Home » Verbatim » 2018 » Verbatim Thursday 8th November, 2018

Verbatim Thursday 8th November, 2018

NATIONAL ASSEMBLY OF

SEYCHELLES

Thursday 8th November, 2018

 The Assembly met at 9am

 National Anthem

 Moment of Reflection

 Mr Speaker in the Chair

 

 MR SPEAKER

Bonzour tou Manm Onorab.  Bonzour tou dimoun ki a lekout e ki pou – ki pe port atansyon e pe swiv travay Lasanble Nasyonal, spesyalman dan sa moman enportan, kot nou pe pran Repons Bidze par bann Manm, swivan Bidze ki Minis Loustau-Lalanne ti delivre avek Lasanble Nasyonal Lendi pase.

Mon ti a kontan osi an menm tan swet labyenveni e en bonzour spesyal Minis Loustau-Lalanne, ki akonpannyen par SS Patrick Payet e PS Damien Thésee.  Bonzour e welcome parmi nou dan Lasanble.

Nou pou al direkteman lo nou Order Paper.  Nou annan serten Prezantasyon Papye.  Mon ava zis pas laparol avek Madam Clerk pour li pas lo sa bann Papye ki deza bann Manm in ganny kopi, apre pour nou pran nou biznes pour lazournen.  Madam Clerk.

 

MADAM CLERK

Mersi bokou Mr Speaker.  Bonzour Mr Speaker.  Bonzour Minis.  Bonzour tou Manm.  Lo Papye koman Prezantasyon Papye sa semenn, nou annan

S.I. 67 pour 2018 – Misuse of Drugs (Appointment of Forensic Analyst), (No.2), Regulations of 2018. 

        S.I. 68 pour 2018 – National Parks and Nature Conservancy (Aldabra) Special Reserve (Designation) Order, 2018. 

        S.I. 69 ankor pour 2018 – National Parks and Nature Conservancy (Aride Island) Special Reserve (Designation) Order of 2018. 

        S.I. 70 pour 2018 – Value Added Tax (Amendment of First Schedule) (No. 2) Regulations of 2018.  E dernyerman

S.I. 71 pour 2018 – Land Reclamation (Retrospective Authority) (No.3) Order 2018.  Mersi Mr Speaker.

 

MR SPEAKER

Mersi Madanm Clerk.  Bon, parey koutim – parey labitid e dapre nou regilasyon Standing Orders, nou pou demar larepons Bidze avek Repons ki pou sorti kot Leader Lopozisyon.  E sa pou swiv par Leader Zafer Gouvernman.  E apre lezot manm osi tou i ava annan – pran zot tour pour zot enterakt.

Alor, toudswit mon ava pas laparol avek Leader Lopozisyon – Onorab Wavel Ramkalawan.  Onorab.

 

HON WAVEL RAMKALAWAN

Mersi Mr Speaker.  Bonzour Mr Speaker.  Bonzour tou bann Manm Onorab.  Bonzour Minis avek ou delegasyon.  E bonzour tou Seselwa ki pe ekoute.  Mr Speaker, ozordi nou komans enn bann legzersis pli enportan pour nou pei.  Mon remersye Minis pour son prezantasyon e byensir sa mersi i osi pour son bann teknisyen ki’n travay byen dir pour met tou sa bann sif ansanm e fer tou keksoz balanse.

Mon profite pour rekonnet tou bann sef Departman, bann Financial Managers ek lezot dimoun ki annan responsabilite direk pour Bidze zot Departman dan Gouvernman.  Sa kolaborasyon pandan sa 2 dernyen lannen in vreman admirab.  E mon sir ki sa travay pour kontinyen port bokou fri.  Mon donn zot tou lankourazman pour kontinyen avek sa travay difisil e parfwa konplike.

Mr Speaker, si nou regard Bidze senpleman koman en legzersis Minister Finans, pou dir ki larzan i pe ranmase dan taks e ki larzan i pe donn sak Minister pour depanse pour tel ou tel rezon, pou napa gran diskisyon.  Petet nou a war i devret donn en pti pe plis isi, en pti pe mwens par laba.

Malerezman nou pe ranmas – nou pe ranmas tan sonm e nou pe depans tan, pa reponn nou konsern lo Bidze.  Bidze Nasyonal i konsern plan Gouvernman an antye.  I pa zis Bidze Minister Finans.  Bidze Nasyonal i bezwen reflekte ki mannyer Gouvernman i anvi diriz nou pei.  E ki i anvi fer pour amelyor lavi sak Seselwa.  Ki mannyer i kree en Nasyon pli for, pli ekilibre, pli dinamik e pli zis.

Ler ou get Bidze avek sa lizye, ou pa gete zis konbyen ki pou ganny ranmase e konbyen pou ganny depanse.  Ou gete ki rezilta sa bann sonm pou annan lo lavi nou Nasyon.  Ou osi gete si nou’n pran pli bon mannyer pour kolekte larzan.  E apre, si nou’n depans sa larzan pli byen ki posib, avek plis lefikasite pour anmenn maksimonm benefis pour nou dimoun e nou sosyete.  Nou osi fer sir ki tou kont i ganny rann lo larzan lepep Seselwa dan Bidze.

Mr Speaker, Minis Finans in penn en zoli portre avek bann sif dan Bidze.  Nou’n tann milyon par isi e milyon par laba.  Me en zoli portre pa ase.  Performans ek rezilta ki pli enportan.  Konbyen fwa nou’n war diferan Minis Finans penn sa zoli portre devan nou lizye?  Met nou pep an pikpok parey nou dir.  Me a lafen lannen nou war sa ki nou’n gannyen, pa li ki nou ti pe ekspekte.

La Mr Speaker, mon oule si remersye tou bann sitwayen ki’n kontakte nou pour donn zot kontribisyon e reaksyon lo sa Bidze.  Zot refleksyon lo larealite lavi nou pep, zot sizesyon ek zot swe, zot rekomandasyon ek zot lide – tousala in ganny ekoute e in ganny pran an konsiderasyon dan nou travay.  Mersi osi pour sa lekip LDS dan Lasanble Nasyonal.  E i kler ki nou latansyon i patriyotik.  E se sa ki permet nou klere kot fodre, sanze kot i neseser e montre nou pe rod sa semen ver en meyer ozordi e demen.

Mr Speaker, atraver sa lekout e konsiltasyon, mon’n kontan pour trouve e konfirmen ki nou dan LDS nou pe anmenn menm mesaz ki nou pep.  Ki nou antann menm konsern e ki nou pe swet menm lavenir pour sa pei.  Lo bann size tel ki kriminalite, drog, travay, servis Lasante, Ledikasyon, lenfrastriktir, gouvernans nou Nasyonalite, ensidswit – nou partaz menm refleksyon.

Seselwa i en Nasyon fyer e fodre ki bann dirizan sa pei i konn met divan anba lezel sa pep pour ki nou kontinyen anvol pli o posib e sorti anba sa nyaz sonm ki pe menas nou ozordi.

Mr Speaker, avan mon al pli lwen, mon oule partaz avek tou dimoun serten bann kestyon ki depi en bon pe letan mon pe demann pep Seselwa e bann larepons ki mon’n resevwar.

Eski ou santi ou pli an sekirite ozordi dan ou lakaz?  Larepons –‘ ‘non.’’  Eski ou santi ou stab dan ou travay?  ‘’En pe,’’ ‘’pa konnen si etranze pou pran mon plas. ‘’ Gouvernman i dir ki lekonomi in amelyore – eski ou santi lamelyorasyon dan ou lavi?  ‘’I pa kler.’’  Eski bann problenm sosyal dan ou distrik tel ki drog ek lalkol in redwir en pe?  ‘’Non, in vin pli pir.’’

Eski ou satisfe mannyer ou biznes pe marse?  ‘’Mon dan difikilte. ‘’ Eski ou satisfe avek sa – avek ou saler e pri marsandiz dan laboutik?  ‘’Non.’’  Eski ou satisfe avek sistenm Ledikasyon?  ‘’En pe.’’ Eski ou satisfe avek servis Lasante?  ‘’Dan balans. ‘’ Eski ou satisfe avek kalite semen?  ‘’Pa bon.’’  Eski ou satisfe ek mannyer ou Gouvernman pe travay? ‘’ Non.’’  Eski ou satisfe – eski ou sityasyon lavi i pli meyer ozordi ki 2an pase?  ‘’Lavi in vin pli dir.’’

Se sa larealite Mr Speaker, ki Gouvernman parfwa pa oule tande.  Laverite se ki sa bann kestyon ek zot larepons, i montre nou en sityasyon kot nou pep – sirtou bann dimoun ki ti met zot konsyans dan Parti Lepep, zot santi ki zot in ganny trair par en group dimoun ki pe ris sakenn son kote.  Savedir gouvernans nou pei i en pe partou kote.  E parey proverb i dir – ‘’ler lelefan i lager, zerb ki ganny kraze.’’

Prezidan in divorse avek son parti.  Vis-Prezidan pa konnen lekel ki siport li.  Leader Gouvernman Biznes dan Lasanble i admet ki poudir son prop koleg pa pare pour ekout li.  Sa menm Leader i dir ki sa ki son Manm i dir, pa fer sans.  Serten Onorab pe demann logmantasyon minimonm lapey R10mil oubyen R20mil par mwan.  Lezot pe demann double pansyon.

Par kont, Minis i propoz 5poursan logmantasyon.  Tousala i zis en dezord e mank leadership ki move pour nou pei.

Nou dan LDS nou annan en vizyon pour Sesel.  En vizyon kot sak Seselwa i konn en meyer kalite lavi.  Plis prosperite, viv an sekirite, annan akse avek swen Lasante de kalite, en bon ledikasyon e vre loportinite pour li realiz tou son rev e potansyel.  Nou determinen pour nou tir nou pei dan sa sityasyon konfizyon e mank direksyon ki i ladan, e remet li lo semen progre.  Se la ki nou pare pour envestir e ki pour ganny bon rannman pour nou pep ek nou pei.  Nou kontan nou Sesel.

Mr Speaker, nou misyon se pou met lenerzi, devosyon e lafyerte dan travay tou Seselwa.  E ranplas maksimonm travayer etranze avek Seselwa.  Nou misyon se pou relans lekonomi nou pei e fer sir ki benefis e prosperite i al pour tou Seselwa.  Nou misyon se pou met lefikasite dan tou sa ki nou fer e transform sa Gouvernman ki’n vin en birokrasi lour, dan en masin efektiv ki fer lavi tou dimoun pli fasil.

Nou vizyon se pou met Seselwa premye dan son pei.  E pou pret – protez tou morso son teritwar.  Nou misyon se pou fer desann pri lavi e soulaz douler bann ki pli dan bezwen.  Nou misyon se pou etablir sekirite, bonn gouvernans, latransparans e elimin koripsyon e gaspiyaz an mezir ki rann kont i ganny byen etablir.

Mr Speaker, i malere pou dir ki bann sif pour 2018 e 2019 i montre nou en Gouvernman ki pa pe fer sa travay ki i bezwen fer.  Mon bezwen dir Minis ki nou bezwen koz fran.  E ki malerezman sa Bidze a sa pwen i reprezant en Gouvernman – en Gouvernman – (pa ou, Minis._  I reprezant en Gouvernman ki mank leadership.  E apard fer provizyon pour bann depans regilye, linisyativ i manke.  E se pour sa rezon ki bokou proze ki’n sipoze realize an 2018 pa’n ganny materyalize.

Mon’n demann Minis pour senpleman konpar bann sif.  Mon demann Minis pour senpleman pour Bidze 2018 e pour Bidze 2019 e i ava konfirm sa ki mon pe dir.  Se sa ki nou konsern profon.  Sa mank dinamizm i reprezant en Gouvernman fatige ki mank lenerzi.  E finalman i fer ki lenpak negativ lo nou pep e nou pei i vreman destriktif e i kapab anmenn dezas lo nou lavenir.

Mr Speaker, mon war tro bokou linefikasite en pe partou.  E in fer ki pandan lannen, MNA lo tou le 2 kote latab in demann bokou kestyon lo kan tel proze pou komanse e materyalize.  Sitwayen in viv dan bokou fristrasyon e zot i pas sa lo zot bann reprezantan.  Zis semenn pase par egzanp, in annan kestyon lo kan eski Outpatients Clinic Anse Royale pou ganny konstrir?  Larepons sete lannen prosenn.

Me letan ou regard detay dan Bidze, i sipoze fini an lannen 2021.  I resanble ki tou proze pou fini an 2020 oubyen 2021 dan sa Bidze.  Letan Minis i donn son larepons Mr Speaker, i ava dir nou ki poursantaz bann proze Kapital ki pa’n ganny materyalize an 2018.  Letan en lopital, en kordgard, renovasyon lekol, en laboratwar, oubyen kek lezot fasilite pa ganny fer dapre plan, Lepep Seselwa ek bann dimoun ki pe esper sa bann fasilite ki soufer.  Letan en promes ganny fer me apre napa swivi, i anmenn fristrasyon ek lakoler.

Par egzanp, mon bezwen dir avek Zabitan Baie Ste Anne, Praslin ki reste otour Stasyon PUC, parey mon frer Mr Philoé – Arman Philoé, e Krisnan – ki malerezman napa nanryen ki pou ganny fer an 2019.  Tou sa bann promes depi ki Mr Dugasse ti ankor Minis e Mrs Mitcy Larue ti MNA, pa pou ganny realize!  Zot pou kontinyen dan sa karbonn e zot byenneme pour kontinyen malad.  Eski sa i normal? Mon dir non – sa i kriminel!

E mon demande Mr Speaker, ki Mr Faure, an tan ki Prezidan, son bann Minis, ek tou son bann MNA i pran sa kouraz e al pas 3 zour laba.  Petet apre zis en lannwit – apre zis en lannwit zot ava santi douler sa bann dimoun.  E aksyon imedyat i ava ganny pran.  Mon bezwen osi dir bann propriyeter bato Praslin ki mon espere ki zot por komersyal i a ganny en kours beton.  E zot ava aret konbat dan labou konblaz avek marsandiz letan lapli.

Mr Speaker, letan bann zabitan La Digue tou-le-z-an i antann konstriksyon nouvo Lopital Logan.  E ki depi Dr Athanasius ti Minis ziska la, zot ankor pe viv dan promes.  E sel keksoz ki zot war se nouvo twa ki komans koule ankor, tiles nef dan en vye batiman.  Me Lopital i reste en zoli desen pour 2020.  Eski sa pa anmenn fristrasyon pour zabitan? Dan menm fason, letan sif dan Bidze pour nouvo lekol La Digue. i reste sif ki bouze avek lannen – eski sa i donn lankourazman?  Se sa ki mon pe dir Mr Speaker – Gouvernman pa pe travay avek en lespri serye.

Me sa ki vreman dekourazan, se letan bann zabitan i war ki pandan sa menm peryod, batiman prive i monte otour zot e biznes i komanse.  Tandis ki tou sa ki asosye avek Gouvernman i pouri an plas.  Kordgard, Lopital, lekol – sa 3 batiman prensipal pour Leta lo La Digue i reste parey!  E bann dimoun ki travay ladan i dir ou, i dekourazan.

Me sa ki pli pir, se ki bann pti travay maintenance pe kout milyon.  Oli planifikasyon?  E la mon anvi dir avek bann zabitan La Digue, larzan i dan Bidze depi lannen pase.  Minis, kwa ki anpes Gouvernman pandan 2019 pou fer sa 3 proze silvouple?  Dimoun pe espere – zot fatige!

Mr Speaker, dan LDS nou dir ki Komisyoner Lapolis pa en arsitek oubyen en enzenyer.  Minis Ledikasyon e Minis Lasante – menm zafer.  Eski i pa ler pou Gouvernman annan en seksyon dedye pour bann Proze Kapital?  Kot enzenyer, arsitek, QS ek lezot profesyonnel i ava travay lo sa bann proze e fer sir ki nou pa ganny ankor en Stad Lanmizik ki komans avek 5milyon dan Bidze e fini plis ki 30milyon?

Sa i ava en bon lenvestisman.  E i ava fer sir ki keksoz i bouze.  Si sa pa arive, nou pou toultan antann ki napa mendev, Procurement Unit ek Tender Board pe tarde.  Silvouple, annou kas sa birokrasi lour.  E annou pas lo aksyon pour benefis sa pep ek bann travayer.  Annou diriz sa pei avek en lespri biznes, kot lefikasite ek letan i presye.

Mr Speaker, tou travayer in espere pou regarde si pou annan lanons konsernan logmantasyon dan lapey.  Malgre zot dezapwentman, omwen in annan en pti logmantasyon.  E sa i byen – saler minimum ek saler home carers i sipoze ogmante par 5poursan an Zanvye 2019.  Tandis ki pour lezot travayer dan Gouvernman, sa 5poursan pou pran lefe an Zilyet 2019.  Mon espere ki travayer pa trouv zot dan menm sityasyon parey size Progressive Income Tax.  Kot son dat komansman ti ganny anvoye parey lavant later.

Avek logmantasyon dan saler minimum, sa i fer ki otomatikman ki pansyon nou dimoun aze li osi i monte.  E sa osi i byen.  Me kestyon ki nou bann pansyoner pe demande – e mon anvi ki Minis i pran sa byen an konsiderasyon, se – akoz ki Gouvernman pe kas kontour avek zot bann dimoun aze?  E donn zot zis 200 Roupi olye 250 Roupi pou fer li vin 5,300.  Eski pansyon dimoun aze pa sipoze egal avek saler minimum?  Se sa ki ti son prensip e alor i devret mars parey.

Lo lot kote Mr Speaker, nou war ki Gouvernman in swazir detrwa landrwa travay pour reviz zot Scheme of Service.  Mon’n ganny plizyer konplent lo sa size akoz dimoun pe dir – malgre ki zot kontan pour sa bann travayer, me selman zot war sa koman en diskriminasyon – alor, en lenzistis.  Si Gouvernman ti anvi reviz scheme, i ti devret fer li pour tou kategori travayer.  La mon bezwen osi azoute ki apre lamars, bann ners – ek promes pour reviz zot Scheme, Gouvernman pa’n gard son parol.  E byento nou riske war zot ankor enn fwa lo semen.  Fodre ki Gouvernman i komans aprann gard son parol.

Mr Speaker, dan menm fason, travayer ki lo Kontra pe dir ki zot osi zot ti devret resevwar sa allowance pour tann servis.  Apre tou, zot pe travay zot osi.  E zot in montre menm devosyon ki zot koleg.  Serten in travay pour 30an, pour 40an.  Letan zot balans zot lapey ek sa ki pour – zot pou gannyen lafen zot Kontra konpare avek sa ki en dimoun ki pa lo Kontra pou akimile pandan sa menm peryod, zot dir plito zot pa ti lo Kontra.

Par egzanp, en dimoun ki annan 30an servis e ki pa lo Kontra, pou tous li R3mil par mwan, oubyen R36mil pour en lannen.  Dan 2an i pou’n fer R72mil.  Eski se sa ki sa dimoun lo Kontra pou gannyen?  Mon krwar ki Gouvernman i devret regard sa size byen menm, eklersi li.  Akoz i kapab annan en lenzistis dan lafason ki zot pe fer keksoz.  Tou travayer i devret resevwar menm benefis.

Kestyon ki reste pour ganny larepons se avek sa bann logmantasyon, ki pou arive avek sekter prive?  Vi ki dan Gouvernman i annan en Public Service Salary Table, e sa pa egziste dan sekter prive.  Eski Minis ti a kapab dir nou Lasanble, kwa ki zot pe mazinen pour bann travayer dan sekter prive?

Sa kestyon, se pa zis travayer ki pe demande, me osi anplwayer.  Akoz zot pe deza komans kalkile ki mannyer zot pou fer bann bout zwenn?  E sa i aplik bokou pour bann pit biznes.  Alor, mon demann leklersisman pli profon lo la.

Mr Speaker, sa i enn bann problenm letan Gouvernman pa regard portre konplet dan nou pei.  Sa logmantasyon lapey e revizyon Scheme of Service, pou fer ki zis dimoun ki travay dan Gouvernman ki pou ganny en pti benefis e sa i pou evapore byen vit.  E portan tou travayer dan sa pei – ki zot travayer dan sekter prive oubyen pe sey konbat dan en pti biznes, pe trimouse pou fer 2 bout zwenn, i ganny touse avek pri lavi.  Kwa ki sa Bidze pe anmennen pour zot?

Bwat ton ki napa VAT lo la.?  Savedir, R1.65 – R1.65  sou?  Kwa vreman ki annan pour zot dan sa Bidze 2019?  Kwa ki sa taxi driver, sa pti kontrakter ki netway obor semen, sa mekanisyen, sa sarpantye, sa doker, sa travayer domestik, oubyen sa ti biznesmenn pe gannyen dan sa Bidze? Larepons i senp – e mwan mon pou dir zot, napa gran keksoz pour zot.

Mr Speaker, se la mon dezapwentman avek sa Bidze.  I pa’n adres pri lavi ditou. O kontrer si nou byen regarde, i pou kontribye pou fer pri lavi ogmante.  Letan Gouvernman pa les prodiksyon lavyann pork ek poul par egzanp, ariv lo en nivo kot i kapab fer konpetisyon avek lavyann enporte, i vedir se konsonmater ki pou pey sa 15poursan VAT ek levy R3 an plis lo lavyann pork.

Oubyen sa 15poursan VAT ek levy R5.92sou lo lavyann poul.  E pa bliye ki lavyann lokal i reste plis ser ki lavyann enporte.  Annou pa oubliye ki biznes i pas tou pri adisyonnel, tou taks, tou logmantasyon karbiran lo konsonmater.  E sa ki’n ganny anonse pa pou en leksepsyon.  Se sa ki pou ede ki pou fer pri lavi monte.

Mr Speaker, avek sa logmantasyon ki’n ganny anonse, i pou vedir pou annan 15poursan taks e 15poursan VAT lo lavyann pork ek poul enporte.  Ki vedir an tou, pou annan 30poursan taks, plis sa levy – levy ki’n monte.  La en kalkil lo pri – en pti kalkil ki nou’n fer.  En poul R55 pou dezormen kout R64.17sou.  En kilo lezel pou sorti R75 pou vin R87.17sou.  Chicken breast R85, pou vin R98. 67sou.  Pork chops R85 pou vin 100 Roupi 75 sou.  Spare ribs R110, pou vin R129.50sou.

Sa Mr Speaker, se bann pri – sa bann pri i baze lo sa logmantasyon ki’n ganny anonse.  E i pa pran an konsiderasyon lezot eleman ki asosye avek kou pou fer biznes li menm.  Eski pri lavi pou – pe desann?  Mon krwar ki sa i en desizyon ki pa’n byen kalkile par Gouvernman.

Mr Speaker, i malere pour dir, me vreman sa Bidze i mank en vizyon ek en stratezi kler lo ki direksyon nou pei pe ale.  I pa donn gran lespwar lazenes ki pe antre dan lanplwa oubyen sa bann zenn fanmir ki pe debourye.  I pa donn en stratezi lo ki mannyer pou konbat lenflasyon ek pri marsandiz ki kontinyen ogmante.  Lo ki mannyer nou protez nou resours lanmer ki pe ganny eksplwate par etranze.  Oubyen ki mannyer pou lager ek bann fleo ki fer bokou nou zenn kalifye prefere reste dan pei kot in al etidye.

Prezantasyon sa Bidze i en refleksyon lo lafason ki Gouvernman in fail pour konbat mank larzan dan pos Seselwa e son pouvwar depanse ki kontinyen tonbe.  Sa 2 pti mezir ki’n ganny mansyonnen, i kapab aport en pti soulazman imedyat, me non pa stabilite lonterm.

Mr Speaker, dapre Gouvernman – e mon site, ’pour sa dernyen 10an nou krwasans ekonomik in plis ki 5poursan par an.  Sa i vedir ki nou lekonomi in grandi par plis ki 50poursan.’’  Kestyon ki nou bezwen demande se, ki mannyer eski sa i benefisye Seselwa?  Ki ozordi nou annan 40poursan nou popilasyon ki pe viv dan lapovrete, plis ki 5mil viktim eroin.

Pour mwan, sa i pa drol akoz reveni sa pei in disparet atraver koripsyon.  Oubyen in al dan pos bann kartel ki pe kontrol lekonomi nou pei e pe fer soufer nou pep.  Seselwa i konnen lekel ki’n akimil larises pandan sa peryod.  E lekel ki pe pey son taks parey i devret.

Seselwa i osi konnen lekel ki’n fer biznes aste later e apre vann – later Leta, e apre vann pour milyon.  Sa i enkli Parti Lepep li menm, ki annan plis ki 59 morso, son bann dalon Minis ki annan ziska 79 kare e avek madanm ansyen Prezidan avek bann pti bout ki i vann pour milyon.  Frer ek ser Seselwa, ou pa ankor war sa?  Annou ouver nou lizye byen gran.

Mr Speaker, enn bann konsern ki ede fer pri lavi monte, se sa sityasyon kot i annan en kantite laboutik ki pe pey – ki pa pe pey VAT me ki sarz kliyan VAT.  Sa larzan pa ganny remet avek SRC pour al dan fon Gouvernman.  Me i rantre dan zot pos ki apre zot anvoy deor atraver bann Biro Desanz.  I bezwen annan aksyon imedyat.  Nou pa kapab dan en sityasyon kot serten marsan i sarz konsonmater 15poursan an plis pour konmisyon.

Me olye remet sa larzan avek Leta, zot met sa dan zot pos.  Sa i apel vole!  Dan sa menm sapit, kestyon ki nou bezwen osi demande, se si lodit bann gro lakonpannyen pe ganny byen fer?  E si zot pe vreman pey sa taks ki zot devret.  Konpran mwan byen – sa se larzan ki pou permet Seselwa ganny en meyer lapey e en meyer lavi.  E alor, i nou responsabilite pou fer sir ki sa larzan i rantre dan Kof Leta.

Mr Speaker, anba sa menm size, mon ti ava kontan pran size Cable &Wireless pour ilistre sa size taks.  Me osi ki mannyer bann lakonpannyen etranze i fer sa ki zot anvi avek travayer Seselwa.  E nou koman en Lasanble, nou pa aksepte sa.  Letan Cable ti ganny vann, Gouvernman ti tonm dakor a kondisyon ki napa okenn Seselwa ki pou ganny pouse.  I ti osi bezwen pey fre sanksyon 30milyon Dolar.  E ki 30poursan par dan sa lakonpannyen ti devret al pour Seselwa.  Kwa ki larealite Mr Speaker?

Travayer Seselwa ti ganny pouse e ranplase par etranze ki’n ganny GOP par sa menm Gouvernman, fre sanksyon pa ankor peye e Cable in transfer plis ki 20milyon Dolar deor san pey okenn withholding tax.  E Seselwa i ankor pe esper shares.  Dan menm fason Mr Speaker, Banyan Tree in ganny vann avek kondisyon ki napa okenn Seselwa ki pou perdi lanplwa.  Seselwa in perdi lanplwa e etranze in komans travay.  Ki Minis i dir?  Zot pa okouran.

Mr Speaker, be lekel ki’n donn sa bann etranze GOP pour travay Sesel?  Eski i pa sa menm Minister?  Sa i montre nou ki nou pei ek son pep pe kontinyen ganny pran pour bann lenbesil!  I pa akseptab e i malere ki sa Gouvernman nepli annan kouraz pour met son lipye ater e pou dir sa bann gran lakonpannyen – fer sa ki nou, nou’n dir zot fer, respekte bann kondisyon sansan – sansan Regilasyon zot biznes i pou ganny revize.

Mr Speaker, mon bezwen osi an pasan eksprim mon regre ki Minis in anonse ki sel 2 Lendistri ki’n vreman fer byen an 2018, se prodiksyon lalkol ek sigaret.  Sa ankor enn fwa i montre nou ki nou pe drive.  Lot dezapwentman se ki taks disik pa pou aplik lo baka ek lapire – 2 labwason ki ede pou detri nou pep ki probableman servi plis disik.

Eski pa i ler pou sa Gouvernman vin brav e ban sa bann labwason parey Pti Ponm ek lezot ki detri nou pe?  Met en kontrol lo lavant lalkol dan tou laboutik e etablir bann liquor stores?  Tousala Mr Speaker, dan bi ed nou pep sorti dan lalkol ki ozordi i pli pir ki drog.  E an menm tan osi, pour nou kapab fer en lekonomi lo nou servis Lasante.  Parski letan en zenn ki servi Pti Ponm, e apre sa i ariv en maler ek li, nou bezwen donn li swen Lasante – i bezwen la dan ICU.  I kout nou pei en kantite larzan e nou, nou pe koz lo responsabilite.

Mr Speaker, ler in arive pour nou annan en nouvo fason gouvernans.  Leadership nou pei ki pou donn lankourazman ek en vre lanvi travay dan Sesel.  Sa nouvo lapros i bezwen enn kot nou pe gouvern en pei parey en biznes.  Sak dimoun i bezwen pran son responsabilite o serye.  E aret fonksyonn dan en fason konmsi pa konsern li.

En drayver i bezwen drive sa loto Gouvernman konmsi sa i son loto.  Kot i pa pou pase dan son loto, i pa kapab fer gou – i pa kapab fer transpor Gouvernman sot kap ros.  Sa sekreter i bezwen reponn sa telefonn, oubyen fer son travay konmsi son reveni ti depann lo sa servis ki i rann.

Me an menm tan, i bezwen annan tou form rekonpans.  Byensir, si ou pe travay dan en landrwa e personn pa enterese avek ou, ou osi ou pe trenn lipye.  Koman sa par sef, latitid dan travay i devret sanze.  Akoz tou dimoun pe montre vre konsern ki ava ale avek rekonpans ki i resevwar.  I bezwen travay pour li ganny en bon rekonpans e non pa zis ganny peanuts.

Mr Speaker, lazenes i sa peryod kot nou annan bokou letan ek lenerzi, me nou napa bokou larises.  Mon ti ava kontan war en Bidze ki diriz nou bann zenn ek zot bann ansennyen ek gid dan bann bon direksyon.  Malgre ki Bidze Ledikasyon i reste parmi bann ki pli o, letan nou depouy li pour regarde kote larzan i ganny depanse, nou war bokou mankman.  I mank aktivite ek ankadrer pour nou bann zenn.

Si nou anvi sov sa zenerasyon kont drog, letarzi ek nanryen-fer, plis lenvestisman i bezwen al dan nou lazenes.  Pli bon progranm letid pour ansennyan, spesyalman bann dan lekol primer – pour zot vreman kalifye.  Plis progranm pour ki nou bann zenn i reste aktiv e an bonn sant, ki ava kit zot lwen avek sa bann ple – fleo ki lapes zot depi ptipti.

Mr Speaker, se senpleman avek en tel lapros ki nou pou konbat obesite.  Donn nou bann zanfan en rev pour vin en sanpyon, en profesyonnel, oubyen en dirizan.  Fodre ki tou nou laplenn i ranpli avek bann zenn an mouvman tou le wikenn akonpannyen par zot paran.  Akoz nou pa kapab planifye pour Seselwa revin ankor sanpyon foutbol, volleyball, basketball, bokse, atletik, naze, koz pli bon Anglais, Francais, vin bann enzenyer, arsitek, avoka?

Mr Speaker, lenvestisman i komans dan lakres ek lekol primer.  Se la kot plis larzan i devret ganny mete, e se sa en mankman dan Bidze.  La mon anvi tir sapo avek sa zenn onm – en zenn onm, Mr Lucas Panayi, ki pe donn son letan pour train nou bann zenn dan foutbol.  Se sa kalite progranm ki nou devret siporte Mr Speaker.

Mr Speaker, sekirite nou pep i primordyal pour nou tou.  Ozordi nou pa an sekirite.  E tou kalite vis pe enfekte nou pep ek nou dimoun, spesyalman bann madanm ki pe viv dan lafreyer.  Sa i en lot landrwa kot i bezwen annan plis lenvestisman, me osi disiplin.

Letan mon dyalog avek Komisyoner ek son bann asistan, mon santi en provon – e profon dekourazman.  Nou pei pa pou kapab kontinyen lo en larout kot zis sa ki mal ki prospere.  Sa lalit kont drog i form parti en pli gro konba ki enkli lezot lazans dan nou pei.  Sa kordinasyon akoz febles imen i bezwen ganny ranverse pour ki finalman tou dimoun i santi ki sa ki pe detri nou sosyete, i osi konsern li.

