Home » Verbatim » 2018 » Verbatim 13th December, 2018

Verbatim 13th December, 2018

NATIONAL ASSEMBLY OF SEYCHELLES

Thursday 13th December, 2018

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bonzour tou Manm Onorab.  Bonzour tou dimoun a lekout e pe swiv travay Lasanble Nasyonal.  E mon annan en bonzour spesyal pour Minis Jean-Paul Adam avek Chairperson pour Electoral Commission Mrs Lagrenade, e osi Minis i akonpannyen par son Advisor Mr Marty Vidot.

Avan nou repran nou travay kot nou ti kite, mon ava zis atir latansyon bann Manm poudir nou annan en Revised Order Paper devan nou e nou pour swiv prosedir lo nou Order Paper akoz nou annan bann nouvo dokiman ki’n vini kot Lasanble e nou annan osi tou en nouvo Bill ki nou pour fer First Reading.

Mon ava demann Madanm Clerk pour nou pran No.4 Presentation of Papers pour lir bann Papye ki pe ganny prezante avek Lasanble bomaten.  Madanm Clerk.

 

MADAM CLERK

Mersi bokou Mr Speaker.  Mersi Mr Speaker.  Bonzour Minis. Bonzour tou Manm. Koman Prezantasyon Papye ozordi, nou annan:

Annual Report of the Auditor General pour 2017- it’s entitled – ‘’Results of Special Reviews.’’

-Answit nou annan en

S.I.78 pour 2018 – Income and Non-Monetary Benefits Tax (Payroll and Employees Status Report) Regulations of 2018.

        S.I. 79 pour 2018 – Income and Non-Monetary Benefits Tax (Amendment of the First Schedule) Regulations of 2018.

S.I. 80 pour 2018- Income and Non-Monetary Benefits Tax (Exempt Emoluments) (Amendment) Regulations of 2018.

        S.I. 81 pour 2018- Excise Tax (Amendment of Schedule 1) (No.3) Regulations, of 2018.  Mersi Mr Speaker.

 

MR SPEAKER

Mersi Madanm Clerk.  Nou ava pran osi item No 5, nou annan en First Reading pour nou fer. Madanm Clerk.

 

MADAM CLERK

Mersi Mr Speaker. This Act may be cited as the Supplementary Appropriation Act of 2018.  Mersi Mr Speaker.

 

MR SPEAKER

Mersi Madanm Clerk.  Bon zis mon a fer en pti koreksyon, Mr Vidot i Personal Assistant to the Minister, mon pe donn ou promosyon, Advisor.  Bon nou ava pran nou travay kot nou ti kite Mardi, kot nou ti pe debat lo sa amannman pour sa, pour Elections (Amendment) Bill, 2018.  Mon ava demann Deputy Sergeant pour move Mace pour retourn nou dan Staz Komite.  E mon ava donn laparol Onorab Bernard Georges pour gid nou lo sa amannman nou ti pe rod en fason pour nou kapab prepar sa amannman pour prezant avek Lasanble pour pran en vot lo la.  Onorab Bernard Georges.

 

HON BERNARD GEORGES

Mersi Mr Chair, bonzour Minis, bonzour Chairperson of the Electoral Commission, tou bann koleg dan Lasanble e tou dimoun ki pe ekout nou dan lakour.

Mr Chair zis avan ki nou ti break Mardi, mon ti’n propoz en lamannman ase sibstansyel a sa Bill, Elections (Amendment) Bill ki devan nou pour pran an kont propozisyon Leader Lopozisyon pour apel sa zofisye prensipal, sa Zofisye Administratif prensipal Komisyon Eleksyon – Chief Executive Officer olye Chief Electoral Officer parey in ganny propoze.

Pandan letan ki nou’n annan depi Mardi ziska ozordi, Onorab Leader Lopozisyon in revwar sa propozisyon e donk olye ki mon pous sa amannman bomaten, mon ti ava propoze ki nou ekout li pour vwar si sa lamannman i still bezwen reste lo latab.  Mersi.

 

MR SPEAKER

Mersi Onorab Georges.  Mon ava donn laparol Onorab Ramkalawan.

 

HON WAVEL RAMKALAWAN

Bonzour Mr Speaker. Mersi bokou e bonzour tou dimoun.  Mr Speaker dan son bann largiman Madanm Lagrenade antan ki i CEO, (ayo la nou komans konfize avek CEO la) entant ki Chairperson Electoral Commission in dir en parol, en fraz in fact ki mon krwar nou devret respekte.  In dir ki Komisyon Elektoral letan zot, zot in koze, zot in santi ki sa Tit Chief Electoral Officer, pour zot i pour pli agreab.  E alor baze lo la mon napa problenm.  Mon krwar nou bezwen respekte sa soz.  Me selman mon anvi dir ki sa largiman ki mon’n met devan, mon konpar li avek non ki en dimoun i annan.  I annan bokou dimoun pandan son lavi antye i apel Jean, tou dimoun i apel li Jean, e mwan koman en Pret mon’n pas dan sa leksperyans, zour i mor ki ou dekouver ki poudir Jean ti son dezyenm non oubyen son trwazyenm non, sete Pierre ki ti son vre non oubyen en lot non.  E sa ki nou ladan dan sa sityasyon la i egzakteman koumsa.  Chief Electoral Officer i pour sa non, son vre non, me selman mon konnen ki poudir tou dimoun pour apel li CEO, e CEO letan ou pour ava pe dir CEO ou pa ava pe dir Chief Electoral Officer, ou ava pe dir Chief Executive Officer.

E krwar mwan annou veye, letan pour ariv en Eleksyon, se la ki nou pour apele, letan nou pour apel li Chief Electoral Officer, nou pa pour servi sa CEO, nou pour act sa akronim CEO, nou pour aktyelman apel li Chief Electoral Officer.

Alor napa problenm, si e byensir mon konnen ki poudir i annan plizyer pei ki servi sa, I mean Zambia i apel li Chief Electoral Officer, selman Zambia i en move legzanp pour ou servi dan bann keksoz ki i annan pour fer avek Eleksyon, Sidafrik osi tou, Sidafrik ou vwar sa konfizyon kot dan zot bann dokiman Ofisyel, parfwa i ganny apele Chief Executive Officer, me dan zot organigram i ganny apele Chief Electoral Officer zis pour montre ki poudir i annan sa pti zwe premye non parfwa, dezyenm non lo soz.

Alors Mr Speaker pour fer keksoz, Mr Chairman pour fer keksoz tre senp annou kit nou sa Tit Chief Electoral Officer ki nou pa bezwen al sanz tousala e san tard plis letan nou, mon retir sa bann lamannman, nou kapab bouze pour nou fini avek sa morso Lezislasyon akoz nou tou nou konpran egzakteman kwa e nou dakor avek sa ki sa morso Lezislasyon pe rod fer.  Mersi bokou Mr Chairman.

 

MR SPEAKER

Mersi Onorab Ramkalawan.  Bon mon ti a kontan zis acknowledge prezans Reprezantan Legal dan Biro Attorney Zeneral Mr Victor Pool, Msye Pool bonzour e welcome parmi nou dan Lasanble.  Bon an vi ki sa amannman in ganny retire, mon ava repas la parol avek Chair Bills Committee Onorab Bernard Georges, nou annan lezot amannman ki nou ava pas ladan e si i annan okenn Manm ki i annan lezot lamannman pour fer oubyen pour annan deba lo serten lamannman, then we will do it. Onorab Bernard Georges.

 

HON BERNARD GEORGES

Mersi Mr Chair. Mr Chair an fonksyon sa ki nou fek tande i, sa lamannman ki mon ti’n propoze lo behalf Leader Lopozisyon i nepli devan nou, e avek anba ou direksyon mon ava pas prezan lo bann proposed amendments ki Bills Committee pe met devan.  Me mwan osi mon’n reflesir e la mon pe fer li, mon pe fer li kler ki sa se a mon Tit personnel, pa koman Bills Committee e a mon Tit personnel.  Lo sa dilenm ki sa non, sa Chief Executive Komisyon Elektoral pour annan, e mon anvi fer 2 propozisyon amannman lo mon behalf, anmezir ki nou pe pas la ozordi, se bann amannman, se bann senp amannman, ki mon krwar i ava reini sa lespri ki pour quote Shakespeare “this is the rose by another name”.

        Annefe sa ki nou pe fer se nou pe donn en non a en Tit e non pa en Tit – a en non.  Son Chief Executive parey nou konnen Komisyon Elektoral pour Chief Executive me i pour ganny apele Chief Electoral Officer ki i pour ranforsi sa nosyon, mon pe propoze ki lo Clause 2 ki devan nou lo nou Bill i annan en propozisyon dan premye paragraf Clause 2(a) pour azout 3 sou seksyon a seksyon 3, e sa pour vin sou Seksyon (1)(A), (1)(B) ek (1)( C).  E ler nou regard lentansyon sa 3 sou Seksyon, lentansyon se pour fer egzakteman sa ki pe ganny dekrir la pour fer ki sa Chief Electoral Officer i ava son non, me son fonksyon i pour Chief Executive Officer.  E mon mwan anvi ranforsi sa Nosyon avek 2 propozisyon lamannman ki devan nou, ki mon pe al propoze la.

Premyerman dan proposed new subsection “(1A) kot i met The Chief Electoral Officer shall also act as CEO Chief Executive Officer” mon krwar ki sa pa ase for.  E mwan sa ki mwan ti ava propoze se olye met “the Chief Electoral Officer shall also act.” Konmsi ou pe dir li ou pour osi CEO, mon anvi ranforsi sa Nosyon e olye dir “The Chief Electoral Officer shall also act as the Chief Executive Officer” mon ti anvi dir “shall be”, the Chief Electoral Officer shall be the Chief Executive Officer” e fer li kler ok ki this is the role, this is the function.

E le moman ki ou’n fer sa, mon ti a osi anvi tighten up proposed new subsection (1B), (1B) pour determin bann fonksyon sa Chief Electoral Officer ki pour vin CEO.  E pour le moman sa i lir konm swivan “subject to other provisions of this Act the term of office, the duties and other functions of the Chief Electoral Officer shall be as provided in Section 92(A)” mon mwan ti a swete propoz ki nou fer li vin pli kler, olye met “and other functions of the Chief Electoral Officer” ki nou met “and functions of the Chief Electoral Officer” epi nou azoute “other than those provided elsewhere in the Act” ok.  Pour fer kler ki son fonksyon pour sa bann ki dan 92(a) an plis ki sa ki deza egziste in the Act.

Mon annan en blan, blan bonnen, other i la avan, me mon krwar si nou fer sa, nou pe donn sa CEO en pe plis bagaz dan lafason ki nou pe determin li.  Olye dir “other functions” ki nou dir “other than those provided elsewhere in the Act” pour fer kler ki i annan fonksyon deza in the Act e an, in addition to that i pour annan bann fonksyon anba 92(a) so that the new section will read, the new proposed subsection will read “(1b) subject to other provisions of this Act, the term of office, the duties and functions of the Chief Electoral Officer other than those provided elsewhere in the Act shall be as provided in subsection, in section 92A” ok donk nou tir other anler kot nou met “other functions e nou met “other than those provide elsewhere in the Act,” pour fer kler ki i pa zis other functions me i zis bann ki supplément sa ki in the Act which is what the intention is dan son formilasyon aktyel.

E mon ti ava propoze pour tir proposed new subsection 1(c)), tir li net.  Akoz ankor enn fwa sa ki i dir se the Chief Electoral Officer, the termChief Electoral Officer’ used in 92(a)shall be construed for the purposes of that section, as the Chief Executive Officer”,  It limits it.

        Si nou tir li net, e ki nou’n fer dan 1(a) the Chief Electoral Officer to be the CEO, nou pa bezwen dir ki it’s only for the purposes of 92(a) ok, it’s over the whole breathe of the Act.

        Alor vwala lo sa pwen bann propozisyon lamannman ki mon pe met devan Lasanble.  Mersi Mr Chair.

 

MR SPEAKER

Mersi Onorab Georges, eski i annan okenn Manm ki oule fer komanter lo la?  Si non, mon ava donn laparol Minis si i akseptab.  Minister.

 

MINISTER JEAN-PAUL ADAM

Mersi bokou Mr Speaker, e bonzour Mr Speaker, bann Leaders dan Lasanble Nasyonal e tou bann Manm Onorab e tou bann dimoun ki pe swiv nou deba.

Mon premyerman mwan ti a kontan remersye Onorab Leader Lopozisyon pour retir sa bann amannman.  Akoz efektivman mon krwar sa i anliny avek propozisyon ki Komisyon Elektoral ti’n fer, e se pour sa osi ki Gouvernman ti’n drafte sa Lalwa dan sa fason pour nou ranforsi zisteman bann Lenstitisyon dan nou pei parey Komisyon Elektoral.  Alor sa mon krwar i al dan bon direksyon e i fer li senp, fer li pli fasil pour nou kapab enplimante.

An se ki konsern bann amannman ki’n ganny propoze par Onorab Bernard Georges dan son kapasite koman Chairperson Bills Committee, mon krwar ki tou sa bann amannman i anliny avek prensip ki Gouvernman in met devan dan sa Lalwa, e alor nou napa problenm, nou aksepte sa bann lamannman dan son prensip.  E mon pe regard Msye Pool kot Biro Attorney Zeneral e mon krwar ki i osi lo zot kote sa i anliny avek bann provizyon ki ti’n ganny met an plas dan Lalwa a lorizin.  Mersi Mr Speaker e mersi tou bann Manm Onorab.

 

MR SPEAKER

Mersi Minis.  Onorab eski nou, nou ava pran li avek lezot apre nou ava fer en sel vot lo amannman ok?  Si ou kapab kontinyen pour pas lo lezot amannman

 

HON BERNARD GEORGES

Mersi Mr Chair.  Mr Chair bann lezot lamannman i lo rapor Bills Committee ki devan Lasanble e se bann ptipti amannman.  Premye i dan Clause (1A) li menm, sorry pardon lo Clause (2A) proposed new subsection (1A) kot olye ki “the CEO will” dir “the CEO, the Chief Electoral Officer shall be the Chief Executive Officer of the Electoral Commission subject to the supervision” nou oule propoz ki nou met “under the supervisionbecause that’s clearer, i pe azir under the supervision of the Electoral Commission.

        2enm i dan Clause (2B) proposed new subsection 92(a), subsection 4 kot i mete “the Chief Electoral Officer shall subject to the control and supervision of the Electoral Commission be responsible for the implementation of the decisions of the Electoral Commission, (sorry Electoral Commission)” nou ti’n propoze azout “shall in addition to the other duties and function provided for under this Act” me i posib ki sa enn i vin redundant prezan akoz nou fek met li dan Clause (1B), alor nou pa bezwen propoz sa.  En pti comma (,) apre Electoral Commission.

        Dan proposed new subsection 92(a)(7) nou pe zis deletenumber of other” pour le moman sa i lir “the Chief Electoral Officer may, subject to the approval of the Electoral Commission, employ such number of other staff” nou anvi zis dir “shall employ such other staff” ok, i pli kler.

Dan Clause (2B) propose new subsection, sorry proposed new section 92(a)(9), nou anvi tir en virgil (,) pa en problenm ek en “the” kot i aparet pour trwazyenm fwa, wi.  So that it will read “the Chief Electoral Officer shall be responsible for keeping up-do-date the records’’ napa comma (,) ‘’shall be responsible for keeping up-do-date the records of the Electoral Commission’’ relating to Electoral Officers registration of voters eksetera san spesifye “the Electoral Officers” akoz sa i ava sanble dir ki se serten zot ki pe ganny targete.

Menm zafer dan sou Seksyon 12, dan son chapeau “the Electoral Commission shall terminate the appointment of the Chief Electoral Officer” nou pe propoze “of a Chief Electoral Officer’” akoz i pli neutral.

        E en fot, e en pti fot dan 12 (d) subsection 12 (d) kot i met Board, it should be Electoral Commission, akoz i ganny apele Electoral Commission and not the Board.

        Vwala Mr Chair, sa se bann propozisyon amannman ki Bills Committee pe fer avek Lasanble pour konsiderasyon Minis e pour konsiderasyon bann Manm Lasanble.  Mersi.

 

MR SPEAKER

Mersi Onorab Georges. Okenn Manm ki oule fer komanter lo bann amannman ki ganny met devan?  Non, si napa mon ava donn laparol Minis pour regarde si zot aksepte sa bann amannman ki’n ganny propoze par Bills Committee.  Minister.

 

MINISTER JEAN-PAUL ADAM

Mersi bokou Mr Speaker e mersi Onorab.  Mon krwar sa bann amannman i toutafe anliny avek propozisyon ki Gouvernman ti’n fer. Nou napa problenm pour aksepte, nou remersye Lasanble pour son sipor pour sa Prozedlwa.  Mersi.

 

MR SPEAKER

Mersi Minis, bon an vi ki bann amannman in ganny aksepte, nou kapab pran en vot lo, wi, wi mon ava demann en Manm pour segonn bann amannman.  Yes Onorab Simon Gill.

 

HON SIMON GILL

Bonzour Mr Speaker. Bonzour Minis. Bonzour tou koleg Onorab, manm piblik ki pe ekout nou.  Mr Speaker bann lamannman parey ganny propoze i ganny segonde.  Mersi.

 

MR SPEAKER

Mersi Onorab Simon Gill, bon nou ava pran en vot lo bann amannman.  Tou Manm ki an faver? Okenn Manm ki kont?  Madanm Clerk?

 

MADAM CLERK

Mersi Mr Chair.  29 Manm in vot an faver, e personn kont.  Mersi.

 

MR SPEAKER

Mersi, savedir tou bann amannman in ganny aksepte par bann Manm Lasanble.  Mon ava ganny en Mosyon pour Third Reading.

 

HON CHARLES DE COMMARMOND

Mersi Mr Speaker.  Bonzour Mr Speaker.  Bonzour Minis ek ou delegasyon, tou Manm Onorab e tou dimoun ki a lekout.

Mr Speaker mon oule move ki The Election (Amendment) Bill, 2018 as amended, i ganny lir en Trwazyenm Fwa.  Mersi.

 

MR SPEAKER

Mersi Onorab De Commarmond. Yes Onorab Simon Gil.

 

HON SIMON GILL

Mersi Mr Speaker.  Mosyon i ganny segonde.  Mersi.

 

MR SPEAKER

Mersi Onorab Simon Gill.  Bon mon a zis demann Deputy Sergeant pour move Mace retourn nou dan Committee of the Whole House avan nou ava, avan nou pran vot lo Motion for Third Reading.

Bon nou pour pran en vot lo Motion for Third Reading of Elections (Amendment) Bill 2018 as amended.  Tou Manm ki an faver? Okenn Manm ki kont?  Madanm Clerk.

 

MADAM CLERK

Mersi Mr Speaker. 29 Manm in vot an faver e personn kont.  Mersi.

 

MR SPEAKER

Mersi, Motion approved by the Assembly.  Mon kapab ganny en Formal Third Reading.

 

MADAM CLERK

Mersi Mr Speaker, this Act may be cited as the Elections (Amendment) Act, 2018.  Mersi Mr Speaker.

 

MR SPEAKER

Mersi, the Elections (Amendment) Act, 2018 in ganny aprouve par Lasanble Nasyonal.  Bon mon ti a kontan remersi Minis e remersi Chairperson Madanm Lagrenade of the Electoral Commission, Mr Victor Pool e Mr Marty Vidot.

Bon mon konnen nou progranm in, nou ti pe mazin pour ale ziska 10er, me nou annan en lot, i depan lo Manm si nou pour komans SIS now, mon konnen i Minis menm ki pour prezante, mon pa konnen si bann lezot delegasyon in arive.  .

        Prezan, bon mon ava eskiz Madanm Lagrenade parmi nou akoz li i pa pour involve dan prosen staz, Madanm Lagrenade mersi bokou e nou ava eskiz ou.

 

 (THE CHAIRPERSON OF THE ELECTORAL COMMISSION MRS LAGRENADE WAS EXCUSED FROM THE HOUSE)

 

 

MR SPEAKER

Bon nou pa pour pran, kapab pran SIS toudswit la akoz lezot dimoun, bann stakeholders ki involve ladan, i pa ankor ariv kot Lasanble akoz nou ti’n progranmen pour 10er.

Mon annan en Mosyon lo Order Paper, si i pa pour pran bokou letan, petet nou ava zis eskiz Minis en pti moman, e Minis i ava tann nou dan Minister’s Waiting Room e nou kapab deal avek sa Mosyon, then nou ava retourn lo nou travay normal ok?  Minis ou ava eskiz nou avek ou delegasyon.

 

(MINISTER JEAN-PAUL ADAM WAS EXCUSED FROM THE HOUSE)

 

MR SPEAKER

Bon anba Standing Order 95 mon reorganiz en pti pe travay lo Order Paper, e mon ava demann Loter Mosyon Leader Lopozisyon, Onorab Ramkalawan pour move son Mosyon, ki nou a kapab dispose of this Motion apre nou ava retourn lo bann Bills. Onorab Ramkalawan laparol i pour ou.

 

HON WAVEL RAMKALAWAN

Mersi bokou Mr Speaker.  Mr Speaker Mosyon ki mon pe anmenn devan Lasanble, se enn ki demande ki en Regilasyon ki Gouvernman in fer e sa Regilasyon i No. 73 pou sa lannen ki kouver bann Regilasyon pou sa ki anba Public Assembly Act i apel Speaker’s Corner i ganny anile.  E sa i enportan dan mon konsiderasyon parski bann Regilasyon ki ladan i tro – i al kont sa lespri ki sa eleman Speaker’s Corner ti ganny anonse e menm la fason ki nou konn li an Prensip.

Mr Speaker Public Assembly Act i permet Minis pou fer bann Regilasyon. E zisteman se anba sa ki Minis pe fer bann Regilasyon.  E nou konn nou Lalwa e pou nou konnen kote nou ale, pou nou kapab konman en Lasanble anil en S.I ki apel e Statutory Instrument ki Gouvernman i prezante, nou bezwen al dan en lot Lalwa.  I pa dan nou Standing Orders e petet sa i enn ban keksoz ki mon  ti ava propoze ki letan nou pe revise nou Standing Orders nou pran li.  Pou ou gannyen, kote ou al fer sa se dan Interpretation and General Provisions Act Seksyon 10 – (non, non) part 10 e plis spesifikman seksyon 64.  E Seksyon 64 i dir avek ou ki letan, letan en S.I ki’n ganny fer anba en lalwa i ganny mete devan Lasanble Nasyonal, apre sa si  Lasanble Nasyonal par en rezolisyon avan 3mwan apre ki sa S.I in ganny mete devan li parey Madanm Clerk fek fer la Papers Laid ki sa S.I. i ganny anile sa S.I i pa pran lefe.  I arete pran lefe.

Me selman tou keksoz ki’n ganny fer avan ki sa rezolisyon i pase i valid, i legal.  Se apartir sa moman kot Lasanble Nasyonal i pas sa S.I ki keksoz i sanze.  E nou’n deza annan en lot rezolisyon Lasanble Nasyonal, ki’n deza quash en S.I.  E sa ti enn ki Onorab Afif ti anmennen an relasyon avek komansman serten seksyon dan en lot Lalwa.

E mon ti a voudre remersye ou Mr Speaker pou lapenn ki ou’n donn mon Mosyon en serten urgency ki i merite, akoz si ou pa ti’n donn li sa urgency nou pa ti pou kapab anmenn li lannen prosenn.  Parski sa S.I i date le 8 Novanm;  le 8 Novanm savedir Desanm, Zanvye, Fevriye, le 8 Fevriye apartir le 8 Fevriye nou pa ti pou kapab anmenn sa S.I devan Lasanble Nasyonal.

E o fet sa i en lot keksoz ankor ki petet nou bezwen rekonsidere whether 3mwan i sa bon peryod pou nou fer sa, parski parey mon pe dir nou annan nou vakans en pe pli long an Desanm, kot i plizoumwen al de mwan alor si en S.I. i ganny anmennen an Novanm e konmsi pour ki napa nanryen ki vin en lobstak pou travay Lasanble Nasyonal.

Sa lo sa kote teknik.  E alor lefe ki nou pe pas sa rezolisyon ozordi, i vedir ki le moman ki nou pas sa rezolisyon sa S.I i pou ganny anile e i pou napa okenn lefe.  Me an menm tan i enportan pou mwan dir ki letan mon pe demande ki sa S.I. i ganny anile, pou ki tou Manm Lasanble nou sezi sa lespri – mon pa pe dir ki fodre pa ki i annan en S.I. ki en Regilasyon pou Speaker’s Corner.  I bezwen annan; i bezwen annan Regilasyon.  Par egzanp Regilasyon pou determinen kote sa speaker’s corner i été? Ki mannyer i pou ganny mannye.

E i pou otomatikman bezwen annan bann lezot bann lezot keksoz.  Par egzanp da sa S.I. la ki mon pe demande ki i ganny anile i annan serten keksoz ki mon dakor avek.  Par egzanp mon dakor ki kot Speaker’s Corner i pa devret annan lalkol, i pa devret annan drog, i devret annan serten lord. Sa i ok.  Mon osi dakor ki sa landrwa ki’n ganny dezinyen konman speaker’s corner zour ki parski la pou le moman sa ki zot – sa ki Gouvernman pe propoze i ganny servi konman speaker’s corner se sa bout lo Freedom Square ki zis apre laplenn hocky.  Ok? 

So i ant laplenn kot laplenn hocky i fini avek sa fil avan Laveni 5 Zen.  E ok Gouvernman in deziny sa morso la me kestyon se ki eski sa morso i pli apropriye?  Me lefe ki  Gouvernman in deziny sa morso i kler ki parey i mete dan sa S.I. – dan sa bann Regilasyon ki letan i annan en levennman Nasyonal dan sa landrwa, letan i annan en rally politik – parski tou bann parti politik i kontan servi, i kontan servi Freedom Square ansyen Gordon Square konman pou sa landrwa dan lavil, kot zot fer zot bann aktivite politik i swiv poudir en rally politik i pran presedans lo Speaker’s Corner.  So i annan serten keksoz ki mon dakor avek dan sa S.I.

Me selman i annan plis keksoz ki mon krwar i pa donn li sa lespri avek ki i sipoze ete.  E premye lespri Mr Speaker ki nou bezwen met an konsiderasyon, se freedom of expression.  En right ki ganny garanti anba nou Konstitisyon.  E enn bann keksoz ki fodre nou gard antet, se ki letan nou Konstitisyon Sesel i donn the right of freedom of expression, i pa pe donn li zis avek Seselwa – menm si i nou Konstitisyon.  I ape dir avek tou dimoun – o fet parski nou’n pran sa drwa konman enn bann Drwa Iniversel nou pe dir avek tou dimoun ki Sesel i rekonnet ou ‘’drwa lekspresyon.’’  Ou en Angle, ou en Franse ou en Alman ou vin Sesel ou ganny drwa koze.

E i pa akoz ou koze a mwen ki bann keksoz ki ou dir i al kont Lalwa ki poudir ou pou ganny deporte. Non.  Ou ganny drwa koze.  E premye bout sa Lalwa ki sa
Regilasyon par egzanp Mr Speaker, ki mon pa dakor avek ki sa Seksyon  4 – Clause 4 ki dir a Speaker premyerman Speaker i met captial ‘s’, i annan zis en Speaker capital ‘s’dan Sesel  e i pe asiz la lo sa sez.  Apard sa bann lezot speaker’s i small ‘s’Ok?   I dir ‘a speaker shall be a citizen of Seychelles.’  Non.  En Seselwa ki al Hyde Park ‘’speaker’s corner ‘’i kapab debout lo son sa ki nou dir an Angle son soapbox i kapab debout lo son bwat e koze.  I kapab debout lo son bwat e vin koz lo Sesel.  Servi sa konman en loportinite pou dir avek tou bann dimoun ki anvi ekout li ki mannyer Sesel i pli zoli pei dan lemonn, e ki mannyer zot devret vin vizit Sesel.  E i menm kapab montre bann portre ki mannyer Sesel i zoli pou kapab atir bann dimoun.

E alor i pa devret annan okenn restriksyon pour ki sel dimoun ki kapab koze laba se en, se en Seselwa.  I posib ki i annan en etranze e la mon pe zis servi en legzanp, i kapab ki i annan en etranze ki anvi debout pou li koz e pou li sansibiliz dimoun – par egzanp lo – en legzanp ki vin dan mon lespri la se bann latak parfwa ki ganny fer dan rezyon Israel e Palestine.  Kekfwa i anvi vin koze pou li montre dimoun ki mannyer bann latak ki ganny fer, i annan bokou zanfan ki ganny touye e ki mannyer sa i mal.  Sa en etranze i kapab vin fer li.

E kekfwa akoz sa landrwa i pou nanryen i pa bezwen al lwe en lasal ensidswit i fer sa dan speaker’s corner e dimoun ki enterese i ava koze. So zafer fodre zis Seselwa mon krwar ki i pa normal.  Aprezan i met bann ler ki sa speaker’s corner i pou available.  E dapre sa Regilasyon ou pou ganny drwa koze zis ant 8er bomaten avek 6er diswar Lendi ziska Vandredi e dan Sanmdi ant 8er bomaten ziska 4er apre midi.  Dan Dimans i fermen.  Be Mr Speaker, speaker’s corner dan Hyde Park se dan Dimans ki annan plis dimoun se parski dan Dimans se sa menm sa zour kot dimoun i annan plis letan lo son lanmen e alor sa i kapab vin en e L’Angleterre sa in vin en aspe kiltirel, donk son bann ler louvertir definitivman i pa bon.

Aprezan Mr Speaker lo 6 Regilasyon 6 i dir avek ou ki pou en dimoun vin koze dan speaker’s corner i bezwen notifye Komisyoner Lapolis.  Be sa konmsi ou pe al demann – sa nou pe retourn ankor par egzanp lo nivo en rally politik en gran zafer, non.  I pa devret annan sa bann zafer notifikasyon.  Lapolis ava konnen ki poudir this is speaker’s corner kot dimoun i kapab vini koze e ki i kapab annan serten dimoun ki pa dakor avek Lapolis li i ava fer bann provizyon pou ki i ava annan en patrol la ankor enn fwa mon pe servi speaker’s corner L’Angleterre parski sa mon pli abitye avek kot toultan i annan en prezans Lapolis pou ki si keksoz i get out of hand alors Lapolis i ava entervenir e ava met lord ek lape.  E sa zafer pou ou bezwen anvoy written notice to the Commissioner of Police pou ou dir avek li the date, the time ki ou pou delivre ou speech, konbyen dimoun ki pou koze, zot non, ensidswit Mr Speaker be sa nou pe egal li avek sa ki in fact menm parti politik konmela.

Letan nou anvoy en notis kot Komisyoner Lapolis nou pa ni bezwen nonmen lekel bann dimoun.  Nou pa ni bezwen dir lekel bann dimoun ki pou koze dan sa rally.  Nou zis enform li ki poudir pou annan en rally politik e lefe ki speaker’s corner li i sipoze ouver, be ou pa bezwen notifye li ke ler ki ou pe al koze ensidswit.

Mr Speaker i osi dir ki en dimoun dan speaker’s corner pa devret servi okenn sistenm anplifikasyon.  Mon konpran sa lespri me selman ozordi, ozordi i annan bann ptipti sistenm.  Bann ti pti sistenm e alor kekfwa i ti pou fer plis sans si i ti ava note e Lanvironnman in dir avek nou ki poudir zot annan bann sistenm ki mezir desibel konbyen ki kantite desibel kekfwa en pti keksoz koumsa i ti ava kapab.

