Home » Verbatim » 2018 » Verbatim Friday 9th November, 2018

Verbatim Friday 9th November, 2018

NATIONAL ASSEMBLY OF SEYCHELLES

Friday 9th November, 2018

 The Assembly met at 9am

 National Anthem

 Moment of Reflection

 Mr Speaker in the Chair

 

MR SPEAKER

Bonzour tou Manm Onorab.  Bonzour tou dimoun ki a lekout e ankor en bonzour spesyal pou Minis pou Finans, Minis Maurice Loustau-Lalanne ki ganny akonpannyen par Mrs Ruth Pool ki Senior Finance Analyst e Ms Sitna Cesar Special Advisor to Minister.  Welcome dan nou Lasanble. Parey yer nou pou kontinyen arive nou travay lo Repons Bidze Ladres ki Minister ti fer Lendi le 5.

E bomaten mon anvi zis averti tou bann Manm ki zot repons i bezwen focus lo Ladres ki Minis ti delivre avek Lasanble Lendi le 5 Novanm.  Okenn latak personnel, okenn remark vize ver okenn Manm, oubyen menm ver direkteman ver serten dimoun an deor and all that, pa pou ganny tolere.

Manm pou ganny demande pou retract, pou prezant en apology.  E si pa pe ganny fer mon pe repran sa  drwa pou zot entervenir e mon pou pas laparol avek prosenn Manm lo lalis.

Alor mon pe demande ki nou reste focus lo Ladres ki Minis ti delivre Lendi le 5 Novanm.

Bon toudswit nou [pou konmanse e mon annan lo mon lalis Onorab Flory Larue e i pou swiv par Onorab Jude Valmont.  Onorab Larue laparol i pou ou.

 

HON FLORY LARUE

Mersi Mr Speaker.  Bonzour Mr Speaker.  Bonzour Minis.  Bonzour tou Manm e bonzour tou dimoun dan lakour.

Sa Bidze pou 2019 i 3enm Bidze ki pou pas devan sa 6enm Lasanble.  An zeneral en Bidze i donn gidans en pep lo ki sityasyon finansyel son pei ; kwa ki pou ganny enplimante pour kontinyen delivre bann servis e ki sanzman ki kapab annan ki pour sanz fason fer biznes dan en pei.  I donn li en vizyon kot pei pou ale an-traver bann plan lonterm ki osi kontinyel dan en Bidze e non pa zis en lalis sif.

An zeneral popilasyon sa pei i enterese pour ekout prezantasyon Bidze e sey konpran ki pe arive.  Sak kous popilasyon i sey vwar ki mannyer li i ganny afekte par depans pei, e kote i pou pozisyonn li dan bann lannen ki pe vini.

Deza Mr Speaker, nou vwar ki sa Bidze zis dan son prezantasyon i enn bann Bidze pli long ki’n deza ganny delivre.  E bokou dimoun pa’n kapab swiv plan ki sa Bidze i sipoze pe sey delivre.  Zis alor dan son bi inisyal i pa’n zwenn lekspektasyon piblik akoz dimoun pa’n kapab swiv e desifre mesaz ki i ti oule pase.

In ganny delivre par Minis Lalanne koman Minis pour Finans Sesel, ki reprezant en pozisyon responsab e respektab.  Dan son pozisyon pep Seselwa i regard li koman sa dimoun ki donn desizyon final lo ki mannyer larzan pep Seselwa pour ganny depanse.  I kominik avek Cabinet of Ministers e pran tou zot konsiderasyon e finaliz depans pour ki pei, parey tit Bidze i dir i anmenn stabilite e progresyon.

Mr Speaker, Bidze in plis ki double dan sa dernyen 5an e ozordi nou trouv nou avek en Bidze R8.4 bilyon, ki fer en logmantasyon en pe plis ki R600 milyon an plis ki lannen pase.

Sa ki domaz i ki Minis pa’n donn en sif spesifik nou det, ki sipoze ganny devwale dapre Konstitisyon e ganny detaye dapre det domestik e etranzer.  Me par kont mon’n vwar ki preski 10poursan Bidze ki’n ganny prezante, i al anver pey lentere lo nou bann det.  Eski Minis i kapab eksplike eksplik sa en pe mye pour nou popilasyon konpran byen kwa ki nou dwa?

Dan Bidze nou vwar ki i annan bokou propozisyon ki baze lo Lalwa ki ‘POU VINI. ‘ Bidze i baze lo reveni, be ki pou arive si sa bann Lalwa pa pase ouswa ganny amande?

En legzanp ki sokan i en Lalwa ki’n vin dan 3 form depi dan Bidze 2017 ki ti ganny prezante an 2016.  Sa i legzanp taks lo propriyete ki ti fer son premye laparisyon dan Bidze 2017 ki dir ki en taks lo propriyete ti pou ganny entrodwir a parti le premye Zilyet 2017 lo later ki apar-tyen sa bann sitwayen non-Seselwa.  Sa ti pou enkli bann etranze ki annan dan zot posesyon en paspor Seselwa e stamp duty ti pou ganny sarze par met kare lo sa bann later.  Plis detay ti pou ganny met a nou dispozisyon le moman ki en letid lo sa taks par en eksper enternasyonal ti pou ganny konplete.

Zilyet 2017 ti pase me napa Lalwa ki’n vini e nou pa’n tann nanryen apropo sa letid.

Dan Bidze 2018 ankor nou ganny dir ki Lalwa ti pou vin devan nou Lasanble e sa taks ti ekspekte kolekte R40 milyon pour en lannen fiskal.

Sa taks ti sipoze annan en poursantaz 0.25poursan e ti pou aplik lo valer tou propriyete ki apartenir a bann etranze; sa ti enkli bann batiman rezidansyel, bann lakonpannyen e bann propriyete lwe tel ki bann lease ki plis ki 25an.

Komisyon Reveni ti pou komans fer koleksyon a-parti Oktob 2018.  Sa bann propriyete ti pour ganny evalye tou le 5an.  En Board Nasyonal pour evalyasyon later ti pou ganny met an plas e se zot ki ti pou desid lo logmantasyon sa tax a lavenir.

La nou an Novanm 2018 okenn sa bann keksoz pa ankor arive.  Napa ni Lalwa e okenn larzan pa’n kapab ganny ranmase.

Dan Bidze 2019 apele ‘Stabilite e Progresyon’ tou keksoz i sanze.  E sa taks i prezan sipoze zis aplikab lo propriyete rezidansyel etranze selman.

Eski bann gran lotel ki laplipar i pou etranze prezan pa pou pey sa taks?

Eski bann propriyete rezidansyel ki atase avek bann gran lotel tel ki Desroches, Four Season, Felisite e lezot lotel, eski zot enkli ladan?

Eski bann lakaz Eden Island ek bann condominium parey Pangia i tonm dan sa kategori? Eski sa Board ki ti ganny anonse pa pou ganny etabli prezan?

Me dan menm laliny dan Bidze 2018, nou ti vwar en propozisyon pour redwir taks biznes pour bann propriyeter ki lwe lakaz ki ti ganny propoze.  Sa ti pou en rediksyon sorti 15poursan pou vin 3poursan e ti pou vin anfors an Zanvye lannen prosenn.  Sa ti ganny propoze avek en bi pour Gouvernman ankouraz plis lenvestisman dan batiman rezidansyel, e an menm tan redwir pri lavi.

Mr Speaker, ki nou vwar?  Dan sa Bidze 2019 ki devan nou, Gouvernman i anvoy sa rediksyon pour 2020.

Mr Speaker, taks lo propriyete etranze i ganny limite e pour bann envestiser Seselwa i ganny anvoye pour lannen prosenn.

Be sa Bidze i sipoze benefisye lekel?  I sipoze anmenn stabilite ek progresyon pour lekel?

Letan nou konpar sa 2 legzanp direkteman baze lo propriyete, i kler ki i pa pou Seselwa.  I annan propriyeter ki’n fini amann son Kontra pour benefisye lokater par fer desann son pri lokasyon.  E bann nouvo propriyeter ki’n negosye Kontra i vwar zot dan en predika-man avek zot nouvo lokater.  Be la lekel ki perdi? Pa zis zot kontinyen zwe avek bann plan serye dimoun?

Si Minis i sanz ankor lannen prosenn, akoz zwe musical chairs ek bann Minis in vin en fars, eski tou pou sanz ankor?  Anfen ‘’kapris letan.’’

Letan Seselwa pe rod en loportinite fer en pti mwenza an plis e bann Digwa i tann Prezidan Faure dir ki par pour ganny vann dan Linyon zot antouziast pour benefisye.  Me apre nanryen pa vini.  Zot tande par pou vann dan SEYPEC e a la dan Bidze sa I ganny met de-kote.

Me par dan labank Seychelles Commercial Bank pe vann avek en partner stratezik.  Be sa en Seselwa ouswa en etranze?  Napa loportinite pour Seselwa aste sa bann par?

Mr Speaker, avek sa 3enm Bidze ki pe pas devan nou, mon vwar plis sanzman ki stabilite finansyel.  Depi ek plan Nasyonal met devan pei par Prezidan dan SONA e par bann diferan sanzman Bidze par 3 diferan Minis, me parkont mon ti a kontan sey regard lefikasite sa Bidze.

Avek en popilasyon kot 40poursan pe viv dan lapovrete, nou kapab dir ki enn bann priyorite nimero enn nou Gouvernman i devret targete pour fer desann pri lavi.

Mr Speaker pri lavi i ganny mansyonnen zis en fwa dan sa Bidze.  Sa se pou dir nou ki kou karbiran i fer li monte.  Sa nou konnen.  E an tou leka karbiran pe kontinyen monte e ozordi in ariv R20 lo laponp.

I pou kontinyen monte ziska ler ki nou dekouver petrol.  Par kont monn souvan mansyonn lenerzi soler a plizyer repriz e mon dezapwente pour vwar ki target pei i zis pour konverti 15poursan nou li-sarz lenerzi par lenerzi soler par 2030.

Sa i pa anliny avek Polisi Tourizm ki pe promot en lanvironnman pli soutenab.  Avek legzanp Alphonse e Aldabra nou vwar ki Gouvernman i pe vreman trenn lipye e pe propoz en vizyon plito limite pour pei.

Ki’n arive avek bann plan ki ti ganny lanse par Seychelles Energy Commission an 2015 pour fer La Digue vin en legzanp koman Kapital lekolozi dan lemonn avan 2020?  Sa letan nou ti ganny dir ki sa ti posib.  Eski finans in ganny mete pour soutenir sa progranm?  Non!  E La Digue pa pou zwenn son target.  Avek sa fail La Digue, eski pei li pou arive zwenn son target?  Nou pa delivre lo en plan e nou le lans lo en lot.  Oli problenm Mr Speaker?

Letan nou lo konservasyon nou lanvironnman, enn bann pli gran topik proteksyon lanvironnman ki’n vin dan latansyon piblik resaman, se devlopman en baz militer lo zil Assomption ki ti met an danze nou kado pour lemonn, Aldabra.

Mr Speaker Sesel ti fer sa komitman avek L’Inde anba Msye James Michel ki ti Prezidan sa letan.  Koman sef Leta nou ekspekte ki i ti konfidan dan sa proze, letan i ti angaz nou dan sa komitman.

Zis detrwa zour pase, sa ansyen Prezidan ki nou pey son pansyon ansanm avek en lot ansyen Prezidan pour en valer R1.6milyon dan sa Bidze 2019, avek son transpor e son sekirite pour larestan son lavi, i fer en Deklarasyon ; I dir nou ki la ki in ganny apwente koman ‘’Lanbasader Mondyal pour Losean’’ ki i prezan kont sa Lakor ki i ti sinyen zis 4an pase.  I dir nou ki la ki son lyen avek losean i pli for i pou mobiliz kominote enternasyonal kont Gouvernman Msye Faure pour pa enplimant sa proze, akoz prezan i regret sa desizyon ki i ti pran.

Me sa desizyon in fer ki tou sa depans ki delegasyon atase avek sa proze in sey fer sans avek proze Assomption in bezwen ganny peye avek larzan taks Seselwa.

Mr Speaker Dapre rimer mon osi konpran ki i regrete in pas baton avek Msye Faure.  Mr Speaker, premyerman Msye Michel in retir tou dout e in konfirmen ki Assomption ti pou vin en baz militer.

E dezyenmman, Msye Danny Faure ti erit son manda atraver demisyon Msye James Michel, in osi erit e sa komitman avek L’Inde lo Assomption, ki in kontinyen soutenir.

Mr Speaker se sa dezord ki nou pe koz lo la.  Enn i deside, lot i siporte e sa ki’n met nou dan sa ben i sanz son nide.  Eski lot kote latab i konpran sa konfizyon ke reflekte dan sa Bidze?

Mr Speaker ki mannyer desizyon i ganny pran lo nou par?  Ler sa ki ti pran desizyon pa kapab siport sa ki in komet en pep antye ladan?  Se sanmenm kalite dezord ki nou vwar dan sa bann Bidze.

Nou’n ganny dir les Danny travay.  Tou sa ki’n vini e tou sa ki pou vini pou travay, me fason travay ki enportan.  Fodre ou fer desizyon ki fonde e ki annan swivi e i pa kout pei me o kontrer i anbelir pei, si non i apel en gaspiyaz, e ankor se Seselwa ki anmas le po kase.

Rann kont pa devret zis en mo me en aksyon.  Fodre en dimoun i responsab son aksyon.  Lo sa kote latab, nou pa oule kontinyen met larzan, me nek plan ki’n ganny fer zis i asize, ouswa i sanze, ouswa proze pa konplete, ouswa zis i debout parey moniman.

Sa dumpsite Anse Royale i en legzanp en moniman menm si i pa sorti dan Bidze.  Par kont plan devlopman Anse Royale ek Beach Park i reste bann desen kot Planning.  Sa i en gaspiyaz letan bann surveyors ek arsitek ki’n bezwen desin sa bann plan ki pa ganny devlope.  I en gaspiyaz resours e letan sa bann profesyonnel.  I Bann promes ki donn lekspektasyon zabitan e apre pa vin en realite.

Mr Speaker ozordi Anse Royale i ganny dir i pour ganny en stasyon tenny dife a en kou R1milyon 650mil.  I byen ki zabitan Sid Mahe pe ganny en stasyon tenny dife e in ganny demarke pour ganny konstrir kot sa pti stage kot bann show i ganny fer zis devan legliz Anglikan e sa later i mezir zis en pe plis ki 3000 met kare.  Me eski Gouvernman in swazir en meyer lokasyon pour sa proze ouswa zot in swazir later pli disponib ki annan?  Mon largiman i ki later i reste en komodite rar e pour vin pli rar dan lefitir.

Fodre ki devlopman distrik I ganny fer dan en plan modern e konpreansib.  I enportan ki konsiderasyon i ganny pran pour ki lespas pour lwazir, i form par planifikasyon pour en lavi balanse e ganny byen demarke.  Espesyalman la ki nou’n ganny dir ki nou popilasyon i pe konbat en problenm obésité.  Dan Anse Royale nou pa ankor mank lespas, me sa pa savedir ki zis nou ranpli lespas ki vid.

Distrik Anse Royale i deza annan en morso later kot biro Ladministrasyon Distrik i ete ki mezir plis ki 13 mil met kare later.  Sa batiman ki lo la i vye e nepli kapab deservi son fonksyon byen.

Distrik Anse Royale in toultan ganny demarke dan plan Gouvernman pour desantraliz servis.  Lefe ki Bidze pa mansyonn nanryen pour ede avek sa problenm avek konzesyon trafik ki afekte tou sitwayen Sid Mahé 2 fwa par zour, ti a en bon loportinite pour Gouvernman sezi sa letan pour devlop sa later antye kot ladministrasyon distrik i ete pour fer tou bann lenfrastriktir Gouvernman lo la.  Sa ti a fer ki zabitan sid Mahé ti a ganny en stasyon tenny dife, en batiman avek bann biro Gouvernman kle tel ki Licensing, Taks, Imigrasyon e lezot ki vwar bokou manm piblik.  Sa landrwa kot stage i ete i kapab ganny garde pour promot fer bann pti konser dan rezyon Sid Mahé

Sa ti a montre ki Gouvernman i pe fer en plan kordinen ant son bann departman pour delivre bann servis ki pour benefisye popilasyon e fer zot lavi pli fasil e sey rezourd sa problenm trafik.

Mr Speaker Lopital Anse Royale ti depi son louvertir an Zen 2013 pran 54 pasyan.  E ti selman an Septanm 2018, plis ki 5an apre son louvertir ki Minister Lasante in kapab delivre lanmwatye son promes par fer 20 lili disponib pour ladmisyon pasyan.  Me i mank ners lo sa bann ward, zot sorti anba zot mont anler ouswa sorti anler desann anba depandan kote ki pli okipe.

Outpatient clinic Anse Royale ki tin ganny promet li nek an 2021 ki i pour ganny konplete. Seselwa nek i espere menm pour sa bann gran plan ganny delivre.

Dan sa prosen 30an bann sif i montre ki nou popilasyon pour enn ki vyei e nou’n ganny dir dan sa Bidze ki en Maison de Troisieme Age pou ganny konsevwar lo zil Perseverance.  Sa proze in deza ganny met devan li osi, zot ti annan later apre zot in perdi later e la zot in reganny later.  Sa i byen e fot espere ki nou a vwar son konsepsyon safwasi.

Mr Speaker me konsern bann dimoun aze i plito lo promes lannen pase dan Bidze ki ti idantifye en gran bezwen pour bann lozman pour dimoun aze.  Gouvernman ti fer en komitman pour fer aksesib later avek sekter prive pour devlop sa prodwi.  Eski sa bann later in ganny idantifye ouswa i zis ankor en promes ki’n ganny fer pour en group dimoun vilnerab?  En group ki depann lo bann Polisi ki enplik zot pour protez zot?

Mon a donn en legzanp: En madanm ki ti ganny 60an, an zanvye 2018 e tin fer tou son formalite pour pran son retret an Desanm 2017.  Me olye pran son retret trankil i ti vwar son lavi boulverse.  I ti’n fer tou son planifikasyon pour ki i ti pou tous son sekirite sosyal e son pansyon ansanm e sa ti a fer ki i ti pou kapab viv konfortableman.  Me letan Bidze 2018 ti ganny prezante, tou keksoz ti sanz imedyatman pour li.  Dan Bidze i ti ganny anonse ki dezormen an Zanvye 2018 bann dimoun ki’n pran retret pa pou kapab tou sekirite sosyal ziska laz 63an. Souden son bann plan ti ganny boulverse akoz i ti bezwen viv zis avek son pansyon.  En Gouvernman i bezwen annan bann Polisi stab e serye pour bann dimoun aze ki pe viv bann dernyen lannen zot lavi e ki’n kontribye senserman dan lasosyete.

Sa Mr Speaker i enn bann rezon akoz fodre planifye en Bidze e fodre bann plan ki ganny donnen i konkret e non pa bann promes dan vid.  Akoz la en sitwayen la en sitasyon kot en sitwayen in vwar li dan gran difikilte finansyel akoz Gouvernman in sanz Polisi san donn ase letan pour fer bann plan alternativ.

Eski dan sa Bidze en fon in ganny mete pour ki planning i kapab fer survey bann later e idantifye zot klerman koman bann later pour fer bann lozman pour dimoun aze?

Sa bann later i bezwen ganny pibliye e sekter prive i ganny pouse pour devlop sa sekter e pran sa loportinite.  Gouvernman ki’n propoz sa e se zot ki drwa nou bann dimoun aze pour annan sa bann keksoz an plas.

Sa problenm alokasyon later pour devlopman i reste en defi ki fer soufer en lot kategori vilnerab, bann manman tousel e bann zenn fanmir.  Pour nou pei devlope nou bezwen en lafors travayer, e sa i enkli zonm ek fanm.  Agrandi en fanmir pa devret limit kontribisyon sa paran dan lekonomi.  Me pour kapab fer sa fodre i annan en servis daycare pour fasilit lavi sa bann paran ki en gran defi ozordi.

Dan en workshop IECD semenn pase nou’n ganny dir ki i annan 3 daycare ki pe ganny konstrir anba Gouvernman Lokal ; Takamaka, Anse Aux Pins ek Grand Anse Praslin.

Tou le 3 proze in ganny retar.  Takamaka i an retar e in ganny difikilte avek kontrakter. Zot in rankontre problenm ek boundary wall e avek fondasyon.  Louvraz in bezwen kase e refer.  Anse Aux Pins zot pa ti’n finaliz later ki ti pou ganny servi e proze in ganny retar.  Grand Anse Praslin proze in ganny re-tender akoz kontrakter in deklar fait e sa proze in ganny retar osi.

E dan sa 3 lenstans, se sa paran ki ti’n planifye pou benefisye sa servis ki bezwen fer bann laranzman alternativ, eski sa i donn li stabilite e eski sa bann sityasyon koumsa i ed nou pei e sa dimoun progrese?

Mr Speaker tou desizyon i annan en kou finansyel lo Bidze me i osi annan en kou lo sa sitwayen ki pe depann lo sa proze ganny delivre pour kapab mye kontribye dan lekonomi.

E sa i donn bokou pwa propozisyon Onorab Ramkalawan pour ki en unit spesyalize i sirvey proze akoz sa bann problenm i pran letan, me sirtou i kout larzan.  E se pep Seselwa ki peye sa bann fot.  Me Gouvernman in toultan fer fas avek sa problenm e nou pa vwar zot pe rod solisyon.  Sa i apel gaspiyaz resours.

Dan Bidze Minis i dir ki 143 later pou ganny fer disponib an 2019 e 72 morso an 2020.  Mon ekspekte ki MLUH i kapab donn bann lokasyon egzakt sa bann later.  Sa topik i sansib e Seselwa in fatige espere lo en lalis e la zot bezwen transfer lo en sistenm pwen ki pa kler.  Bokou plis lenvestisman i bezwen ganny mete pour demark later pli vit e fer zot aksesib.  Seselwa i anvi aste zot later e fer zot lakaz pour zot fanmir.

MLUH i sipoze osi annan a son dispozisyon en zoli morso later Barbarons ki Madanm Rene in sipoze rann Gouvernman.  Fer sa ki neseser ki an 2019 plis dimoun a ganny akse ek sa bann later ki deza annan semen ek lezot fasilite zis obor.

Sif dan Bidze 2019 i montre ki 34poursan nou popilasyon i anba 30an e nou espere prodwir en zenerasyon fitir pli responsab.  Si sa i bi Gouvernman i le dimoun agrandir zot fanmir, fodre donn sa servis e sipor neseser ki zanfan i bezwen.  Responsabilite i pour nou tou, me i sirtou komans avek en Gouvernman responsab.

Mr Speaker lefe ki nou vwar 3enm Minis Finans dan 3an i fer dimoun kestyonn kontinyite e responsabilite bann plan devlopman dan Bidze e ironikman sa Bidze i apel ‘Stabilite e Progresyon’.

Apwentman Minis Lalanne ti pran lefe an Avril 2018 e nou rapel byen ki zis apre son lapwentman Minis ti vwar li pe fer fas avek en problenm kot bokou travayer ti pou perdi zot plas travay kot Air Seychelles.

Minis Lalanne ti vin dan Lasanble e ti dir nou ki sa sityasyon pa ti pou sitan grav.  Me nou ti vwar ki zis detrwa semenn apre plis ki en 100tenn dimoun ti perdi zot lanplwa avek Air Seychelles e nou ti bezwen lager isi dan sa Lasanble pour sey donn zot en meyer package.

E zis komansman sa semenn nou vwar en lot sityasyon kot en 40 enn travayer ki’n ganny destabilize, e zot san okenn notis ki zot ti pou vwar zot dan sa predika-man.  Lotel Banyan Tree kot zot ti pe travay ti pe ganny vann e an Out sa lannen, plis ki 3 mwan pase, travayer sa lotel ti eksprim konsern pour sekirite zot lanplwa dan sa tranzaksyon.

Minis Lalanne ti adres nou Lasanble e i ti dir nou ki okenn bann anplwaye pa ti pou perdi zot lanplwa.

 

MR SPEAKER

Onorab zis en pti moman.  Minis Loustau-Lalanne.

 

HON FLORY LARUE

Eskize.

 

MR SPEAKER

Mon konnen mon osi ennler mon manke be annou ganny li byen.  Kontinyen.

 

HON FLORY LARUE

Eskize Mr Speaker.  Mon apel Flory Larue non pa ‘FLORI.’  Mersi.

Minis Loustau-Lalanne ti adres nou Lasanble e i ti dir nou ki okenn bann anplwaye pa ti pou perdi zot lanplwa dan lavant sa lotel.  (Eskiz mwan Minis, mon’n toultan refer to you as Minis Lalanne), eskize.  I ti eksplik an gran detay bann negosyasyon Gouvernman avek nouvo propriyeter e souliny klerman ki okenn travayer pa ti pou perdi zot lanplwa.  Sa ti fer ki sa bann dimoun ti met konfyans dan sa bann parol.  An traver sa bann diskisyon sa bann anplwaye ti santi ki zot lanplwa i an sekirite e zot kapab fer bann plan finansyel pour fitir zot fanmir espesyalman avek Nwel ki pe vini byento.  I annan zis 2 zour ki nou vwar sityasyon lanplwa sa bann travayer ti sanz en sel kou, e menm zour menm sa 40tenn dimoun, ki preske zot tou zot annan zanfan e komitman finansyel pour peye, ti vwar zot san en lanplwa.  En sityasyon ki dapre Minis an Out pa ti pou arive.

Mr Speaker an Zen 2018, nou ti rankontre en sityasyon ki ti vin devan nou Lasanble pour leklersisman apropo en brosir pour en lakonpannyen Sud-Africain ki ti pe promot lenstalasyon en letablisman touristik lo zil Cosmoledo ki en zil IDC.

Minis ti eksplik nou ki dapre son konesans sa proze ti kot SIB e pa ankor menm ganny aprouve e i li i ti pou met en lobzeksyon kont sa kalite proze.

Me Minis atraver ou Mr Speaker, sa proze in vin en realite e pe deza akeir zot bann kliyan sa semenn.  Depi Zen 2018 ziska la in pas 4 mwan e dan 4 mwan, sa proze ki son bann lasanm i bann containers direkteman lo lans in ganny Planning approval.  In ganny en License.  Mon demande si sa bann lasanm i zwenn kriter ki Minister Tourizm i servi letan en Seselwa i le fer progresyon e devlop en biznes tourizm. Eski in sivre Polisi Nasyonal pour sa kalite devlopman?

Eski en Seselwa ki le fer sa kalite biznes li i pou ganny laprouvasyon Planning?

Dan sa peryod zot in ganny GOP par Minister lanplwa.  Eski sa bann lezot Minister pa ti’n ganny alerte pa sa proze ki ti pe servi en brosir ki ti ganny dekrir koman mensongère ?

Be Minis an traver ou Mr Speaker, sa bann portre ki ti dan sa brosir i egzakteman parey ti ete dan brosir sanmenm sa ki lo zil.  Eski en lenvestigasyon pour ganny fer ouswa i pou business as usual?  Akoz Seselwa i ankoler.

Mr Speaker lefe ki sa zil i anba IDC, eski savedir ki bann loportinite biznes i zis pou etranze e Seselwa pa ganny menm loportinite?

Sa ki’n arive Cosmoledo i montre levidans final ki bann zil IDC i bezwen retourn direkteman anba Gouvernman.  Fodre nou ganny rann nou zil Minis, pour nou konnen ki pe pase e pou nou annan kordinasyon devlopman zil elwanye akoz anba Mr Glenny Savy ki’n ansarz IDC pour plis ki 40an I paret ki zil pa tonm anba menm regilasyon ki larestan Sesel.  Minis, atraver ou Mr Speaker eski ou ankor opoze ek sa proze ki’n fini ouver?

Minis, atraver ou Msye Speaker, dan sa trwa lenstans kot ou’n donn nou en parol dan sa Lasanble e a sak fwa nou’n vwar diferan rezilta.  Kwa ki fer nou annan konfyans dan bann propozisyon ki devan nou?

Nou’n ariv dan en lenpas kot nou bann lenfrastriktir pa an plas pour siport bann servis bazik e neseser ki nou popilasyon i bezwen e fer fas avek nou bann fleo dan nou sosyete.

Sa bann servis I form par responsabilite en Gouvernman, e bann lenstitisyon ki nou envestir ladan i pour devlopman nou pep.  Si nou ti’n byen envestir dan sa bann striktir e donn nou dimoun konfyans dan zot lekor e responsabilite pour zot lekor, zot pa ti pou vwar zot dan bann sityasyon ki zot ladan vwar zot ladan ozordi.

An konklizyon, nou vwar ki Gouvernman Parti Lepep in souvan iresponsab avek larzan Seselwa e toler labi bann zofisye Gouvernman pour anrisir zot lekor, e an rezilta zot in fail nou pep lannen apre lannen.  Letan bat latet Seselwa e fer Seselwa per, in fini!

Mr Speaker bann lenstitisyon pa kapab fer fas avek koripsyon e labi.  Koripsyon i ogmant pri lavi e i afekte reveni ki an retar afekte nou larises.  I kler ki Msye Faure pa oule donn ledan ACCS pour fer son lenvestigasyon akoz son Lalwa ti sipoze ganny amande avan Septanm 2018 pann zanmen ganny prezante.

Minis Dr Larose ti vin avek propozisyon pour fer en forensic audit pour kapab mye detekte koripsyon?  Eski lefe ki i ti pe fer sa bann aksyon desizif ki i ti bezwen kit Gouvernman?

Eski IMF, ouswa Labank Mondyal ouswa en lot antite ti pare pour asiste li dan sa demars?

Sa ti neseser letan nou konsider tou bann sonm larzan ki’n disparet san latras ouswa avek bokou dokimantasyon manke ki apre aparet i aparet dan loto parey Kontra Irish !

Lalis legzanp i long; larzan cash i ganny transporte dan sak devan baro State House, me nou, nou ganny dir ki tou tranzaksyon fodre pas dan sistenm banker.  Bann devwalman tranzaksyon kot SBFA e la prezan zis i pou fermen! Onorab Andre in fer kler ki sa pa pou posib e nou bezwen rekiper sa bann larzan manke e fer bann prosesis legal pour bann kin anvoy lanmen dan Kof Leta zot bezwen rann kont.  Si zot in ganny lord pli o zot a dir e nou konnen lekel bann vre koupab.

Nou’n vwar rol Mrs Lise Bastienne dan bann tranzaksyon finansyel ki pa kler.  Nou’n vwar bann tranzaksyon FIU lenvestigasyon finansyel ti pou kontinyen pour etablir ki mannyer bann travayer dan servis piblik ouswa bann housewife, in vin milyonner ouswa bilyonner!  Bann ki fer bann devlopman rezidansyel ki parey sato, me solman ti annan zis zot semiz lo zot ledo, bann ki a la fer zot karyer zot annan 49 ouswa plis ki 70 bout later Leta.

Nou pep pe soufer e zot dan gran difikilte.  Labi seksyel pa pe ganny latansyon ki i devret e sif i dir ki 1 dan 5 zanfan in ganny abize seksyelman. 8mil dimoun i lo drog.  45poursan bann dimoun ki pe servi methadone in ganny abize seksyelman.  Nou annan en popilasyon 21mil travayer etranze dan en lafors travayer 48mil dimoun. 400mil dimoun i konsilte dokter par an. 40 poursan Seselwa i reste dan lapovrete.  300 zanfan dan lekol piblik dan 1600 dan en lannen i ganny en grad C ou pli o dan IGCSE.

Sa bann sif ba balanse avek nou tit High Income country, i pa balanse avek sa loportinite ki nou dir en zanfan i annan dan Human Capital Index.

Larzan dan Bidze i sipoze asiste sa bann dimoun, e nou ekspekte ki sa Bidze i delivre lo son bann promes.  Pou kapab byen depouy sa Bidze nou bezwen ganny akse avek tou alokasyon larzan ziska son dernyen sou !  Se koumsa ki nou pou kapab mezir lefikasite.

Nou’n ale lo semen parey en Onorab in dir, e nou pou kontinyen al lo semen akoz Gouvernman pa pe tann nou e pep Seselwa pe demann nou pou pas zot mesaz.

Les mwan dir zot ki sa sanzman pe vini.  Letan Gouvernman pa serye se Seselwa ki soufer.  Se sa ki zot tranble letan nou dir DANNY OUT sed laplas e les LDS enplimant sa prosen Bidze pour Seselwa vwar vre progresyon akoz apre 40an zot in nepli kapab delivre.  Mersi Mr Speaker.

 

(APPLAUSE)

 

MR SPEAKER

Mersi Onorab Flory Larue.  Bon mon konnen ou’n mansyonn Mrs Bastienne i en pti pe mirmirasyon lo kote.  Ou mansyon pou Mrs Bastienne ou pa’n atak li personnelman.  Ou pa’n denigre li. Mrs Bastienne ti aparet lo Komite Lasanble FPAC e in pas dan bann prosedir parey lezot dimoun i vin pas devan prosedir.  Ok ?  So i napa okenn latak ki’n ganny  fer pou lo personnalite Mrs Lise Bastienne oubyen pou denigre li.  Bon mon ava pas laparol avek Onorab Jude Valmont.

 

HON JUDE VALMONT

Mersi Mr Speaker.  Mr Speaker, Minis, koleg Onorab, tou dimoun a lekout espesyalman zabitan Pointe Larue bonzour.

Permet mwan o komansman mon lentervansyon pou salye Minis Maurice-Loustau-Lalanne, pou son premye Bidze koman 7enm Minis Finans ki Sesel in konnen pandan sa 42 an legzistans nou pei koman en leta endepandan.

Personnelman, monn annan loner travay dan servis piblik, pli presizeman Minister Zafer Etranzer, anba gidans Minis Loustau-Lalanne ki sa letan ti ankor Sekreter Prensipal.  Mon kontan pou dir ki sa bann menm kalite ki i ti deplwaye koman Sekreter Prensipal i demontre ozordi dan son fonksyon koman Minis Finans.

Mr Speaker, set ankor anba leadership Prezidan Faure e son bann prensip for ki lepep Seselwa i ganny prezante avek sa Bidze anyel pour lannen 2019.  Mon partaz lekspektasyon e lapartenans sak Seselwa dan sa Bidze.

Mr Speaker 2018 i ankor n lannen refleksyon kot ozordi atraver sa Bidze nou war ki Gouvernman i reste a lekout nou popilasyon.  i kontinyen plas Seselwa o sant devlopman nou pei e an menm tan tenir en fason fer ki realis e pridan.

10an apre ki nou ti anbark lo en Reform Ekonomik Mr Speaker, ozordi nou pep i ganny prezante avek en garanti ki Sesel ekonomikman nou lo en bon semen.  Sa i enportan pour kontinyen donn garanti nou bann partenaire devlopman pour met lanfaz lo bann priyorite Nasyonal e tras en larout kler ver en devlopman soutenab.

Mr  Speaker, Bidze 2019 i enn ki vize ver stabilite e progresyon Nou pep dan miltip laspe.  Par egzanp, konsolid pozisyon fiskal nou pei.  Onor nou bann det e asire ki det piblik i ganny redwir konsiderableman.  Kontinyen mentenir en disiplin finansyel for.

