Home » Verbatim » 2018 » Verbatim Monday 12th November, 2018

Verbatim Monday 12th November, 2018

NATIONAL ASSEMBLY OF SEYCHELLES

Monday 12th November, 2018

The Assembly met at 9am

National Anthem

Moment of Reflection

Mr Speaker in the Chair

 

 

MR SPEAKER

Bonzour tou Manm Onorab.  Bonzour tou dimoun ki a lekout.  Bonzour Minis Loustau Lalanne.  Bonzour Ms Celia Cesar Special Advisor to the Minister.  Ms Nelly Coopoosamy Senior Finance Analyst.  Bonzour e welcome dan Lasanble.  Nou pou kontinyen nou travay ozordi avek Repons Bidze.

E parey dan nou diskisyon Vandredi avek Minis, apre ki nou’n fini bann repons ozordi Minis pou retournen demen bomaten pou li donn son larepons bann leklersisman lo diferan pwen ki bann Manm in leve.  E apre sa nou ava pran en pti break e nou a re pran – nou a reconvene toudswit apre pou nou re konmans bann deliberasyon lo bann diferan Bidze.

So vwala en pti pe konman nou pou ale pou sa semenn.  Bon nou ava konmans toudswit avek repons e mon ava demann Onorab Bernard Georges pou pran la parol.  Onorab Georges.

 

HON BERNARD GEORGES

Mersi Mr Speaker.  Bonzour Mr Speaker.  Bonzour Minis avek ou delegasyon. Bonzour tou bann koleg Manm Onorab dan sa Lasanble e tou dimoun ki pe ekout nou oubyen ki pe vey nou lo televizyon dan lakour.

Mr Speaker pandan pros 3erdtan semenn pase mon’n ekout Minis Finans lir son diskour Bidze. Mon premye santiman se ki parol pa manke me aksyon i plito ‘missing in action’ parey Angle i dir.  En  Bidze Nasyonal parey en ki ou er kot nou lakour se en legzersis kot nou regard depans neseser ki nou pou fer dan sa lannen ki pe vini e esey balans a avek reveni ki nou pe gannyen.  Prensipalman taks konbyen nou pou anmase e kote sa pou sorti.  Sa i  en legzersis pran rann e i pa difisil pou fer.  Si napa ase reveni Gouvernman i anmas plis taks ouswa i met nouvo taks.  Si depans i tro Gouvernman i koupe ouswa anvoy pou pli tar.

Dan menm fason kot en lakour si larzan pa ase apre bann depans neseser tel parey loan lakaz, bill delo ek lalimyer, manze lo latab.  Si apre sa bann depans larzan in fini en pti voyaz Maurice ouswa en fridge nef, ouswa e nouvo divider pou salon pa ganny fer.  Sa se Bidze ki get zis en lannen.  Ki mannyer ou pou sorti le 01 Zanvye e ariv le 31 Desanm?  E sa legzersis Minis ou’n fer sa dan en fason standar.

Me legzersis prezant en Bidze i annan osi en lot konponan.  Legzersis Bidze se osi en lokazyon kot Gouvernman i koz direkteman avek son pep e tras en seri lobzektif ki pa limite a e sel lannen me ki regard pli lwen.  I bezwen fer sa akoz Bidze anyel i bezwen osi ganny konsidere dan konteks en peryod pli larz.

I pa vo lapenn ki ou balans ou Bidze en lannen si ou konnen ki lannen prosenn ou pe al bite.  Ou bezwen prevwar alor ou bezwen get devan e fer en plan pou bann lannen ki pe vini.  Dan sa konteks en Bidze i bezwen fer 2 keksoz.  I bezwen prevwar e  propoz en seri lobzektif mwayen term e i bezwen annan mezir a kour term ki pou sanz lavi sitwayen Seselwa imedyatman.  Tou Seselwa i bezwen ler Minis in fini lir son Bidze vwar en keksoz pou li dan sa Bidze.  Akoz en pei pa zis sirviv lannen ale lannen vini.  I bezwen grandi, sanze e epanouir.  E son pep avek li.

Lo sa kote Minis in dezapwent mwan apard bann pansyoner ki pou ganny R200 an plis lo zot pansyon enkli mwan ek Minis Mr Speaker, e mon remersye Minis pou sa mwenza mon pa vwar en lot group Seselwa ki pe ganny en benefis imedya avek sa Bidze.  O kontrer Minis in fer bokou promes pou lannen 2019 an montan.

Si mon pa ti konnen ki eleksyon Prezidansyel ti pou fer ant milye 2019 ek milye 2020 e mon mazinen ki apre sa gran  lamars LDS anvil de semenn pase eleksyon pou fer plito an 2019 ki an 2020 mon ti pou vin dir ki Minis ti pe senpleman retard benefis ki dimoun i bezwen la ozordi.

Me dan konteks eleksyon mon konpran akoz laplipar nouvo propozisyon dan Bidze pou pran lefe dan milye lannen prosenn olye ozordi ouswa le 01 Zanvye 2019.  Mon poz sa la Mr Speaker.

Sa Gouvernman SPPF/ Parti Lepep Mr Speaker i en latrap pou dimoun.  Parey en lakaz bib tou sa ki antre ladan avek son bon lentansyon i ganny atrape dan menm fason.  E mon regrete pou dir ki Minis i dernyen dimoun pou pri dan sa lakaz bib SPPF/ Parti Lepep.  Sa ki mon pe koz lo la se sa labitid anvoy pou demen sa ki ou pa kapab fer ozordi.  Sa Gouvernman ki nou’n annan sa dernyen 40an in fer sa vin zot roadmap.  Fer promes, anbet lepep, ganny eleksyon e apre koul trankil.  Koul sourd.

Zot rapel 5mil lakaz Perseverans?  La sa in met amorfoze e in vin 3mil lakaz ki L’Inde pou donn nou.  Zabitan La Misere Mr Speaker ti ganny promet konpansasyon dan Diskour Leta Lanasyon an Fevriye 2-17, mon repete Fevriye 2017!  La an Novanm 2018 nou ganny dir ki sa pou dan Bidze 2019.  Ou a dir mwan Mr Speaker pa en lot mannev eleksyon sa parey sa premye peyman ki ti fer lavey eleksyon 2011?  Sa Gouvernman i toultan pe anvoy son pep lannen prosenn.

An 2003 nou ti tann LASPIRASYON 2013.  Ler nou’n pros pou ariv 2013 randevou in anvoy 2017 avek STRATEZI 2017.  Ler 2017 ti pros e stratezi ti’n ariv zis ‘’STRAT’’ Gouvernman in deklar VIZYON 2020.  La ki 2020 i anba nou e vizyon i ankor pe teste lizye Minis i anvoy SEYCHELLES VISION 2033.  Eskiz mwan Mr Speaker ou Minis mwan ek lepep Seselwa nou’n danse tou sa bann ball bobes, tou sa bann lannen. Seselwa pa enterese Minis avek 2033.  Seselwa i anvi konnen ki si sa ki pou amelyore dan zot lavi demen bomaten.

Ki mannyer Mr Speaker ou apel sa fenomenn ‘’poul i kakay ozordi me i ponn dizef semenn prosenn ?’’ Les mon reponn mon prop kestyon.  Sa i apel en Gouvernman ki napa direksyon ; ki napa e plan konkret, ki’n la tro lontan e ki bezwen al pas detrwa lannen repo pou ki zot ava repran zot lafors e travay lo en meyer plan pou nou pei.

Yer i fer  Scheme of Service pou en bann travayer Gouvernman.  Sa lannen i fer pou en lot bann.  Yer Lapolis.  Demen Brass Band.  Yer teachers, demen travayer lasante.  Ki mannyer ki nou Gouvernman mon demann mon lekor pa kapab fer en sel revizyon saler pou tou travayer en sel fwa ?  Aranz Scheme of Service pou tou anplwayer Gouvernman ansanm!  Epi regilyerman reviz tou lapey e tou Scheme an fonksyon bezwen Nasyonal kout lavi e responsabilite sa post.  Tou lezot pei i fer li.  Akoz ki nou nou pa kapab?

I paret mwan ki sa ki ganny tande dan sa pei se sa ki kriy pli for.  I pa devret koumsa Mr Speaker.  Me si i koumsa les mwan kriy FOR pou bann travayer Zidisyer.  Mon koz ek zot toulezour.  Get dan zot welfare silvouple Minis.  Met zot o ran sa ki fer en travay parey.  Les mwan kriy FOR pou bann travayer Imigrasyon Airport ek Por. Ler ou konpar zot kondisyon avek par egzanp sa ki travay Customs dan sa de landrwa ou remark en diferans konsiderab pou travay ki plito parey e ki bann shift i plito parey.

Les mwan kriy ‘FOR’ pou bann etidyan aletranze ki pa’n ganny logmantasyon dan zot stipend pou lizyer lannen e ki la sa ki’n ganny propoze pa menm kouver kout lavi dan kou pei kot zot pe etidye. Sa lakaz bib SPPF/ Parti Lepep i pa zis fer bann Minis anvoy keksoz lwen devan.  I osi annan en lot karakteristik Mr Speaker e sa se zoli parol.  E dan diskour Minis nou’n  ganny en bon pe sa bann zoli parol.

Gouvernman Lepep i kontan koz lo bann tyenm ki Sesel i sorti dan plizyer sekter.

Premye dan Lafrik lo GDP  par latet zabitan.

Premye dan larezyon e dan  Lafrik pou isi, pou laba.

To mortalite zanfan,

SMART phone par latet zabitan eksetera. La de semenn pase Minis Lasante in dir nou nou osi nou’n tonm o dan en lot lendeks.  Tousala i byen Mr Speaker me parey Onorab William ti fer nou rapel sa bann lendeks pa ranpli kastrol.

Gouvernman i kontan loz lo sa bann rezilta e Minis i fer nou rapel ki li osi in konmans al dan sa menm laliny.  Dan son diskour nou’n tann broadband, connectivity, tower protocol.  Zoli, zoli dokiman ki Gouvernman i sinyen me larealite se ki sa bann protocol e konvansyon pa anmenn rezilta konkret pou nou dimoun.  Sanz non SFA ek SEnPA pa sanz nanryen!  Bouz progranm Pti Biznes e anvoy kot Labank Devlopman menm si sa ti posib legalman ki pa kler – pa sanz nanryen.  Sa ki nou bezwen se mwen protocol e plis aksyon direk pou amelyor sor nou dimoun.  E se la kot Gouvernman Mr Faure in fail – Mr Speaker.  Malgre Laspirasyon, Stratezi e Vizyon napa ni stratezi, ni vizyon !  Laspirasyon dimoun i reste san menm – en laspirasyon.  E sa se akoz Gouvernman e nou’n vwar sa dan diskour Bidze napa en plan pou nou pei.

Les mwan donn enn de legzanp Mr Speaker pou eklersi sa pwen.  Nou konnen ki loto in vin en nesesite ozordi e pa en lux.  Nou osi konnen ki loto i bezwen semen pou pas lo la.  Si nou, nou konn sa Mr Speaker mon krwar ki Gouvernman osi i bezwen konn sa.  Me ki nou vwar ?  Gouvernman i les loto antre  dan pei par grap akoz i pe anmas excise tax avek license fee lo sak loto, me i pa fer semen apropriye pou sa kantite loto avek rezilta ki tou le bomaten e tou le swar motoris e pasaze bis i pri dan trafik.  La en senp round about kot Hypermarket depi plis ki 1an pe ganny fer e pa ankor ariv ni lanmwatye!

Mardi pase Mr Speaker mon ti al Airport 4.30 apre midi.  Ti pran mwan zis 10 minit pou sorti La Louise e pou ariv 300met avek round about Airport.  Sa dernyen 300met ti pran mwan 30minit pou mwan kouver avek rezilta ki ler mon arive pou check-in – check-in ti’n fini fermen.  Epi oli parking pou sa bann loto?  Rod en parking dan lavil in vin en kosmar.  Eski nou realize ki kantite erdtan travay ki ganny perdi ek galon bennzin ki ganny brile tou le zour zis akoz dimoun i bezwen asiz dan trafik ki swa dan loto prive ouswa dan bis SPTC ouswa vir an ron pou esey trouv en las parking anvil?

Nou koz broadband –2enm kad soumaren, eksetera me esey pey okenn keksoz Ankour la obor nou avek en kart labank.  Napa fasilite.  Pli pir ankor pou ou pey en security deposit ler ou fer en rapel ou bezwen anmenn cash.  2018 Mr Speaker ou ankor bezwen anmenn en lanvlop Roupi pou pey security deposit kot Lakour D’Apel.  Mon mazinen kekfwa ki dan Seychelles vVsion 2033 Lakour Siprenm ava ganny li en kart machine pou li kapab fasilit peyman.  Apre tou kot Biro Lanrezistreman sa i deza posib.  Me mon pa tro krwar.  E si Minis i promet nou ki nou pou’n ariv en target 15poursan lenerzi renouvlab an 2030, 15poursan an 2030 mon pare pou dir li lanmenm la Minis ki a sa vites ler nou’n ariv 100poursan lenerzi renouvlab, resofman klima pou’n deza fer ki nou zil pli elwanye pa pou Aldabra akoz i pou’n fini koule me nou zil pli lwen avek Mahe pou Ile Aride lanmenm la deryer Praslin.

Mon pa kapab Mr Speaker kit Seychelles Vision 2033 san koz en pe lo SIB, Seychelles Investment Bureau sa se en ekselan linisyativ.  Lide se ki e one stop shop pou lenvestiser.  Ou vin la e sa biro i sipoze travay avek ou pou ki dan en pti moman ou ganny dirize e asiste pou realiz ou lenvestisman.  Bann responsab sa biro i akeyan e zot o nivo me birokrasi in fini antre.  I annan tro lobstak dan semen sa lenvestiser.  I ganny demande pou li fer isi, pou li al laba, pou anvoy sa dokiman dan en fason ki ant SIP Licensing ek SRC kot tax pou ou ganny en lotorizasyon ou bezwen tourn an ron avek sa 3 lenstitisyon.  Pou ou ganny en Tax Identification Number TIN avek tax ou bezwen lotorizasyon SIB.  Pou ou ganny Lotorizasyon SIB ou bezwen en license.  Pou ou ganny en license ou bezwen en Tax Identifiction Number.  Pa devret Mr Speaker.  Nou pa kapab, nou pa kapab fer sa.  Sa se bann Lenstitisyon ki la pou ede pa pou met lobstak dan semen en lenvestiser.  Maurice nou vwazen ek nou konpetiter i turn around dan enn a de zour.  Nou i pran nou plizyer semenn.  Pa devret Mr Speaker.  I pa lafot bann travayer sa bann Lenstitisyon.

Mwan mon annan zis praise pou zot.  Zot konpetan, zot akeyan, zot friendly.  Resaman mon’n fer en leksperyans PUC, Licensing ek SIB.  E mon felisit zot pou zot devouman.  Se pa la problenm kot problenm i ete.  Sa sistenm i annan tro kontrol, tro birokrasi.  Nou pei Mr Speaker pa pou avans avek striktir protocol ek stratezi.  I pou avans avek e sanzman mindset lo lapar Gouvernman.

Diskour Minis i fer mwan mazin travayer Gouvernman.  Eskiz mwan bann civil servants ki pe ekout mwan.  Zeneralizasyon i toultan danzere me mon pa kapab pa zeneralize.  Par lafason ki i travay Gouvernman i fer e kantite meeting.  En kantite.  Toulezour.  Partou.  E bann refren pli komen ler ou anvi koz avek en zofisye Gouvernman se i pa la in al meetingMeeting i byen Mr Speaker e i neseser, konpran mwan byen.  Me i annan  tandans parfwa pou nou krwar ki akoz nou al bokou meeting e nou anpli nou lazournen avek meeting ki nou pe travay.

Bidze Minis dan son lansanm i fer mwan menm lenpresyon.  En Bidze ki fer ou krwar  ki sa i en Gouvernman ki fer en ta keksoz, me ler ou depouy li ou realize ki sa se en loto ki pe demar dan gravye.  Tapaz en kantite.  Forward movement – NIL.  Lenpresyon ki diskour Minis i les mwan avek se en Gouvernman ki enterese avek sistenm ek protocol me pa avek rezilta.  Se en Gouvernman ki fer meeting me ki akonpli travay ki i ganny demande e elekte pou fer.  Ou vwar Mr Speaker mon pa eksite ler Minis i koz lo Results- based managment e i dir ki Konsey Minis in aprouv sa.  Mon pa eksite akoz mon konnen ki sa se zis en zoli parol.  Annefe i pa ni en zoli parol.  I en parol ki fer per akoz i pa oule dir nanryen.  Sanzan parastatal si protocol i entrodwir en Sistenm Pwen pou lakaz se pa solisyon.  Se senpleman birokrasi.  Se MUSICAL CHAIRS.  Sa bann Lenstitisyon pa pou vin meyer akoz non i sanze.  Internet pa pou vin pli vit akoz nou’ siny en tower protocol ouswa met en 2enm kab soumaren.  Trafik dan lavil ouswa lo lakot Les pa pou evapore akoz nou anvi.  E dimoun ki bezwen lakaz pe kay lo pwen e pa lo peron zot lakaz nef parey zot ti devret.

Tousala Mr Speaker  pou akonpli ler nou deside rod rezilta e non pa zis kontant nou avek trouv nouvo sistenm pou manage vye problenm.  Sa i anmenn mwan koz lo mon distrik Les Mamelles.  Mon bezwen dir o komansman ki ler mon konpar sa ki lezot distrik in gannyen ek sa ki Les Mamelles i gannyen, i fer mwan mazin sa parol levanzil St Mathew sapit  25 verse 29 ki dir, ‘’ki sa ki annan pou ganny plis ankor e sa ki napa pou ganny aras menm sa pti git ki i annan,  ‘for everyone who has will be given more.  And he will have in adundance and whoever does not have even what he has will be taken away from him.’’

Dan mon progranm pou dernyen eleksyon mon ti promet zabitan Les Mamelles 4 keksoz ki mon pou fer o kour sa manda.  La ki 2an in pase e nou pe al antre dan 3enm  lannen i neseser regarde ki Gouvernman pe propoze dan Bidze 2019 pou mon distrik.  Enn mon promes i fini ganny akonpli, re sirfas bann semen.  I reste 3.  Lakaz, drog ek day care.  Re devlopman laplenn e dan kan i lo plan ganny fer, me i ti osi lo plan ganny fer sa menm moman lannen pase.  Lo progranm 24 lakaz dan 24 distrik dan 24 mwan Les Mamelles i ankor pe esper 24 lakaz apre 12mwan in fini pase. Ki lespwar nou distrik i annan dan Bidze 2019?  Taler mon ava dir zot. Problenm drog pa’n disparet e tou lendikasyon se ki i pa pou disparet a okenn moman ki nou kapab mazinen.

Wi progranm methadone in soulaz problenm, me se drog e non pa lapolis ki ankor pe sirkile bonnavini.  Ki Minis in mete dan Bidze pou sa fleo pou lannen prosenn? Mon  a dir zot taler.  Day care i en nesesite pou mon distrik.  Mon pa bezwen repas lo rezon ki nou bezwen enn.  Mon’n dir sa plizyer fwa.  La ki parti lepep in rann sa bout later da kontour obor klinik kot i ti’n kapab fer en day care depi plizyer lannen me in plifere gard sa later pou li, nou annan lespwar ki omwen nou annan e landrwa pou nou konstrir nou day care.  Alor ki provizyon ki Minis in fer dan Bidze pou nou day care?  Mon a dir zot taler.  An attendant permet mwan Mr Speaker pou fer detrwa propozisyon konkret pou amelyor en pe sa trwa problenm ki ankor reste pou amelyore dan mon distrik.  Anler Briyan e Onorab Leader of Government Business i konn sa tre byen.  Anler Briyan i annan en ward lakaz emergency e detrwa zabitan Les Mamelles ladan.  Parey tou lakaz emergency zabitan i vin permanan ladan akoz Gouvernman pa’n prevwar en lot lozman pou zot.  Sakenn sa bann lakaz i dan en leta enpitwayab.  Karya in manz dibwa ek klwazon, delo, lateras i antre da lakaz.  Dimoun i reste enn lo lot.  En pe parey bokou sa bann lakaz dan laplenn Les Mamelles ki la depi letan kolonyal ki Prezidan li menm in dekrir konman inakseptab e ki devret ganny ranplase o pli vit posib.

Mon solisyon pou sa de problenm lakaz i senp.  Annou pa esper progranm 24/24/24 Minis kot i annan lasasen annou degaz lasasen.  Sityasyon dan laplenn Les Mamelles e dan lakaz emergency Briyan, pa en problenm fer lakaz parey pou dimoun ki lo lalis lakaz.  Dimoun ki lo lalis lakaz i merit ganny e lakaz.  Problenm sa de landrwa se pa problenm dimoun ki pe esper lakaz.  Se dimoun ki an 2018 pe viv dan kondisyon ki pa akseptab.  Tou Seselwa i devret anbarase ki dimoun i ankor pe viv dan sa bann kondisyon ozordi.

Mwan Mr Speaker mon anbarase tou le zour.  Prezidan i devret anbarase.  Minis i devret anbarase.  Mon bann koleg parti lepe an fas ki o pouvwar depi 40an zot osi zot devret anbarase.  Alor silvouple la ki nou pe al regard depans o nivo Nasyonal why not ki nou pa rod fer e saving dan en landrwa ki pa irzan e anvoy kontrakter anler Briyan e dan laplenn Les  Mamelles le 4 Zanvye ler travay i konmanse apre lafet lannen.

Sa 5,6 dimoun dan lakaz emergency Briyan Mr Speaker i dir pa ni bezwen anvoy Kontrakter.  Survey sa later, vann sakenn en morso e zot a debrouye ot menm.  Lala mezir exasperation sa bann rezidan Mr Speaker.  Dan lespwar ki sa ki kriy pli FOR i ganny ekoute Mr Speaker mon kriy for pou zot.  Lakaz i anmenn mwan lo size drog.  Akoz?  Akoz en bann rezon ki drog pa pe redwir dan nou distrik se ki ler ou pe viv dan kondisyon enpitwayab e ki ou napa lespwar dan ou lavi ou rod en fason escape.  Tro bokou nou zenn i vwar sa escape dan drog.  Mwan pase mon ti ganny loportinite avek bann zofisye APDAR pou vizit Londres e vwar ki mannyer trafiker ek adikt i ganny trete.

Sa Lasanble pou ganny loportinite pou retourn lo sa size pli tar dan sa Bidze, me permet mwan Mr Speaker pou entrodwir de lide pou deal avek fleo drog an attendant ki bann sistenm i ganny met an plas.  Larzan Minis i bezwen ganny mete pou ki lapolis i ganny posibilite fer compulsory testing lo en kategori dimoun ki ganny arete, menm si zot lofans pa asosye avek drog.  Dan sa fason tretman e aksyon apropriye i ava kapab ganny pran.  Osi e la nou bezwen target bann trafiker – mon pe propoz en Lalwa ki pou target sispe par servi zot avek en unexplained wealth order.  Les zot vin prouve ki zot pa trafiker olye met sa fardo lo ledo en Lafors Lapolis ki deza tro sarze.  Annou anvoy larzan kot kriz i ete Mr Speaker.  Annou aret fer sa ki dan dimyel vin pli dou.

Annou aret aras sa ki napa pou donn sa ki deza annan.  Letan in arive pou nou depans nou larzan la kot nou bezwen depans li.  Annou repar twa nou lakaz ki pe koule, olye al rod aste en lot masin koup zerb pou fer nou lakour zoli.  Prezan mon  retourn lo sa trwa keksoz ki mon’n promet zot ki mon pou dir zot ki provizyon ki’n ganny fer dan Bidze.

Premye – re devlopman lakaz Les Mamelles.  NIL Mr Speaker.  Nanryen pou dimoun ki pe viv dan sityasyon deplorab kot desarz kabinen i refoul lo semen, kot Prezidan li menm in demande ki lakaz i ganny fer o pli vit  posib.  Me kote ki mon vwar Minis in fer provizyon ?  Château Vallon Luxury Apartments.  Château Vallon Luxury Apartments.  Minis pe al depans pros R10milyon pou fer Luxury Appartments Château Vallon dan distrik Onorab Lepep Wilbert Herminie e i pa pe met R1 Les Mamelles pou fer ranplas en bann lakaz ki pe tonm par morso.  Mersi Minis.  Mon note e zabitan Les Mamelles in note priyorite Gouvernman Mr Faure.

Dezyenm –  Atak sityasyon drog Les Mamelles.  NIL Mr Speaker.  Pa en sou.  Mersi Minis.  Mon’n note e zabitan Les Mamelles in note priyorite Gouvernman Mr Faure.

Trwazyenmman – Day care Les Mamelles.  Ki zot krwar mon pe al dir?  NIL Mr Speaker.  Day care partou kote pe al fer R19milyon pe al ganny depanse pou amelyor biro DA dan plizyer distrik.  Me en day care Les mamelles Minis pa’n kapab trouv larzan pou li fer.  E pourtan sa se en progranm kot mwan mon’n personnelman dir avek Gouvernman ki mon’n deza raise R500mil pou sa proze e mon pou al re rod ankor sponsor prive pou fer li materyalize.  Malgre sa Mr Faure e Minis in ‘SOURD’ lo ‘mwan.’  Mersi Minis.  Mon’n note e zabitan Les Mamells in note priyorite Gouvernman Mr Faure.  E prezan Minis eski ou krwar ki mon kapab vot an faver sa Bidze?  Be zabitan Les mamelles pou zour mwan Mr Speaker  si mon vote e zot pou annan rezon.  Alor Mr Speaker akoz mon pa anvi ganny zoure mon bezwen dir avek Minis ki avek tou respe ki mon annan pou li e mon annan bokou respe akoz Minis pa zis  en zanmi lekol e en dimoun ki mon’n grandi avek me i mon prop kouzen.  Mon bezwen dir avek li ki son Bidze e Gouvernman Mr Faure in dezapwent mwan.

Mr Faure in fer en langazman avek mwan e avek sa Lasanble e son Minis Finans pa’n onor sa langazman.  Mon pa pou siport sa Bidze Mr Speaker.  E mon pa per dir sa ‘O’ e ‘FOR’.  Mon pa pare fer parey zida e pou sa R200 logmantasyon lo pansyon aprouv en Bidze ki kit mon distrik, mon pei ek mon sitwayen ater.  Sorry Mr Speaker, sorry Minis, sorry Mr Faure.  Sa Gouvernman Mr Faure in montre mwan ki mon pa kapab kont lo li alor zot osi pa kont lo mwan.  Mersi Mr Speaker.

(APPLAUSE)

 

MR SPEAKER

Mersi Onorab Bernard Georges.  Mon pou donn laparol Onorab Basil Hoareau ki pou swiv par Onorab Francois Adelaide.  Onorab Basil Hoareau.

 

HON BASIL HOAREAU

Mersi Mr Speaker.  Bonzour tou dimoun ki a lekout.  Bonzour tou bann Manm.  Mr Speaker Bidze prezantasyon Bidze i enn bann levennman pli enportan lo nou kalandriye Lezislatif Mr Speaker.  I pli enportan parske i le moman ki Gouvernman e Egzekitiv an partikilye, i vin devan nou Lasanble e i eksplik avek nou bann Manm Lasanble e osi a pep Seselwa ki mannyer Gouvernman in planifye pou depans larzan Seselwa dan sa next financial year.

E dan nou ka ozordi se pou lannen 2019 Mr Speaker.  I osi enportan parske Gouvernman i vin dir ek nou ki son bann mezir fiskal ki i anvi met an plas pou achieve son bann lobzektif ki i set dan Bidze e i osi enportan Mr Speaker parski sa Bidze i bezwen zwenn laspirasyon nou bann dimoun.

E se pou sa rezon ki nou vwar nou bann dimoun, nou bann sitwayen i annan en lenportans partikilye ki atase avek Bidze parski i anvi vwar li dan sa Bidze.  I anvi konnen si Gouvernman in met li dan Bidze e ki Gouvernman pou donn li dan sa Bidze.  E Mr Speaker letan nou tann nou bann dimoun fer komanter ki swa negativ ouswa pozitiv lo Bidze e la mon pe koz lo nou bann dimoun an deor, pa Manm Lasanble sa pou mwan i en keksoz ki pozitiv.

Menm si zot pe koz lo keksoz negativ lo Bidze me pou mwan mon vwar li pozitiv parski i montre ki nou bann dimoun i enterese kwa ki pe pase dan pei, kwa ki son Gouvernman pe fer e i pe kestyonn son Gouvernman.  Sa pou mwan i enportan pou nou la demokrasi e mon krwar nou devret kontinyen ankouraz sa Mr Speaker, me pa per.  Pa per kan Seselwa i eksprim son lopinyon dan en fason adverse ouswa pozitiv me nou devret kontrer ankouraz zot kontinyelman kestyonn Gouvernman lo fason ki son larzan pe ganny depanse Mr Speaker.

Mr Speaker Bidze i annan provizyon ki Minis in dir pou lentrodiksyon bann scheme saler.  E Onorab Georges in koz lo la e i demande ki Gouvernman i fer en comprehensive revision lo bann Scheme saler.  Mon krwar sa i pozitiv e mon siport Onorab George lo la poudir nou pa kapab pa fer li piecemeal get en bout ozordi get en lot bout me nou devret annan en revizyon konpreansiv.  Me sa ki pe rive ozordi i annan en bout ki pe ganny fer me mon pa pou kapab dir sa bout ki pe ganny fer i osi mal parski i annan nou bann frer Seselwa ladan ki pou gannyen ladan.  E pou mwan sa i pozitiv malgre ki mon siport sa ki Onorab Georges i dir ki sa nou devret pe fer li dan en fason pli konpreansiv.

E Minis in dir pou sa revizyon i annan R58.5milyon ki pe ganny allocate e i annan e bout revizyon ki pou konmans an Zanvye 2019 e en bout ki pe konmans an Zilyet 2019 Mr Speaker.  La ankor mon demann kestyon akoz ki nou pa kapab konmans an Zanvye?  Akoz ki nou bezwen esper Zilyet e mon annan en lenplikasyon legal tou ladan Mr Speaker e mon espere ki Minis e Gouvernman i pran sa an kont e mon pou adres sa byento la dan mon deba la dan mon diskour.

Mr Speaker i annan lentrodiksyon allowance pou long service.  Pozitiv ankor.  Sa i byen e nou’n koz lo la letan Onorab William ti anmenn son Mosyon pou dir Public Service Act dan sa provizyon ki i fer pou bann band ek step i minimum saler, me sa saler i kapab ganny ogmante pou serten travayer prenon kont zot prodiktivite, zot leksperyans ek bann lezot fakter ki Lalwa li menm i fer.  E nou ti demande akoz ki Gouvernman pa fer sa.  E la nou’n vwar poudir Gouvernman in pare pou increase pou donn en pe plis bann travayer ki’ montre zot long service.

E nou pe rekonpans zot pou zot lwayote e zot devouman dan zot louvraz Mr Speaker.  Sa i pozitiv e mon panse osi ki pou ankouraz bann lezot bann lezot travayer dan sekter piblik pou reste da zot louvraz pou zot osi kontinyelman kontribye e sa i ava ede pou fer ki nou retain nou travayer dan sekter piblik, akoz sa bann travayer se bann travayer ki annan leksperyans e i vedir letan ou kit ou travayer ki annan leksperyans i vedir ou sekter piblik i vin pli efficient Mr Speaker.

E ki nou vwar?  Nou vwar poudir sa allowance i ganny monte dan en fason progresiv Mr Speaker.  E pou mwan sa i enportan parski parey ou’n dir nou kontinyelman ankouraz ou bann travayer pou reste dan sa sekter piblik.  E ankor kestyon sa i konmans an Zilyet.  Akoz Zilyet?  Mon pa konnen Minis i bezwen eksplike e ankor parey mon’n dir pou annan en issue legal ki vin avek sa.  Me pou le moman mon ti a kontan adres sekter prive.

Sekter prive nou’n dir dernyerman dan Mosyon pou dir sekter prive nou pou ankouraz zot pou swiv Gouvernman.  Nou pou ankouraz zot to come onboard e swiv legzanp Gouvernman.  La Gouvernman i annan sa Scheme ki i pe entrodwir pou bann long service employees nou demann sekter prive osi pou swiv pou li osi rekonpans son bann travayer ki’n la ki’n servi zot biznes ki’n ede agrandi zot biznes ki’n petet ansanm kree sa biznes ki zot pe – ki ozordi pe donn zot prosperite.

E Mr Speaker sekter prive i bezwen swiv sa.  Me si i pa swiv ki nou pou fer?  Mwan mon krwar i pa pou  fair pou dir travayer dan sekter piblik pe ganny en rekonpans pou zot long service, ki nou kit a lekar nou travayer da sekter prive !  Si sekter prive pa oule swiv nou pou bezwen amann Lalwa pou fors zot pou fer parski sa bann allowance i pa bann allowance ki pou dir in fer dan en fason brit.  I pa bann gro sonm me i bann sonm ki nevertheless nou pe rekonnet kontribisyon ki sa bann travayer pe fer dan lekonomi Sesel.

E mon krwar poudir Gouvernman i bezwen met sa konman en posibilite kot si sekter prive pa le zwenn Gouvernman dan sa demars, Gouvernman i pou bezwen fors li Mr speaker.  Mr Speaker parey mon’n dir mwan mon krwar poudir sa bann Scheme of Service ouswa long service ki pe ganny fer ki pe dir pou konmans an Zilyet i kont Lalwa Minis.  I kont Lalwa i kont Public Salary Act.  Akoz mon dir sa Mr Speaker.  Se letan ou get the Public Salary Act ti annan de bout ki ti vi an fors.  I annan en bout ki ti vin an fors le 1Avril 2014.  E li i ti vin pou tou travayer eksepte bann travayer ki ganny mansyonnen dan 2enm schedule.

Bann travayer ki ganny mansyonnen dan 2enm Schedule i basically bann pozisyon parey ki nou dir ban Constitutional appointees.  I annan MNAs i annan bann Minis and so forth.  Zot pou nou sa bout Public Salary Act ti vin an fors le 01 Zilyet 2014.  Savedir Public Salary Act li menm li, apre ki i ti’n ganny pase son Act li menm son Seksyon 11131(2) ti dir poudir son premye bout i pou konmans pran lefe avek tou travayer le 01Avril 2014.  E Seksyon 7 sa Act i dir poudir at the very least every five years ou bezwen annan en revizyon saler.  Be sa revizyon saler pa pran plas an relasyon avek sa Lalwa par selman dir nou’n revize apre nou postpone sa peyman.

Sa revizyon pou li pran plas dan term sa seksyon 7, i vedir sa letan ki sa provizyon sa revizyon i pran plas legalman.  E dan sa ka dan sa ka an relasyon ek tou travayer legalman sa bann provizyon eksepte bann Schedule 2 sa provizyon i devret pe pran plas le 01 Avril 2019.  I pa kapab pe pran plas an Zilyet.  I kont Lalwa!  Gouvernman pe breach Lalwa dan sa ka Minis!  Nou bezwen re get sa.

Mwan mon dir i devret konmans le  01 Zanvye.  Le 01 Zanvye 2019 – sa ki mon krwar!  E mon ensiste lo la.  Me mon pe dir legalman me nou pa kapab fer li an Zilyet.  Savedir si Gouvernman i krwar politikman i pa pe kapab fer li le 01 Zanvye 2019 i oblize fer li legalman le 01 Avril 2019.  So mon pou dir ek Minis re get sa parski sa i kont Lalwa e nou bezwen konman en Gouvernman respekte lalwa touzour Mr Speaker, e mwan mon ensiste mon krwar parski letan nou enpoz taks par-ler nou konmans li konmansman lannen –  Zanvye.  Me akoz letan nou pe donn en keksoz pozitiv nou bezwen toultan konmans dan milye lannen parski nou dimoun i dir nou sa!  I dir ou tou keksoz ki bon i konmans dan milye lannen.  Be annou konmans li konmansman lannen le 01 Zanvye 2019 Minis !

Minis letan mon koz lo travayer ou osi ou’n adres Sekter Lanplwa.  E  la Minis mon pa pou kapab mank sa loportinite ankor, in ganny koze lo la dan sa Lasanble mon pa pou kapab mank sa loportinite pou koz lo lefe, pou nou fer sir ki sa pei Seselwa i ganny anploye avan etranze.  Nou bezwen fer sir Mr Speaker parey mon’n dir, ki nou maksimiz – mon’n deza dir nou maksimiz pos ki okipe par nou bann frer Seselwa Mr Speaker.

Mr Speaker mon en dimoun ki kontan ekout bann sanson patriyotik.  E mwan la i annan en sanson ki’n vin dan mon lespri letan mon ti pe adres sa size.  En sanson ki’n sante par Mr Thomas Knowles e i dir ek ou koumsa ‘’soufrans en Nasyon se dominasyon par etranze.’’  Sa se soufrans en Nasyon.  E Mr Speaker e sa sanson i dir parey nou ti ete.  Me nou’n retourn ladan Mr Speaker.  Nou’n retourn dan sa domenn kot petet politikman nou endepandan me ekonomikman nou pe ganny dominen par etranze Mr Speaker!  E sa pe kontinyelman arive e nou Gouvernman pa kapab asize  e aksepte sa!

Nou bezwen debout e dir non !  Nou pa pou les nou ganny dominen par etranze.  Etranze i bezwen respekte nou Mr Speaker!  Nou’n vwar ki’n arive ek nou bann frer ek ser Banyan Tree Mr Speaker, kot en lakonpannyen etranze in vin montre nou i napa respe pou nou Lalwa, i napa respe pou Seselwa.  Nou pa kapab les sa arive.  E Gouvernman Mr Speaker i bezwen firm dan son lapros.  Nou’n koz lo Cable & Wireless, sa bann company si zot vin Sesel zot pa respekte nou, nou bezwen dir zot anmas zot pake ale Mr Speaker!

 

(APPLAUSE)

 

HON BASIL HOAREAU

Nou bezwen ferm ladan. Parski si sa bann konpannyen etranze pa respekte nou Gouvernman, pa respekte bann kondisyon ki’n ganny fer ant li ek Gouvernman, i pa respekte nou Lalwa, i vedir si i pa per ou Gouvernman i pou servi nou pep Seselwa konman marspye Mr Speaker!  E sa nou pa kapab aksepte e nou pa pou aksepte Mr Speaker !

 

(APPLAUSE)

 

HON BASIL HOAREAU

Mr Speaker nou pa kapab compromise drwa Seselwa.  I en keksoz ki enportan ki nou debout.  Nou debout Mr Speaker pou nou Seselwa! E sa Minis i anmenn mwan lo en lot issue lo lenvestisman par etranze dan Sesel.  Pou le moman ti annan Lalwa e mon pa vwar li dan nou Lalwa anymore ti annan  Lalwa sa Lalwa in ganny amande ti annan investment code act of 2005 li i ti ganny repeal an 2010 par Investment Act.  Dan sa code ti annan sa ki ti apel restricted areas ki ti restrikte pou Seselwa.  Me pou le moman letan li in ganny repeal napa dan Lalwa.  Me mon mazinen as a matter of policy Gouvernman pe fer li, me i devret dan Lalwa sa.  Sa i devret dan Lalwa. Akoz ki – nou ti annan dan Lalwa nou tir apre nou ti al fer policy.  Be nou bezwen met Lalwa.

E pou mwan sa i enportan ki nou retour li dan Lalwa.  E letan nou dir nou pe restrikte etranze ki nou dir nou dir en etranze li i pa pou kapab fer serten biznes.  Par egzanp own tourism accomodation mon krwar i annan ziskan 10 lasanm, i pa kapab antre ladan.  24 i pa kapab antre ladan.  Zot dir mwan 25.  Ok e i pa kapab.  I pa kapab.

So e nou dir poudir dan domenn konstriksyon i pa pou kapab ganny license No.2 onwards.  I kapab ganny No.1 me i pa kapab ganny No.2.  Ki nou dir solman nou dir en company – en company ki Seselwa i 51poursan i kapab.  Savedir sa etranze i kapab antre dan en company kot li i fer li vi 49poursan ek Seselwa 51poursan i kapab.  Mwan mon dir si nou dir ou pa kapab menm en company  ki kapab ganny sa fodre selman en company ki 100poursan Seselwa.  Nou bezwen pe re get sa.

Si nou pe restrikte biznes selman pou Seselwa nou bezwen restrikte li dan son totalite pa zis pran en dimoun fizik me en company ki totally owned by en Seselwa.  Parski sa bann biznes i annan en rezon akoz nou rezerv pou Seselwa.  Nou vwar poudir bann biznes ki ase small an term son grander e nou pe ankouraz Seselwa pou al dan sa biznes.  E nou  pe dir ek sa etranze gete si ou, ou anvi envestir Sesel be envestir en pti pe plis.  Montre nou poudir ou vreman pe met larzan dan sa lekonomi.  E nou bezwen fer sir sa i arive.

E Minis en keksoz ki nou bezwen fer sir osi se ki sa bann Lalwa i ganny respekte.  Sa bann Lalwa pa pe ganny respekte.  Mon’n deza dir sa dan Lasanble.  Sa bann Lalwa pa  pe ganny respekte.  I annan bann etranze ki pe servi serten nou bann frer Seselwa pou zot bypass sa Lalwa.  E Gouvernman i bezwen serye lo la ; kot Gouvernman i bezwen en Lalwa pou dir si sa i arive sa biznes pou ganny close down, son bann asset tou pou ganny forfeited to the Government.  E nou bezwen apply sa Mr Speaker.  Nou bezwen fer sir poudir letan nou pe protez nou Seselwa, nou pa protez li zis lo papye! Savedir zis lo en Lalwa me nou protez li an pratik ki sa bann Lalwa i ganny anforsi ki son drwa pa ganny vyole.

Permet mwan Mr Speaker re fer avek preamble nou Konstitisyon.  Nou Konstitisyon Mr Speaker i dir ek nou apre ki in set son bann keksoz ki nou aknowledge i dir ek nou prezan ki nou sipoze – ki nou invoke pou fer.  ‘’Invoking the blessings of Almighty God’’ i dir, ‘’solemnly declaring our unswaying commitments during this our third republic to maintain Seychelles as an independent state both politically and ‘’economically. ‘’ Sa en keksoz ki mon dir bann Seselwa nou’n dir ki nou pou fer.  Malerezman i pa pe ganny fer Mr Speaker.  We are compromising our economic independence Mr Speaker and we should anpes sa arive Mr Speaker.

E i dir ek ou ankor nou ‘’solemnly declare’’ ki nou ‘’to participate actively in the sustainable economic and social development of our society.’’  Letan en frer ser Seselwa i ganny pouse dan son louvraz Mr Speaker i vedir ki sa frer Seselwa pe ganny anpese, pe ganny anpese pou desarz son responsabilite ki in dir i pou desarze anver nou Konstitisyon Mr Speaker.  E nou bezwen anpes sa.  E Minis Gouvernman i bezwen dan son bann mezir ki in pran budgetary measures ki i pe pran, i bezwen osi regar sa parski sa Seselwa i anvi vwar li kot son sekirite pou partisip dan devlopman ekonomik son pei, i ganny garanti Mr Speaker.  E sa nou bezwen fer sir i vin en realite e pa zis bann zoli parol ki nou’n koze Mr Speaker.

Parski letan nou’n dir Seselwa i dezyenm class dan son pei i larealite. Nou koz sa dan sa Lasanble.  Ozordi letan dimoun i – bann dimoun pe ganny interview zot mansyonn sa.  Sa i larealite nou bezwen adres sa – Minis e nou bezwen met bann mechanism an plas ki once and for all sa i ganny met akote Mr Speaker.   Minis in koz lo lazenes ek spor.  Minis in dir ek nou poudir i annan R24mil ki pou ganny allocate pou Zwe Des Iles pou nou bann atlet partisip dan Zwe Des Iles.  I annan R4.5milyon ki pou ganny allocate pou All Africa Games an 2019.  Sa i byen nou envestir dan nou atlet e nou donn zot sa loportinite pou zot fer monte nou paviyon e pou fer nou Lim Nasyonal ganny tande Mr Speaker.

Mr Speaker mon pa pou kapab mank sa loportinite pou mon dir mwan konman en Seselwa napa keksoz pli fyer letan mon vwar enn vre zanfan nou later, fer monte nou paviyon e fer nou Lim Nasyonal tande.  Vre zanfan nou later.  Be pa en  en etranze me pa etranze ki nou’n donn li citizenship pou al fer monte paviyon Sesel.  I pa parey!

 

(APPLAUSE)

 

HON BASIL HOAREAU

Letan mon vwar sa zanfan Seselwa ne, grandi Sesel e fer monte sa paviyon, i annan en keksoz spesyal avek Mr Speaker.  E mwan ankor mon pe dir dan sa bann  zwe se nou Seselwa ki devret pe ale. Mon pa krwar poudir nou devret donn nou bann dimoun, fer zot vin bann Seselwa mon pou servi sa term avek tou respe Seselwa papye apre dir  ek zot al fer monte paviyon Sesel.  Eski nou krwar sa dimoun i annan sa leker pou Sesel parey sa vre zanfan Seselwa ?

Mr Speaker ankor enn fwa mon’n dir poudir sa ban zwe nou devret donn loportinite nou zanfan parske sa zanfan Seselwa i vwar son plas ganny pran par en etranze e li i konnen poudir li i ti  pe al fer sa ek leker.  Sa etranze i annan lot keksoz ki i pe rode.  E rightly so sa Lasanble mon mazinen Onorab Ramkalawan ki ti dir sa poudir sa bann dimoun parfwa, zot realize dan zot prop pei zot pa pou al partisip dan bann games Olympic par egzanp, World Championship alor pou zot i en fason pou zot pran sa bann plas pou zot nobou al partisip da sa bann zwe kan ti devret en zanfan Seselwa.