Ozordi, ozordi i annan  sa pti speakers la bann blue tooth speakers bann pti GBL … kot i pa ni  – i pa pou fer gran tapaz me kekfwa zis en pti anplifikasyon i ava ede pour ki, sa dimoun i ganny antann me byensir i bezwen ganny fer dan en fason pou ki pa disturb son lot dimoun ki kapab la o-bor li pe koze parski speaker’s corner i kapab annan 4 dimoun, 4 diferan dimoun ki deside enn pe koz lo, enn pe koz lo legaliz kanabis lot pe kapab pe koz lo ki mannyer kanabis pa devret ganny legalize.  Lot i kapab pe koz lo tou kalite size.

Alor en pti, en pti sistenm anplifikasyon i ava apropriye e menm mwan mon ti ava dir Mr Speaker ki letan ou pe konman koz lo la ou pou vwar ki poudir menm sa landrwa i pa, i pa konvenab pou en tel keksoz.  Speaker’s conduct i dir avek ou ki konmsi i al sitan lwen kot pe dir ‘’a speaker or a member of the public  who attends the delivery of a speech in speaker’s corner shall observe discipline, conduct himself or herself in a non-adversarial, non-partisan and non-confrontational manner.’’

Non-partisan Mr Speaker si en speaker pe koz lo en size politik se ki i partizan.  Alors i pou swiv ki poudir si en dimoun i deside pou li adres e size politik ou pa kapab konmsi ankor enn fwa konmsi nou pe al tro dan – nou pe al tro dan detay e nou pe olye donn sa posibilite pou laliberte lekspresyon ganny vreman ganny eksprimen. nou pe plito siprim li.  Apre sa i dir avek ou ki letan ou laba dan speaker’s corner ou pa ganny drwa display banners, films, photograps, placards, posters, signs, writing ensidswit.  Mr Speaker be si mon deside pou mwan koz lo en size e pou dimoun konnen lo kwa ki mon pe koze mon krwar i toutafe normal pou annan en pti fason.

Si mon anvi koz lo Assumption ki poudir lo Assumption parey mon krwar ladan mon anvi koz lo Assumption ki poudir lo Assumption i pa devret annan en baz militer etranze laba.  Mon krwar avek en pti banner avek zil Assumption avek No to foreign military base lo la.  Napa nanryen mal ladan prezan tou dimoun ki pase i a konnen ki poudir mon pe koz lo sa dimoun pe koz lo Assumption menm parey mon mazinen si en dimoun i anvi koz lo kanabis i ava met en pti fey e i ava dir legalize ki dimoun a konnen ki poudir i pe koz lo kanabis oubyen sa dimoun ki pe koz kont legalizasyon kanabis i ava trouv en pti fey avek en lansenny ki dir ‘’No.’’ Alor Mr Speaker ankor enn fwa i pa fer sans.

Aprezan i dir avek ou en speaker i pa devret koz lo okenn size ki direkteman ou endirekteman, i annan pou fer avek en krwayans relizye, oubyen en larelizyon.  Oubyen ki ok lo larelizyon, be Mr Speaker larelizyon i 2enm size, pli enportan ki mon ti ava dir apard politik.  Tou dimoun i anvi koz lo bann krwayans relizye.   Alors i ava toutafe normal e la ankor enn fwa parey dan Hyde Park corner – dan speaker’s corner kot in fact dan speaker’s corner letan ou pase ou pou trouv plis dimoun ki pe koz lo larelizyon.  Enn pe dir avek ou ‘’the world is coming to an end’’ dan ankor 1mwan. Lot pou dir avek ou tel larelizyon ki pe promot tel keksoz lot, lot, lot.  E lot i ava pe debout laba i ava pe koze lo ki mannyer ou ou devret konverti e sanz ou lavi.

Alor ankor enn fwa, ankor enn fwa i pa fer, i pa fer okenn sans Mr Speaker parski nou pe koz lo lekspresyon nou ape koz lo sa laliberte e pou tou sa bann rezon Mr Speaker mon  krwar ki Minis, Minis i devret retourn avek en nouvo, en nouvo S.I. en nouvo Regilasyon ki ava regard sa bann size e mon espere ki poudir tou sa bann pwen ki mon’n met devan i ava ganny konsidere letan Minis i retourn avek en tel S.I.

Alor Mr Speaker avek sa detrwa mo e parey ou’n vwar mon pa’n anvi, mon pa’n anvi antre avek okenn politik avek sa speaker’s corner, me nou plito pe met lanfaz lo laliberte lekspresyon se sa ki, se sa ki enportan.  E sa laliberte lekspresyon i pou bezwen ganny egzibite.  E la Mr Speaker zis avan menm ki mon propoz avan menm ki mon move ki sa Mosyon i ganny, sa rezolisyon i ganny aksepte par lasanble mon pou zis sit sa ki nou pe vwar ozordi.  Plizyer group in al devan Lorloz, swa kont Assumption, swa kont viktimizasyon, swa pou dyaliz, swa pou – e enn bann keksoz ki’n  permet nou konnen deswit kwa ki zot pe – rezon ki zot la se zot banner ki zot in mete e ensidswit.

Alor Mr Speaker I beg to move ki Lasanble Nasyonal i pas en rezolisyon pou anil S.I. 73,  2018 ki annan tit public Assembly Speaker’s Corner Regulations 2018 ki  ti ganny fer le 8 Novanm 2018  e ti ganny gazete le 19 Novanm 2018.  I beg to move Mr Speaker.

 

MR SPEAKER

Mersi onorab Ramkalawan.  Okenn Manm ki segonde?  Yes Onorab Ferrari.

 

HON JEAN-FRANCOIS FERRARI

Mon segonde Mr Speaker.

 

MR SPEAKER

Mersi Onorab Ferrari. Okenn Manm i oule entervenir lo Mosyon ki devan nou?  Onorab Simon Gill.

 

HON SIMON GILL

Bonzour Mr Speaker.  Mersi Mr Speaker pou donn mwan la parol.  Mr Speaker bann largiman anmennen par Onorab Ramkalawan an relasyon avek speaker’s corner lo son praktikalite mon krwar i annan serten merit.

Me an menm tan ki nou dir i annan serten merit byensir i demande ki Lotorite konsernen i revwar konteni la fason ki i pou regle bann aktivite ki pou pase dan sa landrwa ki nou apel li speaker’s corner.  E dan sa semenn nou’n tann Onorab Ramkalawan dir avek piblik ki lo nou kote nou pe demande swa pou vot kont swa pou abstain e lo nou kote isi nou pou dir nou pou gete sakenn de nou e fer en apresyasyon lo sa ki zot krwar zot devret fer.

Mr Speaker trwazyenmman, i enportan ki mon met detrwa pwen devan nou Lasanble e devan lanasyon Seselwa.  Mr Speaker bann levennman resan dan plizyer pei e pli resan La France, la Reunion –  nou’n ganny en lesantiyon ziska ki degre bann manifestasyon i kapab andomaz stabilite e andomaz la fanmir e andomaz menm la rezyon menm lemonn akoz non.  E petet nou pe krwar poudir napa relasyon avek sa ki nou pe diskite ozordi.  Lespri annan en speaker’s corner son lideal i fantastik e i montre ki zistans nou grander lespri in arive dan Sesel pou nou kapab kontinyen fer fleri nou prosesis demokratik isi dan Sesel.

Me an menm tan mon’n sit La France, mon’n sit La Reunion konman bann manifestasyon resan, e leksperyans ki nou devret tire leson ki nou devret tire se ki zanmen, zanmen e zanmen Mr Speaker ki okenn manifestasyon dan speaker’s corner isi dan Sesel i devret dezenere e antre dan l’anarchie dan Sesel  e dan sa konteks i strikteman dan sa konteks ki mon vwar nesesite kantmenm pou nou sey annan fason pou nou sey regle ki mannyer sa bann aktivite i pran lefe – i pran laform e son konteni dan sa landrwa.

E byensir bann Lazans konsernen – Lapolis eksetera zot pou annan en rol e bokou plis travay pou fer mon prezimen ler sa speaker’s corner finalman i vin efektiv dan nou pei.  E lot eleman ki osi enportan Mr Speaker, nou bezwen sezi sa loportinite nou pa pe pretann pou nou dikte lepep e pou krwar ki nou bann dimoun pli parfe ki tou leres, me an menm tan nou bezwen dir ki ler ou laba dan sa speaker’s corner bann moman ki ou laba, fodre zanmen ankor enn fwa e zanmen sa senp sitwayen, sa zonm – fanm, sa fanmir, sa zenn, sa dimoun aze ki santi li son liberte ganny an pyete par zis ou prezans e ou manifestasyon dan  sa landrwa.  Tout an tenir kont ki ou laliberte lekspresyon i limite ziska kot pou mwan i konmanse.  E sakenn de nou, nou laliberte i limite ziska kot laliberte lezot dimoun i konmanse oubyen i fini.

Nou pa kapab ariv dan en sityasyon dan speaker’s corner a lavenir, kot sa madanm ki desann pou li al fer son shopping ki i anvi sirkile, sa businessman ki anvi deplase avek serten bann lekipman; annefe nenport ki endividi i bezwen santi li ki zanmen e zanmen okenn aktivite dan sa speaker’s corner ki anpyet lo son posibilite pou li bouze libreman, e pou li  fer son bann aktivite lazournen ki in progranmen e ki sa businessman i santi li lib kapab fer son tranzaksyon ki in plan pou en lazournen son biznes.

E ki pei, pei anfen kont pa ariv parey La France kot pei i paralize e i pa ariv parey La Reunion kot pei i paralize.  E sa i bann keksoz enportan.  Malgre tou size ki nou pe koz lo la, i enportan.  E mon pa pou al tro lwen lo la Mr Speaker.  Mwan personnelman mon welcome sa lespri, sa filozofi speaker’s corner, me tou an rekonesan ki dan serten ziridiksyon ki ler nou al dan ekstrenm avek bann sityasyon, avek bann size i kapab provok en dezenerasyon sityasyon e pei i kapab ganny afekte – seryezman afekte e lavi bann sitwayen i ganny seryezman afekte osi.

E byensir Sesel en pei ki depan lo touris okenn egzazerasyon, okenn dezenerasyon en sityasyon dan speaker’s corner  i kapab afekte nou Lendistri Tourizm dan en fason  konsekan e par la swit afekte en kantite dimoun en kantite biznes ki depan lo sa Lendistri.

Mr Speaker mon oule aret la e tou an respektan bann lopinyon bann endividi ki zot pou ale pou al manifeste laba dan sa speaker’s corner.  Mr Speaker mersi bokou.

 

MR SPEAKER

Mersi Onorab Simon Gill.  Mon a donn la parol Onorab Waven William.

 

HON WAVEN WILLIAM

Mersi Mr Speaker.  Bonzour tou dimoun ki a lekout.  Mr Speaker mon’n ekout prezantater Mosyon e an menm tan mon’n ekout entervansyon Onorab Gill, e swivan sa bann entervansyon, mon vwar poudir napa tro gran diverzans.  E byensir sa eleman lord e lape nou bezwen vreman met lanfaz lo la.  E mon osi krwar ki vizavi reglemantasyon i merit annan serten konsiltasyon ki mon krwar i merite, e san tarde mon dir ki mon pou donn sipor sa Mosyon.

Akoz mon krwar ki poudir bann serten konsern ki’n ganny lev-e i fer sans.  E parey mon dir mon krwar dan sa eleman konsiltasyon e mon krwar lemonn an antye ozordi i krwar ladan e mon siport sa lide en speaker’s corner.  Me nou bezwen fer li byen.  Mersi Mr Speaker.

 

MR SPEAKER

Mersi Onorab William.  Mon ava donn laparol Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon’n ekout lentervansyon Onorab Leader Lopozisyon ki mon krwar in dan en fason tre kler in demontre ki lo sa kote latab nou an faver plis laliberte lekspresyon posib dan en sosyete demokratik e ki nou priyorite se pou ouver lespas pou dimoun eksprim zot lopinyon plito ki ferm sa lespas e reglemant sa lespas parey Onorab Gill in sey fer nou en pe per.

An realite mon pa’n tro byen konpran mwan ki Onorab Gill ti pe sey dir akoz ler mon ti pe ekout li mon ti pe mon krwar Onorab William osi in ekout li byen e parey Onorab William i konn byen ler ou al dan en konser classic Endyen, sa bann dimoun ki pe zwe sa bann lenstriman Endyen zot napa en not devan zot.  O fir e an mezir ki zot pe zwe, zot pe rod sa not zot pe rod sa larmoni e se pou sa ki en konser Endyen parler i kapab 30 minit konman i kapab 3erdtan.  Zot kapab vwar sa not dan 2erdtan edmi so

 

(Interruption)

 

MR SPEAKER

Ok.  Onorab.  Onorab. Onorab.

 

(Interruption)

 

MR SPEAKER

Bon en moman.  En moman. Onorab Ferrari i annan drwa, drwa  lekspresyon laliberte lekspresyon dan nou House.  Annou ekout li.  Onorab Ferrari.

 

HON JEAN-FRANCOIS FERRARI

Mersi.

 

MR SPEAKER

Annou kontinyen.  Annou sey annou limit nou lentervansyon lo Mosyon ki devan nou.

 

HON JEAN-FRANCOIS FERRARI

Mersi Mr Speaker.  Mr Speaker mon respekte laliberte lekspresyon Onorab Gill.  Son laliberte pou li pran son lakoler me mon pa’n tro, tro konpran akoz in ankoler me selman mon ti pe senpleman eksplike ki i annan plizyer fason apros en deba.  L’Angleterre, L’Europe dan bann pei ki nou abitye avek i annan en sanson ki dir trwa minit ek swasant segonn nou konnen en konser classic i annan tan son letan ki i pran tandis ki avek Onorab Gill ler li i pe zwe son konser nou pa konnen konbyen letan i pou pran e ozordi nou’n vwar poudir ni en not i pa’n vwar e in fini son konser ni en larmoni i pa’n kapab mete ladan.  Akoz?

 

(Interruption)

 

HON JEAN-FRANCOIS FERRARI

Non be…les mwan, les mwan…

 

MR SPEAKER

Onorab Ferrari, annou al lo Mosyon.  Annou move on.  Annou move on.  Mon dakor –

 

HON JEAN-FRANCOIS FERRARI

Ou konnen Mr Speaker i vreman difisil ler ou’n pas tou ou lavi dan en sistenm kominis parey Cuba  …

 

(Interruption)

 

MR SPEAKER

Non, non Onorab. Onorab …

 

HON JEAN-FRANCOIS FERRARI

Pou ou prezan vin koz lo laliberte lekspresyon.

 

MR SPEAKER

Onorab. Onorab.

 

HON SIMON GILL

Nonsense Ferrari.  Nonsense.

 

MR SPEAKER

Bon, bon, mon annan, mon annan la parol.  Mon annan – annou pa les sa deba dezenere ok.  Onorab Ferrari.

 

HON CHARLES DE COMMARMOND

(Off-Mic)

 

MR SPEAKER

Order!  Order!  Order!  Mon annan laparol.  Onorab Ferrari mon rediriz ou retourn lo lesansyel Mosyon.

 

HON JEAN-FRANCOIS FERRARI

Mr Speaker mon pe koz lo laliberte lekspresyon.  Laliberte lekspresyon …

 

MR SPEAKER

Nou annan en ta …  En moman.  En moman mon pa ankor fini.  Nou annan en kantite travay devan nou ozordi e sirtou yer.  Yer nou’n pran en lazournen e mon remersi ankor bann Manm ki’n vini nou’n fer en extended Bills Committee, nou’n fer en travay  vreman vreman formidab me ti en latas en lazournen e nou’n progranm serten travay ki nou bezwen akonpli ozordi.  Annou focus lo lesansyel ki loter Mosyon in met devan nou.  Mon pa krwar ki bann Manm pou fer bann long entervansyon.  Mon apresye lafason ki Onorab Waven William in fer son entervansyon in aport son sipor.  Annou en pti pe dan sa konteks.  Nou annan Minis in attendance – in- waiting avek son delegasyon pou nou kapab pran lot Bill.  Annou fer nou entervansyon presi lo lesansyel Mosyon apre nou ava move on.  Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon pe sey met en pe lord dan sa refleksyon ki nou pe fer lo laliberte lekspresyon.  Mon pe dir poudir parler i annan en mank larmoni ler ou’n grandi dan en kiltir ki kontrol laliberte lekspresyon.  Ler ou’n viv dan en pei parey Cuba napa laliberte lekspresyon prezan ler ou ou vin koz lo sa laliberte i annan bann mank larmoni ladan akoz i pa egziste!  Prezan ler ou vwar en dimoun pe sorti dan en Sistenm Kominis Cuban pe vin dir nou poudir i dakor se la ki i annan  bann i pe vin fer en scaremongering i pe vin fer per dimoun, pei pou vin parey La France, –  pei pou vin parey La France pou annan dezord si ou les dimoun koze.  Sa madanm ki pe desann pe al bazar, i pou ganny afekte par en dimoun ki pe koze.  Se sa mon pwen ki mon pe sey fer.  Personn laliberte lekspresyon i posib, i posib ki i egziste dan en sosyete e i devret egziste dan en sosyete demokratik!  Annou aret fer per dimoun!  Mr Speaker, akoz milti parti osi ti pou anmenn dezord dan pei!

15 lo 10 ti pou fer sa landrwa vin en dancing hall.  Se sa ki ti dir.  Be Bidze ti pou bloke napa nanryen ti pou pase! Mon pe sey dir avek lepep Seselwa – mon pe eksprim mon lekor pou dir annou pa bezwen per.  Annou pa bezwen met sa bann regleman strik, sa bann regilasyon ki restrikte laliberte lekspresyon!

Me annou met an plas en regilasyon ki ankouraz, ki ankouraz dimoun pou desann anvil pou vin eksprim zot lekor, pou zot montre en portre Assumption sa enn ki kontan Assumption i dir la en pli zoli zil, pli zoli lans dan lemonn nou pa anvi ki okenn militer i vin fer en baz lo la.

Be sa msye i ganny drwa.  Nou pa kapab annan en Lalwa ki dir ou pa pou anmenn en portre.  Se sa bann  pwen ki nou pe sey fer.  Annou ouver sa lespas.  Annou ouver sa deba lo laliberte e annou ankouraz dimoun pou eksprim zot lekor.  Se sa mon pwen Mr Speaker e se pou sa ki mon’n segonn sa Mosyon e ki mon anvi ki lezot Manm lo lot kote latab, i osi akonpanny li dan en fason ouver!  Pa pou vini pou vin fer per dimoun.  Si nou fer speaker’s corner i pou vin parey La France.  Be nou pa kapab fer sa bann keksoz koumsa akoz i pa byen.  I pa byen.  Nou dan en syek kot nou bezwen ouver sa lespas e se sa ki mwan mon pe rekomande Mr speaker.

E mon ti a kontan bann Manm lo lot kote latab ler zot pran la parol zot siport laliberte lekspresyon.   Zot pa vin dir nou poudir pou annan dezord.  ‘’Sa madanm pa pou kapab al bazar!’’  ‘’Trafik pou bloke!’’  Pa vin dir nou sa.

Nou, nou ava deal avek sa bann keksoz parey nou’n deal avek 15 lo 10, nou’n deal avek milti parti sa bann keksoz nou’n avanse  e nou pei i en pli bon landrwa apre sa bann levennman.  Mersi Mr Speaker.

 

MR SPEAKER

Mersi Onorab Ferrari.  Onorab Aglae.

 

HON EGBERT AGLAE

Mersi Mr Speaker pou donn mwan laparol pou koz lo sa Mosyon.  Mon’n ekout Loter Mosyon dan son deliberasyon kot i konsern sa Mosyon e Mr Speaker mwan konman en zenn politisyen e sa S.I. li menm li i pa’n fer en S.I pou politisyen.  In pran kont osi bann lezot laspe kot bann rasanbleman i kapab ganny fer.  Larelizyon i – non Onorab Ramkalawan in nonm larelizyon.  I pou osi annan bann lezot lenstans ki swa dan Ledikasyon, ki swa dan Lasante, ki swa dan Lanvironnman, ki swa dan bann sekter biznes – fermye  lot ensidswit ki anvi met zot lekspresyon devan avek serten petet mekontantman ki kapab pe pase zot santi zot ganny afekte.

E mwan osi mon santi poudir lo size sa S.I. la in dwatet annan plis konsiltasyon ler ti pe ganny met an plas.  Mr Speaker e koumsa san fer politik avek sa S.I. nou tou nou ti a tonm dakor lo la fason e konteni ki sa S.I e lankadreman ki okenn rasanbleman i ganny fer, dan ki konteks ki laform ki ganny fer e ki santi akseptab san – nou koz bokou lo human rights -san ki i afekte okenn drwa endividi ouswa pep Seselwa ki anvi viv son lavi toulezour ler ou pe fer ou bann rasanbleman ou manifestasyon.

Mr Speaker fodre pa osi ki nou reste dan sa lespri lepase.  Mon tann par ou Mr Chair, Onorab Ferrari in tou kou anmenn bann size dan lepase be nou, nou oule move on dan sa laliny nou!  Nou pa anvi viv dan lepase.  Sa ki’n pase in pase, i annan keksoz ki regretab, me nou bezwen kontinyen.   Sa pep li i anvi vwar demen.  I anvi bouz lo demen.  Se sa ki ozordi e sa S.I. li nou santi poudir i annan serten keksoz ladan ki bezwen ganny aranze pou rann li pli ouver, pou rann li osi pli relevans avek bann diferan lafors.  Akoz i pa zis politisyen ki pou servi sa speaker’s corner.  Fodre pa, nou pou krwar zis politisyen ki pou desann pou al servi sa.  I kapab annan lezot parey mon’n nonmen so se sa Mr Speaker ki mon santi ki poudir sa S.I. i bezwen ganny re vwar en pti pe dan son laform e son konteni.  E mwan mon pou siporte pou sa S.I ganny revwar.  Mersi Mr Speaker.

 

MR SPEAKER

Mersi Onorab Aglae. Onorab Henrie.

 

HON GERVAIS HENRIE

Mersi Mr Chair.  Mon pou bref.  An fet entervenan ki’n koz avan mwan, mon kontan pozisyon ki in pran.  Parkont Onorab William mon pa’n tro sir si in dakor avek pozisyon Onorab Gill ouswa si in dakor avek pozisyon Leader Lopozisyon.  Me solman Mr Speaker sa ki mon anvi dir se ki lentansyon Leader Lopozisyon pou anmenn sa Mosyon i kler li vreman kler e telman kler pou bann dimoun ki pe ekoute mazin dan lepase pozisyon ki Lopozisyon in pran vizavi size laliberte lekspresyon drwa rasanbleman.

Rapel le 3 Oktob.  Fer bann dimoun desann pou siny en petisyon e demann trwazyenm Lasanble Nasyonal bann Manm pou pa vot lo sa Lalwa amannman  dan Lalwa telekominikasyon ti pe anmennen.  Sa i enn.

Dezyenmman anmenn Public Order Act Ankour pou prouve poudir ti kont Konstitisyon. E ki ozordi tou popilasyon Sesel pe kapab zwir laliberte lekspresyon e drwa rasanbleman, akoz pozisyon ki Lopozisyon in pran – dan en fason demokratik, dan en fason dan lord, dan lape e avek disiplin e avek refleksyon.  E ozordi bomaten i menm semen ki nou pe pran.

Tandis ki menm si lot Onorab ki’n koz avan mwan in dir poudir nou pe toultan lev size lepase be lo zot kote ki’n fer sa bomaten!  Akoz letan zot fer dimoun per i toultan fason ki zot in fer. Letan zot pe koz pran La Reunion koman legzanp, pran La France konman legzanp e koz touris pou ganny afekte e sa ki pe desann anvil, be i fer per sa.  Nou pa sa ki nou pe fer.  I annan 1,2,3,4,5 6 Seksyon,  6 Seksyon dan sa S.I ki al kont prensip laliberte lekspresyon e drwa rasanbleman ki Leader Lopozisyon in koz lo la.  E pou ou ki kekfwa in manke i annan sa kestyon dan katriyenm Seksyon i dir ou ki zis Seselwa ki kapab koze.  E in eksplike poudir non sa i pa devret le ka. Son senkyenm Seksyon i fermen dan Dimans.  Be mwan si mon anvi koz ek bann dimoun ki sorti lanmes dan Dimans.  Drayver taxi pe travay anvil akoz ou bezwen fermen ?  Akoz ou bezwen met sa bann ler ki ou’n mete?  Dan son sizyenm Seksyon sa kestyon notifye Komisyoner Lapolis nou pe santi poudir i annan difikilte avek sa.  Dan son setyenm Seksyon i dir ou pa kapab servi letan i annan lezot aktivite dan vizinite Freedom Square be zisteman kekfwa la mon profite poudir be mon annan en crowd alor mon anvi koz ek sa crowd, mon merit kapab fer sa.

Wityenm i pe dir ki ou pa kapab servi anplifikasyon son.  Be i annan bann sistenm ou pa bezwen fer li tro for, me solman omwen an mezir nou ki laz pe monte nou pe ganny difikilte tande so si ou anplifye son en pti pe i kas lebra lekel?

E dizyenm i dir ou bann diskour non partizan ki pa konfrontasyonnel, be la anndan nou fer bann diskour ki nou difere, be nou lager?  Alor sa ki nou fer la anndan nou pe osi anmenn deor !  So i senp.

Sa 6 Seksyon e ki nou pe dir i al kont lespri laliberte lekspresyon e drwa rasanbleman, me plito kontrol e sansir e nou, nou pe demande ki sa S.I. i ganny re vwar pou alor parey Onorab Ferrari in dir ouver lespas pour ki nou pep i kontinyelman epanouir dan sa semen ki nou pe pran ozordi. Mersi bokou.

 

MR SPEAKER

Mersi Onorab Henrie.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker ler mon konmans mon entervansyon, mon ti a kontan remind nou tou ki nou pe apros dan, nou pe apros dan moman festivite e i en moman kot nou tou nou bezwen egzers en plis konpasyon, kontrol, limilite anver lezot, e pa servi listwar oubyen leksperyans lezot dimoun pou denigre sa bann dimoun e ridikiliz zot oubyen vin servi largiman lo bann lezot resortisan pou vin fer largiman politik dan Lasanble.  Akoz mon krwar nou’n go past sa.

Mr Speaker Mosyon devan nou i enn ki tre kler akoz i pe vin koz lo sa S.I. ki’n vin devan Lasanble e ki pe demann kreasyon en speaker’s corner. Dan sa S.I. i annan keksoz ki bon ladan.  Me i annan keksoz osi ladan ki al tro lwen ki fer ki prezan pou ou al anmenn en lot S.I. i bezwen ki sa enn i ganny retire e en lot i ganny anmennen.

Kote mwan mon krwar sa S.I. i pe al – i bon par egzanp.  Mr Speaker i pa scaremongering ler en dimoun i vini i dir ek nou koumsa poudir nou bezwen careful e get leksperyans lezot pei o-bor nou ki pe arive dan la fason ki nou, nou egzers nou bann drwa, dan la fason ki nou nou koze, bann keksoz ki nou fer.  I pa scaremongering sa.

I zis ki i enportan toultan si nou le fer en keksoz dan en fason lo en lot kote nou bezwen mazin son lenplikasyon ki pou annan.  Si ozordi dan en pei nou vwar kot i annan bann manifestasyon, bann keksoz ki pe arive i enportan pou nou tir leson ladan e nou’n toultan tir leson from sa ki pe pase otour nou pou ki nou kapab fer keksoz pli byen!

So sa i enportan.  I enportan ki nou annan dan en sosyete demokratik bann pa bann Regilasyon me bann prensip de baz ki nou maintain pou ki nou tou nou pa al dan en direksyon kot nou afekte drwa en lot.  Akoz nou bezwen ekspekte ki drwa en dimoun i konmans kot sa ki pou nou i fini.  Mon dir sa Mr Speaker akoz mwan mon’n pas atraver bokou kritik mwan.  Dan sa Lasanble, an deor sa Lasanble kan Senkyenm Lasanble ti pas Public Order Act.

E Senkyenm Lasanble ki ti pas Public Assembly Act.  E dan  Public Assembly Act Mr Chair e se la kot mon pou al kot sa S.I. i al tro lwen, the spirit of the Public Assembly Act se pou fer li pli fasil pou en dimoun manifeste. Toultan rekonesan bann Prensip ki nou bezwen maintain an se ki konsern drwa e lord ek lape.

Be ler nou get par egzanp e la mon vin kot bann seksyon kot sa Lalwa sa S.I. mon santi pe al tro lwen Seksyon 6, mon vwar Seksyon 6 pe vin tro restriktif.  I vin tro restriktif akoz pou ou al ekrir, fer bann prosedir ou konnen the whole point of a speaker’s corner se ki ozordi ou annan en problenm avek – par egzanp mon pa konnen mwan sa ki pe pase lo bann zil, ou al dan speaker’s corner mon eksprim mon lekor e sa i donn mwan  loportinite pou tir sa fristrasyon ki ou annan ; met li la si i annan dimoun ki anvi ekoute bat lanmen i al i ekoute i bat lanmen and then apre mon ale.  Se sa lideal.  Akoz sa fristrasyon si i reste anndan i manifeste son lekor dan en lot fason.  Me lo en lot kote Mr Chair, i osi enportan ki Lotorite osi i vin  konsernen, avek lefe ki nenport manifestasyon ki ou pou annan, e la mon vin lo en lot Seksyon, Seksyon 10 i pou de-koul dan en eleman partizan.

Si par egzanp en dimoun pe konplent lo sistenm lasante be i pou blanm Gouvernman at one point in time.  Eski sa i partizan?  Ou konpran?  So se pou sa rezon ki nou bezwen nou bezwen revwar.  Akoz mannyer nou konteks si ou le pa politik me nou konteks sosyal ekonomik i ete i pou inevitab ki en dimoun son largiman ler i pe fer i pou al dan en eleman politik.  Be eski ou pou anpes li fer sa pou dir li pa al dan speaker’s corner pou li fer sa?  I bezwen annan en landrwa pou li kapab fer sa.

The whole idea dan speaker’s corner se pou ki pou li kapab fer sa.  Be ler ou met sa restriksyon lo li i pa kapab fer li.  So ou vwar?  Se pou sa rezon ki sa Lalwa i annan en eleman yes.  I annan bann eleman ki bon, be i annan bann eleman ki pa bon son lot kote but i annan bann eleman ki pa akorde avek lespri ki nou’n anmennen.