Kontinyelman kree plis loportinite lanplwa.

Lenvestisman dan lenfrastriktir ek lozman avek bi ankouraz krwasans ekonomik.

Lenvestisman dan bann proze ek progranm pour ki lavi Tou Seselwa i amelyore.

Mr Speaker, i enportan soulinyen ki dan sa Bidze nou vwar bokou komitman finansyer ki nou bann partener Enternasyonal in fer anver nou Lekonomi. Sa i konfirm konfyans ki kominote enternasyonal i annan dan abilite nou pei pour devlope dan en fason ki prezant zot avek loportinite lenvestisman dan plizyer domenn ki an retour pour garanti prosperite nou pep.

Zis sa semenn Mr Speaker, mon’n ganny sans konman en marmay osi attend meeting dyalog politik ansanm dan ou prezans e Linyon Eropeen in konfirm sa ankor i dir Sesel  i lo bon semen.  Nou nepli nou’n sorti sa staz en aid receiver.  Nou bann partenaire politik e zot in angaz bann dyalog politik sa zis en legzanp en case in point Mr Speaker.

Mr Speaker Minis Finans in refer sorti ki le 11 Oktob sa lannen, Labank Mondyal ti ofisyelman atraver son Lendeks Kapital Imen plas Sesel 43enm  dan 157 Pei.  I bon refer sorti ki Sesel i plase premye dan la rezyon e menm dan L’Afrique.  Sa, pep Seselwa i laprev ki padan sa 40an nou Gouvernman in kontinyelman angaz li dan kreasyon loportinite pour byennet son pep.

Ou sa travayer Seselwa, sa travayer ki sorti Pointe Larue, sa Bidze i pour ou, sa Bidze i rekonnet ou zefors.

Se pour sa rezon ki nou Gouvernman in dedye en valer R2.67bilyon pour ou saler e ou bann Reminerasyon ki reprezant en poursantaz 31.5 poursan Bidze 2019.

Bidze 2019 I fer provizyon pour en valer 58.5 milyon roupi zis pour bann nouvo ouswa revizyon dan Scheme saler.  Sa Mr Speaker i souliny lefe ki nou Gouvernman in a lekout lapel nou pep, e osi lapel ki nou konman en Lasanble in fer o non nou bann zabitan pour rekonpans zot pour zot travay dir, pour zot sakrifis.

Mr Speaker, san dout tou travay i annan son lenportans, me permet mwan met lanfaz lo serten ki’n tous mwan e mon kominote direkteman pandan sa dernyen lannen.

Lefe ki bann zofisye welfare dan Lazans Proteksyon Sosyal pour apartir Zanvye 2019 benefisye avek en revizyon zot Scheme Of Service, mon rekonforte, mon konnen ki sa i a vin konman en rekonesans sa bann sakrifis ki zot fer.   Apre tou, se zot ki fer sir ki byennet sosyal kous vilnerab nou popilasyon I ganny sovgarde.  Se zot ki trouv zot devan laport mon bann zabitan ler zot trouv zot dan difikilte fer de bout zwenn.

Mr Speaker, nou tou nou konnen ki lekspektasyon i bokou lo nou bann zofisye transpor lo semen ; pour garanti ki zot fer tou posib pour amelyor kondisyon nou bann semen.  Apre tou, nou tou nou pey road tax e eksepte pli o standar dan kondisyon e osi sekirite nou bann semen.

Mon swete Mr Speaker ki sa rekonpans a vin konman en motivasyon pour zot kapab kontinyen ed nou dan Pointe Larue rod en solisyon permanan pour sa problenm trafik dan plato.

Mr Speaker, Departman Lanplwa i en lot landrwa kot bokou presyon in vini pandan sa bann dernyen lannen.  Sa set akoz bokou lanfaz in ganny mete lo rekritman travayer e osi zot byennet dan landrwa travay.  Alors sa revizyon dan zot Scheme saler, i laprev ki nou Gouvernman i kontinyen met lanfaz lo lanplwa e welfare tou travayer seselwa san leksepsyon.

Bokou koze in ganny fer lo nou Lafors Lapolis, lekspektasyon nou pep i vreman o, nou depann lo zot pour nou sekirite e sekirite nou fanmir.  Mon rekonnet zot sakrifis.  Mon’n a plizyer repriz vwar ki mannyer zot met zot lavi, menm pour zot fanmir an danze zis pour fer sir ki nou reste an lape e trankilite.

Se zot ki lo front line toulezour e pour sa nou Gouvernman i dir zot mersi par sa revizyon zot Scheme saler.  Mon konfidan ki sa pti lankourazman i a fer ki zot kontinyen dedye zot kouraz pour byennet pep Seselwa.

Mon egalman swete ki bann nouvo zenn zofisye ki pe al graduate tre prosennman, zot osi zot a vwar sa konman sa motivasyon, konman sa rekonpans pour zot dedikasyon dan zot letid e swete ki zot vin sa bann zofisye ki ede elev standar Lafors Lapolis.

Mr Speaker, last but not least, sa Bidze i fer provizyon pour rekonpans mon bann frer e ser koleg diplomat.  Mon konnen ki sa demars pour amelyor zot kad saler diplomatik in enn ki’n long. Pandan sa letan malerezman in annan bokou nou bann, bann bon diplomat ki’n kit nou pou bann greener pastures.  Mon swete ki bann ki ankor la a trouv sa konman en lankourazman, e mon menm al pli devan pour demann tou bann ki’n ale pour rekonsider retournen e vin donn en koudmen mannye e ranforsi sa laport loportinite ki ekspoz nou avek kominote enternasyonal.

Mr Speaker, benefis travayer dan sa Bidze pa aret la.  Mon kontan pour soulinyen ki nou Gouvernman i rekonnet bann ki’n dedye zot lavi anver zot karyer.  Alors lentrodiksyon sa Long Service Allowance konman rekonpans pour sa bann travayer pour zot dedikasyon e ankouraz lezot reste dan en lanplwa stab.  Sa i a osi permete ki bann diferan lenstans Gouvernman a kapab vin pli for avek bann travayer eksperyanse e fer ki serten lenzistis dan kad saler i ganny adrese.

Koumsa Mr Speaker ki nou garanti ki service delivery i amelyore.  Travayer Seselwa, mon swete ki avek sa zefors ki nou Gouvernman pe mete dan amelyor zot saler, de zot par zot endeavour pour vin pli efektiv, plis a lekout lekspektasyon nou pep e fer ki zot pa kontinyen vir an ron kot pa neseser.

Mr Speaker, apre ki Minis in prezant sa Bidze pour lannen 2019, mon’n ganny sans enterakte avek bokou travayer dan mon distrik e osi o nivo Nasyonal.  Mon’n fer serten pti remark ki mon ti a kontan met devan pour ki zot ganny leklersisman Minis Finans padan son repons ou menm pwennvi bann lezot responsab padan Staz Komite.

(1) Eski nou bann Carers zot osi zot benefisye avek sa Long Service Allowance?

(2) Apard ki benefis sa Long Service Allowance, eski in annan okenn konsiderasyon pour amelyor Scheme saler bann cleaners dan korperativ?

(3) Eski bann Home Managers kot bann Home of the Elderlies ki lo bann Kontra 2an zot annan posibilite benefisye avek sa Long Service Allowance?

Bann ki lo bann Individual Contracts, ler i ariv en sirkonstans kot Gouvernman i bezwen fer redundancy, ou bann ki zot bann Lazans pe vin Otononm break of service, eski zot osi zot kapab ganny konsidere pour enkli zot bann lannen servis oparavan pour permet zot benefisye avek sa Long Sevice Allowance?

Eski Gouvernman i kapab get dan posibilite retir taks lo peyman konze osi?  Sa i a vin en lot incentive direk pour bann ki dedye maximum zot letan anver zot louvraz tout an rekonesan ki parfwa zot sityasyon dan landrwa travay ki pa permet zot pran bokou konze.

Finalman, eski Gouvernman i kapab dir nou si sa survey Nasyonal ki’n ganny fer resanman, i osi enkli get dan posibilite amelyor lezot Schemes of Service ki pa’n ganny touse pandan sa bann lannen ki’n pase?

Mr Speaker, devlopman nou pei i depan bokou lo lenvestisman nou Gouvernman dan bann proze Kapital.  An 2019 en sonm R123milyon ansanm avek bann don ki ariv R296.4milyon pe ganny propoze.  Apard ki bann proze dan domenn Lagrikiltir, Lasante, Ledikasyon, e en nouvo Lakademi Lapolis, en Maison Troisième Age eksetera.  En sonm signifiant in osi ganny met de kote pour konstriksyon lakaz pour Seselwa.

Mr Speaker, en sonm 161. 4 milyon in ganny dedye pour devlopman 143 bout later an 2019 e 43 bout an 2020; osi nou vwar provizyon pour konstriksyon 406 lakaz an 2019 e ankor 32 an 2020.

Sa bann Don in vin swivan bann vizit D’Eta ki nou Prezidan in fer aletranze.  Sa pa aret la Mr Speaker, i bon pou fer remarke ki atraver sa bann don e loan ki nou’n gannyen avek nou bann pei zanmi tel ki L’Inde ek La Chine nou pou vwar en akselerasyon dan konstriksyon lakaz ki pour permet Gouvernman konstrir 3000 lakaz dan 6an.

Atraver loan e don lavaler R3,026milyon par Gouvernman Endyen sa lannen, pour permet konstriksyon 558 an 2020 e 506 an 2021.

E sa don lavaler 102 milyon roupi ki nou’n gannyen avek Gouvernman Chinois osi pour al anver bann proze lakaz.

Mr Speaker, mon swe se ki avek tou sa devlopman dan domenn later ek lakaz, sa 40 plis aplikan later, e sa plis ki 400 plis aplikan lakaz Pointe Larue pa ganny kit deryer.

Alors mon ti a kontan propoz enn de pti keksoz.  Mon ti a kontan propoze ki Gouvernman atraver Minister responsab i angaz li pour konplet legzersis survey tou later Leta dan bann distrik e osi konplet tou negosyasyon pour bann later prive ki dan labandon pour permet ki sa bann 3000 lakaz i ganny konstrir lo la.

Mr Speaker, Pointe Larue i annan later, alors mon envit Minister pour devlop akse neseser pour permete ki maksimonm later posib I ganny servi pour konstriksyon lakaz ki a benefisye mon bann zabitan direkteman.

Ki bann rezidan Nageon Estate i vwar konmansman 2enm faz redevlopman e rapidman swivi par en 3enm faz.  Mon ti a kontan demann Gouvernman pour reouver lof pour bann ki ankor dan bann lakaz an tol dan sa rezyon pour zot osi kapab rekonstrir zot lakaz anba sa proze.

Ki Gouvernman i seryezman konsider ed bann endividi ki pe struggle finansyerman pour fini konstriksyon zot lakaz.

Ki Gouvernman i konsider opsyon batch tender konstriksyon bann lakaz zis parey in fer avek redevlopman Nageon Estate Faz 1 pour ki i permete ede ki pri konstriksyon lakaz i abese konsiderableman.

Mr Speaker sa i zis en case in point.  Nageon Estate phase 1 ou bezwen met o kler i annan lakaz i annan 14 lakaz ki’n ganny fer zot in pas dan sa bann lakaz sa kontrakter in bid.  E lakaz ki nou ti pe vwar pe kout 1.8 – 1.6milyon in desann 850 ekek mil Roupi -700 ekek mil Roupi.

Alor mon krwar sa lide pa bar standar si nou al    sa nou kapab ede fer li desann sa bout later.

So Minis mon demann pou  e osi Minis responsab pou Labita ek Later  ek Lakaz pou get en kou sa bann bar standard mannyer i fer e pran legzanp e pran lezot lakaz osi bar standar bar standard mon konnen i annan propozisyon pou Cabinet in pas en rezolisyon pou konstrir lakaz bann endividi ki dan problenm.

Alor petet konsider  en distrik si i annan 10 dimoun ki vin devan, ou gard en lalis ouver apre Gouvernman i bar standard sa 10 lakaz  e sa bann dimoun i kapab egalman benefisye.

Pou terminen lo sa size Mr Speaker mon ti a kontan enform tou zabitan Pointe Larue ki sa Bidze egalman fer provizyon pou serten lezot serten Proze Kapital ki pou benefisye nou direkteman.  Sa i lagrandisman semen Anse Francois lavaler 1.5 milyon ki’n pou zot lenformasyon in deza konmanse.

Konstriksyon Semen Caryole ziska ex-Albert, Anse des Genets lavaler R2milyon.  Sa i montre laprev ki demann zabitan Pointe Larue in ganny met a ker sirtou swivan vizit Prezidan Faure ki ti ganny fer dan nou distrik.  Konstriksyon premye Faz en 3enm lane Pointe Larue ki pou enkli pavement e sistenm drenaz.

Mr Speaker, mon ti a kontan point out yer ti ganny, fer sorti ti napa okenn larzan lokasyon finansyer  ki’n ganny mete pou, improvement Lopital Anse Aux Pins e larezyon ki servi sa klinik.  Annou get paz 50 PSIP i montre ki i annan en larzan in ganny met de kote pou renovasyon e improvement Lopital Anse Aux Pins.  E 450 mil in ganny mete pou 2019, 150mil pou 2020 e 2021 respektivman.

Alors sa i vin konman en rekonfor.  I annan keksoz ki pe ganny fer anver amelyor sityasyon klinik Anse Aux Pins pou met nou dimoun n pti pe pli konfortab.

Mr Speaker Bidze ki’n ganny prezante devan nou Lasanble i annan ankor bokou lezot bon eleman, ki mon santi mon bezwen souleve avan mon terminen.  Par egzanp, avek bi pour kontinyen amelyor lanvironnman biznes lokal pour kontinyen ankouraz lanplwa Seselwa, sa Bidze 2019 i fer bann provizyon swivan parmi bokou lezot ankor ;

Kreasyon en lantrepriz Fon Devlopman pour bann pti en mwayen biznes atraver DBS lavaler R46.3milyon sorti kot SBFA e deplis en ekstra 20 milyon an 2020.

Kreasyon en Prompt Payment Policy ek Prozedlwa.  Lamannman Seed Grant Scheme pou fer li vin en Walk in Seed Grant Scheme. 

Letablisman en sistenm pwen pour alokasyon bann later endistriyel e komersyalR8.8milyon devlopman lenfrastriktir lo zone 20.  5 milyon devlopman lenfrastriktir lo Zil Eve, Praslin.  R2.2 milyon amelyorasyon semen dan Zone endistriyel.  En sonm 20milyon anver Sekter LagrikiltirEn letid par Gouvernman e World Bank lo sekter enformel dan Sesel.  Sa Mr Speaker i direkteman an repons mon Mosyon prezante an Me 2017 ki ti lir koumsa:-

Sa lasanble i demann gouvernman pour met an plas en mechanism pou idantifye e monitor bann aktivite ekonomik ki pe deroule dan sekter enformel avek bi ed zot pour devlope pour vin bann biznes pli prospere.”

Tousala Mr Speaker i demontre klerman langazman nou Gouvernman, en Gouvernman ki a lekout pour fer nou bann biznes lokal prospere o tan posib.

Mr Speaker Minister Gouvernman Lokal i reste touzour kle dan anmenn la partaz larises nou pei devan bann laport nou distrik.  Alors, mon akeyir alokasyon en sonm R57 e 52.1milyon anver sa Minister pour lannen 2019.  Sa i a permete ki ankouraz bann diferan aktivite e progranm dan distrik par egzanp Scheme Animater.

Me lo sa kote Mr Speaker mon still santi ki i annan keksoz ki kapab ganny fer malgre mon santi ki sa larzan pa ase me mon menm santi ki nou bezwen met bann prosedir o kler pou bann dimoun ki vin devan zot konnen kot pou ale ki pou, fer e konnen konbyen zot kalifye pou ede pou zot kapab.

No. 2 i annan bann pti proze kominoter ki a permet konstrir plis pti semen, bin sites, amelyor bann fasilite sportive, koup bann pye dibwa danzere, e fer bann pti proze pour prevansyon kont bann dezas natirel eksetera.

Pour konklir Mr Speaker, mon oule fer sorti ki apre konsiltasyon avek diferan dimoun dan mon distrik e en bon revi liv Bidze, mon note ki sa Bidze 2019 in tous tou kous mon popilasyon.

Sa zenn ki pou benefisye atraver bann diferan progranm lankadreman, sa travayer e biznesmenn ki pour benefisye avek bann incentives, sa dimoun aze ki pour benefisye avek plis swen e latansyon.

Alors mwan konman lavwa zabitan Pointe Larue mon pou raport mon sipor pour sa Bidze me avek serten rezervasyon e kestyon kot i fodre.

Sa Bidze i laprev konkret ki Prezidan Faure e nou Gouvernman i enn ki pe travay e reste touzour a lekout.  Laspirasyon son pep a tou nivo.  E pli enportan i pa pe kon tradwir son lekor. Mon swe i ki tou Seselwa padan Staz Komite i angaz zot MNA pour ki konsiltasyon i kontinyen e tou pep Seselwa i trouv li dan en fason ou en lot pe viv sa Bidze.

Mr Speaker, tou lendikasyon i la dan sa Bidze ki Sesel in pas en gir siperyer apre 10an reform ekonomik.  En gir ki dezormen empower nou pour annan plis responsabilite konman sitwayen pour fer nou pei prospere.  Nou napa letan pour trenn lipye. Nou bezwen travay dir e pour sa nou a kontinyen ganny rekonpanse.

Mon terminen par salye zefor tou Seselwa ki travay dir pour fer nou pei Sesel marse.   Mon salye zefors tou Minister, espesyalman Minister Finans dan preparasyon sa Bidze.  Mon remersye tou zabitan Pointe Larue ki’n siport mwan padan ki mon’n la, mersi pour zot konfyans e gidans.

Finalman mon oule pas en mesaz nou Prezidan ki nou zabitan Pointe Larue, nou akote li ‘’all the way.’’ Nou pou kontinyen regard ver ou konman sa Prezidan ki pou ekout nou, ki pour travay pou nou e nou osi nou pour travay avek ou pou ki ou vin sa Prezidan elekte ki serten pe rode an 2020.  Mersi Mr Speaker.

 

(APPLAUSE)

 

MR SPEAKER

Mersi Onorab Jude Valmont.  Mon ava pas laparol avek Onorab John Hoareau.

 

HON JOHN HOAREAU

Mersi Mr Speaker.  Bonzour Mr Speaker.  Bonzour tou dimoun a lekout.  Bonzour Minis.  Mr Speaker mon oule fer en pti refleksyon lo sa ki Onorab De Commarmond in dir yer.

In dir ki nou’n vin prezant en letani problenm e nou bann fo profet ki dimoun pa devret ek nou.

Onorab De Commarmond pa devret fer refleksyon koumsa letan donnen ki en manm FPAC.  Akoz larealite ki pe frap nou ozordi se bokou problenm.  Problenm 50 milyon pou emodyaliz problenm FPAC, problenm later e partou kot ou gete problenm menm.

 

(APPLAUSE)

 

HON JOHN HOAREAU

Mr Speaker Bidze ki Minis Finans in anmenn devan nou Lasanble i pe rod laprouvasyon pou permet, Gouvernman depans 8.46bilyon dan lannen 2019.

Ankor enn fwa nou pe vwar i en Bidze ki zeneralman ranpli ek promes e depans ki pa pou anmenn gran benefis pou tou Seselwa.  I pa’n prekosyon pou ferm laport lo labi parfwa i donn avek lanmen dwat e i repran avek lanmen gos.

An menm tan i en Bidze ki p adres bokou bann defi ki pe pei pe fer fas avek parey pri lavi ek lenflasyon ki tre o.  En sistenm ledikasyon ki pa pe prodwir rezilta ki zistifye depans  dan sa sekter.  En sosyete kot bokou nou lafors travayer in vin adikt dan drog ek lalkol ; en Sekter Lagrikiltir ki’n tonm an rin  e plizyer lezot defi ankor .

Parey laplipar bann Bidze oparavan ki ranpli ek promes bokou bann Capital project pa demare e alafen Minis i vin anonse ki zot in fer en saving lo Bidze.

Mr Speaker mon krwar ki saving i devret ganny fer ler ou annan en disiplin fiskal kot ou koup gaspiyaz e ofer Gouvernman vin pli efektiv.

Me non pa ler ou bidzete pou en proze e apre ou pa fer li.  Mon plis ki sir ki bokou sa bann depans ki’n ganny prozekte pa pou zanmen ganny materyalize akoz move zesyon pei en L’Egzekitiv inefektiv.      Annefe mankman direksyon e vizyon lo lapar dirizan pei pe kontinyelman kontribye dan sa linifektivite.

Mr Speaker Minis Finans in dir nou ki son term Bidze se ‘’Stabilite Progresyon.’’  Dan son term li menm i prezant en konfizyon.  I pa’n defini ki kalite stabilite si ekonomi oubyen politik.

Me sa ki mon konnen stabilite se pou reste menm pozisyon.  Par kont progresyon les pou bouze.  Ki mannyer ou kapab reste menm pozisyon an menm tan bouze.

Mr Speaker mon pa en pesimist me ler mon analiz sa Bidze mon pa vwar  ki sa Bidze pou fer pou anmenn Seselwa pou bouz zot pli a lavan.  Me plito pou reste menm parey e lannen ki lannen pase oubyen menm vin pli mizer.

Eski se sa ki pep Seselwa  pe demande ozordi ?   Byensir non.   Seselwa pe demann son dirizan pou  bouz sa pei pli devan.  Seselwa i le en meyer lavi.  Seselwa i le vwar bann mezir konkret e pragmatique pou adres defi ki sa pei pe fer fas avek.  Tel parey pri lavi.

Les mon donn detrwa legzanp, detrwa rezon, akoz mon pe dir ki sa Bidze pa pou anmenn naryen pou soulev lenflasyon e fer desann pri lavi.

Premyerman Minis i anons en taks an plis lo lavyann poul ek pork enporte lannen prosen.  Mon lir ;

‘’Nouvo taks nouvo en nouvo taks lo lavyann pork enporte pou 15poursan plis R3 par kilo. ‘’

‘’Nouvo taks lo lavyann poul enporte pou 15poursan plis R5.92 par kilo.’’  Dapre Minis sa pou protez prodiksyon lavyann lokal.

Mr Speaker, si Minis ti serye pou adres sa problenm i pa ti ava anmenn en lot kou pou Seselwa.  Me i ti a rod solisyon.  I pa ti ava anmenn en Bidze pou  tap plis lo pos malere.

Mr Speaker, it goes without of saying parey Anglais i dir.  Ler ou fer monte lavyann enporte avan menm ki ou prodiksyon lokal in ranpli sa mankman dan marse i pou napa lefe lo konpetisyon.  Parske toultan ki ou annan en demann pou en komodite ki napa bokou, pri sa komodite pou reste o.

Si Minis i serye i devret donn en letan gras e demann Minister Lagrikiltir pou met bann mekanizm an plas pou fer sir ki sa prodiksyon lavyann lokal i ariv lo nivo loto sifizans apre sifo i ti a met en taks pou donn lavantaz lo prodiksyon lokal.

Lafason ki in fer konmansman Zanvye malere pa pou kapab aste lavyann poul ek pork.  Akoz i pou tro ser.  Alor se bann malere ki pou pey lepokase.

Mr Speaker, Minis in osi aksepte ki lenflasyon an Septanm 2018 ti’n ariv 3.3poursan.  mins in site ki pri pwason en komodite ki nou tou nou depan lo la i a labaz CPI Consumer Price Index e pwason in monte  par rapor avek lannen pase.

Me kwa dan son Bidze ki in anmennen pou amelyor problenm pwason ser?  Mr Speaker nanryen.

Problenm pwason ser problenm pwason ser pe fer bokou Seselwa viv lo en dizef fri ek diri aswar.  Oubyen en pe pasta avek lasos.  Seselwa i nepli afford pou aste pwason konmela.

Mr Speaker premyerman Bidze pa pe met plis resours pou nou gard lakot e SFA pou ranfori sirveyans lo nou lakot an konparezon avek bann lannen presedan.

Oubyen menm  lentrodiksyon nouvo teknolozi pou nou war ki pe pase dan Zone eksklizif.  Toulezour bato Sri Lankan, Maldivien, lezot ankor i vin vol nou pwason.  Nou banbara e nou torti ki nou proteze.  E Lotorite konsernen pa kapab  atrap detekte e atrap zot.

I fer mon tris ler mon vwar ki konbyen pri en bouzwar in arive lo bazar.  E malere pa kapab met kouto lo la.  Tandis ki sa menm kalite pwason pe ganny servi konman labwet pou lapes reken par bann Sri Lankan ki vin lapes ilegalman dan nou delo.

Mr Speaker, dezyenmman peser lokal i ankor pe fer fas avek menm problenm lannen ale lannen vini.  Si pa ice – labwet.  Si pa labwet – SFA pe pran tro bokou letan  pou refund zot konsesyon fuel.  E sa i fors zot anmar bato avek lasose.

Mr Speaker Minis in vin avek en lotriz politik.  Pou sey aranz limaz son Gouvernman.  sa se Human Capital Index. 

Mr Speaker in neseser ki Seselwa i konpran en keksoz tre kler.  Sa konsep pa devre ganny enterpret san analiz lo lezot bann fakter sosyal e demografik ki kapab annan lenpak negativ lo sa lendeks.

Letid ki World Bank in fer ,i baze lo bann mekanizm e len lenfrastriktir ki an plas dan ledikasyon e lasante en zanfan ziska i vin adilt.  Sa letid pa pran kont bann kosmar ki nou pe viv avek toulezour.  Tel konman sa 80poursan nou zanfan ki’n fini S5 san okenn sertifika enternasyonal.  Oubyen en sertifika evokasyonnel.  Ki fer ki bokou nou zanfan pa rantre dan en lenstitisyon Pos-Segonder pou aprann en metye, oubyen ariv liniversite.

Bokou sa bann zenn i vwar zis fernwanr devan zot.  E malerezman tonm dan drog.  Sa i vin en lot problenm pou sosyete.

Mr Speaker, sa gran nonm zenn ki adikt dan drog ek lalkol, en gro popilasyon prizonnyen laplipar zenn avek en to fertilite tre bar mon pe demann mon lekor ki fason ki Human Capital Index ki zot pe sant laglwar lo la, pou anmenn okenn sanzman pozitiv dan nou lekonomi.

Mr Speaker, sa i montre ki ou kapab annan en pli bon Human Capital Index, san fer fas avek sa bann defi ki mon’n nonmen sirtou gidans pou met nou zenn dan bann bon semen.  Nou pozisyon 43 lo Human Capital Index, pa pou servi nou dan nanryen!  Nou pei pou reste konman en bato san gouvernay

Mr Speaker dan Bidze pou ledikasyon ou vwar ki dan Capital project napa provizyon pou en  lekol vokasyonnel pou zanfan segonder.

Se pourtan Prezidan dan son diskour  Leta Lanasyon e bann Minis ki’n vin dan Lasanble ti pronons zot lo la.  zot ti dir sa lekol pou ganny fer Ile Soleil.  Ankor in montre ki Lotorite pa align zot pa align zot byen.  Zot pa kordinen

        Ankor en lot promes ki pa’n ganny akonpli.  Bann zanfan ki pa akademik ti pe esper sa devlopman, pou ki zot a kapab devlop zot talan vokasyonnel.

Bann teachers osi ti pe swete ki lentere sa bann zanfan ti a ganny pran seryezman.  Fodre fer remarke ki bokou [problenm disiplin dan nou lekol, i souvandfwa akoz lentere e bezwen bann zanfan pa ganny konsidere.  I paret mwan ki zis  Gouvernman ‘LDS’ ki pou kapab delivre sa.

Mr Speaker, lekol La Rosiere i en lot proze ki toultan in retourn lo Capital Project parey yoyo.  I annan plis ki 3an depi ler en parti sa lekol in ganny demoli.  Me ziska prezan p ankor ganny rekonstri.  Bokou bann paran Mont Buxton La Rue Hangard i fristre pe demande ki sa lekol i ganny fer i ganny rekonstri.  Sa i en lot promes ki fotespere i ganny realize sa lannen.            Mr Speaker, ler mon pe get sa 11.1 milyon ki pe ganny prozekte pou pey legzanmen enternasyonal i fer mon demande kwa ki pe ganny fer pou redwir lavi dan sa domenn.  Mon vreman kontan ki nou zenn fiy ek garson i ganny sa loportinite pou fer bann legzanmen enternasyonal pou nanryen.  Konpare avek bann zanfan dan lekol prive ki bezwen pey zis R14mil pou 11 legzanmen dan S5.            En sertifika enternasyonal i ouver en laport enorm dan lavi en zenn.  Me sa ki fer mon lapenn se ki souvandfwa bokou sa bann zenn pa pran zot letid o serye.  E malerezman i annan bokou labi.            Mon’n vwar dan lekol Leta kot zanfan in vin avek ki’n an rezistre pou asiz legzanmen i swazir pou pa vini sa zour san okenn rezon valab.  Oubyen i vini zis i  met son non lo papye apre i dormi lo latab ziska ler legzanmen i fini.            Mon pe demande ki Minis Finans i demann avek son  koleg dan Ledikasyon pou etablir en mekanizm obliz bann paran pou met en depozit o mwen 50poursan pou sak sa bann legzanmen ki zot zanfan i asiz.  Si zot pa vini sa zour legzanmen oubyen si zot fail sa depozit pa ganny rann.           Sa Mr Speaker i a fer bann paran e bann zanfan pli responsab anver zot ledikasyon.            Sa i a redwir gaspiyaz resours Leta ki travayer pe kontribye atraver taks.            Mr Speaker, Minis in dir ki 3.5milyon pou ganny depanse dan stationary e 3.3 dan liniform.            Ankor mon vwar ki sa depans ti kapab ganny envite si Minister Ledikasyon ki donn tender sa sekter prive pou fer vini sa bann komodite e vann.           Mr Speaker, 43.2 milyon pe ganny prozekte pou servi pou lwe lakaz pou bann teachers etranze.  Mon propoze ki Minister  i egzekit en plan kot i konstri la serten kantite lakaz tou-le-z-an pou bann teachers etranze parey zot ti fer oparavan.  Lo lonterm, sa Minister ti a ed Gouvernman pou fer en saving 43milyon.  Sa i ava ede annan plis lakaz lo marse pou dimoun lwe e mwens demann i a fer pri lakaz lwe desann.            Mr Speaker, ler mon get lo kote distrik mon distrik mon vwar ki bokou proze ki mon demande avek bann diferan Minister pa’n ganny mete lo sa Bidze.            Depi 2017 ler Prezidan ti vizit     Beau Vallon mon ti fer en demann pou en servis bis Dan Gala.  Me ziska prezan zabitan Dan Gala i bezwen sarye  zot gran tant komisyon plizyer kilomet lo zot latet pou zot rantre se zot.  Menm si i annan en zoli semen koltar ki’n ganny konstri.            Mank volonte lo lapar management SPTC i fer ki zot kontinyelman pe rod leskiz parti leskiz pou pa met en bis lo sa larout.            Mon ti osi demande k i bann flat emergency an tol Dan Gala ki annan plis ki 25an e in tout delapide i ganny rekonstri.            Anvi ki okenn maintenance pa pe ganny fer.  Serten sa bann lakaz i koule  e sa bann dimoun pe kontinyen demande konbyen letan ki lapli pou koul dan zot zorey avan ki Gouvernman i ekout zot.            Mr Speaker fodre fer resorti ankor ki proze rekonstriksyon bann flat ti lo Bidze lannen pase.  Me parey mon’n dir keksoz dan Bidze i zis promes ki pa ganny swiv avek okenn aksyon.  L’Egzekitiv  kontinyelman zwe sourd lo sa pep.  En slipway osi  pou bann peser Mare Anglaise ki osi ti ganny osi proze ki en en proze ki osi mon ti koz avek Prezidan lo la.           I ti dir mon koumsa ki retar lo sa proze pa akseptab.  SFA pa’n fer son louvraz menm si larzan ti’n fini ganny prozekte e donnen par Linyon Eropeen.  Ziska prezan bann peser i ankor pe soufer pe fer monte zot kannot atraver sa     in ganny mete.            Touris konman zabitan pe kontinyelman tonbe lo sa ros  sak fwa zot sorti lo lans pou mont lo semen.  Mon swete ki Lotorite pa esper en lensidan grav arive avan zot taye pou pran aksyon.            San mank respe lo sa akote latab nou pe demande  si Prezidan napa Lotorite lo Egzekitiv set laplas pou sa ankor en lot ki a kapab.            Mr Speaker, pou lerminen mon ti a kontan fer remarke ki tou Seselwa pe espekte vwar zot dan sa Bidze.  Malerezman Misel dan son pti biznes garaz anler dan leo Nouvelle Vallee, pa pou ganny okenn benefis asosye avek logmantasyon  saler anvi ki i pa anploye avek Gouvernman.            Par kont i aste manze dan menm laboutik pare tou dimoun.  Son swe se ki pri marsandiz i desann kot STC.  Me Minis pa’n pran okenn mezir dan sa direksyon.            Pep Seselwa in renouvle zot lapel pou plis ekitabilite dan lafason ki resours pei i ganny partaze.  Pou ki tou dimoun i a ganny en pti bout sa gato.  Pep Seselwa i ankor pe soufer avek pri lavi ki o e bokou promes  ki pa ganny akonpli.  Pep Seselwa i vwar ki fason larzan lepep pe mal ganny servi atraver travay ki Lasanble pe fer  e pep Seselwa i ankoler avek nivo koripsyon dan s a pei.            Atraver zot reprezantan dan Lasanble, zot pe demann L’Egzekitiv pou sekwe zot aret fer malere tourn an ron.  Anmenn solisyon pou problenm ki zot pe fer fas avek.  Sirtou pou bann fanmir ki pe sey fer en bout  ek en lot bout zwenn.  Souvandfwa sours reveni prensipal se selman welfare.            Pou bokou bann zanfan mon le profit sa profite pou demann zot pou pran zot letid o serye.  Reste motive pou ariv pli lwen posib dan lavi.  Annou repran nou pei atraver lokalizasyon bann pozisyon ki  etranze pe okipe pou en meyer demen.  Mersi bokou Mr Speaker.

MR SPEAKER

Mersi Onorab John Hoareau.  Mon ava pas laparol prezan avek Onorab Sylvanne Lemiel.   HON SYLVANNE LEMIELMersi Mr Speaker.  Bonzour Mr Speaker.  Bonzour tou Manm koleg Onorab.  Tou dimoun ki a lekout.

Mr Speaker Prosperite en pei e son pep i depan bokou lo son stabilite politik e ekonomik.  Bidze Nasyonal en pei, i sa zouti primordyal pou kapab enplimant bann priyorite e Polisi Gouvernman an zeneral.

Bidze 2019 ki’n ganny prononse par Minis pou Finans in enn ki ti tre eksplisit e i pe anmenn bokou lespwar.   Sa Bidze i enn ki pe tous tou kous nou popilasyon.  Mon konstate ki konsiderasyon in ganny donnen a bann proze e progranm ki pou amelyor lavi nou bann sitwayen.

