Home » Verbatim » 2018 » Verbatim Wednesday 11th July, 2018

Verbatim Wednesday 11th July, 2018

NATIONAL ASSEMBLY OF SEYCHELLES

Wednesday 11th July, 2018

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bonzour tou Manm Onorab, bonzour tou dimoun ki a lekout e pe swiv travay Lasanble Nasyonal e mon ti a kontan dir en bonzour spesyal pour bann viziter ki anler dan Galeri sa se bann partisipan ki sorti kot Vocational Training Centre e zot in vin lo lenvitasyon Onorab Regina Esparon, Onorab pour Glacis.

Zot pou swiv deba ozordi deba spesyalman i annan sa Mosyon lo dezabilite, apre sa dan break pandan ki zot pe pran enn pti ver juice – en dite mon envite bann Manm Lasanble pour vini pou kapab enterakt avek zot, pour vini pour kapab enterakt avek zot kot petet zot ava kapab partaz enn pti pe zot bann swe zot bann difikilte ki zot pe fer fas avek e pou regarde koman nou sa Lasanble nou kapab ed zot.  Alors welcome e mon swete ki zot ava pas en bon moman avek nou Lasanble la bomaten.

Parey mon’n anonse yer, ozordi nou lentansyon se nou fini midi akoz pour nou kapab les bann Manm e staff Sekretarya pou al attend servis nou Former Clerk Madanm Sheila Banks an siny respe.  So bomaten nou pou pran Mosyon nou ava regarde ki mannyer i pou ale me nou lentansyon se nou fini midi.

Nou ava al direkteman lo Order Paper e nou annan detrwa First Readings e mon a pas laparol ek Madanm Clerk pou fer First Reading.

 

MADAM CLERK

Mersi Mr Speaker, bonzour Mr Speaker, bonzour tou Manm e tou nou bann viziter ki dan Galeri.

Premye Bill lo papye for First Reading se Immigration Bill. 

This Act may be cited as Immigration Act, 2018 and shall come into operation on such date as the Minister may by notice in the Gazette appoint.

Dezyenm Bill Business Tax (Amendment) Bill. 

This Act may be cited as a Business Tax (Amendment) Act, 2018. 

This Act other than section 2 (b) Q (2) and O shall come into operation of 01st January, 2019. 

Section 2 (b) O (3) shall come into operation on such date the Minister may by notice publish in the Gazette appoint.

Trwazyenm Bill – International Trade Zone (Amendment) Bill.  This Act may be cited as the International Trade Zone (Amendment) Act of 2018.

E katriyenm Bill, Control and Protection of Dogs Bills.  This Act may be cited as a Control and Protection of Dogs, 2018.  

Mersi Mr Speaker.

 

MR SPEAKER

Mersi Madanm Clerk e tou bann Manm nou’n sirkil kopi sa bann Bills avek zot pou zot kapab komans pas ladan.

Bon nou pou al direkteman lo nou 5enm item lo azanda sa se Mosyon e mon avar demann Onorab Regina Esparon pou li move son Mosyon.  Onorab laparol i pou ou.

 

HON REGINA ESPARON

Mersi Mr Speaker bonzour tou dimoun ki a lekout tou koleg Onorab en bonzour spesyal pour bann envite dan Galeri staff ek bann zanfan dezabilite sorti kot Vocational Training Centre North East Point.

Mr Speaker avan mon komanse mon pou fer enn pti amannman avek mon Mosyon pou lir koumsa;

‘Sa Lasanble i aprouve pou demann Gouvernman, pou fasilit konstriksyon sant pou bann dimoun avek dezabilite.’ – Konmsi mon pe retir ‘pou met a dispozisyon teren neseser’ i pour vin;

‘Sa Lasanble i aprouve pou demann Gouvernman, pou fasilit konstriksyon sant pou dimoun avek dezabilite.’

 

MR SPEAKER

Ok go ahead Onorab.  Mon krwar i en amannman – i pa vreman sanz son Mosyon.  Wi go ahead

 

HON REGINA ESPARON

Mersi Mr Speaker.  Demen le 12 Zilyet Sesel pou selebre Lazournen Nasyonal pour dimoun avek dezabilite.  En group dimoun ki ganny konsidere koman vilnerab e ki bezwen plis latansyon ki en dimoun ki normal.

E pei in siny Konvansyon pou protez zot, pour fer sir ki zot drwa i ganny respekte e ki zot pa ganny diskriminen parmi lasosyete; savedir Leta i annan serten lobligasyon vizavi sa bann dimoun.

Lo nivo Nasyonal i annan serten Polisi ki’n met an plas pour protez sa bann dimoun e i osi annan en konsil pou dimoun avek dezabilite ki konpri 10 dimoun enkli CEO kot Departman Servis Sosyal ki oversee bann keksoz ki annan pou fer avek dimoun dezabilite.  E sa Konsey i ganny gide par National Council for the Disabled Act. 

Mr Speaker ozordi lemonn pe evolye an sa ki konsern swen pour sa group dimoun.  Nou pe sorti lo medical model e nou pe bouz anver en social model ki pti a pti sosyete i bezwen ganny edike lo la.

Dan mon demars pou anmenn sa Mosyon in pa’n fasil pour ganny statistik akoz napa en database annord an sa ki konsern dimoun avek dezabilite permanant.

E Chairman for Disabled in fer mwan konpran ki prezan ki zot pe travay pou ganny en database, e zot dan prosedir fer survey dan tou distrik pou compile lenformasyon.  Me i annan anviron 1100 dimoun ki pe resevwar lasistans dezabilite e zot pa neseserman annan dezabilite permanan.

Lasosyasyon pour bann dimoun sourd li i en NGO e son bann sesyon i ganny fer kot lekol Au Cap.

Sa ki kapab deplase i asiste sa ki pa kapab i perdi.  Pour bann dimoun ki pa vwar kler ki anvi aprann braille, laklas ti pe fer kot Lekol Eksepsyonnel e la prezan in arete.  Me pour le moman i annan 2 landrwa prensipal ki ofer servis pour bann dimoun dezabilite.

I annan Lekol Eksepsyonnel ki sitye Roche Caiman dan en landrwa rezidansyel, avek bokou defayans, ki pe akomod anviron 92 zanfan, 24 teachers ek 6 asistan.

Kot sa lekol i pozisyonnen i pa ideal i annan zis en larantre.  Napa en emergency exit an ka en dezas i arive.  Mon konnen ki nou pa devret pe fonksyonn an izolasyon an sa ki konsern donn swen bann dimoun avek dezabilite, nou koz bokou lo enklisivite, me an menm tan ki nou pe fe sa nou osi pe devret pe regard laspe sekirite sa bann ki pe resevwar swen e laspe sekirite pour sa bann ki pe donn sa swen.

Mr Speaker apre i annan Vocational Training Centre ki apel VTC ki sitye North East Point ki tonm dan distrik Glacis.  Laba i annan 35 etidyan e 6 enstrikter.  E parmi sa bann enstrikter e parmi sa bann enstrikter i osi annan ki ti pasyon dezabilite ki pe travay a plen tan ki malerezman ki Social Security Act i dir ki si sa dezabilite i dan lanplwa i devret ganny 25poursan son lapey redwir 25poursan redwir dan son benefis ler i dan lanplwa, me pou sa bann dezabilite ki pe travay a plen tan kot VTC i pa leka, akoz zot pe ganny zot zis R1800 par lao sa sekirite sosyal.

Mr Speaker i bon fer resorti ki laba North East Point sa main batiman ki dan milye, ki lontan ou ti apel li Batiman Rehab Centre ki ti en don, son fondasyon ti ganny mete an Zen 1981 sa batiman ti ganny ouver par ansyen Prezidan Rene le 15 Zen, 1982.

Ozordi sa main building pe ganny servi par Minister Lasante, kot zot pe ofer servis teste Zorey pour bann zanfan e osi adilt en bout i ganny servi pou fizyo – en lot bout pou fer prostetik – bann fos e sirtou bann lipye artifisyel en lot bout i vid e ladan i annan zis en microwave sa zot dir pou Occupational Health en lot bout i fer reparasyon wheelchair e tou sa bann servis pe ganny ofer pou piblik. me pa pou sa bann zanfan dezabilite.

Mr Speaker sa bann zanfan dezabilite ek zot enstrikter zot pe servi enn pti bout lo kote drwat ki detase avek main batiman.  Ler ti komanse tou ti ansanm mon pa konnen kote sa divizyon in antre.  En pti bout ki apel VTC la lo son kote drwat ki ti lakaz kot dokter ti reste li i ganny inogire le 01 Desanm lannen 2000 par Madanm Sarah Rene ki ti Patron Dezabilite sa lepok e se Madanm Helene Maiche ki ti pe run sa landrwa.

Laba i separ an 4 bout zot fer sewing, craft parey kolye ek brasle dan sa bout sewing i antre zis 2 latab 2 sez ek 1 bife kot zot stor zot bann lekipman.  En dezabilite dan wheelchair pa kapab antre parske ni dan sa koridor en wheelchair pa kapab pase telman i ptipti.

I annan enn ptipti bout kot zot met en computer e servi koman en landrwa pour bann enstrikter zwenn.  Lot bout kot zot depoz zot manze e en fasilite twalet e ki zot lav bann zafer.

Mr Speaker sa landrwa i vreman sere.  I pa ideal pou sa ban zanfan me zot in ganny met la e zot napa swa.  Nou koz bokou lo skills development program me si napa en landrwa ideal ki konfortab, ki mannyer nou pou develop skills sa bann zanfan?  Sa landrwa i pa zanmen disabled-friendly ler ou gete.

Apre demann par paran ek staff, mon ti vizit laba nou de Onorab Letourdie e Msye Clifford Mondon responsab pour ‘Make a Child Smile’ ki osi en manm lo Disabled CouncilStaff ti dir nou ki i malere ki disabled pe ganny trete koumsa.  Able-bodied i anndan dan bon e sa ki disabled i deor dan mal.

Mr Speaker mon pe vin montre ledwa me mon pe vin penn portre vre sityasyon sa bann manrmay dezabilite.  Se pou sa ki nou pe demann Gouvernman pou fasilit konstriksyon sant pour dimoun avek dezabilite ki pou annan bann fasilite ideal pour ed sa bann zanfan, sorti dan sa sityasyon e pou annan en bon Progranm pou Vacational Training Centre ki pou ed sa bann zanfan pou zot antre dan lemonn travay.

Ozordi en zanfan avek dezabilite i al Lekol Eksepsyonnel ziska 16 an e laba i tonm anba Minister Ledikasyon.  Apre 16 an i ganny anvoye kot Vocational Training Centre e i annan kriter ki ganny servi pour admet bann zanfan laba me i napa en kriter pour exit.  I annan etidyan ki laba i annan plis ki 40an.

Pour fasilite manze Mr Speaker zot servi en bout dan sa main batiman koman lasal a manze kot zot partaz avek bann staff Lasante ki okip sa main block.

E kote ladministrasyon zot servi en lot bout lo kote gos ki lontan bann dokter ti reste.  Laba osi i annan en pti resepsyon – en landrwa ki sipoze pour sarpantye en lot bout kot zot fer travay tanmi enn ptipti bout, kot zot enprim lo latwal – tou sere, sere e par deryer zot annan zot zarden kot Mr Bonne i montre zot lagrikiltir.

En landrwa ki delo i monte e souvan ler plant i grandi se voler ki rekolte akoz i pa an sekirite.

Mr Speaker akoz zot bann landrwa travay ou servis i deparpiye en pe partou.  Ler lapli i tonbe si zot kot craft zot pa kapab sorti si zot napa en kouvertir, pou zot al manze zot bezwen saroy zot manze dan lapli pou zot traverse pou zot al dan sal a manze ki plase dan main block.

E an vi ki zot pe partaz sal a manze ek bann staff Lasante kot main batiman, zot ganny demande pour manz ant 11.30 -midi pou zot ganny sans servi sa landrwa.

Akoz dapre bann enstrikter, i annan bokou konplent par bann staff Lasante laba ki zot pa kapab manz ansanm akoz zot enkonfortab parmi sa bann zanfan.  Alor bann zanfan dezabilite i bezwen servi sa landrwa dan sa dele letan ki zot ganny donnen.  E sa i kree bokou lenkonvenyans pour sa bann zanfan ki bezwen manz an tayan.

E si zot dan la salamanze zot bezwen servi twalet zot pa ganny drwa servi dan main block – lapli loraz zot bezwen traverse pou al dan sa lot block lot kote.

Mon ti demann en staff akoz ki ler manze i vini, zot pa met direkteman dan salamanze zot dir mwan zot pa ganny drwa.

Mr Speaker si sa bann zanfan ti annan en landrwa pou zot keksoz ti pou fasil zot pa ti pou ganny trete koumsa.

En lot problenm ki bann zanfan i fer fas avek se sa problenm inondasyon.  Apre ki Gouvernman ti konble lanmar North East Point pre kot Rehab pou retir semen ki ti pas kot en msye Larisi ki ti aste later e ki ti bezwen son privacy devan kot nou ti apel Soley D’Or.

An rezilta sa i fer ki lanmar pa desarz byen, e ler lapli tonbe, delo i monte deryer batiman kot sa bann zanfan i ete e i kree en lenkonvenyans pour zot pase pou ganny akse avek lot bout batiman lo kote gos e avek main block.  E sa i port bokou danze pour sa bann zanfan ki bezwen mars dan delo oubyen labou, pour al lo sa kote.

E an se moman napa okenn emergency exit ni en assemble point si en dezas i menas zot.  Mr Speaker sa bann sityasyon i rann lavi sa bann zanfan e enstrikter malere.  Zot in met devan Council e CEO kot Departman Sosyal e Mr Simeon i dir mwan i malere ki sa i le ka e zot pa kapab fer nanryen.  Se pou sa ki mon pe demann en nouvo sant ki ava enn avek bann fasilite pour montre parey sign language pou bann zanfan ki sourd, zot a donn leson braille pour bann zanfan ki pa war kler.

Ozordi bann enstrikter i dir ou zot bezwen orthotherapist zot bezwen nutritionist pour zot vwar tanzantan kalite manze ki zanfan i ganny donnen.  Mon mazinen ki avek en nou sant zot ava ganny bann bis spesyalize ki kapab accommodate wheelchair pou deplas sa bann zanfan.

Akoz ozordi i annan zanfan ki ti a kontan vin kot sant me parske zot pa kapab servi transpor piblik e menm si NCFD – National Council for Disabled, i annan en bis ki deplas sa bann zanfan i pa en bis spesyalize.

E en sel transpor pe deservi tou distrik i bezwen kit 4er bomaten pou fer sir i fini fer letour Mahe, pou ki bann zanfan i ariv kot sant 8er pou komans laklas.

E la ankor Mr Simeon in dir ki zot in fer rekomandasyon pou ganny en bis spesyalize ki kout anviron R1.4 milyon me in ganny donnen zis R800 mil dan Bidze 2018.

E la mon lans en lapel ek bann Lorganizasyon Saritab pour ede pour ki bann zanfan i ganny en fasilite transpor spesyalize pour zot deplase.

Mr Speaker en nouvo sant avek bann fasilite modern i redwir en pe sa bann problenm ki sa bann dimoun pe fer fas avek.

Ozordi paran ki annan zanfan avek dezabilite i dir ou ki daycare pa oule pran sa bann zanfan e avek en sant, ou ava fer sir i annan daycare fasilite pou bann zanfan ki en pe pli pti.

Mr Speaker mon konklir an dizan ki i kler ki bann dimoun avek dezabilite, i bezwen en landrwa byen ankadre; an lokasyon ki an sekirite kot mouvman bann dimoun sa bann dimoun pa ganny limite me kot zot santi zot lib; kot zot kapab epanouir e devlope pe enport ki dezabilite ki zot annan.  Alor i kler ki si en dimoun ki annan dezabilite i reste anfermen, i pa pour devlope me i pour plito regrese.

Zot bezwen bann fasilite ki pou permet zot ed zot lekor, kot zot a kapab aprann debourye pour zot vin pli endepandan e sa pour sirman ed zot dan zot progre.

I vre ki i annan dezabilite ki pa pour amelyore, me nou bezwen donn sakenn sa bann zanfan sa sans pour gete ki talan i annan ki i kapab ganny eksplore e devlope, akoz sakenn dan son prop fason zot annan zot don.

Mr Speaker bi Mosyon, se pou osi fer Gouvernman realiz bann defi ki egziste ek sa landrwa kot zot ete ozordi, ek bann difikilte ki bann enstrikter pe rankontre.

En sant parey Mosyon pe demande se pou annan en landrwa avek tou fasilite neseser, ki pou ed sa bann zanfan dan zot devlopman e ki ava byen ganny kordinen; kot ki ava annan pli bon swivi lo devlopman san bann zanfan.  Kot carer oubyen paran osi i kapab vin ede avek bann zanfan dezabilite dan lazournen e zot ava kapab konnen ki mannyer pour ed sa zanfan ler i al dan lakour.

Ki mannyer pour fer sa zanfan grandir dan lazwa, malgre ki i annan serten dezabilite.  Nou bezwen en landrwa avek lentegrasyon e montre enklisivite.

Mr Speaker nou pou osi bezwen dimoun ki’n ganny byen formen pou konpran bezwen sa bann dimoun avek dezabilite pou pli kapab ed zot avek en fasilite avek bon ladministrasyon kot i annan bann spesyalis neseser ki pou kapab ed sa bann zanfan.  Parey mon’n dir speech pathologist, occupational health, personnel, nurse, rehab specialist eksetera.

E Minister Ledikasyon osi i bezwen form Special Needs Teachers ki pou atase ek sa sant, akoz an menm tan ki nou pe fer sant zanfan ki en pe pli kapab ava ganny entegre dan ledikasyon normal.

An terminen Mr Speaker mon ti a kontan demann sipor tou Manm pou aprouv sa Mosyon pour benefis nou bann dimoun avek dezabilite.  Mersi.

 

MR SPEAKER

Mersi Onorab Esparon.  Bon Mosyon move par Onorab Esparon i lir konm swivan;

‘Sa Lasanble i aprouve pou demann Gouvernman pou fasilit konstriksyon en sant pour dimoun avek dezabilite.’

Mosyon i devan nou okenn Manm ki pou segonn Mosyon? Mersi Onorab Letourdie.

 

HON JANY DE LETOURDIE

Mersi Mr Speaker Mosyon i ganny segonde.  Avek ou permisyon Mr Speaker mon fer mon lentervansyon.

 

MR SPEAKER

Ou oule fer ou lentervansyon deswit? Go ahead Onorab.

 

HON JANY DE LETOURDIE

Wi Mr Speaker.  Mon bezwen dir i vreman lavi i vreman anmenn bann fenomenn drol be Mr Speaker antretan mon ti pe antisipe – mon dir sa i ava vin mon premye Mosyon mon ava anmenn dan Sizyenm Lasanble me Mosyon in vini.  Me toutfwa pour mwan mon kontan pour mwan segonn li akoz pour mwan i osi en lot letap signifikan pour mon progre personnel par ozordi mon pe segonn en Mosyon – mon premye fwa.  Alors pour sa mon kontan.

Mr Speaker i en fe ki a sak fwa nou tann sa mo dezabilite zimaz ki vin dan nou lespri i en dimoun ki pe asize dan en wheelchair.  Me sepandan dezabilite i annan plizyer diferan kalite.  Nou kapab sirprann pou zwenn en dimoun ki in ganny kategorize koman i annan en dezabilite, me nou, nou war li parfetman normal.

I osi annan en konfizyon parfwa parmi serten nou, ki nou krwar ki nou kapab servi sa mo andikape akoz nou krwar i sinonim avek dezabilite.  Me sa de term pa parey ditou Mr Speaker.