E letan i aport son kontribisyon, i pa pou regarde dan – i pa pou ganny regarde dan e serten fason e menm vin en danze pour son prop lekor.  Mr Speaker, aksyon imedyat ki pa ni pou kout en kantite larzan, i kapab ganny pran.  Me malerezman sa Gouvernman ozordi i fatige, donk nou bezwen sanzman.  Pey Seselwa, sa ki etranze pe gannyen e nou ava war si nou pa ganny rezilta apropriye.

Dan sa menm lespri Mr Speaker, mon war ki plis larzan i bezwen ganny envestir pour nou vin en pei kot nou frontyer i byen ganny garde.  Kot viziter danzere pa antre, prodwi endezirab pa tonm lo nou semen, e bann aksyon kriminel i ganny met anba kontrol.

Ki i son travayer Imigrasyon ek Customs, sa taxi driver, sa money changer, sa vwazen, sa koleg travay, SLA, FIU ou nenport, i bezwen santi i form par sa plan pou fer nou pep viv an sekirite e dan netway nou pei kont tou sa ki mal.  Nou dan sa konba ansanm.

Letan zanfan mon vwazen i tonbe, i bezwen afekte mwan akoz set en Seselwa ki ganny detri.  Retourn sa slogan ki – ‘’I pran en vilaz, en kominote pour elve en zanfan.’’ Lenvestisman apropriye pour retourn sa lespri ‘annou viv koman frer’.  Se sa ki nou manke dan nou pei ozordi pour nou kapab fer en bon travay e avans devan.

Mr Speaker, si mon pe koz dan sa fason, se parski mon krwar ki vreman koman en pei, nou bezwen rod nou priyorite afen ki nou vreman vin propriyeter nou bann zil.  Partou kot ou regarde, ou war rezilta tro bokou lese-fer, kot finalman Seselwa i ganny konsidere koman pa serye.

E plis travayer etranze i anvair nou pei pour pran nou travay e anvoy nou Dolar presye kot zot.  Bann gro sonm i kit nou pei tou le semenn pour a nouri fanmir bann travayer etranze olye reste dan nou pei pour ede dan son devlopman.  Alor, eski nou pou zis asize san ki Gouvernman i aktyelman diriz sa pei?

Mwan mon enn sa bann Seselwa ki krwar dan Seselwa dan nou pei.  E ki konvenki avek lankourazman, determinasyon ek kouraz pou pran desizyon brav, nou pou vir sa pei dan bon direksyon.  An plis ki sa mon krwar ki moman in arive pou fer li.  Letan nou zis prezant bann Bidze tenny dife san plan a lonterm, nou pou kontinyen koule.

Ozordi mon demann mwan, oli nou lafyerte koman en Nasyon?  E ki nou’n fer pandan tou sa bann lannen avek nou larises?  Ki pe arive avek nou apre plis ki 40an lendepandans e plis ki en kar syek dan lendistri ton?  Eski tou sa pa devret fer nou reveye e regarde ki mannyer nou pou –nou pou vreman pran kontrol nou pei?  Nou’n ganny lendepandans depi 1976 – eski nou pe retourn an aryer an 2018?

Mr Speaker, i primordyal ki nou vin en pei ki ankouraz biznes prop.  Nou bezwen protez biznes Seselwa koman biznes etranze.  Mon santi ki ozordi, tro souvan se etranze ki ganny plis loportinite pou fer biznes e sa ankor enn fwa i fer ki larzan i kit nou pei e ale.  Mon konnen ki i annan serten dimoun, enkli bann diplomat ki pa kontan letan mon dir sa.

Me ki mon pou fer?  Mon en Seselwa e byensir mon bezwen rod lavantaz Seselwa!  Anglais i rod pour Anglais, Français i rod pour Français.  Allemand i rod pour Allemand.  Be mwan mon en Seselwa, mon bezwen rod pour Seselwa.  Konpran mwan byen la.

Mr Speaker, Maurice preski tou bann gran lotel i apartenir pour Mauricien.  Zot in ganny konstri atraver loan ki zot in pran avek bann labank Mauricien.  Ki son rezilta?  Bann lotel i ganny lwe avek bann gran lakonpannyen tel ki Le Meridien, Four Seasons, Oberoi, ensidswit.  Sa i fer ki larzan i reste dan lekonomi Mauricien.

Tandi ki Sesel, tou bann gran lotel pour bann etranze.  Alor letan bann lakonpannyen i lwe, larzan i kit Sesel.  Sa osi fodre ki Gouvernman i donn lankourazman pour ki Seselwa i ganny priyorite.  Par egzanp, akoz ki nou ti bezwen en etranze annan majority shares dan konstriksyon en cold store lo por lapes?  Eski pa ti kapab ankouraz en Seselwa, oubyen en group lenvestiser Seselwa pou fer sa e menm vann shares avek Seselwa ki enterese?

Akoz nou pa ankouraz envestiser Seselwa pou aste bann lotel ki pour etranze?  Akoz ki Gouvernman pa rantre dan en partnership avek SCCI pour ankouraz biznes Seselwa aste bann gran lotel?  Oubyen, eski sa Gouvernman in zis satisfer son lekor pour rode konbyen taks i pou gannyen letan lavant i ganny fer?

Mr Speaker, mon’n dir lot zour, ki biznes Seselwa dan lotelri i bezwen ganny proteze.  Me mon pa’n tann nanryen dan Bidze lo bann incentives ki Seselwa i kapab gannyen.  Enn bann keksoz ki mwan mon krwar i devret arive, se pour donn nou bann Seselwa en pe pli bon deal lo VAT.  Mr Speaker, akoz ki en pti lotel Seselwa i bezwen pey menm VAT ki en gran lotel?

Apre mon osi krwar ki nou bann prop lakonpannyen ek Gouvernman, i bezwen rod konsiltan Seselwa an premye, olye rod etranze ki vini, fer travay e apre retir tou zot larzan.  Annou rod lakonpannyen Seselwa ki ava met son larzan dan nou lekonomi e ede fer nou pei avanse e donn lanplwa Seselwa.  Aret zis vin en Gouvernman 15poursa taks, me vin en Gouvernman ki gard Kapital dan Sesel.

Mr Speaker, la ankor enn fwa, letan mon antann plan pou fer devlopman Waterfront anvil.  Eski vreman nou bezwen etranze pou vin fer sa pour nou?  Ki lankourazman ki Gouvernman in esey donnen pour ki bann biznesmenn Seselwa pa kapab vin devan – ansanm pour realiz en tel proze?

Sa i osi aplik pour devlopman lo nou bann zil elwannyen.  Mon fek antann en proze lo Cosmoledo e en proze fotovoltaik lo Alphonse.  Eski zis Sud-Africain ki kapab fer sa?  Kote ti annan piblisite oubyen en lapel pour Seselwa ki enterese vin devan?  Olye nou zis tande ki i annan tel group ki pe konstri lotel lo tel zil, akoz ki plan pa ganny etale e premye lof i ganny donnen a Seselwa ki serye?

Mr Speaker, mon pe dir tousala, akoz si nou anvi vreman devlop nou pei, donn nou zenn meyer ledikasyon e posibilite, nou popilasyon en bon sistenm Lasante e nou bann travayer meyer deal, nou pei i bezwen vin en katalis pour kreasyon larises.  Nou pa kapab zis fer kado, e nou Seselwa tande, letan kado in fini ganny donnen.

Seselwa osi i kapab vin en strategic partner.  Pa zis etranze.  Seselwa i bezwen pe partisip dan sa prosesis.  Akoz ki serten pei ki bilyon fwa pli ris ki nou, parey UAE i ensiste ki dan tou biznes fodre enn son sitwayen ki annan par mazoriter?  Nou pa kapab fer sa nou?  Sa Gouvernman pe blok Seselwa Mr Speaker.  E nou dan LDS nou pou toultan dir – ‘’larg lanmen Seselwa!’’

Mr Speaker, an menm tan ki nou pe koz protez biznes Seselwa, i enportan pour Gouvernman regarde lekel sa bann biznes ki pe rantre dan pei.  I neseser pour ki bann pti biznes i ganny plis proteksyon e zot pa war etranze pe anvair zot domenn.  Dan menm fason ki pti lotel i rezerve pour Seselwa, lalis bann biznes ki rezerve pour Seselwa osi i bezwen kler.

Nou bezwen osi fer sir ki blansisaz larzan pa ganny fer dan sa bann fason atraver bann biznes etranze ki napa ni gran rannman, me ki servi nou sistenm banker pour lav zot larzan.  Nou mank virzilans dan nou pei.

E se pour sa rezon ki mon pou repete ki nou bezwen ranforsi bann lenstitisyon avek bann Seselwa kapab e konpetan.  Nou annan sa bann dimoun dan nou pei e Seselwa osi aletranze, alor annou rod Seselwa e fer zot fer sa travay pour nou.

Mr Speaker, dan Bidze, nou pa’n antann nanryen konsernan ki mannyer pou fer desann pri lavi, pour ki tou dimoun i ava kapab benefisye.  Sanmenm ki mon’n dir pli boner ki Bidze pa ofer tou Seselwa en pti keksoz, me ki bokou dimoun i ganny kit deor.

Dan en lannen kot sa size pri lavi in preokip nou bann deliberasyon dan sa Lasanble, nou pa’n war Gouvernman vin avek okenn solisyon, oubyen plito, Gouvernman in montre nou ki i pa’n ekout sa Lasanble ditou e pran kont bann propozisyon ki nou’n met devan.

Nou tann tou kalite lalwa ki pou vini, me mon pa’n tann nanryen ki pou konbat dan en fason pli for kont bann kartel ki pe touy nou Seselwa. STC i kontinyen konmsi nanryen – nanryen ki’n ganny dir e diskite.  Parti Lepep i kontinyen ranmas son R800mil tou le mwan.  Se sa ki mon pe fer referans avek letan mon dir ki nou annan en Gouvernman ki pa proaktiv e ki pa pran desizyon.

I bezwen mazin son dalon avan ki i mazin Lepep Seselwa. I bezwen mazin pouvwar politik avan lentere Nasyonal.  Se sa ki pe detri nou pei ek nou pep, e Mr Speaker, se sa kalite latitid ki nou devret met en lafen avek dan nou pei.  LDS i pare pou regard pep Seselwa avan ki i regard politik!

Mr Speaker, dan sa menm konteks, i tre enportan pour ki nou konba kont koripsyon i pa zis reste bann zoli parol.  Ozordi mon ti a ekspekte ki Minis Finans i tal keksoz kler devan – devan nou lo sa lalit kont koripsyon.  Eski pa sanmenm ki pe blok sitan progranm Gouvernman e pe fer nou mank larzan ziska ki nou bezwen pas partou avek nou bol pe mandyan?

Mr Speaker, mon ti a kontan si nou ti a kapab fer en senp pti kalkil. 50milyon Dolar ozordi i vo plis ki R750milyon.  50milyon Dolar in disparet – ki ti pour nou sa.  Annou pa oubliye ki sa 50milyon Dolar ki ti pour nou ki’n ganny vole in ganny envestir e ozordi in fer piti dan bokou pei enkli Singapore, l’Australie, Bulgarie, plizyer pei l’Afrique, La France, Sesel ek lezot landrwa ankor.

Si nou ti ranmas tou sa bann piti ki pou nou menm, kote nou ti pou ete?  Malerezman Gouvernman i per pou met ledan dan son prop Komisyon Anti-Koripsyon.  Nou pei i vin pli pov letan desizyon pa ganny pran. Koripsyon i fer nou pei parey en zoli fiy me avek ledan pouri!

Mr Speaker, tou sa ki mon pe dir i al dan direksyon pour nou koman en pep kapab finalman debout lo nou de lipye, fyer e pare pou fer fas ek lavenir.  Nou pa kapab kontinyen vann nou Nasyonalite anba 5.1.  Me plito nou devret devlop nou bann zenn, donn lankourazman nou etidyan, elimin fleo, donn travayer meyer kondisyon, ranforsi biznes Seselwa.

E permet Seselwa vin lerwa dan en pei ki byen ganny gouvernen par en Gouvernman ki rod byennet Seselwa an premye e ki pa per pou pran desizyon.  En Gouvernman ki met pei avan politik.  Se sa ki nou manke ozordi, e nou dan LDS, nou dir nou pare pou anmenn sa transformasyon dan nou pei Sesel.

Mr Speaker, letan on pe terminen, mon anvi dir ki nou dan LDS, nou’n pare pou sa travay. Ler nou dir ki nou bezwen eleksyon prezidansyel boner, ler nou dir nou bezwen en Prezidan elekte, se akoz nou’n pare pou pran sa responsabilite.  Nou pare pou konmans sa travay transformasyon nou sosyete o pli vit posib.

Me pli enportan ki sa, se nou pei, ki sipoze pli gran ki nou tou, ki bezwen en nouvo souf, en nouvo direksyon, en nouvo lenerzi.  Sa ki kontan Sesel i bezwen fer konfyans Seselwa.  Mr Speaker, Seselwa pe demann sa Drwa pour li swazir son lavenir.  Mr Faure napa Drwa refiz son pep sa Drwa.

Mon repet ankor sa ki Seselwa pe dir – fer eleksyon prezidansyel boner e donn nou sa sans pou tir nou pei dan rigol e remet li – e remet nou pei lo en semen drwat, lo semen silvouple!

Mr Speaker, mon demande ki Gran met i kontinyen zet en regar favorab lo nou pei ek son pep e vers son benediksyon an abondans lo nou.  Tan ka nou dan LDS, nou pa pou zanmen les tonbe!  Mersi bokou.

 

(APPLAUSE)

 

MR SPEAKER

Mersi Onorab Ramkalawan.  Avan mon pas laparol avek Onorab de Commarmond, mon ti a kontan zis rekonnet 2 viziter ki dan nou Galeri.  Sa se Mr Pierre Labiche e Mme Veronique Joseph.  Ankor bann koleg ansyen Seychelles Collegewelcome parmi.  Pierre i – mon konnen zot form par sa Diasporas aletranze.  E i osi i zanfan ex-MNA René Labiche ki ti dan – ki ti servi pei dan People’s Assembly.  Welcome e pandan break ou ava pran en pti dite avek nou.  Nou a kapab fer en pti lenteraksyon.

Bon, mon ava pas laparol avek Leader Zafer Gouvernman, Onorab Charles De Commarmond.

 

HON CHARLES DE COMMARMOND

Mersi Mr Speaker.  Mr Speaker, Manm Onorab Lasanble Nasyonal, Minis ek ou delegasyon, Pep Seselwa, envite isi osi dan nou Lasanble – bonzour.  Mr Speaker, parey dikton i dir – ‘’pa tou parol ki bon koze.’’  E an Anglais i dir –‘’talk is cheap,’’ Mr Speaker.

Sa dernyen 2an i donn nou Pep Seselwa sa loportinite pou war avek nou – zot 2 lizye lekel ki zis koze, koze e koze menm?  E lekel ki’n travay, travay e travay san ses pour sa Sesel ki ozordi lemonn antye pe rekonnet.  E pe demande ki mannyer nou’n reisir pou fer tou sa progre e tou sa demars.

Sa ki annan lizye Mr Speaker, pe war e sa ki annan en konsyans ek en lanmour prop, pe apresye.  Tou sa bann litani konplent par bann fo profet Mr Speaker, par bann profet de maler, i pa nouvo pour ou dan sa Lasanble e pour nou Pep Seselwa.  Nou’n tande pandan sa dernyen 20 a 25an Mr Speaker, in koz lo tou sord kalite keksoz.

La dernyen kou, i annan detrwa nouvo zafer ki vini – Parti Lepep, SMB, lot, lot, lot.  Me Mr Speaker, mon krwar set en konfizyon total e tou sa bann – e nou’n tann ziska ainsi soit-il tou sa bann konplent, tou sa bann ‘’litani’’ problenm!  E Pep Seselwa Mr Speaker, in fatige avek sa bann zis ‘’koze’’, ‘’koze’’, ‘’koze’’ san ses!

Mr Speaker, Pep Seselwa mon dir in fatige ek sa bann gran kozer e pep Seselwa pe demann aksyon.  Aksyon par bann ki ozordi i annan vre pouvwar, Mr Speaker.  Ozordi nou annan en pouvwar balanse, ki pa nou lo sa kote latab ki ti rode.  Nou pa’n zanmen kanpanny pour nou kapab balans latab nou.  Akoz nou ti konnen ki son konsekans, Mr Speaker.

Ozordi nou annan en Lezislatif dirize par Parti Lepep anba direksyon Prezidan Faure.  E – en L’Egzekitiv, (sorry.)  Ozordi nou annan en L’Egzekitiv dirize par Parti Lepep anba Prezidan Faure, e en Lezislatif dirize par LDS.   Me ki nou’n vwar pandan sa dernyen 2an, Mr Speaker?

Pandan ki parti ki diriz L’Egzekitiv anba Prezidan Faure, i kontinyen travay pour sirmont bann gran defi nou pei.  Lot parti ki pe diriz Lezislatif, i zis kontinyen kritike, koze, bloke, menase, imilye, pile e freeze, Mr Speaker!  Letan zot in fatige fer li anndan dan nou Lasanble, zot sot deor lo semen Mr Speaker.  E zot anvi fer en Koudeta Konstitisyonnel, menm si zot, zot pe dir ki zot kont tou kalite Koudeta.

Mr Speaker, la ki nou pe diskit 3enm Bidze ki L’Egzekitiv in anmenn devan nou Lasanble, devan sa pouvwar ki isi la i balanse – ki’n balanse par LDS – kestyon ki Lepep Seselwa pe demande e ki nou ti a kontan konnen, oli zot progranm e zot Bidze alternativ ki zot sipoze annan pour Sesel?  Olye ‘’PIL’’ lo tou sa ki L’Egzekitiv devan dan nou Lasanble – dan direksyon – par direksyon Msye Faure.  Tou sa ki nou prezante isi – Minis, you name it, tousala in ganny ‘pil’ lo la, i ganny zet de-kote.

Akoz zot pa prezant avek Lepep Seselwa zot plan e zot Gouvernman alternativ?  Oli zot shadow Cabinet, Mr Speaker?  Montre nou en kou, lepep a konnen ki vreman zot pe vin fer isi!  Mr Speaker, tousala i bann demagozi pour zot prepar en lot Koudeta.  Parey mon dir, se en Koudeta Konstitisyonnel.

Olye kritike Mr Speaker, ki keksoz pa bouze, Lalwa pe tarde – akoz zot pa servi zot pouvwar mazorite ki annan isi dan sa Lasanble – sa pouvwar Lezislativ ki zot annan pour anmenn bann Private Members’ Bill Mr Speaker, ki ti ava tir sa bann blokaz ki zot pe koz lo la.  Ki – parey zot ti fer ler zot ti anmenn Lalwa Offshore pou fer – pou anmenn larzan pou fer zot dalon ganny larzan.  Met larzan dan pos zot bann zanmi.

Mr Speaker, in ler pou LDS aret koze e komans travay morso parey Msye Faure – nou Prezidan, pe travay Mr Speaker.

 

(APPLAUSE)

 

HON CHARLES DE COMMARMOND

In ler pour zot ‘’put their mouth where the money is’’ Mr Speaker – parey Anglais i dir.  In ler pou zot realize ki lepep pa pou kontinyen soutir tou sa bann ta kapris.  Ozordi Mr Speaker, i annan en plas pour tou Seselwa ki anvi partisip konstriktivman dan devlopman nou pei.  Aret met Sesel an retar, Mr Speaker.  E les Danny travay, nou pe dir!

 

(APPLAUSE)

 

HON CHARLES DE COMMARMOND

Mr Speaker, Bidze 2019 i laprev langazman Gouvernman pou kontinyen travay pour amelyor kalite lavi pep Seselwa.  Sa Bidze i kontiny en seri mezir ki pou adres konsern tou Seselwa.  Tou Seselwa i merit vwar li dan sa Bidze 2019.  Parey mon deza dir dan sa Lasanble, tou Seselwa i devret annan par ladan, Mr Speaker.

Semenn pase, Gouvernman ti selebre e fer en revi 10an ekonomik dan Sesel.  Statistik performans ekonomik nou pei i enn ki tre kler Mr Speaker.  10an pase nou annan rezerv pou zis 2 semenn, nivo lenflasyon ti’n monte, nou pei ti’n nepli kapab tenir lakantite demann ki nou ti annan e nou det ti’n depas limit.  Alor, 10an pase Mr Speaker, Sesel ti deside pou fer sanzman e anmenn nou pei dan en nouvo direksyon.

Pandan sa dernyen 10an Mr Speaker, avek progranm reform makroekonomik, nou’n vwar ki mannyer sa pep koman en Nasyon in akonplir bokou.  Nou det piblik – sa letan ti 151poursan prodwi domestik brit, an 2008.  Mr Speaker, la an Septanm 2018, i selman 59.6poursan prodwi domestik brit.  Nou rezerv an 2008 Mr Speaker – parey mon dir, ti selman 50.9milyon Dolar Américain, ouswa 2 semenn enportasyon.

Le 26 Oktob 2018 Mr Speaker, nou nivo rezerv Nasyonal ki ganny zere par Labank Santral ti aktyelman 555milyon Dolar Américain, ouswa 3.8mwan lenportasyon byen e servis ki nou pep i bezwen.  Ti en desizyon difisil, brav e enportan, me enn ki ti bezwen fer – ganny fer si vreman nou ti anvi fer en meyer lavenir pour nou pep, pour nou pei, pour nou zanfan Mr Speaker, e pep – e nou Pep Seselwa.

E Mr Speaker, dan nou Lasanble, Onorab Deputy Speaker i konn tre byen sa ki mon pe dir akoz, i ti form par sa reform li osi koman PS Finans sa lepok.  Ozordi Mr Speaker – 10an pli tar, nou lekonomi in aranze, i an bonn sante.  Minis pour Finans in vin devan nou Lasanble e prezant avek nou, bann reprezant lepep – en rapor detaye lo performans lekonomi.  E prezant avek nou plan fiskal e bidzeter Gouvernman pour sa nouvo lannen ki pe vini.

Mr Speaker, sa bann lendikasyon makroekonomik i montre ki koman en Pti Leta Zil, nou’n travay vreman dir pour anmenn sa pei lo en lot nivo.  Nou annan stabilite dan nou lekonomi ozordi, Mr Speaker.  Par kont, nou kapab ariv – arive – ariv pli devan si oule, si nou tou nou travay ansanm avek en sel bi.

Mr Speaker, mwayenn, nou total repeyman det pour sa prosen 4an i apepre 53milyon Dolar Américain enkli lentere sa.  Lekonomi in anmenn en krwasans reel 3.6poursan prodwi domestik brit an 2018.  E Gouvernman pe prozekte 3.4poursan pour lannen 2018 – 2019.

Bokou in ganny dir Mr Speaker dan sa Bidze pour kominote biznes.  Sa Bidze ki en pti pe plis ki 8bilyon Roupi, i en rezilta travay dir Mr Speaker, sak zonm e fanm Seselwa.  Akoz si ozordi nou reform in en sikse, se gras a rezilyans e determinasyon nou pep.

Sa Bidze in enn alor, kot nou vwar rezilta sakrifis ki nou’n fer ansanm koman en Nasyon – kot nou rekolte benefis ansanm.  I en Bidze ki bon pour Sesel ek Seselwa.  Alor, nou isi lo sa kote latab Mr Speaker, nou pou siport sa Bidze, me avek serten kosyon e konsey.

Mr Speaker, si ozordi nou reform in en sikse, se gras – parey mon’n dir, gras a determinasyon e rezilyans nou pep Seselwa.  Larzan ki Gouvernman in kolekte atraver taks pandan sa letan e desizyon ki in pran pour redistribye sa larzan avek son pep – avek lepep Seselwa Mr Speaker.

Bann mezir alor – propoze dan Bidze, i reflekte e reponn bezwen bann ki pe leve debourye e an menm tan asiste bann ki pa kapab fer li.  Sa Bidze i baze lo bann prensip fondamantal Parti Lepep, Mr Speaker.  Savedir legalite loportinite e met zonm o sant devlopman.

Mr Speaker, sa Bidze prezante par Minis Finans, i osi laprev konkret ki Gouvernman pe delivre, malgre ki Lopozisyon pe fer nou krwar ki napa nanryen ki pe marse anba ladministrasyon Prezidan Faure.  Mon sezi lokazyon pour remersye Minis avek tou son lekip, pour anmenn en Bidze ki reflekte e reponn bann laspirasyon pep Seselwa, Mr Speaker.

Sa Bidze i reflekte osi bann desizyon propozisyon – bann desizyon e propozisyon ki nou koman reprezantan lepep nou’n anmennen e nou fer anmenn devan Gouvernman.  Par egzanp ozordi Gouvernman in reponn a demann nou pep pour ki nou met plis larzan dan pos Seselwa.

Sa seri mezir propoze, depi logmantasyon minimonm, revizyon striktir saler dan Gouvernman, en lepa enportan pour anmenn en sistenm konpansasyon pour bann dimoun avek plizyer lannen travay dan Gouvernman.  Sa osi pe ganny gete.  En Bidze ki siport bann profesyonnel Lasante, bann etidyan ki pe etidye lo nivo liniversiter.  E osi ki siport bann pti biznes pour kontinyen epanouir.

Mr Speaker, malgre sikse nou reform – malgre sikse nou reform, fodre pa ki nou perdi focus lo sa i nou pe fer dan nou pei.  Lekonomi Sesel i reste frazil e vilnerab a bann sok eksteryer Mr Speaker.  Dan mon bann refleksyon e analiz personnel Mr Speaker, ki mon’n fer lo bann aksyon e lapros ki merit ganny pran pour azir – pour asir lot letap devlopman nou pei, se ki bezwen sanz nou fason fer, nou latitid e pli enportan, nou  merit osi sanz nou mindset, Mr Speaker.

Nou kapab ganny Bidze pli parfe o monn, me si nou mantalite e fason – e fason fer pa sanze, nou riske rekil an aryer lo nou progre ki nou’n fer e akonplir koman en Nasyon pandan sa 40an ki nou’n – ki nou la.  I annan en nesesite Mr Speaker, pour responsabiliz nou pep.  E la mon welcome sa propozisyon pour entrodwir sa prescription fee dan Minister Lasante.  Sa i pou ede pour nou pa abiz lo latizann ki nou gannyen.  I kler Mr Speaker, ki dimoun i merit pran plis responsabilite anver son prop Lasante.

Ozordi nou pre reflesir tre profon lo ki mannyer nou pou kapab konbat bann maladi reel e ki relye a stil lavi.  En Bidze apepre R1bilyon Mr Speaker, pour sekter Lasante.  Kot laplipar depans sa sekter – savedir anviron 45poursan son depans total i pou al anba prodwi e servis.  Ki fer nou realize ki nou merit kapab fer bokou savings e kot nou kapab war plis larzan ganny mete dan bann progranm prevansyon maladi.

Langazman Gouvernman anver nou pep Mr Speaker, pour li kontinyen epanouir, i ganny reflekte atraver Bidze pour sekter Ledikasyon – ki reprezant en total 12poursan Bidze Nasyonal.  Mr Speaker, Gouvernman i kapab prezant pli bon Bidze parey mon’n dir, pou envestir dan sa pep.  Me finalman, tou i repoz lo sa endividi.  I en swa personnel pou sezi loportinite ki pe ganny met a zot dispozisyon atraver sa Bidze.

E la ankor i nesesit en sanzman mindset, Mr Speaker.  sak endividi i merit annan en sans responsabilite personnel.  Sak paran merit pran responsabilite son zanfan pour edik zot e enkilke dan zot zanfan en kiltir pou pran tou son sans dan lavi.  Enstrir dan nou zanfan disiplin e aret krwar ki sa zafer disiplin ek travay dir i zafer zis pour lekol ek ansennyan.

Mr Speaker, lakaz oubyen lozman i en size enportan e i en size konsern pour tou fanmir Seselwa.  Malgre plis demann, Gouvernman i reste angaze atraver sa Bidze pour propoz nouvo fason e lapros pour adres sa size lakaz dan en fason inovativ pour nou kapab fer plis lakaz pour nou pep.

Atraver sa Bidze ki devan nou, nou’n vwar ki mannyer komitman Gouvernman pou fer lakaz pli aksesib avek Lepep Seselwa pour ganny akonplir a plizyer nivo.  Depi bann gran plan devlopman Nasyonal nou pei ziska devan laport sa fanmir ki reste dan leo Cascade, Mr Speaker.

Mr Speaker, ankor – ankor sa i anmenn mwan lo size responsabilite personnel.  I kler ozordi ki en dimoun ki anvi son prop lakaz, i merit fer kontribisyon personnel anver repeyman son lakaz, menm avan ler i ganny allocate sa lakaz – en Polisi Gouvernman ki mon siporte.

Akoz mon fermeman krwar ki dimoun i merit – ki anvi en lakaz, i merit komans pran – i merit pran konsyans ki sa i pour son lakaz. E ki i merit alor peye.  Mon welcome bann nouvo opsyon e veikil finansman pour sekter Lakaz.  Mon felisit Gouvernman pour kontinyen trouv nouvo fason pour adres konsern nou bann dimoun.

Mr Speaker, kou lavi i reste en size konsern mazer pour Lepep Seselwa.  Semenn pase, nou Lasanble Nasyonal – atraver en Mosyon par Onorab Waven William, nou’n diskite otour sa size.  Ozordi nou bezwen agree ki sa size pri lavi i vin redundant dan nou Lasanble, Mr Speaker.  Mon dir in vin redundant Mr Speaker, akoz nou kapab anmenn kantite Mosyon ek kestyon ki nou anvi dan sa Lasanble lo sa size, me sa size i reste.

Sel solisyon se pour nou pas a laksyon, Mr Speaker.  Nou bezwen aksyon konkret pour adres sa size pri lavi.  Menm ki nou kapab dir ki sa se responsabilite Gouvernman, mon oule fer osi resorti ki sa i depan lo tou akter dan lekonomi.  In annan plizyer propozisyon popilis avanse dan sa Lasanble, lo ki mannyer nou kapab adres sa size pri lavi – kou lavi.

Semenn pase menm nou’n tande ki solisyon, se pour peg Roupi kont Dolar.  Mr Speaker, mon pa tro en economist dan sa kalite kalifikasyon, me kestyon ki mon demande, se eski pei i pou kapab afford sa? Ouswa, nou pa pou kree en sityasyon kot nou pou retourn dan black market parey lontan dan sa pei – kot ler ou pe ale lo erport, nek bannla in vin pran larzan avek ou – ou Dolar avek ou.

Mr Speaker, solisyon i petet – solisyon ki petet ti pou ideal se pour ankouraz plis lenvestisman, Mr Speaker – Foreign Direct Investment, mon krwar, pour anmenn plis Dolar dan lekonomi Sesel.  Gouvernman i merit revwar bann striktir e retir bann bottleneck e amelyor bann ‘’Ease of doing business.’’

Mr Speaker, letan nou arive fer sa, i pour enn bann fason, enn bann pa pour amelyor e adres sa sityasyon kou lavi dan Sesel.  Fodre pa ki Pep Seselwa i oubliye ki nou en pei ki enport plis ki 80poursan sa ki nou konsonmen.  E tou sa depans i ganny fer an Dolar.

Mr Speaker, Gouvernman pe kontinyen avek SMEs – bann SMEs Scheme e ki ti komanse si oule dir an 2014, kot anviron 16san dimoun – 16san pti biznes e mwayen biznes i ganny – in benefisye en kantite atraver bann loan, portfolio ki ti anviron R1.4bilyon.  Gouvernman in osi met dan Bidze 2019, 5milyon Roupi pour Seeds Capital.

Mr Speaker, mon lans en lapel ek Departman Devlopman Lendistri ek Lantreprenarya pou travay ek sa bann pti biznes pour vin avek nouvo lide, nouvo proze inovasyon pour zot kapab benefisye ek sa bann finansman ki pe ganny met dan Bidze devan nou la ozordi.  Mr Speaker, sa i ava ed pei pour diversifye son lekonomi e anmenn plis krwasans.

Mon osi lans en lapel avek Enterprise Seychelles Agency e Industrial Estate Authority pour revwar konsep bann micro enterprise dan bann distrik.  Par egzanp, akoz ziska ozordi prezans microenterprise dan distrik – ziska ozordi la ki nou pe koze, microenterprise dan distrik Anse Boileau pa ankor vin operasyonnel an totalite, Mr Speaker?  E osi dan bann distrik parey Grand – Port Glaud, akoz i annan plas vid ki konmela i egziste dan sa bann devlopman?

