Home » Verbatim » 2018 » Verbatim Thursday 21st June, 2018

Verbatim Thursday 21st June, 2018

NATIONAL ASSEMBLY OFSEYCHELLES

Thursday 21st June 2018

 The Assembly met at 9am

 National Anthem

 Moment of Reflection

 Mr Speaker in the Chair

 

 MR SPEAKER

Bonzour tou Manm Onorab e bonzour tou Manm Piblik ki a lekout e pe swiv travay Lasanble Nasyonal.  Bon devan nou annan en Revised Order Paper e nou pour se sa Papye ki nou pour swiv la bomaten.

Nou ava al direkteman lo item limero 4 ki en prezantasyon papye mon ava demann Madanm Deputy Clerk pour ou lir. Yes Madanm Deputy Clerk.

 

MADAM DEPUTY CLERK

Mersi Mr Speaker.  Bonzour tou bann Manm e tou Piblik ki a lekout.  Papye ki pe ganny prezante I report of FPAC Frozen Budgets 2018.  Mersi.

 

MR SPEAKER

Mersi Madanm Deputy Clerk.  Bon an vi ki nou annan en Mosyon en Urgent Motion ki pe tous sa rapor, mon ti a zis kontan demann avek Chair FPAC si oule prezant sa rapor ki mannyer I ete, oubyen ou a prezant li ler ou a pran Mosyon?

 

HON WAVEL RAMKALAWAN

Bonzour Mr Speaker.  Mersi bokou.  Bonzour tou bann koleg MNA e tou dimoun ki pe ekout nou.  Mr Speaker mon ti pe mazinen ki poudir e mon ti koz avek Onorab De Commarmond bomaten, ki poudir nou ava prezant en kopi avek Lasanble – konmsi dan en fason ofisyel and then dan Mosyon mon ava go through sa.

 

MR SPEAKER

Mersi Onorab Ramkalawan.  So nou ava proceed dan sa fason.  Ok.

 

HON WAVEL RAMKALAWAN

Alors Mr Speaker.  I mon gran plezir konman Chairperson FPAC pour prezant sa rapor lo lapar Komite FPAC.  Mon anvi dir ki tou bann Manm in sinyen e nou tou nou dakor avek konteni sa rapor ki plitar nou ava etabli.

E ankor enn fwa Mr Speaker mon pour met lo rikord apresyasyon pour lafason ki Komite FPAC pe travay.  I annan full korperasyon sorti lo tou lede kote latab.  Ofet mon ava menm kapab dir ki pour mwan personnelman mon krwar ki FPAC in vreman vin en Komite Lasanble, kot apartenans politik I ganny met de kote.  E letan nou fer nou travay nou regard sa pli o standar posib e tou bann Manm I toultan korpere tou bann Manm I toultan prezan e nou annan sa bon korperasyon.

Alor Mr Speaker avek sa silvouple aksepte sa rapor lo lapar FPAC.  E mon ti ava kontan zis pour terminen dir ki pandan sa mwan Zilyet I pour osi annan ankor omwen de rapor ki de oubyen trwa rapor ki FPAC pour prezant avek Lasanble.  Mersi.

 

MR SPEAKER

Mersi Onorab Ramkalawan.  Bon nou ava kontinyen nou ava al direkteman lo Mosyon.  E nou ava pran Urgent Motion ki pe move par Leader Lopozisyon Onorab Ramkalawan.  E mon ava demann mover Mosyon pour li move son Mosyon.

 

HON WAVEL RAMKALAWAN

Mr Speaker mersi bokou.  Ankor enn fwa mon konsiltasyon avek bann Manm e la mon ti ava remersye Onorab Pillay pour son konsey.   Nou’n apre prezantasyon sa rapor aprezan Lasanble I bezwen pas en rezolisyon – en rezolisyon pour ki sa bann sonm i ganny released.

E la mon ti ava kontan zis donn en pti git sa istorik lo lafason ki nou fer sa travay.  Ofet I fer 2enm fwa ki Lasanble I fer en travay parey.  Dernyen fwa nou ti fer li pandan deba Bidze li menm, kot nou ti verbalman demande ki serten fon I ganny released.

Me ozordi la nou pe fer li dan en fason atraver en Mosyon.  E petet sa I ava en model ki nou ava adopte pour lavenir.

Mr Speaker zis pour met keksoz an konteks.  Pandan deba Bidze an 2017 pour Bidze 2018 ti annan serten headings ki letan nou ti demann kestyon konman en Lasanble, keksoz pa ti kler.  E en pe sa bann keksoz ki pa ti kler, Lasanble ti tonm dakor ki nou pour sispann sa bann headings.

E parmi bann headings ki’n ganny sispann; par egzanp ti annan National Heritage Foundation.  Ti annan NISTI  – NISTI ti annan en size sekirite;

Departman Defans ti annan en depans lo en Kontra.

Lofis Prezidan ti annan pour fer avek sekirite ek enforcement.  

STB.  E tou sa ki mon pe lir la I dan sa schedule ki atase avek sa rapor.

Ti annan STB.  Ti annan Lazans pour Prevansyon Drog;

National Intelligence Agency;

Fishing Authority.  E la Fishing Authority mon anvi zis met lanfaz parske I annan sa konfizyon ki Fishing Authority ti annan en sonm R6milyon ki ti ganny sispann.  E sa R6milyon ti napa nanryen pour fer avek fuel allocation pour bann peser.  Me sa R6milyon ti annan pour fer avek Proze Aquaculture.

Alors bann peser ankor enn fwa mon met lanfaz lo la avek fuel incentive SFA.

Apre sa Prizon, Judiciary apre sa Children’s Special Fund. 

Mr Speaker depi Zanvye Minister Finans in donn nou sa commitment ki poudir zot pour retourn dan Lasanble avek bann detay ki Lasanble Nasyonal ti pe demande.

Me Minister Finans pa’n fer sa.  Se selman pandan mwan Me ki zot in kontakte FPAC e nou aprezan FPAC nou’n rankontre avek sa bann diferan Lazans.  Bann diferan Minister pour nou ekout zot.

E letan nou’n ekout zot e la I enportan pour mansyonnen Mr Speaker ki poudir sa sonm total ki ti ganny sispann sete en sonm R96,967,729milyon.

E letan Minister Finans in vin devan avek bann diferan antite sete en sonm e I pa ti sa sonm total ki zot ti pe demande ganny release sete en sonm R70,454,461.72milyon ki zot ti demande ki i ganny large pour zot kapab bann diferan landrwa kapab fer zot travay.

Alors sa I montre nou deswit ki poudir I ankor annan en sonm en sonm anviron R29milyon ki pa’n ganny release.  E sa se parske bann diferan antite ansanm avek Minister Finans zot menm zot pa’n tonm dakor kwa ki zot pour prezante devan Lasanble.

E parmi bann Mr Speaker ki pa’n ganny released mon ava dir ki I annan en sonm R900 e sa se bann propozisyon ki Minister Finans ti fer devan Lasanble Nasyonal.  I annan en sonm R940,472mil sa pa’n ganny release.

I annan en lot sonm R1.883milyon ki pa’n ganny release e sa sete pour Sekirite pour Wellness Center.

E anba sa Lazans Drog ti annan en sonm R10.2milyon ki ti ganny mete pour vilaz e ladan zot in demann lotorizasyon pour ki R5milyon I ganny release e sa R5milyon sorti dan sa R10.2milyon pour al dan re alokasyon pour pey konpansasyon bann travayer e pour anploy nouvo staff

Lo zot Proze Rehabilitation Centre malgre ki nou’n tann bokou koze lo la Mr Speaker ziska aprezan I pa ankor finalize.  E Minister Finans ti met sa kler ki poudir sa plan se prezan ki I pe ganny prezante devan Komite Devlopman.

Lot Bidze ki I pa’n ganny ki pa’n ganny prezante se en sonm R7.8milyon pour Servis Prizon e sa in fer kler ki poudir Prizon e sa se pour bann service agreements.

Prizon I ankor pe negosye avek IDC pour an relasyon avek Coetivy e alor sa Minister Finans sa sonm R7.8milyon Minister Finans pa’n propoze ki poudir I ganny sispann.

Apre sa e la ou ava rapel Mr Speaker ki letan ti pe fer prezantasyon kot Konstitisyon e Onorab De Commarmond avek enn de lezot Onorab osi tou ti la enkli Deputy Speaker kot Sef Ziz ti mansyonnen, ki poudir Lasanble in freeze son Bidze.  E  mwan mon ti pran laparol e sa ki mon ti dir dan sa prezantasyon Mr Speaker la I la laprev ki poudir Zidisyer ti annan en sonm R3.3milyon ki ti ganny sispann par Lasanble Nasyonal e sa ti pour bann zafer sekirite ok?

E malerezman Zidisyer avek L’Egzekitiv atraver Minister Finans, zot in zot pa’n mon pa konnen ki in arive ant zot me zot pa’n fer okenn demann pour ki sa sonm I ganny release.

Alor parfwa Mr Speaker mon pe mansyonn sa parske parfwa nou Lasanble I ganny akize pour keksoz ki nou pa responsab.  E mon krwar ki poudir sa bann keksoz koumsa fodre ki I arête enn fwa pour tou.  Zidisyer pa’n prezant okenn ka devan FPAC atraver Minister Finans pour ki sa sonm I ganny release.

E se pour sa rezon ki nou dan nou travay nou pa’n bezwen konsider sa sonm.

Alor Mr Speaker letan tou bann diferan Lazans Minister ek Departman in vin devan Lasanble ansanm avek Minister Finans, devan FPAC nou kestyonn zot e Manm Piblik in ganny sans pour swiv tou bann deba lo televizyon e lo radyo.  Nou’n kestyonn zot in donn nou bann leksplikasyon ki nou ti pe rode e apre ki nou ekout zot, FPAC alors in tonm dakor ki poudir nou kapab fer sa rekomandasyon avek Lasanble Nasyonal, parske se Lasanble Nasyonal ki annan sa Lotorite e non pa FPAC ki alors ki sa sonm R70,454,461.72milyon I ganny release.

Se pour sa rezon Mr Speaker avek sa detrwa parol mon Mosyon I lir ‘the National Assembly resolves  that as per the report (ki nou’n prezante) and the recommendation of the FPAC, the sum of R70,454,461.72million suspended in the 2018 Appropriation Act, be released’.

E mon beg to move ki Lasanble I aprouv sa rezolisyon.  Mersi bokou Mr Speaker.

 

MR SPEAKER

Mersi Onorab Ramkalawan.  Onorab De Commarmond.

 

HON CHARLES DE COMMARMOND

Mersi Mr Speaker.  Bonzour

Mr Speaker.  Bonzour tou Manm Onorab e tou dimoun a lekout.  Mr Speaker mon le segonn sa Mosyon.  E brefman, tre brefman dir de mo.  Premyerman I enportan fer resorti sa ki pe pas devan Lasanble ozordi I en premye e I nouvo.  Nou fer li avan dan sa fason ki’n ganny eksplike, me la dan sa fason koumsa I istorik e an menm tan I en travay tou lede kote.  I en travay ki nou agree pour fer pour pei pa pour nou pa pour parti politik sakenn nou me pour en lot nivo keksoz dan nou pei.

So pour fer ki sa bar ki nou mete la nenport kwa ki nou vini nou demande, ki I pa ganny met pli ba. I a kapab monte me pa ki I desann pli ba.

Mon pe dir sa osi pour ki tou bann Lazans tou bann antite Gouvernman Minister Departman e tou I konpran poudir napa okenn keksoz malis ki ganny fer dan tou sa.  I en prosedir pour anmenn si oule plis bonn gouvernans e latransparans.  E pour fer ki si I annan leksplikasyon en keksoz ki nou pa telman kler pa telman konpran ki i tou normal ki nou demann en leksplikasyon, pour nou kapab nou osi konpran kwa ki nou pe aprouve an term Bidze.

E alor o pli vit ki sa leksplikasyon, sa diskisyon I vini o pli vit ki sa Bidze I ale napa nanryen ki nou bezwen tarde, pour …

E an menm tan mon pran legzanp mon pran sa Linite Lentelizans la, ki pe esper Lalwa ganny fer me selman ti annan en bout larzan ki’n mete dan Bidze.  Be si Lalwa pa vini sa larzan pa pour ganny servi li.

Sanmenm sa nou pe dir be si zot vreman anvi sa I ganny fer anmenn sa Lalwa vitman pour ki sa larzan I ganny release pour ki sa unit I ava kapab marse.

I enportan lentelizans pour en pei.  E nou konsyan sa nou be si zis nou dir be ok be la larzan apre napa Lalwa ki vini sa osi I pa vin byen.  E tou dimoun pe swiv nou dan tou sa ki nou pe fer.  E alor I enportan ki sa latransparans, sa bann leksplikasyon I la pour ki dimoun I vwar e ki bann lenstans I osi zwe zot rol pour nou kapab bouz pli vit avek sa.

E ler mon dir se en standar ki nou mete ki nou ariv lo sa nivo e ki fodre pa zanmen I ganny bese, i osi enportan ki lefe ki I nouvo ki nou pe fer dan nou pe revwar Konstitisyon dan ki nou Lasanble pe revwar son Standing Order, somewhere, somehow sa I ganny mete azour  osi. 

Ki mannyer pour vini mwan personnelman mon pour napa egzakteman son wording, son fason fer, nou bezwen diskit ansanm, pour ki I pran sa lot dimansyon pour ki I tonm dan nou Standing Order ki dan nou Konstitisyon a lavenir ler nou pe vwar sa.

ek sa mon krwar se en si ou vwar sa rapor I pti very short report e me I enportan.  E nou demande ki alor bann lenstans Gouvernman I ti bezwen vreman zot finans e ki zot bouze vitman pour ki nou al de lavan dan nou pei.

E avek sa mon demann tou Manm prezan isi dan nou Lasanble pour siport zot atraver sa rapor e son rezolisyon ki I ava vini ki konsern tou nou Lasanble.  Mersi bokou.

 

MR SPEAKER

Mersi Onorab De Commarmond pour segonn sa Mosyon e pour dir de parol.  Ou pwen with regards to Standing Orders Committee to take sa pwen.  I en pwen ki mon ti pe note mon fini forward avek Madanm Deputy Clerk ki osi sekreter lo sa Komite, kot nou bezwen al regarde ki mannyer pour met li lo rezolisyon sirtou kot I konsern avek finans pour nou entegre li dan nou nouvo Standing Orders.  Mersi Onorab.  Okenn lezot Manm ki le entervenir?  Onorab Sebastien Pillay.

 

HON SEBASTIEN PILLAY

Mersi Mr Speaker.  Bonzour tou Manm Onorab.  Bonzour tou dimoun ki pe ekout nou.  Mr Speaker mon krwar sa legzersis ki nou ganny sans fer avek Minister Finans in enn ki’n tre enportan.

E mon krwar travay ki konman en Komite FPAC I fer lo sa size in en travay ki’n transcend tou bann baryer politik mon kapab dir akoz nou travay dan en fason kolesyal pour nou vreman kapab konpran e donn Minister Finans loportinite pour li access sa bann diferan Bidze ki met devan nou.

Me I annan en pwen ki nou ki enportan ki nou soulinyen Mr Speaker par lefe ki enn bann eleman ki sorti e mon krwar Chairman FPAC I fer resorti trez enportan, se lefe ki sa dan Bidze souvandfwa nou vwar bann propozisyon pour bann capital expenditure ki vini.

E ler sa bann propozisyon I vini si napa si I mank sa planifikasyon, oubyen I mank bann dokiman neseser, bann lezot bann lezot dokiman ki atase avek, I fer li en pe difisil pour nou kapab fer en desizyon lo la.  E mon krwar Leader Lopozisyon in souliny sa tre byen kot I enportan ki nou angaz tou bann Minister avan ki zot vin prezant sa Bidze sirtou lo bann capital expenditures.

Akoz ler nou regard dan sa Bidze enn bann landrwa kot bann Minister Finans li menm e la mon krwar I enportan pour soulinyen se Minister Finans li menm atraver son bann teknisyen, mon krwar zot in fer en travay formidab osi, ki zot in realize poudir I annan landrwa ki zot santi ki zot bezwen plis lenformasyon zot bezwen plis leksplikasyon.

E se la kot I enportan ki pandan sa travay ki nou pe fer I bezwen annan en planifikasyon bi lonterm – en planifikasyon en pe pli kler, pour ki avan ki nou prezant en sonm dan Bidze pour ki nou pour al release li, I annan bann dokiman neseser pour nou kapab dir sa proze pour pas tel letan I annan tel keksoz lo la.

E sa pour avoid dan le fitir en proze I ganny bidzete pour tel amount nou pa vwar nou pe end up dan en sityasyon nou pe rod en Supplementary Budget pour kapab kontinyen pour kapab kontinyen pour kapab fini sa proze.

Sa I en pwen enportan pour nou kapab soulinyen.  Mon krwar en lot pwen enportan ki petet Leader Lopozisyon in soulinyen se lefe ki nou pe etablir en prosedir pour deal avek en sityasyon, me zisteman osi pour donn Lasanble son drwa.

Malgre ki bokou lanfaz I ganny mete lo travay ki FPAC I fer, me se Lasanble as a whole li menm ki ti fer desizyon pour li vot lo sa Bidze.  E bann Manm pa pe abdicate zot drwa ler I annan pour release serten fon dan Bidze malgre ki Konstitisyon li per se I enn nou bann dokiman legal i pa koz lo la.  Me par lefe ki nou annan en lantant politik lo sa bann size sirtou par lefe ki nou annan en konteks politik ase dinamik e diferan ozordi, i enportan ki Lasanble bann Manm I ganny loportinite pour zot fer sa desizyon akoz mon krwar bokou sa bann Bidze I tous bann eleman ki relye avek swa zot distrik, swa bann servis ki pour ganny donnen avek zot distrik swa bann servis ki zot menm petet bann Manm pe advocate pe ganny delivre.

E se sa mon krwar enn bann lesansyel ki nou pe fer ozordi bomaten.  I pour en travay ki nou bezwen kontinyen Mr Speaker.  Akoz dayer mon krwar nou pe al apros travay lo Bidze, i pour enportan ki nou kontinyen travay lo la pour ki nou kapab fer sir ki nou donn sa bann teknisyen ki pe prepar sa bann Bidze, osi loportinite pour zot kapab kot zot santi poudir keksoz pa tro kler pour zot kapab dir keksoz ki pa kler e zot pa konfortab petet pour zot dir nou pour release tel sonm eksetera.

Sa i mon kontribisyon lo sa Mosyon Mr Speaker.  E mon ti a kontan demann tou Manm par lefe ki nou vwar poudir I en travay transparan kot maximum dimoun in ganny involve pour siport sa Mosyon, e pour ki nou kapab bouze ki anfen kont nou pare pour reponn sa kestyon an relasyon avek bann Bidze mon kapab dir mon pa pour servi sa mo frozen mon pour dir suspended in the Budget.  Mersi Mr Speaker.

 

MR SPEAKER

Mersi Onorab Pillay.  Okenn lezot Manm ki le entervenir.  Si non mon ava demann loter Mosyon pour fer en konklizyon.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker napa gran keksoz ankor pour mwan azoute, me mon krwar I annan de pwen ki mon ti a kontan dir.  E mon’n deza met enn sa bann pwen devan Sekretarya Lasanble spesyalman la ler nou devan staz preparasyon Bidze.

Sa pwen Mr Speaker premye pwen se pour demande ki Komite FPAC I resevwar plis resours.  Letan nou vizit bann lezot Parlman oubyen letan nou lir lo lezot Parlman, nou vwar ki poudir I annan resours ki ganny mete avek zot Komite Finans.  E rezon pour sa I senp I annan bokou resers pour fer.  E non selman ki I annan bokou resers pour fer me letan ou pe fer sa bann Hearings kot bann diferan dimoun pe ganny kestyonnen pour donn leklersisman, apre sa ou bezwen fer en rapor.

E par egzanp bomaten, mon kapab dir avek ou ki pour nou zis vini prezant en zoli en zoli morso – en zoli rapor byen soz ki pour al dan library ensidswit, ant son premye paz e dernyen paz I bezwen annan konteni ladan.  E la I en pti rapor, me nou annan osi bann rapor ki pour pli gro.

Par egzanp ler nou pour regard rapor Oditer Zeneral lo bann diferan I pour pli gro.  Letan nou pour fer nou rapor lo music stadium I pour gro li osi.  E pour le moman e sa I enportan pour tou piblik konpran parske parfwa zot kestyonn bann Komite osi tou.  Apre ki bann Manm apre ki bann Manm in asize in fer tou sa bann Hearings e tousala e keksoz I ganny refer avek FPAC.

Apre sa nou bezwen asize ekrir rapor e se pa okenn lezot dimoun ki ekrir sa bann rapor eksepte bann Manm FPAC.

E pour sa enn par egzanp se Onorab Afif ki’n tonm dakor pour li met keksoz ansanm e pare nou sirkil li kot bann Manm sa ki’n anvi fer komanter in fer komanter e finalman ….  So nou pour demande ki dan sa Bidze ki pe vini pour Lasanble ki nou kapab avek FPAC.  E petet I ava kapab en dimoun  ki ava kapab osi ede avek en lot Komite, pour nou ganny en resours – en dimoun e probableman en graduate – en graduate ki ava annan sa konesans, ki ava vin konman en resource person e an menm tan konman sa sekreter sa Komite.  Pour ki an mezir ki nou pe fer travay li I ava fer resers I ava prezant avek bann Manm serten kestyon ki pertinan, me an menm tan osi ki letan nou ava fini sa dimoun I ava pe drafte sa rapor e sa Komite I ava pe regard sa bann rapor.  P

Parske la ozordi Mr Speaker parey ou konman Sef sa lenstitisyon ou konn tre byen, se nou bann Manm ki ekrir sa bann rapor ki ganny prezante e alor la nou pour bezwen en pe resours.  Sa I premye pwen.

Mon 2enm pwen mon repran sa ki tou bann Manm FPAC I krwar ladan, se ki depi ki FPAC sa FPAC pe fer son travay nou santi I annan amelyorasyon.  E sa nou bezwen dir. I annan amelyorasyon dan bann Departman, dan bann Lazans, e dan bann Minister Gouvernman kot I konsern sa eleman finans.

E noun vwar dan Bidze li menm lannen pase, zot ti vini avek bokou plis laklerte lo bann diferan pwen.  E pour sa nou konman FPAC nou ti ava kontan rekomann zot pour sa zefor ki zot in fer felisit zot pour bann zefor ki zot pe fer e demande ki zot poz plis kestyon ankor dan zot Departman letan I pe demann en Bidze, silvouple demann plis kestyon.

Pour ki letan zot vin isi dan Lasanble Nasyonal pour prezantasyon zot Bidze, zot konn bann larepons e zot osi konn rezon det akoz tel sonm pe ganny met devan.

Oubyen letan zot vin devan FPAC ki ankor enn fwa zot ganny bann zot prezant bann rezon ki kler e ki ava fer keksoz pli fasil.  Si nou kapab al dan sa direksyon kot bann diferan Departman ek Minister ek Lazans pe fer bann travay ki kler, bann travay ki transparan, bann travay ki zot pe rann kont dan en fason serye mon krwar Mr Speaker sa I ava en fason ki nou ava elimin koripsyon dan nou pei.

E nou demande ki tou bann prosedir I ganny swiv byen e ki pa zis vini demann en sonm e apre sa ou pa ni konnen ki ou pe al servi sa sonm e pour … e son vre rezon.

Alor Mr Speaker avek tousala ankor enn fwa mon move ki sa rezolisyon I ganny aprouve par Lasanble Nasyonal tou an remersyan tou ann dimoun ki travay an kolaborasyon avek FPAC ki donn nou tou zot korperasyon.  Mersi bokou Mr Speaker.

 

MR SPEAKER

Mersi Onorab Ramkalawan.  Bon in ariv moman pour nou pran en vot lo sa Mosyon ki en rezolisyon ki Lasanble pe pase pour ki sa rapor rekomandasyon FPAC pour release en sonm R70,454,461.72milyon dan ki ti ganny sispann dan Appropriation Bill 2018.  Mon ava demann tou Manm ki an faver pour lev lanmen?  Okenn Manm ki kont?  Madanm Deputy Clerk.

 

MADAM DEPUTY CLERK

Mersi Mr Speaker.  24 Manm in vot an faver.  Personn kont.  Mersi.

 

MR SPEAKER

Bon savedir Mosyon in pase e sa sonm ki mon mansyonnen ki dan sa rezolisyon in ganny release.  Zis avan nou kontinyen mon ti a kontan pran en pti pe ki remark ki Onorab Ramkalawan in fer with regards to additional resources.  I en keksoz ki’n vin a mon latansyon e seryezman regard ladan lo kote Management Lasanble.

Nou pe regarde osi tou akoz la nou dan moman pour prepar nou Bidze pour enkorpor li dan nou Bidze pour lannen prosenn.  Me antretan nou annan nou 6mwan pour nou ale, mon krwar travay I pour entansif – sirtou lo kote FPAC.

Nou pour regarde lo nou kote e sirtou atase avek mon lofis si nou annan sa finans e ekstra ki nou kapab spare e nou kapab konmans bann prosedir pour nou kapab recruit en resource person  ki pour asiste FPAC e petet osi a kapab donn lasistans enn de lezot Komite ki an bezwen.  Ok mersi pour propozisyon Onorab e Komite Finans.

Bon nou ava kontinyen nou travay e nou pour kontinyen lo Mosyon ki ti ganny move Mardi par Onorab Sandy Arissol.  Mosyon I lir konm swivan

‘Vi lenormite e lenportans travay ki Komisyon Anti- Koripsyon I annan pour fer, sa Lasanble I demann Gouvernman pour met plis resours e revwar son striktir imedyatman afen ki I vin efektiv’.

Mosyon in ganny move e Mosyon I ganny segonde par Onorab Flory Larue ki’n rezerv son lentervansyon.  Mon annan de Manm ki’n entervenir sa se Onorab Henrie e Onorab Ferrari.  Okenn ki le entervenir lo sa Mosyon?  Onorab Afif laparol I pour ou.

 

HON AHMED AFIF

Mersi Mr Speaker.  Bonzour tou bann Manm Onorab bonzour tou dimoun a lekout.  Mr Speaker sa Mosyon ki’n prezante par Onorab Arissol esansyelman pe demann plis resours, I pe osi pe demann revwar striktir nou Komisyon Kont Koripsyon.

Pour mwan sa demann kip e ganny fer I en demann ki mon krwar bokou Seselwa bokou nou ki ozordi pe regard travay ki sa Komisyon pe fer, I a dakor avek.  Akoz mon dir sa?  Plis resours annou konmans avek plis resours.

Mr Speaker sa Komisyon son travay se en travay konplike, akoz ler ou pe fer lanket dan koripsyon e sirtou si I annan koripsyon ki annan en lenplikasyon finansyel, souvandfwa sa bann lanket pa ganny fer Sesel.  Souvandfwa I annan en koneksyon avek bann lezot tranzaksyon enternasyonal.

Alor ki fer ki sa Komisyon I pour bezwen li bann dimoun, swa I baze aletranze oubyen I baze Sesel me ki pe travay avek bann lazans aletranze.

Sa I pour enportan pour li fer sa parske se sel fason ki li I pour kapab ganny lenformasyon oubyen levidans ki I pour kapab servi pour li fer labaz pour en ka, ki pour met devan Prokirer Zeneral oubyen Attorney General dan Sesel pour li kapab fer sa.

Avek resours ki nou annan Sesel e nou konnen parske nou ti zwenn Anti- Koripsyon isi dan Lasanble kan zot ti prezant zot Bidze, I kler poudir ozordi zot napa sa kantite resours.  Zot annan staff wi, me zot napa bann dimoun spesyalize oubyen sifizaman dimoun spesyalize dan zot striktir, pour zot kapab delivre travay alaoter ki nou pe ekspekte.  Mon a pran en senp ka annou pran sa ka $50milyon I en ka ki devan zot deza e si ou pour al aprofon en ka koumsa, ou pour bezwen vwar tranzaksyon kot I ti sorti kot sa larzan I sorti.  I ti ganny remet Sesel I ti ganny repatriye aletranze.  Ki labank I ti ale?  Lekel answit ki ti sorti dan sa labank ki ti benefisye avek sa larzan?  Dan ki kont ankor ki I ti ganny transfer?

Tousala se travay ki sa ki nou apel en forensic auditor normalman I fer parske nou pe osi koz lo en peryod letan ki byen lepase parske nou pe koz en peryod 2002 dan sa ka spesifik.  Alor ou pour bezwen bann dimoun lo en baz toulezour, ki pe koz avek bann Lotorite tel ki bann Labank Santral.

Bann Lapolis Forensic aletranze, bann oditer spesyalize e tousala si Komisyon Anti-Koripsyon I bezwen fer avek en CEO avek en oditer lo son kote petet pa pour kapab fer.  I pour bezwen definitivman annan li plis resours pour li kapab fer sa.

Alor sa konman en premye eleman mon vwar zistifikasyon antyerman.  Son lot bout kot I pe demann revwar striktir Anti- Koripsyon petet pour nou regard sa annou regard striktir ki egziste ozordi pour nou reponn sa kestyon.

Sa striktir ki egziste ozordi I fer provizyon pour en Komisyon I parey en Board ki son bann Manm I ganny apwente atraver CAA ki fer rekomandasyon avek Prezidan e answit zot vin konman Commission Members.

Me problenm ki pour mon letan mon regard en striktir koumsa petet I pe reflekte en pe bann tandans ki nou vwar dan bann lorganizasyon komersyal kot ou bezwen annan serten nivo kontrol, latransparans e bon gouvernans dan en sans.  Me dan en striktir tel ki Anti- Corruption pour mwan sa ki pli enportan, byensir ou bezwen annan tou sa bann lezot kontrol lo kote finans e latransparans.

Me eleman tre enportan ki ou bezwen donn en tel organizasyon, se abilite pour fer desizyon vit.  Ki kalite desizyon?  Par egzanp si sa CEO I bezwen al fer en lafouy.  Si sa CEO I bezwen fer en larestasyon I bezwen annan sifizaman pouvwar pour fer li.

Ozordi striktir I egziste I napa sa kalite pouvwar.  Ozordi I menm annan en anbigite an term ki pouvwar li sa CEO I annan e ki pouvwar sa Komisyon e son Board li menm I annan e ki kontrol zot annan.

Si nou regard par egzanp annou pran en lorganizasyon ki son rol se vreman protez Lalwa e donn sekirite dan pei – pran Komisyoner Lapolis par egzanp.  Dan nou Police Act ozordi I en boug ki Lalwa Konstitisyon I osi donn li bokou pouvwar.

I annan en rezon pour sa rezon se ou bezwen permet li annan sa bataz pour li fer desizyon vit, si I bezwen fer larestasyon, si I bezwen fer lanket, I a swiv e I a ganny en warant eksetera.  Me I annan en pouvwar ki vreman permet li vreman delivre son servis ki sekirite e fer sir i annan lord e lape dan pei dan en fason ki efektiv.

Pareyman pour mwan ler mon regard en Komisyon Kont Koripsyon, mon avi I devret I devret – i devret kapab annan en CEO ki annan tou sa liberte me avek tou bann kontrol neseser, me ki donn li preski sa kalite pouvwar ki par egzanp Komisyoner Lapolis I annan.

I devret kapab al fer larestasyon.  I devret kapab al fer lafouy e I devret annan pour mwan preski pouvwar en zofisye dan Lapolis, ki ozordi napa.  E mwan baze lo lenformasyon ki mon’n reisir gannyen ozordi zot pe menm sey travay avek Lapolis ki zot pe demann segonde avek zot, parske zot napa sa pouvwar.

E se pour sa rezon ki mon pe dir ler mon regard sa Mosyon par Onorab Arissol pour revwar striktir I annan merit.  Ou bezwen revwar en sa striktir pour fer sa Komisyon vin efektiv.

En lot petet eleman ki nou devret konsidere ler nou pe get striktir Anti-Koripsyon se lo en pwennvi bidzeter si ou pour annan ou en Board ki dan en sans I pe fer li vin parey en lorganizasyon komersyal, I pe koute.  Me tandis ki si ou napa sa kalite kou, me ou pe annan ou plito en Sekretarya efektiv byensir avek tou kontrol otour li ou pour annan ou en saving dan ou Bidze ki sibstansyel.

