Home » Verbatim » 2018 » Verbatim Wednesday 4th July, 2018

Verbatim Wednesday 4th July, 2018

NATIONAL ASSEMBLY OF SEYCHELLES

 Wednesday 04th July, 2018

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bonzour tou Manm Onorab e bonzour tou Manm piblik ki a lekout e ki pe swiv travay Lasanble Nasyonal.  Nou pou kontinyen nou travay bomaten e la devan mwan lo Order Paper nou annan premye Mosyon e Mosyon i move par Onorab Terence Mondon.  Mon ava pas la parol avek Onorab Mondon pou li prezant son Mosyon.  Onorab laparol i pou ou.  Go ahead.

 

HON TERENCE MONDON

Mersi Mr Speaker.  Bonzour tou bann koleg MNAs e tou bann dimoun ki pe ekout nou Lasanble ozordi bomaten.  Mr Speaker mon prezant avek nou Lasanble Nasyonal sa Mosyon swivan;

Vi ki in annan plizyer propriyete lakonpannyen piblik COSPROH dan lepase sa Lasanble i fer en demann pou ki Oditer Zeneral i fer en lanket detaye pou etablir si okenn dimoun oubyen lakonpannyen prive in benefisye dan lavant sa bann byen COSPROH.  Si ti annan okenn konfli lentere dan sa bann tranzaksyon e si reveni Gouvernman a okenn moman i ganny konpromi.

Mr Speaker sa Mosyon i enportan akoz i pou temwanny langazman Lasanble Nasyonal pou asire ki resours Leta i ganny byen zere pou ki tou Seselwa i a kapab benefisye.

Atraver sa Mosyon nou pe osi kestyonn plizyer laspe otour lavant sa bann propriyete Leta ki ti tonm anba direksyon sa lakonpannyen piblik apele COSPROH ki vedir Compagnie Seychelloise De Promotion Hotelier. 

Mr Speaker COSPROH  ti ganny etabli boner lannen 80 le 22 Out 1980 e sa lakonpannyen ti propriyeter sa bann lotel swivan.  Lo Mahe COSPROH ti annan Vacoas Village, Beau Vallon Bay Hotel, Mahe Beach Hotel, Barbarons Beach hotel, Bel Ombre Hotel, North Holmes Hotel  e Reef Hotel.

E lo Praslin COSPROH ti annan Vacanze, Cote D’Or Lodge, Praslin Beach Hotel, Flying Dutchmen Hotels.

Bonner lannen 90 Mr Mukesh Valabjhi ti ganny apwente Chairman Egzekitiv COSPROH e plizyer lannen pli tar Mr Valabjhi ti ganny sa responsabilite koman Sef Egzekitiv sa lakonpannyen pou negosye e vann tou bann propriyete ki mon’n mansyonnen.

Tou dernyerman nou’n aprann ki Mr Mukesh Valabjhi i enn bann propriyeter en konpannyen ki apel Capital Management Group.  Ler nou regard en pe pli ofon nou vwar ki an 2004 lotel Fisherman ‘s Cove avek Le Meridien Barbarons ti ganny vann avek Hotel Property Limited ki i en lakonpannyen offshore anrezistre dan enn bann zil Caribbean apele British Virgin Island.

Lenformasyon ki nou kapab ranmase otour sa tranzaksyon i fer nou poz ankor bokou kestyon tel ki lekel Direkter Hotel Properties.

an menm loptik nou ti dekouver tou dernyerman ki Madanm Sarah Rene i propriyeter Vacoas Village tandis ki Reef Hotel ti ganny met dan lanmen Msye Francis Savy.  Lotel Vacanze Praslin in osi size en gro skandal ki enkli frod finansyel dan en lakonpannyen Italyen apele Parmalat.

Lavant Beau Vallon Bay e Praslin Beach Hotel e Berjaya Hotel en lakonpannyen Malezyen in anmenn bokou kontrovers li osi ki fer nou ankor kestyonn lentegrite sa bann tranzaksyon.

Ler nou regard balanse sheet serten sa bann lotel zis avan zot ti ganny vann nou konstate ki tou sa bann propriyeter ansanm i reprezant en reveni sibstansyel pour pei me malerezman i pa kler konbyen sa bann propriyete in ganny vann e konbyen larzan ki’n vreman antre dan Kof Leta.

Atraver nou resers nou’n aprann ki bann vre propriyeter sa bann lotel ti bezwen surrender zot byen anba lord Prezidan Larepiblik.

I enportan pou note ki plizyer fanmir in soufer atraver en tel aksyon e i annan parmi sa bann propriyeter ti menm ganny persekite e deporte pou rezon politik.

Ozordi nou kapab apresye ki Seselwa in nepli per pou eksplik zot konsern lo lavant sa bann byen Leta kot bokou kestyon pe ganny demande.

Par egzanp ki prosedir ki ti ganny met an plas pou lavant sa bann propriyete?

Eski ti annan en prosesis tender?

E akoz ki dan bann dosye ki dan lofis anrezistreman napa okenn rapor evalyasyon pou sa bann propriyete?

Akoz ki zis en sel dimoun ki ti pe ansarz tou sa bann tranzaksyon kot Chairman li menm li Sef Egzekitiv lakonpannyen?

Akoz ki serten sa bann propriyete in tonm dan lanmen serten pros ansyen Prezidan Rene?            Eski sa bann propriyete ti ganny vann a son vre pri sa letan e akoz ki Hotel Properties Limited ki propriyeter Le Meridien Barbarons Fishermen’s Cove i anrezistre dan en zil Caribbean?

Finalman; eski i annan dimoun ki’n akt koman en front pou serten Seselwa? Tou sa i bann kestyon ki nou bezwen demande.

Mr Speaker koman en Lasanble serye nou bezwen rod larepons pou tou sa bann kestyon. Nou bezwen konnen si in annan koripsyon ki’n pran plas dan lavant sa bann byen Leta.  Nou bezwen fer sa pou nou frer e ser Seselwa.

Annou fer li pou nou zanfan akoz se zot ki pou ziz nou demen.  I kler ki nou bezwen etabli en meyer platform gouvernans pou nou pei.

Mr Speaker sa i anmenn mwan lo rezon det sa Mosyon ki devan nou Lasanble.  Enn parmi bann rezon prensipal pou en tel Mosyon zisteman se sityasyon e kondisyon lavi ki nou pep pe fer fas avek.

Mr Speaker en gran poursantaz nou popilasyon pe viv dan bann kondisyon difisil e menm deplorab.  Nou fabrik sosyal pe kontinyen degrade.

Pou en gran mazorite fanmir, zot bezwen de baz tel ki lakaz semen pa pe ganny realize e zot pe kontinyen viv lo petet pourtan nou en pti pei avek enn pti popilasyon selman 92mil dimoun.  Kestyon ki nou pe kontinyen demande e ki nou bann viziter i souvan poze se akoz ki ankor dan sa leta?

En lot rezon pou anmenn sa Mosyon se promes ki nou dan lekip LDS ti fer avek pep Seselwa ler nou ti dir zot ki nou pou kler tors dan tou lenstans e dan tou kwen kot nou santi loder koripsyon.  Nou lekip isi dan sa Lasanble i krwar dan sa promes ki’n fer avek pep Seselwa e atraver sa Mosyon nou pe osi renouvle nou langazman anver sa pep.

Mon trwazyenm rezon i swiv bann kestyon ki pep Seselwa pe demande, e nou’n vwar ki zot annan tou merit pou kestyonnen.  Kestyon ki pe ganny demande se ki mannyer ki Msye Valabjhi ki ti ansarz lavant sa bann lotel in akimil sitan larises?

Wi Mr Speaker mon santi ki i nou devwar ensi ki nou responsabilite pou anmenn laklerte pou nou pep.  Alor nou bezwen fer en lenvestigasyon pou etabli si i annan en konneksyon ant larises ki sa Msye in prosede ozordi avek lavant bann resours Leta dan lepase.

Zis an pasan annou osi mazin ki pandan lannen 2002 ti annan en fame tranzaksyon 50milyon Dolar ki ti al lo kont SMB kot Mr Valajhi in ansarz pou plis ki 20an.

En tranzaksyon finansyel ki pa’n kit okenn latras kot bann departman konsernen.  Alor Mr Speaker resers ki mon’n fer atraver enternet i fer mwan dekouver ki Mr Valabjhi in fer plizyer lenvestisman dan bann propriyete dan plizyer pei tel ki Singapore, Dubai e menm Bulgarie.

An 2007 par egzanp zis lavey reform ekonomik avek IMF Mr Valabjhi ansanm avek en partner Sengapouryen Msye Kiso Bouksani ti aste 6 letaz dan en batiman Singapore apele Samsung Hub pou en sonm 122 milyon Dolar Sengapouryen.

Bokou businessmen Seselwa i ankor rapel difikilte ki zot in fer fas avek pou zot soutenir zot biznes pandan sa peryod kot i napa deviz etranzer.  E plizyer parmi zot ti menm bezwen ferm zot biznes.

Ankor 2007 Mr Valabjhi ti aste 154mil 212 share dan en konpannyen Franse apele Net2s pou en sonm 623 mil Ero e i ti fer sa lo non 3 lakonpannyen apele  Brent National Lockson Investment e Golden Dragon.

Atraver son lakonpannyen Capital Management Group – Mr Valabjhi ti osi annan a en moman 50 poursan par dan en lot batiman 12 letaz Singapore apele Finexi.

Sa msye in osi fer en lenvestisman resaman dan en batiman 4 letaz Katoom Junction Singapore. 

Mr Valabjhi i osi annan par atraver son lakonpannyen Capital Management Group dan Midway Resources International en lakonpannyen anrezistre Cayman Islands e zot pe fer leksplorasyon petrol e gaz natirel Kenya e Nigeria atraver zot subsidiary company apele Zararam.

Mr Valabjhi i osi en Direkter lo SoftBank …. Investment Fund. Lakonpannyen Soft Bank i enn parmi bann gran lantrepriz Zaponnen dan servis internet e telekominikasyon.

Mr Valabjhi i osi en Manm Board en lakonpannyen apele Trisums Investment. 

Mr Speaker nou’n osi aprann ki Capital Management Group lakonnyen Mr Savy ansanm avek Msye Kishor Bouksani in envestir dan sa proze 300 villa e 17 lakaz rezidansyel lo zil Felisite pou en valer anviron 110milyon Dolar Ameriken.

Mr Speaker lalis i long e i demontre nesesite pou antreprann en odit ki ava ed nou Lasanble e pep Seselwa konpran pli byen si resours Leta ti ganny konpromi oubyen ganny servi a okenn moman pou benefisye serten endividi, oubyen lakonpannyen prive.

Mr Speaker sa Mosyon ki devan nou Lasanble i osi vin atraver en Mosyon anmennen tou resaman par Onorab Larue, kot nou ti dekouver ki serten endividi dan sa menm lantouraz ti’n akimil plizyer morso Later Leta.

Seselwa ti vreman soke letan zot ti aprann sa kantite labi dan bann tranzaksyon Later Leta.  Parmi sa bann tranzaksyon i enkli later konblaz ki Seselwa i ankor pe peye atraver nou det eksteryer.

Sa ti fer nou realize ki byen Leta ti pe ganny servi pou anrisir enn pti group dimoun privilezye dan nou pei e kot larestan popilasyon pa benefisye menm si zot annan par ladan.

Sa ki’n nou’n dekouver dan bann tranzaksyon later Leta i donn nou rezon pou krwar ki sa menm labi in kapab arive dan lavant bann lotel anba lakonpannyen COSPROH

Mr Speaker sa Mosyon pe eksprim non selman konsern pep Seselwa lo lavant sa bann propriyete Leta, me pe osi transmet en mesaz byen kler.  In nepli tan pou pran pep Seselwa koman bann lenbesil.

Seselwa i oule war bann aksyon konkret ki pou permet li vwar pli kler e konpran pli byen ki’n arive avek byen Leta dan ki zot osi zot annan par.

Byen pep Seselwa pa devret a okenn moman e dan okenn lenstans, ganny konpromi oubyen servi koman propriyete personnel en endividi.

Menm si nou’n pa’n vwar tou detay bann tranzaksyon dan lavant sa bann propriyete Leta, sa ki nou’n dekouver ziska la in zistifye e a mon avi pou fer en lenvestigasyon.

Se lo sa baz ki mon pe demann lasistans e sipor avek lofis Oditer Zeneral pou fer en lenvestigasyon.  I enportan pou nou koman en Lasanble etal bann fe kot i annan dout anmenn laklerte kot i annan konfizyon e pou ki laverite i ava kapab sorti.

Mr Speaker ser koleg Onorab atraver sa Mosyon mon pe rod en fason pou anmenn laklerte dan bann lavant sa bann propriyete Leta anba lakonpannyen COSPROH.        Parey Mosyon i endike, mon pe propoze ki Oditer Zeneral i antreprann sa lenvestigasyon, e mon pe fer sa tout an respektan lendepandans sa lofis.

Avek laprouvasyon nou Lasanble nou Komite FPAC an kolaborasyon avek Lofis Oditer Zeneral, i ava kapab develop en Terms of Reference apropriye pou sa lenvestigasyon.

Mr Speaker mon konsyan ki lofis Oditer Zeneral pa neseserman annan sa resours finansyel oubyen resours imen neseser pou antreprann sa travay dan limedya, e alor mon pe osi propoze ki Oditer Zeneral i ganny sa loportinite pou outsource sa lenvestigasyon avek en Lazans lokal oubyen enternasyonal ki annan konesans e leksperyans neseser pou en tel lenvestigasyon.

E la mon pe mazin en lazans ki posed lekspertiz dan forensic accounting.  

Pou konklir Mr Speaker i enportan pou pep Seselwa realize, ki i nou devwar koman en Lasanble pou anmenn laklerte kot nou santi i kapab annan labi oubyen faver an dot mo koripsyon.

Lenvestigasyon e lenvestigasyon i enn bann meyer fason pou lager kont koripsyon.  Se zisteman Mr Speaker avek sa detrwa mo mon demande ki nou Lasanble i aprouv sa Mosyon.  Mersi Mr Speaker.

 

(APPLAUSE)

 

 

MR SPEAKER

Mersi Onorab Mondon, bon lo Mosyon ki Onorab Mondon in move, eski okenn Manm i oule segonn Mosyon? Onorab Flory Larue?

 

HON FLORY LARUE

Bonzour Mr Speaker mon ti a kontan segonn sa Mosyon e mon ti a kontan donn en deliberasyon lo la silvouple.

 

MR SPEAKER

Mersi Onorab Larue.  Bon Mosyon in segonde e Mosyon alor i ouver pou deba.  Oule entervenir Onorab Larue? Go ahead.

 

HON FLORY LARUE

Mersi Mr Speaker bonzour tou dimoun, bonzour tou Manm.  Mr Speaker sa Mosyon in koz lo nou larises dan form en byen e bann byen ki ganny trouve lo bann later prestizye e plito pre avek lanmer.  Zot ti ganny pran pou en bi spesifik e a lafen nou vwar ki se bann lakonpannyen etranze menm ki’n benefisye avek sa bann byen.

Mosyon Onorab Mondon in demande ki en louvraz i ganny fer ki enn fwa pou tou, tou Seselwa ki finalman i propriyeter tou byen Leta i konnen ki mannyer bann byen pli prestizye nou pei ti ganny distribye.  Sa bann byen zot menm zot ti vin propriyete Leta par aksyon lakizisyon.

Bokou dimoun dan prive ti perdi sa bann byen Leta. Sef D’Eta pei pandan sa bann letan ti fer prosedir pran sa bann propriyete.  Letan Mr Albert Rene ti fer sa, sa bann letan i ti fer li anba banner son parti, parti SPPF letan i ti fer koudeta an Zen 1977 ti dir dan son deklarasyon polisi SPPF ‘an avan pou sosyalizm’ ki lendistri tourizm i bezwen anmenn rezilta benefis pou tou dimoun pa zis bann ki’n sey kapitaliz lo labote natirel Sesel.’’ En kotasyon.

