Home » Verbatim » 2018 » Verbatim Tuesday 25th September, 2018

Verbatim Tuesday 25th September, 2018

 

NATIONAL ASSEMBLY OF SEYCHELLES

Tuesday 25th September, 2018

 The Assembly met at 9am

 National Anthem

 Moment of Reflection

 Mr Speaker in the Chair

 

 

MR SPEAKER

Bonzour tou Manm Onorab.  Bonzour tou dimoun ki a lekout e mon annan en bonzour spesyal pour bann zanfan lekol primer Anse Etoile, ki zot pe ganny akonpannyen la bomaten par Ms Nadia Pillay e Miss Margaret Laboudallon.  Welcome parmi nou bann zanfan e mon swete zot kapab swiv nou Sesyon byen bomaten.  E pandan Break ler zot pour pran en pti goute avek nou, mon envit bann Manm Lasanble, pour vini pour vin enterakt avek zot e nenport pti kestyon ki zot ava annan, zot ava kapab poz nou, e nou a kapab reponn as much as possible.  Alor welcome e mon espere ki zot ava pas en bon letan avek nou.

Bon bomaten nou pour lo nou Order Paper nou annan 8 kestyon pour Minis pour Lagrikiltir avek Lapes swivi par en Private Notice Question pour Minis Dezinyen e Minis pour Imigrasyon.  E sa I pour fini par en Mosyon ki pe ganny anmennen par Dirizan Lopozisyon.  Ok, mon annan 2 Manm ki’n request pour entervenir.  Onorab Chantal Ghislain.

 

HON CHANTAL GHISLAIN

Mersi Mr Speaker.  Bonzour tou dimoun.  Bonzour bann zanfan dan galeri bonzour bann teachers osi ki la.  Mr Speaker ozordi bomaten mon anvi pran laparol, akoz yer swar se avek degou ki mon resevwar en video konsernen en teacher pe fer aksyon seksyel avek en zanfan.

Mon dir degou akoz mon osi mon annan zanfan mon en manman e mon pe pran laparol lo non Komite Madanm dan Lasanble.  Mon osi mon annan de zanfan adolesan zot, zot La Digue mwan mon Mahe.  Ou’n anvoy ou zanfan lekol, mon espekte ki en teacher, I bezwen pran lotorite pour li care pour mon zanfan e pran responsabilite pour li kapab protez mon zanfan.

E la mon pa pe dir zis mon zanfan tousel – mon pe dir tou zanfan.  Nou tou ki la anndan nou annan zanfan nou annan zenn fiy nou annan zenn garson.

Problenm se ki sa dimoun ki dan lotorite ou en teacher ou annan lotorite lo zanfan, pour mwan ou pa kapab ler ou annan lotorite pran ou lafors lo lotorite pour abiz en zanfan.  E sa I mal!  E konman bann madanm isi dan Lasanble; konman bann Manm Lasanble nou kondann sa aksyon – enn mon dir sa akoz I emosyonnel akoz mon osi I fer mwan tranble akoz mon de zanfan mwan osi.  Enn I 13an – enn I 14an.  And mon kwar tou bann lezot osi zot osi zot santi zot parey.

Mon zis swete ki lotorite ki aksyon I ganny pran e ki bann aksyon parey I pa arive.  E pour bann zanfan bann zenn fiy, bann zenn garson, silvouple pran letan pour zot grandi pran letan pour zot viv lavi I gou lavi I ranpli avek defi nou tou konman bann adolesan nou pas dan sa bann aksyon, nou tou nou pas dan sa bann keksoz.  Nou konpran ler ou en adolesan ou annan bann lanvi and all ki pase, me sa dimoun kid an lotorite sa adilt, se li ki bezwen montre sa zanfan, sa adolesan poudir sa pa bon semen.  Semen I la.  Mersi Mr Speaker.

 

MR SPEAKER

Mersi Onorab Ghislain.  Onorab Waven William.

 

HON WAVEN WILLIAM

Mersi Mr Speaker bonzour.  Bonzour tou bann zanfan ki dan Gallery.  Mr Speaker mon ti a kontan siport sa ki Onorab in dir, me  mwan mon pwen i konsernan en lot size lo Order Paper.

Mr Speaker mon vwar ki i annan zis en sel Mosyon lo Order Paper e mon annan en Mosyon ki mon submit ki annan mon kapab dir en lenportans Nasyonal lefe ki Gouvernman la i pe travay lo bann kad saler e mon ti a kontan ki mon Mosyon i ganny konsidere pour prosen lavenir la lo Order Paper.  Mersi.

 

MR SPEAKER

Ok mersi Onorab William.  Zis pour reponn ou konsern mon resevwar Mosyon ki’n sorti kot ou mon resevwar li yer.  Mon’n fini soumet dan lanmen Deputy Clerk i pour ganny konsidere lo ABC demen pour met lo Order Paper pour prosen Sitting.  Wi Mosyon in vin kot mwan yer, mon krwar i date le 20 ou le 21 Septanm, selman yer ki mon resevwar.  Ok?

Bon nou ava apel Minis parmi nou pour nou konmans nou Sesyon.  Mon zis fer rapel osi tou le de Leaders ki midi Komite CPA Commonwealth Parliamentary Association – The Executive Committee pe meet midi. Sa pour nou kapab elekte bann office bearers ki konpri de Vice-Presidents, Trezorye avek Oditer swivi par Komite Reform e Modernizasyon e tou lede miting pour fer dan Speaker’s Conference Room pour enn apre lot.  Yes Onorab Ferrari.

 

HON JEAN-FRANCOIS FERRARI

Mr Speaker.  Zis pour atir ou latansyon ki i annan en rankont IAC ki ti’n prevwar osi pour 12.15 ozordi e i pour clash. So akoz mon ti a kontan en manrmay isi at least i lo CPA … lyez toultan me mon a koz avek ou plitar lo la.  Mersi.

 

MR SPEAKER

Mersi Onorab Ferrari.  Bon mon ti a kontan dir en bonzour e welcome Minis Charles Bastienne parmi nou – Minis ki responsab pour Lagrikiltir ek Lapes.  Minis I akonpannyen par PS pour Lapes Mr Jude Talma, CEO pour SFA Mr Ronny Renaud, Special Advisor pour Lapes Mr Roy Clarisse e PS pour Lagrikiltir Mr Antoine Moustache.  Minis avek ou delegasyon ankor bonzour e welcome parmi nou.  Bon nou ava al direkteman lo kestyon e nou ava pran premye kestyon mon ava demann Onorab John Hoareau pour poz son kestyon.

 

HON JOHN HOAREAU

Mersi Mr Speaker.  Bonzour Mr Speaker.  Bonzour Minis avek ou delegasyon.  Bonzour tou Manm koleg e bonzour tou dimoun ki pe ekoute.  Mr Speaker mon kestyon I lir koumsa:

Eski Minis i kapab dir sa Lasanble si bann mezir ki in ganny dir pou pran an kolaborasyon avek seksyon veteriner pou konbat lisyen eran lo lans Beau Vallon pe marse?

  1. Si non, ki son Minister pou fer an plis pou met sa sityasyon lisyen eran anba kontrol?

Mersi.

 

MR SPEAKER

Mersi Onorab.  Minis Bastienne.

 

MINISTER CHARLES BASTIENNE

Mr Speaker.  Tou Manm Onorab e tou dimoun ki a lekout bonzour.  Dan zefor pour redwir lenpak negatif konsernan lisyen eran, dan landrwa piblik, Minister Lagrikiltir ki responsab landrwa ki kontrol lisyen atraver Lazans Biosekirite NBA in entansifye son aktivite pandan sa dernyen mwan.  NDA in konmans en legzersis anmas lisyen eran dan lavil Victoria e son zanmirant depi juillet sa lannen.

An tou nou anmas nou 139 lisyen eran dan rezyon lavil.  Aprezan sa Lazans pe bouz dan lezot landrwa ki osi enkli Beau Vallon.  Aktivite Beau Vallon ti konmans le 4 Septanm e pe target landrwa swivan carpark kot court basketball landrwa kot I fer Bazar Labrin.  E osi an zeneral lo lans Beau Vallon.

Sa legzersis I ganny fer lizour e aswar e ziska prezan nou anmas nou 72 lisyen dan Beau Vallon.  Ziska prezan bann mezir ki Minister in pran pe anmenn rezilta pozitiv, aprezan I annan mwens lisyen eran ki pe parwaze dan bann landrwa kot sa legzersis  pe fer.

Sa legzersis pour kontinyen ziska sa sityasyon Beau Vallon I ganny met anba kontrol. Mr Speaker dan zefor pour entansifye travay ki pe fer Beau Vallon e bann lezot landrwa, I annan nouvo Prozedlwa pour kontrol e protez lisyen ki devan sa Lasanble, ki pour asire ki bann propriyeter bann lisyen I pran zot responsabilite anver sa bann lisyen.

Minister pe osi anploy travayer adisyonnel e aste plis lekipman pour kapab ogmant kapasite Unit Kontrol Lisyen pour zot kapab enplimant nouvo Lalwa enn fwa ki I ganny aprouve par sa Lasanble.

Travay avek veteriner prive pour zot konsantre zot travay lo zannimo domestik entansifye bann travay sterilizasyon pour kapab kouver bann travay lo Mahe, Praslin ek La Digue;ogmant legzersis atraver atrap lisyen eran dan bann lezot landrwa piblik; patrol bann landrwa kot sa legzersis in deza ganny fer pour asire ki sityasyon pa repete ganny met anba kontrol; organiz formasyon pour zofisye ki dan unit pour bann kontrol lisyen.

E enn fwa ki nouvo Lalwa I ganny aprouve e vin an fors, Minister pour konmans en kanpanny edikasyonnel e progranm sansibilizasyon pour tou bann dimoun ki annan zannimo domestik.  Mersi Mr Speaker.

 

MR SPEAKER

Mersi Minis.  Onorab John Hoareau.

 

HON JOHN HOAREAU

Minis mon krwar ou a dakor avek mwan poudir bann lisyen I kontan frekant bann landrwa kot zot ganny manze.  Eski ou Minister pe fer okenn zefor pour oubyen I anvizaze pour fer okenn zefor pour met bann sign board, ki pour dekouraz bann touris sirtou, oubyen bann lezot dimoun ki aste manze dizon dan Bazar Labrin donn bann lisyen?  Dezyenmman eski ou pe osi fer legzersis avek LWMA pour ki bann bin ki ganny mete obor lans, I bann bin ki lisyen pa kapab zet ater oubyen antre ladan pour tir manze?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Sa de proposal MNA mon krwar I 2 proposal ki annan merit.  -Konsernan sign board mon krwar I en keksoz ki nou ava konsidere evidaman kot I annan manze pour annan lisyen.  Nou kapab fer tou nou zefor an mezir ou tire lezot pour retournen.

E dezyenmman konsernan travay avek LWMA mon krwar sa I en travay ki nou ava konsidere.  Evidaman nou a travay avek sa pour fer sir poudir nou minimiz an mezir ki nou travay pour nou kontrol lisyen eran, I ava ede ki dan tou distrik partou nou kapab met en sistenm an plas, kot evidaman, mwens bin I ava ganny ranverse lo nou semen piblik.  Mersi Mr Speaker.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker Minis in mansyonn travay SSPCA bann veteriner prive.  Mon ti a kontan ki Minis I klarifye, ki bann mezir spesifik ki son Minister pe pran pour siport SSPCA, an vi ki mon’n personnelman mon’n ganny sans vizit zot fasilite ki zot annan anler Providence.

E mon krwar I annan bann mezir sipor ki adisyonnel pour met bann kennel adisyonnel kan zot anmas sa bann lisyen, pour zot met li dan bann kennel.   So eski Gouvernman pe donn serten sipor finansyel oubyen pe rod atraver bann donater a kapab sipor SSPCA pour annan ase kennel ler I anmas sa bann lisyen pour li met ladan?

E lo nivo bann veteriner baz prive, ki sanzman dan kad resours imen par egzanp ki zot pe fer lo Minister, pour fer ki enn zot atrakte plis manrmay pour join servis veteriner, me  osi sey regarde ki sa bann veteriner ki al dan prive pa kapab retournen; byensir pour an propozan en nouvo kad saler avek zot ki mon krwar zot merite.  Mersi Mr Speaker.

 

MR SPEAKER

Mersi Onorab Pillay.  Minis.

 

MINISTER CHARLES BASTIENNE

Mr Speaker.  Minister atraver NDA nou pe travay tre pros avek SSPCA.  Annefe depi ler nou konmans sa legzersis dan lavil Victoria kot nou al entansifye li Beau Vallon, SSPCA I enn nou partener kle ki nou pe travay avek.  So nou mon zwenn avek SSPCA osi zofisye e zot sipoze pe soumet avek nou sipor ki nou pour bezwen donn zot – an vi sa burden an plis ki pe tonm lo zot anvi ki pour le moman Gouvernman son Dog Pound pa ankor pare. e vwala kot SSPCA pe asiste nou.

So pour asiste zot, mon fini diskit avek zot Gouvernman I pare pour nou asiste zot malgre zot en lorganizasyon NGO saritab – ok?

Dezyenmman Mr Speaker letan mon ti prezant Plan Konpreansiv pour Lagrikiltir, mon ti dir ki Gouvernman I espekte by Zanvye lannen prosen si tou diskisyon I al byen avek veteriner prive, se zot ki pour pran responsabilite pour bann zannimo domestik; setadir bann sat ek bann lisyen e ki Gouvernman pour konsantre son zefor lo bann zannimo laferm – bann large animals parey nou dir.  E se sa direksyon ki nou a pe travay e nou espekte poudir swivan diskisyon ki mon fer avek le 4 veteriner prive, nou espekte ki nou kapab konklir sa lakor.

Dezyenmman se ki pour le moman la, I vre ki nou annan en shortage nou vet veteriner e nou pour napa swa nou pe fer recruitment aletranze pour kapab ed nou tanporerman.  Me nou espekte atraver re organizasyon nouvo lenstiti Lekol Lagrikiltir ki pe al lo en pli o nivo apartir lannen prosen ki Minis Ledikasyon I a donn plis detay plitar, nou espekte kapab kre en lanvironnman ki pour ankouraz nou bann zenn pour pran veteriner konman en karyer.  Evidaman an mezir nou ale, nou a kapab revwar zot Scheme osi pour fer li osi pli atiran.  Mersi Mr Speaker.

 

MR SPEAKER

Mersi Minis.  Onorab Clive Roucou.

 

HON CLIVE ROUCOU

Mersi Mr Speaker.  Bonzour Mr Speaker.  Bonzour tou koleg Onorab e bonzour tou dimoun ki a lekout dan lakour.  Mr Speaker premye kestyon ki mon annan pour Minis mon ti a kontan ki Minis I donn sa Lasanble en garanti e lepep Seselwa antye osi, ki okenn fason kriyel pa pe I pa pour ganny servi pour kontrol lisyen eran?

Mon 2enm kestyon se Minis in donn en total of 211 lisyen eran, ki’n ganny atrape mon anvi demann Minis ki pe arive avek sa bann lisyen si zot ganny en sans pour zot ganny re home avan ki okenn lezot prosedir I ganny fer?  Epi 3enm pti kestyon mon anvi demann Minis si I annan okenn penalti lo bann dimoun ki zet bann pti lisyen, oubyen bann lezot lisyen dan landrwa piblik?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Mon ti a kapab Onorab I demann mon pour donn en lasirans Lasanble e pep Seselwa konmkwa napa okenn cruelty, ki nou pe fer konsernan sa bann lisyen letan nou pe atrap zot.  Wi Mr Speaker napa nanryen kriyel ki nou pe fer avek sa bann lisyen.  Sa bann lisyen pe ganny atrape atraver bann latrap ki nou mete Annandler nou servi bann poll pour atrap zot.  Parfwa laplipar di-tan nou servi bann latrap bann kazo ki otomatikman fermen ler zot antre ladan. E apre la zot ganny anmennen kot parfwa kot veteriner e osi kot SSPCA, kot laba nou kit zot pour en dele letan – en serten letan.

Normalman Lalwa mannyer I ete kot Dog Control Act, I dir nou ki nou devret tenir en lisyen omwen 4zour avan desizyon I ganny pran lo zot.  Me nou, nou annan lisyen ziska 2semenn nou pa pe fer nanryen ek sa bann lisyen, me evidaman avek lakantite lisyen ki nou pe kaptire ou pa pour kapab gard zot indefinitely.  

E vwala kot travay I ganny fer par veteriner pour zot screen sa bann lisyen pour vwar bann ki petet ki en pe malad, bann ki agresiv eksetera, e vwala kot nou pour napa swa. Nou pour bezwen nou bezwen put to sleep sa bann lisyen konmsa.

Me I annan tou en prosedir ki nou swiv me nou pep ran bokou plis letan ki Lalwa I donn nou, avan ler ki nou pran bann desizyon parey.  E evidaman mon okouran osi I annan serten sa bann lisyen ki dimoun in vin rode e ki in ganny re home.  I annan en pe sa bann lisyen me mon napa statistik avek mwan.  I annan serten sa bann lisyen in ganny re home.

Konsernan penalti Mr Speaker, pour le moman as far ki mwan mon aware Lalwa aktyel napa provizyon pour annan penalti.  Me nouvo Lalwa ki pour vini ki by the way nou fer second reading kot vot lo merit e prensip in fini ganny pran lo la, nou espekte kapab vini tre byento enn fwa ki Biro Attorney General I fini fer bann amannman ki’n ganny propoze by Bills Committee.  Mersi Mr Speaker.

 

MR SPEAKER

Mersi Minis.  Nou a pran 2enm kestyon.  Onorab Aglae.

 

HON EGBERT AGLAE

Mersi Mr Speaker.  Bonzour Minis avek ou delegasyon.  kestyon I lir koumsa:

Eski Minis i kapab dir ek sa Lasanble, ki plan son Minister pou konstrir lenfrastriktir pon ek semen lo blok Des Arpents e osi Port Launay kot Riverside, avek bi ed bann fermye maksimiz zot prodiksyon?

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Lazans Lagrikiltir I annan en lalis bann proze lenfrastriktir ki unfunded; ki vedir ki napa larzan pour zot enplimantasyon.  Sa I enkli enfrastriktir ki osi enkli pon ki Onorab pe fer referans avek. SAA I annan lentansyon fer demann pour ganny larzan pour li kapab enplimant sa bann proze dan bann lannen ki pe vini.

Sa proze I sipoze asiste 6 fermye ki Onorab pe fer referans avek, I pour mezir enkli sa pon ek semen 800met longer e sipoze kout anviron R2.5milyon.  So le moman ki nou a ganny finansman Mr Speaker, then nou ava proceed pour nou enplimant sa proze.  Mersi.

 

MR SPEAKER

Mersi Minis.  Onorab Aglae.

 

HON EGBERT AGLAE

Mersi Minis pour ou larepons.  Minis etandonnen ki I annan sa plan Master Plan Lagrikiltir I annan sa Plan Konpreansiv osi ki eski, zot pe konsider li konman bann priyorite?  An vi ki lo nivo Sid Was sa 6 distrik ki lagrikiltir Port Glaud I parmi, eski zot pe konsider li konman en priyorite, pour fer demars ganny larzan ase vitman, pour ki sa bann fermye I kapab fer zot prodiksyon?  E osi an vi ki Polisi Lagrikiltir pe fer provizyon pour si ou pa pe devlop ou later maximum, ou riske ganny vwar a lavenir ganny pran ou later?  Eski zot pe pran kont pour ki sa bann issues ki mon’n nonmen la I ganny met an viger ouswa konman priyorite?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Letan nou ti travay lo nou Plan Konpreansiv pour lagrikiltir nou regard tou sa bann proze ki nou ti kapab fer antre baze, lo lanvlop ki nou krwar ki Gouvernman I kapab asiste nou avek.  Me malerezman I annan en total I annan en kantite proze ki zot total I vin R29.9milyon ki nou napa fon.  Me nou pe espekte pour nou kapab gradyelman dan baz gradyel dan bann lannen ki pe vini, baze lo bann prodiktivite ki nou pe ganny kot sa bann laferm konsernen, pour nou kapab enplimant serten sa bann proze.  Ok?  Me wi kot ou’n mansyonnen Onorab I annan en nesesite.  Me selman osi nou pe regarde, kote nou pour al envestir en serten kantite larzan ki pour benefisye maximum fermye.

E dezyenmman osi loportinite pour nou kapab ouver bann nouvo later Lagrikiltir ou vwar?  Mon pa pe dir ki ou’n mansyonn nou I pa enportan.  I osi enportan me nou bezwen vwar avek lanvlop ki nou annan, pour nou kapab fer nou mye pour nou egzekit proze.

Me en lot keksoz ankor se ki ler nou dir poudir fodre fermye I devlop 100poursan zot later, si non posibilite re pran Gouvernman I la, nou pour pran kont serten sa bann defayans ki fermye pe eksperyanse, vizavi lenfrastriktir letan nou pe fer sa travay.  Mersi Mr Speaker.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mersi Mr Speaker.  Bonzour Minis bonzour tou dimoun.  Bonzour tou bann zenn bann zanfan.  Minis mon ti a kontan demann ou, eski ou ti a kapab eksplik sa Lasanble eski demars ki ou Minister pe fer oubyen in fer pour akse bann fon pour devlopman lenfrastriktir avek FDA e bann lorganizasyon similer ki finans devlopman lagrikiltir?  Kan eski zot pe fer sa bann demann?  Eski zot annan bann proze on line e ki nou pe espekte bann led ki nou kapab gannyen dan lavenir?

Mon reste lo sa lo kestyon Des Arpents Minis I en landrwa e mon krwar PS I konn tre byen I landrwa ki son problenm mazer se drenaz so an atandan ki semen oubyen pon I ganny fer, eski Minister Lagrikiltir, I kapab asire ki dan sa sezon Vann Nor ki pe vini nou kapab mitigate en pe – fer en pe travay mitigate en pe sa bann flooding ki arive dan landrwa.

E si zot kapab fer sa eski zot plan se pour al toutafe dan fon akoz I annan 6 fermye mon krwar ki ou’n dir la, enkli ler mon pe dir dan fon mon pe fer referans ek later ki Gouvernman in allocate avek ansyen Minis Herminie, ansyen Minis William Herminie ki’n ganny en bout later laba li osi dan fon.  Eski zot pour arive laba dan fon konmsi, pour dezanklav sa bann bout later?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Fransman pour dir ou mon pa tro konn sa landrwa.  Mon bezwen fer en fason mon al vizite pour mon al dan fon mon osi pour mon kapab konpran en pe sityasyon.  E mon krwar poudir baze lo swivan kestyon Onorab Port Glaud, e ti osi mon plan tre byento pour mon al fer en vizit laba anler Des Arpents pour mon apresye pli byen e konpran bann defi ki sa bann fermye dan sa bann landrwa pe fer fas avek e swivan sa then nou ava regarde ki mannyer nou kapab akselere pour nou kapab fer devlopman laba.

Dezyenmman Mr Speaker konsernan FDA wi an 2014 mon panse Gouvernman ti ganny asiste atraver en soft loan atraver IFAD pour devlopman lagrikiltir e la right now nou dan negosyasyon pour son lot cycle ki nou espekte Minister Finans I a konsidere, pour ki nou kapab benefisye osi atraver sa fon ki sipoze en fon apepre $3milyon.  So si sa I leka then sa osi I a kapab ed nou kapab fer en pe perse kot petet kot le moman nou pe vwar li difisil pour nou fer.  Mersi Mr Speaker.

 

MR SPEAKER

Mersi Minis.  Mon ava donn en dernyen kestyon Onorab Aglae.

 

HON EGBERT AGLAE

Mersi Minis.  Minis zis pour ou leklersisman sa ki Onorab Ferrari sa sit ki I pe koze se ex- Mahe Beach plato kot I annan fermye ki lo la ki I annan en problenm degorzman, akoz delo pa pe sorti ou bann zofisye obor ou  i konnen.  E Minis mon dernyen kestyon ki mon anvi demann ou lo sa size lagrikiltir dan Port Glaud, eski Minis zot pe mazin osi zwenn avek sa bann fermye – sirtou sa bann fermye ki nou pe koze ki annan sa bann problenm akse, pour vwar petet dan le medya ki sipor zot kapab donnen adisyonnel pour fer ki sa bann fermye zot pa santi zot rezete?

E dernyerman eski zot annan en time frame ki zot kapab konsidere once zot in al rod larzan pour zot kapab met sa bann lenfrastriktir an plas? Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Napa okenn fermye ki pou ganny rezete.  Anba nou Plan Konpreansiv, nou pour fer sir ki tou fermye ki serye nou travay avek zot pour fer sir ki zot fer zot bout, pour nou kapab ogmant prodiksyon dan nou pei.

La vi ki Plan Konpreansiv lagrikiltir nou fini lans li, travay in deza konmanse e byento personnelman konman Minis, mon pour bokou plis lo teren, pour mwan fer sir ki mon kouver si posib avan lafen sa lannen preski tou fermye anrezistre ki nou annan avek SAA. 

So nou pour tap tou pour nou kapab fer sir ki tou fermye I ganny sa latansyon ki zot bezwen, pour zot kapab kontribye parey mon dir dan prodiksyon manze dan nou pei.  Mersi Mr Speaker.

 

MR SPEAKER

Mersi Minis.  3enm kestyon Onorab Waven William.

 

HON WAVEN WILLIAM

Mersi Mr Speaker.  Kestyon i konm swivan:

Pou demann Minis pou dir ek sa Lasanble, ki nouvo mezir pe ganny pran pou revwar lafason ki sa Trust Fund pou Lagrikiltir i ganny zere e distribye ver bann proze ki benefisye direk fermye, prodikter e antreprener dan domenn donn valer azoute materyo agrikol?

Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Livestock Trust Fund oubyen LTF ti ganny kree anba Lalwa Public Management Act an 2010 e I ti ganny amande an 2013.  Serten parmi son bann lobzektif se pou kouver an par kou labatwar sipor lasirans pou bann fermye lasirans, dan domenn resers devlopman e formasyon dan elevaz zannimo, sipor bann akse semen lo laferm. Sa fon I zener larzan atraver koleksyon en levy R5 lo sak kilo lavyann poul enporte.

Mr Speaker LTF in kolekte R120milyon depi 2010. Aktyelman I annan R60milyon dan sa kont. Livestock Trust Fund in ganny zere par en Board ki ganny apwente tou le 3an.  Bann Manm Board I sorti dan plizyer lenstitisyon dan pei e osi Minister Finans ek Komers, Minister Lagrikiltir e Lasosyasyon bann Fermye.  Board aktyel in ganny apwente ver lafen 2017.

Mr Speaker resaman in annan en desizyon ki’n ganny pran par Konsey Minis pou transfer responsabilite LTF avek Lazans Lagrikiltir SAA, ki vedir larzan ki ganny kolekte pour aprezan al dan Consolidated Fund e apre ganny re appropriated e la SAA I a deside ki mannyer I a servi sa larzan LTF.

Desizyon pour met LTF anba ladministrasyon SAA I tonm byen lefe ki sa Lazans I pli byen pase pou konnen kote sa larzan I devret ganny servi, pou adres problenm lye avek prodiksyon manze dan pei.

Pandan sa 8 dernyen lannen, larzan dan fon LTF in ganny servi plizoumwen pour fer travay lo bann lenfrastriktir mazer, ki pour anmenn en lenpak signifikan dan Sekter Lagrikiltir.  Permet mwan donn detrwa legzanp;

Renovasyon mazer dan Bazar Victoria, lenstalasyon plizyer sistenm irigasyon dan bann landrwa lagrikiltir lo Mahe e Praslin; plizyer louvraz drenaz lo Mahe e Praslin.  Larzan in osi depanse pour fer plizyer akse semen pour al kot bann laferm

LTF I osi servi pou ofer resours Fon Devlopman Lagrikiltir ADF ki tonm anba Labank Devlopman Sesel.  Mr Speaker konsernan 2enm parti kestyon mon espekte ki SAA, i  ava vwar enn fwa nou konmans ganny rezilta avek nou Plan Konpreansiv pour devlop sekter valer azoute, ki mon krwar I tre enportan osi akoz pour le moman, nou pe met lanfaz lo ogmantasyon prodiksyon lokal.  Mersi Mr Speaker.

 

MR SPEAKER

Mersi Minis.  Onorab William.

 

HON WAVEN WILLIAM

Mersi Mr Speaker.  Mr Speaker mon anvi demann Minis lefe ki Minis pe dir ki ti annan en Board oparavan e la ki sa larzan pe ganny kolekte, in al dan Consolidated Fund e eski Minis i kapab konfirmen ki Board pour napa okenn – mon kapab dir desizyon pour fer vizavi sa depans?

E dezyenmman Minis, lefe ki ou’n dir i annan R60mil la ki reste R60milyon e mon anvi demann ou, eski SAA li letan i pour zer sa fon, dan ki fason i pour aporsyonn li vizavi mon kapab dir bann nesesite e bezwen ki’n la en bon pe letan?

Eski pour annan en konsiltasyon? Par egzanp la Minis mon pe donn ou en legzanp sa semen Letsi Grand Anse Mahe epi i annan en fermye obor lanmer dan plato ki pe fer lesans kannel e zot dwa li en semen – Minis Pamela Charlette ti fer en vizit e ti promet li pour donn li en semen, akoz la i pe servi en semen rezidansyel ki container masin container pa sipoze pas lo la, me sa fermye pe esper son semen.

Mon anvi konnen Minis baze lo larepons ki ou ti donnen semenn pase, poudir tre byento tender pe al ganny donnen Minis letan ou pe dir tre byento kan eski tender pour semen Letsi pou ganny met deor?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Sa fon pour transfer avek SAA ki pour al Consolidated Fund apartir Zanvye 2019.  Sa figure R60milyon ki mon mansyonnen la, ladan I annan en valer proze R44milyon ki sipoze ganny fer servi sa larzan pour ganny fer sa bann proze.  E ladan an gran parti I annan evidaman semen Letsi I lo la, ou kestyon I kan semen Letsi i sipoze konmanse?

Lenformasyon ki mwan mon ti gannyen avek SAA se ki sa proze I sipoze ganny met lo tender plitar semenn prosen.  So mon espekte si tou keksoz I al byen, I ava konmanse avan sa lannen.  Enn fwa nou swiv tou prosedir ki egzize anba Lalwa tender.

Bon parey mon ti pe dir sa sonm R60milyon I annan R44milyon pour bann proze, ladan I annan en seri mon annan en lalis avek mwan I annan en seri tou bann diferan semen ki’n ganny earmark pour ganny fer anba la me malerezman sa proze Port Glaud ki nou koz lo la boner I pa lo la.