Ler nou ti fer revi Bidze Anti-Koripsyon sa size konbyen ti pe kout zot pour zot manage zot Komisyon ti monte.  E I kler sa osi I en eleman ki pe ede fer zot kou eleve me I pa pe vreman delivre sa ki pep Seselwa pe rode.  Pep Seselwa pe rod progre an term lenvestigasyon; pep Seselwa pe rod larepons, zot pe rod en ka devan en Ziz kot zot in vwar koripsyon, me i pa pe arive.  Me larzan pe ganny depanse nou pa pe vwar okenn progre sibstansyel, reel ki nou konman bann sitwayen Sesel ki pe pey sa Komisyon ki nou kapab dir be lala, sa wi, I en keksoz ki pour anpes lezot dimoun fer koripsyon dan Sesel.

Nou pa pe vwar sa bann progre sibstansyel, reel, tanzib ki nou kapab koz lo la.  E alor pour mwan sa se en demann ki absoliman neseser.  Mon krwar Mr Speaker, I bon osi ler nou pe fer sa revi lo striktir regard en pe konparezon enternasyonal.

E sa ki mon konnen se ki Singapore anba son striktir kont koripsyon se egzakteman en striktir kot zot apel li Direkter.  Sa Direkter laba I annan pouvwar en zofisye Lapolis.  Savedir li I annan menm power avek en zofisye Lapolis pour li al fer search, pour li menm fer larestasyon. I annan menm pouvwar avek zofisye Lapolis.

Me selman si I bezwen al pourswiv I pour bezwen parey dan nou Lalwa pour nou, li I pour bezwen al devan Attorney General pour li ganny sa posibilite fer li.  Me selman sa biro Anti-Koripsyon I efektiv. I efektiv.

Zot konnen poudir direkter I kapab al fer search dan nenport ki landrwa.  Zot konnen direkter I annan pouvwar larestasyon.  Direkter I kapab menm san en warant kot li I vwar li neseser dan lentere sekirite, e sekirite, Nasyonal kot I kapab antre menm san en warant.  Mon pa pe dir nou bezwen al tou sa nivo me selman nou bezwen kapab fer sa Komisyon vin pli efektiv.

Onorab Arrisol in osi dir pour fer sa bann revi imedyatman.  Mwan mon krwar I bezwen fer imedyatman parske depi 2016 la I fer 2an ki sa Komisyon I an egzistans me nou pa pe vwar.

E mwan mon pa pe blanm personn dan Komisyon ni son CEO ni personn laba, mwan mon santi poudir I vreman annan bann konstrent ki par lao zot.  Depi zot bann Manm depi zot CEO.

E nou konman en Lasanble ki nou rol se oversight nou bezwen apresye kot nou vwar I annan problenm e nou bezwen dir poudir sa I en problenm reel e nou bezwen propoz en solisyon.  E mon felisit Onorab Arissol pour propoz sa de solisyon plis resours; enn, e revwar son striktir.

Mon krwar set en fason pour nou bouz devan, set en fason pour nou permet ankor en lebra dan Egzekitiv kapab delivre a laoter.  I pour ed nou pei.  Akoz I pour ed nou pei?  Akoz kan tou lorganizasyon pe fer zot loperasyon dan en fason ki napa koripsyon, I ed pei.  Parske sirtou kot I konsern resours finansyel, nou konnen poudir zot pe ganny servi byen nou konnen bann balans pouvwar ki egziste dan pei pe marse e kan sa I marse I ed tou Seselwa mye kapab zer son resours, mye kapab devlope.

Avek sa de mo Mr Speaker mon ti a kontan siport sa Mosyon.  E mon demann tou bann Manm pour vot an faver.  Mersi Mr Speaker.

 

MR SPEAKER

Mersi Onorab Afif.  Mon ava pas laparol avek Onorab Norbert Loizeau.

 

HON NORBERT LOIZEAU

Mersi Mr Speaker.  Bonzour tou Manm e tou dimoun ki a lekout.  Mr Speaker ozordi pour mwan I en size telman enportan e sa ki fer li tre enportan ankor se ki sa Mosyon in ganny anmennen par en senp Manm enn mon koleg ki nou travay lontan obor kanmarad dan nou zenn karyer politik.

E souvandfwa pandan sa bann letan ler nou ti ankor tre zenn dan Lopozisyon nou de Onorab Arissol enn sa pli zenn Manm e toultan nou ti tann koze lo sa koripsyon.

E souvandfwa ti ganny dir par Gouvernman ki pa egziste dan Sesel koripsyon.  Parey Onorab Ferrari ti dir dernyen fwa nou ti ganny dir ki koripsyon I en persepsyon.

Me souvandfwa parfwa ler nou ti voice out serten keksoz an relasyon avek koripsyon sirtou ler Regar ti fer sorti serten lartik lo bann ka koripsyon, zot ti dir nou manti me selman parfwa nou vwar ki zot in vreman petet ti annan kot nou vwar serten dimoun ki ti dan tel landrwa, akoz nou‘n voice out sa serten sityasyon I ti ganny tire I ti ganny mete dan en lot landrwa.  E sa ti ganny arive detanzantan sak fwa nou ti koz lo la.

E sa ki fer mon donn mon gran plezir e montre lentere pour koz lo sa Mosyon Mr Speaker mon rapel dan nou zenn karyer politik nou de Onorab Arissol, kot nou ti ankor pli zenn annan plis lenerzi kot souvandfwa se nou sirtou dan bann dernyen eleksyon, se nou ki ti desann al dan bann tou bann pti trou partou lo carpark Pirat, dan bann pti sou distrik dan pick-up kot nou ti sey koze pour nou sey dir ki sa ki koripsyon I annan dan pei.

E kot nou ti ganny bokou rikannen.  Parfwa nou ti annan en pti bis blan en pti bis H1 blan kot ti pase avek serten dimoun dan Parti Lepep, ti pase ti sikann nou, ti maltret nou.  E nou Mr Speaker nou pa ti les sa fatig nou, nou ti kontinyen avek nou travay akoz nou ti konnen ki sa ki nou pe fer ti bann keksoz ki byen.

E ozordi Mr Speaker ti nou rev nou de Onorab Arissol pour ki kan nou antre dan nou 6enm Lasanble nou pour fer sir ki koripsyon I pour vin en size ki nou pour bezwen tous li en zour.

Akoz nou santi ki koripsyon I nepli en persepsyon koripsyon I la devan nou.  E bokou ka koripsyon ozordi Mr Speaker pe vin pli o kler.  E parey Onorab Arissol ti fer resorti dan son prezantasyon lo Mosyon, ti koz lo bokou Manm dan 5enm Lasanble ki ler ti annan sa size koripsyon ti monte kot zot ti koz lo koripsyon.  Nou ti tann bokou mon pa pour repet ki Onorab Arissol in dir me sa ki nou ti santi se zot ti zis koz lo la, me selman ti napa nanryen konkret ki ti pe ganny arive.

Menm si zot ti pe koz lo sa size koripsyon ti napa en Komite Anti-Koripsyon ki ti ganny etablir pour deal avek sa bann case.  Savedir zis sete bann parol ki ti pe anvole dan divan, pour fer krwar dimoun ki koripsyon pa egziste dan Sesel.  Menm si ti annan serten mansyon lo serten bann Manm ki petet ti partisip dan bann levennman an relasyon avek koripsyon, nanryen nou pa’n vwar me zis keksoz ti pas koumsa menm.

Alors Mr Speaker I enportan ki bann lenstitisyon parey Anti-Koripsyon I ganny ase ledan pour li kapab morde.  Pour li kapab fer en pli bon travay kot lepep Seselwa I a vwar ki vreman travay pe ganny fer e blanm pa vin lo Lasanble Nasyonal.

Mon’n ekout Onorab Henrie Mardi ler I ti pe devwal serten ka ki li I ti panse I annan loder koripsyon ladan.  Ler mon ti pe ekout Onorab Henrie en zenn Manm ki li osi in lager akote nou de Onorab Arissol pandan sa letan mon demann mon lekor Mr Speaker ki kantite ka parey in pase ki nou pa konnen?

Sa ti enn ki Onorab Henrie ti koz lo la.  Me sa I montre nou Mr Speaker ki degre labi in annan pandan tou sa bann lannen kot zis ti ganny ferm lizye lo la e nanryen pa ti ganny fer.  E sa Mr Speaker in kout nou pei ser.  In kout nou pei ser akoz ozordi nou an retar.  Bokou lo keksoz, bokou lo larzan ki petet in pas lo koripsyon ozordi ti kapab dan Kof Leta pour nou kapab deal avek bann problenm parey kou lavi parey bokou dimoun pe koz lo la an se moman dan pei.

Mr Speaker Onorab Arissol in koz lo en keksoz, ki mon panse bokou Manm dan Lasanble Nasyonal ozordi, dan en konversasyon avek dimoun deor sa size in monte.

E mwan mon enn ki sak fwa mon zwenn mon konversasyon avek bokou dimoun deor zot koz lo la.  E bokou dimoun pe demande parey Onorab Arissol ti dir ki nou pe fer?  Zis nou pe koze e dimoun pa’n servi zis sa term koze I annan en term ki zot in servi ki petet I pa pour parlmanter mon pa pour dir Mr Speaker, zis mon pour fer tapaz me napa okenn aksyon ki pe ganny arive avek sa bann dimoun ki nou pe dir ki nou pe met devan ek tou sa bann levidans ki pe ariv o kler ozordi.

Souvandfwa Mr Speaker, nou bann Manm Lasanble enkli mwan osi mon vwar mon pe eksplik – pe eksplik dimoun deor ki rol Lasanble Nasyonal, akoz dimoun pe zis pe krwar ki Lasanble Nasyonal nou kapab fer tou keksoz a la fwa.

Parey Onorab Arissol ti dir bokou dimoun in krwar nou Lapolis nou ki merit ale tyonbo bann dimoun met dan kaso.  Nou ki’n mont State House tyonbo Prezidan tir li met li deor.  Nou Mr Speaker nou bann dimoun ki plito pe anmenn laklerte.  Parey mon ti dir dernyen fwa, nou, nou sa tors Lasanble Nasyonal I sa tors ki pe klere ki pe montre.  Me bann lezot lenstitisyon ki merit pran aksyon, me si zot napa ledan, zot napa resours zot pa pour kapab fer sa.

E se sa ki mwan mon santi ki Mosyon Onorab Arissol I annan bokou lenportans ozordi dan sa sityasyon ki nou pe gete.  Ozordi Mr Speaker FPAC pe fer en travay formidab, plis ki zot kapab se be ki plis zot kapab fer si lezot lenstitisyon ki sipoze kontiny sa travay ki FPAC pe fer, zot lanmen zot santi zot anmare, zot pa kapab fer nanryen zot zis la zis bann ka I vin kot zot me nanryen pa ganny fer.

E la ankor Mr Speaker ler sa bann keksoz parey I arive blanm I tourn lo Lasanble Nasyonal.  E nou dan LDS pli souvandfwa e laplipar bann blanm Mr Speaker I pa vin tro lo bann Manm Parti Lepep, akoz nou dan LDS se nou an mazorite.  E tou sa bann blanm I ganny mete lo LDS konmkwa nou pa pe fer nanryen.  Se sa ki pe arive ozordi.

E vwala akoz Mosyon Onorab Arissol I fer bokou sans.  Anti-Koripsyon – Komite Anti-Koripsyon I bezwen plis resours neseser pour zot kapab fer zot travay.  E avek bann resours Mr Speaker parey Onorab Arissol ti fer resorti zot bezwen fer sir ki dan sa Komisyon li menm zot fer sir ki napa dimoun ki annan okenn ka relye avek koripsyon.  Zot bezwen fer sir ki lepep Seselwa I ganny konfyans dan sa Komisyon.  E parey nou ti vwar dernyenrer I annan kot en Manm ki’n ganny met Ankour mon pa pour al pour sa rezon ki I enportan ki sa Komisyon I vin pli serye e I fer sir ki tou son Manm I clean pour ki sa travay I ava ganny fer byen e ki lepep Seselwa ava kapab konnen ki pe arive.

Mr Speaker ozordi I annan bokou dimoun ki’n partisip dan serten ka koripsyon ki nou koz lo la.  Ozordi nou trouv zot ankor pe marse free ozordi.  I annan pe fer serten travay Gouvernman dan distrik e nou konnen akoz zot pe fer sa travay.  Zot pe fer sa travay akoz tan ki sa Gouvernman I ankor la tan ki Konmisyon Anti Koripsyon napa ledan pour travay zot pour get away avek tousala e zot lavi pour deroul parey I ete Mr Speaker.

An terminan Mr Speaker mon anvi felisit Onorab Arissol pour anmenn sa Mosyon devan senpleman, akoz ler mon get sa kalite Mosyon ki’n vini sa Mosyon in ganny anmennen par en senp boug en senp Onorab ki personn pa pour kapab montre ledwa lo li, poudir in partisip dan koripsyon.

Osi dan nou karyer politik nou de Onorab Arissol, nou’n travay tre pros ansanm dan biro kot ler nou ti an deor politik pour 5an menm si bokou keksoz I arive ki nou tou nou ti bezwen struggle pour bouze, pour nou kapab ganny en keksoz nou osi kot menm nou konsyan nou ti ganny pran dan bann fason malisye, nou ti fer sir ki sa ki nou ti annan nou partaze.

Nou ti fer sir ki nanryen ki pour annan pour fer avek koripsyon pa ti vin dan nou laporte.  E sa Mr Speaker osi ti nou rev nou de Onorab Arissol.  Ti nou rev ki en zour malgre tou bann sityasyon ki nou pas ladan konman bann zenn Manm Lasanble sa letan ler zot dan Parti Lepep, zot ti an mazorite nou ti toultan ti nou rev ki en zour, ler nou pour antre nou pour fer sir ki sa size koripsyon pour enn ki nou pour koz lo la.

E Mr Speaker I annan bokou dimoun pe mazinen petet nou dan LDS nou pe zis gard rankin avek serten dimoun ki’n fer sa bann keksoz.  Non.  I enportan ki dimoun deor I ganny sa kler nou dan LDS nou pe fer sir ki kan ki en Gouvernman en nenport ki Gouvernman ki vin o pouvwar, sa zafer koripsyon pou vin en keksoz lepase.

Kot okenn dimoun ki ler I pour antre dan Gouvernman, si I krwar I pour bour son lanmen dan Kof Leta ler I pour tir son lanmen I pour remarke poudir I annan lanmson ladan e ki annan bokou lanm pour desir zot ledwa e I pa pour pran nanryen.

Si sa nou bi ki ozordi nou pe adres sa Mosyon seryezman.  Nou anvi ki tou Gouvernman ki vin o pouvwar, ki koripsyon I vin en keksoz lepase e ki nou pei I bouz devan, e kot larises nou pei tou Seselwa a benefisye pa zis  serten akoz zot afilyasyon, ouswa serten privilez ki zot in gannyen.

Alors Mr Speaker mon anvi dir avek Onorab Arissol, mon pour donn li tou mon sipor pour sa Mosyon akoz sa Mosyon I en Mosyon serye.  E ki mon krwar bann lenstitisyon parey Anti-Koripsyon e lezot ankor i merit ganny plis resours pour zot kapab fer pli byen zot travay, pour ki ankor enn fwa mon dir ki sa bann move koze pa ava tonm lo Lasanble Nasyonal konmkwa nou ki pa pe fer nanryen.

Mr Speaker mon a remersi ou pour donn mon sa sans poudir sa de pti parol.  Mersi.

 

MR SPEAKER

Mersi Onorab Loizeau.  Mon a pas laparol avek Onorab Clive Roucou.

 

HON CLIVE ROUCOU

Mersi Mr Speaker.  Bonzour tou Manm koleg Onorab bonzour tou dimoun ki a lekout dan lakour.  Mr Speaker ankor enn fwa nou vwar en tel Mosyon avek bokou lenportans devan sa Lasanble.  En Mosyon prezante par Onorab Sandy Arrisol.  Alors mon anvi felisit li pour en tel linisyativ.

En Mosyon prezante par en Manm LDS, nou’n vwar ki tou sa bann Mosyon ki’n ganny byen prezante zoli annan weight se par lot ki dan LDS ki ganny fer.

Nou dan LDS, nou anvi vwar ki sa pei I bouz devan.  Mr Speaker Mosyon pe demann Gouvernman pour met plis resours e revwar son striktir medya pour ki afen ki Anti- Koripsyon I kapab fer son travay pli efektivman.

Mr Speaker ler mon get sa Mosyon mon kapab dir bann key words ladan par egzanp lenormite, lenportans, plis resours, revwar son striktir afen ki I vin pli efektiv.  Alors Mosyon pe fer zis en keksoz primordial, pour ki sa Komisyon I ava annan plis pouvwar pour ki I fer son travay pli byen sanmenm tou ki nou dan LDS nou pe demande.  Ki sa Komisyon I vin pli efektiv.

Mr Speaker pandan sa dernyen 40an e plis, nou’n vwar ki mannyer Koripsyon in ronz nou sosyete.  Ki mannyer koripsyon in ronz sa pti pei ki apel Sesel avek zis plis ki 90mil dimoun.

Mr Speaker ler mon get koripsyon Sesel mon kapab equate li avek problenm eroin dan nou pei.

Ankor enn fwa kekfwa menm zot pa pour kontan I annan zis en group ki koupab se SPUP/SPPF/ Parti Lepep.

 

(APPLAUSE)

 

HON CLIVE ROUCOU

Si koripsyon I koumsa in ariv lo sa oter, se zot depi zot rasin ziska ozordi zot ki koupab.

Mr Speaker nou’n vwar ki pandan plizyer lannen Gouvernman Parti Lepep espesyalman anba Prezidan Michel, ti fer nou krwar ki koripsyon I zis en persepsyon.

Toultan zot in fer nou krwar me selman zot in anbet en serten dimoun en serten group be nou dan LDS non, zot pa’n zanmen.

E zot pa pour zanmen kapab anbet nou.  Alors mon bann frer e ser Seselwa ki pe ekoute koripsyon Sesel I reel, I vre, i vre ankor enn fwa mon dir.

Nou’n vwar dan diferan lenstans kot nou’n tann koz lo $50milyon.  Nou’n tann koz lo later.  Nou’n tann koz lo tou sort kalite trik mardaz ki Gouvernman in fer avek bann klik e zot pros.

Mr Speaker I fer mon tonm lo en pti analozi lo bann ki pe travay dan faktori disik.  Zot dite in dou, zot in met ankor disik.  In sitan dou zot in pran konman disik in sitan dou zot in pran bal disik.  Dernyenrer in sitan dou ki zot in menm pran faktori disik al avek.

Alors Mr Speaker nou dan LDS nou pe met lanfaz lo Komisyon Anti-Koripsyon pour bann ki ti vol faktori i a tourn avek.  Bann ki ti pran bal, I a tourn avek.  Bann ki ti pran poban, I a tourn avek.  Bann ki pour li I tro dou, I a deley en pe I a partaze.

Mr Speaker pour Komisyon Anti-Koripsyon vin pli efektiv, e kapab fer son travay, se fodre ki Gouvernman Parti Lepep I leve e aret trenn son lipye.  Aret trenn son lipye.  Fer sir ki personn pa vol sa pep sa pei e trik sa pep.  Fer sir ki tou larises sa pep I ganny retournen, ki enn fwa pour tou nou tou dan nou pei Sesel nou ava benefisye.

Mr Speaker avek tou lanfaz pour nou met lo Komisyon Anti-Koripsyon nou ava vwar ki ledikasyon lo koripsyon, I ava vin pli devan, ki Seselwa – nou bann frer ek nou ser ki menm mazinen pour trik sa pep e vol sa pep I ava mazin de fwa.

Mr Speaker nou dan LDS nou anvi enn fwa pour tou ki sa I ganny mete dan lepase.  Premyerman akoz lepep Seselwa in fatige – in fatige apre ki tou ki nou dan LDS nou met tou sa o kler nou pa vwar Gouvernman fer nanryen.

Mr Speaker sa pep I ankoler sa pep I ankoler akoz nou tande kot en dimoun in vole, in vol en rezim bannann in vole n keksoz I al prizon.  Me en dimoun ki vol kantite milyon e milyon – 52 bout later nanryen pa arive avek zot.

Alors sa pep I anvi tann en keksoz.  Nou pa pour zis kapab donn en Komisyon Anti- Koripsyon larzan, larzan apre larzan, me resours I fay  e nou pa vwar nanryen.

Nou pe demande ki Gouvernman I aret trenn son lipye.  Alors mon pour demande ki tou mon bann frer, mon bann koleg Manm Onorab lo tou lede kote latab pour siport sa Mosyon.  E mwan mon donn Onorab Arissol garanti ki mon pour siport son Mosyon.  Mersi Mr Speaker.

 

MR SPEAKER

Mersi Onorab Roucou.  Mon a pas laparol avek Onorab Woodcock.

 

HON WAVEL WOODCOCK

Mersi Mr Speaker.  Bonzour tou koleg Onorab e tou dimoun a lekout.  Mr Speaker Mosyon ki Onorab Arissol in met devan Lasanble Nasyonal, se I lir koumsa;

‘Vi lenormite e lenportans travay Anti Koripsyon I annan pour fer, sa Lasanble I demann Gouvernman pour met plis resours e revwar son striktir imedyatman afen I vin efektiv’.

Mr Speaker koripsyon I en fleo ki nou pei in viv anba la pour plizyer lannen mon pa pour dir 40an akoz mon pa anvi ofans personn.

Mr Speaker mon rapel pa tro bokou letan pase ex-Prezidan Michel pandan son konpanny 2015 ti dir ki ‘koripsyon sete en persepsyon’.

Ozordi avek en Lasanble mazorite LDS persepsyon in vin en realite dan nou pei.  Laverite pe sorti e koripsyon Sesel pe ganny ekspoze e in vin tro bokou pour nou pti pei Sesel.  Tors in ganny klere lo plizyer ka koripsyon dan nou pei dan sa mwens ki 2an ki LDS i an mazorite dan sa Lasanble.

Mr Speaker annou konmans avek sa $50milyon ki’n disparet ki sa letan Prezidan Faure ti ankor Vis- Prezidan ti dir ankor dan konpanny eleksyon 2015 ki sa sonm $50milyon ti al dan kont SMB pour rod manze pour lepep Seselwa.

Me le kestyon ki nou bezwen demande se oli rikord sa tranzaksyon?  Ki’n arive avek sa $50milyon?  Sa I en ka ki Komisyon Anti-Koripsyon pe get ladan.  I annan plizyer lezot ka ankor annou pa bliy bann milyon ki bann Irlande in vol sa pep.  Tou bann kont bann businessman ki zot ti sezi e fors bann businessman pour pey bann ransom pour kapab deblok zot kont pour plizyer Dolar ek Ero.

Kantite milyon zot ti pour kontinyen vole sa bann Irlande si 6enm Lasanble pa ti debiste zot e met full stop avek tou sa bann demagozi ki zot ti pe fer.

Mr Speaker annou pa bliye ki sa bann Irlande avek benediksyon Gouvernman Parti Lepep, zot ti menm fer pase en Lalwa pour anpes Oditer Zeneral donn en kopi odit FIU avek Lasanble.

Sete nou Lasanble ki ti bezwen anmenn en lamannman pour nou kapab vwar tou sa bann demagozi e tou sa bann koripsyon ki zot ti pe fer avek FIU.  E pa bliye osi dan NDEA e tou sa bann offshore account ki zot ti kree e bann larzan ti pe transfer sorti Sesel pour al ladan.

Tousala in pase pour plizyer lannen anba watch Parti Lepep e sa watchdog Lasanble Nasyonal 4enm – 5enm Lasanble in les sa bann keksoz pase e san ki nanryen I ganny fer Mr Speaker.

Nou’n vwar bann ex-Minis – ex-First Lady ki ganny plizyer e bann gro morso later Leta pour nanryen ouswa pour R1.  Mr Speaker kantite Seselwa ti kapab benefisye avek sa bann later.  Nou’n vwar bann koripsyon e spekilasyon later lo bann endistriyel – parey Perseverance e Zil Eve Praslin.  Kot bann swadizan businessman in lease later avek Gouvernman pour mwens ki R50mil apre revann pour de milyon roupi.

Later Lagrikiltir I ganny vann avek bann dalon pour fer lotel.  Later Leta in ganny partaze avek dalon avek aktivis politik e avek dalon bann ki byen plase dan Gouvernman.

Mr Speaker koripsyon in pli reel ki zanmen Sesel e fodre met en lafen avek sa bann kalite koripsyon ki’n met nou pei an retar e anrisi serten lo lasyer nou pep Seselwa.

Mr Speaker pour fer sa, fodre nou annan en Komisyon Anti-Koripsyon avek tou pouvwar, lotorite ek resours pour investigate bann alegasyon koripsyon e osi pour anmenn bann dimoun koronpi Ankour pour pei pour zot krim.

Vol lepep Seselwa se en krim e nou pa kapab kontinyen toler voler Sesel.  Ozordi koripsyon I vin dan plizyer laform, dan tou kalite laform.

Mon a donn zot en pti legzanp Mr Speaker – resaman en peser I dir mwan ki pour li kapab vann pwason avek serten lotel, I bezwen pey gous bann chef lotel pour li kapab vann son pwason, ki in al ise bose menm dan vandswet menm dan gro lapli ler I retourn ater avek son pwason I bezwen pey gous pour li kapab vann son pwason.

Tousala se bann kalite form koripsyon ki egziste dan nou pei ozordi.  En businessman I rakonte ki mannyer en zofisye sivil, ti demann li pour pey gous pour deblok son prop larzan pour en travay ki in fer pour Gouvernman e Gouvernman I dwa li.

Si I pa fer sa son file pour asize lo latab ziska armen avan-ler ki I ganny peye.  Bann pti cartel ki ganny kree dan plizyer distrik kot bann pti Kontra konstriksyon parey miray, bus shelter bann proze distrik I ganny donnen avek dalon san ki bann Lalwa prokirman I ganny swiv.  Tousala I arive Sesel.  Bann Kontra ki ganny donnen a bann pri ki’n ganny inflated pour en bann ganny en gous lo la.  Tousala I bann koripsyon ki arive dan nou pei Sesel.

I annan bann zofisye Mr Speaker – in fact I annan bann dimoun e bann lotorite ki’n admet ki sa bann keksoz in arive.  Kot bann zofisye sanniter ouswa menm licensing ki ganny peye avek bann business pour les bann vyolasyon Lalwa pour pase.  Larzan I sanz lanmen pour license ganny aprouve.  Tousala I bann keksoz Mr Speaker ki pe arive dan nou pei.  Tousala se koripsyon.

E Sesel fodre fer sir ki keksoz I pas drwat.  Koripsyon fodre arête a tou nivo se sa Mr Speaker ki pe trangle sa pep.

Mr Speaker depi ler ki LDS in antre dan Lasanble, nou’n deklar en lager kont koripsyon.  Bokou pe dir ki LDS pe zis rod koripsyon partou.  I annan ki in menm dir ki koripsyon pa pour fer pri lavi desann.  Ki koripsyon pa en priyorite.

Mon bann frer ek ser zis mazinen sa kantite milyon ki in kot sa pei pour al dan pos en serten endividi, si  i ti reste Sesel kantite larzan ti pour annan pour envestir dan nou pei e dan nou lekonomi.

Kantite lakaz ki ti kapab ganny fer avek sa bann larzan ki ganny vole dan Kof Leta.  Kantite larzan ki ti kapab ganny envesti dan lapes e lagrikiltir.

Kantite loan ki HFC ti kapab donn bann dimoun ki rod en loan pour pey lakaz.  Sa bann larzan vole ti kapab ganny servi pour donn loan bann zenn ki pe rod larzan pour konmans en pti biznes.

Nou pa kapab les koripsyon kontinyen e anvair e detri nou pei.  Fodre fer en keksoz tanzib.  Fodre Gouvernman I pran bann desizyon brav poudir ‘enough is enough’ parey ki Lasanble Nasyonal pe fer ozordi.  Sesel pa kapab afford pour perdi sa kantite milyon. I pour detri nou lekonomi  Mr Speaker e I pour vreman afekte pri lavi.

Mr Speaker lontan dapre Gouvernman Parti Lepep parey mon’n dir oparavan, koripsyon ti en persepsyon.  Ozordi I annan en lot leskiz ki zot pe servi Mr Speaker.  Sa leskiz se ki koripsyon I partou dan lemonn.  Eski sa I fer koripsyon ok?

Mr Speaker mon pe demann avek Gouvernman pour aret donn leskiz e pran aksyon.  E aksyon ki nou pe demande, se donn Komisyon Anti-Koripsyon bann resours neseser ki zot bezwen pour ranforsi sa Komisyon.  Donn zot bann resours imen ki zot bezwen.  Finansman e Bidze neseser pour zot kapab fer louvraz efikas.

Zot bezwen forensic auditor – bann led legal e lezot staff pour permet ACCS investigate bann alegasyon koripsyon ki nepli alegasyon Sesel ozordi.  Mon demann Gouvernman pour pran zot responsabilite e zot osi dir non a koripsyon.

Avek sa de parol Mr Speaker mon pour donn mon sipor total sa Mosyon e mon pour demann tou Manm Lasanble osi siport sa Mosyon.  Mersi Mr Speaker.

 

MR SPEAKER

Mersi Onorab Woodcock.  Bon nou annan ankor en entervenan I annan 8minit ou pour kapab entervenir dan 8minit Onorab Ernesta?  Ok mon pour propoze ki nou a pran en break e nou ava retournen 11er pour kontinyasyon.

 

 

(BREAK)

 MR SPEAKER

Bon avan nou kontiny deba lo Mosyon nou annan nou en revised Order Paper.  E nou annan en First Reading pour nou fer.  Mon ava demann Madanm Deputy Clerk pour fer First Reading.

MADAM DEPUTY CLERK

Mersi Mr Speaker. This Act  may be cited as a Truth, Reconciliation and National Unity Act, 2018 and shall come into operation on such date as the President may determine by notice in the Gazette appoint.   Mersi.

MR SPEAKER

Mersi Madanm Deputy Clerk.  Bon enn bann size ki nou ti pe diskite dan Standing Order se prosedir.  Anba Standing Order 63(2) Bill I ganny fer First Reading e konman Chair konman Speaker, mon order ki sa Bill I ganny lir en 2enm fwa lo en dat ki I pour ganny agree avek konsiltasyon ABC.  

So for the record of proceedings, mon pe dir ki Bill in  ganny fer First Reading e I pour ganny en Second Reading lo dat ki nou ava agree parey mon dir an konsiltasyon avek ABC.  I bann pti prosedir ki an mezir ki nou pe go along, nou pe vwar ki nou Standing Orders I fer.

Bon nou ava kontinyen nou travay avek deba lo Mosyon ki’n move par Onorab Sandy Arissol.  E mon ava donn laparol Onorab Paul Ernesta.

 

HON PAUL ERNESTA

Mersi Mr Speaker.  Mr Speaker bonzour e tou bann koleg Onorab e tou dimoun a lekout.  Mr Speaker nou tou nou a dakor ki koripsyon I en konsern.  Alor I pa fer okenn dout ki lalit kont koripsyon I enportan pour nou tou.  E menm si sa problenm nou bezwen rekonnet lefe ki son magnitid pe aktyelman diminyen konpare avek sa enn de ka ki nou tanzantan nou tann nou lot kote latab pe fer referans avek.

Sa Mr Speaker, I pa zis mon pwennvi me I en realite.  Akoz si nou get zis apre kreasyon Komisyon Anti- Koripsyon Sesel, nou’n vwar en lorganizasyon enternasyonal apele Transparency International in fer resorti dan son dernyen rapor ki lendis persepsyon Sesel, in amelyore tou dernyerman.

Sa I en devlopman tre pozitiv ki nou merit salye.  E I en gran lankourazman pour tou bann ki angaze dan lalit kont koripsyon dan Sesel – depi Komisyon Anti-Koripsyon, Lorganizasyon Transparency International Seychelles, Gouvernman e medya.