E zot pa krwar dan sa bann zwe pe al anmenn okenn meday zot.  Zot pou napa nanryen an plis me zis pou zot nobou al partisipe.  Mr Speaker mwan mon krwar nou devret donn sa a nou zanfan Seselwa a nou bann atlet Seselwa!

 

(APPLAUSE)

 

HON BASIL HOAREAU

Minis letan nou koz lo Zwe Des Iles i enportan ki zis nou pa anvoy nou atlet al dan Zwe Des Iles me nou bezwen prepar zot byen pou zot ganny en bon rezilta.  Minis mon annan serten bann lasosyasyon ki’n konplent avek mwan ki’n dir mwan zot pa’n ganny sipor NSC dan zot demars pou prepar zot bann atlet.  Lasosyasyon Bisiklet i enn sa lasosyasyon ki pa’n ganny sipor.  Minis i annan – ti annan Tour Maurice resaman.  E dan sa Tour Maurice i annan serten dimoun ki’n ale konman zofisye avek bann atlet ki’n bezwen pey zot tiket dan zot prop pos.  NSC pa ti pe donn zot larzan e mazinen mon krwar i annan plis ki 1mwan depi Tour Maurice in fini ou konnen kan sa dimoun in ganny rann son larzan?  Semenn pase tar semenn pase ki NSC i reemburse li son larzan ki li in depanse pou li nobou al Maurice.  I annan bann konpetisyon ki ti pou an preparasyon sa bann siklis zot pa’n kapab ale akoz NSC pa’n donn zot sipor finansyel.  I annan en konpetisyon resaman ki zot ti pou ale zot pa’n kapab ale akoz letan ki larzan ki NSC in dir zot pou dir zot poudir in pare, rezistrasyon laba kot konpetisyon pou ganny fer in fini cancel.

Savedir nou bann  siklis pa’n ganny sa preparasyon neseser.  Si nou pe depans larzan pou al Zwe Des Iles me yet nou bann siklis, nou bann atlet pa pe ganny sa posibilite pou prepar zot to the maximum.  E NSC  nou bezwen get ladan nou bezwen demann zot pou pran zot bann responsabilite serye Mr Speaker.

E la Mr Speaker mon anvi adres en size. Pansyon pou nou bann atlet.  E lo sa i enportan.

 

(APPLAUSE)

 

HON BASIL HOAREAU

Nou isi dan sa Lasanble konman bann politisyen, letan pansyon MNA in vini nou’n fer sir sa in ganny dealt with in ganny adrese.  Letan Lakour konstitisyonnel ti’n deklare ki pansyon MNA i kont Konstitisyon, nou’n amann Konstitisyon.  E sa osi i pou fer ek bann Minis.  Me nou osi bezwen get sa bann dimoun ki parey mon’n dir ki’n fer tande Lim nasyonal Sesel dan tou kwen lemonn.  Bann ki’n fer monte nou paviyon.  Nou bezwen donn zot en pansyon.  Annefe nou kapab swiv legzanp nou frer Maurice. Maurice  dan zot Bidze 2017 -2018 zot in entrodwir en kad pou sa zot apel sa State recognition allowance scheme for retired athletes. E zot ki zot dir ek ou?  Zot dir ek ou si en atlet in retire e i annan li 35an e in fini retire e in ganny swa meday Bronz, Larzan ouswa Lor dan bann zwe olenpik, para olenpik, World Championship, Commonwealth Games, Jeu de la francophonie, African Games and All Africa Games zot pou ganny e pansyon.  E mon krwar i fer sans … akoz la ou pe met en group atlet ki o nivo ki pli i ki sa e mon krwar i byen zot pa’n nonm Zwe Des Iles.  E mwan mon krwar sa i en legzanp parfe pou nou.  Parfe pou nou parske nou annan en atlet deor.  Nou bezwen fer nou bann atlet konpran poudir nou pou rekonnet zot pa selman ler zot ankor kapab me letan zot nepli kapab nou pou still rekonnet zot.  E nou pou apresye sa ki zot in fer pou nou pei Mr Speaker.

 

(APPLAUSE)

 

HON BASIL HOAREAU

Parske i bann dimoun ki’n anmenn nou paviyon an deor Sesel ki’n fer sa Lim Nasyonal Sesel rezonnen dan parti lemonn Mr Speaker.  E Mr Speaker nou annan sa group atlet.  Nou mazin nou 3 fame bokser Mr Roland Raform, Rival Payet, Mr Jerry Legras.  Nou annan en group atlet.  Mon mazin pou All Africa Games si mon pa tronpe premye Seselwa pou anmenn en meday ti Mr Paul Knowles.  Nou annan madam Janette Georges.

Tousala i bann atlet ki’n kontribye da devlopman nou spor e ki’n fer rezonnen e nou Lim Nasyonal e mon krwar nou bezwen rekonnet sa e nou bezwen mazin lo la.  Fer sa vin en realite e petet prezant en Mosyon lo sa size devan Lasanble ouswa menm anmenn en Private Member’s Bill pou ki nou met sa dan en kad legal osi.  Parski letan nou pe dir pansyon i pa pe koz en gro sonm me en sonm pou nou rekonnet zot parski sa bann atlet ozordi bokou zot i dan injury parski zot in pous zot lekor pou Sesel.  E nou bezwen rekonpans zot pou sa e dir zot mersi pou sa Mr Speaker.

Mr Speaker mon anvi adres sa size prezan lasante.  Parey labitid Gouvernman in met larzan pou lasante e sa i byen parske si nou anvi en lekonomi ki ganny siporte par Seselwa, nou bezwen en pep an bonn sante pou nobou siport nou lekonomi Mr Speaker.  Sa i byen, me mon pou adres sa size prescription  fee Minis.  Onorab Andre ti adres sa i kont Konstitisyon sa Minis.  Nou pa pou kapab fer li.  Mon konpran lozik.  Mon konpran lozik ek Polisi ki  Gouvernman pe vin avek.  Lozik ek Polisi mon siport 100poursan pou dir ou bezwen kontribye ou osi.  Ou lasante i ou responsabilite alor ou osi ou bezwen pran serten responsabilite finansye.  Me mon pa kapab siport sa kot i pe al kontrerman ek nou Konstitisyon.  Parske nou tou letan nou’n antre lofis isi nou’n pran en Oath of Allegiance nou Konstitisyon pou protez li defann li e prezerv nou Konstitisyon.  E bann Minis osi zot in pran Oath of Allegiance e alors nou pa kapab breach nou Konstitisyon.

Parske Speaker a permet mwan pou eksplik sa.  In dir dan Lartik 29 (1) kot nou koz nou right to health care, Gouvernman in dir in fer undertaking ki i pou provide free primary health care.  In dir en undertaking ki in gannyen dan Konstitisyon sa.  E donn latizann i form par of a primary health care.  I form par.  Si ou al kot e dokter dan distrik, i donn ou latizann sa i form par.  Ou al kot en dokter selman ler ou antre dan secondary health care ouswa tertiary,  la ki Gouvernman i kapab dir ek ou gete mon pa’n donn en undertaking.  Me dan Konstitisyon Lartik 29(1) sa undertaking in ganny donnen lo primary health care.  E donn latizann parey mon’n dir  i form par  primary health care e Gouvernman pa kapab fer sa.

Gouvernman pa pou kapab fer sa i pou kont Konstitisyon e nou konman en Lasanble nou pa kapab permet Gouvernman pou fer sa.  Nou bezwen dir ek Gouvernman malgre ki nou pran lozik, me i kont Konstitisyon !  Nou pou bezwen al dan en referendum lo la.  En referendum e ki mon asire pep Seselwa pou vote dan son gran mazorite pou sa.  Parski ou bezwen 60poursan at least 60poursan e Seselwa pou vot li a faver.  E sa i parmi bann lezot size ki bezwen al da referendum Minis.

Nou’n koz lo lezot lamannman dan Konstitisyon right to property nou’n deza fer referans pou dir nou bezwen enkli en provizyon ki state land en dimoun i kapab ganny semen en bout later ek state land.  Nou’n deza dir poudir nou bezwen met sa dan Konstitisyon.  Nou’n deza fer sa proposal – dir poudir pa pou kapab ganny plis.  E sa nou bezwen bann lamannman.  E nou bezwen savedir Gouvernman i bezwen konmans prepar li.  Letan nou pe al re get nou Konstitisyon poudir nou pou bezwen hold e referendum lo sa bann size.

E anmennen e once ki in ganny aprouve par 60poursan popilasyon, then i ava ganny met devan Lasanble e si Lasanble i vot an faver pou sa lamannman par two third then i pase.  Nou bezwen fer li byen.  Nou pa kapab aksepte en sityasyon kot nou fer li kont nou Konstitisyon Mr speaker.

Mr Speaker Minis in dir nou ki an 2019 Gouvernman pe entrodwir en sistenm kot nou pou annan passport bio metric ki pou ranplas sa sistenm ki nou annan ki en passport insurance system.  Savedir nou pe fer passport parey Minis in dir pli sekirize e nou pe donn plis valer a nou passport.

Mr Speaker letan nou donn valer nou passport dan kote gos nou bezwen fer sir dan kote drwat nou pa pe pran bann mezir ki pe fer nou passport vin pli bon marse.  E sa i vedir Mr Speaker parey mon’n deza dir dan sa Lasanble, ki nou bezwen fer sir ki nou pa donn passport bann dimoun ki pa merite!  Paske si Gouvernman  i deside donn valer nou passport an term so sekirite an term fer li vin biometric nou bezwen fer sir sa passport i ganny donnen selman a Seselwa !  Mr Speaker la ankor mon pou demann nou Lasanble pou nou fer le neseser si Egzekitiv pa le fer pou nou letan Konstitisyon i vini pou lamannman, pou nou entrodwir en Clause dan nou Konstitisyon ki pou permet nou revoke sa bann passport ki’n ganny donnen ki pa ti meritorious Mr Speaker.

 

 

(APPLAUSE)

 

HON BASIL HOAREAU

Sa i nou responsabilite sa Mr Speaker e nou pou bezwen fer li Mr Speaker parske si i pa ganny fer nou pa pe desarz nou responsabilite anver sa pep Seselwa Mr Speaker.  Mon krwar sa i enportan Mr Speaker.

Mr Speaker nou koz lo minimum wage.  I byen ki minimum wage pe ganny increase e osi paralelman nou vwar ki retirement benefits e ganny increase Mr Speaker.  Sa i byen, parski nou pe met en pti pe plis larzan dan pos nou bann frer ek ser Seselwa Mr Speaker.  Sa pou mwan i byen me, me parey nou’n deza koze dan sa Lasanble letan nou adres sa issue pri lavi i annan de eleman.  I annan eleman ogmant saler me osi i annan en eleman fer desann sa pri lavi.  E nou bezwen fer sa.  E la kot Minis an fransiz e tou lonnekte mon pou dir avek ou mon pa santi ki sa Bidze in al ase dan sa issue fer desann pri lavi.  Nou’n fer monte saler minimum wage ek retired benefits pou bann dimoun me mezir pou met an plas pou dir fer pri lavi desann mon pa santi sa Bidze in al ase lwen ladan Minis.

E Mr Speaker la kot en issue pa’n ganny adrese kartel.  Mon  ti ava kontan tande dan sa Bidze kot minis ti a’n vin dir nou ki bann mezir Gouvernman pe al met an plas pou detri sa bann Kartel ki egziste?  E Minis sa i enportan, parski pri lavi li menm nou pa pou fer li desann si nou pa detri kartel.  Kartel in anvai nou pei Minis e on krwar Gouvernman i bezwen adres sa.  I en realite ozordi parske kartel pe ronz nou dan de fason i  kit pri lavi o kot i afekte direkteman sa frer ek ser Seselwa.  Apre i annan income splitting ki pe take place kot zot pa pe pey taks e sa osi  pe afekte endirekteman nou bann frer ek ser Seselwa.  Parske larzan ki devret ganny kolekte pou taks  pa pe ganny kolekte savedir nou pa pe ganny larzan ki ti kapab petet donn nou en pli bon zesyon nou Lasante ek nou Ledikasyon.  So sa i enportan nou bezwen adrese i en problenm ki realite ki nou pe fer fas avek.

E mon krwar Minis dan  sa laliny la mon pa santi poudir nou’n al ase parski nou bezwen combine sa de ansanm.  Increase dan saler e mon’n toultan dir sa bann increase pa devret dan en fason feros ou brit kot i kapab annan bann lenpak negativ ; par egzanp kot nou’n koze poudir si ou’n fer en logmantasyon brit sorti 5mil pou 10mil demen nou kapab vwar poudir sa bann dimoun ki pou ganny benefisye zot riske vwar zot san en lanplwa.  Ouswa kot zot vwar poudir i annan lenflasyon kot pri marsandiz i monte.  E Minis nou bezwen re get sa.

Nou’n koz lo tir VAT lo bwat ton me eski vreman nou bann frer e ser seselwa pou benefisye avek sa?  Ouswa marsan pou rod fason pou li benefisye ek sa, san pas sa benefis lo sa frer ser Seselwa.  Petet STC li i pou vann li a e pri rezonnab, me sa bann lezot marsan pou er sa?  Sa i realite.

E la mwan Mr Speaker e nou’n ganny dir poudir IOT malgre ki i ti’n sey fer en price fixing avek i ti pe demann zot pou zot pa vann sa bann ton a e serten pri, akoz nou fer competiton act  ki dir ou pa kapab fer price fixing.  Zot pa kapab fer li akoz i a ganny dir zot pe breach Lalwa.  Be nou bezwen get sa Lalwa e la ankor kot parler nou’n pran Lalwa ki byen ki bon.  Mon mazinen sa zafer Fair Compétition Act mon krwar in vin as part and parcel of WTO.  Si mon pa mistaken se ki in vin ladan. Be  solman nou bezwen osi get sa Lalwa dan nou konteks lokal.  Eski nou pa bezwen annan egzanpsyon  dan sa Lalwa?  Poudir i annan kot Gouvernman i kapab fer Regilasyon dan public interest kot i kapab permet annan serten ka egzanpsyon avek sa bann provizyon Lalwa.

E la kot i konsern ton ti a vin ladan.  E nou bezwen re gete dan nou konteks pou kree egzanpsyon.  Parske nou’n kapab tir VAT lo la nou.  Probableman letan i ariv Anse Royale letan i ariv dan lezot bout Mahe/Praslin sa konsonmater pa pe vwar sa diferans.  Pa pe vwar sa benefis e nou bezwen re get Lalwa ki mannyer nou kapab re get sa.  E mwan mon krwar nou bezwen get sa Fair Compétition Act e allow for exemptions to be made in  the public interest Mr Speaker.

Mr Speaker nou’n koz lo taks i mobilye i byen e sa taks nou’n koz en bon pe letan pase lo la.  E la nou’n ganny dir i pou apply selman nek rezidansyel.  Mon dakor avek sa.  Mon dakor avek sa poudir i apply selman ek rezidansyel mon kapab konpran ki lenpak i ti pou annan lo bann biznes lo en lotel par egzanp pou li pey sa property tax e i apply selman ek etranze.  Me Minis ki nou bezwen fer sir.  Nou bezwen fer sir poudir dimoun pa vini e var en fason pou zot avoid sa Lalwa.  Nou dir i apply selman ek rezidansyel e nou bezwen fer sir poudir letan en dimoun i fer aplikasyon sanksyon nou donn li son sanksyon nou dir li for residential use i servi li for residential use only.  I pa pli tar dir ek ou mon le fer en  biznes apre i dir ek ou be ou konnen mon pa tonm dan biznes mon pa bezwen pey sa taks.

Pli bon legzanp pa lwen ek nou se Eden Island.  Dimoun in aste propriyete Eden Island pou rezidansyel apre ki nou vwar zot menm zot pe fer biznes.  Zot menm zot pe compete ek nou bann frer Seselwa.  Nou pa kapab les sa arive Minis.  Nou bezwen fer sa bann dimoun konpran respekte sa pep ki apel Seselwa ou da son pei – li ki pe host ou dan son pei.  Aksepte e respe son lospitalite Mr Speaker.  E nou bezwen fer sir ki nou pa les sa ganny bypass.  Letan nou’n donn zot pou rezidansyel, i pa pou zanmen ganny sanze demen pou dir be la prezan i pe al fer en biznes.  Si ou’n ganny ou sanksyon prezidansyel i pou reste selman rezidansyel Mr Speaker e nou pa anvi vwar zot pe vin compete ek nou bann frer Seselwa.  E de plis Minis parey mon’n deza dir, si zot breach Lalwa nou bezwen forfeit.

E Minis mon pou demann Gouvernman pou bann later Propriyete ki’n ganny aste lo non Seselwa pou bypass sanksyon.  Moratorium in fini me Gouvernman i bezwen konmans al pran sa bann propriyete.  Zanmen mon pa konnen, mon pa konnen Onorab Georges i annan bokou plis leksperyans ki mwan in dan Lalwa bokou plis letan ki mwan, mon pa konnen mon krwar letan mon ti annan 3an i ti’n fini vin en avoka be mon pa rapel, mwan mon pa rapel kot okenn propriyete in ganny forfeited anba Immovable Property Restriction Act.  Be pourtan in annan en ta sa bann transfer ki’n ganny fer!  Be Gouvernman i bezwen konmans met son lipye ater montre sa bann etranze pou dir ou pa pou vin bat latet Seselwa da son pei ou.  Kot ou pa’n respekte Lalwa nou pou vini nou pou pini nou pou – letan mon dir pini nou pou apply Lalwa to the letter.  Pran sa bann propriyete e sa pou anmenn plis larzan dan fon Gouvernman Minis e i pou ede pou fer dimoun respekte nou konman en Nasyon.

Minis i annan taks lo lavyann ki pe ganny ogmante pa pe ganny entrodwir i pe ganny ogmante Minis e ou’n dir poudir sa pou ganny fer apartir Zanvye 2019.  Mon legzanp kot mon’n dir taks i vin an Zanvye 2019 logmantasyon i vin an Zilyet li.  Sa i en legzanp kler.  Minis mon konpran letan dimoun i dir poudir be la nou pe increase cost of living, kou lavi pe ogmante e i normal pou dimoun demann kestyon akoz i annan i dir ek ou poudir taks pe ganny ogmant e lo lavyann porc ek lavyann poul enporte.  Me nou bezwen osi get son proportionally ki kantite pe ganny ogmante e ki rezon det deryer sa bann mezir.  E la mon konpran sa konteks akoz sa pe ganny fer.  Nou pe fer dan nou konteks sekirite alimanter.  Se sa ki pe ganny fer – pou bi nou ed nou bann fermye bann ki pe fer elevaz zannimo pou zot nobou kapab vin en pe plis konpetitiv e vann zot prodwi.  E an mezir ki sa i fer ki zot kapab ogmant zot prodiktivite e evantyelman kot zot kapab domin sa marse lokalman, e obviously letan ki zot supply pe ogmante, sa i ava regularise pri li menm.

Mon  konpran loptik ladan e mon apresye sa.  E sa i byen.  E Mr Speaker permet mwan pou quote kot sa bann parol swivan ;- ‘ Nou sekirite alimanter Mr Speaker pa devret zanmen ganny reste e ganny garde dan lanmen e kontrol etranze.  Ler nou deside les bann prodwi a baz ganny enporte e ganny devide dan nou pei san pran kont laspe lasante i vreman danzere’.  E Onorab Adelaide ou pou dakor ek mwan ek sa parski mon pe quote ou Onorab Adelaide letan le 23 Me 2018 ou ti met en Mosyon kot ou ti pe demann Gouvernman rather pou protez Sekter Lagrikiltir.  E se sa.  Sa i al dan sa laliny.

E Onorab Ramkalawan mon rapel i ti dir dan sa menm Mosyon i ti dir ‘’mon anvi vwar e pei kot nou sekirite alimanter i ganny priyorite.’’  E la mon panse ki Gouvernman pe ekout Lasanble letan i pe met sa an plas.  Parski sa in pase an Me 2018 e 6mwan pli tar Novanm Gouvernman in bezwen pran kont sa ki Lasanble in dir li e i pe met sa an plas.  Parski nou bezwen fer li.  Mon dakor ek Onorab Ramkalawan in dir sekirite alimanter i bezwen vin en priyorite e nou bezwen ed nou fermye.  Mon konpran e mon siport sa parski mon santi poudir sa i en step in the right direction me Minis, me Minis ki mon krwar ki’n manke avek tou respe dan Bidze se leksplikasyon ki Gouvernman pou met an plas pou nou vreman vwar poudir sa ki nou anvi nou pou achieve?

Se la, parski si ou dir pep Seselwa fer e pti pe sa sakrifis pou annan sa sekirite alimanter nou bezwen osi eksplik pep Seselwa pou dir sa ki nou anvi achieve i achievable.  Nou pou fer li nou e vwala ki mannyer nou pou fer li.  Sa leksplikasyon i bezwen la pou fer sa pep konpran pou dir sa sakrifis pa pou an ven me sa sakrifis i pou enn ki pou port fri Mr Speaker.

Mr Speaker i annan sertennman me malerezman i pa la Onorab Andre in servi in dir poudir sa Bidze i en Bidze ki pe pini pep Seselwa.  Bidze i annan mankman dan Bidze mon aksepte.  Me pou dir ki en Bidze pe pini pep Seselwa i pe al en pe tro lwen e sirtou sorti kot e MNA Mr Speaker ki dan lepase in siport bann Bidze ser sang, bann Bidze kot Seselwa ti pe ganny demande pou ser sang e kot bann Seselwa ti pe santi son lenpak.  Pou en MNA ki’n siport Bidze ‘ser sang’ pou li vin dir sa Bidze ki la i en Bidze ki pe pini Seselwa parey Angle i dir it is a bit rich coming from him Mr Speaker.

 

(APPLAUSE)

 

HON BASIL HOAREAU

Mr Speaker an konklizyon mon anvi dir, poudir i annan  keksoz pozitiv dan Bidze me (laughter) me, me Mr Speaker mon pou dir ki Bidze pa’n ase lwen pou adres pri lavi.  Pri lavi i en keksoz ki pe kontinyelman afekte nou Mr Speaker e pou fini Mr Speaker mon ti a kontan demande, mon ti a kontan demande apre ki nou’n koz lo Seselwa premye, dan son pei mon ti a kontan propoze ki petet Gouvernman e annefe sa pa sorti kot mwan mon ti Praslin sa weekend mon’n zwenn enn mon frer Pralinwa nou ti pe koze e li in sizer sa.

E mon krwar poudir i en bon sizesyon me prose tenm Gouvernman i devret ‘’SESELWA AN PREMYE!’’  Sa i devret prosen tenm ki ganny servi tenm Nasyonal.  ’SESELWA AN PREMYE!  Parski i a fer nou reflesir poudir sak desizyon ki nou pou pran pandan lannen nou bezwen met Seselwa an premye!  Mersi Mr Speaker.

 

(APPLAUSE)

 

MR SPEAKER

Mersi Onorab Basil Hoareau. Bon mon ava pas laparol avek Onorab Francois Adelaide.

 

HON FRANCOIS ADELAIDE

Mersi Mr Speaker.  Bonzour Mr Speaker, bonzour tou bann Manm Onorab e tou Seselwa a lekout.   Mr Speaker mon pou konmanse par dir apre tou sa bon koze ki nou tann parti lepep koze lo Bidze ozordi nou tann en Manm ki dir i mank keksoz ladan.  Savedir Parti Lepep i annan en problenm.  E Onorab De Commarmond in avoue poudir sa Bidze i en Bidze ki bon e la ozordi nou trouve i annan en problenm Onorab fodre zot re align zot lekor ankor en fwa.

Mr Speaker mon konmans mon Bidze ankor en lot lannen ki’n byen dir difisil kot mazorite Seselwa in bezwen aziste, prive, ise, rape pou kapab fer detrwa bout zwenn dan en fason pou sonny e mentenir zot fanmir avek le bi ki demen keksoz a kapab pli meyer e zot soufrans i ava redwir menm ariv a son lafen.  Kot zot sakrifis travay dir devosyon i ava a lafen ganny kouronnen par en meyer demen.

Wi Mr Speaker sa kreol Seselwa an mazorite ki’n fer tou zot mye pou kontribye dan sa Bidze menm si parfwa zot pa’n manze, pa’n sanze, pa’n bennyen akoz zot pa’n kapab pey zot bill delo, pa’n sosyalize akoz zot  in fer telman sakrifis avek bi pou en pti larzan de kote pou kontinyen amelyor lavi zot fanmir.

Mr Speaker pa krwar mon pe envante me si ou frekant ou kominote parey mwan mon fer ou pou kapab konpran ki mon pe sey dekrir.  Ozordi ler mon tann bann gran filozofi eksplike ki mannyer nou premye dan Lafrik lo kantite to reveni mwayenn ki pe antre dan sak pos Seselwa, konmsi sa i en gran reisit, fransman i fer mwan realize ki kantite ipokrit i annan dan sa pei.

Ler nou get sityasyon reel tou le zour dan nou pei nou’n menm etablir en Seksyon pou lit kont Lapovrete.  Eski sa i en reisit pou nou konman  en Nasyon?  Mr Speaker mon le profite a sa lokazyon pou fer en pti prononsman lo sa zafer loan SBFA.  Mon le met lo rikord Lasanble ki mwan ler mon ti pran loan avek SBFA mon ti anploye konman en mekanisyen.  Savedir mon pa ti MNA e mon pa’ n abiz sa sistenm.  E mon loan mon pe peye konpare ek bann lakizasyon ki zot pe dir ki mwan mon pa pe pey mon loan.  E mon rikord i la zot ava trouve.  Sa ki pa pe peye pa mon problenm me mwan mon pe peye.  Mon ti le eklersi sa sityasyon.

Mr Speaker en popilasyon kreol Seselwa mwen 100mil zabitan eparpiye lo diferan zil antoure avek lanmer ki tre ris an bann resours maritim.  Lo bann zil byen fertil kot tou sa ki tonm  dan later i pouse.  Kot sa pep i ganny delo pli prop, pli sen ki tonm preski tou dilon lannen.  En pei kot soley i tape preski tou le zour e son larder i kit nou bronze e an bon sante.  Gran met i fer sir ki okenn gran dezas natirel pa sipoze vin montre zot lafors e vin manifeste dan nou landrwa sa paradi teres.

Enn fwa ki ti annan en Nasyon ki ti apel kreol Seselwa ki ti viv an armoni antre zot e avek lanatir.  Kot la partaz, disiplin, savoir vivre et savoir fer ti lalwa siprenm e valer moral ti ganny enkilke e erite par fanmir an fanmir.  Me lespri bandisite, vorasite ki ti swiv par bann akt koronpi ti baskil tou bann bon valer.  Zonm ti pare pou fer sa paradi vin son propriyete e ti deklar zot Bondye Sesel.  Larestan ti ganny grade konman bann gran sepa kwa Mr Speaker ankor en fwa Kreol Seselwa in ganny sans ekout atantivman ki bann Manm ki zot in vote pou reprezant zot e defann zot drwa pe dir lo sa Bidze 2019.

Mon konvenki ki kreol in trouve tou bann ki’n vreman defann zot lentere e tou bann ki defann lentere parti politik.  Sak fwa ki en Manm in ouver son labous pou koze in  evidan ki lepep Seselwa in kapab lir dan zot lespri e evalye lekel bann MNA ki senser e onnet, e lekel ki’n koz san bon refleksyon.  E pa bliye ki kreol lizye in ouver e lespri in matir.  Minis Loustau-Lalanne dan son kapasite konman Minis ansarz Finans Sesel in anmenn en Bill devan sa Lasanble pou nou aprouve ou permet Gouvernman depans en sonm larzan ki bokou Seselwa in kontribye direkteman swa endirekteman pou li ariv plis ki R8milyon. Savedir zabitan Baie Lazare i osi annan par ladan.  Zot osi zot in kontribye e zot in envestir dan mwan pou fer sir ki mon vey byen zot kontribisyon.  Minis mon oule premyerman remersi ou avek ou lekip ki’n mon’n vreman apresye akoz mon’n trouv e tim Kreol Seselwa ki’n travay tre dir pou anmenn sa dokiman dan sa Lasanble ozordi.

Mon senserman konstate ki menm avek sa bann … sa bann Kreol Seselwa i sirman annan bokou kestyon konsern lo bann iregilarite, dan sa Bidze ki zot menm zot pa’n vreman tonm dakor avek.  Me ki zot in bezwen respekte zot siperyer menm si zot in dir avek Egzekitif ki sa gato i manke zengredyen e pa ankor fini kwi.  Pou ki a lafen Seselwa i a kapab gout ki depi 40an pe kwi.  Me zot in bezwen kit lakwizin akoz Cabinet Egzekitiv in bezwen met bann raspay avek bi pou parti lepep re kontrol Sesel ankor ki zanmen i pou arive.   Seselwa fodre note ki dan sa Bidze tre pe i pou Seselwa parey mwan avek zot.  Me ki mannyer Egzekitiv in marye sa bann alokasyon, zot in fer sir ki sa pti gin ki pou ou i ansanm avek sa ta milyon ki pou zot.  Si mon oule blok zot milyon, mon pou bezwen sakrifye pou ou.

E sa nou pou ganny gete konman  bann ki le pini Seselwa.  Vwala nou bann limitasyon ki nou pou rankontre e si nou fer sa zot pou akiz nou tou kalite me i kler ki bokou lanmson in ganny mete parmi sa detrwa bout bacon ki apel Bidze.  Eski se sanmenm sa gato ki mazorite Seselwa ti pe espere?  Minis silvouple eski a lafen de fen sa gato in vreman kwi?  Eski ou santi ou konfortab pou anmenn sa kalite appropriation?  Eski i bon pou nou le pep Seselwa?  Mon ti ganny en pti problenm lot fwa avek ansyen Minis Larose akoz mon ti kestyonn li sa bann move frekantasyon Parti Lepep.  Konman en frer ki krwar dan lazistis mon ti  senpleman donn li en lendis pou fer atansyon avek sa bann move konpannyon.  E mon kontan ki a lafen defen son lizye i ouver e in ale avek son dinyite entakt.

Mr Speaker mon’n viv avek zot sa bann imen.  Mon konn zot tre byen mersi – ledan koray – leker kannal.  Zot pou riy avek ou devan ou an giz pou donn ou lespwar, me deryer ou zot pou noy tou ou lespwar.  Zot menm kapab sas lape lespri e donn lenpresyon ki ou fou zis parey ler nou lo sa kote latab, nou ti lite e demande pou annan en logmantasyon saler.  Kot-a- kot avek stabiliz to lesanz.  Nou ti ganny dekrir konman ‘fou’, ‘pa serye’, ‘iresponsab’ e dir ki nou pe fer politik bon marse, popilis.  Me ler zot sa i ok.  Minis pa pran nanryen personnel akoz mon pe adres sa pos me non pa ou koman sa endividi.

Sak fwa ki mon’n ganny sans obzerv ou dan sa debat ti’n ariv en ler konmsi mon ti krwar ou’n fini degout sa travay.  Me pa dekouraze Minis.  Zet sa travay lo LDS e ou a vwar nou kapabilite konpare avek lot kote latab ki pe rod formasyon LDS dan prosen Gouvernman.  Pa rod nou zot, pasyante zot.  Me sa ki mon dir zot se nou, nou pou donn zot tou lo lot kote latab avek zot bann konpatriyot en plak ‘’L savedir e plak ‘Learner’ pou me lo zot ledo e aprann avek LDS mannyer pou gouvern sa Gouvernman.  Sa mon asire.

Mr Speaker avek ou permisyon les mon profite pou koriz sa move persepsyon e presedans ki bann Manm  Parti Lepep pe toultan penn. Nou annan SS Payet e nou anvi dir li lo  sa kote latab.  SS Payet pa zanmen gard en move souvenir avek LDS.  Nou’n senserman krwar dan ou kapasite pou vin en Minis sirtou Finans.  Ou’n montre ou konpetan e nou tou lo sa kote latab nou krwar dan ou abilite. Nou’n atas bokou valer avek ou konesans sirtou mannyer ou eklersi nou bann konsern sa dernyen 2an.  Nou ti zis anvi protez ou, akoz nou kontan ou.  En zenes egzanpler nou vreman  konsernen avek ou.  Sa ki pou ou personn pa pou kapab pran  kontinyen sa travay!

Minis atraver ou Mr Speaker ler mon ti pe ekout premye bout Bidze par ou Minis dan mon lespri mon ti picture e bon groser bout bacon ki ti pe vini e seselwa ti pe al benefisye.  Sa lentrodiksyon ti donn mwan lespwar anfen e apre ki Minis ti’n vir vir sa bout bacon en pe tro detrwa gro lanmson i aparet en sel kou an gran, e mon’n fini ganny lafreyer.

Mon annan rezon eksprim konsern akoz zabitan Baie Lazare in konfye mwan pou defann zot lentere e i normal pou pa pran gran risk sirtou  avek Parti Lepep.  Mon konn zot tre byen.  Nou’n trouve dan lepase ki sak fwa laverite in sorti dan Lasanble Nasyonal bann Manm Parti Lepep dan Lasanble zot sel defans se pran laraz, gronnyen, fer bann latak personnel lo diferan Manm LDS menm denigre nou.  Zis parey dyab ler ou anvoy delo beni lo zot, zot ravaze.  Si ou montre zot lakrwa zot afole e revolte. Si mon pe koz mansonz Seselwa fer sa remark.

Minis pa pran nanryen personnel me ler mon pe get sa Bidze i fer mwan realize ki Parti Lepep pa ankor arete avek sa move vilen manni.  Mwan mon rapel sa manni ‘politik zourit.’  Kot zot tous e pti lapat avek ou fer ou vin vilnerab, anbet ou swa akoz   ou lafen swa akoz ou dan bezwen swa akoz ou andete eksetera.  E o moman ki zot donn ou sa faver plis ki 6 ou 7 lapat pe antour ou e pe met pare pou trangle ou, swa pou tyonbo ou, swa pou anpay ou, sis ou dan en fason ki ou pa pou zanmen liber ou avek zot.  Konmsi koze ‘’zis lanmor ki kapab  separ zot.’’  Sa ‘’politik zourit’’ in anzandre dan zot lapo.  Menm dan tou zot fason fer.  Menm si Onorab William i oule ale sa 6 lapat in tete li e mon krwar si i sape son bout lapo pou bezwen reste. ‘Plito lanmour ki viv dan lesklavaz ‘ Onorab.  Kit lapo avek zot me al avek ou dinyite entakt.  Pa trakase Onorab …

 

(APPLAUSE)

 

HON FRANCOIS ADELAIDE

LDS a donn ou plaster e i a geri ou blesir amwen ou’n liber ou avek sa ‘politik zourit.’ Mon’n fatige tann ou kriye ayoyo e mon’n fatige war zot pe reprimann ou dan sa Lasanble swa menm an deor sa Lasanble.  Laplipar Kreol seselwa pe al ganny apepre R250 logmantasyon. Parti Lepep pe sant laglwar konmsi sa i en ta larzan.  Eski zot pa touse?  Zot leker pa fermal bann MNA Parti Lepep pou ek bann Seselwa krwar ki apre tou sa sakrifis nou’n fer tou sa letan nou vo zis R250 an plis?

Eski zot viv zis dan sa Lasanble zis pou protez zot bann dakor abizer, profiter ki’n ris avek propriyete, leritaz e lasyer sa pep? Eski zot in viv dan sa L asanble pou zis vin met retar dan sa   nouvo Sesel ki Seselwa in edike depi son eleksyon lannen pase me ki zot ti vole e detour rezilta.  Eski zot in viv dan Lasanble zis pou zot vin maske sa bann move pratik tel i koripsyon an menm tan vin en rubber stamp zis pou approve bidze 30minit parey zot ti fer oparavan?  Gronnyen mangonnen me sa letan in fini.  Met dan bin listwar. Zot pou bezwen fer parey LDS i dir zot fer.

Eski se sa ki zot apel Msye Faure pe travay?  Eski se sa ki zot dir Msye Faure i serye?  En Bidze avek en logmantasyon saler pou nou tou i fer tou dimoun zwaye me i egalman enportan ki nou stabiliz nou bann pri komodite e servis ki anfen nou pa pe trouv nou parey Zimbabwe kot Seselwa pou bezwen al ek en bouret larzan pou al aste en pake dipen.   I vreman enportan pou stabiliz nou to lesanz devis etranzer akote nou Roupi.  I pa en keksoz ki enposib.  Si dezormen Lalwa i ganny ranforsi e tou larzan ki Sesel i zenere swa atraver biznes lokal swa aletranze i ariv dan nou kont Sesel. Nou kapab fer li en Gouvernman responsab i kapab fer li.  En Gouvernman LDS osi pou kaba fer li.  Aksepte Msye Faure avek son parti divors zot fay.  Zot napa sa konpetans dirize.  Me sa ki zot pe fer se les letan pase, dormi lo file anpes keksoz avek bi met blanm lo LDS e dir ki ler nou’n vini nou pa’n fer nanryen.  Me mwan mon pe met lepep Seselwa okouran ki nou’n met bokou larzan dan bann proze sa lannen me Gouvernman pa’n depanse akoz zot vreman pa serye e zot pa efikas.

Tribinal Later, akoz ki i pa ankor komans son travay?  Bokou Seselwa pe espere dan plas al fer en case Ankour avek en pri parfwa egzorbitan alors fer lazistis sa bann dimoun zot in fini deza perdi donn zot sa privilez silvouple.

Mr Speaker lo sa zafer later, mon krwar osi nou annan en plot lo konblaz mon annan sa dokiman lo konblaz si petet nou annan ou permisyon nou ava project lo screen nou ava idantifye e petet nou ava kapab re-anmenn ankor larzan dan Kof Seselwa si nou kapab fer sir ki sa later pa ganny pran – pou zis endividi me ki lepep Seselwa antye i ava benefisye. Akoz nou’n peye pou konblaz e mon krwar nou tou nou annan par ladan parey zot abitye dir.   Mr Speaker nou kapab project?

 

(laughter)

 

MR SPEAKER

Kontinyen avek ou repons Onorab.

 

HON FRANCOIS ADELAIDE

Ok Mr Speaker mersi apre nou a get ladan.  Koripsyon e soutirer i la baz tou nou problenm.  Tan ki sa size pa ganny adrese dan son totalite Sesel e Seselwa pou kontinyen plere san ses e etranze pou kontinyen diriz, nou abiz nou e profit lo nou.  Nou dan LDS se pa sa ki nou anvi pou nou pei ek nou pep.  Nou anvi tou le meyer pou nou dimoun.  Nou anvi donn zot en vre welfare.  Sa lasistans ki zot pe gannyen konmela se pa li welfare, sa se lasarite.  Bann dimoun o plase ki pe ganny welfare dan sa pei.  Aret anbet nou ek sa zafer welfare.  Mon repete lasarite ki Seselwa pe gannyen.

Mr Speaker Minis in fer en deklarasyon ki travayer dan Gouvernman pou ganny en logmantasyon dan sak lannen ki zot fer dan servis e sa i pa pou al pou bann dimoun ki pe fer Kontra.  Mr Speaker mon santi ki Minis petet i ti ava al re get sa bout akoz lo Kontra pa lo Kontra si ou fer 5an dan en travay ou fer 10an i letan ki ou’n akimile e parey Onorab Ramkalawan ti fer resorti mon krwar i annan en lenzistis ki mon krwar nou devret gete pou korize.  Mr Speaker mon pa’n tann nanryen lo Lor Ble, mon pa’n tann nanryen lo Lekonomi Ble. Ki’n arive avek sa zafer Lekonomi Ble ki nou’n koz lo la diferan repriz?  Eski in sorti dan sa Gouvernman?  Swa eski in vin en zafer prive?  Eski parti pa’n diviz ankor e sakenn pe trenn zot prop azanda? Mr Speaker nou bezwen en pe plis detay pou nou konnen si sa progranm pou bouze ouswa si i pa pou bouze pou nou kapab donn Seselwa plis lespwar.

Ler mon  lo sa size Mr Speaker, parey Dr Larose ti dir en min lor ki pe espere pou li ganny eksplwate se lo lanmer.  Nou’n tann Minis koz lo la dan son Statement lo ki mannyer nou pou eksplwat sa resours pli efikasman.  Minis mon ti a kontan met ou  latansyon ki nou osi dan Baie Lazare nou annan pa mal peser zenn konman pli aze e nou pe kontribye signifikan dan sa lendistri.  Nou’n form en lasosyasyon ki ler mon ti tann ou pe koz lo met WIFI dan lekol mon ti met en note.  Lasosyasyon Peser en pe letan in fini i annan free WIFI lo lans Anse Poules Bleues.  E a dispozisyon nou peser e nou bann zanmi peser pou fasilit zot bann travay ek zot bann kominikasyon.  Sa bann zonm e fanm zot vreman inovativ akoz zot anvi en meyer Baie Lazare.

Minis Lasosyasyon Peser i dan en dilenm akoz nou morso later ki ti’n ganny emark pou nou proze bazar en pe letan pase.  Ou Gouvernman in vann avek en prive akoz zot ti napa larzan sa letan. Zot ki dir. Later ki Gouvernman ti pran avek en prive pou met a dispozisyon Baie Lazare pou nou devlopman in ganny re vann avek en lot prive.  Sa tranzaksyon Mr Speaker mon konsider li konman ilegal. Later ki Gouvernman in acquire pou lentere piblik pa kapab ganny re vann avek prive dan en fason ki  Parti Lepep in fer.

Mon’n deza eksplike kot ansyen Minis Dugasse ti vin  arpant sa kare later li menm en zour 6er diswar e pli tar nou ti aprann ki later zabitan Baie Lazare in fini ganny vann.  Ozordi Msye Faure i re apwent li pou ansarz nou larzan pansyon.  Mon re dir ankor en fwa ki zabitan Baie Lazare pa an faver sa lapwentman.

Msye Faure in ler pou li aret pran zabitan Baie Lazare pou bann lenbesil e pa pran nou bann laviktwar ki nou’n fer dan eleksyon konman en lazar.  Pou peser e zabitan Baie Lazare épanoui dan nou domenn lapes, nou’n fini ekrir Msye Faure dan son kapasite konman Prezidan en let e fer en demann pou nou re ganny nou later.  Plan bazar in fini ganny fer.  PS pou Lapes in fini konfirmen ki nou proze e konsep i enn ki tre enklisiv.  SS pou Finans in fini don nou, nou CSR certificate pou ou rod nou bann Donasyon e Grant.  Nou’n ganny garanti en sonm plis ki R1milyon pou konmans nou bazar, me nou’n pri akoz nou later.  Sa Gouvernman Parti Lepep in kas anba e zot in vann nou later malapropo.  Minis nou pa pou bezwen ganny problenm nou de.  Ou en Minis cool.  Mon ti a swete ki ou anmenn sa konsern devan dan Cabinet Minister e deal avek sa imedyatman pou ki Baie Lazare i ava re ganny son later e nou ava mont nou bazar.

Minis sa propriyeter later ki nou pe koz lo la i en rezidan Baie Lazare.  In toultan pare pou negosye avek nou afen ki nou kapab kordin nou bann aktivite.  In menm montre mwan tou son dokiman i annord apropo sa later, me an realite li osi in ganny vole, li osi in ganny trike.  Parti lepep in fer li aste kabri dan sak. Se sa ki nou apel voler dan pitenge Mr Speaker.  In pare pou li rann sa later me avek kondisyon ki i ganny rann tou son larzan lo to lesanz ozordi avek son lentere.  Mon panse ki tre soudennman zabitan Baie Lazare i ava ganny en larepons lo sa size e nou pa bezwen vwar nou pe al lo semen pou nou al demann Lalwa pou entervenir.

Mr Speaker mon ti a kontan met a latansyon Minis osi lo sa size resours maritim.  Detrwa zenn dan mon distrik in met a mon latansyon pou demann ou konman Minis Finans pou get dan posibilite met en Scheme pou asiste bann zenn ki ti a anvi ganny mwayen finansyel pou siport zot pou al fer bann kours spesyalizasyon, menm bann degre dan domenn lapes.  Sa sekter i enn ki pou sirman  bezwen plis Seselwa kalifye a lavenir pou ede devlop li.  Zot in eksplik mwan an se moman zot vreman ganny difikilte ler zot pe plan pou zot al study e fer en karyer dan sa domenn. Silvouple Minis atraver ou Mr Speaker, mon konnen ki ou kapab fer keksoz pou nou bann zenn anbisye.

Nou devret kree en dyalog pli profon avek sa bann zenn  e regarde ki mannyer Gouvernman i kapab asiste zot e fer zot rev vin en realite.  Mr Speaker sorti dan bato mon sot lo semen.  Minis i annan preski 2an depi ler mon pe koz lo en proze ki apel West Coast Development Project.  Sa i en proze ki date depi ler nou ansyen Onorab Lucas ti ankor dan Lasanble.  Ki’n arive ek sa proze?  Tou dernyerman mon ti demann Minis Charlette a propo sa proze e i ti les mwan konpran ki sa ti pou ganny demare an Zilyet sa lannen.  Akoz ki zot ankor pe met bar dan larou zabitan Baie Lazare? Mon’n vwar dan zot achievement, zot in mete ki plan in fini fermen.

