Home » Verbatim » 2018 » Verbatim Wednesday 17th October, 2018

Verbatim Wednesday 17th October, 2018

NATIONAL ASSEMBLY OF SEYCHELLES

Wednesday 17th October, 2018

The Assembly met at 9am

National Anthem

Moment of Reflection

Mr Deputy Speaker in the Chair

MR DEPUTY SPEAKER

Bon, bonzour bann Manm Onorab.  Bonzour tou dimoun a lekout Lasanble Nasyonal bomaten.  Nou pou kontiny nou travay ozordi bomaten, me avan, avan nou konmanse mon ti a kontan, mon ti a kontan fer en Ruling lo lensidan kot en Manm Lasanble Nasyonal ti raise en matter of privilege.

Parey mon ti promet zot yer swar, mwan mon’n fer li mon devwar pour adres sa size matter of privilege ki ti ganny met a mon latansyon dan mon kapasite konman Speaker, par Onorab Noline Sophola yer apre midi. Mon’n rod plis lenformasyon avek tou lede Manm Onorab, apre ki nou’n adjourn yer swar e bomaten.

Sa ki ti evidan se ki lensidan ti konmanse par en remark ki Onorab Sophola ti’n fer.

Ti annan en reaksyon ki ti swiv avek en lesanz parol ant Onorab Wavel Ramkalawan e Onorab Noline Sophola.  Ti napa okenn moman ki ni Onorab Ramkalawan oubyen Onorab Sophola ti konfront kanmarad direkteman ou fizikman.  Sa ki ti kler se sa latmosfer pa ti kordyal ant sa de Manm pandan sa lensidan. Dapre nou Standing Order si en Manm i santi son privilez in ganny afekte, anba Order 36 i devret anmenn son ka devan Speaker, e pou donn detay lo sa size.  Yer sa pa ti arive pandan sa peryod tea break ant 3.45 ek 4.15 pandan ki mwan mon ti dan mon biro.

Onorab Sophola ti anmenn sa a mon latansyon, apre ki Question Time ti’n fini dan 5.20 e mon ti permet li raise son ka akoz mwan mon ti panse ti annan pour fer avek en lensidan dan Chamber pandan Question Time.  Apre ki mon’n ekout le de kote e osi koz avek lezot Manm ki ti prezan, mon konklir ki sete en lensidan regretab.  Akoz nou konnen ki i annan e nou kontan ki i annan en latmosfer kordyal e amikal a tou moman dan nou Lasanble.

Sa i le ka preski toulezour me byensir i annan moman kot latmosfer i sofe.  E sa i normal dan nenport ki lanvironnman politik.  Mwan mon osi konklir ki i pa’n zanmen annan en moman kot okenn privilez in ganny afekte, okenn sekirite okenn Manm in ganny afekte dan sa lensidan.  E mon pour donn bann rezon akoz;

Non personn, non personn pa’n ganny nonmen dan bann lesanz parol ki’n pase.

2enm; Ni Onorab Sophola, ni Onorab Ramkalawan pa’n fer mwan konnen davans ki zot privilez ti’n ganny afekte parey Standing Orders i demande.

3enm; Onorab Sophola in konfirmen ki in reponn a tou sa bann lesanz dan en fason pour li ki in santi ti apropriye. Me pour servi son prop parol in dir e mwan site

‘’Ou a pike ou pa ava anbarke!’’

Alors mon pa vwar ki mannyer son privilez oubyen son sekirite dan okenn fason in ganny afekte.  Mon ti a kontan fer en lapel avek tou Manm, avek tou Manm pour azir avek restren e pour gard zot kalm a tou moman, malgre ki mon konnen pour annan de moman ki latmosfer i kapab sofe.

Sa mon Ruling final lo sa lensidan e mon pa pe ouver deba lo sa size.  Nou’n vin la pour nou travay e nou annan bokou latas enportan pour nou fini avek ozordi.

Onorab Pillay ou annan en keksoz pour ou dir? Onorab Pillay mon donn ou laparol.

 

HON SEBASTIEN PILLAY

Mersi. Mersi Mr Speaker.  Bonzour tou Manm. Mr Speaker mon en pti konsernen avek ou Ruling lo size Onorab Sophola …

 

(Interruption)

 

MR DEPUTY SPEAKER

Mon’n fer mon pozisyon tre kler.  Mon’n fini fer en Ruling lo la e mon’n dir dan mon Ruling mon pa pe ouver deba lo la.  Si ou pa dakor avek en Ruling ki Speaker in fer, sa i desizyon Speaker ki’n fer!  Mon’n fer sa desizyon – mon pa pe ouver deba, mon pa kapab permet ou ouver deba lo Onorab Pillay!

 

HON SEBASTIEN PILLAY

(Off-Mic)

 

MR DEPUTY SPEAKER

Non.  En Ruling in fer e mon pep e entertain deba nou pe kontinyen avek lo nou Order Paper mon pou fer sa tre kler.

 

HON AUDREY VIDOT

(Off-Mic)

 

MR DEPUTY SPEAKER

Onorab Audrey Vidot eski ou pe pran menm laliny ki Onorab Pillay pe pran? Mon donn ou laparol.

 

HON AUDREY VIDOT

Mersi Mr Speaker. Bonzour tou dimoun prezan. Mr Speaker mwan osi konman en Manm mon annan mon privilez pour mwan dir si, ki mannyer, ki mannyer nou Lasanble nou kapab travay koumsa dernyen fwa Onorab Ferrari ti annan son konsern …

 

MR DEPUTY SPEAKER

I’m sorry ou pe ouver deba lo en Ruling ki mon’n deza fer. Mon pa pe ouver deba lo en Ruling ki mon’n deza pase! Mon pa pe ouver deba lo sa, mon pa pe ouver deba lo sa ka ki’n deza pase.

Onorab Sophola ou’n lev ou lanmen mon pa pe ouver deba lo sa.  Sa matter in fini.  Mon’n fer en Ruling lo la.

Nou pou kontiny nou travay lo nou Order of The Day nou annan …. Order of the Day nou annan detrwa Mosyon ki ti’n ganny table devan nou.  E premyerman, e lo sa bann Mosyon nou annan 4 lo Order Paper.  I annan 4 lo Order Paper, me mon bezwen dir ki dan sa 4 ler Order Paper ti ganny pibliye, apre ki Order Paper ti’n pibliye, e ti’n sirkile mon’n resevwar en Notice sorti kot Onorab Sebastien Pillay ki premye lo lalis Mosyon ki’n ekrir mwan en let le12 Oktob kot in sit son lentansyon pour li withdraw son Mosyon.  E alors premye Mosyon i ganny withdrawn a lenstriksyon sa Manm li menm.

Dezyenm Mosyon ki nou annan se enn par Onorab Paul Ernesta, Manm pour Takamaka e li osi zot a rapel ki son Mosyon le 8 Oktob semenn pase, i ti ekrir Speaker pour demande ki i ganny deferred until further notice.

E swivan son let son Mosyon ti ganny deferred me li osi le 12 Oktob in re-ekrir Clerk pour dir ki i pe withdraw.  Me i pa’n donn okenn rezon zot pe withdraw. Sa i son privilez.  E accordingly mwan mon’n withdraw tou le de Mosyon pour Onorab Pillay e Onorab Paul Ernesta. Ki vedir ki reste nou 3enm Mosyon e 4enm Mosyon.

So, lo Order Paper la devan nou, nou annan 3enm Mosyon ki pour nou deal avek. Onorab Ferrari.

 

HON JEAN-FRANCOIS FERRARI

Mr Speaker avek permisyon mon annan en matter of privilege silvouple.  Mon ti a kontan lev li la deswit.  Mon ti a kontan lev li la deswit!

 

(Interruption)

 

MR DEPUTY SPEAKER

Onorab Ferrari les mwan klersi en pwen.  En matter of privilege ki pe raise dan Chamber

 

(Interruption)

 

MR DEPUTY SPEAKER

… non, non … En matter of privilege, en matter ki urgent ki li i anvi raise dapre nou Standing Order i kapab raise la dan Chamber.

 

(Interruption)

 

MR DEPUTY SPEAKER

Non, i napa 2 standar.  I napa 2 standar.  Si en keksoz i devlope dan Chamber, si i lev en lager dan Chamber ou bezwen deal avek la konmela. Si en Standing Order, si anba Standing Order en Manm i deside pour li lev son lanmen, i son drwa pour li fer li.  Parey Onorab Sophola yer, i lev son lanmen in raise e mon’n fer en Ruling.

 

(Interruption)

 

MR DEPUTY SPEAKER

Annou azir dan en fason kalm.

 

(Interruption)

 

MR DEPUTY SPEAKER

 

Annou azir dan en fason kalm. Mon’n donn Onorab Ferrari laparol. Onorab Ferrari continue.

 

HON JEAN-FRANCOIS FERRARI

Mr Speaker – Mr Speaker mon pe raise en matter of privilege kot mwan santi pour dir mon privilez i mon travay dan sa Lasanble pe ganny ankor enn fwa afekte.

Mr Speaker, mwan mon en Manm Business Committee. Dan Assembly Business Committee dan ou prezans e dan prezans Speaker Prea semenn pase, nou ti agree poudir pour defer en Mosyon oubyen pour withdraw en Mosyon ou bezwen annan en rezon ki valab e ki akseptab. Notwithstanding sa ki privilez ki Standing Orders i donn nenport ki Manm pour withdraw nenport ki kestyon, a nenport ki moman ziske ler sa deba pa ankor ouver lo sa Mosyon – notwithstanding that Speaker Prea ti demande ki ler bann Manm i deside pour withdraw oubyen pour defer en Mosyon zot vin avek en rezon valab!  Zot pa pran li koman en palto fann deryer pour zot met Mosyon lo Order Paper e apre les ou travay lo sa bann Mosyon e detrwa erdtan avan oubyen detrwa zour avan, zot deside pour zot retir sa bann Mosyon.

Mr Speaker i enportan pour mwan dir, ki dan sa Komite Business Lasanble semenn pase, nou ti retrouv nou avek 3 Mosyon. 1 par Onorab Pillay, 1 par Onorab Ernesta, e 1 par Onorab Waven William. Sa 3 Mosyon ti 3 sel Mosyon lo Order Paper, akoz tou sa bann Mosyon e tou le 3 sa bann Mosyon se bann Mosyon ki ti’n ganny previously deferred, e finalman zot in ganny deferred e zot in vin an ta at the bottom of the queue.

Nou, nou, nou Mosyon ti ganny pouse ki mannyer ou kapab dir sa Ad Vitam Aeternum ki nou pa konnen kan i pour pase.  Mon ti demande avek Speaker, mon ti demande e Speaker ti aksepte ki mon rezerv drwa sa kote latab, pour mwan konsilte avek Leader Lopozisyon ki pa ti dan pei pour nou kapab fer antre en Mosyon lo sa Order Paper. Akoz nou, nou’n vin travay, nou, nou pa’n vin defer Mosyon.

Mon ti fer egzakteman sa, mon ti konsilte avek Clerk. Mon ti konsilte avek son bann travayer dan son Lofis e Speaker, mon ti konsilte avek Speaker.  E Speaker ti aksepte dapre nou laranzman ki Mosyon Onorab Flory Larue i ariv lo Order Paper – an 3enm pozisyon.  Mardi bomaten, Mardi bomaten, non Lendi apre midi, 2 er ki mwan koman Chief Whip ki mon ganny lenformasyon ki Onorab Ernesta ek Onorab Pillay in ankor enn fwa withdraw sa Mosyon ki zot ti’n deza withdraw ki zot ti’n ensiste pour vin lo Order Paper! Mr Speaker i pa ak..sep..tab! Sa Lasanble i bezwen en Lasanble ki serye, ki vin travay.  E parey Onorab, mon krwar Onorab Gill ki ti dir dernyen fwa ler en Mosyon i ariv lo Order Paper fodre ou’n pare pour prezant li e pour ou travay lo la!  Onorab Larue pour prezante son Mosyon li kantmenm zot pe met presyon lo li par tir zot demosyon.  Me selman. E semenn pase ti ariv menm difikilte avek mwan.

Mr Speaker i pa ak..sep..tab sa kalite pratik. E mwan mon ava demande ki Lasanble i kondann, sa kalite pratik akoz mwan personnelman koman en Manm mon santi i en mannev byen kalkile – byen kalkile pour derey travay Lasanble e pour fer ki piblik deor apre piblik deor i dir Lasanble pa serye akoz se sa zot lobzektif. Zot pe maniganse, zot pe provoke, zot pe rod tou bann fason pour zot fer, pour ki Lasanble pa fonksyonnen.  Mr Speaker i pa akseptab! Mon demande ki en Ruling serye i ganny pran lo sa size ki sa i ganny kominike avek Speaker Prea osi, e ki nou travay, nou rekomans nou travay dan en fason ki serye.  E ki Onorab Pillay, e Onorab Ernesta pa vin dan sa Lasanble pour zot zis gat letan sa Lasanble! Mersi.

 

MR DEPUTY SPEAKER

Avan mon pronons mon lekor lo la. Mwan war Onorab Pillay ou enn sa dimoun ki met en Mosyon apre ou’n withdraw, mon permet ou.  Mon donn ou laparol.

 

HON SEBASTIEN PILLAY

Mersi Mr Speaker.  Bonzour Mr Speaker, bonzour tou Manm e bonzour tou dimoun ki a lekout.

Mr Speaker mon oule raise en matter of privilege. Akoz mon santi ki mon privilez pe ganny afekte dan sa Lasanble.  Mon Standing Orders Mr Speaker mon apel li mon Standing Orders akoz mwan en Manm Lasanble i donn mwan tou drwa pour  mwan withdraw mon Mosyon ler ki mon anvi withdraw mon Mosyon e baze lo rezon ki mwan ki mon krwar i valab.

Mr Speaker i inakseptab – inakseptab pour en Manm vin demande ki Lasanble ki mwan koman en Manm Lasanble mon pa vin dan Lasanble, akoz li i santi poudir mon’n afekte son privilez! Mr Speaker Onorab pa’n eksplike ki mannyer mon’n afekte son privilez.  I pa’n donn okenn detay lo ki mannyer mon’n afekte son privilez! Onorab mwan war i drol Mr Speaker ki i pe blanm nou lo sa kote latab, e i enportan Mr Speaker ki ou les mwan etablir sirkonstans – akoz si ou pa les mwan Mr Speaker ou pour ganny war koman ou pe favoriz en kote latab! Ou pour ganny war ki ou pe favoriz en kote latab Mr Speaker!

 

(Interruption)

 

HON SEBASTIEN PILLAY

So, i enportan ki nou ziz keksoz ….

 

MR DEPUTY SPEAKER

Onorab Pillay mwan ki deside ki manner mon pour tret sa deba.  Mon’n permet ou koze fer ou pwen.

 

HON SEBASTIEN PILLAY

Mersi, Mr Speaker.  Mersi, mersi.  Mwan osi mon ti asize dan ABC Mr Speaker, me i pa vre ki Lopozisyon ti annan Mosyon ki ti pe ganny pouse. Se akoz a sa moman ki nou ti ganny enformen ki Lopozisyon ti annan en Mosyon! E taler mon koleg i ava konfirmen ki mannyer ou Mosyon in ariv lo Order Paper?  Akoz mon Mosyon ler ti vin lo Order Paper mon ti eksplik Speaker  – enn – mon ti napa 7 zour ler mon ti anvoy mon Mosyon. Me, me mon Mosyon ti appear lo Order Paper! E mon’n donn mon rezon dan sa let ki mwan mon pa pou dan detay.  Si ou, oule donn detay mon let e rezon ki mon’n donn Lasanble, donn gran piblik ou!  Si ou, ou le afekte travay en lenstitisyon Gouvernman ou donn gran piblik!  Mwan mon pa vin dan sa Lasanble pour mwan vin detri sa Gouvernman apre pour mwan vin demann ‘pardon’ personn mwan!  Mwan mon’n vin dan sa Lasanble pour mwan travay – ok?  E mon pa pran Lord …

 

MR DEPUTY SPEAKER

…Onorab Pillay?

 

HON SEBASTIEN PILLAY

…. avek ou Onorab Ferrari oubyen personn ki asize lo lot kote latab.

 

MR DEPUTY SPEAKER

… Onorab Pillay?

 

HON SEBASTIEN PILLAY

Standing Orders ….

 

MR DEPUTY SPEAKER

Onorab Pillay, address the Chair.  Address the Chair, ou pa pe adres Onorab Ferrari ou.  Address the Chair.

 

HON SEBASTIEN PILLAY

Mr Speaker mon apologize – mon pa’n address the Chair mon ava fer li atraver ou. Non, be mwan, mwan kot mon’n fer sa ki mal, ler mon’n fer sa ki mal mon’n pare pour mwan montre mon grander lespri pour mwan dir mon pa’n address the Chair mon address the Chair parey mon’n devret fer.  Mon donn legzanp.

 

MR DEPUTY SPEAKER

Onorab Pillay ou’n fer ou pwen, ou’n fer ou pwen, mersi bokou.

 

HON SEBASTIEN PILLAY

Mersi, Mr Speaker.