Mr Speaker sa progre ki Sesel in anrezistre dan son lalit kont koripsyon, I fer nou realize ki nou lalit pa anven.  E I osi donn nou lespwar, ki nou kapab fer bokou plis e ki nou kapab fer Sesel vin en pei kot napa koripsyon.

Pour fer Sesel vin en pei kot napa koripsyon Mr Speaker, I pa en lanbisyon fou, me enn ki nou kapab realize.  Nou pour kapab realiz sa lanbisyon, si nou donn bann lenstitisyon ki enplike dan lalit kont koripsyon, mwayen pour azir dan en fason efektiv e efikas.

Mr Speaker larzan I enn sa bann mwayen.  Alors par donn Komisyon Anti Koripsyon en pli gro Bidze I en fason pour entansifye lalit kont koripsyon.

Byensir restriktir lenstitisyon ki angaze dan lalit kont koripsyon I osi en lot mwayen pour entansifye sa lalit.

Me Mr Speaker mon oule fer kler ki menm si sa lenstitisyon ki pe zwe en pli gran rol dan lalit kont koripsyon, I pa le sel akter dan sa lalit.

E plis larzan e nouvo striktir dan zot menm pa pour ase pour anmenn bokou plis rezilta dan lalit kont koripsyon.

Sa lalit I zafer nou tou pa zis LDS. Nou lo sa kote latab nou osi angaze dan sa lalit.  Loter Mosyon in li menm anmenn nou dan 5enm Lasanble, kot in annan nesans Anti-Koripsyon.  E in menm fer referans lo lentervansyon nou bann ansyen koleg MNA dan 5enm Lasanble.

Mersi Onorab pour omwen rekonnet travay pozitiv nou 5enm Lasanble.  Se avek sa lespri ki nou pour bouze e se atraver ou zefor, nou zefor e zefor tou dimoun, ki pour fer travay bann lenstitisyon spesyalize parey Komisyon Anti Koripsyon vin pli fasil dan sa lalit.

Mr Speaker mon pour siport demann fer par loter Mosyon pour donn Komisyon Anti-Koripsyon plis resours finansyer e pour revwar striktir sa Komisyon, avek bi fasilit li dan legzekisyon son manda.

n menm tan mon oule fer resorti ki mon sipor pour met plis resours a dispozisyon sa lenstitisyon, se pa akoz problenm koripsyon in vin pli grav me, o kontrer akoz nou pei pe fer progre dan lalit kont koripsyon.  E se zisteman I moman pour met plis resours dan sa lalit, akoz i pe port fri.  E Mr Speaker koripsyon I afekte lavi tou sitwayen ki krwar dan travay dir e onnet.

E ki krwar dan bann prensip nob, parey legalite, loportinite.  Koripsyon napa balizaz.  I afekte tou Seselwa ki swa son krwayans relizye, ki swa son lapartenans politik oubyen menm son sityasyon sosyal.

Alor fodre ki nou tors Lasanble I kler tou dimoun san leksepsyon, non pa zis en kote.  E fodre I pa ki nou politiz deba lo koripsyon.  Nou politiz deba letan nou refize vwar progre ki’n fer dan lalit kont sa fleo.

E letan nou rezet rezilta bann letid ki’n ganny fer par bann lorganizasyon endepandan zis akoz sa bann rezilta pa anliny avek sa ki nou anvi dir.  Me sa ki pli enportan nou merit dir sa ki byen menm si par-ler sa I an dezakor avek nou mesaz politik.

Mr Speaker mon pour siport sa Mosyon, akoz mon krwar ki Komisyon Anti Koripsyon I merit plis mwayen pour fer ki Sesel I anrezistre ankor pli bon rezilta dan domenn lalit kont koripsyon.

Mon krwar ki sa Mosyon pour kontribye ki Sesel ganny en pli bon rezilta dan prosen rapor Transparency International.  E ganny bokou plis kredibilite lo lasenn enternasyonal e osi lokal.  Mersi Mr Speaker.

 

MR SPEAKER

Mersi Onorab Ernesta.  Onorab Aglae.

 

HON EGBERT AGLAE

Mersi Mr Speaker.  Bonzour tou Manm Onorab bonzour tou dimoun a lekout.  Mr Speaker mon pa pour tro long lo sa size lo sa Mosyon selman mon pour donn mon sipor kot I merite.

Mr Speaker ler nou pe ranforsi nou la demokrasi e ki fer mon rapel depi ki Prezidan Faure in vin o pouvwar I enportan latransparans, bon gouvernans e kiltir rann kont.

Mr Speaker pour en pei ranforsi son demokrasi I bezwen annan bann lenstitisyon konman en zouti I fer ki I kapab sofgard lentegrite, souvrennte, sekirite e son drwa imen son sitwayen.  E si nou kapab ranforsi tou sa trwa pilye enportan, pour napa lespas pour koripsyon.

Mr Speaker mon konmans koumsa akoz koripsyon I en act dezonnet par en endividi, ki ganny konfye avek en pozisyon ouswa en pouvwar otoriter pour li pran pour dirize ouswa pran bann desizyon.  E mon konstate Mr Speaker ki koripsyon I pa ariv zis dan Gouvernman, koripsyon I ariv dan prive dan sosyete sivil e tousala I koripsyon.

Mr Speaker I annan diferan form koripsyon ki kapab arive.  Nou’n tann koz lo larzan dan Kof Leta, me selman I annan bann lezot form koripsyon osi ki arive tel ki; frod, fer faver, gaspiyaz resours, labi lo resours, bribery parey nou dir donn gous, tousala I bann form koripsyon ki nou bezwen kapab deal avek e koup son latet.

Mr Speaker mon fer en pti letour lo lemonn bann diferan pei kot I annan bann lenstitisyon ki konbat koripsyon, nou isi nou pe apel li Anti-Corruption Commission.  I annan bann pei parey Lituanie ki li I apel Investigation Taskforce.  Nou annan Maurice ki pour li I en Independent Commission against Corruption.  I annan Madagascar, li pour li I apel National Anti-Corruption ForumL’Angleterre pour li I apel Serious Fraud Office.

Turkey ki li I annan Integrity Commission ki deal ek koripsyon.  Nou annan Singapore ki bann lezot Onorab I kontan koz lo la kot li I apel Corrupt Practice Investigation Unit.  Nou annan dan L’Inde enn pei ki ed nou en kantite ki li annan en Central Vigilance Committee Bureau.

Mr Speaker I enportan ki sa bann lenstitisyon I egziste dan sa bann diferan pei, menm si I pran diferan non, diferan form.  Me sa ki Mosyon pe demande la bomaten se ki I annan plis resours pour aport travay Anti-Koripsyon Sesel pour li kapab delivre.

E mon pour toutafeman dakor ek sa.  Mr Speaker travay en biro Anti- Koripsyon I pa zis pour al investigate pour rode kote ki ti annan frod me en travay kot osi I bezwen partaz lenformasyon akoz koripsyon I sot frontyer.  I annan koripsyon ki’n kapab konmans Sesel, I kapab in fini dan en lot pei ouswa I kapab vis versa I konmans dan en lot pei apre I vin fini Sesel.

Tousala I bann fason ki sa travay sa Komisyon ki pour enorm I pour bezwen vwar li avek plis resours pour li kapab deservi.

I annan bann Korperasyon ki sa Komisyon I bezwen al devlope avek bann lezot lenstitisyon osi pour li kapab ogmant son konesans e kapasite.  I annan osi bann lesanz ki bezwen ganny fer sirtou kot I konsern bann pli bon Polisi ki sa Komisyon I kapab anmennen devan e met devan Gouvernman pour deter corruption pour anpes koripsyon arive.

E Mr Speaker travay sa Komisyon in konmanse depi 2016, I fek ne mon kapab dir I annan bokou pour li akonplir.  E I annan bokou bann pei ki’n anba sa bann Komisyon I annan bann diferan layers of unit, ki deal avek bann diferan fe dan koripsyon.  E  mwan mon ti a swete ki nou biro Anti- Koripsyon I al dan sa laliny,  akoz ler ou pe melanz diferan kalite koripsyon ansanm I pour fer bokou.  Ou bezwen annan bann diferan kapasite expert dan bann tel domenn tel ki si mon pe deal ek frod sa ki pe deal avek sa ki’n sov tax sa ki’n al dan bribery tousala I bann form ki koripsyon ki Anti- Koripsyon pe fer fas, pour li kapab met laklerte lo la e anmenn sa ki koupab a lazistis.

Mr Speaker en fakter enportan pour kapab determin koripsyon ki biro Anti-Koripsyon se son striktir.

Ki mannyer zot konnen zot ganny lenformasyon kot ki annan koripsyon?  En lenformasyon I bezwen sorti atraver en endividi, ouswa en rapor parey nou annan en rapor Oditer Zeneral, ki sorti anyelman ouswa bann lezot form; nou bann sitwayen sivil parey nou dir nou menm nou bann watch dog par-ler, kot I annan medya sosyal ki vini I annan son rol pour li zwe kot parfwa zot deklar bann fe ki annan koripsyon dan diferan lenstans.

Alors sa striktir ki Anti- Koripsyon I bezwen annan I bezwen osi annan serten proteksyon pour anmenn devan pour bann ki vini ki vin dir lala tel landrwa I annan koripsyon ki ganny deroule, e ki dimoun a santi li an sekirite e pour napa lafreyer pour li vin devan kot I annan koripsyon.

Menm dan ou lenstitisyon kot ou travay si ou’n vwar ki I annan bann act labi, bann act koripsyon sa travayer I kapab santi alez ganny proteze san okenn viktimizasyon, apros sa Komisyon dir vwala, san ki mon pour perdi mon plas travay, mon bouse manze, parey nou dir ouswa san ganny menase dan okenn form.  Sa I en rol enportan ki sa Anti-Koripsyon I bezwen annan met li annord avek.

Mr Speaker lo napa ase resours I byen nou kapab donn li dizon 10milyon annou donn li 10milyon konman son Bidze pour li travay, me larzan I pa pour sifi pour li kapab al delivre sa travay.  I bezwen distribye sa resours ki li I annan, avek landrwa ki pli enportan.  Nou ganny tann dir forensic accounts auditor I enportan Sesel, pour nou.

Nou napa byen, byen dimoun ki annan sa lekspertiz e la zot bezwen al o nivo enternasyonal konmans recruit rod bann investigator ki pour kapab konmanse, al rode kwa ki’n pase, ki’n arive e kot keksoz I ete.

Mr Speaker sa Komisyon li menm li I bezwen osi pe travay an kolaborasyon avek bann lezot Lazans.  Attorney Zeneral I bezwen pe fer son travay.  Nou annan Lapolis ki li I pour bezwen pe pran aksyon li ki pour fer larestasyon li ki annan sa manda.

So zot annan bann mayon ki pour bezwen pe zwe.  E lo sa Komisyon osi I pour bezwen annan bann reprezantan ki petet pour lye avek sa bann lorganizasyon lo en baz kontinyel, ki tanzantan zot pe zwenn.  I annan bann desizyon ki a ganny pran e si case I Ankour parey kot Zidisyer I annan detrwa case ki petet posibleman pour al Ankour tousala sa bann dimoun ki dan sa Komisyon avek sa lorganizasyon I bezwen annan en mayon kle.

I bezwen konnen ki pe pase ki zot pe fer e ki aksyon ki pe ganny pran pour fer keksoz bouze.

Mr Speaker mon konstate osi ki en keksoz enportan se ki mannyer ou dekouraz koripsyon arive?  I bon pour annan sa Anti Koripsyon pour li kapab lib pour police pour police bann keksoz ki’n arive ki pe pase me selman en lot fason ki enportan se, ki mannyer nou ankouraz dekouraz koripsyon pour fer sir ki pa bann case pa ariv bokou devan sa biro Anti Koripsyon.  E enn bann mezir mon krwar I enportan se, pour fer bann rekomandasyon avek Gouvernman.

Par egzanp ou’n dan en pozisyon ki ou’n ganny konfye ladan pour pran desizyon ouswa pour lead, si ou pa pe byen ganny peye byensir ou pour annan tantasyon pour peye al ver koripsyon.

So saler I enportan pour nou gete ki bann dimoun ki nou pe konfye zot I kapab politisyen, I kapab Minis, I kapab PS, I kapab CEO, I bezwen ganny byen reminere pour li pa ganny bann tantasyon pour li al fer bann pratik koripsyon.  I annan bann landrwa enportan sirtou dan finansyel – parey SRC nou annan Ladwann, nou annan Lapolis, nou annan bann lezot lenstitisyon kle ki deal avek bann desizyon enportan ki pei, I kapab bouz pli devan.

Kot sa bann dimoun ki dan sa bann Departman osi zot bezwen byen ganny gete pour fer ki zot pa pe ganny bribed, zot pa pe ganny tante pour zot al pran larzan ouswa fer faver en lot, en  lot pour li kapab pase e tousala I en bann form koripsyon.

So Mr Speaker sa lenstitisyon I enportan.  I bezwen grosi.  I pa kapab in ne koumsa menm I pour bezwen kontinyen grandi.  I pour bezwen annan lespas pour li ouver.  E ler mon pe get li a mon avi I bezwen vin en lenstitisyon enportan – parey Minister ki I pour bezwen annan bann diferan layers pour li kapab fer son travay dan la transparans, dan en fason free e san okenn ladan osi.

E kot tou dimoun I egzers sa responsabilite ki in gannyen, dan en fason ki I ava anmenn plis klarite e sa ki nou pep pe demande ozordi.

Alors Mr Speaker mon pour siport Mosyon ki Onorab in anmennen pour kapab detri sa persepsyon ki isi I egziste, e fer ki koripsyon I vin en azanda lepase.  E ki pei resours ki li I prodwir I gannyen I ganny byen zere e partaze pour benefis nou pep Seselwa.  Avek sa Mr Speaker mon pour dir ou mersi.

 

MR SPEAKER

Mersi Onorab Aglae.  Mon ava pas laparol avek Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker sa Mosyon ki devan nou parey tou bann Manm ki’n koze in rekonnet, I en Mosyon ki tre enportan.  E mon krwar ki son moman, son timing parey nou dir an Angle I osi relevan.

E petet la kot nou pe viv dan sa staz, kot I annan bokou kestyon ki pe ganny demande.  Mon krwar ki nou pep antye I rekonnet ki poudir, i annan bokou keksoz ki’n mars mal dan nou pei.

E sa Lasanble parey plizyer Manm in dir avan sa Lasanble in met lalimyer lo plizyer keksoz ki’n mars mal.  E in annan serten lenvestigasyon ki’n konmanse.  Me kwa ki nou vwar?  Nou vwar ki resours ki sa Komisyon I annan, I pa sifizan.  E an plis ki sa son striktir I pa efikas.

Lo kote resours, I kler parey Onorab Arissol I mansyonnen, ki letan Bidze in vin devan Lasanble nou vwar ki poudir zot pa’n ganny sa ki zot bezwen.  Ki mannyer ou kapab annan en Komisyon ki pour regard en size sitan enportan, parey Koripsyon ki napa ase resours?  En moman zot ti annan zot zis en investigation officer.

E sa se CEO ki’n vin dir nou isi dan Lasanble Nasyonal.  Me letan ou konpar sa ki I annan konman resours, me lo lot kote letan ou regard la kantite ka konplent ki’n ganny raporte, I enorm.

E konklizyon se ki avek sa resours ki in gannyen I pa pour kapab fer sa travay.  E mon krwar ki poudir I annan bann lezot lenstitisyon dan pei ki en pe koumsa.  Pran par egzanp biro Ombudsman.  Biro Ombudsman I trouv li dan preski menm sityasyon.  Kot zot sipoze fer en lenvestigasyon e anba Konstitisyon I kler ki poudir, se zot ki annan sa responsabilite pour fer en kantite lenvestigasyon, me selman I pa kapab fer li.

Biro Ombudsman I kapab reviz Lalwa ki ganny prezante.  I kapab anmenn serten propozisyon.  Sa kantite responsabilite ki I annan ki mannyer ou ekspekte en dimoun avek en sekreter pour fer sa?  I enposib.  E alor mon krwar ki parey ki nou pe koz lo bann diferan lenstitisyon dan nou pei, mon krwar ki I enportan pour nou kapab donn zot sa resours ki zot bezwen.

Letan nou regard CAA li osi tou I bezwen plis resours.   Ozordi Mr Speaker kot I annan plis Lalwa ki nou’n pase, ki toultan pe donn zot responsabilite adisyonnel, e la sa Lalwa ki parey nou tou nou konnen I istorik ki nou fek fer First Reading – ankor enn fwa CAA pe ganny demande pour li fer plis travay ankor.

Be letan nou koz avek bann Manm zot dir avek ou ki zot menm zot konman Manm ki osi parfwa azir konman messenger!  Zot al delivre let.  Zot azir konman sekreter.  Zot napa ase sa resours pour zot fer tou keksoz.

Alor Mr Speaker I enportan pour nou letan nou pe regard Komisyon Anti- Koripsyon pour nou demann Gouvernman, dan en fason serye pour donn zot plis resours.  E mwan mon pa pe regard sa konman zis en depans.  Mwan mon pe regard sa konman en lenvestisman.

Akoz I en lenvestisman?  Mr Speaker si Komisyon Anti- Koripsyon – taler mon pour propoze ki son non I sanze, si par egzanp I nobou fer son travay dan en fason serye – dan en fason efikas zis lo sa zafer $50milyon ki nou tou nou konnen $50milyon pa ti devret kit Labank Santral pour li al okenn par!  Mr Speaker $50milyon ozordi I kout I letan ou sanz li an roupi I ekivalan anviron R700milyon.  R700milyon.

Akoz mon dir I en lenvestisman?  Be si ou donn zot resours – dizon zis pour fer sa lenvestigasyon lo sa $50milyon ekivalan R700milyon ou donn li resours ou dir avek li la I la al rod sa, e nou donn ou R20milyon – al rod sa R700milyon.

Be Mr Speaker ou’n depans R20milyon, me sa ki antre se R700milyon!  Antou I ava fer ou R680milyon ki pe antre.  E mwan pour mwan, mon vwar sa konman en bon lenvestisman.  En bon lenvestisman e pei avek R680milyon, annou regarde ki mannyer nou kapab ki mannyer sa larzan I kapab ganny servi – non selman pour nou amelyor nou standar lavi, me osi pour regarde ki mannyer nou pep nou kapab improve lasante, nou kapab improve bann diferan bann diferan lorganizasyon ki ava fer nou standar lavi vin meyer.

Alor mon trouv li konman en lenvestisman e sa kalite desizyon ki nou bezwen vreman pran pour nou kapab fer.  E mwan Mr Speaker, letan nou pe koz lo resours mon pe osi dir e striktir mon pe vwar ki sa zafer $50milyon, be I pe tro tarde!  Lotrozour letan mon’n tann zot dir bann dimoun vin devan e ki i annan serten dimoun ki’n vin devan,  mwan mon krwar ki zot bezwen ganny plis ledan!

E ki Lapolis I devret ed zot osi tou!  Lapolis I devret ed zot, nou konnen poudir sa larzan in al laba lekel ki ti ansarz be kriy sa bann msye, sa bann madanm ensidswit ki dan zot lenvestigasyon zot ava dekouver anmenn zot.

E pran statement ek zot.  E mon e la mon poz kestyon, akoz ki letan en sitwayen ordiner apel li’ sitwayen ordiner’ zis pour nou kapab fer en diferans ki serten ki pas anba Lalwa me serten I pas par lao Lalwa.  En sitwayen I annan en soupson, ou vwar Lapolis I vini apre ki en Departman I fer rapor Lapolis I vini en pti kou msye madanm dan minot enn I dan kaso No.1 lot I dan kaso No.6.  Ganny arête Vandredi, pa enterese ki pe pase dan lakour zot dan kaso e lo Dimans oubyen Lendi bomaten ki zot ganny en pti enterogasyon.

Be sa bann msye kaso la I swazir sa?  Kaso mon ti krwar I kaso e tou dimoun I antre dan kaso.  Letan mon regard lo Nouvel enternasyonal letan mon regard Prezidan ansyen Prezidan Sid Kore mon’n vwar li dan minot mwan e mon’n vwar li in al dan prizon.

Letan mon pe regard Vis-Prezidan ansyen – Premye Minis Maurice Mr Ramgoolam mon ti vwar li pe pase, I ti ganny detenir letan zot ti pe fouy bann milyon ki ti dan son lakaz.

Malaisie sa ki’n fek pase la letan montre tou sa bann minot mon krwar I pour nou tou.  E letan mon pe dir pour nou tou mon pa pe dir zis pour …  Mwan osi tou si demen mon fer keksoz mal minot I sipoze pour mwan.

Be alor annou regarde ki mannyer nou bouze.  Annou met larzan.  Annou envestir e atraver sa nou a kapab ganny larzan.  So mwan mon krwar ki nou bezwen annan en keksoz konkret ki Lalwa pa aplik pour diferan dimoun.

Mr Speaker mwan mon krwar ki sa Komisyon Anti -Koripsyon la pour le moman in tro lour.  E mwan mon vin direk lo la.  Mwan non krwar sa zafer en Komisyon sa bout Komisyon I devret tonbe sa.  Sa zafer 7 dimoun lo en Komisyon apre sa annan en CEO I devret tonbe.

Ozordi sa Komisyon I annan li en Ziz ki asiz Uganda konman son Chairman son Chairperson.  Apre sa ou annan ou 6 Komisyon – 6 Komisyoner isi.  E personnelman mon pa vwar ki sa bann Komisyoner – avek tou respe ki mon annan pour zot.  Avek tou respe ki mon annan pour zot, mon konnen ki poudir serten I annan bann lekspertiz spesifik.

Me sa bann dimoun zot ti ava kapab zot ti ava kapab dan son travay sa body sa lenstitisyon, I ti ava kapab regarde si par egzanp sa lekspertiz spesifik.  Par egzanp ou bezwen en avoka parski  mon konnen ki poudir I annan avoka lo sa Komisyon.

Ou ti ava kapab rod annan serten avoka ki atase avek sa Komisyon, pour ki letan ou bezwen en konsey legal ou ti ava kapab ganny sa.  Lot kote I annan serten ki annan bann lekspertiz forensic par egzanp.  Ankor enn fwa letan ou bezwen zot ou ti a kapab ganny zot.  Me sa bann zafer kot CEO I fer son travay e apre sa I bezwen raport avek Komisyon pour regarde ki bann …!  Be non, I pa marse sa Mr Speaker.

Akoz I pa marse?  Letan ou pe fer sa bann lenvestigasyon parey, sa CEO li I bezwen annan rol – parey Onorab Afif in dir, I bezwen annan rol ekivalan avek Komisyoner Lapolis.  Li ki pe ansarz son lenstitisyon e li ki pran desizyon lo ki mannyer I pour ale

FBI son Direkter I pran desizyon kot I pour ale!  I pa raport avek en lot Komisyon!  Si I anmas levidans me akoz I bezwen …?  Sa body pe fer son travay be akoz ki CEO prezan I bezwen asize devan 7 dimoun pour dir avek zot la I la nou fer lenvestigasyon lo tel dimoun e la I la ki nou’n vwar. ki nou’n vwar, ki nou’n vwar.

Be non Mr Speaker.  Mwan mon krwar ki deswit, deswit sa Komisyon I devret sorti.  Dan Lalwa I bezwen annan en lamannman.

Premye lamannman; tire sa zafer Komisyon annou apel li en Lazans.  Mon vwar I ti pour fer bokou pli sans si I ti ganny apele Anti-Corruption Agency ki ganny run par son CEO e son CEO letan I fer son lenvestigasyon letan I dan son konfidansyalite ensidswit.  E apre sa li I raport letan I annan en case pour li pourswiv – ankor enn fwa I kapab annan de fason – swa I annan son prop prosekiter ki atase avek li, fer laranzman avek biro Attorney Zeneral e zot ale e zot anmenn zot case devan Lakour e keksoz I bouze.

Sa zafer partaz avek en Komisyon, se la kot parfwa lenformasyon I sorti; dimoun I ganny sans aranz son sega e se la kot nou kapab ganny koripsyon dan Anti-Koripsyon.

Alor annou mon krwar met lord lo sa kote. E sa Mr Speaker deswit I ti pour sov pei plis ki R3milyon plis ki R3milyon zis lo sa ki zot donn bann Komisyoner la pour le moman.  Pey en tiket pour en Ziz vin isi, zis pour li asize en semenn – pe fer konmsi I pe fer isi, pe fer laba, donn en pti interview ensidswit?  Be non!

Mon dir annou tir li konman Komisyon Anti- Koripsyon apel li Lazans Anti- Koripsyon e I ti pour fer son travay dan en fason bokou serye – ensidswit.

Mr Speaker parfwa Sesel e sa nou ti fer resorti tanzantan letan nou koz lo drog; Sesel ennler ou a krwar se zis bann dimoun ki annan responsabilite pour zot lager kont serten keksoz, ki pa konnen ki pe arive.  Be $50milyon be fer demann SBC oubyen Tele Sesel pas en kou dan lavil la, be pa zot konnen ki ti al dan kont SMB?  Be pa zot konnen lekel ki ti ansarz SMB pandan sa letan?

Be mwan mon trouv I drol ki poudir Lapolis pa ankor aret sa bann dimoun ki ti ansarz sa kont met zot en kou dan kaso zot osi en Vandredi apre midi fer zot pas en weekend.  Mr Speaker ou ti ava vwar si letan in ariv Lendi bomaten serten lenformasyon pa ti pour konmans sorti!

Akoz ki zis serten Seselwa ki ganny mete dan kaso e dan Vandredi apre midi e letan I ariv Sanmdi 2er bomaten zot trouv en boug ki’n ganny arête Barrel pi, sal, sou ki ganny met dan kaso ansanm avek li.  Be sa bann lezot laba pa kapab?  E nou pa ti ava ganny rezilta?

Alor si Seselwa I konnen, e an plis ki sa paper trail isi I kler, tou keksoz I kler, lekel ki ti Minis Finans, lekel ki ti sinyen pour sa larzan transfer pour al dan sa kont, e ki dan limero kont ki I ti ale, lekel ki ti ansarz ki mannyer pa’n aparet dan audited accounts.

Be mwan mon krwar ki menm Onorab Valmont ti kapab fer sa travay.  Mon tann li pe koze la.  Onorab Valmont ti kapab fer sa travay pour li swiv sa latras.  E obviously be wi ou en boug so ou.

 

(laughter)

 

HON WAVEL RAMKALAWAN

Alor Mr Speaker se sa ki mon pe dir.  E se la kot sa Mosyon I vreman apropriye.  Mon krwar ki nou pe tro tarde.  Nou pe tro tarde e an menm tan ki nou pe tarde, sa larzan ki’n ganny servi pour al aste serten bann lezot assets, tousala pe ganny pe vin pli konplike.  Parske assets pe ganny vann larzan pe ganny transfer kont sorti en landrwa pe al dan en lot landrwa e mon se sa ki mon pe dir Lazans Anti- Koripsyon I devret vin efektiv e I devret vin agresiv dan lafason ki I travay.

Mon pa anvi i travay parey L’Arabie Saoudite, me selman letan nou regard fason pli lannen pase zot ti rezourd problenm koripsyon laba, se ofet zot ekivalan avek FPAC Sesel, ki ti idantifye bann koripsyon e ki zot ti fer zot annan plis ledan.

Mon swete ki nou osi tou FPAC ti annan sa kalite ledan kot zot ti ale zot ti aret bann Prens, bann lot laba met zot dan zot ti dan 5 Star Hotel akoz zot pozisyon, me pa en pti kou tou zafer ti kler?

E la Mr Speaker mon ava dir avek ou, menm sa dimoun sa dimoun ki annan Ile Daros li osi tou I ti ganny detenir.  E in bezwen pey sepa konbyen milyon e apre sa in ganny large.  Annou pa rod difikilte kot keksoz I kapab al ase senp.

E Mr Speaker letan nou pe koz lo resours mwan mon krwar ki poudir sa Komisyon I bezwen larzan pour li … Parey nou dir seed money.  E si en konparezon zis lo sa 50milyon I ti ganny sa seed money, I ti ava kapab fer retournen.

E si nou ganny nou sa 680milyon I antre, ki ti pour kout nou pour nou remet ankor en larzan laba, dizon en lot 10milyon dan travay sa lorganizasyon, pour zot kapab al fer bann lezot resers.

E la Mr Speaker mon anvi dir, ki si nou konman en Lasanble Nasyonal – parey Mosyon in montre bomaten nou’n kapab sov pei atraver bann Bidze ki’n ganny sispann 29milyon be annou envestir kot fodre envestir.

E Mr Speaker zis pour montre ou parfwa ki mannyer parey koze I dir – ennler plito letan dimoun I dir en keksoz lo ou, zis reste trankil parske ler ouver labous apre keksoz I al pli pir.

La lot zour e mon ti ava kontan ki si sa atraver sa ki mon pe dir, ti a ganny en Right of Reply parske mon anvi konn plis lenformasyon.  Ki nou al dekouver Mr Speaker?  Sa zafer Zil Ste Anne!  Sa zafer Zil Ste Anne atraver sa let ki poudir IOR en lakonpannyen ki pour Mr Savy avek Mr Beggs zot pe pey Leta sepa R2milyon  ou konnen ki nou al dekouver Mr Speaker, $220mil tou le an – tou le lannen.  Zot sa lakonpannyen zot lwe en ‘ptipti bout’ kot Lotel Ste Anne I ete avek Beachcomber pour $220mil par an.  Me selman Ste Anne Resort I peye – Beachcomber I peye be li sa lakonpannyen I ganny zil antye! be pa en koripsyon sa?  Pa en koripsyon sa

Apre sa nou ganny gro let Right of Reply.  E mwan mon ti ava kontan ki poudir I annan en Right of Reply ki vini ankor pour eklersi sa.  Parske I ava permet nou al dan pli profon ankor – parske sa bann zafer koumsa I apel koripsyon e se Wavel Ramkalawan ki pe dir anvoy Right of Reply anba Lartik Konstitisyon.

Mr Speaker nou bezwen konman en pei pran sa zafer koripsyon o serye.  E mon nonm zis en sif – mon’n koz lo lenvestisman e lo lot kote mon’n koz lo donn ledan sa Lazans e mon arête apel li Komisyon mwan.

Akoz mwan mon vwar poudir nou bezwen en Lazans ki vreman fer son travay avek bann resours neseser.  Me an menm tan I vre ki nou bezwen en pe plis ledikasyon.  Nou bezwen travay e parey nou pe fer dan Lasanble atraver FPAC kot nou ganny nou en servis sivil ki for, kot nou bann civil servants I for.

Me si nou bann civil servants I for, nou pour bezwen osi annan en whistle blowing mechanism proteksyon whistleblowers, parske ozordi I annan bokou dimoun ki vwar sa bann trik kot I pase, me selman zot pa kapab vin devan akoz zot en pe per.  Wi zot en pe per, parske zot pa santi sa proteksyon total.

So nou pour bezwen sa mechanism, parske nou tou ki la parfwa I annan keksoz ki nou dir dan Lasanble, be kot nou’n gannyen?  Se parske en dimoun dan sa departman I dir avek ou be frer Onorab tel keksoz pe pase dan mon Departman kot I annan bann keksoz pe mars mal.

E la Mr Speaker, mwan mon anvi dir, ki I annan en kantite keksoz ki nou konnen pe arive, e serten dimoun I krwar ki nou pa konnen, serten dimoun I krwar ki nou pa konnen me nou konnen.  E alor mon krwar ki dan civil service nou bezwen en civil service ki for ki ava deza dan li menm vin en mechanism ki lager kont koripsyon, me kot I al an deor zot sa Lazans Anti-Koripsyon, I ava kapab pran en lafors bokou pli for

SRC e la ankor enn fwa nou demann kestyon konbyen fwa nou demann kestyon letan ansyen Minis Larose ti la I ti dir nou konbyen larzan ki I pa’n anmase, me Mr Speaker ou konnen akoz me e lo FPAC nou ti osi demann kestyon.  Se parske I annan serten sa bann menm ki pli gro, ki zot pa pe peye, zot pa pe peye zot pe fer laranzman isi, laranzman laba tandis ki ankor enn fwa nou ava servi sa lekspresyon, sa ‘Seselwa ordiner’ li letan I al tir son pti keksoz ki son fanmir anvoye pour li, I ganny demande pour li pey sa dernyen 5sou.

