, e met ou de-kote dan sa konversasyon ? Prezan pozisyon ki nou pe pran i annan en common ground.  Gouvernman dan Lalwa i dir poudir tou le 5an logmantasyon i iniform.  Savedir si anba pli ba i ganny 5poursan, pli o i ganny 5poursan! Nou osi nou pe pran en pozisyon kot nou pe dir en logmantasyon iniform, kot tou dimoun, nou , nou pe dir an term sif – an term sif, tou dimoun i a ganny parey.

Mon vwar en pe dezonnet.  Mon vwar li malere ki bann dimoun lot kote latab, in swazir pou sot lo en sif 1500 ouswa 4mil. Sa ti en figure of speech !  Egalman en dimoun ti kapab dir si mon ganny R1 nou tou nou a ganny R1!  Akoz ou swazir pou ganny R4mil? Ki ou pe sey fer ler ou fer sa?

Zot in dir poudir nou ladan bann MNA i ladan, wi nou ladan mwan osi mon ladan.  Mwan mon pou ganny R1500 logmantasyon baze lo mon saler ki mon gannyen. Mwan mon pare Gervais Henrie pou forego sa larzan !

 

(APPLAUSE)

 

HON GERVAIS HENRIE

Akoz mon anvi, mon anvi senpatiz, mon anvi partaz soufrans sa dimoun dan mon distrik.

Mr Speaker mon ava donn ou 2 legzanp ; semenn pase mon’n al dan en laboutik mon’n al rod en pe dizef. E letan mon antre, en dizef pe vann R5 – R5 pour mwan aste 10 – R50? Mon dir non mon pa pou aste.  E an menm tan i antre 3 endividi, en granmanman, son fiy, avek sa fiy i annan en lot pti zanfan dan son lanmen -en pti baba ; 3 zenerasyon.

E sa madanm letan sa Endyen i dir li en dizef R5  i ganny sok, i dir, ‘’En dizef R5?’’ I vire i ale ; mon tann zot pe negosye deor zot pa kapab afford lakantite ki zot ti pe vin aste avek larzan. E mwan osi pa’n pran.  E mon santi sa soufrans sa dimoun.

Yer swar 10er mwen 5, mon dan mon lili mon pe lir, mon telefonn i sonnen, e en dimoun Union Vale, pa dan mon distrik i dan distrik La Rivière Anglaise i call mwan. Pandan 5an i pe travay konman en nursing assistant e ozordi i pe ganny li 5an son lapey in reste parey R5,008. E letan i eksplik mwan son soufrans i dir ek mwan poudir  sa logmantasyon ki pe donn li pa ase. E mon konpran e mon dakor avek li, se akoz se pour sa rezon ki nou’n pran sa pozisyon dan Lasanble ki nou pe pran ozordi!

E pour bann dimoun ki pe ekoute konpran nou, dernyen logmantasyon anba sa grid ki nou pe sanze ti an 2013.  E saler pli ba sa lepok ti R5,485 e propozisyon ki Gouvernman ozordi pe pran i pou ogmant li pou vin R5,759 – sa i fer en logmantasyon R274.

Saler pli o ti  R93,985 e  propozisyon ki Gouvernman pe fer i pou ariv R98,680 ki fer en logmantasyon R4,695.

Dan lespas 6an Mr Speaker, 6an – dimoun pli ba pou ganny en logmantasyon selman R274 e saler pli o li i pou ganny R4, 695.

Prezan si nou pran sa larzan nou divize, sa dimoun ki li i pou ganny saler pli o i pou pran en dimoun ki ganny saler pli ba 16 fwa, 16mwan! Savedir i pou tonm li 1an 4mwan pou ganny li sa menm kantite larzan ! Dan 1an 4mwan pour li ganny sa menm kantite larzan en ?

Mwan pour mwan mon saler konman en MNA sa logmantasyon R1500 ki mon pou gannyen i pou pran sa dimoun pli ba 5mwan pou li egal sa R1500 – 5mwan !  E letan li in ariv sa 5mwan ki egal mon R1500 mwan mon’n fini ariv 7,500. E pour sa rezon ki mon dir mon pare pour forego, pour mwan kapab omwen senpatiz avek li lo serten nivo.  E silvouple – e silvouple, silvouple bann profesyonnel ki ganny targete lot kote  pe dir, ‘’wi  ou ou’n travay, ou’n burn the midnight oil.’’  Mwan osi mon’n pase dan sa semen. Me ou konnen kwa ?

Ler mwan mon’n pas dan sa semen la – ler mon’n desann bomaten pour mwan al pran en bis, i annan en dimoun saler pli ba ki ti pe anmenn mwan lekol Polytechnic 6er bomaten! I annan en dimoun ki ti’n leve ki ti’n balye semen !

Ler mon ti ariv lekol, toilette ti’n netwaye !  I annan en dimoun saler  pli ba ki ti’n fer sa pour mwan !

 

 

(APPLAUSE)

 

HON GERVAIS HENRIE

Tou partou kot mon’n pase en dimoun saler pli ba in tyonbo mon lanmen pou fer mwan ariv kot mon’n arive, mon dir zot mersi.

E ozordi mon anvi senpatiz ek zot par forego sa larzan logmantasyon ki Gouvernman pe donn nou. Mon dir mon pa ou le 5poursan, donn mwan en sif egal parey pour zot.  E i a donn nou en lespas ziska Desanm nou a kapab asize ansanm avek brans Egzekitiv ankor enn fwa nou anvoy lanmen Mr Speaker, pour nou annan en konversasyon.

Konpran nou bann dimoun.  Parski bann ki pli o mazinen ki zot pe gannyen.  La pli par zot in lo Kontra 2an, e zot pe ganny en end of contract tou le 2an. Zot pe kapab pas en bon Nwel, zot pe kapab al en vakans avek zot fanmir.

Bokou zot pe ganny fuel allowance ki ankor bann dokiman ki mon’n gannyen R5, 600 ki pou laplipar ka, i plis ki sa carer ouswa, sa dimoun ki lo minimum wage pe gannyen.

Zot ganny allowance pou telefonn, zot pe ganny sa ki apel commuted allowance. Bokou zot i asiz lo bann Board e zot pe ganny en allowance.   Zot pe travel first class.  Zot pe ganny per diem e serten zot pe ganny entertainment allowance.  E i annan pe ganny housing allowance – pour konbyen? Lespas 3an mon krwar la in ariv R4mil nou pe siporte.

Nou pe siporte.  Nou pa pe pran sa bann keksoz avek zot.  Me nou pe dir zot pou en peryod letan, dan sa moman difisil kot pei kou lavi i o; kot sa granmanman, manman e pti zanfan pa’n kapab aste en dizef R5, nou pe dir zot konpran nou, annou partaz en kou!

Sa kastrol manze ki lo latab nou tou annou pran en lasyet, pou en peryod letan ziska ler nou kapab redres keksoz.  Alor mon anvi termin lo Mr Speaker nou pa pe pran, nou pa pe pran nanryen an plis ki zot pa pe gannyen. Me enn fwa pour tou konman en sel Nasyon, silvouple annou konman ser ek frer tyonbo lanmen, lo nenport kote politik ou relizyon ki ou été, me nou tou annou siport e donn en soutyen kanmarad.  Mersi bokou.

 

(APPLAUSE)

 

MR SPEAKER

Mersi Onorab Henrie. Mon ava donn laparol Onorab Johan Loze.

 

HON JOHAN LOZE

Mersi Mr Speaker.  Bonzour tou koleg Onorab.  Mr Speaker –

 

 (Interruption)

 

MR SPEAKER

Onorab Loze mon’n donn ou laparol koze.  I am the Chair e mwan ki deside. Ok?  Onorab Loze.

 

HON JOHAN LOZE

Mr Speaker dernyen fwa mon ti pran laparol lo sa size, i annan en largiman tre senp ki mon ti avanse. Tre senp e tre kler  – tir tou politisyen, tir tou constitutional appointees dan sa 5poursan! Tire, tir net!

 

(APPLAUSE)

 

HON JOHAN LOZE

E la mon repete – pa fer premye fwa mon dir sa dan sa Lasanble.  Al lo rikord zot a trouve – mon ti dir dernyen fwa tir tou politisyen,  tou  constitutional appointees dan sa 5poursan !  Tir nou konfli lentere ki nou, nou annan anndan pour diskit lo nou prop saler.

Menm si i annan ki akiz Ziz, akiz Ziz konmkwa  zot annan konfli lentere ! E nou menm nou, nou pe diskit lo nou prop saler.  Tir nou tou dan sa 5poursan.  La pou napa ni forego ni isi, ni laba, okenn zistwar zis tire!  Pwen se tou !

Mr Speaker dan bann konsiltasyon ki’n fer ek Gouvernman i annan en keksoz ki’n sorti kot bann teknisyen Minister Finans.  Zot deza annan en plan pour bann dimoun ki anba.  E sa ki zot in dir nou pour kout ant 30 a R36milyon. E zot pou vin avek swa dan Midyear Review ouswa dan Bidze an Desanm e sa pou adres zis sa bann band pli ba.

Zot ankor pe diskite bann teknisyen ki mannyer pou enplimant li egzakteman. Me napa personn dan milye ki pou benefisye atraver sa 30 a 36milyon ki zot pe propoze pou adres bann dimoun ki dan bann band pli anba. E sa lenformasyon – zot konnen zot osi LDS – zot in attend bann meeting, zot in ganny dir par Minister Finans, poudir i annan serten travay pe ganny fer.  So

 

(Off-Mic)

 

MR SPEAKER

Onorab kontinyen.

 

HON JOHAN LOZE

Mr Speaker i annan en fason avanse pour bann dimoun ki dan band pli ba, be sa bann ki dan milye, nou bann ners, nou bann dokter, bann polisye, bann civil servants,  sa dimoun ki’n travay 10an dan sa Gouvernman, be pandan sa 10 an in trouv en fason pour li al asiz 4 a 5an lo ban SIM. In lev son nivo, in lite pou ariv kot i ete.  Sa dimoun ki sa supervisor, ki’n struggle pou ariv dan sa pozisyon kot i ete e li son benefis ki pou sipoze vwar atraver sa logmantasyon i ant 8 a R1200 menm R600, i pa 450.

Statement ki’n ganny fer dan sa Lasanble dernyen fwa, ti si enn i ganny 4mil nou tou nou a ganny 4mil, si enn i ganny 1500 nou tou nou a ganny 1500. Personn pa pou ganny 4mil! Personn pa pou ganny 1500, zis sa group politisyen ki depi dernyen fwa mon pe dir – tire !  Tire dan sa 5poursan ! Tire dan sa revi ! Tir li net – tir konpletman ! Koumsa personn pa pou bezwen forego nanryen ki annan pou forego !  Mr Speaker –

 

(Interruption)

 

MR SPEAKER

Order!  Order !

 

HON JOHAN LOZE

 … Bill dan sa Lasanble pe adres sekter piblik, non pa sekter prive, ni lantrepriz piblik. I  pa tou travayer ki pou benefisye ouswa perdi atraver sa revi, e Lasanble ti konnen sa an Desanm. Letan ki zot ti aprouv sa logmantasyon an sonm e an prensip 62milyon divize par 5poursan logmantasyon atraver grid saler. Dan sa 11, 500 travayer sekter piblik i annan anviron 333 ki lo sa band 1 step 1.

Alors lozik LDS se pou kas en grid saler, ki pou 11, 500 travayer an fezan krwar ki zot pe lager pour sa 333 ki lo  band 1 step 1. Mr Speaker kan saler LDS li menm li, in pri dan son vye largiman met larzan dan pos Seselwa ki depi 2015 zot in kaye lo la ! I fer sote 4an e zot pa ankor fer nanryen pou met larzan dan pos personn dan sa pei !

Zour ki LDS i reisi pou adres saler pli ba, isi dan sa Lasanble, la, la nou ava dir ki zot serye e zot senser. Zot annan mazorite preski absoli dan Lasanble ! Zot annan lotonomi finansyel pou zer finans  Lasanble.  E saler pli ba dan Lasanble i still par anba R7mil plus bann diferan allowances ….

 

MR SPEAKER

Onorab, Onorab.