La i montre poudir i annan progre ki nou bezwen fer.  I annan keksoz ki bezwen ganny regete.  Mr Speaker, si nou anvi en lekonomi ki pli performan, bann pti e mwayen biznes i bezwen zwe sa rol dan anmenn plis krwasans dan nou lekonomi – bokou in ganny anonse pour benefis sekter Lagrikiltir Mr Speaker, dan sa Bidze.

Konsesyon kot labatwar, konsesyon pour asiste fermye lo manze poul e konsesyon lo sak kilo koson ki fermye i prodwir.  Adisyonnel-man, GOP pour sa sekter in ganny revwar pou sorti R500 pour ariv R250 par mwan.  Ranboursman VAT pour prodwi ki ganny aste lokalman par biznes dan Lagrikiltir e Lapes, ogmantasyon taks lo enportasyon lavyann poul e lentrodiksyon taks lo lenportasyon lavyann pork.

Mr Speaker, sa bann mezir i ava anmenn en soulazman pour sekter Lagrikiltir, ki pou fer sir ki nou ogmant prodiksyon lokal e koup lo enportasyon.  E sa i ava fer ki nou deviz etranzer i ava reste dan nou pei, dan nou sistenm banker.  E par konsekans, i devret ede pour osi stabiliz pri forex e amelyor koud lavi dan nou pei.

Mr Speaker, liberalizasyon komers in anmenn bokou rezilta e loportinite.  Par kont, lo lendistri domestik i ganny bokou afekte.  Mon welcome i alor lanons ki’n ganny fer dan Bidze 2019 pour fer sir ki i annan Lezislasyon neseser pour protez nou Lendistri lokal kont sa bann prodwi enporte ki afekte nou Lendistri par serten kondisyon advers.

Mr Speaker, dan Bidze 2019, Gouvernman in anonse ki pou annan en sekter prive – ki i pou travay ek sekter prive pandan lannen 2019 pour asire ki annan en stratezi lekonomi e elektronik an plas.  Sa i primordyal Mr Speaker, akoz i ava ede dan kou fer biznes.  Nou limitasyon ki nou annan an term resours imen osi.  Linisyativ E-Government i osi lakle pou fer sir ki Gouvernman – ki tou servis Gouvernman i ganny ofer atraver lyen elektronik.

Mon lans en lapel pour departman ICT – pou fer sir ki prosedir pour entrodwir Mobile Number Portability i ganny fer dan premye kar 2019, Mr Speaker.  Sa i ava ede pour en dimoun ki kit son nimero – pour en dimoun kapab kit so nimero si i pe sanz operater mobile.  Alors, bann operater i a bezwen donn en pli mon servis e fer ki servis mobile i vin pli afordab pour nou pep.

Mr Speaker, mon demande ki sa nouvo Prozedlwa Kont Blansisaz Larzan e Finansman Terorizm, savedir AML avek CFT Act i ganny prezante koman Lasanble repran an 2019.  Sa Lalwa i neseser si nou anvi vreman anmenn plis zefor pour konbat kont blansisaz larzan.

Sa stratezi Nasyonal Fintech in osi kapab anmenn plis krwasans dan nou sistenm finansyer, Mr Speaker.  Par kont, nou bezwen fer atansyon lo bann risk ki kapab asosye a en tel teknolozi.  Nou bezwen edik nou pep lo sa bann risk e fer sir ki nou anmenn bann mezir an plas – ki nou annan bann mezir an plas pour minimiz sa bann risk.

Mr Speaker, i enportan mon fer remarke ki en finansman ase sibstansyel in ganny mete pour kiltir leritaz ek lar dan sa Bidze.  Mon apresye sa Mr Speaker, e nou kiltir ek nou leritaz i enportan. I en eleman fondamantal nou lidantite ek nou linite koman en pep, koman en Nasyon.  I enportan pour sa koezyon sosyal.

E sa sirman i fer sa lyen antre nou – depi nou diversite lopinyon ek diferans ki nou kapab annan.  Me mon servi osi sa loportinite pour demann nou bann artis, mizisyen, ekriven, bann travayer dan domenn kiltir ek lar, pou ed nou.  E nou pep Mr Speaker, pour pran swen avek nou kiltir.  E pou promouvwar sa lespri linite dan nou pei.

Mon osi demann Minister Tourizm ek bann dimoun dan sa lendistri pour pan o serye rol ki sekter Kiltir ek Lar i kapab anmenn – i kapab annan pou fer dan prodiksyon – dan nou prodwi touristik, sorry.  Dan nou prodwi touristik, pour kapab si oule, anmenn e fer plis nou artis e bann artizan benefisye ekonomikman e finansyelman dan sa logmantasyon dan touris ki nou vwar dan nou pei.

Mr Speaker, nou pa kapab nou ganny plis touris me rannman ek sa touris i pa tous tou bann dimoun ki merit ganny touse.  Mr Speaker, mon apresye langaz Gouvernman pou redwir taks biznes komansman lannen 2020.  Gouvernman i bezwen fer sir ki i annan bokou diskisyon avek sekter prive, pou fer sir ki sa propozisyon ki vin devan nou Lasanble an 2019 i pran kont senplisite lo kote biznes e osi lo kote koleksyon reveni.  Savedir lo kote Komisyon Reveni, Mr Speaker.

Gouvernman in osi anonse ki Komisyon Reveni pe esanz lenformasyon, tel ki detay kont labank avek bann omolog enternasyonal.  Sa legzersis i enportan pou fer sir ki biznes ki annan kont labank aletranze i deklar son taks korekteman Mr Speaker.  Sa i ava ede osi pou komisyon Reveni kolekte plis reveni.  E osi Gouvernman i a kapab redwir biznes taks 2020.

Mr Speaker, nou lenerzi i reste en fakter kou lavi ki afekte nou pep.  Mon welcome sa proze Smart Energy dan lakour ki ava donn lenerzi gratwit 500 fanmir Seselwa atraver PV.  Mon demann Minis, konbyen apepre sa bann fanmir pou benefisye?  I enportan i dir nou.  E i osi – e osi dan ki staz sa proze LNG i ete?  E kan ki ou pou kapab war son komansman?  Minister ki responsab pour Lenerzi i bezwen responsabiliz dimoun osi lo fason ki nou servi lenerzi dan lakour.

Mr Speaker, dan liv Bidze, Gouvernman i prezant osi Bidze 2019 pour bann antrepriz piblik.  Plis ki R13.1bilyon pou ganny kolekte e plis ki R11.7bilyon pou ganny depanse par san sa bann antrepriz piblik.  Mr Speaker, letan ou konpar Bidze Nasyonal ki 8.9bilyon total reveni, ki enkli don – savedir bann grant, e 8.46bilyon lo depans, Gouvernman pe prozekte pou kolekte selman 664.8milyon Roupi anba dividend avek nou bann antrepriz piblik.

Sa i reprezant selman 7poursan total reveni Gouvernman.  Eski nou pa kapab kolekte ankor plis avek nou bann antrepriz piblik?  Gouvernman i bezwen amelyor son kad legal pou fer sir ki i annan plis ki anmas – i annan plis latransparans.  E pour lannen 2019 e osi i bezwen annan plis rann kont Mr Speaker, e plis bonn gouvernans parey mon’n dir dan sa bann antrepriz piblik.

Pour lannen 2019, mwan osi – mon’n vwar osi ki Gouvernman i enkli en Fiscal Risk Statement lo nou bann lantrepriz Gouvernman.  Gouvernman i bezwen amelyor son kad legal osi la pou fer sir ki i annan latransparans e devwar rann kont e bonn gouvernans dan sa direksyon.

Mr Speaker, nou krwar nou ki bann antrepriz piblik, nou bezwen donn rol – vre rol, si oule dir, sa bann lantrepriz dan nou lekonomi dan nou pei.  E nou’n vwar poudir PMC i annan en rol enportan pou zwe la.  Nou’n annan meeting – lo FPAC nou’n annan meeting avek PMC e lezot Lazans enternasyonal – par egzanp Fon Monneter Nasyonal, World Bank, tousala – nou’n diskite ansanm e nou war ki rol PMC vizavi sa bann lantrepriz  i bezwen ganny revwar, Mr Speaker.

E ki PMC i a kapab zwe pli bye son rol oversight ler Lalwa i ava sanze.  E nou demande ki sa Lalwa i vini boner an 2019 pou ki PMC i kapab vreman zwe sa rol enportan pou fer ki bann antrepriz piblik i kapab – si zot pa pe perform byen, depi son CEO e bann Board i ganny deal avek apropriyeman.  E ki la, nou a kapab war en pli bon rannman pour anmenn plis reveni par sa bann antrepriz piblik.

Mr Speaker, Gouvernman pe entrodwir en nouvo taks lo disik komansman lannen 2019.  Sa i enportan letan nou regard kou depans Minister Lasante pour tretman bann maladi ki lye avek konsonmasyon disik, enkli dyabet ek obesite.  Par kont, Minister Lasante i bezwen travay lo en bon kanpanny sansibilizasyon pour edik dimoun plis lo danze lo bann labwason ki konteni bokou disik.

Gouvernman i bezwen osi Mr Speaker, donn dimoun bann opsyon – par egzanp, met bann water fountain kot bann lekol pour ankouraz zanfan bwar plis delo.  E osi redwir VAT lo bann labwason ki napa disik – letan ki napa disik ladan.  E ankouraz prodiksyon plis fri lokal.

Mr Speaker, en total R59.9milyon pe ganny propose pour Lazans Proteksyon kont Labi Drog ek Reabilitasyon.  Sa i enkli 14.3milyon ki’n ganny mete pour konmans konstriksyon vilaz pour reabilitasyon bann viktim drog.

APDAR in annan apepre 15san kliyan lo Mahé, Praslin e La Digue Mr Speaker, ki lo progranm methadone.  40poursan in ganny deklare ki i pa pe servi eroin.  E lezot i ankor lo tretman.   Vedir ki i annan progre pe ganny fer e nou bezwen ankouraz sa bann Lazans pour zwe sa rol enportan ki zot annan.

En provizyon 10milyon Mr Speaker, in ganny Bidzete anba Minister Lafanmir pour konstriksyon Sant Rezidansyel pour bann zenn ki annan problenm konportman.  Gouvernman pe kontinyen met larzan dan sekter Lakaz, parey mon’n dir.  Me pou kontinyen lager, si oule dir kont – pour asire ki Seselwa i bezwen en lakaz i ganny asiste.

En sonm 82milyon in ganny mete dan Bidze pour devlopman lakaz.  E sa i enkli 20milyon Mr Speaker, proze ki pou ed bann dimoun ki vilnerab – ki annan lakaz me ki pa kapab fer reparasyon ek zot lakaz.  Zot ava ganny lasistans avek Gouvernman pour ed zot dan sa domenn.

An term lasistans lakaz Mr Speaker, Gouvernman in osi met R18milyon anba Housing Finance Scheme pour asiste dimoun ki pe al konstrir zot lakaz pour premye fwa.  E en serten kantite dimoun – en serten kantite don pou ganny osi ede pour bridge sa gap Mr Speaker, ant loan ki zot gannyen swa ek labank oubyen ek HFC ek zot kout proze.

Gouvernman pe osi al reviz sa Scheme an 2019 pour asire ki plis dimoun i benefisye anba la.  Alor an term lakaz, apard sa larzan ki ganny meter dan Bidze 2019, i annan en proze 3mil lakaz ki Gouvernman i anvizaze enplimante dan sa prosen 6an Mr Speaker.  E ki pou benefisye 558 fanmir an 2020 e 506 fanmir an 2021 anba sa proze.

Mr Speaker, sa Bidze 2019 i adres enn bann defi fondamantal dan striktir reminerasyon bann travayer Gouvernman.  Sa i spesyalman pour bann travayer ki’n lwayal, devoue e atenn en kantite lannen servis dan bann diferan Minister, Departman e Lazans e ki pa lo Kontra.

Sa allowance i enportan Mr Speaker, note i pou tous akote gratwite ki Gouvernman i osi donn bann travayer.  Sa in fer ki oparavan, omwen ki zot ganny en promosyon oubyen ki Gouvernman i anons en logmantasyon dan saler Nasyonal, oubyen ki zot ganny en revizyon dan zot Scheme of Service, sa bann travayer i kapab fer lannen e dan – e lannen apre lannen travay san en logmantasyon dan zot saler de baz.

La alor Mr Speaker, sa i ava ganny gete.  E from now on, i ava ankouraz bann travayer pou fer pli lontan dan sa landrwa kot zot travay e i en lankourazman pour zot.  Alor Mr Speaker, sa propozisyon Gouvernman pour enplimant en Long Service Allowance i enn – i rekonnet nesesite pour rekonpans e anmenn en formil striktir ki ankadre bann travayer Gouvernman ki pa lo Kontra pour resevwar en logmantasyon koman en allowance pour bann lannen ki zot i akimile dan servis lanplwa.

Mr Speaker, sa i pou kout Gouvernman R50.6milyon, avek son lenplimantasyon an 2019.  E R101.2milyon an 2020 koman lenplimantasyon konplet sa proze.  Deplis, tou travayer Gouvernman pou osi resevwar en logmantasyon 5poursan lo zot saler de baz.  Sa i swiv desizyon Gouvernman pou osi revwar kad saler apre 5an lentrodiksyon Public Service Salary Act 2013.

Mr Speaker, Gouvernman in toultan revwar kad ki i kapab – kan – in toultan revwar kan i kapab amelyor lapey son travayer pour motiv zot e atrakte bann nouvo profesyonnel e lezot teknisyen pour travay dan Gouvernman.

Saler minimonm Mr Speaker, pou osi ganny ogmante par 5poursan Zanvye 2019 – pou sorti R33.30 par erdtan pou ariv R34.97 par erdtan pour travayer – pour travayer Seselwa e ekspekte – eksepte Mr Speaker, bann travayer casual, pour zot pou reste parey.  Pandan sa dernyen 10an Mr Speaker, en gran zefor in ganny fer pour asire ki byennet bann travayer i ganny proteze avek en saler minimonm pour asire ki zot kapab ganny en saler ki konsider kou lavi.

Mr speaker, fodre pa nou bliye dan sa pei, an 2008 saler minimonm ti R14.50 par erdtan.  Swivan sa, Gouvernman in enplimant en seri logmantasyon kontinyel koman swivan;  An 2019 – an 2009 in fer monte par 7poursan pou ariv R15. 50.

An Zanvye 2010 saler minimonm in – ti monte par 6poursan pou ariv R16.50 par erdtan.

An Zilyet 2010, saler minimonm in osi ogmant ankor par 20poursan pou ariv R19. 80 par erdtan.

E an Zanvye 2011, ti annan en logmantasyon ankor par 6poursan pou fer sir ki saler minimonm i ariv R21. par erdtan.

Logmantasyon in osi arive an Zen 2013 pour ariv R22. 25 – en logmantasyon 6poursan.

An Zanvye 2014, saler minimonm ti ogmant par 20poursan ankor pou ariv R26 .70 par erdtan.

E an Avril 2016, saler minimonm ti ogmant par 25poursan pour ariv R33.30 par erdtan.  Pour en travayer ki travay 35 erdtan par semen, sa ti ariv en saler R5,0 50 par mwan.

E la an Zanvye 2019, sa pou ariv R5,303.78sou par mwan Mr Speaker.

Nou’n osi vwar Mr Speaker, zefor kontinyel pou amelyor lapey Gouvernman – travayer Gouvernman avek en sonm R58.5milyon pour bann – pour bann diferan Scheme of Service.

Si nou regard en pe dan bann Bidze oparavan, nou pou osi war par egzanp kot an 2016, R20.5milyon ti ganny aprouve pour bann lenplimantasyon nouvo Scheme.

An 2017, sa ti R45.1milyon.  E an 2018, sa ti R91.6milyon.

Tousala mon pe koz lenvestisman ki al pour bann travayer.  Sa alor i en lapel pour tou civil servant osi Mr Speaker.  Pou asire ki zot prezan e livre lo servis ki zot donn nou Pep Seselwa – nou bann sitwayen.  Pour ki nou elev nivo servis ki nou ofer piblik.  Nou rekonnet zefor bokou nou bann profesyonnel e teknisyen dan Gouvernman

Mr Speaker, menm si i annan bokou kritik ki pe dir ki Gouvernman pa pe deliver.  Nou bliye ki se bokou bann zenn graduates, bann travayer eksperyanse, e lezot bann teknisyen devoue ki leve tou le bomaten pour vin travay dan Gouvernman.  Pour perform zot travay e fer marse ladministrasyon piblik, ofer servis kle parey nou bann ners, dokter, ansennyan, gard, zofisye tenny dife, cleaners e bokou lezot ankor Mr Speaker.  Sa bann kad zot la a nou servis e zot fer travay formidab pou fer marse nou pei e nou lekonomi.

Sa bann travayer Gouvernman Mr Speaker, i osi bann ki dan sekter prive – e osi bann ki dan sekter, i bezwen alor ganny valorize.  E non pa konsidere koman bann non-konpetan koman progranm souvan pe refer zot avek e avek nou ladministrasyon – nou Ladministrasyon Piblik.

Akoz letan nou dir ki nou Gouvernman pa pe marse, ladministrasyon piblik pa bon – i non-konpetan, se sa bann travayer ki nou pe dir sa lo zot.  Akoz zot ki fer marse sa bann landrwa Mr Speaker.  Par kont – wi, nou bezwen admet ki bezwen annan amelyorasyon kontinyel dan servis piblik – servis ki zot ofer nou.  E sa enn de zot ki pa pe fer byen, nou demann zot – nou pe adres osi avek zot pour zot improve, pour zot fer pli byen, pour zot deliver vreman alaoter pour nou pep.  Nou tou nou bezwen zwe nou rol e pran nou responsabilite Mr Speaker, o serye.

Mr Speaker, Parti Lepep i reste angaze anver pep Seselwa.  E nou reste lwayal anver nou bann prensip kot sak zonm, fanm e zanfan Seselwa i reste o sant devlopman.  Kot i annan en system Welfare e Lasante ki ekitab pour tou dimoun.  En sistenm Sekirite Sosyal ki kontinyen pran ka avek bann – avek nou bann dimoun aze.  Kot sak zanfan ki’n ne anba soley Sesel i ganny menm sans dan lavi.

Bann prensip nob i reste touzour relevan.  E laprev tou sa se dan sa Bidze Mr Speaker, kot lenvestisman pe ganny fer e mete dan bann sekter kle, ki enkli Ledikasyon, Lasante e Sosyal.  Dan kad nou bann program sosyal Mr Speaker, Gouvernman in toultan fer sir ki sa bann progranm i vize ver dimoun pli vilnerab dan sosyete.  E osi fer sir ki tou dimoun aze i ganny asiste.

An 2012 Mr Speaker, pansyon retret ti senpleman R2, 550 Roupi par mwan.  E ti annan 6,774 pansyoner.  La an 2018, i annan 10,706 pansyoner e zot pe ganny zot R5,050 par mwan.  E sa i en logmantasyon 98poursan lo 2mil – lo 2,012.  Oubyen R2, 500 an plis.  E la Gouvernman pour lannen 2019, in ogmant ankor pansyon retret pour zot ganny R5, 250 par mwan.

Mr Speaker, Gouvernman ti entrodwir Social Safety Net anba Lazans Proteksyon Sosyal depi 2009.

An 2012, ti annan 2,044 dimoun ki ti kout pei R86.7milyon.  E la ozordi an 2018, i annan 2,499 dimoun.  E sa i pe kout pei anviron R53.1milyon.  Lo kote home care ti annan 2,502 home carers an 2012.  E sa in ogmante an 2018 pour vin 3,565 dimoun.

Mr Speaker, total Bidze pour benefis – pour bann benefis e progranm anba Lazans Proteksyon Sosyal, in sorti R485milyon an 2012 pour ariv R1.3bilyon an 2018.  Gouvernman i bezwen revwar sa Mr Speaker.  I bezwen revwar son sistenm pou fer sir ki nou target dimoun ki pli vilnerab e ki pli bezwen.  Akoz sa i en gran logmantasyon e nou pa kapab zis kontinyen ogmant li.

An konklizyon Mr Speaker, mon oule lans en lapel avek tou travayer tou landrwa travay.  Mon oule lans en lapel ek tou landrwa travay Mr Speaker.  Me sirtou bann gran lotel – get nou travayer Seselwa.  Get zot byen e donn zot sa sipor e kit – e fer sir ki zot kit en pe deviz dan nou sistenm banker pour ede fer desann pri lavi.  Nou pou get zot byen – nou pou get zot byen pros an 2019 Mr Speaker.

Avek sa Bidze Mr Speaker, Gouvernman i reste fikse lo bann vizyon e lobzektif mete par Nasyon Ini.  E osi bann vizyon e lobzektif nou parti – Parti Lepep e nou pei.  Sa Bidze i a permet nou respekte nou progranm reform set par Fon Monneter Enternasyonal e World Bank.  E i a permet nou pei kontinyen sa devlopman rapid Mr Speaker, dan l’index Devlopman Imen – rikord ki Sesel pe garde lo nivo l’Afrique.

Kontinyen travay Prezidan Faure.  Lepep Seselwa i kontan ou e i siport ou.  Nou deryer ou.  Mersi bokou Mr Speaker.

 

(APPLAUSE)

 

MR SPEAKER

Mersi Onorab De Commarmond.

Bon, ler nou pou rantre nou pou kontinyen avek nou repons.  E nou pou annan Onorab Ahmed Afif, swivi par Onorab Audrey Vidot.

Ozordi nou pou bezwen ran lantenn SBC midi sharp.  I en demann ki’n vin kot mon lofis akoz i annan serten travay ki zot pe fer.  So, nou pou tenir en pti pe – nou pou pran kont en pti pe letan.  Nou pou pran Break la, nou pou retournen – annou fer li 11.05 nou retournen.  Ok, nou ava pran en Break 20 minit.

Mon envit okenn Manm ki enterese – nou annan nou 2 viziter.  Nou pou pran dite dan Room 3 – Committee Room 3 avek zot.  Okenn Manm ki enterese pour dyalog en pti pe avek zot, zot ganny envite.

Nou ava Break, alor nou retournen 11.05.

 

(BREAK)

 

MR SPEAKER

Bon nou ava kontinyen avek nou travay e mon ava pas la parol avek Onorab Ahmed Afif.

 

HON AHMED AFIF

Mersi Mr Speaker.  Bonzour Minis.  Bonzour tou bann Manm Onorab e tou dimoun a lekout.  Pour la trwazyenm fwa dan sa 6enm Lasanble nou’n ganny prezante ek en bidze Nasyonal, dan sa Bidze ki’n ganny delivre dan 2erdtan edmi par Minis, nou’n tann bokou.

In en Bidze ki’n anmenn sa ki nou apel en sirplis primer, savedir ou balans avan ou pey lentere lo ou det.  Me apre ki ou’n pey lentere lo nou det, nou pour annan en deficit R134 milyon, plis ki 2 fwa sa deficit 2018 ki ti R64milyon.  Kisisa en deficit Mr Speaker?

Se senpleman larzan ki manke pour pey tou sa ki ou bezwen, personnelman mwan mon konsernen kan dan kont final i mank larzan.  Ou pa kapab tou le lannen pe vin pli andete ziska ou pran loan pour ou pey loan, me sa se pa tou ki konsern sa bidze, nou vwar bann gro sonm larzan ki pe ganny depanse pour ledikasyon, lasante problenm sosyal, progranm sosyal eksetera, pour mwan i enportan donn resours sa bann sekter, me sa ki pli enportan se ganny rezilta, mon kontan vwar tou travayer enkli dan Sekter Prive ki lo minimum wage pour vwar zot saler mont par 5poursan a parti le 1 Zanvye 2019.  Mon mazinen sa i baze lo lefe ki lenflasyon pour 4.4poursan an 2019.

Me kestyon se, kwa ki Gouvernman pe fer atraver bidze pour ogmant lefikasite? Savedir prodwir plis avek mwens, san lefikasite pour napa plis prodiksyon, e san prodiksyon pour annan mwens pour donn travayer.  Dan sa bidze nou’n osi vwar en revizyon dan kad saler dan Sekter Piblik ki’n ogmante par 5poursan, mon pran li alor ki tou travayer lo sa grid pour mont par 5poursan a parti zilyet 2019, in annan revizyon allowance pour etidyan, Scheme pour lakaz ek kontribisyon pour HFC sirtou pour zabitan Praslin ek La Digue ki pour ed zot dan zot proze konstriksyon, Gouvernman in osi fer monte serten keksoz sigaret ek lalkol, prodwir disik e pli enportan ler mon lir sa bidze, i paret mwan zot in remet tax, mon pa konnen si VAT lo poul ek pork enporte, e an plis ki sa R3 par kilo lo lavyann pork e preski R1 an plis par kilo lo lavyann poul, ki sa pour fer pour ou ki konsonm poul ek pork?  Nou konn tre byen poudir laplipar lavyann ozordi i enporte, savedir sa bidze in fer monte pri manze, ki avan ti napa taks sa kantite lo la.

Mr Speaker Minis in fer monte pri lavi, an gro sa ki nou trouve se sif final depans e reveni Gouvernman pa’n sanz bokou ant 2018 ek 2019, me pri lavi pour monte akoz lenflasyon pour monte, e taler mon pour koz plis an detay lo la.

Sa ki kler ler nou lir paz 67 Seksyon 2 dan part 2 liv Bidze kot i montre CPI Consumer price Index koman 4.4poursan 2019 konpare avek 3.9poursan an 2018.

Kwa ki sa Bidze in anmennen alors?  Mr Speaker en bidze i en plan, i pa zis an sif, me i en progranm ki mannyer pour anmenn sa pei ver lavenir, en bidze i devret donn ou lespwar desin en semen kot nou ete e kote nou pe ale.

Mr Speaker sa bidze kan ou regard an gro se enn ki i an Angle nou apel li “business as usual” akoz i pa tro diferan avek 2018?  Me Mr Speaker pour mwan sa ki mon pa’n tande dan sa plan, se ki mannyer si nou dan sa leta lespri business as usual, ki mannyer nou pour adres bann size enportan dan sa pei.

E mwan mon ti a kontan ek ou permisyon liste vitman 10 pwen enportan ki pour mwan sa Bidze pa’n vreman adrese.  Premyerman kordinasyon, e mwan repete kordinasyon pour konbat fleo drog.  Nou pli gro defi ozordi se pour ganny zenn Seselwa ki kapab ranplas travayer etranze Sesel, sa pe kout nou pei en fortin e pe fer kou lavi monte de zour an zour, e la mon ti a kontan eksprim mon sipor pour sa bann travayer Banyan Tree ki ti vin vwar mwan zis 2 zour pase, pour rakonte ki mannyer zot in ganny trete vreman mal par zot anplwayer ki’n vreman met mwan dan sok; kot Gouvernman in donn GOP pour etranze ranplas Seselwa ki ti deza an plas, e Seselwa li i ganny met deor par sa bann etranze ki ansarz Banyan Tree.  A ler aktyel zot ankor deor, sa mwan pa kapab aksepte e sela kot Gouvernman in bite, e sete malerezman ou menm Minis ki ti dan Lasanble ki ti dir nou, personn pa pour ganny met deor.  Mon espere ki Gouvernman i rezourd sa problenm pandan sa bann zour ki vini.

Me annou retourn lo size drog ek zenn, akoz nou pa ganny ase zenn pour ranplas etranze?  Bokou pe ganny afekte avek drog ek labi sibstans, dan sa Bidze mon pa vwar ase lanfaz lo ki mannyer nou pour rezourd sa problenm drog, oli bann progranm anba bidze pour ranforsi kordinasyon ant lekol, paran, Lapolis, Servis Sosyal, Lazans Lasante ek bann ki donn methadone pour retir sa dimoun dan sa serk visye.

Oli plan pour anpes bann ki pa ankor antre dan drog, tonm dan drog?  Oli sa bann plan pour donn bann zanfan dan tou distrik en landrwa konvenab pour fer sport oubyen aktivite lwazir?  Oli bann plan pour antretenir sa bann fasilite dan en fason normal ki kapab dire pour bokou lannen ankor?  Oli bann progranm pour redéploie bann zenn, ki pa kapab aprann e ki ozordi i pe annwiy ansennyan? Met retar lekol e met retar lezot zanfan.

Mon annan en kantite kestyon, oli progranm pour anpes bann zenn 15an fini dan kaso oubyen rimann akoz zot pe vol loto, bato e 2 lakaz.  Mwan dan mon distrik anler Ste Helene La Retraite mon annan 1 e i annan 2 zanmi, oli en plan serye pour atak sa fleo drog depi son sistenm dealer ek fourniser ek son sistenm distribisyon ki pe mars tre byen akoz toulezour konmela mwan mon vwar plis bann pti men moter ek car hire, larepons?  Napa!

Plan kordinasyon Mr Speaker, e dan sa Bidze, mon pa vwar sa problenm konmsi lo radar Gouvernman, rezilta i devan nou, ozordi i annan 1,600 zanfan ki ne tou le lannen, alors 17an pli tar e tou le lannen apre sa nou ekspekte vwar preski 1,600 zanfan ki fini lekol ek en bon rezilta, me parmi sa 1, 600 zanfan ki fini bann Lenstitisyon Skoler a laz 17an pour ganny forse 300 ki ganny en grad C ou pli bon ozordi.

Savedir mwens ki 1 dan 5 zanfan ki reisir, 80poursan bann zanfan pa lo standar; savedir 80poursan sa gro depans i pe fini dan gaspiyaz, akoz napa aksyon efektiv.

Ki nou pe fer ek sa bann ki tonm dan drog?   Nou donn methadone, nou sey trete, me si apre tousala ou retourn li dan ghetto kot tou ti komanse, ou pour retourn lo zero, i pour vin en gaspiyaz letan ek larzan, nou bezwen annan plis debousman pour sports pour bann zanfan ki pa ankor tonm dan drog, me ki anvi viv en lavi normal.  Dan sa bidze mwan pa vwar ki mannyer dan mon distrik par egzanp mon pour ganny plis fasilite sportif e mon pa pe demann bokou.  Ozordi dan sa bidze mon pa vwar okenn lanfaz ki pe ganny fer pour sanz lafason nou fer travay kont drog.

Dan Bidze pour mwan i devret annan en resours pour kre en unit anba Lapolis ki kordin lenformasyon ek loperasyon atraver Imigrasyon kot sispe drog i pase.  FIU kot larzan sal i ganny detekte, Coastguard kot zot kordin entersepsyon trafikan lo lanmer; Biro Lanrezistreman kot zot krwar, kot zot vwar kot byen pe ganny anrezistre e Biro Taks ki li i kapab vwar byen kwa ki pe ganny deklare.

Mwan mon pa’n vwar sa dan sa Bidze, e mon krwar nou pe mank en loportinite pour elimin e atak sa problenm drog ki li menm pe met en retar enorm dan nou Lekonomi e dan nou bidze li menm.

No.2, koripsyon move zesyon e birokrasi.

Mr Speaker sa Lasanble e son bann Komite sirtou FPAC ki mwan osi mon lo la, in fer bokou pour demontre bokou ka koripsyon ou move zesyon enkli sa ka $50 milyon Dolar ki ti disparet, rapor later ki’n ganny donnen pour nanryen ek serten endividi oubyen Parti Lepep, bann ka tranzaksyon ilegal par O Zofisye FIU, bann manboulouk par STC pour pey lokasyon R10milyon avek Parti Lepep ki pe fer kou marsandiz monte, proze stad lanmizik ki bidze in vin pros 5 fwa son kou orizinal; progranm donn paspor anba 5 (1) pour bann rezon ki pa legal, peyman plis ki R50 milyon an plis pour fer dyaliz, e semenn pase oubyen 2 semenn pase R80 milyon ki’n disparet kot SBFA.  Ki sa Bidze pe fer pour anmenn nou travay enorm kont koripsyon pli lwen?

