Home » Verbatim » 2018 » Verbatim Tuesday 2nd October, 2018

Verbatim Tuesday 2nd October, 2018

NATIONAL ASSEMBLY OF SEYCHELLES

Tuesday 2nd October, 2018

The Assembly met at 9:07am

National Anthem

Moment of Reflection

Mr Speaker in the Chair

 

MR SPEAKER

Bonzour tou Manm Onorab e bonzour tou dimoun ki a lekout, e ki pe swiv travay Lasanble Nasyonal.  Mon dir en bonzour spesyal pou nou bann envite ki anler dan galeri sa se  bann zabitan distrik Grand Anse Mahe.  Nou welcome parmi nou.  Mon remark enn de bann figir familye.  Welcome parmi nou zot ava swiv nou Sesyon la bomaten e pandan Break zot ava pran – zot ganny envite pou pran en dite en kafe avek nou lo  balkon.  E ankor mon envit bann Manm pou feel free pou vini pou enterakt avek bann zabitan Grand Anse Mahe.

Bon mon ava zis pas en pti pe lo travay ki nou annan la bomaten.  Nou pou konmans avek Kestyon.  Nou annan 4 kestyon pou Minis responsab pou Zafer Lafanmir Madanm Mitcy Larue e ler nou pou fini i annan en Private Notice Question ki sorti kot Leader Lopozisyon sa i pou Minis responsab pou Imigrasyon Leta Sivil e Lanplwa Madanm Telemaque e Minis responsab pou Labita Enfrastriktir avek Later Madanm Pamela Charlette.  E ler nou pou fini nou pou – ler nou fini avek kestyon nou pou pran kontinyasyon Mosyon ki ti ganny prezante semenn pase e deba in konmanse lo la nou pou zis kontinyen avek Mosyon.  E nou osi annan e 2enm Mosyon lo nou Order Paper ki’n ganny anmennen par Onorab Waven William. Vwala en pti travay ki nou annan pou sa 2 zour.  Yes Onorab William.

 

HON WAVEN WILLIAM

Mersi Mr Speaker.  Bonzour.  Bonzour tou dimoun a lekout.  Mr Speaker parey ou mon ti a kontan swet la byenveni bann zabitan distrik Grand Anse Mahe ki dan Gallery.  Mon dir mon vwar zot nef la bomaten.

Mr Speaker lo en lot not mon ti kontan pas mon swe senser kondoleans a la fanmir Dupres, Hokann pou Mr Nichole Dupres ki’n kit nou apartir 11er diswar yer swar e osi mon le pas mon senser kondoleans o non distrik Grand Anse Mahe pou la fanmir Nickson avek Lucy Albert La Misere ki’n perdi zot fiy e nou mazin zot e met zot dan nou lapriyer.  Mersi.

 

MR SPEAKER

Mersi Onorab William.  Bon nou ava apel Minis.  Nou ava appel Minis pou nou konmans nou travay.  Yes Onorab Ferrari.

 

HON JEAN-FRANCOIS FERRARI

Mr Speaker bonzour.  En attendant ki Minis i vini semenn pase nou ti ganny en pti pe konplent konmkwa sistenm son pa ti pe mars tro byen, eski ou pa krwar konmsi i en pti pe pli bon ozordi eski zot in rektifye?

 

MR SPEAKER

Wi nou’n rektifye apre osi tou nou pou demann Minis bann ki panel devan osi tou pou servi micro byen akoz semenn pase osi nou’n ganny kot Minis in met micro akote e li in koz dan vid devan.  So nou pe averti tou bann Minis osi tou ki vini pou kapab koz for pou SBC osi kapab kapte e pou lezot Manm osi kapab konpran.

Mon anvi osi tou enform Komite Reform e Modernizasyon ki nou pou rankontre en pti moman midi ozordi dan Speaker’s Conference Room.  Ok nou dernyen meeting nou ti fer an Juillet.  Nou  anvi fer ankor en meeting ozordi.  Bon mon a dir bonzour e en welcome pou Minis Mitcy Larue Minis responsab pou Zafer La fanmir.  Minis i akonpannyen par Sekreter Prensipal pou Zafer Sosyal Madanm Linda William Melanie e CEO pou Lazans proteksyon Sosyal Mr Marcus Simeon.  Minis ek ou lekip welcome.  Nou ava al toudswit lo kestyon e premye kestyon lo papye Onorab Egbert Agale.

 

HON EGBERT AGLAE

Mersi Mr Speaker.  Bonzour Minis, PS ek CEO.  E bonzour spesyal osi pou bann zabitan Grand Anse ki dan Galeri e tou Manm Onorab e lepep a lekout.  Eski Minis i kapab dir ek sa Lasanble ki leta proze sant reabilitasyon Cap Ternay :-

(1) Ki bann konponan kle sa proze?

(2) E eski plan final in fini ganny aprouve?

 

MR SPEAKER

Mersi Onorab Aglae. Minis.

 

MINISTER MITCY LARUE

Mersi Mr Speaker.  Bonzour Mr Speaker. Bonzour tou Manm Lasanble. Bonzour bann dimoun dan Galeri e bonzour tou dimoun a lekout.  Mr Speaker mon oule remersi Onorab pou son kestyon.  Proze reabilitasyon pou bann zenn ki konsern mon Minister e Minister Ledikasyon ek  Devlopman Resours Imen i an progre.  Sa proze i pou donn sipor bann zenn ki annan konportman difisil swa dan lakour oubyen dan lekol.  Ki bann konponan kle sa proze Mr Speaker, proze i annan li de konponan.  En konponan edikasyonnel, e vokasyonnel pou ganny antreprann par Departman Ledikasyon.  E lot konponan rezidansyel ki pou osi konpri laspe psycho sosyal e vokasyonnel pou anba responsabilite mon Minister.

Zot lanplwa di tan pou ganny zere dapre time table ki pou ganny met an plas pou asire ki tou zenn i partisip dan bann sesyon ki pou lo time table.  Eski plan final in fini aprouve?  Mr Speaker seksyon proze dan Minister MHILT in travay lo en plan baze lo konsep e bezwen ki tou lede Minister in donn zot.

Plan in ganny prezante dan en premye meeting avek en reprezantan tou le de Minister e osi avek Development Committee.  Diskisyon e konsiltasyon desizyon ti ganny pran pou entegre serten fasilite tel ki lakwizin, lasal manze ek bann fasilite rekreasyonnel pou redwir kou sa proze.

Minister pe osi lans en letid EIA e nou pe ekspekte ki tou sa bann travay a fini konplete lafen Desanm oubyen boner  Zanvye 2019.

Apre letid lenpak en lot rankont pou ganny fer avek le de Minister e osi Development Committee.  Mr Speaker sa semenn ki nou ladan nou pou osi annan en lot rankont avek tou bann partner konsernan lo sa size, avek bi pou nou tonm dakor lo lezot lenfrastriktir komen.  Mon oule fer resorti ki i annan osi lezot travay enfrastriktir tel ki amenazman semen, provizyon elektrisite e delo ek telefonn ki pou bezwen pe ganny fer ler konstriksyon pou komanse.

E sa bann depans i bezwen antre dan Bidze PUC, Land Transport ek lezot ankor. Apre ki tou sa ki konsernen in tonm dakor, plan final a ganny soumet avek Lotorite Planning.  Estimasyon provizwar ki nou’n gannyen pou proze total, avek tou son bann lenfrastriktir an deor i pou R64.4milyon.

Me Mr Speaker parey mon’n dir oparavan, kou sa proze pou redwir apre ki tou bann lezot fasilite komen in ganny entegre.  Mon Minister in fer provizyon pou premye faz konstriksyon dan Bidze 2019, pou asire ki ler plan in aprouve, sa proze pa ganny okenn retar pou konmanse.  Mersi Mr Speaker.

 

MR SPEAKER

Mersi Minis.  Onorab Aglae.

 

HON EGBERT AGLAE

Mersi Minis pou larepons ase detaye.  Minis an se moman ki nou napa en sant ki pe fer sa proze sa bann reabilitasyon, ki mannyer eski zot pe tret bann ka ki tonm dan sa kategori an se moman avek sa bann zanfan ki nou vwar i annan problenm disipliner?

E dezyenmman an vi ki sa sit i osi en sit i annan en proze en Master Plan, avek en lot sant ki posibleman pou vin dan sa menm landrwa, eski zot pe pran kont dan sa devlopman pou annan sa lentegrasyon ki pa pou vin en problenm pou annan bann lezot fasilite ki’n ganny mete dan sa Master Plan pou sa sit Cap Ternay?  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Mersi Onorab.  Mr Speaker pou le moman parey zot okouran nou ti vin isi dan Lasanble dernyen fwa kot nou ti donn en pti  pe leksplikasyon lo sant rezidansyel ki pe ganny fer kot Coast Guard.  Sa i landrwa ki ozordi nou pe accommodate sa bann zanfan ki nou annan – 9 -anba nou responsabilite lo en baz rezidansyel e an menm tan zot pe fer ansanm avek Minister Ledikasyon.  Akoz nou napa en lot landrwa pou le moman e zot la an se moman pou nou kapab annan sa progranm avek zot.  I en pilot program parey nou’n dir kot nou pe vwar e la nou’n deza annan 5mwan, ki nou’n pas atraver sa progranm, nou pe fer levalyasyon pou nou vwar ki mannyer nou bouz de lavan.  Ziska ler nou kapab ganny en lot landrwa parey nou dir Cap Ternay.

2enm pwen wi i pou annan APDAR ki nou pe mazinen ki pou osi laba me sa i en travay ki mon pa pe kapab donn detay akoz i annan sa bann konsiltasyon parey mon’n dir ek tou bann partener i annan bann konsiltasyon ki nou pe fer pou vwar byensir bann diferan fakter avan en desizyon final i  ganny pran. Mersi Mr Speaker.

 

MR SPEAKER

Mersi Minis.   Onorab Aglae.

 

HON EGBERT AGLAE

Minis zis an  pasan eski ou ti kapab dir ek sa Lasanble ler sa sant pou’n konplete apepre konbyen zenn i kapab pran dan sa sant ?  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Nou pe mazin apepre en 50tenn zanfan ki pou kapab antre dan sa sant apre i pou annan osi lo kote Ledikasyon i pou annan apepre 100tenn.  Savedir bann ki pou day, lo Ledikasyon i pou annan zot Day Program apre pou annan sa bann ki residential, apepre 50tenn bann zanfan.  Mersi Mr Speaker.

 

MR SPEAKER

Mersi Minis.  Onorab Stephen Pillay.

 

HON STEPHEN PILLAY

Mersi Mr Speaker.  Bonzour a tous.  Mr Speaker mon ti a kontan demann Minis en pti pe detay lo sa first phase 2019 ki sipoze dir pou konmanse inisyalman konbyen pou koute?  E si Minis i kapab fer nou lasanble ganny en scope of work pou sa proze enkli son bann detay ki nou kapab … Mersi Mr Speaker.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Mon krwar mon’n nonm en kou letan mon’n dir dan prezantasyon.  Mon’n nonm en kou R64milyon.  Dan nou Bidze Onorab nou’n met 10milyon akoz premyerman nou pou napa en plan final pou vin prezant devan Lasanble pou Bidze.  Alor nou’n met en sonm 10milyon pou nou kapab ler proze inisyal i fini konplete aprouve, pou nou kapab omwen konmans travay an 2019 pa an retar pou nou konmans nou travay.

 

MR SPEAKER

Mersi Minis.  Onorab Pillay.

 

HON STEPHEN PILLAY

Mersi Mr Speaker.  Eski Minis i pou ok pou li avan i konmans sa proze 10milyon inisyalman pou submit kot Lasanble, parey mon pe dir en scope of work pou nou konnen ki pe al fer, ki bann Bill of Quantities whatever, bann pti detay  ki ou’n travay lo la.  Mersi Mr Speaker.

 

MR SPEAKER

Mersi Onorab.  Minis.

 

MINISTER MITCY LARUE

Mersi Onorab.  Nou a vin ek keksoz pou zot kot Lasanble ler nou anmenn sa Bidze 10milyon – ok.  Mersi.

 

MR SPEAKER

Mersi Minis.  Onorab Waven William.

 

HON WAVEN WILLIAM

Mersi Mr Speaker.  Mr Speaker mon ti a kontan demann Minis, lefe ki nou konnen poudir i annan en problenm mendev kalifye, mon anvi ki Minis i asir nou ki letan sa sant i fini ki zot pou annan tou bann mendev neseser ki zot bezwen pou sa sant epi dezyenmman mon’n tann Minis nonm APDAR, eski Minis ti kapab donn nou sa garanti ki letan sa sant i fini e an menm tan nou konnen pou annan sa proze APDAR, ki i pou napa okenn lenterferans avek sa sant?

E trwazyenmman Minis eski i annan kordinasyon vizavi bann proze dan sa rezyon avek sa proze semen akoz ki arive se ki ti annan en diskisyon oparavan lo la, eski sa proze semen osi pe mars ansanm avek sa proze sa sant?  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Mesi Mr Speaker ou dernyen pwen wi definitivman semen i parey mon’n dir dan mon premye lentervansyon ki i annan tou lenfrastriktir i annan PUC i annan Land Transport, tou sa bann dimoun i bann dimoun kle ki pe travay  ansanm lo sa proze.  I en proze ki pa konsern selman nou me i konsern tou lezot APDAR, i konsern nou i konsern Land Transport, PUC nou bezwen ansanm travay lo sa proze akoz pou nou vwar realizasyon sa proze nou bezwen ki tou sa bann sekter i ansanm  e nou konnen ki nou anvi fer.  Ok?

Dezyenmman lo kote preparasyon, definitivman nou bezwen konmans prepar la akoz parey mon’n dir zot sa pilot project ki nou pe fer, i pe donn nou la baz ki mannyer nou pou kapab kontiny sa proze lo en pli gran lanpler Cap Ternay.

Deza avek bann personnel ki nou annan, nou pe rod ankor lezot ki nou manke e an menm tan i annan training ki nou pe konmanse pou ki lezot – akoz i pa fasil pou nou ganny dimoun pou vin travay kot sa sant, so nou pe fer sa bann travay pou ganny bann dimoun, train bann dimoun e regarde ki mannyer nou pou kapab vreman anmenn meyer progranm.

Akoz dapre levalyasyon ki nou’n fer, i annan en kantite weaknesses, ki nou bezwen adrese.  So tousala nou pe pran kont nou pou pran li kont depi la ziska lannen prosenn pour ki ler nou proze in konplete, nou pou’n pare depi avek nou staffing, depi avek tou keksoz ki nou krwar tou santi kapab vin operasyonnel.

 

MR SPEAKER

Mersi Minis.  Onorab William.

 

HON WAVEN WILLIAM

Mersi Mr Speaker.  I pa’n koz lo size APDAR enterferans.  Mersi.

 

MR SPEAKER

Ok.  Mersi Onorab.  Minis.

 

MINISTER MITCY LARUE

Non, sa osi parey mon’n dir nou pe travay ansanm pou nou vwar, si definitivman ansanm ki mannyer nou pou ansanm, ki kalite lenfrastriktir, ki kalite servis ki nou pou servi ansanm, tou sa la nou pou met ater nou pou get bann diferan fakter pou vwar vreman kwa ki mannyer nou pou fer li pou fer sir an menm tan ki napa sa lenterferans bann zanfan avek bann lezot dimoun, bann kliyan ki pou kot sa lot sant.  Nou pou fer sir nou pa pou vin met nou zanfan an risk a okenn keksoz.  Mersi Mr Speaker.

 

MR SPEAKER

Mersi Minis.  Onorab John Hoareau.

 

HON JOHN HOAREAU

Mersi Mr Speaker.  Bonzour Mr Speaker.  Bonzour Minis.  Minis mon kestyon ti en pti pe lye avek ou plan mendev pou sa sant, me mon ti a osi kontan konnen si i annan okenn lezot finansman ki pe- ki zot in gannyen pou konstrir sa sant apard ki Gouvernman Sesel?

 

MR SPEAKER

Mersi Onorab.  Minis.

 

MINISTER MITCY LARUE

Pou le moman non Mr Speaker kot i konsern finansman avek lezot non, pou le moman i ankor Gouvernman Sesel.  E kot i konsern nou plan mendev, nou deza annan  bann lalis, lalis bann staff ki nou pou bezwen vreman annan pou siport sa bann – deza bann staff ki nou annan ozordi, akoz nou pou bezwen annan counsellors akoz ozordi nou napa mon pou dir.  Nou pe servi en pe bann teachers osi pe travay avek nou ; nou bezwen annan psychologist, nou bezwen annan nou en proper director pou diriz sa sant li menm.

Ozordi nou annan nou en program manager ki nou fek recruit.  Nou bezwen annan office manager, nou bezwen annan administrative parey en ladministrasyon nou bezwen annan tou son bann konponan, apre nou bezwen annan osi tou nou bann staff ki pou travay avek nou bann dimoun – nou bann zenn sirtou aswar.  Akoz i en rezidansyel sa nou bezwen fer sir ki nou annan staff adekwa pou kapab fer sir ki zanfan i an sekirite e zanfan pe viv sa lavi ki nou ekspekte, pou  kapab sanze dan zot.  Apartir ki mannyer zot in vin kot nou.  Mersi Mr Speaker.

 

MR SPEAKER

Mersi Minis.  Onorab Jean- Francois Ferrari.

 

HON JEAN-FRANCOIS FERRARI

Mersi Mr Speaker.  Bonzour.  Bonzour tou dimoun.  Minis mon ti a kontan ganny en keksoz en pe kler la akoz i en pti pe konfize.  Dan bann diskisyon ki nou’n annan nou FPAC avek Minister Finans dan finansman bann diferan proze, ki lo papye pou Cap Ternay.  I annan en konponan pou APDAR e i sipoze annan en konponan ki pou tonm anba Minister Lafanmir. Mwan mon ti a kontan konnen  ki bann detay, eski bann detay pou zot proze in fini donnen e kan eski zot ekspekte vin rod finansman pou sak sa bann proze ki tonm anba zot responsabilite.

Akoz i annan en bout larzan k la ki APDAR pa’n demande, e non ki ankor la avek nou.  Alors nou anvi konnen pou zot Minister La fanmir ki status e ki bann demann ki zot pe fer pou finans sa proze?  Mersi.

 

MR SPEAKER

Mersi Onorab.

 

MINISTER MITCY LARUE

Mersi Onorab.  Mersi Mr Speaker.  Mr Speaker  parey mon’n dir sa semenn la nou pou annan en meeting, kot nou pou kapab finaliz nou proze.  Egzakteman e la nou ava keksoz detay byen pou finans e i ava kapab vin dan Bidze.  Ok?

 

MR SPEAKER

Mersi Minis.  Dernyen  kestyon lo la Onorab Lemiel.

 

HON SYLVANNE LEMIEL

Mersi Mr Speaker.  Bonzour Minis ek ou delegasyon.  Bonzour tou Manm koleg Onorab.  Mr Speaker mon ti a kontan  demann Minis en pti keksoz en.  Akoz  dan vakans, vakans Out mon ti ganny sans enterakte avek en group 40 zenn fiy ki ti  ganny met anba progranm Youth Intergrated Support Program ki ti ganny dirize par madanm Francourt.  E sa i ti vreman en tre, tre bon progranm ki Minister Ledikasyon li menm ti fer.

E sa ti fer kot Lakademi Lafors Defans.  Me ti annan en serten lenkyetid.  Mwan mon le konnen  avek Minis eski in vreman annan en dyalog entans avek Minister Ledikasyon avek Minister Zafer Lafanmir ek Sosyal, pou fer sir ki vreman zot oule en batiman entegre ek kanmarad, or separe.  Akoz ti annan en santiman ki petet i ti pou pli meyer lo kote Ledikasyon, zot ti annan en santiman ki petet zot ganny en batiman separe.  Instead of fer li entegre ansanm avek pou APDAR or whatever ki pou vin avek me i paret mwan zot ti le sa.   Si ti annan sa dyalog entans?  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Mersi Onorab.  Dan vakans wi ti annan bann zanfan ki ti vin, bann fiy sirtou ki ti vin fer zot- pandan lazournen selman zot pa ti reste kot zot, zot ti- anr sa group ki ti pe reste. Ok dan vakans, sorry mon pe-

 

MR SPEAKER

Go ahead Minis.

 

MINISTER MITCY LARUE

Sa group fiy ki ti vini zot ti reste akoz ti dan vakans.  Be dan letan lekol osi i annan ki la be selman zot pa reste ou konpran?  Alors, me selman i annan en dyalog, i annan en travay akoz Minister Ledikasyon se li ki provide bann progranm.  I annan sa dyalog i en travay ansanm, akoz i pa nou selman, me i Minister Ledikasyon avek nou.  Me parey mon’n dir i annan serten travay ki nou bezwen amelyore.  I annan serten weaknesses ki definitivman nou vwar.  Apre evalyasyon nou vwar i annan serten weaknesses ki nou bezwen adrese.

Adrese once and for all koumsa ki ler nou pou move Cap Ternay nou pou’n fini ariv lo sa nivo kot nou krwar nou bezwen ale.  Ou konpran i annan en bon pe difikilte ki nou pas atraver ok?  Be selman sanmenm sa bann keksoz ki apre evalyasyon nou asiz ansanm e nou vwar ki mannyer nou pou bouz de lavan, pou nou fer sir ki sa bann weakness i ganny adrese, pou amelyorasyon sa servis, pou fer sir ki nou pe donn vreman sa servis ki nou pe ekspekte.  Bann paran bann zanfan pe ekspekte e ki nou menm nou personnelman pe donn sa servis nou ekspekte ki sa zanfan apre ler i retourn kot lakour i sa zanfan ki meyer ki ler i ti vini.  Mersi Mr Speaker.

 

MR SPEAKER

Mersi Minis.  Nou a pran 2enm kestyon.  Onorab Regina Esparon.

 

HON REGINA ESPARON

Mersi Mr Speaker.  Bonzour Minis ek ou delegasyon.  Bonzour tou dimoun ki a lekout e bann dimoun dan galeri.  Mr Speaker eski Minis i kapab eksplik sa Lasanble, ki fason peyman pou bann carer ki pa pe pran konze ou son  ranplasan i ganny kalkile?  Mersi Mr Speaker.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Mersi Onorab pou ou kestyon.  Mr Speaker a lafen Septanm 2018, Lazans Proteksyon Sosyal ti annan li 3, 565 Home Carers aktiv lo nou rezis, dan lekel 794 ti pe travay demi zournen.

Savedir 7er ziska midi, Lendi ziska Vandredi.  E 2,771 ti pe travay an plen tan e zot, zot kouver 40erdtan par semenn.  En home carer ki travay demi zournen i ganny li pou le moman en allowance R3,607 tou le mwan.  E sa ki travay a plen tan zot ganny zot R5,772 par mwan.  E lo sa allowance 3poursan i ganny tire konman zot kontribisyon ek Fon Pansyon.  E Gouvernman atraver Lazans i osi fer en kontribisyon egal avek sa ki pou zot.

Pou konmansman sa lannen en alokasyon R185milyon in fer pou finansman sa servis, ki apre tou i en servis esansyel ki son bi primordyal i fer sir ki nou bann dimoun aze oubyen bann ki pe viv ek serten form dezabilite i kontinyen viv dan en fason dignifié dan zot lakour.

A lafen Septanm 2018 apre ki nou ti bezwen  vin devan sa Lasanble pou demann Bidze Siplemanter alokasyon anba sa progranm in monte pou ariv R209milyon e nou ekspekte ki nou pou bezwen en sirplis adisyonnel ankor a en montan 33milyon pou kouver ziska lannen fini.

An 2019 en prozeksyon  240milyon in ganny met dan Bidze pou laprouvasyon konman finansman pou progranm swen domisil kot lakour.  Sa Bidze i 2enm pli gro laliny Bidze ki ganny zere par Lazans.  Premye ladan se benefis pou bann retrete dan lekel en sonm 715milyon in ganny poze, alors zis sa de laliny Bidze i ariv pres R1milyon ki reprezant 74poursan prozeksyon Bidze Lazans an antye.

Avek nou popilasyon ki aze dan bann lannen ki pe vini pou annan ankor plis presyon ankor lo sa progranm.  Enn kot son striktir aktyel an term finansman e osi resours imen pou nou kapab siporte.  An realizan sa, Minister atraver Lazans in anbark lo en progranm reform kot nou pe premyerman ; profesyonnalizm bann home carers aktyel avek bi pou standardiz servis.

Reget striktir e lafason ki sa servis i delivre kot i vin en ki viz direkteman lo sa bezwen sa dimoun.

Amelyor sistenm sipervizyon ki an plas.

Kree en frame work atraver ki sekter prive i a kapab antre pou re lev presyon lo sa servis, par ofer servis rezidansyel prive.  Tousala i anliny avek Polisi lo ageing ki mon ti prezant devan sa Lasanble resaman.  E mon pou vin ankor devan Lasanble pou donn plis leksplikasyon  enn fwa ki sa louvraz i konplete.

Parey nenport ki travayer en home carer osi i ganny li son 21 zour konze pandan lannen.  I enportan pou konnen a sa pwen, ki sa dimoun ki sa home carer i travay avek an realite i son anplwayer.  E Lazans Proteksyon Sosyal i par kont fasilit peyman son allowance.  Alor i enportan parey nenport ki travayer ki sa carer i pran son konze pandan lannen akoz definitivman i bezwen letan pou li repran son souf e poze.

Mon konnen an menm tan ki annan osi de ka ki sa i difisil, parey i annan serten ka kot en paran pe okip son zanfan avek dezabilite, me sa petet i bann ka kot i ankor pli enportan ki zot ganny en repo akoz ou pe travay ek bann zanfan.

E konze i kapab ganny pran par faz i pa neseserman 21 zour en sel kou me i kapab pran par faz dan lannen par egzanp i kapab pran en semenn, en lot semenn ziska ler i pran e lannen antye e i konplet son kantite zour ki i bezwen.

Pou pran konze fodre ki premyerman sa home carer i enform sa dimoun ki i pe travay avek, sa fanmir ki i pe travay avek e la la fanmir i fer debrouy pou ganny en dimoun tanporer.  Se la fanmir ki fer sa.  I fer debrouy pou  ganny en  dimoun tanporer pou ranplas sa dimoun ki travay avek li.  E la ler zot in tonm dakor lo sa dimoun, prezan zot bezwen ansanm avek sa manm fanmir al kot Lazans Proteksyon Sosyal, pou vwar zofisye responsab kot unit pou finaliz bann formalite.

La laprouvasyon ava ganny fer formelman pou sa carer ganny son konze, e la sa carer i pou ganny son larzan menm ki lo son konze e sa lot dimoun i ganny peye pou ranplas sa carer.

Alors otan ki posib parey nenport ki travayer Lazans i ankouraz tou carer pou pran zot konze.  Sa i anliny avek Polisi Gouvernman kot i ankouraz tou travayer pou pran son konze.  Me i annan osi serten ka eksepsyonnel baze lo diskisyon e envestigasyon, en desizyon i kapab ganny pran pou pey konze olye donn li konze, pou ganny ranplase par en lot dimoun.  Be osi i pou tou depan lo Bidze.  Mersi Mr Speaker.

 

MR SPEAKER

Mersi Minis.  Onorab Esparon.

 

HON REGINA ESPARON

Mersi Mr Speaker.  Mr Speaker mon ti a kontan demann Minis premyerman akoz ki konze carer i ganny kalkile lo 21 zour olye lo 28 zour parey pou tou bann travayer normal?  E dan ka kot sa dimoun in dir mon pa kapab ganny en ranplasan tanporer, akoz konmsi ki pa tou dimoun ki pa kapab pran konze, ki pa pe ganny lotorizasyon – (Minis pa pe ekout mwan, mon a esper li fini koze apre mon a kontinyen)  Mersi Minis.  Wi Mr Speaker Minis pa ti pe ekout mwan mon a demann li mon kestyon.  Akoz ki carer zot konze i ganny kalkile lo 21 zour olye 28 zour parey tou bann civil servant?

Premyerman sa.  E dezyenmman in eksplike poudir pou bann ki pa kapab pran konze, i annan serten laranzman, me dernyerman son Minister in enform bann carer ki personn pa pou ganny peye konze e zot in arete pey konze.

E la mon kontan ki in vin dir ki zot kapab konsidere alor bann dimoun ki pe ekoute a konnen zot kapab ale case by case kot Servis Sosyal pou zot kapab ganny peye zot konze.  Parske zot ti’n ganny dir kategorikman zot pa pou ganny peye zot konze Mr Speaker.

E mon ti ava kontan demann Minis akoz ki dan serten ka bann ki pe ganny peye zot konze i annan ki pe ganny 4,010 i annan ki pe ganny 3,090.  Ki mannyer sa i kalkile?  Sa ti la baz mon kestyon. Ki mannyer sa i ganny kalkile?  Mersi Mr Speaker.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Mr Speaker eskize mon krwar mon’n fer en fot taler poudir 21 zour olye 28 zour.  Ok zot ganny parey tou dimoun anliny avek Lalwa travay.  Sa i en pti fot.

Apre Mr Speaker wi mon’n met lanfaz mon’n dir ki tou carer i bezwen pran zot konze, bezwen pran zot konze otan ki posib me i kapab annan bann ka eksepsyonnel; parey nou’n dir kekfwa i annan paran ki li i pe travay ek son zanfan dezabilite ki sa zanfan pa oule personn.  I pa kapab adapte avek personn.   I annan enn de ka kot ou kapab la parey mon’n dir regarde fer envestigasyon, diskite ek sa fanmir non pa zis dir li ‘‘non’’ deswit me fer serten lenvestigasyon ansanm avek fanmir.

E la si i nesesit peye i a ganny peye ankor i tou depan osi lo Bidze ki nou annan.  Lo kestyon si i ganny peye 4mil – en i ganny peye 3,088 oubyen…sa i pou tou depan lo kantite letan ki zot in travay.  Akoz i annan ki pran konze petet menm avan 1an.  I pran son konze be i pou ganny peye dapre son letan ki in travay.   Mersi Mr Speaker.

 

MR SPEAKER

Mersi Minis.  Onorab Waven William.

 

HON WAVEN WILLIAM

Mersi Mr Speaker.  Mr Speaker mon ti a kontan demann Minis, lefe ki kou lavi pe ogmante e lefe ki i annan en progranm pou reviz bann Scheme avek saler eski bann Scheme home carer pe osi ganny konsidere?