 

HON JOHAN LOZE

Yes Mr Speaker?

 

MR SPEAKER

Mon anvi koriz en keksoz.  Lotonomi lo Bidze Lasanble se Sekretarya ki annan – pa parti LDS.  Ok?

 

(Interruption)

 

HON JOHAN LOZE

Mersi Mr Speaker.

 

MR SPEAKER

Order! Order!  Bidze Lasanble i ganny prepare par en lekip Sekretarya ki ganny dirize par nou Direkter Zeneral avek son senior accountant e i ganny zere par Sekretarya. E konman nou Chief mon kapab dir sa nou CEO, se Madanm Clerk.  Ok?

 

HON JOHAN LOZE

Mersi Mr Speaker.

 

MR SPEAKER

Kontinyen.

 

HON JOHAN LOZE

Mersi Mr Speaker, e i byen ki ou’n eklersi sa Mr Speaker, e mon pou repete ki mon’n dir met larzan dan pos travayer Lasanble Mr Speaker! Akoz lasarite bien ordonee i komans devan ou prop laport!

 

(APPLAUSE)

 

HON JOHAN LOZE

Dabor apre ou al met lord kot ou kanmarad. Zour ki saler pli ba dan sa Lasanble i vin R8mil  saler de-baz plis lezot benefis avek allowance, la zot a kapab koze e tap zot lestoman! Depi zour ki zot la zot pa’n reisi adres sa sityasyon, alors avek tou senserite.

Mr Speaker LDS pe propoze pou tir larzan dan pos ners, dokter, teachers, enzenyer, gard e bokou lezot Seselwa ankor ki travay dan servis piblik.

Mon konn en madanm ki’n travay pou 10an dan Gouvernman – 10an Mr Speaker.  E pandan sa 10an ki in dan Gouvernman, in avans son lekor, in envestir dan son prop devlopman e la ozordi i annan li en bon saler.  E li osi i santi ki i pou ganny defavorize atraver sa ki LDS pe propoze.

Selman, nou poz sa lanmenm, nou bouze.  Sa supervisor ki’n lite pandan 20an pou ariv kot in arive, la ozordi pour son rekonpans zot pe koup son logmantasyon par lanmwatye!   LDS zot ou le pini ners, dokter, gard, teachers, tou sa ki’n lite – in limen – in eskente, zis pour zot fer mileage politik!

LDS ozordi zot kont tou bann ki’n al extra class!  Sa menm extra class ki zot menm zot pe dir mete.

Ki’n fer zot zefor ekstra e ki’n envestir dan zot prop devlopman personnel.  LDS zot 30an an aryer dan zot panse!  Zot pe fer bann menm propozisyon ki SPPF ti pe fer 30an pase!

 

(APPLAUSE)

 

HON JOHAN LOZE

Dan en sosyete modern pli ou annan responsabilite,  pli ou ganny byen reminere.  Tou lekonomi modern i fonksyonn koumsa. Tou lekonomi modern i pey en travayer pour son responsabilite. Ou pa pini li Mr Speaker.  Ki mesaz eski LDS pe sey pase? Sa ki fer plis, sa ki sakrifye plis, pou ganny mwens? Sa ki pey plis taks i ganny koupe son logmantasyon?

Annou sey balans en pe Mr Speaker.  Ki valer eski nou lo nou bann profesyonnel? Ki mannyer eski nou valorize zot? LDS pe zis envant tou kalite rezon pou pini nou bann profesyonnel e graduates ! E zot bann propozisyon i pa pou vreman benefisye bann ki lo saler pli ba. Meyer fason pou benefisye bann ki lo saler pli ba, se pou al avek bann propozisyon ki Minister Finans li menm pe fer!  Pa sa ki zot, zot pe sey propoze dan sa 62milyon ki zot in fini aprouve.

Mr Speaker mon’n asiz trankil yer dan sa Lasanble mon’n ekout tou sa ki in annan pou dir, zot in dir bokou keksoz.  I annan in koz lo moral mon krwar byen.  Zot in fer en largiman ki lo zot kote lo zot moral, mon krwar in menm dir lo nou kote nou annan en ‘‘pe moral.’’

Be Mr Speaker, mon le, pour mon closing argument mon ou le zis met en keksoz a laporte piblik. Le 01 Zanvye 2010 en logmantasyon saler 4.3poursan ti pran lefe pour tou travayer Seselwa ; 4.3poursan – pa plis.  Le 01 Zanvye 2010.

Me le 2 Leaders son lannen presedan, le 2 Leaders dan Lasanble Nasyonal zot ti mont State House zot ti negosye zot prop logmantasyon saler !  Zot saler ti sorti R18mil Sesel pou vin R28mil !  En logmantasyon pou plis ki 30poursan !

Aprezan zot ou le koz moral !  Moral Mr Speaker !  Zot Leader ti mont State House ti negosye son prop logmantasyon saler a en to plis ki 30poursan!  Se sa moral! Se sa moral!  Mersi Mr Speaker.  Mersi pour laparol mon’n terminen.

 

(APPLAUSE)

 

MR SPEAKER

Mersi Onorab Loze.  Bon nou annan en de klarifikasyon ki nou bezwen fer.  E mon’n ganny osi alerte par Sekretarya Lasanble ki nou pou bezwen fer klarifikasyon. Parey zot konnen mon Head sa Lenstitisyon, me pa mwan ki siny cheque Lasanble e pa mwan ki dir kote nou pou peye kote ki nou pa pou peye and so on. Ok ?  E i pa osi parti LDS.  Nou annan en striktir an plas e nou swiv, nou swiv tou bann prosedir,  malgre nou annan nou lotonomi ki Finans i donn nou.  E Minister Finans i kontinyen diriz nou. Non ava klarifye serten keksoz pli tar le moman ki mon ganny lenformasyon.  Yes Onorab Ramkalawan.

 

HON WAVEL RAMKALAWAN

Mr Speaker mersi bokou.  Sa dimoun ki’n koze avan mwan, mon pa konnen kote in ganny son lenformasyon –

 

MR SPEAKER

Onorab Loze.

 

HON WAVEL RAMKALAWAN

Mon pa konn li – well, ou pe dir mwan Mr Speaker?

 

(Interruption)

 

HON WAVEL RAMKALAWAN

Mr Speaker, pandan ki mwan mon’n Leader Lopozisyon, sa bann dimoun swivan in Leader of Government Business;  in annan Onorab De Commarmond aktyelman, in annan Onorab Marie Louise Potter; in annan Onorab Patrick Herminie e in annan 9non, non parski Onorab Faure pa li ki ti soz Mr Mancham) Mr Speaker mon anvi dir avek li, ki poudir napa okenn moman – mon pa konnen kote i ganny son bann fo lenformasyon – napa okenn moman ki Leader of Government Business avek Leader Lopozisyon in mont State house pou diskit okenn lapey! Avan logmantasyon!

E mon pe demann li Mr Speaker pou retract sa Statement akoz i totalman fo! E apre tou, apre tou Mr Speaker pandan 5enm Lasanble letan zot in – letan in  sanz fason pou lapey Manm, se Lasanble Nasyonal an antye, ki ti aprouv lapey Manm Lasanble Nasyonal,  e non pa sa 2 Leaders dan Lasanble! Alor silvouple avan nou koze, annou annan facts devan nou.  E  mon ti ava demande ki i re tir sa statement ki fo Mr Speaker.  Mersi.

 

(Interruption)

 

 

MR SPEAKER

Wi.  Mersi, Onorab.

 

(Interruption)

 

MR SPEAKER

Order! Order! Order!  Onorab Loze mon krwar ou statement i en latak lo le 2 Leaders ki isi prezan dan Lasanble e osi tou ki dan…

(Interruption)

 

MR SPEAKER

Order silvouple. Bon mon krwar ou statement i en latak direk lo le 2 Lofis – le 2 Leaders.  E le 2 Leaders zot osi zot in past Leaders dan sa Lasanble e sa 2 referans ki ou’n fer ki konmkwa zot ti al negosye zot prop saler State House i pa byen.  E mon ti a kontan ou ti a retract, Onorab.

 

HON JOHAN LOZE

Mr Speaker retract i pa en problenm.  Selman i laverite!  I laverite!

 

(Interruption)

 

HON JOHAN LOZE

Mon a retract, selman i laverite! E mon krwar  … i napa Mr Speaker …

 

(Interruption)

 

MR SPEAKER

Non, non.  Non, non Onorab, Onorab, en moman. Mon krwar sa statement si ou ti pe mazin i en latak lo Leader Lopozisyon, ou’n fer en latak lo ou prop Leader!  E mwan, mwan  ki pe Chair mon pa pou toler sa. Alor ou retract, e ou retract san okenn kondisyon.  Ok? Mon ou le ou retract akoz in vin en latak,

 

HON JOHAN LOZE

… mon retract san kondisyon.  Mon ava anmenn laprev pli tar Mr Speaker.

 

MR SPEAKER

… lo Onorab De Commarmond e osi tou previous Leaders, ki mwan osi tou ler mon’n servi dan sa Lasanble in lead pozisyon Gouvernman e sa se Onorab Marie Louise Potter, ok ?  Ou’n osi lans sa latak lo li ok ?  So mon ti a zis kontan ki ou retract sa bout.

 

HON JOHAN LOZE

Mr Speaker mon a retract.  Mon pa’n fer okenn latak lo personn. Mersi.

 

MR SPEAKER

Mersi Onorab.  Mersi, dakor.  O? Bon nou pou kontiny avek –

 

(Interruption)

 

MR SPEAKER

Order ! Nou pou kontiny avek nou travay.  Mon ava donn laparol Onorab Simon Gill.  Onorab.

 

(Interruption)

 

MR SPEAKER

Order!  Order!   Onorab Simon Gill.

 

HON SIMON GILL

Bonzour Mr Speaker.  Mersi bokou Mr Speaker pou donn mwan laparol.  Bonzour tou koleg Onorab e manm piblik ki pe ekout nou.

Mr Speaker size devan nou Lasanble i en size ki ase sansib.  I en size ki preokip ozordi Lanasyon Seselwa. E i en size ki pa zis akoz nou pe diskit lo en Prozedlwa ki devan Lasanble lo en Mosyon ki pe reazir lo en S.I. I en size Mr Speaker ki’n preokip nou parti. Depi son formasyon an 1964 pa la ozordi an 2019.  Pa ni yer or lannen pase 2018, ni menm 10an pase.

Me i en size ki’n preokip legzistans nou parti Mr Speaker, mon repete depi son formasyon. E par kont enn bann rezon akoz Msye Rene avek bann lezot Leaders an 64 ti deside pou lit kont en sistenm dyabolik, en sistenm diskriminatwar, en sistenm lenzistis inegalite ant bann diferan saler se zisteman sa rezondet son formasyon!

 

(APPLAUSE)

 

HON SIMON GILL

E Mr Speaker i annan ozordi dan Lasanble la ki pa ti ankor ne !  Letan Msye Rene avek bann lezot Leaders, ti lans en lalit pou liber pep Seselwa. E fodre zanmen nou bliye, wi Onorab Ramkalawan!

 

 

(APPLAUSE)

 

HON SIMON GILL

Fodre zanmen nou bliye!  E Mr Speaker mon repete ozordi, si i annan en keksoz ki’n motiv mwan depi ler mon’n antre dan batay politik dan sa pei, se pou lit kont lenzistis linegalite dan sa pei !

 

(APPLAUSE)

 

HON SIMON GILL

E ozordi pa detrwa bann dimoun ki pa ti ankor ne ki pou vin fer krwar zot pli byen kapab enterpret kondisyon ki pour mwan mon’n ne, e mon’n viv ladan atraver mon lavi.  E ki plizyer de santenn, e de milye Seselwa in viv ladan!

Mr Speaker mon pa kanmi pou koz lo mon kondisyon.  Mon pa kanmi.  Mr Speaker mon’n ne dan lamizer, mon’n grandi dan lamizer, mon’n efiz lamizer, mon’n bwar lamizer !

 

(Off-Mic)

 

HON SIMON GILL

E ozordi, wi Onorab Roucou ou en milyonner, e se gras a sa sistenm ki ou pe lager pou eliminen, ki’n fer ou vin en milyonner Onorab Roucou !

