Home » Verbatim » 2018 » Verbatim Tuesday 18th September, 2018

Verbatim Tuesday 18th September, 2018

NATIONAL ASSEMBLY OF SEYCHELLES

Tuesday 18th September, 2018

 The Assembly met at 9am

 National Anthem

 Moment of Reflection

 Mr Speaker in the Chair

 

MR SPEAKER

Bonzour tou Manm Onorab, bonzour tou bann envite dan Galeri.  Dapre lenformasyon se LDS Youth Association ki pe ganny dirize par son Chair Mr Aaron Bonnelame.

Bonzour zot tou.  E bonzour tou dimoun ki a lekout e ki pe swiv travay Lasanble Nasyonal.

Pou bann envite ki dan Galeri, zot pou swiv sa premye bout travay Lasanble e apre dan Break mon envit Manm lo tou lede kote latab pou join zot pou pran dite lo balkon e pou kapab enterakte osi avek zot.

Bon nou ava al direkteman lo nou Order Paper pou travay ozordi.  Mon ava zis pas en pti pe lo travay ki nou annan lo Order Paper pou sa 2 zour.

Nou pou annan bann prezantasyon bann papye.  nou annan Rapor Bills Committee pou ganny soumet par Chair.  Nou annan kestyon pou repons, e sa i pou vin Minis pou Dezinyen Minis responsab pou Gouvernman Lokal.  Nou pou annan osi tou en Urgent Question ki pou vini anba Standing Order 31 (3) pour Minis Dezinyen ki pou deza isi prezan dan Lasanble.  E sa pou swiv par en PNQ.  E apre PNQ nou annan en Statement  ganny fer lo Plan Konpreansiv pou lagrikiltir par Minis Charles Bastienne.

9enm nou annan 2 Bills, nou annan en Private Member’s Bill, sa i lo Special Pension pou bann post Konstitisyonnel.  I en lamannman ki pou pran kont bann Manm ki’n servi dan Premye Repiblik ant 1976 ek 1977.

E nou annan 2enm Bill sa se pou se Immigration Bill 2018.  Sa pou swiv par Mosyon.  E Mosyon lo Order Paper ozordi sa semenn nou annan zis Mosyon anmennen par Leader Lopozisyon.  Mon’n ganny averti par Onorab William ki pe retir son Mosyon pou lemoman.

Vwala en pe travay ki devan nou.  E mon profit sa moman la pou mon fer en leklersisman swivan Konferans Lapres ki Prezidan ti donnen Zedi pase.

Swivan en kestyon ganny anmennen par en zournalis  SBC, ki Manm Lasanble Nasyonal pe anmenn en  Prozedlwa pou ogmant saler Manm Lasanble, mon anvi met lo rikord ki sa i fo!  Napa okenn Prozedlwa parey lo Order Paper e napa okenn Prozedlwa parey ki’n ariv kot lofis Clerk.

En tel Prozedlwa ki annan lenplikasyon finansyer i pou bezwen swiv bann prosedir neseser e i pou bezwen aprouvasyon Minis Finans e Gouvernman.

Mon repet ankor si okenn zournalis oubyen okenn manm piblik i oule lenformasyon lo travay Lasanble Nasyonal zot lib pou telefonn biro Zofisye Relasyon Piblik, e Lasanble i a don zot lenformasyon ki korek.

6enm Lasanble Nasyonal pe fer son devwar pou met tou len formasyon a dispozisyon manm piblik.  Mersi.

Avek sa mon ava demann Madanm Clerk pou prezant bann Papye – pou lir bann Papye ki devan nou.

 

MADAM CLERK

Mersi bokou Mr Speaker.  Bonzour Mr Speaker.  Bonzour tou Manm e bann dimoun ki dan Galeri, byenveni.  Prezantasyon Papye lo Order Paper sa semenn nou annan;

S.I. 58 pou 2018 Public Utilities Corporation – Romainville Solar Power Field Project Guarantee Debt Order, of 2018.

        E answit nou pou vwar parey in ganny mansyonnen pli boner Rapor Scrutiny of Bills Committee – Septanm 2017 ziska Septanm 2018 e sa pou ganny prezante par Chair Komite Onorab Georges.  Mersi Mr Speaker.

 

MR SPEAKER

Mersi Madanm Clerk.  Bon mon ava call on Onorab Bernard Georges pou prezant Rapor Bills Committee.

 

HON BERNARD GEORGES

Mersi Mr Speaker.  Bonzour Mr Speaker.  Bonzour tou bann koleg Manm Onorab.  Bonzour tou bann oditer ek telespektater dan lakour.  Komite lo Prozedlwa Scrutiny of Bills Committee i annan plezir Mr Speaker pou prezant son 2enm Rapor Anyel avek Lasanble.  Sa rapor i pou ganny peryod Septanm 2017 A Septanm 2018.

Remersiman;

Pandan lannen ki’n de-koule Onorab Basil ti demann avek Komite pou ganny ranplase lo Komite.  I ti ganny ranplase par Onorab Egbert Aglae.  Komite i annan plezir pou welcome Onorab Aglae konman en Manm e remersye Basil Hoareau pou son servis enportan lo Komite.  Swivan son eleksyon konman Speaker, Onorab Prea in ganny ranplase lo Komite par Onorab Phillip Arissol.  Mon vwazen isi dan Lasanble.  Nou welcome Onorab Arissol.

Malgre sa Speaker in deside pou kontinyen servi lo Komite.  Komite i pran sa lokazyon pou felisit li lo son eleksyon, e nou swet ou Mr Speaker tou le meyer dan ou nouvo fonksyon.

Depite Speaker e nou Leader dan Lasanble i partisip preski tou rankont Komite.  Attorney Zeneral in osi asiste mazorite rankont Komite.  Nou rekonnet prezans e partisipasyon sa bann dimoun travay Komite ki’n ganny an anrisi par zot partisipasyon.

Rapor 2018;

Komite in konsider tou Prozedlwa ki’n ganny pibliye.  An 2018 Gouvernman in pibliy son progranm Lezislatif pou sa lannen –  en progranm ki konpri en gran kantite Bill 40 antour enkli detrwa Bill enportan.  Tel ki; Akse a Lenformasyon, Imigrasyon, Taks Biznes, Kontrol Lisyen, e Komisyon Drwa Imen.

An plis Komite i bezwen konsider Bill lo letablisman Komisyon Laverite ek Rekonsilyasyon Nasyonal.  Bill pou amann Kod Sivil in vwar Komite rankontre avek tou Manm Lasanble dan en Sesyon Plenyer pou en semenn antye, avek partisipasyon piblik e dan prezans eksper etranze.  En 2enm Sesyon i pou progranmen pli tar sa lannen.

Pandan sa lannen Komite in konsider 18 Bills, 17 Bills  Piblik e en Bill Prive anmennen par en Manm Lasanble.

Metod travay;

Komite in rankontre tou dilon lannen sak fwa en Bill i ganny pibliye.  Konpare avek lannen pase kot laplipar Bill ti vin devan Lasanble, pardon     Bill ki ti vin devan Lasanble ti bann lamannman Bill, sa lannen mazorite Bills i bann nouvo Lalwa bokou zot  byen long.

I ti kler ki bokou sa bann Bills ti’n ganny drafte anba presyon e zot ti annan bokou fot.  Komite ti alor sanz son metod travay pou pran sa an kont.  Olye koriz fot parey Komite ti’n annan tandans pou fer lannen pase, Komite sa lannen ti vwar le neseser pou rankontre an prezans sa travayer Biro Attorney Zeneral ki ti drafte sa Lalwa e en manm sa Minister ki ti ansarz sa Bill.

Malgre ki sa prosedir ti ogmant travay Komite konsidableman e bokou meeting ti bezwen fer lo en peryod plizyer erdtan, e dan serten ka dan plizyer Sesyon sa metod travay in anmenn bann lavantaz swivan ;

Premyerman Lasanble pa’n bezwen pas bokou letan koriz fot dan Bill letan donnen ki sa ti’n ganny fer dan Komite.  E Minis ti selman aksepte bann koreksyon ki Komite ti’n sizere.

2enm – okenn sanzman mazer dan Polisi en Bill ti ganny adrese avan Second Reading dan en fason ki Lalwa ki ti pase ti pli koeran.

3enm – Manm Lasanble ,,ti alor kapab konsantre lo merit sa Bill dan deba e non pas letan lo  son striktir e lo son langaz.

Mon oule remersye manm Komite Bill pou sa travay eksepsyonnel, anba bokou presyon ki sa diferan prosedir in obliz zot fer.

Malgre sa serten  defayans in kontinyen aparet e sa i ganny kouver dan Seksyon swivan.  Sa lannen Manm Lasanble in konmans resevwar en rapor lo sak Bill, prepare par Komite pou gid zot dan zot, deba lo bann Prozedlwa. Nou swete ki Manm Lasanble trouv sa bann rapor itil.

Komanter ek rekomandasyon, Komite Bill i annan en rol kardinal dan travay Lasanble Nasyonal

Konman sa Komite ki regard kalite Lalwa, nou Komite i premye lo fron sa travay dan Lasanble.  I devwar Komite ki travay Lezislatif dan Lasanble i ganny kordinen pou ki osi efikas e osi pozitiv ki posib.  Avek sa lobzektif antet Komite komanter e rekomandasyon swivan avek Lasanble Nasyonal.  E i annan 4 Mr Speaker.

        (1)Nou kontinyen felisit Gouvernman pou son langazman ouver e pozitiv anver Komite Bill e nou kontinyen rekonnet ki Gouvernman i pare pou aksepte konsey ki nou Komite i donn Minister.  E pou angaz avek Komite dan en fason ki devlopman Lezislatif pou pei i progres dan meyer fason posib.

(2)Komite i eksprim son remersiman anver manm piblik ki’n angaz avek Komite apre ki Bill ki’n ganny pibliye, dan Gazet Ofisyel.  Dan bokou ka sa in fer Gouvernman rekonsider en Polisi ouswa en konpar en sizesyon ki Komite in fer.  Prosedir White Paper i en bon linisyativ e Komite i angaz Gouvernman pou servi sa prosedir plis ankor pou asir partisipasyon piblik dan devlopman Lalwa dan nou pei.

(3) Komite i regete pou raporte ki nou kontinyen obzerve ki bokou Proze Lalwa i ganny tay avek e napa ase letan pou Komite Bill konsider zot avan ki zot ganny mete lo Order Paper. 

Dan nou rapor lannen pase nou ti rekonnet ki Gouvernman i annan son prop azanda Lezislatif e nou ti demande ase letan i ganny donnen pour ki piblik i kapab konsider nouvo Prozedlwa e pou ki MNA i kapab konsilte voter dan distrik avan deba lo en Lalwa isi dan Lasanble.

Nou demann pa ti ganny met an pratik e tro swivan Lasanble in ganny demande pou debat lo Bill ki pa ti’n ganny byen konsidere avek rezilta ki plizyer Bills i bezwen ganny retire ouswa anvoye pou en lot dat pou annan plis konsiltasyon.

Sa pa enspir konfidans dan prosesis Lezislatif e i bezwen ganny rektifye.   Lasanble i bezwen osi aksepte en par dan sa defayans.  Nou repete ki okenn Bill pa devret ganny pibliye dan Gazet Ofisyel osi lontan ki pa’n ganny byen egzaminen pou asire ki napa fot ouswa defayans dan son striktir e dan konteni.

Egalman en Bill pa devret ganny met lo Order Paper avan ki sifizan letan i pase depi son piblikasyon pou asire ki piblik i ganny letan pou konsider li e Komite Bills i ganny letan pou egzamin li.

(4) Komite in kontinyen zouyir lasistans Biro Attorney Zeneral pandan sa lannen.  Nou bezwen fer remarke sepandan ki tro bokou Bill in ganny pibliye avek fot bet ek inatansyon.  Nou demann Departman ki drafte Bill pou pran plis swen ler zot drafte Prozedlwa Ofisyel.

Komite i rekomann avek Lasanble pou konsider kreasyon en Seksyon ki drafte Lalwa avek tou resours travayer neseser isi dan Lasanble pou siport e biro Attorney Zeneral e Komite Bill Lasanble.

An atandan avek bi asire ki selman bon kalite Bill ki vin devan Lasanble Komite pou raport avek Lasanble ki en Bill ki pa ariv lo standar neseser, pa devret ganny konsidere.  E si in fini ariv lo Order Paper i devret ganny rezete.  Nou regrete ki nou bezwen fer sa.  E nou pa oule montre ledwa personn.  Me i nou devwar pou asire ki pli o standar posib i ganny mentenir dan prosesis Lezislatif dan nou pei.  Mersi Mr Speaker.  Sa se Rapor Scrutiny of Bills Committee sa Komite ki rapor lo bann Prozedlwa avek Lasanble.

Rapor Mr Speaker pa ankor ganny sinyen par tou bann Manm malgre ki tou bann Manm i dakor avek son kontenir ki mon fek li r la ozordi.  3 nou bann Manm i labsans dan nou pei.  Enn lo en misyon e 2 pou rezon medikal.  Zot ava siny sa rapor ler zot retournen.  E ler zot in fer sa mon ava sa moman fer ou lofis ganny en kopi Ofisyel.  Mersi Mr Speaker.

 

MR SPEAKER

Mersi Onorab Georges.  Bon mon ava demann Parliamentary Reporter pou appel Minis parmi nou pou reponn kestyon.

Mon anvi zis enform Lasanble ki kestyon Onorab Aglae lefe ki pa dan pei i lo misyon, i pou ganny pran par Onorab William.  E lo 3enm kestyon nou annan en pti fot tipografi mon kapab dir.  Onorab Woodcock i MNA pou Grand Anse Praslin pa Baie Saint Anne Praslin.  Pa konnen si zot in fer en laranzman zot de Onorab Churchill Gill.  Me nou pa anvi al print en lot set Order Paper bomaten – Lofis Clerk in averti mon i nou’n kapab zis fer sa pti koreksyon.

Lot lenformasyon osi Minis in averti mwan ki an vi ki son PS pou Kiltir i annan lezot lobligasyon bomaten, i demann mon permisyon pou pran kestyon No.6 an premye ki apre nou a kapab eskiz son PS pour Kiltir e nou ava pran lezot kestyon pou ki annan pou fer avek Local Government avek Sport. 

Savedir nou pou pran kestyon Onorab John Hoareau premye kestyon No.6.  Bon mon ti a kontan dir bonzour Minis Macsuzy Mondon Minis Dezinyen e welcome li avek son delegasyon dan Lasanble.  Premyerman devan nou pou annan sa kestyon pou Departman Kiltir.  E Minis ganny akonpannyen avek son PS pour Kiltir, Mrs Cecile Kalebi.  Son Special Advisor pou Departman Kiltir Mr Emmanuel D’Offay e Mr Esparon ki pe reprezant Biro Attorney Zeneral.

        Minis avek ou delegasyon bonzour e welcome.  Mon ava prezan pas lo kestyon premye kestyon Onorab John Hoareau.

 

HON JOHN HOAREAU

Bonzour Mr Speaker.  Mersi Mr Speaker.  Bonzour Minis ek ou delegasyon.  Bonzour tou bann Zenn Lasosyasyon Zenn dan LDS anler dan Galeri.  Bonzour tou dimoun ki pe ekoute.

Mr Speaker mon ti lava zis anvi ki ou konsidere pou demann ou lendilzans lo la ki nou azout i annan Libreri avek Larsiv ki nou met li an kestyon la.  Mon ti anvi zis mon azout Departman Kiltir Ladministrasyon e osi Mize Listwar.  Akoz zot form parti menm batiman.  Alors kestyon i a lir koumsa;

Eski Minis i kapab enform sa Lasanble, si lenfestasyon fungus  dan  Larsiv, dan Libreri, dan Departman Kiltir, Seksyon Administrasyon e dan Mize Listwar i ankor pe arive?

Si wi ki pe ganny fer pou anmenn en solisyon permanan pou sa problenm?  Eski i annan okenn konpansasyon ki pou ganny donnen pou sa bann travayer ki’n soufer problenm lasante dan sa  bann landrwa?  Mersi.

 

MR SPEAKER

Mersi Onorab.  Ou amannman i ase sibstansyel, me selman mon mazinen sa problenm i pe ganny trete an zeneral nou ava permet.  E mon ava pas laparol avek Minis Mondon.

 

THE DESIGNATED MINISTER MRS MACSUZY MONDON

Bonzour Mr Speaker.  Bonzour tou bann Manm Onorab, tou bann dimoun ki dan Galeri, e tou bann dimoun ki a lekout dan lakour.

Mr Speaker wi lenfestasyon fungus i ankor pe arive dan larsiv avek libreri.   E sa se akoz natif dokiman ki sa 2 lenstitisyon i travay avek.

Bann materyo ki arsiv e bibliotek i kolekte par egzanp Larsiv Nasyonal dan son koleksyon i annan dokiman date depi lannen 1982.  Sa bann materyo konpoze tel ki; papye e lezot enkli bann lakol ki ganny servi pou kol bann paz liv, ki fer bann materyo tre siseptib a de fason deteryorasyon.

Premye fason deteryorasyon, se atraver prosesis biolozik koze par zensek e fungus. 

        En lot i deteryorasyon koze par kondisyon klimatik e anviron mantal tel ki; limidite tre oubyen bann varyasyon tanperatir lizour e aswar.  Sa  varyasyon dan tanperatir i favoriz devlopman fungus.  Tretman lenfestasyon fungus i en prosedir ki koute e kontinyel.  I pa fasil pou annan en solisyon permanan pou problenm fungus.  Me nou bezwen asire k ganny detekte a tan e kontrol i ganny fer pou minimiz sa lenfestasyon.

E se pou sa rezon nou pe aplik bann mezir baze lo en rekomandasyon rapor fungus date Out 2017.

Mr Speaker rapor i rekomande ki Larsiv Nasyonal i ganny son prop batiman avek tou fasilite neseser pou en arsiv fonksyonnen.  I enportan pou note, ki en Arsiv Nasyonal pa kapab ganny konstrir lo nenport ki morso later, an prenon kont sanzman klima.  I neseser alor pou met li lo en later protez li kont dezas oubyen katastrof natirel.

An se moman Departman Kiltir pe travay konzwentman avek Labank Santral lo en proze PPP pou konstrir en nouvo batiman pou arsiv.  Sa proze pou ganny prezante devan Konsey Minis pou laprouvasyon tre byento.

Antretan ki arsiv pe esper son batiman, son bann servis in ganny transfer tanporerman kot HELENA Building Ile Du Port ek Jupiter House Providence.  En travay entans pe ganny fer pou nou netway bann dokiman annan en versyon elektronik.

Departman Kiltir pe osi travay avek Departman DICT lo en proze pou fast track scanning bann dokiman e pou design en sistenm pou ki manm piblik, i kapab ganny akse avek sa bann dokiman.  Antretan ki arsiv pe reetablir son servis, dimoun ki bezwen lenformasyon i kapab kontakte arsiv.  Rapor ti osi rekonmande, i en plan renovasyon konplet i ganny prepare pou Bibliotek Nasyonal.

Mr Speaker en plan renovasyon sibstansyel pe al ganny fer lo batiman Bibliotek Nasyonal konmansman lannen prosenn.

Sa proze ti ganny aprouve par Konsey Minis le 29 Out 2018 e pou kout Gouvernman en total R68 mil pou renovasyon e modernizasyon.

Pou devlop sa plan renovasyon bann teknisyen Labita ek Lenfrastriktir, Later e Transpor, ti vin fer lenspeksyon konplet lo sa batiman e propoz plizyer mezir pou adres sa sityasyon.  I enportan pou note ki sa batiman i annan 24an legzistans.

Minister pe osi rod lasistans ek son bann partner etranze; en demann in fini ganny fer avek Sri Lanka e L’Inde e osi International Centre for the Study of Preservation and Restoration of Cultural Property pou lasistans bann eksper, pou gid nou lo pli bon fason pou kontrol nivo fungus. 

Minister in osi in envesstir dan formasyon spesyalize pou travayer dan sa 2 lenstitisyon.  An Novanm 2017 3 travayer Bibliotek Nasyonal ti al fer en sesyon travay Singapore, pou vwar lafason ki zot kontrol fungus dan zot lenstitisyon.

E sa lannen 2 travayer bibliotek pe al fer work attachement kot Bibliotek Nasyonal Sud Afrique pou vwar lafason ki zot zer zot bibliotek e en travayer in al fer sesyon lo Library Science La Chine.

        Rapor ti osi rekomande ki nou apwent en Health and Safety Officer dan Departman Kiltir.

Provizyon in fini ganny fer pou kree sa post dan Bidze 2019.  Rapor ti osi rekomande ki en progranm sansibilizasyon pou tou Departman Gouvernman i ganny etablir lo ki mannyer pou prezerv zot dokiman.  In deza annan en Unit dan lenspeksyon dan seksyon arsiv ki al fer vizit dan diferan Departman pou vwar e konsey zot lo ki mannyer zot bezwen gard dokiman pou anpes lenfestasyon fungus. 

Apre sa bann vizit i ava pran en rekomandasyon i ganny soumet bann sekter konsernen.  Arsiv Nasyonal pe organiz en workshop an Oktob sa lannen, lo metod prezervasyon e netwayaz dokiman pou tou Departman Gouvernman ki annan en relasyon direk ou endirek avek arsiv.

Sa workshop pe ganny finanse atraver en proze ki arsiv ti soumet avek UNESCO    boner sa lannen.

Mon ti a kontan fer resorti Mr Speaker, ki fungus e klerman bann dokiman i enportan e ki sak Departman pou bezwen zot osi zwe zot rol pou gard dokiman dan bon kondisyon.

Mon swete ki ler sa proze Bibliotek Nasyonal i ganny prezante dan Bidze 2019, nou ava ganny sipor Lasanble.

Wi Mr Speaker pou annan konpansasyon ki pou ganny donnen pou bann travayer ki’n soufer problenm lasante dan Bibliotek Nasyonal ek Arsiv Nasyonal.

Sa konpansasyon i baze lo rapor ki ti rekomande ki en case i ganny soumet avek Biro Attorney Zeneral pou ki bann travay i ganny peye en konpansasyon lo en baz pro rata depi Zanvye 2013 ziska Zen 2017.  Dapre nou levanter ziska ozordi, i annan en total 213 dimoun ki kalifye pou resevwar konpansasyon.

Mr Speaker Biro Attorney Zeneral in kalkil konpansasyon lo en baz ant R40 mil ziska R60 mil par lannen depandan lo sa bann fakter swivan ;

kalite travay, lokasyon kot bann dimoun i travay, tann servis dan sa de lokasyon ant Zanvye 2013 ziska Zen 2017, e lezot relevans partikilye ki bann travayer  ti mete dan zot form.  Tou bann staff ti ganny en form pou ranpli kot zot ti met tou zot detay.  Tou sa bann form ti ganny donnen ek Biro Attorney Zeneral le 07 Fevriye 2018.  E ti pran Attorney Zeneral apepre 6 mwan pou travay lo sa bann form e prepar bann Letter of Offer pour konpansasyon.

Sa bann let ti ganny distribye atraver biro Sekreter Prensipal pou Kiltir apartir le 20 Out e bann staff ti annan 14 zour pou zot reponn.

An se moman i annan plis ki lanmwatye bann staff ki’n aksepte zot konpansasyon.  Sa i en total 137 staff.  I annan 44 ki’n appeal e i annan apepre 32 ki pa ankor retourn zot form, akoz i annan ki fek pran form pou zot konplete Mr Speaker.  I pou kout Gouvernman anviron R30milyon pou kapab pey sa bann konpansasyon.  Me fodre note ki sa sif i kapab ogmante akoz prezan i annan ankor dimoun ki pe ranpli form.

Peyman konpansasyon pou ganny fer an 2 porsyon.  50poursan pandan mwan Oktob 2018 e 50poursan pou fer lafen Mars 2019.

Mr Speaker mon ti a kontan fer resorti ki tou travayer ki baze dan sa 2 lokasyon, enkli sa ki osi Onorab in mansyonnen – in azoute pe ganny en location allowance R3mil tou lemwan.  Anviron 136 staff pe benefisye atraver sa location allowance e i kout Gouvernman anviron R408mil tou lemwan ki vin apepre R4.8.916milyon par mwan.

Mr Speaker lefe ki rapor i rekomande tou travayer ki malad i ganny asiste avek swen medikal, Departman Kiltir ti ofer staff tretman medikal konmansman Novanm 2017.

E a se moman pe kouver zot bann fre medikal.  Ziska prezan Departman Kiltir in pey en sonm total R166.456mil e pe kontinyen ofer sa ziska ler tou staff i sorti bann batiman Libreri Nasyonal.  Mersi M Speaker.

 

MR SPEAKER

Mersi Minis.  Onorab Hoareau.

 

HON JOHN HOAREAU

Mersi Mr Speaker.  Mr. Speaker mon ti ava konnen akoz ki bann staff pe ganny peye pou 4an edmi dan plas 5an, anvi ki zot in ganny ekspoze depi 2013 Zanvye 2013 ziska Desanm 2017?

E dezyenmman mon ti a kontan konnen, ki kantite larzan antour sa pou kout Gouvernman?  Eski ou’n fer sa klarifikasyon?  Mersi.

 

MR SPEAKER

Minis in demann sa dernyen kestyon.  Me mon ava pas laparol Minis.

 

THE DESIGNATED MINISTER MRS MACSUZY MONDON

Mr Speaker sa peryod i ti ganny rekomande lo rapor ki ti ganny fer letan sa evalyasyon ti ganny fer lo sityasyon fungus, dan Departman.  E tou ansanm konpansasyon ki nou peye, i  pou kout Gouvernman apepre R30milyon.  Ok?  Mersi Mr Speaker.

 

MR SPEAKER

Mersi Minis.  Onorab Georges.

 

HON BERNARD GEORGES

Mersi Mr Speaker.  Mr Speaker Minis in dir ki ankor annan dimoun ki pe ranpli form – son parol.  Eski Minis i kapab garanti nou ki ankor okenn dimoun pe ganny turn away ler zot vin lo en form?

Akoz mwan mon ganny rapor ki en dimoun dan mon distrik ki vin rod en form i ganny dir non mon pa kapab donn ou en form.

Eski Minis i kapab garanti nou ki tou dimoun i santi ki’n ganny afekte, i kapab ganny en form ranpli pou zot konsiderasyon ?  Mersi.

 

MR SPEAKER

Mersi Onorab Georges.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker mon pense pas si nou kapab fer dimoun retournen, si sa dimoun i ti pe travay dan sa letan, dan sa peryod letan ki nou pe konsidere pou pey konpansasyon.  Dan Departman Kiltir i pa kapab refiz li i pou bezwen donn li en form pou li ranpli.  Ok?  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Bonzour Mr Speaker, bonzour Minis.  Bonzour tou bann zenn LDS ki dan Lasanble e osi tou dimoun a lekout.

Mr Speaker mon ti a kontan premyerman demann Minis ki pou arive avek bann zanfan ek bann adilt, ki’n osi servi sa bann fasilite pandan sa bann lannen kot ti annan fungus e ki serten in fer serten konplent lo nivo lasante.  Ofet zot ava rapel byen ki en pti garson ti tonm ti pass out en bann keksoz ki ti alert ki ti raise the alarm konsernan sa sityasyon.

Dezyenmman ; Minis eski i fer sans pou sa bann dimoun ki ti dan Management depi son Minis, son Sekreter Prensipal sa letan ki ti renye ki poudir i annan okenn problenm ?  Ki ti renny bann drwa bann travayer dir zot ki pou dir zot napa okenn fungus e menm al ziska pou dir avek zot ki fungus i dan zot latet.  Eski i normal ki ozordi sa bann dimoun premye lo lalis lo premye ranze e menm pe demann plis larzan e pe rod fer petisyon pou ganny mileage politik, akoz ozordi zot dan politik.  Eski i normal pou zot sa bann dimoun ganny okenn konpansasyon?  Oubyen eski zot pa devret ganny pourswiv devan Lakour pou neglizans mank aksyon, mank konpasyon, ki ozordi pe fer ki sa sityasyon fungus i kontinyen trennen.

E an plis ki sa pe kout Gouvernman plis ki R30 milyon larzan ki ti a kapab fer sa nouvo batiman ki ou a pe dir.  Parski i annan bann nouvo batiman ki’n ganny fer ki kout zis ki kout anviron dan bann 30 milyon ensidswit

Eski alors Minis pa ava konsidere avek konsey Attorney Zeneral, pou pran aksyon kont sa bann dimoun an premye?  E an menm tan donn sa bann travayer ki zot pa konnen pou ki kontinyen letan zot pou soufer, akoz sa bann maladi ozordi zot ganny en problenm isi, demen zot ganny en lot problenm laba ki zot pa konnen i pou lavi sa.  I pou lavi Minis in menm ganny problenm dan lakour akoz zot in sey krwar ki pou dir zot al dormi ek en lot zonm e zot in ganny en maladi e pandan tou sa letan Management pe dir avek zot fungus i dan zot latet.  E ozordi sa bann menm dimoun la tou lazournen zot pe telefonnen pe rode kan konpansasyon pou donnen.

Eski Minis i ava konsider pourswiv zot e fer zot responsab pou pey pou sa neglizans dan sa ki’n arive an relasyon avek sa bann travayer?  Mersi bokou.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker kot i konsern bann zanfan ek bann adilt, napa provizyon ki ganny fer dan rapor pou nou ganny konsidere, kot i konsern peyman konpansasyon.

E kot i konsern 2enm pwen Onorab.  Onorab mon konpran sa largiman kot ou pe fer. Me letan nou’n ganny advise avek Attorney Zeneral pou nou lo peyman konpansasyon in napa okenn Clause – oubyen okenn keksoz ki’n dir nou pou dir sa bann dimoun pou sa bann rezon ki ou’n nonmen.  Zot pa’n merit pe ganny peye sa bann konpansasyon parey ou’n dir en sizesyon i baze lo konsey ki Attorney Zeneral i ava donn nou, i ava regarde si i annan nesesite pou donn serten konsiderasyon.

Me an se moman parey i ete ler ou pran en desizyon e ler ou’n donn en desizyon ki mannyer ou pou peye e tou bann dimoun ki claim e si zot meet sa bann kriter lo baz ki sakenn pe ganny fer, ti pe travay sa letan e zot osi zot merit konpansasyon mon pans ka ki nou pa pou kapab pey zot, zot konpansasyon.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mr Speaker eski pa sa enn bann gro problenm dan nou pei?  E sa ki Minis fek dir la.  Minis kan eski dimoun pou pran zot responsabilite?  E ki pa kout Gouvernman 30 milyon?  Parske sa ki ou pe dir nou la Minis se ki Minis in vini lot in vini in dir ek bann travayer napa okenn fungus, travayer in fer konplent. In dir ek zot napa naryen zot i dan zot latet tousala.  E zot ki ti responsab!

Kan eski dimoun ki responsab pou konnen ki pou dir avek zot responsabilite, i annan sa kot i moral pou zot osi desarze.  E ki i annan konsekans zot pa kapab zot menm zot pe ganny gro lapey, zot menm zot pe negliz drwa bann travayer.  E la ozordi zot menm zot ki pou ganny sepa R60 mil par mwan – par lannen pou sak lannen ki zot in servi.  Konmsi pou pe pey zot ankor pou zot neglizans!

Mon krwar ki sapa akseptab dan sa pei.  E se sa mesaz ki nou devret anvoye.   An plis ki sa ki nou pe dir sa bann dimoun enkli son Minis sa letan Mr Alain St. Ange pe dir, ki ‘’fer petisyon pou li ganny plis larzan !’’ Me kan n ou pou pran … ? Kan nou pou vin serye dan sa pei ?  Mersi bokou.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Onorab mon konpran ki ou pe dir mon e mon pran sa konman en rekomandasyon ki mon pare met devan Biro Attorney Zeneral.  E ki zot kapab donn nou konsey nou lo sa rekomandasyon ki ou pe fer.  Mersi.

 

MR SPEAKER

Mersi Minis.  Onorab Valmont.

 

HON JUDE VALMONT

Bonzour e mersi Mr Speaker.  E bonzour Minis ek ou delegasyon, tou koleg Onorab e tou bann ki pe swiv nou.

Minis eski ou kapab dir nou Lasanble, si ou satisfe ki tou prekosyon neseser pe ganny pran, pou protez bann ki ankor ekspoze avek fungus?  E osi bann ki enplike dan sa loperasyon netwayaz ki ou’n dir?

E eski Minis i kapab donn en pe plis detay, lo bann mezir aktiv ki pe ganny pran?  E dernyen se ki mezir ki pe osi ganny pran pou anpese ki manm piblik  an zeneral i ganny ekspoze avek fungus?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Onorab wi tou bann mezir i annan bann mezir ki nou pe pran zisteman letan nou pe al fer evalyasyon avek modernizasyon library i bann mezir prevansyon ki nou pou pran pou fer sir ki sa problenm ki nou’n rankontre ki pa repete a lavenir.

E byensir pou bann travayer ki ankor la me selman parey ou konnen i annan diferan mezir ki’n ganny pran; i annan travayer ki’n ganny anvoye pou al travay dan lakour par egzanp.  I annan travayer ki’n ganny petet sanz en pe landrwa ki travay.  I annan en bann dimoun ki ankor enplike i annan bann mezir Departman Kiltir pe pran, pou fer sir ki zot pa ganny afekte plis avek sa lenfestasyon.

E parey ou konnen library i fermen an se moman e Departman Kiltir byento pe move dan en lot batiman letan preparasyon pou nou kapab fer renovasyon lo bibliotek.

E dan bann lezot bibliotek osi i annan bann, serten mezir ki nou pe pran avek bann travayer, pou fer sir ki zot osi zot pa ganny afekte parey sa bann travayer la ki nou bezwen pe pey konpansasyon ki pe ganny afekte ok?  Mersi Mr Speaker.

 

MR SPEAKER

Mersi Minis.  Onorab Valmont.

 

HON JUDE VALMONT

Yes mersi Mr Speaker.  En pti follow-up.   Minis i annan sa kestyon lo kote sa bann ki pe enplike, direkteman dan sa loperasyon netwayaz la.

Mon ti a kontan en pe plis detay ki bann mezir konkret ki zot pe pran pou protez sa bann dimoun?  E osi i annan sa 3enm mon 3enm kestyon lo kote mezir pou protez manm piblik si zot ti kapab elabor en pti git lo la silvouple.  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mr Speaker sa bann dimoun ki pe fer sa bann triyaz sa bann dokiman, zot annan zot bann protective gears ki zot servi e sa i pa bann staff ki pe fer i en travay ki’n outsource.

Donk sa bann dimoun i fer zot own zot protez zot lekor letan zot pe fe sa bann travay ki nou donn zot pou fer, ok?  Mersi Mr Speaker.