An plis I annan R15milyon ki sipoze ganny ki pe pran dan sa fon menm pour pon konstriksyon en nouvo labatwar Montagne Posee e parmi tou bann proze semen ki annan en pe partou lo Mahe avek Praslin.

Bon SAA evidaman letan lenformasyon ki mon annan avek Minister Finans se ki letan sa larzan I antre dan sa fon SAA I pour form parti Bidze SAA me from en lot sours ki pour allow li kapab annan bann proze parey ki mon annan devan mon pour li kapab met devan avek Minister Finans, pour kapab ganny sa fon pour servi direkteman pour al dan lagrikiltir.  E osi pa bliye poudir sa fon osi pour ganny servi, pour donn serten subsidy ki mon anonse atraver nou Plan Konpreansiv semenn pase.  Mersi Mr Speaker.

 

MR SPEAKER

Mersi Minis.  Onorab Phillip Arissol.

 

HON PHILLIP ARISSOL

Mersi Mr Speaker.  Bonzour Minis avek ou delegasyon.  Bonzour tou bann zanfan.  Bonzour tou bann Manm Onorab.  Eski Minis I kapab dir nou konbyen fermye lokal ki’n benefisye avek larzan Livestock Trust Fund?  E eski I annan en plan pour fer nouvo bazar Anse Boileau dan sa fon osi silvouple?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Konbyen bann endividi ki’n benefisye mon pou napa sa lenformasyon avek mwan.  Me mon konnen ki poudir nou annan lenformasyon ki mon annan avek mwan, se ki kote larzan in ganny peye – ok?  Atraver bann subsidy ki ti annan evidaman mon krwar sa I annan pou fer avek refund lo R4 lo sak kilo poul, ki ganny touye labatwar e osi poul lo pork osi en total R21.3milyon ti ganny peye anba sa depi 2010 ziska 2017.

E bann letan mon pe regard lo sa lalis ki devan mon la se ki sel landrwa kot pour annan lasistans direk ki pou al pou en fermye e oubyen en slaughter house or whatever se atraver sa subsidy.  So mon pou napa detay non bann endividi.

Me larestan depans ki pe ganny fer se plizoumwen en pe kot pou asiste omwen 2, 3, 4, 10 fermye atraver semen, drenaz ek lezot proze.  Mersi Mr Speaker.

E konsernan Anse Boileau Mr Speaker letan mon pe get bazar Anse Boileau letan mon pe regard lo sa lalis ki devan mwan la, mon pa pe vwar bazar Anse Boileau lo la, me si I annan en nesesite pour annan renovasyon lo bazar Anse Boileau, I pou tonm dan kad travay ki nou pe fer, pou nou fer sir nou annan bann bazar rezyonal, pour nou fer sir nou bann fermye I ganny akse oubyen landrwa vann pou zot vann zot bann prodwir, then nou bezwen fer sir ki nou annan konsiderasyon dan lannen 2019.  Mersi Mr Speaker.

 

MR SPEAKER

Mersi Minis.  Onorab Woodcock.

 

HON WAVEL WOODCOCK

Mersi Mr Speaker.  Bonzour Minis avek ou delegasyon.  Minis I annan konsern parmi bann fermye Praslin ki dan lepase sa LTF pa neseserman benefisye bann fermye lo Praslin.  E mon kestyon ki mon anvi demande se ki dan sa R63milyon ki ganny anmase anba LTF, ki fason ki bann proze ki fason ki bann fermye lo Praslin pou benefisye?

Apre mon lot kestyon ki mon ti a kontan demande se ki I annan rapor konmkwa ki sa LTF Fund pou ganny osi servi pou bann proze lapes eski sa I vre?  E eski I posib pou Minister fer bann Manm Lasanble en kopi sa bann lalis bann proze ki zot pou fer anba sa fon pou Mahe avek Praslin?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Sa fon I Livestock Trust Fund.  So I dedye pirman a lagrikiltir.  Lapes pa sipoze ganny nanryen ladan.  Konsernan lalis mon napa problenm.  Mon ava make available lalis, lalis I avek mwan si oule pran nou le sort li out pou zis Praslin benefisye then diran lazournen, nou ava make it available pou Onorab Mr Speaker.  Mersi.

 

MR SPEAKER

Mersi Minis.  Onorab Woodcock.

 

HON WAVEL WOODCOCK

Minis ou pa’n eksplike donn en pe detay ki fason ki bann fermye pou benefisye ki bann proze ki zot annan antreprann lo Inner Island osi Praslin/La Digue?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Mon okouran poudir dan lepase fermye Praslin in benefisye atraver plizyer proze drenaz ki’n ganny fer Praslin.  E osi bann louvraz letan mon pe regard lo la mon pe vwar poudir I annan louvraz bann disilting of drain Amitie, ki sipoze ganny fer e mon panse menm zafer I aplikab pa zis Grand Anse, me osi lo kote Baie Ste Anne, kot tou le lannen I fer sir poudir I annan en kantite sonm ki ganny met de-kote pou deal avek sa issue disilting, si non se sa ki pou kre bann inondasyon dan bann plato ki pou bann fermye.

Apre dezyenmman se ki nou annan labatwar Praslin ki nou sipoze fer fason by lannen prosen sa lot labatwar I vin operasyonnel.  Mersi Mr Speaker.

 

MR SPEAKER

Mersi Minis.  Onorab Adelaide.

 

HON FRANCOIS ADELAIDE

Mersi Mr Speaker.  Bonzour a tous.  Minis mon tann ou koz lo sa Livestock Trust Fund Board ki ou dir I annan bokou enn de dimoun ki lo la enkli SFA, me mon okouran ki Lasosyasyon Fermye Sesel, kanmenm zot seat I la, me selman zot pa pe ganny reprezante lo la, eski ou kapab konfirm sa avek sa Lasanble?

E mon 2enm kestyon Minis lo kote sa larzan ki ede pour labatwar parey ou konnen poudir mon vreman pasyonnen avek sa zafer balans, eski ou kapab dir sa Lasanble ki formil labatwar pe servi pour konn lapeze zannimo?  E eski ou Minister I satisfe ki fermye pe ganny valer pou son prodwir?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Mon krwar i fer 2enm fwa ki Onorab I lev sa issue labatwar – sa balans, mon krwar mon bezwen al get en kou mwan menm en fason ki nou ava sort li out enn fwa pou tou so les mon ava vwar nou ava sort out si I annan en problenm akoz mon dir ou dernyen fwa letan mon ti fer en vizit anviron 2mwan pase, the issue was not necessarily about balans, be ti annan plis pou fer dan ankesman ki ti tro pti pou zannimo antre ladan.  Serten gro zannimo pa kapab antre ladan, me mon ava retournen mon ava regarde.  Mon dir mon bann zofisye verifye e zot in get back to mon lo menm zafer swivan kestyon ki ou ti demann mwan.  Mon a fer en mannyer – ou ti fer en pli dernyen fwa ki avan lafen sa lannen annou aranz li so nou a fer sa Onorab.

Dezyenmman SFA pa ganny reprezante SFA pa lo Board LTF en?  Apre konsernan fermye wi I annan en Manm e zisteman ti annan en miting yer kot sa Manm Lasosyasyon Fermye ti vin sa miting ki ti fer yer.  So mwan mon’n ganny dir poudir zot aktiv kot sa fon I konsernen.  Mersi Mr Speaker.

 

MR SPEAKER

Mersi Minis.  Onorab Adelaide.

 

HON FRANCOIS ADELAIDE

Wi Minis.  Sa SFA petet mon ki’n mal, akoz Lasosyasyon Fermye Sesel petet an son Angle avek son soz.  Mersi.

 

MR SPEAKER

Ok, Seychelles Farmers Association.  Yes ok be petet ti devret fer en pti pe pli kler pou pa fer dimoun konfize.  Bon Onorab Stephen Pillay.

 

HON STEPHEN PILLAY

Mersi Mr Speaker.  Bonzour a tous.  Mr Speaker mon ti a kontan demann Minis ki relasyon sa Trust Fund avek hatchery si I annan okenn larzan ki ganny met ek hatchery ki ed hatchery pou prodwir pti poul?  E konbyen zot pe donnen pour prodwir poul?  Mersi Mr Speaker.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Lenformasyon ki mon annan se ki hatchery pa pe ganny asiste atraver Livestock Trust Fund.  Mersi.

 

MR SPEAKER

Mersi Minis.  Onorab William.

 

HON WAVEN WILLIAM

Mersi Mr Speaker.  Mr Speaker mon annan de pti kestyon mon anvi ki Minis i konfirmen ki lefe ki nou annan plizyer groupman Lasosyasyon Fermye dan Sesel eski Minis a konsidere ki en reprezantan lo sak sa bann Lasosyasyon i ganny enkli pour – enn – asir en pti pe latransparans zesyon sa larzan.

Dezyenmman Minis lefe ki semenn pase ou ti dir, ki i annan bann ou pa pe ankouraz plizyer bann fermye ki dan prodiksyon lavyann pour zot fer zot labatwar, e ou ti nonm de ou fermye me mon anvi demann ou eski bann lezot ki ou pe ankouraze pou fer labatwar ouswa hatchery, zot pou ganny asiste akoz i resanble ou krwar la zis enn de ki pe benefisye avek serten lasistans.  Mon ti a kontan ou pran sa kestyon byen akoz ki arive pou en pti pe unfair si zis enn de ki ganny asiste, me ou pe ankouraz lezot pou fer labatwar me ou pa pe ganny sa lasistans.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Konsernan reprezantasyon Lasosyasyon bann Fermye ki mon kapab dir ou se ki plitar sa semenn mon sipoze zwenn avek Lasosyasyon Fermye, mon ava ekout en pe zot bann konsern e swivan sa then nou ava rode ki mannyer nou pou bouz de lavan vizavi sa.

Dezyenmman konsernan lasistans dan nou Plan Konpreansiv ki nou vin avek Mr Speaker, nou pa’n fer provizyon pou asiste hatchery avek labatwar.  Kot nou pe asiste nou se ki nou asiste fermye ki en fason ki redwir zot kou an term slaughter.  Par egzanp si nou pran konmela la, i ti pou kout R7 en kilo pou slaughter poul, me sa fermye I pe pey R3 akoz R4 ladan I sorti dan LTF konman en subsidy pou prodwir sa kou slaughtering otherwise sa fermye ti pou bezwen bare full cost of sa R7.  So olye R7 I pe pey li R3.  

So nou pa antre pou nou al fer lenfrastriktir sa labatwar I konsern oubyen hatchery nou prefere bann fermye I servi fasilite ki annan mon apel li nasyonal malgre ki I annan serten lease, ki nou’n donn serten dimoun Nasyonal nou a prefere servi sa.

Me osi pou letan nou ava annan nou labatwar Montagne Posee menm keksoz osi parey I a vin nou National Labatwar.  Me parkont ki nou ti dir dan nou plan konpreansiv pour kapab ed sa fermye pou … ki kantite an term efficiency redwir en pe son kou, kot bann ki kapab annan bann pti labatwar ki pa telman petet osi ser, me ki pou ed zot dan zot efikasite, nou’n dan nou Polisi e nou ankouraz sa pou arive.  Me nou konman Gouvernman, nou pa pou antre pou nou al finans sa lenfrastriktir konsernen.  Mersi Mr Speaker.

 

MR SPEAKER

Mersi Minis.  Nou a pran 4enm kestyon.  Onorab Aglae.

 

HON EGBERT AGLAE

Mersi Mr Speaker.  Eski Minis i kapab dir ek sa Lasanble, si i dan plan son Minister pou met en ice plant dan rezyon Port Glaud ek fasilite dry dock pou bann peser sa rezyon anvi distrik in deza idantifye en lokasyon apropriye?

Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Minister responsab pou Lapes I okouran ki I annan serten diskisyon ki’n konmanse avek Lotorite Distrik konsernen lenstalasyon en ice plant dan rezyon Port Glaud e dry dock pour sa rezyon.  Pou le moman Minister ansanm avek Lotorite Lapes pe fer en evalyasyon konplet lo tou ice plant dan landrwa stratezik dan pei.  Sa legzersis I form demars sa Minister ek SFA pou devlop en Plan Konpreansiv pou lapes parey pou Sekter Lagrikiltir ki nou’n fek lanse resaman.  Sa Plan Konpreansiv pou Lapes i pou ganny fer an konsiltasyon avek bann partener dan Sekter Lapes.  Sa legzersis pou ed nou alor pou nou konpran bezwen e merit bann fasilite ki sa sekter I bezwen pou asire ki Sekter Lapes I kontinyen devlope dan en fason soutenab.  Alor Mr Speaker nou ava pronons nou lo sa size Ice Plant Port Glaud enn fwa ki nou fini sa plan konpreansiv ki nou espekte fini li Mars lannen prosen.  Mersi Mr Speaker.

 

MR SPEAKER

Mersi Minis.  Onorab Aglae.

 

HON EGBERT AGLAE

Mersi pou ou larepons.  Dan ou larepons ou kestyon I annan konsernan sa dry dock ki mon ti a kontan ou pronons ou lekor lo la anvi ki I annan logmantasyon lo lakantite bato sirtou, I annan bann bato ki fer bato charter osi ki dan sa rezyon ler I annan en levennman; tel resaman I annan en bato ki ti mont lo disab Port Glaud e reparasyon pou ganny fer pou li anmenn anvil I pou kout plis ankor anvi sityasyon lenfrastriktir sa bato ler in ariv sa aksidan.

So osi ki annan logmantasyon ki annan bann kantite boat charter ki deza egziste Port Glaud ou konsider sa fasilite ganny fer a en dele letan rezonnab, pou ki nou pa vwar bann bato in ganny zis met ater pe ganny fer bann maintenance dan lanvironnman ki pa conducive, pou ki sa bann aktivite I ganny fer dan en fason apropriye?

E dezyenmman Minis eski ou pou ankouraze okenn lenvestiser ki pare pou antre ansanm an partenarya avek distrik, pou zot kapab donn en koudmen pou zot kapab fer sa bann fasilite?  E si wi ki bann demars ouswa lapel ki ou kapab pe met la deor devan sa bann dimoun ki enterese?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Petet mon ti a rod en klarifikasyon avek Onorab letan I pe nonm mon dry dock ki ou pe dir en slipway?  Wi so Mr Speaker ki mon ava fer mon ava fer SFA fer en assessment konsernan demann Onorab pou Port Glaud e prezan la nou ava regarde pou nou kapab – si I pa en keksoz ki vreman neseser parey ou pe dir me petet son kou pa sitan eleve, then nou ava regarde ki nou kapab fer.

Dezyenmman Mr Speaker mon panse I pou fer plis sans ki les nou a vin avek sa plan by Mars lannen prosenn, la nou ava vwar ki formil ki nou pou adopte konsernan partisipasyon sekter prive dan nou demars dan lapes an zeneral.

Mon kar I enportan ki sekter prive I zwe en rol, me an menm tan I enportan ki nou fer li dan en fason organize.  So sa plan nou ava pran kont tou bann diferan paramet – frame work parey nou dir anba ki nou ava envit sekter prive pour vin partisipe.  So alor petet nou a pronons nou lo sa, petet by Mars lannen prosen, enn fwa nou fer en assessment total pour pei an zeneral.  Mersi Mr Speaker.

 

MR SPEAKER

Mersi Minis.  Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun. Mr Speaker mon annan en kestyon siplemanter ki ava kouver en pe bann size ki’n leve dan kestyon 2, 3 avek 4.

 

MR SPEAKER

Non kestyon siplemanter I pou lo 4.

 

HON GERVAIS HENRIE

Pou la senp rezon ki sa bann kestyon I koz lo pe demann Minis bann plan ki swa dan sekter lagrikiltir ouswa lapes.  Konman en Manm Lasanble, dan nou rol oversight konman Chairman COGA par egzanp ki swiv bann promes Gouvernman, letan mon pe ekout ou akoz mon tann ou pe koz lo en Plan Konpreansiv la ou’n fek mansyonnen en plan Mars 2019.  Selman mon anvi konnen ozordi konman en Manm Lasanble dan nou oversight role pou nou konpran ki Minister Lagrikiltir ek Lapes pou pei e kot pou ale, pou mon vwar ki zot pe fer ozordi.  Akoz sirtou nou pe koz sa manda sa Gouvernman ki I ti gannyen dan sa eleksyon prezidansyel 2015. Depi sa in annan 4 Minis Lagrikiltir mon krwar be so lekel plan ki nou pe koz lo la?  Kote mon ale pou mon vwar sa plan?  Mersi.

 

MR SPEAKER

Mersi Onorab.  Zis mazinen poudir plan ki Minis in prezant ek nou semenn pase pou Lagrikiltir. Minis I annan 2 portfolio en.  Wi Minis, larepons.

 

MINISTER CHARLES BASTIENNE

Mr Speaker.  Onorab nou pa pou fer ou perdi dan plan en?  Ki nou annan nou, se ki ti annan en Master Plan zeneral orizinalman sa ki ti apel li en SNAIP e sa plan ti sipoze en plan ki pou anmenn Lagrikiltir ek Lapes 2015-2020 ok?  sa SNAIP parey mon ti dir I dernyen fwa Mardi pase ler mon ti dan Lasanble, I ti en plan ki ti byen, ti bon, me I ti en plan ki ti pou very costly.  Mon ti dir I ti pou en plan ki pou kout pei omwen R1.4bilyon ok? 

So pour sa rezon sa plan somehow in ganny enplimante piecemeal par bout, me ler mon vin Minis Lagrikiltir la mon vwar poudir pou nou kapab ankadre travay ki nou pe fer nou bezwen pran bann sekter, bann landrwa ki bokou pli enportan, pertinan pou nou ganny rezilta, pou nou pran sa bann keksoz e met li dan en plan.

Se egzakteman ki nou fer pou lagrikiltir.  Pou lagrikiltir   nou’n vin ek en Plan Konpreansiv, ki target pirman prodiksyon; ogmantasyon dan prodiksyon lavyann ogmantasyon dan fri e legim.

Se sa, sa Plan Konpreansiv Lagrikiltir is all about.  E pou kapab achieve sa nou’n vin avek plizyer bann mezir pe ofer bann fermye pou zot kapab valoriz zot later prodwir pou anmenn nou rezilta ki nou le.  E sa Plan Konpreansiv pou Lagrikiltir si ou permet mon Mr Speaker, I en plan avek bann target ki mezirab.

Ou konman en Manm Lasanble, si nou dir ou by juin lannen prosenn nou sipoze ogmant prodiksyon poul sorti 14poursan kot nou ete ozordi e by juin lannen prosen nou le achieve 25, 30poursan ou a demann mon a sa letan kote nou ete avek sa plan pou nou achieve 25, 30poursan e akoz nou pa’n achieve li.

So I mezirab. I kler.  Prezan mon dir poudir lo kote kot Lapes nou bezwen vin avek en Plan Konpreansiv.  Akoz?  Li osi I ava dekoul from sa SNAIP ek tou bann aksyon ki nou kapab pran a kour term pou nou anmenn rezilta lo menm fason ki mezirab parey nou fer pou lagrikiltir.  That’s the whole idea of annan en plan.  E prezan I annan plizyer Onorab e mon konnen poudir I annan plizyer diskisyon vi ki nou pe koz lo konsernan ice la akoz pa privatize eksetera, be sa tousala I ava antre dan sa Plan Konpreansiv kot Gouvernman I ava pronons son lekor – si zanmen nou pou privatiz ice Sesel bann ice plant Sesel ki formil ki nou pou adopte si pou donn incentive ki kalite incentive nou pou donnen.  So this is where we are heading e this is where mon pou dir ou in annan bann lezot plan avan, me sa I a en plan, ki bokou pli spesifik targete avek bann rezilta ki mezirab.  Mersi Mr Speaker.

 

MR SPEAKER

Mersi Minis.  Onorab Henrie.

 

HON GERVAIS HENRIE

Zis en pti follow-up Mr Speaker.  Minis in dir mwan I pa pou fer mwan perdi dan plan mon apresye sa.  Me selman zis lannen pase si mon memwar I servi mon byen anfen defen, Mr Finley Racombo pa ti ankor mor I ti annan en long press conference ki ou predeseser ti donnen dan Maison Colette … Moustache la CEO SFA ti la e kot ti annan en plan avek target.  Akoz mon rapel mon ti demann en kestyon lo statistik sa bann ki ou’n fek dir la lo ki mannyer nou pou agrandi prodiksyon be ki in arive avek sa enn la?  Konmsi prezan la ou vini avek en lot plan …  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Mon krwar mon ti eksplik sa Mardi pase letan mon ti vin la Lasanble.  Mon ti dir poudir sa plan ki nou, nou’n  vin avek I plizoumwen target ver ogmantasyon prodiksyon ki nou koz lagrikiltir.  E mon ti dir poudir mon predeseser letan I ti vin avek sa plan, mon pa konnen si I ti apel en emergency plan ki I ti apele I ti plizoumwen pe al dan direksyon lenfrastriktir.  Bon tou sa lenfrastriktir ki nou koze boner ki ariv R44milyon, se sa bann lenfrastriktir ki sorti dan sa plan orizinal ki petet ti fer sorti dan sa press conference ki ou pe koz lo la.  Ok? 

So kwa ki diferan se ki enn ti pe konsantre lo bann laspe lenfrastriktir e irigasyon e tou me tandis ki sa enn li I pe konsantre pirman lo prodiksyon – en keksoz ki mon konnen nou pep lontan ti pe espere.  Gouvernman konsantre dir nou ki mannyer ou pour ogmant prodiksyon lokal.  Se sa diferans ki annan ant sa de.  I pa vedir poudir I pa pe konplemant kanmarad. Zot pe konplemant kanmarad dan bann fason – lenfrastriktir fodre I annan, pour kapab anmenn nou lo en lot nivo pou nou annan prodiksyon.  Mersi Mr Speaker.

 

MR SPEAKER

Mersi Minis.  Onorab Adelaide.

 

HON FRANCOIS ADELAIDE

Mersi Mr Speaker.  Minis ler ou pe koze lo kote ice plant mon tann ou nonm ice plant rezyonal, eski I annan okenn rekomandasyon petet ki’n vini kot ou ki annan en pti proze pou Baie Lazare sa lannen?  Mersi.  Pou lo kote peser.  Mersi.

 

MR SPEAKER

Bon zis bear in mind ki kestyon I Port Glaud, mon pou allow sa Minis ou a reponn.

 

MINISTER CHARLES BASTIENNE

Mr Speaker.  Pou le moman bann peser Baie Lazare mon krwar zot pe servi fasilite Anse La Mouche, pou zot ganny zot ice.  Me parey mon dir se ki les nou a fer sa travay, nou ava idantifye bann landrwa stratezik.  Evidaman bann peser lo tou Mahe, Praslin, La Digue, zot a ganny konsilte ler nou fer sa travay pou nou vwar stratezikman kote nou pou met ice plant.

Par egzanp la ou pe dir nou ou bezwen enn Baie Lazare, Port Glaud in dir nou I bezwen enn; Glacis I a kapab dir nou I bezwen enn, me nou bezwen vwar kote nou pou kapab dan en fason stratezik met ice plant ki pou benefisye bann peser.  Mersi Mr Speaker.

 

MR SPEAKER

Mersi Minis.  Onorab Terence Mondon.

 

HON TERENCE MONDON

Mersi Mr Speaker.  Mr Speaker mon le demann Minis anvi lenstalasyon ice plant e I bezwen relye avek demann dan sa landrwa, eski Minis I kapab dir nou Lasanble dapre zot resers e leksperyans, ki nivo demann ki pou merit en tel lenstalasyon en tel fasilite dan rezyon Port Glaud?  E an menm tan, ki leson ki ou Minister I retire avek sityasyon ice plant dan nou pei?  Mersi Mr Speaker.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Se zisteman sa ki travay ki nou pou fer pou nou kapab etabli bann paramet kan ki nou pou met en ice plant dan tel landrwa e pou ki rezon.

Ki kantite I annan? Kantite peser fodre I annan?  Nou pa kapab zis met en ice plant akoz I annan demann.  Set atraver letid parey ki pou nou kapab zistifye nesesite pou annan en ice plant.  E 2enm kestyon Onorab Mr Speaker, se ki son kestyon sete kote nou ete ozordi vizavi sityasyon ice?  Mon krwar ki an Mars sa lannen letan nou ti annan en kriz ice nou ti prodwir nou Gouvernman 25ton ice par zour. La ozordi nou pe prodwir nou 41ton par zour – ok?

E an tou nou Gouvernman pe prodwir omwen 15ton ice par mwan e demann pou ice I 2200ton.  Me sa pa neseserman en problenm, akoz se ki nou annan sekter prive ki osi pe prodwir omwen 1200ton ice par mwan.  

So sa I konplemant avek sa ki nou pe prodwir ki allow nou pou nou kapab meet demann.  Me problenm ki annan kot nou vwar se ki son zesyon son Management pou fer sir poudir tou bato pou antre ansanm tou bato I al ansanm la kot ou ganny serten konplikasyon.  So sa I en keksoz ki SFA pe travay lo la lo son zesyon, pou nou fer sir poudir si en masin ice I prodwir 10tonn ki mannyer nou kapab ogmant kapasite stokaz pou fer sir at all times nou annan nou plis ki 10tonn ice available.  Mersi Mr Speaker.

 

MR SPEAKER

Mersi Minis.  Onorab John Hoareau kestyon No.5.

 

HON JOHN HOAREAU

Mersi Mr Speaker.  Mr Speaker dabor mon ti a kontan dir byenveni bann Manm Lasosyasyon Banbara ki dan Gallery.  Mon kestyon I lir koumsa:

Eski Minis I kapab eksplike ki sityasyon stock Banbara dan nou lanmer?

Eski Polisi proteksyon e lapes soutenab pe byen ganny monitor lo sa lo sa lespes sirtou dan rezyon pli dan Sid nou teritwar maritime?

An vi ki lapes Banbara i ouver pou selman 8 mwan dan en lannen e sa bann peser I pey en lasirans pou 1an, eski Minis pour Lapes, i kapab don son garanti ki i pou fer le neseser avek bann lakonpannyen lasirans pou fer ki sa bann peser Banbara i pey pou en kouvertir zis 8 mwan?

Mersi.

 

MR SPEAKER

Bon zis en pti klarifikasyon ou’n sanz 9mwan pou vin 8mwan dan ou kestyon – ok?  Mersi.  Minis.  Minis.

 

MINISTER CHARLES BASTIENNE

Mr Speaker.  Ti tar an 1999 ki Lotorite Lapes SFA ti entrodwir nesesite license pour banbara apre ki plis dimoun ti pe pratik sa aktivite e la kantite Banbara ki ti pe ganny atrape ti pe ogmante.  SFA ti alor anmas statistik lo la kantite banbara ki ti pe ganny lapes depi lannen 2000 kot lakantite banbara ti pe ganny lapes ti pe kontinyen ogmante parey mon dir.

Bon en premye resers dan delo banbara Sesel ti ganny fer par SFA e par lasistans FAO an 2004 e sa resers I konplete an 2005 resers ti konsantre lo plato Mahe ek bann zil zanmirant avek lobzektif pou kolekte lenformasyon lo stok bann lespes komersyal e pou rekomann stratezi pou pli byen amenaz sa lapes.  Serten konklizyon sa resers ti konm swivan;

I bezwen annan kontrol dan sa lespes pou anpes li eksplwatasyon. En sistenm quota par lespes I kapab etabli kapab ganny konplimante bann mezir parey bann minimum size limit; sezon kot lapes I fermen e landrwa kot lapes pa ganny fer sa ki nou apel bann closed areas.

Entrodwir log book pou peser e processors pou kapab monitor tou lapes e fer survey perodikman pou verifye performans sa bann mezir an plas e revwar zot si I neseser.

Apre ki SFA ti obzerv rediksyon lo serten lespes Barbara an 2011, en 2enm letid par Marine Resource Assessment Group (MRAG) ti ganny fer.  Sa ti ganny fer an servan lenformasyon lo bann log book ki ti ganny kolekte.  Ankor bi sa letid sete pou regard leta stok bann banbara e fer rekomandasyon pou son amenazman.

Sa letid ansanm avek SFA in obzerve ki stok banbara ti pe kontinyen desann, e ki zis 4 lespes ek valer komersyal ki ti parmi sa 11 dan lepase ki ti pe ganny prensipalman ganny atrape.  Sa ti sa ki nou apel Black Teeth Fish – Kokosye Nwanr, White Teeth Fish – Kokosye Blan, Prickly Red Fish Sanpye e Flower Teeth Fish – Pentard.  Lannen pase in osi annan en lot letid baze lo premye dekouver e seri lenformasyon ki SFA in kolekte pandan sa dernyen 4an.  Sa 2enm letid in konklir ki tou bann lespes ki ti ganny evalye, ti demontre levidans ki zot popilasyon ti a pe dimini a diferan degre, an partikilye Kokosye Nwanr, ki ti pe demontre en gran diminisyon dan stok.  Baze lo sa resers SFA an konsiltasyon avek Lasosyasyon Banbara ti osi ganny ki ti osi ganny prezante par bann plonzer, e osi par bann patron bato, ti deside pou entrodwir en sistenm quota baze lo kaptir ki ti fer an 2016.

An plis ki sa, nouvo mezir ti fer provizyon pou selman 3 lespes kapab ganny atrape.  Sa ti Kokosye Blan, Sanpye e Pentard.  Quota lo lakantite banbara ki ti kapab ganny retire dan en lannen ti 375mil pyes banbara.  Sa I ti ganny distribye konm swivan; 281,250 Pentard – 56,250 Kokosye Blan 37,500 Sanpye. Sa total I ganny distribye egalman par lespes par bato pou en sezon lapes e I ganny revwar tou le 3mwan e I ganny re distribye baze lo performans bann bato, an prenan kont ki quota total pa ganny depase.  Sa quota ti pran lefe an Zanvye sa lannen e I pou ganny revize tou le 3an ler en nouvo stock assessment, I ganny fer.

Toudmenm analiz ki SFA in fer lo lenformasyon ki in fer lo sa lespes depi Zanvye ziska Zen sa lannen ler quota ti ganny etabli, zis 50poursan sa quota ki’n ganny atrape par bann bato.

Parey zot in kapab konstate rezilta sa bann letid ki mon mansyonnen, I klerman montre sa rediksyon I ganny ranforsi par sa bann lenformasyon swivan;

An 2006 – 36,639 banbara ti ganny atrape a en valer R1.9milyon;

An 2011 – 642mil banbara ti ganny atrape a en valer R51milyon.

An 2017 – 300mil banbara ti ganny atrape a en valer R19milyon.  Pou le moman I annan 25 bato ki annan license me selman 21 ki in aktiv dan sa dernyen sezon.