Komisyon kont koripsyon i trouv zot enkapab pour al pli lwen e Lapolis e Biro Attorney Zeneral i paret mwan, i paret mwan napa ase dimoun kalifye pour anmenn sa lalit.  Zot a rapel dan Ladres Leta La Nasyon sanmenm sa lannen le 6 mars 2018 nou ti ganny dir par Msye Faure koman Prezidan e mon site Mr Speaker “nou pour revwar Lalwa Anti-Koripsyon e donn plis resours sa Lotorite, sa pour asire ki i fonksyonn dan en fason pli efektiv e efikas dan lanket détection e anpes koripsyon, Prozedlwa pour ganny prezante avek Lasanble Nasyonal pour son laprouvasyon avan Septanm sa lannen.” Mon aret site.  Ozordi nou le 8 novanm, oli sa Prozedlwa?

Dan sa Bidze napa en mo lo ki mannyer pour ranforsi lalit kont koripsyon. Se pourtan san koripsyon Bidze ti pour bokou pli for ki ozordi.  Lo sa kote latab nou, nou dir donn ledan sa lenstitisyon e fer li vin efektiv.  Si Gouvernman pa kapab anmenn en Bill pour ranforsi Komisyon kont koripsyon, dir nou, nou ti pour fer li depi avan, me solman zot dir zot pe anmennen, nou pa’n fer li, me dir nou, nou ava anmennen en Prozedlwa atraver en Private Member’s Bill.

 

(APPLAUSE)

 

HON AHMED AFIF

3enm kou marsandiz;

Mr Speaker mon kontan ki finalman Gouvernman in deside pour en aksyon ki mwan mon espere pour redwir pri bwat ton.  Selon mon kalkil VAT lo en bwat ton i posibleman R1.65 par bwat akoz IOT i kapab vann sa bwat pour R11 kot lizin.  Akoz alors en bwat ton ti pe R22 dan magazen?  Minis se pa VAT ki pour fer bwat ton desann en kantite, ou desizyon pour tir VAT i byen, me ou pour perdi R1.65 lo sak bwat, dan en lannen ou riske perdi plis ki 5 a R10 milyon, se mon kalkil.

Zot ti annan zis pour dir avek STC aste ek IOT pour R11 e vann li pour R15, tou Seselwa ti pour benefisye e ou pa ti pour perdi okenn larzan koman Gouvernman, ler STC i vann R15 en bwat, tou larestan marsan ti pour bezwen zwe o bor sa pri, avek en sel desizyon ni okenn Lalwa, ni okenn S.I. ou koup tou sa middlemen dan zwe ki pe ganny proteze akoz ou osi ou dan zwe.  Akoz i pran 2an pour fer sa?  Mwan mon ti koz lo la dan mon larepons bidze an desanm 2016 si ou a rapel Mr Speaker, e mon rapel en latak feros sa letan par Minis letan mon ti fer sa lo mwan personnelman, me solman nou’n rezourd nou problenm nou 2 Minis, mwan krwar Onorab Adelaide osi ti ganny en latak en pe feros, me apre zot in ok.

Me mwan mon kontan ozordi zot in dakor pour fer li.  E sa i devret arive demen bomaten, pa bezwen okenn Lalwa sa, akoz napa mansyon sa R10 milyon rent pour Parti Lepep avek STC? Koupe Minis.  Repran zot later e lwe ek STC pour menm pri ki Gouvernman i lwe ek Parti Lepep, mon krwar i R2, 000 par mwan.

Tou konsonmater pour vwar marsandiz desann par R10 milyon en sel kou, e sa ler i ariv partou dan Sesel, rediksyon pour vin plis ki R10 milyon, eski zot pe al esper ankor 2an pour pran sa desizyon?

4enm redwir kou lentere: Minis atraver ou Mr Speaker lentere pa kapab zis monte Sesel e Labank zis i fer plis profi, Minis in dir dan bidze ki lentere in mont par plis ki 2poursan depi sa lannen e pour reste koumsa menm lannen prosenn parske Gouvernman i ankor pe prete.  Permet mwan eksplike ki mannyer sa lentere i afekte ou dan lakour, pour ou ki’n pran en loan, lentere ki monte i vedir zot pour tir plis lo ou saler tou le mwan akoz lentere.  Mon pour donn zis 2 pti legzanp pour eksplik sa, e mon pour pran ou dan lakour ki’n pran en loan lakaz R300, 000 ki ou pe pey pandan 20an a 8poursan, ozordi ou pe pey R2,509, akoz sa lentere pe mont par 2poursan pour vin 10poursan, ou pour pey R2, 885 en diferans R386 tou le mwan.  Pour ou dan lakour ki’n pran en loan R800, 000, ou pe pey pandan 20an 8poursan, ou pe pey R6, 692, ler i mont par 2poursan, ou pour pey R7, 720 en diferans R1, 029.

Si ou pe ganny ou R5, 500 par mwan, e la Gouvernman i donn ou 5poursan logmantasyon, ou pour ganny ou prezan R5, 775 par mwan, ou saler pou’n ogmante par R275 ki byen, be si ou annan en loan lakaz R300,000 ki ou pe peye, zis lentere pe al mont par R386, ki vedir finalman ou’n ganny R275 dan logmantasyon saler me ou pe al fer kado Labank R386 par mwan, ki vedir Labank in fer ou pli mizer par R111 atraver mezir dan sa bidze.

Pour  en travayer Seselwa ki ti pe ganny apepre R10, 000 par mwan, zot ti vwar zot pe anmenn se zot R1,227.82sou ekstra, par mwan akoz lamannman dan income tax, ki zot ti pase an Zen 2018 apre ki nou’n met presyon pour zot fer li vin pli boner.  E i annan bokou dan sa kad, me parey mon’n eksplike si ou annan en loan R800, 000 la toudswit ou pe al perdi R1,029 dan lentere dan sa benefis ki ou ti pe fer.

Alors atraver sa bidze e sa rezim lentere, se travayer ki pe al perdi bokou benefis.  E tou sa ekstra Mr Speaker pe al kot Labank pour zot azout dan zot plis ki R500 milyon profi antre zot, e ki pour ganny anvoye aletranze e an deviz etranzer.  Kestyon, kan eski sa pov Seselwa pour sorti dan lapovrete?

Pa sanmenm ki pour fer pri Dolar kontinyen monte e pri lavi kontinyen reste o?  Minis mon sipliy avek ou fer en lalit konserte kont lentere, servi ou prop Labank pour anmenn lentere anba, la ki ou pe al vann ou par dan Seychelles Commercial Bank, ou perdi en zouti ki ou ti pour kapab servi pour lager kont lentere e i ti kapab fer desann pri lavi, eski ou partner stratezi ki enterese ganny mwens lentere li?  Mon zis poz sa la.

5enm, redwir pri telekominikasyon: Minis mon pa’n tann nanryen dan sa Bidze ki fer mwan krwar ki okenn kou internet, data ek telefonn pour desann, o kontrer mon’n tann nouvo kab ki pe al kout $20 milyon Dolar oubyen R300 milyon, se nou alors ki pour bezwen rann plis ki R300 milyon apard sa ki nou pe peye ozordi ki deza tro ser.

E mon redir ankor, i tro ser akoz piblikasyon ITU 2017 ki apel ICT prices 2017, i montre ou ki mannyer nou konpare avek plizyer pei lo pri mobile ek data.

        Mr Speaker kot Sesel i tonm 83enm pour annan en mobile ek 500megabyte data Maurice i tonm 51enm, Honduras ki annan 80, 000 dimoun, mon site 80, 000 akoz zot kontan dir be nou en pti pei pour nou i pour vin pli ser, i annan 80, 000 dimoun parey nou, li i 50enm, Anguilla pli pti ankor, zis 15, 000 dimoun ankor, li i 65enm, Sesel 83enm, ki rezon ki nou bezwen ser koumsa?  Zis pour fer plezir 2 ou 3 Lakonpannyen telekominikasyon ki pe fer de santenn de milyon Roupi profi tou le lannen?  Profi, savedir in fini pey son kab soumaren ek tou keksoz li, oli mezir pour fer desann pri telefonn ek data.

6enm, redwir kou lakaz; lo lakaz Mr Speaker apre mon’n ekout bidze ki lankourazman mwan annan pour tou bann dimoun dan mon distrik e dan lezot distrik ki pe esper en lakaz, la non selman nou konnen lentere pour mont par R1,000 tou le mwan, me kou konstriksyon pour vin R1 milyon par lakaz kan nou konnen i devret bokou pli ba, mon dir sa, akoz mon’n tann Minis dir ki zot pe al depans R3 bilyon pour fer 3,000 lakaz, savedir en lakaz i kout R1 milyon, oli bann plan pour fer lakaz a bann kou abordab pour nou sitwayen ki pli dan bezwen?

Sa bann dimoun ki pe rod en lakaz, pa pe rode lakaz R1 milyon, zot pe rod en lakaz ki pa ser, me ki konfortab, i konstrir ek materyo for, me abordab ki i annan ozordi, annan tou keksoz de baz ki zot kapab peye ek zot saler e ki kapab ganny monte ase vit.  Pli nou tarde, pli problenm sosyal i agrave, pli nou pour dan problenm, bokou fanmir dan mon distrik pe esper en lakaz abordab, la mon mazin lafanmir Juliette ki zot lakaz ti brile 4an pase e ki napa mwayen e zot pa ankor ganny zot prop lakaz.

Ozordi fanmir i reste sakenn dan en kwen Mahe elwanye ek kanmarad kan zot later ki zot ti pe viv ansanm lo la i lanmenm e napa konstriksyon lo la, akoz zot napa akse ek finansman atraver Gouvernman.  Set en fanmir ki mizer, akoz i pe pran plis ki 4an pour rezourd en ka parey zot?  Ki sa Bidze pe fer pour anmenn plis lefikasite dan prioritize later, lakaz e son finansman?

7enm loportinite pour biznes; Mr Speaker ki nou pe fe pour ankouraz biznes devlope? Pour annan plis konpetisyon e pour kas baryer birokrasi enkli kot Planning, kot Ladwann, kot Biro Lanrezistreman sirtou kot i konsern Lanrezistreman lipotek oubyen propriyete? Nou dan LDS nou krwar ki Sekter Prive i devret vin moter sa lekonomi, me dan en lanvironnman kot i ganny vre konpetisyon, pa enn kot serten i ganny privilez ek Gouvernman kot zot reisi fer cartel e kot larestan i bezwen ganny kwense.  Tou biznes pe rod sans pour agrandi menm sans pour fer biznes ek Gouvernman ek lotel, dan por lapes ek bato oubyen dan nou bann zil.

Seselwa dabor i devret ganny priyorite pour devlop son pei, a kondisyon ki i swiv tou bann norm etabli e tou lareg ki an plas dan lanvironnman biznes.  Mwan mon kontan tann Minis koz lo lefe ki Gouvernman pour larg serten batiman ki ti pe lwe ser anvil.  Mon espere sa pour fer desann pri rent.  Sa ti enn parmi demann nou, nou ti mete ek Gouvernman lannen pase e ozordi mwan kontan ki i pour raport fri.  Dan biznes nou krwar ki tou dimoun i devret pey son taks dapre son vre aktivite.

Minis Finans lannen pase dan bidze ti dir nou ki zot pour anmenn bann forensic pour fer lodit, eski zot in vini?  Larzan tousel dan Bidze pa pour rezourd nou problenm, fodre Gouvernman pe kordinen pour nou vwar vre rezilta.  Se la ki nou dan LDS nou krwar dan met en lekip ki pour anmenn plis lefikasite. Nou pa krwar dan takse plis, nou krwar dan konsantre nou zefor kot pour anmenn pli bon rezilta finansyel, a lonterm nou, nou krwar fodre redwir taks dan Sesel, me ou selman kapab fer sa, si ou anmas taks kot ou fodre anmase, savedir tou dimoun i pey son bout e personn pa ganny trete par lao Lalwa.

8enm, redwir congestion trafik, Mr Speaker Minis in koz lo proze erport, por, larzan e osi proze semen, me mon pa’n tann nanryen pour adres pli gro size dan transpor, sa se blokaz trafik bomaten ek aswar, oli bann plan pour deblok Lavil e fer marse trafik?  Minis i pa’n koz lo tinel dan son diskour, mwan mon krwar mon konpran li, e mon siport li lo sa enn.  Me Minis oli plan pour fer bann bypass dan Lavil li menm, en plan pour fer fas avek lakantite loto ki pe roule ou antre dan pei, agrandi semen ki egziste, fer trafik sirkile a tou moman, tir gard dan roundabout met detrwa layby pour bis pa blok semen, konstrir overhead crossing Providence, retir traffic light dan Plaisance en sistenm transportasyon efikas i devret en priyorite dan Bidze akoz se sa ki pour anmenn prodiktivite, Seselwa pa kapab zis asiz dan bis, ou loto pe bril bennzin, me nanryen pa roule, pour 2erdtan par zour, me nou pa’n tann nanryen lo sa plan dan Bidze.

9enm; redwir kou delo ek elektrisite, Mr Speaker dan Leta La Nasyon nou ti tann koz lo LNG Liquefied Natural Gas ki Mr Faure ti dir i en solisyon vyab menm ki ti pour kout sa pei plis ki $216milyon Dolar, ozordi nou pa’n tann en parol lo sa dan Bidze.  Mon espere Minis pe mazin parey bokou ki konn sa size e zot pe dir, parkont nou fek antann ki Gouvernman i annan en plan pour fer nou ganny zis 15poursan lenerzi atraver bann sistenm renouvlab e sa an 2030.  Selman Aldabra ek Alphonse in reisi ariv 90poursan zot lenerzi ek soley ki byensir nou ganny pour nanryen, be akoz nou pa fer larestan Sesel fer parey Alphonse ek Aldabra e koup lo karbiran par 90poursan? Sirman sa pour anmenn bokou benefis lonterm pour ou dan lakour e pour ou ki dan biznes, akoz nou pa sey rod larzan ek bann bailleur de fonds pour en tel proze?  Nou a vin sa pli pti pei ki’n kapab koup lenportasyon karbiran preski konpletman, wi i pour kout larzan, me nou pour sov pei osi plis ki $50 milyon Dolar par an dan lenportasyon karbiran.

Dan workshop mwan pase organize par Labank PTA lo sa proze LNG ,ki mwan mon ti pran par ladan mwan osi, ti kler ki pour elektrisite pour monte pour nou tou si nou servi LNG, sa ti sorti tre kler.  Mwan mon dir annou egzamin byen lezot opsyon parey konverti bann zenerater pour servi LPG nou, nou konn li koman gas isi, me pa LNG, sa nou deza annan lenfrastriktir, menm bato ki vin konmela i kapab kontinyen vin fourni nou, konversyon sa bann masin PUC pa pour kout osi ser, LPG osi i prop li.  Mwan mon poz sa lanmenm.

Lo kote delo mon repet sa ki enn mon zabitan Anse Etoile ti dir mwan, en bonnonm ki i annan bokou leksperyans dan lenerzi renouvlab, eski i pa ti pour fer plis sans met panneau photovoltaique anler lo Danm La Gogue ki i ava redwir evaporasyon delo e donn plis lenerzi avek soley ki pa kout en sou, olye dan lagon delo sale parey PUC pe propoze?  An menm tan i pour redwir evaporasyon ki kapab mannyer mon konpran ziska 5, 000tonn delo par zour ki ozordi nou pe, ozordi nou pe desalinen sa kantite.  Sa i a ede redwir kou delo an menm tan, donn nou plis lenerzi, mon pa’n tann okenn reaksyon lo sa ki mon ti mansyonnen lannen pase dan mon repons bidze, ni en mansyon dan sa Bidze pourtan se bann mezir pour redwir kou lavi.

En lot propozisyon, akoz nou pa servi sa kantite twatir ki nou annan, annou servi li, nou annan 30, 000 lakaz avek sepa konbyen batiman Anvil, plizyer in met panneau photovoltaique lo zot twatir, Labank Santral, Unity House, Independence School eksetera, akoz nou bezwen al pran pano soler pou nou met dan delo sale. kot i pour ganny manze e abimen, mwan pe zis demande?  Mon pa malelve Minis, mon poz sa la.

Dernyen pwen, Sekter Finansyel: Mr Speaker ozordi avek tou sa bann sipervizyon e transformasyon lo lasenn biznes aletranze, Sesel i devret pe kapab anmenn plis rannman dan Sekter Finansyel, me ki nou pe vwar?  Kot British Virgin Islands ki ganny, li in ganny devaste par en siklonn zis lannen pase, konpletman, ozordi i pe fer agrandi son Sekter Finansyel e Lanrezistreman par plis ki 14poursan, en rikord pandan sa dernyen 3an menm avan siklonn.  Sesel kot nou, nou dan stabilite zeografik ek finansyel swadizan nou pe fer mwens biznes ki tou le lannen, sa se parske napa ase inovasyon dan sa Sekter, e nou pa kapab blanm zis sa Sekter nou, nou ti annan isi malerezman ‘mafia Irlande’ ki ti pe fer per bann envestiser, ozordi zot in sove, sa Lasanble in anmenn sanzman dan Lalwa ki fer lankadreman biznes enternasyonal pli zis par rapor ek lezot pei, me i pa ase.

Nou sistenm Regilatwar pa efektiv ozordi, Lapolis napa ase resours pour lager kont krim organize, FIU pa partaz lenformasyon e sakenn i dan son silo.  Nou pa pour reisi koman en pei si nou kontinyen koumsa, se sanmenm sa rezon ki ESAAMLG en Lorganizasyon ki afilye avek FATF in kritik nou akoz i krwar bann Lenstitisyon Leta pa efektiv, e sa nou tou nou konnen.

Finalman Mr Speaker, mwan bezwen zis dir ki Minis i nouvo, i pe fer son mye, i nouvo dan sa Minister ki pa enn ki fasil, e mwan mon swet li personnelman bonn sans, pour staff Minister Finans ki’n travay lannwit, lizour lo sa bidze e mon vwar 2 la e mon konn zot zefor, mwan dir zot ki nou apresye zot devouman.  Se zot ki pe tenir lakle kof sa pei, kontinyen fer en bon travay e mon salye zot, menm ki mon kritik bokou dan bidze mon pa pour zanmen mank respe pour tou sa bann profesyonnel dan Gouvernman ki pe travay dir, ki pe fer en pe proze demare, ki pe met fondasyon pour demen.

Sa Lasanble ki LDS i dominen ozordi in anmenn sanzman pozitiv dan Sekter Piblik, bokou bann travayer Minis i konnen ki zot bezwen rann kont e alors zot pa pour toler move pratik, pour zot ki pe fer zot travay onnetman, mon felisit zot nou bezwen zot akoz vre sanzman i fek komanse dan Sesel atraver sa kalite travay sipervizyon e oversight ki pa’n zanmen egziste, kot i mal nou bezwen dir fran, kot i byen nou pour ranforsi.

Sa ki nou pa devret bliye, se ki Seselwa i oule sanzman, Seselwa i oule vwar mwens drog dan son pei, Seselwa i anvi ariv travay a ler, i anvi lopital ki fonksyonn byen kot i pa ganny lenfeksyon ler in fini ganny sonnyen, kot manrmay i al lekol, sa ki pa anvi lekol i ganny en lot plas pour al debourye, pa reste la pour gat lezot, Seselwa i anvi ki son pep i travay olye etranze benefisye, e i reste isi e la mon mazin byensir bann travayer Banyan Tree, Seselwa i anvi son peser i lapes lo ban Mahe e nou bann zil, pa etranze, eski zot, zot fer li, zot pour ganny atrape par nou Coastguard ki devret efektiv.

Seselwa i anvi vwar tou dimoun pey son taks parey Lalwa i dir, Seselwa i anvi ganny loan rezonnab e tou dimoun i re peye, pa en bann ki ganny write-off e re ganny en lot loan menm zour apre file i perdi, napa lanket oubyen Lapolis ki i antre ladan.

Seselwa i anvi vwar mezir pour re ganny son 50milyon Dolar ki’n perdi, e plis sipor pour Komisyon kont koripsyon.  Seselwa ki pe fer dyaliz i anvi ganny meyer swen, akoz napa provizyon pour pey Renasense sirtou kan Gouvernman in donn en komikman an ekrir pour peye pour dyaliz ki’n deza fer e ki’n donn bon rezilta, akoz zot bezwen protez en kontra ilegal avek en Lakonpannyen Dubai?  Lekel ki annan en lentere pour anpes Seselwa ganny bon tretman?  Seselwa i anvi vwar pri marsandiz desann kot STC; Seselwa i anvi vwar pri telefonn desann parey in arive Maurice, Anguilla, Honduras ki osi bann pti lekonomi.

Seselwa i anvi elektrisite pli bon marse, elektrisite ki prop parey photovoltaique i enn, enn fwa ou’n enstale ou pa bezwen enport preski nanryen, pa parey windmill ki pour kout ser dan maintenance avek tou sa mouvman lelis ek salen.

Finalman Me Speaker, avek respe mon santi sa pei napa en direksyon.  Akoz mon dir sa?  6 mwan pase Prezidan ti dir Gouvernman pour vann par dan SEYPEC. 6 mwan pli tar ozordi, sa in sanze. 6 mwan pase tinel ti en opsyon, ozordi nou pa’n tann ankor.  En pe parey pour LNG mon krwar, lo sa kote latab nou, nou toultan vin ek propozisyon serye, ozordi nou pa kapab kontinyen ek business as usual, nou bezwen mazin demen, nou dan en kriz ki pa kapab vin pli grav, sa ki mwan mon pe dir ozordi ganny reflekte par parol Mr Paul Mathieu eksper IMF ki ti Sesel semenn pase, 2 semenn pase e ki ti travay ek sa lekip finans – ki wi Onorab De Commarmond, mon ti form parti 10an pase pour fer en reform.

Dapre Mr Mathieu sa reform ti raport bokou sikse e mwan mon fyer pour tou Seselwa ki ti’n donn en koudmen, i annan 2 ki la deza.

Me Msye Mathieu ti donn en warning 2 semenn pase dan son interview ek magazin Today, i dir i vwar serten danze sirtou lo depans groser Sekter Piblik konpare avek zis detrwa lannen pase.  En danze konpare avek sa ki ti la an 2008.  Eski sa i anmenn lefikasite?  Nou det pe kontinyen monte, eski nou pour vreman kapab redwir li pour li vin anba 50poursan GDP ver 2021?  Mwan mon konnen ki Seselwa pa anvi personn zwe ek son lavenir, Sesel i bezwen Leadership, desizyon ki pe ganny pran toulezour pour anmenn sanzman, lenstitisyon ki fonksyonnen e ki nou fyer, fodre annan direksyon, mezir efektiv e rezilta ki tanzib.  Dan sa bidze mon ti anvi ganny en sans sa direksyon, avek respe Mr Speaker, mon pa resanti sa lirzans dan sa ki mwan mon’n vwar.

Mon pour fini avek en parol ki Prezidan Barack Obama, sa ansyen Prezidan Ameriken byen respektab ti dir; ‘If the people cannot trust their government to do the job for which it exist to protect them and to promote their common welfare, all else is lost.” an dot mo “si dimoun pa kapab konfye dan zot Gouvernman pour louvraz ki i sipoze fer pour protez zot e promouvwar zot byennet komen, tou in perdi. ” Ozordi nou pep i dan sa dilenm.  mon espere ki sesel i kapab sorti dan sa dilenm e sela ki vre solisyon pour nou pei pour vin lo latab.  Mwan mon zwenn avek Leader Lopozisyon Onorab Ramkalawan pour dir tou Seselwa ki mwan osi ‘’MON PA ZANMEN LES TONBE!  E mwan mon pour kontinyen travay avek li e sa lekip ki la pour en meyer Sesel!  Mersi Mr Speaker.

 

(APPLAUSE)

 

MR SPEAKER

Mersi Onorab Afif.  Bon an vi ki mon ti anonse ki nou bezwen rann lantenn SBC 12, mon pa krwar nou pou fer kredi Onorab Vidot pou li rush dan 12 minit so mon ‘n pran desizyon ki lentervansyon Onorab Vidot nou ava pran li 2er apre midi.  Me onorab ti vin vwar mwan zis pou li pas en pti mesaz.  Onorab mon a donn ou laparol.

 

HON AUDREY VIDOT

Mersi Mr Speaker. Bonzour Mr Speaker e tou Manm Onorab e tou dimoun ki a lekout.  Mr Speaker avek ou permisyon mon oule prezan mon senser kondoleans avek lafanmir en zenn garson lekol Plaisance Segonder Ishmael Rosalie ki mon’n fek aprann son lanmor.  Mon lapriyer e avek sa lafanmir – son bann zanmi e pou tou bann staff e zanfan lekol Plaisance Segonder.  Mersi Mr Speaker.

 

MR SPEAKER

Mersi Onorab.  Sa se sa zenn garson ki ti pe lite pou li kapab ganny son lavi dan ICU resaman.  I en zanmi osi mon garson.  Mon krwar de lapar Lasanble Nasyonal an antye nou a eksprim nou kondoleans a lafanmir e osi tou son bann kanmarad son bann koleg lekol enkli son bann mis.

Bon ABC nou pou rankontre 1er e posibilite ki nou ganny PS avek SS parmi nou pou sa miting, pou nou regard en pti pe ki mannyer nou pou travay lo nou kalandriye pou debat Bidze.  E nou pou meet dan Speaker’s Conference Rm. Ok? So avek sa nou ava adjourn e nou repran nou travay 2er apre midi.

 

(BREAK)

 

MR SPEAKER

Bonn apre midi tou Manm Onorab.  Bonn apre midi tou dimoun ki a lekout.  E bonn apre midi spesyal pou Minis pou Finans – Minis Maurice Loustau-Lalanne ki set apre midi ganny akonpannyen par Mrs Sitna Cesar ki Ms Sitna Cesar ki Special Advisor, e Ms Astride Tamatave Direkter pou Public Budget Management.  Welcome parmi nou.  E nou ava al direkteman lo nou travay.  Mon ava pas laparol avek Onorab Audrey Vidot.

 

HON AUDREY VIDOT

Mersi Mr Speaker.  Bonn apre midi Mr Speaker tou Manm Onorab, zabitan Roche Caiman e tou manm piblik a lekout.

Mr Speaker apre ekout entervenan avan mwan koze, i donn mon lenpresyon ki i pa ekout son Leader ler i koze dan sa Lasanble.  Akoz mon le fer li mazinen ki son Leader in deza dir ki LDS i annan en plan 1an – pou elimin drog Sesel !  E LDS i annan en pouvwar 10 lo 10 dan Lasanble.  E zot in zis ‘’koze’’, ‘’koze’’, ‘’’koze’’’ me anmenn sa plan!  Anmenn sa plan 1an Seselwa a konnen ki plan LDS Mr Speaker.

Mr Speaker sa Bidze ki devan nou in ganny anmennen par asir stabilite.  E progresyon kontinyel sa staz lo devlopman ekonomik, ki ti konmans 10an pase, avek lansman progranm, reform, makroekonomik Sesel.

Sa Bidze i enn ki selman kapab anmennen par en Leta performan ki pe ganny dirize dan en fason efektiv.  E sa Bidze pou osi annan en lot lefe dan pei. I pou efektivman touy sa bann zistwar ‘’DANNY OUT ‘’ ki Lopozisyon permanan pe  sey bat latet nou pep avek !

Devan nou, nou annan en Bidze ki pe delivre lo sa ki sa pep ek sa pei i bezwen.  Bidze pou lannen 2019 i annan pou, be mentenir stabile e ankouraz en krwasan soutenab pou bann lannen ki pe vini.  Dan sa direksyon  Bidze prezante par Minis Finans i fer serten lasonpsyon.

Premyerman ki pandan sa lannen ki pe vini nou pou kapab mentenir en sirplis   primer ki pa mwens ki 2poursan.

Dezyenmman –  ki pei pou kapab mentenir en krwasan reel 3.4poursan menm si sa i en lanrisisman lo 2018 ki ti 3.6poursan.

Trwazyenmman – ki parlan lannen 2021 Sesel pou kapab redwir son det ki an se moman 59.6poursan GDP ziska 50poursan GDP.

E katriyenmman ki nou pei pou kapab zer tou bann risk fiskal ki prezante dan en fason soutenab.

Term Bidze ki’n ganny prezante devan nou  Lasanble i ‘’Stabilite E Progresyon.’’  Mr Speaker pou konmanse mon oule koz lo reveni pei.  Reveni pei i fonksyonn en Bidze pou gouvern lafason ki en pei kree pou ranmase e redistribye  larises.

Me pou ki sa larises i kapab re ganny distribye anver bann lendistri bann lenstriman Bidze, e sa larises ki pe ganny kree, i bezwen dabor ganny ranmase konman reveni pei.

Se zisteman lo la s akote reveni ki mon ti a kontan si Minis Finans avek son lekip ti pou kapab port en pe plis latansyon.  Sesel i en pei tre risk.  En pei kot i annan bokou larises ki pe ganny kree toulezour.

Me i zis ki sa larises pa pe ganny ranmase.  Larises ki pe ganny kree lo sa later Sesel.  I bezwen dabor ganny ranmase lo sa later Sesel. Sa i enn bann prensip fondamantal ki lekonomi nou pei ki bezwen fonde  lo la.

Enn bann siny pozitiv.  Se ki pandan sa dernyen 3an kontribisyon taks lo saler anver reveni in bese.  Sorti 5.2poursan an 2015 pou ariv lo en prozeksyon 3.8 poursan an 2019.

Mon’n dir ki i pozitiv akoz letan taks burden pei i poz lo zepol travayer sa i kree en dezekilib dan sosyete.  E kree sa ki bann economist i apel ‘’income inequality’’.  E dan en distrik parey Roche Caiman kot lamazorite bann zabitan i bann travayer sa dezekilib ant sa ki pe ganny plis avek s aki pe ganny mwens i ganny resanti dan en fason tre for.

Mon’n lev sa size reveni Mr Speaker, akoz dan prozeksyon micro ekonomi pei spesifikman.  Dan table of economic and financial indicator 2015 – 2020 mon’ vwar ki zot in prozekte en rediksyon dan revenue excluding grants sa i sorti 37.1poursan GDP an 2019 pou vin 35.6poursan an 2020 e 34.9poursan an 2021.

Mon konnen ki malgre sa lekip Finans pou travay pou mentenir sa en sirplis primer dan Bidze me kantmenm sa mon santi mon vreman konsernen avek en tel posibilite.

Mon konnen i posib ki mon naiv me selman mon konvenki ki dan en pei kot kreasyon larises pe agrandi, koleksyon reveni i osi a grandi e pa egal avek larises ki pe ganny kree e i le sel fason ki larises i kapab redistribye dan en fason ki pli ekitab.

Mr Speaker i annan serten keksoz ki’n ganny dir dan sa Lasanble ki pa vre.  I vre ki lentere lo ki to lentere in monte lo loan pandan sa dernyen 2an.  Me Mr Speaker an realite lo lakaz pa’n monte Onorab Afif.

Mr Speaker nou konnen ki dezir tou Seselwa pou vin propriyeter zot prop lakaz.  Prezidan Faure i reste ferm dan son langazman pou ed bann fanmir ganny zot prop lakaz atraver diferan Scheme ki abordab e rod sipor finansyel pou konstri plis lakaz pou Seselwa.  E sa bann Scheme pe ganny elarzi e pe ganny fer dan latransparans.

Nou rekonesan ki i reste en defi ki satisfer demann lakaz ek later ki pe kontinyelman ogmante.  Mr Speaker, si i annan en konba ki mon’n anmennen e ki mon MNA sa se pou lakaz.  E sa i enkli osi pou bann zabitan Roche Caiman pou zot kapab legalman annan plis opsyon agrandi zot lakaz zis prezan  mon kapab dir ki mon’n reisi lanmwatye sa konba.

Mon dir lanmwatye Mr Speaker avek tou lafransiz, akoz menm si mon’n rezourd pou zot ganny permisyon pou fer konstriksyon kestyon finansman pa ankor ganny adrese.

Mon konpran ki Minis Finans in demann avek HFC pou revwar son bann loan instruments alors mon pou sizere ki dan sa reveni zot met plis loan ki zot met an plas loan ki ankadre zis bann proze lagrandisman lakaz Roche Caiman ki’n tonm anviron R378 mil 900 ler i ganny fer an blok e R252, 600 bann ki ganny fer an fabrik.

Si HFC ti kapab met an plas en loan ki kapab kouver ant 80, 90poursan sa bann proze sa ti ava vreman ed soulaz en pe bann fanmir zabitan Roche Caiman.

