Home » Verbatim » 2018 » Verbatim Wednesday 24th October, 2018

Verbatim Wednesday 24th October, 2018

NATIONAL ASSEMBLY OF SEYCHELLES

Wednesday 24h October, 2018

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bonzour tou Manm Onorab.  Bonzour tou dimoun ki a lekout.  E mon annan en bonzour spesyal pour group CARE Club ki avek nou ozordi dan Galeri.  E mon okouran ki i annan en pti prezantasyon ki zot pour fer avek Lasanble avek bann Manm, alor dan break, ler nou pour pran break mwan ti a kontan demann tou bann Manm pour nou vin dan lobby koman nou fini break nou pour dan lobby ansanm avek mwan menm e nou ava kapab aksepte sa pti prezantasyon avek group CARE Club.  E apre sa nou ava kontinyen e kot nou ava envit zot pour nou pran dite ansanm pour nou kapab fer bann pti lesanz.

Mon osi kontan pour accueil en dezyenm group zanfan lekol primer Bel Ombre e ozordi zot ganny akonpannyen par Ms Marie-Helene Adrienne e Ms Genevieve Lucas.  Ankor bann zanfan, yer ti annan en premye group, ozordi zot dezyenm group i form par dan zot Ledikasyon Sivik, mon swete ki zot a kapab swiv nou sesyon byen.  E dan tea break osi tou nou pour, bann Manm osi i ganny envite pour interacte en pti pe avek zot.  Alor mon swet tou lede group CARE Club avek zanfan lekol primer Bel Ombre byenveni dan nou Lasanble e espérons ki zot a kapab pas en bon letan avek nou.

Bon swivan sa mon pour annan en de pti kominikasyon ki mon pour fer avan nou pran nou travay lo Order Paper.  Nou travay devan nou i pour vreman, vreman plen komansman menm lafen sa semenn.  Mon anvi enform tou bann Manm Lasanble ki Vandredi nou pour annan nou en gran delegasyon Sinwan, sa vandredi la le 26 ki pe vizit Sesel, e zot pour rann en vizit Lasanble dan prezans mwan menm koman Speaker, Deputy Speaker, Madanm Clerk, Madanm Deputy Clerk, le 2 Leaders e Chairman IAC.  Sa pour fer dan Speaker’s Conference Room 9.30 bomaten Vandredi la le 26.

 

Mon osi tou anvi enform bann Manm, ki nou pe ganny loner pour nou resevwar Speaker 7enm Parlman, 4enm Repiblik Ghana, Onorab Profeser Michael Aaron Oquaye, ki pour fer en vizit ofisyel Sesel depi le 1 novanm ziska Sanmdi le 3 Novanm.

Speaker Ghana pour rann en vizit kourtwazi isi kot Lasanble, e ankor mwan envit le 2 Leaders e Chairman IAC pou nou zwenn ansanm dan sa vizit kourtwazi, e mon envit tou lezot Manm kot nou pour annan en “Sittings Spesyal.” Son courtesy call i pour 10er bomaten, nou pour annan en Sitting Spesyal 10.30 kot Speaker Oquaye pour adres Lasanble e apre mon ava demann le 2 Leaders pour fer en pti Reply, ok?  En pti welcome, en pti Reply pour li e apre nou ava les zot konnen okenn lezot progranm ki nou pour organize pour sa vizit.  Alor i en Sitting Spesyal i pour pran petet en demi erdtan a 45 minit, tou Manm i ganny envite pour attend.

Mon osi tou mon anonse ki mon pour absante depi Sanmdi le 27 – sa Sanmdi ziska le 1 Novanm kot mon’n ganny envite pour mon asiste The Global Parliamentary Summit against Hunger and Malnutrition, ki pour fer Madrid, Espagne.  Sa osi pour koz en pti pe rol bann Parlman e Lezislater dan fer sir ki tou pei, tou pep i annan sa drwa pour manze, drwa pour alimantasyon e sa osi tou pour swiv par bann enteraksyon ant bann Parlman.  Sa lenvitasyon in sorti kot Prezidan Siena, Espagne e i osi tou in vin atraver Lanbasader Sesel pour Lerop Mr Sylvester Radegonde.  Pandan mon labsans Deputy Speaker i ava ansarz Lasanble Nasyonal.

Mwan osi tou anonse ki Bidze 2019 – Ladres Bidze pour fer Lendi le 5 Novanm 9er bomaten isi.  Lendi le 5 Novanm kot Minis Finans, Minis Maurice Loustau-Lalanne pour vin prezant Bidze 2019.  Kan nou pour konmans reponn, sa pour ganny deside byento dan meeting ABC ki i ava fer, parey labitid avek Leaders avek Party Whips, pour nou regarde kan ki nou pour komans reponn Bidze.  Me ankor le moman ki nou pour komans repons, moman ki nou pour ale nou pour fer nou travay toulezour e pour nou kapab fini sa travay avan nou rantre dan semenn Nwel.

Mon osi anvi anonse ki pour annan en gran delegasyon Linyon Eropeen ki pour an vizit isi Sesel, i konpri plizyer Anbasader e bann High Ranking Officials e zot anvi rankontre avek Manm Lasanble spesyalman IAC e mwan osi tou fer lapel sa 2 Manm ki lo ACP EU me mwan, me zot deza dan, lo Komite IAC, sa rankont ki pour fer avek Lasanble Nasyonal pour fer le 7 Novanm, Merkredi le 7 Novanm National House 10er bomaten.  Rezon ki nou pe fer National House, se Lasanble Nasyonal napa en Conference Room ase gran pour nou kapab resevwar sa bann dimoun.  Mon krwar i annan plis ki en 20tenn zot e ler nou pe konpri bann Manm Lasanble tou e alor nou bezwen ase lespas.  So vwala en pti pe bann kominikasyon ki mon’n anvi pas avek bann Manm Lasanble bomaten.

Bon nou ava al direkteman lo nou Order Paper e nou ava pran prosen item lo Order Paper sa se Mosyon No.2 e Mosyon ki anmennen par Dirizan Zafer Gouvernman Onorab Charles De Commarmond.  Onorab laparol i pour ou.

 

HON CHARLES DE COMMARMOND

Mersi Mr Speaker.  Bonzour Mr Speaker. Bonzour tou Manm Onorab, bann zanfan sorti lekol Bel Ombre e bann kot CARE e tou dimoun ki a lekout – bonzour tou dimoun.

Mr Speaker Mosyon ki devan nou i lir koumsa;

That the National Assembly resolves to approve the supplementary estimates of SR436,393,406.61 cents laid before the National Assembly in accordance with Article 154 (6) of the Constitution read with Article 154(7) of the Constitution.’

Mr Speaker Gouvernman pe demann laprouvasyon sa Lasanble pour en Mosyon Bidze Siplemanter an 2018 pour en sonm parey mon’n nonmen R436,393,406,61sou.  Swivan legzersis Midyear Review ki’n ganny fer, ki ganny fer tou-le-z-an pour revwar performans Bidze, tou bann Bidze ki’n ganny allocate pour bann diferan progranm e proze Gouvernman in ganny vwar pour en 2enm Bidze Siplemanter.  E nou’n vwar poudir en 2enm Bidze Siplemanter i neseser, pour asire ki Gouvernman i konplet son bann progranm kot i neseser e ki i vwar kot i annan mankman resours.  Me pli enportan kot i vwar i annan savings an vi pour bann diferan rezon reallocate sa bann savings kot i neseser.

Alor Mr Speaker nou pour vwar ki dan sa Bidze, dan sa sonm 436.393 milyon ladan i annan en sonm R192, 55, 80 ki osi pe ganny propoze par Gouvernman koman budget cut e osi en sonm R46, 977, 880 ki pour ganny reallocate an vi ki bann diferan transfer ant bann diferan responsabilite oubyen progranm, ki’n ganny transfer ant Gouvernman.  Sa i fer ki selman zis R196milyon,864mil anviron ki pour ganny fer si oule, i dir ou ki pour fer vreman en lenpak lo Bidze ki larzan adisyonnel ki sa Bidze Siplemanter pe demande.

E ler mon pas lo bann detay, nou vwar ki saler en sonm 233 milyon, 679mil pe ganny demande pour saler.

E ladan R967mil, 980 pour Departman Lenvestisman pour peyman aryeraz lo withholding tax.  Nou vwar poudir i annan 12.8 milyon pour Departman Ladefans pour kouver lenpak zot Scheme of Service ki ti ganny enplimante an Oktob 2017.  I annan osi R375mil, 940 pour Departman Zesyon Risk e Dezas pour anploy kapasite adisyonnel, pour li kapab fer son manda byen e vin pli efikas.

I annan osi R28mil, 710 pour Lotorite Lapwentman Konstitisyonnel – CAA, pour kouver aryeraz dan income tax. 

I annan R13, 500 pour Public Service Appeals Board PSAB pour kouver shortfall dan zot Bidze saler.  I annan R1.6milyon pour Departman Finans pour kouver lenpak lenplimantasyon son Scheme of Service ki ti pran lefe desanm 2017.  I annan 5.957milyon pour Departman Lapolis pour kouver aryeraz dan income tax.  I annan osi R618mil, 530 pour Minister Lasante pour kouver aryeraz dan income tax osi.

Nou vwar poudir i annan R198mil, 960 pour Procurement Oversight Unit pour kouver shortfall dan son saler li osi.  E R339mil, 490 pour Lazans Meteo pour kouver ranplasman bann zofisye kle.

Mr Speaker i osi annan en sonm 3.128 milyon pour kouver shortfall dan saler bann lapwentman Konstitisyonnel, Constitutional Appointees e 207.614milyon pour kouver aryeraz bann peyman Sekirite Sosyal lo bann diferan benefis non-monneter ki ganny donnen dan Gouvernman, or par Gouvernman.  Sa i baze lo odit ki ti ganny fer par Komisyon Reveni SRC.

Goods and Services’, ‘Byen e Servis’; ‘Goods and Service’s ladan i annan en sonm 62.751milyon pe ganny demande dan sa Mosyon, Bidze Siplemanter e ladan sa sonm i annan R636mil, 290 pe ganny rekomande pour Lakademi Tourizm – STA pour kouver bann depans miner lo son loperasyon.

R500mil pour Departman Registration pour kouver kou loperasyon e nouvo lofis pour en Intellectual Property; i annan R995mil, 110 pour relocation, re lokasyon lofis bann servis Departman Kiltir ki ti dan Libreri Nasyonal.  I annan osi R880mil, 610 pour Departman Trade pour kouver VAT lo son rent.  R670mil, 800 pour Procurement Oversight Unit pour kouver rent ki’n ogmante e osi kou bann advert ki zot fer ki lakantite osi i kontinyen ogmante.

I annan 25.670 milyon pour Health Care Agency pour kouver shortfall dan housing rent ki pe kontinyen monte, overseas treatment, lab supplies, savedir bann bezwen pour laboratwar, drugs e overseas air fares.  I annan en sonm 10 milyon osi pe ganny rekomande pour National Sports Council.  Yer Minis in dir nou pour preparasyon bann atlet pour Zwe De Zil Losean Endyen lannen prosenn.

I annan R225, 500 pour Lenstiti Kreol pour son re lokasyon lofis Providence.  14.9 milyon pour STAR an vi ki plan pour Gouvernman repran zesyon landfill in ganny pouse pour pli tar.

Bann proze; Dan Bidze pour proze capital projects nou pe koze la, i annan en sonm R200mil pour Departman Registration pe ganny rekomande pour reparasyon son lofis ki pour aprezan osi okipe lo ground floor e R700 mil pour Lakademi Tourizm pour ki i konplet tou travay lo staz, lo premye staz sa lekol Tourism laba.

I osi annan en sonm R305, 700 ki pe ganny rekomande pour National Arts Council pour konplet repeyman son loan ki ti ganny pran pour fer Galeri lar ek cafeteria, sa i a fer ki Gouvernman i a konplet son Polisi Treasury Single Accounts Mr Speaker.

Bann lezot progranm Gouvernman: Mr Speaker i annan osi en sonm R600mil ki pe ganny rekomande pour Seychelles Chamber of Commerce and Industry, SCCI ki ankor enn fwa in apros Gouvernman pour demann lasistans.  Nou rapel dernyen fwa lannen pase sa ti ganny koupe, nou pa ti donn zot.

E bann lezot benefis Mr Speaker,

‘’benefits and approved programs of Social Security Fund;

Mr Speaker en sonm 33.340 milyon pe ganny, pe osi ganny rekomande pour retirements benefit.  Sa i annefe en omisyon fer par Lazans Proteksyon Sosyal lo bann dimoun ki’n pran retret ti pe ganny peye lo vye rezim. 27 milyon, pour Home Care an vi logmantasyon kontinyel dan demann ziska ki en revi lo zesyon sa bann zafer Home Care la, e bann benefis i ganny fer tre byento.

Gouvernman pe osi rekomande dan sa Bidze Siplemanter, pour asiste SPTC avek ankor en sonm R3.5 milyon pour li kapab aste spares swivan dife e dernyerman, ki dernyerman ti annan laba.  E osi 27.346 milyon pour Contingency pour kouver depans konpansasyon fungus – dapre mwan sa, e Departman Kiltir ek bann lezot provizyon ki kapab arive ziska lafen lannen.  Sa konpansasyon pour ganny peye lanmwatye sa lannen e lot lanmwatye dan Bidze lannen prosenn Mr Speaker.

An konklizyon Mr Speaker, sa i alor i fer en sonm 300 sa bann sif ki mon’n mansyonnen la, i fer en sonm R389milyon, 415mil, 530 an tou, me ladan nou vwar osi i annan en sonm 46.977milyon lo dezyenm annex ki pe ganny reallocate direkteman swivan sa bann restriktirasyon pour transfer manda pour staff dan bann diferan Minister ou Lazans.  Sa i fer an total pour sa Mosyon Bidze Siplemanter pour alor vin R436 milyon,393mil, 406, 61 sou e ladan en sonm parey mon’n dir o komansman en sonm R192 milyon, 551 mil, 80 pe osi ganny rekomande koman budget cut dan bann diferan Minister e Lazans lo Bidze.  Sa i swivan si oule dir legzersis Midyear Review parey mon’n dir e mazorite sa bann cut la, sa bann budget cut i form par bann savings osi avek proze ki pa pour materyalize sa lannen, e Gouvernman in deside pour reprioritise sa bann larzan kot in idantifye, par en Bidze Siplemanter olye ki sa bann Minister i servi li pour lezot keksoz, mon krwar nou konpran sa ki nou pe, lapros ki nou pe pran.

E parey mon’n dir dan lentrodiksyon Mr Speaker, e alor sa zis an realite sa zis R196milyon, 864mil, ki annefe larzan adisyonnel vreman pour sa Bidze siplemanter, sa i an vi ki lafason ki Bidze i ganny apropriye direkteman par Minister, tou savings ki Gouvernman i anvi i gannyen, i reallocate e en budget cut i bezwen ganny fer e en nouvo Mosyon pour en bidze siplemanter pour sa Minister i bezwen ganny osi met devan Lazans ouswa sa progranm e prezan si oule i vin sa bann nouvo bezwen la.