E i osi annan dimoun ki krwar ki andikape i sonm, i vilenn alors zot pa kontan pour servi li.

WHO li in definir dezabilite koman en restriksyon pou perform en aktivite dan en mannyer oubyen en fason ki ganny konsidere normal par en lot imen.  I en kondisyon ki limit mobilite, vizyon, lekout oubyen fonksyonnman mantal en dimoun.

Sa i kapab an rezilta en aksidan oubyen erite oubyen sa dimoun in ganny tromatize mantalman.  Dezabilite pa toultan ki konfye en dimoun dan en wheelchair Mr Speaker dezabilite i kapab mantal, fizik, emosyonnel oubyen en konbinezon tou sa bann tip dezabilite.

Pli souvan dezabilite i ganny definir an term medikal par son limitasyon ki poz lo bann mouvman bann aktivite ek sansibilite sa dimoun la i kapab ganny remarke e ganny resanti.  Alors Mr Speaker en nenport dimoun ki pa kapab perform en aktivite ki laplipar dimoun normal i kapab, akoz en kondisyon medikal ki anpes li i ganny dir koman i annan en dezabilite.

Me prezan WHO i kontinyen li i menm eksplik endikape i definir li koman en konstrent fizik oubyen en labitid enpoze lo en dimoun pe enport si sa dimoun i annan en dezabilite ou non.

Andikape i pert oubyen limitasyon bann loportinite pou pran par dan bann lavi kominoter lo en nivo egal e lezot. Andikape i en inabilite pou ou akonplir en keksoz ki ou ti anvi.  Sa term i osi met lanfaz lo fokalizasyon bann enprevi dan lanvironnman, e osi plizyer travay ek aktivite.  Par egzanp ledikasyon, lenformasyon oubyen kominikasyon e la Mr Speaker mon pe koz en dimansyon sosyal osi.

An aprantan sa leklersisman lo diferans ant sa de term Mr Speaker alors nou kapab dir ki dezabilite i en keksoz ki vreman difisil pour sirmonte tandis ki ler en dimoun i andikape le akoz en defayans kelkonk sa i kapab ganny tire.

Nou kapab osi tonm dakor ki lentansite inabilite pour fer en keksoz, i osi fer en diferans.  Par egzanp si en dimoun pa ni menm kapab debout let alone i pa kapab marse si menm i pa kapab marse dan en wheelchair nou apel li en dimoun avek en dezabilite.

Me si en dimoun li i pe kapab marse oubyen avek led bekir oubyen walker petet nou annan tandans pou nou dir en andikapman.

Mr Speaker Mosyon du jour pe demann Lasanble pour aprouve pou demann Gouvernman pour konstrir bann fasilite spesyalize pou dimoun avek dezabilite.  Annou vwar enn pti pe bann diferan antite ki’n fer provizyon pou bann diferan dimoun a sa bann lepok.

En letablisman ti ganny fonde an 1969 par en Lorganizasyon Volonter e i ti apel Seychelles Children Society. Zot ti komans en progranm ki zot ti apel li the Busy Bee Outings.  E sa premye outing ti pran plas an 1971.

Me  toutfwa an 1970 en group Seselwa in form The Seychelles Children Society e sa ti ganny fonde larzman par bann donasyon prive.  Zot ti organiz bokou aktivite pour lev fon me zot ti osi benefisye avek en pe led Gouvernman.  Determinen pou deservi otan dimoun avek dezabilite zot ti kree en Care Center pour bann zanfan pre-school e osi en Family Advise Center. 

Mr Speaker an Zen 1994 School for the Exceptional ti ouver.  Mon napa detay konbyen zanfan zot ti komans avek, me ozordi sa lekol i annan 92 zanfan e 41 staff e parmi 24 ansenyan e 6 asistan ansenyan.

Sa i anmenn mwan lo mon lot pwen mon plito met dan laform en kestyon Mr Speaker.  Onorab Esparon in tous sa pwen taler in dir eski nou annan en statistik lo dimoun ki annan en dezabilite dan Sesel?  E spesifikasyon zot bann dezabilite?

Mon demann sa kestyon Mr Speaker set akoz sa ki permet nou en bon planifikasyon avek bann spesifisite dan lenfrastriktir, letan sa bann plan i ava pe ganny desinen.  Pour premye fwa en data detaye ti ganny anmase lo dezabilite ti dan en resanman pour lakaz ek popilasyon an 2010.

E sel lot data ki ti ganny anmase avan sa Mr Speaker se an 1971.  Sa letan ti annan zis en sel kestyon ki ti konm swivan;

‘’I annan dimoun andikape kot lakour?’’

Kestyonner an 2010 ti pli spesifik e i ganny adrese lo en nivo endividyel akoz longer kestyonnen pa ti pou ase pou enkli bann lezot lenplikasyon pli detaye.

E la mon ava dir pour sa premye kestyonner 1971 menm si ti annan sa kestyon ki ti demande si – I annan andikape kot ou lakour?  Bann lakour pa ti oblize pour zot reponn.  Sa resansman Mr Speaker ti rikord en total mon pe dir sa enn 2010 ti rikord en 2169 endividi ki annan pour o mwen en dezabilite – en kalite dezabilite omwen.  Sa letan i ti reprezant 2.6 poursan nou popilasyon e zis pou azoute sa ti 8 an pase.

Mr Speaker en dimoun ki annan en dezabilite i pa fer li vin mwen imen ki lezot be o kontrer i pli vilnerab.  I bezwen otan ledikasyon otan proteksyon legal e osi sosyal otan lanmour otan respe, swen medikal, eksetera.  Mon’n ganny sa sans pour al vizit Lekol Eksepsyonnel Roche Caiman avek Mr Mondon e rankontre ansenyan e lezot staff. Mr Speaker zot ti vreman pe fer sorti bokou difikilte ki zot pe fer fas avek konsernan zot landrwa travay.

E osi zot ti fer bokou propozisyon an sa ki konsern fason pou rann lavi sa bann zanfan pli meyer.  Zot in eksprim bokou mankman dan zot landrwa travay; materyo, transpor, fasilite mendev e en mank lekipman modern.

Mwan mon senserman krwar ki en bon letid atraver resansman ki a kapab determin kondisyon e diferan kalite dezabilite ki nou annan i an ganny fer pou nou kapab determinen lespas e lenfrastriktir, pour ki Sesel i a ganny sa landrwa ideal pou akomod tou servis e swen ki nou bezwen pour nou bann dimoun avek dezabilite.

Mr Speaker mon dir annou pa zis depese pou nou fer en sant san planifikasyon.  Apre nou pou war nou ki;

‘’Nou pa kapab mont la ek wheelchair.’’

‘’Sa transpor pa pran wheelchair.’’

‘’Lanvironnman pa conducive.’’

Pake ek lekipman pa ideal pour nou bann bezwen.  Nou bezwen en compound ki kapab akomod ners, dokter, konseye, zofisye sosyal, sekirite, lanbilans, drayver, sickbay, games room, menm bann sport complex you name it Mr Speaker. 

Mr Speaker en sant tousel i pa pou ase pou rann lavi nou dimoun ek dezabilite pli fasil.  Me parske Mosyon me parske Mosyon i lo lenfrastriktir plizoumwen, mon pa avar debord topik, me permet mwan an pasan pour dir mwan swete ki nou pe mazin bann staff spesyalize avek bon package oubyen incentive, ki lasirans i kouver zot byen, akoz zot lanvironnman travay, training en bon kondisyon travay transportasyon e lezot.

Mon konnen ki pou dir ki laplipar zot, zot al kot zot aswar Mr Speaker.  Me nou’n osi konpran poudir ki annan bokou ki napa en landrwa pou ale.  Petet la enn de lasanm pou anmas sa bann ki fanmir in abandonnen i ava osi e-dan.  Mon konnen osi ki pou dir Council pou dimoun avek dezabilite, i annan en gran vizyon pou anmenn en kondisyon meyer pour sa bann dimoun spesyal.

Mon dir zot pa zis kit zot lide ek plan lo papye e mon ankouraz zot pour pouse e pouse.  E nou ozordi dan sa Lasanble Nasyonal, nou’n vin lavwa pour bann ki napa en lavwa e ozordi nou pe ede pou fer sa Lasanble vin pour zot.

Alors Mr Speaker, mon pou donn tou mon sipor sa Mosyon.  Mersi.

 

MR SPEAKER

Mersi Onorab Letourdie.  Mon ava pas laparol avek Onorab Lemiel.

 

HON SYLVANNE LEMIEL

Mersi Mr Speaker.  Bonzour Mr Speaker bonzour tou mon bann koleg Manm Onorab, bonzour nou bann dimoun tre spesyal ki dan Galeri nou bann dimoun ki sorti kot VTC ek Lekol Eksepsyonnel mon krwar bonzour zot tou.

Mr Speaker en dimoun ki pe viv avek en dezabilite, i rezouir menm drwa parey tou lezot dimoun e nou Konstitisyon i fer provizyon lo la.

Depi byen lontan Sesel e Gouvernman in fer li son devwar, pou ki byennet nou bann dimoun ki pe viv avek en dezabilite i ganny eleve e ki zot viv dan dinyite.  Lemonn ti vwar nesesite ki en Konvansyon i ganny adopte pour ede sanz fason panse e latitid vizavi bann dimoun dezabilite e la plizyer pei in adopter e rektifye sa konvansyon enkli Sesel.

Mr Speaker sa sant reabilitasyon North East Point in enn ki’n la pour plizyer lannen e in ede donn bann dimoun serten skills neseser dan domenn vokasyonnel tel koman sarpantye, dan koud, lar, e menm dan socioeconomic.

Sa lepok nou ti pe regard dezabilite koman en maladi alors en gran parti sa sant in konsantre lo sa kote medikal.  Me ki lemonn pe demande ozordi?  Kwa ki nou bann dimoun ki pe viv avek dezabilite i bezwen ozordi.  Kwa ki annan an plas pour ki nou vin azour avek bezwen sa bann dimoun?

Eski sa sant vokasyonnel aktyel pe vreman desarz son rol e fonksyon o maksimonm?

Lemonn ozordi i egzize ki nou sorti dan sa leta lespri kot nou regard dezabilite koman en problenm medikal, me plito annan en model sosyal, kot nou tir tou baryer dan sosyete ki anpes en endividi mouvmante e devlope e set akoz sa ki mon santi ki sa sant North East Point, i pou nepli kapab kontinyen fonksyonn dan sa setting aktyel ki i ete ozordi.

Mr Speaker sa Mosyon pe demande ki Gouvernman i fasilit konstriksyon en sant pou dimoun ki pe viv avek dezabilite.

Mr Speaker dan mon lespri mon pe mazin pli lwen, pli gran, anliny avek Konvansyon.  Annou pa zis konstrir en sant ki zis endividi pou ale – vini, me annou kre en sant ki sa group endividi ler zot antre zot antre avek en bi e zot sorti koman en success story.

E mon war ki nou bezwen fer resers pou rode ki fason bann tel sant i fonksyonnen aletranze.

Mr Speaker enn pti keksoz mon ti a kontan partaze avek mon bann koleg isi menm, bann dimoun ki pe ekoute.  An 2014 sa letan la mon ti Direkter Zeneral kot Community Development e mon ti ansarz progranm.  E Dezabilite en progranm ki ti tonm anba mon responsabilite.

So sa letan e mon ti menm en Manm lo Konsey pour bann dimoun avek dezabilite – mwan ansanm avek Mr Naddy Zialor ki mon krwar i dan Galeri ozordi avek nou, ki i zenn tre dinamik, byen endepandan, e ki osi pe viv avek en dezabilite nou ti al en kour lo Mainstreaming of disabilities avek ki ti fer an Zapon e sa ti ganny sponsor par JICA.

E sa kour ti ganny fer an Zapon e answit nou ti al swiv son lot bout an Malaisie.  Nou ti kapab lemwayen ki mannyer bann Zaponnen e Malezyen ki pe viv avek dezabilite i ganny trete e zot pe viv endepandaman – menm si zot dezabilite i sever.  Nou ti osi ganny sans vwar bann diferan sant ki’n ganny konstrir en pe partou ki’n promouvwar sa konsep ‘viv endepandan’ – ‘Independent Living ‘ti apel li.

Mr Speaker sa leksperyans i reste en inoubliyab.  Mr Speaker ler mon lo sa size lesanz oubyen training aletranze, JICA tou le lannen i annan bann training ki i fer pour bann dimoun avek dezabilite, bann enstrikter e bann lezot dimoun ki travay avek bann dezabilite.

Mon ti a rekomande petet Minister konsernen i travay pli pre avek Minister Zafer Etranzer, pou asire ki bokou plis dimoun ki pe travay avek bann dezabilite, e ki bann dimoun osi ki pe viv avek en dezabilite i ganny sans ganny sa bann training.

Akoz nou ti ganny dir Mr Speaker ki Sesel i pa pe anvoye zot bann dimoun bann training nou bann dezabilite pa pe gannyen sa loportinite.  Sa i zis ki akoz petet i napa sa lyen ant Minister Zafer Etranzer.  I napa sa bann kominikasyon ki pou fer benefisye nou bann dimoun ki pe travay avek bann dimoun ki annan dezabilite e menm bann dezabilite zot menm.

Mr Speaker dezabilite i ganny sans ganny training parey mon’n dir, e osi pou al vwar ki mannyer en pei parey Zapon in reisir e lev nivo lavi nou bann dimoun ki annan dezabilite.

Nou a kapab ganny legzanp lo bann Independent Living Centres ki’n ganny konstrir en pe partou dan zot pei pou deservi bann dimoun avek dezabilite.  Mon oule enform sa Lasanble e Minister konsernen, ki i annan diferan kalite lasistans osi ki Zapon i donnen, pour ed bann pei dan lafrik ki’n pare pou fer bann proze ki annan pou fer avek aksesibilite pour bann dimoun ki pe viv avek en dezabilite.

Mr Speaker retournan lo sa size sant reabilitasyon mon senserman krwar ki sa bout medikal i merit reste antyerman avek Minister Lasante, me ler nou regard sa bout kot bann aktivite vokasyonnel i ganny fer, mon konstate ki i vin tro pti e ki i mank bokou plis fasilite pou nou bann dimoun dezabilite ki’n ganny mete laba pou al aprann en skill.

Mon santi ki sa sant vokasyonnel aktyel, i pa pe vreman ekip nou bann dimoun avek dezabilite pou ganny bann skill e empower zot pou viv endepandan.

I ti pou enportan ki en census i ganny fer pou konn vre bezwen e apre la nou a fer en bon plan.  I tre enportan osi pou fer en assessment lo bann fasilite ki deza la dan bann kominote ki pa pe ganny servi a zot maximum; fer serten reparasyon e met a dispozisyon bann ki dan bezwen.

Nou annan en nesesite pou empower nou bann dimoun pou ki zot ganny byen prepare pour zot fer fas avek realite lemonn ozordi Mr Speaker.  Nou bezwen en sant ki disabled-friendly avek staff ki byen kalifye e tre profesyonnel.

Sa sant pou bezwen dimoun ki pou vreman ed nou bann dezabilite e empower zot, montre zot ki mannyer pou viv endepandan.  Propaz awareness, donn bann skills e osi fer bann advocacy e la bann dezabilite zot menm pou promouvwar e sansibiliz popilasyon vizavi zot drwa e responsabilite.

Mr Speaker i mon swe pour ki nou annan en sant ki ler en dimoun ki pe viv avek en dezabilite i antre, i ganny son training neseser, in ganny ekspoze avek bann attachment, in ganny leksperyans neseser ler i sorti, i a ganny akredite avek en sertifika ki annan menm rekognisyon avek en sant profesyonnel ki egziste dan pei ozordi.

Wi Mr Speaker selman la ki nou pou kapab dir ki i annan success stories kot plis nou bann dimoun pou ganny plase dan lanplwa dapre zot abilite; kot i pou annan lezot role model ki a kapab pran plis responsabilite dan nou sosyete.

Annefe, mon pli gran swe se ki gradyelman nou annan bann dimoun dezabilite ki kalifye e bann dimoun ki pe viv avek en dezabilite ki pran leadership role sa.  Sa sant li menm e menm dan pei.

Mr Speaker mwan mon pou siport Mosyon ki Onorab Esparon in anmennen e mon dir ou mersi Mr Speaker.

 

MR SPEAKER

Mersi Onorab Lemiel.  Mon a pas laparol avek Onorab John Hoareau.

 

HON JOHN HOAREAU

Mersi Mr Speaker bonzour Mr Speaker bonzour tou bann zanfan avek dezabilite ki’n vin dan galeri bonzour tou koleg Onorab e bonzour tou dimoun ki a lekout dan lakour.

Mr Speaker mon pe entervenir lo sa Mosyon avek en santiman melankoli.  Setadir bokou lazwa dan en serten sans me an menm tan bokou tristes.

Mr Speaker mon dir avek bokou lazwa akoz se LDS ki’n anmenn en Mosyon koumsa en Mosyon ki demontre ki nou travay koman en reprezantan pep Seselwa nou pa zis koz lo bann topik popilis, me nou osi advocate pou bann group ki pli vilnerab dan sosyete ki souvandfwa i ganny oubliye oubyen ganny met lo kote par kont zot en bann group dimoun ki bezwen plis lasistans e swen.

En sosyete ki oubliy bann dimoun ki pli vilnerab, set en sosyete ki napa konpasyon e ki napa moralite.  Sa Mosyon i demontre ki LDS pe travay pou byennet tou Seselwa ki swa fizikalman byen, ki swa malad, ki swa annan en dezabilite ki swa ou ris, ki swa ou mizer, tou Seselwa i devret annan menm dwa dan nou sosyete e tou bann drwa ki’n ganny donnen dapre nou Konstitisyon.

Sa i fer mwan mazin en sityasyon ki Abraham Lincoln ti dir e i enn bann prensip ki diriz mon krwayans.

‘’In the eyes of God we are all equal and in the eyes of the Law we should all be equal.’’ 

’Dan lizye Bondye nou tou nou egal devan Lalwa nou tou nou devret egal.’’

Mr Speaker mon dir sa akoz mon osi tris akoz listwar nou pti pei byeneme sa i koensid avek bokou milestone dan lavi nou pep, notaman 42an apre Lendepandans, 41 avek en menm parti o pouvwar – 25 an Trwazyenm Repiblik – 25an depi nouvo Konstitisyon in annefe e ozordi nou GDP per capita i montre ki nou ganny konsidere koman en pei, avek high income.

Apre tousala Mr Speaker i tris pou vwar ki sosyete i kontinyen negliz en group dan nou pei.  Napa ase latansyon i ganny mete lo sor bann dimoun ki pe viv avek dezabilite.  Sa i fer mwan rapel enn pti pe dan listwar ler Hitler ti pe kontrol L’Allemagne an 1933 ziska 1945, kot i ti pe promouvwar en ras siperyer dan lerop; setadir bann dimoun long, blan, lizye ble, seve blonde, e apre i ti esey ekstermin bann dimoun avek dezabilite avek gas anpwazonnen e osi fors zot pou zot ganny sterilize.

Akoz i ti krwar ki bann dimoun avek dezabilite, i kontribye pou fer en popilasyon feb e i fer en fardo lo sosyete Alman.

En keksoz ki Nasyon Ini in dir ki i pa devret ‘Zanmen’ arive ankor dan listwar modern.