 

MR SPEAKER

Mersi Minis.  Onorab Clive Roucou.

 

HON CLIVE ROUCOU

Mersi Mr Speaker.  Bonzour Mr Speaker.  Bonzour Minis avek ou delegasyon.  Mr Speaker mon anvi demann Minis an relasyon ek solisyon permanan pou tretman fungus.  Mon pe demann l isi bann eksper in kapab detekte sa bann fungus spesifik ki pe afekte sa bann biro sa bann departman pou anpese ki nou pe tret zot zeneral ki nou pou vwar recurrent dan sa bann problenm fungus?

        E mon 2enm kestyon se ki norm ki Minister in servi pou swazir pou donn konpansasyon bann dimoun afekte an relasyon avek zot nivo lenfeksyon e lafason ki zot in ganny afekte?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker kot i konsern bann fungus spesifik mon napa sa detay lo la me selman mon konnen parey mon’n dir bann led ki nou pe rode, i annan serten travay ki’n ganny fer.  Me bann led ki nou pe rode osi avek nou partner nou pou fer sir sa fungus ki li in ganny detekte e ki la i pa egziste ankor dan nou library.

Kot i konsern bann norm ki’n ganny servi Onorab, parey mon’n dir bann fakter ki nou’n konsidere pou pey konpansasyon lo la, mon ava zis repete vitman e kalite travay lokasyon, tann servis e an menm tan ti annan serten bann relevans partikilye oubyen spesifik, ki bann travayer zot in kapab mete lo zot form e ki sa i ganny konsidere zisteman, kot i konsern pou kapab deside peyman konpansasyon pou zot ok?  Mersi Mr Speaker.

 

MR SPEAKER

Mersi Minis.  Onorab Roucou.

 

HON CLIVE ROUCOU

Mersi Mr Speaker larepons ki Minis in donnen i en pe dezapwentan.  Ankor nou vwar ki mannyer Gouvernman pe travay.  Zot pe fer tretman kantite larzan pe ganny depanse.  Me yet again 30 milyon apepre.  Me selman nou pa konnen ki nou pe trete.  Alors ankor nou vwar nou pe depans 30 milyon si nou pa konnen spesifikman ki nou pe trete.  Mersi Mr Speaker.

 

MR SPEAKER

Mersi.  Mon krwar sa i en komanter. Onorab De Letourdie.

 

HON JANY DE LETOURDIE

Mersi Mr Speaker.  Bonzour tou dimoun.  Minis mon pou tourn ankor en pti pe lo sa kestyon Onorab Roucou.  Si mon pe konpran par egzanp en drayver ki’n la pou 20an.  In ganny afekte li osi gravite son lenfeksyon i osi parey en dimoun ki travay pli o ki li ki 20an.

Eski i pou ganny menm larzan avek sa dimoun ki ganny plis larzan ki li?  Me selman zot nivo lenfeksyon i parey? Mon pe panse kekfwa tou dimoun di devret pe ganny menm kalite konpansasyon akoz lenfeksyon se lenfeksyon si ou averti mon lo la Minis.

Apre mon lot pwen; ou’n dir ki Arsiv Nasyonal i annan diskisyon ki byento zot pou ganny zot – anfen zot pou ganny zot batiman.  Eski en sit idantifye kote sa batiman pou ganny konstrir e petet konbyen i pou koute?

Apre Minis 3enm pti pwen, eski ou kapab dir nou si bann travayer La Bastille zot in ganny konsidere zot osi pou ganny konpansasyon? Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker kot i konsern peyman konpansasyon kot i bann dimoun arsiv, arsiv li i pou ganny located Ex-Maison Blanche Bel Eau.  Ok? Libreri Nasyonal i pou ganny refer lanmenm la kot i ete, ok?  Kot i konsern La Bastille pa ti form par evalyasyon travay ki ti pe ganny fer ok?  E rapor pa’n konsidere bann dimoun ki ti pe travay dan La Bastille sa letan – ok?  E nou, nou’n konsider konpansasyon baze lo rapor evalyasyon ki ti ganny fer kot bann dimoun pe travay.  Vwala ki nou nou’n konsidere.

E letan ou pe dir ki en lenfeksyon i en lenfeksyon whatever.  Ler mwan mon ti meet avek Komite reprezant bann travayer, ok letan nou ti meet zot se sa ki nou ti propoze lo komansman ki tou dimoun  li ganny parey e zot pa ti dakor.  Zot ti dir pa tou dimoun ki ganny enfekte parey ok?  E se pou sa rezon ki apre nou ti met en range between 40 ant 40 avek R60mil pou sak lannen ki zot in travay.  Ok? Mersi Mr Speaker.

 

MR SPEAKER

Mersi Minis.  Onorab Norbert Loizeau.

 

HON NORBERT LOIZEAU

Mersi Mr Speaker.  Bonzour Minis.  Bonzour tou dimoun dan nou House.  Mr Speaker mon anvi demann Minis.  Minis vi ki kot dan Lenstiti Kreol ek li bann travayer ti pe malad sa ki ti pe ganny lagorz – malad.

 

MR SPEAKER

Onorab, Onorab, Onorab.

 

HON NORBERT LOIZEAU

(Off-Mic)

 

MR SPEAKER

Non kestyon i spesifik lo sa bann lokasyon.  Libreri Nasyonal, Arsiv, Mize Listwar.

 

HON NORBERT LOIZEAU

Mr Speaker be i annan bann dimoun ki travay Lenstiti Kreol ti travay anba avan.  Mon kestyon i lo fungus i pa vedir si mon kestyon i lo fungus mon bezwen konmans ek fungus.  Mon bezwen konmans ek en keksoz apre mon a vin lo fungus. 

 

MR SPEAKER

Go ahead.  Ale go ahead Onorab.

 

HON NORBERT LOIZEAU

Mon kapab kontinyen?

 

MR SPEAKER

Kontinyen

 

HON NORBERT LOIZEAU

Mersi Mr Speaker.  Vi ki sa bann dimoun pe malad e zot in menm ganny bouze Lenstiti Kreol in ganny mete dan en lot batiman Providence.  Lasante in al vwar sanniter e bann ekspert in al gete.  Ki mon anvi demann Minis ki sa bann dimoun in dir mon demande ki dekouver ki zot in vwar konsernan akoz zot ti pe  malad?  Si i fungus si zot o si zot pou benefisye avek sa bann konpansasyon ki pe donnen.  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker prey mon’n dir avan konpansasyon pe ganny donnen baze lo rapor evalyasyon ki ti ganny fer e Lenstiti Kreol pa ti form par sa evalyasyon.  Me selman parey zot dir Onorab wi nou’n bouz bann staff Lenstiti Kreol.  Pa zis rezon zot pe malad.  I annan staff ki’n met a mon latansyon pou dir zot osi zot annan serten problenm lasante ki nou pou bezwen investigate.  Me lot rezon osi se ki nou annan lentansyon pou nou renovate sa batiman.  E nou santi pou lemoman  i pa dan en bon leta ki pou nou

Gard bann staff ladan.

Donk i annan sa bann nesesite pou nou kapab fer en, evalyasyon wi lo Lenstiti Kreol li menm.  E si i annan staff ki’n ganny afekte baze lo evalyasyon ki ava fer, sa konpansasyon i a ganny konsidere.   Mersi Mr Speaker.

 

MR SPEAKER

Mersi Minis.  Onorab Esparon.

 

HON REGINA ESPARON

Mersi Mr Speaker.  Bonzour Minis ek ou delegasyon.  Bonzour bann Manm LDS ki dan Gallery. 

        Mon ti a kontan demann Minis Mr Speaker konbyen i kout Gouvernman pou sa annan travayer etranze ki ti vin met ozone e bann lezot tretman pou fungus?  Mersi Mr Speaker.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker ti kout Gouvernman 2.6 milyon anviron pou sa bann travay ki ti ganny ki Envirotech ti fer  an relasyon avek ozone e bann  humidifier equipment dan library.  Mersi Mr Speaker.

 

MR SPEAKER

Mersi Minis.  Onorab William.

 

HON WAVEN WILLIAM

Mersi Mr Speaker.  Bonzour tou dimoun ki a lekout.  Minis lefe ki ou’n dir i annan 44 bann travayer ki’n fer appeal, mon anvi demann avek ou si sa bann anmenn closure, eski negosyasyon vizavi sa bann appeal pou’n terminen by October, ki sa bann dimoun i kapab eklersi zot case?  

        Dezyenmman Minis lefe ki nou annan sa sityasyon ki’n devlope, e nou konnen pou dir i annan bann lezot batiman kot bokou bann dokiman ki vye e ki kapab kree menm problenm.  Eski Gouvernman pe mazin fer en lot lodit, pou fer sir sa bann sityasyon pa repet ankor dan bann lezot landrwa?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker tou bann Case Appeal i ganny anvoye kot Biro Attorney Zeneral.

E byensir letan ou’n fer ‘appeal’ ou bezwen konpran pou dir ou case pou pran en pti pe plis letan ki lezot.  Mon pa pe kapab dir la whether to sa bann case pou pare.  Sa bann ‘appeal’ pou’n fini deal avek letan nou konmans pey konpansasyon an Oktob akoz sa i pou depan osi plo lakantite travay oubyen letan ki Attorney Zeneral pou pran pou li deal avek sa bann ‘appeal’. 

        Onorab i annan serten travay ki nou pe fer avek bann lezot departman ki travay avek osi sa bann dokiman.  I annan en Seksyon i unit en pti lenspeksyon ki pe al dan sa bann landrwa ok pou al regard sityasyon e an menm tan osi pou advise sa bann Departman lo ki mannyer pou zot kapab mentenir zot bann dokiman pou anpes li ganny fungus. 

E mon’n nonmen osi ki pou dir nou pe fer workshop byento pou tou ,sa bann dimoun dan bann lezot Departman ki fer en pe travay en pti pe familiar avek bann dokiman ki serten bann dimoun ti pe fer dan library pou nou kapab brief zot osi e ed zot pou zot kapab gard zot bann dokiman dan bon leta e tret li parey i fodre.  Mersi Mr Speaker.

 

MR SPEAKER

Mersi Minis.  Onorab William.

 

HON WAVEN WILLIAM

Minis zis pou nou konpran konman Manm Lasanble lefe ki nou pe koz tax payers money.  Mon anvi konnen Minis si zot kapab dir nou ki bann pwen kontorsyon prensipal ki dan bann papye i baze lo la?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mr Speaker mon kapab demann Onorab pou re demann son kestyon silvouple?

 

MR SPEAKER

Mersi Minis.  Onorab.

 

HON WAVEN WILLIAM

Wi Minis avek plezir.  Mon anvi konnen Minis konman bann Manm Lasanble lefe ki nou pe koz tax payers money e i annan 44 bann travayer ki’n fer appeal, nou anvi ou dir nou ki bann pwen prensipal kontorsyon ki’n ganny fer sorti lo sa bann appeal.  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker i annan ki’n koz zot tann servis ok ki zot in fer resorti e i annan osi ki pa agree avek sa sonm ki nou pe donnen.  Ok sa i bann pwen mazer ki pe sorti dan sa bann appeal.  Mersi Mr Speaker.

 

MR SPEAKER

Mersi Minis.  Onorab Paul Ernesta.

 

HON PAUL ERNESTA

Mersi Mr Speaker.  Minis ek ou delegasyon ek bann Onorab, tou dimoun dan lakour bonzour.

Minis eski ou kapab asir sa Lasanble, ki tou travayer ki ankor pe travay menm bann ki’n aret travay ki zot pou ganny zot konpansasyon dapre zot merit?

Apre dezyenmman ou’n koz en pe pli boner lo sa 40 a R60 mil lo baz konpansasyon bann dimoun pou gannyen.  Eski ou kapab donn en pti pe plis detay lekel sa bann kategori group dimoun?  Mon konnen ou’n mansyonn 2 prensipalman pou ganny sa bann konpansasyon?

E osi eski i annan dimoun ki annan plis ki 20an dan en Seksyon, ek en lot ki annan 3an pou ganny menm kantite larzan or enn pou ganny plis ki kanmarad?  Si Minis i kapab eksplik nou lo la?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker parey nou’n definir bann kriter ki’n ganny servi e sa peryod letan ki’n ganny definir dan rapor, pou nou kapab pey konpansasyon e sa si ou tonm dan sa peryod ou klarifye definitivman ou pou ganny konsidere.

E i en pe difisil pou nou dir ki mannyer nou pou deside ant sa parey sa 40 oubyen sa 60 mil.  Akoz parey mon’n, dir sa i baze lo natir travay ki ou ti pe fer.  Akoz bann dimoun ki’n ganny ekspoze plis par egzanp.   E bann dimoun ki’n ganny plis afekte ok?  Sa i bann largiman ki bann travayer ti servi, letan nou ti pe rankontre zot, zot ti dir klerman nou pa kapab donn tou dimoun parey akoz i annan dimoun ki ganny plis afekte ki lezot.

E nou nou’n met sa an konsiderasyon.  E se sa bann lezot keksoz zot partikilye ki nou dir ki sorti dan zot form e nou ganny konsidere, an menm tan osi an relasyon avek natir zot travay.  Ok?  Akoz ou i annan dimoun ki’n travay avek s bann dokiman a plen-tan par egzanp.  Tandis i annan dimoun ki kekfwa zis antre/ sorti dan sa bann landrwa.   Ou vwar? Donk i en pe sa bann konsiderasyon koumsa ki nou donnen ler nou pe donn peyman.  Mersi Mr Speaker.

 

MR SPEAKER

Mersi Minis.  Onorab Noline Sophola.

 

HON NOLINE SOPHOLA

Mersi Mr Speaker.  Bonzour Minis avek ou delegasyon.   Tou envite dan Galeri tou bann Onorab e tou bann dimoun ki a lekout, bonzour.

Mr Speaker avek ou permisyon, Minis son prezantasyon in santre lo batiman isi Mahé.  Me etandonnen ki i annan bann kargezon liv ki sorti  isi i al dan bibliotek La Digue e Praslin.  Eski mon kapab viz mon kestyon pou Minis?

 

MR SPEAKER

Bon mon’n …

 

HON NOLINE SOPHOLA

… me i tous lo fungus Mr Speaker.

 

MR SPEAKER

Bon mon annan – en moman Onorab – mon’n permet Onorab Loizeau anmenn Lenstiti Kreol ladan; mon konnen i tonm anba Departman Kiltir, mon pa konnen si li osi in ganny afekte.  Ale go ahead. 

 

HON NOLINE SOPHOLA

Mersi Mr Speaker.  Minis travayer dan bibliotek La Digue in anmenn dan mon latansyon ki zot osi zot in ganny afekte avek fungus.  Eski i annan travay ki pe ganny fer pou rekonpans zot?  Eski ou Minister in fer en evalyasyon pou konn lenpak lenfestasyon fungus dan bibliotek La Digue?  Mersi.

 

MR SPEAKER

Mersi Onorab.

 

HON NOLINE SOPHOLA

E Praslin.

 

MR SPEAKER

Minis.

 

THE DESIGNATED MINISTER MRS MACSUZY MONDON

Mr Speaker non zot pa pe tonm dan konpansasyon akoz zot pa form par dan sa rapor ki ti ganny fer.  Mon’n krwar mon’n dir 2 fwa oparavan konpansasyon pe baze lo rapor ki ti ganny fer dan bann landrwa ki’n ganny endike e se sa bann dimoun ki pe ganny peye konpansasyon.

Si i annan en ensiste pou fer en evalyasyon lo bibliotek Praslin avek La Digue a lavenir pou nou vwar si i annan en serten staff ki’n ganny afekte Mr Speaker Departman Kiltir i ava fer li.  Mersi.

 

MR SPEAKER

Mersi Minis.  Onorab Ahmed Afif.

 

HON AHMED AFIF

Mersi Mr Speaker.  Bonzour Minis.  Bonzour tou dimoun a lekout.  Mr Speaker mon ti a kontan demann Minis vi ki nou pe koz bokou larzan ki pe ganny verse dan konpansasyon.  E menm ki’n al dan renovasyon batiman.  Eski Minis i krwar son Minister in azir dan en fason ki finansyerman enpridan pou depans R69 milyon dan renovasyon, kan sa batiman li menm ti kout 50 milyon nef? E pa tro lontan 5an pase SEYPEC i fer en batiman an vit 4 letaz in kout 53 milyon enkli son lift son car park enkli son tou keksoz.

Me nou zis renovasyon en building R68 milyon.  Eski Minis i krwar finansyerman noun azir dan en fason pridan.  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mr Speaker sa sonm i baze lo evalyasyon lenspeksyon; konplet evalyasyon ki bann teknisyen MIHLT in fer lo sa batiman.  E petet mon ti a ava pas en pti pe lo serten sa bann travay ki pe ganny fer; par egzanp remet e santraliz sa air condition system ; fer sir ki i annan vantilasyon e  sirkilasyon ler dan library, revwar son sistenm lalimyer.

Ranplas bann partisyon ki’n ganny konstrir fer separasyon ki’n ganny fer e pou en bon pe lannen. Annan  en plan netwayaz lo sa batiman antye pou fer sir ki e aplik bann tretman fungus. 

An menm tan osi ki lapentir ki ganny servi a lavenir i lapentir ki anti-fungal. Nou bezwen osi ranplas sa lit ki dan library e parey nou konnen library i annan en skylight anler e sa nou’n ganny rekomande, ki en lot materyo in ganny servi pou anpese ki i annan sa green house ki osi dan milye sa batiman, e ki fer so e ki osi ede pou fer annan sa sityasyon fungus.

Nou bezwen  Onorab ranplas tou bann wiring e an menm tan osi ranplas tou bann fasilite ek bann lekipman ki’n ganny abimen.  Donk zis pou nou detrwa akoz ki nou bezwen pe depans sa kantite larzan pou nou kapab fer sir ki nou pran tou bann prekosyon neseser.  E an menm tan osi nou bezwen ranplas tou bann liv en bon pe bann liv tou bann lekipman, pou nou fer sir bann liv ki nou anmennen ek bann lekipman i pa pou donn nou sa bann problenm ki nou pe fer fas avek ozordi.  Mersi Mr Speaker.

 

MR SPEAKER

Mersi Minis.  Onorab Afif.

 

HON AHMED AFIF

Mersi Mr Speaker.  Minis mon’n ekout ou byen tou sa bann kou ki ou’n mansyonnen napa nanryen ladan ki annan par egzanp beton ki i annan bann gro striktir tousala ti aircon, wiring, enn de partisyon eksetera.  Mon trouv li difisil pou konpran ki mannyer  sa avek sistenm aircon avek lapentir i kapab desot kou konstriksyon en batiman 2700 met kare, ki’n fer an vit enkli son lift, enkli son car park, enkli tou son tiling zis son meb ki ti manke ti ariv 56milyon.  Sa napa okenn beton, napa okenn bor striktir apard reparasyon lapentir in ariv 68.

Alor mon dernyen kestyon eski zot ti fer en tender?  Eski sa evalyasyon ti ganny fer par bann dimoun ki konpetan e ou satisfe pou dir nou’n depans larzan Gouvernman byen?  Mersi

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker sa sonm i baze lo evalyasyon ki parey mon dir MIHLT in fer.  Par egzanp zis son sistenm aircon ki nou pou met an plas i pou kout nou plis ki R10 milyon.  Zis sa sistenm aircon ki nou pe mete.

Me selman Mr Speaker nou annan en breakdown tou bann travay.  Tou bann travay ki sipoze ganny fer lo renovasyon e re modernizasyon library.  E si i annan nesesite pou nou si Lasanble i anvi ki nou partaz sa avek zot, nou kapab partaze.  Me sa i scope of work baze – i estimate baze lo travay lo plan travay ki nou annan pou nou fer lo library.  Mersi Mr Speaker.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Wi mersi Mr Speaker.  Mr Speaker mon ti a kontan demann en kestyon lo lapar bann dimoun ki ankor pe soufer avek sa maladi ek fungus ki mon’n vwar enn de ka ki vreman fer lapenn e i ras ker.  E mon ti a kontan demann Minis ler nou fer sa bann konpansasyon si i annan bann prosedir oubyen bann provizyon pou swiv sa bann dimoun dan letan, pou swiv zot akoz si i annan – mon pa konnen, mon pa en dokter – si i annan bann ka ki pou aziste en dimoun i mor.  Eski i annan en refleksyon ki’n ganny fer pou swiv sa bann dimoun?

E 2enm kestyon ki lye ek sa enn premye, se ka bann dimoun ki’n desede – mon mazin Mrs Lorna Lepathy ki’n desede ki nou konn li tre byen.  Mon pe mazin mon zanmi  Fabienne Sinon ki ti deside an 2013, ki zot fanmir in zis vwar zot pe kit sa later.  Eski en kontak in ganny pran avek sa bann dimoun pou se soulaz en pti pe zot sa fason ki zot in perdi zot lavi atraver sa problenm?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker parey mon’n dir taler nou pe kontinyen pe fer zot tretman.  Nou osi an kontak mon pa konnen si serten sa bann dimoun i annan ki zot case osi n refer kot Attorney Zeneral  pou nou kapab fer ki nou ki bann dimoun ki’n ganny afekte ki zot tou ki’n ganny afekte at least zot benefisye ou en fason ou en  lot.  E mon krwar sa ki nou pe fer ki konsern tretman medikal pou staff Onorab, sa i pou kontinyen nou pou kontinyen swiv bann staff.  E si i annan lezot keksoz ki Departman Kiltir i bezwen fer, sa i ava ganny rekonsidere par lavenir – ok?  Mersi Mr Speaker.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker.  Bonzour Minis ek ou delegasyon e tou dimoun ki a lekout pou bann Manm osi.

Mr Speaker Minis taler i pa’n reponn en kestyon Onorab Afif lo kestyon tender si sa travay ti ganny tender.  Mon pa’n tann in pronons li lo la si i ti kapab dir nou.

Eski Minis i kapab osi eklersi nou Lasanble, si i annan serten bann ka dimoun afekte ki pe fer zot claim direk san pas avek striktir etabli ?

E dezyenmman lefe ki i annan plizyer travayer Minister Kiltir, Libreri Nasyonal, Arsiv bann staff baze kot record centre, ladministrasyon baze tousala La Bastille bann ki ti baze Praslin ek La Digue epi leres ki zot pe dir la.  Konmsi ki an tenir kont ki zis en peryod letan ki zot on donn sa lenvestigasyon i ganny fer i annan dimoun ki an deor sa bout ki pa pe ganny konsidere.

Eski alor Gouvernman pa ti ava vwar li byen re ouver lenvestigasyon pou get merit sa bann lezot case ki pe ganny met devan ki dimoun pe demande.  Eski pa ti a bon re ouver lenvestigasyon lo la, pou kapab konsider e get merit sa bann lezot dimoun.  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker tender pa ankor fer pou library.  Tender i sipoze ganny fer an Novanm ok?  Donk mon konsey nou a ganny bann sif pli egzakt apre ki tender i fer.  Non Onorab nou pa pe aksepte okenn claim an deor lo sa travay ki nou pe fer.  Me selman mon krwar lo sa premye lenvestigasyon.  Donk nou bezwen annan en sort of en paremet ki nou pe travay within.  E si i annan nesesite pou nou fer lezot lenvestigasyon dan sa bann lezot landrwa ki ou’n nonmen Onorab, wi nou pou demann Gouvernman pou kapab fer sa lenvestigasyon, pou nou fer sir si i annan okenn merit okenn dimoun ki ti merit ganny kouver konpansasyon zot ganny kouver a lavenir.  Mersi.

 

MR SPEAKER

Mersi Minis.  Bon avek sa nou ava remersye PS, Special Advisor pour Kiltir e osi Mr Davis Esparon e mon pa’n ganny lenformasyon lot msye sorti Biro Attorney Zeneral.  Me mon ti a kontan eskiz zot parmi nou.

 

(PS KALEBI AND HER DELEGATION WAS EXCUSED FROM THE HOUSE)

 

MR SPEAKER

E mon ti ava demann lezot manm delegasyon Minis pou vin devan.

Kontinyasyon bann kestyon mon ti a kontan welcome Mrs Marie Celine Vidot, Sekreter Prensipal pou Gouvernman Lokal e Mr Jean Larue CEO pou National Sport Council tou lede welcome dan Lasanble Nasyonal.

Nou ava pran premye kestyon.  E Minis Onorab Aglae i absante, se Onorab William ki pe pran son kestyon.  Onorab William.

 

HON WAVEN WILLIAM

Mersi Mr Speaker.  Lo non Onorab Aglae mon ti a kontan demann Minis si i kapab eksplik sa Lasanble ki plan son Minister atraver NSC pou fer maintenance lo bann lalimyer kot bann venue, e fasilite sportif dan bann distrik?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker plan Minister se pou asire ki tou fasilite sportif dan distrik i ganny mentenir lo en bon nivo.  Konsey Nasyonal pour Spor li i responsab tou bann fasilite sportif Nasyonal e osi rezyonal lo Mahé, Praslin avek La Digue.

Departman Gouvernman Lokal i responsab pou tou fasilite sportif dan distrik.  E sa i osi enkli maintenance lo bann lalimyer.

E se Lazans maintenance baze kot NSC ki responsab pou fer maintenance lo bann venue ek fasilite ki tonm anba Konsey Nasyonal pou Spor.  Sa Lazans i osi fer maintenance lo bann fasilite sportif dan distrik, ler i ganny en demann sorti kot distrik atraver Departman Gouvernman  Lokal.

Mr Speaker Departman Gouvernman Lokal i travay lo en plan aksyon relye avek maintenance bann fasilite sportif lo nivo distrik tou-le- z-an.

E sa i ganny fer an konsiltasyon avek lofis Ladministrasyon Distrik.  Nou osi donn latansyon bann ka dirzans depandan lo bann demann ki distrik li fer o-kour lannen.  Mersi Mr Speaker

 

MR SPEAKER

Mersi Minis.  Onorab William.

 

HON WAVEN WILLIAM

Mr Speaker mon ti a kontan demann Minis anvi defayans ek sa bann lalimyer soler.  Eski Minister pe mazin fer bann ranplasman lalimyer pli efikas sirtou kot bann laplenn foutbol dan distrik?

Eski Departman Gouvernman Lokal i reprezant NSC, zot annan en frekans vizit avek Lotorite Distrik pandan lannen pou evalye leta sa bann fasilite sportif?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mr Speaker wi Minister i annan lentansyon, me si pou li ranplas bann lalimyer ki’n ganny afekte nou krwar parey nou konnen nou annan de kalite lalimyer ki nou pe servi lo bann fasilite lo bann distrik an se moman.  I annan bann lalimyer ki apre bann lalimyer soler ki nou’n realize poudir nou pa pe kapab servi li ankor.  Anmezir ki ganny afekte nou pou bezwen ranplase.  Me an menm tan osi, dan bann lezot landrwa kot nou responsab pou met lalimyer nou deza asir e Onorab ki nou ranplas sa bann lalimyer.

Minister i fer baze lo bann Departman Gouvernman Lokal baze lo bann demann sorti kot bann DA, sa i met dan son plan pou lannen pou li kapab ranplas bann lalimyer.

Me parey mon’n dir taler i annan de ka kot ler i annan bann ka irzan ki i vini e nou sey fer nou mye, pou nou kapab ranplas sa bann lalimyer o pli vit posib.

Sa Lazans kot NSC ki fer travay lo bann lalimyer, nou anvoy bann demann pou sa bann travay kot li e pou li kapab fer sa repar sa bann lalimyer pou nou o nivo distrik.  E parfwa i arive ki nou ganny en pti retar Onorab akoz i menm dimoun ki pe fer bann travay lo bann lalimyer oubyen lo bann lezot fasilite ki NSC i annan, o nivo rezyonal e osi o nivo Nasyonal.  Mersi Mr Speaker.

 

MR SPEAKER

Mersi Minis.  Onorab William.

 

HON WAVEN WILLIAM

Mr Speaker ou a permet mon demann mon kestyon lo Grand Anse Mahé.  Minis baze lo larepons ki ou’n donnen lefe ki sa fasilite rezyonal Grand Anse Mahé lalimyer pa pe alimen pou en bon pe letan.  Si sa larepons ki ou pe donn mwan ou pe dir mon pou dir i annan rapor ouswa vizit ki’n ganny fer lalimyer pa pe fonksyonnen.  I annan zis enn ki fonksyonn.

Epi dezyenmman lo sa NSC Hall la ki en bon pe letan nou’n ganny dir reparasyon pou ganny fer e pa ankor ganny fer.  Mon ti a kontan  ki Minis i donn nou en pti lesplikasyon akoz retar dan sa travay e akoz retar lo ranplas sa bann lalimyer lo laplenn Grand Anse Mahé?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker parfwa petet i annan lalimyer ki mon pa konnen napa dan stok ki nou bezwen fer vini.  Me selman mon a demann CEO NSC Onorab si ou dir i annan en bon pe letan ki lalimyer lo sa bann fasilite Grand Anse Mahé, ki tonm anba NSC, pa ankor ganny repare mon ava demann CEO NSC pou li ava al fer en travay lo la e fer sir ki sa bann lalimyer i ganny repare o pli vit posib.  Mersi Mr Speaker.

 

MR SPEAKER

Mersi Minis.  Onorab Valmont.

 

HON JUDE VALMONT

Mersi Mr Speaker.  Minis mwan mon ti a voudre si sa Lazans, son larzan son Bidze eski i tonm anba Bidze NSC oubyen Local Government ki aranz sa bann lalimyer?

E en pti sizesyon mwan aktyelman response pou aranz lalimyer lo kote distrik Pointe Larue i ase vit.  Mon satisfe.

Me en pti keksoz lo kote maintenance zot bann poto ki zot in mete.  I annan – sa bann    switch anba en kantite dimoun sirtou manrmay zot zwe ladan i danzere.  E petet mon ti a fer en sizesyon ki zot rod en fason pou secure sa landrwa, akoz mon krwar en bon pe landrwa i koumsa zis pou safety nou bann dimoun lo laplenn.  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mr Speaker, mersi.  Wi sa Lazans i tonm anba NSC i annan en Lagreman ek NSC e i ganny peye en sonm 3.6 milyon par an, pou li fer bann travay NSC. 

Kot i konsernan Gouvernman Lokal ler nou, nou fer en request pou demann li, pou travay lo nou bann lalimyer dan nou bann distrik ki nou, nou responsab nou, nou pey sa Lazans pou sa travay ki i fer.  Mersi Mr Speaker.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker

Premyerman mon ti a kontan remersye NSC pou sa servis ki zot annan Mont Fleuri lo nou sant sportif rezyonal ki Grand Anse Mahé i ankor pe espere depi 40an zot.  Zot pa ankor gannyen.  Nou, nou annan en sant e i pe mars ase byen.

Mon kestyon mwan se vi ki Minis in eksplike ki i annan diferan Lazans e diferan Departman, e Minister ki okip diferan laplenn, diferan venue. I tre konfize.  I tre konfizan Minis.  Mwan mon ti a kontan konnen si Minis pa krwar ki nou devret annan en sistenm kot en lorganizasyon i responsab, pou asire ki sa bann keksoz i marse e ki i responsab ki pou li fer bann lapel avek bann diferan seksyon pou aranze.  Mon pran sa legzanp en Basket Ball Court.  I konsern NSC tou li i konsern Gouvernman Lokal i konsern Minister Ledikasyon.

Me selman ler ou pe apresye pou ou ganny en reparasyon tro souvan ou ganny dir be sa pa nou sa i lot sa i lot.  Eski i pa devret annan en lorganizasyon ki ensure ki Gouvernman Lokal i fer son bout,  NSC i fer son bout?  Konmsi enn ki responsab ki pa pas the buck a sak fwa.  La i la mon kestyon Mr Speaker.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker i vre ki Departman Gouvernman Lokal parey mon’n dir i responsab pou mentenir bann fasilite dan distrik.  E NSC i responsab pou nivo rezyonal ek nivo Nasyonal.  Donk i posib ki sa parler wi i annan en konfizyon akoz en fasilite ki o nivo ki ganny konsidere konman en fasilite o nivo rezyonal, i osi tonm dan en distrik i dan enn sa bann distrik.  Me selman se NSC ki mentenir li akoz i ganny konsidere konman nivo rezyonal.

Mon okouran pou dir nou’n deza fer serten diskisyon, pou nou kapab parey Onorab ou pe rekomande pou nou kapab annan en sel landrwa kot tou ,sa bann keksoz i ganny kordinen e i ganny fer e mon konnen a en moman donnen serten propozisyon ki ti ganny fer par Gouvernman Lokal sa letan pa ti ganny aksepte.  E nou kapab re entame diskisyon ankor e revwar pou petet fasilit lavi bann dimoun dan bann distrik revwar si nou kapab annan en sel lorganizasyon en sel landrwa kot tou sa bann keksoz i ganny kordinen kot tou sa bann reparasyon i ganny fer, pou ki a lavenir letan nou ganny demande kote reparasyon akoz reparasyon pa’n, ganny fer nou konnen nou pe kontakte koz avek en sel lorganizasyon.  Mersi Mr Speaker.

 

MR SPEAKER

Mersi Minis.  Onorab Henrie.

 

HON GERVAIS HENRIE

Mersi Mr Speaker.  Bonzour tou dimoun.  Mon kestyon i en pe dan laliny Onorab Ferrari.  Parski mon vwar li en pe tris ki Lasanble Nasyonal pe diskit bann keksoz maintenance lalimyer ouswa multi purpose court akoz si ti annan en lord konman en MNA nou ki pe fer oversight work dan kominote, nou pa ti pou bezwen ,anmennen sa bann kestyon .

E Speaker permet mon pou lefe ki Minis e menm ki ansarz Gouvernman Lokal Spor tonm anba li la Regional Council in vin kot li menm.  In ler pou met en lord dan sa bann zafer kot letan nou konnen i annan en issue, vitman en MNA i kapab koz ek DA i kapab koz ek Chairman Council Regional Council sa bann keksoz i ganny sort out vitman.

E kestyon Minis i koz lo en Lazans ki ganny 3.6 milyon.  Mon pa konn pou bann koleg, me selman letan Bidze Nasyonal in vini mon pa rapel sa Lazans i ganny mansyonnen avek nou osi kler parey la bomaten.  So Minis si ou ti kapab donn ou ti la donn ou en pe detay se ki lekel sa Lazans?  Lekel bann dimoun ki ladan i en zafer ki tender dan 3.6 milyon?  En pe leklersisman silvouple.  Mersi.

 

MR SPEAKER

Mersi Onorab.  Minis.  Yes Minis.

 

THE DESIGNATED MINISTER MRS MACSUZY MONDON

Mr Speaker sa Kontra i en Kontra pou Management bann fasilite sportif parey mon dir ki i tonm anba NSC.  E i en Kontra mon’n ganny dir sa i 2enm Kontra ki sa msye i sinyen ant NSC avek Mr Collin Quatre.

