::
Home » Verbatim » 2019 » Verbatim Monday 4th March, 2019

Verbatim Monday 4th March, 2019

NATIONAL ASSEMBLY OF SEYCHELLES

 Monday 4th March, 2019

 The Assembly met at 9am

 National Anthem

 Moment of Reflection

  Mr Speaker in the Chair

 

MR SPEAKER

Bonzour tou Manm.  Bomaten pandan nou moman Refleksyon, mon pou osi demann tou Manm pou nou obzerv en moman silans, en moman refleksyon pou rekonnet depar 3 dimoun ki’n servi konman Manm Lezislatif.

Nou rekonnet ansyen Prezidan Mr Albert Rene.

Nou rekonnet Mr Rivnet Jumeau e Mr Gilbert Barbier ki le de osi in kit nou tou resaman.  Nou profit sa moman Refleksyon pou fer en moman silans osi.

 

(One minute of silence was observed)

 

MR SPEAKER

Bon Lasanble Nasyonal i ofer kondoleans avek tou Manm lafanmir.  Mersi.  Bon avan nou pran nou travay bomaten mon annan enn de pti kominike ki mon anvi fer from the Chair.  Lasanble Nasyonal, Lasanble Nasyonal in osi aprann pandan recess lanmor Onorab Dr Jiko Luveni Speaker Parlman Fuji e sa ti arive ver lafen Desanm 2018.  Speaker Luveni ti  travay tre pros ek Sesel pou siport lakoz bann Pti Leta Zil e pandan nou dernyen meeting plenyer IPU Speaker Luveni ti siport Mosyon ki ti ganny anmennen par Sesel lo sanzman klimatik e sa Mosyon ti ganny sipor inanim plenyer IPU.  Zis pou rikord Lasanble, Lasanble Nasyonal ti fer sorti en kominike lapres an Desanm pou eksprim kondoleans avek Parlman Fuji e osi tou lafanmir Speaker Luveni.

Bon mon ti a  kontan osi tou mansyonn ozordi e dezinyen the precint of the National Assembly ki 6enm Lasanble pa ankor fer e mon krwar sa i enportan ki tou Manm i konnen akoz ki nou bezwen fer sa.

Anvi ki 6enm Lasanble pa ti ankor ofisyelman nonm oubyen dezinyen son precint mon ti a profite pou mwan fer sa ozordi.

Precint Lasanble Nasyonal parcel H8083 i kot batiman Parlman i ete ek son zalantour ziska dan sa pti parking an deor baro gate No. 2.

Lasanble i os azout parcel H9237 ki zarden Commonwealth ki trouve an  fas ek Palais de Justice konman en extension son precint.  Sa i vedir ki ler en Manm i trouve lo precint Lasanble parey mon’n dezinyen kot batiman i ete e ziska zarden Commonwealth tou Manm i mentenir tou son privilez e son imilite ki i annan.

E i vedir ki okenn somonn pa kapab ganny servi lo li dan sa de landrwa ki mon’n dezinyen.  Mon ti a kontan osi tou anons sanzman enn bann parti politik ki avek nou dan Lasanble.  Pandan recess mon’n osi ganny en let ki date le 17 Desanm se zour ki nou ti pran recess e ki’n sorti kot Lofis Komisyon Elektoral lo sanzman non en parti politik ki konpri nou Lasanble Nasyonal.

Komisyon Elektoral in konfirmen ki parti lepep in sanz son non pou vin United Seychelles.  Alor dezormen non ofisyel Parti Lepep – parti minoriter dan Lasanble Nasyonal, se United Seychelles e bann Manm i vin Manm United Seychelles oubyen pou short Manm US.

Mon ti a kontan zis fini avek lenvitasyon ki toultan nou partaze avek manm piblik.  Lasanble Nasyonal i reste Lasanble tou dimoun e nou  welcome zot tou, tou bann manm piblik pou vin swiv sitting Lasanble Nasyonal sa ki kapab.

Nou extend sa lenvitasyon osi tou pou bann lekol e lannen pase nou’n vwar kot plizyer bann lekol in kapab vin swiv nou bann travay e osi bann etidyan in enterakt avek bann Manm.

I en moman bann diferan group ki vini zot in swazir bann moman pou enterakt avek non selman bann Manm – sa distrik me osi tou avek lezot Manm Lasanble.  Alor zot kapab manm piblik i kapab fer li atraver enn zot Manm oubyen atraver Lasanble zot enform nou e nou nou fer bann demars pou zot kapab vin swiv Lasanble Nasyonal.

Avan nou kontinyen lo Order Paper, mon ava zis donn laparol Onorab De Commarmond ki’n sinyal mwan.

 

HON CHARLES DE COMMARMOND

Mersi Mr Speaker, Sir.  Bonzour Mr Speaker.  Bonzour tou Manm Onorab e tou dimoun ki a lekout.  Mr Speaker etandonnen en rol istorik ki Msye Rene in zwe dan nou pei e son lofis pli o ki in okipe mon oule tou Manm e tou dimoun isi prezan dan nou Lasanble, donn li en minit silans spesyal e mon le dir de mo osi lo li.

 

MR SPEAKER

Ok lo kote son parti i pe fer sa zes – ok?  Mon’n abord li sa les li i pe fer son zes.  Lo kote Lasanble nou’n fini fer li ansanm avek nou moment of reflection.  Annou zis respe lot kote koman zot parti.

 

(All US members stood for one minute of silence)

 

HON CHARLES DE COMMARMOND

Ok mersi.

 

MR SPEAKER

Mersi Onorab.

 

HON CHARLES DE COMMARMOND

Mr Speaker pou bokou Seselwa France Albert Rene ti en ero.  En liberater – en Kaptenn –

 

(Interruption)

 

MR SPEAKER

En moman … En moman …

 

HON CHARLES DE COMMARMOND

En  vizyonner –

 

MR SPEAKER

En moman – Onorab, Onorab …

 

HON CHARLES DE COMMARMOND

…. e zot ….

Onorab. … En moman.  En moman …

 

(Interruption)

 

MR SPEAKER

… Onorab De Commarmond i pe lead son parti dan Lasanble.  In demann mwan pou li dir de pti parol depar zot Leader.  Onorab.

 

(Interruption)

 

MR SPEAKER

… silvouple.  Order!  

 

Interruption)

 

MR SPEAKER

Order!  Order! Annou donn Onorab de Commarmond de minit i a dir de pti mo apre nou a kapab repran nou Biznes.  Onorab.

 

HON CHARLES DE COMMARMOND

Mersi Mr Speaker, Sir.  Omwen ou konpran.  Mr Speaker pou bokou Seselwa France Albert Rene ti en ero, en liberater, en kaptenn, en vizyoner.  Pou lezot i ti senpleman en diktater.

Me sa ki kler se ki dan en fason ou en lot France Albert Rene in tous tou Seselwa!  Sa Sesel ki nou vwar otour nou ozordi se  France Albert Rene.  Nou pa pou kapab zanmen tir son lanprent lo listwar nou pei.

France Albert Rene ti en zonm senp me i ti osi nou Prezidan.  Konman en zonm in fer fot.  Konman  en Prezidan i ti annan en gran leker pou son pep.  I ti lite pou sak zanfan Seselwa annan menm loportinite e pou ganny menm sans dan lavi.  Ozordi sa i en realite pou tou nou zanfan.  I ti krwar dan Seselwa.  Prezidan Rene pa ti annan okenn dout ki zonm e fanm Seselwa i kapab pran son desten dan son prop lanmen.  Ozordi pe enport ki ou nwanr ki ou blan nou senpleman apel nou lekor SE..SEL..WA !

Prezidan Rene ti kontan son vye dimoun e bann ki pli vilnerab. Son mesaz ti senp.  Pa tous nou malere.  Ozordi lo non United Seychelles mon oule partaz so dernyen swe avek lepep Seselwa.

France Albert Rene ti demann nou pou travay e travay dir.  I ti dir nou ki linite, linite nou Nasyon i enportan.  France Albert Rene in ale in kit nou.  In fer son bout e nou dir li mersi, mersi e mersi bokou.  I pa’n kit en Sesel parfe deryer me in kit en Sesel ki meyer ki sa enn ki li i ti viv ladan.

Ozordi i en nouvo letap Mr Speaker.  Ozordi i nou tour annou fer sir ki nou osi ler nou ale nou kit en Sesel  pli meyer ki sa enn ki nou pe viv ladan ozordi.

Mr Speaker lo non tou bann Manm United Seychelles dan Lasanble e lo mon non personnel e mon fanmir mon oule pas nou senser senpati e kondoleans profon a tou fanmir e pros Msye Rene.  A son bann kolaborater, bann siporter e tou bann ki krwar dan son vizyon e filozofi.  Adye nou ero.  Adye Msye France Albert Rene.  Till we meet again.  Mersi.

 

(APPLAUSE)

 

MR SPEAKER

Mersi Onorab De Commarmond.  Nou ava kontinyen lo nou Order Paper.  Nou annan bann prezantasyon bann papye. Mon ava demann Madanm Clerk pou pas lo lalis bann papye ki devan nou.

 

MADAM CLERK

Mersi Mr Speaker.  Bonzour Mr Speaker.  Bonzour tou Manm e tou dimoun ki a lekout.  Lo Order Paper sa semenn Mr Speaker i annan 14 Regilasyon ki’n ganny table e sa bann regilasyon i konm swivan;

S.I 82/2018 Public Service Special Pension (Amendment of Schedule 1) Regulations,2018. 

        S.I. 83/2018 Customs Management (Tariff and Clarification of Goods) (Amendment) (No. 4) Regulations, 2018

        S.I. 84/2018 Excise Tax (Amendment of Schedule) (No.3) Regulations, 2018.

        S.I. 85 /2018 Value Added Tax (Amendment of First Schedule) (No.3) Regulations, 2018.

        S.I. 86/2018 Value Added Tax (Amendment of First Schedule) (No.4) Regulations of 2018.

        S.I. 87/2018 International Trade Zone (Amendment) Regulations, 2018

        S.I. 88/2018 Mutual Fund and Hedge Fund (Substantial Activity Requirements) Regulations, 2018.

        S.I. 89/2018 Securities (Substantial Activity Requirements) Regulations, 2018.

        S.I. 90 /2018 Excise Tax (Fuel Exemptions and Concessions) Regulations, 2018.

        S.I. 1/2019 Health (Fees) Regulations, 2018.

        S.I. 2/2019 Health Professionals (Amendment of Schedules) Regulations, 2018.

        S.I. 3 /2019 Land Reclamation (Retrospective Authority) (No.5) Order, 2019.

        S.I. 4/2019 Public Service Special Pension (Amendment of Schedule) 3 Regulations, 2019.

        S.I. 5/2019 Barclays Bank (Seychelles) Limited Debt Guarantee Order, 2018.  Mersi Mr Speaker.

 

MR SPEAKER

Mersi Madanm Clerk.  Bon mon pe zis fer en lapel pou bann manm piblik ki enterese pou vwar sa bann S.I. zot kapab ganny akse avek kot National Library ki mannyer mon konpran en kopi i ganny depoze laba e osi tou Biro Attorney Zeneral.  Akoz mon konnen parfwa bann S.I. bann dimoun i zis pa pe pran kont avek me i annan bann sanzman bann Regilasyon ki antre ki kapab enpakte lo nou lavi tou le zour.  Madanm Clerk ou annan First Reading.

 

MADAM CLERK

Mersi bokou Mr Speaker.   First Reading dapre nou Order Paper i Anti-Corruption (Amendment) Bill 29 of 2018. This Act may be cited as the Anti-Corruption (Amendment) Act of 2018.  Mersi Mr Speaker.

 

MR SPEAKER

Mersi Madanm Clerk.  Bon avan nou pran nou travay ki Repons lo mesaz Leta Lanasyon ki ti ganny fer par Prezidan Mardi le 26 Fevriye la fason ki nou pou travay nou ankor pe sey negosye avek SBC nou pa ankor ganny en repons konkret pou regarde, si nou kapab nou pou pran 1erdtan lunch break pou re antre 1er pou nou kapab bouze avek nou travay.

E fotespere nou a kapab fini dan sa trwa zour ki nou’n met devan.  Le de Leaders pou ganny an tou 45 minit.  Larestan Manm 30 minit.  E mon pou strik lo 30 minit ozordi.  Ok?   Bon le de Leaders parey mon dir mon touzour egzers sa fleksibilite me zot annan apepre 45 minit me mon pou obzerv sa fleksibilite pou le de LeadersOk?  Onorab De Commarmond pou donn ou 5 minit.

 

HON WAVEL RAMKALAWAN

Wi sanmenm sa ki mon ti pe al dir parski in deza ganny 5 an plis alors i ava donn mwan-

 

MR SPEAKER

Bon nou pou al direkteman lo repons e parey labitid nou konmans ek repons par Leader Lopozisyon e sa pou swivi par repons Leader Zafer Gouvernman Onorab De Commarmond.  Onorab Ramkalawan laparol i pou ou.

 

HON WAVEL RAMKALAWAN

Mersi bokou Mr Speaker.  Bonzour tou koleg Onorab e pep Seselwa.  Mr Speaker ozordi plis ki yer lepep Seselwa i bezwen   sant avek Mr Georges Payet aotvwa ‘’Mon pou sov ou mon pei!’’  Ou pei, mon pei, nou pei i bezwen sakenn son zanfan pou re met li lo ray ankor enn fwa.

Nou bezwen retrouv larout moralite semen vre lazistis sosyal e la drwa tir, santi lepanouisman imen e highway devlopman ekonomik.

An 2019 Sesel pe appel nou pou antre dan en nouvo partenarya avek li pou ki nou kapab lev nou pei.  Nou pep i merit nouvo lespwar. Nou pep pe soufer an silans, akoz i fatige espere dan fernwanr promes vid.  Leta nou pei i devret konsern nou tou.

Leta nou pei i devret revey lepep Seselwa akoz i annan bokou desizyon enportan pou pran afen ki nou vin en pei modern ek en pep konsyansye e determinen.

Seselwa i bezwen pran Lendepandans ‘76 serye konman en pep souveren.  Welfare ek lapares i bezwen ganny ranplase avek travay dir.  Letid serye kouraz ek determinasyon i bezwen vin nou lapriyer bomaten.

Mr Speaker mon salye bann artis ki’n sezi sa vre filozofi lavi atraver zot sanson, poenm ek diferan form lar zot pe kontinyen fer nou lir bann siny ki manifeste otour nou.  Nou bezwen zis pran letan pou ekoute e nou ava kapab tat pou nou pep, antann soufrans ek laspirasyon nou dimoun, dekouver langwas nou lazenes, santi leokri bann travayer, rekonnet leker lour ban paran, tandis ki  konba kominote biznes i a montre nou sa nyaz sonm ki kontinyen kasyet sa vre lespwar ki nou pe serse sak soley lev-e.  Wi keksoz i serye e dan bon Kreol mon a dir zafer i sal.

Mr Speaker diskour Msye Faure dan son kapasite konman Prezidan Larepiblik pa’n donn mwan ek nou pep gran lespwar.  Mon pa’n vwar bann kalite en dirizan ki donn son pep en direksyon e ki fer li viv en vizyon ki anmenn li ver  en meyer demen.

In en diskour ranpli avek parol san gran kalkil.  Lanons ki montre en mank kouraz e pli enportan bann desizyon lanmwatye kwi ki kit nou dan plis dout.  In en diskour ranpli avek lafreyer perdi vot dan en Eleksyon.  Par esey satisfer tou dimoun ki en misyon enposib Msye Faure in kot lepep Seselwa konsyansye dan en lafore perdi.

I malere pou nou akoz labib i dir nou kan i annan en mank vizyon en pep i périt.  Eski se pa sa ki pe arive avek nou zoli pei sak zour ki pase? Mr Speaker nou’n trouv en lepanouisman enportan pou nou pep dan devlopman demokratik nou pei pandan  sa dernyen 2an, depi Septanm 2016.  Ozordi Seselwa i santi li bokou pli lib pou eksprim li, manifeste son laliberte e rod son drwa.  Mon fyer ki dan Lasanble mon’n diriz sa lekip LDS ki’n fer sa vin en realite.  Nou pep ozordi pa pou aksepte nenport leskiz ki ou donn li.  Mon krwar ki sa i pli gro fot ki Gouvernman   Msye Faure pe fer e sa diskour i en legzanp kler en tel fenomenn.

I initil ou vin dir Seselwa ou ki donn li lakaz ek ledikasyon ek lasante.  I konnen ki i peye pou sa bann servis atraver tax ki i kontribye.  Sa i pous nou dan en nouvo kiltir koz laverite avek nou pep!  Eski Gouvernman Msye Faure pa ankor realize ki letan  bann dirizan i koz manti lepep Seselwa i vwar zot alor si zot konnen pa bezwen kasyet laverite akoz nou pep souvan i vwar bokou plis ki bann dirizan i kapab mazinen.

Par egzanp letan Msye Faure i deklar zour fineray Msye Rene konman en konze piblik eski i krwar ki Seselwa i oubliye ki pou Mr Mancham premye Prezidan Larepiblik sa menm Msye Faure pa ti deklar li en konze piblik e alor i trouv sa konman  en lenzistis 1 pwa 2 mezir ?

 

(APPLAUSE)

 

HON WAVEL RAMKALAWAN

Mr Speaker parfwa mon ganny akize konman dominer.  Pou serten dimoun si ou fran ou pa les personn mont lo ou lipye e pran ou pou en boufon, alor ou dominer!  Si ou dir keksoz ki mannyer i ete e ou onnet avek ou lekor alor ou dominer.

Sa Mr Speaker pa ofans mwan akoz mon konnen ki gras a mon fason fran e onnet, nou’n reisi vwar bokou lalimyer dan nou pei e nou’n vwar gran progre dan lafason ki nou pei i ganny dirize ; kot drwa sak endividi an 2019 i pli ganny rekonnet ki an Zilyet 2016.

Alor annou reste fran e onnet e sa i ava kontribye dan fer Seselwa vin en pep determinen.  Mr Speaker ansanm avek lezot dirizan ek aktivis LDS nou’n kontinyen ansanm avek bann lezot aktivis, nou’n kontinyen avek nou kanpanny ‘’DANNY OUT!’’ kot nou pe demann Msye Faure pou demisyonn-en e  fer nouvo eleksyon.  Rezon prensipal pou en tel demann se zisteman akoz nou pa vwar vre leadership pou nou pei anba son direksyon.

Anba ladministrasyon Msye Faure nou pa pe fer gran progre konman en Nasyon. I annan tro bokou promes, vir an ron e mank planifikasyon.  Si deza Msye Faure pa pe diriz nou pei me pe mazin prepar li pou prosen Eleksyon kot i pou debout konman en kandida nou dir li dan sa ka fer eleksyon afen ki sa pep i a swazir son desten.

Parey Angle i dir i pa oule ‘rock the boat’ e alor bokou bann menm problenm i kontinyen.  Direksyon pa kler.  Desizyon i tarde ganny pran e se nou pep ek nou pei ki soufer.  Letan ou krwar i pe al fer en lanons brav e desiziv, i frot o-bor.  Avek en sel still leadership Mr Speaker nou pe pa pou avanse.  Alor mon re demann Msye Faure pou fer sa ki nob e demisyonn-en konman Prezidan e permet lepep Seselwa fer son swa son Gouvernman.

 

 

(APPLAUSE)

 

HON WAVEL RAMKALAWAN

Mr Speaker en pwen  ki montre febles dan preski tou diskour ki sa Gouvernman i fer se mank konsiltasyon.  Keksoz i ganny anonse e konsiltasyon i ganny fer apre.  Son rezilta plis retar e soufrans pou nou pep.

Par egzanp mon demann mwan ki konsiltasyon in annan avek Lasanm Komers lo serten desizyon ki pou afekte  biznes dan Sesel.  Letan mon ekout bann progranm News Extra lo SBC avek bann dimoun ki ansarz serten Lorganizasyon tel ki CARE e APDAR, ankor enn fwa mon demande si in annan konsiltasyon.  Letan mon tann PUC pe met lobzeksyon pou konstriksyon semen Pasquiere  Grand Anse Praslin sa i reflekte latitid sa Gouvernman kot napa konsiltasyon.  Sa i en lakle e mon krwar ki tan ki Msye Faure pa konsilte, nou pou antann en kantite promes me aksyon pou manke.

Letan Msye Faure i vin koz lo lalkol e i pa vin avek bann propozisyon kler pou konbat sa problenm mon dekouraze e mon dezapwente.  Dimoun i demande ki diferans pou fer pou en laboutik pa kapab vann lalkol ek manze, me annan  en landrwa separe.  Eski sa laboutik pou zis azout en pti bout pou van lalkol parey serten laboutik pe fer ozordi ?  Alor ki diferans?

Moratorium lo license ankor enn fwa problenm se ki i deza annan tro bokou alors ki diferans?  Tou Seselwa i konn tre byen Mr Speaker ki pli gro problenm lalkol ozordi se prensipalman sa Pti Ponm, baka ek enn de labwason bon marse ki soul dimoun vit e ki provok bann maladi.

LDS i dir ki nou bezwen  adres sa size seryezman.  E menm dimoun ki ganny en lavi avek prodiksyon, lenportasyon ek lavant sa bann labwason i bezwen konpran nou.  Premyerman sa bann labwason pa bon pou lasante e i pe kout nou pei en kantite larzan zis pou donn swen medikal.  E i fer ki nivo prodiksyon ekonomik i tonbe akoz travayer i vin soular e lalkol i vol zot zouti travay.  Konpran sa byen letan en alkolik i dan ICU e ou azout son tretman ki ou bezwen donn li i kout plis ki R7mil par nwit.

Tretman bann maladi asosye ek lalkol pe kout nou pei en ta milyon Roupi.  Perdi en manm ou fanmir spesyalman en zenn akoz lalkol i anmenn en kantite soufrans e nou vwar pti zanfan pe vin orfelen.  Se pou sa rezon ki nou bezwen serye avek sa size lalkol.  San oubliye ki i annan plis dimoun ki’n vin viktim lalkol ki drog dan nou pei ozordi.  Mr Speaker moratorium i vedir protez sa ki la ozordi.

An dot mo annou kontinyen avek sa sityasyon aktyel  –  kot Pti Ponm ek lezot i kontinyen fer dega.  Frer ek ser Seselwa sa pa en solisyon.  Mwan mon dir annou vin brav.  Mon propoz;

  1. En ban total lo serten labwason ki pe fer dega dan nou sosyete tel ki Pti Ponm, baka, labyer 18poursan lalkol ek bokou lezot ankor.
  2. Annou ankouraz prodiksyon bon lalkol lokal, ki ava koup lo lenportasyon, bann labwason parey Seybrew ek Takamaka Bay, kindeza ganny meday enternasyonal e ki nou ava kapab eksporte pou ranforsi nou lekonomi.

Ogmant lamann ki ava osi enkli kensel license bann boutikye ki vann lalkol ek miner oubyen andeor ler ki Lalwa i permet. Anvoy en mesaz kler e serye e sa i ava donn direksyon.  E Mr Speaker pour dimoun ki ganny atrape pe drive anba lenflians lalkol, annan bann pinisyon serye tel ki sispann zot license.

Sityasyon i grav e nou bezwen responsabiliz nou pep an-mezir ki nou pei i pran aksyon direk e konkret.

Mr Speaker, nou’n ganny bann statistik ki sokan lo labi zanfan.  Sa ki devret pli sokan se lakantite ka labi ki pa ganny raporte. Eski bann Lazans i ase byen ekipe pou fer fas avek sa sityasyon? Eski vreman bann abizer pe ganny kwense? Mon propoze ki i annan en Lazans dedye pou deal zis avek labi zanfan.  Sa i ava anmenn ansanm sikolog, counsellors ek zofisye ki fer lenvestigasyon ek prosekisyon.

Kot nou’n arive se en ‘one stop shop’ ki nou bezwen. Bann Lorganizasyon tel ki NCC, i ava kapab donn sipor reabilitasyon ek ledikasyon. I annan tro bokou nou bann zanfan ki pe pler an silans. Manm fanmiy, ansenyan, school counsellors e menm kominote i annan en rol kle dan sa lalit. Annou silvouple protez nou zanfan.

Mr Speaker, leta nou pei pa pou amelyore – letan bann size grav parey tretman pour drog i ganny servi pour rezon politik. I pa vo lapenn pour esey ganny vot par anmenn en kanpanny dezenformasyon lo sa size.

I pa vo lapenn pour bann ki responsab APDAR pou dir ki LDS i kont progranm methadone kan se gras a LDS ki sa Bidze in ganny aprouve pou enport sa form tretman.

 

(APPLAUSE)

 

HON WAVEL RAMKALAWAN

I meyer pou eksplike ki apard methadone i annan lezot form tretman e ki metod ki pe ganny servi aktyelman i methadone.  Eksplik dimoun ki sa desizyon i en desizyon medikal e non pa politik. Aret mazin an-term vot, me plito regard sa bann dimoun vreman koman bann kliyan ki bezwen sipor, solidarite, e pli enportan, liberasyon dan  prizon kot sa eroin in met zot.

Mr Speaker  in anonse ki UAE pou fer donasyon sa sant reabilitasyon dan distrik Port Glaud.  Sa i byen, me kestyon enportan ki nou bezwen poze se eski Bidze pou gard sa sant fonksyonnel in ganny travay lo la e prezante? Se sa kalite planifikasyon ki nou osi bezwen.  I pa vo lapenn annan en loto kan nou napa larzan pou met benzin ladan. Konbyen i pou koute?

Mr Speaker me an sa ki konsern sa size drog, nou pa’n tann Msye Faure koz lo lalit kont drog limenm. Eski i pa ler pou pran lalit kont drog koman en priyorite?

Par egzanp, akoz ki nou kapab anmenn gard prizonnyen Tanzanyen, me nou pa kapab rod led apropriye pour nou anmenn polisye etranze pou kapab ed nou atak bann trafiker lo nou 3 zil prensipal? Akoz nou pa kapab fer vini en 15enn lisyen pou ed nou fer en netwayaz sa pwazon dan nou pei?

I byen nou met seo, kivet ek bwat lapentir vid pou bar delo ki pe koul dan nou lakaz, me akoz nou pa mont lo tol enkou pou repar sa trou ki dan nou twatir atraver ki delo pe koul lo nou lili?

Kan eski nou pou serye dan atak bann byen malaki? Kan eski nou pou pran aksyon apropriye ek bann pti menn lo scooter ki servi koman kourye pou distribye drog e ki vin en menas dan trafik? Mon pe dir avek Msye Faure ki si i mank kouraz, zet sa travay lo LDS e nou ava fer sa travay, akoz ozordi nou pe senpleman vwar plis zenn ki pe vin viktim.

Annou pa oubliye ki Dr Herminie limenm in dir ki bokou kliyan pa pe swiv tretman methadone akoz pri eroin lo ghetto in tonbe.  Annou sov nou lazenes, me zis en pti warning: Annou osi prepar nou pour sa popilasyon pti baba eroin ki nou sosyete pe komans fer fas avek.

Mr Speaker lalkol ek drog pe detri fabrik nou sosyete. Kan resours imen en pei i ganny detri, se sa pei limenm ki ganny detri. Mon fer en lapel avek lepep Seselwa pou konpran ki si nou pa met sa 2 fleo anba kontrol, se etranze ki pou kontrol nou pei.

Demann ou lekor akoz ki sa Endyen ki vann ou lalkol ziska tar dan lannwit zanmen i sou? Demann ou lekor akoz ki sa gran trafiker li i pa lo eroin? Larepons i senp: Zot pe profit lo ou febles. Frer, ser, debout, aret les zot servi ou! Reklanm ou dignite zonm ek fanm.

Mr Speaker, an sa ki konsern size lakaz mon krwar ki premyerman olye prezant leskiz tel ki ti annan granit dan later, Msye Faure ti devret demann leskiz lepep Seselwa pour lapenn i pa’n kapab delivre lo sa gran promes ki i ti anonse, e sa se 24/24/24.

In napa bon konsiltasyon ek planifikasyon ki’n ganny fer, me zis gran lanons trionfal. Ozordi i annan serten distrik ki ni teren pa ankor idantifye.  Letan ou’n met ou pep lo pik-pok, me ou pa’n delivre, ou premyerman demann li en leskiz, olye met li lo en lot lelan par anonse ki aprezan ou pe al konstri 3mil lakaz!

Eski nou kapab ganny detay lo kote sa bann lakaz pou ganny fer e kan zot pou pare? Ki’n arive avek promes 2017 pou fer lakaz plis letaz lo Ile Aurore? Annou serye e montre respe pour sa pep Seselwa, silvouple.

Lakantite lakaz kinganny delivre i dezapwentan. Msye Faure i dir nou zot in delivre 174 lakaz. Eski i realize ki sa i vedir 7 lakaz par distrikt? Nou’n ganny dir ki sa sif R850mil pou vin R550mil koman kondisyon pou ganny later. Akoz? Pri konstriksyon in diminyen? Oubyen eski Gouvernman in senpleman ris en lot sif sorti dan lesyel san fer bann kalkil?

Sa i fer mwan poz en kestyon prensipal: Konbyen fanmiy ki zot in met retar?  Me lezot kestyon pour refleksyon: Lekel ki dir zot ki en dimoun ki pe rod en bout later, i anvi fer en lakaz blok oubyen ki i pa pare pou debourye dousman, dousman lo limenm? Eski lakaz mwens ki R850mil tinganny ban dan sa pei? Fodre ki zot aksepte ki sa Sistenm Pwen in fail nou pep, e ki fodre regard li ankor, enkli regard ki mannyer sa Minister i fonksyonnen. Akoz ozordi se sa Minister ki fer Seselwa pli fristre dan sa pei.

Mr Speaker, mon osi krwar ki Gouvernman i bezwen annan en sistenm ki regard bann zenn profesyonnel ki annan zot larzan fasilite pou konstri zot lakaz, e ofer zot later.  Avek larzan ki ava ganny ranmase, sa i ava ede pour lezot proze lakaz.  In ler pour sa Minister komans ‘think outside the box’ konmdi Angle. Larg lanmen Seselwa silvouple!

Mr Speaker mon pa rapel antann sa mo koripsyon dan diskour Msye Faure.  E pourtan koripsyon i ankor pe arive dan nou pei.  Anba son prezidans, nou pe kontinyen vwar sa vilen bebet e malgre tou zefor ki Lasanble Nasyonal i fer, spesyalman atraver Komite FPAC, nou kontinyen vwar sa.

A ler aktyel nou ankor pe sey konpran ki mannyer apre tou sa bann dekouvert lo lafason ki bann Irlandais in fer tou kalite trik, an 2017, apre ki Msye Faure tinfini vin prezidan, en avoka Irlande in kapab konvenk FIU pou sinny en Kontra R400mil par mwan avek en avoka lokal, me ki 2 tyer sa sonm, savedir R266mil, i ganny transfer pour sa etranze san pey tax?

Ki mannyer SBFA, sa Lorganizasyon ki ti donn bann pti loan ti kapab pe fer bann aksyon koripsyon lo sa nivo? Me ankor enn fwa, nou vwar serten dan detansyon, me lezot i lib aletranze.  1 pwa 2 mezir?  Prensip ladministrasyon Msye Faure?  Mon espere mon ava ganny larepons.

Mr Speaker, mon swete ki avek bann lamannman dan Lalwa Anti-Koripsyon, sa 50milyon Dolar, ki tradwi an R750milyon, ansanm avek son bann piti i ava rantre dan kof Sesel e bann responsab i ava fer fas avek Lalwa; ki sa bann ki’n pran later Leta konmsi ti pour zot i ava rann e ki bann gro aksyon koripsyon kinvol zanfan Seselwa en meyer lavi e lavenir i a ganny met o-kler. Nou anvi ki koripsyon i ganny met anba kontrol enn fwa pour tou.

 

(APPLAUSE)

 

MR SPEAKER

Mr Speaker lo sa menm size, mon krwar ki mon bezwen dir avek Msye Faure direkteman ki in ler pour li, dan son kapasite koman Sef Ekzekitiv, pou pran aksyon apropriye kan Lasanble i fer bann dekouver. Nou pa kapab kontinyen vwar en mank aksyon kan Lasanble i fer rapor ki ganny anvoy kot li. Nou’n fer rapor lo size Vye Marmit, nou’n fer bokou deba lo size nasyonalite.  E laba kot Vye Marmiit i kler ki in annan trik dan prosesis tender, e ozordi sa landrwa pe ganny sub-let, ki kont Lalwa, me napa nanryen ki’n ganny fer.

Dan son diskour an 2017, la sa ki Msye Faure ti dir: “Okenn propozisyon ki Lasanble Nasyonal i met devan ki pou amelyor sityasyon lavi lepep Seselwa, nou ladministrasyon pou azir lo la.” Lalit kont koripsyon i enn ki pou ede amelyor lavi lepep Seselwa, alor akoz Msye Faure ou pa azir lo la?

Mr Speaker, lo size lalit kont lapovrete ek pri lavi an-zeneral, nou kontinyen war menm zafer, kot Gouvernman pa enterese pou ekout bann propozisyon Lasanble Nasyonal, e pourtan nou’n fer en kantite propozisyon, spesyalman an-relasyon avek STC.

Ozordi, nou kontinyen pa vwar okenn aksyon pou kas bann kartel, me o kontrer ou a krwar  ki STC li osi i zwe en rol pou fer monte pri lavi. Gouvernman i prefere les STC pey plis ki R16milyon avek zot parti politik, ki pas sa later avek sa lakonpannyen. Zis avek sa larzan i ti a kapab enstal fotovoltaik e sa ti ava fer son bil elektrisite sorti plis ki R1milyon par mwan pou vin lanmwatye. Eski sa benefis pa ti a ede fer desann pri komodite?

I kler ki plis aksyon i kapab ganny fer.  Me mon ti a kontan komans par demann kestyon nou fanmir.  E la Mr Speaker parey mon’n dir o komansman, mwan mon pa vin kasyet mon pa zis vin rod vot.  Mon anvi vin fran pou nou adres vre Leta nou Nasyon.  Mon anvi demann nou fanmir Seselwa detrwa kestyon, akoz li osi tou i bezwen pran son responsabilite.

Eski tou adilt dan ou fanmir pe travay?  Eski sakenn pe fer kontribisyon pour tou repa ki i partaze? Letan ou ouver kastrol, eski ou, ou annan  par ladan? Letan ou ouver delo pou bennyen, oubyen ou met lalimyer on, eski ou ti fer en kontribisyon lo bil?

Sak endividi Mr Speaker i bezwen pran son responsabilite, e sa i ava osi ede pou fer kou lavi pli abordab. Mummy, eski ou realize ki si ou 2 zanfan ti al rod en plas travay, sa ti a vedir omwen en reveni minimonm R12mil an plis pour ou lakour?