Sa pou nou distrik i pa en achievement akoz sa proze ti’ dwatet fini e nou achievement ti pou ler nou pe servi li.  Bokou lenfrastriktir tel ki bus shelters, pavement, street light, proper binsite ki ti pou fasilit nou lavi.  Zabitan in fini peye.  Donasyon lo nou par in fini donnen.  Donn nou sa ki pou nou silvouple.  Minis donn nou en parol dan ou summing-up lo sa bann size ki nou’n mete apropo distrik Baie Lazare.

Dan sa Bidze mon pa’n tann nanryen pou soulaz bann zabitan Sid e Les Mahe apropo sa zafer trafik bloke bomaten avek aswar.  Mr Speaker bomaten mon sorti kot mwan 6.30 ler mon ariv anvil i 8.15.  Ou kapab konpran ki mon pe eksplike.  Nou’n fatige avek sa tel sityasyon.  Mon ti panse ki Egzekitiv ti ava fer en bon progranm dan sa
Bidze ki ti a mitigate sa konsern.

Nou bezwen bril plis karbiran tou le zour dan lasemenn.  Bokou propozisyon nou’n met devan Gouvernman tel ki overhead crossing.  Plis layby i pou fasilite anbarke e debarke.  Met plis zofisye lo semen.

Minis Pointe Larue kot roundabout ki pe arive?  Mon byen kontan poudir la mon’n trouve poudir depi Vandredi transpor in konmans sirkile dan sa rezyon.  E en konsern ki mon le met devan Lotorite, se ki in plis ki ler pou nou bar sa semen ki sorti kot bus stop Pointe Larue avan Airport akoz i kree bokou konzesyon e menm par-ler bann touris sirtou bann touris ler pe sorti apre sa hazard ki zot in pran dan avyon pou zot vini ou konnen i riske pou zot sorti lo Airport zis pou zot koupe i en lot hazard ankor, nenport ki keksoz i kapab arive.  So mon ti a kontan ki sa semen ti a ganny divert dan roundabout e ki sityasyon ti ava amelyore.

Mr Speaker apre bokou letan ki nou’n vwar CC monte avek bi pou amelyor sityasyon semen dan Sesel me ki pa’n zanmen realize pare sa ta larzan ki’n envestir atraver road tax ki ou’n peye Minis mon panse ki in ler pou fer en revi lo sa zafer CC transpor.

Sa i ede ogmant pri lavi akoz transportasyon i form en gran parti dan lavi toulezour.  R2.50 par CC i tro for sirtou pou bann pti loto e bann pti transpor ki fer minimum lenpak lo semen. Si mon memwar i bon CC transpor ti monte apropo transpor ki kas semen.  Mon panse nou’n kontribye tro bokou.  Kondisyon semen pa vreman a laoter sirtou dan Sid e Les Mahe.  Bann zabitan pe kontinyelman  vwar zot  pe aste pyes akoz semen pe deranz zot transpor.

Mr Speaker ou pa kapab trangle Seselwa pou pey lor kan an realite ou pe donn li kwiv.  Lanmod Onorab William ‘’enough is enough ‘’Mr Speaker.

Ankor sa size semen mon bann sitwayen i kontinyelman fer mon konpran ki apard sa move kondisyon semen i annan en lot problenm.  Zot santi zot irite par bann lapolis ki kontinyen harass zot lo sa zafer size ‘tint’.  Mon panse ki ler ki Gouvernman i vin avek en Polisi kler.  Pa kapab met tou sa responsabilite lo Komisyoner Lapolis ki deza annan tro bokou pou li fer.  In plis ki le ki swa en (S.I.) i vi dan sa Lasanble pou met en lafen avek sa bann problenm.

Mon pa pou kontan tande ki ler mon pe bwar en pti labyer pou Nwel ek Lannen ki mon zabitan pe bezwen al dan kaso zi akoz en pti bout ‘tint ‘lo son vit loto devan.  Swa i bezwen al Ankour pey sa R200 ki i fek gannyen dan sa pti logmantasyon.  I pou reste li zis R50 pou tenir sa mwan ki ganny konsidere konman pli long an 2019.  Mon pa anvi afront okenn zofisye lapolis avek drayver swa ek sivilyen.  Mon pe fer li mon devwar ki ler nou antre dan staz kominikasyon ki Lapolis i donn e detay kler lo ki mannyer larzan ki in an mase avek  sa zafer ‘tint’ lo vit devan e ki zot pe fer avek akoz mon pe panse ki ou Gouvernman i devret re anbours Seselwa zot larzan.

Bann lakonpannyen ki fer loto in  pran sa linisyativ e prezan zot pe enkli dan zot prodiksyon transpor akoz zot in trouv son benefis.  Eski Gouvernman pa devret mazinen pou rekonpans sa bann Seselwa pou sa bann  bon inovasyon ki zot in envante?

Eski i pa devret pe felisit sa bann Seselwa?  Eski Seselwa i devret ganny pini ler zot vin inovativ ? Silvouple met en lafen avek sa bann kalite harassment e amelyor relasyon ant lapolis avek sivilyen.  Pou annan en larout kot Seselwa i santi li an sekirite i bezwen annan bann groupman ki ede mentenir lord e kontrol lo larout piblik e dan kominote.  Nou lapolis i devret ganny en meyer deal pou sa kalite travay dir e nob.  Mon profite pou remersi SP Julienne ki pe ansarz rezyon sid.  E SP Tirant rezyon was ki pe fer zot mye pou gard sa de rezyon dan sa latmosfer kalm e an sekirite.  I pa fasil me avek korperasyon nou tou nou rezyon pou sirman enn meyer.

Mr Speaker sa travay polisye i merit ganny rekonnet pou zot travay.  Nou’n trouve ki zot in ganny neglize konpare ek bann zofisye etranze; ki swa Gurkhas swa lezot Lafors.  ‘Equal pay for equal work.’  Eski larzan pa ale avek sa bann zofisye lapolis Seselwa?  Silvouple in ler pou nou met en lafen avek sa bann lenzistis.

Nou pou demann detay lo lapey lapolis etranze konpare ek Seselwa e bann incentive pou ki Seselwa i a kapab konpare e gete ki mannyer sa Gouvernman i kontan nou bann Kreol Seselwa.  Minis donn valer nou lapolis. Met resours a zot dispozisyon.  Met plis incentive pou atrakte plis zenn dan sa profesyon.  Silvouple pa bliy nou Lakademi.  Zot osi zot bezwen latansyon ek transformasyon.  Se zot ki pou ede pou annan  en Lafors Lapolis pli efikas.  Minis get dan zot welfare.

En lot group lapolis ki mon anvi koz lo la se sa group ki pe kontinyelman persevere pou zot ganny zot larzan ki Gouvernman Parti Lepep in vole.  Mr Speaker se bann zofisye SVPD.  Bann zonm ek fanm ki’ met zot lavi konman en sakrifis, defann bann lezot sitwayen Kreol swa etranze kont okenn latak piratri swa okenn latak teoris avek bi mentenir lord ek lape lo kannal.  Akoz ki Gouvernman i bezwen vol zot konfyans, vol zot larzan, vol zot kouraz menm sey vol zot dinyite e donn zot lenpresyon ki zot fou ? Zot in bliye ki pa se tou sa larzan ki ti ganny allocate pou zot.  Zot in dir mwan ki fer Gouvernman konnen ki annan apepre 200 zot ki ankor pe pasyonan esper zot merit.

Mr Speaker an se moman la zot pe ekout mwan akoz mon’n ganny en lendikasyon ki zot dir mon fer tande zot lavwa e fer pase zot mesaz.  Zot mesaz i kler e fran.  Zot lizye in ouver.  Zot osi annan fanmir ki lizye in ouver.  Zot ti siport parti lepep dan eleksyon lepase.  Zot ti fer letour Mahe avek fizi e entimid voter.  Zot dir mwan demann en leskiz pou zot e zot osi dir LDS kontinyen lager e get dan zot welfare.

Mr Speaker en lot group travayer ki mon pou met plis lanfaz lo la se bann travayer SNYC.  Mon pa pe fer leksepsyon pou okenn groupman me atraver mon distrik mon’n trouve ki zot pa pe ganny sa lankourazman pou kontinyen travay avek nou lazenes.  Minis nou pou ensiste ki Departman Lazenes i vin dan sa Lasanble avek zot payroll e detay lo bann reminerasyon son bann travayer youth worker.

En group ki pe prepar e gid nou lazenes.  Nou lazenes se nou bann ranplasman demen.  Nou lazenes se nou asset ki nou bezwen envestir dan zot pou lavenir.  Nou lazenes se nou baton vyeyes.  Annou alor pran swen avek zot.  Sonny zot byen, bers zot, vey zot byen.  Donn zot tou de bon pou ki zot devlopman i ava moralman e efikasman bon e zot a vin bann adilt Kreol Seselwa responsab e disiplinen.  Minis envestir plis dan sa bann zenn.

Sa larzan pou sa Departman  pa ase.  Mon krwar ou ek ou lekip i kapab trouv li en meyer deal pou nou lazenes. E la mon profite pou mon quote ankor en kou.  CEO Lawrence.  ‘Nou pe fer fas avek en lazenes ki’n fini deside’.  En parol ki lour sa Mr Speaker.  En parol ki bann dirizan sa pei pa devret ditou pran li a lezer.  Mon santi, mon tris ler nou pe diskit lo sa Bidze mon annan zabitan Baie Lazare ki pe al ganny kit ater, akoz zot pe ganny pouse kot Banyan Tree.  Seselwa pe ganny pouse par etranze dan son prop pei.  Pa i fer ou ankoler Mr Speaker?  Pa nou annan totalman rezon pou dir avek Parti Lepep zwen nou dan sa konpanny DANNY OUT!  En Egzekitiv ti zwe inosan, inyoran dan sa ki’n arive kan zot konn fil e an egwir ki sa ti pou arive.

En Egzekitiv ki pe kasyet lenformasyon kan zot ti’n fini konnen tel tranzaksyon ti pe ganny fer.  Zot ti konnen ki sa bann travayer ti pe al ganny pouse.  Zot ti konnen ki fanmir sa bann anplwayer ti pou ganny afekte.  Nwel e Lannen pe vini.  Ki mannyer nou Lasanble Nasyonal pou santi nou apropo sa bann travayer Banyan Tree sirtou bann ki vreman annan en leker pou tou Seselwa?   Lo non latransparans rann kont e bon gouvernans LDS i demande ki keksoz tanzib i ganny fer pou sa bann dimoun silvouple.

Mon mesaz pou sa bann travayer sirtou bann ki sorti Baie Lazare pa santi okenn soulazman si ou pe sorti tou sa zistans pou ou vin kot Lasanble Nasyonal Mr Speaker – pa pran mwan mal e vin vwar Onorab De Commarmond e espekte ganny solisyon.  Napa nanryen mal kont Onorab De Commarmond, me mon pa oule mon bann zabitan vin gaspiy plis zot letan.  Vwar en lot dimoun silvouple.  Zwazo menm nik kakatwa menm bar.  Li osi i ti konnen ki Banyan Tree ti pe ganny vann.  ‘Ledan koray leker kannal’ parey mon’n dir.  Pa ekspekte nanryen avek sa bann dimoun.  Zis ou vot ou partisipasyon pou fer laplenn plen, swa pou ou bous trou.

Gouvernman Lokal i sa seksyon dan Gouvernman  ki mon’n kapab travay pli byen avek sa lannen.  Anba direktiv PS Marie Celine Vidot nou’n vreman realiz detrwa proze enteresan.  Semen ki zabitan ti’n ganny promet depi 25an pase in afen konman ganny realize.  I pa’n fasil, me avek negosyasyon e persistans nou’n kapab fer sa rev vin e realite menm si mon lenspirasyon pou pouse pou sa proze sete pou benefisye madanm – defen madanm Duval kantmenm in kit nou me mon kontan konnen ki son bann zanfan i ava kapab a lafen benefisye.

Mr Speaker semen pou lafanmir Legaie e konfyans i reste mon priyorite avan sa lannen i fini.  Mon pe demann Gouvernman lokal pou nou kontinyen lo sa bon fason travay e kit nou langazman avek nou progranm pou ki Desanm sa bann zabitan zot a kapab zwenn bonnonm Nwel dan zot loto.  Mon ti aprouv Bidze lannen pase pou realiz sa proze.  Mon konnen ki kantite letan  sa bann fanmir pe espere.  Mon konn zot konsern.  Silvouple larg lanmen e lipye sa bann fanmir.

Mon pou demann plis leklersisman lo sa proze dan Staz Komite.  Minis mon’n apresye ki travayer Seselwa sak lannen ki zot pou travay dan Gouvernman zot pou ganny en pti incentive.  Sa i en bon keksoz me parey mon’n dir oparavan mon ti a kontan ki napa lenzistis dan sa domenn.

 

MR SPEAKER

Annou wrap-up Onorab.

 

HON FRANCOIS ADELAIDE

Mr Speaker ok mon ava pran ankor de pti minit apre mon ava – i annan tro bokou keksoz pou dir lo sa Bidze ki ou menm ou trouve si nou koze nou pou ariv ziska demen bomaten.  E mon ava wrap-up Mr Speaker.

Lo mon dernyen topik.  En size dan sa Bidze ki mon’n tonm anmoure avek se pa lot ki domenn lagrikiltir.  Zot a rapel ki mon  ti fer li mon devwar avek lekip LDS pou table en Mosyon e pou met laklerte lo size lagrikiltir e tou bann difikilte ki sa sekter pe rankontre.  Nou ti menm al en vizit kot SIAH pou sey konpran zot difikilte e laspirasyon.  Bokou lide e sizesyon sa Lasanble ti  diskite e propoze.

Mon’n tann Minis koz en bon pe lo sa sekter ki sirman si i vreman annan volonte pou re donn sa sekter lavi, nou pou kapab fer li.  Mo santi mwan rekonforte avek mon de koleg ki mon ti ganny sans zwenn zot ler on ti al vizit Grand Anse Mahe.  Sa i Mr Stravens avek Mr Nancy.  Nou ti NYS ansanm e mon fyer pou vwar zot pe ansarz bann pozisyon dan sa sekter.  Espérons ki zot ava siport tou bann akter dan lagrikiltir e remet nou sekter lo bon semen.

Lo kote mendev pou fer sa sekter al pli devan mon ti ava apresye si Minis Lagrikiltir i a fer li son priyorite anmenn tou dimoun ki annan lentere dan sa sekter.  Mon agase e mekontan kan mon vwar kreol Seselwa avek bann bagaz solid, ki mannyer i kapab ede pou fer bouze sa sekter devan me zot pe ganny eksklir e met de kote dan bann negosyasyon dan bann forum dan bann Board, dan bann meeting, workshop, eksetera.  Sa sekter i apartyen a nou tou.  I pou tou Seselwa.  Sa ki met plis zefor, resours, inovasyon byensir i pou bouz pli devan.

Mr Speaker mon oule enform Seselwa ki apre ki mon’n al fer resers mon’n konstate ki pri lavyann pe al ogmante ler sa nouvo taks i vin an for lot lannen.  Enportater pe deza pey 15poursan lo poul enporte e sa nouvo taks pou fer li pey ankor 15poursan ki pou fer 30poursan.  Mr Speaker nou ti a kontan Minis eksplik nou si sa nouvo taks i enn nouvo ouswa i enn ki ti la akoz ler ou dir nouvo mon krwar i nouvo, pou ki Seselwa i ava konpran.

Mr Speaker avan mon terminen nou dan Baie Lazare nou pa an faver okenn aksyon ki Gouvernman pe fer pou afekte pri lavi.  Tou keksoz ler ou fer ou bezwen fer li avek bon planifikasyon ki  mwens lefe ava ganny resanti lo nou pep Seselwa.  Minis mon ti a kontan ki dan ou summing-up vi ki ou’n dir lo kote kilo pou lavyann i annan en taks ki pe al ganny monte lo la, me parey mon’n dir tou kou dan sa Lasanble nou ankor pe mezir koson ki mannyer nou pou kapab konpar kilo avek santimet?  Eski nou pou servi kilo?  Zabitan Baie Lazare servi santimet? Mon ti a kontan ou donn en leklersisman lo la silvouple.

Pou fini Mr Speaker mon oule fini an dizan, mon oule osi avan mon fini remersye mon pret laparwas Per Yves pou son devosyon e devouman pou ankouraz bann formasyon bann lasosyasyon tel ki zonm St Francois ki dirize par nou ansyen MNA Lucas e tou lezot groupman pou remet Baie lazare lo semen linite, moralite e progre. Kontinyen sa bon travay.

Mr Speaker mon pe remarke ki apre sa bann deliberasyon ki nou’n fer apropo Bidze bann voler ti’n taye, me la nou konmans vwar zot pe retournen.  LDS met nou avan gard.  Seselwa kit zot lizye ouver e raport okenn ka frod e nou,  nou a met lekleraz lo la.  Mon konvenki ki nou dan LDS nou pou kapab tir Sesel kot i ete e rod en meyer lavi pou nou pei.  Mr Speaker mon pou dir ankor en kou viv linyon demokratik Seselwa.  Prensip Parti Lepep ‘ZET ANBA!’  Lord deliver Seychelles.  Mersi Mr Speaker.

 

MR SPEAKER

Mersi Onorab Adelaide. Onorab De Commarmond.

 

HON CHARLES DE COMMARMOND

Bonzour Mr Speaker.  Mr Speaker anba order 35(1) mon ti le zis fer en pti leksplikasyon arising from alegasyon ki’n ganny fer.  Mon le dir ki Banyan Tree i trouv dan distrik Baie Lazare.  Bann travayer, bann travayer lower Takamaka dan sa zanmirant laba anler me bann travayer zot i telefonn mwan pa mwan ki’n telefonn zot, zot in telefonn mwan e zot in demann en meeting ek mwan swivan zot bann problenm laba e mon ti zwenn zot letan mon ti pe koz avek zot Onorab Ferrari menm in pase in vwar e mon’n aranz meeting avek Minis, nou’n ale kot Minis, Madam Telemaque e nou’n fer en bon meeting.

Madam Telemaque pe follow-up bann case mon’n fek koz avek li over the weekend e sipoze ozordi i pou dir en keksoz dan sa direksyon.  Savedir ki montre ki swivan meeting ki mon’n fer avek zot letan in kontakte mwan in aksyon imedya ki’n ganny fer e mon’n menm fer interview avek tele Sesel lo sa issue e TELE Sesel in fer en bon reporting e keksoz pe bouze.

E mon siport bann pwen ki Onorab Basil in dir dan sa ban direksyon pou fer sir ki nou bann travayer Seselwa e mon ti dir sa osi dan mon entervansyon e travayer Seselwa i bezwen ganny gete an premye e bezwen fer sir ki zot pa ganny abize dan zot bann relasyon travay dan bann lotel.  Mersi.

 

MR SPEAKER

Mersi pou, mersi Onorab De Commarmond pou sa leklersisman. Lo nou kote Lasanble osi tou sa 29 travayer ti demande pou vwar nou e Deputy Speaker in ganny sans pou vwar zot pou koz avek zot.  Me sa ki kontinyen reste en konfizyon lo size sa bann travayer se ki zot in ganny dir zot in ganny fer redundant e nou ,nou konn tre byen menm atraver Air Seychelles se ler en travayer i ganny fer redundant se sa pos osi tou i vin redundant. Be lenformasyon ki mon lofis pe gannyen se ki deswit apre ki sa bann travayer in ganny met deor etranze pe occupy sa bann posts. Sa ankor i vedir poudir lo kote Minister osi tou i annan problenm zot pa pe fer en bon swivi.

So bann travayer pe ekout nou deor e petet mon pa konnen nou ava regarde konman keksoz pou ale si apre ler nou fini deba Bidze nou bezwen anmenn Minister Lanplwa ek Imigrasyon isi pou kestyonnen nou ava fer li posib akoz i annan 45 fanmir ki la, tou keksoz i an dout pou zot e parey plizyer Onorab in dir Nwel ek Lannen pe vini.  Me ankor dan sa laliny kot bokou bann Manm in fer sorti i annan sa sityasyon. Imigrasyon i bezwen konnen ki rezon sa bann etranze in antre dan pei.

E i ti bezwen konnen poudir zot pe al pran plas bann travay ki pe ganny okipe par Seselwa. GOP i ganny donnen par menm Minister ou vwar.  So Lanplwa avek Imigrasyon ki tonm bann menm Minister zot osi tou zot annan en problenm la mon krwar i annan en problenm zot pa pe monitor keksoz byen.  Me nou ava regarde ozordi apre mon mazinen pou annan en Statement from Minister Imigrasyon ek Lanplwa me  de la nou ava regarde ki Lasanble pou fer.

Bon mon konnen nou’n sot en pti pe nou letan me mon tre fleksib lo letan mon pa zis tenir en Manm lo son 30 minit me- nou pou pran en Break ziska 11er edmi.  Ler nou pou antre nou  a pran Onorab Sebastien Pillay e larestan nou ava kontinyen apre midi.  Ok so nou ava Break e nou ava retournen 11.30.

 

(BREAK)

 

MR SPEAKER

Bon nou ava kontinyen nou travay.  Mon ava donn laparol Onorab Sebastien Pillay.  Onorab.

 

HON SEBASTIEN PILLAY

Mersi Mr Speaker.  Bonzour tou manm Onorab.  Bonzour tou bann dimoun ki a lekout e bonzour bann ki aletranze osi pe ekout nou.  Mr Speaker sa prezantasyon Bidze ki Minis in fer avek nou dan sa Lasanble in enn ki’n anmenn plizyer largiman – in an menn plizyer deba e in anmenn plizyer propozisyon dan laliny pou nou kontinyen amelyor lavi lepep Seselwa.  E i enportan Mr Speaker pou nou reste baze lo lesansyel sa Bidze e lenportans bann eleman ki’n anmennen dan sa Bidze.

Mr Speaker sa Bidze in osi prezant loportinite ki Gouvernman in gannyen atraver sa lannen ki’n pase pou li met an plas bann mezir neseser pou kontinyen fer ki nou lekonomi i kontinyen progrese e ki nou pei i kontinyen avanse.

Mr Speaker mon kontan pou vwar dan sa Bidze ki Gouvernman pa’n depart from bann eleman enportan ki nou’n koz lo la souvan dan sa Lasanble pou fer ki nou annan  en pei ki pli an bonn sante, en pei ki pli sen en pei ki pli ini.  E sa i vreman enportan pou nou dan sa Lasanble Mr Speaker.

Mr Speaker ler nou regard dan sa Bidze par egzanp si nou regard lo bann pwen enportan tel konman par egzanp dan Housing Finance Scheme Gouvernman in ankor met larzan dan Housing Finance Scheme.  In ankor donn loportinite Seselwa pou li ganny loan pou li kapab fer son lakaz.  I annan en sonm 18milyon ki’n ganny allocate pou sa. Mr Speaker Gouvernman in ankor met larzan dan home improvement scheme for pensioners.  Sa ankor i montre komitman Gouvernman pou li reste ferm lo bann prensip kot bann dimoun ki pli aze i kapab ganny akse avek kredi ki natirelman zot pa ti pou gannyen atraver bann labank prive, pou ed zot avek bann reparasyon oubyen bann travay ki zot bezwen fer pou zot lakaz.  Sa i enportan ki nou koz lo la Mr speaker.

Mr Speaker mon byen kontan pou vwar osi i annan sa Small Claims Tribunal.  I annan larzan ki’n ganny mete pou sa Small Claims Tribunal.  Akoz?  Akoz dimoun i bezwen depans en kantite larzan pou al fer bann prosedir legal ki atraver sa Small Claims Tribunal ou pa bezwen depans sa kantite larzan pou al fer sa.  Sa osi i ankor en mezir enportan kot Gouvernman in reste ferm lo son prensip pou kontinyen ed nou  bann  kous nou sosyete ki pa neseserman annan sa mwayen pou kapab fer sa bann claims ki zot ti a anvi fer.

Mr Speaker kontrerman avek sa ki’ ganny dir lo lot kote latab, sa Land Compensation Tribunal in ganny set up depi milye 2018 ok e i annan en Bidze ankor ki’n ganny allocate pou li fer son travay.  Nou’n vwar osi Mr Speaker The Youth Employment Scheme i annan larzan ankor ki’n ganny mete e sa i enportan pou nou ankor fokaliz lo bann keksoz ou bann pwen fondamantal ki sa Bidze i anmennen.

Youth Entrepreneurs Scheme Mr Speaker.   Sa osi i annan larzan ki’n ganny mete ladan. E ankor en fwa i montre komitman Gouvernman pou li ankouraz bann zenn antreprener pou zot devlop zot prop biznes, devlop zot kapasite e pou zot partisipe.  Mr Speaker tousala i montre nou poudir sa i en Gouvernman ki annan en plan ki pe travay.  E nou lapros lo sa Bidze i bezwen en lapros kot i byen nou dir i byen e kot i mal nou kritike da en fason konstriktif.

Me sa ki mon’n vwar Mr Speaker lo lot kote latab.  Mon pa’n vwar kritik konstriktif.  Sa ki mon’n vwar Mr Speaker se en menm dyalog ki’n toultan ganny fer pandan sa bann menm lannen par Lopozisyon da sa pei.

 

(APPLAUSE)

 

HON SEBASTIEN PILLAY

E in enn menm dyalog ki’n anmenn  nou a e pwen kot nou pe devlop ou en latitid negativ dan nou popilasyon, dan plas fer zot santi zot empowered e pran responsabilite dan nou pei.  E mon pou ilistre sa Mr Speaker par donn bann legzanp konkret kot bann Manm lo lot kote latab pa’n fer zot resers pou vreman regarde si dan Bidze in annan eleman ki anrisi zot distrik.  Mon a donn legzanp Mr Speaker.

Nou’n tann en Onorab dir par egzanp ek klinik Anse Aux Pins, napa larzan pou klinik Anse Aux Pins be si nou ti’n pran letan pou get dan liv Bidze nou ti ava vwar poudir i annan R450mil in ganny mete pou klinik Anse Aux Pins.  Nou tann Onorab ki’n koz lo Plaisance – lo bann keksoz ki’n ganny fer pou distrik Plaisance.  Me Mr Speaker si nou ti regard dan Bidze nou ti ava vwar poudir i annan devlopman ex-Murray, i annan devlopman klinik Les Mamelles e i annan larzan ki’n ganny mete dan Bidze pou sa.  So annou pa sey vin bat latet pep Seselwa zis pou nou fer kritik me annou rod en fason pou nou fer li dan en fason konstriktiv ki nou a kapab anrisi sa ki pe pase.

E Mr Speaker i enportan ki nou met lanfaz lo la akoz lepep Seselwa deor pe ekout nou pe rode ki solisyon nou annan.  Ki plan nou annan ki tanzib pou nou fer avanse pei.  Be ler nou koz lo plan Mr Speaker nou tann Lopozisyon dir ek nou koumsa zot pou kit zot plan safe ziska ler zot ariv o pouvwar. Alors lekel ki zot pe met an premye?  Eski zot pe  me an premye Seselwa?  Oubyen zot pe met an premye zot lanbisyon pouvwar?  Sa i enportan pou nobou idantifye akoz ler ou met ou plan safe pou ariv o pouvwar ou pa delivre ou pouvwar me pandan sa letan ki sa pep i la in elekte ou ki’n met ou la, ki’n met sa konfyans dan ou pou reprezant li kwa ki ou annan pou ou dir li?  So sa largiman ki nou pou kit nou plan safe pou ler nou ariv o pouvwar i pa fer sans i tonbe.

 

(APPLAUSE)

 

HON SEBASTIEN PILLAY

Sa ki nou devret pe fer se ki nou devret pe travay pou nou kapab fer avanse lavi pep Seselwa.

Mr Speaker bomaten ler mon koleg Onorab Hoareau in koze bokou lopozisyon in soke.  Zot in soke me se sa.  Se sa lesansyel nouvo lapros ki parti lepep pe pran.  Lesansyel nou lapros ki nou pe pran se ki kot i annan en keksoz ki mal nou pou dir i mal, me nou  pa pou dir tou keksoz i mal akoz nou pou tonm dan en baz negativite.  Sa lakaz bib Mr Speaker ki Onorab Georges in koz lo la se li ki’n tonm ladan Mr Speaker.  In tonm ladan ou konnen akoz mon pou dir sa Mr Speaker akoz Onorab Georges i bliye poudir Lopozisyon ti pas Lalwa pou amann Lalwa AML, pou amann Lalwa POCA ki ti fer sa de Lalwa vin bokou pli fay ki zot ete ozordi.  E zot pa oule aksepte sa akoz sa bann Lalwa ler ti ganny amande pa ti benefisye lamazorite lepep Seselwa!  Ti benefisye ban dimoun, ban gro dimoun ki pe fer biznes dan sekter offshore.

 

(APPLAUSE)

 

HON SEBASTIEN PILLAY

Se sa ki’n arive Mr Speaker e zot pa oule aksepte sa ziska ozordi e menm i annan Onorab lot kote latab ki i santi poudir zot vot lo sa Lalwa zot pa ti devret vot lo la me Mr Speaker, me Mr Speaker la demokrasi i montre nou ki poudir ozordi LDS pe vin egzakteman sa ki zot in kritik nou pou ete dan lepase.  Zot in vin en parti ki pa le practice demokrasi among zot prop ran.

E sa Mr Speaker i danzere.  I danzere pou nou pe Mr Speaker.

 

(APPLAUSE)

 

HON SEBASTIEN PILLAY

Mr Speaker ler Onorab William i koz lo en size dan Lasanble – i koz lo en size konman Manm Elekte pou distrik Grand Anse e nou dan sa parti nou respekte akoz distrik Grand Anse in elekte li pou reprezant zot.  Me lo lot kote latab zot pa kapab divors from en lopinyon ki zot in avanse e zot tou zot bezwen koz lo menm keksoz, fer menm latak, fer menm kritik san ki zot regarde kwa ki sa bann kritik ki zot pe fer pe anmennen.  Mr Speaker i enportan sa.  I enportan ki lepep Seselwa i realiz sa.  I enportan ki nou  realize ki nou konman en pep nou bezwen rise above.  Nou bezwen sanz nou fason fer politik dan sa pei.

Mr Speaker nou’n koz lo kritik personnel me eski zot aveg pou vwar ki sa parti ki kritik dimoun plis personnelman dan sa Lasanble e an deor se zot menm lot kote latab!

 

(APPLAUSE)

 

HON SEBASTIEN PILLAY

Mr Speaker konbyen fwa nou’n vwar dan lasanble kan en Manm lo sa lot kote latab in avans en largiman kritik lo sa Manm in retournen e in vin lo en pwennvi personnel dan plas vin en pwennvi sa size ki sa Manm in adrese.  Konbyen fwa?  Menm, menm dan zot bann rally menm dan zot lamars zot pa kapab anpese pou zot kritik, fer kritik personnel san ki zot koz lo bann issues.  Koz lo issues, koz lo zot plan e lepep Seselwa i a deside si zot ki annan meyer plan oubyen si nou ki annan meyer plan.

Si lepep Seselwa i deside ki zot ki annan meyer plan nou pou respekte sa swa ki Seselwa in fer.  Lepep Seselwa  in fer en swa konstitisyonnel pou donn nou en Prezidan ki sorti dan parti lepep.  In fer sa swa konstitisyonnel pou donn zot 15 lo 10 dan Lasanble.  Mon kontinyen remind zot ki 15 lo 10 pa zis pou zot!  15 lo 10 i pou lepep Seselwa !  E si NOU dan sa Lasanble nou pa rise to the occasion ki 15 lo 10 in donn nou Mr Speaker nou pou detri nou pei e by the time nou pran nou pei nou pou vwar nou dan en sityasyon vreman difisil.

Mr Speaker mon koze mon krwar lo lot kote latab i annan 19 dantis.  Well 18 dantis.  Akoz?  Sesel i en zenn fiy ki son ledan in pouri me akoz ou le marye ek sa zenn fiy ki son ledan in pouri?

 

(laughter)

 

HON SEBASTIEN PILLAY

Akoz?  Mr Speaker parfwa nou analize nou bann largiman i bezwen ganny pli byen plase.  Nou bezwen kalkil lo la avan nou servi li.  E sa ki enportan se ki nou bezwen regard lo travay ki nou’n fer.  konbyen zot dan sa Lasanble ki dan zot bann distrik zot in travay ki bann proze in materyalize ?  Pa zot ale zot dir ek zot popilasyon se zot ki’n materyaliz sa proze?  Konbyen la ki’n dir dan Lasanble ki mon kontan mannyer mon pe travay avek Departman Community Development?  Mon kontan mannyer mon pe travay ek sa Departman me selman zot vin dir nou ki koabitasyon in mor, Gouvernman pa pe fonksyonnen.  Zot annan de langaz.  Zot bezwen annan en langaz.  En langaz ki dir sa i nou plan konman LDS, sa i mannyer nou krwar keksoz pou marse e annou avans li pli devan.

Mr Speaker i annan en dekoneksyon parfwa ant largiman ki nou servi avek largiman ki nou donn dimoun deor.  E mon pou ilistre sa avek en lot pwen Mr Speaker.  Dan sa Lasanble ler nou ti annan Control of Dog Act se zot menm lo lot kote latab ki ti raise sa issue e se zot Manm, en Manm lo zot kote latab ki ti atak sa madanm ki ti annan son 40 lisyen.

Se zot menm me apre zot menm Manm i al lo Facebook i al demann raise larzan pou sa madanm pou sa kondisyon ki’n arive e sa zizman ki’n arive.  Ki mannyer zot annan – mon pa konnen ki mannyer zot konekte bann keksoz ki zot dir dan Lasanble e bann keksoz ki zot fer an deor.  Zot bezwen annan en sel langaz.  Be nou dan sa kote nou bezwen konmans annan en sel langaz.  Nou annan en sel langaz akoz nou believe dan serten prensip fondamantal.  Serten prensip ki pou anmenn nou pli devan.  Wi, wi Minis sa Bidze i adres bokou size.  Me eski sa Bidze i fer ase pou adres sa bann size? Senserman,   non.  I byen i annan kot i byen be i annan landrwa kot i bezwen aranze e se sa largiman ki nou, nou pe vin avek dan sa Lasanble.  I pa largiman ki nou pe vin avek ki nou vin kritik sa Bidze dan  son detay.

Mr Speaker nou bezwen met Sesel premye.  Nou bezwen met Sesel, akoz Sesel i ‘pli gran ki nou tou.’  Eski nou krwar ler nou demann en  kous popilasyon pou desann dan semen i anmenn linite dan nou pei?  E menm zot, zot pa satisfe ek sa turnout ler i arive.  Eski zot krwar poudir popilasyon antye pe dir nou pou dir zot fer eleksyon ?  Non i en mesaz kler.

Popilasyon i anvi ki nou konman Lezislatif nou owner tou sa responsabilite ki nou’n gannyen e nou delivre lo sa responsabilite ki nou’n gannyen atraver sa pep.  Se sa ki mon krwar nou bezwen regarde Mr Speaker.  Mr Speaker Onorab Hoareau in koz lo leksplikasyon dan Bidze.  I kler Mr Speaker.  I kler Minis ki napa leksplikasyon e se pou sa rezon dan labsans leksplikasyon dimoun i fer tou kalite spekilasyon tou kalite lide lo la.

Par egzanp Mr Speaker annou koz lo sa size lavyann.  I deza annan en taks 15poursan lo lavyann i deza annan.  I pa nouvo sa me zot in spin li zot in dir poudir i nouvo – i pa nouvo.  Sa ki’n arive Mr Speaker ozordi Mr Speaker, ozordi, ozordi Mr Speaker ozordi i annan en taks 15poursan e R5 par kilo lo poul e 15poursan lavyann porc.  Logmantasyon lo poul i zis 92sou.  92sou.  92 sou an plis ki sa ki annan la.  Logmantasyon lo porc i R3 par kilo.  Alors Mr Speaker pri lavyann pa pe al monte par 15poursan me pou annan en logmantasyon.  Akoz pou annan sa logmantasyon?  Dan laliny ki Onorab Adelaide ti dir pou nou  protez nou bann fermye lokal.

 

(APPLAUSE)

 

HON SEBASTIEN PILLAY

Pou nou anmenn soutenabilité alimanter lo nivo lokal.  Se sa lesansyel sa logmantasyon.  E sa logmantasyon i pa le sel. A en nivo i annan sa logmantasyon a lot nivo i annan bann sipor finansyel ki’n ganny propoze avek bann fermye sirtou atraver bann  sipor kot i konsern labatwar pou zisteman asire pou mitigate sa production cost ki sa bann fermye i annan.  Se sa largiman ki dan sa Lasanble nou bezwen travay ansanm pou nou anmennen.  Largiman ki nou bezwen anmennen se rod bann fason ansanm e mon konnen, mon konnen zot osi zot krwar  ladan e mon pe demann zot pou zwenn ek nou pou travay lo la konman en Lasanble, konman en kolektiv pou nou avans en largiman pou nou protez sa bann fermye.  Ankouraz zot pou prodwi plis e fer sir ki demen Sesel pa depan lo enportasyon akoz sinon si mon ekout serten zot dan zot largiman oparavan avan ki Onorab Adelaide ti’n koze, i paret mwan poudir serten zot ti pe siport plito fermye Brezilyen, fermye deor e menm bann middleman Dubai.

 

(APPLAUSE)

 

HON SEBASTIEN PILLAY

E se sa mon krwar ki zot bezwen parfwa ler zot  koze balans zot bann largiman byen.

Mr Speaker en lot pwen enportan i konsern nou Bidze.  Wi i vre ki nou Bidze i annan en defisit 133milyon me Mr Speaker nou Bidze in ganny diskite baze lo nou progranm avek IMF.  E nou’n vwar poudir nou pou fer en sirplis.  E sa sirplis pou ed nou overcome okenn defisit ki nou annan e demen lannen prosenn nou pou annan en Bidze i pou annan en defisit i pou bezwen annan en defisit.  Napa en Bidze ki pou kapab entrodwir without en defisit.  Akoz?  Akoz nou’n vwar nou dan en sityasyon kot nou pe play catching up avek nou det.  Sa sityasyon Mr Speaker.  E nou pe peye nou det.

Zot realize poudir atraver zefor ki nou tou enkli zot, enkli nou tou Seselwa in mete ozordi nou det in ariv a en nivo ki vin pli soutenab.  Se sa lesansyel  ki nou  bezwen pe travay lo la e se sa ki sa Bidze pe anmennen devan nou pe dir nou fer.  Me parey mon’n dir i annan eleman dan sa Bidze ki pa ase, ki pa al ver pou nou anmenn sa solisyon pli kler Mr Speaker.

Mr Speaker permet mwan prezan pou koz lo 10 eleman dan sa Bidze kot mon krwar, mon krwar sa Bidze pe sey adres mon dir byen seye pou adres kou lavi me i pa al ase lwen.  Mr Speaker in anmenn plis lenerzi renouvlab pou asiste 500 fanmir i byen be Minister Finans i bezwen vwar si sa 500 fanmir i the best ki nou kapab fer.  Eski nou kapab fer plis?  Largiman ki zour nou pou ariv 100poursan Aldabra pou’n koule i pa zanmen devret en largiman ki nou servi.  Largiman ki nou devret pe servi se rod tou fason pou nou fer sir ki nou depandans nou depandans lo karbiran pou zener elektrisite i bezwen desann e mon konnen zot krwar ladan.  E nou tou nou krwar ladan.  Se sa lesansyel ki nou bezwen anmennen.  Rod en fason pou nou fer nou depandans lo karbiran desann akoz se sa, se sa ki menm konponan nou depans dan sa pei.  Se sa ki afekte nou plis.

Mon konnen Gouvernman in propoz proze LNG.  Malerezman Mr Speaker nou pa ti ganny sans pou nou attend sa.  Mon konpran Onorab Afif in ganny sans attend sa prezantasyon e mon konpran i annan en serten largiman in avanse.  Akoz sa i pozitiv ?  Petet then Minis se sa kot mon koleg Onorab Hoareau in koz lo la.  leksplikasyon i bezwen ganny donnen li ki mannyer nou pou achieve sa bann keksoz ek sa bann propozisyon ki nou pe fer.

Se la Minis kot sa Bidze i mank i annan mankman.  Se lakot sa Bidze i annan mankman.  E se la kot nou bezwen fokaliz nou bann zefor pou asire ki le pep Seselwa i ganny sa lenformasyon pou li konnen ki mannyer sa pou marse.

Mr Speaker nou’n koz lo 3mil lakaz ki pou ganny konstrir dan sa prosen 6an.  Nou nou bezwen proud of sa ki nou’n kapab achieve an sa ki konsern lakaz dan sa pei Mr Speaker.  Me i annan bokou pou nou fer.  Nou bezwen vwar ki mannyer nou kapab asire ki sa bann sistenm ki nou met an plas, ki i Sistenm Pwen, ki lezot sistenm ki nou met an plas nou bezwen vwar ki pa kit okenn dimoun deryer.

Se sa ki nou bezwen vwar.  E kot i annan bann lenstans kot dimoun pe ganny kit deryer nou bezwen rod fason pou nou adjust nou bann Policy Mr Speaker.  Adjust nou bann Policy akoz si non si nou pa adjust e nou stick tou sa bann Policy nou pou kite dimoun deryer e se sa ki pou donn rezon sa bann kritik ki ou pa pe fer ase, nou pa pe fer ase konman en Gouvernman, ki pei pa pe fer ase pou li asiste dimoun dan sa konteks.  So i enportan Mr Speaker ki nou koz lo la.

Mr Speaker nou’n koz lo stratezi elektronik.  I byen.  I byen i annan stratezi elektronik be regilater ki regulate sa sekter i bezwen wake up e i bezwen konmans fer son louvraz.  Nou pa kapab allow bann konpannyen ki egziste da sa sekter ozordi pou sarz egzorbitan pou bann servis ki pe ganny provided akoz sa bann servis i nepli vin en luxury!  In vin en nesesite Mr Speaker!

Ozordi pou en etidyan fer son resers i bezwen data i bezwen internet.  Ozordi pou ou fer bann tranzaksyon ou bezwen internet ou bezwen rod fason ki sa sekter i ganny envestir.  Nou pa kapab les sa bann operater dan sa sekter zwir gro, gro profi san ki zot fer bann lenvestisman adekwat pou kontinyen maintain sa servis a en pli o nivo.  E la Mr Speaker mon lans en lapel ek Minister pou vwar ki pou asire ki okenn sa bann konpannyen, okenn sa bann konpannyen pa fer redundancy okenn Seselwa ankor, dan okenn konteks akoz zot in zwir plizyer profi e al rode kote zot in met sa bann profi avan ki zot vin dir zot bezwen fer redundancy pou zot cut cost.

Sa i enportan Mr Speaker akoz se sa ki pep Seselwa pe ziz nou lo la.  Nou abilite to enforce bann keksoz ki nou dir.  Se sa lesansyel ki nou bezwen rode dan sa Bidze.  I annan ki byen, me i annan landrwa kot nou bezwen aranze Mr Speaker.

E la Minis mon’n tande mon pa konnen si vre I stand to be corrected.  Nou konnen in annan sa size Cable &Wireless le pase.  Mon ti a kontan Minis ki dan le fitir ki vini la nou pa vwar Cable & Wireless ankor pe move pou al fer okenn redundancy okenn Seselwa e ki Seselwa i al Ankour ale vini vitam aeternum pou rod en solisyon pou son travay ki in travay pou Cable &Wireless tou sa letan.  I pa pou kapab. Sinon Mr Speaker nou bezwen fer sir poudir larzan ki cable pe peye i larzan ki zot sipoze peye dan lekonomi.  Sa i enportan Mr Speaker.

Me la, me la mon lans en lapel.  Mon lans en lapel avek mon bann koleg dan Lopozisyon, next time ki sa Lalwa SITZ i vini pa zwe dalon lo sa Lalwa SITZ !

 

(APPLAUSE)

 

HON SEBASTIEN PILLAY

Siport sa Lalwa e asire ki okenn konpannyen ki operate Sesel i pey son tax parey tou konpannyen.  Si nou pou donn ou konsesyon i a fer kler kote konsesyon i vini.  Asire asire ki tou nou frer Seselwa ki travay dan SITZ ki ozordi pa ganny kouver anba nou Lalwa lanplwa i ganny kouver.  Mon konnen poudir bokou zot i krwar ladan me  reziste tantasyon serten.  Reziste tantasyon serten pou fer zot fer serten desizyon ki kont, ki kont sa bann dimoun ki’n met zot la.  Se sa ki nou bezwen fer pou nou fer sir ki  nou avans keksoz pli devan.

Mr Speaker nou koz lo R20milyon pou lapovrete.  I enportan Mr Speaker, i enportan –

 

(Interruption)

 

MR SPEAKER

En moman.  En moman Onorab.  Bon depi bomaten mon krwar nou pe les bann entervenan koze byen san disturb annou kontinyen dan sa direksyon.

 

(Interruption)

 

MR SPEAKER

Non.  Order!  Laparol i pou Onorab Sebastien Pillay, annou ekout li silvouple.  Onorab.

 

HON SEBASTIEN PILLAY

Mersi Mr Speaker e mon remersi mon bann koleg lo lot kote latab pou donn mwan zot latansyon.  Mr Speaker Bidze i koz lo R20milyon ki al ver lapovrete.  I byen.  I byen nou annan sa.  Be mon  ti a kontan Minis ki nou fer sir poudir nou target sa lenvestisman.  Annou asire ki sa ki bezwen sa i gannyen.  Annou pa pran bann mezir zeneralize kot apre sa ki vreman bezwen sa i pa gannyen.  Mr Speaker nou’n koz lo sa letid ki’n ganny fer par World Bank lo 40poursan lapovrete e la i enportan Mr Speaker pou nou souliny en eleman.  LDS zot kontan raise sa pwen 40poursan lapovrete me depi sa 40poursan sa letid in sorti en kantite mezir Gouvernman in mete.  Gouvernman pa krwar poudir la n’ariv ler pou li conduct en lot letid.  Let’s find out lekel nou bann dimoun ki pe vreman soufer e nou ava anmenn sa bann – sa soutyen ki zot bezwen kot zot dan plas ki nou al pran bann mezir zeneralize e sa soutyen pa neseserman ariv kot zot at the end of the day ; oubyen ler i arive i ariv dan en fason ki pa permet zot kapab sanz bann keksoz dan zot lavi.  Se sa ki nou bezwen fer.  Bidze i bon lo en kote Mr Speaker, me lo en lot kote i annan serten keksoz ki nou bezwen aranze.

