::
Home » Verbatim » 2018 » Verbatim Tuesday 10th July, 2018

Verbatim Tuesday 10th July, 2018

NATIONAL ASSEMBLY OF SEYCHELLES

Tuesday 10th July, 2018

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bonzour tou Manm Onorab e bonzour tou dimoun ki a lekout e pe swiv travay Lasanble Nasyonal.  Nou pou al direkteman lo travay pou ozordi.  Antretan ki nou pe atann premye Minis pou antre, ki pou Minis pou Ledikasyon, mon a zis pas en pti pe lo Order Paper.  Bomaten nou pou konmans avek Private Notice Question ki sorti kot Leader Lopozisyon.  Sa i kestyon pou Minis pour Ledikasyon e i pou swiv par en Urgent Question ki sorti kot Leader of Government Business e sa i pou Minis Dezinyen Madanm Macsuzy Mondon.  Apre sa nou pou annan 2 Bills pou Second Reading savedir pou ganny prezante apre pou annan deba. Sa i pou Civil Status (Amendment) Bill 2018 e Truth and Reconciliation Billl 2018.  E nou pou fini avek 2 Mosyon ki lo Order Paper.  Vwala  en pti travay ki Lasanble pou fer sa 2 zour.  Yes Onorab Ramkalawan.

 

HON WAVEL RAMKALAWAN

Mr Speaker bonzour e bonzour tou mon bann koleg Onorab e tou dimoun ki pe ekout nou.  Mr Speaker sa matter ki mon anvi raise i en matter of privilege an relasyon ek bann Bills ki nou pase dan nou Lasanble e i annan en konsern vizavi piblik lo konmsi zot pe rode ki staz serten Bills in arive.  Par egzanp nou’n pas, nou’n pas Access To Information.  ( Mon ava les bann dimoun asize).

 

MR SPEAKER

Yes Onorab kontinyen.

 

HON WAVEL RAMKALAWAN

Wi Mr Speaker, mon ava profite pou mon dir Minis avek son delegasyon bonzour zot osi.

Mr Speaker sa pwen ki mon pe leve i konsern bann Bills ki nou’n pase dan sa Lasanble e i annan en konsern vizavi piblik. Nou’n pas, mon ava donn ou zis de legzanp nou’n pas Access to Information, nou’n pas Human Rights Commission e sa la pe al lo en mwan.

E anba Konstitisyon apre ki nou’n pas en Lalwa i anan14 zour pou assent pou li vin pou li al dan gazette sansan i tonbe anba Konstitisyon.

E mon ti ava kontan konnen ki staz sa bann Bills i ete parski nou  Lasanble osi tou pe ganny akize ki konmkwa nou pa pe fer nou travay.  Mon ti anvi zis konnen ki staz ki nou’n arive, si se Lasanble ki pa pe fer sa travay parey ki nou devret fer oubyen si i annan en blokaz en lot landrwa, zis pou ki nou menm nou konman  Manm nou konnen e an plis ki sa piblik i konnen.  Mersi bokou Mr Speaker.  Parski sansan nou prosesis legal pa pe mars parey Konstitisyon i demande. Mersi.

 

MR SPEAKER

Mersi Onorab pou lev sa matter of privilege.  Mon ava rod lenformasyon korek e apre break mon a kapab partaz sa lenformasyon avek zot, akoz nou osi lo kote Sekretarya nou okouran ki poudir i annan serten mon pa dir blokaz me dele ki pe arive me nou ava rod lenformasyon korek e apre mon ava partaz avek zot.

Bon mon ti a kontan welcome Minis pou Ledikasyon e Human Resource Development Mrs Jeanne Simeon.  Minis bonzour e welcome parmi nou dan Lasanble.  Mon osi dir bonzour son bann teknisyen ki pe akonpanny li Madanm Merida Delcy son Special Advisor,  Dr Linda Barallon, PS pou Tertiary Education and Human Resources Development, Mr Antoine Marie Moustache PS Lagrikiltir e Mr Raymond Brioche Board Chairperson of SIAH mon mazinen Lekol Lagrikiltir ek Ortikiltir.  Bon Minis ek ou delegasyon welcome parmi nou bomaten pou sa PNQ ki sorti kot Leader Lopozisyon.

E san tarde mon ava pas laparol avek Leader Lopozisyon pou poz son kestyon.  Onorab.

 

HON WAVEL RAMKALAWAN

Mersi bokou Mr Speaker.  Mr Speaker mon kestyon pou Minis i lir koumsa;

Vi ki sa MOU sa Memorandum of Understanding ant Minister Ledikasyon ek Seychelles Agricultural New Technology Limited ki ti sinyen le 16 Oktob 2012 pou en peryod 5an, e ki’n aprezan ekspire eski Minis pou Ledikasyon i kapab dir nou kwa ki Lekol Lagrikiltir ek  Ortikiltir in benefisye sa 5an?

Eski bann kondisyon sa Kontra in ganny respekte?

Eski Gouvernman pou re pran sa later ki ti orizinalman pou sa lekol?

E finalman eski Gouvernman i satisfe avek sa Korperasyon oubyen in plito en sityasyon kot en lakonpannyen prive etranze i profit lo nou febles e abize?  Mersi bokou Mr Speaker.

 

MR SPEAKER

Mersi Onorab Ramkalawan.  Mon ava pas laparol avek Minis Simeon.  Minis laparol i pou ou.

 

MINISTER JEANNE SIMEON

Mersi Mr Speaker.   Mon ti a dir bonzour Mr Speaker.  Bonzour tou bann  Manm Onorab prezan.  Mersi tou dimoun a lekout.  Mersi Onorab Leader of Opposition pou ou kestyon.  E nou ava provide larepons si mon kapab eklersi en pti pe.  Mon’n demann permisyon pou mon ganny akonpannyen dan Lasanble ozordi par bann teknisyen ki dan Minister Lagrikiltir ek Lapes, akoz  nou’n konstate ki i annan kestyon ki annan lyen direk avek minister Ledikasyon, me i annan kestyon ki osi pa neseserman dan ziridiksyon Minister Ledikasyon.

Mon ava konman se avek larepons.  Pou premye kestyon dapre Lagreman ki ti ganny sinyen par Lekol lagrikiltir ek Ortikiltir ek Seychelles New Agricultural Technology Limited an  Oktob 2012, Minister Ledikasyon ensi ki lekol, pa’n vreman benefisye dapre nou lekspektasyon anba sa 7 provizyon ki ti dan sa MOU baze lo rikord ki nou annan.

Lide ki ti pou Minister Ledikasyon pou siny en tel MOU, se parski a sa lepok teknolozi ki ti pe ganny servi ti nouvo e ti pou kapab donn nou bann etidyan valer azoute dan zot progranm letid ki ti pe ganny ofer.

Dayer, sa fasilite ki Gouvernman ti’n deza lease avek sa lakonpannyen, ti lapros avek sa lekol.

Pou dezyenm kestyon an sa ki konsern kondisyon dan MOU Mr Speaker, nou bezwen aksepte ki tou lede parti pa’n fer ase zefor e tou le de parti pa’n onor bann  kondisyon ki ti’n stipile dan sa MOU.

Dapre lenformasyon rezon prensipal se ki ti annan en baryer kominikasyon, pandan lenplimantasyon.

Kot i konsern later Mr Speaker.  Later lo ki sa laferm Seychelles New Technology Agriculture Company Limited i trouve, ti anba responsabilite Sant Resers Lagrikiltir ki ti Anse Bouleau e non pa Lekol Lagrikiltir sa lepok.

Se sa ki ti fer li pli fasil pou lease sa morso later ek sa lakonpannyen pou en peryod 30an.  Gouvernman napa okenn baz pou le moman dapre Minister Lagrikiltir, pou repran sa later, akoz lakonpannyen pe pey son lokasyon e al ler parey i stipile dan s on Lagreman, dan son lease agreement.

Katriyenm kestyon Mr Speaker parey mon’n deza fer resorti pli boner Minister Ledikasyon ek Rezours Imen  pa’n benefisye dapre nou lekspektasyon, anba sa 7 provizyon ki da sa MOU ki dayer parey Onorab Leader  Lopozisyon in dir in ekspire dei Oktob 2017.

Dan en vizit ki ti ganny fer Vandredi le 6 Zilyet konzwentman avek Zofisye Minister Lagrikiltir ek Manm Board SIAH.  SIAH se nouvo non sa lekol Lagrikilitir ek Ortikiltir, Seychelles Institute for  Agriculture and Horticulture.  Delegasyon ki ti antreprann sa vizit in konstate ki sa lakonpannyen  pa annan ase teknolozi modern ozordi,  e sibstansyel, pou ofer ozordi dan laprantisaz nouvo teknolozi dan devlopman sekter lagrikiltir.

An prenon kont bann nouvo devlopman dan teknolozi lagrikiltir lokalman, e an liny avek vizyon nouvo sant profesyonnel anba direksyon Board, Seychelles Institute of Agriculture and Horticulture SIAH, Minister pa santi annan okenn nesesite pou renouvle sa MOU.

Mersi Mr Speaker.

 

MR SPEAKER

Mersi Minis. Onorab Ramkalawan.

 

HON WAVEL RAMKALAWAN

Mersi bokou Mr Speaker.  E mersi Minis pou ou larepons fran e onnet.  Mr Speaker mon ti ava kontan demann sa bann kestyon swivan.  E mon kontan ki Lagrikiltir osi tou i prezan.  Minister Lagrikiltir i prezan.  Premyerman eski Minis i kapab dir avek nou si letan zot to pe fer sa MOU ,e an menm tan osi letan Gouvernman ti pe deside pou pran sa morso later ki orizinalman ti form parti Lekol Lagrikiltir, eski parmi bann kondisyon sete ki bann  etidyan ti pou benefisye?

E si sa ti form parti kondisyon pou donn sa lease eski sa pa i montre ki sa lakonpannyen in plito abize e ki alor kondisyon sa lease i devret tonbe?

Parski zot pe zis fer biznes prive e ou menm ou Minis ou’n dir ki napa ni menm teknolozi vreman modern ki zot pe servi.  E alor pou sa bann rezon eski Gouvernman atraver Minister Lagrikiltir pa devret repran sa later?

Dezyenmman Minis, Mr Speaker letan mon regard sa Kontra, sa MOU, mon pa pe tro trouve ki mannyer lekol pa’n fulfill son bann bezwen.  Alor mon ti a kontan Minis eklersi nou.  

Ok Minis lo kote lekol zot ti pou etabli ban training needs pou bann etidyan.  Zot ti pou asiste avek sipervizyon,  ek evalyasyon bann etidyan.

Zot ti pou donn  lenz proteksyon pou bann etidyan ek staff letan zot dan training.

Zot ti pou partaz lenformasyon e zot ti pou asire ki sa bann training needs i ganny akonplir e apre sa ti pou annan bann rapor.

So lo sa kote si zanmen bann etidyan in al laba kot sa landrwa obviously i pa fot lekol.  Tandis ki lo lot kote letan mon regard bann devwar lo kote sa lakonpannyen, mon vwar ki poudir se sa lakonpannyen  ki pa’n fulfill son  bann lobligasyon kot zot ti sipoze ouver zot laport pou ki bann etidyan ek bann teachers i vin laba, pou asiste zot dan zot progranm pou provide training, pou partaz lenformasyon, pou asiste ek sipervizyon.

Me pli enteresan ankor se ki sa Lorganizasyon ti sipoze anba 2.7 ti sipoze ed lekol, ed lekol pou li acquire de sa bann hydroponics sheds – bann fasilite ti sipoze donn 2 – ‘the setting up of two, setting up two of the shade house units currently being used by ‘(sa lakonpannyen) ‘for vegetable cultivation to enable the school to undertake adaptability and suitability trials on different planting medium or media available locally.’  

So sa i napa nanryen pou fer ek langaz sa.  Sa i annan pou fer avek ‘’bonzour msye madanm, mon annan  sa de, sa de materyo konstriksyon, sa 2 sheds la i la kote mon pou mete.  Mersi.  Orevwar. ‘’

Alor vi ki Mr Speaker zot pa’n akonplir absoliman nanryen e o kontrer lekol i, lekol in vin lo en dezavantaz.  Lekol ti annan boreholes ki zot ti’n pran e zis la tou resaman ki zot in kapab, zot in kapab repran.  Zot in vreman benefisye – ni en sou zot pa’n ed lekol.  Eski tou sa bann keksoz la i pa fer ki ozordi dan en moman kot nou pe koz met lanfaz lo lagrikiltir, e kot lekol i annan zis 25 etidyan.  Eski i pa ler pou Gouvernman repran sa later, cancel sa lease amwen ki zot fulfill sa bann keksoz ki zot in – ki zot ti dir zot pou fulfill ziska aprezan ni enn pa’n ganny fulfilled.  Mersi bokou.

 

MR SPEAKER

Mersi Onorab Ramkalawan.  Minis.

 

MINISTER JEANNE SIMEON

Mersi Mr Speaker.  Mersi Onorab Leader Lopozisyon.  Mon ti a voudre eklersi la poudir lease later avek Minister Lagrikiltir ti ganny sinyen an 2010.  MOU avek Minister Ledikasyon ti ganny sinyen an 2012.

Savedir la nou kapab dedwir poudir lease ki ti ganny donnen pa ti en kondisyon pou MOU ganny sinyen.

Parey mon’n dir taler MOU li nou ti pe vwar lavantaz  lekol – Minister Ledikasyon in vwar lavantaz en fasilite ki ti lapros avek lekol, e nou nou’n antre ladan pou nou ganny benefis sa lavantaz.

So the MOU parey mon dir ti napa okenn kondisyon pou dir sa MOU ti ganny sinyen akoz sa lease ti’n ganny sinyen, akoz ti lease ti la sa biznes ti pe go on pou 2an avan ler MOU ti antre.

MOU pou nou, nou vwar li parey nou’n dir taler en fasilite, en value added initiative, ki nou bann etidyan ti pou  benefisye vi ki sa later, sa fasilite ti la tre pros avek lekol.  E parey mon’n dir a sa letan 5an pase the tecnhology ki ti pe ganny servi nou ti konsider konman nouvo ; konman inovativ.

Me selman parey nou konnen tou keksoz ki annan pou fer avek teknolozi i evolye e ler nou ;’n al fer sa vizit  la resaman nou’n vwar poudir i annan teknolozi pli modern ki Minister Lagrikiltir li menm, nou’n aprann i pe etabli grand Anse Mahe ki bokou pli avanse ki sa lakonpannyen pe fer.

E se sa ki’n pous nou la akoz avan sa nou ti pe regarde sa MOU nou pou sinyen – nou pa pou sinyen?  Me la nou’n avek gidans Board, nou’n deside poudir be if Gouvernman i annan en fasilite ki i pe ofer pli nouvo  teknolozi, therefore nou sa latasman ki nou annan avek sa lakonpannyen, nou pe zis dir nou pa pou renouvle sa MOU.

Akoz in the first place nou’n vwar i pa ti dan nou  lentere.  Maybe ler ti ganny devlope nou ti pe vwar sa lavantaz.  Onorab in mansyonnen ki – in sit bann kondisyon.  Mon ti a kontan ankor fer kler  ankor enn fwa  poudir dan sa MOU ti annan commitments lo tou le de kote ;  lo tou le de kote.

Nou pa pe kapab blanm lot kote e dir Minister Ledikasyon i annan rezon.  Lo sa ki nou, nou trouve tou le de kote pa’n onor sa Lagreman dan sa MOUOk.  Lekol osi parey Onorab Ramkalawan in site i ti annan son set of commitments ki i ti annan pou onore.

I ti annan pou etabli son training needs; i ti annan pou devlop son progranm ki pou al an konzwentman avek sa lakonpannyen; i ti annan pou asiste get – vwar ki mannyer i pou asiste avek i pou ganny asiste avek sa lakonpannyen; lo ki baz, how often attachment i pou ganny fer; i ti pou annan devlop son bann indicators pou vwar poudir sa keksoz ki zot pe fer, sa practice i pou dan lentere lekol, dan lentere bann zanfan.

E parey mon’n dir sa lakonpannyen osi i annan – ti annan son set of commitments ki li osi i pa’n onore.  So nou vwar poudir lo tou le de kote i annan serten parey ou pou dir fot ki’n fer, me nou’n vwar poudir sa baryer langaz in zwe en gran rol ladan.

Akoz sa letan nou’n aprann avek the previous Director of the School ki en vizit ti ganny fer kot sa lakonpannyen.  En konman nou apel sa en preliminary vizit ti ganny fer kot staff ti ale etidyan ti ale, me unfortunately ler zot pe konverse pou demann kestyon, pou sey etabli baz, pou sey enplimant sa MOU, zot in find out poudir sa bann dimoun dan sa lakonpannyen pa ti pe koz ni Angle ni Franse.

So se sa ki nou pe dir sa baryer, sa baryer dan kominikasyon.  Me pou fer resorti, zot a kapab dir mwan be si ti annan sa baryer kominikasyon akoz ki siny MOU in the first place?  Ok.  Ler MOU ti sinyen an 2012 a sa letan ti annan en dimoun dan sa lakonpannyen, ki ti at least kapab fer enterpretasyon an Franse.  Ok?

Sa ki nou ti’n servi sa dimoun pou nou agree lo commitments ki ti pou dan sa MOU.  Me parey nou pe dir ler by the time ki MOU ti pe al ganny enplimante, nou’n vwar nou avek dimoun dan sa lakonpannyen ki pa kapab kominik okenn dan sa de langaz Angle ouswa Franse  e possibly not even Kreol.

So pou retournen wi kondisyon ti annan dan MOU ti ganny devlope konzwentman sa de parti, me malerezman parey mon dir nou pa’n kapab antre aktivman dan lenplimantasyon, baze lo nou pa’n kapab kominike pou vwar ki mannyer nou pou bouz devan.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi Mr Speaker.  Mr Speaker mon anvi demann Minis, eski i kapab an konsiltasyon avek Minister Lagrikiltir ki reprezante la donn nou en keksoz kler.  Sa teren ki sa lakonpannyen in ganny sa lease lo la, i anviron lanmwatye, i anviron lanmwatye teren ki Lekol Lagrikiltir i annan.  Ok?  Lo sa ti annan son area egzakt mon krwar i donn 27mil met kare.

E sa bout later ki zot lo la ozordi, kot zot annan zot anviron 27, 27 si pa plis bann hydroponics sheds ti form parti orizinalman Lekol Lagrikiltir.  E Gouvernman in deside pou pran, pou excise sa bout pou donn sa lakonpannyen prive.

Eski mon  ti ava kapab Minis avek ou konsiltasyon ganny en keksoz kler ; ki rezon ki rezon – ki Gouvernman ti deside pou li pran sa bout later ki ti pe ganny servi avek Lekol Lagrikiltir ek Ortikiltir, pou zot donn sa lakonpannyen?

Eski ti annan okenn keksoz spesyal ki zot ti’n dekouver ki poudir sa lakonpannyen ti pou azoute   avek sa lekol, malgre ki zot ganny sa an 2010 ek 2012 parey nou’n eksplike me selman eski zot ti pe vwar ki poudir be pou annan en lavantaz e ki finalman sa lakonpannyen in ganny sa parey mon pe dir mwan mon appel sa in anbet nou, in ganny sa e apre sa i pa’n fer absoliman nanryen!

E mon trouv i drol sa zafer langaz akoz La Chine i annan en Lanbasad isi e ki i annan en kantite dimoun ki – i annan en kantite Seselwa e o fet Baie Lazare menm i annan  en msye Alcide Libanotis ki koz langaz Sinwan konmsi i pe  koz pli byen ki – i koz Sinwan pli byen ki i koz Kreol konmsi mon trouv i drol ki konmsi pa’n annan okenn zefor spesyal ki’n ganny fer me ki konmsi mon trouv li plis konman leskiz.  Eski Mini i kapab…

 

MR SPEAKER

Mersi Onorab.  Minis.

 

MINISTER JEANNE SIMEON

Ok.  Mersi Mr Speaker.  Mersi Onorab pou ou kestyon.  Parey mon’n dir taler lease avek Mou i pa ti kondisyonnel – ok?  Pou lease ki ti’n ganny fer avek sa lakonpannyen par Minister Lagrikiltir a sa letan i ti pou parey in fer lease pou plizyer bout later, ki’n donn bann fermye pou devlope.

E rezon prensipal a sa letan, i ti’n vwar poudir sa lakonpannyen ti pe al entrodwir en nouvo teknolozi, so hydroponics, so in zot in fer sa lease an ekspektasyon ki Sesel pe eksperimante avek nouvo teknolozi dan farming e ki nou prezan nou’n antre lo la pou nou rod benefis.

Sa later – sa later ki Onorab pe fer mansyon avek,  parey mon’n dir taler, later pa ti zanmen pou Lekol Lagrikiltir.  Later ti pou Stasyon Resers ki ti baze Grand Anse, ki ti pe servi sa bout later pou fer zot bann eksperimantasyon lo la.  So later zanmen ti pou Lekol Lagrikiltir.

E ler, ler avan ki lease in ganny fer ler lekol ti siny sa Memorandum, prezan nou’n vwar ti’n bezwen fer demarkasyon. Akoz avan sa later ti menm sa ki lekol ti lo la ti pou Minister Lagrikiltir.  So apre sa ti fer sa demarkasyon akoz zot ti pe al konmans fer zot proze, pou nou konnen kote nou balizaz i été.

But still parey mon pe dir pa ti pou Minister Ledikasyon nou, nou ti pe benefisye lo sa later, kot lekol ti été.  Akoz si zot mazin tre byen, Lekol Lagrikiltir in the past, pa ti anba Minister ledikasyon.

Ti anba Minister Lagrikiltir ok?  Apre ki in antre kot Minister Ledikasyon mon vwar a serten pwen osi ti’n retourn ankor dan anba parent Ministry of Agriculture e la in retourn ankor kot Minister Ledikasyon e i form parti prezan nou bann sant profesyonnel ki nou annan.  Parey Maritim, SIT eksetera.

Pou reponn kestyon lo langaz, parey mon’n dir taler Onorab ou annan rezon pou dir poudir i annan Seselwa ki koz Sinwan Sesel pli byen ki Sinwan, me parey mon’n dir taler, nou annan fot nou osi kot Minister Ledikasyon – parey mon ti dir dan mon premye kestyon, nou pa’n fer ase zefor.

We have to admit ki nou pa’n fer ase zefor, pou nou al de lavan, pou nou rod sa lasistans pou nou kapab benefisye sa teknolozi at that time – ok?

E petet lo lapar Sinwan osi li osi i annan en fot ladan, li osi vi ki i konnen poudir in siny en Lagreman avek Minister Ledikasyon, i annan problenm langaz, nou pe dir li osi i ti kapab rod son enterpret pou li kapab fer marse son commitment dan sa dan sa MOU.  Ok nou osi nou ti kapab rode vi ki zot, zot pa’n rode.  Minister Ledikasyon osi ti kapab rode, rod en enterpret me selman malerezman parey mon’n dir taler, tou lede kote pa’n vreman bouze pou lenplimantasyon sa MOU.  Mersi Mr Speaker.

 

MR SPEAKER

Mersi Minis.  Bon mon ti a kontan zis konsey bann Manm pou fer zot – pou al direkteman lo zot kestyon, pou pa fer gran, gran Statement, akoz nou annan en lot Minis osi ki nou anvi pran avan nou break 10.30.  Onorab William.

 

HON WAVEN WILLIAM

Mersi Mr Speaker.  Bonzour Minis avek ou lekip e tou dimoun ki pe ekoute.

Mr Speaker swivan bann larepons ki Minis in donnen lo sa kestyon e pou piblik ki pe ekout Minis la deor, Minis  mon kestyon se ki eski tou sa letan ki (1). Gouvernman atraver Minister Ledikasyon, Minister Lagrikiltir nou’n train bann dimoun ki annan kapasite ozordi ki’n vwayaze deor ki’n mon kapab dir parwaze deor, ki’n trouve ki mannyer bann teknolozi pe evolye, eski Minis ou aksepte ki tou sa bann dimoun dan sa de Minister pa ti konnen poudir sa lakonpannyen, napa bann teknolozi ki pe vin obsolit?

E ki petet sa lakonpannyen in zis benefisye, me i pa’n onor son langazman?

E dezyenmman Minis lefe ki in annan – i kler ki in annan en breach of contract ouswa kondisyon, eski Gouvernman i annan lentansyon cancel sa lease?

E si ou permet mwan Mr Speaker, lefe ki nou konnen sityasyon Lekol Lagrikiltir nou anvi donn nou bann zenn bann bon formasyon, eski ou pa krwar poudir nou devret pe repran sa later ouswa kas sa kondisyon e sa lease avek sa lakonpannyen, ki (1) nou remedi sityasyon?  Mersi.

 

MR SPEAKER

Mersi Onorab William.  Minis.

 

MINISTER JEANNE SIMEON

Mersi Mr Speaker.  Mersi Onorab pou ou kestyon. Parey mon ti dir taler teknolozi modern i evolye at a very rapid rate.  Teknolozi dan lemonn si nou ale nou regarde, sa ki ti tre bon an 2010, petet ozordi in already outdated, akoz in ganny ranplase par sa ki pli modern.

Sa letan ler MOU ti sinyen teknolozi hydroponics ti fek ariv Sesel.  So nou tou nou ti dir poudir sa i en keksoz modern e nou ti anvi ki nou etidyan i ganny ekspoze avek sa ki modern, pou ed zot dan zot progranm letid, dan zot laprantisaz.

Me ankor en fwa mon repete poudir lease later, biznes ki ti ganny set up ti ganny fer avan MOU.  I pa e kondisyon ki Gouvernman i donn sa lakonpannyen, sa bout later pou li travay avek Lekol Lagrikiltir.

I pa ti en kondisyon dan sa lease, ok? Parey mon’n dir taler se Minister Ledikasyon ki’n vwar en tel lavantaz, en tel loportinite, e i bouz devan pou nou antre an kolaborasyon avek sa lakonpannyen, pou benefis nou bann zanfan.  Parey mon’n dir taler sa ki konsern Minister Ledikasyon, nou, nou pe termin nou MOU akoz MOU ti vin apre lease nou, nou pa pe renouvle MOU akoz nou’n vwar poudir for whatever reasons ki mon’n donnen avan, i pa’n vreman anmenn en benefis.

E parey mon’n mansyonnen nou’n vwar ki i annan teknolozi pli modern dan hydroponics, ki Minister Lagrikiltir in anmennen  e nou etidyan i a kapab pran lavantaz lo la.

So sa ti nou langazman so nou, nou pa pe renouvle sa langazman avek sa lakonpannyen, me parey mon’n dir taler lo kote lease, lease pa’n ganny sinyen avek Minister Ledikasyon.  Lease ti ganny sinyen avan MOU so parey mon’n dir taler Gouvernman i annan son bann kondisyon ki i donn lease later, pou devlopman lagrikiltir e sa kondisyon mon’n aprann avek Minister Lagrikiltir, ki  sa lakonpannyen pe respekte son kondisyon e sa kondisyon ti avan MOU.  Mersi Mr Speaker.

 

MR SPEAKER

Mersi Minis.  Onorab Phillip Arissol.

 

HON PHILLIP ARISSOL

Mersi Mr Speaker.  Bonzour Minis avek ou delegasyon.  Bonzour tou Manm Onorab e bann dimoun dan lakour.  Dan son larepons Minis in dir ki tou le de kote pa’n fer ase pou onor sa Lagreman.  Pou sa lakonpannyen nou kapab konpran akoz.  Me Minis eski ou kapab dir nou, pou ki rezon ki Minister Ledikasyon zot pa’n onor – zot in inyor zot responsabilite?  Par egzanp enkli en translator menm en seselwa ki’n al etidye La chine ou sipervizyon.  E dezyenmman ki leson Minister in tire dan sa sityasyon?  Mersi.

 

MR SPEAKER

Mersi Onorab.  Minis.

 

MINISTER JEANNE SIMEON

Mersi Mr Speaker.  Mersi Onorab.  Mon pe reiterate ankor ki en fot in ganny fer, nou’n rekonnet fot ki’n ganny fer nou pe bouz devan pou vwar e solisyon pou sa problenm ki’n arive ki’n an deor nou kontrol parey nou dir.

Parey nou dir nou ti  kapab rod enterpret, me malerezman nou pa’n fer li.  So kantmenm nou pou debat la, it has happened e nou’n ariv nou isi ozordi avek en responsabilite ki nou pa’n onore, pou benefis nou bann zanfan.  Me nou anvi set sa right. 

Pour le moman la Minister Lagrikiltir i annan li son Plan Nasyonal pou lagrikiltir.  Already Minister Ledikasyon in antre an kolaborasyon avek sa Minister, akoz dan sa Plan Lagrikiltir dan National Plan for  Agriculture nou’n vwar kote SIAH, kote Lenstiti lagrikiltir i kapab vwar son plas.

Akoz dan sa Master Plan nou pou bezwen provide mendev, nou pou bezwen provide training, pou bann dimoun ki dan lagrikiltir both in-sevice avek pre-service training, nou pou bezwen vwar nou pe ofer.

E ansanm avek Minister Lagrikiltir, nou pe vwar nouvo devlopman, nouvo teknolozi ki lekol i kapab benefisye pou lavenir.

Savedir leson ki nou’n aprann ladan parey nou’n dir i en fot ki nou’n fer, nou’n aprann nou leson se ki maybe dan lavenir ler ou antre an kolaborasyon – en Lorganizasyon,  and keksoz nou ava fer sir ki avan menm nou konmanse, get bann kondisyon ki pou fer sir ki lenplimantasyon pou mars dan en fason efektiv.

Nou bezwen eklersi sa avan ki nou siny MOU.  Mersi Mr Speaker.

 

MR SPEAKER

Mersi Minis.  Onorab John Hoareau.

 

HON JOHN HOAREAU

Mersi Mr Speaker.  Bonzour Minis ek ou delegasyon.  Mon ti le ki Minis i konfirmen si lefe ki Lekol Lagrikiltir pa’n ganny sa lasistans avek sa lakonpannyen in fer ki sa lekol pa’n kapab delivre serten kou dapre zot progranm, e sa in fer ki answit serten kou pa’n kapab ganny akredite par SQA?  Mersi.

 

MR SPEAKER

Mersi Onorab.  Minis.

 

MINISTER JEANNE SIMEON

Mersi Mr Speaker.  Mersi Onorab.  Parey mon’n dir taler sa kolaborasyon sa MOU ti pou ofer nou valer azoute.  E value added.  Savedir ki bann course ki ti annan kot lagrikiltir in ganny run dapre kriter sa bann course at that time.

Bann etidyan ki ti la dan sa letan ki sa MOU ti pe marse in graduate dapre zot progranm letid ki ti pe swiv.  Sa parey mon pe dir, ti pou en keksoz ki ti pou ede me selman i pa ti en kriter ki zot pou bezwen  pou graduate, pou pass successfully or not bann course ki zot ti pe swiv.

Pou lenformasyon sa Lenstitisyon i ofer 4 progranm. I annan de full time e apre ladan enn i en course in General Agriculture and Ornamental Horticulture and Landscaping e son dirasyon i 2an e sa i anmenn nou at en level of Advance Certificate.

Apre sa i annan osi en Apprentice Program  dan General Agriculture Ornamental and Horticulture and Landscaping li i 1an edmi.  E pandan sa letan ki MOU ti la ki pa ti pe ganny onore, bann group etidyan in graduate avek sertifikasyon sorti kot Lekol Lagrikiltir.

Konsiderasyon lo akreditasyon pour bann courses, Minister Ledikasyon avek SQA – Seychelles Qualifications Authority, in antre avek en travay vreman assidue avek bann Lenstitisyon pou devlop zot bann course dapre egzizans enternasyonal.

E zot – at the end zot ganny akreditasyon pou zot courses vedir sa sertifika ki zot gannyen at the end is a recognized certificate.  Lekol Lagrikiltir parey lezot lekol post – professional centres (pardon) professional centres i ope angaze dan sa devlopman.  I annan  ki’n ariv pli devan ki lezot, me Lagrikiltir li osi in konmans sa travay pou ganny son bann courses accredited.  Mersi Mr Speaker.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mr Speaker mersi.  Bonzour tou dimoun.  Mr Speaker mon ti a kontan demann Minis premyerman vi ki i annan reprezantan Minister Lagrikiltir la, si Minis ti kapab dir nou sa propriyete ki Minis i dir avek nou ti sant eksperimantasyon pou Minister Lagrikiltir, apard sa lanmwatye sa propriyete ki’n ganny lease avek sa Konpannyen Sinwan, eski par deryer i annan okenn lezot bout later ki’n ganny excise ki’n ganny tire e ki’n ganny donnen oubyen lease avek detrwa dalon over the past few years? Mon krwar Mr Moustache i kapab reponn sa kestyon.  I kapab donn ou lenformasyon akoz i en – i konsern Minister Lagrikiltir.