 

MR DEPUTY SPEAKER

Mon pou, mon ti a kontan parey Onorab Prea ti fer sorti ler i ti pe diskit zisteman nou ti lo sa size Mosyon, mon rapel tre byen bann diskisyon ki ti pe pase lo nivo Komite Biznes Lasanble, kot nou diskit byensir bann kestyon, bann Mosyon bann Bill ki vin devan Lasanble, e vreman nou planifye travay Lasanble Nasyonal.

Standing Orders i byen kler lo Mosyon.  I kler pou dir en Manm i bezwen donn Notice avek Speaker atraver Clerk ler i a per fer son Mosyon.  Sa ki osi kler se ki en Manm i osi annan drwa withdraw sa Mosyon.  Sa i kler sa anba Standing Orders. Me, tout an dizan sa nou konnen ki mannyer nou fonksyonnen, e ki mannyer sa lenstitisyon i ganny lefikasite. Lefikasite i vedir ler louvraz in ganny planifye louvraz in ganny fini dan en fason vit an servan resours e letan ki’n met de kote – pli vit e pli meyer posib. Malerezman dan sa Lasanble resaman nou’n vwar plizyer lensidan ki, ki’n pase ki wi in pa’n kas nanryen dan Standing Orders, me ki’n retard travay Lasanble Nasyonal.

Par egzanp, par egzanp in annan detrwa Bill ki’n ganny reprezante par Leader of Government Business lo lapar Gouvernman.  Bann Bill in menm fer First Reading e apre zot ganny withdrawn.  Bann Bill sibstansyel, parey lamannman lo Fon Pansyon, parey ‘Control of Dogs Bill.’  Zot ganny mete devan Lasanble e annou get konmsi lapratik ki arive enn fwa en Bill i vin devan Lasanble ouswa en Mosyon i vin devan Lasanble. Kan i ariv devan Lasanble sa se nou Lord Dizour.  Sa se nou travay, nou latas ki tou dimoun i met zot letan – pa zis letan devan Lasanble, me letan ler zot al se zot dan zot biro kot zot ete, pour zot prepar pour sa latas ki non selman i lo nou Order Paper, me i ganny pibliye avek pep Seselwa, ki e zot konnen dan zot lespri zot pe espekte en deba lo la.

Alor ler nou vini tou dimoun pe ekspekte sa deba lo la, tou dimoun in pare lo la, tou dimoun in met resours e letan de kote pour fer sa preparasyon.  E akoz ou annan sa privilez anba Standing Order ou withdraw li ou pe fer li tout an konesan ki ou’n perdi letan tou larestan Manm.  Ou’n fer zot perdi letan; ou’n fer sa Lasanble perdi letan.  E term pase mon rapel, dan omwen de lokazyon akoz bann Bill in ganny withdrawn Lasanble ti adjourn pour 2 zour konsekitivman – 2 apre midi! I 50poursan letan Lasanble Nasyonal.  Napa personn ki ti’n kas Standing Orders.  Ti byen li me, sa fason travay i retard Lasanble Nasyonal.  I vin parey demen en Manm i kapab anvoy en kestyon pour en Minis, 10 zour davans e Minis i prepar li i vin ek son teknisyen i ariv la devan e ler i arive sa Manm – Speaker i kriy li ou kestyon in arive i dir I’ am sorry Mr Speaker mon pe withdraw mon kestyon.  I kapab fer sa li.

Me, an fezan sa eski ou pa pe retard travay Lasanble Nasyonal?  Eski ou pa pe retard travay sa Minis e son lekip?  Sa i pa le ka ozordi me mon pe donn en analogy – en keksoz ki kapab ariv parey, ki kapab ganny trete parey. Mosyon i egzakteman parey.

Sa ki Onorab ti dir dernyen fwa ler nou vin ek en Mosyon e sa ti ganny reflekte dan remark Onorab Simon Gill dan ABC, kot li osi i krwar ki si ou pou vin avek en Mosyon devan sa Lasanble ou ekrir Speaker atraver Clerk ou donnen ou’n devret prepare. Ou’n devret prepare e ou bezwen otan  ki ou kapab fer li ou devwar pour delivre parske si non ou konnen ou pe met retar dan travay Lasanble, ou konnen ou pe gaspiy letan lezot Manm.

Alors pour mwan wi Onorab Pillay sa ki ou’n fer i parfetman within ou drwa dan Standing Orders, mon napa problenm ek sa.  Sa ki Onorab Ernesta in fer i parfetman within Standing Orders.  Annefe li i pa’n donn okenn rezon akoz in withdraw, zis in dir i pe withdraw.  Son semenn avan zis i dir defer.  En semenn pli tar i vini i dir ‘’ sorry withdraw.’’ I pa’n donn okenn rezon.  I son drwa sa, me eski i pa pe retard travay Lasanble? Eski i sa fason ki nou anvi travay? Mon pour repet parol Onorab Prea Speaker Lasanble Nasyonal, ki ti dir annou travay dan en fason serye, si nou met Mosyon, mon pe fer en lapel avek tou Manm e mon bezwen dir mon pe fer en lapel spesyal lo sa kote latab parske i annan de ka la sa semenn – annefe, dan de semenn kot non selman i ganny deffered me pour 2enm semenn konsekitivman la i ganny withdrawn.

E la mon pe fer en lapel spesyal pour nou pa travay dan sa fason, parske i pe met retar travay Lasanble Nasyonal.  Avek sa nou pour kontinyen i 9.30, Onorab Gill ou ti le en point of order oubyen …?

 

HON SIMON GILL

Bonzour Mr Speaker, mon ti oule entervenir apre bann komanter ki’n fer.

 

MR DEPUTY SPEAKER

Non, mon pa pe ouver deba lo la, parske tou dimoun pour le koz lo la, mon ti a kontan nou al direk lo nou Mosyon.  Nou deza an retar lo nou travay mon ti anvi nou la direk lo nou Mosyon, Onorab Gill.  Nou bezwen al direk lo nou Mosyon, nou napa letan pou fer deba lo sa bann zafer. So, Onorab Flory Larue ou Mosyon i devan nou laparol i pou ou.

 

HON FLORY LARUE

Bonzour Mr Speaker.  Bonzour tou Manm. Bonzour tou dimoun dan lakour. Mr Speaker mon Mosyon i lir koumsa;

‘’Lasanble Nasyonal i fer en lapel serye avek Parti Lepep pour retourn tou propriyete Leta ki zot in pran aste bon marse, oubyen gannyen atraver zot pozisyon privilezye ki zot ti annan sa letan, afen ki sa bann later i a kapab ganny repartisyonnen dan lentere sa bann kominote.’’

Mr Speaker dan ladres SONA le 6 Mars 2018 Prezidan Faure ti dir e mon quote;

‘’Gouvernman i reste angaze pour lit kont koripsyon. Komisyon Anti-Koripsyon i sa Lotorite endepandan ki’n ganny mandate par Lalwa pour fer lanket koripsyon.  Nou pou revwar Lalwa Anti-Koripsyon e donn plis resours sa Lotorite.  Sa pou asire ki i fonksyonn dan en fason pli efektiv e efikas dan lanket deteksyon e anpes koripsyon.

Prozedlwa pour ganny prezante par Lasanble Nasyonal pour son laprouvasyon avan Septanm sa lannen.’’ ferm kotasyon.  Sa pa ankor arive Mr Speaker.  Avek sa retar eski Mr Danny Faure pe anpes deteksyon koripsyon?

Dan mon larepons 6 zour apre SONA le 12 Mars 2018, mon ti dir ki mon ti’n soumet en ka avek Komisyon Anti- Koripsyon zour ki SONA ti’n ganny prezante le 6 Mars 2018 menm.  Mon ti anons ek pep Seselwa ki SPUP/SPPF/Parti Lepep ti anba lenvestigasyon pour koripsyon.  Sa ti pour zot apropriyasyon 40 bout later pandan zot manda.  La nou Oktob 2018 e Bidze pour ganny anmennen le 30 Oktob. E mon pa krwar ki sa Prozedlwa pou’n ganny prezante dan nou Lasanble. Ankor en promes ki Msye Faure pa’n delivre. Nou Komisyon Anti-Koripsyon i ankor dan menm leta.  E la mon vwar mon pe anmenn tou bann fe bann later Parti Lepep devan pep Seselwa, akoz Msye Faure Msye Faure lo labar sa Komisyon pour napa okenn ledan.

Eski sa i enn bann vre bi Msye Faure? Eski pep Seselwa pour santi li konfidans pour an enn levidans dan leta ki Komisyon Anti-Koripsyon i ete ozordi?  Koman en parti politik, Parti Lepep i vreman fyer son pase, kot i dir in anmenn devlopman ek loportinite pour pep Seselwa akoz napa en lot Gouvernman ki ti pour kapab delivre sa.  Zis zot ek zot vizyon.  An mezir ki zot in kontinyen dir sa Seselwa, zot in anrisir zot lekor avek propriyete Leta. Annou rapel ki sel parti ki’n o pouvwar depi le 5 Zen 1977 atraver en Koudeta se SPUP li menm, li menm li SPPF e prezan li menm li Parti Lepep.

Parey mon ti dir dan mon dernyen Mosyon ozordi i lannmen laniverser 2 an ki Msye Faure in pran baton Msye Michel, nou konnen ki i en fe reel ki Egzekitiv pa enterese avek bann sizesyon ki Lezislatif i anmennen sorti kot piblik Seselwa atraver en Mosyon.

Mon repran sa loportinite pour esey fer en lapel, ki petet zot a pran bann Mosyon o serye, me si zot pa fer li mon kapab pran kouraz ki travay ki mon’n fer in edik pep Seselwa. Mon’n deza dir ki Parti Lepep i annan 40 bout later. Me finalman mon’n vwar ki zot ti annan en total 59 morso later!

Sa pour en parti politik ki son ‘MOTO’ se ki tou dimoun i sipoze annan menm loportinite Gouvernman Parti Lepep par kont i aplik en Polisi ki dir ki en sitwayen Seselwa i kapab ganny akse avek zis en morso later Leta dan son lavi.  E si i deza annan later prive, i pa pou zanmen ganny akse avek later Leta me sa pa ti aplik pou bann ki ti dan gouvernans sa parti ek zot fanmir, ek zot dalon e dimoun ki zot ti rann faver e sirtou i pa ti aplik pou parti li menm.

Tou later ki parti Lepep in gannyen in ganny aste direkteman avek Gouvernman eksepte pour sa 3 morso ki mon’n vwar.  Enn sa 3 morso i kot Biro Brans St Louis e lezot i Baie Lazare avek en zistwar byen enteresan.  Mr Speaker mon pou al direk lo sa lalis ki Parti Lepep i annan, ki dan diferan distrik pour ki tou sitwayen i konnen kot zot ete. Mon asire ki bann MNA respektif pou donn plis lesplikasyon lo ki ti kapab ganny fer dan sa bann lokasyon.  I annan bann morso kot ki pou annan bann pri e lezot ki mon napa.

Mont Buxton Mr Speaker, i annan en morso ki mezir 4, 447met kare ki annan en lakaz ki vreman gro lo la.

English River i annan 2 morso ki ansanm i mezir mil 1.353met kare pour en total R270mil sinyen par Msye Danny Faure kot roundabout i ete zis abor klinik.

Glacis i annan en morso ki mezir 1,516met kare ki ti ganny aste pour R130mil sinyen par Msye Danny Faure zis par deryer Ladministrasyon Distrik.

Cascade en morso ki mezir 1,429met kare pour R42mil osi sinyen par Msye Danny Faure zis par deryer Ladministrasyon Distrik.

Takamaka en morso ki mezir 1,561met kare ki ti ganny aste pour R41mil sinyen osi par Msye Danny Faure obor kot kort ek car park Legliz.

Bel Air en morso ki mezir mil 1,340met kare ki ti ganny aste pour R300mil osi sinyen par Msye Danny Faure kot lekol Montessori i ete.

Au Cap en morso ki mezir 1,526met kare ti ganny aste pour R150mil sinyen par Mr Esmee Jumeau ki ganny trouve zis par devan Domaine Val de Pres obor Biro Ladministrasyon Distrik.

Port Glaud en morso ki mezir 882met kare obor semen zis avan semen ki pou mont San Soucis osi sinyen par Msye Danny Faure.

Bel Ombre en morso ki annan 3 pti bout ki ganny met ansanm pou mezir 364 met kare pour R18,250.

Kot lekol International School i annan 3 pti bout ki reste sorti dan en pli gran bout ki ti mezir 1,463 met kare ki ti ganny aste pour R150mil osi sinyen par Msye Danny Faure.

Zot in transfer apre zot in koup an pti morso, apre zot in bliye ki zot annan par dan sa lekol.  Laplipar lezot morso later kot sa lekol, i paret pe ganny lwe avek Gouvernman par en lease ouswa en bay par International School.

Anse Aux Pins i annan en morso ki mezir 2, 309met kare deryer kot Savings Bank.

Anse Boileau i annan en morso ki mezir 1,111met kare obor kort obor Ladministrasyon Distrik.

Beau Vallon i annan en morso ki mezir 986met kare zis dan larantre kot lekol biro brans Parti Lepep i ete.

Roche Caiman zot ti annan 3 morso, i paret de nepli pou zot.  Enn ti en semen antye ki plis ki 200 met kare. Mon vreman pa konpran ki mannyer Parti Lepep ti annan en semen pour li menm. Zot ti annan en lakaz dan en ranze 4 e prezan zot ankor annan en morso ki mezir 602 met kare sa i premye bout ki vizavi kort kot laplenn i ete zis obor Highway.  Sa morso i ankor vid e pa ankor devlope.  Al gete.

Les Mamelles en morso ki mezir 852met kare.

Mont Fleuri en lot morso ki mezir 566met kare kot sa batiman kot Biro Brans ti ete vizavi lekol Lanmizik.

Mr Speaker Barbarons, Grand Anse Mahe zot annan en morso ki son nimero i D2565 ki mezir 12,184 met kare ki apepre 2 laplenn foutbol. Zot ti aste 3 morso avek Gouvernman – enn pour R1, e sa lot 2 ansanm pour R240mil. Sa propriyete i bor lanmer e i baliz direkteman avek kot Msye Rene i pe reste aktyelman Barbarons, e se ti Msye Rene li menm ki ti siny sa dokiman pou fer sa 3 later vin en sel morso.  Sa dokiman ki i ti sinyen napa ni dat ki sa tranzaksyon ti ganny fer dapre bann formalite normal ki devret ganny respekte.

Lo sa propriyete i annan en lakaz ki vreman gran ek lezot pti batiman avek en gran swimming pool prive.  Sa morso later son propriyeter i ganny mete koman ‘Seychelles People Progressive Front of Anse Polite.  Kwa sa Mr Speaker?

En lot Biro Brans Parti Lepep? Eski bann siporter Parti Lepep i ganny akse ek sa bann fasilite Anse Polite?

Pointe Larue Mr Speaker, zot annan en morso – not byen S4296 ki mezir 1,921 met kare ki zot ti aste avek Gouvernman pour R150mil sinyen par Msye Danny Faure.

Sa later i trouve obor bann 2enm group flat SACOS e i bord avek semen en kote e runway lot kote.

Praslin zot annan 3 morso, enn Moulinien Estate Cote D’Or ki ti ganny aste pour R55mil ki mezir 1,232 met kare.  Msye Danny Faure ki ti sinyen pour sa enn.

Enn obor Pension Fund kot STC i ete Grand Anse Praslin ki mezir 952 met kare ki ti ganny aste pour R115 mil osi sinyen par Msye Danny Faure.

Apre kot Horizon Complex Baie Ste Anne ki mezir 2,646 met kare pou R135mil ki annan Nouvobanq, SNYC, e en lepok ti osi annan Minister Lanplwa laba pou plizyer lannen.  Sa batiman antye i pou Parti Lepep.  Sa osi in ganny sinyen par Msye Danny Faure.

La Digue zot annan bann morso vreman stratezik dan sant La Digue.  Mon’n deza site mon a sit ankor.  Sa i kot Biro Por i été kot kiosk i été.  Vizavi Biro Por kot sa  vye lakaz tradisyonnel i été kot ti biro Parti Lepep.  Kot La Noche sa bout later devan La Noche e kot Amusement ek Fun Park tousala bann morso later ki Parti Lepep in aste avek leta. Mon ti sipliy ek Msye Faure pou rann sa bann later bann digwa  pou redonn bann loportinite devlopman.  Mon ti menm dir ki zot ti pe rod vann sa bann later.  E mon fek dekouver ki morso LD1103 in fini ganny vann par Parti Lepep le 5 Me 2018 avek en dimoun dan prive.

Mon pa’n ganny akse avek file me on espekte ki avek rezistrar dan mon konklizyon ki kekfwa mon a kapab devwal pri final ki sa later in ganny vann par Parti Lepep ki zot, zot ti aste avek leta.

Mr Speaker mon ti konmans tousala ler mon ti etonnen pou konnen ler Gouvernman in pran larzan Linyon Eropeen, pou konstri en bazar pou bann zabitan si Mahé dan Anse Royale.