Mon pou donn ou en lot legzanp Mr Speaker.  Kot ou annan en eleman dan sa Lalwa ki petet mon krwar  lot kote latab in petet mal enterpret li.  Annou regard par egzanp seksyon 10 ki koz lo not pa montre bann portre.  E atraver ou Mr Speaker mon le koriz en misapprehension ki Onorab Ferrari in fer.  Ler in dir ou pa montre bann portre par egzanp portre Assumption e dayer Mr Speaker mon le dir ki – par egzanp Assumption ; par egzanp meton nou lo sa kote latab i annan en nouvo Konstitisyon nou’n travay lo la e ladan nou’n met en Clause ki dir poudir pou napa okenn baz militer lo okenn nou bann zil.  Nou anvi ale demen, al koz lo la. Nou ganny drwa montre en portre Assumption akoz en portre Assumption i pa obscene i pa indecent.  Ou konpran?  Sa provizyon in fer ki bann portre ki obscene ki montre vyolans sa  bann ki pa kapab ganny montre.  Se sa mon krwar ki nou bezwen konpran lide me, me, me la fason ki nou’n ekrir sa lartik, i fer ki nou’n enkli lezot eleman bann plakar, bann keksoz e ou bezwen ariv kot sa bout kot pou vwar poudir pe contain violence, la ki pou kapab konpran poudir be serten plakar i kapab sa.

Be prezan si i annan sa konplikasyon dan son lenterpretasyon la, ler mon’n fer mon laplikasyon ek Lapolis mon’n dir mon pe vin koz Assumption ou pou dir mon pa ganny drwa antre ek plakar si sa zofisye pa’n konpran sa eleman Lalwa ki ladan.

So se pou sa rezon ki mon krwar ti devret pli kler, pli senp.  Mon kapab montre plakar sa size ki mon pe vin diskite ou konpran.  Mon kapab montre plakar pou nenport ki size as long ki i pa montre vyolans.

So ou vwar i annan en bon eleman me en lot kote i annan en eleman ki pa akorde avek sa bon lentansyon ki sa Lalwa i oule anmennen.  Mr Speaker mon krwar ou menm ou ou’n dir nou’n grandi konman en Lasanble. Nou’n sanze.  Mr Speaker mwan mon pa’n dan lasanble presedan ki petet serten Manm lo lot kote latab i santi zot rankinen towards. Ok?

Mon pa sorti dan en letan kot dimoun i santi poudir zot asosye mwan ek en – avek en lepok zot lavi ki fermal pou zot.  Me ki mon ti a kontan dir Mr Speaker e i enportan pou nou mazin sa se ki i annan en nouvo zenerasyon Sesel ki oule bouz devan.  E napa scaremongering napa nanryen lo sa S.I. Mr Speaker mwan mon pou siport sa propozisyon pou quash sa S.I.

Mon pou siport li lo merit sa Mosyon.  Se tou.  Lo merit sa Mosyon, akoz sa Mosyon pe fer ki nou ava kapab anmenn en lot S.I. ki pli responsive avek sa ki Lalwa pe demande. Se sa ki enportan.

E an terminan Mr Speaker mon ti a kontan termin kot mon ti konmanse Mr Speaker.  I enportan Mr Speaker pou nou tou realize poudir ler nou pou sanz en eleman dan sa S.I. kot nou dir en dimoun i pa en citizen of Seychelles i kapab al dan speaker corner se anybody ki kapab al dan speaker’s corner.  Prezan i pou enportan ki nou konman Seselwa nou menm nou, nou respekte sa.  Mon’n vwar Mr Speaker ki nou pe apros moman festivite ki nou still annan serten eleman ki anmenn bann eleman mon pa pou dir zenofobi me bann konsern e i konsern mwan sa Mr Speaker dan sa letan.  So petet pandan sa letan en mesaz ki nou Lasanble i devret pe pouse, se ki konman en Nasyon nou akonpli plis ler nou travay ansanm dan linite, ler nou fer keksoz ek konpasyon, ler nou fer keksoz ek limilite e ler nou tou nou vin ansanm.

So pandan sa moman festivite Mr Speaker nou tou nou pou ansanm, nou tou nou pou pe al kot fanmir, annou koman Lasanble annou pas bann bon mesaz.  E ozordi dan Lasanble nou pe travay ansanm konman 2 parti politik nou pe vwar poudir i annan keksoz ki nou bezwen aranze e nou pe aranz li ansanm konman Lasanble pa konman en endividi.  Mersi Mr Speaker.

 

MR SPEAKER

Mersi Onorab Pillay.  Bon mon anvi ki nou dispose of sa Mosyon avan ki nou pran break la.  Mon annan 4 Manm lo mon lalis.  Ok?  I annan de lo kote LDS enkli plus loter Mosyon ki bezwen annan Right of Reply.  E i annan 2 lo kote parti lepep.  Si nou pou fer li bref nou a fini nou a pran break apre ler nou antre pou nou pran lot Prozedlwa ki nou ava ale en sel tre.  Ok ?  So annou agree ki nou al direkteman lo lesansyel Mosyon lo sa S.I. e nou pa les nou deborde al an deor.  Mon a donn laparol Onorab Woodcock.

 

HON WAVEL WOODCOCK

Mersi Mr Speaker.  Mr Speaker lo sa ki Onorab Sebastien Pillay in dir i annan zis en keksoz ki mon dakor avek mesaz ki merit sorti dan Lasanble se en mesaz lape, mesaz linite.  Me selman en keksoz ki sa Lasanble pa kapab fer nou pa kapab zis rubber stamp tou gonaz e kosonnyen ki vin devan sa Lasanble Nasyonal.

Mr Speaker sa S.I. ki devan sa Lasanble la lo speaker’s corner i fer mwan mazin POA.  I fer mwan mazin the Public Order Act.  Sa S.I. i en repetisyon Public Order Act ki ti ganny anmenn dan Senkyenm Lasanble.  E sa Public Order Act Mr Speaker ti vol nou drwa pou rasanble.  Ti vol nou drwa pou eksprim nou lekor konman en Nasyon.  Ou konnen ki ti arive avek sa Lalwa Mr Speaker?  Sa Lalwa 18 Seksyon ek sou Seksyon ti ganny deklare kont nou Konstitisyon Mr Speaker.  Sa Lalwa ti vyol nou Konstitisyon!

E la ki nou pe vwar ozordi en lot Lalwa parey pe vin devan sa Lasanble Nasyonal ki ankor enn fwa, pou vyol nou drwa pou nou eksprim nou lekor.

Mr Speaker nou pa bliye dan Public Order Act ti annan en provizyon ki ti donn Prezidan pouvwar pou enpoz en curfew a nenport ki moman pou restrikte mouvman!

Annou pa bliye osi Mr Speaker ki plizyer keksoz dan sa Public Order Act annou pa bliy enn Lalwa esansyel ki ou ti napa drwa tir portre zofisye menm si sa zofisye ti pe abiz en dimoun.  E tousala Mr Speaker ti ganny repeal e Senkyenm Lasanble plizyer bann Manm ki dan sa Sizyenm Lasanble ti la ler zot ti aprouv sa.  Zot ti zis rubber stamp. Be nou sa Lasanble ki la nou pa pou zis rubber stamp e aprouv zis nenport e kwa ki vin devan sa Lasanble Nasyonal Mr Speaker.  Mon ava koz prezan en pti pe Mr Speaker lo ankor enn fwa mon a tous en pti keksoz.

Ozordi nou pep zot annan zot drwa, akoz ozordi sa sityasyon politik ki nou ladan, klima politik ki ganny anmennen par 15 lo 10,  ozordi sa pep zot kapab annan sa liberte pou zot eksprim zot lekor.

Annou mazinen Mr Speaker si sa Public Order Act ti ankor la ozordi bokou bann etranze ki ti pe ganny zot drwa ti pe ganny abize bann size human trafficking, pa ti pou vin o kler akoz sa Public Order Act ti ganny repeal dimoun ti kapab al devan baro State House  pou fer protestasyon.

Nou vwar bann stevedores in fer protestasyon ler zot pa ti pe ganny en saler ki zot ti merite.  Nou’n vwar bann teachers, nou’n vwar bann ners, nou’n vwar ban drayver konsernan sa size SINOHYDRO, plizyer dimoun i kapab eksprim zot lekor akoz sa Public Order Act ti ganny repeal e zanmen zot ti pou kapab fer li si Lalwa ti ankor an fors Mr Speaker kot ou ti pou bezwen demann permisyon lapolis, Komisyoner Lapolis kot plizyer dimoun pa ti pou gannyen.  Alor Mr Speaker la ki nou pe vwar, zot pe vin avek en Lalwa similar to the Public Order Act ki mwan Mr Speaker zanmen mon pou kapab siport en Lalwa ki abiz lo drwa nou pep!

Mr Speaker les mwan prezan koz lo speaker’s corner, mon pa pou tarde.  Speaker’s corner i en landrwa dezinyen kot nenport dimoun i kapab eksprim son lekor. Zot kapab eksprim zot lopinyon, zot drwa zot annan en drwa pou zot eksprim zot lekor e koz lo nenport ki topik ki nou santi i relevan pou zot ki zot konsernen avek.  Annou pran legzanp Hyde Park L’Angleterre Mr Speaker.  Hyde park L’Angleterre ou kapab koz lo okenn size. Ou kapab koz lo larelizyon, ou kapab koz lo politik as long ki ou pa pe zoure, as long ki ou pa pe ensilte dimoun ouswa ou pe enstig vyolans.  Sa i nou drwa ekspresyon.  Nou drwa lekspresyon pa vedir mont lo semen fer sa bann dega parey nou vwar La Reunion avek La France kontrerman avek sa ki Onorab Gill pe dir. Nou drwa lekspresyon se ki en drwa en laliberte pou nou eksprim nou lopinyon dan en fason ki byen, dan en fason, dan lape dan en fason ki mannyer ou kapab dir sa, konstriktiv. Ok?

Sa bann persepsyon bann vye persepsyon lontan sa bann vye persepsyon kominis  Marxist  lontan in fini sa bann letan!  Annou aksepte poudir nou dan en new Era Sesel – en Era kot dimoun i annan son laliberte pou koze as long as i pa pe vyol drwa en lot dimoun Mr Speaker.  Les mon koz ankor lo Hyde Park.  Mr Speaker, bann Speakers dan speaker’s corner L’Angleterre i annan zis 4 keksoz.

Dan Lalwa i annan zis 4 keksoz ki zot napa drwa fer.  Enn;

Obscenity.  Zot pa annan drwa zoure.  Zot pa annan drwa zoure.

        Blasphemy.  Zot napa drwa blaspheme en lot larelizyon koz mal lo en lot larelizyon, ensilte en lot larelizyon.  E zot pa annan drwa ensilte Larenn, si ou ensilte Larenn gard pe vin anmas ou deswit.  Zot pa annan drwa ensilte Larenn.  E katriyenmman zot pa annan drwa enstig vyolans ouswa break of peace.  Se tou ki zot pa annan drwa fer.  Apard sa zot annan zot drwa pou eksprim zot lekor, koz lo nenport ki keksoz ki zot anvi koz lo la.

E Mr Speaker mon pou osi koz lo de pti keksoz avan mon fini.  Mon pa pou tarde.  Parey Onorab, mon krwar Onorab Gervais Henrie in koz lo la sa zafer ou pa annan drwa zwenn Dimans ou pa annan drwa koz Dimans e sa i pa fe sans Mr Speaker, sa i vreman pa fer sans.

En dimoun speaker’s corner i en landrwa ki spontaneous li.  Anybody i kapab vini anytime si i annan en keksoz lo son leker i kapab vini vin koze.  Sa zafer notifye Komisyoner Lapolis napa en sans.  En Landrwa dezinyen ki ganny fer pou koze nenport ler, nenport zour akfer nou bezwen met sa restriksyon?  Akfer en dimoun bezwen notifye Lapolis?  I en keksoz ki spontaneous sa e sa ki fer li pli worse ankor se normalman ler ou dan en speaker’s corner zis parey Lasanble Nasyonal, Onorab Sebastien Pillay i dir en keksoz Onorab Clifford Andre i reponn.  Be koumsa i marse sa.  En dimoun i vini si i pe koz lo – I don’t know i pe koz lo legaliz marijuana.  En lot dimoun li i pa an faver sa, sa dimoun li i vini i pe koz lo legaliz marijuana en lot dimoun li i pa an faver sa i pou bezwen al notifye lapolis esper ankor 5 zour pou li ganny permisyon pou li vin reponn, non ou reponn la. I vin parey en deba ou kapab eksprim ou lekor.  Tou dimoun i annan son freedom pou li vin dir sa ki i santi pou li i enportan.

Alor Mr Speaker sa provizyon sa ki zot pe fer is not a speaker’s corner.  Sa ki zot pe fer mon pa konnen kalite zafer zot pe sey fer me selman sa i ridikil Mr Speaker.  Seksyon 10 (c) Mr Speaker kot i dir ou pa annan drwa mon ava lir li parey in mete dan sa Seksyon.  Ou pa allow to show or display banners, film, photography, placard, poster, signs containing violence.  Be si en dimoun pe vin koz lo vyolans domestik, en, ouswa be en dimoun i servi lar en desen pou eksprim son lekor.  En dimoun i kapab anmenn en plakar pou demontre bann keksoz si ou pe koz lo parey vyolans Lapolis.  Ok.  Si ou pe koz parey ti arive kot mon pa mazinen ki dat, kot lepep ti pe eksprim zot lekor kont en Lalwa e gard ti ganny anvoye pou bat zot si zot pe eksprim vyolans kont parey mon’n dir vyolans Lafors, Larme, bann vyolans parey Tonton Makout lontan bann keksoz koumsa, be Mr Speaker so mwan mon pe dir anybody should have a freedom at any time pou li vin kot sa speaker’s corner ,si i annan en keksoz ki i anvi koz lo la i bezwen kapab. Akfer i bezwen enform Komisyoner Lapolis?  Sa ki zot pe fer Mr Speaker parey mon’n dir this is not a speaker’s corner!  E mwan mon pa pe dakor ditou avek sa S.I. e alor mwan konman Manm elekte pou distrik Grand Anse Praslin mon pou vot kont sa.  Mersi Mr Speaker.

 

MR SPEAKER

Mersi Onorab Woodcock. Onorab Basil Hoareau.

 

HON BASIL HOAREAU

Mersi Mr Speaker.  Mr Speaker la sa Mosyon ki’n ganny anmennen pou quash the S.I. ki’n ganny fer i pe anmenn nou lo sa size freedom of expression.  Lartik 22 nou Konstitisyon i donn nou sa freedom of expression, me i osi fer en provizyon pou dir sa freedom of expression i kapab ganny limite, i kapab ganny restrikte par en Lalwa ki neseser dan en democratic society.

So an dot mo nou Konstitisyon i rekonnet poudir malgre ki nou annan sa drwa freedom of expression, i osi rekonnet poudir i annan letan ki i pou neseser pou kontrole sa freeedom of expression.  E la Mr Speaker en S.I. in ganny fer ki apel Public Assembly Speaker’s Corner Regulations, 2018.

Mr Speaker mon krwar nou pou bezwen get keksoz an konteks i enportan ki nou ganny keksoz an konteks e nou pa vin emosyonnel e politiz tou keksoz.

Premyerman dan Lalwa Public Assembly Act ti napa obligasyon lo Minis pou fer en speaker’s corner. Nou bezwen fer sa kler.  Ti napa obligasyon.  Sa Public Assembly Act ki’n pase i pa met en obligasyon ki dir fodre anmenn en Regilasyon pou anmenn en speaker’s corner.  Me Regilasyon i dir poudir zeneralman Seksyon 15 Lalwa Public Assembly Act i dir poudir Minis i kapab fer Regilasyon ‘’to give effect to the provisions of the Public Assembly Act.’’  So i zeneral.  E Minis in santi poudir i neseser pou donn lefe e donn met an pratik sa bann drwa ki ganny donnen anba Public Assembly Act pou kree en speaker’s corner.  Sa i byen e sa nou bezwen rekomann Minis pou sa.

Me an menm tan i pa byen osi poudir letan nou kree sa speaker’scCorner ki nou met bann restriksyon ki par lao sa ki neseser dan en democratic society.  Se as long ki  letan nou kree sa speaker’s corner nou pe donn dimoun sa right pou zot al eksprim zot dan en speaker’s corner, nou bezwen an menm tan nou pou met restriksyon met restriksyon neseser dan en sosyete demokratik.

E Mr Speaker pa bokou pei ki annan speaker’s corner.  Legzanp in ganny donnen L’Angleterre Hyde Park.  Singapore i en pei ki annan speaker’s corner.  I en pei ki annan speaker’s corner e li la zis pou fer en konparezon ek pou nou,  li i ti ganny kree an lannen 2000.  An lannen 2000 zot speaker’s corner e zot osi ti annan restriksyon lo ler.  Premye kou zot ti dir poudir zot ler se ant 7er bomaten ziska 7er diswar. Zot osi zot dir ek ou poudir avan ou vin dan speaker’s corner ou bezwen donn notifikasyon Lapolis.  E zot, zot ti dir poudir selman zot sitwayen ek permanent residencePermanent residence ki kapab vin exercise zot drwa dan speaker’s corner.  Me an 2008 Singapore in sanz sa li ; in tir limit lo ler, tir limit lo ler dir round the clock ou kapab vini dan speaker’s corner ki pou nou  mon krwar poudir i pe montre nou poudir an 2008 Singapore in fer sa e nou konnen letan nou pe koz lo  Singapore nou konnen Singapore i pa vreman en bon legzanp.

Avek tou respe letan nou koz la demokrasi.  Nou konnen ki kalite sistenm zot annan e nou bezwen dir sa larealite. E me zot in tir sa zot.  An 2008 zot in tir konpletman e dir koumsa ou kapab vin nenport ki ler.  Zot ti annan en restriksyon lo the use of amplifier, me apre zot in tire zot in dir ok ou kapab servi amplifier ant serten letan.  An serten letan zot pale par egzanp aswar zot pa les ou servi amplifier ki fer sans me zot dir ek ou bann self powered amplifier ou kapab servi.  So parey bann loud hailers ou kapab servi sa.  So mon krwar poudir petet sa restriksyon lo amplifier nou devret re gete.  Regete petet nou bezwen re aranz li kot nou pa fer li en total ban lo la.

Petet son ler lo ler pou servi amplifier nou bezwen mete poudir i annan en serten ler ou pa pou kapab servi sirtou ler nou pe al lo kote aswar.  E kalite amplifier ki ou kapab servi.  Mon krwar sa nou bezwen re gete.

Lo kote ler ki restrikte the use of speaker’s corner sa mon  krwar nou devret retire konpletman mon pa krwar i fer sansan pou annan en speaker’s corner e ou restrikte ler ki dimoun i oule vini parski parey Onorab Henrie in dir Dimans petet i en letan ki bokou dimoun pe travay dan lasemenn.

E sel letan  ki li i pou ganny sa letan pou li al eksprim son lekor dan speaker’s corner se probableman Dimans.  So nou pa kapab tir Dimans mon krwar poudir round the clock en dimoun i devret ganny akse avek speaker’s corner.

Nou’n vwar restriksyon lo kote lefe ki ou bezwen notifye Komisyoner Lapolis e la ki Regilasyon pe dir i pe fer menm kondisyon.  I pe apply menm kondisyon ki annan anba Public Assembly Act.  Mwan letan mon get sa provizyon mon dir be akoz, akoz petet sa in ganny mete?

Mon pe mazinen petet en rezon se ki pou kontrole pa pou kontrol sa ki sa dimoun in pe vin dir me petet si en letan ou vwar ou annan ou 30, 40, 50 speakers ki pe vin lo menm zour, suddenly i kapab kree en chaos e i kapab lead to en sityasyon kot i kapab lead to alterkasyon vyolans.  Akoz si ou annan tro bokou speakers pe vini menm zour.

Me an menm tan mon konpran letan Onorab Woodcock pe dir si sa dimoun i a vini spontaneman?  What if sa dimoun i vini konman en i vin dan lodyans me letan i vwar bann keksoz ki pe ganny debat i dir en be mwan  osi mon anvi eksprim mon lopinyon, mwan osi mon anvi mont anler la prezan eski ou  limit li ou dir ek li koumsa be ou pa pou mont la anler ozordi ou al fer donn ou 5 zour notice apre dan 5 zour ou a mont la anler.

Ou konnen i tir sa spontanite e mon konnen poudir nou kapab do away with sa restriksyon pou donn sa.  Lapolis i a a vin la kot speaker’s corner i a fer son patrol parey labitid si i santi keksoz pe get out of hand, i a pran son pouvwar parey i ete anba Lalwa. Me pou donn notifikasyon kot speaker’s corner mon krwar i pli bon nou retire me mon pa krwar sa i ganny fer avek en bon lentansyon ti pou dir annou sey kontrole pangar i lead to disorder.

Me mon krwar i annan lot fason ki nou kapab deal avek sa Mr Speaker.  Mr Speaker letan nou koz lo Regilasyon 10.  Regilasyon 10 mon annan en pe issue avek Regilasyon 10 la mwan.  Mwan mon annan issue letan i dir ‘’…. shall observe’’ sa dimoun shall observe discipline conduct himself or herself in a non-adversarial and a non partisan manner.’’  Mon annan issue avek adversarial e non-partisan.  Sa dimoun i kapab adversarial i kapab fer li dir mon koz dan en fason ki mon pe koz  kont sa lot dimoun, sa i normal i freedom of expression.  Nou bezwen respekte lopinyon en lot dimoun non-partisan akoz en dimoun ki anvi en lopinyon politik ouswa ki i santi li i senpatiz avek en parti politik, i pa kapab express sa dan speaker’s corner?  Nou donn  li son totalite akoz si i annan en issue ki dimoun i servi pou koz lo la dan freedom of expression se politik.  Si konman mon pou koz lo freedom of expression en dimoun pou konmans koz lo bann issue politik.

E annefe politik i lye avek tou keksoz.  Si en dimoun demen i deside monte dir gete mon pe al kritik Minister Lasante – mon pou al kritik Minister Ledikasyon probableman i pou dir ek ou be sa Gouvernman of the day – pa pe delivre par egzanp ouswa bann Manm Lasanble pa pe delivre lo- i normal ou pa kapab dir non-partisan mon krwar nou devret tire. Sel keksoz ki nou  devret kite non-confrontation manner. Sa mon konpran pangar ou pe dir konfrontasyon la ou pe al dan en sityasyon kot kapab lead to disorder. Me solman nou bezwen tire sa non-adversarial and non-partisan.

Lo kote ‘c’ ek ‘d’ –  ‘c’ parey Onorab Pillay in dir  i pa nenport ki banner nenport ki photograph.  Photograph ki pe contain vyolans, lewd, or obscene or indecent expression.  Onorab Woodcock in fer sorti en pwen ki relevan son pwen.  Si ou pe par egzanp en sityasyon kot lapolis in fer britalite e ou, ou anvi montre bring back to her attention of manm piblik, e ou dir la la en portre ki mon ti tire tel keksoz pe arive.

Mon krwar petet the use of the word containing petet the word ki devret pe ganny servi la se ki pou encourage violence or incite sa i bann mo ki nou devret sa petet it’s a wording ki Minis i devret re gete.  Letan nou koz lo relizyon sak keksoz ki koz lo relizyon lo ‘d’ i byen sa sa i byen sa ankor mon krwar i annan en misinterpretation ki mannyer in ganny lir akoz i pa zis lir nenport ki ‘’… which may cause hostility between different racial, religious groups’’ so ki i pe fer se ki ou kapab koze lo relizyon, me si ou konmans koz lo bann keksoz ki kapab fer en lot group larelizyon feel poudir ou pe blasphemy parey ou pe koz lo la pli boner parey L’Angleterre in ganny kontrole la osi sa i pe target sa i pe target blasphemy la i pe anpes ou ensilte larelizyon en lot group dimoun e sa mon krwar i enportan sa idea ki la i enportan.

Letan an zeneral Mr Speaker pou mon konklir mon pou dir poudir mon krwar i enportan pou Minis re al get – lentansyon pou annan speaker corner i byen, me mon krwar nou bezwen al re get sa bann restriksyon ki’n ganny mete. Nou bezwen fer sir poudir letan nou donn sa bann dimoun the right pou zot al dan en speaker’s corner ki nou pa pe tro limit zot nou pa pe kontrol zot nou bezwen donn zot tou sa drwa tou sa drwa pou ot nobou eksprim zot lekor me subject to selman bann restriksyon ki neseser dan en sosyete demokratik.  E mon santi serten sa bann restriksyon parey lo kote Komisyoner, lo kote amplifier, lo kote ler ki ganny akse i en pe an tro, e alors mon pou donn mon sipor sa Mosyon.  Mersi.

 

MR SPEAKER

Mersi Onorab Basil Hoareau.  Onorab Bernard Georges.

 

HON BERNARD GEORGES

Mersi Mr Speaker.  Mr Speaker tou sa ki mon krwar i merit ganny dir lo sa Mosyon Onorab Leader Lopozisyon bomaten in ganny dir. Mon pa pou prolonz sa deba mon ti anvi zis fer enn de pti komanter.

Premyerman se ki nou ti akey  sa lespri annan en speaker’s corner ki Prezidan Larepiblik ti mansyonnen isi dan Lasanble dan enn son bann diskour Leta Lanasyon konman ankor en pa ki nou pe fer dan lepanouisman nou bann drwa e dan lepanouisman sirtou drwa a lekspresyon.  E sa se en bon keksoz.  Malgre ki mwan personnelman mon ti demann mon lekor, eski  i vreman neseser pou annan en speaker’s corner etan donnen ki i annan en speaker’s corner ozordi ki tou dimoun i servi ki apel Facebook e kekfwa nou kapab apel li en writers corner apard pou Prezidan Trump akoz li son speaker’s corner i apel Twitter.  Me bokou dimoun ki ti ava dan le pase desann lo laplenn pou al fer en lide pase ozordi i prefere servi Facebook pou fer sa me i annan touzour mon krwar en nesesite pou annan en lespas kot bann dimoun ki swa pa anvi servi Facebook oubyen ki pa servi Facebook oubyen ki zot anvi ki zot enteraksyon i personnel pou zot kapab annan enposibilite pou fer li e dan sa ka mon krwar sa lide i bon.

Malerezman parey in ganny dir sa Regilasyon ki’n ganny fer pou reglemant fason ki speakers corner pou ganny servi i mank oubyen i pa senkronize avek lespri annan en speaker’s corner in the first place e i fer en defayans ki mon krwar nou tou nou dakor i bezwen ganny revwar.

Annou cancel sa S.I. go back to the drawing board e vin avek enn ki tou dimoun pou aksepte.  E pwen ki mon ti anvi fer ozordi Mr Speaker se sa.  Ou vwar si ou restrikte, si ou restrikte akse a speaker’s corner oubyen lafason ki speaker’s corner pou ganny servi sel keksoz ki ou pe fer se ou pe dir avek dimoun, dimoun pa pou asiz kot zot e dir mon pa pou al, mon pa pou al speaker’s corner zot pou servi en lot fason zot pou desann kot Lorloz parey zot ti fer.

E ler i ti ganny restrikte dimoun ti servi bann lezot mwayen a zot dispozisyon.  La kote drwat avek mwan mon annan de legzanp.  Onorab Leader Lopozisyon ti servi lefet ki i ti an ser en Dimans bomaten ler lanmes ti pe ganny broadcast lo radyo ; Onorab Ferrari li i ti desann kot Lorloz, sez ti ganny kas lo son ledo mwan mon ti la a plizyer repriz pou al anmenn li sekour oubyen pou al Kordgard pou al gel avek bann gard pou dir larg li akoz sel keksoz ki i ti pe fer i ti pe servi son drwa lekspresyon.

Alor sa pou arive si ou restrikte, si ou restrikte posibilite en dimoun pou al dan speaker’s corner i pou desann kot Lorloz e i pou fer egzakteman sa ki i ti sipoze fer dan speaker’s corner.

E dernyen pwen ki mon anvi fer se en pwen ki’n ganny fer deza me mon ti anvi repete.  I annan dimoun ki pou ekrir Komisyoner Lapolis e ki pou donn notis ki i pe desann.  Akoz kekfwa i anvi koz lo en size kot i anvi fer Lapolis konnen ki son size i kontroversyel e fer sir ki i annan en gard la zis  an ka piblik i ganny incited.  I annan dimoun ki pou fer sa.  I annan dimoun ki pou pibliy lefe ki zot pou desann tel zour pou envit piblik pou ki dimoun ava desann i ava vin ekout zot tel parey kestyon, lide ou legzanp ki’n ganny donnen bomaten, Assumption.  Si mwan mon ti anvi koz lo Assumption mon pa ti anvi zis desann en zour mon ti pou anvi mobiliz dimoun fer dimoun konnen ki tel zour mon pou al koz lo tel size.  Me dimoun pou fer sa.

Me nou bezwen osi provide pou bann dimoun ki anvi appear dan en fason spontane ; dan en fason kot swa  problenm fek lev-e la e zot anvi desann pou al koze.  Mon mazin par egzanp bann travayer etranze si zot krwar ki zot pe ganny abize par zot anplwayer dan en serten fason or whatever, la en landrwa kot zot kapab desann pou al koz lo sa labi ki zot pe gannyen.

E kekfwa zot ava anvi fer li dan en fason spontane akoz sa labi fek arive e zot desann an group pou al fer sa.  Or en parey in ganny dir en dimoun ki anvi reponn imedyatman a en dimoun ki pe fer son speech lo speaker’s corner i esper li fini konman i ale li mont dan son soapbox i reponn sa. sS bann keksoz ki mon krwar nou devret ankouraze olye dekouraze e se pou sa rezon ki ansanm avek bann lezot dimoun isi dan sa Lasanble mon partaz sa ki’n ganny dir.  Annou vot sa S.I. down e retourn avek enn ki reponn a tou nou bann legzizans. Mersi Mr Speaker.

 

MR SPEAKER

Mersi Onorab Georges.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker sa Mosyon ki devan nou la i en Mosyon ki donn nou en sans pou nou davantaz edik nou dimoun.  Edik nou pep lo la demokrasi lo freedom of expression laliberte lekspresyon epi lo sa speaker’s corner ki nou pe koz lo la.  Mwan an plis ki sa ki’n ganny dir be mon dir ozordi la i annan sa speaker’s corner.  I ti kot Lorloz la lotrozour mon vwar en dimoun in desann ti annan en portvwa ek zot, ti annan plakar.  Konmsi i pe deza ganny fer li prezan nou, nou ti le met li en landrwa petet pli apropriye e mon krwar  byen i bezwen annan. Me selman nou’n vwar sa ki’n ganny mete la i bezwen ganny mete properly.  Konmsi i annan keksoz ki nou tou nou tonm dakor ki bezwen ganny aranze e Minis i a re vwar.

Be an fezan sa la nou bezwen osi dir speaker’s corner i pa zis en kestyon en landrwa pou politik li, i pa ni kestyon konmsi ou vini ou vin koz kont Prezidan zis kont Prezidan.  I annan en kantite keksoz ki dimoun mon krwar i bezwen kapab ganny sans vin eksprim li dan speaker’s corner.

Par egzanp i annan dimoun i kapab pe promot en konsep e i anvi vin servi sa landrwa la pou li promot sa.  I anvi an menm tan ganny sipor pou sa konsep, fer dimoun konpran.  I annan dimoun osi i pa konn ekrir li i le vin servi speaker’s corner, be i pa pou al ekrir Komisyoner Lapolis pou demann permisyon i zis desann li so nou devret donn li osi son laliberte, son sans pou li eksprim li.

I annan dimoun par egzanp ki vwar ki rasizm i konmanse i pe pran en lelan dan Sesel.  I le vin pronons li kont sa be i vini.  I vin dan speaker’s corner i vin dir e lezot a swiv li pou kas sa lespri rasis, ensidswit.  I annan dimoun ki vwar ki la zenofobi pe konmanse dan Sesel e pe pran en lanpler be i annan  ki kont sa i desann dan speaker’s corner i annan  lezot dimoun pou swiv li osi pou dir keksoz pou kapab anpes nou pep petet plonz dan en fernwar – dan sa sans la.