Mon dezyenm kestyon anvi ki Minister – anvi ki Gouvernman, in deside ki i apropriye pou li pran lanmwatye later ki sa lekol ti pe fer travay ledikasyon lo la, notaman ki ti pe fer  – ki ti pe plant pasture pou zot kapab travay avek bann zannimo ki dan lekol, e ki la ozordi zot napa en landrwa pou zot plant pasture, eski Minis i pe dir nou si son Gouvernman in deside dan son Polisi, pou met de kote ledikasyon agrikol e favoriz donn later bann konpannyen konstriksyon etranze pou zot vin plante pou nou?

Konmsi si o nivo Cabinet sa in ganny deside ki Lekol Lagrikiltir pou pran en plas segonder, e bann later nou pou donn – parey nou fer Grand Anse – parey nou fer Barbarons, nou pou met an premye bann lakonpannyen etranze ki dan konstriksyon pou zot prodwi manze isi Sesel.  Mersi.

 

MR SPEAKER

Mersi Onorab.  Minis. Minis petet zis mon ava gid ou.  Ou osi lo ou kote si ou kapab join bann repons ase bref akoz letan pa dan nou faver.  Go ahead Minis.

 

MINISTER JEANNE SIMEON

Mersi Mr Speaker.  Mersi Onorab.  Parey nou ti dir taler siperfisi sa bout ki, sa lakonpannyen lo la i de ektar, me sa bout ki pou – ki ankor la ki pou Minister Lagrikiltir li i ale i extend ziska pres Dame Le Roi laba.

E parey nou pe dir tou sa bout dan montanny.  Dapre Minister Lagrikiltir, i annan  5 plots dan sa bout lo kote montanny ki’n ganny donnen avek bann avek Seselwa 5 fermye ki’n – dan sa dernyen 5an.

E sa bann fermye zot ti fer laplikasyon pou sa morso later parey zot fer wherever ki annan later pou Lagrikiltir.

E 5 nou bann Seselwa in benefisye lo la.  E parey ankor i fer resorti lo kote lease avek later parey ou pe dir sa i pa vreman dan ziridiksyon Minister Ledikasyon, me lo kote Minister Lagrikiltir.  E parey mon dir petet i ti’n fer li dan bonn fwa avek en nouvo teknolozi ki pe ganny entrodwir, ki ti pou benefisye lanasyon.

E se pou sa rezon ki zot in donn sa morso later e en lease i pa pou toultan.  E i annan kondisyon parey mon pe dir dan sa lease, si i pa onore then sa lease ava ganny anile.  Me pou le moman dapre Minister Lagrikiltir, lease kondisyon dan lease pe ganny respekte kontrerman avek lezot morso later ki Gouvernman in lease avek Seselwa, fermye ki zot annan problenm pou met bann kondisyon.  Mersi Mr Speaker.

 

MR SPEAKER

Mersi Minis.  Onorab Adelaide.

 

HON FRANCOIS ADELAIDE

Mersi Mr Speaker.  Mersi Minis ek ou delegasyon.  Minis en pti kestyon petet kantmenm ou Minis Ledikasyon nou annan PS Lagrikiltir, eski nou kapab konnen konbyen apre sa lease zot pe peye par lannen silvouple?  Mersi.

 

MR SPEAKER

Onorab, Minis in fer kler lease later i fer avek Minister Lagrikiltir.  Annou demann Minis kestyon ki konsern son Minister baze lo kestyon orizinal ki annan pou fer avek sa MOU.

Minis in dir lease later se Minister Lagrikiltir ki’n antre ladan an 2010.  Ok? Okenn kestyon lo kote later ek Lagrikiltir nou kapab anmenn Minis Lagrikiltir pli tar pou kestyonnen e petet osi tou  mon kapab menm Onorab in sorti kot in osi kestyonn sa lease, rod en kopi sa lease e zot kapab regarde e de la zot kapab al de lavan pou regarde si Minis Lagrikiltir pou vini. Ok? 

So kestyon baze lo relevans lo PNQ lo sa MOU ki in sinyen ant Minister ledikasyon avek sa lakonpannyen.  Go ahead Onorab.  Ok?  Onorab Terence Mondon.

 

HON TERENCE MONDON

Mersi Mr Speaker.  Bonzour Minis avek ou delegasyon.  Mr Speaker mon anvi demann Minis eski i pe dir nou an 2010 akoz i annan dimoun, teknisyen Lagrikiltir devan nou Lasanble, eski an 2010 ti napa Seselwa ki ti pe esper en morso later lagrikiltir, akoz Minis Charlette dernyen fwa ti dir nou i annan 115 seselwa i ankor lo lalis.  E mon pa ankor konpran akoz …zot in lwe avek etranze kan i annan Seselwa pe esper en bout later.  Mersi.

 

MR SPEAKER

Onorab ankor kestyon, annou diriz kestyon.  Minis Ledikasyon ki devan nou, ki devan Lasanble bomaten.  Wi i annan en Zofisye Lagrikiltir ki’n ed li en pti pe lo sa me kestyon pe al an deor, pe al an deor scope.  E ler i al an deor scope mwan mon bezwen re diriz sa Lasanble.

Kestyon ki al pou Minister Lagrikiltir zot kapab re anvoy kestyon kot sekretarya e nou, e menm prosen sesyon nou kapab call Minis Lagrikiltir in pou kapab adres sa bann kestyon okSo spesifikman nou bezwen poz kestyon avek Minis Ledikasyon ki la.  Onorab Flory Larue.

 

HON FLORY LARUE

Bonzour Mr Speaker.  Bonzour Minis ek ou delegasyon.  Bonzour tou dimoun a lekout.  Mr Speaker avek tou respe Minis ti mansyonn  sa lease ki ti ganny sinyen an 2010 alor she had sight of this lease e mon krwar dan laliny kestyon i kapab at least devwal the cost of sa lease, akoz si zanfan pa’n benefisye atraver son MOU ki mannyer pei in benefisye li?

 

MR SPEAKER

Onorab, Onorab.  Mon’n pran en desizyon.  Minis pou ed klarifikasyon pou shed laklerte lo son repons kestyon Onorab Ramkalawan in mansyonnen, akoz Onorab Ramkalawan i provok pou Minis donn sa repons, sa distenksyon ant sa lease lo sa later ek Minister Lagrikiltir avek sa MOU.  Se sa ki Minis in fer tre kler ki an 2010 sa lakonpannyen avek Minister Lagrikiltir ti antre dan en Lagreman, e an 2012 Minister Ledikasyon ti siny sa MOU.  Silvouple annou demann kestyon lo PNQ e lo repons ki Minis i donnen atraver sa PNQ.  Go ahead Onorab.

 

HON FLORY LARUE

Mersi pou klarifikasyon Mr Speaker.  Anliny avek lefe ki sa bout later ti pe ganny servi avan par etidyan pou kapab fer elevaz livestock, zot ti fer pouse bann zerb lelefan lo la e  la ki zot pa kapab kontinyen fer sa pou zot ledikasyon, eski zot annan lezot plan alternativ  la ki lagrikiltir i ganny reprezante, eski i annan en lot bout later zot kapab allocate pou lekol pou zot kapab devlop sa sekter pou zot?  Mersi.

 

MR SPEAKER

Mersi Onorab.  Minis.

 

MINISTER JEANNE SIMEON

Mersi Mr Speaker e mersi Onorab pou ou kestyon.  Parey mon’n dir taler nou pe bouz devan e nou pe rod bann lezot alternativ ki pou kapab donn bann etidyan even plis ki the growing of fodder parey ou pe dir la.

Nou’n antre an kolaborasyon Minister Ledikasyon avek Board SIAH kot nou pe kontakte bann fermye pou zot provide the practice pou nou bann etidyan.

E sa i pou pli parey nou dir i cost effective osi pou nou bann etidyan e zot pou ganny hands-on practice lo sa bann laferm kot sa bann sityasyon, sa bann practice, sa bann travay pe ganny fer. E se sa ki mon’n dir sa i antre tre byen avek Master Plan Lagrikiltir kot lekol lagrikiltir pou ganny lasistans avek sa partenarya avek sa kolaborasyon.

Okenn resers, okenn lezot proze lagrikiltir ki Minister Lagrikiltir i devlope dan son plan, nou bann etidyan kot Lekol Lagrikiltir pou kapab benefisye.

Pli tar nou ava vwar dan ki fason sa pou ariveOk.  Mersi Mr Speaker.

 

MR SPEAKER

Mersi Minis.  Onorab Aglae.

 

HON EGBERT AGLAE

Mersi Mr Speaker.  Minis bonzour ek ou delegasyon.  Minis etandonnen ki sa MOU li i en MOU ki’n ganny fer ek en lakonpannyen e mon pe get li konman en Lagreman komersyal.

Pou nou pa sorti lanmen vid dan sa zafer, anvi ki ou’n dir osi ki sa bann teknolozi ki zot pe servi pa ase modern, me i annan en keksoz ki enportan se sa 2 shade house.  Akoz ou Minister pa ale re negosye ki at least nou ganny 2 sa shade house ki zot ti promet nou so i  ava kapab ganny servi an atandan ki bann lezot devlopman dan sa Master Plan i bouze?  Mersi.

 

MR SPEAKER

Mersi Onorab.  Minis.

 

MINISTER JEANNE SIMEON

Mersi Mr Speaker.  Mersi Onorab.  Parey mon’n dir taler Kontra, Lagreman MOU in ekspire depi lannen pase.  Ok? E nou nou’n deside pou nou pa renouvle.  Si nou pou al rod shade house savedir nou pou bezwen siny en extension of the MOU ouswa en nouvo MOU ok pou kouver sa akoz i en kondisyon dan MOU ki pou nou nou’n fini met li de kote akoz la nou pe get greener pastures pou nou pe get lavenir fitir ki pli briyan pou nou bann etidyan.  Ok?

Nou’n antre dan en Lagreman ki nou’n vwar in turn sour ki pa’n arive konklir, so nou, nou vwar pou nou i plito nou retir nou ladan, e nou servi nou zefor pou nou gete ki mannyer nou kapab bouz devan.

Me shade house avek lakonpannyen ki la pou le moman zot lease i ankor avek Minister Lagrikiltir.  Prezan si Minister Lagrikiltir i ti a kontan on our behalf al negosye avek lakonpannyen pou nou ganny sa 2 shade house, me selman mazinen poudir shade house i al avek lezot keksoz ki nou bann etidyan pou bezwen al anver sa lakonpannyen pou kapab akoz i ti’n dir dan MOU ‘in acquiring and setting up of the shade houses unit currently being used by for vegetable cultivation to enable to’, sa lekol ‘to undertake adaptability and stability trials on different planting mediums and media available locally’.

Savedir la nou kapab gannyen shade houses, me prezan nou bezwen get osi nou kapasite pou nou kapab kontinyen avek shade house ki bezwen maintenance or whatever in the long run.  Ki petet nou – e se sa nou ti antre an sa avek zot – zot ti ava maintain fer tou keksoz nou, nou ti ava ganny sa benefis out of the practice.  Ok?  Nou bezwen mazin sa kote osi.  Mersi Mr Speaker.

 

MR SPEAKER

Mersi Minis.  Onorab Afif.

 

HON AHMED AFIF

Mersi Mr Speaker.  Mr Speaker vi ki bann kestyon e larepons ki Minis in donnen, eski Minis i ti pou pare pou li – pou son Minister dokimant e fer en rapor, senpleman pou arsiv e pou lavenir pou montre kwa ki’n al mal egzakteman?

Mon konnen nou’n koz lo, me met li dan en rapor kwa ki’n al mal e par egzanp dan sa Lagreman ti napa swivi.  Ti napa dimoun ki zot in mete avek responsabilite kler.  Ti napa timeline kwa ki pou ganny delivre.

Ti napa ban endikater kwa ki pou dir si nou’n fer sikse e si nou napa e kan. Si zot kapab dokimant sa e answit sa menm dimoun ki prepar sa si i kapab osi fer rekomandasyon kwa ki nou devret kapab fer ozordi.

Mwan ler mon’n ekout kestyon par Onorab Aglae mon pa vwar nanryen ki anpes en Gouvernman ozordi, parski zot Gouvernman mon pa konnen si ledikasyon si lagrikiltir i al kot sa letablisman i dir ek li, be sa Gouvernman ti annan en lakor avek ou pou ou delivre i pa’n arive me selman an bonn fwa akoz Gouvernman in met en teren a ou dispozisyon, ou’n fer profi depi 2012, ou’n travay ou, me lo nou kote nou pa’n gannyen, alor eski dan sa rapor i a met en rekomandasyon osi ki zot ava kapab ganny en serten benefis avek sa lakonpannyen.

Mwan mon krwar i pou annan en eleman ki sa lakonpannyen i pou pare pou li fer serten keksoz.  Parski i realize poudir li osi i pa’n delivre.  E dan sa lespri negosyasyon bann etidyan ava benefisye.  Parski mwan osi mon’n vizit sa landrwa mon’n vwar poudir teknolozi ki pe ganny servi i vreman aryere e  petet i annan en posibilite pou en Korperasyon donn en lekipman oubyen bann teknolozi ki kapab fer zot pli azour e sa lekol ava prodwir meyer etidyan – non selman ki i ganny bann bon rezilta me ki pou anvi al dan sa domenn lagrikiltir ler zot sorti dan sa lekol.  Mersi.

 

MR SPEAKER

Mersi onorab. Minis.

 

MINISTER JEANNE SIMEON

Mersi Mr Speaker.  Mersi Onorab pou ou kestyon.  Parey nou konnen avek nouvo devlopman dan bann sant profesyonnel, konmela tou bann sant profesyonnel zot annan en Board.  Sa Board li ki pran bann desizyon mazer ki annan pou fer avek sa lenstitisyon.

E Lekol Lagrikiltir i annan son Board e already Board in angaz li dan sa prosesis pou regarde, pou met o kler bann sak sa bann provizyon, sak sa bann commitment ki ti annan dan sa MOU ; akoz i pa’n arive.

Zot pou dokimant sa parey Onorab Afif in demande nou ava prepar – zot ava prepar en rapor pou Minister Ledikasyon.  Nou annan sa ki  lavantaz ki Chairman Board i avek nou ozordi la e son Vice- Chairperson osi lo mon kote gos, zot ava antreprann legzersis e met devan serten rekomandasyon ki Gouvernman i ava kapab vwar ki nou kapab fer.  Mersi Mr Speaker.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker.  Bonzour Mr Speaker.  Mr Speaker premyerman mon krwar reprezantan Minister Lagrikiltir la i merit retournen al kot sa lakonpannyen e vwar ki zot, zot kapab fer pou fer sa lakonpannyen onor  serten sa bann keksoz ki nou’n koz lo la dan Lasanble ozordi.

Napa okenn leskiz si i pe onor whatever i pe onore.  Ti annan en langazman ti’n ganny donnen.  Mon krwar Minister Lagrikiltir i annan en rol enportan pou zot al zwe ladan.  Mon krwar zot bezwen ale al fer en serten travay e i enportan ki zot fer li dan en dele letan ki a permet sa lekol ganny bann resours ki i bezwen.

Mon kestyon Mr Speaker i relye spesifikman avek sa larepons ki Minis in donnen lo Progranm Animals Husbandry ki lekol pe servi ti annan sa bann pasturing ki zot ti fer ek sa bann landrwa.  Ou dir nou pou le moman ki  zot pou al dan bann laferm.

Me mwan mon ti a kontan  konnen anvi ki nou pe apros lafen lannen i annan lezot etidyan ki pou le join sa lekol, kwa ki sa lekol pe fer pou asire ki sa konponan progranm ki ti ava atrakte etidyan pou join sa lekol, pe byen marse e donn nou en lasirans Minis, ki bann keksoz ki kapab ganny fer pe ganny fer pou ki sa Progranm Animals Husbandry kot Lekol Lagrikiltir pe ganny marse a 100poursan e ki etidyan ki a vini, ki ava antre, i  ava pran linisyativ pou zot al ladan.  Akoz zisteman nou le ki nou devlop prodiksyon e nou ankouraz Seselwa pou al dan prodiksyon bann prodwi zannimo.  Mersi.

 

MR SPEAKER

Mersi Onorab.  Minis.

 

MINISTER JEANNE SIMEON

Mersi Mr Speaker.  Mersi Onorab.  Parey mon’n dir oparavan MOU ki pa’n ganny onore – the lease ki ti la sa lakonpannyen ki ti pe – ki la lo sa laferm son bout later whatever sa i pa’n anpes nou dan okenn fason delivre bann progranm, dapre bann progranm letid sa lekol.

Akoz zot la depi 2010 e dan depi 2010 ziska konmela nou’n annan nou 8 cohorts etidyan ki’n sorti dan sa lekol e ki’n graduate pou join the world of work.   E zot in kapab graduate.  Zot in ganny zot sertifikasyon.

E osi nou kapab dir poudir – parey nou’n dir nou pe bouz ver sa private akoz dan ledikasyon nou dir ledikasyon nou bann zanfan devlopman, training nou bann etidyan nou anvi fer li an partenarya avek prive.

So prive osi i annan son rol pou zwe dan training ki zot osi zot pou benefisye.  Bann laferm prive etidyan ki sorti dan Lekol Lagrikiltir pou al travay kot zot so zot pou benefisye zot osi nou vwar zot pe pran sa training zot osi an men, ede pou donn practice nou bann etidyan.  Ok?

Pou marketing Board SIAH – Board Lekol, in already pe travay lo en marketing plan ki mannyer i pou kapab an kolaborasyon avek Minister Lagrikiltir, e son Master Plan ki mannyer zot pou kapab atrakte plis etidyan e atrakte osi etidyan de kalite pou join sa sant profesyonnel e ganny training e osi pou revwar en pe zot progranm letid ki mannyer dan lavenir nou pou kapab devlope ok petet olye zis courses at certificate level avek ki mannyer nou kapab ofer higher level courses; vi ki la nou pou kapab konzwentman avek Minister Lagrikiltir, met an pratik bann nouvo teknolozi.

So nou pe fer o maksimonm ki nou bann zanfan i pas atraver sa training program successfully e i kapab ganny entegre dan lafors travay.  Mon ti a kontan osi enform Lasanble ki last year 2017, nou bann graduates ki’n sorti kot lekol 100% zot in al konmans lanplwa dan agriculture-related fields.

Sa i fer nou bokou plezir akoz in the past nou ti perdi zot a la fen zot training zot tant pou zot al dan en field ki zot pa’n train pou sa.

So mon krwar nou pe gradyelman konmans sansibiliz zot e osi petet bann training ki nou pe revwar, i a zot laporte.  E osi nonm etidyan nou pe vwar ki i pe ogmante. E parey zot konnen la very soon zot pe al ganny en nouvo lekol, nou pe al build en nouvo Lekol Lagrikiltir avek en o standar so sa i osi i ava ede pou nou kapab recruit pli bokou etidyan.

Nou pou revwar nou bann courses parey nou pe dir.  Nou pe fer akreditasyon nou bann courses so sa i pou ed nou parmi lezot stratezi marketing pou nou kapab ganny plis etidyan e devlop zot pou zot ed pei dan devlopman lagrikiltir demen.  Mersi Mr Speaker.

 

MR SPEAKER

Mersi Minis.  Ok mon a pas dernyen kestyon Onorab Ramkalawan.

 

HON WAVEL RAMKALAWAN

Mr Speaker mersi bokou.  Mr Speaker apre ki mon’n ekout sa bann larepons ensidswit mon anvi zis dir Minis sorry nou’n ganny anbete.  Nou’n ganny anbete.  Hydroponics i pa en teknolozi modern.  Hydroponics depi 17tyenm syek ti’n ganny envante e Sesel hydroponics modern, nou ti annan nou la Anse Aux Pins.  Tou dimoun i konnen.  Anse Aux Pins Orangine Estate deryer la Reef Estate depi lontan avan Sinwan i vini pe fer hydroponics, Praslin pe fer hydroponics en ta landrwa pe fer hydroponics.

Alor mwan mon anvi zis konklir an dizan nou’n ganny anbete avek Sinwan, zot in pran later e zot in operate senpleman konman fermye tandis ki letan dan sa menm peryod nou bann Seselwa zot, zot ti pe pas dan plis difikilte zot, zot in vini e zot in antre.

Alor Minis sorry sa bann  zafer teknolozi modern mwan mon pa anvale parski zot pa’n donn nou okenn teknolozi modern ! O kontrer bann teknolozi ki Sinwan i servi bann dimoun ava dir avek ou se bann teknolozi ki’n fini devanse.  Mersi bokou.

 

MR SPEAKER

Mersi Onorab.  Mon pa pran sa konman en kestyon i en Statement.  Bon avek sa mon ava remersi Minis avek son delegasyon parmi nou, e Minis mersi nou ava eskiz zot.  Mon ava demann Parliamentary Reporter pou apel prosen Minis.

 

MINISTER JEANNE SIMEON

Mersi Mr Speaker.  Mersi Onorab pou zot entervansyon.

 

(MINISTER SIMEON AND HER DELEGATION WAS EXCUSED FROM THE HOUSE)

 

MR SPEAKER

Bon nou pran kestyon pou Minis Dezinyen.  E nou pou ale ziska ver 11er apre nou ava pran en break avan nou pran e Second Reading Civil Code. 

Ankor mon dir Civil Status, amannman Civil Status.  Wi ankor mon enplor bann Manm pou kot kestyon avek relevans lo kestyon orizinal.  Si non mon pou entervenir e mon pou koupe.  Apre pa bezwen fer gran statement pou nou kapab permet ki lezot Manm osi i annan en sans pou kapab poz kestyon.

Bonzour Minis Mondon, Minis Dezinyen e Minis pou responsab pou Zafer Etern Gouvernman Lokal, Lazenes, Spor, Kiltir e Risk Disaster.  Minis i akonpannyen par Komisyoner Lapolis Mr Kishnan Labonte, son Special Advisor Ms Sheryl Vangadasamy, e Depite Komisyoner Lapolis Mr Romano Songor.  Minis welcome parmi nou.  E mon ava al direkteman pas laparol avek Leader Government Business Onorab De Commarmond poz ou kestyon.  Onorab.

 

HON CHARLES DE COMMARMOND

Mersi Mr Speaker.  Bonzour Minis ek ou delegasyon.  Bonzour tou Manm Onorab, e tou piblik ki a lekout.

Mr Speaker kestyon i swivan;

An vi problenm Eroin ki pe kontinyen deteryore dan Sesel e lefe in ganny anonse ki omwen 5,000 dimoun pe servi eroin, eski Minis pou Zafer Entern i kapab dir nou Lasanble sa bann pwen swivan:

(1) ki kantite eroin in ganny konfiske depi Zanvye 2017 ziska ozordi – ziska la?

Dezyenmman baze lo konsonmasyon, ki kantite eroin ki son Minister i krwar i dan sirkilasyon dan pei ozordi?

E trwazyenmman la ki nou’n aprann ki i annan lezot kalite drog ki pe antre dan pei parey ‘cocaine’ ek ‘ecstasy’, e an vi ki lapopilasyon pe santi ki Lotorite konsernen pa ankor reisir adres sityasyon drog dan pei, ki son Minister avek Lotorite konsernen pe fer pou adres sa sityasyon?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MACSUZY MONDON

Bonzour Mr Speaker.  Bonzour Leader Lopozisyon, Leader Zafer Gouvernman, tou bann Manm Onorab, e tou dimoun a lekout.

Mr Speaker nou Gouvernman i rekonnet i reste angaze fas a enn nou pli gran defi ki nou pei pe fer fas avek ozordi e sa se drog.

Lafors Lapolis avek son bann partenaire Nasyonal e enternasyonal, i annan manda anba Lalwa pou konbat drog ki pe ganny anmennen.  Oubyen trafike pou distribisyon parmi sa bann dimoun.

Mr Speaker Lafors Lapolis spesifikman Biro Anti-Narcotics ki ziska tar lannen pase konn li konman NDEA.  In sezi plizyer kantite e kalite drog ki ti swa pe rantre oubyen pe ganny sirkile dan nou pei.

Mon pou dan en pti moman pas sa bann detay dan sezi drog eroin pou lannen 2017 e 2018 ziska ozordi parey premye kestyon i demande.

Me permet mwan Mr Speaker pou reponn en parti kestyon limero 3 par mansyonn bann diferan kalite drog ki Sesel in kapab arive sezi ziska ozordi.

Mr Speaker pou en bon pe letan, nou’n vwar en sezi cannabis dan nou pei dan sa bann form swivan.  Son lapay, zerbaz e lagrenn.  Son lapay konprese, son matyer pli konsantre apre ki in ganny modifye konman hashish, cannabis.

Mr Speaker eroin i sa lot drog ilegal ki’n enfiltre dan nou pei pandan en pe letan.  Nou osi annan de lasezi pou en drog ki ase rar Sesel e sa i cocaine.  Li i ti premye fwa ganny sezi an 2011 en lapeze 34.9 granm.  E sa akize in ganny kondannen.

E zis resaman sa lannen en Tanzanian ti ganny arete lo Airport pe rantre avek 244.4 granm cocaine ek 942.2 granm eroin dan form bullets ki ti’n anvale.

Mr Speaker nou napa okenn lezot kalite drog ki nou’n sezi apart bann ki mon’n mansyonnen.  E i enportan note, ki nou’n toultan demann nou bann partenaire pou averti lapolis an ka okenn nouvo form drog oubyen sibstans sispekte lo kontrole i ganny apersevwar dan nou pei.

Mr Speaker an repons kestyon limero 2- Biro Anti-Narkotik in sezi 2.90 kilo granm eroin pou lannen 2017.  E apepre 5.63 kilo granm depi Zanvye ziska Zen sa lannen.

Mr Speaker nou pa kapab donn en sif egzakt lo kantite drog ki an sirkilasyon dan pei.  Me i posib pou nou kapab fer en dediksyon an servan en formil.  Par egzanp dapre dernyen resers ki dir ki annan 4mil a 4,800 dimoun ki lo eroin Sesel.  E si zot pe servi dizon 0.3 granm eroin par zour, sa i donn ou en lendikasyon ki anviron 120 a 144 granm ki kapab pe ganny konsonmen dan en zour.

Mr Speaker Sesel i ganny regarde konman en pei ki pa  neseserman prodwir drog ilegal apart ki sirkilasyon drog cannabis.

E ziska prezan nou napa okenn laprev oubyen levidans, ki Sesel pe prodwir drog danzere tel ki eroin, cocaine oubyen ecstasy.  I enportan note ki ziska ozordi drog ilegal pe rantre dan nou pei atraver nou bann Por e Airport e pli gran poursantaz sa bann kalite drog pe ganny sirkile atraver larout e aktivite maritim.

Fas a sa, menm avek limitasyon resours ek kapabilite maritim ki nou’n Lafors Lapolis i annan.   Lapolis in kapab partisip aktivman ansanm avek son bann partenaire lokal e enternasyonal dan bann loperasyon konzwent gide par lesanz lentelizans enternasyonal e finalman kontribye pou anpes plis ki mil ki eroin antre an sirkilasyon dan rezyon L’Ocean Indien. 

Nou Lafors Lapolis pe kontinyen mentenir son stratezi ansanm avek son bann partner enternasyonal, pou aret bann dealers e trafiker ki pe kit pei lo bann pei lorizin avek drog e ki zot pe anvizaze pe rantre avek Sesel.

Dan menm zefor Mr Speaker, Lafors Lapolis ansanm avek son bann pei vwazen dan rezyon L’Océan Indien pe aktivman angaz zot dan en lapros lenvestigasyon lesanz lenformasyon e lentelizans konzwent lo aktivite bann dealer avek bann trafiker.

Mr Speaker malgre sa, i annan en defi ki bann pei dan larezyon L’Océan Indien Les ek Sid L’Afrique enkli Sesel pe fer fas avek dan sa lalit kont lenportasyon, leksportasyon, distribisyon, trafik ek finansman aktivite drog ilegal.

Malerezman serten pei dan sa rezyon, pa pe neseserman met lalit kont drog konman enn zot bann priyorite prensipal parmi lezot aktivite kriminel ki zot pe rankontre tel ki; terorizm e piratri.

Sa i evantyelman tre en defi pou nou Lafors Lapolis e nou pei.  Sa bann tel pei dan en fason pe permet aktivite drog pou deroule dan zot Por e Airport kot drog i rantre e sorti.

Mr Speaker nou realize bann difikilte ki nou Lafors Lapolis pe fer fas avek lokalman, tel ki mankman kantite e kalite resours imen e osi resours operasyonnel.

E si nou regard bann defi ki nou pe fer fas avek lo nivo kominoter Mr Speaker, Lafors Lapolis Sesel pe vwar li fas anviron plis ki 300 black spot aktiv lo Mahé, Praslin e La Digue kot bann aktivite drog ilegal e lezot aktivite kriminalite pe deroule.

Sa i fer ki evantyelman Lafors Lapolis aktyel pa pe kapab efektivman e rapidman redwir sirkilasyon drog ilegal dan nou bann kominote malgre zefor ki egziste pou reazir.

Mr Speaker fas a fas sa bann defi ki mon’n prezante, lo nivo rezyonal e lokal, si nou ti kapab ogmant nou kapasite mwayen pou lentervansyon lo nivo sirveyans kot nou bann Por e Airport ke dan nou rezon maritim pou annan plis sirveyans, serten nou bann defi lo nivo lokal pou evantyelman redwir.

Pou terminen Mr Speaker, mon oule zis fer rapel ki dan en rapor mondyal pou lannen 2017 INAC Africa, in ganny refer resorti ki rezon L’Afrique pe ase moman pe eksperyans en gran ogmantasyon dan konsonmasyon e trafik drog ilegal, spesyalman eroin e cocaine. 

Nou pou bezwen alor Mr Speaker etablir en lapros kordinen e verifye pou kapab ansanm redwir lakantite drog ilegal lo marse lokal, rezyonal e enternasyonal.  Mersi Mr Speaker.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker premyerman mon ekout atantivman Minis sa ki in dir.  Sa kestyon drog, drog Australien in tyonbo sa napa nanryen pou fer ek Sesel sa.

Epi ou sif ki ou’n donnen 120 – 0.3 granm letan ou met avek sa ki ou kalkile avek lakantite dimoun ki servi eroin i pa tonbe 120 a 140 granm par zour.  Mon krwar la i annan problenm ek sif, fodre zot re gete.

E an menm tan nou konnen deor bann dealers pe vann drog openly e donn nou en garanti ki zot pe ganny tyonbo.

Bann drog eroin ki ou’n nonmen ganny tyonbo oli ozordi?  E eski Mr Speaker Minis i kapab dir nou lefe ki i pe koz lo Airport ensidswit e in dir napa sa bann lezot drog, e nou, nou konnen piblik i konnen pou dir i annan me zot pa ankor tyonbo cocaine ek ecstasy i dan pei.  Eski zot annan lisyen train dan sa domenn ou kapab tyonbo sa bann drog entervenir dan bann ka sa bann drog?

E ki NDEA pe fer ek tou bann transpor la?  Akoz tou bann droger ozordi la zot i pe dan methadone.  E napa bokou zot lo street pou tyonbo.  Akoz zot in vin legal la.  Konmsi kot methadone ou ale ou pran ou zafer.  E prezan li NDEA tou sa ranform i n gannyen Kenyan, ek Indien ensidswit ki zot pe fer ek tou sa transpor?  Konmsi  ki mannyer i pe ganny servi pou en travay NDEA vin pli efikas.  E an menm tan de pti keksoz ankor ki mon konsernen.

Eski travay NDEA li letan i konmans travay kot NDEA i fer declaration of assets parey i demann nou isi dan Lasanble nou fer.  Eski zot osi zot fer pou konnen letan zot konmanse letan zot fini ki deal? 

E dernyerman Mr Speaker i annan unexplained property order.  Eski Minis i kapab dir nou en keksoz an relasyon avek sa?  Sa kestyon unexplained property order avek bann dealer dimoun ki enport drog ensidswit dan Sesel.  Ki zot pe fer dan sa direksyon?  Lefe ki zot konnen zot Lotorite i konnen lekel ki fer vini drog dan Sesel.  Ki  pe fer dan sa direksyon.  Mersi bokou.

 

MR SPEAKER

Mersi Onorab De Commarmond.  En bon pe kestyon la pou Minis asimile.  En moman Minis ou’n pare?   Ok ou kapab konsilte avek ou bann avek ou delegasyon

 

HON CHARLES DE COMMARMOND

Mr Speaker petet dan lespri pou konsiltasyon oubyen lefe ki Komisyoner i la avek Minis.  Eski Minis i krwar i enportan ki nou al dan Committee Stage kekfwa li menm i kapab reponn tou son bann kestyon.

Eski si i krwar nou ava anmenn nou Lasanble dan Committee Stage parey nou ti’n deza diskite pou kapab permet son bann dimoun ki’n vin avek pou entervenir le konpran pli byen?  Mersi.

 

MR SPEAKER

Bon nou ava regarde Minis pe konsilte.  Minis si le kontinyen ki li i pou reponn kestyon    konsiltasyon avek bann zofisye.  Minister. 