E Mr Speaker se sa bezwen ki pe ganny demande, e alor mwan prezant e soumet sa Mosyon pour laprouvasyon nou Lasanble Nasyonal.  Mersi Mr Speaker.

 

MR SPEAKER

Mersi Onorab De Commarmond.  Okenn Manm ki segonn Mosyon?  Onorab Sebastien Pillay?

 

HON SEBASTIEN PILLAY

Mersi Mr Speaker.  Mr Speaker mon oule segonn sa Mosyon.  Avek ou permisyon mon ti oule azout 2 pti keksoz very briefly.

 

MR SPEAKER

Ok Mosyon i ganny segonde.  Mon donn ou laparol.

 

HON SEBASTIEN PILLAY

Mersi Mr Speaker mon pa pou long.  Mr Speaker sa ki enportan pou nou osi soulinyen se ki lefe ki Sesel nou’n met en target pou nou primary surplus savedir larzan – in terms of nou lakantite sirplis larzan ki nou annan, i enportan ki nou eksplik popilasyon ki sa Bidze Siplemanter pa pou afekte nou primary surplus  dan en fason signifikan, akoz nou pou still fer 3 poursan nou GDP  ki vedir nou pou reste lo target pou nou kapab maintain nou bann commitment an se ki konsern nou repeyman nou bann det e an se ki konsern nou  bann commitment enternasyonal e nou bann commitment lokal pou nou bann det.  So sa i enportan ki nou soulinyen.

        2enm pwen ki i enportan pou nou soulinyen – nou fer piblik konpran, se ki Minister Finans malgre i pou vwar savings across bann diferan Departman, i pa pou kapab reallocate sa bann larzan li menm san ki i vin kot nou Lasanble Nasyonal.  Akoz sa i pou vedir ki i pe varye bann Heads ki sa bann Departman in gannyen e sa i kapab ganny fer zis par Lasanble dan letan apropriyasyon.  Savedir letan nou pe diskit Bidze se sel letan ki nou kapab varye sa bann Heads se la.

        So nou kapab redwir me nou pa kapab fer li monte e pou fer li monte i bezwen retourn kot Lasanble avek en Bidze Siplemanter pou li fer sa bann virement ki neseser pou li ferm sa bann transfer.

E en konponan enportan Mr Speaker e ki Lasanble in koz lo la se bann graduate housing allowance i annan an tou apepre 50 konponan graduate housing allowance across bann diferan Departman Gouvernman.  E sa i fer ki se pour sa rezon ki en kantite bann savings ki‘n ganny fer pe ganny re vire dan sa bann area spesifik.

        Apre en dernyen pwen Mr Speaker an se ki konsern lenpak sa Bidze Siplemanter si nou  get son total Mr Speaker nou pou osi remarke ki i annan en konponan larzan ki pe retourn kot SRC ki to the tune of around 200ekek milyon.  So sa i fer ki dan bann realignment ki Gouvernman  pe fer an relasyon avek bann deba ki’n pase dan Lasanble – bann demann ki  ganny fer par bann Manm Lasanble, Gouvernman in fer sir ki aprezan bann in terms of bann commitments ki bann departman Gouvernman i annan avek SRC, sa bann commitments pe ganny met.  E sa i ava fer ki sa gro Bill ki SRC toultan i prezant ek nou lo bann arrears ki i annan, Gouvernman li i ava pe evantyelman tir son lekor dan sa Bill e nou ava konpran kote vreman prezan bann antite oubyen bann konpannyen ki pa pe pey tax lekel sa bann e nou ava kapab pli spesifik dan bann lafason ki nou pou target sa bann konpannyen.

Avek sa Mr Speaker mon ti a kontan soumet ki nou aprouv sa Mosyon.  Mon pa konnen si lot kote latab zot ti ava annan serten konsern ki zot ti ava kontan eksprimen regarding sa.  Mersi Mr Speaker.

 

MR SPEAKER

Mersi Onorab Sebastien Pillay.  Mon ava donn laparol Onorab Ferrari.

 

HON JEAN-FRANCOIS FERRARI

Mersi Mr Speaker.  Bonzour tou dimoun.  Bonzour bann dan Klib CARE e tou dimoun ki a lekout.  Mr Speaker mon lentervansyon lo sa Mosyon i komans avek en remersiman ou Minister Finans lo demann Deputy Chair FPAC ti rankontre avek nou Lendi sa semenn pou sey eklersi nou lo enn de bann Heads lo ki zot pe demande lo  sa Bidze Siplemanter ki Gouvernman pe demande.  Nou’n ganny serten lenformasyon me nou’n ganny osi promet ki nou pou ganny serten lezot detay sa group ki ti vini –Minis, Secretary of StatePS ti napa tou bann detay ki nou ti pe swete gannyen.

E swivan sa nou’n rankontre koman en group – e en caucus lo sa kote latab e nou’n partaz avek nou bann Manm bann pwen ki nou’n leve – bann lenformasyon ki nou’n gannyen.  I kler pou le moman ki i annan plizyer kestyon ki nou ti a swete ganny en larepons oubyen serten detay.  Les mwan dir Mr Speaker ki depi ki nou’n – dan sa nouvo Lasanble ki nou ladan, avek Gouvernman i annan en serten lantant konmkwa nou pou napa bann depans ki ganny fer sa apropriyasyon.  E menm ler pou annan bann demann siplemanter, sa bann demann siplemanter i ava ganny diskite avan e ki Lasanble pa ava retrouv li devan en fait accompli.

Sa Mosyon devan nou ozordi pa en keksoz ki mwan mon konsider en keksoz ki pa kler dan Konstitisyon; sa Mosyon ki devan nou ozordi pe demann nou pou aprouv sa bann sif, me apre lannen prosenn ki pou vin devan nou koman en Bill.  Sa deza an li menm i en keksoz ki en pe difisil.

E 2enm keksoz se ki sa bann vot ki ladan, si nou swiv Mosyon egzakteman parey Onorab De Commarmond in mete, ki’’ nou pran en rezolisyon pou nou aprouv sa bann estimate’’ nou pe deza donn permisyon Gouvernman pou zot depanse.   Now i pa posib pou nou donn permisyon pou depanse tan ki nou pa ankor ganny enn de leklersisman.   E Mon krwar Lasanble an zeneral – pa zis FPAC,  me Lasanble an zeneral i enportan ki zot ganny sa bann leklersisman ki zot pe rode.

Les mwan avek ou permisyon Mr Speaker, vreman briyevman pas lo serten pwen ki nou annan en pe kontansyon lo la.  I pa tou bann pwen – mon’n pran detrwa akoz lalis i long;

Departman Ladefans i annan kestyon ki nou ti a kontan demande lo detay sa nouvo Scheme of Service pou lavaler apepre 13muilyon ki’n ganny demande la pou nou sey konpran son bann pou lekel i pou ale?  Akoz?  Akoz i ti sipoze komans an 2017 i pa’n komans …? E akoz bann kalkilasyon pa’n ganny fer byen?       Akoz?  Eski tou bann – si i Scheme of Service eski sa pou kouver bann kestyon SVPD?  Mon krwar SVPD zot dir ki bann dimoun ki pe rod zot bann letan ki zot in travay lo bann sa…? Konmsi sa se bann kestyon ki konmsi i enportan.

2enm nou ti a kontan ganny serten detay lo Income tax arrears within the Presidential Emoluments ki li i dan en bundle of depans pou lavaler R3.1milyon – i annan lezot pou ex-Speaker ki’n ale ki’n resign, donk li in ganny son bout – son benefis, me i annan en bout ladan ki nou, nou ti a kontan konpran.

Nou ti a kontan ganny en general statement ki detay lo sa ki Onorab lot kote in koz lo la pli boner – setadir graduate housing allowances.  I vre ki nou vwar ki in annan en sonm apepre R9.8milyon ki’n ganny transfer anba Lotorite DPA pou bann respective Ministries, Departments and agencies.  Me solman nou vwar poudir i en gro sonm apepre R16milyon – i enportan ki nou ganny en pe detay lo la.

Home Carer Scheme Minister Lazans pou Proteksyon Sosyal pe demann nou en ekstra R27milyon.  Mr Speaker mon krwar i enportan ki  nou ganny en lenformasyon lo la akoz nou ti spesifikman demann Lazans pou fer en gro zefor pou pli byen manage zot Bidze ki zoot ganny en pou Home Carers pou fer sir ki i annan en pe plis supervision ki pou le moman i vreman, vreman, vreman pa egziste.  Ki mannyer zot pe manage sa?  ki mannyer zot pe fer en travay ki fair – ki annan lazistis ladan; ki sa dimoun ki merit ganny en varer i gannyen e sa dimoun ki pa merite ganny en carer, i ganny dir poudir ou pa merite pou tel, tel rezon.  Donk nou pe rod lazistis e nou pou ganny sa atraver leksplikasyon.

Mr Speaker Onorab De Commarmond in mansyonn en sonm R600mil pour SCCI ki malgre ki dan Bidze proper nou ti dir klerman nou ti met nou pozisyon lo la klerman ki nou, nou santi poudir si i annan en lorganizasyon dan Sesel ki devret kapab raise son larzan atraver son bann Manm si i annan en lorganizasyon ki kapab fer sa se SCCI!  Si SCCI pa kapab fer sa, napa okenn lorganizasyon ki kapab fer.  Akoz zot dan biznes e se zot ki pe fer travay bokou larzan dan Sesel e nou pozisyon i kler lo la!  Nou pa pe siport sa vot.

Problenm se ki zot pe demann nou ‘’resolve to approve.’’ Nou pa kapab ‘’resolves to approve’’ en keksoz ki nou kont.  Alors i enportan ki nou ganny en konversasyon avek Minister Finans pou nou demann zot pou sey tire!  Akoz nou pe dir zot non nou pa pe siport sa!

Management of landfill by STAR – R15milyon Mr Speaker.  Mon krwar i enportan ki nou demann sa bann kestyon – demann kestyon pou nou gete akoz?  Akoz LWMA ti pou fer sa travay mon pa konnen si ti pou kout R15milyon me selman finalman at LWMA dan Bidze lannen pase zot ti dir nou zot pou fer e san demann nou permisyon zot in donn sa avek STAR e pou STAR fer sa management! Kekfwa i annan bann b on rezon – bann rezon valab akoz zot in fer sa me selman mon ti ava kontan demann zot, ler zot in fer sa eski zot in negosye?  Zot kapab donn nou laprev poudir zot in ganny bann pli meyer pri?  R1.2milyon par mwan pou management en landfill i en gro sonm larzan – i fer R40mil par zour!  So sa, sa bann keksoz ki nou ti ava kontan gannyen.

SPTC nou fek mansyonnen la – R3.5milyon.  Mr Speaker ti kler lo televizyon ki dife pa’n ti komans kot SPTC!  Dife in komans lot kote kot mon krwar Mr Francis Savy ki fer bann biznes partou ki lwe menm – mon pa konnen si later pou Part8i Lepep oubyen si pou Gouvernman, selman nou konnen poudir i annan sa bann keksoz laba! Alors nou ti a kontan konnen be ki – eski  Lasirans – sa bann msye ki pou pey sa oubyen nou ki pou peye?

Tousala se bann kestyon ki enportan.  Alor e dernyen pwen, general statement lo bann ‘’savings and recruitment.’’

Mr Speaker i annan – ler mon kalkile, i annan 12milyon dan bann Minister – i annan apepre 15milyon dan bann Regulatory bodies – i annan 8.7milyon ki fer en total R35 – R40 – R44milyon akoz nou pa’n recruit! Nou ti a kontan ganny en statement lo la pou gete be ki pe arive?  Akoz nou pa pe recruit?  Nou pa pe donn sa bann dimoun sa ki zot merite?  Nou pa pe gannyen travayer?  Me si nou pa pe ganny travayer, eski nou pe pey zot byen oubyen nou pa pe pey zot byen sanmenm zot pa vini?  So sanmenm sa bann kestyon ki enportan ki nou annan en deba lo la.

Alors Mr Speaker pou mwan pa pran bokou letan sa Lasanble mwan mon ti ava vreman lans en lapel avek lot kote latab pou permet ki sa vot lo sa Bidze Siplemanter i ganny deferred pou en semenn. E mwan mon ti ava sizere ki semenn prosenn sa Mosyon i kontinyen reste lo – menm si nou’n pran en lot       Mosyon apre i repran presedans dan n ou Order of Business.  Pou nou pran li premye keksoz – premye Mosyon semenn prosenn e mon ti ava dir ki a sa moman la nou ti ava envit – Lasanble ti ava envit bann spesyalis dan Minister Finans – enn de teknisyen E nou, nou ti ava rekomande e ava aksepte ki Lasanble i travay pandan en pti moman koman en Komite pou nou zis ganny sa bann repons e pou nou kapab ava nou pran sa vot lo sa R400milyon.  Mon krwar i enportan piblik pe ekspekte ki nou ganny en repons –    Onorab De Commarmond in eksplik nou – in lir nou bann Headings me nou osi nou’n lir bann Headings me selman i annan en de detay ki enportan ki nou gannyen.

Alor Mr Speaker sa i ava nou pozisyon  – nou pozisyon lo sa kote latab e me mon krwar kekfwa i annan enn de Manm ki ti a kontan zis apiy enn pti pe sa apre nou ava gete ki Leader of Government Business i dir.

Mersi.

 

MR SPEAKER

Mersi Onorab Ferrari.  Bon eski i annan en propozisyon ki’n ganny fer – ou pe reponn son propozisyon akoz ou pou annan ou Right of Reply apre – ok?  Ale Onorab De Commarmond.

 

HON CHARLES DE COMMARMOND

Mr Speaker, mersi bokou.  Mwan mon pa pe konpran ki pe arive.  Nou, nou ti’n tonm dakor dan ABC ki i annan 2 keksoz – i annan 2 lapros vizavi Bidze Siplemanter ki mon krwar nou’n adopte sa bann zafer – i deza annan prezedans e mon ti met klerman – mon ti dir either nou diskit – nou fer en deba lo Mosyon – dan sa sans la mon ti dir eski nou apel Minister Finans nou al dan Committee Stage nou apel zot, zot eksplik nou substantiate tou sa bann keksoz ki zot pe fer?  Oubyen nou fer deba lo Bill letan i vini?  Enn ant le de.

Nou pa pou perdi letan Lasanble pou fer tou lede me enn oubyen en lot lapros. Me nou ti’n tonm dakor lo premye lapros – zot dir ok lo 2enm zot dir ok nou pa pou debat lo Mosyon nou a debat lo Bill.  E si nou oule son lanvers, mwan mon napa en sou problenm nou adjourn Lasanble la tel – Finans i vini nou al dan Committee Stage nou eklersi tou sa.  Si sa bann leklersisman i pa deza ase, nou oule ankor latransparans, e tou mwan mon napa en sou – en sou problenm e se sa anfen kont nou ti propoze inisyalman.  Me zot ti dir non nou a diskit lo Bill letan i vini pa lo Mosyon.  Me mwan nenport fason ki zot, zot anvi – menm si zot pa oule aprouv sa – zot oule vot kont – sa osi mon napa problenm.  Mannyer nou anvi – fer mannyer zot anvi.  Mersi.