I annan dimoun par egzanp ki vwar ki sa 15 lo 10 pa bon.  I pa oule servi lezot mwayen i oule servi speaker’s corner i a vini, i a vini i a vin dir 15 lo 10 kondisyon pa ti koumsa prezan ou pa pou ganny vot ankor ensidswit – i a vin dir.

I annan dimoun par egzanp ki pou li i vwar ki e deza la lo Facebook ou vwar ki konmans dir ki kalite Lasanble ki nou annan.  Zot in menm donn serten non nou Lasanble be speaker’s corner i ava en landrwa i a monte i a vin dir ki sa kalite Lasanble i pa oule i ava dir whatever ki i anvi dir.  E petet la bann mansonz lo Facebook ava diminyen en pe e dimoun a servi sa avenue ki nou pe met devan li la e ki i ava ganny sans, konmsi nou pa met sa ta restriksyon i ava pli fasil pou li vin kapab eksprim li.

Me an di-z-an tou sa Mr Speaker e nou, nou bezwen konpran ki pa tou landrwa ki annan speaker’s corner e bann landrwa ki annan i en sans.  Pou mwan sa i en gran lagrandisman nou demokrasi.  Nou pe valoriz nou demokrasi plis ankor me tou sa i bezwen baze lo detrwa keksoz.  I bezwen annan respe.  Mon krwar mwan nou demokrasi son lavansman son lagrandisman e sa speaker’s corner li i bezwen baze lo respe si napa respe mon krwar nou pe al an deor.

E mon krwar i annan lezot pwen ki’n ganny mansyonnen blaspheme ensidswit, zoure nou bezwen annan – konn kontrol nou  e L’Angleterre parey in ganny dir nou konn tre byen e gard i la konman ou zour Larenn i tyonbo ou i met ou deor.

E mwan mon krwar isi la nou napa Larenn be i pa kapab konman ou zour Prezidan me mon krwar sa kestyon respe i bezwen la e se la kot i bezwen annan sifizaman sekirite, gard i bezwen la pou fer sir ki keksoz pa al an deor kontrol.  Mon krwar sa zafer an deor kontrol i annan en risk sa mon krwar nou tou nou bezwen konpran i kapab dekale i kapab escalate parey nou dir.  I kapab al an deor kontrol e i vin danzere pou nou pti pep.

So sa nou bezwen veye e mon krwar mover Mosyon i konsyan de sa mon asire i pa ti ava anvi ki keksoz i dekale.  E alor dan sa lespri ki i bezwen annan respe, i bezwen annan serten fason  fer.  Nou pa merit vin la pou vin zoure.  Mon krwar zoure i bezwen dan zot landrwa e  gard i devret tyonbo ou konman ou zoure i kont Lalwa sa an tou le ka.

Konman i konmanse i tyonbo ou i sarz ou, ou al laba  e ou pa ava vin ankor zour vin zour ankor.  E sa i en fason par egzanp diferan keksoz ou bezwen vin ek ou plakar Mr Speaker.  Ou konpran?  Pou ou promot akoz la pa get li zis pou vin tir ou fristrasyon.  I en landrwa wi pou vin tir ou fristrasyon. En landrwa apropriye ki nou pe etabli me  pa i pa zis sa li.  Pa zis get sa kote fristrasyon get sa kote pozitiv osi.

Dan en sans promot serten konsep, serten lide, serten fason ki pou ed nou sosyete.  E alor mon vwar li dan sa fason e mon krwar mon ki mover Mosyon in vwar sa bann pwen ki in avanse mon ti pe ekout li e i enportan mon krwar ki i ganny revwar sa S.I. e nou tou nou tonm lo la an prensip e ki nou merit pa tarde nou siport sa Mosyon la e nou, nou dir avek Lotorite revwar li, anbelir li, fer li pli senp.  Fer li pli senp pou tou sa Seselwa pou tou sa dimoun ki pou kapab servi li e deza i ti pe ganny servi nou anmenn li dan sa landrwa apropriye.  E annou fer ki nou demokrasi ava avanse dan laliberte lekspresyon, i ava al lo en lot oter e  – dan respe, dan respe dan en larmoni, dan en fason fer korek san ki nou al an deor limit e nou pa les keksoz depas nou pou vin en problenm pou nou.

Avek sa mwan mon pou siport sa Mosyon.  Mon krwar i byen e mon ti ava demande ki tou dimoun i siport sa Mosyon pou ki nou al  en pe pli devan sirtou la ki Nwel/Lannen pe vini nou bezwen kontinyen reste dan stabilite e i enportan dan lape e annan sa respe e sa i en bon moman ki sa Mosyon in vini annou fer ki i ava anmenn tou sa bon keksoz avek li.  Mersi.

 

MR SPEAKER

Mersi Onorab De Commarmond.  Mon ava donn la parol mover Mosyon pou fer son Right of Reply.  Onorab Ramkalawan.

 

MR SPEAKER

Mersi bokou Mr Speaker. Mr Speaker premyerman mon remersye tou bann Manm ki’n koz lo sa Mosyon ki mon’n prezante pou anil sa S.I. 73 of 2018.  E i annan plizyer keksoz ki’n ganny dir e tou sa bann diferan eleman i zwenn ansanm.  Selman petet ou konnen letan ou koz lo laliberte lekspresyon spesyalman dan Sesel i annan ki koz lo teori me i annan nou ki koz lo sa kote pratik.  E petet la bon apard bann lezot dimoun le 3 Oktob ki ti ganny parski ti napa zis nou de Onorab Ferrari ki ti ganny injured, me sa ki annan bokou dimoun pa realize se ki letan Onorab Ferrari avek mwan nou pennyen dan bomaten, letan nou pas nou lanmen dan nou latet nou trouv sikatris ‘’laliberte lekspresyon’’ dan nou latet e alor letan nou trouv sa sikatris la nou bezwen koz lo la.

E se pou sa rezon ki parfwa i annan serten lezot dimoun pa konnen sa e par egzanp mon osi mon ti a kontan ennler konmsi raz mon latet kler parey serten dimoun i kontan marse Onorab Ferrari osi ti a kontan sa be si nou raz nou latet kler la i pou en vilen site akoz zis konman nou pou raz nou latet kler la ou pou trouv bann pwen ki’n ganny koud ladan ou pou trouv sanpye dan nou latet e Onorab Ferrari ou pou trouv plis ki en sanpye dan son latet.

E parey nou pe dir tou sa bann sanpye la i apel ‘’sikatris laliberte lekspresyon.’’  E se pou sa rezon ki mwan personnelman sak fwa ki mon vwar anything ki annan pou fer avek laliberte lekspresyon kot mon santi kot sa laliberte pe ganny siprimen mon pou vin devan pou mwan lager lo la.  E sa Mr Speaker ankor enn fwa e Onorab Aglae e avek Onorab Mondon ti tann mwan byen for letan kot meeting SADC par egzanp letan nou ti pe koz lo prezantasyon sa Lalwa model letan nou  ti pe koz lo reform elektoral, mon ti dir avek bann dimoun la e zot tou zot ti aplodi letan mon dir mwan mon krwar dan reform elektoral e mon anvi dir zot ki pou mwan i en loner akoz mwan mon enn sa bann dimoun  ki’n deza boycott en eleksyon akoz reform elektoral.

E alor i pa zis en kestyon son teori i son pratik nou’n pas ladan, nou’n konnen ki savedir pa ganny permisyon pou ou fer en meeting. Nou konnen  ki savedir ou pa ganny drwa koze!  Mwan mon enn ki’n ganny ban lo radyo pou mon fer servis akoz mon’n koze!

Mwan mon  enn ki parey mon pe dir ‘sikatris laliberte lekspresyon dan mon latet alor letan nou koz dan en serten fason la nou pa pe zis anvi koze nou pe koz lo la pratik e sa ki dan sa S.I. parey zot tou zot in dakor e la mon bezwen soulinyen Mr Speaker ki poudir mon kontan letan mon’n tann, mon’n tann bann MNA lo lot kote latab koze kot letan zot in dir e Onorab Leader Government Business in dir i pou siport sa.  sa ki enportan pou dir ki sa i en S.I Gouvernman, en Regilasyon Gouvernman e tou Lasanble – parski in dir avek zot ti a kontan tou dimoun siporte, e tou Lasanble pe dir ek Gouvernman be sa ki zot pe mete la pa bon fodre ganny re vwar.

E mon kontan sa lekspresyon ki Onorab Aglae in dir.  Onorab Aglae letan in dir nou  bezwen move on. Wi Onorab nou bezwen move on me selman letan i annan en S.I. ki anpe nou move on sa S.I. la i fer nou retourn an aryer.  Nou bezwen, nou bezwen tir li met de-kote e pou nou  kapab pou nou kapab bouz devan.

Mr Speaker mon  zis anvi mon realize nou annan en kantite travay devan nou me mon anvi zis dir ki dan speaker’s corner L’Angleterre i menm annan en model code e Onorab Woodcock in mansyonn en pti git sa kot i dir:-‘‘Please don’t use’ premyerman i dir :-‘speaker’s corner is your platform. You may use it to express any view any idea any opinion, so long as it is lawfulThere are no rules but you are asked to observe the following code.  Please don’t use offensive language.  Please respect alternative opinion.  Please show courtesy to other speakers and members of the public.  If others are waiting please limit your time to a maximum of 10 minutes.’’ La i la.  Se tou.  Be nou nou bezwen montre nou pep koze.  E letan nou, letan nou les nou pep koze se la ki nou pep pa pou rod zour kanmarad, dimoun pou rod bann lopinyon and this is the shift ki nou bezwen fer dan nou pei.

E si anba Public Assembly Act nou kapab fer sa move – en pe parey nou’n fer dan sa Lasanble kot parfwa menm dimoun pa tro konpran par egzanp Onorab Gill bomaten i pa’n vreman sezi sa konparezon ki Onorab Ferrari ti ape fer.  Be si ou pa sezi en keksoz ou demann leksplikasyon.  E Onorab Ferrari pa ti pe ensilte personn li Mr Speaker.  I ti ape zis servi de legzanp.  Lanmizik classic western, ki annan bann notes ki letan i zwe L’Amerique letan i vin zwe Sesel letan i vin zwe partou sa morso Modzart ki pou annan li si sa morso Modzart ki zwe pou 5 minit an L’Amerique, letan i pou vin zwe Sesel tou i pou 5 minit. Tandis ki lanmizik classic Endyen  li i diferan e nou’n deza asiste e Onorab William mon vwar li pe riye parski i dir avek ou lanmizik Endyen i classic li i napa bann notes li – i napa notes li.  Letan zot konmans zwe la zot rode zot rode zot seye, Sitar i sey donn en soz e prezan ou pa konnen si Sitar ki pou trouve, oubyen si vyolon ki pou trouve, oubyen si Tabla ki pou trouve me apre ki zot rode la aprezan kekfwa zot so e  – Mr Speaker mon krwar ou osi ou ti la.

Nou’n deza asiste en konser lanmizik classic dan ICCS e apre 1erdtan zot ti ankor pe rode.  Aprezan zot ti pran en break Mr Speaker zis konman zot ti pran sa break tou simoun ti profite ti al se li e dezyenm parti konser lasal ti vid!

E se sa se sa ki sa konparezon ki Onorab Ferrari ti ape dir.  Be Mr Speaker fodre pa ki n ou fer dimoun. Fodre pa ki nou fer dimoun krwar ki laliberte lekspresyon i pou anmenn dezord ensidswit e absoliman parey ou zanfan letan ou les ou zanfan koz avek ou eksprim li menm letan i pa dakor avek ou sa zanfan i grandi pou li apresye ou plis, me non selman pou apresye ou plis me son matirite i vin bokou pli boner ki bokou zanfan ki zis konman zot ouver zot labous zot paran i dir ek zot ferm ou labous granmoun pe koze la!  Be sa zanfan  osi tou i kapab pe dir en keksoz ki fer sans.  Alor avek sa Mr Speaker mon dir avek Lasanble annou anil sa S.I. e annou demann Minis pou vin avek en keksoz ki pi bon e nou kote Lasanble nou pare osi pou nou fer nou kontribisyon.  Mersi bokou Mr Speaker.

 

(APPLAUSE)

 

MR SPEAKER

Mersi Onorab Ramkalawan.  Bon mon ava demann tou manm ki an faver Mosyon pou quash S.I, 73 of 2018 pou montre en show of hands.  Tou Manm ki an faver?  Okenn Manm ki kont?

Madanm Clerk.

 

MADAM CLERK

Mersi Mr Speaker.  Mon’n rikord 27 Manm ki’n vot an faver e personn kont.  Mersi.

 

MR SPEAKER

Mersi Madam Clerk.  Savedir Mosyon pou quash S.I. 73 of 2018 in ganny aprouve par Lasanble Nasyonal.

Bon nou ava pran en Break.  Mon ti a kontan ki malgre ler nou pou antre i pou en short session, me at least ler nou antre Minis ava kapab prezant sa prosen Prozedlwa, then nou ava break e nou a retournen apre midi pou nou ouver deba lo la.  So mon sizere nou antre 11.45 e nou ava regarde si i ok avek SBC zis prezantasyon Minis i overlap en pti pe apre midi then nou ava break e nou ava retournen 2er apre midi.  So nou break nou retournen 11.45.

 

(BREAK)

 

MR SPEAKER

Bon nou ava kontinyen nou travay.  E ankor enn fwa mon welcome Minis Adam ki pour prezant sa prosen Prozedlwa.  E Minis i ganny akonpannyen par Attorney Zeneral Msye Frank Ally e Komisyoner Lapolis Msye Kishnan Labonte.  E ankor touzour dan prezans e akonpanny Msye Marty Vidot koman Assistant, Personal Assistant to the Minister avek Msye Victor Pool ki osi reprezant Biro Attorney Zeneral.

E parey mon dir nou pour pran prezantasyon Bill e apre sa nou pour break e nou ava open deba apre midi.  Mon ava demann Onorab De Commarmond pour move Mosyon pour Second Reading.

 

HON CHARLES DE COMMARMOND

Mr Speaker sa Bill osi i paret mon nou pour sot son 7 zour si mon pa tronpe non oubyen …?

 

MR SPEAKER

Non, nou’n deza fer First Reading.  The First Reading wi, zis nou ti pe fer bann travay Bills Committee.  Yes i sitan bokou – mon konnen.

 

 

HON CHARLES DE COMMARMOND

Tou keksoz pe vin vitman la.

 

MR SPEAKER

Wi.

 

HON CHARLES DE COMMARMOND

Mr Speaker anba Order 71 (1) nou Standing Order, mon oule move ki The Bill, Seychelles Intelligence Service Bill, 2018 i ganny lir en Dezyenm Fwa.  Mersi.

 

MR SPEAKER

Mersi Onorab De Commarmond.  Okenn Manm ki segonde?  Yes Onorab Vidot.

 

HON AUDREY VIDOT

Motion seconded Mr Speaker.

 

MR SPEAKER

Mersi Onorab Vidot.  Bon mon ava envit Minis pour entrodwir son BillMinister.

 

MINISTER JEAN-PAUL ADAM

Mersi bokou Mr Speaker.  E ankor enn fwa bonzour Mr Speaker, tou bann Leader dan Lasanble Nasyonal, tou bann Manm Onorab e tou bann dimoun ki pe swiv nou.

I en plezir pour mwan lo lapar Gouvernman prezant sa Prozedlwa pour etablir en Servis Lentelizans pour nou pei Sesel.

Sa Prozedlwa i vize pour batir en lenstitisyon pour lavenir nou pei.  I en Lenstitisyon ki fonde lo bann valer bonn gouvernans, lo latransparans e proteksyon drwa tou sitwayen.

Nou apresye en kantite bann lesanz ki’n ganny fer yer dan konteks Bills Committee e nou apresye ki ozordi nou ava kapab kontinyen lo deba lo sa Prozedlwa baze lo bann eleman kot nou’n kapab agree e osi klarifye, kot i ankor annan nesesite pour nou klarifye lo sa bann diferan lenstans.

Premyerman dan sa Prozedlwa, sa lenstitisyon ki nou pe kree pour asir kordinasyon ant tou bann Lazans ki anmas lenformasyon e i pour osi asire ki i annan aksyon apropriye ki ganny pran baze lo sa bann lenformasyon e lentelizans dan en fason sistematik.

I osi permet nou azir vitman pour aprofondi e pour swiv serten lentelizans kot i neseser e permet bann aksyon neseser pour ganny pran dan en dele letan minim.

Sa lenstitisyon ki ganny kre anba sa Prozedlwa i osi fasilit partaz lenformasyon avek bann partner aletranze, akoz nou fodre nou touzour mazinen poudir ki bann rezo kriminel dan lemonn aktyel, i bann ki parfwa i annan bann selil lokal me ki i annan en laspe global.

Sa Prozedlwa pe ganny anmennen pour adres premyerman bann konsern ki nou popilasyon antye i annan lo nou kapasite koman en pei pour adres bann menas ki devan li.

Sa bann menas i kapab pran plizyer laform.  Premyerman drog i premye konsern ki nou pep i annan, mon krwar sa i kler pour tou Seselwa.  I esansyel pour nou ranforsi nou kapasite Nasyonal pour servi lentelizans pour nou kas bann rezo ki alafwa i annan sa laspe Nasyonal e osi Enternasyonal, e i enportan ki nou met tou nou zefor pour nou kapab adres sa.

Letan Gouvernman in diskit avek Komisyoner Lapolis e avek bann lezot lorganizasyon ki enplike dan sekirite nou Nasyon, zot rekonnet poudir sa i aktyelman en mankman pour nou annan sa kordinasyon e osi nou bann partner etranze ki enplike; par egzanp dan lalit kont drog, in vwar ki i mank en landrwa santralize dan konteks nou pei pour zot kapab osi partaz lenformasyon e permet nou fer bann loperasyon konzwent.

En lot Sekter, en lot menas Mr Speaker e tou bann Manm Onorab ki nou bezwen gard antet, se osi bann risk lye avek nou kapasite pour par egzanp adres bann byen Malaki.

Sa i enkli bann byen Malaki par egzanp dan konteks blanchiment larzan, dan konteks par egzanp koripsyon e osi dan konteks par egzanp bann laspe kriminel, tel ki osi bann trafiker drog kot parfwa zot kapab kasyet zot bann byen anba par egzanp – en biznes oubyen anba en fron ki aparaman kredib.  E alor pour nou byen kapab servi bann provizyon par egzanp dan Proceeds of Crime Act ki permi lasezi bann byen malaki, i enportan pour nou an bon lentelizans.

E sa Lazans ki pe ganny kree anba sa Prozedlwa, i pour permet nou ranforsi sa kapasite pour nou fer li dan en fason sistematik.

Trwazyenmman Mr Speaker e tou bann Manm Onorab, nou bezwen osi konsyan ki koman en pei maritim avek en lespas océanique ki anba nou kontrol 1.3milyon kilomet kare, nou kapab fer fas avek bokou risk lye avek larzer sa lespas.  I annan sa risk trafik drog ki pe pas dan nou delo e ki pe pas osi dan larezyon.  Nou osi dan en rezyon ki malerezman pa stab, i annan plizyer pei dan nou larezyon ki i annan plizyer risk asosye avek zot sityasyon Nasyonal.

I annan problenm lapes ilegal ki en fleo ki afekte Sesel, i afekte osi bann pei dan larezyon.  I annan malerezman osi trafik zarm ki i annan dan sa rezyon e osi trafik imen parmi lezot.

Sa nesesite pour nou ranforsi nou kapasite lentelizans atraver en lenstitisyon for pour permet nou pli byen fer partenarya avek bann Lenstitisyon Enternasyonal e osi byen adres bann partner lokal ki sa bann rezo pe servi e sa i vedir bann Seselwa ki enplike dan sa bann diferan trafik.

Katriyenmman Mr Speaker nou en pei ki osi met lanfaz lo nou lanvironnman e sa i en parti entegral dan par egzanp nou Lendistri touristik.  Nou konsyan ki i annan deplizanpli bann trafik ilegal dan bann prodwir biodiversite ki lye avek Sesel tel ki kokodmer, tel ki bann lezot prodwir ki kapab ganny eksporte dan en fason ilegal.  I annan osi bann risk par egzanp otour polisyon ilegal par bann bato oubyen bann lezot akter.

I enportan ki nou ranforsi nou sekirite environnementales e nou pe koz osi lo laspe Nasyonal kot nou konnen ki enn de bann dimoun ki par egzanp fer bann aktivite ilegal dan kote lanvironnman zot osi enplike parfwa dan bann lezot aktivite.

Lentelizans e kordinasyon lentelizans ant bann diferan Lazans atraver sa Lenstitisyon ki pe ganny kre pour ed nou pour nou adres sa dan en fason pli sistematik.

Senkyenmman Mr Speaker e tou bann Manm Onorab, nou bezwen konsyan osi lenportans sekirite nou frontyer.  Nou en pei ki ouver pour touris, nou en pei osi kot nou annan bokou travayer etranze ekspatriye ki vin travay lo permi travay.

E nou konnen osi deplizanpli ki Seselwa nou vwayaze e nou al dan bann lezot pei e malerezman osi nou bann sitwayen parfwa i enplike dan bann aktivite kriminel dan bann lezot pei.  Avek en bon Lenstitisyon enplike dan kordinasyon lentelizans e litilizasyon sa bann lentelizans nou kapab redwir bann risk ki i annan pour nou pei asosye avek bann vwayaz nou bann sitwayen e osi bann etranze ki vwayaz isi swa pour rezon biznes, tourizm oubyen pour vin travay dan nou pei.  E i enportan pour dir ki nou konsyan sa risk e ki nou ranforsi nou kapasite pour adres sa.

Mr Speaker e tou bann Manm Onorab letan nou’n fer, letan Biro Attorney Zeneral e tou bann partner in travay lo sa Lalwa.  Nou’n gard osi sa lenportans proteksyon pour nou sitwayen koman en eleman primordyal.

E premyerman nou’n pran an kont laspe nou Konstitisyon ki respekte e protez Drwa sak sitwayen pour li kapab viv son lavi an prive e san okenn lentervansyon ilegal oubyen mal apropriye par okenn Lenstitisyon.

Sa Lalwa alor i donn en kad kler pour bann sirkonstans kot mezir apropriye i kapab ganny servi pour ganny lentelizans e kot i neseser par egzanp pour entersepte kominikasyon oubyen pran aksyon similer pour adres okenn risk oubyen menas ki asosye avek aktivite ki en sitwayen i kapab fer, e sa i kouver anba nouvo Seksyon 17 e 18 anba sa Prozedlwa.  E dan sa bann Seksyon nou pe adres bann sirkonstans kot sa bann mezir i kapab ganny aplike, me osi nou’n met klerman bann proteksyon e bann restriksyon ki sa Lazans pour bezwen azir anba la pour li kapab pran sa bann aksyon.

Anba sa Prozedlwa tou linisyativ pour entersepte okenn kominikasyon oubyen pour akse avek okenn dokiman, i bezwen ganny prezante devan en Ziz kot Lakour, e sa i vedir ki i pa pour annan en risk ki nenport ki azan oubyen ki Direkter Zeneral sa Lazans i kapab lo li menm pran en desizyon pour li entersepte okenn kominikasyon ki konsern nenport ki sitwayen, me i bezwen plito montre Lakour poudir i annan en baz, en nesesite konsernen avek sekirite Nasyonal pour kapab fer en tel lentervansyon.

Mr Speaker e tou bann Manm Onorab, sa Prozedlwa i osi prevwar kreasyon en National Intelligence Council en, savedir en Konsey Nasyonal pour lentelizans, e dan propozisyon ki’n ganny debat longman dan Bills Committee, dan propozisyon sa Konsey i ganny prezide par Prezidan e osi i enkli Attorney Zeneral, Sef Lafors Defans, Komisyoner Lapolis e osi Dirizan FIU.  E lentansyon sa Konsey Nasyonal, se pour kre en Lenstitisyon ki en Lenstitisyon Nasyonal e ki donn en kad sipervizyon pour sa Lalwa, e osi koman en kad ki asire ki tou bann proteksyon i ganny swiv dan sa Lalwa, i osi baze lo responsabilite partaze ki egziste dan sa bann rol e enkli par egzanp sa bann rol Konstitisyonnel ki enkli dan Biro, dan fonksyon Biro Attorney Zeneral, dan fonksyon Komisyoner Lapolis par egzanp.

Nou apresye lespri konsansis ki nou’n gannyen dan kad Bills Committee pour kreasyon sa Konsey e ki form parti en ranforsman Lenstitisyon nou pei dan en fason zeneral e spesifikman pour nou kapab adres sa bann menas.

E i enportan osi ki nou regard sa Konsey koman en Lenstitisyon ki pour mars ansanm avek sa Servis Lentelizans e koman enn ki vreman kre en kad ki kler, pa zis pour en zenerasyon, me tou bann zenerasyon o fitir.

Mr Speaker dan konteks sa Prozedlwa, sa Konsey pour annan responsabilite pour propoz en kandida pour ganny apwente pour post Direkter Zeneral.  Sa servis lentelizans ki ganny kree anba sa Prozedlwa pour osi bezwen donn rapor regilye avek sa Konsey.

Anba sa Prozedlwa Servis Lentelizans pour osi bezwen ganny bann kontrol ki neseser e ki normal dan konteks tou bann Lorganizasyon e Lazans ki egziste dan bann Lorganizasyon Gouvernmantal, e dan sa Prozedlwa par egzanp sa Servis Lentelizans pour ganny odite par Biro Oditer Zeneral e rapor sa odit parey tou lezot rapor avek nenport ki Lenstitisyon pour ganny soumet avek Lasanble Nasyonal.

I enportan pour nou note ki Lasanble Nasyonal i annan en rol kle osi pour zwe anver lenplimantasyon sa Lazans Lentelizans, sa Servis Lentelizans e sirtou Komite Defans ek Sekirite dan Lasanble Nasyonal, i kapab demann Servis Lentelizans pour vin fer en rapor devan li.

Tou sa bann diferan pwen ki mon’n fer note, i bann proteksyon ki’n enkli dan sa Lalwa e i osi bann prensip latransparans ki fondamantal pour sikse sa servis.

I osi bann prensip ki nou’n pran an kont e nou’n diskit ansanm dan Bills Committee bann konsern ki’n ganny met devan e nou’n osi fer bann azisteman, nou’n pare pour fer sa bann azisteman kot i neseser.

Mr Speaker e tou bann Manm Onorab, atraver sa Prozedlwa nou pe ede fer nou pei vin pli an sekirite.  Sa i en devwar partaze.  Nou pe osi ede gard nou sitwayen sen e sof.  Fodre nou pa sou estim bann menas ki nou tou nou fer fas avek ozordi.

Nou osi kapab dir avek lasirans ki tou nou sitwayen pour ganny bann proteksyon neseser anba sa Prozedlwa.  E sa Prozedlwa i osi demontre determinasyon ki sa Gouvernman i annan pour rekonnet konpetans e profesyonnalizm nou bann profesyonnel ki enplike dan sa Sekter.

E osi atraver sa Prozedlwa donn zot sa manda, sa responsabilite neseser pour zot kapab fer zot travay.  Atraver sa Lalwa nou pe ranforsi zot kapasite e rekonnet zot determinasyon pour adres sa bann defi ki devan nou tou.

Mr Speaker avek sa bann mo lentrodiksyon, mon remersye tou bann Manm Lasanble pour bann komanter e sizesyon ki zot kapab fer e mwan remersye zot pour zot sipor pour sa Lalwa, sa Prozedlwa ki telman enportan pour nou asir en lavenir prosper pour tou nou sitwayen.  Mersi Mr Speaker e mersi tou Onorab.

 

MR SPEAKER

Mersi Minis Adam.  Bon parey mon’n dir nou pour komans deba, nou pour ouver deba lo sa Prozedlwa ki’n ganny prezante apre midi an vi ki nou bezwen rann SBC lantenn.  Me ankor mon profite pour mwan remersi bann Manm apard Bills Committee ki le 2 Leaders osi ki yer zot in attend sa Sesyon travay pour sa lazournen antye.  Mon remersye Minis osi, Komisyoner, Attorney Zeneral e lezot ki’n vini pour nou kapab konpran en pti pe lentansyon Gouvernman deryer sa BillSo nou ava aret la e nou ava repran nou travay 2er apre midi e nou ava ekout bann entervansyon bann Manm.  Ok nou ava break alor, nou repran 2er apre midi.

 

(BREAK)

 

 

MR SPEAKER

Bonn apre midi tou Manm Onorab.  Bonn apre midi tou dimoun ki a lekout e pe swiv travay Lasanble Nasyonal.  Bonn apre midi spesyal pou nou delegasyon ki parmi nou sa i konpri Minis Jean Paul Adam, Attorney General Mr Ally, Komisyoner Lapolis Mr Labonte Mr Pool e Mr Marthy Vidot.  Bonn apre midi e nou ava kontinyen nou travay.  Nou ti’n aret lo prezantasyon Bill par Minis zis avan nou ti break so deba i ouver prezan lo merit e prensip zeneral sa Bill okenn Manm ki oule entervenir.  Ok mon a donn laparol Onorab John Hoareau pou konmanse.

 

HON JOHN HOAREAU

Mersi Mr Speaker.  Bonn apre midi Mr Speaker.  Bonn apre midi tou dimoun ki a lekout.  Bonn apre midi Minis ek ou lantouraz.  Mr Speaker Bill ki devan nou pe al donn nesans en lenstitisyon ki nou apel Seychelles Intelligence Service.  Sa Bill dan son laform orizinal malerezman, i ti enn ki ti annan bokou defi ladan bokou keksoz ki yer pandan Sesyon extended Bills Committee, bokou lamannman in ganny propoze par Leader Lopozisyon li menm, e nou bezwen rekonnet ki in anmenn en gran sanzman ladan, ki ozordi sa Bill ki mannyer i pe gete la avek bann lamannman ki Minis in fer dan son lentrodiksyon, i montre ki i pou en Bill modern, i montre ki i pou en Bill ki pou reponn a bezwen a legzizans nou pei ozordi dan son staz devlopman ki’n arive.

Mr Speaker bokou dimoun i kapab demann en kestyon koumsa, eski nou pei i bezwen en tel servis lentelizans? An prenan kont ki dan lepase in deza annan bann servis lentelizans dan parti inik, ki son rol ti en pti pe anbigye – anbigye dan lesans ki nou’n vwar ki zot in servi sa Secret Intelligence Unit, dan lepase pou abiz en pti pe pouvwar pou zot abiz right of privacy, kot zot ti fer bokou keksoz ki pa ti dan zot kad pou fer li – ti plito pe abiz nou Konstitisyon ; par egzanp phone tapping san okenn permisyon, ensi ki lezot keksoz si vre dimoun i deryer dan en pti loto pe gete ki ou fer – ki ou pa fer, pe rode ki bor ou vote, ki ou alyans politik ensidswit.  Mon fyer ki sa Bill la in move away from sa kalite keksoz ki nou’n vwar dan lepase.  E i pe anmenn en nouvo dimansyon avek servis lentelizans.