Dapre SFA zot license I permet zot annan en maximum 4 plonzer abor par mare.  Avek sa bann mezir an plas nou konsidere ki stok banbara dan nou lanmer a stabilize e reste soutenab e prosen letid dan 3an a donn nou gidans lo son management.

Kestyon konsernan proteksyon e lapes soutenab pe ganny monitor sirtou dan bann rezyon pli Sid nou teritwar.  Mr Speaker sirveyans nou teritwar maritime kont lapes ilegal, lapes ki pa ganny raporte e pa ganny reglemante sa ki nou apel bann ‘ayoyo fishing’ I responsabilite SFA an kolaborasyon avek Coast Guard.  Parey zot konnen SFA pa ekipe, napa kapasite pou fer patrol lo nou bann zil dan sid tel ki Farquhar, Providence, Assumption, Cosmoledo.  Alor SFA I depan en kantite lo resours gard lakot pou nou kapab fer sa bann patrol.  Konsernan sa issue lasirans Mr Speaker, lenformasyon ki mon annan se ki I annan 2lakonpannyen lasirans ki napa lobzeksyon pou donn kouvertir lasirans pou 8 mwan.  Mersi Mr Speaker.

 

MR SPEAKER

Mersi Minis.  Onorab John Hoareau.

 

HON JOHN HOAREAU

Mersi Mr Speaker.  Mr Speaker Minis in dir nou poudir an 2011 sa resers ki’n ganny fer I baze lo log book – vedir zefor lapes.  Eski SFA I annan bann resours neseser, avek bann mendev kalifye pou fer en letid pli o profon pou determin vre sityasyon stok banbara dan nou delo?

Dezyenmman Mr Speaker mon ti a kontan si Minis I dir avek Lasanble ki pe arive avek sa komitman ki Prezidan ti fer avek Lasosyasyon Banbara pou ki tender I ganny lanse pou donn license pou donn 2 ankor license bann lezot processors dan banbara?

Trwazyenmman mon ti a kontan ki Minis I eksplike ki kantite larzan an term levy zot in kolekte atraver sa kalite aktivite e ki fason zot pe zer sa larzan ki I retonm en pe lo sa kalite aktivite li menm?

Katriyenmman mon ti ava kontan si Minis I kapab dir nou akoz ki license pou serten bato ki pa’n aktiv pandan plis ki 1an ki sipoze ganny revoke me pa’n ganny revoke I pa’n ganny repartaze avek en lot lezot bato?  Mersi.  Me in re ganny donn sa menm bato I re ganny ankor sa menm sa license.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Pou konsernan resers I vre ki pou le moman SFA pe depan an gran parti lo logbook.  Me selman malgre ki SFA pe depan lo log book ki annan tou en prosedir ki an plas ki bann peser banbara I bezwen comply avek ok?  E SFA a sak fwa ki bann peser banbara I antre zot bezwen notifye SFA e SFA fizikman zofisye zot lenspekter I al abor sak bato banbara ki antre pou zot al verifye ki kantite e ki kalite banbara ki’n antre avek so sa travay I pe ganny fer sa physical verification me selman lo landing.

Mon konpran ou kestyon Onorab I annan nesesite pou fer en resers pli aprofondi e se menm kestyon ki mon demann avek SFA, kan eski nou kapab fer en resers pli aprofondi e mon dir poudir nou bezwen regarde ki kalite resours, ki nou pou bezwen pou nou kapab fer li.

Evidaman si nou pe fer resers, nou bezwen plonzer mon pa krwar I pou en difikilte vi ki nou deza annan bann plonzer Seselwa ki pe deza plonze pou al bor banbara.  So mon krwar I annan nesesite pou sa.  Mon pa pou kapab al fer en commitment kan I pou ganny fer me mon kapab dir ou I annan en nesesite pou fer li.

Dezyenmman konsernan sa issue processing plant mon krwar ki swivan diskisyon ki mon gannyen osi avek SFA swivan commitment ki SFA ti fer se ki processing plant right si konsernan son tender, zot ankor pe diskit an formel ki tender pou ganny fer.  Whether I pou ganny fer ki mon panse pou le ka en open tender be bann diferan paramet under which sa tender pou ganny fer, sa I en keksoz ki mon aprann avek SFA zot ankor pe finalize.

Akoz bann kriter pa tro kler ki egzakteman bann kriter ki ou pou mete pou bann processing.  Eski bann pe right now pe lapes banbara pe ganny priyorite over lezot?  Eski ou fer li en open tender avek nenport ki le antre dan sa sekter, I antre pou li vin fer sa processing?  Ki formil ki pou servi?  Plizoumwen se sa.  Me selman mon ava fran avek ou poudir mon pa’n antre an detay avek SFA konsernan bann mankman, vi ki I annan en pe letan ki I annan en prononsman in ganny fer lo la, ki mon krwar poudir ou annan rezon pou pran tro bokou letan.

E trwazyenmman konsernan levy mon krwar Onorab ou pe koz lo sa $2 par kilo ki anmase, sa larzan I al dan Consolidated Fund I pa ale dan en fon avek SFA.  So sa I retourn kot Gouvernman sa $2 par kilo.  Mon krwar en kestyon ki ou’n demande se, ki kantite larzan ki in anmase. lenformasyon ki mon annan avek mon se ki depi 2008 ziska la 2018, I annan en sonm $974,566mil ki’n ganny anmase atraver sa levy $2 par kilo – ok?

Apre konsernan bann bato banbara ki pa aktiv sa I en keksoz ki mon pour bezwen verifye – mon konnen letan mon ti pe regard kondisyon license mwan menm, I kler dan kondisyon license I dir poudir en bato ki pa aktiv pou 4mwan, I stand son sans pou perdi son license.  So sa I en keksoz ki mon ava take up avek SFA akoz ki aksyon pa’n ganny pran dapre kondisyon in the first place letan zot ti ganny donnen zot license.  Mersi Mr Speaker.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker mon ti a kontan demann Minis ki mannyer zot asire ki lenformasyon ki zot pe kolekte avek bann bato e lenformasyon ki konkret?  E ki fason ki zot fer monitoring?  Eski I annan bann sistenm kot zot fer bann spot check?  E fer eski bann bato I konnen poudir a sa zour ki zot pe antre zofisye SFA pe vin monitor?  So eksplik nou en pti pe sa.  … pran e donn konfidans dimoun poudir lo kote regilasyon enforcement regilasyon I annan fason pou zot kontrol sa ki pe pase.  Mersi Mr Speaker.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Lenformasyon ki mon annan se ki okenn bato ki lapes banbara pa kapab antre si I pa’n notifye SFA.  E dapre zot kondisyon se ki at least 12er minimum 4erdtan zot bezwen notifye SFA konmkwa ki zot pe antre e osi annan bann ler spesifik by which ki zot devret antre avek bann designated areas kot zot devret antre.

Enn fwa zot in antre zot surrender zot log book evidaman parey mon eksplike avan se ki lenspekter I mont abor e lenformasyon ki mon gannyen avek SFA ki donn mon se ki sak sa banbara ek bann lespes I ganny konte enn par enn e i ganny antre.  E sa lenformasyon ler I ganny antre I ganny issue avek en dokiman pou ki sa dokiman ki sa peser banbara in antre avek, I kapab menm dokiman ki al kot sa processor.

Savedir I pou annan en verifikasyon ki SFA I kapab al fer kot bann processors a tou moman si zanmen I annan okenn banbara ki’n ganny lapes ilegalman.  So mon krwar poudir apre ki zot in ganny sa lenformasyon, evidaman rekonsilyasyon I donnen avek stock book pou fer sir poudir lenformasyon I rekonsilye si mon kapab dir.  So physical verification by SFA restriksyon lo kote zot pou antre, ler ki zot antre pa ganny drwa ouver zot lakal, kot zot bann banbara I ete san dan prezans zofisye SFA, I bann mezir ki I annan an plas pou fer sir poudir sa lespes sa stok I ganny byen monitor.  Mersi Mr Speaker.

 

MR SPEAKER

Mersi Minis.  Onorab Pillay.

 

HON SEBASTIEN PILLAY

Mersi Mr Speaker.  Mr Speaker lapes banbara Sesel I en pti pe parey lapes Bluefin Tuna ki mon krwar bann eksper SFA I konn tre byen I enn bann lapes ki ganny very well regulated dan lemonn.  Alors mon ti a kontan demann Minis, eski SFA pandan tou sa letan ki nou pe dir I annan illegal fishing ki pe go on dan Sid zot in quantify dan en fason konkret pou donn nou en montan petet konbyen sa illegal fishing pe kout nou ozordi, ki pe arive dan sa rezyon?  E dezyenmman eski parey lezot pei in pran kot parey in met regilasyon ek kontrol lo serten kalite lapes, zot in fer ki sa lapes in eksklizivman – eksklizivman ganny pratike par bann dimoun ki nasyonalite sa bann pei.  Par egzanp dan sa konteks petet mon mal pou dir sa Mr Speaker ki lapes banbara I eksplisitman reste pou Seselwa.  Mersi Mr Speaker.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Devan mon la mon annan bann kondisyon pou lapes banbara.  Ok? Premye lo la I dir en aplikan I devret en sitwayen Sesel ok premye anler lo la.  Konsernan ki kantite I ganny lapes ilegal Mr Speaker mon pou napa sa lenformasyon e dapre letan mon pe koz avek SFA, se ki as part avek nou letid parey Onorab Hoareau in demann nou boner nou bezwen fer sir ki nou quantify pou nou kapab konnen ki kantite resours ki nou pe perdi.

E mon krwar ki I kler poudir napa otan patrol nou ti ava swete dan rezon sid pou fer sir nou bann resours maritim I ganny byen proteze.  Me travay ki SFA I fer an kolaborasyon avek Coast Guard kot sak fwa dapre zot schedule ki zot ki Coast Guard I ale 8 a 10 zour, abor I annan zofisye SFA ki letan zot al fer bann patrol parey.  So sa mon kapab dir ou me pou nou kapab quantify the amount of illegal sa ki nou apel bann ayoyo I pou difisil pou mon a sa moman donnen Mr Speaker.  Mersi.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mersi Mr Speaker.  2 pti kestyon mon ti a kontan demann Minis depi Zanvye depi zot in met bann quota an plas, eski I annan okenn lendikasyon so far ki mannyer stok pe perform?

Mon 2enm kestyon se eski Minis I kapab eksplik sa Lasanble lo sa kontradiksyon ki’n arive dan milye lannen kot SFA ti pe dir stok I anba presyon e Prezidan Larepiblik li in al join bann peser in deside donn zot konsesyon lo fuel, konmsi pou zot ankouraz zot al lapes en pe plis e la mon konnen bann staff SFA ti vreman ankoler dan sa kontradiksyon.

So eski Minis I kapab dir avek nou si Prezidan pou annan en langaz kler lo kontrol banbara, lo kontrol bann stok oubyen I pou still kontinyen toultan dan Gouvernman annan bann kontradiksyon annan bann mesaz en zour dan en direksyon dan en zour a en lot?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Pou nou kapab annan lenformasyon lo performans stok, an 2020 la ki nou pou annan sa lot assessment ki nou pou fer pou nou kapab etabli mannyer stok I ete avan ler nou desid lo sistenm quota.  Me selman mon krwar ki letan quota ti ganny desid lo la ti pe ganny baze plizoumwen lo bann historical data ki ti annan e osi lo bann lenformasyon ki ti pe anmase atraver logbook. 

So vwala kot sa quota 375mil banbara ti ganny mete.  E osi si ou pe get byen an gran parti I sa kalite ki nou apel Pentard.  Rezon I senp se akoz lenformasyon ki mon gannyen avek SFA son cycle I bokou pli vit.  E alor I pa pou sitan met presyon konpare avek Kokosye Nwanr avek Sanpye.  So vwala kot si ou pou dir mon lo stok e osi baze lo take up ki annan dan sa quota I par anba sa limit ki SFA in set.

So son performans li ziska Zanvye ziska ler sezon ti fermen an Me, ki pou repran dayer an Oktob I anviron 50poursan.  

So nou pa ekspekte poudir ant Oktob ziska Desanm I pou sot sa lot 50poursan.  Bon ou kestyon konsernan sa kontradiksyon, I pa pou neseserman en kontradiksyon; mon pa pou get li konman en kontradiksyon.  Kontradiksyon I pou vini si Gouvernman ti pe allow plis bato ankor, pou ale pou al lapes banbara.  Limit ki nou annan lo bato I 25 bato. I reste 25 bato ki mon panse petet sa letan ki bann peser ti pe demande, sete en konsesyon akoz petet osi zot ti pe al rod banbara en pe pli lwen.

Sa en posibilite e pou kwa pa zot osi benefisye atraver fuel subsidy parey lezot peser pe benefisye.  So mon pans pa si sa pou al met plis presyon lo stok.  Mon krwar poudir avek fuel subsidy ki zot in gannyen depi Zanvye ziska la, sa pe montre poudir sa I pa neseserman leka.  Me toutfwa mon vwar poudir ki nou plan e ki Gouvernman pe sey fer se pou kapab amelyor en pe sa lanvironnman pou bann peser banbara kapab fer en pti pe pli byen.  Mersi Mr Speaker.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Minis avek ou delegasyon.  Bonzour bann zanfan ki la e bann peser banbara ki isi e tou bann Manm e tou bann dimoun ki a lekout bonzour.  Mr Speaker mon ti pe koz avek sa bann peser banbara bomaten sa fuel subsidy I enportan pou zot akoz zot ki fer tou bann depans letan zot al lapes.

Mr Speaker eski Minis oubyen SFA I kapab donn nou la kantite egzakt oubyen estimasyon banbara, ki nou pe perdi atraver bann aktivite ilegal sirtou dan Sid Was nou teritwar?

E ki Minister oubyen SFA pe fer konzwentman petet osi avek IDC e Coast Guard pou garanti sekirite nou teritwar pou permet ki bann peser banbara, I kapab eksplwat pli byen sa resours dan en fason legal e an menm tan pe vey nou resours dan sa porsyon nou teritwar, pou anpes bann aktivite ilegal?  Konmsi si sa I ganny fer eski sa I pou ogmant stok la kantite banbara ki kapab ganny eksplwate dan nou teritwar?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Si mon konpran byen kestyon LGB se ki dabor se ki nou fer sir ki nou prezerv nou stok otan ki posib e osi pou etabli ki kantite banbara ki nou pe perdi.  Mr Speaker parey mon dir avek kestyon Onorab Pillay boner, nou pou napa.  Mon pou napa sa mon demann SFA sa lenformasyon.

Me selman ki nou kapab reasir sa Lasanble, se ki parey mon dir boner patrol I ganny fer par Coast Guard an kolaborasyon avek SFA.  SFA I annan en serten fon dan son Bidze atraver sectorial support ki I gannyen atraver EU, pou li kapab fer bann sirveyans dan lanmer, pou nou protez nou resours e sa I ganny servi pou nou al fer bann patrol.

Apart ki patrol ki ganny fer travay ki ganny fer by SFA ki kouver plizoumwen plato Mahe atraver zot prop bato, serten lezot pou pli lwen pou fer parey mon dir an kolaborasyon avek Coast Guard on a plane basis. 

Me selman kestyon Onorab LGB osi I annan merit se ki travay ki kapab ganny fer avek IDC pou fer sir poudir, nou travay an kolaborasyon avek zot pou ki nou kapab vey nou stok en pe pli byen.  Mon krwar ki I annan merit I en travay ki nou pou bezwen entansifye.

E osi parey zot in aprann resaman se ki SFA I dan staz pe al servi sistenm drones pou fer en pe bann sirveyans – ok?  E sa pe I ankor dan son staz eksperimante, kot lenformasyon ki mon annan se ki allow nou pou nou al apepre 16miles ant 60 nautical miles pou nou kapab sirvey nou delo.  So sa I bann opsyon ki annan ki I a kapab ganny deplwaye a lavenir lo bann zil, an kolaborasyon avek IDC, pou fer sir poudir nou annan en pli bon kouvertir an term sirveyans nou delo teritoryal.  Mersi Mr Speaker.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

En pti pwen lo la.  Si Minis I kapab donn nou lo sa ki in fek dir en lide lo kou konbyen I pou arive?  E an menm tan eski zot pe mazinen parey inisyalman letan sa biznes banbara ti konmanse I annan dimoun par egzanp ti stasyonnen lo serten zil, ki fer ki zot prezans laba I osi kapab ede si zot ganny en kolaborasyon ek IDC, atraver plan ki kapab ganny travay lo la.  Si zot annan en prezans sort of permanan oubyen tanporer laba, I a kapab ede pou donn koudmen Lotorite monitor lezot dimoun ki pe fer bann aksyon ilegal; konmsi ki vini pou vin pran pou anmenn Madagascar whatever, akoz nou bezwen ki sa I reste en resours pou Seselwa.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Mon krwar pwen Onorab lo la I valid. I bon.  I en bon pwen ki mon krwar ki nou bezwen regarde parey mon dir boner travay avek IDC.  Letan mon ava zwenn avek Lasosyasyon Banbara osi mon a kapab ekout zot pou mon vwar avek zot ki bann sizesyon ki zot annan pou zot kapab petet vin pli performan an term sa lendistri.

Parey mon dir se ki nou vwar poudir stok pe gradyelman pe desann I posib ki I annan bann lezot landrwa ki bokou pli lwen ki kapab fer ganny eksplwate.  So nou bezwen fer en mannyer pou nou eksplwat nou resours otan ki nou kapab ogmant nou eksplwatasyon resours dan en fason soutenab mon krwar I bon pou pei.  E evidaman I anmenn larises pou nou tou.  So mon krwar sa laspe kolaborasyon I enportan.

E dezyenmman konsernan sa kou Onorab pou lenformasyon, sa pe ganny fer e pe ganny finanse par National Geography Society, so nou pou napa sa cost pou le moman.  Swivan sa, Gouvernman pou dan en pozisyon pou li dir I en bon keksoz en?  Apre ki nou’n fer prosedir neseser e alor nou le adopte li then nou ava met Bidze neseser pou nou fer sa sirveyans.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker bonzour.  Bonzour Minis.  Bonzour bann Onorab e bann zanfan ek bann peser banbara.  Mr Speaker mon premye kestyon I vin lo sa zafer sirveyans, e avek tou respe Minis ou konn mon en pe fran mon pa krwar nanryen ki ou’n dir lo sirveyans, akoz Coast Guard pa’n zanmen aret en bato ki pe lapes ilegalman dan nou lanmer Sesel.  Bato Kenyan a mwen ki I ganny rapor avek peser, la prezan ki I ale.  Bato in antre dan Victoria – dan Por Victoria 2 kilomet avek baz Coast Guard pa’n kapab idantifye.  E mon pa vwar ki mannyer zot pou kapab al fer sirveyans laba deor.

Mr Speaker mon anvi dir avek Minis eski nou pou al vey lakaz letan zannimo in fini sorti ladan?  Malgas in – Cosmoledo nou tou nou konnen, zot in vin avek zot madanm ek zot peser zot in kanpe lo zil Cosmoledo, lo serten lo Menai zot in lizour bann zonm in al anmas banbara bann madanm in fer processing ater e ozordi I annan problenm laba.  Alor eski nou kapab tonm lo en keksoz ki konkret? Sa plan drones.  Parske mwan mon fatige tann en pe sa bann plan e apre nou pa tann nanryen ankor.

Mr Speaker dezyenmman la nou atann poudir bann bato Sinwan pe antre Sesel, dan lanmer Sesel atraver L’Ile Maurice e nou konnen ki poudir zot pe antre, zot in fini pou vin avek bann tonnier.  E parske zot pou vin atraver Maurice e nou konnen ki poudir bann Sinwan letan zot vini zot pa pou zis vin rod ton zot, zot pou netway tou sa ki zot kapab netwaye.

Eski Minis I kapab dir avek nou ki SFA pe konmans prepar zot pou ki I annan bon sirveyans lo bann bato Sinwan ki pe antre?

Apre Mr Speaker Minis in koz avek nou lo diminyasyon quota ensidswit, me eski Minis I kapab dir avek nou vi ki I pe koz lo diminasyon quota, me selman an menm tan mon pe tann ki poudir bann dimoun ki dan license pou process, konmsi ou pou annan plis ki pou antre dan sa?  Eski Minis mon napa problenm avek dimoun ki pe sey debourye mon me selman I pa en kontradiksyon dan li menm?

Ou a pe diminyen quota, an menm tan ou a pe ogmant dimoun ki pou al dan processing?  Konmsi eski nou pa pe met nou dan en sityasyon kot finalman nou ava pe fer en konpetisyon ki pa pou vreman fer sans, pou ki finalman ki nou vwar biznes avanse, nou plito vwar biznes ganny detri.  Sey eksplik mon en pti git sa size la.  Mr Speaker mersi bokou.

 

MR SPEAKER

Mersi Onorab Ramkalawan.  Minis.

 

MINISTER CHARLES BASTIENNE

Mr Speaker.  Si mon a pran sa issue processing premye, se ki Onorab nou pa pe redwir quota.  Nou’n met an plas pou premye fwa napa quota avan, e la prezan I annan en quota.  E sa quota I 375mil banbara.  Mon krwar ki letan ti pran desizyon pou ogmant lakantite processors, se zisteman ti vin a la demann bann peser banbara konmkwa pou zot kapab ganny plis opsyon letan pou zot kapab vann zot bann banbara.  Sa lenformasyon ki mon annan.  E pour kwa pa letan I ava ganny plis processors, avek konpetisyon lo kote processors, I ava ed zot osi petet ganny pli bon pri.  Nou pa konnen.  That was the idea.

Dezyenmman konsernan sirveyans, whether ou krwar ou pa krwar, mon krwar si nou fran avek nou lekor, I annan en mankman. I annan en mankman sirveyans nou 1.4milyon kilomet kare EEZ.  I annan en mankman nou pa ase ekipe e mon kwar poudir Gouvernman I bezwen rod fason pou nou kapab entansifye sa.

Ki pe arive lo zil Cosmoledo mon krwar ou’n mansyonnen, mon pa konnen mon pa’n annan lenformasyon lo la ki’n arive laba, me selman an term sirveyans ziska la sa lannen I annan  omwen 4 bato ki’n ganny atrape pe lapes ilegalman.  E evidaman sa ti ganny fer I annan serten avek kolaborasyon avek bann peser. So I annan sa ki’n arive.

Me pou retourn lo sirveyans Onorab Leader Lopozisyon se ki, sirveyans parey mon’n ganny dir, parey mon dir se ki I ganny fer an kolaborasyon avek Coast Guard atraver serten fon ki nou, nou  annan ki SFA I pey Coast Guard pou kapab fer sa.  E ler sa bann sirveyans a ganny fer I ganny fer parey mon eksplike boner, I annan zofisye SFA abor bato Coast Guard.  So I pa pou posib. I pa posib a tou moman annan bato out there ki pe fer sirveyans me I annan serten progranm schedule ki zot, zot swiv.

Trwazyenmman Mr Speaker konsernan konsern Onorab with regards to long liner – mon krwar bann longliner Sinwan la; as part of nou plan ki nou pe travay lo la nou pe al tackle long liner osi tou.  

Long liner pou le moman zot pa oblize pou zot anmenn zot landing isi, dan nou Por Mahe.  So nou pe al travay lo en plan pou nou vwar avek sa 54 long liner si mon pa tronpe ki pe fly Seychelles Flag, pou fer sir poudir a lavenir atraver serten polisi pou annan plis kontrol lo zot landing.

So ou nonm mon lo konsernan sa enn Sinwan me nou ava vwar mon ava vwar avek mon bann zofisye ki egzakteman license ki annan si I pe flot atraver paviyon Maurice nou, nou bezwen fer sir poudir nou tackle sa issue long liner pli vit posib.  Akoz nou konnen poudir I annan nesesite pou nou met serten kontrol ladan.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mr Speaker mersi bokou.  Minis mersi pou larepons e mon krwar ki dan ou larepons ou plizoumwen dakor en pe avek mon bann dout ki mon pe met devan.

Mr Speaker mon ti anvi zis dir Minis lo sa kote quota e avek an relasyon avek son diminisyon mon servi son bann prop chiffre kot ou’n dir an 2001 non an 2011, zot ti antre avek 642mil banbara, tandis ki an 2017 sete 300mil – ki alors ki definitivman the trend is ki I pe desann.  E menm si la zot annan en quota 375mil bann chiffre ki ou pe donnen parey ou pe dir zis 50poursan ki vedir I annan posibilite ki ni menm 300mil pa pou ganny landed ant la avek lafen lannen.  So se sa ki mon servi sa aspe quota.

Me mon ti ava kontan Mr Speaker demann Minis zot in koz bokou lo aquaculture e lenformasyon ki mon gannyen banbara I en lespes ki ase fasil pou – I ase fasil pou li fer breeding e pou li konmsi pou ganny kantite.  Eski zot annan okenn plan dan SFA, pou zot vi ki nou vwar poudir nonm pe diminyen e an menm tan osi pou bann peser mon konpran zot, parske zot pe ganny zot lavi atraver sa eski I annan okenn plan pou ki zot kapab fer en pe aquaculture zis pou prodwir bann pti piti banbara, apre sa ale, zet zot laba lo bann landrwa lo plato ensidswit dan bann landrwa, pou ki zot grosi – zot grosi e sa resours, I ava dan li menm li; konmsi pou donn en boost sa resours parske sa resours I pa zis en kestyon anmenn li ater pou nou ganny Dolar.

Me I osi en resours ki pou ede dan mentenir nou lavi maritim.  Parske banbara se en se ekivalan en leverdter dan later lagrikiltir.  Alors ki zot pe eski zot annan okenn plan pou zot nobou fer sa?  E an plis ki sa annou pa bliye ki poudir banbara I manze prensipal bouzwar e avek stok ki deza pe desann alors.  Nou ti ava pe donn sa boost nou ava pe sov nou lavi maritim; nou ava pe sov osi nou bann bouzwar nou ava donn zot en pe plis manze e apre sa, nou ava osi pe donn nou bann peser, en pli bon rannman.  Ki zot plan eski zot ava kapab met sa osi dan zot plan?  Mersi bokou.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  I paret mwan poudir Leader Lopozisyon ou’n vwar sa plan.  Mannyer ou pe eksplike se egzakteman mannyer sa plan I ete – sa Master Plan pou aquaculture I pe fer provizyon pou ki I annan sa bann prodiksyon, sa bann sibling ki ganny fer e apre I ale I al ganny met dan losean, pou ki nou kapab annan sa propagasyon banbara.  Se zisteman sa ki ou’n eksplike la se egzakteman sa ki dan Master Plan Aquaculture.  Plizoumwen sa.

E I annan menm bann landrwa potansyel kot in ganny idantifye kot pou kapab fer sa, se ki dan zanmirant Coetivy, zanmirant Poivre osi, sa in fini ganny fer kot bann landrwa potansyel enn fwa ki sa bann sibling ki mon ganny dir I apele, kot I pou al ganny deplwaye evidaman pou fer sa travay dan nou lanmer e ecosystem evidaman pou nou kapab ganny nou bouzwar parey nou pe dir.  Mersi Mr Speaker.

 

MR SPEAKER

Mersi.  Yes Onorab Ramkalawan.

 

HON WAVEL RAMKALAWAN

Mr Speaker.  Mon anvi dir avek Minis mon pa’n ganny okenn kopi plan, me mon kontan mon refleksyon I al anliny avek zot plan.  E alor petet an relasyon avek mon Mosyon ki mon pe al koze taler degaze fer sa eleksyon e LDS I ava diriz sa pei.  Mersi bokou.

 

(APPLAUSE)

 

MR SPEAKER

Mersi pou ou komanter.  Bon nou ava pran dernyen kestyon akoz mon anvi ler nou Break nou kapab eskiz Minis ek son delegasyon pou nou pran lot kestyon ki vin apre.  Mon ava pas laparol avek Onorab William pou kestyon No.6.

 

HON WAVEN WILLIAM

Mersi Mr Speaker.  Pou demann Minis lefe ki Gouvernman pe met bokou lanfaz lo ankouraz sekter prive, pou envestir dan Sekter Lapes espesyalman dan donn valer azoute mon anvi demann Mini, ki bann mezir ki Gouvernman pe pran pou asire ki bann antreprener zot ganny ase materyo brit pou transformen?  La mon pe koz bann bycatch.

Ki nouvo Scheme Konsesyoner ki sa sekter e servis donn valer azoute pou gannyen koman lankourazman?

E Ki kalite lasistans capacity building pou annan pou asir bon zesyon e kalite prodwi pou eksportasyon?

Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  I vre ki Gouvernman pe met bokou lanfaz lo valer azoute e sa set akoz ki Gouvernman I krwar ki nou pei I devret maksimiz reveni ki gannyen atraver nou lendistri lapes.

Pou konmanse I annan en gran potansyel dan bycatch ki prensipalman I sorti lo bann purse seiners. Polisi pou by catch ti ganny etabli lo konmansman 2018 kot Minister I fasilit akse by catch avek pou bann processors. anba sa Polisi – tou by catch lapes endistriyel ki ganny debarke I sipoze ganny transformen pou donn valer azoute.  Atraver Fisheries Act 2014, Gouvernman pe fer provizyon legal pou siport enplimantasyon sa Polisi.

Lo kote lapes endistriyel Minister ansanm avek Lotorite Lapes SFA e an konsiltasyon avek bann partener, pe devlop en regilasyon pou debarkasyon by catch, pou asire ki I annan sifizaman pwason ki pa ganny targete prensipalman, e asire ki tou lespes ki debarke I ganny trete dan bann fason akseptab, pou mentenir son kalite.  Sa I neseser pou asire ki bann antreprener pou ganny plis materyo brit pou fer bann prodwir valer azoute, de ot kalite.

Konsernan Scheme Konsesyon Mr Speaker, Gouvernman pe promouvwar devlopman en lanvironnman favorab pou ankouraz valer azoute.  Alor bann processors pe benefisye avek menm konsesyon parey bann propriyeter bato.

Premyerman Gouvernman pe met a dispozite bann lantreprener, lasistans finansyel e lezot benefis pou ankouraz zot fer valer azoute.  Sa bann lasistans I konm swivan;

Konsesyon lo business tax kot processors I pey en flat rate 15poursan lo reveni e par lao 250mil par an.

En rate spesyal lo depresyasyon; zot ganny konsesyon lo 50poursan konsesyon lo custom duty ler zot enport bann transport komersyal; loan zot kapab prete atraver DBS a en to lentere 3poursan; apre tax enportasyon 5poursan rebate, I aplikab lo lenportasyon serten lekipman ki zot enporte.