Mr Speaker evolisyon i form en parti entegral nou monn.  Tou sa ki viv i evolye.  Sa ki enkli sa i enkli sosyete imen.  E nou sosyete Sesel i pa n leksepsyon sa  ki yer ti en nonm ozordi keksoz i evolye.  E nou vire deklare ki sa i nepli akseptab dan sosyete.  Sa i norm e nou bezwen aksepte.  Bann laranzman politik ki ti ganny fer ,yer ozordi ganny met de kote bann alye e zanmi politik yer ozordi ganny kit ater e maltrete dan Lasanble.

Bann pei kot nou ti vizite yer e deklar nou bann lye familyal ozordi ganny kritike rezete e menm, akize.   E tousala i normal.  E menm akseptab lo non lanbisyon politik personnel.

Yer koabitasyon ti bon.  Ozordi pa bon.  Nou menm deklare ki koabitasyon i mor.  Vir gos vir dwat bat isi bat laba en ta mannev politik ki zis kree en stabilite pou pei e pou sa pep.

Politisyen ki’n ganny elekte lo en platform swadizan responsab,  ozordi pe vin zwenn len nespes politik boukannen.  ‘’DANNY OUT!’’  Ki zot menm zot ki pa ni krwar ladan.  E sertennman sa pep Seselwa pa ni tande ni enterese  sa zistwar ‘’DANNY OUT!’’ 

        Kwa ki sa Bidze pe montre nou Mr Speaker.  En Prezidan ki pe ekoute i pa ekout selman son kote me i ekout tou Seselwa ki annan en lavwa pou koze.

En Prezidan ki depi premye zour son manda in pran tou mezir neseser pou li anter sa kiltir ‘’ek nou pa ek nou’’ ki’n ganny devlope dan nou pei.

Bidze ki devan nou i reflekte swe e laspirasyon bokou pep enkli bokou bann pledwari ki’n ganny anmennen devan atraver prezan-tan tou lede kot latab.  Sa i tre kler dan Bidze ki’n ganny lafason ki’n ganny prezante dan Sekter Lagrikiltir e lezot.

Bidze pe siport lagrikiltir Minis Bastienne ti prezante devan nou Lasanble. Me letan ki nou pe lir bann provizyon  konkret dan sa Bidze i fer nou realize ki lavwa, nou pep in ganny ekoute e ki nou bann fermye e zot fanmir in ganny ekoute.  Aprezan nou  swete ki zot ava sezi tou loportinite ki devan zot  pou donn pep en sours alimantasyon ki stab e ki trese.

Mr Speaker LDS kontan pa kontan Danny Faure pe travay!  Danny pe travay !  I kler travay en Prezidan pa bezwen vin atraver tapaz avek lafanfar.  En Prezidan i bezwen kree en latmosfer stabilite dan pei, pou bann rev e aspirasyon son pep i kapab ganny realize.

Sete egzakteman sa lenstriman Bidze ki devan nou ki le vre test performans en Prezidan.  Se la ki ou pou konnen si i pe ekout nou oubyen non, si dan Bidze  ki ou pou konnen si i pe port latansyon bezwen son pep oubyen non.

Sa ki sa Bidze pe montre nou an realite set en Prezidan ki ekout son pep tre atantivman.  E in sers pou aplik solisyon atraver zouti pli efektiv  ki’n annan, a son, dispozisyon – sa se sa Bidze Mr Speaker.  I annan bokou ki’n deza dekrir sa Bidze konman en Bidze eleksyon.  Me bokou nou in fini deza oubliye kwa ki nou ti demande dan lepase.  Pou en leta azir dan en fason efektiv, i pa pou kapab depans plis ki i gannyen.  Sa i tre kler  pou en leta efektiv i bezwen planifye avan ki i enplimante.  E an menm tan, letan ki i pe pas lo sa bann staz lenplimantasyon sa i bezwen ganny fer dan en fason byen kalkile Mr Speaker.

En leta efektiv i bezwen konn byen balans son reveni e depans.  E pou sa rezon ki nou vwar ki i annan serten keksoz ki nou’n demann Gouvernman depi lannen pase, i pe konmans aparet dan Bidze ozordi.

Si ozordi bann lezot kad profesyonnel, pe osi revwar sa retension allowance ki bann ners i gannyen sa i swiv zot demann pou en tretman ekitab.  Me osi vin apre en long kalifikasyon ki fer son lakonplisman sa Scheme anver ki soutenab.

An retour nou pep i swete pou vwar en gran amelyorasyon dan Servis Lasante ki zot pe resevwar Mr Speaker.  Mwan pou mwan letan ki mon analiz  keksoz i pa prescription fee R25 ki mon pou dir pou ede  amelyor lasante parey bokou dimoun pe dir.  Me plito sa pti allowance ki pou soulaz en pe bann profesyonnel lasante  ed zot pou zot delivre dan zot travay.

Mr Speaker mon pou konklir an dizan i annan  en keksoz ki mon anvi dir avek mon bann zabitan Roche Caiman – sa Bidze ki’n ganny prezante par Minis Loustau-Lalanne i pou zot sa.  I pa ni pou Prezidan Faure i pa ni pou Minis i pa ni pou Parti Lepep i pa ni pou LDS.  Sa i zot propriyete.

Konmsi Onorab D Commarmond ‘’zot annan par ladan !’’  E sey fer zot mye pou servi tou loportinite ki ganny trouve ladan.  Pa les okenn distraksyon kal zot konsantrasyon – fer zot mye posib pou zot lekor ek zot fanmir profite  grandi devlope anrisi zot lekor, met zot fanmir  zot lekor zot lafwa e zot pei an premye.

Pos tou politik e divizyon de kote.  E vreman sers pou lev zot lekor ek zot fanmir.  Nwel pe vini.  Lannen pe vini annou rantre dan en letan refleksyon la partaz ek gratitude.  Enn anver lot.  Sesel i pou nou tou pou Seselwa Sesel.

Alors annou viv byen trankilman a kote kanmarad dan nou pti pei beni.  E annou ‘’TENIR FOR PA LARGE! ‘’ Mersi Mr Speaker.

 

(APPLAUSE)

 

MR SPEAKER

Mersi Onorab Vidot.  Bon mon pou pas la parol avek Onorab Phillip Arissol ki pou swiv par Onorab Churchill Gill.  Onorab Phillip Arissol.

 

HON PHILLIP ARISSOL

Mersi Mr Speaker.  Bonn apre midi Mr Speaker.  Bonn apre midi tou dimoun.  Mr Speaker mersi bokou pou donn mwan la parol pou mon premye repons Bidze Nasyonal vi ki mon’n pran mon plas dan Lasanble an Fevriye.  I mon lentansyon ozordi pou mon aporte mon kontribisyon valab dan deba e fer tande lavwa bann zabitan Anse Boileau ki mon pe reprezante.

Minis in premyerman fer en lalis proze e progranm ki i dir dan lentansyon met an pratik an 2019 e detrwa lezot an mezir ki i pou ganny enplimante an 2020, apre detrwa lezot pli tar.  Pou mwan konman en Seselwa ki kontan rod solisyon senp e pratik pou bann problenm ki bann zabitan dan mon distrik i  fer fas avek, mon premye reaksyon se pou demann Minis si vre li ek son Gouvernman pou kapab met an aplikasyon sa bann promes?  Akoz mon pe demann sa kestyon? Senpleman akoz ler mon pe regard Bidze 2018 sa lannen, mon pe trouve ki en pake promes ki pa’n ganny realize.  Mon pe trouv en pake Proze Kapital ki pa’n ganny enplimante.

Mon vwar larzan ki’n ganny tire dan Proze kapital e ganny anvoye dan welfare.  Mon kestyon alors i akfer nou fer en Bidze si tou le lannen nou pa enplimante?  Ki lefe long term sa pou annan lo lenfrastriktir nou pei ? Si nou pa aranz sa semen ozordi, si nou pa fer maintenance lo sa lekol oubyen sa klinik demen, apre demen, lannen prosen i pou kout nou bokou pli ser.

Mon ti ava kontan alors ler Minis i fer son summing-up i donn nou lasirans e laprev ki i pou enplimant sa Bidze 2019 dan son totalite.  I kler ki i annan plizyer pwen e pozisyon ki nou dan LDS nou’ repete plizyer fwa e ki aprezan Gouvernman in tande.

Mwan mon partikilyerman ere pou tande ki Gouvernman in ekout mon lavwa lo bann laferm abandonnen dan mon distrik.  Mon tande ki sa bann laferm abandonnen pou ganny repran.  Lontan nou pe demande me nou ti ganny lenformasyon ki sa bann landrwa ti’n ganny donnen, pou rezon politik ek bann dalon alors pa kapab fer nanryen.  Yer i pa ti kapab repran.  Ozordi nou kapab.  Eski 15 lo 10 ki’n donn zot sa kouraz?

An menm tan ki Gouvernman in get sa bann laferm ki’n ganny  abandonnen pou rezon politik zot merit get bann fermye ki pe struggle ki determinen e ki bezwen led pou re lans zot prodiksyon.  I annan bokou sa bann fermye ki pare ozordi pou prodwi, me zot pli gro difikilte se en semen apropriye epou  ariv lo zot laferm.

Alors nou ekspekte ki an 2019 sa bann fermye a kapab asire ki zot kapab rekonmans prodiksyon.  Dan menm laliny nou vwar bann fermye Montagne Posée, Anse Boileau, Hermitage, Anse La Mouche ki annan zis rakor lo laferm.  Mon swete ki sa lannen zot ganny delo setadir en bon sistenm irigasyon.

Peser e fermye Anse Boileau i ankor pe esper e landrwa apropriye kot zot kapab vann zot prodwi.  Pa zis ek zabitan Anse Boileau me avek tou dimoun ki anvi aste.  En fasilite mouyaz pou peser.

En fasilite pou zot osi kapab desarz e sarz zot bato menm pandan lanmer mont ouswa lanmer desann.  Taks lo lavyann poul e koson.  Mr Speaker nou ti ganny dir ki World Trade Organization pa kapab met taks lo enportasyon.  Kwa ki’n sanze?  Si zot ti entervenir pli boner sa ti pou sov depans en kantite  dimoun ki ti dan biznes e elevaz poul e koson.  E la nou vwar bann fermye pou bezwen depans plis pou re konstrir bann lenfrastriktir pou re lans zot dan sa biznes.

En gaspiyaz letan, en gaspiyaz larzan e retar pou pei.  Me selman sa in vin tro tar parski sa pa pou fer desann pri lavi.  Mr speaker o kontrer se bann konsonmater ki pou al anmas tou bann kou akoz pri lavyann ki ganny prodwi lokalman i bokou pli ser.

VAT refund lo materyo lagrikiltir ek lapes.  Sa osi lontan nou pe demande.  Mon sel konsern se ki  i annan en ban mafya politik ki napa ni bato lapes, ni laferm ki pe met zot pare pou abiz lo sa sistenm e profite pou fer trik.

Alor mon pe demann Minis ki mezir ki’n ganny met an plas pou asire ki napa en lot laport koripsyon?  Mon swete ki en sistenm management ki kler, modern e senp i ganny met an plas kot e peser ou en fermye ki’n anrezistre pa pou bezwen pe perdi letan apre ki in fini aste son materyo, li menm li i bezwen al dan bann biro avek resi pou li reklanm son VAT.

I pou pli pratik kot en peser ou en fermye i prodwi son laprev anrezistreman kot en dealer, i aste son materyo san pey VAT e li sa dealer i anvoy resi kot landrwa apropriye ki’n ganny etabli.  Mr Speaker sa pa fini la.  Gouvernman i bezwen fer swivi pou vwar laprev kot sa peser ou fermye si vreman sa materyo in ganny aste.

Mr Speaker dan distrik Anse Boileau nou’n vwar konstriksyon ‘Maison Simone’.  En batiman ki’n anmenn landrwa pou detrwa zabitan Anse Boileau ki’n ganny en lokasyon pou zot fer zot biznes.  Me sa i pa ase.  Gouvernman i merit ankouraz ankor bann tel lenvestisman.  Landrwa i annan e bokou zenn Anse Boileau pe swete  lans zot dan zot prop pti biznes.

Minis in fer tou pou li kasyet bann problenm grav ki dan nou pei.  Isi dan sa Lasanble nou dan LDS nou’n kler tors lo bokou ka koripsyon tel ki 50milyon Dolar ki ti ganny donnen par Gouvernman Abu Dhabi.  Larzan dan Bidze State House e Ladefans ki pa’n ganny servi byen.  Plizyer milyon ki’n ganny mete dan kont NDEA e FIU.  STC ki pe pey parti lepep R800mil par mwan pou lokasyon.  Tou sa bann larzan se larzan piblik e i merit dan kof Leta.  E i ti a kapab ganny mete dan diferan proze ou servis pou ede fer desann pri lavi.

Mr Speaker Minis in dir nou ki sport i anzandre dan kiltir sesel konman en fason pou viv an bonn sante e devlop bann abilite fizik e sportif.  E pou asir sa an 2019 Gouvernman pou met bokou lanfaz lo desantralizasyon bann aktivite sportif e anmenn plis aktivite dan distrik e dan rezyon.

Setadir Gouvernman pou bezwen konstrir bann nouvo fasilite ouswa fer maintenance mazer lo bann ki’n avarye.  E Mr Speaker sa en vye rikord sa.  Pandan sa 25an ki mon dan sport mon’n tande sa bann zistwar sirtou pandan letan eleksyon ouswa letan Bidze, alors mon pe demande ki la an 2019 nou vwar en pe plis aksyon e mwens promes.

Mr Speaker Minis in fer nou rapel ki bon performans nou bann atlet i enspir lafyerte e liminite parmi nou pep e ki Gouvernman i bezwen envestir dan preparasyon e partisipasyon tim Sesel dan Zwe De Ile ki pou fer Maurice an 2019 e osi preparasyon pou all Africa Games 2019.  Me avan ki i annan bann atlet pou partisip o nivo Nasyonal nou bezwen annan bann lekip klib pou distrik e  la mon pe dir ki sa R8mil ki sa bann klib i gannyen pa sifi sirtou pou bann lekip ki an deor lavil ou menm lo Praslin e La Digue ki bezwen deplase pou vin partisip dan sport dan diferan konpetisyon ako tou venue i dan sel landrwa se dan lavil.

Mr Speaker wi Gouvernman pou kontinyen siport Federasyon sport ek bann klib sportif atraver Bidze.  Me mon ti a swete ki sa larzan i ogmante.  Met plis larzan da partisipasyon zenn dan sport e aktivite kiltirel e sa pou anpese ki nou bann zenn i tonm dan fleo drog ek lalkol.

Mr Speaker ler Minis i koz lo desantralizasyon spor mon mazin bann zenn ki reste Anse Louis anler dan Gravye.  Pandan en bon pe letan nanryen pa’n ganny fer pou sa bann zenn.  Laba i annan en sant rekreasyonnel ki reste fermen pou mazorite letan.

Si renovasyon ti ganny fer lo sa sant e met a dispozisyon bann zenn kot zot ti a kapab zwenn e pratik bann indoor games tel ki table tennis, dart, table football e domino.

Gouvernman ti menm kapab konstrir – vwar en landrwa pou konstrir en multi purpose court kot sa bann zenn osi ti ava pratik basketball ouswa volleyball.  Mr Speaker sa ti pou ede angaz sa group zenn dan sa rezyon dan bann aktivite pozitiv.

Mr Speaker i domaz Anse Boileau osi pe fer fas avek bann fleo drog.  Bokou zen ki ti kapab dan lanplwa ou sport nepli kapab.  Ki Gouvernman pe fer pou sa bann zenn?  Bokou paran pe rod en rekour.

Mr Speaker tro bokou zenn pe mor alor Minis ava dir nou ki plan Gouvernman lo kote sirveyans nou teritwar?  Ki Gouvernman pe fer pou ki drog pa antre dan pei?  Eski i annan plis larzan pou Coast Guard ?  Kwa ki pe ganny fer ou serye kot nou bann portre dan Sesel?  kwa ki’n ganny mete a dispozisyon lapolis pou li fer pli byen son travay?  Eski i annan en plan pou ed bann zenn ki’n pri dan sa fleo?  Eski Lenstitisyon edikasyonnel pe ganny lasistans pou edik e anpese ki nu bann zenn i tonm dan drog ek lalkol?

Mr Speaker sa problenm drog i anmenn voler.  Voler i partou kote e bann sitwayen i mank sekirite menm dan zot prop lakour dimoun i per. E sa Bidze pa pe donn Seselwa en garanti sekirite.  Eski lapolis pou pli ekipe?  Eski pou annan larzan pou kapab anploy plis zofisye?  Nou vwar plizyer repriz bann viktim i pran Lalwa dan zot lanmen alors afors zot in tro sibir.  Me Mr Speaker sa i pa en bon pratik.  Sa pou anmenn tro bokou dezord dan pei.  Lo size vole konman en Seselwa mon en pe onte, mon latet i bel mon bezwen aksepte ki bokou sa bann dimoun malonnet pe zis pran legzanp lo zot dirizan.  Ler nou tande kwa ki pe  pase, voler dan kitenge, voler dan kitenge  ki pa zanmen ganny met dan kase.  Ki ou ekspekte sitwayen ki pa dan sa bann gro pozisyon fer alor?  Alor eski Gouvernman pou serye?  Eski tou dimoun ki vole mon dir ankor eski tou dimoun ki vole pou ganny pourswiv?

Mr Speaker dan mon distrik later pou konstriksyon lakaz i annan me mon pa vwar ase aksyon ki pe ganny fer pou bann dimoun ki dan bezwen.  Ler pou  partaz avek bann dalon  sa i ganny fer vitman.  I annan ki’n ganny menm plis ki 5 bout.  Me letan pou donn bann zabitan Anse Boileau ki vreman dan bezwen sa i pran lannen e lannen.  Ki Gouvernman pe espere?

Mr Speaker da Bidze 2017 ti annan en alokasyon pou batir biro pou bann MNAs dan distrik.  Sa ti zis en promes ziska prezan naryen pa’n ganny fer.  Anse Boileau i annan en vye pti lakaz ki sa ansyen MNA ki ti la ti gannyen  pou li fer son biro.  Me i ti pou bezwen retir leternik lo twa avan.  Sa pa’n zanmen ganny fer.  Zis apre eleksyon an Fevriye mon’n fer en swivi lo sa size, lo size sa batiman e mon ti ganny  larepons mon let mon ti ganny dir wi mon pou ganny sa landrwa si tou keksoz i ok e la in ariv Novanm leternik i ankor lo sa pti lakaz.

Dan Bidze 2018 e la 2019 sa larzan pa aparet, alors mon pe demann Minis ki pozisyon ou Gouvernman lo size biro pou bann MNA?  Mr Speaker pou plizyer lannen bann zabitan Montagne Posée pe demann bus shelters.  La n’ariv Novanm e nou pa ankor vwar ni enn.  Eski dan proze kapital 2019 sa i a vin en realite pou sa bann dimoun ki sibir swa dan soley ouswa lapli?

Mr speaker mon pa pou manti i annan enn de proze ki’n ganny fer tel ki semen segonder ki’n ganny pyeste dan leo Anse Louis.  Crash barriers ki’n ganny mete kot Anse La Mouche me i reste bokou pou fer.  Par egzanp semen dan banbou, re-sirfas semen Caiman, lalimyer pou bokou semen segonder.

Depi lannen pase 2019 pa ankor gannyen la nou’n ariv Novanm 2018 e sa ki donn sekirite bann dimoun ki deplase dan granmaten pou al travay e ki retourn tar dan lannwit.  Alor mon pe swete ki an 2019, nou ava vwar plis langazman Gouvernman dan bann proze distrik pou lannen 2019 sirtou pou zabitan Anse Boileau.

Mr Speaker ler mon get sa Bidze pou 2019, mon pa vwar kwa ki pou ede fer desann pri lavi. Sa pti R200 ki travayer pou gannyen pou vitman ganny repran.  Elektrisite, delo tousala in monte. Taks lo lavyann enporte pa pou ede fer desann pri lavi.

Alor Mr Speaker mon pa vwar – mon vwar plis Seselwa pou soufer an 2019 e bokou dimoun Anse Boileau ki dan vre bezwen pou soufer.  Mon swete ki Gouvernman i vwar bann mekanizm pou soulaz bann dimoun ki dan lapovrete pou annan plis an 2019.  Zot ki’n la zot ki ankor la e plis i zot devwar pou fer li.  Mersi Mr Speaker.

 

MR SPEAKER

Mersi Onorab Phillip Arissol. Mon a donn Onorab Churchhill Gill. 

 

HON CHURCHILL GILL

Mersi Mr Speaker.  Bonn apre midi Mr Speaker.  Bonn apre midi Minis ek ou lekip.  Bonn apre midi out Manm Onorab. Tou dimoun ki pe ekout nou e en bonn apre midi spesyal pou dimoun Baie Ste Anne e mon profite koman mon la dan Lasanble pou fer zot konnen poudir toultan ki mwan mon dan Lasanble Lasanble bann konversasyon bonmarse lo distrik Baie Ste Anne pa pou ganny fer.

 

(APPLAUSE)

 

HON CHURCHILL GILL

Mr Speaker avek ou permisyon atraver ou bomaten ti ganny dir ki sa Stasyon Elektrisite napa nanryen ki pou ganny fer e i pa pou zanmen ganny fer.   Mon anvi montre sa file e sa file i la dan Lasanble dan Biro kot Speaker PUC apre ki mon ti anmenm kestyon pou follow- up lo sa proze i ti anmennen in montre ki pou fer – file  i dan Biro kot Mr Speaker.  Savedir se sa ki mon pe dir ki sa politik bonmarse lo distrik Baie Ste Anne pa pou ganny tolere ler mon dan Lasanble!

 

 

(APPLAUSE)

 

(Interruption)

)

MR SPEAKER

En moman – en moman.  Order!  Order!

 

(Interruption)

 

MR SPEAKER

Onorab Gill attends!  Mwan osi mon – mon ti anvi mwan osi raise en matter  akoz se mon Lofis in ganny mansyonnen me sa se rezon mon’n anvoy en pti note kot Madam Clerk la.  Mon napa en file koumsa ki’n ….

 

(Interruption)

 

MR SPEAKER

Order!  Order! Mon napa en file parey dan mon Lofis. Mon pa vreman okouran petet dan mon labsans mon pa konnen –

 

(Interruption)

 

 

MR SPEAKER

En moman – yes Onorab Churchill Gill?

 

HON CHURCHILL GILL

Mr Speaker ….

 

MR SPEAKER

Kot sorti petet sa file?

 

HON CHURCHILL GILL

Toultan mon ganny dir mon tann dan sa Lasanble nou oule – nou vin travay serye.  Mwan mon pa en dimoun ki pou vin la ki pou vin fer krwar file i dan ou Biro mwan! Mon’n al dan ou Biro lunchtime – ou kapab get ek ou Sekreter vre sa file ti vin dan ou labsans me selman i dan ou Biro!

 

(APPLAUSE)

 

MR SPEAKER

Mersi.

 

(Interruption)

 

MR SPEAKER

Mersi ok en moman mon ava zis donn laparol –

 

(Interruption)

 

MR SPEAKER

Non, non, non mwan ki pe Chair Onorab Pillay.   Yes Onorab Ramkalawan.

 

HON WAVEL RAMKALAWAN

Mr Speaker wi se mwan ki ti nonm PUC bomaten e …

 

(Interruption)

 

HON WAVEL RAMKALAWAN

Onorab Pillay ou pa Speaker ou!  Speaker i Onorab Prea!

 

MR SPEAKER

Ale Onorab Ramkalawan.

 

HON WAVEL RAMKALAWAN

Mr Speaker Onorab in fer en serten Statement serye ki person pou dir nanryen tan ki li i la!  Me mwan mon ti ava kontan lefe ki i dir file i dan son lanmen ensidswit ou dir kwa ki i annan dan sa file! Akoz mwan mon’n dir ki napa nanryen ki pe ganny fer aprezan mon ti ava kontan ki li i dir avek zabitan Baie Ste Anne kwa ki pe ganny fer imedyatman!  Parske sansan sa ki in dir i pa fer okenn SANS!  Mersi bokou.

 

(Interruption)

 

MR SPEAKER

Mersi. Mersi bon ….

 

(Interruption)

 

 

MR SPEAKER

Bon – en moman – en moman – en moman.  Mon’n donn li sans pou li koze, mon panse ki dan son Repons Onorab Churchill Gill i kapab donn en pti pe plis leklersisman lo la, me an mezir ki ou pe fer ou repons – go ahead Onorab Churchill Gill.

 

HON CHURCHILL GILL

Ya mon’n fer en statement serye akoz mon’n vin travay serye mwan!  Mon pa vin zwe mwan!

 

(APPLAUSE)

 

HON CHURCHILL GILL

Mr Speaker tou dimoun Baie Ste Anne i konn egzakteman ki pou ganny fer kot sa stasyon akoz in nan plizyer meeting ki’n ganny fer e ki’n ganny fer ek zot e la as we Speaker depi yer dimoun pe pran zot form Konpansasyon dan Biro Distrik pou zot al ranpli.  Savedir sa bann dimoun i konnen sansan ki mannyer zot ti pou al dan Biro Distrik pou zot al sers zot form? Sa ki mon pe dir lenformasyon ki’n ganny dir i pa korek mwan mon pe zis koriz sa lenformasyon.   Mon pa’n vin akoz personn mwan!

 

(Interruption)

 

MR SPEAKER

Order! Order!  Kontinyen Onorab Churchill Gill.

 

 

HON CHURCHILL GILL

Mersi.  Mr Speaker konteni Bidze 2019 an plis ki kree lekspektasyon e donn lespwar pou tou Seselwa, i osi moman pou tou Seselwa kontinyen reste angaze e fer refleksyon profon e ki kree sa premiz pou nou pei arive ganny en Bidze parey Minis Finans in prepare avek son bann teknisyen profesyonnel.  Dan sa konteks mesaz pou tou Seselwa, travayer e biznesmenn e nou tou ansanm nou bezwen pe kontinyen pozitivman pou kree en klima favorab dan nou zoli pei.

Mr Speaker pour nou annan en tel Bidze nou moter lekonomi fodre pe mars byen.   Nou lekonomi i depann bokou lo lemonn eksteryer.  Ler nou pei i depan bokou le lemonn eksteryer, nou bezwen annan en bon limaz dan lizye e popilasyon dan lemonn eksteryer.  Ki nou depan lo la bokou e pou met manze lo latab Seselwa.  Alors nou pa kapab dan nou batay politik adopte bann lapros ki met an kestyon sa limaz trankil e stabilite ki kree gran risk pou sali limaz akoz en tel lapros pe zwe ek nou lasyet manze.  I pe met later dan no lasyet manze pou tou sa lakour ki depan lo viziter ki vin dan sa pei.

La mon pe koz avek ou sa dimoun ki fer ou ekskirsyon – ou sa drayver taxi – ou sa car hire  – ou sa guest house  – ou ki fer plonze – ou ki annan biznes lotel – ou sa peser e ou sa laboutik souvenir e lezot ankor.  Pa detri ou pei ki pe fer ou manze.

Alors annou ansanm fer sa bann bon lapros. Aret met later dan manze Seselwa!  Nou bann viziter i vin Sesel pou nou labote e non pa pou senaryo ler zot gete zot dir mwan plito mon al Maurice – La Reunion oubyen lezot destinasyon.  En tel sityasyon i detri tou biznes. Annou ansanm fer refleksyon serye lo la.

 

(APPLAUSE)

 

HON CHURCHILL GILL

Bidze 2019 i fonde lo enn parmi bann prensip fondamantal nou parti.  Legalite dan loportinite – distribisyon ekitab, larises pei travay sak sitwayen Seselwa donnen son pozisyon oubyen sityasyon dan nou sosyoekonomik dan diferan moman. Dan nou sosyete e okenn dout sa pou vin en realite atraver sa seri posibilite ek loportinite konteni dan Bidze 2019.

Mr Speaker lentansyon mon kontribisyon lo larepons Bidze se pou kontinyen fer konversasyon neseser avek tou Seselwa pou mwan koz lo levantay loportinite ki Bidze 2019 i anmennen.  E an plis mon pou osi fer serten sizesyon ki ava kapab ganny konsidere avek bi anrisi konteni zeneral Bidze 2019. 

Mr Speaker realizasyon konkret lobzektif stratezik, zesyon oubyen aktivite ekonomik ki Gouvernman in komanse, malgre plizyer amelyorasyon e adaptasyon, donnen legzizans o-kour bann lannen ki’n pase ozordi san okenn dout sa Bidze i enn ki reponn a bezwen Seselwa dan en fason pli direk.

Mr Speaker, en size ki’n preokip Seselwa pandan sa dernyen         2an se pri lavi.  Ti annan gran nesesite pou en revi konpreansiv lo saler avek reminerasyon avek bi kontribye pou adres sa size ki dan li menm i tre konpleks donnen nou sirkonstans depandans lo bokou bann fakter ki an deor nou e ki tre souvan zot lenfliyans nou zesyon oubyen nou aktivite ekonomik.

Mr Speaker en provizyon  R2.6bilyon in ganny met dan Bidze 2019 pou saler e reminerasyon  ki reprezant  31.3poursan Bidze 2019.  Se sa bann Scheme saler ki pou ganny revize apartir Zanvye 2019.  Nou bann profesyonnel lasante, zofisye transpor lo later.  Dan Lasanble nou’n koz bokou lo koleksyon taks menm dan bann meeting FPAC i bon pou vwar ki lasistans lo saler debaz travayer kot Komisyon Reveni pou osi pran lefe an Zanvye 2019.  Zofisye welfare dan Lazans Proteksyon Sosyal, zofisye Veteriner dan servis  Nasyonal pou biosekitite, Departman Lanplwa, kad Departman Resers, tou Minister, Departman e Lazans.

Mr Speaker i domaz ki donnen limitasyon Bidze saler ek reminerasyon en pe travay dan lezot kategori pou ganny revize an Zilyet.  Lo sa pwen malgre ki mon konpran serten limitasyon reel,  pa anpese  pou fer demann ek Minister Finans pou etidye seryezman pou fer ki tou travayer ki fer pozitivman konsidere avan Zilyet 2019.

Mr Speaker an zeneral tou bann endikater ekonomik i donn nou sa lasirans pou reste tre optimiz akoz lekonomi Sesel i kontinyen grandi.  IMF in konfirm sa – rating index in konfirm sa.

Mr Speaker ler lekonomi en pei i grosi sa pei i ganny larises an plis.  Sa larises anpli si sistematikman fer Sesel kontinyen aplik sa prensip legalite dan loportinite pou partaz larises pei avek tou Ssselwa.  I toutafe normal ki sa Bidze i annan tou sa bann provizyon pozitiv pou tou Seselwa.

Komann Manm Elekte pou Baie Ste Anne ansanm avek zabitan Baie Ste Anne nou akey alokasyon R4milyon pou Bidze pou renovasyon Youth Hostel Anse Royale.  Sa i ava lev nivo akomodasyon pou tou bann zenn etidyan ki sorti lo bann zil.  Zabitan Baie Ste Anne i rekonnet e akey R1.5milyon pou renovasyon Lopital Baie Ste Anne.  Me mon senserman krwar ki ti devret osi annan alokasyon pou serten lekipman spesyalize e ankor plis e anmenn sa servis pli pre ek zabitan lo nou bann zil.  Dan sa konteks ozordi mon pe re-soumet sa demann malgre i lo rikord ki dan plizyer lokazyon mon’n demande ki Minister i seryezman konsider anmenn serten servis spesyalize lo nou zil.

Fermye ti bezwen soutyen sorti kot Gouvernman atraver Minis Lagrikiltir.  I kler ki bann fermye ava dezormen fer sa diferans dan Sekter Lagrikiltir pou benefis nou popilasyon – benefis Sesel.

Taks lo lenportasyon lavyann, poul ek pork ti neseser me nou bezwen fer sir ki nou prodiksyon lokal i akseler-e ariv lo sa lot  nivo.  Sa i tre enportan pou asire ki napa de balansman drastik pou nou lendistri ki depan lo sa bann prodwi.  Sa size finansman pou bann fermye i devret ganny byen zere akoz menm si ozordi nou annan en tel fasilite plizyer fermye i eksprim serten limitasyon.  Nou swete ki tou fermye a ganny met okouran tou prosedir pou akse finansman pou vreman ganny rannman e fer vibre Sekter Lagrikiltir.

Mr Speaker menm si zit 34 nou popilasyon i anba 30 e malgre

ki Minis in dir lazenes in reste ou pou target prensipal pou lannen 2019, e ki spor I dan kiltir Seselwa konman en fason pou viv e an bonn sante e devlop bann abilite fizik e sportif pou devlopman personnel, lefe I reste ki nou bezwen port bokou latansyon lo nou lazenes.