Mr Speaker, tou le lannen pep Seselwa i esper sa letan kot Bidze pei pou ganny prononse, pou zot konnen kwa nouvo ki Gouvernman in planifye pou fer dan pei, e kote ki pou annan amelyorasyon pou zot zouir en lavi pli meyer.

Mr Speaker deplizanpli, tou dimoun sorti dan tou kous nou sosyete i annan zot swe oubyen lopinyon lo kote zot krwar Gouvernman i merit met plis larzan e sa i byen.

En Gouvernman responsab i bezwen touzour a lekout son pep e i osi bezwen fer sir ki Bidze ki ganny prepare, i enn ki pou anmenn progresyon e an menm tan kit nou lekonomi stab.

Mr Speaker se egzakteman sa ki mwan mon vwar Bidze 2019 in ganny prezante dan sa Lasanble pe fer.

Mr Speaker, Lopozisyon pou toultan koze, met presyon e pou dir avek Gouvernman ki i kapab donn plis oubyen Bidze pa bon eksetera.  Me sa ki bann piblik la deor i devret konnen, e zot realize se ki Gouvernman i depans dapre en plan.  Serten son bann progranm e proze dan son plan i ganny akonpli dan kour term dan en dele 1an e serten a long term.

Mr Speaker, ozordi pep Seselwa pe viv en lavi pli sofistike e alaoter.  Sa i byen, me pep Seselwa i devret mazinen ki avek sa kalite oter lavi ki zot pe viv, i osi annan son responsabilite ki al avek.  Responsabilite lo kote zot lasante, zot lakour, zot fanmir, zot travay, zot lanvironnman eksetera.  Akoz tousala Mr Speaker, i ede pou fer en endividi konplet.

Letan mon lo sa size responsabilite Mr Speaker, mon pou profite pou tous sa size lasante.  In plis ki ler pou tou Seselwa pran son lasante koman en priyorite.  Aret abiz lo drog, sigaret, lalkol, manze tro gra, disik e lezot ankor.  I enportan ki tou sa ki nou konsonmen i an moderasyon.

Dan en prezantasyon ki Minis pou Lasante ti vin delivre isi dan sa Lasanble tou dernyerman, i ti fer resorti ki i annan anviron 450mil vizit dokter par lannen ki ganny fer par sa pti popilasyon 95mil dimoun ki pe viv Sesel, e sa i vreman tre o Mr Speaker.

Dan Bidze 2019, nou’n antann ki pou annan lentrodiksyon peyman en fre preskripsyon R25 par pasyan ki pou vizit dokter, me sa pou ekskli bann dimoun aze, dimoun ki pe viv avek en dezabilite e osi bann ki annan maladi kronik.  Mon’n fer en sondaz avek enn de zabitan mon distrik pou ganny zot lopinyon lo sa size e mazorite in dir mwan ki sa i byen, e zot menm krwar ki R25 i tro ba, i annan ki’n sizer R50 parey en Manm isi dan nou Lasanble ti deza sizere avan.  Zot in fer resorti ki bokou dimoun i abiz lo sistenm lasante isi Sesel.

Latizann i ganny zete e zot aksepte zis sa konze. Sepandan Mr Speaker, pandan ki serten sa bann swadizan dimoun ki malad i lo konze dokter, laplipar di-tan, serten zot pe abiz lalkol e osi lezot sibstans.

Mr Speaker, Konsonmasyon sigaret i osi en gro problenm lo lasante.  Ler ou regarde, sa dimoun ki pe fimen, e sa lafimen sorti dan sigaret i osi afekte dimoun ki dan son zanmirant.  Sigaret i donn kanser labous e osi kanser poumon.  Mon panse ki avek lenplimantasyon ankor en taks lo sa prodwi, dimoun ki servi li a koup en pe lo son konsonmasyon e zot a kapab fer en pe savings.

Mr Speaker, in plis ki ler pou nou tou pran nou responsabilite e vin pli serye avek nou lasante.

Mr Speaker, plizyer ogmantasyon dan saler travayer ki lo saler minimonm dan servis piblik e osi casual in ganny anonse.  I osi annan plizyer lezot linisyativ e Scheme ki’n ganny anonse pou amelyor saler travayer.  Tou sa se pou met en pti pe plis larzan dan pos Seselwa an 2019.  Sa i byen, me eski sa pou rezourd nou problenm pri lavi ki pe kontinyelman ogmante de zour an zour?  Eski sa pou fer ki travayer dan servis piblik pou vin pli efikas e donn pep Seselwa en pli bon servis?  Eski sa pou fer ki tou Minister e Lazans pou vin pli proactive e delivre pou nou pep?  Mr Speaker, tou sa, i bann kestyon ki mon pe poze e ki nou pou bezwen vey de tre pros.

Ler nou koz lo met plis larzan dan pos travayer, nou’n kapab konstate ki sak fwa en pti larzan an plis i antre dan zot pos, marsan i fer monte pri marsandiz lo letazer.  Nou’n osi vwar ki bann lezot servis esansyel i fer monte pri zot servis.  An se moman ki mon pe koze i annan paran ki annan zanfan dan daycare ki’n fini ganny let pou dir zot ki apartir Zanvye 2019 Peyman daycare pe monte par R300 ou plis.

Sa zafer donn plis larzan e an menm tan pri komodite e servis i monte in vin koman en serk visye.  Mr Speaker, nou pou bezwen kontinyen travay ansanm avek sekter prive pou rod bann linisyativ e mezir ki vize ver fer desann pri lavi e met an aplikasyon.

An se ki konsern servis dan bann Minister e Lazans, mon swete ki la avek ogmantasyon dan saler e osi bann diferan allowances ki pou ganny donnen, revizyon dan bann Scheme ki pou vin an aplikasyon, tou travayer pou dan en fason ou enn lot benefisye.  Mon espere ki sa i a vin koman en motivasyon pou tou travayer e ki servis piblik i  a vin pli efikas.

Mr Speaker, nou’n aprann ki pou annan en ogmantasyon dan sekirite sosyal pou bann pansyoner e osi bann benefis pou bann dimoun ki pe viv avek en dezabilite.  Zis pou note, nou bann dimoun aze lontan ti pe esper en ogmantasyon.  Apre ki mon’n koz avek serten sa bann dimoun, zot in fer resorti ki zot vreman apresye me zot in dir ki i pa ase.  Serten in menm sizere ki zot ti merit pe ganny omwen R500.  Zot in fer resorti ki lavi i ser.  Pran legzanp pri zot ti donn legzanp pampers sirtou bann vye dimoun ki malad.  I dir pran legzanp pou pampers pou adilt, menm si VAT in ganny tire lo sa lo pampers son pri pa’n vreman desann.  Sa bann dimoun dan sa kategori zot vwar ki sa i tre o.  Laplipar di-tan nou vwar ki bann dimoun dezabilite ki lo lili zot pe servi en kantite sa pampers e mazorite sa pti larzan i ganny zis depanse ladan.  E sa bann dimoun aze in menm dir ki pou zot laz, zot sipoze manz byen, me zot vwar li vreman dir pou zot kapab aste sa bann komodite ki ganny konsidere koman an bonn sante oubyen healthy pou zot. Aakoz zot pri isa bann komodite i artisifisyelman o.

Ler nou get Ledikasyon Mr Speaker i en sekter tre enportan e sa lannen, Gouvernman in fer sir i ganny plis larzan dan Bidze.  Mon kontan tann bann diferan proze ki pou ganny enplimante avek parti sa larzan tel ki reabilitasyon lekol Anse Royale primer, lekol Segonder, e osi renovasyon lo Youth Hostel.  Mon espere ki sa Minister i a rekrit plis mendev pou fer sir ki sa bann proze i materyalize e i ganny fer byen.  Dan lepase in annan proze ki’n ganny retar oubyen pa ganny enplimante akoz mank mendev dan zot Seksyon Proze.

Monn osi soulaze kan monn tande ki plis zefor ankor pou ganny fer pou fer sir ki tou lekol i annan internet oubyen WiFi. Sa in toultan en size konsern par bann lekol kot zot in toultan konplent ki zot ganny internet par rafal oubyen kot internet i vreman dousman.  Avek sa logmantasyon dan lakantite bandwidth mon mazinen sa problenm i a rezourd.

Mon ti a osi kontan lans en lapel avek sa Minister ki fotespere avek tou sa lenvestisman nou ganny rezilta pli meyer sorti kot nou bann zanfan.

Mr Speaker, ler mon lo size ledikasyon, mon oule osi aport mon sipor pou sa logmantasyon dan stipend ki bann etidyan ki Liniversite Sesel e aletranze pou gannyen.   Sa i a ed zot pou pli byen zer zot depans konpare avek difikilte ki zot in gannyen pandan sa bann dernyen lannen.  Mon ti a kontan lans en lapel sirtou avek etidyan ki pe bezwen extend zot training akoz move performans, pran zot letid pli serye e met plis zefor pou zot pass tou size pou ki zot pa bezwen prolonz zot letid pou repet bann modules akoz sa i annan en lenpak lo kote depans an plis ki Gouvernman i bezwen fer sirtou lo stipend.

Mr Speaker, Gouvernman in prozekte pou fer bokou proze dan tou distrik an 2019.  Anse Royale pa en leksepsyon.  Nou pou benefisye avek bokou proze tel ki, konstriksyon en nouvo lakres, nou pou vwar komansman konstriksyon stasyon tenny dife, e mon espere ki an 2019 – wi sa stasyon tenny dife i ganny fer e i a kapab ganny konplete  a son letan ki’n ganny dir i pou konplete.  Out patient clinic, osi mon espere ki i ganny konmanse sa lannen ki i vini i annan R2 milyon dan proze.

Wi Mr Speaker nou’n ganny garanti  ki sa Outpatient clinic pou konmans ganny travay lo la lannen prosen e mwan konman MNA elekte sa distrik mon pou fer sir ki tou sa bann proze …

 

(APPLAUSE)

 

HON SYLVANNE LEMIEL

… tel ki son stasyon tenny dife, son Outpatient clinic, e tou bann lezot in trennen depi lannen pase sa bann proze lannen pase i BEZWEN ganny fer !

 

(APPLAUSE)

 

HON SYLVANNE LEMIEL

Nou pou osi vwar lagrandisman semen Mont Plaisir, konstriksyon lezot nouvo semen segonder, bann pti proze kominoter e osi, anba sa progranm subsidy 3000 lakaz ki en nouvo linisyativ Gouvernman, (les mwan koze Onorab Larue – ou’n koze ou !)  Anse Royale pou benefisye avek 104 lakaz 3 lasanm e 56 lakaz 2 lasanm.  Sa bann lakaz  pou ganny konstri dan diferan … (ekout mwan ou ganny lenformasyon) tel ki Pointe O Sel Leo, Remiz faz 2 e osi faz 2 ex-Sacos.  Mon espere, ki sa bann Minister ki pou enplimant sa bann proze, zot fer laranzman pou rekrit plis travayer, pou ki lenplimantasyon sa bann proze i ganny fer byen e ki tou sa bann proze i a fini dan son dele letan ki’n ganny planifye.

Parkont Mr Speaker, mon oule lans en lapel avek Minister ki responsab pou Litilizasyon Later pou entansifye travay lo kote met bann lenfrastriktir neseser lo later ki’n ganny demarke Fairyland pou land bank e ki alokasyon i ganny fer avek bann dimoun ki lo lalis espere.

Mr Speaker, Lagrikiltir i en sekter ki nou isi dan sa Lasanble nou’n debat bokou lo la.  Nou’n anmenn bokou propozisyon e ozordi mon rekonforte pou vwar ki Gouvernman in ekoute.  E Bidze 2019 pe fer provizyon pou donn Sekter Lagrikiltir en sonm R115.9milyon.

Mon espere ki sa Plan Konpreansif ki Minis pou lagrikiltir ti vin prezante avek nou isi dan sa Lasanble i a ganny realize e ki byento piblik Seselwa i a kapab komans ganny fri, legim, lavyann lokal sorti lo bann laferm partou dan Sesel a en pri tre rezonnab.

Mr Speaker, mon ti a osi kontan met lanfaz lo kote senplifye bann prosedir, ki en fermye i bezwen fer pou ganny akse avek loan e lezot lasistans neseser pou fer ki zot pa gaspiy letan ler zot al fer bann tel tranzaksyon.

Pou konklir Mr Speaker, mon konvenki ki Bidze 2019 pou anmenn plis progre pou nou pei.  I montre ki anba leadership Msye Danny Faure nou pei i stab e bokou plis devlopman i espekte.  Nou bezwen kontinyen travay ‘ansanm’ pou ki nou sitwayen i benefisye ankor plis.

Sesel pe bouze, in annan bokou devlopman sa ki pa vwar i pe fer krwar Mr Speaker.  Wi, i annan problenm, nou bezwen rod solisyon ‘ANSANM.’  Anba direksyon Prezidan Danny Faure, Sesel pou arive lo sa SOME.  Se zis anba son direksyon ki sa pou arive. Prezidan, mon demann ou pou kontinyen rod diferan fason posib pou rod meyer solisyon pou rezourd sa bann problenm ki pe ravaz nou pti Pei Sesel.  Mon remersye ou Mr Speaker.

 

(APPLAUSE) 

MR SPEAKER

Mersi Onorab Sylvanne Lemiel.  Bon nou ava pran en Break e nou ava retournen 11.10.

(BREAK) 

MR SPEAKER

Bon nou ava kontinyen nou travay.  Mon annan Onorab Clive Roucou ki pou swiv par Onorab Egbert Aglae.  Onorab Roucou.

 

HON CLIVE ROUCOU

Mersi Mr Speaker.  Bonzour Mr Speaker.  Bonzour Minis avek ou, ou delegasyon.  Bonzour tou bann koleg Onorab.  Bonzour tou dimoun ki a lekout dan lakour e en pli gran bonzour bann zabitan Plaisance.

Mr Speaker mon pe konmans mon entervansyon konman Manm Elekte pou distrik Plaisance.  Mwan konman Manm Elekte pou distrik Plaisance ki form parti sa 15 lo 10 lo sa kote LDS, mon krwar nou ki dan mazorite e nou ki devret pran laglwar konman Manm Elekte dan sa Lasanble.

Mr Speaker mon’n kontan entervansyon Onorab Lemiel kot Onorab Lemiel in met lanfaz lo new Outpatient clinic Anse Royale.

Mr Speaker mon ti a kontan Onorab Lemiel ti ava dir mwan e sa Lasanble, si i pou konmans travay lannen 2019 – ki in fer pandan sa 2an ki in ete?

Mr Speaker pou mwan konmanse, mon’n ekout tou bann entervenan lo ladres Bidze prezante par Minis Loustau-Lalanne.

Mr Speaker mon’n kapab konstate lekel ki annan sa pep a ker.  Lekel ki annan en vizyon pour Sesel? Lekel ki anvi en meyer lavi pour nou pep Seselwa?  Se pa lot ki sa tim ki lo sa kote latab ase tim LDS.

Mr Speaker parkont mon ti a demann Onorab De Commarmond pou fer en pti legzanmen konsyans.  An traver ou Mr Speaker ler i koz lo bann ‘’profet de valer’’ oubyen bann ‘’fo profet’’ ler zot koz lo ‘’move laron’’ Mr Speaker.  Onorab De Commarmond atraver ou i devret fer en legzanmen konsyans.

Mr Speaker pou kontinyen nou kote LDS nou vin avek bann pwen konstriktiv bann pwen ki nou anvi sa ii meyer pou nou pep nou, nou pa vin koz lo ‘’divan vann swet!’’ Nou, nou pa vin koz lo ‘’kalite reken!’’ E nou, nou pa vin koz lo ni lo ‘’korsol,’’ ni lo ’’zavoka!’’  Nou koz lo sa ki meyer pou nou pep

        Mr Speaker lepep Seselwa pe get zot e mon asire ki lepep Seselwa i regret ler i get sa bann kalite speech – sa bann kalite lanbarasman ki bann Manm lo kote Parti Lepep in met zot ladan.

Mr Speaker pour mwan retourn lo sa ki pli enportan lo deba, se ladres Minis Loustau-Lalanne.  Mr Speaker sa Bidze sa ladres ki’n al pres pou plis -apepre 3 erdtan in avek en kantite mo, me san gran keksoz, pozitiv e konkret ki ava en lenpak imedyat e efektiv lo tou kous popilasyon, espesyalman bann zabitan Plaisance.

        Apre ki mon’n koz avek mon bann zabitan, zot pa konvenki ki mannyer zot lavi pou ganny amelyore dan lannen 2019.  La mon mazin Mrs Estaniella – mon mazin Mrs Ivana, ki de dimoun aze dan mon distrik.  De dimoun aze san mon distrik.  Ki avek sa R200 zot pe sey mazinen ki mannyer zot lavi pou ganny amelyore.

Prenon kont ki zot devret manz byen pou zot larz prenon kont pou zot devret bwar byen pou zot larz.  Alors sa R200 pa ni fer zot nanryen.  Sa i egzakteman ki zot in dir mwan.

Mr Speaker sa Bidze pa’n vin avek bann pozisyon e provizyon kler, vize lo ki mannyer lavi pep Seselwa pour amelyore.  La ki nou pros pour antre dan Desanm e tre byento lannen 2019 lepep Seselwa i ankor war zot dan sonm e dan en nyaz.

Mr Speaker mon konpar sa Bidze avek koman en lakaz ki tou lalimyer i on. Me selman napa personn ladan i annan.  zis promes, promes e plis promes ankor

Lannen pase Mr Speaker, ti menm zafer ti annan gran, gran promes epi bann promes pa’n zanmen materyalize.  lo nivo distrik e menm lo nivo Nasyonal, bann proze pa’n marse.  Alor nou ava dakor ki i annan en dezord dan egzekitif, ou a krwar napa okenn kominikasyon ant Msye Faure Minis e menm Leader of Government Business – napa, napa e napa.  Msye Faure ti menm koz lo tinel – mon ti ava ekspekte ki Minis ti ava met keksoz an relasyon avek sa tinel.  Kantmenm pri bann masin ki nou ava konnen ki pour komans dril sa bann ros.

Mon krwar ki Minis Loustau-Lalanne i konnen tousala ti zis bann white elephant, oubyen gran rev ki Msye Faure ti ladan dan en gran sonmey ler i ti pe mazinen pou li fer tinel.

Dezyenmman bann privatizasyon SEPEC, la sa lannen Minis i dir pa pou privatize.  Mon demande lekel ki ansarz?

        Mr Speaker, lo nivo distrik, mon ti ava kontan demann Minis lo nou bann zabitan Plaisance kote zot sitye? Mon bann frer ek ser Plaisance ankor pe esper zot 24 lakaz, ki ni premye ker ankor komite.     Lenfrastriktir dan ex-Murray anler Copolia ankor i zis en lot rev.  Family flat pou lafanmir Kate ki menm Prezidan Faure ti vizite e i ti annan en promes parey labitid ‘’promes’’ e ‘’promes’’ ziska ozordi napa nanryen.  Zot pe zis fer dimoun vir an ron.

Mr Speaker mon demann mon lekor si vre sa gouvernman parti lepep i annan en plan e si vre zot serye?  Alors mon pe fer sa demann silvouple set la plas i kapab.  Pou kontinyen Mr Speaker, sa Bidze i ganny mezire zis Mardi pase dan Nouvel 8er.  Ler ti interview detrwa dimoun apre ki Minis Loustau-Lalanne ti fer son prezantasyon.

Mr Speaker sa detrwa dimoun ki ti ganny interview ti pe rod en keksoz efektiv e imedyat.  Sa msye ki en planter anler Maldive ti pe ti pe rod delo pou ariv lo son laferm, ki pa ankor gannyen.  Me ti en promes.  Sa madanm ki travay avek Cleaners Corporative pe rod plis larzan dan son pos, pour li sonny zanfan e sonny son fanmir. Ankor tousala i bann keksoz mezirab ki lepep Seselwa i anvi.

Mr Speaker dan son ladres Minis pa’n dir nanryen i pa’n dir nanryen lo pri lavi, i pa’n donn okenn solisyon pou mon bann frer ek ser ki transpirasyon pe tas zot figir an travayan pour sey fer de bout zwenn.  Me ki nou vwar plis taks lo lavyann poul ek pork san ki nou bann fermye Sesel i kapab prodwir ase pou nou soutenir nou pep.

Mr Speaker tousala pa’n ganny dir dan Bidze.  Mr Speaker aprezan mon anvi eksplor detrwa detay dan Bidze li menm li ankor.  Mr Speaker me selman avan mon konmanse mon anvi dir mon dezapwentman ler mon’n tann Minis donn laglwar pe glorifye agrandisman ki lalkol ek sigaret pe fer.  Tousala i bann keksoz ki pa pe fer nou pep dibyen.  Alors i regretan.

Pou kontinyen Mr Speaker mon pran Minister Lasante en Bidze plis ki 1bilyon pou

pou lannen 2019 e alokasyon 460.8milyon ki reprezant 45poursan depans total Sekter Lasante e ‘’goods and services’’

Me Mr Speaker ki nou vwar en alokasyon ki pa byen.  Par egzanp Mr Speaker mon dezapwente ler mon vwar 5.3 milyon pou ‘’training of professional.’’  Me yet again mon vwar pou sekirite i fer

27.6 milyon.  Alors mon ti ava demann Minis dir nou rasyonnal dan sa alokasyon. mon ti ava ekspekte le kontrer.

Mr Speaker mon kontinyen lo Minister Lasante menm.  Ler mon get hemodialysis ki 55 milyon me ler nou mazin tou sa bann magouy ki’n pase avek AMSA avek Minister Lasante li menm kote sa i rantre?   E la mon pe mazin mon bann frer ek ser ki lo dyaliz ki pe rod zot drwa pou zot kontiny zot dyaliz kot Renasense, pou tenir Minis ti a donn ou en leklersisman kote sa kote zot pou rantre ladan.

Mr Speaker ler mon get ‘’renting of accommodation’’ for expatriate health professional i 27.6 milyon.  Mr Speaker ler mon get ‘’procurement of laboratory supply’’ tou lede azout ansanm i tonm apepre parey.  So mon anvi Minis i eklersi nou kwa ki pli enportan si vre lozman expatriate oubyen lenportans ki devret ganny mete lo ki mannyer nou pou amelyor nou sistenm lasante.

Mr Speaker pou kontinyen avek Minister Lasante mon 3.3 milyon pour lanbilans, Minis mon ti a kontan mon ti ava apresye si ou ti a donn nou en leklersisman lo sa zafer lanbilans.  Konbyen lanbilans nou pou gannyen avek sa oli sa 10 lanbilans ki nou ti swadizan pou gannyen avek Gouvernman L’Inde ki menm Minis Jean-Paul Adam ti dir nou isi dan Lasanble.

Mr Speaker pou kontinyen mon vwar konstriksyon pou La Digue Logan Hospital.  Mr Speaker gran mersi nou dan LDS nou kontinyen met en lalimyer lo La Digue.  Akoz lalimyer lo La Digue in tennyen.  Depi ler Onorab ‘’Tep’’ ziska ozordi zanmen – napa nanryen ki’n arive.  Granmersi ‘nou’ dan LDS nou kontinyen kler La Digue.

Alors mon pe demann dimoun La Digue, Sanmdi demen desann vin montre zot dezapwentman! Montre zot dezapwentman avek sa bann MNA Parti Lepep. O piblik.

Mr Speaker en lot pwen ki’n touse dan Bidze se taks lo disik.  Mr Speaker mwan konman en profesyonnel lasante, mon konpran tre byen risk obésité ek dyabet Mr Speaker, me mon ti a kontan Minis e tou bann ki konsernen osi i eksplik en pti git benefis disik lo lasante.

Disik i toultan zis ganny blanmen pou en kantite problenm Lasante.  Me sa pa aktyalite.  Me parkont – me parkont mon konnen wi disik i annan son lefe advers lo lasante.

Mr Speaker pou Minis mon ti a demann Minis ki ti ava annan en keksoz konpreansiv avek tou bann Departman konsernen zis met taks lo bann labwason disik pa pou sanz labitid e latitid dimoun.  Latitid ek labitid i ganny sanze avek ledikasyon.  Mwan konman en edikater mon konnen sa.  Ledikasyon se sel fason pou sanz labitid ek latitid dimoun.

E Minis dan ou repons ou a dir nou ki ou arive avek sa bann taks ki ou pou anmase lo sa bann labwason ki annan disik ladan.

        Mr Speaker ankor mon ti a kontan dan Bidze Minis pa’n koz ditou lo sa problenm met sa problenm isi Sesel.  Lo sa problenm drog ki en kantite nou bann zonm zenn zonm zenn fanm pe pran methadone. 

Mon ti a demann Minis kote e ki mannyer sa Bidze  pou kapab dres en tel sityasyon.  Eski nou pou zis kontinyen donn methadone – donn methadone zis konman en fason maintenance me napa en letan ki pou exit sa progranm? Alors Minis mon ti a kontan ou ti ava diriz nou ankor lo la.

Mr Speaker mon realize – mon realize nou pei pa pe al an avan.  Nou pei pe tourn an aryer.  Alors nou bezwen zis en sel group dimoun ki kapab fer sa pei al an avan.  Se zis LDS.

        Alors pou konklir Mr Speaker po konklir semenn pase – I mean yer mon’n tann Onorab Vidot pe rod nou progranm.  ‘Oli nou plan?’ Mon anvi dir li wi nou dan LDS nou annan plan!  Nou annan plan! Nou plan pou marse ler nou vin o pouvwar.

Me selman mon anvi dir avek Onorab Ramkalawan ler zot pe konmans rod nou plan fer sir nou plan i safe akoz nou konnen ler zot ‘kitenge’ ki zot fer!

 

(Interruption)

 

HON CLIVE ROUCOU

Nou konnen nou konnen bann ki met safari suit ‘’kitenge’’ i pli danzere ki bann ki met gro zip!

 

(laughter)

 

HON CLIVE ROUCOU

Onorab Ramkalawan fer sir avek nou bann plan, akoz nou konnen ki pou arive avek.

Alors Lepep Seselwa ziz Parti Lepep e Ladministrasyon Msye Faure par zot aksyon.  Tan ka mwan ‘’Plito lanmor ki lesklavaz!’’  Mon pa pou ZANMEN les tonbe!  Mersi Mr Speaker.

 

(APPLAUSE)

 

MR SPEAKER

Mersi Onorab Clive Roucou mon a pas laparol avek Onorab Egbert Aglae.

 

HON EGBERT AGLAEMersi Mr Speaker.  Bonzour Minis, tou koleg Onorab, pep Seselwa espesyalman zabitan Port Glaud ki pe ekoute.

Mr Speaker mon oule remersi Minis ek son lekip dan preparasyon sa Bidze

Mr Speaker sa Sesel ki nou ti konnen 40an pase i nepli parey e sa Sesel ki nou ti konnen 10an pase i nepli sa Sesel.  Avek bokou determinasyon e sakrifis sa pep anba leadership nou bann leaders presedan, Sesel in sirmont bokou defi.  Sa presipis ki nou ti pe al tonm ladan, sa ki ti lo volan ti saye pou ki sa pep pa perdi son sours lavi.  Kot ser sang ozordi in vin en fraz lepase e ozordi nou pei i bezwen lager ek obésité.

Mr Speaker apre 40an pase Seselwa i fyer son lidantite, i ganny respe lo kominote enternasyonal e nou’n vin en model egzanpler dan la rezyon, nou premye dan larezyon lo lendeks Devlopman Imen e osi lo nivo L’Afique.

Mr Speaker sa lekonomi ki ti pe fail 10an pase ozordi in permit nou atraver reform ekonomik attend en stati high income countries si ou en failed state ou pa attend sa oter stati.

Mr Speaker, anmezir ki krwasans ekonomik pei i ogmante 3poursan dapre prediksyon sa i kree lespas fiskal pou Gouvernman distribye a proporsyon sa krwasans ver son pep.

Byensir tou demann a kapab ganny akonpli anba en sel Bidze.  E se sa ki sa bidze 2019 plis ki 8bilyon pe anmennen ver sa pep.  En Gouvernman responsab i war li son responsabilite kot i kapab aforsi resours, i aforsi pou byennet son pep.

Mr Speaker en lekspektasyon tipik kan i annan lanons Bidze, tou travayer i atantiv e pe espere vwar kwa ki i annan bon pou zot ladan.  Pe enport ki ou larelizyon ou afilyasyon politik sa Gouvernman i bezwen get tou travayer parey e sa in touzour en model lepase

Pli gran azitasyon kan i annan lanons Bidze pou en travayer, se en antisipasyon logmantasyon dan saler ouswa rediksyon dan taks ouswa dan lezot benefis finansyel enportan pou rekonnet.  I enportan pou rekonnet Mr Speaker ki depi 1977, Seselwa pe konn logmantasyon saler anba sa Gouvernman.

Mr Speaker ozordi saler debwaz in ankor enn fwa ogmante pou ariv 5,250, e osi pou sekirite sosyal.  In bezwen sorti kek par  pou ariv sa sif i pa’n ariv la par azar.  Amezir ki lavi standar lavi sa pep i monte, ozordi i 16mil Dolar par tet zabitan.  Sa i montre siny en pei progrese avek en pli o nivo standar lavi.

Mr Speaker sa i montre ou ki sa pep Seselwa pou bezwen plis larzan dan zot pos mentenir sa o standar lavi.  Sa ki mon’n aprann ek mon granmoun se ki napa baton mazik pou fer sa arive parey serten i le fer nou krwar me zis leadership ki kapab fer  travay diri pou fer ou attend sa.

Mr Speaker, i annan diferan fason fer larzan dan sa pei, e mon salye tou travayer e biznesmenn ki pe fer sa dan en fason onnet e mon enplor bann ki pe asize pou leve sezi loportinite, akoz demen si ou war ou prosen in avanse dan son lavi pa kritik ouswa fer kalonmni lo son lavi, akoz li in travay e ou ou’n deside fer lapares.

Mr Speaker, Tenm Bidze 2019 i ‘’Stabilite e Progresyon’’.  Pou en pei stab i depan lo diferan fakter; fakter politik kot nou bezwen annan en klima politik toleran; kalm, kot dwa e lopinyon sak Seselwa i ganny respekte a tou nivo e kot prosesis demokrasi i ganny respekte san okenn laenn ou okenn form vanzans si non destabilize sa pep pou ganny arive.

Mr Speaker, fodre ki nou pa les nou ganny trennen dan  plan negativ oubyen lanbisyon personnel.  Mr Speaker en rezilta destabilizasyon i en menas direk lo nou lekonomi e en menas direk lo sa pep.  Si nou koz lo lot parti sa tenm.  Mr Speaker permet mwan pou koz lo se ‘’progresyon.’’  Progresyon se lavansman en pei pli devan dan nenport ki domenn ki ou ladan ou ki ou pe fer.  En travayer  ler i dan sa lanplwa i bezwen bouz devan oubyen war li pli devan apre serten lannen ki in dan son lanplwa, si sa pann arive i vedir ou pa’n fer progresyon, e i pa akseptab si en travayer ki’n la plis ki 5an ou 10an si in devoue i merit war li bouz pli devan unless in deside asize lo en bwat karton dan son travay e lezot travay.

Mr Speaker progre en zafer lavi toulezour li menn par egzanp ler ou envestir dan ou lakour ouswa dan ou fanmir, dan ou karyer avek sel bi zot bouz pli devan.

Mr Speaker se avek sa ki mon welcome sa long service allowance, sa i a ede retenir travayer dan lanplwa, donn zot plis motivasyon dan li menm sa lanvi pou toulezour leve pou al travay parey dan Bidze in prononse.  Ler ou ava annan ou 5 a 10an ou a ganny ou R500 lo ou allowance.  10 a 15an ou pou benefisye R1000, 15 a 25an R1500, 20 a 25an R2000, 25 a 30an 2,500, 30 a 35an 3mil, e si ou annan plis ki 35 a 40an 3, 500 e 40an e plis R4,000.  Sa i ken motivasyon ki’n ganny mete dan sa Bidze.

Mr Speaker avan yer en komemorasyon 40an laniverser Labank Santral i annan en msye ki li in la plis ki 35an e la i pe benefisye.  E in witness tou sa progresyon dan transformasyon Labank Santral i vedir ki pandan sa 40an Sesel in transformen, ki le kontrer ki sa ki lot kote latab i le fer nou panse.

Mr Speaker progresyon osi i enportan pou sekter prive koman enn bann moter pilye nou lekonomi.  Ler ou’n konmans ptipti ou bezwen grandi, laprev i la devan nou ozordi, si ozordi ou war i annan presyon lo sa Gouvernman pou plis later pou pti e mwayen biznes dapre sif plis ki 700 aplikan lo ‘waiting ‘vedir i annan progresyon.

Mr Speaker ler ou koz avek bann entrepreneur zot dir ou ki landrwa i tro pti zot bezwen expand, i vedir en sir progresyon me pa siny en failed state.  E avek sa mon demann Gouvernman pou bouz vitman lo sa bann proze konblaz swivan ki Prezidan Faure ti anonse.

Mr speaker egalman i devwar sa Gouvernman pou asire ki klima, regilasyon e policy monneter i reste relevans pou asir progresyon dan sa bann sekter.  I bezwen annan plis fairness e en balans kot sa pti Seselwa i kapab ganny akse ek kredi menm parey sa pli gro lakonpannyen.  Se sa ki bann pti biznes i swete vwar.

Mr Speaker sekter prive pe demande ki Gouvernman i elimin serten birokrasi ki pe met retar devlopman e zot anvi war rezilta desizyon ase vit akoz pou zot’ time is money.’

Mr Speaker apre ladres Bidze monn fer li mon devwar konsilte en group mon zabitan pou ganny zot lopinyon lo serten lanons dan sa Bidze.

Premyerman lo size en prescription fee R25.  Zot in vwar sa akseptab e i annan ki’n dir R25 i tro bonmarse akoz bokou i pare pou peye pou al kot dokter prive plis ki R600 a R800.

E la Mr Speaker i annan osi ki’n fer resorti ki ler pou annan lanmizman nou pare pou pey bann gro tiket R200, R300, R400 pou zot ale.  Me zis zot lasante zot pa kapab pey pou R25 – savedir zot mank serten responsabilite.

Mr Speaker i annan osi ki krwar ki sa i a osi anpese ki i annan plis labi lo sistenm lasante.  Kot sa ‘Monday morning crisis’ anba klinik i a annan en kontrol avek.  I annan lezot zabitan ki krwar ki menm sa R25 pou still ankor annan labi akoz i annan ki pou zis pey zot R25 pou ganny 2 a 3 zour sick leave.

Mr Speaker i annan ki al pli lwen ankor ki dir si ou ganny sick leave ou merit ganny charge en extra fee, tousala i propozisyon fer par serten mon bann zabitan Port Glaud.