 

THE DESIGNATED MINISTER MACSUZY MONDON

Mersi Mr Speaker.  Mr Speaker mon ava esey reponn an konsiltasyon avek mon bann dimoun ki la avek mwan.  Parey ou’n dir i annan en bon pe kestyon ansanm.

Premye kestyon Onorab kot i konsern bann drog pe sey antre, ki mwan mon’n koz lo la i bann drog ki Lapolis in sezi.  I posib ki i annan lezot drog ki’n antre, me si Lapolis i pa’n sezi donk nou pa kapab neseserman fer komanter lo la oubyen dir en keksoz lo la.

Dezyenmman sa bann transpor ki NDEA i annan zot servi pou fer parol.  Me patrol i pa zis lo later.  Parey mon’n dir enn bann fason ki drog eroin i rantre, se zisteman lo lanmer.

E nou bezwen plis Lapolis i bezwen plis resours zisteman pou zot kapab patrol en pe plis lo lanmer.  Me solman mon krwar bann transpor ki NDEA i annan, sa i ganny servi toulezour pou zot kapab fer zot travay ki zot annan pou zot fer.

Kot i konsern declaration of assets.   Wi nou ganny dir pou dir bann dimoun dan NDEA dan Anti-Narcotics Bureau zot fer zot declaration of assets Mr Speaker.  Mersi Mr Speaker.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Be Mr Speaker avek tou respe be Minis Dezinyen pa’n reponn mon tou mon bann kestyon.  Mon’n dir osi lefe ki Lapolis ki la ou’n anvoy lo Lapolis be Lapolis i la ek ou.  Si ou krwar nou merit al dan Committee Stage dir nou, nou a move the Assembly into Committee Stage ki permet zot osi entervenir.  Pa bezwen per Minister.

 

MR SPEAKER

En moman, en moman.  Minis  ler i pe demann kestyon in mansyonn i annan serten lenformasyon kot i pa pou kapab devwale piblikman, an ka i afekte travay ki Lapolis pe fer.

Solman an konsiderasyon ki annan serten kestyon anvi sensitivity i pa pou kapab reponn.

 

HON CHARLES DE COMMARMOND

Mr Speaker therefore nou mwan mon propoze la atraver Mosyon, pou move the Assembly into Committee Stage pou permet son bann dimoun ki vin avek entervenir.  Mon met sa Mosyon la.  Mon pa konnen si i annan dimoun ki le segonde. E Lasanble i ava  deside.

 

MR SPEAKER

Petet mon from the Chair mon a kapab sizer en lot keksoz.  I annan en Komite Sekirite ek Defans, ki ganny formen.  Si zot detay spesifik mon krwar Minis avek son delegasyon i kapab meet avek sa Komite.

Me nou bezwen konpran i annan serten lenformasyon vizavi lentelizans, vizavi serten travay loperasyon ki Lapolis pe fer.  I pa pou kapab devwale la.  Nou konn sa tre byen ok?  So Minis i annan kontak avek mon lofis yer in diskit en pti pe lo sa sityasyon.

Solman annou konpran en pti pe lanpler sa problenm e how sensitive i ete ok ? 

 

HON CHARLES DE COMMARMOND

Mr Speaker mon konpran sa problenm, se sa rezon mon’n anmenn en Urgent Question dan Lasanble ozordi.  E mon pa satisfe larepons ki mon pe gannyen e mon pa dakor avek s ki ou pe dir!  Akoz fransman dir ou mon sezi le pwen sensitivity.  Me i a dir nou kwa ki konsidere sensitive mon kapab reponn sa enn akoz sa si mon dir pou sensitive e i annan lezot ki pa’n ganny reponn ki mwan mon ensiste mon bann kestyon i ganny larepons!  Mersi.

 

MR SPEAKER

Mersi Onorab De Commarmond.  Bon annou …

 

HON CHARLES DE COMMARMOND

Ki mannyer pou Irish i sensitive la pa sensitive?

 

MR SPEAKER

Yes.  Annou.  Mon ava permet lezot Manm demann zot kestyon, apre mon ava retourn lo loter kestyon.  Yes Onorab Valmont?

 

HON JUDE VALMONT

Mersi Mr Speaker.  Bonzour mwan mon ti a voudre segonn sa Mosyon propoze par Onorab De Commarmond.  Mersi.

 

MR SPEAKER

Mosyon pou al dan Staz Komite?  Bon nou ava pran en vot i annan en Mosyon en Mosyon ganny segonde.  Annou pran en vot.

 

(Interruption)

 

MR SPEAKER

Bon. Bon mon pa pou ouver deba mon pa pou ouver deba lo Mosyon.  En Mosyon in ganny propoze pou al dan Staz Komite in ganny segonde.  Annou pran en vot lo la si zot pa dakor then nou kontinyen dan sa direksyon.  Yes Onorab Ramkalawan.

 

HON WAVEL RAMKALAWAN

Mr Speaker mwan mon pe ariv sa staz dan Lasanble kot nou pa kapab lo tou kestyon rantre dan Staz Komite.  Question Time se pou bann Minis. Nou les sa arive enn de fwa.  Me Minis i responsab pou Lapolis e alor Minis i devret pran son responsabilite konsilte avek bann dimoun e donn nou larepons.  Nou pa kapab…tou lazournen al dan Committee Stage. 

 

 

MR SPEAKER

Mersi Onorab.  Se sa direksyon ki Minis pe pran.  Me parey mon’n dir i annan en Mosyon in ganny segonde, annou pran en vot.

Tou Manm ki an faver pou al dan Staz Komite lev lanmen ?  Manm ki kont lev lanmen?

 

(Interruption)

 

MR SPEAKER

Mersi. Ok.  Madanm Clerk.

 

MADAM CLERK

Mersi bokou Mr Speaker.  Mon’n rikord 11 Manm ki an faver e 12 Manm ki kont.  Mersi.

 

MR SPEAKER

Ok Mosyon in ganny defet savedir nou ava kontinyen.  Ok annou kontinyen.  Onorab Sebastien Pillay mon donn  ou laparol pou kestyon.

 

HON SEBASTIEN PILLAY

Mersi Mr Speaker i enteresan dan sa Lasanble mon dir ou en.  Enteresan, enteresan, enteresan!

 

MR SPEAKER

Poz ou kestyon Onorab.

 

HON SEBASTIEN PILLAY

Mersi.  Mr Speaker konmsi ou pe dir mwan si mon fer okenn statement ou pa pou les mon poz mon kestyon – en?

 

MR SPEAKER

Wi.

 

HON SEBASTIEN PILLAY

Mon kapab poz mon kestyon Mr Speaker?

 

MR SPEAKER

Wi kestyon

 

HON SEBASTIEN PILLAY

Mersi Mr Speaker.   Thank you.  Non be i enteresan ou pa konnen pou vote – ou bezwen get ou kanmarad ki mannyer pe vote avan ki ou vote.

 

MR SPEAKER

Onorab….

 

HON SEBASTIEN PILLAY

Sanmenm sa part….

 

(Interruption)

 

MR SPEAKER

Order!  Order!  Order!  Onorab ou forfeit ou sans pou demann kestyon.  Onorab Ernesta.

 

(Interruption)

 

MR SPEAKER

Onorab Ernesta kestyon.  Onorab Ernesta.

 

HON PAUL ERNESTA

Mersi Mr Speaker.  Minis ek ou delegasyon bonzour e tou Manm koleg Onorab bonzour, e tou dimoun a lekout.

Minis pli boner ou’n koz lo diferan bann defi ki lakominote pe fer fas avek.  E nou Takamaka nou annan en gran defi ki nou oule ou kapab donn en laklerte.  Si ou konstate depi i annan plis ki 2 mwan pase nou Kordgard in frenmen.  E avek sa in anmenn en labsans prezans permanan bann Zofisye Lapolis dan nou distrik.

E konsekaman nou’n vwar osi bann logmantasyon dan bann crime-related – asosye avek drog.  Plis nou vwar plis bann mouvman bann dimoun pe deal dan drog dan distrik.

Eski Minis i kapab eksplik sa Lasanble, ki son Minister pe fer pou kapab adres sa sityasyon dan nou distrik?  Mersi Mr Speaker.

 

MR SPEAKER

Mersi Onorab.  Minis.

 

THE DESIGNATED MINISTER MACSUZY MONDON

Mersi Mr Speaker.  Mr Speaker wi nou realize pou dir Takamaka in ariv en problenm avek Kordgard, e mon ti a kontan reasir Onorab ki nou’n fini secure funding pou nou kapab re aranz Kordgard Takamaka.  Nou pa pe zis aranz sa bout kot nou’n ganny kot sa problenm in arive.  Me nou pe osi profite pou nou kapab fer extension kot fodre fer e fer en proper renovation pou kapab permet nou fer sa travay ki nou anvi fer a lavenir.

E Onorab pou lemoman plan pou renovasyon extension Kordgard in fini ganny soumet avek Planning.  Donk nou pe panse nenport ler nou pou kapab konmans travay lo Kordgard.  Mersi.

 

MR SPEAKER

Mersi Minis.  Onorab Valmont.

 

HON JUDE VALMONT

Mersi Mr Speaker.  Mon a posede avek mon kestyon direkteman.  Minis mwan mon anvi konnen konbyen sa ki nou dir gro pwason – suppliers depi 2017 ki’n ganny kondannen pou bann lofans drog?  Supply drog?  Sa enn.

2enm Minis i dir si nou adres nou bann defi sirveyans.  Mon pe demande be ki Lapolis pe fer pou adres sa bann defi sirveyans ?

E trwazyenm Onorab De Commarmond in fer sorti in demande si zofisye ND i deklar zot assets ler zot konmans travay Me mwan mon anvi demann en kestyon lo lot kote.  Ki zot fer pou motiv sa bann zofisye? Ki zot fer pou motiv sa bann zofisye pou asire ki zot e zot fanmir zot an sekirite e pa met an danze zot travay?

Akoz mwan mon konn i annan zofisye Pointe Larue ki pe travay dir, me solman ki ler zot mont se zot ek zot fanmir, lakaz i ganny kase zot ganny harass loto i ganny reye lo la mon krwar Depite i konn byen sa.

Alor mon demande ki zot fer pou asire ki sa bann zofisye travay, san presyon ki zot fanmir i an danze e ler zot lo teren?  Mersi.

 

MR SPEAKER

Mersi Onorab Valmont.  Minis.

 

THE DESIGNATED MINISTER MACSUZY MONDON

Mersi Onorab.  Mr Speaker pou premye larepons kestyon nou annan 8 sa bann dimoun ki’n ganny kondannen.  20 ta i ankor kot biro Attorney Zeneral e 11 ka i devan Lakour.

Kot i konsern 2enm bout kestyon Mr Speaker nou pe enkli proteksyon dan revizyon Lalwa Police Force Act ki pou protez bann zofisye parey ou’n dir Lapolis e osi bann zofisye ki pe fer travay kot Anti-Narcotics Bureau, pou fer sir ki sa bann keksoz ki ou pe dir Onorab i pa arive.  Mersi Mr Speaker.

 

MR SPEAKER

Mersi Minis.  Onorab Henrie.

 

HON GERVAIS HENRIE

Mersi Mr Speaker.  Bonzour  tou dimoun.

 

MR SPEAKER

En moman Onorab Henrie.  Wi Onorab Valmont.

 

HON JUDE VALMONT

Yes i annan en kestyon pa’n ganny reponn.  Minis sa 2enm kestyon la pou adres zot ban defi sirveyans ki Lapolis pe fer pou adres sa bann defi.  Mersi.

 

MR SPEAKER

Minis.

 

THE DESIGNATED MINISTER MACSUZY MONDON

Mersi Onorab.  Mr Speaker pou adres bann defi sirveyans, nou bezwen plis larzan nou bezwen envestir zisteman dan bann bato ki pou permet nou fer sa bann travay  patrol ki nou bezwen fer dan nou delo.  Ok dan nou …  Mersi Mr Speaker.

 

MR SPEAKER

Mersi Minis.  Onorab Henrie.

 

HON GERVAIS HENRIE

Mersi Mr Speaker.  Ankor enn fwa bonzour tou dimoun.  Mon annan 2 kestyon spesifik enn i swiv sa ki Onorab avan mon i demande.

Minis in donn nou en bann sif ki swadizan bann case kot dimoun kondannen bann keksoz koumsa.  Leader of Government Business in ensiste ki Lotorite i konnen lekel bann dealers avek traffickers. 

        So mon premye kestyon mon anvi demann Minis apepre konbyen dimoun Lotorite i sispekte ki bann dealers avek traffickers dan Sesel?  Nou konnen users i dir 5mil me dealers avek traffickers konbyen nou sispekte.

2enm kestyon eski nou annan en legzersis ki’n ganny fer par bann Lotorite konpetan partikilyerman ANB kot zot in map out tou landrwa ki vann drog dan Sesel, par distrik konbyen sa bann landrwa ki zot sispekte pe vann drog dan Sesel?  Mersi bokou.

 

MR SPEAKER

Mersi Onorab.  Minis.

 

THE DESIGNATED MINISTER MACSUZY MONDON

Mersi Mr Speaker.  Mr Speaker i annan apepre 56 nou konnen bann dimoun ki finans ki finans bann dealers e nou annan apepre en 200 bann dealers ki Lapolis i okouran.

E osi bann transporter – bann dimoun ki transport zisteman sa bann larzan drog.  Dan sa bann tranzaksyon ki ganny fer.

Kot i konsern sa legzersis wi i annan en travay lentelizans ki’n ganny fer Mr Speaker.  Me mon pa pe kapab donn plis lenformasyon lo la.  Mersi Mr Speaker.

 

MR SPEAKER

Mersi Minis.  Onorab Vidot.

 

HON AUDREY VIDOT

Mersi Mr Speaker.  Bonzour Minis ek ou delegasyon.  Bonzour tou Manm Onorab.  E tou dimoun ki a lekout.

Mr Speaker mon kestyon i al koumsa ; eski Minis i kapab dir nou Lasanble konbyen ka larestasyon tranzaksyon drog dan bann distrik oubyen lo nivo rezyonal ki Lapolis in akonpli?

Eski Lotorite i satisfe mezir sekirite ki’n met an plas lo New Port letan bann gro container i kit Por pou al desarz bann container partou?

E lastly mon annan en rekomandasyon, mon swete ki baze lo bann larepons ki nou’n gannyen, e osi desizyon ki nou Lasanble in pran nou napa ankor selective transparency   akoz Seselwa laba deor i anvi konnen larepons ki nou pe demande, akoz sa size i konsern nou tre serye.  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MACSUZY MONDON

Mersi Onorab.  Mr Speaker nou kapab fer Lasanble ganny bann statistik par distrik, si i neseser si Lasanble i anvi konnen ki kantite ban arestasyon drog ki’n ganny fer nou kapab anvoy sa lenformasyon apre.

Kot i konsern mezir sekirite lo Por; non nou pa satisfe nou pa satisfe avek mezir sekirite ki egziste lo Por Onorab.  Mersi Mr Speaker.

 

MR SPEAKER

Mersi Minis.  Onorab Roucou.

 

HON CLIVE ROUCOU

Mersi Mr Speaker.  Bonzour Minis avek ou delegasyon. Bonzour tou dimoun.  Mr Speaker 2 kestyon pou Minis.

Eski Minis i kapab dir sa Lasanble si Departman Lapolis i ekipe avek bann test kits neseser pou idantifye bann lezot drog apart ki eroin avek kokain?

Epi mon 2enm kestyon mon pe demann Minis si Departman Lapolis 0pe met lanfaz osi lo bann latizann ki ganny preskrir par dokter ki dimoun i kapab abize silvouple?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MACSUZY MONDON

Mersi Mr Speaker.  Mr Speaker non Lapolis napa tou test kits neseser pou idantifye drog.  E i annan bann moman kot i bezwen rod lezot lasistans pou kapab fer li.

E kot i konsern bann latizann ki preskrir par dokter Onorab Lapolis pa enterfer, napa nanryen pou fer avek bann latizann ki dokter i preskrir dan pei.  Akoz sa i lo kontrol.  Mersi Mr Speaker.

 

MR SPEAKER

Mersi Minis.  Onorab Herminie.

 

HON WILBERT HERMINIE

Mersi Mr Speaker.  Bonzour Minis avek ou delegasyon.  Minis i dir koumsa i a donn nou statistik apre.  Me solman mon kestyon i eski i annan zot in vwar en rediksyon dan drug-related offenses pandan ki sa progranm methadone in rantre an plas.

E 2enm kestyon ki fer Lapolis pou deal avek sa issue drog dan prizon?  Mersi Mr Speaker.

 

MR SPEAKER

Mersi.  Bon ankor mon repriz bann Manm annou anmenn nou kestyon relevan avek kestyon orizinal.  Minis go ahead.

 

THE DESIGNATED MINISTER MACSUZY MONDON

Mersi Mr Speaker.  Mr Speaker non nou pa kapab dir si i annan en rediksyon dan bann drug-related offenses.  Mon krwar i en pe boner pou nou kapab pronons nou lo la.

Kot i konsern drog dan prizon mon krwar nou ava rapel ki dernyen fwa nou dir pou dir i annan  menm letid ki nou ti fer.  E nou ti’n prezante ek Lasanble sa menm letid pe ganny fer dan prizon.  E in fek ganny konplete e an rezilta sa nou ava annan nou en plandaksyon en travay pou nou kapab fer ki nou kapab travay lo la pou nou vwar avek tou bann partner konsernen ki mannyer pou nou kapab deal avek sa problenm drog ki nou

Pe fer fas avek dan prizon ozordi.  Mersi Mr Speaker.

 

MR SPEAKER

Mersi Minis.  Onorab Ghislain.

 

HON CHANTAL GHISLAIN

Mersi Mr Speaker.  Mr Speaker Minis in donn en statistik lo lakantite drog eroin ki’n ganny atrape.  E mwan mon ti anvi konnen si Minis i annan avek li bann lezot statistik drog ki’n ganny atrape dan bann dizon dan lespas 4an.  Sa dernyen 4an menm 5an, pou nou konnen si sa kantite i pe zot in atrape eroin in ogmante ouswa in desann?

E apre mon ti anvi konnen kote sa bann drog i ete ki kote i ete la sa kantite zot in atrape la?  Mersi Mr Speaker.

 

MR SPEAKER

Mersi Onorab.  Minis.

 

THE DESIGNATED MINISTER MACSUZY MONDON

Mersi M Speaker.  Mr Speaker statistik drog nou kapab ankor fourni Lasanble pou sa dernyen 4an fourni Lasanble avek sa lenformasyon.

E bann drog ki’n ganny atrape i ganny garde dan exhibit store.  E sa kan i neseser kan bann exhibit i bezwen anmenn Ankour i ganny anmennen Ankour.  Mersi Mr Speaker.

 

MR SPEAKER

Mersi Minis.  Onorab Sandy Arissol.

 

HON SANDY ARISSOL

Mersi Mr Speaker.  Bonzour Minis avek ou delegasyon.  Mr Speaker zis mon anvi dir si nou pa kapab kontrol drog dan prizon kot i annan 50 baro fil bar ble tou oter.  Si ou anndan ki mannyer nou kapab kontrol drog an deor

Mon ti a kontan demann Minis Mr Speaker, avek bann spekilasyon deor Minis se ki Gouvernman ki enplike dan drog.  Spekilasyon deor se Gouvernman ki enplike dan drog.  Se Prezidan Larepiblik ki enplike dan drog.  Se bann Minis bann zofisye dan Gouvernman ki enplike dan drog.  Se bann travayer NDEA, sa spekilasyon ki annan deor.

 

(Interruption)

 

HON SANDY ARISSOL

Spekilasyon ki annan deor.  E pa bliye Mr Speaker Msye Danny Faure konman Prezidan ti vin dan nou Lasanble e i ti fer deklarasyon lo la bann, spekilasyon ki annan kont li lo drog.  Alors sa i bann spekilasyon.

Alors sa ki mon ti a kontan demann Minis, ki Gouvernman pe fer Minis pou adres sa bann spekilasyon ki annan kont zot lo zot pou zot montre avek lepep Seselwa pou dir zot pe lager lebra kase kont drog akoz dimoun i kontinyen dir zot pa pe met lanfaz, zot pa pe donn resours, zot pa pr donn NDEA bato, zot pa pe donn NDEA zonm pou travay, zot pa pe met scanner lo Airport pou bann detekte drog.  Zot pa pe met en nouvo scanner lo lasose pete bann container ki rantre nou pa konnen ki annan ladan.  Zot pa pe met resours, zot pa met lenerzi CCTV camera everywhere dan bann landrwa stratezik.  Akoz senpleman se zot ki enplike dan drog.

Alor mon kestyon Minis ki zot in fer?  Ki zot pe fer?  Ki zot pou fer pou asir bann manman ki reste Saint Louis ek lepep Seselwa ki zot zanfan i dan drog ki zot, zot pa enplike dan drog zot.  E zot, zot pe lager kase en Gouvernman ki serye parey zot dir zot pe lager lebra kase pou zot elimin drog dan nou pei.  Olye zis sonny bann droger ki nou vwar tou le bomaten met laliny e taxpayers money pe peye pou donn zot bann latizann ki bann paran pe espekte avek Gouvernman ki la.  Avek Minis ki la, Komisyoner Lapolis i la, Mr Songor ki la pou nou rezourd sa problenm drog, kestyon anmennen par Onorab De Commarmond.  Mersi bokou Mr Speaker.

 

MR SPEAKER

Mersi Onorab.  Minis.

 

THE DESIGNATED MINISTER MACSUZY MONDON

Mersi Mr Speaker.  Mr Speaker mon krwar spekilasyon i partou.  Spekilasyon i pa zis Gouvernman me spekilasyon i annan partou dan pei antye.

E kot i konsern Gouvernman, mon krwar i annan deza mezir selman kreasyon Lazans par egzanp. Ok?  Bann serten travay bann mezir ki Gouvernman pe pran kot i konsern kreasyon NDEA par egzanp i en mezir i en striktir ki Gouvernman i met an plas pou adres bann problenm drog ki nou pe fer fas avek dan nou pei.

E mon ti a kontan dir Mr Speaker, ki Gouvernman i reste angaze drog i en konsern dan pei e pou fer tou sa ki li i kapab fer pou nou kapab deal avek sa problenm e tackle sa defi.

Si mon ti kapab wi Onorab nou konsyan pou dir i annan sertennman parey mon’n dir dan mon premye larepons.

E zisteman Lapolis fek travay lo en dokiman ki edik tou bann lekipman ki nou bezwen pou nou kapab fer sa travay ki nou anvi fer pou nou kapab annan bann loperasyon ki efektiv.  E sa i ariv si ou permet mwan Mr Speaker son kou i apepre R58 milyon.

E sa travay ki Lapolis in fer i pou ganny mete devan Gouvernman E Gouvernman i ava konsidere pou nou kapab regarde ki mannyer nou kapab ed Lapolis avek sa bann lekipman neseser ki zot bezwen, pou zot kapab zisteman deal avek sa problenm drog.  Mersi Mr Speaker.

 

MR SPEAKER

Mersi Minis.  Onorab Aglae.

 

HON EGBERT AGLAE

Mersi Mr Speaker.  Minis bonzour avek delegasyon.  Minis mon kestyon i relye avek part 3 sa kestyon kot i konsern bann lezot kalite drog ki kapab rantre dan pei.

Minis i byen konstate avek lavansman teknolozi menm L’Europe.  Lannen pase 2017 – 27 kalite drog rekreasyonnel in ganny dekouver.

Mon kestyon alor eski an atandan ki i nou pe lager ek sa mons eroin nou pa pe perdi hindsight lo lot kote drog pou met nou bann zofisye azour?  E an menm tan rod en lekspertiz neseser ki enportan pou ede ki nou pa napa okenn lezot bebet ki rantre dan sa pei ki nou vwar nou pe fer fas avek pou nou bezwen tay isi, tay laba.  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MACSUZY MONDON

Mersi Mr Speaker.  Mr Speaker Lapolis on deza fer travay kot i pe rod samples bann recreational drugs avek Lapolis lo nivo Sud Afrique.  Me pou fer sa byensir i annan en Protocol ki bezwen ganny swiv.  E byento nou pou annan en delegasyon ki pou sorti Sud Afrique pe vin fer serten travay avek Lapolis Sesel.  Mersi Mr Speaker.

 

MR SPEAKER

Mersi Minis.  Onorab Afif.

 

HON AHMED AFIF

Mersi Mr Speaker.  Mr Speaker mon ti a kontan demann Minis lafason kestyon poze par Onorab De Commarmond, si Minis ti kapab donn nou en lendikasyon ki nou pe reisi dan sa travay pou nou detri pou nou elimin eroin e lezot drog dan Sesel?  So lannen pase zot ti vin avek en Bidze ki sa Lasanble ti aprouve menm dir pou nou pare konsider menm plis Gouvernman ti propoz sa devan nou.

So mwan mon anvi ganny en lendikasyon kler avek Minis.  Avek enn de endikater par egzanp si zot krwar zot pe reisi pou blok bann fason ki drog i rantre ouswa par Airport ouswa par delo sale?  Si zot krwar zot reisi, wi ou non?

Dezyenmman eski baze lo kantite trafiker ki zot dir nou annan 200 trafiker 56 finansye avek transporter pou pa’n donn en sif.

Eski Minis i krwar pou dir baze lo son statistik sa dernyen 3an nou pe reisi blok larout?  Nou pe reisi redwir trafiker met bann ka devan Lalwa pou prosekisyon?  Se sa mon kestyon.  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MACSUZY MONDON

Mersi Mr Speaker.  Mr Speaker nou fer serten progre me mon pa kapab dir pou dir nou pe reisi totalman, akoz i annan ankor bokou plis travay pou nou fer nou fek dir la pou dir nou bezwen plis lekipman plis asset pou nou kapab travay avek.

I annan Lalwa osi ki nou bezwen revwar.  E nou bezwen ankor plis expertise pou nou kapab – pou Lapolis kapab fer bann travay. I annan asset seizure par egzanp ki avek Lapolis prezan i bezwen fer serten travay pou kapab met sa an plas.

Donk mon krwar sa ki enportan se ki tou zefor pe ganny fer Onorab, tou zefor i en bon pe zefor pe ganny fer pou nou kapab fer sir ki nou a lavenir pou nou met sa problenm anba kontrol.

E mon panse letan Lapolis i ava’n ganny tou bann lekipman ki  i bezwen, pou li kapab fer son loperasyon avek mon krwar pou dir nou ava vwar en nou a konmans vwar rezilta dan lafason ki nou pe deal avek sa problenm.  Mersi Mr Speaker.

 

MR SPEAKER

Mersi Minis.  Onorab William.

 

HON WAVEN WILLIAM

Mersi Mr Speaker.  Bonzour Minis avek ou lekip.  Mon ti a kontan pran kot Minis fek terminen.  Minis lefe ki ou’n dir Lafors Lapolis i bezwen bann lekipman.  Eski vreman baze lo zot evalyasyon pou kontrol ouswa elimin sa problenm ki nou pe fer fas avek, ki pe afekte tou mazorite nou bann zenn.

Minis eski zot in set en timeline lefe ki ou pe dir nou zot in pe demann larzan, zot napa ase mendev zot bezwen lekipman.  Eski zot in set bann timeline pou vreman demontre avek Seselwa pou dir (I) i annan sa senserite e i annan sa political will pou nou vreman deal avek sa sityasyon.  Mersi bokou.

 

MR SPEAKER

Mersi Onorab.  Minis.

 

THE DESIGNATED MINISTER MACSUZY MONDON

Mr Speaker nou napa timeline spesifik.  Me Lapolis i annan son plan.  I annan son plan travay kot i met son bann lobzektif ki i bezwen attend pandan en serten peryod letan.

Me mon ti a kontan reasir Onorab pou dir wi sa political will i la.  E mon krwar e mon pa krwar Gouvernman i senser, Lapolis i senser dan sa travay ki pe fer pou li kapab zisteman dousman, dousman, dousman elimin sa problenm.

Donk the will is there Onorab.  Ok pou nou kapab fer li e bann travay ki zisteman Lapolis pe fer mon krwar nou pou arive nou pou kapab zisteman vwar parey lot Onorab in demande nou vwar en rediksyon a lavenir dan sa problenm ki nou pe fer fas avek.  Mersi Mr Speaker.

 

MR SPEAKER

Mersi Minis.  Onorab Loizeau.

 

HON NORBERT LOIZEAU

Mersi Mr Speaker.  Bonzour Minis ek ou delegasyon.  Mr Speaker mon anvi demann Minis, vi ki dan dapre konpran i annan 5mil dimoun adikt lo dan Sesel.

E dapre konpran mazorite se bann zenn e la osi dapre konpran i annan drog ki pe rantre dan bann lekol.  Mon anvi demann Minis ki ou Minister pe fer ansanm ek Lapolis byensir, pou anpese ki drog i rantre dan lekol.

Akoz ler ou get statistik laplipar sa bann zenn ki adikt zot in konmans drog a en tre zenn-az.  Dapre konpran drog i annan dan lekol.  Dir nou ki zot pe fer pou anpese ki drog i antre dan lekol.  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MACSUZY MONDON

Mersi Mr Speaker.  Mr Speaker mon krwar letan nou ti dan Lasanble dernyen fwa Lazans ti fer resorti pou dir nou annan bann school based-prevention program ki zot pe al pe ganny met an plas dan bann lekol pou nou kapab zisteman tackle sa bann problenm parmi nou bann zenn.

E Lapolis byensir kot i annan bann travay ki li i bezwen ganny fer kot i al fer son bann loperasyon.  Kot i konsern osi lazenes Lapolis i fer son travay ki li i annan pou fer avek sa bann zenn kot zot, zot ganny involve.  Dan sa bann sityasyon.

Me o nivo lekol i annan serten travay prevansyon ki pe ganny fer avek sa bann zenn.  Mersi Mr Speaker.

 

MR SPEAKER

Mersi Minis.  Onorab Andre.

 

HON CLIFFORD ANDRE

Mersi Mr Speaker.  Mr Speaker mon ti a kontan demann Minis pou dir avek sa Lasanble, an koneksyon avek sa kestyon ki akoz Lapolis letan i tackle en hot spot i pa fer li avek bi ki sa hot spot pa senpleman zis bouze al dan en lot lokasyon me ki i detri sa aktivite si oule dan sa landrwa?  Mon a donn en legzanp spesifik kekfwa pou asiste Minis avek sa.

Letan Lapolis ti dir pe al tackle Chetty Flat i tackle en pe Chetty Flat.  Me selman aktivite in senpleman bouze.  E in al afekte lezot dimoun ki pa tro lwen avek landrwa.  Sa i mon premye kestyon.

2enm kestyon anvi ki Onorab De Commarmond in demande ki kantite eroin ki’n ganny konfiske depi Zanvye 2017.  Eski Minis i kapab dir nou si Lotorite Lapolis, apre ki en case in fini drog in vin propriyete en lot lenstitisyon dan sa ka Zidisyer.  Si i fer sir ki konzwentman sa drog i ganny detri, ki i pa retourn an sirkilasyon?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MACSUZY MONDON

Mersi Mr Speaker.  Mr Speaker premye kestyon kot i konsern bann hot spot – wi Lapolis letan Lapolis i rantre, i fer serten travay, me mon krwar nou konpran pou dir Lapolis i pa kapab reste la.  Ou’n donn en legzanp parey Chetty Flat i annan lezot Lazans osi ki annan serten travay ki bezwen fer.

E mon panse ki dan bann Housing Estate par egzanp i pou bezwen annan serten travay ki par egzanp PMC i bezwen fer ok pou kapab fer sir ki i annan serten travay sipervizyon pe ganny fer dan sa bann Housing Estate ki sirtou nou pe fer fas avek sa bann problenm drog.

Apre kot i konsern si drog i ganny detri?  Wi Mr Speaker i annan en Komite ki annan reprezantan Lapolis, Lasante, Zidisyer ki sipervize letan en drog in fini ganny servi konman exhibit e ki bezwen ganny detri.  I annan bann prosedir ki ganny fer pou ki sa drog i ganny detri.  Mersi Mr Speaker.

 

MR SPEAKER

Mersi Minis.  In reponn ou premye kestyon lo hot spot ale go ahead Onorab.  Go ahead.

 

HON CLIFFORD ANDRE

Avek ou permisyon Mr Speaker.  Minis in mal konpran mon premye kestyon sete pa pou siperviz dan sa landrwa sete letan ou vin tackle sa landrwa s aktivite senpleman bouze i al en lot landrwa ki pa tro lwen.  Se sa ki mon pe dir si i fer en keksoz comprehensive ki letan zot pe get tackle sa sityasyon, zot pa pe zis tackle li ki nou tir li la i al laba.  Ou konpran ki mon pe dir ou?  Mon a pe dir ou dan menm landrwa Minis. Pa lo menm Estate me solman mon pe dir ou i migrate ki i al dan landrwa.  Mersi

 

MR SPEAKER

Mersi Onorab.  Minis.