Tandis ki sa bann e la mon ganny en serten lenformasyon I annan Mr Speaker ki dwa ziska R103milyon dan tax – pe negosye.  I annan lezot la ki ti dwa R88milyon zot in fek pey R30milyon oubyen R40milyon zot ankor dwa.  Be tousala nou bezwen regarde ki mannyer I afekte nou popilasyon; ki mannyer I afekte lavi dan nou pei.

E aprezan dimoun ki zot fer?  E la I enportan pour nou regarde nou konman en Lasanble parske Onorab Arissol ti byen dir sa, dimoun aprezan letan nou dan Lasanble nou devwal bokou keksoz, nou montre kot in annan serten koripsyon, dimoun aprezan I vir lo nou.

Be zot FPAC zot in devwal sa, sa, sa ki pour arive prezan?  Ki arive?  Zis zot koze laba?  Be nou bezwen e pep Seselwa I bezwen ganny sa kler enn fwa pour tou e mon pe senpleman repet sa ki Onorab Arissol in dir;

‘Lasanble Nasyonal pa li Anti-Koripsyon.’

‘Lasanble Nasyonal pa li Lapolis.’

Lasanble Nasyonal pa li Attorney Zeneral’.

Letan nou kouver sa bann keksoz I annan bann Lazans ki bezwen pran sa bann size, e fer zot travay.  Lasanble Nasyonal nou pe fer de keksoz pour sa pei Sesel.  Nou aprouv Bidze pour ki sa bann Lazans I kapab fer zot travay, e dezyenmman nou ed zot dan zot travay atraver.  Nou lo nou kote nou senpleman e pep Seselwa silvouple konpran nou letan nou pe dir sa.

Nou, nou fer sa de keksoz aprezan lepep Seselwa demann L’Egzekitiv.  Demann Gard.  Demann Biro Attorney Zeneral.  Demann sa bann lenstitisyon kwa ki zot pe fer.  Pa bezwen demann Lasanble Nasyonal kwa ki zot pe fer.

Akoz nou pe fer nou travay!  Nou pe sov larzan lepep Seselwa e nou pe fer sir ki Seselwa I ganny en bon deal.  Alor sa bann lezot Lazans la nou demann zot pour zot fer zot travay.

Mr Speaker sa Mosyon I enn ki bon.  Sa Mosyon I enn ki ed nou avans devan.  E mwan mon pa dakor letan Gouvernman I dir se an Septanm ki I pour vin avek serten lamannman lo sa Lalwa.

Mwan mon dir ek Gouvernman, parey ki nou isi dan Lasanble nou’n lead by example sa Lalwa lo Laverite e Rekonsilyasyon Nasyonal, ki nou’n fer nou vwar poudir I enportan, nou fer nou travay e nou met Lalwa devan.

Alor si nou krwar ki poudir Sesel in perdi en kantite larzan, e la nou non men sonm R700milyon, nou krwar ki poudir Gouvernman I vwar ki poudir sa Lalwa pour amann Lalwa Komisyon Anti- Koripsyon, I bezwen vin imedyatman.  I bezwen vin imedyatman, pour ki travay I kapab bouze.

Avek sa detrwa parol Mr Speaker mon pour demande ki nou donn sipor Onorab Arissol pour sa Mosyon ki in anmennen, parske sa I pa konsern zis Onorab Arissol me I konsern nou dan sa travay ki nou pe fer.  I konsern nou dan sa travay nob ki nou ganny demande pour fer konman bann Manm Lasanble.  Mersi bokou Mr Speaker.

 

MR SPEAKER

Mersi Onorab Ramkalawan.  Onorab De Commarmond ou annan 5minit ou kapab fer ou entervansyon.  Ok go ahead Onorab De Commarmond laparol I pour ou.

 

HON CHARLES DE COMMARMOND

Mersi Mr Speaker.  Mon pour seye dan 5minit, me selman mon kapab zis senpleman.  Mon pour bref Mr Speaker dan menm laliny mon krwar I enportan sa Mosyon ki devan nou I en bon Mosyon sa.  Nou konmans koz lo la depi dan Bidze Siplemanter, nou’n fer resorti bann diferan pwen.  Me I enportan fer met devan lepep en pe keksoz Mr Speaker.

5enm Lasanble letan nou ti vot pour Lalwa Anti- Koripsyon ki’n amande apre, ti pour bann bon rezon ki nou met li.  Ok?  Nou’n apel li Komisyon Anti-Koripsyon – korek mon krwar petet nou bezwen amann li davantaz, pour fer li annan plis ledan.  Sa mon napa problenm avek sa.

Me I enportan ki nou get li osi son lanpler enternasyonal sa.  I pa zis pour kestyon travay kont koripsyon lokalman e osi en body ki pour travay kont koripsyon an relasyon avek bann lezot body enternasyonal.

Mon dir sa akoz, mon’n ganny sans attend detrwa Sesyon, detrwa Konferans e workshop lo nivo enternasyonal kot i konsern sa issue koripsyon.  E nou vwar poudir ozordi koripsyon i pa zis dan en pei li me I vin osi atraver bann lasistans ki en pei i gannyen avek en lot pei.  Oubyen atraver led e lasistans ki bann NGO i gannyen avek lezot pei.

E ler mon ti Brussel nou ti vwar poudir laba zot pe dir bann FPAC sirtou bann Komite Finans – Finans  dan bann Parlman, pour zot met sa lo zot azanda konman en pwen davantaz pour veye ler bann led I antre dan bann pei, kan mannyer pour zot kapab donn en koudmen pour zwe sa rol oversight.

Konmsi sa rol oversight pa zis dan ou Bidze e dan ou pei i al o dela de sa.  E pour sa i enportan alor ki sa Komisyon ki nou pe koze ki ozordi i en Komisyon, son striktir i bezwen ganny vwar.

Petet at the time i ti byen nou fer li koumsa pour li bouze me o fil a mezir ou vwar ou.  E mwan mon santi ozordi i …. le moman, I prime la pour nou kapab fer sa.

Akoz i annan en lot keksoz ki osi pe veye, kot koripsyon parfwa i tir son latet e i tir li byen menm.  Lezot Forum ki mon’n al lo la ki mon ki nou diskite se EITI ler ou pe fer oversight lo bann extractive industries.

Oubyen lo resours; letan ou pe eksplwat resours en pei.  Dizon nou annan lapes ou annan bann Lagreman ki bezwen ganny sinyen.  La osi nou bezwen pli vizilan.  E la kot ler nou pe detekte keksoz ki sa lenstans ki pour deal avek Koripsyon, I bezwen ganny alerte letan nou vwar keksoz pe arive.

E se sa kan mannyer I ete la, mwan mon dir zot fransman,  mwan mon osi mon vwar li i difisil pour Komisyon Anti-Koripsyon parey I ete la, pour li kapab fer tousala.  E kanmenm nou pour alert li fer konmsi ou pe son lanmen I ankor anmare, ou pe dir li lager.  So I pour difisil.

Alor nou vwar poudir wi e ou pli vit ki posib i devret ganny sa sipor ki i bezwen.  Se sa rezon ki mon poz sa kestyon si sa finans – mon ti demann I fini avek SS  pou Finans la si sa lasistans ki i pe donnen dan Bidze Siplemanter, ti pour vreman ase.  Ok?

Avek enteraksyon ki mon’n fer avek Komisyon Anti-Koripsyon, nou vwar poudir, I annan landrwa osi kot zot atraver revwar zot striktir, zot kapab anmenn serten savings.

E se sa nou pe dir fer sa sanzman striktir en pe vitman, pour permet zot kapab fer savings.  Sa savings ki zot ava fer I a ed zot dan lezot area kot zot ava bezwen envestir.

Par egzanp nou’n vwar osi kot Komisyon Anti-Koripsyon i annan overlap avek lezot lenstans ki I annan avek Biro Ombudsman, avek Lapolis avek Ethics Commission, FIU, SRC, Biro Attorney Zeneral tou sa I annan bann bout ki nou pe vwar; par egzanp si napa sa korperasyon byen.

Ok nou pe koz Ethics Commission, nou dan nou Lasanble, nou’n met nou fer sanzman Lalwa pour Ethics Commission!  E nou pe espere nou pour deklar nou assets.  Nou pe espere lontan, me si napa Komisyoner, si napa sa body  me ki nou pour fer nou?

Nou kapab zis – mon pa konnen mon nou koz Lorloz?  Be dir – so ou vwar i annan en demars la kot si ou amann sa Komisyon ou fer ki ou pou donn li plis ledan, byensir nou kapab gete ki mannyer ou kapab enkorpor sa bann overlap ki mon pe dir la, ki pou fer keksoz bouz pli devan.  Zisteman la taler in fek ganny mansyonnen ou pe koz zafer Ste Anne, me  letan ou’n lev li ou’n met piblik pe ekoute, me Anti-Koripsyon li osi pe tande, me fodre nou ekri en let laba?   Mon krwar i tande me si i tande, i take up.   Mwan mon krwar mon vwar li en pti pe koumsa.

Dan FPAC – FPAC pa ankor anvoy en case kot Anti- Koripsyon li!  I pa pou kapab anvoye les koumsa li.  I bezwen dan son rapor letan i fer rapor, i a note ladan poudir i vwar sa, i vwar sa, i vwar sa e i sizere fer sa fer sa, fer sa!

Letan ki i pa pou kapab konmsi i ankor pe investigate me i pa pou kapab se sa ki mon touse la, ki nou Komite i kapab osi al vitman dan sa bann investigation.  Me solman vwala en pti pe ki mannyer i marse.

Si an pasan vi ki konmela FPAC i piblik sa ki i pe koz lo la, sa ki nou diskite, alor la i enportan kot sa bann biro, Anti-Koripsyon ensidswit, ler i tann en keksoz, ki i krwar i fer sans e i oule plis aprofondi avek nou, i kapab osi take it up on themselves pour zot kapab al fer zot investigation.

Me selman mwan mon ti demann Komisyon Anti-Koripsyon Mr Speaker, detrwa pti kestyon lot zour mwan.  Akoz dan nou Lasanble isi li menm, konmsi letan bann entervansyon I ganny fer, parfwa mon tenir mon cool mwan.

Mon pa reponn dan en fason ‘mal’, me selman mon al demann zot si par egzanp tou sa bann ka si I annan bann ka kot zot, zot dir mon wi I annan en bon pe ka, detrwa ka.  E mon demande si tou sa bann ka I bann ka Parti Lepep!

Mon’n al demande akoz nou Lasanble nou dir konmsi ou a krwar tou keksoz i Parti Lepep!  Prezan sa madanm laba I dir mwan poudir ‘’non napa’’  non ni laplipar.’’ I dir mwan I pa mete lo la letan ka i vin devan li i pa mete ki PARTI!

 

(Mic Off)

 

HON CHARLES DE COMMARMOND

Non sa ki mon pe dir ou, zot dir mon i pa mete ki ‘parti’.  E i dir mwan poudir i annan plizyer ka bann biznes – businessman – I annan bann ka kot dimoun ok ki Minis avan, I annan ki ti bon (mon dir tousel) ki si ti Minis avan then, i ti dan Minis bann Gouvernman Parti Lepep.  Sa pour mwan i kler lo la.

Me i dir mwan I annan ki ti PS.  I dir mwan PS kanmenm  ti dan Gouvernman  i dir mwan pa neseserman sa dimoun i ti dan Parti Lepep.

Prezan mon’n al ler nou koze dan Lasanble, i annan bann ka bann non ki’n sorti.  Prezan mon’n ale mon al get kot Parti Lepep.  Mon dir donn ou lalis Manm, mon a gete.

 (laughter)

HON CHARLES DE COMMARMOND

Be Mr Speaker ekoute!  Be i pa lo la!

 

(laughter)

HON CHARLES DE COMMARMOND

Mr Speaker mon pe dir klerman pa lo lalis Manm Parti Lepep! Prezan mon dir be lala zafer.  Mwan mon menm, mon pa ti konnen mon, mon krwar letan zot dir I vre, mon al gete I pa korek!

So mon pe dir sa pour nou I ede pour nou rektifye, pour next time letan nou dir annou get li dan en fason parey FPAC i fer son travay, nou tir politik dan sa.  Mwan mon ti ava kontan nou al dan sa fason pour ki ansanm konman en Lasanble, konman FPAC parey nou fer, ki nou kapab bouz pli byen si nou ti kapab annan en lapros pli pozitiv, pli byen, pli fair, dan en fason koumsa nou a kapab avans devan pour nou deal avek sa bann zafer koripsyon.

E nou tou sa bann lenstans ki mon’n nonmen, I bezwen zwe rol oversight lo nou Bidze, lo sa ki arive dan nou pei, pour nou kapab al de lavan.

Mr Speaker avek lamannman ki mon pe dir dan Komisyon Anti-Koripsyon, i pour fer ki I pour mars pli byen en lenstans par egzanp nou vwar poudir olye annan bann commissioners, ou kapab annan ou bann advisory body avek bann specialist skills.

Konmsi ki I konnen ki I pe fer.  Apre ou annan ou osi Ziz e ou bezwen bann Ziz spesyalize dan Komers, dan Finans.  Ou pa kapab nenport ki Ziz i vin ziz en ka koripsyon!  Pa kapab en Ziz si napa sa baz finansyel e komers, kan mannyer pour al konpran tou sa?

A mon avi mon en lay man a lay person, me selman mon pe dir ki, si nou ti kapab revwar son striktir e donn li resours apropriye, i ti kapab li anplifye son lenstitisyon, fer ki sa rol ti kapab zwe pli byen.  E la i ti ava annan bann dimoun spesyalize pour al dan sa bann direksyon, pour kapab anmenn plis rezilta.

Be selman nou osi ki nou pe koz la, en dernyen pwen annou pa zis get zis kestyon vini kondann en boug konmsi!  Mwan mon get li koumsa.  Mwan mon krwar I annan en lot rol en rol enportan, en rol en pe parey ki’n arive avek lanvironnman dan nou pei, kot ledikasyon in vini depi konmansman dan lekol.  E ozordi nou’n vwar rezilta vreman pozitiv lo sa kote lanvironnman.

E mon krwar mon sa rol edikasyonnel biro Anti- Koripsyon, i kapab vreman en keksoz pour lavenir tre pozitiv.  La osi I bezwen resours pour li anplifye son kalite fason, pour li fer pour li kapab reach out ek bann zanfan.

Dan lekol ki nou bezwen konmans sa e devlop li pour permet ki nou annan en popilasyon a lavenir ki li I vreman konsyan lo kestyon koripsyon.  E ki li I vin en zenerasyon pli pozitiv, pli korek pli byen ki sa ki pour nou.

Nou, nou bezwen pe get lavenir, pe get le fitir.  Bokou nou pa pour la pli tar, me sa ki ava la nou bann zanfan ki pe grandi I a kapab grandi avek en pei ki pli byen.  (Ou la ou me) ok nou pa pour mor konmela. (laughter).  Me selman sa ki mon pe dir la se pour zenerasyon a lavenir, akoz pli ale nou devlope pli nou pour vwar kote nou pour kree larises pour pei.

Pli ou pour kree larises pour pei si ou napa sa bann lenstitisyon ki pour veye ki pour arive avek larises, sela bann danze ki kapab vini.

Be letan nou tou nou pli konsyan e nou zwe en rol pli pozitiv e nou fer keksoz pli byen, la mon krwar I ava minimiz si non elimin tou sa bann move tantasyon e tou sa bann move keksoz.  E la, ler la larises I ava kapab ganny pli byen ganny redistribye.

Avek sa Mr Speaker mon krwar sa Mosyon I en bon Mosyon.  Nou ava donn li sipor e nou ava dir Gouvernman annou bouz en pti pe pli vit, pour revwar sa striktir pour permet sa Komisyon oubyen Lazans parey nou pe sey sizere pour kapab fer son travay pli byen, anmenn sa bann sanzman, sa bann amannman dan Lasanble, pour nou bouz ek sa.  Mersi bokou Mr Speaker.

MR SPEAKER

Mersi Onorab De Commarmond.  Mon krwar I lo en bon not ki nou kapab pran break.  De bon entervansyon avan break Leader Lopozisyon e Leader Government Business.

Bon mon annan de pti lanons apre midi, mon pour absante Deputy Speaker i ava kontinyen avek travay I ava chair mon annan 3 entervenan lo lalis plis mover Mosyon pour fer son konklizyon.

Deputy Speaker ava chair mon pe al asiste en lanterman mon krwar Onorab De Commarmond osi tou akoz I dan distrik Cascade.

Mon osi profit sa lokazyon pour mwan anons mon labsans dan pei, depi Dimans e mon pe retournen Zedi le 28 kot mon pe lead en delegasyon Manm Lasanble kot 43enm Konferans Plenyer SADC ki pour fer Angola.  

So mon pe absante depi Dimans e retourn dan pei le 28 Zen.  Savedir Mardi e Merkredi prosen osi tou se Deputy Speaker ki pour chair.  Avek sa mon a zis swet zot bon kontinyasyon apre midi e nou ava pran break nou a retournen 2er.

 

 (BREAK)

MR DEPUTY SPEAKER

Bonn apre midi tou bann Manm Onorab, Deputy Clerk in port a mon latansyon ki i annan zis 16 nou.  So nou kapab komanse.

Alor nou pour kontiny apre midi avek deba, nou pour kontinyen apre midi avek deba lo Mosyon Onorab Sandy Arissol.  E prosennman lo mon lalis Onorab Sebastien Pillay.  Laparol i pour ou Onorab Pillay.

HON SEBASTIEN PILLAY

Mersi Mr Speaker. Mon ti pe zis get Standing Orders pour fer sir nou annord avek tou keksoz.  La i byen la Mr Speaker, good. Onorab Roucou in arive, byen.

Mersi Mr Speaker pour donn mwan laparol apre midi lo en Mosyon ki mon konsider tre, tre enportan.  Tre enportan akoz mon en dimoun ki krwar fermeman dan konstri bann lenstitisyon ki for, ki kapab mentenir nou demokrasi en kontinyen fer li evolye dan en fason ki zenerasyon fitir i apresye kontribisyon ki nou sa zenerasyon nou’n anmennen.

Be Mr Speaker mwan osi bezwen remind bann Manm Lasanble ki parfwa osi ler nou pran serten pozisyon lo serten size, i osi enportan ki nou regard reperkisyon sa bann pozisyon ki nou pran.

Akoz fodre pa bliye tou sa ki nou fer, i bezwen reste dan konteks nou Konstitisyon an respektan Lalwa ki egziste, e fer sir ki nou bann prosedir ki nou met an plas pa kontradir sa bann prensip fondamantal, ki nou tou nou krwar ladan.

Mr Speaker mon oule fer referans a sa moman avek en sityasyon ki mon krwar i enportan ki mon remind lo Lasanble, lo en desizyon ki nou ti pran e ki petet mon krwar dan lefitir nou pour bezwen revwar sa desizyon.

Nou’n koz bokou lo rol ki sa Komisyon i bezwen zwe, e Mosyon li menm pe ros lo sa sanzman striktir pour ranforsi sa Komisyon e mon pour vin lo bann legzanp konkret, lo bann propozisyon konkret ki mon krwar i kapab ganny fer.

Me sa komisyon li menm pa egziste dan en vacuum.  I pa egziste lo li tousel. I egziste dan en kad legal kot otour li annan bann lezot keksoz ki antre e parmi sa bann keksoz ki antre i osi annan langazman popilasyon.

Ki mannyer popilasyon i angaze anver li osi act koman sa whistleblower dan bann ka, oubyen ede pour anmenn serten presyon, pour anmenn serten sanzman.

Me lo en lot kote osi i annan rol ki bann lezot lafors i bezwen zwe baze lo travay ki sa komisyon i fer.

Mon dir sa Mr Speaker akoz sa i en size ki mon ou konn tre byen, nou’n annan diferans, me i en size ki mon pa pour perdi okenn loportinite pour mwan met lanfaz lo la.

Mon dir sa Mr Speaker, parski enn bann propozisyon ki nou’n war pase anver Lasanble se en bann propozisyon pour retir kont labank koman definisyon propriyete anba enn bann Lalwa ki Lapolis zisteman i servi ozordi pour li fer sa ki ou apel asset for seizure savedir sezi bann byen ki bann dimoun i annan baze lo si i annan levidans ki en krim in ganny komet.

Me anba sa Lalwa ozordi Mr Speaker, Lapolis pa kapab sezi en kont labank.  I pa kapab anmenn sa lasezi lo en kont labank, akoz sa i bezwen ganny fer atraver en lot Lalwa ki li prezan son levidans ki ou bezwen pour ou kapab fer sa lasezi i bokou pli konpleks e bokou pli konplike.

So petet dan sa laliny ki nou, nou oule ale sa i enn bann size ki nou pour bezwen trete dan lefitir, zisteman pour ranforsi sa kad ki sa komisyon i egziste ladan ozordi.  E parey nou’n vwar dan Bidze Siplemanter nou Lasanble, in aprouve pour ki Lapolis i kapab ganny bann zofisye Asset for seizure pour li kapab fer sa travay.

Akoz mon dir sa?  Annou pran en sityasyon kot demen i annan en case kot Anti-Koripsyon in vwar, in anmenn li a son lafen e Lapolis i bezwen fer serten aksyon anver serten assets ki bann dimoun i annan.

Me Lapolis i kapab pran aksyon zis lo bann asset fizik ki sa dimoun i annan.  I pa pour kapab pran aksyon lo kont labank sa dimoun.  Sa i bezwen ganny fer par FIU, anba en lot Lalwa.  E kot ankor son lafason ki i fer li i pa definitivman as clear  as ki nou ti ava anvi i ete parey lezot pei i fer li.

Bokou lezot pei in gard sa propozisyon dan zot Lalwa zisteman, akoz i enn bann eleman osi ki ede dan sa lager kont koripsyon ki size ki nou pe debat lo la ozordi apre midi.  Ou a konpran Mr Speaker ki mwan mon pa’n pran en lapros pour mwan al reponn retorik ki nou’n vwar avanse sorti lo lot kote latab, akoz sertennman parti ki mon reprezanter in o pouvwar e si i annan keksoz ki’n al mal, nou bezwen aksepte si i annan keksoz ki’n al mal.

Me parey mon krwar Leader Government Business in fer kler, nou parti pa tou dimoun ki’n asosye ki dan nou parti e koripsyon  dorenavan i pa pour en keksoz ki asosye zis avek nou parti.

So pour redefinir nou parti atraver sa konotasyon koripsyon mon krwar, i petet en fot ki bann Manm lo kote latab akoz ki lefe i reste ki dan en pei tou dimoun i annan drwa asosye li avek en parti politik e sa i fer ki ozordi i pour annan dimoun ki byento zot pour vwar i pe asiz lo zot kote, avek zot, otour zot, ki pour bezwen al devan sa komisyon.

E fotespere ler sa zour i arive zot as eager e as ranpli avek lantouzyazm pou pursue en azanda transparan, en azanda kler pour asire ki tou dimoun i ganny trete anba bann Lalwa ki la. Sa i zis en pti keksoz mon ti anvi dir zot an pasan.

Mr Speaker dezyenm keksoz ki mon krwar i relevan pour nou dan sa konteks ki nou pe koz lo la, la se lefe ki nou’n tann bokou koze lo reform ki sa komisyon i bezwen fer.

Ki mannyer nou pour reform sa Komisyon.  E sa bann reform in vin atraver bann demann pour ki nou revwar son striktir baze lo Lalwa ki egziste aktyel.

Ler nou regard en pti pe dan lezot, ziridiksyon, laplipar ziridiksyon ki otour nou in pran laform en Komisyon.  Zot in gard laform en Komisyon pour le senp rezon ki ou toultan bezwen annan en checks and balance. Me mon krwar Lopozisyon zot pour al kont enn bann prensip ki zot in argye kont, se sa se kree bann lanpir kot bann dimoun i ganny bann pouvwar ki apre sa bann pouvwar i permet zot anmenn parey zot in dir, labi.

So eski prezan zot pe fer en departure from enn bann keksoz fondamantal ki zot in toultan krwar ladan koman en Lopozisyon pour zot vin atraver, vin avek en sistenm otokratik kot en dimoun li menm li i pour vin judge, jury, and executioner.

Sa i enportan ki zot redefinir. Akoz si nou get byen dan sa Lalwa, rol sa bann komisyoner ki mannyer i ete e rol CEO sa Komisyon i ganny byen determinen.  Now si i annan en problenm ki egziste ozordi, en problenm egzistansyel lo rol ki sa CEO pe zwe anver sa Komisyon, sa i bezwen ganny adrese eternelman par bann striktir ki zot met an plas.

Nou bezwen be very careful kot nou pa kree en sityasyon kot nou kree ankor another super entity e ki demen baze lo personnalite ki sanze – en dimoun i ganny tro bokou pouvwar dan son lanmen.

E zisteman nou’n vwar par egzanp parey zot in koze lo FIU, zot pour pe kree ankor en antite ki annan menm pouvwar parey.

So mon pa konnen si zot pe dir en keksoz en zour, e zot oule dir en lot keksoz en lot zour.  Mon krwar nou bezwen dir menm keksoz toulezour la.

Pa pour oule esey suit konteks ki zot oule fer largiman about.  Akoz sa lenstitisyon ki la i lenstitisyon ki enportan li.

E enn bann rezon Mr Speaker kot mon’n vwar, ler mon’n fer resers kot menm L’Angleterre zot in koze, zot in vwar sa kot ler ou annan sa Lazans ki li menm li i pe fer lenvestigasyon, li menm li ki pour fer arrest, li menm li probableman nou pour al dan en laliny kot nou oule anmenn li pour fer prosekisyon li menm.

Le fe i reste ki ler sa Lazans li menm pe prezant son levidans ou napa en lot checks and balance lo son levidans.

Se pour sa rezon ki laplipar kad legal dan lemonn ou vwar i fonde lo en investigative agency, apre ou annan en prosecuting agency. Ou konpran?  Se sa rezon akoz ou vwar dan en sel landrwa i inevitableman baze lo karakter imen ou pour anmenn en labi without en checks and balance.

So mon krwar i enportan sa size regar ki mannyer nou pour adres re-definisyon sa Komisyon from en Lazans lo en Komisyon i bezwen ganny fer prenan kont tou nou sistenm legal e prenan kont mannyer sa i kapab fonksyonnen dan en pei demokratik, pour ki ou pa anmenn labi dan lefitir.

Mr Speaker en lot pwen enportan ki mon krwar nou bezwen soulinyen, se ki resaman ti annan en meeting ant sa Komisyon avek Prezidan Larepiblik. E sa ti translate dan en commitment pour annan en Bidze Siplemanter ki nou koman Lasanble, nou ti vot an faver.

E zisteman nou ti demann PS Finans e mwan mon rapel mon ti demann sa kestyon si eski sa Komisyon in ganny tou sa ki li i ti demande atraver sa Bidze Siplemanter?  E la son larepons i ti dir mwan wi baze lo virement ki ti ganny fer, Mr Speaker ou ti la, baze lo virement ki pe ganny fer e sonm adisyonnel sa pe vin dan laliny pour asiste sa Komisyon.

So i ava enportan petet koman Lasanble si sa Komisyon i vreman anvi al dan sa laliny kot i le improve, oubyen ranforsi travay ki pe fer, ki nou kapab ganny prezante avek en plan bann diferan eleman konkret ki bezwen, pour nou kapab dir be vwala dan Bidze sa lannen nou ti a kontan vwar X, Y , Z i ganny adrese atraver fon ki Gouvernman pe met a dispozisyon sa Komisyon.

Sa i pour enportan akoz dan labsans en plan konkret sorti kot sa Komisyon, kote i oule ale dan lefitir, kote ki i le ranforsi son bann kad ki egziste ozordi, nou pour riske pe zis fer bann deba ki dan ler san ki nou annan vreman bann sibstans pour nou dir lala bann keksoz konkret ki nou oule fer.  E inevitableman prezan dimoun pour dir dan Lasanble ki nou vin fer, si zis nou vin koze.

E sa osi mon krwar i pour en pwen ki nou pour bezwen adrese o fir letan, akoz parfwa nou menm nou koman Manm Lasanble nou kree bann lekspektasyon ki nou pa pour kapab delivre lo la.

Nou bann lekspektasyon ki tou keksoz i sitan fasil pour fer san realize pour dir dan son lenplikasyon, dan son lenplimantasyon, i pa sitan fasil.  E mon krwar nou tou, nou’n arive en nivo matirite ozordi dan sa Lasanble ki nou konpran sa size nou pe komans debat lo la, e mon apresye ki lapros ki nou pe pran, se en lapros pour nou travay kolektivman pour anmenn solisyon pour bann problenm ki pe afliz nou lasosyete e nou popilasyon. E se sa lesansyel.

Ozordi napa en dimoun ki asiz lo mon kote latab, ni yer dayer ki asiz lo mon kote latab ki pour condone okenn akt koripsyon. E napa en dimoun ki asiz lo lot kote latab. Mon konn tre byen ki condone okenn akt koripsyon.

Nou tou nou parti prenan sa aktivite ki nou bezwen fer me nou bezwen fer li dan en fason konkret, e dan en fason kot nou pour anmenn en solisyon ki konkret.

En lot eleman enportan Mr Speaker ki mon krwar nou bezwen koz lo la, se le fe ki sa Komisyon li menm e mon krwar Leader Lopozisyon in fer sa pwen kot ou annan en ziz ki aletranze. Eski nou pa kapab revwar konpozisyon ki en konpozisyon pli pratik pour nou?

Eski sa i en keksoz ki nou devret konsidere. Akoz tousala i form par sa deba striktirel ki mover Mosyon in mansyonnen ki nou bezwen fer. Akoz lesansyel at the end of the day par egzanp Mr Speaker admeton Komisyon i deside pran en file ki allege ki en dimoun i fer koripsyon, al met sa devan Biro Attorney Zeneral.

Sa file i bezwen detay sak ka.  I pa kapab zis en file i ganny depose kot Biro Attorney Zeneral dir lala ‘X’ in fer koripsyon.

Akoz anba Konstitisyon sa dimoun osi i annan drwa li.  E la ki ou bezwen fer?  Ou bezwen protez kont en dimoun malentansyonen, anmenn en lakizasyon kont en dimoun, si sa dimoun pa’n fer nanryen. Me osi mon konpran ki ou bezwen annan mezir pratik, pour deal ek en sityasyon kot en dimoun in ganny vwar reelman in komet en akt koripsyon.

E se la kot mon krwar i pa zis ranforsi, i pa zis ranforsi sa Komisyon li menm.  Me Mosyon i annan en konotasyon pli larz kot mon krwar mover Mosyon in adres me petet i ti ava bon dan son summing-up osi war ki en lot lebra ki travay akote sa Komisyon se Lapolis e se Biro Attorney Zeneral.

E sa de lofis osi i bezwen ganny ranforsi pour ki zot kapab siport travay ki sa komisyon i bezwen fer.  So si nou regard dan bann keksoz pratik ki nou bezwen fer.  Par egzanp Mr Speaker enn bann pwen fondamantal e bann pwen kardinal, mon krwar ki nou bezwen deal avek se, eski nou pour enshrine sa Komisyon dan nou Konstitisyon?

Eski i devret vin en body Konstitisyonnel e prezan ler nou pour fer sa, nou pour bezwen reponn kestyon lo ki mannyer nou anpes annan diplikasyon rol ki sa Komisyon pour zwe e rol ki Lofis Ombudsman pe zwe. I pour enportan pour nou fer sa, akoz parey lo lot kote latab zot in kontan dir e nou osi nou subscribe to sa, nou pa kapab annan diplikasyon dan travay ki pe ganny fer.  Akoz sa i pour zis kree ki bann Lazans i mars lo lipye kanmarad personn pa kapab ganny en keksoz pour fer li ganny fer.