E mon krwar sa ti bann letan ki letan Gouvernman ti pe pran bann desizyon pou outsource bann service outsource bann service ki Gouvernman i ofer ki sa servis i ganny donnen sa Kontra ki ti ganny sinyen avek sa msye, pou li kapab donn sa servis NSC – ok?   E sa Kontra i en Kontra ki i en dirasyon 2an. E ki ganny re sinyen tou le 2an. Ok?  E sa Kontra i pou sa dimoun mentenir tou bann fasilite sportif o nivo rezyonal e o nivo Nasyonal baze lo sa Bidze ki gannyen tou-le-z-an avek Gouvernman pou li kapab fer sa bann travay – ok?  Mersi Mr Speaker.

 

MR SPEAKER

Mersi Minis.  Onorab Henrie.

 

HON GERVAIS HENRIE

MERSI Mr Speaker.  Mon ti a kontan demann Minis anvi ki i nonm Mr Collin Quatre ki mon konnen in annan en long karyer avek sports bann keksoz koumsa.

Eski i fer plis sans ki zot in tender out sa servis has supposed se ki si NSC ti fer li menm ti annan detrwa dimoun ki ti anploye lo baz plen-tan.  Eski ekonomikman i fer plis sans pou pei tender out sa servis?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker. Mr Speaker mon panse sa i relye avek desizyon pou outsource bann servis – ok?  Parey nou ti outsource bann servis avek bann Cleaning Agencies dan bann diferan landrwa.  I annan plizyer servis ki Gouvernman ti outsource pou li kapab les NSC par egzanp li, i kapab konsantre plis lo bann travay 5bann devlopman sport dan pei olye ki pe al tay deryer pe fer bann renovasyon lo bann fasilite sportif dan distrik.

Donk sa desizyon ti ganny pran pou bann lorganizasyon kapab zisteman konsantre zot bann core business e outsource sa bann servis.  E an menm tan osi mon krwar sa zisteman in anmenn lanplwa, in anmenn serten benefis pou bann dimoun ki anvi ouver al devlop en pti biznes dan nou pei.

Donk pou mwan, mon krwar poudir sa i ed NSC bokou.  Akoz permet li zisteman pou li kapab konsantre lo zot travay ki li annan pou li fer.  Mersi Mr Speaker.

 

MR SPEAKER

Mersi Minis.  Onorab Stephen Pillay.

 

HON STEPHEN PILLAY

Mersi Mr Speaker.  Bonzour Minis ek ou delegasyon.  Mr Speaker mon kestyon pou Minis.  Eski Minis i satisfe son Minister i satisfe ki NSC i fer lo bann fasilite sportif enkli maintenance dan bann distrik enkli Au Cap?  Mersi Mr Speaker.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mr Speaker mon kapab dir avek Onorab pou dir nou pa ti neseserman tro satisfe akoz parey mon’n dir paler kekfwa i annan bann dele ki arive ki nu santi petet travay ti ganny fer pli vit.

Me sa ki nou’n konstate sa lannen se ki i annan en amelyorasyon dan sa servis enkli ki nou pe gannyen.  Mersi Mr Speaker.

 

MR SPEAKER

Mersi Minis.  Onorab Pillay

 

HON STEPHEN PILLAY

Mersi Minis. Me parey Minis i okouran avek PS mon pa satisfe Au Cap nou pa satisfe avek louvraz ki NSC. PS i konn byen lekel ki mon pe koz lo la lo kort Pointe Au Sel.  Mon krwar devret swa rod en lot kontrakter outside ki NSC pa kapab fer anba Gouvernman Lokal whatever.  Me i pa satisfezan ditou.  Mersi Mr Speaker.

 

MR SPEAKER

Mersi Onorab.  Onorab Esparon.

 

HON REGINA ESPARON

Mersi Mr Speaker.  Mr Speaker eski Minis i kapab dir mwan nou fer en kantite plan, nou fer en kantite vizit, nou fer en kantite proze.

Parey Onorab Ferrari in dir, i annan en konfizyon.  E mon ti kontan demann Minis i annan en konfizyon parski i annan en problenm avek kominikasyon.  Kominikasyon ant Minister Gouvernman Lokal avek distrik.

Kwa ki pe ganny fer dan limedya pou amelyor sa kominikasyon ant bann diferan Lazans, pou fer ki sa bann kestyon parey pon, baraz, lalimyer pa vin dan Lasanble parey Onorab Henrie in dir?  Parske la ou’n dir nou zot pe al fer toultan Minis nou pe al fer ki garanti ou pe donn nou sa problenm kominikasyon ant sa bann Lazans pou vreman ganny amelyore?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker mon pa tro konnen Lazans ki Onorab pe fer referans avek.

Me selman letan nou fer bann kominikasyon par egzanp pou bann proze Onorab.  Nou demann bann DA pou kominike dan distrik avek lezot Lotorite dan distrik pou zot kapab fer zot lalis bann proze ki zot, zot anvoy kot nou.

E bann proze ki ganny anvoye kot nou, nou apre nou fer evalyasyon nou travay lo la nou retourn kot distrik, nou dir la i la bann proze ki baze lo funding ki nou annan ki nou pe enplimante pou lannen.

E mon krwar osi i annan en zefor ki nou pe fer resaman kot letan nou’n ganny lalis sa bann travay parey ou pe dir kot parfwa nou fer bann meeting, avek MNA avek DA ansanm pou nou kapab asize pou nou kapab diskite zisteman Onorab pou nou kapab amelyor en pe kominikasyon pou nou kapab tonm dakor osi lo bann travay ki annan pou ganny fer.  E si i annan serten difikilte an relasyon avek sa bann travay kot nou partaz sa bann difikilte avek Lotorite Distrik.

Donk mon ti kapab re asir ou pou dir annan en zefor ki pe ganny fer, pou nou kapab zisteman amelyor sa kominikasyon ant sekretarya Gouvernman Lokal avek Lotorite dan distrik – ok?  Mersi.

 

MR SPEAKER

Mersi.  Onorab William.

 

HON WAVEN WILLIAM

Mersi Mr Speaker.  Mr Speaker Minis pa’n reponn enn mon larepons.  Mon a rephrase mon kestyon.

Minis vizavi sa NSC Hall nou ti ganny dir pou dir kontrakter pe vin fer renovation. 

La distrik Grand Anse Mahé nou pe viv lo petet la nou.  Ti annan en Kontrakter konmansman ti pe vin fer travay. Epi nou ti ganny dir met lo tender pe vin ganny fer travay.  Me nou pa konnen si pou frenmen, bann zenn i anvi servi.  E nou bezwen parfwa azir konman diktater, be dir be non nou annan bann zenn nou bezwen servi sa hall.    

         Me mon anvi demande lefe ki la Mr Larue i la kan ki nou kapab ganny meeting e konnen egzakteman kan ki sa NSC Hall Grand Anse Mahé pou ganny repare – konpletman?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  onorab nou organiz en meeting byen ok avek CEO NSC avek osi PS Local Government, pou nou kapab diskit tou bann travay bann issues ki annan pou fer avek distrik Grand Anse – ok?  Mersi.

 

MR SPEAKER

Mersi Minis.  Avek sa nou ava pran en Break e ler nou ava rantre nou ava kontinyen avek kestyon pou Minis.

 

(BREAK)

 

MR SPEAKER

Bon nou ava repran nou travay.  Zis mon pou revwar en pti pe nou fason ale avek kestyon parey mon ti anonse semenn pase.  Mon an vi par 12:00 nou’n fini avek Minis Dezinyen.  Sa  i ava enkli Kestyon Irzan ki Onorab De Commarmond pou demann Minis.  2er nou ava rantre nou ava pran PNQ e sa i ava swiv par Statement Minis pour Lagrikiltir.

Savedir mon pe restrikte en pe Kestyon Siplemanter.  Bon nou ava kontinyen lo Order Paper.  Nou a pran 2enm kestyon.  Onorab Wilbert Herminie.

 

HON WILBERT HERMINIE

Mersi Mr Speaker.  Bonzour Minis  avek ou delegasyon.  Bonzour tou dimoun ki ale kout.  En bonzour spesyal pou bann zabitan  La Rivière Anglaise.

Speaker avek ou permisyon mon kapab demann mon 2 kestyon an menm tan akoz i dan menm laliny please? 

 

MR SPEAKER

Ou 2 kestyon …

 

HON WILBERT HERMINIE

Kestyon No. 2 ek No. 4.

 

MR SPEAKER

2 avek 4.  En moman.   Yes go ahead.

 

HON WILBERT HERMINIE

Mersi Mr Speaker.  Kestyon i lir koumsa, eski Minis i kapab dir nou Lasanble ki plan son Minister pou maintain bann multipurpose court dan distrik La Riviere Anglaise  vi ki sa bann court i dan bann kondisyon deplorab?

Kestyon No. 4.  Eski Minis i kapab dir nou Lasanble kan ki fencing court Vilaz Trezor pou konmanse, vi ki la konmela boul pe tonm kot bann vwazen e koz lenkonvenyans? Eski sa devlopman pou enkli met lalimyer pou ki court i kapab ganny servi aswar?  Mersi Mr Speaker.

 

MR SPEAKER

Mersi Onorab.  Mersi.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker Ladministrasyon Distrik La Riviere Anglaise in soumet son proze pou repar bann kort dan distrik an Zen sa lannen.  Proze konm swivan kort Union Vale, Vilaz Upper   5th June Avenue Court, ki la opposite vizavi avek Krishna Mart apre kort Vilaz trezor.

Kontra pou aranz Vilaz Trezor e kort Union Vale in fini ganny sinyen an Septanm.  Louvraz pou konmanse tre byento e i espekte fini an Novanm sa lannen.

Tandis ki sa  kort vizavi laboutik Krishna Mart nou ti pe esper konfirmasyon sorti kot MIHLT ek Planning Authority pou konnen si sa kort dan son pozisyon aktyel pou ganny afekte avek bann konstriksyon ki pe fer kot Music Stadium. 

E Onorab nou’n ganny larepons semenn pase ki sa kort pou reste kot i ete.  Donk sa ka nou pou konmans bann demars pou aranz en pe sa kort e si napa okenn difikilte nou espekte fini li sa lannen.  Mersi Mr Speaker.

 

MR SPEAKER

Mersi Minis.  Onorab Herminie.

 

HON WILBERT HERMINIE

Mersi Minis.  Minis ;eski zot annan ou Minister i annan plan pou fer bann maintenance regilye lo sa bann kort e nou pa bezwen retourn ankor tou le lannen, pou menm kestyon so ki sa i vin en progranm regilye ki louvraz i a ganny fer dan en peryod rezonnab ki tou fasilite sportif i a reste dan en fason en mannyer rezonnab ki manrmay li kapab servi dan distrik? Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Wi Onorab.  Minister i annan en plan maintenance pou kapab fer maintenance lo sa bann kort parey ou pe dir regilyerman pou fer sir ki letan i annan bann sityasyon ki arive ki kort i ganny mete e ki toultan bezwen i kapab ganny servi par bann dimoun o nivo distrik.

Donk sa i osi aplik lo sa bann  kort ki nou pe travay lo la.  Mersi Mr Speaker.

 

MR SPEAKER

Mersi Minis.  Onorab Paul Ernesta.

 

HON PAUL ERNESTA

Mersi Mr Speaker mon premye kestyon i annan avek sa ki Onorab Herminie in demande.  Petet si Minis pou annan en Plan Konpreansiv pou tou bann kort dan pei?

E dezyenmman Mr Speaker.  Eski Minis anliny avek bann devlopman pou reparasyon bann kort La Riviere Anglaise ki annan sa bann ring?  Eski zot osi akoz parler dir ou bann manrmay parey letan bann zenn zot zwe zot kase.  Eski i annan osi bann plan pou kapab revwar lafason bann ring ki ganny mete pou permet kapab kontinyen operate.  Thank you.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker normalman Lazans ki fer sa travay pou nou.  Ok?  I en keksoz ki nou kapab konsidere.  Me selman petet an menm tan osi mon ti lava fer en lapel ki nou servi nou bann dimoun dan distrik ki servi bann fasilite byen en mannyer ki nou pa bezwen toultan swa pe repare oubyen swa pe sanze.  Akoz Finalman sa bann fasilite i a zot dispozisyon e zot menm zot ki pe servi.  Me selman nou ava koz avek Lazans konsernen kot i konsern kestyon Onorab pou fer sir ki sa i ganny fer.  Mersi Mr Speaker.

 

MR SPEAKER

Mersi Minis.  Bon mon napa okenn lezot Manm pou sa 2 kestyon.  Nou ava al lo kestyon No.3.  Onorab Wavel Woodcock MNA pou Grand Anse Praslin.

 

HON WAVEL WOODCOCK

Mersi Mr Speaker.  Bonzour Minis ek ou delegasyon, tou Manm tou dimoun a lekout.

Minis mon kestyon i kronm swivan;

Eski Minis i kapab dir sa Lasanble kan ki proze Sport Complex Ile Eve, Baie Ste Anne Praslin pour konmanse e eski tou fasilite sportif lo sa plan pour ganny enkli?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker Sport Complex Ile Eve Baie Ste Anne Praslin ti ganny resevwar konsey Nasyonal pou Sport an 2014 apre louvertir basen naze lo Zil Eve.  Son bi sete pou annan en lezot fasilite sport lo Praslin.  Mr Speaker mon pa kapab enform Lasanble kan ki proze pou konmanse akoz proze pa ankor ganny prezante pou laprouvasyon devan Konsey Minis.  Lotorite Planning pa ankor donn son laprouvasyon pou sa proze an vi ki i annan problenm later ki pa ankor fini rezourd.  E finansman pou sa proze osi pa ankor ganny finalize.

An vi ki sa bann kontrent Mr Speaker, i difisil pou mwan donn en langazman, lo kan ki proze pou konmanse e kwa ki pou enkli ladan.  Mersi Mr Speaker.

 

MR SPEAKER

Mersi Minis.  Onorab Woodcock.

 

HON WAVEL WOODCOCK

Mr Speaker sa larepons ki Minis in donnen i vreman dezapwente lefe ki Minis pou Lazenes, Spor e Kiltir avan, ti vin lo medya sosyal – i ti donn en langazman.  Tou lede MNA lo tou lede kote latab ti zwenn avek Minis ti prezant sa proze sa ti Minis Larue.  E ti menm fer en statement lo medya Nasyonal ki sa proze pou ganny fer o pli kour dele letan posib.

I ti menm anonse ki ti pou annan en sponsorship ki zot ti pou gannyen, avek Gouvernman La Chine.  Alors mon pe demande why is it ki 2014 in ganny anonse proze i prezante until now, ziska prezan nanryen pa ganny fer?  Me kan eski zot pou pran nou, nou bann atlet Praslin serye e ki pe arive avek sa zafer Sponsorship La Chine?  E zot ti dir poudir sa proze i pou fer par plizyer faz.

Lenportans zot ti met lanfaz lo at least  konmans avek en indoor gymnasium e osi tracks sentetik pou bann atlet Praslin.

Alor eski Minister i kapab konsidere si kekfwa lanpler sa proze i tro gro, si zot kapab konsider at least konmans avek sa indoor gymnasium avek sa tartan track pou nou bann atlet lo Praslin pou kab servi.  Mersi Mr Speaker.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Onorab mon repete ki  proze i ankor dan sa sityasyon.  Me mon kapab re asir ou ki nouvo CEO pou al fini fer bann travay debwaz ki annan pou fer.  Setadir al fini sa bann konsiltasyon avek tou sa bann sekter konsernen pou fer sir ki sa bann bout laten ki nou bezwen avek lezot sekter pou nou kapab fer sa proze lo la, ki sa i ganny finalize e ki Planning Authority i kapab zisteman donn son aprouvasyon pou sa proze.

Antretan parey ou dir proze ti deza pou ganny konsidere.  Sa ki Minister Finans in enform mon anba Chinese Grant.  E sa lide i ankor la ok?   Ki sa proze i ganny mete letan i ganny tou son bann keksoz i ganny finalize, i ganny mete konman enn bann proze ki kapab ganny finanse par Gouvernman Chinois. Me selman nou pou al fer tou bann debwaz, ki annan pou fer pou nou kapab fer sir ki sa bann laprouvasyon neseser i ganny donnen – ki sa proze i kapab bouze.  Mersi Mr Speaker.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker.  Bonzour Minis ek ou delegasyon.  Bonzour tou Manm, bann dimoun ki dan Galeri.

Minis konsernan sa proze an Mars 2017 le 21 Mars 2017 Planning Authority ti’n deza ekrir CEO NSC konmkwa i annan problenm avek detrwa bout later e sa ti an Mars 2017.

E apre an Bidze 2018 ler nou ti pe diskite an Desanm nou ti ganny dir par CEO NSC ki i annan 6milyon ki’n deza mete.  Apre i annan 3milyon ki ti pou Anse Royale.  E a ti pou met ansanm avek sa 6milyon pou konmans bann travay debaz.

E la nou Septanm 2018 i paret ki sa osi pa’n bouz ditou.  Petet akoz i kler dapre Planning Authority ki devret rezourd lo la pou kapab al fer bouze.  So petet nou a pou benefis dimoun Praslin.  Silvouple annou fer sa proze bouze.  Akoz deza nou perdi 4an ek 2014 nou espekte la nou a kapab fast track sa process.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Wi mon’n otour ou konsern e ou rekomandasyon e parey mon’n dir nivo CEO i ava tou bann travay ki annan pou fer e fer sir ki laprouvasyon neseser i ganny rode i ganny donnen pou ki nou kapab fer bouz proze.  Mersi Mr Speaker.

 

MR SPEAKER

Mersi Minis.  Nou a pran kestyon No.5 Onorab William ki pou demann dan plas Onorab Aglae.

 

HON WAVEN WILLIAM

Mersi Mr Speaker lo non Onorab Aglae mon anvi demann Minis Anvi sityasyon finansman dan distrik pou bann case emergency, eski Minis ki responsab pou Gouvernman Lokal pe mazin revwar distribisyon alokasyon  finansyel pou fer fas avek en tel defi?  Mersi.

 

MR SPEAKER

Mersi Onorab.  Minis en pti moman.  Mr Adeline ou le bouz obor Minis?  Mon a dir mersi Mr Larue.  E nou a eskiz li parmi nou.  Go ahead Minis.

 

(CEO NAC MR JEAN LARUE WAS EXCUSED FROM THE HOUSE)

 

MR SPEAKER

Go ahead Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker Departman Gouvernman Lokal in touzour sa ki nou apel sa first responder kan ki annan en ka emergency dan distrik.

Sa i kapab dan en ka par egzanp kot i annan en lakaz brile oubyen lezot domaz poze par lefe natirel.  Sepandan Mr Speaker Departman pa fer distribisyon a lokasyon finansyel dan bann distrik pou fer fas avek en tel defi.

Dan tel ka dan lapratik aktyel Ladministrasyon Distrik i ganny alert e bann premye siport neseser i ganny donnen.  Depandan lo gravite sak ka negasyon avek bann lezot Lazans konsernen ganny fer pou bann endividi oubyen fanmir ki’n ganny afekte pou zot kapab ganny led avek sipor.

Bann Minister avek Lazans ki asiste pandan sa bann ka dirzans i par egzanp DRDM, ASP, MIHLT avek SFRSA.  Sakenn i annan en rol ki zot zwe pou zot kapab ede soulaz lavi sa bann fanmir ki’n ganny afekte e zot fer sa konsantman avek en Departman Gouvernman Lokal.  Mersi Mr Speaker.

 

MR SPEAKER

Mersi Minis.  Onorab William.

 

HON WAVEN WILLIAM

Mersi Mr Speaker.  Lefe ki Gouvernman i kontinyelman dir pep Seselwa, ki zot pe met en mars en progranm desantralizasyon servis sa ek resours.

E prenon kont Minis ki ti deza annan en fon alokasyon dan distrik ki nou apel Fon Emergency.  Mon anvi demann Minis ki rasyonal e ki lozik e eski nou annan konsiltasyon pou zot retir sa alokasyon ki distrik ti annan, ti pou fer li en pe pli vit pou kapab reponn sa bann bezwen.

E dezyenmman Minis eski zot pe konsider revwar sa pti allowance zot pe donn sa bann dimoun ki nou tim Emergency     Brigade ki ti pe ganny R500 par an, pou ankouraz sa bann dimoun pou kontinyelman vin devan pou partisipe.  Mersi.

 

MR SPEAKER

Mersi Onorab.  Minis.

 

THE THE DESIGNATED MINISTER MRS MACSUZY MONDON

Mersi Mr Speaker.  Mr Speaker nou dan Bidze ki nou gannyen nou pa toultan ki nou ganny lazan pou emergency.  Ok?  Se petet sa i bann rezon kot nou kapab napa sa lazan pou nou kapab partaze avek distrik.  Ler bann emergency i arive nou rode kote nou kapab ganny lazan pou nou ede.

Parfwa lannen pase nou ti ganny en Bidze ki ti kapab ed nou pou nou kapab fer avek serten travay emergency. 

Me pou lannen 2019, nou’n met en lazan dan Bidze pou nou kapab deal avek sa bann cases e ou sizesyon Onorab ki ou’n fer ki nou rekonsidere, depandan ki kalite Bidze ki nou kapab vwar si nou kapab rekonsider sa.  Mersi Mr Speaker.

 

MR SPEAKER

Mersi Minis.  Onorab William.

 

HON WAVEN WILLIAM

Mersi Mr Speaker. Minis mon ti a vreman kontan si ou re konsidere akoz, lefe ki i ti ganny mete i ti annan en rezon par deryer pou annan sa pti fon dan distrik ki distrik Lotorite i kapab respond ase vit.

E parey mon’n dir se ki (1) nou pa santi nou annan ase konsiltasyon akoz pou nou dan distrik sa pti fon ti vreman enportan letan i annan i annan serten dezas ouswa problenm ki leve ki distrik i kapab respond ase vit.  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mr Speaker, wi si nou ganny Bidze depandan lo Bidze ki nou gannyen pou 2019 nou kapab konsidere Onorab.  Mersi.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker eski Minis i kapab enform Lasanble dan menm laliny, si li son Minister i satisfe avek Bidze ki pe gannyen aktyelman pou deal avek sa bann case emergency e pou regard dan welfare bann Emergency Brigade?

        Eski son Minister i satisfe ki mannyer keksoz i ete la konmela?  E ki i pe fer pou fer sa Bidze ogmant konsiderableman etandonnen sityasyon ki prezant devan bann distrik ozordi?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mr Speaker non nou pa satisfe akoz parey mon’n dir nou napa en Bidze nou pa ganny en Bidze pou 2018.  Me selman sa ki nou’n fer nou’n demann en Bidze pou 2019 ki pou kapab permet nou deal avek sa bann ka emergency ki nou annan dan bann distrik.

La sa ki pe arive Onorab, se ki bann lezot Lazans ki pe ed nou avek bann travay ki nou bezwen fer.  Mersi.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Eski Minis i kapab donn nou en avan gou ki sa Bidze ki ou pe demande pou deal ek sa sityasyon?

 

MR SPEAKER

Minis.

 

THE DESIGNATED MINISTER MRS MACSUZY MONDON

Onorab nou’n demann 1.5 milyon.  Nou’n met en code anba ‘District Disaster Relief Fund.’ 

 

MR SPEAKER

Yes Onorab De Commarmond.

 

HON CHARLES DE COMMARMOND

Mr Speaker nou pe note ki 1.5 milyon pou distribye avek 26 distrik la.  Etandonnen pa nou vwar ki i pa ase i pa fer sans sa?  E ki nou devret al demann plis ki sa?

E nou demande avan Bidze i vin devan nou Lasanble, ki i pran konsiderasyon pou demann en amount en pe pli sibstansyel!  E ki ladan ou bezwen lot amount pou get dan welfare bann Emergency Brigade zot zwe en rol enportan pa kapab donn zot zis R500 pou 1an! Lekel ki pou aksepte sa?  Mon krwar zot devret revwar lafason ki zot pe apros sa sityasyon dan en fason byen koeran e enportan.  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mr Speaker emergency, emergency e pa tou distrik ki ganny menm emergency pandan en lannen.  Nou nou’n demann sa sonm akoz nou osi konsidere ki annan lezot Lazans ki ede.  Letan i annan bann ka parey dan distrik.  Me si i annan nesesite pou nou ganny plis nou kapab deal ek sa bann ka.  Onorab pe rekomande ki sa ti R500 ki sa ti en fixed sum ki nou ti donn Emergency Brigade pa ase.  Nou kapab fer en case pou nou vwar si nou kapab ganny en pe plis lazan.

Me selman pou ou donn tou distrik en sonm larzan parey petet i pa pou en keksoz ki pou tro lozik konmsi – sirtou si ou pe al deal avek en emergency. 

Me selman nou kapab vwar ki mannyer nou kapab e ki si sa nou kapab donn distrik pou lannen prosenn.  Mersi Mr Speaker.

 

MR SPEAKER

Mersi Minis.  Petet zis lo mon par pou fini en kestyon.  Minis mon ti a kontan remersye bann Lotorite Lokal enkli Biro DA, enkli mon constituency clerk pou sa dezas ki’n arive Bel Ombre resaman kot sa ros in kraz lakaz.

E keksoz in ganny fer a se byen vitman lozman in ganny pou sa 2 dimoun e mon konnen ki bann Lotorite pe monte pe vizite pe fer bann evalyasyon pou kapab pran bann desizyon pou lefitir.

Alor mon ti a profite o non lafanmir, pou remersi bann Lotorite ki’n reakte e sitan vit.

Bon avek sa parey mon’n dir anba Standing Order 31 (3) Minis i deza dan Lasanble li annan en Kestyon Irzan.  Nou pou pran sa kestyon avan nou eskiz Minis parmi nou.  E mon a demann CEO Land Transport si oule vin devan lo panel Mr Herath.

E mon a profite osi la pou mon mansyonn Mr Adeline parmi nou konman Project Officer, i Direkter Zeneral Planning Project Planning and Maintenance, Mr Adeline mersi bokou.   E nou welcome CEO SLTA Mr Parinda Herath parmi nou pou sa prosen kestyon. E mon a demann Onorab De Commarmond pou poz son kestyon.

 

HON CHARLES DE COMMARMOND

Mersi Mr Speaker.  Mr Speaker eski Minis pou Devlopman Kominoter i kapab eksplik nou Lasanble; Akoz ki sa proze semen dan Capucin dan distrik Au Cap pa’n ganny materyalize malgre Lagreman ki Gouvernman e lezot Lotorite dan distrik, in fer avek bann zabitan parey nou’n tande dan nouvel Dimans swar?

Dezyenmman depi konbyen tan sa proze i lo lalis proze distrik Au Cap?

Trwazyenmman eski son plan in ganny aprouve e konbyen sa proze i sipoze koute?

E katriyenmman, kote e ki mannyer sa desizyon pou met baraz tiyo ek sa bann peron in ganny pran?  E akoz in napa konsiltasyon?  Mersi.

 

MR SPEAKER

Mersi Onorab De Commarmond.  Yes Onorab Ferrari.

 

HON JEAN-FRANCOIS FERRARI

Mr Speaker mon ti a zis kontan a tir ou latansyon ki anba 31 (3) Lasanble pa aksepte bann kestyon ki fer referans avek sa ki’n pase lo televizyon.

So whilst mon welcome sa kestyon, mon santi poudir Onorab De Commarmond pa devret pe fer referans avek en komanter ki’n ganny fer lo televizyon.  Akoz nou Standing Order pa permet sa.

So zis pou further pou ease of … Mersi.

 

MR SPEAKER

Bon nou konnen i ton dan nou Standing Orders sa ki nou pa fer referans avek bann rapor medya. E semenn pase mon konnen ti annan en Manm ki ti fer referans mon ti allow, Onorab Pillay ti lev sa lobzeksyon.

Mon’n fer Clerk ganny kontak avek Onorab De Commarmond vizavi sa pou retir sa bout, me mon pa konn kominikasyon ki’n arive.  Ok? Me selman mon kontenir, dan lefitir mon aviz ankor ; akoz i annan en part dan nou Standing Orders ki i pa permet ki kestyon ver referans avek bann rapor pou medya.  Ok?  E mon pou allow ozordi i ava pase akoz i pa’n vreman sanz kontenir kestyon.   E dan lefitir okenn Manm ki anmenn kestyon pou sa oubyen poz en Kestyon Siplemanter, ki fer rapor avek en keksoz ki pase dan medya mon pou disallow.  Ok?  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker sa proze semen dan Gravye, Capucin dan distrik Au Cap, i en gro proze semen ki pa ganny konsidere konman en pti proze distrik me plito konman en Proze Kapital.

An 1998 Gouvernman ti devlop en proze lakaz ki ti apel Special Housing dan Leo Capucin spesifikman dan Gravye ti konpri en 12enn lakaz.  Sa letan ti annan en pti santye e osi bokou kap ros pou traverse.

Pou fasilit konstriksyon sa bann lakaz, en gran peron en longer apepre 400 met, ti ganny konstri par zabitan ki ti reste da sa landrwa atraver travay volonter, kot Gouvernman ti donn bann materyo konstriksyon.  Sa ti en linisyativ defen Daisy Rath ki ti DA sa letan.

An 2001 ti annan en demann par bann zabitan pou sey vwar posibilite pou ranplas sa bann peron parey semen transpor.  MNA ek DA sa lepok ti sey rod permisyon pasaz sa ki nou apel way leave avek bann propriyeter later dan sa landrwa.  Dapre lenformasyon, pa tou ki ti pare pou donn zot later pou fer semen.  I enportan note ki sa landrwa i annan bokou later zeritye e menm ziska ozordi i annan zabitan ki pa propriyeter sa later kot zot pe reste.  Sa i konplik negosyasyon pou way leave. Alors proze semen Mr Speaker pa’n bouze.  An 2017 spesifikman le 8 Out Prezidan Faure dan son vizit dan distrik Au Cap, ti vizit sa landrwa swivan rekomandasyon distrik dan prezans MNA avek DA. 

Prezidan Faure ti donn lenstriksyon SLTA, pou fer en letid pou vwar si i posib pou fer en semen dan sa landrwa.  SLTA in konmans demars byen boner 2018, pou fer en survey sa ki nou apel en topographical land survey pou vwar posibilite fer semen e kote sa semen pou pase.  Sa survey in fini konplete.

Lot faz aprezan se design sa semen.  Sa plan pou pare dan milye Oktob sa lannen.  Apre sa Mr Speaker, plan pou bezwen ganny soumet avek distrik Au Cap, pou diskit avek bann zabitan dan sa kominote pou ankor enn fwa negosye permisyon way leave.  Enn fwa ki tou dokimantasyon i annord, ki’n ganny Lagreman ofisyel tou dimoun, plan pou sa proze pou ganny anvoye kot Planning Authority e answit demars pou enplimant sa proze i ava konmanse.

I enportan ki way leave par tou le 16 propriyete pe fer ki enplike i ganny donnen pou nou kapab enplimant sa proze semen.

Mr Speaker rezon ki sa railing ti pe ganny fer se ki ti deza annan en bout sa railing ki ti bar en ranpar e ki pa ti dan en bon kondisyon.  I osi annan parti sa peron ki danzere.  Alors anmenn mezir prekosyon, distrik Au Cap ti enkli sa proze lo son lalis ti proze pou 2018.  Sa ti enkli railing avek en water barrier. 

        Dapre DA ki ti la sa letan, pa tou zabitan ki ti neseserman gnny4 konsilte dan sa pti kominote.  Mr Speaker i en prosedir ki avan proze li ganny anvoye kot Sekretarya Gouvernman Lokal ki tou, bann travay pre-miner dan nouvo distrik i ganny fer.  E sa e i enkli konsiltasyon kot i neseser e negosyasyon pour way leave. 

Gouvernman i reste angaze anver amelyor fasilite pou zabitan dan distrik.  Me zabitan i bezwen osi korpere ler fodre pou nou kapab pli byen adres zot bann bezwen.  Mersi Mr Speaker.

 

MR SPEAKER

Mersi Minis Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker mon’n kit zafer SBC ekspre mwan zis pou montre poudir sa ki SBC in dir lo televizyon la, i pa ti korek ditou.  I annan en diferans ek sa larepons ki ou pe donnen.  E nou demande atraver sa kestyon ki SBC i al koriz zot lenformasyon ki zot in donnen, ki’n mislead lepep Seselwa.  E an menm tan mon le demande eski i annan okenn staff SBC ki dapre ou Minis ou konnen i reste dan sa zanmirant e ki osi form par sa diskisyon pou donn permisyon pou fer sa semen?  E lo kestyon konsiltasyon Minis si ou ti kapab konkretman ki kalite konsiltasyon ki’n ganny fer ek bann dimoun dan sa zanmirant?  Eski i annan meeting ki’n ganny fer, bann dimoun in vini zot in koz avek zot in tonm dakor, negosyasyon ek bann  later zeritye la, bann dimoun ki annan later zeritye la, eski tou sa bann dimoun zot annan par egzanp en egzekiter sa bann later zeritye?  Konmsi zot pe negosye pe koze ek sa bann egzekiter oubyen i annan lezot issues?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker wi i annan 2 travayer SBC dapre lenformasyon ki mon annan ki reste dan sa zanmirant.  E i paret osi bann dimoun ki ti donn interview i en pe bann dimoun ki ti dan sa fanmir la dan sa zanmirant.  Sa lenformasyon ki mon annan.  Door to door ti ganny fer konman enn bann konsiltasyon Onorab.

E byensir pou sa gro proze semen parey mon’n dir ler bann travay in pare proze, pou re ganny anvoye kot Lotorite distrik e distrik i ava fer tou bann konsiltasyon neseser pou fer sir ki tou dimoun i okouran e ki tou dimoun i tonm dakor pou dir wi nou le sa semen e ki bann osi ki semen i pas lo zot propriyete zot osi zot a tonm dakor poudir wi nou pou donn way leave pour ki semen i pas lo nou propriyete pou ki semen i ganny fer.

 

MR SPEAKER

Mersi Minis.  Onorab de Commarmond.

 

HON CHARLES DE COMMARMOND

Eski zot in etabli ziska la par egzanp ki kantite later zeritye ki annan?  Eski sa bann later zeritye i annan egzekiter?

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Nou annan 16 propriyete prive.  Wi i annan ki annan egzekiter Onorab.  Mersi.

 

HON CHARLES DE COMMARMOND

(Off-Mic)

 

THE DESIGNATED MINISTER MRS MACSUZY MONDON

Non pa tou.

 

MR SPEAKER

Mersi Minis.  Onorab Stephen Pillay.