Mon pe met sa 2 pwen devan akoz mon anvi dir  avek tou dimoun ki an  mezir ki LDS nou pe lager pou fer desann pri lavi, i enportan pour zot osi aport zot kontribisyon.  Nou pa pou kapab fer sa travay zis lo nou menm! Zot osi zot bezwen form par sa solisyon.

Mr Speaker, mon vreman soke pou war ki Msye Faure i koz zis 2 pti fraz lo lasante kan sa i en konsern Nasyonal.  I byen ki pou annan resers lo maladi eriditer e ki finalman Gouvernman in antann sa ki LDS, atraver Mosyon Hon Clive Roucou ti propoz konstriksyon en nouvo Lopital spesyalize Providence.  Tousala i byen.

Me lo sa size Lopital, mon espere ki pri ki nou peye pour sa later ek sa bann batiman ki deza pe avarye i enn ki responsab.       Seselwa i apresye travay bann profesyonnel medikal, me nou osi realize ki zot travay anba bokou presyon. Mon espere ki sa lannen zot ava regarde ki mannyer pou rezourd bann problenm de baz tel ki file ki kontinyen perdi, leta bann ward e bann kabinen, dra ek zorye e letan ki pasyan i pran pou war spesyalis e ganny tretman.

Eski nou kapab konnen kwa ki pe arive avek sa progranm pou annan en sistenm kordinnen pour ki lenformasyon pasyan i ganny osi garde dan en fason  elektronikman? I annan detrwa lannen nou pe koz lo sa.

Mr Speaker la ki Lalwa Akse avek Lenformasyon in pase, i ti ava osi byen si sak dimoun i kapab ganny en kod pour li annan akse ek son file pour ki si i anvi en 2enm lopinyon, i ava bokou pli fasil.

Mr Speaker mon zwenn zabitan La Digue ki pa kapab aksepte lakantite letan ki i pe pran, pour konstriksyon nouvo Lopital Logan ki ozordi i dan move kondisyon. I senpleman pa akseptab! La Digue i bezwen son Lopital ek tou fasilite apropriye, pour ki sa ki nou ti war lo medya sosyal pa repet ankor.

Konstri sa Lopital an 2019 silvouple. La mon espere ki La Digue Trust Fund li osi i pe pran an konsiderasyon propozisyon ki mon ti fer lo FPAC pou fer don en ‘incinerator’ kot tou bann dese medikal i ava ganny brile dan en fason izyenik.

Mr Speaker, i enportan dan staz kot nou ete pou annan travayer etranze. Bokou biznes pa ti pou sirviv san etranze, malgre ki nou konsider sa nonm koman tro bokou.

Me  malerezman Seselwa i konsernen avek lakantite etranze ki rantre dan nou pei e travay ilegalman. Non selman ki pandan sa bann dernyen letan nou’n dekouver en sityasyon dezord total kot sakenn i annan stanp ofisyel e pe debourye, me nou osi war ki i annan mank kordinasyon dan sa Minister ant 2 son Departman – sa i Lanplwa ek Imigrasyon.

Dan milye tousala Mr Speaker, mon anvi propoz sa bann keksoz swivan:

  1. Ki i annan en nouvo sistenm kordinasyon ant sa 2 Departman pou asire ki okenn trik lo GOP pa kapab ganny fer;
  2. Ki tou bann anplwayer kinpartisip dan sa koripsyon pou anmenn travayer etranze ilegalman dan pei, i pas devan lazistis e pa ganny permisyon pou anploy okenn travayer etranze ankor;
  3. Ki tou travayer etranze i bezwen annan en Kontra valid letan zot antre dan pei ki’n ganny sertifye par tou lede Departman e aprouve par en zofisye pli senior posib, tel ki PS;
  4. Ki dezorme, tou viziter ki rantre Sesel i ganny en viza zis pour lakantite zour ki i vin konze Sesel; e dernyenman
  5. Ki Gouvernman i limit GOP pour bann biznes laboutik kot nou konnen i annan plis labi.

Mr Speaker Seselwa i tre konsernen avek trafik imen ki sali repitasyon nou pei.  Alor nou pe kont lo sa Minister pou klersi non Sesel. Antretan, fodre ki tou etranze ki napa GOP i ganny deporte dan nou pei apre bann prosedir apropriye.  E mon anvi profite pou felisit sa lorganizasyon ki apel ARID pou sa travay serye ki zot in fer dan nou pei!

 

(APPLAUSE)

 

HON WAVEL RAMKALAWAN

Mr Speaker, mon senserman krwar ki si nou vreman anvi sov nou pei, fodre aret trenn lipye.  Mon pe koz fran e serten dimoun i kapab pa kontan, me sa ki mon bezwen dir zot, se ki kot pasyan ki apel Sesel in arive, nou bezwen donn li latizann pli for pour li kapab viv.  Initil nou dir i fer lapenn e pa fer loperasyon.

Si nou fer sa i pou mor, alor, fodre nou edik nou lekor e regard bann benefis a lonterm ki nou pou kapab gannyen.  Par egzanp, fodre ki sa dimoun ki aret bwar ek fimen, malgre okomansman pou fermal e i pou menm vwar nanm, i realize ki pli tar, non selman i pou fer en lekonomi plis ki R100 par zour, me son poumon ek son lefwa, san bliy son ronnyon pou re ganny zot lasante.

Alor, annou mazin sa bann benefis osi pour sak endividi, pou nou pei ek zenerasyon a lavenir. Kontribisyon sakenn pou fer monte nou pei, alor sakenn donn en koudmen e nou ava ariv kot nou anvi ale koman en pep.

Mr Speaker, nou lanvironnman i labaz sa 2 pilye nou lekonomi. Alor sa i swiv ki nou bezwen vey li byen. Eski vreman nou pe fer sa ozordi? Mon konnen ki bokou pe ganny fer, me eski nou pe fer ase?  Personelman mon pou dir non, e si nou pa pran aksyon serye ozordi, demen pou tro tar.  Fodre pa nou arete zis letan i tro tar.  An dot mo fodre pa nou donn latizann pasyan apre lanmor.  La i moman pour nou pran aksyon.  Mon anvi met devan pour refleksyon ek aksyon serten pwen ki mon konsider koman pertinan.

Premyerman, in ler pour nou regard dan en fason serye nou resours lanmer.  I kler ki se bann Eropeen ki pe pli benefisye avek nou resours ton. Nou pa kapab kontinyen krwar ki sa resours i enfini. Nou bezwen pran desizyon kler e mwan mon anvi propoz detrwa propozisyon:

  1. Mon demande ki Gouvernman i fer tou demars pour ki i annan en ban total lo itilizasyon bann rado oubyen bann FADS dan nou EEZ. Non selman ki zot ede pou detri bann zenn ton ek lezot lespes, me zot en menas pour lanvironnman nou bann koray spesyalman lo bann zil elwanyen.
  2. Sesel i devret osi regard ankor groser bann bato ton ki pe ganny permisyon pou lapes dan nou lanmer avek bi restrikte met en restriksyon lo zis sa bann pli ti tonier. Sa 2 mezir i ava osi protez Lendistri ‘longlining’ dan ki bokou Seselwa in envesti.
  3. Aksyon pli serye i devret ganny pran avek bann bato ki pe lapes ilegalman dan nou lanmer, spesyalman bann Sri Lankans. Me sa i enkli bann tonier osi. Nouvo Lalwa anba ki Coast Guards i fonksyonnen fodre ganny pase o-pli vit posib.

An sa ki konsern lezot aspe nou Lendistri Lapes, eski i pa moman pour nou pei protez enpe plis bann lespes tel ki bourzwa?  Par egzanp, mon krwar ki moman in arive pour defann lapes bourzwa ki anba en serten groser, ki reprezant bann ‘juveniles’.

I ti pou bon pour SFA diriz nou lo la. Apre sa, eski nou pa devret osi, pandan en peryod letan, dizon 2 a 3an ou menm plis, annan en restriksyon total lo eksportasyon bourzwa lo baz komersyal?

An menm tan ki nou fer sa, akoz ki nou pa ankouraz SFA dan zot progranm mariculture pou ede fer reprodiksyon sa bann lespes  pou remet dan nou lanmer pou asir zot logmantasyon. Sa i kapab osi aplik pour reprodiksyon banbara ek lezot lespes lo ki zot in fer resers.

Finalman lo sa size, pour nou kapab protez lapes artizanal anndan brizan, eski SFA pa devret pe osi regard seryezman dan refer stok pwason tel ki kordonyen ek kakatwa, par rantre dan en bon dyalog avek bann peser kazye, ki ava enkli diskisyon konpansasyon pou met serten restriksyon lapes sa bann lespes spesyalman pandan lapondant pour en serten letan? I annan diferan fason pou protez bann lespes, me nou bezwen senpleman vin proaktiv e dyaloge.

Mr Speaker dimoun i bezwen viv, me an menm tan bann lespes i bezwen sirviv. Avek en bon progranm, e la mon pran egzanp,  Rodrigues an-relasyon avek lapes zourit, ozordi tou peser dan sa biznes i kontan akoz i annan plis zourit ki osi pli gro e zot pe fer plis larzan senpleman akoz Gouvernman ek peser in tonm dakor lo en sezon kot sa kalite lespes i fermen. Sa i en size serye pour nou pei konsidere.  E mon envit bann dimoun ki dan sa Lendistri Lapes avek Gouvernman e osi nou Lasanble pou nou diskit byen lo proteksyon bann lespes.

Mr Speaker, i malere pou dir, me Msye Faure pa pe met ase lanfaz lo ledikasyon dan nou pei. Standar pe kontinyen tonbe dan bann lekol Leta. Sistenm primer i bezwen ganny refer e ganny bokou latansyon. Mon propoze ki i annan en progranm serye ki ankouraz bann teachers aktyel e bann zenn ki sorti avek bon rezilta A levels pou vin bann ansennyan primer par donn zot bann bon incentives.

Se la ki nou bezwen komanse pour nou refer nou sistenm ledikasyon. Liniversite Sesel osi i kapab zwe en rol kle dan devlopman sa bann ansenyan.  Nou konnen Mr Speaker ki en headteacher i sa motivater prensipal dan nenport lekol. Kot i annan en bon headteacher, son staff osi i motive, e avek sipor kominote ek paran, sa lekol pou fer byen.

Alor mon pe osi propoze ki Minister avek Gouvernman i regard ankor ki lankourazman sa bann headteachers ek zot bann ansenyan i gannyen. Mon rankontre tro bokou dimoun dan Ledikasyon ki dir ki zot pe esper zot laz arive pou arete. Alor, eski i pa moman pou regard afon dan sa sityasyon? Annou envesti dan bann teachers e nou ava garanti lavenir nou pei avek Seselwa kalifye. An pasan annou pa oubliy bann teachers ki pa ankor ganny peye zot Trezyenm Mwan Lapey akoz zot dat zot lapwentman.

Dan bann lekol, pli gran lanfaz lo disiplin i bezwen osi ganny mete. Paran i bezwen zwe zot rol, e si zot zanfan pa enterese pou aprann, i bezwen annan lezot keksoz pour zot fer.

En zanfan pa kapab i pa ganny drwa anpes en laklas aprann. Lotorite Minister ek lekol i bezwen ganny resanti, e kominote ek paran i neseserman bezwen akonplir zot rol dan ledikasyon bann zanfan. Akoz ki lekol prive i ariv lo sa standar me lekol Leta i en lot zistrwar?

Mr Speaker, nou lazenes i bezwen nouvo lespwar.  Sa i enkli dan kote akademik, me osi dan tou lezot domenn lavi. Mon pe koz lo kreasyon en sosyete kot zenn i kapab devlop zot talan e vreman epanouir.  La mon anvi vwar sa devlpman sportif kot nou lazenes i fer monte nou paviyon dan en lelan patriyotik. Lanfaz lo devlopman sportif ek lar i bezwen ganny relanse e byensir sa i vedir lenvestisman.

Krwar mwan Mr Speaker ki si nou fer sa arive, drog, lalkol ek lezot vis pou vin bann santye ki nou lazenes pou zete zot menm.  Pran swen ek talan nou lazenes e nou sosyete ia ganny transformen, akoz i ava annan bokou plis aktivite kiltirel lokal e enternasyonnal pour nou pep partisip ladan e ganny lwazir ki sen e edikatif.

Mr Speaker, mon konsernen avek nou lekonomi ozordi.  Air Seychelles i reste en gro size akoz i nou lakonpannyen. 2an pase, ti annan en lanons kler ki ti ganny fer: Air Seychelles ti pou pozisyonn li koman en laliny aeryen rezyonnal. I ti rann gro avyon, pous en kantite travayer, e tou keksoz ti pou ok.  Apre sa, nou ti osi ganny dir ki zot pou ganny 2 avyon ki pou maksimiz zot servis rezyonnal.  La souden nou’n ganny dir ki Gouvernman pe donn en sibvansyon 6milyon dolar par an.  Rezon, oubyen leskiz kinganny donnen se ki si bann laliny aeryen i deside aret vin Sesel, Air Seychelles i a kapab ranplas zot. Ed mwan konpran sa silvouple.

Eski avyon ki Air Seychelles i annan i kapab al Lerop e ranplas sa bann avyon?  Mon espere ki pandan sa deba nou ava pli byen konpran sa. Zot ava ed mwan …   Me zis pou soulinyen ki i vre ki planifikasyon dan Gouvernman Msye Faure i en febles masiv. Mazinen Mr Speaker Bidze fek pase e napa en landrwa ki annan en tel sif in ganny mansyonnen. Nou pei pa kapab kontinyen ganny gouvernen dan sa direksyon.

Mr Speaker, pli gran lanfaz i bezwen ganny mete pou ankouraz biznes Seselwa. Pour mwan i kler.  En biznes Seselwa i met son larzan dan labank Sesel e i benefisye nou lekonomi, tandis ki en biznes etranze i asire ki tou profi i ganny eksporte dan pei sa biznesmenn. Mon pe kontinyen vwar ki en pti biznes lotel ki en Seselwa i annan, pe pey menm tax avek en gran lotel.  Sa i devret sanze.  Apre, in osi ler pour Gouvernman pronons son lekor lo kategori biznes ki pou rezerve zis pou Seselwa.  Mon’n deza mansyonn sa, me malerezman in tonm lo zorey sourd. Nou pa kapab les etranze kontinyen tir manze dan labous Seselwa.

Mr Speaker me mon pa kapab aksepte letan Lazans ki sipoze asiste biznes Seselwa i trenn son lipye avek tou kalite leskiz. Zot in fatige antann mwan nonm non Mr Lautee dan sa Lasanble.  Me mon pou kontinyen servi li koman egzanp,  en Seselwa kinfatige e dekouraze zis akoz in premyerman ganny viktimize akoz son kouler politik e ganny refize en morso later konble pou fer en garaz kot son lentansyon se pou ansenny bann zenn Seselwa. Me apre, Msye Faure ti vizit son landrwa Anse Aux Pins e apresye ki sa sityasyon i bezwen sanze. Mr Speaker depi 2an sa msye i ankor pe atann.

Dernyen parol ki in gannyen se later in ganny idantifye, me malerezman Allied Builders pa ankor tir zot materyo konstriksyon lo sa later kot plizyer Seselwa i devret ganny en morso. Oli Lotorite dan sa pei? Eski i akseptab ki en gro lakonpanyen etranze ki fer milyon dan bann gro proze, ki enkli Stad Lanmizik, i ganny drwa met retar plizyer Seselwa ki anvi debourye?  Oli lotorite Msye Faure koman Prezidan?

Mr Speaker pli boner mon’n fer referans avek Lapolis an sa ki konsern lalit kont drog. Me mon osi krwar ki Seselwa pe atann plis ankor avek nou lafors sekirite. Mon konpran zefor ki Komisyonner  Lapolis pe fer, me ankor enn fwa, i malere pou dir ki bokou zofisye pa pe donn sa lafors en bon zimaz. Letan zofisye i azir koman bann gangsters, zour sivilyen e bat dimoun, zot pe depas zot rol e zot pe kas Lalwa.

I byen letan nou tande ki la kantite krim in diminyen. Me eski sa i vreman le ka, oubyen sitwayen i nepli raporte akoz zot pa satisfe avek rezilta ki zot gannyen?  Mr Speaker, si nou Lapolis ti kapab lev zot standar, nou pa ti pou vwar sa kantite lakonpannyen sekirite ki Gouvernman i bezwen anploye.  En gran parti Bidze plizyer Minister i al pour sekirite prive. Sekirite prive in vin en bon biznes fer larzan, e parfwa ou pa ni konnen ki mannyer serten dimoun in kapab ganny en license pou fer tel biznes.

Alor mon anvi fer en lapel ek bann zofisye pou lev limaz sa lafors e azir konsansye. I pa zoli letan nou antann gard pe pran gous, pe partisip dan aktivite ilegal e pe soutir bann trafiker.  Prouv zot lekor ek Seselwa e redonn nou konfyans.  Permet nou viv an-sekirite se nou. Se sa lapel ki Seselwa pe lanse.

Mr Speaker, letan nou dir ki nou bezwen sov nou pei, demann Msye Faure pou demisyonnen e pour nou pei organiz nouvo Eleksyon, nou pa fer li akoz nou voras pouvwar. Mr Speaker Koudeta le 5 Zen 1977 ek bann atrosite ki ti swiv ki pou reste pli gran definisyon laswaf pouvwar ek labi pouvwar dan nou pei.

 

(APPLAUSE)

 

HON WAVEL RAMKALAWAN

Nou demann sa akoz premyerman nou krwar dan la demokrasi ee sa akoz vreman bokou Seselwa pe fatige viv dan en pei ki tourn anron. Pran legzanp sa stasyon petrol ki nou tou nou’n pas devan letan nou’n vin isi kot Lasanble.  Sa stasyon lo ron pwen Ile du Port.  E tou dimoun i ava konpran Leta nou Nasyon. Stasyon in ganny konstri dan en moman rikord e ti sipoze ouver an Septanm lannen pase. E ben, stasyon pa ti ouver e byensir dimoun ti komans demann kestyon.

Finalman larepons ki nou ti gannyen se ki napa semen e personn pa konnen lekel ki sipoze fer semen. La nou’n ariv Mars e stasyon pa ankor ouver! Oli Prezidan Sesel? I les pei rantre dan presipis e i pa servi son Lotorite avek bann Lazans Gouvernman pou donn lepep Seselwa en servis ki neseser?

Mr Speaker SFA pour Gouvernman, SEPEC pour Gouvernman, SLTA pour Gouvernman. Msye Faure i ansarz Gouvernman. I pa fer nanryen? 6mwan pli tar pandan ki tou dimoun pe konplent trafik e bezwen al pran fuel dan stasyon Roche Caiman, nou annan nou en Prezidan ki pa fer nanryen, e pourtan pou fer sa stasyon materyo pa ti ganny transporte dan helicopter!  Sa i montre ou linefikasite sa Gouvernman. Seselwa i senpleman fatige e nou merit sa ki meyer!

Mr Speaker, mon’n esey adres serten bann size ki mon krwar ozordi i konsern nou pep. Mon’n osi met devan serten propozisyon ki mon krwar i ava ede dan rod leklersisman e bouz devan.

Letan nou reorganiz nou sistenm Ledikasyon, nou ava pe kree bann Seselwa kalifye ki pou kapab kontribye dan devlopman nou pei. En bon servis lasante i ava permet nou debout for e fer en kontribisyon solid dan lavenir nou pei.

Travayer ki byen ganny rekonpanse e en pri lavi akseptab, i ava soulaz nou fanmiy. En lalit kont fleo ankor enn fwa pou ranforsi fondasyon nou pei e ede dan devlopman ekonomik.  Me mon anvi direkteman demann spesyalman nou lazenes adilt ki an bonn sante  e ki kapab  travay sa detrwa kestyon:

Mon frer, mon ser eski sa lavi ki ou pe anmennen i permet ou nouri ou lekor sak zour? Eski ou stil lavi pou permet ou atrap serkey ou paran e anmenn li dan son landrwa repo? Oubyen eski i pou permet ou met en bouke fler lo zot latonm?  Oubyen zot ki pou met bouke fler lo ou latonm.  Eski ou  pe nouri sa zanfan ki ou’n met lo later? Reflesi. E si ou larepons i kondann ou, sanz ou lavi, akoz ou en fardo pour ou menm, pour ou fanmiy e pour lasosyete. Leve vin en zenn debouryer, vin en Seselwa ki fyer.

An konklizyon Mr Speaker, mon anvi termin avek parol ansyen Minis Dr Larose ki ti dir ‘‘si selman mon ti konnen.’’ Sa parol Mr Speaker i profon e mon poz li la pou refleksyon.

Mon swe se ki tou Seselwa i ava vwar byen ki nou pei i annan bokou defi ki pa pe ganny adrese par sa Gouvernmen. Ler pour 2enm parti sa sanzman dan nou pei ki pou anmenn transformasyon in arive.  2016 ti mark premye parti. Annou fer 2enm morso an 2019.

Mon priye ki Senyer i beni nou pei Sesel e fer son pep viv an bonn sante ranpli ek kouraz ek determinasyon.  Mr Speaker tan ki sa sanzman pa arive dan nou pei mwan avek mon bann koleg nou pa pou zanmen les tonbe!  Mersi bokou.

 

 

(APPLAUSE)

 

 

MR SPEAKER

Mersi Onorab Ramkalawan.  Mon ava donn laparol avek Leader Zafer Gouvernman Onorab De Commarmond.

 

HON CHARLES DE COMMARMOND

Bonzour Mr Speaker. Bonzour ankor enn fwa bonzour tou Manm Onorab – tou Manm ki a lekout, pep Seselwa espesyalman bann zabitan Cascade.

Mr Speaker, diskour  Prezidan Danny Faure Mardi le 26 Fevriye dan sa Lasanble  pa’n zis montre nou en portre Leta Lanasyon.  Diskour  i osi montre nou kalite Prezidan ki pe diriz Sesel ozordi.  Mwan Mr Speaker, mon’n vwar en Prezidan kalm. En Leader ki an kontrol. En lafors trankil. Mon’n vwar li demontre respe. Mon’n vwar li demontre liminite e rekonnet ki sikse Sesel, se pa li tousel ou son Gouvernman ki’n akonpli.   Mon’n vwar en Prezidan rekonesan, ki konsyan ki se gras a travay dir e devouman sak Seselwa, ki Sesel in ariv kot i ete ozordi. Dir mersi Mr Speaker, pa vedir zwe bon boug. Dir mersi i senpleman bon savwar viv.  Diskour Prezidan in enn ki donn konfyans nou pep.

I montre nou ki nou annan en Prezidan ki annan en vizyon kler e ki pare pou pran desizyon difisil.  Prezidan pa’n vin fer politik dan Lasanble. In koz fransman avek lepep Seselwa.

In fer en diskour fran e onnet.  E se lo sa diskour fran e onnet ki nou kote United Seychelles  nou pou adrese. Prezidan pa’n dir ki tou i parfe.  In fran, in koz laverite lo bann vre defi ki devan nou.  Mwan Mr Speaker, mon’n vwar en vre Leader devan sa Lasanble Mardi pase.  Mon’n vwar sa kalite Leader e Prezidan ki Sesel i bezwen.

En Leader ki pa vin polariz lopinyon, me enn ki annan abilite pou inifye sa pep.  En Leader ki demontre lafors san ki i entimid ou abes son bann oponan,  me ki fer li trankilman e avek respe.  Akoz lafors Mr Speaker, pa vedir lekel ki kapab kriy pli for ou sa ki montre pli gro lebra.  Prezidan Faure i travay dir.  Pour li ‘’Sesel i par lao tou.’’  Son konpa in set lo stabilite, linite e prosperite pour tou Seselwa – pe enport krwayans politik.  Mr Speaker mon repete son konpa in set lo stabilite, linite e prosperite pour tou Seselwa pe enport krwayans politik!

Malgre tanpet, Prezidan Faure in tenir for.  I annan bokou ki’n pile, in annan bokou pile, i annan bloke.  Zot in anmar son lanmen pou anpes li ranforsi son lekip. In annan freeze, zizman, zwe Lakour, imilyasyon plizyer dimoun e apre tousala in defrost lanmenm. Ou a krwar tou batri in desarze tou balon in flak. Pete glob Mr Speaker.  E ki nou’n vwar?  Prezidan Faure in ankor for e prezan ki i for! Sa  en Leader Mr Speaker.

En vre Leader, enn ki vreman kapab diriz pei. En zonm ki kalm e for.  Ki annan tolerans e an menm tan sa rezilyans pour tenir presyon. Akoz nou a rapel, kot i ete lanmans pwalon i so!  Prezidan i en vizyoner ki pe enspir nou pep e donn Seselwa lespwar pou mars ver lavenir latet anler ranpli avek konfyans.

Nou dan United Seychelles nou’n ganny enspire par Prezidan Faure e son diskour akoz nou par natir, nou en parti pozitiv.  Pou nou Mr Speaker, ver delo i touzour lanmwatye plen olye lanmwatye vid.  Problenm pa zis Sesel. Mon krwar ki Seselwa in ase matir e enformen pou vwar ki defi i egziste dan tou pei. Me Mr Speaker, sa ki separ Prezidan Faure avek lezot e sa ki separ United Seychelles avek lezot se ki nou, nou pa vin focus lo problenm nou.   United Seychelles i enterese avek solisyon – olye vwar zis problem, zis pou fer dimoun krwar ki tou keksoz dan sa pei i mal.

Nou pa kapab les problenm konsonm nou, nou pa kapab zis kritike, konplent e apre dir nou pa’n ganny enspire.  Me ler ou dan en leta sitan negativ Mr Speaker, ler olye donn en koudmen nou zis saboule, ler olye konfront difikilte nou saye, ki mannyer ou ekspekte ganny enspire? Sa i parey en dimoun ki touzour an retar, touzour pe konplent, i mank avyon e i dir avyon pa’n take off.  Me Mr Speaker, sa avyon lontan in takeoff.  Me letan ou touzour an retar, pa blanm pilot avyon si ou ganny kit ater!

Le pwen Mr Speaker, se nou dan United Seychelles, nou enspire par diskour Prezidan akoz i ofer lespwar pep Seselwa. Nou, nou dir avek tou Seselwa, annou ansanm kontinyen travay dir. Akoz avek travay dir, pou annan mwens retar.  Nou, nou krwar dan dir mersi akoz nou rekonnet lakonplisman nou pei.  Nou fyer sak fwa ki nou travay dir i ganny rekonnet atraver lemonn.

Mr Speaker, dan United Seychelles, ler Sesel i premye pour en bon rezon dan l’Afrique, nou selebre akoz se Seselwa ki top.   United Seychelles pa selebre ler nou fail, nou pa glorifye dan soufrans nou pep e rod sak loportinite pou zet nou pei anba ouswa met disel dan son boubou.

Malerezman, se sa leta lespri serten nou ozordi dan sa pei. Konbyen fwa dan sa Lasanble Mr Speaker nou’n tann 40poursan lapovrete?  Sa in vin en nespes lapriyer pou serten.  Me ler World Bank, UNDP, Nation  Unies, WHO, IMF e lezot i montre progre kontinyel ki nou pei in fer anba United Seychelles, sa Lasanble i reste trankil.

Nou pa vwar sa lafyerte, sa sans patriotisme  parey mon vwar sa pasyon e leksitasyon ler nou tande nou’n fer mal.  Mon demande, eski nou tou nou bann vre patriyot Seselwa?  Ki mannyer nou kapab apresye le byen otour nou ou kontribye pou en pli bon Leta nou Nasyon, si nou menm nou, nou kontinyen noye dan lanmertim e vanzans?

Mr Speaker, nou bezwen parey Bob Marley in dir ‘emancipate ourselves’ avek sa kalite ‘mental slavery.’ Annou deblok nou lespri e tir negativite ladan.  Nou pa kapab denigre nou pei, kontinyen ankouraz en kiltir ki glorifye problenm e tou sa ki mal. Nou bezwen arete priy pou maler apre konplent ler nou rekolte problenm.   Ki nou ekspekte nou lazenes i fer Mr Speaker, si nou koz lo zot zis ler zot dan lapoud e lo methadone?

Me Leta nou Nasyon, i montre nou ki mazorite zenn dan sa pei i bann manrmay konfyan, ki pe fer sikse –menm lo nivo mondyal- dan domenn akademik, sportif, lanvironnman, e lezot.  Oli lankourazman pou sa bann zenn? Oli felisitasyon? Eski i zwe bon boug ler nou rekonnet e ankouraz sikse?  Eski dir mersi in vin en pese dan sa pei?  Mr Speaker annou lev Sesel anler.

Ozordi, i sagrin mwan pou dir, ki se etranze ki sant nou laglwar e elev nou moral koman en Nasyon.  Granmersi Prezidan Faure i annan sa tanperaman e bon zizman pou diriz sa pei. I pa zis rabase.  I pa zis rabase devan en mikro, i diriz par legzanp.  se sa kalite dirizan ki nou bezwen dan sa pei.  I rekonnet letan pei pa pe fer osi byen, me i ankouraz e felisit nou ler nou reisi.

Mr Speaker se sa ki United Seychelles i ofer pep Seselwa.   Nou en parti lespwar e se avek lespwar e determinasyon ki nou pou reisir sirmont nou bann defi.  Leta nou Nasyon pa enn ki parfe.  Dezapwentman, problenm e defi i par dan lavi sa.

Politik ; be en politik saboule e destriktif, me en politik i devret pragmatique e konstriktiv ;- politik i devret en zouti pour travay lo defi e amelyor kondisyon lavi en pep.   Prezidan Faure dan son diskour in tous plizyer pwen e propoz solisyon konkret pou adres bann defi. United Seychelles i siport son propozisyon lo size lalkol par egzanp.  Kontrerman a sa ki’n ganny dir Prezidan in brav e fran lo sa size.

Lalkol i en problenm ki pe ronz fabrik nou sosyete.  Pandan bokou letan nou’n mank kouraz pour adres sa problenm.  Mon krwar ki tou Seselwa ki vwayaze in vwar ki i annan landrwa e ler spesifik vann lalkol.  Si nou oule bouz devan, nou bezwen fer sa ki neseser.  Mon konnen ki depi lontan Konsey pou drog avek lalkol – DAC– e osi CARE e bann dirizan Legliz pe demann Gouvernman pou pran bann tel mezir.

Mon swete ki sosyete sivil i siport sa demars akoz nou tou koman en sosyete nou devret koz en sel langaz e anvoy menm mesaz.  Bokou letid in fer par Minister Lafanmir ki’n demontre lenpak negativ vyolans domestik lo lafanmir, lo zanfan e son kou ekonomik pou pei.

Dan bokou ka, vyolans i lye direkteman avek labi lalkol.  In ler pour nou ranvers sa sityasyon e mon konvenki ki lanons Prezidan i en bon pa dan sa direksyon.

E mon krwar osi, nou kapab al pli lwen Mr Speaker.  I annan bokou pour fer ankor pou ki sa kiltir bwar an ekse, i ganny eliminen dan nou pei.  United Seychelles i donn son siport total propozisyon Prezidan pou separ landrwa ki vann lalkol avek laboutik.  Mr Speaker, in ler pou pran aksyon e fer keksoz diferaman.  Me konpran mwan byen. Nou pa pe dir personn pa vann lalkol. Me i bezwen annan en lord dan fason ki lalkol i ganny vann.  Nou pa kapab kontinyen Mr Speaker avek en sityasyon kot konmela, laboutik i ganny penn avek posters ki advertise labwason.

Eski i byen ki ler ou zanfan i antre dan en laboutik, premye keksoz ki i vwar se letazer bwar avan manze?    Ki mesaz ki nou pe anvoye pou nou  zanfan e nou lazenes?  Sa pa ase rezon pou vann lalkol dan son prop landrwa?  In ler pour nou aret blok semen e kree problenm trafik letan nou park devan nenport laboutik akoz nou oule aste lalkol.

An sa ki konsern drog Mr Speaker, United Seychelles i reste solider avek bann viktim e zot fanmir.  Sa trazedi i douloure pou nou pep, me nou bezwen annan kouraz pou pran bann desizyon difisil.

Realite Mr Speaker se ki adiksyon i en maladi e nou bezwen ofer sa bann zenn swen e tretman.  I fasil kondannen, i fasil pas zizman, me mon le dir avek tou Seselwa, pou montre plis konpasyon.

Adiksyon i serye Mr Speaker.  Trafik drog i enn pli gro problenm pli gro defi ki lemonn in fer fas avek.  Mon demann en kestyon avek sak Seselwa ozordi. Si ti annan larepons senp, si ti vreman fasil, akoz ki bann pli gro pei, avek plis resours ki nou, pa ankor kapab rezourd sa problenm?  Lekel sa pei, devlope ou ki ankor pe devlope, ki’n reisir elimin drog konpletman dan son sosyete?

Mr Speaker napa; me sa pa anpes nou lager avek tou nou kouraz pou protez nou zanfan e sov bann ki’n tonbe.

Ozordi Mr Speaker, mon le anmenn sipor United Seychelles pou zefor ki pe ganny fer par APDAR e tou lezot Lazans e partner ki pe travay avek bann adikt.  Annou mazinen Mr Speaker, se nou zanfan, nou bann frer e ser Seselwa ki pe bezwen led.  Annou tret zot avek respe.   Annou montre e annou montre zot ki lasosyete pa’n rezet zot Mr Speaker.   Dan sa laliny Mr Speaker, mon le propoze ki Minister Lasante i rekonsider sa bann landrwa piblik, kot zot donn sa bann zenn methadone.

I annan nou Mr Speaker, ki maltret sa bann manrmay ler nou pase e vwar zot dan laliny pe esper latizann.  Mwan Mr Speaker i aras mon leker ler mon vwar sa bann zenn.   Se pour kwa mon demann Gouvernman pou donn sa tretman dan en fason e fasilite, ki respekte dignité imen sa bann zenn e retir stigma. Napa malad ki ganny tretman dan piblik koumsa.

Adiksyon i en maladi, e in ler pou nou tret sa bann zenn avek plis dignité e respe pou zot realize ki sosyete pa’n rezet zot, e pou zot osi annan plis respe pou zot prop lekor.   United Seychelles i akey lanons Prezidan ki nou’n ganny finansman avek Gouvernman Emirat Arab Ini, pou konstrir sa sant Cap Ternay e osi avek Lotorite Franse e Linyon Eropeen pou devlop progranm.

Nou dan United Seychelles nou mesaz i kler an sa ki konsern labi e trafik drog.  Nou demann Prezidan pou pa les okenn nou zenn ater. Ziska sa dernyen adikt, nou devret fer tou pou donn li en dezyenm sans refer son lavi. Li osi i nou zanfan.  Par kont, nou dan United Seychelles nou le vwar plis aksyon kont trafiker.

Okenn trafiker pa devret krwar ki zot ‘safe’ pou kontinyen anpwazonn sa pep.  Mon espere ki sa nouvo Lazans Nasyonal pour Lentelizans i a donn priyorite lalit kont drog, lalit kont trafik drog Mr Speaker.  Lo size, les mon koz osi lo size lapovrete.