 

(APPLAUSE)

 

HON SIMON GILL

Mr Speaker e ozordi, ozordi personn pa kapab fer nou krwar pou dir nou pe viv dan en sityasyon eksepsyonnel – ekstraordiner pour zistifye, met otaz en Prozedlwa dan sa Lasanble. Mon servi sa terminolozi ‘’met otaz’’ en Prozedlwa lo baz ki annan en sityasyon eksepsyonnel, e nou bezwen distribye 62milyon partou across the board menm parey ! Mr Speaker zanmen dan sa pei, zanmen dan sa pei depi ler mon’n annan laz konesans nou’n distribye larzan across the board!

Mr Speaker Onorab Ferrari, Onorab Ferrari atraver ou Mr Speaker i dir nou’n distribye across the board, sak dimoun in ganny en proporsyon. Onorab Afif, Onorab Afif i a konpran sa i a zistifye sa pli byen taler si zanmen i pou entervenir.

Si zanmen Mr Speaker, apre ki nou’n donn bann profesyonnel en latas apre nou Prozedlwa 2013, nou’n donn zot en latas pour zot travay e met an mars en metod, en mekanizm, en striktir, pour nou vwar sa kestyon logmantasyon saler dan sa pei – Mr Speaker ozordi bann politisyen pe dir avek tou sa bann profesyonnel ki’n fer sa letid, ki sa ki zot in fer pa bon.

Onorab Ferrari, Mr Speaker pe dir ek sa Komisyon ki’n travay pou reviz striktir  saler dan sa pei, pe dir zot pa bon  travay ki zot in fer! Les bann politisyen fer  en travay!

Mr Speaker  fodre pa zanmen – i annan en Onorab ki’n koze avan mwan in dir, fodre pa zanmen, Mr Speaker fodre pa zanmen, nou krwar ki sa staz ki nou pei in arive, nou pou dir donn tou dimoun dan sa 62milyon en sonm parey. Sa pe anmenn nou ver katastrof! Mr Speaker sa pe anmenn nou ver katastrof. Mr Speaker mwan mon pou al pli lwen ki sa.

E mon a dir zot, e mon a dir Onorab Gervais Henrie ki kote mon pou arive.  Mon pou ariv atraver premyerman

1) Propoz en revizyon bokou pli favorab ki sa ki LDS pe fer. E byensir i pa pou kapab pran lefe imedyatman. Sa ki nou pou propoze Mr Speaker konman en parti politik, mon repete Mr Speaker, sa ki nou pou propoze konman en parti politik – mon ti konmans tous sa dan mon lentervansyon lo Bill e mon pou repete ankor ozordi, se dan nou zefor pour akoursi sa lekar ki annan dan bann saler ant sa ki pli ba avek sa ki anler, nou demande ki nou elimin premye band, 2enm band, 3enm band e probableman 4enm band – nou eliminen.

E nou pous tou bann dimoun anba, nou anvoy zot lo 3 oubyen lo 4enm band Mr Speaker!

 

(APPLAUSE)

 

HON SIMON GILL

E nou al pli lwen lo laliny orizontal lo son bann step nou pou demande ki nou collapse detrwa step.  E ki nou ti bann dimoun lo premye detrwa step nou anvoy zot pou konmans lo 4enm,  5enm step an montan.

 

(APPLAUSE)

 

HON SIMON GILL

Mr Speaker lot keksoz ki nou pou propoze – ki nou propoze, se ki dan sanmenm dan sa bann diferan grid ki egziste. Son bann diferan step nou pe demande ki tou bann HR dan Gouvernman, avek bann lezot teknisyen, bann expert ki’n asize ki’n fer sa revizyon, ki’n propoz sa 5poursan logmantasyon, se ki zot zwenn ansanm zot tou pour armoniz tou sa bann band e tou sa bann step. Pour ki nou elimin tou sa bann disparite ki egziste dan la bann diferan step !

 

(APPLAUSE)

 

HON SIMON GILL

Mr Speaker nou al pli lwen, nou al pli lwen e nou pe demann Gouvernman ki dan son Midyear Review – Midyear economic review, financial review  ki i fer, pour met an perspektiv sa bann propozisyon ki nou pe fer ozordi dan sa Lasanble.  E vin avek en pozisyon reel, ki lefe ki lenpak finansyel ki sa pou annan lo Bidze 2019 e byensir  prozeksyon pour Bidze 2020. E Mr Speaker lo sa baz, lo sa baz, lo sa baz Mr Speaker nou ava reasire ki sa lekar ki i annan ant sa ki anba e sa ki anler, i ganny akoursi e ki tou nou bann dimoun, i santi zot dan serten fason konfortab.

Me Mr Speaker ler mon’n dir sa, fodre pa zanmen okenn politisyen i esey konfonn nou pep, pou fer nou krwar poudir logmantasyon saler i annan menm dinamik avek koud lavi.

Mr Speaker Onorab Georges in konpran sa tre byen, ki koud lavi pa egal avek logmantasyon saler. E mon kontan i dakor avek mwan.

Mr Speaker lot keksoz ki i annan se ki zanmen, zanmen okenn politisyen i devret fer okenn lesey, pou fer nou krwar ozordi ki tou dimoun dan en sosyete – dan en pei i kapab ganny menm saler! Zanmen in egziste, zanmen pou egziste dan okenn sosyete!

 

(APPLAUSE)

 

HON SIMON GILL

 

E Mr Speaker fodre okenn politisyen i esey konfonn sa pep pou fer okenn sitwayen krwar, poudir responsabilite sa madanm ki Onorab Gervais Henrie i dir i netway laklas, in balye laklas, i ekivalan menm responsabilite ki en Prezidan e pei i annan.  Or sa Headteacher  i annan, or sa teacher i annan. Me Mr Speaker, Mr Speaker sa ki nou bezwen fer, sa ki nou bezwen fer se valoriz tou travay dan en sosyete.

 

(APPLAUSE)

 

HON SIMON GILL

Mon repete – e valoriz tou travay dan en sosyete.  Se sa ki nou bezwen fer – valoriz li.

 

MR SPEAKER

Onorab i reste ou 3 minit.

 

HON SIMON GILL

I ok Mr Speaker, mon a gete si mon kapab fini dan sa 3 minit ki ou dir mwan. Me i reste mwan ankor 7 pwen mon oule touse. Mr Speaker lot pwen ki mon ou le al lo la, ozordi dan bokou pei kot mon’n fer letid mon’n fer resers, mon’n gete e enkli Sesel, enkli La France kot Onorab Ferrari in etidye, i annan en kantite bann  dimoun dan private sector, dan sekter prive, pe ganny bokou plis larzan ki zot Prezidan.  E ozordi dan Sesel Mr Speaker, lefe i reste ki i annan bokou sitwayen Seselwa, pe ganny plis larzan ki nou Prezidan i gannyen!  E fodre zanmen nou esey konfonn sa pep!

Zanmen nou bezwen konfonn sa pep pou fer krwar si sa 5poursan ekivalan R4mil ki Prezidan pe gannyen ki sa i en sonm larzan eksepsyonnel, ekstraordiner – abnormal. Non, i pa ekstraordiner, i pa abnormal.  E nou bezwen rekonnet e valoriz valer e responsabilite ki en Prezidan i annan, ki en Minis i annan, ki  en Manm Lasanble i annan.   Se sa ki nou bezwen fer ! Valoriz tou travay.

E Mr Speaker ou a rapel mon ti demann en kestyon dernyen fwa letan mon ti entervenir  lo sa Prozedlwa. Mon ti demande ki lorizin – mon repete Mr Speaker, ki lorizin sa bann diferan grad saler ki sosyete in adopte.  Ki son lorizin?

E mon reste bafwe avek lorizin sa bann grad saler ki sak bann zonm fanm i donnen zot bann diferan responsabilite ki zot annan dan sosyete. E se sa ki i anmenn mwan dan mon refleksyon, dan mon analiz pour nou fer en transformasyon radikal, profon dan sa striktir saler ki egziste dan Sesel !

 

(APPLAUSE)

 

HON SIMON GILL

E nou pe demann bann teknisyen, bann expert, pour wi pou fer sa louvraz e pou  anmenn bann propozisyon sa transformasyon, sa revolisyon ki nou le trouve dan striktir saler dan sa pei. Me Mr Speaker mon le met lanfaz lo en pwen.

Mon konnen ou pre pou dir mwan mon letan pe fini me i reste mwan ankor 4 pwen dan sa 7 ki ti annan ; lot  pwen ki i annan ki mon ou le fer resorti, fodre zanmen Mr Speaker okenn politisyen i konfonn nou pep, pou fer nou krwar ki sa logmantasyon 5poursan ,i aplikab pour tou bann  dimoun ki dan sekter prive.

Mr Speaker sa logmantasyon 5poursan pa aplikab pou okenn travayer dan sekter prive. I aplikab pou selman bann travayer dan sekter piblik – dan Gouvernman.  Me, me le pwen Onorab Ramkalawan ki dakor ek mwan ki zot in konfonn dimoun,

 

(laughter)

 

HON SIMON GILL

… nou pe dir ki nou bezwen arete senm sa bann konfizyon. Nou bezwen arete sa bann konfizyon Mr Speaker atraver ou.

 

MR SPEAKER

Onorab wrap-up.

 

HON SIMON GILL

Mr Speaker ler mon pou wrap- up Onorab Ramkalawan mon pou dir detrwa keksoz.  Premye keksoz Mr Speaker ki mon bezwen fer re sorti dan sa wrapping-up Mr Speaker se ki annou bouze, annou bouze, annou pa met otaz saler sa pep travayan dan sa pei.

 

(APPLAUSE)

 

HON SIMON GILL

Sa pep in travay.  Sa 62milyon in vote dan Bidze 2019. Annou donn travayer son dues.  Annou donn zot, zot larzan ki’n ganny vote.  Antretan Mr Speaker ki nou pran letan pou demann bann expert pa bann politisyen Mr Speaker, nou fer bann propozisyon me les bann expert travay.

Les bann expert vin avek bann propozisyon, Mr Speaker.  Mr Speaker i enportan ki politisyen i reste an deor sa zafer, e nou konman en parti politik nou pou soumet nou bann propozisyon. E ki mon’n fer soumisyon la ki nou le zot kapte pour ki nou kapab anmenn sa transformasyon enportan ki nou bezwen dan sa pei.  Mr Speaker nou dan sa pei Mr Speaker nou respe tou travayer dan sa pei nou …

 

MR SPEAKER

Mersi.  Mersi Onorab Simon Gill.  Bon mon ava donn laparol Onorab Bernard Georges e sa i ava swiv par Onorab Charles De Commarmond.

 

HON BERNARD GEORGES

Mersi Mr Speaker.  Bonzour tou bann Manm Onorab, bonzour bann dimoun ki pe ekout nou dan lakour. Mr Speaker nou annan devan nou en Mosyon pour quash en S.I. ki’n ganny sinyen par Prezidan Larepiblik.  Se sa ki devan nou ozordi e i paret mwan, i paret mwan mannyer mon’n ekout sa 2 dernyen entervenan lo lot kote latab, ki sa Mosyon pour obtenir linanimite ler nou pe vot lo la.  Akoz i kler, i kler ki lo tou le de  kote latab i annan en lakseptasyon ki sa propozisyon pour ogmant saler par 5poursan right across the Board i pa meyer solisyon pour nou pep.

 

(APPLAUSE)

 

HON BERNARD GEORGES

E sa 3 dernyen entervenan in fer li kler ki i annan en meyer fason pou fer, e sa 2 dernyen in fer propozisyon konkret lo ki mannyer sa i devret arive. Alor Mr Speaker mon pou konsantre lo sa lide, sa lespri ki mon santi pe sorti dan sa Lasanble, ki tou dimoun pou dakor ki sa S.I. i pou bezwen ganny quash dan en fason ki en meyer sistenm ki sa enn ki pe ganny propoze par Gouvernman i ava kapab ganny trouve pour byennet bann travayer dan servis piblik. E la mon ti a kontan fer rapel Onorab Gill ki’n koz  avan mwan ki nou konn lir.