Alor enn par enn bann gran lotel ti ganny pran e zot nouvo propriyete ti apele COSPROH –  Compagnie Seychelloise De Promotion Hotelier Limited ti formen le 2 Out 1980 e son shareholder prensipal ti Gouvernman Sesel e apre i ti osi enkli DBS ki osi son propriyeter se Gouvernman Sesel.

Letan i ganny formen enn bann lobzektif COSPROH ti pou donn bann formasyon pratik pou bann Seselwa ganny en karyer dan lotelri nou tou nou konnen ki’n arive sa.  Enn bann lotel ki COSPROH ti propriyeter ti Reef Hotel e pou montre bann progre ki ti’n ganny fer par sa lotel letan Gouvernman anba direksyon Msye Albert Rene ti deside pran li mon a retourn en pe dan son listwar.

Reef Hotel ti ofisyelman ouver le 17 Mars 1972 i ti kout sa lepok R14milyon. Letan lakonpannyen WC French ti’n fek konplet Rochon Dam avek 825 Seselwa e zot ti fek fini fer airport zot ti apre konstrir Reef Hotel.

I ti ganny konstrir par lasyer pep Seselwa.  Sa letan en bal siman Mr Speaker ti kout R8.90.  Sa lotel ti annan li premye Golf course e i ti premye lotel pou ofer servis 24er e i ti vreman met lendistri tourizm Sesel koman en destinasyon touristik.

Le 14 Fevriye 1972 en mwan avan son louvertir en bonm ti ganny mete kot Reef Hotel, me en mwan apre in ti’n kapab overcome tousala e i ti akey larenn L’Angleterre Queen Elizabeth the 2nd.

I ti ganny vote koman the East Afican Hotel of the year e i en lotel kot bokou Seselwa in marye e in fer bokou entertainment.

COSPROH i en antite ki bokou dimoun in vwar li difisil pou konpran.  Dan bann resers ki mon’n fer mon’n vwar ki en moman ki COSPROH in sanz son non pour apel li Seychelles Hotel Limited an Zilyet 1986 pou mwens ki 1an e repran son non COSPROH  pou li kontinyen fer biznes.

Apre sanz non i paret kot rezistrar ki en lot lakonpannyen i osi ganny formen anba sa nom Seychelles Hotels Properties.

Napa okenn lozik pou sa arive me avek resers aprofondi bann direkter sa lakonpannyen ki ti enkli a sa letan Msye Guy Joseph Morel, Msye Walter Confait, Msye Maurice Loustau- Lalanne a kapab eksplik formasyon sa lakonpannyen avek menm nom e ki tranzaksyon ki’n ganny fer.  Tousala pa kler.

COSPROH ki ti en antite Gouvernman ki son rol prensipal ki ti pou tenir bann propriyete lotel pou Gouvernman e fer zot fonksyonnen ti a en moman annan 14 lotel a son dispozisyon oter Mosyon in nonm zot non.

Parey mon’n eksplike sa ti pou fer vizyon parti SPPF vin en realite pour ki distribisyon larises pei i ganny partaze avek tou Seselwa.  Sa antite in annan en repitasyon lokalman ki son bann detay in souvan reste misterye e bokou fwa menm enserten.

In osi vwar li dan en skandal enternasyonal avek en lakonpannyen Italyen apele Parmalat.  Bann spekilasyon lo kote bann zofisye italyen i dir ki Parmalat in kapab fer frod letan in ganny akize ki in pey COSPROH de fwa letan i ti aste lotel Cote D’Or Lodge.

Serten lenvestigasyon in montre en peyman en sonm apre i montre ki Parmalat ti fer en lot peyman apre nou vwar ki a lafen in deklare ki in ganny vann pou en lot sonm.  I paret ki sa sonm an plis pa tro kler kote in ale, isi i dir en pri e laba i dir en lot.

Me nou vwar se akoz COSPROH  pa’n soumet son bann deklarasyon finansyel anyel pour bann lannen 2002 ziska 2006 letan sa lakonpannyen ti fer son winding-up, nou pa pou konnen ki mannyer COSPROH in eksplik sa doub peyman ouswa peyman an plis ki in ganny fer dan son liv.

Kote sa larzan in ale Mr Speaker? Eski sa bann laranzman ti ant bann zanmi ouswa konesans pros bann ki ti pe zer sa lakonpannyen?

E eski ti annan konfli lentere parey Mosyon pe demande?  Deza sa i fer li enteresan pou fer en lanket la ki prezan nou annan plis akse avek lenformasyon.  La i osi en legzanp ki montre letan en antite parey Rezistrar pa fer bann formalite ki neseser pou wind up en lakonpannyen bann aksyon ki pa normal.  I kapab pase.  E leta sa i enplik en antite piblik dan en tranzaksyon bann desizyon ki’n ganny fer lo zot par pa kapab ganny eksplike.

Me bann Direkter sa lakonpannyen i sipoze responsab.  Eski sa i leka?

Eski boner dan Trwazyenm repiblik ki nou ti sipoze en demokrasi modern ti napa latransparans ek etik dan zerans bann byen Seselwa?

Eski nou bann dirizan pa ti enterese avek lentere sa pep?  Letan mon lo sa pwen mon byen apresye ki biro Rezistrar in kapab al deter file COSPROH dan Larsiv. In pran zot plis ki 2 semenn pou rod sa file e mon’n fek ganny dir ki i ti disponib Zedi pase e mon’n fek vwar li Lendi bomaten ki fek pase.

Me i vreman en konstrent enorm Mr Speaker pou bann staff ki travay laba akoz deza an 2018 sa Departman i ankor pe gard tou son Dokiman Biznes e Later dan en fason mannyel.

Sa i vreman deplorab letan nou koz lo en Gouvernman modern inovativ e enn ki anvi kapab delivre.  Dan en lepok ki teknolozi i en bezwen nou napa en plan moderniz fason gard lenformasyon.

Sa vizib dan tou sekter piblik sa defi i fer ki bokou bann desizyon ki’n ganny pran pa ganny siporte par bann statistik ki konplet ouswa azour.

Mr Speaker sa i enn bann keksoz ki pe tard devlopman e osi fer prodiktivite travayer desann, akoz zot ankor bezwen trouv zot pe al fouy dan arsiv sak fwa en dimoun i vin fer resers ouswa pe pas zot letan pe file file.

Si nou retourn lo Mosyon Mr Speaker dan sa bann menm peryod an 2002, 2006 nou vwar ki COSPROH i fer lavant 4 son bann lotel an total anba bann sirkonstans ki kapab ganny enterprete Mr Speaker koman kontroversyel.

Mon oule ki dimoun i konpran ki Mosyon i demande ki Oditer Zeneral i konsider fer en lanket lo bann byen COSPROH.  Si i deside pou fer sa mon espere ki Oditer Zeneral i rod tou lasistans teknik posib lo senn Nasyonal e menm enternasyonal.

Dan sa ki mon pou eksplike i annan bann antite offshore ki Gouvernman Sesel i fer tranzaksyon avek.  Gouvernman Sesel i reprezant tou pep Seselwa.

Souvan sa bann lakonpannyen offshore i ganny reprezante par en dimoun ki konpletman diferan ki son propriyeter ouswa reprezante par en avoka.  Bann par in ganny vann avek bann enkoni eski en Repiblik i pa bezwen konnen ek ki i pe vann son byen Mr Speaker?

Eski nou’n vann avek en dimoun ki annan en lentere akoz zot ti asosye direkteman avek nou Gouvernman e son bann byen?

Eski nou’n vann ek en dimoun ki servi son larzan pou fer bann aksyon teroris?  Pa pou konnen Mr Speaker akoz nou pa konnen ek ki nou’n vann nou byen.

En bann pli gran kontrovers i lavant sa lotel ki tou Seselwa i konnen koman lotel Meridien Fishermen’s Cove ki trouve Bel Ombre Mr Speaker.  Sa lakonpannyen ti ganny donnen avek COSPROH e COSPROH ti form en lakonpannyen apele Fishermen’s Cove Hotel Limited.

Dan son rapor finansyel 2002 COSPROH ki ti 100 pour 100 propriyeter bann par i dir ki sa ti vo R6milyon.  Fishermen’s Cove Hotel Limited ti osi propriyeter tou bann later e batiman kot sa lotel ti sitye.

Dan sa letan ki Fishermen’s Cove ti ganny vann, Gouvernman ti deside fer bann par disponib dan lakonpannyen nou konnen koman SACOS ozordi.  Akoz ki zot pa ti deside fer parey ek sa antite lotelri?  Lotel Fishermen’s Cove ti ganny vann pou en valer R85 milyon, me avan ki lotel ti ganny vann, COSPROH ti deside 1an avan fer renovasyon lo son lotel pou en valer R29milyon sa vedir Mr Speaker alafen Gouvernman in fer li en profi R56milyon selman.

Akoz ki sa renovasyon ti ganny fer zis avan lavant?  Eski sa renovasyon ti en lavantaz pou propriyeter sa nouvo lakonpannyen ki ti aste Fishermen’s Cove Hotel Limited?  Fishermen’s Cove Hotel Limited ti ganny vann par COSPROH an 2003 avek en lakonpannyen ki baze Sesel.  Annou swiv byen ti apele Hotel Properties Limited pou en valer 85milyon dapre kont lakonpannyen Fishermen’s Cover Hotel.  Alors sa i lakonpannyen ki tenir sa propriyete.  Hotel Properties Limited ki baze Sesel li son propriyeter i apele Hotel Properties Limited British Virgin Islands, alor i annan menm non avek sa enn isi, me i en lakonpannyen offshore e nou napa akse ek son bann detay.

E la tou keksoz i vin sonm akoz i fer ki nou pa konnen ek ki nou’n vann nou lotel.  Nou pa konnen Mr Speaker lekel propriyeter sa lotel.  Sa i propriyeter sa landrwa.  Me li i lwe sa lotel avek Meridien Seychelles Limited ki li i fer biznes managed sa lotel. Sa de lakonpannyen napa nanryen pou fer ek kanmarad parey ler ou lwe en landrwa pou fer biznes, ou pey ou rent tou le mwan e ou fer ou biznes separe avek sa dimoun ki propriyeter sa landrwa.

Alor nou tir Meridien Seychelles Limited dan sa Mosyon COSPROH.

Dan bann dokiman finansyel lannen 2004, Meridien Seychelles Limited i fer son bann deklarasyon parey i demande par Lalwa i deklare ki i ti pe lwe sa propriyete avek Fishermen’s Cove Limited lo en non- cancellable lease pour 20an pour 2.262 milyon Dolar par an.

Sa i fer ou en total 45 milyon Dolar pou 20an e sa i ganny peye koman rent pou dire sa Kontra.  Sa bann detay dan financial statement lakonpannyen me mon’n pa’n vwar sa lease Mr Speaker.  Fotespere ki sa lease agreement osi i kapab ganny devwale dan son antyerte mon pa konnen kote i ete.  Oli sa lease?  Kan egzakteman eski i fini.

Kontinyen swiv mwan byen.  Mr Speaker dan kont Fishermen’s Cove Hotel Limited nou vwar ki son propriyete Hotel Properties Limited koman en lenvestiser ti osi anba Investment Promotion Act parey nou konnen ti ganny son sertifika avek bann egzanpsyon.

Sa i sa lakonpannyen ki owner tou propriyete kot Fishemen’s Cove e li i pe lwe sa propriyete avek Meridien.  Li sa lakonpannyen Hotel Properties Limited, anba Investment Promotion Act i ganny son sertifika ki nou tou nou konnen ti donn bokou egzanpsyon.

I paret osi i ti ganny sertifika egzanpsyon anba Business Tax Act 1987 Minis Finans sa letan Minis James Michel ki ti annan pouvwar pou donn li en sertifika avek egzanpsyon pey tax.

Savedir Mr Speaker ki Hotel Properties Limited Sesel sa enn ki Sesel pa pey okenn tax e mon prezimen ki sa ti pou en peryod 20 an.

Mr Speaker enn bann kestyon ki nou kapab demande eski tou sa bann sertifika egzanpsyon i pou 20an?  Minister Finans i bezwen annan en rezistra sa bann sertifika, akoz i pa aksesib.  Eski Oditer Zeneral i santi i annan merit pou fer en lanket sa bann detay i a ganny devwale.

Alor bann Direkter COSPROH ti deside fer renovasyon ki vo 29milyon lo Fishermen’s Cove Hotel e apre vann li pou 85 milyon e donn Gouvernman Sesel 56 milyon roupi profi.

Annou mazinen ki sa bann lakonpannyen i ganny run par bann Direkter e enn bann Direkter Prensipal dan tou bann lakonpannyen ki COSPROH ti tenir pou Gouvernman Msye Mukesh Valabjhi ti Direkter ouswa Manager lo tou sa lakonpannyen.

Zis apre ki lotel ti’n ganny vann nouvo propriyeter Fishermen’s Cove Hotel Limited i lwe sa menm propriyete li pou R14.5milyon par an pour 20 an.  Dan zis 5an Mr Speaker sa nouvo lakonpannyen ki COSPROH in vann li sa propriyete i fer dan zis 5an R72 milyon tax free.

I paret osi ki avek menm lokater ki i ti pe lwe avek depi avan alor avek Le Meridien menm akoz in la en bon pe letan.

E mon prezimen i lozik i anvoy son larzan an deviz pandan sa peryod 2002-2006 BVI kot son propriyeter prensipal ki nou pa konnen lekel Mr Speaker.  Alors deviz etranzer pe kit Sesel pandan en peryod kot lavi ti vreman difisil, me nou pa konnen lekel ki benefisye sa larzan.

Annou osi met nou lekor dan konteks sa letan ti annan bokou problenm ekonomik Sesel e deviz etranzer ti rar me olye nou Gouvernman benefisye avek sa lease ki Hotel Property Limited i lwe avek Meridien an Dolar – olye nou gouvernman benefisye bann Direkter ki ti run Fishermen’s Cove Limited pou COSPROH ki enkli Msye Mukesh Valabjhi, i pran sa loportinite ganny foreign exchange e donn en lot lakonpannyen ki nou pa konnen lekel son propriyeter ki baze BVI.

Dan en rapor UNDP zot eksplike ki an rezilta bokou lanprent ki Sesel ti’n fer, ki an 2002 ti annan vreman bann gro det e dapre sa menm rapor kalkilasyon i montre ki Sesel ti kapab pei pli andete par kapita an 2002 deza nou ti annan en tit.

Gouvernman Sesel ti bezwen deviz me desizyon i paret pa ti ganny pran dan son lentere sa i mon lenterpretasyon Mr Speaker.

Lannen 2002 i osi lannen istorik kot parey loter Mosyon in dir 50milyon Dolar ti disparet sorti Labank Santral Sesel anba bann sirkonstans ki ziska ozordi an 2018 i ankor pa kler.

Msye Danny Faure ti deklare dan en PPB Parti Lepep resaman ki sa larzan ti’n ganny mete dan kont SMB L’Angleterre.

Msye Faure ti eksplike ki sa larzan ti en don me dan Bidze Nasyonal sa larzan pa reflekte ditou.  Mon oule fer piblik osi mazinen ki sa letan Msye Rene ti Chairman SMB, e Mr Mukesh Valabjhi ti Managing Director SMB.  Sa larzan ti al dan kont SMB.  Mr Mukesh Valabjhi in osi deside se servi koman economic advisor pou Prezidan Albert Rene ki pou sa letan ti pran desizyon final lo tou lentere pou repiblik Sesel, e pou bokou lannen i ti enn dan zis 2 Direkter COSPROH.

An 2004 Sesel pa ti kapab pey son det me selman nou vwar ki a sa menm lepok i annan levidans ziska en total 2.5 bilyon Dolar, ti dan bann kont aletranze ki swa pour bann endividyel ouswa lakonpannyen Seselwa.