E konsernan kapasite building, lasistans ki zot pe gannyen pou le moman Lotorite Lapes atraver son Departman Post Harvest I asiste bann antreprener avek bann fasilite laboratwar ek processing, e osi bann teknisyen I ganny sans kapab devlop nouvo prodwir.

SFA I osi organiz bann formasyon pou asire ki bann processors I zwenn standar nasyonal enternasyonal, e osi asire ki I annan bann lavantaz konpetitiv si zanmen zot deside eksport zot prodwir.

SFA in organiz plizyer formasyon dan sa bann domenn swivan;

Premyerman I annan Food Safety System Certification ki I rekomande dan tou bann landrwa processing.

I annan sa HACCP. Sa I annan 2 kategori.  E sa HACCP Hazard Analysis Critical Control Point I pou bann apranti. Apre ou annan sa HACCP CLIP – sa I Certified Lead Implement Professional. Sa I formasyon pou bann profesyonnel pou fer sir ki bann processors I kapab enplimant sa sistenm, dan zot prop letablisman.  Tou sa bann formasyon in ganny fer I pe ganny fer gratwitman e zot ti ouver pou bann processors ki deza dan lendistri e bann ki pe montre lentere pou zwenn sa lendistri.

SFA pe osi ed bann processors avek evalyasyon zot plan biznes, e donn zot gidans lo meyer fason ki zot kapab enplimant bann prosedir, pou asire ki zot letablisman pe zwenn tou bann peramet e standar spesifik, konsernan zot aktivite.  Mersi Mr Speaker.

 

MR SPEAKER

Mersi Minis.  Onorab William.

 

HON WAVEN WILLIAM

Mersi Mr Speaker.  Mr Speaker mon ti a kontan demann Minis dan son bann lalis konsesyon ki I dir bann sa bann antreprener zot gannyen, mon pa’n tann ou nonm kou delo avek kouran ki ozordi I ase o, e sa I annan en lenpak lo kou prodiktivite pou sa bann antreprener.

Dezyenmman Minis lefe ki nou annan sa Ile Du Port I annan sa lakonpannyen ki sipoze pe manage osi bann zafer pwason avek bycatch.  Mon anvi konnen Minis lefe ki ozordi nou konnen poudir anba the common fisheries policy Linyon Eropeen zot ankouraz zot bann peser pou vin avek bycatch dan sa bann pei Lerop.  Mon anvi konnen lefe ki la pou le moman I annan en pe problenm e letan sa lakonpannyen I konmans fonksyonnen dan sa gro lakonpannyen son kou ki I pou sarz sa bann antreprener pou aste sa bann by catch, I pou annan en lefe direk pou ogmant zot kou prodiksyon.  Ki Gouvernman pe fer pou protez sa bann lantreprener ki anvi al ladan ouswa ki’n deza konmanse?  E mon anvi ki Minis I dir nou ki I kapasite ozordi ki kapab stok sa bann bycatch?  Eski nou annan kapasite eski ozordi bann antreprener ki dan sa bann biznes zot pe ganny ase by catch e kalite bycatch?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Si mon pran konsernan kapasite evidaman pou le moman bann biznes ki pe sa aktivite bycatch zot napa kapasite pou zot abzorb tou sa bann by catch ki pe antre lenformasyon ki mon annan omwen 14mil ton by catch I antre me pou le moman nou kapab process omwen zis 5mil ton e parmi ladan I annan ki zis pe ganny re eksporte par serten processors ki nou apel processors.

Me bycatch I annan e pou nou kapab garanti poudir by catch I kontinyelman annan se pou sa ki Gouvernman pe vin avek sa regilasyon.  E sa regilasyon li nou pou fer sir poudir en serten kantite by catch I land Mahe, e apre I ganny make I ganny made available pou nou bann processors.

Konsernan pri ki mon pe aprann la, ki nou pe peye se ki pri I more or less se ki pri ki zot ganny lo en international market konsernan bycatch – ok?  Ki mon krwar konsernan si mon kapab dir ou mon zwenn avek serten processors, zot pa pe neseserman konplent pri.  Zot pou konplent avek mwan ti plizoumwen pou zot ganny la kantite by catch ki zot ti bezwen pou zot process, ki nou fer serten entervansyon, ki mwan krwar pou le moman pe mars ase ok.

Me si zanmen I derey ankor pou okenn rezon, then nou ava entervenir antretan ki nou pe esper regilasyon konsernan by catch.  Ler ou pe eksplike la, nou kapab vwar poudir I annan loportinite, kantite loportinite kot by catch I konsernen, e I pou kontinyen annan.  Akoz anba IOTC Regulations 1704 I egzize poudir tou bann bato bann purse seiners zot antre ek zot bann by catch. e la I 14mil.  E mon konsyan e lenformasyon ki mon gannyen se ki I kapab annan bokou plis by catch ki kapab antre dan lavenir.

And yet alone si Gouvernman I vin avek polisi konsernan son long liner, la ankor I annan ankor en pe plis by catch ki purse seiners ki kapab ganny land Sesel a lavenir.

So loportinite I enorm kot by catch processing I konsernen.  E nou pe bouz boner avek nou regilasyon, pou nou fer sir poudir nou bann dimoun, nou bann processors pa dezavantaze.

Lo kote lezot konsesyon Onorab delo avek elektrisite, mon kapab dir avek sa Lasanble poudir, I vre ki serten dokiman ti ganny diskite lo pou donn rediksyon pou donn konsesyon lo elektrisite, me ler mon vin dan Minister mon ti vwar poudir I annan plizyer lenformasyon ki manke avan ler ki nou fer serten desizyon.

Akoz? Set akoz lenformasyon ki nou ti pe gannyen pa ti pe rekonsilye; par egzanp eksportasyon pou bann dimoun ki dan processing, zot lenformasyon pa ti pe annord avek lenformasyon ki nou ti pe gannyen petet atraver SBS.  Sa bann lenformasyon pa ti pe rekonsilye.  So ki nou’n fer nou, se ki mon request pou nou ganny tou lenformasyon konplet avan ler okenn rekomandasyon I ganny fer devan Gouvernman, konsernan si zanmen nou pou donn konsesyon lo delo avek elektrisite.  Mersi Mr Speaker.

 

MR SPEAKER

Mersi Minis.  Onorab Stephen Pillay.

 

HON STEPHEN PILLAY

Mersi Mr Speaker.  Mr Speaker mon ti a kontan demann Minis lo sa valer azoute ki – dir nou pou osi kapab en lenformasyon lo bann lenfrastriktir ki I annan sirtou Providence, e bann unit ki egziste, ki kapab servi pou fer processing?  Eski bann later I available pou dimoun kapab fer zot konstriksyon fer processing?

E en lalis osi ki bann later I annan Providence ki available?  E bann ki’n ganny lease ki I pa lye preski tou avek pwason?  Mannyer ki tou sa lalis lekel ki pe fer, kwa ki I pe fer sa bann unit?  E eski I pe konsidere osi ki bann mandater bato ki’n demande fer request zot bout later ,pou zot kapab fer zot value adding ek lezot ice – bann zafer?  Ki kriter ki zot pe servi later ki annan si in ganny put into good use lo Providence?  Mersi Mr Speaker.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Konsernan lenfrastriktir mon krwar petet Onorab pe fer referans avek sa 9 unit ki annan Providence kot ladan zis 2 ki operasyonnel e 3 annefe lenformasyon ki mon annan se ki ti annan plizyer retar.  Mon krwar Lasanble in diskit sa a plizyer repriz akoz ki sa bann unit in ganny konstri pandan tou sa bann letan, e nou pa pe vwar poudir I pe ganny servi parey I ti devret parey orizinalman I ti ganny year marked pou fer.

 

Me lenformasyon swivan diskisyon ki mon fer avek SFA, se ki nou espekte dan bann detrwa mwan ki devan nou, nou pou kapab rezourd tou sa problenm, kot sa bann dimoun zot pou kapab dabor ganny zot lease ava annord.  E dezyenmman PUC I ava’n konplent konstriksyon substation ki pou allow sifizaman lenerzi pou ariv kot sa bann landrwa laba plizoumwen kot zot bann processing area.

Konsernan alokasyon later, si I annan later sifizaman, mon krwar poudir zot okouran ki I annan serten later Providence ki ti ganny rezerve pou bann aktivite valer azoute. Osi I annan later si mon pa tronpe mon krwar mon vwar en bon Ile Du Port osi ti annan serten later osi ki ti ganny rezerve pou sa bann pou bann fasilite parey.

Mon aprann ki I annan serten ki’n fini ganny allocate, me I annan devlopman ki pa’n arive lo la.  Swivan diskisyon ki mon fer avek SFA, se ki nou bezwen bouze lo la pou nou kapab pran serten aksyon.  Me mon ganny dir osi poudir ti annan serten retar kot lease I konsernen.  Enn fwa ki SFA I ava fini sort out kantite lease ki annan pou fer avek serten later ki’n ganny allocate, me pa’n ganny devlope, la SFA ava donn zot en dele letan rezonnab pou zot fer zot set up zot business apropriye.  So an gro Mr Speaker mon krwar mon’n adres konsern Onorab, unless I ti annan okenn swivi I ti le fer?  Mersi Mr Speaker.

 

MR SPEAKER

Mersi Minis.  Onorab Pillay.

 

HON STEPHEN PILLAY

Mr Speaker mersi.  Minis ou bann – CEO I konn byen louvraz zafer boat owners ki pe rod en bout later pou fer processing.  E eski ou kapab donn nou en lalis sa bann later Providence e Ile Du Port, ki parey ou pe dir lekel zot lease owners e ki zot pe fer lo la?  Zot pe store marsandiz ouswa zot pe processing pou nou kapab konnen pou nou en sipor osi Minister Lapes pou travay ek sa boat owners mon ti a kontan ganny en repons avek Minis.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  Napa okenn lobzeksyon pou fer sa lalis available pou Onorab pou sa Lasanble.  E kestyon se ki konbyen boat owners ki pe rod later ki pou fer processing se sa ou kestyon Onorab?  Wi mon pou napa sa lenformasyon avek mon me ler nou a submit sa lalis ki ou’n demann nou la, nou a fer en sel soumisyon pou ou kapab ganny sa lenformasyon.  Mersi Mr Speaker.

 

MR SPEAKER

Mersi Minis.  Onorab Ahmed Afif.

 

HON AHMED AFIF

Mersi Mr Speaker.  Mr Speaker mon ti a kontan demann Minis dan son plan ki i annan pou Sekter Lapes, eski I annan en target lo ki kantite valer azoute nou devret fer avek bann ton ki pe pas atraver Sesel?  Parey nou konnen ozordi Minis zis en pti gin ki pe al valer azoute atraver IOT dan tou ton ki vini larestan I al Maurice e Maurice zot annan lizin ki pe fer loins eksetera.  Ki target ki ou annan pou bann pwason ki pe pas Sesel pou zot ganny process isi e fer valer azoute an kree lanplwa e deviz pou Sesel?  E ki dele letan zot ekspekte fer li?  Ou dir ou pou donn nou tou bann operater, konbyen zot I annan konman ou lalis I pare?   E eski ou kapab donn nou en lendikasyon lo target ki zot annan – e dele letan?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  I kler poudir lo kote valer azoute I en sekter ki Gouvernman en pe letan pe koz lo la e nou anvi delivre lo la pli vit posib I vre ki ozordi valer azoute I plizoumwen avek IOT e osi la mon fek pe donn serten lenformasyon konsernan bycatch ki la osi I annan serten valer azoute pe ganny fer.

Me mon krwar ki konsernan target fransman ki napa target ki’n ganny devlope me otan ki posib maximum ki nou kapab fer lokalman, mon krwar poudir I enportan ki Gouvernman I al dan sa laliny pou donn sipor.

I vre ki Maurice pe konsantre lo bann zafer loin ek lezot, mon krwar ki in deza annan lentere ki’n ganny eksprimen apropo sekter prive pou zot antre pou zot osi al prepar al fer loins ek bann lezot prodwir a baz valer azoute.  Ki dapre mon lenformasyon ki mon annan se ki, le moman ki nou kapab bouze avek sa Central Cold Storage ki pou vin an plas lannen prosenn, then sa pou vin en spin off pou kapab ed nou pou nou kapab akseler-e avek lo laspe valer azoute.  So konsernen pou reponn ou kestyon pli spesifikman Onorab, maximum ki nou kapab prodwir ki nou kapab fer valer azoute isi lokalman, atraver ton ki lapes dan nou delo ki I dan zanmirant Sid Was Losean Endyen ki ganny landed Sesel, mon krwar I pli bon pou nou lekonomi.  Mersi Mr Speaker.

 

MR SPEAKER

Mersi Minis.  Dernyen kestyon Onorab William.

 

HON WAVEN WILLIAM

Mersi Mr Speaker.  Mr Speaker an lefe ki Minis in mansyonnen poudir nou annan en ta loportinite e ki nou kapasite tonaz pou bycatch i 14mil tonn e nou pe servi selman 5mil tonn, Minis mon anvi demande lo kote I mank proaktivite – lo sekter prive ouswa lo kote egzekitiv pou fer sa sekter bouze?

E dezyenmman mon krwar sa eleman target, akoz si ou annan sa sekter parey ou pe dir Sesel pe promot fortman Blue Economy nou pe koz bokou lo fer valer azoute, konmsi ki vreman konmsi konkretman sa Plan Konpreansiv I annan pou fer pou pous dimoun dan sa sekter, pou fer sir ki nou maksimiz sa benefis vizavi valer azoute dan lapes?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker.  I annan en bon pe letan depi ler Gouvernman pe koz lo valer azoute dan lapes, me menm parey mon dir mon fek reponn kestyon Onorab Pillay konmkwa ki plizyer morso later in ganny met a zot dispozisyon.  Me mon panse se ki nou bezwen al vwar akoz envestiser pa pe neseserman antre sirtou si ou pe koz ek mon konsernan lo bycatch kot nou konnen I annan potansyel enorm.

E menm zafer lo kote ton parey Onorab Afif in dir mwan I annan potansyel I la.  Me mon krwar se ki nou pou bezwen vwar avek bann avek envestiser akoz pa antre mon konnen kou envestisman inisyal I bokou o.  Me ler Gouvernman ti deside atraver DBS pou nou aret donn loan pou bato lapes, ki nou ti dir se ki sa fon larzan sa larzan ki annan kot DBS, I devret ganny dedye a valer azoute.  So Gouvernman in deza atraver DBS pe ofer posibilite finansman, me malerezman I pa pe bouz parey mon ti ava swete.

Si mon pa tronpe pou le moman nou annan nou 3 oubyen 4 operater ki dan bann processors by catch.  E sa bann processors letan mon diskit avek zot, zot pe konman dousman.  Me zot pe ekspekte poudir zot pou servi bokou plis by catch an mezir zot ogmant zot lenvestisman – an mezir zot kapab fer plis penetrasyon avek bann prodwir labaz valer azoute ki zot pe prodwir.

So kote problenm I ete, mon krwar ki nou pou bezwen vwar nou konman en Gouvernman kote ki ete, ki lezot mankman ki annan ki pe anpes sa lendistri sou-sekter valer azoute devlope. E aprezan apre nou ava pran bann mezir kolektiv pou fer sir oubyen si fodre vin avek konsesyon sa I en keksoz ki Gouvernman I ava diskit lo la.  Akoz mon konnen kou envestisman I o apre operating cost in the absence of information, nou pa pe tro kapab fer en desizyon ziska ler nou a ganny bann lenformasyon ki nou bezwen.  Mersi Mr Speaker.

 

MR SPEAKER

Mersi Minis.  Bon nou ariv alafen nou Sesyon Kestyon pou Minis Bastienne avek son delegasyon.  Nou … Yes Onorab Ferrari?

 

HON JEAN-FRANCOIS FERRARI

Mr Speaker.  Vreman kourt Minis in dir nou poudir zot an retar sa 2 nouvo processors sa de processors dan Lendistri Banbara, kan nou kapab ganny kan zot pou ganny zot license, silvouple?

 

MR SPEAKER

Wi.  I en kestyon … I pa en …

 

HON JEAN-FRANCOIS FERRARI

Non akoz Minis in dir nou pa’n byen konpran.  Kan zot pou ganny zot license?  Mersi.

 

MR SPEAKER

Ok.

 

HON JEAN-FRANCOIS FERRARI

Kan zot pou ganny zot license?  Mersi

 

MR SPEAKER

Minis si ou kapab fer Lasanble ganny sa lenformasyon.  Ok? Parey lezot lenformasyon ki ou’n promet Lasanble, ou ava fer Lasanble osi tou ganny sa lenformasyon.  Nou’n ariv alafen Sesyon.  Nou ava dir mersi Minis ek son delegasyon nou ava eskiz zot parmi nou.  E Lasanble nou pou Break nou pou repran nou travay 11.30 avek PNQ.

 

 

(BREAK)

 

 

MR SPEAKER

Bon nou a kontinyen nou travay parey mon dir avan nou Break lo Order Paper pe al pran Private Notice Question ki sorti kot Leader Lopozisyon.  E pou reponn sa kestyon parmi nou annan Minis Dezinyen Madanm Macsuzy Mondon ki Minis osi responsab pou Spor I akonpannyen par CEO National Sports Council Mr Jean Larue.  E apre nou annan Minis pou Lanplwa, Imigrasyon e Civil Status Madanm Myriam Telemaque ki akonpannyen par son PS pou Imigrasyon ek Civil Status Mr Alain Volcere e Special Advisor to the Minister Mr Michel Marie.  Le 2 Minis bonzour welcome parmi nou avek zot delegasyon e nou ava al direkteman lo Private Notice Question.  Onorab Ramkalawan.

 

HON WAVEL RAMKALAWAN

Mersi Mr Speaker.  E bonzour Minis Dezinyen e Minis Telemaque.  Mr Speaker

Eski Minis responsab pour Sports e Minis responsab pour Limigrasyon i kapab dir Lasanble:

Premyerman kan e anba ki sirkonstans eski Mathieu ek Simon Bachmann, 2 Franse, in ganny nasyonalite Seselwa?

(2) Lekel, par non e dat, lezot etranze ki’n ganny nasyonalite depi Oktob 2016, anba sa menm provizyon Lalwa, parey sa 2 Franse?  E

(3) Akoz ki Gouvernman aktyel, dirize par Mr. Danny Faure in prefere donn 2 Franse priyorite lo Seselwa dan sport?

Mersi bokou.

 

MR SPEAKER

Mersi Onorab Ramkalawan.  Mon ava pas laparol avek Minis Telemaque.

 

MINISTER MYRIAM TELEMAQUE

Bonzour Mr Speaker.  Bonzour Leader of the Opposition Leader of Government Business e tou Manm ki dan Lasanble ozordi.  Mr Speaker parey Manm Onorab isi prezan I okouran kestyon sitwayennte Seselwa, I ganny gouvernen par Konstitisyon Larepiblik e Lalwa Citizenship Act 1994 ki ti ganny amande an Novanm 2013, ki dekrir sirkonstans anba lekel en endividi I kapab fer en laplikasyon pou vin en sitwayen Seselwa.

Citizenship Act ki’n vin an viger depi Novanm 2013 I fer provizyon pou en etranze ganny sitwayennte Seselwa anba sirkonstans swivan:

Maryaz avek en Seselwa.

Dimoun ki travay dan en domenn ki ganny vwar konman en priyorite pou pei.

Sirkonstans spesyal.

E dimoun ki kalifye konman envestiser.

Seksyon 5 (1) Citizenship Act i fer provizyon pou ki Prezidan Larepiblik I servi son prerogative pou akord sitwayennte Seselwa en etranze ki normalman pa ti pou elizib pou natiralizasyon oubyen lanrezistreman.

Swivan soumisyon en tel demann analiz e egzaminasyon de-pre I ganny fer swivi par rekomandasyon pou konsiderasyon si sa kandida I merite.  Se zis ki apre sa legzersis in konplete ki dosye I ganny soumet pou laprouvasyon avek Lotorite apropriye.

Dan bokou ka sa bann endividi I annan en abilite eksepsyonnel dan domenn parey lar, lasyans, ledikasyon, lalwa, biznes oubyen spor.

Dan sa bann sirkonstans koumsa Seksyon 5 (1) I ganny aplike.  Dan sa ka spesifik sa de sitwayen Franse Mr ek Simon Bachmann aze 22 e 19an ki labaz sa kestyon ozordi, en demann pou zot lanrezistreman pou vin sitwayen Seselwa, ti ganny fer par Chairman Lasosyasyon Naze e sa rekomandasyon ti osi resevwar sipor ansyen Sef Egzekitiv NSC.  Rasyonnel ki ti donnen pou sa demann, I ki sa de nazer ki annan bokou potansyel pou reprezant Sesel dan prosen Zwe De Zil e osi Sanpyonna Lafrik e lezot konpetisyon ki a swiv.  Byensir avek antisipasyon ki zot ava anmenn meday pou Sesel.

Lot konsiderasyon ki ti ganny met lanfaz lo la I zot kalifikasyon konman enstrikter naze e zot kontribisyon sibstansyel ki zot kapab fer dan formasyon e lankadreman nouvo group nazer ensi ki enstrikter pou lavenir.

Mr Speaker kot etranze in akey sitwayennte Seselwa pou reprezant Sesel, dan bann sportif enternasyonal espesyalman natasyon, in deza arive dan lepase.

An sa ki konsern 2enm kestyon Mr Speaker I annan zis en etranze ki’n ganny nasyonalite Seselwa dan menm sirkonstans parey sa 2 Franse depi Oktob 2016.  Sa zwer basketball I apel Solomon Alao en sitwayen Nizeryen e dapre nou rikord in marye avek en Seselwa.  Le 09 Zilyet 2014 Chairman Seychelles Basket Ball Federation ti fer en demann avek ansyen Sef Egzekitiv NSC pou asiste sa basketballer pou li ganny nasyonalite Seselwa.

Le 30 Zilyet 2014 ansyen Sef Egzekitiv NSC, ti fer en demann pou fer sa etranze ganny nasyonalite.  Son demann pa ti ganny aprouve pou la rezon se akoz sa sportsman ti pe zwen pou en tim basketball an Reunion.

An 2018 sa etranze ti fer en lot demann e ansyen Sef Egzekitiv NSC ti konfirmen, ki NSC I ankor pe siport demann pou sa sportsman ganny nasyonalite Seselwa.

NSC ti fer re sorti ki sa basketballer pou zwe pou National Team Sesel Basketball si I ganny nasyonalite Seselwa?  Baze lo sa bann lenformasyon, son demann ti ganny akorde.  Mr Speaker mon aprezan pas laparol avek Minis Dezinyen pou pran sa 3enm bout kestyon silvouple.  Mersi.

 

MR SPEAKER

Mersi Minis Telemaque.  Minis Mondon.

 

THE DESIGNATED MINISTER MRS MACSUZY MONDON

Bonzour Mr Speaker.  Bonzour Leader Lopozisyon e Leader Zafer Gouvernman e tou Manm Onorab dan Lasanble.  Mr Speaker an 2003 Zwe De Zil ki ti fer Maurice nou ava rapel en nazer ki ti ganny sitwayennte Seselwa son lannen presedan an 2002, ti compete dan konpetisyon naze dan Sesel e I ti anmenn 4 meday Lor.

An 2007 Zwe De Zil ki ti fer Madagascar sa menm nazer ti compete lo non Sesel e I ti anmenn 7 meday Lor – en Larzan e Bronz.  En lot nazer osi avek sitwayennte Seselwa, ti ganny en meday Larzan avek en Bronz.

Mr Speaker an 2011 Zwe De Zil ki ti fer Sesel sa nazer ti osi compete ankor pou Sesel e I ti lev nou paviyon pli o ler I ti anmenn 5 meday Lor.  Son pti ser ki ti osi ganny sitwayennte Seselwa, ti osi anmenn 2 meday Larzan e en Bronz.

Dan konpetisyon relay tou lede ser ti anmenn meday Larzan avek Bronz.  Mr Speaker mon fer sa pti tour lorizon pou senpleman montre ki kalite kontribisyon ki de legzanp presedans ti anmenn pou nou pei.

Departman Spor pa konsider lefe ki 2 Franse in ganny nasyonalite Seselwa konman en priyorite lo lezot Seselwa dan spor.  Sa 2 dimoun pa pe neseserman ranplas Seselwa me pou plito konplemant e ranforsi lekip Seselwa.

Lasosyasyon Naze in rekonnet potansyel dan sa de dimoun e vwar merit pou fer demann lo sitwayennte Seselwa pou zot.

Mr Speaker Departman Spor e Konsey Nasyonal pou Spor I krwar ki potansyel sa 2 zenn pou anmenn en nouvo dimansyon dan lantrennman e konpetisyon parmi nou lekip nazer.  I pa nou lentansyon Mr Speaker pou donn okenn etranze priyorite lo Seselwa dan spor.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker mon anvi nou ganny serten keksoz kler premyerman kisisa ki anpese pou sa 2 Franse enkli zot paran ki pe travay avek Lasosyasyon Naze, pou zot ede pou ki Seselwa son standar I monte e ki Seselwa ki reprezant Sesel olye ki nou donn zot nasyonalite?  Sa mon pa kapab ganny en konpran.  Dezyenmman eski Minis pe dir avek Seselwa ozordi, ki poudir nou nasyonalite Seselwa son valer in ariv egal en meday Lor dan Zwe De Zil? Ki ankor enn fwa mon pa kapab aksepte e mon krwar ki Seselwa pa pou kapab zanmen aksepte sa.

Mr Speaker 5 (1) I dir avek nou ki Prezidan pou li kapab akord sa sitwayennte, I bezwen I kapab donn sa en dimoun ki’n fer ‘’

who has done signal honor or rendered distinguished       service to Seychelles or the person is otherwise meritorious. ‘’ Sa 2 Franse pa ankor fer nanryen pou Sesel!  Sa 2 Franse pa ankor fer absoliman nanryen pou Sesel enn I annan 22an lot I annan 19an – zot pa ankor fer nanryen pou Sesel.  Alor mon anvi konnen ki baz vreman ki eski nou deal lo potansyel nou pa kapab donn nou nasyonalite baze lo potansyel si non tou dimoun atraver lemonn annou fer zot vin Seselwa akoz zot annan potansyel.

Mr Speaker mon ti a kontan ki Minis I eksplik sa kler anba Lartik 5 (1) ki ‘signal honor’ ki sa bann dimoun in fer?  Ki distinguished service ki zot in rann Sesel?  E kwa ki zot in fer ki ‘meritorious’ eksepte ki zot pe naz avek nou bann eksepte ki zot pe naz avek nou bann nazer Seselwa?

E apre sa Mr Speaker letan Minis pe dir konsernan zot pa pou bar semen Seselwa ensidswit –  Mr Speaker eski Minis I kapab eksplik nou eski ou annan en lekip naze ki annan 10 dimoun ladan, e aprezan ou pran 2 Franse ou met ladan Seselwa son sans semen pa’n ganny bare?

Mr Speaker nou Lasosyasyon nou Gouvernman I kapab met lanfaz lo devlop Seselwa, olye pran etranze fer vin Seselwa sa menm Gouvernman ki letan ti fer premye Zwe De Zil ti konplent letan en Réunionnais sa menm Gouvernman ki ti konplent letan ti annan en Réunionnais ki ti en sprinter zot ti konplent akoz zot ti dir se pa I pe partisip pou La Reunion I pa devret fer.   Eski Gouvernman ozordi pa pe montre lipokrizi letan nou pe fer sa bann kalite keksoz?  Mersi bokou.

 

(APPLAUSE)

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker Departman Spor NSC I travay tre pros parey nou konnen avek bann diferan Lasosyasyon I annan dan pei e kan I fer serten rekomandasyon ki nou, nou krwar ki I annan serten merit byensir NSC e Departman Spor I anmenn son sipor.

E demann NSC sete ki ti rekomandasyon ki sa 2 zenn I ganny nasyonalite.  Parey Minis in eksplike pou zot kapab partisip dan bann zwe ki Sesel I partisip ladan.  Donk nou, nou siport sa demann ki’n ganny fer par sa Lasosyasyon.

Mr Speaker nou pa pe dir ditou ki nou nasyonalite in vin egal ozordi en meday dan Zwe De Zil.  Non, sa I pa ditou le ka.  Mon krwar parey mon’n dir if anything sa partisipasyon sa bann dimoun I ava anmenn en lot dimansyon zisteman dan lantrennman, e dan lekip nou bann nazer.

Akoz mon krwar I annan I ava fer konpetisyon petet pli o nivo pou zot e petet I ava pous zot osi pou zot kapab ogmant zot performans.  E mon krwar nou okouran osi Mr Speaker poudir papa sa2e zenn, I pou le moman I nou coach pou nou bann nazer dan pei e mannyer mon konpran I en tre bon lantrener.

Mr Speaker kot I konsern partisipasyon dan bann zwe nou annan kot I konsern naze ek atletik nou annan sa ki apel en qualified time.  Savedir tou nazer ki meet sa kriter I pou ganny sans pou li partisip dan konpetisyon naze e mon pa vwar ki mannyer partisipasyon sa de dimoun I pou afekte zot partisipasyon.  Akoz tou dimoun ki kalifye finalman ki zwenn sa kriter zot pou ganny sans pou zot partisipe.

Mon ti a kontan reasir sa Lasanble Mr Speaker poudir nou lentansyon se kontinyen devlop Seselwa e se pou sa rezon ki NSC Departman Spor dan bann lannen ki’n pase, zot in fer zefor pou anmenn bann pli bon lantrener posib pou kapab antrenn nou bann dimoun, pou kapab kontinyen devlop dan zot performans dan spor e fer sir ki zot perform a sa oter ki nou anvi zot performen.  Mersi Mr Speaker.

 

MR SPEAKER

Mersi Minis.  Minis Telemaque oule azout keksoz.

 

MINISTER MYRIAM TELEMAQUE

Mersi Mr Speaker.  Mr Speaker konsernan parey Leader of the Opposition in mansyonnen I vre ki zot bezwen annan sa kategori Lalwa I ganny kouver anba meritorious e osi si zot in fer distinguished service.  Kalifikasyon ki’n ganny prezante avek nou lofis, I montre poudir zot annan zot pou fer kontribisyon sibstansyel dan pou pei dan domenn spor.  Se tou Mr Speaker.

 

MR SPEAKER

Yes Onorab Ramkalawan.  En moman ou le mon retourn kot ou mon ava kontinyen ek bann kestyon.

 

HON WAVEL RAMKALAWAN

Yes.

 

MR SPEAKER

Yes ale Onorab Ramkalawan.

 

HON WAVEL RAMKALAWAN

Mr Speaker.  Premyerman Minis in dir avek nou ki zot pou Mr Speaker nou pa konnen ki arive demen! Usain Bolt ti krwar I pou dan son dernyen paryaz taye I pou ganny en medya Lor dan son dernyen 100met, me I ti ganny bate!