 

THE DESIGNATED MINISTER MACSUZY MONDON

Mersi Mr Speaker.  Mr Speaker i annan travay swivi osi ki Lapolis i fer.  Letan i fer en travay ganny dan en  landrwa  i pa zis vini fer li la apre i fini.  Mon krwar sa travay i kontinyen sa bann dimoun i ganny swiv e i pa zis fini la Onorab.  Mersi Mr Speaker.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker.  Bonzour tou Manm Onorab.   Bonzour Minis, e bonzour tou dimoun ki pe ekout nou.  Mr Speaker mon ti a kontan demann Minis kan eski son Minister pou pare pou vin fer en statement devan sa Komite ki’n ganny formen ki ou’n mansyonnen bomaten, lo egzakteman kwa ki tou bann defayans ki Lapolis pe fer fas avek vizavi lentersepsyon, lekipman, lakantite apreansyon ki zot in fer, kan zot pou pare pou vin fer sa statement?  Ki nou kapab ganny en nide pli kler vi ki nou pa kapab al dan Committee Stage la, pou nou kapab ganny pli kler egzakteman ki lanpler problenm i été lo nivo Lapolis?

Eski Minis ou kapab dir nou, si i dan lentansyon Lapolis pou travay ek Minister Ledikasyon baze lo sa kestyon ki’n ganny demande oparavan.  Ki mon santi pa’n ganny byen reponn, pou travay pli pre avek Minister Ledikasyon pou kapab etablir en sistenm kot zot kapab rantre dan bann lekol e fer bann spotcheck kan i neseser pou asire bann zanfan pa vin a risk ganny afekte par nou.  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MACSUZY MONDON

Mersi Mr Speaker.  Mr Speaker sa statement avek Komite nou kapab fer nenport ler ki zot pare ok? 

E kot i konsern travay pli pre avek bann lezot sekter.  Wi Mr Speaker mon konnen pou dir Lapolis i travay avek konzwentman avek Minister Ledikasyon.  Zisteman letan zot ganny apele pou anmenn serten lasistans.  E dan zot plan lo ‘Zero tolerance to drugs’ i annan deza bann sekter ki’n ganny idantifye tel ki Minister Ledikasyon, Minister Lasante, Minister Lafanmir, Departman Lazenes bann NGOs, ki Lapolis pou travay avek a lavenir pou nou kapab zisteman annan en zefor konzwent pou nou kapab deal avek problenm drog.  Mersi Mr Speaker.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker letan Minis in koz lo detri bann drog ki zot in tyonbo, zot in anmase, sa bann aksyon, eski i kapab donn nou en garanti ki laprosenn fwa zot fer sa zot konmans fer li avek medya.  Konmsi ki zot filmen e i montre.

Akoz mon rapel dernyen fwa zot in en bann letan konmsi sa kantite ki zot pe anmase mon pa vwar kote zot pe detrir.

Me ti bon ki piblik i vwar sa; enn.  E an menm tan ou nonm detrwa sif taler ou’n dir 8 gro dealer whatever in ganny kondannen, 20 in ganny case i kot Attorney Zeneral, 11 ka i Ankour.

Epi ou’n dir i annan 56 ki fe vini drog ki zot konnen ki fer vini dan pei, bann hard drugs sirtou, i annan 20 dealers sa ki zot konnen.

Now, kestyon i swivan eski zot satisfe avek sa ki zot in fer ziskan konmela?  E ki zot pe fer ki Lapolis pe fer pou aret sa bann lezot, zot konnen zot in dir zot konnen i annan 56 dimoun ki fer vini.  I annan 20 i annan 200 dealers e an menm tan zot in dir 8 ki’n ganny kondannen.  I annan 20 ki ka i kot Attorney Zeneral, e 11 ki Ankour. Eski zot satisfe ek sa ki zot in tyonbo deza?  E ki zot pe fer pou tyonbo lezot?

E an menm tan pou fini Mr Speaker eski Minis i kapab dir nou ki Lotorite pe panse.  Eski zot pe reflesir seryezman lo medical cannabis sirtou son si zot pe mazin legaliz li and whatnot, ki son lapse medisinal cannabis konmsi ki zot pe mazinen dan sa direksyon?  Mersi.

 

MR SPEAKER

Mersi Onorab.  Minis.

 

THE DESIGNATED MINISTER MACSUZY MONDON

Mersi Mr Speaker.  Mr Speaker, mannyer mon konpran medya i la letan nou fer sa bann ler nou fer sa bann prosedir pou nou bril drog.

Me nou kapab verifye si sa pa pe arive.  E nou pa vwar en problenm ki medya i la ki letan sa letan sa i pe ganny fer.  Mon krwar nou’n deza vwar osi lo medya si mon pa tronpe dan lepase letan serten drog in ganny brile.

Bann dealers Onorab wi mon krwar avek resours ki nou annan, nou ase satisfe avek travay ki nou pe fer e byensir pou Lapolis kapab kontinyen prosekit, deal avek sa bann dealers nou bezwen fer sir ki nou annan sifizaman levidans.  E parfwa petet sa ki monte pou fer nou pa kapab fer sa travay ki mannyer nou ti a kontan fer li.

Kot i konsern Mr Speaker sa zafer legaliz cannabis.  Mr Speaker mwan mon pa dan en pozisyon pou mon pronons mon whether pou legaliz cannabis oubyen non.  Mon konnen pou dir Minis Lasante avek mwan menm nou responsab pou Home Affairs,  nou annan en case ki’n ganny anmennen Ankour lo la e en case ki pa ankor fini.  Donk mon pans pa si mon dan en pozisyon pou mon kapab fer okenn komanter lo la.  Mersi Mr Speaker.

 

MR SPEAKER

Mersi Minis.  Bon avek sa nou ava mon ti a kontan remersi Minis, Komisyoner Lapolis, son Depite e Ms Vangadasamy.

Minis mersi bokou e nou ava eskiz zot parmi nou.

 

 

(THE DESIGNATED MINISTER – MRS MONDON AND HER DELEGATION WAS EXCUSED FROM THE HOUSE)

 

 

MR SPEAKER

Bon zis mon ava diriz Lasanble ki mannyer nou pou kontinyen nou travay.  Nou pou pran en break la.  Nou pou retournen midi mwen kar 11.45 kot nou pou pran Civil Status (Amendment) Bill ok?  Nou break nou retournen 11.45.

 

(BREAK)

 

MR SPEAKER

Bon, nou ava kontinyen nou travay.  Nou ava apel Minis responsab pour Lanplwa, Imigrasyon avek Civil Status.  Mon espere ki Manm i annan kopi Rapor Bills Committee ki’n ganny sirkile – non?  Kopi Rapor Bills Committee lo sa 2 Bill ki nou pou pran la.  Zot napa?  Ok, nou ava fer provizyon, nou ava ganny en pe kopi pour zot.  Ok, yes.

Bon, zis pour enform bann Manm – bann ki annan fasilite IT, aparaman, sa 2 Rapor in ganny anvoye avek Order Paper – regarde.  I annan Rapor Bills Committee lo Civil Status (Amendment) avek lo Truth and Reconciliation Bill.  In ganny anvoy e Lendi le 9 Zilyet, ok?  Si fodre mon ava fer – Madanm Clerk nou kapab fer en pe kopi pour sirkile avek Manm.

Bon, mon ti a kontan welcome Minis Télémaque parmi nou.  Minis responsab pour Lanplwa, Imigrasyon avek Leta Sivil – Minister, welcome!

Minister i akonpannyen par PS pour Imigrasyon – Mr Alain Volcere, Special Advisor pour Imigrasyon e Leta Sivil – Mr Michel Marie e Principal Civil Status Officer, Ms Marietta Labrosse.  E an menm tan nou, nou osi tou ganny lasistans Attorney Zeneral – Mr Frank Ally, Ms Bootna e avek Mr Pool.  Sorry Mr Pool, mon – pourtan ou familye avek nou.  Ou tanzantan prezan dan Lasanble.

Bon, nou ava, mon ava ganny en Mosyon pour Second Reading.

 

HON CHARLES DE COMMARMOND

Mersi Mr Speaker.  Bonzour Minis ek ou delegasyon.  Mr Speaker, anba Order 64(2) lo Standing Order, mon oule move ki Civil Status (Amendment) Bill, 2018 i ganny lir en Dezyenm Fwa.  Mersi.

 

MR SPEAKER

Ok.  Manm pour segonder?

 

HON SEBASTIEN PILLAY

Mr Speaker, mon segonn sa Mosyon.

 

MR SPEAKER

Mersi Onorab Pillay.  Mon ava demann Minis pour prezant son BillMinister go ahead.

 

MINISTER MYRIAM TELEMAQUE

Bonzour Mr Speaker, mersi.  Bonzour Leader Lopozisyon.  Bonzour Leader Zafer Gouvernman e tou dimoun ki a lekout.

Mr Speaker, Lalwa ki gouvern lanrezistreman nesans, lanmor, sanzman non e selebrasyon maryaz – setadir Civil Status Act, i an egzistans depi 1883.  Pandan tou sa letan, lanrezistreman sa bann levennman solannel in ganny fer dan Lofis Leta Sivil ziska bann lannen 1980, letan Sesel ti komans akeyir maryaz etranze, swivan larive en seri letablisman touristik tel parey sa bann lotel ki’n ganny konstri dan rezyon Nor Mahé.

Sa kalite devlopman an konbinezon avek zoli map laplaz e en peizaz seren, i fer ki Sesel in kapab kontinyelman ganny promouvwar osi koman en destinasyon kot touris i kapab vin marye.

Annefe sa marse etranze in devlop dan en fason tre satisfezan sorti 465 maryaz dan lannen 2000 pour al 510 an 2005, 981 an 210 e 2,321 lannen pase.

Dan lansanm nou konstate, ki dan sa detrwa lannen pase nou pei in konn en logmantasyon dan lakantite maryaz ki’n ganny anrezistre – sirtou an se ki konsern etranze ki vin marye Sesel.

Sa lamannman dan Civil Status Act 1991 ki nou pe anmenn devan Lasanble Nasyonal ozordi, i annan pour bi reponn bezwen e lekspektasyon piblik ki’n evolye pandan sa bann dernyen lannen; rektifye defayans ki egziste an se ki konsern koleksyon peyman asosye avek ladministrasyon maryaz sivil e osi regilariz sityasyon konsernan peyman allowance pour zofisye ki administre maryaz.

Propozisyon i demande ki Lartik 76(1) e 76(2), i ganny amande e ki en Clause i ganny entrodwir, pour permet Minis konsernen inisye direktiv e Regilasyon, ki ava asir lenplimantasyon efikas bann provizyon anba sa Lalwa.

Lartik 76(1) alors pou ganny amande pour ki okenn demann pou selebre en maryaz sivil dan en lokasyon prive, i ganny akonpannyen par peyman en fre ki pour al dan Consolidated Fund.

Lamannman i fer provizyon pour sa zofisye ki’n administre maryaz, ganny peye en allowance pour sak maryaz.

Lartik 76(2) i senpleman endike ki allowance ki sa zofisye pou ganny peye, pa pou gannyen tenir an kont letan son benefis pour ganny determinen apre son retret.

Lartik 164 e 165 i en adisyon ki parey mon’n dir oparavan, pour donn Minis sa manda pour inisye okenn direktiv, Regilasyon oubyen mezir enkli bann fre e allowance ki devret ganny peye anba sa Lalwa.

Mon ti a kontan soumet sa lamannman devan Lasanble e demann tou Manm pour donn zot sipor.  Mersi Mr Speaker.

 

MR SPEAKER

Mersi Minister.  Bon, deba i ouver lo merit e prensip zeneral sa Bill.  Okenn Manm ki oule entervenir?  Yes Onorab Esparon

 

HON REGINA ESPARON

Mersi Mr Speaker.  Bonzour Minis ek ou delegasyon.  Bonzour tou dimoun a lekout.  Mr Speaker, mon pou donn sipor sa lamannman dan Lalwa Civil Status, ki pe propoze ki sa larzan ki ganny kolekte atraver rann sa servis pour marye 2 dimoun par en zofisye dan en landrwa prive, apard kot Leta Sivil li menm.  Sa lamannman, parey Minis in eksplike pe regle serten iregilarite ki annan ozordi.

I vre ki ozordi napa en pri fiks pour donn sa servis an deor lofis Leta Sivil.  Mon konnen ennler zot sarz R1500, ennler zot sarz R2,000.

An menm tan ki mon pe, an menm tan ki nou pe met sa Regilasyon Mr Speaker, nou bezwen pran kont ki sa zofisye souvandfwa i donn sa servis an deor son ler travay.  E par fwa i bezwen deplas lwen pour li al kot sa kliyan.  E souvandfwa ler i ariv kot sa landrwa ki i pe al rann sa servis, pa tou dimoun ki’n pare.

I bezwen esper en ta letan – si nouvo marye in pare, nouvel marye pa ankor arive, oubyen zot bezwen esper temwen.

Pour bann dimoun ki marye lo zil, parey Silhouette – nou’n vwar poudir Minis in dir poudir i annan en logmantasyon dan bann touris ki’n marye.  Silhouette, Ile au Cerf – ki pri zot pou sarze?  Oubyen mazin pour sarze?

Si i annan en laranzman spesyal atraver lofis ki pou ganny fer, la osi Minis i a bezwen pran kont letan ki balans bann pri ki zot pou pey sa zofisye.

Alor sa reminerasyon ki pou ganny, ki pe ganny propoze pour sa zofisye, i bezwen enn ki ankourazan, ki reflekte valer pour sa servis e letan ki sa dimoun pe donnen pour sa servis.

Minis, kekfwa dan ou larepons ou a dir nou si pou annan en pri fix oubyen si pou depan lo distans ki sa zofisye pour deplase.  Si zot pe osi mazin ofer sa servis par rezyon – kot ou annan en zofisye ki li i kouver en rezyon e en lot i deplase pour en lot rezyon.

Mr Speaker, sa zafer maryaz dan lakour la, i en koutim ki lontan i egziste dan kiltir Seselwa.  Lontan en dimoun i dir ou, mwan mon prefere marye O Gref, ki savedir i al kot Civil Status.

Oubyen en lot i dir ou, mwan mon swazir marye o salon, kot i fer sa maryaz se li – en koutim ki bokou i ankor swazir pour swiv.

Me nou’n osi vwar ki bokou etranze i prefere pa marye kot biro Leta Sivil – la osi i bezwen annan en distenksyon lo pri ki en etranze i peye e pri ki sa servis, ki en Seselwa i peye pour sa servis.

Lartik 76(2) i fer resorti ki sa reminerasyon ki sa zofisye pou gannyen, pa pou ganny kalkile dan pansyon oubyen ler i ganny kalkil son benefis retret.  Petet Minis ti a dir nou si sa zofisye pou ganny sa benefis o mwan oubyen sa pou ganny azoute lo son saler koman en allowance.

Akoz apre tou nou bezwen rekonnet ki sa bann zofisye in rann en kantite dimoun faver atraver sa servis ki zot ti pe ofer.

Mon konnen i annan dimoun ki prefere marye se li, oubyen ki i pe fer e, oubyen kot i pe fer sa resepsyon olye al kot biro – pour en kantite rezon.  Kot biro i sitye i pa tro apropriye.  Mon pa konnen avek nouvo laranzman biro ki mannyer i ete – akoz mon pa ankor al laba.

Lontan ou bezwen debarke sepa ki kote, marse pour ariv kot sa biro kot tou dimoun pe get ou – ou konpran mwan?  Sa osi i bann lenkonvenyans, Minis.  E bokou i swazir pou marye se li an prive.

Avek sa 2 pti mo Mr Speaker, mon pou donn mon sipor pour sa lamannman. Mersi.

 

MR SPEAKER

Mersi Onorab Esparon.  Onorab De Commarmond

 

HON CHARLES DE COMMARMOND

Mersi Mr Speaker.  Mr Speaker, sa Prozedlwa ki devan nou i en Prozedlwa ki senp.  I pe met azour serten keksoz ki pe arive avek nou Civil – Lalwa Civil Status, sirtou kot i konsern kestyon marye, maryaz-o-salon parey nou pe dir ouswa marye an deor biro Civil Status li menm.

I enportan fer resorti Mr Speaker, nou Lalwa Civil Status la, i enn bann pli vye Lalwa ki nou annan – depi 1883 in komanse.  E sa letan sa bann keksoz ki ladan i ganny amande o fir amezir – in annan plizyer amannman, so, nou kapab met sa koumsa, pandan bann lannen ki ekroule.

E dernyen amannman ti an 1991, e i en Lalwa ki pa toultan touse pou fer bann sanzman lezer.  I ganny touse pou fer bann sanzman en pe serye.

Me la ki nou pe vwar, sa kestyon maryaz la – si en dimoun, Seselwa, i desann i vin o biro laba, O Gref parey nou dir, i vin marye, i napa nanryen ki peye – i free sa, en servis Gouvernman i donnen.  E i fer ant 8er – 4er an prensip.

Me si ou pou fer kot ou, o-salon parey in ganny dir, la, ouswa dan en lot landrwa, i apel still o salon menm konmsi, dan, me an deor biro, si i ganny fer an deor biro – i annan en larzan ki ganny peye.

Prezan i annan diferan kalite maryaz.  Nou annan pour etranze – etranze ek etranze.  Vedir msye, madanm, tou etranze.  I annan de ka msye etranze ouswa madanm etranze e lot i Seselwa.

Apre ou annan kot tou le 2 i Seselwa.  So, i tousala, i dan diferan kategori ki i ganny servi.  Be prezan ler ou pe fer maryaz an deor biro, sa zofisye Civil Status ordinerman i deplase pour al fer sa maryaz laba.

Parfwa osi, en dimoun i kapab deside – 2 dimoun, letan pe marye o-salon, savedir an deor biro Civil Status, swa kot sa lotel, swa kot i pe organiz sa maryaz, i kapab ki sa zofisye osi i sorti pandan ler travay osi pou al donn sa servis laba.

E se la kot i annan en servis, en peyman ki ganny fer – en larzan ki ganny peye.  E Lalwa Civil Status li menm i tel ki, i dir ki ou bezwen pey avek sa Zofisye Civil Status.  E sa larzan letan i ganny peye, i pa ale dan kont Gouvernman direkteman e la dan sa fason ki i ganny fer – i annan serten keksoz ki pa annord.  Se sa ki sa Lalwa pe fer, pe met tousala annord.

`       Me la nou war poudir sa bann zofisye ki fer, donn sa servis la, i pou perdi – i pou perdi signifikaman.  E dan sa loptik Lalwa pe demande ki Minis i fer Regilasyon an deor sa Lalwa – well, an konformite avek Lalwa, i fer Regilasyon pour regilariz sa ki mon pe koze la.

E dan sa Regilasyon nou demann Minis pou fer sir ki i get sa bann zofisye Civil Status byen – napa bokou zot sa bann Zofisye Civil Status ki fer sa.  I annan anviron en 5, en 6 konmela la, me i kapab ogmante definitivman.  Nou kapab dir Minis, letan i pe revwar la, i fer Regilasyon, get posibilite pour ankouraz bann Zofisye Civil Status, savedir si i annan plis zot ki kapab donn sa servis, zot a ganny en mwenza zot osi – regard, revwar zot package pour zot kapab esey pa perdi, ouswa perdi minimonm posib dan sa sans la.

Nou pe alors demande ki sa Prozedlwa ki devan nou i ganny fer dan sa lespri.  E ki pour regilariz sa pratik ki nou pe koze la e ki larzan ki ganny fer, ki ganny peye – akoz diferan keksoz, par egzanp si, en konparezon MASON i pe organiz sa maryaz la, sa Zofisye Civil Status i ale, be MASON i kapab, ouswa sa lorganizasyon – i annan dimoun ki konmela i donn sa servis prive li, alors i sarz sa ki pe marye en serten pri.

Prezan i pey Civil Status en lot pri.  Konmsi mon pa dir i annan dezord ladan mwan, be solman ki mannyer i ete, i neseser pou revwar li, fer li byen an konformite – akoz sirtou sa bout kot ou pou pey Leta.  Si Leta i pe donn ou, i fer ou peye.  An prensip, si ou pou fer maryaz an deor biro, mon krwar i R50.  Sa i depi toultan in R50 – en bann, bann lannen.  Be sityasyon lavi dan Sesel in sanze, e mon krwar pa si i pou neseserman vin R50.  Petet an tenir kont, par kont i ganny peye plis letan sa dimoun – i annan dimoun par egzanp i pe fer prive, i kapab sarz li en lot pri, i annan ziska R8, 9, 10mil  i ganny sarze sa zafer.

E prezan sanmenm sa ki nou pe dir, ler i ava annan Regilasyon, tou sa bann keksoz i a ganny met en lord ladan.  nou a gete kekfwa i pou monte, i pou sorti R50, i ava kapab mont en pti pe.  En fason Gouvernman i kapab anmas osi en pe larzan pour kapab al dan fon Gouvernman li menm, dan Consolidated Fund, e non pa al direk avek sa bann dimoun.

Avek sa mon krwar i kler, i en straight forward Prozedlwa.  Nou demande ki nou vot an faver pour nou kapab met sa an azour.  Mersi.

 

MR SPEAKER

Mersi Onorab de Commarmond.  Onorab Ramkalawan

 

HON WAVEL RAMKALAWAN

Mer Speaker, mersi.  Bonzour Minis ek ou delegasyon.  Mr Speaker, mwan avan mon koze, mon ti ava kontan si Minis ti a kapab dir avek nou – konbyen zot pe mazinen pour met lo zot liv?  Parski sirman pour zot anmenn en Lalwa ki pou regilariz en keksoz, i bezwen ki deza zot annan en lendikasyon konbyen en maryaz pou koute?  Konbyen sa Civil Status Officer pou gannyen?  Mon ti ava kontan ganny en lendikasyon e sa i pou determin sa ki mon pe dir.  Mersi bokou.

 

MR SPEAKER

Bon, eski nou pa dan Staz Komite?  E…

 

HON WAVEL RAMKALAWAN

Mr Speaker, zis en keksoz ki mon ekspekte ki Minis ti ava’n dir dan son prezantasyon pour ede.

 

MR SPEAKER

Minis donn nou en lendikasyon pour diriz deba.  Go ahead Minister.

 

MINISTER MYRIAM TELEMAQUE

Mr Speaker, mersi.  Mersi Leader Lopozisyon.  Pour le moman nou pa kapab komet nou lekor konbyen nou pou donnen.  Nou bezwen fer diskisyon avek bann DMCs.  Selman nou’n kapab asize diskite – nou krwar nou pou fer li dan en range 1500 a 3,000.  Nou pa ankor tonm lo en figure egzakt.  E nou bezwen at least selman tonm lo en figure ki rezonnab akoz nou bezwen mazinen i annan nou Seselwa osi ki marye.

 

MR SPEAKER

Mersi Minis.  Go ahead Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker, mon konpran ki, mon konpran rezondet ki’n ganny anmenn devan e mon konpran osi ki mannyer sa 2 Manm in koze.  E mwan osi tou mon pou koz dan sa direksyon.

Mwan mon siport sa bann Zofisye Civil Status ki fer sa travay.  Mon siport zot akoz zot bann dimoun ki ed ou.  Se bann dimoun ki tre zantiy e se bann dimoun ki ede fer en maryaz, en langazman vreman serye vin gou.

Mon’n asiste bann seremoni lo plizyer repriz.  E letan mon pe dir mon siport zot, mwan mon annan en problenm avek Gouvernman vin regilariz tou bann keksoz.  Mwan mon dir si en dimoun pe debourye atraver sa responsabilite ki i annan, be les debourye!  Les li debourye!

Akoz ki aprezan sa larzan ki sa dimoun i gannyen i bezwen al dan Consolidated Fund?  E apre sa, zot ava determinen konbyen i pou gannyen?  Mwan mon krwar ki wi, i normal pour ki i annan serten keksoz – me selman nou bezwen regarde ki mannyer, spesyalman dan sa staz kot nou ete la, kot ou annan ou bann Zofisye Civil Status ki pe pran zot wikenn, ki en Sanmdi apre midi kan zot sipoze avek zot fanmir, nenport ler – parske zot, zot met zot a dispozisyon sa bann dimoun ki pe marye.

Parfwa aswar tou, zot ale e tousala – alors se sa ki mon pe demann mon lekor en kestyon.  Akoz ki i bezwen annan bann kontrol lo ki larzan ki zot pou anmase pour al dan Consolidated Fund?

Mon pa tro dakor avek sa.  Parski ozordi Sesel, ofet Mr Speaker, mon kapab dir avek ou, enn bann desizyon letan mon ti ankor lo bann Komite Legliz Anglikann – lefe ki en touris i vin Sesel, i tonm anmoure avek Anse Cachee, Intendance, i tonm anmoure avek se pa ki lot landrwa, i dir avek ou i anvi marye laba.  E alors Legliz Anglikann ti tonm lo en prensip ki pou dir maryaz nou pou fer li dan Legliz.  Letan ou fini dan legliz, al Anse Cachet ou, al tir ou bann portre Anse Cachee ou, al tir ou bann portre nenport ki landrwa ki ou anvi.  E malerezman, pour nou bann Civil Status Officers pour le moman kot sa touris i tonm anmoure, si in fer bann laranzman avek son Lazans ki pe organiz son maryaz, sa Civil Status Officer i trouv li pe al laba li.

E alor, nou bezwen rekonnet sa langazman, sa devosyon ki zot annan.  E letan mon pe regard lo Internet, kot i pe donnen bann diferan pri – par egzanp, bann diferan lotel, parske sa i en bon biznes, par egzanp Hilton i dir avek ou en maryaz in Paradise i kapab kout ou apartir 870 Liv Sterlen.

Constance Lemuria, 1720 Liv Sterlen,

Coco-de-Mer li i en pe pli bon marse,

550 Liv Sterlen, Kempinski 1,060 Liv Sterlen, Sainte Anne 590 Liv Sterlen, Four Seasons 2,230 Liv Sterlen,

Banyan Tree 1470 Liv sterlen.  –

Sakenn i annan son rate.  E i annan en lot lakonpannyen ki mete, par egzanp pour La Digue, pour Mahé ordinerman i 1,050 Dolar.

Be la zot pe donn en discount 890 e sa i enkli sa Government Service and Administration Expenses, Official Marriage Certificate e Apostille by the Supreme Court.  La Digue sa lakonpannyen li i donn $1250, selman la i lo en discount 1,090 – Praslin $1,090. Alor, i annan en bon biznes la – e zot pe fer tousala.

Me selman mwan mon pe retourn lo sa zofisye ki al fer sa bann maryaz.  Kot 1(B), sa nouvo 1(B), 76(1)(B) – The fees received by an officer shall be paid over to the Consolidated Fund and the officer shall be entitled to receive an allowance, per marriage, as may be prescribed. 

Mwan mon ti ava kontan ki i mars en pe lot fason – ki pou dir sa zofisye li i ava annan son fees e ki Gouvernman li i ava met en keksoz minimonm.  Sa mon pe koz an term pour – les dimoun debourye!  I mean sa bann dimoun parey nou pe dir, napa bokou zot ki pe fer sa travay.  Par egzanp, Gouvernman i ava met en fee ki sa zofisye i bezwen peye pour li al fer sa maryaz.  Sepa dizon R200 – R200 kot i ava pran bann liv neseser, i ava al laba e fer son maryaz.  Li sa dimoun si avek sa lazans ki pe fer sa maryaz – dizon i ganny li $100, €100, 150, ensidswit – be annou pa antre dan sa bann zafer.  Parski Gouvernman konmsi i tro oule kontrole.  Les sa bann dimoun debourye.  E mwan mon anvi met sa dan en fason for devan Gouvernman.

Ou konnen, i annan diferan pei ki pran diferan tradisyon.  E mwan ofet mon ti panse ki lo Mahé nou ti kapab donn en pe plis lenportans Biro Maire Lavil.  Kot par egzanp, letan ti a pe renouvle Lakour Siprenm, mon ti mazinen ki poudir sa par egzanp, la dan milye lavil, ti a kapab vin Lofis Maire Victoria.  E ki bann maryaz sivil ti a ganny fer la.  E la i annan parking – i annan parking la, ti pou gou parski parfwa dan bann pei letan ou vizite – mon konnen La France sa i en tradisyon, La Réunion ki swiv of course from – kot i gou pour ou war en nouvo/nouvel marye byen abiye, kekfwa ti a zoli pour zot tir en portre avek L’Horloge dan background, ki konmsi pour nou etabli en serten tradisyon.

Sa osi tou i ti a kapab vin, form parti nou kiltir.  E kot parey nou pe dir, bann dimoun apre zot ti a kapab al partou kote, ensidswit.  Parski maryaz i osi annan en eleman piblik avek li, i annan en eleman piblik.  Letan ou afise, sa lafis i la piblik li.  Tou dimoun i konnen ki poudir Pierre Paul pou marye avek Pierreline Paulette.  Parski i dan biro piblik pour tou dimoun war.

Be alor, kisisa ki anpes nou pour nou al dan direksyon kot bann maryaz sivil – mon pe met sa koman en posibilite byensir, tout an respektan swa bann dimoun.  Me selman si nou ti anvi ki i vin form parti en kiltir, nou ti ava kapab servi plis Biro Maire Lavil Victoria e develop sa kiltir.

E mwan mon plis ki sir ki i for posib ki bann touris ti pou annan en, zot ti pou kontan serten, sa tradisyon.  Parske letan mon regard Festival Kreol, letan zot fer maryaz tradisyonnel, nou war bann touris zot byen enterese avek sa.  Ki mannyer mon konpran, in menm annan touris ki’n marye dan maryaz tradisyonnel pandan Festival Kreol.

Mwan mon pe zis sey regarde ki mannyer, olye zis nou chop, chop, chop – pey isi, pey lab, soz, ensidswit.  Nou sey regarde dan sa sityasyon kot zisteman nou pe annan plis touris ki pe marye, ki Seselwa, ki mannyer nou kapab servi sa loportinite pour nou ede develop nou kiltir.

An menm osi ede pour ki plis dimoun i kapab ganny en keksoz ladan.  Parske an menm tan osi, nou pe koz lo lavil Victoria – Biro Maire Lavil Victoria.  Mwan mon pe koz osi an menm tan osi, en pti git plis lavi dan sa lavil.

Si par egzanp, sa touris letan ti pe soz dan sa package, ti annan en pti band kanmtole ki ti pou kapab vin zwe, ti pou gou 10er bomaten ou pe pase, oubyen 3er apre midi ou pase dan lavil, en pti band kanmtole pe, en pti laserenad, sa touris in marye – i ti pou ede konmsi pou donn en pe plis lavi dan nou lavil Victoria.

Alors petet mwan mon lespri i en pe romantik, mon lespri i en pe – ki mannyer nou kapab an menm tan osi fer li atiran?  Ki petet bann dimoun letan – e maryaz ki pe kontinyen desann, letan zot ava war tou sa bann keksoz, kekfwa i ava ankouraz en pe nou bann zenn.

Olye zis mazin fer zanfan, zot ava dir – be mwan osi tou mon anvi pas la!  Parey nou ankouraz nou bann zanfan dan zot ledikasyon, sa osi tou ti ava en soz ki ti pou dir – mwan osi tou mon ti ava kontan en zour pe mars bwadsou – bwadsou – en pti band kanmtole pe tap en pti lanmizik, tou bann dimoun pe regard mwan, (hmm)?  Konmsi nou pa ti a kapab ede konmsi pour nou donn en pe lankourazman?

Parski si nek zis nou kontinyen sek, sek, sek, i pou – sa kiltir maryaz i pou kontinyen desann.  Me si nou pe donn li en pti keksoz azoute, en pti valer azoute, i ava ede anmenn plis sa romantizm – sa romanticism avek sa fason viv, sa seremoni i ava kapab ede.

Alor mwan Mr Speaker, mon pou demande ki, petet sa 1(b) – mon konnen mon pa’n fer okenn, mon pa’n propoz okenn lamannman.  Me selman mwan personnelman, sa 76 (1)(B)The fees received by an officer shall be paid over to the Consolidated Fund and the officer shall be entitled to receive an allowance, per marriage, as may be prescribed – sa mwan personnelman, mwan mon pa dakor avek.

Akoz mon krwar ki poudir dan sa staz kot nou ete, dan sa travay ki zot pe fer, les sa bann zofisye zot osi tou debourye.  Les sa bann zofisye zot osi tou ganny en keksoz e mon krwar i ava ede.

Avek sa detrwa parol Mr Speaker, mon ava ekout larepons Minis.  E, parski mwan Mr Speaker, ou konnen – ou, ou konn mon fason panse.  Mon krwar parfwa dan nou pei, dimoun ki pare pour li al en pti git an plis, pour li ganny en pti 5sou, parfwa se sa bann dimoun ki ganny penalize, ki ganny demande pour pey plis.

Tandis ki serten dimoun ki pa pare pou fer sa, bann dimoun ki plito pe viv lo Welfare, ensidswit, zot, zot pli byen pase.