Mr Speaker pou en pei 94 mil zabitan avek e total plis ki R400mil konsiltasyon ki vedir ki tou Seselwa i al plis ki 4 fwa kot dokter par lannen.  Pou mwan sa i egal swa en labi ouswa en pep ki pa an bonn sante e Gouvernman i bezwen fer son devwar pran bann tel mezir e osi kontinyen edik pou sa pep kot i konsern son lasante.

Mr Speaker lasante sa pep i reste responsabilite sak endividi.   Si ou deside abiz lalkol ek sigaret pour annan konsekans, a longer di-tan lo ou lasante.  Menm parey si ou pa manz sa ki fer ou reste an bonn sante ou riske sibir konsekans maladi.

Mr Speaker, ozordi sa Bidze Minister Lasante in ariv plis ki R1bilyon sa i reprezant plis ki 12poursan sa Bidze 2019.

Ankor enn fwa i nou responsabilite pou nou lasante me i devwar sa Gouvernman pou met mezir an plas pou edike e preserve.  En senp matematik R25 par 400 mil konsiltasyon i vedir R10 milyon par lannen, ki Gouvernman ti kapab depanse lo lezot lekipman lekip-man etandonnen nou pe koz bann sant spesyalize ki nou bezwen a lavenir.

Mr Speaker mon pou osi met blanm lo bann Department konsernen ki pa pe anforsi zot manda regilater pou detekte e anpese ki bann prodwir ki pa bon pou lasante pa kontinyen ante dan sa pei ouswa ganny kontinyen prodwi lokalman si nou serye e pran bann tel mezir la nou a dir nou konsernen avek lasante sa pep o pli profon.

Mr Speaker tan ki nou ferm lizye e ouswa soutir dalon ouswa pran lanvlop anba latab sa bann tel sityasyon pou reste parey e i devwar nou tou pou anpes sa arive

Mr Speaker, en lot topik diskisyon ki in al en pe pli lwen se sa taks sa taks lo disik.  E dan nouvel Minister Lasante i eksplik rezon det e bokou pei devlope pe enplimante.  So far fer 26 pei mondyal in entrodwir entel taks e sa lannen li menm 5 pei in entrodwir entel tax tel ki Ireland, Angleterre, Sud Afrique, e la Sesel.  Zot in fer sa Mr Speaker avek bi annan en popilasyon pli an bonn sante.  Me i reste en responsabilite parey mon’n dir pou sak endividi kot i konsern son lasante.

Mr Speaker nou konsernen avek rapidite devlopman e pouvwar depans konsonmater.  Par-ler i anmenn bann move desizyon lo kwa ki nou konsonmen.  I byen ki pli ou annan varyete ou annan plis swa me eski nou pe fer sa bann bon swa?

Mr Speaker, mon retourn lo lesansyel sa sugar tax.  I annan zabitan ki krwar ki serten group mwen fortinen pour ganny afekte sirtou bann single parent kot en pake juice ki si son disik ki par lao 5 gram par 100 mililit i pou tro ser pour li aste demen, e avek 3 ou 4 zanfan kot i ti pe donn 3 pake juice ki kout R7, ki fer li R21 par zour la avek logmantasyon apepre R2 lo sak pake juice i pou tonm R9e si ou annan 3 zanfan i pe fer ou R27 par zour.  E ler ou fer li par 5 zour dan lasemenn ki al lekol cou fwa li par 4 dan en mwan i pou kout ou R540 par mwan.  Kan avan ti pou kout li zis R420 si sa juice ti ankor R7 vedir en logmantasyon 120 roupi e mazinen saler debaz in mont par zis R200 e 5poursan.

Mr Speaker, de la mon zabitan i dir fer serten azisteman dan serten sa bann kategori juice 100poursan si fodre exempt zot pou le moman annou fer li akoz nou bezwen fer letid pli profon lo sa lenpak kot i konsern sa sugar tax.  Me  egalman zot par kont sa taks lo lezot labwason.

E la Mr Speaker mon pe demann Minis Finans, si i pou posib tenir en kou lo sa taks lo sa bann juice 100poursan.

Mr Speaker, mon osi fer li mon devwar pou get konteni disik bann lezot juice sirtou bann ki dir ‘’NO SUGAR ADDED’’ e mon’n dekouver ki dan sa 100ML i annan 7 a 10 granm disik.

E mon’n fer en analiz pli profon mon dir alor si en zanfan pe konsonm li en pake juice 10 granm par zour i vedir 10 granm lo 6 zour    ziska Sanmdi i pou fer 60 granm  par semen fwa li par 4 semen I fer 240 granm ; vedir  preski en kar en kilo disik dan son lekor, sa zanfan dan en mwan.  san kont sa bann gato, ice pop, ice cake ki i pou konsonmen.  Alors eski nou pou kontinyen avek sa trend?

Mr Speaker, mon senserman krwar  ki sa larzan taks ki pou anmase atraver sa sugar tax i merit al ver bann progranm ledikasyon fizik pou sa zanfan, devlop e finans bann progranm ki ankouraz plis aktivite fizik dan lekol, e apre ler lekol, dan landrwa travay, dan lakominote  e kre en unit spesyal ki a fer sir ki sa pep i aktiv e dedye bann diferan lazournen ki a ankouraz pep pou fer legzersis.

Mr Speaker, en lot size enportan ki mon dyalog lo la avek mon bann zabitan se kou lavi li menn ki menm si i annan logmantasyon lo saler debaz pou zot, i pa ase e zot konpran poudir si ou donn en logmantasyon saler agresiv sa pou kre lenflasyon.  E osi lefe negativ lo sekter prive akoz i pou bezwen swa pous serten travayer ouswa ogmant pri son prodwi e servis.  E sa li menn i direkteman ogmant kou lavi, ki nou menm nou dan sa Lasanble a diferan repriz pe debat lo la.

Alors Mr Speaker ki solisyon pour fer desann kou lavi, i vre ki bann fakter eksteryer nou pa pou kapab kontrole pou napa kontrol lo la.  I annan ki pe dir retourn pri kontrol en keksoz ki bokou lot kote latab ti kont dan letan Msye Rene, e la ozordi serten siporter Lopozisyon pe dir fodre met pri kontrol.

Mr Speaker me nou tou nou konnen kot nou’n arive ek bann lagreman WTO, COMESA, eksetera i pa fasil ditou  i pou difisil anvi nou dan en marse lib, liberalizasyon, mes chere amis i vin avek son kou e nou bezwen fer atansyon ki direksyon parfwa nou bann politisyen i profetize.

Mr Speaker, kou lavi pa depan antyerman lo Gouvernman me lo tou sekter.  Me li Gouvernman i bezwen azir koman sa watchdog, pou fer sir ki napa labi dan pricing depi kot sa marsandiz i sorti ziska ki ariv dan sa letazer.  .

Mr Speaker ozordi tanzantan nou tann nonm kartel. Alors ki mezir Gouvernman pe pran a traver lenstitisyon ki sipoze regilariz e polisi sa bann sekter ki pe profit lo lasyer sa pep pou fer gro, gro profi sa okenn pitye..  Fodre zot sorti dan sa zone konfor dan sa aircon al get en kou dan sa bann retail sectors ki pe pase, e met en lord kot labi pe ganny pratike. Se sa ki sa pep pe espere vwar.

Mr Speaker, en sekter enportan pou pei i Sekter Lagrikiltir plis ki 115 milyon pe al ver lagrikiltir me pou mwan i pa ase nou ankor tre lwen avek rekomandasyon 5poursan  Nasyon Ini. 

Mr Speaker tan ki plis resours pa al ver sa sekter pa espekte gran amelyorasyon me mon konvenki ki nou lo bon direksyon avek sa Plan Konpreansif lagrikiltir e mon pou kontinyen debat pou mon bann fermye sirtou Port Glaud e la sa taks lo lavyann enporte  ya donn plis proteksyon pou nou fermye Seselwa

Gouvernman pe donn zot en boost avek konsesyon e osi proteksyon kont konpetisyon dan enportasyon lavyann enporte.

Mr Speaker, sa i vedir ki wi kou poul ek pork enporte pou annan en pti logmantasyon me pe fer lespas pou fermye Seselwa ogmant zot prodiksyon e asir en market pou zot epanouir.  E se sa ki lot kote latab in touzour prese.

Eski prezan lo sa taks lo lenportasyon pe sanz zot nide lo proteksyon nou fermye Seselwa.  Fermye Port Glaud pe note.

Mr Speaker, en lot eleman positive dan sa Bidze se kot Gouvernman pe al ed bann fermye avek bann shade house en konponan tre enportan pou prodiksyon akoz sanzman klima, Eski en Gouvernman mank planifikasyon ti pou al dan sa direksyon?

Mr Speaker kot I konsern lozman, 24/24/24 pe byen progrese e swivan lanons bann loan ek Grant avek lenn pour plis konstriksyon lakaz e maintenance  dan bann housing estate pou asir en lakaz konvenab e lespwar  pou sa ki pe esper son lakaz i ava vin vre.

Mr Speaker malgre defi Msye Faure pe delivre!

 

(APPLAUSE)

 

HON EGBERT AGLAE

Mr Speaker mon konstate ki annan nou  la ki pa le tann  nonm L’Inde.   I annan nou la anndan ki yer ti dir ki  i desandans.  Mon respekte tou lorizinalite tou dimoun.  Me Les tousala Mr Speaker  – en pei i bezwen annan bann partener bilateral.  Anmezir ki relasyon bilateral I devlope, sa bann pei parey L’Inde e Lasinn zot ofer ou led ouswa si ou demann zot led zot ouvertman pare pou ede.   Eski Ler sa bann pei I pare pou ed Sesel eski annan nesesite pou nou sey bloke?   Eski zot oule Sesel retourn an aryer?   Pep Seselwa  annou note.  Nou bezwen nou led nou bann pei zanmi me zot bezwen respe nou souvrennte.

Mr Speaker, kot I konsern bann Proze Kapital malgre defi lenplimantasyon, Gouvernman in anmenn larzan dan Bidze.  I vedir Gouvernman I annan plan.  Me I paret I annan ankor ki pe trenn lipye ouswa anvi bloke pou retard devlopman apre blanm I tonm lo Gouvernman e blanm Prezidan Faure.

Mr Speaker, dan sa Bidze larzan in ganny mete pou tou distrik bouze dan term proze, ou semen.  Ou lakaz, ou miray ou drenaz, ou laplenn, ou kort proze lenfrastriktir, twatir amelyorasyon e rediksyon dezas tousala I  ganny trouve dan sa Bidze 2019 menm nou ti a swete ganny plis.

Mr Speaker, mon war li drol ki serten Onorab lo lot kote latab, I dir nanryen pa’n ganny fer alors ki pe pase pandan?  Ki’n pase dan sa 2an dan zot distrik?  Kote sa 1 milyon pou pti proze in ale?  Eski napa proze ki’n materialize dan zot distrik?  Mr Speaker selman lo Facebook ou war pe poste ler zot proze in akonplir, ouswa pe al komanse.

 

(APPLAUSE)

 

HON EGBERT AGLAE

Mr Speaker annou aret konfiz nou lekor. Mr Speaker sa ki nou lo sa kote latab i swete war se en amelyorasyon dan  lenplimantasyon Proze Kapital.   Retir bann birokrasi ki met retar e donn distrik plis lotonomi.

Mr Speaker, zabitan Port Glaud pe esper kontinite dan travay ki mon’n deza komanse.  Fermye Des Arpents, e Port Launay pe esper ZOT proze semen materyalize.  I ankor annan nesesite pou annan bus shelter, proze retir danze dan movetan, rediksyon delo sale lo semen vizavi Vilaz Prezidan e proze pou ed bann ki pli vilnerab dan mon distrik.  E mon pe kontinyen pouse pou sa arive.

Mon anvi dir de mon lo Konsey Distrik Mr Speaker, akoz I annan ki’n dir ler in vin chairman Konsey Rezyonal labous plen li ki ansarz sa MNA e ki li dir ki proze ki pou fer.   Be mwan mon en en travayer parey zistwar I dir ‘’pti tayer debourye!’’ Mon pa la Mr Speaker pou vin rod pouvwar politik.  Mr Speaker

Mon dir ek zabitan Port Glaud ki zot distrik I dan bon lanmen.

Mr Speaker, kot I konsern Lasante mon’n anmenn plizyer kestyon dan nou distrik kot I konsern klinik Port Glaud e klinik Beolière.

La mon le dir zabitan, ki klinik Port Glaud pe al amelyore, depi son waiting area.  En access pou lanbilans pou osi a lavenir annan serten servis spesyalize, ki pou plase kot klinik Beolière e mon pou kontinyen lager pou Beolière ouver 7 zour lo 7 anmezir ki sityasyon staff I amelyore.

Mr Speaker, kot I konsern ledikasyon mon felisit tou teachers ki pe fer louvraz nob pou zot kontinyen.   E plis ki R1bilyon I dan sa Bidze pou kouver bann depans pou asire ki i annan liv, materyo pou lekol, liniform, formasyon ansenyan, servis manze abordab e pli enportan benefis pou bann teacher.  E mon mesaz pou ver bann etidyan se pran loportinite anba sa Bidze – konn zot priyorite etidye e etidye.

Pou konklir Mr Speaker

ki Bondye I kontinyen beni Sesel.  Pep Seselwa Sa I en bidze ‘’larg sang !’’ E LES DANNY TRAVAY!

Mersi.

 

(APPLAUSE)

 

MR SPEAKER

Mersi Onorab Egbert Aglae.  Bon avek sa nou ava Break e nou ava retournen 2er apre midi.

 

 

(BREAK)

 

MR SPEAKER

Bon bonn apre midi tou Manm Onorab.  Bonn apre midi tou dimoun ki a lekout e ankor en tre bonn apre midi Maurice Loustau-Lalanne avek son lekip ki’n sanze.  Mon krwar Ms Croisee avek Ms Verghese welcome parmi nou.  E zot pou la pou akonpanny Minis pou apre midi.  Bon mon kontan sa pti mirmirasyon apresyasyon nou pe kontinyen avek nou lantrennman isi kot Lasanble.  Nou fer sir ki tou nou bann rezerv osi tou in kaba take over dan okenn sirkonstans ki kapab arive.  Bon mon ti a kontan osi tou fer konnen bann Manm Lasanble ki pandan lunch break mon ti ganny prezante avek en dokiman par Onorab Lemiel e Onorab Esparon ki zot ti an Misyon en Misyon PAP Ruanda e zot in prezant mon Lofis avek en gro liv – en gro dokiman – ‘’The True story and Heavenly Culture World Peace Restoration of Light – Peace and Cessation of War’’.  I en gro dokiman.  I en dokiman vreman enteresan ki’n ganny compiled.  Mon’n fin fer desann.  Mon’n met dan Library.  Savedir i accessible pou tou bann Manm si zot anvi fer okenn referans ki zot oule fer and so on.

Apre osi tou mon anvi enform bann Manm ki nou pe aim pou nou fini avek Repons Lendi le 12 e Mardi le 13 – nou’n deza fini sirkil dokiman ki’n sorti kot Minister Finans swivan meeting ki nou ‘n gannyen yer dan konpannyen SS Payet avek PS Thésee, kot nou pou koman pran bann Minister, bann Departman Mardi bomaten e nou ler travay i pou 9er a 12 e 1er-5.30.  So nou pou pran en pti pe.  Nou pou pran 1erdtan dan nou Break time.  Probableman par- ler nou a komans 1.15 me selman as a much as possible.  E nou pou respe en pti pe bann ler osi tou ki nou rann lantenn avek SBC.  Nou bann Break bomaten – Break apre midi i pou reste parey.  Ok?  So vwala en pti pe bann fason ki nou pou travay as of Mardi prosen.  Bon nou ava demare e mon ava donn laparol avek Onorab Wavel Woodcock ki pou swiv par Onorab Wilbert Herminie.   Onorab Woodcock.

 

HON WAVEL WOODCOCK

Mersi Mr Speaker, koleg Onorab, ser, frer Seselwa, pep Praslinois bonn apre midi.  Mr Speaker premye lenpresyon ki mon’n gannyen apre diskour Minis Finans lo Bidze 2019 se ki sa Bidze pa’n ganny fer Sesel.  Ou a krwar ki sa Bidze in ganny fer dan Lenn. Akoz mon dir sa Mr Speaker partou kot ou gete dan sa Bidze ou vwar bann Donasyon, bann Grant, loan ki L’Inde pe donn Sesel; dan lakaz, dan proze sosyal, dan baz militer, transportasyon, dan Lasante, dan Ledikasyon, dan Biro Attorney Zeneral e dan plezir lezot Minister e departman Gouvernmantal.

Mr Speaker nou pa koz en milyon roupi ki Lenn pe donnen, ouswa pep Sesel.  Mr Speaker nou pe koz anviron R800milyon. Me le kestyon ki lepep Seselwa pe demande, se akoz ki Lenn pe envestir tou sa larzan Sesel? Kwa ki zot pe ekspekte avek Sesel? Eski se en baz militer lo Zil Assomption ki zot le? Kwa ki Lenn pe ekspekte avek Sesel an retour? Ozordi Mr Speaker Sesel pe depan bokou lo bann pei etranze pour devlopman nou pei, nou pe pret larzan ki nou napa pour rann e nou pe kontinyen andet nou pei. Ozordi Sesel anba Gouvernman Parti Lepep, zot pet ay deryer L’Inde ek Lasinn, avek en pti bol mandyan konmsi Oliver Twist. ‘’Silvouple msye donn mwan en pti pe plis.’’ Mr Speaker si ou pe get dan bann pei dan larezyon ou pour vwar ki plizyer pei i vin lesklav bann gro pei akoz zot napa mwayen pour re-pey zot det. –

Sri Lanka i bezwen donn Lasinn en Por pour re-pey son det akoz zot dwa Lasinn pli ki R1bilyon! Djibouti osi zot anba presyon pour donn enn zot por enportan Lasinn pour repey zot det ki pe fer Lanmerik ankoler akoz zot annan en baz militer laba.

Public debt, det piblik Kenya i 50bilyon Dolar e ladan 72 poursan sa bann det i pour Lasinn. Sa bann gro pei zot pe ankouraz depandans atraver bann pratik, predatory loans ki met bann lezot Nasyon dan bann det ki zot pa kapab re-peye. Sesel fodre nou fer atansyon nou pa tonm dan sa latrap, apre vwar nou zoli pei Sesel anba presyon pour vann nou birthright! Ozordi Sesel anba Gouvernman Parti Lepep nou’n vin en pei ki viv lo handouts. Nou’n vin tro depandan lo bann pei etranze pour devlop nou pei.

Mr Speaker avek tou sa bann bilyon ki’n kit nou pei Sesel atraver koripsyon, atraver bann kartel, bann middleman, atraver vole ek frod, ozordi Sesel nou pa ti pour bezwen depann lo okenn pei etranze pour devlop nou pei.

Mr Speaker en keksoz ki kler ek sa Bidze, se ki i montre klerman ki sa Gouvernman i en Gouvernman ki koz plis ki fer aksyon, plis ki i pran aksyon.

Bann Minis dan Gouvernman Parti Lepep in fer plizyer promes dan lepase. Promes pour fer bann diferan proze, pour benefisye plizyer distrik.  Me ler Bidze i vini, ou vwar ki proze in toultan ganny anvoye!

An 2017 zot ti fer promes ki plizyer proze pour komans an 2018. E ler 2018 i arive zot anvoy proze pour 2019.  E la bann proze ki ti ganny forecast pour komanse 2019, zot in ankor anvoy pou 2020.  Dapre prezan tou proze pour 2020. Sak fwa eleksyon pe aprose, gro, gro proze pour komanse! Sa i fer mwan mazin proze sport complex Ile Eve Praslin ki sipoze komanse depi 2015, pandan eleksyon Prezidansyel.

Apre eleksyon proze in dan limbo.  Proze ti retourn ankor lo plan an 2016, dan letan eleksyon Lasanble Nasyonal.  Apre eleksyon Minis ti dir ki proze pour komans an 2018.  Dan Bidze 2018 napa proze.  E la dan Bidze 2019 ankor napa proze sport complex!  Proze prezan in ganny anvoye pour 2020 pour ki sipoze ganny finanse par en grant R21.7milyon.  Mr Speaker sa Gouvernman zot zis bat latet Lepep Praslinois.

Re-lokasyon ek konpansasyon pour bann zabitan obor stasyon PUC Baie Ste Anne Praslin pa enkli dan Bidze 2019, zot ankor pe fer legzersis pour anmas lenformasyon.  Lannen ale, lannen vini, zot pe anmas lenformasyon menm, menm apre tou sa promes ki Gouvernman in fer avek bann zabitan dan sa rezyon ki pe ganny afekte avek tapaz emisyon bann gas danzere.

Mr Speaker sa Gouvernman pe pran zabitan Baie Ste Anne pour en fars! Konm labitid Mr Speaker, ‘’Gran prometer, pti donner!’’ menm si Onorab Gill, Churchill Gill in montre en gro faz sorti kot PUC lo sa size nou tou nou konnen pour dir en bon pe fayl pe pour gomon lo la State House e dan plizyer Minister. En kantite master plan in ganny prezante devan sa Lasanble. Plizyer ‘Aspirasyon’, ASPIRASYON 2020, VIZYON 2030!  Tou le 10 an ‘Aspirasyon i ganny anvoye e aksyon ek rezilta, zero. Master Plan ki ganny sanze avek tou nouvo Minister sak fwa zot fer musical chair.

Menm zafer pour por komersyal Ile Eve Praslin, e osi por pasaze Baie Ste Anne Praslin, kot marsandiz ek pasaze pe debark dan labou. Touris pe debark dan labou, marsandiz, manze pe debark dan labou lo por komersyal.

Sa bann problenm Mr Speaker pa pe ganny adrese isi dan sa Bidze.  Sa Gouvernman fodre ki zot serye zot kot i konsern Praslin.  En lot keksoz Mr Speaker en lapel plito ki a plizyer repriz mon’n fer dan sa Lasanble, parmi bann lezot keksoz ki mon’n toultan met lanfaz lo la, koman Manm Elekte pour Grand Anse Praslin se en rediksyon lo sa 15poursan taks lo rent rezidansyel. Mon largiman sete si taks lo rent lakaz dan bann landrwa rezidansyel i desann ki pour ede fer pri rent lakaz desann.

Mr Speaker Minis Larose lo son ladres pour Bidze 2018 ti anonse, ki sa taks pour desann sorti 15poursan, pour vin 3poursan an 2019.  Me ki nou’n vwar Mr Speaker?  La dan sa ladres Bidze pour 2019, Minis Loustau-Lalanne in dir ki prezan sa rediksyon lo sa taks pour aprezan vin an fors an 2020. Very convenient Mr Speaker. Tou rediksyon ek proze in ganny anvoye pour letan eleksyon, pour bat latet lepep Seselwa.

La tou tiyo Mr Speaker in fermen. Ler eleksyon pour aprose tiyo pour ganny ouver pour sey anbet lepep Seselwa. Me sa pep Mr Speaker pa pour tonm dan sa latrap ankor!

Mr Speaker dan bann premye lentervansyon ki mon ti fer ler mon ti antre dan sa Lasanble mon ti pouse e met lanfaz lo en semen piblik pour kolekte Laplenn Hollandaise avek Pasquiere.  Dan letan kolonyal sa semen ti deza egziste ki menm transpor ti kapab pas lo la. Me avek lannen sa semen pa’n ganny okipe e in ganny anvair.

E ozordi Seselwa avek etranze zot servi sa semen koman en nature trail.  Ozordi Mr Speaker Minis in anonse dan son ladres Bidze, dan son speech lo Bidze ki en sonm R46.5milyon in ganny Bidzete pour met tarmac lo sa semen, R46.5milyon.

Me Mr Speaker resaman Komite Lasanble COGA avek mwan menm nou ti zwenn avek bann zofisye SLTA pour get sa proze, plan sa semen, e nou ti ganny dir ki sa proze pour kout R40milyon.  La in ganny ogmante par R6.5milyon. Mr Speaker, mwan vreman konsernen avek sa sonm par le fe ki an 2011 pour met tarmac lo en kilomet semen ti kout selman R1milyon.  Avek lenflasyon, mwan mazinen ki an 2019 estimasyon pour en kilomet semen i merit anviron R2 milyon.  Semen Laplenn Hollandaise pour Pasquiere i apepre 5 kilomet, ki fer ki sa semen i merit kout anviron 10 milyon pour met tarmac,  pou met koltar lo la.

SLTA in dir ki i annan enn de pon ki pour ganny fer tou dilon semen, ki mon prezimen i kapab kout otaz sa semen, mont en pti pe pli o.  Me Mr Speaker, mon pa krwar ki sa semen i merit kout R46.5 milyon. Mon pa konnen prezan si akoz eleksyon pe aprose zansla zot pe esey rod en fason pour fer detrwa milyon pas anba latab.

Sa ki osi alarman Mr Speaker se ki SLTA napa lekipman Praslin. Parey rollers, nou napa rollers, nou napa JCB e zot pe outsource e donn kontra enn de bann kontrakter pour fer bann proze semen Praslin.

Le kestyon se lekel sa bann kontrakter ki pour benefisye? Deza i annan en bann pe koze, pe dir ki zot pe al anmas en bon pe milyon avek sa proze.  Nou’n vwar dan lepase ki touzour menm kontrakter ki ganny kontra lo Praslin. Eski nou pour vwar en lot sityasyon parey Stad Lanmizik?

Mr Speaker avan nou apros sa sonm.  Fodre ki Minister i donn bann detay kler lo ki mannyer zot in tonm lo sa sif e ki mannyer zot pour depans sa larzan lo sa semen.

 

(APPLAUSE)

 

HON WAVEL WOODCOCK

Wi Gouvernman in deside fer desann personal contribution anver housing loan avek HFC sorti 7.5 pour vin 5poursan pour en zabitan Inner Island akoz parey Minis in dir kou materyo konstriksyon i pli eleve lo Zil Pros. Me problenm Mr Speaker se ki menm si kontribisyon personnel i ganny redwir posibilite pour en zabitan ganny loan i vreman ba.  Mon konn plizyer Praslinois ki pe espere pour ganny en loan avek HFC pour plizyer lannen.  Menm si zot pare pour kontribye plis ki 10 poursan kontribisyon personnel.  Sak fwa zot al kot HFC, zot ganny dir ki napa larzan.  Ase pran pep Praslinois pour en fars!          Si zot pour fer desann kontribisyon personnel fer osi plis loan available pour pep Praslinois.

Mr Speaker les mwan koz lo en lenzistis kont en kategori etidyan dan Pos-Segonder. Bann etidyan ki fer Advance Diploma dan Tourism Management avek Shannon College atraver STA, Seychelles Tourism Academy, sa bann etidyan a laz 19 a 28an i ganny swazir akoz zot bon performans skoler e bon performans dan Sekter Tourizm pour fer en Advance International Diploma dan Tourism Management.  Me i sagrinan Mr Speaker ki menm si Sekter Tourizm i en sekter enportan nou lekonomi allowance ki sa bann etidyan i gannyen i vreman ba. En etidyan pe ganny li zis R1600 allowance kontrerman avek en etidyan Liniversite Sesel ki ganny en pti plis ki R3mil. Ladan menm sa bann etidyan i al fer staz aletranze dan 2enm lannen e zot allowance i selman R1800 e R2mil pour 3enm lannen.

Allowance pour bann lezot etidyan liniversite aletranze pe ganny ogmante. Me selman pour sa bann etidyan STA ki pe etidye avek Shannon College i reste parey. Me Mr Speaker i pli worst pour bann etidyan ki sorti Praslin avek La Digue, zot, zot bezwen pey akomodasyon Youth Hostel ki kout R1500 par le fe ki zot bann mature student ki fer ki reste zot zis R100 lo zot allowance.

Bann etidyan liniversite Sesel ki sorti zil pros zot ganny R3mil extra pour akomodasyon, me bann etidyan advance diploma dan management dan STA pa pe ganny okenn allowance. Mr Speaker sa i vreman unfair e fodre ki Minis i get ladan.

Sa ki osi unfair se ki bann zenn ki sorti dan lanplwa ki tip e ganny en saler stab ler zot enroll lo sa course zot pa mentenir zot saler.  Zot tou zot ganny allowance R1600. Zis mazin en zenn ki pe ganny R7 mil a R8mil saler apre zot bezwen retourn lo en allowance R1600!  Sa i pa aplik pour bann etidyan ki dan bann lezot liniversite enkli liniversite Sesel.  Dan mon lopinyon Mr Speaker sa se en lenzistis. An fen’’ kapris letan’’ tousala!            Mr Speaker mon pour get lo Bidze pour Lasante. Mon vreman dezapwente. Napa preski nanryen pour Praslin. Gouvernman i bezwen envestir plis dan bann fasilite medikal pour nou zabitan. Praslin nou bezwen en Lospis pour bann dimoun avek maladi terminal, en landrwa konfortab pour zot avek zot fanmir.

Nou bezwen staff permanan pour operate masin x-ray Praslin. A plizyer repriz zabitan   Zil Pros i bezwen al Mahe pour fer x-ray, menm pour en pti fracture.  En lot gro problenm Zil Pros Mr Speaker semen MedEvac. Ozordi Minister Lasante i ankor pe depan lo Air Seychelles. E dan bann ka emergency pandan lannwit pasyan i bezwen esper ziska 7er bomaten pour zot kapab ganny en avyon pour al Mahe.

Mr Speaker mon konn 4 ka, dan en ka en dimoun ti perdi son lavi dan 3 lezot ka enkli en manm mon fanmir ki ti ganny latak leker. Sa bann dimoun in paralize akoz lopital Baie Ste Anne in tarde anvoy zot Mahe pour ganny emergency medical assistance. Napa avyon pour MedEvac pandan lannwit, in agrav lasante e menm pran lavi plizyer zabitan Praslin.

Mr Speaker parey dan plizyer pei aletranze in ler pour Gouvernman envestir dan nou prop avyon ouswa helicopter MedEvac. Nou pa kapab kontinyen depan lo Air Seychelles, ouswa Zil Air. Enn ler pasyan emergency i bezwen esper plizyer erdtan lo Airport avan zot ganny avyon. Mr Speaker nou pa kapab kontinyen koumsa. Fodre ki Gouvernman i envestir plis dan sistenm lasante pour zabitan Zil Pros.

En lot konsern se pour refund bann dimoun ki’n depans dan zot pos pour reganny zot lasante.  Mon konn 2 zabitan dan mon distrik ki’n depans plizyer sonm pour tretman zot maladi aletranze.  Enn ti ganny dir ki i pa bezwen retourn aletranze pour al fer checkup, ki son maladi in geri.  Me ler i ti pey dan son pos pour li al fer check up dan L’Inde, i ti war ki son i pa’n geri me in spread dan en lot parti son lekor.  Minister i refize refund sa Madanm.  En lot ka se Mr Lionel Etheve Anse Kerlan Praslin.   In donn mwan permisyon ou servi son non.  Annefe in donn mwan permisyon pou mwan servi son non akoz i pe lager avek en maladi danzere e in depans plis ki R2milyon pou reganny son lasante.  Minister Lasante e pa’n fer nanryen pou sa msye latizann ki i bezwen napa Sesel.   E i pe lite kont sa maladi.  Me Gouvernman i sourd lo li.

Sa msye Mr Speaker i pa pe demann bokou, i pe demann Gouvernman pour refund kantmenm zis 20 poursan sa larzan ki’n depanse pour li kapab kontinyen son tretman aletranze.  Mr Speaker, sa msye i en msye ki’n kontribye bokou dan lekonomi Praslin e ek Sesel atraver taks ki i peye.  Me sa Gouvernman pa pe antren li.  I santi ki i pe ganny viktimize e lafanmir i fristre.  Fodre Mr Speaker ki nou pran ka avek nou bann frer ek ser Seselwa.                 E Gouvernman i bezwen annan en Polisi kler lo lafason ki Gouvernman i refund bann dimoun ki’n depans dan zot pos pour reganny zot lasante. Mr Speaker, Minister Lasante fodre desantraliz plis bann servis lasante.  Nou bezwen en CT SCAN pour inner islands. Nou osi bezwen en sant pour rehabilitate bann dimoun ki’n ganny latak leker.

Ozordi Minister Lasante i bezwen anvoy bann zabitan Zil Pros trete lopital North East Point Mahe pour fer fizyo e swiv bann tretman apre latak leker. Mr Speaker bann fanmir ki sorti Praslin i bezwen depans bokou larzan pour al get zot fanmir Mahe e menm pour pey akomodasyon pour reste Mahe, pour zot kapab pli pros avek zot fanmir ki malad.

Si Gouvernman i fer en sant fizyo pour bann dimoun ki ganny latak leker lo Zil Pros i pour ed bann fanmir Praslin, non selman koup depans, me bann pasyan i kapab, zot ava pli pros avek zot fanmir ki kapab donn zot plis sipor moral.  Nou bezwen en tel sant lo Praslin. Pa fodre komans avek bokou kantmenm en sant reabilitasyon, ouswa  fizyo avek zis 10 lasanm pour komanse, kapab deserve Praslin avek La Digue olye ki relocate sa bann dimoun e anvoy zot Mahe kot Lopital North East Point.

Mr Speaker kot i konsern Lagrikiltir avek Lapes, dan bann lentervansyon ki mon’n fer dan lepase sirtou deba lo Bidze, mon’n dir a plizyer repriz ki Gouvernman i bezwen envestir plis dan lagrikiltir lo Inner Island atraver envestir dan bann lekipman ek lenfrastriktir parey shade house pour bann fermye.  Mon kontan ki Gouvernman in pran sa an konsiderasyon e ki zot pour met bann shade house a dispozisyon bann fermye Praslin.

Me dan en lot souf Minis in dir dan son diskour ki en labatwar lavyann rouz ki pour kout R2.5milyon pour ganny fer Praslin lannen prosen.  Me ler mon get dan Bidze mon vwar zis en sonm R300mil dan Bidze 2018 me napa nanryen dan Bidze pour 2019, ni menm 2020.  Eski Minis pe esey anbet lepep Praslinois?

Sa ki enteresan ankor pour note Mr Speaker se ki pour renovate lofis SAA Amitie Praslin, total project cost pour kout R1.3milyon. Refencing sa lofis, ek de baro feray pour kout R280mil, selman en labatwar pour kout zis R300 mil r sel sonm ki mon war dan Bidze e sa i pour dan Bidze ‘’2018’’.

Mr Speaker i en zafer la ki pa tro katolik.  Kekfwa Minis dan son konklizyon i kapab eksplik sa.  Kot i konsern Sekter Lapes, kot Praslin i konsernen Minis in dir dan son diskour ki de proze por lapes in ganny inisye pour Grand Anse avek Baie St Anne.  Me sa ki Minis pa’n dir Mr Speaker se ki napa en sou larzan ki’n ganny mete dan Bidze 2019 pour sa proze; pour sa de proze por lapes Grand Anse avek Baie St Anne Praslin.

SFA in dir ki napa larzan, ki zot bezwen al tap laport aletranze, swa ek Zaponnen, JICA, ouswa ek lezot pei. Gouvernman i ankor pe mandyan menm pour devlop lapes lo Praslin.