Alors eski Minis pe dir avek nou ki aprezan sa Lalwa parske la I kler ki poudir zot in al kont Lalwa zot prop Lalwa anba 5 (1) anba ki in gannyen ‘signal honor, distinguished service’, nou pe koz lo potansyel me dan sa ka Prezidan I kapab donn nenport dimoun nasyonalite.  Akoz I pe dir’’ I pou?’’ Kot nou’n arive Mr Speaker? Sa I premye.

2enm Minis pou responsab pou Spor I dir ki sa I ava anmenn plis konpetisyon, I ava isi, I ava laba, be dan sa ka annou donn tou zanfan bann coach ki vin Sesel nasyonalite Seselwa!  Eski Minis pa vwar ki poudir sa desizyon ki zot in pran mon napa problenm avek papa sa msye ki Bachmann li I pe fer son travay in vin Sesel, I pe ganny peye pou li fer sa travay e nou ekspekte li devlope, me eski Minis I ava dakor ki sa desizyon ki zot in pran finalman zot pe fer nou nasyonalite premyerman pas pou nanryen ditou?

E dezyenmman…prostitye nou sitwayennte Seselwa, e mwan konman en Dirizan dan sa pei mon pa kapab aksepte sa e eski Minis I ava konsidere pou repran – pou kennsel sa nasyonalite, akoz I pa zwenn Lartik 5 (1) – Seksyon 5 (1) dan nou Lalwa Sitwayennte?  Mersi bokou.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mr Speaker mersi bokou.  Onorab NSC in fer rekomandasyon avek nou biro. Rekomandasyon ki NSC in fer ti baze lo kalifikasyon sa 2swimmers e apre promes ki zot pou fer anmenn meday pou Sesel.  E nou vwar par zot listwar poudir zot very good e ki zot pou annan sa potansyel pou zot impart zot knowledge, avek bann lezot swimmers ki deza la.  Baze lo la ki desizyon ti ganny pran.

 

MR SPEAKER

Mersi Minis.  Onorab Basil Hoareau.

 

HON BASIL HOAREAU

Mersi Mr Speaker.  Bonzour Minis tou lede Minis e bann dimoun ki pe ekout nou e tou bann Manm.  Zis mon clarify en keksoz.  Sa 2 dimoun avan mon al lo mon kestyon Minis ou pe dir zot in ganny anba 5 (1) ok.  Minis ankor mon pou en pe petet repetitive lo sa ki Onorab Ramkalawan in dir.  Mon get 5 (1) mon pa vwar kot sa de dimoun I antre.  Mon pa vwar Minis I dir ou otherwise meritorious.  Meritorious I vedir sa dimoun I fer keksoz merit.. it’s already done! He’s already proven him or herself!  E sa 2 dimoun dan sa ka pa meet sa.  Pa meet sa kriter.  Minis eski ou pa krwar I plis ki ler pou nou respekte Lalwa? Letan nou fer Lalwa nou bezwen respekte li.

 

(APPLAUSE)

 

HON BASIL HOAREAU

I enportan.  I plis ki ler pou nou respekte Lalwa, akoz Lalwa I lo nou papye nou pa pe respekte.  Sa 2 dimoun pa meet sa.  Sa si I anmenn devan Lakour pou ganny kase! pa meet – sa 2 dimoun pa meritorious Minis.

E dezyenmman Minis eski sa bann dimoun ti’n fer en aplikasyon, wi ouswa non? Ouswa ou pe dir ek nou Lasosyasyon Naze ki ti’n fer en serten aplikasyon.  E lot keksoz ki dir ek ou ladan with consent of that person, eski I annan en dokiman ki sa dimoun in sinyen ki zot dir zot donn zot konsantman pou zot vin sitwayen Seselwa si zot pa’n apply?  Mon ti a kontan konn sa avan mon kontinyen petet en supplementary.  Mersi.

 

MR SPEAKER

Mersi Onorab Basil Hoareau.  Minis.  Minis Telemaque.

 

MINISTER MYRIAM TELEMAQUE

Mr Speaker mersi bokou.  Mersi Onorab.  Onorab demann ti sorti kot NSC e NSC ti fer sa demann anba Seksyon 5 (1) e nou lofis ti konsidere e nou servi sa Seksyon 5 (1) sanmenm sa Seksyon ki nou’n servi.  E konsernan zot laprouvasyon, si zot dakor mon mazinen kekfwa Chairman in bezwen koz avek zot, dir zot poudir – met zot okouran e zot in donn zot laprouvasyon.  Akoz I annan en dokiman ki zot I annan en form ki zot in ranpli pou fer sa demann.

 

MR SPEAKER

Yes Onorab Basil Hoareau.

 

HON BASIL HOAREAU

Minis ler ou dir mon zot in fer en form sa ki mon anvi konpran eski Lasosyasyon Naze in vini in dir avek Gouvernman, I dir gete nou anvi sa 2 dimoun ganny citizenship Seselwa.  E prezan I annan en aplikasyon formel ki’n ganny fer par sa bann dimoun, kot zot in apply to become Seychellois citizens?  E si sa I le ka – e si sa pa le ka eski si zot in zis ganny donnen, eski I annan en dokiman ki Gouvernman I dan son posesyon ki Gouvernman I dan son posesyon – en dokiman kot sa bann dimoun –  sa e dimoun la dan sa ka partikilye in consent?  In dir wi nou pare pou aksepte sitwayennte Seselwa?

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mr Speaker mersi bokou.  Nou napa dokiman ki montre poudir sa 2 swimmers in agree pou ganny sa nasyonalite, akoz tou demann ti ganny fer atraver NSC.  E wi I annan en formiler ki zot gannyen pou zot fer sa demann.  Mersi Mr Speaker.

 

MR SPEAKER

Mersi Minis.  Onorab Basil Hoareau.

 

HON BASIL HOAREAU

Minis ankor Lalwa pa ganny meet. I dir ek ou ‘’with the consent of the person.’’ Akoz 5 (1) I aktyelman pa en dimoun ki’n apply.  I en dimoun ki ou anvi donn li ki ou krwar poudir I merite e ou ale ou donn li se sa ki I dir ek ou ‘’with the consent.’’  Akoz pa en dimoun ki apply.  Si en dimoun I apply ou pa kapab ganny 5 (1).  Se sa ki mon’n demann ou.

E sa ki ou’n dir ek mon Minis sa ki ou’n dir ek nou konman en Lasanble isi se ki zot pa ti apply, me lo at the request of the request of the Lasosyasyon Naze, sa in ganny donnen avek zot.  But there should have been also consent, pou fer sir poudir zot pe aksepte.  So mwan Minis ankor avek mon pou regret poudir seksyon 5 (1) pa’n ganny respekte Minis.  E mon krwar nou bezwen regete.

E Minis mon krwar nou deza koze dan Lasanble poudir, nou anvi reviz nou Citizenship Act nou anvi menm reget nou Lartik ki deal avek Citizenship dan nou Konstitisyon, avek sa bi antet.  Eski Minis ou pa krwar poudir preski petet a sa moman avan ki sa bann Lalwa I vini devan Lasanble, poudir nou devret at least met moratorium lo donn citizenship?   Mete  – dir ‘’la pou le moman nou pa pou donnen. Annou esper nouvo Lalwa vini.’’ Akoz nou santi poudir sa bann Lalwa pa zis.  Pa zis.  There is no fairness avek ki mannyer Lalwa I ete pou nou pep deor.  Nou bezwen mon krwar fodre nou met en moratorium poudir pou le moman annou met en fren lo la ziska nouvo Lalwa I vini e nou ava refer.  Otherwise I annan dimoun ki pe kontinyen pase.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mr Speaker mersi bokou.  Mersi Onorab.  Onorab konsernan nou revi Lalwa Sitwayennte, sa I an diskisyon dan nou lofis e nou pou fer provizyon nou pou vin avek nouvo Lalwa kot Lasanble avan juin lannen prosen.  Lo sa 2enm pwen ki ou’n releve konsernan moratorium lo citizenship; mon krwar mon pa pou kapab donn en desizyon la, selman nou a pran an konsiderasyon ou komanter ki ou’n fer sorti.  Mersi Mr Speaker.

 

MR SPEAKER

Mersi Minis.  Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun.  Mr Speaker sa sityasyon ki devan nou se en déjà vu.  Le 14 Avril 2001 zournal NASYON ti pibliy en Lartik ti apel ‘’Who rules Swimming in Seychelles?’ Otour saga lafanmir Austin, kot son papa Shrone ti ansarz federasyon naze e bann Seselwa bann nazer Seselwa ti pe konplent.

Dan zournal DAILY … NASYON pou Gouvernman sa.  Konplent sa unfair treatment ki bann etranze I gannyen lo nou e lotorite ki la ozordi devan nou pa aprann zot leson, e nou vwar ozordi pe repete avek lafanmir Bachmann.  Mon kestyon; Minis in koz lo en tour lorizon e I nonm en atlet ki napa kouraz lo la kourtwazi pou nonm son non se Shaun Austin sa ta meday ki in nonmen, me annou demande oli bann Austin ozordi?  Oli zot?  Kwa ki zot ankor pe fer pou anmenn naze dan Sesel devan?

I annan en italyen Lela Regamonti – oli li?  I osi in ganny nou nasyonalite, in naze pou nou.  So mon anvi demann Minis, ki lasirans ki Gouvernman I annan ki sa bann dimoun zot pa zis pe vini pou zot pa pe target zis Zwe De Zil me Olympic – World Champion pa par al tou bann loportinite coaching ki annan deor zot pe benefisye.  Alor ki garanti ki Gouvernman I annan ek sa bann dimoun a lavenir pou kontinyen donn Sesel en rannman.  Mon premye kestyon.

Dezyenmman sa pratik donn bann etranze sitwayennte pou zot kapab compete dan lasenn sportif, I en pratik tre komen parmi bann pei Arab.  Qatar zot fer sa en kantite akoz zot napa sa abilite zot pran bann Afriken pou tay pou zot e ganny meday lor Olenpik.  So mon anvi konnen si nou telman frekant bann Arab ki nou pe aprann sa pratik avek zot?  Mersi bokou.

 

MR SPEAKER

Mersi Onorab Henrie.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker spor pou serten I en karyer ki ou fer pou en serten kantite letan.  E parfwa osi parey nou konnen petet plitar dan ou lavi ou karyer profesyonnel pa permet ou pou kontinyen.  E se petet pou sa rezon ki nou vwar ki I annan serten dimoun ki fer spor pou en pe letan, apre zot swazir pou pas plis letan avek zot fanmir; oubyen petet konman en adilt zot swazir pou fer lezot keksoz.  Ok?

Byensir Konsey Nasyonal pour Spor pa kapab donn okenn garanti, oubyen asire ki sa atlet ki’n ganny nasyonalite pou toultan reste dan pei, oubyen kontinyen partisip dan sa spor.  Me mon krwar I enportan osi nonmen mon krwar I annan en non ki’n ganny nonmen la, ki sa nazer ti partisipe I ti ganny nasyonalite akoz son paran ti deza Seselwa.  Donk mon krwar I annan diferan kategori bann dimoun ki’n ganny sitwayennte ok pou zot kapab an relasyon avek spor pou zot kapab partisip ladan.

Mr Speaker mon ti a kontan petet reasir Lasanble nou lentansyon se pa fer etranze pas par lao Seselwa Onorab ou’n dir I annan plizyer pei pa zis pei Arab. I annan plizyer pei osi ki fer sa.  E pa akoz nou pe fer ki vedir nou pe swiv legzanp sa ki Arab pe fer.  Me selman parey mon dir oparavan si nou travay pros avek lasosyasyon e si NSC Departman Spor I santi poudir sa rekomandasyon ki Lasosyasyon pe fer ok I en rekomandasyon ki bezwen siporte, of course I pou siport sa rekomandasyon pou nou kapab ede e ed sa Lasosyasyon petet pou li kapab sey anmenn en pe sa konpetisyon ki anvi anmennen dan sa disiplin sportif ki li I pe ansarz.  Mersi Mr Speaker.

 

MR SPEAKER

Mersi Minis.  Onorab Phillip Arissol.

 

HON PHILLIP ARISSOL

Mersi Mr Speaker.  Mr Speaker vi ki Guillaume Bachmann I direkter teknik naze, e I sipoze ede devlop nazer e antrenner dan en Seselwa me selman li ki voyaz avek Lekip Nasyonal Sesel dan tou konpetisyon enternasyonal, ki plan Minister alor I annan pou bann lantrener Seselwa?

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker sa msye I direkter teknik e mon panse I travay avek bann lezot coach e bann lezot coach zot osi zot annan zot klib, ki zot responsab.  Donk I annan sa travay ki ganny fer ansanm ok, pou nou kapab fer sir ki lantrennman dan spor I osi sa nivo ki nou anvi anmenn li.  Mersi Mr Speaker.

 

MR SPEAKER

Mersi Minis.  Onorab Arissol.

 

HON PHILLIP ARISSOL

Mr Speaker.  Me selman I sanble ki tou voyaz aletranze ki ganny fer okenn lantrener Seselwa pa asiste e zot pa zanmen konnen zot devlopman pa asire ki mannyer zot pou devlope si zot pa partisipe?  Mersi.

 

MR SPEAKER

Mersi.  Minis oule fer komanter.  Yes.

 

THE DESIGNATED MINISTER MRS MACSUZY MONDON

Mr Speaker.  Mon pa konnen si sa I leka me selman mon konnen si ou annan en national coach ler en national team I vwayaze, I bezwen li akonpanny son national team, o nivo enternasyonal kot I pe al fer sa konpetisyon.  E si I annan lezot coach ki pa ganny anmennen oubyen ki pa partisipe, sa nou kapab verifye Onorab en me solman mon pa okouran.  Mersi Mr Speaker.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker mon le dir avan mon demann kestyon si ou permet mwan, ki nou bezwen careful about bann stetment ki nou fer kot si nou tro frekant en nasyonalite, nou vin parey en nasyonalite, akoz mon krwar i lo border lo zenofobi.  Mon ti a kontan demann Minis Mr Speaker 9mersi Onorab Henrie pou remind mwan Konstitisyon zisteman parey Konstitisyon atraver Speaker) mersi Onorab Larue.

Mr Speaker mon ti a kontan demann Minis eski Lasosyasyon Naze in vin kot NSC oubyen okenn Manm Lasosyasyon Naze in vin kot NSC, pou fer okenn konplent in regards to management of national team naze?  Akoz sa ki pe devlope dan sa kestyon I kler poudir I annan serten konsern lo nivo Lasosyasyon Naze?  Eski alors in annan okenn pledwari, konplent formel, ki’n ganny fer vizavi lafason ki keksoz ki pe ganny run dan Lasosyasyon Naze ozordi?  Eski Minis I kapab klarifye sa pou nou.

Mon 2enm pwen Mr Speaker, baze lo kestyon ki mon koleg obor mon in demande Onorab Hoareau in demande Mr Speaker, eski Gouvernman pa ti a krwar I en bon lide, sirtou dan bann sirkonstans kot nou pe koz bann dimoun ki pa pe meet bann kriter sirtou Seksyon 5 ki sa provizyon Lalwa nou tenir li on hold pou ki okenn demann citizenship ki ganny fer anba sa provizyon Lalwa, pa ganny entertain until ki complete revizyon Lalwa Citizenship I ganny fer.

Mon konnen nou pa pe koz lo en moratarium zeneral nou pe koz lo sa Seksyon spesifik.  E mon dernyen pwen Mr Speaker mon ti a kontan klarifye, eski Departman Spor I kapab dir nou baze lo mon konnen Mr Larue I en dimoun tre konpetan dan son domenn si I annan lezot pei, mon pa konnen si zot in dir si I annan lezot pei, parey La France oubyen L’Angleterre oubyen bann lezot pei Was ki pratik en sistenm, kot zot fer sitwayennte bann atlet ki tre o nivo?  Eski I annan sa kalite pratik dan bann lezot pei?  Mr Speaker mersi.

 

MR SPEAKER

Mersi Onorab Pillay.  Bon I annan de part kestyon Minis Mondon ou a pran premye par apre swiv par Minis Telemaque.  Go ahead Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker non NSC pa’n ganny okenn konplent lo sa ki nou pe diskite bomaten la Onorab.  Lo kot I konsern lezot pei, wi mannyer nou konpran I annan lezot pei ki fer sa, me nou kapab osi fer resers pou rode lekel sa bann lezot pei pou donn sa bann lenformasyon.  Me mon krwar sa I arive Onorab.  Mon krwar I annan lot pei ki fer sa ok ki donn nasyonalite bann sportsman.  Mersi Mr Speaker.

 

MR SPEAKER

Mersi Minis Mondon.  Minis Telemaque.

 

MINISTER MYRIAM TELEMAQUE

Mersi Mr Speaker.  Mr Speaker sa ki Onorab Pillay in fer resorti mon ava note, selman mon ti a kontan fer resorti poudir I annan 5 (1) ek 5 (2) e 5 (2) I annan sirkonstans spesyal. I annan bann dimoun ki kalifye anba la.  Si ou met en moratarium lo 5 zot pa pou kapab fer sa demann.  Alor sa mon zis pe fer en komanter.

 

MR SPEAKER

Mersi Minis.  Onorab Pillay.

 

HON SEBASTIEN PILLAY

Mr Speaker.  Mon krwar pou retir tou dout, pou retir tou dout konmsi sa eleman diskresyon ki ozordi I egziste anba Seksyon 5 nou dan en fason nou ferm sa laport pou le moman, akoz ki pou arive konsern ki mon annan prezan la, akoz Minis I bezwen reakte lo lenformasyon ki I gannyen lo from en lot Lasosyasyon.  So I annan en prosedir ki pe ganny swiv sa I pa zis ganny donnen Minis pa’n zis leve en zour bomaten transfer sa file anvoy kot Prezidan pou li aprouve.  In annan tou en seri prosedir ki’n ganny swiv.

So vi ki I annan konsern lo nivo lorizin sa bann prosedir then, ki mon pe dir si nou pa kapab trust prosedir, then annou tenir and regarde ki mannyer nou kapab re enforce li dan en fason ki, si demen Lasosyasyon Volleyball I vini I le ganny I pe propoz sitwayennte pou en dimoun, or Football Federation pe propoz sitwayennte, pou en dimoun nou a konnen poudir be lala prosedir ki bezwen ganny swiv e lala bann kriter ki bezwen ganny met.  E non pa malgre en Lasosyasyon pe met serten presyon ki nou pou acquiesced to sa presyon.  Akoz I pou kree en sityasyon parey nou pe vwar ozordi, kot I annan lensertitid otour sitwayennte ki pou nou tou I en size vreman kontansye.  Mersi Mr Speaker.

 

MR SPEAKER

Mersi Onorab Pillay.  Minis.

 

MINISTER MYRIAM TELEMAQUE

Mersi Mr Speaker.  Mr Speaker nou a pran not tou sa bann rekomandasyon ki Onorab Pillay in fer resorti e nou a pran an konsiderasyon.  Mersi Mr Speaker.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon krwar I enportan pou nou tou agree ki napa okenn problenm avek sa coach Swimming Association, eksetera menm bann ki’n fer rekomandasyon pou sa msye son bann zanfan ganny nasyonalite.  Tou dimoun dan lemonn antye I sey rod meyer pou li menm e pou son zanfan.  Mon ti a kontan demann avek Minis eski Minis pa krwar ki zot 2Minis ki la konman bann advisor Prezidan, zot in fail dan zot travay pou zot advise Prezidan ki son desizyon I amount to kas Lalwa?

E ki sa se en travay ki zot ganny apwente zot ganny nonmen pou zot donn li the best possible advise, plito ki vin defann li ler in fer en move desizyon?  Eski zot aksepte sa?

2enm keksoz zot pe dir nou poudir a lavenir nou ava ganny bann benefis.  Me Mr Speaker mwan mon ti a kontan demann avek Minis responsab pou Spor si sa 2 garson I sitan bon e vi ki konmela zot pa ni reste Sesel zot reste La Reunion akoz zot pa naz pou La Reunion?  Akoz zot devret si zot ti sitan zot devret kapab ganny en plas pou zot reprezant La Reunion.  So eski zot in ganny advise pou zot pei?

E finalman mon ti a kontan dir avek Minis Mondon ki I tre danzere pou servi sa fraz in deza arive dan lepase; dan lepase I annan dimoun ki’n disparet; I annan dimoun ki’n ganny tortire; I annan dimoun ki’n ganny met dan kaso.  Sa ki’n arive dan lepase Minis Mondon, mwan avek bokou respe ou konnen mon annan bokou respe pou ou, in ariv dan lepase, nou pe anmenn sa pei dan en nouvo direksyon e nou ti a kontan konnen si ou avek ou Gouvernman zot pare, pou zot akonpanny sa pei dan en nouvo direksyon, kot Lalwa I ganny respekte!  I lo sa prensip.  Mersi Mr Speaker.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker premye bout kestyon Onorab si nou nou’n fail letan nou advise Prezidan non mon pa krwar Minis Imigrasyon oubyen mon menm depandan kwa ki nou annan pou fer avek sa desizyon si nou’n fail mon pense pas si nou fail pou nou fer sa Onorab.  Kot I konsern si sa de nazer in deza akoz sa de nazer pa naz La Reunion; Onorab zot in deza naze pou La Reunion ok dan lepase.

E mon ti a kontan reasir ou ki non nou pa pe reste nou pa pe viv dan lepase e parfwa I bon fer li pou nou konnen pou nou vwar aktyalite avan pou nou konnen annandler parey nou dir dan Festival Kreol en lizye dan lepase – en lizye lo lavenir, i bon konnen kote nou sorti pou nou konnen kote nou arive pou nou apresye, kot nou’n arive ozordi e mon kapab reasir ou poudir anba prezidans anba direksyon Prezidan Faure, nou pe travay pou en meyer lavenir pou Sesel.  Mersi Mr Speaker.

 

MR SPEAKER

Mersi Minis.  Minis Telemaque oule azout keksoz.

 

MINISTER MYRIAM TELEMAQUE

Mersi Mr Speaker.  Mr Speaker mon pa krwar mon’n fail akoz mon pa en dimoun ki fail.  E mon krwar nou pou baz nou desizyon lo rekomandasyon ki NSC in fer avek nou lofis.  Nou, nou la pou nou siport okenn sportsmen. Zot rekomandasyon ki zot ti fer ti vreman for e alor desizyon ti ganny pran pou donn sa 2 nazer citizenship.  Se baze lo sa ki nou ti donnen.  Mersi Mr Speaker.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Ok Minis.  Konmsi sa ki ou pe dir nou la se ki desizyon in ganny baze lo rekomandasyon NSC pa lo Lalwa?  E pourtan Lalwa I siprenm.  So mon vreman enkyet e mon ti a kontan ki zot reflesir en bon pe ankor akoz it’s not right.  Mersi.

 

MR SPEAKER

Mersi Onorab Ferrari.  Minis oule reponn.  Yes Minis.

 

MINISTER MYRIAM TELEMAQUE

Non Mr Speaker.  Mon respekte komanter Onorab Ferrari.

 

MR SPEAKER

Mersi.  Onorab Afif.

 

HON AHMED AFIF

Mersi Mr Speaker.  Mr Speaker mon ti a kontan zis demann Minis si dan son larepons ki in donnen ki zot in osi konsider Seksyon 5 (2) dan Lalwa dan laplikasyon ki’n mon panse in vin devan zot I paret I annan en aplikasyon.  Akoz dan 5 (2) I kler anba ki kondisyon ou kapab ganny sitwayennte anba 5 (2) I dir:

‘The President may cause to be registered to become a citizen a person, any person not otherwise entitled to, or eligible for citizenship, with respect of whom special circumstances exist which in the opinion of the President warrant such registration’.  Savedir I bezwen annan en sirkonstans spesyal.  Prezan Lalwa I al pli lwen I dir ‘for the purposes of section 2 special circumstances are …’ e I annan 4 sirkonstans I kapab nenport dan sa 4

  1. The person possesses an extraordinary ability in science, arts, education, economy, business, law or sports
  2. I kapab annan en Degree
  3. A person has made significant contribution
  4. A person is married to a Seychellois

Me I kontinyen e se la kot I enportan. I dir ‘and’ savedir I kapab nenport dan sa 4 ‘and the person referred to fulfils the following conditions

  1. Has been a legal resident on aggregated period of 15 years or more, or permanent resident for a period of 10 years immediately performing an application and has physically been present in Seychelles for an aggregated period of at least 13 years
  2. Has not been absent from Seychelles exceeding period of 1year without the prior written permission of the Minister
  3. Obtains at least 80 percent of marks in one of the 3 national languages,
  4. Has not been sentenced to a term of imprisonment 1 year or more.

Be, kestyon eski sa 2 dimoun in fer en aggregate period of 15 years or more?  Parske si ou ti pou al anba kondisyon ki zot annan extraordinary ability i pa ankor prouve me zot annan.  An plis ki sa zot bezwen – zot in bezwen fer en aggregate period of 15 years or permanent resident of 10 years.  Eski zot in zwenn sa bann kondisyon?

MR SPEAKER

 

Mersi Onorab.  Minis.

 

MINISTER MYRIAM TELEMAQUE

Mr Speaker.  Parey Onorab in fer resorti sirkonstans spesyal I annan 4 kategori parey ou’n dir I annan maryaz, i annan etidyan; I annan priority workers apre I annan lenvestiser.  Sa bann swimmers zot pa’n ganny anba 5 (2) in ganny anba 5 (1).  Sa ki zot in gannyen.  Mon byen okouran mwan.  Parey Onorab Hoareau in fer resorti si I annan en nesesite pou nou regarde re-vizit nou ava re-vizit ok?  Napa problenm mon pran an konsiderasyon bann komanter ki’n ganny fer e nou a regarde nou a get back to the Assembly.  Mersi.

 

MR SPEAKER

Mersi Minis.  Bon mon annan en bon pe Manm ki lo lalis.  Mon annan kontak nou an kontak avek SBC nou pa le enteronp zot progranm, deza nou pran en pe zot letan taler, mon sizere ki nou Break nou repran travay 2er e le de Minis ek zot delegasyon a retournen pou reponn kestyon.  En moman …  Onorab De Commarmond.

 

HON CHARLES DE COMMARMOND

Mr Speaker.  Mon kestyon I en pti kestyon e I senp; konmsi pti menm.  Konmsi zis mon ti pe demande si ou permet mwan …

 

(Interruption)

 

MR SPEAKER

Order!  Order!  Order! 

 

HON CHARLES DE COMMARMOND

Petet …

 

MR SPEAKER

En moman Onorab.  Ok?  Mon ‘n donn li laparol annou ekout li.  Ok?  Ale go ahead Onorab nou annan nou 5minit.

 

HON CHARLES DE COMMARMOND

Pa ni menm 5minit.  Non zis pe demande ki konsey legal ki tou lede Minister ek biro Prezidan in gannyen pou pran sa tel desizyon.

 

MR SPEAKER

Ok mersi.  Minis Telemaque.

 

MINISTER MYRIAM TELEMAQUE

Mersi Mr Speaker.  Mr Speaker bann demann ki’n ganny fer dan sa bann kategori nou konsider li anba 5 (1).  Sa I sa kategori ki nou abitye toultan servi.  E parey mon’n dir si I annan en nesesite pou nou re-vizit nou a re-vizit e nou a fer konnen Lasanble be selman this is the category we use.  Not 5 (2) we use always 5 (1).  Mersi Mr Speaker.

 

MR SPEAKER

Mersi Minis.  Bon en moman, Onorab Andre in alert mwan ki I pa pou la 2er son non I lo lalis mon annan osi en pti window la pou demann ou kestyon vitman.

 

HON CLIFFORD ANDRE

Mersi Mr Speaker.  Mr Speaker anvi ki distinguished servis I ganny – meritorious service I ganny definisyon konman praise, worthy, honorable, commendable e nanryen pa’n ganny fer par sa bann dimoun e Minis in emphasize ankor, ki zot in ganny citizenship anba 5 (1) e Konstitisyon Lartik 13 I dekoul lo en Act, eski Minis I kapab konfirmen ki zot inefikasite I montre poudir Gouvernman Parti Lepep I ineffective akoz I pe kas Konstitisyon Sesel?  E dan sa konteks zot ava volontye pou zot demisyonen?

E dezyenmman Minis Mondon in dir nou, ki poudir I annan bann keksoz ki pe ganny fer an term sa bann dimoun, eski Minis I kapab dir nou ki kantite larzan ki Gouvernman Sesel atraver NSC e Federasyon pou depanse avek sa bann dimoun vi ki zot pa reste Sesel pou zot ale vini pou zot al train?  Eski Minis osi I kapab dir nou ki bor nou’n devlope depi dernyen Zwe De Zil avek naze pou nazer Seselwa?  Mersi.

 

MR SPEAKER

Mersi Onorab.  Minis.  Bon I annan en bout pou Minis Telemaque en bout pou Minis Mondon.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker depans ki nou fer avek bann nazer I parey.  I pa pou annan I parey bann depans ki nou pou fer pou lantrennman ki nou fer pou zot e bann lezot depans ki nou fer an preparasyon, pou zot kapab partisip dan bann konpetisyon ki annan enkli Zwe De Zil.  Onorab kot I konsern lenformasyon kot devlopman depi dernyen Zwe De Zil, mon napa sa bann lenformasyon avek mon be lenformasyon ki nou kapab al rode avek Lasosyasyon Naze, ki apre nou kapab met li a dispozisyon Lasanble.  Mersi Mr Speaker.

 

MR SPEAKER

Mersi Minis Mondon.  Minis Telemaque.

 

MINISTER MYRIAM TELEMAQUE

Mr Speaker.  Konsernan effectiveness, mwan mon krwar nou vreman effective e nou a pran not komanter konsernan Lalwa 5 (1) Lalwa 5 (2).  E lo size demisyonen normalman mon pa pou demisyonen mwan.  Non, nonsorry mon pou dezapwent ou, me selman non mon pe demisyonen mwan.

 

MR SPEAKER

Mersi Minis.  Bon non.  Yes Onorab Ramkalawan.

 

HON WAVEL RAMKALAWAN

Mr Speaker.  Mon anvi la ki sa 2Minis pe retournen mon ti ava kontan zis dir avek Minis ki poudir parti 2 mon kestyon I pa’n ganny reponn; konmsi mon ti ava kontan si ou retourn avek sa lenformasyon apre midi, akoz mon kestyon se lekel par non e dat lezot etranze ki’n ganny nasyonalite depi Oktob 2016 anba sa menm provizyon Lalwa parey sa 2 franse.  Savedir tou etranze ki’n ganny nasyonalite anba sa seksyon 5 (1).  Pa neseser ki zot nazer me tou depi Oktob 2016.  Se sa ki ti mon kestyon.  Mersi.