E dezyenmman Minis mon konnen poudir zot sipoze pe al ofer en Scheme Supervisor Carer dan distrik.  Kan ki sa Scheme pou konmanse ?  E pou bann dimoun ki enterese ki bann prosedir  pou zot apply?  E trwazyenmman Minis par egzanp en carer ki’n travay dizon 20an, eski i annan okenn konpansasyon pou sa carer ki pe travay depi Lendi ziska Sanmdi, e ler ou regarde in donn en bon servis eski i annan en pti konpansasyon pou li pou sa bann ki pe travay sa bann long letan parey?  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Mon konnen ou’n demann mwan 4 diferan kestyon enn lo Scheme Carers ki i 5,700 ler ou pe travay 48 erdtan par semenn parey lezot travayer zot ganny 5,700.  E fodre note ki bann travayer ki carer ki ou pe dir i annan 20an zot ti pe travay avan sa anba Minister Lasante.  E ler zot in transfer pou vin kot Lazans Proteksyon Sosyal la, zot in ganny zot bann benefis ki zot ti devret pe gannyen letan zot in vini.  Ok?

E la sa reform parey nou pe dir ki nou pe travay lo la la i pou enkli tou sa bann keksoz. I pou antre ladan pou vwar ki mannyer, par egzanp i annan carer pe travay selman 3erdtan ozordi.  I annan carer ki travay full time.  I annan carer ki al travay avek 2 dimoun pandan diferan  kantite erdtan, me avek 2 dimoun.  Konmsi i annan en bon pe travay ki nou  bezwen asize pou nou vwar pou nou  parey nou dir standardize e profesyonnalizm sa servis ki nou pe donnen, apre from there ler nou’n kapab train tou nou bann carer donn zot sa skill neseser pou zot kapab travay avek nou bann dimoun aze ek dimoun dezabilite, la aprezan nou a kapab vwar si i nesesit annan en Scheme nouvo pou zot, oubyen whatever la nou ava travay lo la e nou ava donn lenformasyon.

Me fodre osi pa oubliye ki tou carer zot osi zot ganny 13 Mwan Saler parey lezot travayer according to Lalwa.  E lo kestyon sipervizyon la osi en bon pe travay pou nou fer, en bon pe travay pou nou fer akoz aktyelman nou annan nou zis 10 dimoun ki pe fer sa travay sipervizyon ; vedir ki fer letour pou monitor en pti pe ki mannyer bann carer pe fer zot travay e pou 3, 765 dimoun 10 dimoun ki pe supervise nou kapab konpran poudir i pa telman fasil me nou bezwen organiz byen zot progranm travay.

Me sa ankor lefe ki demann bokou, nou bezwen asize vwar en pti pe ki rol sa bann dimoun, ki bann  travay zot bezwen fer e according to sa la, nou kapab vwar ki mannyer nou aziste zot saler oubyen non.

Me selman i annan en kantite travay ki nou bezwen fer.  Akoz parey nou konnen zot tou zot koze, nou tou nou vwar nou kou pe monte ekspre mon’n met sa bann pwen devan zot oparavan pou zot vwar en pti pe kou pe monte eski nou soutenir ki mannyer nou soutenir sa, akoz nou pa anvi konpromi nou bann aze oubyen nou bann dimoun avek dezabilite,  alor i enportan ki nou asize nou fer en travay byen konpreansiv pou nou vwar kote nou anvi ale, ki mannyer nou anvi ale pou nou pa konpromi nou bann vye avek dezabilite.  Mersi Mr Speaker.

 

MR SPEAKER

Mersi Minis.  Onorab William.

 

HON WAVEN WILLIAM

Mersi Mr Speaker.  Mr Speaker mon ti a kontan demann Minis par egzanp si i annan en home carer ki travay avek en dimoun aze kot en lakour e an menm tan i annan zanfan ki pe travay ki anvi pey sa carer en pti larzan pou li fer en pti louvraz adisyonnel eski Minister i permet sa?  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr speaker.  Wi definitivman par egzanp kot nou annan detrwa ka kot petet e dimoun i travay 3erdtan me sa fanmir li i santi i bezwen plis ki sa, e sa fanmir i kontribye i pey sa dimoun pou reste lazournen antye e i donn li sa adisyonnel.  Zot ganny drwa.  As long ki zot kouver sa nou – zot kapab travay ek en lot dimoun as long ki zot kouver.  Si ou annan ou 3erdtan kot en fanmir ou pa kapab kit sa fanmir al fer en lot me pa donn sa servis, me ou pe ganny peye ek nou.  La nou pa pou tolere.  Ou fer sa ki la apre ou al don en lot e sa fanmir i peye napa problenm avek sa.  Mersi Mr Speaker.

 

MR SPEAKER

Mersi Minis.  Onorab Wavel Woodcock.

 

HON WAVEL WOODCOCK

Mersi Mr Speaker.  Bonzour Minis ou delegasyon e tou Manm, e tou dimoun a lekout.  Minis i annan konsern parmi bann carers sirtou bann carers ki travay avek 2 dimoun, ki zot pa pe ganny peye pou travay avek de dimoun me zot ganny peye lapey pou travay avek en dimoun selman.  Annefe mon konn plizyer ka lo Praslin kot carers pe travay avek de dimoun ki sa bann dimoun sirtou bann dimoun aze ouswa avek dezabilite ki zot pa pe kapab okip zot lekor me selman zot pe ganny en sel lapey.  Alor mon kestyon se ki ou Minister pe fer pou garanti ki sa bann carer zot ganny peye dapre zot travay e equal work for equal pay?  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Mersi Onorab.  Mon ti a kontan fer remarke ki letan nou pe donn  carer – mon a donn en legzanp.  par egzanp dan en fanmir nou annan nou msye petet ki bedridden apre nou annan madanm li osi i en pti pe ayo ayo.  Savedir i fer de dimoun dan sa fanmir.  E la  en carer i ganny donnen pou en zournen.  Son pli o nou kapab donn li i en zournen.  Nou donn li en zournen e sa carer li i bezwen okip tou le de sa de dimoun.  Nou pa pou kapab pey li ekstra, pey li pou travay ek sa enn bedridden i dan menm lakaz apre pey li pou travay ek sa madanm menm ki dan menm lakaz ankor ekstra, nou pa pou kapab fer sa.  Nou bezwen pey li son 8erdtan ki i pe kouver pou sa household.  Ou konpran  Akoz sankwa ki mannyer nou zistifye ?  Ki kantite erdtan i fer ek enn ki kantite erdtan i fer ek lot?  Ki mannyer? As long ki bann  travay ki en carer i sipoze pe fer dan sa lakaz i ganny fer.  E i asiste sa 2 dimoun.  Sankwa nou pou annan nou mon pa konnen de – sa dimoun pou ganny li de lapey ki nou pa kapab fer.  Mersi Mr Speaker.

 

MR SPEAKER

Mersi Minis.  Onorab Woodcock.

 

HON WAVEL WOODCOCK

Minis mon vwar sa vreman unfair.  Mwan mon’n vizit plizyer sa bann fanmir ki mon konnen en carer pe okip de manm fanmir, ouswa de dimoun ki konnen – parey bann carer ou konnen normalman bann dimoun ki i travay avek se bann dimoun ki konn ase byen.

Me still Mr Speaker nou bezwen pran kont ennler sa bann dimoun i annan en bann ki ou kapab … akoz de dimoun ki bedridden.  En carer i ganny peye R5,600 pou travay ek e dimoun me enn ki pe travay ek de dimoun a plizyer repriz i annan bann ka kot tou le de dimoun i bedridden e sa carer i sitan annan en gro travay lo li kot i bezwen benny tou le de dimoun, pran menm ka ki li en carer pe ganny R5,600 me selman i pe travay doub travay pou li okip de dimoun ki Mr Speaker i en pe tough.  Ennler pou zot vir sa bann dimoun lo lili zot bezwen rod lasistans e led bann lezot dimoun pou kapab lev sa dimoun prezan mazin pe travay avek de dimoun ki vreman malad Mr Speaker mon pa vwar li fair pou en dimoun pe fer doub travay me ganny peye pou travay zis en dimoun.

Mr Speaker it’s really, really unfair e mon krwar ki Minis i bezwen re get sa.  E mon annan en lot kestyon ankor Mr Speaker i en pti pe lo sa laliny.  Minis i annan plizyer paran ki bezwen travay avek manm zot fanmir 24 lo 24.  Lizour aswar e osi menm zot bezwen travay menm weekend osi sirtou bann ka kot sa bann carers i bezwen travay avek bann dimoun avek dezabilite, parey cerebral palsy ouswa bann lezot dezabilite.  E a plizyer repriz sa bann paran  carer zot napa swa zot bezwen travay ek zot fanmir akoz sa dezabilite.

Zot bezwen sakrifye en louvraz ouswa en karyer pou zot travay a plen tan avek sa manm fanmir ki annan sa dezabilite.  Zot ti kapab pe fer en louvraz kot zot ti pe pli byen ganny peye, me zot bezwen sakrifye zot lavi pou zot travay a plen tan avek sa bann manm fanmir avek dezabilite.

Mon kestyon Minis.  Ki ou pou fer aziste saler sa bann carer, sa bann para ki  bezwen travay a plen tan  24 lo 24 enkli weekend avek sa bann dimoun avek dezabilite?  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Mon vwar ki Onorab i pe koz konman en politisyen.  I normal me annou regard osi de kote.  Wi annou regard en pti pe osi par egzanp ler nou dir sa 2 dimoun ki reste dan menm fanmir.  Eski sa bann dimoun zot annan  osi la fanmir ki reste avek zot?  Sa osi nou bezwen regarde.  Eski i annan la fanmir ki la avek zot?  Ki kontribisyon sa  fanmir osi i kapab fer ?  Gouvernman i vini i donn ou en carer i asiste en carer pou travay avek zot pandan 8erdtan.  Lafanmir pou mwan i devret pe antre pe anmenn sa adisyonnel ki nou pa pe anmenn.

Me osi  an menm tan i annan de ka osi eksepsyonnel kot ou kapab dir i annan nou regarde nou baz sa ka i kapab annan en pti allowance ki donn sa dimoun ki pe fer sa kantite erdtan, me ankor la i tou depan lo sityasyon e sirkonstans.  Me selman nou bezwen get li lo en lot lanpler osi kot nou bezwen demann osi lafanmir pou donn serten – anmenn serten sipor an term si zot pa kapab anmenn li an term finansyel, me anmenn li an term sipor donn en koudmen parey ou dir pa kapab lev sa dimoun, nou donn en koudmen leve.  Akoz i apel apre tou i apel nou gran paran – nou paran.  E letan ou koz lo dezabilite, dezabilite  osi ozordi letan nou pe al lo nou lalis nou vwar nou annan  bokou, bokou paran  ki pe vin carer zot zanfan avek dezabilite.

I annan  ki dimoun an deor ki carer dezabilite zot zanfan me i annan zot paran menm ki vin zot carer.  E laplipar zot zot ganny zot full day.   Me laplipar i ganny full day.  Be nou donn full day ki 5700 keksoz.  Me aprezan la sa paran li osi konman en paran mon krwar i bezwen meet nou half way la lo semen kot nou kapab ansanm fer sa diferans pou sa zanfan.

Me si sa paran osi i annan ankor lezot presyon lezot problenm finansman, zot kapab osi apply pou welfare assistance e la nou get nou household income e zot kapab ganny sa.  E dezyenmman zot zanfan osi pe ganny dezabilite benefis ki zot zanfan pe gannyen pe anmenn kot lakour.

Alor tou sa la mon krwar nou bezwen pran li konman en an term pli gro, e pa regard zis enn me met lezot keksoz ansanm.  Mersi Mr Speaker.

 

MR SPEAKER

Mersi Minis.  Onorab Valmont mon pou donn ou laparol.  Ou nonm i lo lalis, i pa pou  en question arising i  ou … si ou le follow up sa enn met ek ou kestyon fer li tou le de ansanm.

 

HON JUDE VALMONT

Bonzour.  Mersi Mr Speaker.  Bonzour Minis ek ou delegasyon tou koleg Onorab e manm piblik ki pe swiv nou.  Mr Speaker premyerman zis sa matter arising, zis pou remind Minis ki lannen pase dan sa menm Lasanble, ler nou ti pe diskit Bidze mon rapel sa menm issue ki Onorab Woodcock in met lanfaz lo la la, nou ti demann sa kestyon.  E mon rapel CEO sa letan ti pran la parol ti dir ler zot pou annan reform zot pou sey konsider sa issue.

E la mon krwar bann MNA Mr Speaker nou pa pe koz parey politisyen nou pe koz lo baz imaniteryen.  Nou konpran sa bann dimoun ki douler zot pas ladan nou dan distrik nou konn byen.  Minis mon krwar ou osi  ou konn byen sa ki mwan mon anvi met lanfaz lo la.

E 2enm yer Minis dan son speech pou Lazournen bann Dimoun Aze, in dir nou pou fer tou nou Gouvernman pou fer tou pou fer lavi nou bann dimoun aze pli konfortab, alor mon ti a kontan fe propozisyon; mwan mon ti a demann Minis si zot pa kapab konsidere petet ouver  en lalis pou anrezistre bann dimoun ki enterese pou vin carer.  Sa mon dir sa Minis akoz i annan sirkonstans parey Minis in fer sorti, manm fanmir i al rod carer zot.  Be  pa tou dimoun ki annan manm fanmir ki al rod carer.  I annan dimoun aze nou ganny kontak avek e i difisil.

Petet mon ti a voudre zot konsider sa dan zot reform. Zot fer kree en pool for carers dan plas zis ranplase la en dimoun i annan en problenm i pa ganny carer i li tousel dan lakour, zot vini zot vin anba ASP e zot annan bann zofisye Welfare dan tou distrik, alor zot kapab anrezistre laba e sa bann dimoun a ganny kontak e a fasilit lavi nou bann dimoun aze.  Mersi.

 

MR SPEAKER

Mersi Onorab.  Mon kontan ou komanter.  Mon krwar tou le de kote latab i eksprim en pti pe lo sa baz imaniter ler Minis ti pe reponn.  Minis.

 

MINISTER MITCY LARUE

Mersi Mr Speaker.  Mon krwar sa ki Onorab in dir i vreman en keksoz ki nou pe mazinen, akoz nou santi bokou fanmir i vini i dir ek ou poudir i pa pe ganny en dimoun pou li kapab ranplas son carer oubyen menm si Lasante i deside dapre Barthel zot i vwar poudir sa dimoun i bezwen en carer zot pa fasil pou zot ganny en carer pou anploye. So definitivman dan nou reform nou pou bezwen adres sa akoz nou pe mazinen annan en pool byensir e petet menm pa ganny met anba Lazans Proteksyon Sosyal, me i annan petet parey en pti pe Cleaners Association or whatever.  I bann keksoz ki nou pe travay lo la diskite e nou pou annan bann meeting ki nou pou fer dan ban distrik osi kot nou ti a kontan dimoun i vini i donn en pe zot propozisyon.  E la i a pli fasil pou dimoun pli kapab rod son carer la apre be selman tou carer i bezwen ganny train.

 

MR SPEAKER

Mersi Minis.  Onorab Valmont.

 

HON JUDE VALMONT

Yes Mr Speaker.  Mersi.  Petet mon ti a voudre demann Minis kan ki nou kapab ekspekte vwar rezilta?  En dele letan silvouple Minis?  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Nou pe fer tou pou nou konmanse pli tar dan lannen 2019 i bezwen ganny met an aplikasyon sa bann keksoz.  Apre ki nou’n fer nou bann meeting konsiltativ dan distrik, nou pou lans nou bann meeting kot nou ganny pwennvi lapopilasyon dimoun i vini nou ganny zot bann pwennvi, apre nou asiz lo reform byensir nou anmenn pou laprouvasyon e nou pou vin isi kot zot tou pou vin anmenn devan zot apre la nou demare ek nou reform – once ki in ganny aprouve par tou parti.

 

MR SPEAKER

Mersi Minis.  Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun.  Mr Speaker dan son larepons Minis in donn nou de sif ki ler ou azout ansanm i dir nou poudir i fer 74poursan Bidze ASP.  Kestyon mon anvi demann Minis letan nou pe koze ozordi ki degre soutenab sa sityasyon i ete pou pei?  E parey Fon Pansyon resaman in fer legzersis kot piblikman in diskit lo bann figures an relasyon avek fason ki dimoun pe viv ; kantite letan ki dimoun pe viv pou nou kapab konnen konman en pei e Lasanble lefe ki nou diskit Bidze kwa ki nou pe deal avek?

Eski in annan en prozeksyon ki Gouvernman in fer pou kapab donn nou en portre lavenir sa sif ki mannyer i pou kontinyen si i pou kontinyen agrandi si i pou pe desann, si i pou annan enstabilite ki mannyer nou konman en pti lekonomi nou pou fer fas ek sa sityasyon?  Mersi bokou.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Mon krwar Onorab ou’n dir poudir eski sa sif i soutenab?  Eski nou pou – parey nou’n dir nou annan en popilasyon ki pe vyei ok?  E pli nou dimoun i viv pli lontan pli nou bezwen lo kote lasante nou bezwen plis resours, nou bezwen plis resours lo nivo pansyon, plis lo nivo carer lasistans, lo tou savedir pou annan vreman en presyon.  E letan nou pe regarde definitivman i pa pou soutenab.  E se sa ki nou ti fer en forum kot nou ti anmenn tou bann diferan partner ansanm pou sa Policy Ageing ki nou ti anmenn dan Lasanble ki nou ti koz lo la longman, nou’ al fer en forum premye kot nou’n asize nou’n analiz tou sa bann keksoz, e la nou pe vin avek en Progress Report ki nou pe ozordi menm apre midi la mon pe diskite avek diferan sekter, kot apre lanmenm ler nou pou fer en plan, en road map kot nou pou bouze ver konsiltasyon avek piblik an zeneral; akoz nou pa kapab zis vini enpoze dir nou pou tir sa, pou met sa, nou pa pou fer sa, me nou bezwen ganny konsiltasyon avek piblik, anmenn zot pwennvi.

E de la nou bezwen annan en progranm ki pou soutenab.  Nou bezwen regarde kwa ki nou bezwen met an plas ki pou soutenab pou lavenir.  Alor i enportan pou nou fer sa travay akoz letan Onorab pe demann pey sa dimoun – de dimoun dan en fanmir pey de carer eski nou pou kapab fer sa?  Eski nou pou kapab fer sa? Eski i pou soutenab si ou annan 25 fanmir ki annan de dimoun ki nou bezwen al carer donn li de lapey.

Eski i soutenab?  Oubyen nou annan en pool of carers kot nou dir ou fer 3 erdtan la ou al fer 3 erdtan kot sa lot, ou konnen i annan en kantite travay ki mon pe dir nou bezwen fer ansanm pou nou vwar kwa ki soutenab, me an menm tan tout an prenon kont ki nou pa konpromi pa konpromi nou bann dimoun ki bezwen en servis.  Mersi Mr Speaker.

 

MR SPEAKER

Mersi Minis.  Minis mon krwar sa ki Manm pe demande pa de lapey me petet en top up, en top up lo zot saler si zot pe travay avek de dimoun.  Onorab Henrie.

 

HON GERVAIS HENRIE

Mersi Mr speaker.  Mon ti ava pli enterese si mon ti’n tann en sif ganny mansyonnen.  Par egzanp Fon Pansyon in deza annan en  lodit ki’n ganny fer ki’n dir poudir pou li reste soutenab fodre dousman, dousman kontribisyon dan Fon Pansyon par endividi i ogmante par mon krwar in dir si mon memwar i servi mwan byen swa up to 9percent or even 19percentSo prezan pou pansyon Social Security mon mazinen zot pe koz lo la pou bann retrete ki limit ki nou kapab pouse?  Akoz an menm tan nou tann Gouvernman pe al ogmante li lannen prosenn i pe al mont R250 lo la so how far can we push it ?  Mwan mon anvi en sif ki mon annan en nide dan mon latet ki poudir kwa ki soutenab ou pa soutenab?  Mersi bokou.

 

MR SPEAKER

Mersi Onorab.  Minis.

 

MINISTER MITCY LARUE

Mersi onorab.  Parey mon’n dir nou pe travay  nou parey Fon Pansyon osi i enn nou sekter ki nou pe travay avek.  Ou konpran ?  Nou osi nou pe fer nou lodit.  Nou pe fer nou lodit enteryerman.  Ler nou’n fini fer tousala, mon pa pou kapab donn ou en sif la i pou mal pou mon donn ou en sif apre demen sa sif pa balanse ek sa ki mon’n dir ou demen mon vin dir ou en lot.

Alor ler nou’n fini pare avek tou nou vin devan la nou ava donn zot egzakteman kwa kote nou pe ale ki nou sif, eksetera.  Mersi Mr Speaker.

 

MR SPEAKER

Mersi Minis. Bon mon ti a zis konsey bann Manm pou fer zot kestyon bref pa fer long Statement.  Onorab Aglae.

 

HON EGBERT AGLAE

Mersi Mr Speaker.  Minis mon pou retourn lo pran konze.  Eski pa in ler osi pou petet kategoriz sa bann carer ki pe travay avek dezabilite ouswa bann ki annan medikal bedridden pou ki fer sir ki zot ler zot bezwen sa larzan konze zot pa bezwen al pas dan en ta prosedir konpare avek ban carer konsider normal konmsi met zot dan en special category.

E dezyenmman Minis bann carer osi zot dir ki zot merit ganny rekonnet alor zot ti a kontan annan en lazournen pou zot sey konsider sa silvouple?

E dernyerman Minis se bann carer osi ouswa bann endividi ki annan bann carer ki zot travay avek pe demande ki i annan en laliny direk pou raport kot i annan labi ouswa kot i annan bann misconduct ki pe arive?  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Mon krwar ou pwen No.1 nou’n note.  Nou ava pran sa an konsiderasyon pou fasilit en pti pe keksoz fer en pti pe pli vit.  Dezyenmman osi wi mon ti’n note pou mwan demande ki ozordi nou annan bann supervisor ki ale, me parey mon’n dir i tre limite.  Nou pa kapab ariv kot tou bann fanmir ki pe annan en carer avek zot pe travay oubyen bann dimoun ki pe viv zot tousel ki annan en carer.  E nou santi i annan serten labi.

E nou, nou ti a kontan demann bann fanmir si zot santi i annan labi par egzanp zot carer pa pe vin travay a ler oubyen i pa vin ditou zot bezwen enform zot konnen kot zot enformen nou ava  – kot Lazans zot enformen zot dir mon carer pa vini, apre Lazans i fe en investigation.

E pa zis sa dimoun ki la mon krwar dan lakominote nou annan dimoun ki reste pre nou annan lezot manm fanmir.

Letan nou remark sa bann tel labi annou sorti annou dir, poudir i annan tel keksoz pe pase la silvouple zet en koudey regarde ki pe arive apre nou kapab redres sa bann sityasyon.  Mon krwar i bezwen nou tou ansanm nou fer sa travay e non pa zis sa dimoun ki pe monitor.  I bezwen en keksoz ki nou fer ansanm pou benefis sa dimoun aze oubyen sa dimoun avek dezabilite.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Bonzour e bonzour tou dimoun.  Mr Speaker letan nou pe koz lo sa size carer byensir pou mwan mon mazin bann dimoun ki ti konmans, e mon krwar ki i en moman kot nou bezwen osi rekonnet zot par egzanp Madanm Geraldine Laporte.  Sa rol ki in zwe pou entrodwir  carer.  Me sa letan sete pou bann sityasyon  spesifik kot dimoun ti dan bezwen.  E Mr Speaker mon anvi demann Minis si i opa santi ki poudir sa zafer carer taler ou’n mansyonn sa mo politik zisteman, ki poudir avek sa zafer carer ki ozordi i n deborde, in depas nou konpletman, se pa zisteman akoz in annan tro bokou politik ki’n ganny fer avek.  Kot dimoun in ganny carer spesyalman pandan letan kot in annan kanpanny politik pou nobou ganny vot sa fanmir.

Dezyenmman Mr Speaker letan nou’n koz lo – Onorab Henrie in koz lo en evalyasyon, mon pa rapel ki dernyen fwa konmsi in annan en actuary ki’n ganny apwente pou nobou regard tousala parski ozordi Minis in  konfirm sa nou pe depans 1bilyon roupi dan sa eleman sosyal, welfare e tou.  R1bilyon dan en Bidze 7bilyon.

Mr Speaker en setyenm nou Bidze i dan Welfare?  Eski vreman nou pou kapab mon re demann sa kestyon nou pou kapab soutenir sa lavites e sa, sa pace ki sa keksoz pe deroule?  E mon dernyen  pwen Mr Speaker mon dernyen kestyon, se pou dir Minis, donn nou en progranm sa konsiltasyon ki zot pou annan.  Akoz konmsi depi bomaten mon pe tro tann ‘’nou pou fer sa’’, ‘’nou annan lentansyon fer sa’’, nou pou planifye’’ – ki konmsi nou pa pe ganny nanryen konkret.  Mon krwar se sa ki nou anvi keksoz konkret parski apre tou sa bann lannen kot nou’n annan carer nou’n tann koz lo training, mon pa konnen konbyen lannen nou’n tann koz lo training spesyalman pou bann dimoun, bann dimoun aze ki bezwen pran serten tretman pou  train carer pou nobou manage latizann sa bann dimoun.  Me mon pa tro sir si nou’n ariv tro lwen.  Mersi bokou.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Premyerman Mr Speaker lo kestyon sa 1bilyon ki nou dir lo Welfare avek lezot lasistans la nou pe travay ansanm avek World Bank. World Bank pe donn nou en pti pe – pe travay avek zot lo bann diferan laspe sa ki nou pou apre ansanm.

Lo kestyon konsiltasyon nou kapab donn en garanti ki nou pe konmans nou bann konsiltasyon konmansman Novanm.  E la nou pou annan en progranm dan tou bann distrik kote nou pou ale, kwa ki nou pou diskite pou ki tou dimoun i a konnen.

Nou ava fer sir mon a demann CEO pou anvoy en progranm once ki nou’n finalize kot Lasanble Nasyonal pou ki zot ava kapab ganny osi zot partisipasyon.  Lo kestyon training Mr Speaker mon pou dir depi lannen pase nou’n anbark lo en progranm training  e nou annan nou en bon pe demen menm mon konnen i annan en group bann carers ki pou ganny zot sertifika Roche Caiman.  E Praslin ti ganny sertifika dernyen fwa e nou pe kontinyen me nou pe rankontre osi pa mal difikilte pou kapab train bann carers.

Rezon i senp.  Se akoz ki mannyer nou ganny release zot from kot zot pe travay pou vin attend bann training session e sa i en keksoz ki nou bezwen travay ek bann fanmir pou zot kapab ed nou release bann carer pou kapab attend zot bann sesyon training, akoz mon krwar i annan en problenm la kot nou demann sipor la fanmir pou donn nou akoz sankwa nou bann carers pa pou ganny training.

Akoz training pe ganny fer par Zofisye Minister Lasante, nou annan Red Cross nou annan tou bann dimoun ki pou kapab anmenn sa bann skills, neseser pou bann carer kapab vreman, vreman okip bann dimoun.

Lo kestyon kantite dimoun ki ganny carer si realis oubyen non, parey mon’n dir taler nou annan en evalyasyon ki nou pe fer lo tou bann dimoun ki ganny carer ozordi i en travay  ki ongoing la.  E pou nou vwar en pti pe.  Akoz carer letan ti ganny donnen, letan dimoun ti ganny donnen en carer tou dilon ziska ozordi, i annan en form ki ganny ranpli – i en – nou apel sa en Barthel Index ki zot ranpli e sa se Minister Lasante ki ranpli i al kot sa fanmir i al vizit sa dimoun ki’n demann en carer e la zot fer ranpli son form Barthel, apre zot fer zot rekomandasyon dapre sa ki zot, zot in vwar, mobilite eksetera, en kantite pwen i ganny mete lo la e de la la, ki zot demande ki sa dimoun i ganny asiste avek en carer.

Me si pou dir ti annan politik, mon pa konnen i kapab wi, i kapab non, me selman mazorite dimoun mon konnen ki pe ganny carer i bann dimoun ki bezwen en carer.  Me i kapab.  I kapab annan labi, mon pa pou dir napa labi me apre ki nou’n fini fer nou evalyasyon, la nou a kapab vwar vreman si ti annan labi e nou ava retir labi kot i neseser.

E fodre note osi ki Barthel osi ansanm avek Minister Lasante nou pe osi  revwar sa Barthel ki nou servi ozordi ok? Pou nou vwar ki mannyer, ki mannyer.  Me selman an menm tan nou bezwen asire sa en keksoz ki mon ti a kontan donn mon lasirans, se ki nou pou tire labi definitivman, me nou bezwen osi pa konpromi bann dimoun ki bezwen lasistans en carer.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi Mr Speaker.  Mr Speaker definitivman mon pou dir dimoun ki bezwen definitivman zot merite.  Mon krwar lo sa kote sosyal e nou sans lazistis mon krwar sa napa problenm.  Be Mr Speaker mon anvi demann Minis, zot pe al fer sa bann konsiltasyon an Novanm e an Novanm Bidze i fini devan Lasanble.  Eski zot pa krwar ki poudir Novanm i en move letan pou konmanse?  Eski si zot ti’n konmans sa depi premye parti lannen, ki aprezan ti ava kapab balans Bidze parski definitivman sa size pou mont devan Lasanble.

Dezyenmman lo kote sipervizyon, parski sa osi tou i kapab vin enn dan zot konsiltasyon.  Parski ozordi i annan bokou dimoun e nou nou koz fran, i annan carers ki pe fer en travay formidab e ofet mon krwar ki se sa ki Onorab Woodcock ti ape dir, ki zot bezwen – spesyalman bann ki pe pran swen avek de dimoun petet plis pou sa travay ki zot fer.  Me lo lot kote nou bezwen rekonnet ki poudir i annan carer ki apel zis carer me ki sa mo ‘care ‘pa pe arive e letan ti annan en sistenm kot ti annan sipervizyon sa osi tou ti ede zisteman pou asire ki sa dimoun ki bezwen ki’n annan  sa nesesite i pe gannyen sa bann swen parski ozordi Minis I’m sure Mr Speaker Minis i konnen ki poudir serten vye dimoun letan carer in pas kot zot, zot pa vwar zot lalyans, zot pa vwar zot larzan, zot pa vwar zot pti kado ki zot zanfan in anmennen pou zot.