Me selman sa later sa bazar ti lo la ti pou Parti Lepep.  Sa kalite fonksyonnman fer tranzaksyon pa ti kler ditou. Akoz sa ti vedir zot in menm tronp en lorganizasyon enternasyonal ki’n fer en don pou lentere e devlopman pep Seselwa.  Se apre sa lensidan ki mon ti antreprann bann lenvestigasyon  pli serye pou regarde ki kantite later egzakteman Parti Lepep i annan.  Sa lenvestigasyon  Anse Royale ti fer mwan fer fas avek Prezidan dan en meeting piblik Anse Royale le 27 Zanvye2017.  Kot mon ti donn li dokiman e demann li kan ki Parti Lepep pou rann Seselwa sa later ki zot ti aste avek Gouvernman pou zis R60mil sinyen par Msye Danny Faure li menm.

Zis apre dan Zanvye 2017 sa later ti ganny koupe an detrwa pti morso.  Mon fyer pou dir par kont ki sa later in ganny rann an pti morso zot in rann nou 3 an Desanm 2017 pou R1.

Sa Mr Speaker i sel later ki Parti Lepep i rann dan son 59.  Mon espere ki zot ava rann lezot later pou benefisye devlopman dan bann distrik, pou lentere nou popilasyon an antye.

Mr Speaker apre nou annan nou bann later direkteman dan lizye tou Seselwa ki zot vwar toulezour.  Nou tou nou pas devan ex- Discoteque Flanbwayan.  Sa propriyete  i later konble e i mezir  10,439 met kare.   I vast e ti a kapab annan plizyer batiman kle pou nou bann Minister.

Zis semenn pase nou’n tande ki Minister Kiltir pe al lwe SACOS Tower.  Lezot Minister osi i mank biro ; tel ki Minister Tourizm  menm Minister Lasante.  Sa later ti a kapab ganny servi pou konstri biro gouvernmantal e preski an labandon e preski totalman vid.  I annan en dimoun ki servi en morso a kote kot nou vwar en bato bann latant ki ganny lwe ek lezot.

Ki kantite keksoz ki kapab ganny fer pou devlopman nou lavil si Gouvernman ti’n gard sa propriyete pou deservi pep Seselwa, olye vann Parti Lepep pou lentere personnel?

Me sa enn ki’n vreman en vol direk lepep Seselwa, se Maison Du Peuple.  Sa later V8013 i mezir 6,044 met kare. En propriyete ki depi son konmansman i sipoze otan pou ‘Tou’ Seselwa.  Kot manm piblik in vin ansanm pou konstri sa batman.  I ti ganny konstri avek lasyer pep Seselwa.  Piblik ti kontribye direkteman atraver donasyon ti ganny met ansanm dan bann aktivite tel ki konpetisyon lapes.  Sa bann aktivite ti sipoze lev en fon R3milyon.  Me sa ti ganny sirpase.  Menm nou vwar en enzenyer sa lepok ti ganny estimen pou kout anviron R150mil ti ganny donnen gratwitman.

Gouvernman Algérien ti donn ou R7milyon.  Linyon Sovyetik sa letan ti donn 13,050 tonn siman.  Nor Kore ti donn  2mil tonn siman e Belgique ti donn 59tonn feray.

Fyer pou fondasyon ti ganny mete an Zen 1979 e an Avril 1981 plis ki R8.5 milyon ti’n ganny depanse lo konstriksyon sa batiman.

Son louvertir ti ganny fer par Msye Albert Rene ek Msye Chadli Bebnjedid le 5Avril 1981 e son plak ti dir zour louvertir ‘’Don du Peuple Algérien au peuple Seychellois.’’ Mon repete ‘’Un Don du Peuple Algérien au peuple Seychellois.’’ Sa batiman ki an 1982 ti’n kout R10 milyon pou fer  kot plizyer Seselwa, ti kontribye ti ganny transfer lo Parti Lepep ant 1996 po zis R900mil Mr Speaker!

En batiman ek son later i antye ti’n kout plis ki R10 milyon pou konstri ti ganny transfer lo en Parti Politik ki li dan Gouvernman en batiman ki pe ganny donnen pou pep Seselwa ti ganny vole par Parti Lepep an 1996 pou R900mil!

 

(Interruption)

 

HON FLORY LARUE

En Gouvernman ki vol son pep ! En batiman k iti pou pep Seselwa!  Sa i vreman fer lapenn.

I kler i sa batiman k iti ganny sinyen par personn dot Msye Danny Faure li menm, ti en tronpri!  Ozordi konman Prezidan ki’n vin o pouvwar atraver Parti Lepep e i dir ki ‘’Sesel i Pli Gran ki Nou’’ eski i pa krwar  sa aksyon ki Parti Lepep i pran en batiman ki vo plis ki R10milyon i en vol ki pa akseptab?  Espesyalman avek son lenplikasyon direk dan sa tranzaksyon!  Letan i dir ‘’ ’Sesel i Pli Gran ki Nou,’’  eski i mazinen ki propriyete Seselwa i bezwen retourn kot Seselwa!

Mr Speaker dan bann lannen pli resan nou’n vwar Parti Lepep pran bann mors later  konman en lease.  2 sa propriyete i bor STC Builders Depot e tou lede ansanm i ganny lwe avek Parti Lepep pou R131mil par an i fer en rent R11mil par mwan depi Me 2014 pou 4, 443 met kare later ki ankor vid.

Enn sa bann later i V10104 ki mezir 2,041met kare.  E sa 3enm morso later i ganny trouve  kot STC Builders Depot i ete ozordi.

Sa propriyete ti ganny lwe avek Island Construction le 23 Me 2003 lo en lease 30an ki ti kout R73mil par an ouswa en rent R6mil par mwan.  An Zanvye 2013 Mr Franky Petrousse i ti reprezantant Island Construction ti pas sa menm lease  lo Parti Lepep pou R1. Sa i fer ki Parti Lepep sipoze parey Gouvernman sa rent R6 mil ouswa R73 mil par ran.

STC Builders Depot ti ouver son laport ofisyelman le 26 Septanm 2014 dapre    STC. 

Nou’n ganny dir isi dan sa Lasanble i STC ti pe lwe sa propriyete avek Parti Lepep pou R800 mil par mwan ouswa R9.5milyon Roupi par an pou en batiman.

Sa i fer ki STC i lwe sa landrwa pou 4an.  Ki fer en total rent 38milyon 400mil Roupi ki STC i pou pep Seselwa i pou Gouvernman i pey Parti Lepep.  I reste 15an lo sa lease. 

Alor li  i pey Gouvernman sa R73mil par an.  Me STC i pey Parti Lepep R9.6milyon pou menm letan.

Me akoz eski Gouvernman ti toler sa kalite pratik letan ki i propriyeter direk STC?  Eski Gouvernman ti pe pran son rol serye pou ki STC i kapab delivre dan son manda pou fer komodite  STC i vann o pli ba pri pli posib e abordab?

Akoz ki Gouvernman pa’n plifere fer aksesib sa later ki pou STC li menm (pardon) ti fer aksesib sa later e donn STC li menm tou sa letan me olye in plifere donn sa Parti Politik i li i sorti ladan.

Pa sanmenm sa en konfli lentere direk?  Leta sa in ganny ekspoze nou lasanble i demande ki STC e Gouvernman i regard sa pratik imedyatman rod en solisyon pou protez  lentere STC!

Me resaman nou tande ki STC ki son propriyeter Gouvernman, i propoze pou al ase sa lease avek Parti Lepep pou R17milyon.  Gouvernman ti dir Seselwa ki nou byen bezwen later pou fer devlopman.  E zot ti kree en det pou pei par fer konblaz.  Sa det later konble ganny peye par tou Seselwa.

Sa bann dimoun dan Biro Later ti prensipalman Cabinet of Ministers ek Minis Later ti deside pou lwe nou later avek zot lekor  pou bann  pri minim.  Letan zot ganny dekouver zot deside re vin negosye avek STC ki pou Gouvernman, e ti sipoze dan lentere Seselwa  e vin revann nou, nou prop later pou R17milyon.  Konklizyon in vin fer en profi lo ledo Seselwa, Mr Speaker.

E mon rapel tre byen dan Press Conference Msye Faure ti fer ti dir nou ki li i annan en laliny rouz.  E bann ki ganny donnen responsabilite fodre pa travers sa laliny rouz.  I ti dir ki dan Gouvernman fodre annan bann bonn gouvernans latransparans e rann kont.  I ti dir klerman bann ki le fer bokou larzan pa devret travay dan sekter piblik, e ki si aksyon i ganny pran avek zot, fodre pa ki zot dir zot pe ganny viktimize ouswa abize.

Eski zot, zot pe respekte zot prop prensip lo distribisyon legal?  Eski Parti Lepep in esey vin ris lo pep Seselwa?  Eski si aksyon i ganny pran avek zot zot santi zot pe ganny viktimize ?

Letan nou demann sa bann kestyon nou ganny dir ki nou pe kree divizyon. Mr Speaker la mon ava retourn lo sa bann later Baie Lazare ki mon ti mansyonnen avan.

Parti Lepep in ganny en bout later prive pou R1 an 1999 dan Baie Lazare, ki mezir plis ki 31mil met kare later.  En zoli kado pou R1.  Napa problenm – in ganny son kado.  Zot separ sa later an de morso. E 1an pli tar zot vann sa morso avek lekel ou krwar zot pou donn sa later Mr Speaker?  Zot vann sa later avek Gouvernman Sesel pep Seselwa pou R5milyon!  R5milyon!  E Mr Christian Lionnet i aste sa later lo nou par!  I donn nou en bon deal. Eski lentere Seselwa ti ganny proteze? En later R1 Parti Lepep i vann Seselwa pou 5milyon.  Sa later i kot kort e Ladministrasyon Distrik Baie Lazare i été, e zot ti pran en lot morso e zot ti separ sa an de e s bout i ankor pou zot Mr Speaker.

Lekel ki le vin ris lo ledo Leta, Msye Faure?  Yer swar Msye Faure in koz lo bann prensip i pou asir en bon devlopman tel konman loportinite egal lazistis sosyal e redistribisyon ekitab larises pei.

Me kote sa bann parol ti été dan tranzaksyon later?  Sa later i annan en later ki mezir 1,684 met kare, ki zis ki an montan La Misère apre roundabout kot sa batiman ti biro brans Parti Lepep ti ganny vann par Gouvernman reprezante part Mr Joseph Nourrice pou R140mil.  E sa dokiman ti ganny sinyen par Msye Faure pou Parti Lepep.

An Out 2015 Parti Lepep i deside pran sa menm later, ki an montan La Louise, La Misère Parti Lepep i deside pou revann sa later.  In aste sa later ek Gouvernman li Mr Speaker.  Eski ou konnen e ki in revann sa later? Byensir i revann sa later avek Gouvernman avek pep Seselwa reprezante par Mr Joseph Francois pou R8milyon 293 mil en bout later ki mezir mil 1,684 met kare later ki ti ganny aste avek Gouvernman Sesel pou en kou R140mil  par Parti Lepep i ganny revann an 2015 par Parti Lepep avek Gouvernman Sesel, reprezante par Mr joseph Francois pou R8milyon 293mil Mr Speaker!

Dan sa Press Conference ki Msye Faure ti mansyonnen son laliny rouz i ti dir osi ki personn napa drwa benefisye ek larzan ki pa pou li ; ki nou devret annan disiplin dan tou sekter pou pei kapab fonksyonn byen.

In dir ki si en dimoun in ganny demande pou kit son travay i annan 3 dimoun ankor pe espere pou fer en pli bon travay!  Eski sapa rezon eski sa pa rezonn byen sa ki pe ganny demande ozordi letan nou get tou sa kantite lavant later kot Msye Faure in bis konfidans Seselwa?  Eski i ti annan disiplin ek prensip letan i ti pe aste sa ta later lo non son parti avek Leta?

I ti dir ki bann ki’n ganny mete konman bann ‘’defander nou lentere,’’ parey bann  dan Biro Later tel ki Minis, i sipoze protez nou byen e fer sir letan i annan en tranzaksyon se Leta ki benefisye.  Dan sa lavant later ziska stamp duty pa ti ganny peye lo sa R8milyon 293 mil!  Ti free!  Sa transfer ti ganny fer pou nanryen Mr Speaker.  Kof Leta ti benefisye e a lafen se Seselwa ki perdi.  Kof Leta i kontinyen reste vid  e pos Parti Lepep i kontinyen  ganny ranpli.   Letan nou get dat sa lavant an Out 2015, eski sa pa larzan ti pou al kontribye anver larzan konpanny eleksyon pou Parti Lepep pou eleksyon prezidansyel an Desanm 2015?

Eski Komisyoner Elektoral pa devret fer en odit bann sours larzan Parti Lepep ki al dan konpanny?  Eski nou bann eleksyon ti ‘free and fair’ letan en parti politik pe ganny sours larzan direkteman avek later Leta ?  Dan ka STC sa larzan rent ti al direk dan Kof Parti Lepep pou kontribye dan eleksyon.  E dan ka sa later  La Louise, i kler ki sa R8 milyon ti kontribye direk dan konpanny eleksyon ki Msye Faure ti li menm li debout konman Vis–Prezidan obor Msye Michel, ki’n apre donn li son manda ‘pas baton?’

Mr Speaker mon annan detay sa bann diferan later Parti Lepep ki’n ganny aste avek piblik Sesel atraver sa group, ki sipoze protez propriyete Leta – Gouvernman.  Sa menm Gouvernman ki ansarz devlopman lokal, kot tou sa bann later ki prensipalman trouve dan bann sant ti a kapab ganny servi pou devlop distrik.

I kler ki Parti Lepep in abiz s pouvwar.  I kler ki larzan lepep sorti dan Consolidated Fund in ganny abize.  Letan nou’n re aste sa bann later.  E la nou pou al re aste lease STC.  I kler ki nou’n ganny vole  par Parti Lepep!  I kler ki nou’n perdi bann loportinite, ki nou pa kapab mezir son kou, akoz Parti Lepep ki’n pran sa later pou li!  Seselwa ki’n perdi dan bann devlopman potansyel ki ti’n kapab arive si sa bann later ti ankor pou Leta.

E napa landrwa pli kler ki lo La Digue kot ozordi Digwa pa konnen ki mannyer pou devlop zot sant lavil ler Parti Lepep in monopoliz sa bann later e form en cartel dan sant La Digue.

E la zot pe anrisi zot lekor par konmans vann sa bann propriyete olye rann e promot devlopman nou zil.

I kler ki Msye Danny Faure in donn lanmen pran sa bann loportinite avek Seselwa.

Mr Speaker mon demann tou Manm pou siport sa Mosyon, ki an retourn sa bann later ki Seselwa i a re ganny plis later pou devlopman dan zot distrik respektif e kapab ganny  plis loportinite direkteman dan zot distrik pou partisip dan devlopman pei.  Mersi Mr Speaker.

 

(APPLAUSE)

 

MR DEPUTY SPEAKER

Mersi Onorab Larue.  Eski Mosyon i ganny segonde?  Onorab Hoareau.

 

HON JOHN HOAREAU

Bonzour Mr Speaker.  Bonzour tou dimoun a lekout.  Bonzour tou Manm Onorab.

Mr Speaker mon oule segonn sa Mosyon e mon ti ava demann ou permisyon si mon ti kapab pran en 5 minit pou mon koz lo sa Mosyon  si posib.

 

MR DEPUTY SPEAKER

Proceed Onorab Hoareau.

 

HON JOHN HOAREAU

Mersi.  Mr Speaker Mosyon ki Onorab Larue in anmenn devan sa Lasanble pe fer en lapel serye –  serye mon pe dir en lapel spesyal avek Parti Lepep, pou retourn tou sa bann propriyete in gannyen pou aste dan letan kot ti annan gran privilez anfen ki sa bann propriyete i a retourn pou bann kou dan benefis Seselwa zeneral.

Mr Speaker en lapel koumsa i montre nou ki nou lo sa kote latab nou war bokou, bokou pli lwen.  Nou pe get benefis nou pep.  Nou pa pe get benefis parti.

Mr Speaker i enportan ler nou debat lo sa Mosyon, ki nou lev sa Mosyon an kote sa avek lepok ki nou ti pe viv ladan yer e osi lepok ki nou pe viv ladan ozordi.

Mr Speaker dan lepok Parti Inik, letan Seselwa ti napa diferans avek Parti ki ti o pouvwar ; setadir Parti SPPF.  Laprezidans pei ti napa distenksyon avek Leta.   Nou ti lo en swadizan Sistenm Sosyalis Marksis ki ti annan gran resanblans avek La Dictature.  Dan sosyete Franse sa lepok Lerwa Louis X1V ki ti Proklanmen ki se Bondye ki’n donn li pouvwar pou kontrole.  E personn ankor pa pou kapab annan sa drwa oubyen sa pouvwar pou kontrole.  ‘L’Etat cest moi c’est moi L’Etat.’’       

Alor Prezidan ki ti annan pouvwar absoli parey Lerwa Louis X1V ti fer sa ki li i ti anvi dan sa pei.

Malerezman nou pe viv anba sa prensip Parti Inik pou plizyer lannen.  Bann lannen ki bokou dimoun ki ankor vivid dan zot lespri.

Nou’n vwar ki bokou desizyon in ganny pran avek bi pou kontrol tou, avek lentansyon pou pini dimoun, ki pa ti krwar dan sa bann prensip Sosyaliz Marksis.

Mr Speaker en bann metod ti ganny servi pou pini dimoun, ki pa ti vin sosyalis,  or ki pa ti oule krwar dan sa sistenm Sosyalis, sete pou pran zot propriyete.  Sa sete anba direksyon ansyen Prezidan Rene.   Kot koripsyon di norm di zour  e labi  pouvwar ti fer pou benefis en pti group, parey dan zistwar Ali baba nou konnen.