 

MR SPEAKER

Mersi Onorab Ramkalawan.  Mon krwar Onorab De Commarmond osi tou in endik mon ki son kestyon pa’n ganny reponn.  Nou ava pran sa 2er.  Bon mon ti a kontan demann le 2 Minis avek zot delegasyon pou retournen 2er pou nou kontinyen sa Sesyon Kestyon.  E zis avan nou Break mon ti a zis kontan enform bann Manm Komite Reform ek Modernizasyon ki nou’n postpone miting ozordi, akoz I annan 2 miting ki clash so deswit la Komite CPA pou zwenn, I pa pou en long miting apre sa pou swiv par Komite Zafer Etranzer ki pou meet dan Rm 3.  Bon nou ava Break e nou ava retournen 2er.

 

 

(BREAK)

 

 

MR SPEAKER

Bonn apre midi tou Manm Onorab.  Bon apre midi Minis Mondon, Minis Telemaque avek zot delegasyon.  E bonn apre midi tou dimoun osi ki a lekout.  Bon apre midi nou bann visitors osi ki dan Galeri.  Bon nou ava kontinyen avek nou travay.  I annan kestyon ki avan nou ti Break ki pa ti ankor ganny reponn me mon’n note ki Onorab De Commarmond pa la in aviz mwan ki i annan en pti problenm ek son transpor.  I pe sort out.  Petet nou ava zis pran bout kestyon pou Onorab Ramkalawan sa kestyon ki pa ti ankor reponn.  Nou a pran sa premye apre nou ava swiv lalis.

E ler Onorab De Commarmond ava antre nou ava pran son bout kestyon ki pa ti ankor ganny repons.  Bon petet mon ava zis demann Onorab Ramkalawan pou re poz – dibyen pou tou dimoun pou Minis pou le de Minis e pou bann dimoun ki a lekout.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker sa morso kestyon ki Minis pa’n reponn se sa ki swiv la;  Lekel  par non ek dat lezot etranze ki’n ganny nasyonalite Seselwa byensir, depi Oktob 2016 anba sa menm provizyon Lalwa parey sa 2 Franse?  Mersi.

 

MR SPEAKER

Mersi Onorab Ramkalawan.  Minis Telemaque.

 

MINISTER MYRIAM TELEMAQUE

Mersi Mr Speaker.  Mr Speaker lalis i la.  Nou’n nobou travay lo lalis dan lunch hour e pou rezon respe pou sa bann endividi e rezon etik si ti posib, mon ti ava donn ou sa lalis e ou ti ava prezante avek bann Manm silvouple.  Mersi Mr Speaker.

 

MR SPEAKER

Mersi Minis. Onorab Ramkalawan.

 

HON WAVEL RAMKALAWAN

Mr Speaker.  Mr Speaker.  Sa lalis ki nou pe rode se bann dimoun ki anba Seksyon 5(1) Lalwa, se bann dimoun ki’n fer bann gran keksoz pour Sesel!  Ki’n fer bann keksoz ki merit loner, laglwar, tou sa bann keksoz e nou Seselwa nou pa devret konnen lekel dimoun ki’n fer sa bann gran keksoz pou Sesel?

Mr Speaker nou’n fek pas en Lalwa ki apel Access to Information. Eski Minis pe dir avek nou ki etranze i ganny nasyonalite Seselwa e nou konman Seselwa nou pa devret konnen lekel sa bann dimoun ki demen i kapab met zot non pou vin Prezidan Larepiblik Sesel?  Oubyen Manm Lasanble Nasyonal.  I’m sorry Mr Speaker sa pa akseptab ditou.

 

MR SPEAKER

Mersi. Mersi Onorab Ramkalawan.  Bon Minis mon petet mon fer rapel bann Manm ki’n dan Katriyenm Lasanble, mwan osi mon ti anmenn en kestyon similer, pou demande ki bann etranze ki ganny sitwayennte parey zot non i ganny pibliye ler zot pe apply pou sitwayennte apre zot non i ganny pibliye si zot ganny sitwayennte.  Repons ki mon ti gannyen se ki Lalwa pa permet.  Me dapre mon konpran, napa okenn Lalwa ki kouver sa.  Ok? So minis kestyon in ganny demande in ganny poze si ou annan lalis devan nou ou kapab pas lo sa lalis. Go ahead Minister.

 

MINISTER MYRIAM TELEMAQUE

Mersi Mr Speaker mon a pas lo lalis avek ou lotorizasyon.  Kestyon i demann non avek dat.

 

MR SPEAKER

Wi.

 

MINISTER MYRIAM TELEMAQUE

Pa nasyonalite avan …si mon pa tronpe.

 

MR SPEAKER

Non.  Go ahead non avek dat.

 

MINISTER MYRIAM TELEMAQUE

Non avek dat.  Le 10 Me 2017 Mukoko Landry Maketa.

Le 10 Me 2017 Louison Everick Bissica Mbila.

Le 10 Me 2017 Pierre Maddiela.

Le 10 Me 2017 Vivien Marie Alice.

Le 10 Me 2017 James Richard Wong Yin Song.

Le 10 Me 2017 Guy Lambon Inkumene.

Le 9 Zen 2017 Darlene Shane Jean.  Le 12 zen 2017 Fahed Mohamed. S El Materi.

Le 12 Zen 2017 Khadija El Materi.  Le 12 Zen 2017 Leila El Materi.

Le 12 Zen 2017 Brahim Naji El Materi.

Le 12 Zen 2017 Naeema Fahad M.A Almatri.

Le 14 Zen 2017 Landry Philippe Rasamison.

Le 14 Zen Muriel Kavanagh.

Le 12 Zen 2017Nesri Al Matri.

Le 24 Zilyet 2017 Ricky Michael Isaie.

Le 24 Zilyet 2017 Rosa Media Isaie.

Le15 Septanm 2017 Kuin Wong Yin Song.

Le 9 Oktob 2017 Fransica Alketa Isaie.

Le 12 Fevriye 2017 Thomas Scott Kaplan.

Le 25 Oktob 2017 Brigit Sebastian.  Le 25 oktob 2017 Aniamma Varghese.

Le 25 Oktob 2017 Micheal Nirmal Joseph.

Le 28 Novanm 2017 Mayya Nirolaevna Bolotova.

Le 28 Novanm 2017 Ekaterina Andreyena Bolotova.

Le 3 Novanm 2017 Ckelly Gaizka Ravaovison.

Le 1 Desanm 2017 Abdelhak Guennani.

Le 3 Desanm 2017 Hexafensekage Fonseka.

Le 3 Novanm 2017 karuna Thilake Malkankanamalage.

Le 1 Desanm 2017 Vidura Bashana Fonseka.

Le 5 Desanm 2017 Lilia Malak Rhim.

Le 5 Desanm 2017 Ouassila Drissi.

Le 8 desanm 2017 Christopher Ryan.

Le 12 Zanvye 2018 Jonah Nirmal Annasse.

Le 9 zanvye 2018 Tiya Kaushalkumar Patel.

Le 9 Zanvye 2018 Keya Kaushalkumar Patel.

Le 9 Fevriye 2018 Tomas Sagl.

Le 9 Fevriye 2018 Martin Sagova.

Le 12 Fevriye 2018 Indumil Priyanga Tennege.

Le 12 Fevriye 2018 Unmade Chitra Tennege.

Le 12 Fevriye 2018 Madadeniya Nushara Tennege.

Le 12 Fevriye 2018 Madedeniya Ashen Tennege.

Le 15 Mars 2018 Josephraj Xavier.

Le 15 Mars 2018 Franck Jean Jacques Duthuit.

Le 15 mars 2018 Isabelle Cecile Claire Duthuit.

Le 15 mars 2018 Yannick Duthruit.

Le 12 Mars 2018 Solomon Alao.

Le 11 Avril 2018 Wencelas Bienvenu Patrice Alemanana.

Le 25 Avirl 2018 Marona Driouche.

Le 19 Avril 2018 Frank Gilbert Arsene Van Kerkhove.

Le 11 Me 2018 David Gilles Humbert.

Le 11 Me 2018 Carmen Deborah Henderson.

Le 30 me 2018 Justin Richard Rabesahala.

Le 30 Me 2018 Bertriz Nagarian Perez.

Le 15 Zen 2018 Simon Bachmann.

Le 15 Zen 2018 Mathieu Bachmann.

Le 3 Zilyet 2018 Maria Fernada Perez Goderich.

Le 8 Out 2018 Sathiyamoorthy Abisheak.

Le 28 Out 2018 Aurore Arcambal.

Lalis i konplete Mr
Speaker. Mersi.

 

MR SPEAKER

Mersi.  Mersi Minis. Onorab Ramkalawan.

 

HON WAVEL RAMKALAWAN

Mr Speaker mon pa konnen si sa lalis ki – mersi bokou Minis premyerman.  Sa lalis ki ou’n lir mon ti pe demann anba sa menm provizyon ki sa de Franse in gannyen savedir anba 5(1).  Tou sa ki ou’n lir la in ganny anba 5(1)?  Mr Speaker sa 2 Franse petet zis en pti kestyon.  Sa de Franse ki nou’n koz lo la, zot ti annan potansyel pou ganny Lor pou Sesel.  E potansyel parey nou dir nou tou nou annan potansyel pou nou vin en astronot, me pa nou tou ki vin astronot.  Eski Minis ti ava kapab dir avek nou, dan tou sa bann lalis ki in donn nou la eski i kapab dir avek nou anba Lalwa anba 5(1) e mon ti ava kontan ankor enn fwa remind Minis ki 5(1) i dir.  Mon konnen in travay dan Imigrasyon pandan en long letan mon napa okenn dout lo son konpetans, me anba 5(1) ‘where the President, the President is of the opinion that a person has done signal honour or rendered distinguished service to Seychelles or the person is otherwise meritorious the President may with the consent of that person cause the person to be registered as a citizen’.  Pou le moman tou bann pret, leser, levek parski zot letan zot ti ganny zot nasyonalite zot ti al State House dan en seremoni  SBC ti la e zot ti ganny interviewed.  E ti menm annan enn sa bann dimoun ki pou montre ki poudir ‘it was not with the consent of that person’, parski li i ti ganny demande i ti ganny en phone call ti dir avek li vin raport kot biro Imigrasyon e sa per ti dir i ti menm krwar ki i pe al ganny deporte.  Me lefe ki ti son lanniverser sa zour apre i ti  – letan i ti ganny dir i pe ganny nasyonalite, i ti vwar ki poudir sete en ‘kado ekstraordiner’.  Pli bon kado.

Alor Mr Speaker nou’n konn bann Leser ek bann Pret apre sa nou’n konn sa 2 Bachmann.  E Prezidan ti eksplike ki poudir bann Leser ek bann Pret se sa kalite dimoun ki pou zot travay ki zot in fer zot pe ed nou sosyete.  Napa problenm avek sa.  Ti a bon permisyon i konnen mon napa problenm avek son bann bon don bann travay ki in fer.  me Mr Speaker mon ti ava kontan dan sa lespri si Minis ti ava kapab dir avek nou anba 5(1) ki merit premyerman  Mr El Materi avek tou son bann zanfan i annan 5 El Materi ki ou’n nonmen la.  6 El Materi, Isaie, Che Jean, lot, lot bann non ki mwan menm mon’n bliye Sathilake, Fonseka, koman?  Darlene, lot, lot, lot.  Sey dir nou ki bann gran aksyon, bann gran keksoz ki sa bann dimoun in fer pou ki Imigrasyon anba ou Minister, in propoz avek Prezidan ki poudir sa bann dimoun i merit ganny nasyonalite Seselwa?  Mon ti ava kontan ganny en larepons silvouple?

 

MR SPEAKER

Mersi Onorab.  Minis.  Yes Minis.

 

MINISTER MYRIAM TELEMAQUE

Mr Speaker mersi pou kestyon.  Mr Speaker i annan antet sa bann dimoun ki nou’n fer resorti – mon kapab mazin en pe pou zot case personnelman.  Selman parey nou’n fer resorti ce matin zot case ti meritorious ki i anba prerogative Prezidan.  E nou annan bann ka ki bann teachers ki’n travay isi en bon pe letan e pou la rezon demann in ganny fer.  E nou osi annan bann fanmir, i annan en fanmir spesifik ki zot i ne Diego Gracia e dokiman zot napa alor zot in viv Sesel pou 30an, 35an konsiderasyon osi ti ganny pran.  Nou annan bann Pret parey ou dir.  I annan bann Misyonner osi ki’n ganny pran.

E dan ka sa msye ki ou’n nonmen mon krwar son dosye ti la kot Imigrasyon pou en bon pe letan, e son permi rezidan ti pe al expire soon e pou la rezon comme d’habitude Imigrasyon i fer monte son dosye, e ti ganny process kot Lotorite konsernen e pou la rezon ki apre mon krwar Prezidan i fer son komanter dan press conference i ti agree pou donn sa msye son citizenship.

 

MR SPEAKER

Mersi Minis. Onorab Ramkalawan.

 

HON WAVEL RAMKALAWAN

Mr Speaker nou pe demann kestyon anba 5(1).  Anba 5(1) i en keksoz spesyal ok?  I spesyal.  E nou vwar sa dan lemonn antye.  Ti annan sa garson Afriken ki ti grenp 4 letaz pou li sov en pti zanfan, Prezidan Franse ti kriy li Elize ti donn li nasyonalite parski i ti’n fer en aksyon eroik.  Mr Speaker nou Lalwa Imigrasyon i dir avek nou ki en nenport dimoun i kapab apply pou sitwayennte e i rod trwa sponsors, e apre sa i pase e Imigrasyon i kapab fer en rekomandasyon pozitiv, parey bomaten nou ti ape lir.  En dimoun ki’n ne Diego Garcia mon konpran parski Diego Garcia ek tou son bann problenm ensidswit me i ti kapab osi fer son aplikasyon dan en fason normal pou ki  son bann non i ganny mete lo zournal e i ti a ganny gazete i ti ava dir mon’n ne Diego Garcia mon’n viv Sesel depi Diego Garcia ti fermen, mon’n lekol isi mon fer tou mon bann keksoz isi, mon’n marye lo Mahe alor mon pe demande bann special circumstances parey nou vwar ki serten dimoun dir i anvi vin Seselwa akoz ‘I love Seychelles’ konmsi nou, nou pa kontan Sesel.

Mr Speaker mwan mon anvi en break down prezan.  Bann teachers osi tou ki’n travay isi pandan long letan zot kapab ti kapab fer anba tousala.  Mwan mon issue ki mon pe leve Minis se eski, se Prezidan Larepiblik li menm ki’n deside donn sa bann dimoun sa nasyonalite anba seksyon 5(1)?  Parski li ki donnen anba 5(1).  Oubyen eski se Imigrasyon li menm li, ki’n fer sa rekomandasyon?

Parski pli boner letan nou’n reponn konsernan sa 2 frer Bachmann, nou’n ganny dir ki Lasosyasyon Naze ki ti fer rekomandasyon.  E mon kapab dir avek ou Minis ki mon’n koz avek bann Manm ki ti lo Lasosyasyon Naze, sa letan bann Manm ki ti lo Lasosyasyon zot, zot pa ti konnen.  Zot, zot pa ti konnen Onorab Pillay atraver – ok? E   bann manm, bann Manm Lasosyasyon se la ki zot pe ganny konfirmasyon ki poudir in deza annan sa kalite demann.

Alor Minis sey donn nou Mr Speaker, eski ou kapab sey dir Minis donn nou ki sa bann keksoz loner ki sa bann dimoun in fer pou Sesel e anba ki Clause?  Akoz si nou pa kapab ganny en keksoz kler i vedir Imigrasyon in mal konsey Prezidan, oubyen Prezidan in pran sa desizyon lo li menm e alor Prezidan in kas Konstitisyon in al kont Konstitisyon e anba sa parey Onorab Andre in dir bomaten sa i en impeachable offence.

 

(APPLAUSE)

 

HON WAVEL RAMKALAWAN

Ki konsey ki zot in donn Prezidan?

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mr Speaker 5(1) i prerogative Prezidan.  Lalwa i la.  I kler.  E i pou meritorious si Prezidan in vwar le nesesite in fer sa ki neseser.  Demann i vini kot Imigrasyon.  Laplikasyon i process parey mon ti dir dan opening Statement.  Lotorite prezan li i son devwar si li i annan en swa, si i aprouve oubyen non.  Ok?  Sa pou premye kestyon.  Apre Mr Speaker konsernan Swimming Association mon vwar li en pe drol akoz mon annan dokiman ki zot ti ekri, zot ti siporte an Me 2018.  Zot ti siporte pou demande akoz mon pa ti pou vin dir si nou ti napa en demann.  Si sa Chairman, well (nou nonm non) ti Mr David Vidot. Ti fer demann. Mr Speaker mwan mon pa pou kapab get Manm.  Mon get demann ki vini.

 

(Interruption)

 

MR SPEAKER

Order! Order!  Order!  Order! 

 

MINISTER MYRIAM TELEMAQUE

Chairman i annan Lotorite lo Manm e siporte par ex-CEO NSC.  Demann ki ti vini.  Nou pa pou dir si nou pa’n gannyen.  Mon pa pou – konmsi dokiman ti annan.  Mersi Mr Speaker.

 

MR SPEAKER

Yes….

 

HON WAVEL RAMKALAWAN

Mr Speaker 2 keksoz, (1) sa ki mon’n dir Minis mon pa’n dir li ki poudir ti napa en let ki ti vin kot li.  E byensir mon konnen ki poudir en let se sa Chairman sa Federasyon ki pou sinyen.  Sa mon napa problenm avek sa mwan Mr Speaker.

Sa ki mon pe dir minis se ki Federasyon bann Manm ki lo Federasyon zanmen sa in ganny diskite dan zot prezans pou pas en rezolisyon.  E petet la sa i pa konsern ou Minis, petet Minis Sports ti a kapab dir nou parski zot ki ansarz bann Federasyon pou vwar dan ki Minutes parski i en desizyon enportan koumsa in bezwen ganny minite, dan ki Minutes sa Lasosyasyon ki zot in mete ‘The Association sepa in siport sa, in pas rezolisyon pou fer e demann pou ki sa bann dimoun i vin – sa mon premye.

2enm Mr Speaker zis lo sa pwen epi … Mr Speaker be sa  nasyonalite Seselwa la sa citizenship Seselwa, eski Minis pe dir avek nou ki poudir parey en biye 100 oubyen en biye R500 ki dan pos Msye Danny Faure e i donn nenport dimoun ki i anvi ?  Letan en dimoun i vin Prezidan i donn nasyonalite nenport dimoun ki i anvi?  I pa swiv Lalwa?  Zis i dir i meritorious?  Napa okenn check ensidswit ki ganny fer?

E Mr Speaker mwan mon pou demann Minis parski mwan mon’n fini vwar ki poudir sa lalis 62 e letan nou pe regard Lalwa mwan mon krwar ki i bezwen annan en Court case pou nou demann judicial review pou nou regarde si Prezidan in swiv Lalwa …

 

 

(APPLAUSE)

 

HON WAVEL RAMKALAWAN

… akoz i kler ki poudir anba Lalwa  i pa’n swiv pou li kapab donn sa bann dimoun pou li donn nasyonalite anba sa provizyon.  Nasyonalite Seselwa i pa en biye R500 dan pos Msye Faure.  Mersi bokou.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mr Speaker Lalwa i la.  In ganny amande an Novanm 2013.  Si Onorab i santi ki sa pouvwar i devret ganny tire, sa Seksyon anmenn en Private Member’s Bill nou ava amend Lalwa!  Se tou.  Mersi Mr Speaker.

 

MR SPEAKER

Mersi Minis.  Bon Onorab Basil Hoareau in sinyal mwan –  wi, wi en moman.  Minis Mondon ou le reponn sa bout lo sports?  Go ahead Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker mon napa okenn rikord okenn Minutes kot sa desizyon in ganny pran.  Me selman mon kapab demann CEO pou rode avek Lasosyasyon.  Sa ki mon annan se ki en let ki Chairman CEO Lasosyasyon Swimming Association ti ekri NSC sa letan, e CEO NSC apre ti ekri Prezidan pou atas sa let e pou siport sa demann ki Chairman in fer.  Be napa nanryen ki anpes nou Onorab pou al rode si ti en rezolisyon, si ti annan Minutes Meeting or whatever.  Mersi Mr Speaker.

 

MR SPEAKER

Mersi Minis.  Onorab Basil Hoareau.

 

HON BASIL HOAREAU

Mersi Mr Speaker.  Mr Speaker mon relasyon i an relasyon ek sa Mr El Materi.   Letan mon’n ekout Minis annefe letan mon ti pe vini dan transpor, mon pa ti ankor ariv kot Lasanble mon ti pe ekoute.  E letan mon’n ekout Minis sa ki mon konpran se ki ti annan en laplikasyon ki sa Mr El Materi ti’n fer pou citizenship.  E la kote mon annan problenm avek li i tonm dan 5(1).

Mon pa krwar i meritorious me menm sa parey mon’n dir boner mon pa krwar ki en dimoun ki fer en laplikasyon pou citizenship i devret ganny donnen anba 5(1).  5(1) i ganny reserve pou en dimoun ki ou anvi bestow on him sa citizenship.  Par egzanp L’Angleterre dimoun i ganny knighted an rekonesan zot distinguished services ouswa keksoz zot in fer.  Nou Sesel sa 5(1) i ganny met koumsa pou nou si nou anvi dir ek en dimoun gete ou pa’n demann citizenship ou me ou’n fer en keksoz ekselan atraver Sesel, e nou anvi rekonnet sa nou bestow on you nou citizenship.  

E se sa ki i dir ek ou with the consent akoz ou ki al anver li e ou dir mon anvi donn ou.  E li prezan i dir ek ou – ou demann li son consent e i donn ou.  Ou pa kapab donn anba 5(1) donn en dimoun ki apply, li ki pe demann ou pou donnen.  This is where pou mwan Minis mon pa krwar poudir sa msye i tonm anba 5(1).  I pa meet.  E lo kote lo kote Onorab Ramkalawan in raise sa issue judicial review.  Nou pou annan en problenm judicial review nou pou annan en problenm parski rules ki  gid judicial review i dir ek ou koumsa poudir ‘the Supreme Court shall not grant a petitioner  leave to proceed unless a Court is satisfied that the petitioner has sufficient interest in the subject matter of the petition.’ Ki vedir se ki fodre sa dimoun i annan – tou Seselwa i annan sufficient interest ladan, me la ki i annan interest, me ‘sufficient interestwill mean somebody who over above sa ki en normal dimoun i annan.

E par egzanp si nou pou pran sa de legzanp sa de Franse ki’n fek gannyen la, fodre en dimoun par egzanp ki ti en nazer, en nazer ki li i santi poudir son plas pe ganny pran li i kapab annan en case li i pou dir ek ou i annan en sufficient interest over and above of the ordinary Seychellois.  E me having said that mwan mon pwen Mr Speaker se ki ou annan en diferans ant en dimoun ki’n ganny donnen citizenship dan en fason valab, dan en fason valab, e ki prezan ou pe al revoke.  La ou pe al revoke e la ou bezwen meet bann kriter ki Lalwa i demann ou.

Ek enn ki son citizenship from the word go, pa’n zanmen valab.  Savedir it’s a nullity depi komansman.  It’s as if ou pa’n zanmen donn li.  So it’s not actually a revocation ki pe pran plas i zis ki ou pe dir sa dimoun gete mon sorry sa ki mon’n donn ou actually I did not give it to you properly.

E la diferans.  It’s not a revocation.  So i kapab ganny pran.  I kapab ganny pran not necessarily par Lakour e not necessarily ki ou pe al fer revocation parski ou pa pe revoke.  Revoke is when you’ve granted something e i annan en lefe valid apre la ou dir mon pe cancel li.  But you’re not canceling now all you’re doing is ou pe donn lefe the illegality.  Ou pe dir gete it was ilegal from the word go. It’s as if it’s a nullitySo mon krwar poudir i annan provizyon ki kapab ganny pran pou re gete 5(1) kot bann sityasyon kot nou pa’n respekte 5(1) Mr Speaker.

 

MR SPEAKER

Mersi Onorab Hoareau.  Minis, le 2 Minis zot le fer en komanter?  Minis Telemaque.

 

MINISTER MYRIAM TELEMAQUE

Mr Speaker mersi.  Mon krwar sa ki Onorab Basil Hoareau in fer resorti, i pou en prosedir ki si i ganny mete devan judicial review nou a deside ki pou fer.  Se tou Mr Speaker.  Mersi.

 

MR SPEAKER

Mersi Minis.  Bon nou ava kontinyen avek nou bann kestyon.  Onorab Norbert Loizeau.

 

HON NORBERT LOIZEAU

Mersi Mr Speaker.  Bonzour Minis.  Bonzour tou dimoun.  Mr Speaker mwan mon kestyon pou vize lo nou ti pe koz lo la pli boner, sa 2 garson Bachmann la kot naze.  Minis ou’n dir pli boner ki sa 2 garson zot pa pe vin pran plas personn zot dan natasyon, me lenformasyon ki mon pe gannyen ki pou World Championship 4 Seselwa in ganny tiket pou partisip ladan.  2 fiy – 2 garson.  E la mon pe gete vi ki aktyelman nou annan Seselwa ki zot letan i pa move zot kapab meet kriter, pou zot al World Championship.  Garson mon pe dir me vi ki sa de Franse zot, zot letan i en pti pe pli o eski pa i montre ki zot pou pas par devan sa bann manrmay Mr Speaker?  Sa enn.

Apre pli boner zot in koz lo DTN zot dir sa msye i DTN an menm tan i coach.  Mon ti a kontan ganny en leksplikasyon lo la ki son rol.  E osi Minis mon ti  a kontan ou – vi ki sa msye li i sipoze Direkter teknik si i en DTN, eski pandan bann letan ki in  la i annan okenn plan kour term – long term or mwayenn term ki’n  prezante pou devlop natasyon e osi bann coach? Akoz dapre konpran sa dernyen 2an ki la napa nanryen ki’n ganny met ater.  Mersi.

 

MR SPEAKER

Mersi Onorab Loizeau.  Minis Mondon.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker kot i konsern sa World Championship ki Onorab pe koz lo la mon napa lenformasyon me mon ava al verifye.  Kot i konsern sa msye ki sa Direkter Teknik pou natasyon, osi si i annan en plan pou devlop natasyon e oubyen pou devlop bann coach, mon panse i bezwen annan, me ankor nou ava al rode.  Sa ki mwan mon’n ganny enformen toultan, se ki sa msye i en tre bon lantrener e i pe fer bokou pou natasyon dan Sesel. Pandan sa 3an – pou 3an  ki in la in fer bokou.  Sa lenformasyon ki mon mon’n ganny dir me si i annan en plan nou a rode ki plan ki i annan pou devlop natasyon oubyen antrenn bann lantrener Seselwa dan pei.  Mersi Mr Speaker.

 

MR SPEAKER

Mersi Minis.  Onorab Wavel Woodcock.

 

HON WAVEL WOODCOCK

Mersi Mr Speaker.  Minis mon kestyon i konm swivan.   Minis eski Prezidan Faure in donn nasyonalite sa 2 garson pou fer faver zot papa ki osi personal swimming coach se Minis Adam avek Mr Bertrand Belle ki  Konseye Ekonomik Prezidan Faure e garson Chief Protocol Officer?  Mon 2enm kestyon Minis se Minis vi ki ou’n dir ki ou Minister pa’n fail eski ou Minister pa’n fail ler zot ti donn Shrone Austin nasyonalite ki ozordi  i wanted par CID ki son non i lo red alert lo sistenm Imigrasyon Sesel, ki zofisye Imigrasyon i bezwen alert lapolis, si i retourn Sesel.  Eski ou Minister pa’n aprann zot leson?  Mersi.

 

MR SPEAKER

Mersi Onorab Woodcock.  I annan en part kestyon pou Minis Mondon apre nou ava pas lot part ki annan pou fer avek Imigrasyon avek Minis Telemaque.  Minis Mondon.

 

THE DESIGNATED MINISTER MRS MACSUZY MONDON

Mr Speaker mon a pran en bout sa kestyon kot i konsern whether in ganny nasyonalite Seselwa akoz i personal coach Minis Adam oubyen Bertrand Belle.  Onorab ou pe dir mwan la mon pa ti okouran, e dan sa let ki – rekomandasyon ki ti vini sa pa ti ganny mete konman en zistifikasyon pou donn zot nasyonalite Seselwa. Mersi Mr Speaker.

 

MR SPEAKER

Mersi Minis.  Minis Telemaque.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker rikord i montre ki sa fiy Shrone Austin i pa ti gannyen anba 5(1) son paran ti apply registration as a minor.  Sa rikord ki montre.

 

MR SPEAKER

Mersi Minis.  Onorab Woodcock.

 

HON WAVEL WOODCOCK

Eski Minis i kapab konfirmen poudir Shrone Austin i lo sistenm Imigrasyon akoz CID pe rod li e si i retourn Sesel zot bezwen alert CID.  Eski i annan okenn lofans ki in fer ki CID pe rod sa fiy Sesel ki zot, zot in donn nasyonalite?  Mersi Mr Speaker.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mr Speaker fransman dir ou mon pa pou konnen, akoz i annan bokou dimoun lo nou alert list.  Be mon pa pou kapab dir i lo alert list apre mon ava dir wi kan i pa lo la oubyen mon pou bezwen zis dir mon pa okouran.  Si nou bezwen sa lenformasyon nou a kapab fer available apre.  Mersi.

 

MR SPEAKER

Ok.  Mersi Minis.  Onorab Jany De Letourdie.

 

HON JANY DE LETOURDIE

Mersi Mr Speaker.  Bonn apre midi tou dimoun.  Mr Speaker apre tou sa bann devwalman ki nou’n – bann nouvo devwalman ki nou’n vwar ozordi a propo nou sitwayennte, mon ti a demann Seselwa pou nou ouver nou lizye nou zorey e osi nou lespri pou nou byen swivre ki pe pase ozordi.  Akoz Mr Speaker mon krwar nou tou dan sa Lasanble, nou tou le de kote latab enkli Minis osi nou annan en drwa akoz se nou gardyen nou sitwayennte nou osi akoz mon krwar poudir nou devret aksepte poudir pli ale i pe vin tro fasil pou en dimoun ganny sitwayennte Sesel.  Mon kestyon Minis ki bann kalite pou tourn lo sa 2 Bachmann.  Ki bann kalite ekstrememan spesyal ki sa de nazer i annan ki vreman kapab aport zot nou sitwayennte ki vreman presye pou nou, e ki nou bann prop nazer lokal, zot napa pou fer sikse?  Akoz mon krwar poudir bomaten Minis ou’n mansyonnen poudir akoz petet zot in gannyen akoz ou pe ‘antisipe’ ki zot anmenn meday.  Mersi Mr Speaker.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mr Speaker mersi.  Parey mon ti fer resorti dan mon Statement ce matin demann ti ganny sorti kot Chairman Swimming Association.  Ladan i ti fer resorti poudir zot kalifikasyon i vreman o, e ki zot pou kapab fer formasyon e lankadreman nou bann zenn nazer e osi enstrikter pou lavenir.  E apre osi nou ti – ansyen CEO NSC ti donn sa siport pou nou kapab demann pou li ganny citizenship.  Se baze lo la ki nou’n pran sa desizyon.