 

MR SPEAKER

Non.  Annou – mon krwar nou ganny dan mon kote from the Chair mon pe konpran keksoz lotreman.  Annou pa al dan poudir annou kill sa Mosyon – annou vote – annou pran en vot kot epi nou pou vwar lot kote latab swa i pou abstain, i pa pou donn sipor zis en kote – so annou fer keksoz byen.  Parey mon toultan mon kontan servi sa mo kot pou travay pou lentere Lasanble Nasyonal nou toultan rod en konsansis – ok?

Mon krwar sa ki mwan mon’n konpran from Onorab Ferrari i pa’n ouver en deba lo sa Bill.  I pense – mon pa ti asiste Komite FPAC Lendi ki ti en Special Meeting – li in pense ki zot pa’n ganny ase detay.  In fer sorti dan son lentervansyon e zot ti a kontan plis detay e se sa rezon ki i pe dir annou pa pran en desizyon lo sa Mosyon – ‘’don’t kill the Motion’ which is a good Motion e ou’n prezante ou’n dir ki bann rezondet deryer sa bann depans ekstra me pou kapab rod en pti pe plis – annan fleksibilite rod en pti pe plis detay.

Bon i pa’n move koman en Mosyon yet – in fer en propozisyon avek – mon ava donn laparol en pti moman Onorab Andre ki’n lev lanmen and then I will come back to you Onorab De Commarmond. Onorab Andre.

 

HON CLIFFORD ANDRE

Mersi Mr Speaker.  Bonzour tou Manm Onorab – dimoun a lekout e bann zanfan e lezot envite ki dan Galeri.

Mr Speaker avan mon tous en pti git lo sa Supplementary Appropriation Bill mon oule zis sey eklersi en pti pe nou Lasanble; provizyon ki Onorab De Commarmond in vin anba la  – anba nou Konstitisyon se 154(6) ki dir si ou’n fer en depans oubyen ou pa ti’n apropriye larzan pou sa depans respektif  – mon ava lir son bout an Angle – kot i dir ‘’A supplementary estimate showing the sum of money required or spent shall be laid before the National Assembly.’’

So letan nou pe get Mosyon – Mosyon i osi vin anba 154(7) -154(7) i dir ‘’where in respect of an financial year a supplementary estimate laid before the National Assembly in accordance with Clause 6 has been approved’’ – i korek so in aprouv anba 6 ‘’by a resolution of the National Assembly a supplementary appropriation Bill shall be introduced.’’

So mwan letan mon pe gete in fini dir nou la en supplementary estimate pou ganny entrodwir in the next financial year.  Mwan mon pe sey gete eski nou pa kapab divors sa 2?  Akoz anba 154(6) i dir ou anmennen pou nou ‘’resolve to approve.’’ So we resolve we approve anba 154(6). Aprezan son lannen answit letan pou anmennen i vin anba 154(7) akoz anba 154(7) i dir ou letan nou’n fini approve.  So mwan mon e dir annou pa fer tou lede ansanm akoz i annan bann konsekans ki si nou pa aprouv sa Supplementary Bill prezan on one ou’n fer 154(7) so i annan bann issues oubyen – ki mon krwar nou bezwen pe reget en pti pe.

2enm pwen mon pou menm si Onorab Ferrari pa’n anmenn en Mosyon mwan mon pou dir annou anmenn en Mosyon pou nou anvoy sa Bill pou semenn prosen –

 

MR SPEAKER

I pa en Bill la  – e en Mosyon.

 

HON CLIFFORD ANDRE

Sorry, sorry sa supplementary estimate  en  – sa Mosyon  – my apologies Mr Speaker, sa  – Konmsi sa supplementary estimate ki subject of the Motion nou ava anvoy li pou semenn prosen, pou nou kapab ganny en pti pe plis detay akoz letan mwan mon gete Lapolis ladan in demann li 5.9milyon.  5.9milyon e lo la in mete ‘’to cater for dues in relation to income tax arrears’’ eski sa income tax ki FIU pa ti peye?  Ki nou’n dir ki nou – nou tou nou’n tande – nou tou nou’n tande lo televizyon – FPAC kot in dir ki zot pou al fer Minister Finans peye.  Eski pa pe pas par back door pou gannyen pou peye?  Akoz FIU ti annan bann – ozordi bann fonksyon pe al avek Lapolis.

So mwan mon ti ava kontan ganny sa – apre letan nou get dan sa estimate pa pou mwan gat letan, akoz nou konnen ki nou pou annan sa bann deba, me selman zot ava vin prepare – ler nou pe gete tou Minister i annan additional funds relating to graduate housing allowance.  Konbyen graduate zot anploye depi Desanm? Kot nou tande poudir i annan bokou graduates ki dir ou i pa pe ganny en travay so mon krwar i enportan ki letan Minister i vini i dir nou  Minister  -par egzanp annou pran en pti kou Department Information Communication and Technology pe demann ou 560mil alors ki kantite in anploye ki nou bezwen donn li ankor 560mil?

Departman Zidisyer ki kantite in anploye ki nou bezwen donn li 280mil?  So ti a bon ki nou ganny sa bann lenformasyon pou nou kapab osi demen nou substantiate.  e bann Schemes of Service ki zot in mete akoz letan zot ti vin kot nou ti annan provizyon dan bidze ki ti’n ganny fer pou new Schemes of Service.  Mon krwar  – mwan mon pou pran mon letan pou mwan al get verbatim an referans avek sa bann Departman ki ti dir poudir sa Bidze i pou new Schemes of Service, ozordi i vin kot nou i dir nou en Supplementary pou new Schemes of Service.  Konmsi nou bezwen ganny en bon leksplikasyon akoz sa se larzan pep Seselwa ki nou pe dir pou depanse oubyen ki’n depanse!  I bezwen annan zistifikasyon avek pep Seselwa lo ki mannyer son larzan pe ganny depanse e ki li i pe vwar – nou’n pe annan en Mosyon ki pe dir pri lavi oubyen bann inequalities Onorab William pou anmennen, mon krwar nou bezwen fer sir ki nou ganny sa byen.  Si inequalities i pe ganny koze par lefe ki nou vin avek en kantite Supplementary Budget kot apre pri lavi i kontinyen reste o e sa dimoun pa pe vwar sa.  Menm si nou pe dir pou annan 3 poursan surplus the common person ki ekri nou, nou oule konnen ki mannyer sa i afekte nou!

Mersi Mr Speaker.

 

MR SPEAKER

Bon.  Non, Onorab Pillay mon annan lezot Manm.  Ou’n koz en kou – mon annan lezot Manm ki lo lalis.  Mon pou donn zot en pti sans.  Ok?  Zot pe fer en pti entervansyon bref pou zot … I’ll come back to you.  Ok?  Zis mon anvi ….

 

(Interruption)

 

MR SPEAKER

Order!   Zis mon anvi ankor met lo rikord.  Anvi ki nou vwar nou sa sityasyon parey i fer ankor travay ki mannyer Egzekitiv pe delivre.  Sa Supplementary ankor i vin dan en fason ki nou pe rush things through.  Ok nou tou nou ti konnen poudir nou ti’n met 29 Oktob pou Bidze e apre ki Minister Finans in dir nou ki poudir i annan bann aktivite ki pe mark 10an Lanniverser bann Reform Ekonomik ki zot ti fer nou’n agree pou anvoy li en semenn pli tar.  Me ankor mon santi poudir i parey bann Bills ki nou pe gannyen ki zis i vini vitman zot anvi pase vitman, me apre nou vwar en ta fot ladan ki ganny withdrawn nou pe vwar ankor ki en Siplemanter pe ganny rush through the Assembly san ki Manm i ganny bann detay ki zot pe rode.  En moman Onorab Commarmond ou pou annan ou drwa pou ou koze.  Ok?  Se sa mon krwar ki’n lev sa.  Si FPAC ti bezwen fer li en Urgent Meeting Lendi akoz sa request ti vin semenn pase.  Am I right – am I wrong Mr Deputy Speaker?  Mon ti absante sa request ti selman arive semenn pase – Ok e ankor nou’n – nou’n fer le neseser pou met li lo Order Paper me parey Onorab Ferrari ki en Manm FPAC in dir dan sa Meeting ler i ti ale ek bann Zofisye Finans zot pa’n ganny tou detay ki zot ti pe demande.

E menm zofisye Finans in dir poudir zot napa mon pran parol ki Onorab Ferrari in dir zot napa tou detay.  Eski – mwan mon anvi ki ler nou sorti la desizyon ki nou pran, manm piblik i konpran desizyon ki nou’n pran.  Zot pa dir nou poudir 6enm Lasanble Nasyonal in aprouv en keksoz ki i napa lenformasyon lo la – i napa tou detay.  Mon anvi ki Lasanble Nasyonal i sorti la avek en desizyon ki ibn pran ki parey nou’n dir i pa sarze lo nou konsyans.  Ok?  En moman – en moman mon annan 2 Manm ankor ki pou fer komanter – Onorab De Commarmond I will give you the right e Onorab Sebastien Pillay.  Onorab Afif.

 

HON AHMED AFIF

Mersi Mr Speaker.  Bonzour tou bann Manm Onorab. Bonzour tou bann manrmay CARE Club e tou dimoun a lekout.  Mr Speaker tou dabor permet mwan fer en pti entervansyon lo Mosyon li menm, apre mon a fer en propozisyon.  Mon ti a kontan tou dabor – petet pou lenformasyon piblik ki pa tro konpran prosesis Bidze li menm li ki mannyer i marse.  Anba Konstitisyon i demande ki en Bidze i bezwen ganny approve par Lasanble Nasyonal a lannen pase an Desanm nou ti aprouv en Bidze pou 2018 me konstitisyon i osi fer provizyon ki pandan lannen ki ou’n aprouv son Bidze – lannen pase ti 7.9Bilyon i ariv bann moman kot sa Gouvernman i trouv li i bezwen fer bann depans ki i pa ti’n demann oubyen i pa ti ankor ganny laprouvasyon Lasanble Nasyonal.  Alor i permet li pa vin  avek en Bill pou demann aprouvasyon adisyonnel me vin avek bann estimasyon devan Lasanble Nasyonal pou li kapab dir be ler mon vin kot ou lannen prosenn mon pou vin zistifye e demann ou permisyon pou tou bann depans ki mon pe fer sa lannen.

Alor an 2018 bann depans adisyonnel ki pa ti’n fer previzyon i pou anmenn bann detay pou laprouvasyon an 2019 me selman – me selman i enportan akoz si nou lir sa Mosyon ki devan nou sa Mosyon pe lir poudir nou pe approve ki sa Supplementary Estimate laid before the National Assembly in accordance with 154(6) read with Article154 (7).

Savedir ‘resolves to approve’; vedir nou pe approve sa bann estimate – nou pe approve.  E pou piblik ki la deor i dir be wi nou ti aprouv R7.9milyon zot in kestyonnen Departman par Departman e la en sel kou nou vwar 436.4milyon ankor – konmsi i pros 67poursan ekstra ankor.

Alor i enportan pou non selman piblik me nou koman Manm satisfer nou lekor akoz nou pe ‘resolve to approve’ – to approve the estimate, ki vedir lannen prosenn ler bann sif final i vin devan nou vi ki nou’n approve nou pou santi nou oblize pou nou aprouve sa.  Alor mwan mon konpran antyerman sa pozisyon ki pe ganny mete par Onorab Ferrari ki avan nou dir nou ‘resolves to approve’ nou annan en bon lide kwa sa.  Sa semenn annefe nou ‘n resevwar sa Mosyon semenn pase e toudswit koman FPAC e nou ti anvi en pe lenformasyon e nou’n demann Minister Finans pou vini Lendi.  Lendi bomaten 8.15 avek Minster Finans nou’n komans pas lo bann detay 12milyon pou Defans eksetera diferan Heading e pou laplipar zot Minster Finans in dir ek nou zot napa detay avek zot me zot pare pou soumet sa avek nou.

Me alor mwan mon krwar dan tou latransparans e pou nou fer lazistis avek dimoun ki’n elekte nou e pou nou fer en travay oversight e koman nou manda Finance and Public Accounts Committee osi mon santi ki i neseser pou nou annan sa oversight lo bann sid ki pe ganny mete.  E i pa en bann ptipti sif li nou pe koz R436milyon.  I annan bokou dimoun ki kapab dir deor poudir be zot menm par egzanp dan FPAC zot in koz en kantite lo larzan ki pa’n devret servi byen – larzan ki merite retourn dan Kof Gouvernman sa bann larzan pa ankor tournen e la nou trouv zot avek en Bill zot pe dir be aprouv ankor 436 e zot pa ni pe demann lenformasyon.

I annan dimoun ki pe dir sa laba deor e zot annan rezon!  Se pour sa rezon ki mwan mon krwar avan nou dir nou aprouv sa Mosyon ki dir ‘resolves to approve dan sa Supplementary Estimate i normal ki nou demann – ki nou ganny en pe lenformasyon ki kapab ed nou konvenk nou lekor poudir sa bann sonm ki devan nou i bann sonm rezonnab.  Si i bann sonm rezonnab i kapab dir be dan sa ka nou a ‘’resolves to approve’’ e lannen prosen ler i a vini koman en Bill – Appropriation Bill nou ava konsider li dan en fason favorab.

Alor Mr Speaker pou pa fer pli long, mwan mon ti a kontan sizere anba Order 38(6)(i) i for India mon demande ki nou adjourn debate lo sa Mosyon e mon demann leave to Sit again.

        Mon pa pe demann – nou pa pe dir ki nou pa dakor avek Bidze Siplemanter – nou pa pe dir sa ditou nou pe senpleman dir nou anvi lenformasyon konkret, detaye ki vin devan nou ki donn nou sa lasirans ki sa depans i en depans ki pe ganny fer byen.

En lot rezon Mr Speaker mon krwar ri enportan nou fer sa legzersis  se parske ki ler ou aprouve nenport ki Bidze –  en par egzanp lannen pase  dan sa 7.9milyon ki ti approve e annan en gro sonm lasan ki capital project  – R1.1 oubyen R1.2 milyon. Savedir nou koman en Parlman Minister Finans koman Lebra Finansyel Gouvernman in fer sa desizyon ki en porsyon nou depans ki lenvestisman – en porsyon nou depans i bann recurrent cost se sa desizyon finansyel ki ganny pran.

Parey ou dan lakour ler ou ganny ou lapey ou deside ki en porsyon ladan i pou al dan repey mon lakaz e mon loto sa i m on lenvestisman en porsyon i al pou mon bann lezot depans rekrit bann lezot rekrit bann kou operasyonnel.   Koumsa nou fer desizyon.  Pareyman Gouvernman in fer en desizyon.  Me si nou get sa Appropriation Bill ozordi ki devan nou i sanz tousala parske i annan en gro porsyon bann kou capital projects ki zot pa’n fer. Prezan tou sa bann capital projects sa larzan zot pe dir be tire anvoy dan bann kou loperasyon.  Be eski sa i en keksoz ki fezab pou en pei a lonterm si toultan ou pa fer capital projects. Prezan tou sa bann capital projects sa larzan zot pe dir be tire anvoy li dan bann kou loperasyon be eski sa i en keksoz ki fezab pou en pei a lonterm si toultan ou pa pe fer capital projects.   Lannen pase par egzanp mon rapel nou ti fer en saving pros 300milyon.