Alors, se sa mon largiman, se sa mon soumisyon – sa i lafason ki mwan mon santi e mon met sa lo latab e mon demann dimoun pou fer zot prop analiz, fer zot prop refleksyon lo sa ki mon pe met devan lo latab.  Mersi bokou Mr Speaker.

 

MR SPEAKER

Mersi Onorab Ramkalawan.  Mon pou donn laparol Onorab De Commarmond parey mon’n fer avek Onorab Ramkalawan pou ganny leklersisman.  Onorab De Commarmond

 

HON CHARLES DE COMMARMOND

Wi, Mr Speaker – zis en leklersisman swivan sa ki’n ganny dir par Leader Lopozisyon.  Eski Minis i kapab, ava nou kontinyen, konmsi pou fasilit nou ki mannyer nou pou kontinyen, si Minis i kapab dir nou, aktyelman la, ok, nou konn pour Seselwa – be sirtou kot i konsern pour etranze, sa Zofisye Civil Status i ale, i fer sa maryaz, i ganny en peyman, i annan en bout ladan ki al pour Gouvernman, i al – ki mannyer i ete konmela la?

Akoz sa ki’n ganny propoze i fer en kantite sans.  So, si nou konnen ki mannyer i ete konmela la, pour nou kapab vwar ki mannyer i kapab enfliyans nou desizyon lo la.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mersi Mr Speaker.  Mr Speaker, pour le moman dapre lenformasyon ki mon annan sorti kot Prensipal Civil Status Officer, en koup etranze i anvi vin marye Sesel, i annan bann DMCs ki fer kontak avek bann zofisye, e en pri i ganny set pour sa maryaz.  E Civil Status i donn zot en resi e maryaz i al ganny fer.  Gouvernman pa ganny nanryen ladan.  Maryaz i ganny fer dan ler travay, i ganny fer apre 4er, i ganny fer dan wikenn.  Mersi Mr Speaker.

 

MR SPEAKER

Mon ava pas laparol avek Onorab Sebastien Pillay.

 

HON SEBASTIEN PILLAY

Mersi Mr Speaker.  Bonn apre midi tou dimoun.  Mr Speaker, Prozedlwa devan nou i enn ki, i enn ki ase senp dan li menm akoz mon krwar sa ki i pe fer se ki i pe regilariz serten fonksyon entern ki Biro Civil, ki nou Biro Leta Sivil i fer.  Mon krwar selman a priyori nou bezwen met en perspektiv 2 keksoz.

Premye keksoz se ki, i annan en connotation legal ler en dimoun i marye a Leta Sivil.  E sa mon krwar fodre nou pa bliye.  Sa i aplik pour etranze koman Seselwa.  So, i enportan ki malgre ki nou oule propoz bann nide inovatif, nou pa retir sa lenportans legal ki asosye avek en maryaz a Leta Sivil, en maryaz ki apre i pou konekte avek bann size leritaz, bann size propriyete, ki mon krwar Onorab Georges i kapab klarifye pli byen.

Bokou dimoun i anba lenpresyon ki si ou marye legliz, i annan menm connotation, me i pa le ka.  Set en maryaz ki ganny fer a Leta Sivil ki vreman enstitye sa laspe legal dan sa relasyon ki’n ganny formen ant sa 2 dimoun, e sa nou pa kapab bliye.

E ozordi nou pe vwar, si mon resers i bon, i byen, Minis i kapab koriz mwan – nou pe vwar bokou plis dimoun pe marye a Leta Sivil avan e apre bokou detrwa lannen pli tar ki zot pe al marye en maryaz kot zot fer en seremoni maryaz, selebre zot maryaz legliz.  E sa i en laspe enportan letan nou pe diskit sa size.

E baze lo sa, nou bezwen osi mazinen poudir i annan sa eleman privacy ki asosye avek en maryaz.  E parfwa malgre ki sa maryaz in afise, sa 2 dimoun ki pe marye, zot osi souvandfwa prefere pour selebre sa maryaz dan privacy swa zot lakour, oubyen dan en landrwa ki zot, zot in dezinyen koman en landrwa ki zot oule a marye.

E mon krwar sa i enportan osi ki nou pa perdi devi sa lenportans ki sa i annan, kot nou donn sitwayen – akoz nou pe koz pour Seselwa la, nou sitwayen loportinite pour zot swazir kote zot oule fer zot reinyon.  E parfwa sa landrwa kot zot marye osi, zot annan en pti resepsyon kot lakour pour, kot zot envit detrwa zanmi, detrwa zanmi pros.

Nide ki nou annan en maryaz Leta Sivil ki ganny fer dan Biro Maire Lavil, i pa en nide ki nouvo.  I en nide ki’n la mon rapel depi Mrs Jacqueline Moustache-Belle ti ankor Maire Lavil.  Me i en nide i pa ti, ki ti ganny en pe difikilte akoz stati legal ki sa Lofis Maire Lavil li menm li i annan.  Akoz dan bokou pei, par egzanp La France e menm La Réunion, bann dimoun i selebre zot maryaz dan La Mairie – dan sa landrwa kot i annan en Maire Lavil.  E sa Maire li i annan en rol administrative legal.

E sa ozordi malerezman dan nou sistenm legal i pa le ka e sa i pou bezwen ganny etablir – whether prezan ki nou pou annan bann maryaz ki pou ganny selebre dan Biro Maire Lavil.  Mon krwar i annan en travay ki Gouvernman pe fer pandan detrwa lannen, e mon krwar i annan serten lavansman lo sa.  E malgre sa, nou pa devret mon krwar, a okenn moman restrikte ki en dimoun i bezwen marye dan en landrwa spesifik.  Akoz mon krwar sa pou tir en pti pe sa kiltir ki nou annan, kot parey lontan, kot ou fer Lasal Vert kot ou lakour, kot ou marye – mon krwar sa i en keksoz kiltirel ki anndan nou.

Prezan lo lot kote osi, nou’n vwar poudir pandan sa bann dernyen lannen in annan en logmantasyon lakantite etranze, viziter ki vin Sesel, ki oule marye Sesel.  E zot fer sa pour bann rezon ki Minis in dir.

Me enn bann rezon prensipal ki zot fer sa set akoz bokou dimoun ki vizit Sesel, i santi ki Sesel i en pei stab.  Nou Seselwa, nou en bann dimoun akeyan, nou en bann dimoun tre modest e nou pare pour nou ede souvandfwa letan dimoun pe selebre sa bann maryaz.

E sanmenm sa rezon akoz nou’n vwar poudir pandan sa bann dernyen lannen osi, i annan bann pti – si ou kapab apel zot antreprener lokal, ki zot, zot in komans zot pti biznes, kot zot al met zot pti dekorasyon lo lans.  Dayer, mon fek pase pyer North East Point, ti annan enn tre zoli.  Kot ti annan en koup ti pe marye lo lans Carana.

So, sa i en keksoz ki arive ozordi e sa osi nou pa kapab deny sa loportinite.  E mon krwar ler nou pe re-get sa Lalwa, mon krwar sa ki bon ek sa Lalwa se ki i pe restrikte son lekor lo pou regard bann fonksyon entern ki Departman Civil Status i annan.

Me sa pa vedir ki nou annan, ki napa serten kestyon ki nou bezwen raise vizavi sa Lalwa.  E mon premye kestyon ki mon pou raise vizavi sa Lalwa i konsern en provizyon dan Lalwa ki koz kot sa bann dimoun i marye e kot sa zofisye i ete.

E sa mon pa tro, tro ganny en konpran ki nou pe sey dir la.  Dan sa Lalwa nou dir poudir kot ler dimoun i anvi marye, kot zot anvi selebre zot maryaz, swa i en lakaz, swa i en landrwa, me si sa landrwa i tonm dan distrik kot sa zofisye, dan distrik sa zofisye – so, sa mon pa konpran.  Eski i en distrik ki sa zofisye i assign to?  Oubyen i en distrik kot ozordi nou’n dir par egzanp, tel zofisye ale, al selebre maryaz dan sa distrik?

Akoz si nou pran li lot fason Mr Speaker, lenterpretasyon ki sa Lalwa i pe donn nou e Attorney Zeneral i la, petet i kapab koriz mwan – lenterpretasyon ki i pe donn mwan, se ki ou pe dir poudir si par egzanp en maryaz pe ganny selebre Glacis, i annan 2 lenterpretasyon.

Premye lenterpretasyon se ki, si en zofisye alors ki reste Glacis ki pou bezwen selebre sa maryaz.  E parey nou konnen, i annan 2 fason kot nou regard distrik.  I annan sa size Civil Status Districts ki deal avek Central and South.

Apre i annan sa size Distrik Elektoral li menm – ki deal avek nou bann distrik ozordi ki ganny reprezante par bann MNA dan Lasanble.  So, mon ti a kontan ki Minis dan ou summing-up, ou fer nou kler lo kwa ki sa pe sey dir.

Akoz pour mwan i pa kler ozordi si ou pe dir mwan poudir sa zofisye ki dan sa distrik – eski alors par egzanp, si Mrs Marietta ki en distrik – mon servi son non akoz Mr Speaker, mon annan – se Mrs Marietta ki ti fer mon maryaz.  E mon krwar in last.  Mersi.

 

(Interruption)

 

HON SEBASTIEN PILLAY

Wi mon’n marye, mersi.  Felisitasyon, en?  Ou war mon kontan Lasanble Nasyonal, Mr Speaker.  Zot toultan pare pour donn nou sa lankourazman dan nou lavi.

Mr Speaker, si par egzanp, sa madanm i trouv li dan distrik, dan en distrik par egzanp, Cascade, sa koman en Distrik Elektoral – mon pa krwar i annan en kantite dimoun, i annan bann Seselwa ki selebre zot maryaz Cascade.

Me eski nou annan bokou etranze oubyen bann DMCs ki al selebre en maryaz Cascade?  Lefe i reste ki non – lamazorite dimoun i selebre zot maryaz par egzanp, dan bann landrwa touristik kot i annan sa laspe touristik avek.  E se la kot mon pa ganny en konpran si nou pe dir ki dan, parmi sa bann 5 zofisye, zot pou kapab al partou – dan tou bann landrwa e selebre sa bann maryaz?  Sa i mon premye pwen ki mon ti a kontan Minis i klarifye.

Mon dezyenm pwen ki mon ti a kontan Minis i klarifye, sa pwen in ganny souleve, se kot i konsern allowance.  Eski sa allowance pou dan okenn fason pe fer keksoz vin pli ekitab?  Pou fer ki nou annan 5 zofisye, tou le 5 zofisye pou ganny menm allowance, oubyen pou fer ki nou pou annan serten derogasyon vizavi sinyorite?  Sa ki mon oule asire mwan, se ki ozordi nou annan bann zofisye ki pe fer sa, nou pa pe afekte sa bann zofisye par regilariz keksoz e fer ki bann prosedir administrativ entern, mon konpran i vin pli kler, i ganny frame anba Lalwa, wi – me selman eski nou pa pe dan sa konteks, dezavantaz sa bann zofisye?  So, petet Minis ti ava bon si ou ti a kapab klarifye sa pour nou.

E mon lot pwen i konsern the mode of conveyance – lafason ki sa dimoun, sa zofisye pou ariv kot sa maryaz.  Dan sa Lalwa in prevwar ki i pou ganny allowance ki pou ganny peye.  Posibleman prezan sa allowance li i pou ganny mete ansanm dan sa Consolidated Fund. 

So, eski ler nou pe koz lo sa allowance ki sa zofisye pou gannyen, i pou enkorpor son allowance ki i pou selebre sa maryaz?  Me i pou osi enkorpor allowance ki sipoze ganny peye avek sa zofisye par lefe ki’n fer sa deplasman?  Dizon en maryaz pe ganny fer kot Lemuria, Praslin.  Oubyen en maryaz pe ganny fer kot Four Seasons oubyen Kempinski – sa zofisye pe deplase pou al Kempinski, eski sa pou enkorpor sa morso dan sa Lalwa?

Mon dernyen pwen Mr Speaker, i konsern lo sa pri ki pe ganny sarze par bann DMCs.  E mon konnen dan sa pri ki bann DMCs i sarze, parey mon’n fer referans oparavan, nou annan bann lezot Seselwa ki pe fer serten biznes ki benefisye ladan.

So mon ti a kontan ki Gouvernman i reasir nou ki nou pa entrodwir en provizyon restriktif ki apre i ava dezavantaz sa lot group dimoun ki’n leve, ki pe debourye, ki’n war en loportinite pour zot fer bann dekor lo lans e ed bann dimoun pour marye – ki mon krwar i en tre bon keksoz.  Me osi regard en pti pe pli lwen kot pour anpese petet ki, bann lotel i vin wise to sa e komans internally prezan ofer en one-stopsort en full package e ki totalman cut out sa bann pti antreprener ki zisteman mon war zot fer en travay formidab dan lafason ki zot ozordi pe operate.

Avek sa Mr Speaker, mon krwar pou nou Seselwa, i annan en keksoz ki nou bezwen dir ozordi apre midi, se ki nou devret fyer ki dimoun i sorti dan 4 kwen lemonn e zot vin dan nou pei pour zot marye.  I en keksoz ki nou devret fyer e i en keksoz ki zanmen fodre nou perdi.  I en keksoz ki al fer nou koezyon sosyal.  I en keksoz ki al ver stabilite nou pei.

Me i en keksoz osi ki al ver devlopman ki nou pei i fer, ki’n montre ki larestan lemonn ki nou koman en Nasyon, nou’n ariv en nivo kot bokou dimoun aletranze, bokou pei i get nou koman en model dan lafason ki nou fer keksoz.

E mon ti a kontan ki sa, nou koman Seselwa nou pran li a ker ki nou bezwen toultan maintain sa.  E fer sir ki a okenn moman nou pa perdi sa ki nou annan e sa ki nou’n gannyen ozordi.  Mersi Mr Speaker.

 

MR SPEAKER

Mersi Onorab Pillay.  Bon, mon ankor 2 Manm pou entervenir, e an vi ki mon bezwen rann lantenn avek SBC, mon aprann ki Cabinet Meeting is over, Minis nou pou retournen 2er, nou ava kontinyen.  Nou annan 2 Manm pou entervenir apre nou ava donn ou Drwa de Repons e nou ava pran bann amannman.

Nou ava fer li koumsa zis akoz nou’n run en pe an retar bomaten e nou bezwen rann SBC lantenn.  Me avan nou adjourn, mon anvi klarifye matter of privilege ki Leader Lopozisyon in leve bomaten.

An sa ki konsern sa kestyon 14 zour, ki ler en Bill in ganny aprouve par Lasanble, kot i annan konsern piblik, kot i annan konsern Manm Lasanble – mon’n ganny ankor avize par enn nou avoka ki in-house, Onorab Bernard Georges, e ankor Onorab, mersi bokou, ki’n klarifye nou sityasyon.

Dapre Order 73(b), ler en Bill i ganny lir en trwazyenm fwa, sa Bill i ganny prezante avek Prezidan o plito posib pour assent.  Napa en time limit la.  Se sa moman kot Lasanble i konpil bann amannman e i liaise avek AG’s Office, kot le 2 prezan i fer sir ki tou bann amannman ki bann Manm in leve i ganny enkorpore dan sa Bill as amended parey Lasanble in aprouve.

E ler tou bann amannman in fini, AG’s Office i anvoy sa 5 kopi kot Lasanble – Lasanble i verifye, Clerk i sinyen.  La ler i ariv dan lofis kot Prezidan, se la kot sa 14 zour i komans marse.  Se la kot Prezidan i bezwen pran 14 zour pour li assent to oubyen pour li pa ascend to kot sa Bill apre i retournen, ok? 

So, i anliny avek Lartik Konstitisyon – me vwala klarifikasyon.  Savedir sa 2 Bill la ki pa ankor, ki Prezidan pa ankor assent to, pa ankor arive kot Prezidan.  Mon konnen i annan enn ki ankor pe ale back and forth ant Lasanble avek AG’s Office.  So, napa okenn ant sa 2 lofis – ni AG’s Office, ni Lofis Sekretarya Lasanble ki an tor.  Bann prosedir ankor pe fer e sa 14 zour i ganny defini dan sa fason ki mon’n dir, okSo, vwala en pti pe klarifikasyon.

Bon, avek sa Minis nou ava – parey mon’n dir, nou ava re-pran 2er, nou ava fini avek sa amannman lo Civil Status e apre nou ava pran lot Bill lo nou Order Paper.  Bon, nou ava break e nou ava reconvene 2er apre midi.

Bon, zis en pti, sorry, en pti lanons.  Mon konnen i annan – mon ti’n demann CPA Committee pour meet, ok.  An vi ki nou pe run an retar and all that, mon pou postpone sa miting CPA.  Me i annan en miting jointlyHIV/Aids avek lot Komite pour SRHR Committee e Komite Madanm Parlmanter osi tou.  Zot pe rankontre dan Room 3.  E mon krwar zot konnen poudir i annan en azanda ase irzan.

So, sa 3 Komite pe rankontre.  Me CPA Executive Committee, nou ava schedule en lot dat.  Ok, nou ava adjourn e nou ava repran 2er apre midi.

 

(BREAK)

 

MR SPEAKER

Bonn apre midi tou Manm Onorab.  Bonn apre midi Minis avek ou delegasyon.  Mersi pou reste avek nou pour kontinyasyon sa Bill.  Mon ti a kontan osi dir en bonn apre midi tou bann dimoun ki a lekout e ki pe swiv travay Lasanble Nasyonal.  Bon, nou ava kontinyen avek deba lo sa Bill – Civil Status (Amendment).  E mon ava pas laparol avek Onorab Georges.

 

HON BERNARD GEORGES

Mersi Mr Speaker.  Bonn apre midi Mr Speaker, Minis, delegasyon, tou bann Manm Onorab.  Mr Speaker, mon pa ti annan gran lentansyon koz lo sa Bill ozordi, me mon krwar ki swivan deba ki’n annan bomaten e mon krwar ki i ava, mon krwar ki ti ava byen – mon mic pa pe marse?  Non.  Ok.

 

MR SPEAKER

Remet on micro Onorab.

 

HON BERNARD GEORGES

Bonn apre midi Mr Speaker.

 

MR SPEAKER

It’s better, no?  Go ahead

 

HON BERNARD GEORGES

I en pe feb me – bonn apre midi.  Mr Speaker, mon ekout avek latansyon bann lentervansyon avan nou ti break pour dezennen.  E parey mon ti pe dir, enn bann rezon prensipal ki mon’n pran laparol apre midi avek ou permisyon, se pou fer en meakoulpa.  Onorab Leader Lopozisyon in mansyonnen pli boner ki ti ava byen pour annan en landrwa anvil kot maryaz i kapab ganny selebre, kot en pe pli meyer ki sa ki nou annan ziska prezan.

E i vre ki Gouvernman detrwa lannen pase ti’n propoze pour ki ansyen Lakour Siprenm i vin sa landrwa.  E annefe i ti pou vin Mairie kot Maire Lavil ti pou annan son biro e dapre ds aki mon konpran, Civil Status osi ti pou la.

E dan en fason ki en pe parey dan bokou lezot pei, Mairie Lavil i vin en landrwa kot maryaz i ganny selebre.  E mon meakoulpa se mwan ki ti responsab pour fer Gouvernman sanz sa nide.  Mon bezwen met sa lo latab, e se sa rezon prensipal ki mon’n pran sa laparol ozordi.

A sa moman mon ti krwar e mon ankor touzour krwar ki sa batiman Lakour, kot mwan menm mwan mon’n travay e mon konnen bann lezot koleg dan sa Lasanble sertennman, Attorney Zeneral ki la avek nou apre midi e Onorab Clifford André, nou’n pas bokou lannen dan sa batiman.  Mon pa ti anvi vwar li vin en landrwa ki ti, vin en lot Biro Gouvernman.

Mon ti prefere ki i en landrwa ki tou Seselwa ti a kapab zwir, ti a kapab servi e se pour sa rezon ki mon’n propoze ki olye fer li vin Maire, Mairie Lavil Vitoria, ki plito i vin Mize Listwar Natirel nou pei e Mairie al dan sa lot landrwa ki ti li ganny dezinyen koman Mize Listwar.

Mon konpran santiman ki’n ganny eksprimen bomaten, ki i ti ava bon annan en landrwa kot, en landrwa apropriye, en landrwa konvenab, en landrwa smart, si mon kapab servi sa mo, kot dimoun ki anvi marye sivil i vin marye.  Mwan mon rapel mon’n marye sivil dan Biro Civil Status, Independence House – lokazyon ti zwaye me lanvironnman ti en pe tris.  I pa ti en zoli biro kot ou ti pe la marye.  Dapre sa ki mon konpran, in ganny amelyor en pe.

Me mon krwar ki pour valoriz maryaz, i ti ava bon annan en landrwa apropriye.  En dimoun in text mwan bomaten pou dir mwan, at least en landrwa kot marye avek nouvel marye i kapab debarke olye al park, travers semen dan zot zoli lenz, eksetera.

E ansyen Lakour Siprenm ti ava reponn a sa legzizans, me i pa tro tar, i pa tro tar – i annan en pti annex avek li ki pa ankor ganny servi, ki ti a kapab vin en landrwa maryaz.  Sa se pa nou ki pou deside, se Gouvernman dizour, Civil Status Department eksetera ki pou deside.

Me mon dakor avek sa santiman ki nou devret donn en servis eksepsyonnel a bann dimoun ki pe marye – marye zot dan en landrwa ki smart, en landrwa kot zot kapab ganny akse avek dan en fason senp e non pa parey i ete konmela.  E sa mon krwar i en aki ki, en keksoz ki nou bezwen aksepte.

Me nou bezwen osi aksepte ki, parey in ganny dir, bokou Seselwa ki marye, i prefere marye kot zot oubyen dan en lotel, menm zot maryaz sivil olye vin dan Biro Civil Status, dan Biro Leta Sivil.

Me mon krwar  ki osi devret aksepte ki pour la gran mazorite etranze ki vin marye isi Sesel, zot vin marye isi Sesel akoz zot anvi marye pa dan en biro, sinon zot ti a fer li kot zot – zot kontan marye lo en lans, zot kontan marye dan en zarden, dan en landrwa ki memorab.

E kekfwa si nou annan en landrwa memorab dan sant lavil, nou pou ganny en serten nonm dimoun ki pou vin marye la.  Me mon krwar ki pour sa ki konsern lamazorite etranze, zot vin Sesel pou marye dan en landrwa ki tipikman Seselwa – en lans parey mon’n dir, oubyen en zoli zarden, e non pa dan en lasal ki kapab, dan nenport ki pei.  Mon ti ava kontan avan ki mon abord size prensipal ki devan nou ozordi, fe 2 lezot pti remark.

Enn se – kestyon i ganny demande bomaten e mon krwar ki nou bezwen reponn li.  Se ki maryaz isi Sesel, se maryaz sivil ki ganny rekonnet.  Benediksyon Legliz oubyen maryaz relizye i en keksoz, i en sipleman.  Me li menm li i pa sa ki pou donn ou en stati legal maryaz.  I ti leka dan lepase kot tou bann per Katolik ek tou bann per Anglikann ti osi Zofisye Leta Sivil.  E zot ti kapab selebre en maryaz sivil an menm tan ki maryaz relizye – tel parey i arive dan bokou pei.

Me sa in ganny tire e mon krwar sa ziste rezon akoz i ti ase difisil pour mentenir en kantite rezis maryaz dan sak parwas, dan sak legliz an menm tan ki ou pe sey mentenir enn dan en landrwa santral.  E sa set enn bann keksoz santralize, i fer li vin pli apropriye.

Dezyenm keksoz ki mon ti anvi dir, e la mon rezwenn sa lespri Leader Lopozisyon bomaten, se otan ki posib annou esey pa nivle par anba.  Annou se donn dimoun ler anba zot lezel, divan anba zot lezel pour zot kapab epanouir.  E dan sa menm Lasanble mon’n deza dir ki par egzanp, an sa ki konsern taks, mwan mon napa okenn problenm ki sak Tax Officer, sak dimoun ki travay dan Departman Taks e ki anmas taks, mon napa okenn problenm pour donn zot en poursantaz.  Les zot vin milyonner, les zot vin bilyonner si nou anvi avek sa poursantaz, tan ki zot pe anmenn reveni dan kof Gouvernman.

E mon krwar sa set en keksoz ki i pou difisil pour arive, me mwan mon krwar ki i en keksoz ki – mwan mon napa problenm avek e mon krwar ki i ti ava en keksoz ki byen.

Tel parey Civil Status Officers, in ganny dir mon pa bezwen repete – ki en Civil Status Officer i en dimoun ki annan en stati, en stati legal tre, tre enportan.  E nou kapab dir o menm nivo ki Noter e o menm nivo menm, malgre ki i pa ganny rekonnet, ki bann Ziz ek bann Mazistra.  Akoz sa fonksyon ki zot deservi i en fonksyon ekstrememan enportan.

E se pour sa rezon ki bann Zofisye Leta Sivil i ganny swazir, i ganny sertifye, i ganny sworn.  Se bann dimoun, se pa nenport ki, ki kapab fer sa fonksyon – se bann dimoun ki respektab dan lasosyete.

Me an plis ki sa, se bann dimoun ki akoz nou legzizans, kot nou pe ganny 300/400 maryaz Seselwa, me 2,300maryaz etranze par an, se bann dimoun ki deplizanpli akoz sa bann legzizans ki mon fek mansyonnen toutaler, i bezwen sorti kot zot, al dan sa bann landrwa ki bann dimoun, bann etranze i anvi marye ladan.

E donk zot pe give up zot letan, zot pe give up zot Sanmdi apre midi.  E mwan mon konn Zofisye Leta Sivil ki al de maryaz an maryaz – i vini i dir ou gete, degaze, degaze akoz mon annan en lot maryaz pour al selebre!  Mon annan en lot apre pour al fer!  Ok – zot pe ganny larzan me zot pe sakrifye en serten kantite zot letan lwazir, zot pe sakrifye bann letan ki zot ti ava prefere probableman reste avek zot fanmir oubyen zot menm zot al lo en lans, al dan en landrwa, al enjoy en pe.

Me mon osi konpran Gouvernman, nou pa’n ganny dir me mon krwar ki enn bann rezon deryer sa Bill se ki Gouvernman in realize ki avek 2,300 dimoun ki pe marye e en logmantasyon ki pe arive, i en sours reveni ase konsiderab pour Leta.

E kekfwa i en sours reveni ki Gouvernman dan son loptik i krwar ki i pa devret al direkteman don pos sa bann Civil Status Officers, me i devret osi vin pour Leta.  Nou pa bezwen fer en gran kalkil.  Si sak dimoun ki marye i pey R2,000  a sa Zofisye Leta Sivil pou marye li, i annan 2,300 par an – i fer pros R5milyon.  Donk, i en sours reveni ase enportan.

E mon konpran donk swe Gouvernman lo en kote pou partaz dan sa gato.  E mon osi konpran sa pwen ki’n ganny fer bomaten par Onorab Pillay, ki i bezwen osi annan en serten legalite – akoz nou tou konnen.  I annan si mon pa tronpe, 2 Distrik Civil Status isi Mahé, oubyen 3.  Me sertennman 2 – Central avek Sid.  I annan enn La Digue, enn Praslin.  I kler ki sa Zofisye Leta Sivil ki pe marye bann etranze e ki reste dan rezyon Sid, pou marye bokou plis ki bann rezyon Santral.  Napa bokou touris ki anvi vin marye – eskiz mwan pou dir, Les Mamelles oubyen Mont Buxton, oubyen Corgat Estate.

Zot plito al marye Avani, Kempinski, Four Seasons, bann landrwa koumsa.  Alor, sa dimoun ki en Zofisye Leta Sivil dan en landrwa ki annan plis maryaz i pou fer plis reveni ki sa enn ki annan en pe mwens maryaz.

E donk si mon konpran sa Lalwa, Gouvernman i anvi anmenn en serten reglemantasyon dan sa ki zot pe fer.  Sa ki fodre pa nou fe anmezir sa reglemantasyon i arive, kot nou anvi ki Gouvernman i pran en par dan sa larzan, dan sa reveni, kot nou anvi en serten legalite parmi bann Civil Status Officers – sa ki pa fodre arive se ki nou touy incentive.  Se ki nou touy incentive en dimoun ki li i pare pour al fer 4 maryaz en Sanmdi apre midi akoz i pe ganny en larzan.  Fodre pa nou fer sa!

E nou bezwen trouv donk en formil, e mon sir ki taler dan Staz Komite nou ava trouv en formil kot Gouvernman ek sa Zofisye Leta Sivil a kapab partaz sa larises dan en fason ekitab parmi zot san ki sa dimoun ki pe sakrifye son letan i santi ki i pe sakrifye son letan pour nanryen ditou.  Akoz i pa pou fair, oubyen i pa pou fer son travay dan en fason konvenab.

Donk Mr Speaker, mon ti anvi tout en apportant mon sipor a sa Bill, akoz mon konpran son rezonnman, e mon konpran son nide.  Mon ti ava kontan ki nou reflesir en pe.  E bann kestyon in ganny demande bomaten par nou 2 Leaders.

I bann kestyon mon krwar, lenportans kapital.  Si nou ti konnen egzakteman konbyen reveni nou pe gannyen pour sa 2,300 dimoun; si nou ti konnen ki ki sa sonm ki Gouvernman ti annan lentansyon par Regilasyon, pou donn sak Civil Status Officer par maryaz ki zot selebre, nou ti ava dan en pli bon, bokou pli bon pozisyon pour nou kapab dir wi oubyen non, oubyen annou sanze, annou donn en pe plis or whatever.

Me nou napa sa bann sif devan nou e i fer nou travay vin en pti pe difisil.  E mon ti ava donk, demann avek Minis ler i pe koze taler, pou esey donn nou sa bann paramet pour ki nou kapab nou menm nou prezan deside ki mannyer nou pou balans sa 2 keksoz – partaz reveni avek Gouvernman, me osi donn sa incentive ki zot merite avek bann Zofisye Leta Sivil ki selebre maryaz.  Mersi Mr Speaker.

 

MR SPEAKER

Mersi Onorab Georges.  Onorab Churchill Gill.

 

HON CHURCHILL GILL

Mersi Mr Speaker – bonn apre midi.  Bonn apre midi Minis ek tou Manm.  Zisteman mon oule pran sa bout – mon lentervansyon i pour lo sa allowance menm.  Zis pour mwan donn en pe leklersisman akoz kekfwa i annan, nou pe krwar poudir sa bann sif ki bomaten in ganny donnen – konbyen pe koute en maryaz dan bann diferan letablisman?

Mon anvi anmenn en pe leklersisman lo la akoz sa sif la, sa i sa package ki si en dimoun i anvi vin marye dan sa letablisman, i pou bezwen pey sa letablisman.

Me selman sa dimoun ki pe vin marye sa dimoun, sa touris, pa sa ki i pe gannyen li.  Akoz dan sa package la, i annan kou parey, bouke fler, sanpanny, gato, fotografer, dekorasyon, si i annan okenn mizisyen ki sa kliyan i demande.

Alors, ler nou pe koz sa allowance, ler nou pe dir ki sa allowance ki, sa larzan ki sa zofisye pou gannyen pour al dan Consolidated Fund, apre pour li ganny allowance, i pa vreman annan bokou pou ale.

Akoz sa zofisye i ganny zis sa – si in pran li enn erdtan, trwa kar-d- erdtan pou li marye sa kliyan, i ganny peye sa li, se tou ki i pou gannyen.  E bomaten Minis in dir i pe mazinen pour negosye avek DMC – R1500 a 3,000.  Aparaman i ganny drwa zis sanmenm sa sonm ki sa zofisye pou gannyen.

So mon ti anvi zis met en pe leklersisman, en mannyer pou nou kler konmkwa pa neseserman sa dimoun pe ganny en kantite larzan akoz i pe fer sa menm si sa package i o.  Mersi.

 

MR SPEAKER

Mersi Onorab Gill.  Onorab Chantal Ghislain

 

HON CHANTAL GHISLAIN

Yes, mersi Mr Speaker.  Mr Speaker, mon pa pou long lo la akoz i annan bokou keksoz ki’n ganny dir.  Be selman mon ti a voudre mwan osi aport mon kontribisyon an se ki konsern sa zafer allowance e annan pou fer avek larzan.  E sak fwa nou koz larzan, i touzour Seselwa i konn son pos.

And toultan nou’n dir poudir, pour ou kapab konbat koripsyon, pour ou kapab konbat nenport ki keksoz ki annan, kont larzan ki dir ou larzan piblik, nou bezwen, kot an se ki konsern incentive, i bezwen la.  I vre ki maryaz ler ou marye lo Leta Sesel, it’s sa pei ki reveni i devret vin pour li.