Sa pandan en letan kot Seselwa in travers bokou letap, nou’n tann ser sang, rod forex dan pipeline e lepok ‘Napa’.

Nou’n idantifye ki Fishermen’s Cove Hotel limited ti ganny aste par en lakonpannyen apele Hotel Properties Limited ki annan de enn Sesel avek enn BVI.

Sa enn baze Sesel li ti ganny formen le 22 Desanm 2003 zis avan Nwel, son dokiman i idantifye son bann Direkter koman Msye Hussein Karimjee, Mr Raza Bilgrami e zot ladres i ganny donnen koman Airtel.  Propriyeter bann mazorite par i sa lakonpannyen avek menm non BVI e en par ti pou Mr Bilgrami ki osi ganny donnen pouvwar pou reprezant sa bann dimoun isi Sesel.

En kopi sa pouvwar i ganny trouve dan file sa lakonpannyen e lenstriksyon dan sa fax i dir i donn Mr Bilgrami power of Attorney pou negosye aste 2 lotel koni koman Le Meridien Barbarons e Le Meridien Fishermen’s Cove.

Me sa ki drol Mr Speaker sa power of Attorney i donn en limitasyon pou Mr Bilgrami al negosye lo sa 2 lotel pou en valer R150mil.  Mon’n gete regete mon’n vwar R150mil sa i son power ki i ti’n ganny donnen pou al negosye sa de lotel.

Sa i paret vreman bizar me in ekrir an nwar ek blan ki savedir Mr Speaker mon pa konnen – i pa kler. Me si Oditer i fer en lanket i a kapab kekfwa konsider sa dokiman e vwar en signifikasyon dan sa lenstriksyon ki Mr Bilgrami ki ti gannyen kekfwa i a kapab eklersi nou kote, akoz sa ti ganny fer?

Mr Bilgrami i osi direkter en lot lakonpannyen ki li i apele Mr Speaker Bel Ombre Hotels Development Limited.  Sa lakonpannyen i anrezistre isi me li osi son propriyeter i Hotel Properties Limited British Virgin Islands.  Menm propriyeter ki nou ti vann Fishermen’s Cove avek, me nou pa konnen pou ki Mr Speaker en.

Alor nou pa konnen lekel son benefisyer reel.  Li in ganny lwe sa propriyete ki sorti kot Berjaya Beau Vallon Bay i ete ek kot Fishermen’s Cove i ete ki mezir 72mil met kare later pa enn pti bout pa enn ‘ptipti’ bout menm – ase gran bout mon krwar pou R15milyon par Gouvernman pou en lease 99an e apre i pey Gouvernman R1 par an.

Bon deal in gannyen lo later li prime land beach front pou 99an.  Se Mr Noelin Didon ki ti siny sa Lagreman pou sa lakonpannyen.

Sa tranzaksyon pou H Resort, H Hotel mon pa konnen ki mannyen egzakteman i apele ti pas zis 8 zour avan Msye Albert Rene i pas sa fame baton avek Msye James Michel koman Prezidan.  Eski i annan koensidans ladan Mr Speaker?  Mon pe demande mon pa konnen.

Nou a mazinen ki Msye Michel in deza ganny mansyonnen avek lyen avek en lakonpannyen baze BVI apele Solei Overseas Holdings eski in pare pou revel avek lepep Seselwa akoz sa letan koman Prezidan, ti bezwen zis sa lepok annan en lakonpannyen dan en lot offshore, etan i ti kapab fer enn isi?  E ki kalite tranzaksyon ki Prezidan ti pe fer?  Eski i kapab annan en lyen?

Mosyon i demande si i annan en konfli lentere mon krwar i parfetman normal sa ki ti ansarz leta i kapab montre nou si ti annan en konfli lentere.

Alors Fishermen’s Cove Hotel ek H Hotel tou le de i annan menm propriyeter ki baze BVI, Mr Speaker mon pa konnen lekel.  Letan mon ti konmanse mon ti koz lo vizyon bann Dirizan dan parti SPUP/ SPPF/Parti Lepep e byento en nouvo non ankor akoz la zot in anfen deside anmenn etik osen zot parti.

Zot ti komanse avek lentansyon pran avek propriyeter pou partaz avek tou dimoun me ozordi nou pli pa konnen pou ki e si nou Gouvernman in benefisye nou pa konn ditou.

Alor nou pli an fernwar ki ler nou ti komanse Mr Speaker.  Me anfen zot pa’n kapab delivre akoz ozordi lakonpannyen Madam Sara Rene i propriyeter Vacoas Village ki osi annan son lyen avek COSPROH  e serten propriyete Fishermen’s Cove i pou en lakonpannyen apele Bwa Sagay ek serten lotel ek later nou pa konnen lekel zot propriyeter.

Dan ta i annan Port Glaud Development Company Limited ki ti trade pou Mahe Beach Hotel en Bwa Sagay ki enkli propriyete Fishermen’s Cove en Seychelles National Investment Cooperation ki ti fonksyon en pe parey SSI ki nou konnen i fer nenport kwa, me mon’n pa’n vwar okenn dokiman akoz li son bann dokiman i kot Minister Finans.

I annan Barbarons Hotels ki li osi nou vwar lyen avek bann dimoun ki Mukesh Valabjhi ti annan lyen pros avek e bann dimoun ki’n fer biznes avek.

Annou mazinen Mr Speaker ki Mosyon i demande ki si i annan konfli lentere nou ti a kontan si Oditer Zeneral ti kapab fer en lenvestigasyon.  Reef Hotel ki mon’n mansyonnen avan son propriyeter li i ti vann lotel avek Saint Anne Resort.

Saint Anne Resort li osi i kapab annan en konfli lentere Mr Speaker akoz sa ki Mosyon pe demande.

Hotel Properties Limited ki li i BVI ki mon’n koz bokou lo la ki nou pa konn son propriyeter e osi propriyeter later en lot later byen enteresan Mr Speaker.

Petit Anse Development Limited ki ozordi nou konnen i Four Seasons.  Si dan tou sa ki mon’n mansyonnen napa konfli lentere Mr Speaker anba COSPROH vreman mon sirprann.

Lalis i long Mr Speaker i annan bokou lenformasyon ki bezwen ganny klersi.  Mon ankouraz Oditer Zeneral pou anmenn en laklerte lo sa topik e devwal bann prosedir pou sak antite dan bokou detay.

Tou sa bann propriyete ti ganny pran Mr Speaker nou’n dir pou byennet nou pep.  Bann sirkonstans ki ti ganny vann ladan i pa kler.  Nou dwa nou lekor e nou zanfan en kont randi e sa Lasanble koman en premye Lasanble responsab i demande ki en lenvestigasyon i ganny pran i ganny fer dan tou byen COSPROH pou lentere pei Mr Speaker. Mersi.

 

(APPLAUSE)

 

MR SPEAKER

Mersi Onorab Flory Larue, okenn lezot Manm ki oule entervenir lo sa Mosyon? Onorab Afif.

 

HON AHMED AFIF

Mersi Mr Speaker bonzour tou bann Manm Onorab bonzour tou dimoun a lekout.

Mr Speaker sa Mosyon ki’n ganny prezante par Onorab Mondon se en Mosyon mon krwar koman en Lasanble nou devret siporte pou la senp rezon ki nou anvi asire ki tou Seselwa i benefisye avek tou bann byen Leta.

Sa Mosyon ki devan nou i lo COSPROH e i pe demann detrwa kestyon tre senp.  Eski okenn dimoun ti benefisye avek sa bann byen COSPROH? Eski i annan okenn lakonpannyen ki’n benefisye avek bann byen COSPROH? Eski Leta in perdi reveni ki i ti kapab anmase akoz sa bann byen COSPROH in ganny vann.

Mon krwar Mr Speaker i enportan pou nou koman en Lasanble, donn lenportans avek bann byen Leta.  Parske nou rol koman en Lasanble Nasyonal se vreman oversight lo aksyon Gouvernman e la fason ki i pe zer nou bann byen.

Mon krwar i enportan pou nou retras enn pti pe listwar parske ler nou dir COSPROH bokou dimoun pa konnen lekel COSPROH parske en lakonpannyen ki ti ganny etabli an lannen ’80 – 3an apre koudeta.

E sa letan bokou dimoun ti a rapel ti en lepok kot lespri Sosyalis ti for e dan en dokiman ki apele SPPF policy statement ‘Onward to Socialism ‘ki Msye Rene ti pibliye i ti dir ladan ‘in accordance with the aims of Seychelles People Progressive Front the tourist industry must result in economic benefits to all and not simple to those who has sought to capitalized on the natural beauty of the country”.

Savedir i pe dir nou labote natirel ou pa kapab annan zis enn de dimoun ki pe benefisye avek fodre tou Seselwa i pe benefisye avek, fodre tou Seselwa i benefisye avek.

E dan sa lespri ti 3an apre koudeta Gouvernman ti sezi detrwa lotel ki ti prive e i ti komans avek Flying Dutchmen ‘81 – 1an apre COSPROH  i ganny etabli, Northholme, Fishermen’s Cove an ‘82, Mahe Beach, Barbarons Meridien ozordi Avani, Reef Hotel, Beau Vallon Bay, Vacoas Village Beau Vallon.

Zot ti osi form en lot lakonpannyen Seychelles Hotels Limited and ‘85 5an pli tar e li i ti komans zer 10 parmi bann lotel ki Gouvernman ti’n acquire.  E zot konnen ki a sa lepok, ti annan en pe difikilte dan tourizm parske ‘81 ti annan en latak par mersener, stabilite politik pa ti tro o e sa letan nou ti pe ganny nou forse 77mil touris par an.

Zis pou konpare ozordi nou pe ganny apepre 350mil touris par ran.  Me Gouvernman ti vit pou li realize sa lide ki ou bezwen sezi lotel, sezi biznes e sey fer li mars lo ou menm Gouvernman pou kapab partaz benefis pli byen pa’n zanmen en bon lide.  In pa’n marse e zot in realize dan bann milye ‘80 pour dir petet stratezi i bezwen sanze.  In pa’n vann son lotel, me i pran sa bann lotel mon a donn 2 legzanp Fishermen’s Cove i lwe li ek Meridien and ’85.  Mahe Beach ti lwe li ek Sheraton an ’86.  Nou’n ariv milye ‘80 la.

Ler in ariv an ‘90 miltiparti ‘93 Gouvernman i deside non selman i pou komans lwe me i a vann prezan.  I a vann son bann lotel, 93 COSPROH ki dan sa Mosyon i vann Berjaya, i vann Mahe Beach e 20poursan dan Praslin Berjaya, total ki i ti anmase 31 milyon Dolar.

Zot fer bann demars pour zot kontinyen vann lotel nou al 10 apre la nou al 2003, Fishermen’s Cove ki ti anba COSPROH an realite li COSPROH in etabli en lot lakonpannyen ki apel Fishermen’s Cove Hotel Limited ki son piti, piti COSPROH e i deside vann Fishermen’s Cove Hotel Limited ki li propriyeter Fishermen’s Cove e i vann sa pour R85milyon.

Dan anviron menm lepok Barbarons Avani ki ti osi en byen COSPROH atraver en lot lakonpannyen COSPROH  menm i vann sa lotel 65 milyon roupi in ariv 150 la ki’n vann sa 2.

Loter Mosyon pe demande eski okenn dimoun in benefisye ler sa bann byen in ganny vann?  Eski okenn lakonpannyen in benefisye ler sa bann lotel in ganny vann?

Sa ki nou konnen se ler sa bann lotel e mon pe nonm zis sa 2 pour le moman ti napa okenn tender, me ti annan lentere dan lendistri tourizm nou konn Fregate ki ti ganny etablir, nou konn North Island ki’n ganny etablir nou’n konn Ephelia ki’n ganny etablir resaman Lemuria avan ki’n ganny etablir plizyer lotel ti’n ganny etablir dan sa bann letan.  E mon asire i ti pou fer sans sa letan pou nou tender 2 propriyete ki lo bann sit enportan parey Fishermen’s Cove lo la plaz Beau Vallon e lot kote Barbarons ti pou de landrwa ki senn la ki dir enn ti vo 85 e lot ti vo 65 e lekel ki ti deside pou dir sa bann pri ki nou devret vann zot.

Ler nou get dan bann dokiman ofisyel ki egziste ozordi kot Rezistrar e nou demande be lekel ki ti aste Fishermen’s Cove pou R85 milyon e ler nou regarde li Fishermen’s Cove son propriyeter i en lakonpannyen lokal i apel Hotel Properties Limited i lokal li – in anrezistre Sesel li selman ler ou get kot Rezistrar nou anvi konnen lekel li parske in ganny en byen Leta ou get son propriyeter, son propriyeter i Hotel Properties Limited an BVI i annan 50 shares an tou li sa enn la i annan 49 shares e en lot dimoun i apele Raza Bilgrami.

I annan en share li dan sa 50.  Savedir propriyeter i en dimoun ki apel Hotel Properties e i baze an BVI.  Se zot ki pe ansarz, zot ki propriyeter lotel Fishermen’s CoveBVI is British Virgin Islands ki enn bann pti zil ki enn son lendistri prensipal se lanrezistreman lakonpannyen.

Annou regard Barbarons ler ou get dan kont 2014 ki mon ti regarde li osi in ganny vann prezan nou demande be lekel son propriyeter e ler ou get dan son return ki fer kot Rezistrar i annan 2 dimoun.

Enn i apel Atoll Beach Holding son ladres i Maison La Rosiere ki mon mazinen i son azan ki i pe reprezant li e lot se li i annan 24, 999 shares pres 25 mil shares e lot Bashir Ally Karimjee  – 1 share.

Savedir la ankor dan 2 byen Leta nou war en lakonpannyen BVI offshore en lot i en lakonpannyen Atoll Beach ki mon napa lenformasyon lo la.

Annou pa bliye R150 milyon ki Leta in ganny ek sa de.  Prezan kestyon ki bokou dimoun i pe demande, e mon mazinen ki loter Mosyon pe demande eski nou’n perdi reveni ladan – zis dan sa 2 deal i annan bokou lotel ankor ki’n ganny vann par Leta par COSPROH.

Annou regard Fishermen’s Cove sa lakonpannyen son propriyeter i finalman an BVI, sa lakonpannyen dapre tou rikord i pe lwe sa lotel Fishermen’s Cove avek Meridien; Meridien zis i la i managed lotel i vey son bann kliyan, me i pey sa lakonpannyen pou li lwe sa landrwa e i pe pey li 2.2milyon Dolar par an.

En lotel ki li i zis aste pou R85milyon me selman i pe resevwar 2.2 milyon Dolar.  Alor plis ki R30 milyon tou le lannen depi 2004, depi 2004.

Mon’n fer enn pti kalkil vitman depi 2004 sa lepok pa ti R14 i ti apepre R6 ler ou kalkil reveni ki Leta ti’n kapab anmase zis avek Fishermen’s Cove, ou pe ariv ou ziska ozordi R323milyon.

Konbyen Leta ti anmase li?  85 sa zis Fishermen’s Cove.  Barbarons mon napa lenformasyon lo konbyen sa lakonpannyen pe lwe avek Meridien, me li en lotel i annan li pres 160 lasanm, Fishermen’s Cove ti zis 68 lasanm mon krwar.

Dizon li ti pe ganny dan sa peryod mon lestimasyon fasilman R200milyon – azout avek sa 300 ekek nou desot R500milyon ki Leta ti’n kapab ramase.  Leta pa’n ramase li in anmas zis R150milyon an 2004.

Eski nou’n perdi?  Pour mwan pa tro difisil pou reponn sa i kler poudir nou’n pa’n fer en desizyon ki dan lentere Leta Seselwa sa.  I kler pou mwan.  E sa ki osi kler pour mwan i bezwen annan en dimoun ki’n benefisye.