Me Mr Speaker napa okenn gran lanfaz ki’n ganny mete lo sport complex pou asire ki progranm desantralizasyon aktivite sportif, I benefisye popilasyon e sa I met bann atlet Praslin en sityasyon dezavantaze I pou enteresan pou vwar konbyen atlet Praslin ki ganny selekte pou zwe de zil.

En lot dezapwentman pou atlet Praslin se ki kontribisyon pou bann diferan atlet pou bann zil pros se kontinyen eksperyans gran difikilte pou kapab met zot depans akoz ki zot ganny en pe larzan dapre ki Minis I santi zot devret donn zot.

Me sa I pa realite akoz I pa pran kont zot vre depans.  Alors mon pe demande ki sa size I ganny pran o serye lannen 2019 nou vwar zwe de zil pe vini omwen R24milyon in nobou met akote.  Silvouple get nou atlet si nou krwar dan lazenes 2019 annou vwar ki mannyer ki sa bann atlet I a kapab ganny larzan adisyonnel pou zot kapab vin pratik zot spor Mahe.

Pou dimoun Praslin I annan en retar dan prosesis travay pou finaliz dokiman lavant later I annan dimoun ki annan plis ki 5an ki zot pe esper lavant later mon swete ki la dan Bidze I annan pour ogmantasyon ogmant staff dan Biro Prokirer Zeneral nou ava kapab apresye amelyorasyon dan zefor pou termin travay lavant later dan mwens letan pou ki tou sa bann dimoun a kapab ganny tou zot bann dokiman annord.  I annan en kantite ki pe I annan en komite ki pe pouse pou ki peser Praslin I ganny bon fasilite neseser pou zot kapab fer zot aktivite dan en landrwa tre konvenab ki zot in espere pou bokou letan.

Nou espekte ki peser Praslin I a konmans vwar konmansman proze ki peser in inisye pou lenfrastriktir lapes artizanal Baie Ste Anne ek Grand Anse.  En keksoz ki kontinyelman fer li tre difisil pou bann pti biznes demare se fasilite finansyel.  Sa I en konsern ki kontinyen anpes nou lekonomi fonksyonnen lo son potansyel maximum.  Sa lanons dan Bidze konsernan letablisman en prompt payment policy prosedir Lalwa ansanm avek amannman Seed Capital Grant Scheme, in ganny revize pou fer li vin en walk in Seed Capital Grant Scheme pou lavaler R5milyon dan Bidze 2019 I en bon pa dan bon direksyon.

I annan dimoun ki ankor pe esper lokasyon later lo Zil Eve Baie Ste Anne mon espekte avan lannen fini nou a vwar a kapab vwar later pe konmans ganny donnen avek bann zabitan konsernen ki zwenn bann kriter etabli.

Mon kontan pou vwar ki I annan R5milyon pou devlopman lenfrastriktir lo Zil Eve.  Dezyenmman mon osi note ki gran lanfaz departman lenvestisman se pou revwar prosedir e rekomandasyon ki dimoun I bezwen swiv pou ouver en biznes.  Praslin pe antre dan en lot faz tre enportan son devlopman nou bezwen bann lenfrastriktir pou reponn a bann legzizans sa nouvo letap.

Egalman konstriksyon 150met lasose pasaze vizavi terminal cargo lo Zil Eve Baie Ste Anne avek en kapasite pou pran 4 bato 500 pasaze enteril alafwa I pou reprezant sa nouvo lelan lo Baie Ste Anne.  Mon note Mr Speaker ki sa lasose pou osi kapab pran en pti bato krwazyer enteril e ki kou total proze pou en valer R19milyon e in ganny prozekte pou konplete milye 2019.

Pou konplemant sa proze lasose pasaze en batiman ki pou servi konman terminal pasaze pou ganny konstri a en kou R40milyon.  Mon espekte ki lanplwa neseser pou plizyer Praslinois ava ganny garanti e mon demann tou mon bann zenn Praslin pou sezi loportinite ler sa bann fasilite modern I konplete.

Mr Speaker zabitan Baie Ste Anne I byen akey en sonm R17.3milyon ki’n ganny prevwar pou labours bann etidyan pos segonder sa bann etidyan I bezwen tel sipor spesyalman bann etidyan Praslin ek La Digue ki dan bann lenstitisyon pos segonder ki pou ganny R1400 par mwan adisyonel diran 3an letid akoz zot osi kontribye R200 pou fre servis kot youth hostel en size ki mon kapab note ki tou le 3 MNA lo Zil Pros, in travay ansanm pou pouse ki sa I ganny arive.

Nou bann dimoun vilnerab ki kapab kontribye direk avek logmantasyon dan bann benefis ek progranm aprouve pou Lazans Proteksyon Sosyal sa bann benefis pou ganny ogmante konm swivan pansyon retret pou sorti R5050 pou ariv R5150, benefis envalidite ek dezabilite pou sorti R5050 pou ariv R5250; benefis fineray pou sorti R1700 pou ariv R2000.

Sa revizyon lo Scheme Sibvansyon Lakaz e kontribisyon personnel par HFC pou bann rezidan Praslin ek La Digue I vin konman en gran soulazman pou fer fas ek kou konstriksyon pou Praslin ek La Digue an vi logmantasyon lo materyo an prenan kont tou transportasyon ki pli o ki Mahe.

Mr Speaker an se moman tou bann aplikan HFC I pli bezwen kontribye 7.5poursan kontribisyon personnel pou zot loan lakaz apartir le 1 Zanvye tou bann zabitan lo Praslin ek La Digue pou ganny en rediksyon personnel 7.5 pou ariv 5poursan.

I enportan ki lezot Scheme pe osi ganny revize akoz dimoun sa de zil in toultan pe fer fas ek bokou plis depans.

Mr Speaker menm si I annan bokou ki’n ganny pran an konsiderasyon dan Bidze 2019 pou zabitan Praslin mon le lans lapel avek tou Minister konsernen ki annan bann proze ki pa ankor ganny adrese, pou fer le neseser pou bouze.

Kontinyasyon proze lakaz Marie Jeanne Estate faz 3 12 blok lagrandisman semen Salazie provizyon dan Bidze 2019 me nou bezwen asire egzekisyon an 2019. Lagrandisman semen Anse La Blague nou bezwen vwar son enplimantasyon pandan lannen 2019.  Semen Fond Azore 2enm faz sa osi en proze enportan ki nou bezwen vwar son egzekisyon an 2019.

Nouvo stasyon Lapolis Baie Ste Anne plizyer deliberasyon in ganny fer lo sa size I mon swe lo non zabitan Baie Ste Anne pou vwar progre ver enplimantasyon sa proze ver lannen 2019.

Proze devlopman Fond Ferdinand pou kree plis lanplwa pou zabitan Praslin konseye pou konsesyon pou bato cargo pou Praslin ek La Digue, fodre ki bann propriyeter bann bato I ganny eksplike ki son prosedir pou zot kapab benefisye avek sa konsesyon.

An konklizyon Mr Speaker mon krwar ki sa Bidze I pou tou Seselwa e nou devret sezi loportinite pou nou progre personnel e kontribye pou nou pei e ki Sesel ava prospere ankor plis.

Mon swete ki Gouvernman I a kontinyen lo sa semen prosperite tou Seselwa pou en meyer lavenir.  Bomaten dan Lasanble mon tann en Onorab konfirmen ki reform ekonomik ti konmans 2010 e I tie n gran sikse.  Mon ti demann mon lekor sa letan be lekel ki ti Minis Finans me prezan mon vwar ki I pa lot se ki Prezidan Faure ki ti Minis Finans mon krwar sa I konfirmen ki Prezidan Faure I kapab delivre e mon swete ki I a kontinyen delivre pou tou Seselwa.  Mersi Mr Speaker.

 

(APPLAUSE)

 

MR SPEAKER

Mersi Onorab Churchill Gill.  Bon zis mon anvi klarifye sa zafer file.  Aparaman mon sekreter in enform mwan ki sa file ti vin dan mon labsans me nou annan serten prosedir an plas – protokol ki nou swiv.  Bokou fwa bann dokiman ki vin kot mwan – par egzanp I sorti kot Minister Finans bann dokiman Bidze – bann dokiman bann Midterm Reviews and so on – bann rapor odit ki sorti kot Oditer, parfwa I vin plizyer kopi kot fodre mon anvoy en kopi kot FPAC par egzanp mon fer li.  E toultan en kopi I al kot Biro Madanm Clerk e sa son landrwa kot tou Manm I ale pou rod en kopi.

E parfwa ler ou ganny en kopi parey sa file ki avek Onorab Churchill Gill I bulky e ou ganny zis enn, apre petet ki ou’n pas ladan oubyen Deputy Speaker I pas ladan ou fer li al kot Biro Madanm Clerk kot tou Manm kapab ganny access avek.

Me mon’n zis montre mon sirpriz dan serten sans, akoz mon pa ti okouran ki sa file in vin yer.  Nou pa ti ankor fini.  Ki mannyer mon konpran Deputy Speaker ti’n donn lord mon sekreter Ms Panagary pou scan me I pa ti ankor fini scan pou nou apre forward kot Madanm Clerk.  Napa nanryen mal pou en Manm access en file, me nou fer li ordinerman the protocol se nou fer li through the office of the Clerk.  Alright?  Yes Onorab Churchill Gill.

 

HON CHURCHILL GILL

Yes pwen note Mr Speaker.  I pa mon lentansyon pou mon al kas okenn protokol, akoz mon konnen sa bann keksoz I devret ganny swiv.  Selman mon krwar ler mon ti apros ou sekreter sa ki ou pe dir mwan la I ti kapab dir mwan e mwan mon ti ava al kot Madanm Clerk mon ti a swiv protokol.  Mersi.

 

MR SPEAKER

Wi.  Si ou ti pe rod sa dokiman ki menm li pa ti ankor gannyen I ti pou rode kote I ete.

 

HON CHURCHILL GILL

Me selman sa dokiman I pa’n fek vini la li.  Parey ou’n dir in vin dan ou labsans wi I annan en pe letan.  Mersi.

 

MR SPEAKER

Wi I annan en pe letan.  Mersi Onorab Churchill Gill.

 

HON JEAN-FRANCOIS FERRARI

Point of clarification Mr Speaker.

 

MR SPEAKER

Wi Onorab Ferrari.

 

HON JEAN-FRANCOIS FERRARI

Avek ou permisyon.

 

(Interruption)

 

MR SPEAKER

Annou silvouple.  I am the Chair.

 

HON JEAN-FRANCOIS FERRARI

 Bwar en pe delo bann manm Parti Lepep. Bwar en pe delo! Relax.  Bann Manm Parti Lepep bwar en pe delo relax. Mr Speaker –

 

MR SPEAKER

Mon fleksib.  Menm lo lot kote osi tou letan zot annan en pwen kalrifikasyon mon pou donn zot laparol.  Yes Onorab.

 

HON JEAN-FRANCOIS FERRARI

Mr Speaker.  Mon ti zis anvi eksplik Lasanble ki sa file in vin isi swivan en demann ki mwan mon ti fer avek …

 

 

 

(Interruption)

 

MR SPEAKER

En moman – en moman!  Ale Onorab Ferrari.

 

HON JEAN-FRANCOIS FERRARI

… en demann ki mon ti fer avek PUC pou nou ganny en leklersisman on the procurement process pou nou konnen ki mannyer sa Kontra ki pou al fer ki pou renovate sa landrwa in ganny fer e ki mannyer sa konpannyen Dubai ACE CRANE in ganny sa Kontra!  Sa file mon fek pe koz avek bann zofisye PUC I konteni bann dokiman ki eksplike akoz sa bann konpannyen the process e napa nanryen pou fer avek konpansasyon oubyen en form Konpansasyon oubyen nanryen.  I annan pou fer avek the procurement process e mon ti a kontan Onorab Gill aprezan ziska prezan nou ti krwar ou en dimoun ki’n donn bon lenformasyon ou’n mislead Lasanble e I pa zoli!  Mersi.

 

(Interruption)

 

MR SPEAKER

Alright mersi.  En moman en moman – en moman.  Bon apre sa entervansyon Onorab Ferrari mon rapel pandan ki Minis Cosgrow ti la avek CEO PUC ti annan en request pou dokiman.  Parey mon dir mon pa ankor vwar sa file mon pa konnen si sa bann dokiman.  En moman Onorab De Commarmond mon a repas laparol avek Onorab Churchill Gill.

 

HON CHURCHILL GILL

Lasanble e pou letan personn pa ankor war file mon vwar I drol ki mannyer Onorab Ferrari pe dir ki I annan dan file.  Dan file ki annan ladan I mete I annan bann travay lo power station – procurement, apre I annan due diligence. La ou vwar in donnen.  Ok?  Prezan PUC pa donnen Konpansasyon sa I en tranzaksyon ki ganny fer dan biro Attorney General.  Mersi.

 

MR SPEAKER

Bon mersi.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker nou’n ekout ou byen nou’n  konpran konnen I annan keksoz ki mon pe obzerve e sa mon pou dir fran en pe letan nou pe obzerve osi, ler ki en dokiman I vini sorti en landrwa ki petet swa nou Lasanble direkteman swa se en Komite ki’n fer request in demande, e sa dokiman I vin kot Lasanble I byen sa prosedir, be I enportan osi at one point ki the shortest delay possible ki nou Lofis le de Leaders I ganny akse avek sa bann lenformasyon pou  petet evit bann keksoz in future dan sa direksyon.  Mersi.

 

MR SPEAKER

Mersi Onorab De Commarmond.  Mon krwar sa I ganny fer as much as possible.  Parey mon dir kantmenm I vin direkteman a mon Biro I al kot Lofis Madanm Clerk e li I dissimilate I pase sa lenformasyon.

 

HON CHARLES DE COMMARMOND

Non me pa toultan ki nou gannyen e i vin ….

 

MR SPEAKER

Me selman dan sa ka I en gro file e nou pa anvi perdi li.  Prosedir se I sorti kot mon I al kot biro Madanm Clerk kot menm I ganny met en limero avek e apre okenn Manm ki anvi akse avek I pas atraver e nou kapab akse.  Me si nou kapab ganny – e bokou fwa nou request en e-copy si nou ganny en print out pou nou sey anvoy kot tou bann Manm osi.  Me I kot le 2 lofis wi I enportan ki nou anvoy kot le 2 lofis.

 

HON CHARLES DE COMMARMOND

Konmsi ki nou okouran ki sa dokiman ki pou kanmenm kot Clerk prezan si okenn Manm nou fer konnen nou bann Manm.  Si I annan ki anvi akse avek then nou konnen sa lenformasyon I la.  Se sa ki mon pe sey dir.

 

MR SPEAKER

Wi mersi.  Dernyen parol Onorab …….

 

HON WAVEL RAMKALAWAN

Mr Speaker.  Onorab Gill I fek fer en statement konsernan Konpansasyon.  Mwan mon ti ava kontan si Minis dan son larepons I dir avek nou dan sa Bidze, ki nou pe diskite, kote ki annan Konpansasyon pou bann zabitan Baie Ste Anne ki reste otour stasyon elektrisite?  Akoz I N.A.P.A!  Mersi bokou.

 

MR SPEAKER

Mersi.  Minis in note. I en remark ki Onorab Churchill Gill in fer Minis ou note annou kontinyen avek nou travay.  Onorab De Commarmond pwen I valid I note e nou ava fer sir keksoz I mars byen.  Bon mon ava pas laparol avek – short Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker depi bomaten tou Manm in koze personn pa’n raise point of Order ler Manm pe koze.  Mon ti krwar nou agree as a matter of procedure dan Lasanble en Manm pe koze si en kote I anvi reply avek sa ki sa Manm in dir ou annan Manm pa ankor koze fer li reply. Me si nou tou nou pou enteronp kanmarad ler nou pe koze nou pa pou stick to sa schedule ki nou agree lo sa.  Se tou mon pwen Mr Speaker.  Mersi.

 

MR SPEAKER

Mersi.  Mersi Onorab.  Bon ok sa pti deba entervansyon in arive vizavi sa file alright?  Nou fini avek sa nou pou kontinyen nou travay.  Mon a donn laparol Onorab Stephen Pillay e Onorab Stephen Pillay pou swiv par Onorab Waven William.

 

HON STEPHEN PILLAY

Mersi Mr Speaker.  Bonn apre midi a tous.  Apre ki mon asize e ekout sa pti speech Bidze ki Minis in fer Lendi avek ou permisyon Mr Speaker mon osi mon le akord partaz mon pwennvi lo sa Bidze.  Mon’n lir e relir detrwa fwa sa pti speech avek bi pou esey konpran byen kler pran sa Bidze ki pe propoze pou pep Seselwa – sirtou zabitan Au Cap ki mon pe reprezante dan sa Lasanble.

Mr Speaker I sa letan ki ler Bidze I prezante dan Lasanble ki nou asize e debat lo la.  Konman reprezantan nou distrik nou devret fer tou sa ki posib pou fer sir ki tou larzan Seselwa ki pe al ganny depanse I ganny zistifye e se la ki tou gaspiyaz move pratik e mal apropriye I ganny eliminen si fodre koupe nou koupe.

Sa pou ganny fer dan tou alokasyon Minister, Departman e Lazans e enn bann premye alert ti monte se ler dan sa lentrodiksyon Minis I koz lo en long lalis devlopman lenfrastriktir fodre sa lalis I ganny zistifye e ankor si fodre koupe nou koupe.

Me parkont Mr Speaker kwa ki’n sirprann mwan dan sa speech, se ni en pti mo pa’n ganny dir lo kou lavi; ni ki mannyer pou fer desann sa kou lavi oubyen ki mannyer pou met en pti pe plis larzan dan pos Seselwa apar R250.

In koz lo vilnerabilite me parkont ni en plan solisyon pa’n ganny prezante pou tir sa bann dimoun dan sa sityasyon.  Bann vilnerab zis zot in ganny dir zot pa pou ganny kit deryer me zot a reste kot zot ete akoz pei pa pe bouz devan avek sa Bidze.

Mwan mon ti a kontan vwar en progranm byen define ki Bidze I anmennen pou elimin lapovrete e tir dimoun dan sa vilnerabilite.  Pa dir mon apre 2an nou pou al fer ankor letid ek lapovrete pou letid ek lapovrete e nou pou ganny en nouvo index lapovrete.

Mr Speaker dan detay Bidze nou a ganny sans pou debat lo la dan Staz Komite. Me la mon ava al en pti kou an bref lo ki Gouvernman pe propoze e mon lopinyon dan bann diferan Minister, Departman e Lazans.

Dan Tourizm I sipoze stab me en keksoz ki mon konsernen avek se sa reveni tourizm an deviz I pa pe antre dan sistenm finansyel Sesel mon demande ki Minis I fer le neseser ki tou letablisman tourizm fodre fer antre dan sistenm, tou larzan ki kliyan I peye pou vin Sesel.  Me non pa pou kit dan kont deor.  Sa ti ava tir presyon lo deviz dan pei e ede fer desann kou deviz e viv lo enport preski tou sa ki nou bezwen sa ti ava ede fer desann kou lavi Sesel.

Mr Speaker sa taks an plis lo lalkol ek sigaret enn ki mon krwar zis zot in vwar en fason pou anmas ankor plis larzan lo ledo Seselwa mon pa krwar ki zot pe fer sa pou vey lasante sa bann dimoun mon pa krwar sa ki pe servi sa de prodwir pou aret servi li ler Zanvye pou arive.  Mon krwar I pou tir dan en lot landrwa anba son depans lakour e gran probabilite se zanfan e lafanmir ki pou soufer.

Minis I dir ki bann proze lakaz sosyal I pe boost sekter konstriksyon, me mon lenkyetid dan sa sekter se bokou sa bann proze pe ganny manipile e zis en pti group pe benefisye ek zot dalon konbyen proze ki in vreman swiv prosedir tender zis e dwat?

Mon pou demande ki nou get byen sa National Tender Board tro bokou pe pase laba avek bann antite ki pe swazir kontra.  Mr Speaker sekter konstriksyon I osi parmi enn bann premye ki pe tir dolar dan nou sistenm atraver bann kartel Money Changer pou al aletranze.

Mr Speaker bann revizyon e nouvo Scheme of Service ki’n ganny anonse pou Zanvye e Zilyet pou serten travayer Gouvernman e kit deryer 64poursan nou mendev dan sekter prive.  I resanble ki Gouvernman in sourd lo sa Mosyon anmennen par Parti Lepep pou revwar saler e pou travay pres avek sekter prive lo sa lo sa bi.

E sa pa drol pou mon Mr Speaker akoz zot Leader in deza dir nou parol dan Lasanble I parey delo lo fey sonz.  Mwan osi mon krwar pa selman si en Seselwa ki lo saler minimum pou satisfe sa gro R250 prenan kont sa oter kou lavi.

Alor Mr Speaker I pou reste e nou pou vwar ankor plis depandans lo welfare bokou plis Seselwa ankor – ki vedir plis larzan pou Lazans Sosyal dan sa danze e pou mon sa I en gro failure lo lapar Gouvernman ki mon vwar dan sa Bidze.

Dan ledikasyon plis lizye I devret ganny mete lo zot sirtou lo zot bann ‘’goods and services’’ dan bann Kontra Sekirite e Maintenance I ganny tender out.

E dan zot bann proze Bidze parey mon dir si fodre koupe nou pou koupe.  Nou pou bezwen rod en opsyon verifikasyon pou sa bann tender e ki zot zis e transparan retar dan lenplimantasyon proze I fer nou vwar semenn pase kot serten savings ti bezwen ganny transfer dan lezot Minister.  Mon krwar serten kondisyon I devret ganny mete par sa Lasanble avan ki okenn larzan I ganny aprouve en prose zistifye I ganny mete.

En revi lo training e saler bann staff I avek nouvo etidyan pou ankouraz zot pou pran sa karyer me lo en nivo zis e egal avek bann nivo travayer etranze sirtou lo lapey e akse avek lakaz sa I apel en perks pou zot.

Dan Lasante I osi annan nou bann etidyan ki anvi pran sa karyer I devret ganny ankouraze ankor sirtou avek en bon lapey avek en lasistans lakaz vi ki nou vwar R27milyon pou lakaz expat.

Sa R16milyon pou Sekirite fodre osi nou ganny plis detay lo la.  Mon pe demande osi ki en lodit I ganny fer lo dyaliz I devret ganny fer deswit parmi Minister Lasante, apre sa bann revelasyon ki nou fek war sorti kote laba e sa rapor o pli vit posib I ganny soumet avek sa Lasanble.

Mon le pran sa lokazyon Mr Speaker felisit bann staff lasante pou zot bon travay ek devouman – sirtou a sak fwa ki mon pas laba mon konnen ki zot pe sey zot mye avek bann resours ki zot annan mon konnen I pa ase.

Bann Proze Kapital pou lasante osi parey pou lezot Minister, Departman oubyen Lazans nou pe demande ki serten kondisyon e komitman I ganny mete avan larzan I ganny aprouve serten tender I devret vin met ganny akorde kot Lasanble.

Mon ti a osi kontan demann Minister Lasante atraver Finans pou konnen konbyen lanbilans pou gannyen avek sa R3.3milyon e konbyen pou ganny stasyonnen lo lopital Anse Royale?

Mon dir sa akoz I annan en defayans lanbilans kot sa lopital se a de repriz mon war pase mon ti temwanny sa ler en garson ti bezwen lanbilans pou vin sers li kot lekol ti napa.

An menm tan Mr Speaker avek ou permisyon Mr Speaker mon le remersye head teacher Anse Royale Segonder Miss Beguita Denis e Mis e lezot son bann staff ki ti reazir pou anmenn sa garson lopital kot I ti ganny sa bon swen mersi ankor enn fwa.

Me malerezman Mr Speaker ziska ozordi paran sa garson ankor pe esper apwentman pou vwar en spesyalis kot Lopital pou li.  Mr Speaker dan Lagrikiltir mon tann enn de bann linisyativ pou dres sityasyon me selman nou bezwen demann nou lekor lekel ki responsab pou les sa sekter ariv dan sa sityasyon pa sa Gouvernman ki la Parti Lepep SPPF?  Lontan ti’n ler pou ki zot enplimant en sistenm intensive farming avek 100poursan itilizasyon later Lagrikiltir sa ti ariv a dispozisyon later avek otan dimoun posib pou asir nou sekirite alimanter avek en baz fermye Seselwa.  Me la ki nou pe vwar?  En pti group fermye avek laplipar travayer etranze zot in pran monopoli lo sa sekter.

Alor mon ti a swete ki dan limedya bann gro laferm I ganny koupe serten zot gro bout e donn lezot fermye Seselwa pou fer green house anba en sistenm entansiv.  Dan bann plan Proze Kapital pou Lagrikiltir sa Minister osi I bezwen pas anba menm prosedir parey lezot avan larzan I ganny aprouve.  Parey nou dir si fodre koupe nou pou koupe.  Mr Speaker eski Minis I kapab dir nou akoz I pe koz lo hydroponics konmsi zanmen in deza annan Sesel?  Akoz ki sa enn ki I ti annan avan in les abandonnen e tonm an rin?

Mr Speaker Later ek Labita zis fodre pa nou bliye ki avan sa nouvo lanons Mr Speaker ti’n deza annan enn pou 5mil lakaz.  Me sa en lanons pou 3mil lakaz pou vin atraver mannyer nou aprann en SPV.  Sa pa nenport ki veykil Mr Speaker sa en special purpose pou PMC.  Mon prezimen avek full financial options, I pou raise apepre R3milyon ekek pou sa proze R3mil milyon – R1milyon apepre pou lakaz parey in ganny dir.  Me eski nou vwar ki pe arive kot Tender Board?

Lakaz I varye I annan bed sitter R1milyon lakaz 2 lasanm R400mil.  San menm mon dir oparavan Mr Speaker en lord I merit ganny mete.  Fodre zot zistifye tou sa larzan lakaz si non nou pou koupe si PMC pe fer sa proze mon demande eski lezot proze ki anmars pou osi retournen vin tonm anba PMC prezan?  Eski PMC pou fer e manage sa bann proze ki rol zot pou zwe dan alokasyon avek sa bann lakaz?

Parey nou tande en pe letan pase pa tro lontan ti annan en Onorab ti anmennen poudir I annan tro bann manboulouk dan sa bann alokasyon lakaz sirtou mon krwar dan kote Praslin.  Mon napa problenm si PMC I kapab fer son louvraz me ankor fodre napa okenn lenterferans e menm prosedir I bezwen ganny swiv pou Proze Kapital avan nou vwar proze.

Mr Speaker Local Government sa R18.8milyon pou Sekirite e sa R6.9milyon pou Maintenance nou pou bezwen plis detay akoz mwan personnelman mon dezapwente avek serten travay maintenance e sekirite dan distrik Au Cap.

Mr Speaker ankor Local Government I bezwen osi zistifye son bann capital projects, osi byen ki Small Development Projects.  Anba Family Affairs Minis in fer stetment konsernan risk ler nou tro depandan lo travayer etranze sa I en konsern ki tou letan nou koz lo la.  Nou’n dir aboli certificate of entitlement me zot ankor pe dormi lo la.  Nou dir dan serten pos fodre travayer etranze I annan en counterpart obligatwar atase avek li, e apre 2an sa expat si I pa’n kapab transfer knowledge, I kit pei e ale!

Napa nouvo GOP ankor si bann benefis etranze I gannyen pa konparab avek Seselwa tel ki lakaz manze itilite e prenan kont osi forex i sorti Sesel napa bokou Seselwa ki pou al travay lo sa minimum saler ler dimoun ki pe fer menm louvraz ek li pe ganny 2 fwa son saler ek sa bann fasilite ki mon mansyonnen avan menm avek sa gro ogmantasyon R250mil par mwan.

Lazenes ek Spor; dan Au Cap Mr Speaker I annan en gran defayans e mankman dan alokasyon larzan dan fon bann klib spor e sa mon konnen I partou dan lezot distrik.  alor nou bezwen lans en lapel tre for pou plis larzan dan fon pou nou bann tim dan distrik.  Mr Speaker lo kote sekirite Nasyonal nou vwar parey nou vwar plizyer lezot NDA’s en gran alokasyon pou bann proze kapital li osi menm si serten lezot Minister enkli Departman Lapolis pe resevwar bokou grants avek bann pei zanmi nou fer kler ki sa bann grants fodre I ganny I antre dan Consolidated Fund avan.  E ler proze I pas lo verifikasyon par sa Lasanble la finansman a ganny aprouve – pa avan.

Mr Speaker dan lanvironnman e lenerzi R238.8milyon pou LWMA pey bann pti kontrakter pou netwayaz sa fodre nou ganny detay e plis an plis lo la.  Avek en lasirans ki I pe ganny byen zere pou anpes labi e lapliferans.

Enn bann defayans ki Au Cap pe pas atraver dan sa de lannen pase se PUC pa’n kapab enstal laplipar street lights – zis leskiz apre leskiz napa adaptor napa.

Kab; Ki mannyer alor nou kapab krwar dan zot ler zot pe koz nouvo kalite lalimyer lo semen?  Mr Speaker parey lezot koleg in dir en lot keksoz ki drol pou mon nou pa’n tann nonm ditou tinel ni zenerater NLG nou tann zis SEYPEC pe privatize epi I pa pou privatize.  Epi Mr Speaker ler Kreol I koze deor e dir poudir Gouvernman lepep napa en plan lonterm e konm dir Minis zot annan zis en band aid approach serten I le tonm kriz.

Mr Speaker mwan mon pe look forward pou mwan partisip dan deba sa Bidze lo detay dan Committee Stage.  Mr Speaker Bidze Gouvernman ki’n anmenn dan sa Lasanble, se pou nou debat lo la – aprouve kot I neseser.  Me osi enportan pou koupe kot nou vwar neseser.  Sa I nou devwar sansan nou fail nou consistency.  E fodre pa nou ezite pou kler sa tors byen for.

Mr Speaker avek sa Bidze napa nanryen pou sa ki pe trimouse pou fer de bout zwenn e I fer lapenn pou mon welfare pou vin sel mwayen pou soulaz en bon pe douler travayer.  Avek sa mank direksyon e san en plan lonterm pou fer desann pri lavi, mon pa krwar ki sa Bidze pou anmenn en gran diferans pou en meyer lavi Sesel – ni pou redwir lapovrete – ni pou fer desann kou lavi e I pa pou fer nou avans devan, me nou pou zis drive lo brizan parey sa bato lo bor Sainte Anne.  Mersi Mr Speaker.

 

MR SPEAKER

Mersi Onorab Stephen Pillay.  Bon nou pou Break apre ler nou retournen nou ava pran Onorab Waven William swivi par Onorab Clifford Andre.  Nou a Break nou a retournen 4er.

 

 

(BREAK)

 

MR SPEAKER

Bon nou ava kontinyen nou travay.  Mon anvi zis averti bann Manm anfen mon anvi averti Minis avek son delegasyon ki nou pou al ziska 5.30 mon nou fini ganny an kontak avek SBC zis pou nou kapab catch up en pti pe nou letan pou bomaten ki nou allow ki SBC I repran lantern midi.  Bon nou ava kontinyen e mon ava pas laparol avek Onorab Waven William.

 

HON WAVEN WILLIAM

Mersi Mr Speaker.  Bonn apre midi tou dimoun ki a lekout.  Mr Speaker an repons Diskour 2019 mon annan sa pou dir;

an premye enstan mon remersi Bondye pou son faver e lagras lo Sesel e pep Seselwa anver provizyon pou sa Bidze.  Dan sa menm laliny mon salye zefor pou Seselwa dan servis piblik, dan prive e aletranze ki travay dir pou ki larises I ganny kre pou siport devlopman Sesel e pep Seselwa.

Mr Speaker la fodre dir sa zafer kree larises I responsabilite tou sitwayen Seselwa dan nenport ki kwen Sesel ouswa aletranze dan sekter servis e prodiksyon ki fer larzan.

Mon rol konman serviter lepep isi ler sak prezantasyon Bidze I ganny fer, se pou rode kwa an plis ki nou kapab fer pou kree plis larises; permet fanmir Seselwa ganny plis larzan pou viv dan dinyite e rode kwa an plis ki kapab ganny fer pou kree sa potansyel e loportinite pou tou benefisye touzour ankor.