Mr Speaker nou’n koz lo allowance etidyan dan Lenstitisyon ledikasyon tertiaire e la mon le vin lo en pwen Mr Speaker.  Yer mon ganny sans swiv en deba lo televizyon mon krwar bokou nou nou’n swiv ti annan bann largiman for ti pe ganny avanse.

Eski, eski si ou paran in kapab afford pou anvoy ou dan en lekol prive ou devret ganny sa allowance lo nivo tertiaire?  Me Mr Speaker i en largiman osi i annan bokou paran i save en kantite pou anvoy sa zanfan dan lekol prive!  I pa vedir poudir sak paran ki anvoy son zanfan lekol prive i annan larzan.  I annan en kantite dimoun ki fer savings pou anvoy zot zanfan e i pa vedir poudir akoz i anvoy son zanfan lekol prive ki son zanfan i devret diskalifye.  Alors si nou pe met an plas mechanism pou asire ki sa ki bezwen gannyen i gannyen then petet Gouvernman i devret rod fason pou byen etabli sa balans.  Si nou pou means test nou pou means test be mwan personnelman mon krwar nou bezwen get sa byen akoz i enportan sa allowance pou sa bann zanfan.  I vreman enportan.  E ki nou bezwen fer nou bezwen ankouraze, ankouraze ki sa bann zanfan prezan i pran li o serye kontinyen sa ledikasyon e sa leksplikasyon ki pei i envestir dan ou pou ki demen ou kapab kontribye.

Me souvandfwa Mr Speaker e la mon koz fran, Gouvernman pa fer ase pou edike.  I pa fer ase!  I plito krwar poudir in fini met mezir alors ale keksoz in ganny fer me i pa mars koumsa.  Konbyen fwa nou’n ganny dir poudir en keksoz pe al ganny fer apre i pa ganny fer?  E se pou sa rezon ki apre nou vwar poudir i annan  kritik ki vin lo Gouvernman me sa bann kritik i byen plase parfwa akoz lo serten sirkonstans nou pa pe fer ase pou nou eksplike e edike lo kwa ki pe arive.

Mr Speaker en lot eleman dan sa Bidze ki nou konnen ki pou atas avek li se sa common reporting standards an se ki konsern bann biznes pou zot raport lo zot taks.  Mon koleg Onorab Hoareau in koz lo la e Mr Speaker mon ti byen apresye ki ler mon ti ganny sans attend en meeting Bills Committee mon ti koz avek en expert dan domenn kontabilite e sa msye ti dir mwan be ki mannyer Sesel i annan konpannyen ki li i pou pey sa kantite tax e lezot i pey sa kantite tax.  Li pou li i santi poudir tou dimoun i ou pe zwir dan sa pei ou bezwen pey  menm kantite taks.

E la i fer sans Mr Speaker akoz ler nou regard atraver PIT si ou en profesyonnel e ou’n ariv en threshold ou pe pey parfwa plis taks lo poursantaz ki en biznes ki pe fer 3 fwa sa ki ou pe gannyen.  E i en realite.  So mon pa pou al kasyet mon plan dan okenn larmwar okenn tirwar.  Mwan mon plan se ki tou  senpleman regarde ki mannyer ou amenn ekitabilite dan sa domenn e asire ki tou dimoun ki pe travay letan it comes to nou tax sa tax i egalitarian.  Akoz ou pa kapab pini mwan pou zefor ek sakrifis ki mon’n fer, me en lot ki li i pe zwir i pe fer biznes li i pa pe pey parey.  I pa fer sans.  Savedir ou pe dekouraz mwan demen, pe dekouraz sa zenn ki pe grandi pou li asize lo sa ban lekol pou li devlop son kapasite al pli devan dan son ledikasyon akoz i pou al end up ganny takse plis ler i fini ler in pli tar.  Se sa – se dan sa eleman.  So i annan en eleman ki bon me kote nou kapab avans keksoz pli devan.  Mr Speaker i osi annan eleman kot i konsern plis prodiksyon dan domenn lagrikiltir ki mon’n koz lo la i byen.

E la nou pe met zefor lo la me i enportan ki nou swiv sa ki pe arive.  Tre enportan.  Nou pa kapab zis met li la dir out of sight, out of mind e apre nou les li.  Nou bezwen kontinyen swiv li.  Nou bezwen rod fason pou fer sir poudir sa ki nou’n met mezir lo ki nou mete i bezwen ariv a  sa rezilta.  Se sa ki nou bezwen fer.

En lot pwen Mr Speaker an se ki konsern logmantasyon lo saler minimum e lezot benefis sosyal e la mon zwen mon koleg Onorab Hoareau.  Wi akoz nou pa fer li boner posib?  Mon konnen ki Gouvernman in fer.  Gouvernman   in realize poudir be ok si mon pa kapab donn sa logmantasyon e la mon fran mon konpran sa plan.  Si mon pou al donn sa logmantasyon  ki mon kapab mon donnen an plis. Mon ava reward ou lo ou tann servis.  Savedir si ou’n travay 5an ou ganny sa plus i ava vin sa logmantasyon ki vin lo ou saler.  I byen.

Be akoz nou pa entrodwir li pli boner?  Akoz si legalman i pou kree en problenm pou nou then let’s introduce it as per the legal requirement ki ganny demande which is April.  Akoz si nou lengthen li anvoy li pli tar me lo lot kote dimoun i vwar poudir taks lo en komodite pe pran plas Zanvye Gouvernman i anvoy de mesaz.  So mesaz ki Gouvernman i bezwen anvoye se en mesaz mon pe improve ou lavi, mon pe improve ou kondisyon  lavi e la la mezir tanzib ki mon pe fer pou fer li.

Mr Speaker dernyen pwen ki mon annan dizyenm pwen se konsesyon lo karbiran.  Mr Speaker i byen ki nou kontinyen donn konsesyon lo karbiran pou PUC, STC ek SFA, me Minis i bezwen ganny vwar bann pratik ki pe arive par egzanp Mr Speaker.  Ozordi si nou pa fer en logmantasyon lo  nivo tarif rezidansyel i pou annan en problenm pou bann dimoun ki annan en take aways e nou pou bezwen al ogmant zot.  E deza Mr Speaker mwan mon konn en take away Providence ki pe pey apepre R3 ekek elektrisite.  On top of that i pe pey li R13mil rent.  I fer li around R16mil.  E bokou bann koleg lo latab i konnen kote sa take away i ete.  Sa take away i Providence e sa owner in dir mwan la i annan e Konpannyen ki pe al ouver en restoran dan sa landrwa.  Further competing avek sa bann pti biznes.  So ki mannyer ou kapab annan ou – ki pe ouver en restoran dan en Industrial Estate keksoz koumsa?  Nou bezwen annan en balans ant bann mezir ki nou pran ek bann aksyon ki ganny pran konkretman pou nou fer sir ki nou pa at the end of the day sa bann mezir ki nou pe le pran i napa en lenpak akoz bann lezot keksoz ki arive i afekte li.  Se dan sa konteks ki nou lo sa akote latab nou pe regard sa Bidze.

Nou pa kapab le regard sa Bidze  e dir tou keksoz i byen  lavi i an roz tou zafer i korek Sesel.  Nou tou annou ale.  Annou vin  koz Committee Stage apre tou zafer i korek.  Annou al dan Nwel, annou al dan lannen annou al enjoy.  Non.

Kot i mal nou bezwen dir i mal.  Me nou pa kapab zis kritike for the sake of kritike e pa vwar nanryen ki byen.  Akoz ladan bann keksoz ki byen se nou menm dan sa Lasanble lo tou le de kote latab ki’n lager pou anmennen.  Sa bann mezir se nou menm ki’n koz lo la pou li arive.

Onorab Hoareau in sit legzanp bann mezir ki bann koleg lo lot kote latab in mansyonnen.  … bann koleg lo lot kote in sit legzanp ki bann koleg isi in anmennen.  Nou bezwen travay isi konman en Lasanble kolektiv.  E Mr Speaker en parol ki mon ti dir dernyen fwa se as long ki nou nou kit sa divizyon lo nou de kote sitan larz i annan bann dimoun ki pe profit dan sa divizyon.  En kantite dimoun.  Sa ki nou’n koz lo la sa bann kartel.   Zot profit lo sa divizyon akoz nou pa kapab come to an agreement about how to deal avek sa sityasyon!  E i vre Mr Speaker.  Largiman ki Onorab Hoareau in avanse vizavi, vizavi FTC i en pwen enportan akoz par egzanp si demen IOT ti dir mon le vann mon bwat ton R12 i ti pou against Fair Competiton Act e i ti pou ganny en let ki ti pou dir li be ou pe al kont Lalwa.

Se pou sa rezon kot nou vwar ki ban mezir ki nou bezwen pran se bann mezir pou nou asire ki lepep i benefisye.  E kot i annan bann egzanpsyon in the public interest mon krwar nou bezwen fer en serten lentrodiksyon akoz malgre ki mon konnen bann Polisi ekonomik i dir nou, nou pa devret la dan sa bann eleman i annan serten eleman akoz nou en pti lekonomi, akoz nou en pti popilasyon ki nou bezwen fer en serten keksoz ki nou balans sa ki pe arive pou asire ki se popilasyon ki benefisye.  E mwan mon krwar sa propozisyon ki nou annan sa egzanpsyon i en bon propozisyon.

Mr Speaker i annan bokou keksoz ki nou’n koz lo la me i annan en pwen fondamantal, en pwen kardinal ki reste.  Se Seselwa a proiri ki bezwen benefisye dan son pei.  Se Seselwa ki bezwen toultan benefisye an premye.  Mon konnen lo nou kote latab nou’n ganny bokou lakizasyon ki nou’n donn GOP, nou’n donn citizenship.  Mr Speaker mon largiman pou sa se ki nou pei ti bezwen devlope ok.  Nou’n ariv en nivo devlopman dan nou pei ozordi  ki nou pei pe bouz devan. Me la a sa moman ki nou’n arive la nou pa kapab kontinyen as business as usual.  Nou bezwen rod fason pou asire e sekiriz lanplwa a priori an premye lye pou Seselwa.

Si nou bezwen restrikte GOP let’s do it.  Si nou bezwen fer sir ki kot ou napa en GOP out of the country nou bezwen fer li.  Akoz ou a vin travay, ou a kontribye apre ou ava ale.  Me mwan mon dir annou al pli devan.  Avan ki nou donn en GOP pou en konpannyen ki pe rod en dimoun pou travay lo nivo management annou egzize, mon konnen pou difisil o komansman, annou egzize ki ou annan en  Seselwa ki kapab pran sa pos apre 2an mon a donn ou sa GOP sinon mon pa pe donn ou GOP.  Al rod en Seselwa an deor !   Sa i enportan sa Mr Speaker akoz pou montre ki poudir la la nou bezwen partake into sa economic growth ki se nou ki pe kontribye pou fer li arive. Seselwa Mr Speaker toultan an premye.  E se sa lesansyel ki nou bezwen koz lo la nou tou ozordi dan sa Lasanble.

Mr Speaker i annan bokou eleman dan sa Bidze osi ki fer nou reflekte lo nou lapros.  Nou lapros konman politisyen.  Nou lapros anver kanmarad.  Mr Speaker ou a remarke atraver mon diskour mon’n swazir pou mon pa fer okenn latak personnel lo okenn personn.  Mon’n swazir pou koz lo lafason ki nou, nou pe enterpret politik ozordi Sesel.  Se sa ki nou bezwen mazinen.

Eski dimoun an deor i dakor ek lafason ki  nou pe enterpret politik nou tou le de? Ki nou LDS ki nou parti lepe.  Ou byen eski nou pa pe give rise to en lot lafors  ki li i annan en lot enterpretasyon?  E eski sa i pou dan benefis nou pei?  Petet.  I swa demokratik pou annan son krwayans politik me sa ki mon krwar nou devret pe sey fer nou se ki rod fason pou nou travay ansanm pou nou kontinyen fer sa pei avanse.  Lesansyel i la Mr Speaker.  Nou annan abilite pou nou kapab fer li be nou bezwen fer li ansanm.  Nou pa pou kapab fer li sakenn p redi son kote.  E se sa ki nou ,nou bezwen met an perspektiv toultan dan sa Lasanble Mr speaker.  Napa lot fason pou nou vwar li.

Mr Speaker i annan bokou size ki nou’n adrese dan sa Bidze.  I annan bokou propozisyon ki nou’n fer dan sa Bidze.  I annan bokou kestyon ki nou’n demande otour sa Bidze.  Me bann kestyon fondamantal ki nou bezwen adrese Mr Speaker nou pa pou kapab adres li san nou koz lo bann keksoz ki pou fer Seselwa ozordi demande whether or not, nou konman de parti politik nou’n a la oter sa konfyans ki zot in fer nou.

Premye pwen ki mon oule koz lo la Mr Speaker se ki konsern District Council.  Eski ozordi lepep Seselwa i satisfe avek district council?  Eski vi ki sa i en proze pilot sorry Regional council.  Mon leskiz Mr Speaker.  Eski  ozordi Seselwa i santi ki nou devret met plis resours anver Regional Council?   Oubyen nou devret gete si sa proze i marse avan nou met sa bann resours adisyonnel ladan.  Akoz nou tann bokou konplent.  Regional Council pe antre isi pe antre laba i napa en stati legal i plito en brans administrative, so eski sa kad management distrik in fini ganny etabli a sa nivo ki prezan nou pe al met sa kantite resours adisyonnel ?  Eski pa ti ava meyer a sa moman sa resours adisyonnel i ganny petet diverted towards distrik li menm.  Met li dan bann proze distrik li menm, dan aktivite ki distrik li menm.   Dan laliny ki Leader Lopozisyon ti koze ankouraz bann aktivite lo nivo distrik pou tir bann zenn dan bann fleo, dan bann frekantasyon ki zot pa devret pe fer.

Sa i en pwen ki nou bezwen koze lo la Mr Speaker.  Mr Speaker mon bezwen osi kosyonn nou popilasyon lo lapros kot i konsern sa size methadone.  Nou’n koz bokou lo la e bokou nou i annan bann santiman for lo sa size methadone.  Me eski alternatif pa don methadone pa i pli worse ki donn ki donn li.  Alternatif pa donn methadone i kree en lot problenm.  En pli gro problenm.

Mon krwar nou bezwen get sa progranm e son sikse ki in anmennen a sa moman me annou pa pran sa progranm konman le sel opsyon ki nou annan.  Nou bezwen rod lezot keksoz e se pou sa rezon Minis ki mon santi poudir Bidze i bezwen rod en lot fason pou adres sa.  Ki mannyer nou anmenn bann keksoz pli targeted pou fer sa bann zenn kontribye.  Nou pa zis tri zot lo drog.  Me si nou tir zot nou retourn zot dan lakour, dan ghetto zot pou retourn laba.  Ki mannyer nou kapab fer fason pou anpes sa bann ghetto.  Pou tir sa bann ghetto.

Se sa bann eleman ki nou bezwen rode dan sa Bidze ki mannyer nou pou kapab fer keksoz marse.  Mr speaker en lot keksoz ki nou bezwen koz lo la se sekirite, responsabiliz nou popilasyon.  Ki mannyer sa Bidze i al ver sa?  Petet dayer ler lapolis i ava vini nou ava kapab koz lo la plis.  I trakasan Mr Speaker ler ou tande lo radyo lo televizyon en dimoun in absant lakour e nou pe rod li.

E mon krwar yer swar en madanm ti donn en sif 75 ka kot sa in arive apre sa dimoun in ganny vwar me ki mannyer nou kapab ariv dan sa sityasyon kot dimoun pa pe responsabiliz zot lekor.  Mon krwar konman politisyen se sa mon pe koz lo sa rol ki nou annan pou zwe tou le de latab konman politisyen.  Ki mannyer nou responsabiliz popilasyon anver bann keksoz

Ki zot bezwen fer ki nou bezwen fer konman en popilasyon pou nou avoid sa bann sityasyon.

I pa akseptab Mr Speaker pou en zenn fiy mon pa pe pik lo sa case me selman sa i ka ki’n sorti i pa akseptab pou okenn zanfan ou okenn dimoun kit son lakour al kot en zanmi.  E apre ou vwar in bezwen mont lo televizyon in kree lenkyetid, i kree bann sityasyon konplike.  Mon krwar nou bezwen ranforsi sa lenportans en lespri responsab dan nou kominote.

E nou pa kapab zis kontinyen ‘koze’ ‘koze’ ‘koze’ san ki nou fer bann aksyon tanzib pou sa e mon krwar e se sa mon krwar kot ler mon koleg Onorab Hoareau i koz lo bann eleman  dan Bidze ki manke se kot i pe dir  ki mannyer nou fer sa bann eleman vreman sorti.  Petet i ava sorti atraver bann Minister.

E la kot sa bann Minister i a bezwen own up to sa responsabilite pou zot eksplik bann mezir ki zot pe pran dan en fason direk pou tackle sa bann problenm.  Akoz se sa ki nou pe rode.  Konman brans lezislatif pei nou reprezant laspirasyon dimoun.

Nou reprezant sa ban dimoun ki met nou la.  e nou bezwen own up to sa bann responsabilite ki nou’n gannyen.  Pou reprezant zot dan e fason konkret.  So tousala i bann keksoz ki fer ki mon krwar ou bezwen pran en lapros ek sa Bidze ki yes i annan keksoz ki bon but i annan keksoz ki nou bezwen fer.  E tou sala i al dan laliny ki pou nou kapab annan en Bidze pli konplet, en lapros pli konplet ler nou deal ek Bidze Mr Speaker.

Mon lot pwen Mr Speaker ava mon terminen i konsern egalite ant nou bann travayer e sa i en pwen ki mon ti koz lo la.  E mon krwar Gouvernman i bezwen seryezman re balans li lo la.  Nou pa kapab annan nou en enzenyer Seselwa ki’n train, travay akote en enzenyer etranze ki’n train me sa enzenyer etranze i ganny en housing, i ganny en transpor, i ganny education allowance pou son zanfan, me sa travayer Seselwa i pa gannyen.

Ki li annan menm kalifikasyon e parfwa konn pli byen konteks bann proze kot i pe enplimante.  This is what we are saying! Donn sa enzenyer Seselwa kondisyon ki a permet li pou li kontan fyer son travay ki i pe fer.  There’s nothing wrong avek donn li en allowance pou son housing adisyonnel si ou’n kapab lwe en lakaz pou sa etranze ki’n vin travay dan pei.  Ou konpran?  Se sa ki enportan Mr Speaker.

Mr Speaker mon tann serten ronfle lo lot kote latab mon pa konnen si Onorab i pe dakor ek sa ki mon pe dir oubyen i pa dakor, me mon konnen Onorab ou pou bezwen pe siport mwan lo la akoz sa ki mon pe koz lo la se Seselwa an ‘premye’.

At the end of the day Mr Speaker sa Bidze li menm in anmenn bokou kestyon, in propoz serten solisyon.  Prezan i reste lot letap, lot letap travay ki nou annan se pou nou regard li dan Committee Stage. Ki mannyer sa Bidze prezan i adres bann size dan Committee Stage.  Ki bann eleman nou kapab entrodwir.  E nou lo sa kote latab nou pou annan serten propozisyon ki nou pou fer.  nou pou annan propozisyon pou bann school leavers ki fini A Levels.  Nou pou annan propozisyon pou Minister Ledikasyon an se ki konsern attainment bann zanfan lo nivo IGCSE nou pou annan propozisyon an se ki konsern benefis sosyal.

E la mon ti a kontan kosyonn, kosyonn Onorab ki’n koz avan mwan.  Nou bi Onorab se pa pou ogmant welfare.  Nou bi se pou tir dimoun lo welfare e fer zot al travay.  Nou bi se sa.  Akoz sa i pou al an dezakor avek bann keksoz ki nou toultan preach lo la.  E mon krwar ki poudir sa i enportan ki nou gete Mr Speaker e an terminan Mr Speaker mon krwar ki nou, nou annan en travay devan nou konman en Lasanble, nou annan en travay devan nou ki serye, ki nou bezwen fer.  Nou ava bezwen gete ki mannyer nou kapab fer sa travay me sa travay nou pa pou kapab akonpli li san ki nou travay ansanm.  San ki nou met latet ansanm pou nou akonpli li.  San ki nou anmenn kritik, nou anmenn dezakor, nou anmenn plis divizyon.

Se sa ki nou bezwen travay pou fer nou anmenn plis linyon antre nou, anmenn plis linyon antre nou pep akoz nou pep, nou zenerasyon fitir i pran legzanp lo nou konman politisyen.  Zot regard ki mannyer nou reakte.  E nou pa ti a kontan demen dimoun an deor i krwar poudir nou nou zenofobi dan Lasanble akoz nou koz lo etranze serten  fason.  I krwar akoz nou tel fason akoz nou koz tel fason.  Me non.

Sa ki nou bezwen fer se ki nou bezwen fer se kontinyen eksplik dimoun kote nou stand, akoz nou krwar dan serten keksoz e ki mannyer nou kapab fer nou pei avans pli devan.  E se pou sa rezo Mr Speaker ki nou’n ganny elekte dan sa Lasanble.  E se pou sa rezon Mr Speaker ki mwan ler mon koz parey mon koze mon koz akoz mon krwar poudir nou bezwen fer pli byen pou lepep Seselwa.  Mersi Mr Speaker.

 

(APPLAUSE)

 

MR SPEAKER

Mersi Onorab Sebastien Pillay.  Mon krwar nou tou nou kapab dir se sa labote sizyenm Lasanble.  Nou vwar ki direksyon nou pe ale.  Nou vwar ki nivo repons nou pe gannyen e ki nivo menm nou deba i arive.  E i pa pou sorti zis keksoz negativ isi me i pou sorti bokou keksoz ki pozitiv lo tou le de kote latab.  Mon a donn laparol Onorab Ramkalawan.

 

HON WAVEL RAMKALAWAN

Yes.  Mr Speaker mon ti ava kontan fer en pwen klarifikasyon lo de komanter ki Onorab Pillay in fer ki mon krwar in mal enterpret serten parol.  Onorab Pillay in donn lenpresyon ki letan mon’n servi sa lekspresyon en zenn fiy avek ledan pouri gate whatever you want to call it ki poudir mon pe fer referans konmsi dan en zar konmsi mon pe dir Sesel konmsi dan en fason negativ.  Mr Speaker mon krwar ki i enportan pou regard konteks e ki letan en dimoun i sey vir ou parol dan en fason pirman negativ spesyalman pou en dimoun ki en ansennyan ki konnen ki poudir dan – letan ou ansenny etidyan oubyen letan ou koze, i annan en kantite keksoz ki apel figure of speech.

E letan ou dir Sesel pe mars lo zis en kote lipye oubyen i zoli me i abiye dan lenz desire, oubyen pe regard zis avek en kote lizye.  Nou konnen ki poudir sa i pa pe koz direkteman lo en dimoun as such.  Ou ape fer en konparezon.

E pou lenformasyon Onorab Pillay, pou lenformasyon Onorab Pillay letan mon’n servi sa lekspresyon mon ti pe koz lo koripsyon!  Sete en sapit lo koripsyon!  Mon ti pe koz lo sa 50milyon ki’n disparet.  Mon ti ape koz lo sa 50milyon Dolar ki’n ale pou ganny envestir dan bann lezot landrwa e an plis ki sa mon ti ape kritik Gouvernman ki poudir ki Gouvernman pa pe donn ledan son komisyon Anti- Koripsyon e aprezan mon ti pe dir e la mon site ‘’nou pei i vin pli pov letan desizyon pa ganny pran.’’  E alor se la kot mon’n servi sa figure of speech ki pou dir nou pei i ganny detri e letan ou regard li – mon konnen zot pe zwe lo sa parol, me selman nou tou nou konnen ki poudir sa lekspresyon was just that and nothing more.

Dezyenmman Mr Speaker letan la mon ti ava kontan sit parol Minis li menm.  Sa zafer taks lo lavyann porc ek lavyann poul.  Pa nou dan LDS ki’n dekrir sa konman en nouvo taks se Minis li menm ki’n dir sa.  E la mon site.  Minis i dir lo paz 35 son speech an Kreol. Kot i dir  ‘‘Nouvo, nouvo taks lo lavyann porc enporte pou 15poursan plus R3pa kilo.’’  Nouvo taks lo lavyann poul enporte pou 15poursan plis R5.92.’  Mr Speaker sa mo nouvo i deza annan en taks la.  Nouvo i  vedir nouvo.  I vedir adisyonnel.  Si Minis, si Minis ti’n dir taks lo lavyann enporte pou reste 15poursan me levy pou ogmante la i ti ava annan en diferan en diferan enterpretasyon.  Me letan in dir ‘’nouvo’’ e i deza annan i vedir i pe azoute.  I annan en 15poursan ankor ki pe azoute.  E se pou sa rezon ki dan mon diskour Mr Speaker mon ti fer kler pou dir ek Minis eklersi sa.  E alor letan nou pe, letan nou pe zis konmsi servi bann keksoz koumsa konmsi nou ki’n, nou ki’n vin fer sa diskour, then mon krwar ki Onorab pe deliberaman mislead e mon krwar ki se sa ki nou pa devret annan dan sa Lasanble.  Mersi bokou Mr Speaker.

 

MR SPEAKER

Mersi Onorab Ramkalawan.  Mon a donn laparol Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker mon pou konmans avek sa dezyenm pwen ki Onorab Ramkalawan in raise e se pou sa rezon ki ler mwan mon’n entervenir mon’n dir parey mon koleg onorab Hoareau in dir nou bezwen donn leksplikasyon Minis.  E Mon ti met onus lo Minis pou don leksplikasyon lo sa size baze lo bann komanter ki ti’n ganny fer.  Mon 2enm pwen ki mon le koz lo la e mon kontan Onorab Ramkalawan in  qualify sa figure of speech e sa i al dan laliny ki mon’n pran dan mon Bidze.  Si ou a realize dan mon diskour Mr Speaker mon pa’n fer okenn figure of speech pou dekrir mon bann koleg lo lot kote latab.

Akoz Mr Speaker mon’n fer sa akoz figure of speech i ganny enterprete dan diferan fason e mon kontan Onorab Ramkalawan in ganny loportinite pou li klarifye sa figure of speech mon napa okenn problenm avek sa.  I pa’n mon lentansyon pou pran sa figure of speech ki Onorab Ramkalawan in servi pou mon vir sa dan okenn fason me Mr Speaker.  Me Mr Speaker i enportan e ou ou’n remind nou of this semenn pase ou ti donn en Ruling lo la e mon’n follow ou Ruling mon’n gard mon lentervansyon lo mon size ki mon’n annan.  Si mon’n fer mon pwen politik mon’n fer li dan en fason zeneral avek  bann legzanp ki mon’n gannyen san ki mon  fer latak personnel lo personn.

E sa i enportan dan sa laliny dan lespri ki Onorab Ramkalawan in eksplik son figure of speech ki nou tou ler nou servi en figure of speech nou fer sir poudir apre demen i pa ganny mal enterprete.  Mon’n fek koz ek mon koleg Onorab Hoareau lo la.  Mersi Mr speaker.

 

MR SPEAKER

Bon mersi Onorab Pillay.  Bon avek sa nou ava Break e nou a repran nou travay 2er apre midi.

 

(BREAK)

 

MR SPEAKER

Bonn apre midi tou Manm Onorab.  Bonn apre midi tou dimoun ki a lekout.  e ki pe swiv travay Lasanble Nasyonal.  Bonn apre midi spesyal Minis Maurice Loustau-Lalanne avek ou lekip.  Mon krwar ou lekip  Ms Agathine, avek Ms Tamatave.   Welcome e parey labitid swen a lavenir dan nou Lasanble.

Bon pou nou pou kontinyen avek nou travay savedir Repons lo diskour Bidze ki ti fer par Minis pou Finans Lendi pase e apre midi nou ava pran nou ava konmans avek Onorab Regina Esparon.  E nou ava swiv par Onorab Simon Gill. Onorab Esparon.

 

HON REGINA ESPARON

Mersi Mr Speaker.  Bonn apre midi tou dimoun ki a lekout sirtou zabitan Glacis.

Mon pou konmans mon lentervansyon an dizan ki s Bidze ki Minis Finans in prezant devan nou pou lannen 2019 i enn ki ranpli ek promes.

E premye kestyon ki mon pou koze .se konbyen dan sa bann promes ki Gouvernman Parti Lepep in fer dan sa Bidze ki zot pou vreman onore.

I tre enportan Mr Speaker ki dimoun ‘ki laba deor pe ekoute konnen kwa ki nou kwa ki in ganny dir ki konpletman pe  al ganny fer pou zot osi aziste zot lavi e santi sa soulazman

Zot kapab vin isi dan Lasanble dire kantite keksoz.  Ki ler i tonm dan zorey dimoun i paret gou pou tande me apre pa neseserman ki zot fer.

Yer zot ti dir nou zot pou vin privatize shares dan SEYPEC avek Seselwa ki enterese.  Ozordi zot dir non.  Pa pou kapab privatize.

En lot zour zot ti pou fer tinel Grand Anse ek Beauvallon konman en solisyon pou konzesyon trafik.  Ozordi Mr Speaker ou a krwar ni Msye Faure ni lezot Minis pa pe krwar dan zafer tinel akoz zot in kit li ater trankilman.  4n zour zot dir nou zot pou delivre 5 mil lakaz d[an 5an.  Apre ler zot pa kapab delivre lo zot promes zot pas baton en ale.

La ozordi Mr Speaker Minis in vin dir nou zot pou ganny loan e donk 3bilyon Roupi sorti L’Inde pou konstrir 3mil lakaz.  558 an 2020 a 2021. E zot in ganny osi don sorti La Chine R1.2 milyon ki zot pou osi met dan lakaz.

Sa i en prozeksyon ki Minis in donn nou.  In dir nou ki zot pou delivre 143 ek 72 morso later dan sa prosen 2an.

Annou rapel ki lot fwa ki Minis ti osi dir nou pou annan 200 morso later.  Selman lalis later ek lakaz ek later i reste long e i annan ki lo lalis plis ki 20an dan distrik e mon mazinen i en pe parey dan lezot distrik.

Msye Faure dan son Ladres Leta Lanasyon Fevriye 2017 i ti promet pou konstri 24 lakaz dan 24 distrik dan 24 mwan.  22 mwan in pase ni menm lanmwatye pa ankor ganny delivre.  Zot bon lo bokou fer bokou promes e dir bann zoli parol Mr Speaker.

Tel parey zot ti promet bann ners en bon Scheme of Service e ozordi zot pa pe kapab fini delivre tan zot in dir donn bann ners.  E pa etonnen letan zot trouv sa bann ners redesann ankor lo semen pou zot rod sa ki zot pa ankor gannyen.  Ou konpran akoz mon dir ki mon pa krwar .dan zot bann parol akoz ler ou pe deal ek en Gouvernman ki pa efikas ou pa espekte gran keksoz.  Parol maksimonm.  Aksyon minimonm.

E parey Onorab William in dir ‘enough is enough !’  Pran palrey decleration of assets Lalwa in pase in, fini ganny assent me ziska prezan Ladministrasyon Msye Faure pa ankor apwent en Komisyoner pou kapab konmans bann prosedir.  Mon pa konnen si i pe esper kabri manz tousala apre pou fer li.  kwa ki zot pe kasyet apre zot pa anvi deklare.

E pourtan sa i form parti dan sa gran prensip latransparans e rann kont Msye Faure  i kontan koz lo la konman enn son bann gran prensip.

Sa Bidze parey tou lezot ki’n ganny prezante oparavan i enn ki dapre zot pou elimin lapovrete e pou met larzan plis larzan dan pos Seselwa.

Me realite se ki sak lannen Bidze i met pli taks lo malere e plis larzan dan pos Gouvernman.  E apre ki nou vwar sa ki privilezye  e byen plase i ganny aste pou donn bal ladan.  Parey nou’n vwar kot SBFA loan pou fanmir loan pou zanmi loan pou belser e loan pou bofrer.

E pourtan bann dimoun ki vreman dan bezwen e ki pe rod fer demars pou konmans en pti biznes in ganny kit ater.  Poumon sa i apel lenzistis.  E zis mazinen si zot ti’n regard tou Seselwa byen ki mannyer nivo satisfaksyon nou pep ti pou ete.

Petet osi Mr Speaker se sa ki fer nou reste konman en pei konman en move ranking kot in developing business i konsernen.  Se akoz kot biznes i konsernen ki etranze oubyen lokal zot aplik sa prensip ek nou pa ek nou.  Sak lannen zot promet ki zot pou redistribye larises dan en fason ekitab pou sa ki dan bezwen.

Me  ofet se zis  en pti group ki benefisye.  Nou later i ganny partaz e antre dalon.  Enn i pran 50 morso lo t i pran 79 e sa ki ganny sans i zis donn bal.  Tandis ki ou, ou vye lo lalis malere ki napa finisyon.  Minis i vin dir nou annou travay dan en sel bi lide i bon.  Prensip i akseptab.  Me ki mannyer nou kapab fer sa ler sa Gouvernman pe les etranze tir manze dan labous Seselwa?  Ki mannyer nou kapab kontinyen travay dan en sel bi ler Seselwa pe vin 2enm plas dan en prop pei ?

Mr Speaker an plis ki sa dimoun i ankoler letan Minis i vin rakont bann zistwar ki pa akseptab.  Wi nou bezwen etranze pou ede nou lekonomi.  Me annou osi regard lentere nou dimoun an premye.

Tro souvan Mr Speaker sa Gouvernman i zwe ek dimoun.  Pran ka avek bann travayer Bayan Tree kot ,Gouvernman in donn GOP travayer etranze e apre in lav ,son lanmen.  In dir i pa okouran ki mannyer etranze pe ganny favorize dan plas Seselwa.  Eski i annan de landrwa ki donn GOP ?  Eski sa ban dimoun ki’n pran plas 40 Seselwa pa pe travay ilegal.  Akoz sa lipokrizi.

Mr Speaker i bon ki dan letan Break nou’n ganny lenformasyon konmkwa Sanmdi ti annan en spot check par Biro Lanplwa kot Bayan Tree e i annan 15 travayer  Endyen ki pe travay dan zarden san en GOP.  Ok mon demann en leklersisman ki tris ki sa bann manman ki annan zanfan ki ti pe debourye pou pas dan en kalite tourman.

E mon pou dir ek sa bann travayer ki se Gouvernman SPPF/ Parti Lepep k iresponsab pou met zot dan sa sityasyon an par sa Mr Speaker mon osi konpran ki i annan en zwe politik ant Departman Lanplwa ek Linyon Travayer ki Parti Lepep.  Pou bezwen annan en bon lenvestigasyon ki ganny fer byento akoz travayer Lasanble in fini tal kart lo latab.  E letan mon lo sa pwen Mr Speaker i fer mwan mazin en ka dan mon distrik kot i annan etranze ki ganny GOP i pe travay Sesel pou en lakonpannyen International Traders Seychelles Limited.  Li sa msye i deza annan en ka An kour kot in lwe lakaz i pa ankor peye.  I dan lakaz Mr Delcy e li i pe refize peye.  E ler nou’n fer demars nou’n vwar son GOP in fini.  Lo i pa liste i pa travay.  Me ki ou konpran Mr Speaker?

En lot kestyon se pou sa i fer mon demande, eski i annan koripsyon dan zafer donn GOP kot i konsern biro lanplwa imigrasyon e menm lopital.

Kestyon pou en sanpyon Mr Speaker mon poz sa la.

I, drol nou bann Minis mansyonn nanryen lo okenn mezir pou elimin koripsyon.  E mon pa vwar nanryen ki’n ganny menm dan sa Bidze ki Garanti pli ki efikasite latransparans e bon gouvernans.

Nou ti ava’n konpran si Minis ti’n vin ek bann desizyon konkret e dir nou ki wi zot in rekonnet ki’n annan lerer.  E ki Gouvernman i annan lentansyon seryezman pou redres sa bann lenzistis lepase tel ki repran tou later ki dimoun i gannyen an malapropo e redistribye dimoun ki dan bezwen.  E mon repete Mr Speaker.  Sa ki’n ganny li malapropo ! Reviz bann loan ki’n ganny write-off kot SBFA e fer bann dimoun rann sa larzan! Donn vre levidans kor Anti-Koripsyon pou kapab rod sa 50 milyon Dolar ki’n disparet!

Fer Parti Lepep rann sa bann later ki anrezistre anba zot non e koumsa sa bann dimoun ki lo lalis lakaz a kapab ganny en bout later.  Kan eski zot pou ranmas sa larzan ki ankor dwa dan aryeraz kot SRC?  Ki aksyon konkret zot pe pran konsernan rann taks ki pa’n ganny peye par bann Irelande pou deal avek sa bann nasyonalite anba 5(1) eksetera?  La mon ti a konpran ki zot serye pou retourn bann larzan piblik dan kof Gouvernman pou met nou pei dan Kof Gouvernman pou met nu pei an premye.

Minis in dir ki lemonn pe get nou.  Wi Minis lemonn pe get nou me avek mefyans.  Akoz osi zot ti krwar dan nou  pou bann larzan i ganny aksepte en pe partou.  Ozordi ni nou pei vwazen Maurice, La Reunion, Madagascar pa oule nou larzan.  An plis ki sa ozordi nou dan gran problenm correspondence banking, ki fer ki difisil pou bann labank transfer larzan libreman.  Tousala se bann size ki en Gouvernman LDS pou deswit atake e re donn nou pei sa kredibilite ki i merite.  Afe ki biznes ti ava ganny fasilite e nou lekonomi i ava grandi avek biznes prop.  LDS i anvi nou pei LDS i anvi donn nou pei son vre lafyerte.

Mr Speaker Minis i dir ki sak Seselwa i bezwen vwar son prop devlopman dan sa pei e personn pa merit ganny kit ater.  Sa parol li menm i prezante prensip ki nob.  Ki nou tou nou ti a kontan vwar arive.  Malerezman son parol i lwen realite.  Kote ki li sa fanmir ki reste 23 zot dan en lakaz 3 lasanm i vwar son devlopman anba sa Bidze kan Sistenm Pwen in fini dir li ki i pa kalifye?  Kote ki li sa enn ki pe esper en proze semen Gouvernman in dir li ki i pa tonm lo lalis priyorite, akoz kantmenm i annan son problenm i pa kalifye anba proze kominoter akoz zot fer pou benefisye 4 a 5 fanmir e non pa endividi?  Kote ki ou ki ou annan ou prop later e plis ki 10an ou pe espere en loan ek MLUH pou konstri ou lakaz ou ganny dir akoz ou annan zis en zanfan ou bezwen espere pou tonm dan sa devlopman?

Mr Speaker me parol Minis i aplike i aplik vre pou sa politisyen ki Sef parti politik ki kapab konstri en sato letaz anler Sorento ki kout plis ki kout en kantite milyon Roupi.  Lo en later ki zabitan Glacis ti’n deza ganny dir i tonm dan Rezerv!

Wi Minis demann dimoun parey Mr Justin Constant ek son frer, ki ti’n fer demars pou ganny en morso e zot ava dir ou zot ava dir ou larepons ki zot ti gannyen.

Zabitan Glacis i kontinyen ganny met lo ‘lalis espere’ e sa ki annan privilez i pas par devan zot.  I vreman tousan ler ou tann en manman vin kot ou pou dir ou in ganny met deor avek sn de son pti baba 2 mwan e son 2 lezot zanfan. I napa en landrwa lozman.  Sityasyon dan bann bedsitter i kontinyen deteryore.  I annan ki’n fer plis ki 23an e pe atann.  E i ankor pe esper promes.  La mon mazin Jane, Rosie ek Aline 3 merd fanmir ki zot ka i pli grav.

Mr Speaker mon rekonnet ki sa Bidze pe seye pou aziste lapey travayer vizavi pri lavi.  Me mwan osi krwar  ki i pa al ase lwen.  E sa ki pli vilnerab pou kontinyen reste deryer.  sa logmantasyon 5poursan lo lapey minimonm.  E lo bann benefis sosyal tel ki pansyon e bann lasistans.

Wi Gouvernman in donn logmantasyon  R200 a R250.  Me ler ou get vre sityasyon ou vwar kot sa logmantasyon pa signifiant e pa pou ed lavi sa endividi. Sa dimoun ki pe ganny sa R200 ou byen R252,  i aste manze dan menm laboutik ek nou tou. I aste son lavyann kot nou, nou aste ler Gouvernman i met sa nouvo taks  15poursan lo lavyann pri e azout sa R5.92 par kilo i osi i pou ganny afekte.  Si i ti pe pey en kilo poul R65 la ek sa nouvo taks  i  pe al pey anviron R80.

E menm zafer pou lavyann pork.  Sa nouvo taks 15poursan e sa R3 ki zot pou azoute pou fer sa lavyann pork sorti R85 pou vin R102.  Eski lavi pe desann?  E pa bliye Mr Speaker tou biznes ki vann manze pou aziste son pri  se konsonmater ki pou soufer.

Mr Speaker mon ti a kontan ki Minis i donn ou en leklersisman lo sa long service allowance.  Mon’n tann zis pou bann travayer Gouvernman.  Ki pou arive ek bann travayer parastatal eski Minis pe mazin osi entrodwir en Scheme ki zot osi zot ti a benefisye?  Oubyen eski bann travayer parastatal osi pou gannyen?

Mon senserman krwar ki malgre ki nou pe aziste sa saler sa pa pou amelyor Bidze serten fanmir.  Nou zefor i devret vize lo fer desann pri marsandiz ek bann servis pou fer ki tou dimoun i a benefisye.  Akoz nou tou nou a dan menm magazen.  Nou tou nou ganny elektrisite avek PUC.  Tousala pe kontinyen monte.

Ozordi ler Minis i dir zot pe dir 15poursan VAT lo bwat ton e sa i ava, fer desann pri lavi.  Mon riye, mon pe dir Minis sa pa ase!  Akoz 15poursan VAT ki ou pe retire l en bwat ton i reprezant zis R1.65.  E kote sa pou anmenn sa merd fanmir?

Minis ou tir R1.65 lo en bwat ton e ou met R5.92 lo en kilo lavyann.  Vreman!  Wi nou a pe fer desann pri lavi!

Mr Speaker petet Minis ti a kapab eklersi mon lo sa pwen pou nou konnen enn fwa pou tou  dan ki kad bann home carers i travay? Oubyen ganny kategorize ?  i ganny konze i ganny Trezyenm Mwan  Saler, selman i pa pe ganny peye tann servis ek Gratwite.  Mon krwar ki’n plis ki ler pou nou met sa bann dimoun dan menm ka ek lezot travayer Gouvernman kot zot a ganny zot benefis parey bann lezot travayer gannyen.

Akoz i annan ki fer sa louvraz ki’n fer sa louvraz ki plis ki 15an e zot osi zot ti a kontan si zot ti a pe benefisye sa allowance pou tann servis parey lezot travayer. Mr Speaker akoz sa bann carer zot kad louvraz i parey en nursing assistant.  Si pa plis.  Sof zot, zot donn sa swen kot lakour.  Nu bezwen pran kont ki zot al dan menm laboutik ki nou tou.  Zot sibir tou sa koud lavi ki nenport ki dimoun i sibir.  Akoz zot bezwen ganny defavorize?

Minis  gete kwa ki kapab ganny fer pou sa bann home carers silvouple.  R250 pa nanryen dan zot lanmen.  Mon dir ki i enportan pou nou pep konsonm prodwir ki fer nou reste an bonn sante.  Evit prodwir disik koup lagres eksetera.

Me de lot kote Mr Speaker.  Mon pou dir ki ban prodwir ki bon pou lasante zot menm ki vann pli ser.  E dimoun pa kapab aste.  Tou sa bon pa bon li menm li ki vann pli bon marse.  Alors sa fanmir ki pli vilnerab i pou ase sa ki pli bon marse.  Konmdir koze i pou tay son palto dapre son latwal!  Eski Gouvernman pa kapab regard dan sityasyon e fer serten propozisyon afe ki nou pep i ava viv pli byen e sa i ava ede koup Bidze Minister lasante.  E byensir sosyete a viv pli lontan.

Mr Speaker letan mon lo sa size lasante on le tous lo sa zafer R25 paye pou preskripsyon ki bomaten mon’n tan i Anti-Konstitisyonnel.  Nou konnen ki bokou dimoun ki al kot dokter sirtou dan Lendi sa bann dimoun ki pe al rod en zour konze.  Sa bann dimoun rantre kot dokter ler i sorti i ganny son papye konze e sonm preskripsyon i pou pran son konze i pou kit sa preskripsyon ater oubyen met sa dan bin !  Eski sa i bon pou nou lekonomi?  Annou mazin ankor lo la.

Mr Speaker mon pou osi fer remarke ki i annan ansemoman mankman serten re agent kot laboratwar.  E sa i fer ki i annan maladi ki pa pe ganny detekte.  E se solman letopsi ki pou dir ki i ti gannyen.  Apre tou nu lasante i enn nou priyorite.  I bon osi fer resorti ki aktyelman la delo so dan female ward opa pe marse.  E sa mankman i depi semenn pase.  Ki mannyer ou espekte en pasyan ki’n malad i benny dan delo fre?  Kwa ki nou priyorite Mr Speaker?