Mr Speaker oule dir mwan ki Gouvernman pa kapab trouv sa larzan dan Consolidated Fund pour fer sa 2 proze lasose?  Zis avek sa 80 milyon det SBFA ki pa ankor re-peye enkli sa 6 milyon ki’n ganny write-off nou’n ti’n kapab ganny sa 2 lasose pour Grand Anse avek Baie St Anne Praslin. Sa de proze lasose, enkli enn Grand Praslin i ankor lo petet.  Menm si Minis Dezinyen dan legzibisyon Ortikiltir, Lagrikiltir ek Lapes pour Zil Pros 2018 ti donn son langazman dan son diskour ki Gouvernman pour fer sa de lasose.

Mr Speaker lo lot kote latab nou’n tann tou sord keksoz dan zot repons Bidze.  Atraver ou Mr Speaker Onorab Vidot in koz lo Income Inequality en keksoz ki nou dan LDS nou’n fatige koz lo la .Me le kestyon Mr Speaker se lekel ki’n kree Income Inequality dan nou pei Sesel?  Se pa lot ki parti Lepep!  Se zot ki’n soutir KARTEL Sesel en ‘’pti group elit’’ ki’n donn bal dan larzan e later Leta!  Se zot ki’n anmenn Irlande Sesel pou trangle e vol bann biznesmenn etranze ek Seselwa.

Se zot Mr Speaker enkli zot bann MNA, ex-MNA Parti Lepep ki’n donn bal dan larzan SBFA, apre zot pa’n oule rann!  Se zot ki’n partaz later Leta ek lezot asset Leta antre zot ek zot bann manm fanmir apre zot a vin koz lo Income Inequality avek Wealth distribution!  Larises in ganny distribye e partaze antre zot!  Ladan menm i annan enn ki pe dir ‘’fodre tourn lalang 7 fwa avan koze’,’ san realize ki li menm li ki’n ede fouy trou dan KOF Leta ler in pran loan plis ki R300mil apre pa re-peye!  Sanmenm sa ki mon apel ‘’Move Laron’’ Mr Speaker!

 

(Interruption)

 

HON WAVEL WOODCOCK

Mr Speaker zot oule fer nou krwar lizour pou aswar.  Ozordi zot pe koz lo Human

 

(Interruption)

 

MR SPEAKER

Order! Order! Order! – Onorab mon‘n dir si i annan okenn referans direk e okenn latak direk lo en Manm mon pou entervenir mon pa pou tolere.   In en referans an zeneral.

 

(Interruption)

 

MR SPEAKER

Alright? I pa’n mansyonn okenn non Onorab.  I pa’n mansyon okenn non.

 

(Interruption)

 

MR SPEAKER

Yes Onorab De Commarmond?

 

HON CHARLES DE COMMARMOND

Mr Speaker fodre i retir sa ki in dir akoz in dir – ekoute in dir ‘MNA LO SA KOTE LATAB’ ki’n pran larzan ki pa’n rann e ki’n vole! Now nou konn tre byen Lasanble si okenn dimoun okenn MNA i annan keksoz ki nou annan kont li – ki in fer en keksoz ki mal and whatnot i annan en Mosyon ki ou kapab mete!  Me ou pa dir keksoz koumsa la dan sa Lasanble akoz sansan nou osi nou kapab dir!  Lot kote osi i annan dimoun ki’n vole!  Zot osi zot voler l lot kote!  That’s it!  E nou annan bann laprev!

 

(Interruption)

 

MR SPEAKER

Mersi.  Mersi.

 

(Interruption)

 

MR SPEAKER

Order!  Order!  Order! Order!  Order!

 

HON CHARLES DE COMMARMOND

E nou kapab mansyonn non lo lot kote!

 

MR SPEAKER

Onorab, Onorab.  Bon sa ki mwan mon’n tann Onorab Woodcock in dir – in nonm – wi in mansyonn ‘lot kote latab’ – MNA, ex-MNA e menm bann dimoun, lezot dimoun  ankor.  I pa’n ….

 

(Interruption)

 

MR SPEAKER

… silvouple mwan ki pe koze.  Mersi.  I pa’n nonm okenn non – okenn Manm alright?  Onorab Woodcock kontinyen.

 

HON WAVEL WOODCOCK

Mersi Mr Speaker.

 

(Interruption)

 

MR SPEAKER

Onorab De Commarmond – mon’n fer en Ruling lo son Entervansyon ok?  And this is final!  Si mon war en Manm ki pe sey impute any improper motives mon ava antre.         E nou konnen dapre Standing Order i annan en fason ki rantre.  Ok?  Pou le moman pou le moman – mon satisfer ki i pa’n fer okenn lakizasyon direk lo okenn Manm.  Alright?  Onorab Woodcock kontinyen.

 

HON WAVEL WOODCOCK

Mr Speaker zot oule fer nou krwar lizour pou aswar.  Ozordi zot pe koz lo Human Capital Index selman en return graduate pe ganny en basic salary mwens ki R10mil. etranze pe ganny plis loportinite Sesel ki Seselwa. Mwens ki 34poursan zenn pe ganny grade C and above dan zot IGCSE.  E dir granmersi lekol prive ki ede fer sa poursantaz monte sa krwar nou ti pour pa anba 20 poursan! Atraver ou Mr Speaker, Onorab Aglae in dir ki ser sang i en keksoz lepase.  Me larealite Mr Speaker se ki Seselwa pe ser sang ziska ler zot in nepli kapab respire.

Zis ek sa VAT 15 poursan lo lavyann poul par lao lo sa 15 poursan taks, plizyer fanmir pour war li difisil pour met manze lo lasyet zot zanfan. Pandan lunch break Mr Speaker enn mwan ansenyan ki en pansyoner in call mwan e i dir mwan Gouvernman pe azout R250 lo sekirite sosyal. Me larzan pa ankor ariv dan nou pos deza keksoz pe ogmante laboutik.  I dir mwan ki en kilo ponm STC Praslin in ariv R53.  En kilo ponm R53! Letan ‘Ser Sang’ in fini? Selman pri lavi pe kontinyelman ogmante anba ladministrasyon msye Faure plis Seselwa pe viv anba lapovrete.

Statistik pa koz manti.  Statistik i montre ki 54poursan nou popilasyon pe ganny en saler pli ba ki R8,050.50sou anba Ladministrasyon Msye Faure . Anba Gouvernman Parti Lepep, Seselwa pe vin pli mizer!

Mr Speaker Onorab De Commarmond in dir ki nou oule fer ‘Koudeta Konstitisyonnel!’ ‘Koudeta Konstitisyonnel’ i ler zot ti mazorite dan Lasanble e zot ti sanz Lalwa pour fer ‘Pas Baton’ antre dan nou Konstitisyon!  Se sa ‘Koudeta Konstitisyonnel!’

 

(APPLAUSE)

 

HON WAVEL WOODCOCK

Menm si Lalwa in ganny amande pour tir ‘Pas Baton’ Msye Faure i ankor still pe tenir ‘FOR son baton ‘kantmenm son baton pa pour li!  Mr Speaker fodre nou serye nou dan sa Lasanble. Nou viv dan en pei demokratik. E pep Seselwa i annan en dwa eksprim zot lekor.  Zot annan dwa fer protestasyon an pe. Sanmenm sa ki apel en pei demokratik.

Mon konnen ki konsep demokrasi i en konsep en pe nouvo pour zot lo lot kote latab. A le fe ki detrwa lannen pase, baton ek tear gas ti mele ler lepep Seselwa ti sey fer tande zot lavwa.  Me ozordi nou dan en nouvo Sesel ki’n ganny libere par LDS avek lagras Bondye.

Mr Speaker an konklizyon mon pa pour kapab fini mon lentervansyon san koz lo Gouvernman Lokal.  Mr Speaker mon vreman dezapwente avek lavites ki proze deker Grand Anse pe ale. Mon pa asire ki Gouvernman pe fer pour rekiper sa larzan ki sa lakonpannyen Sinwan in pran apre zot pa’n fini louvraz. Zot pa’n finis a proze.  Proze ti sipoze fini depi Oktob sa lannen e proze pa ankor fini akoz sa lakonpannyen Sinwan in pran larzan e pa’n fer sa proze.

Me petet Mr Speaker ler nou pe depouy sa Bidze Minis pour Gouvernman Lokal i ava eksplik avek sa Lasanble ki pe arive avek sa proze. En lot konsern se PS  pour Gouvernman Lokal ti’n donn son parol ki zot pour fer renovasyon lo sant kominoter Bake Yaya Anse Kerlan avek playground Grand Anse Praslin.

Playground ti’n menm ganny met dan proze pour 2018 me ziska prezan a leksepsyon sa 3 zouzou ki Gouvernman Lasinn in donnen nou playground i ankor tel-ekel. Travay lo sant Bake Yaya pa dan Bidze 2019 ki montre en mank langazman  par Minister Gouvernman Lokal.

Travay pour met koltar lo semen segonder St Joseph obor lekol Praslin segonder enkli drenaz, en proze ki pour ganny antreprann par Gouvernman lokal ek SLTA, pa ankor komanse.  Menm si SLTA in dir ki proze in ganny tender.

Mr Speaker i annan plizyer proze ki’n komanse me ki pa ankor fini. Semen segonder obor Oasis pour al dan fon kot madanm Jeannevol; semen Lamodesti, semen Le Relax, e plizyer lezot proze Gouvernman Lokal pa ankor terminen.

Administrater distrik in dir ki napa ase larzan sa lannen pour konplet tou sa bann proze.  Me mon pe espere ki dan sa Bidze 2019, Minister Loka – Gouvernman Lokal i a gard son parol e konplet tou nou bann proze enkli bann nouvo proze ki’n ganny bidzete pour 2019.

n lot dezapwentman Mr Speaker se semen Konsolasyon ki pa’n ganny enkli dan Bidze 2019.  Sa semen i dan en leta enpitwayab ki SLTA a plizyer repriz in promet pour aranze, me nanryen pa ankor ganny fer. Menm si mon’n zwenn avek SLTA avek Lotorite konsernen avek Minister.  Nou’n koz lo la dan Lasanble a plizyer repriz, ziska prezan Gouvernman Danny Faure pa ankor fer nanryen pour amelyor enn bann semen pli enportan, nou Praslin semen Konsolasyon.

 

MR SPEAKER

Onorab, Onorab.

 

(Interruption)

 

MR SPEAKER

Onorab De Commarmond avek Onorab Pillay dernyen warning.  Ok?

 

(Interruption)

 

MR SPEAKER

Mon pe Chair! Mon pe Chair! Mon’n antann son referans ki in avek Prezidan. Mon pe rantre, mon pe entervenir.  Pa zot ki pour dir ki mannyer mon pour travay!

 

(Interruption)

 

HON WAVEL WOODCOCK

Eskize, Mr Speaker Gouvernman Prezidan Faure en. Mon’n fer en pti fot – mon pa’n azout sa bout devan.

 

MR SPEAKER

Mersi Onorab.

 

HON WAVEL WOODCOCK

Mr Speaker depi sa Lasanble in komanse in annan bokou koze lo vertical integration. Gouvernman in come up avek en polisi me en Polisi ki pa binding. Minister i bezwen get pli lwen ki sa Polisi.  Ozordi i annan en DMC ki pe konteste sa polisi vertical integration Ankour. Mon senserman krwar i merit annan en Lalwa kler lo vertical integration pour protez bann pti biznes Sesel ki ankouraz konpetisyon.  En tel Lalwa i ava osi ede deal avek sa bann diferan kartel ki’n anvair nou pei sirtou bann kartel dan tourism, telekominikasyon e dan wholesale ek retail.

Mr Speaker, mon pour profit sa lokazyon pour envit tou bann Manm lot kote latab pour zwenn nou, pour nou rally ‘’DANNY OUT’’ ki nou pe fer Sanmdi 2er apre midi, menm si bato in plen kantmenm lo ledo en reken zot kapab ariv La Digue.

Avek sa de mo Mr Speaker, mwan fer en lapel avek Minis Finans ek lezot Minister pour met en pe plis lanfaz e larzan dan devlopman nou bann Zil Pros Praslin ek La Digue.  Akoz nou kontribye nou lo Zil Pros, Praslin ek La Digue nou kontribye en kantite dan lekonomi Sesel e Minister Gouvernman i bezwen get en pti pe pli byen dan welfare nou pei.  Akoz Mr Speaker, ‘’enough is enough!’’ Mersi bokou.

 

(APPLAUSE)

 

MR SPEAKER

Mersi Onorab Woodcock.  Bon mon anvi fer sorti okenn referans avek Prezidan.  Si zot pa anvi servi Prezidan – Msye Faure. I annan sa slogan ki pe go on, DANNY OUT! Sa i ok. Tou le de kote i servi, be referans direk avek son tit ki i annan dan pei, swa i Prezidan, swa i Msye Faure. E okenn Minis osi tou, bann zofisye osi tou dan Gouvernman nou bezwen aport sa respe. Bon mon ava pas laparol avek Onorab Wilbert Herminie.

Onorab Herminie laparol i pour ou.

 

HON WILBERT HERMINIE

Mersi Mr Speaker.  Mr Speaker koleg Onorab, ser, frer Seselwa, zabitan, La Riviere Anglaise.  Bonn apre midi. Bidze 2019 ankor enn fwa i reflekte bann valer e prensip fondamantal Parti Lepep ki’n reste fondamantal depi formasyon nou parti, parti SPUP.

Sa bann prensip apre bokou lannen i ankor relevan e mon kontan.  Mr Speaker mon dir mon kontan akoz malgre ki bokou isi la anndan in dir a plizyer repriz ki sa parti ki o pouvwar pa’n fer nanryen dan sa pei pandan sa 40an ki nou o pouvwar, alors ozordi mwan a dir e mon a demann ki mannyer sa pei in ariv sa zistans kot i ete ozordi.  Oli stok petrol?  Oli sa sel tiyo, delo obor semen ki nou tou, nou ti al savoye? Oli kabinen trou? Oli kot nou vyeyar ti desann pour al lav lasyet e frot kastrol?  Oli Mr Speaker? Dapre sa ki sa parti in fer pandan sa 40an se senpleman pran en donn bal.  Si sa parti i ti zis donn bal, eski larzan pour anvoy nou bann sitwayen malad sonnyen aletranze, kote ki’n ale?

Eski bann etidyan ki’n al study liniversite, kote sa larzan in ale? Zot koz lo later ki parti in pran, eski zot pe dir ki parti sa bann later ki Gouvernman ti pran pour redistribye avek bann zabitan anler. Ma Joie zwa ki zot anvi ki sa bann later i ganny rann, ki sa bann dimoun pa sipoze ganny zot prop lakaz ek later?

Mr Speaker mon komans mon lentervansyon lo sa not lo Bidze 2019 akoz lepep i bezwen ganny aret anbete.  Lopozisyon i bezwen aret anbet sa pep.

 

(APPLAUSE)

 

 

HON WILBERT HERMINIE

I vre si vreman Parti Lepep ti’n zis pran larzan sa pep demann zot lekor ki ti pou’n arive avek sa pei ozordi?  Demann zot lekor ki ti pou’n arive avek nou pti pei.  Sesel ti pou’n faid.  Sa bann pti biznes pa ti pour kapab devlope pour vin mwayen, ou vin gran biznes.

Konbyen nou bann frer ek ser Seselwa ki ti pou kapab annan biznes dan Sesel?  Kote ou sa taksi drayver ti pou ganny gro taxi?  Ou ti pou kontinyen pe travay koman drayver avek sa gro msye.  Kote pei ti pou ganny larzan pou fer lakaz, aranz semen, fer danm e lezot proze?  Si vreman sa pei ti dan en leta ki lopozisyon in dekrir eski bann pei zanmi ti pou ofer nou Grant ek Loan?  Eski IMF ti pou aport son sipor pou Sesel?  Eski Minis Finans ti pou’n kapab promet travayer Seselwa sa bann Scheme e allowance ki pou komanse pran lefe apartir lannen prosenn?

Alors Mr Speaker osi lontan ki sa Gouvernman – Gouvernman Parti Lepep i kontinyen krwar dan devlopman son zenn – dan ledikasyon pou tou etidyan – lasante pou tou son pep – en meyer lavi pou tou bann vyeyar – fasilite sportif pou son bann sportsmen – pou en Seselwa kapab vin en enzenyer – en  pilot en kaptenn ,en dokter.

Mr Speaker mwan mon pou kontinyen aport mon soutyen akoz Parti Lepep pou kontinyen reste determinen pou anmenn en meyer lavi pou son pep akoz parti Lepep pou kontinyen determinen pou anmenn en meyer lavi pou son pep malgre tou sa ki’n ganny dir zis pou detri sa parti.

Dan Sesel nou’n vwar ki en kantite konsesyon apre konsesyon ki sa Gouvernman – Gouvernman Parti Lepep in donnen ek gran kouraz e bann sekter prive i osi devlope.

Ozordi dan Sesel apre 40an ki Parti Lepep in o pouvwar i annan plizyer lenstans ki sa ki’n komans koman en labourer ozordi in vin en kontrakter.  Sa ki ti an waitress ozordi in vin en manager.  Sa ki ti koman en porter ozordi i en senir office manager.  Wi zot lentelizans i fer zot avanse, me osi loportinite in ganny mete a zot pozisyon.  Me tousala i pa laprev ki Sesel in avan e ki Seselwa in evolye?  I zis malere ki serten pa kapab pe travay  pou zot lavansman, me plito konsantre pou fer sabotaz pou ki sa Gouvernman e bi prensipal se pou tir Parti Lepep o pouvwar san realize konsekans ki zot zanfan e zot pti zanfan pou arive demen.

Mr Speaker nou sorti lwen e pou nou ariv pli lwen ki sa.  Dan laplenn dan lamars ler nou vwar sanmenm sa enn ki’n benefisye avek plizyer biznes laboutik, pli gro laferm pe kriye e dir ki Gouvernman pa bon – mon pou demande anba ki Gouvernman ki ou reisir pou ariv kot ou ete ozordi?

 

(APPLAUSE)

 

HON WILBERT HERMINIE

Si pa lot ki Parti Lepep?  Si sa Gouvernman pa ti met sa bann loportinite a ou laport ki manner ozordi ou ti pou ariv kot ou ete? Ozordi i pa bon apre ki ou’n fini benefisye.  E sa enn ki pa ganny nanryen ou pa pe realize ou pe debout obor sa enn ki’n ganny en ou pe kriy ‘’pa bon’’ e ou osi ou pe donn li lanmen pou kriy ‘’pa bon!’’

Nou’n tande plizyer fwa met plis larzan dan pos Seselwa.  Ozordi ou asize e ou demann ou lekor s lasanble mon’n vote pou met zot la, ki zot in fer pou met plis larzan dan mon pos?   Sa Lasanble KI ou’n fer li vin ou Lasanble?  En pwen refleksyon pou tou dimoun.

Koman nou manda ki anliny avek prensip nou parti Gouvernman in ekout zot, zot demann pou met plis larzan dan zot pos.  Gouvernman – Gouvernman Parti Lepep, in pran en desizyon pou esey adres sa sityasyon.  Sa i en premye pa.  I pa solisyon total me en keksoz i toultan annan en komansman.

Dan Bidze 2019 Minis in anonse ki 58.5milyon in ganny meter pou revizyon oubyen en lentrodiksyon bann Scheme saler pou bann travayer Seselwa.   Ou sa dental professional – sa health care assistant a parti Zanvye 2019 ou pou resevwar en retention allowance. 

Pou sa dokter ki’n etidye pandan plizyer lannen a aletranze e apre retourn Sesel e pou pe deservi ou pep sa Gouvernman i promet pou fer en revizyon dan ou Scheme e ou osi ou pou ganny en risk allowance. 

Allowance pou bann zofisye transpor lo semen, Brass Band, zofisye Welfare, bann diferan Scheme pou osi ganny anvizaze an 2019.  E menm Gouvernman in al pli lwen pou pran kont travayer ki travay dan Gouvernman pandan plizyer lannen.  Zot osi zot pou benefisye avek en allowance dan zot bann lannen servis ki zot in deservi dan sa Gouvernman Parti Lepep.

E parey listwar ava in demontre se Parti Lepep i toultan kontinyen rod meyer fason pou pran ka avek sa pep.  E Lopozisyon ki in fer?  Zis demann eleksyon apre eleksyon.  San vin avek okenn Bidze alternativ.

 

(APPLAUSE)

 

HON WILBERT HERMINIE

Mr Speaker Lopozisyon in toultan vwar sa pa bon – sa pa bon – sa pa bon!   Zot annan zorey me zot pa tande!  Zot annan lizye me zot pa trouv kler e alors si vreman zot servi e zot annan lentere Seselwa e anvi fer diferans dan sa pep akoz zot pa ti in avek propozisyon?   Oli propozisyon?  Lamars?  Par fer lamars?  Nou pou met plis – par fer lamars zot pou met plis larzan dan pous seselwa?  Par fer lamars zot pou fer pri lavi desann?  Alors apre sa dernyen lamars kot zot ti fer ki ti annan pli plakar ki dimoun …

 

(APPLAUSE)

 

HON WILBERT HERMINIE

… konbyen plis Seselwa in ganny larzan dan zot pos?  Mr Speaker ler serten pe mars dan semen ek plakar DANNY OUT! Prezidan Faure li i pe kontinyen travay pou sa pep san okenn diskriminasyon!

 

(APPLAUSE)

 

HON WILBERT HERMINIE

I travay POU TOU Seselwa.  Rezilta travay Prezidan Faure i la.  Prezidan Faure in apwent en Komite pou revwar la reminerasyon servis piblik.  Ozordi Gouvernman in aprouv en logmantasyon 5poursan lo saler debaz.  Ou osi sa enn ki ti pe dir ‘’Out’’ ou’n ganny pran an konsiderasyon.  Ladan e ou menm ou pou ganny sa 5pousan logmantasyon.  Mazin sa byen.  Zonm dan lopilans i souvan oubliy son nesans.

Mr Speaker, isi dan sa Lasanble a plizyer repriz nou’n tande par bann koleg lo lot kote latab kot zot pe kriye konte konbyen fwa Prezidan Faure in traver.  Mr Speaker sa i en lot rezilta ki montre nou Prezidan pe al lo son bann misyon aletranze pa pou lwazir parey sete ni oule fer nou krwar isi dan sa Lasanble.

Minis dan son diskour in dir ki Gouvernman Sesel in siny en Lagreman Small  Development Projects ek L’Inde e sa pou en total 35 milyon e Lagreman in ganny sinyen pandan visit Leta Prezidan Faure dan L’Inde.  E en proze ki pou benefisye lepep Seselwa non pa endyen.

Mr Speaker i pou benefisyan nou bann zenn akoz sa larzan i pou al prensipal an dan bann lekol ki enkli lekol Anse Boileau – Grand Anse Praslin, Mont Fleuri, Plaisance spesyalman lekol Lar Riviere Anglaise.  E mwan Mr Speake dan tou moman kot mon distrik in ganny touse mon ou toultan aport mon sipor e pou dir Prezidan Faure en gro ‘Mersi!  Akoz mon bann zabitan i benefisye.  Son vizit in aport fri pou nou tou e nou tou nou pou apresye sa. Pou ou kapab fer sikse dan en pei koman en prezidan ou bezwen bon leadership e bon lanmitye.  Lanmitye ek lezot pei i toultan enportan.  Gouvernman L’Inde in osi pare pou asiste Seselwa avek en daycare Ile Perseverance pros kot Lapolis Ile Du Port.  Parti Lepep napa baton mazik.  Sesel pa kapab fer tou lo li menm.

Nou bezwen lezot pei pou aport zot sipor e led.  Sesel i en bato lo losean ki pe al ver en por.  Nou’n fer bokou sikse e bokou pei in pran nou koman en legzanp.  Lefe ki i annan bokou pei ki pare pou ed nou pou re-negosyasyon ek nou pou nou bann loan, i montre ki lenstitisyon enternasyonal i annan konfidans dan no lekonomi e i annan konfidans dan direksyon ki Gouvernman Parti Lepep pe diriz sa pei.   Set akoz nou annan bonn gouvernans.  Pou bann ki pa krwar dan lanmitye e ki pa krwar dan bonn gouvernans e ki toultan pe kritike e kraze bann pei zanmi, mwan osi mon ti ava demann zot si dan lannen 2000 zanmen zot vin o pouvwar kote e lekel ki zot pou ganny led avek?  Ozordi dan sa Lasanble nou tann koz gro labours ‘’nou annan respe’’ – ‘’annou viv koman frer.’’ Mr Speaker respe nou sipoze annan respe pou tou nou frer ek ser; respe pou nou bann dimoun ki pli vye ki nou – respe pou nou bann fanm e osi

annou anpes bann menas pour lezot.

Akoz sa pa pe met en bon limaz lo nou.  I toultan en plezir Mr Speaker, i toultan en plezir pour aprann Mr Speaker ki langazman sa Gouvernman reste anver lasante son pep koman en priyorite; kot en total plis ki R1bilyon in ganny allocate dan lasante.

Sa Gouvernman i vwar lenportans annan en pep an bonn sante koman en fason pour fer nou pep vin pli responsab anver zot lasante en lentrodiksyon R25 i ganny entrodwi koman en fre pour preskripsyon. I annan serten dimoun ki’n ganny exempt pour pey sa fre, i annan plizyer pwennvi lo la. Desizyon ki Gouvernman in pran.  Me lamazorite dimoun ki mon’n koz avek i krwar ki sa i en bon nide ki depi lontan ti devret ganny entrodwi avek bi pour esey fer nou pep pran plis responsabilite anver zot lasante.

Koman mon promes pour eleksyon e nenport loportinite ki mon gannyen, mon kontinyen met lanfaz lo konstriksyon plis lakaz dan mon distrik.  Sa mon pour kontinyen met presyon ziska ler mon vwar mazorite mon bann zabitan dan en lakaz ki apel pour zot.  Sa i osi enkli distribisyon bann morso later dan distrik pour bann ki kapab fer zot prop devlopman. Pandan lannen 2019, mon pour kontinyen met presyon lo sa Minister ki proze lakaz i ganny finalize.

Mr Speaker, Parti Lepep in toultan krwar dan son vyeyar pour viv an dinyite dan zot vye zour.  Apre negosyasyon neseser Maison Trwazyenm-Az pour komanse an 2020 e pour sitye lo zil Perseverance.  E la lo sa note Mr Speaker, mon ti a kontan tous lo en pwen, sa i bann proze. Isi dan sa Lasanble nou annan en Komite ki apel Committee of Government Assurances ki mwan lo la lo sa Komite.  Mr Speaker pandan lannen 2018, sa Komite in fer vizit lo plizyer proze ki Gouvernman in fer oubyen pe fer.  E tou sa bann proze ki’n ganny vizite in pase lo televizyon Nasyonal.

Chairman sa Komite ki Onorab Henrie dan son bann interview in toultan dir ki sa Komite i satisfe avek mannyer travay pe ale.  Me Mr Speaker ler ou leader i dir lekontrer ki bann proze pa’n ganny materyalize, eski sa i vedir ki ou leader i bezwen mars plis, vizit plis e vwar pour li menm avan fer okenn komanter?

 

(APPLAUSE)

 

HON WILBERT HERMINIE

Akoz sa i apel kontradiksyon. Dan ou lespri ou pe pans ki pa pe fer.  Dan ou lizye malgre i la devan ou, me ou pa pe war ki pe ganny fer.  Dan ou zorey ou tann zis ‘’napa’’, ou labous i koz zis ‘’napa.’’ Pa fer sans sa ki ou dir akoz rezilta i la. ou pli konfize e ou vin konfiz lezot.

 

(APPLAUSE)

 

HON WILBERT HERMINIE

Dan Sesel laprev i la ki Gouvernman, Gouvernman Parti Lepep i krwar dan son zenn. E laprev i la pour nou zize. Apre lentrodiksyon My First Job Scheme en lentansyon par Gouvernman Parti Lepep, 448 graduate in ganny plase dan lanplwa.  En Gouvernman ki annan leker pour tou menm pour bann zenn ki napa skill ou leksperyans, i ganny mete lo Skill Development Programme. En total 223 zenn i lo la.

URS en lot linisyativ entrodwi par sa Gouvernman pour ed nou bann zenn.  E la Minis in dir nou ki 126 zenn pour ganny asiste anba sa scheme.  Alors Mr Speaker eski tousala i pa laprev par Gouvernman i annan en lentere dan son pep ki sa Gouvernman pa pe zis koze me i pe son parol an aksyon e fer keksoz arive.

Sa Gouvernman i rod solisyon konpare avek lopozisyon ki zot kritike’’ pa bon’’ me selman ki pa vin avek okenn propozisyon.

Mon tre kontan Mr Speaker letan Minis in enform nou ki Gouvernman pour mentenir son langazman pour finans bann progranm sosyal, pour bann dimoun ki pli vilnerab dan nou sosyete.

Mr Speaker sa osi i form parti en prensip Parti Lepep pour nou pa kit personn deryer. Nou’n fer li nou pour kontinyen fer li malgre i annan plizyer ki pa apresye e pour toultan kritike.  Mr Speaker, nou, nou annan en leker pour tou.

Dan Bidze pour lannen 2019 Parti Lepep in pran kont sa carer ki pe travay avek Madanm Jean anler Ma Joie, ou Trezyenm Mwan Saler i osi garanti. In pran kont msye Adeline ki en pansyoner kot Union Vale ki oule pran en loan pour aranz son twatir lakaz.

Sa Bidze i osi pran kont fon dedye pour bann fanmir ki pli vilnerab i osi pour ganny pran an kont. Sa nou pa oubli lafanmir Naiken tou.

Mr Speaker eski Gouvernman pa pe get sakenn son pep, menm si i pe fer li lo en baz direk ou personnel. Eski pei pa pe progrese? Eski pei i kapab fer tousala pour son pep. Larepons i non Mr Speaker.

Mr Speaker tou sa progranm ki’n ganny mete dan plas se Gouvernman SPUP, SPPF, e Parti Lepep ki’n entrodwir sa dan Sesel. E Lopozisyon i la zis asize kritike e menm al pran repo.  E ler zot retournen zot dir ‘‘Pa bon!’, ‘’Zet anba!’’

Nou dan lepep nou pour kontinyen avek nou bann progranm pour soutenir nou pep.  Akoz si nou ti ekout sa Lopozisyon tou sa letan ozordi Sesel ti pou’n fini perdi direksyon. Akoz tou keksoz zot kont.  Zot ti kont liniversite Sesel, zot ti kont konblaz, zot ti kont pri kontrol, zot ti kont SMB.  E la zot in anmenn deba pour fer frenm Hypermarket! E dir nou al rod bal diri anba langar.

Vi ki zot dir nou ki keksoz i ser la alors kestyon i reste kote en frer Seselwa pour gannyen pour aste en bal? Alors se zis bann parey ou ki pour reisir aste en bal?

Mr Speaker si ou pran lagonm e efas tou bann proze ki Lopozisyon ti kont lo Sesel, map Mahe ti pour konsiderableman pli pti.

 

(APPLAUSE)

 

HON WILBERT HERMINIE

Mr Speaker mon pa pour kapab termin mon lentervansyon san ki pour tous lo mon distrik English River. Mr Speaker dan mon distrik nou lo en bon semen. Plizyer proze dan distrik in ganny antreprann pandan lannen 2018.  E sa pour kontinyen pandan lannen 2019.  Sa i enkli konstriksyon semen, peron, re-sirfas semen, lenstalasyon lalimyer kot napa, re-roofing.

Mr Speaker osi pli evidans se renovasyon lo klinik La Riviere Anglaise.  Mwan osi met lanfaz ki aprezan servis a osi vin pli a loter, e manm piblik ava apresye.

Mr Speaker peser pa’n ganny oubliye.  Bann lenfrastriktir ek fasilite pour ganny amelyore e sa pour enkli pour bann peser Perseverance.

Pour konklir Mr Speaker mon oule re-afirm mon sipor pour sa Bidze ki Gouvernman Parti Lepep in demontre ankor enn fwa ki annan en Gouvernman ki caring, ki toultan krwar dan son pep, e i pour toultan asir en meyer lavi demen pour son pep.

Nou’n akonplir bokou pour Sesel, e pour Seselwa. I reste ankor bokou pour nou fer. Se gras a SPUP/SPPF/, Parti Lepep ki Sesel in ariv kot i ete ozordi.  Ki Lopozisyon in fer apard kritike e fer lamars? Zot anmenn en Private Member’s Bill met plis larzan dan pos zot bann dalon risar lo offshore e koup lanmen FIU avek NDEA.

Kot in mal nou’n bezwen aranze.  Kot i byen nou bezwen anbelir.  Apre ki mon’n ekout bann Onorab koze bomaten in zis kritike me pti git solisyon in ganny anmenn devan.  Nou pa bezwen en Lopozisyon permanan ki’n fatige.  Alors mon reste konvenki ‘’Plis ki Zanmen’’ ki Parti lepep i reste le meyer solisyon pour Sesel e laprev i la dan sa Bidze.  Mon pour remersye tou mon bann zabitan pour ekout mwan e mwan remersye lepep Seselwa. Mersi Mr Speaker.

 

(APPLAUSE)

 

MR SPEAKER

Mersi Onorab Herminie.  Mwan ava pas laparol avek Onorab Jany De Letourdie.  E sa i pour ganny swiv par Onorab Noline Sophola.  Onorab De Letourdie.

 

HON JANY DE LETOURDIE

Mersi Mr Speaker, bonzour tou dimoun.  Mr Speaker Bidze i sa keksoz pli enportan ki tou Seselwa i merit vreman pe port latansyon avek.  Akoz se li sa prosedir kree en plan pour permet ou pour depans ou larzan.  Gouvernman li atraver Minister Finans li i annan sa responsabilite pour kree sa pli gran plan pour depans larzan ki’n ganny anmase e ki ou osi ou’n kontribye ki permet ou answit pour determinen davans si ou pour annan ase larzan pour fer bann depans ki ou bezwen oubyen ki ou ti a kontan fer.

Tou senp, dan en langaz senp ki tou dimoun i kapab konpran Bidze se senpleman balans ou depans avek ou larzan ki ou gannyen.  Dan son Diskour Minis an zeneral in les konpran ki tou Seselwa i a kapab vwar sa Bidze pe tous li dan en fason ou en lot atraver bann diferans mezir e lapros ki’n ganny pran.

Me zis atraver sa pti legzersis ki SBC ti montre yer swar Mr Speaker nou’n fini vwar ki Seselwa in gannyen touse me pa dan sa fason ki petet Minis ti pe antisipe.  Mr Speaker i vre ki sa Bidze in tant pou anmenn plis logmantasyon en pe partou parmi bann travayer e bann benefisyer sekirite sosyal.  O komansman letan mon’n tann Minis pe anons sa bann mezir avek lantouzyazm ou ava tante pou krwar ki bann benefisyer ti devret pe dir en gran mersi pou sa.  Me ler ou akout diferan lopinyon e fer en pti kalkilasyon Mr Speaker ou ganny en konpran par egzanp ki ler sa Madanm 67an ki ganny son larzan sekirite ki dir be la sa R252 logmantasyon be i pa pou fer okenn diferans lo mon Bidze akoz la lavyann pou pe monte osi elektrisite e bann komodite parey fri ek legim ki esansyel pou li manz en ladyet balanse e an bonn santer.