Mon touzour konvenki Mr Speaker ki nou kapab fer pli byen.  Mon osi rekonnet ki a tou pri sa vizyon e misyon pou fer sa bezwen adapte ek sirkonstans tandans global,  dan sa monn enterkonnekte.  I bezwen annan en gouvernans Egzekitiv Lezislatif Zidisyer ek sekter prive, ki vizilan agresiv e proaktiv.  Akoz lefe sanzman mondyal I osi tous nou nenport ki fason, akoz an gran parti nou depan lo enportasyon Mr Speaker.

Preanbil nou Konstitisyon I mansyonnen ki nou annan en sityasyon frazil konman en Pti Leta Zil Mr Speaker.

Mr Speaker 10an progre e sikse progranm ekonomik malgre ti difisil Seselwa in solider fer sakrifis manz son kou an silans par serten e dan lot fason vokal par serten lot group.  IMF, Banque Mondiale e Banque Developpement Africain, zot pe felisit nou.  Sa I byen Mr Speaker e nou kontan.

Ozordi kou lavi pe plonz serten nou kous fanmir Seselwa dan lapovrete e serten ver le 15 tou le mwan dan sa menm direksyon.  Se pou sa rezon ki mon Mosyon an gran parti tip e demann Gouvernman pou koriz bann lenzistis linegalite e pran bann lezot mezir dan en legzersis revizyon enkliziv, pou fer lavi Seselwa pli eze.  Travay ek sekter prive dan partenarya pou diriz dan menm direksyon dan moman apropriye kot I posib.

Mon konstate ki Gouvernman pti a pti pe bouze dan sa direksyon ek sa Bidze e an menm tan ki Lasanble ti pe dir e kontinyen dir ki fodre get dan welfare Seselwa I donn li sa fair deal.

Mr Speaker politisyen I kapab fer tou kalite politik, me politik vant Seselwa I serye personn pa kapab zwe avek!  Mr Speaker fransman dir ou I pa ase.  Me I en konmansman.  Onorab Ferrari ti dir nou semenn pase dan deba lo sa Mosyon ki Gouvernman fodre tall son palto dapre son latwal ki mon dakor ek li, me ek en serten degre rezervasyon ki lafason zesyon resours e aksyon pou siport aktivite dan sekter ekonomik pei, pou maksimiz kreasyon plis larises.  Akoz rezervasyon Mr Speaker?  Minis mon senserman kwar ki nou kapab fer pli byen ankor e ki Seselwa I benefisye ankor plis.

Mr Speaker Minis mon pa santi ki tou kart in ganny tale devan pep Seselwa pou vreman angaz li senserman pou reste motive pou travay pli dir ankor! Motivasyon napa ase – sirtou kot I konsern disparite saler e loportinite pou fer plis larzan le I konnen ki pe donn son tou.

Mon a sit enn de legzanp pou siport mon analiz sa saler debaz R5,050 ki pe vin R5,250 pa ase e tou fodre ganny fer pou amelyor li pli vit posib ouswa par lezot mezir ki evantyelman Mr Speaker I ariv R10mil.

Mr Speaker sa pe fer travayer sa kategori viv lo balizaz lapovrete.  Mr Speaker I annan en kous travayer Seselwa ki fini zot Kontra swa aret travay pou plizyer rezon ouswa pran retret, ouswa pou rezon aksidan dan travay pe bezwen arête.  Zot swiv tou prosedir ofisyel pou ganny zot benefis.

Mr Speaker akoz I pran 3 a 6 mwan pou zot ganny zot benefis?  Tel parey peyman konze, tann servis, gratite e domaz tel parey bann zofisye Ladefans, manm Lafors sekirite, ansenyan e sa ki lo kontra servis eksetera.  Ki serten sa kategori pe ankor pe espere.  Pli Lotorite I tarde lapovrete I koste zot.  Se sa travayer Seselwa ki santi li malere e vin pli fristre kont sistenm an plas.  Akoz ki bann travayer casual ki dan servis pou plis ki 2an a 10an pa ganny anploye a plen tan?  si sa servis I en nesesite ki zot pe donnen akoz zot pe zwe avek zot bol diri?  Pous zot si zot fer en pti fot akoz pa anploy zot a plen tan?

La Mr Speaker nou menm isi dan sa Lasanble nou dir I annan lanplwa pou tou e ki Gouvernman I devret reazir IMF I kapab dir I annan danze akoz Ladministrasyon Gouvernman I tro gro, me si enn nou frer e ser Seselwa ki dan lanplwa vo mye dan lanplwa ki al lo welfare.

Mon oule avans ankor sa lide Mr Speaker, ki Lotorite I kre sans pou travayer Seselwa pou benefisye o maximum son travay overtime ki I fer, pou soutenir li ziska lafen di-mwan pou konsider en fason negosyasyon ek sa travayer ki poursantaz I oule ki oule, me pa zis time off.  Si par mwan I desot 60erdtan pa enpoz time off, me etal son peyman an plis lo lot mwan.  Sa travayer I en lot fason pou li sa travayer ganny larzan dan son pos.

Mon enplor Gouvernman pou konsidere sirtou lefe ki serten pe travay dan konze piblik e dan wikenn kot lapey I double – time off pa fer bokou sans pou li.  Ki son kandyou dan son pos Mr Speaker.

Mr Speaker Gouvernman I dir ki det Sesel I apepre 59poursan e ki I anvi redwir sa pou vin 50poursan ver 2021.  Mr Speaker mon panse ki si dan sa lakonpannyen Sesel e partenarya Gouvernman ek sekter prive, otan zefor pou etabli konfyans pou ganny fer vreman pran en lapros konsiltasyon enklisiv, pou sa pli meyer desizyon ekonomik pei, ti pou annan senser langazman e sa det Sesel ti kapab redwir pli vit.

Ti pou annan en pli meyer zefor inifye pou fer li arive Mr Speaker.  Ek en direksyon enklisiv pli kler e siporte par tou akter kle dan lekonomi Sesel, sa 6milyon Dolar ki pe kit nou pei tou le mwan.  Sa kantite milyon ti dan kof Gouvernman ki sekter e sekter prive pou pey lozman sa bann travayer prive dan nou lekonomi pou sa apepre 21 e 22mil etranze pa ti pou neseser kit pei.

Ti a ganny servi pou anbelir nou pep.  Nou pe perdi akoz nou annan tro bokou travayer etranze ki pa merite dan pei Mr Speaker.

Mr Speaker Seselwa I anvi konnen en plan kler e detaye dan tou sekter; ki mannyer nou lokaliz sa bann pozisyon.  En plan kler e realis ki sa zanfan Seselwa ki’n al etidye ki pe understudy sa etranze ki demen I vreman pran plas sa etranze.  Mr Speaker me pa zis pran son plas, me osi ganny en reveni ki ekivalan a lanmwatye ouswa trwa kar ki pou sa etranze!  Akoz pa donn sa Seselwa sipor lakaz oubyen transpor?  Akoz Mr Speaker en pwa de mezir?  Nou pa krwar ki sa ti pou pous Seselwa nou pa krwar poudir sa ti pou pous Seselwa pou take over e pran ownership son ekonomi ler I konnen I konnen I pe gannyen byen peye e ki pe osi ganny pli valorize e rekonnet pou son konpetans Mr Speaker?

Konbyen lannen isi dan sa Lasanble nou pe koze lo problenm capital flight e problenm vertical integration malgre tar mon kontan aprann ki Lalwa pe vini pou adres size ki pe fer Sesel e fanmir Seselwa perdi larzan e benefis personnel.  Zis akoz lakonpannyen etranze dan offshore e bann gro lakonpannyen isi Sesel pe fer tranzaksyon e transfer preski tou deviz ki’n ganny kre dan lekonomi Sesel aletranze.

Mr Speaker lo lentegrasyon vertikal mon telman pa konpran akoz ki lotorite in trenn lipye pou met an plas Lalwa pou protez nou bann pti entrepreneur lokal depi bann ki dan biznes taxi, omnibus, bato ekskirsyon, artizan, restoran, kot bann gro lotel e biznes ki annan kapasite pou diversifye.  Sarz pri ki pli ba e trangle bann ki nou menm nou dir leve debourye.  Ozordi malgre zot lanmen in large Mr Speaker me zot lipye I anmare me zot pou tonbe.  Dan sa menm laliny mon pou tous lo the ‘’Ease of doing business’’ dan Sesel.  Mr Speaker I byen ki I annan sa komite o nivo koze tousel pa kre larises me aksyon proaktiv ki pou met plis larzan dan rezerv e dan pos Seselwa in plis ki ler pou konpran ki ‘’Ease of doing business’’ se sa lespas letan ki I pran pou sa envestiser transfer son larzan Sesel sorti dan labank aletranze.  E sa letan ki I pran pou sa envestiser envestir son larzan dan proze Sesel.

Mr Speaker pa kapab pe pran 1an pou ganny pou bann tranzaksyon vetting lo sa envestiser etranze kot nou pei frer Maurice pe pran 1 zour, 2 semenn ziska 3 mwan pou fer li.

Mr Speaker be si nou kontinyen nou pou perdi bann envestiser e bann loportinite kreasyon larises e met larzan dan pos Seselwa!  Mr Speaker Minis nou bezwen envestisman direk etranzer sa I osi ede pou anrisir nou pti mwayen lantrepriz.

Sepandan pa fer sekter pti biznes eksperyans en kalite lanvironnman kanibal ki letan Minis Gouvernman pe dir Seselwa pran ownership lans dan aktivite ekonomik I ganny toufe e trangle.  Sirtou sa mank vreman konsiltasyon pou konn le vre problenm ki ler desizyon final I ganny pran I ava aplon parey Seselwa I dir.  Biznes Seselwa I a dir ki wi, nou pe ganny valorize e rekonnet dan nou pei.  Mr Speaker akoz koze la deor se I tough e I delika e I difisil pou fer biznes Sesel.

Mr Speaker lo konsern ki pe fatig zabitan e pep Seselwa se sa Sistenm Pwen – sirtou pou bann ki’n fer laplikasyon planifye li 4an a 10an zot pe santi ki zot pe ganny kit deryer Mr Speaker.  Sa bann kriter si ou napa partner de ouswa 4 piti si ou pa pe dormi dan salon e ki ou pa kapab montre ki ou kapab pran en loan R850mil I zis ridikil Mr Speaker.

Menm si nou ganny dir ki zot bezwen konmans met lord dan en serten landrwa si loportinite I pou tou, akoz sa sistenm class?  Akoz sa lapros lo aplikan ki lo lalis avan Sistenm Pwen Mr Speaker?

Mr Speaker sa I pa en fair deal pou Seselwa e mon demande ki sa I ganny ankor revwar pou plis lazistis.

Mr Speaker Grand Anse Mahe zabitan, lantreprener, fermye, bann kid an servis touris e Seselwa an zeneral menm si mon anmenn Mosyon lo nivo kriminalite ki pe vin alarman dan pei Mr Speaker mon pa satisfe ek realite ziska prezan.

Nou osi pa satisfe e kalite sipor ki nou gard lans pe gannyen enkli lafors dan rezyon I mank vizibilite e sa bann zenn fanm e msye zot saler allowance merit ganny get ladan deswit Mr Speaker!  Pa demen.  Pa an Zilyet, me ozordi pou zot kapab desarz pli byen zot responsabilite e reste motive.

Mr Speaker mon osi dezapwente ek lapros ki Lotorite dan diferan sekter piblik pe fer, ler I konsern size devlopman distrik Grand Anse Mahe.  Pou sit enn de MLUH, Gouvernman Lokal, Lazenes Spor e Kiltir, Welfare Mr Speaker.  Ler nou pe koz problenm emergency I pa kapab pran 3mwan! I pa kapab pran 1mwan! I devret pe pran apepre 24erdtan Mr Speaker.  E la nou a dir ki sistenm I efikas.

Mr Speaker la ankor bann dimoun ki pe fer pe donn sa bann servis Pti Anfans en bon pe zot dan distrik zot konpran problenm sa zenn koup oubyen sa manman ki travay anvil ki bezwen kit son zanfan dan distrik.  Sa propriyeter olye fer sarz R1500 I fer zot pey R1000 e ler zot pran en pti pe plis ki 10 Mr Speaker zot ganny problenm, me I bon fer konnen ki sa 10 zanfan avek sa pri ki zot pe peye letan I ariv lafen di-mwan pa reste zot nanryen ditou!  E mwan mon demande wi nou bezwen gard standar, me annou regarde sa realite lokal dan sa bann distrik ki nou dimoun pe fer fas avek Mr Speaker!

Mr Speaker Grand Anse Mahe I ankor pe ganny kit deryer dan sa laspe en konsiltasyon fran! Ou ganny konsilte apre ki desizyon I ganny pran e ganny enpoze lo nou dan en swadizan konsiltasyon, kot napa sans negosyasyon, kot napa swivi nou pa kontan! Nou’n ganny ase!  ‘’Enough is enough!’’

Nou krwar ki nou Lotorite Distrik menm si Gouvernman Santral I gouvernen, nou merit ganny serten respe akoz nou accountable avek nou bann sitwayen!

Mr Speaker kot I mal mon bezwen dir I mal e kot I byen mon pou siporte.  Sa pa vedir ki ler ki nou ki dan kote Gouvernman nou hold Egzekitiv accountable I en krim Mr Speaker!  Non!  I nou devwar konman bann reprezantan.  Enn mon rol primordyal se pou koze pou mon dimoun e fer sorti konsern! I annan en limit Mr Speaker.!

Mon kontan ki finalman ki Gouvernman in rekonnet ki I bezwen revwar lafason problenm sosyal pe ganny adrese a labaz.  Ti’n plis ki ler pou evit konplikasyon travay e pou anpes pti lanpir I primordyal en lapros konplemant zefor bann akter dan distrik sirtou dan konbat problenm lafanmir, lapovrete, drog, lalkol ek sa vilnerabilite fas ek mank ase resours.  Mon demande ki lotorite distrik I ganny enkli dan diskisyon dan sa nouvo lapros dan en fason konsiderab e enklisiv pou nou zwe byen nou rol.

Mr Speaker me pas zis koze nou bezwen ase resours pou nou kapab travay avek.  Sa pou fer en diferans ki zis koze.  Mr Speaker avan terminen mon pou dir ki mon pa satisfe ek la kantite larzan ki dan Bidze pou siport progranm dan distrik tel parey aktivite kiltir, spor ek lwazir pou tou nou bann laz dimoun.  R9mil ekek par mwan I pa ase ek tou sa ki nou pe ganny demande pou fer.  Menm sa I aplik pou sipor ki Ladministrasyon Distrik pe gannyen.

Mr Speaker mon pou demann Minis Finans lefe ki Konsey Rezyonal I en proze pilot 1an zot vre rol pa ankor tro kler pe annan diplikasyon travay ki Ladministrasyon Distrik ki annan pe fer avek Manm Elekte Minister pe al depans R50milyon pou azout biro pou depans anviron R700ekek pou zot ganny bann lasistans mendev pou travay avek zot!

Mr Speaker lefe ki sa Konsey li menm napa en stati legal me en lakor anba parasol koabitasyon ki’n ganny kestyonnen par serten kous nou popilasyon e diferan group, eski nou pou kontinyen fer sa bann depans?  Mon pe propoze ki sa R5milyon e R700mil I ganny partaze avek tou Ladministrasyon Distrik pou zot vin pli efikas.  La mon pa pe dir frenm Konsey Rezyonal.  Mwan, mon pe dir annou pa depans larzan ki nou napa, be met resours dan bann sekter kot I merite e lontan nou pe lager ki Biro Ladministrasyon Distrik I ganny plis larzan, alors mon pe demande ki sa demann ki sa demann I ganny konsidere.  Mr Speaker prenan kont ki lapey de baz I R5,050mil letan ou mazin bann allowance, sa I en pwen pou note.  De lot kote Mr Speaker Gouvernman I donn konsesyon lo kare later, pou biznes e lespas; I donn konsesyon pou karbiran, I donn konsesyon pou loan materyo e lekipman enporte, I donn sibvansyon isi e laba dan sekter konstriksyon.  Mr Speaker ensi ki Lagrikiltir ek Tourizm silvouple Minis lekel ki vreman pe sirveye pou vwar si vreman konsonmater Seselwa pe osi benefisye lo besman lo pri sa bann komodite e servis?

Mr Speaker Minis malerezman dan sa Diskour sa pa’n ganny dir me nou ganny dir poudir konsesyon isi, konsesyon laba pe ganny donnen.  Mr Speaker Seselwa I bezwen ganny en pri rezonnab avek son lasyer ki’n kontribye, ki fer ki sa bann konsesyon pe ganny donnen.

Mr Speaker tou travayer Seselwa in kontribye alors zot merit pe ganny en bon deal lekel ki monitor bann Lazans Telekominikasyon parey Airtel, Intel e Cable pou asire ki zot donn Seselwa e viziter sa bon servis enkli labank e lakonpannyen lasirans?

Seselwa I fristre letan kontra lafen di-mwan I bezwen gat 1erdtan letan I arive pou pey son bill 2erdtan Mr Speaker I fatige. I pe donnen ler pou depanse osi I bezwen annan fristrasyon.

Mr Speaker Minis in mansyonnen ki serten sonm larzan in ganny mete pou rezourd peyman polisyon dan La Misère. Minis annou rezonn en kou la sanmenm tou ouswa I annan ankor?  Dimoun La Misère pe ekoute! Nou ti a kontan letan ou donn ou repons ou donn nou en pe lesplikasyon lo la.

Mr Speaker an terminan menm si serten kous nou popilasyon pa tro kontan, mon anvi dir avek zot pou annan kouraz – menm si pasyans I sape parfwa annan lespwar ki sa travay sa lager pou amelyor lavi Seselwa, I en batay ki sa Lasanble pou kontinyen fer.  Sa ki mon konnen se ki travay I bezwen zefor tou Seselwa nou tou TOGETHER pou kree sa Sesel ki nou anvi kre larises posib pou ki tou I benefisye ki personn pa santi I pe ganny afekte ekonomikman ouswa pe ganny kit deryer.

I depan lo nou tou.  Wi mon avek ou pep Seselwa personn pa pou vin fer li pou nou sa I mesaz kler ki dan en rankont avek delegasyon Linyon Eropeen dan en rankont diplomatik, ki nou ti gannyen resaman, zot ti fer kler avek nou ki Sesel in ariv en nivo ris e ki pou nepli annan ankor hand out.  Alors nou pou bezwen re aziste nou reorganize nou pou nou kapab pran sa responsabilite ki devan nou akoz lemonn pa pou esper Sesel Mr Speaker.

Minis ek ou lekip mersi pou zot travay pou nou annan plizyer e mon pou annan plizyer kestyon ek leklersisman pou ou e lezot bann Lazans, Minister ki pou vini devan nou dan sa Lasanble.

E pou terminen Mr Speaker mon dir ki Sesel e pep Seselwa I kontinyen ganny beni ek lagras Bondye e ki nou kontinyen prospere.  Wi nou kapab.  Mon pa zanmen sou estim kapasite pep Seselwa.  Mersi.

 

(APPLAUSE)

 

MR SPEAKER

Mersi Onorab William.  Mon krwar pou lev okenn pwen klarifikasyon mon krwar son repons I direkteman lo Bidze.  Mersi Onorab.  Mon ava pas laparol avek Onorab Clifford Andre.

 

HON CLIFFORD ANDRE

Mersi Mr Speaker.  Bonn apre midi tou dimoun ki a lekout.  Bonn apre midi Minis.  Bonn apre midi bann Manm Lasanble.  Mr Speaker mon oule konmans mon reaksyon par dir ki sa Bidze 2019, I enn ki pou anmenn plis difikilte pou nou pep.

I vre ki nou pou soufer avek plis avek sa Bidze akoz pri lavi pou kontinyen ogmante e nou pep pou kontinyen soufer.  Sa Bidze I demontre nou ki Parti Lepep I en parti ki napa pep Seselwa a ker, me I mazin zis son lekor e ki mannyer I pou kontinyelman benefisye lo lasyer travayer Seselwa.

Lasanble atraver Mosyon ki Onorab William ti anmennen apre ki I ti ekout LDS kot nou ti diskit lo pri lavi a plizyer repriz nou ti aprouv a linanimite, pou demann sa Gouvernman pou revwar saler Seselwa ki pe travay.

Me ki nou vwar Mr Speaker, sa Gouvernman I sourd menm lo Manm son prop parti.

Minis in dir nou ki tenm sa Bidze I ’Stabilite e Progresyon’ me ler nou gete nou vwar plis soufrans e matir pou nou tou sa bann logmantasyon ki zot in donnen, pou senpleman ganny abzorbe dan sa bann pri eleve ki pe ganny entrodwir par lentrodiksyon bann nouvo taks e logmantasyon dan pri lavyann.

Ler nou pe gete Mr Speaker, I menm e menm si pri lavyann enporte pou ogmante me I pou reste pli bonmarse ki lavyann lokal. I enportan pou note avek konsern, ki prodikter lokal, pa pou kapab vreman satisfer demann marse lokal.

Alors eski sa pou vreman anmenn pou vreman annan en lenpak pozitiv lo nou pep? Larepons se non.  Mr Speaker Minis in dir nou e mon quote “10an pase nou Nasyon ti anbark lo en vwayaz pou en transformasyon ekonomik.” Sepandan Mr Speaker sa menm letan ki sa 6enm Lasanble avek sa mazorite LDS, in dekouver bann vol ki’n pase e sa Mr Speaker I plis ki R500milyon!

Minis pa’n dir nou ki son Minister pe fer ou pou fer pou al sers nou larzan ou demann bann ki responsab pou rann nou, nou larzan e apre fer prosedir pou ki zot ganny pourswiv e zot rann kont pep Seselwa.

I enportan note ki dan son diskour Bidze Minis in fer resorti e mon ankor fer son quote “lentere lo fasilite deposit ti ganny ogmante sorti 1poursan pou vin 2poursan e lentere lo fasilite kredi ti ganny ogmante sorti 6poursan pou vin 8poursan.” I klerman remarkab

Mr Speaker, ki zot pe pran nou pou bann fou bet.  Akoz ler lentere lo fasilite deposit I monte I mont zis par 1poursan, me lo fasilite kredi I monte sorti 6poursan pou vin 8poursan e sa I vedir 2poursan.  Alors ler ou gannyen ou ganny zis 2poursan me ler ou peye ou pey 8poursan alors ou pa pou zanmen benefisye.

Avek en logmantasyon R112.3milyon oubyen 1.3poursan konpare avek lannen pase, kote nou bann Seselwa nou pou vwar nou pe benefisye dan sa Bidze, akoz I en Bidze akoz en Bidze I bezwen ganny fer pou asire ki Seselwa I reste focus.  I reste the focus e I premye pou benefisye.  Me sa Bidze I enn ki pou garanti ki Parti Lepep I kontinyelman benefisye, akoz eleksyon pe vini e zot pou esey tou sort pou asire ki zot servi nou resours malapropo.

Mwan si ou demann mwan apar ki saler bann travayer, nou pou bezwen get tre byen e afon sa Bidze e kot fodre, bloke.  Mon pou demande ki nou bloke kot fodre, koupe kot fodre; mon pou demande pou nou koupe.

Mon pa pou permet pep Seselwa ganny abize koumsa.  Alors mon pou demann tou Manm bann koleg tou mon bann koleg pou fer byen atansyon ler nou pe repas lo sa Bidze.  There are too many hidden agendas and we have to read between the lines.

Mr Speaker a sa staz mon ti a kontan fer resorti avek Onorab Churchill Gill, ki sa ki in dir an referans avek PUC ki annan Konpansasyon sa I en legzersis ki pe ganny fer ki’n ganny fer dan lannen ‘90.

E mon oule fer resorti ki a sa pwen Lasanble Nasyonal ti ankor kot National Library e se Minis Dugasse ki ti responsab pou lenerzi e Onorab Mitcy Larue ki ti Manm Lasanble pou Baie Ste Anne Praslin.  I enportan note ki a sa pwen ki sa zonm ki ti debat, ki ti lager e ki ankor pe kontinyen lager ozordi, pou ki sa bann dimoun I ganny en konpansasyon, se pa lot ki Onorab Wavel Ramkalawan ki dan sa Lasanble ozordi.

Mr Speaker I enportan pou nou note, ki napa okenn form ki sa bann dimoun pe anpli.  Se letan zofisye sorti Mahe I mont Praslin, ki zot ganny demande pou zot pas lo sa bann – pou zot fer sa legzersis.  Mon oule dir sa bann dimoun eski zot pou kontinyen fer legzersis tou lazournen?  Zanmen zot pou ganny en rekour lo sa legzersis ki zot in fer?

Annou aret pran nou pep pou bann fou bet!  Pou enn fwa donn zot – donn zot sa ki zot devret gannyen. Onorab Churchill Gill pran sa an konsiderasyon.

Mr Speaker ler nou get saler, saler nou bann sitwayen irespektiv kot zot travay, I reste en eleman pli enportan dan okenn Bidze.

Minis in enform sa Lasanble bann nouvo Schemes of Service. I pa pou tou Seselwa I senpleman serten Departman ki pou ganny ogmantasyon.

Mon kestyon I sa bann lezot travayer laboutik ki zot al ladan, I diferan ek sa bann lezot? Sa kalite latitid Mr Speaker, I demontre en Gouvernman ki napa direksyon e pa pe kapab satisfer son pep an zeneral.  Avek en lensertitid dan sa ogmantasyon ou mon pou dir dan bann diferan Scheme of Service, mon pe demann Minis pou fer sa bann Scheme of Service pran lefe bann ki pou ganny met an aplikasyon pran lefe an Zanvye olye an Zilyet.

En ogmantasyon 5poursan lo saler I vedir nanryen dan pos travayer Minis. Tou sa 5poursan pe ganny abzorbe – parey mon dir oparavan dan bann ogmantasyon dan tou direksyon.

Mon a donn en legzanp.  En dimoun ki pe ganny R10mil ozordi Mr Speaker, I pou vedir en logmantasyon R500.  Konmela ki en dimoun pou fer avek R500?  Ou al laboutik e ler ou sorti avek de ou twa komodite dan en sak e si I reste ou R10 ou byen sanse. Alors annou get byen nou pep alors eski nou sitwayen napa dwa ganny en logmantasyon signifikan?

Koreksyon Mr Speaker  -nou pa’n tann Minis dir nanryen lo ki Gouvernman pou fer pou sa bann larzan ki’n disparet dan Kof Leta retournen o kontrer ki nou vwar zot dir zot pou ferm SBFA ki ti pe cater pou sa pti biznes avek bi pou ed li grandi e kontribye pou lekonomi nou pei.

SBFA Act Mr Speaker ki en Lalwa seksyon 4 I dir ‘the principal object of the Agency is to provide financial assistance by way of concessionary loan to small business enterprise, for the purpose of promoting the development of the industry undertaken by such small business enterprise and to develop the marketing competitiveness of such enterprise at local and international level’.

I enportan pou fer resorti ki sa bann rapor ki’n ganny soumet avek nou Lasanble par Minis li menm, I obliz Lotorite konsernen pou met zot lekor an reg avek Kod Penal Sesel.  Seksyon 24 sa Act I dir klerman e mon quote “the Chief Executive Officer Chairperson, Vice-Chairperson, Members, Officers and employees of the Agency shall be deemed to be public servants within the meaning of section 91 to 96 of the Penal Code”.

Alors akoz ki SBFA I bezwen ganny fermen e transfer son bann fonksyon avek DBSDBS ti la ler SBFA ti formen par en Lalwa an 2013!  Minis pa kapab zis vin dir nou ki sa Lalwa I pa kapab zis vin dir nou ki sa Lalwa ki’n in kree pe ganny fermen!  Ki Lalwa in kre pe ganny fermen koumsa menm e sa bann fonksyon pe ganny transfer.  I pou bezwen vin ganny laprouvasyon sa Lasanble!

Mwan mon dir avek Minis tre kler ki mon pou vot kont sa repeal, akoz mon krwar ki sa lorganizasyon I bezwen reste.  Fer tou bann ki’n pran loan e pa’n peye pou re-peye Minis.

 

(APPLAUSE)

 

HON CLIFFORD ANDRE

Revwar ki lenplimantasyon bann Lareg I ganny aplike e sa ki met lanmen dan kof aksyon I ganny pran kont li.

 

(APPLAUSE)

 

HON CLIFFORD ANDRE

Sa larzan se larzan taks pep Seselwa.  R20milyon par lannen I bokou.  E si nou fer sa ki fodre fer byen napa rezon akoz nou bezwen ferm sa lorganizasyon ki pou ed nou bann pti biznes;  det ki pa’n ganny peye ki pa’n ganny kolekte lafen 2017.

Lafen 2017 Mr Speaker bann det bann det bann Departman Gouvernman ki pa ti kolekte ti ariv en total R20, 692, 100milyon avek R2.3milyon pou Departman Rezistrasyon – R507mil pou Departman Labita.

Alors kestyon ki nou pe bezwen demann nou lekor Mr Speaker se eski sa bann det in ganny kolekte? Ki mannyer Registration ki pa sipoze anrezistre okenn dokiman si bann fre pa’n ganny peye avan in fer sa?  I neseser ki Minis I enform nou dan son summing- up; si sa bann larzan in ganny kolekte?

E lekel ki ti dwa sa bann larzan?

Akoz ki Gouvernman pa’n rann nou kont lo sa bann det?

Lapolis:

Mr Speaker Lafors Lapolis I reste en defi mazer pou et fran avek ou nou pep nepli annan konfyans dan Lafors Lapolis. Moral I ba e bokou polisye pe menase pou kite si zot kondisyon pa amelyore tre vit.

Anse Aux Pins pou en legzanp in benefisye avek en nouvo Kordgard, me resours imen ek materyel I reste en defi e napa satisfaksyon lo letan ki I pran pou Lapolis ariv kot en lensidan apre tou sa letan ki pran pou en case file bouze I enkrwayab.

Peyman R25 pou preskripsyon:

Mr Speaker sa propozisyon pou fer en dimoun pey R25 pou preskripsyon I enn ki bon an prensip, me nou bezwen get en kou si sa pa pou ankor ogmant pri lavi.

A sa staz Mr Speaker, mon le refer nou Lasanble e Minis avek nou Konstitisyon Lartik 29 e mon pou quote I dir “the state recognizes the right of every citizen to protection of health and to the enjoyment of attainable and sustainable attainable standards of physical and mental health and with the view of ensuring the effect exercise of this right the state undertakes ‘’- I en lobligasyon ki ganny mete lo Leta ‘’to take steps to provide for free primary health care in state institutions for all its citizens”.

Mr Speaker mon pou demann Minis, pou revwar sa provizyon avan ki nou aplik sa R25 lo preskripsyon akoz I pou ganny konsidere konman en vyolasyon Lartik 29(1)(a) kot I obliz Leta pou donn en free health care avek tou sitwayen.  Akoz Gouvernman Mr Speaker avan ki I entrodwir R25, I pa rod bann mwayen e mezir ki nou dan LDS nou donn li a plizyer repriz pou fer desann pri lavi, e apre I ava entrodwir sa?  Apre ki in anmenn en lamannman, pou nou Konstitisyon, kot nou ava dir poudir ki sa kalite lenplikasyon lenplimantasyon.  I vini a – I vin letan nou pe get bann sityasyon ki devan nou.  Logmantasyon enkontrolab mon apel li Mr Speaker.

Parey Onorab William in dir Seselwa in fatige tann menm tune tou le lannen.  Sa Bidze I enn ki pou fer soufer nou pep.  Sa ki pep Seselwa I oule ozordi, se vwar plis ki zanmen e ki zot pli determinen pou vwar se en bes dan pri lavi ki’n mont par lao nou latet.

I remarkab ki Sesel I enn bann destinasyon pli ser o monn Mr Speaker.  Sa I ganny reflekte dan sa pti logmantasyon dan larive touris pou lannen 2018 konpare avek lannen 2017.

Minis atraver ou Speaker, mon pou et fran avek ou, aret fer Seselwa soufer.  Bann endikater enternasyonal pa vedir nanryen pou nou ler nou pos I reste vid e nou sitwayen I kontinyen vwar li difisil pou fer de bout zwenn.  Ozordi kot ou pase – parey Onorab William in dir – sitwayen I dir sa Bidze pa bon! Sa logmantasyon pou ganny konsonmen par bann lezot pri ki inevitableman pou monte .