Mr Speaker le 13 Desanm 2006 United Nation ti adopte e ouver en Konvansyon on ‘Rights for Persons With Disabilities’ pou bann pei sinyen e Sesel in siny sa Konvansyon.  Ozordi si en zanfan i annan en dezabilite lo Mahe depandan ki kalite dezabilite e son severite, apre ki in ganny 15an i sorti kot Lekol Eksepsyonnel Plaisance; serten i ganny loportinite pou al Vacational Centre North East Point.

Me laplipar zanfan i reste se zot e la lavi pour zot, i tourn zis otour zot lakour.  Swivan sa zot vin en group dimoun ki’n ganny totalman oubliye.  Enn bann rezon ki sa paran i pli vomye, kit zot zanfan kot lakour set akoz kot VTC napa ase ankadrer e lekipman e resours pou devlop potansyel zot zanfan.

Mr Speaker Lekol Eksepsyonnel Plaisance in ede enn pti pe ziska 15an.  Sa lekol i deza annan bokou defi tel koman napa internet connection menm si i annan detrwa computer ki’n ganny par en donasyon alor zanfan pa kapab benefisye avek bann progranm vize ver zot bezwen.

Landrwa i ptipti e napa ase laklas e resours pou ledikasyon spesyal.  I mank teacher assistant, i annan en servis physiotherapy zis dan Mardi ki pa zwen i bezwen lekol antye.

Teachers i rente bokou avek sa bann zanfan akoz sa bann zanfan i en pe difisil e zot pa ganny okenn special education allowance pour incentivize zot e napa proper curriculum koman gidans ki pou permet bann teachers pou assess progre bann zanfan kot bann target spesifik.

An menm tan Mr Speaker, mon krwar ki bokou plis zefor i devret ganny fer lo nivo Minister Ledikasyon, pou entegre zanfan avek dezabilite ki pa sever, dan bann lekol normal.  Pour sa ganny realize, fodre i annan bokou plis teachers ki ganny formen dan ledikasyon spesyal e bann lekol i ganny modifye avek lasal spesyalize pou kapab donn formasyon zanfan avek bezwen spesyal.

Sa i ava anforsi nide enklizivite dan ledikasyon kot bann zanfan ek dezabilite i a santi zot ganny valorize parey lezot zanfan.

Lo nivo distrik mon pe demann en kestyon mon demande konbyen Sant Sosyal, Biro Ladministrasyon Distrik e lezot lenfrastriktir ti ki disabled-friendly?   Dan Victoria li menm konbyen biro, laboutik e lezot fasilite ki disabled-friendly? 

Mosyon ki Onorab Esparon in anmennen kot i pe demann Gouvernman pou konstrir bann fasilite pou zanfan avek dezabilite i annan bokou merit sa se pou plizyer rezon.

Premyerman Mr Speaker en nouvo sant ki ofer devlopman fizik e lenstriksyon i ed bann paran osi ki travay souvandfwa koman carer avek zot bann zanfan, pou zot ganny enn pti break pandan lazournen ler zot zanfan avek dezabilite i al dan sa sant.

Dezyenmman Mr Speaker i a prodwir en latmosfer sosyal ki sa bann zanfan i a sosyalize e detann pou fer agrandi zot lanmitye, sa i a ed zot osi pou agrandi zot mantalman.  Sa bann zanfan pa ava asiz dan traka ou limazinasyon.

Trwazyenmman Mr Speaker en sant i a permet zot kontinyen ganny akse avek bann servis spesyalize, e serten legzersis terapetik ki se zot, zot pa pe gannyen.

Katriyenmman en nouvo sant i anmenn serten progranm ki agrandi zot konesans pou fer zot pli endepandan e menm ganny loportinite pour zot kapab pran bann lanplwa e viv en lavi pli normal.

Mr Speaker mon senserman krwar ki Gouvernman i bezwen konsider en sant osi lo Praslin.

La mon mazin piti Grace Mondon lo Mahe pti Vineda Marcel Beau Vallon ki i annan en talan artistik tre for e ti Nelson Capricieuse Amitie Praslin, i kapab ganny menm sans pour zot ganny akse avek bann servis spesyalize ki en sant pou dezabilite i kapab ofer.

Mr Speaker si dokter Herminie i vin dan nou Lasanble e demann nou dan bidze 45milyon pou fer en letablisman 400 lasanm pour bann droger Cap Ternay e pou donn zot methadone toulezour, e si Gouvernman Parti Lepep ti vwar li neseser pou konstrir Jj Spirit building ki’n kout 155milyon i devret napa problenm pou konstrir detrwa sant pou bann zanfan andikape petet par rezyon – (ekskiz mwan) dezabilite petet par rezyon.

Mwan mon pou siport sa Mosyon e mon pou demann tou bann Manm pou fer parey.  Koman en pep ki pe devlope nou pa kapab kit serten group deryer.

Nou annan en drwa moral pou nou siport tou kous lapopilasyon e pou promouvwar protez e asir zwisans total tou bann drwa imen ek tou bann liberte fondamantal par bann dimoun avek dezabilite e pou promot respe pou zot dinyite.  Mersi Mr Speaker.

 

(APPLAUSE)

 

MR SPEAKER

Mersi Onorab Hoareau, ou pou entervenir ou mon met ou non lo lalis?

 

(Mic Off)

 

MR SPEAKER

Nou’n byen komanse annou byen fini.  Yes Onorab Pillay.

 

HON SEBASTIEN PILLAY

Mr Speaker i pa mon lentansyon pou enteronp en Manm letan i pe koze, i pa ki mon enjoy fer li,

 

MR SPEAKER

Wi go ahead.

 

HON SEBASTIEN PILLAY

Me ler en Manm i fer en statement mon krwar mon ti a kontan i substantiate.  Dan son lentervansyon Onorab in fer alizyon pou dir Gouvernman Lepep in konstrir building Jj Spirit dan ESPACE, mon ti a kontan i substantiate oli levidans konmkwa se Gouvernman Sesel ki’n konstrir Jj Spirit oubyen se pa sa Fondasyon ki’n konstrir son building.  Nou pa kapab fer sa then nou pe donn piblik fo lenformasyon an deor.

 

(Interruption)

 

MR SPEAKER

I enportan.

 

MR SPEAKER

Mersi, Onorab mon krwar in fer, pour mwan mon’n pran li koman en referanse in fer avek sa.  Wi in fer en referans nou pa pou al debat lo sa.  Mon ava pas laparol avek Onorab William.

 

HON WAVEN WILLIAM

Mersi Mr Speaker.  Mr Speaker i en gran plezir pour mwan dir enn de pti mo lo sa Mosyon van tou mon ti a kontan dir bonzour tou bann dimoun ki a lekout e bonzour tou bann Manm Konsey Dezabilite e bann lezot dimoun ki dan Galeri ki’n vini ozordi pou ekout Lasanble.

Mr Speaker avan ki mon koz lo sa Mosyon, mon ti a kontan nou fer referans avek Lartik 36 avek 37 ki lir konm swivan; “The States recognises the right of the age and the disable to special protection and with a view to ensuring the effective exercise of these rights undertakes to make reasonable provision for improving quality of life and for the welfare and maintenance and the age of the disable. To promote program specifically aimed at achieving the greatest possible development of the disabled.’’

Sa i Lartik 36 e 37 i lir konm swivan; “The state recognises the right of every citizen to a decent and dignified existence and with a view to ensuring that, the states and to ensure that the citizen are not left unprovided for, by reason of incapacity to work, or involuntary unemployment undertakes to maintain a system of social security…”

Epi Lartik 38 avek lezot i koz lo bann drwa.  Mr Speaker mwan mon ti a kontan ki sa Mosyon ozordi i donn nou en loportinite pa zis pou koz lo en sant, akoz ki arive se ki mwan anvi ki nou debord enn pti git akoz si nou koz lo zis en sant apre sa sant kwa?  Akoz i annan problenm ankor ki letan sa bann dimoun dezabilite ki letan in pas atraver sa sant letan i sorti laba kwa ki arive?

E mwan an siportan sa Mosyon, mon ti a kontan fer en demann direk avek Minister lafanmir avek Prezidan Larepiblik mon konnen ki zot pe ekoute, ki nou fer en fason ki annan provizyon ki ganny mete dan Bidze 2019 ki nou ava annan en nouvo sant.

Mon krwar ki nou bezwen fer bann demann konkret alors mon pe demande ki Gouvernman i met a dispozisyon dan alokasyon Bidze 2019 larzan sifizan pou nou kapab kree sa sant.  E mon pou dir ki i annan lezot alternative osi tou, akoz ozordi nou annan bann plizyer pei zanmi atraver bann lanbasad ki nou kapab ganny bann lasistans.

Nou annan nou bann Lanbasad osi deor ki mon konnen dan zot travay zot rankontre bann diferan loportinite, kot mon konnen e mon krwar ki lasistans i kapab ganny donnen pou nou kapab kre sa sant.

Mr Speaker nou Gouvernman i koz plas zonm o sant devlopman.  Nou koz osi lo enklizivite.  Nou koz osi lo pa kit personn deryer.  E koman en Manm Lasanble ler mon regard mon responsabilite pou defann drwa nou bann sitwayen ki enkli bann dimoun dezabilite ki reprezant en group minorite e mwan mon pe dir ki mon pa vreman o nivo distrik vwar egzakteman kwa ki pe arive.

Mon annan en zenn onm la anler par le non Naddy Zialor e mon pou dir ki sa msye malgre i annan serten dezabilite i en dimoun endepandan.  E mon admir li pou son fason fer e mon ti ava demande ki lezot i osi pran sa legzanp.

 

(APPLAUSE)

 

HON WAVEN WILLIAM

E mwan mon ti a kontan ki nou donn en gro lanmen a sa bann dimoun ki dezabilite ke pe vreman seye pou vin endepandan.

 

(APPLAUSE)

 

HON WAVEN WILLIAM

Mr Speaker letan ki mon pe koz lo sa size osi – in ganny mansyonnen taler, me letan nou regard bann devlopman Sesel ki konsern Gouvernman letan nou pe koz lo lenfrastriktir menm dan sekter prive, menm i annan par egzanp policy planning ensidswit in mansyonnen me nou, nou pa oule ki keksoz i zis ganny mete black and white.  Nou anvi aksyon.  Nou anvi solisyon akoz nou’n koz pour tro bokou letan.  Nou anvi vwar keksoz ganny arive pour sa bann dimoun.

Akoz ki i arive se ki si zis nou koze me nanryen pa arive finalman sa dimoun i dir, be zis nou pe koze e an menm tan ou kapab dir zot pe ganny defavorize.

E Mr Speaker mwan mon ti a kontan ki atraver sa Mosyon ki Gouvernman mon konnen ki a lekout, ki nou vreman pran sa bann rekomandasyon o serye.  Mr Speaker apre sa sant nou pe koz osi lo distrik, mon ti a kontan letan nou pe koz sa progranm desantralizasyon, ki nou osi desantraliz resours Mr Speaker.  Mwan mon’n en dimoun ki sistematikman pe amenn en pledwari ki Gouvernman i donn plis resours lo nivo distrik.

Mr Speaker nou annan en progranm ki’n komanse distrik i ganny li zis 2R0mil pour 1an! Be letan ou pe get sa R20mil ou pe get ou group osi dezabilite ou demande eski sa R20mil i pou kapab fasilit tou sa ki ou anvi fer?  Non Mr Speaker?  

 E la mon ankor pe lans en lapel e mon kontan ki nou pe al lans Regional District Council byento.  E mon a demande ki sa bann Regional Council i pran sa an konsiderasyon.  Akoz – enn, se ler nou pe koz enklizivite nou pe koz partisipasyon mwan mon anvi ki letan sa bann dimoun pe tann nou pe dir sa, ki nou pa zis koze, me nou back it up avek resours Mr Speaker.  Akoz zis koze san resours nanryen pa pou arive.

Mr Speaker wi i annan en Council.  Ozordi nou annan plizyer bann dimoun ki’n nonmen Sekreter D’Eta nou annan Anbasader pour bann zanfan ensidswit, me si fodre met en Anbasader pour bann dimoun dezabilite pour donn focus –  Mr Speakerpou donn e latansyon spesifik sa bann groupman dimoun, mwan mon pe demande Mr Speaker ki Gouvernman i konsider sa propozisyon osi tou.

Mr Speaker i osi annan sa nesesite pou revwar aktivite ki Minister Lafanmir avek Sosyal i pe fer, vizavi sa bann groupman.   Akoz parey mon pou dir mwan o nivo distrik vizibman mon pa pe vwar bokou keksoz ki pe arive.  E ler mon fer vizit mon trouve serten sa bann dimoun ki zot la zot avek zot paran zot, me pa bokou keksoz ki pe arive Mr Speaker.  E zot santi zot en ti pe si ou kapab dir pe ganny kit deryer.  E nou, nou dir ki nou pa anvi ki person i ganny kit deryer alors annou back it up par aksyon avek solisyon.

Mr Speaker apard ki sa sant, mon rekonnet ki Gouvernman in fer serten keksoz nou bezwen rekonnet ki Gouvernman in fer serten keksoz, me mwan mon pe demande ankor ki Gouvernman i revwar enn pti ankor.

E taler mon’n tann en koleg lot kote en Onorab in koz lo en resansman, si i neseser pou nou fer en lot resansman annou fer li.  E mwan mon pe demande mon met lanfaz ankor lo la ki Gouvernman dan Bidze 2019 i met a dispozisyon larzan pour nou kapab fer sa nouvo sant, pour nou bann dimoun dezabilite.  Mersi Mr Speaker.

 

MR SPEAKER

Mersi Onorab William mon a pas laparol avek Onorab Clive Roucou.

 

HON CLIVE ROUCOU

Bonzour Mr Speaker.  Mersi Mr Speaker bonzour tou koleg Onorab bonzour tou nou bann etidyan sorti VTC e zot bann ansenyan.

Mr Speaker Mosyon prezante par Onorab Esparon pe demann Gouvernman pou konstrir en fasilite pou nou bann ser ek frer Seselwa ki annan en dezabilite oubyen pe viv avek en dezabilite kelkonk.  Mr Speaker sa Mosyon i annan en kantite lenportans.  Sa set akoz bann dimoun ki pe viv avek en dezabilite aktyelman pa pe ganny sa ki meyer espesyalman an relasyon avek ki loter Mosyon i a pe demande en fasilite, en fasilite ki pou kapab akomod nou bann frer ek ser Seselwa.

Mr Speaker nou’n war ki nou 2 sant ki pe akomod nou bann frer ek ser Seselwa ki avek dezabilite zot menm zot, zot pa user friendly e nou war menm kot nou pase lo semen nou war bann building nou war lofis nou war labank e lezot lenfrastriktir ki pa bon oubyen ki pa friendly pou nou bann dimoun avek dezabilite.

Mr Speaker tou sa bann mankman e in ganny konfirmen dan plan stratezi konsey Nasyonal pour bann dimoun avek dezabilite kot in site bann dimoun avek dezabilite pe kontinyen eksperyans bann baryer ki anpes zot epanouir.

E ki zot in kontinyen pou dir ki annan en kantite parey zot in dir bann significant challenges ki fodre ganny adrese.  Par egzanp akse avek ledikasyon e loportinite pou bann dimoun ki annan en dezabilite pou zot train dan en keksoz ki zot kontan oubyen vini dan lefitir.

Mr Speaker dan Lartik 3 dan bann prensip zeneral dan konvansyon drwa bann dimoun avek dezabilite par Nasyon Ini i fer kler ki i devret annan loportinite egal bann fasilite aksesib an respektan bann kapasite ki bann dimoun ki annan dezabilite i annan.  Alor Mr Speaker sa i en laprev ki nou bezwen amelyor lavi nou bann dimoun isi Sesel ki pe viv avek en dezabilite.

Mr Speaker definisyon en dezabilite set en kondisyon fizik e mantal ki fer lanpesman lo mouvman, lo bann sans e aktivite sa endividi.  Par egzanp sa dimoun i kapab sourd – i kapab pa vwar kler i kapab annan en lanpesman fizik sa zis pou nonm detrwa.

E Mr Speaker demen Zedi le 12 Zilyet i Lazournen Nasyonal pour nou bann dimoun ki pe viv avek dezabilite isi dan Sesel.  Alor mon profit sa lokazyon pou mwan premyerman remersye bann ansenyan e lezot profesyonnel ki travay avek sa bann dimoun, ki donn zot kouraz zot dedikasyon e zot konpasyon pou sa bann dimoun e mon konnen, mon konnen sa travay pa fasil.

Pli enportan mon anvi siport bann paran ki nwit o zour zot avek zot bann zanfan la mon mazin Mr Clifford Mondon mon mazin Linda, mon mazin Sheila, mon mazin Flory mon mazin Mona, tou sa bann dimoun i annan en zanfan avek dezabilite.  Mon anvi dir zot kouraz!

E nou koman bann Manm Lasanble nou pou kontinyen donn zot sa sipor e nou pou fer sir e sa Mosyon i en fason ki nou bann Manm Lasanble nou pe siport dan ki mannyer nou bann zenn frer, zenn Seselwa avek dezabilite i ava kapab epanouir.

Mr Speaker nou 2 sant ki pe akomod nou bann zenn ozordi; nou annan Lekol Eksepsyonnel Plaisance ki li menm in ganny konstrir 25an pase e i pa user-friendly.  Nou’n war lannen apre lannen bann bout in zis ganny azoute zis pou sey sort of akomod sa bann zenn.

Me sa pe fer sa bann zenn dibyen.  Nou war kot lekol, koridor i en pe etrwat wheelchair pa kapab pase, lanvironnman lekol, toilet tousala pa byen pour bann zanfan.  Zis kot Lekol Eksepsyonnel i annan 92 zanfan 24 teachers e 6 asistan.  E 92 zanfan ek 24 teachers i menm par ase ler ou pran zot kondisyon ek zot dezabilite ki zot annan.

Mon pe enplor Minister, mon pe enplor Gouvernman pour fer le neseser ki plis teachers plis ankadrer i ganny train pou siport nou bann zanfan.  E nou bann zanfan laz 16an i bouz VTC.  VTC i annan 35 etidyan, i annan 35 dimoun mon pa kapab dir zot etidyan akoz zot aze 15 an a 39an.

15an a 39an i en progranm ki fer lapenn kot zot napa en exit 39an mon ti ekspekte sa bann dimoun in kapab acquire en skill kot zot kapab antre dan lavi tou le zour nou pep.  Kot zot kapab vin endepandan; kot zot sant vokasyonnel zot ti’n en keksoz zot ti kapab aprann being en fermye aprann anything ki, nou ti kapab pous zot dan lavi toulezour nou pep.  Nou war Lekol Eksepsyonnel in ganny separe an 4 bout e parey osi i pa user-friendly. 

Wheelchair pa kapab pase landrwa kwi manze pa ideal; napa en landrwa repoze ki sa bann zanfan ek zot dezabilite i kapab repoze.  Napa en landrwa kot en bout medical si i annan okenn keksoz ki arive avek sa bann dimoun ners dokter, i kapab vwar zot.

Mr Speaker mwan mon pe enplor Gouvernman annou pa rezet nou bann dimoun.  I blan ek nwar lo papye me selman aksyon i tre pe.

Mr Speaker mon anvi met sa lanfaz pli gro lanfaz lo VTC.  Mon anvi ki apre mon swe se ki apre ki zot in fer zot bout kot Lekol Eksepsyonnel zot antre VTC se ki zot kapab sorti en zour koman en dimoun endepandan.

Mr Speaker ler mon koz ler bann dimoun eksepsyonnel bann dimoun dezabilite premyerman i fer mwan mazin sa gran atlet Oscar Pistorious ki son nom in site dan sport menm si i ti napa lipye avek son prostetik nou’n war ki mannyer, in met en non lo lasenn enternasyonal.