I annan en kantite keksoz ki pe arive alor eski zot annan dan sa progranm ki pou osi byensir enplikasyon finansyel pou fer sir ki dimoun pe ganny sa servis ki zot merite atraver proper sipervizyon, pou fer sir ki bann carer i vini ensidswit?  Mersi bokou.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Mr Speaker pou dir petet ou ti’n devret fer li pli boner.  Me nou ti bezwen konmans premyerman avek en Policy.  E nou ti anmenn Policy isi dan Lasanble mon krwar an – pa pe tro rapel si an Out si an Zilyet something nou ti anmenn en Policy.  Nou bezwen konmans ek Policy avan ganny laprouvasyon Cabinet lo en Policy, anmenn Policy kot zot apre la nou bezwen prezan annan sa progranm ki mannyer nou progrese ki mannyer nou fer nou sa me i pa pou fer – mon pa krwar i pou fer en gran lenpak lo Bidze, akoz si byensir nou pa pou servi bann larzan dan Bidze larzan i a reste nou pa bezwen – plito nou annan ki nou napa.  Akoz i enportan pou nou get dan welfare nou bann dimoun.

Me selman Policy ti bezwen vin avan apre la nou bouz lo bann diferan step pou nou kapab arive fini al fer nou bann reform neseser.  E lo kote carer sipervizyon bann carer parey yer mon ti dir letan mon ti adres bann dimoun aze mon krwar personnelman i annan bokou ki pe fer byen, pe fer zot travay avek lanmour, avek konpasyon e zot in ganny bann ki’n train ankor zot in ganny le skills neseser ankor pou zot kapab fer pli byen e sa ban dimoun koumsa nou apresye zot servis nou dir zot mersi.

Me nou annan osi bann ki nou bezwen adrese e sa osi mon ti lans en lapel ki si zot in deside pou vin travay konman en carer zot bezwen annan en leker pou sa travay.  Pa zis vini fer  en pti bout sove parey nou dir annan sa bann move labitid annan sa bann move konportman, mank respe nou bann vye dimoun nou bezwen sanze.  Nou pa kapab kontinyen sa e sa osi pou ganny adrese dan reform atraver ki tou dimoun avan i ganny anploye konman en  carer i pou bezwen nannan son sertifika ki in train.  Ki in train pou li kapab donn sa servis akoz sa dimoun dan lot kote laba li i pe ekspekte en servis kalite.  Son fanmir pe ekspekte en servis kalite.  E si en carer in train konman en carer i kapab osi vin en nursing assistant.  Sa son baz train li apre i kapab si i pa anvi reste carer i kapab osi vin en nursing assistant kot Lopital dan Minister Lasante.  So i annan tousala e mon donn zot garanti nou pou ale o si vit ki nou kapab pou nou kapab anmenn bann reform neseser pou benefis tou dimoun.  Mersi Mr Speaker.

 

MR SPEAKER

Mersi Minis.  Onorab Wilbert Herminie.

 

HON WILBERT HERMINIE

Mersi Mr Speaker.  Bonzour Minis avek ou delegasyon.  Bonzour tou dimoun a lekout.  Minis mon premye pwen, pwen klarifikasyon ; ki kalite kous travayer ki kalifye pou vin ranplas en carer?  Par egzanp eski en travayer dan sekter piblik pandan son konze i allow pou li ranplas travay konman en ranplasan carer?  epi mon dezyenm kestyon eski pansyoner ki ankor for ki ankor kapab eski zot allow zot pou kapab travay avek zot zanfan sirtou bann ki annan kondisyon kronik lasante kronik?  Mersi.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Pou ranplas carer, wi i kapab en dimoun ki pe travay dan Gouvernman si li i anvi petet i lo son konze petet i osi i pran son konze petet dan son fanmir.  I konnen poudir la son carer son manman i bezwen pran son konze prezan li osi i pran son konze menm letan e i kapab travay dan plas sa carer.  I kapab fer sa.  Okenn dimoun dan nenport ki sekter.  Dezyenmman pansyoner ki ankor for ki kapab travay si i kapab travay avek son fanmir nou pa tro ankouraze.  Nou pa tro ankouraze akoz i deza pe ganny peye anba ou konnen anba konman – son pansyon i pe ganny peye anba sa fon prezan nou pe pey li ankor konman en care,r nou pa tro ankouraz me selman nou kapab osi fer serten leksepsyon.  Leksepsyon atraver parey mon’n dir vizit, regarde si vreman i napa personn, oubyen kwa, i ankor for i kapab fer sa.  Nou donn serten sans pou sa dimoun travay.

E petet i kapab osi petet parey mon pe ganny dir i kapab osi en dimoun i kapab al fer kot en lot dimoun osi.  En dimoun i pe travay kot en dimoun i kapab ale bouz kot en lot dimoun osi al travay.  E i kapab ganny peye.  So mon krwar i annan fleksibilite me selman tou i depan lo kalite, ki mannyer sa sirkonstans i ete.  Nou pa devret ouver en laport pou kree sa labi.

 

MR SPEAKER

Mersi Minis.

 

MINISTER MITCY LARUE

Mersi Mr Speaker.

 

MR SPEAKER

Onorab Chantal Ghislain.

 

HON CHANTAL GHISLAIN

Mersi Mr Speaker.  Bonzour tou dimoun.  Mr Speaker mon kestyon i en kestyon ki bokou bann carers ki konmela ganny anploye avek Gouvernman zot pe demande, lefe ki zot ganny anploye zot osi zot pe vwar li akoz ki zot, zot pa ganny gratwite me ler zot travay pou 5an ou plis.  Mon konn i annan en madanm mon konnen La Digue in travay 15an avek menm dimoun e zanmen in ganny okenn gratwite form Gratwite and all and i menm pare pou vin travay aswar ennler weekend ler sa dimoun i bezwen li.  I pa demann nanryen ekstra, me still i vini.  Sa kestyon ki mwan mon ti anvi demande akoz ki en carer ki li in travay plis ki 5an parey nenport ki lezot travayer zot pa gannyen en Gratwite a lafen zot 5an?  Mersi Mr Speaker.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  I pa en Scheme sa.  I plito en progranm anba Lazans prezan ki sa anplwayer i plito sa fanmir en ler ou pe gete.  Me dan bar reform nou a gete ki mannyer nou kapab, nou kapab revwar sa sistenm ki mannyer i devret pe marse pou ki zot osi zot kapab benefisye tou bann diferan benefis ki annan, ki zot kapab benefis.  Akoz la zot plito en – i anba sa Scheme kot Lazans la e zot pe ganny peye atraver la me zot anplwayer i plito sa sa dimoun ki zot pe travay avek sa fanmir ki zot pe travay avek, alor zot pa kapab benefisye atraver a mwen zot pe ganny  zot Trezyenm Mwan Saler zot pe ganny zot konze anyel.

 

MR SPEAKER

Mersi Minis.  Onorab Ghislain.

 

HON CHANTAL GHISLAIN

Yes Mr Speaker.  Letan nou regard sa bann travayer zot ganny Trezyenm Mwan Saler zot ganny konze zot ganny trete parey nenport ki travayer Gouvernman ki ganny anploye me selman zis ler in ariv ler zot 5an zot pa ganny Gratwite parey tou lezot travayer and mon krwar la osi i annan keksoz ki bezwen ganny aranze.  Mersi Mr Speaker.

 

MR SPEAKER

Mersi Onorab.  Minis.

 

MINISTER MITCY LARUE

Yes be se sa ki nou pou sanmenm sa bann keksoz ki nou bezwen revwar dan reform.  Nou bezwen konmsi revwar tou sa bann keksoz dan reform.  Ler nou pe dir nou pe profesyonnalizm sa ou konnen, nou bezwen fer li fer sir ki zot ganny tou sa ki vi avek.  Akoz ozordi i annan training, zot bezwen train osi akoz ozordi i annan carer ki pa le vin train.  Zot pa oule train be zot bezwen train akoz zot bezwen annan sa kalifikasyon pou ou vin en carer.  So tousala i bann keksoz ki pou vin dan sa package.  Mersi Mr Speaker.

 

MR SPEAKER

Mersi Minis.  Bon anvi ki nou annan bann enn de bann dimoun en pe aze osi avek nou, nou pou pran Break, tea break la 10.30 pou nou retournen 11er.  Mon ti a kontan demann bann Manm pou sey fer zot kestyon bref pou fer gran Statement e Minis osi otan posib pou annan 2 kestyon pou ou fini 11er ki pa- omwen ou a fini 11.30 nou fini nou a kapab eskiz ou parmi nou e pou nou pran Private Notice Question.  Nou ava pran e Break en nou a retournen 11er.

 

(BREAK)

 

MR SPEAKER

Bon nou ava kontinyen avek kestyon pour Minis Larue.  Minis responsab pou sa Zafer Lafanmir.  Nou a pran kestyon No.3.   Onorab Esparon.

 

HON REGINA ESPARON

Mersi Mr Speaker.  Mr Speaker, eski Minis pour Lafanmir ek Zafer Sosyal i kapab donn detay sa Lasanble dan ki fason ki sa Donasyon R300mil sorti kot UNESCO ki ti ganny donnen pou bann dezabilite ti ganny depanse?  Mersi Mr Speaker.

 

MR SPEAKER

Mersi Onorab.  Minis.

 

MINISTER MITCY LARUE

Mersi Mr Speaker.  Mr Speaker kestyon ki’n ganny adrese a mon Minister ozordi i pe adres spesyalman en lasosyasyon ki tonm anba en lot Minister.  E mon pa vwar li fezab anba mon ziridiksyon pou mon donn kapab adres sa sityasyon.

 

MR SPEAKER

Mersi Minis.  Yes Onorab. Esparon.

 

HON REGINA ESPARON

Mersi Mr Speaker.  Mr Speaker anba ki Minister i tonbe?  Mon ti a kontan ganny en lesplikasyon.

 

MR SPEAKER

Wi petet Minis ou a kapab gid nou dezabilite.

 

MINISTER MITCY LARUE

Mer Speaker Lasosyasyon, Lasosyasyon bann Dezabilite par egzanp Lasosyasyon Trwazyenmman, Lasosyasyon Dezabilite i annan ankor lezot ki tonm anba Minister of Local Government, me pa anba mon Minister direkteman, non.  Mersi.

 

MR SPEAKER

Savedir Onorab nou a kapab re forward ou kestyon pou Minister Gouvernman Lokal.  Yes Onorab Esparon.

 

HON REGINA ESPARON

Mersi Mr Speaker.  Mr Speaker me selman mon, vwar li en pe malonnet.  Ki nou’n anvoy sa kestyon kot Minis i ti ava’n ekrir nou ki nou pa tonm anba son Minister olye pou zis vin dir nou la ki pa pe kapab reponn akoz i pa tonm anba son Minister.  Sa i ti ava en pe pli onnet konmsi.  Mersi Mr Speaker.

 

MR SPEAKER

Ok.

 

MINISTER MITCY LARUE

Mersi Mr Speaker. mon krwar i vin de kote la.  Mon krwar konman Manm Lasanble zot osi konnen lekel bann kestyon avek ki zot adrese.  Akoz mon sa kestyon i vini i pas atraver mon sistenm, apre letan mon e gete mon dir annou travay lo la, la nou vwar dernyen minit akoz nou pa pe travay lo kestyon pandan plizyer letan, me nou travay lo kestyon la lo bann dernyen letan.  E prezan nou vwar pou dir sa kestyon definitivman i adres mon Minister direkteman.  Mon krwar i bezwen travay tou lede kote. Pa zisteman nou Minister me zot osi.  Mersi.

 

MR SPEAKER

Mersi Minis.  Yes Onorab Ramkalawan.

 

HON WAVEL RAMKALAWAN

Mr Speaker mon bezwen siport sa ki Onorab  Esparon pe dir.  Sekretarya i anvoy kestyon kot Minis.  Letan Minis i dir i pe vin reponn kestyon, se la ki Sekretarya i met bann kestyon lo Order Paper. Se parske Minis sa Minister in dir ki in pare pou li vin reponn sa bann kestyon!

Me si in vwar ki en kestyon pa pou li.  Mon krwar ki i toutafe dan laliny normal  k ii enform Lasanble ki, parski la i napa nanryen pou fer avek Manm.  Parske mwan mon konnen ki pou dir sekretarya menm lo ABC letan pe regard bann kestyon si nou santi ki pou dir en kestyon i pa pou sa Minister spesifik me pou en lot lo ABC nou fer li.

Me ki an plis ki sa Mr Speaker, mon krwar ki mon bezwen met sa lo rikord ki konmsi ki lafason ki Minis in reponn sa ou konnen nou konmsi – ‘’nou pas tou letan zis pe get kestyon’’ – as if konmsi Lasanble pa enportan.

Mr Speaker mon krwar ki sa latitid i n move latitid e ki sa travay ki ganny fer dan sa Lasanble i bezwen ganny pran o serye e ki Minis pa kapab vin dan Lasanble e dir ki sa kestyon pa pou li.  Be li corporate responsibility i pa pas avek son lot Minis pou li donn en larepons normal?  Sa kalite latitid sanmenm sa ki fer nou dir i annan problenm dan sa Gouvernman.  Mersi bokou.

 

MR SPEAKER

Mersi Onorab.  Bon sa kestyon wi ti pas devan ABC e Onorab Esparon li in anmenn sa kestyon pou Minis Zafer Lafanmir.  E tou Manm ABC tou nou pa’n vwar dezabilite i tonm anba zot Minister.

Me ankor petet Minis ou ler ou ti ganny ou notifye sa kestyon.  Petet ti ava byen ki si en oversight lo nou par konman Sekretarya, nou ti a kapab ganny enformen  ki sa kestyon pa tonm anba pou responsabilite anba ou Minister.

Anfen nou ava retir sa kestyon nou a defer li pou en lot moman pou son Minister apropriye.  Ok? Onorab Esparon nou ava al lo kestyon No.4.

 

HON REGINA ESPARON

Mersi Mr Speaker.  Mr Speaker me la s a lot kestyon osi pou menm dan menm laliny pa vo lapenn ki mon demann li.

 

MR SPEAKER

Wi.

 

HON REGINA ESPARON

Fotespere ler sa lot Minis i vini  i pa ava dir mon anvoy kot en lot Minis ankor.

 

MR SPEAKER

Wi.

 

HON REGINA ESPARON

Mersi Mr Speaker.

 

MR SPEAKER

Se sa.  Ok savedir sa de kestyon i ganny retire.  I malere nou ti’n kapab vwar sa depi – oubyen Minis osi ti’n kapab dir ou avan Break.  Ki  nou ti’n kapab release ou avek ou lezot …

 

MINISTER MITCY LARUE

Non sa enn mon kapab donn ou serten larepons.

 

MR SPEAKER

Sa enn ou pou kapab reponn Minis?  I annan pou fer ek Disabled ankor.  Ok eski Minis si ou reponn s enn then ou pou kapab reponn sa lot.  Wi en moman, en moman, en moman.  Yes Onorab Esparon.

 

HON REGINA ESPARON

Mr Speaker mersi.  Mr Speaker me mon pa ganny en konpran ki mannyer Minis pou reponn sa enn i pa pou reponn sa lot.  Akoz nou pe say sa enn ki anler e nou kapab reponn sa lot anba kan i annan pou fer ek menm lorganizasyon.  Mon pa ganny en konpran mwan.

 

MR SPEAKER

Tou lede i en Donasyon.  Tou lede i en Donasyon ki al pou menm lorganizasyon – ok ? 

 

HON REGINA ESPARON

Tou lede i annan pou fer ek menm Lorganizasyon Mr Simeon i la konman en dimoun involve dan sa bann zafer.

 

MR SPEAKER

Ok annou pa ok annou pa trenn sa de kestyon i pa pou Minis ki responsab pou Zafer Lafanmir.  Nou ava retire e nou ava anvoy li kot Minis apropriye – ok? 

Minis Larue nou ava remersi  ou.  E nou av eskiz ou parmi nou.  Mersi PS William Melanie e mersi CEO Marcus Simeon.

Ok nou ava eskiz zot.  Sa 2 kestyon nou ava take up avek the right Minister. 

 

(MINISTER LARUE AND

HER DELEGATION WAS EXCUSED FROM THE HOUSE)

 

MR SPEAKER

Yes Onorab Ramkalawan.

 

HON WAVEL RAMKALAWAN

Mr Speaker sorry, selman mon pa pe ganny en konpran ki’n arive la dan sa Lasanble.  Parski tou lede kestyon ti ganny dir ki ti ganny donnen pou bann ‘Disabled’ – ok? 

Kestyon 4 osi tou i dir pou bann ‘Disabled’.  E Minis i dir i pa kapab reponn No. 3.  Me selman i kapab reponn No. 4.

Mr Speaker Onorab Wavel Ramkalawan i dan en leta konfizyon.  Mersi bokou.

 

MR SPEAKER

Se sa se s desizyon ki mon’n pran pou evit pou evit en pti pe plis mon kapab dir sa leta konfize.  Tou lede kestyon i ava ganny anvoye kot son Minister kot Minister apropriye – ok?  Yes Onorab De Commarmond.

 

HON CHARLES DE COMMARMOND

Non zis bonzour Mr Speaker.  Bonzour tou dimoun. Mr Speaker zis konmsi selman mon vwar en keksoz i en pti pe drol.

Mr Speaker wi, mon dir mon vwar en keksoz pen pti pe drol.  Ordinerman  kestyon nou anvoy kot sa Minister.  Minister i regarde i dir sa enn la pa pou mon i dir ou li i ekrir Lasanble.

Me se mwan mon dir sa pou soz.  Si en Minister pa’n dir pa pou li, be nou’n pran li konman i pou li.  Konmsi i en pe – nou lans en rapel petet pou dir zot regard byen, fer nou konnen si an ka nou’n mal anvoye ouswa i pa aplik pou sa Minister, at least have the courtesy of dir nou.  Mersi.

 

MR SPEAKER

Se sa – se sa mon krwar ki in sorti la.  En Manm son kestyon i lo Order Paper anba Standing Orders i annan tou drwa menm si plas retir son kestyon.  Sa i son drwa.

Me pou en Minis i’n ganny notifye, e in aksepte pou reponn sa bann kestyon, e ler pou li dan Lasanble kestyon i ganny poze i dir be sa pa tonm anba son Minister, then i annan en problenm la ok? Nou ava rektifye demen nou pou rankontre ABC nou ava rektifye.  Yes Onorab Ghislain.

 

HON CHANTAL GHISLAIN

Mersi Mr Speaker.  Mr Speaker 3enm kestyon sa 3enm kestyon larzan ti ganny donnen avek Lasosyasyon Dezabilite ki tonm avek Gouvernman Lokal.  Katriyenm kestyon sa larzan ti al pou Council ki tonm anba Minister Larue.  Sanmenm sa i pe dir ou katriyenm kestyon i kapab reponn.

 

MR SPEAKER

Kestyon pa fer referans avek Council.  Vwar kestyon i al direkteman pou bann Disabled.  Vwar nou regard sa kestyon i parey i annan de donasyon ki loter en kestyon in mete ki in ganny donnen pou bann Disabled.  Vwala bon nou’n fini sort out sa de kestyon i ava ganny anvoye kot Minister Gouvernman Lokal.

Nou ava prezan apel Minis Telemaque e Minis Charlette pou reponn Private Notice Question.

        Ok mersi.  Bon mon ti a kontan welcome e dir en bonzour Minis Myriam Telemaque, Minis responsab pou Lanplwa, Imigrasyon e Civil Status. Minis i akonpannyen par son PS pou Imigrasyon e, Civil Status Mr Alain Volcere.  E son Special Advisor Mr Michel Marie.  E osi welcome bonzour Minis Pamela Charlette Minis responsab pou Labita, Enfrastriktir avek Transpor lo Later.  Minis Charlette i akonpannyen par Mr Gerard Hoareau son Special Advisor, Mr Ravi Valmont Sekreter Prensipal pou later.  E Mr Parinda Herath CEO pou Lazans Transpor lo Later.

Le de Minis avek zot lekip welcome dan Lasanble Nasyonal.   Mon va prezan pas laparol avek  Onorab Ramkalawan pou li poz son Private Notice Question Onorab.

 

HON WAVEL RAMKALAWAN

Mersi bokou Mr Speaker.  Bonzour bann Minis avek zot bann delegasyon.

Mr Speaker premyerman mon krwar petet taler zot ava reponn petet dan non sa madanm kekfwa i annan en ‘r’ ki manke mon krwar.  Mon pa konnen anyway zot ava ki mannyer mon konpran i ‘p, r, o’ lo papye nou’n met ‘p, o’ i posib i vin ‘p, r, o’ me anyway larepons i ava … 

        Mr Speaker eski Minis responsab  pou Imigrasyon, e

Minis responsab pou Later ek Transpor, i kapab dir Lasanble Nasyonal (

1) Kan e anba ki sirkonstans eski Lana Prokopyeva ti ganny donnen nasyonalite Seselwa?

Eski Lotorite konsernen ti fer okenn resers lo sa madanm avan ki zot ti donn li nasyonalite pou regarde si i annord avek son pei natal, e si i kapab retourn laba oubyen si Lotorite laba pe rod li an relasyon avek serten tranzaksyon ki pa annord?

(3) Eski i annan okenn propriyete Port Glaud ki’n ganny anrezistre lo son non?

E finalman Ki vre lentere sa madanm dan sa proze pou elarzi sa semen ek sa  propozisyon road diversion? Eski i pe promot son prop lentere akoz i annan proze konstri bann Chalets, ki kapab fer ki Seselwa pou napa akse avek sa morso lans kot bokou nou i kontan fer piknik?  Mersi bokou.

 

MR SPEAKER

Mersi Onorab.  Mon ava pas laparol premyerman avek Minis Telemaque.  Minister. 

 

MINISTER MYRIAM TELEMAQUE

Bonzour Mr Speaker.  Bonzour Leader Opposition, Leader Government Business e tou bann Manm Onorab prezan, e bann dimoun ki a lekout.

Pou premye kestyon Lana Prokopyeva ek son msye Sergey Prokopyev ti ganny citizenship anba ladministrasyon oparavan.

Son citizenship ti annakor avek Seksyon 5 (1) Citizenship Act 1994 ki ti ganny amande an Novanm 2013.

Pou 2enm kestyon Mr Speaker wi Mr Speaker, resers ti fanny fer lo li par lo tou lede par Financial Intelligence Unit – FIU.  E i ti napa okenn lobzeksyon pou, donn sitwayennte.  Mon site FIU ‘’has conducted at due diligence in accordance with it’s statutory mandate and has iidentified no adverse information related to money laundering or criminality at this time, which would suggest the persons  unsuitable or ineligible for the decision to award of citizenship.’’ 

An plis ki sa en police character certificate sorti kot Seychelles Police i dir ki annan ‘’nothing detemental – detrimental sorry is known against’’ sa madanm ek son msye.  Mersi Mr Speaker.

 

MR SPEAKER

Mesi Minis.  2enm pati kestyon Minis Pamela Charlette.’

 

MINISTER PAMELA CHARLETTE

Mersi Mr Speaker.  Bonzour tou dimoun ki a lekout.  Bonzour tou bann Onorab.  Mr Speaker 3enm kestyon resers ki nou’n fer napa later ki’n anrezistre lo non sa madanm oubyen son msye direkteman.

Me i annan 4 kare later ki nou’n idantifye Port Glaud ki anrezistre lo 4 lakonpannyen  ki sa madanm i annan lentere ladan.

Si ou permet mon nonmen Mr Speaker.  Sa i J1701 ki anba Sandria Rosewood PTY Limited.  Sa later ti ganny purchase an Desanm 2017 from James Lesperance ek Jill Azemia.  E sa later ti ganny vann R1.7 milyon.  Sa lakonpannyen i parey mon’n dir i Sandria Rosewood PTY Limited  ki Prokopyeva i 50 share e son msye i annan 50 share. 

        2enm J1721 in ganny anrezistre anba Magnolia Landrail PTY Limited.  I osi ek sa later Mr Speaker ti ganny aste ti ganny aste prive from Francis Louise R2.0milyon.  E dan sa lakonpannyen Magnolia Landrail PTY Limited Lana i annan 50 share e son msye i annan 50 share. 

        I annan osi J1724 ki ganny anrezistre anba Blossom Sunshine PTY Limited.  E sa Mr Speaker in annan detrwa bann owners ki evantyelman i ti ganny aste i ti ganny vann avek en Sergey Avilov an 2014 ki apre in ganny vann avek Blossom Sunshine PTY Limited ki sa de dimoun ankor i annan 50 shares each. 

        Mr Speaker dernyen i annan J3895 ankor Port Glaud ki anrezistre anba Sainte Ange River PTY Limited ki’n osi ganny purchase from en Rukaiya Jumaye Avril 2018 e sa anba sa non  Sainte Ange River PTY Limited.  Sa madanm ek son msye zot osi annan 50 shares each.  Sa i sa 4 later ki nou’n idantifye Port Glaud ki anba bann lakonpannyen ki sa de dimoun i annan shares. 

Pou kestyon No. 4 Mr Speaker, ki vre lentere rol sa madanm dan sa proze pou elarzir sa semen.

Mr Speaker pou lemoman, nou pa ankor vwar okenn – SIB in konfirmen ki napa okenn laplikasyon ki’n antre.  E osi Planning in konfirmen  ki napa okenn laplikasyon ki’n antre sorti kot sa madanm  konmkwa i annan lentere pou fer en proze parey in dir dan sa landrwa.

Me selman nou lofis – nou Minister ti ganny par sa petisyon ki ti anmennen ki ti fer nou konnen pou dir i annan bann en konsep ki sa madanm in avek.  Alor Mr Speaker nou, nou pou lemoman nou pozisyon se sa semen pe ganny fer pou kontinyen.  Nou annan en retar akoz problenm avek kontrakter ki nou’n gannyen ki nou’n bezwen re-tender.  Me nou  proze semen i kontinyen e akoz sa i en proze ki distrik  li menm li ti demande.  E Minis Bastienne lannen pase ti vin dan Lasanble ti eksplike sa semen.

So nou proze pou nou i kontinyen lo sa laliny.  Mersi.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mersi tou lede Minis pou zot larepons.   Mon premye kestyon byensir i al lo sa ki tou Seselwa in fini konnen 5 (1). tou Seselwa  in konn sa Seksyon dan Lalwa Imigrasyon.

Mon ti a kontan premyerman demann Minis kwa ki ti kwa ki fer sa de dimoun i meritorious kwa ki zot in fer pou Sesel pu zot merit ganny sitwayennte anba 5 (1) parey mon premye kestyon.

Dezyenmman dan sa menm  konteks eski Minis pou Imigrasyon i  kapab osi dir avek nou si letan zot ti pe mazin donn li nasyonalite eski ti annan okenn rapor ki pou dir ti’n deza annan court case  an, relasyon avek serten travayer etranze ki ti’n Filipino plis, spesifik ki ti annan en court case e apre sa ti bezwen fer en out of court settlement ki alor ti montre ki pou dir i ti bezwen pey tou bann keksoz.  Alors i montre ki pou dir son karakter pa ti vreman sa karakter ki nou swete pou bann dimoun ki pran nou Nasyonalite.  Sa pou Minis Imigrasyon.

Dezyenmman Mr Speaker eski Minis li kapab dir avek nou si sa kot spesifikman mon dir sa 3 morso later sa 701, 1721, e 1724 si dan zot rikord eski sa bann later, ti deza dan land bank?  E si ti da n land bank kan eski sa bann lavant in swiv Provizyon bann Lalwa Land Bank pou asire ki the first – apre 7an whatever it is avan ti 7an aprezan i 15an ki premye lof ti ganny fer avek Gouvernman li menm.  Konmsi bann regilasyon eski tou sa bann Regilasyon pou sa 3 lavant la obor La Grotte in ganny fer anba Lalwa an swivan Lalwa?

E an plis ki sa Mr Speaker eski konmsi ankor enn fwa pou montre lo sa  kote karakter, eski dan zot rikord i annan ki pou dir letan ti annan sanksyon pou aste en later Anse  La Mouche ki pou dir Gouvernman ti refize donn sanksyon.  Eski Gouvernman in refize donn sanksyon savedir i ti bezwen annan bann rezon spesifik?

E letan eski tou sa bann later in ganny vann avek li avek sa bann lakonpannyen apre ki in ganny Nasyonalite Seselwa?  Mersi bokou.

 

MR SPEAKER

Mersi Onorab Ramkalawan.  Minis Telemaque.

 

MINISTER MYRIAM TELEMAQUE

Mersi Mr Speaker.  Mr Speaker parey mon ti fer resorti dernyen fwa dan case sa de garson ti annan en rekomandasyon ki ti ganny fer sorti kot bann Lotorite

Dan sa ka Prezidan in servi son lopinyon e son zizman in award citizenship sa de dimoun.  E nou bezwen mazinen pou dir Seksyon 1 i pou en prérogative Prezidan.  E pou sa rezon lin ganny donnen.

Lo size si i ti annan en  court case Filipino ki ti annan en out of court settlement nou okouran.  Mon krwar parey ou’n e mon krwar parey ou’n dir ti annan en out of court settlement.   Me Prezidan in fer son prérogative in donnen konman 5 (1).  Mon pa kapab tro fer komanter lo la.  Mersi Mr Speaker.

 

MR SPEAKER

Mersi Minis Telemaque.  Minis Charlette.

 

MINISTER PAMELA CHARLETTE

Mersi Mr Speaker.  Mon konmans avek ou 2enm kestyon.  Ler nou fer nou resers nou vwar ki pou dir nou prezimen ki restriksyon ti’n tonbe akoz, akoz Rezistrar li menm li ler sa bann dimoun   koz in aste li avek prive, ler en dimoun i ale pou li fer sa sanzman kot Registra si i annan bann restriksyon toultan i vin back kot later.

So napa nanryen ki’n vin kot nou so nou prezimen i ti’n fini tonbe sa bann restriksyon.

Wi sa bann later ti dan en proze land bank ki ti vann avek Seselwa e then Seselwa, apre in vann avek prive.  Ok. 