Lo size lapovrete Mr Speaker, mon krwar ki in ler pou nou annan en lapros serye lo sa size.  United Seychelles pa pou pran okenn lektir avek bann ki pe fer nou krwar ki Seselwa nou  pe mor lafen, ki napa manze, napa delo, napa travay, napa lakaz, napa ledikasyon ou napa lasante.  Mr Speaker se sa lapovrete. Se sa kondisyon ki ti egziste Sesel 50an pase e ki United Seychelles in retir sa pep ladan.  Annou pa konfiz kou lavi avek lapovrete.

Annou pa konfiz sa pep avek bann statistik ki pa konplet.   Sa ki le koz lo lapovrete, mon dir zot al koz avek zot paran e gran paran e i ava rakont zot vre lapovrete dan Sesel.

Par kont Mr Speaker, United Seychelles pou reste touzour lo kote bann ki mwen fortinen.  Kot i annan vre bezwen, kot dimoun i bezwen lasistans, nou siport sa bann mezir parey ki Prezidan in anonse pou empower dimoun e retir labi dan sistenm.  Mesaz United Seychelles i kler.   Sesel 2019 pa Sesel 1976.  Seselwa ozordi i annan loportinite, Seselwa i annan swa.

Annou aret fer politik ‘’40poursan.’’  Ler etranze i visit Sesel:

 

  • Zot vwar kalite lakaz ki nou apel Social Housing,
  • zot vwar sa kantite loto nef lo semen,
  • zot konstat bann statistic parey kantite dimoun ki vwayaze par an,
  • zot vwar lakantite dimoun ki propriyeter zot prop lakaz,
  • zot vwar kantite lakaz ki annan akse avek delo trete e elektrisite,
  • zot vwar lakantite dimoun ki annan telefonn portab e akse avek internet
  • zot vwar akse ki dimoun i annan avek ledikasyon e lasante

Mr Speaker si mon kontinyen mon pou ale ziska demen bomaten.  Me le pwen i ki sa bann dimoun i riy nou. Zot demann nou, oli lapovrete? Zot menm dir nou, ki nou pa kalifye pou ganny led.  E tou sa i bann siny ki nou pa en pei pov.

Mr Speaker, pou bann ki fer resers lo lot kote latab, mon a les zot al rod bann statistik spesifik pou bann size ki mon’n site.  United Seychelles i konnen ki in fer pou sa pep Seselwa!

 

(APPLAUSE)

 

HON CHARLES DE COMMARMOND

E kot i annan bezwen, kot dimoun i ganny kit ater, se nou ki’n touzour la, pare pou ede e ofer nou solidarite.  Nou pou kontinyen Mr Speaker, me nou bezwen osi fer sir ki lasistans vin pli efektiv.  Lakaz Mr Speaker i en lot size ki Prezidan in anons bann nouvo mezir.

E lakaz, i en lot size ki United Seychelles pa bezwen lektir lo la.  Letan nou ti konmans konstrir lakaz lo later konble Roche Caiman, en bann ti maltret Seselwa e dir zot ki Gouvernman pe met zot dan Lakaz Lapen.  Pa bliy Nageon Estate, sa dapre zot ti Lakaz Pizon.

Mr Speaker, sa Gouvernman anba United Seychelles in kree loportinite pou dimoun vin propriyeter zot prop lakaz.  Permet mwan partaz en statistik pour bann ki le fer nou krwar ki Seselwa pe dormi anba ros.  Dernyen resansman i montre nou ki ozordi, dan Sesel 75poursan lakaz dan Sesel, 3 dan 4 lakaz, i annan zis 4 dimoun ou mwens ki viv ladan – ki viv dan sa bann lakaz.  Sa i vedir ki nou problenm lakaz i plito baze lo lekspektasyon e swa ki dimoun i annan e non pa neseserman avek bann lakaz ankonbre, kot dimoun pe dormi enn lo lot lo kanmarad.

Sa se statistik ki pe koze.  E kot i ankor annan lakaz ankonbre Mr Speaker, se bann leksepsyon e se sa ki nou Polisi lakaz pe adrese.  Mr Speaker, United Seychelles i rekonnet lekspektasyon Seselwa pou annan zot prop bout later e lakaz.

Me annou pa konfiz problenm personnel dimoun ouswa problem sosyal parey ler fanmir i kase pou vin fer politik avek size later e lakaz.   United Seychelles i siport Prezidan Faure 200poursan akoz si aziste Sistenm Pwen avek bann nouvo mezir ki Prezidan in anonse, si nou konplet sa 3000mil lakaz avek lasistans Gouvernman L’Inde, mon konvenki, ki nou bann frer e ser Seselwa ki bezwen lakaz pou ganny asiste.

Pou konklir Mr Speaker, Mon le servi en fraz dan diskour Prezidan. Prezidan in fer nou rapel ki Leta nou Nasyon se nou.  Mr Speaker, Ozordi nou annan loportinite partisipe, kontribye e kritike.   Me annou fer li dan en fason konstriktiv.   Mon lans lapel avek tou Seselwa, nenport ki krwayans politik pou nou osi met Sesel premye.   Annou apiy nou pei.

United Seychelles i annan loner pou diriz sa pei pandan tou sa letan.  Nou’n annan nou loner pou fer li Mr Speaker e malgre bann mankman, nou’n reisi kree en nasyon Seselwa ki ozordi i kapab debout avek lafyerte akote lezot Nasyon o monnUnited Seychelles in kree, in kree loportinite pou tou Seselwa grandi e determin kalite lavi ki i anvi.

Se sa pli gran rev e pli gran dezir ansyen Prezidan Rene ki’n fek kit nou.  Fodre ki zenn Seselwa i sezi loportinite, ki zot aprann, ki zot annan respe, ki zot annan konfyans e lespwar dan zot lekor e zot pei.  Ozordi, ler nou regard leta nou Nasyon, nou dan United Seychelles nou dir Prezidan Rene mersi, mersi e mersi bokou.

 

(APPLAUSE)

 

HON CHARLES DE COMMARMOND

Prezidan Rene pa ti en zonm parfe. I pa’n reisir fer tou dimoun kontan, me mon konnen ki in fer bokou, bokou e bokou menm pou pep Seselwa.

Son pli gran lakonplisman, e pli gran lakonplisman United Seychelles, i en Sesel kot sak fanm, sak zonm, sak zanfan i annan loportinite, e i annan swa.   United Seychelles in lager pou met sa fondasyon an plas. Pou retir inegalite ek lenzistis dan sa sosyete.  Rezilta, i dan sa Sesel ki nou vwar otour nou Ozordi Mr Speaker.   Konpar sa Sesel 40an pase, e apre vin dir mwan, ki sa pei pa’n devlope, ki Seselwa pann progrese.  Nou dan United Seychelles nou pare pou fransir sa lot letap nou devlopman. Parey nou vizyon dan nou Konstitisyon i dir “A United Seychelles where every child, woman and man is empowered to cross the next frontier of development.’’

Nou dir avek sa pep zwenn nou, follow US, kontinyen travay dir kontinyen siport kanmarad e reste solider pour ki ansanm nou anmenn nou Sesel pli devan.

Nou dan United Seychelles konman en parti progresif, patriyotik e demokratik nou siport Prezidan Faure pou en Sesel ini pour ki tou Seselwa i kapab travay ansanm pou nou Sesel ki par lao tou.  An siportan son mesaz lo Leta nou Nasyon, nou dan United Seychelles, nou renouvle nou sipor pou vizyon ki in etale pou lavenir Sesel, e nou pou fer sir ki i reisir.  Mon lans en lapel avek tou Seselwa avek lepep Seselwa an antye pou siport Prezidan Faure dan sa travay nob ki i pe fer.  Mr Speaker, mon remersye ou.

 

(APPLAUSE)

 

MR SPEAKER

Mersi Onorab De Commarmond.  Bon nou pou pran break e retournen 11er sharp.  Nou ava adjourn ziska 11er.

 

(BREAK)

 

MR SPEAKER

Bon nou pou repran nou travay.  Me zis avan mon pas laparol avek prosenn Manm.  Mon demann  bann Manm Lasanble pou permet mwan zis fer en pti kominike akoz mon’n anvoy kot lapres semenn pase, mon’n osi anvoy kot Lapolis me i paret ki zis Nasyon ki’n pick up.

I annan apepre 2mwan mon portre pe ganny servi lo medya sosyal, lo Facebook e mon pe ganny asosye avek bann L Lenstitisyon finansye dan Sesel ki donn loan dimoun.

Nicholas Prea pa donn loan personn!

Nicholas koman Speaker, mon pe okip sa lofis kot Lasanble Nasyonal, mon annan en sel responsabilite, mon napa okenn biznes deor, mon napa okenn responsabilite deor.  Mon sel responsabilite se Speaker Lasanble Nasyonal e sey fer marse sa lenstitisyon!

Alor mon ti annan mon en account ki dormant lo Facebook, mon’n deside po mon deactivate sa account, Nicholas Prea i pa lo Facebook anymore !  E mon napa  lentansyon retourn lo Facebook pou lezot dimoun servi mon portre e pou fer bann lezot keksoz parey avek.

Alor mon lapel pou tou Seselwa e mon konnen i annan ki ti pe tonm ladan.  Sa i en scam!  Mon’n deza raport avek Lapolis plizyer fwa e semenn pase mon’n fer li ankor.  Pa tonm dan sa bann latrap!

Mon konnen i annan in pas dan sa sityasyon avan.  Mon konnen i annan serten Manm Lasanble in pas dan sa sityasyon.  Alor tou Seselwa zot konnen kote loan i donnen zot konnen lekel ki donn loan.

Okenn Manm Lasanble e Speaker Lasanble pa donn loan personn.  Mon ti anvi zis met sa o kler akoz petet i sey mwayen ki mon kapab kominik avek bann Manm piblik.   Nou ava kontinyen nou travay e nou’n ganny plizoumwen go ahead avek SBC ki nou pou rann zot lantenn midi e nou pou repran nou travay 1 er.  So  mon ava pas laparol avek Onorab Terence Mondon.

 

HON TERENCE MONDON

Mersi Mr Speaker.  Bonn apre midi tou bann koleg Manm Lasanble Nasyonal e tou dimoun ki a lekout.

Ser, frer Seselwa  Mardi le 26 Fevriye, i fer 3enm diskour ki Prezidan Larepiblik i delivre  lo Leta Lanasyon Seselwa, e parey labitid, dan sak diskour Prezidan  i  fer  nouvo  promes.  Sa lannen in promet plis lakaz, Lopital spesyalize, plis sekirite lo zil parmi lezot ankor.

Prezidan in servi sa lokasyon pou esey fer nou krwar ki tou keksoz pe mars byen.  Dapre li nou lo bon semen e nou pe fer progre. Malerezman, kot mon pase dan mon distrik mon vwar en lot realite.

Mr Speaker ler mon analiz konteni diskour Prezidan Faure an relasyon avek larealite lavi nou pep, e defi ki nou pe fas avek koman en Nasyon Seselwa, mon vreman trakase.

Mon trakase akoz mon vwar ki nou pei sesel pa pe al pli lwen ki sa e i kler ki nou pou kontinyen vir an-ron avek menm problenm e menm senaryo!   Sa ki Prezidan Faure in prezant avek pep Seselwa, pa enspir konfidans pou lavenir.

Mr Speaker nou pa kapab regard problenm reel dan en fason siperfisyel.  Sak lannen ki pase nou problenm i agrave, akoz sa Gouvernman i rod solisyon ki siperfisyel.  Fabrik sosyal nou sosyete pe kontinyen deteryore  zour an zour  e nou valer koman en pep souvren pe ganny konpromi. Nou kiltir ki defini sa ki nou ete koman en Kreol Seselwa pe ganny diformen.

Sa ki pe arive dan nou pei i reel.

Statistik lo nesans i montre en logmantasyon dan lakantite pti baba ki mor menm avan ki zot ganny 1an. E sa i fer nou mazin konsekans bann sibstans danzere lo bann zanfan ki pe ne ozordi.

Rezilta lo performans akademik dan bann lekol piblik, in tonm sitan ba e saki pe ganny fer lo nivo lakres e primer pa sifi pou ranvers sa sityasyon.

Mon apresye ki nou kapab kont lo travayer etranze dan bann sekter prodiktiv nou lekonomi, me lakantite etranze ki pe rantre dan lezot sekter non-prodiktiv, i vreman alarman e sa Gouvernman in perdi kontrol.  Mon santi ki si nou pa fer atansyon, i pou ariv en moman kot zot pou bezwen aret sant sa sanson “Sa nou Sesel Sa” akoz i pou nepli nou Sesel.

Mr Speaker, lo sa not mon anvi met a latansyon sa Lasanble ki lo Facebook deza nou vwar en post sorti kot Lasosyasyon Retailers ki pe demann tou marsan pou ferm laboutik Zedi depi 6er bomaten ziska 6er diswar.   E pour mwan mon kondann sa kalite aksyon.

 

(APPLAUSE)

 

HON TERENCE MONDON

I pa akseptab dan nou pei nou annan en dimoun lorizin Endyen ki nou’n aksepte li dan nou pei ki ozordi pou dictate ki ler laboutik pou ouver pou nou kominote kapab ganny servi.

Mr Speaker mon analiz lo diskour Prezidan i pa baze zis lo sa ki in dir, me mon’n osi pran kont lo sa ki i pa’n dir nou.  Ler mon regard bann  konsern Nasyonal, mon vwar ki Prezidan in evite regard problenm dan son vre lanpler.

Size Koripsyon: I kler ki Prezidan pa anvi e napa okenn plan pou elimin koripsyon ki pe ronny nou sosyete zour an zour.  E parey nou konnen, koripsyon i annan en lefe direk lo kou lavi. O mwen, Prezidan ti devret abord sa size koripsyon e dir nou ki li i pou fer pou fast track sa bann ka ki deza kot Konmisyon Anti-Koripsyon.

Sistenm Kontrol: Seselwa i konsernen avek nivo kontrol ki egziste.  Napa bon kontrol dan nou pei e bann sistenm ki an plas pe ganny abize. Mon ganny lenpresyon ki Prezidan pa vwar gran problenm avek sa logmantasyon travayer etranze dan bann sekter non-prodiktiv tel ki dan bann laboutik retail.

Pri Lavi : I annan plizyer fakter ki afekte pri lavi e Prezidan in swazir pou koz selman lo sibvansyon ek rediksyon dan VAT.  In koz lo 2 keksoz ki met presyon lo Bidze Nasyonal.

Sa ki fer mwan dezapwente parkont se ki Prezidan pa’n enterese adres sa 2 lezot fakter ki annan en lefe direk lo kou lavi e sa se sistenm kartel ki pe étranglé nou pep e koripsyon.

Nou konnen ki i annan detrwa gran marsan ki pe fikse pri marsandiz pou retir maximum benefis lo konsonmater. I annan menm ki met presyon lo bann pti marsan pou pa pran marsandiz zot konpetiter. E ozordi lo Facebook nou pe vwar egzakteman sa ki mon pe dir.

Ser, frer Seselwa, nou konnen kote sa lanpayaz i ete e i kler akoz ki sa size kartel pa zanmen ganny adrese.

Mr Speaker, i annan en lyen direk ant pri lavi avek koripsyon. Dan bokou ka, Seselwa pe pey bokou plis pou en servis, ouswa en prodwi akoz koripsyon. Kwa ki sa Gouvernman in fer pou adres sa size? Pou anmenn en senp amannman dan Lalwa  ki gouvern travay Komisyon Anti-Koripsyon in pran pros 2an.  Dan menm konteks, I annan plis ki 2an ki nou lekip LDS pe demande ki nou trouv latras sa fame 50milyon Dolar ki ti disparet dan labank santral, me prezidan avek  son lekip pe fer tou pou retard sa prose.

Nou pa bezwen esper lamannman dan Lalwa Anti-Koripsyon pou fer sa. Nou annan FIU pourtan e lofis Prosekiter Zeneral i osi annan ase pouvwar pou entervenir. Diskour Leta Lanasyon i devret adres bann konsern mazer nou popilasyon e sa 50milyon dolar ki’n disparet i konsern lamazorite Seselwa akoz i ti en don pou pep Seselwa akoz sa larzan ti sipoze pas atraver kont Trezor.  I pa ti sipoze annan okenn lyen avek serten kont prive Singapore.

Apre tou sa letan, Seselwa i merit konn laverite.  Pran zot letan me pa pran Seselwa pou lenbesil.  Linyorans pa vedir enbesilite.

Mr Speaker i pa akseptab pou en Gouvernman kontinyen zwe ronn avek problenm. In nepli tan pou annan en Gouvernman ki zis tir la,  met la. Nou bezwen en Gouvernman ki rezourd problenm dan en fason direk e serye.

Nou annan en kantite profesyonnel dan nou pei, bann dimoun avek kapasite neseser pou fer sa diferans pou Sesel. Me pou sa transformasyon arrive, nou bezwen en  bon leadership ki krwar e apresye potansyel nou lafors travayer Seselwa. Sistenm aktyel pa pe valoriz potansyel sa kous nou popilasyon ki posed savwar fer, konesans e abilite.

In plis ki ler pou nou bann profesyonnel ganny en saler ki ekivalan ek en etranze pou menm kalifikasyon e leksperyans.  Nou bezwen annan en kiltir serye dan tou saki nou fer.  En Gouvernman LDS pou kapab re kiltiv sa vre lafors travay ki nou zanset ti posede. LDS pou lead by example, pou ki sa kiltir travay serye pou fer en diferans, i osi rezonn dan tou kous nou popilasyon.

Mr Speaker, dapre Labank Mondyal, prodwi domestik brit  par tête d’habitant i met Sesel parmi bann 80 ekek pei pli ris o monn.  Me ler mon regard sityasyon nou bann dimoun dan kominote, mon poz mon lekor kestyon.  Oli distribisyon larises dan nou pei? Me sa ki osi alarman se lafason ki resours piblik pe ganny zere anba sa Gouvernman.

Mr Speaker Seselwa an zeneral i dezapwente avek lafason ki sa Gouvernman pe zer larzan piblik.  Nou ekspekte ki resours piblik i ganny zere avek tou lentegrite, pridans e disiplin. Sa responsabilite i primordyal e se sa ki fer ki latransparans, rann kont e disiplin i form labaz bann prensip iniversel, pou asir bon gouvernans en pei.  Sa bann prensip ti apenn aplike dan nou pei ziska ki pep Seselwa ti swazir LDS pou diriz nou Lasanble Nasyonal.

Lekip LDS  dan Lasanble Nasyonal i pran sa manda o-serye akoz nou  konnen ki byennet en Nasyon i depan lo lafason ki son resours i ganny zere.  Koman en pti pei avek en popilasyon selman 90,000mil zabitan, nou pa devret dan sa degenn kot nou ete ozordi. Nou pa devret pe tap laport partou kote pou konstrir lakaz pou nou pep, akoz Seselwa (an gran mazorite) i deza pe kontribye pour son lakaz, malgre ki pri lavi i egzorbitan.

Nou pei i fer ase larzan pou donn nou pep en lavi bokou pli desan ki nou pe viv ozordi.

Me ler nou regard potansyel  nou resours, mon kapab dir ki lamazorite Seselwa pa pe ganny en deal ki akseptab. Pour tro bokou letan, sa pti group dimoun ki’n diriz nou pei zot in plito regard zot lentere personnel avan tou. Nou lekip LDS in fer tou pour ekspoz zot bann tranzaksyon malonnet e nou’n fer li pou ki Seselwa i konnen ki mannyer larzan piblik in ganny servi pou kree larises pou en pti group dimoun.

Nou osi konnen ki mannyer SMB in ganny servi pou fer serten endividi vin milti-milyonner lo ledo pep Seselwa.  I kler ki zot in abiz lo konfyans ki sa pep tin met dan zot. Malgre tousala, mon santi mwan soulaze ozordi ler mon vwar bann dimoun, ki ti lo menm bato avek mwan, pe realize ki zot in plito ganny servi e sete sa pti group ki’n toultan o-sant devlopman.

 

(APPLAUSE)

 

HON TERENCE MONDON

An plis ki sa Mr Speaker,  nou’n dekouver atraver travay nou konmite Lasanble FPAC, ki sa lenstitisyon ki sipoze gardyen lentelizans finansyel nou pei, zot osi zot donn zot bal avek konplisite detrwa dimoun byen plase dan gouvernans pei. Plizyer santenn milyon Roupi larzan piblik ti ganny plase dan en kont labank sekre, kot bann tranzaksyon ti ganny fer san okenn sistenm kontrol e person pa ti bezwen rann kont.

Sa menm lenstitisyon ti pe fer bann tranzaksyon finansyel ki ti an defo avek Lalwa Taks e reveni ki ti sipoze rantre dan kof Leta pa ti ganny kolekte.  I evidan akoz ki nou pei i dan en tel sityasyon e ou kapab konpran akoz ou bezwen esper tou sa letan pou ou ganny asiste avek en lakaz.

Mr Speaker Rapor Oditer Zeneral i ranpli, lannen apre lannen, avek bann ka kot Lalwa Prokirman pa’n ganny respekte. Nou’n vwar par egzanp, ki Kontra  pou Sant Dyaliz Lopital Sesel ti ganny donnen par lofis ansyen Prezidan san menm pas atraver prosesis tender. Oli legzanp?

Ozordi ler Prezidan Faure i koz lo valer pou larzan, mon oule dir li avek tou respe, in tro tar.  Se Gouvernman LDS ki pou fer Seselwa ganny valer pour son larzan e nou pa pou konfye zot ankor avek Kof Leta.  Apre tou sa letan nou pei i kontinyen ganny gouvernen dan en fason désorganisé e Seselwa i kontinyen sibir le konsekans.

Partou kote nou vwar move planifikasyon. En proze parey stad lanmizik ki ti pou kout   mwens ki R10milyon pe ariv dan son R40milyon  ozordi.

Proze elarzisman semen depi  borlanmer Bougainville pou al Val D’en Dor i en lot legzanp kot Seselwa i bezwen sibir konsekans en mankman dan sipervizyon dan bann proze. Se sa menm Seselwa ki pa ankor ganny en lakaz konvenab pou son fanmir ki bezwen pey pou zot move planifikasyon e linefikasite.

Move planifikasyon i osi anmenn retar dan lavi nou zabitan parey sa Proze  lakaz ex Desaubin Takamaka kot ziska prezan pa ankor ganny fer alokasyon akoz pandan 5 an ki sa proze ti pe ganny konstrir zot pa’n prevwar en sistenm sewage apropriye pou deservi sa devlopman.

Ler en Gouvernman i pran 5 an olye 3an pou konplet en proze lakaz 48 unit, ki’n ganny finanse atraver donasyon, nou pa pe fer progre e nou pa pe fer progre  me plito retard sa karantenn fanmir ki pe esper zot lakaz.

Ozordi, partou kote ou  antann zis retar, plis retar e ankor retar.

Mr Speaker, Prezidan Faure pe anmenn en politik ki vreman trakase. En politik depandans lo led pei zanmi pou tou keksoz.   En politik ki kapab met nou pei dan en sityasyon konpromi.

Koman en pei souveren avek en GDP /Capita ase e-leve, nou pa devret pe depan lo donasyon sa degre  e mon vwar sa plito anbarasan. I anbarasan pou mwan ler mon vwar ki nou Gouvernman pe kontinyen depan lo menm pei pou   Transpor piblik, Lanbilans, Lakaz.  Mon pa konnen kwa ankor ki zot pe demande.

Seselwa i Nasyon fyer e mon krwar ki nou pa devret annan en Gouvernman ki pou konpromi nou lafyerte e sirtou nou souverennte.  Sa ki pli trakasan se ki nou pa konnen ki zot pe promet Gouvernman endyen sirtou ler nou konnen ki sa pei ti anvi met en Baz Militer lo zil Asompsyon.

Mr Speaker i dan nou kiltir pou  fer kado en zanmi oubyen donn en led en dimoun ki dan bezwen, me sa ki pli enportan se ki ler nou fer sa, nou fer li avek en leker prop e san okenn azanda.

Me ler mon vwar sa bann bis SPTC avek gro lekritir ‘’INDIA’’ i montre ki sa Gouvernman US in perdi direksyon e pa pe respekte Seselwa.

In plis ki ler pou nou pei Sesel ganny dirize par en Gouvernman ki pou travay drwat avek lentegrite,  senserite e tou respe pou son pep.

Wi, nou bezwen en Gouvernman ki pou protez pep seselwa. Nou bezwen en Gouvernman ki kapab garanti son pep son bann bezwen de baz tel ki lakaz, lanbilans, transport piblik san ki bezwen depan lo donasyon.

Mr Speaker Prezidan i koz lo travayer etranze in dir ki dan Sekter Tourizm prosedir pou anploy etranze i mars byen e prosedir i ganny swiv. Me  petet Prezidan in oubliye ki ti arive avek sa bann travayer Banyan Tree ler sa lotel ti ganny vann lannen pase kot Seselwa ti ganny met deor san okenn zistifikasyon ou rezon valab.  En group travayer etranze ti deza pe komans travay san okenn GOP. Fodre pa ki zot kontinyen fer krwar ki tou keksoz i ok kan i pa ok.

Mr Speaker  Prezidan in dir nou ki zot pe travay avek Labank Mondyal pou konstrir en nouvo lekol teknik lo Ile Soleil, me kestyon ki mon demande se akoz ki Gouvernman i bezwen en nouvo lekol teknik kan nou tou nou konnen ki zot in negliz SIT pandan plizyer lannen.

Nou bann zenn etidyan ki’n pas atraver sa Lenstitisyon in sibir en mankman ansenyan lannen apre lannen.  Sa ki kler se ki Gouvernman pa ti pare pou fer lenvestisman neseser pou retenir bann ansenyan Seselwa kot sa lenstitisyon.

Mr Speaker, i pa difisil pou ranvers sa tandans dan performans nou bann lekol ki swa akademik ou vokasyonnel.  Me pour sa arive nou bezwen en Gouvernman ki serye avek sa size ledikasyon.  Mon krwar ki enn bann pli gran swe en paran, se pou vwar son zanfan ganny en bon ledikasyon ki ava permet li reisir dan lavi.

Ser, frer Seselwa zot in temwanny sanzman pozitiv ki’n arive dan travay Lasanble Nasyonal depi ki LDS pe diriz nou lenstitisyon. Nou travay pou redres nou pei pou kontinyen e pou ki demen ler nou pas labar avek nou zanfan, zot pou annan zot en pei ki drwat e solid. Annou toultan mazinen ki nou drwa nou fitir zenerasyon  en pei ki pli bon ki sa Sesel ki nou annan ozordi.

Mr Speaker, mon parkour politik in permet mwan dekouver e menm pli byen apresye nou dirizan dan LDS.  Mon’n travay avek plizyer dirizan e mon kapab konpar bann pwen for e pwen feb sakenn de zot.  Me keksoz ki pli enportan pour mwan dan en dirizan, se son senserite anver byennet son pep, son lonnekte e entegrite dan lafason ki fer son travay.  Sakenn de nou i annan son moman dan lavi, e dan konteks politik, mon krwar ki moman in arive pou nou pei sesel ganny en dirizan LDS !

 

(APPLAUSE)

 

HON TERENCE MONDON

Nou gran fanmir LDS i osi regroup bann dimoun ki’n lalit pou ki vre laliberte e mon repete vre laliberte la demokrasi i renye dan nou pei.  E mon salye zot pour zot kouraz ek determinasyon.

Mr Speaker, nou pei i vreman bezwen en zonm ki kapab debout for pou defann zentere Seselwa. Nou annan sa zonm ‘’IS’’I dan nou lekip LDS e anba son direksyon, mon asire ki Sesel pou transformen pou le meyer.

Wi Mr Speaker, Sesel i pli gran ki nou tou alor, annou donn Sesel en sans avek LDS ! Mersi bokou.

 

(APPLAUSE)

 

 

MR SPEAKER

Mersi Onorab Mondon.  Mon ava pas laparol avek Onorab Simon Gill.

 

HON SIMON GILL

Bonzour Mr Speaker.  Bonzour tou koleg Onorab.  Bonzour tou manm piblik ki pe ekout nou deliberasyon lo diskour lo repons diskour lo Leta Lanasyon.

Mr Speaker Leta en Nasyon i en fenomenn ki dinamik, i sanze sak zour, sak moman depandan ki kontribisyon ki kote ou été ki travay ou pe fer dan ou pei.  Si ou annan en gran poursantaz ou pep ki pe travay.

Mr Speaker, ki pe travay for pou anmenn son pei pli devan toulezour napa mankman travay, sa i demontre Leta en Nasyon toulezour.

Mr Speaker nou konman bann Manm Lasanble Nasyonal bann Leaders politik ki la dan Lasanble Nasyonal bann Leaders politik ki an deor Lasanble Nasyonal sak kontribisyon ki nou fer sak parol ki nou koze sak diskour, ki nou fer, sak ekrir ki nou ekrir dan nou zournal, sak komanter ki nou fer lo bann rezo sosyal i ede e kontribye pou determin a diferan moman Leta en Nasyon.

Mr Speaker senpleman Leta en Nasyon pa ganny determinen pa zis Prezidan dan nenport ki pei dan nenport ki sosyete. Sakenn de nou pe kontribye pou defini Leta nou Nasyon a diferan moman.  Mr Speaker Prezidan Danny Faure in delivre son diskour le 26 Fevriye dan sa Lasanble e le 27 Fevriye ler lanons ti ganny fer ki enn bann gran arsitek sosyete modern Sesel in kit nou le 27 minwiven (12.20) Leta Lanasyon Seselwa deza ti antre dan en lot dimansyon deza ti pe fokaliz lo en lot size.  E ziska ozordi Mr Speaker Leta Lanasyon Seselwa pe sey reviv listwar kontribisyon sa zonm larsitek Sesel sosyete modern Sesel.

Mr Speaker Msye France Albert Rene ki in kit nou toultan mon dir e li menm li in deza dir i pa en sen, i pa en zonm parfe.  Nou respekte li pou sa ki in été e nou respekte li e aplodi li pou bann kontribisyon pozitiv ki in fer depi ler in antre lo lasenn politik Sesel, ziska ler in rann Leta Sesel avek Msye James Alix Michel an 2004. E in kontinyen diriz nou parti.  E Mr Speaker i toutafe normal ki nou lo sa kote latab, nou bann manm nou bann siporter, mwan mon dir nou pa dan dey.

Nou pe selebre lakonplisman en zonm ki’n fer son kontribisyon, pou anmenn Sesel kot i été ozordi. Byensir Mr Speaker ler ou pa pe fer fas avek kontribisyon en sen ou pe fer fas avek en zonm enparfe, me ki in fer en kontribisyon; ki’n annan en lefe ki i annan en lenpak bokou endividi dan sosyete Seselwa, i enportan ki nou rekonnet son kontribisyon ki in fer.

Me ler mon dir sa Mr Speaker, i enportan ki mon souliny en keksoz ki sakenn de nou, sak sitwayen Seselwa lo nou annan en posibilite nou ki ankor vivan nou ankor annan lafors lenerzi annan lentelizans ; nou ankor annan en loportinite pou sosyete Seselwa rekonnet e aplodi tou kontribisyon ki nou’n fer ler Gran Met pou deside poudir ou ler in arive.

Pozitiv ou negativ sak zonm sak fanm Mr Speaker i a determinen ki mannyer pou selebre ou kontribisyon ki mannyer pou rekonnet ou kontribisyon – pozitiv ou negativ.

Dan sak fanmir Seselwa Mr Speaker sak zanfan Seselwa Mr Speaker nou bezwen donn zot sa laliberte e sa posibilite reel pou selebre e pou demontre ki mannyer zot in ganny touse par kontribisyon sa zonm apele France Albert Rene.

Nou pou rann li son servis le 7 Mr Speaker e nou pou met li anler Mont Fleuri dan simityer Mont Fleuri.  In anonse in demande pou li antere avek son manman e sa i en liberte ki nou pe donn sa msye.  I ti en zonm ki senp me i ti en zonm parol. In annan bann mankman dan son parkour Mr Speaker.  Nou rekonnet lo nou kote e mon’n deza fer en deklarasyon dan sa Lasanble e ozordi Mr Speaker permet mon pou fer enlot deklarasyon ki si sa msye dan son parkour in tous okenn dimoun, dan en fason ki zot santi i pa pozitiv, Mr Speaker mwan konman enn sa bann dimoun, dan leadership nou parti United Seychelle,s mon met mwan devan pou mwan dir pardonn sa msye.

Les li ale trankil e nou isi deryer – nou isi deryer nou anpàn en loportinite nou ankor vivan, annou apresye tou sa bann moman kot nou santi i annan bann mankman, e annou asire ki nou fer keksoz ki nou koriz sa bann mankman e ki nou pa repet sa bann mankman ki’n annan en lefe pa neseserman dezirab dan sosyete Seselwa, e lo sak fanmir ki i santi ganny touse dan en fason ki i pa apropriye.

Mr Speaker i annan en keksoz ki Msye Rene ti dir mon personnelman avan son depar mon ti ganny sans zwenn li e koz ek li lo son lili Lopital e sa ti le 20 Fevriye.  Mon ti koz avek li.  Mon ti demann li ki mannyer i santi li a se moman?

E Msye Rene ti dir mwan ‘‘mon ok, mon byen.’’ Me i ti eksprim ek mon en regre Mr Speaker e ler mon pe fer mon konklizyon taler, mon pou partaz avek sa Lasanble sa regre ki Msye Rene ti partaz avek mwan le 20 Fevriye anviron 7.30 apre midi  dan Lopital.

Mr Speaker dan United Seychelles nou parti nou mouvman ki’n lanse ofisyelman le 17 Desanm 2018, nou’n met a laporte tou Seselwa en Konstitisyon modern – en Konstitisyon ki annan bann provizyon ki napa presedan dan okenn Konstitisyon okenn parti politik ki egziste ozordi lo later Sesel.

Mr Speaker mon lir e etidye Konstitisyon tou sa bann parti politik ki egziste ozordi, e sa ki mon konnen avek sertitid, se ki i annan bann provizyon ki tre inovativ dan United Seychelles.  E nou pou fer tou nou bann koleg LDS ganny en kopi sa nouvo Konstitisyon.

 

(laughter)

 

 

HON SIMON GILL

E mon swete ki zot ava pran letan pou etidye li e pou fer e bann kritik ki zot annan pou fer dan konteni sa nouvo Konstitisyon.  Mr Speaker dan Konstitisyon modern United Seychelles, nou’n defini sa ki nou été, sa ki nou ti été e nou’n defini nou vizyon e sa vizyon ki nou’n defini Mr Speaker se pa lot ki vwar dan nou lepok e nou pou tant tou pouvwar dan nou lepok la ki nou annan sa loportinite pou vwar arive en United Seychelles Mr Speaker.