Mr Speaker  ozordi Sesel Seselwa i per pou son prop sekirite.  Dimoun i dir ou lontan zot ti per aswar.  Me ozordi menm lizour dimoun ki tousel kot lakour i viv dan lafreyer.  Dimoun i ganny vole menm dan Legliz gran lizour letan pe fer lapriyer kot Katedral Imakile Konsepsyon!  Ek sa sityasyon drog ki pe  depas nou sitasyon pe agrave.  En dimoun pa santi zot an sekirite.  E sa bann zenn ki fodre kriy zot konman bann ‘pti men lapoud’ i kontinyen ravaz tou distrik. Vol touris, antre dan lakour dimoun e vole pran sa ki zot bezwen.  Si ou annan en pye fri devan ou laport pli move ou vin en target.  E parfwa ou bezwen zis les zot pangar ou lav i kapab ganny menase.

Ler ou annan ou plis ki anviron 5mil a 6mil, zenn ki lo eroin 350 – 360 black spot dan pei e ou annan ou zis 150 zofisye AND!  ou kapab konpran sityasyon?  Alor Mr Speaker nou bezwen plis mendev.  E bann mezir kolektiv ti vreman nou le met sa sityasyon drog anba kontrol.  Pa vin rod progranm LDS lo drog.  Manda i dan zot lanmen.  Zot ki bezwen deal avek.  Si zot anvi vwar nou progranm drog – met LDS o pouvwar zot a trouve.

 

(APPLAUSE)

 

HON REGINA ALCINDOR

Menm parey zot anvi vwar nou shadow Cabinet fer eleksyon zot a trouve!  Pa rod nou esper nou!

Me antretan i bon fer resorti ki drog i reste defi mazer ki Gouvernman i nepli annan plan ki mannyer pou deal avek.  Se pou sa ki sel keksoz ki zot kapab  met lanfaz lo la se sa progranm methadone.  Petet Mr Speaker i enportan pou dir ki sa i en metod aksepte par lemonn dan tretman eroin.  Sa i en fason.  I annan bokou lezot ankor.

La alor mon ti a kontan demann Gouvernman oubyen bann Lazans konsernen, pou osi regard lezot metod.  Eski napa fason pli diskre pou donn sa bann dimoun zot tretman?

Mr Speaker mon remark en ogmantasyon 30poursan dan Bidze Welfare.  Mon dakor ki nou pei bezwen pran ka ek dimoun ki mwen fortinen e pli vilnerab.  En Gouvernman ki responsab i osi bezwen edik son pep ki mannyer pou ed son lekor, pou ki demen sa progranm Welfare i a ed sa dimoun pli vilnerab pou refer son lavi e gradyelman vin endepandan.  E sorti lo sa progranm.

Enn ler mon krwar ki Gouvernman SPPF/Parti Lepep i kontan letan dimoun pe depan lo welfare akoz sa i donn ot sa loportinite pou monitor sa dimoun e souvandfwa zot fe sa drwa pas konman en faver.  Ziska prezan mon pa ankor tann okenn progranm serye pou retir dimoun lo welfare e met zot dan lanplwa permanan.

Mon pou ensiste fodre zis dimoun ki dan bezwen ki devret resevwar welfare.  Fodre pei i vin pli serye e evite ki i annan labi.  Sirtou dan letan eleksyon kot ou vwar gran, gran laliny dimoun pe ale par grap pou ganny larzan welfare.  Akoz apre tou larzan welfare se tax payers money ki Seselwa i peye Mr Speaker.

Lo sa size lo sa proze 24 lakaz  dan 24 mwan. Mon pou repet sa ki Minis Finans  ti dir ,ki dan son prezantasyon Bidze lannen pase.  Mon quote ; ‘’savedir ki anba sa progranm progre i swivan ; de proze in konplete 7 proze p al lo tender sa mwan e sa ti distrik Cascade, Roche Caiman, Glacis eksetera’’.  Sa ti Novanm lannen pase ler i ti prezant Bidze Mr Speaker.

Me ziska prezan mon pe koz lo distrik Glacis kantmenm zot in dir ki zot ti pe al tender proze 24 lakaz dan 24 mwan Novanm lannen pase, ni menm teren pa ankor garanti pou sa proze.  sa landrwa kot zot ti pe mazin fer i ankor  an kestyon.

Alor ka ki zot ti dir zot pe al tender Mr Speaker?  In ler pou nou pran e aret fer krwar e bat latet Seselwa.  Mon pa pou met blanm lo okenn Minis Finans akoz apre tou zot met dan zot diskour lenformasyon ki zot resevwar avek bann Minister ek Lazans.

Alor mon ti a kontan mon ti a donn Minis en pti konsey pou verifye byen lenformasyon avan fer deklarasyon.  Akoz Minis bokou mensonges!

Mr Speaker mon pou dakor ki nou pei i bezwen pe bouz ver lotosifizans.  Me selman i annan en kantite defi ki nou bezwen simante  pou nou attend sa bi.  Wi nou bezwen relans nou Sekter Lagrikiltir ogmant prodiktivite pou nou koup nou lenportasyon.  Pou nou arive fer sa nou pep i bezwen konpran ki kontribisyon sak Seselwa dan sa pei i enportan.  Nou zenn i bezwen pran zot responsabilite serye.  Nou pa pou bouz devan si en kar nou zenn ki lo methadone e lot kar i lo welfare ek ‘pti ponm’ zis en lanmwatye popilasyon ki pe travay pou soutenir sa pei.

Nou sipoze en high income country ki akonpli en kantite.  Me selman i reste ki 40poursan popilasyon i kontinyen viv dan lapovrete.  I bezwen annan en fason pou Gouvernans nou pei montre direksyon.  Malerezman ankor enn fwa leadership i fail pou adres esansyel e sa i fer ki lezot i trenn lipye.  Letan nou dir fodre nouvo eleksyon, se parski nou pei pa pe bouz e e i mank direksyon.  Nou pep in ase soufer e mon osi mon pou dir Mr Speaker ‘’enough is enough !’’ 

Les mwan regarde kwa ki mon distrik in ganny promet dan sa Bidze.  Anba Proze Kapital i annan 3 proze ki ti’n sipoze demare lannen pase.  Ki ziska prezan pa ankor materyalize.  Enn ti proze agrandisman semen lo komansman vilaz North East Point.  Konman en MNA elekte mon’n fer li mon devwar ansanm ek DA pou anmenn CEO transpor lo site, pou aprofondi lo sa proze e konnen kan ki sa pou demare.  E ziska prezan keksoz i ankor pe trennen e semen i ankor zis plan lo papye.

Lot proze se sa proze agrandisman semen La Gogue konmansman kot Legliz Glacis pou al lo danm La Gauge.  Sa osi mon’n vizite ansanm avek DA ek CEO Land Transport. 

        Ozordi dimoun ki pe servi s a semen, i pas dan bokou difikilte sirtou ler  lapli i tonbe bis pa kapab fer letour e dimoun La Gogue i ankor pe reve  ki sa semen sa proze  i ganny realize.

Pourtan CEO in dir in dir nou ki 2.4 milyon ti’n fini ganny mete pou sa pou son premye faz dan Bidze  lannen pase,  akoz i en proze ki pou fer  par faz.  E ziska prezan ni menm premye faz nou pa ankor vwar.

En lot proze se sa proze  playground pou zanfan lekol Glacis.  Sa osi enn ki pe trennen.  Larzan in ganny vote e proze pa ankor demare.  Mwan pase Minis in vin dir  nou ki pe al fer  tre byento plan in finalize pe al tender. 

Mon oule re asir en zabitan Glacis sirtou bann paran ki annan zanfan kot lekol, ki mon pou kontinyen swiv sa  pre pou fer sir  ki lannen prosenn Gouvernman i delivre e zot zanfan a ganny zot playground! 

Mr Speaker la mon bezwen fer  en komanter  baze lo sa ki serten Manm i dir ki LDS ki nou dan LDS nou kontan ‘freeze’ bann sonm dan Bidze.  Wi kot i neseser nou’n fer.  Sa pou bon rezon.  Me zis pou obzerve ki sa 3 proze ki mon’n nonmen e bokou lezot tel ki parey lekol ek Lopital La Digue, larzan in ganny vote.  Eski proze i ganny bouze ?  Non.

Alors silvouple aret met linefikasite zot Gouvernman lo led LDS! Dir ek zot Gouvernman aranz li en pe.  E zot bann MNA aret rabase, rabase, rabase,  konmsi kof Gouvernman i pou LDS.  Pran zot responsabilite e deliver!  Si zot pa kapab deliver nou dir OUT! 

Lot proze se sa proze store peser ki’n demare depi 2017 e in ganny retar.  Akoz serten sanzman dan son striktir.  Mon swete ki sa proze  i ganny eklersi e i a re demare e konplete lannen prosenn.

Nou kontan ki proze changing room in demare pe konplete.  An vi ki Glacis napa te neseser pou fer fasilite  spor, nou dan demars pou agrandi sa laplenn i egziste e amelyor fasilite spor.  Bus stop dan sant Glacis Bidze in fini ganny aprouve lannen pase, me son lokasyon i ankor problenm parey bus stop Carana.  Nou swete ki sa i a kapab ganny finalize byento.  Lalis lakaz ek lalis later i reste long.  E dimoun ki lo lalis lakaz  pa konnen kan zot pou ganny ede sirtou anba sa Sistenm Pwen, ki bokou pa ankor konpran ki mannye i marse.  Nepli annan lakaz emergency e letan en maler i arive pa konnen kote pou met sa bann viktim.

La mon mazin Mr France Guichard ki son lakaz ti brile 6an pase e ziska prezan i ankor dan en bedsitter e pa ankor konnen kan i pou ganny ede.

Jane i ankor pe dormi dan lakwizin, Aline i ankor bedsitter, Mrs Juliette ek Mrs Tirant i ankor pe esper miray  deryer zot lakaz lo flat e zot in ganny dir ki napa landrwa pou fer desarz delo.

Mr Speaker nou bezwen rezourd nou bezwen rod solisyon nou pa kapab les dimoun dan sa leta!  I malere pou dir i bann proze distrik i kontinyen trennen.  E bokou dimoun i dekouraze e bokou i akoz sa problenm wayleave. 

Me selman i annan distrik ki zot malgre tou zot zot gannyen wayleave.  Dimoun i ankor i ankor pe ganny pini. Parey sa madanm 54an ki’n telefonn mwan pandan lunch time ki reste Cascade, ki dir mwan in bezwen met son tonton 82an lo son ledo sak fwa i malad pou li ariv kot semen pou li ganny lanbilans.

Pourtan i dir ek mon 10 dimoun dan vwazinaz in fini siny wayleave pou kapab fer semen me i pa konpran akoz son semen pa ankor ganny fer!  Sa madanm i dir mon met son soufrans devan Lasanble Mr Speaker.  E mon senpatiz avek li.

Mon pa kapab reste trankil e pa koz lo lekol primer Glacis.  I byen ki nou  ganny en nouvo lekol avek Gouvernman Chinois an 2016.  Mon kontan vwar ki bann ansenyan  e lezot travayer i don tou pou progre bann zanfan ki dan lekol laba anba direksyon Ms Vivienne e mon tir sapo ek zot ek zot pou zot devouman.

Me Mr Speaker ozordi i fer preski 3n ki sa lekol pe ganny servi.  I annan defayans lo son sistenm elektrisite – son tiles ater i glise.  2 staff in tonbe zot ankor pe fer  physio.  Son raling pe sorti enn par enn.  Teachers  i per ki zanfan i apiy avek e zot tonm anba.  Dibwa ki pa’n trete pe ganny manze ek karya anndan.  E dan en meeting ki mwan menm mon, mon ti gannyen ek PS Ledikasyon ek Project Manager mwan pase, i ti fer konpran ki Minister pou bezwen depans ankor R1.2 milyon pou fer sa louvraz reparasyon lo sa lekol.

En larzan Mr Speaker ki ti an kapab ganny servi pou ed nou zanfan dan zot letid ek laprantisaz.  Malerezman serten kado ki’n bann kado i an pwazon-nen konmdir Mauricien. 

Proze daycare pe ganny relocate akoz administrasyon distrik in bouz kot daycare ti ete e daycare pou al kot ladministrasyon distrik ti ete.

Kordgard ki pe grenn par morso pe al ganny bouz dan Sant Kominoter  tanporerman antretan ki diskisyon i kontinyen pou vwar teren pou n nouvo Kordgard.  Akoz Mr Valentin i dir ek mon ki li i pou gard pou Glacis i pa anvi en Police post li, me i anvi en i vwar en Kord Gard ki fonksyonnen e ki efektiv.

Mr Speaker  les mon dir ki mi annan bokou defi pou fer fas avek.  Bokou ti an kapab ganny sirmonte si selman Gouvernman ti donn direksyon kler.  Montre lankourazman ek sa dezir pou akonpli sa ki meyer pou nou pep.

Me mon bezwen dir ki mon trouv en trenn lipye ki ou a krwar i enn ki’n ganny byen organize avek en stratezi kler.  Nou bezwen senpleman regard bann dat ki’n ganny nonmen.  Plis dan sa Bidze.  Eski i annan sa irzans?  Antouka mon pa krwar sa mon.

I kler akoz sa Mr Speaker  akoz zot Prezidan i dir pou dir in divorse avek parti selman i le reste dan sa menm lakaz kot in divorse.  E nou, nou pe dir ek nou Prezidan be si ou’n divorse silvouple OUT!  Pa bezwen reste dan sa lakaz !

Par fwa mon le krwar ki Parti Lepep pe boycott sa pei! Mazinen kwa ki ti arive apre ki LDS ti raport mazorite 15 lo 10 isi dan Lasanble.  Clerk, Deputy Clerk, Serzan, Sef Departman Finans e bokou lezot ti kite an grap avek lentansyon paraliz Lasanble Nasyonal!

Erezman nou’n reisi debourye e sa Lenstitisyon in reste la lo son de lipye e in fer en travay bokou plis ki sa 5enm Lasanble!  E sa in ganny rekonnet par bokou Seselwa eksepte detrwa Manm Parti Lepep Mr Speaker – parey Onorab Valmont i kontan dir malgre ki tou  kritik i reste i la konman sa dimoun avek sa tit Onorab.

Dan sa lespri boycott ou a krwar ki proze i trennen zis pou pini nou pep pou ki apre zot met sa blanm lo LDS.  Me sa pa pou marse.  LDS i determinen pou fer keksoz bouze.   Se pou sa rezon nou pe dir avek Msye Faure annou retourn devan lepep Seselwa e les sa pep desid son lavenir.

Nou kontinyen debout lo kote nou pep e nou pou fer sir ki nou delivre bokou dan en kourt letan.  Apre nou vwar sa konfizyon.  Ki mon pa konnen lekel ki met dan zot lespri.  Petet se ‘sat maron’, ‘Bernadette’ ‘masin koltar’, ‘Aline,’ ‘Pti Toya’ oubyen Loze li menm.  Sa se pou fer zot krwar ki LDS i en Lopozisyon permanan.

Mr Speaker mon ava eksplik zot kote zot in biteAn 2016 lepep Seselwa ti donn LDS en mazorite 15 lo 10  dan Lasanble Nasyonal.  Lo Mahe LDS raport 14  dan 22 distrik. Lo Praslin 1 lo 1 !  Lo Inner Island Parti Lepep ti gannyen.  Sa ti fer 15 lo 10.  Me lepep Seselwa ti osi donn LDS sa ki nou apel popular vote.  Setadir nou ti ganny dir vot ki Parti Lepep.  Sa i osi vedir  ki si  ti annan en eleksyon prezidansyel se LDS ki ti pou raporte!  Alor reveye konmdir Anglais smell the coffee!  Si zot pa ankor byen konpran mo a senplifye pou zot.  Fer eleksyon prezidansyel.  E se LDS ki pou gannyen!

LDS pa en lopozisyon permanan li. LDS  i ‘’Government in-waiting.’’  Alor mon pou dir ek tou sa ki pe soufer tou bann ki anvi vwar en sanzman annan lespwar.  Nou pou kontinyen pas sa mesaz Danny OUT ziska nou a reisi akoz Mr Speaker – Nou, nou pa pou zanmen LES TONBE! Mersi.

 

(APPLAUSE)

 

MR SPEAKER

Mersi Onorab Esparon.  Mon ava pas laparol avek Onorab Simon Gill.

 

HON SIMON GILL

Mersi bokou Mr Speaker.  Bonn apre midi Mr Speaker.  Bonn apre midi tou Manm Onorab dan Lasanble tou manm piblik ki pe ekout nou. E bonn apre midi Minis avek ou lekip.

Mr Speaker depi ler Bidze  219 in ganny prezante par Minis Finans, bokou Seselwa in ganny loportinite pou zot fer plizyer refleksyon lo la.  E bokou nou, bann Manm Lasanble Nasyonal in osi annan loportinite pou analize e fer refleksyon lo Bidze 2019.

Sakenn de nou, nou annan nou lopinyon nou annan nou rezervasyon nou annan bann bon kote ki nou’n vwar dan Bidze 2019.  E nou’n osi annan bann kritik ki nou’n vwar.  Sa i en proze ki mon vwar li normal.  Annefe i en labote dan en sistenm demokratik kot bann Manm Parlman e piblik an zeneral i ganny loportinite pou fer bann kontribisyon anver sa ki pe pase dan zot pei e sa ki zot ti ava swete zot bann reprezantan ki zot in elekte pase lo zot par dan Lasanble Nasyonal ler Bidze pe ganny debat lo la.

Sepandan Mr Speaker i enportan ki mon fer detrwa komanter de mon par lo bann lentervansyon ki’n ganny fer depi ler nou’n konmans diskit lo Bidze 2019.

Premyerman Mr Speaker Bidze 2019 pa en Bidze ki ‘Made in India.’  I en Bidze ki’n ganny fer par bann profesyonnel kapab konpetan ki’n pran zot letan pou etidye e pou sorti avek bann rezilta ekselan dan zot letid e deside retournen pou donn en kontribisyon ver devlopman zot patri Sesel e donn lanmen pou konstri en batir sosyete Seselwa.

Mr Speaker dan mon konsiderasyon personnel mon’n vwar sa statement Bidze ‘’Made in India’’ konman en ensilt.  En lensilt pou lentegrite lo bann profesyonnel dan Minister Finans.  E detrwa ki’n koz avek mon i dir mon lo nou ote annou fer atansyon.

Mersi pou dir mon serye mon, mon krwar ki mon pe serye dan sa ki mon pe dir.  Mr Speaker i en enportan ki nou vwar sa bann tandans.  Sa bann tandans i danzere.  Yer nou ti koz lo (pa trakase avek sa bann zafer  Basil mon napa nanryen pou fer ek Basil mwan).  Yer nou ti koz lo  Mr Onezime OUT!  Nou ti koz lo Gappy OUT!  La nou koz Danny OUT! 

Mr Speaker i annan en tandans ki pe devlope dan sa pei ki danzere.  I ekstrememan danzere, akoz i annan parmi sa bann mouvman laenn ki pe ganny transmet dan nou pei.

 

(APPLAUSE)

 

HON SIMON GILL

Ekstrememan serye.  Nou pe koz stabilite dan Sesel.  Nou e koz respe dan Sesel e i annan ki profit sa bann moman pou zot mank respe pou tou  dimoun.  Nou napa en limit!  Nou mank respe pou tou dimoun e sa i danzere Mr Speaker.

Nou ekrir mannyer nou oule.  Lo Facebook.   Nou fer bann diferan komanter e Onorab Ramkalawan li osi i santi li tre fatige avek sa bann komanter lo Facebook.  Sa i tonm dan kad respe!  I tonm dan kad respe.  Zot akiz nou oubyen zot pen nou konman bann nwanr mazanbik e sa i danzere!  I pa bon !  Nou bezwen letan nou ganny bann loportinite pou diskit e fer bann lentervansyon lo size Bidze 2019, nou bezwen evite pas sa an komanter e fer bann refleksyon serye pou ki nou anmenn nou kontribisyon, nou anrisir Bidze 2019, nou montre nou bann rezervasyon ki nou annan pou ki nou kapab fer nou kontribisyon pou fer pei pou fer Sesel avanse.

Mr Speaker dan Bidze 2019 konman en sitwayen ordiner, pa konman en Manm Lasanble Nasyonal, mon vwar lespwar dan Bidze 2019.

En lespwar dan Bidze  2019, i pa zis en statement akoz nou ganny loportinite pou dir.  Non.  Mr Speaker sak lannen Gouvernman Parti SPUP/SPPF/ Lepep in prezant Bidze.  E dan sak lannen ki nou’n prezant en Bidze zanmen, zanmen, zanmen nou’n pretann krwar ki en Bidze ki nou prezante pou en lannen pa anmenn solisyon pou tou problenm Sesel.  Non!  En Bidze  ki ou prezante pou en lannen pa zanmen kapab port solisyon pou tou problenm Sesel.

Me sepandan i donn en sans direksyon.  I donn ou en sans pou etablir serten priyorite – serten domenn spesifik kot koman en Gouvernman.  E byensir ler ou’n ekout serten bann lekol serten bann leko serten bann kontribisyon ki bann Lasanble  no menm  nou, ki bann sitwayen deor ki bann diferan lorganizasyon i kontribye, Gouvernman i sey etabli e sey en lekilib.  Pou ki nou kapab arive prozekte en depans pu nou akonpli serten lobzektif tre spesifik.

E byensir ler nou koz bann priyorite ki’n ganny defini dan Bidze 2019 Mr Speaker, mon vwar No.1 se sa  revolisyon ki nou menm nou’n demande ki nou bezwen anmennen, pou relans oubyen relev Sekter Lagrikiltir dan Sesel.

Byensir pa nou tou ki’n dakor avek lafason,  ki Minis in prezant lapros vizavi sa transformasyon –  sa relansman ki nou anvi anmennen dan Sekter Lagrikiltir.  Me sa ki enportan – sa ki enportan Mr Speaker se omwen nou’n prezant en sans direksyon.  Omwen nou’n prezant en serten en kantite mezir pou nou kapab adres serten konsern ki nou konsider enportan.  E Sekter Lagrikiltir Onorab Ferrari i en sekter tre enportan.  E mon kontan dan ou lentervansyon ki ou ti fer lo Mosyon Onorab Adelaide ou ti koz an faver sa transformasyon enkli nou menm nou lo sa kote latab,  nou’n koz lo nesesit annan en transformasyon.  Annan en relansman.

Now kestyon ki poze – kestyon ki poze, eski mezir pou met en levy adisyonnel or met en poursantaz adisyonnel ki nou peye ler nou enport lavyann koson – poul, eski sa le vi ki nou e mete sa bout adisyonnel i rezonnab?  Eski Sekter Lagrikiltir dan Sesel, in ariv en staz kot zot kapab vreman rantre e konble – konble sa antite lenportasyon  e son kou ki pou koute ki nou kapab anvoy lo marse  pou ki nou pep i kapab konsonm lavyann poul lavyann pork a en pri rezonnab? Ki si oule ekilibre or balanse oubyen pli bon marse ki s bann lavyann ki nou enporte.

Sa i kestyon fondamantal ki nou bezwen poz nou lekor.  E ler Minis Lagrikiltir i vini, avek son bann teknisyen nou ava demann zot ki prozeksyon ki zot in fer, pou ki nou bann prodikter lokal i kapab reisi arive  ekilibre prodiksyon lokal anfas lakantite lenportasyon ki nou pe fer dan sa pei.

E nou ava gete ki dele letan nou’n donnen e si vreman nou bann dimoun ki anlinyen isi dan Sesel pou vreman kapab akonpli sa latas.  Ki bann sipor adisyonnel ki nou bezwen don sa bann fermye ki pe prodwir lavyann dan Sesel, pou ki dan en  mwens dele letan posib nou kapab arive vreman ekilibre oubyen etablir en balans rezonnab, pou ki pep Seselwa i kapab vreman aste lavyann a en pri ki rezonnab.  E ki probableman bann dimoun ki pi enporte – bann prodikter lokal ki pe enporte i a pran en desizyon pou koup zot lenportasyon e sa i ava annan en lefe pozitiv lo konsonmater Seselwa.

Mr Speaker Onorab Ferrari i kontan entervenir letan mon pe koze.  Mon prezimen ti ava byen dir li silvouple les Onorab Gill koze akoz in donn zot tou posibilite pou koze e la i son tour pou li koze i pa’n enteronp personn depi ler zot in konmanse.

Mr Speaker eski nou kapab tonm dan dakor lo sa silvouple ?

 

MR SPEAKER

Kontinyen Onorab.  Si i annan okenn enteripsyon  mon ava rantre.  Bon zis  sa i zeneral po tou Manm.  Annou ekout Onorab Simon Gill. Onorab kontinyen.

 

HON SIMON GILL

Mersi bokou Mr Speaker.  Mr Speaker mon oule koz lo en lot size – pri lavi.

Mr Speaker pri lavi i en size ki nou pou tann koze dan sa Lasanble ziska ler nou  manda i fini.  In en size  ki nou’n tann koz lo la depi 1993 depi premye Lasanble Miltiparti ti vin an egzistans.  E ziska ozordi nou ankor pe koz lo la.

Me i annan en keksoz ki’n sanze.  Ler nou ti koz lo pri lavi 15an pase ou menm 20an pase.  Ti annan serten mekanizm ki ti an egzistans.  Ti annan serten striktir ekonomik ki ti annegzistans. Malgre i a ti parfe me ti annan en fason kontrole.

Mon pou dir sa mon konnen i pou  ofans en kantite  nou bann koleg lo lot kote latab me it’s ok osi lontan ki nou respekte  lopinyon.

Mr Speaker apre ki mon’n ekout tou sa bann koze lo pri lavi lo sa pei apre ki Gouvernman Parti SPUP/ SPPF/ Lepep i liberaliz lekonomi ki ti en demann en presyon ensiportab par serten kous Lopozisyon dan sa pei nou’n liberaliz lekonomi.

Nou’n tir pri kontrol dan sa sistenm.  Nou’n ganny akize ki i pa ti bon sa pri kontrol – i pa ti parfe, nou aksepte sa.  Me ozordi ler nou’n ganny trennen avek en filozofi pou dir marse lib i solisyon pou anmenn komodite  pli bonmarse dan sa pei, sa fenomenn pa pe rezourd sa problenm!

E Onorab Afif Onorab Afif Mr Speaker i konn sa tre byen. Pou dir dan konteks Sesel sa zafer teroriz liberalizasyon pa pou marse dan son totalite !  I zis parey ki ou pe fer en nespes mon pa oule servi sa term ozordi la me i en problenm.  I artifisyel.

Me selman ki nou dir Mr Speaker ?  Nou’n dir kartel ki pe anpes pri komodite desann.  Nou dir kartel.

Mr Speaker eski nou kapab fer en demann dan sa Lasanble ozordi pou ki tou sa ki annan non son sa bann biznes  ki nou apel kartel spell it out!  Met ater dan sa Lasanble dan moman ki nou pe ariv dan Committee Stage.  Si nou pa pe ganny en sans entervenir pou koz lo la, met ater.  I vre Onorab  Hoareau Basil Hoareau lo nou kote in koz lo kartel me pa zis li.  Detrwa nou bann koleg isi in koz lo kartel.  E lo lot kote latab n osi koz lo cartel.  Mwan ki mon e dir, les pep Seselwa konnen ozordi Mr Speaker, avan nou fini deba lo merit  e prensip zeneral Bidze 2019, les pep Seselwa konnen mo tou sa bann kartel ki i annan dan sa pei …

 

(APPLAUSE)

 

HON SIMON GILL

… e ki pep anpes pri komodite  desann dan sa pei Mr Speaker.  Met ater Mr Speaker!  Sa i premye keksoz.

Mr Speaker  zour nou fer sa, nou ava defini ki lapros nou pran konman en Lasanble pou nou arive adres sa bann biznes, pou nou dir i Kartel.  Pou nou dir i Kartelsa i premye konponan ki nou dir pe afekte koud lavi or pri lavi. Annou met ater silvouple.

2enm keksoz Mr Speaker, ler nou koz koud lavi bann entervenan ki’n pase  avan mwan e in vin lo kote Onorab  Afif, lo kote Onorab Ramkalawan, nou’n koz lo labank.  Nou’n koz lo sistenm banker.  E nou’n met lanfaz lo ki mannyer labank pe kontribye, pou osi gard koud lavi o.

Mr Speaker lo kote labank Money Changer pa labank.  Mr Speaker labank i annan mansyon ki Gouvernman i annan 2 labank or i annan par dan 2 labank.  Dan Nouvo Banque avek Seychelles Commercial Bank.

Mr Speaker, sa ki nou konnen i annan serten bann prodwir ki         Nouvobanq pe ofer lepep Seselwa ki bokou pli konpetitiv ki tou labank dan sa pei.  I annan prodwir ki Seychelles Commercial Bank pe ofer ki konparab oubyen en pe pli ser an term son to lentere ki i sarze lo bann diferan loan portfolyo.  Nou annan nou Mauritius Commercial Bank ki pe ofer serten prodwir ki osi konpetitiv ki Seychelles Commercial Bank e Nouvobanq e Barclays.

Now, in annan en demann – in annan en demann dan lentervansyon Onorab Afif pou ki labank ki Gouvernman i annan par ladan i bouze e etabli standar met sa barenm.  Sa mon dakor avek.  Annou bouz dan sa direksyon. Me i pa ase ki labank Gouvernman i bouze.  Dan plizyer moman nou’n koz lo nesesite ki nou antre an dyalog avek tou labank ki pe operate dan Sesel, pou ki an retour zot donn bann prodwir avek bann to lentere ki rezonnab.  E zot entrodwir bann prodwir adisyonnel pou ki an retour nou kree sa lespas favorab pou ki bann biznes i ganny en sans rantre e kapab ganny Kapital pou zot fer biznes.  Sa i en legzersis enportan e mon konvenki ki nou kapab fer li e mon konvenki ki zot kapab kontribye efektivman dan rediksyon pri lavi.

Lot sekter ki ekstrememan enportan Mr Speaker, se sistenm telekominikasyon bann dimoun ki donn servis telefonn, televizyon, internet, eksetera.

Mr Speaker la osi mon dakor ki 2enm kab soumaren si sa i kapab kontribye pou fer desann pou fer desann pri servis ki sa bann provider i donnen, so be it!  Annou bouze.  Me si nou pa kapab annan en serten sans garanti ki sa bann provider pou kontribye efektivman pou fer desann kou zot servis, then nou bezwen re-seen e re-look ki lenvestisman ki nou fer dan sa sekter.

`       Mr Speaker i osi enportan ki nou al pli lwen.  Pli lwen kot nou ale se nou al lo kote taks.  Taks i annan en kantite kontribisyon kantite entervenan ki’n dir taks i partou.

Me Mr Speaker dapre bann statistik bann resers ki nou’n fer lo sa kote latab nou vwar i annan 1,500 komodite dan sa pei ki taks i zero lo la or VAT i zero lo la.  .

Mr Speaker mon dakor avek bann lentervansyon ki’n ganny fer – si i annan – si i annan bann komers ki pe kolekte VAT.  E pa pe retourn sa dan sistenm mon krwar nou bezwen re vwar sa tre vitman pou nou kapab ave redres sa sityasyon.  E sa osi byensir – e sa osi byensir i kontribye – i en sonm adisyonnel lo kou bann servis e pri bann komodite.  E si sa nou deal avek i ava osi annan en lefe pozitiv lo sey konsern koud lavi or pri lavi dan Sesel.

Mr Speaker nou pa pou aret la. Nou pa pou aret la akoz nou krwar ki enportan dan sa moman ki nou pe koz lo Bidze 2019, ki nou vwar lezot laspe.  Lezot laspe se ki nou bezwen tonm dakor ozordi konman en Lasanble, avan ler Minis i donn son repons probableman o kote LDS Onorab Ramkalawan, Onorab Ferrari or Onorab Afif i ava donn en direktiv  bann lezot koleg ki pe al koze pou zot state zot pozisyon.

Eske nou tonm dakor pou retourn pri kontrol dan sa pei?  Eske  nou tonm dakor pou nou entrodwir en form pri kontrol dan sa pei? Sa i enportan ki sa repons i ganny donnen ozordi avan ler nou fini sa Sesyon.

Mr Speaker,  nou al pli lwen – nou l pli lwen akoz  i annan en konponan enportan,  ki’n ganny koz lo la lo sa sa kote latab e lo lot kote latab.  E sa se stabilite nou Dolar an fas avek nou Roupi.

Mr Speaker ou pa bezwen en gran ekonomis pou  ou konpran sa.  Osi lontan ki i annan en dinamik dan to lesanz, nou napa en serten stabilite otour en lannen nu pou os annan sa problenm avek pri servis e pri komodite.  Sa ki sa dimoun i peye, i anmenn dan lakour pou konman en komodite oubyen sa servis ki zot peye.

Now i annan bann pei ki’n ganny avanse  ki’n dir nou annou peg nou Roupi or Dolar avek Roupi, pou kapab ganny sa lekilib –  enn.  2enm teori se ki Labank Santral i entervenir e servi nou rezerv pou stabiliz to resanz.

Mr Speaker sa ki mon konnen se ki Onorab Afif pa dakor avek sa 2 teori.  Onorab Afif i pa dakor pou Labank Santral antre pran rezerv pou stabiliz to lesanz.  I pa dakor avek sa li.  E si i ganny en loportinite taler i ava refer son speech ankor lo Bidze pou li convey en pozisyon pli kler ki in convey.  Me dan lot kote Onorab Afif osi i pa dakor Mr Speaker ki nou peg nou  Roupi dan en basket, avek bi pou etabli en to resanz konstan e permanan tou dilon lannen.  Akoz i annan bann risk ki koman en ekonomis i konnen pou arive.

Now Mr Speaker, lo sa 2 varyan ki kontribye dan koud lavi – dan pri komodite inisyalman bann servis mon pou demann Minis avek ou bann teknisyen o bann expert ki nou annan, ki diran deba swa dan Committee Stage  oubyen letan ou pe donn ou repons lo bann diferan kontribisyon ki nou’n fer, mon ti a voudre ou state en pozisyon kler lo sa kestyon stabilizasyon lo to resanz dan sa pei.

Lot eleman ki’n rantre an parantez Mr Speaker, nou’n diskit lo la nou de Onorab Afif Mr Speaker – bann Money Changer.  I annan en kantite keksoz ki nou konpran in pase e pe pase.  E dan enn mon bann lentervansyon avan deba lo Bidze Mr Speaker, mon ti fer en soumisyon e demann Minis Finans atraver ou Mr Speaker, ki Labank Santral i bouze pou etabli en link – pou etabli en link direk avek tou Money Changer ki nou annan dan sa pei.

Pou ki a nenport ki moman Lendi ziska Dimans.  24 lo 24, 7 lo 7, nou kapab arive konpran dinamik ki pase atraver tou sa bann Money Changer, akoz i annan serten bann ekonomis – serten bann expert dan Finans, ki mon’n enterakte avek zot, zot dir nou poudir sa sekter Money Changer i enn bann konponan ki kontribye ekstrememan negativman dan déséquilibré dan déséquilibre ki annan dan nou to lesanz.  Si s ai leka i ava osi kontribye pozitivman ler ki nou’n kapab konpran zot loperasyon – al dan son detay e met bann mekanizm pou regle nou kapab arive pe egzers serten kontrol relatif lo to lesanz dan sa pei.

Mr Speaker nou al pli lwen – nou al pli lwen.  Mr Speaker ler nou al pli lwen nou ale pou koz lo nou servis lasante.  Mr Speaker i enportan ki nou note en keksoz dan sa pei.  E sa ki enportan nou note, se depi 28an – depi 28an Mr Speaker depi 28an or relativman plis ki Lopozisyon in evolye dan sa pei, napa personn ki’n vin avek okenn nouvote dan sistenm lasante, or pou sistenm lasante dan sa pei.

Mr Speaker, lasante dan sa pei i en keksoz ki lo kote  Parti SPUP/ SPPF/ Lepep nou pran li a ker.  Nou pran li  a ker akoz nou konnen kwa ki ti egziste dan sa pei Mr Speaker!  E nou konnen ki transformasyon nou’n anmennen dan servis lasante pou sa pep!

E Mr Speaker mon’n tann Minis lanons  en prescription fee R25.  E mon’n tann en kantite bann Onorab lo lot kote latab, enkli isi ki’n koz lo nesesite ki lepep i fer en kontribisyon an ver son servis lasante.

Mr Speaker bomaten nou’n tann Onorab Basil Hoareau dan son lentervansyon, in dir i annan en problenm konstitisyonnel avek sa size.

Mr Speaker atraver ou nou ava dir avek Minis nou ti ava voudre antann son pozisyon lo la koman en Minis or Attorney Zeneral oubyen Gouvernman.  Me Mr Speaker mon prezimen – mon prezimen ki nou tou isi dan sa Lasanble ler mon’n ekout tou bann entervenan ki’n koz avan mwan dan bann sesyon avan, e dan moman kot nou pe diskit lo Bidze, ki nou’n tonm dakor ki nou pep i bezwen fer serten kontribisyon vizavi servis lasante.  Mon krwar Onorab Ferrari i dakor sa.

E Mr Speaker si, si i annan en konprenezon lo sa size, nou ava dir Minis  probableman sa ki nou devret fer, nou devret advise Gouvernman pou pran sa size pou met dan en referendum.  E la i met sa size dan en referendum nou ava kapab ganny laprouvasyon lepep Seselwa dan son totalite.  Mon krwar sa  i ava en move enportan ki nou ava fer si i annan en problenm Konstitisyonanalité avek sa provizyon ki Minis in anmennen dan Bidze.

Mon pe dir sa akoz deza in poz en problenm kot enn nou bann entervenan in dir i annan en problenm Konstitisyonnel avek sa.

So sa prozeksyon ki Minister Finans in fer ki Gouvernman in fer pa pou kapab aboutir li dan nanryen.

Now la ki nou devret pran se konsilte lepep go back to the people.  Tel parey ki nou pe dir annou fer nouvo eleksyon nou ava rod en manda en direksyon lo sa size.

Mr Speaker  nou al pli lwen.  Nou al pli lwen lo sa  kestyon Bidze 2019.  Dan Bidze 2019 Mr Speaker, nou’n fer provizyon enportan ou nou sistenm ledikasyon dan son totalite.

Mr Speaker ankor lo Ledikasyon, i enportan ki nou fer detrwa pwen.  Bann pwen ki nou bezwen soulinyen lo Ledikasyon, se ki mwan sa laz ki mon’n arive ankor enn fwa mon konnen ki mannyer nou pou sistenm Ledikasyon ti ete dan lepase.  Mon konnen ki transformasyon e ki lenvestisman Gouvernman SPUP/ SPPF/ Lepep in fer dan nou Sistenm Ledikasyon. Mon konnen ki in fer.  Nou’n fer en kantite lenvestisman.  E ozordi, ozordi sa menm kaset ki Onorab Arissol i zwe dan sak moman Bidze, ozordi sa menm kaset – sa menm kaset nou bezwen zwe li akoz i pe fer sir ki lepep pa konpran ki mannyer nou Sistenm Ledikasyon ti ete dan lepase !  Nou’n go a long way Mr Speaker pou nou kapab anmenn sa transformasyon ki nou’n reisi anmennen dan nou sistenm Ledikasyon ozordi.

Me eski nou satisfe?  Eski nou satisfe Mr Speaker?  Non nou pa satisfe. Mr Speaker lo s akote latab nou pa pou zanmen satisfe avek nou kalite servis ki nou pe donnen dan nou Sistenm Ledikasyon.  Nou pa pou zanmen satisfe.  Akoz nou konvenki ki toultan i annan bann posibilite loportinite pou nou fer bokou pli byen.  Nou believe – senserman believe ki nou bezwen donn en ledikasyon de kalite.  En ledikasyon de kalite.  Ekstrememan enportan sa!  So nou bezwen kontinyen dan sa demars.  E nenport ki keksoz ki nou bezwen fer pou nou donn nou pep en ledikasyon de kalite, nou bezwen fer li.  Egalman lo kote servis  lasante nou bezwen fer sir ki nu kontinyen ogmant kalite servi nou lasante.

Mr Speaker mon reste konvenki ki nou kapab fer li.  Nou kapab fer li konman en pep – nou kapab fer li konman en Gouvernman.

Mr Speaker nou al pli lwen.  Nou al pli lwen pou mwan koz lo relasyon Bilateral e relasyon Miltilateral ki Sesel – Leta Sesel Gouvernman Sesel, i annan avek bann lezot pei.

Anpasan dan mon lentrodiksyon Mr Speaker mon’n koz lo sa Bidze ki’n ganny defini konman Bidze ‘Made in India.’ 

Mr Speaker, nenport ki pei – nenport ki pei dan lemonn ki’n napa zanmi,  i en pei ki pa devre egziste.  E labote Sesel Mr Speaker, labote Sesel se ki Sesel i annan en kantite zanmi – bann bon zanmi.  E sa bann bon zanmi Mr Speaker, se sanmenm sa bann bon zanmi ki nu met li dan bann pei ki etann zot lanmen – malgre zot dan difikilte zot soulaz Sesel.  Se sa ki nou apel bann Korperasyon – Relasyon ki Sesel i annan etabli avek plizyer pei.  Depi ler nou’n ganny nou lendepandans Mr Speaker i annan en kantite pei ki nou’n etablir bann relasyon avek.  E ki nou’n donn nou sipor nu soutyen sa bann pei dan bann lorganizasyon enternasyonal dan bann vot eksetera e ki zot realize ki Sesel i en pei senser  i en pei ki zot kapab kont lo la dan bann moman ki zot bezwen Sesel.

Mr Speaker an fen kont napa en pei ki pa bezwen kanmarad.  Tou pei i bezwen kanmarad.  E sa ki nou bezwen fer Mr Speaker, se remersye bann pei ki ankor enn fwa malgre tou zot bann difikilte, tou zot problenm ki zot annan, dan sak moman Kki Sesel in tap laport zot in volonterman donn Sesel sipor donn Sesel l’appui.  L’appui zeneralman ki napa bann kondisyon avek.

Mr Speaker taler mon pou koz lo Assomption mon pe vini.  Mr Speaker, lot keksoz ki ekskreman enportan ki nou koz lo la se devlopman lakaz dan sa pei.

Mr Speaker, ler mon’n ekout Onorab Georges Mr Speaker, kot in met son Les Mamelles in dir Les Mamelles konmsi en distrik ki’n ganny pli martirize Mr Speaker.  Mon pe soumet avek ou ozordi.  Baze lo leksperyans ki mwan mon konnen lo Les Mamelles e baze lo listwar Les Mamelles – lo bann portre ki nou  annan lo Les Mamelles 20an pase Mr Speaker, Onorab Georges humblement dir mersi Gouvernman Parti SPUP / SPPF/ Lepep.

 

(APPLAUSE)

 

HON SIMON GILL

Mr Speaker, si i annan en distrik – Mr Speaker si i annan en distrik ki’n sibir en pli gran transformasyon dan devlopman bann lenfrastriktir dan konstriksyon lakaz, se byensir se Les Mamelles!

Mr Speaker, me eske nou’n fini avek devlopman Les Mamelles?  Mr Speaker non nou pa ankor fini.  Mr Speaker eski nou’n fini avek konstriksyon devlopman lakaz dan tou nou bann distrik?  Non nou pa ankor fini.  Mr Speaker eske i annan en volonte e en determinasyon pou nou kontinyen konstri lakaz dan sa pei?  Wi i annan.  E sa Gouvernman SPUP / SPPF/Lepep i reste e determinen pou kontinyen batir lakaz !

 

(APPLAUSE)

 

HON SIMON GILL

Onorab Regina Esparon donn lespwar bann dimoun Glacis! Onorab Adelaide donn lespwar bann dimoun Baie Lazare!  Onorab Hoareau donn lespwar bann dimoun Beau Vallon Onorab Hoareau Beau Vallon, donn zot lespwar!

Mr Speaker, Gouvernman Parti SPUP/ SPPF/ Lepep pou rezourd problenm lakaz pou sa 3mil aplikan ki nou annan dan sa pei!

 

(APPLAUSE)

 

HON SIMON GILL

Nou reste determinen and committed  pou nou adres sa problenm! Mr Speaker sa, sa, sa i lespwar ki bann dimoun i devret annan.

Mr Speaker nou al pli lwen – nou al pli lwen.  Kote nou al pli lwen Mr Speaker.  Mr Speaker nou al pli lwen ler nou koz lo sa kantite lenvestisman ki nou’n fer dan devlopman lenfrastriktir dan sa pei Mr Speaker.  Nou al lo bann konblaz ki nou’n fer.

Ozordi Mr Speaker ler mon koz avek bann  businessman lo Providence, i annan en kantite businessman lo Providence ou konnen ki zot pe demande Mr Speaker?  Zot pe dir nou lespas ki zot in gannyen pa ase.

Mr Speaker ki i montre ou sa?  Lespas ki pa ase i montre ou en sel keksoz – i en ledikasyon  ki sa biznes ki ti la 5an pase ozordi in grosi e i anvi expand.  E i pe, rod plis lespas.  Wi i annan pa ankor konmanse.  E sa ki pa ankor komanse Mr Speaker nou dir zot bouze – konmanse.  Nou rekonnet bann limitasyon ki zot kapab annan nou les zot bouze – konmanse.

Mr Speaker i annan tro bokou dimoun pe enteronpe letan mon pe entervenir, probableman mon ava bwar en pe delo e mon al les zot bwar en pe delo zot a les mon koze !