Dan en lot fason dir konmsi ou’n donn li avek lanmen drwat e pran avek lanmen gos.

Mr Speaker parkont si ti annan osi en gran zefor lo lapar Gouvernman pou fer pri lavi desann en keksoz ki nou dan LDS nou’n toultan met lanfaz lo la, apre ki en dimoun in  ti a’n pey tou son bann det e aste son bann komodite esansyel i ti a vwar li avek o mwen en pti R200 a R400  koman en pti savings pou li omwen la sa ogmantasyon ti a fer en diferans lo sak saler.

Mr Speaker permet mwan pou tous detrwa pwen ki bann dimoun i vwar li par rapor avek sa Bidze ki zot vwar zot en pe dezapwente.  Par egzanp i annan serten travayer ki santi ki lazistis pa’n ganny fer a rapor a zot saler.  Sa Mr Speaker i sa group travayer ki ekspoze a risk akoz natir zot travay.  Par egzanp bann ki travay dan koltar bann grenper poto PUC, bann ki travay deryer dan kanmiyon ki tir salte e lezot ankor.

Minis atraver ou Mr Speaker nou konnen ki sa bann travayer zot napa vreman – zot pa’n ganny en saler eleve.  Malgre bokou dimoun i krwar ki zot ti merit pe ganny plis.  Me Seselwa pa akimil overtime ki zot kapab ganny en pti pe plis R10mil pou zot anmenn kot lakour.

Mr Speaker, akoz natir zot travay en zonm ek en fanm ki travay dan koltar i pou difisil pou li esper 25 – 40an servis pou ganny en logmantasyon konsiderab R3 a R4mil par lao son saler debaz. Alors Minis petet la mon a dir eski i annan en nesesite pou fer en legzersis, pou vwar lekel sa bann louvraz ki tonm dan sa kategori e travay lo en Scheme spesyal ki a osi ankourazan e atiran ki a permet la relev apre 15an oubyen  20an servis.

E pourtan Mr Speaker dan Bidze i annan allowance pou library e archive assistant kot Departman Kiltir, me eski bann school librarians pe demande i annan keksoz pou zot?   Akoz mon mazinen ki ex-Minis Finans ti mansyonnen e dir ki ti sipoze annan en keksoz pou zot.  Mon pa’n trouve me petet osi ki la mon pa vwar – Minis si ou ti ava kapab klarifye silvouple.

Mon lot pwen Mr Speaker i enn ki mon atas bokou lenportans avek se Lar, Kiltir ek Leritaz.  Avek en logmantasyon preske R50milyon lo son Bidze, i vre ki sa i montre gran lenportans pou sa sekter an 2019, me fodre note ki sa logmantasyon Mr Speaker i pe al lo preski tou anver lenfrastriktir renovasyon Carnegie – renovasyon Theatre De Palmes  – Konsey Nasyonal Lar – Carnegie – kontraksyon nouvo Blok pou Lenstiti Kreol- renovasyon vye Lakour Siprenm  ek reparasyon twatir Sant Konferans Enternasyonal Sesel.  Sa i byen Mr Speaker.  I byen Minis, be oli lenvestisman anver ledikasyon ek devlopman kiltirel e artistik pou asire prodiksyon de kalite olye ki medyokrite?

Prodiksyon ki pou nouri nou lar e donn nou en fondasyon solid e ekspoz nou avek lezot fasilite kreativite.

Mr Speaker kote Ex ki son sel mwayen ganny son dipen li se performen solo ek son gitar i vwar li dan sa Bidze?  Sa benn tradisyonnel ki li avan i ti annan 4 sware ki i ti kapab perform dan lotel, e prezan tousala in ganny pran ek li i vwar li avek zis enn e plito  i kapab osi i kapab napa nanryen osi pou li fer eski sa Bidze i pe anmenn en soulazman pou li?

Mr Speaker letan nou pou al dan Staz Komite kot nou pou kapab pli byen depouye nou pou fer sir ki sa ki merite ki ava gannyen. Mwan avek en pe disan artis dan mon lavenn Mr Speaker mon vwar li i pa byen ki i annan en serten progranm sosyal ki apel Everlasting Ministry mon krwar ki pe ganny en Bidze zis akoz i pe propaz Gospel Music.  Unless i annan en lot azanda.  Tandis ki Chorale ek Music Society ki propaz tou bon kalite lanmizik e menm ki al reprezant Sesel bokou fwa enternasyonal li i pa pe gannyen.  ‘’Bling Bling Poetry’’ pa pe gannyen.  Patrick Victor Foundation pa pe gannyen e lezot esansyel Lar ankor Sesel zot pa gannyen ern Bidze zis pou zot.

Mr    Speaker, sa pa zis anver devlopman lar e i pa anmenn progre avek stabilite.

Mr Speaker nou dan LDS depi sa Lasanble in komans deba lo Bidze me zot, nou’n sey ganny maltrete.  ‘’Move laron’’ ‘’fo profet’’ -’’profet de maler’’ me Mr Speaker pa en zafer ankor tousala?

Lekel sa Seselwa la deor ki pou ekout zot bann lakizasyon e zot bann lensilt lanse kont LDS?  Be fodre kekfwa enn ki’n fek debarke sorti lo en Plannet ki’n fek dekouver konmela menm.  Zot pe dir nou aret koze akoz Seselwa i fatige ek bann kozer!  Me Mr Speaker be nou bann Parlmanter!  Nou louvraz se pou ‘’Parler!’’

 

(APPLAUSE)

 

HON JANY DE LETOURDIE

Seselwa pa pou zanmen, zanmen, ganny ase ekout LDS’Parler!’’ Akoz nou pa bann move laron nou! Me nou pe anmenm La Bonne Nouvelle – nou pe koz laverite Mr Speaker!

 

(APPLAUSE)

 

HON JANY DE LETOURDIE

Mr Speaker permet mwan atraver ou Mr Speaker mon demann ou permisyon pour mwan adres 2 pti parol a mon MNA silvouple.  Onorab Vidot mon vreman kontan –

 

(Interruption)

 

HON JANY DE LETOURDIE

Non mon serye – ya ….

 

MR SPEAKER

Onorab mon pou veye.  Atraver mwan ou kapab adres en Manm me zis fer sir

 

HON JANY DE LETOURDIE

 … wi Mr Speaker ou ava dir mwan – ou ava dir mwan si mon pe al offboard.

 

 

MR SPEAKER

Montre respe.

 

HON JANY DE LETOURDIE

 … wi Mr Speaker.  Onorab Vidot mon vreman apresye – mon vreman kontan pou antann ou dir yer ki ou’n vreman lite e servi tou ou pouvwar ki anfen ou pou kapab anmenn en pe laklerte pou bann zabitan Roche Caiman kapab ganny zot lakaz.  Sa i byen e mon krwar ki bann zabitan zot in antann ou.  Malgre ki parfwa ou’n dir ki MNA pa donn lakaz – zet tousala – me solman Onorab ou osi ou pa ekoute ler ou Leader i koze annandler!  Mon challenge ou alor pou fer parey li! Anter sistenm ‘ek nou pa ek nou’’ ou osi!  Koumsa ou ava pe travay pou tou dimoun ….

 

(APPLAUSE)

 

(Interruption)

 

MR SPEAKER

Non.  Non, non.

 

HON JANY DE LETOURDIE

Not good?

 

(Interruption)

 

MR SPEAKER

Non.  Kontinyen Onorab Letourdie.

 

HON JANY DE LETOURDIE

… pour ki …

 

(Interruption)

 

HON GERVAIS HENRIE

(Off-Mic)

 

MR SPEAKER

Order!  Order!  Onorab Letourdie.

 

HON JANY DE LETOURDIE

… e anfen Onorab si ou fer sa – pou ki mon MNA Onorab Vidot  pou si ou fer sa, dan sa fason ou ava ganny en vilaz pli stab, pli an armoni, pli an bonn sante parey nou Motto Roche Caiman i dir.

 

(APPLAUSE)

 

HON JANY DE LETOURDIE

Mr Speaker, la ki nou pe koz lo Bidze, annou mazin en pti pe  ki i annan bann dimoun bann travayer ki pe fer out zot neseser pou ganny en sans lans dan en pti biznes ki swa netwayaz ou lezot.  En lannen pe koule lo zot la Mr Speaker e zot pa ankor tann nanryen.  Zot napa ni en lanplwa ni en reveni e la mon pa ni menm konnen si zot santi zot par dan sa Bidze.  An tou fwa ki zot pe fer, zot ankor pe esper LWMA pou dir zot, si zot in gannyen sa Kontra si zot pa’n gannyen, e antretan ki zot pou met dan zot kastrol?

Ki mannyer zot fanmir pou ganny nouri?  Sa mon pe dir pou dir kekfwa i en defayans lo la par L’Egzekitiv ki fer dimoun espere, espere pour tro bokou letan ki nou’n deza koz lo la avan.

Annou mazin osi lezot nou frer Mr Speaker avek ser ki dan en fason ou en lot ki pa kapab ganny en travay e pa ni kapab ganny lasistans welfare pou rezon ki li menm li i pa konnen akoz.  Kote sa bann dimoun i war zot i sitye dan sa Bidze? Eski nou kapab koz Bidze avek li?

Mr Speaker nou’n toultan dir ki dimoun, Seselwa i pa oule travay selman nou’n toultan dir pa zanmen zeneralize akoz i annan en bon group Seselwa la deor ki vreman ankouraze pou travay e i met tou son zefor pou fer sir ki son travay i touzour i rann a ler e son konpetans ladan.

Mon ti ava demande Mr Speaker avek tou bann anplwayer pour fer sir ki ler nou bann travayer i fer byen kontinyen ankouraz zot e mon’n zot sa ki zot merite.

Akoz mon’n dir sa Mr Speaker? Akoz mon’n ganny en pti note tanzantan par enn de mon bann koleg sirtou bann ki travay avek IDC. Zot pe demande ki at least nou fer en keksoz pou zot, akoz Mr Speaker zot santi ki zot pe ganny zoure, zot pe ganny maltrete avek bann sef e osi bann etranze.  Zot ganny peze dan louvraz e zot pa ganny okenn loportinite malgre zot annan zot savwar fer.

Alors Mr Speaker mon demande pour tou dimoun ki krwar ki i ape fer sa avek nou bann travayer Seselwa ki vreman pe donnen pou arete silvouple!  Akoz sansan pour napa sa stabilite parey nou pe demande.

Pou konklir Mr Speaker, mon pe fer en refleksyon lo sa ki Onorab De Commarmond, i pa la i ti dir yer e mon’n pans bokou lo la in fer 3 pti kotasyon.  I dir Seselwa pe rod aksyon avek sa ki o pouvwar.  Ok? E sa se zot menm bann Lepep.  E Seselwa i dir i fatige espere, e i dir zot ase met retar sa pei ‘’Enough is enough!’’ Lot pwen ki i ti dir se oli Bidze LDS prezant avek le pep Seselwa? Be Mr Speaker dir Lepep avanse Seselwa a trouve mannyer LDS ava donn zot en Bidze avek …..

In dir in ler pour LDS aret koze e travay dir.  Mr Speaker look who’s talking about travay dir? Hehehe!  Mersi bokou Mr Speaker.

 

(APPLAUSE)

 

MR SPEAKER

Mersi Onorab De Letourdie. Bon, en moman, mon anvi fer en pti komanter mon’n, taler mon’n koze avek Onorab Lemiel petet parfwa zot pa realize ki mannyer nou dimoun deor ti kapab pli benefisye ler dan Lasanble i annan 2 dimoun ki pe reprezant sa distrik.  Si nou kapab anmenn nou sinerzi ansanm i annan bon, i annan diferans enn sorti dan en kote, lot sorti dan lot kote.  Be i annan bokou proze dan distrik kot si lede i met zefor ansanm, i kapab anmenn benefis pour sa bann dimoun.  Anse Royale i en legzanp, Roche Caiman i en legzanp e mwan avek Onorab Basil Hoareau zanmen nou difere lo serten proze Bel Ombre. Zanmen nou atak kanmarad dan Lasanble e menm pandan nou kanpanny nou’n fer sa konman en legzanp kot nou’n kapab reisir annan en lanmitye, nou anvoy lanmen ek kanmarad nou kapab travay ansanm.

Me ankor parey mon’n dir pour benefis, pour benefis nou dimoun, pour benefis sa distrik.  Nou kapab fer sa nou kapab difere lo lezot keksoz me ler i vin kot nou distrik i konsernen ti a byen pou vwar sa.  Mon ava zis donn en pti parol Onorab Audrey Vidot.

 

HON AUDREY VIDOT

Mersi Mr Speaker.  Mr Speaker anba Order 36(1) mon lev en matter of privilege, mon santi konman en Manm anba Order 54(5) avek 54(7)(d). Onorab De Letourdie in fer mansyon konmkwa pou dir mwan mon’n dir avek dimoun ki mon pa donn lakaz?  Wi, mon pa donn lakaz zabitan Roche Caiman akoz se Minister ki donnen.  E dan mon speech mon pou quote ankor pou piblik ankor dimoun Roche Caiman pou tande ki mon ti dir Mr Speaker mon quote ‘’si i annan en konba ki mon’n anmennen depi ki mon’n MNA sa se pour lakaz e sa i enkli pour bann zabitan Roche Caiman, i kapab legalman annan plis opsyon pour agrandi zot lakaz ziska prezan mon’n kapab dir sa mon’n reisi lanmwatye. ‘’Ti napa nanryen pou dir avek mon donn lakaz Mr Speaker.  Savedir Onorab De Letourdie bezwen retract sa bout silvouple Mr Speaker akoz i pa’n sorti byen.  Dimoun pou krwar mon’n dir lotreman.  Mersi.

 

MR SPEAKER

Ok, mersi.  Mersi, mersi Onorab Vidot pour sa leklersisman.  Zis mon ava donn laparol back to Onorab De Letourdie zis ou ava koriz sa pti bout.  Akoz wi i annan en lensinyasyon ki konmkwa i donn lakaz. Onorab De Letourdie.

 

HON JANY DE LETOURDIE

Mr Speaker mersi. Onorab Vidot si ou panse, selman mon ti pe vreman dir li a bonnfwa. Mon ti pe vreman dir li a bonnfwa me si ou krwar i afekte ou mon retir sa remark e mon demann leskiz.

 

MR SPEAKER

Mersi Onorab, that’s good. Se sa fason ki nou move forward, mersi tou lede Onorab. Mon ava pas laparol avek Onorab Noline Sophola.

 

HON NOLINE SOPHOLA

Mersi e bonn apre midi Mr Speaker.

 

(Interruption)

 

MR SPEAKER

Bon annou reste trankil annou ekout en lot Manm koze. Onorab Sophola laparol i pou ou.  Ok, annou annan en pe lord.

 

HON NOLINE SOPHOLA

Mr Speaker, i byen note ki ler tou bann Manm in koze mon’n reste trankil. Leader in koze mon’n reste trankil. E alor donn mwan mon sans pour mwan koze mon parol i pou mwan. Mersi Mr Speaker.

 

MR SPEAKER

Mwan ki pou refri.  Mwan ki pou refri.  Laparol i pou ou Onorab.

 

HON NOLINE SOPHOLA

Mersi e bonn apre midi Mr Speaker.  Bonn apre midi tou Manm Onorab.  Zabitan La Digue ek Zil Pros e tou dimoun ki pe ekout deba lo Bidze 2019. Mr Speaker annou les Danny travay! Nou pei pe progrese!

 

(APPLAUSE)

 

HON NOLINE SOPHOLA

Progre sirtou, progre en Nasyon pa ariv dizour ou lannmen. Nou bezwen en prensip lo kwa ki nou ler fer pour nou dimoun.  Nou bezwen en plan mobilizasyon pep ou sipor e apre lenvestisman, e letan pou realiz nou laspirasyon. Parti Lepep ki ‘’MWAN’’ ansanm avek gran mazorite Digwa e de milye Seselwa i angaze ladan i dakor ek sa prensip pou donn loportinite tou dimoun. Nou krwar dan sa plan, nou donn nou sipor e nou form parti sa gran mouvman pou pour kontinyen anmenn sa nasyon Seselwa lo sa semen progre. Aprezan i tour Prezan Faure pou gard nou pei an mouvman.

En mouvman dinamik pou ariv lo lot letap devlopman. Mon dir mersi Minis, Anbasader Loustau-Lalanne pour prezant Bidze 2019, ou’n koz pour 3erdtan. Me ou’n dir bokou, sa ki annan zorey i ekoute e i apresye.  Nou’n fek selebre 10an sikse reform ekonomik.  Enn bann pli gran sikse reform dan lemonn dapre ekonomis enternasyonal. Mr Speaker, parey Minis in dir dan son prezantasyon nou bezwen kontinyen travay dir, ansanm dan linite pour gard nou progre ekonomik e sosyal. Pour nou kapab soutenir nou devlopman pour zenerasyon ki pe vini.

Alor mon ti pe priye ki nou deba konman en konpanny eleksyon toudmenm mon annan lespwar ki nou fini nou travay dan en legzanp linite.  E ki nou pran bann desizyon kolektiv dan lentere tou dimoun.  I annan diferans ant le de kote latab dan sa Lasanble se ki parti Lepep in prouve ki i envestir bokou dan ledikasyon ek lasante nou pep. Dan lozman, dan byennet tou dimoun, i pa bann lenvestisman ki annan rezilta dizour ou lannmen parey nou kontan dir ‘’ozordi pou demen.’’ Pa tro lontan pase bann lazans enternasyonal ti pe dir ki Sesel i en pti Lafrik kot in pli bon ne. E la le 11 Oktob mwan pase labank mondyal in pibliy lendeks kapital imen ki montre ki Sesel i premye dan lafrik kot en zanfan i ne e grandi pou realiz pli byen tou son potansyel. Sa i rapor labank mondyal i en fe. Nou pa kapab lager avek Labank Mondyal.  I laverite.

Sirman nou le fer bokou pli byen si sak zanfan sak adilt i pran son responsabilite. Nou a fer li si fleo drog, fleo lalkol, Si lezot fleo sosyal i disparet. Si nou pran nou responsabilite personnel, pran bon desizyon personnel, aprann lekol, okip byen nou lakour.

Mr Speaker en Seselwa byen edike an pli bonn santé i travay pli byen i pou sa rezon ki nou dan Parti Lepep nou krwar ki saler debaz i kapab ogmante. Devlopman sosyal, devlopman Sesel i dan en krwaze semen. Nou popilasyon pa pe grandi parey avan, i neseser ki nou revwar fason nou fer nou lekonomi fonksyonnen. I byen ki Minis Finans i koz lo plis litilizasyon teknolozi akoz sa ansanm avek nou meyer ledikasyon a vin pli prodiktiv.

Mr Speaker e an plis, si Sesel ti annan en min lor, oubyen dekouver petrol imedyatman nou pou kapab donn en meyer saler minimum parey in deza ganny propoze R10mil. Petet en zour nou kapab donn 35mil akoz non? Nou pa kapab ogmant saler zis akoz pri lavi o.  Me pour mye rekonpans nou travayer pou zot prodiktivite ek bon performans. Kan lekonomi i grosi, kan en lakonpannyen i fer plis profi i normal ki travayer osi i benefisye akoz se lafors kolektiv tou dimoun ki’n anmenn sa krwasans.

Dimoun pa viv selman lo bwat ton, parey sa dikton i dir, ‘’man does not live on bread and water only.’’ I osi oule son drwa i annan son swa, mon admet ki nou lo sa kote latab nou napa baton mazik.

Me pandan letan ki mon dan sa Lasanble mon pou touzour zwenn mon bann koleg pou ki nou pei i kontinyen donn meyer prodiktivite ek meyer rekonpans.

Mon dir mersi Onorab Waven William, pou son mosyon semenn pase. Mon mazin travayer lizin ton, travayer dan sekter prive, tou travayer Digwa e anfen tou travayer Seselwa an zeneral.

Prezidan Faure pe konsantre lo pei i pou sa rezon ki i pa pe ganny distraksyon avek travay parti. Malerezman son bann adverser pe profite, pe fer konpanny pou vin o pouvwar pli vit posib. Me fodre byen note en gard byen sa dikton antet, ler nou prese nou manz manze so.  Byento nou pou war rezilta sa manze so.

Annou les Danny travay!  Pei pe progrese, latas ki devan nou la konmela dan sa Lasanble se ansanm trouv solisyon e donn sipor wi an angle nou dir TOGETHER e donn sipor pou ki tou Seselwa i avans devan.  Pri lavi yer nou ti dir … (just like you)

 

(laughter)

 

HON NOLINE SOPHOLA

Yer nou ti dir ki pei pa kapab siport en logmantasyon dan saler debaz.  Ozordi nou le plis pour sa ki ganny plis, annou mazin byen avan nou koze.  Pep Seselwa fodre pa ki zanmen zot oubliye ki zot ti ganny promet par Lopozisyon ki zot ti pou met larzan dan pos Seselwa. Me oli ziska prezan an ven….

Pa tro lontan pase Lopozisyon pa ti dakor avek propozisyon nou Gouvernman pour amann Lalwa Offshore, pour travayer zouir pli bon kondisyon.  Pourtan zot ti annan lavwa pour deblok larzan ki ti a lenvestigasyon blansisaz. Ou demande be pour ki zot pe rode? Pour zot bann dalon ki deza annan larzan.

Mr Speaker, mon dir ki Gouvernman in fer gaspiyaz, Mr Speaker mon fyer pou deklare ankor enn fwa ki lo sa bann later La Digue ki Gouvernman in vann R35mil  – mon repete 35mil La Digue ozordi nou war 200 pti guest house lo la, swa zot owners oubyen operators.

Si, (taler ou a ganny pou ou) … si nou oule administre pei parey nou fer marse en biznes, mazinen ki dan biznes zis larzan ki konte.  I annan en kantite biznes an deor sa Lasanble ki alor pli kalifye pou sa travay.

Mr Speaker sa Bidze 2019 anba tenm stabilite progresyon i en Bidze ki pe donn lespwar tou Seselwa. Akoz i fer provizyon pour ede amelyor bann defi ki pe arive dan pei. e pli enportan redwir kou lavi ki an retour tou popilasyon Seselwa a benefisye dan en fason ou en lot.  Mr Speaker dan sa klima politik kot i annan bokou kontrovers, serten politisyen i krwar ki zot pli konnen ki lezot.

Parfwa nou kapab dir ki annan ‘’Dokter Konn Tou’’ parmi nou.  Zot ki toultan byen e lezot i toultan mal.  Sa bann tel latitid parey i annan lespri vanzans, mank respe, mal onnet, bully e plis ki sa fann propagann zis pour fer zot vin popiler i kit nou popilasyon dan dout.  Sirtou kan en Onorab i fer konparezon an servan en zenn fiy avek ledan gate.  Pa i montre tre kler ki napa respe pour sa sex feminen ki nou apel bann madanm? Tousala i kree enstabilite dan pei parmi popilasyon. E plis ankor dan bann biznes e bokou envestiser pe ezite pour vin fer biznes Sesel.  Sa pe retard nou progre.  Eski sa nou oule war da nou pti Sesel?

Sa bann tel latitid i kontradir sa tenm ‘Stabilite e Progresyon’ ki tre enportan e ki sa Bidze 2019 in dekoul ladan. Mr Speaker, mou oule senpleman fer tou pep Seselwa realize ki mannyer sa Bidze i donn nou lespwar; ki mannyer nou pour benefisye e ki mannyer nou Gouvernman pe kontinyelman travay pour amelyor tou sitwayen.  Me Mr Speaker sa Bidze pe fer provizyon pour tou pep Seselwa ganny en logmantasyon saler, enkli bann benefis.  Menm bann etidyan dan bann lenstitisyon ledikasyon tersyer, sa i bezwen ganny fer pour reste anliny avek logmantasyon dan pri lavi.  Mon demann bann sekter prive pour zot osi esey rod bann diferan fason pour rekonpans bann travayer, sirtou bann ki annan long lannen dan Lanplwa.  Sa i pour en fason pour montre sa bann travayer ki zot travay i ganny valorize e i pour en lankourazman pour lezot reste pli lontan dan lanplwa.

Mr Speaker fodre ki pep Seselwa i konsyan ki sak fwa i annan en logmantasyon saler pri bann komodite i ogmante lo letazer.  Plis ki pour annan larzan an sirkilasyon, plis keksoz pour ogmante. I vedir ki logmantasyon bann travayer i pa vedir en pli gran purchasing power pour bann fanmir. Pep Seselwa i enportan mazinen fodre pa ki zot oubliye ki Lopozisyon ti promet ki nou lavi ti pour meyer si nou larg lanmen marsan. Lanmen marsan in large, me ozordi ki nou war? Zot ki pe lager akoz zot in realize ki sa pa pe marse!

Mr Speaker en total en milyar 44milyon Roupi in ganny prevwar pour Sekter Ledikasyon ki reprezant 12.1 Bidze Nasyonal. I annan bokou defi dan sa Minister e sa pe ganny rektifye gradyelman.  Me Mr Speaker (ou ti deza reste ladan) malgre tou sa defi, nou pe rikord serten sikse. Mardi le 6 Novanm preski 200 liniversite ti rankontre avek Prezidan Faure.

Minister Ledikasyon e lezot ankor. E pli enportan ankor enn nou ansenyan Seselwa manmzel Joyceline Dogley ki ti swiv son letid Botswana ki trouve Lafrik, ti sorti meyer parmi tou sa bann etidyan.

 

(APPLAUSE)

 

HON NOLINE SOPHOLA

Eski sa pa en rezon pour nou fyer?  Eski nou Gouvernman pa pe delivre?  Pep Seselwa sirtou bann paran, nou bezwen fyer ler nou zanfan i fer sikse. Wi, nou kapab fer bokou plis ankor. Mr Speaker, en sonm 17.3milyon in prevwar pour labous bann etidyan pos segonder.  Gouvernman pour kontinyen donn sipor bann etidyan pour ed zot ariv lo target. Tou etidyan swiv sa ki mon pe al dir byen akoz parfwa zot pa ganny letan swiv Nouvel.

Etidyan premye lannen zot pour ganny zot R850 par mwan, 2enm lannen R950, e 3enm lannen mwan ki Manm elekte, 3enm lannen, zot pour ganny zot (1milyon 50) par mwan, 1,050, 1,050mil  par mwan,

 

(Off-Mic)

 

HON NOLINE SOPHOLA

(…just like you!) Eski sa pa i bann siny ki pe anmenn progresyon dan sa Minister? E i byen zistifye, akoz ki sa Minister in ganny en tel sonm dan Bidze. Eski nou pour kontinyen dir ki Gouvernman pa pe travay?  Non.

Mwan demann sa Minister pour kontinyen anmenn inovasyon e envestir plis dan formasyon tou bann ansenyan. P a selman bann ansenyan primer parey ti ganny dir.  Me met plis lanfaz lo training bann spesyalis parey psikolog, counselor akoz la i annan en gran mank.  Nou Prezidan i ekoute e apre i egzekite.  Nou ti demande dan Bidze 2018 e la in donnen.  E mwan fyer koman Manm elekte pour La Digue ek Zil Pros pour anons serten sa bann lakonplisman ki Zil Pros in gannyen dan sa Bidze. Gouvernman i rekonnet e osi ekout nou ler nou dir ki materyo konstriksyon lo La Digue ek Praslin i vreman o.

Alor apartir Zanvye 2019 tou zabitan lo La Digue ek Praslin pour ganny en rediksyon lo zot kontribisyon personnel, loan lakaz, sorti 7.5 poursan pour vin 5poursan. (Ou ti ladan ou osi kot mwan.) Pour annan revizyon dan scheme sibvansyon lakaz, revizyon formil kalkilasyon sa sibvansyon Avril 2019.  Sa linisyativ i tre byen.  Me la mwan oule fer resorti Minis ki zis bann dimoun ki pe pran loan lakaz ek HFC ki son maksimonm i 8,500 ki pe benefisye.  Me, nou bezwen tenir kont ki i annan bann lezot dimoun ki fer de louvraz pour zot kapab aste zot materyo pour fer zot konstriksyon.  Alor mon pe demande, ki mannyer sa bann dimoun ki pa pran loan ek HFC i kapab osi benefisye dan sa scheme sibvansyon.

Lekol ek lopital La Digue, i enteresan en sonm 5milyon roupi in ganny allocate pour lekol e 5.6milyon pour Lopital. Kordgard en sonm 3.5milyon in ganny donnen pour renovasyon.  Tou sa bann proze in fini tender.  E mon fyer pour dir ki plan nou lekol in ganny fer par en zenn Digwa.  Travay pour komanse pandan lannen 2019. Tou digwa i konnen ki sa 3 batiman i lo mon plan devlopman La Digue.  Digwa annou pa les nou ganny anbete avek sa bann propagann.  Digwa si zot oule konn plis lo zot lekol, i ankor boner la, zot ganny envite pour asiste en prezantasyon ozordi La Digue dirize par plizyer responsab dan Minister Ledikasyon. Zot bann dout a ganny byen klarifye.  Sa ki meyer sours lenformasyon.  Aret ekout bann demagozi ki ganny dir la dan sa Lasanble parfwa.

Mr Speaker nou Gouvernman i annan en vizyon pou anmenn devlopman lo tou bann zil prensipal, akoz i senpleman annan son pep a ker e i pe travay pour tou pep Seselwa. Ler mon get Youth Hostel Anse Royale, Mr Speaker … (Chief Whip ou kapab aret deranz mwan silvouple?)

 

MR SPEAKER

Onorab.  Onorab.

 

HON NOLINE SOPHOLA

En sonm R4milyon in ganny donnen pour renovasyon Hostel.  Sa i 2enm lakour nou bann zanfan, alor nou bezwen ase konfortab pour zot viv ladan. Apard sa labours ki bann etidyan Pos-Segonder pou gannyen bann etidyan Praslin ek La Digue dan bann lenstitisyon pos segonder i ganny R1400 par mwan adisyonnel diran sa 3 lannen letid e R200 i ganny tire pour bann servis litilite kot Youth Hostel.  Tou paran La Digue ek Praslin, i rekonnet sa bon travay ki nou Gouvernman pe fer pour nou bann zenn zenerasyon.  Sa i montre klerman ki i en Gouvernman ki krwar dan nou bann zenn alor i pa per pour envestir dan zot.

Dan lannen 2018 Mr Speaker Digwa in war ki pe annan devlopman lo La Digue.  Lannen 2019 i pa pou en leksepsyon nou pou kontinyen fer devlopman e plis ankor.  Selman bann ki pe fer krwar ki zot aveg, oubyen zot pa le aksepte larealite; ki zot pa war progre ki pe dir ki La Digue in fail silvouple reveye dan sa kosmar, reveye dan sa sonmey. LDS oli zot plan alternativ pou La Digue?

 

(APPLAUSE)

 

HON NOLINE SOPHOLA

Mr Speaker mon kontan ki departman Lazenes ek sport in ganny R3.2milyon me nou Digwa nou pa tro satisfe ki mannyer larzan i ganny distribye. N ou pa vreman konnen konbyen La Digue i benefisye dan sa Bidze.  Fodre esey reviz sa fason fer alor mon pe demann Gouvernman ki dan sa gro Bidze sak Minister i dir konbyen larzan dan zot alokasyon ki zot pe donn La Digue. Akoz sa pou ede annan plis kontrol ek latransparans dan lafason ki larzan i ganny distribye pou diferan proze dan bann distrik.  Mr Speaker pou terminen mon ou le reasir tou pep Seselwa ki sa Bidze in tous dimoun,in tous tou dimoun, atraver bann diferan alokasyon dan bann minister. Nou bezwen adopte en lapros global e nou ki bezwen fer li marse par lafason ki nou enplimant li.

Pep Seselwa nou pei pe progrese, Prezidan Faure pe tenir, annou tenir for. Mr Speaker nou La Digue, nou pran gran latansyon lo nou kiltir, sirtou kot nou lorizin i konsernen. Mwan Noline Antoine Sophola …

 

(APPLAUSE)

 

HON NOLINE SOPHOLA

… mon fyer mon lorizin Afriken senpleman akoz nou gran pye ti bann lesklav. Mon kapab dekrir nou konman en melting pot, e mon pou dir ki nou tou ki la dan sa Lasanble nou desandans Afriken! Fodre pa ki nou per pour nou dir, annou reflesir avan parle, avan kritike parey en sanson i dir. Mr Speaker …

 

(Interruption)

 

HON NOLINE SOPHOLA

… (etiket ou manke madanm)

 

 

(Interruption)

 

HON NOLINE SOPHOLA

Mr Speaker nou Lasanble i live! Fodre donn bon legzanp nou popilasyon espesyalman nou bann zanfan. Mersi Mr Speaker

 

(APPLAUSE)

 

MR SPEAKER

Mersi Onorab Sophola. Bon i annan – depi yer mon pe ganny en pe komanter deor ki konmkwa zot koz bokou. Me parey Onorab Letourdie in fer sorti zot bann Parlmanter, zot la pour parler, e mon bezwen les zot parler. Bon avan nou pran Break, mon ti a zis kontan ki Lasanble, o non Lasanble Nasyonal nou pas nou kondoleans avek lafanmir Julie e sa gran fanmir SBC e Nasyon a lokazyon sa mesaz tri ski nou’n aprann yer, kot Marylene Julie in passed. E nou konnen in prezan dan nou bann deliberasyon kot Lasanble, sirtou FPAC kot in la pou li kouver bann deliberasyon.  E nou konn tre byen son bann involvement ankor partou dan bann landrwa kot bann zournalis in frekante.  So, o non Lasanble Nasyonal mon ti a kontan ki nou pas kondoleans avek son fanmir.

Bon avek sa nou ava pran en Break e mon sizere nou retournen 4.15 pour nou kontinyen e nou pou pran Onorab Terence Mondon, swivi par Onorab Paul Ernesta.

 

(BREAK)

 

MR SPEAKER

Bon bonn apre midi tou Manm Onorab.  Bonn apre midi tou dimoun ki a lekout e ankor en tre bonn apre midi Maurice Loustau-Lalanne avek son lekip ki’n sanze.  Mon krwar Ms Croisee avek Ms Verghese welcome parmi nou.  E zot pou la pou akonpanny Minis pou apre midi.  Bon mon kontan sa pti mirmirasyon apresyasyon nou pe kontinyen avek nou lantrennman isi kot Lasanble.  Nou fer sir ki tou  nou bann rezerv osi tou in kaba take over dan okenn sirkonstans ki kapab arive.  Bon mon ti a kontan osi tou fer konnen bann Manm Lasanble ki pandan lunch break mon ti ganny prezante avek en dokiman par Onorab Lemiel e Onorab Esparon ki zot ti an Misyon en Misyon PAP Ruanda e zot in prezant mon Lofis avek en gro liv – en gro dokiman – ‘’The True story and Heavenly Culture World Peace Restoration of Light – Peace and Cessation of War’’.  I en gro dokiman.  I en dokiman vreman enteresan ki’n ganny compiled.  Mon’n fin fer desann.  Mon’n met dan Library.  Savedir i accessible pou tou bann Manm si zot anvi fer okenn referans ki zot oule fer and so on.