Sa ki ti oze ouver son labous ti ganny fer disparet, oubyen  ti dir ganny dir ‘’bato i pase – avyon i pase, foulkan ale!’’

Mr Speaker sa sistenm i fer ki bokou propriyete in tonm dan lanmen Parti SPPF. 

        Dan mon distrik i annan dimoun osi ki’n vin viktim sa sistenm barbar.  Zis Lotorite  9sorry) zis l9o kote semen Ladministrasyon Distrik sa propriyete ti enn propriyete ki ti pou lafanmir Sullivan.  Sa later ti ganny konfiske – ti ganny pran in ganny divize  an plizyer morso.  En Biro Brans ki ti’n ganny fer lo sa parcel V8051 avek son dimansyon 986met kare ti dan propriyete ki ti pour lafanmir Sullivan.

Sa propriyete i an potansyel, pou met omwen 3  gran lakaz lo la.  E parmi sa 59 propriyete ki Parti Lepep i annan.

Mr Speaker sa landrwa ek sa biro i lo en prime land dan Beau Vallon.  Dan lepase sa biro in ganny servi konman en stasyon kle pou sey kontrol distrik.

Pou bokou dimoun dan Beau Vallon, sa landrwa i reprezant divizyon e i anmenn bokou move souvenir.  Tandis pou serten i landrwa ki zot al vwar  aranze danse oubyen partisipe tou le 5 Zen ler laniverser Koudeta.

Pou bokou zabitan i en biro ki ler en dimoun i al raport ou laba, ou ganny met sa ki apel en Blacklist. 

Ennler kantmenm ou pa’n fer naryen mal, me si vwazen pa’n kontan ou i a laba i anmenn en fo konplent lo ou keksoz pou mars pou ou. Sa ki ti bezwen en lakaz ti bezwen al zwe rol laba.

Mr Speaker ozordi nou pe viv dan en sistenm miltiparti kot i annan plis dan demokratik ki avan.  Mon oule dir granmersi pou tou sa bann ki’n ede pou nou ariv lo sa nivo menm si nou ankor lwen nou ankor lwen  pou nou ale.

Alor Mr Speaker Mosyon pe senpleman demann Parti Lepep, pou zwenn sa zefor ki nou pe fer pou efas sa lepase ki’n diviz nou.  Ki’n anmenn bokou soufrans e montre ki demontre ki zot serye ler zot pe koz lo ‘rekonsilyasyon’ e montre ki zot serye ler zot pe koz lo ‘Linite’.

Pou mon distrik pli gran keksoz ki Parti Lepep i kapab fer, se rann nou sa morso teren  met li a dispozisyon piblik Beau Vallon.  Setadir pran sa teren e sa biro fer li vin en biro kot MNA i ganny elekte dan sa distrik i kapab servi dan lefitir.  Si pa mwan i vin en lot, i vin nenport ki, ki a kapab servi sa biro pou zwenn son pep, son dimoun dan distrik e koz ek son pep anmenn son pep pli devan.  Sa se ki bokou zabitan pe demande.

Mr Speaker mon pou termin avek en lapel spesyal ankor avek bann Manm Parti Lepep lo lot kote latab.  Anvi ki partou, partou dan laplipar bann distrik i osi annan bann propriyete ki SPPF in pran oubyen aste pou fer li vin Biro Brans, annou met Sesel nou lekor nou met nou pei avan nou parti.  Alor mon pe sipliye ki enn fwa pou tou,  annou efas sa letap dan nou listwar  ki’n anmenn bokou divizyon.  Zot a kapab vin Parti ‘Solisyon ‘olye Parti ‘Problenm’.  Demann zot leadership pou fer sa ki byen.  E rann sa 59 propriyete avek Leta.  Nou pei i a pran en nouvo souf e sa bann propriyete ava ganny servi pou benefis pei.

Mr Speaker mon pou siport sa Mosyon, akoz i enn ki anmenn bokou merit.  E i al dan bon direksyon pou anmenn linite pou anmenn plis linite dan nou pei.

Alor mon pe demann tou bann lezot Manm ensi ki Manm Parti Lepep pou vot faver sa Mosyon e donn Sesel en nouvo souf.  Mersi.

 

MR DEPUTY SPEAKER

Mersi Onorab John Hoareau.  Onorab Francois Adelaide.

 

HON FRANCOIS ADELAIDE

Mersi Mr Speaker.  Mr Speaker  mon’n ganny  en sok vre! Frison i pase lo mwan!  Me selman mon a sey entervenir akoz sa ki mon ‘n tande i vreman sokan.

Mr Speaker atraver ou zabitan Baie Lazare, bonzour.  Si zot annan internet al lo GoogleNet tap sa parcel number C3525, C3822, e C3823.  Baie Lazare i bezwen konn son vre zistwar.  Bokou dokiman in ganny kasyet me larealite i la.

Baie Lazare parey lezot distrik, dan sa zafer kot Parti Lepep in kapitaliz lo bann sitwayen, e priv zot devlopman lo zot later, e anpese ki zabitan distrik ti a kapab vin en pe pli endepandan e ganny  bann fasilite, ki ti a permet zot devlope ekonomikman sosyalman, eksetera.

Ozordi si ou vwar serten nou zenn pe tonm dan bann  dekadans sosyal, nou adilt pe fer fas avek bokou defi, lapovrete pe kontinyen tir son kannson ; ou ganny peye le 30 e larzan pa arive ziska le 10 ; pri lavi i kontinyen monte e lespwar i kontinyen perdi, lekel ki pou blanmen?

Apre tou nou tou nou konn sa dikton ‘’ler pou senm divan ou sirman rekolte tanpet.’’  En sosyete ki vreman envestir dan son dimoun, set en sosyete  ki pou prospere. En sosyete ki abiz son pep set en sosyete ki pou ranpli avek bokou problenm.

Yer nou’n trouve en House Allocation Committee byen arme  avek zarm ‘’ek nou pa ek nou.’’ E mon konnen si en Lopozisyon i pas devan zot san pitye son sans pou ganny asiste i preski zero.  E si pa mirak ki sov li.

Eski vreman nou pe viv dan sa ‘Nouvo Sesel’ kot sa ki merite i ava erite san ganny diskriminen pa pirman son krwayans politik?

Mr Speaker atraver ou, mon le lans en lapel kosyon avek Msye Faure, sa ki’n pas lo Baie Ste Anne Praslin lo sa size later, fer sir pa ariv ankor a lavenir.

E la mon pe met lo rikord Lasanble Baie Lazare nou le latransparans ler alokasyon later i konmanse – lakaz i konmanse.

Mr Speaker parey nou’n dir Baie Lazare i bezwen konn son vre zistwar zot later.  En gran bout later ki ti ganny negosye  pou met a dispozisyon zabitan Baie Lazare pou son devlopman.  Si en keksoz pa pou ou e ou, ou deside pran e anrezistre li lo ou non ki mannyer i apele?  Si en keksoz pa pou ou, ou lwe li e ou pran tou larzan pou ou ki mannyer i apele?

Eski nou bann zabitan Baie Lazare, nou ti ganny konsilte lo ki zot pou fer avek nou later? Konbyen zot in benefisye finansyerman avek nou bout later kan nou, nou ti annan pat ladan?  Sa kare later ki nou pe koz lo la i sitye dan sant Baie Lazare.  Parcel number C3525 ankor enn fwa mon repete – C3822 e C3823, ti en sel propriyete ki ti pou en propriyeter  i ti ganny donnen avek Gouvernman Sesel pou devlopman distrik Baie Lazare.

C3525 ki sa pli gran kare ki a se moman i annan sant Ladministrasyon Distrik lo la multipurpose court – SPTC Depot, Playground, Daycare e de pti lenfrastriktir.

Parcel number 3823 i egalman nou propriyete.  Ki i annan an se moman zot pe lwe.  Parti Lepep in deside lwe avek en lakonpannyen ki pe aktyelman fer nursery lo la. Eski ou zabitan Baie Lazare, ou ti ganny konsilte ler sa desizyon ti ganny pran?  Konbyen larzan nou pe gannyen ler Parti Lepep pe lwe sa propriyete?  Oli latransparans e oli rann kont?  Eski zot pou dir nou, NOU zenofobik ler nou e rod nou bout later?

Ler ou fer letour dan Baie Lazare e vwar bann zenes ki anvi en landrwa rekonmans fer en pti biznes, pou zot vin pli endepandan e zot ganny dir ki napa landrwa.  E kan aktyelman i annan landrwa, me ki pe mal ganny divize.  Mwan konman sa MNA, i fer mwan ditor.

Mr Speaker bann madanm sorti dan tou kwen Mahé, zis pou vin tres seve dan Baie Lazare – Top class!  Mon’n ganny sans koz avek enn de sa bann mademwazel ki pe fer hair dresser kot zot lakour.

Mr Speaker zot prodwir i top, top, top!  Kliyan pa konnen ki pou fer avek.  Me zot pa pe ganny sans pou zot ganny en bout later pou fer zot pti biznes.  Akoz  zot ganny dir napa landrwa.  E mwan mon dir non, i annan landrwa.

E Parti Lepep ki pe anpes zot ganny landrwa akoz zot in deside fer en dil avek etranze e lwe sa later pou fer nursery lo la.  Eski sa i korek?  Mr Speaker prime land – gold mine ki ti devret met a dispozisyon presizeman zabitan Baie Lazare, pou bann devlopman ekonomik.  Me ki nou vwar?  Eski Parti Lepep i krwar dan potansyel Seselwa pou devlope?  Ouswa parey zot labitid  les nou kreve avek bi nou depan lo zot e la zot a dray nou lapo labous mannyer zot oule.

En propriyete kot nou ti kapab met nou en bon groser complex.  Ki ti ava fasilman,  konstrir e kot zabitan Baie Lazare ti a kapab lwe bann apartman e fer biznes sakenn dan son domenn.  Sa ti a ede anmenn plis dimoun dan nou distrik.  Fermye ti a ganny sans vann zot legim ek fri.  Peser ti a ganny plis market pou vann zot pwason e prodwir lanmer.  Artizan ti a ganny sans benefisye.  Vann zot lar e ganny bokou marketing.  Baie Lazare ti ava vin pli vivan.  Kot lamazorite dimoun ti pou ganny plis lokipasyon. E sa ti a dekouraz nou zenn pou tonm dan bann problenm sosyal tel ki drog avek lalkol.  ‘    Avek en fasilite koumsa byensir bann zournalye  ti a benefisye. En pti diskotek.  Bann lofis, en pti pub pou lazenes.  E lezot fasilite lwazir.

Mr Speaker lot fwa nou ti koz lo Regional Cold Storage pou bann fermye.  Sa landrwa ti pou ideal pou fer en devlopman parey.  Vi ki nou annan bokou fermye dan sa rezyon.

Akoz, eski nou bezwen lwe nou zoli bout later avek etranze?  Kan nou kapab devlop li nou menm?  Eski sa Gouvernman Parti Lepep, i vreman met Seselwa o sant devlopman?  Ouswa nou ankor avek sa slogan ‘’Leksplwatasyon zonm par zonm?’’

Se pourtan bokou zabitan ti eksprim dezir pou envestir dan sa landrwa.  Akoz ki zot ganny kit deryer.  Sa parcel number C3822, Isa bout kot  Parti Lepep in fer en sant kominoter.  La konmela nou apel li pti pub. 

Sa sant i ganny lwe avek zabitan pou fer bann aktivite familyal.  Maryaz, ‘Get Together,’ ki bon. Me i annan bokou lespas ankor pou plis devlopman.

Ozordi mwan konman MNA pou Baie Lazare, mon napa en lofis dan sant Baie Lazare.  Kot bann zabitan ti kapab vini e koz zot problenm.  Aspirasyon, nide, eksetera ki ti a poz Baie Lazare pli devan.  Tou ban MNA oparavan in servi sa landrwa konman zot lofis.  Akoz ki mwan mon’n ganny refize? Menm si mon’n ganny elekte? Eski se sa ki Msye Faure pe presye lo travay ansanm?  Si mwan en Lebra Gouvernman ki zot kontan koz lo la labous plen, akoz ki Lebra Gouvernman pa dan plas kot lebra i sipoze été?

E ozordi mon le met lo rikord Lasanble, e dir avek Msye Faure ki mwan mon’n ganny elekte par mazorite zabitan Baie Lazare.  Mon pe travay sanses. E onor mon promes pou remet Baie Lazare lo map sikse dan Sesel.

Mon pe fer en lapel avek ou konman Prezidan pou met a dispozisyon avek tou bann Manm elekte dan Sesel en lofis ofisyel.  Sa lofis i ava ganny pase avek sa lot MNA ki a ganny elekte lavenir.  E sa i ava permet swivi tou bann progranm pou byennet nou pei.  Zis koze san aksyon konkret, i fer dimoun perdi konfyans.  Zis parey dikton i dir ‘’Gran prometer, pti donner.’’  Ler i sonn ankor enn fwa zabitan Baie Lazare pran kontrol son distrik.  Kot nou ava vreman ganny valer e erit sa ki nou merite.

Si nou pou kontinyen divize bos sakenn pou li, etranze pou kontinyelman rantre dan nou milye, e nou pou kontinyen separ nou.  En lapel spesyal pou tou zabitan Baie Lazare.  Pran zot desten dan zot lanmen.  E ede konbat tou bann lenzistis. Ki pe met bar dan zot semen.  Tou keksoz i konmans avek e rev met zot rev dan realite ; persevere ou pou arive.

Parey mwan mon ti reve pou vin en MNA bokou ti krwar ki mon pa pou realize.  Mon’n fer li e osi ou kapab fer li.

Sel dimoun ki pou anpes ou fer li se pa lot ki menm.  Nou’n tir Baie Lazare anba en sistenm diktatir – zot in donn mon lanmen pou fer li.  Prezan nou pou bezwen defann teritwar.  Ou annan par dan sakre later C3822 – ou annan par dan kare later C3823.  Ou annan par dan sa kare later

C3525.  Sa bout later i apartyen pou zabitan Baie Lazare.  Si pou nou, nou bezwen ganny rann.  Zwenn mwan dan sa demars pou repran nou bout later avek Parti Lepep.  Nou annan par ladan.  ‘OU’ annan par ladan.  Zabitan Baie Lazare leve, debout – lager pou nou rezon.  Si pa nou, lekel?  Espérons ki Msye Faure koman Prezidan Sesel i a deswit pran en desizyon  e larg lanmen zabitan Baie Lazare.

Mr Speaker sa Mosyon i en bon Mosyon e mon pou siport li avek tou loner e mon ti a kontan ki lot kote osi i zwenn nou dan sa demars pou retourn tou later zabitan Baie Lazare avek zabitan Baie Lazare.  Mersi Mr Speaker.

 

MR DEPUTY SPEAKER

Mersi Onorab Adelaide.   Bon in 10.25. Prosennman lo mon lalis mon annan Onorab Woodcock, eski ou krwar ou ti pou fini … ? Ou ti a plifere konmans 11er.  Ok dan sa ka nou’n ariv pres 10.30, mon pou adjourn e nou pou repran 11er.

 

(BREAK)

 

MR DEPUTY SPEAKER

Bon bonzour tou bann Manm Onorab, tou dimoun a lekout. Nou kontiny nou travay Lasanble Nasyonal pou ozordi.

Lo Order Paper nou annan Mosyon par Onorab Flory Larue e nou annan detrwa entervenan e lot prosen lo lalis se Onorab Wavel Woodcock.  Mon donn ou laparol.

 

HON WAVEL WOODCOCK

Mersi Mr Speaker.  Mr Speaker mon bezwen aport mon sipor pou sa Mosyon, akoz i kler ki en gran lenzistis in ganny fer kont lepep Seselwa, Mahé, Pralin avek La Digue.  Kont tou Seselwa.

Mr Speaker mon leker i fermal !  Mon fristre – mon menm ankoler, ler mon tann ki mannyer Parti Lepep in abiz nou later Leta!  Bann revelasyon ki Onorab Flory Larue in fer resorti zisteman avan nou pran Break Mr Speaker i vreman sokan e i vreman alarman e i sagrinan Mr Speaker, ki en keksoz parey in arive dan nou pei  Sesel!

Mr Speaker mon rapel parol ki Prezidan Faure ti dir apre son Inogirasyon e Onorab Larue i ekout sa in mansyonn sa pli boner kot Prezidan ti dir ki,’’ i angaze pou lit koripsyon!’’

Mr Speaker la ozordi nou vwar lekel sa Parti ki tou sa lannen, ti pe ankouraz toler soutir e zot menm zot pe fer koripsyon dan nou pei Sesel.

Mr Speaker Prezidan ti pe koz lo koripsyon, ozordi kot ou vwar koripsyon    Koripsyon i dan zot prop lakaz.  Dan son lakaz SPUP/SPPF/ Parti Lepep ozordi.  Mon pa konnen byento ki nouvo non zot pou donnen ‘Nouvo Lepep’ mon krwar, me selman Mr Speaker ozordi ou pou vwar klerman ki sa Parti  i annan Parti pli koronpi dan L’Afrique e mon kapab dir dan lemonn Mr Speaker!