E ler nou lir Public Service Salary Act dan sa S.I. nou konpran ki sa i annan pou fer avek saler servis piblik e non pa saler bann dimoun ki travay dan sekter prive. Mr Speaker tou dimoun i dakor, tou dimoun dan sa pei,  depi Prezidan Larepiblik ziska  sa Lasanble Nasyonal ek ou travayer partou i dakor ki en logmantasyon saler i bezwen ganny donnen.  E nou ti vote lannen pase pou ki R62milyon  i ava ganny allocate pou logmantasyon saler servis piblik. Sel kestyon ki reste ozordi, se meyer fason pou partaz sa R62milyon parmi sa bann travayer servis piblik.

E se la kot i annan en diferans ant sa ki zot, zot pe propoze dan sa S.I. ek ki nou, nou pe propoze lo nou kote latab. Me parey mon’n dir menm lo zot kote i paret mwan ki zot in konmans aksepte ki sa propozisyon dan sa S.I. oubyen dan sa Bill ki ti’n vin avan, i pa meyer fason.  E mon vwar atraver sa ki fek ganny dir ki zot in konmans aksepte nou propozisyon ki sa ki devret ganny fer, se antre dan en dyalog avek Gouvernman pou trouv meyer solisyon pou nou bann travayer servis piblik.

E sa i anmenn mwan Mr Speaker lo sa 3 rezon akoz ki sa S.I. devan nou i devret ganny quash. Onorab Ferrari ler i ti pran laparol yer ti mansyonn 2 rezon.  Enn en rezon striktirel se sa S.I. li menm e lot sa ki nou apel en kestyon, en size moral ; setadir lafason ki sa SI pe sey donn sa increment bann travayer.

Mr Speaker parey zot ava’n konpran mwan mon toutafe dakor, lo kestyon moral lo kestyon konteni sa S.I. ki sa S.I. pa kapab pase. Akoz en logmantasyon 5 poursan right across the board i pa meyer fason pour nou konpans bann travayer servis piblik.

I en fason senp, i en fason inilateral me i pa meyer fason.  I annan en pli bon fason pou partaz sa R62milyon e sa meyer fason se pou donn parey zot menm  zot, zot,  in aksepte bomaten sa ki pli ba plis e sa ki pli o mwens. En keksoz ki en logmantasyon 5poursan right across the board pa arive fer.

Donk lo sa akote Mr Speaker mon konnen en mon konvenki ki tou sa Lasanble pou aksepte ki sa S.I. pa kapab al devan, akoz nou kapab fer pli byen.

Mon pour vin lo kote striktirel dan en minit en mon le mon entervansyon dan sa letan ki reste mwan  i focus lo la. Me avan sa mon bezwen demann en kestyon Mr Speaker, e sa kestyon se bonn fwa Gouvernman – good faith Gouvernman.

E la mon bezwen pran en kestyon ki ou ti demande yer dan sanmenm sa Lasanble. Si, si Gouvernman ti’n kapab fer sa sanzman atraver sa S.I. akzo ki zot in anmenn en Bill devan sa Lasanble pour demann nou sanz sa striktir dan sa latab – dan sa Schedule ?

E sa set en kestyon ki al direkteman lo good faith Gouvernman, Eski Gouvernman vreman i annan bonn fwa dan sa ki zot pe demande? Eski vreman zot anvi ki i annan en logmantasyon saler? Oubyen eski zot telman zot telman focus lo zot 5poursan right across the board, ki zot ou le anver e kontre tou, ki sa propozisyon i pase, malgre ki tou dimoun i konnen ki sa se pa meyer fason pou fer.

E sa i anmenn mwan Mr Speaker,  lo rezon akoz mon pou demann avek tou nou bann Manm Lasanble isi bomaten Ozordi bomaten including bann lo kote United Seychelles, pou vot pour ki sa S.I.  i ganny kennsel.

Filozofi – e mon konnen ki sa mo i annan serten Manm Lasanble pa kontan – filozofi deryer Public Service Salary Act i kler. E i ganny mete dan son, dan long title filozofi sa Lalwa i ganny dir ki sa ki Gouvernman pe rode, se en striktir saler sa ki zot, zot apel en uniform salary structure pour servis piblik. E sa i enportan.  E set a la baz menm sa reform ki zot pe tante fer la ;

en uniform salary structure.

Sa in ganny fer atraver en latab. In  ganny eksplike ki i annan band e i annan plizyer dan en latab,  kot anmezir ki ou progrese dan lavi, ou pou progrese e ou pou sorti cleaner ou pou ariv Prezidan en zour. Se koumsa ki sa striktir in ganny fer.  E akoz en striktir pa eternel, i annan en provizyon dan Seksyon 7 pour en revizyon tou le 5an.

E se la kot problenm i arive. Gouvernman akoz se li Egzekitif in deside apwent bann expert, pour fer en propozisyon. E sa bann expert in fer en propozisyon 5 poursan right across the board.

E Gouvernman i aprouv sa devan nou e in demann nou pou aprouv sa konman reform pour sa 5an ki’n fek pase e sa 5an ki pe vini.

Lo sa kote latab nou’n annan temerite pou dir avek Gouvernman sorry nou  pa krwar ki sa se meyer fason pou partaz sa 62milyon ki nou ti vote lannen pase.

Nou pa krwar ki sa se meyer fason pou anmenn en sanzman striktirel oubyen en revizyon dan sa saler.

Se sa ki nou’n dir, nou pa’n dir plis ki sa.  Me nou’n anmenn en propozisyon pou dir meyer fason pou fer li, se pou servi sa larzan e donn sa ki anba plis e donn sa ki anler en pe mwens.

Nou pa’n fer en sou  plis ki sa. Zot in fer en kantite politik lo sa lide. Me mon kontan, mon kontan ki atraver s politik zot menm zot, zot in arive konpran ki se koumsa ki i devret al devan.

E alors ki mannyer nou pou ariv lo sa destinasyon ki tou lede kote latab i a progrese ozordi ? Sel fason e se sel fason pou progrese se pou cancel sa S.I. ki devan nou pou retourn lo sa Bill ki ti ganny anmennen, pou reform sa Bill par en lamannman ki hopefully tou lede kote i kapab tonm dakor lo la, e pou arvi a sa solisyon ki nou tou nou anvi pou benefis nou bann travayer sekter piblik.

Alor ki mannyer eski zot asa al dan filozofi, ki mannyer zot, zot kapab vot avek nou ozordi pou kennsel sa Bill?  Mr Speaker nou en bann Manm Lasanble Nasyonal, nou’n ganny elekte direkteman oubyen proposyonnelman pour nou fer Lezislasyon dan s pei. Sa pouvwar in ganny donnen avek zis nou.  Me, me nou konstitisyon in dir ki akoz parey mon ti eksplike yer, nou pa kapab pas tou bann Lalwa ki annan akoz napa ase zournen dan en semenn – napa ase erdtan dan en zournen pou fer sa, nou, nou kapab donn pouvwar avek serten Lotorite pou pas Lalwa sibstidyer  sa ki nou apel S.I.

E se egzakteman sa ki’n ganny fer dan sa Public Service Salary Act.  Nou’n donn pouvwar avek Minis ansarz ladministrasyon pour li fer serten sanzman.  Sa ki nou pa’n donn li – akoz nou napa pou donn li se pouvwar pou vin en Lezislater parey nou ! Nou’n dir li ou kapab sanz serten keksoz, me ou pa kapab sanz en Lalwa.  Akoz sa se nou prerogatif.  Pa akoz nou ki anvi. Non !  Me akoz Konstitisyon ki’n donn nou sa pouvwar.  Nou pa kapab, Akoz Konstitisyon pa permet nou pou nou dir avek Prezidan ou kapab sanz en Lalwa.

Nou pa kapab fer li e nou pa kapab donn li en pouvwar vag, pour li kapab enterpret sa pouvwar, konmsi li i kapab sanz en Lalwa !  E set egzakteman sa ki in fer.  E se pour sa rezon ki mon kestyonn good faith Gouvernman dan sa S.I. ki zot in anmennen devan nou.

Akoz ou pa kapab Mr Speaker, an menm tan ki ou’n anvoy en Bill devan Lasanble anvoy en S.I. ki pe demann menm zafer avek sa Bill. Sa i pa posib e okenn Gouvernman ki fer li, i en Gouvernman ki pa responsab e ki pa pe pran son responsabilite konstitisyonnel dan en fason korek.  E se pour sa rezon alor ki mon demann avek zot ozordi – letan pa permet mwan pour al tou bann detay, me mon a dir zot sa, Prezidan ti annan pouvwar pour li sanz sa latab dan Schedule 1 sa Act.  Sa i ti annan pouvwar fer li.  Sa ki i napa pouvwar se sanz sa Schedule !

E se sa ki i pe sey fer anba sa S.I. akoz si zot regard tre byen son Lalwa li menm zot ava war ki i annan 2 Schedule, Schedule 1 e Schedule 2. Schedule 1 i annan en sel keksoz ladan se en latab, e sa latab selon mwan i annan li permisyon pou fer li, anba Seksyon 4 ek Seksyon 7 sa Lalwa.

I ti kapab si i ti anvi zis fer en S.I. e sanz sa latab.   Si i ti’n fer li, i ti pou still annan menm problenm, akoz i ti pou still lo sa kote latab demann ki sa S.I. i ganny quash. Pa akoz i napa pouvwar pou fer li me akoz son konteni nou krwar i pa meyer konteni –  meyer fason pou fer sa revizyon saler ki i per fer li. Me la ozordi nou pa ni bezwen ni al laba.

E mon pe envit zot konman Manm Lasanble Nasyon ki annan prerogatif Lezislasyon dan sa pei, annou pa ni al dan rezon moralite ; annou pa ni al dan son konteni sa Bill. Me zis lo lefet ki sa Bill sa S.I. pe sey sanz en Lalwa e ki Prezidan napa permisyon pou fer li e napa lotorite pou fer li, zis pou sa rezon sa S.I. i devret ganny strike down.

E mon dir en dernyen keksoz Mr Speaker lo sa size, e sa se lafason dan S.I. li menm li in ganny drafte.  En dimoun ki annan en pouvwar pa bezwen eksplik son pouvwar. Gouvernman – Prezidan ti a ava senpleman konmans sa S.I.  avek, ‘’now therefore …’’ Sel keksoz i ti a bezwen fer se, ‘’ … in exercise of the powers conferred by section 13, of the Public Service  Salary Act the President makes the following regulations:1, 2. Se tou ki i ti bezwen fer.

Me ki in fer in pas en paz pou eksplike akoz ki i pe al fer sa!  Zanmen mon’n deza war sa dan S.I. Mr Speaker.  En S.I. ou pa bezwen eksplike akoz kas 1, 2, 3 kontour pou ou al eksplike akoz ou pe al fer en keksoz.   E nou konnen akoz Prezidan in fer sa !

Akoz li menm li i pa sir ki i annan sa pouvwar pour fer sa ki i pe fer. Alor i pe sey fer en leksplikasyon. I pe sey eksplik avek son prop lekor akoz ki i pe fer sa.

Me nou, nou bann dimoun rezonnab nou.  Nou, nou bann Lezislater.   Nou’n ganny elekte parey mon’n dir pour nou fer Lezislasyon. Nou pa kapab aksepte ki en lot dimoun pou vin enterfer avek  nou travay menm si son lentansyon i bon ! Menm si son lentansyon i bon !

E mon pa pe dir ki lentansyon Prezidan pa bon.  Mon krwar i anvi fini ek sa zafer e move forward. Me Malerezman i pe fer dan en fason – premyerman ki pa legal e dezyenmman i pe fer li dan en fason ki pa apropriye.  Akoz i annan en meyer fason ki donn dimoun ki travay dan sekter piblik, en meyer logmantasyon dan zot saler – en meyer revizyon saler.

Alor mon bann koleg Onorab lo lot kote latab, bomaten tou lede kote in koz lo travay ansanm.