So ler nou pour annan sa lamannman dan Konstitisyon, si nou pour amann Konstitisyon sa ankor en keksoz ki nou pour bezwen fer. Lo sa size mwan menm mwan personnelman Mr Speaker mon krwar petet ti ava en bon nide pour annan sa. Ou konpran mwan?  Se ki ou enshrine li dan Konstitisyon ki form parti nou fabrik demokratik poudir ki sa Komisyon i egziste as part of the constitutional mandate. Akoz an vi sa Lalwa, demen ou ganny ou en lot mazorite dan Lasanble e li i deside pour dir be ok mon pour do away sa Komisyon. Mon repeal sa Lalwa Mr Speaker.  Be ler mon repeal sa Lalwa Komisyon i fini, nepli annan Komisyon.

Me par kont ler ou enshrine li dan Konstitisyon i pour pran en mazoriter 2 tyer pour kapab ganny sa lamannman.  E mwan mon pa krwar senserman Mr Speaker ki mannyer politik pe ale dan Sesel, okenn Parti Politik pour zanmen annan ankor 2 tyer dan Lasanble Nasyonal.  Sa i en garanti sa.

Mon konnen mon koleg Onorab Henrie pa tro dakor ek sa.  Me selman sa i en laverite, ni LDS pa pe ganny 2 tyer dan Lasanble Mr Speaker, zot a kapab riske gard zot mazorite, zot riske perdi tou en. Ou pa konnen – keksoz i arive dan politik.  Ok?

So sa zot bezwen pran kont sa akoz ver pa ankor plen en.  Mazin byen!  En lot keksoz ki mon krwar i enportan e mon konnen mover Mosyon in koz lo la, se asire ki i annan transparans dan la fason kot sa Komisyon i egziste.

Ozordi Mr Speaker Komisyon pe lwe en building kot zot pe pey en rent avek en konpannyen, ouswa en dimoun ki li i asosye avek en parti politik.  Ok?  I asosye avek en parti politik, me mon krwar petet dan lespri latransparans se la kot mon krwar mon oule demann mover Mosyon pour siport mwan lo la, pour nou demande ki par egzanp ti annan sa nosyon pour annan en Constitution House.

E se pour sa rezon ki mon’n dir ki in met Komisyon dan Konstitisyon. Sa Constitutional House li i ava house Electoral Commission, i ava house Ombudsman, i ava house tou sa bann eleman Konstitisyonnel ki ava fer ki zot ava dan en building kot nou pa ava annan kestyon, as to the transparency ki egziste vizavi sa bann lenstitisyon.

E mon konnen dapre lenformasyon ki mon annan, i annan en concept note ki’n ganny prepare lo la. Me i pa vedir ki sa concept note, en concept usually i ganny prepare pour al demann en donor agency, oubyen en Gouvernman pour ede.

I en keksoz ki nou Lasanble nou kapab fer en desizyon lo la. Nou kapab deside pour dir be ok annou once and for all met tou nou bann Lazans Konstitisyonnel dan en landrwa kot zot ava dan tou transparans fer zot travay e pa ava annan okenn kestyon, as to transparans zot travay ki zot pe fer.

I pa ava annan kestyon lo ou pe rent avek isi, ou pe rent avek laba.  Se sa lesansyel. Akoz parey lo zot kote zot very quick pour dir par egzanp nou parti pe rent isi, pe rent laba me par egzanp Mr Boulle i owner sa landrwa kot Komisyon pe rent ozordi.  Pa i vre?  Oubyen pa vre?   Zot pa konnen sa?   Anr i entere… I enteresan bann keksoz ki zot konnen oubyen zot pa konnen.

 

(Interruption)

 

HON SEBATIEN PILLAY

Zot … be … Mr Speaker mon ankor lo Mosyon – relevans Onorab Larue si le fe ki parey ou kontan koz lo Komisyon, mon krwar ti ava bon ou vwar dan sa loptik ki Komisyon i dan en landrwa ki transparan, ki personn pa kapab asosye li avek okenn keksoz! E ki personn pa pe fer ozordi asosye li.  Me selman mon pe dir mover Mosyon in koz lo kwa ki nou kapab fer pour ranforsi Komisyon.   Mon krwar sa i en bann keksoz ki nou kapab fer.

En lot eleman enportan Mr Speaker ki mon krwar i neseser pour nou koz lo la, se rol ki Komisyon i zwe anver bann Lazans. Ok?  Non si mon pa’n fer mon research i ava annan en Right of Reply, nou ava sa …   Mon pour kontinyen.

Mr Speaker i annan over 100 Government agencies ki sa komisyon i bezwen enterakte avek.  E se la kot mon krwar main bulk sa ki nou’n koz lo la i vini.  Ki kantite resours i annan, nou’n tann koz lo bann forensic auditors, bann lezot dimoun ki bezwen vin asosye pour travay avek sa Komisyon.

Se la kot mon krwar ki nou bezwen met an plas sa real structure ki kapab fer sa louvraz. E parey ou’n dir i annan bann keksoz konpleks ki sa bann dimoun i bezwen investigate.  So sa ki mwan mon pe fer se prezant bann konpozisyon formel ki nou kapab fer pour zisteman adres bann issue pour nou fer sa komisyon vin pli for.

 

  • amann Konstitisyon pour met li ladan. Donn li son pouvwar Konstitisyonnel.
  • donn li en landrwa ki pour li menm, kot nou pa kapab raise okenn kestyon ki demen i pa ava anba scrutiny personn pour  Sa i enportan.
  • resours pour li ganny ase staff pour li kapab fer son travay dan en fason kler, dan en fason konkret me osi dan en fason efikas pour li kapab delivre lo son travay ki i pe fer.
  • Mr Speaker se vwar lekel bann lezot rol ki pe ganny zwe par bann lezot Komisyon par egzanp Ethics Commission, Ombudsman, ki bann rol ki kapab reste anba Ombudsman, ki bann rol ki devret vin anba sa Komisyon pour fer ki ler nou fini avek sa reform striktirel petet ki nou oule war, i ava annan en si oule en Komisyon ki nou tou, nou tonm dakor avek.

E se sa mon krwar lesansyel Mosyon Onorab Arissol ki mon pour siporte, ki mon siporte dayer akoz mon krwar i en Mosyon ki tre, tre enportan pour nou konsidere.

An konklizyon Mr Speaker, mon pour remind bann dimoun lo lot kote latab ki ler nou ti anmenn premye Bidze pour Komisyon ki a sa moman dan plas regard striktir sa komisyon, zot ti vreman busy plito pe regard saler bann komisyoner.  Pa bliye sa.

E zot ti pe fokaliz zot deba lo bann komisyoner.  Mon byen kontan ki ozordi zot realign zot lekor pour konsider rol pli laz ki sa Komisyon i bezwen zwe.  E mwan ki mon pe remind zot pour fer se ki zot in vwar, e mwan zot pour remind zot sa, zot in vwar pour dir dan Lasanble nou achieve plis progre ler nou travay ansanm.  E nou achieve mwens progre ler enn i asiz en lo kote latab e i komans anvoy ros lo lot.  Non Mr Speaker ou konnen tousala i annan bann keksoz ki nou bezwen met an perspektiv.  Akoz ou konnen ler nou dir en keksoz apre nou dir en lot.  I enteresan – par egzanp recently nou ti tann en Onorab dan Lasanble dir poudir Gouvernman in anmas en kantite taks avek bann gro biznes, alors Gouvernman i devret konsidere fer sa bann gro biznes aret pey tax. Non i relevan, akoz sa pwen ti ganny leve sorti lo lot kote latab.

Me apre nou’n vwar pour dir sa i ganny kontraye par en lot dimoun ki mon krwar in byen in ganny kontraye.  Mon krwar Leader Lopozisyon in fer en very good point la li.  Se ki malgre sa bann, i annan dimoun bann gro businessman ki zot pa pe peye zot taks parey zot devret.  Me nou’n vwar pour dir lo menm kote latab en dimoun in dir be donn gro businessman en break eksetera.  Ou konnen i bann keksoz ki zot bezwen align sa ki zot dir avek sa ki zot anvi fer.

Ozordi nou, nou anvi annan en Komisyon Anti-Koripsyon ki for, ki transparan e ki kapab travay.  Sa ki nou anvi. Prezan sa ki nou bezwen deside, e sa i en desizyon serye ki nou bezwen pran, eski ou oule en Lazans Anti-Koripsyon, in which case it becomes an investigative agency and a prosecuting agency probably, or eski nou oule en Komisyon kot ou retain en checks and balance lo rol ki ou bann lezot dimoun dan Komisyon i bezwen zwe?

Dan labsans sa Mr Speaker, dan labsans nou pour ankor enn fwa kree en lot Lazans ki li menm li i vin en super agency, ki li menm li malgre i pe investigate koripsyon dan lezot pei nou’n vwar, bann tel Lazans apre li menm li i vin sa Lazans ki kree plis labi, ki kree plis problenm akoz napa personn, i sitan powerful ki personn pa kapab put in li in check.

E mwan Mr Speaker mwan an faver sa Mosyon for one other reason Mr Speaker. Mwan mon en dimoun i krwar dan transparans mwan.  E sa Mosyon pe anmenn nou dan latransparans.  E mon felisit Onorab pour anmenn sa Mosyon.

Malgre ki a en moman donnen mon ti santi pour dir Mosyon le fe ki i ti’n ganny adrese atraver Supplementary Budget, me largiman ki’n ganny avanse par lezot dimoun lo lot kote latab e sanmenm sa ki nou bezwen ekout kanmarad se ki Mosyon is not only about the Budget.  Ok?  Mosyon i pli laz ki the Budget.  E se sa ki enportan ki nou bezwen konsidere.

Avek sa Mr Speaker, mon pour remersi Lasanble pour son latansyon e mon remersi Lasanble pour son latansyon e mon remersi mon bann koleg lo lot kote latap pour konpran sa ki mon’n dir, e pour reelman prezan fer sa ki zot dir e pa zis koze!  Mersi Mr Speaker.

 

MR DEPUTY SPEAKER

Bon mersi Onorab Pillay.  I reste mwan zis en dernyen entervenan avan mon pour demann Onorab Arissol pour fer son wrap-up e sa se Onorab Sylvanne Lemiel.  Laparol i pour ou.

 

HON SYLVANNE LEMIEL

Mersi Mr Speaker. Bonn apre midi Mr Speaker, bonn apre midi tou mon bann koleg Manm Onorab e tou bann dimoun ki al ekout.  Mr Speaker, lager kont koripsyon i i annan en gran sinifikasyon pour asir sekirite en pei. Koripsyon i met an danze e met lobstak dan fonksyonnman sekter piblik.

I fer piblik perdi konfyans dan bann lenstitisyon Gouvernman e i osi met lobstak lademokrasi e devlopman stab en pei. Alors lager kont koripsyon i tre enportan pour lavansman dan bon direksyon nou pei.  Mr Speaker nou realize ki koripsyon i en fenomenn mondyal ki fondamantalman arive, akoz mankman konportman etik.

Dimoun an zeneral e travayer zot devret ganny sansibilize plis lo severite koripsyon. An plis i ti a byen si dan bann lekol zot entrodwir en size tel ki; bon mannyer fer oubyen bon konportman etik pou prepar nou bann zenn avan zot al dan pos segonder e osi dan lemonn travay.

Sa i kapab ede, pour nou ganny bann travayer ki onnet pour travay pour lavansman e lavenir en pei.  I osi bye note ki travayer servis piblik i devret pe touzour travay konsyansyezman drwat e dan zentere bann piblik sa mazin okenn byen personnel e okenn lezot benefis par kote apard ki zot saler.

Mr Speaker i annan diferan sirkonstans ki provoke koripsyon par egzanp kot i napa en Komisyon Anti-koripsyon oubyen menm si i annan en Komisyon e zot napa ledan pour morde e resours pour zot fer zot travay pour zot kapab demaske bann aktivite koronpi ki arive dan bann landrwa travay piblik e osi bann travayer ki fer koripsyon.

Mr Speaker, ozordi nou tan tou sord form koripsyon tel ki pran larzan pour donn en servis; par egzanp en travayer ki travay dan en serten biro Gouvernman i pran larzan en kliyan pour ki sa kliyan i ganny sa servis pli vit, oubyen pour fer en faver.

I osi annan bann travayer ki santi ki zot saler i ba e i tant zot pour pran larzan pour zot donn en servis en kliyan.

Mr Speaker nenport ki ant sa bann legzanp ki mon’n donnen, ou menm bann ki’n ganny dir par Loter Mosyon Mardi apre midi, pa devret pe arive dan sekter piblik, e ni menm dan okenn lorganizasyon.

En travayer servis piblik, in ganny mete dan en pozisyon pour li fer son travay byen san okenn faver oubyen preferans.  I devret donn en servis egal e efikas tou dimoun. Gouvernman dizour pe met lanfaz lo bonn gouvernans, rann kont e osi latransparans. Set akoz sa ki nou vwar en Komisyon Anti-koripsyon in ganny mete an plas, pour ki i kapab travay pour anmenn rezilta kot zot a kapab anmenn en laklerte dan bann ka alegasyon koripsyon ki’n ganny anmennen devan zot.

Sa Koripsyon i ziska ozordi annan 109 ka ki’n ganny fayle kot zot.  Zot annan zot 12 travayer.  E sa Komisyon i santi ki i bezwen plis staff.  Zot osi annan en Chairman e 6 lezot manm ki pe travay lo sa bann ka ki devan zot.  Dapre sa Komisyon i ti’n orizinalman demann en Bidze R14. 162milyon pour lannen 2018.

Me Minister Finans ti donn selman 11 milyon, mon a repran Mr Speaker mon krwar mon’n fer en fot dan sa sonm. Dapre sa Komisyon i ti’n orizinalman demann en Bidze R14, 162 milyon pour lannen 2018.  Me Minister Finans ti donn li selman R11,956,460 milyon ki Lasanble ti aprouve an Desanm 2017.

Dan Bidze Siplemanter ki fek ganny pase isi dan sa Lasanble resaman, sa Komisyon in ganny en alokasyon R500mil pour ede soulaz zot dan zot travay. Me kantmenm sa Mr Speaker, sa sonm pa sifi.  Apard ki sa mankman resours finansyel, sa Komisyon fas avek lezot defi. Byento nou pour vwar serten amannman ki pour arive dan zot Lalwa. E osi serten restriktirasyon pour fer ki sa komisyon i vin pli efikas.

Mr Speaker, sa Mosyon ki’n ganny table i annan son merit. Nou tou nou devret donn nou sipor total e lankourazman sa Komisyon pour zot fer zot travay pli byen e ki zot a desarz zot responsabilite pli efikas e an retour i a ede dan sa lalit pour elimin koripsyon dan nou pei. Mersi Mr Speaker.

 

MR DEPUTY SPEAKER

Mersi, mersi Onorab Lemiel. Bon nou’n ariv a lafen tou bann entervenan ki’n demann pour koze.  Mon pour demann Onorab Sandy Arissol ki loter sa Mosyon pour li fer son summing up. Laparol i pour ou Onorab Arissol.

 

HON SANDY ARISSOL

Mersi Mr Speaker, bonn apre midi tou Manm e bonn apre midi tou bann dimoun ki a lekout. Mr Speaker mon ti a kontan komanse par remersye tou bann Manm ki’n entervenir lo mon Mosyon e mon ti a kontan dir mersi tou bann ki’n ede, ki’n kontribye pour nou kapab anmenn en tel Mosyon. E mon ti a kontan felisit bann ki’n anmenn bann pwen konkret parey nou’n fek tann Onorab Lemiel avek bann sif ki bann pwen kler.

E mon ti a kontan osi felisit Onorab Pillay, menm si i pa’n tro align lo komansman. Be selman lo finisyon mon dakor in re align son lekor parski i pour don sipor mwan Mosyon. Alor mon ti a kontan felisit li pour fer sa.

Mr Speaker mon ti a kontan spesifikman remersye sa 2 leaders parske zot in tonm lo en consensus parey nou dir kot olye apel li en Komisyon nou kapab konsider apel li en Lazans e Onorab De Commarmond in prezant son sipor menm si Onorab Pillay pe montre en pe rezistans lo la e sa i en siny ki alignment pa tro, tro bon.

So mon pour felisit sa 2 Leaders pour siport sa. E mwan osi mon pour donn mon full sipor, olye komisyon e lazans, plitar mon ava eksplike.

Be selman i annan en keksoz Mr Speaker ki mon ti a kontan dir ki’n fatig mwan letan mon’n tann Onorab De Commarmond koze avan nou pran lunch break. Parski letan Onorab De Commarmond ki Leader Government Business in fer en statement dan Lasanble Nasyonal ozordi pour dir li in ganny en lalis, in vwar en lalis, e lo sa lalis in kapab li menm li idantifye si i annan Parti Lepep, oubyen napa Parti Lepep, oubyen napa Parti Lepep lo sa lalis.

Kestyon ki mon pe demann mon lekor se kote Onorab De Commarmond i ganny en tel lalis?  Eski in ganny sa lalis anndan kot ACCS akoz sis a i le ka lanmenm la i montre nou pour dir nou annan en problenm.

Parske mon senserman krwar dan kredibilite Madanm May De Silva, e mon pa krwar i pour otoriz okenn lenformasyon ki annan pour fer avek lenvestigasyon, oubyen tel lenformasyon konfidansyel pour sorti pour ariv dan lanmen nenport ki endividi laba deor. Sa i en pwen.

Dezyenm pwen i kapab ki Onorab De Commarmond in ganny sa bann lenformasyon avek en Komisyoner ki anndan par egzanp.

Letan nou pe koz sanz Lazans, sanz Komisyon fer li vin en lazans parski kredibilite bann dimoun ki travay anndan menm. E se pour sa rezon mwan pour siport sa ki Onorab Ramkalawan in dir bomaten, kontrerman avek sa ki Onorab Pillay pe dir nou la apre midi. Parski eski letan ou annan en kantite dimoun ki travay dan en komisyon eski kredibilite, konfidansyalite i pa zwe en rol?

E la sa ki Onorab De Commarmond in fer bomaten sa i montre mwan klerman pour dir nou annan en problenm anndan laba, e nou pour bezwen rode kote sa problenm i ete parski sa ki’n arive pour li ganny serten lenformasyon pour mwan sa i pa korek, i pa byen e mon krwar pour dir i pour bezwen retract sa statement ki i ti fer dan Lasanble Nasyonal, parski sa i pa bon pour nou lenstitisyon. E i pa bon pour ACCS, en Lazans ki nou pe rod sipor pour zot e plis resours pour zot kapab fer zot travay byen e avek plis lefikasite e osi avek kredibilite,  Mr Speaker.

Be mon ti a kontan dir kekfwa akoz en tel Mosyon?  En tel Mosyon pour demann plis resours parey mon Mosyon i lir Mr Speaker, mwan a zis relir li; ‘vi lenormite e lenportans travay (ki nou kapab apel li Lazans) Anti-koripsyon i annan pour fer, sa Lasanble i demann Gouvernman pour met plis resours imedyatman a fen ki i vin pli efektiv.’

Akoz en tel Mosyon Mr Speaker. Parfwa dimoun i kestyonn kalite Mosyon ki anmenn dan Lasanble Nasyonal, en bann Mosyon ki pa fer sans. Nou pe toultan retourn an aryer, nou pa pe get devan. Nou pe rod en bann, dimoun i vey nou dan tou sa ki nou pe fer. Me i enportan pour mwan eksplike akoz en tel Mosyon.

Mr Speaker, ozordi dan Nasyon oubyen menm lo medya par fwa nou tann dimoun i anvoy bann advert pour dir son sak in perdi, son telefonn mobile in perdi, ki nimero, ki standar, ki kalite nouvo model, oubyen enn son pet in perdi, en lisyen in perdi pour li dan zanmerant, i tel kouler, i tel groser e sa zannimo i annan en valer santimantal pour li en menm i annan en rekonpans.         Be nou dan Lasanble Nasyonal, nou pa travay lo lemosyon, oubyen pour ganny rekonpans, oubyen pour travay lo advert. Nou, nou travay i ganny gouvernen par nou Konstitisyon ki nou ti sermante pour nou defann.

E zisteman la nou dan lasemenn kot nou pe selebre 25 an nou Konstitisyon e nou Konstitisyon i dir nou ki nou koman en sitwayen, en Seselwa, nou annan bann devwar fondamantal anver nou pei ki nou bezwen travay anba la.

Dan Lartik 40, nou ganny dir ki nou bezwen kontribye dan en fason ki anmenn byennet pour nou kominote.             Se pour sa rezon Mr Speaker, mon’n anmenn en tel Mosyon.  Parski sa ki nou pe demande ozordi, i pour byennet nou kominote, lepep Seselwa avek Sesel avan tou ki nou dir i pli gran ki nou.

Me zisteman letan mon lo la, mwan ti a kontan fer referans avek en sonm ki’n ganny mansyonnen bomaten sa sete sa $50mil ki’n, 50 milyon ki’n pas isi, in pas laba, e letan Onorab Ramkalawan ti koz lo la, son konversasyon ti anviron R700milyon ki ti kapab dan lekonomi pei.

Me kestyon ki nou bezwen demande eski 700 milyon pa ti pour byennet lepep Seselwa an sa ki konsern epanouisman nou pei par egzanp dan nou lekonomi?

Konbyen lakaz nou ti kapab gannyen avek 700 milyon. Konbyen bout later nou ti pou’n kapab devlope pour ki nou Seselwa, olye aste en bout later dan prive ki bokou pli ser, i ti a kout li en pe pli meyer marse e sa i ti a ede fer desann pri lavi ki tou dimoun i koz lo la.

700 milyon dan Kof Gouvernman i ti pour ede soulaz en pe pri lavi dan nou pei. Se pour sa rezon en tel Mosyon in ganny anmennen.

Me selman lo sa 700 milyon, mon ti a kontan dir en keksoz Mr Speaker. Mon’n tann koz lo la, be lenformasyon ki mon annan se sa 700 milyon la, eski ti en larzan ki nou ti ganny donnen koman en kado, oubyen eski i pa en loan ki Gouvernman Abu Dhabi ti pret Sesel? Se la kot mwan mon konfizyon i vini e ki mon ti a kontan Minister Finans i donn nou en leklersisman lo la. Parski si i en loan ki Gouvernman Abu Dhabi in donn Sesel, eski in al dan serten kont endividyelman, epi letan i pou’n ganny depanse se zabitan distrik St Louis avek lepep Seselwa ki pour pey latet koson parey nou dir an Kreol?

Eski i pour enportan pour Minister Finans vin devan, eksplik lepep Seselwa.  Si ti en loan ki nou ti ganny donnen, oubyen si en kado ki nou ti gannyen?  I pour enportan dan tou sa bann demars ki nou pe fer, pour nou ganny kler sa bann lenformasyon letan bann lenvestigasyon pe kontinyen Mr Speaker.

Mon dezyenm pwen mon ti a kontan koz lo la se plis resours mon’n demande pour ACCS.  Akoz mon demann plis resours?  Onorab Lemiel in dir la dan son entervansyon ki zot annan 12 staff e la pour le moman zot annan zot 109 ka, me mwan ti a kontan dir en keksoz ki Onorab Leader Lopozisyon Wavel Ramkalawan in dir bomaten, ozordi dan nou distrik nou tou ki annan en distrik, nou annan bann dimoun ozordi ki ganny arete, ki ganny detenir, e ki ganny donnen, swa pour en bout drog, swa pour en rezim bannann, swa i pa’n pey alimoni.  Me sa bann dimoun bann ‘Seselwa Ordiner’, parey nou ti servi li bomaten pour nou kapab konpran ki nou pe koz lo la, sa bann dimoun zot pas atraver bann prosedir zot ki ale avek zot.

Me eski letan nou pe koz 700 milyon roupi, letan nou pe koz bann endividi ki enplike ek sa, eski sa menm prosedir pa ti devret aplik pour bann ki enplike ladan?

Kot par egzanp Mr Speaker, sa bann dimoun ki anba envestigasyon, zot byen i ganny sezi. I ganny met en pause lo la, paspor i ganny pran avek zot, e zot ganny anmase ziska bann envestigasyon i go on.

E la nou annan en legzanp kler. I annan sa dimoun from Anti-Corruption Commission ki deza anba serten lenvestigasyon ki nou’n tann koz lo la, mon pa ava plis lo la parski i deza Ankour. Be selman li i annan en prosedir ki li i pe pas atraver.

Eski sa kalite prosedir nou pe koz lo la pa ti devret aplik pour tou dimoun, tou Seselwa parey parski nou tou  nou pa par lao Lalwa Mr Speaker.                 Alor avek plis resours ki mon pe demande pour ki sa kalite travay i ganny fer byen, i ganny fer dan latransparans.

E se pour sa rezon ki la, mon ti a met lanfaz lo Lapolis par egzanp pour ki lapolis i zwe son rol en pti pli byen, investigate, kestyonn bann dimoun. Lekel ki responsab e apartir la zot a kapab sakenn fer zot bout an relasyon avek travay ki nou, nou pe koz lo la ozordi.  Se pour sa rezon mon pe rod plis sipor – plis sipor  pour sa Lazans ki nou anvi i bouze e i donn plis rannman pour sa popilasyon laba deor ki nou pe koz lo la.

Mon 3enm pwen Mr Speaker, mon ti a kontan mwan premyerman felisit FPAC.  Set atraver FPAC ek lezot komite ki nou annan dan Lasanble Nasyonal ki dimoun i kontan kestyonnen an relasyon ek sa bann Komite ki nou annan. Mon ti a kontan ozordi felisit FPAC, parski bomaten letan rapor in ganny prezante, letan Leader Lopozisyon ki Chairman FPAC ti dir pour dir sa travay etrwatman ki annan ant tou le de parti, letan i konsern bann keksoz serye dan Lasanble.

E ozordi mwan mon kontan la letan tou bann Manm lot kote parti ki’n entervenir pour donn sipor mon Mosyon, zot in montre, montre sa senserite pour sa bann keksoz koumsa ki bon pour nou pei parey nou Konstitisyon i dir ek nou, nou bezwen defann e rod sa ki meyer pour nou kominote, nou ganny en konsansis lo la pour nou kapab anmenn keksoz pli devan.

Mon ti a kontan alor felisit FPAC ankor enn fwa ek tou lezot Komite ki pe fer en travay dan nou Lasanble Nasyonal.

Mon pe dir sa Mr Speaker parski se atraver FPAC bann Hearings ki zot in fer ki’n al live lo radyo, televizyon kot dimoun in konpran ozordi, dimoun in tande kote 218 milyon in kapab ale, bann Kontra ki nou’n tann koz lo la.  Sa ki’n responsab pour erase computer, sa ki ti annan 2 kont ki ti manage li tousel olye en Komisyon.

I annan tout en seri envestigasyon, en seri lenformasyon, ki ozordi i deor dan piblik laba. Se pour sa rezon mon’n anmenn en tel Mosyon pour ki letan FPAC pe fer son travay, Lasanble Nasyonal pe fer son travay ki lezot lebra Gouvernman, lezot Lazans zot osi zot kontribye pour keksoz kapab bouz devan e pour nou kapab al pli devan. Parski tou sa ki nou pe fer, i pour bon pour nou pei, plis larzan i retourn dan mont Gouvernman. sa i fer ki pri lavi i ava soulaze dan nou pei.

E alor Mr Speaker, pour mwan konklir, mon ti a kontan dir avek Gouvernman – avek Gouvernman sete zot ki ti etablir, ki ti form sa Komisyon an 2016 alor i pour enportan pour sa Gouvernman letan mon pe anmenn mon Mosyon la dan Lasanble Nasyonal, mon ti a kontan ki zot Walk The Talk. Montre pour dir zot osi zot serye.  Parey FPAC i serye parey nou Lasanble Nasyonal nou serye.

E se pour sa rezon mwan pour siport sa ki’n ganny propoze bomaten pour ki sa komisyon avek serten lamannman ki nou ava fer ansanm avek lezot bout dan Lalwa ki nou krwar i konsern sa Lazans, pour li kapab bouz pli devan pour ki, bann travay neseser i ava ganny fer pour ki, tou dimoun dan nou pei i ava annan konfyans dan nou lenstitisyon e i ava annan konfyans dan tou lezot lebra Gouvernman.

Mr Speaker mon ava konklir lo sa not pour dir MOTO ACCS se ini kont koripsyon sa pour devlopman lape ek sekirite.

Alor avek sa detrwa mo Mr Speaker, mon ti a kontan ankor enn fwa remersye tou bann Manm ki’n koze lo lapar e pour donn sipor mon Mosyon, e mon ti a kontan la ki letan mon pe fini ki Lasanble antye i donn sipor sa Mosyon pour nou kapab donn sipor ACCS atraver tou lezot resours, mwayen ki nou’n demande atraver sa Mosyon. Avek sa mon ti a kontan remersye ou Mr Speaker.

 

 (APPLAUSE)

 

MR DEPUTY SPEAKER

Mersi Onorab Arissol. Bon la vi ki nou’n fini deba lo sa Mosyon, nou pour pran en vot lo Mosyon, e Mosyon zis pour klarite se par Onorab Sandy Arissol i dir;

‘ vi lenormite e lenportans travay ki Komisyon Anti-koripsyon i annan pour fer, sa Lasanble i demann Gouvernman pour met plis resours e revwar son striktir imedyatman a fen ki i vin efektiv.’

Mon ti a kontan demann tou bann Manm ki an faver sa Mosyon pour lev zot lanmen?        Eski i annan okenn Manm ki kont?  Deputy Clerk ou a donn nou count silvouple.

 

MADAM DEPUTY CLERK

Mersi Mr Speaker 19 Manm an faver, personn kont.  Mersi.

 

MR DEPUTY SPEAKER

Mersi Deputy Clerk.  I kler pour dir Mosyon i pase e nou kontiny nou travay lo Order Paper.  E prosenn item se ankor en lot Mosyon par Onorab Egbert Aglae, Manm pour Port Glaud. E mon ti a kontan donn ou laparol, Onorab Aglae ou a lir ou Mosyon.

 

HON EGBERT AGLAE

Bonn apre midi Mr Deputy, tou Manm, tou dimoun a lekout. Mosyon i lir konm swivan.

‘Avek bi pour redwir traffic jam pandan peak hours, sa Lasanble i demande ki Gouvernman i fer en letid pour revwar posibilite, sanz ler ki serten servis piblik i donnen, i donn zot servis – pour evite ki tou travayer i komans, e fini travay menm ler. ‘

Mr Speaker nou tou ki la ozordi koman en travayer, nou war nou bezwen deplase e parey tou le servis travay i komanse i plizoumwen 8er bomaten.

Mr Speaker, bokou dimoun ki mon’n koz avek ki mon’n aprose letan mon pe travay lo sa Mosyon, zot in eksprim en fristrasyon ki zot gannyen sirtou ler i ariv bomaten.  Ki swa si ou pe viv dan Sid, dan Les, dan Nor zot pas atraver en difikilte kozesyon depi 7er bomaten ziskan ver 8.30.  E sa i koz pa mal problenm sirtou ler ou pe ariv tar dan ou travay, ler sa ki ou ti pe set pour ou akonplir sa ler ou pa pe kapab fer li.

Mr Speaker nou war i annan en gran kantite logmantasyon trafik lo semen ozordi.  E bann statistik i montre, ki ozordi Sesel nou pe annou nou anviron 223 transpor ki pe antre lo semen par mwan.  Kantite transpor ki’n anrezistre kot Licensing ozordi i 31,441. Kantite transport ki’n anrezistre me ki pa pe roule lo semen i 4, 950. Kantite biz ki SPTC i annan ki pe roule ozordi i 319; kantite moter sa ki nou apel scooter osi i 1,044, kantite car hire ki nou annan ozordi i 169, i annan 2001 loto ladan.

Mr Speaker on average statistik i montre ki i annan en loto pour 3 dimoun isi Sesel.

Mr Speaker mon’n donn sa bann statistik akoz i montre ki si sa trend i kontinyen, byensir nou pour annan plis konzesyon.  Konzesyon i arive akoz deplasman ki nou bezwen fer pour nou al fer nou bann bezwen, pour nou al fer nou bann servis, pour nou al dan nou travay.

Mr Speaker, ler ou pe regard prezan to lanplwa isi, to travayer ki dan sekter prive ozordi, statistik 2017 i montre nou ozordi ki nou annan 30, 630 travayer ki pe travay dan sekter prive.