Mon ava donn en legzanp Mr Speaker.  Ozordi akoz I pou annan en logmantasyon dan pri komodite taks lo disik, logmantasyon lo elektrisite, ek delo en dimoun ki aranz loto – en garaz ki aranz loto I pou fer sir ki I kapab minimiz son bann depans e I kapab rekouver sa logmantasyon.  Ki I pou fer Mr Speaker?

I pou met sa kou lo son kliyan.  Alors ou al kot li pou ou al fer en servis I pou vin pli ser!  E si ou’n ganny R200 oubyen ou’n ganny R500 I ganny konsonmen dan sa aktivite.  Alors pri pou aranz loto pou ogmante.  Sa pou ariv dan tou sekter menm mon konman en avoka mon pou bezwen ogmant mon pri servis akoz mon pou bezwen pey plis bann utilities! Seselwa in dir nou fatige avek tousala.

Mr Speaker la nou fek vwar bann travayer Seselwa kot Bayan Tree senpleman ganny met deor par bann envestiser etranze.  Nou pe dir ki pri lavi pe al monte ki zot pou fer la ki zot san en lanplwa sa bann travayer?  E zot osi annan zanfan.  Sa Gouvernman Mr Speaker pa pe protez son pep.

Minister Lanplwa I devret entervenir imedyatman e non pa esper en dele letan ki pou agrav sityasyon sa bann travayer.  Mon ti ganny sans vwar sa bann dimoun menm zour ki zot ti ganny zot let e I osi enportan pou fer resorti Mr Speaker, ki lo zot payslip ki mon annan enn de zot Konpansasyon pa’n ganny byen kalkile e byen peye.

E I annan ki’n ganny mwens ki R20mil zot konpansasyon ki due.  Alors ki Gouvernman I bezwen pli I bezwen travay lo sa pri lavi ki pe defons plafon! Sesel pe vin en pei kot Gouvernman mazin zis ki mannyer pou anmas taks apre taks e plis taks san regard bann konsekans sa ki annan lo nou pep.

Mr Speaker mon pa pas en pti kou lo vizit ki ti ganny fer dan mon distrik Anse Aux Pins.

Mr Speaker dan sa Bidze mon pa’n vwar nanryen ki pou mon pa’n vwar nanryen ki pe ganny fer pou amelyor kondisyon sa 5 dimoun ki ti size vizit Prezidan plis ki 1an pase.  Sa bann dimoun ki swa zot bann endividi bann biznes, zot ankor dan menm kondisyon PS Choppy kot Minister Later ki Prezidan ti donn lenstriksyon pou debloke pa ankor debloke mon krwar ki si nanryen pa ganny fer Seselwa fodre pran byen not e met en Gouvernman o pouvwar ki pou pran zot lentere a ker.

E sa Mr Speaker se pa lot ki LDS!  Nou pa pou kapab zis tourn an ron lo tou diferan size Sesel ek Seselwa pe soufer nou kriye zot pa tande.  Nou pou bezwen fer aksyon akoz nou pli determinen ozordi ki yer! Nou vant ek nou pos i nou priyorite.

Swivan vizit ki ti ganny fer dan vizit Anse Aux Pins diskisyon, entervyou ti ganny fer avek bi pou fer semenn leo Capucin ki al Dan Kreson.  Mr Speaker ankor mon pa war nanryen ankor dan sa        Bidze.  Diskisyon – promes ti ganny fer ki an 2019 capital projects pou ganny fer pou sa semen me ankor mon pa vwar nanryen. Zot demann zabitan Anse Aux Pin lekskiz e dir ki problenm se wayleave.  Mwan Mr Speaker mon’n demann zot les mwan konnen lekel zot pe rankontre difikilte avek me ziska ozordi mon pa ankor vwar okenn dokiman ki prouve ki problenm se vreman wayleave.

Alors mon oule dir avek Minis rod en fason pou donn sa bann zabitan, zot semenn.  Zot in fer zot kontribisyon dan sa pei.  Ozordi sa menm pei I drwa zot en semen kot zot ava kapab anmenn zot bann komisyon kot zot dan konro4r e si zot malad lanbilans I ava anmenn zot kot zot.

La ki Minis in dir nou pou annan ankor lanbilans ki pou arive.  Tou le lannen nou tann menm zafer.  Me oli tou sa larzan ki ti’n ganny bidzete pou lanbilans dan lepase? Zot o ase fer!  Klinik Anse Aux Pins pa’n figir dan sa Bidze ditou.  Ki sa nou bann zabitan pa dimoun zot?  Ki mannyer ou le li I ava pey R25 ler son kondisyon I reste parey?  Fan pa marse. Lasal ki panse I pti. Pasyan ek ners pe travay dan bann kondisyon deplorab sa fodre ganny revwar.  Met en keksoz dan sa Bidze pou klinik Anse Aux Pins apre mon a gete ki mon pou fer ler I ariv ler pou vote.

Anse Aux Pins deserves better.  Mersi Mr Speaker.

 

(APPLAUSE)

 

MR SPEAKER

Mersi Onorab Andre.  Mon ava prezan pas laparol avek Onorab Chantal Ghislain.

 

HON CHANTAL GHISLAIN

Mersi Mr Speaker.  Mr Speaker ler mon tann Onorab vin koz avan mwan pe koze i fer mwan mazinen ki i bliy keksoz vitman li en.  Mon annan devan mwan la dan Bidze Reply Merkredi le 19 Desanm 2017 Onorab Andre ti dir, mon quote en parey in ganny dir lo sa verbatim en.  ‘’Avek bi pou kontinyen amelyor lasante nou pep e osi bann … defi dan maladi ki ganny raporte dan lopital konmela, Minister Lasante pou toultan vwar li pe bezwen plis larzan pou li kapab fer fonksyonnen bann servis ki i offer.’

Mon pa konnen si i ti dir offer oubyen sa me selman mon pe lir parey in dir en.  Osi avek en pep ki ekspekte bokou nou pou bezwen detanzaot gete dan  le fitir ki mannyer Gouvernman i pou kapab soutenir sa pep.

Dan sa konteks mon ti a kontan propoze ki Gouvernman i revwar bann servis lasante e sey gete ki mannyer dimoun i kapab kontribye ver zot tretman ou menm konsiltasyon.

Sa i ava redwir presyon finansyel ki ganny mete lo Minister Finans pou finans loperasyon Minister Lasante.’’  Mon unquote Mr Speaker.  Sa letan i ti ankor avoka Mr Speaker.

Mr Speaker lo Bidze 2019 i byen ki la dan sa letan boulverse, en Bidze ki pe profetiz stabilite e progresyon ekonomik i travers devan nou Lasanble.  Stabilite i enportan pou en Nasyon.  En Nasyon ki stab i pli kapab atrakte byennet pou son pep.  Malerezman i pa nou tou ki konpran sa.  Bidze i sa moman kot tou bann rev laspirasyon e swe nou pep i ganny manifeste e i pran laform dan lemonn reel.  Set a sa moman ki en pep i kapab vreman tap tou direksyon divan e vreman santi kwa ki lavenir i annan pou ofer.

Mr Speaker pou konmanse mon’n fer mansyon en letan boulverse, me sa boulvers i pa en ki normal sa.  I pa ditou en fenomenn natirel me plito en nespes mannev politik an plastik ki’n ganny mete an plas zis pou benefis enn de.

En laform politik artifisyel ki pe polye konsyans nou pep avek e nespes refren monotonn e repetitiv ‘’DANNY OUT,’’ sorti kot sa menm lopozisyon permanan ki tou lazournen i sanz son pozisyon lo tou size serye ki travers devan li.

Mr Speaker zisteman la konman mon’n ouver sa liv ‘’DANNY OUT’’ ou vwar sa zafer ‘’DANNY OUT’’ la sa i zis en zafer lake bat lisyen, ouswa lisyen bat lake.  En kanpanny psikolozik ki LDS pe sey kol dan lespri Seselwa zis parey syndicate pe fer.  La mon pa konnen si syndicate pe bat LDS avek sa zafer ‘’DANNY OUT’’ ouswa  ‘’DANNY OUT’’ pe bat syndicate.  Selman sa ki nou konnen se ki ‘’DANNY OUT’’ i en mannev politik LDS avek syndicate.  Me kwa ki laverite lo sa Bidze Mr Speaker?  Laverite se ki devan nou i amann en Bidze ki pe konmans anons botan pou Sesel e letan botan normalman i sipoze annan rekolt ase pou nou tou.  Mon pe koz lo botan Mr Speaker akoz sa lannen i fer 10an depi ki Sesel in rantre dan son progranm makroekonomik nou konman en pep malgre ki nou konnen kot nou sorti me sakenn de nou konman en endividi i pa toultan ki nou vreman asire kote ki nou pe ale e ki larout egzakteman ki pe ganny trase.

La enn bann keksoz ki mon a dir se ki nou pa sezi ase loportinite.  Nou pa profit ase lo sa ki deza devan nou.  Tro souvan nou ekout move laron e olye sers nou prop dibyen nou zis asize e re minen e mazin lo dimal menm kot napa okenn dimal.

Sesel i en pei ki’n sorti top li lendeks imen me eski nou Seselwa nou vreman top lo nou devlopman personnel?  Laverite se non Mr Speaker.  Lo baz devlopman personnel nou ankor annan bokou problenm.  Tro souvan nou dimoun i ezite pou sezi loportinite.

I annan bokou nou pep sirtou bann zenn ki mank konfyans dan zot menm.  Ki pa vreman konsistan dan sa ki zot fer e ki pa disiplinen avek zot prop aksyon.  Tradisyonnelman Seselwa nou en pep ki’n toultan travayan.  Nou lev granmaten  e nou rente ziska tar.  Me sa osi  pa ti le meyer fason akoz imen nou bezwen annan en bon balans lavi.

Mon konsey pou le pep Seselwa i sa.  Botan i aport boner depi letan i letan botan in toultan aport boner.  Me pou garanti ki ou ganny ou par sa boner ou bezwen tras ou direksyon.  Ou bezwen konsistan e disiplinen dan tou sa ki ou fer akoz zwazo pa fer nik dan e sel zour.  Ni ou, ou pa pou batir ou lavi dan en sel zour.  Alors envestir en pti gin ou letan toulezour dan konstriksyon ou prop lavi.  E en zour ou pou trouv rezilta.

Bondye i donn nou 24erdtan sak zour dan lekel ou annan pou fer tou sa ki ou annan pou fer.  Met akote en 2 erdtan ladan pou ou devlopman personnel.  2 erdtan tou le zour zis pou devlop ou i pa bokou.  Mon pe dir sa Mr Speaker akoz letan botan i vini fodre ki sakenn de nou i pozisyon nou pou fer sa rekolt.

Si nou pa devlop nou personnelman si nou pa envestir dan nou lekor nou pou toultan pe debout akote e donn bann move laron lanmen pou konplent dimal kot napa dimal.  Mon pran nou kad travayer Mr Speaker.

Sesel toultan ou’n tann koz lo move travayer.  Me zanmen ou’n tann en mous vole lo move anplwayer.  Me sa bann dimoun zot sen zot?  Ki mannyer eski i arive ki en dimoun i kapab pas plis ki 10an son lavi lo minimum wage ki swa dan sekter prive ouswa dan Gouvernman sa i pa en keksoz ki akseptab.

Travayer Seselwa fodre zot regroup zot ansanm, solider e zwen bann Linyon Travayer.  Sa i le sel solisyon dan sa Sesel modern kot nou’n arive.  Lo kote Linyon Travayer ziska prezan zot pe fer bon lo travay me i annan en louvraz enportan ki bezwen ganny fer dan nou pei.  Si nou tou nou pou rekolte nou par minimum wage i pa en saler.  Minimum wage i pa ou saler.

Ou saler se sa ki ou ek ou anplwayer zot tonm dakor lo la.  Ou aksepte pou li pey ou tan larzan an retour pou ou donn li tan erdtan travay.  Minimum wage i zis sa preskripsyon legal ki fors en anplwayer pou li napa dwa pey ou pli ba ki sa.

Menm logmantasyon i sipoze en size negosyasyon ant anplwaye avek anplwayer.  I pa Gouvernman ki bezwen fors en anplwayer pou donn  son travayer logmantasyon.  E en travayer osi  pa kapab zis aksepte pou reste lo minimum wage vitam aeternam san okenn amelyorasyon dan son kondisyon.

Se zisteman sa bann keksoz koumsa ki kree lanmertim dan dimoun e kree lespas dan leker pou bann move laron antre vin ‘yonyonyon’.  I bezwen annan en konversasyon fran e onnet ant sa travayer ki pe ede kree sa larises e sa anplwayer ki li pe zer sa larises.

En konversasyon pa vedir ki ou pou ganny tou sa ki ou pe demande.  Se pou sa ki apel bann tel konversasyon en negosyasyon.  Me omwen ou ava ganny en bout, kantmenm en pti bout, me sa i meyer ki nanryen ditou.  E nou konman en parti politik ki ti lite pou travayer 18an ganny drwa vote, nou ki’n lite pou amelyor kondisyon travay, nou ki’n lite ki tou travayer i ganny e pansyon ler i vye, nou ki’n lite pou travayer ganny son idantite atraver nou lalit pou lendepandans.  Nou ki’n lite pou dinyite travayer Seselwa. Nou konman en parti nou pou toultan akote travayer.  Pa rod nou !

 

(APPLAUSE)

 

HON CHANTAL GHISLAIN

Pou rezim tousala dan 8 mo ; ‘’Travayer Seselwa zot bezwen debout pou zot drwa !’’

Mr Speaker sa i osi entrodwir mon en lot size.  Sa nouvo palto fann deryer ranplas travayer Seselwa ki pare pou travay avek etranze fodre arete !  Sa sityasyon travayer etranze dan Sesel in ariv dan en staz kriz kot i pe konmans donn nou pei en move repitasyon.  Departman Imigrasyon i bezwen sorti deswit e konmans fer en revi konplet sa sityasyon.  Nou pa pe tret sa sityasyon konman business as usual, akoz la i nepli business as usual.  La i pe konmans vin en nespes fleo kot en zenn manman Seselwa i ganny forse pou montre travay en etranze sansan  i ganny met deor.

Me kisisa sa Mr Speaker?  Kote nou pe ale dan sa pei?  Sekirite lanplwa travayer Seselwa pa pou kapab ganny met otaz par ni bann travayer etranze, ni bann envestiser etranze e ni par nou bann prop Seselwa, ki pe soutir e ankouraz sa bann kalite pratik dan nou pei.

I vre ki devlopman ekonomik i anmenn prosperite pou nou tou me nou pa pou kapab vann nou nanm, vann nou pep, vann nou pei lo non prosperite non pli.  Nou bezwen konnen kote pou tir laliny e la kot nou’n arive mon dir ki ‘’Enough is enough!’’

Mr Speaker si nou pou annan en Bidze ki pou anons botan sa i pou bezwen botan pou nou pep an premye non pa pou lezot.  Lezot ava vin apre.  Nou Seselwa nou’n esper 10an.  La i nou letan.  Mr Speaker menm si sanson in deza sante ki botan, botan in fini ale botan botan pa pou retournen pa pou retrouv ankor, me la apre en dizenn lannen travay dir nou pei pe konmans vwar laklerte e nou pep i konmans respir en nouvo souf.

Lenvestisman ki nou pei atraver Bidze pe fer  dan devlopman nou pep atraver lasante, ledikasyon, lozman e bann diferan progranm sosyal, i enorm.  Se nou  sa pep Seselwa ki’n travay pou anmenn sa rekolt.  E se zisteman nou sa pep Seselwa ki devret benefisye an premye avek okenn boner e prosperite ki dekoul dan bann provizyon sa Bidze.

Mr Speaker mwan personnelman si i annan en mezir bidzeter ki mon pli kontan ki tou leres sa se provizyon pou kree lozman pou bann fanmir Seselwa.  Napa keksoz pli gou ki letan  en fanmir i ganny son prop lakaz pou mwan mon get tou zefor pou batir lozman pou abrit nou Nasyon konman enn ki nob.

Alors mon pou aplodi e remersi tou mezir ki trouve dan sa Bidze ki kapab kontribye pou en fanmir.  Seselwa a ganny son prop lakaz e byensir avek sa kantite konstriksyon ki’n anonse dan Bidze lannen prosenn, sa pou vreman en leksplozyon masiv dan domenn konstriksyon e byensir plis prosperite e plis krwasans ekonomik.

E mon bezwen anons e mansonz ki’n ganny dir isi dan sa Lasanble bomaten.  Bomaten Onorab Afif in asize e fer en kont lo lakantite lentere ki pe al monte lo loan lakaz.  Mr Speaker sa i en mansonz ki pe zis met lafreyer dan Seselwa.  I vre ki to lentere in monte dan sa dernyen 2an.

Me larealite se ki to lentere lakaz pa’n monte.  Tourn lalang Mr Speaker!  Tourn lalang 7fwa dan labous avan koze granmoun i dir.

 

(APPLAUSE)

 

HON CHANTAL GHISLAIN

Mr Speaker mon santi mwan soulaze ki bokou lanfaz pe mete dan Bidze dan domenn lagrikiltir.  Ler mon regard sa kantite konsesyon ki nou bann agrikilter pe gannyen mon pe zis demann mon lekor ki fason nou pa devret vwar en logmantasyon dan prodiksyon lavyann lokal?  E si kou prodiksyon ki zot ti pe dir ti lakoz sa os dan pri lavyann lokal la ki bann konsesyon in al direk lo zot kou prodiksyon,  rezilta i devret en bes dan pri lavyann lokal alors.  Anfen sa reste ã voir ki mannyer sa i deroule.  Me en keksoz ki kler se ki nou bann agrikilter i devret vin pli proactive.

Konmela i annan en demann enorm pou zavoka ek korsol lo marse mondyal.  De fri ki pouse fasilman isi Sesel.  Sa demann ek mankman, sa de fri lo marse mondyal i an rezilta son lizaz.

Bokou zavoka i ganny servi dan prodiksyon bann prodwi labote ki fer i annan e mankman dan sa fri pou konsonmasyon piblik.  Demann pou korsol li son demann i tre o ki fer ki son pri osi i o.

Demann pou korsol atraver lemonn i akoz i ganny konsidere konman e fri mirakilez e natirel konman remed dan domenn lasante.  Zis en pti resers mon’n vwar ki e kilo korsol i kout 2.5 Dolar tandis ki zavoka i kout 2 a 3 Dolar par kilo.   E telman  zavoka i rar L’Europe sa lannen pri zavoka sa lannen ti’n menm ariv 9 dolar lo marse.  Mr Speaker mon’n koz lo sa de prodwi akoz i de prodwi ki pouse fasilman isi e ki pa demann latansyon toulezour.

Mr Speaker nou bann sitwayen aze zot pilye nou kominote akoz zot ranpli avek sazes e konesans lavi ki presye ki nou kapab servi pou nou prop benefis.  I tre enportan pou rekonnet nou bann sitwayen aze e kontribisyon ki zot in anmennen dan nou sosyete.  Wi mon ti MNA ki ti demande pou double sekirite sosyal pou ban dimoun aze 80an an montan.

Sa demann Mr Speaker mon ti fer selman 7 zour pase e mon pa ti pe ekspekte dan 7 zour Minis ti pou’n fini aziste sa e zis met li dan Bidze san  konsiltasyon pou vwar kote pou pran.

La devan Minis Finans avek son bann teknisyen, mon oule repet ankor akoz se sa kategori laz sitwayen aze ki dan plis difikilte pou rezon medikal.  Tandis ki nou bann santener zot, zot pli spesyal alor zot devret ganny byen onore.

Mr Speaker nou touzour antann dir ki en sosyete i ganny defini par la fason ki nou tret nou dimoun aze akoz se zot ki’n trimouse pandan sa moman ki ti vreman dir dan listwar nou pei.  Konstriksyon sa pei ti konmans avek zot e i toutafe normal ki ler zot in ariv moman retret zot re zwir en pansyon.

Malgre ki mon rekonnet zefor pou asire ki zot viv dan dignité. nou bezwen fer fas avek bann sanzman dan kondisyon lavi ozordi.  In plis ki ler pou nou pei rekonnet e asir en pli bon kondisyon lavi pou nou bann dimoun ki aze laz 80an an montan.  E lala ki mon ti dir Minister atraver Mr Speaker.

Mr Speaker mon’n dir ki bann dimoun ki ariv laz 80an an plis i resevwar 50poursan an plis lo son sekirite sosyal.  90an ou plis i resevwar 75poursan plis lo son sekirite sosyal.  Sa i ava annan pou bi ankouraz dimoun pou viv e lavi an bonn sante e an rezilta zot ava viv ziska sa laz.

Mr Speaker i gou tande e trouve ki tou bann santener i ankor reste avek zot fanmir.  E sa i zis montre ou ki ler ou antoure avek ou fanmir e kot ou ganny latansyon e lanmour ou viv lontan.  Nou bann santener zot pli spesyal akoz zot in arive viv 100 lannen avek zot fanmir e sa i  en gro laz.

Plizyer pei atraver lemonn i onor zot bann santener dan diferan fason.  Dan plizyer pei zot resevwar kado e mo felisitasyon par bann Lenstitisyon Leta ler zot selebre santyenm laniverser.

Mon’n fer en pti resers pou vwar en pti pe bann pei ki zot fer avek zot bann dimoun santener.  La Suede par egzanp zot bann santener zot ganny en telegranm sorti kot lerwa ek larenn La Suede.  Italy zot resevwar en let sorti kot Prezidan Larepiblik Italy.  Grande Bretagne e lezot monarsi e teritwar Commonwealth, zot anvoy bann swe ler bann sitwayen i selebre zot 100an e sak fwa zot selebre zot laniverser apre ki ot in ariv 105an.

Mon pe dir dan sa bann pei i posib zot anvoy en let akoz i difisil pou zot vwar zot Prezidan ouswa menm rankontre larenn.  An Irlande i enteresan li.  Zot bann santener i resevwar en sonm 2, 540 Euro ki ekivalan anviron R40mil Sesel.  Leta Ini zot ganny en let.  Japan zot resevwar en silver cup – en sertifika kot premye Minis Zaponnen e sa ki pli enteresan k Barbados se ki zot fer en tenm postal a loner sak santener.

Mr Speaker me nou Sesel, ki nou kapab fer pou onor nou bann santener?  Apard en meday e en pannyen sorti kot Prezidan Larepiblik ?  Mon sizere ki nou donn en logmantasyon 100poursan lo zot sekirite sosyal.  E nou kapab al pli lwen ki sa.  La mon demande ki sa i al ver Minister Lasante spesifikman.  Allocate zot avek e dokter e ners prive ki a la on call pou ki si i ariv en keksoz nenport ler avek sa dimoun 100an an montan i kapab call sa dokter e ners ki ava vin kot li olye deplase pou al lopital.

Mr Speaker tou sa bann keksoz i kapab fasilman ganny fer pou sa bann dimoun dan sa kategori laz.  Fer li par faz me fodre i ganny fer.  E pou sa bann ki ariv laz 100an ou plis sa i kapab fasilman komanse an Zanvye 2019 Minister.  I annan zis 9 zot sa bann dimoun aze 100an ou plis isi sesel.

Nou kapab al pli lwen ki sa akoz mon’n vwar ki ide sa tenm postal parey Barbados i fer i en keksoz ekselan.  Sa bann tenm i kapab ganny vann dan bann magazen souvenir kot Airport ou menm avek bann koleksyonner tenm postal atraver lemonn a en pri ase sibstansyel, senpleman akoz i pou bann tenm postal tre enportan.

Larzan koleksyonnen avek lavant sa bann tenm postal i ava ede pou re donn sa bann dimoun aze sa logmantasyon me pli enportan ankor en tenm postal parey i pou en trezor ki nou kapab garde dan nou ban arsiv.  Mr Speaker pou mon konklizyon ozordi mon oule reflekte santiman enn de Digwa ki mon’n koz avek.  La Digue i en zil ki’n ganny bokou frekante par Prezidan Rene depi son zenn tan.

E i annan serten nou bann Digwa pli aze ki rappel byen Prezidan Rene avek son bann panse politik konmsi sa ti ankor yer.  E dan mon konklizyon mon oule servi loportinite pou reflekte en pe lo sa.  Etranze ki vin envestir dan nou pei zot ava envestir, kree lanplwa, kree larises me pa zot ki pou diriz nou.

Etranze ki vin travay dan nou pei zot ava travay, zot a sonny zot fanmir apre zot a retourn se zot.  Bann pei zanmi ki vin asiste nou zot ava vini zot ava asiste nou an retour nou ava siport zot kot nou kapab me Sesel i reste e pei souveren ki apartien a bann Seselwa Sesel.

I pou nepli letan kot nenport ki endividi pou swazir lo li menm pou al dan pei deor, pou al koz pou Sesel e apre an  retournant ler tou keksoz in so, ler kolye in so dan likou pe ganny trangle, nou sot laba nou dir pa nou.

 

 

 

(laughter)

 

 

HON CHANTAL GHISLAIN

Sa i laliny ki nou lo sa kote latab nou pe tire ozordi.  Sa i pa en keksoz nouvo i zis en retour lopozisyon orizinal parti SPUP.  Mersi Mr Speaker.

 

MR SPEAKER

Mersi Onorab Chantal Ghislain.  Yes Onorab Ferrari.

 

HON JEAN-FRANCIOS FERRARI

Mr Speaker mon krwar ki i enportan pou sa deba pa al – pa glis dan bann domenn ki pa zoli.  Mon ti a kontan met devan ou en point of order anba – en matter of privilege anba 54(7) kot Onorab Ghislain in konpar en aktivite ki mwan mon ti pe pran par ladan avek mon ban koleg ki ti en demonstrasyon dan lavil avek aktivite en Lorganizasyon ki apel syndicate.  Now mon konnen poudir Onorab Ghislain i konnen  i konn sa bann dimoun me mwan mon pa konn zot.  Me selman mon krwar i pa apropriye pou e Lorganizasyon ki en Lorganizasyon kriminel ki lapolis pe fer en lanket ladan ki i ganny konpare avek bann Manm Lasanble Nasyonal.  I pa apropriye e mon ava zantiman, zantiman demann Onorab Ghislain pou li retir sa parol akoz i pa byen e mon pa anvi eksplik li bann konsekans ki kapab arive me selman mon ti ava zis ekspekte i ava retire.  Mersi Mr Speaker.

 

MR SPEAKER

Mersi Onorab Ferrari.  Bon mon osi mon pa’n anvi enteronp Onorab Ghislain ler in mansyonn sa.  Mon krwar sa zafer ‘sendika’ i reste- annou kit li an deor Lasanble.  Le de Leaders in pronons zot lo la dan Lasanble ler bann keksoz in konmans fannen sirtou  Onorab De Commarmond mon napa krwar ki okenn Manm sa 6enm Lasanble i anvi asosye li avek laterer, avek en group ki nou pa konnen lekel zot ki pe esey pran sa pep otaz.  So dan sa laliny nou ti a kontan ki nou kit sa bout deor e mon a donn ou laparol pou retract sa pti bout ki ou’n dir lo sa konparezon e parti en kote latab avek ‘sendika’.  Onorab Chantal Ghislain.

 

HON CHANTAL GHISLAIN

Mr Speaker mwan mon pa’n konpare mon.  Mon zis senpleman mon’n dir ‘syndicate’ pe dir ‘’DANNY OUT !’’, LDS pe dir ‘’DANNY OUT !’’ Se tou.  Mon pa’n konpare mon.  Mersi Mr Speaker.  Prezan si ou le mon tir ‘syndicate’ mon tir ‘syndicate’ ladan.  Mersi Mr Speaker.

 

(Interruption)

 

MR SPEAKER

Ok.  Mersi.  Non annou pa rantre annou pa rantre plis dan sa detay.  Mon ava donn la parol Deputy Speaker.  Onorab Afif.

 

HON AHMED AFIF

Mersi Mr Speaker.  Mr Speaker mon ti a kontan ki Onorab Ghislain anba 54(7) in impute en improper motive lo mon lapar.  In dir poudir bomaten mwan mon’n koz lalang e i site poudir mon’n koz lalang akoz mon’n dir poudir lentere lo housing avek labank komersyal ki mwan mon ti koz lo la i pa korek.  Ki i pou reste i pa pou monte.  Onorab Ghislain pou ou lenformasyon avan mon vin dir bann deklarasyon koumsa mon tyek avek labank.  Mon’n tyek avek 2 labank.  Nouvobanq ki labank Gouvernman.  Mon’n ekrir son Managing Director pou mwan demann li  e in dir mwan lentere i 5poursan pou le moman, me selman varyab dapre marse.  Varyab, ler i monte i pou monte.  Ler mon’n demann – i varyab akoz i pou sanze ler the prime rate i monte e prime rate i ganny revize regilyerman baze lo sa ki Minis in dir.

 

(Interruption)

 

HON AHMED AFIF

Be i ganny revize regilyerman – mon pa’n dir kan i pou ganny revize zot reviz sa regilyerman.  Regilyerman e bann labank i fer sa preski tou le mwan.  Tou le mwan e Minis in fek anonse i pou monte e i pou monte.  Mwan mon dir si i monte si i monte vwala kot i pou ete.

Dezyenmman mon’n ekrir MCB, mon ekrir MCB pou demann zot ki zot Polisi e vwala ki zot dir zot Polisi.  Prime rate minus 2%.  Savedir prime rate ki zot ki determinen regilyerman e ler lentere i monte zot pou mezir sa normalman zot pou vey Treasury Bill rate e i pe monte e Minis in donn bon lendikasyon pou dir i pe al monte par 2poursan.

Ler i pou monte prime rate pou monte li osi.  Ler i monte minus 2%  i mont par 2poursan li osi.  Alors mwan mon pa’n vin mislead sa Lasanble.  Mon pa pou zanmen mislead pep Seselwa.  Mon pe donn zot baze lo fe ki mon’n tyek ek labank Komersyal.  Sel labank mon pa ankor tyek avek se Barclays Bank.  Mon pou gannyen ler mon pou gannyen mon pou enform ou.  Mon pa vin mislead personn isi.

 

MR SPEAKER

Mersi Onorab Afif pou klarifikasyon.  En moman.  Nou tou nou’n fatige en long lazournen.  Annou pa enteronpe.  Onorab Ramkalawan.

 

HON WAVEL RAMKALAWAN

Yes Mr Speaker mwan osi mon ti ava kontan zis fer e pti klarifikasyon.  Onorab Ghislain in fer referans direk avek mwan letan in dir ‘’kolye dan mon likou i so’’ e sa i pe refer avek ler mon ti vizit L’Inde.  E mon anvi dir senpleman avek Onorab Ghislain ki poudir mwan mon FYER ki poudir mon’n ariv dan vilaz kot mon gran per ti ale e zot in met kolye otour mon likou pou welcome mwan tandi ki li i pa ni konnen dan ki parti Lafrik i sorti!  Mersi.

 

(laughter)

 

MR SPEAKER

Non.  Non.  Non, non, non, non non. Non.

 

(Interruption)

 

MR SPEAKER

Ok.  Order!  Order!  Annou pa fini nou lazournen koumsa.  Ok?  Onorab Ghislain.  Order!  Order!  Annou.  Non.  Non. Non Onorab.  I annan en lesanz lo tou le de kote latab, annou fer fini koumsanmenm.  Mon sey lans en konsey.  Annou esey baz nou repons lo ladres ki Minis in fer Lendi.  Minis in fer en long ladres Lendi in donn nou bokou detay and all that.  Annou sey baz nou repons lo la.

Onorab William in fer tre byen ki i pa ouver laport pou nou kapab reponn kanmarad.  Annou fer atansyon ki kalite parol.  Nou kapab fer en referans avek ki en Manm in dir me annou fer atansyon ki mannyer nou adres sa Manm.  Ok ?

Bon nou pa pou pran okenn lezot Manm la me demen bomaten nou pou konmans avek Onorab Flory Larue ki pou swiv par Onorab Jude Valmont.  Pou la ozordi nou pou termin la e mon ti a kontan remersi Minis Loustau-Lalanne, Ms Cesar avek Ms Tamatave ki’n parmi nou pou demi zournen.

E mon ti  a kontan osi remersi SBC pou sa konprenezon e sa bon lantant ki Lasanble Nasyonal avek SBC i share.  E tou bann Manm osi tou mon remersi zot e nou ava adjourn e repran nou travay demen 9er bomaten.

 

(ADJOURNMENT)