 

HON STEPHEN PILLAY

Mersi Mr Speaker.  Mr Speaker konmsi klarifikasyon ek Minis.  Sa proze Dan Gravye i e proze kapital pa bann project district akoz i pa kout milyon.  Sa survey ki SLTA pou fer pou donn nou an mid-October eski i enkli survey pou Dan Gravye ek ex-Home osi ki ti tonm anba menm vizit ek Prezidan ki ler nou ti al gete? E konmsi toultan nou pa ganny sa scope of work en estimasyon ki mannyer Gouvernman pou kapab balans en Bidze? I annan step pou li fer.  Rod survey.  Fer ou scope of work epi ki i pou vin dan Lasanble pou vin demann Bidze pou sa semen.  Pou tou le de ex-Home avek Dan Gravye.

Konsiltasyon in ganny fer avek sa bann dimoun dan distrik.  Zot tou.  In konmans depi 20an pase.  Be la, la dernyen kou letan nou ti al vizit distrik – mwan mon ti ale mwan.  Konman MNA LDS mon’n pase Capucin ek  Gravye.  E mon’n dir tou dimoun mon pe siporte sa semen.

Me i annan en prosedir ki devret marse ki nou pou ale, topografi, scope of work epi lenplimantasyon i pou vin la dan Lasanble pou nou balans son Bidze pou capital projects.  Mersi Mr Speaker.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mr Speaker survey in fini ganny fer parey mon’n dir dan mon larepons.  SLTA pe travay lo design e se ler en design semen in fini ganny fer kot tou bann preparasyon par egzanp kote pou fer miray, kot pou annan drenaz.  Ki kantite miray pou annan e se la ki SLTA pou kapab donn en cost estimate konbyen sa proze i pou koute.  E mon panse si tousala i fini ganny fer, sa i ava ganny mete propoze pou li fer.  Me solman mon bezwen dir byen kantmenm nou donn en cost estimate, kantmenm si nou anvi met li dan Bidze 2019 san ki sa 16 propriyeter zot tou zot donn wayleave, zot tou zot dakor pou sa semen pas lo zot later, nou pa pou kapab bouze avek sa proze semen.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mr Speaker mon ti ava kontan zis demann Minis ki diferans i fer si i annan travayer SBC ki reste laba?  Eski sa konmsi i afekte sa proze?  Mersi bokou.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mr Speaker i pa afekte sa proze selman petet zot annan pa konnen zot in ganny petet sa sans pou zot al lo SBC pou zot fer sa konplent.  Zot in ganny en pti pe petet sa privilez akoz zot travay SBC e bann dimoun in anmenn sa a nou latansyon poudir i annan bann dimoun- sa bann dimoun ki enplike ladan se bann travayer SBC.

 

MR SPEAKER

Onorab Ramkalawan.

 

HON WAVEL RAMKALAWAN

Mr Speaker be dan sa 16 lezot fanmir la eski ou annan landrwa ki sa 16 lezot dimoun i travay kekfwa sa osi tou i annan en lenpak lo sa proze?  Depandan lo Minister kot zot ete.

 

MR SPEAKER

Mersi, mersi Onorab.  Onorab Vidot.

 

HON AUDREY VIDOT

Mersi Mr Speaker.  Bonzour tou dimoun prezan.  Mr Speaker mon kestyon pou Minis dan son larepons in fer resorti ki Lotorite distrik Au Cap ti’n pran desizyon pou fer met railing dan zot Pti Proze Kominoter.  Eski sa in vin apre konsern ki’n ganny met dan latansyon Lotorite, oubyen osi apre vizit ki petet a sa letan ki Lotorite in vwar poudir i annan en danze avek striktir sa peron ki petet pou safeguard bann dimoun dan sa zanmirant tanporerman pou enplimant en tel proze?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Demann pou fer railing parey mon’n dir avek sa water barrier ti vin dan soumisyon lalis proze distrik.  Donk sa ti vini byen avan akoz konmela lalis proze nou fer met avan.  Mon santi Lotorite Distrik in santi poudir i annan serten danze antretan ki nou pe esper semen petet ti ava bon met en railing la ok, e an menm tan osi sa water barrier ki mon panse, ti ava ede pou fer sa peron en pe mwen danzere pou bann dimoun ki pe deservi sa semen.  Mersi Mr Speaker.

 

MR SPEAKER

Mersi Minis.  Onorab Valmont.

 

HON JUDE VALMONT

Mersi Mr Speaker.  Minis mwan mon ti a voudre demande si ou’n dir si pa ganny way leave pa pou kapab fer semen.  Alor eski ou pe konfirmen ki napa en lot alternativ si napa en way leave pou fer sa semen?  E 2enm konbyen fanmir ki sa semen pou benefisye anler Dan Gravye?  Mersi.

 

MR SPEAKER

Mersi, mersi Onorab.  Minis.

 

THE DESIGNATED MINISTER MRS MACSUZY MONDON

Mr Speaker pou le moman non mon krwar nou tou ki la nou konnen bann problenm ki nou gannyen ek wayleave e nou konnen konbyen fwa parfwa nou annan lentansyon pou nou kapab fer en proze marse dan en distrik e nou bloke zisteman akoz letan kekfwa ou annan 5 dimoun ou annan 3 ki dakor ou annan 2 ki pa dakor nou bloke e proze i reste la i pa bouze.  Sa i le ka Onorab e si nou pa gannyen parey mon pe dir ou, i pou difisil pou nou kapab fer sa proze semen.  Si mon konpran byen i annan apepre en 50enn fanmir dan sa rezyon ki pou benefisye avek sa semen letan nou pou’n fer li.  Mersi Mr Speaker.

 

MR SPEAKER

Mersi Minis.  Onorab Sebastien Pillay.

 

HON WAVEL RAMKALAWAN

Mr Speaker zis Onorab Valmont in vir lo mwan pe soz konsernan in dir 16 sepa ki… konmsi Mr Speaker dir li aranz li en pe parski sa…

 

(Interruption)

 

MR SPEAKER

Ok.  Order!  Order!  Yes Onorab Valmont.

 

HON JUDE VALMONT

Yes Mr Speaker mon pa’n mon pa’n dir nanryen mon pa’n nonm non personn.  Mon pa vwar rezon pou Onorab LOTO sot anler, nerve.  Mon pa’n nonm non personn.  Mon’n zistifye mon ka. Mersi.

 

MR SPEAKER

Mersi.  Mersi Onorab.  Bon Onorab Sebastien Pillay.  Onorab Pillay.

 

HON SEBASTIEN PILLAY

Mersi Mr Speaker. Mr Speaker mon ti a kontan demann Minis akoz sa size way leave i kontinyelman monte kot bann proze kominoter i konsernen e i pa fer premye fwa sa size i monte dan Lasanble.  Mon asire tou bann Manm Onorab dan sa Lasanble at one point in time, in come across sa problenm wayleave.  So eski Minister, eski son Minister oubyen Minister oubyen sa Departman pa’n krwar poudir la in ler pou zot met an plas mon pa konnen travay avek AG’s Office pou annan en tim legal e pran tou sa bann proze kot i annan wayleave akoz zot pa kapab pran en proze kot wayleave pa ankor gannyen met li lo pending e apre re viv sa proze pli tar, akoz dimoun pe konmans met presyon?

Zot bezwen konmans annan en petet en lapros en pe pli sistematik, konpreansif pou deal ek la.  So eski zot in met an plas en sistenm oubyen en tim legal – parey mon krwar zot ti’n deza propoze pou zot fer, pou kapab tackle sa size wayleave, kot bann proze parey i konsernen?  Mersi Mr Speaker.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Non Mr Speaker.  Nou pa ankor met an plas okenn – mon krwar pa si nou’ fer okenn diskisyon lo la Onorab oubyen met an plas en tim legal pou regarde ki nou sipoze fer.  Me selman si mon pa tronpe i annan en keksoz pou fer avek compulsory acquisition ki mon krwar i en long prosedir.  Mon pa konnen finalman si sa, i pou anmenn nou pou nou kapab ganny en solisyon pou sa bann problenm. Me si – nou kapab rod advice ek AG’s Office si i annan posibilite ki nou pou kapab vwar en laklerte a lavenir kot i konsern sa bann zafer wayleave e pa anpes nou diskite pou vwar ki si sa nou kapab ganny fer.  Mersi Mr Speaker.

 

MR SPEAKER

Mersi Minis.  Onorab Pillay.

 

HON SEBASTIEN PILLAY

Mersi Mr Speaker.  Mr Speaker petet mon ti a kontan klarifye par lefe ki annan plizyer ka ki’n al Ankour e mon konnen Onorab Georges i pou kapab siport mwan lo la kot Lakour in donn desizyon an faver bann fanmir ki’n trouv zot lekor enclave.  Mon krwar petet ti ava apropriye pou Minister konmans eksplor bann opsyon legal oubyen ed – rod en fason pou eksplor bann opsyon legal akoz in annan rekour legal ki’n ganny donnen dan bann sityasyon kot bann dimoun pa’n kapab ganny akse pou al se zot oubyen akse semen.

E mon krwar ti ava bon nou fer li akoz pli nou espere pli the cost of fer sa bann proze i ogmante.  Probableman pou fer sa proze 5an pase – 10an pase i pa pou parey sa lannen e i pa pou parey 5an de la.

So eski sa i pa ti ava en keksoz apropriye pou zot konsidere vizavi bann lapros legal ki devret ganny pran?  San ki mon pe koz lo acquire later oubyen okenn dimoun.  Be Mr Speaker Onorab ou annan drwa demann kestyon.  Si ou anvi lev ou lanmen demann ou kestyon.

 

(Interruption)

 

MR SPEAKER

Onorab.  Order!  Order!  Order!  Order!  Order!  Onorab Pillay fini ou kestyon.  Fini?  Mersi.  Minis.

 

THE DESIGNATED MINISTER MRS MACSUZY MONDON

Mr Speaker mersi.  Mon pa konnen si Minister Later oubyen si Departman Gouvernman Lokal ki bezwen inisye sa, me selman Onorab nou kapab rod advice avek AG’s Office lo ki mannyer nou pou kapab travay lo sa problenm ki nou pe fer fas avek.  Mersi Mr Speaker.

 

MR SPEAKER

Mersi Minis.  Onorab Henrie.

 

HON GERVAIS HENRIE

Mersi Mr Speaker.  Kestyon mon ti ava kontan demann Minis par lefe ki in dir nou poudir depi ‘98 konmsi sa proze i ankour.  E evidaman dan tou bann proze semen i annan en prosedir ki’n ganny byen etabli e Mr Herath obor Minis la in deza eksplik mwan konmsi i annan en prosedir kler dan Gouvernman so eski Minis pe dir nou poudir in annan en breakdown dan kominikasyon ant bann Lotorite avek sa 16 propriyeter pou zot konpran kwa ki vin avan pou ki evantyelman en proze i ganny materyalize?

Nou bezwen konpran si i annan en breakdown dan kominikasyon e si sa bann dimoun in annan en mankman pou konpran?  Sa i mon kestyon lo kominikasyon.  E dezyenmman Mr Speaker konman en zournalis mon krwar nou Lasanble pa kapab pran en pozisyon akoz zournalis i still tax payers e still reste dan kominote ki si letan demen nou kouver en size dan nou kominote, apre nou ganny atake dan Lasanble Nasyonal.  This is not on!  Mersi bokou.

 

MR SPEAKER

Ok.  Mersi, mersi.

(Interruption)

 

MR SPEAKER

 

Onorab Pillay, Onorab Henrie zot in poz en kestyon pou Minis.

(Interruption)

 

MR SPEAKER

Onorab, Onorab.  Mersi. Minis.

 

THE DESIGNATED MINISTER MRS MACSUZY MONDON

Wi Mr Speaker diskisyon pou proze semen ti konmans 2001 en.  Lakaz ti ganny fer an 1998 me Onorab lenformasyon ki mon annan se tou bann Lotorite Distrik ki’n pase bann DAs bann MNAs dan bann lannen, zot in sey negosye.  Zot in sey negosye depi 2001 pou zot kapab sey en lakor avek tou bann propriyeter pou fer sa semen me sa pa’n abouti dan en rezilta pozitiv.  Mersi Mr Speaker.

 

MR SPEAKER

Mersi Minis.  Onorab Henrie.

 

HON GERVAIS HENRIE

Mersi Mr Speaker savedir Minis pe konfirmen ki retar pou sa proze i an pli gran parti lafot bann dimoun ki pou benefisye ki pa’n le korpere.  I pa akoz MNA, i pa akoz DA i pa akoz Gouvernman?  Mersi.

 

MR SPEAKER

Mersi Onorab.  Minis.

 

(Interruption)

 

MR SPEAKER

OrderOrder!  Mon krwar Onorab Henrie i pe menm tir bann MNA avan ladan.  I pa pe fer referans zis lo sa MNA, zis lo sa DA ozordi oubyen menm bann DA avan – ok?  Bon Onorab Ferrari.  Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker on ti a kontan zis demann Minis de kestyon silvouple.

Premyerman eski Minis i kapab konfirm avek Lasanble poudir i annan sa prosedir ‘acquisition in the public interest.’  Mon vwar Onorab Pillay pe fer letour me selman i per nonm sa zafer acquisition me kekfwa in pran tro …son Gouvernman in pran tro bokou later dimoun malapropo dan lepase me i annan, i annan en prosedir e eski Gouvernman pe servi sa prosedir pou anpese ki en sel dimoun akoz Minis la in dir la si i pa gannyen avek 16 dimoun i pa pou kapab fer.  I pa normal si i annan en sel dimoun ki pe anpes 15 lezot dimoun akse avek en semen nou devret pran aksyon legal e i annan Lalwa nou pa devret abiz Lawa parey sa dernyen 40an nou devret fer li – so eski Minis pe konsider sa?

2enm kestyon Minis mon pa konnen kekfwa SLTA i okouran.  Enn bann lide deryer fer sa semen ki en peron ozordi i vin en semen motorable se pou kapab al zwenn dapre MNA Anse Aux Pins Mr Andre pe dir al zwenn avek sa enn ki pas kot bann Payet anler dan leo Capucin.  Konmsi i pou ede pou sirkil trafik.  I pa pou zis en semen ki pou fini lanmenm me i sipoze al zwenn posibleman avek en semen ki pou servi lezot zabitan.

So mon pe demande si sa i lo plan e si i lo plan mon ava ankouraz Minis pou kapab proceed avek sa dan en fason akoz i pou servi en gran kominote.  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker ziska prezan Departman pa’n pran otan ki mon okouran aksyon legal dan bann sityasyon parey.  Me ou a krwar mon santi bann sizesyon ki pe sorti la se ki a lavenir nou bezwen rod fason pou nou al dan sa laliny pou nou kapab fer sir ki bann zabitan i benefisye otan ki posib letan nou annan bann proze parey.  Pou 2enm bout kestyon Onorab.  Sa i sa faz semen ki nou pe fer, ki en premye faz ki nou pe fer pou nou kapab anmenn sa semen pou sa 400met anviron longer ki nou pe fer li.

Posibilite pou li al zwenn avek en lot semen petet i a kapab ganny konsidere a lavenir me la sa ki nou pe konsidere se sa premye faz pou nou kapab deservi sa bann fanmir ki pe reste dan sa kominote.  Mersi Onorab.

 

MR SPEAKER

Mersi Minis.  Onorab Bernard Georges.

 

HON BERNARD GEORGES

Mersi Mr Speaker.  Mr Speaker Onorab Ferrari in demann kestyon ki mon ti pe al demande me mon ti ava profit sa lokazyon avek ou permisyon anmenn mon sipor lo sa linisyativ servi acquisition of land in the Public Interest Act e mon ti ava zis aport a latansyon Minis akoz nou tou dan nou distrik nou annan bokou nou dan nou distrik nou annan sa problenm.  E mon ava zis aport a latansyon Minis ki Lakour Konstitisyonnel in dir ki si i pou fer en semen kantmenm i pou deservi plizyer dimoun e non pa tou piblik an antye sa i ava in the public interest.  Alor mon krwar sa zot annan en bon lavenir devan zot.  Mersi.

 

MR SPEAKER

Mersi Onorab.  Bon Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker la ki sa semen in arete sa proze plito pou met sa bann bar tiyo i arete, ki pou arive e an menm tan lefe ki PUC li osi i annan basen delo ki servi la kominote en pe par lao e mo asire sa semen ti pou osi ed PUC, ki li PUC i pe fer dan sa direksyon eski petet i pou donn zot koudmen?  Eski i annan en rol i pou zwe li osi lefe ki li osi i pou benefisye?  E mon krwar i kler nou pa – nou Lasanble e mwan menm letan mon’n poz sa kestyon ti napa nanryen pou fer kont zournalis.  Mwan mon lentere se ki laverite i ganny eksplike, i ganny donnen a lepep ki pe ekout bann nouvel.  Mon kontan ki Lasanble la i pe shed light lo sa sityasyon.  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker kot i konsern PUC napa okenn diskisyon ziska prezan ki’n ganny fer.  Me selman petet apre ki semen in fini ganny design ti en nesesite mon panse Land Transport i ava anmenn PUC onboard.  E kot i konsern sa pti bout proze distrik Onorab ki nou, nou ti pe fer nou’n ganny dir arete.  So nou pa pe kontinyen avek sa proze pou le moman.  Nou’n ganny dir arete par Lotorite Distrik apre ki sa lensidan konplent i arive.  Mersi Mr Speaker.

 

MR SPEAKER

Mersi Minis.  Zis avan nou eskiz ou Minis mon osi mon’n ganny en dimoun ki’n vin kot mwan yer, ki’n dir mwan poudir sa proze ti ganny konsevwar 20an pase; egzakteman parey ou’n dir ‘98 ti konmanse.

E dapre lenformasyon se ti annan en survey ki ti ganny fer ki si sa moman la kot i annan aparaman ti annan sa lakseptans par bann dimoun pou fer en semen motorable, si ti’n ganny fer sa lepok, ti’n ganny aprouvasyon Lotorite ti pou kout apepre ant 400 a R650mil sa lepok 20an pase.  Petet zis Minis ti kapab donn nou si i annan en cost ozordi, konbyen i pou kout nou finalman pou fer sa semen?  E sa railing ki’n ganny arete sa proze railing konbyen osi ti pou kout nou?  Minis.

 

THE DESIGNATED MINISTER MRS MACSUZY MONDON

Mersi Mr Speaker.  Mr Speaker mon panse letan bann travay design in ganny fer Land Transport ava dan en pli bon pozisyon pou donn nou en estimated cost be definitivman la la dan sa letan i pou kout definitivman plis ki R400mil, akoz i pa en semen enn ki fasil pou fer e kekfwa nou pe regard dan en range around 2 a 3 mon ti ava dir pa mwens ki en R 3milyon.  Kot i konsern sa proze railing li i ti pe kout Gouvernman Lokal R173, 650mil pou kapab me railing avek water barrier avek sa peron.  Mersi Mr Speaker.

 

MR SPEAKER

Mersi Minis pou sa lenformasyon.  Bon avek sa nou termin kestyon pou Minis Dezinyen Madam Mondon.  Nou ava remersi li e nou ava eskiz li parmi nou.  Nou remersi osi son PS Madanm Vidot, CEO SLTA Mr Parinda Herath e DG proze pou Planning Mr Adeline.  Minis nou ava eskiz ou ek ou delegasyon.  Mersi.

 

(THE DESIGNATED MINISTER MRS MACSUZY MONDON AND HER DELEGATION WAS EXCUSED FROM THE HOUSE)

 

MR SPEAKER

Bon zis mon ava enform bann Manm ki FPAC pe rankontre midi edmi dan Committee Rm 3.  E parey mon’n anonse apre midi ler nou rantre nou pou pran PNQ kestyon anmennen par Leader Lopozisyon e sa i ava swiv par Statement par Minis Lagrikiltir.  Nou ava alor adjourn e nou a re pran nou travay 2er apre midi.

 

(BREAK)

 

MR SPEAKER

Bonn apre midi tou Manm Onorab e bon apre midi Minis Didier Dogley Minis responsab pou Tourizm e Minis Pamela Charlette Minis responsab pou Labita Lenfrastriktir ek Land Transport.  Le de Minis akonpannyen par PS Anne Lafortune e Special Advisor Mr Gerard Hoareau.  Bon apre midi e welcome parmi nou e mon ti a kontan swet en bon apre midi tou bann dimoun ki a lekout e ki pe swiv travay Lasanble Nasyonal.

Avan nou repran nou travay, mon annan en pti leklersisman ki mon anvi fer from the Chair.  Pandan Break mon’n ganny enformen par sa zournalis SBC ki ti fer sa reportaz lo sa sityasyon semen Dan Gravye dan distrik Au cap pou met serten keksoz o kler.  Sete zournalis SBC Ms Marietta Labrosse ki ti fer sa reportaz lo sa sityasyon semen.  Ms Labrosse in fer resorti ki zanmen in reste laba.  I ti en zabitan Baie Lazare e i pe reste Perseverance pandan sa dernyen 7an.  Sete son msye ki ti ganny assigned pou fer sa filming e par koensidans in sorti dan sa kominote savedir Dan Gravye Au Cap.  Li osi in fer sorti ki i ganny afekte par sa sityasyon espesyalman kot in bezwen anmenn son manman pou plizyer lannen dan sa bann peron.

An vi ki zot zournalis zot santi zot in rann lapel pou fer e assignment e i enn zot drwa pou pas en reportaz e lenformasyon ki pe afekte en kominote.  E parey Minis in dir bomaten sa kominote i konpri anviron 50 fanmir.

Vwala leklersisman ki mon ti anvi fer e mon ti a kontan remersi zot.  Bon nou pou al direkteman lo Order Paper e prosennman lo Order Paper nou annan PNQ.  Mon ti a kontan demann Onorab Ramkalawan pou li poz son kestyon pou Minis.

 

HON WAVEL RAMKALAWAN

Mersi bokou Mr Speaker.  E bon apre midi Minis Dogley, Minis Charlette e zot bann asistan.  Mr Speaker vi ki i annan de Minis mon pa ava spesifikman mansyonn Minis Tourizm, me mon ava plito demande si Gouvernman i kapab donn Lasanble tou detay konsernan bann negosyasyon lo lavant lotel well Reef Hotel.  Mersi bokou.

 

MR SPEAKER

Mersi Onorab.  Zis pou lenformasyon nou pa’n ganny Minis Finans in prezant son leskiz mon krwar i annan serten obligasyon.  I prezant son leskiz mon krwar i annan serten obligasyon.  In prezant son leskiz ki i pa’n kapab prezan avek nou me le 2 Minis mon swete a kapab reponn bann konsern bann Manm.  Minis Dogley la parol i pou ou.

 

MINISTER DIDIER DOGLEY

Mersi Mr Speaker.  Bon apre midi tou bann Onorab dan Lasanble e osi tou bann dimoun ki a lekout.  Nou pou reponn swivan mwan mon pou fer Statement lo lapar sa de Minis ki la mwan avek mon koleg Minis, Minis Charlette apre nou ava pran kestyon depandan si sa kestyon i aplike pou responsabilite ki tonm anba nou Minister. Lakonpannyen lotel Morisyen New Mauritian Hotel Limited ki plizoumwen koni isi konman Beachcomber ti’ enform Gouvernman Sesel atraver Minister Tourizm e Minister responsab pour Later en pe letan pase ki sa lakonpannyen ti annan lentansyon vann Reef Hotel.  An Mars sa lannen Dokter Krishna Malhotra ti Sesel pou rod konsey lo en konsep lotel ki son lakonpannyen i anvi konstrir lo sa teren kot lotel Reef Hotel i ete.  Le 03 Avril Departman Tourizm ti resevwar en konsep pou en proze lotel sorti kot en lakonpannyen Sud Afrique pou sa menm sit.  Resaman reprezantan New Mauritian Hotel Limited ti rann nou en vizit kot zot ti enform nou ki zot lakonpannyen in ariv en Lagreman avek Dokter Krishna Malhotra pou vann li Reef Hotel.

Mon ti resevwar en let ekrir le  31 Zilyet sorti kot CEO New Mauritian Hotel Limited ki ti enform mwan ofisyelman ki zot ti pe kree 2 nouvo holding companies, enn Reef Hotel Reef Resort Limited e lot Praslin Resort Limited ki aprezan pou own sa 2 sit lotel separeman. Dezyenmman zot ti konfirmen ki zot in antre dan en Lagreman avek Doctor Krishna Malhotra pou zot vann li sa lotel laba Reef Hotel pou re devlop sa landrwa.

Mr Speaker sa ti dernyen kominikasyon ki nou’n gannyen avek New Mauritian Hotel Limited.  An se moman napa okenn laplikasyon pou sanksyon ki’n rantre konsernan lavant Reef Hotel.  Se selman ler en tel laplikasyon i a antre ki pou nou i kler ki sa landrwa i ofisyelman pe ganny vann.  Ler i ava fer son laplikasyon pou sanksyon avek Gouvernman pou li aste bann shares dan sa lakonpannyen New Mauritius Hotel Limited ki propriyeter sa lotel, i pou ganny  enformen par bann Lotorite Seselwa lo bann tax ki pou bezwen ganny peye si  i aste bann shares ouswa propriyete li menm.

An total i annan 6.5poursan pou li peye.  Savedir 1.5poursan i pou sanksyon processing fee e 5poursan i stamp duty lo pri marse sa propriyete ouswa bann shares dan sa lakonpannyen New Mauritius Hotel Limited pou sa lotel.

Mr Speaker mon ti a kontan reasir Onorab sa Lasanble e tou bann Manm piblik ki a lekout ki Gouvernman pou fer sir ki tou bann tax ki devret ganny peye dan en tel tranzaksyon i ganny ranmase par Leta.  Mersi Mr Speaker.

 

MR SPEAKER

Mersi Minis Dogley.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker premyerman mon ti a kontan anfen  mon annan de kestyon l aki pou swiv  e de kestyon pou montre ki konmsi Gouvernman i enterese zis avek ranmas tax i pa pe regard lezot keksoz ki asosye avek sa lavant e mwan mon trouv sa i en pe malere.

Mr Speaker vi ki Reef Hotel premyerman ti ganny vann dan bann sirkonstans vreman bizar atraver Mr Mukesh Valabhji ki sa letan ti ansarz COSPROH ki li a son tour ti dan en lakonpannyen apele Indian Ocean Hotels Limited kot COSPROH ti annan 55poursan e en lot lakonpannyen Commonwealth Development Corporation ti annan 45poursan.  E vi ki COSPROH i anba en lenvestigasyon Zidisyer anba dirize par Oditer Zeneral eski Gouvernman i ava konsider aret tou demars pou fer sir ki Reef Hotel pa ganny vann dan limedya avan ki tou sa bann zafer i eklersi?  Premye kestyon.

Mon dezyenm kestyon Mr Speaker vi ki sa case konsernan lavant Reef Hotel in ganny raporte avek the Mauritius Financial Service Commission e the Mauritius stock exchange e ki bann demars pe osi al ganny fer pou raport sa demars avek the Independent Commission againstThe Independent Commission Against Corruption – ICAC Maurice akoz sa dimoun ki anvi aste Reef Hotel Dokter Malhotra parey Minis in dir ki trouv zann ansyen Prezidan e ansyen premyer Minis Maurice Onorab Anerood Jugnauth e rezon pou sase akoz i ti enkli sa msye la dokter, i ti enkli dan en fame zafer lavant lopital MedPOINT pou en son R145milyon avek Gouvernman kan dapre evalyasyon sa lopital ti vo R75milyon.  E ki premye Minis aktyel Maurice Ravin Jugnauth ki sa letan li ki ti fer sa tranzaksyon i ti Minis Finans e apre sa i ti ganny kondannen devan Lakour e ki sa case pa ankor fini parski i devan Privy Council L’Angleterre, ki pozisyon ki Gouvernman vi ki mon pe mansyonn tou sa bann keksoz, ki pozisyon ki Gouvernman Sesel pou pran an relasyon avek donn sanksyon pou sa lavant?

Eski pe zis mazin anmans larzan tax oubyen eski sa Gouvernman parti lepep dirize par Mr Danny Faure, pou ankor enn fwa anbaras Sesel lo lasenn enternasyonal e donn Sesel move piblisite e partisip atraver sa dan en aksyon koripsyon?  Mersi bokou.

 

MR SPEAKER

Mersi Onorab.  Mon a pas la parol avek Minis.  Minister.

 

 

MINISTER PAMELA CHARLETTE

Mersi Mr Speaker.  Si mon kapab reponn en pe kestyon Onorab.  Onorab ler sanksyon i vini i annan en prosedir ki nou fer ki apel en due diligence ki mon krwar en bon pe dimoun i konnen e sa bann due diligence ki nou fer se nou get file, nou get bann dokiman, nou anmas dokiman i annan en kominikasyon ki nou fer avek sa promoter, sa dimoun ki’n anvoy nou sa bann lenformasyon.  E sa bann lenformasyon i pas dan due diligence par FIU. 

So FIU i fer son due diligence apre son rezilta i re vin kot nou kot la nou al devan Cabinet nou get bann lenformasyon ki nou gannyen e then as a Cabinet nou pran en desizyon.  So si ou pe dir i annan tou sa bann keksoz ki’nmonte i pou sorti e la Cabinet ki pou fer son desizyon.

Parey ou’n dir lo kote COSPROH i annan investigation e sa mon krwar sa komite i dan e pli bon pozisyon pou dir nou ki bann lenformasyon ki zot gannyen konmsa sa i a ganny osi konsidere dan zot laplikasyon me pou le moman nou napa okenn aplikasyon sanksyon ki’n vini for the sale of Reef Hotel.  Mersi.

 

MR SPEAKER

Mersi Minis Pamela Charlette.  Mon a donn la parol Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon ti a premyerman kontan ki Minis pou Tourizm i kapab eklersi sa pwen kot in dir i annan 2 sit en ki i kapab ganny klase konman Praslin Resort Limited.  Konmsi i annan de konpannyen.  Eski sa involve osi i annan 2 sit?  Se sa ki Minis in dir konmsi eksplik nou en pe ki si apard sa sit Reef Hotel sa konpannyen i own en lot sit ki asosye avek Reef Hotel?

Mon 2enm kestyon mon ti a kontan demande si bann Minis ki la i kapab dir nou si Gouvernman in fini deside e aksepte ki si tou bann kondisyon i ganny reini zot pou les vann sa lotel avek en nouvo antreprener?  E eski Gouvernman pa’n a okenn moman konsider re apropri sa lotel pou en devlopman kelkonk vi sa santiman personnel ki bokou Seselwa i annan avek Reef Hotel e ki en sit ki kapab fer en bon pe devlopman?

Eski zot in fini deside?  Eski zot in fini konsidere pou zot re apropri sa sit e fer en nouvo devlopman ?  Mersi.

 

MR SPEAKER

Mersi Onorab.  Mon a pas la parol avek Minis.

 

MINISTER DIDIER DOGLEY

Sorry pou sa pti retar.  Mersi Onorab pou sa kestyon.  Beachcomber ouswa sa enn New Mauritian Hotel Limited ki own Beachcomber Hotel i annan trwa sit ki zot manage ouswa ki zot own isi Sesel.  Enn zot annan en lease lo Praslin Cote D’Or kot Beachcomber ti pe al fer lotel.  Apre 2enm i annan Ste Anne kot zot annan lotel.  Apre 3enm se sa lotel Reef Hotel ki zot ti own zot ti met zot staff ladan.

Ler zot in ekrir nou sa ki zot ti le fer zot ti enform nou poudir zot ti le re organiz zot finans, e konman en lakonpannyen e alor ki zot ti le fer zot ti kree 2 Holding Company.  Olye gard li parey i ti ete anba the New Mauritian Hotel Limited zot ti le kree 2 Holding Company, enn pou hold sa propriyete kot Reef Hotel pou fasilit lavant apre dezyenm zot ti le kree en lot lakonpannyen ki apel Praslin Resort Limited e li osi i pou hold sa propriyete ki lo Praslin laba Cote D’Or.

Dezyenmman konman Minis Tourizm ouswa konman Tourism pou nou sa sit kot Reef Hotel i ete, nou krwar poudir i en landrwa ki ideal pou devlop en lotel, en Resort en landrwa kot Seselwa osi i a ganny sans vini vin partisipe akoz ler Reef Hotel ti egziste parey ou’n mansyonnen i annan en kantite Seselwa ki ti frekant sa landrwa sirtou dan les Mahe.

An se moman napa en landrwa kot Seselwa vreman i kapab al pas en bon moman ek zot fanmir ouswa al en dinen.  Ou pou bezwen al bor Victoria ziska Eden Island ouswa al pli o ziska Alamanda.  I ti a bon ki i annan en propriyete e lotel parey dan sa landrwa e an menm ta ki nou’n vwar pandan sa bann dernyen lannen i annan nesesite pou annan plis lasanm a nivo 4 zetwal e upper 3 zetwal akoz ler nou – pli ale nou bann lotel i plen preski toultan i nepli annan en peak season ek en low season Sesel.  E ler i annan bann group ki le vin fer bann meeting ouswa bann levennman isi Sesel, lakonpannyen enternasyonal ki fer promosyon sanmenm sa ki vann Sesel zot vwar li difisil pou vann Sesel, akoz zot pa kapab ganny la kantite lasanm dan menm landrwa  e alor i annan en nesesite pou nou fer li.

E in view ki i pa dezirab pou al rod bann nouvo landrwa ki vyerz e pou nou i fer plis sans pou devlop bann landrwa ki’n deza devlope e re met zot a en lot lanpler ki kapab deservi dimoun ki reste dan sa landrwa e an menm tan kontribye dan lekonomi Sesel olye ki nou annan en ruin laba Anse Aux Pins ki pa pe kontribye grande chose dan lekonomi.

 

MR SPEAKER

Mersi Minis Dogley.  Onorab, non en moman.  Minis Pamela Charlette.

 

MINISTER PAMELA CHARLETTE

Mersi Mr Speaker.  Kekfwa mon kapab azoute ki anba Land Use Plan sa landrwa i deza anba touristik.  Apre osi sa later in fini ganny vann, so savedir i en later ki freehold.  Si Gouvernman i deside pou re process then i pou annan en lenplikasyon legal ki nou pou bezwen al ladan, so sa i pou bezwen annan en diskisyon, en negosyasyon somewhat pou nou kapab re process sa later.  Mersi.

 

MR SPEAKER

Mersi Minis Charlette.  Onorab Sebastien Pillay.

 

HON SEBASTIEN PILLAY

Mersi Mr Speaker.  Bonn apre midi e bonn apre midi tou dimoun.  Mr Speaker mon ti a kontan demann Minis ler zot in koz lo tax, eski zot in fer en evalyasyon endepandan lo valer sa propriyete – sa lotel as it stands ozordi?  Zot pe koz lo anmas tax sa i mon premye bout mon kestyon.