 

(Interruption)

 

MR SPEAKER

Bon annou donn li sans pou li fini – ok?  Les li ankor en 3 4 minit les li fini.  Kontinyen Onorab.

 

HON SIMON GILL

Mr Speaker, i reste mon 6 pwen ki mon ti a voudre koz lo la.  Si ou permet mwan, mon pou tous lo sa 6 pwen, me pa tro detay me en pti pe pli bref.

Mr Speaker, mon pou kontinyen lo sa enn pwen lo bann biznes, akoz i tonm dan sa dernyen 6 pwen ki mon annan.

Lo biznes Mr Speaker, lo biznes.  Mr Speaker dan sa pei dan sa pei Mr Speaker mon pou koz lo Cosmoledo mon pe vini.

Mr Speaker, lo biznes dan sa pei.  Mr Speaker, 40an wi nou’n la.  40an nou’n la wi – i ok! 

Mr Speaker be sa 40an ki nou’n la ler nou koz biznes dan sa pei i annan biznes ki’n konmans avek detrwa mil e ozordi wi zot bann multi millionaire dan sa pei ozordi.  E anba ki sirkonstans ki zot in vin bann multi millionaire?  Se gras a Gouvernman Parti SPUP/SPPF/Lepep.  Zot in vin bann milyonner.

Now, now Mr Speaker now Mr Speaker …

 

(Off-Mic)

 

HON SIMON GILL

Pardon.

 

MR SPEAKER

Onorab.

 

HON SIMON GILL

Non mon pa pe al sit personn la mwan.  Mon pa pe al sit personn an partikilye.  Nou’n dir met lalis tou bann kartel taler nou ava koz lo la.  Mr Speaker …

 

MR SPEAKER

En moman …

 

HON SIMON GILL

Wi me zot pe enteronp mwan e zot pe anpes mwan fini tous mon 6 pwen!

 

MR SPEAKER

Bon si nou kontinyen enteronpe mon pou bezwen donn li ankor 10 minit.

 

(APPLAUSE)

 

MR SPEAKER

Alor annou hear Onorab Simon Gill out.  Onorab.

 

HON SIMON GILL

Wi Mr Speaker pou biznes kapab fleri dan sa pei i annan en kondisyon e probableman de kondisyon ki enportan.  Lekel sa de kondisyon?  Premye kondisyon – premye kondisyon se stabilite.  Stabilite.  2enm kondisyon enportan endispansab se lape.

Mr Speaker fodre zanmen fodre zanmen i nou ariv en moman dan sa pei kot stabilite e lape i ganny menase dan sa pei.  Fodre zanmen e zanmen Mr Speaker zanmen Mr Speaker ki stabilite e lape  i ganny menase dan sa pei!

E lo sa de pwen Mr Speaker i anmenn mon pou koz lo mon 5enm pwen.  Dan sa 4 ki reste.  Sa i lo tourizm.  Lo kestyon tourizm Mr Speaker, nou tou nou konnen tourizm kot i annan lager, kot i annan enstabilite pa vini.  Pa vini Mr Speaker.

E se pou sa rezon ki mon’n koz lo lape, avek stabilite.  An relasyon avek tourizm. E tourizm Mr Speaker Minis i ava konfirm sa poudir tourizm i enn bann, sekter ekonomik ki anmenn pli gro poursantaz deviz etranzer dan Sesel e ki ede pou finans en kantite konponan dan nou Bidze.

I pa en gran dekouver Onorab Henrie, me sa ki nou pe dir se ki nou bezwen fer sir Onorab Henrie ki OU, ou pa vin en konplis dan met dezord en enstabilite  dan sa pei !

 

 

(APPLAUSE)

 

HON SIMON GILL

Se sa ki nou bezwen fer atansyon.

Akoz Mr Speaker, Mr Speaker, ler ankor enn fwa i annan enstabilite i annan diskord, i annan en kantite tanpet dan okenn pei, tourizm si mon kapab servi sa term i farous, e i pa vini.  Alor nou reveni i desann.  E ou sa guest house – ou sa lotel …

 

MR SPEAKER

Onorab wrap-up. 

 

HON SIMON GILL

Mr Speaker mersi ou pe dir mon wrap-up.  Wi mon pou tay vitman lo mon 4 lezot pwen ki reste  mon pou fini.  Mr Speaker ler nou kree problenm dan sa pei, nou bezwen fer atansyon.

Mr Speaker, mon lot pwen se reform mikro ekonomi ki nou’n konmanse depi 2008 e ki nou’n selebre son 10enm laniverser sa lannen.

Mr Speaker wi i antre dan Bidze, akoz se sanmenm sa transformasyon ekonomik ki nou’n anmennen depi 2008 ziska 2010, ki’n kapab fer plizyer keksoz.  E enn bann keksoz enportan ki’n pous nou bann profesyonnel pou ale, se pou negosye nou det!

E ozordi si nou det i en pti pe par lao 50poursan nou GDP i konpare avek sa ki ti ete 10an pase Mr Speaker san dout nou’n fer en gran progre.

Onorab Ramkalawan pe fer mon mansyon Onorab Afif, Mr Speaker  byensir, byensir wi nou rekonnet ou kontribisyon  Onorab Afif dan sa reform ki ou ti inisye depi 2008 ziska ler ou ti deside sorti dan Gouvernman e cross the floor ! 

 

(laughter)

 

HON SIMON GILL

Mr Speaker, Mr Speaker i enportan ki nou etabli en keksoz ekstrememan enportan.  Keksoz ki nou bezwen etablir, se si nou’n reisi si nou’n reisi dan sa dernyen 10an ki Chairman ki s aki ansarz Central Bank – ki sa madanm Gouverner Central Bank Onorab nou apel li Onorab akoz i e gran dimoun ozordi dan sa pei – Abel Caroline Abel, Mr Speaker, dan son lentervansyon, dan son diskour i dir sa dernyen bann lannen – sa dernyen 40an ki Central Bank i la,  i dir it is a relatively lshort period of time !. 

E Mr Speaker ozordi zot pe dir nou poudir nou’n la 40an nou’n tro bokou letan.  Mr Speaker 40an is a relatively short period of time !

 

(APPLAUSE)

 

HON SIMON GILL

… pou en pei transformen – pou en pei kapab anmenn sa kalite transformasyon e rezilta ki nou’n gannyen. Wi Mr Speaker i en mervey.  I en mervey ler Sesel ozordi i ganny renonmen, par bann lorganizasyon enternasyonal kot ozordi nou’n ganny dir  pou dir nou annan nou en devlopman lendeks devlopman i le konparab e menm pli o dan L’Afrique e dan la rezyon.

Mr Speaker sa i tre enportan.  E si nou’n nobou attend sa rezilta nou bezwen dir bravo Sesel bravo bann leaders dan sa pei bravo, bravo bann profesyonnel ki’n kontribye pou anmenn Sesel lo sa nivo.  Bravo Parti SPUP/ SPPF/ Lepep Mr Speaker !  Nou ki’n la e nou bezwen nou ki’n la e nou bezwen pran sa ‘LAGLWAR’ Mr Speaker !  Mr Speaker dernyen pwen dernyen pwen Mr Speaker dernyen pwen Mr Speaker i mon oule koz lo la se sa 40poursan lapovrete mon pe al konklir lo la Mr Speaker.

Mr Speaker nou pa oule rekonnet – nou pa oule rekonnet letan bann lorganizasyon enternasyonal i felisit Sesel ou son bann lakonplisman.  Sa ki nou, nou rekonnet ki nou’n fer en kantite tapaz – nou annan en kantite repetisyon lo la les sa 40poursan lapovrete ki serten lorganizasyon in dir.

Akoz nou pa oule rekonnet letan bann lorganizasyon enternasyonal i praise Sesel?  Akoz nou pa oule rekonnet sa, nou le koz 10 nou le koz lo 40poursan lapovrete?  Akoz sa nou krwar  i donn nou dividend politik?

Mr Speaker – non!  Mr Speaker non !  Mr Speaker nou dir sa nouvo parti ki pe formen Mr Speaker e ki byento pe al lanse, Mr Speaker sa nouvo parti nou pou kontinyen envok – nou pou kontinyen envok sa bann prensip fondamantal orizinal, ki’n ankre nou ; ki’n anmenn nou pou fer sa transformasyon enportan, ki nou’n arive fer dan sa pei!

M Speaker kot i annan nesesite pou fer sanzman, nou pou fer sanzman.  Nou bezwen fer sanzman nou rekonnet bann limitasyon ki annan. Nou rekonnet bann limitasyon ki sak pei, ki sak Gouvernman, ki sak sosyete i annan.

E Mr Speaker dan mon konklizyon i enportan ki mon dir, napa personn – napa personn lo later ki parfe.

Mr Speaker dan leadership LDS napa personn ki parfe!  Dan leadership Parti SPUP/SPPF/Lepep napa personn ki parfe ! Wi nou’n komet bann fot.  In annan bann mankman.  E nou annan sitan liminite pou nou dir nou rekonnet.  E nou acknowledge bann mankman – bann lerer ki’n  ganny komet.

Mr Speaker sa nouvo parti ki pe vini byento, pou acknowledge tousala. E nou pou kontinyen – kontinyen reste avek menm determinasyon!  E nou pou kontinyen dir  Mr Speaker ki Sesel pou SESELWA!  Orizinalman nou ti konmans ek sa.  Sesel pou SESELWA! Nou pou kontinyen defann sa bann travayer, ki depi ’64 nou’n lager pou zot.  Nou’n anmenn zot pou ganny zot idantite.  Se nou ki’n anmenn depandan lo sa pei.  Nou pou kontinyen anmenn transformasyon dan sa pei Sesel, pour ki Sesel e Seselwa i kontinyen zouir bann benefis ki nou pou anmennen pou zot.  E nou swete – nou swete Mr Speaker ki dan sa parkour ki nou pou anmennen, ‘ANSANM’-‘TOGETHER’ malgre nou annan diferans lopinyon  ki nou difere lo serten size  nou ava kapab kont lo sipor nou bann koleg dan LDS, pou ki ‘ANSANM’– nou kapab kit en Sesel meyer ki nou ti vin zwenn.

Mr Speaker  mon pou dir avek Minis Finans ki kont lo nou lo sa kote latab, pou vot an faver sa Bidze.  En Bidze ki nou konnen i ranpli avek lespwar – en Bidze ki pou anmenn Sesel délavant pou sa lannen 2019.  Mersi tou bann profesyonnel dan Minister Finans,  ki’n ede pou donn sa Bidze parey zot in donnen.

Malgre son limitasyon, nou konnen ki pou akonpli serten lobzektif enportan dan sa pei Mr Speaker.

Mr Speaker mersi bokou pou donn mwan laparol Mr Speaker.

 

MR SPEAKER

Mersi Onorab Simon Gill.  Bon nou pou pran en Break ziska 4er apre nou ava retournen pou nou fini koz lo Bidze 2019.

Nou Break nou repran travay 4er.

 

(BREAK)

 

MR SPEAKER

Bon nou a kontiny nou travay. Mon ava pas laparol avek Onorab Norbert Loizeau.

 

HON NORBERT LOIZEAU

Mersi Mr Speaker.  Bonzour.  Bonzour Minis ek ou delegasyon. Bonzour tou Manm.  Bonzour – bonn apre midi tou bann dimoun ki a lekout spesyalman bann zabitan distrik Bel Air, ki’n anvoy mon dan Lasanble pou ‘koze’, ‘koze’ e ‘koze’ menm.

Mr Speaker apre ki mon’n ekout tou bann Manm lo lot kote latab koze,  partikilye mon’n ekout Onorab William ki’n fer en zoli diskour kot in tous bann pwen enportan – ki tous kous nou popilasyon e malgre sa apre ki m tande in ganny problenm dan son kan apre ki in fini fer son diskour.

Mon‘n ekout Onorab Hoareau Mr Speaker, ki’n fer resorti ki annan keksoz dan sa Bidze ki kont Konstitisyonnel e mon panse ler a ler pou vote vi ki sa Bidze i annan keksoz ki kont Konstitisyonnel, Onorab Basil Hoareau i ava vot ‘kont.’

E ler mon’n ekout lezot Manm ki’n dir tou keksoz  i ok Mr Speaker.  E ki zot dir diskour Bidze zot in plito maltrete fer latak personnel lo nou lo prensipalman nou bann leaders isi lo sa kote.

Mr, Speaker sa i montre en konfizyon total ki annan dan Parti Lepep!  Sa i montre  en mank kordinasyon lo zot kote.  Mr Speaker ozordi koman en Manm Elekte pou distrik Bel Air parey Onorab Lemiel Manm Elekte pou distrik Anse Royale.

Mr Speaker mon fyer pou mwan form parti sa lekip zonm fanm solid ki apel LDS.  mon fyer akoz nou’n akonpli bokou, bokou keksoz  ansanm.

Me pou annan en parkour fasil – in annan botan i annan movetan me nou vizyon pou nou pei i toultan reste parey.  E nou’n montre Mr Speaker konman en Lopozisyon serye mannyer nou kapab ede amenn nou pei a en pli o nivo.

Me pou bann lot kote latab ki ankor aveg – k iankor annan en lasenn politik otour-e avek zot lespri, zot pa vwar nanryen byen.  Zot in pri dan lepase Mr Speaker.

Mr Speaker semenn pase mon’n tann Onorab De Commarmond dir ki nou konman en mazorite dan Lopozisyon nou pa’n fer nanryen – nou’n zis ‘koze’, ‘koze’ e ‘koze’ menm.  Me nanryen pa’n arive.

Mon anvi dir avek Onorab atraver ou Mr Speaker,  wi nou’n kontinyen koze me avek en Egzekitiv avek en striktir Leta ki pa pe fonksyon byen – nanryen pa pou arive materyalize.  Avek en Gouvernman avek en Prezidan k itou keksoz i glise konmsi delo lo fey sonz keksoz dan nou pei pou kontinyen degrengole.

Ozordi Mr Speaker malgre ki nou isi lo sa kote latab nou’n zis ‘koze’, ‘koze’ e ‘koze’.  An traver sa bann koze Mr Speake,r nou’n reisi montre avek lepep Seselwa ki mannyer pandan 40an ki SPUP/SPPF/Parti Lepep in o pouvwar, nou’n montre Mr Speaker atraver sa bann’ ‘koze’, ‘koze’ e ‘koze’ menm ki mannyer zot, zot Gouvernman in kontinyen vole, vole e vole menm !

Mr Speaker, nou isi nou pou toultan kontinyen koze.  Akoz isi dan Lasanble  i annan 2 group.  I annan nou lo kote isi ki bann Parlmanter apre i annan en group laba ki bann manter Mr  Speaker !  Zot zis koz mensonge, kalonmni zis pou zot kapab reste o pouvwar.

 

(Interruption)

 

 

MR SPEAKER

Ok, en moman, en moman en moman.  Onorab, Onorab Loizeau ou kapab servi sa bann term, me pa fer li direkteman lo Manm lot kote latab.  Si ou pe akiz en Manm lot kote latab direkteman, ou pou bezwen substantiate.  Alright?   An zeneral ou kapab servi sa term – ok?

 

HON NORBERT LOIZEAU

Ok Mr Speaker mon pe koz an zeneral mwan.

 

Interruption)

 

HON FLORY LARUE

Aret mangonnen les Onorab koze.

 

MR SPEAKER

Kontinyen Onorab Loizeau.

 

HON NORBERT LOIZEAU

Mr Speaker an traver sa koze ki nou’n koze nou’n montre ki mannyer nou larzan in ganny disparet dan Labank Santral petet Minis ou pa ti la sa bann letan ou ti ankor PS dan en Minister.

Mr Speaker nou’n montre ki mannyer 50 milyon Dolar in ganny disparet in ganny anvoy kont aletranze.  Mr Speaker kot ozordi bann dimoun in fer en fortin avek. Ozordi Onorab Gill in konfirm sa avek nou Mr Speaker ki laplipar bann dimoun ti konmans avek en pti sou detrwa pti mil Roupi ozordi atraver bann larzan in ganny transfer ki zot in pran Mr Speaker,  ozordi zot bann Bilyonner Mr Speaker!

Mr Speaker nou’n montre atraver bann koze ki nou’n koze Onorab De Commarmond atraver ou Mr Speaker, kot bann mafya Irelande i vin travay kot FIU NDEA ki mannyer zot in donn bal dan larzan ; ki mannyer zot in vini zot in travay.  Me selman bann Kontra zanmen in annan ; kot Kontra i disparet  dan kof Gouvernman anler State House Mr Speaker, me zot in sorti zot in ale sa Gouvernman fer zot nanryen!

Kot bann konekte Mr Speaker parey bann ansyen Minis kot ozordi zot annan plis ki 70 morso later lo zot non sa Gouvernman pa’n zanmen fer naryen pou kapab rekiper nou bann later avek sa bann dimoun!  Kot en pti madanm Mr Speaker kot li i annan detrwa gran, gran bout ki li i apel plizyer ‘pti bout’ ki li apel plizyer gran bout ki li i apel bann ‘pti bout’  Mr Speaker.

E nou bann pti biznes Mr Speaker, nou, nou pa vwar nanryen pou nou.  E taler Onorab Gill ankor in fer resorti ki later Providence i limite bann dimoun ki’n konmans fer biznes in konmans ptipti in agrandi, ozordi zot trouve lespas i limite.

E Mr Speaker, mon anvi dir Onorab Gill nou, nou donn en Gouvernman i donn en pti biznes en landrwa Providence.  Pou li fer son biznes, pou li agrandi.  Me ler ou agrandi ou’n vin gro ou al aste later dan prive Gouvernman, pa pou kapab donn ou ankor.  En lot pti biznes ki a vini i a ganny en morso pou li fer grandi ede pou li vin pli gran.

Mr Speaker nou’n montre ki mannyer  L’Union Estate mannyer zot ti pe donn bal dan L’Union Estate e ozordi Mr Speaker atraver sa nouvo group dimoun – sa nouvo ladministrasyon L’Union Estate keksoz in sanze!  Ozordi prodiksyon lokal in ogmante.   Elevaz zannimo pork Mr Speaker in ogmante.  Ozordi L’Union i annan anviron 700 koson ki pe ganny sonnyen.  E dapre konpran by lannen prosen pou telman annan zot pou bezwen tir bann pti koson dile e vann avek SMB pandan letan Nwel.

Mr Speaker atraver tou sa bann koze ki nou’n koze nou’n kler tors lo tou bann malfe ki sa Gouvernman ti pe fer.

Me Minis dan son speech pa’n dir nanryen lo la.  Napa gran logmantasyon pou bann lenstitisyon parey Anti-Koripsyon, ACC, Anti-Corruption Commission Mr Speaker pou zot kapab fer bann travay pli byen, kot byen lepep Seselwa i a kapab retourn da Kof Leta.

Zot dir nou zis koze Mr Speaker. Zot ki zot ti fer Mr Speaker?  Zot, zot ti zis ‘vote’, ‘vote’ e ‘vote’ Mr Speaker! Menm bann Lalwa ki pa ti an akor avek Konstitisyon pei zot vote pour sanze Mr Speaker. Mr Speaker dan labsans Onorab Andre, Onorab Andre in text mwan in dir mwan dir zot wi, i osi i ti vote, me sa bann letan Mr Speaker i pa ti ankor war kler, me la in war kler, in sorti, in kit zot dan zot dezord ki zot ti ete.  Akoz ler li i ti pe vote Mr Speaker, zot, zot ti pe ‘pran’, ‘pran’, ‘pran’.

E Mr Speaker, mwan anvi dir Onorab Hoareau,  mon kontan mannyer i pe koze e mwan anvi dir zot laba sepa si lannen prosen zot pour war Onorab Hoareau avek zot akoz i pe kontribye pour fer zot Gouvernman tonbe Mr Speaker akoz in demande pour ale zot in dir li reste alors in reste!  E mon mazinen Mr Speaker si lannen prosen zot pour war Onorab Hoareau ankor!

Mr Speaker Onorab Gill taler pli boner in koz lo en tandans ki pe arive dan nou pei. In koz lo Onezime OUT!  Gappy OUT!  Danny OUT!  Wi Mr Speaker, nou, nou’n fer sa bann keksoz dan sa bann keksoz ki nou’n fer zanmen in annan laenn Mr Speaker. Zanmen in annan dezord, o kontre Mr Speaker dan ‘’GAPPY OUT’’ ki nou’n trouve atraver FPAC ki Onorab De Commarmond ek lezot i lo la, nou war ki sa msye ti pe pran, ti pe okip de kont, ki enn ti zis li ki sinyen.  Eski sa nou ti pe fer dezord, nou pe fer laenn Mr Speaker, nou ti pe montre lepep Seselwa kote nou larzan ti pe ale.

Mr Speaker dan tou sa lamars zanmen in annan dezord, zanmen nou annan bonm nou. Nou’n met bonm? Zanmen in annan okenn bonm dan tant vakwa kot radyo Sesel, menm si nou’n fer lamars kont Onezime OUT Mr Speaker. Tousala nou pa’n fer. O kontrer Mr Speaker ler nou ti pe fer bann lamars an pe ki ti arive, nou’n vwar zot okouran Mr Speaker, Minis ou okouran ki le 3 Oktob kot zot, zot ti vin fer vyolans ek nou, kot Onorab Ramkalawan ek Onorab Ferrari ti ganny bate, zot ti kas son latet, se sa dezord!  Nou zanmen nou’n fer dezord Mr Speaker. Mr Speaker e ler nou pe koz lo dezord Onorab Gill, zis mazinen, nou zanmen nou pour fer koudeta.  Koudeta zot ki ti fer, zot ki’n senm laterer parmi nou popilasyon, se zot ki’n senm laenn Mr Speaker. Nou, nou pa pour zanmen fer sa nou. Nou pour kontinyen fer nou keksoz an pe e byen e tou keksoz ki nou pour fer, nou pour fer li pour Seselwa.

Mr Speaker dan tou sa ki mon’n dir oparavan, nou annan en Gouvernman ki napa volante pour fer nanryen! Mon konpran akoz Minis, akoz petet parmi annan serten ki konplis dan sa bann koripsyon ki’n ganny arive.  La la fason Mr Speaker ki bokou nou larzan ki la fason ki nou larzan in ganny ale, atraver koripsyon e sa elimin koripsyon, nou pa pour kapab fer nanryen dan sa pei. Nou pour toultan, met taks.

Plito ki nou war taks ki pe ganny kontinyen mete partou kote Mr Speaker.  Eski mwan anvi demann Minis. Eski taks i rezourd problenm? Non Mr Speaker. Taks i met plis problenm parfwa lo nou popilasyon. Mon kontan ki pour annan 5 poursan logmantasyon lo saler minimal Mr Speaker me avek bann cartel ki pe ganny soutire par Gouvernman.  Mon anvi dir Minis si napa en bes dan prodwir esansyel – si koud lavi pa desann, sa pti logmantasyon zis pour pase ale koumsa menm.

E deplis Minis sa bann taks ki zot pe mete lo sigaret ek bann lalkol a labaz disik, Minis mon anvi dir ou ki sanmenm sa bann kategori dimoun ki pe ganny sa bann pti taks, ki pe servi sa bann komodite.  Lezot dimoun ki pli eze pa servi. Minis mon panse ou pa servi ‘pti ponm’ OU!  Ou pa servi pti ponm. Se sa bann pti dimoun ki servi pti ponm Mr Speaker ek sigaret.

E sa Mr Speaker, e taks lo sa bann keksoz Mr Speaker pa pour anpes sa bann dimoun aret konsonm sa bann prodwir. Taks pa sanz stil lavi en dimoun. Taks pa sanz stil lavi en adikt ouswa en alkolik o kontrer i fer zot soufer plis.

Mon anvi demann Minis ki i pour fer avek sa bann taks, sa larzan taks ki zot pe ranmase? Akoz en keksoz ki mon pour dir ou Minis, sa bann dimoun ki annan sa pti logmantasyon zot pe kontinyen pey taks zot.  Zot pe kontinyen servi sa larzan pour zot kontinyen bwar pour zot anmas taks pour antre dan Kof Gouvernman. Eski Mr Speaker sa taks la prezan ki zot pe anmase, zot pour reserve koman welfare lo sa bann menm dimoun ki pe ganny afekte avek sa bann lalkol ek sigaret, zot pe met taks lo la?

Mr Speaker mon pe demann sa akoz Minis pa’n dir nou ki mannyer sa taks ki zot pour ranmase pour ganny servi. Eski zis zot pour ranmase? Mon ti pe ekspekte ki Minis i dir nou ki serten larzan ti ava al dan bann progranm sansibilizasyon, prevansyon kont drog, lalkol, bann progranm edikasyonel Mr Speaker, me ki pa pour pas zis en zour, me pour pas toulezour pandan le mwan pour ki sa bann dimoun a konnen kwa danze Mr Speaker.  Akoz taks, taks pa pour marse lo bann adikt, sa en keksoz ki mon pe dir ou Minis.

Be nou bann larzan eski zot pour met zis taks Mr Speaker? Be nou bann larzan ki’n disparet dan Labank Santral, nou pa rode? Kot ozordi bann ki responsab in vin pli ris parey Onorab Gill in dir pli tar, bann ki fay, zot, zot tap dan dir Mr Speaker akoz taks, taks pe apri lo zot ledo! Mr Speaker se koripsyon parey mon’n dir ki’n anmenn nou pei dan sa trou ki nou ete ozordi.  Si nou pa elimin koripsyon dan nou pei, zanmen nou pour bouz an avan, nou pa pour bezwen, si nou kapab elimin koripsyon Mr Speaker taks nou pa pour bezwen mete lo malere.  Ozordi Mr Speaker bann pti biznes pa war nanryen dan Bidze ki pour ed zot agrandi.  Malgre i annan bokou devlopman ki’n ganny dir pour arive an 2019, bann pti biznes pa war zot ladan Minis.

Gro, gro proze pe ganny fer me zis etranze ki pe benefisye. Nou’n war lo televizyon lot zour kot en proze ki’n ganny fer lo serten Zil Elwanye, set apre ki bann proze in fini ganny fer ki nou apre nou war lo televizyon ki’n arive laba?  Mr Speaker legzanp sa proze photovoltaic par egzanp pa i annan Seselwa ki annan biznes, ki annan biznes dan sa domenn photovoltaic, eski pa ti a kapab met en pti tender pour zot kapab ganny en pti keksoz lo la? Ki nou war Mr Speaker, zis bann konpannyen etranze ki pe benefisye. Sa i fer mwan mazin proze Danm La Gogue, etranze ki’n benefisye.  Pa nou ti war Mr Speaker, Minis kot bann drayver pickup ti desann anvil pour bloke akoz zot ti’n ganny anbete, zot ti’n ganny dir ki zot pour ganny en pti cut dan bann deal me apre zot ti war gro, gro pickup 10 tonn, se pa 15 tonn desann lasose e zot, zot ti ganny kit ater.

Mr Speaker eski ler en proze pe ganny deroule Sesel eski bann pti biznes pa i enportan ki zot ganny en pti keksoz ladan? Mr Speaker pour Gouvernman Parti Lepep non.  Se zis bann, gro, gro biznes etranze ki benefisye.

Ozordi Mr Speaker nou war nou bann pti biznes ki pe fer bann travay parey refrizerasyon, air conditioning, elektrisyen, elektronik e lezot Mr Speaker, nou war ki mannyer bann enportater ki osi form par bann Kartel pe dray nou e Gouvernman pa dir nanryen. Kot zot fer rantre zot bann teknisyen, zot bann prop teknisyen etranze pour enstal zot bann prodwir tek aircon, e reparasyon lo tou bann lezot lekipman Mr Speaker, e nou, nou bann pti Seselwa i ganny kit ater. Me nou bann pti teknisyen lokal Mr Speaker nou pa ganny nanryen Mr Speaker.  Pourtan Minis nou sa bann pi biznes lokal Sesel, nou, nou larzan i reste Sesel, nou Mr Speaker.  Nou larzan pa kit Sesel pour al deor.

Me tandis sa bann teknisyen etranze ki vini, zot bezwen pas kot Cash Plus partou e transfer zot larzan Mr Speaker aletranze. E vwala kot nou larzan i ale.  E la mon anvi dir ek sa Gouvernman ki bann operater pti biznes i ankoler avek zot, akoz nanryen pa pe ganny fer pour anpes sa bann keksoz parey arive, arete Mr Speaker.  Sa se bann labi ki pe afekte nou bann pti biznes lokal.

Mr Speaker e la i fer mwan mazin sa building leve debrouye. Ozordi i annan bokou pti biznes Mr Speaker ki pe esey rod en pti landrwa pour zot kapab fer zot biznes, pourtan sa building Mr Speaker, sa building ti ganny fer pour pti biznes, ozordi ler ou demande zot dir ou napa. E pourtan Minis i enteresan ki ou al gete. I annan serten laba bann landrwa i zis fermen, ou war zis bann pti bill elektrik delo ki pous anba la. E dapre konpran Minis se bann gro, gro businessman ki annan gro, gro biznes ki’n ganny sa bann landrwa, zot in zis kit la, mon pa konnen ki zot pe espere ki apre zot al lwe avek en etranze pour R25mil, R30mil ki zot fer gro, gro profi.  Minis i enportan pour get en pe, bann pti biznes pe rod landrwa napa, al en kou laba al gete. E la Mr Speaker permet mwan koz lo en keksoz, lo en size ki tou mon lavi, mon’n annan gran lanmour pour fer li, sa se sports.

Dan Bidze ki’n prezante, bokou larzan in plizoumwen al de gran zwe enternasyonal tel ki Zwe De Iles, e All Africa Games. Mr Speaker bann sportsman ek bann atlet deor pa pe war nanryen pour bann klib ki zot pe reprezante. Pa war nanryen sirtou Mr Speaker, pour bann klib, pour bann tim ki anrezistre anba distrik. Minis i enportan pour konnen ki sa bann atlet ki al partisip lo nivo enternasyonal, zot sorti dan bann klib.  E sa bann klib zot depans en ta larzan pour kapab met sa bann zwer lo en nivo kot apre lekip Nasyonal i kapab pran pour al sa bann konpetisyon aletranze.

E alor Minis zot pa pe envestir dan bann klib. La mwan a dir ou Minis ki sa larzan ki pas par Local Government ki distribye avek bann team sport lo nivo distrik i fay. Minis 8 mil roupi pour 1 an. Ek sa Minis sa larzan pa donn en sel kou, kot nou kapab balans nou Bidze pandan lannen.  Zot donn li par quarter Mr Speaker.

Zot donn R2mil par quarter tou le 3 mwan. Mr Speaker, pa tou tim ki ganny R8mil, zis tim ki dan premye divizyon ki ganny sa. Si ou dan dezyenm, 3 enm divizyon, ou ganny mwens. Selman zour i annan en gro konpetisyon enternasyonal zot vin lanmenm kot sa bann klib Mr Speaker pour zot vin rod zwer. E Minis mon anvi dir ou ki sa R2mil ki zot donnen par quarter, ni en soulye ou pa kapab aste avek. Mwan mon annan en lekip basketball, en soulye i vo plis ki R2mil. Eski nou pour servi en soulye 15 zwer sakenn son tour?

Minis nou annan ice, nou annan transportasyon pour bann klib ki reste en pe ovan, Anse Royale, mon konnen bann lot kote latab pour dakor ek nou. Sa bann klib zot depans en kantite, nou annan travel ki nou fer pour al zwe ek bann klib, tim La Digue, Praslin Mr Speaker. Sa pti larzan ki zot donnen i fay. Mr Speaker mwan anvi dir ou en keksoz get dan bann club sport, lo nivo distrik; get dan bann lakademi, get dan bann dimoun ki pe travay dir, ki pe form bann lakademi parey nou Bel Air nou annan.  Nou pe form bann zwer ki alevenir, pour al dan bann klib, pa zis dan nou klib Bel Air, zot pour kapab al dan diferan klib kot a lavenir Gouvernman pour kapab servi pour al reprezant Sesel aletranze.  Get dan sa bann klib Mr Speaker.

Minis si ou pa aranz sa bann klib – si ou pa met plis larzan dan Bidze ou pour war plis zenn dan lapoud, dan eroin.  E zanmen zot pour fini deal ek sa problenm methadone Mr Speaker. Ou pour war ki Lazans Drog Mr Speaker, sa Lazans ki pe esey lager kont drog ki msye Herminie i ansarz, pour kontinyen vin demann bann gro, gro Bidze pour lager kont drog.  Akoz tou nou zenn pour fini mor dan drog.  E la Mr Speaker mon anvi siport Onorab Basil Hoareau ler in koz lo pansyon pour bann atlet ki’n fer monte nou paviyon pandan bann letan Mr Speaker.

Mon pour siport Onorab Hoareau akoz sa letan Mr Speaker sa bann dimoun pa ti fer sport, zis sport e zot pa ti ganny peye. Zot ti fer sport apre zot letan travay. Ti annan ki ti mason apre ki zot in fin roul ros Mr Speaker zot ti desann e zot ti fer byen. E ozordi nou war serten zis in ganny kit ater, e nanryen pa pe ganny fer pour zot.  Alors mon pour siport sa ki Onorab Basil Haoreau in koz lo la.

E mon pour osi dakor avek Onorab Hoareau Mr Speaker pour ki se bann atlet Seselwa ki benefisye avek sa bann larzan ki pe donnen pour sa de gran zwe Mr Speaker pour sa bann milyon ki pe mete pour sa 2 zwe. Pa etranze Mr Speaker. Nou, nou nasyonalite pa vo en Meday Lor. Nou se prestiz, nou nasyonalite Mr Speaker i en keksoz ki sakre pour nou, nou pa kapab vann li zis pour nou ganny en Meday Lor ouswa en Meday Larzan.

Mr Speaker permet mwan tous en pti git dan mon distrik.  Mr Speaker ozordi dan mon distrik bokou zabitan i ankor pe esper en lakaz.  Me sistenm pwen pe anpes zot kapab ganny en lakaz.  Bann ki ganny en lapey ba, pa pe war zot pour antre dan sa Sistenm Pwen malgre sa pti logmantasyon ki zot in donnen, zot pa pour antre lo sa Sistenm Pwen. E sa pe anmenn bokou fristrasyon dan nou distrik, dan nou kominote. E deplis nou’n ganny promet 24 unit, dan 24 mwan, la in ariv 20 mwan Mr Speaker. Nou’n war zis en bout komansman, nou pa konnen si i pour arive fini dan 24 mwan. Me nou, nou ankor pe espere. Malgre ki i annan serten proze ki pe ganny fer Mr Speaker – mon pa pour koz manti vreman i annan serten pti proze ki pe ganny fer dan nou distrik.

Me proze pli enportan Mr Speaker, ki i annan bokou letan pa’n komanse. Me pourtan, me pourtan dan vizit ki Prezidan ti fer lannen pase i ti dir ki sa lannen sa proze elarzisman semen Curio Road pour komanse. Mr Speaker nou’n ariv Novanm e nanryen pa ankor komanse.  Nou zis pe demande, nou pe zis pe priye toulezour ki napa en maler ki arive dan sa semen, akoz gro, gro transpor pe pase, semen i bloke. E sityasyon i vin pli grav de zour an zour.  Pour konklir Mr Speaker, mon anvi dir avek lepep Seselwa ki nou isi lo sa kote latab, nou pour kontinyen ‘klere’, ‘klere’, ‘klere’ menm ziska tou sa ki apartyen a lepep Seselwa i pour retourn dan Kof Leta e Seselwa pour rezouir li nou tou ansanm. Mr Speaker avek sa mwan a dir mersi pour sa detrwa pti letan ki ou’n permet mwan.  Mersi.

 

(APPLAUSE)

 

MR SPEAKER

Mersi Onorab Loizeau.  Mon a donn laparol Onorab Sandy Arissol.

 

HON SANDY ARISSOL

Mersi, mersi Mr Speaker. Bonn apre midi Mr Speaker, sa de Leaders dan Lasanble Nasyonal, tou Manm Lasanble Nasyonal, Minis Finans avek ou delegasyon, zabitan distrik St Louis avek lepep Seselwa. Mr Speaker touzour dan nou Lasanble Nasyonal, nou riye letan Onorab Simon Gill i koze.  Mwan mon kontan riye parske Onorab Simon Gill, toultan i anvi donn lenpresyon pour dir nou tou nou ti ne menm lannen, menm dat avek li!  Si li i ti ne 1950, fodre nou tou nou konnen ki ti pase 1950!  Dan sa pei diferan dimoun, diferan dat nesans, diferan marenn, diferan paren.  Alor pa vin sey fer nou krwar sa ki ou anvi krwar Onorab Gill!

Mr Speaker Onorab Gill i kontan manz son bannann e i kontan anvoy son lapo lo nou. Letan Onorab Gill i vin dan Lasanble Nasyonal i dir avek nou aret ensit vyolans. Nou anvi remind Onorab Gill sel parti dan sa pei, SEL PARTI dan sa pei ki’n fer vyolans, se parti ki Onorab Gill i atase avek. Sa se parti SPUP/ SPPF, ozordi zot apel Lepep e la byento zot pe al batize pour apel en lot non!  Sel parti ki’n fer dezord dan sa pei ki’n ensit vyolans, zot in fer dimoun disparet, zot in entimid dimoun!  Alor mon ti a kontan dir Onorab Gill, Mr Speaker, letan en morso bannann pa anvoy lapo lo nou pour donn lenpresyon pour dir nou ki’n manz sa bannann koudeta sa bannann entimidasyon!

Alor Mr Speaker mon ti a kontan dir Onorab Gill i pour bezwen align son lekor, pa sey anvoy so lapo bannann lo nou! Dezyenmman, Mr Speaker letan Onorab Basil Hoareau i vin dan Lasanble Nasyonal, e i dir ek nou pour dir Bidze pa Konstitisyonnel, zot in kas Lalwa pei.  Me pourtan lo lot kote latab ou annan bann Manm ki vini ki dir ek ou tou keksoz i ok, e zot dalon i bat lanmen byen for lo latab.  E sa i montre konfizyon total lo lapar SPPF!  Zot letan in fini, zot nepli annan nide, silvouple etre rezonnab e sed la plas pour bann ki annan nide parey nou dan LDS!

Dezyenmman Mr Speaker, Onorab Pillay, fame Onorab Pillay, Sebastien Pillay, i vin dan nou Lasanble e i donn nou en lektir lo lir nou liv Finans, fodre nou aprann lir nou liv Bidze ki Minis Finans in donn nou.  Be mon ti a kontan demann sa menm Onorab Pillay ki asize dan nou Lasanble ozordi, eski Onorab Chantal Ghislain ki asiz dan Lasanble lo menm kote ek ou in lir son liv Bidze?  Letan i vini i koz lo ‘move laron’, ki paz i ete move laron, mon pa’n vwar mwan. Sey eksplik mwan. Letan Onorab Ghislain i vini i koz lo roul lalang, kote i ete sa 77 fwa’ roul lalang’ la, mon pa war dan Bidze mwan! Eski Onorab Ghislain in lir son liv Bidze?

Mr Speaker letan Onorab Herminie sorti dan distrik La Riviere Anglaise i vini i koz lo Stov Petrol kote dan Bidze i annan Stov Petrol, mon pa war mwan, mon pe rode ki paz, mon pa trouve.  Savedir zot pa’n lir zot Bidze. Zis zot in vini, zot lir en speech ki zot in gannyen e zot speech in pli entelizan ki zot, e zot tou zot in kanmi!

Alor i enportan letan zot vin dan Lasanble Nasyonal sa 6enm Lasanble Nasyonal i nepli en fars parey 5enm Lasanble!  Konnen ki zot dir, konnen ki zot fer, e fer sir zot parol i align avek zot speech ki zot in gannyen pour lir.

Mr Speaker letan Onorab Ernesta i vini i dir ek nou dan Lasanble nou zis ‘koze’, nou ‘koze’, nou ‘koze.’ Zidisyer i sipoze size li, Egzekitiv zot sipoze EgzekitIv ki zot pa pe fer. Se pour sa rezon ki nou pe demann DANNY OUT!  Akoz zot pa pe egzekite.  Parlmanter, dan mo parlmanter i annan de bout mo – parey Onorab Loizeau in dir la, premye morso ki koz lo ‘parler’, ki nou dan LDS nou a pran, apre i annan en bout ki apel ‘manter’ – p.a.r.l – manter – sa nou a kot la ater si zot anvi pran zot a pran, si zot pa oule kit lanmenm.  Nou, nou pour pran parler nou.  Nou, nou pour kontinyen ‘parler’, ‘parler’, e parler!’   Sanmenm sa ki mon pe fer la.  Alor donn mwan latansyon pour mwan dir zot sa ki fodre dir zot dan en pti moman la. Selman sa ki zot bezwen konpran, nou dan LDS nou pa vin la pour fer zot plezir nou.  Nou pa vin la pour dir zot sa kid an zot faver.  Nou, nou vin la pour dir zot kote zot mal. Kontan pa kontan se sa nou manda.  Se pour sa rezon lepep Seselwa in dir 15 lo 10 i enportan. Akoz?  5enm Lasanble zot ti annan en mazorite.  Ki zot in fer?  Nanryen. Bwar dite, manz gato, lev lanmen, vote apre al tir petar Maurice. Sa letan in fini!  La nou’n vin ‘koze’, ‘koze’, e ‘koze’. La mon konmanse Mr Speaker.

Mr Speaker parey tou-le-z-an finisyon lannen nou ganny sans koman Manm Lasanble, pou nou koz lo merit prezantasyon Bidze prezante par Minis Finans,  Sa lannen  se Mr Loustau-Lalanne ki’n fer pep Seselwa sa loner pou prezant sa deba devan Lasanble Nasyonal.

Mr Speaker tenm pou Bidze sa lannen se Stabilite e Progresyon, me avan mon elabor sa tenm, mon anvi anmenn zot lo sa de lezot tenm pou sa de Bidze prezante par Minis Peter Larose 2 an pase, ki ti reprezant ladministrasyon Msye Faure sa letan.

Tenm pou pou Bidze 2017 sete Devlopman enklisiv avek loportinite pou tou.  Nou ti ganny dir ki sa tenm pou tous lekspektasyon nou pep. I vedir ki napa personn ki pou ganny kit deryer dan sa devlopman.  Larises ki pou ganny kree pou ganny distribye dan en fason ekitab, egal – transparan. Nou ti ganny dir ki sa Bidze 2017 ti pou adres 5 lobzektif prensipal ki Minis Larose ti prezante atraver Ladministrasyon Msye Faure. Premye pwen; pou elimin lapovrete dan nou pei. Ozordi si nou koz lo sa plis ki 40 poursan lapovrete Onorab Gill i pran lofans ladan Mr Speaker.                           2) Pou distribye larises dan en fason ekitab pou enkli tou dimoun ki dan bezwen.  Sa ki nou’n vwar nou later in ganny partaze antre zot. Later endistriyel i annan ki ankor pe asiz lo la pe esper li gonfle pour li revann.

3) Pou ofer nouvo loportinite pou nou pep partisip e envestir dan nou devlopman ekonomik. Donn loan zis zot dalon ek fanmir apre zot pa peye.  Sanmenm sa partisip dan envestisman sa.

Katriyenm pwen, ou transform byen nou Nasyon dan en fason dirab e soutenab pou kree plis prosperite pou nou pep ki nou deservi. Travayer ganny pouse dan zot prop pei, dan zot prop lanplwa.

5) Pou asire ki Sesel i reste en destinasyon ki atir e sekiriz lenvestisman. Be annou gete kwa ki nou ti ganny promet dan sa de pretan Bidze. Gouvernman i dir i determinen pou redwir kou lavi pou Seselwa, sa i ava anmenn en rediksyon dan laprovrete.  Sa i vedir en zefor konzwen par tou partener akoz sa size i konsern nou tou.

Bann mezir pou osi ganny pran pou ki Praslin e La Digue i osi benefisye avek rediksyon dan pri – sa se Minis Finans ki ti dir nou. Selman sa menm Gouvernman ti pe al ogmant pri avyon ki deservi sa de zil. Gran mersi nou dan LDS ki ti lager ek Minis ek Gouvernman pou pa trangle sa zabitan zil par ogmant pri tiket Mr Speaker! Granmersi LDS!   Gouvernman atraver Minis Finans sa letan i dir ek nou in demande ki STC i redwir pri lo komodite debaz e osi serten lezot komodite ki ganny servi par bann fanmir. Lalis sa bann komodite pou byento ganny anonse. Mon pa konnen si sanmenm sa bann komodite ki Onorab Ghislain in koz lo la, korsol ek zavoka, tousala set en mank dirkesyon Mr Speaker. Sel keksoz ki’n ganny anonse se Minis Finans i perdi son plas travay anba ladministrasyon msye Faure. E lalis nou pa’n zanmen gannyen.

Minis ki reprezant Ladministrasyon Msye Faure i dir ek Lasanble Nasyonal nou bezwen sistenm Telekominikasyon efikas e abordab, ki fondamantal pou nou tou enter koneksyon. Minis i dir an se moman nou an diskisyon avek bann lakonpannyen telekominikasyon pou zot redwir zot kou bann servis ki zot ofer kliyan. Nou lobzektif se pou fasilit koneksyon ‘pli vit’ a bann kliyan lokal e enternasyonal pou amelyor sa.

Ki’n arive ek negosyasyon Mr Speaker, nou pa’n tann nanryen!  Kou sa bann servis in desann, sa bann servis in desann. Tousala bann zoli parol, sak fwa Bidze zero aksyon lo lapar Egzekitiv. Se pou sa rezon nou ti ranpli lavil menm avek gro lapli (Onorab Valmont) pou nou kriy DANNY OUT, akoz Gouvernman i inefikas.