 

        (APPLAUSE)

 

HON SIMON GILL

Sa i nou vizyon.  En United Seychelles.  Mr Speaker i posib  – i posib annan en United Seychelles dan nou lepok, dan zenerasyon sa bann zenn politisyen ki la ozordi dan sa Lasanble Nasyonal e politisyen ki deor.  I en kestyon ki nou tou nou bezwen tonm dakor ki sa pti pei ki apel Sesel pa kapab kontinyen reste divize ; pa kapab kontinyen dan tou keksoz pou nou anmenn bann doz partizan politik.

E ler mon’n ekout diskour Leader Lopozisyon bomaten, i annan bann deklarasyon ki in fer ki i anliny avek bann pozisyon ki nou lo sa kote latab nou partaze, e ki nou pe deza fer li.  I enportan ki ler nou koze, ki ler nou fer nou bann lentervansyon Mr Speaker, ki nou asire ki nou mezir sa ki nou dir, tou an rekonesan nesesite pou nou kapab zwenn nou tou ansanm, lo tou lede kote latab pou nou bouz devan e anmenn sa transformasyon dan nou pep ; anmenn sa transformasyon ki neseser dan nou pep Mr Speaker – en transformasyon ki nou get keksoz dan en perspektiv pou nou inifye nou pep pa pou nou polariz nou pep.  Ekstrememan enportan.

Me Mr Speaker ler ou get nou politik ler mon get politik LDS ler mon get politik United Seychelles, ler mon get bann lezot parti politik dan sa pei ou konnen nou diferans esansyel ki nou annan, se pa lo bann prensip finalman.  Par egzanp LDS avek nou, lezot parti politik, nou pa difere ozordi ki sak Seselwa i bezwen annan en twa konvenab lo son latet, me ki nou pe difere nou pe difere parfwa lo bann mekanizm, lo lafason ki nou met an aplikasyon keksoz.

Me sa ki enportan Mr Speaker se ki konman en Gouvernman konman en parti politik lo sa kote latab, nou pe reste firm ; ferm lo en prensip fondamantal ki’n kit nou depi 1964 renonse par Msye France Albert Rene lo kestyon lakaz dan sa pei ; en lakaz konvenab pou tou Seselwa ki dezire annan en lakaz.

E Mr Speaker sa ki byen, sa ki pozitiv se ki sa zonm ki anler la State House ozordi, pe reste firm lo lenplimantasyon sa Prensip.  Malgre i annan bann kritik ki dir i pe promet or nou pe promet me sa ki enportan Mr Speaker, se ki lakaz dan sa pei, pe ganny fer toulezour Mr Speaker.  Toulezour!

Napa en sel moman – napa en sel lannen Mr Speaker, ki nou’n met en poz lo konstriksyon lakaz dan sa pei.  Me ki nou annan?  Nou annan en popilasyon ki pe kontinyen grandi.  Nou annan bann fanmir ki pe kontinyen kase.  Nou annan bann endividi ki oule sakenn ganny son lendepandans e sorti anba twa son manman, anba twa son papa.

E demann i kontinyen Mr Speaker.  Demann pou kontinyen me en Gouvernman i bezwen reste a lekout sa bann demann.  E wi kot nou napa posibilite pou nou zener nou prop resours nou pou bezwen al tap laport lezot pei pou donn nou en koudmen dan sa zefor nasyonal pou nou donn posibilite nou bann sitwayen nou bann fanmir ganny zot twa.

E se sa ki pe dir en Gouvernman responsab i fer ou commit e nou pe rod fason pou nou delivre nou annan retar wi nou annan retar me nou reste committed pou nou delivre!  Se sa lespwar!

E ler Msye Faure in anons konstriksyon ankor 3mil lakaz ki’n ganny finansman – wi sa i lespwar pa ki in vini pou fer en lot promes, me i lespwar. I lespwar ki bann dimoun ki pe atann, ki zot kapab finalman ganny en kouvertir konvenab rezonnab lo zot latet.

Mr Speaker lot keksoz ki ekstrememan enportan ki mon kouver ozordi se lo sa kestyon Lalkol.  Lo kestyon Lalkol Prezidan Faure in anons serten mezir, me mon senserman krwar ki nou kapab al bokou pli lwen ki sa.

I en kestyon letan annou bouze lo serten bann mezir ki in anonse.  Nou reste firm lo la e in envit nou sa Lasanble pou nou kontribye serten bann size dan son diskour ki in fer, e sa i en size ki bann lide in konmans antre ozordi lo bann lentervansyon ki’n ganny fer.

Mon krwar nou devret take it all the way pou ki nou kapab arive fer en lenpak or kre en lenpak pozitiv letan ki konsern rezon sibstansyel lo konsonmasyon lalkol dan sa pei ki apel Sesel.

Dan sa pei kot bokou bann fanmir ti ava voudre trouv en kontrol sibstansyel serye lo lavant e konsonmasyon lalkol e mon kontan sinyal ki nou’n gannyen bomaten lo diskour repons Leta Lanasyon sorti kot Leader Lopozisyon, i pozitiv. I pozitiv, akoz i pe montre nou ki i pare pou antre dan sa demars pou nou annan en mezir efektiv e en demars efikas, pou nou fer sir ki nou met sa enn sityasyon anba kontrol – pozitiv.  E mon welcome mon kontan sa pozisyon e annou bouz devan.

Lot keksoz ki enportan Mr Speaker ki mon oule koz lo la, se lo kestyon Ledikasyon –  Ledikasyon.  Mr Speaker nou annan en listwar dan Ledikasyon.  Tanzantan ler mon koz lo listwar ledikasyon pa bokou nou ki ekoute.  I annan i santi li i ganny grinyote ler mon koz lo listwar ledikasyon.

Me Mr Speaker ler mon ekout diskour bann diferan diskour prononse par Msye France Albert Rene – prononse par Prezidan James Alix Michel e prononse par Msye Prezidan Danny Faure.  Dan tou sa bann diferan diskour ti diskour bann Leaders politik isi dan sa Lasanble, sa ki mon apresye se nou tou nou oule ki ledikasyon dan sa pei, son standar, son nivo i ogmante.

Mr Speaker nou pa kapab kontinyen zis dir ki nou oule nivo standar ledikasyon ogmante.  Nou bezwen e kontinyen montre sa pep.  E dernyen fwa ler Minister Ledikasyon ti isi dan sa Lasanble, i annan en demann ki mon ti fer, ler nou ti koz lo Bidze 2019.

Nou ti dir zot bezwen pe fer plis en legzersis PR pou zot montre sa pep, pou zot konvenk sa pep ki apre tou sa lenvestisman ki nou pe fer, apre tou ki sa pli gro porsyon Bidze i al kot zot Minister, zot bezwen pe konvenk sa pep atraver bann mezir, bann desizyon bann aksyon konkret ki zot pe fer pou zot os nivo e standar ledikasyon dan lekol piblik!  This is the challenge ki Minister Ledikasyon i annan avek tou son lekip dan tou lo bann lenstitisyon skoler.  It is a big challenge!

E ozordi enn bann challenge ki nou pe anvoy kot zot Mr Speaker ler mon pe donn mon repons lo diskour Leta Lanasyon, nou pe dir zot vin devan – vin dan sa Lasanble pran en moman avek nou.  Vin montre nou.  Vin eksplik sa pep ki bann mezir konkret sa Minister pe fer pou os nivo e standar ledikasyon dan Sesel.

Me an menm tan Mr Speaker nou bezwen rezonnab – realis.  En bon pe nou bann Manm Onorab isi dan sa Lasanble Mr Speaker ki’n ganny bann Bachelors Degree ; ki’n ganny bann Masters Degree – ki’n zot nivo ki zot in attain zot in pas atraver nou sistenm skoler.

I annan byensir in lekol dan Seychelles College, me bann ki pa’n ganny an sans al dan sa bann lekol nou ki’n ganny en sans al swiv nou sistenm ledikasyon, ozordi Mr Speaker malgre avek tou mankman ki nou annan, nou fyer ki nou nobou kapab annan en group profesyonnel dan diferan domenn isi dan sa pei.

Atraver nou sistenm ledikasyon loportinite ki nou donn bann zenn Seselwa, zot in al deor dan liniversite, pou zot ganny zot Masters, pou zot ganny zot Doktora e nou dir zot keep it up.  Me ozordi nou bezwen pe vwar zot pe kontribye dan en fason efektiv, pou anmenn Sesel devan.

Annou pa shy away avek nou responsabilite Mr Speaker.   Sa ki nou konnen se ki Sesel i pa pou kapab ofer zot menm saler ki L’Angleterre, ki Lanmerik oubyen Laswed i ofer bann graduates, me sa ki nou kapab ofer zot sa ki nou resours i permet.  E ozordi, ozordi demann ki nou pe fer, demann ki mon pe fer, se ki nou bezwen kontinyelman revwar ki mannyer nou donn reminerasyon nou bann profesyonnel, nou bann graduate dan sa pei ; pou ki zot santi zot alez pou apre ki zot in pas zot letan dan liniversite, zot osi santi zot kapab kontribye dan en fason efektiv e efikas pou la bonne marche nou sosyete isi dan Sesel Mr Speaker.  Pa reste deor desann vini vin kontribye ou par vin zwenn nou pou nou kapab fer sa pei marse Mr Speaker.

 

MR SPEAKER

Onorab ou annan ou 4 minit ki reste ou.

 

HON SIMON GILL

Mr Speaker mersi bokou pou dir mon i reste 4 minit i annan ankor detrwa size ki mon oule koz lo la.  Me lot size ki ekstrememan enportan ki nou antre lo la Mr Speaker, se dir avek nou pep ki lespwar dan Sesel – lespwar dan sosyete Seselwa Mr Speaker, i ozordi en kestyon enportan.  Si lespwar dan Sesel i ekivalan LDS, mwan mon a dir zot osi ki lespwar dan lavenir sa pei, i osi bezwen ganny trouve dan en zonm ki kapab diriz sa pei.

E si LDS si Onorab Georges pe montre ledwa lo Onorab Ramkalawan, Mr Speaker mwan mon a dir zot lot kote latab lespwar dan stabilite, lespwar ki tou ou bann rev i kapab vin en realite ozordi lespwar se dan sa zonm ki pe diriz State House ozordi!

 

(APPLAUSE)

 

HON SIMON GILL

Mr Speaker Msye Danny Faure – Msye Danny in montre nou ki i annan sa bann eleman ; i annan sa bann eleman ; i annan sa bann zengredyen, i annan sa bann kalite pou li kapab anmenn sa rekonsilyasyon ant nou pep.

 

E nou isi dan Lasanble Nasyonal, nou oule ki nou bann koleg Onorab dan LDS, i konpran ki nou oule annan en rekonsilyasyon, pou nou kapab anmenn sa Sesel ‘’Inifye’’ ki enn nou vizyon ki nou étale e ki’n ganny étale dabor depi Msye France Albert Rene!

Me son regre Mr Speaker, son regre ki Msye Rene in dir mon ler mon ti vwar li le 20, se in dir mwan, ki enn nou bann defi ki li i rekonnet, se ki parfwa dan nou parkour ki nou tant pou get NOU avan! Sa i en stetment ki Msye Rene in fer avek mwan le 20 Fevriye.

E se sa mon oule partaz avek lepep Seselwa – avek nou bann koleg Onorab ozordi.  E Mr Speaker se lo sa premiz – se lo sa premiz Mr Speaker zisteman, ki mon tonm dakor 500poursan avek lapros ki Prezidan Danny Faure pe swiv dan sa pei!

I pe sey rod sa lekilib. Dan gouvernans sa pei, bann mezir ki in pran, bann lapros ki in pran vizavi bann diferan size, ler nou dir poudir koabitasyon in mor Prezidan Faure i reste konvenki e toultan viv avek sa lespwar, ki le de kote latab isi dan sa Lasanble, ki pe ankre sa lespri koabitasyon ki nou …

 

MR SPEAKER

Your time is up.

 

 

 

HON SIMON GILL

… kapab travay ansanm!

E Mr Speaker lespwar Sesel, lespwar dan lavenir Sesel Mr Speaker, se ki nou kapab travay ansanm e inifye nou pep!  Pa diviz nou pep e pa polariz nou pep.  Nou pep i demann nou sa ki meyer de nou konman bann Leaders politik!  Nou pep i demann nou pou nou kree sa lespwar.  Vin sa bann model ki …

 

MR SPEAKER

Onorab.

 

HON SIMON GILL

… pou ki zot kapab swiv.  Mr Speaker, lo sa pwen mon ava dir ou mersi malgre mon bann koleg i en pti pe azite lot kote laba ki zot in donn mon 2minit an plis Mr Speaker ; ki mon pou asize mon pou kontinyen ekout zot, lafason ki zot pou prezant zot repons lo diskour Leta Lanasyon akoz i pou en moman tournan ozordi. Eskan ler nou fini konteni zot diskour.  Mr Speaker mersi bokou pou akord mon sa letan.  Mersi bokou.

 

(APPLAUSE)

 

MR SPEAKER

Mersi.  Bon mon annan de pti lanons pou mon fer Komite COGA Komite Lasirans pe rankontre tou swit kot Committee Rm 3.  E 12.15 Komite Madanm ansanm avek Komite HIV/Aids pou rankontre dan Speakers Conference Room.  Nou pou Break e nou pou repran nou travay 1er.

 

 

(BREAK)

 

MR SPEAKER

Bonn apre midi tou Manm Onorab.  Bonn apre midi tou dimoun ki a lekout e pe swiv travay Lasanble Nasyonal.  Nou ava kontinyen avek nou travay repons lo mesaz Leta Lanasyon delivre par Prezidan Faure semenn pase.  Prosennman lo mon lalis mon annan Onorab John Hoareau.

 

HON JOHN HOAREAU

Mersi Mr Speaker.  Bonn apre midi Mr Speaker.  Bonn apre midi tou dimoun ki a lekout e bonn apre midi bann Manm Onorab.

Mr Speaker parey nou konnen diskour Leta de Lanasyon i en lokazyon anyel kot en Manm Parlman i ganny loportinite pour fer en analiz lo lafason ki Egzekitiv anba gidans Prezidan pei, Msye Danny Faure in performen pandan lannen e ki letan nou pep i vwar li ladan dan le fitir imedya.  An menm tan koman en Manm Elekte dan nou distrik respektif diskour Leta de Lanasyon i donn nou sa privilez pour adres serten konsern nou zabitan nou bann proze dan nou distrik.

Mr Speaker mon’n ekout diskour Msye Faure avek bokou latansyon, me mon pa’n tann okenn mezir drastik pour redres plizyer bann malez dan nou sosyete apard serten kontrol lo lalkol, rediksyon pri gas e konstriksyon Lekol Vokasyonnel Ile Soleil.  I plito en speech ‘’business as usual’’.  Malerezman fason ki mon mwan vwar leta mon pei i koumsa:

  1. Nou’n komans lannen avek en rikord ka omisid, serten lyen avek vyolans domestik e 1 rikord ka swisid e en keksoz alarman parmi i annan zanfan.
  2. En mankman 46 teachers dan lekol segonder e plis ki 300 teachers etranze dan nou sistenm ledikasyon.  Plis ki 80poursan nou teachers dan lekol primer kot la baz ledikasyon i ganny mete pe teach san en Diplonm.  Rekritman nouvo etidyan pour pran en karyer dan teaching pour ranplas bann etranze e bann ki’n pran retret i pli ba ki zanmen.  La mon pe met lanfaz lo nouvo etidyan, non pa in-service teachers ki pe fer part-time courses.
  3. En mansonz lo pass rate ki mon pour koz lo la pli tar.
  4. En Departman Imigrasyon ki napa en Lalwa modern e pe fonksyonn anba en Dekre Prezidansyel kot omwen 59 etranze in ganny citizenship lannen pase, serten anba parasol meritokrasi menm si napa okenn zistifikasyon.
  5. Bokou ka trafik labi imen, bokou labi Lalwa Lanplwa par bann ki pe fer vini travayer etranze. Zis pour donn en legzanp ARID ti dekouver plis ki 70 travayer etranze pe travay avek en Lakonpannyen san GOP tou resaman.
  6. Bokou koze lo nivo lapovrete absoli ki’n fini depas 40poursan nou popilasyon.
  7. Labi imen par Lafors Lapolis e en popilasyon prizonnyen ki pe kontinyelman ogmante. Sityasyon drog dan Prizon i alarman e lye avek vyolans laba.
  8. Litilizasyon drog e lalkol ki alarman ki menm ariv en nivo ki pe menas nou lafors travayer e menm nou legzistans koman en pep. Itilizasyon drog par bann madanm ansent ki pe fer ogmante mortalite enfantil.
  9. Pri lavi ki pe kontinyelman monte par lao latet tou malere e STC ki pa pe zwe son rol pour fer desann pri marsandiz.
  10. Plis 700 milyon Dolar ki kit pei lannen pase koman peyman pour tou sa ki nou konsonmen ki reprezant 24poursan an plis ki lannen presedan.

Sa i vedir 96poursan larzan ki nou zenere i retourn aletranze e napa nanryen pour Labank Santral met 2 kote pour letan dir.  E tousala i ganny ankadre par move planifikasyon e zesyon Ekonomik e en Egzekitiv in efektiv akoz prensipalman lack of serious Leadership.

Anfen kont dan en fraz, nou kapab dir ki Leta nou pei i enn kot i annan gran potansyel pour devlope, me parkont nou’n anvlope e nou lo poz.  Lepep i fristre akoz napa nanryen ki pe bouze.  I annan ki pour dir ki mon pe vwar lavi Sesel dan en fason negativ.

Kontan pa kontan, mon mwan la pour koz laverite.  Mon pe challenge nenport lo lot kote latab pour demanti mwan si sa si pa vre Leta nou Nasyon, si sa bann problenm pa egziste ozordi.

Mr Speaker mon ti a kontan al an detay lo sa 10 pwen ki mon’n liste, me mon konnen letan pa pour permet, alor mon pour elabor lo 3 pwen selman.

Premyerman lo size ledikasyon.   Mr Speaker mon senserman krwar ki ledikasyon se lakle lavenir en pep.  Atraver ledikasyon nou devlop konesans, valer, skil e latitid oubyen sa ki nou apel fason fer.  Set en atraver en bon sistenm ledikasyon ki nou bezwen prodwir travayer a tou nivo, pou reponn bezwen mendev pei.

Set atraver en bon sistenm ledikasyon ki nou prodwi zonm, fanm responsab ki pou batir en fanmir solid e konsekaman en sosyete solid kot i annan respe pou tou dimoun e kot tou dimoun i annan en plas o sant devlopman son pei.

A en lot mo, kot kontribisyon sak endividi i ganny valorize. A lafen sak endividi i kapab rezouir larises pei atraver bann devlopman nouvo lenfrastriktir e bann pli bon sistenm lasante e lezot benefis ki Leta i kapab ofer.

Mr Speaker ozordi nou sistenm ledikasyon i deplorab.  Serten bann Professional Centers parey SIT, Lekol Lagrikiltir e Ortikiltir pa ankor ganny akreditasyon. Sa i vedir ki apre ki en etidyan in fer en kour dan sa bann pos segonder, son sertifika pa pou kapab ganny rekonnet akoz sa bann kour pa’n satisfer kriter lo kad kalifikasyon Nasyonal.

Eski Gouvernman dirize par Prezidan Msye Faure, pe pran sa bann zenn etidyan dan sa bann lenstitisyon konman en fars?  Eski i ape zwe avek lavenir sa bann zenn?  Konklizyon se bann zenn ki pou tire zot menm.

Mr Speaker, mon ti pe koz avek en zenn etidyan ki lekol SIT e ki’n pran en kour dan Konstriksyon.  I dir mwan ki i pe al kit lekol. Ler mon demann li akoz?  I dir mwan ki toulezour napa teachers pou serten kour e i zis al zwe domino dan laklas. In fatige ek sa, alor i oule al fer en lo deboury.  Sa I tris.

Mon demann mon lekor konbyen zenn ki vwar li dan sa sityasyon ozordi?  An prenon kont sa sityasyon, eski en zour nou pou kapab prodwi mendev neseser dan sa Sekter Konstriksyon?

Mr Speaker i fer mwan lapenn pou vwar ki malgre bokou zefor ki pe ganny mete pou adres standar lo kote ledikasyon Petit Enfance.  Me ler sa menm zanfan ki’n demontre bon konpetans oubyen komansman i mont dan laklas en pe pli o dan primer, ou vwar ki son nivo i desann.  Nou kapab retir en sel konklizyon la. Sa i vedir ki progranm ledikasyon primer pe fail nou zanfan.

Avek 80 poursan teachers ki pe teach lo nivo primer san en Diplonm e formasyon neseser, ki mirak ki nou espekte i arive ler sa zanfan i antre dan segonder?  Ki fason nou pou ganny bon rezilta dan lekol segonder si labaz i pa bon?  Ki pe arive avek nou program formasyon teachers?  Zis pou donn en legzanp, lekol primer Glaçis i annan li 15 teachers e ladan 11 napa okenn sertifika teaching.

Souvandfwa ler ou dialog ek bann teknisyen dan Minister, ou vwar ki i annan bokou lide  – plan d’action ki’n ganny fer, me parey labitid tre pe ki ganny materialize.  Ankor sa i fer ou kestyonn lefikasite Gouvernman Msye Danny Faure akoz tousala i aret lo son latab.

Malgre sa, mon oule felisit bokou bann teachers endividyelman ki pe kontinyen met bokou zefor, menm si i annan bokou challenge dan sa profesyon.  Nou bann problem dan ledikasyon se pa touzour zot lafot. Bokou bann sanzman i devret ganny fer lo nivo lafason resours i ganny zere. Nou bezwen nouvo vizyon, nou bezwen nouvo Polisi dan ledikasyon e linisyativ pour fer monte standar.

Fodre realize ki sa lasenn i annan bokou mayon e si gouvernay i montre lo koray, byensir nou pou nofraze.  Dezyenmman Mr Speaker, mon oule fer en komanter lo rezilta IGCSE ki Minister Ledikasyon in fer resorti tou resaman.  Sa i en keksoz, si i annan en keksoz ki Assessment Development Officer in fer byen dan sa rapor, se pou defigir larealite avek fo statistik.

Sa sif 98poursan pass rate dan IGCSE e 36poursan C and above i senpleman fo.  Premyerman Mr Speaker si i annan 1,161 zanfan ki’n fini S5 e zis 692 ki’n fini, ki’n fer legzanmen, sa 469 zanfan ki pa’n pass selection exam i osi devret ganny konsidere konman bann failures, akoz senpleman zot pa’n satisfer kriter pour zot kapab al asiz sa bann legzanmen IGCSE.

        Sa i fer ki labaz konparatif i devret 1,161 etidyan non pa 692  parey sa statistik i montre. Si sa fe ti ganny pran an konsiderasyon le vre pass rate C and above  dan en 5 ti pou tonm anviron 28poursan. Sa i bokou pli ba ki sa ki’n ganny pibliye. An konparezon ler nou get lekol Endepandan li son pass rate C and above i 73poursan.

2enm pwen Mr Speaker, ki pa’n ganny fer resorti dan sa rapor, se an mwayen konbyen IGCSE en zanfan ki anrezistre in fer?  Dapre mon kalkil i tonm 3 e ki lekol prive i tonm 8 etidyan, 8 par etidyan.

Standard enternasyonal ki nou devret pe benchmark avek, se 5 IGCSE par etidyan. Sa standar in ganny mete pour en zanfan kapab ganny sa ki apel nou apel en International Certificate of Education (ICE) apre ki in termin lekol segonder.  Dan lepok O-level sa ti apel General certificate of Education. (GCE).  Sa standard i osi ganny mete koman en standar minimum ki si sa etidyan i anvi kontinyen son letid dan A-level i kapab fer li avek son 5 IGCSE.

Mon oule osi fer resorti lefe ki si 692 zanfan an tou dan lekol Leta ki’n asiz legzanmen i montre ki en mwayen zis 62 zanfan dan sak lekol segonder ki’n asiz legzanmen IGCSE.  E sa sif i vreman ba ler ou konpar lakantite zanfan ki’n fini S5.

Ladan menm zofisye Minister Ledikasyon i dir ‘satisfying results.’ Mwan, mon krwar sa statistik ki’n ganny pibliye i zis en ‘white washed statistics’.

Si Minis Ledikasyon ti vreman serye ler i ti dir ‘’personn pa devret ganny kit deryer’’  i devret promot en deba Nasyonal lo sa size, e pran aksyon pour re-aranz nou sistenm ledikasyon anfen ki nou zanfan pa reste deryer, akoz senpleman zot paran pa afford pou met zot dan lekol peye.

Mon pe swete ki lannen prosen sa bann profesyonnel i a donn nou en pli bon rapor ki a reflekte la realite.  Mr Speaker mon oule profit sa lokasyon pour koz lo en size ki tou Seselwa, kot ou pase i dir Onorab koz en pti pe lo la, menm si i annan bokou ki’n ganny dir dan sa Lasanble lo sa size.  Sa se pri lavi.

Mr Speaker, mon apresye privilez pou form parti sa group MNA ki ti fer en visit travay Maurice pandan Recess.  En diskisyon ki’n mark mwan bokou dan sa vizit se, nou kozri avek Premye Minis Mauricien lo size Lagreman pou fer bulk buying, en linisyativ ki ti sorti dan deba pri lavi dan Lasanble lannen pase, e ki Prezidan Faure ti diskit avek son omolog Mauricien.

Mr Speaker malerezman ziska prezan nanryen pa’n bouze.  I pa nouvel, ki Msye Faure pa en boug ki serye.  Me mwan, mon pa zanmen ekspekte, si lo nivo la diplomasi e langazman ant de dirizan, ki Msye Faure i osi feb koumsa.  Atraver sa diskisyon mon’n dekouver ki menm si en gran kantite lafanfar in ganny zwe lo la medya, Msye Faure napa okenn volonte pour fer desann pri lavi!

Sa set akoz napa okenn swivi ki ganny fer lo sa bann MOU, ki ti pe, ki ti pour fer Seselwa ganny komodite pli bonmarse. Ankor Prezidan Faure in trenbal gran, gran delegasyon Kenya pour ganny legim e fri bonmarse, Botswana pour fer ganny lavyann bef ensidswit. Oli rezilta?

Mon pe, mon sir ki Seselwa pe note ki napa okenn commitment lo kote Msye Faure pour fer desan pri lavi.  Si ti annan, mon enplor li pou vin dan sa Lasanble e vin dir nou, konbyen sa bann MOU ki in sinyen lo size pri lavi ki’n anmenn benefis pou Seselwa?

Ki komodite e marsandiz ki’n desan an rezilta son zefor?  Dan plas marsandiz desann, kontrerman nou vwar ki CEO PUC i vin lo televizyon pou anonse ki i pour fer revwar tarif litilite piblik, pour permet li anmas plis reveni pou zer son bann proze a lavenir.  Sa i vedir ankor en kou lo latet malere tre prosennman.

Mr Speaker, ler ou fer en analize, ou vwar klerman ki napa okenn, ki si napa okenn sanzman Dirizan, si napa ‘serious leadership’ sa ki mizer pou kontinyelman vin pli mizer e sa ki ris pou vin kontinyelman pli ris. Nou’n fini antre dan en sistenm kot larises i dan lanmen en pti group dimoun. La klas mizerab pe grosi e standar lavi nou pep pe desann pli ba, Lye avek standar lavi, nou deza pe vwar koman lalkol ek drog, kriminalite, nivo ledikasyon ba e lezot malez sosyal ki pe ronz nou.

Mr Speaker sa i anmenn mwan lo en lot pwen ase sansib, me en pwen ki ler nou evalye Leta nou Nasyon nou bezwen koz lo la. Sa se size imigrasyon.

Statistik Nasyonal i demontre ki lendeks to fertilite nou pep i zis 2.5. Par raport avek staz démographique ki nou pep i ladan, i fer ki dan le fitir nou pou vin en pep ki pe vyei.  Setadir napa ase zanfan ki pe ne pou fer grosi nou popilasyon. Sa pou anmenn en lefe direk lo lakantite travayer e nou potansyel pou zener reveni pou pei.

Avek sa de balans lo depandans e kapasite pour zener reveni, nou pou fer fas avek bokou defi sosyal e politik.  Zis pou nonm serten, nou pour kontinyelman bezwen mendev etranze.  I annan risk ki nou lekonomi I raptisi akoz nou pour bezwen met plis larzan pou servis sosyal lye avek bezwen bann Trwazyenm-Az.  Pour annan plis presyon lo nou sistenm lasante e lezot ankor.

Me dan tousala, kestyon ki nou devret pran o serye se ki fason nou devret protez nou pep Kreol e nou lidantite Seselwa?  Mon krwar senserman ki i vreman neseser ki Lalwa Citizenship i vin pli serye pour anpes etranze vin Seselwa.

Sa ki’n vin pou travay, i a vini i a travay, me i pa devret zanmen en loportinite pour li vin Seselwa e zwir tou bann benefis ki Seselwa i gannyen.

Si nou pa pran kont sa realite ki nou apel ‘dilution’ nou pour vwar ki Kreol Seselwa pour pran en d2enm plas dan son prop pei.

A ler aktyel ki nou pe viv, pouvwar ekonomik i deza dan lanmen serten Seselwa ki’n natiralize e ki annan lorizin Azyatik.  Si nou pa serye avek sa size sitwayennte nou pour vwar ki pouvwar politik pou osi kit nou.  Nou pou dan en sityasyon en pe parey nou pep frer Mauricien.  Ozordi dirizan Lopozisyon Mauricien, Mr Xavier Luc Duval ti dir nou ki defi mazer ki i pe fer fas avek se pou lager ki Kreol Mauricien i ganny en pli gran reprezantasyon dan Parlman ki a reflekte poursantaz zot popilasyon.

Mr Speaker avan mon terminen, mon ti a kontan koz lo leta mon distrik Beau Vallon. Mon byen apresye ki apre bann diskisyon ki mon’n fer avek Prezidan Faure, in pran desizyon pou leta aste propriyete Société Du Logement Pascal Village e propriyete sitye kot Bazar Labrin i ganny fer.  Sa i en gran sikse pou mwan e LDS.  Dezormen, sa propriyete ex-Société du Logement Pascal Village pour ganny re devlope par MLUH pour fer en nouvo flat pour zabitan Beau Vallon.  Tandis ki sa propriyete kot Bazar Labrin ti, i fer pour osi ganny re-develope pou benefis tou Seselwa e etranze ki vin servi lans Beau Vallon. Mon pou sezi tou loportinite koman Manm Elekte pour mwan met zot sizesyon devan lo kwa ki zot anvi vwar lo sa teren.

Bokou proze semen e lezot lenfrastriktir in ganny fer dan mon prezans dan Beau Vallon.  Mon ankor dezapwente par selman avek serten travay ki’n mal planifye oubyen ki pa’n ganny fer san okenn rezon valid malgre nou’n propoze.

Premyerman nouvo flat Pascal Village ki’n terminen depi desanm pa ankor ganny allocate avek bann zabitan akoz problem koneksyon sewage.

Mr Speaker sa i reflekte move planifikasyon lo kote MLUH.  Akoz sa, plizyer fanmir pe bezwen sibir gro lapli dan lakaz koule san konnen kan flat pou ganny donnen.

Dezyenmman sa slipway la Mare Anglaise kot zot in fer rock armoring pa ankor ganny fer apre plis ki 2an depi SFA in ganny larzan avek Linyon Eropeen pour konstri.

Sa i pa akseptab, akoz i annan en pti kominote peser la Mare Anglaise ki zot bato pe defonse a sak fwa ki zot fer li mont par lao high water mark.  Seselwa koman touris i tonbe e ganny dimal lo sa bann gro ros.  Mon pe fer en pledwari avek SFA, pour aret fer martir sa bann peser la Mare Anglaise e konstri zot slipway.

Mr Speaker bann lakaz en tol ki ti’n ganny fer konman emergency housing dan Gala Le Niole, in vin en kosmar pour sa bann fanmir ki pe viv ladan pour plis ki 25an.

MLUH in oubliy zot, me mwan mon pa’n oubliy zot.  Prezidan ti vizite e vwar pou li menm.  Malgre sa naryen pa ankor ganny fer. Mon pe ankor fer en pledwari avek MLUH pour aret fer martir sa bann zabitan sirtou bann ki lakaz i koule e re devlop sa landrwa.  La mon mazin Madanm Philoe ki’n annan en laplikasyon lakaz pour pou plis ki 18ans. Mr Estro dan enn sa emergency housing ki ti a kontan en meyer lozman.

Mr Speaker, en terminant mon ti a kontan reaffirm mon langazman total e langazman LDS dan Lasanble anba direksyon Leader Lopozisyon, Onorab Ramkalawan, pour kontinyelman pouse pour ki nou sistenm ledikasyon i a vin enn de kalite e enn ki rann nou pep fyer.

Nou pou osi donn zot nou komitman pour konbat kont pri lavi ki depas latet tou malere, anfen ki standard lavi Seselwa i a vin pli o.

Nou pou fer sir ki Limigrasyon i ganny kontrole par en Lalwa non pa en Dekre Prezidansyel e laport pour citizenship i ganny restrikte.

Avek LDS Seselwa ou pa pour zanmen vin en sitwayen 2enm klas dan ou prop pei!

Pou zabitan Beau Vallon mon pe demann zot pour kontinyelman donn mwan zot siport pour nou fer Beau Vallon vin en meyer distrik pou viv ladan dan sesel.  Mersi.

 

 

MR SPEAKER

Mersi Onorab John Hoareau.  Mon a don laparol Onorab Waven William.

 

HON WAVEN WILLIAM

Mersi Mr Speaker.  Mr Speaker mon kontan ki mon ti ganny sa privilez pou swet Msye  France Albert Rene  bon aniverser le 16 Novanm 2018 a son 83enm laniverser. Ozordi le 4 Mars 2019, lo non distrik Grand Anse Mahe  mon prezant nou senser kondoleans ek son fanmir. O fon nou leker nou pou vreman mank ou e mazin ou en allant.

Mon dir ou mersi, mersi e mersi bokou pou tou, Msye Rene, akoz ou ti vreman sa gid ek sa sipor en mazorite Seselwa.  Mon zwaye akoz avan kit nou ou’n aksepte Kris koman ou senyer e sover.

Mr Speaker apre diskour Leta lanasyon, koman sa Manm elekte distrik Grand Anse Mahe ki konnen ki fason sa Sistenm Pwen in afekte plizyer fanmir, mon senserman krwar ki sa Sistenm Pwen i merit ganny aboli, akoz i pa solisyon pli meyer pou rezourd problenm ganny en morso later par Seselwa.