E dezyenmman prenon kont ki sa zafer kreasyon ki bann holding companies bann gran konpannyen i fer i en fason pou zot at the end of the day sey avoid pey sa bann tax ki zot devret peye.  Eski zot in fer sir pou zot fer en lenvestigasyon pou vwar si sa bann konpannyen ki pe ganny kree napa sanzman bann shares aletranze ki lamazorite larzan pe pas dan en lot ziridiksyon e nou, nou pe vwar zis en konponan sa tranzaksyon isi Sesel?  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mr Speaker lo kote tax non nou pa ankor vreman fer en evalyasyon akoz ler son amount ki zot pe mete lo sa transfer ki nou pou konnen egzakteman konbyen tax i pou peye.

 

MR SPEAKER

Yes Onorab Pillay.

 

HON SEBASTIEN PILLAY

Mersi Mr Speaker.  Mr Speaker mon ti ava ekspekte vi ki Reef Hotel i deza la nou pou esper sa lakonpannyen donn nou son valer ki i pe met lo la akoz ki Gouvernman pa rod en independent accessor e li i assess sa valer koumsa ler ou a konnen sa dimoun i avek en valer, ou ava kapab dir be i pa lozik pou ou vann sa propriyete e la ou a konnen there’s something else at play.

So why eski Gouvernman pa met sa akoz i menm kestyon ki ti souleve ler Onorab Gill Onorab Churchill Gill ti anmenn en kestyon an relasyon avek lavant en lot lotel isi ki’n ganny raporte dan medya.  Mersi.  I annan en bout mon kestyon ki pa ankor reponn Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker. Normalman nou espere avan nou fer en independent evaluator arive fer sa evalyasyon.  Me selman nou ava konsidere pou fer li en pti pe pli avan.  Me selman wi i ganny fer me selman once ki nou receive bann dokiman then nou fer en evaluation ki endepandan.

 

MR SPEAKER

Mersi Minis.  Mon krwar ou ankor annan – ou dezyenm kestyon i ankor anpandan.

 

HON SEBASTIEN PILLAY

Mon kapab re demann mon kestyon Mr Speaker?

 

MR SPEAKER

Yes Onorab Pillay.

 

HON SEBASTIEN PILLAY

Wi Mr Speaker mon krwar tou dimoun la anndan tou Seselwa i konsernen par lefe ki i annan tranzaksyon larzan ki pe involve bann gro konpannyen e baze lo sa ki nou’n lir en kantite parfwa sa bann konpannyen i incorporate zot lekor dan bann diferan ziridiksyon, e apre ler bann tranzaksyon i ganny fer nou Sesel nou vwar zis en konponan tranzaksyon ki’n ganny fer e posibleman lot konponan tranzaksyon i ganny fer elsewhere.  So sa ki nou pe demande se eski Gouvernman in met an plas en mechanism pou etidye whether or not dan sa ka spesifik sa osi i kapab arive prenon kont otour sa bann lakonpannyen ki’n ganny lefe in annan bann kestyon ki involve bann case Ankour bann envestigasyon?  So eski Gouvernman in pran sa an kont avan ki nou mazin zis lo kolekte sa bann tax ki nou devret kolekte?  Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mr Speaker mersi.  Mon krwar i menm prosesis akoz ler nou pe get dan sa ka ki la laplipar bann lakonpannyen ladan i baze Maurice ek Sesel.  So wi i  annan sa – ler zot vini avek zot bann dokiman bann sanksyon nou investigate sa bann lakonpannyen kote zot ete pou nou kapab donn zot plis lenformasyon  e apre sa nou verifye byen menm zot source of funds osi i e keksoz ki nou vreman met lanfaz lo la.  Mersi.

 

MR SPEAKER

Mersi Minis.  Onorab Bernard Georges.

 

HON BERNARD GEORGES

Mersi Mr Speaker.  Mr Speaker mersi.  Konman en dimoun ki’n pas en bon pe lannen son zenn tan dan Reef Hotel mon ti a kontan Minis kapab reponn mwan sa bann kestyon swivan;

Premyerman ki mannyer ki
Gouvernman in les Reef Hotel ki ti’n ganny aste e nou ti’n ganny dir pou ki Beachcomber ti pou fer e Hotel School oubyen en Tourism Academy pou zot bann lotel ki zot ti pou vin fer Sesel.  Ki mannyer Gouvernman in les sa kondisyon ler zot ti aste tonm dan loubli e les Reef Hotel ariv sa leta ki i ete ozordi ki enpitwayab ler pou pase dan semen?

E dan sa menm laliny ki mannyer eski Gouvernman in les Beachcomber asiz lo sa morso later Cote D’Or Praslin ki prime hotel development site e pa fer nanryen depi zour ki zot in acquire sa lease lo sa landrwa, san fors zot devlop sa de landrwa dan la fason ki zot ti’n promet zot ti pou fer ler zot in ganny bann konsesyon pou zot vin invest isi Sesel?  E lo sa – dan sa konteks eski Minis kekfwa Minis Charlette ti a kapab eksplik nou akoz Minis Tourizm in koz lo de tax 1.5poursan sanction application fee e 5poursan stamp duty.  Oli sa konponan sanction duty ki zeneralman tou bann etranze ki aste en propriyete isi Sesel i bezwen peye ki mont ziska 11poursan ankor, pou fer sir ki pouvoir l’achat etranze e pouvoir l’achat Seselwa i vin en pe lo klarite.

E dan sa konteks mon dernyen morso kestyon eski Minis i kapab konfirm ek sa Lasanble ki olye zis fer en deal parey nou’n ganny dir ant Beachcomber Maurice avek en lot envestiser Morisyen ki zot ava donn loportinite ki okenn lenvestiser Seselwa ki anvi aste sa landrwa pou fer sa devlopman pou fer li an premye parey ti toultan le ka ler sanksyon ti ganny applied fo ?  Mersi Mr Speaker.

 

MR SPEAKER

Mersi Onorab Georges.  Minis.

 

MINISTER DIDIER DOGLEY

Mersi Mr Speaker.  Konsernan envestisman Seselwa dan sa landrwa lenformasyon ki nou nou’n gannyen se ki ti annan en lakonpannyen ki ti’n tender ouswa ti pe rod bann buyers partou aletranze, pou gete lekel ki enterese.  Akoz sa prosesis pou vann Reef Hotel i pa en keksoz ki’n konmans yer in konmans en pe letan.  E i annan plizyer lakonpannyen ki’n montre lentere petet ti’n devret anons li osi Sesel en pe plis ki kekfwa bann Seselwa ki ti enterese e ki annan sa mwayen pou aste sa landrwa zot osi zot ti’n kapab met en lentere devan ouswa met en serten sonm devan ki zot pare pou aste sa landrwa.

Akoz parey mon’n dir dan sa Statement ki mon’n fer o komansman i ti annan menm en lakonpannyen Sud Afrique ki ti’n vin isi Sesel ki ti’n montre lentere.  Alor menm parey ti annan bann lezot lakonpannyen dan larezyon ki’n montre sa lentere mon krwar wi ti a posib pou Seselwa osi montre lentere e partisip ladan.

Petet bann lenformasyon pa’n bouz ase widely isi Sesel parey kekfwa i ti’n kapab fer li.  Me solman i pa en keksoz ki’n ganny kasyet.  I pa en keksoz ki’n ganny toufe i en keksoz ki ti o kler e nenport dimoun ki ti anvi envestir ti annan loportinite pou fer li.

Dezyenm keksoz se ki konsernan Reef Hotel avek sa propriyete prime development land laba – nou’n rekonnet poudir i annan en defayans konsernan sa bann landrwa ki malerezman i annan bokou bann dimoun ki’n vini zot montre lentere; zot vin akont nou en pake zistwar pou dir zot pou fer sa, zot pou isi, zot pou fer laba apre apre en serten letan ler ou’n siny Lagreman, nou vwar poudir zot pa neseserman delivre dapre ki zot in dir nou pou fer.

E sa i en keksoz ki dan Minister ki nou rekonnet, e ki nou’n vwar nesesite pou revwar lafason ki nou, nou travay avek sa bann propriyete.  E menm avek sa Moratorium i pou ed nou akoz nou pa kapab devlop lezot landrwa, nou pou bezwen revwar e nou pe revwar tou sa bann site ki egziste, kot ti annan lotel dan lepase.  E ki nou’n allocate pou fer lotel pou fer sir ki sa bann keksoz i bouze e ki nou arete sa zafer donn plis propriyete swa vann propriyete e ki a lafen nou ganny bann envestiser ki malonnet e ki pa neseserman delivre lo zot promes ki zot fer avek Gouvernman.  Mersi Mr Speaker.

 

MR SPEAKER

Mersi Minis.  Onorab Georges.

 

HON BERNARD GEORGES

Mersi Mr Speaker.  Mr Speaker, mersi Minis pou ou repons me i annan enn ki Minis pa’n tous lo la.  E sa se sa kestyon sanction duty 11poursan ki’n ganny aplike e mwan mon kapab donn zot en lalis bann dimoun ki’n ganny aplike.

E dezyenmman eski Minis i konfirmen ki avan ki sa proze pou sanz lanmen etandonnen bann defayans ki Minis li menm li in aksepte ki’n arive par lepase ki okenn permisyon pa pou ganny donnen, pou en etranze aste sa lotel a mwens ki parey in ganny fer dan lepase sa tranzaksyon i ganny advertise isi Sesel e loportinite i ganny donnen a Seselwa pou zot envestir? E si napa se selman la ki Gouvernman ava konsider vann avek etranze.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Si mon kapab Mr Speaker si mon kapab reponn regarding sanction.  Sanksyon pou le moman ler mon pe gete i 1.5% apre i annan en sanction processing fee ki ler ou fer ou laplikasyon ou ganny R1000 par ou laplikasyon.  So si ou pe dir mwan 11% i kapab i annan en range up to 11% ki sa i ganny konsidere.

 

MR SPEAKER

Mersi Minis.  Onorab Georges.

 

HON BERNARD GEORGES

Non, Mr Speaker mon krwar nou pe koz at cost purposes la e i enportan pou nou ganny sa byen kler.  Ler ou fer e laplikasyon pou ou ganny sanksyon ek Gouvernman ou bezwen pey 1.5poursan that’s the sanction application fee.  Sa ou peye e i pa ranboursab.  Si sanksyon i non ou’n perdi sa se 1.5poursan.  Ler ou transfer shares, oubyen later, tou dimoun etranze konman Seselwa i pey 5poursan sa se stamp duty.  Donk deza ou’n ariv 6.5poursan e se sa 6.5poursan ki Minis Tourizm in koz lo la taler.  Sa i byen sa i normal i aplikab.

Me on top of that i annan en keksoz ki apel sanction duty ki Minister i sarze – pa dan tou ka me i annan lamazorite ka kot en etranze i aste en propriyete isi Sesel zot sarz li 11poursan sanction duty par lao sa 6.5poursan, pou fer ki Seselwa i ganny en pouvoir d’achat ki lo parite avek en etranze, pou fer sir ki etranze pa toultan akoz zot annan plis mwayen kapab aste later e les Seselwa ater.  Se pou sa rezon ki mon ensiste lo sa sanction duty ki pa’n ganny mansyonnen pou konnen eski i pou annan or eski pou annan en advertising sa lavant, pou ki Seselwa an priyorite i kapab vin devan e se selman si napa Seselwa ki etranze a kapab aste?  Mersi.

 

MR SPEAKER

Mersi Onorab Georges.  Minis.

 

MINISTER PAMELA CHARLETTE

Mr Speaker pou mon kapab reponn sa kestyon mon ava verifye regarding  sa 11% en akoz mwan tou sa ki’n pas devan mwan in 1.5% me selman any dues ki sa lakonpannyen pou owe pou bezwen – nou pou bezwen fer li peye.  Mersi.

 

MR SPEAKER

Mersi Minis. Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Ministers ek zot delegasyon. Mr Speaker de keksoz.  Enn – eski Minis i kapab dir nou konbyen Reef Hotel e sa sit osi Praslin ti ganny vann originally?

Dezyenmman donn en latasman e valer istorik Reef Hotel, nou Lasanble atraver kestyon mon krwar i pe lans en lapel tre, tre for avek Gouvernman pou gard sa sit dan lanmen devloper Seselwa.   Konmsi nou pe dir i devret annan en restriksyon ki sa sit i devret reste touzour dan lanmen Seselwa.  Pa devret ganny transfer ek etranze.  E mon ti a kontan ganny gidans nou bann avoka dan Lasanble osi pou regarde kwa ki kapab ganny fer pou nou anpese ki Reef Hotel i ganny transfer dan lanmen etranze ki reste a devloper Seselwa.

E mon ti ava kontan alor Minis i dir nou ki zot konman Seselwa de natif zot in fer dan sa direksyon pou gard sa propriyete a valer e latasman istorik tre for dan lanmen Seselwa.  Nou pa oule ki sa i ava ariv parey La Bastille, Venn House ensidswit; gran mersi mon krwar sa in retourn back.  Be nou pa kapab kontinyen les sa bann zafer arive dan nou pti pei dan nou zoli pti pei.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Zis pou mwan retourn lo sa ki Onorab Georges in demande regarding sanction duty.  Lenformasyon ki nou annan se sa 11% i pou bann ki pe purchase property for residential purposes.  Residential homes.

 

HON BERNARD GEORGES

(Off-Mic)

 

MR SPEAKER

Ok kontinyen Minis.

 

MINISTER PAMELA CHARLETTE

Mersi Mr Speaker.  Zis donn mwan en pti letan Onorab pou mwan gete dan mon file si kekfwa mon annan lo lavant later.  Me parey mon’n dir si Gouvernman pou deside pou pran sa later i bezwen annan en kart legal ki nou bezwen fer anba la akoz i deza freehold.  Savedir sa dimoun in fini aste i pou li, so nou bezwen antre dan en negosyasyon legal pou kapab fer li.  Mersi.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Wi still mon ensiste ki zot reponn mon kestyon, lekel sa dimoun zot kapab dir nou lekel sa dimoun ki’n aste?  I freehold lekel ki’n aste e konbyen originally sa propriyete ti ganny transfer sa ki mon pe demande ek sa enn Praslin?  E prezan mon’n demann sa bann lezot kestyon ki zot pe dir nou lo la.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Onorab pou le moman Reef Hotel i anba Ste Anne Resort Limited ok?  E la ki i annan sa restriktirasyon ki zot pe fer li an 3 diferan subsidiary. E Ste Anne Resort Limited li, i own by the New Mauritius Hotels Limited which is the ultimate beneficial owner – ok?  Ler ti vann an 2001 – Mr Speaker lavant avek Ste Anne Resort Limited ti 1.5million US Dollars. 

 

MR SPEAKER

Dolar ti R6 sa lepok non?  Minis lo sa propriyete Praslin eski ou annan lenformasyon lo sa lease lo sa propriyete Praslin ki lot part kestyon?

 

MINISTER PAMELA CHARLETTE

Onorab nou napa pou Praslin nou’n anmenn zis pou Reef Hotel.  Me selman i en lease li i pa’n vann.

 

MR SPEAKER

Ok.  Onorab De Commarmond.

 

HON CHARLES DE COMMARMOND

Wi mon – eski sa larepons ki Minis in donnen i vedir ki Reef Hotel in fini transfer dan lanmen etranze, sa konpannyen i en konpannyen etranze i deza dan lanmen etranze?  Vreman nou konsernen en kantite.  Mwan mon anvi gidans petet tou bann avoka isi pou kapab vwar kwa ki kapab ganny fer pou nou fer serten sanzman dan sa bann zafer.

Me selman petet zot pa ti la letan sa in sanz in transfer e mon annan en konsern, ler bann keksoz bann propriyete avek valer istorik, sa grander la, pou transfer dan lanmen etranze.  Mon vreman, vreman sagren dan sa sityasyon si sa in fini ganny fer me, mersi pou sa lenformasyon.

 

MR SPEAKER

Mersi Onorab de Commarmond.  Onorab Churchill Gill.

 

HON CHURCHILL GILL

Mersi Mr Speaker.  Bon apre midi le 2 Minis, delegasyon.  Minis mon kestyon i lo sa lease Praslin akoz sa lease i annan en bon pe lannen menm ki i la.  As we speak la ozordi eski ou Minister i annan okenn lenformasyon ki pou arive avek sa landrwa si pou annan okenn devlopman ki pou al ganny fer in the near future la?  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mersi Mr Speaker.  Mr Speaker konsernan sa propriyete Cote D’Or Praslin.  Nou’n fini ekrir Beachcomber pou dir zot depi lannen pase pou dir zot bezwen anvoy en Komikman kwa ki zot pe fer ek sa propriyete laba Praslin, e nou’n donn zot ziska Oktob sa lannen pou zot reponn nou e eksplik nou ki pou fer si non nou pa ganny okenn komitman e nou pou bezwen akoz i annan sa Moratorium akoz nou pou bezwen pran sa bann lasanm at least en serten nonm ki’n ganny committed dan sa site e donn lezot dimoun ki enterese pou fer devlopman deswit.  E an menm tan nou pou bezwen angaz nou avek zot, ki enn fwa pou tou ki nou bezwen ganny en desizyon ferm si vreman zot annan larzan pou envestir ouswa si Gouvernman i bezwen repran sa lease so ouswa zot bezwen vann sa lease ouswa bezwen vann sa lease avek en lot lakonpannyen, ki annan larzan e ki anvi envestir isi Sesel.  Mersi Mr Speaker.

 

MR SPEAKER

Mersi Minis.  Onorab Flory Larue.

 

HON FLORY LARUE.

Mersi Mr Speaker.  Bonn apre midi tou dimoun.  Bonn apre midi Minis.  Anliny avek kestyon lo kote – sa propriyete ti belong to  COSPROH e COSPROH ti entity Gouvernman e ozordi nou vwar ki Prezidan in set up en enquiry le 11 juillet 2018.   I ti set up en commission of enquiry pou bann assets pou COSPROH.  Anliny avek sa lenvestigasyon e lefe ki sa dimoun ki’n aste ti’n state byen klerman ki sa i freehold sa i sa original purchaser ki ti aste a 2001 avek Indian Ocean Hotels.  Eski i annan okenn keksoz ki nou kapab fer anliny avek sa lenvestigasyon, lefe ki sa propriyete ki plis ki 31mil met kare grander ti en asset Leta?

Mon dezyenm kestyon i lo sa lease pou Praslin.  Minis ti dir nou letan nou ti pe diskit bann lease ki Gouvernman i annan e ki dimoun pa pe devlop later, ki tou bann lease ti pou ganny re assess.  Dan sa ka lefe ki sa propriyeter in kit sa dormant, eski nou pou allow en sale of sa lease ki en lot devloper olye repran sa propriyete back pou Gouvernman?  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Keksoz ki Gouvernman i pou bezwen fer akoz la pou le moman napa okenn aplikasyon pou nou – pou vann shares so i plito nou les sa Komite fer son lenvestigasyon pou nou kapab pran nou desizyon.  Regarding pou re assess wi ti annan en re assessment ki nou ti fer me sa nou osi konpran par Minister Tourism that ki deza sa promoter oubyen sa dimoun ki own sa lease in ganny kominike e la nou, nou ava ansanm avek Tourism nou a gete si sa lease pou Côte D’Or pou terminen.

Mr speaker sa i en lease pou e devlopman Nasyonal ki pou osi dan lentere Sesel; savedir nou bezwen fer sir ki nou desizyon ki nou pran i dan lentere piblik e osi lo kote nou devlopman ekonomik lo kote Tourism, akoz i ti deza dan lalis bann lotel ki ti pou fer devlopman lo la.  Alors Tourism parey in dir, in fini ekrir promoter pou demann li son plan ki pou fer ek sa later, e then once ki nou ganny en larepons then nou a konnen ki desizyon pou fer.  Mersi.

 

MR SPEAKER

Mersi Minis.  Onorab Larue.

 

HON FLORY LARUE

Mersi Mr Speaker.  Mersi Minis pou ou larepons.  Mr Speaker atraver ou mon ti a kontan demann Minis ki lefe ki nou pe koz lo lentere Nasyonal nou pa kapab zis regard ozordi akoz en propriyete ki ti belong to Gouvernman ki fer ki ti belong pou lepep Seselwa, apre an 2001 i ganny vann pou R9milyon, letan dan son leta orizinal ler i ti ganny konstri ti kout R14milyon dan bann lannen ‘70 nou bezwen konman en Lasanble demann Gouvernman pou fer sir ki state assets ki’n change hands at en low pri parey Onorab Pillay in eksplike, bann tranzaksyon kot larzan pa parey.  Pa’n ariv zis aletranze in ariv isi osi letan bann State assets ti change hands.

Alor dan ka Reef Hotel ki ti en asset COSPROH eski Gouvernman in demann Registrar pou advice bann owners of COSPROH properties ki i annan en lenvestigasyon pe go on e right now zot propriyete pa free pou bouze!  Akoz i anba investigation akoz si sa sale i ganny trouve pa ti legal nou bezwen kapab repran nou assets, akoz ti pou Leta sa.   Mon ti a kontan konnen si nou pe pran bann enquiry ek sa bann propriyete o serye silvouple?  Dan lentere Nasyonal. Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Onorab wi nou pe pran li o serye sanmenm ki nou’n fer nou’n pran tou file nou’n anvoy kot AG’s Office osi pou li kapab konmsi gid nou lo bann pozisyon e bann keksoz ki pe vini  pou le moman.  Mersi.

 

MR SPEAKER

Mersi Minis.  Onorab Larue.

 

HON FLORY LARUE

Mr Speaker mersi bokou.  Me lo sa pwen mon ti a kontan osi advice Minis ki dan file sa propriyete S121 i annan zis en papye; sa lavant kot Ste Anne i aste sa later.  History sa propriyete napa! Pourtan in ganny rent avek diferan entity avek Hotel Management Company an ‘95 pou apepre 30milyon.  Dapre mon konpran napa dokimantasyon pou sa propriyete.   Mon’n fer resers e napa so sa osi i en keksoz ki nou bezwen fer li disponib ki letan en seselwa i anvi al gete ki’n arive ek sa asset i kapab vwar me napa dokimantasyon dan sa file.  Mersi.

 

MR SPEAKER

Mersi onorab.  Minis ou kle fer en komanter?

 

MINISTER PAMELA CHARLETTE

Sorry Mr Speaker.  Non mon pe zis mazinen ki file ki kot Registrar oubyen ki kot nou Departman.

 

HON FLORY LARUE

Mr Speaker mersi.  Atraver ou – Minis sa file i kot Registrar solman i en entity Gouvernman.  Tou bann dokimantasyon i bezwen azour e letan mon regard dan sa file i annan zis en papye pou sa propriyete.  Mersi.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Kot nou osi nou annan en pe dokiman lo la.  Nou annan en pe dokiman lo file Reef Hotel so i annan en pe dokiman ki nou kapab, mon pa konnen kwa ki dokiman ki Registrar i anmase, me solman nou osi nou anmas en pe bann dokiman.  Mersi.

 

MR SPEAKER

Mersi Minis. Onorab Basil Hoareau.

 

HON BASIL HOAREAU

Mersi Mr Speaker.  Minis premyerman an relasyon avek sa lease Beachcomber ki annan Praslin mon pou dezagree avek ou Minis letan ou’n dir akoz i dan lentere Nasyonal pou annan en devlopman lotel laba ki nou pa devret pe konsider konman cancel sa lease.  Vi ki zot pa’n fer zot devlopman within the stipulated time.  Parski mon mazinen poudir i mal i pa fair lo lezot dimoun ki nou Gouvernman pe dir zot pe al pran lease sa bann dimoun akoz zot pa’n fer zot devlopman within the stipulated time.  Pou nou anmenn consistency annan fairness, mon krwar i pou enportan ki nou repran sa lease.

Mon krwar Policy ki Gouvernman in deklare dan Lasanble, kot i ti’n dir i pou pran lease bann dimoun ki pa’n devlop zot bann bout later ki zot gannyen lo Providence, bann reclaim land i fair ki Gouvernman i anba en lobligasyon pou repran sa lease ek Beachcomber vwar vi ki zot dan menm kategori.  Sa i enn.

E dezyenmman Minis Onorab Pillay in fer sorti sa pwen pou dir ki ou riske annan bann sityasyon kot e i paret mwan ki menm ou larepons ki ou’n donnen pou dir menm sa bann companie Morisyen la pe aranz zot lakaz dan en fason ki evantyelman sa tranzaksyon transfer shares pou ganny fer Maurice – ki li Sesel nou pa pou anmas sa sanction duty ki Onorab Georges in dir ki zeneralman i korek.  I apepre, sanction duty i dir ou i from between 0% to 30%.  Me zeneralman practice ki Gouvernman in fer pou le moman i dan 11poursan.

E i riske ki nou pa anmas sa akoz zot fer zot tranzaksyon Maurice.  Mwan mon krwar poudir premyerman Lalwa ki mannyer in ganny drafte i kler pou mwan.  I kler pou mwan mon krwar i annan en misinterpretation ki nou devret kapab pe anmas sa larzan menm si sa tranzaksyon i Maurice, me petet ki nou devret fer pou asir sa pou fer li vin – pou tighten the rope, konmsi nou fer li plis – fer sir ki zot pa nobou annan en landrwa pase.

Letan zot ganny sanksyon si nou donn zot sanksyon. Pou zot re aranz zot bann companie, nou fer li en kondisyon poudir menm si sa tranzaksyon i ganny fer an deor Sesel zot pou bezwen pey sa sanction duty.

Nou met sa en kondisyon zot sanksyon ki zot gannyen; savedir sa pou letan zot fini aranz zot companie parey ou pe dir pou zot evantyelman selman si zot deside vann sa lavant ki’n ganny mansyonnen i take place, then zot a still oblize pey nou, nou sanction duty zis parey zot ti pou peye si sa tranzaksyon ti’n take place Sesel.  Me solman mon krwar Lalwa i kler me petet si nou fer li pli kler nou devret re get Lalwa.  Mersi.

 

MR SPEAKER

Mersi Onorab Hoareau.  Minis.

 

MINISTER PAMELA CHARLETTE

Mersi Mr Speaker.  Mr Speaker regarding Beachcomber lease wi nou bezwen esper son larepons from Tourism pou nou konnen si nou pou re pran sa lease.  Lo kote sanction duty wi as much as possible nou ki nou fer ler i annan en demann pou sanksyon nou fer sir ki tranzaksyon i pas isi koumsa nou anmas maximum larzan ki nou kapab.  Nou donn advice sa bann envestiser par egzanp through en local company isi Sesel.  Nou fer zot fer zot lakonpannyen e koumsa larzan i ganny pase – tranzaksyon i ganny pase Sesel.

 

MR SPEAKER

Mersi Minis.  Onorab Hoareau.

 

HON BASIL HOAREAU

Minis mon krwar mon pou dezagree mon pa krwar nou devret esper zot larepons.  Mwan mon krwar si zot in breach zot in breach; akoz sa bann dimoun si nou pou apply sa mezir nou devret sa ek bann dimoun tou ki’n breach zot lease an relasyon ek bann reclaim land.  Nou devret dir ek zot nou pe donn zot en pe letan pou zot al build – si zot pa pe build then nou pe repran.  Me si nou dir nou pe al repran la then the same prensip i devret ganny apply avek Beach Comber akoz i pa fair sansan.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Onorab.  Nou ava konsidere pou fer sa ansanm ek Tourism nou ava diskite.  Mersi.

 

MR SPEAKER

Mersi Minis.  Onorab Ahmed Afif.

 

HON AHMED AFIF

Mersi Mr Speaker.  Mr Speaker mon ti a kontan demann Minis si i pou pare pou konsider 3kondisyon anba lakel zot donn sanksyon pou en tel deal pou vann sa later kot Reef Hotel?

(1) se premyerman ki zot demann sa lakonpannyen ki i bezwen advertise sa lavant dan marse lokal e donn Seselwa sa premye sans pou kapab fer en lof.

Dezyenmman ki zot met en kondisyon dan sanksyon ki zanmen i bezwen ganny vann ki zot pa a met 11poursan, zot kapab met 50poursan duty si i vann ek en etranze.  En sanction duty 50poursan si i vann ek etranze.  Si ek en Seselwa tarif normal i aplike.

E trwazyenmman, konman en kondisyon, ki zot bezwen rann sa later Praslin, parske zot pa’n devlope e zot pe al fer en gro benefis atraver en tranzaksyon ki klerman Sesel ki pe perdi then i rezonnab pou ou dir ek zot be ou osi ou a fer en profi dan sa lavant parski ou pe al devlop ou lotel Ste Anne, me selman Leta Seselwa ki’n larg en byen ki annan en kantite valer ki li ki pe al realize e Leta Seselwa pa pou al realiz preski nanryen i met en demann ki rezonnab.  Eski zot pare pou konsider sa trwa kondisyon?  Mersi.

 

MR SPEAKER

Mersi Onorab Afif.  Minis.

 

MINISTER PAMELA CHARLETTE

Mersi Mr Speaker nou ava konsider bann sizesyon ki Onorab in anmennen apre nou ava diskite avek bann stakeholders pou nou pran en desizyon.  Mersi.

 

MR SPEAKER

Mersi Minis.  Onorab Henrie.

 

HON GERVAIS HENRIE

Mersi Mr Speaker.  Bonn apre midi tou dimoun.  Kestyon mon ti ava kontan demann Minis.  Minis Tourizm in mansyonn kestyon bann lasanm Reef Hotel, akoz enn bann lenformasyon ki dan domenn piblik se ki en- sa rekonstriksyon Ste Anne Resort bann lasanm Reef Hotel in ganny mansyonnen pou transfer lo sa zil pou fer vin 245 lasanm olye 87 Villa.  So prezan avek sa propozisyon pou vann Reef Hotel mon ti ava kontan demann Minis ki mannyer sa laranzman pou marse?  Sa i premye kestyon.

Dezyenmman Reef Hotel mon rappel byen ansyen Minis Devlopman Nasyonal Mr Jacquelin Dugasse in deza vin reponn en bann kestyon lo sa sit si mon memwar i servi mon byen an 2008 apepre dan Katriyenm Lasanble e ti annan en lenformasyon ki ti partaz avek Lasanble ki Gouvernman en letan ti pe sey re aste Reef Hotel e bann dimoun Indian Ocean Resort the owner zot ti pe demann Gouvernman 3milyon e Gouvernman ti pe dir be get sa non akoz ou’n aste (1.5 nou’n dir ouswa)  1.5 prezan ou le vann mwan 2 fwa plis e mon pa pou aste.  So si sa ti depi an 2008 sa lenformasyon in vin dan domenn piblik…depi sa mon anvi konnen baze lo kestyon ki Onorab Georges in demande menm kestyon ki Onorab De Commarmond in demande, eski in annan en zefor, en linisyativ lo lapar Gouvernman prenon kont sa lenportans istorik Reef Hotel  – i enn bann premye lotel in menm annan bonm laba ki’n petet konmsi dan listwar Sesel in telman enportan Reef Hotel, si in annan sa zefor sa linisyativ lo lapar Gouvernman pou fer sir ki Reef Hotel i retourn dan lanmen Seselwa?  So sa i mon de kestyon Mr Speaker.  Mersi.

 

MR SPEAKER

Mersi Onorab Henrie.  Minis.

 

MINISTER DIDIER DOGLEY

Mersi Mr Speaker.  Konsernan lakantite lasanm ki ti pou annan lo Ste Anne avek Reef Hotel i ti annan bann diskisyon ki ti pase lannen pase e boner sa lannen avan ki mwan mon ti pran sa portfolio kot Minister ti pe konsider transfer lakantite 75 lasanm sorti kot Reef Hotel pou konmans devlopman ki pou fer lo Ste Anne e gard larestan pou Reef Hotel.  Be apre ler zot in asize zot in re diskite zot in vwar poudir Ste Anne i annan kapasite pou pran sa 295 lasanm e ki Reef Hotel sa 7 arpan later ki i annan laba i annan sa kapasite pou li retain sa kantite lasanm alor i pa fer sans pou senpleman koupe senpleman akoz ou anvi koupe.  Ou bezwen fer bann desizyon baze lo kapasite sa landrwa si i kapab pran sa kantite lasanm dan en fason ki son dansite i pa al overboard.

E a lafen zot ti pran desizyon zot ti dir ok gard Reef Hotel ek son 150 lasanm a lafen i pou annan EIA ki pou ganny fer e sa EIA li i pou determinen si sa landrwa i kapab pran sa kantite lasanm ouswa non.  E menm keksoz avek Ste Anne. Menm lozik menm fason panse ti ganny aplike pou Ste Anne, me Ste Anne son EIA in fini ganny fer e bann rekomandasyon in fini met a dispozisyon Beachcomber.  Konsernan lavant Reef Hotel an 2008 mon napa sa bann detay.  Sa ki Gouvernman i enterese avek se ki Reef Hotel i ganny re devlope a en nivo ki pou nou sirtou dan Tourism ki a nivo en 3 Star Plus ouswa en 4 Star Hotel me solman ki annan ase loportinite pou dimoun dan sa rezyon pou vin partisipe e osi zwir sa propriyete e non pa selman pou touris.

Alor ozordi nou ganny diskisyon lo ki seselwa i devret annan priyorite pou aste.  Si i annan Seselwa ki annan sa sonm nou ava re diskite nou ava vwar si i a kapab re ganny met anler lo tender e bann Seselwa hopefully pa bann ki pe front pou lezot dimoun i a ganny sans pou partisip dan sa tender.  Mersi Mr Speaker.

 

MR SPEAKER

Mersi Minis.  Onorab Henrie.

 

HON GERVAIS HENRIE

Mersi Mr Speaker.  En follow- up lo sa zafer Ste Anne avek lasanm.  Anliny avek kestyon Onorab Gill eski Ste Anne Resorts si i annan en koneksyon avek sa later Côte D’Or e si zot in fer okenn propozisyon pou sa later Côte D’Or, akoz i paret ki dernyen fwa ki nou’n koz lo sa Memoratoryonm bann lotel ti annan 18 ki ti ganny site e Côte D’Or li i pa ti feature, i pa ti feature.  So alor pou annan pou napa eski Ste Anne pou fer en propozisyon pou laba mon ti ava kontan zis klarifye lo la silvouple?  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mersi Mr Speaker.  Mr Speaker lenformasyon ki mon annan ziska prezan – annefe ler Departman Tourizm in ekri Beachcomber lannen pase pou dir zot ki zot bezwen donn enkli proze Concept devlopman pou sa landrwa lo Praslin pli tar Oktob sa lannen – mwan prosen, nou’n ganny en let ki zot in ekri apre ki zot ti ganny sa  let ki Departman in ekri zot, zot ti re ekri Departman e zot in dir ek Departman koumsa ki konmansman sa lannen zot pou donn en plan ki pou donn lenformasyon ki mannyer zot annan plan pou devlop sa landrwa.