Sa lakonpannyen ki li in aste Fishermen’s Cove in bezwen benefisye parske in pa’n pey bokou e sa enn ki’n aste Barbarons in bezwen benefisye parske ler ou get konbyen zot pe lwe konbyen zot aste i tre, tre profitab.

Alor pour mwan nou koman en Lasanble nou napa sifizaman resours pou nou kapab al fouye, al fer lodit, al rode ki mannyer tranzaksyon in pase me, loter Mosyon pe dir demann Oditer Zeneral pou ed nou fer en lanket detaye pour etablir si i annan okenn dimoun ki’n benefisye.

Onorab Larue in mansyonn plizyer non, ki monte dan tou sa bann tranzaksyon.  Par egzanp si ou pe get Fishermen’s Cove nou dir ki son propriyeter i BVI.  Epi ou annan Raza Bilgrami.  Ler ou regard Barbarons Raza Bilgrami son ladres i Airtel. 

Airtel i deza en landrwa kot in lwe avek anba bann sirkonstans kot nou’n kestyonnen son propriyete kot i ete.  Barbarons sa non Karimjee i monte, Karimjee ti enn bann fourniser mazer pou SMB e son Chairman Egzekitiv Mr Valabhji i monte sa nom ankor i monte e Mr Valabjhi ti Chairman COSPROH.

Eski ti annan koneksyon?  Mon pa krwar nou, nou la pou fer akizasyon, me sertennman i lev bokou kestyon, i lev bokou kestyon e zis sa bann sif ki mon’n donnen avek zis 2 byen Leta, 2 byen Leta parmi plis ki en dizenn probableman en douzenn ki vreman i annan valer, i kler poudir Leta Seselwa, si nou pe swiv sa polisi ki ti ganny pibliye dan ‘Onward to Socialism’ ki dir ki, ‘the tourist industry must result in economic benefits to all and not simple those who  have sought to capitalize on the natural beauty of the country’’ si nou krwar ladan annou siport sa Mosyon parske i pa zanmen tro tar.  Pa zanmen tro tar pou nou dir annou rode kot nou’n al mal e nou aranze.

Ozordi nou annan Truth and Reconciliation ki pe pase nou annan bokou lanket ki pe ganny fer.  Si i annan keksoz ki’n  al mal kot leta Seselwa ozordi in al mal annou fer Leta reganny sa ki merite.

Taler mon ti nonm en sif R500milyon ki reveni nou ti’n kapab ranmase.  Ki vedir R500 milyon?   Zis pou donn en legzanp Mr Speaker nou koman en Lasanble Nasyonal, nou depans anviron R40milyon dan en lannen.

Alor i plis ki 12an – 13 an ki ou’n ti’n kapab finans Lasanble Nasyonal zis avek 2 lotel.  13an ki nou pe en Lasanble en pei pou li kapab fer son bann travay, 13an zis ek 2 byen Leta nou’n ti’n kapab fer li me nou’n pa’n gannyen sa larzan.

E alor pou mwan loter Mosyon ki fer bokou sans ki mwan mon krwar ki Oditer Zeneral i devret annan en lekip ki konpetan e probableman avek travay ki annan ozordi probableman i pou napa ase dimoun pou met lo en travay koumsa, mwan mon krwar si bezwen donn li resours pou li trouve, donn li e nou devret fer tou sa ki nou kapab pou fer sir nou konn laverite lo sa ki’n pase, me non selman laverite nou trouv en solisyon pou fer sa bann byen Leta retourn dan en fason ki pep Seselwa i benefisye avek zot benefis ki zot anmennen pour … e zot pe kontinyen anmennen pour Sesel.

Alors Mr Speaker mon pou termin la mon pou siport sa Mosyon e mon espere avek bann lezot entervansyon ki pou annan ki pou ankor detay petet lo bann propriyete COSPROH mon espere ki dimoun sa Lasanble i ava siporte pou ki nou anmenn laklerte pou pep Seselwa e pou Seselwa kapab kontinyen benefisye avek byen Leta.  Mersi bokou Mr Speaker.

 

MR SPEAKER

Mersi Onorab Afif.  Mon ava pas laparol avek Onorab Sebastien Pillay.

 

HON SEBASTIEN PILLAY

Mersi Mr Speaker bonzour e bonzour tou Manm Onorab e bonzour tou dimoun ki a lekout e ki pe regard nou

Mr Speaker Mosyon devan nou i koz lo annan en si oule en lenvestigasyon dan bann sale propriyete COSPROH. 

Mr Speaker bann propriyete COSPROH i reprezant bann propriyete Leta e okenn zefor ki al ver rod laverite ki al ver rod lenformasyon konkret lo ki’n arive, nou pou siporte mwan mon pou siporte Mr Speaker sa mon oule dir

Me selman dan tousala Mr Speaker i enportan pou met dan perspektiv, tou bann keksoz ki nou pe dir pou ki nou kler lo sa ki nou oule fer e lo sa ki nou oule achieve. 

Mr Speaker pandan ki mover Mosyon in koz lo son Mosyon e lezot entervenan Onorab Larue, zot in mansyon serten keksoz ki fer mwan mazinen ki souvandfwa mon kontant remind Lopozisyon dan sa Lasanble, e i enportan pou mwan kontinyen remind zot.

Premyerman Onorab ki’n move son Mosyon in koz lo bann Direkter ki egziste dan bann konpannyen offshore, ki ozordi koman en endividi en Manm piblik nou, nou pa kapab ganny akse avek lenformasyon Direkter bann lakonpannyen offshore.  Nou pa kapab ganny akse.

E ti annan en move par OECD, IMF resaman atraver bann Lezislasyon dan bann diferan pei ki gouvern bann Lalwa offshore pou fer ki bann rezis Direkter i vin piblik.

Me dan Lasanble, dan nou Lasanble lo lot kote latab zot ti vot an faver lamannman lo Lalwa pou zisteman fer pour bann rezis Direkter dan bann konpannyen offshore pa vin piblik, e ki pou ou ganny akse avek sa lenformasyon ou bezwen en Lotorite pou ou ganny akse avek sa lenformasyon.

Par kont si nou Sesel nou ti’n komans sa demars pou fer sa e lead par egzanp, ozordi bann lenformasyon ki par egzanp sorry Onorab Flory Larue oubyen Onorab Terence Mondon ti pe rode, lo lekel ki Direkter sa bann lakonpannyen Solei Overseas Holdings, lot, lot lakonpannyen ki zot in nonmen, nou ti a kapab ganny sa lenformasyon.

Si dan sa sekter ti annan plis klarite e ti annan plis transparans.  E sa toultan mon pou remind zot dan Lasanble LDS.

Akoz ler mwan mon ti koz, mon ti koze pou ki nou pa met sa provizyon dan nou Lalwa e ki nou move ver la transparans, zot ti deside pou fer kontrerman.

E ozordi zisteman ler nou pe anmenn nou en lenvestigasyon nou war nou dan en sityasyon kot nou bezwen ganny lenformasyon pou nou konnen egzakteman ki in arive.

Mr Speaker i enportan pou nou fer sa bann pwen akoz nou osi nou anvi ed zot dan sa demars zis parey Onorab Larue in nonmen ki nou dan nou Kongre resaman, nou’n entrodwir en provizyon ki nou pou annan nou en Komisyon Etik dan nou parti.

I annan en rezon akoz nou’n fer sa Mr Speaker.  Nou’n fer sa akoz nou krwar etik e latransparans i labaz politik lo ki nenport ki parti i bezwen fonksyonnen.

Akoz Mr Speaker?  Akoz sa i donn nou menm prosedir e provizyon pour ki nou kapab recall en Leader dan nou parti, ki nou santi in pa’n alaoter bann prensip fondamantal ki nou parti i reprezante.

Mon parti pa reprezant okenn prensip an si konsern koripsyon zis parey Onorab Afif in quick to remind Lasanble Nasyonal ozordi dan’ Onward to Socialism’ dan mon parti i koz lo pou annan la zwisans byennet nou pei pou tou dimoun.  Pou tou Seselwa!

E zot ava dakor ek mwan ki growth ki’n ganny fer dan sa tourism industry, pandan sa bann dernyen lannen ki mon parti in o pouvwar in en growth ki Seselwa in benefisye.

Me e la mon pou dakor ek zot me eski i annan dimoun ki’n benefisye an plis ki lezot? Eski i annan dimoun ki’n servi son pozisyon pou li ganny plis ki lezot?  Sa mon antyerman dakor ek zot e nou bezwen regarde si sa in arive.

Akoz nou tou nou bezwen mars lo en prensip la transparans, accountability e bonn Gouvernans.  E mon krwar si nou, viv sa prensip si nou pare pou nou dir ki nou koman en Lasanble koman en Brans Gouvernman – fodre pa bliye Mr Speaker ki nou Lasanble nou en Brans Gouvernman!

Annou pa krwar ki Gouvernman i zis Egzekitiv, annou pa sey fer krwar dimoun ki Gouvernman i zis Egzekitiv.  Lasanble i osi form parti Gouvernman tel ki koman Zidisyer i osi form parti Gouvernman.

Nou pei in deside pou li anbark li dan en sistenm Prezidansyel, me kot i annan separasyon pouvwar ant Egzekitiv, Lezislatif e Zidisyer.

E nou koman en brans Gouvernman nou bezwen hold nou Gouvernman e mon dir byen nou Gouvernman to account si i annan keksoz ki nou santi pa’n mars lafason ki’n devret marse.

Sa i bann pwen fondamantal lo ki lo tou le de kote latab nou tonm dakor lo la, e napa personn ki kapab dir zot pa dakor avek sa.  Sa i mon premye pwen Mr Speaker.

Mon lot pwen Mr Speaker e sa i enportan, i enportan – nou annan plizyer dimoun ki’n travay a plizyer repriz lo nivo Gouvernman, ki a kapab donn nou lenformasyon.  Par egzanp nou konnen ki Onorab Afif ti forex controller pandan sa bann letan.

So nou ava konnen pa egzanp bann alegasyon ki Onorab Flory Larue in fer si i annan akoz sa ki enportan e sa ki mon kontan e ki Onorab Afif in dir e ki mon dakor avek, se ki ozordi nou ankor annan sa bann dimoun la, ki ava kapab reponn sa bann kestyon ki nou oule zot reponn vizavi sa size ki nou’n souleve ozordi dan sa Lasanble.

Se sa ki nou oule al lo la Mr Speaker.  Mr Speaker mon parti i pe reklanm so lidantite.  Son lidantite Mr Speaker, son lidantite i baze lo fairness la transparans e travay pour sa pep.

Mwan Mr Speaker mon pa en dimoun ki vin dan sa Lasanble pour mwan endorse swa condone koripsyon!  Napa okenn Manm ki asiz lo sa kote latab ki vin asize pou endorse koripsyon, me i enportan Mr Speaker, i enportan ki koman 2 parti politik dan Lasanble nou avans bann Mosyon ki annan en baz legal ki sound.

Ki annan en baz legal ki byen fonde pou ki nou menm nou sa ki nou oule achieve nou kapab achieve li par etablir bann pozisyon legal kler!

Akoz si Mosyon, Mosyon li menm li pa donn nou en baz legal pou fer li Mr Speaker sa ki nou pou fer dan Lasanble se vin fer en ta tapaz – en ta koze san ki pou annan okenn aksyon ki pou ganny pran.

E sa i fondamantal Mr Speaker.  E mon krwar enn bann keksoz ki nou bezwen fer lo tou lede kote latab, se nou bezwen asize e regarde vi ki lo sa bann size nou annan lagreman lo la ki nou travay ansanm pou konsolid bann kad legal ki a permet nou zisteman pou annan zisteman sa bann kalite lenvestigasyon, baze lo bann levennman ki’n pase dan lepase.

Mon applaud travay ki Truth and Reconciliation Commission – I mean nou Komite dan Lasanble in fer –  Onorab Hoareau, Onorab Ramkalawan tou bann dimoun ki lo sa Komite in fer bann travay lo sa size.

E sa i byen akoz nou’n etabli en baz legal kler pou ki nou kapab fer keksoz marse.  Sa ki Onorab Mondon in anmennen atraver son Mosyon i pe deal en lakonpannyen ki ti ganny liquidated Mr Speaker.  So i enportan ki nou kapab etabli ki mannyer nou pou ganny sa lenformasyon.

Sa i enportan pou nou Mr Speaker akoz sa bann kestyon ki nou pe demande i pou nesesit rod lenformasyon e nou pou bezwen annan en baz pour nou kapab rod sa bann lenformasyon.  Sa i enportan.

Mon lot pwen Mr Speaker i konsern sales sa bann propriyete.  I byen ki nou dir sa bann propriyete in ganny vann avek diferan dimoun eksetera, me pou enportan osi pou nou etablir.  I annan en kantite keksoz ki a sa letan pa ti ganny gide par bann Lalwa ki ozordi nou annan; bann Lalwa ki’n zisteman ganny mete par Gouvernman e atraver Lezislasyon ki ti la bann lezislater ki ti la SNP sa letan ti dan Lasanble Parti Lepep, Parti SPPF zot in met Lezislasyon ki ozordi i fer ki ou annan sales of Government assets i bezwen pas atraver bann prosedir tender!

Me bokou zot pe koz lo sa prosedir tender ki a sa moman ti napa.  Savedir sa ki nou pou bezwen fer prezan se regarde si sa bann lotel, sa bann assets ti ganny vann at fair market value sa letan ki zot ti ganny vann!

So nou konpran nou pa kapab al lo sa baz pa ti ganny tender nou bezwen al lo en baz eski son valer ki i ti ganny vann ti valer ki ti son real value ki i ti ganny vann, ouswa sa bann dimoun ki ti pe aste sa bann propriyete ti pe ganny en kado!

Se sa kot mwan mon stand se sa kot mon parti i stand!  Nou, nou krwar ki i devret annan latransparans i devret annan fairness, e kot parey Onorab Afif in dir kot nou krwar fermeman dan en keksoz, nou bezwen stand behide it pous li devan e asire ki nou rod en solisyon nou rod larepons ki lepep Seselwa ozordi i anvi.

Mr Speaker mwan mon pran sa rezilta eleksyon ki’n arive pou en wake up call pour mon parti.  E mwan mon’n ekoute sa ki dimoun in annan pou dir mwan.  E Seselwa i anvi latransparans e Seselwa i anvi fairness.

E sa Mosyon devan nou ozordi i al zisteman dan sa laliny e pou sa rezon, se pou sa rezon ki mwan mon pe siport sa Mosyon Mr Speaker.  Mwan mon pa vin condone okenn aktivite par okenn endividi.  Sa ki santi li i annan okenn kestyon pour li reponn i ava reponn son bann kestyon.

Me Mr Speaker, parey Onorab Afif in dir mon pa pou akiz personn.  Mon pa pou kondann person Mr Speaker akoz mwan mon pa ni en zis mon pa ni en ziri.

Mon en Manm Lasanble Nasyonal e mon manda Mr Speaker, mon manda se reprezant lentere lepep Seselwa.  E kot lentere lepep Seselwa Mr Speaker, kot lentere Seselwa a okenn moman ki nou koman en Lasanble kot nou santi kot nou lentere pa’n ganny respekte, nou bezwen demann kestyon nou bezwen rod larepons.  Se sa ki nou bezwen draw the line Mr Speaker.  Se la kot nou bezwen plas nou lekor.

Alors Mr Speaker mon pa pou pli long.  Sa Mosyon Mr Speaker i en bon Mosyon.  Mon pou siport sa Mosyon.  Me i pou enportan parey mon’n dir Mr Speaker nou etabli bann baz kler lo lafason ki nou pou bouze going forward ek sa Mosyon pou ki nou pa vin dir nou menm nou dan Lasanble pou ki fer en kantite koze e Gouvernman pa pe fer nanryen.

Fodre nou arete dir sa!  We are part and parcel of Government!  E mon rapel dan interview ki Onorab Henri mon koleg lo lot kote latab ti fer Mont Buxton, Gouvernman se nou, nou tou e se nou ki bezwen fer marse Gouvernman – pa zis Egzekitiv!