Parti Lepep Mr Speaker in aste 56 bout later avek Gouvernman. Oli Polisi Gouvernman Mr Speaker?   Tou sa bann pti Seselwa ki zot in trangle ki ozordi tou sa bann letan pe espere pou ganny en bout later ki’n ganny viktimize ki’n ganny sere tou sa bann later ki zot in sezi anba Land Acquisition Act! 

        E Polisi ozordi Mr Speaker kot Minister in dir ki si ou aste en morso later ou pa annan drwa aste  … si ou aste en later lo land bank ou pa annan drwa re aste en lot morso later avek Gouvernman.

An plis ki sa i menm dir pou dir si ou deza annan later prive, ou pou kapab aste later Gouvernman.  Parti Lepep Mr Speaker i annan lo 3 later prive e in aste ‘56’ bout later avek Gouvernman Mr Speaker!

Ok.  E parey Onorab Flory Larue in fer resorti Mr Speaker lamazorite sa bann later se Msye Danny Faure li menm ki’n siny lavant sa bann later on behalf of Parti Lepep!

E pa bliye osi Mr Speaker pou dir Msye Faure ti osi form par sa Gouvernman Parti Lepep – sa letan Mr Speaker!

Mr Speaker e la ozordi i Prezidan Larepiblik Sesel!  Nou’n vwar par egzanp Onorab Flory Larue in fer sorti later in ganny vann pou preski nanryen bokou pli ba ki market value. 

        I annan later ki’n menm ganny pou vann pou selman R1 Mr Speaker.  Ki mannyer i apele sa?

Mr Speaker ler nou get tousala, en keksoz i kler e i met kler pou tou pep Seselwa deor.  Sa i montre ki Msye Faure i koronpi li menm!  In partisip dan koripsyon!  Legzanp i kler, levidans i la kot Registration tou  lepep Seselwa i kapab vwar.  Pran legzanp later V89 V8798, ki Parti Lepep ti aste avek Gouvernman pou selman R140 mil Mr Speaker.  E apre sa menm Parti i revann sa later avek Gouvernman pou R8.3milyon Mr Speaker!  Ki mannyer i apele?  Sinyen par lekel? Msye Prezidan Faure ozordi i pe ankouraz koripsyon.

Apre nou pe rode akoz ki Lalwa pou ranforsi Anti-Corruption Commission pe tarde vini?   Mr Speaker i kler Prezidan Faure pa anvi ki Anti- Corruption Commission i osi investigate li menm!  Akoz i osi i koronpi!

Laverite pe sorti ozordi Mr Speaker.  Sa Msye in form parti dan koripsyon ki sa parti politik in fer.

Mr Speaker eski nou pou les Onorab Charles De Commarmond ‘pti Danny travay menm  Prezidan i bezwen vin devan lepep Seselwa, eksplik sa pep ki mannyer  in siny tou sa bann dokiman?  Ki mannyer in siny tou sa bann later ki’n ganny transfer sorti Gouvernman pou Parti Lepep pou preske nanryen?  In soutir vol sa pep Seselwa ozordi, e nou pa kapab toler sa dan nou pei Sesel!

Mr Speaker nou vwar ozordi 12mil met kare later in ganny vann avek sa parti pou selman R1 Mr Speaker – vann avek Parti Lepep!

La sa later nou vwar Mr Speaker swimming pool – gro lakaz in ganny fer lo sa later.

E Mr Speaker 10mil met kare later koumsa, nou ti kapab fer condominium pou bann return graduate ; lakaz pou benefisye bann zabitan Grand Anse ki Onorab Waven William pou plizyer lannen pe demande, pou son bann zabitan son distrik.  In sorti dan sa menm parti li osi.  Onorab William atraver ou Mr Speaker, koz avek ou Prezidan demann li ki mannyer in kapab fer sa avek son pep – avek sa bann dimoun ki’n vot pou li laba Grand Anse Mahé.

Mr Speaker ankor  lo pa bliye Maison Du Peuple ozordi in sorti – ki in kout sa letan  son market value ti apepre R10 milyon.  Konbyen Parti Lepep ti aste Maison Du Peuple Mr Speaker?  Pou zis R900 mil en batiman ki kout sa letan son valer ti apepre R10milyon Mr Speaker!

Tousala se koripsyon ki sa Gouvernman Parti lepep, SPUP/SPPF byento ‘Nouvo Sesel’ ouswa whatever zot anvi apel li i en Gouvernman koronpi depi son Prezidan ziska son bann Minis – en bon pe zot, zot koronpi!  Apre en bann zot a vin devan Lasanble zot a dir zot touni, selman zot a pe fer sato 15 letaz Mr Speaker!

 

(Interruption)

 

HON WAVEL WOODCOCK

Ki mannyer i apele tousala?

 

MR DEPUTY SPEAKER

Onorab Woodcock mon annan en point of order.  Go head Onorab Pillay.

 

HON SEBASTIEN PILLAY

Mersi Mr Speaker.  Mr Speaker mon pe dan ou latansyon Onorab ki i pe koze atraver ou lo en point of order – Order 54 (5) Mr Speaker.

E mon ti a kontan Mr Speaker ki Onorab i lir byen son 54 (5) e ki nou Lasanble i aprann respekte nou Standing Orders ; ki Onorab i lir byen sa Order e i konsider Mr Speaker son next step in regards to son lapros dan son speech Mr Speaker.  Mon ti a kontan rule of sa point of order vizavi bann komanter ki’n ganny fer lo conduct Prezidan Larepiblik dan lentervansyon ki Onorab in konmans fer lo sa Mosyon.  Mersi Mr Speaker.

 

(Interruption)

 

MR DEPUTY SPEAKER

Mersi Onorab Pillay.  Standing Order 54 (5) i kler pou dir ou pa annan drwa dir okenn keksoz ki nonm Prezidan, Vis- Prezidan, Speaker eksetera, dan en fason kot ou pe kestyonn lafason ki li kondwir son lekor.  Eksepte si i annan en Mosyon ki’n mete, spesifik lo la.

Sa Mosyon ozordi  i spesifik lo later Parti Lepep – pa direkteman lo la.  Alor mon ti va konsey ou ler ou pe fer ou lentervansyon pou servi en langaz ki pa an konfli avek 54 (5).  Ou kapab kontinyen Onorab.

 

HON WAVEL WOODCOCK

Mersi Mr Speaker.  Ok Mr Speaker mon pou kontinyen koz sa bann later ki Parti Lepep in aste pou nanryen avek Gouvernman.  Si i en par Msye Faure sa letan kan i pa ti ankor vin Prezidan.  E Mosyon ozordi parey nou pe koze nou pe koz lo bann later ki Parti Lepep in aste avek Gouvernman, ki nou ozordi sa Lasanble atraver Mosyon anmennen par Onorab Larue nou pe demande ki sa bann later i reganny nou bezwen repran sa bann later dan en fason ki pou benefisye lepep Seselwa.

Mr Speaker annou pran legzanp Praslin ozordi mon retourn lo mon zil.  I kler ki Parti Lepep ki’n osi abiz lo later Leta Praslin. Mon ava donn en pti lesplikasyon.  Annou get sa bout later Cote D’Or pa tro lwen avek Moulinien Estate i en laplenn Moulinien Estate e Parti Lepep in aste avek Gouvernman pou zis Mr Speaker mazinen 1,232 met kare pou R55mil Mr Speaker! R55mil Mr Speaker!

E si ou vwar leta sa landrwa ozordi lontan bann zenn bann manrmay dan sa rezyon ti servi konman en pti playing field.  La ozordi si ou vwar leta sa later sa bann poto gol pe tonm tousel.  Resaman ti fer vizit laba e mon pa mazinen avek ki sa Minister ki nou ti al vizit laba mon krwar Onorab Gill ti la.

Detrwa zenn ti apros mwan, ti koz avek mwan.  Zot ti zot ankor ek mon zot konnen pou dir mon Onorab pou distrik Grand Anse Praslin.  E sa bann zans i dir mon ki get sa landrwa son degenn ki ladan.  Sa landrwa, sa later playing field sa laplenn ki apartir Parti Lepep.  Sa bann zenn i dir ou ki sa i en bon landrwa pou fer en playing field.  Ti kapab devlop sa landrwa dan en fason ki ti kapab benefisye bann zabitan Moulinien Estate, akoz i mank zot landrwa pou zot mon konnen pou zot fofile, pou zot zwe ouswa pu zot devlop zot defoule – fer bann aktivite sportif.

E menm Mr Speaker, en keksoz ki manke par lefe ki en gran kominote la dan sa plato Cote D’Or la Moulinien bann dimoun dan zanmirant, sa larter i ase gran pou fer en pti play ground, ki ti kapab benefisye bann zabitan dan sa rezyon.

Mr Speaker nou tou nou konnen poudir Parti Lepep pa enterese avek sa.  Akoz nou konnen ki zot fer byen.  Ou konnen Parti Lepep i annan en keksoz ki zot fer vreman byen Mr Speaker – zot sharp lo la – zot master lo la.  Sa se lands speculation.  Aste later – retenir pou en pe letan aste li pou R55mil aste li pou R100mil – R50 mil apre re vann pou milyon!   E zot ki’n montre legzanp ki mannyer pou fer land speculation dan sa pei Sesel.

Se pou sa rezon ki ozordi nou vwar pou dir land speculation, i en keksoz ki vreman difisil pou konbat.  Akoz Mr Speaker, se sa Gouvernman ki o pouvwar se sa apartir ki la ozordi dan Egzekitiv ki’n ankouraz sa bann keksoz dan lepase.  E prezan zot in vin donn en sanblan zot pe fer krwar pou dir zot, zot pe lager kont koripsyon kan zot menm zot ‘LOTER’ pli gro koripsyon ki ‘n arive dan nou pei Sesel!

Mr Speaker mon a koz lo en lot bout later ankor.  Later parti Lepep ankor Mr Speaker annou vin dan mon distrik ankor Grand Anse Praslin, kot biro brans Parti Lepep i été obor STC lanmenm la a kote building Fon Pansyon 952met kare.

Mr Speaker la ozordi pou plizyer lannen lakres Grand Anse Praslin i dan en leta enpitwayab.  En leta deplorab  e sa lekol lakres i lo later Lanmisyon.

Apre ki lanmisyon in demande pou Gouvernman relocate sa lotel akoz ou bezwen later pou fer devlopman e osi ki leta ki sa lekol ti ladan ler lapli i tonbe manrmay i bezwen zwe dan labou, kosonnyen deor.  Nou ti annan nou en landrwa ideal pou nou fer sa lakres Mr Speaker.  Me la kot sa biro brans Parti  Lepep i été lanmenm la obor semen i dan lakominote olye Mr Speaker ki prezan zot bezwen al sa devlopman ki pe ganny fer kot lekol primer Grand Anse Praslin, Minister Ledikasyon i bezwen met en lot letaz, pou kapab akomode sa bann manrmay lakres, ki fer ki sa lekol pandan bokou plis zanfan lekol primer Grand Anse Praslin ; sa lekol pou pli kon zeste e bann teacher pe eksprim en konsern – konmkwa dan sa pti area deza i konzeste, ou met en lakres pou met en lakres la ankor, i pou fer sa lekol bokou pli konzeste e manrmay napa landrwa pou zwe.

Me si nou ti pran sa bout la kot sa Biro Brans se nou ti’n fer sa lakres la.  Be pa Pralinwa Grand Anse Praslin ti pou benefisye?

Mr Speaker zot in pran later tro bokou partou dan bann distrik – bann later ki ti kapab benefisye bann later ki ti pou kapab deservi nou kominote.

Annou koz ankor lo en lot landrwa ankor Mr Speaker ki montre ou en keksoz enteresan.

Mon pa pou tarde Mr Speaker, Horizon Complex building Horizon Complex Baie Ste Anne obor laplenn foutbol ki mezir 2,646 met kare ki Gouvernman Parti Lepep in aste ki Parti Lepep I mean – in aste sa avek Gouvernman pou R135mil selman Mr Speaker.  R135 mil pou 2, 646 met kare.

Apre zot in fer en batiman lo la.  Apre ki zot fer Mr Speaker?  Zot re lwe sa batiman avek Gouvernman parske plizyer biro Gouvernman e bann  antite Gouvernman – bann Lazans Gouvernman, pe lwe bann konportman, pe lwe bann unit dan sa batiman zot pe pey sepa konbyen R1000 tou lemwan.  En legzanp Nouvobanq ki dan Horizon Comoplex, SNYC dan Horizon Complex, Biro Lanplwa ti dan Horizon Complex, la mon’n aprann ki in fek bouze resaman.  E i annan bann lezot lofis ankor – bann lezot Departman Gouvernman ki pe lwe en unit dan sa batiman.

E tou sa Mr Speaker, i montre ou en keksoz kler.  I montre ou kwa koripsyon!  Sa later ti kapab deservi nou pe koz Government miles lo kote lo Mahé, nou pe koz mon pe dir Ile Eve annou fer en Government miles kot tou bann lofis bann biro Gouvernman ava ete be sa landrwa osi (sorry) Ile Du Port be la be sa landrwa ti pou en landrwa ideal pou fer sa.

Ozordi bann lofis Gouvernman pe ganny difikilte ganny landrwa lo Praslin.  Sa building Horizon Complex i kapab ganny deservi pou ankadre tou bann lofis, tou bann antite Gouvernman.  Olye ki sa i pou Parti Lepep, e tou lemwan zot pe met en gro sonm avek parti Lepep – sorry Parti Lepep pe kolekte en gro sonm avek Gouvernman, kan sa building – sa batiman ti merit en batiman en building pou Gouvernman, me non pa pou en parti politik, ki pe benefisye avek de milyon Roupi tou lemwan Mr Speaker.

Mr Speaker ankor enn fwa lekel ki ti siny sa later Horizon Complex kot Horizon Complex ti ete Praslin?  Se pa lot ki Msye Danny Roland Faure!  Li ki ti siny lavant later pou Parti Lepep.  Apre ozordi i vin rod divors!

‘’Mon’n divorse avek Parti Lepep!’’

‘’Mon anvi anmenn linite Nasyonal dan Sesel !’’ Me selman li menm li sa dimoun ki’n fer plis koripsyon dan nou pei!

Apre ki Parti Lepep Mr Speaker I apologise pou sa.  Mon’n realize poudir ou ti’n dir mwan boner.  Apre ki Parti Lepep in byen anrisi zot lekor,  yer swar Mr Speaker nou vin vwar Msye Faure in vin fe PPB lo televizyon.

 

(Interruption)

 

HON WAVEL RAMKALAWAN

Non, non mon pe dir en keksoz ki lepep Seselwa tou, yer swar in tande.  Mon pa pe dir nanryen mal lo li.  Mon’n dir in fer son PPB yer swar.

Apre i dir li i pa deal avek Parti Lepep  li!  I napa nanryen pou fer ek zot.  Ok.   Sa bann later Mr Speaker ti kapab benefisye bokou Seselwa.

Mon ti a kontan dan son lentervansyon, dan son konklizyon, Onorab Gill i azout tou sa later ansanm sorry Onorab Larue, eskiz mwan i ava azout tou sa bann later i ava dir ou ki kantite square metre total e kantite larzan total – en ki sa bann later ki’n ganny vann avek Parti Lepep ok – (Onorab Larue i dir i annan i ava donn sa bann lenformasyon plitar).  Mr Speaker an konklizyon sa bann later ti kapab benefisye nou pep plizyer proze lakaz, condominium, bann diferan fasilite ti kapab ganny fer pou devlop bann plizyer lendistri plizyer sekter tourism, lapes, sport pou lazenes, tousala bann pti biznes i kapab benefisye avek sa bann later.

Mr Speaker nou’n vwar pou dir sa parti in napa ditou lentere Seselwa aker – zot sel lentansyon sete pou anrisir zot lekor.  Zot ti pe get zis zot lentere personnel e zot ankor pe zis get zis zot lentere personnel.

Parey sa proverb i dir, ‘’A leopard can never change its spots.’’  ‘’Blan bonnen’’ (mannyer i ale sa ?) ‘’Blan bonnen, bonnen blan’’ Mr Speaker.  Avek sa mon pou siport sa Mosyon ki Onorab Flory Larue in met devan Lasanble Nasyonal.  E mon pou demann tou Manm menm lo lot kote latab si zot annan en leker, en konsyans silvouple annou siport sa Mosyon!  Mersi bokou Mr Speaker.

 

MR DEPUTY SPEAKER

Mersi Onorab Woodcock.  Mon annan Onorab Simon Gill.  Proceed Onorab Churchill Gill.

 

HON CHURCHILL GILL

Non mon le zis fer leklersisman sa laplenn Cote D’Or i pou Mr Moulinien annefe – in repran.  Zis pou fer eklersi pangar …

 

MR DEPUTY SPEAKER

Alright mersi bokou.  Mersi bokou Onorab Churchill Gill.  Onorab Simon Gill ou annan laparol.

 

HON SIMON GILL

Bonzour Mr Speaker.  Bonzour tou koleg Onorab.  Bonzour tou manm piblik ki pe ekout nou deliberasyon ozordi bomaten.

Mr Speaker kontenir Mosyon prezante par Onorab ‘Flori’ Larue i anmenn nou pou dir detrwa keksoz lo sa size later.