Minis i dir ek sa Lasanble atraver son liv Bidze, zot an diskisyon avek servis litilizasyon piblik PUC pou rekonsider son tarif pou bann lakour, pti biznes e bann lakonpannyen dan sekter prodiksyon. Me ki nou’n war Mr Speaker?  Sa menm PUC tou le trwa mwan i reviz son kou pou ogmante pa pou fer desann, lekel ki diriz pei sa enn i dir en keksoz, sa     lot i fer en lot keksoz, apre zot dir nou ‘‘LES DANNY TRAVAY!’’ Move planifikasyon, zoli parol dan Bidze 2017, apre pa delivre!  DANNY OUT!

Bidze 2018 Mr Speaker prezante dan sa menm Lasanble avek tenm ‘Travay Pour Prosperite Tou Seselwa’. Minis i dir ankor  i vedir ki nou bezwen travay pou atenn en devlopman soutenab sa voyaz.  Devlopman kapital imen e prosperite pou tou.  Sa tenm i endike ki pei i dan bon direksyon, en direksyon kler entern, stabilite ek progre.

Mr Speaker pa bliye nou annan en group Seselwa fek ganny pouse dan zot prop pei, dan zot prop lanplwa, dan zot prop pei, e etranze li in ganny priyorite par devan zot, savedir pei napa direksyon sakenn i vin dan sa Lasanble zot dir nou tou sord kalite mensonge, e zot dir tou sort kalite mensonge, bann parol mensongere  e zot anbet lepep Seselwa.

Annou get depans kapital ki tin prozekte pou sa lannen 2018 Mr Speaker, Minis Labita i ekspekte konplet 335 lakaz e fer alokasyon 200 morso later pour delivre. Mr Speaker Gouvernman in fail.

Komitman pou konstri 24 lakaz dan 24 mwan dan 24 distrik – pa’n delivre Mr Speaker.  St Louis pa’n ganny okenn proze 24.  Senpleman zot in anbet zabitan distrik St Louis par fer li krwar son proze i dan sa menm proze ki ti’n demare de lannen avan. Alor St Louis pa’n gannyen nou 24!  Fodre St louis i ganny son proze Minis Finans, son 24 lakaz teren nou annan, nou a dir zot, nou a montre zot kot i annan e fotespere nou CC Member ki Onorab Gill i ava siport nou proze 24 dan distrik St Louis ki nou pa’n gannyen anba sa menm Bidze ki zot ti vote!

Konstriksyon lopital Logan ki’n ganny en alokasyon 5 milyon.  La nou’n tann ankor sa lannen me selman nanryen pa’n ganny fer, selman zot pe demann ankor larzan.

Konstriksyon lekol La Rosiere ki’n ganny en alokasyon 36milyon nanryen pa’n fer.  La nou’n tann ankor en lot sonm pou Bidze 2019. Paran ti ganny dir  sa ti pou en parkour kour term, me zanfan pe kontinyen monte desann pou al Mt Fleuri, Gouvernman pa serye Mr Speaker!  Zot koze napa aksyon.  Letan nou koz lo la Parti lepep atraver son leader i dir sa vye kaset, vye ritorik selman obor li son bann Manm in zwe sa menm vye rikord depi 1977, sa pour li i ok sa.  Kontrer i bat lanmen! Alor pou li pa koz lo la me zis fer parey 5enm Lasanble zot ti vote dan lepase e apre e al tir petar Maurice e lepep ti war zot.

Mr Speaker Minis ti dir ek lepep Seselwa ki i annan gran plezir pou enform lepep Seselwa apre vizit ofisyel Prezidan Maurice tou dimoun i rapel. Sesel in siny en Lagreman avek Maurice pou enport bann komodite atraver bulk buying lo marse enternasyonal. Benefis en tel lagreman komersyal an gro, se partaz bann kargezon, redwir kou transportasyon, ganny pli meyer marse. Avek tou sa zefor pour pas bann benefis ek konsonmater e redwir pri lavi. Zistwar e ankor zistwar, Gouvernman pa serye!  Eski sa vye kaset sa?  En vye rikord sa?  En vye ritorik sa? Onorab De Commarmond i a dir nou apre.

Prezan annou get en kou ki Minis Lalanne pe vin prezant ek lepep Seselwa. Minis Loustau-Lalanne. Son tenm se Stabilite e Progre. E i dir ki tou Seselwa i bezwen vwar li dan sa progre ki pei in fer e mon dakor ek ou Minis. Personn pa devret ganny kit ater, sa osi mon 100 poursan dakor ek ou. Konmdi Onorab Waven William larg nou lanmen selman zot anmar ou lipye.  Tipikman Parti Lepep!

Selman annou get en kou prezan ki Minis pe ofer. Zis en pe kad travay ki Scheme pe revize, long service allowance zis serten kategori travayer ki pou gannyen.  Dimoun aze in ganny zis R250 logmantasyon, me komodite pa desann i reste parey e la nou ekspekte ki lannen prosenn i pou ogmante ankor parske servis pour ogmante. Travayer ki ganny minimum wage zot in ganny 250, letan nou diviz li par nou kalkil li i tonm R8.50 par zour. Ni en bwat ton avek ou pa pour gannyen.

Gouvernman in deside ki tax pou etranze pou lo zis zot lakour rezidansyel me non pa lo propriyete lakonpannyen, Sa i en fars mazorite sa bann etranze in vin Seselwa, oubyen zot lakaz i anrezistre atraver zot lakonpannyen. Savedir Gouvernman i riske pa anmas gran keksoz ki i devret ek bann gro lakonpannyen, zot, zot pou kontinyen fer profi bann gro lakonpannyen lo lasyer nou Seselwa. Konmdi Onorab Waven William mon krwar ‘’enough is enough!’’

Me sa Seselwa ki lwe lakaz li i pou kontinyen pey son lakaz ser li, ou konnen akoz tax 15 poursan ki ti pou ganny revize in anvoy pou 2020, pou li desann 3 poursan, Seselwa i kontinyen ganny trangle par sa Gouvernman, selman zot koz lo   Bidze pou tou Seselwa oubyen etranze ki benefisye dan sa pei.  Eski progresyon sa? Mon poz sa la.

Me kestyon ki mon demande eski nou kapab met nou konfyans dan Minis Lalanne ki la devan nou ozordi?  E pou li responsab larzan nou pei, e mon pe demann li sa pour li reasir nou dan son Repons  letan i fer son summing-up, pour mwan koman Manm elekte pour distrik St Louis, avek pour lepep Seselwa laba deor tann li.

Mr Speaker mon pe dir sa akoz nou bezwen rapel byen, sete sanmenm  Minis Lalanne ki asize dan nou Lasanble Nasyonal ki ti asir Lasanble ki travayer Air Seychelles pa pou perdi zot plas travay! Travayer Bayan tree parey, e se li ki ti dir ek Lasanble bann devlopman lo zil Cosmoledo se en bann mensongere.    Se pou sa rezon ki nou enkli mwan nou ti desann anvil Sanmdi le 3 Novanm Onorab Valmont pour nou kriye DANNY OUT! Akoz Gouvernman pa tro konnen ki pe pase dan son pei. Etranze in antre Onorab Valmont e zot pe fer sa ki zot anvi, ni Minis ni ou Prezidan Onorab Valmont Mr Speaker pa kapab fer nanryen! Parey Onorab Waven William in dir Mr Speaker, ‘’enough is enough!’’ Onorab Valmont.

Letan mon lo sa pwen mon anvi prezant mon dezapwentman avek Minister Lanplwa.  Letan zot ki si sipoze legzanp, siport e protez travayer ki nou’n vwar? Travayer Seselwa koman etranze pe ganny abize anba zot watch. Anba Employment Act protection of salary i fer kler lo dat peyman pou saler, selman Sesel nou annan travayer ki ziska 6 mwan pa ankor ganny peye, oli aksyon konkret sorti kot sa Minister ek son Gouvernman? Zis zot donn interview, asize e fer zot konfortab. Gouvernman  inefikas Mr Speaker!

Lanplwa pe zis donn interview me larealite i la deor, pa zis koze me fer aksyon. Ozordi Aride ki pe montre Minister lanplwa kote problenm i ete, me parkont dan biro PS i annan Technical Advisor, i annan Private Sekretary, Liaison officer, me ki zot pe fer zot tou dan enn enn biro? Sa bann pos in ler pou aboli – en group travayer laba menm ki dir mwan. Gouvernman Msye Faure in fail travayer ek lepep Seselwa. Ler travayer i travay i bezwen ganny plis larzan e proteksyon neseser ki bezwen. Letan mon lo travayer, mwan anvi fer en mosyon spesyal pour bann travay SEYPEC Mr Speaker ki zot pe kriy osekour, bann ki lo tanker, e osi bann ki travay ater menm isi, i enportan ki Minister Lanplwa i rann zot en vizit.

Mr Speaker sa lannen Minis Loustau-Lalanne, Minis Finans dan sa Gouvernman Mr Faure i vini i dir nou ki 10 an pase nou ti anbark lo en progranm pou en transformasyon ekonomik. E ki de semen pase nou’n selebre 10an sa lakonplisman e nou’n war progre ki nou’n fer koman en Nasyon. Minis Lalanne i menm dir nou Mr Speaker, ki tou Seselwa i bezwen war son devlopman dan progre pei, e personn pa devret ganny kit deryer akoz son vilnerabilite.  Minis in dir ki Gouvernman, sekter prive, ek sosyete sivil nou bezwen annan en sel goal, sa se travay pou devlopman Sesel. En keksoz ki nou dan LDS nou krwar ladan.

Mr Speaker letan Seselwa ek zabitan distrik St Louis ti pe fer son sakrifis, zot tip e ser zot sang, e ti pe travay pou Sesel.  Mr Speaker ki nou’n aprann pandan sa 10 an koman en nasyon ki nou’n aprann koman en Nasyon ki larises nou pei ti pe ganny distribye par enn de group mafia, bann Irlande ki ti swadizan pe vey nou souverennte e asire ki Sesel i reste en destinasyon ki atir e sekiriz lanvironnman.

Sa tousala ti ganny soutire par 5enm Lasanble ki sa letan zot pa ti konn lir zot liv Bidze ek Gouvernman konplis!  Granmersi 15 lo 10 Mr Speaker atraver FPAC nou’n aprann lakantite milyon ki’n kit nou lekonomi, e bann zofisye dan Gouvernman ki’n enplike atraver bann dokiman ki’n vin piblik.

Nou lekonomi avek tou sa larzan ki’n ti’n menm sot anviron R200milyon ti’n kapab ed nou lekonomi.  Ki mon pe dir par sa Mr Speaker, plis fasilite semen parey nou pe rode dan distrik St Louis. Belonie nou annan en proze semen, semen pou zabitan Semen Serret, konekte ek semen Belonie, en laranzman semen pou bann zabitan Semen Kato ki’n reste la pou plizyer lannen Mr Speaker se sa partaz larises kot nou zabitan i santi li i form par  Bidze.

Me 200 milyon ou menm plis milyon perdi. Kestyon ki mon pe demande eski lapolis ki nou vot Bidze pou li ansanm ek FIU ki zot pe fer? Pa nou devret apel zot dan Lasanble e demann zot kwa ki zot in fer pandan sa 2 an anba Ladministrasyon Msye Faure pou rekiper larzan zabitan distrik St Louis ek lepep Seselwa olye zis donn interview!

Letan Seselwa ti pe travay pou en sel goal sa pou Sesel ti annan en pti group dimoun ki ti pe benefisye atraver bann tranzaksyon later Mr Speaker; ki later endistriyel, swa later prive, tousala i annan pou fer ek finans pei akoz i annan bann kou finansyel atraver stamp duty ki devret antre dan Kof Gouvernman.  Me nou tou nou konnen ki letan sa bann tranzaksyon pa ganny fer parey i devret fer parey, leta e lepep Seselwa i perdi. Sa i fer ki pei i an retar ek distribisyon ek alokasyon later ek bann Seselwa ki’n lo lalis vernanm eternanm. Soutire par sa 5enm Lasanble ki pa ti konn lir zot Bidze sa letan e ozordi zot in konn lir gras a 15 lo 10.

Letan mon ankor lo size lakaz Gouvernman in met a dispozisyon Minister Labita en sonm 161.4 milyon pou plizyer proze later ek lakaz pou Bidze 2019.  Mon demande ki sa bann proze i ganny akselere. Dan mon distrik mon annan plizyer proze ki date dan bann lannen Erod ki  Minis Dugasse ti ankor la koman Minis Lakaz, Gouvernman in neglize e zot in rod tou sort leskiz pour zot pa asiste zabitan mon distrik.

Lafanmir Adela i en legzanp kler Mr Speaker ki mon kriye sak fwa mon koz lo size lakaz, Prezidan in vizit zot, in dir i annan larzan Zot kondisyon in deteryore, e zot pe esper Gouvernman pou remet zot dan en emergency house ki’n pare, pou zot kapab, pour Gouvernman komans zot proze.

Proze eX-Morel deryer ladministrasyon distrik kot Meganne ek lafanmir Adrienne i reste enkli lezot fanmir parey fanmir Valentin ki zot kondisyon pa bon, tousala Mr Speaker in ganny vizit par tou lotorite konsernen.  Larzan i annan kwa ki zot pe tarde pou enplimante? Pou ki sa bann fanmir zot pa ganny kit deryer parey Minis Loustau-Lalanne dan son Bidze.

Proze ex-Ahman ki’n la pou plizyer lannen, proze obor lekol Belonie segonder kot John Anderson pe reste dan en leta enpitwayab, de landrwa kot nou kapab konstri ankor proze lakaz pou ki sa bann sitwayen ki lo lalis zot kapab abrit zot fanmir Mr Speaker.

Si Gouvernman Parti Lepep ti konn zer byen son larises, anmas larzan avek sa ki fodre anmase parey bann etranze, bann biznes re-anmas nou loan, nou ti ava annan ase larzan pou enplimant nou bann proze olye pran avek pei zanmi. Manze ENDYEN, bis ENDYEN, lanbilans ENDYEN, lakaz ENDYEN, stati ENDYEN menm! Bidze ou a krwar ENDYEN ki’n donnen!  ‘Manrten fourtou!’ – konmdi ma soeur.

Si Ladministrasyon Msye Faure atraver Minis finans ti serye e ti annan bon gouvernans, nou pa ti pou tann sa ki noun tande kot SBFA.  Nou larzan ti pe ganny partaze antre dalon Mr Speaker, fanmir, me letan bann zenn dan mon distrik, parey Graham, Radegonde ki pe debrouye anler lo ter St Louis, me tou Lotorite pase zot sikann li, zot takin li pour li sorti, me li pa’n ganny asiste, oubyen zot pa ofer li bann led, kote i pour ale Mr Speaker? Letan bann zenn pa ganny gete sa i fer ki plizyer nou zenn zot in dekouraze, akoz zot pa’n ganny sa lenportans parey Bidze ti’n promet pou zot form parti lepanouisman, e personn pa devret ganny kit deryer menm son vilnerabilite parey tou bann Minis zot dir nou ler zot vin dan Lasanble.

Mr Speaker la nou’n aprann ki bann travayer ki’n travay senserman kot SBFA san tous en sou larzan lepep li ki bezwen pey le po kase; li ki pou         bezwen ganny transfer kot en lot lenstitisyon menm si zot pa kontan!          Olye deal ek sa problenm zot fermen e transfer staff.  Mwan mon pe dir lapolis i bezwen enplike pou fer en lanket akoz plizyer file in perdi!  Lekel bann file ki’n perdi? File Arissol? File Pilay?  File Mondon ki’n perdi, oubyen file Manm Lasanble, file Minis?  Sa osi nou bezwen rode Mr Speaker. I pa kapab toultan menm file ki perdi. Lekel ki pou rann sa bann larzan?  Lapolis i bezwen fer en lenvestigasyon Mr Speaker

Me pourtan bann ki koupab zot mwan aprann zot in ganny peye tou zot konpansasyon? Eski sa i zis? Pei pou kontinyen perdi larzan e Ladministrasyon Msye Faure ek Minis Finans pa pou fer nanryen.  Lapolis ki pe fer? Ki i pe fer dan sa zafer?  Eski i fini konmsan menm sa? Eski bann Manman ki zot zanfan in kondannen akoz i pa’n pey alimoni Mr Speaker, eski zot in ganny en fair deal alor?  Eski lazistis i donn bon zizman dan sa pei Sesel?

Si Ladministrasyon Msye Faure ti efikas zot ti avar met zefor pou retrouv tou larzan ki devret dan nou lekonomi. Sa 50milyon ki nou koz lo la toulezour dan sa Lasanble Mr Speaker ki’n perdi, ki ti’n kapab ed Sesel pou akonpli son bann proze. Plis larzan dan nou lekonomi i ava fer nou bann travayer ava benefisye en bon logmantasyon dan son saler.  Nou pa bezwen en baton mazik sorti Port Glaud sa Mr Speaker!  Se bonn volante Gouvernman! Mr Speaker mon fyer mon form parti lekip LDS akoz gran mersi LDS ki ozordi Gouvernman Parti Lepep in aksepte ki 40 poursan nou pep pe viv dan lapovrete. Fo profet sa?  Vye kaset sa? Vye rikord sa oubyen nou bezwen en baton mazik sa?  Mon poz sa la ater.

Granmersi LDS ki dimoun aze ti ganny en logmantasyon dan zot sekirite sosyal Mr Speaker.  Letan nou ti propoze Onorab Valmont, SPPF, sa parti ki ou siporte ti dir ek nou, nou ‘FOU!’ Nou pa ‘responsab!’  Nou pa ‘Realist!’ Me ozordi in soulaz sa dimoun aze dan mon distrik, ek nou bann dimoun aze dan nou pei.  Pa en vye ritorik sa Mr Speaker, se larealite lavi ozordi?

Gran mersi LDS ki ti demann Gouvernman pou entrodwir Trezyenm Mwan Saler, Minis Finans sa letan ti dir son nide sa, e ti dan en file lo son latab e pou fer en lanket dan lekel ki’n vol sa swadizan file Mr Speaker! Ti donn interview lo SBC tou, mon byen rapel!  Ziska prezan napa okenn rezilta lanket. Sel rezilta in benefisye se nou bann zabitan in ganny en pti larzan alafen lannen.  Gran mersi LDS i annan bon nide. Bon nide nou annan nou. Sa se Onorab Vidot ki ti dir Mr Speaker, kantite bon nide nou annan, e nou pare pou travay pou Sesel.  Letan nou, nou pe travay pour Sesel Onorab Vidot i a kontinyen asize dan son konfor Roche Caiman e i ava enjoy son cartoon prefere sa se ‘SESAME STREET’ Mr Speaker.  Enjoy ou cartoon Onorab!

 

MR SPEAKER

Onorab, Onorab,

 

(laughter)

 

MR SPEAKER

i en akizasyon direk.  Retract. Retract sa bout, wi.

 

HON SANDY ARRISOL

Retract i kontan…

 

MR SPEAKER

Non. Non.  Ou retract

 

HON SANDY ARISSOL

Mon pa konpran ki mon pour retract, fodre ou dir mwan ki mon pour retract Mr Speaker.

 

MR SPEAKER

I annan en akizasyon ki ou’n fer lo Onorab Vidot, retract apre ou kontinyen ou Repons.

 

HON SANDY ARISSOL

Mon retract Onorab Vidot. Mon kontinyen.

 

(laughter)

 

HON SANDY ARISSOL

Onorab tanporer, sa se Onorab Herminie Mr Speaker, ki war nou koman en lopozisyon permanan ek Onorab Antoine Noline Sophola, zot, zot demande oli larzan ki nou ti promet Seselwa?  Les mwan dir Onorab Herminie Mr Speaker, avek Onorab Sophola ki pa la, kote sa bann larzan i ete! Atraver ou Mr Speaker. Si ti napa, (Onorab Valmont relax ou lekor ou) si ti napa. (Ou’n koze, ou’n fer lentervansyon konmsi dan lanterman Pointe Larue, mwan mon pe koze mwan) … si ti napa LDS dan Lasanble Mr Speaker kote nou ti pou konnen pour dir mafya Irlande in vol nou larzan anviron 200 milyon, oubyen si pa menm plis?  Pa larzan ki nou ti kapab antre dan Kof Gouvernman ki zot ki ansarz pour nou met dan pos Seselwa? Labi kot L’Union Estate, R33milyon, MNA sa bann letan mon rapel zot pe fouy transe avek Minis Michel, pe vizit transe, lo La Digue!  Sa mon ti war Mr Speaker pa en lakizasyon, ti montre lo SBC, zot ti pe konsantre zis lo transe zot! 33milyon perdi anba zot watch Mr Speaker, pa larzan ki ti kapab antre dan kof Gouvernman pour nou met dan pos Seselwa Onorab Herminie?

Kontra kot 5enm Lasanble ek dalon pou bann sef benefisye. Larzan perdi ankor Mr Speaker. Stad Lanmizik ki ti komans ek 5 milyon la ozordi konte in fini me koko i ankor annan. 50 milyon Dolar ki zot, anba zot watch in perdi.  Enn i dir nou ti aste diri, lot i dir nou’n al Baroda, lot zot dir ‘’nou pa konnen!’’

Eski pa larzan sa ki zot ki responsab ki ti kapab antre dan Kof Gouvernman atraver zot Minis Finans ki ansarz nou larzan pour me larzan dan pos Seselwa?  Ler zot, zot in pran, demann nou kot nou pour ganny larzan pour met dan pos Seselwa? Se anba zot watch ki tou sa bann larzan in perdi. Savedir Gouvernman SPPF, zot in fail lepep Seselwa akoz tousala in pas anba zot, enkli Onorab Herminie Mr Speaker.  Zot pour bezwen rann nou, nou larzan!  Zot pour bezwen retourn sa larzan dan Kof Leta! En lot keksoz enteresan Mr Speaker larzan perdi antre dan kont SPDF, (mon pe vin Onorab Hoareau espere ou!) Larzan perdi State House antre dan kont SPDF apre sorti par milyon.

Mr Speaker mon ti al asiste FPAC.  Granmersi FPAC.  Mon komanse;

An Zen 2016 – 3milyon, Zen 2016 – 3milyon – antre dan en kont sorti dan en lot kont.

An Zen 2016 menm 3 milyon antre dan en kont sorti dan en lot kont,

Zen 2016 menm 2milyon antre dan en kont, sorti dan en lot kont.

Zilyet 2016 2milyon antre dan en kont sorti dan en lot kont.

Zilyet 2016 – 100mil Dolar antre dan en kont sorti dan en lot kont,

222mil Dolar antre dan en kont sorti dan en lot kont. Mr Speaker tousala larzan perdi anba zot watch bann SPPF! E zot dir ek nou LES DANNY TRAVAY!  E zot in fail lepep Seselwa Mr Speaker.  Epi Onorab Herminie i a ganny lodas dir, nou, nou’n promet Seselwa larzan!  Zot in pran nou larzan, zot a remet dan Kof.  Ler nou, nou vin o pouvwar nou ava ansarz Labank Santral nou a met larzan dan pos Seselwa!  Pa manz zot bannann, anvoy lapo lo nou!

 

(APPLAUSE)

 

HON SANDY ARISSOL

E i enportan pour nou dir tousala in ganny soutire par 5enm Lasanble Nasyonal. Sa letan – sa letan ki zot ti pe fer? Ti napa FPAC?  Personn pa ti demann kestyon?  Personn pa ti fer Hearing?  Granmersi LDS in ganny 15 lo 10 Mr Speaker. Si ou annan lizye ou devret vwar, si ou annan zorey ou devret tande. SPPF i bezwen rann nou, nou larzan, rod nou larzan ki zot, rod nou larzan ek lepep Seselwa.  Epi zot ava montre nou ledwa.

Ler bann SPPF zot ti vann nou paspor pou ganny larzan pou zot byen personnel, tousala zot in fer.  Oli sa bann larzan?  Sa boug ti ganny mete dan en bwat li apre ki zot ti’n pran son larzan zot ti fer li kit pei -dan en goni mon krwar – zot ti fer li ale.

Be kestyon ki mon anvi demande Mr Speaker pa en  labi sa. Ler i ariv en keksoz, msye Marek. Ler i ariv en keksoz koumsa ek en msye sa pa apel en labi sa? Labi i ariv zis avek bann madanm? Pa apel rasis sa? Vol li, pran son larzan, apre deport li, ki mannyer i apele sa Mr Speaker?  Zot ti devret donn li sans fer en interview lo televizyon li osi pou li eksplike dan ki grander goni zot ti met li.  Ki grander kouronn zot ti met dan son likou, ki groser minot zot ti met dan son lanmen.  Zot ti devret donn li en sans pour li eksplik son lekor, sanmenm sa ki apel labi anba Gouvernman Parti Lepep Mr Speaker ki Onorab Gill i form parti sa menm parti ki li i krwar i pe sey anvoy sa lapo lo nou.  Sa ki zot in fer ek sa msye i en labi.  E zot devret demann en leskiz son fanmir. Mr Speaker mon lot pwen. Pe rod larzan mon a dir zot kot larzan i ete.

Kreasyon en parti politik apele PDM. PDM ti ganny kree avek en larzan Mr Speaker.  I annan dimoun ki’n donn interview; i annan dimoun ki’n vin devan, i annan dimoun ki’n fer lartik, kreasyon PDM. Kestyon ki mon anvi demande, konbyen larzan lepep Seselwa ki’n ganny servi pour kreasyon PDM?  Konbyen ti peye, sa lakaz anler La Louise?  Sa lakaz Le Niole?

Eski konvansyon PDM ti ganny fer? Eski kont ki larzan ki Lasanble ti donn li, ti ganny odite pour asire ki tou larzan i la? Lekel ki responsab pour kreasyon PDM? Mon poz sa kestyon.  Pa bliye Mr Speaker, Mr Elizabeth en Manm Komisyoner Eleksyon ti dir ki 600mil donnen a PDM pa konnen ki’n arive avek.  Lekel ki’n pran, lekel pa’n pran, kot in ale.  Medya ki ti dir sa.  Sa i kot nou larzan in ale Onorab Herminie zot de Onorab Sophola Mr Speaker.  SPPF manz zot bannann apre zot anvoy lapo lo nou.

Lepep pe note lepep pe war parey zot kontan dir nou.  Si ti napa LDS kote nou ti pou konnen ki loan kot SBFA in ganny donnen ek dalon, fanmir, bann dalon SPPF.  Ganny 1 loan, 2 loan, 3loan, apre zot menm zot, zot loan i write-off! Mwan mon anvi dir zot en pti keksoz Mr Speaker, ler zot al pey zot loan, zot pa zoure laba.  Parske zot menm dir mwan i annan dimoun i rode si pti seo i annan lanmans, seo toultan i annan lanmans li pa bezwen zot zoure ler zot al laba kot SBFA.  Mr Speaker zis rann zot larzan ki zot in pran.  I apel larzan lepep Seselwa.

Ozordi anba Ladministrasyon Msye Faure zis Seselwa pe desann kot lorloz pou demonstre zot fristrasyon.  Apre zot dir nou les Danny travay! Enough is enough Mr Speaker en Manm elekte dan Parti Lepep i kriye olye koz lo ‘korsol’ swa ‘zavoka’, swa ‘stov petrol’, ‘lav kastrol deor,’ ‘bwar delo obor semen’, koz lo ‘move laron’, ‘roul ou lalang’ bann vre retorik konmdir Onorab De Commarmond.  Sa Onorab i vini e i adres bann defi e i aksepte ki wi i annan problenm dan sa pei.  Se pa vye kaset sa, oubyen vye retorik.  In aksepte in dir nou bezwen fer keksoz pour Sesel. En keksoz ki nou, nou krwar ladan.  Pa bezwen baton mazik Mr Speaker. Se volante lo lapar sa Gouvernman!  Ler nou demann kestyon tousala, sa pa anmenn enstabilite sa, pa fer dimoun per Pointe Larue sa Mr Speaker.  Nou pe rod bann kestyon akoz sa i nou rol koman Manm Lasanble Nasyonal.  I pa fer okenn granmoun per.  Alor pa anbet nou ek sa zafer.  Se pour sa rezon Mr Speaker.

Se pou sa rezon mon pou salye Onorab Wavel John Charles Ramkalawan pou sa bon travay ki in fer, ki i pe fer, e ki i pou kontinyen fer pou nou pei ek lepep Seselwa.  Seselwa i kontan li e zot apresye travay ki i pe fer pou sa pei, si Seselwa ozordi in ganny kouraz dan tou kwen Sesel pour zot desann obor lorloz menm bann pasyan Dyaliz se gras a li!  Lo non mon bann koleg e lo non mon distrik St Louis mon anvi dir avek Onorab mersi Onorab Ramkalawan, mersi bokou pour sa travay Onorab Ramkalawan ek ou lekip.

 

(APPLAUSE)

 

HON SANDY ARISSOL

Konmdi Onorab Mitcy Larue si pa ou Onorab, lekel?

Se  pou sa rezon Onorab Valmont ki FPAC ki chair par Onorab Ramkalawan pe ganny felisite pou sa bon travay, akoz menm bann Manm SPPF lo lot kote zot rekonnet e aksepte atraver rapor ki zot tou zot in sinyen, parske zot santi i annan en travay ki pe ganny fer.  E sa i laprev zot lapresyasyon.  Pa bezwen bat lanmen selman nou konnen zot apresye. Mersi bokou lo par msye Ramkalawan.

Mr Speaker mon ti pou kontan dir ek Minis ler mon pe konklir e tou sa bann travayer devoue kot Minister Finans mersi bokou pou zot korperasyon.  Mon aprann ki zot reste en ler eske en pe apre ler me pour zot prezant Bidze pei, mon krwar i enportan. Mersi pour zot sipor pandan lannen. Mon ti a kontan osi dir mersi bann manm Sekretarya ki tanzantan nou fatig zot en kou pour zot sipor, zabitan distrik St Louis ek tou Seselwa, tou travayer Seselwa mwan ti a dir zot mersi bokou. Mr Speaker e mwan ti a kontan dir ki pye Valmont Mr Speaker, pa pour zanmen aport Arissol li, pye Valmont pour restan toultan aport pye Valmont. Arissol pour aport Arrisol. Alor kant a mwan Mr Speaker mon pour kontinyen dir DANNY OUT!  E mon pa pou zanmen les mon pei avek mon distrik tonbe!  Mr Speaker avek sa de parol mon ti a kontan dir ou mersi bokou.

 

(APPLAUSE)

 

MR SPEAKER

Mersi Onorab Sandy Arrisol. Avan nou pran dernyen entervenan, mon a zis ekout Onorab Basil Hoareau.

 

HON BASIL HOAREAU

Mersi Mr Speaker. Mr Speaker mon pa ti la me mon’n ganny dir ki Onorab Arissol in fer en statement. Si sa i korek mon ti a kontan correct en misapprehension lo son par. Aparaman Onorab Arrisol in dir mon’n dir pour dir Bidze kont Konstitisyon, korek?  Ok. Mon ti a kontan koriz sa misapprehension, mon pa’n dir ki Bidze i kont Konstitisyon. Mon’n dir i annan sa eleman prescription fee ki si nou kapab fer li byen, i pour kont Konstitisyon.  Se sa ki mon’n dir – mon pa’n dir Bidze.  So mon ti a kontan koriz sa.

 

MR SPEAKER

Mersi, mersi, Onorab Basil Hoareau.  Mon krwar sa i osi ki i ti anvi dir, i pa’n anvi dir Bidze me in mal mete.  Mersi pour klarifikasyon Onorab. Mwan a donn laparol Onorab Jean-Francois Ferrari.

 

(Interruption)

 

HON JEAN-FRANCOIS FERRARI

Mersi Mr Speaker. Mr Speaker …

 

MR SPEAKER

Bon, non, zis mwan a fer konnen Lasanble i annan enn de Manm ki zot pe war i absante and all that. I annan serten rezon. Mon Lofis i okouran e mon krwar lofis Madanm Clerk, par egzanp Onorab Sophola tou. I annan serten keksoz ki’n arive. Nou okouran. Ok?  Ale Onorab Ferrari.

 

HON JEAN-FRANCOIS FERRARI

Non Mr Speaker, nou’n soufer nou pandan 50 minit. Ti fermal, bezwen ekoute. Be selman anyway.

Mersi Mr Speaker. Mr Speaker en Bidze Nasyonal i en dokiman enportan parey bokou Manm in dir. I sipoze met ater Polisi en Gouvernman pour bann mwan ek bann lannen ki pe vini. En Bidze i montre larout ki Gouvernman in deside pran pour devlopman en pei, e son plan pour lavenir. Dan sa Bidze ki Minis in prezant nou semenn pase i difisil pour en parlmanter eksperyanse parey mwan, konpran vreman kote sa Gouvernman i anvi ki Sesel i ale.  Ler mon fer analiz e konparezon avek Bidze sa lannen 2018, e osi avek lanons fer par Prezidan Larepiblik dan son diskour Leta Lanasyon pli boner sa lannen, mon war en seri kontradiksyon ki ase enkyetan.

En Gouvernman Mr Speaker parey en lekip sportif i bezwen touzour pe re-aziste, regroupe e pe relanse.  Minis pa kapab dir nou ki i pe rod stabilite akoz stabilite i en teknik defansiv. Nou, nou bezwen aksyon e nouvo lide.  E parey nou.  An se moman i paret ki nou, nou parey en bato ki lo mouyaz.  Nou stab Minis i dir nou.  Laroul pe bat, bat nou, me nou stab.  Masin pa pe marse me nou stab. Kaptenn pe refize pran labar akoz in divorse ek son lekipaz me pa trakase, nou stab. Tou dimoun in aret lapes e pe obzerve, be pa bezwen enkyet. Minis i dir nou.  Nou stab. Dan kannot i annan detrwa triker ki pe profit sa sityasyon pour vol nou laliny ek nou lanmson. I annan ki pe tir borde nou kannot, me pa get sa, Msye Faure i dir.  Bliy tousala – pa get lepase.

Me ler ou get dan sak lapes sa bann Onorab ou war sa roulo lakord ki ou ti pe rode, ou war sa pake lanmson ki’n disparet, ou war sa bout borde, be nou bezwen kriye Mr Speaker. Mr Speaker.  Nou stab?  Prezidan i dir pa get sa, les mwan fini mon travay, les Danny travay.  Non Minis!  Non Prezidan! Nou pa kapab les sa sityasyon kontinyen degrade.  Nou napa dwa vir ledo.  Nou’n ganny elekte pour donn Sesel en pei ki fonksyonnen.  Pa enn ki son gear box in cease konmdir Madanm Marie-Lise Potter. Nou’n ganny elekte pour anmenn lazistis ek lonnekte, pa pour soutir koripsyon ek krim.  Sa Bidze Minis i egzakteman en Bidze tranzisyon. Parey Msye Faure i en Prezidan tranzisyon.

Parey nou’n dir depi komansman en Prezidan ki la pour kit ladministrasyon ouver, ni plis ni mwens. Se pour sa rezon ki depi premye zour, nou ti demann Msye Faure pour fer eleksyon Prezidansyel boner, pour nou sorti dan sa peryod tranzisyon ki nou ladan.

Ler Msye Michel ti taye, kit baton avek ou Msye Faure. Ou’n ensiste pour ou reste, ou ti envit nou pour mars ek ou lo sa semen latransparans e rann kont, nou’n aksepte e nou’n fer en bon bout larout ansanm.  Me pandan sa letan nou’n fer en kantite travay pour met lord dan nou bann lenstitisyon demokratik, administrative e ekonomik.

Nou’n fer en bon pe progre e nou’n met an plas en bon pe zouti ki sipoze permet nou avanse lo sa semen rann kont e latransparans.  En zouti pli enportan ki nou’n repare, se nou tors.  Aprezan ozordi msye Faure ou annan a ou dispozisyon dan Lasanble Nasyonal en tors 18 batri ki pe kler partou anba latab, dan tant lapes, dan Kof Leta, dan kont labank, partou kote. Avek sa tors fernwanr in aprezan vin lizour.

Nou’n ede osi pour vot de Bidze ki’n anmenn plis mwayen pour lapolis, ki sa de dezyenm zouti enportan ki ler nou kriy ‘’bare voler’’ e osi lankourazman ki nou’n donn biro Attorney Zeneral pour fer bann Lalwa ki merit meyer e prosekit sa bann voler.  Lo ou kote Msye Faure ou’n promet nou ki ou pour donn ledan Komisyon Anti- Koripsyon. Sa se bann zouti enportan Msye Faure.

Me malerezman la ozordi, ou pe kas kontour ek nou.  E sa nou pa dakor, nou pa aksepte. Ou ti promet ou pour fer ou bout, me ou pe zwe bliye. Ler nou montre ou kot i mal ou zwe pa war.  Ler nou dir ou laverite, i zwe sourd lo nou. Ler nou fer Lamars Protestasyon pour ou pa tande ou al lo zil.

Dapre enn mon koleg isi dan Lasanble ki’n rankontre Msye Faure tou resaman Prezidan in demann ek li akfer nou pe mont sa konpanny DANNY OUT, ki problenm i ti demande? Msye Faure problenm se ki ou’n kas sa kontra ki ou ti’n fer avek Lepep Seselwa pou met lord dan sa pei.  Ou’n trai ou parol.  O non stabilite ou pe protez bann  malonnet e bann voler!

Se sa larepons pou ou kestyon.  E nou, nou pa kapab esper ou akoz pli nou tarde, pli sityasyon i agrave. Bann malonnet e bann triker e bann mafya, e bann lanperer ti’n konmans per sa lalimyer ki nou ti pe klere lo zot aktivite malonnet e zot ti’n antre anba disab parey sa pwason ki apel sol.  La prezan, zot konmans nepli per.  Zot ti’n maron e la zot pe retournen.  Zot ti’n al kasyet dan bwa, me la zot pe marse dan lavil, byen fyer, lebra ouver, parey bann akter, e zot 60 ekek bout later ki zot in pran ek Gouvernman i ankor lo zot non e zot larzan sal i dan nou labank.  E ou, Msye Faure, ou pe soutir sa boug kan ou konnen ki mannyer sa pei in ganny vole. Alors, mon demann ou Msye Faure, ki mannyer ou kapab regard sa pep Seselwa dan son lizye e dir avek en lavwa for ki ou’n ranpli ou bout dan ou Kontra?

Ki ou’n fer pou fer retourn sa 50milyon Dolar?        Konbyen kare later ki ou’n repran avek bann abizer, sirtou sa enn ki Parti Lepep pe lwe R2mil mon krwar ek Gouvernman e pe re-lwe R800 mil ek STC? Konbyen sa bann loan ki SBFA in write-off pou ou bann dalon, ou bann koleg e ou bann asosye ki ou’n fer retournen?      Konbyen dimoun ki’n responsab pou sa bann aksyon ki’n ganny met ankour?       Koripsyon, Msye Faure, i detri kredibilite en Gouvernman e detri sa siman moral ki tenir en pep e en sosyete ansanm.  Koripsyon i detri sa fondasyon ki soutenir demokrasi e bon gouvernans. Se akoz sa lager i sitan enportan, ki nou bezwen dir ou ale si ou napa kouraz pou anmenn sa lager.  Si nou perdi sa lager kont koripsyon, nou pou perdi tou lezot lager.  Nou pou perdi lager kont trafik drog par egzanp.

Akfer en marmay lekol pou santi ki i bezwen travay dir pou aprann en metye ki pou permet li viv byen, si i vwar en voler, en trafiker pe marse lebra ouver dan semen, pe donn lord lo stadium, pe marse dan bann gro, gro jeep? Si nou permet sa, nou pou perdi sa lager pou en meyer servis ledikasyon.  Akfer en dimoun malonnet pou per gard ler ou vwar en dimoun ki’n ganny kondannen pou frod eleksyon pe asize dan en fotey dan zarden State House pe selebre laviktwar Parti Lepep?     Fotespere, Msye Faure, ki ou’n sezi akoz nou pe demann ou pou sed laplas, konmdir Onorab Gill.

Napa nanryen personnel, me i kler ki ou nepli dan sa Kontra pou donn Seselwa en meyer pei.  Aprezan, si apre ki ou’n ekout nou byen sa 18 dimoun dan sa lasal e sa de lot dan ou prop kote, si ou’n ekout sa bann dimoun ki’n koze, ou’n senserman realize ki sa ki nou pe dir i vre, si ou’n vreman annan en sanzman leker e ou’n retrouv ou kouraz ek ou determinasyon, fer nou konnen, pa zis par en promes oubyen en reasirans, me par enn oubyen 2 aksyon konkret – en pe deswit. Pran aksyon kont bann voler.  Si o kontrer ou napa lentansyon sanz nanryen dan ou metod travay, donn nou, silvouple, en dat pli boner posib pou en eleksyon Prezidansyel!

Aprezan  Mr Speaker mon vin lo serten detay pli spesifik lo Bidze 2019.        Mon remersye Minis e son lekip pou zot travay.  Mon zwenn avek Leader Lopozisyon pou renouvle nou komitman pou kontinyen travay avek Minister Finans dan lentere Sesel.  Mon demann Minis pou pran bann kritik dan sa bon lespri pozitiv ki nou’n fer e mon swete Minis ki ou pa’n ofanse par okenn parol ki nou’n kapab dir.  Mon konpran ki par ler nou bezwen soufer ler ou’n ek serten dimoun ou bezwen ekoute sirtou lo lot kote latab, me sa i fer parti dan nou travay e nou apresye ki ou’n la dan sa Lasanble pe ekout tou sa ki’n ganny dir.

Lo koleksyon larzan atraver taks e lezot fees and fines    Mr Speaker mon pou demann Minis si i pou kapab eksplik nou dan son larepons, ki bann zouti SRC i annan a zot dispozisyon pou evalye pour assess, bann taks ki merit ganny peye par sekter telekominikasyon e sekter prodiksyon labwason?  Mon en pe enkyet ki nou pe depan bokou lo bann returns ki sa bann konpannyen i fer zot menm,  me ki SRC napa okenn zouti modern pou etabli ki nou pe vreman anmas sa ki nou merit pe anmase.  Donn nou sa lasirans Minis ki nou pa pe zis pran bann parol sorti kot sa bann businessman.   Nou konnen ki kot Seybrew i annan bann konter ki donn nou bann sif egzakt. Me eski i annan dan bann lezot landrwa, e sirtou dan servis telekominikasyon?         Lo menm size telekominikasyon, eski Minis i kapab eksplik sa Lasanble sa ‘’2milyon downward revision in Telecommunications Licences due to revisions of nominal telecommunications growth.’’ Paz 36 ‘’other tax.’’  Eski sa i en lendikasyon ki sa bann konpannyen telekominikasyon pe deklar en bes dan zot turnover?  Si sa i vre mon soke Minis. Mon ti a vreman kontan mon krwar lepep Seselwa a vreman kontan si ou ti kapab eksplik sa?

Lo kestyon bann don, sirtou Grants linked to balance of payments ki Gouvernman i revwar, eski Minis i kapab eksplik nou akoz eski pou sa lannen 2018, Bidze ti prevwar 400milyon pou nou resevwar, me nou’n resevwar zis R248 milyon? Mon tou-l-tan konsernen par kapasite Minis, sirtou Minister Zafer Etranzer pou kapab access sa bann Grants.  I en lenkyetid ki mwan koman chairman, Chairperson International Affairs Committee ki toultan santi ki nou pa pe met ase kapasite pour nou kapab ganny sa bann Grants.  Mersi pour sa.

Mon konsernen Minis osi, lo sa sonm R325milyon  Stamp Duty ki nou sipoze resevwar e ladan i sipoze annan R222milyon ki an rezilta lavant Cable & Wireless.  Eski sa negosyasyon in finalize Minis? Eski sa sonm i asire. Eski tou bann konsern bann travayer ti ganny pouse, eski sa bann konsern in ganny adrese, oubyen eski i ankor annan bann pending issues, e ki nou devret profited an sa lokasyon ler Cable & Wireless pe finaliz sa peyman, pour nou fer sir ki sa ki pour Cesar i al pour Cesar e sa ki pour bann travayer i al pour bann travayer.

Apre, Minis,  eski ou kapab dir nou eski sa sonm R48.7milyon anba menm heading ‘stamp duty’ ki konsern lavant, ki konsern taks lo lavant Banyan Tree pa’n ganny mete pour 2019. Eski Minis sa sonm in ganny kolekte an 2018?     E ki si sa i le ka, mwan pour satisfe.      Minis, nou ti ava kontan konnen si ou personnelman ou  satisfe avek koleksyon VAT lo komers an detay.  Nou konnen ki sa 15 poursan VAT i ganny mete lo konsonmater me ki sa i ganny zis ranmase par bann marsan lo lapar Gouvernman, me ki sa i merit retourn dan kont Gouvernman apre ki bann marsan in vann sa bann marsandiz.

Mr Speaker i mwan lopinyon senser e konsidere ki pa tou marsan ki pe fer sa parey zot devret fer.  Eski zot dan Minister Finans eski zot in met an plas en bon sistenm pou evalye ki sonm sa VAT ki zot merite pe anmase?  Ki’n arive avek plan pou fer li obligatwar annan cash register dan bann mwayen e gro laboutik?