 

MR SPEAKER

Mersi Minis.  Onorab De Letourdie.

 

HON JANY DE LETOURDIE

Mr Speaker mon ti ava kontan ozordi demann sa de Minis profondeman, konman en Seselwa orizinal, eski zot pa krwar zot personnelman ki nou sitwayennte pe ganny donnen tro fasil?

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mr Speaker sitwayennte i annan en prosedir ki ou bezwen pas ladan.  Si zot krwar i annan okenn amannman ki nou devret fer avek Seksyon 5(1).  Onorab Ferrari ti deza anmenn en Mosyon nou’n ekoute nou pran an konsiderasyon bann rekomandasyon ki ti ganny fer resorti.  Nou a kapab pran sa an konsiderasyon e zot osi zot ava fer nou konnen ki zot ti a kontan fer resorti dan sa amannman.  Mersi.

 

MR SPEAKER

Mersi Minis.  Onorab Sandy Arissol.

 

HON SANDY ARISSOL

Mersi Mr Speaker.  Bon apre midi Minis avek zot delegasyon.  Mr Speaker mon kontan letan mon antann Minis Telemaque dir nou kapab amann 5(1) e fer provizyon pou travay lo la me selman still kantmenm nou amande be Minis ki responsab pa swiv Lalwa pa pou fer okenn diferans parey i ete egzakteman la.

Mwan mon ti a kontan siport mon ser Onorab De Letourdie pou dir Sesel nou en pe tro pti pou nou kontinyen ek sa bann zafer nasyonalite Mr Speaker parski pa bliy nou annan en kantite rikord nasyonalite.  Nou annan nou Seselwa ki’n ganny atrape pe kondannen Sid Lafrik.  Nou annan Seselwa ki’n ale dan bwat kartron.  Nou annan en kantite rikord ki’n sali nou pei.  Mwan mon sante poudir la kot in arive parey Onorab Hoareau ti dir bomaten nou bezwen tyonbo en kou ek sa bann zafer nasyonalite parski nou konman en pti pei nou anvwa disparisyon an term zil, an term sinyatir, an term Seselwa.  Alor i enportan pou nou tyonbo en kou.

Alor mon ti a kontan dir avek Minis Mr Speaker, mon kontan letan Minis in dir poudir zot efikas, zot pa pou resign, zot pe fer zot travay byen selman mwan  mon krwar nou  bezwen annan en propozisyon swa nou bezwen revoke sa 2 nasyonalite ki nou’n donnen ki kestyon i baze lo la sa 2 Franse.  Swa Minis Telemaque ki la konman Minis Imigrasyon ou’n mal ganny advice – oubyen ou’n mal advice Prezidan swa Minis Telemaque ou pou bezwen ale konman Minis, trwazyenmman si pa ou ki ale Prezidan Faure i pou bezwen resign, parski i pe zis donn nou nasyonalite nenport ki dimoun ki i zwenn akoz i santi zot pe fer en bon keksoz pou pei.  Sa i mon premye zot a donn mwan zot lavi lo la.  Minis Telemaque ou a dir mon ki ou panse parski Mr Faure ti dir ek nou da son dernyen interview poudir li i pou viv avek son desizyon pou El Materi.

La apre midi nou bezwen konnen lekel ki pou viv avek desizyon sa 2 Franse.  Sa i premye.  Dezyenmman mon ti a kontan dir poudir sa 2 Franse mon aprann zot pa reste Sesel e la mon aprann poudir enn ant sa de frer zot sipoze pe al vin enn lo Praslin savedir zot ki pou al ansarz sa bout seksyon lo Praslin olye dan plas en Seselwa.  Mon 2enm kestyon Mr Speaker i retourn lo papa prezan Mr Guillaume.  Mr Guillaume eski sa plas ki i ansarz ozordi konman DTN Minis eski ti ganny advertise sa pozisyon?  Lekel ki pe understudy Mr Guillaume pou ki en Seselwa i ranplas li?  Lekel ki pe renouvle son Kontra pou li kontinyen travay?  Eski Lasosyasyon Naze?  Nouvo CEO ki la?  Ansyen CEO ki’n ale?  Oubyen Mr David konman Chairman konman en sel dimoun?    Mon lot kestyon ki mon ti a kontan demande i vin lo madanm Guillaume manman sa 2 garson.  Mon aprann poudir Katherine madanm Mr Guillaume li i annan en klib ki apel Toto ki montre naze plizyer zanfan.  Kestyon mon pe demande mon aprann poudir lekol International School, Montessori i annan bann endividi osi ki aprann naze avek li mon aprann peyman i ganny fer avek li direkteman e letan son msye pa la letan son msye pa la li ki ouver biro i annan akse ek tou landrwa ek tou fasilite.  Mon kestyon lo la.  Eski sa madanm i annan GOP li?  I pe reste la lo kwa Independent permit, resident permit, lo GOP son msye akoz i pe annan akse ek larzan i pe fer biznes li.  Eksplik nou en pti pe Minis ki mannyer i marse sa bann zafer la?  Mersi bokou.

 

MR SPEAKER

Mersi Onorab.  Bon i annan kestyon pou tou le de Minis.  Ok.  Minis Mondon.

 

THE DESIGNATED MINISTER MRS MACSUZY MONDON

Mr Speaker mwan mon pa okouran si post ti ganny advertise – 3an pase letan sa msye ti ganny anmennen Sesel pou travay i ban lenformasyon ki nou kapab rode.  Mon panse renouvelman son Kontra, son performance ti ganny assess par NSC e ek Federasyon ansanm e en desizyon i ganny pran si son Kontra i ganny renouvle oubyen non.  Onorab ou’n donn en lenformasyon la ki nou bezwen al aprofondir al rod plis lenformasyon lo la si sa msye pe fer – oubyen sa madanm pe montre naze e pe ganny peye direkteman sa larzan pe al dan son pos.  CEO  i ava al rode si sa i vre.  Mersi Mr Speaker.

 

MR SPEAKER

Mersi Minis Mondon.  Minis Telemaque.

 

MINISTER MYRIAM TELEMAQUE

Mr Speaker parey mon’n dir ce matin, dan ka sa 2 nazer demann ti sorti kot NSC pou donn zot sitwayennte e sa Seksyon 5(1) i larz li.  I larz i annan bokou ka ki antre dan sa Seksyon anba sa meritorious e mwan mon krwar nou’n byen aviz Prezidan lo sa laliny.  I annan seksyon 5(2) me 5(2) i annan 4 kriter ki zot pa ti pou tonm ladan se pou la rezon ki nou’n anvoy li dan 5(1), prezan Prezidan in servi son prerogative.  E parey mon’n dir si zot krwar i annan en – in ganny mal servi zot annan zis  pou go for judicial review parey zot pe dir e nou a regarde ki arive.

 

MR SPEAKER

Mersi Minis.  Onorab Sandy Arissol.

 

HON SANDY ARISSOL

Mersi Mr Speaker.  Mersi Minis Telemaque ek Minis Mondon pou zot larepons.  Mr Speaker mon ti  a kontan retourn kot Minis Mondon parski mon vwar Mr Larue i asiz obor li, Mr Laure ozordi i nouvo CEO e Mr Larue i enn bann dimoun ki’n avek NSC en bon pe lannen e lenformasyon ki mon annan la lo papye ki mon’n gannyen sa klib Toto i annefe depi 2017 e sa madanm konman mon pe dir la sa madanm Katherine ki coach e mon mazinen la by now Mr Larue i bezwen konnen, i annan sa klib e ki sa klib pe fer, si sa madanm pe pran en larzan si sa madanm pa pe pran en larzan.  Mon krwar Mr Larue i bezwen okouran.  Mon pa krwar i en lenformasyon ki nou bezwen al rode pou retourn kot Lasanble parski Mr Larue in laba pou en bon pe lannen kot sport.  Mersi bokou.

 

MR SPEAKER

Mersi Onorab Arissol.  Minis Mondon.

 

THE DESIGNATED MINISTER MRS MACSUZY MONDON

Mersi Mr Speaker.  Onorab wi CEO i okouran poudir i annan sa klib Toto.  Selman sa bann lenformasyon ki ou pe donnen si sa madanm ki ansarz or whoever, i napa sa bann lenformasyon pou li donn ou.  Mersi Mr Speaker.

 

MR SPEAKER

Mersi Minis.  Onorab Stephen Pillay.

 

HON STEPHEN PILLAY

Mersi Mr Speaker.  Mr Speaker apre ki mon’n ekout bann larepons Minis mon vwar en gran defayans.  Minis pe dir anmenn Private Member’[s Bill pou aranz 5(1).  Pe dir i annan pwen pe demande pou revoke sa bann citizenship me parey Onorab Hoareau in dir napa nanryen pou revoke. I pa valid.  Napa nanryen pou Private Member’s Bill akoz sa Lalwa i bon pou en dimoun ki merite.  So apre ki mon’n ekout tou ou larepons Minis e ki in dir par egzanp i pa pou resign menm si Minis in donn move konsiltasyon Prezidan e fer prezidan kas Lalwa ki kapab en ka impeachment si Minis pa oule demisyon nen mon demann Prezidan pou demisyonn li, sinon nou devret pe demande ki Lasanble i refer Msye Faure avek Constitutional Court anba Konstitisyon 54 pou kas Lalwa.  Mersi Mr Speaker.

 

(APPLAUSE)

 

MR SPEAKER

Mersi Onorab.  Minis.  Minis Telemaque.

 

MINISTER MYRIAM TELEMAQUE

Mr Speaker mon pa pou fer komanter.  Mersi.

 

MR SPEAKER

Mersi Minis.  Mon ava donn laparol prezan Onorab Audrey Vidot.

 

HON AUDREY VIDOT

Mersi Mr Speaker.  Bon apre midi Minis avek ou delegasyon, tou le de Minis, bann Manm Onorab, e tou dimoun ki a lekout.  Mr Speaker dan – en bann kestyon letan Onorab Leader Lopozisyon ti pe koz avek Minis in dir poudir bann Manm Lasosyasyon pa okouran lo sa demann e mon kestyon pou Minis Dezinyen petet ti a byen zot kapab verifye avek Chairman, ensi ki ansyen CEO petet pou ki rezon zot in desizyon pou met presyon pou ensure ki sa bann dimoun i ganny zot sitwayennte?

E dezyenmman eski minis i kapab eksplik nou byen, ki prosedir byen an detay ki bann prosedir lo sa bann non ki ou’n mansyonnen ki zot in ganny zot sitwayennte?  E i annan piblik pe demande a ki moman ki en dimoun i kapab challenge bann tel desizyon lo kote donn sitwayennte e eski okenn dimoun i kapab challenge sa devan Lakour?  Mersi Mr Speaker.

 

MR SPEAKER

Mersi Onorab Vidot.  Nou ava pas la parol avek Minis Mondon avan apre Minis Telemaque.  Minis Mondon.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker mon krwar mon’n mansyonnen taler nou ava al verifye sa desizyon wi, vwar si i annan okenn Minutes Meeting, vwar si i annan okenn rezolisyon ki’n ganny pran etandonnen ki bann Manm Lasosyasyon pe dir poudir zot pa okouran ki sa desizyon in ganny pran donk nou ava fer en travay lo la pou nou vwar ki mannyer desizyon ti ganny pran pou rekomann sitwayennte pou sa 2 dimoun.  Mersi Mr Speaker.

 

MR SPEAKER

Mersi Minis Mondon.  Minis Telemaque.

 

MINISTER MYRIAM TELEMAQUE

Mersi Mr Speaker.  Mr Speaker dan ka si i annan okenn dimoun ki anvi challenge sa desizyon, mon propoze ki i ava rod rekour kot Lakour.  That’s the only option akoz Lalwa pa kouver anba la.  Napa nanryen dan Lalwa.  Mersi.

 

MR SPEAKER

Mersi Minis.  Onorab Vidot.

 

HON AUDREY VIDOT

Mersi Minis pou larepons.  Mon lot kestyon konsernan eski Minis i kapab eksplik nou, petet bann prosedir an term serten case ki bann non ki ou’n mansyonnen an detay, ki zot in fer pou zot ganny sitwayennte. Mersi.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mersi Mr Speaker.  Parey mon ti’n mansyonnen bomaten normalman en demann i ganny fer kot Biro Imigrasyon sa bann dimoun i fer en demann, konsiderasyon i ganny pran, evalyasyon i ganny fer e apre dosye i ganny process kot Lotorite pli o.  Mersi Mr Speaker.

 

MR SPEAKER

Mersi Minis.  Onorab Clive Roucou.

 

HON CLIVE ROUCOU

Mersi Mr Speaker.  Bon apre midi Mr Speaker.  Bon apre midi tou le 2 Minis. Bon apre midi tou koleg Onorab.  Mr Speaker parey tou mon bann koleg lo sa kote latab.  Mwan osi mon vreman dezapwente avek larepons ki tou le de Minis in donnen.

Mwan osi mon pe demande ki tou le 2 Minis pa pe kapab fer sa ki zot pe fer alors demisyon nen oubyen Mr Prezidan Faure li osi i devret ale!  Mr Speaker mon kestyon i lir koumsa, eski Minis i kapab donn personal best sa 2 nazer Franse an konparezon avek nou bann nazer Seselwa ki nou kapab vwar zot abilite ziska lannen prosen?  Epi mon dezyenm kestyon, Minis taler in koz lo Mr El Materi e nou’n dir ki sa 2 garson ti ganny propozisyon sorti kot Lotorite naze, mon ti a kontan demann Minis lekel ki ti propoz la  fanmir El Materi pou ganny nasyonalite Seselwa e lekel ki ti segonde?  Mersi silvouple.

 

MR SPEAKER

Mersi Onorab. Minis.

 

THE DESIGNATED MINISTER MRS MACSUZY MONDON

Mr Speaker mon a reponn sa premye bout kestyon kot i konsern sa 2 nazer.  Dan zot rezilta Onorab dan Zwe Des Iles 2015 Simon enn sa bann frer son letan dan 400 met naze ti 4minit 50 segonn 60 santyenm.  I ti sorti 2enm La Reunion.  Lo 200 met Mathieu Bachmann ti osi sorti 2enm avek 1 minit 55 segonn e 70 santyenm.  100 met papiyon Mathieu Bachmann ti sorti premye avek en letan 55 segonn 57 santyenm.  Relay naze lib 100 met Mathieu ti sorti ti dan lekip ki ti sorti 2enm avek en letan 3 minit 29 segonn e 10 santyenm.  Sa en pe bann performans, bann rezilta ki sa de e tou sa bann rezilta ti par devan nou bann nazer pou nou dan sa konpetisyon.  Mersi Mr Speaker.

 

MR SPEAKER

Mersi Minis Mondon.  Minis Telemaque.

 

MINISTER MYRIAM TELEMAQUE

Mersi Mr Speaker.  Mr Speaker parey mon’n mansyonnen ce matin lo size sa msye ki i mansyonnen, son dosye ti kot Imigrasyon in la pou en bon pe letan e son permi rezidan ti pe al ekspire e parey labitid nou ti call up the file e nou ti fer process son dosye e apre parey nou konnen Prezidan in fer resorti in elabor tou keksoz dan son press conference in pran responsabilite in dir li ki ti aprouve pou donn citizenship sa msye.  Mersi Mr Speaker.

 

MR SPEAKER

Mersi Minis.  Onorab Flory Larue.

 

HON FLORY LARUE

Mersi Mr Speaker.  Bonn apre midi Minis.  Bon apre midi tou dimoun.  Nou dan en letan kot nou pe koz en kantite lo responsabilite e dan nou ka nou, nou le vwar Lezislatif e nou get anver Egzekitiv pou egzekite.  Dan sa kestyon nou’n vwar bokou larepons in ganny anmenn devan me mon santi ki nou pe sorti lo son bi prensipal.  Sa lalis non ouswa sa 2 Franse in ganny zot citizenship anba 5(1).

Dan 5(1) i konmans klerman pou dir dan lopinyon Prezidan letan en dimoun i fer loner ouswa rann gran service Sesel se Prezidan ki ofer li sa citizenship.  Pandan letan ki Minis in koze a plizyer repriz mon’n tann li servi sa mo zot in apply.

Mon krwar Onorab Hoareau letan in sey eksplike o komansman, in dir ki sa pa formil ki ganny servi, napa aplikasyon par sa dimoun.  Nou’n ganny en lalis apepre 60 non ki’n ganny donnen.  Eski Minis pe konfirmen ki dan sa 60 non ki’n ganny donnen, form ki’n ganny servi pou donn citizenship i parey in ganny dir anba 5(1) ki Prezidan dan son lopinyon in vwar ki sa dimoun i merite e la in donn li citizenship?  Sa i kestyon 1.

Me solman en lot kestyon mon vwar ki nou bezwen demande lo ki mannyer si le ka ki pa Prezidan – ti form i pa korek si mon konpran Onorab Hoareau i pe dir ki desizyon i lie avek ou Minis.  Si form ki sa citizenship in ganny donnen i pa korek it means sa citizenship pa stand.  Eski ou pare pou repran napa revocation la, napa court, i annan zis lefe ki laform ki sa citizenship in ganny donnen i pa korek and the power lies with you to take back the document which has been given in a wrong way.  Eski ou pare pou fer sa si sa i le ka?  Mersi.

 

MR SPEAKER

Mersi Onorab Larue.  Minis.  Minis Telemaque.

 

MINISTER MYRIAM TELEMAQUE

Mr Speaker parey mon’n fer resorti ce matin napa laplikasyon, en demann i ganny fer parey NSC ti fer en demann ok?  E parey mon’n dir ce matin 5(1) i prérogative Prezidan e meritorious.  Prezidan in vwar li e se ‘otherwise meritorious’.  Prezidan i vwar li neseser in analize in aprouve pou sa 2 zanfan, sa 2 nazer ganny nasyonalite.

Lo kote form ki nou annan kot Imigrasyon nou annan form 5(2) special circumstances.  E sa de nazer i pa ti pou tonbe anba 5(2) akoz i annan son kriter ki la.  Se pou la rezon ki zot in ganny donnen anba 5(1).  Mon krwar mon’n fer kler Mr Speaker mon pa konnen si i annan okenn leklersisman ankor.  Mersi.

 

MR SPEAKER

Mersi Minis.  Onorab Larue.

 

HON FLORY LARUE

Mersi Mr Speaker.  Mersi Minis pou ou larepons.  Lefe ki dan sa ka pou sa 2 franse klerman ou’n eksplik nou listwar sa file pou dir ki se Lasosyasyon ki’n fer aplikasyon lo zot par.  Mon ti a kontan demande si posib atraver ou Speaker ki Minis i osi klarifye sa lalis pli lwen an dizan dan sak ka, dan ki sityasyon ki aplikasyon in ganny fer pou zot e par ki?

E mon dezapwente avek larepons Minis Mr Speaker atraver ou, letan i dir nou ki kriter pa ganny zwenn pou sa 2 Franse anba 2.  Akoz zot pa zwenn sa bann lezot kriter ki vin avek, me anba (1).  Mon krwar in ganny lir plizyer fwa nou pei i ganny dirize par Konstitisyon.  Nou konman Lasanble Nasyonal nou pran en oath anba Konstitisyon.  Nou la pou nou uphold Konstitisyon.  Minis konman en par Egzekitiv i bezwen aplik Lalwa si i pe donn nou citizenship e i annan en Lalwa ki dir li ki mannyer i pou donn.

5(1) i dir ou’n bezwen perform kek keksoz i pa dir ou ‘POU’ perform.  Ki mannyer nou kapab zis donnen letan Lalwa i kler, i kler i de laliny.  Mon vreman dezapwente Minis pou dir mwan akoz i pa meet (2) nou bezwen donn (1).  I pa meet (1) osi, ki nou fer nou donnen kantmenm?  What do we do? Konmsi sa ki mon krwar kestyon ki le ganny demande.

 

MR SPEAKER

Mersi Onorab Larue.  Minis Telemaque.

 

MINISTER MYRIAM TELEMAQUE

Mr Speaker 5(1) i prerogative Prezidan.  Mon krwar nou fini met – nou’n dakor.  Me i dir ou ‘otherwise meritorious.’  ‘Otherwise meritorious’ e i ti merite.  Dapre pwennvi i ti merite.  Se pou la rezon ki in baz li lo 5(1).  Selman parey mon dir diferan dimoun diferan avoka i enterpret li dan diferan fason.  E sa lafason ki nou enterpret li Imigrasyon ki nou toultan enterpret.

 

MR SPEAKER

Mersi Minis.  Onorab Larue.

 

HON FLORY LARUE

Mr Speaker mersi me eski Minis pou kapab detay sa lalis ki nou kapab pli byen konpran bann aplikan kan ki ti apply on behalf of sa bann … akoz 60 i bokou depi – sa lalis ki Onorab Ramkalawan in demande, i from October 2016.  Si i more than 60 people  i fer apepre 3 dimoun on average par mwan ki pe ganny citizenship dan nou pei e i annan serten dimoun ki pe met zot devan e zot pe fer sa bann akt ki fer ki nou pei i ofer zot sa passport.  Alor mon krwar nou merite konman lasanble Nasyonal ganny en lalis pli detaye pou dir nou ki mannyer zot filing en pe forward parey dan ka Lasosyasyon Naze.  Si ou kapab met sa an detay pou nou silvouple?

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mersi Mr Speaker nou a fer le neseser.  Mersi.

 

MR SPEAKER

Bon petet, Minis a sa pwen sa lalis osi i vin en propriyete Lasanble mon ti a demann ou apre ki ou fini ou ava donn en kopi avek Lofis Deputy Clerk pou Lasanble Nasyonal retenir en kopi.  Bon nou ava kontinyen avek nou kestyon. Onorab Sebastien Pillay.

 

HON SEBASTIEN PILLAY

Mersi Mr Speaker.  Non Onorab Larue mon pa pe la defann mon zis kontan Statement Onorab Flory Larue ki dir nou zis bezwen atraver ou Mr Speaker sa wonderful Statement ki Onorab Larue i fer lo respekte Konstitisyon, mon dir be dan ka Prezidan respekte Konstitisyon les Danny travay!  Ou vwar?

 

(APPLAUSE)

 

HON SEBASTIEN PILLAY

Non Mr Speaker mwan mon ti a kontan klarifye en pwen.  Mon pe – nou’n esanze lo tou le de kote latab pozisyon me mon pa’n kler lo pozisyon ki LDS ti pe pran.  Nou pozisyon ki nou ti pe pran, se ki vi ki i paret i annan en konsern avek sa provizyon Lalwa nou put li on hold.

 

(Interruption)

 

HON SEBASTIEN PILLAY

Mr Speaker, mon’n les ou koze Onorab.

 

MR SPEAKER

Bon, Order! Order! Order! En moman.  Onorab Pillay en moman.  Mon’n permet sak Manm ki’n demann kestyon fer en pti Statement eksprim konsern eksprim dezapwentman, and so on – ok?  Annou fer ki lezot manm osi a kapab ganny sa sans.  Ok?  Mon’n donn laparol i en size vreman, vreman serye i enportan se sa rezon ki nou pe kontinyen ek sa Sesyon Kestyon ok?  Onorab Henrie ou pou annan ou sans ankor parey mon donn sa sans ankor Onorab Sebastien Pillay.  Onorab Pillay kontinyen.

 

HON SEBASTIEN PILLAY

Mersi Mr Speaker e ou ava remarke ki ou lazournen antye mon pa’n enteronp okenn Manm ki’n demann zot kestyon en?  Mr Speaker mon ti pe zis klarifye akoz mon’n tann en Onorab lo lot kote latab atraver ou fer en Statement ki 5(1) i byen ki nou annan li so mon ti a kontan konpran vizavi bann kestyon ki nou pe demande?

Dan sa bann larepons ki nou’n gannyen i annan dimoun dan sa lalis alor lot kote i aksepte i meritorious pou ganny sa citizenship.  So mon krwar petet nou devret pe retourn lo lesansyel sa kestyon ki konsern sa de endividi ki’n ganny sa citizenship ki Onorab Ramkalawan in anmennen.   E ler Onorab Ramkalawan in anmenn sa kestyon, i kler ki poudir i annan en konsern ki’n ganny souleve, ki bezwen come from Lasosyasyon bann dimoun asosye avek sa sport.

So kestyon which begs itself prezan se ki Minister pou fer, pou al investigate bann konsern ki’n annan lo nivo sa Lasosyasyon akoz nou pe ganny dir ki Manm pa’n konnen in annan NSC ki’n pouse in annan Chairman ki’n pouse, so pou klarifye lo nivo sa Lasosyasyon bann konsern ki sa Manm sa Lasosyasyon i annan pou determinen whether or not i napa bann prosedir ki pa’n ganny swiv oubyen bann Manm pa’n ganny konsilte ler sa demann pou sitwayennte in ganny fer avek Imigrasyon?

E mon dezyenm kestyon Mr Speaker dan sa lenvestigasyon osi determinen, si sa demann ki sa 2 dimoun in fer i pa’n vin en fason kot petet si zot ti reste dan zot pei, zot pa ti pou kapab kalifye petet pou sa bann levennman akoz the pool of dimoun ki profesyonnel dan sa domenn i plis, e alors petet zot pa ti pou a sa nivo pou zot kalifye.

So tousala i bann keksoz ki mon krwar zot bezwen investigate e pou nou adres sa sityasyon akoz pou pran parol ki Onorab Stephen Pillay in dir atraver ou Mr Speaker 5(1) i en provizyon ki la e mon pa krwar poudir demen menm si nou annan en Prezidan LDS ki pou retir 5(1)!  Si nou le fer sa then annou agree ozordi  ki nou vin anmenn en Private Member’s Bill e nou retir prérogative Prezidan doreavan pou donn sitwayennte, me mon pa krwar sa i pou en keksoz ki realis, e en keksoz ki nou devret pe al ladan so petet annou limit nou lekor pou nou rod en larepons akoz? Akoz ki Lasosyasyon Naze in vwar li neseser petet serten dimoun vwar li neseser atraver Leader Lopozisyon, pou kapab anmenn sa PNQ e pou nou demann sa kestyon. Annou regard akoz rezondet sa kestyon.  Mersi Mr Speaker.

 

MR SPEAKER

Mersi Onorab.  Minis petet Minis Mondon i ava repran sa kestyon.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker wi nou ava fer lenvestigasyon neseser atraver Lasosyasyon e parey mon’n dir i kler ki nou’ ganny serten Manm Lasosyasyon pa ti okouran ki en tel desizyon ti’n ganny pran. Donk NSC i ava carry out lenvestigasyon pou nou kapab etabli bann fe kwa egzakteman ki’n arive letan sa rekomandasyon in ganny fer.  Mersi Mr Speaker.

 

HON GERVAIS HENRIE

Mersi Mr Speaker.  Mr Speaker, pour kestyon No.2 ki Onorab Leader Lopozisyon in demande – en lalis non in ganny lir, e ladan i annan 2 non ki provok en pe mon kiryozite.  Dabor i annan sa Solomon Alao.  Mon swete mon pe dir son non byen.  Apre, byensir lafanmir El Materi.

Mon pe lev sa 2 fanmir ouswa bann endividi, akoz letan zot in eksplik prosedir – le 2 Minis in eksplik prosedir, kot i dir i prérogative Prezidan, i analize e Prezidan i aprouve.  Li Prezidan, son lesplikasyon lo rikord piblik ziska konmela, par egzanp, dan ka lafanmir El Materi, in dir poudir sete, i pa konn sa boug, zanmen in zwenn sa boug.  E ki i ti ganny bann rekomandasyon atraver bann channel Gouvernman on file par travayer servis piblik.

Mon kestyon – due diligence lo la par Departman Imigrasyon.  Annou pran sa Nigérian dabor – Solomon.  Ozordi letan nou pe koze, i fek gannyen li, pa tro lontan.  I dan en prosedir pou li separe avek son madanm.  E a plizyer repriz in annan rapor kont li dan Stasyon Lapolis – lakizasyon, alegasyon, vyolans domestik.  Eski bann Zofisye Imigrasyon, ki dwatet travay pros ek Lapolis in fer bann due diligence pou konn background sa boug avan nou donn li nou nasyonalite?

Lafanmir El Materi – El Materi in separe avek son madanm depi an Zanvye 2017.  Son bann zanfan ek son madanm pa Sesel.  Zot in retourn kot Ben Ali i ete, Qatar – li i ankor isi La Misère.  Li selman in ganny nasyonalite an Zen 2017, ki vin preski 6 mwan pli tar apre ki i separe ek son fanmir.  Solman sa bann zanfan in gannyen.  E ladan mon krwar i menm annan son manman, parski in nonm pres 6.  En tantin ki mon krwar mon’n deza zwenn en zour.  Mon krwar zot ti’n perdi, zot in ariv Arpent Vert, tantin dan vwal, i en lorizin Turque.

So due diligence – kwa ki nou, nou pe fer, sa Departman Imigrasyon, ki nou donn en Bidze nou koman Lasanble tou-le-z-an?  Zot ki sipoze pe veye lekel ki nou pe donn nou sitwayennte.  Alor eski zot pa pe dormi lo travay ki nou’n donn zot sa responsabilite pou fer?  Mon premye kestyon, Mr Speaker.  Ki due diligence zot fer?

 

MR SPEAKER

Onorab i fer 2 mon krwar la.

 

HON GERVAIS HENRIE

Non, sa i mon premye kestyon – due diligence, process pour verifye bann dimoun ki zot pe donn sitwayennte.

Mon 2enm kestyon i en kestyon en pe teknik, ki ava al pour Minis Sports.  An relasyon avek letan en atlet i pou reprezant en pei, anba Lalwa FINA – Fédération International Natation, se ki i bezwen omwen, dan sa pei ki i pou al naze pour dan prosen konpetisyon omwen 1an.  Ki fer ki Zwe De Ile si i an Out 2019, zot dwatet Sesel la ozordi pe reste pour kalifye zot, zot 1an – parski nou deza Septanm la.  E ki mannyer alor zot pou kapab reprezant Sesel sa 2 dimoun?  E si i pou napa posibilite ki sa voyaz La Réunion ki lev founga avek nou e dir poudir sa 2 zans pa kalifye pou naze pour nou?  Mersi bokou.