Mon mazin ankor lot atlet Jessica Long i enn bann pli bon nazer avek dezabilite e in ganny 5 Meday Lor e 2 Meday Larzan an paralympic an Lonn.

Sa i montre ki dimoun avek dezabilite i annan skills se zis nou e la Gouvernman Sesel fodre i met a laporte sa bann dimoun pou zot devlope.

Mr Speaker en nouvo sant parey Mosyon pe demande i ava ed sa bann dimoun avek dezabilite en kantite; kot nou kapab enkorpor Lekol Eksepsyonnel avek VTC anba en sel twa.

I ava en sant kot i ava annan bout medikal, ners, dokter, nitrisyonnis ki kapab advise sa bann dimoun avek dezabilite e ki kapab pran swen avek zot dan okenn evantyalite.

I ava en sant kot i ava kapab nou bann etidyan nou bann zanfan i kapab bouze.  I ava kapab enkorpor bann aktivite ek lafanmir e nou bann zanfan avek dezabilite i ava war zot an partenans avek sa landrwa.

Mr Speaker mon anvi met laksan ankor lo bann aktivite par Minister Lafanmir e Ledikasyon ki ava kapab annan en keksoz striktire ki ava kapab edik e ki nou bann zanfan oubyen nou bann dimoun avek dezabilite i ava kapab epanouir.

Mr Speaker mon osi tou mon pou met en laksan lo bidze 2019 ki i ava kapab annan en keksoz pou nou bann frer ek ser avek dezabilite pour sa zot ava vin pli endepandan.

Alors pour konklir Mr Speaker mon pou donn sipor Mosyon prezante par Onorab Esparon.  Mersi.

 

MR SPEAKER

Mersi Onorab Roucou – mon a pas laparol avek Onorab Audrey Vidot.

 

HON AUDREY VIDOT

Mersi Mr Speaker.  Bonzour Mr Speaker tou Manm Onorab nou bann envite ki dan Galeri e tou dimoun ki a lekout.

Mr Speaker en devlopman ki santre lo dimoun e ki pran konsiderasyon bann fakter imen dean desizyon Polisi ek bann mezir anver prensip egalite pou tou, kot tou sitwayen i annan menm loportinite pou develop tou zot potansyel anver limitasyon lapovrete dan tou son form anver ledikasyon, ki pour nou i lakle devlopman pou en reisi.

Nou lo sa kote latab nou reste angaze akoz nou konsyan dwa nou pep e asire ki person pa ganny kit deryer.  Mr Speaker en sant pou dimoun avek dezabilite i kree loportinite pou donn bann servis e fasilite ki dan benefis ek development fizik sosyal ekonomik e personnel bann dimoun avek dezabilite.

Mosyon Onorab Esparon pe demann Gouvernman pou met en fasilite konstriksyon en sant pou dimoun avek dezabilite e dan mon resers mon’n konpran ki dan distrik Glacis i deza annan plis ki en fasilite ki pe ganny deservi par bann zanfan e adilt avek dezabilite, osi byen ki bann profesyonnel lasante e ansenyan ki travay avek bann dimoun dezabilite.  Parmi sa bann fasilite i en sant reabilitasyon e lot i en sant kot bann etidyan ki’n arete ki dan Lekol Eksepsyonnel e pe kontir zot letid vokasyonnel.

Mr Speaker bokou konsern in ganny fer resorti par bann entervenan avan mwan lo sa size sa sant reabilitasyon e sa sant vokasyonnel.  Mon swete ki Lotorite konsernen pe ekout pou fer le neseser pou adres bann konsern aktyel e fer resorti kwa ki zot in fer e kwa ki zot pe fer pou adres sa bann konsern.

E si teren kot sa vokasyonnel pou permet annan plis devlopman, mon zwenn mon koleg Onorab William par demann Gouvernman pou konsider met an plas e moderniz lenfrastriktir neseser ki deza egziste, ki a fer provizyon pou en meyer sant pou dimoun avek dezabilite.

E sa sant Mr Speaker a osi permet ki nou bann dimoun avek dezabilite i ganny bann lenfrastriktir ki manke e ki demann en bon renovasyon.

Mr Speaker en sant byen modernize pou dimoun avek dezabilite, i kree bokou loportinite tel ki; en landrwa kot bann dezabilite ek zot ansenyan a kapab asize libreman pou manze e sosyalize ziska laklas i rantre i pou repran; landrwa pou bann dezabilite kapab pratik bann aktivite fizik e rekreasyonnel, fasilite adisyonnel pour bann dezabilite ek zot bann ansenyan pou kapab fer e organiz bann lezot kour e donn sans bann dezabilite aprann bann lezot keksoz tel ki petet en landrwa IT pou aprofondir zot bann konesans lo servis computer why not en Wellness and Spa, kot zot kapab aprann lezot keksoz e lezot ankor ki kre bann loportinite ki kas bann baryer akse pou lezot loportinite lanplwa.

Mr Speaker mon pou konklir lo sa bann pwen swivan, nou rekonnet tou bann travay ki pe byen fer pour bann dimoun dezabilite, me i reste en priyorite ki Lotorite konsernen i adres bann konsern ki bann Manm in fer resorti dan nou Lasanble ozordi, e pran li tre serye.

Fer li en langazman pou trouv finansman neseser anmenn plis rezilta pou byennet nou bann dimoun dezabilite.  Annou kontinyen ed bann dezabilite dan zot lavi personnel e travay pou adres bann problenm imedyat.

Akoz nou bezwen motiv e enspir nou bann dezabilite pou akonplir zot anbisyonn; amelyor kominikasyon e langazman pa zis kot sant reabilitasyon e kot sant vokasyonnel me dan kominote.

Mr Speaker nou bann distrik i bezwen kontinyen anmenn progranm aktivite pou angaz nou bann dimoun dezabilite e donn sipor bann paran ki carer zot zanfan dezabilite ganny en day off.

Bokou zot napa en lavi personnel kot zot ganny en sans distrer zot akoz zot bezwen avek zot zanfan 24 lo 7.  La mon rapel bann letan ki mon ti DA English River bokou fwa bann DAs dan nou rezyon nou ti organiz bann rankont avek nou bann dimoun dezabilite, pou anmenn zot enn pti vizit e menm pas en letan kot basen naze Roche Caiman.

E bokou fwa nou menm dan nou distrik a sa letan nou ti zwenn kot ladministrasyon distrik organiz bann pti aktivite sosyal, tap enn pti parti domino, e byensir annan nou pti lanmizik pou annan enn pti ladans.

Mr Speaker nou bezwen kontinyen kree en pli bon relasyon ant nou bann dezabilite avek lafanmir, zanmi e lezot dimoun dan lantouraz e annou pa oubliy sa bann ansenyan ki devoue travay avek nou zanfan dezabilite.

La mon osi mansyonn bann ki kot Lekol Eksepsyonnel ki zot osi i demann revwar zot Scheme travay pou donn zot plis lankourazman e rekonesan pour sa bann bon swen adisyonnel ki zot donn nou bann zanfan.

Parey loter Mosyon in fer resorti, sa bann ansenyan i demann plis loportinite training pour zot kapab azour avek fason pou fasilit zot travay avek diferan karakter nou bann zanfan.  E zot bezwen bann lekipman e resours adisyonnel ki pou ed zot ek sa travay nob.

Mr Speaker nou bezwen mazin osi nou bann travayer nou bann drayver bis ki travay avek sa bann lenstitisyon.  Ler nou regard kot Lekol Eksepsyonnel zot napa ni menm en landrwa pour zot repoze pou pran zot pti break apre ki zot in fer letour Mahe depi tre granmaten pou kapab anmenn tou nou bann zanfan kot zot lenstitisyon e retourn avek zot dan lakour.

Zot osi bezwen asiste sak sa bann zanfan pou antre e sorti dan bis toulezour espesyalman bann ki servi wheelchair.  I osi annan en konsern mankman bis ki pou kapab fasilit sa bann manrmay pou cater zot pou antre dan bis avek zot wheelchair.  Mon’n konpran ki kot lekol ozordi zot annan zot 3 bis me selman zis 2 ki pe marse.

Mr Speaker mon termin lo sa not bann dezabilite i bezwen pli byen ganny okipe e rekonnet.  Zot bezwen osi konn konpran zot drwa ki pou permet zot ogmant zot lendepandans zot abilite e pran kontrol sipor ki zot resevwar avek lafyerte mersi Mr Speaker.

 

MR SPEAKER

Mersi Onorab Vidot. Onorab Flory Larue.

 

HON FLORY LARUE

Bonzour Mr Speaker.  Bonzour tou dimoun ki pe ekout nou, e sirtou bonzour tou nou bann guest ki dan Galeri.

Mr Speaker sa Mosyon i enn ki target direkteman nou sitwayen Seselwa avek dezabilite ki bezwen sipor tou la kominote e sirtou Gouvernman Sesel.  Me sa group dimoun spesyal, i en group ki pli vilnerab dan lasosyete e rol Gouvernman se pou protez sa group dimoun pli vilnerab dan nou la sosyete.

An zeneral zanfan i ganny gete koman sa group ki nou bezwen toultan proteze, me letan ou annan en zanfan ki dezabilite e ki zot pli vilnerab ankor, i en devwar absoli ki Gouvernman i protez zot.  Eski sa i leka Sesel?  Mon ti a kontan ek tou mon leker reponn dan pozitiv lo sa kestyon me i pa leka.  Mosyon i demande ki Gouvernman i konstrir en sant spesyalize pou sa group dimoun.

Mon krwar avek lalis ki Onorab Esparon in lir avek bann defi ki sa bann zanfan i a pe rankontre pour le moman, sa i bezwen ganny fer o pli vit posib.

Pour le moman ofisyelman kot Lekol Eksepsyonnel nou annan 88 zelev, sa bann zenn pa’n demande pou annan sa bann defayans fizik, me akoz zot annan sa dezabilite fizik, nou Gouvernman i oblize anba Konstitisyon pou annan responsabilite anver zot.  Onorab William in lir sa lartik pour nou dan Konstitisyon e i dir nou bezwen rekonnet zot dwa ou bann proteksyon spesyal.

Resaman apre vizit ki’n ganny fer par Letourdie e Onorab Esparon avek Mr Clifford Mondon ki en zofisye LDS ki osi en paran en zanfan avek dezabilite e koman sa dimoun deryer lasosyasyon ‘Make a Child Smile’ zot ti vizit Lekol Eksepsyonnel e zot ti fer en rapor avek tim MNA LDS dan Lasanble, pou preparasyon pour sa Mosyon.

Son bann revelasyon Mr Speaker ti vreman sokan.  Sa group zanfan i trouv zot dan en fasilite ki pa ti ganny fer pour zot spesifikasyon, alors sa lekol ki trouve Roche Caiman in bezwen sey kot zot kapab fer bann modifikasyon pou kapab zwenn bann bezwen sa bann zanfan.

Me zot sityasyon i lwen avek ideal pour ed zot evolisyon.  An Zeneral en lasosyete i ganny zize par lafason ki i tret son bann sitwayen ki pli vilnerab.  E dan sa sekter bann paran pe fer leokri.  Sa group i pti, me zot pe soufer.  Nou tou ki paran i oule en servis ki mye pour nou zanfan, bann paran avek dezabilite i parey nou, me rapor ki’n ganny fer par sa vizit i montre ki nou pa ankor zwenn sa target.

Apre ki vizit in ganny fer, i kler ki en sant apropriye i bezwen enkli en ankadreman depi zot pli Pti Anfans.  Akoz pa bliye bann paran zanfan avek dezabilite i bann dimoun ki travay e avek bann pti zanfan zot bezwen en servis daycare.  Me bann Daycare pa pran zanfan avek dezabilite alors soudennman sa fanmir i trouv zot avek en paran ki pa kapab retourn dan lanplwa akoz bann difikilte asosye avek dezabilite zot zanfan.

Alor en sant ti a elev sa premye difikilte pour sa bann paran, e i ti a osi ed sa paran pou kapab byen adapte avek bezwen son zanfan, akoz i ti pou zwen lezot paran ki osi annan menm sityasyon parey le e i ti a trouv en sipor.   Sa lekol i annan bokou defi ki enkli sirtou bann bezwen pratik sa ban zanfan.  En sant ki enkli tou fasilite ansanm ti a fer ki zanfan ti a ganny tou zot servis depi Daycare ziska adilt akoz parfwa zot depandan lo servis spesyalize pour lavi.

Mon ti a kontan eksplik dimoun ki en lasosyete i ganny zize par son abilite pou fasilit bann servis pou dimoun avek dezabilite.  Alor enn mon bann premye aksyon koman MNA ti pou mezir bann sistenm an plas ki desid lo bezwen kominoter dan distrik pou adopte bann bezwen bann dimoun avek dezabilite, dan son prosesis pran desizyon.

Alor Mr Speaker mon ti al ver Ladministrasyon Anse Royale.  Mon ti deside apre ki nou’n antre dan Lasanble an Septanm 2016, pou fer en kontribisyon direk avek bann zenn anba 18an dan mon distrik e osi rankontre zot.

Alor Mr Speaker mon ti deside pour lev fon pou kontribye en donasyon finansyer pour bann zanfan dan mon distrik avek dezabilite anba 18an.  Pour fer sa mon ti deside partisip dan en konpetisyon tay 21 kilomet ki i en demi maraton dan Eco-Maraton ki ti ganny fer an Fevriye 2017.  Mon ti bezwen train pour 2 mwan depi Desanm 2016 tou le bomaten avek en coach depi 6.30 bomaten.

I ti difisil me mon ti persevere mon ti kapab konplet mon lakour menm avek blesir dan enn mon zenou avek en letan zis en pe plis ki 2erd tan edmi.  Mon ti kapab elev fon zis en pe plis ki R30mil e apre lakours mon ti enpasyan pou partaz sa larzan.

Me mon bi prensipal ti pou teste bann sistenm ki ti deza an plas.  mon ti premyerman demann Ladministrasyon Distrik pou donn mwan en lalis ofisyel tou zanfan avek dezabilite anba 18an dan mon distrik.  Ti pran mwan 6 mwan pour ganny larepons.

Sa apre ki mon’n klerman eksprimen ki mon oule fer en donasyon finansyer anver sa group spesyal.  Letan mon ti ganny sa lalis ti annan zis 3 non lo la e pa ti en lalis azour.  Ozordi Onorab Esparon in dir klerman dan sa Lasanble ki napa en database annord  pour le moman e mwan mon kapab konfirmen.

Mon ti sirprann pou vwar pou ki sa lalis pa azour akoz sa group i vreman pti.  Alor mon ti swivre avek korespondans avek konsey pou dimoun avek dezabilite.  E la mon ti ganny en lot lalis apre mon ti demann Lekol Eksepsyonnel pou donn mwan en lalis zanfan ki sorti dan distrik Anse Royale e la ankor mon ti ganny en lot lalis.

Pandan sa peryod mon ti ganny akize, ki mon’n vol sa larzan pour mon benefis personnel.

Mr Speaker mon oule fer kler sirtou avek bann donater ki tou larzan ki mon ti resevwar mon’n deklar avek Biro Parti LDS atraver Mr Mancienne e mon’n donn lalis tou dimoun ki’n kontribye e sonm ki zot ti kontribye dan sa sponsorship.

Zot kapab menm ozordi al verifye ki mon’n deklar tou larzan ki ti ganny donnen avek mwan.  Me sa ki pa disponib apre plis ki 1an edmi Mr Speaker i en lalis konplet sorti kot Ladministrasyon Distrik ki deside lo bezwen tou sitwayen sa pei ki enkli dimoun avek dezabilite.

Mr Speaker eski i normal ki en biro ki desid lo semen ek plan devlopman tou dimoun pa konnen lekel bann dimoun dan distrik ki annan dezabilite?  Onorab Esparon in dir ki i sipoze annan zis en pe plis ki 1100 dimoun avek dezabilite ki pe ganny lasistans finansyel alor lendikasyon sif final i montre ki sa group i pti.

Me Sesel napa en database konplet sa i fer lapenn Mr Speaker akoz ki mannyer ou kapab dir ki ou’n enkli zot dan desizyon pei, letan ou pa ni konnen konbyen zot i annan.

Dan mon ka mon ti annan en fon pou donnen me pa ti oule donn avek nenport ek ki mon ti oule sa lalis konpreansiv.  Me ofisyel me ziska ozordi mon ankor pe asiz lo la Mr Speaker.

Mon’n fer bann vizit prive avek 6 zenn dan distrik depi de mwan pase akoz mon’n ti vwar ki zanmen mon ti ganny en lalis konplet pour le moman nou pe esper en rezilta final en zenn fiy ki pe fer tes aprofondi kot lopital Sesel pou vwar ki kalite lekipman i pou bezwen pou ed li avek son vizyon.  Enn fwa nou ganny kou final tou lekipman ansanm pour sa 6 zanfan larzan pou ganny distribye e pibliye avek konsantman sa fanmir byensir.

Sa ki mon konklir ki dan mon pei nou pa pran nou responsabilite konstitisyonnel serye.  Mon demann mon lekor ki dan tou sa vizit ki Msye Prezidan Faure in fer eski in vizit sa bann zanfan kot lekol pou vwar zot bezwen?  Larepons i koumsa;

i ti vizit Lekol Eksepsyonnel pour detrwa minit pour Children’s Day sa lannen se tou!  E zanmen in deza vizit VTC Centre.  Mon demann li silvouple Msye Prezidan pou al vwar dan limedya kwa ki kapab ganny fer kot sa bann sant deza e imedyatman avan tinel pou idantifye en landrwa e deblok larzan pour en sant pour sa group pli vilnerab dan nou lasosyete.

Akoz koman en pep se sa ki pou mezir nou responsabilite moral nou pe ed 5,000 adikt lo methadone lo en nivo Nasyonal me nou bliye regard nou bann zanfan dezabilite.  Sa rapor i montre nou ki nou pa pe fer sa travay zot in ganny mete en landrwa me pa en landrwa ki’n ganny fer pour zot bann bezwen.

Zanfan avek dezabilite pa savedir ki zot abilite mantal pa bon. O kontrer zot kapab annan bokou potansyel. Me isi Sesel i paret ki nou onte. Dan bann pei modern sa bann dimoun i form par nou lasosyete. Isi nou kasyet zot – ziska bann ki pe partaz batiman avek zot North East Point pa konfortab dan zot prezans, zot bezwen manz dan 30 minit pour vacate Dining Hall.

Eski sa i humane pour en group en dimoun ki nou konsider pli vilnerab? Sa pa akseptab ditou. Mr Speaker nou bezwen evolye alor en sant i fason modern pour nou zwenn zot bezwen. Mr Speaker mon siport Mosyon Onorab Esparon akoz mon krwar i en komansman pour nou adres bann fasilite bazik ki sa group dimoun spesyal i bezwen.

Dan sa kad, nou a kapab fer bann fasilite, ofer bann fasilite sportif, edikasyonnel, e formasyon pour ed zot vin endepandan e kapab partisip dan nou lasosyete.  Sa i en komansman.

Apre nou a fer, nou a fer sir ki sa sant i ganny bann dimoun ki spesyalize pour ed sa bann zenn.  Zot bann sitwayen parey nou.  Zot pa’n swazir zot fason fizik.  E nenport ki ant nou i kapab trouv nou ouswa nou zanfan dan sa sityasyon, annou pran nou responsabilite e travay vitman pour fer sa vin en realite.