I en Bill ki pe anmenn en nouvo lenstitisyon – pe kre en nouvo lenstitisyon ki menm si Prezidan i sanze, sa lenstitisyon i a reste touzour la pou li travay lo lentelizans.

E petet bokou dimoun pou demande kwa sa lentelizans? nou tou nou konnen ki poudir en pei i bezwen anmas lenformasyon dan tou sekter be it lo lanvironnman, be it lo sekirite pei li menm, be it lo limigrasyon be it lo tou lezot sekter border control, poaching, drug trafficking, ensidswit.  Me ler ou anmas sa lenformasyon ou analiz li, se la ki i vin lentelizans.

E sa lofis oubyen sa nouvo lenstitisyon se zisteman pou anmas sa bann lenformasyon, e analiz li e met li a laporte en National Council National – Intelligence Council.  Alor i retir en pe bann pouvwar anbigye ki ti annan dan son versyon orizinal which is zis answerable avek Prezidan, e ou ti advice Prezidan.  Me sa pa pou leka la i pou prezant son lenformasyon avek en Council e Council ki pou annan sa manda pou evaluate the threat ki annan avek pei.

Parey mon’n dir i annan bokou kalite threat ki nou pei i kapab fer fas avek dan sa lemonn modern ki nou pe viv ladan.  Nou pe koz sa drug triangle ki egziste ant Lazi, Losean Endyen e Les Lafrik.  So nou vwar ki bokou bann lenformasyon i ganny ranmase par Lapolis e oparavan NDEA, me i reste zis la ek Lapolis zot fer zot travay wi me i pa en lenformasyon ki ganny partaze avek bann lezot kad dan Gouvernman ki bezwen sa lenformasyon.

Ozordi nou pe koz lo POCA Proceeds of Crimes Act kot nou krwar poudir bokou bann dimoun ki’n ganny atraver illicit drugs oubyen bann lezot keksoz ki annan pou fer avek bann biznes ilegal me napa en fason pou kapab met tou sa bann lentelizans ansanm e pou anmenn en case devan Lakour akoz i vreman difisil, pou rod tou bann diferan Agencies dizon FIU, lot, lot, lot, pou met tou sa bann lenformasyon ansanm.  Me avek sa kreasyon sa Intelligence Service, i pou annan serten kordinasyon kot i anmay tou sa bann si oule sa bann mayon sa lasenn FIU, Lapolis, Larme ensidswit, so i a kapab anmas sa bann lenformasyon avek tou sa bann diferan divizyon analiz li, met li dan en form lentelizans e prezant avek en National Council – National Intelligence Council ki li apre i ava evalye okenn threat ki annan lo pei.

Alor sa i en pa dan en bon direksyon dan li menm Mr Speaker.  Nou konnen poudir dan plizyer lezot pei, i annan bann Intelligence Services parey pou Sid Lanmerik CIA, MI5 – UK, KGB an Larisi.  So lezot pei osi partou, partou ler ou kapab fer en pti resers lo internet zot osi zot annan en National Security Council. Petet pou nou i National Intelligence Council pou zot i National Security Council ki evalye okenn bann lenformasyon ki vin atraver lentelizans ki ganny provide, e i donn bann decision makers sans pou kapab fer bann desizyon lo sa bann laliny  koumsa.

Mr Speaker ankor lo kote sinerzi mon kapab dir poudir en Lazans koumsa i pou donn ou byennet, akoz olye ki nou vwar nou resours i ganny met dan diferan fason pou nou sey anmenn menm rezilta, nou vwar nou resours i ganny konsantre dan en sel lorganizasyon, ki ava aprezan anmas tou bann lenformasyon e bann analiz bann lenformasyon pou anmenn a laporte bann decision makers. 

So dan en sans nou pa pe replik travay nou pa ni pe kre ni en lobstak, me selman nou pe anmenn en serten kordinasyon ki ava ede pou anmenn pei pli devan.  Mr Speaker avek sa se sa mon kontribisyon mon krwar poudir sa Lalwa i en bon Lalwa i en Lalwa ki al dan bon direksyon e i pou ed nou servis nou bann Dirizan fer bann li bon desizyon baze lo en konesans profon lo servis lo lentelizans ki pou anmennen par sa servis.

Petet zis avan mon terminen mon ti a zis kontan ki Minis petet dan son larepons pli tar, i donn nou en deskripsyon si zot pou osi define sa national interest ki yer mon ti met devan, akoz ler nou pe koz lo national interest sirtou dan Seksyon 13 sa Lalwa as pursuant to the Article mon krwar i devret ganny define pou fer sir ki i anmas lesansyel kwa ki ganny vedir par national interest.  Finalman i pou osi kapab entervenir e demann lenformasyon lo bann kont labank atraver laplikasyon par Ziz, ki mon krwar poudir sa i en keksoz ki byen.

Oparavan nou ti vwar bokou lenformasyon ki t ganny leak san bezwen neseserman pas atraver en striktir – en prosedir kot Zidisyer i ganny involve so sa osi mon krwar i en lafors sa ki keksoz pa ganny fer abitrerman, me okenn keksoz parey phone tapping oubyen pou ganny akse avek lenformasyon finansyel i ganny fer atraver en Ziz.  Avek sa Mr Speaker mon pou apport mon soutyen avek sa Bill e mon krwar parey mon dir i pou ed nou al dan en pli bon direksyon.  Mersi.

 

MR SPEAKER

Mersi Onorab John Hoareau.  Mon a donn laparol Onorab Gervais Henrie.

 

HON GERVAIS HENRIE

Mersi Mr Speaker.  Mon pran laparol ozordi apre midi mon konmans par rakont Lasanble en pti zistwar.  Desanm 2015 savedir i fer nou egzakteman 3an pase.  Ki ti annan dan Sesel ti annan eleksyon prezidansyel i ti al dan 2 round.  Prezan ti annan en kantite keksoz ki pe arive bann miting bann rally bann PPBs ki ti pe ganny fer e mwan dan milye tousala mon ti pe kordin ansanm avek en lekip bann lezot dimoun the media campaign of SNP – kandida prezidansyel SNP.  Prezan nou ti bezwen load en kantite bann portre bann video lo rezo sosyal.   I ti annan en moman kot nou internet vreman dousman, e prezan mon pran sa mon poudir kekfwa akoz volim bann uploading e downloading ti pe arive.  Be en Dimans ti annan en rally mon pa rapel kote be zot pran pres 1erdtan pou met en album portre – in ariv dan minwi mon fatige mon call Cable & Wireless evidaman mon ti upset avek zot – zot servis mon rapel e mon ava demann leskiz sa dimoun mon ti koz avek mon pa rapel son non – parske mon’n lev mon lavwa avek li pou eksplik li ki difikilte nou pe gannyen.  E mon rappel sa dimoun i met en three way conversation i lev en Mr D’Offay mon rappel dan Cable &Wireless i dir Mr D’Offay i annan Mr Gervais Henrie la ki ankoler akoz son servis internet i dousman Mr D’Offay in prezant leskiz in dir ok zot pou anvoy bann teknisyen lannmen pou vin vwar ki pe arive.  So vre zot in vini e zot in pas en kab ti bezwen repas en kab ti bann dernyen zenerasyon of whatever teknolozi zot ti fiber optic ki zot ti pe servi ok.  Sityasyon in amelyore me detrwa zour pl tar menm zafer – napa koneksyon.  Prezan recall Cable ankor zot vini investigate difil in koupe – in koupe i pas la dan sa semen devan National House e sa difil in koupe la kot klinik Dr Albert ti été koupe – physically koupe!  Bannla i bezwen repase.

So prezan be mon rod en pe lenformasyon konman zournalis, mon annan enpe kontak partou dan Lapolis wherever – mon ti le lenformasyon mon kapab rode.  E en dimoun i dir be i annan en lenterferans en third party lo sa laliny la akoz letan sa difil pe vin kot nou i annan express printing ki orizinalman ti fer Regar ki vin SNP apre i vin Le Seychellois anler.

So en 3enm en third party ti pe enterfer avek nou laliny kominikasyon.  Prezan mon dir ale rode ki bor sa third party.  Zot dir mwan i annan en lofis somewhere deryer Kordgard Santral ki pe fer sa.  Deryer Kordgard Santral lekel sa bann boug ki la deryer?  I annan bann boug la zot marse soulye bout pwent kannson nwar semiz karo toultan an deor – mon krwar akoz i annan rivolver anba la.  Ou vwar zot partou sa bann boug la. State Security it was them ki ti pe fer sa.

E ozordi mon nou dan Lasanble nou pe pas Bidze mon pa tro sir Bidze sa bann boug i été.  Mon’n vot Bidze Lapolis – mon pa’n vot Bidze Larme me mon demann mon lekor toultan kote sa bann boug.  Mon konn zot e nou tou ki la nou konn sa bann boug Sesel i pti nou vwar zot ennler Ankour en letan zot ti la dan Lasanble Nasyonal, nou vwar zot Erport.

Sak fwa en aktivite politik nou vwar zot pe gete lekel ki’n vini. So i egziste ozordi dan Sesel en bann boug ki nou pa konnen ki zot pe fer. So parey entervenan ki’n koze devan avan mon Onorab Beau Vallon in dir nou poudir sa …

 

MR SPEAKER

Onorab John Hoareau.

 

HON GERVAIS HENRIE

Onorab John Hoareau Manm elekte pou distrik Beau Vallon. So sa Bill i fer ki i met en lord – i met en lord dan en dezord parske la nou ava konnen poudir sa Lazans la sa son Bidze tan i gannyen lekel ki ansarz e si nou annan en problenm kot nou ale.  Parske dan sa bann boug ki met soulye bout pwent konnson nwar semiz karo toultan met an deor la kote nou ale? Nou al kot Komisyoner Lapolis?  Eski nou al State House?  Eski nou al kot SPDF?

         Ozordi ler mon pe koze nou pa konnen.  So sa Bill i fer i met en lord dan en dezord.  E ler mon pe dir en lord dan en dezord, pou benefis bann dimoun deor ki pe ekoute, sa Bill dan son laform orizinal pa ti en bon Bill ki ti pou anmenn latransparans, bon gouvernans e rann kont.  Erezman LDS in pran en langazman serye vizavi sa Bill akoz nou dir nou krwar en lenstitisyon leta konm tel i bezwen organize.  E non napa come on  – nou bezwen dir laverite – ki kantite travay? Zot osi zot in fer zot bout ler zot vini zot ava rekonnet zot bout ki zot in fer me la ozordi mon bezwen dir avek piblik Seselwa, ki kantite travay ki LDS yer – mon pa en Manm Bills Committee, me selman mon vin asiste zot rankont, Onorab Georges e bann lezot Manm bann dimoun lot kote latab, Onorab Pillay si oule mon acknowledge ou prezans dan sa miting, wi ou ti la e in fer en kantite travay ; kot par egzanp the sa konsep a National Security Council ouswa en National Intelligence Council ki’n osi vini i pa ti dan son Bill orizinal, kot pou nou asire prezan i annan the oversight e ki kalite relasyon i pou annan avek Lasanble Nasyonal.  Par egzanp sa bann keksoz in ganny diskite, son Bidze kote i pou pase.  Eski i pou en kont endepandan ouswa i pou swiv formil ki pou egziste dan sistenm Leta ki i pou pas atraver sistenm Treasury?  

        Tousala in ganny diskite.  E mersi pou bann dimoun ki’n ganny partisipe pou zefor ki zot in mete.  Alor en keksoz ki ava donn Sesel dan Kominote Nasyon en rekognisyon se ki prezan zot pou annan en pwen kontak ki zot ava koz avek. Par egzanp Interpol i ava konnen e ki zot pou koze.  I annan bann lezot lorganizasyon par egzanp Southern Regional Police Chief Corporation Organisation i a konnen e ki i pou koze.  Menm parey Eastern Africa Police Chief Organisation akoz tousala i bann lorganizasyon bann antite nasyonal ki partaz lenformasyon.

E souvandfwa sa bann lenformasyon menm dan rim Losean Endyen tou bann pei manm Lenn, Ostrali, zot ava annan en pwen kontak akoz nou losean i telman vas, parey Minis dan son lentervansyon in dir ki i annan bann problenm lapes ilegal ; i annan drug trade ki pe pase ; i annan tou sa bann sekirite maritim ; proteksyon lanvironnman.  

        So zot avan annan en pwen kontak.  E dan tousala lenformasyon savedir i kapab ganny en sanze lo en baz gratwit, Bidze ki sa lorganizasyon i kapab gannyen nou ava kapab byen konnen ki mannyer i pe byen depanse nou pa ava tande poudir nou pe zis pey nou bann kontak Somali – sa bann kontak ti egziste menm sa?

So la prezan nou pe met en lord dan en dezord.  E mwan sa i gro benefis ki mon vwar avek sa Bill.  Mon pa pou – mon pa kont pou kreasyon sa antite, selman ozordi parey mon pa ti vot pou son Bidze, mon pa pou vote pou son kreasyon.  Akoz parey mon ti eksprimen letan nou ti vot lo Bidze Lafors Ladefans, mon annan mon toultan en pe pa krentif – mon pa anvi servi sa mo krentif me mon dout – mon annan la en rezidan vizavi sa bann antite, akoz mon krwar an mezir ki mon reste konman en Manm Lasanble Nasyonal, mon ava mye konpran ki zot fer, nou a kapab kestyonnen e apre dezormen nou ava dir ok.

Parski  si non, i annan toultan sa posibilite ki bann tel lorganizasyon i ganny mal servi politikman.  Maurice anfet in fek pas dan en sityasyon kot zot National Security Services ki zot travay ki mannyer i apelé ti ganny blanmen par bann parti politik poudir wi letan eleksyon zot ekout telefonn dimoun – zot – e isi dan Sesel nou sorti dan en lepok.  Nou sorti dan en lepok kot nou viv lontan ladan e alor pou mwan e pou bokou bann dimoun dan mon distrik, zot ankor annan sa retisan pou zot aksepte, bann keksoz pou dir non, sityasyon pou sanze.  Parske souvandfwa i bann dimoun ki sorti dan sa bann lepok ki pou la, pou zer sa nouvo striktir.

Donk mon zis mon a repete mon a termin lo sa pwen Mr Speaker.  Mon rekonnet nesesite kree antite Leta ki dezormen i ava egziste dan en kad legal, menm si demen pou annan en sanzman Gouvernman e i pou annan bann mekanizm oversight, rannkont bann keksoz koumsa, e apre i kree en striktir kot Komite enternasyonal i kapab annan en pwen kontak pou zot kapab deal avek Sesel parmi Kominote Nasyon.

Donk se sa ki mon ti ava annan poudir lo la me mon rezerv mon dwa pou mon pa vot an faver ou kont sa Bill.  Mersi bokou.

 

MR SPEAKER

Mersi Onorab Henrie.  Mon a donn laparol Onorab Basil Hoareau.

 

HON BASIL HOAREAU

Mersi Mr Speaker.  Mr Speaker parey in ganny dir Bill ki devan nou se pou nou kree en Intelligence Service pou nou pei i apel Seychelles Intelligence Service Act sa Lalwa ki i pou ganny kree.  E sa i vedir nou pe kree en servis lentelizans me selman ler nou koz lo servis lentelizans i enportan pou nou bann dimoun konpran e pou nou osi konpran, poudir sa ki nou pe kree se ki nou apel en Security Intelligence.

Savedir nou pe kre en lentelizans pou nou protez nou pei, pou protez sekirite nou Nasyon se sa travay sa servis ki pe ganny kree se pou li travay an relasyon ek bann domestic threats ki i kapab annan.  E nou bezwen distinguish sa avek en sityasyon avek bann servis ki pou ganny kree pou spy lo nou bann sitwayen, sa i pa le bi.  E i annan bann safeguard ki’n ganny mete dan Lalwa pou anpes sa arive pou li meet li nou pa kapab dir petet i pou ganny remove konpletman, e hopfully bann dimoun ki pou apply sa Lalwa pou apply li avek bonnfwa parey i devret ganny aplike.

E i osi i pa pe kre sa ki nou appel en foreign intelligence savedir nou pa pe kree en group lentelizans en servis lentelizans pou nou al spy lo lezot pei sa i pa le bi nou bezwen fer li kler se selman pou nou annan nou security intelligence, pou nou protez nou teritwar e protez nou Nasyon kont okenn bann menas teroris bann lezot menas ki kapab ganny anmennen lo kote Nasyonal.

Parske ozordi sa bann menas se bann menas ki vre, ki reel malgre pou le moman – touch wood – nou pei pa’n sibir okenn sa bann aktivite teroris as such, me i bann keksoz ki reel ki Sesel i kapab fer fas avek e i enportan ki nou annan en servis ki kapab detekte sa avan i arive Mr Speaker.

Ki sa Lalwa pe fer i pe kre premyerman en legal framework pou annan en gidans Lalwa within which sa servis pou operate i pe kree i pe dir ou ki composition lekel bann dimoun ki pou compose of that service ; ki mannyer bann apwentman i ganny fer ki son fonksyon e ki son fason i pou desarz son fonksyon Mr Speaker.

So i enportan i sa Lalwa i ganny pase.  E mon pou retourn lo sa pwen ki Onorab Henrie in fer sorti en pe lo lefe ki poudir in servi sa term poudir i pe met lord kot i annan dezord kot sa Lalwa i pou annan en benefis li osi kot i pou letan nou pe kree sa servis an menm tan nou pe osi protez nou bann sitwayen kont bann sa ki mon pou servi kont bann rogue services, ki kapab zis letan i napa kontrol i fer lezot keksoz an deor sa ki devret ganny fer e kot i breach right tou bann sitwayen e with the right to privacy Mr Speaker.

Konpozisyon pou le moman nou pe dir poudir dan konpozisyon pou annan direk en Director General ki li si oule konman son rol i pou la konman sa dimoun ki pou at the head of this Agency e pou le moman i pou ganny propoze ki i pou ganny apwente par Prezidan.

Mon pa pou le anticipate bann proposal ki’n ganny fer par Bills Committee mon konnen Bills Committee in travay dir lo la.  E mon vwar bann lamannman ki’n ganny propoze bann lamannman ki vreman sibstansyel e bann lamannman ki relevan.  E par egzanp la, i pe dir poudir se pou annan enn bann rekomandasyon ki pe al ganny fer se ki Prezidan pa pou zis kapab apwente li menm li i pou bezwen upon recommendation of a Council, ki an lefe i anliny par egzanp avek Lalwa Kenya.  Kenya i annan en international service e li aktyelman en Act, me selman son National Intelligence Service i ganny kree dan zot Konstitisyon zot in met sa dan zot Konstitisyon.

Parey pou nou annan Police Force nou annan Seychelles People’s Defence Service ki dan nou Konstitisyon zot enkli sa sa as part of their Constitution ki mon mazinen i en legzanp fantastik pou nou servi, petet ler nou pe fer en lamannman nou Konstitisyon pou enkli sa ladan.

Akoz i form par sa network sekirite e i kree sa body dan son Konstitisyon.  Apre i annan son Lalwa ki par egzanp nou annan Lafors Lapolis ki ganny kree dan Konstitisyon, me nou osi annan en Police Force Act ki gide ki mannyer sa fonksyon pou ganny desarze and so forth. E pareyman nou devret fer en keksoz, parey pou the Intelligence Service parey Kenya in fer.

Li Kenya ki mannyer i ganny apwente son Director General i dir ek ou ganny apwente par Prezidan with the approval of the National Assembly  – en pe parey nou fer avek Minis avek Anbasader.

So i annan en – pou anpese – pou anpese annan en labi.  Parske nou bezwen realize vre Prezidan i head of State, me Prezidan osi i en politisyen at the end of the day. E si letan i ariv kot politisyen nou bezwen fer sir poudir politisyen pa kapab abiz sa Lalwa.  Pa kapab abiz sa Lalwa.  E mon krwar i enportan ki letan nou dir parey Kenya i dir ou i bezwen ganny apwente par avek approval of the National Assembly, pou fer sir poudir sa dimoun ki pe ganny apwente i pe ganny vet par son National Assembly.

E dan nou ka se si proposal ki pe ganny fer par Council, mon krwar i enportan.  At least i pa zis Prezidan tousel ki pou apwent en Director Général akoz pou en dimoun ki pou annan en ta pouvwar anba sa Lalwa so i enportan ki sa dimoun ki pe ganny apwente i annan en consensus en konsiltasyon ki pe ganny pran, pou fer sir poudir napa labi dan sa apwentman.

Ouswa pou en dimoun ki pou ganny apwente lo en baz politik Mr Speaker.  Sa i montre si nou pou fer sa i pou annan en pe plis latransparans dan fason ki nou pou apwent sa Director General.  

Lo kote Direkter osi se Prezidan ki pou le moman anba Bill pe ganny propoze se ki Prezidan ki pou apwente, apre ki in konsilte son Director Général.  Mon mazinen i pou anba sa ki mon’n vwar i pou annan en lamannman lo la, still pe retir Prezidan, me Council then ki pou apwente avek consensus of Director Général e dan Kenya osi i fer en pe parey selman Kenya se Direkter Général ki apwente, avek konsiltasyon Council. 

So sa ki nou vwar poudir nou annan en sityasyon kot nou pe fer sir ki dan sa bann lapwentman i pa zis en dimoun tousel ouswa zis en lofis ki pou zis fer apwentman me i pou annan konsiltasyon avek en lot body – en lot Lotorite.  E ki pou mwan i enportan.

Me en keksoz ki mon vwar ki mon pa konnen e mon ti a kontan bring to the attention of Lasanble Nasyonal, me osi avek bann Manm Bills Committee Mr Speaker.  Mon pa konnen si i en keksoz dan wording en – akoz sa lofis Direkter i en lofis ki bezwen ganny kree.  Parske Direkter letan mon gete li i pou the administrative head, i pou parey bann Chief Executive Officer of the service.  Me the wording ki in ganny servi the 5 (2) ki mon krwar dan lamannman i pou vin 6 (2) i dir ‘the President may appoint’ mon pa krwar – akoz letan ou dir me  ‘’may’where I read it i annan en diskresyon ki deside pa apwente.  I believe the word ‘’shall’’ i devret ganny servi la poudir i pou apwente subject to sa.  Akoz letan nou dir ‘’may’ is as if i kapab pa apwente.

Se eski sa Polisi eski i riske si this is the idea se ki i kapab pa apwente then ok nou a kit ‘’may’with the intention me eski nou pa pe kree en lacuna then dan sa servis?  nou pa pe kre en lacuna dan sa servis vi ki i pou napa en Direkter?

Mon krwar poudir i pou enportan, akoz ki nou annan en Direkter akoz son fonksyon sa Direkter i pa parey sa fonksyon Direkter Zeneral 2 diferan fonksyon sa.  E mon krwar we should consider.  Sa i en keksoz ki mon met devan ki petet apre Minis i a reponn lo la i a dir avek nou si sa Polisi se pou pa apwent pou posibilite pou pa apwent en Direkter e akoz.  E si pou ariv pou napa en lefe lo sa fonksyon sa lentelizans.

Lot keksoz ki mon anvi met an kont se, kalifikasyon ; kalifikasyon.  Letan nou get 5 (1) Direkter Zeneral sel ki Lalwa i dir nou ‘’… shall appoint a suitable person as the Director Général for the service,’’ ‘’suitable person – ok?’ I pa pe defini nou pa pe al dan detay i pa pe al dan kalifikasyon nou vwar suitable person e potansyelman nou kapab argue poudir suitable person means en dimoun petet ki obviously ki annan serten leksperyans dan lentelizans – en dimoun ki annan lentegrite and so forth.

Me nou les li dan en fason obzektif.  Mon konpar sa avek Kenya.  Kenya dan son Seksyon 8 son Lalwa i fer li kler ki bann kriter ki ou meet e enn keksoz petet en keksoz ki nou devret mazin lo la i dir ou bezwen en sitwayen Kenya you must be a citizen of Kenya pou nou napa sa eski nou anvi annan en sityasyon kot sa Director Général ler i vin join service i non-Seychellois nou anvi en sityasyon kot nou ti gannyen ek FIU dan lepase?

Eski i en keksoz ki nou bezwen mazin lo la i dir ek nou i dir ek ou poudir ou bezwen en citizen of Kenya sa ki nou bezwen asize osi petet mazin food for thought, ki nou bezwen mazin lo la konman en Lasanble e akoz mon pa ti pou kontan vwar en etranze pe head that Director Général.  Akoz en etranze i kapab met ou i kapab compromise ou – i kapab compromise ou i vin travay pou son larzan i pa vin vreman travay parey en Seselwa pou vin travay avek leker en pe, pou son pei Mr Speaker.  Mon krwar sa i enportan ki nou regete petet sa kalifikasyon.  E Kenya ki mannyer i drafte son Lalwa i kler i annan diferan ; par egzanp i dir ek ou poudir ou bezwen en sitwayen Kenya – ou bezwen annan en knowledge and at least 15an leksperyans dan lentelizans, pou ou vin head sa.

Mon pa konnen petet 15an i en pti pe bokou – nou pou al limit nou, me selman mon krwar i enportan ki sa dimoun i en sitwayen Seselwa Mr Speaker.  Nou’n annan en leksperyans en move leksperyans ek bann Irish mon pa ti kontan vwar sa pe repet son lekor avek nou Intelligence Service, ki nou pe kree.  Apre i al pli lwen dan zot Lalwa zot met en disqualification cCause zot disqualify serten dimoun. E parmi bann dimoun ki zot disqualify vi ki zot in dir ek ou ki zot bezwen sitwayen Kenya zot dir ek nou ki zot pa oule en dimoun ki annan dual nationality.  Zot pa oule en dimoun ki annan dual nationality e mon konpran lentansyon, lentansyon se ki ou anvi en dimoun ki ou sitwayen ki son lwayote i pou la avek en sel pei.  I pa pe serve two masters parey nou dir, me i pe rely avek en en sel pei, e i santi poudir son devwar konman en sitwayen i avek son sel pei.  E  mwan mon ti a kontan vwar en keksoz koumsa petet dan nou Bill – dan nou Lalwa.

E likewise pou Direkter osi zot annan menm sa bann kalifikasyon – zot pa annan sa bann kalifikasyon ki dir ou en pe lekel poudir ki poudir i bezwen en sitwayen Kenya.

Mr Speaker en lot keksoz enportan ki annan dan sa Bill se ki i pe dir ek ou ki sa Intelligence Service i endepandan i pa pou subject to the control en direksyon of anyone.  I dir i endepandan anba Seksyon 3(4) me i dir ek ou dan 3(3) poudir pou le moman ki ti pe ganny propoze se ki supervision lo la se pou ganny donnen avek Prezidan, me i dir ek ou ki i endepandan me la i pe ganny propoze ki se i pou ganny supervision ek Council.  Me i pou endepandan e mon krwar sa lendepandans i enportan.

Me selman i dir ek ou i pa pou ‘’… subject to the direction and control of anyone.’’ So to that effect i pe maintain son lendepandans.  I pa pou subject and control and direction of anyone so sa i enportan ki ou maintain son lendepandans’ akoz ou pa anvi ki i  pe ganny kontrole.  Malgre ki proposal ki pou ganny fer par lamannman, se ki Council pou oversee in a way, louvraz ki pe ganny fer, me ou pou maintain son lendepandans, e sa pou mwan i enportan.

I enportan, akoz nou pa anvi ki sa servis i ganny servi konman en political tool.  Sa nou bezwen tire konpletman dan sa Lalwa.  Nou anvi sa Council – sa service i fer son sel fonksyon ki i sipoze fer, sa se protez Sesel e protez Seselwa.  Pa pou spy pou fer espyonnaz lo Seselwa pou rezon politik lo Seselwa ki an deor sa Lalwa.  E sa pou mon i tre enportan. Nou konnen e nou bezwen fer fas avek realite poudir dan lepase, dan lepase.

In annan moman kot espyonnaz in ganny fer pou political purpose pou lezot purpose ki pa ti devret merite.  E mon krwar la avek sa Bill ki pe ganny prezante nou pe retir posibilite e nou pe menm parey mon pou koz lo la pli tar kree lofans pou bann dimoun ki al fer sa bann keksoz, dan en fason ki pa within the law.

E  mwan mon pou propoze pli tar ki nou increase santans. Parske 20mil pou konman en fine e 5an prizon pou enterfer – pou enterfer.  Mon krwar sa ki ganny dir pou propoze pou R100mil pou lamannman ki pe anmennen, me still pou mwan i ba.  Pour ou al enterfer ek drwa en dimoun, ou devret ganny pini dan en fason serye.  Ou devret ganny pini dan en fason serye – premyerman pou dekouraze e pou fer sir letan ou’n fer li ou a ganny dealt with accordingly.

Akoz ou’n al enterfer ek drwa en dimoun – ou’n al ekout son konversasyon telefonn, ou’n al fer lezot keksoz ilegalman mon krwar sa pinisyon, i devret commensurate avek sa ilegal act ki ou’n fer e sa lefe ki sa in anmennen lo en dimoun.

Mr Speaker nou vwar poudir enn fonksyon sa servis, se ki pou li i pou kapab investigate e gather lenformasyon pou li nobou detekte bann menaz ki annan kont Sesel e pou li advice Gouvernman.  E la i en keksoz enportan i dir ek ou poudir i kapab gather sa lenformasyon inside and outside of Seychelles. E petet mon pou sizere ankor mon vwar Kenya in fer sa Kenya i annan en extra territorial provision dan son Lalwa – ki mon pa vwar dan pou nou.  Ki dan sa extra territorial provizyon ki i dir ek ou, i dir ou klerman poudir premyerman okenn lofans ki ganny kree anba sa Lalwa, si i ganny komet an deor Kenya  savedir Sesel ti ganny koupe an deor Sesel, i pou ganny trete konmsi in ganny kree, i en lofans osi Sesel ok ?

Apre i dir ek ou poudir bann pouvwar ki sa Director General i annan e Direkter  i annan anba zot Lalwa, i osi apply to overseas. So bann keksoz ki i kapab fer Sesel, i permet li anba sa Lalwa pou li al fer deor.  Obviously i pou bezwen fer sa subject to the laws of sa pei, ki i pe al fer, me selman legalman dan son Lalwa domestik, i donn sa extra territorial powers son bann staff.

E ki mon krwar nou devret enkli sa ladan.  Akoz i en keksoz enportan ki nou pe nou bezwen empower nou bann dimoun pou zot pa zis nobou fer gather intelligence – fer sa bann investigation parey nou’n dir Sesel, nou’n fini dir zot an deor Sesel, me donn zot sa pouvwar klerman ki zot kapab fer sa bann akt an deor Sesel Mr Speaker.

Enn bann pouvwar ki nou vwar se ki zot annan sa servis pou kapab ganny akse ek bann lenformasyon lo bann bank accounts.

Me selman la i fer li kler poudir zot pou kapab ganny akse ek sa selman, si zot in fer laplikasyon avek Lakour e Lakour in deside.  In dakor avek zot aplikasyon ki zot kapab ganny akse avek lenformasyon regarding sa bank account, me zot bezwen satisfer Lakour serten kondisyon.  Zot bezwen montre premyerman poudir, sa lenformasyon ki zot sa bank account pe ganny servi pou fer tranzaksyon an relasyon ek en aktivite ki kontrerman avek sa Lalwa.

Savedir par egzanp si en dimoun pe servi sa bank account pou li fer sa tranzaksyon, pou li fer bann tranzaksyon pou an relasyon ek bann aktivite ki en menas pou Sesel ; sa then zot pou kapab ganny servi sa pou zot ganny akse bank account e la nou dir Lakour.