Me selman nou bezwen pran an kont ki menm si nou pe dir ki sa travayer i annan letan ki i al travay dan son letan travay, si zot pa kapab regard dan posibilite – wi, dan son letan travay i ava ale, me selman en poursantaz i ava pran, i ava vin pour li.  Dizon par egzanp, i al son maryaz apre ler travay, i al dan wikenn, wi, i ava – konmsi si zot pa kapab al, konmsi al re-regard ankor kekfwa ki sa poursantaz still i pou annan ki pou al pour sa travayer e still Gouvernman i ava anmas son bout.  Akoz aparaman mannyer mon konpran poudir lontan ti dir poudir R50 ki pou, anyway, ki ti la pou fer maryaz an deor – ni menm R150 manke zot pa’n gannyen.  Me si i pe dir ou poudir en maryaz ki zot fer lo lans or kot zot ale ant R1500 a 3,000, dizon sa ki zot, pri ki zot pe regarde – regard ankor dan posibilite ki nou pa pe tir tou keksoz.  Pa akoz konmsi nou vwar en Seselwa konmsi i pe, in war en fason pour li gannyen, me selman nou vini nou pran tou.

Mwan mon pa krwar i tonm byen konmsi, ouswa i normal.  Akoz sa dimoun i pou, deza i pou – son nivo devouman dan son louvraz i pou desann.  Byensir i pou desann en kantite.  Par egzanp, menm si i pou dir ou poudir be foud-kwa mon pou ale?  Be plito mon kontinyen asiz la dan mon biro 8er – 4er, mon fer sa si mon pa pe ganny nanryen.

Be tout an prenon kont, nou konnen poudir sa travayer, we i pe travay 8er – 4er, i pe ganny en saler – sa i ava on top of sa ki i fer, menm si i al dan letan travay.  Konmsi ariv dan en poursantaz ki dir be ok, be sa Gouvernman i bezwen ranmase and then you, ou take sa ler ou fer li dan ou letan travay.

Me ler ou fer li dan letan apre travay, ouswa dan wikenn, still Gouvernman i a ganny en bout ladan, me selman mon konnen poudir sa travayer i pe gannyen.  Finalman i pou annan plis rannman dan son louvraz e i pou redwir sa kantite ki dimoun i pran.

Akoz letan ou dir ou pe konbat koripsyon, ou bezwen konmsi fer fason ki – sirtou si dimoun pe travay dan larzan, ou bezwen donn li incentive, ou bezwen donn li lankourazman pou li pa pran, pou li pa – konmsi fer li ki i retournen konmsi, i rann kont.

Mwan sa i mon kontribisyon ki mon ti anvi aport lo la.  Zis regard, re-regard ankor lo fason ki zot pe – ki sa bann travayer, pour zot kapab ganny zot larzan.  And ki Gouvernman osi, li osi i ava anmase.

Parske nou pe dir poudir sa liv Gouvernman ki, i pour Gouvernman, tou sa stanp and everything and se Gouvernman Sesel ki met – ki mannyer nou dir sa?  Ki legaliz sa maryaz li menm.  So, nou osi as en pei nou bezwen ranmase tou.  Koman en pei kot nou war nou bezwen anmas reveni, nou bezwen anmase.  Me selman nou pa kapab touy en keksoz ki ti deza la, menm si i annan pou fer avek nou Seselwa ki pe fer.  E enn nou Seselwa i ganny en larzan an plis lo la – ki dan en fason ki menm i pou redwir lo bidze kot Imigrasyon, olye ou ti pou al ogmant son saler.

Me selman at least li, kot Civil Status, sorry, i ti pou al ogmant son saler ki Gouvernman ki bezwen pey li.  Be tandis ki si sa i son saler, me selman i war i pe ganny ankor en bout, si li i pe donn Gouvernman dan pour li, mon krwar sa ti a en pli bon fason.  Sa ki ti mon kontribisyon Mr Speaker.  Mersi.

 

MR SPEAKER

Mersi Onorab Ghislain.  Bon, avek sa mon ava pas laparol avek Minis pour son Drwa de Repons.  Minister.

 

MINISTER MYRIAM TELEMAQUE

Mersi Mr Speaker.  Bonn apre midi Mr Speaker.  Bonn apre midi Leader Lopozisyon.  Bonn apre midi Leader, LGB e tou Manm ki la prezan.  Mersi bokou pour zot bann entervenir ki zot in fer lo sa size.

Selman mon ti a kontan fer resorti en pwen – avan nou ti mazin pour anmenn sa amannman dan sa Lalwa Leta Sivil, bokou konsiltasyon in ganny fer.  Nou’n konsilte DPA, nou’n konsilte Attorney Zeneral, nou’n konsilte Finans – Minister Finans osi.

Apre osi bokou bann entervansyon ki’n ganny fer bomaten, bann pwen ki’n ganny fer resorti, tousala nou ti’n pran kont ler nou ti pe fer lamannman dan sa Lalwa.  Par egzanp, konpansasyon pour bann Zofisye Leta Sivil, osi mwayen pour zot deplasman pour al selebre maryaz.

Mon ti a kontan osi fer resorti Mr Speaker, ki Zofisye Leta Sivil – selebre maryaz i form par zot louvraz e i zot travay.  Zot osi rikord nesans, lanmor, divors e lezot travay ki zot annan, enkli bann marginal entries ki zot sipoze ganny fer e met azour dapre sa ki Lakour in rekomande.

Travay i ganny afekte bokou dan biro ler i annan sa bann maryaz akoz maryaz in ogmante.  I pa sa rezon ki nou pe fer lamannman.  Selman mon ti a kontan fer resorti pou dir travay i ganny dan biro.

In fer resorti bomaten Mr Speaker, ki nou pa sipoze ranmas sa larzan akoz public servant pe debourye – i vre!  Be selman nou bezwen mazinen nou annan bann travayer kart idantite, ki al travay Praslin wikenn, zot al travay par le apre 4er, zot ranmas larzan, zot osi zot a vin kot Minis, zot a dir, be donn nou en poursantaz sa larzan!

Parey nou annan Zofisye Imigrasyon, i a dir ou be donn mwan en poursantaz sa GOP fees!  I a dir mwan donn mwan en waiving oubyen en poursantaz lo passport fees!  Tousala nou bezwen mazinen akoz i aplik pour zot, i dan menm Minister.  Ok?

Mon ti a kontan fer resorti parey Onorab Georges in dir, Zofisye Leta Sivil i sermante pour li administre maryaz sivil.  E sa i en servis ki nou sipoze donn piblik – i sipoze gratwit.  Be selman nou war nou dan en sityasyon ki nou bezwen al fer kot lakaz, kot lakour sa dimoun e dan lotel – i zot swa.  E nou, nou bezwen donn zot sa servis – nou pa defann zot swazir.  Si tou maryaz ti ganny fer dan Biro Leta Sivil Victoria, ti pou napa sa sityasyon peyman.  Me selman nou bezwen aksepte, Sesel i evolye, dimoun i swazir kote i anvi marye, nou pa kapab anpes zot.

Lo size, me kot pou selebre maryaz?  En bon pe letan nou an diskisyon avek Mayor’s Office – en bon pe letan.  Ler mon pe dir en bon pe letan, pres 1an – nou an diskisyon pour nou kapab selebre maryaz kot Mayor’s Office.  Mon kapab dir poudir dan sa semenn ki pe vini, nou pe al siny en lagreman avek Mayor’s Office pour nou kapab ganny sa landrwa pour nou selebre maryaz laba.

Nou ekspekte nou premye maryaz pou ganny selebre mwan Out.  Tou nou bann lekipman, nou bann – mon kapab dir pake, in deza ganny mete kot Mayor’s Office.  Laba i a pli gran, i ava pli konfortab, i ava pli smart parey nou dir.  E nou a kapab – sa koup ki pe marye, i a kapab envit son fanmir pour temwen sa levennman ki vreman presye e zot a kapab la pou donn sa sipor.  Ok.

Lentansyon pour nou anmenn sa lamannman dan sa, dan Leta Sivil, sa 76(1), 76(2), sete pa pou fer okenn – nou pa kapab dir malis, be selman pour nou kapab met lord.  Akoz i paret mwan la ki mannyer i ete la, napa en kontrol. Zis nou aprann maryaz pe ganny fer tel landrwa e ou demande oli tel zofisye – maryaz in al ganny fer.

E koman zot konnen zot osi, kot i konsern larzan, ou bezwen tou keksoz ganny resi, dokimante pou dir i annan en peyman ki’n ganny fer.  se pour larezon ki nou pe anmenn sa lamannman, pour nou kapab fer sa prosedir pli kredib e pli efikas.  Se, that’s the – se sa larezon.

E si zot rapel byen lannen pase ler mon ti prezant bidze, nou ti dir nou pou fer laranzman pour nou reviz Scheme of Service Civil Status Officers.  E sa nou pe fer akoz prenon kont osi ki petet ler pou annan sa lamannman, kekfwa i annan ki pou perdi en pe – nou’n pran kont tousala.  E nou’n gannyen premye draft e Civil Status – nou pou diskite avek Zofisye Leta Sivil akoz nou ti deza diskite premye fwa avek zot.  Zot okouran sa prosedir zot – toultan nou’n konsilte zot, zot konnen.

E sa Civil Status, sa Scheme of Service i pou pran kont zot saler de baz, zot pou ganny en Inducement Allowance, zot pou annan en Clothing Allowance, zot pou annan en Transport Allowance, zot pou annan en Standby Allowance.  Tousala nou’n pran kont an vi ki ler pou pey maryaz prezan i pou vin pey dan sa Consolidated Fund.

Dernyen pwen ki mon ti a kontan fer resorti Mr Speaker, mon pe ankor demann Lasanble pou siport sa Lalwa dan lespri bon gouvernans e latransparans an menm tan ki i a vin reveni pour Gouvernman – akoz nou vwar parey nou dir, i annan en leakage e nou oule at least anmenn sa reveni – se pour larezon.  Mersi Mr Speaker.

 

MR SPEAKER

Mersi Minister.  Bon, nou’n ariv moman pour nou, pour Lasanble pran en desizyon lo merit e prensip zeneral sa Bill ki devan nou.  Mon ava demann tou Manm ki an faver pour lev lanmen.  Nou pe pran en vot lo prensip e merit zeneral Bill – Civil Status (Amendment) ki devan nou.  Ok.  Okenn Manm ki kont?  Madam Deputy

 

MADAM DEPUTY CLERK

Mersi Mr Speaker.  Bonn apre midi tou bann Manm.  Mon’n rikord 25 Manm ki’n vot an faver sa Mosyon, person kont.  Mersi.

 

MR SPEAKER

Bon, vot in ganny pase pour merit zeneral pour sa Bill.  Mon kapab ganny en Formal Second Reading?

 

MADAM DEPUTY CLERK

A Bill of an Act to amend the Civil Status Act (Cap.34).  Mersi.

 

MR SPEAKER

Mersi Madam Deputy Clerk.  Bon, eski nou pou al dan Staz Komite?  Yes Onorab Georges?

 

HON BERNARD GEORGES

Yes Mr Speaker.  Mon mazinen ki i annan detrwa lamannman ki Bills Committee in propoze.  E kekfwa nou devret esey trouv en formil pour capture sa ki nou’n tande lo allowance bomaten.  Mr Chair nou’n…

 

MR SPEAKER

Bon, nou ava zis move dan Staz Komite.

 

HON BERNARD GEORGES

Non, pa ankor arive, nou pa ankor arive laba?  Non.

 

MR SPEAKER

Nou pa ankor move.  Mon ava demann Sergeant pou move Mace.

Mersi Sergeant.  Yes Onorab Georges

 

HON BERNARD GEORGES

Mersi Mr Chair.  Mr Chair, Bills Committee in propoz en seri lamannman ase senp.  Devan nou i annan 3 seri lamannman.  Mon pa konnen si i annan okenn lobzeksyon lo la par Minis.  Apard en lamannman ki lamannman a Clause 2(a) e Seksyon 76(1), kot nou pe propoze ki olye met district of that officer ler nou pe koz lo distrik sa Zofisye Leta Sivil, nou propoze met ‘district assigned to that officer’.  Setadir ki i pa neseserman sa distrik kot i pe reste me i sa distrik Leta Sivil kot i ganny assign – akoz i posib ki en Zofisye Leta Sivil i kapab reste Takamaka me i ganny assign Santral e vis-versa.

Apard sa enn, tou leres se bann lamannman senp – tipografik.  Alor, eski nou kapab konnen avek Minis e Biro Prokirer Zeneral si zot pe aksepte sa bann oubyen si i annan okenn difikilte?

 

MR SPEAKER

Mersi Onorab Georges.  Mon ava pas laparol avek AG.

 

ATTORNEY GENERAL FRANK ALLY

Mersi Mr Speaker e bonn apre midi tou bann Manm, wi nou’n diskite dan Bills Committee e sa bann propozisyon i akseptab, me selman apre en pe refleksyon ler mon pe get Clause 67 (1) (b) petet mon pa konnen si Komite i kapab konsider rather than “the fees received by an officer” si nou ti kapab met “the fees prescribed under or paid under 76 (2)” e apre nou kapab fer menm lamannman so that to tir sa eleman ki “as if the fees are paid, are received by the officer sort of  fizikman over counter ouswa ‘‘at the event’’ me rather sa fee i ganny paid administrativman in advance.   Mon pa konnen si…

 

MR SPEAKER

Ok, mersi AG.  Onorab Georges.

 

ATTORNEY GENERAL FRANK ALLY

So that i a lir “the fees prescribed under 76 (2)” sorry “76 1 (a), 1 (a) shall be paid over to the Consolidated Fund,” me selman petet nou ti pour bezwen aranz li en pti git pour then petet separ sa 2 e la nou a mete kot sa zofisye li i pour resevwar en allowance per marriage, pour rezon drafting nou a kapab separe, me sa i en keksoz ki nou kapab organize.

 

MR SPEAKER

Ok.  Onorab Georges.

 

HON BERNARD GEORGES

Mersi Mr Chair mon napa, mon krwar pa i annan okenn problenm avek sa, annefe si nou regard Clause 2 (a), Seksyon 76 (2) nou a vwar i annan deza “the fees received under Subsection 1 (a)” alor zis to sa ki nou a fer se dan 76 (1) (b) nou ava met “the fees prescribed under Subsection 1 (a)” e anba limero, anba “76 (2) the fees prescribed under Subsection 1 (a)” egzakteman parey okIf that works? Yes.

 

MR SPEAKER

Propozisyon pour separ 76 (1) (b).

 

HON BERNARD GEORGES

Mon ti annan en propozisyon pour fer dan en serten minit, ki ava take care of that, me mon krwar Onorab Ferrari ti annan en pwen ou pour fer lo sa enn la?

 

MR SPEAKER

Yes Onorab Ferrari.

 

HON JEAN-FRANÇOIS FERRARI

Yes bonzour Mr Speaker, mon ti a kontan demann AG dan sa propozisyon ki i pe fer la, eski i pe, eski nou pe al dan direksyon kot i klerman definir poudir there is a prescribed fee for Government that is, and that should be a, and that should be paid over to the Consolidated Fund?

 E eski dan ou lespri ki ou pe, eski sous-entendu ki then the fees which will, ki pour bann allowance ki pour kouver conveyance, sa it’s because it’s not prescribed i reste en pe ouver e ki Gouvernman in fini gannyen son bout li which is prescribed e ki i permet prezan ki sa zofisye pa bezwen, i bezwen met dan Consolidated Fund zis sa ki pour Gouvernman, sa ki pour li pour li defre son bann sa, i reste pour li, eski nou pe avans dan sa direksyon, akoz si nou pe avans dan sa direksyon, direksyon mwan mon fully support sa.  Mersi.

 

MR SPEAKER

Mersi Onorab.  Onorab Pillay.

 

HON SEBASTIEN PILLAY

Mersi Mr Speaker, Mr Speaker sa lamannman ki Attorney Zeneral pe propoze, i fer kler prezan ki sa larzan malgre sa zofisye ki ti pe resevwar i en larzan ki zis parey meton mon pe al kot Rezistrar mon pe fer en search mon bezwen peye, i en fee ki ou peye pour sa servis ki ganny provided, i en public service ki sa dimoun i provide ki prezan mon pey li sa fee.  

E sa i fer ki i vin kler prezan ki sa i vin anba Lalwa e administrativman prezan ki mannyer i ganny manage.

Lo pwen Onorab Ferrari si ou regard Seksyon 2 kot i konsern Regilasyon ou pour vwar dan sa seri Regilasyon A, B, C, D i ankor enn fwa fer preskripsyon pour sa mode of conveyance;

Savedir sa osi pour ganny preskrir.  I deza dan Lalwa ki pour ganny preskrir.  So si ou get byen kot sa 2, e ou regard 2 (b) conveyance to be provided to the officer ki pe celebrate sa maryaz under 76 ki’n ganny mansyonnen oparavan, so i deza osi pe preskrir la.  

So savedir sa ki nou, sa allowance ki zot pe propoze i pour pran kont sa mode of conveyance osi baze lo ki sa Lalwa pe dir plus sa allowance per marriage osi.  So ou vwar diferans ant le de la, i deza dan Lalwa.

 

MR SPEAKER

Yes Onorab Georges.

 

HON BERNARD GEORGES

Mersi Mr Chair.  Mr Chair mon ti pe mazin sa, I think, mon krwar conveyance i ase senp, i ganny, i ava ganny kontrole.  Conveyance i pa sa ki enportan, se allowance ki enportan la, e mon krwar si nou kapab focus lo allowance avan.  Si nou kit li mannyer i ete la Minis in eksplike ki sa ki zot anvi fer, se met lord fer sir ki tou dimoun i ganny menm allowance, tou Zofisye Leta Sivil i ganny menm allowance.

Si nou pa anvi sa formil e ki nou anvi les en serten diskresyon, i annan selon mwan enn an 2 fason, anfen i annan plizyer me mon pe mazin zis 2 fason la ki nou kapab fer.

Si nou regar 76 1 (b) nou kapab aret sa fraz apre Consolidated Fund, pa mansyonn allowance ditou, epi tir 165 (2) (c) tir li net, pa mansyonn allowance, les sa Zofisye Leta Sivil si i anvi negosye son allowance avek sa bann dimoun.  

So nou pa pe met okenn konstrent lo okenn dimoun, or si nou anvi fer li pozitiv, sa ki nou kapab fer se 76 (1) (B) met dan sa dezyenm parti “and the officer shall be entitled to receive an allowance per marriage celebrated as may be prescribed” annou met “and the officer shall be entitled to receive an allowance per marriage as the officer may negotiate with the parties” ok?  So ou met, i pa al ditou dan direksyon ki Minis i anvi ale, me i al dan direksyon sa ki’n ganny eksprimen en pe ozordi dan sa Lasanble, kot ou met, ou les sa diskresyon ant sa Zofisye Leta Sivil avek sa bann parti, me sa ki ou pe fer sir la, se ki i annan en sonm fikse ki antre dan kof Gouvernman pour sak maryaz.

 

MR SPEAKER

Mersi Onorab Georges.  Onorab Pillay.

 

HON SEBASTIEN PILLAY

Mersi Mr Speaker. Mr Speaker be sa i pour raise en konsern akoz ki i arive, akoz parey sa package ki Onorab Ramkalawan in list down, dan sa package zot in osi enkorpor bann fees ki zot pour peye.

So prezan ki oupour vwar.  ou pour vwar sa zofisye pe negosye en lot fee additional to sa fee ki deza ganny preskrir.  E mon pa konnen si i normal dan en fason rasyonnel pour ekspekte poudir sa zofisye i pour ganny, i annan en fee ki mon par egzanp mon pe marye mon pe pey en fee an premye lye apre dezyenm sa zofisye prezan pour vin negosye en lot fee ek mwan ki mon bezwen pey li.

So i pour annan 2 lenstans negosyasyon ki pour arive ki mon pa krwar poudir i gel ansanm.

Apre mon lot pwen ki mon konsernen avek Mr Speaker, lo sa premye propozisyon ki si ou retir sa allowance ladan, sa allowance pe vin en entitlement ki sa dimoun i pour gannyen.  Nou’n fer li legalman kler poudir i bezwen gannyen sa allowance si ou tir sa entitlement dan sa allowance, i kapab ki sa allowance ki i ti pour gannyen i ti pour plis ki sa negotiated fee ki ti pour al negosye.

So sa zofisye, si nou pour servi sa term i pour perdi.  So mon krwar rather mon ekspekte ki Minister zot in diskite avek sa bann zofisye e zot in tonm lo sa barenm ki dir be ekitableman across the Board, bann zofisye i ava benefisye about, avek en allowance ki pran konsiderasyon zot tou sa bann zofisye ki fer sa travay e non pa ou vwar poudir petet i annan en zofisye ki benefisye plis ki lot.

So mon ekspekte poudir sa konsiltasyon i arive within the Ministry, me fodre nou careful ki nou pa retir en provizyon legal ki donn en dimoun en allowance, ki fer li kler ki en dimoun i ganny en allowance apre i ekspekte sa dimoun al rod sa allowance avek sa antite ki i travay avek.  Nou pe kree en lot problenm la underline.

 

MR SPEAKER

Bon AG. AG atann en pti moman, mon annan ankor 2 Manm ki oule entervenir, Onorab De Commarmond.

 

HON CHARLES DE COMMARMOND

Mersi Mr Chair.  Non Mr Chair zis pour klarifye, la sa ki nou pe koze la, i pa aplik pour tou maryaz, i aplik pour maryaz etranze e an deor biro.  Si sa etranze i vin dan biro i pa pey nanryen ok, i zis pour etranze ki an deor biro Civil Status sa maryaz i ganny fer, si pa korek zot klarifye, si sa i koumsa e nou pe dir i pour annan en Regilasyon, Regilasyon li tou sa bann ka kot en bout si i R200, si i R300 ki pour al pour Gouvernman pour son Ladministrasyon akoz sa gro liv la, i pour Gouvernman sa, i pa pour sa zofisye.

In anmenn laba in fer sinyen in donn li son, mon krwar i annan en pti cost avek, se sa ki i pe dir i annan en bout la ki i ava vin pour Gouvernman ki R200, ki R300 zot ava deside, zot a met li dan Regilasyon nou ki nou a fer nou a veye letan Regilasyon i sorti, si sa i reflekte i ok, si i pa reflekte nou quash sa Regilasyon.  Mon krwar koumsa.  Mersi.

 

MR SPEAKER

Mersi Onorab. Onorab Ramkalawan.

 

HON WAVEL RAMKALAWAN

Mr Speaker mon dakor antyerman avek sa ki Onorab Georges pe propoze, mon krwar ki sa i donn sa fleksibilite e pour mwan mon krwar ki i capture sa ki mon ti pe met devan bomaten kot ou annan sa prescribed fee sa i ok, la i la me apre sa ou, sa zofisye li i annan son fleksibilite pour li al debourye li e sa i pa pour afekte sa bann packages, akoz i pa pour afekte?

Mon pe regard ankor sa bann packages, i dir ek ou maryaz ‘’as from’’ par egzanp Hilton i dir avek ou, ou kapab fer ou maryaz Sesel from £870 parey Onorab Gill in dir, sa i ava spesifye si ou anvi vin marye Sesel e ou anvi 15 bouke roz, ou ava pey pour 15 bouke roz, me li i annan en minimum package avek en pti bouke lo ou latab.

E se la kot mon osi krwar ki poudir letan i ape negosye avek sa dimoun, sa dimoun i anvi al beni son, i anvi al fer son maryaz Sivil Anse Diri, ok e se la kot sa zofisye i ava negosye, i ava antre an negosyasyon poudir be si mon pour al Anse Diri mwan mon pour, ou bezwen pey mwan R4, 000 e li sa zofisye li i fer son negosyasyon.

Sa parti laba i dakor sa bout negosyasyon, sa i en negosyasyon prive.  Li sa zofisye i konnen ki poudir the prescribed fee i R500, se sa ki antre dan Consolidated Fund, R500 i antre dan Consolidated Fund li akoz i pe donn tou son letan, i pe fer tou son bann zafer li i ava ganny li R3, 500 en konparezon, se sa lafason ki mwan mon vwar li.  E se pour sa rezon ki mwan mon pe segonn sa ki Onorab Georges pe dir kot tou sa bann zafer allowance ensidswit, tou sa bann deal nou tire fini li avek Consolidated Fund dan sa 76 (1) (B).

E Mr Chairman e sa i en pe parey wholesale, wholesale avek retail, wholesale ou’n pey wholesale tel pri apre sa ou ale retail, I mean Seybrew wholesale i en pri li, be apre sa retail i ariv ziska R80 dan en lotel, be ou aprezan ou si ou anvi en Seybrew R80 ou al pey ou Seybrew R80, si ou pa anvi en Seybrew R80 ou desann anba kot Biro Civil Status kot Biro Mayor ensidswit ki zot pe soz ou antre ou marye ou pey tenm R15 ou fini ou ale.

Onorab Valmont i dakor avek mwan ok?  So se sa mon krwar ki se sa ki nou pe dir e les dimoun debourye, les dimoun debourye, demen annou osi mazin plitar.  Demen i kapab annan bann, parski i annan pa tou zofisye ki ganny dwa fer maryaz ki stasyonnen dan en biro non, i annan en pe freelance menm la letan nou pe koze.

Par egzanp La Digue, La Digue sa dimoun i pa travay dan biro Civil Status li, sa dimoun in ganny sworn-in koman en Civil Status Officer pour li kapab fer maryaz, be demen i kapab ki sa dimoun i deside pour li konmsi depandan ki mannyer pei i devlope, set up en Agency, en Agency kot son Civil Status Officer i ansanm, son, i annan son bann sez, i annan son bann zafer ki i fer, konmsi annou mazin osi plitar kot les dimoun debourye pour nou kapab devlop keksoz dan en fason plis ki olye zis lotel ki gannyen?

Demen par egzanp nou annan en Civil Status, the Senior Civil Status Officer avek nou Madanm Labrosse la, Manmzel Labrosse kot demen li i kapab deside pour li set up en biznes menm parey avek ou annan Notary Public, me pa tou ki travay avek, i annan ki prive e pour li anrezistre son bann dokiman ok, mon pe al en pe dan sa direksyon.  En Noter Mr Speaker, Noter i annan Noter Gouvernman me i osi annan Noter Prive, be li i konnen ki poudir pour li al anrezistre en dokiman i kout sepa R100, me sa Noter i ale i pey son R100 laba li, i anrezistre sa dokiman me selman letan i sarz sa kliyan i sarz sa kliyan R800, so nou, nou pe regard en pe dan sa direksyon kot larg lanmen, larg lanmen, me selman li Gouvernman, Gouvernman i annan son prescribed fees, in anmas son prescribed fees li i ok, li osi i ape benefisye dan sa tranzaksyon me sa dimoun osi tou ki pe al Anse Diri se pa Gouvernman ki pe al Anse Diri, se sa endividi vandswet ki zot pe al anmenn li Anse Diri parski sa dimoun in anvi vwar sunset avan i al marye ok ki alor larg sa.

Onorab, mon krwar Mr Chairman mwan krwar mon’n eksprim mon tre kler e petet nou ava ganny en response e nou ava kapab bouze lo la parski nou krwar nou kapab…

 

MR SPEAKER

Mersi Onorab Ramkalawan mon ava donn laparol Attorney Zeneral.

 

ATTORNEY GENERAL FRANK ALLY

Mersi Mr Speaker. Mr Speaker mon krwar nou pe mal get sa mo “allowances” allowance la in lieu of such conveyance, so si nou pour les sa Civil Status Officer avek sa bann dimoun tou bann parti ki pe al marye negosye en allowance for their conveyance i kapab en room for abuse kot finalman i pour napa certainty pour sa dimoun ki pe al marye konbyen i kapab kout li.

Si sa dimoun par egzanp i reste Anse Boileau i anvi marye e i napa en mwayen transpor pour li transport sa officer to and back and forth, i pour bezwen pey sa dimoun en allowance, so ki mon krwar sa Lalwa pe propoze se ki i ava annan en Regilasyon kot i ava set out bann rates pour sa allowance ganny peye dan plas donn li en transpor.

Si par egzanp mon santi sa dimoun pe negosye avek mwan e i dir mwan i oule R2, 000, mon kapab dir avek li be ok my friend en loto pour kout mwan R1, 000 pour mwan lwe pour mwan fer en drayver anmenn ou back and forth laba, so mon krwar sa i petet en keksoz ki nou dwatet gete i pa en allowance pour selebre sa maryaz akoz i annan en diferans ant the prescribed fee pour selebre sa maryaz, me allowance anba 2 anba ki i allowance ‘in lieu.’ So mon sa ki nou bezwen pran konsiderasyon.  Thank you.

 

MR SPEAKER

Mersi, mersi AG. Onorab Georges.

 

HON BERNARD GEORGES

Mersi Mr Chair, mon krwar Mr Chair mon, Attorney General pe limit son lekor lo 165 2 (b) e i annan parfetman rezon nou, nou ti pe koz 125 (2) (c) which is an allowance for celebrating the marriage, se sa ki vin anba 76 (1) (B), anba 76 (1) (B) i annan en fee, en prescribed fee ki pour al pour Gouvernman e ki i annan en allowance ki sa Zofisye Leta Sivil i gannyen, alor mon krwar ki parey mon’n dir conveyance i pa en problenm sa, i kapab annan en fee kot i ganny prescribed poudir ki si sa dimoun pa pe donn ou transpor pour vin marye li kot li, ou ava ganny en allowance pour transpor, sa mon krwar pa nou annan okenn problenm, i ase senp, se konbyen ou pour pey sa Zofisye Leta Sivil e mon krwar si mon ti kapab anmenn enn de bann pti presizyon ankor i ava kekfwa ed nou pour fer nou refleksyon, i pa zis Zofisye Leta Sivil ki pour, ki ava ganny posibilite fer en pti larzan an plis oubyen gro larzan an plis or whatever, en larzan an plis.

E sa i arive dan bokou Sekter Civil Service, en teacher i kapab donn extra courses apre ler e ganny peye, napa nanryen ki anpes li pour fer sa; en veteriner ki travay dan servis Gouvernman 8er-4er i kapab wikenn oubyen apre ler al tret en lisyen oubyen en zannimo en landrwa e ganny peye.

Alors sa se bann keksoz ki kouran e ki mon krwar i devret ganny ankouraze pour ki pei i mars pli byen.  Si nou per ki pour annan labi, i annan en fason ase senp pour kontrol labi e mon krwar ki internally Civil Status, Chief Officer of Civil Status ki ansarz bann Zofisye Leta Sivil i kapab dir pandan ler travay 8er-4er pa pour arive sa, sa se ler Gouvernman.

Si en dimoun i anvi al marye Anse Cachee 2er apre midi en zedi, COCS i kapab dir non, i ava vin marye isi kot Civil Status Office or (Onorab Pillay donn mwan en pti git letan pour eksplike silvouple), apre ou ava kapab reponn or, or i ava…

 

MR SPEAKER

Ok.  Order!  Order! …

 

HON BERNARD GEORGES

Ouswa Sef Zofisye Leta Sivil i ava dir dan sa ka nou ava permet ou ale, me sa allowance i pour negosye par nou e ou ava anmenn sa allowance isi, ou ava ganny en par, sa i kapab ganny fer par zot menm zot internally, nou pa bezwen antre dan sa kantite detay.  Me, me parkont bann maryaz wikenn Dimans eksetera apre ler, sa egzakteman parey sa veteriner oubyen sa teacher ki pe donn extra hours, sa ou les li, ou les sa dimoun negosye son allowance free market parey nou anvi.  Alor i, nou kapab annan both Regilasyon pandan ler travay anba PSO, me osi en serten laliberte pour bann dimoun ki anvi pran zot letan lib e pour al rann en servis e fer en sonm larzan.

 

MR SPEAKER

Mersi Onorab Georges.  Onorab Pillay.

 

HON SEBASTIEN PILLAY

Mersi Mr Speaker.  Mr Speaker mon konpran tre byen ki Onorab Georges pe sey fer, i pe sey zistifye en pwen pour li satisfer en largiman ki zot in avanse ki i pa pe realize dan sey zistifye son pwen ki i pe fer, i pe retir posibilite ki sa allowance sirplis ki sa negotiated fee, ki zot pe al fer, sa bann dimoun pa pour gannyen.

Ou pe met en entitlement anba zot saler dan zot package pour asire garanti ek sa bann dimoun i ganny sa e legal, sa i premye pwen, dezyenm pwen ki i pa pe realize son mistake ki i pe fer Mr Speaker avek tou respe ki mon annan pour li, marye Dimans, marye Sanmdi i still en maryaz legal, it is still en legal issue, i pa sanz nanryen dan louvraz ki sa bann zofisye pe fer konparab avek en veteriner ki li i al fer en travay apre ler kot lakour en dimoun, be ekoute ou’n dir mwan ekout ou, mon pe ekoute Onorab Ramkalawan, ekout mwan mon a fer ou konpran Onorab…

 

MR SPEAKER

Order!  Order!  Order!