Mon pran sa lokazyon pour fer en pledwari avek sekter prive.  Sa lekol i bezwen en transport spesyalize imedyatman pour transport sa bann zanfan.  En bis i a ed sa bann zanfan pour kapab fer bann vizit e partisip dan lavi kominoter nou pei.  Alor okenn pei ki kapab fer en donasyon, i kapab apros Mr Clifford Mondon ki annan en gran leksperyans avek zer bann gro sonm pour fer bann donasyon atraver son lasosyasyon; ‘Make a Child Smile’ pour en transport apropriye pour zot.

Zot bezwen komans en traze depi 4er bomaten.  Alor ed zot.  Zot osi annan en bezwen pour ganny fasilite internet ki’n ganny promet par Minister me pa ankor ganny fer.  Sa osi i en keksoz ki bann service providers i kapab mont devan e adopte pour donn lekol sa servis pour le moman. Defi i bokou.  Me mwan demann Gouvernman pour fer premye pa e ankadre sa bann zanfan dan en lanvironnman apropriye e apre nou azout bann lezot servis pour donn zot bann loportinite da nou pei pour devlop zot performans. Mersi Mr Speaker.

 

MR SPEAKER

Mersi Onorab Larue.  Nou ava pran en break e nou ava retournen 11er.

 

(BREAK)

 

MR SPEAKER

Bon nou a kontiny nou deba.  Mon ava donn laparol Onorab Sophola.

 

HON NOLINE SOPHOLA

Mersi Mr Speaker.  Bonzour Mr Speaker, tou Manm Onorab, tou envite e tou dimoun a lekout.

Mr Speaker sa Mosyon lo konstriksyon en sant spesyalize lo dezabilite, e apre bann definisyon mo dezabilite, i pe fer mon reflesir ki nou tou nou annan serten dezabilite.  I annan ki abilite I grav e lezot mwen grav e mon pe reflesir si nou pa bezwen dir abilite spesyal ki pour bezwen al dan sa sant.

Mr Speaker nenport ki Gouvernman ki vin o pouvwar I pour bezwen donn lenportans e onor tou langazman ki’n ganny sinyen vizavi sa group dezabilite.  Akoz sa I zot drwa I non pa ki nou pe fer zot en faver.

Mr Speaker Sesel in siny e ratifye plizyer Konvansyon anliny avek dezabilite.  Enn ki pli popiler I drwa sa bann dezabilite.  E lo sa laliny I annan travay ki pe ganny fer par diferan Minister pour ede adres sa bann bezwen, me mon pa kapab dir ki mon satisfe.

I annan ankor bokou travay pour nou fer pour nou kapab satisfer sa group dezabilite.

Nou tou Seselwa nou bezwen zwenn ansanm pour ed sa group.  Annou ed zot pour fer zot desizyon non pa desid pour zot.

Les zot donn zot pwennvi.  Menm mon a dir ki sa Mosyon ozordi annou fer fason donn zot sa loportinite pour zot koz lo la, akoz zot ki pour servi e zot pli byen konnen ki nou ki zot bezwen.

Mr Speaker dan pei, I annan plizyer defi anliny avek dezabilite. I annan en kantite ki’n ganny dir bomaten e mon pa pour tro repete.

Mr Speaker en defi mazer ki fodre nou regarde se dan Planning Division. I annan plizyer konstriksyon ki pe ganny fer, semen pe ganny fer san met fasilite pour sa bann abilite spesyal.

La I annan travay irzan ki sa divizyon I bezwen fer pour amelyor sa sityasyon.  Pour donn sa group menm sans ed zot pour zot vin endepandan, e non pa sak fwa ki zot pour deplase zot bezwen annan en carer avek zot.

An se moman I annan 92 zanfan ki pe al kot Lekol Eksepsyonnel parey in dir bomaten.  Mon ti al fer en pti vizit laba e mon osi mon vwar bokou keksoz parey in ganny dir.

Sa bann staff avek led serten paran, zot fer zot mye pour rann lavi sa bann zanfan fasil pour viv kot sa lekol.  Mon a dir paran ek staff kontiny sa bon travay – fodre pa ki nou dekouraze dan lavi.

Me malgre tou sa zefor ki pe ganny mete, bann staff I rankontre bokou difikilte.  Enn ki pa’n nonmen bomaten parmi lezot I bann meb dan zot laklas.  Bann meb serten pa tou I vye I pa apropriye pour sa bann zanfan spesyal.

Parfwa menm ansenyan I bezwen menm resikle pour akomod zot bezwen.  I osi annan servis ki an se moman zot pa pe gannyen.

Me malgre ki zot pe kontinyen demande I enportan ki Minister Ledikasyon I rann en vizit laba.  Mon dir en vizit profon, non pa en vizit zis nou get all ã la légère.  Akoz ã la légère nou pa vwar ki pase pli devan.  Apre ki sa bann zanfan in konplet zot letid kot Lekol Eksepsyonnel minorite zot I al kot sant Vocational Training ki nou apel li VTC.

Pour zot kapab devlop zot en pe plis eski zot vreman pe devlop zot konpetans?  Oubyen zot pe regrese?  Ki rekognisyon zot gannyen apre ki zot in konplet VTC pour zot antre dan lemonn travay?

Akoz mon krwar I en rezon det met zot laba pour zot ganny en pti travay, me ki rekognisyon ki annan an plas?  VTC I trouve kot Sant Reabilitasyon North East Point.  Kestyon ki mon pe demande ozordi, I si sa sant ti fer pour abrit sa bann zanfan avek abilite dezabilite ou ti annan en lot fonksyon?

Eski sa landrwa I apropriye?  I konvenab pour sa bann zanfan?

Lekel ki pe monitor progre sa bann zanfan?  Dapre lenformasyon I annan serten zanfan ki pa oule al kot sa sant.  Malgre ki paran I sey anmennen pa oule reste.  Nou bezwen rode akoz ki pe pase laba dan sa sant.

Me mon konnen ki travay I eseye, me I annan en mank ki fodre ganny adrese.  Parey sa Mosyon pe demande annan en landrwa konvenab pour sa group avek dezabilite, pour ki zot a kapab devlop zot antyerman e santi zot dan en landrwa ki an sekirite.

Mon krwar konstriksyon sa sant spesyalize, si nou ti kapab fer li atase avek en lekol I ti pour dan benefis plizyer dimoun.  Annou reflesir lo la.

La nou pe koz lo en sant lo Mahe me fodre ki nou tenir kont ki dimoun avek dezabilite I partou dan Sesel. Alor annou mazin Praslin ek La Digue osi pandan ki desizyon pe ganny pran ver sa group dezabilite.

Akoz sa bann group zanfan osi zot annan menm dwa e zot osi zot bezwen benefisye.

Mon pour koz lo sa group La Digue. Sa group spesyalize La Digue pa pe ganny rekonnet zot osi zot bezwen ganny en sant apropriye spesyalize avek tou mendev byen formen e resours neseser.

Pour le moman mon pour dir an kontan bann adilt nou annan nou en 30enn dezabilite.  I vre ki Mosyon pe demann konstriksyon en sant dezabilite spesyal parey Loter Mosyon in dir nou bezwen mendev kalifye e resours apropriye.

Mon demann Minister konsernen pour reflesir lo la, sirtou ler zot pe prepar zot Bidze, pa dan le medya me pa tro tar osi fer li en priyorite.

Alor tou dimoun prive, Gouvernman, dan diferan sekter annou viv ek lespwar, annou donn en koudmen ki en zour nou group dimoun avek dezabilite a santi zot fyer kot zot ete.  Mersi Mr Speaker.

 

(APPLAUSE)

 

MR SPEAKER

Mersi Onorab Sophola.  Onorab Woodcock.

 

HON WAVEL WOODCOCK

Mersi Mr Speaker.  Bonzour Mr Speaker tou koleg Onorab e tou dimoun a lekout.  Mr Speaker ozordi sa Mosyon ki devan sa Lasanble I vreman enportan e mon konman Manm elekte pour Grand Anse Praslin mon toultan annan en soft spot en plas spesyal dan mon leker pour bann dimoun avek dezabilite sirtou bann zenn.

Annefe mon konnen ki Komite pour dezabilite Praslin pe fer zot mye menm si zot annan resours limite pour fer bann aktivite pour sey ankadre bann zenn.

Mon konnen ki sa lannen zot in sey fer trwa aktivite e mon osi mon organiz pa bokou letan pase, mon sey organize n pti aktivite pour zot en pti dezennen.  E sa ki ti fer mon realize dan sa dezennen se ki bokou sa bann zenn zot annan bokou abilite zot kapab fer bokou keksoz, me selman I mank bann lankadreman I mank plis loportinite pour zot.

E mon kontan ki sa Mosyon ozordi ki devan nou, nou pe debat lo la nou pe koz lo la.  Mr Speaker sa Mosyon pe demande ki Gouvernman pe demann Gouvernman pour fasilit konstriksyon sant pour bann dimoun avek dezabilite.

Mr Speaker I annan en nesesite pour osi annan en tel sant pour annan en sant pour bann dimoun avek dezabilite lo Inner Island.

Annefe Mr Speaker pour mon resers ki mon fer atraver konversasyon avek Komite Pour Dezabilite pour bann dimoun avek dezabilite lo Praslin zot in enform mwan ki I annan environ en santenn dimoun zenn ek adilt e Trwazyenm-Az avek dezabilite lo Praslin.

Me problenm se Mr Speaker parey mon’n mansyonnen se ki napa en sant apropriye pour ankadre – bann dimoun avek dezabilite lo Praslin. pa zis lo Praslin me annefe lo Inner Island.   En pti pe parey sa sant vokasyonnel North East Point menm si i annan plizyer defayans, me solman nou osi lo Inner Island nou bezwen annan en sant avek tou bann fasilite neseser lo Inner Island.

Mr Speaker an se moman la, sel lankadreman pour bann zenn avek fasilite lo Praslin, se en laklas kot lekol Baie Ste Anne.  E sa laklas kot Baie Ste Anne primer i pran bann zanfan ziska P6 e once sa bann zanfan zot fini P6 zot bann ki annan mwens dezabilite, zot kapab al Lekol Segonder – lekol normal – zot fer bann laklas normal, me solman i annan bann pti leson spesyal ki’n ganny prepare par Minister Ledikasyon ou sey ankadre zot, me i pa ase.

E sa osi I pa fer provizyon pour bann zenn ki kekfwa zot dezabilite I en pti pe plis, ki kekfwa zot annan bann special needs ki kekfwa zot bezwen led pli spesyalize.  E alors sa bann zenn I tant pour ganny neglize e napa nanryen ki ganny fer pour ankadre zot pour build zot kapasite pour empower zot pour prepar zot pour le fitir,, pour zot lavenir, pour letan zot ariv en laz pour petet zot bezwen depan lo zot lekor petet pour napa sa dimoun ki pour la, ki pour donn zot sa sipor.

Mr Speaker selman sa ki mon vwar pli sagrinan pour mwan akoz annefe mon’n koz ek plizyer sa bann zenn ki annan dezabilite mon konn plizyer zot.

Sa ki pli sagrinan pour mon se ki ler sa bann zenn zot fini segonder napa nanryen napa en sant napa en landrwa napa bann progranm training pour ankadre sa bann zenn.

Konmsi zot zis ou zis vwar plizyer sa bann zenn ou vwar zot pe marsaye lo semen, ouswa ou vwar zot se zot, zot pe ganny difikilte ganny en travay zot napa en travay e zot ganny difikilte menm pour zot antre dan lanplwa.  Akoz – enn zot mank sa formasyon de zot napa sa training apropriye zot mank sa bann skills ki pour devlop zot.

E bokou fwa sa bann zenn Mr Speaker se bann zenn ki annan bokou abilite, zot annan bokou talan, zot ase zot I annan ki byen edike.  La mon pe mazin Mary Payet; Mary Payet I en fiy ki vreman entelizan I ekri byen mon vwar li lo Facebook son bann pti keksoz ki ekri I kominik byen, I koz byen, me selman akoz son dezabilite son paran pe sey ed li rod louvraz I vwar li difikilte pour rod louvraz ,I pa pe gannyen I pe tap laport.

E menm Minister kanmenm Komite pour bann dimoun dezabilite pe rod fason pour ed li I still war li ganny difikilte pour li ganny en landrwa travay.

Akoz dan landrwa travay menm napa bann provizyon bann fasilite bann fason bann Polisi, pour ede ankadre e anploy sa bann zenn avek dezabilite.  Sa en keksoz ki Gouvernman osi I merit get ladan.

Mon ti mansyonn sa dezennen boner ki mon ti organize ansanm an partenarya avek Komite pour dezabilite.  Ti annan en garson ki ti apel Janil Lucas, Janil I sant – I annan en lavwa eksepsyonnel.  Tou sa bann sanson Sesel sirtou sa bann sanson popiler, I konn sa bann sanson par ker.  Konmsi I annan sa abilite me I napa en landrwa pour ankadre pour devlop li pour li annan sa skill neseser pour why not fer en album? 

Akoz ki I pa kapab partisip dan bann konpetisyon parey Sesel I Annan Talan?  Ou konnen – konmsi I mank en sant.  I mank en landrwa pour ankadre sa bann zenn.  Mon mazin Roland Jeannevol osi mon ti soke!  In fact sa zour dan sa pti dezennen ki ti organize Roland ti fer en danse ti dans sitan byen ki I ti fer bokou nou bann dimoun ki napa dezabilite kanmi.

Si nou ti annan en tel sant pour nou ankadre sa bann zenn lo Praslin pour devlop zot lo bann skill, fer bann pti progranm spesyal, sosyal, whatnot nou ti kapab ed sa bann zenn pour devlop zot bann skill devlop zot talan e zot bann abilite.

Alor Mr Speaker, se pour sa rezon ki nou bezwen en tel sant pour Inner Island.  E ki mon pe propoze Mr Speaker e annefe mon pour donn en pe plis detay lo la, parey ki osi Komite pour Dezabilite lo Praslin e menm Council, I konn sa tre byen se en sant vokasyonnel.  En sant vokasyonnel pour bann dezabilite, bann dimoun avek dezabilite lo Inner Island.

Mr Speaker permet mon pour dir en keksoz ki fer mon en pe dezapwente e pa zis mon bann paran lo Praslin Komite Dezabilite lo Praslin pe dezapwente avek sa sityasyon.

Mr Speaker I annan plis ki 10an depi Gouvernman in donn en morso later Marie Jeanne Estate parcel PR4072 ki mezir 1869 square metre ti ganny donnen avek Council for the Disabled.  E annefe sa later I deza anrezistre lo Council pour bann dimoun avek dezabilite me ziska prezan Mr Speaker napa nanryen ki’n ganny fer lo sa later.

En sant ti ganny propoze lo sa later, pour fer provizyon tou bann fasilite neseser ki bann dimoun avek dezabilite I bezwen pour devlop zot bann skill parey mon dir pour ankadre zot, pour empower zot pour build zot kapasite.  Ziska prezan Mr Speaker, later I la 10an in pase napa nanryen ki’n ganny batir, ki’n ganny fer lo sa later.

Mr Speaker mon pour osi dir, ki mon krwar I merit Gouvernman I merit pran sa konman en priyorite pour fer provizyon Onorab William in koz lo la boner pour fer ki dan Bidze ki Minis in fer pour get ladan mon pa konnen si i pou tonm anba Minister Lafanmir, si I pour tonm anba Minis pour Land Use and Habitat.  Me selman Cabinet an zeneral zot bezwen get dan lafason ki zot pour fer provizyon finansman pour zot finalman pour zot dezabilite lo Praslin, pour kapab ganny en fasilite neseser.  Pa zis pour Praslin me pour Inner Island kot I kapab annan bann parey mon dir, non selman bann vokasyonnel, me kot I kapab annan bann laklas osi ki sa bann zanfan avek dezabilite I kapab swiv.

Mr Speaker zis pour mansyonnen ki Komite avek Dezabilite zot in sey zot mye.  Zot in sey zot mye pour zot sey raise sa fon e la zot pe al en pti pe pli devan.  Komite pour Dezabilite Praslin Mr Speaker zot in menm devlop en plan zot in drafte en konsep pour en tel sant pour sa sant vokasyonnel Marie Jeanne Estate.

E mwan Mr Speaker mon fer mon homework, mon’n apros zot mon zwenn avek zot e tanzantan mon’n zwenn avek zot mon partisip dan plizyer aktivite ki zot in fer.

Mon annan en kopi sa konsep ki Komite pour Dezabilite Praslin in prepare.  I pa ankor vin en plan I en konsep.  Me dapre sa konsep sa sant pour fer provizyon pour bann training.  Parey mon’n dir en laklas bann laklas aprantisaz kot bann zenn avek dezabilite, I kapab fer bann craft sirtou sa ki I annan pour fer avek tourism a vann kot bann pti kot lotel ouswa vann dan bann I don’t know menm dan sa sant osi.

Why not annan en pti landrwa kot bann dezabilite zot desin bann pti travay zot craft zot painting or bann lezot pti travay ki zot fer, ki zot kapab vann avek bann touris, kot I annan menm propozisyon kot zot kapab vann parey kwi manze fer bann pti snack, aprann koud, aprann bann diferan pti skill ki pour kapab ed zot pour zot kapab raise ganny en fason pour raise en income pour zot menm.

E osi Mr Speaker sa sant I a fer provizyon pour sa bann zenn aprann en metye.  Zot kapab aprann bann diferan skill.  E menm annan bann laklas spesyalize bann laklas spesyal pour bann zenn ouswa bann dimoun avek dezabilite ki kekfwa ki soud, ouswa pour bann ki pa vwar kler ouswa pour bann ki annan bann lezot kalite needs ou konpran?  So I enportan.  I en nesesite.  In ariv ler ki nou ganny en tel sant pour nou pour nou bann frer avek ser dezabilite ki reste lo Inner Island lo Praslin avek La Digue.

Mr Speaker an plis ki sa dapre sa konsep, ler mon pe gete dan sa plan pour annan bann lasanm pour annan en multipurpose room ki dan en fason ki sa bann –  ki Council ki sa kwa ki sa Komite ki mon pe sizere ki en Komite Inner Island ki pour run sa sant.

I kapab raise bann fon I kapab raise larzan pour zot sant e osi avek manrmay dezabilite, bann dimoun bann adilt tou sa dezabilite lo Praslin, pour zot kapab lwe bann lasanm sa multipurpose room avek bann lezot group parey Praslin nou pe ganny difikilte bann zenn I vwar zot dan difikilte pour ganny en landrwa parey pour fer bann aktivite ouswa menm parey bann Trwazyenm-Az.

Konmsi zot annan sa multipurpose room zot kapab lwe li avek bann lezot group ki kapab benefisye an menm tan zot kapab anmas en pti income en pti larzan pour zot kapab servi pour zot bann depans pour zot aktivite ki zot fer, ouswa nenport bann depans ki zot fer Mr Speaker.

E parey mon’n dir mon pe propoze ki sa sant I ganny run par en Komite Inner Island ki  pou non selman ankadre zis bann zenn Praslin, me I ava ankadre tou le 3 distrik Baie Ste Anne Grand Anse avek La Digue.

Mr Speaker sa ki mon osi aprann avek sa Komite pour dezabilite pour Inner Island se ki zot annan lentansyon prezant sa konsep avek piblik byento.  Zot annan osi Mr Speaker lentansyon pour form ou vwar zot pe pran bann linisyativ lo zot menm, me zot bezwen sipor zot bezwen sipor Gouvernman.  Zot pe form en Komite pour Finans pour sa proze pour sa sant vokasyonnel.  E sa Komite pour Finans li I pour ede raise fon larzan pour fer sa batiman ouswa menm pour fer sa batiman.