E mon krwar nou annan trust dan nou Zidisyer e nou annan nou anvi nou zidisyer i osi apply sa Lalwa byen; apply sa Lalwa byen e la mon ti a kontan dir poudir i enportan ki Zidisyer letan sa Lalwa i ganny donnen, sa pouvwar i donn dan zot lanmen, zot fer li byen.  Nou konnen avek tou respe poudir dan lepase FIU letan in vin ek sa aplikasyon se dan lepase Lakour ti more or less pe rubber stamp sa bann laplikasyon.  Mon bezwen fer sa konman en Lasanble.

E mon espere ki sa pa arive dan sa sityasyon.  Parske nou anvi vwar sa zidisyer konman sa body ki li i vet sa aplikasyon.  Li ki stand between the applicant and the responder  sa pou fer ex parte me li ki stand between the applicant.  E sa dimoun ki ou pe al demande pou al enterfer son bann drwa pou al get son bank account and so forth.

E i enportan ki sa enn ki dan milye i fer sa obzektif e i fer sir kot i pa pe les sa bann provizyon ganny servi, pou abiz lo drwa sa bann lezot dimoun.  Sa i enportan.  I annan osi anba seksyon 17 e 18 bann direksyon ki kapab ganny fer kot nou dir pou intercept bann telekominikasyon, bann parcel and so forth.  Sa nou pe al lo drwa privacy ki ganny proteze anba nou Konstitisyon, me ki kree nou Konstitisyon i kree bann leksepsyon provided ki i ganny fer dan en Lalwa, e i neseser dan en sosyete demokratik, ki sa Lalwa mon santi i neseser.

E la kot mon santi poudir ankor mon krwar poudir nou Zidisyer pou bezwen fer sir poudir i fer sa balans byen e pou protez nou pei kont bann menas, me osi pou fer si napa labi ki ganny fer dan sa Lalwa.  E sa ki mon kontan dan sa Lalwa an relasyon avek en aplikasyon ki ganny fer avek Lakour, swa pou entersepte bann telekominikasyon, bann parcels, swa packages and so forth, ouswa pou antre lo en propriyete pou al fer search ek parmi bann lezot direksyon, se ki basically ou pou bezwen montre Lakour ki there is no alternative. 

It is the only alternative ki nou annan.  Akoz enn bann keksoz ki mon mete dan ou aplikasyon, ou bezwen dir ek Lakour poudir i annan lezot investigation procedures ki’n ganny fer, me ki’n fail, ouswa ou zis satisfer Lakour poudir menm si ou servi lezot investigation procedures i pa pou successful. 

So basically it’s as if ou pe dir ek Lakour there is no other alternatives. It’s the sole remedy available.  So then ki Lakour pou allow ou  i pou fer dan sa direksyon.  So si Lakour i vwar poudir ou annan en merits dan  ou aplikasyon, in terms poudir sa dimoun i kapab  pe fer bann aktivite ki kont Lalwa, e ki ou – vre  petet sa entersepsyon i pou ed ou,  me solman  Lakour i vwar poudir ou annan lot alternative rather than to go  and deal avek son intercept son telekominikasyon, Lakour pa pou les ou fer sa.

So basically it’s a last resort i pou al kot Lakour ki ou pou al fer sa bann entersepsyon e sa bann interference.  E mon krwar sa i enportan Mr Speaker.  Mr Speaker parey mon’n dir nou annan  bann Seksyon 17 (2) kot ki kree bann lofans; lofans si en dimoun i akt an deor sa Lalwa, savedir i deside li al intercept son telefonn, telekominikasyon san ki i al kot Lakour, san ki i swiv provizyon sa Lalwa, then i annan en lofans.

E lofans pou le moman i vedir i pe dir ou i en fine ki pa exceed 20mil, e en sentence ki pa exceed 5years.  Me sa ki mon ganny dir proposal dan lamannman, se en fine pou 100mil.  Me mwan mon krwar nou devret mazin fer sa en pti pe pli for.  Akoz nou bezwen fer sir poudir sa bann drwa la ki non Konstitisyon in donn nou la, i ganny proteze e i ganny respe.  Pou dir en dimoun ki ou dir ek li poudir gete, si ou al breach sa bann right, ki en dimoun i annan anba son Konstitisyon ou pe al fer en keksoz ilegal, pou annan en pinisyon sever pou sa.

E la kot mon zwenn ek Onorab Henrie poudir, i annan bann proteksyon ki pe vini.  I annan bann proteksyon ki pe vini anba la.  E sa i en proteksyon – parske avan ti napa bann lofans as such pou al enterfer avek bann telefonn and so forth, me la nou pe kree li konman en lofans nou pe kree li konman en lofans.

Mon annan en rezervasyon Mr Speaker – mon konpran – mon rezervasyon ki mon annan se an relasyon avek 5 (2) ki mon krwar poudir i pou vin 6 (2) kot nou pe dir poudir ‘the provison of section 1 shall not be concurred as (b) limiting of continuation establishment of functions of an intelligence capability connected to any ministry, office  or agency in respect of any functions relating to ministerial intelligence’ e letan mon get definisyon ‘ministerial intelligence’ i pe fer referans avek en Lalwa li fer referans lo son definisyon avek en Lalwa akoz ‘by which by or any written law has been enstrusted to any ministry.’ So letan mon’n get sa mon’n dir be akoz ki nou pa ti pou fer en sityasyon kot tou sa bann lentelizans i avek sa Seychelles Intelligence Service rather ki ou annan en main body, me apre ou les lezot lentelizans avek en lot body?  Konmsi mon pe dir si nou pe met lord nou poudir then ok The Body ki pou annan sa intelligence powers e i fer li kler.  Mon konpran mon en pti pe konforte ler nou vwar sa definisyon ‘ministerial intelligence’ dan lesans poudir i en Lalwa.  I pe refer avek en Lalwa poudir so i pa pou dir zis dan Minister i pa kapab zis kre en intelligence body, me i bezwen ki en Lalwa i permet li e i bezwen an relasyon ek en Lalwa.

Me selman still mon pa konnen si mon ti pou santi mon kekfwa en pti pe pli rekonforte si i ti vreman i ti selman an relasyon avek sa Intelligence Service ki nou pe kree li ki ti pou annan sa pouvwar.

Me parey mon’n dir i annan still en serten proteksyon akoz i bezwen ganny fer anba Lalwa Mr Speaker.

E en lot keksoz se ki nou annan Seksyon 20 present section 20 ki mon krwar i pou vin 21 la avek  bann lamannman, se ki nou vwar poudir sa lenformasyon ki sa bann zofisye Intelligence Service i gather, zot pa pou kapab divulge sa avek the third party.  Sa i enportan parske nou fer sir ki lenformasyon ki zot gannyen i reste avek zot pa servi sa lenformasyon ki zot gannyen dan zot lofis, pou zot al donn ek lezot dimoun third parties, parske zot louvraz ki zot pe fer zot pou kapab ganny akse ek bann lezot keksoz sensitive,  sensitive,  lo bann sitwayen Mr Speaker.

Mr Speaker parey mon dir mon ti a kontan evantyelman ki nou kre ki letan nou fer bann lamannman Konstitisyon, ki nou encorportate sa avek nou Konstitisyon Mr Speaker. Nou incorporate sa e mon ti a kontan  zis konman en side note Mr Speaker dir poudir, mon krwar Konstitisyon Kenya i en Konstitisyon ki nou bezwen get byen – get byen akoz mon get son Konstitisyon detrwa fwa zot in amann zot konstitisyon zot in basically repeal Constitution, e kree enn nouvo an 2010.

Parey zot fundamental rights e zot in met bokou plis keksoz dan zot fundamental rights ki zot annan prezaman. Zot en very good example – en very good example an term zot Konstitisyon ki mannyer in ganny fer drafte bann keksoz ki zot in mete, mon pa dir nou pran tou be selman i en very good example from which we can work from  -an term sa.

E parey mon dir zot in met sa e apre zot in met sa dan zot Konstitisyon apre zot in fer en Lalwa ki set out zot bann fonksyon and so forth.  E en lot keksoz ki mon’n vwar se ki zot annan en disciplinary code.  Zot in donn Council powers pou fer disciplinary code an relasyon avek sa bann travayer, ki ganny anploye avek Intelligence Service.  Sa disciplinary code mon pa konnen si nou osi nou annan en keksoz ki nou kapab mete dan nou Lalwa poudir Council i set out akoz sa disciplinary code ki i fer, i osi protez sa travayer.

I sipoze dir ek li ki mannyer i pou ganny terminated, dan ki fason si ou komet en lofans, so i protez li osi.  Akoz sa bann travayer osi ki pou al travay laba.  Demen si zot ganny en lord par en dimoun i dir mon oule ou al fer sa e li i debout i dir ek ou i dir ek sa dimoun non, i pa dapre Lalwa I will not do it.

Nou bezwen osi protez zot; nou bezwen osi protez zot sansan nou pa anvi en sityasyon kot demen akoz ou pa’n obeir en illegal instructions kot ou vwar ou a laport.  So ki nou bezwen protez sa bann dimoun poudir zot santi poudir zot osi annan en serten sekirite dan zot louvraz.  E sa disciplinary code letan ou gete i donn zot sa. I donn zot sa e kot nou fer sir poudir bann apwentman i kot bann travayer – bann agents si mon kapab servi sa mo, pou santi zot poudir gete, zot annan security dan zot tenure of zot louvraz e alor zot a pare pou zot debout kont bann enterferans ilegal ki pe ganny fer avek zot.

E Mr Speaker konklizyon mon poudir mon krwar i en bon lalwa e mon espere ki i ganny apply to the letter.  Mon espere ki nou respekte sa Lalwa.  Mon espere ki dan lavenir sa Lalwa pa ganny servi dan en pou abiz drwa Seselwa, me sa Lalwa i ganny servi for the sole purpose for which it is being acted se pou protez lentere Nasyonal Sesel e Seselwa.  Mersi Mr Speaker.

 

MR SPEAKER

Mersi Onorab Basil Hoareau.  Mon a donn laparol Onorab Ahmed Afif.

 

HON AHMED AFIF

Mersi Mr Speaker.  Mr Speaker sa Bill ki devan nou i en Bill ki son bi prensipal se vreman pou met en lankadreman  otour sa ki nou apel sekirite.  E dan Bill nou pe koz lo Sekirite Nasyonal alor petet premye keksoz i enportan pou nou defini pou dimoun ki pe ekout deor kwa sa sekirite.

 

Sekirite se vreman en keksoz kot ou napa menas e si ou pe koz sekirite Nasyonal ou pe koz en Nasyon ki napa menas alor se sa premye keksoz ler mon regard sa Bill ki devan nou mon vwar en kreasyon, en lorganizasyon ki vreman lanfaz pe ganny mete lo lentelizans.  I koz osi lo sekirite.

Me lenpresyon mon pe gannyen se ki ler i pe koz lo lentelizans e lafason li in ganny drafte sa Bill pe kree en keksoz en lorganizasyon e i pe met en lankadreman senpleman pou fer en keksoz ki nou abitye petet fer pandan plizyer lannen pou fer li vin legal.  E sete sa Bill orizinal ki ti vin devan nou, kot ou annan en servis ki nou appel li en servis lentelizans e ki li prezan i ganny li serten pouvwar atraver en Direkter Zeneral avek en Direkter i ganny li serten fon atraver Bidze e menm ti pe kapab ganny en kont banker, selman i en lorganizasyon Gouvernman e i ti annan pouvwar vin donn konsey Prezidan ; i ti annan lezot pouvwar ki menm an deor ki i pa ti anba kontrol personn, e parmi son bann pouvwar, ti annan menm enn ki dir other functions ki pa kler.

Alor premye keksoz ki ti frap mwan kan mon ti regard sa Bill se kote nou anvi ale avek?  E petet kwa ki Gouvernman pe sey anmennen devan pep Seselwa, ki Seselwa i bezwen? Ozordi ler nou pe koz lo sekirite ki nou pe koz lo la? Nou pe koz lo en pei kot nou napa menas drog, kot nou napa menas lapes ilegal par egzanp ; nou napa en menas ki kapab annan polisyon ki pe arive dan nou delo par egzanp.  Sa osi i en menas.  Nou pe koz bann menas parey ki nou kapab annan maladi kapab ariv Sesel.

E tousala se bann keksoz ki menas sekirite.  I annan osi lezot menas tel ki dimoun i servi pou pei e ou lenstitisyon, pou fer blansisaz.  E alor an fezan sa ou pei i ganny regarde konman move konsekans se sanksyon  ganny mete kont ou e alors i e menas lo ou pei.  Tousala se bann menas.  Me sa Bill ler ou’n regard li dan son laform orizinal ler in vin devan nou, i ti plito parey en morso lezislasyon pou kree zis en sistenm pou ankadre sa ki’n deza la.

Sa ki nou konn li an term sekirite isi Sesel, se i annan bann dimoun ki marse dan sunglass marse dan en jeep nou ti dir zot spy.  Alor ou donn li en lankadreman legal.  Sa ti en pti pe en keksoz i annan bann dimoun ki parey pou swiv ou apre zot annan en database ki zot garde. Sa i ti koz kont msye mark son non dan en liv.  Sa mon krwar son fanmir zis son fanmir i pa siport Gouvernman, mark son non dan en liv e ler son piti i vin rod louvraz, i pa pou ganny clearance.  Ti egziste sa en lepok.  Mon krwar sa in sanz en kantite.  Me ler mon lir sa Bill lafason i été, mon’n ganny lenpresyon poudir sete vreman en sistenm pou ankadre tousala anba en parasol, e i pou appel Seychelles Intelligence Service.

Me a sa pwen, mon ti a kontan remersi Minis e delegasyon Gouvernman ki’n vini, parske yer nou annan en diskisyon kot lo kote LDS i dirize par Onorab Leader Lopozisyon – Onorab Ramkalawan kot nou met serten propozisyon, kot nou, nou’n met en vizyon poukwa lafason ki nou krwar okenn unit ki pe ofer en servis senk sekirite – pa zis en servis lentelizans en servis sekirite pou Nasyon Seselwa ki i kapab annan kredibilite.  Se sa ki nou anmennen.

Alor bann keksoz ki nou’n vwar pa ti devret egziste dan sa Bill  – se pou par egzanp dan 3 (4) sa Bill orizinal – i dir poudir nou pou annan sa servis pou en ‘independent body and shall not be subject to  the direction or control of any person or authority.’

Alor en pti pe parey Onorab Henrie in eksplike taler, i annan bann dimoun soulye bout, pwent semiz an deor, ki nou pa tro konnen e ki zot raporte.  E zot ti la e petet zot pa ti subject to the control of anyone.  Petet zot ti koumsa.  Alors sa nou, nou pe propoze sa i bezwen sanze kot nou vizyon se annan en group dimoun – profesyonnel – profesyonnel zot in train dan lentelizans.  Zot annan zot en biro en landrwa e zot louvraz en legzanp par egzanp kot mon annan en boug ki spesyaliz dan bann loperasyon drog.

E li son louvraz se pa pou al donn konsey Prezidan – se pa pou al donn konsey okenn dimoun, son louvraz se anmas lenformasyon partou ki konsernen konverti sa lenformasyon fer li vin lentelizans.

En legzanp fer krwar en dimoun ou’n tann en morso lenformasyon i dir i annan en msye Mont Buxton i pa kontan Onorab Gill, sa i en lenformasyon.  En lot lenformasyon ou tande sa msye i dir zour i zwenn Onorab Gill i pou dir li sa ki i annan pou li dir.  En lot morso lenformasyon ou ganny en 3enm lenformasyon i dir i pe pran en pirat i pou ariv Lasanble Nasyonal 5er ozordi ; en lot bout lenformasyon me ler ou met sa 3 ansanm si i annan en boug ki pe assess sa lenformasyon i dir baze lo sa lenformasyon mon annan krwayans poudir en boug i anvi vin dir Mr Gill en keksoz ozordi 5er.  Sa se lentelizans prezan.

Alor mwan sa ki mon pe mazinen pou mwan sa ki nou lo sa kote latab nou annan en vizyon, se nou annan en unit ki li i pa son louvraz pou li al donn konsey Prezidan – i pa son louvraz pou li pas kot Minister poudir zot anploy tel dimoun pou anploye, son louvraz se annan spesyalis lenformasyon pou lentelizans,  kot par egzanp si li i konnen poudir en fason pou anmenn sekirite dan pei se detri drog, alor nou annan en spesyalis dan sa unit son louvraz se konnen tou sa ki i annan pou konnen lo biznes drog Sesel.

Alor i pou al pa bezwen fer tou sa louvraz li menm li i pou al par egzanp kot Imigrasyon e i a konnen si i annan lenformasyon lo bann dimoun ki involve ladan ; konbyen sa boug i mont Dubai oubyen Kenya oubyen Madagascar ; sa i en lenformasyon sa.  I ava al kot labank oubyen FIU oubyen Labank Santral, i a konnen ki bor i annan kont e i a ganny lenformasyon lo sa bann kont avek permisyon byensir.

I ava al kot Licensing Authority i a konnen lekel biznes sa dimoun i annan.  I ava al kot Lotorite tax i a konnen ki sa boug in deklare ; i ava al kot later i a konnen ki later sa boug i annan.  I konnen ki in deklare konman son mwayen.  I ava kot SLA i a konnen si i annan veikil ki in aste ki in revann – kot labank i a konnen si in pran loan ler i ti fer sa bann lenvestisman.  E tou sa lenformasyon ler in ganny tousala ansanm, li i kapab konmans penn sa portre lekel bann boug ki pe fer bann biznes ilegal Sesel, e enn fwa ki in ganny sa portre lo sa premye bout louvraz ki sa servis ki nou pe donn li son lankadreman, son premye louvraz ki li i kapab fer se i a kapab al kot Komisyoner Lapolis e dir Komisyoner Lapolis ou annan en unit ki lager kont drog, mwan mon annan lenformasyon konkret ki mon kapab donn ou e ki mon espere i kapab ed ou pou redwir en menas sekirite.  Lala en servis lentelizans e sekirite pou pei.

Alor i al kot Lapolis – Lapolis i annan son zouti li; i annan son zonm li; li prezan i konnen kwa ki i pou bezwen al fer.  Parske li i napa neseserman letan pou al fer tou sa bann keksoz.

Dezyenmman dan sa unit i kapab annan en lot dimoun sa boug i fer louvraz drog, sa lot dimoun son louvraz se veye lekel ki pe servi Sesel konman en sant pou zot fer blansisaz larzan.  Alors li i konnen lekel bann lakonpannyen ki pe servi Sesel pou sa bann kalite tranzaksyon? Lekel zot bann azan lokal ki pe fer sa bann tranzaksyon? E li alor i spesyaliz ladan li.  I rod lenformasyon; i servi labank – i servi Minister Finans – i servi ankor parey mon eksplike taler i ava al kot lezot Lazans SLA, SRC eksetera, e i pas sa lenformasyon avek FIU. 

        FIU prezan li i kapab servi sa lenformasyon pou li kapab swa sezi en kont, swa pran aksyon neseser.  Se sa kalite vizyon ki nou annan alor se en group dimoun ki zot louvraz i vreman teknik.  Zot louvraz i vreman pou al rod lenformasyon transform sa lenformasyon fer li vin lentelizans, prezan ler ou’n ariv sa staz lentelizans se la kot ou vin kot en lot dimoun kot ou raport avek – ou pa kapab pa raport ek personn ou se la prezan kot ou e sa sete kot nou propozisyon ki nou fer lamannman nou propoz lamannman dan sa Bill, kot prezan ou annan ou en Council.  Mon pa konnen si nou pou apel li National Intelligence oubyen en National Security Council mon prefer sa mo security akoz lentelizans i zis en morso dan sekirite.  Sekirite sa ki nou pe rode pou pep Seselwa.

Prezan li sa group dimoun ek son Direkter General i prezant tou sa bann lenformasyon avek sa Security Council e li sa Security Council i ganny prezide par Prezidan avek detrwa dimoun ki zot rol se vreman i lye avek sekirite pei; par egzanp Lapolis, Militer, Attorney General sa bann kalite dimoun ki pou la, ki zot konpran menas nou pei me se zot ki pou donn en direksyon avek sa unit.  Alors sa unit pa kapab asiz lo li menm.  Sa unit pa kapab vin en konseye pou Prezidan.

Mr Speaker mon krwar si nou annan nou en lankadreman ki ganny sipervize par en Konsey; si nou annan en lankadreman kot tou keksoz i ganny fer anba en Lalwa ki kler ki transparan pou mon se la fason ki Sesel i devret bouze ; set en fason kot nou pou ganny meyer lenformasyon ek lentelizans, ki pe al kot bann dimoun ki bezwen li ozordi.  Parke se sa fason ki Sesel pou evite pas dan bann move sityasyon, ki nou’n annan e ki nou’n vwar resaman.  En legzanp se mon mazinen se en pti pe koumsa ki bann Irlande ti pe fer avan en propozisyon tel ki nou vwar ozordi devan nou in arive bann Irlande ki sipoze ti pe ansarz FIU, nou’n vwar kontra ki zot in sinyen avek Gouvernman ki zot dir ki zot ki pe donn lentelizans ek sekirite ek pei.

Apar zot louvraz FIU se zot ki ti pou al fer sa e nou vwar tou kalite dezord ki’n arive e kot sa msye ki ansarz sa unit FIU li menm li i annan son lakonpannyen prive an deor li menm li ki dir sa lakonpannyen prive pe donn lenformasyon i pe anvoy gro Bill kot Gouvernman e ki finalman nou realize Gouvernman in perdi R216milyon atraver sa.  E nou pa konnen ki lenformasyon zot in donnen parske Lapolis zot dir ou zot pa’n zanmen gannyen e Militer i dir ou i pa’n zanmen ganny lenformasyon ek sa bann zans so ki lenformasyon ki lentelizans ki zot in donn Sesel e ki sekirite Sesel in gannyen.

Me parkont mon pou mon ler mon regard sityasyon nasyonal ozordi sa ki kler pou mon se ki i mank en servis kordinen kot bann Lazans tel ki Lapolis e tel ki Militer i pe vreman ganny donnen lenformasyon ki kapab pran aksyon imedya sa mon krwar i pe arive.  En legzanp se si par egzanp en kont ozordi anba nou Lalwa AML ozordi – si labank i donn en lenformasyon ki i annan en tranzaksyon sispe ki in arive en STR e otomatikman sa Lalwa i fer provizyon ki sa kont i freeze.  Savedir napa tranzaksyon lo la pou 5 zour, san ki FIU i antre ladan, san ki labank i antre ladan.  Lefe ki in issue STR otomatikman sa kont i ganny freeze.

Me ozordi ki nou pe vwar pe arive ler sa i arive, e si Lapolis li i pa ganny lenformasyon konm kwa sa kont pe ganny freeze apre egzanp akoz dizon ki sa boug i dir in resevwar en gro larzan e vann later, oubyen in vann en loto – i pa konnen li, parske sa en lenformasyon ki in sorti kot labank pe al kot FIU.  E li FIU dizon ki li i pa enform Lapolis poudir sa tranzaksyon in arive, e en lot dimoun ki pa ganny enformen se Rezistrar li menm, i pa ganny enformen poudir sa boug in dir dan son deklarasyon ek son bankye konmkwa li in fek vann en bout later – i annan en vant later li Rezistrar – sa ler i napa lavant later – Rezistrar pa konnen li Lapolis osi pa konnen, sa se larzan drog ; savedir Lotorite dan pei ki Lapolis, li ki sipoze al deal ek sa bann sityasyon, i pa pou zanmen okouran li, parske personn pa dir li.  Napa sa lesanz lenformasyon ant FIU ek Lapolis e napa en dimoun ki pe kordin sa.

E se pou sa rezon ki en servis ki pe kordin tou sa bann lenformasyon parske Sesel nou anmas en kantite lenformasyon preski tou lenformasyon lo en endividi – nou annan nou konnen depi ler ou kit pei – Sesel i konnen – i konnen ler ou aste en loto, ler ou vann en bout later i konnen ler ou fer ou tranzaksyon labank tou keksoz otour ou i konnen – i en pti pei.

Me selman sa ki nou vwar rezilta nou vwar dimoun i kontinyen fer biznes ilegal drog i kontinyen ogmante bann Lotorite ki annan Bidze ase sibstansyel pa pe kapab vin efektiv, malgre ki nou annan en sistenm lentelizans e servis sekirite defakto, ki napa en Lalwa otour li, ki sipoze an mars!  I kler poudir i pa pe marse.

E sa Bill ozordi i en lesey e lo sa kote latab nou fer nou bout pou nou met en vizyon e an plis ki en vizyon donn propozisyon konkret atraver bann lamannman ki’n propoze yer, e mon kontan ki Gouvernman in aksepte an gran parti, e ki prezan i a kre en unit profesyonnel bann dimoun Seselwa espérons ki pou anmas lenformasyon e pas sa lenformasyon avek bann Lazans konsernen, ki sa lalit pou nou anmenn meyer sekirite dan pei – meyer sekirite pou nou dimoun, kot nou ava vwar mwens bann keksoz ilegal pe pase, i ava kapab arive pou la premyer fwa.

E si sa i arive mon krwar nou pou bouz dan en nouvo direksyon, kot tou dimoun pou viv anpe kot dimoun pou krwar dan sa ki nou apel rule of law dimoun pou krwar ladan ; parske en bon pe dimoun nepli krwar ladan.  I dir ou mwan mon travay pou 30an, mon ankor pe ganny R9mil, me en boug mon konnen pa’n travay ditou monte desann Dubai i en milyonner  mon pa konnen ki i fer mwan, selman i ok li e zanmen nanryen i arive ek li.

E alor dimoun i konmans perdi konfyans dan Lalwa.  I konmans dir ou be Lapolis pa vo lapenn zot la.  Nou kapab fer sa ki nou oule dan sa pei.  E si nou les en sityasyon koumsa kontinyen deroule Sesel, ou ganny ou en pei kot i pou vin lawless – kot personn pa pou respe lenstitisyon e finalman nou pou napa sekirite.

Alors mwan Mr Speaker mon an faver sa morso Lezislasyon parey nou propoze pou amande, pou fer li ki nou pou annan profesyonnel, en sistenm ki annord, en sistenm dwat, en sistenm ki personn pa vin azir konman en Konseye Spesyal zis li ki poudir kwa ki annan pou fer e personn pa pou kapab deservi en Lotorite pou penaliz oubyen tir drwa en lot Seselwa.

Avek sa Mr Speaker mon ti a kontan dir ki mon pou siport sa Bill parey in ganny amande.  E mon krwar i pou anmenn Sesel dan en nouvo direksyon.  Mersi Mr Speaker.

 

MR SPEAKER

Mersi Onorab Afif.  Nou annan 13 minit Onorab Pillay oubyen Onorab Simon Gill.  13 minit Onorab Pillay.

 

HON SEBASTIEN PILLAY

Mersi Mr Speaker.  Bonn apre midi Mr Speaker.  Bonn apre midi tou Manm Onorab.  Bon apre midi Minis avek ou delegasyon e bonn apre midi tou dimoun ki a lekout.  Mr Speaker mon pa pou long, mon pou tre bref lo sa Lalwa, me mon krwar selman i enportan ki lo konmansman la mon dir ki in en plezir tou dilon lazournen yer, lapros travay ki nou pran konman en Lasanble, pou nou kapab realize e anmenn nobou anmenn en Lalwa devan, ki si oule i fer zistis laspirasyon tou le de kote latab e bann request ki nou ti annan.

E mon dir sa Mr Speaker akoz mon pran en keksoz ki ti ganny dir par enn mon koleg Onorab Aglae, ler i ti ganny loportinite pou li kot Chair Komite ti pe dir nou poudir donn en nou apersi zeneral, e kot i ti dir poudir sa Lalwa pa zanmen devret vin en Lalwa ki ganny servi dan en fason pou swa espyonn swa met okenn dimoun, dan okenn sityasyon konprometan, ouswa fer okenn keksoz ki pa an form nou Konstitisyon.

Mon krwar Onorab Aglae ler i ti dir sa.  E bomaten ler mon ekout li ler in konmans son lentervansyon, in bann pwen fondamantal lo ki nou osi lo sa kote latab – par egzanp bomaten nou ti pran en desizyon kot nou ti vot an faver sa Mosyon kot nou ti quash sa S.I.  E se dan sa laliny ki nou bezwen ale.  Akoz sa Lalwa Mr Speaker, i en Lalwa kot ozordi nou pe lans en lapel avek tou sa bann ki pe fer ditor nou pei, ou pa pou vin zwe politik – ni lo en kote ni lo lot kote.  E ki si ou pou vin fer ditor nou pei nou pou napa landrwa kasyet nou pou bezwen vin rod ou.  E si ou pe vin en lennmi nou pei, nou pou fer sir poudir ou peye si ou pe vin fer ditor nou pei.

Mon dir sa Mr Speaker akoz tro bokou letan nou pas nou letan asiz lo de kote larivyer si oule dir, e bliye sa ki pe pase dan milye larivyer.  Sa ki pe pase se bann dimoun mal entansyonnel ki toultan profit ladan, pou zot fer zot bann aktivite.

Me avek sa Lalwa i bann loportinite pou nou dir be, la nou met an plas en kad legal, pou nou annan en unit pou travayer ki kapab travay, pou anmenn ansanm lenformasyon e lentelizans pou ki zisteman nou al nou kapab reponn a lapel e legzizans sa nouvo sityasyon ki nou pei i trouv li ladan.

Mr Speaker mon dir sa akoz ozordi bann threats pou nou pei, i nepli bann threats ki ou pe espekte ; par egzanp taler mon pe koz avek enn de dimoun e zot dir mwan, me Sesel osi  ozordi par egzanp ou annan lenvestiser ki kapab vin envestir ki par lasosyasyon – par asosyasyon ki zot, zot annan avek lezot dimoun, i kapab konpromet nou sekirite Nasyonal.  Ou konnen ou pa espekte sa.  Ou regard en lenvestiser i anmenn foreign investment – ou dir i en bon keksoz pou ou, me ler ou ekout sa ki sa bann dimoun pe dir, provenans kot sa dimoun i sorti, son rol ki pe vin zwe i kapab par son lasosyasyon afekte ou sekirite Nasyonal.

E se pou sa rezon ki mon kontan ler Onorab Hoareau i dir i annan sa nou bezwen annan sa extraterritorial provision dan sa Lalwa ki rol sa extra territorial provision pou zwe, me ki nou bezwen fer sir poudir sa Provizyon pa ganny vwar konman en Provizyon ki ava anmenn sa Lalwa pou fer bann aktivite an deor Sesel demann sa bann dimoun ki pou enplimant sa Lalwa bann aktivite ki pa an konformite avek Lalwa.

E se pou sa rezon ki ler Komite ler nou ti pe regard sa bann fines dan sa Lalwa orizinalman se pou sa rezon ki Komite koman en Komite nou ti pran desizyon ki nou bezwen fer monte sa bann fines, pou asire ki okenn dimoun ki enplimant sa Lalwa, i enplimant li e konn konsekans son aksyon si i al an deor sa Lalwa in set out.

Mr Speaker i annan en lot eleman fondamantal dan sa Lalwa e i enteresan ki Onorab Hoareau in raise sa, ki nou konman Komite petet nou pa ti konsider li.