Later prive i vreman en komodite ser ki pa tro abordab pou sa Seselwa ki’n prive e anmas larzan pou realize son rev aste en bout later e konstri son fwaye.  Ek sa lentere labank ki o prezan la, garanter in rar, rar, rar., Mr Speaker.   Dimoun pa oule pran risk konmela pou vin garanter.

En legzanp Mr Speaker, ou pran en loan R500mil, lentere pou pey i R55mil e par lao ou ganny forse pran en lasirans pou ganny sa loan.  Si ou annan ou 8an pou rann sa loan Mr Speaker ou bezwen pey R6mil par mwan pandan sa 8an.  En larzan ki ou pa pou zanmen gannyen ouswa rann pou ou fini pey ou loan. En larzan ki ti kapab ganny envestir dan ou proze lakaz, me ki’n ganny pran ek ou ek lespri sekiriz labank.

Mon pe ganny en repitasyon ki konmkwa mon anmenn zis konplent ek problenm devan. Mr Speaker si en dimoun i anmenn koko pou mwan amenn devan, kot sa koko pou ganny rape, perse e kwi manze, mon bezwen donn sa koko ki mon’n ganny met konfyans pou delivre.  Mon pa kapab sanze e amenn mandarin ki pa pou ede rezourd problenm sa endividi ouswa pou distrik.

Mon’n ganny anvoye isi pou koz pou sa pep ki’n elekte mwan! Mon pa’n ganny dir reste trankil e aksepte ki tou i ok kan dimoun pe esper solisyon! Mon bezwen onor mon langazman e koz pou zot Mr Speaker.

Tenm nasyonal se valoriz en kiltir travay dir. Sa i byen Mr Speaker.  Me annou osi dan Lotorite rekonpans byen travayer ki’n travay dir e pe kontinyen fer li.

Mr Speaker, Seselwa ki travay dir dan sekter piblik e prive zot travay dir pou ede annan en Bidze tou-le-z-an.   Seselwa i anvi ki son larzan i ganny byen depanse. Seselwa i anvi ki bann civil servant zot zer byen son larzan me pa trenn lipye pou enplimant aksyon pou anmenn solisyon, me pa tola tola parey i leka ozordi.

I pa akseptab ki i pran 7mwan pou komans prose reparasyon en bedsitter.  E lo sa size bedsitter, ki fodre arive pou PMC pran aksyon pli konkret pou rezourd problenm fungus Savy Estate.

Mr Speaker akoz en kabinen piblik, ki’n ganny fer plis ki 1an, pe pran letan pou Departman Gouvernman lokal deside kan pou les piblik servi?  Eski met en brans delo e kouran i sitan difisil? Menm si Lotorite Distrik in propoz lide lo ki fason nou kapab fer li fonksyonnen.

Mr Speaker, i fasil pou rod tou sort leskiz pou defann sa mank efikasite.  Serten civil servant ki ganny anploye par Seselwa.  Mon felisit tou bann ki pe travay dir, me i annan enn de o plase, ou krwar zot vin travay ek en baton feray e lasenn moter. Zot fer tou zot zefor pou asasin bann antreprener ki pran linisyativ. Si ou napa kontak ouswa zot pa’n dakor ek ou, i pli pir Mr Speaker.

Napa kalite pwen teknik zot pa pou dir ou, ek bi zis pou dekouraz ou e demoraliz ou.  Rezon ki mon’n dir sa Mr Speaker, se akoz serten antreprener pe fer fas ek sa kalite tretman e realite malapropo. Mon pa kapab nonm zot non pangar zot ganny plis viktimize.  Sa fason fer fodre sanze.  Olye bann repons dekourazan, annou ofer lespwar ek gidans pou realiz sa linisyativ.

Ki fer mwan rapel letan mon ti anmenn Mosyon lannen pase, kot mon ti sey amenn devan sor serten travayer dan en sekter piblik  Mr Speaker zot ti ganny dir ki zot welfare pe ganny get ladan.  Mr Speaker zot louvraz se sarz e desarz marsandiz dan pickup, pez langre e pwazon kourpa e lezot.  I annan parmi ki bann profesyonnel san Doktora.

Mr Speaker, zot travay dir pa’n ganny valorize, akoz zot ti ganny dir ki le 01Zanvye 2019 zot pou aret travay. Solman zot ti ganny dir an premye lye ki zot welfare pe al ganny get ladan. Zot ti byen kontan, panse ki zot pe al ganny rekomanse. Rezon pou fer zot arete Mr Speaker, sete, akoz zot in al koz ek Waven William.  Sa in fatig mwan en kantite Mr Speaker.  Eski sa i lazistis?  Eski zot travay dir inn valorize ouswa  in ganny defavorize?

Mr Speaker, sa drog ki pe ronz nou zenn, zot lavenir, zot lafors – Mr Speaker i ras ker letan sa manman pe koz ek ou; i ras ker letan son de larm pe koule ler ou gete ki mannyer zenes in ganny anvair par sa drog. Dimoun bezwen kasyet larzan, kasyet manze e lezot keksoz valer, zis pou droger pa pran pou fer kado, akoz pri ki zot al vann zis pou ganny sa fix apre lefe methadone in fini. I annan paran e Trwazyenm-Az, zot ganny menase si napa 25 roupi pou donnen. Zot per e zot pler an silans, akoz zot nepli konnen avek ki pou koze.

Kote nou pe ale Mr Speaker? Ki nou fer? Annou atak problenm dan rasin. Annou aret zis koup brans, zot pou bourzonn pli tar. Annou rod solisyon pli konkret pou rezourd problenm. Diferan statistik pe ganny donnen, en mazorite piblik pe demande e konsernen akoz se larzan ki nou napa bokou, ki pe vid dan en progranm ki Seselwa pa tro, tro kontan e pa tro asire si vreman i pe marse.

Mr Speaker parol lo semen la se ki droger i pran tretman pou permet zot travay e ganny larzan pou aste drog pli tar. Eski sa i sa vre realite deor la?  Si wi, ki lefe lo lasante sa endividi lo son lefwa e ronnyon. E sa i met plis presyon lo Minister Lasante pou depans plis ankor larzan ki ti kapab al dan en lot sekter.

Mr Speaker, toulezour mon zwenn e koz ek plizyer travayer.  En mazorite pa satisfe ek zot saler de baz sirtou bann ki’n donnen menm pou 20 tan a 40 tan an montan.  Olye zot kontribisyon ganny valorize, zot ganny peze, viktimize ek lespwar ki zot a kite.

En manman ti fer mwan konpran, ki i ganny R13mil pou 42an servis.  Son garson ki dan en lot sekter ki annan 6an tan servis i tous R14mil par mwan.  I ti dir mwan ki, sa garson ti dir mwan ki i  santi li anbarase ler i konpar son saler ek pou son manman,  sirtou lefe ki i konnen ki son manman in donnen menm.

Sa manman pe mazin pran retret boner akoz i pa vwar ki sa Lotorite pe valoriz son konesans, son kontribisyon e valer son leksperyans travay.  Ler i arete, se zenes dan sa sekter ki pou perdi e  sesel ki pou perdi.

Mr Speaker lot lenzistis, i annan civil servant ki reste kaye lo probasyon par lespri malisye zot siperyer, akoz i koz son rezon, akoz i demann kestyon e akoz i reklanm son drwa.

Mr Speaker i annan travayer ki ganny viktimize akoz i pe rod kopi son appraisal form, menm si Lalwa i dir ki ou lenformasyon personnel, ou annan drwa gannyen  pou ou siperyer demann ou akoz ou pe rod sa, ou pa sipoze ganny kopi, konmsi sa appraisal form i son propriyete prive.  Sa i mal Mr Speaker.  Mon envit Lotorite pou get en pe ki pe pase.  Menm dan serten bann parastatal osi pou koriz sa bann lenzistis. Mon demande ki sa revizyon saler e tann servis i osi tous travayer dan sekter parastatal, zot osi bezwen ganny touse dan sa lespri enklizivite lakonpannyen Sesel.  Annou valoriz nou bann travayer ki pe donnen menm, pey zot byen e zot a kontinyen travay pli dir ankor.

Mr Speaker si mon’n train koman en solda, pa tret mwan parey en gard, valoriz mon profesyon e pa redwir mon stati e redwir mon package lafen di-mwan. Ki fason travayer pa pou fristre ek sa kalite tretman.  Kot i byen annou anbelir e kot mal annou amenn soulazman.

Mr Speaker motiv nou bann zenn, nou bann zenn bezwen ganny motive  pou tenir e pou ranplas bann etranze pli vit par donn zot en pwen depar byen detaye pou aprann pli vit.  Silvouple, ler in konplet son parkour, pa bezwen sant li demen tanto e anvoy son promosyon parey lavant.  later.

Donn li sa package ki donn valer son nivo ki konparab ek pou sa etranze.  Si sa bann diferan lenzistis dan tou son form i ganny kontrole e eliminen dan serten Departman piblik e sekter prive, sa tenm ‘’Valoriz sa kiltir travay dir’’ pou ganny sipor inanim dan pei e rezilta kree larises lafen lannen pou depas ekspektasyon.

Mr Speaker sa pep deor la i anvi solisyon pou amelyor zot kondisyon lavi.  Sa pep i konnen kwa ki Gouvernman in fer byen.  Nou annan en pep deor la ki azour ek lenformasyon e ki anvi amelyorasyon dan servis piblik pou li fer fas ek realite lavi.

Mr Speaker, pep pe koze e pep pe dir, ki i bezwen en lord zeneral ganny mete dan sa pei.  E ki koripsyon devret ganny dil avek dan en fason pli sever.  Sa biznes ‘’you take, I take’’ bezwen arete dan sa nouvo letap.

Mr Speaker ki amenn mwan lo mon lot pwen, bann ka repeated offenders, akoz tro bokou leniency pe ganny servi, kot kriminel i kontinyen fer krim. Viktim lanmen i tonbe letan i pa vwar zistis dan son totalite.  Kriminel i ganny plis proteksyon e zistis ki viktim, plis proteksyon ki viktim.  Bann viktim i anvi en nouvo souf Mr Speaker.

Mr Speaker, la mon lans en lapel ek nou Lasanble pou nou osi vin pli proaktiv, pou pous bann Lotorite konsernen pou amenn solisyon konkret.  Pa fer letour ek problenm.

Mr Speaker nou’n aprann ki Lapolis, Zidisyer e Attorney Zeneral zot zwenn. Pep i anvi vwar lazistis dan son totalite. Nivo kriminalite i ankor o konpare ek sif ofisyel ki pe ganny donnen. Rezon se ki viktim in perdi konfyans akoz i ganny toultan bann repons fatige, ki fer li pran bann lezot mezir, ki kout li ser pou asir son sekirite.

Mr Speaker mwan ek ou nou napa sekirite ouswa bodyguard kot nou, parey sa mazorite fanmir Seselwa.

Pep i espekte ki Gouvernman parey Konstitisyon i dir pou sofgard son drwa e son sekirite.  Akoz nou ankor annan serten zenn ki pe teroriz distrik ek bann aksyon vol touris, kas transpor, vol  laferm e kas lakaz dimoun? Serten latitid tel parey menas bann ki pli vye si pann satisfer sa demann pou R25, ouswa labi lo sa boutikye Endyen ki pa’n pare pou aste de sopin.

Mr Speaker prezidan in tous lo sa size lalkol e son bann konsekans, i normal e mon swete ki tou Lazans konsernen zot angaze pou vreman met an konteks problenm e pou amenn bann mezir pli apropriye ki pa kre plis problenm pou sosyete dan en lot bor.

Sepandan pep pe demande, ki’n arive ek enplimantasyon Lalwa dan sa pei.

En pe letan pase Prezidan ti dir ek bann sef Lazans Gouvernman pou sorti dan zot konfor e al zwenn ek bann Lotorite Lokal e zabitan pou konpran pli byen sa vre realite a labaz dan distrik kot i konsernen. I annan ki fer li e i annan ki ankor krwar ki lopinyon Lotorite e zabitan distrik pa enportan. La i annan en bon pe lord pou mete, akoz dan Grand Anse Mahe  nou leksperyans pa fer nou kontan ek lafason ki nou pe ganny trete.

Mr Speaker i konmsi nou dan en laboratwar pe konstaman ganny fer eksperimantasyon. Ouswa dan en laklas primer ek mis lekol.  Sa ki nou pa realice, se ki zabitan i annan bokou konsey e kontribisyon pozitiv pou fer an sa ki konsern devlopman dan distrik. Akoz zot konn zot lanvironnman pli byen. Zot annan propozisyon pou serten solisyon posib.  Mr Speaker pa mank nou respe par donn nou nenport kwa Mr Speaker ; tel parey bann lenformasyon ki pa korek.  Met nou zabitan lo ler, fer vizit e miting e fer nou kapot ek las. Tel parey; detrwa legzanp se sa lespri travay ansanm dan sa community policiny, ki malgre bokou koze, pa ankor komanse, ki fer linisyativ kominoter fay dan konbat krim ler i mank sa laspe policing.

Landrwa ki’n ganny swazir pou met bann lakaz dirzans, ki pa apropriye e ki pe deza fer lev bokou konsern lo zesyon e danze potansyel. Desarz delo ki al inond kot lezot ki pa ti pou leka si ti annan vre konsiltasyon. Mr Speaker ou krwar ki nou kontan operate dan en latmosfer plis damage control? Serten legzanp, Mr Speaker;

Mankman en plan zesyon lo en baz kourt, mwayen e lonterm pou elimin bann danze lo larout piblik, larivyer e desarz.

Mank proaktivite lo lapar PUC pou anpes serten endividi al benny par lao baraz delo Grand Anse Mahe, menm si a plizyer lokazyon isi dan sa Lasanble mon’n demande.

Lot se mank proaktivite pou enstal bann speed bump pou redwir vites lo semen, sirtou kot bann vilaz ki bordaz ek semen pou evit aksidan fatal. Barbarons in eksperyans 5 aksidan dan en mwan akoz speed.

Serten laysenns pou repeated offenders merit ganny arase, olye sir saz pou pa met seatbelt, sirtou dan lavil kot ou pe rod en pti trou pou park an tayan e oubliy seatbelt.

Mr Speaker en zabitan i dir mwan, la zot pe konfiz nou plis, parey dan prosesis delinking ant rol MNA  avek DA par entrodwir Konsey Rezyonal. Zis pou retir latansyon lo sa vre realite gaspiyaz larzan, dan plas met larzan kot i merite. ‘’Olye konsantre met larzan dan pos Seselwa, zot pe met larzan dan pos dalon’’ i dir mwan.

I dir mwan Mr William, ‘’ou plennyen pou Ladministrasyon Distrik ganny plis resours pou pli byen fer son travay.  Zot dir nou napa larzan, me solman zot trouv larzan pou kree Konsey Rezyonal.’’

Mr Speaker e i kontinyen dir mwan, en, la mwan mon pe tous R5, 250 par mwan, mon pe skente 8er ziska 4er, i annan lezot mon bann frer e ser ki’n travay dir e ankor pe tous par anba R7,500.  I demann mwan Mr Speaker en Konsey Rezyonal, ki louvraz an plis ki i fer konpare avek Ladministrasyon Distrik, pou son tyermenn ganny R10mil konseye ganny R7,500 i dir  mwan eski zot pe vin fer menm travay ek Ladministrasyon Distrik e ganny byen peye?

Be nou, ki deal? I demann mwan si sa i normal? Si i pa i en gro lenzistis? Sirtou ki sa, i sipoze en lesey ki pou ganny evalye an Zilyet. I kontinyen dir mwan, zot dir nou dan Lasanble ki si ti fer eleksyon Konsey Distrik ti pou depans plis larzan. Be sa kalite allowance Konsey,  Lasanble pa’n debat lo la, be oli lazistis pou sa mazorite ki pe vreman valoriz sa kiltir travay dir? Bann ki zot saler merit ganny ogmante.

Mr Speaker e i kontinyen dir mwan, be la ki mannyer Mr William, mon pou valoriz kiltir travay dir kan serten pa pe transpire e rente parey bokou nou?  Pa ki nou zalou zot pozisyon, sa i en gro lenzistis kont travayer e volonter.   En lot mon siporter i dir mwan, ‘’… en, Mr William be sa progranm methadone e sa gro klinik ki vo sepa konbyen. pa en gaspiyaz nou larzan ? Pa in ler pou revwar ankor. Eski vreman nou pe rezourd problenm ouswa agrav nou sityasyon?

Mr Speaker, sa i demontre ki fason nou pep pe swivre devlopman de pre, e pe reflesir epe fer konparezon. Serten desizyon pe ki fer li fristre, akoz bann lenzistis ler i vwar ki napa ase bis pou li ariv a ler travay, kouran pe koupe san espekte e son savings i al dan ranplas son lekipman andomaze. Pe pey kabri dan sak, ver kalite lakaz ki i pe lwe e aste. Vi ki i dan bezwen e i napa bokou swa, letan in perdi son sans kalifye pou en morso later akoz le fame land point system.

Mr Speaker e la  manm Brigad ki’n volonter ek gro lapli resaman, in volonter pandan lontan.  Son zepol pou tonbe letan i konnen ki nek an 2020 ki pou annan revizyon allowance konpare ek sa ki ti ganny dir.  Eski i pou gannyen motive letan sak lannen ou dir li vin miting, pou li DA anvoy lalis anvoy lalis bann bezwen e ki pa materyalize Mr Speaker?

Mr Speaker, serten mon sitwayen pe viv lo petet – si zot ‘’pou’’ ‘’ouswa’’, ouswa zot ‘’pa pou’’ ek Minister Later e lakaz e Departman Gouvernman lokal. Mr Speaker in sanz 4 Minis dan Minister Lakaz e serten konsern ek problenm serten sitwayen Grand Anse pa ankor rezourd menm.

Pa akoz lotorite distrik pann ise pouse pou met devan sa bann ka endividyel. I pa akoz MNA pann pouse me o kontrer zot vwar MNA koman pe tro enterfer avek ka son zabitan distrik. Be si mon pa enterfer zot pou kontinyen trenn lipye Mr Speaker.  Mon bezwen fer li mon napa swa.

Mr Speaker mon demann si  sak fwa en Minis i sanze tou file i al avek ouswa i perdi? Solman zofisye sinyor i ankor la e ki konnen me solman i pa fer nanryen pou ed sa nouvo minis. I rod tou sort lanpayaz pou retard progre ver aprouve e ganny en solisyon. Mr Speaker epi zot ava dir dimoun riye ek sa kalite tretman ki kiltiv fristrasyon.

Mr Speaker on pou sit enn de ka ki mon bezwen fer li akoz in pran tro bokou letan.  La mon koz lo : ka en bout later ki Ms Anita Jacqueline pe espere pou li gannyen o-bor son manman.  Mr Speaker in pas plis ki 6an i pa ankor ganny en let pou dir li konbyen i vo sa bout later.

Mr Speaker kan en propriyeter dan  vilaz Orchid ki Ms Monica Barbe ki pe reste dan en lakaz i pe demann aste Mr Speaker.  Minis In vin lo teren Mr Speaker ansyen Minis sa lepok in dir li  ‘’pa trakase nou pou rezourd ou problenm.’’

Mr Speaker i annan plis ki 1an e sa madanm ler ou regard repeyman ki in fer, envestisman ki in fer in fini pey pou sa propriyete.  Mr Speaker lalis priyorite ki zot ti fer DA fer pou serten zabitan distrik ganny en kare later dan son prop distrik.  Land point system in vini san en warning ouswa konpromi land point system i diskalifye zot.

Bann parol pou met an plas en proze tretman desarz Grand Anse Mahe depi 2018 i pa ankor ganny rezourd.

Bann ka dirzans ki Lotorite Distrik i amenn devan me kot ou zis pa konnen ki plan ou solisyon posib pou rezourd sa bann ka. I annan tro sa latitid lese fer, mank konpasyon pou donn en servis pli proaktiv lo lapar serten zofisye. Serten i konpran me pa zot ki pran desizyon final.

mon met devan ka Ron Esparon, li osi en pe letan pase mon pe koz 2 a 3an in ganny promet en bout later.  Mr Speaker in ganny letan kit Sesel al travay deor, me still i pe kontinyen swivre pou  enn se zour ganny son bout later.

De  lot kote Divizyon Gouvernman Lokal mon demann mon lekor si vreman son vizyon i ankor anliny ek son misyon atraver Ladministrasyon Distrik?  Mr Speaker, mon’n deza tyermenn Konsey Distrik, sa vizyon baze lo sa fondasyon Msye France Albert Rene ti enn ki bon. Kot sa ki vini ti pou kontinyen anbelir.  Sa vizyon i ankor relevan.

Ozordi kontour pe ganny kase e i annan plis konfizyon akoz en fason fer enpoze olye ankouraz plis konsiltasyon pou vreman fer kominote pran sa ownership. 

Mr Speaker, a labaz dan kominote, 2 Komite ki enportan ki Ladministrasyon Distrik pe travay avek i sa district team e sa regroupman ki konpri bann reprezantan bann progranm, bann aktivite dan distrik.

Mr Speaker i annan en gro lenzistis ladan, se ki sa bann endividi a mon avi zot merit ganny en pti allowance ozordi pou sa travay akoz zot pe kontribye konsiderableman.  Zot pa pe gannyen  o kontrer zot pe ganny demande pou kontinyen fer li volonter ler bann nouvo rezyonal pe gannyen.   Wi nou krwar dan sa lespri volontarya, be serten sa bann reprezantan zot dir mwan ‘’zot nou’n la, nou’n donnen menm la en lot i vini e i detri tou nou lespwar ganny rekonnet.’’ Mr Speaker, i neseser koriz sa lenzistis pou vreman fer distrik pran ownership e ganny empowered.

Sesel i bezwen a tou pri stabilite politik, sekirite, lape pou sofgard lenvestisman e devlopman. Sesel i bezwen en administrasyon, ki senserman pe sofgard lentere Seselwa dan tou son laspe devlopman.  Kot sa Seselwa pa santi li koman en sitwayen 2enm klas ouswa pe ganny kit deryer dan son prop pei.  Kot Seselwa i kapab eksprim li libreman, kot drwa imen i ganny respekte, kot laplikasyon lalwa i efikas e zis. Mr Speaker dan sa krwaze devlopman kot Sesel in arive i annan bokou Lalwa ki merit sanze pou reponn a bezwen ozordi.

Sa Lasanble pou bezwen tonm dakor pou deblok sa bann lanpayaz.

Mr Speaker atraver mon analiz e diskisyon resaman ek sitwayen dan  distrik zot pe demann en amelyorasyon dan

servis bis, sirtou lo bomaten Grand Anse, Barbarons e La Misere. Mr Speaker, pourtan nou annan, bann lenspekter, lo larout.  Mon avoue ki mon pa konn zot responsabilite. Zabitan zot menm zot in al kot SPTC pou plenny zot sor – parey Seselwa i dir, zot al  poste zot let kot lapos, olye poste li lo lans. Zot pa satisfe ek sa servis e mon demande ki CEO SPTC i vin zwenn ek Lotorite distrik pou konn sa vre konteks problenm.  Revwar sityasyon pou donn en solisyon.

Mr Speaker, letan lakaz dirzans i pare, parey nou’n ganny dir ki dan milye Mars, nou espekte ant 150 a 200 nouvo dimoun.  Sa pou agrav ankor plis sityasyon bis dan distrik.  I fer mwan demande si Lazans konsernen pe kominike avek SPTC pou revwar distribisyon e kalkilasyon bann progranm bis.

Mr Speaker nou welcome sa bann nouvo proze lakaz ki Prezidan in mansyonnen e mon demande ki dan planifikasyon zot ofer plis lespas.  Akoz premye faz proze lakaz Vilaz Orchid, sa bann lakaz 3 lasanm i mank lespas pou fanmir ki’n gannyen konpare ek bann ki annan de lasanm.  Mon’n ganny sans asiste en miting avek nouvo CEO PMC dan vilaz Trioan Barbarons 3 a 4 semenn pase

Mr Speaker, bokou referans in   ganny fer ek Chetty flat Anse Aux Pins. Zabitan in fer sorti problenm ki’n komans parey Chetty flat.  Mon pe demann PMC silvouple pa les sa lagrenn parey Chetty flat ki Barbarons e lezot vilaz dan distrik Grand Anse Mahe, zot tonm parey Chetty flat ti ete.  Annou atak sityasyon boner.

Mr Speaker, en keksoz ki monn note, se ki osi lontan ki serten zofisye i krwar ki tou konnesans i ek zot, dan plas

travay ek kominote, zot pou gaspiy nou letan e resours ki nou napa pou donn bal ladan ;

tel parey pe arive dan bann Kontra reparasyon ki ganny repete e repete, me ki rezidan pa trouv amelyorasyon dan rezourd son problenm.

Ler ou dir Mr Speaker, ou vin lennmi Leta akoz zot mark ou Mr Speaker.  Frer e ser pep Seselwa, isi dan sa Lasanble nou rol se koze e kontinyen koze e enfliyans Gouvernman pou reazir pou adres problenm e amenn solisyon posib!

Mr Speaker, avan konklir mon anvi adres direkteman fanmir Seselwa.  Mr Speaker Desanm mon’n ganny sans partisip ek group zanfan e Trwazyenm-Az dan distrik.  Dan plizyer rankont ek zanfan, ou dekouver linosans bann zanfan e apresye zot lenerzi e menm dekouver bann fitir talan.   Sa ki ti frap mwan se lafason ki zot reazir, lafason zot sanze, konversasyon ki ou gannyen ek zot, aksyon ki zot fer, i donn ou en portre dan lakour, dan lekol e dan kominote ki zanfan i ganny ekspoze avek.

Annou nou tou vey byen zot devlopman, parey Prezidan in fer sorti. Annou nou tou dan pozisyon responsab pou kree sa lanvironnman apropriye pou zot grandi byen.   Fer zot al ek en vites ki zanfan i merit swivre  be pa enn ki adilt pe viv. Apre tou zanfan i kopye sa ki pase otour li Mr Speaker.  Annou donn bon gidans nou zenes e annou servi zot nouvo konesans e ekspertiz pli enkliziv pou devlopman pei.

Mr Speaker annou kontinyen fer tou pou tret nou bann Trwazyenm-Az ek dinyite.  Annou valoriz larises zot leksperyans e konesans. Pa abandonn zot akoz zot in vye.

Mr Speaker mon kontan lelan ki Gouvernman pe pran e pe gard zot relevan, me mon a dir ki i annan plas pou plis progre dan zot konesans. Annou pa mank sa lokazyon pou fer sa ki pli byen.

Mr Speaker mon anvi felisit bann travayer DRDM ki’n vreman a ler pou degaz lasasen ; travayer PUC elektrik e lezot e tou Brigad Dirzans distrik ensi Ladministrasyon Distrik pandan bann moman ki nou ti pe eksperyans ban move tan.

Sepandan mon demande ki DRDM zot pa tarde pou koup sa bann pye dibwa menasan La Misère  ziska Pti Barbarons ki prezant en menas potansyel piblik.

Distrik ti sanse ki sa pye albizya in kraz selman baro msye Bonte me pa touy personn.  Annou retir danze vitman. Mon osi felisit sa kontrakter ki’n travay san ses pou liber semen.  Mon osi sezi lokazyon pou felisit Lazans ki pe met koltar La Misère pou zot travay ekselan me pou asire ki travay ki’n ganny aksepte i kontinyen pou finalman fini.

Mon osi demande ki serten speed bump i ganny ete parey Lotorite Distrik in propoze  dan bann rezyon ki nou krwar i kapab kree bann potansyel aksidan. Annou vwar tou sa ki posib pou rekonpans nou bann drayver SPTC ki dray sa bann gro, gro bis Mr Speaker dan bann teren vreman difisil.

Mr Speaker i anmenn mwan lo mon pwen final ;  sa se konpansasyon zabitan La Misère e son lezalantour. Mr Speaker mon eksprim mon dezapwentman ozordi ek lafason ki sa size pe ganny administre.

Si vreman Gouvernman i anvi amenn klotir  annou bouze e Biro Attorney Zeneral i bezwen gard son parol ki zabitan i trouv aksyon vreman la Mars ouswa Avril. I  annan zabitan ki pe mor dan sa pe espere, en kont apepre 50 deza Mr Speaker. E la mon demande ki zot bann ki’n mor zot fanmir i kapab tous zot larzan malgre ki zot in mor.

E mon demande M Speaker ki sa lofis i aret trenn lipye lo la  e konmans sa prosesis la konmela menm.  Annou pa esper lavey eleksyon sinon nou pou regrete  an 2020.

Mr Speaker en terminant mon anvi ankor pas mon swe kondoleans ek fanmir Adela Elizabeth ki’n perdi zot pros Mr Desire Adela.  Mon osi ofer mon kondoleans ek fanmir Labrosse pou lanmor Mr Harry Labrosse e mon osi mazin tou bann ki’n kit nou e bann ki pe trete lopital.  Mr Speaker mon  remersi tou zabitan pou zot sipor kontinyel e kontinyen kont lo zot pou fer avanse nou distrik. Mon pou kontinyen dir ki kot i byen mon pou dir kontinyen anbelir. Kot i mal mon pou dir ki nou kapab fer pli byen e kot i mal mon pou dir i mal, dan lentere pep Seselwa e pou benefis Sesel e mon distrik.  Mersi Mr Speaker.

 

(APPLAUSE)

 

 

MR SPEAKER

Mersi Onorab William.  Onorab Regina Esparon.

 

HON REGINA ESPARON

Mersi Mr. Speaker.  Bonn apre midi tou dimoun ki a lekout.   Sa diskour ki mon’n ekoute semenn pase ki ti sipoze Leta nou Nasyon pa’n donn mwan okenn lespwar.

E ler mon’n fer en letour dan mwan distrik Glaçis ki mon reprezante, napa personn ki’n dir mwan ki i santi li soulaze dan sa bann parol prononse par Msye Faure.

An zeneral mazorite pep Seselwa pa santi ki sa ki’n ganny dir, pour fer en diferans dan zot lavi, akoz napa gran lespwar.  Sa se akoz sa eleman mank konfyans ki evidan dan sa bann zoli parol ki’n ganny dir.  In napa en analiz profon, e sa bann parol pa’n tous larealite lavi ki dimoun pe santi ozordi.  In napa en ton serye e nanryen nouvo, me plito zis en repetisyon sa ki nou’n deza tande.

Kestyon ki Mon pe poze se eski Msye Faure i vreman konn Leta nou Nasyon ozordi?  E kwa ki pe preokip sa pep?  Mon ti fer li mon devwar pour poz sa kestyon diferan dimoun dan mon distrik e aryer.  Larepons se Msye Faure pa neseserman konn vre Leta nou Nasyon, e ni menm kwa ki priyorite sa pep, akoz i pa dan nou soulye alor i pa pe santi zanpoul:

Sa madanm 4 zanfan ki travay netway semen i dir mwan, ‘’Madanm, mon mwan mon’n aret ekoute, toultan menm zafer zis promes, apre ou pa tann nanryen, lo size ki’n ganny dir.

kot lakour mwan menm zonm, mon menm fanm, akoz mon mari i dan prizon pour drog, mon pa vwar nanryen ki pour soulaz mwan dan sa ki’n ganny dir, lavi i kontinyen parey.’’

Sa madanm 2 zanfan ki pe monte desann kot Housing, e zot dir li i napa ase pwen pour li ganny konsidere pour en lakaz, i dir mwan in fatige, ekout sa bann bater latet akoz dan sa diskour napa nanryen ki’n anonse ki pour sanz son sityasyon.  I reste zis pour li osi pran son pake al met anba Independence House.

Sa boug ki pe plante anler dan leo North East Point i dir mwan ki Prezidan in bliye ki zot egziste, akoz ni en fwa dan son diskour i pa’n nonm Sekter Agrikol, ni Sekter Lapes.  Alor nou pa enportan pour zot i dir mwan.

E sa zenn garson ki mon’n zwen pe tap boul borlanmer, i dir mwan, ‘’konpran mwan byen madanm, semenn pase fek annan lansman Tenm Nasyonal, ki dir ‘Valoriz kiltir, travay dir’’’ be mwan mon pa’n tann Prezidan mansyonn nanryen dan sa direksyon ni menm fer referans ek sa Tenm.  Mon mwan mon ankor pe rod en lanplwa 2an ki mon’n fini kit lekol, nek zot anvoy mwan demen tanto, mon fer pti zournen, mon pe travay dir mwan, be oli lavenir ladan?’’

I kler ki bokou parol ki’n ganny dir dan sa diskour, in fini dan divan, akoz Gouvernman Msye Faure i enn ki pa efektiv, napa direksyon, napa en vizyon kler lo ki mannyer pour diriz sa pei e larg lanmen sa pep ki anvi debourye.

Me i pe kontinyen fer fo promes zis pour reste o pouvwar, kontinyen protez son lantouraz ki sorti dan menm parti avek li.  Akoz i per pour pran aksyon? Akoz i per pour pran aksyon?  Parey nou’n vwar dan sa bann zafer 52 ‘’ptipti’’ bout later, e sa lot 69 lot bout, ki sa bann ansyen SPUP /SPPF pe zwir.

Nanryen pa’n arive, kabri in manz salad in fini.  Tanka pep Seselwa i anvi vwar lazistis ek lespwar ki demen zot a ganny ede ek en ptipti bout ladan zot osi.  I kler ki sa regre ki dapre Onorab Gill, i dir Msye Rene in eksprimen i vre.

Sa parti SPUP/SPPF/US in plito travay pour zot lekor!  Me Selman zot in oule anbet pep Seselwa par dir ki zot pe met dimoun o-sant devlopman, kan se zot pos ki konsern zot e zot dalon dan swadizan sa lalit.

Dan sa diskour Msye. Faure in koz lo vizyon 2033.  En lepok son Gouvernman ti koz lo ‘’Laspirasyon 2013,’’ ‘’Stratezi 2017’’, ‘’Laspirasyon 2020;’’ oparavan in koz lo ‘’Tinel,’’ ‘’Highway depi Beau Vallon ziske Grand Anse.’’ ‘’LNG.’’

43an o pouvwar nide in fini.  E kantmenm nou a kit zot 100an o pouvwar zot pour zis vir an ron, kontinyen ranpli zot pos e soutir koripsyon, tandis ki mazorite Seselwa i dan dezespwar e pe manz son margoz anmer e viv dan lapovrete!

En pei pa kapab kontinyen ganny dirize lo fo promes.  Nou bezwen vwar keksoz tanzib, keksoz ki kapab ganny materialize, e ki pei i kapab soutenir.  Fodre nou aret reve, e promet keksoz ki nou konnen pa pour zanmen materyalize.  Parkont en Gouvernman efektiv i bezwen annan en bon planifikasyon, e en vizyon kler lo bezwen son pep.  E de lot kote son pep i bezwen santi soulazman dan bann mezir ki ganny enplimante, e dan bann desizyon ki Gouvernman i pran.