        3enm  kestyon ou kestyon regarding Anse La Mouche ti annan en aplikasyon pou sanksyon parey ou’n dir pou Anse La Mouche.  E dan sanksyon wi ti annan en adverse comments from FIU pou sa letan pa vann li pa pas par sa later lo li.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mr Speaker sa ki mon ti ava kontan konnen, si Minis par egzanp Minis in dir ki ti annan en adverse comment pou sa rezon ki i pa ti ganny sanksyon pou li aste sa.

Be sa i ti avan ki i ti ganny Nasyonalite.  Parski letan ou ganny, Nasyonalite ou pa bezwen sanksyon.  Eski sa pa pe donn nou en lendikasyon, ki pou dir la mon pe link tou lede ansanm, ki pou dir FIU in fail dan son travay.  Parske i ti’n devret vwar ki pou dir i annan en adverse comment.  Savedir si o u pa pe donn en dimoun sanksyon pou li aste en bout later, apre ou donn li Nasyonalite ki pli o.   Akoz mon pe vwar ki pou dir i annan en problenm la.  E dan sa menm konteks Minis  Telemaque in dir avek ki ti annan sa police certificate. 

        E mon pe ganny lenpresyon ki pou dir sa police certificate sete en  local police certificate.  

        Eski ankor enn fwa sa pa montre nou ki pou dir i annan en keksoz ki pa annord.  Eski dan zot file i annan en police certificate from the country of origin?  Sa ki mon ti ava kontan konnen.

E apre si Minis ti ava kapab dir nou egzakteman ki dat ki i ti ganny Nasyonalite?  Mon pa’n tro sezi anba ansyen rezim parey ou’n dir Msye Michel ki ti Prezidan – ki dat egzakteman ki i ti ganny aprouve son sitwayennte ?  Mersi bokou Mr Speaker.

E pou Minis Charlette si i kapab dir avek nou sa bann later la, mon mazinen i en pe pre ek kanmarad sa bann obor La Grotte pou donn nou son total son total siperfisi.  Mersi bokou.

 

MR SPEAKER

Mersi Onorab Ramkalawan.  Minis Telemaque.

 

MINISTER MYRIAM TELEMAQUE

Mersi Mr Speaker.  Mr Speaker laprouvasyon ti ganny donnen le 14 Oktob 2016.  E konsernan FIU mon pa pou kapab tro fer komanter lo la selman sa ki mon konnen FIU sa Lotorite ki fer due diligence.  Si in issue en let mon mazinen in eksplor to have tou avenues, avan in fer sorti en dokiman pou donn nou.  Mersi Mr Speaker.

 

MR SPEAKER

Mersi Minis.  Minis  Charlette.

 

MINISTER PAMELA CHARLETTE

Mersi Mr Speaker.  sa 3 bout later ki ou pe dir obor La Grotte i pa tro obor kanmarad.  Zot en pti pe a lekar.

Son total siperfisi i 3,548 square metre an total tou le trwa ansanm.

 

MR SPEAKER

Yes Onorab.

 

HON WAVEL RAMKALAWAN

Konmsi zis en pti keksoz ki enteresan ki fer mon poz en kestyon.  Eski zot pe dir nou ki dernyen aksyon ki Msye Michel i fer konman Prezidan son last day of office in Office Vandredi le 14 Oktob avan ki Msye Faure i vin Prezidan le 16 Oktob, sete pou li donn Nasyonalite sa de dimoun sa de Russians?  Konmsi mon pe trouv sa konman en keksoz vreman bizar.  E eski Minis pe dir avek nou sa se bann dokiman ki dan file li menm?  Mersi Mr Speaker.

 

MR SPEAKER

Mersi Onorab.  Minis Telemaque.

 

MINISTER MYRIAM TELEMAQUE

Mr Speaker laprouvasyon ti ganny donnen le 14 Oktob – sa dokiman ki nou annan – Oktob 2016.

 

MR SPEAKER

Mersi Minis.  Mon ava pas laparol avek Onorab Aglae.

 

HON WAVEL RAMKALAWAN

Konsernan file konmsi i resanble ki file pa la.  I annan sa file i la?  Selman sa file i egziste?  Ok.

 

MR SPEAKER

Ok, Onorab Aglae.

 

HON EGBERT AGLAE

Mersi Mr Speaker.  Bonzour tou lede Minis ek son delegasyon.  Mr Speaker permet mon avan mon demann Minis mon kestyon, anvi ki sa PNQ pe adres en size ki mon involve dan mon distrik.  Vi ki sa serten Minis pa ti la ler mon ti anvoy sa Urgent Question osi pa ti pase,  mon pou profite pou mon poz Minis serten kestyon lo sa laliny.

Minis eski Minis ki responsab pour Labita pou kapab dir ek sa Lasanble si i annan okenn lenformasyon osi ki sa madanm  an kestyon in osi demande pou annan serten propriyete ki trouve later land bank Port Glaud, pou li kapab ganny aste pou fer son proze?

E dezyenmman Minis eski dan sa proze e-larz-man semen tou prosedir Planning ek lanvironnman ti ganny swiv?  Eski ler ti pe fe provizyon pou ganny bann wayleave pou proze kapab ganny konsevwar,  eski ti annan okenn lobzeksyon par okenn zabitan ki reste dan sa rezyon?  E Minis swivan sa petisyon ki pe fer demann pou annan en  road diversion, eski Minister ki ou’n dir ou’n resevwar serten dokiman tou resaman, e parey zot in vwar i annan en kopi online,  eski ou, Minister ti apros sa endividi pou koz avek li?  E ki pozisyon Minister dan sa laliny?

E dernyerman Minis eski Lotorite, Lotorite konsernen ansanm avek Gouvernman Egzekitiv pe mazin pran serten aksyon, anvi ki sa petisyon ti ganny ti ganny fer, sete pou konsern lanvironnman pa koup pye dibwa, e apre i nou’n vwar loi medya ki sa madanm in dir sa petisyon i konsern en road diversion.

 Eski i annan aksyon legal Gouvernman Egzekitiv pe mazin pran pou ki sa petisyon e bann ki’n sinyen in ganny resevwar dan n faon ou n lot in ganny koz manti avek?  Mersi.

 

MR SPEAKER

Mersi Onorab Aglae.  Minis Charlette.

 

MINISTER PAMELA CHARLETTE

Mersi Mr Speaker.  Onorab parey mon’n dir oparavan sa li en proze ki distrik menm ti  initiate.  E in swiv bann prosedir Planning e s se konsilte tou bann stakeholders pou rod zot bann feedback.  E ti napa okenn lobzeksyon a sa letan, pou sa proze.  E sanmenm ki avan mwan mon vin Minis Labita ek Land Trasnport sa proze in fini demare.

Ti napa bezwen pou nou demann wayleave akoz sa enlargement ki pe fer i dan road reserves.  Savedir en later ki nou rezerve toultan.  Si i annan bann devlopman Nasyonal ki kapab arive oubyen enlargement of road sa ki ganny servi.

Parey mon’n dir in nou’n fer konnen tou dimoun, apre sa petisyon sanmenm sa ki Land Transport avek bann lezot stakeholders ti monte pou gete vreman, ki sa madanm i anvi nou fer lo sa semen.  E nou, nou pozisyon se pou nou kontinyen fer sa semen nou’n konmanse akoz i annan bann proze Cap Ternay ki pou ganny fer.  E osi nou pou kontinyen avek sa proze unless ki pa bezwen oubyen Gouvernman li dir pa bezwen fer sa semen.

Me pou lemoman nou pozisyon se nou kontinyen fer sa semen akoz i annan bann proze ki pou ganny fer Cap Ternay e nou bezwen parey distrik ti demande nou bezwen enlarge en pe sa se semen pou kapab fer li pli fasil pou transpor sirkile.  Mersi.

 

MR SPEAKER

Mersi Minis.  Mon krwar i annan en bout petisyon petet Onorab Aglae ou a kapab repran.

 

HON EGBERT AGLAE

Minis mon pou repran sa dernyen kestyon ki mon’n demann ou ;  anvi ki ti annan sa petisyon online, e kot i annan bann sinyatir ki’n ganny sinyen lo sa petisyon.  E lobzektif petisyon sete pou lobzektif lanvironnman kot ti pou annan serten pye dibwa ki ti pou ganny koupe.  E petisyon ti ganny fer.  Me apre lo medya pou dir sa petisyon in ganny servi pou anmenn en lot lobzektif – sa se en road diversion.

Eski Minis dan son kapasite dan Egzekitiv, zot pe mazin pran serten aksyon kont sa endividi, ki’n servi sa petisyon dan en lot lavantaz pou li?  E Mr Speaker si ou permet mon a demann en siplemanter.

 

MR SPEAKER

Yes go ahead Onorab.

 

HON EGBERT AGLAE

Minis an vi ki osi i annan sa endividi an kestyon in fer resorti, ki i pou pourswiv Gouvernman.  Si demen i annan en case Ankour ki dir pou dir sa madanm swa i ganny son case mon pe prezimen, mon pe met li demen –  ki posibilite ouswa ki lenpak en road diversion dan sa landrwa i ganny fer ki son lenpak i kapab anmennen?  Mersi.

 

MR SPEAKER

Mersi Onorab.  Minis Charlette.

 

MINISTER PAMELA CHARLETTE

Mersi Mr Speaker.  Vi ki nou fek sorti sa vizit avek tou bann stakeholders mon krwar i ava annan en rapor.  Stakeholders i ava met en rapor devan.  E osi ava nou ava anvoy sa file kot AG’s office ki  pou kapab advise nou en pti pe pli byen si pou annan en legal enplikasyon.

Pou 2enm kestyon lenpak sa diversion byen sir nou pa’n kot Land Transport nou pa’n vreman fer en costing as such nou’n deza annan en survey ki nou bezwen fer pou gete sa semen kot pou pase.  Me nou konnen ki nou pou bezwen koup plis pye dibwa.  Akoz i len landrwa ki nou pa konn son topographie – nou pa konn son land profile pou nou kapab dir konbyen i kapab koute.  Me zis vizyelman nou kapab dir i pou kout plis ser ki sa ki nou, nou pe fer la.  Osi sa semen i pou pas dan en housing estate ki nou pa pe konseye li fer.  Akoz i annan bann lenplikasyon transpor dan milye en housing estate.  Mersi.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker.  Bonzour Mr Speaker.  Ou pe demann sans pou reponn mon kestyon.  Me mon pe al allow mwan pou raise en point of order pou demann en klarifikasyon.

 

MR SPEAKER

Point of order.  Ale go ahead. 

 

HON SEBASTIEN PILLAY

Mr Speaker Onorab Aglae in demann en kestyon spesifikman lo en kestyon.  Nou ti a kontan ganny plis lenformasyon akoz baze lo lenformasyon ki Onorab Aglae in met devan nou, se ki sa petisyon in mislead bann dimoun ki’n siny sa petisyon.

So i ti a kontan konnen from Land Transport, kwa ki sa petisyon ti dir egzakteman konbyen dimoun ki’n siny sa petisyon?  Akoz sa petisyon tou dimoun in vwar lo rezo sosyal ti dir pou, dir ti annan bann lenpak anviron mantal.

E apre sa petisyon in vire e vin lo en baz road diversion.  So mon pa krwar kestyon Onorab Aglae in ganny reponn, mon ti a kontan si Minis ek son lekip ti a kapab adres sa kestyon?  Mersi.

 

MR SPEAKER

Yes mersi Onorab Pillay.  Minis klarifikasyon.

 

MINISTER PAMELA CHARLETTE

Mersi Mr Speaker.  Sa petisyon spesifik ki nou’n vwar i baze plito parey ou pe dir lo lanvironnman ki nou pou afekte coastline.  E dan sa petisyon i annan nou apepre 21 dimoun ki’n siny sa petisyon.

 

MR SPEAKER

Yes Minis.

 

MINISTER PAMELA CHARLETTE

Nou pa’n verifye vreman si bann dimoun Port Glaud, me selman i annan 21 non lo la.  Nou pa’n, verifye vreman si bann dimoun Port Glaud.

 

MR SPEAKER

Mersi Minis.  Onorab Pillay ou kestyon.

 

HON SEBASTIEN PILLAY

Mersi Mr Speaker.  Mr Speaker premye kestyon demann Minis se eski Lasanble i kapab ganny en lalis tou bann dimoun ki’n siny sa petisyon premyerman, oubyen en kopi sa petisyon?

Dezyenmman nou ti a kontan Minis i klarifye lekel sa Avoka ki’n siny sa bann oubyen ki’n ede pou fer sa bann tranzaksyon later?

Nou ti a kontan Minis i klarifye eski vi ki sa semen pe pas dan en road reserve natirelman kot i annan en road reserve, Gouvernman i devret kapab elarzi semen kot i anvi elarzi semen kot i anvi elarzi semen i pa pe pas lo later prive.

So akoz alors ki zot pa’n adres bann size raise sa petisyon avek sa bann dimoun an traver en meeting piblik,  e prouve pou dir napa sa lenpak ki ti pe koz lo la pe sa i plito en  giz pou fer en lot kalite demann anver Gouvernman.  Mon pa konnen si mon kestyon i kler Mr Speaker.  Mersi.

 

MR SPEAKER

Mersi Onorab.  Minis Charlette.

 

MINISTER PAMELA CHARLETTE

Mersi Mr Speaker.  Onorab wi nou kapab donn en lalis bann dimoun ki lo sa petisyon avek en kopi petisyon.

Dezyenmman avoka ki’n dan sa bann tranzaksyon later Mr Gerard Morel.  E osi parey mon’n dir oparavan nou premye lenstans se pou ale avek bann skakeholders al gete si vreman ki sa ban zabitan ti p dir lo sa petisyon.  si i vreman i leka.

E osi apre sa initiate meeting ki pou fer dan distrik avek bann zabitan.  [

 

MR SPEAKER

Yes Onorab Pillay.

 

HON SEBASTIEN PILLAY

Mersi Mr Speaker.  Petet mon osi ozordi mon en pti pe konfize. Mon pa en dimoun Port Glaud so mon pa pou konnen ki mannyer sa proze pou benefisye dimoun  Port Glaud.  Me mon ti ava krwar pou dir si i annan premye en premye rezerve anver sa proze i ti ava sorti kot bann zabitan Port Glaud.

Me sa semen mwan mon’n NYS tou dimoun in pas NYS tou dimoun in vwar sa landrwa zot konnen sa semen i etrwat.  E i difisil pou bann transpor pase.  So  i bezwen annan en proze koumsa.  So eski Minis i kapab klarifye sa proze eski i pe ganny fer dan lentere zabitan Port Glaud parey i pe ganny pouse par MNA sa distrik?  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Parey mon’n dir ler mon ti konmanse sa proze i inisye par distrik pa nou, e nou’n profite akoz ti annan en National Project ki pe fer laba Port Glaud  Cap Ternay ki wi prezan nou’n met larzan pou fer ki Gouvernman in met larzan pou fer sa proze  pou konmanse sa proze.  At least.  Mersi.

 

MR SPEAKER

Mersi.

 

MINISTER PAMELA CHARLETTE

Byensir i pou benefisye tou dimoun ki servi sa semen Port Launay ziska Cap Ternay.  Mersi.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mersi Mr Speaker.  En pti kestyon silvouple. Premyerman kestyon pou mon, ti a kontan Minis pou responsab pour Imigrasyon kapab eklersi  avek sa bann dimoun ki pe ekoute, ler i dir ki  5 (1) i prérogative  Prezidan.  Eski Minis i kapab eklersi ki sa prérogative ki antyerman pou Prezidan i osi depann lo 3 keksoz.  Ki Lalwa i dir ki sa dimoun in bezwen fer en signal honor savedir en gran loner ki sa dimoun i bezwen rann oubyen rann en servis distenge distinguished service. 

Oubyen ki sa dimoun otreman i merite.  Eski Minis i kapab fer li kler ki Prezidan i napa en konplet drwa san okenn kondisyon ki i annan sa bann kondisyon ki enportan ,5 (1)?  Sa i mon premye kestyon.

Mon 2enm kestyon i konsern, mon ti a kontan si Minis i kapab fer nou konman en Lasanble gannyen kan pou Minis Charlette silvouple.  Kan eski sa bann plots dan sa later land bank ti ganny vann  avek  sa bann msye ki apre in re vann sa?

Akoz i enportan akoz Minis in dir nou pou dir si i pa‘n fer okenn obzeksyon kot anrezistreman lavant, donk i devret ok.  Nou, nou pa believe.  Nou believe ki par-ler i annan presyon ki ganny mete lo anrezistreman pou les pase lavant.

Alors i enportan pou nou konnen, kan eski sa bann dimoun in aste bann later avek land bank?  E kan eski zot in vann sa later avek sa de envestiser ki nou’n vwar la?

Nou’n ganny enn 2017 sa premye bout 701.  Me lot nou pa’n gannyen.  So sa i la.

E dernyerman an par san Minis kekfwa zot la en pe pa tro lontan m mon krwar Special Advisor Marie i konnen, sa Mr James Lesperance li menm li sa msye ki ti ganny tyonbo avek kart idantite bann dimoun avan eleksyon?  E ki apre i ti ganny ranmas e son drwa vote?  Konmsi i enportan pou nou konnen akoz kekfwa msye mon pa konnen Minis enn antre zot kapab eklersi sa  pwen silvouple.

 

MR SPEAKER

Mersi Onorab.  Minis Telemaque.

 

MINISTER MYRIAM TELEMAQUE

Mersi Mr Speaker.  Mr Speaker Onorab sa ki’n fer sorti ki i annan ‘signal honor’, servis distenge e 3enm ‘meritorious’.  Parey ou’n dir selman nou bezwen mazinen pou dir 5 (1)  i anba Prezidan pou li fer son desizyon.  E li in servi son prérogative pou donnen Onorab.  Se sa ki ou’n vwar in donn li 5 (1) anba sa 5 (1).

 

(Interruption)

 

MR SPEAKER

Ok Minis kontinyen.

 

MINISTER MYRIAM TELEMAQUE

Li ki ziz-e e li ki fer son lopinyon anba sa konvers sa seksyon li ki’n servi son prérogative in donnen.

 

MR SPEAKER

Ok.

 

MINISTER PAMELA CHARLETTE

Mersi MR Speaker.  Mon a pran kestyon.

 

MR SPEAKER

Yes Minis  Charlette.

 

MINISTER PAMELA CHARLETTE

Mon a pran kestyon Onorab Ferrari.  Premye bout later J1701 ti ganny vann an  201 7 par Gouvernman, .non an  2010 sorry.   Apre zot, zot ti aste li 2017.

J1721 1996 apre ti ganny sa de dimoun ti aste an Novanm 2017.

J1724 li i ti ganny vann  an 2002 par Gouvernman, apre in ganny vann par sa dimoun prive an 2012, apre en lot dimoun prive in aste ankor an 2014.  Savedir i annan de.

 

MR SPEAKER

Ok mersi Minis.  Onorab Ferrari.

 

HON JEAN-FRANCOIS FERRARI

Minis ou ti  kapab dir nou si ki Polisi ou Minister pou lemoman Polisi Gouvernman ki ler en dimoun i ganny en gran faver en gran servis ki Gouvernman i fer i vann li en bout later pou li fer son lakaz pou li fer son biznes.

Napa kontrol lo la konmsi ou pa zis kapab revann akoz  ler mon vwar en bout later in vann premye in vann 1.7 milyon – 2enm in vann 2 milyon.  Mon pa tro krwar Gouvernman in vann sa bann later avek sa bann dimoun 1.7 milyon li 2 milyon.  Mon krwar sa bann dimoun in fer zoli profi lo la.

Me konmsi eski prosedir in sanze pou kapab annan en pe plis kontrol lo sa bann keksoz koumsa silvouple?  Mersi Onorab.  Minis.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mr Speaker sanmenm ki an Out nou ti anmenn nou nouvo Policy Stateland Policy.  E ladan i met lanfaz ki nou pa pou toler okenn vann later avek non-Seychellois – enn.

Dezyenmman si i annan avan ki nou avan ki sa later i vin en freehold, nou pou met lo en lease nou lease li pou en serten letan apre ki ler son lakaz in fini ganny konstri ki nou transfer li lo freehold as a freehold property. 

        E ladan si par egzanp si en dimoun apre sa bann restriksyon apre i annan en development Government, ki osi ki nou’n fer rantre ladan.  E si s dimoun in fini i vin lo freehold then son propriyete i vin pou li.  Si i deside vann sa later, Gouvernman i annan premye i an premye ki bezwen ganny konsidere avan.

E osi si i pe vann sa later menm si avek en Seselwa, i annan bann lezot restriksyon ki nou mete ; par egzanp sa stamp duties par diferans lo market value i bezwen pey Gouvernman. I osi si i bezwen pey sa stamp duty osi.

So i annan bokou bann restriksyon ki nou’n mete dan sa nouvo Policy Policy ou kapab vwar li osi lo nou website,  ki nou’n mete zis pou nou kapab met en pe kontrol lo sa bann tranzaksyon ki pe ariv kot dimoun i aste later Gouvernman land bank a en pri subsidise apre i vann li a en pri en tre kantite larzan.  Mersi.

 

MR SPEAKER

Mersi Minis.  Bon mon anvi vi ki nou pou ale ziska 12:30.  Me mon annan en bon pe Manm ki’n eksprim dezir pou demann en kestyon, annou fer li presi annou fer li to the point ok annou pa fer gran statement avek.  Onorab Basil Hoareau.

 

HON BASIL HOAREAU

Mersi Mr Speaker.  Bonzour tou dimoun.  Mr Speaker anyway mon pwennvi lo  5 (1) tou dimoun i konnen dan sa Lasanble mon p krwar  ki pou dir 5 (1) i kapab ganny servi dan sa case. 

Anyway mon kestyon i relasyon avek Minis Charlette.  Minis i Polisi Gouvernman pou dir an relasyon avek sanksyon Gouvernman pa pou donn sanksyon an relasyon avek later, ki sorti dan land bank, eski sa i Polisi Gouvernman?

E si sa i leka, ski Minis pou dakor ek mon pou dir sa Polisi basically in ganny bate la par sa dimoun konman sitwayennte Seselwa pou li nobou acquire later ki dan land bank ki pa sipoze zanmen gannyen si ti napa en  sanksyon?  Eski sa i korek?

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Wi korek.  anba nou Polisi wi nou kategorikman dir pou dir nou pa vann later avek non-Seychellois. 

Me sa dimoun in ganny son citizenship so i en Seselwa so i ganny li bann i aplike konman en Seselwa si i pe aste en bout later tou bann keksoz i aplike avek.  Mersi.

 

MR SPEAKER

Mersi Minis.  Onorab Hoareau.

 

HON BASIL HOAREAU

Savedir an dot Minis later ki ti sipoze ganny rezerve pou nou bann Seselwa pou zot fer zot lakaz, fer batir zot matrimonial home in now end up dan lanmen en dimoun ki teknikman i pa en Seselwa.

 

MR SPEAKER

Mersi Onorab Hoareau.  Minis.

 

MINISTER PAMELA CHARLETTE

Korek Mr Speaker.

 

MR SPEAKER

Mersi Minis.  Onorab Stephen  Pillay.

 

HON LSTEPHEN PILLAY

Mersi Mr Speaker.  Mr. Speaker mon kestyon i enn pou Minis Telemaque ek Minis Charlette.

Se kekfwa Minis Telemaque an relye avek sa ki Onorab Ferrari avek Onorab Hoareau dir lo 5 (1).  Eski zot pa donn okenn advice Prezidan prérogative parey Onorab i dir i void -3 merit.  Napa personn ki advice Prezidan kot zot ler pou dir zot ki sa i pa teknikman parey Onorab in dir.

Me dezyenmman pou Minis Telemaque si i ou kapab donn nou en pti apersi Minis Charlette ki diferans ler ou aste later anba en konpannyen ek en endividi ?  E eski i annan okenn posibilite ki si sa lavant endividi ti kapab raise okenn flags. 

Eski i annan posibilite ki dimoun atraver en konpannyen i kapab kasyet deryer la pou aste en bout later?

 

MR SPEAKER

Mersi Onorab. Minis Telemaque.

 

MINISTER MYRIAM TELEMAQUE

Mr Speaker mersi bokou.  Wi nou donnen Prezidan advice.  E parey Lalwa i son prérogative si ou pou aprouve oubyen non.  Mersi Mr Speaker.

 

MR SPEAKER

Mersi Minis.  Minis Charlette.

 

MINISTER PAMELA CHARLETTE

Mersi Mr Speaker.  Ler nou pou konpar en endividi avek en lakonpannyen, mon pa’n asize pou mon mazin son lenplikasyon.  Ler ou annan en lakonpannyen ou annan de shareholder, ou kapab annan detrwa dimoun ki kapab own sa bann shares.  Mon krwar kote tax i bezwen aplike.

Me selman i annan bokou dimoun parey nou konnen ki kekfwa i kapab hold en shares on behalf another person.  Me selman sa i bezwen osi deklare.  Mon krwar registra i bezwen annan son fason ki mannyer i  fer son i tyeke whether sa dimoun in accordance avek Companies Act pou kapab allow sa tranzaksyon pou li pase.  Mersi.

 

MR SPEAKER

Mersi Minis. Onorab Chantal Ghislain.

 

HON CHANTAL GHISLAIN

Mersi Mr Speaker.  Mr Speaker Minis dan son larepons pli boner i ti’n dir i annan later ki ti’n land bank ki bann Seselwa ti aste pou fer zot lakaz.

Mon kestyon Minis i eski a okenn moman la, an se moman okenn sa bann dimoun oubyen zot fanmir pros i osi aparet ankor lo lalis later ouswa lakaz kot ou Minister. Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Pou ou kestyon spesifik nou pa’n ale pou nou gete si vreman sa bann dimoun i annan en aplikasyon.

Me nou Polisi i kler ki si en dimoun in deza ganny asiste avek later oubyen lakaz i pa ankor ganny asiste ankor avek en prodwir kot nou kot nou Minister.  Mersi.

 

MR SPEAKER

Mersi Minis.  Onorab Woodcock.

 

HON WAVEL WOODCOCK

Mersi Mr Speaker.  Mon kestyon i en pti pe lo sa laliny ki Onorab Ferrari in demande.

Minis par lefe ki Gouvernman ti deza annan en Polisi, en Polisi kot i konsern bann later land bank i en dimoun ki aste en later land bank i pa annan drwa re vann sa later dan en lespas 7an.  E sa later ki in aste i bezwen devlop son later.

Mon kestyon i si mon konpran byen Minis si mon konpran byen sa lenformasyon ki ou’n donnen, i annan enn sa later ki’n ganny vann avan ki i ganny 7an.

E mon kestyon i akoz ki Minister, akoz ki sa Polisi pa’n ganny swiv?  E par lefe ki ou Minister in fail ou enplimant sa Polisi ki’n permet plizyer dimoun pou aste later leta apre revann.  Eski ou Minister in les land speculation arive e ganny pratike dan sa bann later.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Ok mersi Mr Speaker.  Mr Speaker parey mon’n ganny enformen bann diferan premye kou 5an, 7an apre in monte 15an.

Pou lemoman mon pa kapab mon bezwen al investigate en pti pe spesifikman lo sa bout ki ou’n dir, si ti annan okenn restriksyon ki ti’n mete, akoz par egzanp parey mon’n dir Registrar ler sa tranzaksyon i pase akoz sa dimoun i en Seselwa.  Ler sa tranzaksyon i pase akoz sa dimoun i en Seselwa.  Ler sa tranzaksyon i pase si i annan okenn restriksyon Registrar i vin kot nou i dir pou dir i annan en restriksyon lo later.  E i enform nou.  So from there on i nou kapab fer nou bann prosedir.

 

MR SPEAKER

Onorab Woodcock.

 

HON WAVEL WOODCOCK

Mon 2enm kestyon i anliny avek sa ki Onorab Ghislain in demande.

Eski Minis i kapab fer nou sa Lasanble ganny lenformasyon, lo sa 3 Seselwa ki’n revann sa later.  Si zot in re aste ankor later Leta?

Akoz dapre lenformasyon i annan enn ou 2 sa bann dimoun ki’n vann zot later e zot in re aste ankor later Leta.  Mersi.

 

MR SPEAKER

Mersi.  Minis.

 

MINISTER PAMELA CHARLETTE

Mersi Mr Speaker.  Nou a fer ou ganny sa lenformasyon Onorab.

 

MR SPEAKER

Mersi Minis.  Onorab Afif.

 

HON AHMED AFIF

Mers Mr Speaker.  Mr Speaker mon ti la kontan demann Minis Telemaque si anba 5 (1) kan i donn sa 3 rezon ki Prezidan i kapab servi pou li donn sitwayennte.  Si lo file ki zot garde kot Imigrasyon, i annan en rezon kler an ekrir ki Prezidan i marke lekel dan sa bann rezon ki in servi pou li donn sitwayennte?  Mersi.

 

MR SPEAKER

Mersi Onorab.  minis Telemaque.

 

MINISTER MYRIAM TELEMAQUE

Mersi Mr Speaker.  Normalman Prezidan i zis met ‘approve.’  Selman mon napa sa lenformasyon ki spesifikman i mete.  Mon kapab fer available pli tar. Mersi.

 

MR SPEAKER

Mersi.  Minis.  Onorab Afif.

 

HON AHMED AFIF

Mr Speaker mon trouv li drol ki Minis i dir Prezidan i met, zis ‘approve.’ I bezwen dir in aprouve anba 5 (1) e i bezwen donn en rezon.  Parski si non i pa fer sans.  Menm lo file zot pa kler anba ki rezon in ganny donnen?  Se mon kestyon.

E 2enm eski Minis i kapab fer nou ganny en lalis tou bann sitwayennte ki’n osi donnen dan anba prezidans Msye Michel.

 

MR SPEAKER

Mersi Onorab.

 

HON AHMED AFIF

Anba 5 (1).

 

MR SPEAKER

Minis.

 

MINISTER MYRIAM TELEMAQUE

Mr Speaker.  Mersi bokou pou sa premye kestyon mon napa lenformasyon savedir mon pa kapab fer komanter, si i posib mon kapab fer available sa lenformasyon.

Konsernan lalis nou a kapab nou a travay lo en lalis nou a travay lo en lalis nou a fer gannyen.  Mersi.

 

MR SPEAKER

Mersi Minis.  Onorab Bernard Georges.

 

HON BERNARD GEORGES

Mersi Mr Speaker.  Mr Speaker mon annan en kestyon pou sakenn ant sa 2 Minis.