Mon pe demann zot, akoz vreman nou lo sa kote latab, e nou konnen ki zot osi lo zot kote latab zot napa okenn swa. Fas a en Lalwa a en S.I. ki pa legal nou sel, nou sel solisyon se pou strike li down !  Alors mon pe  demann zot met a kote – met akote, tou bann largiman emosyonnel lo ki mannyer nou pou anmenn meyer solisyon pour nou bann travayer servis piblik, e senpleman lo en pwen legal ; akoz sa S.I. pa konstitisyonnel i pa legal akoz sa dimoun ki’n fer li napa sa pouvwar pou fer li ; akoz i pe sey sanz en Schedule e non pa selman en latab lo sa Schedule. Strikteman lo sa pwen join avek nou e strike down sa S.I ! Ler nou a’n  fer sa, la nou ava kapab ansanm koz avek Egzekitiv e anmenn meyer solisyon pour nou bann travayer sekter piblik. Mersi Mr Speaker.

 

(APPLAUSE)

 

 

MR SPEAKER

Mersi Onorab Georges.  Mon ava donn laparol Onorab Charles De Commarmond.

 

HON CHARLES DE COMMARMOND

Mersi Mr Speaker. Mr Speaker depi yer nou’n ekout bokou keksoz konsernan kondisyon travayer Seselwa. Mon pran lo bout kot Onorab Gill in kite e la nou le met lanfaz lo rezon lalit United Seychelles.

United Seychelles ler ti konmanse atraver SPUP e enn bann rezon fondamantal se pou sanz kondisyon travayer Seselwa. E sa tou dilon pou ganny fer. E ziska ozordi.   E rezon ki nou pe koze nou se nou pe diskite, se ankor davantaz pou revwar kondisyon travayer Seselwa.

E a sa pwen la, i enportan pour met lanfaz lo sa bann keksoz.

  • Kondisyon sa saler avek

koud lavi fodre nou tou nou war la diferans. E ki i pa menm keksoz.   Mwan mon enn sa Manm Lasanble ki all along in seryezman e fortman koz lo kou lavi pou nou rod en fason pou fer redwir – fer desann, pour ki i vin pli abordab. Sa pou ozordi mon  a zis tous li koumsa me i a vin en pwen pour lezot diskisyon fondamantal apre, ki United Seychelles i pou anmennen dan sa Lasanble.

E Ozordi bann issues ki devan nou i ki United Seychelles in annan en dyalog ek Gouvernman.

E sa dyalog la nou’n tous detrwa pwen, i ankor lezot pwen ki nou pou met ater. Akoz nou, nou krwar pou dir devret annan en revi konplet striktir saler, e kondisyon saler dan Sesel antye !

Sa striktir konplet i bezwen i bezwen enkli en kantite lezot keksoz ankor.  Taler mon ava touse. Me sa ki devan nou, i kwa ? I zis pour nou kapab quash en S.I. . e akoz ki nou bezwen ariv lo la sa i rightful –  si oule rol en Lasanble. Lasanble si i krwar en S.I  i merit quash li i met son Mosyon devan e i annan 3 mwan pou fer sa.  E mon pa war rezon lirzans sa. 3 mwan in annan, me akoz in ariv koumsa?

In ariv koumsa, akoz depi letan Bidze ou  menm nou kapab menm avan depi 2013, ti annan en Lalwa pou kondisyon saler, ki ti ganny met devan. E ki dan sa Lalwa, ki tou le 5an i bezwen ganny revwar.

E sa Komite ki’n revwar in met serte propozisyon. E dan sa propozisyon, alor dan Bidze ti annan serten porsyon Bidze ki’n ganny allocate pour sa.  E tou Manm Lasanble isi ti konnen sa, ti vwar sa. Me nanryen pa’n ganny mete pour kapab anpes sa Bidze pase  a sa letan.  Tou sa bann diskisyon ki ou war pe fer la, ti’n devret  kekfwa mon krwar pe fer depi avan. Me pa’n ganny fer.  Les li !

Alor Gouvernman letan komitman i ganny fer dan Bidze, i bezwen anmenn son Lalwa apropriye. E ler in anmenn Lalwa, a 2 repriz nou Lasanble pa’n diskit an plen lo la.

Dan Committee stage in ganny dir arete! E sanmenm sa rezon ki mon ti anmenn en Mosyon pou tir sa Lalwa konpletman ! Akoz nou’n war kote United Seychelles, nou ti war ti annan en mankman. E nou’n  diskit ek Gouvernman.  Gouvernman in dir ok, nou retir sa Lalwa pour nou fer en keksoz pli profon.

Me lo lot kote latab zot pa’n dakor pour nou retir sa Lalwa pour nou anmenn en keksoz pli fondamantal. Me nou pe dir zot fer mannyer zot anvi !  Zot kapab pli dominer ki zot kapab avek zot mazorite, nou pe dir zot lo kote United Seychelles, nou pou anmenn en Lalwa pli fondamantal pou kondisyon travayer Seselwa !

 

(APPLAUSE)

 

HON CHARLES DE COMMARMOND

E nou swete zot a donn nou sipor a sa letan. Me  alor ki komitman letan sa in arive, ki nou pa’n tire,  nou pa’n retir  la, sa propozisyon lwa Gouvernman in anmenn son S.I !

Now, mwan mon pa pou dan legalite S.I. is ilegal si i pa legal sa, sa ki konsernen i a get son debrouy. Anmenn li dan Lakour Konstitisyonnel, anmenn li kot zot anvi, al gete sa pa mon louvraz.  Mwan mon pa fer sa bout mwan. Me selman, me selman ok?

 

(Interruption)

 

HON CHARLES DE COMMARMOND

Mr Speaker Onorab Flory Larue.  (La in byen dir a – in byen dir?)

 

(laughter)

 

HON CHARLES DE COMMARMOND

Eski ou kapab reste trankil ou pa’n lev ou lanmen pou ou koze, ekoute ki pe ganny dir pou ou konpran ki pe arive …

 

MR SPEAKER

Onorab.  Onorab, kontinyen.

 

HON CHARLES DE COMMARMOND

… through the Chair. Mersi Mr Speaker.  Alor Mr Speaker i enportan, i enportan, Onorab Georges ki’n fek koz avan mwan, i pe koz bonnfwa Gouvernman! Be byensir Gouvernman i annan bonnfwa! Sa ki’n aprouve dan Bidze i ti pe met an pratik, an egzekisyon.  Ou konpran mwan?  Now nou ki nou pe dir la, Gouvernman i bezwen onore sa, akoz i pou ganny challenge si i pa onore sa ki nou’n tonm dakor pour li fer ! Be sa parey mon dir mon pou kit la pour zot.  Be nou ki nou pe dir  dan United Seychelles nou, nou pe vin avek serten lezot propozisyon konplet ; ki nou ou le – nou oule  dan sa review letan nou pe dir tir sa Bill, nou ou le ki en keksoz pli konplet i ganny anmennen.

Premyerman ; Gouvernman i bezwen revwar sa civil service  la. Wi, i bezwen annan en lodit ganny fer. Antye  ek tou son  bann travayer Gouvernman enkli parastatal. I bezwen en lodit ganny fer.  Mwan yer  Mr Speaker, letan – avantyer  letan bann polisye ti la, nou pe koze. E nou’n vwar pou dir i annan en problenm enorm.  E enn sa problenm se nou kalite standar e nivo nou civil service  . I annan dimoun dan nou pei –  nou a  pe koz lo  get zot saler me i untrainable. Tou sa i bann keksoz ki nou bezwen pe gete sa.

E prezan mwan mon anvi met devan  Gouvernman en lot pwen, e United Seychelles i bezwen fer sir ki sa i antre letan revwar whatever striktir saler la, sa i antre.

1) Bann allowance permanan ki en travayer i gannyen. Be en dimoun i al etidye – yer bomaten mon’n donn en zenn garson Cascade pasaz, ki mon abitye donn li pasaz an tou leka …

 

(Off-Mic)

 

 

HON CHARLES DE COMMARMOND

Sa ki ou pe dir lotrozour Onorab Ferrari i lalang sa. Mwan ler nou pe koze, i dir mwan zot in anvoy li etidye. Ok?  I travay dan DICT zot in anvoy li etidye. E ler in fini etidye, zot donn li en allowance sa allowance i pa kapab zis pour serten peryod letan sa.  I en  allowance ki pour son letid ;   ki in al etidye in  fer byen parey bann lezot manrmay Cascade e alor sa salary review la, i pa pou touse son allowance i tous zis sa basic.

La i annan en problenm.  I annan en problenm.  Alor nou dan United Seychelles nou pe dir ek  Gouvernman revwar tousala. Tou sa bann allowance permanan la i bezwen enkli lo  ou saler de-baz e revwar sa striktir saler. Se sa ki Onorab Gill in propoze taler nou a revwar sa salary band.  I bezwen ganny revwar imedyatman sa.

Me nou pa kapab fer li akoz sa i pa pou tous – i pou an plis lo sa Bidze ki devan nou. Serten keksoz ki nou pe propoze, i pou an plis ki sa Bidze devan nou. Alor se sa rezon ki nou pe dir ki dan Midyear  Review, sa Lalwa nouvo nou pou propoz li, i pou bezwen vini pou tous sa bann keksoz ki nou pe koze.

En lot keksoz ki nou bezwen gete   –  nou annan par egzanp –  la nou pe koz zis dan public service. Be selman ler nou fer en  keksoz nou dir  kot parastatal laba, zot osi i Gouvernman li osi.  Selman li sa long service allowance i pa pe tous li. Sa osi i bezwen ganny gete.  E ler mon lo long service allowace, Long Service allowance li osi i bezwen ganny enkli dan sa package akoz ou pa pe donn li sa zis pour 2 mwan sa. Ou pe donn li toultan ! Be i bezwen enkli dan sa package letan ou pe kalkil son 5poursan si demen i  10 poursan – i bezwen lo sa package antye.

Sa i bezwen revwar ensi ki lezot keksoz Mr Speaker.  Parey mon’n dir dan parastatal sa long service allowance i bezwen osi ganny enkli letan nou pe get kondisyon travayer. E sa United Seychelles i bezwen fer sir ki i ganny rantre dan whatever bann deal ki pe ganny met devan, e ki nou pli tar parey mon dir, nou bezwen obliz Gouvernman, pour aksepte serten keksoz.

Be byensir parey mon’n dir i vin avek en Bidze.  E sa Bidze nou menm nou, nou bezwen pe revwar.  Be Bidze ki devan nou pa kapab pran tousala an konsiderasyon. E  se sa rezon ki nou pe dir donn zot, zot 5 poursan la, akoz sa i en komitman ki’n fini ganny fer.

 

 (APPLAUSE)

 

 

HON CHARLES DE COMMARMOND

Pandan letan ki nou krwar dan 2 mwan. 2 mwan nou kapab war tou sa ki nou koze –  ki nou pe dir –  lo zot kote serten, lo nou kote serten e ki nou kapab war en keksoz pli konplet, pli konpreansiv ki nou kapab met devan nou Lasanble, pour aprouvasyon.

Vwala Mr Speaker mon krwar i sa bann keksoz ki nou, nou pe met devan e ki nou oule ki sa bann propozisyon revwar salary band, revwar sa striktir ki nou pe koze, ensidswit, sorti lo kote United Seychelles – mon swete zot pa pran nou bann nide (akoz mon war Onorab Afif pe note tou sa ki nou  ti pe dir)

 

(laughter)

 

HON CHARLES DE COMMARMOND

… fodre  ki zot pa pran nou bann nide ! La mon oule ki – kontrer nou bezwen fer piblikasyon sorti tou nou bann pwen bezwen sorti lo la ! Bezwen note poudir United Seychelles sa bann lide la i sorti kot NOU !

E nou, nou bezwen kontinyen pouse, pour kondisyon travayer, pou amelyor lapey travayer e fer sir ki i ganny en better deal.  E i napa zis sa – mon pa kapab dir tou la, akoz si ou dir tou taler zot pou pran tou nou bann nide

 

(laughter)

 

HON CHARLES DE COMMARMOND

… nou, nou bezwen fer sir Mr  Speaker. E i annan bann suprises ki pou vini o fir an mezir e sa zot gannyen ; mon swete zot pou kapab digest byen.  E avek nou dir travayer, konpran sityasyon osi, pasyante i annan en kantite keksoz pozitiv ki United Seychelles pe vin avek dan zot faver, me an zeneral nou tou bezwen rod en fason pour nou solider avek,  e konpran sa sityasyon ki devan nou ozordi.