Akoz kan napa bon planifikasyon, nou vwar bokou gaspiyaz, sa i met presyon lo bidze Gouvernman e resours piblik, Devlopman i ganny retarde e sa i koz bokou fristrasyon.  Nou’n vwar ozordi kot bokou proze in komanse e pa’n fini akoz napa en bon planifikasyon parey gear store pour bann peser Glaçis, Shell rezyon Nor ki napa semen, music stadium ki zot kontinyen azout lezel avek son plan orizinal; proze 24-24-24, ki bokou dimoun in ganny dir pour soulaz zot problenm.

I byen pou dir ki se lepep ki fer Leta nou Nasyon.  Me kwa ki anpes sa Gouvernman ekout leokri sa pep?  Pour konpran son vre Leta e rod meyer solisyon pour soulaz nou sor?  Me nou’n vwar ki zot kontinyen anvoy dimoun demen tanto, reste lo en bus stop ki bis pa pase, oubyen kit zot lo en bwe, parey bokou pe pase dan sa bann, parey dan sa bann problenm lakaz.

 

Ozordi nou rekonnet ki pour annan sa bon fondasyon nou bezwen bann fanmir solid, ki pour kapab enkilke bon valer moral dan nou zanfan; pour ki demen zot grandi pour vin bann adilt responsab, e pran la relev.

Me kwa ki Gouvernman pe fer pou empower sa zenn?  Lekel ki’n detri e pe kontinyen detri sa valer ki bann zenerasyon dan mon lepok ti pe promote?  Si zot fer en analiz profon, zot pour vwar ki se zot menm ki koupab e responsab, pour detri sa bon valer ki sosyete ti pe rekolte avek sa ki ti pli aze.

Lekel ki ti ban lanmes NYS?  Kraz Lasapel lo zil? Deport per ki ti pe koz kont zot prensip? LDS?  Oubyen zot rezim Parti Inik ki ti krwar zot menm ‘’Bondye Later’’ e zot ti oule kontrol tou.  Ozordi Mr. speaker zot pe rekolte sa ki zot menm zot in senmen!.  Son fri i anmer, prezan rod kouraz tonm lo zot zenou e fer ‘’semafot!’’

Prezidan in koz lo labi zanfan e in donn nou en sif 119 dan 2an e 55 ki pa ankor ariv devan lazistis.  Pour mwan sa i bokou.  I byen in lans lapel pour raporte, me i fail pour dir nou ki bann mezir serye ki pour ganny enplimante pour dekouraz lezot, pour aret sa labi.

Ozordi nou vwar ka kot papa ki Tribinal in donn zot drwa pour pran zanfan pour wikenn san sipervizyon pe ganny sarze Ankour pour abiz son prop zanfan.  Nou bezwen mezir pli sever, e bokou terapi e bon program reabilitasyon pour sa bann pervert parey, avan nou re larg zot dan sosyete.

I osi enportan ki sa bann Lazans ki deal ek labi zanfan, i ganny ranforsi e annan plis kordinasyon, akoz mannyer i ete ozordi, ou pa konnen lekel ki fer lekel, e bokou case i ale vini antretan ki zanfan pe kontinyen ganny abize e tromatize.

Mwan mon ti a kontan dir ou sa zenn, ki pe ekout mwan; – Lev-e, reveye dan sa lefe methadone, sekwe sa lapoud lo ou e pran ou responsabilite dan ou lanmen, vin devan pour ede rekonstri sa pei.  I pa sifi pour ou reste deryer e dir, ki etranze pe anvair nou pei.  Akoz avek US ou pour reste pri dan sa lapoud ek methadone, e ou pa pour konnen kwa ki pour garanti ou lavenir.  Ou ki bezwen debout solid si ou anvi vwar en lavenir devan ou.  Tou i depan lo ou zefor e ou determinasyon.

Ou sa zenn fir oubyen zenn garson ki ankor pe lekol, i neseser ki ou vin pli serye dan ou letid pour ganny sa grad neseser ki pour garanti ou en letid pli avanse, e en bon karyer.  Pour ki demen ou kapab annan en lavenir briyan devan ou.  Tousala i depan lo ou zefor personnel, lankourazman ou paran e ou ansenyan.  Sosyete pe kont lo ou pour anmenn sa pei pli devan.

Mr. Speaker i enportan note ki si nou anvi ede e valoriz nou zenn, i osi neseser ki Departman Ladministrasyon Piblik i met an plas progranm ki pour ankadre sa zenn byen lo bezwen pei, e non pa anvoy li Liniversite e ler i retournen napa louvraz pou ofer li.

E retir bann birokrasi, viktimizasyon, e baryer politik ki ankor annan, ki anpes zenn ki’n kalifye ganny en lanplwa. Annou aret met afilyasyon politik son paran koman en kriter ki pour garanti li en louvraz.

Tandis ki etranze ki napa okenn kalifikasyon, pe ganny sa loportinite pour tir manze dan son labous.  Souvandfwa ler sa zenn napa en lokipasyon, i fasil pour li tonm dan tantasyon e pli tar i vin en viktim sosyete.

Ozordi nou dir ki lalkol pe detri lafanmir Seselwa.  Wi sa i vre.  Selman annou pa bliye ki se parti SPUP/ Lepep /US ki’n fer bokou parti bwar dan bann letan kanpanny eleksyon, zis pour ganny vot.  Sa bann lenterval zot tanpi konnen si zanfan anba laz i met triko ‘’Leker dan Leker,’’ i abiz lalkol.  Pour zot, si i ranpli laplenn, ase.

Zot menm parti SPUP/ Lepep /US ki donn license gos, dwat pandan letan kanpanny eleksyon, e zot menm annan kontrol lo serten lakanbiz kot lapire i ganny donnen pour nanryen zis pou detrwa vot.

E la i fer mon mazin sa ki pase dan leo North East Point e dan leo La Gogue, ler i annan eleksyon.  Ozordi nou pe vwar, nou pe anmas son rezilta. Parkont Mr. Speaker pa ankor fini, byento nou pour vwar.  Apre zot menm zot ki pour kri lasasen dan 4an.

Ozordi nou vin dir met moratorium, lo nouvo license lalkol, kestyon se ki pour arive ek sa bann ki deza pe prodwir lalkol lokalman?  Ki son konteni zot prodwir pe detri lasante sa pep?  Eski zot pour zis kontinyen?  Mwan mon pe dir sa ki pa bon pou konsonmasyon, met en ban total lo la.

Msye Faure i dir ki Laboutik pour ganny 1an pour fer le neseser pour aret vann lalkol ansanm ek manze.  La osi Mr. Speaker mon krwar i devret annan en serten kontrol ler sa Lalwa i vini.  Zot devret balans byen bann kriter ki zot pe al met devan, ki i pa vin ‘’business as usual’’ e nou vwar en lot kartel dan sa domenn.

En lot keksoz ki kontinyen met retar nou lazenes, e devlopman nou pei se sa problenm drog e sirtou sityasyon eroin.  I vreman fer lapenn ler en manman i rakont ou ki mannyer 2 son zanfan anba laz i lo eroin.

I tris pour vwar 2 zenn adolesan, komans zot lavenir dan sa fason, e ou demande ki mannyer fitir zot lavi pour ete.  Mon konnen i annan Juvenile Center ki’n ganny etabli pour bann ka parey.  Eski i pe marse?  E eski i efektiv?  Laba osi napa kontrol, zanfan ki sipoze anba zot sipervizyon in perdi, e selman 2 mwan apre ki zot raporte pour rode.

Donn methadone i pa le sel solisyon pour sa problem.  I zis en fason pour tret bann adikt.  Me kwa ki pe ganny fer pour anpese ki drog i antre dan pei?  Mon’n deza dir e mon repete, Mr. Speaker otan ki i kontinyen annan lipokrizi, e 2 standard dan lafason ki Lotorite i adrese oubyen deal ek sa sityasyon drog, nou pour pe lager en lager fay.

I byen nou dir ed zot dan sa lalit.  Mon vwar li byen drol ki Msye Faure in mank sa lokazyon pour dir nou ki bann desizyon serye ki son Gouvernman pe pran, pour anpese ki drog i rantre dan pei, akoz sa i primordyal

Toudmenm, Mon ti a’n swete tann li dir ki zot pe al entansifye sirveyans lo erport ek lo por pour detekte drog, oubyen Gouvernman pe al envestir dan bann nouvo masin ki scan tou bagaz e osi dimoun ler i debarke.

Pour evite ki dimoun i ganny depouye e imilye par lafason ki lafouy i ganny fer.  E sa ki ganny soupsonnen a ganny deal avek dan en fason diskre.  Lontan ti annan bann lisyen ki ti la lo Erport pour santi bagaz, konmela nepli annan.  Pourtan nou ti pey dog trainer plis ki R100, 000 par mwan ek larzan pep Seselwa pour donn lantrennman lisyen pour detekte drog.  Kwa ki’n arive?  Irish dan pe plim nou, in pran depi lisyen in al avek?

I kler ki zot in perdi Kontrol lo sa sityasyon drog.  Ozordi APDAR en Lazans ki ti ganny kree pour ede dan sa lalit, li menm ki pe, ki son zofisye pe ganny servi pou transport drog, parey dan ka kot enn in ganny arete lo lasose Praslin. Konbyen lezot ki pe fer parey ?

E lo lot kote ANB, en unit ki ti sipoze pe travay pour detekte drog,  laba i annan plis dealers, ki ou kapab trouve lo bann ghetto e dan bann black spot.

Nou’n vwar resaman kot medya sosyal in donn nou bann clue ki mannyer sa bann zafer i pase.  Mon pa konnen si Lotorite pe pran li serye e fer en envestigasyon.  Akoz napa lafimen san dife.

Prezidan i dir i annan 2,000 droger lo sa program methadone.  Tandis ki Dr. Herminie i dir i annan 1,500.  Mon pa konnen lekel ki pe kontredir kanmarad.  Me mwan mon pe dir ek Msye Faure pour aret zis zwe avek sif.  Nou bezwen fer fas ek realite.  Konbyen adikt ki li i pe viv dan son prop monn, ki pa’n anrezistre, e ki pa ni lo progranm methadone.  Desann lo ghetto Msye Faure, ou a vwar realite.  Eski APDAR pe vreman tous tou adikt?  Parkont nou kontan sa fason ki sa lorganizasyon ki apel DURNS pe travay e mon krwar zot merit plis lankourazman.  Tanka zofisye ANB i annan tro bokou ki pas lo ghetto zis pour pran zot pti cassage, komedi manrmay, apre zot al dans ‘’whine.’’

Msye Faure met en kou soulye sa paran ki son zanfan i lo eroin, met soulye sa enn ki son zanfan anba laz i lo sibstans, e ou a konpran son soufrans, sa i a ede ou pour rod meyer solisyon pour sa sityasyon e konpran Leta nou Nasyon.

Akoz ler ou pa dan son soulye ou pa pou santi zanpoul ki i pe gannyen.  Ou pa pour konpran lentansite sa sityasyon drog lo lavi lafanmir.  Lo sa merd fanmir ki ganny li R6, 000 e ler i sorti travay son zanfan in vol tou, e ni manze i pa ankor aste pour le mwan.

Pour mwan sa sityasyon drog i enkyetan, e i reste enn nou bann defi mazer ki Gouvernman in perdi kontrol lo la, e pe refiz-e adrese.

Ou a krwar zot zis koz lo la pour fer krwar zot pe rod solisyon, kan an realite, zot pe kontinyen protez dimoun ki pe akimil son larises lo febles bann adikt.  Sa ki pli deplorab se ki Lotorite konsernen, mazorite letan i konnen lekel zot, akoz drog pe vin en lot kartel dan Sesel.  Selman zot prefere pa tous sa bann gro msye, akoz pangar zot a perdi zot pti finansman dan prosen kanpanny eleksyon.  Mon demann mon lekor ziska ki tan sa bann dimoun pour kontinyen ganny proteze? Tandis ki nou zanfan i kontinyen ganny afekte.

E otan ki Msye Faure ek son Gouvernman i refiz-e adres sa sityasyon, nou pour kontinyen vwar kot lavenir nou bann zanfan i ganny detri.  Bann manman ki lo eroin, zot riske ganny afekte ek HIV ek Hepatitis C, e si zot donn nesans, sa zanfan pour vin pli at risk, e infant mortality pour kontinyen ogmante.

Nou pour bezwen plis larzan dan Bidze Lasante pour tret konplikasyon an rezilta adiksyon e plis larzan pour mentenir sa progranm methadone.

Plis paran pour soufer ek sa sityasyon e sa pour viz ver plis lapovrete.   Se sa Leta nou Nasyon Mr Speaker.  Eski se sa vizyon lonterm ki Msye Faure ti pe koz lo la?

A sa pwen, Mr Speaker mon anvi adres Msye Faure direkteman.  Silvouple Aret fer politik bon marse ek sa zafer drog ek program methadone.  Si ou vreman annan sa pep a ker, aret pran keksoz a la lezer.  Annou deklar en lager Nasyonal lo sa size drog, akoz i pe afekte nou tou.

E ou pti men lo scooter ki pe ganny servi pour transport drog pour sa gro msye, mazin son konsekans, akoz ou osi ou pe ede detri sosyete e detri lavenir nou bann zenn.

En lot problem ki met retar bann fanmir Seselwa, se problem lakaz ek e sa Sistenm Pwen in fer li pli konplike e pli difisil pour serten ki ti menm lo lalis priyorite ganny asiste.

E la mon pe kestyonn sa bann kriter ki ganny mete.  Pour later Mr. Speaker i pli konplike.  I annan dimoun ki’n ganny dir zot pa kalifye anba sa abilite finansyel R15, 000 me ki ti a kapab ganny konsidere pour 12,000.  Eski zot pou re-ganny apele pour en lot evalyasyon oubyen pour ganny sans fer en appeal?

Glaçis i en sa distrik kot aplikan lo lalis lakaz i reste statik.  E tou demars ki nou sey fer, zot dir ou esper sa bann unit 24 -24- 24 ki pe al ganny konstri.  Nou’n fini pas son 24 mwan, savedir 2an in pase depi ki sa ti ganny anonse.

E ler Msye Faure i vin dir nou ki retar, i akoz negosyasyon.  Mon krwar la i dwa zabitan Glaçis en leskiz, akoz lannen pase zot ti vin dir nou zot pe al tender, e mon ti kestyonnen pour mwan demande.  Kwa ki zot ti pe al tender akoz ni teren pa ti ankor garanti. Labitid bat latet sa.

E mon anvi dir zot zabitan Glaçis ki negosyasyon pa ankor finalize.  Akoz 2 semenn pase mon’n al visit sa teren ansanm ek Minis Charlette, e pa ankor garanti ki zot in ganny landrwa pou fer semen.

Menm si Gouvernman in aste sa morso later, tou lezot propriyete o bor i propriyete prive e Minister i bezwen al re negosye semen prezan ki pour pran en lot 6 mwan e mon pa vwar sa dele letan ki Prezidan in dir pour komanse lafen lannen koman en keksoz ki pour konkretize.

Mon pe dir zot sa pour zot pa, pour zot konpran vre sityasyon, e pa viv lo ‘’petet.’’  Antretan zot reste lo lalis espere, e mon konnen ki i annan ki lo lalis depi 1998 a 1999 e pa ankor ganny asiste.

E mon’n touzour pe demande ki bann ka ki vreman dan mal i ganny anvoye dan en lot distrik.

Parfwa mon zis pa konpran ki mannyer sa zafer pwen i marse.  23an lo lalis 6an pe pey Home Savings Scheme 2 fwa plis ki lo son Kontra, pe reste ek manman ek lezot frer, pe dormi dan menm lasanm ek en garson 19 ek enn 25an, pour ganny dir ou napa ase pwen, konmdi sa madanm mon’n vin granmanman.  Kan ki mon pour kalifye?  Ler mon pe pran semen kazern?

Mr Speaker en lot keksoz ki pre-okip nou se nou sistenm lasante.   Sa ki dimoun i anvi se en sistenm lasante ki i efikas, ki lo standard e pe donn en bon servis.  Kot sa ki malad i kapab ganny son gerizon oubyen en soulazman.

Pli gro problem ki dimoun i fer fas avek se sa zafer kart perdi.  I pa akseptab ki en dimoun i sorti kot li granmaten e ler i ariv son tour pou li vwar dokter, zot dir li i bezwen espere akoz son kart in perdi

Bokou fwa sa i fer dimoun fristre.  E mon pa pe blanm sa bann Clerk mwan, akoz zot osi zot souvandfwa zot bezwen monte desann pour al rod sa file.  E parfwa ler sa pasyan i demann son kart pour li kit avek li, i ganny dir, i kont zot Regilasyon pour ou pran ou kart pour al avek se ou.

Parkont mon ti pou’n trouv, parkont mon ti pou’n trouv amelyorasyon si sa Health Information System ti’n fini ganny etablir.  Pourtan, bidze depi lannen pase in fini fer provizyon pour sa.  E en lot keksoz ki mon pa’n tann Msye Faure mansyonn ditou.

Lot problem se sa zafer kot lekipman pa bon, e mon pa konnen ki demars Gouvernman pe fer pour ki sistenm i ganny modernize.  Kot zot envestir dan lekipman modern, annan teknisyen ki ganny train pour mentenir sa bann lekipman dan bon leta, e sa ti pour fer ki zot koup lo depans pour anvoy dimoun aletranze.

Problem fungus dan Lopital i en lot problenm.  Kot staff i santi zot at risk, e pe per pangar zot a osi ganny afekte parey travayer libreri.  Annou pa bliy, annou pa bliy letan ki i pran pour en pasyan vwar spesyalis.  Oli prensip lasante ki pli ou ganny tretman boner, pli ou ganny sans pour ganny ou gerizon?  Fini sa

Mr Speaker pri lavi i en lot, i enn ki preokip mazorite sitwayen.  E ziska prezan, napa gran mezir ki’n ganny anonse pour montre ki nou pe soulaz lafanmir.

Sa de pti mezir quick fix pa al ase lwen.  Tir detrwa pti Roupi lo gas, bwat ton, donn koupon, pa ase.  Antretan elektrisite ek delo i reste ser, bis i reste ser, bann servis parey telefonn, internet ki pli ale i esansyel i reste ser, i reste o.  Lentere lo loan e repeyman pa desann;

Tax lo lakaz lwe, ki an 2017 Minis Finans, sa lepok ti Minis Larose ti anonse dan premye lye ki i pour pran lefe an 2019 koman en mezir pour redwir pri lavi.

Ankor la nou’n vwar kot Gouvernman napa plan, akoz prezan zot in deside anvoy li pour 2020.  Konbyen fanmir ki ti a’n benefisye si zis sa tax lo lakaz lwe ti’n sorti 15poursan pour vin 3poursan Zanvye sa lannen.  Bokou fanmir ti pou’n benefisye.

Prezan mon konpran akoz Minis Larose in dir ou koumsa, ‘’Si mon ti konnen!’’ Letan Msye Faure pe koz lo bonn gouvernans, latransparans, e rann kont.  Mon demande si sa imsye i vreman konnen kwa ki pase dan son Gouvernman.

Parski ozordi dan son prop Gouvernman sa ki lanmen drwat pe ranmase, lanmen gos pe met dan pos.  Lontan ti pran par Roupi dan pti lanvlop kaki, me konmela zot pran par milyon parey nou’n vwar dan ka FIU.  Si Selman Gouvernman ti al rod nou bann larzan ki’n disparet e retourn li dan Kof Leta sa ti a donn en soulazman, e ti a ede redres nou lekonomi.

Lannen pase zot ti dir nou zot pour enstal sistenm photovoltaic, ki ti en donasyon Endyen,  lo bann lakaz dimoun ki pli vilnerab petet la osi annou konsider bann fanmir ki annan zanfan dezabilite konman enn zot kliyan.

Lapolis i en lot landrwa ki pa dan bon leta.  E nou pe vwar kot britalite pe re aparet.  Ozordi bokou zofisye sinyor pe dekouraze avek lafason ki nivo sa profesyon pe desann, i annan ki ti’n kite e ki’n retournen pe dir ki nivo profesyonnalizm dan Lapolis in degrade.

Mon ti koz ek en zofisye dan domenn Trafik ki dir mwan, li i dekouraze e i pe espere zis pour li pran son retret.  Akoz ler ou ganny anvoye Praslin ou pa ganny okenn allowance.  Lontan ti donn R75 par zour, ozordi i donn ou 2 bwat manze ek 2 boutey delo.  Eski sa i ankourazan pour en zofisye ki’n fer 34an dan Lapolis?  Aranz nou en pe si nou oule ki sa profesyon i vin enn ki a la oter.

Sekirite pei i ankor en problenm.  E sa i lye direkteman ek sa problenm drog, kot bann droger ki pa oule travay, i pas zot letan vol tou keksoz dimoun, pour vann pour ganny ase eroin pour satisfer zot adiksyon.  Akoz menm sa bann ki lo methadone i annan ki ankor pe servi eroin.  E sa sityasyon i menas sekirite pei e pe detri Lendistri Tourizm.

Mr. speaker avan mon terminen les mon a fer en pti tour lorizon lo mon distrik Glaçis.  Mon’n pouse pour ki semen larantre North East Point i agrandi, e mon kontan ki travay in komanse tar lannen pase.

Me pour semen La Gogue, mon pa satisfe akoz CEO Land Transport pa’n gard son promes ki i ti dir, pour komanse premye, pour komans premye faz lafen lannen pase, e ni menm dir nou ki retar zot in gannyen

Re lokasyon Day Care in konmanse e mon swete ki par zen sa lannen i a vin operasyonnel.  Nou ankor pe negosye pour ganny en morso teren dan Sant Glaçis pour fer bus shelter, pour lagrandisman laplenn foutbol e finaliz fasilite pour bann peser.

E mon krwar ki la ki nou’n reisi kre en Lasosyasyon Peser pour distrik Glaçis, keksoz a bouz en pe pli vit.

Mwan menm ek DA nou’n diskit 8 proze ek PS Gouvernman Lokal, ki nou espere a ganny konmanse byento.  Me nou ankor annan 3 proze semen ki anba negosyasyon pour ganny way leave.  1 i kot Child Minding North East Point e 2 lezot glacis menm.

Lo kote land bank mon swete ki, travay i a kontinyen pour met lenfrastriktir e ki zabitan Glaçis ki kalifye a ganny asiste ek en morso

Mon ti a kontan fer resorti ki sa zafer later ek lakaz kot sa Minister, i toultan reste en sekre, e sanmenm Minister ki pli difisil pour travay avek.  Si ou pa vreman pouse pour ganny lenformasyon pour ed ou dimoun, ou pour reste dan fernwar, akoz bokou fwa ou pa ganny korperasyon depi nivo PS CEO ziska sa zofisye pli ba.

Kot Flat Malaysian travay in sipoze komanse nenport ler. Me nanryen pa ankor ganny fer.  2an ki’n arive la.

Lo lot kote dimoun ankor dan lensertitid an sa ki konsern, sa lanons ki’n ganny fer par PUC lo koupir delo, letan danm i ganny, travay lo danm i kontinyen.

Msye Faure pa’n dir nanryen lo la e ni PUC ziska prezan pa ankor vin devan pour dir ki mannyer zot pe plan pour distribye delo dan sa lepok.  Wi nou’n dir rezerve, aste basen, be eski dimoun pour kapab rezerv delo pour 2mwan?  Bann Letablisman Touristik osi i anvi konnen ki mannyer distribisyon pour ete.

Travay pour rektifye, bann problem kot lekol Glaçis i ongoing, e i pe pran plis letan ki i ti’n prevwar.  Headteacher ek bann lezot staff pe fer zot mye pour vey zanfan, a tou moman pour ki zot pa ganny dimal.

La Mr. Speaker mon ti a kontan lans an lapel ek Minister Ledikasyon, pour fer tou demars posib pour ki bann travayer, pour bann travayer Cleaning Agency kot Lekol Glaçis i ganny peye zot  Trezyenm Mwan Saler.

Ler ou fer demars al kot Minister, Minister i dir ou Trezor.  Ler ou dir Trezor, Trezor i dir ou papye.  Mon pa konnen si papye prezan pour dir ou kankrela, me i reste ki sa bann dimoun pa ankor ganny peye zot Trezyenm Mwan Saler saler ozordi le 4 Mars.

Mr Speaker an konklizyon mon anvi terminen en disant ki pour Sesel bouz devan, fodre nou redonn sosyete en direksyon pour ki dimoun a ganny konfyans, e santi en soulazman.

Larzan Kont Piblik fodre byen ganny zere.  E fodre Gouvernman i rod nou bann larzan ki’n disparet parey sa 50 milyon Dolar e sa bann ki Irish in donn bal ladan e retourn dan Kof Leta.

Aret tret Seselwa konman sitwayen 2em klas, e redonn Seselwa son idantite!

Fer en letid serye pour rode konbyen etranze ki pe travay san en GOP e pran mezir neseser, e ofer sa bann plas Seselwa ki pe rod en lanplwa.

Msye Faure si vreman ou kontan Sesel, fer loner tou Seselwa, rann nou, nou pei e les pep Seselwa elekte en Prezidan, akoz Mazorite dimoun in dir in ganny ase e ‘’enough, is enough!’’  Mersi Mr Speaker.

 

(APPLAUSE)

 

MR SPEAKER

Mersi Onorab Esparon.  Mon a pas laparol avek Onorab Noline Sophola

 

HON NOLINE SOPHOLA

Mersi Mr Speaker.  Bon  apre midi tou Manm Onorab, zabitan La Digue ek zil pros e tou dimoun ki a lekout.

Msye Speaker, Nou pei i dan en moman gran latristes. Dan sa moman dey mon santi kantmenm sa sans linite Nasyonal, sa sans senpati ki anmenn nou ansanm ler nou perdi en pros. Mon bezwen profite pour ankor enn fwa eksprim mon santiman senser dan rekonsilyasyon Nasyonal. En keksoz nou bezwen touzour gard anker. Dan nou pti pei nou pe viv parey dan en gran fanmir.  Mr Speaker i pour sa rezon ki dan mon lentervansyon, mon pa pe fer lakizasyon kont personn. Sakenn de nou dan sa Lasanble i lib pour fer son prezantasyon dan son fason. Tou Seselwa i konpran sa tre byen.  Mon tre fyer mon en Digwa akoz nou vwar solisyon e nou pe pran bann nouvo loportinite.

Diskour Leta Lanasyon i devret ganny regarde konman en moman tre enportan dan lavi tou Seselwa akoz sa i moman ki nou pou konn bann progre ki nou tou ansanm,  koman en Pei ou koman en Nasyon, nou’n kapab akonpli  ouswa ki nou pa’n kapab akonpli dan lepase e ki reflekte dan nou prezan. E osi ki difikilte nou’n rankontre, an kontan solisyon pour sa bann lobstak.

Osi tre enportan i vizyon pour le fitir. E tou sa anba direksyon Prezidan  Danny Faure, dan tou son sazes, ansanm avek lezot partner sosyal, ekonomik e politik.

En vizyon kot in konmans rapel lenportans travay dir ansanm dan linite e larmoni Nasyonal, san bliy souliny lenportans lafanmir dan tou sosyete, e pli spesifikman dan en pti sosyete parey nou sosyete.

Sa ladres  in ganny delivre par en zonm, senp, ki krwar dan Prensip parti SPUP e ki ozordi nou pe apel li United Seychelles.  Sa parti ki nou defen per fondater France Albert René e lezot Seselwa determinen ti kree e ki zot krwar ladan e nou osi nou krwar ladan.  Se touzour avek en lespri linite, respe, latransparans, rann kont,  latolerans ki nou Prezidan Danny Faure in tenir vreman for pour adres lepep Seselwa dan son diskour Leta Lanasyon le 26 Fevriye.   En diskour ki  ranpli ek lespwar pour tou sitwayen nenport ki laz ki ou ete.

Prezidan in met gran lanfaz lo travay dir, akoz i krwar ladan.    Akoz i annan sa vizyon kot i anvi vwar pei progrese  kot tou dimoun san leksepsyon i bezwen kontribye dan  devlopman  dan tou laspe  pei  e benefisye an retour osi, vedir  sakenn dan son domenn ki’n spesyaliz ladan.  Swa dan lekonomi, sosyal, politik, spirityel e lezot ankor. Parey Angle i dir,’’he has not left any stone unturne’’ dan lavi nou Nasyon.

Sa swe Prezidan Faure, i anliny avek tenm Nasyonal Sesel sa lannen ki “Valoriz kiltir travay dir.’’.  Dan Konstitisyon United Seychelles paz 3, i dir ki nou  valoriz travay dir e osi bann diferan abilite ek talan.  Si nou tou nou zwenn ansanm  dan sa prosesis, nou pou ede fer Sesel al an avan. Nou pou vwar en Sesel kot tou dimoun pou pli fyer e pli prospere.

Annefe Prezidan in abord diferan tenm an konmansman par lafanmir e an pourswivan par konstriksyon lakaz, size kout lavi ki ser, lapovrete dan nou pei, lasante nou popilasyon, sityasyon lanplwa, ledikasyon, konstriksyon lenfrastriktir pour fitir devlopman, sityasyon Air Seychelles, sekirite dan pei e dan nou Zone Ekonomik Eksklizif.

Me Mr Speaker mon pa pou kapab koz lo tou sa la akoz i pou arive ziska demen bomaten.  Si nou analiz byen son diskour kot in devlop sakenn sa bann tenm, nou pou trouve ki in totalman senser avek nou pep. Pandan  ki Prezidan ti pe devlop sak tenm, in komans par dir ki sikse nou’n fer, ki difikilte nou’n rankontre e ki mannyer nou pou fer pour sirmont sa bann defi.

Si nou analiz egalman byen diskour nou Prezidan, nou pou trouve ki definitivman ki nou Gouvernman i annan en vizyon kler. E sa vizyon se pour asir en devlopman armonye nou pei, e ki mannyer fri sa devlopman i devret benefisye sak fanmir Seselwa. Sa i reflekte tou senpleman dan bann mezir ki Gouvernman pe propoze pour adres nou bann defi e ki tous tou kours nou popilasyon.

Mon repete, lakle nou sikse dan sa prosesis devlopman i trouv dan travay dir, linite Nasyonal, lape e sekirite, lonnekte, e nou konpasyon anver sa ki pli feb ouswa sa ki’n tonbe dan son parkour.

Gouvernman, anba direksyon Prezidan Faure, in pran en seri mezir pour ki sa i arive.  Gran mazorite Seselwa i kontan travay e krwar dan kiltir travay dir.  Se sa ki fer nou sikse koman en Nasyon.

Legzanp i la devan nou, preski dan tou distrik, Mahe, Praslin ek La Digue, nou annan bann biznes ki’n ganny kree. Ler mon get La Digue, bokou dimoun i’n lev-e e debrouye ;  serten par fer de travay par zour e ozordi zot bann fanmir i fyer zot lakonplisman.  Bokou zot i annan zot pti biznes zis pou nonm enn de guesthouse, taksi, vann fri, bato, laboutik, “take away”, salon seve. E tou sa bann biznes i ganny administre par zot menm.  Gouvernman e Lotorite Distrik pe kontinyelman anmenn devlopman ki pou kree lanplwa pour nou popilasyon. Avek louvertir bazar, in annan plis peser ek fermye ki an konpetisyon pou fer pli byen. Tou sa bann loportinite pou  fer biznes in ganny mete par sa Gouvernman ki o  pouvwar e Digwa in profite pou avans devan.

Prezidan e son Gouvernman in pran bann lezot linisyativ pour amelyor lenfrastriktir pou bann Digwa.  Sa se sa proze amelyor lenfrastriktir lo lasose kot i annan bokou congestion, sirtou pandan larive bann bato pasaze e kargo alafwa. La avek sa travay deplasman bato ki transport  karbiran,  i pou ganny bouze lo en lot kote lasose,  dimoun a trouv zot plis an sekirite e lasose a mwen ankonbran.  Pou le moman i annan serten nou ki pa pe tro kontan sa ki pe arive me a lavenir nou vwar son fri ladan ki in aporte.

Sa proze sewage ki’n fini demare, i pou en gran soulazman pour  Digwa, akoz zot  ti’n fatige  pas dan problenm septic tank ki plen  dan sezon  gro lapli, ki kout en fortin pour ponpe e parfwa sa fasilite pa ti aksesib.  Sa proze  pou ed zot redwir sa gro depans me mon pe demann korporasyon tou dimoun pandan ki travay i plis an progre.  Mon koz lo koupir kouran ki Digwa i sibir de tanzantan  e parfwa ki ale pour de zour, sa i vin ek en gran kou pour popilasyon. Nou Gouvernman i’n ekoute e in azir  par  demann PUC pou met en nouvo kab elektrik ant Praslin ek La Digue; sa i a vin konman en backup pour nenport evantyalite ki kapab arive. O non tou Digwa mon dir mersi nou Gouvernman pour ekout nou lavwa.

Annan en lozman konvenab i en dwa fondamantal sak fanmir. Depi 1964, sa ti vizyon parti SPUP e i ti pli vizib an  1977. Ozordi sa drwa fondamantal i aparet dan nou Konstitisyon e Gouvernman i  fer sir ki sa vizyon i ganny materyalize.  E United Sesel pour kontinyen avek sa menm prensip.

Minister pour Lakaz ek Later ti met an plas serten kriter ki konpri sistenm pwen pour ki  en dimoun i kapab ganny asiste ek en teren. Bokou dimoun ti rankontre plizyer difikilte sirtou ler ti ariv lo kote saler.  La Digue i parmi bann distrik ki ti pli vilnerab kot saler ti konsernen. Ek sa nouvo lapros plis dimoun a benefisye.

Plizyer nou, nou’n  koz lo sa size alokasyon pwen ; nou’n sizere ki mannyer pou amelyor.  Prezidan Faure parey son labitid  in ekoute e apre in egzekite.  Mon pou zis repas lo la pou petet ki serten nou pa’n tro byen konpran.  Prezan olye R15mil reveni par mwan, sak personn pou bezwen R12mil pour en sonm R550mil.  Sa amelyorasyon pour ed plis fanmir pou ganny en lozman.  E sa i pa pou aret la, akoz proze lakaz ki’n inisye pour sa ki reveni i ankor pli feb, pou kontinyen.  E si fodre revizyon a ganny fer, ler moman in arive.

Dan sa proze 24 lakaz dan 24 mwan dan 24 distrik, mon fyer pour dir ki sa lannen, travay a konplete  lo La Digue e byento bann fanmir kalifye a ganny zot lakaz.  Zot osi zot a benefisye parey lezot Seselwa.

Prezidan in fer sir ki bann lenfrastriktir parey semen, delo ek elektrisite i ariv kot sa bann lakaz.  E parmi bann devlopman zis pou nonm en pe lannen pase, 4 semen ek drenaz in konplete e sa travay pou kontinyen sa lannen. Nou annan lespwar ki plis devlopman pour arive lo nou zil.  Prezidan mon konnen ki bokou fanmir i rekonesan pour sa komitman ki ou Gouvernman i annan o size lozman pour Seselwa. Mersi pour sa.