Pou Minis Telemaque.  Minis an referans avek sa dernyen kestyon ki’n ganny poze e avek sa statement ki Onorab Basil Hoareau in fer pli boner ki mon partaze.

Eski ou pare antan ki Minis ansarz Imigrasyon, pou donn en lasirans avek sa Lasanble, ki ou kava revwar tou bann sitwayennte ki’n ganny donnen anba en prérogative ki pa egziste anba Lartik 5 (1) akoz i annan 3 rezon ki’n Prezidan i bezwen servi.

E ou ava advise Prezidan dan tou sa bann ka kot ou vwar ki napa en rezon valab pou revoke sa bann sitwayennte, an tan ki Minis.

E dezyenmman pou Minis Charlette, eski Minis osi ou kapab donn ou en lasirans i ou ava revwar tou bann ka kot len dimoun ki’n ganny sitwayennte anba 5 (1) in aste an konferans avek bann Seselwa en morso later land bank? 

E donn nou sa lasirans ki ou ava advise Gouvernman pou fer le neseser pou revoke tou sa bann later ki’n ganny aste. Mersi.

 

MR SPEAKER

Mersi Onorab Georges.  Minis Telemaque.

 

MINISTER MYRIAM TELEMAQUE

Mersi Mr Speaker.  Mr Speaker pou mon kapab fer en komanter lo sa premye kestyon mon krwar mon pou bezwen diskit avek Prezidan, e osi AG e apre mon’n note sa apre nou a vwar the way forward. 

 

MR SPEAKER

Mersi Minis.  Minis Charlette.

 

MINISTER PAMELA CHARLETTE

Mersi Mr Speaker.  Mr Speaker mon krwar nou a fer en legzersis intenally nou a gete ki i anmenn nou.  Apre nou ava met devan Gouvernman pou diskite e pou al en pozisyon.  Mersi.

 

MR SPEAKER

Bon Onorab Flory Larue.

 

HON FLORY LARUE

Mersi Mr Speaker.  Bonzour Minis, bonzour tou dimoun a lekout.

Eski Minis Telemaque i kapab klarifye kekfwa mon’n mal tande in dir i annan en police certificate ki’n ganny donnen isi Sesel pa dan sa pei of origin of sa dimoun.  Sa ki Minis in dir si i kapab klarifye si sa i korek.  Si sa ki prosedir.

Apre lo kote funding eski Minis Charlette i kapab dir nou kote funding pou sa proze i sorti?  E eski okenn donasyon i ganny fer pou sa proze sorti dan sekter prive?  Mersi.

 

MR SPEAKER

Mersi Onorab.  Minis Telemaque.

 

MINISTER MYRIAM TELEMAQUE

Mersi Mr Speaker.  Mr Speaker parey mon’n fer resorti oparavan, i annan en police character certificate ki’n sorti isi Sesel.  Mon mazinen i link avek Interpol, selman mon pa pou kapab fer komanter lo la bokou.

E apre mon ti mansyonnen konsernan i annan FIU ki’n donn son  ‘no objection letter.’  Sa nou ti fer referans avek.  Mersi.

 

MR SPEAKER

Mersi Minis.

 

MINISTER PAMELA CHARLETTE

Mersi Mr Speaker.  Pou kestyon Onorab Larue funding antyerman Gouvernman pou sa proze semen.  Mersi.

 

MR SPEAKER

Mersi.   Onorab Larue.

 

HON FLORY LARUE

Mersi Mr Speaker.  Mersi Minis pou zot larepons.  Savedir napa okenn kontribisyon ki’n ganny fer sorti sekter prive pou okenn devlopman ki lye ek sa semen?

 

MR SPEAKER

Mersi Onorab.  Minis.

 

MINISTER PAMELA CHARLETTE

Dapre ki mon konpran pou sa proze semen, napa okenn funding ki sorti kot bann lezot dimoun prive.

Me selman dapre mon konpran i annan en proze ki distrik ki pe fer ki sipoze mon krwar sponsored par Ephilia se tou.  Me sa i pa nou proze napa nanryen pou fer ek nou proze semen.  Nou proze semen i fund by Gouvernman.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mr Speaker, mon ti a kontan dir ki anyway i enteresan ankor enn fwa.  Parske bomaten nou vwar ki mannyer Seselwa i ganny enfliyans-e.

E apre sa Seselwa ki nou, nou a pe lager pou zot ganny, ganny en bout later.  E zot taye pou al vann later avek menm dimoun etranze e apre nou konman Manm Lasanble nou, nou, ganny demande pou nou kontinyen defann Seselwa.

Kekfwa Mr Speaker mon ti la kontan dir premyerman Seselwa annou konsansye  letan nou aste en bout later land bank annou fer nou lakaz.  Annou realize ki bann benefis ki nou annan pou nou fanmir.  Sa i zis en komanter zeneral.  E apre Mr Speaker sa eleman sa Citizenship Act sa 5 (1) ki definitivman nou bezwen regarde.

E la Mr Speaker mon ti a kontan dir avek ou ki swivan ki Onorab De Commarmond ti propoze sa Zedi FPAC nou’n fini pran kontak avek Minis Telemaque sa Zedi.  FPAC pe fer en whole day ‘hearing’ lo sa 59 sa aplikasyon ti ganny fer anba 5 (1) pou nou regarde petet dan sa laliny parey minis in dir ki zot fer konsiltasyon.  Nou konman en Lasanble nou ava kapab deswit prepar nou rapor e prezant li avek Minis pou ki i ava kapab sa osi i a kapab gete.

E Mr Speaker, mon kestyon final; eski Minis pe konfirmen ki pou dir sa proze elarzisman semen sel bout sa semen ki zot kapab fer li se lo kote bor lanmer, olye fer li lo kote montanny – lo kote montanny parski bann later mon konn ase .byen sa teren.

Eski zot pa ti kapab fer sa proze bor kote montanny pou ki zot ti a kapab evite a tou lenstans koup okenn pye dibwa.  Me plito kapab demann en pti wayleave oubyen ou bezwen al demann wayleave ek sa madanm menm, mon pa konnen, ki konmsi nou ti a  kapab tou sa bann problenm.  E finalman, finalman Mr Speaker ki problenm spesifik ki zot in gannyen avek sa kontrakter pou fer sa proze?  Eski kontrakter zis in kit site in ale?

Eski kontrakter in ganny en pti laranzman finansyel pou li abandonn sa proze? Ki egzakteman problenm in gannyen ek sa kontrakter?

 

MR SPEAKER

Mersi Onorab.  Minis Charlette

 

MINISTER PAMELA CHARLETTE

Mersi Mr Speaker.  Lo kote semen maksimonm ki nou pe enlarge nou pe enlarge lo kote ki vir ek montanny menm.

Me selman i annan landrwa dan sa semen kot nou bezwen aranz en pe lot kote, akoz i annan bann miray ki nou bezwen aranze.

So pou nou al divert sa semen i pou pli i pou koz en pe plis katastrof lanvironnman, akoz bann landrwa i bwaze e parey mon’n dir nou bezwen koup plis pye dibwa.

E nou pa ankor konn vreman nou pa ankor fer survey regarding topography pou nou kapab konnen selman nou vreman kapab feasible fer semen bor kot sa diversion in dir.

Me nou pe pran prekosyon ansanm avek lanvironnman pou nou as much as possible Minis en pe bann dega ki pou annan.

Lo kote kontrakter pou sa semen nou’n SLTA in fini terminate Kontra avek sa kontrakter, akoz ti annan bann dezagreman.  E kontrakter i fini ganny peye son larzan ki in fini travay i zis ki le dan prosedir re-tender pou nou kapab rekonmans travay ki sipoze by Novanm nou rekonmans refer sa semen ankor.  Mersi.

 

MR SPEAKER

Yes Onorab Ramkalawan.

 

HON WAVEL RAMKALAWAN

Final petet pou Minis Telemaque.  Minis eski ou pe konfirmen ki pou dir dan file sa  madanm i napa en police certificate from son country of origin?  Me ki sertifika Lapolis ki ou annan dan file set en sertifika avek Lapolis lokal.

 

MR SPEAKER

Minis Telemaque.

 

MINISTER MYRIAM TELEMAQUE

Mersi Mr Speaker.  Mr Speaker nou annan en dokiman sorti kot Lapolis Sesel.  E apre nou annan en clearance sorti kot FIU.  E FIU i fer referans avek lafanmir.  Mersi Mr Speaker.

 

MR SPEAKER

Mersi Minis Telemaque.  Bon avek sa nou’n ariv a lafen  Sesyon Kestyon pou ozordi.  Mon ti a kontan remersi tou lede Minis, Minis Telemaque, Minis Charlette avek zot bann lekip Mr Michel Marie, Mr Volcere, Mr Valmont, Mr Herath e Mr Hoareau.

Minis mersi ankor tou lede e nou ava eskiz zot parmi nou.

 

(MINISTER CHARLETTE AND HER DELEGATION WAS EXCUSED FROM THE HOUSE)

 

MR SPEAKER

Bon mon zis remind bann Manm ki form par Komite Reform e Modernizasyon.  Nou pou rankontre en pti moman i pa pou en long meeting tout swit la apre.  E nou pou Break nou pou repran nou travay 2er kot nou ava kontinyen avek deba lo Mosyon.

 

(BREAK)

 

MR SPEAKER

Bonn apre tou Manm Onorab.  Bonn apre midi tou dimoun ki a lekout e ki pe kontinyen swiv travay Lasanble Nasyonal.  Nou pou repran nou travay parey mon ti’n dir avan nou pran Break pour nou kontinyen avek Mosyon ki’n ganny move par Onorab Ramkalawan.  Ok?  

Yes Onorab Lemiel?

 

HON SYLVANNE LEMIEL

Mersi Mr Speaker.  Bonn apre midi Mr Speaker.  Bonn apre midi tou bann Manm Onorab.  Mr Speaker, mon pe lev en matter of privilege isi dan sa Lasanble ozordi apre midi akoz mon santi ki koman en Manm Lasanble e Manm elekte pour distrik Anse Royale, mon non  pe ganny sali en pti pe lo Facebook.

E i paret mwan – mwan mon pe krwar ki i en fake profile ki pe sirkil sa bann lenformasyon kot konmkwa mwan yer swar mon ti dan en levennman kot en serten lotel.  E ki mon’n fer en bann pake diskord.  Mon’n bwar, mon’n sou, mon’n fer en pake zafer laba.  E during Break Mr Speaker pour lenformasyon, mon en dimoun ki pa servi lalkol.  E mon pa en manm IAC.  E mon pan zanmen ganny envite sa levennman ki ti fer kot H Hotel.

So, i vreman deplorab parfwa pour nou vwar ki mannyer nou kanmarad i denigre kanmarad.  Ek sa fake profile i en madanm.  I fer lapenn pou vwar ki mannyer nou madanm nou denigre lezot madanm.  E petet sa bann dimoun, zot ki ti dan sa fonksyon.  Petet sa dimoun ki’n fer sa aksyon i konnen lekel li.  Me mon non pe ganny servi, i domaz Mr Speaker.

E sa i pe afekte mwan.  I pe afekte mon personnalite.  I pe afekte mon dinyite koman MNA pour distrik Anse Royale.  E MNA Elekte pour sa distrik.  I vreman mal akoz mwan mon pa zanmen pans dimal pour okenn dimoun – okenn nou Manm Lasanble, okenn dimoun an deor osi.  E mon pa zanmen koz mal osi.

So, Mr Speaker, mon ti a kontan petet ki sa i vin o kler, i vin a la – a lekout bann piblik ki pe ekoute akoz mon’n ganny mwan omwen 10 mesaz ek phone calls dan Break.

Mon’n ganny mesaz letan nou’n la anndan.  Koman sa mesaz in sorti after tea Break bomaten, tou bann dimoun pe komans anvoy mwan mesaz pe demann mwan – ki ou’n al fer?  Onorab Lemiel, ki ou’n al fer?  Ki’n arive?  Kwa ki’n deranze ki ou’n al fer?  Me selman mon oule dir zabitan Anse Royale e tou le Pep Seselwa osi ki pe ekoute poudir Sylvanne Lemiel pa en bwarer, i pa en dimoun ki fer problenm, i pa en dimoun ki bwar.  Mon respekte lezot, mon respekte lopinyon lezot.  Mersi Mr Speaker pou donn mwan sa loportinite pour mwan eksprim mwan.  Mersi.

 

MR SPEAKER

Mersi.  Mersi Onorab Lemiel.  Mon ava donn laparol Onorab Ramkalawan.

 

HON WAVEL RAMKALAWAN

Mr Speaker, mersi bokou.  Mon bezwen dir ki mon’n ganny en sans pour mwan koz avek Onorab Lemiel.  E mon pou aport mon soutyen an antye pour sa ki in dir.  Mon war li i vreman regretan ki en Manm nou Lasanble Nasyonal in ganny denigre dan sa fason ki sa in arive.

Onorab Lemiel i en manm PAN African Parliament.  E mwan mon enn bann dimoun ansanm avek Onorab Gill, Onorab Alcindor, Onorab Mondon, ki vwayaz avek li e ki partisip avek li.  E definitivman sa ki in dir i absoliman vre.  Madanm Lemiel – Onorab Lemiel i en dimoun ki toultan konport li dan en fason byen koman en madanm, espesyalman dan piblik.  Sa ki’n aparet lo Facebook, mon’n ganny sans pour mwan war – i totalman pa akseptab, espesyalman ki Onorab Lemiel in fer kler ki poudir li i pa ti dan sa fonksyon yer swar.

Me Mr Speaker, mon krwar ki sa size e sa ki’n arive, i montre nou ankor enn fwa ki lo sa Facebook, atraver bann fake profiles, atraver bann fason kot nou denigre nou kanmarad, mwan osi tou mon – mwan mon’n, mwan mon lapo in epe lo sa kote.  Be i pou – i kler ki poudir a en serten moman, e mon espere ki i vin pli vit posib, nou ava kapab met an egzorsis sa ki nou Konstitisyon i donn nou – Laliberte Lekspresyon.  Me selman pour nou konnen ki poudir sa Laliberte Lekspresyon i osi konsern bann dimoun ki zot pe denigre.  E ki nou ava kapab, koman en sosyete al dan sa direksyon.

Alor Mr Speaker, lo nou kote dan LDS nou osi tou nou eksprim nou solidarite avek nou sœur, Onorab Lemiel.  E nou osi aport nou kondannasyon pour s aki pe arive.   E mon ti ava fer en lapel avek sa dimoun ki’n fer sa profile pour li denigre Onorab Lemiel, pour li fer sa keksoz ki byen.  Savedir retir sa komanter pour ki lavi dimoun ki kapab kontinyen dan en fason normal.  Mersi bokou Mr Speaker.

 

MR SPEAKER

Mersi Onorab Ramkalawan.  Mon zwenn ansanm avek Onorab Ramkalawan, avek Onorab Lemiel e tou Manm Lasanble, enkli manm Sekretarya, akoz nou osi koman Sekretarya nou pas dan pa mal sa bann kalite denigrasyon lo medya sosyal.  Be mon pou touzour debout akote bann Manm e nou Sekretarya.  E kot fodre defann, mon pou defann.

E parey mon ti dir tou dernyen fwa, annou servi medya sosyal byen.  Wi – i annan laliberte lekspresyon.  Me i annan responsabilite osi tou ki mars avek.  Parey mon i dir dernyen, nou pa kapab tret nou kanmarad tou sord kalite non, tou sord kalite!  Akoz nou pa ti a kontan nou kanmarad i fer parey avek nou.  So, mon donn sipor enn nou Manm – Onorab Lemiel.  E mon swete, parey Onorab Ramkalawan in dir, ki sa bann keksoz i ava arete.

I annan fason kot nou kapab met nou kritik devan.  E dan bokou fwa, mon konnen i annan Manm ki annan sa grander lespri ki pran li koman bann kritik konstriktif.  E nou servi pour nou regard en pti pe lafason ki nou pe travay pour nou amelyor lafason ki nou pe travay.

Alor mon swe e mon lapel avek bann manm piblik se – annou servi medya sosyal byen.  I en bon rezo kot nou kapab esanz lenformasyon.  Mon vwar menm i annan bann dimoun ki ganny bann kontak avek bann zanmi ek bann fanmir e pe ganny servi li byen.  E mon ti a swete ki se dan direksyon ki nou Seselwa e nou pti pei ti kapab avanse.

Bon, avek sa nou ava kontinyen nou travay pour apre midi.  E mon avan demann – mon ava pas laparol avek Onorab Clive Roucou.

 

HON CLIVE ROUCOU

Mersi Mr Speaker.  Bonn apre midi Mr Speaker.  Bonn apre midi tou koleg Onorab.  E bonn apre midi tou dimoun ki a lekout dan lakour.

Mr Speaker, Mosyon prezante par Onorab Ramkalawan semenn pase pa kapab vin pli kler ki sa.  E i pa’n kapab vin dan ne pli bon moman ki sa.  Tou dimoun ki pe vi Sesel ozordi, i konn larealite.

Mr Speaker, Mosyon i kler dan tou priz.  E i vin avek 3 pwen enportan – lafason ki Egzekitiv pe diriz nou pei, napa aksyon efektiv dan ladministrasyon pei, e striktir leta Sesel pe deteryore.  Alor, tou le 3 pwen ansanm i vin avek en pli gran demann.  E sa pli gran demann se ki pe demann Msye Faure pou pran en aksyon onorab e demisyonen imedyatman.  E koumsa, sa i ava dan lentere Sesel e lepep Seselwa i a kapab deside lekel en zonm oubyen en fanm ki kapab pran latet sa pei e anmenn sa pei dan en bon direksyon.  Dan en bon direksyon kot nou pa pou nofraz bato, me selman nou ava ariv kot por.

Mr Speaker, sa Mosyon i kler, dimoun an deor i konpran.  Nou isi, i annan nou ki pa tro konpran.  Mr Speaker, se pour sela ki mon vin avek – mon eksprim en pe mon dezapwentman avek en pe mon bann koleg lo lot kote latab ki’n vin – ki pran sa Mosyon koman en joke.  Ki pran sa Mosyon konmsi napa lenportans.  Mr Speaker, pour mwan koman en Manm sa Sizyenm Lasanble, mon pran sa Lasanble koman en Lasanble ki vreman serye.

E nou lo sa kote latab nou serye, nou lo s akote latab nou met nou pep avan, nou lo sa kote latab nou met nou pep an premye.  Nou krwar e nou senserman krwar, e mwan personnelman, mon senserman krwar ki nou pei Sesel i ‘Pli gran ki nou’, – vre.  E nou kapab anmenn li lo en pli bon direksyon e en pli bon semen.  E Mosyon i kler – nou war ki anba Msye Faure, sa pei pa lo en bon direksyon.  Si nou les li kontinyen ale pour ankor detrwa mwan, mon asire nou pou tonbe.  E Mr Speaker, pour mwan, mon pa war i drol – mon pa war i drol leta ki nou pei i ladan ozordi.

Ti evidan – ti evidan ki Parti Lepep avek Msye Faure koman latet Egzekitiv ti pou perdi kontrol e direksyon nou pei.  E s a i kapab ganny mezire e levidans i la lo tou bann defayans ki nou pei i ladan ozordi.  E tousala personn pa devret ganny blanmen, me pa lot ki Msye Faure li menm.  Li ki’n ede e li ki pe kontribye pour nou kontinyen perdi direksyon Sesel.

E mon bann koleg Onorab – e mon bann zanmi ki dan Parti Lepep, depi – depi lontan mon krwar zot ti pe santi e zot ti pe war kot sa pei pou koule.  Akoz depi lontan zot ti pe sante ki nou’n pare pou koul ansanm.  Me nou dan LDS – nou dan LDS e mwan koman en Manm sa Lasanble, mon pou dir non, nou pa ou koul sa pei.  E nou pa pou koul avek zot, se pour sela ki Mosyon i kler.

E parey Onorab Ramkalawan ti dir semenn pase, i annan 2 sinyatir – Lesperance – Lesperance e Lespoir.  Be mwan mon pe azout en lot sinyatir lo.  Mon pe dir Labonté.  Alors, mon demann Msye Faure pou annan en pe labonte silvouple, demisyonen.  Demisyonen – donn en dimoun, donn en dimoun ki kapab anmenn sa pei pli devan.

Mr Speaker, alors en zour Prezidan René – Msye René ti dir pou fer nou vin pti Monaco, pou fer nou vin en pti Singapore.  2enm Msye Michel, li i ti anvi fer nou vin en pti Abu Dhabi – tou le 2 in fail.  Me Msye Faure, mon krwar li i pou akonplir sa ki li i anvi nou vini – en pti Somalie oubyen en pti Venezuela, sanmenm tou.  Mr Speaker, Msye Faure in pran sa pei in met lo son zenou.  E in kontinyen anmenn tou sord kalite promes, promes e promes toulezour.

Mon pran zis mon distrik – Plaisance, kot Msye Faure ti fer vizit avek mwan menm.  Kot i ti pase i ti promet lafanmir Kate anler Copolia, zoli lakaz/flat pour zot.  Be ziska ozordi, nanryen pa’n materyalize.  In kit sa bann dimoun anpandan.  In vizit proze Lakaz 24 dan distrik Plaisance – Kan Gard, ziska ozordi, ni premye pyer nou pa ankor war.  E in fer promes left, right and centre, ziska ozordi nou pa pe war nanryen.

Mr Speaker, anba ladministrasyon Msye Faure, nou war ki sa pei pe fail.   40an, 40poursan dimoun pe viv dan lapovrete.  E Sesel kot en sistenm ledikasyon e en sistenm Lasante pe kontinyen degrengole.  En Sesel kot Gouvernman Parti Lepep i fer son pep vin dezyenm klas dan son prop pei.  En Sesel kot nasyonalite Seselwa pe ganny vann oubyen donnen left, right and centre, menm pour meday Lor.  At least sa move boug ti vann pour 30 pyes larzan menm si i ti pann epi.  Me selman pa pour meday Lor.

Mr Speaker, tousala se atraver ladministrasyon Msye Faure.  Mr Speaker, mon pran en keksoz ki pros ek mon leker.  Toultan mon pran Minister Lasante.  Mon pa anvi personn i krwar ki mon zenofobik.  Me ler mon war etranze, ler mon war etranze, ler mon war etranze pran premye plas.  Ler mon war nou Seselwa soufer zis akoz Msye Faure pa kapab met son lipye ater, pou donn en direksyon pozitiv.  Zis la apre midi mon’n fer en pti vizit kot Lopital Sesel, mon war zis kot Medical – Biomedical Engineer, kot mon war etranze parey nou dir, pe dres labous Seselwa.  Nou war Seselwa pe plere zis akoz etranze ki pe deside, zis akoz etranze ki pe fer tou, zis akoz etranze ki krwar i siperyer dan nou prop pei.  Ankor kot Minister Lasante – nou war kot nou annan bann ners etranze, ners Indien, ners Sri Lankan, ners Filipino.

Mr Speaker, i fer lapenn ler nou war sa bann dimoun ki’n vini mwens ki 2an, zot in ganny senior post.  Tanka nou bann frer ek ser Seselwa, li i ankor junior.  Be ki pli fer lapenn Mr Speaker, zot in vin senior dan papye dan biro.  Lo duty roster zot junior pangar zot pwen ki zot pe dir, ners Seselwa pou ankoler si i war sa.  Zot ganny peye senior selman lo duty roster  zot junior.

E nou bann frer Seselwa ki la, zot ankor pe trimouse.  Ki fer lapenn ankor – nou ners Seselwa pe trimouse avek bann senior nurse  etranze, me selman en junior Seselwa ki pe ansarz en roster – pe ansarz en shift.  Msye Faure, tousala ou’n fail – tousala ou’n fail pour ou pa war ki mannyer nou pep pe ganny oprimen.  Mr Speaker, nou war ki bann lezot fasilite Gouvernman, lezot lebra, tousala pa pe war – pa efikas.

Dernyerman nou’n war en bato ki’n ariv ziska dan larad Sesel, zis lanmenm la deryer Ste Anne.  Mr Speaker, si sa bann dimoun ti anvi touy dimoun, ti anvi bril Mahe, ti anvi bril nou bann Zil Pros, ti’n fer.  Alors, mon demande ki mannyer anba Msye Faure, i pa war sa bann keksoz?  Pour konbyen letan ki nou pou kontinyen espere?  Pour konbyen letan nou pou kontinyen tenn nou lipye, les en brans Gouvernman ki pe trenn son lipye e ki napa – ki pa efektiv?

Alors Mr Speaker, Mosyon pe fer – pe demann kler, silvouple Msye Faure, cède la place.  Nou napa nanryen mal kont ou koman en zonm.  Nou napa nanryen lafen pouvwar, me selman ki nou anvi ?  Nou anvi en Sesel ki prospere.  Nou anvi en Sesel ki prospere.  Nou anvi en Sesel ki pou al devan.  E Mosyon prezante par Onorab Ramkalawan – en zonm avek en vizyon pour Sesel, en zonm ki pe get sa pei al avenir.  En zonm ki konnen ki en zour isi Sesel nou kapab annan dimyel ek dile ki kapab koule.

Me avek Msye Faure dan latet Egzekitiv, nou pa pou war.  Mon pou war nou bann frer ek ser pe kontinyen soufer.  Nou bann nou bann zonm – zenn zonm pe kontinyen met laliny Methadone.  Nou pou war nou bann fiy pe fail zot legzanmen, me selman pe pas zot pregnancy test.  Alors Mr Speaker, nou pou war anba Msye Faure, nanryen pa pou arive.  Nou pou end up avek en ‘failed state’.  Mr Speaker, mon enplor li lo mwan menm koman endividi, silvouple demisyonen!  Fer sa ki onorab, fer sa ki enportan pour sa pep.  Si vre ou krwar ki Sesel i pli gran ki nou tou, si vre enn zot moto ki ti dir – zot kontan Sesel, si vre nou kontan Sesel, alors Mr Speaker, mon demann Msye Faure pour li demisyonen.

Par kont, nou war serten nou bann Manm Onorab ki anvoy latet, ki pe demande ki si nou, nou pa kontan, dizourd nou Lasanble.  Parey Onorab Ramkalawan in ganny sa lafors pour li anmenn en tel Mosyon,  mwan osi mon enplor zot – anmenn en tel Mosyon pou ‘Dizourd Lasanble!’

Mr Speaker, napa nanryen pour nou dir ankor.  Nou war ki si – direksyon Sesel in ale.  Nou war ki mannyer nou pei pe tonbe.  Nou war ki mannyer nou pei in ariv lo son zenou.  Alor, sa ki responsab se Msye Faure.  Msye Faure ki Prezidan Larepiblik Sesel.  Silvouple Msye Faure, demisyonen!

Mr Speaker pour konklir, mon demann tou Manm Onorab pou siport sa Mosyon ki nou ava ganny en meyer Sesel!  Mersi.

 

MR SPEAKER

Mersi Onorab Roucou.  Mon ava donn laparol Onorab Sylvanne Lemiel.

 

HON SYLVANNE LEMIEL

Mersi Mr Speaker.  Bonn apre midi tou mon bann koleg ek tou bann lezot dimoun ki a lekout.

Mr Speaker, dan lavi tou keksoz i ariv a son letan.  Atansyon lanbisyon!  I enportan  pour nou Pep Seselwa laba deor konnen ki sa mosyon ki’n ganny table devan nou Lasanble ozordi or depi semenn pase, pa kapab tir Msye Danny Faure koman Prezidan Sesel.  Lartik 53 e Lartik 54 nou Konstitisyon i dir tre kler dan ki fason en Prezidan i ganny retire o pouvwar.  Kwa ki Prezidan fer – kwa ki Prezidan Faure in fer mal ki LDS pe demann li pou demisyonen?  Eski Prezidan Faure in fer okenn keksoz ki kapab ganny kategorize koman gross misconduct?

Mon ti a kontan konnen Mr Speaker.  Pep Seselwa, ganny sa byen kler, ki Prezidan Faure pa kapab kit lofis zis akoz kapris Lopozisyon.  Annou aret diskord dan nou pei.  Sesel i bezwen bouze e nou bezwen kontinyen annan stabilite politik e ekonomik.  Mr Speaker, mon pe swiv byen sa ki pe pase dan nou pei ozordi.  Apre sa dernyen eleksyon, parey LDS i kontan dir – 15 lo 10, serten Seselwa in ganny en latitid fer sa ki zot anvi dan sa pei.

Depi ler ki LDS in apre avek sa slogan ’’Pil lo l’’, serten nou frer e ser i krwar ki i normal pour pil lo kanmarad.  Menm zanfan lekol, zot krwar ki sa i byen.  E se sa langaz ki zot servi.  E menm fer zot fer vyolans, lager avek zot bann koleg, menm avek teachers.  Eski tou sa i lafot Prezidan Faure?  Dimoun napa respe pour kanmarad.  Si zot anvi maltret ou, zoure, antre dan ou lakaz, bat ou e fer nenport kwa avek ou, pour zot sa i normal.  Akoz dapre sa group dimoun ki annan sa tel, bann tel latitid, pour zot sa i la demokrasi.  E dapre zot, zot ki la.

Mr Speaker, mon’n osi remarke ki serten Seselwa i vin  pli zenefobik e rasis.  Sa i fer lapenn!  E si nou kontinyen koumsa, mon pa vwar nou pou al lwen.  Mr Speaker, Prezidan Faure i en Leader ki pe rod sa ki pli bon pour Sesel.  I pe anmenn en lapros dyalog, rann kont, latransparans e bonn gouvernans.  En lapros kot nou pe vwar tou Seselwa pe ganny apele pou fer son kontribisyon peu importe ki son krwayans politik, ras kouler – ras, kouler e relizyon.  En lapros enkliziv Mr Speaker.  Kwa ki mal avek sa?  In met an plas diferan Lenstitisyon pou deal avek bann ka koripsyon.  Kot sa ki’n fer son fot i a peye, si zot vwar koupab.

Mon pe vwar ki Prezidan Faure pe vreman travay dir pour rod fason pou anmenn plis devlopman pour nou pei e nou pep.  Nou’n vwar ki atraver son bann negosyasyon ki in fer a aletranze, nou pe kapab ganny serten Grant pour bann proze ki pou amelyor lavi nou pep.  I en Prezidan ki’n pran la bar dan en moman pli difisil ki zanmen okenn Prezidan dan Sesel in fer fas avek.  E ziska prezan, i pe byen debourye.