Mon apel li saving me ou devret kontan ler ou fer en saving me i pa vreman parske proze pa’n ganny enplimante – lekol pa’n ganny fer – lopital pa’n ganny fer – bann lakaz pa’n ganny fere tousala se  keksoz.  I ti pou kree lanplwa – i ti pou anmenn konfor – i ti pou ogmant kalite lavi.  E ler nou pa pe fer sa bann keksoz i annan son danze e alor mwan mon krwar dan sa         (Bill) sa estimate ki devan nou dan sa Mosyon i annan en bout sa eleman kot nou pe koup – e i annan plizyer landrwa  par egzanp si mon kaba site Mr Speaker lo paz pti 5 i annan Ministry of Education and Human Resource Development savings – R40milyon ‘as a result of delays in the execution of projects’  – R40milyon – preski R800mil par semenn – R100mil par zour ki zot ti kapab pe enplimant proze. R100 par zour.  Be akoz zot pa’n enplimante?  Prezan i dir be non pa servi sa larzan – sa larzan nou pa’n fer nou pa’n kapab fer be pran al donn – anploy lezot dimoun zis anploye e nou pa ni konnen si sa lanplwa ki zot pe kree i sa lanplwa ki reel.  Mon a donn en legzanp nou pe dir Home Carer nou tou nou kontan Home Carer tou dimoun fanmir i benefisye enormeman atraver Home Carer me nou’n demande a plizyer repriz eski i annan en monitoring lo la?  Eski larzan ki sipoze pe peye pou vey en dimoun ki vye ki pa kapab i en bon keksoz mon mazinen eski i pe ganny servi pou sa?  Parski finalman sa vye dimoun pa’n ganny veye oubyen pa pe gannyen sa servis.

Mwan dan mon distrik mon konn en madanm ki pa vwar kler ki pa pe gannyen – in demande.  Mrs Andre si i pe ekout mwan i konnen.  Be sa bann keksoz koumsa la ler ou war sa bann Bidze i vin devan ou me ou pa vwar sa zefor pou fer sir poudir zot pe fer sa bann louvraz pou fer sir ki larzan i ganny depanse.

Alor pou mwan i zistifye akoz nou bezwen ganny detay. I enportan pou nou ganny sa bann detay.  Alor Mr Speaker mon move ki anba 38(6)(i) ki nou adjourn debate e nou demann ou permisyon leave to sit again apre ki nou’n ganny lenformasyon e posibleman menm semenn prosenn  oubyen menm osito ki nou kapab.  Mersi Mr Speaker.

 

MR SPEAKER

En moman – mersi Onorab Afif.  Bon i annan parey mon’n dir i annan en propozisyon ki Onorab Ferrari in fer, me nou’n ariv en moman kot en Mosyon in ganny propoze pou adjourn debate anba 38(6)(i).

 

(Off-Mic)

 

MR SPEAKER

Wi in fer en propozisyon.  Ok in fer en propozisyon ok mon ankor annan 3 Manm se sa rezon ki mon pa pou entertain mon dir i annan en propozisyon ki’n ganny fer – ok?  Manm ki’n koz lo Mosyon i pa pou kapab move sa Mosyon – ok?  Anba nou Standing Orders i annan ankor 3 Manm ki ‘n lev lanmen mon ava ekout zot apre nou ava regard prosedir pou nou swiv.  Onorab Sandy Arissol.

 

HON SANDY ARISSOL

Mersi Mr Speaker.  Bonzour tou Manm.  Bonzour tou dimoun ki a lekout.  Mr Speaker zisteman anba Order 38(6)(i) mon ti ava kontan move en Mosyon pou nou adjourn sa deba ki nou pe koz lo la akoz mwan osi mon santi poudir nou i enportan ki nou ganny serten leklersisman an relasyon ek sa ki nou pe koz lo la.  Mon ti a kontan fer resorti poudir mwan mon krwar ziska prezan tou manm e menm manm piblik nou kontan travay ki FPAC pe fe an relasyon avek finans, be solman sa ki enportan pou nou osi mazinen poudir se Manm FPAC ki annan drwa demann kestyon letan zot zwenn Minister Finans.  E tou Manm dan Lasanble zot bezwen nou vot pou nou aprouv serten Bidze Gouvernman pou nou kestyonnen.

Alor i enportan pou nou koman bann Manm dan Lasanble Nasyonal ganny plis leklersisman an sa ki konsern Roupi – Sou sa Seselwa laba deor.

Dezyenmman mon ti a kontan dir poudir letan mon’n tann koz lo ABC i enportan pou bann manm piblik konnen poudir letan nou zwenn dan ABC pa neseserman nou konnen kwa ki nou pe al diskite.  Me letan n ou al lo ABC I annan serten keksoz ki ganny met deor, lo latab e prezan nou ki reprezant en parti politik, Nou bezwen retournen al kot nou Caucus pou nou kapab diskite. Set egzakteman sa ki’n arive.  Lo ABC in pran serten desizyon lo ki pou fer, me selman letan lezot Manm in ekoute an sa konsern larzan piblik i enportan ki nou tou nou kapab ganny bann lenformasyon konkret – nou kapab konnen ki si sa ki nou pe vote – ki si sa ki’n depanse e ki si sa ki Gouvernman pe propoze.  Se pour sa rezon mon mazin lentervansyon  ki Onorab De Commarmond ti fer, letan nou as ABC nou ti mazin lo speech list, me Onorab De Commarmond ti fer nou konpran  poudir son bann  manm pa dakor avek sa zafer speech list.  Zot santi zot annan zot drwa pou zot koze e zot lev zot lanmen letan zot anvi koze olye fer speech list e set egzakteman sa ki’n arive lo kote LDS nou, nou santi ki sa zafer zis enn ki pou koze nou pa dakor – nou tou nou bezwen entervenir – nou tou nou bezwen demann kestyon e nou tou nou bezwen klarifikasyon!  Mersi bokou Mr Speaker e mon ti a kontan en dimoun pou segonn mon Mosyon!   Mersi bokou.

 

MR SPEAKER

Mersi Onorab Sandy Arissol.  Onorab Stephen Pillay.

 

HON STEPHEN PILLAY

Mersi Mr Speaker mon oule segonn sa Mosyon

 

MR SPEAKER

Bon i annan en Mosyon ki ‘n ganny move – ki’n ganny segonde.  Mon a zis fer en pti komanter swivan komanter KI Onorab  Sandy Arissol ki Deputy Whip pou LDS in fer.   Yer ler nou’n fer ABC nou’n koze lo sa Mosyon lo ki fason pou tackle li.  Nou annan rikord ki ganny mentenir osi tou pou ABC e  ankor koriz mwan si mon mal ki nou osi tou pou ABC e ankor koriz mwan si mon mal Onorab Ferrari ti’n mansyonnen poudir i annan serten rezervasyon lo lafason ki sa rezolisyon in pase apre son Bill i vini.   Ok?

Zis sa – mwan ler mon’n rantre the ABC was being chaired by Deputy Speaker, kot mwan mon‘n asize mon’n zis tann sa me mon pa’n okouran ki keksoz pou al dan sa zistans me parey in dir in retournen in meet ek son Caucus vwala.

Me solman yer i ti dir i annan serten rezervasyon akoz i pa santi li konfortab avek lafason ki Mosyon i vini ki mon krwar i annan tou rezon.   Mwan osi a plizyer fwa ki mon’n en Manm dan sa Lasanble ler ou vini ou – dan lepase Onorab De Commarmond ou konn tre byen – Onorab William ki’n la nou ti aprouv Siplemanter ki ti’n fini depanse!  So kantmenm nou ti fer tapaz and all that ou konnen poudir i ti anven.  Larzan ti’n fini depanse apre ti vin devan Lasanble. 

        Apre an mezir ki nou Lasanble in grandi nou’n dir ek Minister Finans vin demann laprouvasyon Lasanble sonm ou anvi depans an plis apre nou ava donn ou permisyon pou ou depanse.  Ok?  Me i ankor annan sa roulman kot ou aprouv en Mosyon e le moman ki ou aprouv en Mosyon depans i komans fer me ou ganny detay lannen prosenn.  Alor mon krwar demann – demann ki pe mon santi mwan mon pli konfortab si i annan sa konsansis lo ou kote ki’n move sa Mosyon ok?  Me i annan en Mosyon ki’n move.  Onorab Ferrari in fer en propozisyon avek ou koman mover Mosyon. Ok mon krwar i al en pti pe dan sa direksyon ki nou anvi ale ou osi koman en Manm FPAC  ek Onorab Sebastien Pillay pou rod otan leklersisman pou nou pep pou nou dimoun deor  – pou konpran kwa ki Lasanble pe approve.  Ok?  I annan – ok so mon’n fer sa pti komanter.  I annan en Mosyon ki’n ganny mete in ganny segonde ok, nou ava pran en vot lo sa Mosyon –ok apre nou a kapab – mon ava ouver deba lo sa Mosyon mon ava donn ou laparol osi tou pou ou koze.  Mon ankor – akoz   mon ankor annan 2 Manm lo ou kote ki’n lev lanmen.

Ale mon a ekout ou avan.  Onorab De Commarmond.

 

HON CHARLES DE COMMARMOND

Mr Speaker mon pe sey ekoute mwan.  Me sa ki ou pe dir pa bon, akoz si nou vot lo sa Mosyon, savedir napa debate li, ou konpran?  Lo sa Mosyon la napa debate sa.

 

MR SPEAKER

I annan debate.  I annan debate

 

HON CHARLES DE COMMARMOND

Non lo…

 

MR SPEAKER

1 kapab annan debate lo Mosyon pour defer the vote on your original Motion….

 

HON CHARLES DE COMMARMOND

Non, non, non, no debate, Standing Order – no debate!  Me selman mwan avan nou vot lo Mosyon, zis konmsi ki mon pe sey dir, mon pa konnen si zot in sezi mwan byen letan mon’n koze taler, nou pa ti ni pour ariv dan sa moman ki nou pe fer la, sa bann, mon pa oule servi sa bann mo ki ou a dir mwan i pa bon, me sa ki nou pe fer nou pa ti ariv la, dan FPAC, Deputy Speaker ou ti pe Chair, ou’n demann tou sa bann kestyon ok,

 

(Interruption)

 

HON CHARLES DE COMMARMOND

… ekoute! Ou’n demann kestyon prezan mwan ti poz kestyon mon pour,

 

Interruption)

 

HON CHARLES DE COMMARMOND

… ekoute – pour lapros ki nou devret pran.  Akoz dan lepase, ler mon dir dan lepase dernyen Bidze Siplemanter nou’n servi sa lapros.  Mon ti demande byen kler, eski nou pour debat lo Mosyon oubyen lo Bill?  Mon ti poz sa kestyon, e mon ti dir si nou pour debat lo Mosyon when i move the Motion nou fer sir ki bann zans Finans i deor, nou al dan Committee Stage nou apel zot la nou poz zot otan kestyon posib.  Me sa, egzakteman be sa ki mwan ti propoze e zot ti dir mwan non!  Sa mon problenm? Zot pe gat letan Lasanble, si zot ti’n dir mwan i ok la, la nou ti lwen, sa bann zans ti’n antre e bann zans Finans ti la e nou ti ape demann kestyon!

 

(Interruption)

 

 

MR SPEAKER

Order!  Order.

 

HON CHARLES DE COMMARMOND

So, mon pwen i la ou konpran?  Mwan ki mon pe sey dir …

 

(Interruption

 

MR SPEAKER

Order! Order!  En moman, en moman…

 

HON CHARLES DE COMMARMOND

Mon’n….

 

(Interruption

 

MR SPEAKER

En moman Onorab De Commarmond.   Order!  Ok, mon’ donn la parol Onorab De Commarmond, annou ekoute silvouple.  Onorab De Commarmond.

 

HON CHARLES DE COMMARMOND

Keksoz i kler i koumsa.  Prezan mwan mon pa anvi ankor perdi letan Lasanble la Mr Speaker, ki nou pour fer la?  E mwan konpran Onorab Arissol sa ki zot Leader in vin dir zot pa dakor avek, zot pe, i ok, e mwan mon dir parey mon ti dir o komansman, therefore pa ni bezwen semenn prosenn, si nou gete la nou adjourn en pti kou nou gete si Finans i pare pour vini la, nou komans demann li kestyon, non, non si zot oule ok why next week?  Annou apel zot la.  Ok?  So, se sa.

 

MR SPEAKER

Ok, ok.  Order!  Order!

 

HON CHARLES DE COMMARMOND

Prezan Mr Speaker fer mannyer zot anvi, si zot apel, apel la, si oule apel semenn prosenn, si oule apel lannen prosenn as you wish.  Nou napa nanryen pour kasyet napa nanryen pour per, bann zans a vini i ava eksplike, i a reponn bann kestyon, be annou pa perdi plis letan, annou bouze, deside ki nou pour fer, zot deside, semenn prosenn, i ok, semenn prosenn si zot anvi i ok.  Mon pa ni bezwen Mosyon, pa ni bezwen nanryen, semenn prosenn dakor, Mardi, Merkredi?  Mardi – Merkredi?

 

(Interruption

 

MR SPEAKER

Ok, ok ..   Order!  Order!…

 

HON CHARLES DE COMMARMOND

Cancel tou fer Mardi.  Si ou oule en zour an plis, annou fer en zour an plis, mannyer zot anvi.  Mersi bokou Mr Speaker.

 

MR SPEAKER

Mersi Onorab.  Bon avan nou pran en vot lo sa Mosyon ki’n move par Onorab Arissol, mon pour zis donn, non par Onorab Aglae ou fek lev lanmen, be mon annan 2 Manm ki’n lev lanmen oparavan ki mon’n note, Onorab William avek swivi par Onorab Churchill Gill, 2 minit pour fer en pti komanter and then nou ava bezwen pran en desizyon.  En moman – yes Onorab Pillay.

 

HON SEBASTIEN PILLAY

Mersi Mr Speaker.  Mr Speaker i annan en misapprehension ki petet mwan pa konnen si lenformasyon in reach bann Manm lo lot kote latab, dan meeting ki nou ti gannyen ek Minister Finans zot ti eksplik nou poudir vi ki se DPA ozordi ki pe pey bann graduate housing allowance, sa larzan pe transfer prezan according to bann diferan landrwa kot sa bann dimoun i travay.  Mon ti a kontan…

 

(Interruption)

 

MR SPEAKER

Order!

 

HON SEBASTIEN PILLAY

Mr Speaker mon ti a kontan en retract

 

MR SPEAKER

Kontinyen Onorab, kontinyen…

 

HON SEBASTIEN PILLAY

Prezan ki mwan ti pe klarifye Mr Speaker, annou zis fer sir ki sa move e sa pa afekte lefe ki lafen di-mwan pe vini e sa graduate housing allowance ki sa bann dimoun sipoze pe gannyen anba DPA zot kontinyen ganny lim…

(Interruption)

 

HON SEBASTIEN PILLAY

… mon pa pe, ekoute, me zot …

 

MR SPEAKER

Order!  Order!  Order!  