Me an menm tan i enportan ki nou dir detrwa keksoz, an sa ki konsern lafason ki nou Lasanble pe deroule.  Mon en dimoun ki ekout tou sa ki koze, dan kalm, trankilite e serenite.  I vre parfwa, dan bann lezot Parlman nou trouv bann dimoun san ses nek zot entervenir koze an bonnavini.  Mon swete k ava annan mwens lentervansyon an menm tan ki mwan mon’n ganny floor par  ou Mr Speaker.

Ek sa Lasanble nou’n byen konmanse e mon ti a voudre ki nou kontinyen travay dan en fason dan lord.  Kot nou espekte lopinyon sakenn de nou, akoz sakenn de nou, nou annan nou lopinyon.  An menm tan anba leadership nou Deputy Speaker ozordi nou espekte dezir ki tou bann  i ganny donnen lo en baz enparsyal.  Tou bann lenterpretasyon bann fe bann sityasyon, i ganny donn lo en baz enparsyal non pa partizan.

Nou tou nou annan drwa isi dan sa Lasanble Mr Speaker, e nou tou nou pou egzers nou drwa san okenn lafreyer oubyen en imitasyon oubyen ki pa neseser.

Mr Speaker sak parti politik …

 

MR DEPUTY SPEAKER

En pti moman Onorab Gill, mon annan en point of order.  Onorab Larue.

 

HON FLORY LARUE

Mr Speaker dapre nou Standing Order under 54 (1) i dir nou ki, en Manm ‘’shall confine his or her observation to the subject under discussion and may not introduce matters not relevant thereto. ‘’

       

(Interruption)

 

HON FLORY LARUE

Mon krwar ki Onorab Gill in mal pronons mon non deza apre i pe sorti direkteman lo konteni, e i pe kestyonn lotorite olye koz lo Mosyon lo later Parti Lepep!  Mersi Mr Speaker.

 

MR DEPUTY SPEAKER

Mersi Onorab Larue.  Onorab Larue mon telman dakor ki ou non devret ganny repons parey ou konnen i devret ganny prononse normalman i Flory Larue.  Alor mon ti a demann Onorab Gill ler ou fer referans avek zis konman en siny respe en Manm Onorab ou dir li Flory Larue.

Dezyenmman mon pa’n aret ou malgre ki mon’n tann ou lapant koze, malgre ki ou pa’n dir eksplisitman, mon santi i ti pe al an deor kontenir Mosyon.  Alor mon ti ava pareyman donn ou en konsey silvouple reste lo sa Mosyon.  Ou kapab kontinyen.

 

HON SIMON GILL

Mersi bokou Mr Speaker.  Mon swete ki tou bann Manm sorti an deor size Mosyon i ganny rikorde e reste lo size Mosyon!.

 

(APPLAUSE)    

 

HON SIMON GILL

Mr Speaker tou parti politik ki al dan eleksyon.  Tou parti politik Mr Speaker, ki anvoy kandida dan en eleksyon e ki ganny eleksyon, i form Gouvernman, i pran en desizyon lafason ki mannyer i pou administre pei e ki mannyer pou delivre bann servis ki lepep, ki sa sitwayen i bezwen.

Mr Speaker fodre pa nou bliye ki sesel nou pa fek konmanse an 1993, avek premye eleksyon miltiparti.  Sesel nou’n konmans nou listwar byen lontan.  Sesel nou’n ganny nou lendepandans an ’76 e Sesel wi nou’n fer en sanzman Gouvernman an  ’77 le 5 Zen.  E dan sanzman Gouvernman ki nou’n fer le 5Zen ’77 Gouvernman ki’n pran labar dan sa pei in pran en desizyon dan lafason ki mannyer pou fer pei!  Dan lafason ki mannyer i pou ariv ver lepep e delivre ver lepep.  Delivre ver bezwen sa pep.  E akonplir bann lobzektif ki’n ganny definir.

Mr Speaker Parti SPPF ki ti vin lo later Sesel an ’78 i ti proklanm son lekor, pou desantraliz son aktivite e kree bann fasilite lo nivo sa distrik.  E dizan sa parkour dan sistenm Parti Inik nou ti vwar li neseser pou kree bann fasilite – ankor enn fwa mon repete pou nou kapab annan en landrwa  pou nou zer biznes parti e zer biznes Gouvernman, pou ki nou retourn nou lapel a bezwen sa pep.  Sa i lafason ki nou, nou ti deside.

Mr Speaker si demen bomaten (Onorab Ferrari i pa kapab les mon trankil aret  koze) i deside zour zot ganny eleksyon pou zot administre pei dan en lot fason zot ava deside i mannyer zot ava administre zot pei.  Ki mannyer zot a delivre ver bezwen sa pep.

Me nou nou’n deside pou annan en Biro Brans pou annan en fasilite nou Parti SPPF dan sak distrik.  Pou nou kapab reach out ver sa pep.  Pou nou kapab ekout sa pep.  Pou nou kapab delivre nou bezwen sa pep.

Mr Speaker listwar ; listwar i prouve pou dir Sesel nou parti ki’n la o pouvwar ziska ozordi nou’n delivre.  Nou’n delivre en kantite keksoz ki sa pep ozordi pe zouir enkli ou Onorab Ferrari.  Enkli u bann  koleg lo lot kote latab laba zot pe zouir sa ki nou’n delivre depi 1977 ziska ozordi.  Nou’n delivre en kantite.

Si ozordi Onorab Ferrari Mr Speaker, oule repran tou sa bann later ler li i rantre dan Gouvernman ozordi ede milye pe reste kot propriyeter sa bann lakaz, move – go ahead pran sa bann later onorab Ferrari atraver LDS si ou form Gouvernman prosennman al pran tu sa bann later ki Gouvernman Parti Lepep in acquire e ki met bann dimoun ordiner ki’n donn zot posibilite pou vre ownership zot propriyete.

Si oule pran tou sa bann later Onorab Ferrari atraver ou Mr Speaker ale pran fer li konman en Polisi LDS pou pran tou sa bann later pu dir ave tou sa bann Seselwa sorti l osa bann later k gouvernman in acquire nou bezwen rann zot, zot met.

Mr Speaker sa i enportan.  Sa i enportan pou nou note.  I enportan lepep  Seselwa la deor i not sa pou dir LDS i annan lentansyon fer li zot Polisi pou zot tir tou Seselwa lo later ki Gouvernman in acquire dan lepase!  Mannyer mon pe vwar deba pe ale mon ganny sa lenpresyon.

 

MR DEPUTY SPEAKER

Onorab Gill en pti moman silvouple.  Point of order Onorab Ramkalawan.

 

HON WAVEL RAMKALAWAN

Mr Speaker Onorab Gill pe mislead tou keksoz – the Motion is not about propriyete ki’n ganny acquire pou lepep Seselwa pe reste ozordi! Mosyon se lo later ki Parti Lepep i pran!  Alor mon ti a kontan Mr Speaker si ou dir Onorab Gill pa bezwen vin anbet  sa pep parey zot in fer pandan tou sa bann lannen!  Mersi bokou.

 

MR DEPUTY SPEAKER

Mersi Onorab Ramkalawan.  Onorab Gill mon bezwen dir ou sa ki ou’n dir ou’n dir keksoz ki pa’n pase dan deba bomaten.  I pa’n zanmen personn pa’n zanmen donn lenpresyon oubyen fer okenn sizesyon, ki okenn Gouvernman LDS ou en lot pe vin pran okenn later ki’n deza ganny pran.  Mon pa’n tann sa bomaten.

Alor annou pa  met keksoz ki pa’n ganny dir  bomaten.  Ou kapab kontinyen prezantasyon.  Onorab Larue ou annan en point of order?  Yes.

 

HON FLORY LARUE

Mersi Mr Speaker, konman loter Mosyon mon pou quote Standing Order 54 (7) (d) kot i dir ‘’a Member shall not impute improper motives or to make a personal charge against any Member expect upon a motion calling into question the conduct of the Member.’’ 

 

MR DEPUTY SPEAKER

Wi mon’n tann ou kler mon krwar ou pe dir (7) (d).

 

HON FLORY LARUE

 (d).

 

MR DEPUTY SPEAKER

 (d) for delta.

 

HON FLORY LARUE

Yes.  Kot i pe sa bout kot i pe ‘’impute improper motives.’’  Ok ?  Akoz sa ki i pe dir ‘aquisition’ napa nanryen pou fer ek sa Mosyon e at no pwen dan deba ‘acquisition’ in ganny mansyonnen.  E i pe fer fo lenpresyon konmkwa nou dan LDS  nou pe vin pran later pep Seselwa.  Sa i vreman  konpletman fo – kont nou prensip nou parti ki konpletman.  Alor i bezwen swa retract ouswa apologise.  Mersi Mr Speaker.

 

MR DEPUTY SPEAKER

Onorab Gill.  Mersi Onorab Larue.  Onorab Gill pa’n dir pou dir Onorab Ferrari pou fer sa.  Me in sizere in sizere  ki si i krwar sa i en keksoz i devret fer proceed al fer.

Endirekteman ou pe impute en motive – ou e impute en motive lo en Manm e i pa korek.  E ou annan rezon anba Standing Order ou pa anliny avek sa Standing Order.

        Mon ti ava demann ou Onorab Gill silvouple gard ou kontenir ou diskour relevan avek Mosyon, e an swivan tou bann norm ki annan e tou Regilasyon dan Standing Order.  Mersi, ou kapab kontinyen.

 

HON SIMON GILL

Mersi bokou Mr Speaker.  Mr Speaker mon pou kontinyen avek Mosyon tout an respektan bann norm dan Standing Order, akoz mon pa’n mansyonn non okenn endividi mon dir mon annan lenpresyon ki LDS atraver Onorab Ferrari i ki en Manm dan LDS mon’n dir ‘’son parti’’  -pa li  -‘’son parti’’.  Mon pa pe impute improper motives lo Onorab Ferrari.  Mon’n dir ‘’son parti.’’

 

MR DEPUTY SPEAKER

Wi.

 

HON SIMON GILL

Ok. 

 

MR DEPUTY SPEAKER

Annou stick a Motion ki Parti Lepep …

 

HON SIMON GILL

… mon dir petet son parti  si i oule fer sa koman zot Polisi.

 

MR DEPUTY SPEAKER

Ok kontinyen.  Me selman stick the Motion.  Ok.

 

HON SIMON GILL

Ok Mr Speaker.  Mosyon ki’n ganny ekrir par Onorab Larue  i kler.  I kler Mosyon mon konn byen son wording Mosyon  i pa zis nou’n pran later  nou’n met isi nou’n fer laba.  Annou lir byen Mosyon in deza dan kontenir Mosyon i impute improper motives dan sa  Mosyon li menm li!

Akoz Parti Lepep pa’n pran later personn.  Nou pa’n pran later.  Mr Speaker tou sa bann tranzaksyon later  ki’n pase  mon ;n eksplike  dan ki konteks ki mannyer nou ti bezwen kree bann fasilite lo nivo distrik pou nou kapab fer  biznes Gouvernman marse, pou nou kapab open up e reach out pou fer nou popilasyon  ver lepep Seselwa dan sak bann distrik.

Mr Speaker nou parti pandan plis ki 50an legzistans  in annan bann Manm ki atraver bann lannen in kontribye en kantite dan nou parti. In kontribye finansyerman n kontribye materyelman dan nou parti e  se sa ki’n tard nou fer nou vin sa ki nou ete ozordi dan sa parti.

Avek tou lenperfeksyon parey lezot parti politik ki annan dan Sesel, ki pa bann  politik parfe, ki napa bann nide leadership parfe, nou tou selman i annan en keksoz ki pe ini nou.  Nou oule ki Sesel i vin en pei ki pli meyer ki letan nou ti ne nou’n ganny konesans  ki nou’n grandi e te or i ti été.  Nou le i vin meyer.

E si nou ti annan konman en misyon Mr Speaker  pou nou devlop sa pei pou nou fer li vin meyer konpare avek letan pase, ankor enn fwa i zistifye rezon akoz  nou’n depans sitan kantite resours  pou nou kapab kree bann fasilite  pou nou kapab al ver nou pep  pou nou kapab ekout nou pep.

I annan bann zonm, bann fanm ki’n donn zot letan, zot lenerzi, ki’n travay konman bann volonter dan tou sa bann fasilite nou parti dan bann distrik pou zot kapab ekout lepep.  Pou zot kapab apresye  problenm sa pep ek zot fer problenm desann bann leaders ki antour bann solisyon i ganny serse.

Mr Speaker sel dimoun dan sa pei, ki pa pou aksepte pou dir in annan devlopman, ki in annan progre pandan sa dernyen 40an ki nou’n la, se zis bann dimoun ki aveg e mon swete ki nou napa tro bokou dimoun aveg isi dan sa Lasanble Mr Speaker !

Mr Speaker  nou tou, nou tou ki la, nou penn en portre  konmsi ki napa nanryen keksoz i bon ki’n pase dan sa pei!  E ki mannyer nou, nou la si napa okenn keksoz ki bon dan sa pei?  Be ki mannyer nou, nou la?  Ki mannyer sa tim LDS i la lo lot kote latab?  Ki mannyer nou dan Parti Lepep nou la lo sa kote latab  si napa nanryen ki bon dan sa pei?  Nou la Mr Speaker zisteman akoz nou annan keksoz ki bon dan sa pei.  Se pou sa rezon kot nou la.

E nou pe fer mannyer pou nou fer sir ki keksoz i vin pli meyer.  Se pou sa rezon akoz nou la.  Nou pa bann dimoun ki aveg.  Ki oule nou convince sa pep al deor, zot pe dir Lepep le kontrer zot, zot oule  convince sa pep la deor atraver bann parol, bann speech delibere pou zot fer krwar sa pep la deor, ki napa nanryen ki’n pase ki bon dan sa pei!

Mr Speaker, sa dan labaz   Kreol nou kapab dir i zis pa kapab ganny aksepte !  I pa laverite !  I zis bann mansonz ki nou pe sey fer mannyer pou nou sey deceive sa pep ; mislead sa pep !  Zot ki le mislead sa pep – fer krwar k i tou dimoun dan Parti Lepep i koronpi ; fer krwar  ki nu en parti  pa’n fer nanryen dan sa pei, depi tou sa lannen nou’n la.  Ki mannyer tou sa bann propriyeter bann lakaz, in arive ganny bann lakaz?  Si nou ti napa en Polisi vizavi lakaz malgre, avek tou son lenperfeksyon ki zot, zot koz lo la ki sa pep ozordi in ganny en shelter.  In ganny en landrwa pou zot reste.  Zot in ganny bann propriété  ki’n ganny met lo zot non!  Zot owner zot propriyete!  Lekel ki’n fer sa?

 

MR DEPUTY SPEAKER

Onorab Gill zis le remind ou, ou pe koz lo bann propriyete  ki Parti Lepep in gannyen atraver Gouvernman?  Parske  sa subject sa Mosyon.  Oubyen ou pe koz lo alokasyon later  e en Polisi Gouvernman?  Parske de keksoz annou koz lo propriyete Leta, oubyen propriyete ki’n ganny aste par  Parti Lepep.  Pa alokasyon polisi Gouvernman later.  Ou kapab proceed.

 

HON SIMON GILL

Mr Speaker, mon apresye bann komanter ki ou pe fer.  E mon ti a voudre ler tou sa bann entervenan avan mwan ou ti ava’n fer menm komanter Mr Speaker!  Akoz zot in anmenn en bann eleman ki pa merit devan avek konteni Mosyon, Mr Speaker.  With all respect let us be fair, let us not be bias or be seen to be bias, Mr Speaker. 

 

MR DEPUTY SPEAKER

Onorab Gill, mon’n ekout  bann lentervansyon – mon’n ekout bann lentervansyon annan dimoun avan tou ti focus lo later Parti Lepep later Parti Lepep e byensir i annan detrwa i dir keksoz ki pa an faver Parti Lepep.

Me selman ou konsern Parti Lepep parski ii deba lo i size sa deba ozordi.  Byensir nou bezwen mansyonn Parti Lepep.  Byensir zot pou annan lopinyon lo la.  E Sa i normal me nou pa kapab melanz Polisi Later Gouvernman  e son alokasyon avek konteni e deba ki dan sa Mosyon ozordi.

Mon ti a kontan fer sa distenksyon.  E mon garanti ou mon promet ou si lo lot kote latab  si zot, zot rantre bann size  ki pa lo sa Mosyon, mon pou fer parey.  Parske mon krwar nou devret reste lo Mosyon.  Ou kapab kontinyen.

 

HON SIMON GILL

Mersi bokou Mr Speaker, mon pou kontinyen.  Lot size ki ekstrememan enportan lo kestyon later Parti Lepep, nou koz lo Mr Speaker, se byensir nou rantre dan listwar ankor enn fwa apre miltiparti letan nou’n rantre dan letap sa ki nou appel de-linking.

Onorab Georges atraver ou Mr Speaker i enn bann dimoun ki’n koz bokou sa lepok lo de-linking.  E dan de-linking ki nou’n vwar?   Nou’n vwar bann fasilite, bann building kot bann Manm Lasanble Parti Lepep dan en moman istorik, ti pe servi kot bann Ladministrasyon Distrik kot i été ozordi, nou ti ganny dir sorti.  Delink e i ti form par en move pou parti sorti – delink aktivite biznes Gouvernman.