Menm serten siporter Lopozisyon in dir ki Danny pe travay.  I vreman set son bar tre o.  Kontinyen dan menm laliny Msye Prezidan, ziska ki ou manda i a terminen an 2020 !  Lepep Seselwa pe note – ozordi napa plas pou score pwen politik.  Me plito, ozordi in ariv ler pour nou tou travay pour byennet nou pei e sa pep ki’n elekte nou.  Se sa ki devret gid nou aksyon e lanbisyon koman Leaders.  Wi Mr Speaker, akoz nou osi nou bann Leaders.  E nou bezwen a la oter sa lekspektasyon ki nou’n kree dan nou pep.  Demann Prezidan Faure pou demisyonen pa pou fer nou vin pli bon Leaders.  e pa pou fer nou aport en meyer kontribisyon anver nou pei.

Pa bliye, nou tou la anndan nou ti donn sa pep en langazman.  E nou bezwen onor nou langazman.  Napa kalite promes ki LDS ti fer avek Lepep Seselwa.  Enn parmi, se met plis larzan dan zot pos.  Be, ki zot pe fer pou kapab met larzan dan pos Seselwa?  Olye met larzan dan pos Seselwa an zeneral, zot in fer pase en Private Member’s Bill – Anti-Money Laundering, pour met plis larzan dan pos zot dalon.  E ozordi Sesel in ganny term – in ganny terminen koman – in ganny dekrir koman en pei ki pa annord avek Lalwa enternasyonal ki gouvern sa bann size offshore  e marse finansyel enternasyonal.

Mr Speaker, tanzantan isi dan sa Lasanble, LDS in sey anmenn nou dan lepase.  Zot in koz lo tou sa ki mal dan pei.  Konmsi napa nanryen ki byen ki’n ganny fer.  Me ki kalite progre ki sa in anmennen pour nou pep Mr Speaker?  Seselwa i ankor pe esper LDS pou met larzan dan zot pos.  Mr Speaker, en bon Leader i pa travay avek dimoun – i travay avek dimoun, me i pa dikte.  Mr Speaker, Prezidan Faure pe travay pou ranforsi bann Lenstitisyon Gouvernman.  In donn Zidisyer, Lezislatif, tou Minis, PS, Sef Egzekitiv lespas pour zot travay.  I pa enterfer dan travay personn.  Alors?

Tou sa bann dimoun ki’n ganny met dan sa bann pozisyon, zot konn zot responsabilite.  E se zot devwar pou desarz li byen.

E la mon sizere, ki prezidan koman latet egzekitiv i devret egzers plis kontrol oubyen annan pli bon oversight pou fer sir ki bann Minis, bann Minister i vin pli efektiv e efikas.  Mr Speaker, nou tou isi e piblik osi, zot rapel ki lannen pase Prezidan ti propoz 2 zonm avek en fanm tre konpetan koman Minis dan sa Lasanble.  E LDS pa ti vot zot nominasyon an dizan ki zot pe rod technocrate me pa politisyen.

Pa lontan, detrwa mwan pase, nou ti reganny nominasyon 3 lezot teknisyen tre smart e profesyonnel. Propoze koman Minis.  Ankor enn fwa, LDS ti refize zot nominasyon e donn tout sord leskiz pou zistifye akoz zot pa pou vot pour nominasyon sa 3 dimoun.  Tou sa in ganny fer avek en mannev pour paraliz Egzekitiv e fer Prezidan Faure fail dan son travay.

Apre zot a dir ki coach i kapab sanz zwer.  Be zwer ki coach pou sanze?  Si bann ki annan pouvwar pour aprouv, pour donn zwer, i deside pour pa aprouve.

Mr Speaker, LDS pe hold sa Gouvernman hostage.  Ziska ozordi, Prezidan Faure pa’n kapab ganny son Cabinet ki i ti anvi travay avek e sa i malere.  E la zot vwar ki nanryen pa pe marse.  Tou dimoun dan Egzekitiv pa pe performen.  E sa i enkli bann Lopozisyon osi ki travay dan Egzekitiv.  E zot oule Prezidan cède la place.

La i bon pour LDS vin dirize – lekonomi in progrese, biznes pe marse, lanmans pwalon in rafresi.  Me mon’n demann mon lekor p eski sanmenm sa ki LDS pe dir Sesel i en ‘failed state’?  Eski LDS in pare pou vin diriz en ‘failed state?’  Be Mr Speaker, tousala i zis en bann mannev politik pour LDS konfiz dimoun.

Mr Speaker, nou annan bokou defi devan nou, me Prezidan ape travay.  I annan ankor bokou  pour nou fer.  E nou bezwen fer li avek tou devosyon posib.  Pa vin met bar dan larou kanmarad!  Prezidan Faure, atraver Egzekitiv, pe fer tou pour ranforsi tou bann Lenstitisyon Leta.

Annou siport sa e met tou lanbisyon politik akote.  Annou met Sesel premye.  En mesaz pour tou travayer servis piblik – travay avek tou zot devosyon!  Bann teknisyen dan tou bann Minister e dan tou bann Lazans, donn bon lenformasyon zot Minis, sirtou ler zot vin isi dan sa Lasanble.  Bann Minis, zot osi zot bezwen egzers plis disiplin e ranforsi zot sistenm monitoring dan zot Minister.  Pran aksyon avek sa ki pa delivre.  E fer zot rann kont.  Reste pli konekte avek zot bann travayer e la zot a ganny en lafors travayer ki pli motive e zot ava delivre en pli bon servis.  Koman en Leader  tre sarz, Prezidan Faure pe diriz Sesel avek entegrite.  I annan bann bon kalite, i vwar bon dan dimoun.  I pa zanmen mank respe pour personn.  I pa fer vyolans.  I pa en dimoun – i en dimoun ki inifye dimoun.  I pa diviz dimoun.

I en bridge builder me i pa en bridge destroyer.  Ler i pe konstrir, zot, zot oule detrir, kase, bloke, freeze.  I pa en dimoun ki anvoy son responsabilite lo lezot.  I pran son responsabilite pour son aksyon.

En legzanp, se sa zafer paspor ki’n donn avek Msye El Materi, kot i annan ki par kont in ganny larzan dan sa zafer.  Fodre Pep Seselwa  i konnen lekel ki’n ganny larzan avek El Materi Mr Speaker.

Mr Speaker, Prezidan Faure pa en dimoun ki gard rankin.  Me dan lavi, tou dimoun i annan son limit.  Prezidan Faure in ne e ganny batize Faure.  Mon oule zis dir – mon oule zis dir zot ki en zonm ki annan lafwa.  I en zonm ki pa profit lo fristrasyon dimoun.  I pe  kontinyen rod sa bon pour Sesel e son pep.  Wi, Sesel i annan son problenm.  Nou pou travay dir pour sirmont sa bann problenm.

Mon rekonnet ki i annan serten defayans, me mon annan lespwar dan lavenir.  Mon vwar nou annan en Prezidan ki pe travay, ki pe travay dir.  E ki’n donn son komitman pour li travay pli dir.  Nou bezwen Sesel stab.  Annou respekte kalandriye eleksyon.  E la mon a propoze ki nou anmenn en Private Member’s Bill pour amann Konstitisyon e demande ki nou respe dat eleksyon.  Mersi Mr Speaker.

 

(APPLAUSE)

 

MR SPEAKER

Mersi Onorab Lemiel.  Mon ava pas laparol avek Onorab François Adelaide.

 

HON FRANCOIS ADELAIDE

Mersi Mr Speaker.  Bonn apre midi tou MNA.  Bonn apre midi tou Seselwa a lekout.  Mr Speaker, si ozordi apepre 2an ki Msye Faure in ganny mete pour ranplas Msye Michel, e ki Lasanble i bezwen anmenn en Mosyon pou dir li – pran en desizyon onorer e demisyonen, pour ki Sesel e Seselwa i ava war en meyer lavenir anba en lot Gouvernman e en lot Prezidan.  Mr Speaker, keksoz i vreman mal.

Kontrerman ki Msye Faure ti pe dir, kot nou devret fer atansyon, e nou pe menas stabilite atraver sa Mosyon.  Me o kontrer nou pe ede donn Seselwa en lo souf, en lot lespwar.  Nou oule ki Seselwa i remet konfyans dan zot lekor.  Ki apre 40an bat latet, anfen nou pou lib tre prosennman.  Nou pou lib kont okenn sours lesklavaz mantal, kot Gouvernman ki donn tou keksoz.

E nou’n aprezan konpran ki Gouvernman i senpleman fasilitater.  Ou gran paran, ou paran, ou menm, ou zanfan, ou pti zanfan, ki ti e pe travay, i kontribye dan lentere sa pei.  Se pa Msye Rene ki ti donnen.  Se pa Msye Michel ki ti donnen.  E se pa Msye Faure ki pe donnen, parey zot toultan fer krwar.

Si ozordi koman en nasyon, nou tenir menm avek tou sa bann lenzistis, labi, viktimize, e komet tout sord bann atrosite, menm teoriz sa pep, se pa lot ki Gran Met ki’n protez nou e nou pei.  Listwar Moise ti pou bezwen repet son lekor.  E petet Sesel in ganny swazir koman en pep ki ti’n ganny oprese.  Me 40an pli tar sa  menm pep pe dir nou’n ganny ase.

Menas stabilite pei set en repertwar ki tou gran sef Parti Lepep i konn sant par ker.  Mazin kanpanny dernyen eleksyon, ki zot bann Manm ti dir?  Menas stabilite, avyon pou aret vini – eski avyon in vreman aret vini?  Ouswa nou’n trouv en logmantasyon dan vol aeryen?  On dire zot ti pe esper LDS pour zot kapab retournen.  Menas stabilite, akoz LDS pou blok bidze.  E Lasanble Nasyonal pou vin parey en dance floor.  Kantite mansonz ankor, zis pou fer krwar ki LDS ti pou anmenn less development for Seychelles.

Eski zot in bliye se pa lot ki Msye Faure ki ti kriye aotvwa lo stage?  Ki mannyer nou pou kapab krwar en boug ki fer li fer lapenn e rod konpasyon?  Kan ki menm i anbet Seselwa e dir ouvertman – meaning LDS se Less Development for Seychelles.  Tan ki i pa azir senser e demann leskiz, mon pa krwar dan okenn parol ki i dir.  Seselwa en nasyon kalm, zantiy, responsab, travayant, amikal.  Ozordi zot in bezwen pous zot bann reprezantan dan Lasanble Nasyonal pour al sa zistans pou dir kareman avek Msye Faure – demisyonen imedyatman!

Eski lamazorite Seselwa pe reve?  Eski i pa normal, nou koman reprezantan Lepep Seselwa pou fer zot lavwa tande?  Seselwa partou kote pe kriye, pe konplent.  Pri lavi pe sot plafon, etranze pe abiz zot, etranze pe ranplas zot, larzan lafen di-mwan pa ariv ziska le 10, bokou ankor.  Akoz ki Msye Faure i zwe pa tande?  Konmsi sanson – the answer is blowing in the wind.

Mister Michel an 2015, i ti konstate ki Seselwa ti anvi en nouvo Gouvernman.  I ti konnen ki malgre sa kantite travay ki Parti Lepep ti’n fer, tel ki aste Kart Idantite, donn sitwayennte pour vote, lezot kalite trik, Seselwa ti’n fini deside.  Avek bokou kouraz, refleksyon, e koman en zanfan Sesel ki ti konnen ki Sesel i pli gran ki tou, i ti konpran ki son kalite leadership, i pa pou kapab travay avek LDS.  I ti pran en desizyon tre brav, onorer, pour li demisyonen.  Akoz i ti’n fini konnen ki set en Gouvernman LDS ki pep Seselwa i anvi.

En legzanp ki nou pa devret bliye, akoz an fezan sa i ti senpleman montre par son zes ki i ti aksepte swa Seselwa.  Eski Msye Faure pa’n aprann avek Msye Michel ki Seselwa i anvi – in vin en Nasyon matir?  Ki pa oze ganny anbete ankor?  Pourtan, Msye Faure dan son Conférence de Presse ti dir ki i pa pou demisyonen ziska ler son manda i vini an 2020.  Menm si mazorite Seselwa pe proteste dan tou sord fason pour montre zot mekontantman vizavi son leadership e son mank konpetans pour dirize.

Mon panse ki ti – i ti a swiv legzanp son predeseser pour retourn kot Lepep Seselwa e demann zot si zot ankor anvi li ki kontinyen ouswa zot anvi en lot?  Mr Speaker, Sesel i ‘Pli gran ki nou.’  En Gouvernman rann kont, latransparans e bonn gouvernans, nou’n tann bokou koze sorti kot Msye Faure lo sa size.  Zis koze apre koze.  Bann zoli parol lo medya, dan bann konferans isi e aletranze.  Me ki in abouti li a lafen dizour?  Seselwa in dir – ase koze!  Aksyon ki nou anvi trouve.  Me avek sa leadership anba Msye Faure, sa i difisil pour enplimante.

Bokou fwa nou’n tann li dir avek son ladministrasyon – sorti dan zot konfor e al ver Lepep Seselwa pour konpran pli byen kip e pase.  Tre pe ki’n ekoute e mazorite in kontinyelman fer Seselwa dous depi bomaten ziska aswar, zour apre zour, semenn apre semenn, mwan, menm lannen.

Pour en senp lenformasyon dan en Biro Gouvernman, si MNA pa entervenir, nanryen pa marse.  Eski i devret kontiny koumsa?  Me malgre tou sa bann konplent, Msye Faure pa enterese pour rod feedback.  Me i kontinyelman zwe musical chair avek bann Minis.  Mon vreman pa ganny en konpran akoz ki sa zafer feedback e monitoring ki Msye René ti egzize, pa’n zanmen antre dan ladministrasyon Msye Faure.  En zouti tre enportan ki ti pou vreman anmenn bokou rekour pour sa pei.

Me en Mosyon dan Lasanble, parey nou konnen, set en komansman bann nide konversasyon, rezonnman, ki gradyelman atrakte bokou nide emansipasyon dan popilasyon e ensit desizyon serye ki Gouvernman pa devret ni pran li a la lezer.  I bezwen – i bezwen  pran sa bann deba, nide, aspirasyon, tre serye akoz se pep ki pe koze.  Pep ki pe reve, pep ki ganny afekte, pep ki pe pey le konsekans, pep ki bezwen deside, e pep ki pou bezwen pran aksyon.  An dot mo, people’s power.  E nou tou nou konnen ki mazorite ki konte e LDS ki annan sa mazorite Sesel konmela.

Kontan pa kontan, gronnyen sa ki anvi, me realite i la devan nou.  Nou napa okenn kapris dan bann desizyon ki nou pran.  Nou pa pou zanmen adopte okenn kapris dan bann desizyon ki nou pou pran.  Nou napa okenn kapris dan bann desizyon ki nou’n pran.  E nou pa pou zanmen adopte okenn desizyon dan bann desizyon ki nou pe pran e ki nou pou pran dan lavenir.  Nou pou fer kler avek sa pep sa ki zot anvi e nou mentenir nou desizyon.

Mr Speaker, nou, nou’n dir – Danny OUT!  Nou ti donn zot Minis – pran par egzanp, Minis Larose, en technocrate.  Ozordi ki’n arive avek li?  Ler i ti deside pour li travay drwat, i paret mwan zot pa ti kontan.  E i ti bezwen demisyonen.  Ozordi zot pe koz nou pa’n donn li Minis.  Nou, nou ti pe senpleman protez lentegrite sa bann dimoun ki ti pe vini akoz nou konnen anba sa Ladministrasyon, zot pa ti pou zanmen kapab perform parey zot ti a mazinen.

Mr Speaker, olye fer bann politik saboule, ouswa bann politik demagozi, akoz nou pa sey met lafors ansanm?  E demann Msye Faure pou fer sa ki byen.  Onorab Ghislain, i konnen ki li i gannyen.  Akoz botan pour zot pe aprezan terminen.  Zot blanm lo kapris letan.  Lasenn koripsyon dousman, dousman pe frenmen.  Byento, Seselwa pou konn plis laverite.  I pou sey fer tou fason pour li vin anbet ou.  Fer poenm apre poenm.  Fotespere, Seselwa pe dekouver son talan.  E mon asire sa voyaz, apre ki Lasanble i a dizourd, son coach i a sizer li avek Lasosyasyon ‘Bling Bling’,

 

(laughter)

 

HON FRANCOIS ADELAIDE

… pou konsider akoz i annan en skill.

Apre tou Onorab, i annan ase letan pou fer poenm kapris letan akoz i napa distrik.  I a pe viv larealite en distrik.  Konmela i pa la devan laport dimoun pou vwar soufrans, ni fristrasyon dimoun.  Nou koman bann être imen ki’n ganny sa privilez par lao tou kreasyon pour deside ki mannyer nou ti a kontan vwar sa monn.  E nou bann Leader dan sa pei ki’n osi privilezye pour reprezant pep, nou fermeman krwar ki nou pou ganny zize lo lafason ki nou azir anver sa ki pli feb ki nou, sa ki pli mwen fortinen ki nou.  E ki depan lo nou pour anmenn en pe rekonfor sekirite e lezot laspe, fasilite, pour zot lavi.

E a mon avi, mon pa krwar ki i korek pour nou bann politisyen profit lo lafebles e abiz sa pep – gos, drwat, dan tou sord fason.  Oli nou moralite koman en être imen?  Nou pou ganny zize lo lafason nou’n fer.  E mon pe zis ankor enn fwa fer zot mazinen, parey mwan osi mon’n ganny fer mazinen.  Mon santi mwan zennen Mr Speaker, avek sa alegasyon ki Onorab Ernesta ti fer semenn pase – Mr Chair.  In dir ouvertman ki Lasanble in fail.  Mwan mon trouv le kontrer.  Bokou nou dan sa Lasanble, lo sa kote latab, menm lo lot kote latab, nou konnen ki kantite travay sa Lasanble in fer e pe kontinyen fer pour byennet nou pei.

Dan distrik, bokou nou MNA, nou al dormi avek latet fermal, tansyon monte, ouswa leker lour akoz nou souvandfwa fer fas avek bann sityasyon tousan parfwa.  Ler nou pe re-konsol sa bann lafanmir, nou souvandfwa anmenn en pe sa bann problenm avek nou.  E mwan ki’n vin devan malgre diferan lakizasyon, maltrete, e lezot mannev sal e denigrasyon, avek le bi pour anmenn en nouvo souf pour mon distrik e pour mon pei Sesel.

Si mwan, mon santi ki mon’n fail, mon pa pou kontinyen reste dan mon pozisyon.  Mon pou fer senserman – mon pou senserman anmenn en let demisyon.  Akoz mon konnen ki Sesel e Seselwa, sirtou zabitan Baie Lazare, pa devret pe ganny fail ankor akoz en dimoun ki’n deside fail.  E se pour sa rezon ki mon pe demann tou sa ki’n santi fail, swa ki’n fail, enkli Msye Danny Faure, e osi Onorab Ernesta ki’n avoue ki li osi in fail, pour aret fail Seselwa e demisyonen imedyatman.

 

(APPLAUSE)

 

HON FRANCOIS ADELAIDE

Koman reprezantan Baie Lazare, nou osi nou santi dezapwentman total lo kote bann Minis avek Msye Faure, dan lafason ki zot pe diriz pei.  Legzanp Mr Speaker – nou’n vwar kot serten zabitan Baie Lazare ti ganny afekte avek delo kontaminasyon.  Kot malpropte zannimo in koule dan bann sours delo.  Gouvernman pa’n santi touse pou anmenn soutyen pour zabitan.  Zot in prefere kasyet zis pour kontinyen protez dalon.  Tandis ki bann zabitan pe bezwen travay pli dir pour zot aste boutey delo dispenser e lezot lekipman pour pirifye delo, zis pour prezerv zot Lasante, kan zot ti posed sa delo pli prop dan Sesel.

Eski Gouvernman pa ti devret rantre e asiste sa bann zabitan avek menm en pti led finansyel?  E osi avek en pti privilez pour al fer en medical check up.  Erezman la ki MNA, parey mwan ki pa per okenn afron, sa bann o preser ki sa bann dimoun ti pe gannyen dan lepase, zot pe vitman konn zot Drwa e zot lafors koman en kominote.  E se sa bann – e sa bann ki krwar ki zabitan i ankor pe dormi, mon oule lans en lapel kosyon avek zot.

2enm dezapwentman i vin lo laspe promet zabitan pou ganny akse avek lans.  2an pli tar, ni en Prozedlwa pa ankor vin dan sa Lasanble.  Kwa ki arive ki tou sa letan nou ankor pe espere?  Mr Speaker, ou ava rapel ki Baie Lazare ti parmi sa distrik ki Msye Faure ti vizite.  Bokou promes ti ganny fer.  Zabitan ki ti ganny vizite ti ganny lespwar.  Zot in menm fer en madanm kraz son prop lakaz avek bi ki Gouvernman pou vin asiste li.  Ziska ozordi, sa madanm ankor pe lwe lakaz dan son pos.  Son bann zanfan, sakenn in eparpiye e zot rev in preski brize.  Sa ki pli tousan, se sanmenm sa bann zanfan ki Parti Lepep ti servi pou fer pas port an port dan dernyen eleksyon.  Oli zot konpasyon pour limanite?

Dan sou-distrik Dezer, ankor promes pour asiste bann fanmir avek lozman konvenab.  Mr Speaker, dezapwentman i vin ankor vize ver devlopman ekonomik zabitan Baie Lazare.  Depi en pe letan MNA avek DA ti pe antisipe pou met a laporte zabitan Baie Lazare en teren ki ti pou anmenn bokou devlopman lo kote pti biznes, tel ki kyosk pour bann artizan nou distrik, landrwa kot endividi ti kapab lwe bann lekipman watersports, fun park, bann landrwa detant, vi ki nou annan ankor bann nouvo housing estate ki pe ganny devlope.

I menm annan en zabitan – Msye Larue, ki’n deza depans li plis ki 20mil Roupi pour montre Gouvernman ki i annan gra lentere pour ede aport soutyen pour son distrik.  Son proze ti pou ed li ek son fanmir pour rantre dan en biznes, amelyor zot lavi.  Akoz ki i ganny sere?  Me selman ler eleksyon, tou bann bon parol – tou keksoz i posib.  Me apre eleksyon, zot zwe sourd lo li.  Zot bliye ki eleksyon pou bezwen vin ankor.

Nou’n ekri Minis Later, Minis Lanvironnman.  Nou’n ekri Prezidan Larepiblik pour nou ganny en repons, me an ven – zot zwe sourd lo nou.  Mon panse ki zot pe anmas sa bout later pou don zot dalon.  Me safwasi zabitan Baie Lazare pou montre zot – pou montre Gouvernman ki zabitan i devret pas premye dan son landrwa.

Proze West Coast Development – zabitan Baie Lazare in kontinyelman eksprim son dezapwentman akoz avek L’Egzekitiv pou zis koze me napa aksyon lo proze enportan ki ti pou benefis nou distrik.  Zot ava rapel dernyen fwa, ki mon ti demann Minis Charlette sa kestyon.  I ti konfirmen ki travay pou komanse lafen Zilyet.  Eski nou’n war keksoz tanzib komanse?  Sa proze ki enkli pavement sorti Anse a la Mouche ziska Baie Lazare.  I ti pou enkli bus shelters pour bann zabitan Anse a la Mouche dan zanmirant Blue LagoonBus shelters ankor ki ti pou soulaz bann zabitan dan zanmirant Mr Anselbert Libanotis, vi ki sa landrwa ki zot pe esper bis i danzere e pa apropriye ditou.  Sa proze osi ti pou asire – ti pou asir sekirite nou bann pyeton, enkli nou bann zanfan.  Me i malere pou dir ki sa Gouvernman, anba direksyon Msye Faure, in anvoy zabitan Baie Lazare merd.

Mr Speaker, Baie Lazare, ou vwar travayer etranze pe mars lo semen avek bann zouti tel ki parey lafrin, lapony.  Pe diriz dan nou brizan, dan nou larivyer, pour eksplwat nou bann resours.  Menm bann ki nou, nou pe proteze.  Konbyen fwa apre ki zabitan in met mwan okouran ki mon’n adres bann Lotorite konsernen?  Mon’n menm dir a plizyer repriz dan Lasanble e eksprim mekontantman lo la par sitwayen.  Eski sa Gouvernman in ekoute e pran aksyon?  Zero.

Rezon ki nou war zot pe kontinyen envant pli bokou zouti pour zot al avek lo brizan.  Ki kantite koze ankor nou bezwen koze pour Lotorite konsernen tande?  Land Point System avek Housing Point System – total failure!  Apre bokou letan kot Seselwa, sirtou zabitan Baie Lazare ti pe espere pour ganny asiste avek en bout later, bokou zot in telefonn mwan e eksprim zot dezapwentman.

Bokou fakter ki pa’n ganny enkli dan sa demars e nou’n vwar mazorite Seselwa, sirtou zabitan Baie Lazare ganny kit ater.  Zot in get zis sa 800mil Roupi.  Par egzanp, en fanmir ki annan mason, sarpantye, elektrisyen, plonber – zot osi zot devret ganny enkli akoz en porsyon sa 800mil i enkli dan kou konstriksyon.  Konbyen fanmir ki’n deza fini aste zot materyo e pe esper zis en bout later?

Lo sa size Land Point System, mon oule fer en demann pour ki sa prose pilot dan Sid, Was i arete imedyatman e Minister konsernen i devret retourn lo tablo pour koriz sa bann lenzistis e egzazerasyon pour byennet tou Seselwa ki pe rod akse avek en bout later Gouvernman.

E nou pou bezwen konnen konbyen ki sa progranm in koute ler zot in fer sa progranm Land e Housing Point System.  Lenzistis, labi, lenkonpetans e mank konpasyon par sa Gouvernman i ede fer Seselwa soufer, enkli zabitan Baie Lazare.  Lot domenn enportan ki Gouvernman in kontinyen dezapwent zabitan Baie Lazare, se lo kote lagrikiltir e lapes.

Fermye Baie Lazare i preski pa konn zot pozisyon vizavi zot karyer.  Eski zot pou kontinyen pante swa zot pou bezwen al anploye?  Partou kote kot ou get, problenm.  Promes parti promes.  Minis nek i sanz portfolio sak trimes.  Promes kantite me aksyon zero.  Pa in plis ki ler pour bann fermye fer zot lavwa tande?  Fermye silvouple, ouver zot lizye.

Senp legzanp – apre tou sa koze pou demann en balans pour pez zannimo ler pe vann labatwar.  Depi ansyen Minis Benstrong, Minis Charlette in vini, la Minis Bastienne.  Sak fwa ki zot vin dan Lasanble, sa size i monte.  E nou pa pou arete ziska ler nou vwar rezilta.

Napa okenn ‘kapris letan’ ladan.  Sak fwa ki zot vini, nou pou redir zot ankor.  Mister Faure i reste konvenki ki dan 2018, ler Seselwa i devret pe kontinyen mezir koson dan likou e determin zot pwa.  Mr Speaker, ki sa, sa?  Eski Lasanble pou bezwen anmenn en Mosyon pour demann Gouvernman e fors Msye Faure pour met en balans dan labatwar?  Lasanble pa Egzekitiv!  Si Egzekitiv pa kapab delivre, anvoy lavwa – dir zot pa kapab e cède la place pour en lot Gouvernman.

Peser Baie Lazare, zot osi zot pe soufer.  Zot ti ganny promet en bazar.  Later in vann, later Gouvernman in fini vann.  Mr Speaker, peser i rakont mwan ki mannyer sa later ti ganny vann.  E ler ki Gouvernman ti acquire pour lentere piblik, nou vwar li ganny vann avek en prive. Zot rakont mwan ki 6er diswar en gro loto nwanr i vini, ansyen Minis i vini avek en latres, i konman mezir landrwa.  8er – 4er i Minis, 6er i arpanter – mon mazinen ki 8er, petet i ti en Bankye.  E zis lo sa size, zabitan Baie Lazare in osi eksprim zot dezapwentman avek Msye Faure pour apwent Msye Dugasse lo Board Fon Pansyon.  Le rezon i tre senp – nou pa trust li pour pran desizyon ki konsern nou larzan.  E i devret ganny retire imedyatman.

Nou tou nou konn Lalwa ki gouvern sa topik akizisyon later pour lentere piblik.  Nou zabitan Baie Lazare, nou’n ganny vole par sa Gouvernman.  Akoz zot in vann nou byen malapropo, kan Lalwa ti deza an plas pour protez nou.  E non oule a sa moman la, met sa a latansyon Msye Faure pour li aksyonn lo la imedyatman.

Mr Speaker, sa later ki mon pe koze, sa msye in eksprimen ki i pare pour rann sa bout later.  Me fodre ki Gouvernman i rann li son larzan lo to lesanz ozordi avek son profi.  En desizyon ki pou met fardo lo tax payers money zis akoz move planifikasyon sa Gouvernman.  Eski sa Gouvernman ti oule fer nou vin bann soubalter?  Zabitan Baie Lazare, la mon pe met ankor legzanp devan zot pour zot gete akfer nou oule ki Msye Faure i demisyonen.

Mesaz zabitan i kler – Mr Mr Speaker, en lot legzanp – apre ki Gouvernman Msye Faure ti deside pou fer proze met ros antye lo lans Anse à la Mouche, e ki Bidze ti’n fini aprouve, serten zabitan Baie Lazare, sirtou bann ki reste dan rezyon, zot ti met zot lipye ater e zot ti kontakte mwan pour eksprim zot dezapwentman lo sa proze pour detri sa morso lans.

Koman zot MNA ki annan zorey e leker pour zot, mon ti fer li mon devwar pou met Lotorite konsernen okouran.  Minis Dogley ti ekri mwan pour enform mwan ki plan in fini ganny fer e zot pou go ahead  avek zot proze.  Me mon ti met on lipye ater avek lapiy mon bann zabitan.  Ozordi mon kontan pou vwar bann Seselwa, enkli etranze pe retourn lo sa zoli lans ki’n reganny son bote pour vin pas en pti letan detant, tel ki piknik, sun tan, sosyalize, menm vin reget sunset.