Dan Parastatal nou annan nou 7, 562 ki pe travay dan parastatal. E dan Gouvernman nou annan nou 9, 998. E koman bann etidyan nou annan nou plis ki 12mil etidyan ki bezwen deplase.

Mr Speaker ou kapab mazinen ki sa ki lenpak i anmennen sirtou sa ki nou apel dan nou peak hours.

Mr Speaker Mosyon pe demande ki Gouvernman i fer en letid, pour revwar serten ler nou bann servis parey i annan serten pei ki’n pas atraver en tel prosesis.  Dan mon demars pour travay lo sa Mosyon, mon’n osi koz avek Minis ki responsab pour Limigrasyon ek Lanplwa. E zot in eksplik mwan pour dir an 2006 zot ti’n deza sey fer en letid dan son Seksyon pour sey revwar serten ler travay.

Si ou ti pe komans travay 8er bomaten i fer ou komans travay 9er ou fini 5er. Si ou ti pe travay 9er bomaten i kapab pous 10er pour fini 6er.

Sa ti en letid ki zot ti fer internally avek zot.  Me in fer mwan konpran poudir i pa’n tro marse, sel rezon sete serten latitid. Latitid serten travayer avek serten reazisteman.

Nou, tou nou konnen pour dir nou koman en pep, koman en Seselwa ler ou pe sanz serten nou fason fer ki nou i pran en pe letan, pour nou al adapte avek.

E sa i en pwen kle ki in fer resorti.  Lezot sakrifis ki sa bann paran i bezwen fer tel ki anmenn zot zanfan dan Daycare, anmas zot zanfan apre lekol, ouswa pour ariv lakaz pli boner pour sey kapab get zot zanfan.  Sa i enn bann fakter ki’n petet fer li pa marse.

Me sa ki Mosyon pe demande, se pa pour entrodwir en sanzman ler dan drastik dan tou sekter.  Bokou presyon i kapab ganny tire ozordi lo serten servis; par egzanp nou konplent dan bomaten napa ase bis. Be si nou ti kapab resanz serten ler travay parey nou dir, nou konnen pour dir etidyan i bezwen antre lekol 7.30 ouswa 7.45, petet nou aziste serten ler pour fer ki si paran pe desann ek zanfan, ouswa zanfan i desann avan, e paran i desann apre, sa i ava ede pour redwir konzesyon ouswa presyon lo servis bis SPTC.

En lot fakter ki sa i ava ede Mr Speaker, se osi i kapab kontribye se ogmant serten prodiktivite.  Par egzanp bann serten servis ki li i kapab operate apre ler ki ava donn dimoun en lot leksperyans ouswa si li i pa ganny ler pandan lazournen pour al fer attend sa bann servis i kapab ale.

Me mon konstate Mr Speaker ki annan bann servis irzans ki zot, zot pa pour kapab petet tonm dan sa kategori akoz zot bezwen operate lo en baz 24 er lo 24, tel ki parey dan medikal, Lapolis, Larme ek bann lezot servis esansyel. Sa nou konpran tre byen.

Me selman i annan serten servis ki nou, nou kapab komans avek tel ki; bann servis finansyel.  I annan serten Departman dan serten Minister ki nou santi petet zot relevans serten travay i pa egzizan ki zot pour komans tre boner, i kapab ganny konsidere.  E sa osi i ava ede pour tir presyon e sa langwas ki nou gannyen dan bomaten.

Mr Speaker mon’n fer en parkour 7er bomaten mon’n sorti se mwan Port Glaud, mon’n pas – pour mwan pas dan Sid ki ler mon’n ariv Au Cap sa zour trafik in komans bloke, in pran mwan pour mwan kapab ariv kot Airport Mr Speaker apepre 40 minit.

E pour mwan ariv anvil 1 erdtan ti’n fini sote zis akoz trafik.  E nou pe war bann dimoun ki mon’n koz avek, zot pe bezwen kit ziskan 6er bomaten pour zot ariv dan zot destinasyon a en ler akseptab ouswa ariv boner.  Mr Speaker dan Nor in ed en pti gin avek sa lentrodiksyon nouvo semen. Me si ou pa desann ase boner osi, ou pour bloke ziska Perseverance.

Mr Speaker mon’n pas Port Glaud par La Misère osi, laba pir, pir ki pir. Ou pour fristre e si ou pa’n met bennzin aswar dan ou loto, ou riske bennzin i fini akoz sa erdtan ki ou pour fer dan trafik e sa i fer dimoun fristre Mr Speaker.

Psikolozikman Mr Speaker i pour fatig ou, i fatig en endividi e ou ki anvi komans travay fre ler ou’n komans avek an lanmertim, ou komans avek en fristrasyon tousala i annan kestyon lo ou prodiktivite dan lazournen. Alors Mr Speaker Mosyon ki mon pe met devan pour demande ki sa letid ki ava ganny fer i a determinen lekel servis ki nou kapab komans petet en proze pilot avek, pour vwar ki mannyer nou kapab tir en pe presyon.

Bokou in ganny dir par fer nouvo semen ouswa ogmant lenfrastriktir semen, me Mr Speaker sa pa pour ase pour nou kapab rezourd sa problenm.  I annan travay ki nou kapab konsider avek modernizasyon teknolozi ki nou kapab fer se nou, avek ou computer – sistenm internet ki parey. I annan serten lorganizasyon i kapab konsider fer sa.  E i ava annan en sistenm monitoring an plas santral ki a war si sa dimoun vre pe travay. Si ler ou pe anvoy ou bann korespondans ouswa lenformasyon ki sipoze donn ou in anvoye tousala i kapab ganny fer ozordi.

Bokou bann aletranze Mr Speaker i annan departman ki’n outsource, ki’n anvoy zot bann serten servis, desantralize dan en sans, e in marse pour dir in efektiv.  Ozordi bokou dimoun pe ganny larzan par zis asize kot li pe fer en tranzaksyon lo son computer e lakonpannyen i marse e sa endividi i ganny en saler lafen di-mwan.

Mr Speaker mon konstate ki Sesel i vre pa ankor ariv lo sa o nivo, me selman avek letan nou pour bezwen pe war nou pe fer fas avek en tel larealite. Mr Speaker avek sa mon move ki mon Mosyon i ganny segonde, mersi.

 

MR DEPUTY SPEAKER

Mersi Onorab Aglae.  Okenn dimoun pou segonde? Onorab Ernesta.

 

HON PAUL ERNESTA

Mersi Mr Speaker. Mr Speaker mon segonn Mosyon Onorab Aglae e an menm tan mon demande pour mwan fer mon lentervansyon.

 

MR DEPUTY SPEAKER

Go ahead.

 

HON PAUL ERNESTA

Mersi Mr Speaker.  Mr Speaker Mosyon Onorab Aglae i tous bann size fondamantal nou sosyete.  Mon pour sitye en pe mon Mosyon, mon lentervansyon lo bann konsern ki oule ki sa problenm traffic jam, i annan lo nou, ki mannyer i enpakte lo nou sosyete Mr Speaker.  Dapre listwar nou pei bann premye mwayen transpor, si nou al en pe dan listwar ti bann Pous Pous. E sa ti dan pli gran mazorite ka ganny servi par bann Gran Blan e osi bann dimoun ki ti annan larzan.

Me ki nou’n vwar gradyelman, nou’n vwar evolisyon dan sa direksyon kot Pous Pous in ganny ranplase ek enn de bann lezot mwayen transpor. Nou’n menm vwar pick-up ki ti ganny servi en lepok koman bis.

Ozordi si nou retourn lo static parey mon koleg in koz lo la. nou’n vwar ki in annan en logmantasyon sibstansyel dan lakantite transpor ki nou annan dan pei.

Me konsern ki nou annan ozordi letan nou get pei li menm zistans ki ant bann landrwa lo nou zil prensipal, la mon pe koz lo Mahe, bann problenm sirkilasyon ki fer ki letan ki pran pour kouver sa zistans i ganny miltipliye menm si nou en pti pei.

Letan nou get kot normalman en bis, en bis piblik i pran 1 erdtan, mwan la mon koz en legzanp parey Takamaka pour ariv anvil avek problenm traffic jam, en pasaze sorti Takamaka e lezot distrik an deor lavil i pran plis letan pou zot ariv anvil menm sa letan nou kapab dir en letan i kapab double.

Mr Speaker sa i montre nou ki traffic jam i double letan ki pran pour kouver en zistans. Sa pour nou i reprezant en gaspiyaz letan. E sa gaspiyaz letan i annan en bann le fe dan lezot domenn.  Par egzanp, sa erdtan ki en dimoun i perdi akoz i bezwen kit kot li 1 erdtan avan, avan son ler labitid pour kapab kouver letan perdi lo larout, i 1 erdtan mwens ki i pase kot son lakour.

I ti’n kapab servi sa letan pour repoz en pe plis ou menm vin pli prodiktiv dan son travay. sa 30 minit ki en dimoun i perdi dan travay akoz i ariv 1 erdtan an retar i 30 minit ki afekte kantite travay ki i fer e 30 minit travay ki son anplwayer i perdi.

E si sa dimoun get li koman en etidyan, 30 minit an retar i vedir 30 minit dan leson ki in manke. Nou al pli lwen si nou pour al miltiplir li prezan Mr Speaker nou pran sa 30 minit nou miltiplir li par 5 zour par semenn e miltiplir li par 4 semenn dan en mwan, e lakantite mwan dan en lannen nou pour vwar ki sa problenm traffic jam pe kout nou lekonomi en kantite an term letan gaspiye e loportinite perdi.

Mr Speaker traffic jam i osi annan en kou sosyal enorm. En dimoun ki pa kapab repoz ase akoz i bezwen lev granmaten pour bouz boner e perdi letan lo larout, i sirman perdi an term kalite son lavi akoz sa dimoun i trakas bokou.  E parey Onorab in mansyonnen i anmenn bokou fristrasyon osi pour sa dimoun.

Lot kote lafanmir. Lafanmir sa dimoun ki kit anvil 4 er e ariv kot li 6er sonnen akoz traffic jam li i perdi an term lakantite letan ki sa dimoun ti kapab pase avek son fanmir.

Alor nou a dakor ki traffic jam i annan en lenpak negativ lo lavi lafanmir e lakominote, akoz dimoun napa letan pour zot fanmir e pour kominote.

Mr Speaker lezot problenm lye avek traffic jam pour liber bokou lenerzi dan nou pei akoz, letan perdi ki annan en lenpak ekonomik e sosyal pour ganny rekipere pour aktivite kreativ.

Se zisteman akoz traffic jam, i annan en gran lenpak negatif lo nou lekonomi e nou sosyete, ki nou bezwen adres sa problenm. Mr Speaker nou kapab anmenn bann diferan propozisyon pour ede rezourd sa problenm.

Loter in mansyonnen pli boner, nou kapab par egzanp konstri bann flyover kot i posib, met plis parking dan lavil, elarzi bann semen kot nou kapab.  Tousala Mr Speaker i bann propozisyon ki pour nou i kapab annan bann kou sibstansyel lo nou pei. Mwan mon krwar mon senserman krwar alor, ki en reorganizasyon dan serten servis piblik i kapab enn parmi bann plizyer meyer solisyon ki nou kapab anmennen.

A la baz nou bezwen sers plis fleksibilite dan bann aktivite ki pour ganny reflekte an term mwens presyon pour transpor e disparisyon dan bann peak hours. Nou bezwen etidye lenpak bann tel sanzman e nou bezwen tir legzanp lo serten pei oubyen lavil, ki’n entrodwir bann sanzman parey.

Mr Speaker en Seselwa ki reste lwen ek son landrwa travay, i defavorize akoz (1) ki reste pres ek landrwa travay sa i pour mwan i en lenzistis ki nou pa kapab tolere.

En lot keksoz i annan en gran diferans sosyal ant en sitwayen ki reste dan lavil e enn ki reste an deor lavil. Avek sa problenm traffic jam i annan mwens enteraksyon. E sa i move pour koezyon nou sosyete.

Mr Speaker mon’n segonn sa Mosyon akoz koman reprezantan distrik Takamaka, mon konnen lenpak ki sa problenm traffic jam i annan lo zabitan mon distrik.

Par egzanp mon kontan boner Loter Mosyon in koz lo son leksperyans kot li menm li in fer diferan letour lo Mahe dan son transport pour li kapab eksperyans sa. E menm sityasyon ki nou zabitan mon distrik pe fer fas avek.

Par egzanp nou vwar nou bann dimoun pli boner, zot pe pran bis 6 er mwen en kar, 6. 20. E ler ki zot ariv Anvil i apepre dan 8er sonnen, pour ariv lo 9er. E la si zot mank en bis, ‘manman’ zot pour war zot pe ganny plis problenm ankor.

De lot kote nou pe vwar nou bann dimoun, bann ki annan transpor, zot ki zot fer?  Zot bezwen sorti pli boner, fer letour egzakteman parey loter Mosyon in dir, fer letour par La Misère zis pour zot kapab ariv Anvil ase boner pour zot kapab ganny zot letan travay a ler.

Alor Mr Speaker sa an prenan kont tou difikilte ki nou bann dimoun, nou bann zabitan pe fer fas avek, mon demande avek lotorite pour zot ekout nou konsern parey loter Mosyon in demande pour zot fer en letid pour zot kapab sey anmenn sa bann propozisyon pour avek lespri, pour kapab ede rezourd sa problenm ki nou pep pe fer fas avek.

Avek sa Mr Speaker, mon pour anmenn mon sipor pour sa Mosyon. Mersi.

 

MR DEPUTY SPEAKER

Mersi Onorab Ernesta.  Prosen lo mon lalis, Onorab Pillay, Sebastien Pillay, ou annan laparol.

 

HON SEBASTIEN PILLAY

Mersi Mr Speaker. Mr Speaker sa size traffic jam la i en size ki tro bokou letan nou pe koz lo la e i pa en size ki pour ale akoz toultan ou pour annan sa problenm. Me selman nide deryer sa Mosyon se anmenn en lot fason pour get sa problenm.

Annou pran nou konteks ozordi, tou travay komans preski menm ler, e i fini menm ler.  Savedir tou dimoun pe bouz o menm moman.  E tou dimoun i dan semen o menm moman.  I annan bokou lezot pei ki’n eksplor kot serten travay i komans en ler en pe pli tar e fini en pe plitar.  Koumsa ki a sa moman lakantite trafik ki lo semen i diminyen e i fer ki ou pa ganny sa problenm parey i ete. me avan mon al dan natir, oubyen laspe sa Mosyon li menm, i annan en keksoz ki nou bezwen soulinyen avan tou.

Enn bann lakoz kot nou annan sa bann problenm lo semen osi Mr Speaker se design nou bann semen. E mon konnen mon pour sorti en pti pe an deor, pa zis lo design me par egzanp lo la fason ki, mon konnen Lazans i fer en bon pe travay, be la fason ki sa bann semen i ganny maintained.

Mon konnen la anndan tou dimoun a en moman donnen pe konplent, akoz en drayver i pey son road tax, i met son transpor lo semen, bomaten i desann semen i ok, ler i retournen apre midi semen pe kase e transpor pe bloke.

Prezan semen i fek pe ganny aranze. I fini ganny aranze, 2 zour pli tar e lot lazans i vini, i kas ankor sa menm semen ki fek ganny aranze.  E ankor ou war pour dir a en moman donnen trafik i bloke akoz i annan road work ki pe ganny fer!

Me sa i pa zis le problenm sa. Lot problenm prezan ler sa bann semen in fini ganny aranze.  Par egzanp Mr Speaker ou a dakor ek mwan sa bout semen ki sorti depi kot lekol Anse Etoile ki al ziskan dan La Retret i annan sa bout beton ki zot in mete, me sa i deranz transpor dimoun.  Ou mazinen pour dir en dimoun pe pey son road tax, i pe pey son fuel e i bezwen pey maintenance lo son transpor e bann parts ki wear and tear i wear and tear pli vit ki zot ti pour wear and tear si semen ti dan en fason pli konvenab.  Konpran?  So se sa mon krwar ki ler nou pe get sa deba lo sa Mosyon, nou bezwen osi pe get deba lo striktir ki nou annan an plas pour sa bann semen, la fason ki bann semen i ganny servi, eski tou transpor i bezwen antre dan lavil kot i kree bann bottleneck kot i annan zis en larantre ek en landrwa sorti?

Eski nou devret ban?  Servi serten transpor dan serten area dan lavil kot i kree sa bann bottleneck?  Eski sa i bann keksoz ki nou bezwen fer. Par egzanp bokou pei in eksplor servi par egzanp bisiklet around bann landrwa, pour fer li pli fasil pour bann dimoun deplase san ki zot servi zot transpor.

Mr Speaker sa size transportasyon, traffic jam i en sours fristrasyon, i en, i anmenn en konponan finansyel akoz bann dimoun i kit zot transpor on i bril plis … bennzin, e pour en dimoun ki pe met aircon dan son transpor par le fe ki i so, swa i fer desann tou son vit, me en dimoun in aste son transpor i oule dray dan konfor. Swa i met son aircon e son transpor run pandan letan ki i dan trafik, e i perdi plis letan.

E i annan en lot kote sa problenm kot par egzanp en Onorab ti pe diskit sa avek mwan dernyen fwa, kot dimoun i aret pour donn, pour debark en dimoun par egzanp.

I bezwen debark li dan semen menm.  Si mwan mon’n arete, 2 transpor pli devan in arete, lot in arete, lot in arete, ankor enn fwa sa i kree en serten kantite letan ki ou bezwen pase dan en traffic jam.

Si ti annan en layby ki fer li pli fasil pour ou debark sa dimoun pour sa transpor kontinyen ale napa problenm. Be si ou pe bezwen arete, si napa en laybay kot ou pour bezwen arete, si ou kalkil en laliny transpor ki ladan i annan apepre 75 transpor, si ladan 25 transpor pe arete pour debark en dimoun, ou kapab konte kantite letan sak dimoun i pran pour debarke. E sa i ogmant letan ki ou pour fer dan sa traffic jam.  So tousala i bann keksoz ki neseser pour konsidere.

Me lesansyel sa Mosyon i enn ki anmenn nou pli devan akoz nou konsider vwar sa flexi hour system kot i konsern travay.

E mon konnen bann anplwayer i pa pour neseserman kontan sa Mosyon akoz i pour al dan laliny, eski i pour afekte prodiktivite.  Be eski nou kapab rethink sa prodiktivite par fer ki par egzanp, let’s say par egzanp kot Minister Labita e la mon hope ki bann civil servants laba pa pran mwan mal.  Zot komans petet 9 er e zot fini 5er as opposed ki tou dimoun pe komans ansanm 8er.

Tou dimoun kot Minister Labita i dan menm trafik, Minister Tourism, lot, lot, lot. Mon pe koz lo Minister akoz i pa en keksoz ki mon kapab enpoz lo sekter prive.  Akoz i pa normal pour enpoz serten regilasyon.  Me mwan konnen i annan landrwa dan sekter prive ki practice sa flexi hour pour zot ganny maximum out of their staff.   

Mon krwar ozordi sa size traffic jam i pa’n en size vreman ki ler nou get listwar Lasanble i pa’n en size ki’n vin atraver en Mosyon oparavan li.  In vin atraver sirtou bann kestyon ki’n ganny demande.

Me ozordi nou annan sans pour nou regard sa size pour nou dir be eski petet pa i annan en solisyon somewhere pour sa size isi ki petet nou pa pe war, nou pa pe konsidere?  Akoz nou demann kestyon, nou ganny dir pour dir … me resaman nou’n vwar kot menm en proze semen in ganny fer, roundabout ganny fer.  Me en roundabout li menm li par fwa i kree konzesyon trafik.  Ou Konpran?  E ou pa ni ganny en konpran prezan akoz mon konnen pour dir sa bann zofisye i travay en kantite.

Be konmsi eski i annan en zefor, petet en zefor vreman serye mon kapab dir, pour vreman rezourd sa problenm? Mon konnen zot anvi. Tou lentansyon, tou lendikasyon i montre pour dir zot anvi rezourd sa problenm.

Me parfwa ou konnen, mon war li en pti pe drol, out ay deryer en boug akoz in met en tinted lo son loto me selman son loto pe kase, i bezwen sanz bush anba la tanzantan, i annan keksoz fairness ki nou bezwen gete la.  I pa vedir de mal i fer en byen. Be selman tou dimoun pour dir ou be i pe pey son road tax e i deserve pour li kapab ariv dan son landrwa travay a ler.  A ler.

E mon krwar le pwen ki pour vini Mr Speaker e mon konnen dimoun pour komanse demann sa kestyon se eski zot pour ganny valer pour sa road tax ki zot pe peye?  Akoz sa road ou pa pey li zis pour sa semen ki ou servi, ou pey li pour ganny sa servis lo sa semen pour ou kapab ou menm ou delivre lo sa ki ou anvi fer.

Par egzanp Sesel nou pe demande ki nou annan bann delivery service.  Be en delivery service pa pour marse, akoz i pour pri dan trafik.  E la nou pe anpes ganny en loportinite biznes ki petet en dimoun ti kapab fer.  Ou vwar? So petet in ler pour nou komans remain lo sa size e vwar vreman ki mannyer nou pour kapab rezourd sa bann problenm.

Mwan pour mwan par egzanp lontan Mr Speaker si pour ou ariv Lasanble ou ti annan ou zis sa semen pour ou desann, ou pa pour arive Lasanble, kanmenm – si ou pa’n sorti kot ou byen boner, ou pa pour arive Lasanble a ler.  E se pour sa rezon ki ler Lasanble ti pour li vin 9er.  Enn bann rezon sete sa.  Me si nou’n kapab vwar pour dir i marse pour Lasanble, 9er-5er, why not ki i pa pour marse pour lezot landrwa travay?  Mon pa dir tou, mon dir be nou alternate.

Akoz mon krwar dan bokou pei i annan landrwa ki annan longer hours en zour ki lannmen zot annan shorter hours.  Konmsi ki nou aret met nou lekor dan en kad ‘rizid’ kot tou keksoz i bezwen ganny fer en ler, fini en ler.

Sa petet i ava donn serten fleksibilite.  Me tout an prenan kont ki sa servis ki mon pe gannyen i bezwen valer pour mon larzan.  Si mon save mon pran en loan pour aste en transpor, mon ekspekte pour dir mon pa bezwen pe aranz mon transpor tou le mwan, akoz i pe kase akoz semen eksetera!   E mon ekspekte osi par egzanp vi ki ou annan en Utilities Committee ki sa Utilities Committee i konnen pour dir PUC pe al pas son tiyo, alors pa vo lapenn nou fer road surfacing la, e mon fer road surfacing be selman demen PUC i vini i kase.

Mon pa pe blanm sa bann lazans, be selman mon krwar i bezwen annan kordinasyon pli kler ki fer ki servis ki popilasyon i gannyen i pli bon. E se sa ki nide deryer sa Mosyon.  Sa Mosyon pe nesesit, pe ensit si oule en deba lo sa size pour ki nou kapab komans koz lo la.  E mwan mon krwar pour dir popilasyon antye i devret kapab at least, bann deba ki pe go on anvoy zot bann kontribisyon akoz a plizyer repriz mon’n al lo rezo sosyal e mon’n vwar plizyer dimoun pe konplent lo sa size.

E ozordi i en size ki mon krwar o transcend okenn baryer politik kot nou pe koz lo en keksoz ki fer nou lavi vin pli fonksyonnel e pli pratik.  E avek sa Mr Speaker mon pour donn mon sipor Mosyon ki Onorab Aglae in anmennen.  Mersi.

 

MR DEPUTY SPEAKER

Mersi Onorab Pillay. Mon napa okenn demann pour lezot entervenan.  E alor mon ti a kontan demann Onorab Aglae pour li fer son… Onorab Larue ou ti oule entervenir. Laparol i pour ou.

 

HON FLORY LARUE

Bonn apre midi Mr Speaker. Mersi.  Mosyon i koz klerman lo sanzman e i koz lo sanzman ler ki zot pe propoze ki kekfwa nou kapab regete.

Wi i annan en baz dan sa.  I kapab en keksoz ki Gouvernman i enplimante o fir a mezir akoz sa kantite transpor ki pe antre dan pei i vreman bokou. Me selman Mr Speaker i annan bokou keksoz ki nou kapab fer dan limedyat. Mwan osi mon sorti dan Sid, e pour mwan kapab ariv Anvil 8 er bomaten, mon annan mon transpor, mon bezwen kit avan 6.30.

Si ou antre dan ou transpor, ou sorti Anse Royale apre 6.30, ou garanti ki ou kapab ariv anvil apre 8er, i fer ki dimoun ki pe pran bis vreman i annan sa difikilte pour ariv travay a ler. Ki nou kapab fer? Mon krwar Gouvernman i bezwen demann son lekor sa kestyon dan limedyat.

Resers i montre klerman ki bann trafik jams spesyalman bann kot napa en aksidan, napa en lensidan ki’n arive dan semen, i souvan ganny formen par over braking letan en dimoun i pez fren tro bokou, ouswa tro for, i fer bann akimilasyon par fwa en pe segonn nou krwar. Me sa akimilasyon letan i annan bokou transpor lo semen an menm tan i fer ki en traffic jam i formen.

I montre ki la fason ki nou drive i annan en le fe direk lo sa bann traffic jam ki formen letan napa bann aksidan dan semen. Me nou dan nou sityasyon isi avek en one lane dan sak kote letan nou sorti dan Sid, i annan bann lezot keksoz ki anplifye sa traffic jam.  

Par egzanp pour bann bis piblik napa siding kot bann bus stop. Souvan i fer ki sa bis i bezwen aret dan semen li menm e sa osi i ede pour azout sa bann segonn an plis ki letan i arete i pe debark ouswa pran pasaze, kot  i azout ler dan traffic jam.

Letan nou pe regard nou bann defayans ki nou annan, ki kapab kekfwa ganny rektifye toudswit, nou bezwen regarde ki dan Sid nou annan plizyer lekol, nou annan enn Au Cap, enn Anse Aux Pins, enn Pointe Larue.  E dan sa bann ler 6.30 – 7er bokou dimoun pe anmenn zot zanfan lekol.  E zot osi zot debark zot zanfan souvan lo semen piblik, lo grann rout, e sa i akimil, i fer ler ki dimoun i reste dan trafik akimile.

Si ti annan plis kekfwa bann monitoring lo semen direkteman kot sa bann landrwa kle ki ti kapab ganny idantifye, kekfwa ti ava annan en meyer sityasyon pour le moman akoz nou pe koz dan limedya.

Eski nou pa ti kapab servi bann zenn, bann zenn kadet ki sorti dan Lakademi Lafors Lapolis, Point Larue pour ede fer sa monitoring?  Kekfwa ti ava en par dan zot training pour al direk lo semen, pour deal avek bann problenm trafik e sa ti a ede pour kapab enplimant ledikasyon drayver.

Letan nou’n koz lo bis e napa sa sidings sa ti en keksoz imedya ki Gouvernman ti kapab regarde, idantifye e met bann siding kot bann landrwa ki napa pour kapab ede ki bis i pran siding letan zot arete. Me en lot keksoz osi ki ede ki i annan en logmantasyon dan transport prive lo semen, i defayans ki nou pei in annan dan delivre en servis piblik, transport piblik pour nou dimoun.

Sa servis ki nou annan i annan bokou, bokou defi.  E si kekfwa nou ti’n prezant nou pep avek en keksoz pli kordinen e pli responsab, en sistenm pli responsab, dimoun pa ti bezwen vwar zot pe aste en transpor prive.  Dan bann lezot pei souvan letan ou annan ou en sistenm piblik, transpor piblik ki efikas i annan, i zwe en gran rol lo kantite trafik ki annan lo semen.

Sa ti ava kapab en keksoz ki Gouvernman ti kapab regarde dan lefitir pour fer en sistenm transport piblik ki vin pli efektiv.

Letan zot pe regarde osi pour sanz ler travay, i fasil pour dir me ankor letan bokou nou popilasyon i pran bis piblik pour vin travay, letan nou pour sanz ler, nou pour bezwen regarde eski bis pour available pli tar, pli boner, akoz deza pour dimoun ki anvi kit pli boner napa, napa bis, bann dimoun ki sorti Valdandor, bann dimoun sorti Mont Plaisir, bann dimoun ki sorti Les Canelles, i war zot difisil pour zot kapab pran bis pli boner letan napa sa servis.

Savedir tou sa bann keksoz i bezwen ganny met ansanm letan nou pe regard sa problenm trafik. Pa zis dimoun ki i annan transpor prive me tou sa bann lezot keksoz ki Gouvernman pa pe regarde i osi ede.

Nou’n koz lo le fe ki annan lo lekonomi, le fe ki napa bis aswar, i fer ki bokou biznes pa ofer serten servis tel ki kekfwa take away dan bann distrik ki ti a kontan ouver aswar zot pa fer li akoz napa dimoun ki pe bouze; kekfwa bann magazen ki ti a kontan ouver pli tar, dimoun pa oule rested an lavil pli tar akoz zot anvi bouze akoz napa bis pli tar.

I annan bokou sa bann keksoz ki fer ki lekonomi, dimoun pa kapab ouver zot biznes. Letan nou koz lo sport, lavi an pli bonn sante. I annan bokou dimoun pa kapab ariv Roche Caiman. Si dimoun ti anvi fer zot legzersis dan bomaten, le fe ki napa trafik, napa en bon sistenm trafik piblik, transpor piblik, dimoun pa kapab deplase pour fer sa.

Savedir sa traffic jam i en keksoz bokou lezot keksoz ki plis ki sanz ler ou bezwen ganny regarde.  Gouvernman i bezwen ganny regarde, Gouvernman i bezwen fer en plan ki bezwen pran tou sa bann keksoz an men.  Letan nou get ler travay eski nou pa ti kapab osi get ler lekol?  Eski lekol pa ti kapab komans enn pti pe pli tar akoz sa osi ti a kapab ede pou tir en pe trafik dan bomaten. Me selman letan nou pe koz lo traffic jam pou antre dan Victoria dan bomaten mwan mon koz spesifikman dan Sid.

Dan Sid Mahe nou annan nou en roundabout ki’n vin en Moniman.  Depi lannen pase Desanm 2017 sa roundabout ti sipoze ouver, in ouver pou en pe letan avek son siding pou ed Airport pou tir en pe konzesyon ki ti arive souvan kot Airport, me la nou vwar ki sa in fermen. I fermen e i koz plis konzesyon.  Eski Lapolis dan limedya pa ti kapab regarde pou met en dimoun aktivman la pou sey monitor mouvman lo sa roundabout?  

Akoz in vreman vin plito en fardo rather than en keksoz ki ti pou fasilit transpor.  E pli devan kot cargo i annan en zebra crossing ki ganny servi tou le de minit i annan en dimoun ki pe koup semen, ankor sa ‘stop and start’ – ‘stop and start’ i vreman fer en gran lefe.  Lefe ki en dimoun i sorti Anse Royale pou ariv anvil i pran 1erdtan edmi dan bomaten, i pa akseptab.

Alors sanz ler lo kote Mosyon sanz ler travay mon krwar i en keksoz ki kapab marse dan le fitir akoz i annan bokou, bokou transpor ki antre dan pei me pour le moman Mr Speaker mon krwar ki Gouvernman i annan bokou keksoz ki i kapab fer dan limedya.  Mersi.

 

MR DEPUTY SPEAKER

Mersi Onorab Larue vi ki i 3.26 e mon annan ankor zis 2 entervenan, mon propoze ki nou ava adjourn la e nou a tourn 4er esperons ki nou kapab fini bann deba lo sa Mosyon.  Alor nou adjourn ziska 4er.

 

(BREAK)

 

MR DEPUTY SPEAKER

Bonn apre midi tou Manm Onorab e tou dimoun a lekout nou kontiny nou progranm nou travay pou apre midi e prosen dimoun pou koze lo Mosyon Onorab Egbert Aglae se Onorab Jude Valmont.