Kot nou santi Egzekitiv!  pa pe fer marse, nou bezwen remind li ki i pa pe fer marse.  Se sa nou rol koman en Manm Lasanble!  Se sa nou rol koman Parlmanter.  E mon angaz tou Manm Lasanble Mr Speaker to live that spirit!  Mon krwar dan sa latransparans, dan sa accountability dan sa bonn Gouvernans ki nou tou dan sa Lasanble nou oule anmennen pou sa pei!  Mersi Mr Speaker.

 

(APPLAUSE)

 

MR SPEAKER

Mersi Onorab Sebastien Pillay. Mon a donn laparol Onorab Woodcock.

 

HON WAVEN WOODCOCK

Mersi Mr Speaker.  Bonzour Mr Speaker tou koleg Onorab e tou dimoun a lekoutMr Speaker mon pe ekout entervansyon Onorab Pillay.  Mon seryezman krwar ki i annan keksoz ki Onorab Pillay in dir la bomaten i pa fer okenn sans – Mr Speaker par lefe ki Gouvernman i kapab fer en aplikasyon avek Lakour pour disclosure non sa bann Direkter.

Plizyer pei in fer sa e nou osi Sesel nou kapab fer sa.  Mr Speaker apre koudeta 1977 en gro lenzistis ti arive Sesel Gouvernman SPUP ti kree en lakonpannyen piblik Companie Seychelloise de Promotion Hotelier Limited – COSPROH.

Sa lakonpannyen avek backing Gouvernman Parti Lepep – Parti Inik SPUP avek zot filozofi sosyalis – kominis zot ti komans sezi tou bann lotel ki ti propriyete bann etranze.

Akoz Polisi sa parti diktater sa letan, se ki tou lotel ti merit vin propriyete Leta!  E term Angle ki ti ganny servi pou sa se nationalisation.

Sa ki enteresan Mr Speaker sa ki ti komans en prensip kominis SPUP/SPPF Parti Lepep, pa ti tarde pou vin en prensip Kapitalis kot sa menm keksoz ki SPUP ti ape sipoze larg en kont se sa menm prensip Kapitalis ki SPUP/ SPPF/Parti Lepep ti enplimante pou anrisir en serten endividi – en sistenm kot Sesel pe vwar li pe viv ladan ozordi -en sistenm kot zis detrwa dimoun ki’n benefisye avek asset e lamazorite bann later prime lepep Seselwa.

Mr Speaker mon pou rakont listwar lotel Flying Dutchmen.  Msye Ryan Dutchmen ek son fanmir ti aste 15 arpan later Grand Anse Praslin an 1975.  Zot ti komans enn pti bar e restoran.  Sa bar e restoran ti vreman popiler parmi zabitan Praslin tou zot staff ti Pralinwa an mezir ki restoran ti progrese zot ti deside fer bann bungalows e 1 poursantaz profi ki sa lotel ti fer ti ganny partaze avek tou son bann staff.

Mr Speaker apre koudeta sa fanmir ti resevwar en let avek Gouvernman SPUP – Parti Lepep ozordi ki ti enform zot ki Gouvernman pe sezi lotel Flying Dutchmen.  Non selman ki Gouvernman ti pou sezi sa lotel me ti pou osi sezi later e tou asset Msye Dutchmen.

E zot ti donn Msye Dutchmen zis 2 semenn pou kit Sesel avek son madanm ek zanfan.  Par lefe ki Msye Dutchmen ti etranze i ti napa swa be forfeit son lotel avek sa nouvo Gouvernman.

Msye Dutchmen pou sey avoid sa ti alor deside pou pas bay son lotel lo en Seselwa en Praslinwa, me Gouvernman atraver COSPROH pa ti aksepte sa e fors sa fanmir Dutchmen pou vann zot lotel bokou pli ba ki valer sa lotel e fors sa fanmir pou kit Sesel pardfors

Mr Speaker mon annan tou dokiman bann prosedir letap ki sa fanmir in pas ladan.  Permet mwan pou lir let ki defen Minis Ogilvy Berlouis ti ekrir sa fanmir.

Mr Ryan Hard KV Dutchmen Flying Dutchmen Hotel Grand Anse Praslin.

‘’Dear Sir,

I am directed by the Minister to inform you that the temporary employment issued to Mr ….V Dutchman, Ms Anette Dutchman, Master John K O Dutchman and yourself are cancelled.  You are therefore required to make arrangement to leave Seychelles within 2 weeks from the date of this letter.

Yours faithfully,

J C O Berlouis – (Chief Immigration Officer)

Mr Speaker sa ki Gouvernman SPUP/ SPPF/ Parti Lepep in fer avek sa fanmir i en gro lenzistis. Menm si apre plizyer repriz zot in klanm konpansasyon sa Gouvernman in sourd lo zot. Fodre pa bliye ki enn Manm sa fanmir i en Seselwa.

Mr Speaker pou plizyer lannen COSPROH in run sa lotel e plizyer lezot lotel ki zot ti sezi ziska retour miltiparti.

Sa ki enteresan Mr Speaker dan retour miltiparti plizyer sa bann lotel ti ganny vann avek bann offshore companies. Notaman bann konpannyen ki anrezistre dan bann offshore jurisdiction parey British Virgin Island BVI.

I enportan pour note ki plizyer sa bann offshore companies i link avek kanmarad, atraver zot Direkter e bann lotel ki montre en lyen kler avek kanmarad.

Mr Speaker i enportan pour note ki Direkter COSPROH ki’n run Flying Dutchman e lezot lotel sete pa lot ki Mr Mukesh Valabji. Annou pa bliye ki sa msye ti konmans konman en Managing Director avek SMB, Economic advisor Prezidan Rene e Chairman PUC.

Le kestyon ki bokou dimoun pe demande se ki mannyer en msye ki ti pe ganny en saler ant 15mil a 20mil roupi par mwan ozordi son net worth i plis ki 110 milyon Dolar?

Mr Speaker annou pa bliye ki ler sa 50milyon Dolar ti disparet ki ti swadizan pour al dan kont SMB sete pa lot ki Mr Mukesh ki ti Managing Director SMB sa letan.

Mr Speaker menm si dan nou resers lo sa Mosyon kot Registrar e lezot landrwa nou’n dekouver ki plizyer files in manke nou’n nobou war en koneksyon enportan ant plizyer sa bann offshore ouswa shell companies, ki annan swa menm Direkter ki link avek en konpannyen prensipal dan BVI.

Sa lakonpannyen prensipal ki nou’n vwar, se en konpannyen apele Hotel Properties Limited British Virgin Island.

E nou’n osi vwar plizyer lezot lakonpannyen ki  propriyete sa lakonpannyen dan BVI. Sa se enn Hotels Properties Limited Seychelles, Bel Ombre Hotels Limited e trwazyenm Fisherman’s Cove Limited.

E nou’n osi vwar bann menm Direkter partou notaman Karimjee, ki osi shareholder dan Barbarons Beach Hotel.

Mr Speaker Fisherman’s Cove Hotel ti premyerman ganny vann avek COSPROH pou en serten sonm e apre ganny revann avek Hotel Properties Limited dan British Virgin Island.

Annou pa bliye ki sete Mr Mukesh ki ti Direkter COSPROH ler Fisherman’s Cove ti ganny vann avek COSPROH.  E Fisherman’s Cove ozordi i propriyete Hotel Properties Limited British Virgin Island.

Mr Speaker les mwan lir en lartik lo en website kot profile Msye Mukesh ti ganny pibliye pour entrodwir msye Mukesh koman en Keynote  Speaker dan en Konferans Dubai. Mon ava lir Mr Speaker, Mukesh Valabji Chairman Capital Management Group. Mukesh Valabji is the Chairman of the Seychelles Base Capital Management Group with business interests in media telecommunication, real estate, hospitality and trading in the Seychelles Middle east Europe and Asia.  

Prior to embarking on his private enterprise Mukesh founded the Seychelles Marketing Board (SMB) in 1985 and stepped down as a Managing Director in 2006.

SMB was a the largest enterprise and employer in the Seychelles, contributing in the 15 to 20%of the Seychelles GDP.

Mukesh was also the Economic Advisor to the President of Seychelles Mr Rene from 2000 to 2004 and Chairman of the Public Utility Corporation and COSPROH Hotel Company.  He was also  ‘’he was also’’ (get byen ) he was also former owner of Le Meridien Fisherman’s Cove. Mukesh is currently involve in the development of the Ultra Luxury Six Senses Zil Pasyon Resort and Zil Pasyon residence on Felicite Island in Seychelles, with over US 110million invested. The Resort will open around mid 2016.  And the private residence has been attracting significant investment from high networth individual globally.

Additionally, Mr Speaker Mukesh will soon be embarking on a landmark project in Seychelles to develop prime waterfront land on Maia Land into to the largest intergraded resort in the Seychelles.’

 Eski sa pe fer referans lo H Hotel? Including a five star hotel luxury branded residence, premium condominiums waterfront dining and entertainment facilities, high-end retail, casino and more.

Outside of Seychelles Mukesh has various investments including commercial building and retail mall in Singapore, Bulgaria and Dubai.

        Furthermore Mukesh sits on the board of various companies including SoftBank … Investment, Crimson Firm as well as Midland Resource International. ‘  Lot Mr Speaker dan sa profile i fer sorti byen kler ki msye Mukesh i propriyeter Fisherman’s Cove, ti propriyeter Fisherman’s Cove ki osi propriyeter Hotel Properties Limited dan British Virgin Island, ki osi propriyeter H Hotel Belombre.

Mr Speaker, i annan keksoz ki en pe drol la, eski plizyer bann major hotels Sesel i propriyete en sel zonm?

Eski lendistri tourism asset e plizyer propriyete Sesel i dan lanmen en sel endividi?

Mr Speaker fodre ki Gouvernman i get ladan.  Se pou sa rezon Mr Speaker ki mon pou siport sa Mosyon ki pe demande, ki vi ki i annan plizyer lavant konpannyen public COSPROH dan le pase. Sa Lasanble i fer demann pour ki Oditer Zeneral, en request ki nou pe fer, i fer en lanket detaye pour etabli si okenn dimoun oubyen okenn lakonpannyen prive in benefisye dan lavant sa bann byen COSPROH?

Si ti annan okenn konfli lentere dan sa tranzaksyon e si reveni Gouvernman a okenn moman i ganny konpromi? Mon osi profit sa lokazyon pour remersye tou sa bann dimoun ki’n vin ed nou avek resers lo sa Mosyon. Nou tim Lasanble e osi Mr Alexander Pierre avek sa Mr Speaker mon pou sipor sa Mosyon. Mersi bokou.

 

MR SPEAKER

Mersi, Onorab Woodcock.  Bon nou ava pran en Break e nou ava kontinyen avek deba lo Mosyon 11er.

 

(BREAK)

 

MR SPEAKER

Bon nou ava kontinyen avek deba lo Mosyon ki’n ganny move par Onorab Terence Mondon, e mon ava donn laparol Onorab Sandy Arissol.

 

HON SANDY ARISSOL

Mersi Mr Speaker.  Bonzour tou Manm, bonzour tou dimoun ki a lekout. Mr Speaker mon ti a kontan dir de pti mo lo Mosyon anmennen par Onorab Mondon. Son Mosyon i lir koumsa;

vi ki i annan plizyer lavant propriyete lakonpannyen Public COSPROH dan le pase, sa Lasanble i fer demann pour ki Oditer Zeneral i fer en lanket detaye pour etabli si okenn dimoun oubyen lakonpannyen prive, in benefisye dan lavant sa bann byen COSPROH. Si ti annan okenn konfli lentere dan sa bann tranzaksyon e si reveni Gouvernman a okenn moman in ganny konpromi?

Mr Speaker mon pou siport sa Mosyon parske, mwan mon enn bann dimoun ki kontan eksplike.

Ou konnen dimoun deor letan zot tann ou anmenn Mosyon isi dan Lasanble Nasyonal toultan zot demann kestyon ek bann Mosyon ki nou anmennen.  Kote ki zot benefisye, kwa ki pei i gannyen avek bann Mosyon, kote zot kapab bann endividi oubyen bann voter ki vot pour nou koman bann Manm Lasanble zot benefisye atraver sa Mosyon.

Me letan mon’n ekout bann entervenan koze, mon’n sirpriz avek zot bann resers ki zot in fer letan mon’n tann Loter Mosyon Onorab Mondon in koz lo Mosyon.

In prezant son Mosyon avek lakantite bann lotel ki ti annan anba COSPROH.  

Letan mon’n tann Onorab Flory Larue osi in koze an relasyon ek sa bann size, bann lenformasyon ki li in donnen.  E letan Onorab Woodcock osi in koze bann lentervansyon ki zot in fer, oubyen lentervansyon ki in fer an relasyon avek Flying Dutchman.

Ki Flying Dutchman mon rapel byen sa pti lotel Praslin apre ti vin Mari… en lepok e la si mon pa tronpe i zis la koumsanmenm i pa pe fonksyonnen.

E mon osi kontan letan mon’n tann Onorab Pillay, Mr Speaker, Letan Onorab Pillay en zenn parey mwan menm ki nou’n ne menm lannen nou’n lekol preski menm letan, e mon kontan letan in vini fran, onnet e in dir devan sa Lasanble Nasyonal, pou dir in tann sa laklos ki pe sonnen finalman. E mwan mon kontan letan en zenn parey Onorab Pillay i dir in tan sa laklos apre tou sa lannen parski mwan mon enn sa bann dimoun ki’n konn donn lanmen sonn sa laklos dan Lopozisyon.

Se pour sa mwan dan Lopozisyon mon’n kontan mon’n en sa dimoun ki’n sonn sa bann laklos pour ki lezot mon frer i tande sa ki  byen dan nou pei.

Parske mon rapel letan mon ti ankor pli pti mon ti kontan get cartoon Pink Panther – en cartoon fame ki bann zenn i kontan gete ozordi e li toultan letan pour leve bomaten i ti annan en alarm clock ki met obor son lili, Mr Speaker.

E tou le bomaten letan son alarm clock i sonnen li i pran en marto i kraz sa alarm clock i pran i zet dan en kartron.

E dan son lasanm ater ti annan en kartron ranpli avek alarm clock!  E mon kontan ozordi Onorab Pillay in pran sa marto finalman in zete.  E nou pa a vwar en kartron avek alarm clock obor li kot finalman in tande sa laklos ki nou dan LDS, nou ti a pe sonnen.

Mr Speaker e mon felisit li pour sa.  I enportan.  Letan en dimoun in fer keksoz byen nou felisite, letan i fer bann komanter nou, nou kritike mon tou lede kote i marse.

Mr Speaker, ou konnen ki kantite keksoz en lesson ki mon pe aprann avek COSPROH se letan nou konman bann politisyen nou fer letour dan nou distrik nou koz ek nou bann dimoun dan nou distrik nou get kondisyon lavi ki nou bann dimoun i fer fas avek dan nou distrik. Nou get bann Mosyon ki nou menm nou, nou anmennen avek pri lavi, nou’n anmenn Mosyon lo STC, nou pe lager avek PUC pou fer desann kou elektrisite avek delo. Bann keksoz debaz ki nou dimoun i servi; letan Onorab William in anmenn en Mosyon pour ki lakriminalite dan nou pei i ganny deal avek seryezman.

Me letan mon pe get Mosyon COSPROH, mon pe ekout bann sif mon pe ekout bann biznes ki’n ganny etabli, bann dimoun ki’n benefisye, atraver tousala mwan mon santi mwan tris, konman en Seselwa.

Mwan mon santi mwan tris konman en zenn parske letan ou get dan nou pei dan sa letan apre tou sa lannen, letan mon’n tann koz ‘77, ‘77 i dan nou listwar nou pa pou zanmen aret koz li apre ki Gouvernman in pran pei.