 

HON SEBASTIEN PILLAY

Ou pa kapab ganny tou koze pour zot, akoz sa ki nou pe argimante la, nou pe dir koumsa poudir aret sa Clause kot nou dir “prescribed fee dan Consolidated Fundok so prescribed fee i R1, 000 pour sa dimoun marye ok, sa dimoun pour marye nou dir prescribed fee R1, 000, i pey son R1,000 par lo la nou pe dir sa zofisye ki vin selebre sa maryaz kot i pe ale laba, i pour vini i pour negosye en lot fee ek sa dimoun pour selebre sa maryaz, is this fair?  Is it fair?  Konmsi pour sa dimoun ki li i pe pey sa akoz mazinen zot pe pran sa Lalwa konm kwa poudir pe deal zis avek etranze, sa Lalwa pa pe deal zis ek maryaz etranze ki pour fer Anse Cachee, ki pour fer partou.

I pe deal ek maryaz Seselwa tou.  E mon lot pwen ki Onorab Georges in raise ki mon vwar poudir i pa tro fer sans, si mwan mon’n deside pour marye kot mwan Glaçis ou pour dir ek mwan koumsa, be ou pa ganny dwa marye Glaçis, me selman en lot dimoun ki pe fer son maryaz dan lasemenn, i pour annan drwa pour li marye kot i anvi, be oli egalite de Loi la?

So mon krwar Mr Speaker sa ki nou bezwen reste, gard en perspektiv, Minis in dir poudir the prescribed fee would be between R1, 500 and R3, 000, that would be the prescribed fee e sa nou pe koz bann maryaz non rezidan.  Am i correct Minister?  Maryaz non rezidan, maryaz Seselwa i deza annan en fee ki bann dimoun pe peye, now anba sa prescribed fee ki la dan sa package ki bann lotel i ofer, zot deza enkorpor ladan e i deza annan bann dimoun ki pe benefisye ki pe fer bann pti biznes, mon konpran pwen ki Lopozisyon pe avanse, pwen, zot pwen se ki ok dan sa R3, 000 i al pour Gouvernman be additionally.  

So pour nou kapab tonm lo en compromise i pour inevitableman vedir ki Minister pour bezwen fer son prescribed fee desann pour vin pli ba pour ki prezan sa Zofisye i al negosye sa lot bout.  Be si nou gard sa prescribed fee kot i ete e nou pa ankor ni menm konnen ki kalite allowance ki sa bann dimoun pour gannyen, nou pe fer, ozordi nou pe fer en deba dan abstre Mr Speaker, mon krwar fodre nou konnen poudir sa allowance ki sa bann dimoun pe gannyen i posibleman, e mon krwar i for probab ki i pour plis ki sa negotiated fee ki sa bann dimoun pour al negosye avek sa kliyan.  So nou riske pe fer en disservice sa bann dimoun Mr Speaker.

 

MR SPEAKER

Mersi. En moman. Onorab Andre.

 

HON CLIFFORD ANDRE

Mr Speaker bonn apre midi, mon pa ankor konpran ki mannyer en dimoun pour ganny en allowance ki pli o ki sa ki li i pe al negosye, me ki Gouvernman pour anmas larzan, kote Gouvernman i anmas larzan pour pey en dimoun plis ki sa ki pe al negosye?  Sa lozik mon pa ankor konpran kantmenm mon ape sey konpran sa ki Onorab Pillay in dir.  Selman mwan ki mon oule dir pour mwan siport sa ki Onorab Georges in dir?

 

(Interruption)

 

HON CLIFFORD ANDRE

Fini?

 

MR SPEAKER

Kontinyen Onorab.

 

HON CLIFFORD ANDRE

Mon kapab kontinyen, wi ki mwan mon pe dir, mon pe siport sa ki Onorab Georges pe dir akoz Ladministrasyon Prezidan Faure in dir larg lanmen Seselwa, met divan anba lezel pour les zot epanouir.  I ti dir loportinite pour fer plis ki en louvraz i la, largiman ki kekfwa zot ava avanse se ki i menm louvraz, i byen ki Minis i dir, e mwan mon dakor ki pour annan en prescribed fee ki dir pour ou servi sa liv apre 4er i kapab R200,i kapab R400, i kapab R500.

Permet sa zofisye ki pe al fer sa travay pour li kapab negosye akoz bokou dimoun ki pe marye zot dan lazwa Mr Speaker, zot pare pour zot depans larzan pour zot marye, alors zot pour pare pour zot negosye e menm,

 

(Interruption)

 

HON CLIFFORD ANDRE

… (ou’n koze mon’n ekoute, ou pa’n koze espere ase malelve silvouple.)

 

MR SPEAKER

Onorab. Onorab kontinyen.  Kontinyen Onorab.

 

HON CLIFFORD ANDRE

Bokou, bokou dimoun ki pe al marye Mr Speaker menm si ou’n dir li R1, 500 i kapab donn ou R2, 000 akoz li pour li sa servis sirtou si ou’n vini ou’n ofer li en servis ki li in kontan, i santi ki poudir in akseptab e i pare pour li partaz avek en pti pe plis pour li fer sir ki ou osi letan ou pe ale ou kontan kantmenm i pour donn ou en pti boutey champagne avek en pti bout gato.

So alors mwan mon krwar ki nou bezwen permet, permet sa Lalwa pa retir benefis ki en dimoun, nou tou, nou konnen Lalwa Lanplwa mannyer i marse, Attorney Zeneral i la, i annan Onorab Georges ki dan domenn Lanplwa in fer bokou case nou tou nou konnen nou pa zanmen met en dimoun dan en pozisyon pli dezavantaze finansyerman ki i ete ozordi.

E si sa bann dimoun pe fer en travay ozordi, zot pe ganny zot en minimum x amount, eski i normal ozordi pour nou al dir nou pe fer en Lalwa ki pour deprive zot of sa x amount.  me selman sa ki nou pe dir, nou konpran Gouvernman i bezwen anmase lo la, mwan mon 100 poursan dakor ki nou bezwen anmas en larzan, me selman lesansyel se ki si sa dimoun li letan i pe ale i pe al negosye en fee, Gouvernman i dir ou, ou bezwen pey tan, i a pey son tan e leres tan i ava vin pour li.  Mersi Mr Speaker.

 

MR SPEAKER

Mersi Onorab, bon nou pe exhaust deba lo sa pwen, mon pour donn Onorab Ramkalawan ek Onorab De Commarmond dernyen parol apre mon a donn laparol AG oubyen Minis, Onorab Ramkalawan.

 

HON WAVEL RAMKALAWAN

Mr Speaker sa ki pe ganny regilarize anba sa Lalwa se maryaz at a private house or place.  Si ou anvi marye at a private place dan en private house ou peye, se sa ki, se sa ki son baz sansan, sansan e sa fodre i kler pour sa Seselwa parski la les etranze, kler pour sa Seselwa, sa Lalwa la i pa pe fors ou dan okenn fason, sa Lalwa i ape regilariz en posibilite en swa ki ou fer.

Si ou anvi marye pa pey nanryen, ou al avek ou msye, ou msye ek madanm zot desann Independence House pour le moman zot antre anndan la, ler ki in dir zot vini ‘’eski ou aksepte Paul koman ou msye – wi, ou aksepte Pierreline koman ou madanm – wi.’’ Sinyen la i la, la bag, met bag dan son ledwa anbras kanmarad.  Mon deklar zot ‘’fanm ek zonm.’’ Ok?

 

HON JEAN-FRANCOIS FERRARI

(Mic Off)

Pa bolot feray…

 

HON WAVEL RAMKALAWAN

Ok fini avek sa, be si Paul avek Pierreline, si Paul ek Pierre-Lyn i anvi marye Cascade 8er diswar, 8er diswar lo, egzakteman lo highway Cascade e i anvi Madanm Labrosse vin beni zot maryaz Madanm Labrosse i dir be get sa annou koze, Madanm Labrosse i konnen poudir i bezwen pey R500 la ba anba apre sa i dir pour mwan vin lo highway 8er diswar la i la, ou pour pey mwan R2, 000.

Be si i pa anvi desann anba Civil Status.  Alors mon pa ganny en konpran ki problenm Onorab Pillay avek sa.  E Mr Chairman se sa ki nou pe koz lo la e an plis ki sa zafer marye pandan lasemenn 76 sa soz 2 (2) i dir avek ou “the Regulations may provide for, Regulations provide for fees to be paid by the parties celebrating a marriage, the mode of conveyance” ensidswit tou sa bann zafer, be ladan letan pe fer bann Regilasyon sa bann diferan Seksyon i ava dir si en zofisye Civil Status pe fer maryaz Anse Cachee 2er apre midi merkredi la i la bann fees.

La i la the prescribed fees i kapab sanze pour kouver sa erdtan ki i pour soz.  E lekel ki pour pey sa, se sa 2 dimoun Paul ek Pierreline ki anvi marye Anse Cachee zot pour konnen ki poudir si zot pe marye zedi 2er apre midi e zot pour bezwen tir sa Civil Status Officer dan son biro pandan ler travay, i pour kout zot the prescribed fees i pour al en pe pli o.  Be oli problenm?  Mon pa vwar okenn problenm parski Mr Chairman parey nou pe dir sa i about en swa ki en dimoun pe fer.

Leta pa pe sarz dimoun an plis, Leta pa anvi fer tousala, menm parey ou anvi marye?  Ou anvi pran ou loto e beni ou maryaz napa problenm, be si ou anvi rod en limousine avek tou kalite keksoz lo la R20, 000 fler, be sa en lot zafer the cost is yours, it’s your choice but the bottom line  se ki the State i gard son responsabilite, pour ki 2 dimoun ki anvi marye i desann biro Civil Status i marye.

Sa se bann laranzman prive ki nou pe koz lo la alors si ou anvi en laranzman prive ou annan ou larzan peye, e sa Civil Status Officer i la i pare pour li negosye pour en pri, la i la napa nanryen.

Sa zafer transpor ki AG in mansyonnen, be non sa Civil Status Officer i devret kapab dir sorry menm si ou pe ganny en taxi pirat pour R10, mon pa enterese ek ou taxi pirat mwan, mwan mon annan mon loto e mwan mon pour met mon fre pour mwan ariv Takamaka R2, 000, be si ou pa oule fer en lot swa, nou pa pe fors ou, ou toultan annan lot posibilite.

Alor Mr Chairman mon ti ava kontan pour nou fini sa, nou retourn lo sa pwen ki Onorab Georges in mete.  Onorab Georges i annan 30 minit pase in fini ofer en solisyon e Onorab Pillay li i ape met retar dan sa zafer.  Mersi bokou.

 

(Interruption)

 

HON WAVEL RAMKALAWAN

Mr Speaker freedom of expression

 

HON SEBASTIEN PILLAY

(Mic Off)

Mon annan drwa koze dan sa Lasanble mwan…

 

MR SPEAKER

Ok.  Order!  Order!  Order!

 

HON WAVEL RAMKALAWAN

Mr Speaker mon ganny drwa osi dekrir son fason koze. Son fason koze – retar.

 

MR SPEAKER

Order!  Order!  Order!  Order!

 

HON SEBASTIEN PILLAY

Mwan osi mon ganny drwa koze…

 

MR SPEAKER

Onorab Pillay.  Onorab Pillay.

 

HON SEBASTIEN PILLAY

Yes.

 

MR SPEAKER

Order!  I pe eksprim son lopinyon, i pa’n dir ou napa drwa koze, ou’n gannyen ou dwa koze, bon depi bomaten mon’n forfe en kou ou drwa ou’n re montre mon ou Konstitisyon mon’n reinstate ou drwa ok?

Nou pa pe infringe lo drwa kanmarad, me i so lopinyon pour dir in fer en lekspresyon lo sa ki ou’n dir.  Vwala ou’n ganny sans koze, annou fini.  Nou annan Vis-Prezidan depi 2er i la, i pe esper nou i annan en lot travay ankor pour nou deal avek ozordi ok?  Bon Onorab Ramkalawan in fini fer son pwen, mon ava pas la parol avek Onorab De Commarmond.

 

HON CHARLES DE COMMARMOND

Mersi Mr Chair…

 

(Interruption)

 

HON SEBASTIEN PILLAY

(Mic Off)

Be en zour pa …

 

MR SPEAKER

Go ahead.  Annou sey reste trankil….

 

HON CHARLES DE COMMARMOND

Mon pe esper zot fini …

 

MR SPEAKER

E nou a kapab release Minis avek son delegasyon.

 

HON SEBASTIEN PILLAY

(Mic Off)

En bon pe po fler laba lot kote laba….

 

MR SPEAKER

Annou … Order silvouple.  Depi bomaten mon remarke mon pa konnen ki’n arive pandan wikenn ek yer, tou bann i Manm azite  …

 

HON SEBASTIEN PILLAY

(Mic Off)

Mr Speaker Onorab Ramkalawan pa oule mon koze dan sa Lasanble…

 

MR SPEAKER

Tou bann Manm i azite ozordi, mon remarke.  Ok annou sey fini sa lazournen dan en fason kalm. Onorab De Commarmond

 

HON CHARLES DE COMMARMOND

Mersi Mr Chair. Mr Chair i kler ki i annan detrwa kestyon la en, enn i vre i en kestyon swa, konmsi dernyen eksplike mon pour eksplike la, en boug li i oule marye i pa oule pey en sou nanryen i desann dan biro i al marye pa pey nanryen   E sa i aplik pour tou dimoun ki oule marye dan Sesel.

Etranze osi tou, i annan son tenm, sa tenm mon krwar i pey R15, konbyen R50 konmela, pa peye, ni tenm pa peye, nanryen pa peye, la pa, i gratwit tou napa tenm, tou i gratwit sa kado konmsi sa pei nou pei la i fer ek sa ki oule marye dir li la, la vin marye nou marye ou nanryen ou pa peye.

Prezan si oule marye an deor biro be nou, nou pe koz en pe koz en pti pe abstre la nou la nou, boner mon’n demann Minis serten kestyon nou pa ankor ganny sa bann larepons.  Sanmenm sa ki fer ki nou pe koz abstre petet pour serten dimoun akoz ki fer ki nou pa pe konpran menm keksoz.  E Minis li i bezwen dir nou sa lenformasyon ki nou pe rode pour fer pa neseserman nou 2 Onorab Ramkalawan, me lezot dimoun ki pe ekout nou konpran sa ki nou pe koze la.

I annan en keksoz Minis ki i bezwen dir nou kler; dan ka en maryaz en Seselwa i kapab avek en etranze or i kapab 2 Seselwa or i kapab 2 etranze letan 2 dimoun pe marye an deor biro Minis, i kapab Ile Cachee, i kapab Anse Diri, i kapab dan son lakaz kot li, kapab Desroches i kapab you name it lo lalin, Cascade mannyer li an deor biro li, konbyen ki Gouvernman li i anmase ladan?

Eski Gouvernman i annan en fee ki i mete ki konmsi letan par egzanp madanm, Ms Labrosse la Marietta i monte i ale i fer sa maryaz sa dimoun dapre Lalwa i pey li, li i donn en resi dan sa ki pey li la, ki nou pe dir i dir i kapab 2,000, 4,000, 5, 000, 10, 000, 20,000 dapre bann sif ki’n ganny nonmen eski ladan la i annan en porsyon larzan ki i vin donn anba biro i dir sa bout la pour Gouvernman ki dapre Lalwa i dir?

Ouswa Gouvernman ozordi i pa anmas nanryen ladan?  Fer nou kler sa keksoz, mon krwar sa i baz enportan, ler nou’n konpran sa si i egziste, sa pa egziste ler la i pour fer nou pli fasil pour nou konpran e desid lo sa lot pwen ki nou pe avans devan.

Avan mon al pli devan mon ti anvi ki Lotorite ki devan nou, Minis, AG i klersi nou pour ki piblik i konpran lo la.  Mersi.

 

MR SPEAKER

Mersi Onorab, avek sa mon ava donn la parol Minis oubyen AG.  Minis.

 

MINISTER MYRIAM TELEMAQUE

Mersi Mr Speaker.  Mr Speaker konmela tou maryaz ki ganny fer an deor lofis i relevan, si Seselwa, si i etranze tou maryaz Gouvernman pa ganny naryen lo la li, nanryen, nanryen, nanryen, zofisye i sorti dan ler travay i ale, i al selebre sa maryaz, sa dimoun mon mazinen i pey ek zot e Gouvernman pa ganny nanryen – pour le moman.

 

MR SPEAKER

Ok mersi Minis pour sa leklersisman. Onorab De Commarmond.

 

HON CHARLES DE COMMARMOND

Mersi Mr Chair.  Problenm i la.  Prezan ki i pe dir Lalwa ki pe anmenn devan nou pe dir ki, ki mannyer i ete la les sa zofisye kontinyen debourye ganny son larzan selman i pe dir la anmenn en pti granm pour papye pour lot, lot, lot pour Gouvernman pour met dan Consolidated Fund i kapab R200, R300, R400 selman ti a bon si zot ti dir nou konbyen zot pe manse, selman ou dir dan Regilasyon sa i ava ganny preskrir.

Be selman ou Lalwa ki mannyer pe mete la i pa pe dir sa nou, nou pe dir fer li koumsa, les Ms Labrosse ale fer son maryaz parey labitid si pour fer Highway kout tan i gete osi si sa dimoun pa pour kapab pey li kantmenm i anvi fer an deor, i dir be ok i desid lo son pri me ladan i konnen li dan sa pri ki i pe dir i annan R200, i annan R300 sepa i annan R400 ki li letan i desann prezan la, i pour bezwen donn Gouvernman pour sa papye, sa gro liv ki in servi, sa papye and few little cost ankor ki in servi pour donn sa dimoun.  Basta se sa ki nou pe dir e se sa ki nou ti ava anvi i ganny pran konsiderasyon par Minister lo Lalwa ki nou pe mete lo amannman ki mon krwar Onorab Georges si i dan sa direksyon, then it should be clear e nou vot lo la pour nou ale.  Mersi.

 

MR SPEAKER

Mersi Onorab De Commarmond.  Bon dakor, AG ou oule fer komanter lo mon krwar lamannman ki Onorab Georges. Ale AG.

 

ATTORNEY GENERAL FRANK ALLY

Non mon krwar sa ki sa lamannman i propoze, se ki sa bann allowances i ava certain so that napa en, ou pe bargain avek en kliyan.  Because otherwise la sa zofisye i en Zofisye Leta e la i pe al bargain avek sa kliyan, i pe al dir gete pour mwan fer ou maryaz i pour ariv ou R3, 000 ek Mr X ek lot i pour ariv ou R6, 000 e mon pa konnen how comfortable bann Manm Lasanble Nasyonal zot pour vwar zot konfortab avek ler Gouvernman li menm li akoz sa zofisye i pour en Zofisye Gouvernman li, i pe al dan en, an negosyasyon avek en dimoun.

E mon mazinen Civil Status Office i realize, bann dimoun i konplet Sesel i en destinasyon ase ser e la ou pe anvoy, ou pe fer zot vin bann cowboys kwa?  E mon krwar si sa prescribed fee i ganny, sa fee i ganny prescribed and out of that prescribed fee then an amount i ganny spesifye kot i pour pey zot koman as an allowance.

 

MR SPEAKER

Mersi AG.  Onorab De Commarmond.

 

HON CHARLES DE COMMARMOND

Wi mersi Mr Chair permet mwan, mon’n konpran AG me prezan les Ms Labrosse li i travay laba ou pe dir pa fer, be sa dimoun prezan li i deside pour pa marye la Mahe i mont La Digue, eski sa dimoun La Digue i travay fulltime avek Civil Status?  Non?  Alor li i laba, i kapab pran son desizyon, i kapab fer li dan sa fason e ozordi ki mannyer i ape marse?  Ozordi sa ki ou pe dir la, i pe fer ozordi li?

Ozordi sa dimoun i dan biro i travay Civil Status i ale i al fer son maryaz deor, i pran sa zafer Gouvernman sa gro liv sa isi, sa laba i ale i anmenn ek li i fer sinyen deor, personn pa ankor dir nanryen, personn pa ankor ni al dir en mon osi mon pour fer parey, mwan osi mon gard, mon osi mon pour donn ou en papye, mon osi i annan en kasaz lo la pour mwan.  I pa mars koumsa, tou dimoun in konpran i annan 4, 5 dimoun kot Civil Status ki pe fer sa depi Lalwa depi ler i egziste i depi 1883 ou’n dir.

Depi ler sa Lalwa Civil Status i la, bann dimoun over the years in fer sa personn pa’n konplent la zis ki mwan mon ti, mon krwar Lalwa pe vin avek i pe dir ni Gouvernman pa ganny nanryen ladan aktyelman ki mannyer i ete, Lalwa pe dir Gouvernman prezan en pti kasaz ladan pour li akoz son papye pour li son soz, son bann zofisye osi pour li akoz i travay dan son ler, la osi i vin en pti fee, en fee i a deside lo la ki vin pour Gouvernman.  Alor pandan letan travay letan sa zofisye pe sorti sa i a ganny kouver par sa fee ki i ava donn Gouvernman ki ava antre dan Consolidated Fund.

Li i a kontinyen fer son pti zafer i ava debourye i napa bokou zot, sa i ava ankouraz bann lezot dimoun, lezot zenn pour rod en louvraz serye kot Civil Status pour ede pli tar akoz i annan lezot louvraz zot fer osi pour fer sir ki laba kot Civil Status toultan zot donn nou sa bon servis parey zot donn nou ozordi.  Mersi.

 

MR SPEAKER

Savedir ou dakor ki sa 2 parti in negosye, in antre dan en negosyasyon, wi sa zot…

 

(Interruption)

 

HON CHARLES DE COMMARMOND

Parey i ete konmela.  Be konmela i negosye mon krwar, mon pa konnen ki mannyer i fer, be parey i fer nou pa pe dir sanze nou.

 

MR SPEAKER

Negosyasyon i ganny fer konmela…

 

HON CHARLES DE COMMARMOND

Mon pa konnen si i fer negosyasyon, si i pa fer, nou pe zis carry-on be sanmenm sa pti granm pour Gouvernman.  Mersi.

 

MR SPEAKER

Vitman Onorab Pillay, nou oule fini sa Bill avan 3.30.

 

HON SEBASTIEN PILLAY

Mersi Mr Speaker. Mr Speaker mon krwar nou bezwen rod en solisyon e nou problenm i toultour sa allowance ki posibleman ki si par egzanp tou sa larzan i al dan Consolidated Fund, nou pa pe garanti poudir sa zofisye ozordi baze lo sa ki i pe fer i pe ganny sa peyman parey.

Dan propozisyon lamannman ki Onorab Georges in fer in aret kot si mon pa tronpe kot Consolidated Fund, ou’n aret la ou?  E prezan ou pe retir sa provizyon allowance ok?

 Mwan mon swiv en pti pe e dir akoz mon en pti enkonfortab ler ou tir provizyon en allowance ki vin entitlement legal pour en dimoun dan Lalwa, eski i annan en lot fason ki nou kapab word sa ki si nou dir par egzanp sa prescribed fee ki, sa fee ki pour ganny prescribed la i pa kapab en fee osi ki sitan o ki then pa les okenn margin pour sa zofisye negosye – ou konpran mwan?

Si par egzanp sa fee i RR3, 000 konpran?  Sa fee, prescribed fee pour sa dimoun ki pe marye an deor let’s say, akoz parey in dir pour 1, 500 a R3, 000 i R3, 000 then sa zofisye napa okenn gran margin pour li negosye akoz the whole 3, 000 pe vin dan Consolidated Fund so ki nou, ki mannyer nou kapab avek sa lamannman ki ou pe propoze si nou konfortab pour tir sa mo “allowance” si nou konfortab konpletman pour tir sa mo “allowance” then nou kapab go according to sa ki Onorab Georges in dir.  Si everybody i dakor ki nou fer sa Mr Speaker.

 

MR SPEAKER

Bon..,

 

HON SEBASTIEN PILLAY

Onorab Georges mon ti a kontan i fer en komanter lo la Mr Speaker.

 

MR SPEAKER

Yes en moman, petet zis mon ava azout en pti keksoz pour deba, menm lanterman i annan negosyasyon, nou pe koz zis maryaz menm lanterman i annan negosyasyon, ou kapab fer en lanterman avek R10, 000 ou kapab fer en lanterman ek R50, 000,  ou vwar?  

So parey Onorab De Commarmond in dir sa prosesis negosyasyon kot sa zofisye in rantre ek sa lot parti negosye i la, e la mon krwar kot lamannman pe vini pe sey fer propozisyon pour les sa negosyasyon kontinyen an menm tan ki Gouvernman li i ganny son prescribed fee. Onorab Ferrari.

 

HON JEAN-FRANÇOIS FERRARI

Tre vit Mr Speaker.  Mr Speaker Minis e lezot zofisye, AG ki’n pran la parol in demann nou en, si nou pe les sa ouver ki mannyer i kapab arive, si pa kapab annan labi sa i en kestyon ki’n monte.  Mwan mon ti a kontan dir partaz avek Minis avek bann zofisye ki la ki nou dan LDS nou vreman, pour en pei ouver kot dimoun i pran linisyativ, en pei kot dimoun i pran linisyativ apre son travay i ale i al fer en lot travay e i vin ris, i vin milyonner.

E mwan mon believe poudir en dimoun ki fer maryaz mon swete ki en zour i vin en milyonner.  Nou anvi sorti dan sa pei dan sa kalite mindset kot Sesel zis detrwa dimoun ki ganny drwa ganny larzan, konmsi si ou’n ganny larzan ou en voler oubyen ou en trafiker drog.

Mr Speaker mwan pwen ki mon anvi fer se ki pour le moman i pa’n annan okenn labi ki nou okouran.  Pour le moman sa ki nou sir, se ki Gouvernman pa pe ganny en sou lo sa travay, sa nou asire, e nou anvi ki Gouvernman i ganny en reveni, sa i en pwen ki mon krwar nou tou nou dakor lo la.

Prezan nou anvi ki sa dimoun ki fer sa maryaz ki deplas li apre wikenn apre ler i ganny li en sonm ki satisfezan.  Si nou fikse, si nou fikse en sonm, Onorab.

 

(Interruption)

 

MR SPEAKER

Kontinyen.

 

HON JEAN-FRANÇOIS FERRARI

Mon a les ou koze non?

 

MR SPEAKER

Non kontinyen Onorab Ferrari.

 

HON JEAN-FRANÇOIS FERRARI

Onorab Ghislain, be sa i en malelve sa, be pa pour kapab.

 

MR SPEAKER

Annou sey fini. Onorab Ferrari kontinyen.

 

HON JEAN-FRANÇOIS FERRARI

Mr Speaker nou anvi ki sa dimoun i kapab e nou annan konfyans nou lo sa kote latab ki pour napa egzazerasyon akoz i pour bann market forces, i pour bann keksoz ki rezonnab, nou konnen nou, e nou konnen osi ki par egzanp demen Gouvernman pa pour vin demann R3, 000 pour li anrezistre en maryaz, akoz i pe ganny zero Roupi ozordi, kekfwa i ava vin R300 oubyen i a vin R400 oubyen i a vin R500.

Si i annan egzazerasyon mon pa ekspekte ki Gouvernman ki vin egzazere, e nou konnen poudir en (SI) pour vin devan Lasanble e nou ava, nou ava osi nou aport nou kontribisyon lo la, so mon ti anvi zis vreman fer sa propozisyon ki parey Onorab Pillay in dir boner ki garanti i annan allowance.

Napa garanti, ler ou annan en marse ki ouver, en marse travay kot nou anvi nou bann dimoun i travay plis parey mwan ler mon ti zenn mon’n fer, ler mon ti fek tournen mon ti fer 3 louvraz, mwan ti travay dan Gouvernman mon, mon ti ale mon ti fer 3 louvraz, ankor 2 louvraz toulezour akoz se koumsa ki mon’n ganny elve.

E se sa ki mon anvi dir. So nou bezwen les, nou bezwen pran sa risk dan sa nouvo faz ki nou ladan, nou bezwen pran sa risk pour nou ouver sa marse ankouraz bann dimoun pour zot antre dan sa travay e fer li, se pour sa ki mwan mon toutafe dakor ki mon konklir lo la ki, nou fikse the prescribed fee needs to be fix and this will be fix through en (SI) ki Minis i ava anvoy devan Lasanble, apard sa les sa msye oubyen sa madanm fer li i pa, si en touris i vini i pey €200 pour li marye lo lans Anse Cachee oubyen lo lans, i pa en gran zafer pour li.  Nou osi, nou osi nou bezwen rod en fason pour nou pep gannyen, nou anvi ki nou pep i gannyen, mwan mon pa mind si demen en dimoun ki pe fer sa maryaz i ganny plis ki en Manm Lasanble kekfwa Onorab Pillay ou pa anvi sa dimoun i ganny plis larzan ki ou!  Be nou anvi nou!

 

HON SEBASTIEN PILLAY

(Mic Off)

Mr Speaker.

 

MR SPEAKER

Non, annou pa al dan sa direksyon.  Ou fer, ou’n fini fer le pwen, ok

 

HON JEAN-FRANÇOIS FERRARI

Atraver ou Mr Speaker, nou anvi ki bann dimoun i debourye.  So mwan mon ava pran propozisyon Onorab Georges ki parey Onorab De Commarmond in fer e nou ankouraz bann dimoun pour nou al dan sa direksyon. E bouze.  Mersi.

 

MR SPEAKER

Bon mon pour…

 

HON SEBASTIEN PILLAY

Mwan mon anvi tou dimoun gannyen dan en fason drwat Onorab. Sa ki mon oule fer.

 

MR SPEAKER

Onorab Pillay. Onorab Pillay mon pa’n donn ou la parol, ok?  Bon mon ava pas dernyen parol Onorab Georges apre mon ava donn la parol Minis oubyen AG.

 

HON BERNARD GEORGES

Mersi Mr Chair, Mr Chair dapre sa ki mon konpran si mon’n swiv byen, swe Minis e avek konkirans Lasanble se ki i annan en prescribed fee pour sak maryaz, sa mon in rev oli napa okenn napa okenn kontestasyon lo la e, me sa kestyon e ki i ava annan en allowance pour transpor pour anmenn sa dimoun kot maryaz, sa i ava ganny regilarize.

Me pa pour annan okenn kontrol lo allowance ki anba sa lamannman, pa pour annan okenn kontrol lo en allowance ki sa Zofisye Leta Sivil pour gannyen pour bann maryaz ki i selebre dan ler pour li menm.  Pou ariv laba, pour ariv laba mon ti’n fer 2 propozisyon me nou bezwen annan en trwazyenm ki nou aret dan Clause 2 (a) setadir Seksyon 76 (1) (B) maziskil ki nou aret sa apre mo “consolidated fund” so le sel keksoz ki i ava ladan se “the fees received by an officer shall be the, pardon?  “the fee prescribed under Subsection 1 (a)” propozisyon lamannman Attorney Zeneral shall be paid into the Consolidated Fund.  (pwen).  Setadir ki i ava annan en fee ki pour ganny prescribed anba 76 (1) (a) e sa fee pour ganny peye dan Consolidated Fund i aret la.

Nou pour bezwen prezan elimin 2 keksoz, enn se, anba Clause 2 (b) Seksyon 165 (2) (c) nou bezwen eliminen akoz li i koz lo allowance, nou’n tir allowance dan 1 (B), 76 (1) (B) nou bezwen tir li la, me nou annan 76 (d) anba Clause 2 (a) propozisyon Seksyon 76 (d) li osi i pour bezwen ale, akoz i dir ki “the fee, the prescribed fee shall not be taken into account in computing the officers pension or soz.  I pa pour, i obvious i pa pour ganny akoz i pa son allowance sa.  I son fee, i sa fee ki pe ganny peye dan Consolidated Fund.

Alor nou nepli bezwen 76 (d) – i ale.  Si sa bann lamannman i satisfer swe sa Lasanble mon mazinen ki avek sa bann lamannman nou kapab bouze.

 

MR SPEAKER

 

ATTORNEY GENERAL FRANK ALLY

Mon krwar sa i pour en matter ki nou bezwen diskite, me selman si nou pour fer li koumsa then therefore pour napa en allowance pour sa zofisye.  Sa zofisye pour al selebre maryaz i pour pey sa bann parti pour pey sa fee, me la ou pe les en sityasyon kot sa bann parti ki pe marye i pour dir avek li be anba ki Lalwa ki ou vin negosye en fee avek mwan, ou en public officer ou, eski sa i pa pour afekte sa zofisye evantyelman?

Akoz si nou pour elimin 1 (B) nou pour met en full stop (.) after Consolidated Fund, nou pour elimin 76 bracket (2) nou pour tir okenn referans avek allowance i vedir ki ler ou selebre maryaz mon pey Gouvernman son fee parey mon fer nenport kwa and then si ou pa selebre mon maryaz…

 

MR SPEAKER

Ok AG.  Onorab Georges.