Pou fini Mr Speaker ler nou pe get sa sityasyon ki devan nou, nou dan United Seychelles, nou pa met presyon lo personn ki mannyer pou vote dan sa Lasanble.  E sa i pa premye fwa ki mon dir sa !Ii pa fer premye fwa ki mon dir.  Lo nou kote  isi, nou lib pou vot mannyer nou anvi, lo bann diferan pwen ki devan nou Lasanble.

 

(APPLAUSE)

 

HON CHARLES DE COMMARMOND

E nou pa parey zot lo lot kote latab ki bezwen swiv e oblize fer sa ki zot Sef i dir zot!

 

(laughter)

 

HON CHARLES DE COMMARMOND

Mersi bokou Mr Speaker.  Isi nou annan en free vote lo nou kote latab !  Mersi.

 

MR SPEAKER

Mersi Onorab De Commarmond.  Bon mon ava donn loter Mosyon Onorab Ramkalawan Drwa Repons.  Onorab Ramkalawan.

 

HON WAVEL RAMKALAWAN

Mersi bokou Mr Speaker. Zis avan mon pran laparol Mr Speaker, mon ti ava kontan ou dir Onorab – mon ti ava demande ki Onorab De Commarmond i retir sa dernyen parol, ki in dir ; kot in dir lo nou kote isi bann Manm i vot parey zot Sef i dir zot fer.

 

MR SPEAKER

Non, mon pa pou al dan sa direksyon.  Mon mazinen sa …

 

(APPLAUSE)

 

 

MR SPEAKER

… tou lede kote tanzantan i annan en pti sa bann fason koze.  Ok? Me mon krwar zot Manm si zot santi ki – anfen, mon pa krwar ki zot santi zot ganny forse vote and all that. Mon zis fer en senp legzanp kot mon’n apersevwar serten keksoz, mon krwar yer menm oubyen avanyer kot nou’n war ler Mosyon – ti annan en Mosyon ki ti anmennen ti annan detrwa Manm ki pa’n vote, ki’n plito kit zot lanmen ater. So, mon krwar i mars lo toulede kote, me mon krwar i en fason – i en figure of speech ki Onorab De Commarmond, ok? Onorab Ramkalawan kontinyen.

 

HON WAVEL RAMKALAWAN

Mersi bokou Mr Speaker.  Mon kontan ki pou dir ou’n ekplike ki pou dir sa dernyen parol Onorab De Commarmond i senpleman en parol ki pa fer sans! Mersi bokou. Mr Speaker e an menm tan osi mon ti ava kontan remind Onorab De Commarmond pli vye Manm sa Lasanble Nasyonal – i pli vye Manm akoz li depi ‘93  – depi ‘93 depi 3enm repiblik in en Manm Lasanble Nasyonal. E avan sa in en Manm Nasyonal dan People’s Assembly.  Mon anvi remind li

li son rol prensipal koman en Manm Lasanble.  Akoz i resanble ki in bliye son rol.  Dan son diskour in dir li i pa pou al regard legalite sa S.I.  Be mon anvi remind ou Onorab atraver Mr Speaker, ki poudir se sa ‘OU rol Prensipal’ koman en Lezislater !

Ou rol prensipal se pou ou regard Lalwa. Se pou ou regarde kwa ki legal e kwa ki pa ilegal.  Alor ou statement in fer nou vwar kler ki poudir ou’n fail ou role konman en Lezislater dan sa pe !  Mr Speaker, Mr Speaker dan kan US mon’n vwar zis ‘’konfizyon,’’ ‘’konfizyon’’ e plis ‘’konfizyon’’.  Onorab Sanders ki mon realize i konnen mon pe al koze –

 

MR SPEAKER

Onorab Vidot.

 

HON WAVEL RAMKALAWAN

Vidot, yeah, ne Sanders in deside pou li sorti.  Li i dir donn sa 5poursan.  En lot MNA i dir,’’ pa donn politisyen.’’  Onorab Gill i dir ‘’collapse bann band. ‘’ Collapse bann band, ferm serten steps, fer bouze.’’  Mr Speaker ki zot pozisyon?  Mon ti ava kontan konnen ki pozisyon ki US i annan?  E i kler ki poudir ozordi la nou trouv zis konfizyon.  E zot dir avek nou ki poudir zot pe,  vin avek bann bon keksoz.

Mr Speaker ou konnen kote lot konfizyon i vini?  Onorab Gill i dir fodre pa ki politisyen i fer sa.  Savedir ki politisyen letan nou pe kestyonn sa grid, savedir nou pa pe rekonnet lentegrite ek lentelizans bann dimoun ki ti lo sa Board pou fer revi.  Hmm.  E sa i tipik Onorab Gill li i pa vin avek en bout papye pou li fer son speech.  Si i ti vin ek en bout papye, i ti ava konpran ki poudir lo No.1 in dir sa.

E ki i pa kapab aprezan letan i ariv lo No.5 kontredir sa ki in dir.  Mr Speaker apre ki in dir politisyen fodre pa antre ladan, Onorab Gill i vin donn leson lo ki mannyer sa travay i devret ganny fer.

Be, be Mr Speaker sa sanmenm sa ki mon apel konfizyon dan zot parti.  Konfizyon total parfwa mon demande si zot zorey i tande kwa ki zot labous i dir !  Annou pran keksoz dan en fason normal ; dan en fason serye letan nou pe koz lo en size serye. Prezan Mr Speaker lafason ki zot koze i fer dimoun konfize.  E la mon bezwen dir, avan mon al lo sa pwen, mon anvi Mr Speaker felisit Onorab Waven William Manm Elekte pou Grand Anse.

 

(APPLAUSE)

 

HON WAVEL RAMKALAWAN

Mr Speaker mon felisit Onorab William akoz mon pa anvi met li a sa pwen avan vot i pran pa konnen ki mannyer bann lezot pou vote, me lefe ki Onorab William li in eksprim klerman ki poudir i pou vot an faver sa Mosyon pou quash sa S.I. e an plis ki sa in osi aksepte ki poudir sa S.I. i ilegal.  Alor sa deza la i fer Onorab William sorti dan sa ta konfizyon parski i vin  ek sa menm lespri ki nou, nou pe vin avek. Kot nou pe dir i enportan pou nou diskite akoz sa ki nou pe koz lo la ozordi, i annan keksoz ki manke e i annan keksoz ki pa fer sans. E Mr Speaker mon ava zis dir ou en keksoz.

Dan sa grid ki dan sa S.I. baze lo propozisyon Gouvernman sa larzan ki zot in mete i pa pou ase pou pey travayer.  62milyon pou zot lenformasyon, pa ase zot bezwen en minimum 66milyon zis pou met an aplikasyon sa grid ki zot pe – akoz?  Onorab Pillay i demande akoz?  Ou en matematisyen mon ava eksplik ou Mr Speaker.  Rezon se ki zot kalkil pa balanse.

E ou konnen ou Onorab Pillay ki poudir si ou pe fer en kalkil e ou pa azout bann sonm, si letan ou pran 2 avek 2 i vin 5, oubyen 2 avek 2 i vin 3 savedir i mal.  E travay preliminer ki nou’n fer lo sa grid, lo sa grid – zot grid,  baze lo payroll ki zot in donn nou i montre ki poudir deza la i annan en mank an R6milyon.

Alor, alor 4milyon sorry.  Alor sa ki zot pe prezante li menm li i pa tonm annord e pou bezwen en Supplementary Appropriation.

Be Mr Speaker ou konnen serten bann parol ki’n ganny dir la, in fer serten konfizyon deor.  In fer serten dimoun konfize.   Mon ava dir ou.

Enn bann keksoz ki ban Manm e se la aprezan ki mon pe sey ganny en konpran ki sa Manm sa dernyen Manm pou antre dan sa Lasanble ti a pe sey dir, letan i ti ape dir zot ti al negosye zot lapey.

Mr Speaker pa ti pe koz ni pou Onorab De Commarmond, ni pou mwan.  Mon’n konpran en pti git la aprezan, ou konnen pou ki i ti ape koze?  I ti a pe koz pou Mrs Marie-Anotinette Rose avek David Pierre.  Mon ava eksplike e mon ava substantiate.

Rezon pou sa se parski sa zafer lapey ti pas dan 5enm Lasanble.  Relax.    5enm Lasanble Mr Speaker Act 27 of 2013, ti 5enm Lasanble sa.  Le 31 Desanm 2013 Mr Michel ti accent en Bill National Assembly Members Emoluments (Amendment) Act 2013 ki ti pou pran lefe le 01 Zilyet 2014.

E Mr Speaker ladan ki ti donn sa gro logmantasyon Manm Lasanble.  Sete ladan ki ti dir, ki ti repeal en Seksyon e ti dir ki Manm Lasanble e ‘‘a monthly salary of a sum specified at step 1 of salary band 18 of the Public Service Salary tabled under the Public Service Salary Act 2013 which  ‘’ – well sa ti pou Speaker, apre sa bann lezot ankor, ‘‘a monthly salary of a sum specified at step 1 of salary band 17 of the Public’ …’, sa ti pou bann Manm.

Mr Speaker sete a sa pwen ki Members Emoluments ki ti en Lalwa lo li menm, ti ganny entegre dan sa salary grid.  E akoz serten dimoun pa ti tro swiv Lasanble 5enm repiblik, zot pa ti konpran kwa ki pe arive e  la, la letan nou pe koze i annan serten konfizyon laba deor, parski serten dimoun pe dir ki Manm Lasanble li i pa pou ganny enkli dan sa grid.  Kan sa i fo akoz saler Manm Lasanble i konekte direkteman avek sa grid e alor letan en Manm Lasanble i dir ki li i pare pou li forego tel, tel, tel keksoz i annord; i annord.  Parski i annord akoz i dan sa salary grid! I dan sa salary grid.  Zot Mr Speaker, Onorab Pillay i kapab ekout en pe silvouple?

 

MR SPEAKER

Kontinyen Onorab.  Bon Order!  Order !  Les nou ava –

 

HON WAVEL RAMKALAWAN

Mr Speaker be zisteman, be zisteman Mr Speaker ou vwar tou sa bann parol la ki konfize e aprezan i fer ki dimoun laba deor tou i konfize.  Dimoun i krwar ki poudir Manm Lasanble pe koz lo sa salary grid e sa salary grid napa nanryen pou fer avek zot, akoz zot, zot lapey i anba en lot Lalwa kan sa salary grid i annan keksoz direk pou fer avek lapey Manm Lasanble parski Lalwa an 2013 letan ti ganny amande, ti fer egzakteman sa.

Mr Speaker dan koze yer sa menm Onorab la ki kontan egzers son drwa, in koz lo Konstitisyon.  Sa se Onorab Pillay.  Onorab Pillay in dir ki nou nou’n ganny sermante pou nou respekte Konstitisyon. E wi Mr Speaker e la ankor enn  fwa i en loner pou mon servi mon Konstitisyon Kreol e mon remersye Lenstiti Kreol.

E wi Mr Speaker, letan nou ti fer nou serman la i la ki nou ti dir,’’  Mwan Wavel John Charles Ramkalawan, mon fer en promes solannel e mon senserman deklare e konfirmen ki mon pou touzour lwayal e gard vre fidelite anver Konstitisyon Sesel e ki mon pou prezerv, protez e defann Konstitisyon Sesel.’’  Sete sa ki nou ti sermante.

Mr Speaker, Onorab prezan in fer referans avek Lartik 89 e i dir nou bezwen respekte Lartik 89.  E wi e Lartik 89 i dir ou Lartik 85 ek 86 ‘’ … pa ava fonksyonn pou anpes en Lalwa donn en dimoun ouswa en pouvwar Lotorite pou pas lezislasyon segonder. ‘’ Personn pa pe anpes li.  In fer son lezislasyon segonder e 85 Mr Speaker, Lartik 85 i dir klerman, ‘’…. pouvwar Lezislatif Sesel i ganny envesti dan Lasanble Nasyonal e i ava ganny egzerse dapre e an akor  avek sa Konstitisyon.’’  E se sa responsabilite ki Onorab De Commarmond i pa pare pou li pran ozordi.