Zot ti dir nou bann keksoz konkret, zot pou tir nou dan lesklavaz, zot pou fer keksoz byen pour nou pep, zot pou pran avek sa ki annan bokou pou zot partaz avek egalman avek bann ki napa ditou. Me letan ou asize ou ekout listwar e atraver Mosyon COSPROH pa sa ki mon tande Mr Speaker.

Atraver Mosyon COSPROH mon aprann letan mon pe ekoute ek bann dimoun ki’n fer resers detrwa dimoun ki’n benefisye dan nou pei.

En pti group dimoun ki’n benefisye, serten endividi dan nou pei ki’n benefisye Mr Speaker, se sa ki fer mwan tris koman en zenn.  Akoz mon dir sa? Parske letan mon’n tann Onorab Afif in koze i annan en sonm enteresan ki mon’n tann li in mansyonnen.  In mansyonn avek dan 12 lotel ki COSPROH ti annan, letan in mansyonn zis de ki li in koz lo la i annan en sonm 500 milyon ki’n ganny mansyonnen.

e letan mon asize mon fer rezon la letan mon pe ekout sa Mosyon, mon rapel ti annan en deba ki nou menm nou, nou annan en pe konfli lo la sete en baz militer Assomption pour protez nou teritwar.

Me kestyon mon demann mon lekor, si avek de lotel sa letan nou pe ganny sa kalite profi, eski sa letan avek sa 12 lotel nou pa ti’n ganny en baz militer pour nou protez nou teritwar?

Sa i en premye kestyon ki mon demann mon lekor Mr Speaker. Avek sa kantite larzan, avek sa kalite larzan ki nou’n aprann ki i annan bann endividi serten dimoun ozordi i annan bann block building i annan apartman aletranze, eski prezan mon vire mon demann mon lekor avek tou bann Seselwa ki pe ekout nou eski sa letan nou pei nou pa ti a fer ozordi avek bann reveni ki nou pei ti a kolekte?  Nou pa ti a fer plis lakaz pour nou dimoun.

Nou a pe koz lakaz en pti pe pli modern par egzanp. Eski nou ti ava annan osi letan mon pe koz modern en lopital modern dan nou pti pei parey Onorab Roucou ti anmenn en Mosyon pe demann Gouvernman pou fer?

Eski atraver tou sa bann larzan perdi nou pep pa ti ava’n benefisye? E toultan keksoz ki nou pe koz lo la se pri lavi.  Eski letan mon get tou sa bann larzan bann sif ki’n ganny mansyonnen, eski nou pep ozordi, eski nou saler ozordi pa ti ava devret apre 40 an eski nou saler ti ava pe reste 5,050? Ki nou tou ozordi ki 5,050 i difisil pour en dimoun viv avek me selman avek tou bann disiplin fiskal dan finans zot dir avek ou sa.

Be letan mon get bann sif bann kantite letan mon’n tann Onorab Afif i mansyonn bann lannen ki ti ganny vann 80 an montan nou’n ariv lot lannen e letan mon’n tann bann biznes ki bann lezot dimoun i annan aletranze. Mon demann mon lekor ozordi letan nou pe koze 2018, kekfwa eski saler minimum Sesel pa devret R10mil e plis.

Letan mon pe demann kestyon, konmsi avek kantite larzan ki nou Sesel nou’n annan e nou’n fer atraver tousala, se sa bann kestyon ki mon pe demande Mr Speaker, konman en zenn ki kontan mon pei, konman en zenn ki pe rod tou sa ki meyer pour nou dimoun. Lakaz pli afordab, lakaz ki dimoun i kapab en pti pe pli konfortab pour li kapab reste ladan.  En meyer lasante pour nou dimoun, en pli bon saler pour nou dimoun an term gratwite avek zot tann servis ki zot gannyen avek tou larzan ki mon’n tann mansyonnen.

E ozordi letan mon get nou bann zenn nou tou nou annan nou lopinyon diferan an sa ki konsern drog dan nou pei avek kalite tretman ki nou bann zenn pe gannyen.

Me eski kekfwa avek tousala si pa ti’n arive atraver bann lakonpannyen ki nou, nou’n tande kot sakenn i fer pour li, sakenn in bous son kote.  Eski kekfwa drog pa ti’n antre dan nou pei, kot ti ava annan nou bann zenn ti ava annan plis konfyans dan nou sistenm pour ki zot ganny en lanplwa e zot, zot lanplwa pe donn zot en bon saler e sa i fer ki zot a tenir zot e zot kapab soutenir zot fanmir? E avek tousala nou ti ava annan mwens problenm sosyal ki ozordi nou pe fer fas avek.

E letan mon pe asize la Mr Speaker mon pe fer tou sa analiz, e mon swete ki loter Mosyon ek nou tou ki ava koz lo sa Mosyon, avek dimoun ki ava pe ekoute deor, zot a konpran akoz nou pe anmenn bann tel Mosyon pour nou rode kote larises nou pei in ale.  Kote nou pei in perdi, kote nou pei…. Ozordi nou pe tap laport kot bann pei etranze pour ed nou avek serten keksoz.

Vre nou pti, pti nou bezwen led eksteryer, me selman parfwa letan nou vir otour nou menm nou resours ki nou annan letan nou get etranze pe antre dan nou pei parske, parey loter Mosyon Onorab Williams ti servi en term en min lor zot in vwar.  Be si nou, nou pa’n servi nou min lor oubyen nou’n pran nou min lor pas ant detrwa dimoun eski nou zenn i benefisye?              Eski pei i benefisye? Mr Speaker mwan mon pou siport sa Mosyon parske parey mon koleg Onorab Pillay in dir i pa pou debout an faver bann dimoun ki’n fer bann move keksoz son pei.  I pe mazin en keksoz drwat e nou lo nou kote latab toultan nou’n pans bann keksoz ki drwat e se pour sa rezon nou’n anmenn bann tel Mosyon parske nou anvi rode, nou anvi rode kwa ki byen pour nou pei e nou anvi anmenn lazistis.

Lo tou keksoz ki’n pase dan nou pei, alor mon pou siport sa Mosyon, parske i pe demann Oditer Zeneral pour fer en travay. E letan sa travay pou’n ganny dimoun dan mon distrik St Louis a benefisye, Lasanble pour benefisye parske pour en travay kolektif ki nou pe fer ansanm e lepep Seselwa i ava benefisye omwen i a konnen kote in ale, kote pei ti’n kapab anmas serten reveni.

Mr Speaker mon pa pou long me mon ti anvi fer sa refleksyon pou ki nou dimoun ki pe swiv nou zot konpran zot vwar direksyon ki Lasanble Nasyonal pe ale e zot konpran sa travay ki nou, nou pe fer konman en Lasanble e sirtou lo sa Mosyon ki mon krwar i pou en travay kolektiv.

E parey Onorab Pillay in donn son komitman, mon asire ki lezot lo son kote latab pou fer sa.  Alor Mr Speaker avek sa de pti mo, mwan mon ti a kontan dir Onorab Mondon mon pou siport sa Mosyon, parske i pou bon pour Lasanble e i pou bon pou pei avek le pep Seselwa. Mersi bokou Mr Speaker.

 

MR SPEAKER

Mersi Onorab Arissol. Okenn lezot Manm ki le entervenir? Onorab Basil Hoareau.

 

HON BASIL HOAREAU

Mersi Mr Speaker.  Bonzour Mr Speaker, bonzour tou bann Manm e tou bann dimoun ki a lekout.  Mr Speaker dernyen fwa ki mon ti adres sa Lasanble mon ti dir pou dir fodre nou fer politik patriyotik. E politik patriyotik i vedir nou fer sa ki byen pour Sesel e pour Seselwa Mr Speaker.  E trwa keksoz ki’n gid nou travay touzour dan sa Lasanble e ki’n gid osi Egzekitiv, e ki nou’n koz lo la sa trwa prensip la transparans, bonn Gouvernans e rann kont.

La transparans i pa vedir ki nou pratik li zis ozordi, me latransparans i demande ki nou bezwen gete ki’n arive dan le pase; ki’n arive ek bann asset Gouvernman ki’n arive ek bann propriyete ki apartyen pep Seselwa.

E sa latransparans nou bezwen anmenn li parey mon’n dir, get ver le pase gete si i annan keksoz ki’n al mal.

Bonn gouvernans egalman i pa vedir ki nou fer bonn gouvernans ozordi, be bonn gouvernans i vedir ki nou bezwen al demann kestyon lo keksoz ki arive dan le pase e fer sir ki lazistis i ganny fer kot in annan lenzistis dan le pase.

Rann kont i pa vedir ki zis ozordi ki nou bann zofisye Gouvernman ouswa nou bann public servants ki zot bezwen rann kont. Be bann ki’n okip bann pozisyon dan Gouvernman dan le pase, bann ki okip bann pozisyon kot zot bezwen accountable avek pep Seselwa nou bezwen dir avek zot osi rann kont ek sa pep Mr Speaker.

Mr Speaker, isi lo a kote latab nou debout akote pep Seselwa, akote Sesel.  Nou pa dan biznes soutir personn, nou pa dan biznes kasyet okenn koripsyon kot in arive. Kot koripsyon in arive, kot keksoz in al mal nou bezwen lev sa kouvertir e dir ek pep Seselwa gete lala koripsyon, e lala ki nou pe al fer pou anmenn lazistis pour nou kot i annan keksoz kot in pas mal pour nou refer li vin byen Mr Speaker.

Mr Speaker propriyete Gouvernman i apel pou Sesel ek Seselwa, personn pa kapab servi propriyete Gouvernman dan en fason ki as if sa propriyete i selman pour li. Letan okenn desizyon in ganny pran an relasyon ki okenn asset ki Gouvernman i annan i bezwen ganny pran pour lentere tou dimoun.                             Fer sir poudir sa desizyon ki ganny pran i benefisye Sesel ek Seselwa antye Mr Speaker.  E Mosyon Mr Speaker ki pe demann nou ki Oditer Zeneral i fer en lanket detaye pour etablir ki’n arive ek bann propriyete COSPROH, i en Mosyon ki al dan bon direksyon.  I en Mosyon ki mon krwar ki en Mosyon ki mon pou dir i an relasyon avek sa politik patriyotik, parske nou pe demann kestyon.

I enportan si nou pa’n ganny larepons dan le pase si nou santi pou dir i annan keksoz ki pa kler ki kestyon i ganny demande e ki en lanket detaye i ganny fer pour etablir laverite.

E si laverite i etabli i montre pou dir napa nanryen ki ti’n ganny mal fer nou ava dir i byen me si lanket i montre nou pou dir i annan keksoz ki’n mal fer i annan keksoz ki pa’n ganny fer dan benefis Seselwa e Sesel e ki rather keksoz in ganny fer benefis pour serten endividi selman aksyon pou bezwen ganny pran!

Nou bezwen fer retournen sa ki apartir pour le pep Seselwa! Parske nou bann resours Mr Speaker i enportan, nou en pti pei tou nou resours i enportan. I enportan ki nou’n nobou zer nou bann resours dan en fason ki ekitab. Dan en fason ki annan fairness, dan en fason kot Seselwa pa ganny penalize Mr Speaker.

Mr Speaker mon pou dir en keksoz, en keksoz ki pou en pe harsh petet me ki mwan mon senserman krwar ladan e ki mon asire ki lo sa kote latab nou krwar ladan.

Mr Speaker nou’n koz lo eskobar dan sa pei, nou’n koz lo eskobar dan sa Lasanble. Nou’n dir poudir zot in ronz nou sosyete zot pe detrir nou sosyete, me les mwan demann en kestyon. ki diferans i annan ek en eskobar avek en dimoun ouswa en politisyen ki li in vol sa pei?  Ki diferans i annan ant sa de?

Tou lede in ronz sa pei, tou lede in fer keksoz ki mal parske ozordi si i annan keksoz ki’n ganny pran mon pou don’n en legzanp. Sa eskobar i vann son drog, sa zenn ki’n vin en viktim i end up lopital e ki kapab menm mor akoz sa drog.

Letan resours pei i ganny mal servi ou sistenm lasante pa kapab fonksyonn ki mannyer i devret. Letan en dimoun i malad i pa ganny tretman akoz son sistenm lasante pa pe permet li donn li sa tretman. E i osi perdi son lavi, ki diferans i annan ant sa de? Menm aksyon fason, menm fason ki nou le deal avek eskobar pou osi bezwen deal avek koripsyon dan sa pei Mr Speaker!

 

(APPLAUSE)

 

HON BASIL HOAREAU

Sa nou bezwen fer. Sa nou bezwen fer nou pou bezwen fer li san pitye Mr speaker. Mr Speaker mwan parey mon’n dir mon pe donn sa Mosyon mon full sipor me i annan en keksoz ki mon pou demann Onorab Mondon pou konsidere.

Mon pe dir sa dan en fason tre byen, parske mon anvi ki vreman letan nou dir sa Mosyon i ganny, sa lanket i ganny fer i ganny fer avek efikasite. Nou pa kapab dir avek Oditer Zeneral al fer laket me apre Oditer Zeneral i war li dan en sityasyon ki pa pe kapab fer son lanket byen.

Son lanmen i anmare e apre nou pe dir ek li be ou pa pe delivre lo sa ki nou ti’n demann ou.  Oditer Zeneral Mr Speaker, akoz ler mon’n war Mosyon mon’n al get en kou bann provizyon lalwa ki gid Oditer Zeneral.  Oditer Zeneral i annan en pouvwar anba Konstitisyon li, anba 158(7), i dir li wi pou dir Lasanble i kapab otoriz li pou fer okenn investigation me an relasyon ek bann bodies ki i ganny mansyonnen dan Lartik 158 (3). Ok bann bodies ki ganny mansyonnen dan 158 (3) an dot mo bann bodies ki Departman Gouvernman and so forth.

Annou mazin COSPROH, nou pe demann li pou fer sa relasyon pou COSPROH, nou. COSPROH, pa en Departman Gouvernman teknikman li akoz i ti en company pa en Departman me, me i vre ki Auditor General Act anba Seksyon 8 i dir ek ou poudir, sa Act i kapab donn Auditor General en pe plis pouvwar ok ki dan Konstitisyon.

Dan Seksyon 13, letan nou get Seksyon 13 nou Auditor General Act, Auditor General i annan pouvwar pour li al fer serten investigation a relasyon avek public authority ok?

E letan ou get definisyon public authority anba Auditor General Act i enkli vre en konpanny  ki Gouvernman i annan kontrol lo la.

En konpanny ki Gouvernman i annan kontrol lo la me COSPROH in ganny dissolved.  COSPROH in ganny dissolved   I no longer, akoz ler ou lir sa provizyon i en konpanny ki right now Gouvernman i annan kontrol lo la.  COSPROH in ganny dissolved li!

Letan mon’n fer research in ganny dissolved.  So teknikman, teknikman demen, teknikman Auditor General i kapab war li dan en problenm kot letan i ale, akoz i pou al dir ek en dimoun mon le ou vini pour mwan demann ou kestyon.  Sa dimoun i kapab dir ek li ou pa pe exercise en fonksyon anba sa Act ou, akoz sa konpanny nepli …           Zot pa en public authority anymore.  In the past it was a public authority but not now. Akoz in nepli en company ki Gouvernman i annan kontrol akoz sa konpanny is no longer existent.

Mwan ki mon pe dir e mon krwar sa, i kapab fer son lanmen anmare, akoz i pe desarz en fonksyon an relasyon ek son Act.  E si i pe desarz en relasyon avek en konpanny ki nonexistent – ki no longer ou kapab tret li parey en public authority, en dimoun i kapab dir ek li mon pa pe vini mon pa anvi vini.  Ki ou pou fer?

Akoz i annan bann aksyon si demann dimoun pou vini e i pa vini, be la i pou dir ek ou selman si ou pe egzorsis en function under the Act.