Me malerezman la ek Septanm sa plan pa ankor antre ziska prezan; savedir mwan prosen nou pou bezwen pran en desizyon final lo sa.  Lenformasyon ki mon annan mon konpran wi Beachcomber ti ladan me solman akoz mon napa sa bann dokiman la devan mwan les mwan mon a konfirmen apre mon a les zot konnen.  Mersi Mr Speaker.

 

MR SPEAKER

Mersi Minis.  Onorab Woodcock.

 

HON WAVEL WOODCOCK

Mr Speaker lo menm laliny ki Onorab Henrie in demande.  Annefe mon annan sa lalis avek bann lotel ki ti ganny eksklir dan sa Moratorium.  Côte D’Or pa enkli ladan sel leksepsyon ki ti ganny fer ti ganny fer pou lotel ki ti pou fer Anse Lazio.  Praslin i annan zis de lotel ki ti ganny eksklir sa sete Anse Boudin e Anse Lazio.  Napa okenn lotel ki ti ganny fer Côte D’Or ki ti ganny excluded MoratoriumSo alor mon kestyon is, eski nou vwar Gouvernman prezan pe servi de pwa de mezir ki sa Moratorium, pe aplik zis pou serten konpannyen e i annan bann konpannyen ki zot pe fer leksepsyon.  So if that is the case then what is the point of having a Moratorium?  I sipoze fini at the end of 2020.  Mersi.

 

MR SPEAKER

Mersi Onorab.  Minis.

 

MINISTER DIDIER DOGLEY

Mr Speaker ler ou fer en desizyon lo devlopman dan le fitir, ou pa kapab fer li vin retrospective.  Si ou’n fini donn en dimoun en let, en laprouvasyon poudir i kapab go ahead ek son proze e li in fini fer bann tranzaksyon pou li devlop sa landrwa, ler ou pran desizyon ou pa kapab fer li retrospective, akoz sa dimoun i kapab sue ou e demann ou konpansasyon.  E mon pa konnen ki lalis ki Onorab i annan sanmenm sa ki mon’n dir les mon tyek sa lalis ki Minister i annan, pou fer sir poudir nou annan the right lease.  E dapre PS wi i ti lo lalis e nou, nou pe demann zis donn nou loportinite, pou nou al retir nou lalis pou nou tyeke pou fer sir si i korek e nou, nou ava anvoy kot ou, pou fer sir nou ganny the right lease e non pa ki nou annan en diskisyon i annan en lalis isi i annan en lalis laba.  Mersi Mr Speaker.

 

MR SPEAKER

Mersi Minis.  Mon a pran de dernyen kestyon Onorab De Commarmond apre loter kestyon Onorab Ramkalawan.  Onorab De Commarmond.

 

HON CHARLES DE COMMARMOND

Mr Speaker mersi.  Zis en pti leklersisman.  Ou konnen i annan en relasyon ant Reef Hotel avek Ste Anne la, akoz konpannyen mon krwar ki’n aste prezan 250an an 2020 legzistans nou Nasyon.  Nasyon Seselwa.  Premye ti vini an 1770 Ste Anne e prezan savedir Ste Anne li i en sit pli istorik ankor ki Reef Hotel, si ou le Ste Anne se sit nou legzistans berso nou legzistans konman en Nasyon konman en pep.  E prezan mon zis anvi demann en pti kestyon si zot okouran petet.  I annan en pti bout later lo Ste Anne ki reste pou Leta pou Gouvernman ki nou kapab fer selebrasyon nou 250an – somewhere laba konmsi pou dir ki nou dimoun ava konnen laba nou pep, nou popilasyon ti konmanse.  Mersi.

 

MR SPEAKER

Mersi Onorab De Commarmond.  Minis.

 

MINISTER PAMELA CHARLETTE

Mersi Mr Speaker.  Mr Speaker an zeneral later mon krwar i ankor pou Leta.  Ste Anne i ankor pou Leta, i ankor pou Gouvernman Sesel so si i annan posibilite pou fer parey ou pe dir pou fer – zot fer demann kekfwa Leta i ava konsidere.  Me selman later i ankor pou Gouvernman i zis ki in lease.  Yes the whole island wi me selman i still dan posesyon nou Gouvernman.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Onorab de Commarmond in donn mon en laliny la pou mwan pa bann laliny ki zot vann lo ghetto me en laliny pou mwan kapab antre ladan.  Mr Speaker be zisteman Ste Anne li osi tou i annan en lease ki zot in fer avek Mr Francis Savy.  Be sa lease la depi en bann letan.  Ki bann kondisyon sa lease?  Parski i osi tou i en lease ki devret fini pran.  Parski letan lo komite zil letan pe koz lo lease pe tann dir pou repran lease avek Mr Siva Coetivy akoz i pa’n garde.  Lot pa’n garde, be akoz ki zisteman sa lease lo Ste Anne i pe la re ganny pran.  Repran nou later – cancel okenn lease akoz kondisyon bann lease pa’n ganny garde.

Apre sa Beachcomber– sa later laba Côte D’Or i kler ki poudir kondisyon – e la mon dakor antyerman avek Onorab Hoareau, ki poudir kondisyon in kase.  E an plis ki sa letan pe koz lo lotel ensidswit, ki mannyer – parski la avek tou respe pou Minis Dogley Minis Loustau-Lalanne sa lalis ki ou pe demande kote Onorab Woodcock in gannyen, se Minis Loustau-Lalanne ki ti donn sa lalis isi dan Lasanble alors nou tou nou annan sa lalis e Côte D’Or pa lo la, e i ti eksplik byen ki poudir se zis bann lotel bann lakonpannyen ki’n annan zot later e ki’n deza donn en konsep lo ki mannyer keksoz pou devlope, ki ganny enkli dan sa, ki ganny eksklir plito dan sa Moratorium.  E alor mwan mon krwar ki lo sa kote la mon krwar ki fodre pa ki nou pe, fodre pa ki nou pe sot isi sot laba, pou nou kapab fer tou bann – konmsi pou nou rod leskiz.

Dezyenmman nou’n osi tann Prezidan nonm bann konblaz.  Bann konblaz ki pou ganny fer e en serten moman ti annan propozisyon konblaz Anse Aux Pins.  Ti nonmen ki poudir Anse Aux Pins i enn sa bann landrwa kot kapab fer en konblaz.  Eski sa proze i ankor la?  Oubyen eski avek sa devlopman lotel ensidswit, konmsi donn nou en pe leta sa sityasyon parski sa definitivman pou annan en lenpak direk lo okenn devlopman lotel.

I mean si ou pe fer en konblaz ki pou pas ora sa lotel, swa li i pou a aste sa later ki devan li oubyen i pou al afekte son devlopman.  Mon ti ava kontan si nou kapab ganny en pe detay.  Me finalman Mr Speaker mwan osi tou mon krwar ki i kler parski mon osi mon’n dan sa Lasanble pandan en long letan e bann deklarasyon Minis Dugasse i bann deklarasyon ki’n ganny fer dan mon prezans e i kler ki poudir sa zafer Reef Hotel ankor enn fwa in annan bann kondisyon, bann kondisyon ki’n ganny donnen, me ki sa bann kondisyon la pe ganny kase konpletman zis pou nobou, zis pou nobou fer larzan parey tou businessman me ki mon krwar ki poudir si bann kondisyon pe ganny kase, ankor enn fwa nou devret kapab dir kondisyon pe ganny  kase la ou Dolar e rann nou, nou later e nou, nou ava fer nou devlopman avek.  Mersi bokou.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mon a konmans avek reclamation.  Dan plan ki Gouvernman ki annan ki Prezidan Faure ti anonse Anse Aux Pins i pa ladan pou le moman.  I annan zis Ile Soleil ki dernyerman ki’n deza fini fer.  Lo kote bann kondisyon ki ti annan avek Reef Hotel well Ste Anne Resort probably akoz li ki own dan Lagreman, nou ki nou annan recent nou, nou pa vwar sa bann kondisyon kekfwa ki ou pe dir.

E osi regarding Ste Anne li osi parey mon ti anonse, avan ler nou ti fer sa ler nou ti vin fer sa deklarasyon lo kote bann lease dernyerman, e nou ti dir poudir nou pou fer en – nou ti’n fini fer en legzersis e parey mon ti eksplike, vi ki i annan en lease ki vin avek bann kondisyon development covenant i annan bann ki nou’n bezwen anvoy kot AG’s Office pou kapab deal avek personnelman si zot in breach zot bann covenant.

Par egzanp bann dimoun ki Perseverance, Ile Du Port sa nou’n ekrir zot nou menm ki apre zot in come back ek nou donn nou lenformasyon.  Me bann parey bann zil ki i en lease ki en pe long term, e i annan bann ki – parl-er napa bann development covenant lo la nou bezwen anvoy kot AG’s Office pou donn nou en advice how we go forward.  Mersi.

 

MR SPEAKER

Mersi Minis Charlette.  Minis Dogley.

 

MINISTER DIDIER DOGLEY

Mersi Mr Speaker.  Mr Speaker mon pa pou kapab koz lo behalf Minis Loustau- Lalanne mon pa ti la dan Lasanble ler ti annan diskisyon, me sel keksoz mon ti a voudre fer konpran se ki i annan en konsep plan ki ti ganny submit en pe letan pase par Beach Comber pou sa propriyete Cote D’Or e zot ti ganny approval ek Gouvernman pou fer en lotel 112 lasanm lo sa propriyete.  Sa in ganny konfirmen.  Kestyon lalis ankor mon repete nou ava fer sir poudir we get the right lease nou ava anvoye pou Lasanble.  Mersi Mr Speaker.

 

MR SPEAKER

Mersi Minis Dogley.  Bon avek sa nou ava remersi le de Minis parmi nou Minis Charlette Minis Dogley, e PS Lafortune Special Advisor Mr Hoareau. Mersi e nou ava eskiz zot parmi nou.

 

(MINISTER DOGLEY AND MINISTER CHARLETTE AND THEIR DELEGATION WAS EXCUSED FROM THE HOUSE)

 

MR SPEAKER

Bon mon annan – nou annan Minis Bastienne ki deza isi kot Lasanble pe atann.  Mon pe zis fer en propozisyon eski nou Break nou pran en Break apre nou a retournen nou a pran Minis Bastienne?  Minis Bastienne in arive.  Oubyen nou kontinyen nou fer en sel ale?  Nou a pran en Break. Nou a pran en Break nou a retournen mwen 10?  Ok nou a retournen 4 mwen 10 alor en?  Ok.

 

(BREAK)

 

MR SPEAKER

Bon, nou a kontinyen nou travay.  Mon ti a kontan welcome Minis Charles Bastienne.  Minis responsab pour Lagrikiltir avek Lapes, ki akonpannyen par son Sekreter Prensipal pour Lagrikiltir – Mr Antoine Moustache, CEO pour Lazans Lagrikiltir – Mr Linetta Joubert e Acting CEO pour National Biosecurity Agency – Mr Keven Nancy.  Minis avek ou delegasyon, welcome parmi nou.  E toudswit mon a donn ou laparol pour ou fer ou Statement.

 

MINISTER CHARLES BASTIENNE

Mr Speaker, tou Manm Onorab, tou bann dimoun ki a lekout, espesyalman tou nou bann fermye, bonn apre midi.

Sekter Agrikol i enn parmi bann pilye pli enportan dan nou lekonomi.  Ozordi, i en size ki preokip nou popilasyon – Gouvernman, zot dan sa Lasanble e prensipalman nou bann fermye.  Rezon i senp, set akoz san manze napa lavi!  E set atraver lagrikiltir prensipalman ki nou manze i ganny prodwir.  Malerezman pandan sa dernyen deseni, lagrikiltir dan Sesel in pas dan plizyer tirbilans, kot i pre pou collapse konpletman, malgre ki lezot sekter nou lekonomi i kontinyen agrandi.

Tou ti komans avek liberalizasyon an 2006.  Swivi par reform ekonomik an 2008 e answit aksansyon Sesel dan WTO an 2015.  Sa bann sok pa’n fer dibyen Sekter Lagrikiltir.  E si ozordi nanryen konkret pa ganny fer, nou sekirite alimanter pou kontinyen ganny menase plis ankor.  Ozordi, plis ki zanmen nou bezwen vin avek solisyon ki pour enn fwa pour tou, relans e redinamiz Sekter Lagrikiltir.

Dan lepase, serten aksyon in ganny pran me sa bann aksyon pa’n neseserman adres prodiksyon direkteman.  Apre ki nou’n ekout sa Lasanble, e swivan en seri konsiltasyon an Zilyet avek nou bann fermye, Minister in vin avek en plan konpreansiv pou relev e dinamiz Sekter Lagrikiltir pour ogmant prodiksyon lokal.

Mr Speaker, permet mwan fer en pti analiz lo sak sou-sekter dan lagrikiltir.  Pour komanse – prodiksyon poul, par egzanp ;

Poul i form parti nou ladyet toulezour konpare avek lepase kot Seselwa ti tant pou manz poul zis dan Dimans oubyen pandan serten lokasyon spesyal.  20an pase nou ti prodwir 90poursan lo demann pour poul.  An 2004, nou prodwir 86poursan e ozordi nou prodwir selman 14poursan.

Pandan bann lannen ki’n pase, demann in kontinyen ogmante.  E lafen 2017, demann ti 4,436 tonn.  E lokalman nou ti pe prodwir 633 tonn.  Ozordi nou pe enport poul sorti prensipalman Brésil, Sud-Afrique, l’Emirats Arabes Unis, Kenya, l’Amérique e Ukraine.  Apard ki bann lotel ki serten i fer vin zot prop lavyann zot menm, i annan omwen 10 enportater ki fer vini poul.  Zot tou ansanm ti fer vin en total 3,590 tonn poul an 2017.

Sete an 2009 ki nou ti komans santi vre lenpak lo sekter prodiksyon poul, ler fermye ti’n komans abandonn zot biznes akoz i ti preski dir enposib pour zot fer konpetisyon avek poul enporte.  E dezyenmman, akoz kou prodiksyon ti’n sitan eleve.  Malgre ki an 2011 Gouvernman ti met en levy R5 lo sak kilo poul enporte, sa pa’n vreman ede.  E sa sekter i kontinyen deteryore, kot ozordi parey mon’n dir, prodiksyon lokal i zis 14poursan.

Koman en Gouvernman responsab, nou pa pou kapab les sa sityasyon kontinyen.  Alor Gouvernman in deside pran sa bann aksyon swivan pou nou kapab ariv lo target ki nou pe mete.

Premyerman, nou pe etablir en target ki dan sa prosen 3an, nou pou bezwen akonplir 50poursan lotosifizans dan prodiksyon poul.  Nou pe prevwar ki par Zen 2019, nou pou’n ogmant prodiksyon sorti 14poursan pou vin 25poursan.  Ki mannyer nou pou fer sa?

Dabor, nou pou angaz sa 7 prodikter poul pou servi zot kapasite aktyel o maksimonm pour ogmant prodiksyon, sorti 633 tonn pou vin omwen mil tonn lo en baz anyel.  Aktyelman, nou resers i montre ki zot pe servi selman 56poursan zot kapasite.  Pour le moman i annan 10 fermye ki annan zot kazo me zot aktiv.  Si zot ti aktiv, zot pou fasilman azout ankor en 800 tonn lo en baz anyel.

Nou’n fer en evalyasyon lo sa bann laferm e nou’n etablir ki zot tou zot kapab rekomans prodiksyon, san gran lenvestisman Kapital akoz lamazorite zot, zot kabann poul i ankor dan ase bon leta.  Sa bann fermye si zot oule ganny en loan avek Agricultural Development FundADF, zot loan pou ganny fast track.  Pour bann fermye ki zot loan i an aryeraz, zot loan pou ganny restriktire.  E loan adisyonnel pou ganny donnen lo baz bann kondisyon pli serye.  Si okenn fermye pa deside pou antre dan prodiksyon, Gouvernman atraver Lazans Lagrikiltir – SAA, pou repran sa later e donn en dimoun ki enterese.

Sekter Lagrikiltir pe aktyelman benefisye avek plizyer konsesyon, spesyalman lo taks lo enportasyon lekipman e transpor.  Fermye pa pe benefisye avek konsesyon lo prodwi de baz ki zot bezwen dan prodiksyon poul, spesyalman manze poul.

Gouvernman in alor deside pou donn fermye incentives pou li kapab prodwir dan demars pour nou koup lo kou prodiksyon.  Fermye ti pou pey R7 pour sak kilo lavyann poul ki ganny touye labatwar e Gouvernman pe donn pour le moman en sibvansyon  lo sak kilo lavyann ki vedir fermye pe pey R3.

Pour le moman, sa pou reste ziska ler nou fini etablir vre kou en kilo lavyann poul labatwar, pli tar lafen Oktob sa lannen.  Nou’n osi etabli ki manze poul i reprezant 65poursan dan kou prodiksyon lavyann.  E sa ti en fakter mazer, akoz lamazorite fermye ti deside aret sonny poul.  Premye fwa, Gouvernman in deside pou donn fermye R2.30 lo sak kilo lavyann poul ki sorti kot labatwar.  Sa i a ed zot pou koup omwen 15poursan lo kou prodiksyon.  Fermye in toultan konplent osi lo lefe ki zot ganny konsesyon selman ler zot enport zot materyo zot menm.  Zot pa ganny konsesyon ler zot aste lokalman.  Lo sa size, Gouvernman in dakor pou donn fermye konsesyon lo bann lenvestisman mazer ki zot fer, tel ki letan zot aste tol, dibwa pour zot laferm.  E sa i a ganny sertifye par Lazans Lagrikiltir – SAA.  Bann kriter pour sa ava ganny donnen pli tar par Lazans.

Gouvernman in osi deside pou met en taks adisyonnel lo lenportasyon poul.  E Minister Finans i ekspekte donn plis detay pli tar.  Sekter prodiksyon lavyann pa pou avanse, si Gouvernman pa osi met lanmen lo bann fasilite.  Setadir bann fasilite ki bezwen pou siport sa sekter, tel ki Hatchery, Animal Feed e Labatwar.  Minister in fer en evalyasyon lo hatchery Montagne Posée vizavi son kapasite pour prodwir pti poul.  Son kapasite aktyel i pour prodwir 107mil pti poul par mwan.

Gouvernman i santi ki sa aktivite i devret reste dan lanmen sekter prive.  Me avek bann kondisyon serye, pou fer sir ki pti poul i toultan annan pour fermye.  En nouvo Lagreman pou ganny sinyen avek loperater sa hatchery.  Gouvernman, atraver Lazans Lagrikiltir pe negosye avek sa operater pou fer desann pri pti poul.  I osi annan en lot operater prive ki sipoze komans prodiksyon pti poul an Oktob ki pou osi ede.

Mr Speaker, kondisyon sa labatwar Le Rocher pe koz gran defi pour nou fermye kapab penetre marse.  Gouvernman pe kontinyen avek son plan pour konstrir en nouvo labatwar pour poul, koson, bef avek kabri Montagne Posée.  Sa labatwar pou ganny finansman R15milyon atraver Livestock Trust Fund e L’Union Européen atraver en donasyon pour donn lekipman pour en valer 180mil Ero.  Konstriksyon sa fasilite i ekspekte komanse tar sa lannen.  E i pou pran omwen 15 mwan pour konplete.

Antretan i enportan ki nou fer travay irzan pou met Labatwar Le Rocher lo standar minimonm ki Lasante i demande.  Travay in deza komanse e nou’n ganny garanti avek sa operater ki tou pour konplete d’ici, le 01 Novanm.  Gouvernman pou kontinyen ankouraz fermye pou annan zot prop labatwar akoz sa pour ede anmenn en pe lefikasite dan zot prodiksyon.

Pour kapab annan logmantasyon dan prodiksyon, i esansyel ki manze zannimo i disponib.  E sa i lakle dan realizasyon sa Plan Konpreansiv, ki nou pe koz lo la ozordi.  Parey in ganny dir avan, manze zannimo i reprezant 65poursan kou prodiksyon.  Pour le moman i annan prensipalman 2 lakonpannyen Mauricien e en lakonpannyen lokal ki pe fourni fermye avek manze zannimo.  Gouvernman i ankouraz prodiksyon manze zannimo lokal akoz i krwar i pli meyer an term kalite.

Kapasite lizin manze zannimo isi i 40 tonn par zour.  Operater sa fasilite in konfirmen, ki i pe prodwir selman 2 fwa par semenn akoz demann i ba akoz fermye pe servi lezot prodwi enporte.  Pour kapab garanti supply manze lokal sorti kot sa lizin lokal evidaman, Gouvernman pou rantre dan en Lagreman pou fer sir napa mankman sa prodwi lo marse.

Aprezan nou pou abord prodiksyon pork.  Parey prodiksyon poul, pork osi in fer fas avek bann gro defi depi 2008.  Ziska lannen 2007, pei ti pe prodwir plis ki 50poursan son demann pour pork.  Apre 2007, sityasyon in kontinyelman deteryore pour ariv lo en mwayenn 30poursan.  Ozordi, sa sekter pe prodwir selman 429 tonn lo en demann 1562 tonn, ki reprezant 27poursan.  I annan 52 fermye ki pe sonny koson legalman.  E omwen en 50 pe prodwir ilegalman akoz zot napa permi.

Minister, atraver SAA e Lasante Piblik, pou vizit sa 50 fermye ki pe prodwir legalman avan ki en desizyon i a ganny pran lo zot case.

Ki mannyer nou pou ogmant prodiksyon porkGouvernman pou komans fer legzersis parey nou’n fer pour poul pou evalye zesyon bann laferm koson.  E swivan sa, met en target pour ogmant prodiksyon pou ariv 50poursan dan sa prosen 3an.  Sa legzersis i sipoze konplete dan sa prosen 2 mwan.

Bann fermye ki annan difikilte finansyel pou ganny apele e ansanm nou pou fer en plan pour nou kapab ed zot.  Bann laferm ki’n ganny abandonnen, pou ganny repran si fermye pa montre okenn lentere.  Baze lo kalkilasyon ki nou’n fer, fermye pa pe neseserman fer profi lo elevaz koson.  Alor Gouvernman in deside pou pran sa mezir swivan:-

Kou pli o dan prodiksyon pork se manze, parey mon’n dir boner, ki reprezant apepre 65poursan. Gouvernman in alor deside pou donn bann prodikter koson – savedir sa fermye direkteman, R6.50 lo sak kilo pork ki zot prodwir.  Sa i ekivalan 15poursan kou manze ki zot depanse.

Gouvernman in osi tonm dakor pou enpoz en taks adisyonnel lo pork enportan apartir le 1 Zanvye 2019.  Minister Finans a donn plis detay lo la.  Praslin osi pou ganny son labatwar lannen prosenn, vi ki en sonm R2.5milyon in ganny bidzete pour en tel fasilite lo sa zil.

Prezan Mr Speaker, permet mwan pas lo prodiksyon fri, legim avek gro manze.

Prodiksyon fri, legim ek gro manze i osi enportan dan sekirite alimanter nou pei.  Pandan bann lannen ki’n pase, Gouvernman in donn lease avek fermye san vreman akonpanny zot dan zot parkour vi ki i en sekter ki ase sansib.  An konsekans, serten fermye pa’n kapab zwenn lobzektif Gouvernman pou maksimiz Later Leta pour lagrikiltir ki i fer ki sa in enpakte lo prodiksyon agrikol.

Evalyasyon ki nou’n fer i montre ki plis ki 50poursan nou fermye pe valoriz mwens ki 50poursan later Leta pour lagrikiltir.

Zis pas en revi serten bann prodiksyon lokal ki nou pe fer an se moman.

Tomat – nou pe prodwir zis 19poursan nou demann pour tomat.

Sou – nou pe prodwir 14poursan.

Kokonm – 41poursan.

Gro piman – 7poursan.  I evidan ki i lo en nivo tre ba e sa i le ka pour plizyer lezot prodwi agrikol.

Propozisyon pour ogmant prodiksyon legim, fri e gro manze.

Dan nou zefor pour ogmant e garanti prodiksyon, Gouvernman in pran sa bann desizyon swivan:- I kler ki pei pa pou zanmen kapab prodwir tou sa ki i bezwen.  Alor Minister in deside konsantre lo 15 prodwi koman bann core produce pour komanse.  Sa bann prodwi swivan i nou bann core produce:- tomat, leti, gro piman, kokonm, brenzel, bred, sou, piman, bannann, manyok, patat, zepis, zironmon, zariko e papay.  Sa bann prodwi i nou priyorite dan nou bann diskisyon ek bann enportater.

Tou later lagrikiltir pou ganny evalye dapre zot abilite pour prodwir sa 15 prodwi.  Fodre note ki lamazorite sa 15 prodwi, fermye pou kapab prodwir tou dilon lannen.  Minister pou ankouraz tou fermye pour vin pli prodiktiv.  En sistenm pou ganny met an plas pour evalye lefikasite e prodiktivite lo en baz regilye.  Nouvo Polisi i egzize ki fermye i devlop 100poursan zot later konpare avek 80poursan ki ti le ka – ki le ka pour le moman.

Minister pou promot litilizasyon shade house pour prodiksyon legim.  Sa bann shade house in prouv so lekor pandan 25an.  Me malerezman in napa promosyon konsistan parmi bann fermye.  Minister in osi fer en legzersis kot nou’n etablir ki dan sa 436 fermye ki anrezistre e ki lo Later Leta, zis 203 ki pe prodwir par alo 50poursan.  Alor, koman priyorite, nou pou travay avek sa bann fermye.  Setadir bann ki pe prodwir par alo 50poursan.  E bann ki bezwen loan, zot case pour loan pou ganny akselere.

SAA pou donn en servis kot fermye pour kapab osi lwe serten lekipman, parey rotavator, Auger Machine ek lezot ankor pour ed zot vin pli prodiktiv.  An sa ki konsern lezot teknolozi parey sistenm hydroponics – plizyer resers pe ganny fer kot Stasyon Resers Anse Boileau, kot sa tel teknolozi i deza an plas.  Resers i kontinyen avan ki Minister i pran en desizyon lo sa size.  Pour bann fermye ki lo later Gouvernman e ki’n aret prodiksyon me zot annan en striktir lo sa later, Gouvernman pou revwar zot lease.

Si zot anvi rekomans prodiksyon, en evalyasyon pou ganny fer pour vwar ki kalite lenfrastriktir fodre mete an plas pou komans prodiksyon imedyatman.  En fasilite loan pou ganny ofer avek sa ki bezwen.  Si zot pa enterese, Gouvernman pou repran later anliny avek nouvo Polisi.  Minister pou asire ki bann prodwi esansyel i annan an kalite e osi an kantite.  Serten travay in deza – serten travay i bezwen ganny fer lo store Grand Anse Mahé.  E bann lezot sales outlet, pou asire ki fermye i ganny akse avek bann legren ek bann lezot prodwi de kalite ki zot bezwen pour prodiksyon.

Antretan, Gouvernman i rekonnet ki en pti zarden kot lakour, sa ki nou apel en backyard farming, i osi enportan dan sekirite alimanter.  Dapre statistik 2011, ti annan 8mil lakour avek en pti zarden manze kot lakaz.  Minister pou siport e met plis lanfaz lo backyard farming.  Minister atraver SAA pou kontinyen vann plan fri, ki pour ede dan prodiksyon manze.  Antretan, nou ti a swete ki sekter prive i pran sa loportinite biznes.

Sa Plan Konpreansiv lo lagrikiltir pa pou kapab ganny realize si napa resours finansyel.  Pour le moman, sel sours finansman mazer, set atraver Agricultural Development Fund – ADF, ki pe ofer lentere a 2.5poursan.

ADF ti ganny kree pour asiste bann pti e mwayen fermye avek loan pour pa plis ki R1milyon.  Aktyelman i annan R17milyon dan sa kont avek DBS.  Gouvernman in dakor pour ogmant kontribisyon anyel ki i fer dan LTF, sorti R3milyon pou vin R20milyon.  An plis ki sa, Gouvernman pou met ankor R30milyon pour sa prosen 2an komansman lannen prosenn.

SAA pou travay tre pros avek DBS pou redwir lakantite fermye ki pa pe pey zot loan, ki pour le moman i 46poursan – pou vin 35poursan d’ici juin lannen prosenn.  E redwir li gradyelman par 5poursan bann lannen swivan.  SAA pou enform DBS lo proporsyon ki sa portfolio loan pou ganny allocate, anliny avek sou-sekter ki Minister i oule promote.  Par egzanp, pour sa prosen 3 mwan, lanfaz pour lo prodiksyon poul e legim.

An Zen sa lannen, Lasanble ti dedye preske en lazournen antye pour debat lo finansman pour Lagrikiltir e difikilte ki fermye pe rankontre pou ganny akse ek finans.  Nou’n pran zot bann pwen an konsiderasyon.  E Minister in negosye avek DBS e loan pou ganny donnen konm swivan ;

Pour bann loan par alo R350mil, kondisyon i konm swivan ;

Sa fermye pou bezwen donn en mortgage lo en freehold propriyete ki i annan.  I bezwen donn en pledge lo en transpor oubyen en lekipman, en floating charge dan kad en lakonpannyen.  E parfwa labank osi i kapab demann en garanti banker.

Me pour loan ki par anba R350mil, ki tous laplipar fermye – fermye pou selman bezwen donn en pledge lo sa lease ki i pe lwe avek Gouvernman.  Zot pa pou bezwen en dimoun koman garanter e lezot konplikasyon parey ti le ka oparavan.

Dan nou zefor pou akseler prosesis ganny loan, tou laplikasyon pou aprezan ganny fer atraver Lazans Lagrikiltir – SAA, e non pa DBS.  Zofisye SAA pou evalye sa fermye e fer tou son formalite avan ki i anvoy laplikasyon kot DBS pour aprouvasyon.

Kliyan pou selman al kot DBS pou siny zot Lagreman loan.  Laranzman ki nou’n fer e ki nou’n gannyen avek DBS, se ki tou loan anba R350mil, fodre ganny aprouve dan en dele letan 2 semenn, apre ki SAA in anvoy zot laplikasyon konplet kot DBS.  T

ou loan pou annan en grace period ant 3 mwan a 18 mwan.  Tou fermye pou bezwen annan en kont labank pour kapab benefisye avek en loan.  E si zanmen en fermye pa pey son loan, otomatikman DBS pou kapab ganny son repeyman atraver sistenm Contract Farming ki mon pou eksplike dan en pti moman.

Lavant prodwi agrikol e lavyann e reste touzour en defi pour serten fermye.  Menm si nou pe met tou sa lanfaz lo prodiksyon, Minister pou bezwen sanz lafason fer pour reisir zwenn son lobzektif dan kad prodiksyon lokal.  En Unit Marketing pe ganny met an plas dan SAA.  Son rol se azir koman en fasilitater ant fermye ek marse.  E asire ki fermye i annan bon akse avek marse a tou moman.

SAA pe osi met an plas en Sistenm Contract Farming.  Sa sistenm pou asire ki tou fermye i tret zot aktivite koman en biznes.  Zot pou oblize prodwir dapre zot Kontra e zwenn tou kondisyon zot Kontra.

Minister in fini diskit avek STC, Global Supply, ISPC e osi Hospitality Seychelles – bann enportater prensipal dan pei.  E zot tou zot in dakor pour al dan en Sistenm Kontra avek fermye.  Nou pou osi fer diskisyon avek bann letablisman touristik osi.  Se sa Marketing Unit ki pou fasilit tou Kontra ki pou ganny donnen lo en baz transparan e avek kondisyon.

Minister Lagrikiltir pe osi travay tre pros avek Minister Lasante pou promot prodwir lokal ki annan bann gran valer nitritif e benefis pour lasante.  Minister Lagrikiltir pe osi travay avek Departman Komers, Minister Lasante, espesyalman Lasante Piblik e osi Biro Standar Sesel ek Lazans Biosekirite, pou vwar meyer fason pour kontrol kalite lenportasyon lavyann, legim e fri.

Pour kapab realiz sa Plan Konpreansiv, i tre enportan ki SAA i anploy ankor plis zofisye ekstansyon, pour azout avek sa ki i deza annan.  Avek nou lapros, SAA i bezwen pli zofisye pour al fer vizit lo bann laferm omwen en fwa par mwan.

I pour responsabilite sa bann zofisye pou fer sir ki bann fermye pe prodwir dapre plan ki zot pou’n tonm dakor avek SAA.  E osi asire ki zot pe ranmas tou lenformasyon avek bann fermye pour asire ki i annan ne bon sistenm monitoring an plas.  SAA pou osi bezwen sa ki nou apel bann Marketing Intelligence Officers pour kapab lyez avek fermye atraver zofisye ekstansyon pou ranmas lenformasyon pour monitor sa ki pe ganny met dan kazo, dan park e ki pe ganny plante par bann fermye.

Mr Speaker, nou pa pou reisir dan nou demars pour relans Sekter Lagrikiltir san resours imen pour kapab soutenir sa sekter e osi bann resers ki neseser.  Lekol Lagrikiltir – SIAH i aktyelman tonm anba Minister Ledikasyon.  Gouvernman in dakor pou annan en co-management ant Minister Ledikasyon ek Minister Lagrikiltir.  En Stirring Committee in komans travay lo sa nouvo lapros.  E nou ava ganny plis detay tre byento.

Sa Lasanble osi, a plizyer repriz in fer sorti kot fermye pe ganny afekte avek bann voler lo laferm.  Minister i krwar ki sel fason pour kapab deal avek voler ki vol bann prodwi ki bann fermye in rente pour zot prodwir, se pour annan en lapros byen kordinen avek Lalwa e langazman tou fermye.  Avek nouvo lapros, fermye pou bezwen vin pli serye akoz SAA pou bezwen plis lenformasyon avek zot.  Zot pou bezwen organiz zot e en sel fason set atraver en dokimantasyon.

Byento fermye pou ganny demande pou donn resi pour sak tranzaksyon ki zot fer.  Zofisye ekstansyon pou vin kolaborater pli pros pour bann fermye.  E dan san okenn sityasyon, se zofisye ekstansyon ki pour zot premye pwen kontak.  Atraver diskisyon ki’n fer avek Lapolis, nou ekspekte annan en lapros kolaboratif ant SAA, Lapolis e fermye.

Nou ekspekte annan bann check ki pou ganny fer obor semen, dan bazar, dan bann take-away e osi dan bann letablisman touristik.  A tou moman, zot pou bezwen montre laprev kote zot in aste sa bann prodwi.  Si zot pa kapab montre laprev, i pou ganny sispekte konmkwa sa bann prodwi in ganny vole.  E alors zot pou bezwen rann kont.

Mr Speaker, les mwan abord bann lezot mezir ki Minister Lagrikiltir pe al enplimante pour nou kapab redinamiz sa sekter osi.  Gouvernman in osi dakor ki apartir Zanvye 2019, GOP pou etranze ki vin travay dan Sekter Lagrikiltir pou 50poursan mwen konpare avek rate GOP aktyel.  Sa i neseser akoz fermye i vwar li vreman difisil pou fer son aktivite akoz en gran mankman mendev lokalman.