E mon krwar Lasanble i bezwen apresye travay Komite se pa pou donn zot en Lalwa ki parfe.  En travay Komite se pou donn en Lalwa ki bann gran prensip nou tonm dakor lo la, me ki Lasanble i toultan rezerv son drwa pou fer bann lamannman as kot i santi ki i annan bann lamannman ki devret ganny fer.   E sa Provizyon ki deal avek nasyonalite sa dimoun ki pou ansarz sa Lazans, i en Provizyon enportan.

E ki nou bezwen konsidere konman Lasanble whether or not, si nou annan sa dimoun Sesel ki annan sa konpetans – si nou anvi restrikte sa pou sa dimoun i la Sesel ozordi ki annan sa konpetans, oubyen nou anvi les li pou ki demen i ava annan sa dimoun ki ganny apwente.  

        So tousala i bann konsiderasyon ki nou bezwen pran ler nou pe vot nou pou vot lo sa Lalwa, oubyen nou pou al dan Committee Stage pou nou diskit sa Lalwa dan plis detay.

Mon le osi dir Mr Speaker ti en desizyon kolektif, pou nou fer ki bann desizyon finansyel sa Lalwa, i pas atraver Consolidated Fund.  E dayer dan sa konteks Komisyoner Lapolis ti ed nou ladan, akoz i ti eksplik nou ki mannyer Lapolis ozordi pe fer sa travay atraver Consolidated Fund, e pou ki rezon alors sa Lalwa i devret al lo sa laliny.  E konman en Manm FPAC mon ti konsernen par sa, akoz ti esansyel ki nou annan sa Provizyon, kot nou met tou keksoz anba Consolidated Fund.  

        E malgre ki Lalwa avan ti pe predir par egzanp bann Grants – bann Donasyon, me nou vwar ki Minister Finans anba lapros ki in pran, i pe met tou sa bann Grant e Donasyon anba Consolidated Fund. 

        So tousala i kapab pas atraver Trezor e nou annan en fason efektiv pou nou kapab kontrole, pou nou manage larzan ki nou donn bann Lazans, pou fer sir ki sa bann Lazans – tou Lazans i konform dapre Lalwa, e napa en super agency par lao lezot vizavi financial regulation, ki nou annan dan pei.  So sa ti enportan.

Mon ti dir ou mon pou bref Mr Speaker, akoz mon pou rezerv laplipar mon bann komanter pou Committee Stage.  An terminan Mr Speaker mon krwar lapros ki nou bezwen pran, dorénavant se regard lentere Sesel e met Sesel avan tou – toultan.  Akoz bokou dimoun i dir nou pti akoz nou bezwen isi.

Be dimoun pa realize poudir i annan en volim tranzaksyon – en volim tranzaksyon finansyel ki pas atraver nou pei, swa atraver bann sistenm labank dan en fason lezitim, osi atraver bann lezot sistenm enformel dan en fason ilezitim, ki sibstansyel e ki nou pa kapab kontinyen les sa arive akoz se sa bann aktivite ki pe fuel latak, ki nou annan lo sosyete ozordi atraver drog, atraver bann konportman anti- sosyal.

E ki konman en Lasanble nou bezwen lans en lapel tre kler ki nou pa condone okenn sa bann aktivite ; ki nou anvi lans en lapel poudir ki konman en Lasanble, konman en Brans gouvernans dan nou pei, nou pe fer nou bout pou asire ki i annan en kad legal, pou ki nou komans en lager san ses kont sa bann keksoz ki pe arive, e protez nou pei.  Me osi dan en fason pozitiv, ede pou fer nou pei devlop plis ankor.  Mersi Mr Speaker.

 

MR SPEAKER

Mersi Onorab Pillay.  Mon krwar i reste dan ou letan i reste nou 6 minit eski Onorab William eski ou pou kourt?  Ok mon ava donn nou laparol Onorab Waven William.

 

HON WAVEN WILLIAM

Mersi Mr Speaker.  Mr Speaker sa size ki devan nou la i en size ki i vreman enportan – vreman enportan, akoz malgre nou en pti pei, me ozordi nou pe koz en vilaz global ki nou form parti ; nou pe koz lentegrasyon ; nou pe koz bann frontyer ki’n ouver e bann lenfliyans – annan bon lenfliyans e osi ou annan bann move lenfliyans.

Mr Speaker ou kapab annan tou sa bann kad legal, ou kapab met an plas bann diferan striktir oubyen mekanizm, me sa ki enportan se ki mon krwar Onorab Afif in tous en mo, me selman mon pou azout enn avek, se sa lentegrite avek kredibilite sa bann striktir ek mekanizm.

Mr Speaker nou bezwen osi koz fran ki ozordi Sesel, letan ou pe koz resours imen mwan menm mon pe demann mon lekor la kestyon se ki, avek bann endividi, ouswa Lazans ki nou pe anmas bann lenformasyon lentelizans, e avek lenformasyon ki la deor avek piblik, kestyon se eski nou pou servi serten bann menm dimoun, ki ozordi dan piblik ou pe tann bann serten bann lenformasyon, ki letan ou analize piblik menm i dir poudir be sa i mank serten kredibilite.

Mr Speaker pa zis sa osi me nou bezwen osi pran konsyan ki sa bann dimoun ki pe donn bann servis lentelizans, nou bezwen pey zot osi byen, pou zot pa ganny tante ouswa ankouraze pou fer bann lezot bann aktivite.  Akoz si ou pa pey dimoun byen ki travay dan sa bann Lazans, ouswa bann dimoun pe donn bann lenformasyon lentelizans, serten degre nivo proteksyon e osi zot package saler sa osi letan nou pe vot lo sa Bill nou pou bezwen ki Gouvernman i pran sa an konteks.

Mr Speaker lot keksoz konman en Seselwa mon voyaz en kantite be  mon voyaze, be an menm tan ou pe vwar poudir be i annan serten landrwa dan nou pei nou pe vot pou sa Lalwa ozordi ki ou trouve be petet letan nou pe met an plas sa nouvo lankadreman, ki nou vreman pran kont nouvo realite Sesel.  Akoz dan bann distrik, i annan bann lenfrastriktir, ki ou santi poudir tro bokou letan nou pe pran keksoz a la lezer.  E nou plito reaktif – pa proaktif pou kapab – enn -anpes bann danze letan i kapab arive.  E mon pou siport sa Prozedlwa e  mwan mon ti a kontan ki sa 2 pwen i ganny pran an kont.

Enn, se sa eleman dan bann endividi pou ganny swazir se sa eleman lentegrite, kredibilite.

Epi an menm tan annou pey sa bann dimoun ki pe donn sa bann servis en bon package.

An terminan Mr Speaker mon pe demann mon lekor en kestyon la, pou en dimoun ankouraze ozordi pou donn lenformasyon ; par egzanp i annan en tranzaksyon dizon letan sa servis i enteronpe sa  tranzaksyon, i annan en valer ki al avek.  Me eski sa dimoun ki donn sa lenformasyon i ganny en rekonpans pou li ankouraze demen bomaten pou li solider e vreman regarde fason i kapab donn koudmen sa Lazans, pou fer sir ki sekirite Nasyonal pei i ganny pran kont.  Mon krwar tousala nou bezwen mazinen letan nou pe koz lo sa Bill e siport sa nouvo Prozedlwa.  Mersi Mr Speaker.

 

MR SPEAKER

Mersi Onorab William.  Bon zis avan nou Break mon anvi pas en lenformasyon FPAC pe meet Committee Room 3 la pandan break avek PS Thesee e Onorab William, Onorab Georges, Attorney General ki la avek nou, pou meet en pti moman dan Speakers Conference Room la toudswit ler nou break.  Ok nou ava retournen repran nou travay 4er.

 

 

(BREAK)

 

 

MR SPEAKER

Bon avan nou kontinyen nou travay mon ti a zis prezant leskiz pou bann dimoun ki pe swiv nou travay, sa i akoz bann miting ki nou fer dan break e sirtou miting FPAC ki nou prolonz en pti pe.  Bon nou ava kontinyen avek deba lo Prozedlwa ki devan nou.  E prosennman mon annan Onorab Georges ki pou entervenir.  Onorab.

 

HON BERNARD GEORGES

Mersi Mr Speaker.  Mr Speaker pa ti mon lentansyon pou koz lo sa Bill, akoz ler nou pou al dan Committee Stage mon pou koz en pe.  Me mon’n ganny enspire par de keksoz ki Onorab Leader Lopozisyon e Onorab Gervais Henrie ti dir e mon krwar ki mon devwar pou mwan fer enn de pti remark apre midi.  E mon prefas sa ki mon pe al dir an di-z-an ki sa pozisyon kot nou arive dan sa pei, i en pozisyon ki tre diferan ki kot nou ti été.

E sa mon vwar nou devret aplodir e nou devret konsyan e kontan ki nou pei in sorti dan en peryod kot mefyans politik ti the order of the day e ozordi nou kapab parey nou montre yer dan Bills Committee zwenn ansanm konman en group dimoun serye e dan lentere nasyonal Onorab John Hoareau ti demande bomaten en definisyon ou plito sa apre midi en definisyon linite nasyonal lentere Nasyonal – dan lentere Nasyonal setadir en fason pou promouvwar keksoz ki pli gran ki nou.

Ler ou dir en keksoz dan lentere Nasyonal ou regard lanasyon avan ou, oubyen avan sa ki ou siporte.  Ou regard byennet lanasyon.  Ou pe regard en keksoz ki bon pou tou dimoun e non pa pou zis en serten sekter.  Ler par egzanp pou fer en keksoz dan lentere Nasyonal ki afekte en dimoun, oubyen en group dimoun, ou kapab dir ki sa i regretab me i neseser akoz lentere Nasyonal i pli gran ki nou lentere.

E parey mon ti pe dir mon kontan ki nou kapab ozordi konman en diferan tandans politik, diferan sekter, zwenn ansanm e trouv en Lalwa tel parey sa enn, ki en Lalwa ki annan pou fer avek keksoz ki vreman enportan – parey dife si ou travay li byen me ki kapab tre afekte bokou dimoun si ou pa konn metriz li.

E nou kapab – nou’n kapab e in montre la ozordi ankor e nou pou montre ler nou vot lo sa Lalwa, ki nou ariv a en staz kot divizyon politik ek mefyans, i kapab ganny met deryer nou.

Onorab Ramkalawan bomaten dan en lot konteks ti dir ki i koz – oubyen ler nou, nou’n koze lo sa kote latab, nou koz ek leksperyans – nou pa pe koz dan en fason teorik, e i annan rezon.  E Mr Speaker Onorab Gervias Henrie konmans son lentervansyon ozordi par rakont en pti zistwar, e mon ti a kontan rakont enn de zistwar zisteman pa pou nou retourn an aryer – loin de ça sa nou fini depase sa leta, me mon krwar pou nou met an konteks akoz ki yer nou santi li bon lo sa kote latab, pou nou angaz avek Minis ek Gouvernman, pou anmenn serten modifikasyon dan sa Lalwa, akoz leksperyans ki nou’n viv in montre nou ki nou pa devret assume okenn keksoz.

Nou pa devret les okenn laport ouver.  Nou devret fer sir ki pou servi en dikton ki ler nou ariv dan milye larivyer, sa skorpyon pa pik nou.  Mr Speaker  mwan mon pa’n ganny latet kase mon pa’n ganny fermen dan kase – mon pa’n gannyen sa bann kalite keksoz, me mon kapab dir ou sa ki mon’n gannyen lo en nivo lentelizans.  Ler mon ti pe grandi mon ti konnen ti annan en seksyon Lapolis ki ti apel en SB – ‘Special Branch.’  E   nou tou nou ti konnen ki sa se bann gard ki pa ti met liniform e ki ti marse e i pe anmas lenformasyon pou ed Gouvernman kolonyal konnen ki menas sekirite ti annan eksetera.  E sa nou tou nou ti konnen.  E i ti en open secret.

E tou pei i bezwen annan en seri informant – sa nou pa kapab dir i pa pou annan ti annan yer i annan ozordi e i pou annan demen.  E i toutafe normal ki en pei dan lentere Nasyonal, i konnen oubyen Dirizan en pei i konnen ki a nenport ki moman kote menas pou vini pou li pran serten aksyon pou anpes menas pou arive.

Nou konnen osi ki Mr Speaker ki pou rezon politik bokou nou lo sa kote latab, ti ganny targeted.  E mwan mon konnen akoz mon konnen akoz okenn nou bann kont labank, zanmen ti en sekre akoz tanzantan ler mon antre labank bann zofisye labank, i dir mwan be ki ou’n fer mon dir akoz i dir be en warant in arive la pou nou tyek dan ou kont.  ‘’Tyeke napa problenm ou.’’  Sa ti en keksoz normal mon viv tou mon lavi profesyonnel an konesan ki mon ti napa okenn sekre, akoz ki i ti annan en dimoun somewhere ki ti pli enterese avek sa ki mon fer ki mwan menm.  E bokou pli tar mon aprann osi ki mon telefonn a tou moman ti anba lekout.  E bann dimoun ki ti siny warant pou ekout mon telefonn ti dir mon ou konnen tanzantan mon bezwen siny en warrant pou ou mon dir be mon konnen napa problenm annefe toultan mon assume dan mon lavi ki tou mon telefonn toultan ti anba ekout.

E en fraz ki Onorab Hoareau in dir pli boner Onorab Basil Hoareau e i enportan, e sa se ki nou konnen ki sa bann keksoz ler ou al ankor pou demann en warant la i rubber stamp sa.  Rar – mon pa konnen ki sa Ziz oubyen sa Mazistra i servi poudir mon non sa enn mon pa pe sinyen. Obviously konman i ariv devan li, i pou prezimen poudir i annan en rezon e pou sinyen.

E la Mr Speaker mon en pti joke  mwan mon ti pou Mazistra en lepok e mon ti siny warrant search warrant ki Lapolis ti anmenn kot mwan.  E mon ti siny tou zanmen mon ti kestyonnen e mon annan en kopi en warant ki mon garde akoz i vreman enteresan Korddard Mont Fleuri in anmenn en warant pou mwan La Louise anler mon sinyen granmaten, akoz zot pe al fouy kot en dimoun e zot ti pe al rod – lo sa warant ti ekri ‘’one red handle knife with a red handle ‘’.  E mon ti trouv sa telman enteresan mont i gard en kopi.  Mon pa konnen si zot in trouve si zot pa’n trouve me i kler ki obviously ki ou pou trust sa dimoun ki pe vin devan ou, e ki fer afidavit e ki dir ou siny en warant akoz nou konnen ki sa dimoun i annan tel keksoz nou pe al rode.

E sa nou bezwen sorti dan sa mindset.  Ler mon pe koz lo telefonn – zistwar ki mon ti anvi rakont zot, se bank account, telefonn en zour ki mannyer mon konnen avan ki dimoun i dir mon ki mon telefonn pe ganny ekoute, ki mannyer mon konnen ki mon telefonn pe ganny ekoute? Sa i en zistwar klasik – klasik.  Mon pran mon telefonn biro, mon telefonn en kliyan L’Angleterre ki ti call mon e mon ti ankour kekfwa mon pa ti konnen me mon recall li back 0044207 eksetera, e en madanm i reponn. I ti drol akoz sa dimoun ki mon ti pe call i en zonm e a mon avi mon ti pe call son telefonn personnel – anyway en madanm i reponn e mon dir kekfwa son sekreter mon dir ‘can i  speak to x’ e sa madanm i dir mon ‘is that you Bernard ?’ Mon dir ‘yes who is this ? ’ I dir mwan ‘Angela’ madanm Mario Richie, ki ti en dimoun ase koni isi mon dir ‘But Angela ki ou pe fer dan biro sa msye L’Angleterre ki mon pe call ?’ i dir mon ‘mon pa dan biro okenn msye L’Angleterre mon dir ‘kot ou été’ i dir ‘mon dan mon loto Sidafrik Johannesburg.’ E se la ki mon konnen ki pa zis mon telefonn ti pe ganny ekoute, me telefonn Mr Richie osi ti pe ganny ekoute.  E sa dimoun ki ti pe metriz sa de plug akoz sa lepok ti ankor plug enn isi, plug enn laba, eksetera ti tronpe e ti zwenn ansanm e olye mwan koz ek en dimoun ki mon ti anvi koze mon end up avek en lot dimoun ki i ti bug.  E mon bezwen dir li ‘be gete si ou pa konnen les mon dir ou la ki ou telefonn pe ganny ekoute osi’.

Alor Mr Speaker nou’n viv sa bann letan e nou bezwen viv avek.  E malgre ki ozordi dan nou for enteryer, nou devret dir ek nou lekor sa bann keksoz i dan lepase – konpran nou ler nou dir ki pou lentere Nasyonal dan lentere Nasyonal nou pa kapab pran risk.  Nou pa kapab pran risk.

Mon boper ki zot ti konnen defen paren tanzantan li zot ti vin fouye kot li pou bann rezon bet.  Olye dir nou pe vin fouy akoz nou vwar ou annan en papye ki kritik Gouvernman whatever, zot dir nou vin fouy drog – ziska son boulwar dan lakwizin zot al fouy ladan pou al rod drog.  E zot konnen zot pa ti pou – Ki zot ti pe sey fer angiz fouy drog zot ti pe espekte ki zot pou al bat avek en dokiman sibversif or whatever.  E finalman – e finalman ler nou pe koz avek sa bann dimoun soulye pwent avek semiz karo an deor kannson, Onorab Ferrari in bezwen in reste kot mon madanm ek mwan pandan en peryod plizyer semenn a en serten moman, akoz partou kot ti ale ti en loto ki ti swiv li avek en drayver dan en semiz karo dan en sennglas semiz an deor kannson.

E sa ki ti pli gou se ki i ti vini Onorab Ferrari i vini i park sa loto i park an deor nou baro nou esper li, tou lannwit nou asize nou dinen nou dormi nou get televizyon nou dormi nou lev-e bomaten loto i la Onorab Ferrari i antre dan son loto i ale, loto i swiv li.  Ou konnen? .  Fantastik e pandan en bann mwan sa in kontinyen ok?

E Mr Speaker nou kapab pas en apre midi antye pe rakont zot bann forfe ki nou lo sa kote latab bokou nou bezwen pas ladan, pou en senp rezon se akoz nou pa ti siport parti ki ti o pouvwar.  Se tou rezon.  Se tou rezon.  Ti napa okenn lezot rezon nou pa ti pe ni overthrow pei ; nou pa ti pe ni fer Coup D’état ; nou pa ti pe fer nanryen zis nou ti fer kler ki nou pa ti siport sa parti ki ti o pouvwar.

Alor Mr Speaker ozordi parey mon dir a de repriz e mon repete, sa ki nou anvi fer se etabli en servis lentelizans, ki pou an deor tou sa bann mannev politik ; ki pou anmenn nou pei lo en nivo ki in arive deza, me nou bezwen konsolid sa nivo. E nou bezwen fer sir e se pou sa rezon ki nou pran telman lontan yer, pou regard sak defayans posib ki annan dan sa Lalwa, pou ferm sa pti loophole zis an ka i annan en problenm.

E taler enn bann keksoz ki mon pa ti vwar me lo nou kote latab nou vwar ‘’any other service’’ or ‘’any other duties ‘’sa nou vwar partou dan tou kontra lanplwa toultan dernyen clause se ‘’any other duties that you may be asked’’ i normal mon pa’n i pa’n strike mwan sa, me in strike enn ou de parmi nou be i tro larz akoz sa ‘’any other’’ duties i kapab anglob en keksoz ki nou pa anvi.  Alor nou pe donk fer en Lalwa ki pou kler ki pou progresiv ki pou modern me ki pou osi garanti ki nou pa pou glis an aryer pou napa posibilite lenterferans avek sa Lazans pou ki sa Lazans i ganny servi pou zis en Seksyon e non pa en lot Seksyon.  E nou anvi en Lalwa e les mon termin lo sa dernyen parol nou anvi en Lalwa ki bon pou ozordi ki nou pei pe viv anba Prezidan Faure me ki pou osi bon demen ler nou pei pou viv anba Prezidan Ramkalawan.  Mersi Mr Speaker.

 

MR SPEAKER

Mersi Onorab Georges.  Mon ava donn laparol Onorab Simon Gill.

 

(Interruption)

 

HON SIMON GILL

Bonn apre midi Mr Speaker.  Bonn apre midi Minis.  Bonn apre midi tou koleg Onorab e manm piblik ki pe ekout nou.  Mr Speaker Prozedlwa ki devan nou dan sa Lasanble i en Prozedlwa ki pe anmenn Sesel lwen e sa zistans ki sa Prozedlwa pou anmenn Sesel ler mon dir pou anmenn li lwen in ganny manifeste atraver en fenomenn ki pa tre souvan pou nou kapab vwar li i annan en kantite lesey ki nou fer, me sa enn moman malgre Onorab Ferrari pa ti la i ti absante yer ler nou ti pe diskit lo sa Prozedlwa an Komite nou ti vreman vwar sa lespri ‘’Togetherness.’’  Sa lespri pou nou travay ansanm e sers sa ki meyer pou nou met dan sa Prozedlwa pou ki an retour Sesel e selman Sesel ki benefisye e par laswit lepep Seselwa i vin met par antyer en Prozedlwa ki modern.

E lo sa not Mr Speaker mon krwar nou fer en par ekstraordiner eksepsyonnel e lo nou kote isi mon krwar nou devret onnetman e senserman rekonnet kontribisyon enportan ki nou bann koleg dan LDS in fer, dan bann deba dan bann kontribisyon pou nou kapab anmenn sa Prozedlwa modern.

Me egalman Mr Speaker nou pa pou fer lazistis san rekonnet bann profesyonnel ki’n travay lo sa Prozedlwa, ki’n amenn li devan nou Lasanble evantyelman, pou nou kapab asize konman en lekip e ansanm avek zot avek bann lezot partner ki annan lentere direk dan sa Prozedlwa pou zwenn ansanm e pou nou kapab donn Sesel sa ki pli byen – sa ki pli meyer.

Mon krwar i dan sa lespri ki nou bezwen kontinyen Mr Speaker san krwar poudir akoz nou’n etidye L’Angleterre oubyen akoz nou etidye La France e bann ki’n etidye Czecholovakie oubyen bann ki’n etidye Cuba i enferyer,  me kot nou tou ansanm pe enport kote nou etidye nou kapab kontribye efektivman, pou ki Sesel, e selman Sesel i benefisye e ki nou fer nou kontribisyon par konsekans.

Mr Speaker back to the Bill parey Onorab Ramkalawan pe dir i enportan ki nou mansyonn en keksoz.  E pou nou kapab fer en travay konsekan ler nou pe aplik konteni sa Bill nou bezwen donn respect tou pei.  Nou bezwen donn respect tou nasyonalite. Nou bezwen respekte pep Kiben ; nou bezwen respekte pep Franse nou bezwen respekte pep La Renyon.

Mr Speaker bann pep sak pep i annan drwa al lo determinasyon e determinen ki mannyer zot ser zot pei e ki sistenm politik zot servi pou zer zot pei e ki sistenm sekirite zot met an plas sakenn dan zot pei.

Mr Speaker i enportan ki mon dir malgre mon konnen serten pou grense nou bezwen respekte pep Kiben ankor enn fwa – mon repete – akoz zot pe fer en kontribisyon eksepsyonnel dan lemonn avek tou zot bann lenperfeksyon e zot pe donn Sesel en kontribisyon efektiv dan nou Sekter Lasante avek tou zot lenperfeksyon.  E nou bezwen donn respe tou bann etidyan ki’n etidye Cuba.  This is the way forward!  Nou pa kapab vin dan sa Lasanble pou nou vin denigre bann dimoun ki’n etidye dan en pei, ki le kontrer avek nou.  Nou bezwen donn respect sa ki’n etidye Lostrali sa ki in etidye L’Angleterre, La France, Czecholovakie, Larisi e Cuba.

 

MR SPEAKER

Onorab en moman depi ler nou konmans deba lo sa Bill en moman depi ler Minis in prezant Bill, mon pa’n okouran okenn Manm ki’n entervenir ki’n atak okenn en lot zot nasyonalite oubyen okenn etidyan Seselwa ki’n etidye dan sa bann pei.  Referans avek Cuba, avek lezot pei lezot sistenm ti ganny fer bomaten ler sa S.I. ti pe ganny debate pou ganny quash.

Lo sa Mosyon pa’n arive sa, alor annou retourn lo merit en prensip zeneral sa Mosyon pou nou kapab fini e pran en desizyon.  Nou annan en kantite amannman ki devan nou e nou ti a kontan sorti la avan adjorunment ki nou kapab vot lo sa Mosyon.  Annou re focus Onorab Gill.

 

HON SIMON GILL

Mersi bokou Mr Speaker.  Mr Speaker i malere ki i sa moman ki mon’n gannyen pou fer en pwen, zisteman ki an referans avek bann latak personnel – bann derogasyon personnel ki serten Onorab dan sa Lasanble in servi mon privilez pou fer lo mwan personnelman dan sa Lasanble ok?  Mr Speaker …

 

(Interruption)

 

MR SPEAKER

 Ok.  Annou move on prezan.

 

HON SIMON GILL

Mr Speaker mon pou bouz devan akoz mon krwar poudir sa Prozedlwa ki nou pe diskit lo la i en Prozedlwa  tre enportan. Ia tre enportan dan lesans kot ozordi napa pei Mr Speaker, ki annan – si oule ki immune avek latak – avek bann threat lo li.  E Sesel i bezwen bouz devan.  Sesel nou bezwen pe fer sir ki nou bouz avek sa dinamik sanzman – sanzman dan metod, dan teknik dan menm teknolozi ki bann dimoun ki pa neseserman annan bonn lentansyon i servi pou zot arive attain bann benefis personnel, swa pou zot gain oubyen lenstitisyon oubyen pou serten endividi.

Mr Speaker, lemonn teknolozi in sitan devlope e pe al vit.  E si i annan en keksoz ki mon pou met lanfaz lo la avek sa nouvo lenstitisyon ki nou pe al kree, se pou asire ki nou kapab annan tou bann ekspertiz neseser, e ki nou met lanfaz lo devlop kapasite tou nou bann zonm – fanm ki pou form parti sa Lazans Lentelizans dan nou pei, pou ki zot kapab arive donn en kontribisyon efektiv, an sa ki konsern lalit kont tou kalite form latak ki Sesel – swa ki nou eksperyanse oubyen ki i annan en risk pou nou eksperyanse.

Sa lenstitisyon Mr Speaker, i pa en lenstitisyon ki devret depan lo en zonm oubyen lo en fanm.  Sa lenstitisyon i devret li menm li en lenstitisyon ki for, e se egzakteman sa batay – sa travay ki Prezidan Faure pe anmennen se pou kre bann lenstitisyon ki for bann lenstitisyon ki kapab debout lo li menm.  Mr Speaker pe enport ki konteni lentansyon sa Prozedlwa se pou kre en lenstitisyon ki kapab permet Sesel anmas bann lenformasyon pou ki nou kapab reste nou a lekout e azour avek sa ki pe pase.

 

Ler nou pe dir poudir pa sa ki in anmennen wi i annan en kantite Bill ki nou fer kantite sanzman isi dan sa Lasanble, e nou pou kontinyen konman en tim konman en lekip fer bann sanzman bann modifikasyon dan bann Prozedlwa ki ganny anmennen isi dan nou Lasanble.  Me lenportans – lenportans Mr Speaker, se ki i annan en zonm ki annan en lentansyon pou kree bann lenstitisyon ki kapab sirviv parey nou dir sirviv son letan e kapab donn Sesel sa ki meyer.

Mr Speaker mon pa pou fer lazistis si mon pa dir ki dan sa Prozedlwa i annan tou bann safeguard ki’n ganny mete e ki’n ganny anbelir pou asire ki sa lenstitisyon dan son fonksyonnman i operate dan en fason ki transparan.  I annan bann safeguard ki’n ganny mete  – parey mon’n dir ki’n ganny anbelir pou fer sir ki okenn endividi pa fer okenn aksyon ki anpyet lo drwa laliberte, e drwa sirkilasyon e drwa annan en lavi prive sak sitwayen Seselwa. I tre enportan.  E lo sa not mon‘n konpran listwar – mon’n konpran bann leksperyans ki’n ganny met ater dan sa Lasanble.  E si i annan en mesaz ki mon kapab pas avek nou bann koleg nou pou dir zot lo mon kote mon regrete sa bann lensidan in arive, me an menm tan annou tonm dakor, annou bouz de lavan.  Annou get lefitir.  Lepase in arive nou tir leson dan nou pase e nou tonm dakor pou nou bouz devan, apre ki nou tir bann leson pou anpes nou repet bann menm lerer, pou nou fer sir ki sa ki nou fer i dwat, i pozitiv e ki sakenn de nou – sakenn de nou frer, ser i kapab viv en lavi dan lape dan trankilite.  E pou ki Sesel Mr Speaker e selman Sesel avan tou ki sorti venker dan tou sa ki nou fer.

Mr Speaker lespri travay ‘Ansanm’ – lespri ‘Togetherness ‘i bezwen kontinyen prevail dan nou Lasanble.  E ankor enn fwa pou konklir i enportan ki nou remersye tou nou bann koleg lo tou le de kote latab ki’n fer bann kontribisyon eksepsyonnel, pou ki nou kapab anmenn sa Prozedlwa ki’n ganny anbelir e ki vreman reprezant en lenstriman, en zouti modern, pou ki nou kapab fer bann travay ki defini dan konteni sa Prozedlwa.  Mersi Mr Speaker.

 

MR SPEAKER

Mersi Onorab Simon Gill.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker konmsi nou byen konmanse la en pti kou in ariv Msye Faure – in anmenn en Bill sa Bill i pe –  Mr Speaker sa Bill orizinal ki ti mete le 21 Zen i en Bill ki pa ti pou ariv long zistans.  Ok sa Bill – i en Bill ki ti pou fer nou retourn dan sistenm Tonton Makout!  Alor mon anvi dir avek Onorab Gill pa vin avek sa bann politik tro bon marse ok? Sa Bill pa ti pou zanmen kre en lenstitisyon sa Bill ki la ki dan son form orizinal, ki avan nou pou amann li i ti pou kre senpleman enlot group Tonton Makout ki ti pou vey dimoun – ki ti pou repet sa ki ti’n arive.

E i ti pou an rapor egzakteman parey sa bann keksoz ki ti arive lontan. Parey in ganny dekrir kot Onorab Ferrari e  mwan mon riye parske mon osi mon pase ladan sa bann zafer.  E kot Onorab Ferrari konmsi malgre ki zot ti annan zot Tonton Makout nou ti pli malen ki tonton Makout.  Tonton Makout ti swiv Onorab Ferrari ziska kot mon reste Onorab Ferrari ti antre ti reste lo semen nou de Onorab Ferrari nou ti ekri’’ Parti Seselwa Underground’’, apre sa i sorti i ti kontinyen e nou ti pibliye e Msye Rene pa ti konnen lekel ki pe pibliye Parti Seselwa Underground’’. 

        Ziska ki nou de Onorab Ferrari nou ti mont anler State House e nou ti koz avek li e nou ti dir avek li ‘’NOU ‘’ki pe pibliye sa !  Alor i annan enta keksoz ki en zour nou ava met dan en liv parske letan zot ti lot kote laba zot pe zot pa’n zanmen konnen lo the receiving end.  Nou nou lo the receiving end e sa Bill ki mannyer i ti été – e se pou sa rezon ki yer mon pran mon letan pou mon la depi 9er bomaten ziska ki nou’n fini avek sa keksoz pou nou fer sa travay.