Ou war?  Sa Seksyon 14 i fer kler.  E mwan ki mon pou propoze se ki demann Onorab Mondon pour petet, akoz nou, nou anvi ki sa Mosyon i vin efektiv nou.  Akoz si nou pa ti anvi i vin efektiv nou ti pou zis remain quiet e prezan les sa ale.  Me nou anvi i vin efektiv  nou anvi ki nou pa zis pas en Mosyon for the sake of passing sa Mosyon, me ki i vin an fors.

Mon a fer en detrwa, de sizesyon avek Onorab Mondon.  Petet, eski nou devret tir Oditer Zeneral dir Gouvernman?  Ouswa, eski nou devret dir Oditer Zeneral dir Anti-Corruption Commission?  Ouswa en lot fason ki nou demande en trwazyenm fason, mon dir de me en trwazyenm se ki nou demann Gouvernman pour etablir an Commission of Enquiry anba Enquiry Act.

Eski sa pa en lot opsyon parske la li sa Commission of Enquiry pour annan tou son pouvwar li. Vwala, akoz mwan mon pou krwar ki Auditor General pour ganny difikilte si COSPROH ti ankor in existence vi ki i ti ganny kontrole, i ti major shareholders ti Gouvernman, then i ti pou tonbe konman en public authority anba sa Lalwa.

Me nou riske ganny problenm right now, akoz COSPROH has been dissolved – ou war?  Sa i en keksoz ki mon  pe, mon pa mete akoz zis mon anvi dir, me mon krwar o kontrer zis akoz lo s kote latab nou vreman anvi ki sa aksyon i ganny fer, ki sa lanket i ganny fer, e i en lanket ki letan i anvoy sa lotorite pou al fer sa lanket i al avek tou son ledan.  Pa avek en ledan ki pa pe kapab morde apre, nou sa ki nou pe dir e nou pe dir sa dan sa, avek sa bi e dan sa loptik.

E Mr Speaker parey mon’n dir mon krwar i enportan ki nou al gete si bann propriyete COSPROH letan zot ti ganny vann zot ti ganny vann dan benefis lepep si letan zot ti ganny vann Seselwa ti benefisye to the maximum – si bann resours ki nou sipoze resevwar atraver sa bann tranzaksyon, nou’n benefisye sak Seselwa ki’n kapab benefisye avek sa.

E i enportan ki kestyon i ganny demande.  E mon krwar ki sa lanket i enn ki byen e Mr Speaker i pa zis byen. Les mwan fini dir sa i pa zis byen an relasyon ek sa lanket li menm, me  i pou osi fer sir pou dir dan le fitir bann tranzaksyon ki ganny fer an relasyon propriyete Sesel e Seselwa, i ganny fer dan latransparans dan en fason kot dimoun i realize pou dir kestyon i kapab ganny demande plitar.

E parske nou bezwen realize pou dir letan nou fer en keksoz nou bezwen fer li tre byen e dan lentere le pep e lepep Seselwa.  Avek sa Mr Speaker, mon pou napa okenn lezitasyon mon donn mon sipor total sa Mosyon.  Mersi.

 

(APPLAUSE)

 

MR SPEAKER

Mersi Onorab Basil Hoareau. Petet ler mon’n ekout tou bann entervenan depi bomaten i annan en pti pe konfizyon about liquidation, dissolvement of COSPROH menm lo mon kote sete en travay ki mwan mon’n fer, nou pa’n vreman okouran kan COSPROH ti ganny dissolved. Eski ou annan sa lenformasyon Onorab Basil Hoareau?

 

HON BASIL HOAREAU

Non, Mr speaker mwan letan mon’n kontakte kot Registrar of Companies sa ki mon’n ganny dir se ki COSPROH is dissolved. Prezan dissolve parey ou pe dir whether it was done by way of liquidation, par ler nou servi sa mo dissolve letan i dissolve savedir it was liquidated.

Me selman par ler letan mon’n ganny sa lenformasyon si it was the company which was struck of the register parey nou dir.  Kot zis par ler Rezistrar i annan pouvwar pour li strike off.  Si sa in ganny fer, be selman letan mon’n ganny dir mon’n ganny dir in dissolved.  Me selman it’s no longer in existent.

 

MR SPEAKER

Wi sa pour, mon pa le enterfer dan Mosyon ki kote i pe ale. Mon’n lev sa akoz mon panse dan bann lannen 2006/ 2007, par egzanp Bel Ombre asosye avek lotel Fisherman’s Cove ki ti anba COSPROH, ti annan bann propriyete ki osi tou ti anba la.  Par egzanp kot bann managers ti reste Mount Simpsons and so on.  E ler a en moman mon ti pe enquire lo en sa propriyete mon ti ganny dir pou dir i ankor avek COSPROH.  Ler mon ti rod lenformasyon mon ti ganny dir non se SMB ki ansarz.

So, i annan sa de, parey i annan serten Manm in fer sorti kot i annan sa maryaz ant COSPROH avek SMB.

E ki mannyer osi tou si COSPROH sa bann moman la ti dissolve ki mannyer sa bann lezot properties atase avek sa bann lotel parey mon’n dir sa bann lakaz bann managers and so on ti ganny mon pa konnen mwan dealt with ti ganny vann and so on.  So i annan en pti pe konfizyon la as to the process. Yes Onorab Afif.

 

HON AHMED AFIF

Mersi Mr Speaker zis pou donn ou pti lenformasyon ki mwan mon’n gannyen atraver Rezistrar –  si ou al lo son website e ou tip COSPROH son status ki donn ou se ‘SEIZED’ apre i mete dan bracket (dissolved).

Sa pozisyon ofisyel Rezistrar. Savedir dapre Lalwa Companies Act anba Seksyon 280 lo ki mannyer ou dissolve en lakonpannyen eksetera, so in dissolve dapre Rezistrar.

Selman mon napa en sertifika ki i montre si in swiv tou prosedir pour dissolution.

 

MR SPEAKER

Eski i annan en dat?

 

HON AHMED AFIF

I napa en dat ki in dissolved  -non.

 

MR SPEAKER

Ok, bon nou ava kontinyen deba lo Mosyon.  Okenn lezot Manm ki oule entervenir ankor lo Mosyon?   Ok, Onorab Ferrari.

 

HON JEAN-FRANCOIS FERRARI

Mersi, Mr Speaker.  Mr Speaker, mon pran laparol lo sa Mosyon, pou en rezon prensipal, se ki mwan personnelman mon konnen ki mon bann koleg lo lot kote latab, in toultan mars lo en prensip, ki si nou war en keksoz mal in arive e nou pa dir nanryen e nou pa fer nanryen.

Demen nou pou ekspekte ki si nou, nou fer en keksoz mal sa ki vin apre nou li osi pa pour fer nanryen. Alors i nou responsabilite konman Manm Lasanble pour nou regard en sityasyon menm ki annan 10an ki annan 20an pase me selman kot in angaz oubyen afekte larzan piblik i enportan ki nou fer sa travay.                            Napa sa sheet of limitation lo kantite lannen ki nou kapab vwar keksoz e investigate en sityasyon.

E nou, nou preferans se ki nou deal avek o pli vit posib pour ki sa pei i kapab rekonnet bann fot ki arive e ki nou kapab avanse lo bann, avek bann meyer lenstitisyon e meyer fason management nou pei a la venir.

Mon kontan pour mwan vwar ki bann Manm lo lot kote latab in finalman dakor pour zot soutenir sa travay ki nou, nou anvi fer.

Mon krwar i enportan pour note sa e mon krwar ki menm si pou kontinyen annan serten rezistans mazorite pep Seselwa in aksepte ki nou bezwen deal avek sa bann problenm.                              Nou bezwen fini fer sa bann lanket e nou bezwen avanse.

Byensir ler mon tann Onorab Pillay pe koze, mon war li par ler in vin ek bann largiman teknik ki ou a krwar enn ler sa bann largiman se pour retard sa lanket, rod bann leskiz pour nou pa fer keksoz, rod bann rezon akoz nou pa kapab avanse …

 

(Interruption)

 

HON JEAN-FRANCOIS FERRARI

(Onorab Pillay mon’n les ou koze, zis les mwan koze silvouple) … ki mon santi i pa en keksoz ki bon pour nou deba.

I napa okenn lekskiz pour nou sey met okenn retar dan lanket ki pe ganny fer.  Me selman mon ti a kontan dir o konmansman la ki sa lanket, sa lenvestigasyon ki nou pe demande pou ganny fer par Oditer Zeneral, e mon’n note pwen Onorab Hoareau, ki pe sizere ki nou regard bann lezot Lotorite ki kapab fer sa lanket. Me mon kapab dir ki sa lanket, sa lenvestigasyon ki nou pe fer ki nou swete fer pa pou zanmen abouti, pa pou zanmen ariv lo en rezilta si Egzekitif pa pare pou donn en koudmen.

E mon tris e tris pour mwan dir pour le moman Egzekitif pa’n pare. Pour senserman, onnetman donn lanmen pour fer sa bann lanket arive, sa bann lenvestigasyon pran plas.

Mon retourn en pti pe lo sa bann size ki’n ganny leve dan pli boner sa lannen e lannen pase.  Par egzanp sa lanket lo sa 50milyon Dolar, i kler ki si Egzekitif, bann lotorite Gouvernmantal Sesel ti anvi ki sa lanket i arive. Ki zot ti fer lapel avek bann Lotorite Enternasyonal ki fer lanket dan sa bann ka frod ek koripsyon, nou ti pou annan rapidman en solisyon.

Me mon bann koleg lo lot kote latab mon ti a kontan dir zot ki zot Gouvernman zot Egzekitif pa pe onboard lo sa bann keksoz, zot  pe trenn lipye   zot pa pe fer sa ki zot annan sa ki zot responsabilite i devret ete. I pa normal, mwan mon dir i pa normal ki Sef Egzekitif Prezidan Faure i lav son lanmen parey Pilat dan sa bann keksoz, an dizan ki i annan bann lenstitisyon ki’n ganny set up pour fer zisteman sa bann keksoz.  I pa normal.

En Prezidan Larepiblik i devret servi son Lotorite si i believe dan sa ki nou pe fer pou li fer avanse sa bann keksoz. Mon a donn zot en legzanp.  I annan plizyer lakonpannyen dan lemonn, plizyer lorganizasyon dan lemonn ki afilye avek bann lorganizasyon enternasyonal e enn ki vin dan mon lespri deswit se Cole en lakonpannyen ki spesyalize dan investigate frod ek koripsyon ki baze Luxembourg ki’n involve dan bann lanket lo Markos, bann lanket dernyerman lo ansyen Premye Minis Malezi.  I senp.

E sa  bann dimoun – sa Premye Minis i dan kaso la koman nou pe koze i dan minot akoz nouvo Gouvernman Malezi in demann led enternasyonal, in demande led enternasyonal e zot in gannyen led enternasyonal pour zot kapab azir lo bann kont aletranze lo bann kont dan bann paradik fiskal e rezilta ozordi i la.

Alors avek respe Onorab Pillay, silvouple sa largiman ki nou lalwa pa permet napa konesans e ki pou kapab rod lenformasyon ki arive dan offshore jurisdiction i pa korek Onorab Pillay. Gouvernman i kapab fer li e pli o lotorite pei i devret involve dan sa keksoz.

Alors Mr Speaker mon ti a kontan dir ki apard koze, apard lo sa ki zot in dir bomaten Onorab Pillay, Onorab Hoareau in dir zot in deklar zot dezir zot lentansyon, pou war sa bann keksoz ganny pran aksyon avek sa pour le moman malerezman i zis parol.

Mwan mon ti a kontan vwar aksyon e mon rekonnet ki zot, zot pa kapab pran aksyon zot ki la zot pa kapab pran aksyon me mon swete ki sa ki zot in dir bomaten i ganny tande par Egzekitif, e ki Egzekitif i pran aksyon.

E nou konmans bouze dan sa direksyon akoz sityasyon i pa soutenab pour pep Seselwa.  E la mon vin spesifikman lo sa Mosyon.

Mr Speaker en propriyete Fisherman’s Cove hotel i ganny evalye 200 milyon roupi akoz COSPROH pe rod en loan pour li kapab fer renovasyon lotel e sa loan i R29milyon. Ki dapre mon lenformasyon COSPROH i gannyen avek Nouvobanq pou fer renovasyon.

E pour zot kapab ganny sa loan zot deklare pou dir lotel i annan en valer R200milyon ki konpri valer total later, bann building, lekipman, meb ,fitting e sa ki zot apel ‘work in progress’. E dan zot liv sa i valer R200milyon.

COSPROH i prêt R29 milyon avek Nouvobanq i fer sa travay, e i vann sa lotel zis apre pou R85milyon. En lotel ki’n ganny evalye R200milyon par COSPROH li menm zot depans 29milyon e vann 85milyon an realite an realite zot in vann li pour R56milyon.

Mwan Mr Speaker mon en economist, mon pa en matematisyen, mon pa en spesyalis dan accounting. Me selman mon get sa trwa sif e mon war pou dir ki annan keksoz ki mal ladan, e ki en byen ki pou le pep Seselwa in ganny vann en kar son valer ki i ti devret, ki ti’n ganny marke dan liv koman son vre valer.

Kestyon ki nou demande alors se, eski in annan en relasyon ki pa etik, ant bann dimoun ki ti pe manage sa byen lepep Seselwa e sa bann dimoun ki ti pe aste sa byen?

Eski i annan en relasyon ek sa de dimoun? E larepons Mr Speaker se wi.  E la deswit i en gro problenm akoz ou pa kapab, ou pa kapab ler ou pe okip en byen Gouvernman ou menm ou benefisye personnelman ler en tranzaksyon i ganny fer.

E nou konnen pou dir Fisherman’s Cove Hotel ti ganny vann parey mon’n dir pour 85 milyon roupi. E bann direkter ki’n aparet se bann menm direkter ki nou war zot dan Intelvision, e ki nou konnen pou dir Mr Mukesh Valabji son lyen avek Intelvision i kler e ki Mr Bilgrami avek en lot msye zot osi zot involve dan Intelvision.

Mr Speaker sa pour mwan i en problenm.  E sa pour mwan i sifizaman pou demande ki en lanket i ganny fer. Mon pa’n akiz personn selman mon’n nonm bann non e mon ti a kontan ki sa lanket ki ganny fer i swa demontre ki sa bann dimoun ki mon’n nonm zot non zot ti inosan dan sa zafer oubyen zot ti koupab.

Ki in annan en move tranzaksyon, ki in annan en lack of ethics; ki’n annan en failure dan ladministrasyon sa lanket ki pour deside. Mwan mon pa la pou montre ledwa, e pour mwan dir lekel ki koupab lekel ki pa koupab.

Zisteman Mr Speaker pour mwan ler Onorab Mondon ti eksprim son lentere pour met sa Mosyon devan Lasanble, mon ti personnelman avek serten mon bann koleg lo sa kote latab, nou ti kontakte Registrar of Companies e registrar dan en fason tre korperatif in resevwar mon bann koleg e mwan menm dan son bann biro e in met a dispozisyon otan bann files ki posib.

I annan ki pa ti la, i annan ki’n pran letan pour li arive, i annan ki ti’n perdi me ki’n ganny retrouve a la dernyen minit me i annan ankor ki mwan mon ti a kontan vwar.

Alors mwan dan mon lanket Mr Speaker mon pa kapab dir ki mon konn to keksoz.  Mon pa konnen. Mon war bann keksoz ki drol.  Mon war bann keksoz ki dapre mon etik pour mwan personnelman, mon war bann keksoz ki mal me selman mon napa lenformasyon.  E mon pe demande ki biro Oditer Zeneral i ed mwan, i ed nou konman en Lasanble i ed nou pour nou ariv dan fon sa problenm.

Pour nou ariv, pour nou konn tou bann keksoz ki’n arive.  Nou a gete taler ler sa Mosyon i fini si se Oditer Zeneral ki pou fer.  Me selman konman en Lasanble e mwan mon pa kanmi pour mwan dir avek bann Oditer mon pa konnen tou bann keksoz.