Apre osi tou mon anvi enform bann Manm ki nou pe aim pou nou fini avek Repons Lendi le 12 e Mardi le 13 – nou’n deza fini sirkil dokiman ki’n sorti kot Minister Finans swivan meeting ki nou ‘n gannyen yer dan konpannyen SS Payet avek PS Thésee, kot nou pou koman pran bann Minister, bann Departman Mardi bomaten e nou ler travay i pou 9er a 12 e 1er-5.30.  So nou pou pran en pti pe.  Nou pou pran 1erdtan dan nou Break time.  Probableman par- ler nou a komans 1.15 me selman as a much as possible.  E nou pou respe en pti pe bann ler osi tou ki nou rann lantenn avek SBC.  Nou bann Break bomaten – Break apre midi i pou reste parey.  Ok?  So vwala en pti pe bann fason ki nou pou travay as of Mardi prosen.  Bon nou ava demare e mon ava donn laparol avek Onorab Wavel Woodcock ki pou swiv par Onorab Wilbert Herminie.   Onorab Woodcock.

 

 

(BREAK)

 

MR SPEAKER

Bon, nou a kontinyen nou travay.  Mon ava pas laparol avek Onorab Terence Mondon.

 

HON TERENCE MONDON

Mersi Mr Speaker.  Bonn apre midi Minis avek ou lekip, tou bann koleg MNAs e tou dimoun ki pe ekout nou deba Bidze.  Ser frer Seselwa Lendi le 5 Novanm, nou ti ganny prezante avek Bidze Nasyonal pou lannen 2019.  Parey labitid, mon ekout diskour Minis Finans avek bokou lentere, pou esey konpran ki bann priyorite Gouvernman Msye Faure pour sa lannen ki pe vini, e ki bann stratezi zot pe adopte pou retir nou pei kot i été ozordi.

Mon ti ekspekte ki dan son diskour Minis Finans, ti ava adres bann size ki preokip sak Seselwa e vin avek en plan konpreansiv ki kapab redonn nou pei en nouvo souf, afen ki tou nou frer e ser ki’n perdi o sant devlopman sa Gouvernman i ava kapab ganny en pe lespwar.

Mr Speaker en Bidze Nasyonal i en zouti politik enportan pou en pei, e I devret ganny prepare dan en fason progresiv e byen kalkile.  Atraver en Bidze nou devret pe adres problenm dan en fason serye e konsistan.  Malerezman, mon bezwen dir avek Minis ki sa bann eleman i manke dan sa Bidze.

Premyerman, I annan serten mezir mal kalkile e ki pou agrav sityasyon nou pep ; par egzanp lenpak sa nouvo taks lo lenportasyon lavyann.  Dezyenmman, serten stratezi pa al ase lwen e i pa pou neseserman efektiv.

E trwazyenmman mon osi vwar serten desizyon ki pa konsistan avek bann promes ki sa Gouvernman in fer avek sa pep Seselwa.

Katriyenmman Bidze pa pe adres problenm kou lavi dan en fason serye e konpreansiv.

Mr Speaker mon sezi loportinite pou donn mon reaksyon lo sa Bidze ki Minis Finans in dekrir koman en Bidze, pou stabilite e progresyon ekonomik.  Malerezman mon vwar en Bidze plito siperfisyel i pa tenir kont larealite lavi nou pep.

Menm si reform 2008 etablir anba sirveyans IMF ti anmenn stabilite e krwasans ekonomik fodre pa zot anbet zot lekor pou dir ki Bidze 2019 pe al dan menm direksyon akoz I annan en pe letan ki Gouvernman in fini sortir lo sa semen reform.  I enportan pou Seselwa reflesir byen e konpran kote nou ti été 10an pase kote nou été ozordi e kote nou pe ale koman en nasyon anba sa menm Gouvernman.  Bokou i ankor rapel sakrifis ki Seselwa ti bezwen fer pandan reform.

Seselwa in sibir e dan Lasanble Nasyonal sa letan, tou le 2 kote latab ti siport sa prosesis reform.  I enportan alor ler nou koz lo Bidze Nasyonal nou osi tenir kont ki’n pase avek nou resours pandan sa menm peryod kot lamazorite Seselwa ti fer sakrifis.

Mr Speaker an 2008 Gouvernman aktyel ti’n anmenn nou pei o bout en presipis det nou pei ti’n ariv 150poursan GDP e nou pei ti pros pou deklar fait. Sa i pa en sityasyon ki nou devret fer nou fyer ki devret fer nou fyer me koman en pep i plito demontre neglizans en Gouvernman dan zesyon resours son pep.

Avek led e sipor Fon Monneter Enternasyonal e Labank Mondyal, en nouvo stratezi ti ganny formile pou met nou pei lo semen stabilite e krwasans ekonomik.  Avek led sa 2 lorganizasyon enternasyonal,  Sesel ti antre an negosyasyon lo nivo bilateral e miltilateral pou re-fas nou det eksteryer pou sorti 150poursan an 2008 pou vin 67poursan GDP an 2013.

I enportan pou note ki plizyer travayer Seselwa ti perdi zot lanplwa e parmi ti annan plizyer profesyonnel eksperyanse ti ganny demande pou pran early retirement.

Mr Speaker me sa ki lamazorite Seselwa pa ti konnen sa letan, enkli mwan menm, se ki ler nou ti pe sakrifye en pti group dan leadership Parti Lepep ti pe donn bal avek resours nou pei.  Nou’n aprann tou dernyerman atraver travay FPAC ki plizyer 100enn milyon ti pe kit pei atraver FIU pou bann servis ki ziska ozordi personn pa kapab zistifye an term valer pou larzan.

En kont spesyal ti osi ganny organize kot bann sef ti met larzan ki zot sezi e apre partaze antre zot anba non ‘’‘Sekirite Nasyonal.’’  Nou’n osi aprann atraver Mosyon lo COSPROH ki dan sa menm peryod reform serten msye kot SMB ti pe aste plizyer batiman dan Singapore, Dubai parmi plizyer lezot pei ankor.

Nou’n osi dekouver ki 50milyon Dolar ki Seselwa ti ganny kado ki ti pe ganny partaze e met lo bann diferan kont aletranze.  Lalis I long Mr Speaker me i pa mon lentansyon pran tou mon letan koz lo labi e soufrans lepase dan sa Bidze.  Me ler Parti Lepep i servi sa fraz ‘Seselwa i touzour o sant devlopman’ mon le senpleman dir avek zot silvouple aret pran Seselwa pou bann lenbesil!

I annan en gran diferans ant ‘linyorans’ ek  ‘lenbesil.’  Mr Speaker mon retras sa semen reform ekonomik ki Minis in koz lo la dan son diskour Bidze akoz nou bezwen met keksoz dan son vre perspektiv.

I vreman enportan ki nou pep i realize kote nou debout ozordi par rapor avek kote nou ti’n kapab ete si nou ti’n ganny dirizan ki onnet si ti pe ganny dirize par bann dimoun onnet e senser.  Ser frer Seselwa nou annan en zoli pti pei avek en popilasyon selman 94mil dimoun.  Nou kapab zis mazinen kote nou ti pou été ozordi si nou resours pa ti ganny abize

Mr Speaker aprezan mon oule met sa Bidze ki ladministrasyon Prezidan Faure in prezant avek nou Lasanble dan perspektiv kote nou été ozordi e kote nou pe ale.

Mr Speaker lannen pase zot in met en sonm R10milyon dan Bidze Ladefans anba en item apele National Security Services. Nou’n aprann resaman atraver travay FPAC ki sa R10milyon i en larzan ki ganny kontrole par Komandan- An-Sef Ladefans – Brigadye Leopold Payet e son zofisye responsab pou finans zot zis zot siny blank cheque san okenn dokimantasyon.  Kestyon ki nou bezwen demande eski se sa zot definisyon pou prensip bon gouvernans?

Ler plizyer milyon larzan piblik i ganny servi koman larzan pos serten endividi.

Seselwa in perdi plizyer bilyon Roupi swa an term resours finansyel oubyen atraver bann propriyete ki’n ganny partaze antre en pti group dimoun.

Kestyon ki nou bezwen demande akoz ki dan Bidze 2019 napa okenn provizyon pou outsource lenvestigasyon lo sa 50milyon Dolar avek en Lazans enternasyonal spesyalize dan sa domenn?  Omwen sa ti ava permet pep Seselwa pou konn laverite e an menm tan donn nou pep sa posibilite rekiper resours ki’n ganny pran avek zot.  Mr Speaker mon demande oli lazistis pou nou pep?  Akoz lazistis i enn bann prensip bon gouvernans.

Mr Speaker ziska prezan napa en stratezi kler koman zot pou elimin sa 40poursan povrete parmi nou popilasyon.  Lasarite anba Byennet Sosyal pa pou zanmen elimin lapovrete.  Pandan sa dernyen 5an Sekter lagrikiltir in tonm sitan ba olye siport partisipasyon nou lazenes dan sa sekter me ki nou’n aprann lanmwatye later ki ti pou Lekol Lagrikiltir ti ganny donnen avek Sinwan pou en hydrophonic farming prive tandis ki nou zenn ti bezwen pran pyos avek lapel.  Ler en Gouvernman i sakrifye letid e devlopman nou zenn pou entretenir en etranze se Sinwan ki o sant devlopman e pa Seselwa!

Nou devret kapab konpran akoz nou la kot nou été ozordi.  Mon oule dir Minis pou kapab ogmant prodiksyon lokal dan Sekter Lagrikiltir lo en nivo lo en tre o nivo zot pou bezwen fer bokou plis ki sa ki’n ganny propoze dan sa Bidze ozordi sa sekter napa zenn pou fer larelev.

Bidze 2019 ti devret vin avek en Plan Konpreansiv pou Lekol Lagrikiltir enkli lekipman ek teknolozi modern.  Gouvernman i devret repran sa landrwa avek Sinwan e re devlop sa landrwa pou kree plis lespas pou lelevaz zannimo enkli prodiksyon pti poul e pti koson ki fermye ti kapab aste a en pri sibvansyonnen.

Avek en Plan Konpreansiv Lekol Lagrikiltir i ava kapab zwe en rol enportan dan devlopman sa sekter.  Me tou sa pou pran en pe letan antretan Seselwa pou bezwen aste lavyann enporte a en pri pli eleve.  Alor stratezi ki’n ganny propoze dan Bidze pou Sekter Lagrikiltir i enn ki pa neseserman armonize e in mal kalkile.

Mon krwar ki Gouvernman i devret donn bokou plis sipor sekter lagrikiltir ki ti ava permet zot prodwir a en pri pli konpetitiv lo marse lokal, san ki zot bezwen fer prodwi enporte vin pli ser.  Mon konvenki ki Seselwa pou swazir prodwi lokal otan ki napa en gran diferans ant pri lavyann enporte e lavyann lokal.  Mon ganny lenpresyon ki sa Gouvernman pa okouran ki i annan en gran kous nou popilasyon ozordi ki pe depan lo prodwi enporte pou nourrir son fanmir.  Fodre note ki Bidze ki’n ganny propoze pa adres kou lavi e logmantasyon dan saler, pa neseserman en solisyon soutenab.

Mr Speaker tou dimoun i konnen ki ozordi i annan en group Kartel ki’n fini pran kontrol lenportasyon e Gouvernman pa pe fer nanryen pou protez lentere Seselwa kot bann pri komodite pe ganny fikse o detriman konsonmater.

Mon oule demann Minis ki mezir ou pe pran kont sa bann Kartel anvi ki Kartel i en pratik ilegal dan en marse lib?  Ki ou plan proteksyon pou nou bann konsonmater?  Larises i osi ganny kree lo nou pei e pe al dan bann kont aletranze e alor Gouvernman napa en stratezi konkret pou fasilit larantre Seselwa dan bann landrwa dominen par etranze.  Sa latitid lese fer pou protez dalon pe kout nou pei tre ser.

Mr Speaker I kler ki sa Gouvernman napa sa disiplin neseser pou retir sa fardo det lo nou ledo.  E si zot kontinyen parey zot pe ale nou zanfan osi pou kontinyen anmenn sa fardo.  Ler nou regard bann Bidze ki’n ganny prezante pandan sa dernyen 5an, i kler ki Bidze i ganny prezante avek en overall deficit e sa I ganny finanse par loan adisyonnel.  En loan I reste en det menm si I vin avek serten konsesyon.  Depi 2013 ziska 2018 nou det in redwir par selman 7poursan e in pran sa Gouvernman 5an pou fer sa.

Pourtan rediksyon det ti enn bann priyorite anba reform ekonomik.  Napa konsistans e sa Gouvernman pa pe tenir son langazman.  Alor ki zot kontinyen fer det pou kouver zot defisit – non pa prezant en Bidze ki reflekte reveni ki pei i kapab ramase.

Leader Lopozisyon ek Onorab Afif in donn legzanp bann biznes kot Gouvernman pa pe ranmas reveni ki zot devret pe ranmase.  En zour zot dir avek nou, ki a lafen 2018 zot pou redwir nou det a en nivo 50poursan GDP – en lot zour zot dir sa 50poursan GDP pou ganny materyalize ver lafen 2020.  E ozordi zot pe koz lannen 2021.

An plis ki sa a sak fwa ki I annan en lespas fiskal, swa atraver larzan ki pa’n ganny depanse, oubyen atraver reveni an plis ki’n ganny kolekte, Gouvernman I anmenn en Bidze Siplemanter kot Lasanble Nasyonal.  Napa leskiz ki zot pa’n donnen pou zot depans sa larzan.

Dan sa menm lespri ki Onorab Leader Lopozisyon in avanse dan son larepons lo Bidze, i ti ava preferab ki zot servi larzan an plis dan en fason pli prodiktiv olye retourn kot bann Departman oubyen Minister.  Par egzanp akoz zot pa met sa bann larzan sirplis a dispozisyon Seselwa pou devlop bann sekter prodiktiv ki an retour i ava kree plis larises pou nou pei?  Ouswa, fer bann sa larzan disponib pou bann proze lenerzi renouvlab tel ki proze photovoltaic parey i ganny propoze pli boner.

Dan zot rapor Bidze zot in osi vwar ki zot pe planifye en legzersis pou rekalkil nou GDP akoz dapre zot leksperyans, sa nouvo lenformasyon ki zot ava anmase pou fer GDP pli o ki été ozordi.  E sa i ava fer ki nou poursantaz det an relasyon avek GDP ava abese otomatikman.  Mon oule zis dir avek Minis ki fodre pa sa i vin en lekskiz pou prolonz repeyman nou det.

Mr Speaker I annan plis ki 5an depi ki Labank Mondyal ti prezant Gouvernman zot rapor lo lanvironnman biznes isi Sesel.  Zot ti fer resorti bann keksoz ki bezwen ganny fer, pou ki nou lanvironnman biznes i vin pli fasil afen ki i ankouraz partisipasyon sekter prive ensi byen ki lenvestiser etranze.

E ler mon konpar pozisyon Sesel lo klasman enternasyonal, avek lezot pei tel ki Maurice e Rwanda mon vwar ki Sesel pa pe bouze.  Tandis ki Rwanda en pei ki’n pas atraver zenosid kot 1milyon Tutsi ti ganny touye dan lespas 100 zour i ozordi lavil pli prop dan Lafrik.  I 2enm lavil pli an sekirite dan lemonn.

Lo klasman fasilite fer biznes zot sorti 90enm an 2008 pou vin 29enm an 2017.  Mr Speaker sa i legzanp en pei kot i annan direksyon kler  kot son Gouvernman pe fer en travay serye pou son pep.  Maurice i ozordi i plase 25enm sorti 49enm lo klasman e in fer sa dan lespas 1an.  Tandis ki Sesel I reste 93enm lo klasman.  Napa progresyon dan sa sekter Minis.

Mr Speaker en lot legzanp ki montre ki sa Gouvernman pa konsistan, se grander striktir Ladministrasyon Prezidan Faure.  Apre ki sa menm Gouvernman ti fer redundant plizyer 100enn travayer Seselwa anba progranm reform ekonomik, ozordi nou vwar sa striktir in retourn plizoumwen parey avan – an term lakantite travayer dan servis piblik.

I kler ki latet sa Ladministrasyon Prezidan Faure i tro lour e sa i anmenn en konsekans negativ lo Bidze pei.  Dan menm konteks parey mon bann koleg LDS in fer resorti bann diferan striktir i travay dan izolasyon e napa bon kordinasyon antre zot sa fason travay i anmenn bokou gaspiyaz dan resours piblik.

Mon donn en senp legzanp ; SLTA i pey en pti kontrakter pou penn bus stop lo semen son landmen PUC i fouy dan menm landrwa pou zot pas zot kab e 2 semenn plitar sa Lazans i bezwen re-pey sa kontrakter pou repenn bus stop ankor.

Nou vwar menm senaryo partou dan Gouvernman e sa i repete lannen apre lannen.  I kler ki bann sif dan sa Bidze i osi reflekte en bon poursantaz gaspiyaz e mon ti ava kontan konnen si Minister i fer en travay pou idantifye e pou koup gaspiyaz dan servis piblik?

Mr Speaker ler mon fer letour mon distrik Takamaka – kot mon reste – kot mon ne mon konstate ki Gouvernman i pran bokou letan pou konplet serten proze enportan pou lakominote.

Proze lakaz ex-Desaubin alokasyon lakaz i ganny anvoye parey lavant later 1an in pase e lamazorite aplikan ki pe esper en lakaz pa konnen kote zot debout e zot kontinyen viv lo ‘’petet.’’  Proze land bank Anse Corail I annan plis ki 4an depi ki sa 6 morso later in ganny divize e se selman detrwa zour pase ki proze semen ki mezir anviron Selman 30 a 35met pe ganny konstrir pou deservi sa 6 morso.  Zot!  En dimoun I bezwen esper 4an apre ki later in ganny divize pou li ganny asiste.

Elarzisman semen Val D’En D’Or; sa osi I paret ki’n sezi ankor en kou.  Kordgard Takamaka I fer plis ki 6 mwan ki nou Kordgard I fermen pourtan Minis Finans ti dir nou dan FPAC ki en sonm larzan ki nou ti pe unfreeze pou al ver reparasyon sa kordgard.  I pa akseptab pou annan sa retar dan en tel proze sitan enportan pou  lakominote.  Semen Anse Marie Louise pandan letan gro lapli dimoun napa landrwa pase e zot bezwen rod ‘Pirat’ zabitan pe esper plis ki 5an.  Mr Speaker mwan osi mon en dimoun ki krwar dan Seselwa e mon konnen ki lamazorite nou lafors travayer Seselwa i posed sa devouman e konpasyon pou sa transformasyon ki nou pei i bezwen.  Menm si dan bokou landrwa travay kot i annan management etranze parey dan bann gran lotel zot pa ganny byen apresye e menm parfwa zot ganny maltrete zot kontinyen desann tou le bomaten pou fer zot zournen konte.  Sa i fer mwan mazin travayer Banyan Tree ki ozordi zot in perdi zot lanplwa a senpleman akoz nou annan en Gouvernman dezorganize.

Pou konklir Mr Speaker nou pei i fer sifizaman larzan pou donn pep Seselwa en lavi bokou pli meyer e prospere i vreman malere ki nou resours pe plito ranpli pos en pti group privilezye dan nou sosyete.

E si ozordi nou la kot nou été se akoz bann desizyon pa’n zanmen ganny fer dan lentere pep Seselwa an zeneral parey nou toultan dir Seselwa i o sant devlopman.  In plis ki ler pou nou met lord dan nou pei e pour fer sa nou bezwen en dirizan ki for, onnet e senser ki annan byennet Seselwa a ker.  Mon remersi ou Mr Speaker.

 

(APPLAUSE)

 

MR SPEAKER

Mersi Onorab Mondon.  Mon a pas laparol avek Onorab Paul Ernesta.

 

HON PAUL ERNESTA

Mersi Mr Speaker.  Mr Speaker mon bann koleg Onorab tou dimoun a lekout e zabitan Takamaka bon apre midi.  Mr Speaker letan mon ekout entervenan avan mon pe fer revi lo sityasyon bann keksoz Takamaka ki pa’n arive i fer mon realize ki mon krwar Onorab i pa konn son distrik e i bliye ki i ti deza la konman Manm Elekte pou distrik Takamaka e osi konman PS Transpor pandan sa letan e tou sa bann bokou sa bann proze ti la avan sa dernyen 5an 6an.

E Mr Speaker stabilite i senpleman vedir en Leta ki stab e stab i pa vedir ki ou reste an plas Onorab me plito ki ou annan bon balans e ou pa kapab fasilman ganny savire zis parey en bato ki stab lo kannal i stab me i pa reste an plas.

Progresyon se letan ki ou pe gradyelman devlope e bouz ver en leta pli avanse se sa tenm Bidze pa sa ki’n ganny dir pli boner ou menm bomaten kot stabilite i ganny definir konman letan ou pe reste an plas annou aret servi nou Lasanble pou konfiz e mis lead nou pep silvouple parey zot konfize.

 

(APPLAUSE)

 

MR SPEAKER

Lo en kote progresyon ek stabilite siporte par en Bidze plis ki R8bilyon ; lo lot kote ‘’koze’’, ‘’koze’’, ‘’koze’’, ‘’koze’’, ‘’koze’’ menm me ni en plan ni en progranm zot napa ‘’konplent’’ ‘’konplent’’, ‘’konplent’’ me okenn solisyon zot napa.  E pou zot leskiz …

 

(APPLAUSE)

 

(Interruption)

 

MR SPEAKER

Order!  Order!  Order!  Onorab, Onorab, Onorab.  Bon mon pa le tann okenn akizasyon ‘’voler’’ dan sa Lasanble.  Ok.  Serten term in ganny servi boner par serten Manm i pa’n nonm ‘’voler’’ mon pa oule nou depas sa bout pou nou akiz okenn Manm ‘’voler’’ dan sa Lasanble.  Onorab Ernesta i annan laparol e parey pou tou lezot Manm annou ekoute annou donn li son sans pou li koze.  Onorab Ernesta kontinyen.

 

HON PAUL ERNESTA

Mersi Mr Speaker.  Mr Speaker granmoun in toultan dir letan ou montre en ledwa lo ou kanmarad kat i pwent lo ou.

 

(APPLAUSE)

 

MR SPEAKER

Mr Speaker e pou zot leskiz zot dir kasyet plan me lekel ki pe benefisye letan ki zot pe kasyet sa swadizan plan?

1an pou rezourd problenm eroin ki zot dir zot annan eski sa bann droger pe benefisye?  Eski zot paran pe benefisye?  Eski sosyete pe benefisye?  Si ou demann mon Mr Speaker sel plan ki zot annan se pou ‘’koze’’, ‘’koze’’, ‘koze’’ e kontinyen ‘’koze’’ akont zistwar lepep Seselwa.

Si ou demann mwan Mr Speaker a mon avi zot sel plan ki zot annan se sa plan ‘’Bannann Mozambique’’ ki zot in rekonnet ki zot dir zot annan.  Bidze 2019 prezante Lendi par Minis Finans i kontinyen en seri mezir ki pou adres konsern tou Seselwa.  Tou Seselwa i merit vwar li dan sa Bidze parske i reflekte dezir Gouvernman pou fikse bann problenm ki lepep Seselwa pe fer fas avek, avek lentansyon pou amelyor kalite lavi Seselwa i annan 10an isi apre ki lemonn ti’n pas dan en boulversman ekonomi grav enn ki zanmen lemonn li menm in konnen ki plis ki 50an nou pti pei ansanm avek plizyer nou bann dimoun ti vwar nou anba en kriz ekonomik mondyal.  Nou ankor rapel tre byen difikilte sa moman depar volonter, problenm carer e lavi ser an rezilta devalyasyon nou Roupi.

I ti an moman kot bann ek leker pli feb, ti’n konpletman les tonbe zot ti larg lanmans pwalon e deklar lakwizin tro so!  Me i ti annan en lot group ki ti debout for deryer sa bann reform e ozordi mon fyer pou obzerve atraver apersi zeneral lekonomi 2018 prezante par Minis Finans mon konstate ki lekonomi nou pei i an bon sante parey Onorab Ghislain in dir botan in anons boner.

Mr Speaker malgre sa, nou realize ki pa tou ki parfe ki i annan serten nou sitwayen pa santi zot personnelman ganny touse zot napa sa feel good factor sa i reisit e sikse nou progranm reform pa ankor ariv devan zot laport.

Pri lavi i reste kantmenm ase o pou enn de nou zabitan, lozman malgre tou sa milye lakaz konstri par Gouvernman lepep i reste ankor en gro problenm pou bokou Seselwa enkli mon distrik Takamaka.  Mr Speaker mwan mon dir sa group dimoun p.a.s.y.a.n.s akoz sa Bidze 2018 pou adres plizyer konsern lepep.

Sa i annan en keksoz ki ganny reflekte dan sa Bidze 2019 se enn bann prensip fondamantal nou parti ki met nou pep o sant tou devlopman.  En Polisi ki pa le kit okenn nou zanfan deryer.  En Polisi ki krwar dan liberalizasyon liberasyon sak zanfan sak zenn Seselwa irespektiv kouler son lapo relizyon krwayans politik ouswa son lorizin rasyal ou menm ki kontinan son zanset i sorti lo la.

Ledikasyon e devlopman resours imen i sitan fondamantal e enportan pou nou ki ozordi 12.1poursan Bidze Nasyonal in ganny dedye pou sa sekter.

Sa i reprezant en lenvestisman R10,786mil par sak zabitan.  Pandan 40an sa sekter in reste parmi sa de premye priyorite dan progranm Gouvernman.  E sa ki nou kapab vwar ozordi se ki malgre bann defi ki nou annan nou annan serten lefikasite dan sa de sekter.

Si ozordi i annan profesyonnel kalifye dan Finans, Lasante, Tourism e lezot sekter se gras sa sistenm ledikasyon gratwit avek son lobzektif menm sans pou tou zanfan Seselwa.  Mr Speaker sa Gouvernman in travay pou anmenn sa bann Polisi dan sa sistenm ki’n benefisye bokou nou anndan prezan dan sa Lasanble.

Mr Speaker sa i merit motiv nou pou redouble nou zefor pou kontinyen amelyor nou sistenm ledikasyon antye malgre tou sa ki Gouvernman pe fer i toultan annan lespas pou amelyorasyon.  Mon swe a lavenir se vwar en pti pe plis alokasyon sa Minister i al ver bann depans pou materyo lekol e formasyon bann ansenyan ki annan lenpak direk lo ledikasyon nou zanfan.

Komitman Gouvernman anver lasante lepep i ganny klerman demontre.  Mr Speaker dan sa R1.2milyon ki ankor enn fwa Gouvernman in demann nou pou aprouve, pou amelyor nou servis lasante mon pa pou fer krwar pou en moman pou apresye defi ki bann travayer lasante i fer fas avek an rezilta nou devlopman ekonomik e nou o standar lavi nou pep ozordi pe soufer avek bann maladi ki kout bokou pli ser pou sonnyen ; dyabet, kanser, tansyon o, problenm kardyovaskiler, bann maladi lo plans parey nou bann dokter i apel sa disease of affluence.

Swivan bann mezir anonse par Minis e la mon refer lo sa lentrodiksyon sa prescription fee.  Mr Speaker nou tou nou pou avoue ki sa i a ede koup en pe lo bann labi.  Nou tou nou konn sityasyon kot bann sant lasante dan Lendi bomaten ouswa lannmen en konze piblik.  Ozordi dan mazorite fridge Seselwa nou konnen i annan detrwa boutey latizann ki nou zis servi en pe epi pli tar zete.

Seselwa i merite realize ki sa i vin a en kou tan ki sa nouvo mezir i pou adres labi lo en lot kote mon santi ki sa Minister i kapab fer pli byen.  Malgre lannen apre lannen Bidze pou Minister Lasante in kontinyelman ogmante saler Scheme Service travayer Lasante in ganny revwar.  Pep Seselwa ti a swete an retour vwar en amelyorasyon dan nivo sa servis.

E la Mr Speaker nou bezwen konstate ki nou problenm dan lasante pa pou rezourd avek pli gran kantite larzan me avek en sanzman e latitid personnel se pou sa rezon ki ozordi mon pou demande enn fwa pou tou ki sa Minister e entrodwir en code pou drwa bann pasyan kot par egzanp i defini klerman ki kantite letan ki akseptab pou en pasyan asiz lo en ban klinik pou vwar dokter?

E ki kantite letan ki akseptab pou en pasyan ganny sans vwar en spesyalis?  Minister Lasante i bezwen etabli bann target defini pou ki lepep Seselwa konman son konsonmater e son kliyan i ava osi konnen ki zot drwa.  Fodre pa ki sa Minister i vwar sa konman en lesey pou redwir son lotorite e son lendepandans me plito konman target ki’n etabli pou son lekor pou pli byen performen avek bi pou donn en pli meyer servis pou lepep Seselwa.

Mr Speaker Gouvernman pe met en sonm en pe plis ki R1.3milyon dan sekter lafanmir, ki reprezant en logmantasyon vreman sibstansyel e in osi letan nou get repartisyon Bidze e lezot mezir dan tou lezot sekter mon vwar son benefis direk ki al kot nou bann fanmir.

Mon rekonnet e apresye sa komitman e lenportans ki Gouvernman in mete pou nou lafanmir konman en lot sekter kle pou nou pei.  Sa i akoz ozordi nou bann fanmir Seselwa espesyalman nou bann fanmir Takamaka, zot pe fer fas avek bokou defi enfliyanse avek bann fakter tel ki mondyalizasyon, fleo sosyal e lezot kiltir enporte dan nou sosyete.  Konsekaman sa pe challenge e menm kas nou fabrik lafanmir.  Mr Speaker bokou mon bann zabitan pe travay an deor distrik.  Bokou zot bezwen kit kot zot lakour granmaten pou ganny bis pou al travay e ariv kot zot pa pli boner ki 6er, akoz sa problenm traffic jam e osi problenm bis.

Sa i anmenn en lenpak negativ lo sa fanmir, akoz i napa letan pour li pas ek son zanfan.  E i osi azout plis presyon lo sirtou letan i mank sa bis, de lot kote si ti ava anvi aste en loto dezyenm men o mwen R35,000 avek dizon Mr Adeline, ki ti a permet li depas pli fasilman, me malerezman son kapasite finansyel Mr Speaker pa permet li.

 

HON JUDE VALMONT

 (Off-Mic)

Mr Adeline pa pour vann li…

 

HON PAUL ERNESTA

E menm ozordi avek devlopman ki’n arive dan sa pei, napa loto R35, 000 e mon pa krwar ki Msye Adeline pour oule vann son loto R35,000 menm avek son pli bon dalon,

Mr Speaker sa i montre ki i pour toultan annan en gran poursantaz nou zabitan ki pour toultan depan lo servis bis.  E i enportan alors ki avek sa bidze 2019 SPTC i get dan bezwen servis bis pour nou distrik.

Sa ek lespri pour met bis spesifikman pour nou distrik, par egzanp met en bis ki vir ou komans pran dimoun dan plato Takamaka.  E Mr Speaker sa taks ki’n ganny mete lo sigaret e labwason disik i pour anmenn en benefis lonterm pour nou fanmir, i annan politisyen pe fer krwar ki sa pour ogmant pri lavi, mon kondann zot pour pa koz laverite ek sa pep zis pour lavantaz politik, bidze Minister Lasante in ariv R1.2bilyon ki reprezant R10,587 par sak zabitan.  E en bon porsyon pe al ver tretman, ozordi atraver Polisi Gouvernman e prensip nou parti kou lasante i ganny distribye atraver popilasyon e konsekaman sa fanmir i pa santi sa lenpak direk lo sa kou ki i bezwen peye.

Parkont vre azanda en lot group ki krwar dan prensip liberal, se pour fer Seselwa pey pour son lasante, zot in deza dir, fer Seselwa pey pour swen spesyalize… Sa i vedir ki si dan en lakour i annan 4 manm fanmir deza sa fanmir pour bezwen trouv plis ki R40, 000 pour kouver zot fre lasante, la ki vreman sa fanmir pour soufer kot i pour santi lenpak direk vre kou lavi, deza nou pe santi lefe de liberalizasyon dan serten sekter.

Dapre statistik Minister Lasante bann maladi tel parey dyabet, obezite, tansyon e lezot ankor ki i annan en lyen direk avek konsonmasyon sa bann prodwir pe montre en gran logmantasyon e i pe vin tre alarman.

Donk sa pe met plis presyon lo Bidze Minister Lasante pour tret sa bann maladi.  Sa taks alor pour ede non selman dan redwir konsonmasyon sa bann prodwir, me osi responsabiliz nou pour pran swen e kontrol nou lasante.  Savedir pli nou konsonm mwens ouswa nou pa konsonm ditou sa bann prodwir i pour ede gard nou lekor an bonn sante, nou vin pli prodiktiv, i redwir nou risk malad e osi presyon lo nou sistenm lasante.

E letan nou pa pe aste sa bann prodwir, plis larzan i reste ek nou, e i al ver lekonomi familyal ki anmenn plis benefis pour nou fanmir dan lonterm, koman en paran responsab nou bezwen konpran sa nesesite pour aret detri nou lekor e nou fanmir, e se sa ledikasyon ki nou bezwen donn nou pep, koman en dirizan responsab akoz demen nou pour erit en pep malad e nou pour bezwen trouv plis larzan pour sonny zot.

E annou ankouraz e demann Gouvernman pour met Polisi strik evantyelman dan sa bann kalite prodwir ki i annan serten nivo disik ki par lao standar recommandable, ankouraz marsan pour fer vini plis prodwir alternativ ouswa ki sugar free, deza la i pour ede fer desann pri lavi akoz napa tax lo sa bann prodwir konsekaman sa pour amelyor lavi nou pep.

Mr Speaker en lot group sitwayen ki’n ganny touse dan en fason partikilye dan sa Bidze, se nou bann frer e ser ki ankor pe esper en lozman ouswa later pour fer, pour zot batir zot fwaye, en nide ki mwan vreman welcome, me de lot kote Minister konsernen i merit met plis zefor dan lenplimantasyon sa bann proze, pour asire ki tou bann proze i ganny byen fer avek bon planifikasyon e delivre vitman, la mon pe koz pour sa proze lakaz ex-Desaubin dan distrik ki kontrakter pa ankor delivre.

Mon rekonnet bann retar e difikilte tel ki negosyasyon avek propriyete prive pour ganny later pour met outflows STP negosyasyon ek distribiter pour ganny bann materyo neseser pour konstriksyon STP.  Me la ki tousala in fini mon demande ki kontrakter i akseler zot travay pour konplet sa proze ki ek lespwar avan sa lannen fini bann zabitan a kapab ganny zot lakle.

Mr Speaker demann pour later i reste en lot bezwen pour nou zabitan. Pour mwan i enportan ki plis zefor i mekaniz pli favorab i ganny met an plas pour alokasyon bann later pour nou zabitan, e mon demande ki avek sa nouvo land bank Anse Corail ki lo son staz finalisation i ganny allocate avek i ganny allocate avek mon bann zabitan Takamaka ki lo lalis demann later an deor sa Sistenm Pwen ki dezavantaz nou bann zabitan.