 

HON JUDE VALMONT

Mersi Mr Speaker e bonn apre midi, bonn apre midi tou Manm Onorab e bonn apre midi tou bann ki a lekout.  Mr Speaker mon rapel byen parol Dr Larose ansyen Minis Finans dan prezantasyon Bidze ler i ti dir ‘Time is money.’  Ozordi keksoz ki enteres nou pep, se en lavi pli meyer en lavi pli konfortab.  Alors Mr Speaker lespri sa Mosyon i zisteman vize ver rod sa meyer fason pou redwir malez nou pep par eksplor fason pou redwir trafik.  Onorab Aglae Mr Speaker in propoz sa konsep flexi time konman en solisyon probab, me selman mwan mon pou focus en pe plis lo sa problenm trafik li menm.

Parey ou konnen Mr Speaker distrik Pointe Larue ki mon reprezante i enn parmi bann distrik ki renonmen pour koz trafik.  E sa i koz zis konfor pou bann dimoun ki pe travers dan sa rezyon pou al dan sa rezyon pou al ver rezyon Sid.  Mr Speaker kwa ki fer sa?

An konesan sa distrik mon’n vwar ki i annan lekol, nou annan 3 lekol nou napa zis segonder ki bann zanfan Pointe Larue, Anse Aux Pins e Cascade i vin kot sa lekol, me nou menm annan lekol primer e osi nou annan Daycare.

Parey zot konnen Daycare diferan landrwa dan diferan distrik bann dimoun i sorti sa bann distrik zot anmenn zot bann zanfan Pointe Larue.

Petet sa landrwa i en landrwa ase konvenyan osi akoz i pres ek lavil nou konsider li pres avek rezon Sid osi petet sa i en fakter ki definitivman i kre konsesyon, akoz ou war lekol parey ler travay i antre 8 er nou war bokou bis tata ki la.  An se moman i anmenn etidyan paran i vin dan transpor vin drop zot bann zanfan e transpor ki sorti dan sa rezyon osi, rezyon Pointe Larue, zot zwenn ansanm a en ler ant mon pe gete dan 6er edmi 7er an montan ki parey ki Onorab Aglae in fer sorti, i pran vre i pran sorti Au Cap – mon krwar  Onorab Ferrari pou konn sa byen i sorti laba li osi, ou sorti Au Cap i pran ou apepre 40 minit zis pou ou ariv rezyon par Pointe Larue Onorab Larue aktyelman i Airport, Airport kot sa roundabout la ki ou koz lo la  i pran apepre 40 minit.

Par lo la Mr Speaker i annan menm UCPS en bon pe dimoun i konnen en kantite sa bann kanmiyon i sorti a en pwen i sorti Anse Faure la kot nou dir Kan Larme kot zil Diswet i vin i pas dan plato e i al dan Anse Dejeuner laba.  Alor nou vwar mouvman sa bann gro kanmiyon osi ki kre lenkonvenyans.  Alor i annan de bout UCPS osi ki kree sa problenm annan de ler akoz nou war konvanzans sa  bann kanmiyon avek lezot transpor sirtou dan bomaten.

Mr Speaker nou menm annan Legliz serten letan petet i pa toultan, me selman i kontribye akoz nou bann dimoun ki pe al Legliz nou konnen i fer lanmes dan Mardi bomaten, nou annan bann krwayan ki vin Legliz e toultan ou bezwen, kot ete ou bezwen aret transpor pou bann dimoun pase, alor sa osi i kree serten lenkonvenyans.

Mr Speaker annou pa bliye ki i annan en lot eleman ki afekte trafik ki osi mon anvi met lanfaz lo la.  Se sa delo ki monte letan lapli.  Kantite fwa delo i monte dan rezyon Pointe Larue ou pa war kot ou pe pase delimitasyon, ti annan bann pti delimitasyon ki zot in mete bokou in kase e akoz motoris i bat ladan.  Ou pa war semen.  Alor dimoun i al vreman dousman

  • pou pa tonm dan sa bann rigol.
  • Pou delo pa tonm dan transpor pou fre lanmenm pou arete.

Mr Speaker en lot keksoz ki afekte trafik dan sa rezyon se en lack petet pavement.  Annou get kot bokou dimoun i konn sa restoran pa restoran eskize sa take away pti piman la Anse Francois kot Raymond nou dir sa kot Vielle nou.  Ou war i mank pavement la ziska rezyon Airport.  E sa ki fer bokou manrmay bomaten zot sorti bann ki reste Anse Dejeuner.  Akoz Pointe Larue segonder ordinerman bann manrmay Anse Dejeuner rezyon Airport an montan ki vin lekol segonder alor bokou zot marse i annan bokou travayer ki marse osi sorti rezyon Cascade pou vin dan rezyon kot Sigaret; kot UCPS.

Alor tousala i kree trafik, akoz en transpor i bezwen veye li pangar i tap sa dimoun.  E nou’n war semen dan sa rezyon i etrwat, i etrwat alor tou lede pyeton i bezwen vey transpor, e transpor i bezwen vey pyeton e sa ki fer i redwi ki lavites ki ou pe dray alor i kre trafik.

Mr Speaker mon par ler mon asize mon analize e mon pe get sa bann kontribiter pou trafik mon mazin serten solisyon.  Parey mon krwar nou merit kontinyen ankouraz amelyorasyon serten semen bann rezyon Pointe Larue.  Zot in fer sorti i annan propozisyon pou en trwazyenm lane.  

Sa i bann propozisyon ki’n vini me selman i annan keksoz osi ki nou kapab fer Mr Speaker, apard esper fer en manman proze parey nou dir kapital ki pou fer sepa kantite letan, i annan bann pti keksoz i annan Onorab ki’n fer resorti.  Enportan nou amelyor bann layby.

E sa an dizan sa mon rekonnet ki SLTA Lazans i annan keksoz byen.  I annan keksoz ki zot pe fer ki pe ede i pa pou redwir trafik ki mannyer be i ede soulaze.

Par egzanp Mr Speaker i annan layby ki’n ganny fer.  I annan layby ki’n ganny fer i annan lekol mon’n war i annan sa pti layby la ki bann paran i kapab zis ler zot pe pase zis drop zot bann zanfan apre ale.  Sa i bann pti keksoz ki zot in fer osi.

Me selman still i annan improvement pou ganny fer.  La mon pe koz spesifikman dan rezyon Pointe Larue mwan mon sorti laba mon’n grandi laba mon konn byen sa landrwa.

I annan parey bann bus stop, i annan bann bus stop petet nou merit agrandi, en legzanp tipik petet ki mwan mon war se sa pti bout si ou get Anse Aux Pins avan katiolo sa en legzanp tipik.  SLTA in servi landrwa zot in ouver e la bis in nobou rondi anndan.

Pointe Larue i annan me selman annou konsider groser sa bann bis tata.  Ou met en 2 lo bus stop ou met en 2 koumsa lo en bus stop in deza ranpli li e i annan de ler in vin 3, 4 e ki ou fer dan sa lenstans?  Alor petet nou bezwen konsider sa.

En landrwa ankor en hot spot se Anse Francois.  Ler mon dir Anse Francois bann Onorab e dimoun pe swiv mwan avan Sigaret la, i annan en landrwa i ase tight la kot i annan laboutik kot nou dir Liz Hairdresser la, bis i kontan aret la.  Si bis i aret la, la ou pa nobou overtake ou akoz i annan transpor ki pe monte.  Alors sa i kree en ‘manman problenm.

Mr Speaker letan mon pe koz sa en keksoz ki mon’n manke se Airport li menm.  Airport i kontribye kre konzesyon.  Nou’n war lendistri tourizm in agrandi volim lakantite avyon konmela i bokou plis, e nou war ki mouvman transpor i enorm dan rezyon Airport.

E kote son larantre ek son sorti i ete pou le moman, ankor i debord lo sa main semen.  Nou’n war ki zot SLTA in sey fer roundabout parey i annan serten Manm in fer resorti, i pa ankor fini louvraz in tard en pe, akoz mon war i annan serten bout parey in ganny mansyonnen, pa ankor ouver e otan pa war sa roundabout la, sa bout ouver sa de-blokaz ou pou kontinyelman war trafik.

Me selman petet mwan ler mon pas laba, mon pa konn zot bann Onorab si zot in war petet mwan mon krwar  sa roundabout son ron i tro larz, son semen i tro pti li menm, e pavement i en pe tro larz li osi.  Alor petet sa i kontribye akoz ler ou ploye, mwan mon drayver parey serten i ete la ou ploye ou tant pou say lo sa transpor ki anndan.

Alor i tant pou fer ou redwir speed.  Alor i fer trafik.  Si nou gete mwan letan mon mont Pointe Larue apre let’s say apre en zournen travay anvil annou dir ou mont dan 4er ou, ou sorti depi Providence ou’n pri dan trafik.  Alors sa roundabout si zot pa fer sa debousman kot Airport, still i pou fer sa i pou kre lenkonvenyans.

Mr Speaker apre i annan mon profit lokazyon, pou koz en pe lo sa issue speed bump lo plato Pointe Larue.  I annan 3 speed bump dan plato Pointe Larue i annan 3 speed bump ki nou dir bann bumper crossing.

Bokou, mwan mon menm mwan MNA mon’n ganny challenge.  Zot demann mwan be akoz lotorite distrik in permete met 3 speed bump koumsa dan plato Pointe Larue ki ede zisteman pou fer trafik.  Mr Speaker mon profit lokazyon pou dir, mwan mon konpran me selman nou bezwen fer balansman ant safety lo semen avek trafik.

Mon get li koumsa mwan ou sorti bomaten ou pas lo sa bann ou dan trafik ou pe mont lo sa speed bump petet i pran ou en 3 en 5 segon pou mont lo la alor i pa fer vreman lefe.  Me selman ki lotorite distrik i panse?  Speed bump koumsa i amelyor sekirite transpor i vin en pti pe pli dousman, e i ede i ed sa zabitan Pointe Larue i ed sa pti zanfan ki sorti Au Cap ki vin lekol Pointe Larue i evite ki i ganny tape lo semen e sa osi i kapab kontribye fer trafik.

Alor nou bezwen fer sa balansman.  E mon kontan pou dir depi ler speed bump in ganny mete napa en aksidan fatal ki’n ganny rikorde.  Alor petet solisyon ki bann dimoun pe mazinen se pa tir sa bann speed bump me petet agrandi semen parey zot in dir trwazyenm lane.

Mr Speaker mwan mon fransman mon dir mon pa sitan konvenki ki sa trwazyenm lane dan Pointe Larue pou ede amelyor trafik ki mannyer?  Mwan mon toultan krwar  ki lamelyorasyon trafik dan plato Pointe Larue i depandan – i depan lo sa koneksyon ant Anse Aux Pins sa rezyon karyol Pointe Larue, Nageon Estate avek sa semen ki nou dir semen Rosebelle Airport.

Akoz si sa semen i ganny fer, i donn en solisyon, mazinen ou sorti, ou ti pou fer 40 minit dan trafik sorti Au Cap pou al kot Airport ou pas semen Anse Aux Pins ou mont par Reef Estate oubyen ou mont par semen Guy William ou mont anler dan simityer ou donm dan Karyol, ou desann direk dan Pointe Larue ou pas anler menm ou tonm dan semen Rosebelle i apepre 100, 200 met avek highway.  Alor i ede evite si ou pa pe servi plato Pointe Larue, ou pa bezwen pas laba.

Alor bann transpor ki pou pas dan plato se zisteman bann transpor ki pe al drop travayer kekfwa ou pe al travay kot Amalgamated Tobacco, UCPS e bann paran ki pe drop zot bann zanfan lekol.

Alors sa Mr Speaker mon lans en lapel ankor mon profite mon lans en lapel avek lotorite konsernen ekout mwan koman MNA sa distrik ki konn sa issue.  Ekout lapel nou bann dimoun ki pe pri osi ki pe pas dan sa fristrasyon trafik, san ki zot war ki pa neseser petet – ekout nou sey konsidere enn fwa pou tou sey fer sa semen.

Nou annan later teren i ase bon semen Anse Dejeuner i ase larz nou zis bezwen konplimant li en pe i a ede petet anmenn sa solisyon ki nou pe rode pou rezyon Sid.  I a ede redwir fristrasyon.

Mr Speaker en lot keksoz ankor se, mon krwar i nou responsabilite motoris osi.  Konbyen fwa nou’n war dan semen kot motoris in arete dan en fason inapropriye, ki i bar tou dimoun prezan ou bezwen arete esper li zot pou debarke. Sa ki pou dir bye bye  -sa ki pou donn en kiss avan i ale – tousala i bann keksoz disiplin Mr Speaker.  I ede tard – retard trafik.

Mr Speaker alor dan sa laliny mon ti a voudre petet ankouraz bann gard.  Nou annan gard ki byen verse dan sa domenn trafik ankouraz zot pou vin enn pti pe pli strict avek motoris.  Ler zot war sa bann motoris in arete pe tarde pou debark en dimoun, bouz zot.

I pa neseser ki ou pe donn zot tiket ou pe pini zot me selman ou koman sa gard, sa Lotorite ou kapab dir ek en dimoun be bouze vitman be ale fer sa, i a ede fer trafik bouze.

En lot keksoz Mr Speaker i annan MNA in mansyonnen la apre midi i annan bann zofisye osi kot Lakademi ki kapab ede mwan mon totalman dakor ek sa.  Ler zot pe fer – mon pa pe dir zot pa fer nanryen laba, me selman ler zot annan laklas petet laklas trafik oubyen zot annan enstrikter ki’n pa’n vini, ou en rezon ou en lot zot napa laklas, mon krwar i en bon lide.  I en bon lide fer zot sorti e vini fer bouze trafik.  Sirtou dan bomaten avan zot al laklas 7er edmi zot vini zot ede dan Pointe Larue la; dan 4er koumsa zot ede dan bann peak hours petet i a ede zot ankouraze petet tousala i a konplimant louvraz bann gard Anse Aux Pins ki reprezant rezyon Les.

Mr Speaker i annan en lot pti keksoz osi.  I annan en pe letan mon ti war ti annan ler bann gro, gro kanmiyon bann gro, gro veikil ti ganny kontrole.  Mon konnen dan Victoria ti annan en serten ler ou kapab antre en serten ler ki zot kapab mouvmante.  Mon krwar  sa en keksoz ki merit ganny ranforsi akoz si ou redwir lakantite sa bann transpor parey annou get en JCB konbyen kilomet i pe roule a ler?  En 10 en 20 kilomet?

Alor i ede tard trafik petet nou merit enn ti pe pli strict lo la osi.  Mr Speaker en lot keksoz ankor petet nou merit konsidere la dan lespri flexi time osi nou merit get en kou fer sa balans ant landrwa travay Gouvernman – servis piblik avek ler komans lekol.  In ganny mansyonnen tousala mon rekonnet sa.

Lekol petet i kapab komans pli tar petet servis piblik e landrwa travay petet i kapab 8er lekol i komans 10er akoz tou fason i pou fini avan 4er, nou fer sa balans mon krwar i kapab marse.

En legzanp tipik se kot Imigrasyon mon’n war sa in mars byen akoz ki i fer Imigrasyon zot ouver midi petet zot permet serten dimoun vin servi sa servis ki zot pa kapab servi a en serten letan.  Alors si ou get sa Imigrasyon si in nobou fer sa li flexi time sa mon dir Mr Speaker en.

Si Imigrasyon in nobou servi sa alor petet lezot landrwa mon konnen pa tou ki pou nobou fer sa, alor petet sa bout letid dan Mosyon Onorab Aglae la i antre petet nou bezwen fer en letid.

Dan break la mon menm ganny konversasyon avek Onorab Lemiel mon krwar Lenstiti Guy Morel si mon pa tronpe, in deza fer enn sa letid petet i ti a bon Gouvernman rantre an kontak ek zot gete ki vreman zot in fer dan sa laliny.

Mr Speaker alor dan sa laliny menm ou koz flexi time i annan en lot keksoz ou bezwen konsidere se desantraliz bann servis Gouvernman.  I en keksoz ki pe sey ganny fer.  Nou konnen parey zofisye sosyal i baze dan distrik – zofisye ASP Lazans Proteksyon Sosyal i dan distrik.  Petet i annan lezot lazans ki kapab vin dan distrik oubyen rezyonal Mr Speaker.  En legzanp se Housing.  Zot zofisye dan plas mont petet mon konnen Pointe Larue i mont i pa monte aktyelman i baze anvil, petet i kapab baze dan nou distrik.

Ladministrasyon Distrik Mr Speaker petet in pa’n ganny fer pou cater me selman nou kapab fer partitioning e nou kapab fer sa bann zofisye vin la.

Bokou dimoun zot al servi Biro Lakaz pou zot fer zot laplikasyon and what not.  Alor annou met bokou plis sa bann servis o nivo distrik e konsidere en lot legzanp en Biro Imigrasyon kot nou al fer passport nou al fer GOP and whatnot.  Mr Speaker why not nou pa fer li?

Mon konnen i capital intensive me petet i kapab ed nou soulaz sa problenm trafik fer li rezyonal.  Annou fer li rezyonal petet bann dimoun i kapab akse li bann servis esansyel.  Annou get PUC i annan Anse Royale alor petet nou kapab ankouraz sa bann desantralizasyon osi arive.

Sa i pou ede soulaz en pe sa problenm trafik Mr Speaker.  Mr Speaker mon krwar mon’n koz ase e mon demann tou Manm pou ede pou siport sa Mosyon.  Akoz;

(1) i pou ed nou vre i ede ek sa problenm trafik anmenn serten soulazman, tir en pe fristrasyon pou al travay.  Ou konnen Mr Speaker ou’n leve 6er bomaten ou’n pri dan trafik sorti Au Cap 40 minit ou’n al fer ankor en 50enn minit a 1erdtan tan avan-ler ou ariv anvil.

Ler ou ariv 8er ekek bomaten Mr Speaker ou menm ou pe ganny problenm ek boss i dir toultan ou ariv tar ou seye me petet ou koman sa zabitan Pointe Larue sa zabitan Anse Aux Pins you name it.  Ou, ou annan zanfan pou okipe bomaten i arive ki ou ganny tar.  Zanfan ou konnen ou mank bis e si i arive ou ganny problenm dan ou landrwa travay,  e alor petet pour redwir tousala, sa Mosyon i dan sa laliny pou rod fason rod solisyon pou amelyor lavi Seselwa e met nou en pe pli an konfor.  Alor dan sa laliny mon demann tou Manm Onorab pou siport sa Mosyon e mon pou fer parey.  Mersi Mr Speaker.

 

MR DEPUTY SPEAKER

Mersi Onorab Valmont.  Prosen lo mon lalis mon annan Onorab Sandy Arissol.  Laparol i pou ou.

 

HON SANDY ARISSOL

Mersi Mr Speaker bonn apre midi ankor enn fwa tou Manm.  Mr Speaker mon krwar trafik i en size ki konsern tou distrik e mon asire si Onorab Adelaide si I ti la li osi ti pou annan detrwa keksoz pou li dir lo la parske i en keksoz ki i kontan adrese.  I kontan koz lo la parske li osi kot i reste i pran menm direksyon menm larout ki tou bann ki reste dan Sid e i pran.  E osi pou li i en pwen konsern.  Parey nou tou nou konnen Onorab Adelaide i Senegal avek en delegasyon Lasanble.

So, mon ti a kontan komanse par dir mon kontan letan mon tann Onorab Ernesta dir pou dir bann dimoun ki reste ovan, zot  ganny defavorize konpare avek bann dimoun ki reste dan lavil.

Me selman mon anvi dir Mr Speaker dir ek Onorab Ernesta, Onorab Ernesta ti reste Mon Buxton obor nou la  li, in al reste anler laba Takamaka kot prezan i vwar li ganny defavorize kont bann dimoun ki reste Mont Buxton.

Mon pa konnen si later laba ki mou, so in permet li al reste laba, me selman mon konpran, mon konpran son soufrans.  Me selman Mr Speaker i enportan pou nou mazin byen non, nou pe demann li pou li retournen mon pa konnen si i annan plas Onorab Gervais i a dir li.

Me selman an menm tan ki nou pe dir Mr Speaker pa bliye letan mon’n tann Onorab Ernesta koz lo Anse Royale,  Anse Royale ti ganny promet pou li vin en dezyenm lavil.  Me kin arive nou pa’n tann nanryen.  Pa bliye ti annan bann distrik ovan en lepok ti’n ganny byento mon aprann i pou vini letan zot pou’n ganny zot Fire Brigade mon krwar ki pou dan en pozisyon ‘Stratezik’ alor zot pou vin lavil.

So, mon osi mazin byen ti annan en promet pou annan en tren, sistenm tren, mon krwar ki ti pou sorti Anse Royale mon krwar ki ti pou al Anse Boileau ki mon krwar ti (pou sorti Mamelles?)  – ti pou sorti Mamelles ti pou pas Anse Royale mon krwar  ti pou al Anse Boileau kot Onorab Andre Pool, sa letan.  Tousala nou ti tande.  Se bann keksoz, ti bann plan ki Barry Laine ti anmennen pou nou kapab ede avek trafik.  E la tou dernyerman nou’n tann mansyonn fame tinel.

So tousala i bann i bann mon pa konnen si Barry Laine menm ki’n donn sa lide, selman tousala i bann propozisyon ki’n ganny met devan pour ki trafik i deblok en pe.  Alor mon ti a kontan komans ek sa.

Dezyenmman Mr Speaker mon pa konn trafik en pe anler parey zot pe koz lo la selman definitivman sa roundabout ki kot Airport i en chaos konpare letan ti napa roundabout kot bann drayver ti kapab larg kanmarad les pase.  La pou le moman vre i en chaos.

E pa bliy Plaisance.  Plaisance zot annan zot mon krwar distrik ki annan plis traffic light i Plaisance.  Zot annan zot 4 e tou le 4 mon krwar i alim ansanm – prezan ou pa tro konnen ki direksyon si ou mont La Misère si ou desann Plaisance si ou retourn Roche Caiman oubyen si ou al Les Mamelles kot Onorab Georges.

Tousala se bann lenstans ki fer ki trafik i bloke.  Me letan ki nou pe koz lo sa bann zafer i annan en lot keksoz ki nou bezwen aksepte ki nou bezwen koz lo la.  Ozordi en keksoz Sesel nou pou bezwen letan ek letan koz lo e konsider li serye.  Sesel ozordi nou fonksyonn lo en sel ler.

Parey in ganny dir travay i komans menm ler, bis i roul a en ler, i aret en ler.  Tou biznes i ouver en ler, i ferm en ler Sesel.  E tou lezot fonksyon dan nou pei se egzakteman sa.  Mon krwar i en kiltir ki’n ganny enplimante dan nou sistenm e sa i fer ki nou tou in mars lo en sel ler e tou dimoun i mars ansanm, nou tou nou sir fer sir nou pe ganny sa dernyen bis, nou tou nou pe fer sir nou pe ganny premye bis, parske nou tou nou komans travay a ler.  Se egzakteman apre midi.

Apre midi letan biro Gouvernman i fermen midi, mazorite bann laboutik i fermen anvil akoz nou tou nou manz a ler Sesel.  Si laboutik (A) i ferm 1er – fodre laboutik (B) osi i ferm 1er parske laboutik li osi i bezwen al manz 1er menm.

Nou’n annan nou en sistenm kot nou’n mars lo menm keksoz toultan e sa osi in ede ki fer ki trafik ozordi in vin en problenm.  Mon krwar sa i enn bann keksoz ki avek letan nou pou bezwen konsidere, parske nou tou ki voyaze letan ou al Singapore par egzanp letan ou sorti Malaisie ou pe rantre 4er bomaten Mustafa li i reste ouver li, e toultan i annan dimoun ki pe travay ladan e nou, nou konn byen sa bann zafer parske letan nou, nou al dan lezot pei nou tant pou relax en pe dan lazournen e aswar ki nou fer sa ki nou annan pou fer.

Me Sesel ozordi letan i dir ek ou 5er ki en bout St Louis i tonm dan lavil, napa nanryen dan lavil, lavil i mor parey nou dir parske tou fonksyon in komans en ler e in fini en lot ler.

En lot pti keksoz Mr Speaker ki afekte trafik se kordinasyon, kordinasyon ant Lazans ki responsab trafik ek Gouvernman e osi parfwa bann Lotorite, lezot Lotorite par egzanp Lotorite Distrik.  Ki mon pe dir par sa?

Par egzanp la letan nou pe koze zis kot Quincy Street kot nou apel Quincy Street kot i annan Quincy supermarket avek Chez Deenu kot Barrel Trading la deza nou annan nou 2 zebra crossing la.  2 zebra crossing zis la dan sa semen.  Prezan letan sa pti bout semen i annan en zebra crossing ki egzakteman ki aflere avek Barrel Trading ki koup semen pou al lot kote e ou annan en kot Chez Deenu pou al lo semen pou al lo car park kot nou dir Carpark Pirat ki vizavi avek Tanp Endou prezan bis ki sorti dan Nor i desann i aret bann dimoun lo bus stop dan milye sa dimoun i pa enterese pou retourn lo zebra crossing par deryer oubyen al devan li, i koup lanmenm la dan milye semen.

Parfwa nou demann nou lekor si i annan kordinasyon ant bann Lotorite e si i annan fizibilite ant bann keksoz ki zot mete par egzanp.

E ozordi letan nou pe koz zebra crossing e i annan bann bus stop i annan bann siding ki antre.  Ozordi bus stop drayver bis li, drayver bis i en drayver kantmenm nou siport zot nou rod tou keksoz pou zot, parfwa zot en group dimoun letan i konsern semen zot mazin zis zot lekor.

Sa mwan mon pou dir e mon pou kontinyen repete.  Menm nou kontinyen lager pou zot.  Drayver bis letan trafik i so dan bomaten li i deside pa antre dan son siding – pa neseserman zot tou, me ki i fer li i aret dwat dan sa menm lale ki ou sipoze desann prezan ou ptipti par deryer li ou pa war devan prezan ou bezwen reste par deryer li, ziskan ler li sa drayver i deside debark tou son dimoun pey tiket oubyen ranbark son bann dimoun apre ki i ale.  Sa osi i fer trafik.

I fer en kantite trafik Mr Speaker.  E ozordi letan nou pe koz bann crossing ki nou annan dan semen, be letan nou get lavil, la Francis Rachel ti annan en lale ki  ti desann dan lavil e en lale ki ti tir presyon dan lavil anmenn li an deor lavil.  Ki nou’n war in arive avek sa ozordi?

Tou le de ozordi i pran trafik an deor lavil zot anmenn anndan dan lavil.  Sa i fer ki i annan en blokaz dan nou lavil.  E ozordi mazorite bann semen ki zot pe fer ek son pavement son pavement i o e letan lanbilans pe demann semen napa landrwa koman drayver dir nou antre dan pti siding, oubyen mont en kou lo pavement pou les lanbilans pase.

E letan mon pe koz lo lanbilans Mr Speaker i enportan pou mwan dir ozordi bann drayver lanbilans la ki nou dan sa Lasanble nou lager pou zot, rod zot kondisyon rod saler i annan zot ki pa serye laba deor.  Ou konnen akoz mon dir Mr Speaker parske lanbilans in pran zot en target 8er bomaten midi avek 4er zot ki zot bezwen?  Zot bezwen zis semen pase, akoz i pa anvi pri dan trafik.

Alor ki i fer li parey manrmay i kontan dir i met son ‘WIR WANR’ alor tou dimoun i avanse i les li pase ziskan dan roundabout ki mont Lopital apre i fini li.  I tennyen li.  Parfwa ou get zot dan laglas zot pe riye, akoz i ti bezwen zis semen pase, me letan ou koz avek bann profesyonnel lasante, letan lanbilans i pe demann semen ek en emergency i sipoze monte ziskan anler kot emergency i ete.  Me pa lanmwatye semen.  Tousala i bann keksoz Mr Speaker ki ede pou kre trafik dan semen e sirtou dan lavil.

E dernyen pwen ki mon ti a kontan koz lo la se disiplin ki nou, nou annan koman drayver enkli mwan menm.  Ozordi drayver dan Sesel napa disiplin.  Parey Onorab Valmont in dir drayver ozordi i aret kot i anvi, ler i anvi e i pran son letan i fer sa ki i oule.  Tou dimoun ozordi i arete lo laliny zonn i met hazard lo son loto, tou le 4 son lalimyer i alimen, ou ki park dan en parking ou riske ganny en tiket me bann drayver ki pa responsab zot aret kot zot anvi.

La si ou pe vin sorti kot Kingsgate House ou pe vini tou sa pavement drayver in park parske in al met NASYON in al fer kek konmisyon laba in al partou e selman li son transpor in park la lo pavement.

Tousala i bann sityasyon ki fer ki sityasyon trafik dan lavil i bloke.  Parfwa bann senp pti keksoz la si nou get kot Freshcut par egzanp vizavi avek stenn bis Lotorite ki responsab ki in fer?  In met en seri pilye pti poto feray tou dilon lo sa pavement akoz?  Senpleman dan aswar bann fanmir ki vin anvil zot anvi al kot Bluchers Grill zot park en pe anler aswar avek mwens sirkilasyon trafik pou zot pa blok the main road alor bann dimoun i vini Lotorite  konsernen in met bann pti pike feray toultour anler.

E si zanmen i annan en lensidan fire brigade i bezwen pase.  Lanbilans i bezwen pase kote drayver i sey rondi pou donn plas trafik pou pase?  Se pour sa mon dir parfwa napa kordinasyon oubyen pou nou ase ansanm pou nou gete.

E letan mon lo sa pwen ti annan en diskisyon la kot Hypermarket pou annan en lot roundabout zis parey kot Airport, alor kestyon ki mon pe demande eski en roundabout kot Hypermarket ki deservi bann dimoun ki pas kot Weeling ki pas deryer kot lekol pos segonder e zot, zot pas deryer kot NIE ti ete lontan e zot vin lo pon e zot al kot Hypermarket.  Eski en roundabout la a sa pwen i pou ede rezourd sirkilasyon?  Oubyen par egzanp in ganny propoze oubyen annan en passover.  Zis pou dimoun sorti ater pas anler desan kot Hyper fer son tranzaksyon e li i retournen san obstruct trafik oubyen san li i vey son lavi pou li koupe.   Se tou ki dimoun pe demande.

Mon krwar parfwa bann kordinasyon bann konsiltasyon i enportan pou nou ansanm gete ki mannyer nou kapab deal avek tou sa bann zafer.

E i annan en keksoz enportan ki fodre pa nou bliye.  Apard drayver Seselwa, nou osi annan bann drayver etranze spesyalman bann drayver endyen Mr Speaker ki dray bann gro, gro kanmiyon konstriksyon avek sepa kantite materyo la avek sepa konbyen zonm abor, zot zot pas dan tou direksyon.

Zot sey fer fason pou overtake tou transpor akoz zot krwar zot dray parey zot dray dan zot pei. Mwan mon’n al Lenn mon’n vwar mannyer setaki i rod son semen pase, me nou en pti pei parey nou Lalwa i bezwen aplik pou tou dimoun.

E ozordi avek sa i en problenm dan nou pti lavil parey nou pe dir.  Me selman i pou enportan pou ki Lalwa parey mon’n tann lo gro kanmiyon gro masin ki sipoze pase tel ler, i annan sa Lalwa, sa Lalwa i la li me selman pa pe ganny ranforsi.  Gard zot preferab aret ou 5 zot pou li get ou driving license pou zot get ou road tax si in peye, si pa’n peye kan i annan plizyer  oubyen ki i annan plizyer lezot keksoz ki zot kapab fer.

Alor dan sa travay letan nou pe koz lo sa Mosyon ki Onorab Aglae in anmennen mon krwar i pou enportan pou tou lazans, ankor enn fwa pou tou Lazans parey mon’n demande dan mon Mosyon taler pou nou tou kapab travay ansanm.

Rode ki fason nou kapab fer pou amelyor trafik be selman trafik i bezwen komans avek nou menm, enkli mwan koman drayver pou nou annan disiplin lo semen, pour ki nou menm nou, nou pa ganny war pe blok trafik ki lizour ki aswar dan okenn fason.

Mr Speaker sa ti mon kontribisyon pou Mosyon anmennen par Onorab Aglae e parey mon’n dir si Onorab Adelaide osi ti pou kontan dir enn pti keksoz lo la, me selman mwan les lezot dimoun ki annan lezot keksoz pou dir avan nou donn sipor pou Mosyon Onorab Aglae.  Mersi bokou Mr Speaker.