E dapre zot Bidze, zot analysis se sa proze I pour kout anviron R4milyon ki mon krwar ki Gouvernman I kapab zwe en rol pour kontribye en sonm anver sa.  Mr Speaker plizyer stakeholder lo sa Finance Committee lentansyon sa Komite se ki bann stakeholders ki pour lo sa Finance Committee se bann dimoun ki sorti dan tou kous nou Kominote.  Ki non selman bann dimoun ki sorti lo sa Komite pour Dezabilite, me I ava osi enkorpor bann why not bann teachers, why not bann businessman, bann paran, e menm bann lotorite dan distrik I kapab form parti sa Finance Committee ansanm nou tou a tap en laport nou a gete ki mannyer nou kapab ede fer en tel sant lo Praslin.

E Gouvernman li I ava gete ki mannyer I osi I ava ed nou finansyelman.  So en linisyativ pe ganny pran la deza par sa bann dimoun par sa Komite pour Dezabilite e menm bann paran.  Akoz sa Komite se bokou bann paran ki lo la ki I annan bann zanfan ki annan bann dezabilite.  E zot pe fer en keksoz.

E mwan mon pe demann Gouvernman – in fact mon pe sipliye avek Gouvernman, pour zot fer en keksoz pour sa bann zenn akoz mwan mon santi poudir Mr Speaker, napa ase.  Napa ase ki pe ganny fer.  Non selman lo Mahe partou dan Sesel lo Praslin, lo La Digue ki pe ganny fer pour ankadre nou bann zenn.  E nou bezwen fer sa vin en priyorite dan nou pei.  Nou bezwen donn zot bann dimoun avek dezabilite zot lenportans, zot dinyite e zot plas enportan dan nou sosyete Mr Speaker.

Mr Speaker parey mon mansyonnen boner Onorab William in mansyonnen poudir dan Bidze ki pe vini mon mazinen dan Oktob ki Gouvernman I bezwen gete dan en fason ki li I bezwen envestir ede pour fer sa proze vin en realite.

Mr Speaker mon pe al wrap-up la, parey mon dir Mr Speaker Komite pour Dezabilite osi sa plan e sa konsep ki zot in mete, I sipoze ganny finalize by Desanm.  Akoz zot pour fini fer zot bann travay tou bann detay dan sa plan, I sipoze finalize e kot osi mon mazinen zot pour ankor prezant avek piblik.

E mon profit sa lokazyon la Mr Speaker pour mwan osi fer en lapel avek tou manm piblik parey mon fer Gouvernman tou manm piblik pour osi kontribye anver en tel proze.  Konmsi montre poudir nou osi tou nou annan en leker, e bann dimoun avek dezabilite, I enportan pour nou e zot annan en lenportans dan nou sosyete.

Mon pa pour kapab konklir sa Mosyon, san ki mon fer en lot lapel Mr Speaker avek manm piblik, sirtou bann businessmen, bann lotel, partou pour zot osi rod en fason ede an atandan ki nou pe esper sa sant menm si sa sant I fer dan lefitir, mon pe fer en lapel avek tou bann biznes lo Praslin e menm lo Mahe, pour nou ouver laport.

Pour nou ofer travay bann zenn avek dezabilite, ki annan sa abilite pour travay.  Mon pe mazin ankor enn fwa mon koz lo li pli boner Mary Payet I en fiy vreman entelizan, parey mon dir tou keksoz apart ki son dezabilite ki i pa pe tro kapab marse, me selman I annan sa lentelizans.  I annan sa potansyel.  I kapab travay fasilman konman en resepsyonnis – ok?

E mon pe fer en lapel pour tou Praslinois pour nou rod en fason pour nou ankadre, ede pour donn en pti louvraz sa bann zenn avek dezabilite, akoz zot osi zot bezwen en pti saler at the end of the month annou ede pour nou siport sa bann zenn.

Avek sa Mr Speaker mon pour siport sa Mosyon e mon konnen ki lo tou lede kote latab nou tou nou pour siport sa Mosyon.  Mersi Mr Speaker.

 

MR SPEAKER

Mersi Onorab Woodcock.  Petet zis mon anvi fer en pti remark lo dernyen pwen Lasanble Nasyonal I osi krwar dan inclusivity – avek rekomandasyon ki Council Disabled ti fer, Lasanble pe anploy en travayer ki annan dezabilite e zot konn li tre byen.  Zot konnen poudir I annan konpetans I pe travay byen.  Sa se Michelle.  Bon mon a pas laparol avek Onorab Sebastien Pillay.

 

HON SEBASTIEN PILLAY

Mersi Mr Speaker.  Bonzour tou Manm Onorab bonzour tou bann dimoun dan Galeri e bonzour tou bann dimoun ki pe ekout nou ki pe regard nou.  Mr Speaker mon pour konmans mon lentervansyon lo sa Mosyon par fer en meakoulpa si ou le konman en imen avan, akoz mon krwar dan nou lavi toulezour nou tou nou busy avek sa ki enportan pour nou, nou fanmir nou lakour.

E unless ki nou pe viv avek en dimoun ki annan dezabilite oubyen nou pe rankontre en dimoun ki annan dezabilite konman nou vwazen toulezour nou souvandfwa pa pe mazin lo sa size.

E ler nou kontiny nou lavi toulezour dan nou travay kot nou annan sa ki nou annan pour fer, ankor enn fwa nou ganny preokipe par bann lezot keksoz ki pe pase.  E sa size I pa mont devan nou konsyans.

Me I pa eskize ki sa bann dimoun ki zot pe fer fas avek sa sityasyon, ki annan sa dezabilite pour zot sa toulezour zot pe viv avek.

E petet mon krwar ozordi dan Lasanble nou bezwen sey lans en lapel ki nou pa pe zis koz lo en sant me nou pe koz lo en fason pli larz ki mannyer nou konman en sosyete, nou regarde e tret bann dimoun avek dezabilite e non pa kre si oule dir bann pti subset ki donn zot en pti travay ki donn zot en pti isi en pti laba.  Me pour nou al ver vreman en Polisi enklizyon kot pour nou al ver enkli tou dimoun tou sitwayen dan devlopman nou pei.  E mon krwar se sa lesansyel sa Mosyon ki devan nou Lasanble ozordi Mr Speaker.

Mon’n swazir pour konmans mon lentervansyon koumsa Mr Speaker akoz I pa fer premye fwa ki Lasanble I diskit lo en Mosyon ki annan pour fer avek bann dimoun ki annan dezabilite.  Le 4 Novanm si mon rapel tre byen pandan 2014 – 5enm Lasanble ti debat lo en menm Mosyon anmennen par Onorab Lenny Lebon, e sa Mosyon ti pe koz lo en Polisi Nasyonal pour aksesibilite dan landrwa piblik pour tou dimoun avek dezabilite.

Me e nou vwar poudir apre sa I annan bann attempt par bann buildings letan in ganny fer pour annan en ramp pour fasilit akse bann dimoun avek dezabilite.  Me nou bezwen admet osi ki petet si nou demann bann dimoun ki annan dezabilite zot dir ou ki sa i pa’n ase pour kapab vreman al ver en solisyon tanzib pour sa problenm.

Mr Speaker sa size I en size tre enportan akoz boner Onorab Waven William I fer referans lo Lartik 36 nou Konstitisyon.

Me Lartik 36 nou kapab lir li avek Lartik 40 nou Konstitisyon.  E Lartik 40 nou Konstitisyon, I koz lo bann duties lo bann devwar ki en sitwayen I annan.  E dan sa bann devwar I annan, pour li anploy Konstitisyon, pour li travay, me kestyon ki nou bezwen demann nou lekor, se eski konman en sosyete – koman en sosyete nou pe donn loportinite pour li kapab uphold or pour li kapab al ver sa bann devwar ki ganny trouve dan Lartik 40 nou Konstitisyon?

Wi nou kapab donn en dimoun en dwa me eski nou pe ed li pour li kapab fulfill son devwar fulfill son responsabilite anver son pei?  En dimoun avek dezabilite I reste en sitwayen Seselwa whether I annan dezabilite oubyen non.

E sa Lartik I dir ou ki tou sitwayen Seselwa I bezwen annan I bezwen kapab fulfill son responsabilite e I nou devwar pour ed zot fulfill sa responsabilite.  Alors dan nou deba ler nou pe koz lo en sant nou bezwen fer en fason ki nou asire ki nou pa pe koz lo en sant konman sa sant I vin konman en destinasyon final pour en dimoun avek dezabilite.  Sa sant I bezwen en sant ki al lo en baz plito formasyon ki al lo en baz plito lasistans, pour ed en dimoun avek dezabilite pour kapab ganny asimile dan lasosyete e dan travay zis parey en dimoun ki ti pour napa en dezabilite.

E se sa lesansyel ki nou bezwen koz lo la.  Akoz at the end of the day nou kapab annan nou en sant me nou pour napa en staff dan sa sant.  Eski sa sant pour vin en landrwa kot nou dir tou dimoun ki annan dezabilite pour al dan sa sant nou pour fer vocational training pour annan bann landrwa pour zot fer aktivite vokasyonnel?

Me avek letan lakantite dimoun ki annan dezabilite ki pour al dan sa sant pour ogmante e sa sant li menm pa pour kapab fulfill bezwen nesesite ki sa Mosyon laliny ki sa Mosyon I le pran ozordi.  

So I enportan ki ler nou pe lans en lapel ver sipor Gouvernman e loter Mosyon I pe fer kler ki I pe koz lo fasilitasyon Gouvernman pour fer sa sant arive akoz mon konpran ki loter Mosyon pe dir.  Loter Mosyon pa pe zis koz lo Gouvernman, me I anvi envit en deba pli larz ki lasosyete an zeneral tou bann akter, biznes, sekter prive e tou dimoun tou sitwayen Sesel I vin angaze pour kapab ede fer sa sant vin en realite.  Pa zis dan lesans ki I vin en sant, me dan lesans ki I ede pour rod en fason pour ed sa bann dimoun avek dezabilite e provide en platform atraver ki bann dimoun avek dezabilite I kapab ganny sa asimilasyon si oule dan lasosyete pli larz.  Se sa mon krwar lideal deryer sa ki loter Mosyon pe vin avek.

Mr Speaker enn bann keksoz petet ki mon krwar ki pour en defayans malgre ki nou ganny en sant, se lefe ki mon panse eski Sesel nou pa devret al dan laliny etabli en kad legal en pe pli kler ki a kapab donn sa latansyon sa size ki nou pe koz lo la ozordi.

Kad legal ki nou annan se Lalwa ki gouvern National Council for the Disabled.  Me ler nou regard sa kad legal I plito mon lopinyon I plito administrative, akoz I donn fonksyonnman eksetera.  Me eski petet pa ti ava bon ki nou al ver annan en Lalwa konkret, ki koz lo la, ki fer ki demen par egzanp ki ou annan okenn batiman ki pe ganny fer, en dimoun avek dezabilite I ganny akse, ki si I annan interview pour en louvraz nou kapab asire e garanti ki legalman okenn dimoun pour ganny konsidere lo baz son merit?

E non pa mon pa dir pe arive be I kapab pe arive nou pa konnen non pa diskriminen akoz I annan en dezabilite ki pa permet li petet a sa moman ki en dimoun in fer interview avek li krwar ki poudir I pa kapab fer sa louvraz.

Mon krwar sa I bann eleman fondamantal ki nou bezwen met an perspektiv ler nou pe diskit lo sa Mosyon.  Mr Speaker sa anmenn mon lo laliny ki nou bezwen koz lo en fair access to work, akoz mwan mon pa an faver unless I absoliman neseser mon pa an faver practice okenn aksyon leksklizyon oubyen kree okenn lezot sant, pour tir dimoun ki annan en dezabilite dan main mainstream sosyete, e anmenn li akote pour donn li serten keksoz ki nou krwar pe donn li.

Mon krwar nou pran sa lapros dan lepase, akoz nou regard li lo en pwennvi, sosyal kot nou met bann sipor sosyal finansye atraver bann Lalwa ki nou annan – Disability Benefits anba Lalwa.

I byen ki nou fer sa.  Me fodre nou konpran osi par egzanp I annan dimoun ki annan en dezabilite ki petet son dezabilite I zis ki I dan en wheelchair.  Son fakilte mantal I fonksyonn parey tou dimoun son abilite I parey tou dimoun e sa I permet li pour fer okenn fonksyon ki en dimoun normal pour fer a leksepsyon ki son mobilite I redwir.  Se tou.  So mon krwar I fondamantal ki nou regard sa akse fair access to work e pour regarde ki bann mekanizm ki nou kapab mete an regardan ki bann entervenan ki’n koz avan mwan, in koz lo la pour sey promote e siport en dimoun ki annan dezabilite, pour li kapab ganny akse avek travay.

Parfwa Mr Speaker parey ler mon ti konmans mon lentervansyon nou pa realize ki petet nou, nou pe regard sa e nou pe koz lo la nou siport sa, me pa tou dimoun ki petet I annan menm lespri ki nou.  Pa tou dimoun ki regard size dan menm fason ki nou.

I annan dimoun ki regard mobilite en dimoun poudir mobilite sa dimoun I pour afekte son travay san prenan kont sa mobilite, I pa en lenpak lo sa travay ki sa dimoun pour fer.  Apre tou, Mr Speaker en dimoun I kapab ne avek en dezabilite, oubyen en dimoun I kapab normal e demen atraver en aksidan kelkonk, en keksoz I arive I vwar li dan en sityasyon I vwar li avek en dezabilite.

Me sa pa redwir sa dimoun dan okenn fason.  E mon krwar se sa lespri ki nou bezwen pe met lanfaz lo la.  E akoz sa Mosyon e Mosyon ki Onorab Lebon ti anmennen oparavan, I bann Mosyon enportan ki Gouvernman I bezwen pran kont.  Akoz premyerman Lasanble Nasyonal ti attend en Sesyon kot nou ti koz lo bann sustainable development goals. Me enn bann goal ladan dan sa lazanda 2030 ki nou tou nou ti attend, I annan pour fer zisteman avek annan en baz lenformasyon ki konsern avek deal avek dezabilite.

E ou vwar kot nou ti pe ganny demande pour koz lo ki mannyer Parlman I angaz li avek bann sustainable development goals, mon pa krwar ki Minister Finans I devret pe al raporte ki demen nou meet SDG isi laba, me selman nou annan sa bann konponan, par egzanp ki deal avek annan en database ki dir nou klerman konbyen dimoun ki annan dezabilite, oubyen ki mannyer nou servi sa database pour met an plas bann Polisi ki fasilit bann enklizyon dan devlopman nou pei, pour sa bann dimoun.

E mon krwar se sa ki bezwen vini.  E Mosyon pe koz lo fasilitasyon.  E zisteman se koumsa ki nou kapab enfliyans budget process e la petet langazman ki nou devret pe donn sa bann dimoun ki la ozordi konman en Lasanble  langazman ki nou devret pe donnen se ki ler nou pour attempt deba lo Bidze, nou lizye pe bezwen pe regard bann proze devlopman ki Gouvernman I annan.

E enn bann proze ki nou bezwen pe koz lo la, I pa zis koz lo en sant me nou bezwen osi pe koz lo formasyon pour bann dimoun ki pour travay avek sa bann dimoun pour dezabilite.  Akoz nou bezwen admet nou kapab annan en sant ki pour zis vin en white elephant, akoz pour napa personn pour mannye sa sant e pour travay avek sa bann dimoun ler sa sant in ganny met an plas.

Mon krwar I annan en kantite keksoz ki nou kapab fer e mon pour zis donn zot en legzanp akoz ki malgre ki nou koz lo la nou parfwa mazin lo la, me parfwa nou fer bann keksoz ki pa neseserman ede.

Annou pran par egzanp EXPO ki ti ganny fer resaman, bokou dimoun in vizit expo be si nou regard EXPO dan lafason ki son akse ti ete, I pa ti pour posib pour en dimoun dan en wheelchair ganny akse avek serten landrwa dan EXPO.

Mon pa pe blanm Lorganizasyon EXPO me selman I montre ki parfwa I vin en problenm ki vin out of sight e out of mind mentality ki nou pour gannyen, e nou pa vreman regard li.  E mon ti ganny sans zwenn avek en paran kot stall SEYPEC sa madanm pour rapel.  E I ti montre mon son zenn garson e I ti montre mon ki mannyer son garson I anvi vizit sa bann diferan landrwa kot I annan zannimo eksetera, me I pa’n fasil pour li.  I pa lafot bann dimoun ki ti pe fer zot bann stall me petet I en keksoz ki nou bezwen konmans mazin lo la,  ki mannyer nou sanz nou lespri otour sa size e regard li dan en fason pli larz, dan en fason kot nou sey zisteman pratik sa enklizyon ki nou pe koz lo la.  E non pa ki I vin en Mosyon dan tanzantan e nou degaze fer serten keksoz lo la apre nou pa vwar li vin en keksoz ki kontinyen, en keksoz ki konkret.

An konklizyon Mr Speaker mon le felisit tou dimoun ki travay avek bann dimoun I annan dezabilite, e mon pa kapab konklir Mr Speaker san koz en pti pe – par egzanp mon konnen I pa neseserman lo Mosyon, me selman I en keksoz nou bezwen realis travay formidab osi ki bann paran ki annan otizm pe fer.  E sakrifis ki sa bann paran pe fer pour zisteman ed zot zanfan adapte ek lanvironnman lekol e zot zanfan kapab kontinyen dan en lanvironnman lekol.

E mon krwar ler nou pe koz lo en sant lo en dezabilite mon pa le mix sa de akoz enn I kapab pran plis lo lot me I enportan ki nou sosyete I konmans koz lo sa bann size Mr Speaker, akoz otizm I la nou annan zanfan ki pe soufer avek otizm e nou annan plizyer dimoun volonter ki pe fer travay formidab e lekol kot mon zanfan I ale lekol La Retraite I annan zanfan ki’n pas dan sa bann sityasyon I annan paran ki’n ede I annan ansenyan in fer en kantite pour travay avek sa bann zanfan e bokou lezot lekol pe fer.

E petet letan nou pe koz lo sa Mosyon I ava ensit sa deba Nasyonal otour la fason ki nou konman en pep nou regard lezot dimoun, kot parfwa nou tou nou santi nou normal me petet sa bann dimoun pe pas dan bann sityasyon pli difisil oubyen pli konplike, pli konpleks.  Ki nou bann mekanizm sosyal ki nou annan ozordi, pa pe permet nou adres bann problenm ki zot pe fer fas avek.

Mr Speaker nou koz bokou lo nou en higher to – en high income country, be nou bezwen vin osi dan sa income country avek bann high income solutions.  E bann solisyon ki nou bezwen vin avek I bann solisyon ki pour ase radikal, ase drastik, me I pour en bridge ki nou bezwen cross.

 Bann bis ki fer pli fasil pour bann dimoun avek dezabilite pour antre ladan, bann landrwa kot I ed bann dimoun annan ki annan hearing impairment; bann keksoz ki annan braille pour ed bann dimoun ki pa vwar kler.

Tousala I bann fason pli larz.  E nou bezwen fer sa konversasyon nou bezwen konmans met resours lo la.  Akoz si nou le ki nou konman en sosyete nou ganny vwar konman en sosyete enklisif nou pa kapab enklisiv zis lo kote ras, kouler, larelizyon nou bezwen enklisiv lo tou baz.

E se sa ki nou Konstitisyon I dir e se pour sa rezon ki mon pour siport sa Mosyon e mon ti a kontan ki an konklizyon mon konnen poudir mover Mosyon in koz avek bann dimoun kot Rehab Center kot VTC.