Tou fanmir ti a swete war zot zanfan grandi pour vin en bon sitwayen. Sa i en ideal me i pa touzour fasil dan en monn ki plen avek bann diferan fleo, e Sesel pann ganny eparnye.

Nou bann zanfan, i nou trezor e zot reprezant lavenir parey Prezidan ti dir.

Sa sif 119 ka lo labi zanfan ki’n ganny prezante, selman pour sa dernyen lannen, i vreman efreyan. Ki pe arive avek nou sosyete?  Konman en paran, en sitwayen Seselwa mon fremir par sa bann sityasyon. Me pinisyon  tousel pa pou fer gran diferans. Mon krwar ki nou bezwen asosye pinisyon e ledikasyon pour bann abizer;  e edik osi bann viktim potansyel, ki mannyer pou evite met zot lekor an risk.  Annan en progranm reabilitasyon pour bann viktim. An plis edik nou popilasyon lo bann valer  imen parey respe, latolerans e ki aksyon zot devret pran an ka ki zot annan soupsonn ki  labi lo zanfan pe arive dan zot kominote.

Parfwa nou oubliy nou viktim, ki si nou pa donn zot tretman neseser zot osi zot pou vin bann abizer. Paran mon demann zot fer letan pour ekout e obzerv zot zanfan. Vin zanmi ek zot zanfan e  la zot a konn  zot zanfan pli byen pour kapab sov zot.

Bokou nou, nou zis kondann bann zenn  ki tonm dan sa fleo drog ek lalkol. Lavi pa fasil pour serten zot ki’n vin viktim.  I  pa fasil pour zot bann pros  pour viv avek zot toulezour e pour pei an zeneral. Pei i depans bokou akoz Gouvernman i anvi vwar en sanzman pozitiv dan zot. Laz ki zot ete, se zot ki bezwen pe kontribye dan lasosyete e non pa lasosyete pe depans lo zot. Nou tou annou zwenn ansanm pour donn zot sa sipor.  Aret kritik  sa sistenm methadone, akoz i annan son laspe pozitiv ladan. Solisyon pa zis pini!

Nou kapab war dan plizyer progranm e temwannyaz  kot in montre travay ki pe ganny fer e rezilta ki pe anmennen. Nou kapab ede par aksepte zot dan lanplwa, edik zot e ankouraz zot pour al fer tretman pour  ki zot a  kapab kontribye dan lasosyete.  La Digue pa’n ganny eparnye avek sa fleo drog ek lalkol. Nou osi nou pe rod meyer fason pou ed bann viktim labi sibstans.  Se pour sa rezon ki mon pou touzour donn mon sipor pour ed sa group vilnerab dan lasosyete.  Me mon dir ki nou kapab amelyor lafason fer.

Me mon krwar ki Gouvernman i bezwen annan en meyer sistenm lentelizans e  agrandi  plis  sipor  rezyonal  pour  ede redwir lakantite drog ki rantre dan pei.

Gouvernman Prezidan Faure i’n met en moratorium lo licence prodiksyon lalkol. I pa’n zanmen dir pa servi lalkol, me i dir servi  an  moderasyon  akoz tou keksoz ki nou mal servi i annan son reperkisyon lo nou lavi.  Sa kestyon lalkol, in deza ganny debat lo la dan Lasanble, e nou Gouvernman in ekoute, in obzerve e la i pe azir.  Nou sa zenerasyon ki la, annou garanti en lavenir pour nou bann zenn ki pe grandi.

Sa Lalwa ki Prezidan in koz lo la lo lalkol, mon konnen ki bokou nou pa pou kontan; me a lavenir nou pou war ki ti en bon linisyativ. Kan nou zenn zenerasyon pa vwar lakol dan tou landrwa, zot lanvi pour servi pour mwens. Parey  sanson David Philoe i dir, annan ‘’Lespwar pou nou zanfan demen’’.  Alor annou fer li pour nou zanfan, si vreman nou kontan zot.

Preski toulezour dan Sesel, i annan en dimoun ki kit nou avek maladi kanser. Nou tou nou konnen ki  napa gerizon me pour sa maladi me nou kapab fer bokou lo kote prevansyon.

Alor sa lapel ki Gouvernman pe lanse par ankouraz tou dimoun, sirtou bann ki annan en manm zot fanmir ki’n vin en viktim, al fer zot tes ki tre enportan.  Zot a ganny led boner si i neseser.  Mon pe enplor tou dimoun pou sezi sa loportinite fer zot tes boner.

Mon apresye vivman, sa lide annan en Lopital spesyalize. I pou anmenn gran benefis lo nou pei. I pou premyerman redwir depans finansyel  pour pasyan al aletranze, e  de lot kote pasyan pour pli pre avek zot fanmir. Sa dan li menm i en terapi dan prosesis tretman. E i pou kree plis lanplwa dan domenn medikal.

Digwa pandan ki mon pe koz lo lasante mon dir zot pa dekouraze, mon pe asire  ki Lopital Logan pou ganny konstrir, e la mon demann nou gouvernman pou akseler, travay pou Digwa ganny nou lopital o pli vit posib.

Mr Speaker, malgre tou sa defi ki Minister Ledikasyon pe fer fas avek, tou personnel konsernen pe travay dir ansanm pour anmenn  amelyorasyon. Bann lekol pe prodwir ase bon rezilta depi primer ziska  post segonder.  Avek larive plis ansennyan, annan plis resours apropriye e sa kiltir travay dir, san dout nou standar pour amelyore  e rezilta pour meyer.  Zenn profit zot letid.  Nou Gouvernman pe fer tou posib pour zot. Sezi tou loportinite.

Mr Speaker, pandan ki mon ti pe prepar mon larepons pour sa ladres leta lanasyon, mon’n realize ki pep Seselwa i en pep beni , akoz napa bokou pei o monn ki zot Gouvernman i pran byen swen ek son sitwayen. En Gouvernman ki annan en vizyon byen kler, ki anglob  tou dimoun san eksepsyon.  En Gouvernman ki annan son pep aker, e tou sa ki i fer, i fer li dan lape.

Mr Speaker, pou terminen,  mon demann tou pep Seselwa, san eksepsyon annou met tou nou diferans de kote.  Annou zwenn ansanm pour travay pour en sel Sesel. Zwenn avek Prezidan Faure, fer li vin pli for ankor akoz se li sa sel zonm ki pou kapab anmenn Sesel lo sa lot nivo.   Se li sa zonm ki nou bezwen krwar ladan si nou anvi  kontinyen vwar  en Sesel meyer pour nou zanfan e tou Seselwa an zeneral.  Mersi Mr Speaker.

 

(APPLAUSE)

 

MR SPEAKER

Mersi Onorab Sophola.  Onorab Jany Letourdie.

 

HON JANY LETOURDIE

Mersi Mr Speaker.  Bonzour tou dimoun.“Se nou lepep Seselwa ki fer Leta nou Nasyon.”  Sa se bann parol Prezidan Faure dan son 3enm diskour Leta Lanasyon le 26 Fevriye, e i vreman vre.

Alors?  Alors ki Leta Lanasyon i sipoze donn nou en apersi lo kondisyon pei e souliny bann problenm ki pli serye.  Lepep Seselwa i osi ekout avek gran latansyon pour konnen ki bann progranm ki’n ganny met an plas pou remedye oubyen soulaz sa bann defayans.

Napa okenn dout ki Leta nou Nasyon an 2019, i enn ki reflekte bokou problem relye avek bann fleo sosyal.  Kestyon ki laplipar Seselwa ki konsernen i poze se, eski vreman nou lekonomi pe kontinyelman grandi?  Apre zot osi demande, be oli sa vizyon kler?

Ser lepep Seselwa, letan i pas vit.  Deza sa 6enm Lasanble in antre dan son 3enm lannen travay.  En travay ki in angaze pour fer en servant tou mwayen posib pour egzers son manda sipervizyon, pour anmenn latransparans, rann kont e promouvwar la bonn gouvernans.  Se pour sa rezon, ki nou isi dan sa 6enm Lasanble e sirtou nou isi lo sa kote latab Lopozisyon nou pe dir “annou serye kot i konsern planifikasyon e byennet nou pei!”

Mr Speaker nou sipoze pli pti ki Sesel, alors nou tou dan en fason ou en lot, nou annan en fir oubyen en garson, en mari oubyen en fanm, en vwazen, oubyen en frer oubyen en ser, oubyen menm enn dan nou fanmir pros ki pe ganny kontrole par drog oubyen lalkol e pe rann lavi nou fanmir malere akoz nou pe divize.

Letan ki APDAR, Centre d’Accueil, DURNS, CARE e lezot ankor pe esey ed nou bann dimoun, mon pa’n antann en plan ki pour konplimante e donn zot sa lespwar ki poudir ankor dan tan letan lenportasyon drog dan nou pei i ava redwir konsiderableman.

Alors bann ki’n geri ava napa posibilite pour retonm ankor e bann ki pa’n zanmen servi pa ava ganny tante pou seye.  Akoz ler napa, nou pa konsonmen, o kontrer ki ou tande,’’Drog zanmen pour aret vini Sesel! “Akoz sa se fason petet ki larzan i ganny pli vitman e pli bokou.

I annan 3 fason pour drog antre dan Sesel mon mazinen, swa i pas anler, swa ater, swa lo delo.  Me eski Lotorite konsernen in annan en progranm serye pour entansifye zot sirveyans oubyen se zis met sat vey lagres.

Pep Seselwa eski nou realize ki si nanryen pa ganny fer nou pour napa ase zenn Seselwa pour pran la relev demen?  Zis mazinen ki pour arive, si sa zenn zenerasyon i vin depandan lo sibstans ek lalkol?

E pa bliye sa zenerasyon eroin i komans depi ler pti baba li, depi ler i ankor dan vant e ler i ne pov baba in fini ganny son stanp.  Bann zenn fir ek zenn garson Seselwa, mon demann zot pour zot pran konsyans, sa pei i pour zot osi, se zot ki bann vre Seselwa, alors pa les nou tonbe e pa les personn vin pran sa gouvernay dan zot lanmen.

Mazinen ler ou ek ou fanmir i ganny swazir pour ganny met lo lalis sa ki pli mizer sa i pa en reisit e ni en laglwar, akoz souvandfwa set akoz ou menm ki’n swazir sa stati.  Ou a pe fer martir sa enn ki reste anler laba dan leo e ki pe leve granmaten toulezour pour pran bis pour al travay Anvil.  I pe kontinyen pey tax pour donn ou lasistans, be selman elektrisite malerezman pa ankor arive kot li akoz semen konvenab pa ankor fer.  Li i napa kouran e ou ki annan ou pa kontribye e ou pa ed ou fanmir pour peye.  Sa pa apel responsab e i pa byen.

Mr Speaker si vreman i ti annan en volonte pour sov sa pep kont lalkol e bann maladi ki asosye avek labi lalkol? Si i vreman annan en volonte pour sov sa pep kont sibstans ki pe fer deklinen nou lazenes, fodre Gouvernman Egzekitiv i vin ek en plan agresiv ki pour met ledikasyon dan latet nou dimoun olye les zot kontinyen met bann lezot lefe artifisyel.

Fodre zot aret dir dimoun, aret fer dimoun krwar ki LDS pa anvi zot ganny zot methadone, akoz si sa ti vre, nou ti ava’n lev nou lanmen pour montre nou lentansyon kler e nou ti a’n vot kont.  Nou krwar dan esey plizyer metod ki a la resers en solisyon, me selman les mwan osi dir Mr Speaker ki ler en zofisye APDAR i ganny atrape pe fer trafik drog, sa pa anmenn en bon konfyans pour son landrwa travay.

Eski sa bann lalkol ki vann byen bonmarse ki avek R100 ou kapab aste 4 pti flakon?  Eski i pe fer dibyen bann ki pe konsonmen?  Eski en letid profon in ganny fer pour vwar si zot vreman lo standar?  Eski nou, nou pa pe donn lanmen touy nou dimoun par donn laysenns an bonnavini pour sa bann kalite prodwi?

Mr Speaker be ki ditor i pour fer nou Seselwa si en zour napa ankor lakanbiz baka ek lapire?  E si en zour nou nepli annan ankor bann Pti Ponm, Pti Zonn, pti ‘’Windowlene’’ e tou sa bann prodwi a baz lalkol ki pa standar lo nou letazer dan magazen?

Egzakteman!  Sa ki lepep Seselwa i osi anvi tande se ki tou led posib, tou mwayen e demars pour ede konbat drog ek lalkol pe ganny eksplwate, e non pa zis rod fon pour konstrir batiman pour bann adikt, akoz sankwa nou pour annan zis building pe debout Mr Speaker, me viktim pour kontinyen ogmante san annan gran sekour pour zot.

Leta nou Nasyon i konsern osi fristrasyon dimoun lo size lakaz ek later.  Mon krwar nou tou ki la anndan nou’n bezwen lir omwen enn sa bann let ki Minister Labita ek Lenfrastriktir in ekrir bann aplikan pour lakaz ek later.

Apre ki zot in espere pour en kantite letan, i senpleman dekourazan pour resevwar en larepons de favorab ki anons zot ki zot pa’n kalifye e sa in plonz zot dan en lot depresyon ankor.

Laplipar aplikan mon krwar pa’n kalifye e alors zot pour bezwen rekomans fer en lot demars fer rapel oubyen al lo en lot Scheme ki zot pa konnen kan pour abouti.

Granmoun i toultan dir ‘’en promes i en det’’ me depi 2017 Prezidan Faure in fer en promes avek pep Seselwa pour delivre 24 lakaz dan 24 distrik dan 24 mwan.  24 mwan mon krwar i fer 2an en, e la nou’n ariv 2an 3 mwan e zis 178 younit ki’n ganny fer dan zis 5 distrik.

Prezidan i dir nou sa plan ti enn ki tre anbisye dan tou son laspe.  Alors mon panse ti en bon rezon ki i ti’n merit fini.  La nou pe dir, nou pe ganny dir ki 350 younit dan 16 distrik pour konplete avan lafen lannen.  Anfen sa voyaz in pridan i pa’n dir nou ki lannen pour konplete.

Mr Speaker letan nou antann tou sa leskiz, teren i annan bokou ros, kontrakter pa ankor mobilize, akse ek later in tarde, sa pa i donn nou en lendikasyon lo move planifikasyon?

Dimoun i konfize ek sa sistenm pwen.  E letan zot esey demande konbyen pwen zot annan, e akoz zot anvi konnen, pour konnen ki lezot keksoz zot devret fer.  Personn pa kapab dir zot.

Mon’n antann Minis dir ki sistenm i efikas e ki la, i la pour fer sir ki person pa ganny defavorize, me ki ou trouve se dimoun ki pe kontinyen peye depi plis 14an pase pa ankor ganny ase pwen pou kalifye menm.

Dimoun i marse partou pour rod lakaz pour zot lwe akoz zot pa pe ganny okenn rekour ek sa Minister e la ki zot vwar?  Zot vwar plizyer lakaz ki ankor vid pour en gran peryod letan oubyen bann ki’n fini ganny lwe avek lezot etranze, se sa ki fer dimoun fristre akoz zot ki vreman bezwen sa lakaz, zot pa pe gannyen, e sa bann ki’n gannyen pa pe servi.

Mr Speaker konmela        i annan tout sort teknolozi e dimoun i kapab servi plizyer kalite materyo pour fer son lakaz.  Me les dimoun fer son lakaz par rapor a son mwayen ki i annan si i anvi.  Olye ser li dan sa Sistenm Pwen les li debourye sirtou si i annan son later, esey ed li pour ganny teren si i napa.  Minister i merit gid li lo kote Planning, lo kote delo ek elektrisite e kalite materyo ki i pe servi, pou fer sir ki i pa an defo, sa i a kapab petet vin en gran soulazman lo demann pour lozman.

Me si ti vreman annan en volonte pour fer sir ki zabitan Roche Caiman, sa distrik kot mon reste i annan lakaz pour akomod tou sa bann fanmir ki’n agrandi pandan sa 25an, Gouvernman Egzekitiv ti’n devret vwar sa koman en priyorite.  Teren ti annan Mr Speaker me zot in prefere vann ek tou zot bann dalon.

Mr Speaker Pangia Beach in montre zot ki mannyer pour fer 4 younit dan 1an.  Nou zabitan Roche Caiman nou ankor pe langi pe esey forse pou rod lespas pour fer nou 24 younit!  Sa i byen.

Letan mon antann Prezidan Faure koz lo nouvo Lopital spesyalize Providence, en sourir i vin lo mon lalev akoz mon mazin mon koleg Onorab Roucou, akoz i ti anmenn sa Mosyon dan Lasanble parske li koman en profesyonnel lontan i ti’n vwar poudir sa nesesite ti bezwen.  Sa i byen, Me Mr Speaker Minister Lasante in annan en bann defayans ki’n egziste depi kektan ki pa ankor kapab ganny adrese!

File pasyan ki kontinyen perdi oubyen ganny tronpe avek en lot.  Bann malad ki kontinyen esper pou plis ki 3 erdtan avan vwar en dokter.  Servis lanbilans ki kontinyen ankor en problem.  Nivo lizyenn dan Lopital ek bann klinik i deplorab, mon pe koz par leksperyans tou la Mr Speaker.  Lekipman ek akseswar ki manke oubyen ki’n kase ki fodre ganny ranplase.

Mr Speaker nou pa pe egzazere, akoz nenport moman ou kapab zwenn en dimoun ki rakont ou oubyen ki’n met lo Facebook pour konplent move servis ki in gannyen avek Minister Lasante.

2 semenn pase en msye aze ti sorti Anse Royale pour al son apwentman kot twa ver, me son transpor ti’n pri dan trafik akoz sa aksidan ki ti’n arive Providence.  Son apwentman ti 9er e li i ti ariv 9er en kar, dokter pa ti vwar li e ti fer li al se li e ti dir li retourn lopital son semenn prosenn.  Sa i pa akseptab!  E i fer dimoun vreman ankoler.

Mr Speaker letan ki bann travayer etranze pe antre sorti dan nou pei, parfwa zot annan zot GOP, parfwa zot napa.  E menm zot plas travay i garanti, dan lot kote en 20tenn dimoun pe ganny fer redundant kot Eden Island parmi i annan ki’n travay pour plis ki 10an.  E aprezan zot vwar zot san lanplwa avek loan pour peye e zanfan pour sonnyen.

Ki leta lespri sa endividi ler i aprann ki poudir en etranze ki’n pran son plas?  Seselwa i kontinyen ganny defavorize pour etranze kot i konsern lanplwa e personn pa pe ekoute.

O kontrer en Tenm Nasyonal i traverse i dir nou “Valoriz travay dir!”  Mon napa okenn problenm avek sa Tenm, me fodre i pa reste zis en Tenm.  Fodre fer sir ki tou Seselwa i pare pour li travay.  Fodre fer sir ki tou Seselwa ki pare pour li travay i ganny sa loportinite pour fer li.

Letan en Seselwa i raport kot Minister Lanplwa akoz move kondisyon travay oubyen in ganny maltrete avek son boss,  fer sir ki zistwar in ganny ekoute tou lede kote pour kapab pas en bon zizman.  Fodre pa zis pran zentere anplwayer akoz li ki dir ki pour fer e li ki i annan Pouvwar finansyel.

Lozman, lasante, ledikasyon ek lanplwa i devwar en Prezidan ek son Gouvernman pour met a dispozisyon son pep e i drwa sa sitwayen pour li gannyen!  Aret anglouti lespri dimoun pour fer li krwar sa i en faver e personn pa ti pour fer sa apard li!

I form parti travay sa Prezidan pour okip byennet son pep, me selman i annan i prefere fer politik avek.

Leta nou Nasyon Mr Speaker ozordi i se ki, an se moman i annan 2 kalite santiman parmi nou – la.  Sa i vin apre lanmor Msye Rene.  Bann ki siport li, zot pa kapab aksepte ki en komanter negativ i ganny dir kont li.  Be sa i normal.

Be pour bann ki krwar poudir zot in ganny maltrete e zot in ganny mal fer anba son rezim, definitivman zot pa pour kapab pran tou sa laglwar e sant ‘’Alleluia pour’’ li.  Sa osi i normal.

Mr Speaker mon konnen kantmenm ki poudir i difisil pour aksepte lopinyon dimoun, dan en fason kalm malgre drwa lekspresyon i egziste.

Dan bann diskour Leta Lanasyon Msye Rene ki SBC pe broadcast sanses, nou kapab tann li pe pres lo ‘’lape’’, ‘’viv dan lape’’ e ‘’ale anpe!’’  Sa i nou radyo ek televizyon Nasyonal, alors swa ou ekoute oubyen ou tennyen.

Me mon pour mwan Peter Tosh enn parmi mon bann gran santer prefere i dir ‘‘I don’t want no peace, we need equal right and justice!’’ Se selman apre ki lazistis in rennyen, ki lape i pour vin volonter!  Se sa ki’n kondisyonn Leta nou Nasyon pour en kantite letan dan sa pei.  Lenzistis Mr Speaker.

 

(APPLAUSE)

 

HON JANY DE LETOURDIE

Ozordi Leta Lanasyon in ariv dan demann pardon pour bann mal ki Msye Rene in fer.  Mon krwar dan demann pardon mwan Mr Speaker.  Vreman.  Me fodre zot vreman serye e senser akoz i lour sa pour zot anmennen, zot konnen? Huh!

Pour zot ganny le pardon, fodre zot kit ater tou sa bann viktimizasyon ek bann ditor ki zot Ero in servi kont sa bann dimoun akoz sa dimoun pa ti siport li!  Zot dan US, les tonbe politik’’ ek nou, pa ek nou’’ e aret ziz dimoun akoz son kouler politik!  Ler zot in prouve ki vreman zot in kapab vreman let go, la zot ava ganny le pardon!

Mon demann Prezidan Faure pour ouver en liv konplent dan sak distrik e la bann sitwayen ava vin ekrir ladan e zot a konpran ki difikilte lepep Seselwa i gannyen, i rankontre.  Ankouraz zot, ankouraz sa bann dimoun pour ekrir e met devan bann problenm reel!

Pep Seselwa, LDS i la pour zot.  Se LDS ki pour toultan pe rod sa meyer pour zot!  E pour lenstan, LDS pour touzour met zot dan laklerte lo Leta Lanasyon!  Mersi Mr Speaker.

 

(APPLAUSE)

 

 

MR SPEAKER

Mersi Onorab Letourdie.  Mon annan en pti pe letan me solman mon krwar in ler pou nou pran en Break. Nou ava Break nou ava retournen 4er kot nou pou pran ankor 2 lot Manm avan nou rann lantenn 5er avek SBC.  Nou ava retournen 4er.

 

 

(BREAK)

 

 

 

MR SPEAKER

Bon nou ava kontinyen nou travay.  Mon ava pas laparol avek Onorab Sylvanne Lemiel.  Onorab.

 

HON SYLVANNE LEMIEL

Mersi Mr Speaker.  Bonn apre midi Mr Speaker.  Bonn apre midi tou mon bann Koleg Manm Onorab.  Tou dimoun ki a lekout.

Mr Speaker lannen 2018 in ale e kontrerman avek sa ki nou’n toultan tande avek serten dan nou Lasanble, nou pei pa’n koule, i pa’n faid.  Nou konman en Nasyon nou pa’n fel.  Wi Mr Speaker 2018 in al avek bokou bon souvenir, me in osi anmenn avek li sa ki move.  Sa i larealite lavi ki nou bezwen fer fas avek.

2019 in fer son laparisyon e pep Seselwa pe espere.  Pe espere ki i pour anmennen.  I annan ki pe mazin antreprann en nouvo proze tel ki konstri lakaz, antre dan en nouvo biznes, fonde en fanmir, marye e lezot ankor.

Parkont Mr Speaker, i pour kapab annan bann lezot evantyalite ki petet nou pa pe espekte ki pour kapab frappe nou.  Me dan tou sa ki pour arive, nou bezwen reste touzour pozitiv.

Mr Speaker, ler mon regard Prezidan Faure zour i ti pe delivre son diskour, mon’n vwar en zonm ki ti tre kalm, konfidan e portre en bon zimaz koman en vre zonm D’éta.  In vin ranforsi son mesaz koman en inifikater.  Prezidan in demontre rezilyans e i ankor pe tenir sa bann prensip United Seychelles.

Mr Speaker letan nou pe koz lo Leta nou Nasyon, permet mwan fer en letour dan mwan distrik.  2018 ti en lannen ki’n anmenn bokou defi pour nou dan distrik Anse Royale.  Me nou’n travay tre dir pour nou kapab sirmont serten sa bann defi.

Ler mon regard lo kote devlopman, nou kapab konstate ki in annan serten devlopman mazer ki’n arive dan Anse Royale par bann sekter biznes e prive.

Par egzanp nou’n vwar nouvo batiman ki pe héberge MCB.  Nou’n vwar SEYPEC ki’n fer amelyorasyon lo stasyon Petrol, Konstriksyon en nouvo batiman komersyal kot byento zabitan Anse Royale e bann ki reste dan Rezyon Sid Mahe a kapab vin aste lavyann fre dan en nouvo La Boucherie.

Lo kote devlopman dan nou kominote, nou’n kapab akonpli serten pti proze ki pe benefisye bann dimoun ki reste dan diferan sou distrik dan Anse Royale.

Par egzanp nou’n konstri bann bin site dan bann landrwa kot ti napa.  Nou’n fer amelyorasyon lo serten semen ki ti demann amelyore.  Nou’n osi kapab amelyor kondisyon serten lakaz ki ti dan move leta sirtou pour bann fanmir ki pli vilnerab dan nou Kominote.

Mon ti a kontan profit sa lokazyon pour mwan dir zabitan Anse Royale ki travay pa fini la.  O kontrer, i annan ankor bokou pour nou fer.  Nou pour vwar bokou plis devlopman pandan lannen 2019.  Byento proze pour konstriksyon 24 lakaz pour komanse e se Lakonpannyen Sai Fu Enterprise ki pour konstri sa bann lakaz ki sipoze konplete an Desanm 2019.

Nou pour osi vwar konstriksyon en stasyon tenny dife ki pour komanse e lezot pti proze kominoter dan diferan sou distrik.  Travay pour amelyor kondisyon nou bann semen tel ki semen Mont Plaisir e lezot ankor.

Mr Speaker, mon ti a kontan salye sipor e korporasyon bann zabitan Anse Royal, letan ki nou pe antreprann bann proze dan nou distrik.  Les mwan sezi sa loportinite pour remersye sa group dimoun ki ti reprezant bann zabitan pour proze semen ‘Grand Rivière’ ki ti fer letan pour zot al ansanm avek mwan kot SS Patrick Payet le 26 Desanm 2018 pour nou al diskite e rod fason pour nou ganny finansman pour nou kapab komans sa proze sa lannen.

Sa i fer ou vwar ki letan nou met politik de kote e nou travay ansanm pour en sel bi, sa i anmenn la reisit, e se nou kominote e zot menm bann zabitan ki benefisye.

Mon remersye zabitan sa rezyon osi pour zot pasyans.  Travay tanporer in ganny fer lo sa santye ‘Grand Rivière’ pour ki an ka lapli i tonbe, omwen sa semen i ava pli aksesib pour marse.

Dan ankor detrwa mwan, nou pour vwar komansman konstriksyon sa nouvo semen.  Zabitan Anse Royale mazinen ki dan tou sa ki nou fer, i enportan ki nou donn sipor e reste ini.  Linite i fer lafors.  Annou kritik konstriktivman e vin avek solisyon akoz kritik negativ san solisyon, pa pour anmenn nou lwen. Nou tou nou annan en rol pour zwe.  Nou devret travay ansanm e rod solisyon ansanm.

Mr Speaker, Sesel ozordi pe frot zepol avek bann gro pei.  Nou vwar nou Lekonomi pe kontinyelman amelyore.  Nou pe vwar bokou devlopman ki pe arive, lakaz pe kontinyen ganny konstri, me demann pour lakaz i kontinyen ogmante.

E la mon konstate ki fodre annan plis zefor pour fer sir ki sa bann proze i ganny swiv de pre e ki zot fini dan zot dele letan ki’n ganny prevwar.  Dan menm laliny mon vin lo bann proze kominoter.  Nou vwar ki i annan bokou retar akoz mankman mendev.  Mon pe ‘espere’ ki sa lannen sa i ganny amelyore e ki sa bann proze 2019 i ganny materyalize.

Mr Speaker statistik sorti kot Lazans ki pe lit kont lapovrete i montre ki lapovrete i egziste.  I dan diferan dimansyon isi dan nou pti pei Sesel.

I annan serten lapovrete ki lye avek lakaz, serten i bann ka lizyenn e osi lezot ankor.  Ler mon regard dan distrik Anse Royale, nou napa bokou ka, me sa enn de ki nou annan, i bezwen latansyon imedya, sirtou bann ki i annan a fer avek lasistans pour donn zot en meyer kondisyon lakaz.

Dan sa R20 milyon ki dan Bidze sa lannen, mon sir ki sa bann zabitan mon distrik ki tonm dan sa kategori pour kapab ganny asiste e zot a vwar en amelyorasyon dan zot kondisyon lavi.

Mr Speaker mon osi oule fer resorti ki bokou dimoun in deza ganny asiste avek swa reparasyon zot lakaz, oubyen konstriksyon en nouvo lakaz anba progranm ki Lazans Proteksyon sosyal i ede.

An tou nou’n asiste 28 fanmir pandan lannen 2018.  Mon oule enplor sa bann dimoun ki’n ganny asiste pour pran swen avek zot lakaz, pran letan pour okip zot lakour e anbelir li.

Fer zot lakour vin sa Fwaye ki pli konvenab e izyenik pour zot zanfan.  Pour bann ki ankor pe esper lasistans, annan pasyans.  E sa lannen menm nou pour travay pour fer sir ki zot ganny lasistans neseser.

Mr Speaker, Sesel i annan bokou dimoun ki ris.  Mon santi ki larises pei pa pe ganny byen distribye.  I annan tro gran lekar larzan e bann ki annan i reste toultan annan.  E sa ki napa pe kontinyen trimouse.  Nou bezwen travay plis pour kontinyen rod fason pour anmenn sa larises pour nou pep.

Mr Speaker, letan nou pe koz lo larises, mon konstate ki i ti annan en total R450milyon ki ti sipoze antre dan bidze Nasyonal atraver tax ki’n antre dan pos travayer, e sa in benefisye tou dimoun dan en fason ou en lot.

Zis pou note ki le 01 Zilyet 2019, ankor R50.6milyon sorti dan bidze Nasyonal pei pour ganny donnen koman allowances pour travayer ki’n fer 5, 10, 15 ziska 40 an, an montan.

Ankor larzan pour ganny mete dan pos travayer pour ede aranz en pe zot reveni ki antre kot lakour.  Mon espere ki avek sa larzan an plis ki travayer pour gannyen, zot a kapab met en pti mwenza de kote pour letan dir.  Fodre ki Seselwa i devlop en latitid anmas en pti larzan ki pour kapab servi zot menm pli tar.

Mr Speaker, tou dimoun ozordi i annan sa dezir e lanvi pour annan zot prop lakaz.  Mon rekonnet travay ki Minister ki responsab pour Later ek Lakaz pe fer, me i annan ankor bokou pour fer, akoz demann i kontinyelman ogmante.

Mon soulaze ki sa Minister in revwar serten kriter lo sa sistenm pwen later.  Avek sa sanzman, mon krwar ki plis dimoun dan mon distrik ki ti’n ganny dir ki zot pa kalifye, prezan zot ka a ganny rekonsidere.

Mr Speaker, letan nou get Leta nou Nasyon i enportan ki nou osi zet en regar lo servis ki bann diferan Minister i donn manm piblik.

Mon rekonnet ki i annan bokou travay ki pe ganny fer dan servis piblik.  Me i reste ankor bokou travay pour fer.  Mon konstate ki i annan ankor letarzi dan serten Minister.

Fodre travayer servis piblik i vin pli serye e donn en servis ki pli efikas e efektiv.  I annan de ka kot nou ti kapab donn en dimoun en repons dan en zour, oubyen dan 1 semenn.  Me nou pran plizyer mwan e menm lannen pour donn en larepons.  Sa i kree bokou fristrasyon.  Nou merit evite kree fristrasyon dan pep Seselwa e annou travay konsyansyezman e donn en pli bon servis.

Mon osi konstate ki fodre i annan pli bon kordinasyon ant bann Minister e bann Lazans sirtou ler pour pran en desizyon lo serten proze, swa pour en endividi oubyen pour en kominote.  In ler pour sak Minister e Lazans revwar zot bann Polisi e fer ki i an akord avek kanmarad.

Mr Speaker dan bann diferan Lalwa osi i bezwen ganny revwar pour fer sir ki zot vin azour e adres larealite sa Sesel ozordi.

Mr Speaker respe i en gran verti dan lavi.  Si nou annan respe pour enn a lot, tou keksoz pour marse e nou pour ariv lwen.

Letan mon pe koz lo respe, les mwan sezi sa loportinite pour demann pep Seselwa an zeneral pour egzers plis respe pour kanmarad.

I malere pour vwar ki ozordi an 2019, serten dimoun dan nou sosyete nepli konn viv.  Serten Seselwa i pran laglwar pour selebre maler son prosen.          I domaz ki Facebook in vin en platform pour serten dimoun maltrete e abes lezot !

Tou sa Mr Speaker, i fer mwan dimal.  Letan mon vwar ki leta mental nou Nasyon Seselwa in arive ozordi.  E sa bann tel fason viv pa portre bon legzanp pour nou bann zenn.

Serten nou, nepli annan konpasyon pour lezot.  Mr Speaker, ler nou annan respe pour lezot, se la ki nou osi nou ganny respekte.

Permet mwan Mr Speaker pour mon lans en lapel avek mwan bann Koleg isi menm dan sa Lasanble, pour nou donn legzanp e pratik respe e tolerans anver kanmarad.  I tousan parfwa pour antann komanter ki piblik an deor ki regard nou lo televizyon i dir lo nou konportman e latitid dan sa Lasanble!

Alors sa lannen Mr Speaker, mon espere ki nou tou isi dan sa Lasanble, nou travay pli byen ansanm e avek respe e tolerans anver enn a lot.

Mr Speaker nou dir ki lafanmir i pilye en sosyete.  Nou bann fanmir ozordi pe fer fas avek bokou defi tel ki drog, lalkol e vyolans domestik.

Bokou nou bann fanmir pe kase oubyen pa stab akoz sa bann problenm.  Mr Speaker, letan mon lo sa size lalkol, konmela nou pe vwar bokou zenn fiy e madanm pe konsonm bokou lalkol.  Zot pe menm bwar plis ki bann Msye, e sa i vreman malere.