 

MR DEPUTY SPEAKER

Mersi Onorab Arissol.  Dernyen entervenan avan mon pou demann Onorab Aglae pou fer summing-up se Onorab Ramkalawan.

 

HON WAVEL RAMKALAWAN

Mr Speaker mersi bokou.  Mon krwar ki Onorab Arissol in pran bokou konmsi son lentervansyon in kouver bokou bann aspe ki fer nou dan sityasyon ki nou ete ozordi.  E mwan mon’n riye letan in koz lo bis SPTC ki’n pa’n antre dan son siding parey in devret fer oubyen ki blok partou apre sa ou’n pri deryer li e letan ou regard deryer li ou war en gro lansenny ki dir ‘’HOW IS MY DRIVING TODAY?’’ E seryezman parfwa i demann ou dir zot egzakteman ki mannyer zot driving i ete e ou pou telefonnen akfer ou pou telefonnen i en gaspiyaz letan?

Mr Speaker sa i anmenn mwan direkteman lo mon pwen – se la kourtwazi.  Lakourtwazi i manke lo semen.  Mwan mon’n deza la Biznak dan en pti  …semen i ptipti en garson in aret son transpor zis pou li al aste 2 sopin labyer.  Trafik in bloke konpletman.  Prezan mon pran li lo mwann menm mon dir avek li be ou pa war ki pou dir kot ou’n park i pa byen e i annan 2 laliny zonn?  Son larepons sete,’’ dir’’ (koumsa menm i dir ek mwan) – ‘’ dir sa malbar met son laboutik en lot landrwa.’’  Kourtwazi.  E nou tou nou’n pas dan sa bann sityasyon kot trafik in bloke ou war ou pe al dousman, pe al dousman, pe al dousman, en kou an gran zis ou war trafik zis i debloke. E akoz trafik i debloke senpleman set akoz sa dimoun ki’n santi li i neseser zis pou li aret dan milye semen in fini fer sa ki i bezwen fer e aprezan i ale.  I mank kourtwazi Mr Speaker e mon krwar  si nou ti egzers en pe plis kourtwazi, i ti ava annan plis trafik ti ava sirkil plis e i pa ti ava annan sa bann traffic jam parey nou annan ozordi.

E lo tou semen dan bomaten mon pas la lari Hangard pti semen e ankor enn fwa dimoun zis i park e letan zot park zot blok trafik konpletman.  Alor mon krwar ki nou bezwen definitivman annan plis gard trafik.  Annan plis dimoun pe okip trafik.

E mwan parfwa mon demande letan ou war 5 gard ansanm pe – enn i aret ou lot i regard ou lasirans lot i regard ou license 2 i debout i zis regard ou.  Mwan mon demande sa bann dimoun la zot devret, i devret annan plis zot dan bann peak hours, dan bann landrwa kot zisteman i annan sa bann problenm trafik.

E ki mannyer pou nou ede pou soulaz tousala?   Annou vin pli modern.  Ozordi i annan bann ok definitivman en scooter i enn bann fason pou nobou sirkil, be osi pa i osi annan bann bisiklet ki annan enn pti moter avek?  Bann motorized bicycles? 

Akoz e sa Onorab Valmont i kapab fer nou ganny kontak an Sinn pou nou ganny en bon kontak pou nou fer vini.

Mr Speaker sa ti a kapab senp.  Par egzanp dan Pointe Larue si par egzanp ou ti annan ou 2 gard 2 sa bann zenn gard ki lo 2 sa bann pti bisiklet ki … be pe sirkile enn an montan en lo an desandan, eski sa pa ti pou ede letan sa dimoun ti’n park dan milye semen ki i rezon pou li blok trafik ki pou dir avek li bouze.  Bouze e an plis ki sa mon krwar osi nou bezwen vin pli strik ek bann drayver.

Sa bann gard koumsa zot bezwen annan zot camera avek zot avek enn pti zafer ki montre kot ou’n park.  Konmsi sa dimoun pa kapab met sa ki pou dir en loto ki’n arete mete tir enn pti portre vitman e apre sa ou fer sa anba kot Licensing sa dimoun i ganny son tiket.

E krwar mwan bann pti keksoz koumsa Mr Speaker dan lavil ankor enn fwa si ti annan sa bann fasilite kot bann gard, bann gard bann traffic wardens lo sa bann pti bisiklet mon apele nou pa bezwen donn zot moter donn zot gran keksoz en bisiklet ki annan en moter ki annan bokou laba La Digue, akoz nou pa kapab servi en keksoz ki ava permet lapolis bouze?

So Onorab Aglae sa ki in dir i konsern nou tou.  I konsern nou tou.  E Mr Speaker mon krwar i annan en keksoz osi ki nou bezwen aksepte e Onorab Arissol in mansyonn sa mank kordinasyon.  Ozordi la mon tande pou dir i pe fer en trwazyenm lane Pointe Laure.  Ou a krwar enn ler zot asize aswar zot mazinen annou fer en trwazyenm lane e alor fer en trwazyenm lane.

Bann semen La Rivière Anglaise, Castor road en moman i one way sorti lavil pou al La Rivière Anglaise – en lot moman i one way sorti La Rivière Anglaise pou desann anvil.

Le Chantier en moman i en two way enn pti kou i en one way tou lede dan en sel direksyon.  Apre pe rode pou al antre dan l’Esplanade pou fer en lot lane.  Lot kote lo konblaz devan Yacht club en moman i annan en lane ki al dan lot direksyon enn pti kou lane in fermen la prezan ou annan ou en bout semen ki parey en appendix ki napa ni lenportans e zis lespas.

Mr Speaker napa kordinasyon e letan nou pe fer sa deba i annan en zenn Seselwa en arsitek ki dir avek mwan ki in deza ofer son servis e i annan lezot zenn Seselwa ki ti ava kontan ofer zot servis, pou ki i annan en plan entegral, en plan kot konmsi nou kapab fer keksoz, me zot pa enterese.

E pa bliye Mr Speaker e mwan sa i vreman sok mon letan ou regard lakantite lespas ki semen i pran dan nou pei.  Nou napa bokou later nou, me regard la kantite lespas ki semen i pran.

Ler ou pas Perseverance letan ou regard zis sa kantite later konble kot zot in fer semen, i tro bokou.  Tousala nou bezwen kordinen.  La regard Roche Caiman li menm.   Roche Caiman letan ti pe fer semen zot ti fer en semen pou ki ou kapab olye ou kapab desann ziska net anba pou ou pas anndan pou ou al Plaisance; apre sa zot menm zot ki fer sa semen, e letan zot fer semen zot koze ki mannyer sa i ava ed trafik pou pas la anndan.

Apre sa zot deside met 2 bar feray atraver pou zot dir non, non, non sa pou disrupt trafik dan Roche Caiman.  Konmsi annou konnen ki nou anvi fer?  E parey loter Mosyon in mansyonnen avek lezot dimoun, tou lazournen zis pe kas semen e PUC i pli gran culprit!  

Be PUC napa en plan li?  Konmsi kan eski PUC pou annan en long term plan?  Nek zis ou war zot, zot pe koupe.  La yer mon mont dan lakour Semen Serret pa tro bokou letan pase zot in koup lo kote drwat Semen Serret obor kot Msye Betsy, kot granmanman Onorab Vidot.

La zot pe koup ankor.  Dernyen fwa zot ti met en tiyo nwar – la zot pe met en tiyo oranz e ou poz ou lekor kestyon.  Napa kordinasyon e se pou sa rezon nou dan sa sityasyon kot nou ete.

E byensir dan milye lavil i annan bokou – ki mannyer ou ekspekte ki tou trafik ki sorti Beau Vallon, tou trafik ki sorti Beau Vallon pe desann anvil zot napa priyorite pou zot rantre dan lavil la letan zot ariv kot Quincy tandis ki priyorite i zis pou trafik ki sorti dan lavil ki pe koup Quincy.

I napa en balans.  E alors se pou sa rezon ki dan bomaten, trafik ki sorti Beau Vallon parfwa i depas Lasapel.  Senpleman akoz anba napa priyorite.  50/50 si ti met zis en lalimyer 50 poursan pe sorti anvil ti ava pase, lot 50 poursan sorti Beau Vallon ti ava li osi pase.

Mr Speaker so mwan mon krwar ki nou bezwen kordinasyon nou bezwen nou bann arsitek osi pou ede.

E apre i annan en lot keksoz ankor ki drol.  Letan ou sorti Eden Island i annan en dual carriageway e lo en dual carriageway son bout kote dwat i servi pou overtake egzakteman parey ant Providence avek lo Airport. Me nou ki nou pe war lo sa bout semen.

Lo sa bout semen dimoun i lo bout kote drwat i ape cruise. Be i met retar trafik e aprezan ki ou war, ou war drayver pe sorti lo en kote pe sey pas dan milye pe sey al lot kote laba, drayver i bezwen konpran ki pou dir sa bout dual carriageway lo son kote dwat sa i pou overtaking e si nou ti annan sa disiplin ankor en fwa ti ava en fasilite.

Mon personnelman mon ankor pe regard sa semen sorti la kot roundabout pwason la pou ariv ziske laba.  Mon war zot pe elarzi semen e i montre ou pour dir i napa okenn plan.  Se parski detrwa lannen pase nou ti plant tou sa bann pye dibwa e nou ti war ki pou dir pye dibwa i bon ensidswit, e apre sa pye dibwa letan in ariv son grander kot in mature la prezan nou pou koup tou pye dibwa la aprezan ki nou pou elarzi semen e nou pou al met en roundabout.

Parey Onorab Arissol in dir mwan mon zis pa war kote ki sa roundabout pou fer, pou tir trafik sorti lo semen Mont Fleuri pou anvoy lo devan Hypermarket?  Pou tir Hypermarket pou anvoy Mont Fleuri.  Mont Fleuri i deza plen sa semen ki mont dan direksyon Sid letan i ariv 4er i deza bloke.

Eski nou pa pou al dan en lot zafer apre sa ankor enn fwa planifikasyon. Planifikasyon nou tou ki’n voyaze nou’n war ki pou dir si ou annan en dual carriageway letan ou apros roundabout la i annan 2 lane lo roundabout.

Me nou, nou sorti lo en one lane nou rantre dan en two lane roundabout e apre sa sorti lo en two 2 lane roundabout nou rantre lo en one lane semen.  E se pour sa rezon ki toultan dimoun pe menase, personn pa oule ekout kanmarad, zot mont lo televizyon zot fer bann progranm.  Zot dir avek ou sa ki lo kote dwat i annan priyorite; be ki ou pou fer letan ou annan priyorite sa boug tou dimoun lo roundabout napa en landrwa ki annan pli gran mess ankor ki lo roundabout!

La sa roundabout Trwa Zwazo set en mess.  Tou dimoun i veye pou li ganny loportinite pou li ale.  Ou pe al lasose lenfirmite!  Ou pe mont bor kote Mont Fleuri lenfirmite! Ou sorti Mont Fleuri pou ou vin dan direksyon La Rivière Anglaise lenfirmite menm!  Zot annou annan en plan! Annou annan en plan!

La lo loto; byensir la kantite loto parey Onorab Aglae in mansyonnen, eski napa en plan?  Eski zis nou pou dir fer rantre loto? Fer rantre loto menm?  Be i bezwen at some point annan en keksoz.

Singapore i annan en prensip.  Singapore i annan en prensip ki pou son grander in servi li byen.  Ou pa kapab zis fer vini loto.  Fodre ki apre en serten tan la i ava dir ok sa bann loto kestyon polisyon ensidswit zot bezwen ganny sorti.  E se sa bann loto ki nou a en serten moman nou ti pe fer vini dan nou pei.  Be nou, nou pou zis les loto rantre?  E nou pa war ki pou dir i pou annan bann konsekans? E son konsekans nou deza pe santi li.

E apre Mr Speaker sa en keksoz ki mon’n deza mansyonnen depi nou ti ankor dan Lasanble kot National Library.  Fodre nou entrodwir en red line no parking area.  Ou  annan, single yellow line – double yellow line apre sa red lineRed line means si ou’n park la ou loto i ganny towed away, parske la si ou park ou pe blok trafik.

E mon a donn zot en legzanp kot mon santi i devret annan sa me la Quincy, semen Quincy ki mannyer loto i kapab park la devan laboutik Deenu blok tou trafik zis pou anmas en pasaze?  La i devret red line!

Si ou park la krwar mwan si nou ti annan sa sistenm kot i ganny towed away, dimoun ti pou bouze. Dimoun ti pou vin serye.  Oubyen en fine ki vreman so!  En fine ki for en kantite.  E Mr Speaker nou bezwen al dan bann direksyon ki vreman serye, pou nou kapab reganny en serten kourtwazi reganny en serten disiplin e sa i ava ede pou ki trafik i ava sirkile dan la fason ki i devret ale.

So mwan mon pou se sa mon kontribisyon definitivman mon pou siport sa Mosyon.  Selman mon ti pou kontan konnen lekel sa bann serten servis ki Onorab i krwar i devret sanz zot ler.  Parske letan ou pe balanse i annan serten servis wi kot i annan bokou dimoun ki pe rode, me selman an menm tan osi fodre ki nou kapab balans sa osi.  E mon krwar ki sa propozisyon pou nou e sa i enn bann size ki mon’n ganny sans koz lo la se sa government mile.

Ou war si bann servis Gouvernman e sa propozisyon ki sorti la vizavi Lakour an desandan lo kote drwat kot depi ant Shell avek isi  e mon krwar l’Inde i sipoze pe donn en sipor kot nou ti annan nou tou bann servis Gouvernman sa i ti ava permet – konmsi nou ti ava apel li en government mile.  Sa ti ava permet ki en dimoun ki pe desann ki pe vin rod servis Gouvernman, i konnen ki poudir letan mon sorti kot Imigrasyon, si mon bezwen sot en pti kou dan en lot departman, i lanmenm la.  i pa bezwen pran son transpor pour li deplase!  I pa bezwen sorti Independence House pour li al kot Unity House, oubyen pe al Oliaji Trade Centre, oubyen lot.  Ou konnen ki poudir tou bann landrwa Gouvernman, zot la!  E sa dan li menm li ti ava fasilit keksoz.  E letan mon regard Malavois kot zot in, nou premye parking, kot nou annan bann storey, ensidswit, sa osi tou nou ti ava kapab, i ti ava kapab annan son prop parking la – kot dimoun i desann, i park dan en landrwa e sa i fasilit keksoz.

Alor Mr Speaker, mon krwar ki definitivman i annan keksoz pour nou fer.  E mon krwar ki, bon nou pou definitivman sipor sa Mosyon.  Me annou osi fer en lapel avek bann drayver – silvouple montre plis kourtwazi!  Telefonn dan kwen likou letan ou pe drive.  Konbyen fwa trafik i bloke senpleman akoz i annan en dimoun, son telefonn in pri dan kwen son likou?  E alors i bezwen pe manoeuvre.  E alors i pe drive dousman.

Servi son sistenm Bluetooth par egzanp.  Servi son sistenm Bluetooth – fer li pas atraver son speaker.  Servi – met microphone on lo, met speaker on dan ou, lo ou telefonn pour ki ou a kapab koze san ki ou bezwen pe fer sa bann keksoz.

E pourtan, tousala Lalwa i la li.  Lalwa i la me selman i annan en lese fer!  License – pa ti koz lo License pour vin pwen.  En sistenm pour ki dimoun i kapab pran son responsabilite, weh.  So, Mr Speaker, nou kapab nou kapab – be akoz ki nou Lasanble ki diskit sa bann keksoz?

Be sa bann dimoun dan sa bann Departman la, ki ansarz la, be zot pa diskite zot?  Be akoz nou letan nou fe en deba, nou vin avek mil solisyon?  Be zot, letan zot asize – akoz zot travay avek Gouvernman, nek zis zot, zot file?  Zot zis reve?  Nou akoz nou bezwen retourn kot Lepep Seselwa, mou, pour nou ganny elekte, alors nou, nou reflesir?  Be nou demann zot osi tou pour silvouple, servi en pe zot lentelizans e donn Seselwa en good deal olye ki nou pe soufer parey Onorab Aglae in mete dan son Mosyon.  E ki mon krwar nou ava kapab bouz devan.

E SPTC, silvouple, tir sa lansenny – ‘HOW IS MY DRIVING TODAY?’  Akoz ou bann drayver – i annan en bon pe ou bann drayver, zot pe zis blok trafik.  Nou konnen ki poudir zot annan bokou bann bon drayver, me train plis zot bann drayver.  Parski sa bann gro bis ki aswar zot met zot full light, e ou dan ou loto, menm si ou sey flash avek zot, kot zot asize laba anler, zot napa okenn lenpak lo zot.  Zot kontinyen mars ek zot full light.  E nou, ek tou bann dimoun ki drive, sa bann dimoun i soufer.  Mersi bokou Mr Speaker.

 

MR DEPUTY SPEAKER

Mersi Onorab Ramkalawan.  Petet zis avan mon demann Onorab Aglae pou sum-up, zis mon a met en pti largiman ekonomik ki Gouvernman osi i devret realize.  Parske mon konnen apre midi bokou solisyon in ganny propoze lo tou le 2 kote.

E petet enn bann largiman Gouvernman i kapab vin avek se ki zot napa resours pou al met flyover, pou refer semen, eksetera.  Me si zis nou konsider pour ne moman ki i annan omwen 20mil loto ki sirkile tou le bomaten.  E si nou met ki sakenn pe depan plis posibleman R10 an plis bennzin par zour – sa i vin R200mil par zour.  E dan en lannen ou pe koz probableman R70milyon.  Dizon en $5milyon ki ou pe depanse san realize an plis ki ou devret.  E vwala larzan ki ou kapab deswit servi pour ou kapab met en pe dan lenfrastriktir.  E sa i zis dan 1an sa, zis dan 1an.  Mazin konbyen lannen ki nou pe pas ladan.  Alor i annan en benefis ekonomik pou seryezman asize, revwar solisyon.

Mon pa krwar i devret en letid tro long.  Parske nou’n koz lo la pandan plizyer lannen e mon krwar si zot vreman deside, asize fer desizyon.  Fer desizyon ki fodre fer dan sa pei pour kapab redwir trafik, mon krwar nou pou war nou sityasyon lo semen dan bomaten e dan apre midi amelyore.

E avek sa, mon ti ava envit Onorab Aglae pou fer … pour summing-up.

 

HON EGBERT AGLAE

Mersi Mr Speaker.  Mon a dir mersi tou bann entervenan ki’n entervi lo sa Mosyon.  Mr Speaker, la ler ki i ete egzakteman 4. 56 e tou travay in large, e antretan ki bann Manm ti pe koze, mon pe ganny bokou mesaz.  I annan ki dir ou, la Pointe Larue pa borde.  I annan ki dir ou, mon pe monte la zis kot Kordgard santral, in fini pri, in fini bloke.

Mr Speaker, sa i larealite ki nou bezwen fer fas avek bomaten e apre midi.  E dan midi osi tou, parey ler nou al rod take-away.  Mr Speaker, i enportan, I enportan ki nou pran sa size serye.

E bokou bann Manm in met rekomandasyon la devan.  Si ozordi la, nou’n arive 6 mwan dan en lannen – e mon’n nonm en sif taler kot nou pou annan nou, i annan plis ki 31mil transpor.

E sa prosen 6 mwan, pou annan ankor 1300 ekek transpor ki pou antre lo semen.  Travayer ki pe ogmant a en to lentere, en to 3poursan – ki pou fer ki anviron 1500 travayer logmantasyon par lannen.  Mr Speaker, sa i penn sa portre pou war poudir ki si nou pa met lanmen lo sa sityasyon trafik an menm tan avek sa ler ki nou travay, keksoz pa pou zanmen sanze.  Nou pou kontinyen fristre lo nou larout.

Mr Speaker, bokou rekomandasyon in ganny fer kot i konsern bon planifikasyon lenfrastriktir, parey semen i bezwen reganny aranze.  Bann roundabout ki nou’n koz lo la.  La presizeman i annan roundabout Airport kot manm piblik pe fer konplent.

I annan 2 akse ki’n ganny fer swadizan pou transpor antre ki’n ganny bloke.  Pour ki rezon ki nou’n bloke e pour ki rezon nou’n fer li?  Nou annan bann transpor, bann long haul vehicle ki lontan ti annan en ler ki ou bezwen pase.  Ozordi ou war nenport ki pe pase – gro container, gro isi, gro laba.  Tousala pe ede fer en serten konzesyon dan trafik.

Mr Speaker, i annan serten endividi ki dir ou, dan vakans zot pa tro ganny bokou problenm trafik – akoz?  Napa lekol.  Alor, Planning Authority i bezwen komans konsider bann devlopman bann lekol skoler ki, kote ki zot, sa bann lekol i merit plase?  E ki zot semen alternativ ki zot kapab servi pou fer sir?

Mon konnen Lekol Endepandan, pa tro lwen ek nou la, in fer en pa dan sa laliny – ki in fer li en lot fason pase.  Kot ou vini ou drop ou zanfan, i pas lo en bon i ale.  Me si i annan lezot lekol ki kapab fer menm sistenm, i pour enportan.

Mr Speaker, bokou konzesyon i vini akoz bokou servis i santre, i santralize.  Dan lavil ozordi, ki nou pe vwar?  Tou dimoun i bezwen vini pou vin servi son sistenm, sa sistenm banker.  I dir ou mon bezwen war – al dan biro kot Housing, pou al HFC, pou al kot Welfare, Oceangate House, pou al kot biro laba Unity House, i bezwen al Ankour.  Tousala i bann servis ki bann dimoun i bezwen, me selman zot pe vin dan en ler zot bezwen rann lapel dan lavil.

Nou annan kot Lopital osi, bokou pasyan i bezwen rann lapel 8er bomaten e vin ankonbre Lopital.  Tousala i bann amelyorasyon ki nou kapab fer si nou sanz serten flexible hours ki fer ki keksoz i ava redwir.  Dan lavil, sirtou ler ou pe get lavil – ou annan kot Trinity House, kot ou annan bann pedestrian crossing, kot legliz i annan enn, kot kordgard dimoun pe koupe ale vini, kot Quincy i bezwen koupe pour al Carpark Pirat, kot Unity – Orion Mall i menm zafer menm.  Be si zis nou kapab enplimant bann overhead pedestrian crossing, i pou ede ki trafik i sirkil plis.

E Onorab Afif in nonmen ki en Bidze ki ti kapab ganny mete ki menm si nou pa pe kapab fer li deswit tou, me at least par en lannen 3 a 4 sa bann keksoz i kapab ganny materyalize

Mr Speaker en lot laspe enportan annou ankouraz dimoun pou petet servi plis nou servis bis.  Ozordi SPTC pe commute aprepre 30 mil dimoun par zour e si lekol ti larg 4er parey travay i large nou sibir ankor plis, plis problenm trafik.  Alors Mr Speaker i ava annan bann landrwa rezerve ki bis i pase ouswa bann bike ouswa scooters i kapab pase pou li pa okazyonn plis konzesyon.

Mr Speaker ler nou pe koz desantralizasyon servis i enportan.  I annan koleg Onorab Arissol in nonm dezyenm lavil, wi i enportan pou nou desantraliz sa bann keksoz.  Akoz i a fer ki dimoun pa pou zis pran en bis pou li desann swa pou li vin sers son larzan ouswa pou li vin pey son bill si sa bann servis i desantralize definitivman i pou annan en lenpak rediksyon dan konzesyon trafik.

I annan ki’n dir met plis ATM partou.  I enportan wi, ou met plis ATM i enportan me selman ou pou tir larzan si ou bezwen desann anvil pou ou al depans sa larzan i pa pou fer sans.  So i annan bann servis ki nou bezwen sanz son serten ler laboutik akoz tou laboutik ler in ariv 5er i bezwen fermen?  Akoz ler 5er i sonnen bazar i bezwen fermen li osi?  Mon krwar  i enportan pou nou revwar sa bann ler byensir avek serten remaniman avek nou staff kot nou bezwen koz ek travayer pou dir look nou bezwen dir ou pou travay tel ler e li i ava aranz son progranm.

Mr Speaker en dimoun osi in fer mwan konpran pour dir si mon pou pran en taksi pandan peak hours i kout mwan pli ser akoz sa drayver i dir ou i pe bril plis fuel si i ti pou ariv li 200 roupi i pou pey li 300 a 400 roupi i en bann lefe.  En drayver pick-up i parey i dir ou non sa ler mon pa pou apre sers ou materyo les apre, apre mon ava vin serse.  Tousala i bann kou e i kree bann retar dan progresyon e retar dan nou kapab bouz pli devan.

Mr Speaker en laspe enportan ki’n nonmen la se policing the road.  Mon krwar i enportan.  Bann drayver i bezwen pli vizilan annan pli kourtwazi parey in ganny dir.  Akoz nou tou nou bezwen servi sa menm servis kot nou pou pase e nou tou nou bezwen par ler give and take ou bezwen give and take.

Mr Speaker i annan bann semen ou bezwen krwaz ek kanmarad pou koup enn pou al lo lot, si napa bon korperasyon tou kou sa ki deryer par deryer son kanmarad li i pou bezwen soufer i bezwen espere ouswa akoz ou pa pe give and take.

Mr Speaker i annan bann pei sirtou parey Lerop ki’n enplimant bann flexible hours e nou’n war pou dir bann benefis ki vin avek.  Son benefis se ki ou kapab ganny en pe letan pou ou fer serten byen personnel, ki ou bezwen fer swa kot lakour ouswa petet pas kot en zanmi ouswa en fanmir.

I annan lefe kot in redwir bann commuting time ki ou bezwen espere dan trafik e sa, sa i save ou, ou fuel cost.  I redwir stress ki related avek sa trafik e ou antre dan travay enn pti pe pli an souriyan mon kapab dir.  I redwir overload travay akoz i annan kontinite si ou sipoze komans 8er e ler mwan mon pou vini petet 10er ouswa ou pe ale 3er mwan mon pe pick up pour mwan.   So i annan en kontinite mon kapab pran sa ki ou’n pa’n fini mon kontinyen fer ziskan tar.  Tousala i ede pou fer redwir sa bann stres.

In prouve osi i redwir dan turnover travayer.  Travayer i pli azour, i pli alez dan son travay e i kontan i napa sa presyon lo li.  In osi prouve ki i redwir serten kou asosye avek nou lavi toulezour tel ki parey si ou pe kit ou zanfan long hours kot en Daycare ouswa en child minding i kapab kout ou plis ….

Petet enn ou manm fanmir li ki fini travay pli boner i kapab pase pran ou zanfan ki ou pa bezwen kit li …

Mr Speaker so i annan en kantite benefis ki kapab vin avek si nou sanz serten ler travay ki kapab re-aziste.  E i annan Onorab Lopozisyon in demande ki kalite bann servis travay ki nou kapab petet konsidere.  Onorab Leader Lopozisyon (sorry) nou annan parey bann servis finansyel bann financial sector ki kapab ganny antre ladan ok? Nou annan bann IT ki donn IT, nou annan telekominikasyon bann dimoun ki petet ki pe travay dan bann designing bann designer.

Nou annan bann enstrikter ki kapab antre ladan menm nou kapab met nou bazardye ozordi ladan ki li i pa bezwen desann granmaten, si i konnen pour dir nou konnen ler nou pe fini 6er nou pou kapab ganny en keksoz pou nou al kwi tousala bazar.

I annan bann sales outlet, bann sales agent, bann marketing.  Landrwa marketing nou annan bann travay parey farmasi, bann dokter prive, klinik prive tousala i bann keksoz ki nou pe servi bakery ,pou nou al aste nou dipen, i bann keksoz ki nou kapab aranze ki i a ede.  I pou ede akoz si nou kapab aranz sa me selman lo onus parey nou dir an Angle i reste lo Gouvernman pou li kapab enplimante i reste lo bann antite pou zot vin pli proaktiv.

Bann Lazans pou vwar kot i annan bann defayans pa per pou met devan pou enplimante pa per pou met devan Gouvernman pou dir mon bezwen tel resours pou mwan kapab fer tel keksoz akoz sa pou ede amelyor kou lavi.

Mr Speaker pou terminen en keksoz enportan dizon par egzanp La Misère tou kou mon bezwen nonm La Misère akoz mon fer sa semen bokou si ou pe monte dan peak hours i ariv en aksidan Mr Speaker ou pou bezwen fer ou 1erdtan.  Pointe Laure menm zafer menm semenn pase ouswa de semenn pase avan lo ter kot ti kas ros avan kot UCPS i antre la, Anse Faure en bis mon krwar en transpor i tonm lot kote semen ou bezwen fer ou hours.

I annan dimoun i bezwen divert pas par La Misère pou li kapab arive.

So i bann keksoz ki nou ti kapab envite dan en fason si nou kapab amelyor serten nou bann lenfrastriktir.  Mr Speaker i annan ki’n koz lo proze tinel petet proze tinel i kapab ede dan le fitir.  Nou’n tann nonm lo tren – fame tren ki ti ganny propoze, akoz letan nou get dan bann pei parey Lerop i annan bann ferry services.  Nou annan metro – bokou dimoun i kit zot transpor zot servi metro me Sesel nou, nou ti kapab si nou ti annan en servis bis ki pli efektiv, pli konfortab, mon kapab dir pli konfortab petet bokou dimoun ti a kit son transpor i ti a pran sa bis i ti a desann.

Me ou konnen pou nou par-ler, ler bis i plen ou bezwen debout.  Mwan sorti Port Glaud pou debout ziska anvil ek sa bann montanny ek sa bann kontour i pa ankouraz en dimoun pou kit son transpor se li.

So nou bezwen marye en pe sa bann teknolozi modern vin enn pti pe pli inovativ pli konsyan pour dir imen i bezwen bouze, imen i bezwen deplase.

Alors Mr Speaker mon pou remersi tou bann Manm ki’n partisipe pou donn zot kontribisyon mon espere ki bann ki’n ekoute deor ki annan en say dan sa bann konsern ki nou’n nonmen pou zot pran li an aksyon.  Pran li an aksyon akoz sityasyon trafik i pa pou vin pli byen, si nou pa pran bann aksyon e lendikasyon data ki nou annan devan i montre pour dir keksoz pe vin pli worse, si nou pa pran aksyon imedyatman.  Alors Mr Speaker.  Mersi.

 

(APPLAUSE)

 

 

MR DEPUTY SPEAKER

Mersi Onorab Aglae in ariv ler pou nou pran en vot lo sa Mosyon ki lir konm swivan’ “Avek bi pou redwir traffic jam pandan dan bann peak hours, sa Lasanble i demande ki Gouvernman i fer en letid, pou war posibilite sanz ler ki serten servis piblik i donn zot servis, pou evite ki nou travayer i komans e fini travay menm ler”.

Tou bann Manm ki an faver silvouple lev zot lanmen?  Okenn Manm ki kont? Madanm Deputy Clerk ou a donn nou counts.

 

MADAM DEPUTY CLERK

Mersi Mr Speaker 18 Manm in vot an faver sa Mosyon.  Personn kont.  Mersi.

 

MR DEPUTY SPEAKER

Ok 18 Manm in vot an faver alors sa Mosyon in pase.  Nou annan nou, nou’n fini desot 5er savedir sa prosen item en lot Mosyon par Onorab Mondon i ava vin dan nou prosen sitting.

Mon ti a zis kontan avan nou adjourn ozordi zis fer en lanons ki demen pou annan en workshop kot Eden Bleu kot tou bann Manm bokou bann Manm Lasanble pou ale.

Sa workshop i ganny organize par lanbasad Ameriken e i annan en envite msye Lex Paulson ki pou koz lo la demokrasi la transparans e zisteman en size ki nou’n koz lo la bomaten Anti-Koripsyon.

Pou osi annan bann manm Lapres e lezot envite e pou menm annan bann Manm Sekretarya Lasanble Nasyonal ki pou prezan.

Alors zis pou lenformasyon tou bann dimoun ki pe ekoute.

Be avek sa nou’n ariv lafen travay pour ozordi e nou pou rezwenn ankor Mardi le 26 Zen 9er bomaten.

 

(ADJOURNMENT)