I annan serten in ganny lenformasyon, mon ti a kontan nou koz lo ki mannyer nou kapab fer sa sant pa zis vin en sant kot nou vin en repozitwar en dimoun ek dezabilite, me ki vin konman en setting stone si oule – en springboard pour en dimoun avek dezabilite, kot nou pa met li laba e apre I out of sight e I out of mind e retourn back to the same kind of debate ki nou gannyen dan lepase.

Avek sa Mr Speaker mon pour terminen mon lentervansyon, e mon le demann tou Manm pour adres sa size dan en fason fair, dan en fason ouver e anmenn bann eleman ki mon krwar I neseser pour konmans ensit sa deba Nasyonal ki nou gannyen lo sa size.  Mersi Mr Speaker.

 

MR SPEAKER

Mersi Onorab Pillay.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker mon pran laparol pour mon azout mon sipor avek sa Mosyon ki Onorab Esparon in met devan nou Lasanble pour nou konsidere.  Byensir bomaten ti enteresan pour vwar bann zanfan, bann adilt osi ki’n la prezan mon konnen poudir zot pas atraver bann challenges bann diferan challenges dan zot lavi.

E bann challenges ki zot pas ladan an menm tan osi fodre pa ki nou krwar ki sa konmsi I rezerve zis pour zot.  Parske nou tou dan nou lavi nou annan diferan challenges.  E petet letan mon pe regard sa Mosyon, mon pe regard en mo ki parfwa I ganny mal enterprete e sa I sa mo ‘normal’.  Parfwa nou tant dan nou sosyete e dan nou fason koze e I byen ki sa bann keksoz pe sanze kot nou fer distenksyon ant dimoun.

Nou vwar nou kapab dekrir enn konman en dimoun normal ek enn ki pa normal.  Mr Speaker mon krwar ki sa I form parti nou ledikasyon, parske ofet nou tou nou normal, napa en dimoun ki pa normal nou tou nou normal.

E zis pour montre ou ki tou dimoun I normal, me tou dimoun I annan diferan abilite.   Mwan mon konsider mon lekor normal me si ou demann mon pour mwan desin, pour mwan fer en desen ok mon a desin en pti tonton avek bann stick people konmsi, en latet ron en baton pour son lekor de baton pour son lebra de baton pour son lipye se sa ki mon pour kapab desinen.

Me letan mon mazin mon frer ki unfortunately in kit nou Mr Boudanne letan nou ti avek son labous sa ki li I desinen I pa ti de pti baton de pti isi, de pti laba, me sete bann desen ekstraordiner.  E zis diferans ant li ek mwan se ki sakenn ant nou I annan diferan abilite.

Me nou tou nou normal akoz nou tou nou ganny kree dan menm limaz sa kreater.  E mon krwar ki si nou kapab apros lavi en pe dan sa direksyon, mon krwar nou pour kapab annan en vizyon en vizyon o monn ki pour totalman diferan.  E sa dan li menm li I ava fer nou realize ki sa ki pli for I bezwen ed annefe sa ki pli feb.  E sa ki pli feb i bezwen ganny konsiderasyon pli spesyal afen ki finalman alafen dizour, sa ki for I kapab vin pli for, sa ki feb I kapab vin pli for, me lenportans se pa pour ki sa for I abiz lo sa ki feb, me ki finalman nou kapab partaz nou bann abilite, partaz bann don ki nou annan, afen ki finalman sa monn I vin en monn ki meyer.

Alor Mr Speaker sa I mon premye pwen.  Me prezan apartir la, e se sa ki Mosyon Onorab Esparon pe demande, se ki mannyer eski nou konman en sosyete, e li I pe demann Gouvernman, parske li letan nou pe dir Gouvernman nou pe dir sosyete, nou kapab ranplas sa mo ‘Gouvernman’ avek ‘sosyete’ parske se sa sosyete ki finalman ki pour annan sa responsabilite, pour ki sosyete I pran sa responsabilite, pour li met plis fasilite spesyalize, a dispozisyon bann ki pli feb.

E mon krwar ki poudir sa Mosyon I fantastik me an menm tan osi fodre ki nou realize ki parfwa sosyete I dousman, I dousman pour li fer sa bann keksoz e mon kontan ki Onorab Pillay in mansyonn Mosyon ki Mr Lebon ti anmennen dan Lasanble.

Me an menm tan mon krwar ki nou pour rekonnet ki poudir malgre ki in annan sa demars napa gran keksoz ki’n ganny fer.

E mon riye Mr Speaker e la mon pour dir ki mon espere ki Komite Modernizasyon I pran sa byen an konsiderasyon, ki poudir nou Lasanble Nasyonal I pa ‘friendly’.  Nou Lasanble Nasyonal I pa ‘friendly’.

En dimoun avek en wheelchair en dimoun ki servi en wheelchair pour trouv li difisil pour li vin ekout sesyon Lasanble Nasyonal ki nou tou nou pe dir –‘ I ou Lasanble’.

Me si ‘I mon Lasanble’ mon pa kapab antre ladan I bezwen annan en keksoz ki ganny fer, alors mon espere ki Lasanble Nasyonal.  Lakour Siprenm menm parey Palais De Justice ki mannyer eski en dimoun avek en dimoun, avek serten challenge, I pour kapab mont dan Lakour prensipal pour li ekout son case?  I pa kapab.  Fodre I ganny led.  Me selman sa bann dimoun pe dir be zot devret kapab fer li.

Mr Speaker 2 mwan pase Archbishop James Wong I ti koz avek mwan an relasyon avek en fanmir dan ou distrik ofet ki annan en zanfan avek serten dezabilite, ki par egzanp I ti trouv li avek limitasyon.  In anvi al regard en show ICCS be ICCS I en lot challenge ankor.

E mon ti pran li lo mon menm pour mon koz avek Mr Emmanuel D’Offay pour mon dir avek li ki ICCS sa main landrwa kot pli gran landrwa kot nou fer bann aktivite kiltirel ensidswit, be i pa tou ki ale.

E atraver bann dyalog in dir avek mwan zot pour fer serten keksoz.  So nou bezwen regarde ki mannyer nou kapab fer e dan nou mindset li menm li parey mon pe dir fodre ki nou konsider nou tou lo menm nivo, nou tou nou kreasyon Bondye.  E alors nou tou nou normal dan son lizye, me sa ki pli for I bezwen toultan ed sa ki pli feb.

Mr Speaker letan mon regard travay ki Mr Mondon Clifford Mondon I fer me anba son lorganizasyon ‘Make a Child Smile’.  Mon krwar ki nou tou nou touse atraver son devosyon, letan in koze lo televizyon ensidswit lo ki mannyer I pran sa konman en vokasyon pour li fer serten keksoz e mwan lannen pase Mr Speaker letan mon ti pe vwar sa prize giving ceremony kot zot ti pe rekonpans bann dimoun ki fer travay lo en baz volontarya, mwan mon ti krwar enn bann dimoun ki ofet I devret ganny rekonnet e ki devret ganny rekonpanse, se en dimoun parey Mr Clifford Mondon atraver son NGO ‘Make A Child Smile.’

Alor Mr Speaker sa Mosyon mon krwar ki tou bann dimoun ki’n koze in eksprim bann diferan nou regard sa Mosyon absoliman pare yen dyanman dan diferan facets.

E mon krwar ki mesaz ki nou pe mesaz ki Lasanble pe anvi pase, lavey Lazournen Enternasyonal avek bann dimoun ki viv avek dezabilite, se pour nou dir annou fer sa monn vin meyer.  Mon krwar ki se sa meyer – se sa mesaz ki nou pe anvi pase.  E bann diferan dimoun ki’n ganny mansyonnen pandan sa deba.

E mwan I annan serten dimoun ki’n vreman tous mon I mean sa de ser Brigitte avek Cecile.  Kot espesyalman Cecile ki I annan parey nou tou nou konn Cecile I en dimoun Nasyonal I en Ero Nasyonal I annan problenm avek son eyesight e se li ki’n montre mon Mr Speaker bann diferan Apps ki annan dan iPhone mon servi iPhone bann diferan Apps ki annan dan iPhone pour bann dimoun ki annan zisteman problenm pour avek zot lizye.  Ki mannyer iPhone I sitan friendly pour ki en dimoun ki annan problenm avek son lizye I kapab servi son telefonn absoliman – parey en dimoun ki napa problenm avek son lizye e sa I fantastik.

E la zisteman letan nou pe ozordi nou pe koz plis zisteman pour sa kategori dimoun ki annan problenm avek zot eyesight lo kote Komisyon Elektoral ti a pe koz pour bann dimoun pour regard ballot paper.

E ozordi nou konnen ki poudir atraver lemonn I annan sa move pour ki lo ballot paper I osi annan braille pour ki sa dimoun I pa bezwen pour ki li osi tou son vot I reste sekre.

Me tousala nou bezwen avans li nou bezwen pous li pour li vin pli for.  E mwan letan mon pe regard sa Mosyon mon pe regard li osi konman letan nou ava fer bann fasilite nou ava pe zisteman ed dimoun avek diferan abilite pour zot nobou devlope, pour zot nobou avans devan.

Donk mon krwar ki kler ki nou tou nou pour donn sipor e nou tou dan nou fanmir I annan dimoun avek diferan abilite me nou tou nou konsider parey mon dir nou konsider nou bann dimoun konman normal.

Ofet nou konnen ki poudir lekor imen I adapte dan serten fason ki poudir letan ou annan en sense ki pli feb lezot I vin pli for e tousala se bann keksoz ki konman en sosyete nou bezwen pran an konsiderasyon.

Alor Mr Speaker mon krwar ki sa ki nou pe met devan Gouvernman serten keksoz ki fer bokou sans, en keksoz ki nou bezwen pouse, e la zis an pasan mon ava dir ki letan sa Lasanble I diskit keksoz I bon ki Gouvernman I pran li an konsiderasyon.

E la par egzanp la bomaten la mon kontan ki sa Mosyon ki nou ti diskit lo la de semenn pase anmennen par Onorab Mondon lo COSPROH ki poudir bomaten Prezidan in ekout sa ki Lasanble in dir e sa Commission of enquiry in fini ganny etabli.  Se sa lafason ki nou bezwen travay.  Letan keksoz I for e sosyete pe koz lo la annou pran aksyon e annou bouz devan.

Sa osi tou sa Mosyon ki la mon pa vwar okenn rezon akoz dan Bidze ki pe vini an Desanm, nou pa devret annan bann keksoz konkret. Onorab Woodcock in koz pour Praslin Onorab Sophola osi tou in mansyonn La Digue, nou pe regard lo Mahe.  Be mwan mon krwar ki I devret annan en keksoz konkret.  Afen ki ava annan sa scope osi tou pour ki plis nou bann zenn I ava lans li dan sa direksyon.

E la Mr Speaker mon krwar ki enn bann keksoz ki parfwa osi nou sosyete I fer fot, letan nou sey tret tou dimoun an term lapey an term konmsi nou sey fer fason pour nou tret tou dimoun parey.  Me mwan mon krwar poudir I bezwen annan serten distenksyon.  Par egzanp lo ki kalite travay ki en dimoun pe fer.

En teacher ki pe ansenny en zanfan ki annan difikilte aprann, I pas bokou plis letan, I pli difisil.  E alor si nou pour anvi annan bann zenn ki pran sa konman en vokasyon, ki devlope pour fer sa bann kalite keksoz, mon krwar ki nou bezwen osi azout son rekonpans ansanm avek li.

Alor Mr Speaker avek sa detrwa parol, mon pour siport Mosyon anmennen par Onorab Esparon, e mon kontan bann deskripsyon ki’n ganny servi e mon kontan bann parol ki’n ganny servi dan sa deba, e mon krwar si sa Mosyon I ed nou konman en Lasanble, I ed nou konman en sosyete pour nou grandi.  E pour nou donn tou dimoun sa dinyite ki I merite e pour permet tou Manm nou Kominote tou Manm nou sosyete pour santi ki vreman I annan en par dan sa Kominote e ki si li I pa kapab lev 100 kilo me I kapab lev 10 kilo – sa 10 kilo ki I leve I osi enportan ki sa 100 kilo ki en lot pour leve.

Avek sa de parol Mr Speaker mon swet nou tou, parske nou tou nou annan serten dezabilite mon swet nou tou en Bonn Fet enternasyonal demen.  Mersi bokou.

 

MR SPEAKER

Mersi Onorab Ramkalawan.  Zis mon pour pran en pti pwen ki ou’n fer sorti, pandan break ler mon ti pe enterakt avek bann zanfan ki ti la enkli Mr Danny Zailor se sa zot dezir se ki Gouvernman I ekout sa deba ki Lasanble pe fer.  E Gouvernman I pran bann rekomandasyon ki sorti dan sa deba e I met an aksyon.  E mon swete ki sa I ava arive.  Bon I reste de Manm avek mover Mosyon eski nou kapab fer nou entervansyon petet 5minit sakenn ki nou a kapab rann SBC son lantern avan 12.30.  Onorab Ghislain.

 

HON CHANTAL GHISLAIN

Mersi Mr Speaker.  Mr Speaker zis kekfwa met en pti pe koriz en keksoz demen I pa Lazournen Enternasyonal pour bann Dezabilite.  Me I Zournen Nasyonal pour bann Lasosyasyon Dezabilite. Zournen Enternasyonal – bann dezabilite enternasyonal I selebre le 3 Desanm zis pour met sa …

Mr Speaker parey nou tou nou konnen osi dimoun dan lavi nou tou nou fer fas avek bokou defi e nou viv e pour bann ki viv avek bann dezabilite sa bann defi I pli gran lefe ki zot bezwen fas avek en kantite keksoz tel ki mal konprenezon, lakseptans, lapresyasyon e menm lakseptans.

Lartik 1 Deklarasyon Iniversel Drwa Imen I dir ki tou imen in ne lib e egal dan dinyite e drwa.  Sesel ti rektifye Konvansyon Nasyon Ini lo drwa dimoun avek dezabilite an Oktob 2009.  En Konvansyon ki asire ki azir dan full enjoyment of human rights pour bann dimoun avek dezabilite ek egalite e anba Lalwa.

Bokou keksoz in ganny dir par egzanp nou osi loter Mosyon in dir napa bann statistik me letan nou pe regard resansman 2010 ki ti fer, nou vwar ki isi Sesel I annan bann dimoun ki pe viv avek dezabilite I reprezant apepre 3poursan nou popilasyon ki fer ki annan 2200 dimoun sitwayen Sesel ki pe viv avek dezabilite.

E ladan I annan bokou ki pe travay e bokou osi ki pe travay dan bann sekter prive e I annan osi ki pe travay pour zot menm.  Me selman letan ou pe regarde bokou bann difikilte ki bann dimoun I fer fas avek dan sirkilasyon; par egzanp dan bann transpor piblik deplasman en zeneral partisipasyon dan bann aktivite ki ganny organize lo nivo distrik oubyen Nasyonal; akse oubyen posibilite pour devlop zot lendepandans sosyal e ekonomik zis pour nonm enn de.

E mon pe vwar wi sa Mosyon I annan son merit e I pour ganny mon full sipor.  Me mon bezwen fer remarke e port a latansyon Lasanble ki menm si ozordi Loter Mosyon in fer referans lo sa sant reabilitasyon ki sa sant North East Point I bon ki nou konn listwar sa sant e son rezon det.  Sa sant reabilitasyon parey son non I dir ti ouver an 1982 swivan en kado ki Sesel ti gannyen avek Gouvernman Libyen.  Sa ti en sant reabilitasyon parey son non I dir ki vedir ou al laba dan sa sant pour fer bann reabilitasyon bann pasyan apre ki in resevwar en dezabilite.

Pour konmanse I ti pe servi son fonksyon e se pour sa rezon ki Minister Lasante in anvoy bokou pasyan laba pour reabilit zot I annan laba ki al sers zot prostetik parey lipye ouswa zot pour zot kapab retourn dan zot lavi toulezour.  Me konfizyon ki kan ki bann dezabilite zanfan dezabilite in ariv laba e ki fason in ariv laba sa bokou dimoun pa konnen ki mannyer in arive ki bokou dimoun pe vwar zot ou a krwar zot pe lager en plas dan en sant reabilitasyon, kan pa zot ki ti sipoze laba.

Donk Sesel I bezwen en sant ki nou pe dire n sant pour nou bann dimoun avek dezabilite, en sant modern avek tou son bann fasilite lekol eksetera pour ki tou bann zanfan I kapab fulfill zot bann langazman parey nenport ki endividi Seselwa I kapab fer.

Mr Speaker o kour mon karyer osi konman zournalis mon rankontre bokou zanfan dezabilite ti menm gou letan ou al Sanpyonna Sport ou fer bokou zanmi bokou ziska ozordi I ankor annan ki ankor mazinen I annan par egzanp, mon pe mazin Madanm Ms Venida Marcel – Margaret Sanders, Naddy Zailor.  I bann zanfan ki’n grandi la e ziska prezan zot pe ankor kominik avek ou e I fer ou realize pa akoz en zanfan I annan dezabilite ki apre en serten letan ki ou pa kapab zwenn zot dan bann lezot aktivite sosyal, me ou pa kapab zwenn zot lot landrwa ki ou pa kapab kit zanmi.

Mr Speaker letan mon pe regard osi lo nou pe regard en pe lo bann fasilite ki bann dezabilite konmela I gannyen, ler nou pe regarde bokou keksoz in ganny fer dizon dan lavil.  Par egzanp I annan bann ramp ki’n mete dizon en pe partou.  Me akse avek bann building piblik anfet tou sa bann building napa akse avek bann pour bann dimoun ki annan dezabilite.  Parske nou konnen ki bann dimoun avek dezabilite I bezwen toilet ki spesyal.

Sa dimoun ki annan son wheelchair I pa pe kapab deplase libreman li tousel pour li desann anvil, toultan I bezwen annan sa lot dimoun ki avek li.  Par egzanp mon pe regard dan bann pei bann pei ki devlope, zot menm annan bann bis spesyal kot sa dimoun I pa bezwen en lot dimoun avek li pour li kapab desann anvil.

Dizon par egzanp I servi son wheelchair I kapab antre dan sa bis kot I annan bann bouton kot I peze kot I antre, I monte and I kapab konmsi I pa bezwen in fini vin endepandan lo li menm.

Bokou sa bann dimoun avek dezabilite zot pe rod sa menm bann dimoun ki pa vwar kler zot pa kapab marse libreman anvil parske menm si I annan lalimyer trafik, zot pa kapab koup semen zot tousel.

So I annan bokou keksoz ki nou kapab pe fer pour kapab asire ki tou nou bann dimoun avek dezabilite, zot osi zot ganny akse avek bann landrwa piblik zot kapab fer tou keksoz, pour nou kapab Sesel konman en pei nou osi onor nou langazman sa Konvansyon ki nou ti sinyen lo dwa bann dimoun ki pe viv avek dezabilite.

E pour terminen Mr Speaker mon pe koz en pti pe lo nou pe koz lo responsabilite Gouvernman, me osi nou ti a kontan koz en pti pe lo responsabilite bann sekter prive la mon pe koz lo bann dimoun avek ki annan dezabilite lo Praslin avek La Digue.

Mr Speaker sa bann dimoun sa bann zanfan zot pa kapab bouze pour vin Mahe anfet nou konnen ki zot pe resevwar sa lasistans anba Benefis Sosyal ki R5,050 zot pa pe kapab viv zot en lavi ki bokou lezot dimoun ti a kontan kapab pe viv.

Zot pa kapab deplase pour vin Mahe lefe ki zot bezwen pey sa full fare zot bato avek zot avyon, donk mon pe demande ki bann dimoun ki ansarz sa bann dimoun dezabilite lasosyasyon I kapab fer en full survey – survey konplet pour nou konnen ki kantite zanfan ki annan avek dezabilite, ki mobil ki kapab vwayaze pour nou kapab donn zot en kad spesyal pour ki zot osi.