Sa bann madanm, se bann manman ki annan detrwa zanfan pour okipe, me ki nou pe vwar ozordi ?  Sa bann madanm pa pe pran zot responsabilite.  Serten pe konsonm lalkol devan zot zanfan.

Nou pe vwar ki zanfan pe tonm dan bann problenm sosyal.  Zot pe al lekol sal e devergonde, ansennyan zot travay i double akoz zot bezwen desarz responsabilite paran osi.

De lot kote, nou vwar bann zonm osi ki pe kontinyen abiz lalkol e zot pa pe anmenn ase reveni kot lakour.  Larzan i fini dan pey kredi bwar dan magazen.  Tou sa pe fer nou bann fanmir degrengole e se bann zanfan ki soufer.

Maladi i kontinyen ogmante akoz konsonmasyon lalkol e lezot sibstans danzere.  Konbyen bon travayer Seselwa ki ozordi pe asize dan lakour akoz problenm lasante ki’n ganny koze par lalkol?

Mr Speaker, tousala i met presyon lo bidze Minister Lasante, lo bidze Lazans Proteksyon Sosyal e osi lo Lekonomi nou pei.

Fodre ki Lotorite konsernen i port plis latansyon lo bann kalite labwason alkolize ki antre dan nou pei.

En keksoz ki bann abizer lalkol i devret realize; lalkol pa pour zanmen rezourd zot problenm.  O kontrer i met ou dan plis problenm.  Alors bann madanm, fer li en rezolisyon pour sa lannen 2019 – i pa ankor tro tar – pour zot redwir lakantite lalkol ki zot servi.

Bann dimoun ki konsonm lalkol, zot devret realize ki konsonmasyon an moderasyon i pa pour afekte ou.  Me si ou abiz lo sa sibstans li osi i pour abiz ou e i pour fer ou dimal.

Mr Speaker, ogmantasyon tax lo bann diferan kalite lalkol i byen.  Plis larzan i antre dan Kof Leta.  Me i pour osi anmenn lezot problenm sirtou pour bann ki pa pour neseserman arete bwar oubyen zot pa pour neseserman redwir konsonmasyon.

Mon santi ki nou bezwen pe kontinyelman edike e sansibiliz dimoun lo danze sa sibstans.  Mon sizere ki sa larzan tax ki pour ganny anmase, i ganny met dan en Fon e i a ganny servi pour fer bann progranm edikasyonnel e sansibilizasyon pli agresiv.

Mr Speaker, Seselwa in touzour en Nasyon ki travay dir.  Me ki nou pe vwar tou dernyerman?  Bann senp travay ki en Seselwa i kapab fer, nou pe vwar etranze ki pe fer.  Par egzanp balye nou semen, plante, met fuel dan transpor, travay, donn manze dan takeaway eksetera.

Gouvernman in met sistenm an plas pour asiste dimoun ki dan bezwen, me sistenm in ganny abize.  Ozordi, menm bann ki kapab travay i pa vwar sa nesesite e zot prefere al rod lasistans welfer.  Mon apresye ki Lazans Proteksyon Sosyal in revwar zot kondisyon pour asiste en dimoun e zot pe osi ede pour plas dimoun dan en lanplwa.

Mr Speaker nou bann dimoun aze i en bann bon legzanp.  Zot in travay tre dir pour ede dan devlopman nou pei, élevé zot fanmir e esey donn zot zanfan en ledikasyon menm si ti vreman difisil.  Zot ti fer li zot devwar pour lev-e tou le bomaten pour al debourye.  Mon oule salye travay ki nou bann dimoun aze in fer e mon dir zot Mersi.

Bann zenn ozordi, zot devret pran legzanp lo nou bann gran paran ki ti lev-e tou le bomaten e al rann lapel dan zot travay e zot ava pe ede pour anmenn plis devlopman pour nou pei.

Kiltir travay in touzour dan nou.  Mr Speaker akoz si Sesel in ariv kot in arive ozordi, set akoz bann zonm e fanm ki’n travay tre dir e ki ankor pe travay dir sanses, pour fer sir ki sa pei Sesel i ariv pli lwen ankor.

Mon oule enplor nou bann zenn fiy e garson ki i annan laz travay pour lev-e e rod en travay ki zot kapab fer e donn lanmen kontribye dan Lekonomi nou pei.  I vreman gou ler ou pa pe depan lo lasyer lezot e ou pe travay onnetman pour ou ganny ou dipen kotidyen.

Leta nou Nasyon set osi leta nou bann zenn.  Parske se zot lavenir nou pei.  Mon annan en mesaz pour tou bann zenn ozordi, pran zot ledikasyon o serye.  Tou sa ki zot pe gannyen ozordi pa pran li for granted. Zot a realize ki pli gro parti bidze in al pour ledikasyon.

Sezi sa loportinite pour zot etidye.  Etidye e etidye pour zot kapab vin sa ki zot anvi vini demen.

Mr Speaker, mon apresye ki in annan en amelyorasyon dan serten rezilta pour bann legzanmen 2018 tel ki IGCSE ek A ‘Level.  Me mon santi ki nou kapab fer pli bokou, nou kapab fer bokou pli byen ki sa ankor.  Mon pa krwar, mon pa vwar akoz ki nou pa kapab perform parey ou byen pli meyer ki lekol prive.

Zenn, zot devret met zot ledikasyon an premye.  Pran letan pour zot viv e pran letan pour grandi.  Dan lavi tou keksoz i annan son letan.

Lannen 2018 bokou zenn in perdi zot lavi.  Mon enplor tou sa bann ki ankor la pour pran plis swen avek zot lavi.  Sa kado ki Bondye in donn zot. Zenn i merit osi egzers plis respe pour zot paran, Gran Paran, lezot adilt, dimoun aze, zot bann ansennyan e osi bann Lenstitisyon.

Mr Speaker nou kiltir se nou fason fer, nou fason viv, nou fason azir.  Sesel nou annan nou en Kiltir ki tre ris.  Nou bezwen valoriz li, nou bezwen pe montre nou bann zanfan e zenn nou vre Kiltir Kreol e pa per pour demontre li partou kot zot ete.

Mr Speaker, ler nou dir ki nou en Seselwa ki fyer son kiltir, nou bezwen demontre sa dan tou sa ki nou fer.  Nou annan bokou santer e mizisyen ki perform bann sanson tradisyonnel e lezot ki perform bann lanmizik modern.  Nou annan bokou pent, poet e metteur en scène ki pe vreman travay dir pour kit nou bann tradisyon vivan, me zot pe rankontre serten difikilte.

Mon ti a kontan fer, mon ti a kontan fer zot konnen ki nou apresye zot e ki nou siport zot koman bann artis lokal.  Nou ti a sizere, mon ti a sizere ki Gouvernman i regard dan posibilite pour revwar sa tax ki nou bann artis i bezwen peye lo prodiksyon zot travay e lo bann materyo brit ki zot servi.  Sa i a ede pour zot prodwi plis travay e osi pri sa bann prodiksyon i a kapab bese.  An plis, an plis ki sa mon swete.

An plis ki sa mon ti a swete ki nou regard de pre Lalwa ki gid bann performans ki annan en baz Kiltirel ki kapab ganny pratiquer.

Nou pe promot nou moutya kot UNESCO pour li vin enn nou Patrimwann Seselwa.

Alors Mr Speaker nou devret akseler travay pour reviz nou Lalwa kot i neseser.

Mr Speaker an konklizyon mon ti a kontan fer resorti ki lannen 2019 pa en lannen ki, mon a repran Mr Speaker.

Mr Speaker an konklizyon mon ti a kontan fer resorti ki lannen 2019 pour en lannen ki tre promettant.  I en lannen kot nou pe kont lo tou dimoun pour fer sakenn son morso, pour anmenn plis devlopman dan nou pei.

Pour ki tou sa i arive, nou bezwen reste ini avek kanmarad.  Linite i anmenn lape, respe, responsabilite, langazman e tou lezot eleman pozitiv dan en pep e en pei.

Mr Speaker, mon koman en Manm United Seychelles, mon oule pres linite dan nou pep e avek bann zabitan mwan distrik.  Mon vwar potansyel dan nou pei.  Mon refiz-e pour vwar laenn ek vanzans.  Sesel i pli gran ki nou tou.

 

(APPLAUSE)

 

HON SYLVANNE LEMIEL

Annou inifye, annou travay ansanm pour nou kapab anmenn plis devlopman pour nou pei e nou distrik. “United we stand!

 

(APPLAUSE)

 

 

MR SPEAKER

Mersi Onorab Lemiel.  Mon ava pas laparol avek Onorab Bernard Georges.

 

HON BERNARD GEORGES

Mersi Mr Speaker.  Bonn apre midi bann Manm Onorab e bann dimoun ki pe ekoute.

Mr Speaker semenn pase nou isi dan sa Lasanble e lepep Seselwa an antye ti esper Prezidan avek gran lenpasyans vin lir son mesaz lo Leta nou Nasyon parey i fer tou-le-z-an.  Gran lekspektasyon pandan plizyer semenn e sa bann zour avan mardi pase in vitman malerezman tourn an dezapwentman.

Pandan en erdtan Prezidan in lir en mesaz ki sanble-mwan li menm li i pa ti tro satisfe avek.  Ou ti a krwar li osi i ti pe lir sa bann parol dan son diskour pour la premyer fwa.  Diskour ti mank sibstans, ti mank ton, e mank lenerzi.  La kot nou ti’n devret sorti avek en lantouzyazm ki nou pei i solid e nou Nasyon i for, pare pour deal avek bann defi e anmenn nou pep pli lwen ankor, o kontrer nou ti ganny en sort seminar lo diferan Sekter Gouvernman.  Lapel ti lans plizyer fwa dan plizyer direksyon, e nou ti ganny demande pour annan bokou konprenezon.

Lenpresyon ki mon ti gannyen en écoutant Msye Faure se en zonm ki pwa traka in abes li; ki krwar, ki vwar li difisil pour gouvernen ; ki fatige ; ki nepli annan kouraz pour kontinyen.

Dan lafason ki mesaz Leta Lanasyon in ganny ekri, dan son mank vizyon, dan son napa bagaz, e dan lafason ki in ganny delivre san gran lenerzi e avek en kalite lespri plito negativ, mon rekonnet en Prezidan alafen son letan e ki son lakours pe al terminen.  In ler alor pour nou dir dan en fason kler: si ou pa kapab gouvernen, Mr Prezidan, in ler pour ou sorti e les sa ki kapab pran kontrol.

 

(APPLAUSE)

 

 

HON BERNARD GEORGES

Konman en pep nou annan gran defi devan nou.  Travay ki nou Lasanble in fer sa dernyen 2an, sirtou dan son bann Komite, e la sirtou FPAC, in montre nou sa tre kler.  Nou pei in mal gouvernen pandan tro bokou lannen avek tro bokou labi ki Gouvernman, swa pa’n kapab kontrole, swa in partisip ladan li menm o-detriman nou pei.  Lezot Manm Lasanble in koz, e pour koz, lo sa bann size. Mwan mon oule fer en refleksyon lo zis 3.

Nou bann pli gran defi konman en Nasyon i reste bann defi sosyal.  Bann ki Prezidan in mansyonnen tel parey labi drog, labi lalkol, labi zanfan, problenm lafanmir,  me osi lezot ankor, parey pri lavi, mankman lakaz konvenab e logmantasyon dan lenfeksyon HIV ek Epatit C.  Dan tou sa bann Sekter, Gouvernman Msye Faure in fail.  Zis de statistik ki sorti dan son prop diskour i ase pour demontre sa :

Premye, se ki dan en workforce 50,000 dimoun isi Sesel, 23,000 i etranze.  Sa se preske 1 etranze ki pe travay isi pour sak Seselwa ki pe travay isi.

2enm, se ki avek sistenm pwen selman 174 lakaz in ganny delivre dan sa dernyen lannen.  Parey in ganny dir bomaten,  Sa i vedir mwens ki 7 lakaz par distrik dan 1 lannen, ouswa en lakaz tou le de mwan.

Sa 2 sif i telman fer mon per Mr Speaker ki mon anvi senpleman termin mon repons la e dir nou annou aret koze, me annou repran kontrol nou pei ozordi men !  Nou pa kapab esper ankor akoz avek sak zour ki pase nou sityasyon i vin pli difisil e lavi Seselwa i vin pli dir.

Dan tousala nou vwar Msye Faure pa fer nanryen.  Tou sa bann mankman e koripsyon ki FPAC in met devan Gouvernman, Msye Faure pa’n fer nanryen apard en pti sanzman isi e en pti sanzman laba.  Si ou pa kapab anmenn pei dan en fason normal, Msye Faure, sorti e les sa ki kapab pran kontrol.

Nou pei i annan en kantite problenm, Mr Speaker.  Lalis i long e mon’n mansyonn detrwa pli boner.  Me i annan 2 ki tous tro bokou dimoun ozordi e partou kot mon pase dan mwan distrik se sa menm 2 ki pli souvan i ganny met devan mwan e sa se pri lavi e mank lozman.

Dan en fason, problenm pri lavi i pli fasil pou rezourd : en dimoun i kapab triyange, travay pli dir, ouswa rod en dezyenm dyob, pret en larzan e fer sa de bout zwenn.  Me ler ou napa en lozman e ou pe dormi ater dan salon lakaz ou manman avek ou zanfan, ouswa partaz en lasanm avek 3lezot dimoun ; ler ou lakaz i koule, karya pe manz dibwa klwazon e desarz kabinen i refoul dan ou sink ; ler tou biro i dir ou pasyant ankor; ler MNA ek DA i fer rekomandasyon pour ou ganny en lakaz, me en dimoun dan biro lakaz i dir ou pa merite, ouswa ki ou pwen pa donn ou sa priyorite, ki ou kapab fer? Kot ou pou ale?

Problem lozman, Mr Speaker i nou problem No.1 Sesel.  Ler ou lo eroin ou kapab al lo program methadone.  Ler ou napa lanplwa ou kapab rod en lanplwa.  Ler ou ganny bate, ou kapab al lapolis ouswa Ankour.  Ler ou malad, ou kapab al trete.  Me ler ou napa en lozman, e ou napa larzan ouswa later pour ou fer sa ki pour ou, ou a la mersi Gouvernman.  E tan ki Gouvernman pa fer en lozman pour ou, ou kontinyen dormi dan salon avek ou zanfan, ouswa met kivet anpare ler lapli i tonbe.

Sa lannen i fer 18an ki mon swa Reprezantan Lopozisyon, swa ki mon MNA Les Mamelles.  Si mon koz koumsa se akoz mon’n fatige Mr Speaker, e zabitan mon distrik in fatige lannen ale, lannen vini, ekout zoli diskour ki lakaz pour gannyen, me, lannen ale, lannen vini, zot kontinyen tal matla ater dan salon pou dormi.

Lo sa size lakaz, sa Gouvernman in fail.  Mon pa ni kapab donn sa Gouvernman en non, akoz in annan tro bokou depi ki mon pe demann en solisyon pour nou problenm lakaz.  Mon demann avek, mon’n demann avek SPPF ; mon’n demann avek Parti Lepep, e la mon pe fer en lapel avek US.  

United Seychelles, Mr Speaker?  I annan en sel keksoz ki Sesel i United lo la, e sa se tir sa Gouvernman o pouvwar o pli vit posib e met en lekip State House ki pour pas an aksyon olye zis koz parol.

Problem mank lozman i senp pou eksplike.  Sistenm pwen ki delivre 7 lakaz par distrik dan 1an in fail, alor annou touy li.

Sistenm loan in fail, swa larzan pa ase pour fer en lakaz, swa ou pa gannyen ditou akoz en dimoun in kalkile ki ou pa pour kapab re peye.  Touy sa sistenm.

Napa ase unit ki pe ganny konstri:  avan yer ti Sinwan, yer ti UAE, ozordi se Lenn ki pe donn nou lakaz.  Avan yer ti pou annan 5,000, apre ti pour 2,000, la ozordi Lenn pour fer 600 !  Tro nou dimoun Mr Speaker pe viv dan lakaz ki pa lo nivo pou imen reste ladan e mon pe koz dan konesans le koz Les Mamelles; ouswa, si i lo en bon standar, i annan tro dimoun ki pe partaz sa 2 ou 3 lasanm dan sa lakaz.

An sa ki konsern later pour sa bann zenn ki anvi aste en kare pour fer zot prop lakaz, sa Gouvernman ankor enn fwa in fail konpletman.

Pourtan, Mr Speaker, Sesel i annan ase later pour ki sak dimoun ki anvi ouswa bezwen en kare i kapab gannyen.  Fodre ki Gouvernman i ouver plis later dan bann kolin e fer sa aksesib a nou popilasyon.  Pa konsantre zis lo fer flat.  Pa konsantre fer lakaz zis lo later konble kot i fasil.  Ouver bann later Gouvernman partou dan distrik e met sa a dispozisyon dimoun ki bezwen.

Dan le pase nou’n vwar en lot failure Gouvernman dan sa domenn malerezman.  Olye ouver later pour dimoun ki napa, Gouvernman in met bokou resours pou fer Estate pour milyonner : Carana, Sorento, Fairyland, Anse Royale.  Apre aret donn dimoun ki i annan, ankor plis.  Konsantre lo sa ki napa.  Ankouraz bann propriyeter later pour fer parey avek loan ki pour permet zot met sa lenfrastriktir an plas.  Annou pa bliye ki Reef Estate, Green Estate, Turtle Bay, Sancta Maria, tousala se bann devloper prive ki’n fer sa bann Estate.  Annou osi pa bliye ki Gouvernman li menm in annan serten sikse dan sa bann proze.  Mon mazin La Retraite, mon mazin North East Point, pour donn 2 legzanp.

Les mwan alor Mr Speaker avek ou permisyon donn sa Gouvernman detrwa lide lo ki mannyer pour rezourd problenm lozman enn fwa pour tou.

Premyerman kontinyen rod led avek pei zanmi, met en pe nou prop larzan, e kontinyen avek program fer lakaz dan sak distrik.

Dezyenmman ouver plis later Leta pour Seselwa ki anvi en kare pou fer zot prop lakaz e ki annan le mwayen, ouswa akse avek loan pou fer li.

Trwazyenmman, ogmant akse avek finans pour ki, pour sa ki annan en bout later pou li fer en lakaz, ouswa fer de-alafwa ; 1 pour li, e 1 pour lwe ouswa revann pour li pour ed li re pey sa 1 ki i pe fer pou li.  Abandonn sa lide Gouvernman fer 2 lakaz lo later en dimoun, i pa pou marse.  Les sa dimoun li menm fer son 2 lakaz.

Katriyenm, aboli Sistenm Pwen. Les sa DA ek son MNA ki konn problenm dan distrik, ki konn nou dimoun, fer desizyon lekel ki devret ganny lakaz.  Pa en anplwaye Gouvernman ki pe lir en fayl, e ki pe kont pwen.

Avek sa bann sanzman Mr Speaker mon parye ki enn fwa pour tou nou pour rezourd sa problenm ki’n la avek nou depi ki sa parti ki o pouvwar ozordi, ti vin o pouvwar tou sa bann lannen pase.

Si problenm lozman pa ti ase pour montre nou en Gouvernman ki pa konnen ki mannyer pou administre en pei, akoz i pa kapab get 2 keksoz alafwa pour vwar son problenm ek son solisyon, les mwan donn en lot legzanp :

Trafik.  Sa in vin en kosmar e isi menm dan sa Lasanble, MNA in anmenn Mosyon e in demann kestyon pou esey rod en soulazman a en problenm ki retard devlopman nou pei.

Mwan  menm mwan mon’n koz lo sa nouvo rikord ki nou pei in etabli, pour azout avek sa 3 ki Prezidan in mansyonnen Mardi pase :

Nou premye dan Lafrik pour letan ki i pran pour konstrir en roundabout.  La in desot 18mwan e roundabout kot Hypermarket pa ankor fini.  Dan menm peryod letan Mr Speaker, nou vwazen Maurice in fer en metro leze pou sorti Rose Hill pour desann Port Louis e in konstri flyover pour degaz trafik. Nou, nou ankor pe lager avek en roundabout.

Problenm trafik Sesel i montre nou plizyer rezon akoz sa Gouvernman Msye Faure in fail e akoz i bezwen ganny ranplase o pli vit posib.

Premye, ki mannyer en Gouvernman i les loto ek masin antre dan pei san ki i osi regard lagrandisman semen pou fer sa bann transpor sirkile?  Lanmen gos, Mr Speaker sa enn ki pe donn permi pou enport transport e ki anmas duty ek road tax i bezwen koz avek lanmen drwat, sa enn ki fer semen pour sa bann transpor sirkil lo la.  Isi en lanmen i sourd lo lot.

  1. Zanmen sirfas semen Sesel in otan dan en move leta.  Semen i annan zis pyes lo la parey en vye kannson.  Laroul partou kote. La Anse Royale e Pointe au Sel, pa pase.  Mon konpran ki PUC n bezwen fouy rigol pour li pas kab, me repar semen vit, silvouple.  Ki mannyer ankor enn fwa nou vwazen Maurice  i kapab annan bon sirfas lo son semen partou e ki nou, nou pa kapab ?
  2. Rezilta sa 2 fenomenn i apel Trafik pa bouze, parking anvil napa. Rezilta sa, se ki nou Lekonomi i ganny direkteman afekte par bennzin ki ganny servi an tro ler ou asiz dan trafik ouswa roul an ron pour ou rod en parking, e letan travay i perdi.  En Gouvernman serye ti pou’n fer en keksoz pour rezourd sa problenm lontan.
  3. Napa ase lapolis trafik e napa ase mezir ki pe ganny pran kont drayver ki pa dray byen ouswa ki en menas lo semen.

 

Konpran mon byen Mr Speaker.  Zofisye trafik ki travay byen i travay vreman byen.  Vandredi pase mon ti ganny arete dan en spot check Grand ’Anse Mahe 11-er diswar.  Sa bann zofisye trafik ti profesyonnel, kourtwa e efikas.  Bravo, bravo sa bann zofisye e zot siperyer. Sa i donn nou lespwar.

Me se lo management lapolis trafik ki mon diriz mon lapel. Drive dan, drive in vin en problenm konstan, e nou pe zwe avek en bonm ki pou pete en zour.  Non selman sirfas semen i move parey mon’n dir.  Dan bokou landrwa lapli, apre en lapli i reste gran losean lo semen, e congestion i fer drayver fristre, me i annan tro cowboy ki annan licence.

Lo sa bout semen ant stasyon SEYPEC Roche Caiman ek Eden, epi ant roundabout Eden ek Intelvision, en aksidan pour arive en zour e dimoun pour perdi lavi.  Mon pa swete, me mon pe lans en lapel.  Transpor zis i fer vites epi zot overtake e fors ou tay lo bor semen pou evit zot.  Picanto ek i-10 lwe pa konn kod larout e zis koup gos/drwat mannyer zot kontan. Taksi i toultan pli prese e i bezwen fors son lekor devan ou.

Semenn pase lo highway enn in pas o bor mwan e mon ti pe fer mon maksimonm 80 kilomet a ler, telman vit ki si i ti annan lezel i ti’n pou’n take off.  Pti men lo scooter i overtake ou gos/drwat, parfwa tou lede ansanm.  Zot vin lo ou dan milye semen e fors ou saye.  Kot roundabout Fishtail/Cat Cocos transpor i pas drwat e i pa fer letour.  La ozordi 12:10 Mr Speaker, enn i fek fer sa devan mwan, S23323 en euro car, en pti I10 Euro Car.   Mon’n dir ek mon lekor mon pour vin dir sa Lasanble, e la mon pe dir.

Kot Maison du Peuple kot napa en right turn loto i vir drwat.  Lotrozour en pick-up in fer sa.  Pa zis sa i fer li devan en transpor lapolis e sa transpor lapolis pa fer nanryen.  Traffic light drayver nepli obeir e si semen i kler zot pas atraver lalimyer rouz.  Dan tousala Mr Speaker ki gard trafik pe fer?  Ki sa bann camera Anvil pe fer?  E problenm se pa zis en problenm trafik.  Ler en dimoun i kas en Lalwa trafik e nanryen pa arive, i kas enn ki pli gro.  Ler nanryen pa arive, i kas en lot Lalwa.  Si ou pa kontrol bann pti problenm Mr Speaker, bann pli gro pour vin manz ou.  Se la kot koripsyon i antre e lesefer i arive domin nou.

5.Napa ase lalimyer aswar lo semen.  Nou sityasyon trafik i telman grav e nou semen i telman annan en volim trafik ki ler in arive pour ki tou semen prensipal dan nou pei i bezwen lalimyer parey Victoria e parey highway.  Pour konmanse, tou roundabout, pedestrian crossing ek speed bump i devret ganny alimen aswar.  Semen segonder i bezwen plis lalimyer pour bann dimoun ki mars apye.  Malgre lalimyer i ganny mete, still napa ase.  Zis Victoria i bezwen decongested.

  1. La kot in arive Mr Speaker, i annan zis 2 solisyon. Ki Gouvernman Msye Faure ankor enn fwa pa’n mazin lo la.  Olye agrandi semen pour les plis transpor, transpor antre dan sant Lavil, mon sizere nou blok sant Lavil e fer li vin en pedestrian area.  E 2enm mon sizere nou tir servis Gouvernman dan sant Lavil e anvoy li an deor, isi lo Ile du Port kot deza i annan 2 brans Gouvernman ki’n sitye.  Victoria a retourn konman en Lavil komersyal, e Lavil Administratif pour an deor.  Mon pour byento amenn en Mosyon dan sa Lasanble pour eksplik sa lide dan tou son detay akoz ozordi nou napa letan.  Mon mazinen sepandan ki se Gouvernman LDS ki pour realiz sa proze, akoz pour napa ase letan pour Msye Faure fer li la ki eleksyon i dan en pti pe plis ki 1an.

Trwazyenm e dernyen topik mon le adrese ozordi, se 2 problenm sosyal ki afekte enn de kous nou popilasyon ki parfwa nou pa focus lo zot.  Sa se prizonnyen e manrmay delenkan.

Chairman APDAR, Dr Herminie ti dir dan en entervyou lo televizyon 2 semenn pase ki to lenfeksyon, to lenfeksyon HIV, eskiz mwan, HIV ek Epatit C dan prizon i enkyetan e i annan rezon.

        Dan prizon, Mr Speaker, nou pe kwi en kastrol ki pou anpwazonn nou sosyete.  Personnelman mon vwar li difisil pour viv dan en sosyete ki anvoy zenn dimoun dan prizon an bonn sante, pou ki ler zot sorti laba zot antre, pour ki ler zot laba zot antre dan tou sort move pratik e ler zot sorti zot in trouble psikolozikman akoz sa ki zot in bezwen fer laba pou sirviv, e zot in ganny enfekte avek HIV ek Epatit C.

Nou pa kapab fer krwar ki nou pa konnen.  Nou napa drwa fer krwar ki nou pa konnen.  Si prizon i pe afekte nou zenn ki al laba, fodre nou rod en lot solisyon.  Sak zour ki pase i en zour an tro pour koriz nou fot. Konpran mwan byen, Mr Speaker.  Si ou’n komet en krim ou bezwen ganny pini.  Prizon i en pinisyon kot ou perdi ou laliberte.  I pa en landrwa kot ou ganny anvoye pour ou abize ou ganny abize seksyelman ouswa kot ou al rod viris HIV ek Epatit C.  Non !  Nou bezwen dir byen for Non !  Prezidan Faure i bezwen donn nou en lot solisyon.

Semenn pase a lokazyon Lazournen Kont Diskriminasyon, Prezidan in dir ki nou sosyete i bezwen enn kot napa okenn diskriminasyon ki swa lo kouler, lapartenans politik, larelizyon ou seksyalite en dimoun.  Mon dakor avek li.  2 semenn pase mon’n asiste en seminar lo lapar Lasanble Nasyonal Sidafrik lo menm size.  La i pa moman pour antre dan detay sa filozofi, me si nou sistenm pinisyon i fer diskriminasyon, nou bezwen atak li osi.  Si en zenn i al prizon, si en zenn ki al prizon i bezwen fer sex avek en lot dimoun menm sex ouswa partaz sereng dan en fason volonter ouswa par fors pour li ganny drog ouswa en faver, e ganny enfekte avek HIV ek Epatit C nou bezwen kondann sa pratik e dir ki fodre nou sanze.

Menm zafer pour zanfan delenkan.  Prezidan in demann plis paran angaz zot avek zot zanfan pour asire ki zot aprann lekol.  Sa i byen.  Me parol, tousel pa pour fer sa arive Mr Speaker.  Tou dimoun ki fimen i konnen ki sigaret pa bon pour lasante, me zot kontinyen fimen, (Onorab Valmont i get mwan.)  Bwar lalkol, parey. Pran eroin, parey.  Me still dimoun i fer li. Pour toultan annan paran ki pa enterese avek sa ki pase lekol, ki servi lekol konman en daycare pour zot zanfan.  Ler en zanfan ki sorti dan en milye parey e i tonm dan move lenfliyans, ou annou ou en doub problenm.  Sa zanfan i deranz lezot zanfan dan son laklas ki anvi aprann, e sa zanfan i deranz son lafanmir ek son vwazinaz.  A lonterm lekol Leta pour bezwen revwar lafason ki i ganny manage. Leader Lopozisyon bomaten in koz lo la e mwan dakor avek li en propozisyon ki headteacher ek teacher en lekol i vin plis parey manager en biznes e ki etidyan i son anploye.  Avek lapey e kondisyon bokou pli enteresan ki sa ki zot gannyen konmela, headteacher ek teacher a pran zot rol e al fer paran e zanfan angaze e asire ki tou zanfan i fer zot mye.

Antretan ki sa pour arive avek sa bann zanfan ki pa oule aprann, antretan ki pour arive avek sa bann zanfan ki pa oule aprann, ouswa ki pa oule al lekol e tonm dan move frekantasyon ki zot paran pa kapab kontrole?  E i annan bokou, mon mwan konn plizyer.  Fasilite Ile du Swet pour bann zanfan ki pa oule aprann i bezwen selon mwan ganny agrandi a kour term pour ki plis bann marmay i kapab ganny sa disiplin ki zot merite e ki lasosyete e lafanmir ki zot pe afekte i ganny en repu avek zot.

Prezidan Faure in koz lo lafanmir konman sa fondasyon en sosyete. Wi, i annan rezon.  Me annou pa bliye ki enn bann rezon prensipal pour destriksyon lafanmir konman sa baz lasosyete sete sa lenstitisyon ki li menm Msye Faure ti ansarz a en lepok.

Mon pe koz Mr Speaker lo NYS.  Prensip fondamantal sa Lenstitisyon  malgre sa ki’n ganny dir e sa ki pour ganny dir lo li, sete pa lot ki endoctrinassions.  Retir zanfan a en laz kot zot pli bezwen gidans zot paran e met zot dan en Lenstitisyon kot zot pour vin bann serviter Leta ek en parti inik. Anpes zot ganny gidans spirityel a sa moman kritik dan zot lavi.  Prezidan Faure pa kapab montre ledwa lo labi seksyel, lalkol ek lezot fenomenn sosyal pour destriksyon lafanmir Sesel.  Ledwa i devret vir lo li menm, e son lapriyer i devret parey Onorab Esparon in dir ‘se ma fot, se ma fot, se ma tre gran fot.’’

An konklizyon, nou vwar ki lo sa trwa problenm ki mon’n adrese ozordi, i annan en difil ki konekte tou le 3.  Sa se en mank lide e en mank lorganizasyon.  E se sa ki arive avek en Gouvernman ki napa vizyon e ki’n o pouvwar tro lontan.  I pa vwar sa ki vreman bezwen se en sanzman fondamantal dan fason fer.  Se en seri lide orizinel.  Se en resers pour solisyon, non pa diferan fason pour manage vye problenm.  En sanzman non en parti politik, i pa solisyon.  Sanzman Minis ek re shuffle en Cabinet, i pa en solisyon. I annan en sel solisyon.  E Seselwa i konn sa solisyon byen, akoz an 2016 zot in fer en premye pa ver li.

Msye Faure i annan en lot problem.  I le pas pour bon boug.  Alor, i pa pran desizyon ki difisil.  I le fer plezir tou dimoun Mr Speaker, e i pa arive fer plezir personn.

Ler ou Prezidan napa en mesaz lo Leta son Nasyon, e son diskour i en lalis maintenance  lev miray dam La Gogue, aranz La Promenade Beau Vallon, agrandi por e fini en lopital ki’n seize depi plis ki 10an san okenn vizyon pour nou pei, letan in arive pou remersye li pour son travay e sizer avek li ki in ler pou li al repoze.

Ozordi, Mr Speaker, Les Mamelles i still napa lakaz nef, ni sa 24.  Annefe olye 24/24/24, nou, nou annan 0/0/0.  Zabitan La Misère parey Onorab William in dir, i still pa ankor ganny peyman ki zot ti’n ganny promet dan Mesaz Leta Lanasyon an 2017 dan sa menm sa Lasanble.  E malgre Komisyon Laverite e Rekonsilyasyon Nasyonal ki pe al ganny apwente byento, trafik ki bloke Victoria i ankor bloke lo 3 semen ki zot non i ankor dan sa nouvo letap ki nou sipoze ladan ; Revolution Avenue, Semen Francis Rachel e Laveni le 5 Zen.

Laverite, Mr Speaker, se mesaz Prezidan Danny Faure olye anmenn nou pei ver nouvo lorizon avek konfyans e determinasyon, in montre nou ki set en om ki’n pri dan son lepase, avek menm fason fer ki son predeseser – parey en avyon ki swa i pa kapab dekole, ouswa i pe fer letour pour rod en plas apoze.

En Gouvernman ki lannen ale, lannen vini pa kapab delivre lo son promes lakaz ek lozman ; ki pa kapab asire ki semen i ganny refer ek trafik i sirkile, ki pa kapab tenir son langazman avek kominote La Misère, san mansyonn en sistenm ledikasyon en dégringolade e en servis lasante ki pe zis arive fonksyonnen, i bezwen en nouvo Leadership.

Mon’n ekout mesaz Prezidan Faure atantivman lo Leta nou Nasyon. Apre sa refleksyon ki mon’n fer dan sa repons apre midi, mon konklizyon i kler konman i senp.  Avek tou respe ki mon annan pour Msye Faure, e mon annan Mr Speaker bokou respe pour li, mon’n arive kapab rezim mon repons a mesaz Leta Lanasyon 2019 dan selman 2 mo: DANNY OUT!  Mersi Mr Speaker.

 

(APPLAUSE)

 

 

MR SPEAKER

Mersi Onorab Georges. Nou’n ariv lafen nou lazournen travay.   Nou pou kontinyen demen avek Repons par lezot Manm.   E demen bomaten nou  pou repran nou travay 9er parey labitid.  Avek swa lasanble i adjourn e nou ava rankontre demain matin.

 

 

(ADJOURNMENT)