Mr Speaker kapasite finansye mazorite nou zabitan i limit zot pour aste later dan prive, nou tou nou konnen konbyen later i koute ozordi dan prive, menm si ozordi pri later dan land bank i plis ki R35,000, me nou konnen son pri i bokou abordab pour nou bann dimoun.

Mr Speaker letan Minis in koz serten sibvansyon ki in mete pour bann zabitan La Digue lo bann housing loan pour konstriksyon lo sa zil, mon kontan pour zabitan sa zil i montre ki Gouvernman i care pour son dimoun.  Avek sa lespri caring mon pour demann Gouvernman pour osi get nou bann zabitan Takamaka par konsider donn zot bann loan favorab ki a permet zot konstrir ou menm konplet zot lakaz, mon dir sa Mr Speaker akoz sa loan ki Gouvernman pe met a dispozisyon popilasyon i pa dan lavantaz mon bann zabitan.  Prenon kont ki distrik i en pe eparnye kont tou sa bann servis konpare ek en lot distrik, sa i fer ki kou transportasyon ki osi enkli ‘sarwa’ ki afekte bokou nou distrik.

En lot keksoz ki’n met retar devlopman nou distrik, i later zeritye, ozordi zabitan i vwar li bokou pli fasil, pli difisil pour pran en loan pour konstrir ou menm repar son lakaz akoz sa problenm later zeritye.  Resaman distrik in bezwen cancel devlopman en semen dan leo Quatres Bornes akoz sa problenm later zeritye, mon pou demann Gouvernman ansanm avek Biro Attorney General pour rapidman revwar Lalwa ki i ava fasilit konstriksyon dan nou distrik.

Mr Speaker lazenes i en lot group nou sosyete ki pe benefisye dan sa Bidze pour lannen prosenn.  Lazenes i lavenir nou pei, alors si nou anvi en lavenir ki meyer ki ozordi le sel mwayen pour nou fer sa, se pour envestir dan nou lazenes e ofer zot sans e loportinite pour zot devlopman, alors i pa paradoksal ki parfwa nou kritik sanmenm sa lazenes ki sipoze ofer nou pei en meyer lavenir.

I vre ki par ler serten zenn i adopte bann konportman ki met zot lavi a risk oubyen ki fer bann keksoz ki montre ki zot gaspiy resours ki envestir dan zot, atraver finansman plizyer dan bann progranm e proze Bidze 2019 i demontre langazman, Gouvernman pour pran son responsabilite anver nou zenn tre serye, apard sa bidze ki’n ganny mete dan Bidze pour lenplimantasyon diferan progranm lo nivo distrik, mon pour demann Minister konsernen pour osi revwar travay bann travayer lazenes lo nivo distrik, etablir en striktir operasyonnel byen kler pour nou bann travayer lazenes.

Mr Speaker mon osi note sa kantite Bidze ki’n ganny mete pour SLTA, avek devlopman semen dan distrik Takamaka in vin pli pti e i annan menm serten landrwa ki’n komans vin danzere pour nou bann pyeton.  Avek sa Bidze i a permet sa Departman konsernen pour kapab revwar e amelyor nou bann semen dan nou distrik.

Mr Speaker Gouvernman in envestir bokou dan bann proze, me malerezman parfwa i annan retar dan son lenplimantasyon.  Nou Kordgard in malerezman ganny afekte ek sa sityasyon.  Mon swete ki parey mon’n ganny promet sa proze pour ganny komanse avan komansman Desanm sa lannen.  E dan Bidze 2018 sa lannen ki pour ganny komanse tre byento.

Mr Speaker mon kontan pour vwar osi plizyer lezot mezir ki tous kous Seselwa direk, atraver logmantasyon dan saler minimonm, allowance pour tan service dan Gouvernman tou sa bann mezir ki prouve ki sirman larzan pe ganny mete dan pos Seselwa.  De lot kote nou vwar serten Letablisman touristik ki pe maltret nou bann travayer.  La mon pe koz pour lotel Banyan Tree ki’n pous nou bann travayer malapropo e an mazorite i nou zabitan Takamaka.

 

HON JUDE VALMONT

( Off-Mic)

Lekel son HR Manager?

 

HON PAUL ERNESTA

Mon ti la avek zot sa zour.  Mon’n ekout zot lafason zot in ganny trete.  Mon’n koz avek Minis Lanplwa lo zot size e demen i annan en negosyasyon ki pe ganny fer avek tou sa bann zabitan, sa bann travayer e osi avek Management Banyan Tree pour rezourd sa problenm.  Mon kondann sa bann kalite aksyon kont mon bann travayer.

Mr Speaker mon pran menm refleksyon ki Onorab Ghislain in fer – en refleksyon retire dan enn bann diskour Prezidan Rene e ki osi pozisyon orizinal Parti SPUP.  ‘’etranze ki vin envestir dan nou pei, zot ava envestir, kree lanplwa, kree larises me pa zot ki pour diriz nou!

Etranze ki vin travay dan nou pei, zot ava travay, zot a sonny zot fanmir apre zot a retourn se zot!

 

(APPLAUSE)

 

HON PAUL ERNESTA

Bann pei zanmi ki vin asiste nou, zot ava vini, zot ava asiste nou, an retour nou ava siport zot kot nou kapab, me Sesel i reste en pei Souveren ki appartient a bann Seselwa, Sesel!

 

(APPLAUSE)

 

HON PAUL ERNESTA

Mr Speaker pour konklir, sa bidze i enn ki’n vreman pran kont tou kous nou sosyete.  Pou kapab asir sikse son lenplimantasyon, Gouvernman i merit met an plas bann mezir strik avek bann plan ek kontrol kler, akoz parfwa sa ki manke e sa labsans parfwa i fer annan bann labi e move zesyon.  Si i annan en keksoz ki Seselwa i anvi, se pour viv byen, pour viv anpe, pour viv ansanm.  Seselwa pe sers tou loportinite pour devlope e avanse, sa ki mon kontan ozordi se ki sa bidze i reprezant Seselwa avek bokou loportinite pour devlope e avanse.  Prezidan Faure pe travay!

 

(APPLAUSE)

 

HON PAUL ERNESTA

Prezidan Faure pe ekout son pep! Prezidan Faure pep Seselwa i dir sa Lopozisyon pour reste permanan Lopozisyon e OUT!

 

APPLAUSE)

 

HON PAUL ERNESTA

Mon osi remersye tou bann profesyonnel, dan tou bann Minister konsernen ki’n pran zot letan pour travay lo sa Bidze.  Mersi Mr Speaker.

 

MR SPEAKER

Mersi Onorab Ernesta.  Nou ava pran en dernyen entervenan, Onorab Gervais Henrie.

 

HON GERVAIS HENRIE

Mersi Mr Speaker.  Bonn apre midi tou dimoun sirtou bann zabitan Mont Buxton mwan apresye sa loportinite kontribye dan 3enm deba lo en Bidze prezante par Ladministrasyon Msye Danny Faure.  Mon oule met lo rikord mon rekonesans ver kontribisyon bann zabitan mon distrik Mont Buxton dan zot bann kapasite endividyel koman travayer businessmen, Manm NGO e sitwayen konsyansye ki’n asiste dan preparasyon mon larepons.  Zot refleksyon e realite zot sizesyon e swe, zot rekomandasyon e pledwari zot demann en konsern in ganny pran an konsiderasyon pa zis par mon tousel, me osi mon bann Koleg lo sa kote latab.

Mr Speaker avek soutyen ek kontribisyon direk mon bann constituent ki mon pour donn mon larepons lo Bidze 2019, mon donn zot mon lasirans ki mon pour reste zot lavwa e ki mon pour kontinyen debout lo zot kote pour zot e avek zot.

Atraver bann konsiltasyon bann dimoun in idantifye sa bann konsern swivan zot santi Minis Finans pa’n elabor en plan kler ki mannyer sa Bidze pour anmenn en transformasyon pozitiv dan zot lavi toulezour; kriminalite kreasyon lanplwa e lagrandisman lekonomi, meyer swen lasante avek ledikasyon, lenfrastriktir modern, gouvernans kalite lavi, san oubliy rediksyon dan kou lavi.  E atraver deba lo bidze 2019 ki’n komanse depi yer, serten mon bann koleg MNA, LDS in deza fer resorti plizyer sa bann konsern piblik Seselwa.

Mr Speaker dabor mon anvi dir kwa ki zabitan Mont Buxton i apresye avek sa Bidze, zot panse ki sa bidze in seye, mon repete in seye pour pran en lapros balanse ant depans avek koleksyon reveni, repeyman det avek lenvestisman dan serten Sekter kle.

Zot rekonnet ki reveni total Gouvernman i anvizaze kolekte lannen prosen sa estimasyon R8.95 bilyon pour asire ki tou travayer servis piblik i garanti en saler sa 12 mwan ki devan nou tou azer, bann ki pli vilnerab sirtou bann ki annan en dezabilite i garanti lasistans finansyel avek Lazans Proteksyon Sosyal.

Tou zanfan pour kontinyen al lekol, tou malad pour resevwar tretman medikal, salte pour ganny tire o bor semen, veikil sirtou transpor piblik e Lendistri pour kontinyen marse akoz pei pour afford karbiran.

Me kwa ki i annan ekstraordiner avek sa lalis mon’n pas lo la?  Konmdir Onorab Afif i en Bidze ‘’business as usual. ‘’E in leka depi an 1993 ler premye Lasanble Nasyonal ti aprouv premye bidze apre retour miltiparti, e sa i pour reste le ka irespektiv lekel Gouvernman ki o pouvwar tan ki Nasyon Seselwa i kontinyen travay konsyansyezman e kontribye pozitivman ver devlopman lekonomi nou pti zil.

Me dimoun Mont Buxton i pli anbisye ki sa.  Zot legzizans pe demann plis lanbisyon atraver mwayen ki pei i annan sorti kot Minis Maurice Loustau-Lalanne e son zenn lekip teknisyen ki dabor nou annan bokou respe pour zot travay Mr Speaker.

Dayer mon felisit Comptroller General ki en zabitan nou distrik pour preparasyon son premye bidze swivan son lapwentman an avril sa lannen ansanm avek son asistan, me zabitan mon distrik ti anvi vwar en pe plis linovasyon, lenspirasyon vizyon en pe risk, lanbisyon e lodasite dan bidze 2019.

Promes detrwa santenn lakaz, logmantasyon 5 poursan lo saler de baz e peyman sekirite sosyal, nouvo Scheme saler ouswa lentrodiksyon allowance pour bann ki’n travay avek Gouvernman pour en pe pli lontan e menm Konpansasyon pour esey koriz lenzistis, pour bann ki’n soufer akoz Gouvernman pa’n azir o si vit.

I sa ki nou abitye vwar avek Gouvernman Parti Lepep, napa nanryen nouvo i pa sirprenan.  E parey mon dir Mr Speaker sa ki Bidze 2019 pe ofer, i sa ki nenport Gouvernman ki o pouvwar i merit ofer.  Pandan sa dernyen 24an nou’n vwar Bidze Sesel sorti R1bilyon, 122milyon, 847 mil an 1994 pour ariv R8 bilyon, 463milyon, 445mil,488 ozordi.

Sa i larzan ki mwan, ou e nou tou pe kontribye, lannen apre lannen bidze Gouvernman i kontinyen ogmante, mwan avek ou nou kontinyen ganny demande pour pey plis taks fer ankor sakrifis ser sang, i vin pli rezilyan, kan nou ganny en pti logmantasyon avek lanmen drwat, son dalon lanmen gos i pase i rakle tou, 2019 pa pour en leksepsyon.  Sa 5poursan logmantasyon ki travayer avek saler debaz bann carers e osi pansyoner pe ganny promet vitman pour disparet atraver sa bann logmantasyon swivan; depi an Oktob i annan en levy R2 lo sak boutey an ver.

Depi Septanm le 1 sa lannen, elektrisite in monte par R63 pour en lakour ki pe servi 300 inite par mwan, tandis ki lo bill delo in annan en logmantasyon R12.75sou pour en lakour ki konsonm 15met kib avek en logmantasyon R13.75sou pour pri desarz kou litilite sa lakour in fini ariv R89.50sou.  Nou bezwen osi pran kont logmantasyon dan prodwir taba, fimen i en adiktiv, i en adiksyon e zis par fer monte pri pa anpes personn aret fimen;- en bwat sigaret pe al monte par R6 pour ariv R64, lo sak sigaret mazin byen Gouvernman i ranmas R3.99sou fasilman koman taks, nouvo taks lo disik pe al fer en limonnad pet sorti R17 pour ariv apepre 19 a R20; pri en labyer Seybrew osi pour monte, i ava sorti R23 pour ariv apepre R24.50.  Note ki lo sak sopin labyer Seybrew Gouvernman pe anmas R6 koman taks.  I osi annan en nouvo sarz R25 lo sak preskripsyon dokter dan bann Sant Lasante piblik ki pe vin an fors a parti premye kar 2019.  Me pli fermal pri manze pe al monte.  En nouvo tax 15poursan e osi en levy R3 lo sak kilo lavyann koson, lo lavyann poul enporte i osi annan en nouvo taks 15poursan e son levy pe al monte sorti R5 pour vin R5.92sou lo sak kilo, sa i 2 prodwir ki Seselwa i manz plis,

akoz zot pli bon marse ki sa ki prodwir lokalman, e parey sa detrwa pti kalkil ki Dirizan Lopozisyon ti elabore yer, en poul R55 pour monte e kout R64.17sou, 1 kilo lezel pour vann R12.17sou pli ser, pork chop monte par R15.75sou e spare ribs R19.50 par kilo.  Ler mon azout tou sa bann logmantasyon ansanm Mr Speaker mon ganny en total R180.59sou.  Nou a rapel ki en dimoun aze pe ganny en logmantasyon R200, e bann ki ganny en saler de baz pe al ganny en logmantasyon 5poursan ouswa R252 par lao sa R5,050.  Pour bann MNA Parti Lepep si zot lizyer i ouver si zot konsyansye e si zot annan lanmour prop parey Leader of Government Business yer bomaten ti dir, eski zot krwar i annan lazistis dan sa ki zot Gouvernman pe ofer sa bann dimoun aze, ki’n trimouse pour Sesel depi lamars diri e in ede met zot o pouvwar?

Eski sanmenm sa zonm o sant devlopman? Zabitan Mont Buxton i dezapwente ki bidze 2019 pa’n adres size pri lavi direkteman e fer okenn solisyon tanzib, malgre sa kantite koze ki 6enm Lasanble Nasyonal in koz lo pri lavi depi ki nou’n pret serman an oktob 2016.  Zot pa krwar ki konsesyon ki pe ofer pour Sekter Lagrikiltir avek Lapes pour benefisye zot direkteman, zot pa krwar ki pri fri, legim, pwason avek lavyann ki prodwir lokalman pe al desann.  Nou pour bezwen kontinyen trimouse.

Mr Speaker i enportan ki nou rapel nou lekor ki napa okenn pye larzan deryer State House, Maison du Peuple e Liberty House non pli, se pour sa rezon ki bokou dimoun dan mon distrik pe demann Gouvernman ki i vin pli realis dan fason ki i depans nou larzan pa zis akoz i kapab ogmant tax ek kolekte reveni ki i bezwen depans an bonnavini.  Minis Finans atraver konsey son zenn lekip teknisyen fodre zanmen i per e egzize ki dezormen bann Minister, Departman e Lazans Gouvernman; setadir bann MDA’s i koup zot depans.

Atraver direksyon Fon Monneter Enternasyonal IMF mon rekonnet ki Bidze tou Antite Gouvernman an 2019 i baze lo konsep Program Performance- Base Budgeting, me mon oule eksprim mon rezervasyon ki laspe sirveyans avek evalyasyon sa konsep in vin tro tar, kabri lontan pe manz salad.

Rapor anyel Biro Oditer Zeneral lannen apre lannen i kontinyen souliny linefikasite gaspiyaz move zesyon e menm koripsyon dan Gouvernman.  Solisyon Gouvernman Parti Lepep ozordi se senpleman tir en koupab la e anvoy li laba, fer li pran son retret avek tou benefis ouswa zis ferm en Antite ler nou’n debiste zot.

Mr Speaker mwan mon krwar ki bidze tou bann MDAs ozordi i kapab koup par 20poursan senpleman akoz i annan tro bokou over pricing, gaspiyaz avek linefikasite atraver Gouvernman.  E se mon pov frer avek ser Seselwa ki lannen apre lannen i bezwen pey lepokase.

I pa enposib pour demann bann MDAs pour vin avek en Bidze ki 20poursan mwens e ekspekte zot akonplir menm rezilta ki son lannen avan, si nou oule akonplir plis koman en pti Nasyon determinen in ler pour nou met presyon, bann MDAs i bezwen vreman bezwen re egzamin zot lokipasyon, zot loperasyon.  Nepli tan les zot fonksyonn dan en lanvironnman kot napa kontrol, in ler  pour obliz bann zofisye konsernen dan sak MDAs ki zot bezwen delivre menm rezilta avek mwens resours si zot pa kapab fer li ranplas zot avek bann ki kapab.

Pour tro lontan masin Gouvernman in fonksyonn lo en baz mon bezwen plis pour fer plis.  Setadir pour zot fer okenn keksoz an plis, tax payers i bezwen donn zot plis larzan, plis mendev e plis resours.  Eski nou’n deza konpar kou pour fer marse en lekol ouswa klinik prive avek enn piblik pour ziz lefikasite avek rezilta? In ler pour sanz nou fason fer, le moman in arive pour konsantre lo laspe kou over pricing, gaspiyaz, redeplwayman, redundancy, duplication dan rol bann MDA’s en renouvellement.  Me pli enportan parmi tousala Mr Speaker se sa eleman koripsyon ki kapab egziste dan sak sa bann progranm Gouvernman.

E la Mr Speaker mon oule dir de pti mo avek piblik Seselwa.  Mon annan en santiman ki serten zot i kapab annwiye ler nou pe al tro dan pti detay Bidze, be laba menm ki i annan zafer.

Apre ki Parti Lepep in fer 40an o pouvwar, nou dan Lopozisyon nou konn tre byen ki i annan plizyer zot dan Gouvernman pe vin milyonner akoz zot pe kontinyen manipil prosesis Bidze.  Zot servi zot bann dalon pour front diferan Konpannyen pour fer biznes avek Gouvernman.  Kan nou al dan bann pti detay, la nou kapab konnen kot pour tir lagres e denons bann zofisye koronpi, bann kontrakter ki pe sarz tro bokou e bann businessmen avek koneksyon politik.

Mon anvi donn 3 sif ki Minis Loustau-Lalanne in site dan son diskour lendi koman legzanp; akomodasyon pour bann etranze ki travay avek Minister Ledikasyon avek Lasante i ariv en total R70.8 milyon par lannen ki reprezant en sonm R193,000 par zour; servis sekirite pour Minister Ledikasyon, Lasante e Gouvernman Lokal i ariv R69.1 milyon par lannen ki reprezant en sonm R189,000 par zour; lofis ki Gouvernman i lwe i ariv R50milyon par lannen ki reprezant en sonm R136, 000 par zour.  Now mon pa pe dir ki tou dimoun, tou bann Seselwa ki fer biznes avek Gouvernman i dezonnet.  Me nou kapab apresye tantasyon pour bann zofisye Gouvernman donn en bal.  Ler nou kalkil sa poursantaz bidze tou le lannen ki pe al dan bann servis avek prodwir ki Gouvernman pe procure tel ki lwe loto, servis netwayaz, manze pour lekol, SPDF ek Lopital, konsiltan profesyonnel stationary, liniform ek kontrakter parmi bokou lezot ankor.

Annou pa bliy promes ansyen Minis Finans Dr Peter Larose isi devan sa Lasanble dan son diskour Bidze 2017 letan i ti promet pour entrodwir plis disiplin bidzeter atraver Gouvernman.  Anba sa plan Gouvernman ti pour redwir son kou voyaz aletranze par 15poursan; redwir kou telefonn par 10poursan, redwir depans lo karbiran e loto lwe par 10poursan.

Sirman sa pa ti plan Dr Larose.  Sa ti bezwen plan Gouvernman ki i ti vin anonse la.  Ki’n arive avek zot plan?  Eski sanmenm sa ki Leader of Government Business i apel en Gouvernman ki pe delivre? E ler Gouvernman i refiz-e fer Lekonomi, lekel ki pey pour son vanite?  Se mwan, ou e nou tou.  E lo sa pwen Mr Speaker atraver ou mon oule reponn en komanter fer par Onorab Herminie pli boner dan son lentervansyon letan i dir ki koman Chairman COGA mon koz lo bann proze e toultan dir ki mon satisfe.  Koman en light minded individual, wi nou bezwen rekonnet ki i annan zefor ki ganny fer isi e laba.  Me solman si Onorab Herminie ti ekoute e i ti tande e i ti gete e trouve i ti ava konnen poudir dan sak sa bann interviews ki mon’n fer, letan ki nou’n rekonnet sa ki i pe fer nou’n osi note bann limitasyon, nou’n osi note bann challenges ki pe annan ek ki mannyer Gouvernman i kapab amelyore lo la apre ki Komite in asize e konsilte.  E mon’n toultan fer resorti swe e lopinyon Komite.

Mr Speaker dan sa menm loptik nou’n vwar poudir bokou bann Manm ki’n koze lot kote latab pe defann Gouvernman, pe dir les, mon pour bezwen servi sa menm lekspresyon “LES DANNY TRAVAY!” Be sa akoz bokou zot pe soutir sa bann move keksoz ki pe arive dan nou pei, sa Lasanble i en brans ki separe avek Egzekitiv nou annan en rol oversight.  Si, si zot ti donn nou en koudmen pour ekler tou sa bann keksoz ki pe mal marse e met presyon lo brans Egzekitiv pour aranze, sa pei ti pour bokou pli lwen! Zot en fardo pour nou!

Mr Speaker mon lo en lot pwen i konsern bann travayer Seselwa, bann travayer Seselwa ki pe fer pli gran kontribisyon dan Kof Gouvernman lo en baz toulezour.  Sa bann travayer konsyansye ki pe pey 15poursan tax ou plis lo zot saler, zot pe esper sepaman konbyen lannen pour en kare later ouswa en lakaz, me antretan zot pe pey 15poursan VAT lo lokasyon kot zot pe lwe, sa ki i annan en pti transpor pe pey road tax a parti R2.50sou par CC san oubliy sa R8 excise tax pour Gouvernman lo sak lit karbiran ki i servi, lo son pti saving Labank i annan en lot taks ki i peye tou le mwan ler i deside pran en lasirans pour asir son lavenir.  Lo la osi i bezwen pey VAT.  I pey taks lo son bill telefonn avek internet.  Par lao tousala lo mazorite prodwir avek servis ki sa endividi i servi ou konsonmen i annan VAT.

Annou pa oubliye ki i annan en seri levy ki li sa endividi i oblize peye lo en baz toulezour, lo son bill delo i annan environment levy, lo son boutey an ver ki i aste i annan R2, byento i pour osi pey levy lo sak kilo lavyann koson enporte e logmantasyon lo lavyann poul enporte ki i pour manze.

Si i al restoran i annan en service charge pour li peye, e kan i ranmas son pti larzan pour al en voyaz aletranze, son tiket avyon osi Gouvernman in fer li pey en taks.  Sertennman lalis i long.  Sa i vedir ki pour en travayer ki pe ganny an mwayenn R10, 000 par mwan en tyer sa larzan ouswa R3, 000 par mwan i al dan kof Gouvernman an dot mo i pey Gouvernman R40, 000 par lannen dan diferan form taks.  Malgre tou sa kontribisyon dir mwan kote sa Seselwa ki li ki travay dan sekter prive i napa zanfan ki pe al lekol, son paran pa ankor ariv laz retret, i pa al kot klinik Gouvernman.  Si i pa santi li tro byen i sot kot dokter dan klinik prive, dir mwan kote i benefisye dan sa Bidze?  I pa pour benefisye avek long service allowance ou menm sa 5poursan logmantasyon dan saler an zilyet 2019?  Oli li dan sa Bidze?  Menm avek sa kantite kontribisyon atraver reveni Gouvernman, i vwar ki son vwazinaz pa pe byen ganny netwaye par kontrakter.  I bezwen mars dan fernwar akoz napa lalimyer dan semen.

Bis SPTC pa respekte bann ler pour anmenn li travay a ler, lapli, soley i bezwen debout lo en bus stop ki napa en kouvertir.  Depi retour Miltiparti i pe esper en semen loto pour ariv kot li, i pa zanmen vwar patrol lapolis dan son vwazinaz, me i vwar zis pti men pe pike e pe kick.

Dir mwan ki mannyer Gouvernman i anvizaze sanz tablo realite sa endividi? Mr Speaker letan Leader of Government Business i dir nou ki dan sa Bidze i bon pour tou dimoun ki tou Seselwa i vwar li ladan e ki Gouvernman pe delivre, mon anvi reponn li an dizan sa rikord i ‘’reye’’, e in plis ki ‘’reye’’.

En lot ansyen Minis Finans Mr Pierre Laporte in admet a plizyer fwa ki Seselwa i enn bann Nasyon dan lemonn ki pli ganny takse par son prop Gouvernman.  Kan alor eski travayer Seselwa pour ganny en tax break? Kan ki nou pour ofer li en loportinite prosperite, ki’n arive avek promes Gouvernman pour vann bann envestiser Seselwa 20poursan par dan Nouvobanq, 10poursan par dan IOT, 15poursan par dan Land Marine, sa 5.9poursan par dan Labank Lenvestisman Eropeen e sa 20poursan par Agence Française de Développement dan Labank Devlopman DBS? SEYPEC plan pour vann son par in osi ganny aboli.  Ki’n arive avek zot plan? Eski sanmenm sa ki Leader of Government Business i apel en Gouvernman ki pe delivre?

Selman dan milye tousala li Gouvernman i kontinyen donn bal, me gras a sa Lopozisyon ki dapre of Leader of Government Business i zis ‘’koze,’’ ‘’koze,’’ ‘’koze,’’ la nou’n nabou met o kler bann gro sonm ki’n disparet dan nou pei.  Zis an ka ou pa rapel 50 milyon Dolar ki ti swadizan ganny transfer dan kont SMB L’Angleterre an 2002;

R80 milyon ki sa 1,759 kliyan ki ankor dwa SBFA; R16milyon ki State House ti ordonn SPDF tire Labank e donn zot cash san okenn resi;

R120milyon ki dapre bann dokiman Lakour in ganny sezi avek bann Lakonpannyen Offshore, me pa’n zanmen rekonsilye dan balans kont Leta;

En sonm par lao R200 milyon ki’n kit Sesel atraver kontra NDEA, FIU, SPDF avek Lapolis, avek bann Irlande dapre lanket FPAC,

sa pros R425milyon larzan tax ki SRC pa ankor ranmase;

60 morso later pour Parti Lepep, en lot 70 bout pour enn zot ansyen Minis e sa trale pti bout pour Madanm zot Per Fondater,

Sa R823, 000 Parti Lepep pe sarz STC par mwan lo later ki zot pe gannyen pou’n, ki zot ti gannyen pour nanryen.

E sa 59 Seselwa 5.1 gras a zot Prezidan ki’n divorse avek zot, tousala se gras a sa bann koze ki sa bann keksoz i vin o kler, e nou larzan, nou later, nou later, nou sitwayennte nou pour rode. Mr Speaker pour Mont Buxton ankor enn fwa sa lannen promes konstriksyon lekol La Rosière in retournen. Me letan mon mazin ki Minis Loustau Lalanne ti dir nou isi dan sa Lasanble lo size travayer Air Seychelles, travayer Lotel Banyan Tree e Departman e devlopman lotel lo zil Cosmoledo, mon krwar sa lanons lekol La Rosière mon krwar i kapab en lanons mensongère.  I annan 4an depi ki nou pe esper konstriksyon e renovasyon sa lekol – 4an, Lagreman loan ti sinyen avek Fon Devlopman pour Kuwait an Novanm 2014, repeyman sa loan i pandan en peryod 24an, e sa ki enteresan Mr Speaker, se ki i annan en peryod Gras 4an.

Alor sa peryod Gras i sipoze fini la an novanm 2018.  E nou ekspekte komans re peye lannen prosen, me ni en blok pa ankor ganny mete okenn par.  Eski sanmenm sa ki Leader of Government Business i apel en Gouvernman ki pe delivre?

Lot kestyon enteresan otour sa proze i se ki Fon Devlopman pour Kuwait ti pibliye ki kou estimasyon sa proze ti R139 milyon, 456 mil ki reprezant 74poursan total sa proze.  Me ozordi ler mon get lenformasyon dan liv Bidze, i dir ki loan etranze pour sa proze i R49milyon, 500mil e R22milyon, 962mil koman finansman lokal ki fer en total R72milyon, 462 mil.

Mr Speaker sa i reprezant en diferans R66milyon, 994 mil ant larzan loan ki Kuwait Development Fund pe dir in donnen e sa ki dan Bidze.  Dan sa Staz Komite ler Minister Ledikasyon i vini, lo non zabitan Mont Buxton mon ava demann zot pour eksplik nou pli byen sa sityasyon.

Lo kote Proze Kapital en sonm R2 milyon in ganny met dan bidze pour konstriksyon 2 semen;

1 milyon pe al pour fer 3enm e 4enm faz proze semen dan Lenn e 1 milyon pour proze Ex-Haynes; sa 2 proze pe trenn lipye depi an 2017, tandis ki lezot proze semen ki ti ganny idantifye, tel ki semen Esparon Davide, Pate-Kek, Bibi, lagrandisman semen Belonie/Roche Bois tousala alokasyon mon vwar i zero, e ankor dan Staz Komite mon a rod leklersisman avek Lotorite Transpor lo Later.

Lagrandisman krwaze semen kot lekol La Rosière tender ti fermen le 9 oktob, me sa ki in gannyen i ekspekte konplet sa travay dan 3 mwan.  Nou semen Mont Buxton i reste dan move kondisyon, re sirfas zeneral ki ansyen Minis pour Transpor Mr Charles Bastienne ti promet dan Staz Komite an 2017 in ariv vizavi Ola Bakery e in cease lanmenm.  Avek semen i vin bus stop.  Sa enn ki zot in kraze dan Lenn pa ankor rekonstrir. Madanm Hoareau e Madanm Ferley note.  I annan 1an depi promes SLTA isi dan sa Lasanble ki nouvo bus stop ti pour rekonstrir avan lafen 2018.

Nou sityasyon delo sirtou dan wikenn, non pa ankor amelyore. Mon dernyen konversasyon avek responsab PUC lo sa size, larepons i se ki korperasyon litilite piblik pe antreprann bann travay neseser pour rezourd sa problenm delo koupe enn fwa pour tou.

Alor annou esper ankor en pti kou, lakaz i reste en defi pour zabitan nou distrik.  Proze 24 lakaz dan 24 distrik dan 24 mwan si Gouvernman i onnet avek son lekor i konsyansye, e i annan lanmour prop i ava admet ki zabitan Mont Buxton pa’n benefisye direkteman dan sa proze. Pyer Fondasyon pour proze lakaz Ex Dominique Savio ti mete an Zanvye 2015.  E alokasyon ti’n fini fer avan mon ganny elekte MNA an Oktob 2016 e lanons pour proze 24/24/24 ti fer dan Diskour Leta Lanasyon 2017.  Mont Buxton i bezwen en nouvo proze lakaz.  Mon lapel i pour Legliz Anglikan tonm dakor avek Lotorite lo lavant sa propriyete La Rue Hangard e permet rev bokou fanmir materyalize atraver en twa lo zot latet.  I osi annan en sonm anviron 1.5 milyon ki’n ganny bidzete pour bann pti proze kominoter.

Sa ki mon annan pour dir avek bann zabitan Mont Buxton konsernan sa sif, i se ki in ganny met la pour asiste ou, ou bezwen, ou bezwen angaze avek Lotorite Distrik asiste bann rankont piblik ki ganny fer pour konnen ki pe pase dan ou distrik.  E met ou konsern devan pour ou osi kapab benefisye dan sa ki pe, ki ou, ou kontribye dan Kof Leta.  Mon lofis Maison Ste Claire i reste ouver pour nou koze nenport moman, apre tou mon’n ganny elekte lo tiket LDS me mon deservi distrik Mont Buxton irespektiv ki Parti Politik ki ou siporte.

An konklizyon Mr Speaker, mon oule remet sa bann kestyon swivan devan mon zabitan bann menm kestyon ki’n dan refleksyon Dirizan Lopozisyon atraver son enteraksyon avek popilasyon.  Me avan mon bann kestyon i vini pa bliye, Tenm Bidze 2019 i ‘Stabilite avek Prosperite.” Alor kestyon i se ki, eski ou santi pli an sekirite ki 2an pase?  Eski ou santi ou an sekirite dan ou louvraz?  Eski ou annan ase konfyans pour ouver en pti biznes?  Eski ou pouvoir d’achat in ogmante?  Apre 2an eski ou pe ganny en meyer swen lasante?  Eski ou annan zanfan e i ape ganny en meyer ledikasyon?  Eski ou semen avek drenaz in fini aranze?  Eski ou satisfe avek konportman Gouvernman?  Eski ou kalite lavi in amelyore?

Mazorite ou larepons mon

garanti i al kontrerman avek tou sa ki bann MNA Parti Lepep ki’n koze ziska aprezan in esey fer ou krwar, zot annan en sel largiman, akoz échange stabilite pour lensertitid? Me parey tou lezot parti politik ki’n fer lontan O Pouvwar zot in fatige e mank lenerzi.  Zot mank inovasyon, lenspirasyon, lanbisyon, vizyon avek lodasite e sa pe enpakte negativman lo ou ansanm ek mwan.  Sel zouti ki zot annan se pour fer ou per lo pozisyon, me nou lavi e nou fitir i pour nou.  Montre Leader of Government Business avek son konfreri ki zot lizye in ouver, zot konsyansye e zot annan lanmour prop pour dir avek zansla enn fwa pour tou kile les LDS travay!  Mersi Mr Speaker.

 

(APPLAUSE)

 

MR SPEAKER

Mersi Onorab Henrie.  Bon se la ki nou pour aret travay pour ozordi, mon ti a kontan remersi tou bann Manm e tou bann dimoun ki’n a lekout e swiv deba pour sa 2 zour.  Nou pa ankor fini.  Nou annan en dernyen zour lendi avan nou rantre dan bann detay.  Mon ti a kontan remersi Minis Maurice Loustau-Lalanne ki’n parmi nou sa 2 zour e set apre midi in akonpannyen par Miss Croisee e Ms Verghese.  Mersi pour attend Lasanble avek nou.  E mon ti a kontan osi remersi SBC e mon konnen dan bann sezour ki pe vini nou pour kontinyen travay etrwatman ansanm touzour an kolaborasyon.

Bon avek sa de mo mon ti a kontan swet zot tou en bon wikenn.  E Lasanble i adjourn e repran son travay Lendi 9er bomaten.

 

(ADJOURNMENT)