En lans ki pou sirman re-anmenn bokou kliyan kot sa bann letablisman.  Erezman, gras a koz zabitan Baie Lazare ti’n deside defann zot teritwar.  Me si zot ti kit sa dan lanmen Gouvernman, ozordi nou ti pou apel sa landrwa Ros Lanmous dan plas Anse à la Mouche.  Mr Speaker, trafik bloke dan Sid – nou ti anmenn Minis ankor enn fwa dan Lasanble pour esey anmenn soutyen pour bann zabitan sorti dan Sid-Les Mahe.  Konmela transpor i bloke depi Ty Foo.

E si Gouvernman i reste parey, dan e pe letan trafik pou bloke ziska anse Royale.  Me si bann Minister konsernen ti pran zot responsabilite respektivman, nou ti ekspekte pe vwar Lapolis dan sa rezyon e bokou lenkonvenyan ki pou ganny deal avek e flow transpor ti pou bokou amelyore.  Me ziska ozordi, ni en Lapolis ou pa trouve pour ede avek sityasyon trafik.

Mr Speaker, respe e welfare travayer i vreman enportan pour ki nou lafors travayer i kontinyen grandir.  E zot kapab nourir zot fanmir.  La mon per refer avek sa ka kot Lotel  Four Seasons, kot travayer Seselwa in siny en petisyon e pe demann Gouvernman pour entervenir.  Zot pe eksprimen ki zot pe ganny trete koman lesklav.  Manager pe vol zot ‘tips’, Seselwa pe ganny peze par etranze lo kote karyer.  Etranze plis ki 11an pe travay san ganny ranplase par Seselwa.  GOP pour travayer pe ganny donnen san swivre lareg, e post travay ki pa pe ganny advertise me pe ganny donnen zis avek etranze e Seselwa zis zot gete.  Akoz ki Gouvernman i reste trankil lo sa size?

Mon mazin ankor enn fwa mon fermye, Robin Magnan, ki ankor pe lwe en bout later.  I pa fer premyer fwa ki mon dir sa dan Lasanble.  I pe prodwir, i pe demann Gouvernman pour asiste li avek en bout later Gouvernman.  Mon mazin Msye Jules Robert, ki li osi i annan son dokiman, in ariv ziska kot Msye Faure.  Me larepons i pa ankor gannyen.  En zabitan ki lo mon leker e ki souvandfwa pe rod son rezon, se Hansel Moustache ki a plizyer repriz in ekri Msye Faure pour demande ki zistis i ganny fer dan son ka spesifik, me Msye Faure i zwe sourd.  Eski ler en Seselwa i vwar i ganny abize, son drwa in ganny vyole, i ekri tou Minister e dernyen opsyon pour rod en rekour, i al Seselwa ou pa kapab ganny rekour dan ou pei – kote ki ou pou ale ankor?  Akoz ki Msye Faure i ankor pe reste trankil lo sa size?  Me la ki nou’n aprann ki tou le mwan i ti pe siny an mwayenn 2 paspor e donn sitwayen etranze e fer vin Seselwa, mon demann mon lekor – kwa ankor ki i ti pe fer tou sa bann letan e ki pa’n kapab reakte lo file sa bann dimoun?

Lazenes Seselwa i  nou ranplasan demen.  Nou pe fer fas avek en lazenes ki’n fini deside.  La mon pe quote parol CEO Lawrence – en statement  ki mon pe toultan met ater.  Eski Msye Faure i pran nou bann zenn o serye?  Bokou demann in ganny fer par bokou endividi konsernen, ki’n dir silvouple, envestir plis dan nou lazenes akoz se zot nou ranplasan.  Rafal Bidze lafen 2017, Lasanble ti fer en demann pour konsidere ogmant larzan ki vize ver devlopman zenn, tel ki rode ki mannyer Gouvernman i a vers plis larzan pour siport bann tim foutbol – bann tim sportif, finans plis aktivite pour zenes, sipor SNYC avek zot bann progranm ki vize ver devlopman e langazman bann zenn dan bann distrik.  Me mon pa konnen si zis Baie Lazare ki’n ganny tre pe de sou, ki i pa’n kapab fer son bann proze bouze.

Mr Speaker, la mon pe koz pour en zenn ki’n deside kit son travay kot lotel pour vin travay avek lazenes akoz i kontan son travay.  Son lapey in desann.  Me akoz ki Gouvernman pa get dan son welfare e donn li en pti pe plis pour li kapab ed bann zenn akoz i annan sa a ker.  Anba direksyon Msye Faure,  nou’n trouv menm bann ansyen Zofisye Larme – Lafors Defans, ki’n travay dir, mank sonmey, pour vey sa revolisyon ki’n anmenn zot dan sa bann pozisyon kot zot ete ozordi, pe eksprim zot dezapwentman.  Zot in ganny rezete, oubliye, rekonesans pour zot kontribisyon enportan, zot pa pe gannyen.  Menm bann manm SVPD ki’n kit zot fanmir pour al vey bato an mer, zot ankor pe rod zot rezon.  Zot konpansasyon ki zot ti ganny promet, zot pa ankor gannyen.  Menm si Lasanble in sey lager, me Egzekitiv i reste ankor sourd lo sa bann dimoun.

Mr Speaker, mon panse i annan ase legzanp devan nou.  Baie Lazare nou konvenki ki in – ki Msye Faure in nepli annan kontrol lo son Egzekitiv.  Tre pe ki ekout li.  Me mazorite zot kontinyen fer sa k zot anvi.  Menm Onorab De Commarmond ti fer li per e ti dir li – pa assent okenn Lalwa ki zot minorite, zot pa dakor avek.  Msye Faure in avoue ki i pa ekout Lasanble.  E sa i montre ki i pa enterese avek nou koman bann Manm ki’n ganny mete pour reprezant Lepep Seselwa.

Mwan, mon ti ganny vote par mazorite Baie Lazare pour vin fer zot lavwa tande dan Lasanble, dan lakominote, dan bann Minister, menm dan Biro Prezidan.  Zabitan Baie Lazare pa ti zanmen zot pour koabitasyon.  Rapel byen ki an 2015, rafal eleksyon, nou ti montre nou vre lentansyon.  Pour premye fwa dan listwar, 3 eleksyon konsekitiv, Baie Lazare Lopozisyon ti ranporte.  Nou ankor annan lendirans pou fer ankor plis viktwar.  I kler ki zabitan Baie Lazare i an faver sanzman dan sa pei.  Tout an respektan nou bann lezot frer ek ser ki siport Parti Lepep.  Baie Lazare i reste LDS akoz nou konnen ki napa okenn leadership anba Parti Lepep – napa progre.

Mr Speaker, Msye Faure in dir ki i pou fini son manda.  Baie Lazare i dir li, sorry, non Msye Faure, fodre ou demisyonen!  Ou napa sa kapasite e konpetans neseser pour diriz Sesel ver progre, akoz ou pa pe kapab met lord dan ou Gouvernman.  E se pour sa rezon ki Sesel pe ariv dan sa sityasyon enkyetan.  E nou koman LDS, nou pa pou kapab les sa arive.  Vwala akoz nou pe demann ou pour pran sa aksyon onorer e demisyonen !

LDS i annan en kantite plan pour tir Sesel kot i ete ozordi.  Nou annan Seselwa kapab, ki kapab anmenn en transformasyon pour en meyer Sesel.  Sesel e Seselwa i merit le meyer.  Si ou krwar ki Sesel i ‘Pli gran ki tou, e menm Pli gran ki ou, silvouple fer sa ki byen.  Donn Sesel en sans pour rekonmanse.  Kot linite, disiplin, valer moral, devosyon, travay dir i a souliny nou sikse koman en Nasyon beni.  Si nou pe demann li pou fer sa pa onorer, se pa akoz nou pa apresye li koman en Seselwa.  O kontrer nou senserman kontan e apresye li koman en frer.

E sa se le kontrer ki Onorab Ghislain ti dir.  LDS i fran – kot i mal, nou dir i mal.  Nou pa koz deryer.  E si sa ki zot failure, set akoz zot per e kontan kasyet realite.  E zot swa aste dimoun, swa viktimiz dimoun ki napa menm krwayans ek zot.  E sey pez problenm ki souvandfwa i pet an fler e okazyonn bokou lenkonvenyans.  E atraver sa Mosyon, nou pe osi protez li pour li kapab enjoy fri son travay.  Pli ki i pou reste, pli i pou kree plis tansyon pour li e son bann rival dan son menm parti ki in divorse avek, menm son siporter.

Mon panse ki i devret pe mazin seryezman lo la.  En loportinite degize ki i kapab sov son loner koman en frer ki’n servi Sesel pour tou sa letan.  Mon panse ki i ti ava osi en bon loportinite pour li resign pour ki apre ki in resign, al fer en pti kour lo ki mannyer petet i kapab detann son lekor.  Menm al aprann koman i zwe sitar, vi ki mon ti vwar ki i  ti krwar i ti annan gran lentere ler i ti laba dan l’Inde avek sa lenstriman.

Ler ou ekout serten MNA Parti Lepep koze lo dizourd sa Lasanble, mon pa konvenki ki zot senser.  Ou menm santi lafreyer dan zot parol.  Menm lenpresyon lo zot figir i montre lapert e lenkyetid.  E la mon lans en lapel avek Onorab Ghislain e Onorab Ernesta, pou anmenn en Mosyon pour nou Dizourd Lasanble.  E nou, nou pare.  Zot konnen avek en disolisyon Lasanble Nasyonal, bokou zot pa pou ariv ankor dan sa sez kot zot ete.

 

(Interruption)

 

HON FRANCOIS ADELAIDE

Konmsi – konmsi zot panse ki atraver Msye Faure, ler i koz lo li i kapab dizourd Lasanble, e MNA  Lepep ki pe koz lo dizourd Lasanble, on dire ki zot krwar zot pou bat latet LDS.  E zot krwar zot pou bat nou dan changing room.  Zot panse zot pou bat nou ek koze e nou pa pou sorti dan changing room pour vin compete ek zot.  Malerezman, nou dan LDS, nou pa ganny bate dan changing room – nou konn nou lafors.  Bring it on Mr Faure!  Boul i dan ou kare.  Mannyer oule zwe nou pare.  Me sa ki nou dir, nou pa oule ki ou ariv 2020 dan sa letan dirize ki ou pe fer.  Cette fois-ci nou asir nou kou e nou pou ganny laviktwar.  Swa dizourd sa Lasanble o pli vit posib ou menm, swa donn nou detrwa Manm lo lot kote latab, e nou ava ganny nou 2 tyer e nou ava dizourd sa Lasanble.

Mr Speaker, parey Onorab De Commarmond ti dir, byen vantar, ‘’Election you want, election you will get!’’  Mwan mon ofisyelman lans kanpanny pou demann Danny Faure pour demisyonen dan Baie Lazare !  E nou reste angaze ziska ler nou ganny en nouvo eleksyon – swa Lezislatif, swa Prezidansyel.  Mr Speaker, pour terminen, mon ti a kontan quote en pti parol – en ansyen Minis ti al vizit son ser.  Laba i ti zwenn son pti nyes.  Son pti nyes ti dir li, tantin mon’n ganny mwan 7 sat.  Ladan 6 i Parti Lepep, zis enn ki LDS.  Son 7 zour apre, ler tantin ti retournen, son fiy ti dir li – tantin keksoz in sanze. La 6 sat in vin LDS, zis enn ki ankor Parti Lepep.  Savedir, li i ti pe servi sa terminolozi ki zot lizye in ouver.

Premye kou enn lizye ti’n ouver e la safwasi 6 ki lizye in ouver.  E Seselwa, lizye in ouver.  Plis ki zanmen! Mon fyer ki Seselwa alafendefen pe deside pran zot desten dan zot lanmen.  Pa i pou gou ler tou Seselwa pou konn son vre valer, son vre drwa e devwar dan nou pei.  Kot politik bat latet i ava arete e politik konstriktiv i ava ganny re-etablir.  Kot Seselwa i a konn son vre valer koman en nasyon, non pa ganny aste pour en fridge, en cooker, ouswa en flatscreen.  Seselwa i ava ganny ranplase dan son prop pei, me i ava ganny loportinite pour li devlope e met son servis a laporte son pei.  Kot moralite i ava la baz tou sikse e nou Konstitisyon i ava vin sa dezyenm liv – sa dezyenm labib kotidyenn.  E nou tou aotvwa, tou Seselwa a ot vwar, i a kriy – Finis Coronat Opus!   Avek LDS nou pou arive!  Plito tar ki zanmen!  Mr Speaker, mwan lo mon kote, mon dir – Danny OUT! pour prosperite Sesel. LDS Sesel!  ‘’Lord Deliver Seychelles! ‘’ Mersi Mr Speaker.

 

(APPLAUSE)

 

(Interruption)

 

 

MR SPEAKER

Non.  Non.  Non, non, non, non, non, non, non, non.  Order!  Order!  Order!  Nou tou dan nou pti lapriyer nou demann Bondye pou delivre nou par ler.  Ok.  I pa heresy sa.  Ok?  Mon a donn laparol Onorab Valmont

 

(Interruption)

 

MR SPEAKER

Order!

 

HON JUDE VALMONT

Mersi.  Bonn apre midi.  Mersi Mr Speaker.  Bonn apre midi tou koleg Onorab.  Bonn apre midi tou manm piblik ki pe swiv nou.  Mr Speaker, permet mwan pou komans mon lentervansyon par en sitasyon biblik, sorti dan Luke, sapit 6, verse 43 – ‘’Mefye zot bann fo profet.  Zot in vin kot ou degize dan lapo mouton me anndan, zot en bann loulou feros.  Zot ava ganny rekonnet par zot fri.  Ou pa rekolte rezen lo pye pikan, ni fig lo pye ros.  Tou pye fri i aport bon fri.  Tandis ki en move pye fri i prodwi move fri.  En bon pye fri pa zanmen aport move fri.  E move pye fri pa zanmen donn ou on fri.  Tou pye dibwa ki aport bon fri – ki pa aport bon fri Mr Speaker, i ganny zete dan dife.  Alor, zot ava rekonnet bann fo profet par zot FRI !’’

Mosyon Mr Speaker ki devan nou Lasanble, i kapab ganny rezourd dan fason pli senp posib.  Bann Onorab oparavan lot kote latab in dir, anmenn en Mosyon pour nou Dizourd sa Lasanble.  An vi ki zot mazorite, zot pa bezwen esper 3 mwan.  Mwan mon pou vot pour si zot ti dizourd sa Lasanble.  Alor anmennen!  Bring it on!

 

(APPLAUSE)

 

HON JUDE VALMONT

Mr Speaker, mon pa pou al sit bann endikater ekonomik, ni sit statistik ki montre progre dan sekter sosyal, eksetera, pour montre ki nou Gouvernman anba leadership Prezidan Faure pe travay.  Mon pa ni pou bezwen al zistifye avek Pep Seselwa akoz  Sesel fek ganny klase premye dan L’Afrique pour devlopman imen baze lo lakonplisman Nasyonal.  Me mon pou pas mon mesaz an repons sa Mosyon li menm.

Mr Speaker alors, si nou pa oule dizourd nou Lasanble, annou swazir pour nou kontinyen travay.  Parey Prezidan in dir – in demann nou tou Seselwa pou fer, les Danny travay silvouple!

Mr Speaker, nou ti ganny elekte pour delivre pour Pep Seselwa.  Nou travay i sipoze annan en rezilta direk lo dimoun ki’n met nou dan sa Lasanble.  Nou pa sipoze zis fer en ta tapaz e apre blanm Egzekitiv, blanm tou dimoun.  Me nou lekor nou pa blanmen.

Blanmen i fasil, sirtou ler nou konnen ki sa ki nou pe blanmen pa kapab reponn nou deswit.  Ouswa koriz nou mansonz e lakizasyon.  Nou koman bann Manm Lasanble Nasyonal Sesel, nou annan en devwar e responsabilite pou donn en koudmen fer desann pri lavi.

Donn Gouvernman koudmen pou kontiny devlopman nou pei.  Nou annan en responsabilite pou fer sa diferans dan lavi Seselwa.  E non, pa pou zis vin rod nou prop gen ouswa nou prop lanbisyon politik.

Mr Speaker, Lasanble pa en laplenn foutbol, ni en ring kot nou bokse ek nou oponan.  Me en Lenstitisyon enportan e tre serye, kot nou parti ti etabli.

O kour en kantite lannen, sa Lenstitisyon in enn ki’n ganny en stati e repitasyon ziska menm aletranze.  Se nou ki’n pran la relev e merit gard sa stati.  Me si nou kontinyen fer sa  ki nou pe fer, larogans, dominer, lager ek nou oponan politik, nou pou fer desann repitasyon dan sa Lasanble e nou pa pou kit nou mark dan listwar sa Sizyenm Lasanble.

Mr Speaker, ou kapab fer ou mye koman Speaker.  Me si sa rasanbleman ki la pa azir profesyonnel, olye zis fer politik, ou travay osi pour an ven.

E nou Lasanble pou zis koze e dir nou ki ti fer sa.  Kan an realite nou pa’n fer nanryen valab.  Deza serten desizyon ki sa Lasanble in pran, pa neseserman nou lo sa kote akoz zot ki an mazorite, parey zot kontan dir – zot ki la.  Ozordi pe anmenn rezilta ki pa favorab.

Par egzanp, ti en desizyon par Leaders politik pou met tou prizonnyen ansanm olye anmenn en high security prison.  E ler krim i arive dan prizon, nou taye nou demande ki sa ki ansarz prizon i demisyonen ouswa nou blanm Gouvernman, ki by the way nou form parti.

Nou ti ferm NDEA ki ti en network ki ti pe marse.  La drog pe kontinyen ronz nou sosyete plis ki zanmen.  Initil nou vin sant zistwar koripsyon par sa bann Irlandais.  Sa bann tapaz napa otan lefe ki si nou pa kriy sa bann Irlandais, lezot dimoun enplike e lezot koze pour piblik tande.  Mr Speaker, koman politisyen responsab, nou merit kapab respekte stabilite nou pei, respekte nou pep, respekte en Seselwa parey nou.  Nou pa kapab kan i fer nou plezir, ouswa akoz nou mood, nou oule eleksyon.

Eleksyon i anmenn en lot tandans – en lot latmosfer dan nou pei.  I pa en fancy fair ouswa en piknik.  E sirtou sa kalite latmosfer ki nou’n war ankor dan bann dernyen eleksyon, i anmenn bokou divizyon e bann mesaz ki ganny pase i afekte ziska nou zanmen dan lekol.

Sesel pa kontinyen koumsa Mr Speaker.  Nou pa ti abitye koumsa.  E nou koman politisyen nou bezwen get nou, si sa ki nou fer i legzanp pour lezot.  Nou napa zis en tit, me  nou annan en responsabilite osi.  E sa pep i kontribye pour pey nou pou desarz nou responsabilite.  Nou reste serviter lepep apre tou.

Mr Speaker, kwa ki pe al mal ki nou pe blanm Prezidan Faure?  Mwan personnelman mon pa krwar Prezidan Faure – mon krwar Prezidan Faure i viktim presyon lezot dimoun.  Lanmans pwalon i so!  Alor nou tir nou fristrasyon lo Prezidan Faure.  Selman Mr Speaker, nou mont State House, nou al bwar dite, nou al koz lezot pti koze.  Mr Speaker, Prezidan Faure i en dimoun senp, onnet, fran, toleran, ranpli ek pasyans.  Parey in dir, i respe kot i ete – la prezidans.  I respekte son bann adverser politik.  I krwar dan lape ek linite.  I aranze kot i war i mal.  I aksepte tor kot i fer fot.  I prezant leskiz kan i neseser.  I met Seselwa premye.  I ouver son laport pour tou Seselwa.  In sakrifye sa ki pli enportan pour li pou li kapab travay pour tou Seselwa.

Lekel la antre zot, ki pare pou sorti dan zot parti politik e aksepte pour zot ganny kritike par zot bann zanmi e siporter pour met sa pei premye?  I en rezilta ki dan Lopozisyon – i en realite Mr Speaker, ki dan Lopozisyon, zot partisip dan eleksyon e zot kontan politik pour zot ganny larzan.  Ensilte si zot oule, me bokou zot lavi in amelyore pandan sa 2an.  Mr Speaker, dezormen laverite i toultan ofans son met.

Prezidan Faure ti antre a latet Gouvernman avek 3 prensip nob.  Bonn gouvernans, latransparans e rann kont.  Konbyen nou ki pare pou debout devan medya an direk pare i fer?  Pour rann kont e azir transparan, menm lo size ki personnel, zot pou boycott  li e tir defo.  Me laverite i get Seselwa an fas.  Zot bann propagann e fake news nepli konfiz dimoun.

Mr Speaker, Prezidan pa servi televizyon pour li saboule ouswa dir nenport kwa ki kapab apre pran responsabilite pour sa ki – pa pran responsabilite pour sa ki in dir.  Si i en pratik ki pas dan nou Lasanble pou akize, imilye, name and shame  konmsi nou en bann sen, konmsi nou parfwa – dikton i dir, ler ou montre ledwa ou kanmarad, vey byen sa 4 ki vir lo ou.

Mr Speaker, lekel ki sen la anndan?  Dan labib, Jean, sapit 8, i enstri nou – ‘’sa enn parmi zot ki pa’n zanmen fer pese, anvoy premye ros lo li.  Lo sa later, tou zonm i peser.  E i en kondisyon zonm ki nou zonm pa parfe.’’  Si i annan okenn parmi nou isi anndan ki konsider nou lekor koman zonm parfe, nou devret imedyatman rekonsidere.  Tou zonm i ranpli avek defo e febles, me nou viv dan en monn kot zonm i avans devan lo konpasyon.  E non pa lo laenn, vanzans ek nwizans.

Mwan, mon war sa Mosyon koman zis en mwayen pour LDS servi Lasanble avek SBC, fer politik bonmarse.  E non i pa en fe ki Leader Lopozisyon i annan lamazorite dimoun deryer li.  I napa ni menm lamazorite dimoun dan Lopozisyon deryer li Mr Speaker.  Nou pe kree lenkonvenyans e lenkyetid ki pa neseser lo nou bann dimoun aze.  Yer menm nou’n koze nou’n dir annou tret zot byen, annou met zot an konfor.  Dimoun aze – nou bann dimoun latet i fatige pe mazinen eleksyon toulezour.

Zot annan lafreyer antann politisyen koz parey serten nou i koze dan sa Lasanble Mr Speaker.  Zot per, zot per!  Yer kantite dimoun in demann mwan – zot Onorab pou annan eleksyon?  Mon dir zot, Mr Speaker – eleksyon prezidansyel?  Mon pa war mwan.  Ni menm Lasanble – LDS pa pou zanmen debout la pou dir – anmenn en Mosyon pour nou dizourd Lasanble, zanmen zot pou anmennen!  Annou Mr Speaker – annou pa donn lenpresyon ki nou annan pouvwar ouswa Manda pou fer nenport kwa dan sa Lasanble.  I annan keksoz ki ganny dir ki fer lezot dimoun ziz nou moral e valer ki nou krwar ladan.  Konmdi koze, pa akoz nou konn dir ki nou kapab e merit dir.  Nou merit koman adilt, e parmi nou i annan paran, nou merit reflesir avan nou koze – koz pe gard pe silvouple!

Mr Speaker, nou pep pa ekspekte mirak akoz zot konnen ki rezilta eleksyon 2016, ki’n met nou prezidan e menm Lasanble dan sa pozisyon, zot pe resanti en laginy.  Zot blanm tou sa ki mal ki arive lo sa rezilta 15 lo 10.  Sa rezilta i vin en malediksyon, Mr Speaker.

Me bokou, si pa mazorite nou, pe dir gran mersi Prezidan Faure ki lo sa sez State House.  Dir sa ki nou oule, napa en lot pou fer sa ki i pe fer!  i pran lentelizans – i pran en dimoun ki konn politik, ki konn son pei, ki konn sa pep ki i viv avek pour desarz sa responsabilite.  Se sa ki diferansye Lopozisyon avek Parti Lepep.  I ganny enkilke dan nou bann dirizan pour annan konpasyon, pour met dimoun premye, pour pa ekspekte an retour, e pour onnet.  Initil ki lot kote latab i kontinyen kriy for e fer menm retorik ouswa lakizasyon kont nou bann dimoun.  Zot zis koze, zot zis fer tapaz, zot zis donn en lenpresyon.

En dimoun pa kapab vin Prezidan sa pti pei Sesel Mr Speaker, si i pa toleran e annan rankin dan leker.  Gouvernman pe fer son mye e nou pe war rezilta.  Kot i annan defayans parfwa, parey mon’n dir, koze par lobstak ki nou menm – nou menm nou mete, Prezidan i a pe aranze.  Seselwa, zabitan Pointe Larue, nou Prezidan, Msye Danny Faure in koze e annou ekout li.  Annou al travay, annou kontiny nou lavi.  Annou pa les propagann, rimer, kalonmni e tapaz bann politisyen dan Lopozisyon fer nou per.

Nou pli determinen, parey Prezidan, pour ini nou pep e fer avanse nou zoli pei.  Mwan ek zabitan Pointe Larue – si zot in dir Danny OUT, mon dir Danny in.  E nou, nou dir zot, anmenn zot Mosyon, nou a vot pour.  Zot pa a bezwen esper 3 mwan pou ganny 3 MNA pour vote.  Mwan mon’n dir zot mon pou vote pour zot dizourd Lasanble.  Alor, mon poz sa la e mon dir zot ankor, Les Danny travay silvouple.  Mersi.

 

(APPLAUSE)

 

MR SPEAKER

Mersi.  Mersi.  Yes.  Onorab Ramkalawan.

 

HON WAVEL RAMKALAWAN

Point of order! ‘Letan kapris!’  Mr Speaker, Mr Speaker.

 

(Interruption)

 

MR SPEAKER

Order!

 

HON WAVEL RAMKALAWAN

Mr Speaker, mon ti ava kontan si ou ti ava dir nou – petet ou koman Speaker, parski mon en pe etonnen la.  I resanble ki poudir dan sa Lasanble, Manm i annan diferan pouvwar.  Parski i resanble ki poudir i annan zis serten Manm, dapre parol ki’n ganny dir, konmsi zis serten Manm ki kapab anmenn serten kalite Mosyon.  Mon ti ava kontan ou ti ava klarifye nou lo la, ki poudir dan nou Standing Orders, spesyalman kot Mosyon i konsernen, nenport Manm i kapab anmenn sa Mosyon.  Nou tou nou annan pouvwar.  Parski i kapab pe donn en fo lenpresyon laba deor ki poudir akoz LDS ki annan mazorite dan Lasanble, zis LDS i ki kapab anmenn en Mosyon pou dizourd Lasanble.  Sa ki mon pwen e petet ti a va kapab donn en leklersisman.  Mersi bokou.

 

MR SPEAKER

Bon, Onorab ou’n fini koze, i pe klarifye – i pe demann klarifikasyon.

 

 

(Interruption)

 

MR SPEAKER

En moman!  En moman!  En moman!  En moman!  Order!  Order!  Order!  Order!  Ok.

Onorab Ramkalawan in demann The Chair en klarifikasyon.  E mwan ki dan chair, mwan ki pou reponn, ok?  I annan – dan bann deliberasyon, bann entervansyon, i annan bann parol ki sorti ki kapab donn bann fo lenpresyon manm piblik deor.

Par egzanp, kot nou pe ensilte kanmarad, nou pe lager – napa lager ki pase dan Lasanble Nasyonal.  Se en landrwa kot i annan 2 parti politik, e tou le 2 parti politik i fer sorti zot pwennvi.  E zot defann zot Polisi.  Zot atak Polisi lot kote e zot fer pase sa ki pour zot.

Se sa landrwa, e i sa main  landrwa dan Sesel, dan nou pti pei kot politik i ganny fer.  Se sa rezon ki ler mwan mon’n pran speakership, mon’n dir dan Sekretarya napa politik.  Dan Lasanble Nasyonal i en sel landrwa ki politik i ganny fer, se dan Chamber.  Me napa lager.

Ler nou pe sorti la, nou pe al pran break, Manm pe al dan Member’s Lounge, pe al pran en dite ansanm, pe zwenn kanmarad deor, dan bann Committee kot i bann Komite bi-partizan, kot bann Manm i fer bann travay ekselan.  Par egzanp, nou vwar FPAC, kot i annan travay bi-partizan ki anmenn bann rezilta pour nou Lasanble e pour nou pei.

Alor, zis fer en pti pe atansyon.  Mon konnen petet dan zot leksitasyon, zot servi en pti pe sa bann mo.  Me petet i kapab anvoy move sinyal deor.  Menm i annan en pti pe sa laspe xenophobia, ki pe fannen en pti pe deor.  E ankor sa nou bezwen veye, petet atraver bann lekspresyon ki nou servi.  Ok?

Wi, dan nou Standing Orders nenport Manm i kapab anmenn Mosyon as long ki sa Mosyon ek son wording i pas tes.  Nenport Manm i kapab anmenn Mosyon.  Nenport Manm i kapab anmenn en Mosyon pou dizourd Lasanble.  Me i konnen poudir i bezwen – i konnen ki kantite sipor i pou bezwen pour son Mosyon pase.

En Manm i kapab anmenn en Mosyon pou dizourd Lasanble, menm si i konnen i pa pou ganny sipor.  Me i prezant son Mosyon – i prezant son Mosyon e i ganny drwa koze.  Ok.  So, vwala – vwala en pti pe, annou – an menm tan parey toultan mon dir, annou servi nou bann entervansyon pour nou kapab edik en pti pe nou bann dimoun deor.

Me Onorab Valmont mon krwar ou’n pas en bon pe letan dan ou Labib sa wikenn.  Akoz ou’n fer en bon pe – ou’n donn nou en bon pe bann lekspresyon biblik.  Ok.

Bon, avek sa nou ava pran en Break.  Nou ava retournen 4.10 pour kontinyasyon.

 

(BREAK)

 

MR SPEAKER

Bon, nou ava kontinyen nou travay.  Prosennman lo lalis, mon annan Onorab Bernard Georges.

 

HON BERNARD GEORGES

Mersi Mr Speaker.  Mr Speaker, i paret mwan, an ekoutan enn de Manm apre midi, nou perdi en pti pe lespri sa Mosyon devan nou.  E avek ou permisyon, mon ti ava kontan konmans mon lentervansyon apre midi avek en pti lalis sa ki mwan mon war sa Mosyon pa pe demande.  Mon krwar sa i ava ed nou kekfwa, dan nou refleksyon lo sa ki sa Mosyon pe aktyelman rode.