Gouvernman – dezyenmman, Gouvernman pou konstrir en fasilite karantenn Montagne Posée pour bann zannimo laferm – en keksoz ki nou napa pour le moman.

Trwazyenmman, Gouvernman in osi deside ki okenn fermye ki annan en lease pour plante lo later Leta, i plante.  I pa pou ganny drwa servi son laferm pour stok prodwir enporte lo la.  NBA pou ranforsi sa mezir.

Gouvernman pou deside ki kantite prodikter pou bezwen dan sa prosen 2an.  E pour met an plas en plan pour konstriksyon lenfrastriktir pour loperasyon en laferm.  E sa nouvo laferm pou ganny lwe avek fermye dapre kriter ki ganny etablir.  Fermye pou ganny demande pour prodwi dapre bann target ki ganny etablir par Lazans Lagrikiltir, sinon zot pa – si zot pa fer li, zot lease pou ganny kennsel.  Vi ki fermye pe lwe later, tou sa bann byen ki lo later i reste propriyete Gouvernman.

Minister Lagrikiltir pou an Oktob siny en Lagreman avek Minister Ledikasyon ki pour permet Minister Lagrikiltir annan kolaborasyon pros avek bann enstrikter Lagrikiltir dan bann lekol segonder.  Minister Lagrikiltir pou donn lasistans teknik e materyo neseser dan bann lekol segonder, pour donn zot sans devlop plis lentere dan lagrikiltir dan bann zenn pli boner.  Minister Ledikasyon in osi dakor pou enkli lagrikiltir dan zot Curriculum lekol.

Seksyon Veteriner ki tonm anba responsabilite National Biosecurity Agency, eskiz mwan Mr Speaker.  Seksyon Veteriner i tonm anba responsabilite NBA.  Veteriner pe konsantre lo tou kalite zannimo.  E en bon pe letan i pe osi deservi bann zannimo domestik parey sat avek lisyen.  Minister in dakor ki manda veteriner Gouvernman, se pou pran swen plito avek bann zannimo laferm.

Gouvernman pe fer diskisyon avek veteriner prive pour zot pran responsabilite bann zannimo domestik.  Enn fwa ki tou in tonm dakor, veteriner prive pou pran bann fasilite Union Vale ki egziste pour sa fonksyon.  Nou swe se ki veteriner prive i pran responsabilite tou sa ki annan pou fer konsernan sat avek lisyen dan pei an Zanvye 2019.  Tre byento nou pe al komans konstriksyon en nouvo Vet building lo Ile du Port.  E nou ekspekte met a laporte veteriner prive serten fasilite.  Enn fwa veteriner prive in pran sa responsabilite, veteriner Gouvernman pou bouz Grand Anse Mahé, kot zot ava pli pre avek kominote fermye.

Minister i rekonnet lenportans apikiltir dan lagrikiltir.  E nou pou devlop en Polisi pour sa sou-sekter par Mars lannen prosen.  Nou pou travay etrwat kolaborasyon avek Lasosyasyon pou promouvwar apikiltir.  Minister in komans evalyasyon lo posibilite elimin pestisid e langre sentetik dan Sekter Lagrikiltir dan sa prosen 5an pour byennet Lasante nou Nasyon.  Nou anvizaze servi plis prodwi bio e organik.

Enn parmi bann mezir enterimer, se pou rekomann avek Board Pestisid pour anpes lenportasyon 10 pestisid ki pe ganny servi lokalman right now, aktyelman, ki sa bann 10 pestisid zot, zot in ganny ban dan pei L’Union Européen.  NBA pe ranforsi son loperasyon lo bann Por e Erport.  Pour fer sa, i bezwen double lakantite zofisye ki pe travay dan sa domenn stratezik.  Koman son priyorite, sa lazans pe repar e modifye sa incinerator lo Erport pour ki i kapab operasyonnel pli tar Desanm sa lannen.

Sa incinerator lo Por pou ganny ranplase pandan lannen 2019 an parti avek en Donasyon avek SADC.  Antretan, nou oule enform sa Lasanble ki NBA i ekipe ek tou fasilite neseser pou fer bann dyagnostik lo bann plant, pest ek maladi ki afekte prodiksyon dan Sekter Lagrikiltir.  Sa bann lekipman, an gran parti in ganny donnen par IAEA.  E zot pou zwe en rol primordyal dan bio-sekirite pei e lasistans pour nou bann fermye.

Mr Speaker, sa plan ki mon’n prezante, mon ekspekte ki tou fermye i vwar zot ladan.  Pour lenformasyon sa Lasanble e tou fermye ki a lekout, i enportan pour note ki valer total lenportasyon ki direkteman lye avek plan lannen pase, ti R450milyon.  Zis mazinen, ki degre loportinite i a zot laporte?  Mersi Mr Speaker.

 

MR SPEAKER

Mersi Minis Bastienne.  Bon, si i annan okenn Manm ki anvi demann Minis kestyon, nou ava ouver pour kestyon pour en demi erdtan.

Onorab Churchill Gill.

 

HON CHURCHILL GILL

Mersi Mr Speaker.  Bonn apre midi Minis.  Minis pour tou sa ki ou’n eksplik nou, mon ti a kontan si ou ti a eksplik sa Lasanble, avek dimoun deor, dan tousala, ki lenpak pou annan lo cost of living?  Eski ou war ki i pou annan en amelyorasyon?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker, bi ultime sa plan se pour nou fer sir poudir nou ogmant prodiksyon.  Evidaman letan nou pou’n ogmant prodiksyon, laranzman ki pou’n gannyen avek sa bann fermye, sirtou atraver Contract Farming, i pou allow sa bann fermye pour zot kapab prodwir plis.

Ler nou pou annan plis prodiksyon, e osi baze lo serten kalkilasyon osi ki mon Minister in fer konsernan kou prodiksyon legim – legim, poul, pork, nou pou kapab at least met sa lenformasyon avek nou bann fermye pour zot kapab demann en pri ki rezonnab.  Nou konnen konbyen i koute pou prodwir en kilo tomat.  Nou konnen konbyen i koute pou prodwir en kilo leti.  So, nou, nou ekspekte poudir atraver sa plan e fasilit ki nou pou mete pour nou bann fermye, kou lavi, sa i ava ede pou fer desann kou lavi dan pei.  Mersi Mr Speaker.

 

MR SPEAKER

Mersi Minis.  Onorab Philip Arissol.

 

HON PHILIP ARISSOL

Mersi Mr Speaker.  Bonn apre midi avek ou delegasyon.  Bonn apre midi tou dimoun.  Mr Speaker, dan Bidze 2018 pour Lagrikiltir, en sonm R40.3milyon ti’n ganny met akote pour – dan Livestock Trust Fund pour lenfrastriktir.  La nou’n ariv Septanm, eski Minis i kapab dir sa Lasanble ki staz son Minister in arive avek proze semen e proze irigasyon pour bann laferm Montagne Posée, Hermitage e dan leo Anse Louis?  E kan ki sa bann proze pou ganny konplete ?  Mersi.

 

MR SPEAKER

Mersi Onorab Arissol.  Minis.

 

MINISTER CHARLES BASTIENNE

Mr Speaker, wi – an gran parti Livestock Trust Fund ti pe ganny servi pour kapab fer sa bann devlopman lenfrastriktir.  Annefe, ti annan en sonm R44.8milyon ti pe ganny servi pou fer sa bann lenfrastriktir e sa bann proze i ongoing.  Mon annan full lalis Avek mwan la Mr Speaker, ki donn lalis kote nou ete avek sa bann prose.

Laplipar s bann proze in fini ganny tender.  E i annan ki zot proze pe deza ki’n komanse.  I annan proze osi ki’n konplete.  Me still i annan lezot proze ki swa i kot Procurement oubyen bann demars pe ganny fer pour zot komanse.  Me nou kapab dir e reasir sa bann dimoun kot sa 2 proze spesifik ki ou’n mansyonnen, poudir proze pou ganny fer.  Akoz zot larzan in ganny met de kote pou kapab ganny realize.  Mersi Mr Speaker.

 

MR SPEAKER

Mersi Minis.  Onorab Regina Esparon.

 

HON REGINA ESPARON

Mersi Mr Speaker.  Mr Speaker, dan son Statement, Minis in dir ek nou koumsa i annan 2 gran prodikter manze zannimo dan pei e zot kapasite  i 40 tonn par zour.  Me selman zot pe prodwir zis 2 fwa par semenn.  E Minis in dir osi dir nou ki son Minister pe rantre dan en Lagreman avek – pe al antre dan en Lagreman.  Selman i pa’n dir nou si i pe al antre dan en Lagreman avek ‘zot’.

Mon ti a kontan konnen Minis, donn nou en pti pe detay, ki kalite Lagreman ou pe al – zot Minister pe al antre ladan avek sa 2 prodikter manze zannimo?  E mon 2enm kestyon – kwa ki’n anpes zot bouz dan sa direksyon tou sa letan?  Mersi Mr Speaker.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker, zis pour en koreksyon Onorab – i annan 1 prodikter lokal.  Apre i annan 2 enportater prensipal, en?  Sa ki  mon ti dir dan mon Statement.

Bon, ki kalite Lagreman?  Lagreman se ki nou oule fer sir poudir a tou moman i annan manze zannimo lokal dan pei.  Setadir, sa prodikter, pa bliye in ganny lease sa landrwa avek Gouvernman.  Tou sa bann fasilite ti ganny donnen an – ki lannen ti ganny donnen – PS?  An 2012 ti pas en Bay avek li pour li run sa fasilite.

Me nou, nou pe al egzize pou dir  atou moman i annan son stok Mai, i annan son stok Soya, e i ava annan son Wheat brand ek bann lezot ki bezwen dan prodiksyon.  So, nou, nou oule fer sir poudir nou pa zanmen run out of sa.  E annefe, dan nou negosyasyon ki nou pe fer avek li, i pou bezwen annan en buffer stock pour en serten peryod letan si zanmen pour okenn rezon bann raw material ki bezwen pour prodiksyon manze zannimo pa ariv dan pei.

Me ou 3enm kestyon, petet Mr Speaker, mon ti a kapab rod en pti pe plis leklersisman avek Onorab silvouple?

 

MR SPEAKER

Onorab Esparon.

 

HON REGINA ESPARON

Mersi.  Mr Speaker.  Mon it pe demann Minis kwa ki’n anpes zot bouz dan sa direksyon tou sa letan pour ed sa bann fermye?  Non, Minister – Minister Lagrikiltir.  Konmsi kwa ki’n anpes zot bouz dan sa direksyon anver sa bann fermye tou sa bann letan?  Mersi Mr Speaker.

 

MR SPEAKER

Ok.  Minis.

 

MINISTER CHARLES BASTIENNE

Mr Speaker, dan lepase in annan plizyer bann Plan Lagrikiltir ki’n ganny pran, en.  I annan en plan ki ti apel SNAIP, ki ti ganny fer an kolaborasyon avek FAO, ki ti en progranm ki pou ale pour omwen 10an.  Me SNAIP par morso i ti pe ganny egzekite, me i ti en plan ki ti pout anviron sa letan, apepre R1.4bilyon.  I ti en plan ki ti vreman anbisye.  Me nou vwar poudir sityasyon nou lekonomi pa ti pou permet nou pour kapab enplimant en plan parey.

Me lannen mon predeseser ti vin dan Lasanble avek en plan.  Li sa plan – sa plan ki i ti prezante, ti annan plizoumwen pou fer avek sipor an term lenfrastriktir ek lezot.  Me sa plan ki nou, nou pe prezante la ozordi i annan pou fer avek direkteman target prodiksyon.  Fer sir poudir nou donn tou bann incentive neseser nou bann fermye pour zot prodwir.  Akoz apre sa plan ler nou fer tou bann analiz ek konsiltasyon ki nou’n fer avek bann fermye baze lo bann pwen ki zot in met devan – d’ailleurs zis pour lenformasyon sa Lasanble, nou’n fer nou 5 diferan konsiltasyon avek fermye pandan mwan juillet.

Nou ti fer ek Praslin, kot nou’n vwar bann fermye La Digue osi ti vini.  Nou’n fer enn kot Double Tree – Alamanda.  Nou ti fer enn kot AVANI.  Apre nou ti fer enn kot STC anvil.  So, nou annan plis ki 200 fermye ki ti partisip dan sa bann konsiltasyon ki nou ti fer.

So, nou ekspekte avek sa plan ki nou pe met devan la, nu pou adres laplipar bann problenm ki fermye ti pe rankontre.  So, pour kapab dir ou akoz pa ti ganny fer – i annan plizyer keksoz ki’n ganny fer.  E mon krwar petet sa bann keksoz ki’n ganny fer dan lepase, ti pe met labaz pour nou kapab vin ek en plan parey nou pe prezante ozordi.  Mersi Mr Speaker.

 

MR SPEAKER

Mersi Minis.  Onorab Henrie.

 

HON GERVAIS HENRIE

Mersi Mr Speaker.  En pti kestyon pour Minis.  In dir ki GOP pour bann travayer lo laferm pou redwir 50poursan.  E eski sa i vreman i en solisyon pour donn en boost Lagrikiltir?  Mon pe dir sa akoz semenn pase mon fek ekout en rapor lo BBC.  Uganda zot in fer en progranm ki pe mars tre byen.  Kot bann prizonnyen  i ganny hire koman bann farm labourers.  E i annan en Lalwa ki’n pase ki fodre bann fermye i pey zot en minimonm, en saler ki’n reglemante, bann solda i veye pour zot pa sove.  E i pe ed sa pei en kantite.  Son lagrikiltir pe amelyore, pe kree lanplwa.  Sa bann prizonnyen pe ganny reabilite.  E zot annan en larzan ler zot sorti dan prizon.

Ozordi nou, 400ekek zonm pe asize Montagne Posée.  E nou bann solda nou pa tro konnen ki zot pe fer.  Eski napa sans ki nou get en pe dan sa sityasyon nou osi?  Ki mannyer nou kapab borrow from another African success story?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker, mon pa pou kapab tro fer komanter konsernan prizonnyen.  Me solman mon krwar ki Prezidan Faure in fer resorti konmkwa ki pe al pran nouvo lapros vizavi ban prizonnyen.  Bann ki pou ganny release lo laysenns e tou, pou fer zot vin pli prodiktiv – sa i dan domenn piblik.

Me konsernan GOP, sa i en keksoz ki’n sorti dan nou bann meeting konsiltasyon ki nou’n fer avek bann fermye.   E pa bliye i annan plizyer laferm ki pe anploy bann travayer etranze.  E depi janvier sa lannen, zot vwar zot pe konmans pey Personal Income Tax.  Zot bezwen peye zot – i, zot napa sa threshold R8,555.

E bann fermye osi ti’n met en propozisyon avek nou – pour kwa pa nou konsidere pour zot pa pey PIT.  Me letan nou’n diskite lo nivo Gouvernman, nou krwar poudir tou dimoun i devret pey PIT.   E nou pa kapab fer leksepsyon lo kote laferm.  Me nou panse poudir koman en konpromi, petet nou kapab regard lo baz GOP – fer zot pey 50poursan GOP fees.

Me nide konsernan pou servi prizonnyen, mon krwar Lotorite Prizon e Minis konsernen ki responsab pour Home Affairs pe tann ou.  Si zanmen sa i en keksoz ki zot oule ankadre li dan kad progranm pour reabilit prizonnyen, then zot ava kapab petet fer le neseser.  Mersi Mr Speaker.

 

MR SPEAKER

Mersi Minis.  Onorab John Hoareau.

 

HON JOHN HOAREAU

Mersi Mr Speaker.  Mr Speaker, enn bann fakter trez-enportan pour lagrikiltir se later li menm.  Minis i n pas en pti pe an bref – an riflan en pti pe lo  bann later ki pou ganny repran si pa pe ganny servi.  Sa ti en keksoz ki ti’n ganny demande en pe byen lontan.  Me ti annan bokou bann legal barriers avek bann size konpansasyon.  So, i kapab donn nou en pti pe leklersisman ki mannyer sa pou marse?

Apre dezyenmman, i annan bann nouvo plot osi ki ti’n ganny dir depi en pe letan pase.  Depi dernyen fwa Minis ava li ti vin dan Lasanble, ki zot pou donn akse avek bann dimoun – bann planter,  me mon pa’n tann ou nonm sa dan ou plan la.  Si i annan okenn travay ki zot pe fer pour donn nouvo plot  pour bann dimoun – bann new entrance.

        Apre Minis, eski ou kapab dir nou ki rezon ki Lasirans ki tonm anba SACOS ek Harry Savy in ganny aktyelman dis-kontinyen pour bann farmer?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker, konsernan later pou repran – s aki nou appel retraction, se ki mon krwar tou fermye i tann nou ozordi.  E sa osi i en keksoz ki’n sorti tre for dan konsiltasyon ki nou’n fer avek zot, ler zot vwar poudir later Lagrikiltir pa pe ganny valorize.  Parey mon’n dir dan mon lentervansyon se ki i annan apepre 50poursan – i annan 203 fermye ki pe prodwi par lao 50poursan dan en total 436.  Laplipar sa bann fermye pe prodwi par anba 50poursan.

E nou avek nouvo Polisi, nou pe egzize ki fermye i servi zot later 100poursan.  So, annefe sa – letan nou pe revwar Lagreman, Lagreman pou dir – si ou pa pe prodwi 100poursn ou later dapre assessment ki nou’n fer, san zistifikasyon e kriter pour nou retract sa later, pour nou pran sa later pou antre.  Nou pou tre serye lo la, tre sever lo la.

Mon kapab dir ou, se ki sistenm avan ziska la ler Minister atraver SAA ti donn Later Lagrikiltir – annefe nou annan 11 sa bann later ki mon pou eksplike la, se ki pa ti donn zot en lease.  Ou ti allocate  later avek zot, donn zot en Allocation Letter.  E apre ki zot in ganny allocate later, zot ganny dele letan pour zot prouv zot lekor pou zot komans prodwir.  E pare sa then en lease  i ganny donnen.  Nou annan 111 sa bann case koumsa.  E ladan mon kapab dir ou, i annan plis ki lanmwatye pa pe prodwir.

So, nou napa baryer legal akoz napa Lease Agreement ki nou annan avek zot.  So, sa bann later, nou pou bouz ase vit pour nou kapab gannyen pour nou re-allocate avek bann dimoun ki bezwen later.  An tou nou annan nou 134 dimoun ki lo lalis atant pe esper en morso later.  Bann kriter atraver sistenm en selective tender lo lalis dapre nou nouvo Polisi alokasyon ki nou pe met an plas, se ki priyorite i a pour sa bann dimoun ki pe atann tou sa letan pou ganny asiste ek en morso later.

Mon panse avek lapros, avek sipor tou dimoun, mon pa war okenn rezon akoz sa bann dimoun ki pa pe prodwir, zot pa prodwir ogmant zot prodiksyon, within en dele letan – nou pou donn zot 3 mwan si mon pa tronpe, pour zot komans plante.  Oubyen komans sonny zot zannimo, bann ki annan park.  Si zot pa fer li, Gouvernman pou napa swa, nou pou bezwen pran.  E si ou konpansasyon i antre, sa osi i annan en formel ki ganny servi, ki’n ganny etablir, kot i annan bann striktir ki’n ganny fer avek permisyon Lazans Lagrikiltir.

Lo kote nouvo later, mon kapab dir ou se ki atraver travay ki nou pou fer, nou pou ganny nou en bon pe later ki pa pe devlope pour nou kapab reallocateSo, nou pa pou neseserman, apard ki mon konnen Baie Ste Anne Praslin i annan bann nouvo plot ki’n ganny allocate dan zanmerant kot Dawn Dew Farm.  So, sa in ganny allocate, ki mon krwar pe ganny byen valorize ziska prezan.

Me solman la nou pou konsantre pour nou al repran later ki dimoun pa pe fer nanryen.  Mon asir Onorab e mon ava dir ek sa Lasanble poudir, fer en letour partou, ou ava vwar ki kantite later lagrikiltir ki nou annan.  E dapre kalkilasyon ki nou’n fer, nou pe valoriz zis 40poursan nou Later Lagrikiltir.  60poursan pa pe gannyen valorize.  So, we need to do something about sa.

Mr Speaker, konsernan Lasirans – mon kapab dir ou se ki sa osi mon ekspekte Minister Finans  – Minis Finans dan Bidze, i a kapab koz en pe lo la Lasirans.  Me solman, nou lapros ki nou oule pran nou, se ki tou fermye anrezistre fodre i annan Lasirans – sa lapros ki nou pe al servi.  Akoz Lasirans osi i ganny subsidise par Gouvernman, kot 50poursan zot premium  i ganny peye atraver Livestock Trust Fund.  Ok?

Me mon kapab dir avek ou e mon kapab dir avek sa Lasanble, sa ki ou’n dir mwan i korek.  Pour le moman Lasirans ki nou annan jointly ant SACOS avek H.Savy  in fini expire – napa.  Pour komanse ti annan apepre 55 dimoun ki ti lo sa Scheme Lasirans.  Me as of last year, zis avan son expiry date ti fini, ti annan zis 16 fermye ki ti lo sa Lasirans.

So, nou pe al redinamiz tou keksoz nou.  Nou pou fer mannyer ki nou annan en bon poul e nou oule fer sir poudir bann fermye anrezistre, zot tou zot annan en proper Insurance.  Si non, ler maler i arive, tousala i tonm lo Gouvernman.  Me Lasirans i a kapab take care of sa.  Mersi Mr Speaker.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Minis ek ou delegasyon.  Premyerman les mwan welcome e felisit Minis pour sa nouvo Plan Lagrikiltir.  Nou swete alor  ki i pa reste zis en plan me i vin aksyon – nou oule.  E vann li letan ou pe ale.  Konmsi pli ou fer progre lo la, i enportan ki pep Seselwa i konnen sa bann progre ki ou pe fer.

Mr Speaker, eski avek sa Statement ki Minis in fer dan nou Lasanble, Minis pe konfirmen ki Bidze Lagrikiltir pou ganny ogmante sibstansyelman pour 2019?  E si i kapab donn nou en sif oubyen en poursantaz, Bidze anyel lo la pour nou konpare avek bann demann ki bann Lorganizasyon enternasyonal  i rekomande pour bann pei.  Sirtou bann pei an devlopman.

E an menm tan, eski pour nou – pour ogmant prodiksyon pri materyo debaz i bezwen  rezonnab.  I bezwen vreman abordab pour ki i permet ogmantasyon prodiksyon.  E eski ou kapab dir kwa sa bann keksoz ki de baz ki fermye pou bezwen pour ogmant sa prodiksyon ki pri pou desann vreman?  Par egzanp, ou nonm GOP, manze zannimo, kekfwa langre, legren, green house – konstriksyon green house, ensidswit.

Konmsi donn nou en – sa lalis byen e dir nou konmsi ki mannyer i pou desann pour ki nou war li?  E fermye i a santi li – vreman war konmsi konkretman, lala sa bann keksoz i pou desann pour ki  i kapab ankouraz li e fer li ogmant prodiksyon.

E dernyerman, eski Lasosyasyon Lagrikiltir/Fermye, whatever – ki pou son rol dan sa plan li?  Ki i pou fer li?  Lot fwa mon krwar ti vann, vann bann zafer letan ti annan – manze zannimo, la, soz, apre nou’n perdi tou.  La sa voyaz la, ki mannyer son rol pou ete?  Ki i pou fer pour siport fermye ?  E fer ki atraver zot aksyon zot osi, i ede pou fer desann  pri manze e garanti konsonmasyon – garanti nou food security si nou kapab dir, dan nou pei.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker, si nou pran SAA, NBA, avek Minister li menm, total Bidze i 115milyon – sa ti pou lannen 2018.  Ok?   Bon, pour nou kapab egzekit sa plan dan tou son totalite, pou pey sa bann subsidies, pou pey – pou fer sir Gouvernman i kapab transfer 20milyon kot DBS pour Agricultural Development Fund, nou pe prevwar ki pour lannen 2019, Bidze nou ekspekte en adisyonnel, en – apepre R75milyon pour 2019 e 2020 nou ekspekte anviron R70milyon adisyonnel.  Ok?

 

HON CHARLES DE COMMARMOND

(Off-Mic)

 

MINISTER CHARLES BASTIENNE

Adisyonnel.  Adisyonnel.  Sa ki nou annan pour 2018 i 115milyon.   Ok?  Sa i san sa sa plan – sa plan, san sa bann linisyativ ki nou pe pran.  E nou, nou pe dir – e ki mannyer i vini sa eparpirman,  se ki anba LTF, nou ekspekte anmas en sonm 17milyon an 2019.  ADF ava transfer 25milyon.  E atraver Bidze nou ekspekte anviron en lot 38milyon.   So tousala i vin sa sonm R75milyon ki mon’n koz lo la.

So dezyenmman Mr Speaker, bann materyo debaz ki nou annan lo stor, lo stor Lagrikiltir, i deza pe ganny vann avek bann fermye at en markup zis 5poursan an plis of cost.  I azout zis 5poursan lo la – so, i deza debaz.

Me solman ki mon kapab dir sa Lasanble, diskisyon right now, mon pa ankor met devan Gouvernman se ki ler nou pe al  lans, nou pe fer sa tranzisyon pour nou elimin pestisid avek bann langre sentetik, evidaman bann prodwi bio i bokou pli ser,  then Gouvernman pou bezwen vin avek en plan, ki mannyer nou pou kapab fer bann prodwi bio abordab pour nou bann fermye ler nou pe fer sa tranzisyon.  Sa lo kote sa.

Lasosyasyon Lagrikiltir i annan en gran rol pour zwe.  Nou krwar i enportan ki letan i annan en lasosyasyon, evidaman i pli fasil pour zot anmenn zot bann pwen devan, pour Gouvernman kapab konsidere.  Me i annan serten lasosyasyon – annefe i annan serten lasosyasyon lo nivo rezyonal, i annan ki for, i annan ki mwen for.  Me mon krwar ki lo nivo Minister, nou’n dir ki nou bezwen travay avek sa bann lasosyasyon, pour zot vin en pe pli for, en fason ki set atraver lasosyasyon ki pour kapab ede pou kapab vann sa plan.

Akoz lasosyasyon, se zot ki pou ganny en veikil pour kapab enform zot bann manm tou bann fasilite, tou bann posibilite ki egziste pour kapab petet promot lagrikiltir bokou plis ankor.  Nou oule war ogmantasyon dan prodiksyon.  E vwala kot tou dimoun pou bezwen onboard pour nou kapab fer monte sa.  Mersi Mr Speaker.

 

MR SPEAKER

Mersi Minis.  Onorab Woodcock.

 

HON WAVEL WOODCOCK

Mersi Mr Speaker.  Minis la koman mon pe koze, i annan fermye Praslin ki zot tomat pe pouri avek zot akoz zot pe ganny difikilte pou vann zot tomat avek bann letablisman touristik, bann lotel, bann supermarket e menm avek STC ki prefere aste legim ek bann prodwi enporte.  Mon kestyon i – ki ou Minister pe fer pour ankouraz bann lotel, bann letablisman touristik, bann supermarket parey STC, aste plis legim, fri e prodwi lokal olye aste bann prodwi enporte?

Mon 2enm kestyon Minis se, par lefe ki konsonmater i ankor pe depan lo lavyann poul enporte, ou pa krwar ki si sa logmantasyon taks lo lavyann poul i ganny enplimante avan ki prodiksyon lokal i ogmante, i monte ki – konmela i selman 14poursan, ki pou fer ki pri lavi pou monte par lefe ki sa 10 enportater lavyann poul pou pas sa kou lo konsonmater?  Tan ki napa ase prodiksyon lavyann poul lokal, konsonmater pou bezwen kontinyen depan lo lavyann poul enporte.

Mon kestyon final Minis se, ki ou Minister in konsider subsidise kou transportasyon animal feed – manze zannimo, pou transport – subsidise kou transportasyon animal feed – manze zannimo, pou al Praslin or Inner Island pour ki i ede redwir en kou elevaz?  E osi i – obviously i pou fer desann pri lavyann?  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker, dabor konsernan bann fermye Praslin ki zot tomat pe pouri avek zot, i regretab – i pa devret pe arive sa.  E zisteman, se sa lobzektif sa plan.  Lobzektiv sa plan se ki nou antre dan en sistenm Contract Farming.  Ler ou antre dan en sistenm Contract Farming, tou tomat ki ou met dan later, tou pye leti ki ou met dan later, ou’n fini konnen kot pe ale.  Ou’n fini konnen ki kantite ou devret pe mete e avek ki pou vann.

E ou konnen Mr Speaker, mon konnen in toultan, toultan difisil pour bann fermye kapab fer serten penetrasyon dan marse, dan bann market pour plizyer rezon.  E mon krwar ki swivan diskisyon ki nou’n fer avek sa bann main enportater, avek serten otelye osi, nou pe konpran kote problenm pe vini.  Souvan zot dir ou poudir sa neseserman annan consistency.  E zot pa kapab toultan garanti poudir zot pou gannyen sa ki zot oule.

Me solman mon kapab dir avek sa Lasanble, enn nou bann partner kle dan egzekisyon sa plan, se STC.  STC i full onboard avek nou pour nou kapab see through atraver bann target ki nou, nou pe diskite ek STC lo kote STC.  An plis nou annan tou sa bann lezot distribiter/enportater ki nou pe travay avek.

Dezyenmman Mr Speaker, konsernan si enpoz sa taks, ki pou annan?  Ou konnen letan ti pe negosye aksesyon avek WTO, i annan serten bann bound rate within which Sesel i kapab navige pour li kapab ed son lendistri.  E mon krwar sa bound rate ki nou annan pour poul, ki mon dir Minister Finans ava eksplike, i pa telman o vi ki i telman limite.  I pa pou annan telman gran lenpak.

Me solman, an menm tan sa ki enportan se ki vi ki nou pe ekspekte by Desanm sa lannen, komans war en bon logmantasyon dan prodiksyon lavyann lokal, mon krwar sa i ava ede pour kapab donn sa debousman nou bann prodikter lokal.  E osi parey mon’n dir, se ki i vre ki lavyann lokal i en pti pe pli ser.  Me solman, finalman nou konnen ki nou pe manze.  I ganny prodwir lokal, nou konnen ki egzakteman ki nou, nou pe manze isi an term son valer nitritif e tou bann keksoz ki al ladan.

Konsernan pou subsidise transportasyon pour bann manze zannimo pour Zil Pros, mon krwar sa i en pwen ki nou ava konsidere.  Mon krwar i annan merit e sa i en keksoz ki nou ava konsidere.  E apre nou ava fe en kominikasyon lo la.  Mersi Mr Speaker.

 

MR SPEAKER

Mersi Minis.  Onorab Adelaide.

 

HON FRANCOIS ADELAIDE

Mersi Mr Speaker.  Bonn apre midi a tous.  Minis mon’n ekout dan ou pti deliberasyon.  Mon krwar in anmenn en pe lespwar pour bann fermye ki ti pe atann sa bann desizyon koumsa pour pran.  Me solman, mon ti a kontan ki sa bann keksoz, lanmod Onorab De Commarmond, i ganny fer en pe o pli vit posib, ki sa bann fermye ava relans dan lagrikiltir e zot ava vin pli prodiktiv.

E mwan mon petet mon pe mazinen, parey pour komanse, petet si zot ti kapab sibvansyonn en pe bann fermye lagrikiltir.  Mon tou kou mon krwar sa.  Kanmenm pour en premye 2an, pour ki zot ava ganny en hickup apre zot ava bouze.

Mon lot pti pwen se ki, eski dan sa prezantasyon, eski tou bann eksper, tou bann teknisyen, tou bann groupman lagrikiltir, zot onboard lo en sel proze pour bouz devan lagrikiltir?  Akoz laplipar letan se ki ou tande i annan teknisyen ki pa’n ganny konsilte, i annan bann lezot eksper ki ti kapab donn plis input, me solman zot pa’n ganny konsilte.

Apre mon lot keksoz ankor – lo kote bann zil, mon pa’n tann nanryen lo sa kote pour devlop plis lagrikiltir.  Apre en – bann nouvo Scheme pour bann teknisyen.  Akoz i bann travay ki si nou perdi sa bann dimoun avek sa bann latet, mon krwar i pou en pert pour nou pei.  Akoz ki nou pa aranz zot Scheme, ankouraz zot pour ki zot a reste an sa domenn.  E zot a vin fruitful pour nou pei.

Minis apre mon dernyen pti komanter se ki, i fer katriyenm Minis la pour Lagrikiltir.  Mon ti annan en size ki mon’n koze tou lazournen lo la, se balans.  En balans dan labatwar pour bann fermye.  Akoz mon ankor pe kontinyen ganny konplent avek bann zabitan Baie Lazare ki nou napa balans.  2018 nou napa balans e nou pa pe kapab donn en bon lapeze pour nou bann zannimo.

So, mon ti a kontan ki ou sa Minis ki nou ti a kapab ganny en balans dan labatwar.  E mon pe met sa ek ou – silvouple fer sa pour bann fermye, fer sa pour bann zabitan Baie Lazare.  Minis apre en pti konsern ankor – mon’n ganny en pti konplent poudir nou’n fer vini 2 Cuban lo kote NBA.  Zot ankor pe asize plis ki detrwa mwan, dan en lakaz lwe.  Zot pa pe ganny mete an good use.  So, mon ti a kontan ki sa bann gaspiyaz osi i arete.  E sa bann larzan nou a met dan Lagrikiltir pour ki nou sekter i a bouze.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker, mon a komans avek sa 2 Cuban.  Mon ti fer en vizit kot nou sant Grand Anse Mahé.  Mon pa pou apel li ex-BBC, me apel li kot nou Sant Grand Anse Mahé, kot Sant NBA.  E sa 2 Cuban have been put to use.  Depi komansman Septanm nou’n komans loperasyon lo fasilite Grand Anse Mahé, zisteman atraver sa ki mon’n dir boner, Donasyon ki nou ti gannyen avek IAEA.  E bann zofisye sorti kot IAEA zot in vini, zot in vwar poudir nou’n finalman, nou pe komans servi sa bann lekipman ki zot in donn nou.  They have been put to use.

        E ler mon ti laba i annan serten rapor osi ki zot, zot ti prezant avek mwan vizavi travay ki zot pe fer.  Ok?  E tre byento bann fermye pou war zot komans vin vizit zot laferm pou kapab donn zot bann bon konsey osi.

Balans labatwar – mon’n vizit labatwar, balans i la, i annan balans.  I zis ki ti annan serten ankesman, en – akoz ti e pe tro pti, sitan en kesman.  E mon rapel tre byen letan mon ti vizit anviron 2 mwan pase, mon ti donn lenstriksyon ki sa i ganny fer deswit.  Me solman mon zofisye la pa pe kapab konfirm avek mwan si sa in fini ganny fer.  Balans i la, zis sa ankesman kot zannimo i antre i ti tro pti.  Ok?