Fer sa travay pou konverti li dan en lenstitisyon.  E se sa ki nou anvi.  E mwan sa Bill ozordi ki mannyer i pe ganny ki mannyer i ganny amande, e mwan menm lafason ki Onorab Gill in koze i menm demann mon si in lir sa bann amannman ki pe ganny propoze se sa.

E Mr Speaker se la kot mon pa anvi al antre dan sa bann zafer.  Parske mon krwar ki yer Minis Adam, Komisyoner Lapolis, Attorney General ek i annan reprezantan larme Mr Mellie avek reprezantan SRC avek bann Manm Bills Committee, me selman finalman lo apre midi Mr Victor Pool e selman malerezman ki apre midi nou’n trouv nou avek en group redwir ki ti annan Onorab Georges konman sorry Mr Speaker mon’n bliye pou mansyonn ou konman en dimoun osi ki ti la prezan, e finalman apre midi in annan Onorab Georges avek Onorab Pillay konman de Manm lo Bills Committee Onorab Afif mon menm Mr Speaker e avek Attorney General ek son asistan nou asize nou travay lo tou sa bann travay.  Ok nou’n fer tousala.  E akoz Mr Speaker?

Se parske nou anvi donn nou pei sa ki meyer.  Nou anvi donn nou pei en lenstitisyon ki pou regard sekirite Nasyonal. Nou anvi reasir nou dimoun ki poudir nou pe break away from the past.  Parey Onorab Aglae in dir bomaten – break away from the past practices.  Mwan osi mon telefonn ti bug preski lo en baz permanan. Tanzantan ler mon ti pe drive mon loto ti annan en dimoun ki ti a pe swiv mwan.

Mon gannyen tousala.  Deor mon lakaz – parking kot bann loto in park zot pa’n gannyen sa bann keksoz zot lo sa lot kote nou gannyen sa bann zafer. – E malgre ki nou’n ganny tou sa bann zafer e ozordi Mr Speaker nou bezwen mazin si nou annan en Komite Rekonsilyasyon Nasyonal Laverite, se parske sa bann menm dimoun – LOTO 1122 Mr Speaker be pa nou tou nou konnen ki ti misyon LOTO 1122?  LOTO 1122 ti de dimoun Tonton Makout ki ti swiv ou ki ti responsab pou disparisyon Seselwa!  Nou pa anvi sa ankor dan sa pei!  Nou pa anvi sa ankor dan sa pei!  Nou anvi ki privacy en endividi i ganny respekte i ganny rekonnet.

E alor nou anvi ki sa Seychelles Intelligence Service Bill, i ava ganny compose of dimoun – dimoun ki pa pou vin rode lekel ki ou siporte – lekel lot laba.  Dimoun ki ava enterese vreman avek sekirite Nasyonal ; ki ava ede pou nou konbat kont bann keksoz ki pe ki kapab met nou pep an retar ; ki ava ede dan tou bann issues lager drog ; ki ava money laundering ; bann size lanvironnman.  eEsa i enn bann size ki nou osi koz lo la.

Ozordi nou tande ki bann lezar dan Vallee De Mai pe ganny vann. Me sa i en size national security, parske i konsern nou Patrimwann.  Nou Patrimwann Nasyonal.  E tou bann lezot keksoz ki pe arive.  E ozordi ou trouv tou bann kalite smuggling atraver lemonn.  Lotrozour  i annan en dimoun in ganny arete avek sepa konbyen diferan kalite – pa Sesel me avek sepa konbyen diferan kalite pti torti diferan kalite peroke ensidswit, tousala se bann keksoz osi tou ki nou bezwen fer atansyon.  Akoz nou flora ek nou fauna i osi annan en eleman enportan pou nou.  Menm parey osi tou avek bann zafer money laundering, bann zafer krim ki kapab ganny komet isi dan nou pei, tousala se bann keksoz ki fodre nou fer sir ki nou travay lo la.

E Mr Speaker nou’n fer kler nou pa anvi ankor vwar de dimoun dan en jeep zis pe fer letour, zis pe get dimoun, zis pe fer per dimoun, zis pe harass dimoun.  Tousala se bann keksoz ki nou pa anvi vwar ankor dan nou pei se pou sa rezon ki nou anvi en lenstitisyon e sa lenstitisyon ki i ava ansarz sekirite nasyonal avek son servis lentelizans zot ava al anmas lenformasyon e zot ava fer li vin lentelizans e letan i ava vin lentelizans i ava ganny pase avek sa ki nou ava appel Seychelles well National Security Council.  E nou pe met li lo en nivo vreman o ki ganny chair par Prezidan kot Komisyoner Lapolis, Sef dan Larme avek Attorney Generale bann dimoun ki annan bann pozisyon vreman responsab e bann dimoun ki pou fer en travay ki pou regard sekirite Nasyonal.  Se sa ki mon pe rode.  Mr Speaker ozordi nou tou nou konnen Sesel nou bann borders nou apel li bann porous borders ou pa konnen kote en dimoun pou antre. E se pou sa rezon ki bann Sri Lankans zot antre en bout zot vin vol nou pwason ; bann Malgas i antre lo lot bout zot in vol nou banbara ek bann lezot keksoz sorti dan Sid.  Bann Iranyen i antre pou zot anmenn drog ; bann Somalyen i sorti laba i vin pran nou Seselwa dan nou teritwar.  Se parske nou border i porous.

E alor nou bezwen rod en fason pou nou kolekte lentelizans e atraver sa lentelizans pou nou kapab pran aksyon neseser.

So sa Bill ki devan nou se sa ki i pou fer i pou ed nou pou nou al lo en lot nivo.  Pou nou al ver en sosyete vreman demokratik – kot tou dimoun i ava santi mon lib dan mon pei me dan sa laliberte, fodre pa ki mon komet fodre pa ki mon antre dan bann aksyon kriminel, fodre pa ki mon involve dan bann keksoz ki pou ede detri mon pei.

E Mr Speaker letan Onorab Hoareau par egzanp in mansyonn konsernan sa eleman Sef sa lorganizasyon konman en Seselwa – mwan osi mon siport sa.  Mon siport sa antyerman ofet mon ti koz lo la letan parske letan nou ti fer lamannman lo en Lalwa well Lalwa Seychelles Police Force Act.  Parske dan Seychelles Police Force Act ti annan en moman kot i ti dir napa okenn etranze ki kapab tenir mon krwar par lao pozisyon Sef Sirentandan, me apre sa pandan en peryod letan nou’n vwar kot zot in bezwen amann sa Lalwa pou permet etranze.

E nou annan etranze ki pran pozisyon ziska depite komisyoner lapolis mon plito vwar ki en etranze i ava vin konman en Konseye – en Konseye napa problenm pou annan en etranze, me ki sa bann pozisyon i ganny rezerve pou Seselwa.  Me la ankor enn fwa kot nou dir avek Seselwa be letan ou annan sa pozisyon fer ou travay byen pa bezwen al involve dan bann tou kalite aksyon ki pou ede pou detri sa bann soz.

E mon mazinen – mon mazinen ki nou’n annan en serten moman kot bann Komisyoner Lapolis e mon dir sa san ezitasyon, kot bann Komisyoner Lapolis zot ti vwar zot letan Parti Lepep oubyen SPPF sa letan ti annan zot rally politik, ou ti vwar Komisyoner Lapolis dan son triko ‘’LASIRANS’’ oubyen lot be ki mon kontan pou vwar ki ozordi ankor enn fwa nou pe bouze ; nou pe bouze  kot i annan en serten disiplin e tousala se bann keksoz ki pou nou pou nou bouz devan.

E alor Mr Speaker mwan osi tou mon dakor ki poudir Seselwa i ava en Seselwa konman Sef sa lorganizasyon me selman mon poudir ki poudir a sa staz kot nou été fodre nou veye  lekel sa Seselwa ki nou met la, parske bokou bann dimoun ki’n involve, oubyen ki’n al fer training lo sa kote lentelizans, zot in al fer training pou gete ki mannyer i swiv Onorab Ferrari, ki mannyer pou ekout telefonn dimoun ilegalman, ki mannyer pou … e zot mindset malerezman pa ankor sanze.  Akoz ozordi i ankor annan sa kalite mindset parmi sa bann dimoun.  E mon krwar sa osi tou i ava donn nou posibilite pou nou regarde lekel sa bann dimoun ki’n ariv staz pou zot pran zot retret petet e pou zot ale pou nou kapab ganny sa new breath of fresh air dan nou sistenm sekirite.

Mr Speaker sa Lalwa lefe ki premye fwa ki dan en Lalwa in nonm sa Komite Defans ek Sekirite, mon krwar ki dan li menm li in fini fer ki sa Komite i pou bezwen dezormen vin a Standing Committee of the National Assembly ; ki vedir ki sak Lasanble pou bezwen o konmansman son Sesyon pou li nonm pou bezwen annan lamannman konstitisyonnel tou pou fer li vin tonm lo menm nivo avek Standing Orders Committee avek Finance and Public Accounts Committee.  E ki i ava fer ki ler en nouvo Lasanble i fini prêt serman apar nonm Manm lo sa 2 Komite ki dan Konstitisyon zot ava bezwen osi nonm Manm lo Defence and Security Committee, akoz la zot annan en rol oversight an relasyon avek sa Lalwa.

Alor Mr Speaker mon krwar ki mwan personnelman mon satisfe avek sa travay ki nou fer yer.  Mon satisfe ki poudir kantite propozisyon ki nou met devan in ganny aksepte, me pli enportan mon krwar dan sa travay se pou konverti sa Bill Zen 2018 dan sa enn la ki ava – well  – letan i ava pase pou sa dat Zen i ava ankor la, me selman dan sa letan i vin en Act nou a vwar nou menm nou ki poudir sete lenstitisyon ki nou pe etabli.  E nou pa anvi ankor lentelizans ki enterfer avek the privacy of individuals for political reasons.  Nou anvi lentelizans ki enterfer avek the privacy of individuals an relasyon avek sekirite Nasyonal.  Avek sa detrwa parol Mr Speaker mon krwar ki poudir sa Bill parey nou annan lide amann li, i enn ki pou deservi sa rol e mon krwar ki nou pei i ava ganny li en bon morse Lezislasyon ki nou tou nou ava kapab viv avek.  Mersi bokou Mr Speaker.

 

MR SPEAKER

Mersi Onorab Ramkalawan.  Mon a donn laparol dernyen entervenan Onorab De Commarmond.

 

HON CHARLES DE COMMARMOND

Mersi Mr Speaker bonn apre midi.  Bonn apre Minis avek ou delegasyon e tou dimoun ki pe ekoute.  Mr Speaker mon sa Prozedlwa ki devan nou mon krwar i en bon keksoz ki pe arive dan nou pei ; en bon keksoz ki devan nou Lasanble e mon ti ava kontan tou Manm i siporte.  Sa Prozedlwa in osi fer bokou i sorti kot Egzekitiv wi me o fil an mezir ki in ganny diskite dan Komite dan Bills Committee o fir an mezir ki in annan bann sanzman ki’n bann amannman ki’n ganny propoze e nou annan konsiltasyon etrwat avek Prezidan Larepiblik pou osi ganny son sipor e blessing e son understanding lo la.

E annou pa bliye Prezidan Faure i enn sa Prezidan ki nou annan la ki kwa bokou dan lenstitisyon.  E depi konmansman son manda in dir avek lepep Seselwa e ki i pou fer sir ki dan Sesel no matter kan li i a kit pouvwar, me i a kit Sesel avek bann lenstitisyon for e kredib e mon krwar sa i form par sa manda sa promes ki in fer avek pep Seselwa, e la ankor i pe delivre.  E  mwan mon krwar ki sa Prozedlwa avek bann diskisyon pozitiv ki in ganny fer dan Bills Committee, i pe met devan pep Seselwa en lenstitisyon e non pa en sistenm sekirite ki tonm dan lanmen enn ou de dimoun, me ki i vin en sistenm dan en lenstitisyon plito sekirite pou lepep Seselwa.

E sa letan i fini ganny fer i pou vin en keksoz en Prezidan i vini en Prezidan i ale, me nou sistenm sekirite – nou sistenm sa lenstitisyon ki pou pran par dan lentelizans e sekirite nou pei, nou pep i reste kontinyen fer son travay.

E pou mwan sa i en bon keksoz ki pe arive mon pe mazinen lot zour la mon dir be si sa bann dimoun dan lepase bann dimoun ki’n ekout telefonn lezot dimoun, e sirtou bann dimoun ki ti annan pouvwar, e dan plizyer pei i antre sa si lepep ti pe osi ekout zot tande ki zot ti pe koze ki laranzman ki zot ti pe fer isi laba petet nou bann pei e dan sa ka la Sesel, nou ti ava en meyer pei.  En kantite keksoz krwar mon Mr Speaker pa ti pou arive ouswa ti ava ariv diferaman, me i ti pou vin pli byen.

Par egzanp avek en bon sistenm lentelizans e sekirite, en kantite keksoz i kapab ganny avoided.  En Coup D’etat i kapab ganny anpese arive.  E pou mwan sa – e pou mwan sa mon dir ek sa ki nou pe kree la i bezwen fer sir ki i pa arive ankor dan nou pei.  Mwan mon believe dan sa ki mon pe dir la e sa en bon sistenm lentelizans. Ou konnen sak pei osi – sak pei i annan son sistenm sekirite lentelizans ; sak pei i annan son fason ki li i fer pou achieve lape pou achieve stabilite pou achieve sekirite pou son pep.

Mr Speaker mon osi tanzantan dan televizyon, dan bann diferan progranm lo internet osi parfwa serten lenformasyon i sorti, kot ou vwar apre plizyer letan sa Prezidan in fini mor – petet dan serten ka, oubyen in retire en bann letan, nek lenformasyon i sorti i dir ou desizyon ki ti ganny pran pou anvair tel pei or pou pran tel desizyon prezan ki ou konn son vre rezon.  Nek 15an 10an 20an apre.  Prezan ki ou konmans fer rezon ou dir get sa, sa rezon en move keksoz ki ti konmsi en move desizyon ki ti ganny fer then, akoz sistenm lentelizans i mal ganny zere, i tonm dan lanmen move dimoun, i kapab osi en danze, en danze pou lepep.  So se sa rezon ki ou vwar lafason ki sa Bill i pe été la, i kapab nou pe swete ki i anpes bann danze – i anpes bann keksoz ki pou fer nou pran move desizyon.

Parkont i sipoze nou pou nou kapab fer fas avek bann nouvo threats ki annan ozordi dan lemonn – dan nou pei.  Nou pe koz lo nou border i very porous i fasil antre – wi.  Konman en pei ki nou lakot i delo sale, akoz nou annan en kantite teritwar nou EEZ me sa i fer li fasil pou antre.  E nou vwar nou bann menas ki annan e ki pe kontinyen annan, e i pe kontinyen ogmante.

E nou vwar osi bann lezot keksoz lokalman ki pe arive.  Nou vwar lo Facebook par egzanp, sa osi  –social media – social media osi i vin en threat sa.  Nou vwar osi bann problenm la nou annan lot la personn pa’n koz lo la lo Sendika en lot threat ankor ; vre pa vre ensidswit me i bann keksoz ki pe pran letan pou dekouver tousala.  I pran letan zisteman akoz nou sistenm lentelizans nou sistenm sekirite i mank keksoz sa Bill sa – Prozedlwa en fwa ki i vin an legzistans i pou ede pou ogmant sa level ki nou ti ava anvi i ava anmenn sa kordinasyon i ava kre en Lazans ki vreman i ava annan sa kordinasyon lenformasyon pou vin lentelizans en letan nou dessiminate li letan – in filter e ki i vin lentelizans e sa lentelizans la i ava ganny servi dan nou sistenm sekirite, pou permet nou kapab vin pli aktif – pran bann desizyon pli konkret e korek, pou elimin e kontrol bann threats ki annan dan nou pei ozordi e ki pe ogmante.

E diferan threats in ganny mansyonnen – mon pa pou al dan detay tousala, me definitivman i pou fer nou vin en pep plis an sekirite.  I pou annan safety.  Sa ki enportan – sa e stabilite.

Si napa sa bann keksoz la nou pei i reste enstab e sa i anpes nou progrese.  So mon krwar poudir sa i bann pwen enportan.  Be i annan osi lezot pwen enportan. Pou ou kapab annan en bon sistenm sekirite, e nou’n vwar in ganny dir osi nou bezwen dimoun avek kredibilite, dimoun avek konesans, dimoun avek konpetans e dimoun avek bann abilite enportan.  E fodre pa ki i annan lipokrizi.  Fodre pa ki nou annan malis.  Dimoun parfwa e souvandfwa i servi sistenm lentelizans, i servi lenformasyon ki i annan e i fer li vin lentelizans e zot servi sa dan en fason malisye.  Sa osi nou vwar – pa zis dan Sesel partou.  E i enportan ki nou vin konsyan de sa. E se sa ki ou vwar letan i vin en diskisyon i a pli fasil pou kapab dekouver – vwar letan dimoun pe servi lenformasyon, pe servi lentelizans dan en fason malisyez i a ganny deal avek apropriyeman.

E la nou swete alor ki i ava fer ki sa lenstitisyon ki nou pe kre la atraver sa Bill i ava vin pli kredib, e pli enportan pou zwe son rol ; zwe son rol pou fer ki i pep Seselwa i reste dan sekirite, i viv dan sekirite e sa i a permet li vin en pep pli performan, en pep pli byen e i a permet alor nou lekonomi kontinyen devlop dan en fason byen.

Mr Speaker striktir ki pe ganny etabli atraver sa Prozedlwa, i en striktir enportan i en striktir ki annan nouvote ladan mon kapab dir, e sa bann nouvote i bezwen anmenn bann bon rezilta.  San ki nou al dan detay mou krwar nou ki lafason e avek sa sekirite mon kapab dir sa sekirite ki sa Prozedlwa in ganny diskite dan Bills Committee, nou vwar poudir nou pa pe koz en keksoz pou en boug.  Nou pa pe koz en keksoz la pou en dimoun nou ; nou pa pe koz en keksoz la pou Komisyoner Lapolis.  Nou a pe koz en keksoz la pou pep Seselwa me nou pe konfye dan lanmen sa lenstitisyon.

Nou pe dir ki vwala sa lenstitisyon.  E Prezidan i pou reste latet li.  Sa Prezidan ki la i reste latet sa lenstitisyon pou kapab fer sir ki sa bann lenformasyon i ganny servi byen dan lentere pep osi.  E Mr Speaker ler pou nou fini, mon krwar i enportan pou nou dir ki en bon sistenm lentelizans, en bon sistenm lenformasyon en bon sistenm sekirite i sa ozordi dan nou pei Sesel ki nou bezwen.  Sa i pou donn konfyans.  I donn konfyans pa zis pep ; i donn konfyans osi etranze ki vin vizit ou pei – nou bann touris ; i osi donn konfyans envestiser ki vin envestir dan nou pei.  Sa osi mon krwar i bann keksoz ki enportan, akoz nou touris i vin i frazil li, i vilnerab e si touris i pe vin dan en pei ki pa safe, ki pa secure, ki pa annan en bon sistenm lord e sekirite, me definitivman i pou dekouraz li e i pa vini e si touris i pa vin dan Sesel ou konnen ki arive.

E alor tou sa i zwe i annan en mayon i pa reste li tousel sa ki nou pe kree la me i form par en mayon dan nou sistenm pei li menm dan nou sistenm governance, ki pou fer ki tou dimoun i ava annan son rol pou zwe e i ava donn en koudmen.  Ler ou annan en bon sistenm sekirite en dimoun pou osi donn ou lenformasyon, konman i tann en keksoz i pou fer konnen.

E letan i pa konfyans alor la i ganny sa lenformasyon i gard pou li i pa pou dir ou nanryen e mon krwar mon la sa ki mon pe koze i ava en bon keksoz ki nou pe fer.

Mr Speaker avek sa mon ava demande ankor enn fwa ki tou dimoun i donn sipor sa Prozedlwa akoz nou vwar i pou anmenn en bon keksoz i pou anmenn nou pei lo en lot nivo, ki nou merit arive.  E parey mon pe dir mon dir i annan sa modernizasyon ladan e nou demann tou dimoun osi nou pep nou lans en lapel avek nou pep pou kontribye anver sa lenstitisyon ki nou pe fer, akoz sa lenstitisyon i osi konsern sak nou sitwayen.  Mersi bokou e mon pou siport sa Prozedlwa.  Mersi.

 

MR SPEAKER

Mersi Onorab De Commarmond.  Bon mon ti a zis kontan demann Minis si ou repons pou long?  Si i pou long nou pa pou ofer ou dibyen pou nou pran ou repons la, akoz nou pou bezwen rann lantern SBC tre byento, me si ou annan en short reply, then nou a kapab fini petet avek Formal Second Reading e nou a pran Staz Komite akoz nou annan en bon pe amannman.  Minister.

 

MINISTER MR JEAN-PAUL ADAM

Mersi bokou Mr Speaker.  Mon estimen apepre en 10minit pou regard bann diferan mon kas tou bann diferan pwen ki’n fer sorti.

 

MR SPEAKER

Ok go ahead Minister.

 

MINISTER JEAN-PAUL ADAM

Mersi Mr Speaker.  E mersi tou bann Manm Onorab pou zot kontribisyon.  Premyerman mon krwar i enportan pou nou koz en pti pe lo prosesis ki Bill in ganny formile.  Akoz mon vwar serten Onorab petet pe kree en lenpresyon ki sa premye Bill ki nou vin avek ti pou ti vin avek en lentansyon negatif.  Nou’n vwar dan nou fason travay yer letan nou asize dan Bills Committee ki nou fer en travay kolaborasyon en travay ki’n permet nou amelyor sa Bill me i enportan pou nou vwar osi ki sa premye Bill ki nou vin avek ti napa okenn lentansyon pou nou kree okenn difikilte oubyen problenm oubyen menm pou kre en lenstitisyon ki apre ti kapab ganny mal servi.

E bokou bann sof gard ki mon koz lo la dan mon lentrodiksyon e bokou Onorab in koz lo la annefe ti deza dan sa Bill lorizin menm si lafason ki serten bann Onorab in adres Lasanble in donn lenpresyon, ki petet sa in vin apre.  Mon note ki i annan serten lezot Bill ki’n ganny diskite avek amannman ganny fer dan Lasanble, sa enn i pa’n leka.  Me mon krwar petet i dan lentere tou dimoun pou montre sa track changes Bill dimoun i ava vwar travay ki’n ganny fer par tou Manm Lasanble ansanm pou nou vreman anmenn en meyer solisyon posib.

Me bann sofgard pou mon zis resite Mr Speaker bann sofgard ki ti la byen depar sete par egzanp pou asire ki Lasanble Nasyonal ti annan en rol ki sa Lazans i kapab ganny kriye par Komite Defans e Sekirite devan Lasanble Nasyonal – bann eleman ki okenn aksyon pa kapab ganny fer san lotorizasyon en Ziz e osi bann kriter otour ki sa lotorizasyon i kapab ganny fer deba sa Ziz.

Mon ava tous brefman avek serten bann pwen en pti pe pli spesifik mon krwar Onorab Hoareau in koz en pti pe lo sa kestyon interest me dan Bills Committee letan nou ti diskite sa Clause ki fer referans avek in ganny propoze in ganny tire nou pou adres sa mon krwar apre en pti pe pli an detay me sirtou nou adres a sa Lalwa sa konsep plito en menas kont sekirite piblik.

I annan osi lezot kestyon ki’n ganny lev-e en pti pe par Onorab Hoaeau lo kestyon pou servi ‘shall’ plito ki ‘may’ ankor mon krwar i ava ganny diskite pli byen an detay me son prensip sa i anliny avek sa ki nou ti pe mazin fer tou fason.

An sa ki konsern pou nou defini pli byen sa ki nou appel en ‘suitable person’ osi sa i en keksoz ki kapab ganny konsidere me ti a bon petet ki sa propozisyon i ganny fer petet par Manm Lasanble.

Apre an se ki konsern osi propozisyon osi par Onorab Hoareau an se ki konsern bann lanmann ki ganny donnen si en dimoun i abiz sa Lalwa si sa i kapab ganny revwar nou kapab regard se la e osi an se ki konsern bann provizyon ekstra teritoryal.

Onorab Hoareau e osi Onorab Georges in koz en pti pe lo lafreyer ki parfwa Lakour parey nou dir sa rubber stamp me mon kwari si nou regard byen sa Lalwa e Onorab Hoareau in sit sa se ki i annan bann sofgard dan sa Lalwa dan sa Seksyon kot i eksplik byen ki i pa zis en kestyon ki en afidavit i bezwen ganny fer me ki sa afidavit i bezwen montre klerman ki i annan en menas o sekirite piblik e ki i annan en menas baze lo lofans ki serye e i annan sa bann definisyon ki vedir ki en Ziz si i pou vreman etidye sa Lalwa i pa pou kapab zis stanpe i pou bezwen regard konteks sa Lalwa pou li kapab donn permisyon pou en tel aksyon pou ganny fer.

Ti annan kestyon par plis ki en Manm otour sa term ‘ministerial intelligence’ mon krwar sa in ganny defini dan son bann definisyon i tourn otour sa konsep ki diferan Minister i anmas diferan lenformasyon e sa lenformasyon i bezwen kapab antre dan kad sa Lazans, me nou kapab servi en lot term i en term ki mon krwar Attorney Generale in regarde se en tou en term ki departmental intelligence.

An se ki konsern bann pwen ki’n ganny sorti par Onorab Afif mon krwar sa legzanp ki in servi otour FIU i enn ki tre relevan vizavi bi sa Lalwa akoz par egzanp aktyelman FIU i kapab i anmas serten lenformasyon me i mank sa kordinasyon ki sa Lalwa pou anmennen attraper sa Lazans, e i pou fer sir ki sa lenformasyon i ganny servi dan serten lezot konteks.

Nou not osi sa terminolozi en ‘Security Council’ plito ki ‘Intelligence Council’ mon krwar sa i anliny tou fason avek sa ki lentansyon sa ki in ganny met devan.  E mon lot osi bann lentervansyon par Onorab Pillay ki in fer kler ki lentansyon sa Lalwa, se pou anvoy en mesaz kler ki Sesel i serye vizavi son sekirite entern e osi vizavi bann menas ekstern.

E osi i annan sa lapros kolektif ki i an rezilta bann deba dan Bills Committee yer setadir ki lapwentman sa direkter zeneral i ganny fer konman en desizyon kolektif par sa konsey e sa i en keksoz ki’n anrisi sa prosesis.

Mon’n osi not bann konsern par Onorab William an se ki konsern nesesite pou nou pa zis reaktif me ki nou kapab pli byen sitye sa ki nou fer dan en konteks global pou nou pli byen prepare.

E osi nou lot bann pwen ki’n ganny met devan par Onorab Leader Lopozisyon ki sa Lezislasyon i bezwen montre nou en direksyon kler lavenir e ki kree en kad ki kouver tou bann evantyalite.  E parey Onorab De Commarmond in dir ki sa i en lenstitisyon pou lepep Seselwa e tou lepep Seselwa e Onorab Gill osi in tous lo la ki nou pe batir bann lenstitisyon for e sete toultan sa lentansyon Egzekitif letan nou amenn li devan.

E lot lo osi lo bann pwen ki mon’n mansyonnen osi dan mon lentrodiksyon Onorab Ramkalawan in fer sorti lenportans lanvironnman e ki fodre nou note pa bokou sa bann aspe kriminel ki lye avek lanvironnman parfwa i lye avek bann lezot krim menm bann par egzanp ki fer lavant ilegal lavant teritwar souvandfwa zot enplike dan bann lezot aktivite kriminel.

Lezot pwen petet en pti pe an vites se mon krwar Onorab Hoareau e Onorab Ramkalawan in koz lo la lo lenportans ki sa bann dimoun i travay dan sa Lazans i bann Seselwa, e sa i bann pwen ki i kapab ganny adrese e ki bann dimoun ki ganny apwente i bann dimoun ki konpetan bann dimoun ki annan bann kapasite en lentegrite ki rezonnab.

Mon krwar Mr Speaker ki sa an zeneral i kouver tou bann pwen mazer, menm si mon pas en pti pe an vites avek sa bann pwen akoz mon konsyan ki letan i en pti pe pa dan nou faver.  E zis dernyen pwen ki mon ti ava dir ki sa Lalwa i osi pou nou montre konfyans ki nou tou konman en Seselwa, nou bezwen met dan nou prop kad profesyonnel Seselwa.

Nou’n konmans sa konversasyon otour sa Prozedlwa Lentelizans letan ki Komisyoner Lapolis in idantifye poudir i annan en mankman dan kapasite Nasyonal e in apros Attorney General e Prezidan pou nou kapab adres sa mankman.

E letan nou pou al pli devan sa lenstitisyon i enn i pou tou zenerasyon e i enn ki pou tou pep Seselwa pou nou kree sa konfyans neseser dan nou lenstitisyon pou nou kapab delivre pou prosperite nou Nasyon.  Mersi Mr Speaker e mersi tou Manm Onorab.

 

MR SPEAKER

Mersi Minis.  Bon nou pou pran en vot lo merit e prensip zeneral sa Prozedlwa ki devan nou.  Mon ava demann tou Manm ki an faver? Okenn Manm ki kont?  Madanm Clerk.

 

MADAM CLERK

Mr Speaker mersi.  Mon rikord 26 Manm ki’n vot an faver.  E personn kont.  Mersi.

 

MR SPEAKER

Mersi Madanm Clerk.  Nou kapab ganny en Formal Second Reading Madanm Clerk.

 

MADAM CLERK

Mersi Mr Speaker.  ‘A Bill of an Act to provide for the establishment of the Seychelles Intelligence Service in order to preserve national security; to define its powers, duties and functions, to regulate the administration and control of the service and for matters connected therewith or incidental thereto’.  Mersi Mr Speaker.

 

MR SPEAKER

Mersi Madanm Clerk.  Bon parey mon anonse nou annan bokou amannman ki pou ganny prezante avek Lasanble e nou pou fer li en sistenm parey nou ti fer avan yer, kot nou pou prozekte bann amannman e nou ava vwar bann track ki mannyer nou pou kapab swiv sa bann amannman – swiv son Bill e ki mannyer bann amannman i antre ladan.

An vi sa pou pran en pe letan nou pou fer li demen maten ler nou ava repran demen 9er bomaten.  Mon anvi zis fer rapel bann Manm Lasanble ki demen nou sitting i pou half day nou pou ale ziska 12 akoz demen apre midi nou pe rankontre avek group OECD Zot deza dan pei e zot pe fer rankont avek Manm Lasanble demen e mon ti ava demann maximum si pa tou ki kapab be maximum Manm Lasanble pou asiste sa rankont demen avek group OECD.  I reste pou mwan remersi Minis, Attorney General, Komisyoner, personal assistant to the Minister tou Manm Lasanble e tou dimoun ki a lekout ki swiv travay Lasanble e osi byensir staff Sekretarya e bann staff SBC e SBC menm, mon remersi zot pou lazournen travay e nou ava adjourn e repran nou travay demen 9er bomaten.

 

 

(ADJOURNMENT)