Mr Speaker i osi dir ki,  ‘’… pouvwar Lezislatif i envesti dan Lasanble Nasyonal i ava ganny egzerse avek bann Prozedlwa aprouve par Lasanble e konsanti ouswa konsidere konman par Prezidan. ‘’

Mr Speaker letan nou konman en Lasanble, nou ganny sa pouvwar pou nou regard Lezislasyon anba Lartik 85, nou bezwen fer sir ki bann morso Lalwa, swa zot  bann morso Lalwa bann S.I. bann regilasyon, oubyen bann Prozedlwa letan zot pas dan nou Lasanble zot bann Lalwa ki an akor avek Konstitisyon.  E se sa ki nou pe fer ozordi.

Yer Onorab Clifford Andre e bomaten Onorab Georges ankor enn fwa, in fer kler ki poudir i annan en problenm e alor letan i annan en problenm lo legalite en morso Lalwa, en morso Lezislasyon fodre nou fer keksoz.

E Mr Speaker ozordi se sa ki nou lo nou kote e ki Onorab William osi tou in eksprimen klerman, ki nou pe fer.  Se sa ki nou pe fer.  Me selman Mr Speaker mwan an menm tan mon trouv li drol letan Onorab Pillay i lev en tel size – parski Onorab Pillay i dan en parti politik ki pa respekte Konstitisyon !

Sel parti politik dan Sesel ki’n deza desir en Konstitisyon, bril sa Konstitisyon, met li laba, fer li fini se parti SPUP anba Msye Rene le 5 Zen ’77 !

 

 

  (APPLAUSE)

 

HON WAVEL RAMKALAWAN

E an plis ki sa Mr Speaker mon osi konpran letan Onorab Pillay i koz koumsa,  letan, e mon trouv drol, parski Onorab Pillay dan 5enm Lasanble ki nou,  nou pa ti la ki i ti fer nou fer?  I pa ti fer nou vin dan Lasanble li.  I ti fer nou vin 25 met, 50 met avek Lasanble Nasyonal.  Devan Lakour Konstitisyonnel akoz li i enn parmi sa bann Manm ki’n pas bann Lalwa ki kont Konstitisyon e nou’n bezwen al fer Lakour deklar sa bann –nou’n bezwen fer Lakour al deklar sa bann Lalwa konman ilegalNull and void Lakour Konstitisyonnel in dir.

Mr Speaker letan – mwan pou mon i vreman tris.  E en kestyon ki mwan mon’n demann mwan se be akoz ki lo kote US, akoz ki Onorab Vidot pa oule ki dimoun i ganny en pe plis?  Akoz ki i oule ki dimoun i ganny sa R274 e non pa en pe plis?  R274.  Akoz zot pa oule fer sa ?

Onorab Pillay yer in vin koz lo allowance, in vin koz lo tou sa bann keksoz – ki poudir sa bann dimoun ki dan bann pli – band pli ba zot, zot pou osi ganny allowance.

Zot annou konpar  sa ki kapab ganny konpare !  Annou pa akoz sa dimoun laba anba pe ganny en pti allowance, en pti allowance preski nanryen ditou ki fer son lapey vin R6mil, annou pa vin konpar sa avek sa ki bann laba anler i gannyen !  Annou – pa kapab.

Mr Speaker mon a donn ou en legzanp.  Lo sa payroll ki zot in donn nou la, i annan en kantite keksoz ki nou pe vwar.

Mr Speaker i annan en endividi ki ganny li son lapey R20,355.  Sa i lo payroll.  R20,355. Ou konnen konbyen son allowance ki i gannyen konbyen i tonbe?  E sa mon pe dir lo dernyen payroll.  Son allowance ki i gannyen i R164, 221!

E sa i fer, sa i fer ki son lapey ki in anmenn kot li i R184,576.

En lot ankor ki son lapey i R20,549 i ganny li en standing allowance R11,060 ek en periodic allowance R136,803 ki fer li anmenn dan lakour R168, 432,  eski ou kapab konpar sa avek mil roupi long service allowance?

 

  (APPLAUSE)

 

HON WAVEL RAMKALAWAN

Eski ou kapab konpar sa avek mil roupi long service allowance ?  Mr Speaker letan mon tann sa bann kalite largiman i fer mwan ankoler akoz ozordi US sa parti  zot pa pe regard sa pep Seselwa.

E nou lo nou kote, nou, nou pa pe vin rod Meday Lor nou.  Nou pa pe vin rod Meday Lor.  Nou pe senpleman dir kot nou ete kot nou ete annou, annou, annou senser. Annou serye.  Annou serye e apre sa nou ava kapab bouz devan.  Annou pran an konsiderasyon sa pep.  Annou pa met plis manze dan lasyet sa bann ki plen.  E annou kit lasyet vid pou sa bann ki zot lasyet i vid.  Nou pe dir ozordi kot nou ete, annou balans en pe keksoz.

E Mr Speaker la ozordi zot sey vin anbet nou pou dir ki saler, saler napa nanryen pou fer avek pri lavi.  Be letan ou al laboutik avek ki ou pey sa bann konmisyon ki ou aste?  I pa avek lapey ki ou gannyen?  Alors lapey ki ou annan – lapey ki ou resevwar i annan  en relasyon direk avek pri lavi.  Si en keksoz i R150 ou  annan zis R100 ou pou gannyen?

Alor Mr Speaker ankor en fwa mon dir annou serye.  Annou serye lo sa zafer, lo sa grid ki nou pe koz lo la e nou, nou senpleman anvi ankor en  fwa dir, nou,  nou anvi en deba, en deba rezonnab.  Nou pa anvi ki nou taye pou donn nanryen ditou bann dimoun, me annou asize koze, regard li byen pou ki finalman, finalman nou ava kapab ganny the best deal possible.  Se tou ki nou pe rode.  Nou pe rod the best deal possible pou tou nou bann dimoun.

E la Mr Speaker mon anvi dir avek ou ki i enteresan.  Zot in sey vin zwe politik.  Yer zot ti zwe politik.  Yer zot ti zwe politik malere. Yer zot ti zwe politik malere.  Ozordi ki nou’n tande dan sa Lasanble an komansman par Onorab Sanders bomaten e avek Onorab …

 

MR SPEAKER

Onorab Vidot.

 

HON WAVEL RAMKALAWAN

Tou kou mon konn li konman – i konnen.  In dir li menm li tousala.  Mr Speaker ki nou’n tann zot pe vin dir ?  Ozordi zot pe koz burning the midnight oil, sa dokter, sa ners, sa isi sa laba.  Byensir be nou, nou debout akote tou sa bann dimoun toultan !  Me letan mon  ti vwar sa bann ners pe desann pe marse sorti, sorti Lopital pou vin State House, kot baro State House. mon pa ti  vwar ni Onorab Sanders, mon pa ti vwar ni –

 

MR SPEAKER

Onorab Vidot.

 

HON WAVEL RAMKALAWAN

Onorab Vidot.  Mon pa ti vwar ni Onorab Vidot.  Mon pa ti vwar ni Onorab Pillay, mon pa ti vwar personn lo zot kote.  Kot zot ti ete ?  Me o kontrer mon ti vwar Onorab Ferrari, mon ti vwar Onorab Roucou, mon ti vwar Onorab Arissol.  Se sa ki mon ti vwar.

Mr Speaker apre sa nou’n ede pou zot lager pou zot ganny bann bon Scheme, bann meyer Scheme.  Ozordi Mr Speaker mon anvi dir avek sa bann ki pe zis koze, ki poudir i annan en kantite  bann profesyonnel ki’n fer kler ki poudir zot pare pou forego sa grid e zot pare pou zot siport bann dimoun ki pli ba.

Letan nou pe koze la Mr Speaker, en CEO in dir avek mwan mon pa ti konnen ki poudir pou ganny R1500 en CEO in anvoy mwan en text in dir avek mwan pa mansyonn mon non, me selman mwan mon pare pou mwan forego e mon donn ou tou mon sipor, mon donn tou siport USLDS dan lafason –

 

 

(Interruption)

 

 

HON WAVEL RAMKALAWAN

… pa trakase zot.  Ok napa nanryen ankor ki zot le dir ?

 

MR SPEAKER

Onorab kontinyen.

 

HON WAVEL RAMKALAWAN

Ki poudir zot donn tou sipor LDS dan sa demars ki nou pe fer.  Mr Speaker ozordi ankor enn fwa ozordi ankor enn fwa mon konvenki ki poudir finalman menm si Onorab Gill ti ganny sa loner parey i ti dir avek nou pou li letan Msye Rene ti dan son bann dernyen zour pou li ekout sa ki Msye Rene ti dir li, i pa ti vreman konpran.   I pa’n konpran.  In tann parol.  Letan Msye Rene ti dir avek li, problenm se ki zot konman en parti zot in mazin zis zot lekor. Zot pa’n mazin ase dimoun.  US pa ankor konpran sa parol Msye Rene e mwan mon ti ava kontan ki zot vreman retourn ankor e regard sa bann parol.

Mr Speaker letan mon pe terminen, mon anvi dir en parol, en text ki mon’n gannyen bomaten sorti kot en dimoun ki ti en gran siporter US/ Parti lepep e ki ozordi, ozordi i ankor dan enn – pe tenir enn sa bann gro pozisyon.  E kot i kapab ganny en gro allowance.  I anvoy mwan en mesaz bomaten i dir ek mwan:-

‘’Good morning father.  I just want to add my full support to your proposal on the increase of Public workers Salary.  If Danny and his Government are really concerned about the high cost of living in this country, he should put politics aside and accept your proposal which is really to the benefit of the lower paid workersFurthermore Danny who is – a  zanfan SPUP as he put it should – re read the book ‘Onwards to Socialism’. 

Kind regards and may continue to bless you in your work. ‘’

Mr Speaker la i zot mesaz.  Sa i zot mesaz retourn ankor.  Retourn ankor dan zot rasin.  Re dekouver zot rasin akoz ozordi zot dan en leta konfizyon, kot zot pe mazin zis zot lekor.  Mr Speaker avek sa detrwa parol mon demande ki Lasanble i aprouve pou ki sa S.I. i ganny kennsel e ki nou bouz pli devan pou nou kontiny sa travay.  Mersi bokou Mr Speaker.

 

(APPLAUSE)

 

MR SPEAKER

Mersi Onorab Ramkalawan. Zis mon anvi.  Mon annan la parol.  Mon anvi zis demann ou pou retract en bout dan ou konklizyon kot ou’n mansyonn ex-Onorab David Pierre ki ozordi i en Anbasader e ex Onorab Antoinette Rose ki osi i en Anbasader ozordi ki zot ti al negosye zot saler State House akoz ou’n mansyonnen apre pou dir i ti vin atraver en  deba lo Act dan 5enm Lasanble an 2013. Zis retract sa pti bout.

 

HON WAVEL RAMKALAWAN

Mon konpran ou antyerman Mr Speaker, me selman mon anvi zis eksplik ou ki mon pa ti pe akiz zot.  Mon ti a pe dir ki mon konpran parski sa letan sete zot  ki ti sa de Leaders  pandan ki –

 

MR SPEAKER

Me parey mon’n fer ek Onorab –

 

HON WAVEL RAMKALAWAN

Ok, Mr Speaker mon retract sa dernyen bout ou konnen mon napa problenm ek sa.  Mersi bokou.

 

MR SPEAKER

Mersi.  Petet mon osi tou mon’n fer le neseser ki mon’n demann Madanm Clerk pou fer mon ganny en kopi sa Act ou mon verifye egzakteman kan ti vini.  Akoz i annan mansyon ki’n vini lo – ki menm Lasanble i ganny kontrole, Sekretarya i ganny kontrole par LDS e LDS ki desid lo saler eksetera, e ki nou’n ogmant saler travayer Lasanble.

Travayer Lasanble atraver sa Act 2013 son – wi travayer Lasanble  i tonm – malgre nou lotonomi nou tonm within sa latab ki DPA i fer sorti.  E Manm Lasanble atraver sa Act in vwar li osi tonm ladan.