 

HON SEBASTIEN PILLAY

Napa taktik ladan Mr Speaker, nou’n dakor pour nou move, move sa prosesis next week.

 

MR SPEAKER

Annou … en moman, en moman.  Kontinyen Onorab Pillay.

 

HON SEBASTIEN PILLAY

Mersi Mr Speaker.  Mon ti oule zis lans en lapel avek Minister Finans pour asire ki sa bann dimoun ki sipoze ganny zot graduate housing allowance, zot gannyen, akoz sa i pa sorti dan nouvo larzan, me i sorti dan nouvo larzan ki DPA pa pe no longer run sa graduate housing allowance.  Mersi.

 

MR SPEAKER

Mersi Onorab Pillay.  Me ankor mon fer en pti komanter lo sa ki ou’n dir Onorab Pillay, se sa ki mon’n dir from The Chair, nou pa kapab kontinyen ki keksoz i ganny rush dan Lasanble, san ki bann Manm i ganny detay – lo tou lede kote latab, ok lo tou lede kote latab san …

 

(Interruption)

 

MR SPEAKER

 … attends, attends, san ki bann Manm i ganny detay, apre nou vwar nou pe dir poudir nou bezwen sa larzan yer pour nou depanse, pa demen, me yer, ok me se sa.  Ale mon ava ekout Onorab William apre Onorab Churchill Gill. Onorab William.

 

HON WAVEN WILLIAM

Mersi Mr Speaker.  Bonzour tou dimoun ki a lekout, Mr Speaker i montre ou poudir zonm pa parfe.  E letan ou pe dir sa, se ki nou ganny gide par nou Standing Order, me swivan sa deba ki mwan pe ekoute la atantivman, i montre nou kler poudir nou annan serten bann febles e mon pa lo en Komite FPAC mwan, me mon pa konnen si zot annan en prosedir avek ki zot apros bann size parey bann Supplementary Budget.  Mon krwar petet sa mon sizesyon, se ki dan lavenir nou adopte en prosedir, sa ki mon pe montre ledwa personn, akoz ki arive?  Se ki si nou adopte bann prosedir petet nou fason travay ava en pti pe deroul pli byen.  Me selman parey ou pe dir, nou annan en Mosyon devan Lasanble, mwan krwar tou lede parti in tonm dakor ki zot pare pour defer e pour anmenn bann zofisye Finans isi, so mon pe move ki nou pran en vot.  Mersi.

 

MR SPEAKER

Mersi Onorab William.  Ok Onorab Churchill Gill, ou osi ou en Manm FPAC, nou anvi ekout ou.

 

HON CHURCHILL GILL

Mersi Mr Speaker.  Mr Speaker mwan mon vwar poudir annou pa perdi plis letan…

 

MR SPEAKER

Ok.

 

HON CHURCHILL GILL

… akoz koman Manm Lasanble, si Manm i santi i bezwen detay, annou donn sa bann detay, nou a deal avek, nou a fini apre keksoz i ava ganny aprouve, e nou a kontiny nou travay.  Mersi.

 

MR SPEAKER

Mersi Onorab Churchill Gill, bon mon krwar i annan en lantant. Onorab De Commarmond ou original Motion i pa mor, i pa’n ganny touye, me zis i annan sa Mosyon pour defer ok?  Bon nou pour pran en vot lo Mosyon ki’n ganny move par Onorab Sandy Arissol, anba 38(6) (I) ki deba lo Mosyon anmennen par Onorab De Commarmond, an vi ki Lasanble pe demann en pti pe plis detay lo bann sif i ganny anvoye, e ankor parey Onorab Ferrari in mete devan ki mon aksepte, i pour pran presedans lo Order Paper semenn prosenn ok, i ava vin premye menm si nou pour komans avek Mosyon Onorab William, sa Mosyon i ava pran presedans pour nou kapab fini avek e get it out of the way – ok?  Mosyon in ganny segonde par Onorab Stephen Pillay alor mon ava demann Lasanble pour pran en desizyon ok, tou Manm ki an faver, ok okenn Manm ki kont?  Ok Madanm Clerk.

 

MADAM CLERK

Mersi Mr Speaker, lo propozisyon pour, lo Mosyon pour postpone deba pour semenn prosenn, mon’n rikord 14 Manm an faver, e personn kont.  Mersi.

 

MR SPEAKER

Bon Mosyon in ganny aprouvasyon Lasanble, so nou, pour kontinyen deba e mwan ava demann avek petet ek Deputy Chair FPAC, Onorab Afif, fer bann let neseser, nou annan nou demen ek Vandredi, ek Lendi pour kapab re anmenn sa Komite Finans pour zot kapab donn detay, e mon a osi tou demann bann Manm ki pa lo FPAC ki anvi asiste sa Sesyon okAhnr zot oule fer li dan … ?

 

(Interruption)

 

 

MR SPEAKER

Ok, ok en moman, en moman, en moman, en moman.

 

(Off-Mic)

 

MR SPEAKER

 Ok wi, ok, ok i tonm en….

 

HON CHARLES DE COMMARMOND

Sa ki mon’n sizere i se ki, nou apel, nou al dan Committee Stage sa Mosyon parey nou’n deza fer avan, nou apel Finans la devan la tou dimoun a poz otan kestyon ensidswit, sa ki nou pe demande.

 

MR SPEAKER

Ok mersi, mersi Onorab De Commarmond.  Ok?  E ankor pour konsonmasyon, wi pour konsonmasyon piblik osi tou.  Bon mon ava met keksoz devan zot …

 

(Interruption)

 

MR SPEAKER

Order! Order! Nou’n apre ki nou’n desid Order Paper pour semenn prosenn nou’n vwar i annan en bon pe kestyon, e nou annan Minis Lasante osi tou ki pe vin fer en Statement, mon a sizere si pa 3.30, zot santi poudir nou’n fini avek kestyon, avek Statement Minis Lasante zot anvi pour sa 1 erdtan edmi anmenn Minister Finans isi, zot kapab fer li, mon pa pe la, desizyon i pour zot an konsiltasyon, ou sinon, Merkredi bomaten 9er koman zot komanse anmenn Minister Finans turn the Assembly into Committee of the Whole Assembly e kestyonnen e demann bann detay, then retourn koman Lasanble e Onorab De Commarmond koman loter Mosyon i ava fer en summing-up e nou ava bouz devan – ok?  Annou fer li koumsa, alright?  Bon nou pa pour pran lot Mosyon la toudswit, mon krwar napa ase letan pour Onorab William prezant son Mosyon dan 8 minit, mon ava sizere ki nou pran en Break, e parey mon’n dir mon’n ganny en pti pe plis leksplikasyon lo kwa ki CARE Club i anvi fer, mon ava zis met devan zot.

Dan lobby, mon’n envit tou Manm dan lobby ki pour enkli mwan osi tou pour nou rankontre avek sa group ki sorti kot CARE Club, sa group pour fer en prezantasyon avek tou bann Manm, en pti booklet ki pour komemor Alcohol Awareness Month – ok?  Prezantasyon pour ganny fer avek le de Leaders ok, e lo kote LDS on behalf of, Onorab Ferrari i ava pran on behalf of Leader Lopozisyon, pour annan en zanfan aparaman ki pour dir de pti mo ok?  E apre parey mon dir nou ava envit sa bann zanfan avek zot bann miss avek zot pour nou al pran dite ansanm, ok?  So nou ava Break e nou ava rankontre toudswit deor dan lobby.  Mersi.

 

(BREAK)

 

MR SPEAKER

Bon mon prezant leskiz pou sa retar ki nou’n gannyen, anvi en pti pe nou bann komitman avek bann group viziter ozordi kot nou Lasanble.  Nou pou kontinyen nou travay e mon ava pas laparol avek Onorab William ki pou move son Mosyon.  Onorab.

 

HON WAVEN WILLIAM

Mr Speaker mersi.  Mr Speaker avan ler ki mon pran diskour lo mon Mosyon, mon ti a kontan fer sa detrwa remark swivan.  Enn se ki mon senpatiz avek la fanmir Alissop ki’n perdi enn zot pros.

E mon 2enm pwen se Mr Speaker mon ti a kontan remersi ou avek Sekretarya avek Komite ABC ki letan mon ti demann deferment pou mon Mosyon, ki in kapab vin lo Order Paper mon kapab take up letan mon retournen.

E mon 3enm pwen Mr Speaker i en pwen ki mon ti a kontan ki lo tou le de kote latab nou kapab apros sa deba, adres lesansyel sa Mosyon, san ki nou bezwen al lo bann laspe personnel – pou nou kapab fer zistis sa Mosyon ki i sorti byen e nou kapab ganny en vot inanim letan nou’n ariv a lafen sa diskisyon.

Mr Speaker o komansman menm mon ti a kontan salye tou travayer Seselwa a nenport ki pozisyon zot ete dan sosyete, bann ki’n fini pran zot retret, e osi nou pa pou bliy bann osi ki aletranze, ki zot osi deor zot osi kontribye en gran parti dan lekonomi Sesel letan zot anvoy larzan kot zot fanmir ouswa zot vin envestir dan Sesel.  Mr Speaker travayer Seselwa i en pep ki kapab travay.  Travayer Seselwa i konsyan son rol dan devlopman pei.  Travayer Seselwa letan i pe donnen 12mwan lo 12mwan e lannen apre lannen, fas ek en kout lavi ki zwe lo son moral travayer i ekspekte ki Lotorite i get dan son welfare, pou li kapab fer de bout zwenn e viv en lavi dan dinyite ek son fanmir ler i donnen i ganny rekonnet i vin pli determinen pou travay pli dir ankor.

Mr Speaker vi ki Gouvernman pe travay lo revizyon kad saler, e an rekonesan ki kout lavi pe anmenn serten degre soufrans dan fanmir Seselwa ek sa lekspektasyon ki Gouvernman i get dan welfare Seselwa, ki form la baz sa Mosyon.

Mosyon  pe osi demann Gouvernman pou osi pran lezot mezir akoz ogmantasyon saler li tousel pa pou neseserman fer lavi Seselwa pli eze.  Pou bezwen annan lezot aksyon pou balans keksoz.  Alor Mosyon devan Lasanble i lir konm swivan ;

‘’Prenon kont Prenon kont kou lavi ki pe ogmante, e sa nesesite pou revwar kad saler, e gratwite parmi lezot mezir ankor, sa Lasanble i demann Gouvernman dan sa revizyon ki i fer ki:-

  1. I koriz bann lenzistis e inegalite a tou nivo kot i posib ; tenir kont kalite travay, eleman risk, tann servis, leksperyans e konesans.

 

  1. Met lanfaz dan kondisyon lanplwa ki ogmantasyon i baze lo bon performans, prodiktivite baze lo bann target.

 

  1. Ki bann dokiman Lagreman travay e kondisyon kler i ganny etabli pou sak pozisyon dan tou sekter.

 

  1. Travay ek sekter prive me pa enpoz lo zot pou swivre dan moman apropriye.

 

  1. Met ouswa ranforsi Regilasyon pou ankouraz Sekter Prive pou ede Kontrol kout lavi kot i posib.

Mr Speaker Fon Moniter Enternasyonal Bank Mondyal zot in klasifye Sesel koman en pei ek en reveni an mwayenn o dapre zot kriter e formil klasifikasyon nivo devlopman ekonomik.

Zot evalyasyon se ki Sesel par tet d’habitant i pe fer anviron 26mil Dolar e si mon kalkilasyon i byen nou pe koz en sif 2.34bilyon Dolar ki R1 nou pe koz anviron R3.76trilyon.

Mr Speaker kestyon se ki fason sa larises ki zot dir nou pei pe fer pe ganny zere?   Eski Seselwa pe vreman ganny en fair deal?  Mr Speaker parey enn mon zabitan ki pe swivre prosesis devlopman de pros i dir mwan –  akoz ki sa bann gro msye IMF ouswa Bank Mondyal zot fer vizit zis kot Prezidan ?  Zis kot Leader Lopozisyon e Leader Zafer Gouvernman, me zot pa rann serten kous nou pep dan sosyete pou vizite e pou vreman konpran serten realite ki zot bann target ki zot pe mete e anvi nou zwenn pou dir ek nou  kan nou pou larg en pe sa sang.  I kontinyen dir mwan Mr Speaker ki wi nou rekonnet ki nou rating ‘Lendex’ Devlopman Imen in monte me sa i pa trouve letan i tous son saler lafen di-mwan e kout lavi ki pe trangle li.

I osi dir mwan an riyan Mr speaker ki sa rating la ou pa kapab met dan kastrol.  E ki fodre Seselwa i santi larzan pe antre dan son pos parey i ti ganny dir.

Mr Speaker konman serviter lepep, e ki konekte ek pep a la baz, mon konnen ki soufrans, ki difikilte e ki sakrifis en mazorite fanmir Seselwa bezwen fer pou soutenir son fanmir tou le mwan.

En pep ki fristre e oprese pa pou konsantre dan travay.  Mon demann Gouvernman pou fer keksoz.  Fer keksoz ki sa travayer a kontinyen ankouraze, leve granmaten determinen pou al pran son bis pou all travay pou donn son maximum dan son travay ek lafyerte.  De plis reste motive  e satisfe ki son kontribisyon pe ganny valorize, ki son lafors son sakrifis e kouraz ki i pe donnen an retour li e son fanmir zot pe osi benefisye.

Mr Speaker i parey Leader Zafer Gouvernman i kontan dir ki zot a santi ki vreman zot annan par ladan e ki ‘TOGETHER’ parey Onorab Gill i dir e i kontan fer nou konpran. Dan sa legzersis revizyon an kad saler ki an mars Mosyon pe osi demande ki fason donn konpansasyon parey gratwite, bonus bann diferan allowance e overtime i ganny revwar.

Mosyon pe demande ki dan sa revizyon ki Gouvernman pe fer ki pa fer en revizyon kosmetik lo sirfas, me i al pli lwen e an detay pou re gete e adopte en fason fer pou anmenn liniformite dan lespas letan pli favorab, pou donn Gratwite sirtou la ki zot pe mazin ogmant laz retret.  Kree sa opsyon pey overtime dan plas donn time off.  Ki sa travayer ava annan en swa e ogmant son package le mwan. Dan plas enpoze pou koupe e anpes li ganny sa pti mwenza an plis pou soutenir li ziska lot saler.  I neseser revwar kalite allowance e la kantite dan bann diferan ka e sirkonstans pozisyon travay kot i merite.

Sa legzersis bezwen tenir kont kalite lanvironnman travay.  Sa eleman risk deplasman travay lwen ek fanmir.  Sa lenkonvenyans akoz deplasman par endividi ouswa Fanmir Mr Speaker.  Mr Speaker ki saler i vize lo en minimum akseptab pou fer fas ek bann sityasyon parey lenflasyon e kout lavi.  Dan sa laliny mon pe propoze ki saler minimum de baz i evantyelman vin R10mil par mwan.