 

MR SPEAKER

Mersi Onorab Henrie.  Mon a pas laparol avek Minis Télémaque avan.  Minis Télémaque.

 

MINISTER MYRIAM TELEMAQUE

Mr Speaker, mersi.  Konsernan sa Solomon Alao – Mr Speaker, son madanm osi ti siporte pour li ganny sa nasyonalite.  I ti fer demann li osi.  I ti vin kot biro, i ti vin vwar nou.  Si i annan problenm sosyal – non, domestik, mon ti pa ti okouran. Ok?

E konsernan sa msye El Materi, mon krwar nou’n koz bokou lo la – i vre kestyon i ganny demande.  Be desizyon pou donn li ti prérogative Prezidan.  E sa i Lalwa 5(1).

 

MR SPEAKER

Minis petet zis …

 

MINISTER MYRIAM TELEMAQUE

Mon pa kapab al plis ki sa mwan Mr Speaker.  Mon bezwen baz lo Lalwa.

 

MR SPEAKER

Wi.  Minis petet, la mon ganny en pti pe tantasyon pour mwan demann ou en kestyon with regards to sa Nigerian.  Eski son aplikasyon ti ganny konsidere lo baz kontribisyon dan Sports oubyen atraver maryaz?  Si atraver maryaz, konbyen lannen in marye pour li ganny konsidere atraver maryaz?  Was it not en mariage de convenance?  Minis.  Shed en pti pe laklerte.

 

MINISTER MYRIAM TELEMAQUE

Mr Speaker, ce matin dan mon opening Statement, mon’n fer resorti pou dir sa garson osi i en sportsman ki NSC ti donn sipor pou fer – pou donn li nasyonalite Seselwa.  E ansyen CEO ti siport sa laplikasyon.  Son madanm osi ti fer – ti siporte.  Mersi Mr Speaker.

 

MR SPEAKER

Ok.  Mersi Minis.  Mon ava pas laparol avek Minis Mondon.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker, kot i konsern partisipasyon sa 2 zenn pou reprezant Sesel.  Nou’n verifye avek CIJ, ki Comité International des Jeux.  E osi avek Komite Olenpik Sesel, ki dir nou poudir wi, zot kalifye pour zot partisip – pour zot reprezant Sesel dan bann konpetisyon sportif.  Mersi Mr Speaker.

 

MR SPEAKER

Mersi Minis.  Onorab Henrie.

 

HON GERVAIS HENRIE

Mersi Mr Speaker.  Mon ava zis annan en pti siplemanter lo kestyon lafanmir El Materi pour Minis Imigrasyon.

In repete ankor – prérogative Prezidan.  E mwan mon a repete poudir Prezidan i dir in ganny tou bann dossier dan en – lo file par en Zofisye Gouvernman.  Eski Imigrasyon pa’n dir ek Prezidan poudir be bann fanmir, zanfan ek madanm in kite pei?  Zot pa isi zot – depi Zanvye sa bann zans in separe!  Prezan ou donn nasyonalite an Zen – i annan 6 mwan.  Be zot pa dir Prezidan?  Konmsi zot les sa boug fer sa kalite mistake ki in fer ki demen i kapab ganny impeach?  Lekel ki pou pran responsabilite pour sa?  Mwan si mon ti Prezidan, ti annan dimoun ti pou perdi louvraz tanto.  Mersi.

 

MR SPEAKER

Mersi Onorab.  Minis Télémaque, oule fer komanter?

 

MINISTER MYRIAM TELEMAQUE

Mr Speaker, sa madanm ek son bann zanfan ti isi.  Si zot in ale, zot fek ale, Mr Speaker.  Akoz formalite citizenship ou bezwen pran oath.  Sa madanm ti isi, i ti pran oath – savedir i ti bezwen dan pei.  Si zot in ale apre, mon pa kapab – mon pa pou kapab akoz mon pa konnen.  Me selman zot ti isi – tou zanfan ti isi.  Zot ti pe lekol tou isi.  Mersi Mr Speaker.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker, mon annan en kestyon.  Mon ti a kontan demann Minis si i kapab eksplik ankor avek Lasanble si i krwar ki – si i vwar li normal ki dan 24 mwan in annan 64 etranze ki’n fer keksoz ki’n ganny dekrir ganny ‘signal honour,’ ‘distinguished service’ e ki zot in ‘meritorious?’  Setadir 3 nasyonalite in ganny donnen tou le mwan depi ler ki Msye Faure in pran baton Prezidan.  Eski Minis i krwar poudir sa i korek anba prensip ki prérogative Prezidan, i en prérogative eksepsyonnel?  Sa i mon kestyon, mersi bokou Mr Speaker.

 

MR SPEAKER

Mersi Onorab Ferrari.  Minis.

 

MINISTER MYRIAM TELEMAQUE

Mr Speaker, lalis i 59, petet mon pa konnen – 59.  Nou korize, nou dir 59.  E kekfwa zot a krwar mon pe repete, me Mr Speaker, nou bezwen konsantre lo Lalwa 5(1).  Mon pou toultan sir sanmenm akoz Lalwa i prérogative Prezidan.  Nenport dimoun ki travay Imigrasyon i pou dir ou – 5(1) is the prerogative of the President.  E se li ki’n pran son desizyon i donnen.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mersi Minis.  Mon apresye ou repons.  Mon ti a zis kontan dir ki – eski Minis pa krwar poudir 5(1) i ok.  Mwan mon war li ok koman en Lalwa as long ki i respekte, se tou!  Nou pa ni bezwen sanz li, nou pa bezwen fer – tir li dan Konstitisyon.  It just needs to be respected.  E ki i pa normal ki tou le 2 semenn nou pe donn en nasyonalite Seselwa – i pa sa.  Akoz si Mr Speaker, that’s the trend ki nou pou al lo la, then nou pou bezwen sanz nou pozisyon pou dir – be okenn Prezidan pa pou ganny drwa donn sa.

Pourtan, pourtan tou Prezidan dan lemonn i annan sa prérogative, pour en dimoun ki’n servi, ki’n servi – ki’n o servis nou pei e ki pa Seselwa.  Me selman, la obviously i pe ganny abize e mon pa konnen si Minis i krwar napa okenn labi lo la.  Me mwan mon dir, sa dimoun ki’n apply, son 2 zanfan, sa Head of Swimming Association ki’n ekrir sa let, sa CEO NSC ki’n fer, Minis ki’n process sa laplikasyon, napa enn sa bann dimoun ki an tor.  Se senpleman Prezidan ki’n abiz son Lotorite.

Sa bann dimoun zot in apply, zot in go through the process, the procedure, prezidan i devret war.  I fek dir nou i konn byen son Konstitisyon – in montre nou i konn byen son Konstitisyon, i kapab fer nou – diffuse nou dan Lasanble, i fek dir nou.  Be sa bout la i pa konnen?  So, mwan mon krwar poudir i en gran mankman e sa i en keksoz ki pa devret kit koumsanmenm.  Mersi.

 

MR SPEAKER

Mersi Onorab.  Mon krwar mo ki oule dir, term ki nou servi se ‘dissolve’, pa ‘diffuse’ – wi.  Minis Télémaque.

 

MINISTER MYRIAM TELEMAQUE

Ou konnen Mr Speaker, mwan mon en teknisyen Imigrasyon, mon pou baz zis Lalwa.  Mon pou dir ou Lalwa i donn Prezidan permisyon – son prérogative anba 5(1).  Si nou krwar i annan lot rezon, nek nou anmenn Lakour oubyen nou challenge, oubyen parey mon’n dir, nou anmenn en Member’s Bill – Private Member’s Bill.  E apre nou a regarde from there.

 

MR SPEAKER

Mersi Minis.  Onorab Waven William.

 

HON WAVEN WILLIAM

Mersi Mr Speaker.  Mon ti a kontan demann Minister Télémaque, presize – lefe ki i annan bokou konsern e lefe ki i annan bann lezot konsern ki’n leve oparavan, sirtou konsern GOP Imigrasyon.  Kan ki Lasanble i ekspekte, si i kapab presize, pour nou ganny en Lalwa pli kler vizavi Lalwa Imigrasyon?

E dezyenmman, Minis – ankor lo sa Provizyon 5(1) la, eski i annan en limit par an ouswa i ouver?  Mersi.

 

MR SPEAKER

Mersi Onorab.  Minis Télémaque.

 

MINISTER MYRIAM TELEMAQUE

Mr Speaker, nou ti a – nou pe travay lo nou Immigration Bill.  Be selman i annan en pe – nou bezwen netway li en pe.  E apre nou a retourn avek Lasanble.  E apre nou annan…

 

MR SPEAKER

Bon, Minis mon krwar kekfwa i pe mean citizenship.

 

MINISTER MYRIAM TELEMAQUE

Wi, wi, mon pe al lo la.

 

MR SPEAKER

A… non?  Yes.  Ok, go ahead Minis.

 

MINISTER MYRIAM TELEMAQUE

E apre Citizenship Act, mon’n dir ce matin poudir nou pe revize.  E avan – nou’n fini komanse, e nou pe mazinen avan juin lannen prosen, nou pou anmenn dan Lasanble.  E napa limit lo Seksyon 5(1) – i napa en limit, i prérogative Prezidan.  Mersi Mr Speaker.

 

MR SPEAKER

Ok.  Mersi Minis.  Bon, mon annan 2 – le 2 leaders ki mon pe donn zot sanz.  Sa se Onorab De Commarmond i annan kestyon bomaten osi tou.  Mon ava pas laparol avek Onorab De Commarmond.

 

HON CHARLES DE COMMARMOND

Mersi Mr Speaker, i kler letan nou’n ekout bann larepons – bann kestyon ki’n ganny demande, ki Prezidan napa tor li.  Sa ki’n fer anba Lalwa, anba Provizyon 5(1), in fer li dapre Lalwa koman i ete.  Me i osi kler, a mon avi ki in annan serten mankman.  Par egzanp, serten konsey kekfwa ki pa’n ganny donnen korekteman pour ki si oule, bann serten tyek par serten lenstans i ganny fer pour advise li korekteman.  Se sa mon kestyon taler mon ti demande – ki legal advice ki’n ganny pran dan tou sa bann desizyon?

So, mon santi i annan en mankman la.  Alor in fer en lapel avek bann Lotorite konsernen depi kot in konmanse sa.  Depi kot son Lasosyasyon Naze, son NSC, e pour lezot lenstans – tou sa ki’n zwe en rol ladan la, i bezwen pe konsey Prezidan korekteman.  Sansan Prezidan li ki i fer?  I pran desizyon baze lo sa ki zot in donn li.  E lontan nou ti annan en Prezidan ki ti en avoka mon konnen, Msye René.  Me sa enn ki nou annan i pa en avoka li.  Alor i bezwen fye lo zot.

Alor mon lans en lapel pou pli byen – dan tou bann lenstans Gouvernman, pou pli byen advice Prezidan legalman.  Sa i en pwen.  E mon ti ava ankor redemann sa kestyon – to what extend ki legal advice in vreman ganny fer e ganny demande dan sa domenn ki nou pe koze la – bann Minis i kapab dir ek nou ankor?  E mon konnen sa 5(1) i larz.  Me selman par egzanp, si serten prosedir i mal ganny fer, si i pa devret ranpli form – si i ti devret ranpli form, ou pa’n fer li ranpli, si ti devret annan en isi ou pa’n fer li, alor sa i osi zwe en rol.  Se sa bann pwen ki mon pe demande lo kestyon advice legal.

2enm kestyon or dezyenm lapel se ki, i annan osi en lapel tre serye, tre enportan ki mon konnen plizyer fwa in ganny leve.  E zisteman lafanmir El Materi la in ganny mansyonnen en kantite fwa dan Lasanble ozordi.  I annan en lapel par former Speaker, pou demande ki en envestigasyon serye i ganny fer par FPAC dan sa domenn la, kot i konsern sa citizenship pour lafanmir El Materi.

Mon lans lapel alor dan nou Lasanble, pour ki FPAC – vi ki Chairman ki’n poz le question originel la, i take it upon itself konmsi – nou pran li, e mwan ki en manm FPAC osi, nou pran li seryezman pour ki nou komans en lenvestigasyon – nou fer en lenvestigasyon irzan dan sa ka kot i konsern El Materi.  Nou, nou fer – la nou pe koz – well ti mansyonn sa enn la, nou komans sa pour nou vwar ladan.  Mersi bokou Mr Speaker.

 

MR SPEAKER

Mersi Onorab De Commarmond.  Bon, i annan kestyon pour tou le 2 Minis.  Minis Télémaque.

 

MINISTER MYRIAM TELEMAQUE

Mr Speaker, mersi.  Souvandfwa nou annan kontak – nou rod advice avek Biro Attorney Zeneral.  E i aviz nou ki laliny ki nou pou pran.  E mon krwar nou pe fer byen akoz nou annan en relasyon byen pros avek li.  E parey dan ka sa bann – sa case, in baze lo Seksyon 5(1).  Mersi Mr Speaker.

 

MR SPEAKER

Mersi Minis.  Minis Mondon oule – Minis Mondon oule azout keksoz lo la?  Minis – Minis Mondon, non?  Bon, mon prezant en leskiz pour Onorab Terence Mondon.  Vre mon annan ou lo lalis – mon annan sitan bokou, mon’n mank ou.  Mon ava donn ou laparol.

 

(Off-Mic)

 

MR SPEAKER

Wi, Onorab Mondon in lev lanmen.

 

HON TERENCE MONDON

Mersi Mr Speaker.  Mr Speaker, mon kestyon pour Minis – lenformasyon ki nou, nou’n gannyen o size El Materi, se ki i ganny sitwayennte Seselwa lo baz statelessness.  An vi ki aprezan nou aprann ki son fanmir pe reste Qatar, eski sa i pa donn nou, ou Minister loportinite pou kapab rekonsider son sitwayennte?  E eski i annan okenn peyman ki ganny fer dan bann ka kot zot donn sitwayennte anba Seksyon 1?

E trwazyenmman – eski Minis i kapab dir nou akoz ki ou Minister pa vwar li neseser pou met nou pep okouran lentansyon ou Gouvernman avan menm ki zot donn sitwayennte anba Seksyon 1 – sa Lalwa Sitwayennte?  Mersi.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mersi Mr Speaker.  Mr Speaker, mon krwar mon’n eksplike konsernan sa msye, fason ki i ti ganny son nasyonalite.  E prosedir ki’n ganny fer, dosye– son resident permit ti pe al ekspire e tou le ka.  Konsernan peyman – napa peyman ki’n ganny fer.  Okenn peyman pa’n ganny fer.  Pardon?  E napa okenn peyman ki’n ganny fer.

Lo size si nou devret fer konnen nou pep?  Mon pe mazin kekfwa ou pe dir piblikasyon dan NASYON.  Regilasyon 2(b) ek 3, Citizenship Act 1994 i donn ou sa pouvwar pour pa mete.  Se pour larezon ki i pa mete.  Wi.  E nou ganny – i servi pour sa Seksyon 5(1).  Mersi Mr Speaker.

 

MR SPEAKER

Mersi Minis.  Onorab Mondon.

 

HON TERENCE MONDON

Mersi Mr Speaker.  Minis ou pa vwar li sa i mal ki Seselwa pa konnen lentansyon Gouvernman pou zot donn sitwayennte en etranze, ki pou vin dan Sesel?

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mr Speaker, mersi.  Mon pou retourn ankor lo sa legzersis ki nou pe fer pour nou reviz Lalwa Sitwayennte.  E sa komanter ki ou’n pase la, nou a pran kont ler nou pe reviz Lalwa.  Mersi.

 

MR SPEAKER

Mersi.  Petet la osi mon krwar la se Access to Information Act i rantre.  Wi.  Se sa bann lenformasyon ki riske ganny challenge anba sa Act.

Bon, mon ava retourn kot Loter PNQ, mon a donn dernyen laparol Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker, zis avan mon – si zis, mon ti anvi zis konfirmen ki Madanm Télémaque ti vin Minis apre, an Oktob 2017, non?  Zilyet?  Zilyet.

Mr Speaker, rezon ki mon pe demann sa se parski ofet sa bann desizyon – Madanm Télémaque i konn byen li ki mon pe al dir.  Sa bann desizyon ti ariv avan ki Minis ti vin Minis – avan ki Madanm Télémaque ti vin Minis.  E eski Minis i kapab dir avek nou – parske ou ti ankor dan en o pozisyon kot Imigrasyon, si ofet Msye El Materi i pa ti’n fer laplikasyon pour sitwayennte dan en fason normal?  E la ekout mwan byen Minis.

Ti annan 2 sponsors parey Lalwa i demande.  E sa 2 sponsors sete Msye Payet – PS Payet, ti annan Madanm Maryse Berlouis e ti annan Monsieur Elvis Chetty.  Ok?  Eski i pa baze lo la ki Monsieur Faure, apre ki ou koman en teknisyen ti’n fer tou travay ki ou devret fer, e ou ti rekonnet ki poudir i pa ti pou kapab ganny nasyonalite, e se la kot 5(1) ti vini.  E ki kontrerman avek sa ki Onorab De Commarmond in dir ki, Prezidan in ganny mal konseye.  Ofet sete Prezidan, parey i ti dir dan 2 Conférence de Presse – son premye Conférence de Presse kot i ti dir i ti donn nasyonalite lo baz imaniteryen. E dezyenmman kot in dir li ki’n pran desizyon.  Alor, Minis eski ou kapab dir avek nou, si se pa Monsieur Faure li menm li ki responsab pour sa nasyonalite?

Dezyenmman Mr Speaker – Onorab De Commarmond in repran parol ansyen Speaker e in met sa devan FPAC.  Mr Speaker, mwan koman Chairperson FPAC, mon kapab deswit la eksprimen ki poudir mwan personnelman mon napa okenn konfli lentere.  E ki si sa i wish Lasanble Nasyonal, nou ava pare, menm si i al en pe an deor manda FPAC – parske FPAC i plito en Body ki regard finans ek bann prosedir finansyel.  Me selman si Lasanble Nasyonal i deside donn sa manda FPAC koman  en Body Lasanble Nasyonal pou al fer sa travay spesifik avek bann Terms of Reference spesifik, mwan mon apre pou mwan pran sa – mon pare pou mwan lead FPAC dan en tel lenvestigasyon pour nou regard tou le 59 laplikasyon.  Sa mon napa problenm pou fer.  Parski petet osi, Mr Speaker, parey Onorab De Commarmond pe dir e serten dimoun ki apel sat maron, lisyen eran, konmsi bann diferan non lo Facebook – non, non, lo Facebook.  Non, non, pa ou, pa ou!

 

MR SPEAKER

Non.

 

HON WAVEL RAMKALAWAN

Pa sote!  Mon pe dir ki sa bann zafer la, ki kekfwa ler FPAC i ava fer en hearing piblik ki ava pas lo televizyon, sat maron i a bezwen mor.  Ok.  Sat maron pa pou nannan personn.  Alor nou pare pour nou fer sa.

Me Mr Speaker, an menm tan osi, eski Minis pa krwar ki poudir letan en dimoun i vin – i ganny nasyonalite, mon retourn ankor lo sa ki mon’n dir oparavan, i ganny nasyonalite akoz in fer keksoz ekstraordiner – anba 5(1), ki konmsi ti a bon pour Seselwa konnen lekel li?  Pour ki nou ti ava kapab sey imit son bann kalite ki i annan. Ti ava kapab ed nou pour nou fer bann keksoz bon.

Prezan Mr Speaker, pour nou 2 Franse.  Mr Speaker, si sa 2 Franse i sitan bon parey Minis i oule fer nou krwar, be akoz ki dan Zwe De Ile 2015, parske se dan Zwe De Ile 2015 ki bann dernyen letan ki nou, nou annan.  Be akoz zot pa ti ganny plis meday Lor?  Akoz konmsi zot pa ti…? Parski nou annan, i annan bann dimoun ki’n reprezant Maurice, ki’n reprezant Sesel menm, bann endividi ki aktyelman in ganny plis meday lor.  Parski sa ki ou’n dir nou la, zot meyer letan an 2015 in permet zot pour – enn ti ganny meday Lor, lot ti ganny 2 meday Larzan. E mon krwar pa si 2 meday Larzan i fer en meday Lor.  Alor konmsi, akoz ki zot pa’n fer tousala?

Apre Mr Speaker, annou – mon ti ava kontan Minis, konmsi enn fwa pour tou annou – e sa i en keksoz ki toultan nou dir, e Onorab Henrie in mansyonnen, ki poudir en keksoz ki nou pa fer ase se due diligence!  Due diligence!  Si sa 2 Franse in kapab ganny en meday ek 2 meday larzan dan Zwe De Ile, e zot Réunionnais zot – eski pa i kler ki poudir sa 2 dimoun pa pou zanmen ariv Zwe Olenpik dan lekip La France?  Eski pa i kler ki poudir zanmen zot pou ariv Jeux Olympique anba tim La France?

Parski zot bezwen al fer – al reprezant La FranceLa Réunion pa ale Olympic li, se La France ki al Zwe Olenpik.  Alor – e World Championship?  La Réunion pa ale World Championship li, se La France ki ale.  Eski pa i kler ki poudir Sesel pe servi koman en shortcut pour ki sa 2 messieurs i kapab ariv laba ariv laba?  E tout en connaissant ki poudir avek zot passport Franse, zanmen zot pou ariv laba!

Alor Mr Speaker, eski seryezman apre tou sa ki’n ganny dir dan sa Lasanble depi bomaten lo tou le 2 kote latab, avek tou sa ki nou’n ganny dir – tou sa ki nou’n dir, pwen ki’n ganny met devan lo kote legal, lo kote tou bann lezot, eski pa i kler ki poudir sa Lartik – sa Seksyon 5(1) dan Lalwa in ganny abize?  In ganny mal servi?  E ki Gouvernman i devret seryezman pran sa desizyon pour zot regard ankor sa bann nasyonalite ki zot in donnen.

Akoz Mr Speaker, si zot, zot pa fer, mwan mon anvi dir, en Gouvernman LDS pou fer.  E sa bann nasyonalite pou ganny revoke lo baz ki zot in ganny donnen anba move provizyon Lalwa.  E i pou zis en keksoz legal ki pou kler, kler, kler.  Silvouple, annou pa les nou pei down.  Sesel i pli gran ki nou tou!  Be si Sesel i pli gran ki nou tou, nou sitwayennte – be sa i sel keksoz ki nou annan sa.  Sel keksoz ki pa kapab pran avek nou.

Alor, annou montre respe pour sa sitwayennte e kot nou lonbri in antere.  E annou pa zis donnen akoz – ok ou en teacher ou’n vin Sesel.  E demen mon pou fer serten referans lo sa zafer sitwayennte.  Parski nou grander pei Mr Speaker, sa manda ki Prezidan Faure pe koz lo la, annou pa bliye sa manda an 2015 ti annan zis 193 vot ki ti separe.  E si nou pe donn 59 vot – 59 sitwayennte dan 2an, be i pou fer en diferans.  I kapab fer en diferans lo direksyon ki nou pei i pran li menm.

Alor, ankor enn fwa mon fer en dernyen lapel, pour ki nou regard tousala seryezman.  E mwan mon pa pou demann Minis pou – mwan mon konnen Minis in sezi tou bann pwen ki nou’n met ater devan nou. Minis nou ti vot pour li parske nou ti rekonnet son konpetans.  Me selman Minis, nou bezwen dir ki i annan en problenm la.  Nou annan en problenm lo nou lanmen.  E nou ti ava demande ki ou pran sa bann problenm seryezman.  E ou konsey Prezidan pou revwar tou sa bann nasyonalite, enkli sa 2 Franse.

E tou sa bann keksoz ki nou’n dir konsernan sa bann travay ki i pe fer laba kot swimming pool.  Nou konnen ki poudir Mr Larue in bezwen al fer vizit akoz i annan problenm laba kot swimming pool.  Zanfan pe ganny lenfeksyon dan zot zorey akoz kalite klorin pa bon.   I annan size cleanliness, i annan size fer parti e apre sa letan zot fini fer parti, tou dimoun zis sot dan swimming pool.  Bann prosedir pa pe ganny swiv.

E an plis ki sa Mr Speaker, mon a fini lo la – CEO i konn tre byen ki poudir sa msye in vin koman Konseye Teknik, la i osi coach.  E an menm tan osi li ki pe domin kot swimming pool e ki i annan konplent lo la.  E ki menm lo nivo lakademi, lo nivo lakademi avek vizavi bann klib, i annan en kantite bann problenm.  Parski Mr Speaker, parey bomaten Minis Bastienne ti dir – ti demann mwan si mon’n war zot kopi plan.  Mwan en dimoun ki senpleman fouraye e bokou dimoun i koz avek nou.  E pa krwar ki poudir nou pa konnen ki pe pase kot sa swimming pool.  Mersi bokou.

 

MR SPEAKER

Mersi Onorab Ramkalawan.  Bon, i annan en pe komanter, i annan en pe kestyon and all that.  Petet pour nou konklir, mon ava pas laparol avek tou le 2 Minis.  Mon ava komans avek Minis Mondon, apre nou ava fini avek Minis Télémaque.  Minister.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker, bann pwen ki Onorab in souleve, nou ava fer sir ki sa i ganny – i form parti nou lenvestigasyon.  E nou ava demann Lasosyasyon pou reponn oubyen pou pronons zot lo la.  Onorab, wi – CEO i okouran ki i annan plizyer defayans kot swimming pool – in ganny met a son latansyon.  I annan aksyon ki’n deza ganny pran.  E i annan aksyon – i annan keksoz ki i pe travay lo la avek lentansyon ki sa bann problenm ki ou pe dir i egziste laba, i ava ganny rezourd e sityasyon i ava amelyore.

Mon dir ou mersi Mr Speaker pour donn nou sans pou vin reponn e klarifye kestyon ki’n ganny demande ozordi.  E bann keksoz ki nou’n dir nou pou al rod lenformasyon lo la, nou ava rod lenformasyon apre nou ava fer Lasanble gannyen.  Mersi Mr Speaker.

 

MR SPEAKER

Mersi Minis Mondon.

 

(Off-Mic)

 

MR SPEAKER

Wi.

 

HON WAVEL RAMKALAWAN

Mr Speaker, zis lo sa size ki Sesel ankor enn fwa pe ganny servi koman en stepping stone, en shortcut.  Parske sa 2 Franse pa pou zanmen ariv Olenpik – sa 2 Réunionnais, pa pou zanmen ariv Olenpik anba lekip Franse Me ki zot pe servi Sesel pour zot kapab ariv laba.

 

MR SPEAKER

Wi.  Minis in dir, in mansyonnen.  Minis pou donn nou lenformasyon.  Oule azoute – azout keksoz Minis?  Minis Mondon?

 

THE DESIGNATED MINISTER MRS MACSUZY MONDON

Non, Mr Speaker.  Mon ti pe zis al dir, i a form – i pou for parti nou lenvestigasyon.  E Lasosyasyon i ava bezwen dir nou – klarifye lo komanter ki Onorab in fer.  Si nou pe ganny servi koman en shortcut.  Letan nou ti fer sa rekomandasyon, eski nou pa ti realize poudir petet nou pe ganny servi koman en shortcut.  Tousala Onorab, i ava form parti travay ki nou pou al fer avek Lasosyasyon.  Mersi Mr Speaker.

 

MR SPEAKER

Mersi Minis Mondon.  Minis Télémaque.

 

MINISTER MYRIAM TELEMAQUE

Mersi Mr Speaker.  Mr Speaker, bokou keksoz in ganny fer resorti – bokou pwen.  E bokou rekomandasyon.  Bann pwen ki vreman valab, ki mon krwar nou bezwen pran not.  E mazin lo la ler nou pe reviz sa Lalwa Citizenship, ki nou ava – ek gidans AG, nou a regarde kot nou kapab fer antre osi.  E parey konsernan bann Seselwa osi, Seselwa ki oule konnen lekel ki ganny citizenship, sa osi tou nou a bezwen ler nou reviz Lalwa, met – fer antre.  Akoz pour le moman anba 5(1) napa provizyon.  Nou bezwen mazin lo la tou.

E mon krwar lo size sa msye – El Materi, Prezidan in pronons son lekor dan son Conférence de Presse.  E mon pa pou kapab fer pli bokou komanter lo la.  Mersi Mr Speaker.

 

MR SPEAKER

Mersi Minis Télémaque. E lezot size mon krwar, si Lasanble i dakor, i ava mandat FPAC pou fer investigation apre nou ava ganny rapor.

Bon, a sa pwen mon ti a kontan remersi Minis Dezinyen – Minis Mondon, Minis pour Imigrasyon e Leta Sivil – Madanm Télémaque, PS Volcere, Special Advisor – Michel Marie e CEO NSC – Mr Jean Larue.  Mersi pou pas pli ki demi zournen parmi nou.  Nou’n vreman apresye otan posib ki zot in kapab donn nou leklersisman pour sa kestyon.  Nou swet zot bonn kontinyasyon e nou ava eskiz zot parmi nou.

 

(THE DESIGNATED MINISTER MRS MACSUZY MONDON & MINISTER TELEMAQUE AND THEIR DELEGATION WAS EXCUSED FROM THE HOUSE)

 

MR SPEAKER

Bon, nou’n travay kontinyelman depi 2er.  Mon konnen in ariv ler pour en Break.  Nou pou pran en Break 30 minit ki pou fer nou retourn 4.30 pour nou komans en Mosyon, ki nou pou bezwen rann lantern avek SBC 5er.  Nou’n abiz en pti pe lo SBC ozordi.

So, mon sizere nou komans fresh demen bomaten – 9er bomaten avek Mosyon, si loter Mosyon i agree.  Ok.  Nou ava al dan sa direksyon.

Ankor avan nou adjourn, mon prezant mon senser leskiz avek SBC pour bomaten e apre dan midi.  Mon konnen atraver Madam Clerk, nou’n bounce off en pti pe avek SBC.  Me nou sey fer mannyer nou mye – nou fer nou mye ki par midi edmi nou’n rann zot lantern akoz zot osi zot annan bann progranm.  I annan bann dimoun ki pas zot – ki anvi pas zot Lanons, zot Mesaz osi tou.  So, otan posib nou ava sey mentenir sa pour nou respekte sa bann ler.

Bon, avek sa mon ava dir nou’n fer en long zournen travay.  Nou ava adjourn e nou ava repran nou travay demen 9er bomaten.

 

(ADJOURNMENT)