Eski ou kapab dir nou Minis si, lo baz bann sif lenportasyon ki Customs i annan, ler ou’n retir bann marsandiz ki VAT Zero-rated oubyen VAT Free, sa sif koleksyon VAT  ki 2.44 bilyon sa lannen i sanmenm ki nou ti merit pe anmase?  Oubyen eski nou pa asire, eski nou krwar pour dir sa koleksyon i devret en pe pli efikas, e plis larzan i devret antre dan Kof Leta. Minis mon ti a kontan demann en kestyon, lev en pwen lo taks, lo lavyann pour ek pork.  Mon ti La Digue Sanmdi pase Mr Speaker, Onorab Loizeau in konfirmen taler ki zot kapasite pou prodwir koson kot L’Union Estate in plen e ki zot annan apepre 700 koson dan park. Problenm se napa lavant. Enportater i plifere fer vin lavyann koson sorti deor e bann lotel i plifere aste ek zot. STC osi msye Minis, STC osi pa oule aste lavyann pork lokal. Menm si i annan dekwa lavyann pork La Digue, STC i kontinyen vann lavyann enporte.      Alors, Mr Speaker, i pa en kestyon met taks lo lavyann enporte, me ed sirtou bann prodikter pou vann zot prodwi. Menm problenm pou bann fermye fri ek legim.  Sa ki zot pe demande se pa proteksyon me akse avek bann konsonmater tel ki Lotel, Restoran, Take Away e lezot gran konsonmater. Eski nou Gouvernman, eski OU Minis Finans, ou pa kapab konvenk sa bann gro enportater, trouv bann mwayen pour fer zot konpran tel ki ISPC, Global, Apex, eksetera pou donn priyorite prodikter Seselwa? Eski bann lotel pa kapab fer parey?

Si nou ankouraz prodikter Seselwa avek akse ek en marse lavant, sa i kapab fer ki zot pour rann nou en pe lavant e nou kapab ekspekte ki  pri i ava desann pti morso. Me tan ki tou faver i al ver prodwi enporte, Minis ou kapab met tou ou taks, met tou ou levy ki ou le me mwan mon santi ki sa pa pou fer gran lefe.  Zis konsonmater Seselwa ki pou soufer plis ek bann pri pli o pour kontinyen tap zot.

Lo sa note, mon oule ki Gouvernman i regete ki pou arive avek sa landrwa, kot AGRO i ete Pointe Larue, zis an fas, kot Onorab Valmont i reste me zanmen i koz lo la.  Sa landrwa ti a byen kapab ganny transformen dan en sant wholesale, en sant aste e lavant bann prodwi an gro ; kot bann prodwi agrikol i ganny vann an gro ; kot bann lote lek bann lezot biznes i vin rod zot supply.  Kot bann Shipchandlers.  Konmsi ankouraz en lorganizasyon pour met an plas sa marse an gro.

Seselwa Mr Speaker sirtou bann fermye pe demann bann solisyon konkret e senp silvouple.  Taks lo propriyete Minis, mon konnen ki serten etranze e zot dalon Seselwa in lager for pou dekouraz Gouvernman pou met sa taks lo bann propriyete etranze ! Mon konnen sa.  I annan en gran lobby parmi bann etranze ki annan bon kontak State House ki pa lager kont sa taks. Sanmenm pa ti enplimante an Zanvye 2018.  Mon dezapwente ki sa taks, ki lontan nou dan LDS nou pe demande, aprezan in ganny anvoye Avril 2019.  Me eski vreman nou pa kapab speed up son lenplimantasyon pou Zanvye? E Minis, nou ti a kontan konnen, en leksplikasyon lo sa kalkilasyon 0.25 poursan.  Par egzanp lo en lakaz 3 lasanm Eden Island oubyen lo zil Desroches, fotespere sa bann dimoun pa vin dir nou pour dir non, non sa i en  biznes sa, zot in aste pour zot lwe, pa pe vin en rezidansyel, konmsi pa met nou ladan?  Mr Speaker mwan mon konn dimoun, in fact mon kapab dir mon papa ti annan en lakaz La France, pey 3 taks, peye li, ler ou en etranze ou peye.

Sa bann dimoun zot konnen pour dir zot bezwen peye zot, selman zot lager pour zot pa pe peye.  Alors i pa en krim pour nou demann zot, pour zot kontribye.  Mon krwar nou bezwen ensiste e blok tou bann loopholes parey Onorab Hoareau in dir pour fer sir sa bann dimoun osi, Sesel i en prodwi rar Mr Speaker e Minis. Tou dimoun ti a kontan vin Sesel, ou bezwen pey en premium pour ou vin dan nou pei.  Nou’n gard li prop, nou’n gard li zoli, nou bezwen peye sa premium. Pa krwar konmsi ou pe vin Sesel konmsi ou pe al lo lakot Lespanny oubyen lo lakot Tinizi, oubyen Marok.  Ou pe vin Sesel.  E i koute si ou anvi vin Sesel.

So, Minis in dir nou pour dir in annan sa pour arive sa lannen e fotespere ki i pa ganny fer, pa ganny met retar ladan.             Lo taks lo disik Minis.  Dapre lenformasyon, sa taks ti pou osi aplik pou disik ki servi dan fabrikasyon Ice cream, me enn sa bann gro businessman  ki annan zoli kontak li osi anler State House ki in ‘lobby’ Gouvernman pou pa met sa taks, akoz li pli gro prodikter ice cream Sesel.  Konmsi i pa tro, tro afekte li konmsi.  Alors Gouvernman in aksepte. Eski sa i vre Minis? Zis in ale in fer interview dan PEOPLE, apre zafer in korek!.                            Minis in donn nou detay ki mannyer konsesyon fuel pou ganny donnen a lavenir. Mon koz byen for pou bann peser ki nou dan LDS, nou pe aprouve pou zot kontinyen ganny zot konsesyon fuel an 2019.  Parey nou ti fer an 2018.  E parey nou ti fer an 2017.  Sa bann sef kot SFA, ekout mwan byen ki pe dir ek peser ki Lasanble pa’n vot Bidze pou fuel, arete lalang silvouple!  Arete sa lalang!

Minis mon ti a kontan prezan demann ou an sa ki konsern bann TIA (Tourism Incentive Tax) ki sipoze ‘expire’ lafen lannen.  Ou’n dir nou pour dir serten bann ki reste pour ganny ‘extended’ atraver sa ‘phased out approach’ e zot pou benefisye ankor 1 an, 2an lo nou ledo?  Sa ki mon ti a kontan demann ou Minis, se eski sa benefis, phased out apprach i pou aplike pou bann ki zot TIA pe fini le 31 Desanm, oubyen ler i fini i apel fini?  Sa i enportan pour mwan tande. Eski sa benefis pour aplik pour servis helicopter ki transport laplipar letan bann milyonner? Minis ou’n dir ki in annan konsiltasyon piblik ki’n ganny fer lo sa size, mon ti a kontan konnen kote e kan sa konsiltasyon in ganny fer silvouple?            Nou’n ganny dir osi Minis  ki SMSA pou ganny son lotonomi e i pou pli byen kapab deal ek bann kontrol tel ki license bato ek survey.  Sa i fer mwan riye Minis! Mon anvi riye! Sa SMSA ki nou konnen ozordi la, pour met lefikasite la?  Sa SMSA ki nou koz lo la?  Mon pa krwar Minis.  Antouka pa avek sa bann prensip ki egziste konmela kot SMSA.  E la mon lir ki ‘all vessels including fishing vessels will be registered and surveyed’.  Bato Seselwa, wi. Wi, wi, zot pou tay deryer tou sa dernyen pti Seselwa, me sa bann bato etranze Minis ki plake Eden Island e ki fer charter, ki anploy etranze san GOP, ki maltret Seselwa, ki pare pou donn gous partou kote, lekel ki pou al met lord laba Mr Speaker? Lekel ki POU al met lord ek sa bann dimoun ki fer zis biznes “family and friends;” charter family and friends, zis ou vini, ou sorti Sid Afrik ou pran en yacht, ou met Sesel, e ou fer family and friends. Minis ou menm ou Minis, ler ou ti ankor Minis Finans, mon konnen ou annan bokou louvraz, me still mon pour fer ou mazinen pour dir ou ti promet pou met en LORD dan sa lendistri!  Ou ti promet!  Me ou pa’n kapab!  Me i ankor annan dezord akoz nou bezwen sey ede ki mannyer pour donn en plas dan sa lendistri pour bann Seselwa, bann zenn Seselwa, e pour bann biznes Seselwa.  Nou en pei lanmer, nou en pei peser, nou en pei navigater.  Si nou pa kapab ganny en lespas dan sa bann biznes ki nou pour fer?

Ozordi Minis sityasyon in pir. La aprezan, zot in pran kontrol Eden Island ek tou bann zil IDC dan Sid. Mon krwar fodre aprezan ou annan paspor Sid Afriken pou al Cosmoledo, Assomption, Astove, eksetera !

Souvan ler nou pe koze nou, nou pe get sa Endyen ki pe travay dan laboutik, nou bliye gete.  Akoz sa Endyen ler i vini avek en back pack lo son ledo, nou dir i en mizerab. Me ler blan i vini, avek briefcase i en businessman, nou pa get li nou !  Nou bliye get li!  Li i antre i al Eden Island, i fer business  lo nou ledo, nou pa koz lo li. Alors Mr Speaker, mwan mon ti a kontan lo sa size nou zil, mwan oule lans en lapel avek tou Seselwa pour pran konsyans ki nou pe perdi nou zil Minis.

Msye Glenny Savy CEO IDC pe les Sid Afriken pran nou zil!  Pour Seselwa, zot pe … pour Seselwa.  Msye Savy pe donn tou biznes son bann dalon, sirtou son bann blan Morisyen, bann Sid Afriken. Ok?  Si en lot dimoun i dir sa, mwan kekfwa zot pa ava dir mwan rasis, akoz mon lapo i kler, mon kapab koz lo bann blan ki vin pran manze dan labous Seselwa.  Alor  mwan ava koze mwan!  Sa bann dimoun pe pous Seselwa, pe donn tou biznes zot dalon.  E fer sa ki zot anvi, pe fer lotel lo lans, pe fer lasanm dan container, prezan personn pa kapab dir zot nanryen! Prezidan, Minis Finans napa personn e ganny mwan byen kler, e sa pa ozordi, ni yer, napa personn dan sa Gouvernman ki kapab donn en ‘Lord’ msye Glenny Savy!  NAPA!

 

(APPLAUSE)

 

HON JEAN-FRANCOIS FERRARI

Napa personn – ok ?  Mwan mon pa ankor war mwan antouka.              E mwan mon ti a kontan ki si i annan en Gouvernman ki pa kapab donn en Polisi, donn, aplik Lalwa lo nou bann zil, me swa sa Gouvernman i ale, swa sa msye ki ansarz nou zil i ale!  I bezwen annan keksoz ki arive. Pa kapab pa arive Minis.  Alors la ler nou pe koze Minis, i annan 18 kare later ki pe ganny tire, ki pe ganny marke pour vann ek etranze ankor lo zil Desroches! – 18 kare!  Fek pas kot PLANNING, ok?  Now,Anyone’, i kapab aste.  I kapab msye Savy i ava dir ou be ou osi, ou en Seselwa ou kapab aste. Me mwan mon kapab al aste en kare later Deroches mwan? Fodre mon’n pran tant lapes mon’n al avek. Ler personn pa ti pe gete!  Mwan mon kapab ale.

 

(laughter)

 

 

HON JEAN-FRANCOIS FERRARI

Par anba msye Savy, etranze Mr Speaker pour vin lerwa dan nou pei! E Seselwa pa pour zanmen ganny sa sans ki i merite!  Minis, pep Seselwa, Prezidan Faure, nou’n ganny ase! Nou’n ganny ase!  Pran en desizyon silvouple.  E si ou pa kapab pran en desizyon kekfwa vre, kekfwa vre ou pe sa msye.  Be si ou per, be ale, les li i a met kandida i a vin Prezidan!  Ou konpran?  Akoz i ki sipoze Sef – ok  Alors sa mwan mon ti a kontan dir ki 30 an dominer lo nou zil i tro lontan!  Anba LDS mwan anons en bon nouvel ki byento nou pour repran kontrol nou zil pour Seselwa.

 

APPLAUSE)

 

HON JEAN-FRANCOIS FERRARI

Mr Speaker annou regard detrwa pwen ki pa kler ki, mon’n koz lo reveni Gouvernman lo depans Gouvernman:

5poursan logmantasyon lapey malerezman pa pou fer okenn diferans pou laplipar travayer.  Sa ki Seselwa pe demande se bann mezir ki fer bese pri lavi Minis, fer bese pri marsandiz. Seselwa i oule bann mezir konkret ki fer en diferans.  Seselwa i oule kot son Gouvernman i deal avek bann kartel ki pe fikse bann pri tro o.

Tir VAT lo en bwat ton i pou zis R2 lo R23, me en bwat ton pour still kout R19. Nou kapab fer li ariv R15. Nou kapab fer li ariv R13.  Nou pa in dir, be pri benzin lo laponp pa i kontrole?  Be si pri benzin lo laponp i kontrole, SEYPEC i pour Gouvernman! Gouvernman i annan 40 poursan dan IOT, i napa en parol pour li dir? Konmsi annou get sa pri bwat ton en kou nou a met en recommended retail price?  E zis  marsan ki pare pou vann li a sa pri ki rekomande ki pou ganny sa prodwi. Sa ki pa enterese vann li – akoz i krwar profi tro ti gin, les li, lezot dimoun i ava vann.     Logmantasyon lapey, Minis, malerezman i benefisye zis en bann, zis bann ki dan lanplwa. Bann ki self-employed, sa fermye, sa peser, napa nanryen pour li.  Se pour sa ki nou, nou pe lager pour pri lavi an zeneral desann.  I drol Mr Speaker ki mannyer bann ki’n plis siport sa Gouvernman in ganny plis kit ater!  Lekel ki travay plis pou sa Parti Lepep ki bann anplwaye dan biro distrik? Eski Seselwa i realize ki sa bann dimoun, notaman bann ‘field technicians’, ozordi an 2018 pe ganny zis R5,050 par mwan!  Pa bliye ki lo sa saler mizerab e lesklavaz, sa dimoun i bezwen pey son pansyon ek son taks li menm. Sa pa en krim kont zot bann koleg?  Mon bann koleg lo lot kote latab?  E zot pa war li drol ki ozordi se nou dan LDS ki bezwen lager pou bann ‘aktivis’ Lepep ki’n fer kanpanny pour zot, ki’n anmenn dimoun vote pour zot, akoz nou krwar pour dir zot pe ganny trete parey bann lesklav.  Me zot bezwen revey mon bann zanmi.  Se sa bann keksoz ki zot bezwen pe met lanfaz lo la?

Lo lasante.  Sote 1bilyon roupi in ganny rezerve pou sa sekter Minis, mersi bokou. Alors, akfer Gouvernman i bezwen kit lo trotwar dan bor lorloz 30 Seselwa ki bezwen servis Dyaliz?  Mon pa vwar sa lozik!  Sirtou ler FPAC in anmenn laprev ki sa Kontra avek AMSA pa’n ganny fer dapre regilasyon e i pe kout Gouvernman pli ser.  Nou pa pe demann pour AMSA fermen me sirman i annan plas pou en lot servis Dyaliz dan Sesel e la i annan enn ki serten dimoun i satisfe avek e ki pli bonmarse.  Akoz zot refize ekout rekomandasyon FPAC? Lekel ki pe benefisye ler zis AMSA ki ganny Kontra ek Gouvernman?

Mon tande ki enn bann rezon se ki sa i form parti en gro lager, en lager pli gro ki nou, en gro lager ant Msye James Michel ek Msye Danny Faure!  Akoz enn pe sey lwe son landrwa e lot pa oule ki i ganny sa kliyan laba.  Kisisa? E ler sa de lelefan, zot pe lager antre zot, 30 Seselwa i ganny kraze.  Pa kapab kontinyen koumsa.  Gouvernman i bezwen deside, nou pa kapab fer bann desizyon lo baz akoz nou kontan oubyen nou pe lager ek en dimoun.        Menm parey dan Departman Later. Mon ti a kontan adres direkteman Msye Faure, e dir li tou lendikasyon pe montre ki sa Sistenm Pwen pa pe marse.  I annan en kantite Seselwa ki zot larzan in pare e zot anvi aste zot later e konmans konstri zot lakaz. Msye Faure, ou Gouvernman pe met zot retar.  Ler ou pa donn zot sa sans pou envesti dan zot prop lakaz, ki zot fer ek zot larzan.  Sa bann dimoun, sirtou bann zenn i dekouraze, zot perdi direksyon e zot al depans zot larzan Dubai, Amusement oubyen dan drog.                    Silvouple, donn sa bann dimoun en sans pou fer en keksoz byen avek zot lavi. Oubyen eski zot oule zis kontinyen fer Seselwa depan lo zot, met Seselwa lo lalis, kontinyen kit zot lo lalis e apre ‘from cradle to grave’ zot ki pour okip sa bann Seselwa an esperan ki sa bann dimoun apre i vot pou Parti Lepep? Forget it !  Forget it !

Sa letan in fini e fodre zot konnen. Par egzanp Mont Fleuri, mon pe demann zis trwa bout later pou trwa zabitan, pa kapab gannyen. I annan plis ki 1an ki nou pe demande zot.  Pa kapab fer sa? Me selman ti kapab tir 4 kare dan Kan Tobruk pou donn bann ansyen kandida, actual kandida Parti Lepep, bann aktivis, ti kapab tire 4 dan Kan Tobruk? Selman pour donn 4 Seselwa ki pare pour zot peye, ki’n anmas zot larzan sou par sou zot pa kapab donnen?

Mr Speaker dan Mont Fleuri ankor, bato lakaz malerezman i lo mouyaz.  I fer 4 mwan ki sa premye 16 lakaz in pare dan progranm redevlopman Corgate Estate, me ankor pe ale vini pou fer alokasyon. Nou annan en Gouvernman ki annan tro bokou difikilte pou pran desizyon.  Sa pa apel stabilite Minis.  I apel limobilite!  I apel en bato lo mouyaz!  Minis mon oule anrezistre mon lakoler ki Gouvernman pa ankor met an plas en sistenm kontrol pour fer sir ki sa ki bezwen carer i gannyen, me sa ki pas zot letan Amusement, pa gannyen! Parey nou’n dir – zot osi zot in dir sa lot kote latab. Nou pe rod lazistis! Nou pe rod aret labi! Nou pa kapab sa Bidze pour monte, zanmen i pour arete.                        Si madanm Jeanne Talma Corgate Estate i bezwen en carer full time, donn li son carer.  Me si madanm Ferrari, son fanmir i kapab peye, fer zot pey en bout oubyen pey tou! Nou pe zis rod lazistis e lefikasite Minis.

Nou pa, nou nepli bann sosyalis fou, bann kominis fou ki prese ki nou tou nou egal, parey zot bann sef ti prese, Nou Tou nou ‘Egal!’  Saler la LI i pe marse dan helicopter, ou ‘Egal’ ou. Ok? Nou tou nou egal, alor nou tou nou a ganny nou carer be li i en milyonner, ou, ou en pti malere ater.  Ed sa enn ki bezwen, pa ed bann milyonner.  Se sa ki nou pe esey rode. Lazistis ek lefikasite. Pareyman pou welfare Minis; annou met en plas en sistenm efikas, ki annan pou bit final tir dimoun lo welfare e met zot dan lanplwa.  Se sa ki nou pe rode. Annou met plis zefor dan « reskilling » ki dan lasistans long term. Annou privilezye bann led one-off emergency plito ki fer dimoun depandan zot lavi antye.

Tir sa bato ki apel Sesel lo mouyaz, Minis, e vin avek bann solisyon ki met divan dan nou lavwal sa bato.  Ler mon pe koz lo lanplwa Mr Speaker mon dezespere ler mon pa trouv bann mezir dan sa Bidze pou ankouraz lanplwa Seselwa e dekouraz labi lo travayer etranze.  Minis, sistenm GOP in vin en fars in vin tro fasil. Nou bezwen ankadre sa pratik e fer sir ki sa bann permi i al prensipalman e inikman pou bann sekter ki reelman bezwen travayer etranze, e i annan sa bann sekter.

Nou konpran pou lotel, nou konpran pour tourizm, nou konpran pour konstriksyon, nou konpran pour lagrikiltir. Me nou pa konpran akoz tou sa bann GOP dan sekter komers an detay!   Nou pa kapab konpran sa!

Silvouple Minis rod en fason pour bloke!  Blok sa labi o pli vit posib.  Si en marsan i oule ouver en 2enm oubyen en 3enm laboutik, oubyen en dizyenm laboutik, oubyen en 20tenn laboutik akoz i pe fer son kartel, be les li i ava rod travayer lokalman. Nou, nou bezwen ankouraz li!  I ouver 20 laboutik nou bezwen donn li travayer, i pran etranze pour li met ladan.  Ler pour napa ase travayer pour travay dan laboutik i konsantre lo sa enn ki annan.  Nou bezwen Mr Speaker e Minis komans en landrwa.

E mwan mon pe propoze ki nou bezwen fer distengsyon kont the real economy dan lendistri ki  e add value, ki pe fer bann prodiksyon ki pe ed nou, vreman ed nou GDP avek sekter lavant an detay.  Nou bezwen fer distengsyon.

Annou komans la, e nou ava gete ki mannyer nou kapab avanse.  Akoz Mr Speaker, Minis mwan mon annan bokou zenn fiy dan Mont Fleuri ki mon konnen ki ti a kontan travay koman en shop assistant.  Be selman zot pa gannyen.  Zot pa gannyen sa pals. Akoz i annan dimoun i pas devan zot akoz sa bann, akoz en Seselwa li i pa pour kapab, ou pa pour kapab fer li travay depi 7er bomaten, ziska 8 er diswar.  Me selman, sa bann la, sa Endyen, sa Sri Lankan, i pour travay koman en lesklav.  E se sa ki sa bann marsan i kontan.  So annou, annou rod en balans. Mwan mon pa kont personn, ni marsan, e nou isi nou pa kont sa bann dimoun.  Selman nou anvi lazistis.

E nou anvi parey, mon kontan mwan tann lot kote latab, e menm Onorab Gill ki’n komanse pour li dir pour dir tansyon sa bann keksoz ki nou pe dir lo etranze apre li menm li mon’n tann li ler dan son final, mon’n tann li dir ‘SESELWA PREMYE’, parey Onorab Hoareau in dir SESELWA PREMYE. Mon toutafe dakor. Konbyen letan nou pe dir nou. Ler Prezidan Michel ti pe dir ‘Seychelles FIRST’, be i ti pe dir Seychellois FIRST, ki sa depi 10 an, nou le dir – welcome onboard bann Onorab lo lot kote latab.  Letan i kourt msye Mr Speaker, e mwan pa pour tarde.  Mon ti a kontan dir mwan bann koleg lo lot kote latab zot annan rezon selebre sa 10 an reform ekonomik.

Nou ti dan minorite dan Lasanble an 2008, me nou ti anmenn tou nou sipor pou sa reform kantmenm la ozordi nou pa ganny envite dan selebrasyon.  Nou pa ganny envite dan selebrasyon. Onorab Gill, ou’n al selebre bann zafer, bann Liberal, bann IMF, bann marse lib?  Ou pa’n al selebre, be ou bann Minis ti laba pe selebre marse lib.  Selman mwan pa tro, tro ganny en konpran konmsi akoz ou pa dakor avek zot!

Dan bor mwan, i annan en  arsitek pli enportan dan sa reform enn bann arsitek pli enportan, e mwan oule krwar i enportan, i en dimoun ki ti enportan dan sa reform, akoz ler in ale, mon war son koleg, son koleg ki ti Minis Finans sa lepok prezan ki in vin Prezidan, mon war i en pe fay, fay! Konmsi ou a krwar i bezwen en dimoun konmsi ki pour kapab ed li konmsi dirize.  Me mon enkyet Minis. Mon komans en pe enkyet pour nou det.

Depi sa detrwa lannen ki msye Afif i nepli dan bor, i nepli dan sa pirog nanm, mon pe war bann problenm ekonomik pe reaparet.  Nou pe prêt ankor pour pey nou det. Sanmenm sa mon ti a kontan dir papa Onorab Ernesta i kapab komans konpoz en lot moutya – akoz byento nou pour bezwen rod en lot fason pour nou pey nou det, ZOT det, nou ki pour peye, bann det, ki zot, zot in fer.

An 2017 nou’n pret 9 milyon, 2018 155milyon – an 2019 Minis in prevwar ki nou pou pret 133milyon. Okenn Seselwa pa bezwen al liniversite pou li konnen ki ler ou bezwen al prêt larzan pou ou re-pey ou det, ou dan en problenm vre.  Zis lentere sa lannen, e mon ti a kontan pour bann ki pa’n lir Bidze, bann ki pa’n lir bann detay zis lentere sa lannen mon bann koleg, zis lentere R720 milyon, zis lentere, pa ankor pey en sou det, zis lentere, R720 milyon! Mon kit sa avek zot.   Onorab Sophola in demann nou pou pran pasyans.  Oli li, i pa la in ale, ok.  I dir nou ki ler Gouvernman i envesti ozordi nou pa kapab ekspekte profi demen.  Sa i vre.  Ler ou aste en kare later Linyon pou R30mil ou pa kapab ekspekte pou vann li 2an apre pou R1.1 milyon!  Sa konmsi en lekspektasyon en pe o!  E an plis ki ler ou vann li pou R1.1milyon ou ganny sans prezan – ou ganny dekwa larzan pou aste pa ni enn  – 2 condominium!

 

(Interrruption)

 

HON JEAN-FRANCOIS FERRARI

Ou vwar?  2 condominium!

 

(Interrruption)

 

HON JEAN-FRANCOIS FERRARI

Menm parey pou Onorab De Commarmond ok ,- mon asire i pou dakor avek mwan – ki en dimoun pa kapab lwe en bazar R2mil avek Gouvernman apre re-lwe sa bazar avek en boutikye Endyen!  Sa i bann ‘return’ enkrwayab!  Sa vreman – parey Onorab De Commarmond i dir i apel ‘’Put your mouth where your money is!’’

 

(laughter)

 

HON JEAN-FRANCOIS FERRARI

Menm parey en parti Politik pa kapab lwe en kare later R20mil apre re-lwe R800mil!   Nou pa’n deza tande sa!  Nou pa vwar me solman i arive Sesel!  Alors ler ou — menm zafer Onorab De Commarmond i okouran – menm zafer parey ou ganny en bay – ou ganny en lease lo en later – par egzanp – mon donn en legzanp Mr Speaker, lo later VI5974 Providence si ou pa devlop li, ou tranpe e ou pe get ki mannyer ou pou kapab vann li pou milyon!  Tandis ki i annan lezot dimoun ki pe rod en pti kare la!  Dan okenn pei – dan okenn pei mon krwar sa bann keksoz pa tro, tro arive.

Se pour sa Minis, ler mon get sa bann tranzaksyon, ki fer sitan profi mon pros pou mwan sizere – (be la ou, ou riske perdi ou louvraz) –  mon pros pou mwan sizere ki Msye Faure i apwent Onorab De Commarmond Minis Finans e Onorab Sophola koman Sekreter D’Eta!

 

(laughter)

 

HON JEAN-FRANCOIS FERRARI

Akoz zot ava kapab montre sa Gouvernman ki mannyer pou fer bon ‘return’ lo larzan!

 

(laughter)

 

HON JEAN-FRANCOIS FERRARI

La nou pou vwar – la nou pou vwar ki mannyer i annan bann bon investment ok?  E gro profi.  So mon konklizyon Mr Speaker i lo size drog e Progranm methadone.  Nou dan LDS, nou siport tou progranm ki kapab ede pou sov nou lazenes dan sa kosmar.  Progranm methadone i enn sa progranm e Onorab Bernard Georges i reprezant nou Lasanble lo APDAR. Lannen pase nou’n donn finansman e sa lannen nou pou donn ankor finansman menm si nou krwar ki sikse sa progranm i feb akoz napa swivi, napa counseling, napa en ase zefor serye pou akonpanny sa bann dimoun. Pour lemoman nou pe zis tir dimoun lo adiksyon heroin e met zot lo adiksyon methadone.        Serten zofisye Mr Speaker dan sa Progranm methadone pe zwe politik e pe fann rimer ki nou dan LDS, nou pa siport sa progranm. Plan sa bann zofisye se pou mont en kanpanny pou fer ki tou sa bann dimoun lo methadone i vot pou Parti Lepep dan prosen eleksyon, oubyen sorry, mon retire, i vot pour sa Nouvo Parti ki serten pe al formen dan prosen eleksyon. Akoz mannyer mon konpran pe al kase la.

Mon dir ki sa bann dimoun, ki zot pe fer, zot pe zwe, sa zwe ki zot pe zwe, i pa en zwe pti zanfan sa. Zot pe zwe ek lavenir nou zanfan. E sa i serye.  Melanz politik ek drog i en krim e si zot fer sa Sesel zanmen pou pardonn zot.

Mr Speaker, napa personn ki onnet dan sa pei ki kapab dir ki nou, sa mazorite dan 6enm Lasanble Nasyonal nou pa’n seye pou donn lanmen redres nou pei. Laplipar bann Minister in felisit nou!  Oditer Zeneral in felisit nou.  Bann reprezantan IMF ek World Bank in felisit nou!  Wi, nou’n kontribye avek sa pti mwayen ki nou napa. Ler mon tann lot kote latab pe dir vin avek en Bidze alternativ, mon krwar zot krwar pour dir nou annan en lot Minister Finans deryer la e nou ava zis call detrwa teknisyen la vini ekrir en Bidze pour nou. Pa koumsa ki marse.  Sa ki nou, nou fer nou, sa ki nou dir, sa ki nou kontribye, Mr Speaker, ou konnen i vin atraver travay dir e devosyon pou nou pei.

Lizour aswar nou donn nou kouraz. Ozordi mon remersye Leader Lopozisyon pou son travay e son gidans. Bann dan sa lasanble ki maltret ou msye Ramkalawan, ki gognard ou, ki sey abes ou, zot zis montre ki zot per ou!  E la mwan napa okenn ezitasyon pour dir sirtou lo lot kote latab, bann MNA madanm ki’n pran en target konmsi lo ou.  Be mwan mon dir avek zot,

 

(Interrruption)

 

HON JEAN-FRANCOIS FERRARI

… pa bezwen … sa i en plan, sa i en plan byen kalkile – Onorab Ramkalawan sa i en plan byen kalkile, pour zot fer ou ankoler.  Pa bezwen perdi ou letan avek zot!  Sa bann dimoun zot pe zis protez zot byen. Pa mwan ti obor ou La Digue ler en Digwa ti pe montre tou bann kare later ki sa bann dimoun in gannyen? Sa bann dimoun Onorab Ramkalawan zot pe zis protez sa ki zot in gannyen.  E zot per ki en zour zot pour bezwen donn, nou pour demann zot enn de kestyon!

Mr Faure osi i fer … pa pare pou ‘walk the talk’ lo sa size rann kont.  In klerman kas son Kontra!  E i konnen in kas Kontra.  E alors ki rezon ki nou annan pour nou reste dan sa laranzman? Seselwa depi premye zour pe demann eleksyon boner e mon kontan, mwan pe al fer en lanons la ki finalman Msye Faure in tann sa lapel e in aksepte pou donn nou sa eleksyon lannen prosen ! La mon konmans krwar ki vre ‘Sesel i pli gran ki nou tou!’  Dan sa gro liv Bidze Minis, mon pa konnen si ou annan ou kopi, me bann ki annan zot kopi silvouple, silvouple vir lo paz lo Seksyon 4, paz 1, anba tit ‘’Constitutional Appointments Emoluments Estimates for 2019,’’ Gouvernman Mr Speaker pe demann Lasanble Nasyonal pou aprouv en  sonm R6, 585.580 e sa pou peyman ‘’End of Term Gratuity ’’an 2019 pour Prezidan, Vis-Prezidan e bann Minis.  Sa i laprev ki menm si Msye Faure pa’n fer en lanons ofisyel, in pran sa desizyon trankil, trankil, anba, anba, vilou, vilou – in finalman aksepte pou ekout lavwa sa plizyer santenn dimoun ki’n desann lo semen Mahe, Praslin ek La Digue sa dernyen detrwa semenn!           Dapre mon kalkil Mr Speaker lo sa sif ki’n mete pour Prezidan, Vis- Prezidan e tou dimoun, i vedir ki zot term pour al fini an 2019.  E mon’n fer kalkil ki dernyen zour ki Prezidan Faure pour don lofis, Prezidan State House se le 16 Out 2019 e sa zour nou pou annan en eleksyon Prezidansyel !

 

(APPLAUSE)

 

HON JEAN-FRANCOIS FERRARI

Pour nou sa i anmenn en gran satisfaksyon akoz Lepep Seselwa pou reganny son drwa pou swazir son Prezidan apre tou sa bann lannen ‘Pas Baton!’ Dan 9 mwan,  mwan bann frer ek ser nou pou annan en Prezidan elekte isi Sesel!

 

 

(APPLAUSE)

 

HON JEAN-FRANCOIS FERRARI

Mon pe esper en konfirmasyon avek Minis lo sa laliny spesifik dan Bidze.  Mon swet tou Seselwa en lavenir dan laklerte, dan prosperite, en pei kot i annan en Gouvernman onnet e prop.  Mon swet Minis ek son lekip pou trouv zot vre plas dan sa nouvo Sesel ki nou pe al kree!  Demen nou konmans travay lo detay Bidze avek lespwar dan lavenir. Sesel e Pep Seselwa e bann zabitan Mont Fleuri  i kapab kont lo LDS pou donn nou pei meyer Bidze posib !  Mersi.

 

(APPLAUSE)

 

HON JEAN-FRANCOIS FERRARI

 

MR SPEAKER

Mersi, mersi Onorab Ferrari. Bon avan nou adjourn, mwan osi mon pran detrwa minit zis pour mwan dir de pti mo.

 

HON NICHOLAS PREA

Apard sa kantite ki tou bann Manm in dir, mwan annan enn pti keksoz mwan anvi partaz avek Minis, avek nou Lasanble.  Premyerman mon ti a kontan remersi Minis ek son lekip pour preparasyon sa Bidze, e osi pour vin pas 3 zour avek nou dan Lasanble pour ekout tou bann Repons.

Nou annan ankor bokou bann zour travay ki devan nou e mwan swete ki nou ava fer sa dan en lespri tre ouver, e pozitiv pour byennet nou pep e nou pei parey bokou bann Manm in fer sorti lo tou le de kote latab.

Minis mon pour brefman pas lo serten size ki mon konnen pa’n tro ganny aborde e plizyer dimoun in apros mwan, pour mwan met sa bann pwen devan. Anba Minister Ledikasyon ki nou ti a kontan ki Minister li menm li Minister Ledikasyon ti kapab regard ladan anba sirveyans Minister Finans, bann counselors, i annan aparaman 2counselors pour tou sa lekol e zot pe demande, mon konnen ki Minis in anons keksoz dan Bidze, zot pe demande ki zot package i ganny aranze e ki en zefor i ganny fer pour plis counselors. Pour plis graduate osi petet, bann manrmay pour pran counseling koman enn zot karyer pour ed zot avek sa montanny problenm ki zot pe fer fas avek.

Bann staff ogzilyer dan bann lekol in demande osi tou pour get en pti pe dan zot kondisyon e zot Scheme travay. Semenn pase, Mardi pase egzakteman mon’n attend en renyon plis ki 180 graduates. E la mwan ti a kontan Minis ou osi ou kapab atraver ou Minister donn sipor Minister, anfen NHRD ki pour kontinyen sirvey fitir sa bann graduates pour organiz zot package, donn zot en meyer deal.  Zot pe santi ki i annan bokou etranze ki pe travay dan bann departman ki zot pe rantre, pe pli byen pase ki zot. Me zot, zot kontan zot pei, zot in al etidye, zot in fer gro, gro sakrifis, zot in retournen, zot anvi travay pour zot pei.

Me ler zot pe regard akote zot, sa package ki sa bann etranze i lo la i pa en keksoz ki ankouraz zot. So alor Minis mon met sa a devan ou.  Lo kote SLTA, premyerman mon ti a kontan felisit tou bann zofisye SLTA pour sa travay re-sirfas semen primer e plizyer semen segonder dan distrik Bel Ombre.  Sa in amelyor bokou sityasyon motoris, e pyeton e menm bann viziter osi tou in vwar sa sanzman sirtou bann repeaters ki mon’n rankontre plizyer, dan distrik Bel Ombre.  Mon swete ki sa proze pavement ant larantre Beau Belle e lekol Bel Ombre a materyalize finalman boner lannen prosenn.

Mon ti a kontan osi profite la ankor pour fer ankor sa demann avek SLTA pour regard posibilite met en sirfas koltar lo semen ex-Khashoggi Estate. Minis mersi pour regard en pti dan welfare bann traffic wardens. Finalman i annan plizyer nou dan Lasanble, kontan mwan ki’n koz en pti lo travay sa bann wardens. Zot fer travay ekselan sirtou dan lavil e mon apresye ki zot pour enkli dan sa Bidze.

Lo kote Minister Lasante Onorab John Hoareau pa’n mank lokazyon pour dir, le premye Desanm 2016 Prezidan ler i ti pe vizit klinik nou distrik, i ti fer en promes ki ler nou ti met devan li avek dan Ners Ansarz klinik pour nou ganny en lanbilans avek en pti loto ki pour deservi sa klinik.  2an pli tar nou klinik i ankor dan menm sityasyon. Ni lanbilans, ni loto.

Lasante nou’n war in ganny en Bidze plis ki en bilyon Roupi. Me i annan ankor plizyer defi. Minis nou fek perdi en zenn garson 15 an.  E mon’n aprann atraver bann dokter ek bann nurse ki sa kemikal ki fer tes pour leptospiroz, i menm kemikal ki fer tes pour detekte lafyev dengue e influenza, napa dan pei!  E santiyon disan i ganny anvoye par bann klinik, bann dokter i anvoye me napa rezilta ki retournen.

Zot pe ganny dir ki sa kemikal aparaman zot konpran i lo order pour en pe letan, me pa ankor antre dan pei.  Alor Minis mon ti a kontan demann ou atraver ou pour regard en pti pe sityasyon avek Minister Lasante kwa ki pe arive, nou pe koz lavi la nou’n fek perdi enn 15an, me i annan ankor bokou devan nou.

Lo kote lagrikiltir mon, mon kontan pe aprann ki annan bann mezir ki pe ganny pran me mon’n koz avek de main prodikter lagrikiltir.  Sa sekter pa’n ganny konsilte lo sa bann incentive ki pe vini. Zot pa vreman konnen ki mannyer sa benefis konpar zot e pour zot pas sa lo konsonmater.  So, Minis mon demande ki atraver ou avek Minister Lagrikiltir plis konsiltasyon i ganny fer ek sa sekter ki finalman bann kliyan bann konsonmater i ava benefisye.

E la mon pou dir prodwi lokal i pli bon an term pli bon kalite e osi tou an term i pli bon an term nou lasante, akoz nou konnen kwa ki nou pe konsonmen konpare avek bann ki nou enporte ki nou pa vreman konnen ki mannyer i pe ganny prodwi?  Ki mannyer i pe ganny stoke? E ki mannyer i pe ariv isi?

Alor mon ensiste ki sa sekter i ganny konsilte. Nou’n koz bokou fwa e sirtou lo enfrastriktir pou bann fermye. E la, malgre i annan 2an nou pe demande ki bann semen sirtou, i ganny amelyore e tou dernyerman Onorab William ek mwan menm nou’n koz lo sa semen Letchi Grand Anse, dan Letchi e la i annan omwen 2 gran prodikter lagrikiltir e plizyer lezot pti fermye.

Sanmdi mon ti vizit sa landrwa Minis parey nou kontan dir dan sa Lasanble kondisyon sa semen i deplorab. Dan mon distrik Minis i malere pou dir ki ziska prezan proze 24/24/24 i ankor en proze ki ankor zis lo papye.  Napa nanryen ki’n ganny demare dan distrik Bel Ombre.

Sa 2 proze land bank i osi dan difikilte, sa enn Le Niole devlopman semen in ganny en gran retar e sa enn Mount Simpson pa ankor konmans ditou.  I annan aplikan in la si lontan ki zot larz pe monte e deza la labank in konmans dir zot pa pou entertain zot loan. Swivan vizit prezidan dan distrik egzakteman 1an pase napa nanryen ki’n sanze. Sa bann fanmir ki zot lakaz ti’n brile le premye zen 2017 i ankor dan menm sityasyon.

Sa madanm ki ti’n fer 22 an dan lakaz emergency e ki prezidan ti dir i pa akseptab sa lannen i azout ankor 1 an lo sa 22. Sa fanmir ki’n fer 12an dan bedsitter emergency i azout ankor 1 an ek son soufrans e la zis mazinen i dan en bedsitter en lasanm apre 12 an son premye zanfan i dan lekol segonder e i en fiy ki bezwen en pti pe son privacy e sa fanmir in azout ankor 2 zanfan dan zot fanmir.

Mon dakor avek Onorab Basil Hoareau ler in koz lo rekonnet nou bann atlet ki’n fer byen aletranze.  Mon annan plizyer ka dan mon distrik e mon ti a kontan sit en ka spesifik. Mr Steven Baccus ki’n fer monte paviyon Sesel a plizyer lokazyon, i annan plis ki 10an si mon pa tronpe 15 an i ankor lo lalis lakaz. I ankor pe reste dan en lasanm kot son manman ek son madanm ek son pti fiy ki’n ariv 9an. I dir mwan i anvi agrandi son fanmir me son manman pa pou permet li akoz i napa landrwa pou akomod li avek en fanmir.

Minis ou’n mansyonn dan Bidze ki i annan provizyon pou ed bann fanmir vilnerab partou dan bann distrik pou fer reparasyon ek zot lakaz. Mon’n deza tann sa oparavan, mon konn 2 fanmir Bel Ombre ki i ale vini pe sey fer aplikasyon pou kapab ganny en pti larzan pou fer renovasyon lo zot lakaz, akoz zot pa kapab al pran en gro loan, zot pe vir an ron. Mon swete ki an 2019 tou sa bann fanmir ki dan tel bezwen i a kapab tap in dan sa tel biznes ki ou’n mete Minis.

Lakaz ki’n kraze pli boner an Septanm par en dezas natirel, ziska ozordi sa fanmir i ankor pe reste dan guest house e s agro ros pe reste dan zot lakaz anba lavarang.  Silvouple i en dezas natirel, sa ros in sorti lo later Leta, i pa sa fanmir ki lakoz ki sa ros in kraz zot lakaz e mank pran zot lavi.  Parey Onorab George in dir Bel Ombre osi tou a plizyer repriz nou’n demann en fasilite pour en daycare. Fanmir i dir zot fatige trenbale toulezour, bomaten e aswar pour anmenn zot zanfan partou kote.

Bel Ombre i annan bokou defi. Me mon swete apre sa bon travay ki nou pe fer ansanm avek DA, Ladministrasyon pour Distrik ek son lekip nou pour kapab sirmont en pe sa bann defi dan lannen prosenn. Mon fini lo en not pli pozitiv.  Mon kontan ki la i annan en bon enteraksyon ant tou bann akter lo size redevlopman por lapes Bel Ombre. E mon ti a kontan extend en lenvitasyon avek Onorab Basil Hoareau pour zwenn nou, nou’n form en Komite spesyal ki konpri Minister Tourizm, SMSA, SPA, SFA, Kominote Peser Bel Ombre e kominote bann bato lwazir.

Onorab mwan ava fer ou konnen kan prosenn meeting pour nou travay akoz la nou konnen pour dir i pour annan en proze ki pour komans demare lannen prosenn.

Wi nou pa pour kapab fer tou keksoz an menm tan lo por lapes.  Me omwen ler nou a komans en bout nou konnen pour dir nou pa pour arete, nou’n komanse.

So vwala en pti ki mwan ti anvi partaz avek Minis e avek nou Lasanble.  E mon swete parey mon dir ki dan sa depouyman Bidze, nou ava fer lie k en lespri ouver e pozitiv pour nou rod sa ki byen pour nou kominote, pour nou pep e pour nou pei. Mersi.

 

MR SPEAKER

Bon mon ti a kontan ankor enn fwa remersi Minis avek Ms Tamatave e avek Ms Agathine ki parmi nou apre midi.  Parey mon ti’n anonse bomaten, Minis demen bomaten 9er i pour vin donn nou repons tou sa bann pwen, leklersisman osi tou, tou sa bann ki’n ganny leve par bann Manm.

E apre sa nou ava pran en Break apepre 30 minit e ler nou ava re-antre, nou’n fini pare avek en progranm ki SS Payet in donn Lasanble Nasyonal, pour nou komans bann travay pour nou vwar bann Bidze par Minister, par departman.

So vwala en pti pe nou travay e mon pe dir nou pour travay toulezour. Me o tan posib nou pour respe bann Break. Me nou’n ganny laranzman avek SBC ki nou pour kapab pran depi 1 er, nu pour rakoursi en pti pe nou lunch time, nou pour fer li par 1 erdtan, 12 ziska 1er, e 1er nou repran nou travay pour nou kapab fini nou travay a tan.

Mon osi averti bann Manm ki deza i annan bann Bills ki an sirkilasyon. E mon konnen Bills Committee osi pe meet pour nou vwar en pe bann nouvo Bills, pour nou kapab retir sa bann ki deza la ki pending.  E atak osi tou bann ki nouvo.  Ler nou pour pran bann Bills osi tou nou pour fer li toulezour, avek en bi ki nou kapab retir sa backlog avek Lasanble e lannen prosenn nou kapab komans lo en paz ki prop.  So vwala en pti pe travay ki devan nou. Mon ti a kontan remersi tou bann Manm e osi tou remersi SBC ki’n ozordi in overlap en pti pe par lao 6er.  Bon avek sa nou ava pran nou travay demen maten 9er.

 

(ADJOURNMENT)