Mr Speaker avek sa baz i ava ed lezot bann ki dan milye osi en kalkilasyon ki rezonnab pou zot.  Mr Speaker sa i ava tir bokou traka.  De lot kote ki Gouvernman i anmenn serten degre liniformite dan kad saler dan serten diferan pozisyon, pou koriz lenzistis e linegalite dan klasifikasyon saler prenon kont ki tou metye i enportan e ki sakenn i konplemant kanmarad pou kree larises pei.  I bezwen annan diferans dan konsiderasyon peyman tann servis fonde lo leksperyans an relasyon ek posed sertifika ouswa non.  Ansyen travayer ki war zot pe bezwen train etranze e zenn graduate ki zwenn Lorganizasyon travay pou ed zot adapte.  Zot pe demande akoz ki panda letan ki zot pe  montre ki Lotorite pa get dan zot welfare pou sa leta ki zot pe gide e montre sa bann endividi?

Mr Speaker i osi neseser pou Gouvernman revwar dekalaz serten package saler etranze ek sa Seselwa ki pe fer preski menm travay.  Dan mazorite  sirkonstans zot bezwen pe fye lo sa travayer Seselwa pou zwenn zot target dan pei, akoz pa kapab konsider donn lanmwatye ouswa trwa kar sa package etranze sa Seselwa ki i pa ava santi li enferyer ouswa kon man en sitwayen 2enm Klas dan son pei.

Mr Speaker la mon pa ganny en konpran letan dan Bidze Lasanble, nou ganny dir Departman Gouvernman pa kapab delivre akoz i mank travayer kalifye.  Napa travayer ouswa travayer i kite e al dan sekter prive akoz saler i pli bon.   Alor si sa menm travayer ki’n kite i al dan sekter prive e i re ganny anploye i bon.  Si i pa ganny valorize e  byen rekonpanse i pou ale.

Mr Speaker alor konbyen letan nou pou esper Departman Ladministrasyon e Finans pou aret zwe boulko avek bann file ki monte desann pou donn en pti mwenza an plis sa travayer?  Rod tou sord kalite leskiz akoz pa kapab aprouve Mr Speaker.  Mr Speaker la mon pou dir ki bokou fwa i pa PS ouswa siperyer dan sa bann Departman ki pa anvi.  Problenm i avek Departman Ladministrasyon ki’n trenn lipye pe rod zistifikasyon menm.

Kestyon se eski i merit pa i en klasifikasyon dan li menm?  Eski pa in ler pou sorti dan sa zone konfor e al temwaye pou konnen akoz sa bann rekomandasyon pe ganny fer?   Mr Speaker silvouple mon lans en lapel annou ankouraz travayer ki annan konpetans lannen des annes pou reste dan servis piblik sinon tou travayer eksperyanse  pou ale.  E lekel ki pou perdi Mr Speaker?

Mr Speaker la mon lans en lapel ek sekter prive pou osi konsider revwar zot striktir travayer ki devoue e pe ed zot lakonpannyen prospere pou kot i posib e merite get dan zot welfare fer zot prezans kont pou gard zot motive.  Mr Speaker baze lo sa ki mon’n dir permet, mwan tous lo enn de legzanp pou ilistre mon pozisyon lo serten bann fe.

Bann drayver dan plizyer bann seksyon ki fer overtime, Mr Speaker an pei i annan en ta dimoun ki fer overtime e mon pe koz pou zot osi tou.  Ki travay overtime par lao 44 erdtan.  Zot pa ganny peye ase, zot kalifye zis R1200 e larestan zour zot bezwen pran time off. Mr Speaker travayer ti pou pli satisfe pou ganny peye, akoz letan ou’n koste son lapey lemwan ek son overtime i touzour keksoz ek sa lavi ser.  Plis time off pa fer son lavi eze.  Plis larzan dan son pos ki fer en diferans Mr Speaker.

De lot kote Mr Speaker i annan travayer ki’n travay overtime ki Departman Ladministrasyon pe trenn lipye lo la e pa oule peye akoz i depas limit le mwan.  Solisyon i senp Mr Speaker.  Etal peyman overtime lo bann lezot mwan ki sa travayer a ganny peye son larzan ki in travay.  Oli problenm?

Akoz i annan ki dan weekend e konze piblik pe travay menm pou rezourd bann ka emergency tel parey delo kase, kouran koupe, diferan bann dimoun ki travay dan lezot sekter ki pe travay vreman dir Mr Speaker.  Oli zot lankourazman ki aplik pou bann ners, bann gard sekirite parmi lezot ankor Mr Speaker?  Lot legzanp se allowance ki donn ant mil a R2500 par mwan.  Si ou ganny enn a trwa zour konze medikal swa i ganny rasyonnen ouswa i ganny koupe net.  Pou travayer ki abize i merite koupe, me Mr Speaker pou bann ki pe vreman donnen menm, ki pran konze medikal rar pou zot bon servis zot merit ganny en diferan tretman parey koze i dir, tret mwan byen e ou a dekouver mon valer.  Mon pa ava degoute pou mon ale.

Mr Speaker de lot kote ou pran serten nou bann zenn maren lo Tenk Petrol.  I bann Seselwa e pe travay lo nou tanker.  Mr Speaker i pa zis ki dekalaz zot saler e konpansasyon epou bann maren etranze i sitan gran pou menm responsabilite.

Mr Speaker i pa normal ki sa zenn maren si in fer 6mwan ouswa 7mwan lo lanmer ler i vin Sesel e petet asize pou ankor 4 a 6mwan san en sipor reveni.  I pa byen.  Sa i pa normal e i bann lenzistis ki fodre Lotorite i get ladan, menm si sa bann zenn zot pe anploye avek e lakonpannyen etranze me zot bann Seselwa letan zot vin Sesel zot bezwen zot sipor.  Mr Speaker e la mon’n ganny dir si sa bann zenn maren pandan sa 4 a 6mwan ki zot ater, zot al rod en lot pti lanplwa pou soutenir zot zot kapab ganny problenm avek Lotorite Mr Speaker e parey mon dir sa i pa byen, i merit ganny korize.

Lot bor Mr Speaker pou nou bann Seselwa ki ganny apwente ouswa ganny anvoye dan bann Misyon deor, Mr Speaker mon vreman dezapwente avek Lotorite vreman dezapwente ek lafason ki zot pe tret nou Seselwa konpare ek etranze menm isi Sesel.  Ki vreman fer plizyer dimoun dir ki pe ganny trete konman sitwayen 2enm Klas kontrerman ek latansyon ki etranze i gannyen dan son pei.  Mr Speaker sa i mal.

Mr Speaker pou en Speaker en fanmir Seselwa ki kit tou deryer pou 1an, pou 2an ouswa 4an maximum pou al travay deor.  Mr Speaker deside pou ale akoz lanmour pou son pei son travay, loportinite pou aprann plis e pou ganny en pti pe plis an retour dan term legal i annan sakrifis ki ganny fer.  I annan lenkonvenyans ki arive,  i annan en pozman dan son vizyon e son target personnel, son plan devlopman.

Sa ki pe donnen ozordi pa fer sans.  I pa ankourazan Mr Speaker.  Mon oule salye tou sa bann endividi swa zot in kite ouswa ki pe travay pou zot zefor pasyans e devosyon.  Mon osi salye zefor bann ki pe pouse pou annan en revizyon e en sanzman.

Mon demande ki Gouvernman i get dan zot welfare nou bann Diplomat aletranze a tou nivo.  Lasistans apropriye depi ler zot pe deplase, zot saler, zot foreign service allowance, sipor soutyen pou zot fanmir ki al ek zot, sa eleman risk osi bann ki bezwen fer fas ek de sezon extreme par egzanp liver avek lete Mr Speaker.

Ou’n travel, mwan mon’n travel, nou konnen ki nou pe dir.  Sa allowance lenz fodre sanze Mr Speaker.  I pa akseptab e menm sa i aplik pou nou bann Seselwa dan bann diferan pozisyon isi Sesel ki al Misyon deor pou detrwa zour ouswa semenn mon demann Lotorite pou tret nou bann sitwayen travayer Seselwa ek  dinyite.  In annan bokou koze lo la.  In annan nou frer e ser ki pe manz anndan an silans akoz zot in fatige koze.  Me dir les bato marse Mr Speaker.

Mr Speaker nou pa kapab les bato marse.  Nou anvi ki i annan en sanzman.  Nou anvi ki i annan en revizyon.  Mr Speaker la ozordi mon pe koz pou zot akoz mon konnen en mon konpran kwa ki zot fer fas avek dan zot bann diferan parti lemonn.  Nou tann entel in ganny apwente ouswa elekte konman zofisye, Diplomat, konman politisyen me nou pa konnen ki zot pas atraver deor aletranze pou gard paviyon Sesel touzour pli o.

Mazinen toultan ki deor lwen laba i pa Sesel.  Ou lwen ek tou dimoun.  Personn pa anvi konn  e tann ou problenm.  Sesel ou ti a rod en led ek fanmir.  Laba ou en enkoni Mr Speaker.  Mr Speaker prezan nou get dan ka nou bann zenn ki al training aletranze.  Menm si se Gouvernman ki peye zot travay dir konplet  zot training e retourn Sesel.  Kestyon fondamantal, se eski Lotorite pe vreman get dan zot welfare dan diferan nivo ki zot ete?  Eski zot pe ganny ankouraze pou reste Sesel menm apre ki zot in fini zot Kontra re pey Gouvernman ?  Eski kriter sa land point system pa pe fer zot kaye?  Mon demande ki Lotorite i get dan zot welfare pou gard nou bann zenn profesyonnel dan servis piblik.  Mr Speaker dan sa vilaz global sirtou ek devlopman sekter kominikasyon nou zenn profesyonnel pou kapab ki nou pou touzour akoz pei devlope pe atrakte zot.

Mr Speaker mon kapab koze lo bann  diferan ka e sityasyon ki mon’n rankontre ouswa pas atraver dan mon prop leksperyans mon lavi karyer.  Me letan pa pou permet Mr Speaker.  Mesaz kler ki mwan mon anvi anvoye se ki Gouvernman dan sa legzersis do something about it!

Pa trenn lipye lo aksyon.  Pa esper kabri manz tou salad.  Pa rod touzour leskiz pou fer sa ki byen me donn sa pep e sa travayer Seselwa sa ki i merite, en fair deal Mr Speaker.  Comme dit  ‘Trou Kler,’ ler zot pou donn ou en pti mwenza lo zot vin lo torti, me ler zot pou pran zot vin lo zekler Mr Speaker!  Eski sa kalite fason fer balans pou tonm tou en kote Mr Speaker?

Mr Speaker lot pwen mon Mosyon se ki Gouvernman bezwen a tou pri annan bann Kontra e dokiman travay ki kler, ki pa konfize e son bann enterpretasyon e kalifikasyon mesaz zot pas li presi.

Sa i evidaman kree difikilte pou e de parti rezourd problenm menm par zot reprezantan letan moman in arive akoz problenm enterpretasyon Mr Speaker.  Ozordi Seselwa i konn en gran parti son drwa akoz Gouvernman in met an plas plizyer Lazans pou ed li rezourd son problenm lanplwa e rod rekour.

Alor ofisyelman i bezwen annan bann Lagreman ki kler ki ganny met azour ek realite lavi e ki sa senp Seselwa ki ganny anploye i konpran son Kontra travay.  Sa dokiman i bezwen osi met lanfaz ki apard ki saler bann kondisyon lo responsabilite kalite rekonpans baze fonde lo bann performans, nivo leksperyans travay, target pou zwenn par mwan e par an lo servis e prodiksyon.

Mr Speaker sinon i pa pou lafot sa travayer.  Si lanvironnman travay zouti a son dispozisyon pa permet li zwenn bann target ki pa rezonnab.  Ek mankman teknolozi apropriye ek direksyon kler dan ladministrasyon ki pou le met son performans bokou Lazans Gouvernman bezwen pran kont sa pou delivre en pli meyer servis ki pep Seselwa pe gannyen ozordi e pe ekspekte dan distrik e nasyonalman avek servis piblik Mr Speaker.  Mr Speaker mon de dernyen pwen i refer ek sekter prive.

Sekter prive i ganny rekonnet konman en partner kle mondyalman dan devlopman socio ekonomik en pei.  Sesel i pa e leksepsyon.  Pou sa sekter byen i enportan ki Gouvernman,  i kree e touzour gard sa lanvironnman apropriye ki fasilit lavi sa sekter pou grandi e kre larises. Dan sa partenarya ki egziste ant Gouvernman ek sekter prive mon pe demande ki Gouvernman i zwe en rol pli proaktiv ankor pou anmenn plis enklisivite dan sa konsiltasyon pou trouv sa pli meyer bon balans ki travayer dan sekter prive i osi benefisye byen pou zot kontribisyon.

Mon pa an faver en latitid enpoze me plito en prosesis dyalog pou konpran kanmarad e ki tou parti prenan i santi li konfortab me pa anba presyon lavi ek mank konprenezon sa realite fer biznes Sesel.

Apre tou, sekter prive bezwen pe fer en reveni an plis pou li kapab donnen Mr Speaker.  Lotorite bezwen rekonnet e aksepte ki lanvironnman fer biznes Sesel i pa zis difisil me i delika, akoz nou frazilite e vilnerabilite konman en pti  leta zil.  Plizyer mankman i entansifye nou problenm tel parey pti marse, mank diversifikasyon, kalite resours ki i demande pou o nivo.

Servis e prodwi.  Pou zwenn norm e standar enternasyonal.  Konpetisyon Mr Speaker i feros la deor e si ou mal sote ou a plonze e  deklar fait.  Mon rekonnet ki serten zefor pe ganny fer me nou bezwen vwar plis zefor e aksyon proaktiv pou sirmont klasifikasyon ki nou pe gannyen par bann diferan Lazans deor lo kote difikilte pou fer biznes.  Gouvernman bezwen enplimant en mezir me pa en pwa de mezir pou serten dimoun ouswa etranze ki lezot bezwen skente pou serten servis ki depan lo Gouvernman.

Mr Speaker sa fason fer i kas ‘cool’ e moral e kree fristrasyon.  Ek lespri negativ dan sa sekter.  Sa Seselwa ki pe prodwi e gard son deviz Sesel devre pe ganny byen trete osi pli byen ki sa etranze ouswa sa enn ki pe transfer tou son larzan deor Sesel.

Mon dir nou Seselwa annou donn zot tou lankourazman pou zot epanouir Mr Speaker.  Vi ki se Gouvernman ki fer Polisi, mon demande ki diskisyon lo stratezi e menm Polisi i ganny byen  diskite ek tou kous sekter prive.  Pa diskit tou le tan ek menm pti group ki asosye avek Lasanm Komers akoz pa tou biznes ki anrezistre anba zot.  I annan lespas pou fer pli byen.  Kre plas e sa latmosfer pou tou kontribye son pwennvi ki finalman desizyon final ava en zafer vre lapartenans lakonpannyen Sesel.  Zot a dir e siporte ki wi nou kontan Sesel.  Mr Speaker dan sa demars pou fer desann kout lavi, dan sa partenarya ant Gouvernman ek sekter prive mon pe sizer konm swivan.

  • Ki Gouvernman i vreman montre e fer konnen ki i pe koup gaspiyaz Mr Speaker.