Bann logmantasyon ki bann Manm Lasanble e 6enm Lasanble in gannyen in vin pirman atraver sa latab ki DPA in met devan nou. An mezir ou bouze ou bouz par steps.  Ok ?  Napa okenn logmantasyon 6enm Lasanble ki’n vini pou amann sa National Assembly Members Emoluments (Amendment) Act 2017.

E parey Loter Mosyon in dir sa Act ti ganny assent to by Prezidan Michel 31 Desanm 2013 e i ti vin an fors le 01 Zilyet 2014.

So i pirman dan moman kot 5enm Lasanble ti pe travay.  6enm Lasanble ziska prezan napa nanryen ki’n vini ki’n tous saler okenn Manm Lasanble.  Mon pran de pti pwen avan nou, avan nou pran en vot.  Onorab Loze.

 

HON JOHAN LOZE

Mr Speaker anba lLord 56 mon oule koriz en misapprehension.  Dan mon speech mon pa’n fer okenn referans lo nanryen ki’n arive 2013.  Mon ti pe koz lo lannen 2009 kot serten negosyasyon ti ganny fer ant le de Leaders avek Egzekitif.

E saler ti sorti 18mil pou le de Leaders pou al 28mil.  Sa ki mon ti pe koz lo la.  Mr Speaker ou ava rapel ou menm, pou premye fwa ki en Bill ti vin devan nou Lasanble e Manm lo tou le de kote ti ganny gagged, ni ou Mr Speaker ou ti napa drwa koze, zis le de Leaders ki ti koz lo sa logmantasyon. Onorab Georges osi i ti dan Lasanble i ava rapel.  Mon ti asize anler dan galeri kot vye Library.  Mr Speaker mon rapel tre byen.

 

MR SPEAKER

Annou pa al pli lwen.

 

HON JOHAN LOZE

Mon rapel tre byen kwa ki’n pase.

 

MR SPEAKER

Annou pa al pli lwen Onorab.

 

HON JOHAN LOZE

Thank you Mr Speaker.

 

MR SPEAKER

Onorab Simon Gill.

 

HON SIMON GILL

Mersi bokou Mr Speaker.  En misapprehension bref ki mon oule met an perspektiv.

Mr Speaker lo nou kote, konman en parti politik pa endividi.  Konman en parti politik mon’n dir, nou pou fer propozisyon e mon’n lans detrwa propozisyon ki konman en parti politik nou pe fer.

E mon’n dir les bann profesyonnel konsider sa bann propozisyon, gete dan zot bann revi milye lannen ki zot pou fer si sa bann propozisyon ki nou pe fer i rezonnab e gete ki mannyer nou kapab re aziste tou sa bann zafer striktir or step, band, saler.

Sa napa nanryen pou fer avek dictate ki fodre donn tou dimoun R400 or R300.

 

 

(APPLAUSE)

 

HON SIMON GILL

Mon pa’n vin dictate Gouvernman.  Nou pa’n vin zet nanryen ki’n ganny fer dan sa Lasanble.  E mon leta lespri i annord – i korek Mr Speaker.

 

MR SPEAKER

Mersi Onorab.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker mon pe raise en point of order ki in impute mon karakter in terms of ler mon’n vot lo POA.  Sa referans in ganny fer, ki mon ti vot lo sa Lalwa.  E ti anvoy bann dimoun 50 met avek nou.  Mon pou zis remind Onorab ki sa Lalwa ti pase bokou letan apre sa lensidan, ki i ti pe refer to.  Non, non petet mon’n mal konpran, petet  i pa’n dir sa-

 

(Interruption)

 

MR SPEAKER

Order! Order! Order! Mon krwar sa ki Leader Lopozisyon ti pe refer to se the Public Order Act ki 5enm Lasanble ti vote, ki zot, zot ti bezwen al devan Lakour Konstitisyonnel pou demontre ki i kont lespri Konstitisyon.

 

HON SEBASTIEN PILLAY

Ki mon ti le remind Onorab Mr Speaker atraver ou, tre humblement, ki li osi in vot en Lalwa ki ti kont Konstitisyon e ki Mr Ian Delorie ti challenge devan Lakour Konstitisyonnel ki Lakour ti deklar unconstitutional e sa sete Lalwa pou pansyon bann MNA ki Onorab ti an Lasanble, ler ti pase!  So nou tou le de Onorab nou’n deza vot en Lalwa ki kont Konstitisyon, baze lo Lartik 46 e Lartik 130 nou Konstitisyon.  Mersi Mr Speaker.

 

MR SPEAKER

Mersi Onorab Pillay.  Onorab Flory Larue, apre Onorab Clifford Andre.

 

HON FLORY LARUE

Mersi Mr Speaker.  Bonzour Mr Speaker, anba 36 Mr Speaker mon krwar mon privilez in ganny afekte konman en Manm Lasanble Nasyonal, letan Onorab De Commarmond in spesifye ki mwan konman en Manm mon vot parey mon Sef i dir mwan.  Mon krwar sa i konpletman fo e i en move persepsyon pou piblik.

Letan zot krwar ki Manm Lasanble Nasyonal i anba, i ganny rule ouswa i ganny dikte ki mannyer pou fer.  Mwan mon vot dapre mon konsyans e dapre travay ki ganny fer dan Lasanble Nasyonal. Si zot laba zot vot koumsa sa i pa aplikab pou mon kote latab akoz mon Sef pa fer li !  Mersi Mr Speaker.

 

(APPLAUSE)

 

MR SPEAKER

Mersi.  Mersi.  Mon dir nou pa pou prolonze dan sa deba.  Mon’n fer en remark lo la taler.  Mon krwar sa i sorti lo tou le de kote.  Parfwa kot tou le de kote latab nou dir be ou konman ou pou vote, ou,  ou pou bezwen swiv en Manm oubyen ou bezwen swiv ou LeaderOk?   So i en figure of speech ki nou’n allow dan Lasanble.  Pwen i note Onorab Larue.  Onorab Clifford Andre.

 

HON CLIFFORD ANDRE

Mersi Mr Speaker.

 

MR SPEAKER

Kourt.

 

HON CLIFFORD ANDRE

Anba Order 36 mon pa pou kapab etre kourt Mr Speaker akoz mon santi ki mon privilez in ganny afekte.  Onorab Audrey Vidot in dir ki mwan mon’n akiz bann Ziz e mon le klarifye ki se pa sa ki mon ti dir yer.  Mon pa’n akiz okenn Ziz e i annan en lot Manm osi ki’n fer, ki’n dir mwan mon’n akiz bann Ziz.  Mon ti pe dir ki poudir par lefe ki saler tou dimoun ki al anba Public Service i ganny afekte – sa i enkli bann dimoun dan Zidisyer.  E alors i pou difisil si nou anmenn en case pou nou pa annan konfli lentere dan sa sityasyon.  Alor mon ti a kontan i retract sa Statement kot in dir poudir mwan mon’n akiz bann Zis akoz pa sa ki mon ti pe fer.  Mersi.

 

MR SPEAKER

Non mon – Onorab, Onorab.  Mon’n les pase. Mon’n les pase sa, ankor pou mwan i en figure of speech kot in sey pran sa ki ou’n dir in tant pou li vire.  Mon pa santi ki, mon pa – non,  non,  non.  Non,  non.  Nou pa pou antre, nou pa pou antre dan deba.  Yer ou’n fer sorti ou pwen pou dir si nou al devan Lakour i pou annan konfli lentere.  Li in tant pou li vir sa en lot fason e mon pa krwar, mon pa krwar i aggrieve ou oubyen i pe impute any improper motives, ok ?  Nou pou fini nou – wi wi.  Ok.  Nou fini la.  Nou ava prezan pran en vot, in ariv –  Onorab Andre vitman.

 

HON CLIFFORD ANDRE

Wi vitman. Mr Speaker sa ki letan en dimoun i dir ou lakizasyon –

 

MR SPEAKER

Onorab Georges.  En minit nou pe al pran en vot.  Wi mon  konnen.  Onorab Andre vitman.

 

HON CLIFFORD ANDRE

Letan i fer lakizasyon i serye e sirtou dan sa profesyon kot mon ete i pe sey afekte mon privilez konman en Manm Lasanble e an koneksyon avek mon profesyon.  Sa ki mon pe dir.  E mon krwar i enportan ki sa kalite senaryo pa arive dan sa Lasanble si nou serye.  Nou pa en Day Care.  Mersi.

 

MR SPEAKER

Annou, wi.  Annou.  Bon,  bon.  Order!  Order!  Order!  Ou pwen in note in al lo rikord …

 

(Interruption)

 

MR SPEAKER

e non, non.  Annou fini lanmenm.  Bon in ariv en moman pou pran en vot lo Mosyon ki’n ganny anmennen par Onorab Wavel Ramkalawan, ki demande ki :- The National Assembly resolves to quash S.I. 18 of 2019 in accordance with Interpretation and General Provisions Act Section 64(2).  Mon ava demann tou Manm ki an faver?  Okenn Manm ki kont? Madanm Clerk ?

 

MADAM CLERK

Mersi bokou Mr Speaker.  Mon’n rikord 18 Manm ki’n vot an faver e 12 Manm ki’n vot kont.  Mersi.

 

MR SPEAKER

Mersi Madanm Clerk.  Savedir Lasanble Nasyonal in vote pou anil S.I. 18 of 2019.  Bon –  Yes Onorab Henrie.

 

HON GERVAIS HENRIE

Mr Speaker vot kont, vot kont i konbyen in ganny mansyonnen akoz  mon ….

 

MR SPEAKER

Mon ava zis – Madanm Clerk.  Madanm Clerk re donn rezilta vot pour e vot kont.

 

MADAM CLERK

Mersi bokou Mr Speaker.  Mon’n rikord 18 Manm ki’n vot pour e 12 Manm ki’n vot kont.

 

(Interruption)

 

 

MADAM CLERK

I annan en abstention.  Mr Speaker nou ava re pran.  Eskiz mwan.

 

(Interruption)

 

MR SPEAKER

Non i annan – wi.  Ok.  Ok 

 

(Interruption)

 

MR SPEAKER

Order!  Order!  Bon mwan sa ki mon’n remarke i annan en Manm lo kote US in vot pour pou quash e larestan in vot kont.

(Interruption)

 

MR SPEAKER

Bon i pa  fer en diferans.  Bill, Bill in ganny anile.

 

(APPLAUSE)

MR SPEAKER

Bill in ganny anile.  

 

(Interruption)

 

MR SPEAKER

Ok bon, bon.   Ok.  Zis pou nou set rikord straight for the record of the National Assembly.  Nou pou repran vot lo sa Mosyon ki devan nou.   Tou Manm ki an faver? Tou Manm ki kont?  Ok mon osi i kler pou mwan la prezan.  Madanm Clerk, re donn, rezilta

 

(APPLAUSE)

 

MR SPEAKER

Re donn rezilta ? Re donn rezilta.

 

MADAM CLERK

Mersi Mr Speaker.  Mon demann mon leskiz – pou sa pti fot, sa pti lerer.  Mon’n rikord 18 Manm ki’n vot pour e 11 Manm ki’n vot kont.  Mersi bokou Mr Speaker.

 

MR SPEAKER

Mersi Madanm Clerk.  E ankor parey mon dir sa S.I. 18 of 2019 in ganny quash, in ganny anile par Lasanble Nasyonal.

Bon avan nou adjourn mon ti a zis pou lenformasyon tou bann Manm e manm piblik.  Mon konnen ler mon absante kestyon i ganny leve.  Mon pe lead – mon pe absante ant le 4 – savedir ozordi tanto apre midi ziska le 11 mon antre dan pei.  Mon pe lead delegasyon Nasyonal kot 140enm Sesyon Plenyer IPU e sa i pe fer Qatar.  Ok.  So mon ti a kontan remersi tou Manm ki’n anfen ki nou’n kapab fer sa sitting la ozordi bomaten.

Mon ti a kontan remersi tou dimoun ki’n a lekout e byensir mon ti a kontan remersi SBC pou osi ankor enn fwa kolabor avek nou kapab vin kouver sa sitting bomaten.  Lasanble Nasyonal i adjourn e nou repran travay Mardi le 9 Avril 9er bomaten.

 

(ADJOURNMENT)