Sa Mosyon pa demann avek Prezidan Faure pour li sorti State House e les Wavel Ramkalawan antre koman Prezidan.  Pa sa ki i pe demande.  Sa Mosyon pa pe al kont Konstitisyon.  E mon konnen sa pwen pou ganny resorti pli tar.  I kler, nou tou nou konnen ki Konstitisyon pa permet en – nou Lasanble dan en rezim prezidansyel parey nou annan isi, pour Lasanble vot pour ki Prezidan i ale.

Sa i pa en Mosyon ‘’no confidence’’ parey i kapab annan dan bann rezim parlmanter, kot si Gouvernman i perdi en Mosyon non-konfyans, i bezwen demisyonen.  E sa Mosyon i pa en Mosyon personnel, ki Leader Lopozisyon in anmennen kont Prezidan akoz i pa kontan Prezidan e alor i anvi Prezidan i ale.

Mon krwar nou bezwen kler ki sa Mosyon pa rod sa bann keksoz ki mon fek mansyonnen.  I a pe rode akoz i pa dan lentere okenn dimoun pou fer parey ti ganny par lepase.  E taler mon ava retourn lo la pou dir kile, les Jj travay.  Oubyen sa ki pa kontan, kite ale.  Se pa sa bi sa Mosyon ki devan nou apre midi.  Sa Mosyon, dan mon lenterpretasyon, i en lodit, i en sa ki nou apel an Anglais, en mid-term assessment.  En lodit lo travay ki L’Egzekitiv in fer.  E sa Mosyon i swazir sa mo L’Egzekitiv dan son premye laliny.  I pa pe target  Prezidan, i pe target L’Egzekitiv.  Natirelman zot ava dir mwan, Prezidan ki ansarz L’Egzekitiv, alor i pe ganny target.  E son konklizyon Mosyon pe demann Prezidan, demisyonen.  Me nou ava vwar akoz ki Mosyon in ganny frame dan sa fason.

Sa ki sa Mosyon pe fer, se ki dan lentere Nasyonal, pe demann avek Lezislatif e Lepep Seselwa, pas en zizman lo ki mannyer pei pe ganny anmennen anba direksyon Msye Faure – ansarz L’Egzekitiv.  E si, parey nou lo sa kote latab nou dir, sa zizman i en zizman ki defayan, demann avek Msye Faure, fer en sel keksoz ki rezonnab – demisyonen e les nouvo eleksyon ganny fer.  Se tou ki sa Mosyon pe demande Mr Speaker.  Sa Mosyon pa pe al dan okenn sa bann polémique ki mon’n tande apre midi dan en lentervansyon – en lentervansyon sirtou.

E les mon a dir zot ki o komansman manda Prezidan Faure, mwan mon ti enn sa bann dimoun ki ti dir – don nou parti, mon pa krwar ki nou devret les li fer menm en zour koman Prezidan.  Akoz lafason donk i ti’n vin Prezidan.  Mwan, mon ti parmi sa bann ki ti dir, e mon’n dir dan mon premye lentervansyon dan sa Lasanble, ki i en Prezidan enterimer, e i devret reste l pour detrwa semenn e call eleksyon akoz sa pei ti bezwen eleksyon par lafason ki sa 2 dernyen eleksyon in deroule.  E par lafason ki Prezidan Michel in demisyonen.

E zot ava rapel ki dan bann premye lentervansyon, mon ti menm refize apel Msye Faure Prezidan.  E dan sak entervansyon, mon ti apel li Msye Faure.  Me se Onorab Leader Lopozisyon ki ti dir – non.  Non, non, non. Nou bezwen en pe letan.  Nou bezwen les li pran kontrol pei akoz nou pa kapab fer li nanryen – anba Konstitisyon, mannyer in arive, in any event i Prezidan.  Ki nou kontan, ki nou pa kontan, nou pa kapab fer nanryen.  E annou les pei stabilize akoz sa bann dernyen levennman ki ti ‘n ganny – bann dernyen eleksyon 2015 ek 2016.

Nou ti bezwen en peryod kalm ek en peryod linite dan lentere Nasyonal avan antre dan ankor en lager partizan parey nou ti’n fek sorti ladan an 2015 ek 2016.  I ti annan rezon Leader Lopozisyon.  E set egzakteman sa ki nou’n war.  E dan nou kote, parey nou’n dir, e mwan, mon lo rikord dan interview dan zournal TODAY, ki’n anmenn mwan ganny en gran dispit avek ou predeseser Mr Speaker, ki pa ti kontan ditou sa ki mon ti dir.  E mon ti dir apepre 1an pase, i pa ankor ler pour nou demann eleksyon prezidansyel.  Pei i bezwen pas dan en serten peryod, pour ki kalm, linite Nasyonal i retourn dan nou pei.  Apre sa, nou a fer en assessment nou ava gete kan eski i pour byen pou anmenn en eleksyon, ou pour antre dan en nouvo kanpanny eleksyon.

E lo sa – lo sa pwen nou bezwen dir ki pei in mars tre byen.  Pa akoz Prezidan Faure selman in anmenn en travay kot in met pei avan li menm, avan son parti.  Me osi e sirtou akoz leadership Lopozisyon dan sa Lasanble Nasyonal an partikilye.  E Lasanble Nasyonal ansanm in dakor pour travay dan en fason koabitasyon pandan sa 2 dernyen lannen.  E donk Mr Speaker, set avek s pti istorik ki nou bezwen regard sa Mosyon ki devan nou la ozordi.

Bi en parti politik, annou pa bliye, e annou pa sey anbet nou lekor.  Bi en parti politik, depi zour son kreasyon, se pour sey ariv o pouvwar dan son pei akoz i krwar ki son nide, son Manifesto, son bann prensip i ava pli bon pour ladministrasyon sa pei ki sa parti ki o pouvwar.  Sa nou bezwen aksepte o komansman.  Nou pa kapab fer krwar ki nou parti i en parti ki in ganny kree pour Leader Lopozisyon a vitam aeternam.    E ki nou byen satisfe ki nou dan Lopozisyon.  Non Mr Speaker, nou pa kapab anbet okenn dimoun.  E sirtou en Lopozisyon, ler en parti politik in ariv dan pozisyon Lopozisyon dan en pei.  E sirtou ler in ariv dan en pozisyon Lopozisyon, tel parey nou, nou ete ozordi, kot nou annan lamazorite Lezislatif, dot an plis, sa parti i pou aspire pour li vin op pouvwar.

E dezyenmman, annou aksepte – annou pa sey anbet lekor okenn dimoun.  Sak politisyen, nou tou isi, sans exception, e Prezidan – sak politisyen i annan en ego.  Sak fwa nou stand dan en eleksyon, nou ale nou dir ek nou bann dimoun ki pou vot pour nou – nou, nou pli bon ki nou oponan.  I bezwen annan sa i ego.  Ou bezwen anvi gannyen.  Ou pa al dan politik pour ou perdi.  Personn pa al dan politik pour li perdi.  Ou al dan politik pour ou gannyen.  Ou al dan politik akoz ou krwar ki ou kapab fer pli byen – swa pour ou distrik, swa pour ou rezyon, swa pour ou pei, ki sa enn ki la.

Alor, dan sa konteks Mr Speaker, mon ti a kontan regard en pti pe ki mannyer nou pei ozordi i diferan avek mannyer i ti devret – mannyer i ti ete, pour nou regard en pe akoz Leader Lopozisyon in anmenn sa Mosyon.  E akoz sa Mosyon i annan merit.

Nou’n sorti dan en sistenm – e mon kontan dir ki nou’n sorti dan en sistenm kot Prezidan avek Leta ki menm keksoz.  E sa nou konnen ki dan dezyenm repiblik, Prezidan avek Sesel ti one and the same.  E nou ti ganny rapel sa toulezour.  Annefe mon fek pas en semenn an France semenn pase.  E mon’n vizit La Vallée Versaille, kot Louis XIV ti dir sa bann – ti dir sa gran parol – L’Etat c’est moi.  The State – Leta i mwan, napa okenn diferans.

E nou ti dan sa sityasyon en lepok.  E yer, ansanm avek detrwa nou bann koleg isi dan Lasanble, nou ti asiste lazournen bann dimoun aze State House.  E mwan, mon ti rapel, e mon ti frape par lefet ki a en lepok, sa zournen i ti enn kot Prezidan ti swazir pour li fer en pe politik e donn en pti larzan an plis bann vyeyar.  E fer krwar ki Leta avek li – setadir sa ki li i ti pe donnen, i ti pe donn sa akoz i ti son bon ker.  En pti pe parey lera – le Roi Louis XIV.

Nou’n sorti dan sistenm – ou’n perdi eleksyon, prezan esper 5an.  Asize, espere – dan 5an ou a vin lager ankor en kou.  Tel parey sa menm Prezidan ti dir avek sa menm Leader Lopozisyon ki isi dan sa Lasanble ozordi.

Ozordi nou’n ariv en sistenm Mr Speaker, kot sa dimoun ki vin Prezidan pei i pa l’incarnation l’Etat.  I en administrater.  E si ozordi sa Mosyon in ganny anmennen, se pou dir ki mannyer pei pe ganny administre ozordi, i pa meyer fason ki pei i devret ganny administre.  E  se pour sa rezon ki i devret annan en eleksyon pour ki Lepep Seselwa ki war sa bann keksoz.  Pa nou ki pe dir nou zot ozordi, zot ki’n vin dir nou sa bann keksoz.  Pour zot annan en sans pli vit ki posib si zot anvi.  Akoz nou, nou pa kapab kontrol eleksyon nou.  Nou pa kapab konnen ki mannyer en dimoun pou vote.

Bring it on Onorab Valmont! Wi, nou kapab bring it on.  Me ni ou ni mwan nou pa konnen ki Lepep Seselwa pou fer ler nou bring it on.  Me sa ki nou pe demande se, eski nou devret esper ankor lafen manda Prezidan Faure, parey li in demande dan son Conférence la Presse lotrozour, avan en lot le séance politik?  Oubyen eski pei in ariv dan en sityasyon kot sa i devret ganny fer la o pli vit posib?

Ou vwar Mr Speaker, dan en pei, nou kapab annan en swa ant en Ladministrasyon bon lentansyon avek en Ladministrasyon efektif.  Nou pa kapab annan sa swa.  Nou pa kapab dir – be pardonn en Gouvernman akoz son ladministrasyon pa osi efektif ki i devret ete akoz son lentansyon i bon.  Nou pa kapab dir – les en dimoun la akoz i pe travay dan lentere nasyonal, malgre ki i annan defayans dan son ladministrasyon – non!  Nou pa kapab – sa set en false choice.  E set en swa ki fo!  Nou pa devret annan sa swa devan nou.  Nou devret annan tou le 2.

Nou devret annan en Ladministrasyon ki for, e ki efektif, e ki pe delivre pour lepep Seselwa.  E an menm tan, en ladministrasyon ki pe gouvern dan en fason bon lentansyon, transparans, bonn gouvernans, ek tou lezot.  E se la kot mon krwar, Mr Speaker, i annan en defayans dan nou pei ozordi.  E parey mon dir, sa napa nanryen pou fer avek personnalite.

Mon pa krwar ki annan okenn dimoun ki pou dir ki Prezidan Faure i en move dimoun.  Oubyen ki pou rekonnet kil o nivo bon lentansyon, ki i napa bon lentansyon.  Mon krwar kot son defayans i vini se ki, son Gouvernman, son L’Egzekitiv, pa efektif.  E se li, malerezman ki ansarz L’Egzekitiv.

E se pour sa rezon ki, parey mon ti’n mansyonnen taler, sa Mosyon i komans avek L’Egzekitiv, me apre i montre lo ledwa lo Prezidan e i demann Prezidan pou fer en keksoz.  Akoz ki mannyer si non, nou ti pou fer en lodit?  Ki nou ti pou demande a sa moman?  Ki Lasanble i dezapwente ki Gouvernman pa pe fonksyonn byen?  Ouswa ki Lasanble pe demann avek Gouvernman, repran en pe souf e delivre plis?  Non – nou en Lopozisyon nou.  Nou bezwen demann sa keksoz ki pou fer sans.  E sa keksoz ki pou fer sans se demann avek sa dimoun ki la, akoz ou travay i pa a la oter, ou bezwen ale.  E les Seselwa fer en swa pour – si i anvi, en tim ki pou anmenn plis lefikasite dan son travay.

Mon pa pou ozordi Mr Speaker, akoz mon konnen bann ki’n koz avan mwan in donn en lalis bann keksoz ki defayan dan nou pei.  E mon konnen ki Prezidan li menm li i konnen ki i annan serten keksoz ki defayan dan nou pei.  Me mon ava mansyonn zis enn/de keksoz ki mon pa war akoz nou pa ankor kapab deal avek.  Akoz ozordi, ki nou ankor still annan en Lavenir le 5 Zen ek en Lavenir Francis Rachel?  Eksplik mwan akoz sa 2 pti keksoz nou pa’n kapab deal avek?

Akoz ki nou annan en komite ki’n ganny etabli pour regard bann zafer later, e ki still an pli tar pa ankor kapab fonksyonnen?

Akoz ki La Misère – Onorab Waven William, ek mwan, ek ou menm Mr Speaker, nou koz lo la preski tou le semenn – akoz ki an pli tar, ou 18 mwan pli tar nou pa ankor kapab rezourd problenm La Misère?

Akoz ki problenm drog ozordi dan mon distrik, napa okenn sanzman?  Akoz ki ou pa war gard?  Akoz ki bis 6.30

ki mont Les Mamelles nepli monte?  Akoz?  SPTC pa kapab met en dimoun abor pou fer sir ki napa okenn vandalizm, eksetera.  E zot fer bann dimoun Les Mamelles soufer.  Akoz Mr Speaker, ki bann Bills ki vin devan nou Lasanble i vin avek otan fot?  E ki nou pa’n kapab, 1an apre ki nou’n fer sorti nou Rapor lannen pase, nou pa’n war okenn amelyorasyon?  O kontrer nou’n war en deteryorasyon.  Akoz ki 50 paspor Seselwa in ganny donnen?  Non, 50 – en senkantenn?  Akoz nou pe koz tinel, ler trafik i ankor bloke dan bomaten ki nou bezwen anmenn en Mosyon devan sa Lasanble pou dir – pou demann avek Gouvernman, pou sipliy avek Gouvernman, fer en keksoz pou deblok sa kalite keksoz.

E Mr Speaker, mwan mon krwar ki responsabilite i bezwen reste avek Prezidan.  Malgre ki i en bon boug.  E malgre ki i annan bon lentansyon e i annan zoli parol.  Me ki mannyer mon pou blanm en dimoun akoz en dokiman ki mon anmenn Biro Lanrezistreman i pran letan – i pran tro letan pour ganny anrezistre?  Oubyen parey mon’n war lotrozour, en envestiser ki vin isi Sesel e  ki anvi en permi, i bezwen esper plizyer semenn pour ki bann background checks i ganny fer kont li.  Malgre ki bann dimoun ki travay dan sa bann Departman – e konpran mwan byen, se bann dimoun ekstraordiner.  E mwan si mon annan en keksoz pou dir ozordi se ki mannyer mon war ki bann travayer dan bann Departman, se bann dimoun avek en bon leker.  E ki anvi fer travay marse, me ki still pa pe marse.

Ki mannyer sa i arive?  Ler pou koz lo sa envestiser, mon dir avek zot – mon dir avek zot, mon dir, be akfer esper 6 semenn, ler Maurice nou kapab fer sa dan 24 erdtan?  Zot dir mwan wi, wi, nou konnen Maurice i kapab fer sa dan 24 erdtan.  Me zot annan larzan, zot kapab fer li.  Mon dir, be demande!  Zot vin devan Lasanble tou-le-z-an, demande si zot kapab – si zot krwar ki zot bezwen pou fer nou pei vin pli performan.  Demande – nou annan bann striktir pou fer tou keksoz lo televizyon konmela.  Personn pa kapab dir ki zot pa konnen ki si sa ki zot bezwen fer.

E alor Mr Speaker, tousala  i montre mwan ki tou keksoz dan nou pei i annan potansyel pour li marse.  E i annan potansyel pour li mars byen.  E dan serten ka, i mars byen.  Me ler ou regard tou sa panoplie konplent – e la taler mon’n ekout Onorab Adelaide, zis dab Baie Lazare li menm li, mon latet in fermal avek son lalis konplent.  Ki mannyer ki nou kapab dir ki nou pei, malgre tou sa bann bon lentansyon, malgre sa bon feeling ki nou annan – akoz i annan en bon feeling dan nou pei.  Nou annan en feeling linite, nou annan en feeling travay ansanm.  Malgre sa, ki mannyer nou kapab dir avek nou lekor ki nou ladministrasyon – kantmenm i pa efektif, nou devret esper ankor 2an.

E se sa, mon krwar bi sa Mosyon ki Onorab Leader Lopozisyon in anmennen.  E se pour sa rezon ki mwan, mon’n deside pran laparol e koz dan sa fason.  Akoz mon krwar ki si nou analiz sa Mosyon dan sa fason, e si nou kler avek nou lekor, e nou pa anbet nou lekor, e ki nou regarde, ki nou war ki bann keksoz ki esansyel dan nou pei pa pe marse, sa sel keksoz ki nou bezwen fer se, demann avek Gouvernman – be demisyonen e les en lot Gouvernman vin devan.  Si Lepep Seselwa i krwar ki se sa ki nou bezwen.

Mon fek ganny rapel Mr Speaker, sa ki mon ti dir isi dan 2 semenn pase.  Ki si ou en Seselwa – enn ou paran i Seselwa e ou’n ne an deor Sesel avan 1979, le 5 Zen 1979, fodre ou pas en tes pour ou vin Seselwa.  Mannyer ou eksplik sa?  Ki mannyer nou eksplik sa bann birokrasi ki ankor pe anmar lipye tro bokou nou bann dimoun ozordi?  E ki pe fer ki i annan fristrasyon dan pei.

E mon krwar se fristrasyon ki’n anmenn bann dimoun deor, demann avek Leader Lopozisyon – be anmenn sa Mosyon, e enn fwa pour tou annou demann avek Gouvernman pou fer en keksoz konkret.  E sa keksoz konkret – e nou bezwen dir akoz nou politisyen, e nou tou nou annan en laspirasyon pour al pli devan.

E nou lo sa kote latab, nou aspire ariv State House dan prosen séance, alor Mr Speaker, nou bezwen demann ozordi avek Prezidan Faure, parey Mosyon Onorab Leader Lopozisyon pe demann li – demisyonen dan lentere Nasyonal.  E Lepep Seselwa ava kapab swazir lekel ki pou anmenn li dan sa bann lannen ki pe vini.  Mersi Mr Speaker.

 

MR SPEAKER

Mersi Onorab Georges.  Mon ava pas laparol avek Onorab Noline Sophola.

 

HON NOLINE SOPHOLA

Mersi Mr Speaker.  Mr Speaker, Leader Lopozisyon in anmenn en Mosyon ki an realite i konsern zis li.  I napa nanryen pou fer avek Prezidan, ni okenn lezot dimoun.  Mon pa pe fer plis komanter lo sa sityasyon.  Mon les sa avek lepep Seselwa.

Mr Speaker, presizeman, Merkredi le 12 Septanm, sa Lasanble in pas en lazournen antye pour diskit lo lenportans Konstitisyon.  Pour konklir lazournen, tou Manm ti an faver ki tou dimoun san leksepsyon  i bezwen konn konteni Konstitisyon.  Me ozordi ankor, nou pe diskit lo en lot Mosyon ki fer nou retourn  dan Konstitisyon.  Si vreman sa ki nou dir  dan sa Lasanble, nou met li an pratik, Loter Mosyon ti pou konnen ki dan Konstitisyon i longman lo Prezidan.  Tou sa ki nou anvi konnen, sirtou kan e ki mannyer Prezidan i kapab demisyonen, ou ganny fer demisyonen, i trouve dan nou Konstitisyon.

Mr Speaker, dan en pei an zeneral, tou dimoun i diferan.  E sakenn i apresye keksoz dan son prop fason.  Sirtou si i dan son faver, ouswa i dan son benefis.  Si loter Mosyon koman en Manm Parlman, i pa apresye travay Prezidan, i annan tou drwa table en tel Mosyon.  Me i konnen ki Mosyon pa binding.  E ki i pa kapab enpoz son nide lo Prezidan e popilasyon Sesel an zeneral.  E parey mon ti dir dan mon lentervansyon lo Konstitisyon, menm si nou konn nou Konstitisyon, i annan nou k ioule servi li kan i dan nou faver.

Apre tou, sa Lopozisyon ki la, zanmen in aksepte.  E zanmen pou aksepte ki son konpetiter pe fer byen.  Se tou Seselwa i konnen.  Pa ti bezwen tel Mosyon pou konfirm sa.  Mr Speaker, akfer alor anmenn en tel Mosyon si Lopozisyon napa en lot azanda.  Kan Chairperson COGA in dir dan Lasanble dan son Rapor, ki menm si i annan bokou ki reste pou fer, i santi ki dan bann Minister, keksoz pe bouze e evolye dan en bon direksyon.

Menm Vandredi, 19 e Sanmdi 20 Septanm, menm Komite ti Praslin ek La Digue.  E menm remark ti ganny fer resorti ankor – keksoz pe bouze.  E mon pou dir, pe bouz devan bon direksyon.  Vre l’agenda Lopozisyon se ariv o pouvwar vitman.  E pour sa arive, zot pare pou war Prezidan fail e met Sesel otaz.  Depi ki Lopozisyon in ganny son mazorite dan Lasanble, i vre ki zot pe fer zot louvraz – checks and balances lo  L’Egzekitiv.  Me osi, zot tant pou dir ki napa progre ki’n ganny fer pandan sa dernyen 40an pour zot avans zot azanda personnel.  Tou sa ki annan lizye e lespri, pa pou zanmen krwar.

Mr Speaker, 2 semenn pase, kot en garaz zis an deor lavil, en zenn onm pe konplent ki Lasanble pe tro konsantre lo lepase.  I dir sa lazenes ozordi pa ti la sa lepok.  Ozordi, zot pe mazin zot lavenir.  E si i annan keksoz lepase ki sa Lasanble i oule retournen – i oule retourn lo la, fer bann pti komite, diskit antre zot.  E pa gaspiy letan SBC, pa gaspiy letan lezot dimoun.  Mon toutafe dakor parey bokou dimoun in dir, ki Prezidan Faure i anvi war linite dan pei.  Malgre ki i konnen ki i pa fasil, ki li koman Prezidan pei, i pou bezwen fer bokou sakrifis, e met bokou delo dan diven pou fer sa arive.

Mr Speaker, Prezidan Faure i krwar e i konnen ki avek linite, lespri travay ansanm, Sesel pou avans tre lwen.  E tou pep pou benefisye.  Me ler ou annan en group ki pe mazin dan en lot direksyon – selman vanzans, sa i retard progre.  Sesel in fer progre rapid, parfwa tro vit pandan sa dernyen 40an.  Me dan sa dernyen 2 lannen, nou’n les ale bokou loportinite akoz politik retar, politik bloke.

Mr Speaker, avan sa Lasanble ti pran Recess, en Prozedlwa apele international Trade Zone Bill (Amendment) 2018, ti vin devan sa Lasanble.  Gouvernman Prezidan Faure ti oule met keksoz dan Lalwa pour ki tou travayer, sirtou bann Seselwa kot IOT i ganny zot Trezyenm Mwan Saler ek lezot benefis.  Ki ti arive?  Demann Lopozisyon.  Si la i pa oule, alor avek pouvwar, ou pou oule?

Mr Speaker, Zedi le 13 Septanm pandan Conférence de Presse, Prezidan Faure in byen eksplike ki mannyer eleksyon i pran plas dan en pei.  E ki li se selman an 2020, ki i pe prozekte prosen eleksyon akoz i krwar ki en eleksyon pa en fars oubyen en zwe bingo.  I en keksoz enportan ki determin lavenir en pep.  Alor, annou respe li.  Ler moman i ava arive, vedir 2020, la ki Prezidan Faure pou anonse si li i anvi met son kandidatir prezidansyel ou non.

Me pour le moman, se li ki Prezidan.  Li ki pou fer son desizyon e non pa en dimoun ki pou demann li pou sorti.  Lekel k ioule mont State House?  Ki pa kapab esper son letan arive?  Lekel ki laswaf pouvwar dan sa pei?  2020 ki nou pou konnen – alor, annou les Prezidan Faure travay.  A lafen son manda, pep i a zize dan bwat vote si i pou swazir li ou non.  Pep a deside si zot oule travay dan linite ouswa sakenn pou bos son kote.  2020 ki nou pou konnen.

Me pour le moman, si Lopozisyon pa kapab donn li lanmen travay, i a bezwen donn li son lespas pour li kontinyen son manda.  E travay pour Lepep Seselwa ziska 2020.  Mr Speaker, Lopozisyon pe rod eleksyon.  I pa sirprenan ki Lopozisyon pe ankor rod eleksyon.  Depi ki zot in ganny mazorite dan sa Lasanble, nek zot rod eleksyon prezidansyel a tou pri, anver e kont Konstitisyon.  Me lekel ki dir pep Seselwa ki zot pou fer si zanmen zot ganny eleksyon prezidansyel?

En Lopozisyon ki pa kapab rekonnet sa progre ki pei in fer pandan tou sa letan, pa pou kapab anmenn progre pour pei.  Akoz progre i konmans par dir laverite.  Laverite i montre senserite.  Ki mon pa dir pa tir defayans e adres bann fot ouswa bann lerer ki’n ganny komet.  Me lekel sa imen ki pa fer fot?  Mon pa osi dir, pa fouy dan lepase.  Akoz lepase i eklersi nou prezan.  E permet nou anvizaz lavenir dan la sérénité.  E dan lakonnesans dan kote nou sorti?  Ki nou ete?  E kote nou anvi ale?  Me si nou tro met nou latet dan lepase, ler nou relev li, letan in fini ale.  Nou pei pou’n fini sap nou.

Pour Lopozisyon, napa nanryen de bon ki’n arive dan sa pei pandan sa 40 dernyen lannen.  Mon dakor ki nou devret adres problenm sa 40 poursan nou popilasyon ki tonm dan lapovrete, e tou sa ki pa pe marse dan nou pei.  Me zot pa dir ki poursantaz nou popilasyon ki ti dan lamizer avan, ki ti napa lakaz, ki ti napa later.  Menm imedyatman avan 1977.  Pour ki lepep Seselwa, sirtou bann zenn, i kapab fer son kalkil li menm e fer son nide, si i annan progre ou non.

Mr Speaker, Prezidan in asir pep Seselwa ki an Oktob – byento, i pou donn en lalis tou sa ki’n arive fer pour Pep Seselwa pandan sa letan ki in vin o pouvwar.  Mont La Digue e vwar koman Diguois pe kontinyen pran loportinite ki a zot porte.  Get nou sif dan lendistri touris.  Get lezot endikater ekonomik.  Mon pa pou al mansyonn lezot sikse.  E mon demann tou Seselwa, san leksepsyon, pou komans reflesir lo sa 2 pti pwen ki mon pou nonmen.

Lekel ki an mazorite dan sa Lasanble?  Lekel ki pe konsantre lo proze lepase olye konsantre plis lo lavenir e ede pou fer desann kou lavi?  Lekel ki ti sant sa zoli sanson pou met plis larzan dan pos Seselwa?  Apre zot vir ledo lo travayer IOT.  Lekel ki pe kontinyelman boycott  L’Egzekitiv, par blok – par bloke ou deblok Bidze ler zot kontan?  E met retar dan pei e fer soufer bann fanmir.

Lo sa pwen, mon repran parol en drayver taxi mwan pase.  I ti dir ki lontan dimoun, zenn oubyen aze, ek lezot ki ti oule fer en pti biznes, ti kapab al rod en pti led.  I ti azoute ki sa larzan ti bezwen sorti kek par.  Ozordi, keksoz in bloke.  I ti dir i pe obzerve e i pe not byen.  Lekel ki boycott, par 2 fwa, nominasyon bann Seselwa kalifye dan post Minis?  E ki ti pou kapab fer en diferans pour pei ou pour Pep Seselwa sou bann fo preteks e ki al kont Konstitisyon?  Larepons a tou sa bann kestyon, se Lopozisyon.

O kontrer, Prezidan Faure, pa dan lespri perdi letan.  Si non, i ti annan loportinite pour anmenn Lopozisyon devan Lakour Konstitisyonnel.  Me pour linite Nasyonal e progre pei i pli enportan ki ganny en laviktwar personnel dan Lakour Konstitisyonnel.  Mr Speaker, si i pran en vilaz pour edik en zanfan, i bezwen pran tout en pep pour progrese e devlop en pei dan larmoni.  Sa devwar pa tonm lo ledo Prezidan tousel.  I tonm osi lo Lasanble, lo Zidisyer, lo bann Minister, lo bann Sekreter Prensipal, lo bann CEO, lo bann teknisyen a tou nivo.  E an gro, i tonm lo pep an zeneral.  Prezidan in byen konpran sa.  Set akoz sa ki i pe fer lapel a tou Seselwa de bonn volonte – dan nenport ki pei zot ete, nenport ki parti politik ki zot ladan, nenport ki kouler lapo ki zot ete, e nenport ki krwayans relizyez ki zot annan.  Se pour sa rezon ki mon pou demann Lopozisyon – ki zot pran en aksyon onorab, e pran zot vre rol Lopozisyon, e kontinyen kontribye dan progre pei, o non Sesel ki ‘Pli gran ki nou tou, e o non respe nou Konstitisyon.  Lopozisyon pa la zis pour opoze.  I en Brans dan Gouvernman.  Alor, mon demann zot pour les Danny Faure ki nou Prezidan pei, travay.  Donn li son letan pour li montre pep Seselwa ki li ek son lekip i kapab fer pour Sesel.  Zot, les Danny travay!  Mersi Mr Speaker.

 

(APPLAUSE)

 

MR SPEAKER

Mersi Onorab Sophola.  Bon, nou ava aret la pour ozordi e nou ava kontinyen nou travay.  E avek deba lo – ki ava kontinyen demen bomaten.  So, nou ava adjourn e nou ava repran demen 9er bomaten.

 

(ADJOURNMENT)