Mr Speaker konman en Manm Parlman letan mon pe fer mon travay dan distrik mon vwar ki fason gaspiyaz tou le zour pe arive, e si nou kapab koup sa bann gaspiyaz i pou fer nou en ta savings e nou kapab pas sa avek nou bann travayer Seselwa.

Dezyenmman ; Gouvernman pou bezwen pli determinen  dan sa zefor pou elimin koripsyon.  Ler i dir zero tolerans ver koripsyon par montre legzanp e lenformasyon lo ki pe arive e ki zot pe fer about it.

Mr Speaker trwazyenmman ki Gouvernman pou bezwen  senserman revwar lapros ver nouvo model plan ekonomik, ver donn plis latansyon, ver sekter komers dan son totalite.

Katriyenmman. Gouvernman ii bezwen gard byen rikord statistik pou presizyon alokasyon resours e kalite lapros ouswa lanfaz ki bezwen al avek.

Senkyenmman – ki Gouvernman pou bezwen met an plas ban Lalwa modern e revwar serten pou reponn a legzizans e socio ekonomik ozordi pour ki Sesel i vreman kre larises.  Ki Gouvernman i anmas plis reveni apropriye dan bann lannen.  Ki travayer osi i vreman trouv sa benefis Mr Speaker.

Sizyenmman ki Gouvernman pou bezwen atraver son bann diferan Lazans ki ede, kree e lans pti biznes ki zot a zour ek sa realite ki lanvironnman fer biznes Sesel i difisil e nou anvi ki zot do something about it Mr Speaker.

Mr Speaker pa les resours ki nou napa bokou gaspiye.  Si Lotorite konman eksper i vwar ki loan pou ganny servi dan en move fason e ki nou pou perdi sa larzan Mr Speaker Gouvernman konman propriyeter ki lwe later ek Seselwa, pou fasilit akse ek lespas, lwe ek bann pti lantrepriz, Gouvernman pou bezwen antre pou fer sir ki sa propriyeter Seselwa ouswa etranze pa degorz sa pti antreprener ler i vin lwe lespas.  Lwe lespas ozordi Sesel Mr Speaker i ser.  E sa i azoute e fer kou lavi monte.

Nevyenmman Mr Speaker komisyon Fair Trading pou bezwen pli proaktiv pou kontrol labi serten bann komersan ki rod tou trou dan Lalwa kontrol pri fikse pri e fer kartel, pou gard pri serten komodite avek servis o.  Seselwa pe demande ki Fair Trading pe fer an plis? Seselwa pe dir ki NATCOF pa ti kapab fer bokou.  Ti dir la nou pe met Fair Trading e donn li ledan pou li morde.  Si fodre donn li plis ledan, annou donn li Mr Speaker!

Mr Speaker lot pwen ; Sanzman Klima ozordi in vin en menas prensipal e pli direk nou plannet vize ver domaz nou lanvironnman.  Sesel in ratifye lakor Paris.  I bezwen pe diriz sa demars pou ki son pep i swivre e pran konsyan sa vre danze. Gouvernman pou bezwen diriz par legzanp par bann vre aksyon tanzib ki pep a vwar ki i serye.  Sa bann karbiran ki nou pe servi an gran parti pe polye nou lanvironnman e nou latmosfer Mr Speaker.  Akoz ki Gouvernman pa enstal sistenm soler lo tou batiman Gouvernman?  Akoz ki STC pa fer parey? Akoz ki Gouvernman pa pli proaktiv pou asiste sitwayen pou swivre?  Akoz ki i pa tir tou taks lo lenportasyon transpor elektrik,  si nou anvi ‘’go green’ parey nou pe dir Mr Speaker?

Mr Speaker sa depans ki Sesel e Seselwa pe fer par enport karbiran ava koupe, si nou kapab met lanfaz lo enstalasyon bann pano soler.

Mr Speaker mon lot pwen mon anvi propoze se ki nou batiman Lasanble osi Mr Speaker nou bezwen lead par example, ki nou osi dan lavenir nou bouz dan sa direksyon.

E mon konnen Mr Speaker, ou’n partaz sa pwennvi avek mwan.  Ou ti a kontan ki nou bouz dan sa direksyon.  E mwan mon pou siport sa Mosyon Mr Speaker.

De lot kote Gouvernman  devret pe regard ankor son sistenm taksasyon  pou fer sekter prive ganny lespas pou zot envestir.  Gouvernman fodre get byen sa bann Lakor Komersyal rezyonal pou fer sir ki nou bann prodikter lokal pa ganny pini Mr Speaker.

De lot kote ki Gouvernman i fer bann Labank Komersyal lefe ki zot kliyan, i an gran parti Seselwa pou ede abes kou servis get en pe dan sa bann lentere lo savings e lo bann  pre.  Devre annan bann diferan kliyan ki annan plis ki 5an an montan.  Endividi ki’n touzour bon e fidel ek zot, zot merit ganny en pli bon deal.  Pou nou larzan nou ganny sarze komisyon lo sak servis.  Nou prop larzan pe servi pou labank agrandi son biznes.  Seselwa i konsyan ki profi zot fer e ki lapey zot bann CEO i gannyen.

Travayer Seselwa ki travay ek bann labank osi zot merit ganny en fair deal e nou pe demann zot pou do something about it.

Mr Speaker akoz ki travayer etranze pa devret pey zot lakaz ozordi isi Sesel parey nou letan nou pou al deor nou osi nou bezwen fer parey?

Mr Speaker an terminant ankor en fwa mon pou demann avek sa Lasanble – mon konnen poudir dan zot diferan rol ki zot pe zwe dan distrik zot in rankontre bann fe e mon konnen ki zot pou aport bann bon, bon sizesyon alor Mr Speaker mon ti a  kontan aret la e demann zot pou siport mwan inanimite pou nou fer sa Mosyon pase.  Mersi.

 

MR SPEAKER

Mersi Onorab William.  Bon avan mon demann en Manm pou segonde, deza ou’n mansyonn sa zafer ‘’go green’’, Lasanble Nasyonal Management Team pe deza al dan sa direksyon nou pe fer en pe diskisyon plizyer proze ki nou pou pran.  Mersi pou mansyonn sa Onorab William.  Bon Mosyon in ganny prezante.  Okenn Manm ki segonn Mosyon?  Onorab Sebastien Pillay.

 

HON SEBASTIEN PILLAY

Mersi Mr Speaker.  Mon ti a kontan segonn sa Mosyon e mon ti a kontan entervenir.

 

MR SPEAKER

Mersi Onorab Pillay.  Mosyon in ganny segonde, alor deba i ouver. Ou le entervenir ou annan ou 12 minit mon mazinen nou kapab overlap en pti pe.  Ok go ahead Onorab.

 

HON SEBASTIEN PILLAY

Mersi Mr Speaker.  Bonzour tou Manm Onorab e bonzour tou dimoun ki pe ekout nou.  Mr Speaker sa Mosyon ki devan nou i enn ki vin a en moman tre enportan, akoz dan bann travay ki Gouvernman pe fer a relasyon avek provizyon Lalwa i annan sa revizyon kad saler, ki koni konman en public service ki nou kapab vwar li dan son embodiment atraver Public Service Salary table.  E sa kad sale pe ganny revize apre ki in fer 5an depi ler ti ganny enplimante an 2013.

E sa revizyon i enkorpor bann diferan eleman sanzman dan kou lavi.  I enkorpor bann nouvo demann lo sa endividi, bann nouvo fonksyon dan travay sa endividi e se pou sa rezon ki sa Mosyon i enportan.  Akoz sa Mosyon pa pe zis koz lo sa bann kondisyon ki egziste, me pe koz lo sa bann kondisyon an referans avek etabli en kriter performans kan nou fer sa bann revizyon.  Sa i premye pwen enportan ki nou bezwen fer lo osa Mosyon.

2enm pwen enportan lo sa Mosyon Mr Speaker ki i pe koz lo la se i pe koz lo si ou le sa ki apel bann inegalite.  E la i enportan Mr Speaker pou mwan prezant pozisyon nou parti –  pa pozisyon Gouvernman pozisyon nou parti dan Lasanble lo sa size.

Mr Speaker rezon akoz mon fer sa, se akoz nou, nou annan en santiman anver ki mannyer nou ti a kontan vwar keksoz.  Si pozisyon Gouvernman i diferan, then Gouvernman li i ava travay lo ki mannyer pou li enplimant son pozisyon.  Me nou, nou krwar sa ki nou santi baze lo sa ki’n ganny dir avek plizyer dimoun, e bann enteraksyon ki nou’n gannyen, i annan  serten keksoz ki nou bezwen fer pou fer serten lazisteman.  E pou mwan fer sa pou mon ilistre sa Mr Speaker mon krwar i enportan pou nou get konteks ki nou ladan ozordi.

Mr Speaker mon krwar si nou tou nou’n swiv bann aktyalite, oubyen nou’n vwar sa ki pe pase, nou’n vwar poudir par egzanp pri fuel in monte lo laponp.  Pou mwan Mr Speaker mon vwar li en pe drol ki pri fuel in monte.  Annefe mon bezwen eksplik sa byen Mr Speaker.

Sa ki mon vwar drol mon i se ki malgre ki ler pri petrol i desann pri fuel lo laponp i still monte!  Me selman la mon konpran i dir pri petrol lo laponp pri petrol in monte an zeneral e la pri fuel in mont ankor!  So sa ki mon pe sey konekte avek le de Mr Speaker se ki lakonpannyen SEYPEC, i bezwen pe fer tre byen, akoz panda bann letan ki pri fuel i monte i pe anmas reveni.

Prezan si nou pran bann dimoun ki anploye, bann Seselwa ki anploye avek SEYPEC e sirtou nou koz lo kad bann zenn Seselwa ki’ n train pou al lo ban tankers avek SEYPEC.  E ki nou’n vwar?  Nou’n vwar en discrepancies ant lapey ki nou bann zenn Seselwa pe gannyen e lapey ki bann etranze i gannyen.

E sa ki nou kapab vwar osi se ki ou vwar de lenstans kot ou annan ou zenn Seselwa ki annan menm kalifikasyon menm nivo ki en etranze me sa etranze pe resevwar plis.

Se pou sa rezon ki nou, nou bezwen konmans koz lo sa bann size pou zisteman adres en pwen fondamantal dan sa bann Mosyon se sa bann inegalite ki egziste.

Mr Speaker anpasan mon konnen i pa neseserman lo deba, me mon ti a kontan ki Minister Finans osi i konmans investigate sa size ‘fuel’, akoz i en size ki konmans vin trakasan.  Akoz si nou pe vwar ki annan dan pri deor e ler i desann i devret desann osi si i parey dan lezot landrwa, me akoz ki i bezwen monte?

So konekte sa avek lefe ki sa konpannyen pe fer byen then sa konpannyen i devret kapab don menm kondisyon – mon a ganny korize si mon mal Mr Speaker, i devret kapab donn menm kondisyon nou bann Seselwa ki’n train lo sa nivo, ki annan sa kapasite zisteman parey zot pe donn bann menm kondisyon bann lezot etranze.

Mon kapab konpran pou dir ou pe sey atrakte etranze.  Me ou bezwen osi sey retain sa bann Seselwa ki’n train ! Sinon zot pou al lezot landrwa pou zot al rod lezot fonksyon.

E ler nou koz Mr Speaker lo lefe ki sa bann Seselwa, sa bann zenn Seselwa tre konpetan, tre kalifye zot retournen apre 6mwan zot bezwen asize apre 6mwan, si zot pa ganny reposted!  E la zot depan lo sa larzan ki zot in fer lo zot Kontra ki zot in ale.  E se la kot i annan mon krwar en si nou pou apel li en i pa vreman en inegalite me i annan en lapsus ki egziste lo ki mannyer nou ankadre sa sityasyon an sa ki konsern sa bann zenn ler zot ater! Sa i en pwen enportan.

E si nou pran sa largiman Mr Speaker kot nou pe koz lo…. sa bann inegalite e nou avans li en pti pe pli devan.  Mr Speaker resaman mon’n ganny konversasyon avek detrwa bann zenn enzenyer, be i enteresan ki nou pe vwar nou pe rely lo foreign work force akoz ou napa ase pou nou kapab provide dan bann Lenstitisyon ki nou bezwen sa bann dimoun, but at the same time ler nou vwar bann kondisyon ki nou pe donn sa bann etranze, as oppose to bann kondisyon ki bann Seselwa pe gannyen, nou bezwen demann serten kestyon e se la kot nou, nou pozisyon i se ki swa, swa sa bann post i ganny lokalize – swa in terms to sa bann kondisyon, serten sa bann perks – si nou kapab apel li perks ki nou pe donn sa bann travayer etranze, i devret kapab ganny donnen avek nou bann Seselwa ki’n osi etidye, ki’n osi kalifye ki sa bann dimoun.

Se la ankor kot sa Mosyon e kot nou pozisyon se koriz sa inegalite, ki nou santi i egziste.  Be nou, nou pa pe dir zis ale fer en blanket keksoz, kot nou pe fer monte saler tou dimoun eksetera.  Non!  Non!  Mon pa pe koz lo saler minimum la Mr Speaker mon pe koz lo premye pwen sa Mosyon, ki pe koz lo inegalite. Nou, nou pe koz lo en keksoz ki baze lo performans, e si,  e si sa bann profesyonnel pe delivre dan zot travay, zot devret pe ganny bann kondisyon ki permet zot pou reste dan sa travay!

Mr Speaker mon konnen dayer par egzanp i annan serten Minister ozordi par egzanp parey Minister Ledikasyon ki depan lo enzenyer.  Be si nou pa donn sa bann enzenyer ki Seselwa, sa kalite kondisyon ki neseser pou permet zot annan en lespri kot zot kapab fonksyonnen, e donn – Mr Speaker mon krwar i annan en Statement ki mover Mosyon in fer se donn son maximum dan son travay ek lafyerte, then i pou ale e se pou sa rezon ki nou pou vwar nou avek en inabilite pou nou kapab konplet nou proze ki nou met an plas pou nou konplete.

E se la kot sa Mosyon i vreman, vreman enportan.  E fondamantalman mon pran lapel ki mover Mosyon in fer se ki nou anmenn sa deba lo pwennvi lo bann facts ki nou annan lo sa ki dimoun pe dir nou, Mr Speaker akoz i enportan.

Mr speaker en lot pwen ki enportan ki nou regarde – mon konnen ki malgre ki sa i tous sekter prive me nou bezwen vwar ki mannyer nou deal ek sa sityasyon, akoz nou annan  plizyer Seselwa ki pe travay dan lotel ozordi ,ki malgre ki zot annan kalifikasyon – e souvandfwa nou vwar ki se sa Seselwa ki pe fer lamazorite travay, ki pe fer sa etranze ki nou’n anmennen – e mon le fer kler Mr Speaker, nou pa kont annan travayer etranze me sa ki nou oule se ki nou renumerate sa Seselwa ki pe fer sa louvraz ,dan en fason ki a permet li donn son maximum dan son louvraz avek lafyerte.

E se sa kot sa Mosyon pe vini ozordi an premye lye.  Sa Mosyon pe demann nou ki dan sa revizyon ki nou pe fer, malgre pou annan revizyon lo saler de baz ki nou pou donn dimoun me i osi annan en  revizyon osi dan bann kondisyon lo travay ki sa bann dimoun i fer, pou asire ki baze lo zot performans sa bann dimoun i ganny peye parey zot devret.