 

HON BERNARD GEORGES

Wi i en pwen Mr Speaker si nou anvi fer kler ki sa Zofisye Leta Sivil i kapab annan en allowance, dan sa ka nou ava fer propozisyon ki mon ti’n fer bomaten ki dan 76 1 (B) nou pa aret li apre Consolidated Fund e nou kontinyen nou dir “and the officer shall be entitled to receive an allowance per marriage celebrated as the officer and the parties may agree. ”

Donk sa i donn li Pouvwar legal pour li negosye en allowance e la dan sa ka nou gard 76 (2) akoz la aprezan nou bezwen fer kler ki sa pa pour afekte son pansyon ek son gratwite, me nou still tir 165 (2) akoz sa allowance pour nepli en allowance ki pour ganny prescribed, i pour en allowance ki pour ganny negosye ant sa zofisye avek sa parti ki pe marye.

 

MR SPEAKER

Ok.

 

ATTORNEY GENERAL FRANK ALLY

Savedir dan sa ka nou kit li,  sot 2.  Me – anyway mon pa pour retourn lo sa deba ‘’as the parties may agree’’ nou pour retourn ver sa deba lo pour annan en negosyasyon e i pa anmenn sertente.  Ou konnen akoz mon krwar sa ki sa Lalwa ti pe sey anmennen, se sa ki the bedrock of the Law se ki ou bezwen annan certainty, ler sa touris i sorti Timbuktu i ariv Sesel oubyen avan i ariv Sesel, i deside pour li marye, i konnen egzakteman, ok dan en serten sityasyon i kapab annan en reprezantan en Agent Sesel ki’n fini dir li oubyen ki’n fini negosye avek en Civil Status Officer.

Me dan en ka par egzanp kot i zis anvi marye, ouswa i napa okenn Agent, so la i komans negosye ek sa zofisye e sa zofisye i vin, i komans, i le met en fee akoz ler nou pour koz agree, sa zofisye i bezwen tonm dakor e la napa personn ki kapab e en maryaz i ganny fer, i bezwen ganny selebre ase vit, i bezwen, so i, napa personn ki pour al arbitrate lo ou what is reasonable or what, or not reasonable.

Whereas la i pour annan dan en Regilasyon sa allowance e Lasanble pour konnen i pour annan en Droit de regard parey LGB in dir evantyelman sa Regilasyon i vin devan Lasanble, Lasanble i pour kapab quash sa Regilasyon si i anvi.

E i kapab annan bann rates par egzanp, si ou anvi marye Praslin e oubyen ou anvi marye Takamaka or whatever so i annan pri, i pour annan serten rates ki ava ganny set pour sa ki ava anmenn en serten reasonableness.  Mersi Mr Speaker.

 

MR SPEAKER

Me petet AG sa senaryo ki ou pe partaz avek nou i pe aktyelman go on, e i pe go on for many, many years kot sa dimoun ki pa’n pas atraver en DMC ler i vin Sesel i anvi marye Sesel Anse Cachee, Anse Diri se la kot i negosye son bann laranzman.  I rod en wedding planner ki pe organiz li lo lans parey Onorab Pillay in dir taler Glaçis ki pe organiz lo lans and all that, se la kot negosyasyon i komanse.  E i al menm avek sa zofisye ki pour vin fer sa maryaz, negosyasyon.  I pe go on aktyelman, Onorab De Commarmond.

 

HON CHARLES DE COMMARMOND

Mr Chair isi devan nou la, devan panel nou annan Manmzel Labrosse, Manmzel Labrosse i enn ki fer sa keksoz la, si i ti kapab share avek nou ki mannyer i fer ozordi.  Mersi.

 

MR SPEAKER

Mersi Onorab, eski Manmzel Labrosse i oule partaz leksperyans avek Lasanble?  Go ahead.

 

MS MARIETTE LABROSSE

Sa pri i ganny fikse lo, i en sel pri sa i R1, 500 kot nou pe ale.  I en sel pri i fix sa, pardon?

 

MR SPEAKER

Ok.  Onorab Georges.

 

HON BERNARD GEORGES

Presizeman Mr Speaker mon krwar ou fer le pwen Mr Speaker e, me mon krwar i ava bon repete. Ozordi i annan en allowance ki ganny peye avek sa Zofisye Leta Sivil e donk nou pa pe sanz nanryen ler nou pe fer sa lamannman, i annan en allowance ki ganny peye, sa ki nou annan la devan nou set en swa.

Swa nou kontrol sa allowance par Regilasyon, swa nou les marse lib pour les dimoun, sa Zofisye Leta Sivil dan son ler negosye son allowance, me dan ler Gouvernman i ava bezwen abide par ki en Memorandum sorti kot Chief Officer of Civil Status i ava dir li konbyen pour sarze.

Mon krwar se sa distenksyon ki nou annan devan nou.  Si akoz mon annan la parol, si nou pour al dan direksyon en marse lib parey sa propozisyon ki mon’n fer, mon bezwen dir ki mon bezwen propoz en lamannman avek 76 (2) akoz se pa son fee received ki pa pour ganny pran an konsiderasyon, se the allowance agreed.  Alor 76 (2) pour bezwen lir “the allowance agreed under Subsection 1 (b) rather than the fee prescribed will not be taken into consideration in calculating pension.”

 

HON CHARLES DE COMMARMOND

Mr Chair be la i vin en issue la, se sa ki mon dir taler nou ti pe koz dan abstre, abstract, Ms Labrosse sa ki in dir nou la ozordi, savedir nenport maryaz an deor biro ki swa ou fer li Northolme, ki swa ou fer li Labriz – Silhouette, ki swa ou vin fer li lo highway Cascade ouswa lo Glaçis, ouswa wherever si i an deor biro i R1, 500 sa, sa zofisye ki vin fer sa maryaz i ganny R1, 500 e ladan li Gouvernman i pa ganny nanryen.  Koumsa i ete.  Ou pa bezwen negosye, savedir napa okenn negosyasyon ki ganny fer.  Napa negosyasyon prezan nou akoz ki nou anvi anmenn negosyasyon nou, nou ti krwar ki deza zot pe negosye, deza i annan en serten negosyasyon si ou al fer Labriz i kout tan, si ou al fer lot landrwa lo highway i kout mwens, si ou fer dan lakaz sa dimoun Petit Paris i kout ankor mwens nou, nou ti krwar petet i koumsa.

Se sa ki mon ti pe dir taler nou ti pe koz en pe dan abstraction, abstre.  Alor baze lo la sa ki in ganny deklare mon krwar sa ki alors sa Lalwa pe anmennen nou devret pran an konsiderasyon, nou devret go back prezan nou, akoz nou pa’n, nou pe deside en keksoz, akoz sansan nou pe anmenn en keksoz ki pli konplike ki nou pa pe konpran.

Akoz mwan ti krwar mon aktyelman i koumsa, savedir aktyelman la son fee i R1,500, prezan li Gouvernman la ek sa lamannman i pe dir ok i kapab R1,500 i kapab en pti pe plis i kapab ant 1, 500 ek 3, 000 dapre Regilasyon ki a mete e prezan i pe dir baze lo la ou, mon servi sa akoz ou la ek nou, sa zofisye i ava prezan ganny en allowance, e i kapab al fer sa bann keksoz rather than konmela ki nanryen pa ganny peye, sa allowance antye, sa fee antye i al pour li prezan, mon pa konnen.  Mon zis met sa la ater.  Mersi.

 

MR SPEAKER

Bon avan nou al pli lwen, mon pe demann ek Lasanble ki nou pour pran en desizyon lo prosen Bill ki devan nou, akoz mon ti ekspekte ki sa enn pour pran en demi erdtan, Vis-Prezidan pe espere depi 2er alor mon ti a kontan ki nou tonm lo en konsansis, demen bomaten nou deza annan en Mosyon e nou annan en group dimoun dezabilite ki deza pe vini.

So mon pa ti ekspekte ki sa pti amannman ki devan nou pour anmenn nou sa zistans, mon pa anvi curb deba mon anvi ki nou sorti la avek en keksoz ki byen, me annou pran en desizyon akoz mon pa anvi ki Vis-Prezidan i kontinyen reste apre nou pour dir nou napa ase pour nou pran akoz 5er i nou limitasyon. Yes Onorab Pillay.

 

HON SEBASTIEN PILLAY

Mon kapab fer en sizesyon mon a gete si lo kote zot dakor?

 

MR SPEAKER

Lo sa ki mon’n dir?  Pa … Annou met on hold pour deba…

 

HON SEBASTIEN PILLAY

Pour nou sey frenm sa Mr Speaker…

 

MR SPEAKER

Mon oule pran en desizyon si nou pe gard VP in-waiting, oubyen si nou pe postpone sa deba lo sa prosen Bill?  Se sa ki mon oule, akoz mon pa santi it’s fair ki depi 2er Vis-Prezidan pe esper nou.  Yes Onorab Ferrari.

 

HON JEAN-FRANÇOIS FERARRI

Mr Speaker mon mazinen kekfwa bann Manm ava dakor avek mwan, semenn prosenn i annan en travay ase entans lo Civil Code

 

MR SPEAKER

Wi me nou pa ankor ganny Civil Code.

 

MR SPEAKER

Civil Code pa ankor ganny Gazetted.

 

HON JEAN-FRANÇOIS FERARRI

Ok, me o ka ki i arive, mwan personnelman mon ti a sizere ki nou fini avek sa e nou pran TRC e nou travay nou sey fini akoz nou bezwen avanse.

 

MR SPEAKER

Bon, mon, nou pa ankor, parey mon pe dir nou pa ankor ganny Civil Code, Civil Code pa ankor ni menm fer First Reading so i posib ki mardi nou ti kapab retourn lo TRC Mardi. Yes Onorab De Commarmond.

 

HON CHARLES DE COMMARMOND

Mon sizere nou, demen bomaten first thing nou pran TRC ;savedir VP i ava vin demen bomaten by 10er, break 10er nou’n fini avek e nou pran sa Mosyon pandan 11er – midi nou fini savedir dir lekol vini dan sa letan, ler nou fini nou annan lanterman pour nou ale.  Mersi.

 

MR SPEAKER

Mon pa vwar nou.  Onorab mwan osi mon ti’n set letan ozordi, me nou’n vwar ki menm ler ou dir ek en Manm poudir ou’n frenm ou lalis, sa Manm pa happy i santi ki mon’n vyol sa drwa anba Konstitisyon pour li koze, bon si zot pa kapab pran en desizyon mon pour bezwen enpoz en desizyon, ok?  Si zot pa kapab annan en konsansis mwan mon pour bezwen pran en desizyon.  Yes Onorab Valmont.

 

HON JUDE VALMONT

Mersi Mr Speaker, si en pti sizesyon, akoz nou pa kan nou annan letan la sa lot Bill i vin demen bomaten, nou bouz Mosyon pour en pe pli tar koumsa ou annan letan pour enform bann dimoun ki pour vini …

 

MR SPEAKER

Demen nou annan zis half day.

 

HON JUDE VALMONT

Petet nou pran Bill demen bomaten apre Mosyon nou anvoy pour next week or the week after.

 

MR SPEAKER

I annan – ok, yes Onorab Valmont rezon demen se ki tou bann lozistik in fini an plas pour Lasanble akey en group bann less-abled persons ok parmi nou pour sa Mosyon.  Onorab Pillay.

 

HON SEBASTIEN PILLAY

Mr Speaker mon krwar nou tou nou dakor poudir TRC i en Bill enportan…

 

MR SPEAKER

Enportan nou pa kapab rush li, yes

 

HON SEBASTIEN PILLAY

E nou pa kapab fini li dan 1erdtan i pa pour fer zistis sa size.  Petet koman en sizesyon mon ti a kontan propoze malgre ki nou’n set semenn prosen pour nou pour nou travay lo Civil Code e vi ki nou pa ankor ganny Civil Code akoz nou pa dedye en zour semenn prosen pour nou pran TRC e fer zistis sa size, e nou ava kontinyen akoz nou’n agree avek, nou’n annan en lagreman ki Civil Code osi i osi enportan e i osi konsekan pour nou popilasyon ki nou ava or throughout next week nou ava pran li.  Mon krwar mon pa konnen si bann lezot Manm i dakor ek sa ki i the best pozisyon ki nou kapab come up with.  Mersi Mr Speaker.

 

MR SPEAKER

Mersi Onorab Pillay, sa i al en pti pe dan laliny desizyon ki mon ti pe al pran, se ki mon okouran ki Vis-Prezidan i pour available as of Mardi le 17 so mardi le 17 nou dedye lazournen antye pour TRC e Merkredi onward nou pran Civil Code.  E la mon dir onward nou kapab sit Sanmdi osi tou.  Ok nou ti pe dedye 4 zour pour Civil Code si fodre nou pa fini Vandredi nou sit Sanmdi osi tou, sa mon, sa lespri ki mon ti pe al ladan, Onorab Georges.

 

HON BERNARD GEORGES

Mersi Mr Chair, Mr Chair mon pe…

 

MR SPEAKER

Silans.  Order!  Order!  Yes Onorab.

 

HON BERNARD GEORGES

Mwan lo sa ki ou fek propoze la, mon ti anvi zis aport a ou latansyon ki bann expert ki isi pour Civil Code i vin ekspre, e zot ti dan antisipasyon ki ti pour annan 5 zour travay, la in desann 4, si nou redwir li pour vin 3 zour, zot pour bezwen ale sanmdi alor si nou pour anvoy en keksoz Sanmdi i ti ava preferab ou anvoy TRC olye Civil Code.

E pour annan osi parey ou konnen en delegasyon sorti Maurice ki pe vin asiste deba lo Civil Code.  Alor mon ti ava swete etandonnen ki sa bann dimoun pe deplas ekspreseman pour sa e deza ki nou’n redwir 5 zour pour vin 4 ki nou gard otan letan ki posib pour Civil Code semenn prosen.

Eski mon ti a kapab sizer si nou pour pran, nou pour bezwen pran en Mosyon demen akoz napa lot fason e plan in deza ganny fer, akoz nou pa pran Mosyon ziska break akoz ordinerman bann viziter isi i reste ziska break e apre sa nou pran TRC.  Mon konsyan ki pour annan zis 1erdtan, oubyen ki nou fer 1erdtan TRC ozordi e ki nou fer 1erdtan TRC demen ant break avek midi.

 

MR SPEAKER

Bon i pres 4er nou pa ankor fini en senp pti lamannman, anfen en pti amannman ki’n vin konplike devan nou, mon pa konnen konbyen letan ankor nou pour ale. Onorab Ramkalawan.

 

HON WAVEL RAMKALAWAN

Mr Speaker mon konpran ki malgre dimoun i kritik ou, i kritik Lasanble ki akoz nou negosye, be mon krwar negosyasyon i bon.  Mr Speaker ler ki’n arive mwan mon krwar annou pran en break annou retournen dan 30 minit nou fini avek sa Lalwa TRC napa okenn nesesite pour nou tay avek li, ni ozordi ni demen, ni semenn prosenn annou keep to sa Schedule ki demen nou annan Mosyon lo bann dimoun avek dezabilite, semenn prosenn apartir Lendi nou pran Civil Code e apre sa letan nou’n fini avek Civil Code son semenn answit nou pran TRC e nou donn li tou lazistis.  Mersi bokou.

 

MR SPEAKER

Ok, dakor, bon mon ti a kontan piblikman mon prezant leskiz avek Vis-Prezidan ki in-waiting depi 2er avek mon panse i annan zofisye avek li, e mon ti ava demann Parliamentary Reporter pour eskiz Vis-Prezidan e nou kapab les li ale.

Eski nou adjourn e nou pran en break la?  Petet i ava annan bann pti negosyasyon ankor ki ava pe go on pandan sa break e nou retournen 4er edmi avek en bi ki pas 5er nou’n fini avek sa amannman ki devan nou ok?  Bon nou ava break e nou ava retournen 4er edmi.

 

(BREAK)

 

MR SPEAKER

Bon nou ava kontinyen nou travay lo sa Bill ki devan nou, mon ava donn laparol Minis.

 

MINISTER MYRIAM TELEMAQUE

Mersi Mr Speaker. Mr Speaker mon’n ekout atantivman bann deliberasyon ki’n pase e mon krwar petet mon devret donn en pe leklersisman e koz en pe lo sa nouvo Scheme of Service ki nou anvizaze met anfors pour bann Civil Status officers, ladan dan sa Scheme nou’n reviz saler debaz tou bann zofisye, nou pe donn zot parey mon’n dir en inducement allowance, en clothing allowance, en transport allowance avek en standby allowance, e nou’n pran osi prenon kont ki nou pour met idantifye, apwent en Registrar, sa Registrar i pour la pour li schedule tou maryaz i ava, si i annan okenn koup ki anvi marye i ava vin pey the prescribed fee avek sa Registrar e sa Registrar osi ki pour schedule the marriage i ava delegate en zofisye pour li al fer maryaz pour nou kapab annan e pe lord e rikord lekel zofisye ki’n al fer tel maryaz, kote i ete or aid to.

        E nou ti a kontan osi, nou’n fer provizyon dan sa Scheme of Service petet nou ti devret fer resorti pli avan pour bann part time Civil Status Officers.  Akoz nou konnen poudir i annan bokou maryaz an se moman si e nou’n fer provizyon pour en saler i ganny donnen ek bann part time officers.  Sa bann zofisye part time i ava ganny apwente koman apwente e sermante koman en Civil Status Officer e zot osi zot a ganny delege pour al fer maryaz tel landrwa dan en lokasyon kot bann dimoun, sa koup i ti a kontan maryaz i ganny fer.

Lo size sa Lalwa li menm li nou ti a pli kontan sa Lalwa i pase e apre i a donn Minis pour vwar pour fer bann Regilasyon, e dan sa Regilasyon nou a pran konsiderasyon sa bann allowances ki zot, zot pe diskite lo la an se moman.  Si i annan rezon pour nou reviz sa allowance tousala nou a ganny pran an konsiderasyon e nou a take it onboard.  Mersi Mr Speaker.

 

MR SPEAKER

Mersi Minis.  Bon eski sa i konsansis ki le 2 kote in tonm lo la?  Onorab Georges.

 

HON BERNARD GEORGES

Mr Chair nou’n koz avek Minis dan sa break e nou konpran egzakteman kot Minis, dan sa ki Minis pe dir, me mon krwar nou ti ava, lo nou kote nou ti anvi fer kler ki i bezwen annan en distenksyon ant en fee ki Gouvernman pour gannyen pour sak maryaz ki pe ganny selebre, dan en landrwa an deor lofis Leta Sivil Anvil e en allowance ki ganny peye par a sa Zofisye Leta Sivil ki perform sa maryaz.

Sa 2 keksoz fodre i reste separe e avek lentansyon ki Gouvernman i ava ganny son reveni me osi sa Zofisye Leta Sivil i ava ganny en reward pour sa travay ki i pe fer sirtou an deor ler travay, pour kapab permet ki sa i ale mon ti ava e pour gard lespri sa Bill san ki nou sanz li tro bokou me pour fer kler, mon ti ava kontan propoz bann, sa bann lamannman swivan.

Premyerman lespri sa mo “prescribed fee” dan Clause 2 (a) Seksyon 76 1 (A), 1 (A) capital i mansyonn prescribed fee, mansyonnen ki ler en dimoun i anvi marye son request i ava ganny entertain ler i pey en prescribed fee.

Sa prescribed fee i annan 2 konponan, i en fee ki pour ganny peye avek Gouvernman, ki Gouvernman pour ganny son larzan ladan e i annan en konponan sa allowance ki sa Zofisye Leta Sivil pour resevwar, i kapab anba sa Scheme of Service, i kapab par anba sa Scheme of Service, me i bezwen annan en konponan ladan, si se sa konprenezon Minis, mon propozisyon, se sa propozisyon swivan.

Dan 76 1 (B) parey Attorney Zeneral in propoze pli boner olye “the fees received by an officer” i ava “the fee prescribed under Subsection 1 (a).” sa prescribed fee i ava ganny peye into the Consolidated Fund and the officer shall be entitled to receive an allowance per marriage celebrated as may be prescribed..’’ mannyer i ete la.

Me nou pe sanz fees received nou pe met fees prescribed under Subsection 1, donk sa i fer kler ki dan sa konponan fees prescribed i annan, i pour ganny peye dan Consolidated Fund, donk i vin larzan Gouvernman me i annan ladan sa, i annan en konponan allowance ki sa zofisye pour resevwar.

Dan 76 1 (2), 76 1 (2) olye “the fees received under Subsection 1 (a) shall not be taken into account in computing the officers pension” nou bezwen fer kler ki se pa the fee received akoz ladan i annan en konponan pour Gouvernman nou bezwen sanze e met “the allowance received or any allowance received under Subsection 1 (a) shall not be taken into account.”

Donk ankor nou ankor lo menm mon krwar menm longer done.  Kot mon ti ava swete i anmenn, nou annan plis presizyon i vin anba Clause 2 (b) Seksyon 165 2 (c) 165 2 (c) olye met “the allowances payable to an officer” parey i ete konmela mwan ti ava propoz sa formilasyon swivan “the allowances payable to an officer who celebrates a marriage,

No.1 – during office hours,

E No.2 – outside office hours under Section 76 pour fer kler, pour met lespri ki nou swete ki i annan en distenksyon, nou swete ki i annan en allowance during office hours ki kapab antre dan sa Scheme of Service me ki outside office hours sa Zofisye Leta Sivil i ava ganny en sipleman ki pa pour sorti dan pos Gouvernman ki pour sorti dan sa prescribed fee, alor ler Minis i ava prescribe son fee i ava dir within office hours nou pe al kot ou private home ou prescribed fee i tan, outside office hours i tan a i plis, akoz sa konponan allowance pour sanze pour sa Zofisye Leta Sivil.  Si mon’n fer byen konpran e ki i annan konsansis lo la mon krwar sa i ava kouver sa ki tou lede kote i swete vwar.

 

MR SPEAKER

Mersi Onorab Georges. Onorab Pillay.

 

HON SEBASTIEN PILLAY

Mersi Mr Speaker, Mr Speaker mon krwar sa propozisyon i dan laliny ki nou’n diskite akoz mwan ti a kontan ki Minister i pran konsiderasyon ki the outside office hours part i pour zis parey nenport zofisye ozordi ki fer en keksoz outside office hours extra class pour en teacher eksetera, ki zot ganny serten dédommagement pour sa.

Me avek Minis kot in koz lo allowance pour transpor akoz 2 (b), 165 2 (b) i koz lo the mode of conveyance e mon krwar i tie in avek sa allowance pour transpor.  So mon pour vey sa Regilasyon pour vwar si ler nou pe (CAP) sa allowance pour transpor nou pa pe (CAP) li a en nivo ki bokou pli ba ki baze lo sa bann fees ki nou pe, ki nou oule prescribe.

Akoz pa bliye poudir Gouvernman pour anmas li en reveni si nou pe koz lo sa laliny ki zot in ale around R8 million zis lo sa konponan maryaz ki ganny fer an deor.  Mersi Mr Speaker.

 

MR SPEAKER

Mersi Onorab Pillay, Onorab Andre.

 

HON CLIFFORD ANDRE

Mersi Mr Speaker, Mr Chair, Mr Chair mwan mon oule demann Minis e letan mon pe ekout Onorab Georges sa ki in dir mon konpran, me selman eski Minis i kapab donn nou en garanti ki sa allowance pa pour definitivman mwens ki R1,500 ki a ler aktyel sa bann dimoun pe gannyen e si mon’n ekout li byen in dir ki poudir Gouvernman pe mazinen pour fer sa prescribed fee ant 1, 500 a R3, 000.  So ki a fer ki Gouvernman osi a ganny en par definitivman, me selman zot, zot allowance ki i a ganny regularize me i pa pour desann plis ki R1, 500.  Mersi.

 

MR SPEAKER

Mersi, yes Onorab Andre.  Minister.

 

HON CLIFFORD ANDRE

I pa pour desann pli ba ki 1, 500.

 

MR SPEAKER

I pa pour desann pli ba ki 1, 500, wi ok, Minister.

 

MINISTER MYRIAM TELEMAQUE

Mersi Mr Speaker, Onorab the prescribed fee nou pa mazinen pour desann pli ba ki 1, 500 akoz i deza pe ganny 1, 500 pour peye.

 

MR SPEAKER

Ok.

HON CLIFFORD ANDRE

Mon krwar i annan en pti konfizyon la, prescribed fee se sa ki pour ganny peye avek Gouvernman, korek, prezan mwan mon pe dir the allowance of the officer ki al selebre sa maryaz ki a ler aktyel dapre ki nou konpran i pe ganny R1, 500 par maryaz zot selebre.  So ki mwan mon pe dir, si Minis i kapab donn nou en langazman la ki Gouvernman i ava gete ki sa allowance ki sa zofisye pour gannyen, definitivman Gouvernman i kapab fer R3,000 li, i kapab fer R4, 000 si i le, me selman sa allowance i sa zofisye pour gannyen i pa pour pli ba ki i pe gannyen la konmela ki vedir i pa pour pli ba ki R1, 500 a ler aktyel ki i pe gannyen.  Mersi.

 

MR SPEAKER

Mersi Onorab.  Minis.

 

MINISTER MYRIAM TELEMAQUE

Mr Speaker nou bezwen prenon kont ki i annan allowances dan sa Scheme, selman mon konnen nou pe koz allowance ki pour dan Lalwa e mon pa kapab komet mon lekor pour dir i pour pli ba, i pour pli ba ki R1, 500 oubyen pli o akoz nou pa ankor agree konbyen pour donnen.

 

MR SPEAKER

Mersi Minis. Onorab Georges.

 

HON BERNARD GEORGES

Mersi Mr Chair, Mr Chair i annan en keksoz ki paret mwan ki nou pa pe vwar, sa lelefan ki dan sa Lasanble se sa 2 mo dan 76 1 (B) per marriage i pa en, sa Lalwa antye i tourn otour sa 2 mo i pa en kestyon allowance, Scheme of Service eksetera sa i fine sa, sa tou zofisye Gouvernman i annan, sa set en allowance ki Lalwa i dir zot pour ganny peye pour sak maryaz ki zot selebre that’s why nou annan sa soz.

Nou sa ki nou pe sey dir se, sak maryaz ki sak Zofisye Leta Sivil i ganny selebre i bezwen ganny en allowance e sa allowance pour vin dan sa prescribed fee sanmenm sa mon’n fer sa formilasyon, during office hours prescribed fee will be R2,000 pour Gouvernman par egzanp, R1, 500 pour sa or whatever, R500 pour sa zofisye ki pe selebre, plus transpor, i la transpor 76 (1), plus transpor sa ou a peye dan Consolidated Fund sa zofisye i ganny son allowance.

An deor ler travay R2, 000 pour Gouvernman, R1, 500 pour sa dimoun ki selebre plus transpor that’s what we want.  E se sa ki lentansyon sa Lalwa ki pour sak maryaz ou pour ganny en reward, ou pa pour ganny zis anploye 8er-4er avek en Scheme of Service si ou fer 5 maryaz oubyen si ou fer 500 ou pour ganny parey, that’s the idea.

 

MR SPEAKER

Mersi.  Onorab De Commarmond.

 

HON CHARLES DE COMMARMOND

Non zis an plis, i paret ki i pe ganny met en pe fairness osi ladan, aktyelman la mon krwar i annan parey nou’n dir 5, 6 zofisye ki pe fer sa e avek lamannman i kapab annan plis ki sa 4, 5, 6 zofisye ki fer sa, akoz letan ou pran sif 2, 000 ekek maryaz zis etranze sa e ou diviz li par sa let’s say 5 zofisye ki fer sa maryaz, e i vin apepre 400 sakenn miltiplir par 1,500 par maryaz i vin 600, 000 par an zis nou, konmsi mon pe met sa la e kekfwa avek sa ki zot pe fer la i pour ogmant lakantite dimoun ki zot pour deside pour fer maryaz, i kapab anmenn plis fairness parmi bann zofisye kot Imigrasyon osi ki lezot dimoun i kapab ganny en sans ladan.  Mersi.

 

MR SPEAKER

Yes AG.

ATTORNEY GENERAL FRANK ALLY

Bon mon ti, baze lo sa lamannman sa propozisyon ki Onorab Georges in anmennen, mon ti a zis kontan si ti a zis go through espesyalman 1(B), 76 (1) – 1 (B) if it will be the fees, the fee prescribed under Section 76 (1) -1 (B) shall be paid over to the Consolidated Fund full stop.  (.).  So then it will carry on to, and the officer shall be entitled to receive an allowance per marriage as may be prescribed ; or to be paid an allowance as may be prescribed, and then the prescrib … e lo 165 (2) nou pour gard 2 (a) nou, are we going to do our way with (b)?  Kite, ‘’allowance payable to celebrate the marriage’’ sa osi nou kite, sorry nou read li avek parey ou’n mete “the allowance is payable to an officer during working hours and outside working hours and then any other matter as well.

        Non i enportan akoz parey ou’n dir sa, the marriage, 76 (1) i koz senpleman lo en maryaz ki pour ganny selebre dan en private house or place e i kapab ganny fer during working hours e osi outside working hours.  E prezan i pour depan lo rates akoz sa dimoun ki selebre li outside working hours i kapab bezwen pran konsiderasyon en serten overtime rate ki li pour li kapab met compensate li pour li sorti dan son, se li pour li al selebre maryaz.

MR SPEAKER

Yes Onorab Georges.

HON BERNARD GEORGES

Idealman Mr Speaker, si ti ava annan en definisyon prescribed fee ki ti ava met the prescribed fees to include “the fee payable for the marriage, the allowance and the transport” i ti ava met tou keksoz, i ti ava anglob tou keksoz e nou kapab fer li, nou kapab fer li anba 27(6)(1) (a) payment of a prescribed fee which shall include x, y and z” vwar la aprezan nou tie li, li up konpletman.

 

MR SPEAKER

 

ATTORNEY GENERAL FRANK ALLY

Mon krwar petet mon a les Minis be selman mon krwar legalman i akseptab.

 

MR SPEAKER

Bon mon ava donn Minis dernyen parol pour regarde si nou aksepte tou sa bann lamannman and then nou ava pran en vot lo amannman, Minis.

 

MINISTER MYRIAM TELEMAQUE

Mersi Mr Speaker, nou ava aksepte sa bann amannman ki’n ganny propoze e nou a pran kont e AG i redrafte Lalwa i a met annord.  Mersi.

 

MR SPEAKER

Mersi Minis.  Nou’n fini deba.  Minis in aksepte bann lamannman.

 

HON SEBASTIEN PILLAY

Mr Speaker anba 2 (a) mon pa konnen si Onorab Georges in konsidere si kot nou pe koz lo the fees to paid by parties for celebrating under Section 76, eski nou pe met li the fees pour tou konmsi pour in or outside or are we saying nou pour fer en derogasyon dan that would be the fees to be paid during working hours or outside working hours, the whole thing?  Ok.

 

MR SPEAKER

Bon, dakor nou kapab pran en vot lo bann amannman ki’n ganny propoze, tou Manm ki an faver bann amannman?  Okenn Manm ki kont?  Madanm Deputy Clerk.

 

MADAM DEPUTY CLERK

Mersi Mr Speaker, 22 Manm in vot an faver sa Mosyon, personn kont.

 

MR SPEAKER

Mersi Madanm Deputy Clerk.  Mon ava demann Sergeant pour reconstitute dan Lasanble, Komite of the Whole Assembly.  Mon kapab ganny en Mosyon pour Third Reading.

 

HON CHARLES DE COMMARMOND

Thank you Mr Speaker, Mr Speaker anba Order 71 (1) nou Standing Order mon oule move ki The Civil Status (Amendment) Bill 2018 as amended i ganny lir en Trwazyenm Fwa.  Mersi.

 

MR SPEAKER

Mersi Onorab De Commarmond, seconder?

 

HON SEBASTIEN PILLAY

Mersi Mr Speaker, Motion seconded.

 

MR SPEAKER

Mersi Onorab Sebastien Pillay, bon nou kapab pran en vot lo Mosyon pour Third Reading, tou Manm ki an faver?  Okenn Manm ki kont?  Madanm Deputy Clerk.

 

MADAM DEPUTY CLERK

Mersi Mr Speaker, ankor 22 Manm in vot an faver sa Mosyon, personn kont.

 

MR SPEAKER

Bon mon kapab ganny en Formal Third Reading.

 

MADAM DEPUTY CLERK

This Act may be cited as The Civil Status (Amendment) Act 2018.  Thank you.

 

MR SPEAKER

Mersi.  Savedir Bill ki devan nou in pase as amended.  Avek sa mon ti a kontan remersi Minis Telemaque, AG avek lezot manm delegasyon, me nou remersi zot e nou ava eskiz zot parmi nou.

 

(MINISTER TELEMAQUE AND HER DELEGATION WAS EXCUSED FROM THE HOUSE)

 

MR SPEAKER

Bon mon ava zis sinyal bann Manm ki demen nou annan 2 Mosyon lo Order Paper, me i annan posibilite nou pour pran zis en Mosyon, sa premye Mosyon akoz Lasanble pe break midi e pour annan staff Sekretarya avek bann Manm ki pour asiste servis fener nou Former Clerk Madanm Sheila Banks.  E pour lenformasyon bann Manm, servis pe fer 2er apre midi Legliz Good Shepherd.  So nou ava adjourn e nou ava rezwenn demen bomaten 9er.

 

(ADJOURNMENT)