        Scheme pour nou bann teknisyen – mon krwar ki nou a komans travay.  Nou a komans travay dir pour nou kapab enplimant sa plan.  Nou a les nou bann teknisyen prouv zot plis ankor.  Donn rannman – donn rannman pei.  Anmenn plis prodiksyon kot nou bann fermye i konsernen.  Apre definitivman nou a regard dan zot Scheme pour nou fer sir poudir nou retenir zot.

Konsernan si tou dimoun i onboard?  Sa plan i pa en plan Minis.  Sa i en plan kolektiv.  I en plan ki’n ganny fer avek tou bann zofisye senior dan Lagrikiltir, ki’n asiz ansanm avek mwan pandan sa dernyen 3 mwan edmi, pour nou fer en odit e met mikroskop lo Lagrikiltir dan son totalite.  Se sa ki nou’n fer.  E apre ki nou’n fer sa, serten travay in al ganny fer lo teren.  Zot al anmas plis lenformasyon ankor, konfirm serten keksoz kot nou ti annan dout.  E finalman, nou’n nabou vin ek en plan konpreansiv ki apel ‘Nou Plan’ – pour nou tou kid an Minister Lagrikiltir.

Trwazyenmman – wi, parey Onorab De Commarmond in dir, ou osi ou’n dir, nou pe bouz vitman ek sa plan nou.  Nou anvi war rezilta deswit. E se pour sa rezon ki lamazorite keksoz ki mon’n dir la, i pou pran lefe le 01 Oktob, sa lannen.  Ki en mannye ki avan lafen sa lannen, nou bezwen pe komans vwar rezilta.

Konsernan zil elwanye, mon’n dir boner poudir, parey zot konnen e mon krwar ti dan medya, konmkwa ki IDC i annan zot plan.  I annan plan vizavi bann prodiksyon lo bann zil elwanye.  Me toutfwa osi, parey in ganny fer resorti, bann Zil Elwanye i osi ase frazil. E nou bezwen fer sir ki nou pe fer lo bann Zil Elwanye.

En lenformasyon ki mon’n donn zot pli boner se ki, pour le moman nou pe valorize zis 40poursan lo later Lagrikiltir, 60poursan pa pe ganny valorize.  E nou santi nou, dan Minister Lagrikiltir ki nou ava valorize lamazorite later ki nou kapab.  E apre prodwir dapre parey mon’n dir, sa 15 prodwir apard ki bann livestock.  E apre la nou ava vwar nesesite pour nou ale pou al bouz lo zil elwanye pou fer prodiksyon.

Nou santi – nou santi dan Minister e osi atraver konsiltasyon ki nou’n fer, lamazorite nou manze ki mon’n koz lo la dan sa plan, i kapab ganny Mahe, Praslin ek La Digue – lamazorite.  So, Zil Elwanye i annan son plan pour Lagrikiltir.  Petet pour bann lezot keksoz ki pa pou neseserman – petet osi afekte bann fermye letan zot fully angaz zot dan prodiksyon.  Mon krwar mon’n reponn tou ou kestyon Onorab Adelaide.  Mersi Mr Speaker.

 

MR SPEAKER

Mersi Minis.  Bon, i reste ankor 7 Manm.   Mon ti a kontan ki zot fer zot kestyon kourt pour nou kapab rann SBC lantenn.  Onorab William.

 

HON WAVEN WILLIAM

Mersi Mr Speaker.  Mr Speaker, mon ti a kontan demann Minis – dan sa plan konpreansiv, e lefe ki i annan plis ki 2an ki bann fermye Semen Letsi pe esper sa proze semen komanse, avek sa fermye ki pe transport son materyo dan en container obor lanmer pou fer lesans kannel.  Kan eski sa bann fermye pou trouv sa proze komanse?

Dezyenmman Minis – nou welcome sa plan.  Me mon anvi demann ou e menm fer en sizesyon pour ki sa plan la, si i pa pe angaz osi bann Lasosyasyon Fermye, eski ou pe mazin osi bann rankont ase frekan pou vwar ki sa plan ki ou pe met na aplikasyon – ki ou pou met an aplikasyon pou vreman benefisye Lepep Seselwa?  Akoz rezon ki mon pe dir sa se ki Gouvernman pe pran serten bann desizyon la ki defer en pti ki lefe ki kou lavi pou vreman desann e ki pri legim pou desann.  Alors i enportan Minis, ki i annan sa rankont konstaman avek bann fermye pou vreman swivre sa plan pou fer sir ki i al dan bon direksyon.  Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker, konsernan sa Semen Letsi, lenformasyon ki mon’n gannyen avek CEO SAA, se ki nou’n fini ganny aprouvasyon avek POU.  E nou ekspekte tender  pour pibliye nenport ki moman la.  So, nou ekspekte proze a kapab komanse petet dan mwan Oktob ki devan nou.  Ok ?

        Dezyenmman, kominikasyon sa plan it re, tre enportan.  E se pour sa ki nou’n set up en tim kominikasyon.  E lo la nou annan reprezantan Minister Lasante ki en nitrisyonnis, pour nou kapab at least edik nou bann dimoun vizavi bann benefis pour zot consume bann prodwi lokal.  Definitivman fermye pou bezwen – ou konnen mwan mon’n vin la, mon pe lans sa plan konpreansiv.  Fermye pou bezwen ganny eksplike an detay rezondet par deryer ki mannyer i pou marse e osi bann benefis pour fermye.

E osi ki nou ekspekte pour kapab nou popilasyon an antye benefisye an retour avek sa bann lenvestisman ki Gouvernman pe fer vizavi sa plan.  So, wi nou pou zwenn avek bann fermye.  Wi, pou annan bokou kominikasyon ki pou ganny fer dan bann semenn ki pe vini, en fason pour nou kapab enform nou bann dimoun lo bokou plis detay.  Mon pa’n al dan telman detay kot sa plan i konsernen.  Akoz Mr Speaker, ti pou pran nou omwen 2 erdtan si mon ti fer tou bann detay konsernan – konsernen avek sa plan.  Mersi Mr Speaker.

 

MR SPEAKER

Mersi Minis.  Onorab Letourdie.

 

HON JANY DE LETOURDIE

Mersi Mr Speaker.  Me mon – en kestyon in tonm, in fini pase akoz i ti konsernan pour availaibility later pour lakantite dimoun ki ti a kontan plante, mon krwar Minis in eksplike.  Me Minis – Mr Speaker avek ou permisyon, i annan en pti soz ki’n antre la.  Minis, eski Minister Lagrikiltir ti a konsider kiltivasyon – prepar en teren pour kiltivasyon nou bann fri ki’n vreman nou war in preski disparet pour kapab vin available pou dimoun kapab aste, menm son plant.

Par egzanp, nou pe koz Manbolo, Zanbroza, Letsi, Kopayi, Serimolya eksetera.  Konsiderasyon pour prepare pou dimoun kapab aste.  Ya.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker le 21 Oktob en, i tonm dan nou Lazournen Food Week ki Minister pe organize.  Tou le lannen zot konnen   World Food Day i le 16 Oktob e sa lannen nou’n fer en manifestasyon manze lokal.  Dan sa manifestasyon, nou pou annan nou bann fermye ki ou partisipe evidaman.  I pou parye en bazar i pou tonm en zour Dimans e osi nou pou annan en gran lavant bann plan. Fri. Parey tradisyonnelman nou Stasyon Resers Anse Boileau i prodwir;  bann fri nou pou annan bann plan legim  ki pou ed dimoun ek zot bann backyard farming.

Me solman mon ti a kontan enform sa Lasanble lo la right now  nou an negosyasyon avek Minister Lanvironnman pou nou servi bann buffer ki avek lafore pou nou kapab valorize e  pou nou a kaba annan agroforestry lo bann buffer kot i a kapab serten ki ou’n mansyonnen Onorab, ki a kapab ganny plante lo bann buffer enn fwa ki nou’n an negosyasyon avek Minister Lanvironnman pou nou valoriz sa bann buffer ki pou le moman pa pe neseserman ganny favorize.

Sa i ava ed nou ganny lespas me pa neseserman servi later Lagrikiltir ki’n telman  bezwen pou nou fer – parey mon’n dir boner dan bann devlopman agrikol, me plito nou ava servi bann buffer for that purpose.

Mersi Mr Speaker.

 

MR SPEAKER

Mersi Minis.  Onorab Lemiel.

 

HON SYLVANNE LEMIEL

Mersi Mr Speaker.  Bonn apre midi Minis ek ou delegasyon.  Mr Speaker mon ti a kontan demann Minis – mon konnen sak Minis ki vini, i vin avek son linisyativ i byen.  Me selman mon santi ki sa linisyativ ki predeseser Minis Bastienne ti vin avek i enn  osi ki otan byen.

So eski Minis dan sa prezantasyon ki ou’n fer la letan ou regarde i plizoumwen pe viz ver ogmant prodiksyon fri ek legim – plizoumwen legim avek prodiksyon lavyann.   So mon krwar san lenfrastriktir osi i fer ki prodiksyon legim, lavyann i pa pou vin otan parey nou swete, eski ou pe marye sa plan ou predeseser avek sa enn, la ki ou ou’n vin avek la avek ou tim e oubyen sa plan lenfrastriktir  ki avan pe ganny shelved?

Mersi.

 

MR SPEAKER

Mersi Onorab.  Minis.

 

MINISTER CHARLES BASTIENNE

Mr Speaker konsernan bann proze ki ti’n ganny mete pou kapab fer bann proze irigasyon e bann proze lenfrastriktir i ongoing.  Onorab fer demann mwan Semen Betsy nou’n konfirmen malgre serten retar ki byento pe al lo tender.  Depi ler ki nou’n vin dan sa Minister napa okenn sa bann proze ki nou nou’n dir ki mwan mon ‘n pran desizyon pou nou shelved.

Tou sa bann proze i kontinyen malgre ki sa bann lenfrastriktir i pe kout nou en gro sonm larzan, me zot pe kontinyen akoz ki nou krwar akoz pa bliye kontinite sa ki nou pe travay lo la, me lapros ki nou, nou pe pran la  i pa kestyon fason travay.  Me le moman i apropriye la pou nou kapab al met lanfaz lo prodiksyon kot nou ava vwar bann benefis direk.  Nou’n fer lenfrastriktir e bann konsonmater pa pe neseserman vwar sa bann benefis direk, me la avek sa plan ki nou pe vin avek nou pou vwar sa benefis direk.  Mersi Mr Speaker.

 

MR SPEAKER

Mersi Minis.  Onorab Stephen Pillay.

 

HON STEPHEN PILLAY

Mersi Mr Speaker.  Bonn apre midi Minis avek ou delegasyon.  Mon kestyon ki mon oule demann Minis, dan son plan eski i annan en norm or limit lo lakantite travayer etranze par laferm – dizon par met kare konbyen travayer etranze en norm ki pe allocate?

        E eski osi i demann en limit lo la grander laferm ki Minister i allocate par endividi en fason pou garanti sa 134 aplikan.  Si son plan i succeed nou annan 100poursan prodiksyon ou pou annan  134 aplikan, eski nou devret annan en limit lo la grander laferm par endividi ?  Mersi Mr Speaker.

 

MR SPEAKER

Mersi Onorab.   Minis.

 

MINISTER CHARLES BASTIENNE

Mr Speaker mon ti pe konsilte sa akoz i en kestyon en pe teknik with regards to limit lo grander later.  Aparaman mon aprann avek  CEO (SAA) poudir i annan en limit lo la lo grander later.  Me mon pa’n ganny sa lenformasyon pou kapab dir ou konbyen ektar si 1 ektar – si 2 ektar  si 3 ektar.  Sa lenformasyon mon napa e sa mon  kapab fer ou gannyen  pe plitar en?  Lenformasyon spesifik.

Konsernan lo Konsernan travayer etranze lo grander laferm ler bann fermye i fer en laplikasyon avek lanplwa pou fer vini zot travayer etranze, evidaman i donn zot en certificate of entitlement swivan  rekomandasyon k SAA in fer.  E sa  i annan pou fer avek son grander later son grander laferm  ki li i annan.  I an relasyon avek sa.  Ok ?  So i direkteman lye  kantite travayer etranze i pou gannyen son  certificate of entitlement i ou baze lo grander son laferm. Mersi Mr Speaker.

 

MR SPEAKER

Mersi Minis.  Onorab Pillay ok?

Mersi.  Onorab Vidot.

 

HON AUDREY VIDOT

Mersi  Mr Speaker.  Mr Speaker pli boner letan Onorab Arissol from Anse Boileau ti demann Minis en kestyon selman i pa’n al an detay ti pou pli byen akoz i annan piblik ki pe demann lenformasyon.  Eski Minis i kapab eklersi pli byen lo plan Devlopman lo semen Montagne Posée ki pou bann fermye ki pou bann ki pe prodwi poul.  Mersi.

 

MR SPEAKER

Mersi Onorab Vidot.   Minis.

 

MINISTER CHARLES BASTIENNE

Mr Speaker  lenformasyon ki mon annan, se ki i annan 2 proze Montagne Posée – enn in komanse enn nenport ki moman pou al lo tender.  Se sa lenformasyon ki mon annan la.  Mersi Mr Speaker.

 

MR SPEAKER

 Ok.  Mersi Onorab.   Minis.   Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mwan mon pa pou fer parey Onorab De Commarmond pou felisit Minis akoz i fer mwan mazin Mr Louis Gopal ki ti donn Minis Finans en Pri Nobel pour Lekonomi, apre 2an apre nou pei ti faid.  So mwan mon pe ekout sa plan ki Minis in met devan.  I enteresan.  Me solman nou pou bezwen en bon pe letan refleksyon lo la e atann reaksyon bann fermye zot menm  – bann akter prensipal dan sa lendistri, pou gete si vreman zot in ganny konsilte e non selman ganny ekoute me si zot in ganny tande, akoz sa i de diferan keksoz.

Mon kestyon mwan Minis se Mr Speaker i Minis in dir nou  pli gro kondisyon lareisit sa plan, i depan lo resours imen  alors mon kestyon i senp kote nou pou gannyen  sa resours imen?  Akoz bokou bann keksoz in ganny dir pou ganny loan fodre evalyasyon bann proze oli bann zofisye pou evalye bann proze ?

Pou ou kapab swiv bann fermye fodre ou annan extension officer oli  sa bann extension officer?   Oli e konnyen letan i pou pran si Minis pe dir nou  ki poudir i pou al train zot e konbyen letan i pou pran pour zot kapab arive  e efektivman lo teren?  Sa i mon premye kestyon.

Mon 2enm kestyon Minis  mon mazinen  bokou fermye i  konnen ki poudir enn bann rezon lagrikiltir in fail se  avek bann lentervansyon politik Gouvernman dan lepase ki’n deside poudir en fermye poul pa ganny drwa fer 20mil poul – pa ganny drwa fer 40mil ou pa pou ganny drwa fer 4mil oubyen ou pa pou ganny drwa fer 2mil.  Gouvernman ki dir ou konbyen ou ganny drwa fer.  E sete menm keksoz Gouvernman  ki pou enterfer dan tou bann keksoz ki ou anvi fer.  Eski sa lentervansyon Gouvernman baze lo bann kestyon politik par egzanp si ou annan en b on kontak politik ou gannyen  en bon bout later – dernyerman zot ankor pe donnen bann zofisye larme ki fek resign bann gro, gro plot later 10 arpan Montagne Posée.  Zot pou kontinyen donnen sa bann keksoz akoz si zot kontinyen fer li konmsa pou napa okenn sikse dan sa proze.

Mon  dernyen kestyon Mr Speaker, i konsern marketing ek lavan ki Minis pa’n koz  preske ditou lo la.  Ler ou prodwi ou bezwen annan en landrwa pou ou vann ki plan ki Minister Lagrikiltir i annan pou met an plas bann striktir ki pou permet bann fermye ler zot in fini prodwi pou zot vann zot prodwi pa pou zot al asize deryer en treto – dernyen en table dan bazar me zot prodwi e annan bann striktir prive mon pa pe dir refer bann parey SMB ti fer lontan Gouvernman refer bann keksoz.  Bann striktir prive i annan en gran lespas la kot Agro ti été Pointe Larue, la akoz zot pa ofer sa  a bann dimoun ki kapab aste bann wholesalers aste bann keksoz – konmsi ki en fermye i konnen in ganny en landrwa i pe al vann bann keksoz; eski zot pe gete konmsi sa  kote marketing sa kote fasilite pou ankouraz bann fermye pou annan lespas e pou ankouraz lotel pou vin dan sa lespas pou li kapab supply son lotel   Pou li pa bezwen aste  2pake tomat en landrwa – en pake zariko en lot landrwa me at least konmsi i annan en keksoz ki striktire ki organize.  Eski sa laspe ki lenportans dan ou plan Minis ?  Mersi.

 

MR SPEAKER

Mersi Onorab.   Minis.

 

MINISTER CHARLES BASTIENNE

Mr Speaker, parey  mon’n dir taler, se ki an konklizyon mon ekspekte fermye i vwar zot ladan – i vwar zot dan sa plan ki nou’n vin avek.  I pa en plan ki nou’n asiz dan biro antre nou.  Nou nou’n dir i bon fer sa, san ale pou al koz ek bann fermye.

Mon’n dir taler nou’n fer plizyer seri konsiltasyon avek bann fermye e vwala ki’n dekoul dan sa bann konsiltasyon.   E swivan konsiltasyon  nou’n  el enterpret li dan fason pou  nou kapab pou anmenn sistenm, prosedir, incentive pou zot kapab prodwi.

Konsernan resours imen Mr Speaker, mon kapab dir ou  se ki  nou pe reorganiz SAA SAA pe ganny reorganiz.  Extension officers nou ti krwar nou ti pou bezwen pli bokou, nou deza annan nou omwen 9 extension officers me lafason ki nou pe travay ki nou annan la, i mank nou pa plis ki 2 extension officers pou nou kapab fer sa plan arive lafason ki nou’n met sistenm an plas.   So it can be done.  I pa pou en problenm e Gouvernman atraver sa plan i vin en fasilitater.

Nou konnen poudir sa konzantir ki nou’n mete ozordi kot Lagrikiltir i été, absoliman fodre nou akonpanny bann fermye pou tir zot kot zot été pou zot bouz devan  – donn zot sa konfyans sa konfidans pou zot kapab rekomans fer prodiksyon e alor nou koman sa fasilitater premyerman nou pe set en Marketing Unit dan  Lazans lagrikiltir.  Sa Marketing Unit se li ki vin sa lyen ant bann farmers ek bann distribiter.  Sa i premye lye.  E sa osi i pou ed nou pou nou kapab annan en fason organize kot nou pou kab annan en Sistenm Contract Farming kot sa fermye i prodwi dapre Kontra i fer sir i respe sa kontra pou li fer mannyer po9u li donn whoever ki bezwen ki li in antre an  Kontra avek.

Nou annan bann egzanp  i annan fermye ki right now ki pe supply STC avek zot bann prodwi.  K nou vwar?  STC souvan i dir nou koumsa i dir avek bann fermye nou oule ki  ou anmenn nou 3fwa par semenn Lendi, Merkredi, Vandredi pa pli tar ki 9er bomaten.  Me malerezman i annan serten fermye ki fer byen ki respekte sa, me i annan  lezot  ki deside anmenn 11.30 – 12.  Ou vwar?  Kot zot pa pe neseserman respekte sa ki  zot pe annan laranzman ki zot pe annan ek STC.

Me fermye osi  pou bezwen  vin bokou pli serye anvi ki bann market pe fer sir ki zot annan consistency dan sa ki zot bezwen pou fer sir ki toultan i available sa ki sa bann landrwa i bezwen.

Nou pe plan Onorab pou nou – nou deza annan serten regional market.  Nou annan en market Ans Royale – nou annan en market anvil nou pe fer plan now right  nou pe fer en  proper market legim obor market pwason Grand Anse Praslin.   La Digue in ganny pou li.  Nou pe revwar bann landrwa kot nou kapab annan bann régional market kot vi ki mwan Minis ki responsab pou Lagrikiltir ek Lapes, kot nou kapab combine tou lede ansanm.  Akoz nou’n ganny dir dan bann meeting apre plizyer repriz pou nou kapab annan en bon lavant legim fodre nou lavant pwason i lanmen obor.  Sa i enn bann keksoz ki’n ganny fer resorti par bann fermye si i korek oubyen nou me sa i enn bann keksoz ki’n ganny fer sorti.

Me ou osi ou’n fer sorti en pwen ki tre enportan.  Se ki nou bezwen annan sa landrwa kot sa lotel i bezwen fresh vegetables ki fek anmennen ki i kapab gannyen. Nou an diskisyon right now avek STC pou dan zanmerant Hypermarket  kot zot kapab sa ki nou apel en green field kot la zot ava stock tou bann keksoz ki bann fermye i anmennen dapre zot Kontra, evidaman pou depoz la e tou lotel, tou bann dimoun ki bezwen aste i aste in bulk i pou vin dan sa landrwa e zot, zot ava konnen e zot ava ganny tou sa ki zot bezwen kot bann prodwi lagrikiltir i konsernen.

So ou bann pwen i byen me solman nou ekspekte i annan serten keksoz ki pou ariv la e i pou annan serten keksoz ki pou pran en pe letan.  Nou pa pe vin rod Pri Nobel nou.  Ki nou pe vin rode nou se pou fer sir nou ogmant prodiksyon o maksimonm posib – fer sir  nou abnn dimoun i manz en bann keksoz ki fer a en pri abordab anfen kont ki nou oule achieve se sekirite alimanter.  Sekirite alimanter i annan 4 konponan.  I dir ou fodre ou afordabilite, accesibilite e  fodre i safe for consumption apre i vin nutriciousSo se sa laliny ki nou pe ale pou nou kapab garanti sekirite alimanter nou pep.

Mersi Mr Speaker.

 

MR SPEAKER

Mersi Minis.   Mon annan 2 pti kestyon from the Chair.

Minis ou’n mansyonn sa hatchery ki pe ganny konstri par en fermye prive, eski ou Minister i pa fer premye fwa ki mon demande – i annan plan pou reabilit sa semen pou al kot sa nouvo hatchery e osi pou anmenn kot sa 2 fermye.  Enn i pou owner sa hatchery – en lot par lao ki pe vreman travay for pou li kapab prodwi pou pei.  Minis ou konnen kote mon pe dir.

Apre i annan ankor en fermye ki pe vreman struggle  e i ankor pe struggle pou li kapab reste dan biznes  e prodwi pou– pei – i ti demann permi pou li enport letchi sorti Maurice mwan pase e i ti ganny rezete.  Ou’n mansyonn ki NBA i annan tou lekipman modern la e sa fermye in dir poudir i ankor enterese pou enport letchi e Maurice in prevwar en tre, tre bon sezon komansman Desanm pou ki Seselwa, i a kapab manz letchi a en pri abordab e pa pey 5 letchi R75.

Si Minis i kab P konsider  sa anvi ki NBA i annan tou lekipman modern pou kapab  detekte si i annan okenn problenm avek bann prodwi ki sorti Maurice.  Minis.

 

MINISTER CHARLES BASTIENNE

Mr Speaker, mersi pou ou kestyon.  Dabor  kot sa hatchery prive pe fer annefe sa  li menm li kot nou pe koz Semen Letsi ki kestyon in demande pli boner ki mon’n dir poudir i pe al lo tender so i take care of sa.

Dezyenmman konsernan Maurice sa dimoun i oule fer vini letchi, normalman avan-ler nenport ki pei i kadab anvoy son keksoz Sesel pou eksport Sesel normalman i bezwen fer ki nou appel PRA – ok?   En Pest Risk Analysis.  Alor ler nou’n fer sa lo konsernan Maurice vizavi letchi lenformasyon ki mon annan avek NBA la se ki nou Sesel pou le moman, malerezman nou annan 2 kalite fruit FlyMe Maurice li i bokou pli grav li i annan li 9 kalite.  E ler NBA in fer son PRA avek Maurice, i paret mwan ki zot pa’n kapab trete avan-ler zot  anvoy sa prodwi Sesel.  E Se pour sa rezon ki NBA pa kapab pran sa risk pou zot kapab allow sa lenportasyon ziska ler zot satisfer zot lekor poudir pa pou koz okenn danze pou nou biosekirite.  Mersi Mr Speaker.

 

MR SPEAKER

Ok, mersi Minis.  Bon avek sa nou ava  remersi Minis Bastienne e nou ava ekskiz ou avek ou lekip parmi nou lasanble.   Mersi Minis.

 

(MINISTER BASTIENNE AND HIS DELEGATION WAS EXCUSED FROM THE HOUSE)

 

MR SPEAKER

Bon avan nou adjourn mon krwar i enportan ki mon fer en lanons from the Chair.  Mon pa pe preempt nanryen – nou an konversasyon avek LGB e Madanm Clerk i annan kontak avek Biro Atttorney Zeneral e avek Minis responsab pour Imigrasyon.

Sityasyon i koumsa, mon krwar it’s only fair lo bann Manm.  I annan bokou travay,  bokou zefor in ganny met ladan.  Avan ki LGB i fer son move ofisyel demain matin – nou’n ganny enformen e nou‘n fek ganny en kopi let sorti kot Minis la ki Minister pe withdraw sa Immigration Bill – Ok?   E sa i ava ganny fer formally demann bomaten.   I enportan mon krwar parey mon dir mon krwar it’s only fair ki mon fer zot konn la tanto akoz mon konnen i annan bokou travay – bokou zefor ki preparasyon ki bann Manm in met ladan, me menm sa kopi ki’n sorti kot AG’s Office  ki nou an sirkilasyon i annan bokou problenm avek.  Alor desizyon in ganny pran pou withdraw so demen nou pou annan zis 2 item lo Order Paper – sa Private Member’s Bill apre Mosyon.

So bann Manm tanto  i ava kapab konsantre lo sa 2 item ki an plas prepar pour Immigration e demen Immigration Bill i ganny retire.  Ok sa lenformasyon ki mon anvi pas avek zot from the Chair.  Ok?

Yes Onorab Ferrari?

 

HON JEAN-FRANCOIS FERRARI

Mr Speaker, mon pa oule pran letan Lasanble me selman ou menm ou, ou konnen Mr Speaker konbyen letan nou’n pase – konbyen travay nou’n fer lo sa Bill.  Nou’n fer li akoz nou’n mazinen poudir ok menm pa nou plis ki 190 fot nou’n tire enn par enn.  Nou’n pas lo Lartik par Lartik de semenn.  Yer fernwanr ki nou sorti isi.  Mr Speaker personnelman mon ava dir sa ou. ou ava fer ou resers personnelman mwan mon krwar i en stratezi sorti kot Parti Lepep pou met retar ek travay Lasanble.

La nou’n fini fer nou travay nou bezwen al kit li ater apre al rekomans ankor lo la  – mwan mon santi Mr Speaker  poudir sa i konpletman inakseptab e mwan mon vwar sa koman en travay en Gouvernman ki konpletman enkonpetan e ki i devret resign!

 

(APPLAUSE)

 

MR SPEAKER

Bon se sa konteni rapor ki  onorab Georges in prezante bomaten.   Dan Bills Committee sa in sorti tre, tre for e bann ki attend Bills Committee zot konnen poudir toultan se sa bann kritik ki nou fer anver zofisye sa bann Minister avek AG’s Office.  Tro bokou fot.  E  Menm parey mon’n dir sa amannman ki’n ganny anvoye – sa Bill as amended ki’n anvoy from AG’s Office mwan osi bomaten mon’n pas lo plizyer seksyon i ankor ranpli avek fot.  Ok?  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker, napa nanryen pou fer avek enkonpetans Gouvernman dan lesans ki Prezidan Larepiblik in ensiste ki sa Bill i vin dan nou Lasanble.  In ensiste.  Me problenm i vin avek Biro Attorney Zeneral.  Biro Attorney Zeneral nou ti ansanm dan Bills Committee e nou’n diskite.  Nou’n netway otan ki nou ti kapab tou bann dimoun i la Onorab Georges ki Chair Bills Committee in la me Bill in retournen !  I pa’n al kot Prezidan Bill.  In al kot Biro Attorney Zeneral pou enkli sa bann netwayaz, ensi lezot pwen me in retournen avek tou sa bann fot ki zot menm zot in trouve taler zot in al konsilte e se sa ki in vin ankor back dan nou Lasanble.  E prezan Minis pe dir withdraw akoz i bezwen ganny revwar ankor sa Prozedlwa.  Alor i pa nanryen ki fer avek Prezidan Larepiblik, me i annan pou fer avek bann lezot landrwa ki bezwen deal ek sa bann Bills apropriyeman.  Mersi  e demen nou ava formelman withdraw sa Bill.

 

MR SPEAKER

Mersi Onorab De Commarmond.  Bon  – yes Onorab Ramkalawan?

 

HON WAVEL RAMKALAWAN

Mr Speaker sa ki Onorab De Commarmond pe sey dir nou la personn ant nou pa pou anvale.  Sa se bann Bill ki sorti kot Gouvernman!  They are not Private Member’s BillsBill i sorti kot Gouvernman.  I form parti plan Gouvernman!  Gouvernman i annan en dimoun ki ansarz e sa se Prezidan Larepiblik!  Biro Attorney Zeneral i tonm direkteman anba Biro Prezidan.  Zot in donn nou en lalis Bills ki pou pase.

Mr Speaker eski ou realize ki term pase i annan Pension Fund ki bezwen retournen – Dog’s Bill in bezwen retournen tou sa bann seri Bills lo lekonomi – Economic Development Bills sepa ki lot zafer.  I annan en seri.  Letan in tir sa enn in tir 4 ankor.  I annan en lot ki Gouvernman ti anvi anmennen  – emoluments bann zafer.

Mr Speaker nou annan ou Bills anviron 10 Bills an tou ki zot in anmennen – parol  ki mon tann plis Onorab De Commarmond konmela se ‘’Mr Speaker mon pe withdraw’.’  Tou lazournen i pe withdraw! Toultan i pe withdraw me kan eski nou pou serye dan sa landrwa?

Mr Speaker mwan personnelman mon ava dir avek ou laverite, mon’n anmenn en Mosyon depi komansman term  – Parti Lepep in trennen lo Mosyon Konstitisyon nou’n pran en lazournen napa problenm, apre sa in annan Mosyon Onorab William – Onorab William zis in deside withdraw.  Mwan letan nou’n regard progranm Lasanble pou sa semenn – nou’n al regarde i annan en seri kestyon in annan Urgent Question  – in annan PNQ apre sa in annan Statement from Minis.  Plis en Bill – Immigration Bill ki en longer ki annan sepa konbyen paz !

Mr Speaker nou bezwen mazinen ki poudir dimoun i vin la dan sa Lasanble nou prepar nou psikolozikman!  Nou pa zis vin la pou nou zwe! E mwan personnelman mon ava dir ou laverite Mr Speaker apre ki nou’n pas depi 1er apre midi ziska 7er diswar pou nou regard  tou – I mean sa Bill la parey ou konnen Mr Speaker mwan mon’n diriz en Sesyon Caucus nou’n konn sa Bill parker.  E tou son fot.  Ok e tou son fot.  E Gouvernman li pa kapab fer parey nou?  I pa kapab asize fer parey nou? E la ozordi  – la ozordi apre ki nou’n gat tou sa letan yer finalman kot…. I dir i pe withdraw e nou pa konnen ki i pe vin avek e apre demen… Mr Speaker mwan dan sa ka ou konnen ki mon propoze?  Demen annou pa sit annou sit semenn prosenn!  Parski Mr Speaker nou bezwen osi pran an konsiderasyon.  Nou annan en Mosyon enportan – en Mosyon enportan kot nou prepar nou byen menm pou nou fer en bon travay. me lo kote Gouvernman  – nou nou’n pare pou nou vin fer en bon travay e Gouvernman nek zis i ape withdraw mwan mon dir demen, annou pa sit annou sit semenn prosenn kot nou tou nou ava konnen nou vin isi kot nou byen prepare psikolozikman prepare pou nou fer en bon travay!  Mersi bokou.

 

MR SPEAKER

Mersi Onorab Ramkalawan.  Bon annou pa fer en deba akoz nou bezwen rann SBC osi lantenn.  Onorab De Commarmond.

 

HON CHARLES DE COMMARMOND

Non napa okenn gran deba Mr Speaker.  Senpleman sa ki pe ganny avanse i dan lavantaz pou met ou Mosyon osi – konmsi ou ganny letan pou ou pas sa Mosyon.  Now, sa pwen kot Bills ki sorti kot Gouvernman  i vini e i bezwen ganny withdraw mwan mon’n osi lev sa avek Gouvernman e osi avek Prezidan poudir sa kalite keksoz nou pa pou kapab kontinyen aksepte.  I bezwen kot sa bann Minister kot letan  bann Bill i sorti la, i bezwen sorti pli byen ki i pe sorti konmela.  Sa lo la i kler e mon’n ensiste e mon pou kontinyen ensiste e nou osi lo nou kote nou pou fer sir ki vreman e la Bills Committee  – sa travay ekselan ki i pe fer e nou avan en Bill i pou bezwen vin lo Order Paper mon krwar mwan Bills Committee i bezwen donn son sanksyon lo la – son laprouvasyon.  Pa pou kapab vin zis lo Order Paper ki Bills Committee pa ankor fini agree – wi la nou’n dakor pou li vin lo Order Paper.  E lo sa pwen nou ava al dan sa bann direksyon.  Mon agree ek sa.  Mersi.

 

MR SPEAKER

Bon ankor mon fer referans ek rapor Bills Committee.  Enn bann rekomandasyon ki’n sorti bomaten se ki Bill pa ganny mete lo Order Paper toultan  Bills Committee pa scrutinize pa pas lo la, e pa donn son go ahead.

So nou pou resevwar Bill e nou pou esper go ahead avek Bills Committee kot nou ava fer tou sa bann enteraksyon avek AG’s Office ek sa Minister konsernen then nou ava met li lo Order Paper pou First Reading apre nou ava swiv bann prosedir.  Nou ava fer li koumsa.

Me demen nou pou bezwen meet demen, akoz i annan sa Bill pou withdraw –  i annan en Private Member’s Bill.  Nou kapab si zot agree demen nou meet demen bomaten nou fer sa de – i annan sa Private Member’s Bill apre ou ou anmenn en Mosyon pou withdraw sa Bill apre nou ava pran en desizyon si nou pou adjourn ziska semenn prosenn e nou pa a pran sa Mosyon.  Ok?  So vwala sityasyon nou meet demen bomaten 9er.

E avan mon rann lantenn mon oule remersye SBC pou donn  nou en pti letan an plis ozordi.  Ok Lasanble i adjourn e nou repran nou travay demen 9er bomaten.   

 

        (ADJOURNMENT)