E dan sa bann peryod  par lefe ki nou parti ti bezwen kontinyen egziste e fer son travay pou ekout lepep, pou sers fason pou adres  problenm lepep, nou ti trouv nou, nou ti bezwen rod lezot fasilite, pou nou kapab fer biznes nou parti e ed Gouvernman dan son demars pou rezourd problenm lepep.  Bann building kot nou’n sorti  in ganny evalye, en valer ki’n ganny etabli e tranzaksyon konsekan in ganny fer.

Mr Speaker nou al lo bann tranzaksyon resan.  I vre ki Parti Lepep in erit bann propriyete avek son pwen neseser Parti SPPF.  Mr Speaker i annan bann propriyete ki anba non Parti Lepep ozordi, kot napa en devlopman ki’n ganny fer lo la, ziska la mon pe koze, or kot napa en konsep – napa en design ki’n ganny fer, sa bann propriyete desizyon in ganny pran par Komite Santral depi 2017 premye kar pou nou retourn sa bann propriyete.

I annan 8 propriyete Mr Speaker, kot Parti Lepep in fini dir avek Gouvernman ki sa bann propriyete nou pa pe retenir li e nou pe retourn li avek Gouvernman, pou li fer bann lezot tranzaksyon ki santi i bezwen fer.  E fodre note Mr Speaker pour rikord ki sa bann propriyete, si Parti Lepep ki erit sa bann propriyete  son valer ki’n ganny etabli ki ti peye atraver byensir parey mon pe dir larzan nou bann Manm ki’n kontribye, ki’n fer sakrifis,  ki’n anbelir sa parti ki nou été ozordi, malgre ki nou konnen malgre ki tou bann Onorab dan sa Lasanble i konnen, ki zeneralman propriyete i apresye son valer, atraver lannen, nou pa pe pran valer aktyel ki sa propriyete i koute. Sa propriyete pe ganny retournen menm valer ki ti koute swa 10an pase ouswa 15an pase or 20an pase.  Sa i pozisyon  nou parti Mr Speaker  e bann detay mon pa pou rantre dan bann detay ozordi.  Me larestan propriété kot i été  en batiman kot i annan en building ki nou ki’n konstri, kot son later pe lease avek Gouvernman e batiman i pou nou.  I lo nou non parti.  Or  si i annan en later byensir ki nou’n aste li priveman parey i annan mansyon ki’n ganny fer, bann later prive tou in ganny mansyonnen.  E ankor enn fwa mon repete kot i annan en konsep or kot i annan en lenvestisman ki Ankour, sa bann propriyete Mr Speaker desizyon in ganny pran pou pa pou retourn sa bann propriyete !

Byensir sa size nou konnen pa pou sorti lo azanda  LDS Mr Speaker.  Nou konnen i pou reste lo zot azanda.  Akoz i ganny motive politikman!  Me an menm tan i enportan ki nou konpran ki Parti Lepep i egziste i pou kontinyen egziste e nou reste determinen pou nou kontinyen anmenn boner e prosperite pou lepep Seselwa!

Parey nou’n kontinyen fer li depi ler nou’n pran pei an ’77 – malgre tou bann lenperfeksyon ki nou’n kapab pas atraver Mr Speaker –  malgre tou bann challenge tou bann defi ki nou’n kapab pas atraver  Mr Speaker – nou parti nou Gouvernman ki la anler anba Msye Prezidan Faure i reste entakt!

Mr Speaker zonm i vini  dan leadership en parti.  Zonm i ale dan leadership en parti.  Me dan leadership Parti Lepep Mr Speaker, si Onorab Ferrari i dir i voler i reste – wi mon pou dir li voler i reste parey voler i reste dan LDS! 

 

(APPLAUSE)

 

HON SIMON GILL

Mr Speaker nou pou kontinyen devlop bann lobzektif ki’n ganny trase depi byen lontan par nou parti.  Nou pou kontinyen anbelir tou sa bann keksoz ki nou kontinyen fer.  Nou’n aprann Mr Speaker, nou pou kontinyen aprann.  E si i annan en keksoz ki nenport ki Gouvernman i bezwen sistematikman pe fer, se pou kontinyen aprann.

Mr Speaker napa personn dan sa pei – napa personn dan sa Lasanble ki konn tou!  E ki annan solisyon pou tou problenm!  Napa personn!  E i pa egziste dan okenn pei personn ki annan solisyon tou problenm ki  zot bann sosyete respektif, i fer fas avek.

E LDS Mr Speaker, napa solisyon pou tou problenm Sesel.  LDS Mr Speaker atraver ou napa bann zonm parfe  ladan!  Nou annan bann zonm ki avek lenperfeksyon e ki sakenn de nou le moman ki nou leve nou dir ed mwan,  pour mwan kapab fer pli byen ki mon ti fer yer.  Oubyen fer pli byen ki mon’n fer  dan bann lannen ki’n pase  Mr Speaker.  e dan Parti Lepep toulezour ler nou leve bann zonm fanm ki dan leadership Parti Lepep avek tou nou bann lenperfeksyon ki nou annan, nou kontinyen demande pou nou kapab fer pli byen ki sa ki nou’n fer yer!

E si i annan nesesite  Mr Speaker –  Mr Speaker si i annan nesesite pou nou demann leskiz, pou nou demann pardon parey LDS i oule nou demann pardon, nou ava fer li.

Mr Speaker nou annan sa kouraz ; nou annan sa sans imilite pou nou fer li!  Pa parey serten bann leaders ki coward pou aksepte ler zot fer fot e pa pare pou demann pardon e demann en leskiz  Mr Speaker!

Mr Speaker nou a fer li.  E mwan si i neseser pou mwan demann pardon pou serten dimoun ki mon’n fer mon’n mal cross li, mon ava demann pardon Mr Speaker!  Mon annan sa linite.  Mon enb pou mwan demann pardon pou mwan fer li.  Mon pa kanmi! Mon pa kanmi!

Mr Speaker i enportan pou mwan konklir ozordi pou nou fer sir e pou nou asire, ki prosen Mosyon ki mon pou anmenn dan sa Lasanble  Mr Speaker, mon pou fer sir ki mon’n parey Onorab Larue ler mon anmenn sa Mosyon se pou fer en letid serye avan ler mon Mosyon i rantre, se pou rode sak sa bann gran propriyete ki serten nou, nou annan ki kote ki nou’n  gannyen?

 

Interruption)

 

HON SIMON GILL

Nou a rode ki kote nou ganny sa bann gran propriyete, lekel ki’n donn nou konbyen nou’n peye,  eksetera, eksetera.  Nou ava kapab …

 

MR DEPUTY SPEAKER

Onorab Gill ou’n fer 35 minit mon ava demann  ou silvouple .wrap-up pandan sa prosen 3 minit si posib.

 

HON SIMON GILL

Mr Speaker mon konpran ou pe dir mwan mon’n fer 35 minit, mersi bokou pou donn mwan sa letan adisyonnel.  Mon pou al fini avek mon konklizyon par dir avek mon bann koleg lo lot kote latab ki annou kalm.  Annou gard lespri kalm.  Annou reste trankil.  E Mr Speaker pou donn zot laparol pou zot koze apre midi si zot annan keksoz pou dir.

E Mr Speaker Mosyon Onorab Larue i donn nou en loportinite pou nou met keksoz o kler – met bann fe o kler ki mon’n fer resorti e mon swete k i apre ki mon’n dir ki pozisyon nou parti in pran lo size bann later, ki nou ava aret akiz nou dan sa kote latab konmkwa ki nou bann dimoun ki’n mal fer tranzaksyon avek bann later.

Nou bezwen rasire e rasir nou pep, ki later ki’n rantre dan nou posesyon konman en apartir politik, pa konman en endividi.  Prezidan Faure si in siny serten dokiman later, in siny serten bann dokiman later baze lo son pozisyon ki ti annan dan Parti a lepok ki ti siny sa bann dokiman later ki’n vin anba non Parti SPPF e Parti Lepep.

I pa’n siny okenn tranzaksyon akoz in fer koripsyon!  In siny sa bann tranzaksyon lo en baz legal! Tou sa bann propriyete ki’n transfer anba  non Parti SPPF e Parti Lepep in ganny pas atraver bann tranzaksyon legal bann tranzaksyon ofisyel Mr Speaker.

 

MR DEPUTY SPEAKER

Onorab Gill mon ti’n donn ou 3 minit pou ou wrap-up, i reste ou zis en minit silvouple.

 

HON SIMON GILL

Yes Mr Speaker, mon remersi ou pou donn mwan sa bann letan adisyonnel.  E lo sa  lot ou ava dir avek loter Mosyon ki  mon regrete.  Baze lo bann motiv ki’n ganny resorti dan Mosyon mwan personnelman mon pa pou kapab siport son Mosyon.  Mersi bokou Mr Speaker.

 

(Interruption)

 

MR DEPUTY SPEAKER

Mersi.  Mersi Onorab Gill.  Mon ou permet sa deba pou kontinyen omwen ankor 15 – 20 minit.   Mon pou donn laparol Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker mon’n ekout avek gran latansyon spesyalman sa ki Onorab Simon Gill in dir.  E parey mon’ dir depi yer,  mwan mon en Kreol mon manman Kreol mon papa Kreol, mwan osi mon en pti Kreol.  E mon konpran byen parol.

E mon anvi premyerman dir avek Onorab Simon Gil ki pou dir si i krwar  ki sa mo ‘coward’ i pe adres avek mon silvouple reflesir ankor!

Mwan Onorab Ramkalawan mon’n debout  Mon’n vwar ou premye Prezidan rann bat, mon’n vwar ou 2enm Prezidan rann bat e sa enn la 3enm nou pou bat li dan bwat vote!

 

(APPLAUSE)

 

HON WAVEL RAMKALAWAN

E alor ‘coward’ i ava en mo ki ou pa ava zanmen servi ankor vizavi avek mwan!  E Mr Speaker letan mon pe konmanse Mr Speaker, mon pe reponn egzakteman son parol li ki’n entrodwir sa mo li ki in al anba sa direksyon tipik zot rode letan zot gannyen zot ganny lasasen.

Me letan ou rode fodre ou annan ase lafors!  Letan ou mont lo ring fodre ou kapab konbat.  Si ou pa kapab konbat ou reste an deor ring!

       

(APPLAUSE)

 

MR DEPUTY SPEAKER

Mr Speaker –  Mr Speaker mon trouv i byen drol mon trouv  i byen drol ki dan sa Mosyon –

 

(Interruption)

 

HON WAVEL RAMKALAWAN

Mr Speaker.

 

MR DEPUTY SPEAKER

Onorab Ramkalawan en moman.  Onorab Ramkalawan pa’n menas personn.  I pa’n menas personn mon’n ekout byen son lapant koze.  Klerman i pe fer en referans avek en keksoz ki’n dir dan lentervansyon me i pe reponn ou lafason ki li in konpran.  I pa’n menas personn, i pa’n servi okenn langaz obsenn.  Alor mon pe permet li kontinyen.  Ale kontinyen Onorab.

 

HON WAVEL RAMKALAWAN

Mr Speaker mersi bokou. Mon vreman trouv i drol ki sak fwa ler mon koze zot krwar mon menas zot!  Sa mon vreman i trouv i drol.

Mr Speaker mon osi trouv i drol ki enn bann fraz ki kontinyelman servi letan i pe adres sa Mosyon, se ‘’nou parti anba leadership Prezidan Faure. ’’ Me Msye Prezidan Faure pa ti sipoze divorse?  Eski ankor enn fwa la konmsi nou pe … eski ankor en fwa  sa ‘lespri konfizyon’ i kontinyen renye?  Parski anba ‘’leadership Prezidan Faure nou parti’’, me mon ti pe espekte Parti Lepep i anba ‘’leadership’’ Prezidan Faure.

Mr Speaker mwan letan mon regard sa Mosyon mon vwar li dan sa fason swivan ; premyerman mon le felisit Onorab Larue pou sa resers ki in fer.

 

(APPLAUSE)

 

HON WAVEL RAMKALAWAN

Felisitasyon!  Felisitasyon Onorab Larue parske ou’n fer en travay vreman byen ou’n fer ou resers, ou’n outline tou sa bann propriyete.  E ou’n donn lepep Seselwa lenformasyon apropriye.

Mr Speaker mon vwar Onorab Pillay e lev son lanmen ki pe rode li?

 

(Interruption)

 

MR DEPUTY SPEAKER

Eski ou e lev lanmen pou en point of order?  Non?  Ale dir mwan ou point of order?  Ou napa?

 

(Interruption)

 

MR DEPUTY SPEAKER

Oule koze?

 

(Interruption)

 

MR DEPUTY SPEAKER

Ok.  Mon a met ou lo lalis.

 

(Interruption)

 

MR DEPUTY SPEAKER

Non mon pa’n vwar ou ler ou’n lev ou lanmen.  Mon’n konpran ou’n lev ou lanmen  …

 

(Interruption)

 

HON WAVEL RAMKALAWAN

Mr Speaker …

 

MR DEPUTY SPEAKER

Mon’n pran not. Ou kapab kontinyen Onorab Ramkalawan.

 

HON WAVEL RAMKALAWAN

Yes mersi bokou Mr Speaker.  Mr Speaker dan zarden i annan  en pti fler ki apel Sansib. I resanble ki i komans pous dan Lasanble tou.

 

(laughter)

 

HON WAVEL RAMKALAWAN

Ki i pe … I anvi laparol?  Onorab Sanders i anvi laparol Mr Speaker.

 

MR DEPUTY SPEAKER

Mon pa’n tann sa bann komanter. Ou kapab kontinyen Onorab Ramkalawan.

 

HON WAVEL RAMKALAWAN

Mr Speaker lafason ki mon parey mon’n dir mon felisit Onorab Larue e aprezan letan mon regard sa bann kalite  kategori mon vreman kontan lafason ki nou bann diferan Manm n pran laparol, in elabor sa bann propriyete Leta prensipalman  ki Parti Lepep in pran.

E mon kontan antann ki Parti Lepep i anvi retourn sa bann propriyete.  Me selman sa bann kalite promes la Mr Speaker, fodre nou fer atansyon.  E sela kot sa Mosyon, son ‘wording’ i reste vreman aplikab.  Parski nou’n tann en kantite keksoz.  Nou’n tande i kont larme dan Nouvobanq i fermen e prezan nou vwar pou dir kont pe ganny servi.  Nou’n antann diferaman keksoz e la ozordi nou tande pou dir Parti Lepep pe retourn larter me mwan personnelman mon pa tro krwar sa.

E alors i enportan pou lepep Seselwa pou kontinyen swiv byen sa deba.  E sa deba parey Onorab Larue in entrodwir li, se pou nou pe kestyonn Polisi Gouvernman.  Parski sa bann later wi i annan en pe letan depi ki zot in pran prensipalman dan lannen 1996 e sa letan Gouvernman ti annan li en Polisi tre kler.  En dimoun – en kare later.

Me alor li ki mannyer in kapab pran plis ki 50 kare later  ki ti pou Gouvernman e pas sa lo son Parti?

Se la  se sa i problenm.  E letan en problenm i koumsa,  nou bezwen rekonnet ki poudir i annan en problenm e apre sa nou ava regarde ki mannyer nou pou rezourd li.

Me selman Mr Speaker an menm tan sa ki mwan mon’n dekouver, se, e sa i montre mon sa i en mank sa bonn volonte lo lapar Parti Lepep.  Se par egzanp letan zot in acquire serten propriyete oubyen zot in acquire premyerman lo nivo Nasyonal.  Apre sa zot in pas li avek zot parti.  E letan son met dan 3enm Repiblik i sey vin reklanm son later zot, zot kontinyen fer bay.

E ki nou vwar?  Annou pran par egzanp Mize.  Sa ki ti appel Mize SPUP plot number V4908 – 183met kare.  Zot ti pran. Leta ti acquire apre sa ti pas avek Parti Lepep.  E apre sa lafanmir Yumarji ti vin reklanm zot later.  Reklanm zot landrwa.  Ki nou ti vwar? Lakour ti donn zot Lakour ti rekonnet ki sa tranzaksyon sete en tranzaksyon enzi !  E Lakour ti demann lafanmir Yumarji son propriyete.   Me ki nou ti vwar lo lapar Parti Lepep.  Nou ti vwar zot fayle en appeal, zot ti fayle en appeal Gouvernman osi tou ti fayle en appeal e se atraver bann diferan entervansyon ki finalman zot ti withdraw sa appeal e ozordi letan nou pas anvil e mwan mon tre fyer e mon felisit mon kanmarad lekol, nou ti dan menm laklas nou de Yumarji mon kontan mon fyer an olye mon vwar SPUP Mesium mon vwar Hassan Ally Building.  An memwar zot papa i ti sa menm Gouvernman ti fer li disparet e ki ziska ozordi zot ankor pe rode kote zot papa i ete pou zot kapab omwen konman bann Mizilman, pou zot kapab fer sa dernyen rityel – sa’ surah’ sorti dan Quran pou lape, pou repo larm Mr Hassan Ally.

So nou vwar sa sityasyon kot Parti Lepep i azir dominer.  Lakour i donn en Lord zot kontinyen al lager kont sa Lord.