Akoz I difisil pour ou konnen poudir en dimoun I kapab zis vin dir ou poudir I annan dezabilite, alors I pa pe kapab pey full fare.  So I ava annan son kart parey son ki atase avek son kart idantite, parey bann vye dimoun bann dimoun aze zot annan zot kart idantite ki met zot laz lo la I fasil pour zot konnen poudir ou en dimoun ki annan laz retret.

Me tandis ki en dimoun ki annan dezabilite, pa tro fasil sirtou si en dimoun I sourd, ouswa I annan kek dezabilite mantal, menm si fizikman I kapab marse me selman still I en dezabilite, me I pa pe kapab travay pour li ganny son full lapey donk I pe viv lo sa benefis Sosyal.

Si Lasosyasyon Dezabilite I kapab anrezistre tou sa bann dimoun, donn zot kart as en dezabilite, pour ki zot kapab zot osi letan dizon bato menm avyon I dir be ok nou pe fer pey bann dimoun ki annan dezabilite pa pey sa full fare I a fasil pour zot kapab peye.  

So se sa mon kontribisyon Onorab mon pour port mon full sipor avek sa Mosyon.  Mersi Mr Speaker.

 

MR SPEAKER

Mersi Onorab Ghislain.  Onorab Aglae.

 

HON EGBERT AGLAE

Mersi Mr Speaker.  Bonzour tou Manm Onorab a lekout e tou piblik espesyalman si I annan bann dezabilite ki pe ekout nou en gro bonzour.  Mr Speaker pour nou kapab konpran sityasyon bann dezabilite nou bezwen parfwa pe met nou dan zot soulye e antre dan zot lespri pour nou kapab konpran e ki mannyer nou aport zot bann soutyen.

Parey Mosyon pe demande pour fasilit konstriksyon en sant pour sa bann dimoun ki’n ganny kategorize, ki annan sa bann dezabilite.  E mwan mon ti a kontan nou al en pti pe pli devan avek sa Mosyon plis ki sant nou pe demann sant.

Mr Speaker I annan diferan kalite dezabilite ozordi ki egziste nou koz lo sa ki pa vwar kler, sa ki sourd, sa ki annan problenm mobilite pa kapab bouze, I annan sa ki ganny bann dezabilite avek zot devlopman mantal osi, nou annan osi ki ganny dezabilite gras a bann serten kondisyon maladi ki dan lavi, letan zot pe viv zot bezwen pe fer vwar zot pe fer fas avek.

E tousala Mr Speaker dezabilite ki nenport ki pei I vwar li pe fer fas avek.  Mr Speaker mon konstate ki depi ler ti annan kreasyon nou National Disabled Council sa ti an 1994 ki ti antre anba en Lalwa e  li son manda sete pour li kapab kordin bann aktivite swa dan prive swa dan Gouvernman e angaz bann lezot dimoun partner, pour kapab ede, pour kapab get byennet bann dimoun ek dezabilite.

E sa Mr Speaker sa letan ti ouver bann laport, pour kapab annan bann lezot Komite ki nou ti vwar ti kree dan distrik Port Glaud I pa’n en leksepsyon kot nou ti vwar bann Komite ki ti pe liaise avek bann dezabilite e la ti annan bann aktivite ki ti ganny kordinen.

E sa a en pwen letan ti pe marse me ozordi Mr Speaker nou vwar poudir ki sa kalite aktivite in preski perdi, in preski napa ditou e mon santi ki sans ki sa Konsey ti’n ganny etabli son manda pa ti pe neseserman ganny gete.

E I fer ki ti annan nesesite ozordi pour nou revwar rol sa Konsey e revwar son manda e reget en lizye lo li pour fer ki I deservi sa ki mandate anba Lalwa.

Mr Speaker I annan survey ki’n ganny fer dan bann diferan pei e ou pe vwar poudir ki mannyer bann dezabilite zot dezavantaze.

42poursan I montre poudir bann dezabilite ler zot in ganny interview zot in ganny pas atraver sa survey ki 42 in konplent poudir zot pa’n kapab bouze sorti lo zot lili pour al fer serten bezwen, akoz ti napa personn pour ed zot.

16poursan in dir ki zot napa mwayen savedir la mwayen finansyel pour zot kapab ganny bann servis debaz, kalite manze ki zot sipoze pe manze.

45poursan bann fanmir in vwar poudir ler mon annan en dimoun ki annan dezabilite dan fanmir I vin parey en burden ki sa I mal.  2

3poursan sa bann dimoun ki dan dezabilite zot per pour al dan en nursing landrwa reabilitasyon akoz zot pa pe ganny trete byen ouswa zot pe ganny maltrete.

40poursan pe ganny refize en travay menm si zot annan serten dezabilite ki zot montre ki zot kapab fer serten travay.

Mr Speaker sa I en lemonn ki en dimoun dezabilite pe viv ladan e nou bezwen konpran sa.

Mr Speaker malgre anba Lalwa nou annan en Konsey ki’n ganny mandate nou vwar poudir an term Polisi pa bokou ki pe ganny fer ozordi avek sa la kantite devlopman isi.  Mon vwar bokou building ki ganny konstri, ki pa pran kont bann dezabilite disability-friendly. Nou vwar lakaz dan housing estate kot nou tou nou bann dezabilite nou tou nou pe viv napa serten fason pour zot bouze pase ouswa ou kapab annan serten aktivite menm si zot dan lakour a fer zot lavi vin pli ere.

E sa pe koz pa mal konstrent e bann paran pe lans en lapel ozordi bann paran ki annan zanfan ouswa en dimoun ki zot pe siporte ki annan dezabilite pour Gouvernman vwar en pe bann Polisi ki konsern bann dezabilite.

I pa zis kot lakour, me I dan bann landrwa travay I dan bann servis ki zot bezwen pas atraver menm lopital pour zot al serten landrwa ler I dir ou mon bezwen anmenn li kot dantis i bezwen mars en mars peron pour li al laba I pa kapab.  Tousala I bann keksoz ki nou bezwen ganny revwar.

Mr Speaker lo lot kote ler nou pe koz en sant dezabilite I pa en neseserman nou bezwen vwar en sant dan lokasyon, ki parey nou dir ki si nou pour dakor nou pour met li Perseverance I pa pour ase sa Mr Speaker.  Akoz nou pa le kree en sant ki demen I pour vin parey en Headquarters kot tou dezabilite I bezwen desann pour vini pour li petet pas atraver serten servis me nou bezwen annan en sant ki pour konplimant en desantralizasyon servis dezabilite ki ava osi antre dan distrik.

Mon dir sa Mr Speaker akoz bokou pei in vwar poudir malgre zot in kree bann sant santralize zot in vwar zot avek serten konstrent menm akoz ler ou’n met sa dezabilite dan sa sant ant en ler me I la, apre sa ler ki li in kite I vwar li retourn dan en lanvironnman vreman difisil ki I pa’n ganny set up sa kondisyon pour nou kapab akey sa dezabilite pour fer ki I kontinyen ganny sa servis ki I neseser avek son dezabilite ki I annan.

E se sa rezon ki tou distrik – tou distrik li I bezwen annan li serten servis ki kapab ede.  E sa servis li menm li nou bezwen annan bann volontarya ki vini ouswa bann dimoun ki annan serten Mosyon ki annan bann leker osi ki pare, pour volonterman vin kontribye pour zot kapab ler in sorti kot sant, I retournen dan sa distrik I ganny sipor pour li kontinyen sa dezabilite.

Mr Speaker lo en lot konteks parey manda National Disabled Council in dir I fer resorti I pa zis Gouvernman ki kapab ki bezwen antre ladan sekter prive I bezwen antre ladan nou tou nou bezwen donn en koudmen nou pe koz lo finansman sa proze.

Nou annan nou CSR ozordi I kapab ganny servi pour konbat pour ede konstri en tel fasilite ansanm avek Gouvernman an partenarya.

Mr Speaker ler nou pe koz lo dezabilite osi sa bann servis ki bann paran direkteman osi I bezwen akoz ozordi bokou paran I bezwen negliz son travay ki I fer li ekonomikman dezavantaze akoz I bezwen vwar li rested an lakour fye lo sa pti larzan dezabilite ki I pour ganny asiste, kan li I ti kapab petet ale ekonomikman vin pli prodiktiv pour li kapab pous nivo lavi son fanmir.

Tousala I bann problenm ki nou bann paran ouswa bann carer ki pe pran en dezabilite anba son sirveyans ki fer mon mazin bann dimoun parey Anifa Didon ler I Cap Ternay mon mazin Madanm Labiche mon mazin Mr Laurence – Mr John Leng tousala I bann dimoun e lezot ankor ki pe viv avek bann dezabilite e ki zot bezwen bann latansyon 24 lo 24 mon kapab dir.

E nou konman en Lasanble mon krwar nou pe fer nou bout par siport sa Mosyon anmennen par Onorab Esparon pour ki nou ava vwar en lot souf kot National Council.  I a vini I a bezwen pran son responsabilite enplimant son manda ki I sipoze gannyen Gouvernman I a antre par met resours finansyel.

E nou lans lapel pour bann endividi, ki kapab annan sipor ki kapab vin donn koudmen e bann ki annan mwayen osi pour donnen annou donnen e nou ava vwar en lot kalite Seselwa ki pe viv avek dezabilite pli zwaye.  Avek sa Mr Speaker mon pare pour donn sipor sa Mosyon.  Mersi.

 

MR SPEAKER

Mersi Onorab Aglae.  Mon ava pas laparol avek Onorab Esparon pour li fer son konklizyon.  Onorab.

 

HON REGINA ESPARON

Mersi Mr Speaker.  Dabor mon oule remersi tou dimoun ki’n entervenir lo sa Mosyon.  Mersi Onorab Letourdie pour segonn sa Mosyon.  E mon swete ki Gouvernman I antann pledwari sa Lasanble o pli vit posib e fer keksoz dan sa direksyon pour soulaz sor nou bann dimoun avek dezabilite parey Leader Lopozisyon fek fer resorti.

Mon kontan ki dan nou deba nou pa’n eksklir bann dezabilite Praslin ek La Digue.  Mon kontan Onorab Woodcock in mansyonn nou ser Mary e Onorab Hoareau in koz lo nou frer Nelson Praslin.  Sa demann I osi pour zot.  Mon konnen ki la an se moman ki Mary I la devan televizyon pe ekout atantivman.

Mr Speaker wi nou siny konvansyon pour protez sa bann dimoun parey bann Manm in fer nou rapel Lartik 36 Lartik 40 nou Konstitisyon ki koz lo dwa dimoun aze avek dimoun avek dezabilite.

Me nou bezwen annan progranm ki pour onor sa bann Lartik ki pour protez zot dinyite sa bann dimoun nou pa kapab nou pour kapab siny milyon Konvansyon, me si dan la pratik nou pa pe fer nanryen pour zwenn sa bann Lartik pa vo lapenn.

Mr Speaker bann lorganizasyon lokal ki deal avek dimoun ki dezabilite I bezwen osi ranforsi lyen atraver Minister Zafer Etranzer avek bann lorganizasyon enternasyonal pour ganny larzan pour ed zot.  Mon lans en lapel avek Minister Finans pour met a dispozisyon finans neseser pour konstri sa bann fasilite spesyalize pour sa bann zanfan.

Ozordi sa bann zanfan kot VTC I bezwen lasistans medikal zot bezwen al klinik La Rivière Anglaise oubyen Glacis e la avek en nouvo sant I pour bezwen annan fasilite medikal pour attend tou sa bann zanfan.

Mr Speaker Council in travay lo en plan stratezi 2018 ziska 2022 e zot in rekonnet bann defi parey in ganny listre dan sapit 2 ki dir ki ‘VTC fodre ganny expand pour ki sa bann zanfan I kapab devlop zot skill to the maximum. ‘

Lo kote bann pei ki form parti Linyon Afriken nou annan en lorganizasyon ki apel ADA Africa Disability Alliance zot osi zot pe travay lo en protokol ki pour sofgard lentegrite nou bann dimoun avek dezabilite.

Mon menm e Onorab Lemiel atraver nou travay ki nou pe fer Pan African Parliament nou’n ganny sans donn nou pwennvi lo preparasyon sa protokol ki byento Sesel pour ganny demande pour ratifye.

E mon’n deza met Minis Lafanmir an kontak avek sa lorganizasyon ki pe travay lo sa protokol. I pour en lenstriman ki pour bon pour nou pei e I pour ed nou bann dimoun avek dezabilite.

Ozordi sa sant aktyel pe vreman fonksyonn konman en daycare e dan plizyer konvansyon nou tann sa monte e I pa pe empower nou bann dimoun.  Staff napa training pourtan I annan loportinite aletranze pour training parey nou tann fer resorti.  Akoz nou pa pe anvoy nou bann dimoun?

Nou bezwen Special Needs Teachers atase avek sant se sa ki mon pe lans en lapel avek Minister Ledikasyon pour train plis teacher ki pour ansenny special needs.

I annan Manm ki’n fer resorti ki sa sant parey I ete ozordi pa pour kapab deserve son fonksyon, alor nou pa kapab les li fonksyonn parey en daycare nou bezwen rod fason pour devlop skill sa bann manrmay o maximum.

Ozordi carer ki pe ganny peye pour okip sa bann zanfan pa kapab vin kot VTC pour ede akoz napa landrwa apropriye.  Staff pa pe byen ganny ankadre zot pa happy avek sityasyon I annan ki ankor pe espere pour ganny peye zot konze pour plis ki 8an.

Staff disabled ki zot santi ki zot kouraz pe ganny eksplwate e zot fer resorti ki pa akoz zot disable ki zot bezwen ganny eksplwate.  Pourtan Lalwa I dir klerman ki sa dimoun avek dezabilite ki dan full lanplwa I sipoze ganny zis 25poursan son saler redwir lo son pansyon.

Si nou anvi fer bann keksoz pour sa bann zanfan annou fer li byen.  Mr Speaker avan mon terminen mon pour pas lo de pti pwen ki en paran in ekri mon dan en let ki in anvoye.

‘Onorab pa tou keksoz ki parfe pour bann disable dan Sesel.  Gouvernman in fer bokou me nou bann dimoun ki pe viv avek dezabilite I annan ankor bokou pour fer.’

‘Onorab letan sa sant I a vin an operasyon bann dezabilite ava aret ganny viktimize.’

‘Transpor piblik I en lot problenm. Bann bis ki nou annan pa ganny fer pour dimoun disabled e I fer lapenn pour dimoun ki annan dezabilite pe grenpe pe antre dan bis e ler zot ariv dan bis zot bezwen debout akoz son frer ki byen pa enterese pour leve pour donn li en plas’.

E mon kontan ki Leader Lopozisyon in fer sorti poudir Mr Speaker nou koz akse avek bann batiman ki enposib pour bann dimoun avek dezabilite, e la Leader Lopozisyon in fer resorti poudir wi nou Lasanble osi I pa en landrwa ki disabled-friendly, akoz en dimoun dan en wheelchair pa pour zanmen kapab vin ekout Lasanble.

E sa dimoun in menm dir nou pa pe vin montre ledwa nou zis nou pa pe vin montre ledwa koriz personn me plito annou travay ansanm pour vin rod solisyon e met politik de kote.

E in demande pour nou tou siport sa Mosyon.  Mon le remersi tou dimoun ki’n ed mwan dan mon demars pour anmenn sa Mosyon. CEO kot Departman Sosyal Mr Simeon Chairperson Council Madanm Ernesta Chairperson Disabled Manm Council Mr Zailor, Mr Mondon e bann staff kot VTC.

Mr Speaker avek sa de mo mon demann tou Manm pour siport sa Mosyon.  Mersi bokou.

 

(APPLAUSE)

 

MR SPEAKER

Mersi Onorab Esparon.  Bon in ariv moman pour nou pran en vot lo Mosyon ki’n ganny prezante debate.  ‘Sa Lasanble I aprouve pour demann Gouvernman pour fasilit konstriksyon en sant pour dimoun avek dezabilite’.

Mon ava demann tou Manm ki an faver?  Okenn Manm ki kont?  Madanm Clerk.

 

MADAM CLERK

Mersi Mr Speaker.  Avek plezir mon raporte ki mon rikord 28 Manm an faver.  E personn kont.  Mersi.

 

MR SPEAKER

Mersi savedir Mosyon in ganny aprouvasyon total inanimite Lasanble Nasyonal.  Bon mon annan zis de pti lanons pour mon fer avan nou break.

Mon pe enform bann Manm Komite Zil ki demen bomaten I annan en rankont dan Committee Room 3 e size se Devlopman Zil Coetivy.  Yes Onorab Ramkalawan.

 

HON WAVEL RAMKALAWAN

Mr Speaker zis lefe ki en size ki konsern nou tou konman en Lasanble konman Chairperson sa Komite mon ti ava kontan etann en lenvitasyon pour tou Manm ki ti ava ki lib e ki ti ava kontan asiste.  Mersi.

 

MR SPEAKER

Mersi Onorab Ramkalawan.  Savedir tou Manm ki lib e ki enterese I kapab attend en.  Dezyenmman Komite Reform e Modernizasyon pe rankontre Vandredi 9.30 Room 3. 

Bills Committee pa ankor konfirmen I annan posibilite Bills Committee I sipoze meet Vandredi ou si non Lendi.  Bon avek sa nou pour ok zis en moman Onorab Ferrari.  Onorab Arrisol Sandy Arrisol.

 

HON SANDY ARISSOL

Mr Speaker zis pour Reform ek Modernizasyon.  I annan en rakont pour bann MNA dan Sid Vandredi an relasyon avek Sistenm Pwen pour lakaz avek later.

So lo nou Komite nou annan nou deza de MNA nou annan Onorab Pillay avek Onorab Adelaide ki pour enplike ladan mon pa konnen si I pour annan ankor lezot Onorab William.

 

MR SPEAKER

Petet Onorab ki ler Vandredi akoz …

 

HON SANDY ARISSOL

Bomaten.

 

MR SPEAKER

Anr ok akoz Vandredi I annan lansman ofisyel Regional Council …

 

HON SANDY ARISSOL

Yes apre midi.

 

MR SPEAKER

… kot bann Manm in ganny envite.

 

HON SANDY ARISSOL

Mon a zis met sa dan ou latansyon konman Chair Committee.

 

MR SPEAKER

Ok mersi Onorab Sandy Arrisol.  Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon ti a kontan enform Lasanble osi ki demen bomaten mon pa konnen si I en miting ki pour clash avek lezot.  Me Internal Affairs Committee pe rankontre en konsiltan ki pour prezant en travay lo bann National Legal Framework for Trade, Trade Remedies and different Trade Measures.  Ki pe ganny ankadre par Departman Trade and Investment.  

So sa osi si I annan bann Manm ki enterese zot welcome pour zot asiste.  Mon krwar I 10.30 demen bomaten.

 

MR SPEAKER

Ok mersi Onorab Ferrari.  Bon san ki mon oubliye mon ti a kontan group ABC nou ti a kapab zwenn 5minit forse 10 15minit deswit apre zis pour nou regard travay semenn prosen.

Akoz parey mon dir nou pa ankor ganny Official Gazette me selman bann lenformasyon civil code in deza vini konmans sirkile avek bann Manm.

So next week nou annan sa de expert, sa de avoka pe antre e Lasanble Nasyonal pour tackle Civil Code.  Ok, avek sa nou ava adjourn e nou repran nou travay Mardi 9er bomaten.

 

 

(ADJOURNMENT)