I enportan sa Mr Speaker.  I enportan akoz pou nou kapab retenir Seselwa ki nou’ train, ki nou’n anvoy train nou bezwen osi donn zot bann kondisyon travay ki enpor – ki byen.  Mr Speaker nou konpran zefor ki Gouvernman in fer.  Nou konpran par egzanp Gouvernman in pran zefor pou ki retir PIT lo bann Konpansasyon par egzanp ki bann dimoun pou gannyen.  Par egzanp si Gouvernman pa ti’n pran sa mezir pou retir PIT en teacher ki ti pou’n travay pandan 40an le i ti pou al tous son Konpansasyon, i ti pou vwar li pe pey 30poursan PIT lo sa Konpansasyon e sa mon konpran in retire.

Be si nou go back e nou regard nivo sa Konpansasyon sa kalkil ki pe ganny fer, ki nou servi eski petet i pa letan pou nou revwar sa formil ki nou pe servi pour kalkil sa Konpansasyon?  Mon konnen Mr Speaker ki taler mon pou ganny reminded ki 40an nou’n la nou pa’n fer sa be Mr Speaker ozordi mwan mon la mon pe koz lo la.  Mon pa kapab koz lo 40 an mon kapab koz la.  E sa ki mon krwar nou devret fer se la si nou kapab ganny en Lagreman nou tou, ki sa i pozisyon ki nou devret pran, se sa pozisyon ki nou devret pran so why not ki dan plas nou koz 1.25 days in terms of kalkilasyon Konpansasyon why not koz 1.75?  I pa bokou, me selman dan long term i pou fer en gro  diferans pou sa dimoun.  Why not menm koz lo 2days ?

Pou bann dimoun ki konnen se ki ou Konpansasyon i ganny kalkile lo 2 zour travay me la i pe ganny kalkile lo 1.25 zour.  Mon krwar i leta akoz sa formil in la pou e bon pe letan sa.  I en sanzman ki nou kapab fer ki tanzibman par egzanp ler ou regard bann kad travay parey bann nurses, teachers, sa i pou en benefis pou sa dimoun ki pe donnen de zour an zour ki apre 30an ler i pran son retirement oubyen i deside pou li aret travay, i a santi poudir in ganny en Konpansasyon ki a la oter sa ki in donnen in the first place Mr Speaker.

 

MR SPEAKER

Onorab donn mwan zis en pti moman letan pou mwan aknowledge Anbasader parmi nou.  I just would like to recognize the presence of His excellency the Ambassador from Mexico who is here in our Gallery.  OkWelcome Mr AmbassadorOk, later on we would be having a meeting. Ok?  Carry on Hon’ble Sebastien Pillay.

 

HON SEBASTIEN PILLAY

Thank you.  Thank you Mr Speaker.  Mr Speaker mon konnen poudir i annan mon pou ganny sipor lo sa pwen ki mon’n fer an relasyon avek kalkilasyon Konpansasyon.  Mon konnen mon bann koleg lo lot kote latab pou vwar merit dan ogmant sa formil ki nou fer kalkilasyon me i annan en lot keksoz ki mon ti a kontan fer en pledwari avek Lasanble, e sa i konsern graduate allowance Mr Speaker.

Mr Speaker ozordi ler nou koz lo graduate allowance e la ankor mon santi, mwan pou mon vwar li en inegalite. Mon personnelman mon vwar li konman en inegalite.  Akoz mon vwar li en inegalite?  Se ki ler en etidyan i ganny train deor i vini, si i travay dan Gouvernman i ganny sa graduate allowance.  Sa petet en keksoz mon ava ganny korize lo la.  Me si  sa etidyan i travay dan sekter prive i pa pe gannyen.

Me i pe kontribye pou pei selman.  I Sesel pe kontribye, e i en graduate.  Mon konpran i pou annan lezot deba be mon krwar in ler pou nou vreman konmans adres sa size dan en fason serye e dir ok – ou en etidyan that is en – sa i en lankourazman pou ou pursue ou letid.  I en lankourazman pou ki ler pou ou retournen pou vin travay – akoz pa bliye poudir bann laplipar, lamazorite etidyan Seselwa ki al etidye aletranze i fer ekstrememan byen.  Mon koleg akote mwan Onorab Hoareau i e dimoun ki ti fer ekstrememan byen dan son letid, e ti’n kapab reste L’Angleterre.  E lot kote latab i annan plizyer koleg parey.

E mon krwar enn bann rezon ki nou kapab ankouraz nou bann etidyan pou retournen, se ki mannyer nou kapab met bann kondisyon ki a fer zot retournen e kontan pou travay e kontribye pou pei.  So sa i pozisyon ki nou konman en parti nou santi i enportan, pou nou pran ozordi, baze lo konzantir ekonomik ki nou pei i ladan e posibilite reel ki i annan pou nou kapab fer sa bann sanzman.

Mr Speaker nou pa pe demann bann revizyon oubyen bann sanzman ki pou difisil pou attain.  Mon pa vwar difikilte Mr Speaker zis pou refer sa pwen pou sanz sa formil kalkilasyon e fer ki ou kapab donn en pe plis en dimoun ki’n donn omwen 40an dan son louvraz.  Mon pa vwar difikilte ladan.  Akoz sa formil ozordi i 1.25 e si ou al aziste li e par lefe ki prezan nou’n nobou tir PIT lo sa Konpansasyon i fer ki sa dimoun i a ganny en pti pe plis ler i fini travay.

Se sa ki nou pe rode. Se sa ki nou pe rode in terms of koriz bann inegalite ki annan dan bann kondisyon.  Akoz nou par egzanp konman en MNA nou benefisye avek en end of year gratuity.  Nou benefisye avek en end of term gratuity.  E mon krwar it’s only fair si nou pe koz lo egalite, nou osi anmenn en lavwa pou siport lezot kad travay pour ki ot osi egalman,  egalman zot ava benefisye avek travay ki zot pe donnen.

So sa Mosyon it’s also about the recognition Mr Speaker dan louvraz ki en dimoun i fer.  I about valuing en louvraz e travay ki en dimoun i fer, pou fer sir ki demen baze lo posibilite reel pou donn li an retour en Konpansasyon, en reward pou sa travay ki in fer.  Se sa vreman ki sa Mosyon pe rode devan nou ozordi Mr Speaker.

Mr Speaker mon konnen ki poudir dan deba ki pou swiv nou pou avans diferan size lo la.  Me si nou kapab avans bann size kot nou pa zis met bann sif partou, me nou koz lo bann posibilite reel ki ava annan ki nou kapab vreman fer sa bann sanzman, dimoun deor pou vwar ki nou’n think about this process.  Nou pa’n zis swazir sa Mosyon pou met li lo Order Paper e vini pou sey fer politik avek.  E mon kontan ki mover Mosyon in fer sa pwen kler lo komansman.

Sa pwen Mr Speaker ki nou’n sey fer ek sa Mosyon, se pou nou vin koz lo bann propozisyon reel ki nou kapab anmennen vizavi improve kondisyon travay pou nou bann Seselwa ki dan bann landrwa travay.

Ou konnen Mr Speaker mwan mon’n zwenn avek en zenn enzenyer ki’n koz ek mwan i dir mwan koumsa poudir regarde ler nou fer vini en etranze pou travay dan projects, sa dimoun i ganny en lakaz – sa dimoun i probableman ganny en transpor, sa dimoun i ganny en saler, sa dimoun si i annan zanfan, zanfan i al dan lekol ok, education allowance.  So tousala i gannyen.  Li sa enzenyer i ganny li zis son saler.  Si i fer overtime i a ganny en pe overtime.  Si i annan serten commuted allowance meal allowance i ava gannyen.

Be akoz nou pa donn li half of sa housing allowance si i pe rent? Dan plas ki nou pe fer vini e etranze sa boug i a pare pou ki donn de fwa plis.  Si nou donn li half sa housing allowance why not in fact, why not in fact nou donn li, nou donn li sa housing e sa boug i dir be ar be la mon vwar poudir zot pe aranz mwan.  Be mwan mon pare mon pou vin Dimans, mon pou al lo mon proze Dimans. Mon pou al lo mon proze 7 zour dan en semenn mon konnen an retour mon travay pe ganny valued.

Se sa ki Mr Speaker mon’n swazir pou mwan pran sa lapros lo sa Mosyon.  Mon konnen mon ganny blanmen souvandfwa dan Lasanble pou pran en lapros defansiv an sa ki konsern Gouvernman.  Be mwan mon dir Mr Speaker kot Gouvernman pe fer byen ok mon a defann li.  Be kot mon santi pou dir i kapab aranze on pou dir li aranze e sa i mon rol konman en reprezantan mon parti dan sa Lasanble Mr Speaker.  E se sa ki mon pe fer ozordi.

 

(APPLAUSE)

 

HON SEBASTIEN PILLAY

Mr Speaker an konklizyon mon remersi ou pou donn mwan sa pti morso letan.  Mon konnen poudir bann Manm i anvi ki nou kontinyen ek sa deba apre dezennen.  I annan en keksoz fondamantal ki nou devret mazinen Mr Speaker.  E sa se ki i annan nou 90mil Seselwa and each one of sa bann Seselwa se nou ki kontribye, sa bann ki isi Sesel, se nou ki kontribye dan larises sa pei.  I pa personn L’Angleterre ; i pa personn Australie, i pa personn Canada, se nou ki pey tax Sesel.  Se nou ki ler tax i monte nou ki bezwen peye.  Se nou ki ler pri komodite dan laboutik i monte se nou ki bezwen peye.  I pa sa boug ki asize Canada.  I pa sa boug ki asize L’Angleterre.  I pa sa boug ki asize Australie.  E nou ki nou pe demande nou Mr Speaker?  Nou ki nou pe demande – nou pe zis demande ki larises ki nou, nou kree dan sa pei i ganny reparti e dan sa konteks Mr Speaker valoriz kontribisyon ki nou bann Seselwa dan diferan landrwa travay pe fer, pou asire ki demen zot a reste dan sa landrwa travay, zot a donn plis e pou servi sa term ankor Mr Speaker, zot ava donn son maximum dan son travay avek lafyerte.  Mon remersi ou Mr Speaker.

 

MR SPEAKER

Mersi Onorab Sebastien Pillay.  Mwan zis mon anvi fer de pti komanter.  Ler ou’n koz lo graduates ki retourn dan nou pei ki travay dan prive, mon ti lev sa dan Lasanble mon ti ankor Deputy Speaker, mon ti take it up with DPA, DPA ti donn en leksplikasyon ki ler en graduate i al dan prive, zot ankouraz sa konpannyen prive pou top up saler sa bann graduates, me i pa arive sa.  Mon ti ganny en rankont avek sirtou bann manrmay bann graduates sorti Shannon College ki zot al travay dan Lendistri Tourizm kot nou annan bezwen sirtou dan bann lotel zot pa pe santi sa.  Zot pa pe vwar sa.  E vwala en pti pe dan sa direksyon kot mon osi mon largiman mon ti pe anmennen se ler ou en graduate ou en returning graduate you are all returning graduate e ou bezwen ganny ankouraze pou ou travay pou ou pei pa ki ou, ou ale e etranze i rantre e i ganny bokou plis perks ki ou.  

Ok?  Dezyenm pti pwen petet mon kapab fer sorti ankor.  Annou pran SCAASCAA in anba direksyon en Seselwa for so many years e SCAA in fer tre byen.  E ozordi sa Seselwa ki lorizin i sorti dan nou distrik nou de Onorab Hoareau Belombre Onorab Arissol Onorab John Hoareau tou Belombre Mr Gilbert Faure, in anmenn in diriz SCAA dan en semen sikse.

Lafen lannen la i pe pran son retret e mon kontan ozordi ki mon’n fek aprann ki Mr Garry Albert ki pe al take over.  Ankor i en Seselwa ki mon krwar i pa’n ganny sa sans pou li prouv son lekor e espérons ki i a kontinyen dan menm larout ki i a tenir SCAA dan sa direksyon ki nou’n vwar.

Bon nou pou annan – mon ti a kontan ki delegasyon ki ti al IPU avek mwan nou pou meet 1er dan Speaker’s Conference Room.  Apre pou Anbasader vizit avek Anbasader mon ti a kontan ankor extend lenvitasyon avek Chairman Komite IAC e Deputy Speaker pou akonpanny mwan pou rankontre Anbasader Mexico.  Bon avek sa nou ava pran en Break e nou ava retournen 2er pou kontinyasyon travay e deba lo Mosyon ki’n ganny move par Onorab Waven William.  Nou a Break nou a repran nou travay 2er.

 

(BREAK)

 

MR SPEAKER

Bonn apre midi tou bann Manm ki prezan e bonn apre midi bann dimoun ki a lekout.  Bon napa quorum, mon pour pran desizyon si fodre nou adjourn Lasanble ziska semenn prosenn or, akoz nou tou nou dir nou serye nou pe travay, me it’s not fair, it’s not fair.  Nou annan en Mosyon ki’n ganny move, ok mon donn 2 minit mon a demann Onorab lot kote si zot anvi regard deor si zot koleg i la, fer zot rantre, me si non pour adjourn Lasanble.

 

(Interruption)

 

HON JEAN-FRANÇOIS FERRARI

(Off-Mic)

Mr Speaker….

 

MR SPEAKER

Wi zis ler nou anvi travay…

 

HON JEAN-FRANÇOIS FERRARI

(Off-Mic)

Mwan mon ava dir i pa fair Onorab William, i en mank respe pour Onorab William ou vwar?

 

(Interruption)

 

MR SPEAKER

Nou konpran… non i annan….

 

HON JEAN-FRANÇOIS FERRARI

(Off-Mic)

I annan son Mosyon, in dir nou i pour vot an faver tou.

 

MR SPEAKER

I annan Manm, i annan son 3 Manm o bor li ki dakor avek sa ki nou pe dir, ki nou pe kominike.

 

(Interruption)

 

HON JEAN-FRANÇOIS FERRARI

(Off-Mic)

Larestan pa serye, larestan pa serye,

 

(Interruption)

 

HON JEAN-FRANÇOIS FERRARI

(Off-Mic)

Onorab Gill vin…

 

MR SPEAKER

I pa sorti byen lo nou Lasanble, e an deor avek piblik, so nou bezwen adjourn, deza nou’n perdi 10 minit.

 

(Interruption)

 

MR SPEAKER

E petet pour serten Manm mon pour kontinyen pour serten Manm, menm Onorab William i konn tre byen nou busy, nou tre busy, Onorab Ferrari, Deputy Speaker dan nou bann break nou pa asize, i annan bokou bann meetings ki nou pe fer, nou’n resevwar Anbasader nou fer long meeting, nou’n rankontre nou group IPU, nou’n meet ankor e Sekretarya osi tou pa asize dan Break, Madanm Clerk, Deputy Clerk osi tousala in busy.

Ok so mon ava pran desizyon.  Mon pour adjourn Lasanble e Lasanble i a repran son travay Mardi prosen 9er bomaten.

(ADJOURNMENT)