2enm kategori ki mon vwar Mr Speaker, se bann later  ki zot zis pran e Onorab Larue in mansyonn sa parcel number V8911 1,340met kare anler Bel Air kot Montessori School i ete.  E pou demann ou sa sete en rezidans ki ti ganny servi pou bann etranze ki ti travay Sesel.  Sa letan sete prensipalman bann dokter ki ti servi sa batiman.

E kestyon ki ou demann ou se akoz ki Parti Lepep i devret oubyen SPPF sa letan, akoz ki zot devret pran sa batiman avek son later?  E apre lwe li.  Lwe li e pou zot fer larzan pou zot menm.

E sa Mr Speaker kontrerman avek zot in sey  anbet nou pou dir nou Onorab Gill kot in sey fer nou konpran ki parti ti pe extend – ti pe grandi – ti bezwen Biro Brans ; – ti bezwen isi ti bezwen laba.  Sa zanmen in deza en Biro Brans.  Zanmen in deza en Biro Brans.

E zot in plito servi li pou komersyal.  Aprezan se la kot nou al lo en 3enm kategori.  Sa 3enm kategori se serten propriyete prive ki zot in aste lo non Parti.

Me selman si ou’n si premyerman sa propriyete ki ou’n pran, ki ou’n aste preski pou nanryen avek Gouvernman, ou’n met lo non Parti – ou’n fer biznes ou akimil larises e aprezan avek sa larises ki ou’n mal gannyen, ou aste en propriyete prive.  Pou mwan sa  i vin en lot problenm.

E se la Mr Speaker kot par egzanp mon kapab fer li paralel kot letan e si Gouvernman i les Anti-Corruption Commission fer son travay, donn li ase ledan, i pou al vwar ki par egzanp pou sa 50milyon Dolar premyerman i en larzan ki’n gannyen ilegalman e ki apartir la sela kot nou pou al – Gouvernman Sesel pou vin  – nou pei pou ris li.  Akoz ?  Akoz avek sa 50 milyon Dolar ilegal nou pou al ganny propriyete Singapore ; nou pou al ganny propriyete Bulgaria ; nou pou al ganny propriyete dan serten landrwa L’Afrique, nou pou ganny serten propriyete isi Sesel li menm.

Alor par egzanp sa propriyete ki zot in aste St Louis kot zot in fer zot Biro Brans V5487 – 2,040 met kare ki zot in aste avek prive.

Mr Speaker sa i vin en propriyete ki zot in servi larzan ki zot in akimile from en biznes ki li a premye lye in ganny – in vin dan zot koleksyon. Akoz  vreman Parti Lepep i annan en koleksyon propriyete ki kouver 3 paz kot Biro Lanrezistreman. Alors sa osi i vin pa normal.

Aprezan Mr Speaker i annan en lot kategori e sa lot kategori, se zis bann landrwa ki annan ki annan en valer komersyal, kot li Parti Lepep in zis  fer speculation.  Savedir in fini transfer sa later lo li pou en sonm derizwar e la ozordi prezan i a pe tranpe avek.  Par egzanp letan nou regard sa later Roche Caiman – e la Mr Speaker  letan mon trouv i drol ki letan nou fer bann rali Roche Caiman e nou bann dimoun i ava kontan konnen ki pou dir letan nou fer rali Roche Caiman kot nou met nou  stage se pou Parti Lepep.  Se pou Parti Lepep.  Sa V10270.  E mon mazinen ki petet laprosenn fwa nou fer sa nou fer sa nou a bezwen demann Onorab Sanders permisyon pou nou servi sa – ‘Vidot’ permisyon pou nou servi sa bout later e fodre pa ki nou bliye pou nou ekrir en let.

Alors Mr Speaker se sa kalite kot zot zis pran.  E sa i osi aplik pou Mamelles.  Mamelles zis konman ou kit Ladministrasyon zis konman ou Community Centre kot Ladministrasyon Distrik i annan sa bout later la V12216 – 852met kare, kot ankor enn fwa zis zot in pran.  E pourtan – e pourtan sa i en spot ideal pour bann paran kapab vwar etablisman en Daycare Centre. 

Onorab Georges pe sey tou konman MNA Les Mamelles pou li demann ki sa bout later  i ava ganny en Daycare Centre i ava ganny konstri lo la, pou ki lakominote  an antye i ava ganny servi.

Alors Mr Speaker mwan sa bann kalite later, mwan mon demande si Gouvernman pa devret repran sa bann later dan lentere Nasyonal?  Konstitisyon i permet pou ki bann later parey i kapab ganny pran pou lo nivo dan lentere Nasyonal pou devlope.  E mon mazinen i vin menm parey avek sa morso later  ki’n ganny mansyonnen Anse Royale, ki en fasilite pou  kominote, e si i en fasilite pou kominote dan lentere Nasyonal mon napa okenn problenm avek sa.

So e letan nou pe regard pe partou Mr Speaker nou pou vwar ki i annan plizyer sa bann later.

Me aprezan i annan en lot kategori e sa se bann kategori kot i kler ki poudir Parti Lepep SPPF in servi son pozisyon, pou li abize.  Maison Du Peuple in ganny mansyonnen mon pa pou al dan plis detay ankor.

Maison Du Peuple kot i ete sa batiman li menm i en labi.  Sa ti pou lepep Seselwa!  I pa kapab vin pou Parti Lepep.

E mon krwar ki poudir sa bout la kot Maison Du Peuple kot i ete i devret retourn pou Leta – rann zot, zot R900mil i zot in peye e servi sa pou  – well Gouvernman li i ava deside pou ki rezon ki i pou servi sa batiman.  Me i pa kapab – menm parey Mr Speaker sa bout later ki obor Maison Du Peuple V7267 ki donn 10, 430met kare kot ti annan Flambloyant Diskotek e kot lotrozour dife ki ti bril bann bis ti konmanse lo la.  Sa bout later i prime land dan milye Victoria,  i pa kapab reste pou Parti Lepep!  E mon espere Mr Speaker ki sa ki mon pe dir mon pa pe mon zanmen mon’n azir dan en fason konman en ekstremis – mon plito kontan vwar rezon.  E letan mon pe dir sa mon pa vwar akoz ozordi lo sa bout later la prime land i devret annan bann pti langar dibwa ki si ou sey fer enn planning pou met ou problenm i annan en batiman.  E ler ou gete Mr Speaker sa bout later i 10,430met kare.

So lanmenm la i annan en gran lespas e nou pe rod landrwa dan milye lavil pou kapab devlope – pe ganny en kantite problenm.  Mwan mon krwar ki sa ankor enn fwa i tonm dan sa kategori kot Gouvernman in abize.  In abize e ozordi nou trouv nou dan sityasyon.  E mwan mon krwar ki wi en Gouvernman LDS mon pe espere ki sa bann kalite later ki Parti Lepep/SPPF n pran sa bann kalite later nu pou bezwen fer retournen.

Pa later kot dimoun in konstri son lakaz o kontrer kot dimoun in konstri son lakaz me nou pe dir fasilit ed dimoun pou zot aste zot kare later ; donn zot sa  bann zafer Sistenm Pwen ki yer  nou’n bat avek kot zis in konfiz dimoun plis, e in anmenn en ta konplikasyon.  Nou nou pe dir non – fasilit keksoz  larg lanmen Seselwa, met divan anba zot lezel, pou ki Seselwa i kapab debourye avek son fanmir e ganny en landrwa apropriye pou ki nou fini avek sa bann zafer pwen si ou annan de dimoun en zonm ek en fanm ki reste lo en lili selman zot frer ek ser ensidswit ou a ganny 4 pwen ; si ou annan en piti pe dormi dan salon ou a ganny 4 pwen sa bann zafer koumsa.  Annou fini avek!

 

(Off-Mic)

 

HON WAVEL RAMKALAWAN

Weh – Weh e si Ou napa zonm selman ou annan en piti ou annan 10 pwen sepa ki sa bann zafer. Sa bann deal i bezwen fini.

E Mr Speaker i annan en lot kategori ki vreman mon trouv i sad.  Sa se kot Parti Lepep/SPPF zot in pran bann fasilite pou distrik.  Bann fasilite kominoter ki zot in pas lo zot non.  E en legzanp se Larivyer Anglaise.

Mr Speaker eski ou ti realize ki pou dir Sant Kominoter Larivyer Anglaise ki en dir batiman ki letan mwan mon ti ankor letan mon ti ankor en zanfan, ti en labatwar.  Labatwar ki ti la letan mon ti pe grandi mwan.  Apre sa  in ganny transformen e apre in vin en sant kominoter.

Me sant kominoter – sant kominoter ozordi i antye pou Parti Lepep/SPPF!  Be ki mannyer en fasilite kominoter en parti politik i kapab pran? Mon krwar ki en nenport dimoun ki reflesir i ava dir be non, sa pa normal!  I pli normal ki sa i retourn pou sa kominote pou ki tou dimoun i kapab servi.

E an plis ki sa Mr Speaker, sa ki vreman tris, se ki dan La Riviere Anglaise sa i sel sant.  Sel sant ki i annan.  E prezan letan Gouvernman i bezwen fer en aktivite kot i pou anmenn ansanm kominote, i bezwen lwe sa avek Parti Lepep!

Letan lotrozour nou’n fer meeting rezyonal pou meeting pou distrik La Rivière Anglaise pou enform dimoun lo kote Regional Council.  Nou ti bezwen servi sanmenm.

Be eski sa dan li menm i pa montre ou ki poudir sa landrwa i pa kapab pou en parti politik?  I bezwen pou sa kominote.

E ozordi si par egzanp ok Anse Etoile, Anse Etoile en nenport parti politik ki anvi organiz en aktivite dan sant kominoter, i ava kontakte Gouvernman Lokal e i ava kapab servi sa fasilite. Be La Rivière Anglaise i pou en parti politik.  Alors i pa normal.

Mr Speaker se sa bann kalite keksoz la ki mon vwar sa  en lot kategori.  E sa Mosyon i senpleman fer lapel, pou ki rezonnman i retourn ankor dan nou fason fer keksoz.  E non selman ki rezonnman i tourn dan nou fason fer keksoz, me si nou pe koz sa bann gran, gran koze sa bann gran, gran retorik parey nou’n tande yer swar – sa bann poenm ki mon krwar in anrezistre dan group ‘Bling, Bling, tou sa bann zafer Mr Speaker, mon krwar in ler pou nou bouz lo aksyon.

E aksyon i demande ki wi regard sa ki nou pep i bezwen ki mannyer nou kapab fer keksoz bouz devan.  E ankor enn fwa mon vin dan ou distrik Mr Speaker, dan ou distrik Anse Etoile, kot la ankor enn fwa konblaz i ganny fer sant kominoter i ganny konstrir – i annan en Kominote Peser, me sa bout later – sa bout later ti kapab ganny servi konman en fasilite pou bann peser, pou ki i été?  I pou Parti Lepep!

Be zot, zot ki …?  Zot bezwen store pou peser zot?  Ki Mr Speaker sa ki nou bezwen e se la ki nou apel planifikasyon.  Me li i pa enterese avek planifikasyon li.  Egzakteman parey letan ti annan dife lo New Port, apre sa ti form en gro Komite  e ti dir regarde ki mannyer pou planifye.  Selman lo lot kote nou vwar sa menm zafer ki apel planifikasyon, ki mannyer i go wrong totally.  Letan nou pe vin isi la, zot fer  en petrol station – en petrol station vizavi sa petrol station i annan en lekol – en lekol primer! Lo bor li i annan en Depo pour SPTC e lot kote i annan Helena Building se nou bann archive ki la ozordi.  Sa ki apel bon planifikasyon Mr Speaker!  E sanmenm sa rezon ki obor kot en Kominote Peser ti a kapab konstrir en ice plant pou larg lanmen bann peser obor bazar lanmenm la.  Non, non Parti Lepep ki’n rantre ladan.

Alor letan mon pe regard sa bann diferan kategori, mon krwar i kler  ki sa Mosyon  i en Mosyon ki fer gran sans ; i en Mosyon ki demann nou, pase mesaz tre kler e mwan espere ki pou dir dan milye tou sa bann keksoz ki nou pe dir,  nou ava trouv en mouvman ki pou ariv kot Parti Lepep i deside pou li rann sa bann later e ki pli tar pa ava ganny aquired in the National interest e be si i pou ganny aquired in the national interest i pou vreman enportan pou kominote parske parey Onorab Hoareau in dir – ki Biro Brans Parti Lepep i fer dan larantre en  lekol?  Beau Vallon?  E si pa zis akoz i vizavi sant kominoter?

Donk Mr Speaker mwan mon krwar ki pou dir sa Mosyon i fer bokou sans.  Sa Mosyon i anmenn nou regard sa ki nou kontinyelman apel ‘’I Pli Gran ki Nou Tou’.  Mwan mon krwar ki pou dir Parti Lepep, i bezwen bouze, akoz la ozordi, zot ki la konman en Gouvernman.  E si Msye Faure parey Onorab Gill in dir i ankor ‘Nou Parti i anba leadership Prezidan Faure,’’  mon ti ava demande ki sa manni mars katpat aswar pou al dan lasanm, e letan ou’n dir ou’n divorse, i arete!  Si ou’n divorse, sorti dan sa lakaz!

Me si onorab Gill pe dir  ki Onorab Faure – Prezidan Faure – Msye Faure ki ankor la, alors mon priye ki i ava pran son responsabilite seryezman e i ava dir ek sa bann dimoun ki dan son parti  be regard sa fer sa ki neseser.

Akoz sinon Mr Speaker nou pou kontinyen, nou pou kontinyen trouv nou dan bann sityasyon parey yer nou’n tann tou sa bann zoli parol me selman an menm tan la nou pe bliye pou dir Sesel in ganny blacklisted akoz sa bann akoz sa bann golden passport ki nou rantre ladan.

Alors fodre nou fer atansyon avek sa detrwa parol Mr Speaker, mon pou dir fodre nou fer atansyon sa bann gran gran parol ki ganny dir e bann gran, gran promes e mwan mon pou raport mon siport total pou Mosyon prezante par Onorab Larue.  Akoz mon krwar i en bon Mosyon pou nou sityasyon Nasyonal.  Mersi bokou Mr Speaker.

 

(APPLAUSE)

 

MR DEPUTY SPEAKER

Mersi  Onorab Ramkalawan.  Bon in ariv 12.30.  Zis pou mwan port a latansyon bann Manm ki nou annan 2 Komite ki pe zwenn.  Annefe nou an retar pou Bills Committee ti anvi zwenn depi midi.  Me zot annan en delegasyon detrwa dimoun osi ki’n arive, alor Bills Committee pou zwenn toudswit Committee Rm 3 e answit Komite Biznes Lasanble – ABC mon pe propoze 115.  E pou  larestan lazournen, i paret nou pou napa naryen lo Order Paper parske lot item ki nou annan se en Mosyon par Onorab Waven William, me malerezman i pa dan pei. E alor nou pa pou kapab pran sa Mosyon ozordi.  Alor mwan mon pou propoze pou dan sa ka nou pou adjourn pou ozordi e nou pou bezwen repran Mardi prosen le – Nou pou adjourn larestan deba lo sa Mosyon pou prosenn Sitting parske i annan plizyer lezot Manm ki’n lev lanmen enkli ki ‘ou menm’.  So nou annan plizyer dimoun ki’n lev lanmen mon pou adjourn deba lo sa Mosyon pou semenn prosenn.  Onorab Ferrari.

 

HON JEAN-FRANCOIS FERRARI

Mr Speaker mon krwar kekfwa in sap pou ou osi anonse ki   plizyer Manm ti pou absante apre midi, akoz i zot lentansyon e nou demann Lasanble lendirzans pou nou kapab al asiste, donn nou sipor  ansyen Manm Lasanble  Onorab Dick  Esparon e Onorab Terence Mondon tou  lede i dan lafanmir ki’n ganny sa ….

 

MR DEPUTY SPEAKER

Absoliman Onorab Ferrari mon’n pran not sa.  Annefe lafason keksoz in deroule ozordi, i tonm parfe pou nou  kapab otan ki nou kapab – otan Manm ki kapab pou asiste dan lanterman garson Anbasader  Dick Esparon e son madanm Judy.  Ki mwan osi mon pou ale.  E mon servi sa lokazyon pou pas mon kondoleans avek Anbasader Esparon i ti ansyen Manm Onorab Lasanble Nasyonal osi.

E vwala alor sa ki kapab ale mon ankouraz zot pou ale. Avan nou fini – Onorab Pillay.

 

HON SEBASTIEN PILLAY

I paret mwan ou’n met mon lo ‘mute’ Mr Speaker.  Me mersi Mr Speaker.  Mr Speaker nou ti osi lo lot kote eksprimen ki i annan plizyer Manm ki pe attend feray garson ansyen Onorab Esparon – SS Esparon  ozordi ki’n en Manm nou Parti e en dimoun ki’n kontribye bokou dan devlopman nou pei.

So nou demann leskiz lo nou lot kote osi as well an relasyon avek sityasyon.  Mersi Mr Speaker.

 

MR DEPUTY SPEAKER

Mersi Onorab Pillay.  Parey mon’n dir zot ganny eskize ozordi lafason travay i ganny deroule tout fason.

Alor vwala nou pou repran Mardi le 23 Oktob 9er bomaten.

 

(ADJOURNMENT)