Mon’n ganny en pe lenformasyon, me i annan keksoz ki manke e mon pa konnen kote pou al rode ki mannyer pou ganny sa keksoz alor fer mannyer demann avek en spesyalis ki pou fer sa travay pour nou.

Me selman mon ti a kontan zis sinyal Onorab Hoareau dan on refleksyon ki i pe fer lo, eski Oditer Zeneral i legalman dan en pozisyon pour li entervenir lo sa lanket akoz dizolisyon sa bann konpannyen?

Mwan mon ti a kontan dir ki dapre lenformasyon eksper ki mon’n gannyen e mon ti a kontan dir i osi lopinyon bann o zofisye Registrar of Companies ki disolisyon, likidasyon COSPROH pa’n ganny fer dan en fason legal.  E ki sa i vedir ki i pa’n ganny likide.

Par egzanp ler bann dokiman likidasyon ti arive an Zen 2006, sa konpannyen pa ti ankor depoz son bann kont son bann annual returns, son bann financial statements depi 2002.  E dapre lenformasyon ki mwan mon’n gannyen sa bann dokiman i still outstanding.

Donk nou kapab still argimante ki disolisyon pa’n konplete e ki nou kapab alors move dan sa direksyon.

Me sa pa mwan ki pou dir, sa mon krwar Lasanble konman en lenstitisyon i ava gete si sa sityasyon i ti’n devret anpes Registrar of Companies pou donn son laprouvasyon lo sa petisyon ki ti ganny depoze pour wind up sa konpannyen.

Alors Mr Speaker mon ti a kontan an sa moman donn ankor enn de sif, zis pour piblik konpran ki nou pe dir.

Reef Hotel en konpannyen ki ti pou COSPROH en ki bokou Seselwa dan mon zenerasyon e bann pli zenn ankor in vreman pas en bon pe letan laba e in en parti nou lavi.

Reef Hotel i ganny konstri an 1972 i ganny ouver e la in kout R14 milyon.  I ganny vann 15an apre apepre, 15an apre pour R10milyon.  Mon’n mal dir la mwan, mon pa krwar mon’n mal dir – from R14 milyon ki in koute apre i ganny vann R10 milyon setadir 2milyon Dolar si ma memoire est bonne. Kan Dolar ti R5.

Si sa i le ka parey mon’n dir toultan si sa i le ka i annan en problenm. 15an apre en biznes pa kapab vo mwen ki i ti vo 15an avan.

Alors mon konpran i annan en largiman ki pe ganny fer e la i annan en largiman teknik. Ki – me selman mon pa anvi sa largiman teknik i vin anpes nou fer nou lanket. Largiman se ti napa Tender Board sa lepok.  Wi ti napa Tender Board sa lepok, me ti annan moralite, ti devret annan moralite, ti devret annan en fason fer.  E si nou al rode nou pou war pou dir ti annan prosedir ki Gouvernman ti bezwen servi pour li dispose, pour li vann en asset ki i pe tenir o non le pep Seselwa.

Donk s i en dezyenm legzanp kot apre 15an en propriyete i ganny vann pli bon marse ki ler i ti ganny konstri. I i fer 2 la.

Nou konnen pou dir ti annan en skandal Italy avek konpannyen Parmalat, ki zot ti’n invest zot ti’n aste pour 99 an en lease 99an dan lakonpannyen Cote D’Or Lodge Praslin. E dan zot liv, lanket ti montre sa lepok ki zot ti pey ankor si ma memoire est bonne, zot ti pey 7.5milyon Dolar pou sa konpannyen avek mon krwar Zil Sov Souri include ladan,  mon krwar – Ile Sov Souris, pour Vacanze.  La kot ozordi i apel Vacanze.  E me selman, me selman ler bann Italyen ti fer lanket dan sa skandal, zot ti dekouver se pa 7.5 milyon Dolar ki ti sorti dan kont Parmalat me 12.3 milyon Dolar.

Alors, alors Mr Speaker mon pa pe akiz personn se bann Italyen sa, me mwan osi mon annan en pe disan Italyen e mon konnen pou dir i pa bann, pa tou Italyen ki bann lanfandker. Sa problenm ti kapab ariv laba, me sa problenm ti kapab ariv lo sa tranzaksyon isi! Kestyon sete kote sa 4.3 milyon Dolar an plis in ale, se tou ki nou le konnen! Si personn pa’n pran si okenn dimoun isi Sesel pa’n pran sa 4.3milyon Dolar fair and good nou move on.

Me selman ti ava enteresan, i ti ava enportan konman nou bann zesyonner, bann managers larzan piblik nou rod fason pour nou konnen kwa egzakteman ki’n arive, e laprev la i la larzan ki’n rantre. Eski in antre 7.5milyon Dolar pour Sesel?  Sanmenm sa ki ti sipoze antre?  Ok ferm sa file bouz lo en lot.

Donk sa i trwazyenm legzanp ki mon anvi dir zot, ki mon ti anvi met devan Lasanble pour montre pou dir sa Mosyon i pa en Mosyon parey bann avoka Ankour ti kapab dekrir li parey frivolous, vexatious.  Non, Onorab Hoareau?

I pa koumsa, i en Mosyon serye i pa en Mosyon ki la ki pou fer okenn witch-hunting ki pour fer rod lipou kot napa lipou, me i en Mosyon ki i nou devwar konman en Lasanble pour nou deal avek e apre move on.

An menm tan nou ava vwar, akoz sa ki pep Seselwa pa konnen se ki avek sa tranzaksyon lo Fisherman’s Cove par egzanp i annan plis ki sa ki’n arive. Avan ki Fisherman’s Cove i ganny vann Minis Finans i akord sa konpannyen anba Investment Promotion Act 1980… non, non, sa i vin apre sa.  Wi i byen anba Investment Promotion Act 1994 i ganny konsesyon tax e en sertifika pou dapre mon lenformasyon 20an. En konsesyon pour 20an.  E sa ki enteresan i lo biznes tax dan pey biznes tax, parey Intelvision ti gannyen e parey Onorab Afif ti dir pli boner ki’n permet sa lakonpannyen ki’n aste fisherman’s Cove fer biznes pandan 20an sa pey sa pei en sou tax!

Be mon bann koleg, ki zistans nou’n voyaze ant sa premye statement ki Onorab Afif in fer lo (mannyer ti apele?) ‘Onward to Socialism’ pour kot nou ete ozordi.  Ki zistans nou’n sa?

Finalman dan sa, mwan mon pres pou pare pou dir ki mwan e bokou lezot dimoun ki ti a en serten moman dan nou zenn larz siport SPUP.  Wi ti annan bann bon keksoz, bann bon prensip ki ti ganny met ater pour avanse.  Be ki’n arive avek sa bann bon prensip? Ki’n arive?

Onorab Arrisol in dir ti pran avek bann ki annan tro bokou pou donn ek bann ki napa ditou! Robin Hood.  La prezan ou pran avek sa bann ki napa pou donn ek sa bann ki annan deza? Ou pou pran ek bann malere pou donn …?  Ar.. Prezan zot rode akoz mwan mon’n sorti ladan!

Konman en koleg, konman enn zot koleg mon bezwen warn zot, mon bezwen warn zot mon pa kapab fer parey Onorab Pillay pran en marto kraz sa revey!  Les sa revey sonnen!  Pour ki Onorab De Commarmond, Onorab Gill, i a war poudir be leve dan sa sonmey!  Sa ki bann la in dir nou pa sa ki nou pe fer.

Leve! Reveye les sa revey sonnen!  O kontrer pran sa marto tap lo latet ki’n kas nou rev, ki’n kas nou prensip ki ti byen zoli. Ki’n kraz revey.  Onorab Pillay ou pa kapab kraz revey kraz sa sitar, sa gran gitar ki Prezidan ti pe zwe laba dan L’Inde

 

(laughter)

 

HON JEAN-FRANCOIS

E sa wi.

Sa i danzere!  Pa kraz sa revey ki pe lev nou dan nou sonm lanbil ki pe dir nou, ki pe sonn en alarm!  Se sa ki nou anvi fer nou. Nou anvi ki nou avans devans lo bann prensip ki nou pe respekte nou menm. Ki nou pe respekte mon krwar Onorab Gill ou dakor ek mwan lo la.  Ou konpran?

So, sorry Onorab Speaker, mwan mon anvi la fer en pti konklizyon politik, pour mwan dir avek zot bannla napa lavi laba kot zot ete! Napa lavi zot in ganny anbete.  Sorti!  Pa rode kan mon’n sorti mwan mon’n sorti depi boner mwan!  Mwan lontan mon revey in sonnen mwan.

So, i enportan Mr Speaker ki mon pa konnen si zot pe al fer en lot Konstitisyon – en lot parti, mon swet zot bonn sans akoz mon believe dan miltiparti. Mon believe ki i devret annan en bon lopozisyon, plizyer parti politik ki nou demokrasi i devret vibran.  E mon swete ki a lavenir zot kapab vin sa Lopozisyon, responsab determinen parey nou, nou’n fer.

Me selman la pour le moman pa rod bann leskiz annou, annou avanse.  Akoz parey Onorab Hoareau in dir, si napa diferans ant eskobar ek koripsyon e mon dakor avek Onorab Hoareau.  I menm lefe, i menm domaz ki i fer lo nou pei.  Be ki mannyer nou pou dil avek koripsyon kan eskobar i ankor deor?  Kot nou pa kapab deal avek eskobar.  E se pour sa ki mwan mon dir si napa en volonte politik, si napa en volonte dan Egzekitif nou pa pou kapab avanse.

Alors mwan konman en Manm sa Lasanble e mon konklir la Mr Speaker.  Mwan mon pou propoze ler nou antre dan bann deba Bidze ki nou envestir dan sa bann lanket. Nou envestir ladan nou donn mwayen.  nou ale nou rod komitman Egzekitif.  Akoz en lenvestisman, dan sa lanket 50 milyon Dolar i potansyel en profi 45milyon Dolar.

Menm si i kout nou 5 milyon Dolar i en profi 45 milyon Dolar.  I annan bann sif ki’n ganny mete devan nou taler bann gro, gro propriyete bann gro, gro tower 13 letaz, bann 6 letaz – tousala.  Be sa i vo en ta milyon dolar sa be si nou kapab ganny 45 ladan annou invest pour nou ganny sa 45.  Annou depans en pti larzan e sela kot komitman Egzekitiv i enportan.

E zot komitman zot, mon krwar, e mon pou hold zot tou zot parol ki zot in dir ki zot komitman i 100 poursan.  Alors zot ava siporte ler nou pou demande ki Gouvernman i pare pour li invest, in pare pour li depanse pour li rekolte e pour kapab deal avek sa problenm fini e pour nou move on.

Finalman Mr Speaker, i byen mon war pou dir i annan nou pe avans dan en direksyon enteresan.  Sa parti ki mon pa konn son non la akoz i pe al sanz son non so, kekfwa mon bezwen apel li sa parti – ok.

Sa parti in dir pou dir zot pour fer komite etik pou fer sir ki bann keksoz ki bann dimoun ki pran bann responsabilite, i ganny screen i e fer sir zot ganny bann bon dimoun.

Neseserman nou osi nou fer sa nou.  Nou osi nou fer.  Nou napa en Komite Etik, me selman nou annan, nou tou nou annan en pe etik.                      Mwan mon kestyon pour zot se, be bann ki anndan lo la, bann ki’n fini antre, akoz sa Komite mannyer mon’n tande se pou get bann ki’n antre – be bann ki’n fini anndan la ki pe asize lo sa de gro ban de kote ti annan mon’n war lo televizyon, kot Onorab Pillay ti pe asiz lo la. Onorab Hoareau ti pe asiz en pe dan fon lo la, pe ekrir Konstitisyon.

Bann ki’n fini antre ki pou arive?  Nou pa pou al get zot konmsi?  Bann ki’n ganny 50 bout later, ki’n laba anndan trankil pa pou redir zot konmsi en kou, konmsi be tyonbo en kou?  Etik sa nou bezwen koze nou bezwen get sa en kou. Ou konpran?

Se sa bann keksoz ki nou bezwen fer.  E mwan mon determinen pour mwan mars avek zot, pou mars avek pep Seselwa, fer sa ki neseser pour nou parey mon’n dir put these things to rest e konsantre lo konstri sa pei ki sa responsabilite avek lagras Bondye, si Bondye pitye i tonm lo nou, nou ava annan, nou ava’n fini balye salon ler nou pou antre.

Nou pa pou pas nou letan pour nou re-kontinyen get sa bann keksoz.

So, annou, mon ed zot avan ki zot poz lakle lo ‘latab ronn’ ed nou pas en balye dan lakaz, pas en balye, nou met keksoz prop nou avanse e nou pei i avanse.  Mersi bokou Mr Speaker.

 

(APPLAUSE)

 

MR SPEAKER

Mersi, Onorab Ferrari.  Mon ava zis donn laparol pour en leklersisman Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker anba Order 56 (1) (d) mon le fer en klarifikasyon.  Mr Speaker Onorab Ferrari in donn lenpresyon dan son lentervansyon ki mwan mon’n fer lentervansyon, kot mon’n koz lo met retar lo bann travay ki nou pe koze anba sa Mosyon.

Mon krwar Onorab Ferrari in misrepresent konpletman sa ki mon’n dir.  Sa ki mon’n dir Mr Speaker i senp; mon’n dir koumsa pou ki dan sa Lasanble nou ti pas en Lalwa pou ki sekter offshore dan nouvo Lalwa ki pe ganny demande ki bann Direkter, Direkter ki dan en konpannyen offshore sa lalis direkter i ganny fer pou sey ganny donnen avek sa lalis pou bann dimoun tel koman bann avoka bann dimoun ki fer bann travay avek sa bann konpannyen.

Lamannman ki nou ti pase dan sa Lalwa e se sa ki Onorab Ferrari pe refer avek, in fer ki nou ozordi zis en lazans en lenstitisyon leta ki kapab ganny sa lenformasyon atraver bann prosedir vreman konplike.

Me LDS i vreman krwar dan langazman popilasyon pour tackle bann lenstans bann dimoun i kapab servi bann konpannyen offshore pour al met zot larzan, then sa lalis direkter ti kapab vin piblik oubyen akse avek sa lalis pour en dimoun ki anvi ganny sa lenformasyon dan servis piblik.

Se sa ki mon’n dir Mr Speaker e Mr Speaker, Mr Speaker sa ki mon’n fer kler Mr Speaker.

Dezyenm pwen kot Onorab Ferrari in misrepresent sa ki nou’n dir ler nou’n dir ti napa Tender Board, me sa ki mon’n dir Onorab Ferrari se ki malgre ti napa Tender Board eski sa bann propriyete ti ganny vann at the value ki’n fer ki nou lepep Seselwa nou’n benefisye o maximum?

Largiman teknik Mr Speaker, i relye otour ki mannyer nou pou fer sa Mosyon marse e la …

 

MR SPEAKER

Wind-up. 

 

HON SEBASTIEN PILLAY

Mon a wind up Mr Speaker mon dakor ek son pwen e ki why not propose lo a pwent en bann envestigater enternasyonal parey lezot pei in fer pour zisteman sorti dan sa sityasyon ki nou ladan. Mersi Mr Speaker.

 

MR SPEAKER

Mersi, mersi pour ou leklersisman Onorab Pillay. Bon deba pa ankor exhausted lo sa Mosyon nou pou repran nou travay 2er.  Mon annan zis de pti lanons pou mwan fer with regards to meeting.

ABC nou pou rankontre 1er dan Speaker’s Conference Room, nou annan bokou pour nou diskite. So, pour nou pa rush apre nou ava fer li 1er e mon ti a kontan osi tou alert Bills Committee bann Manm Bills Committee, ki i annan en annan en meeting pe ganny sizere demen 9.30 bomaten Committee Room 3.

E petet zis pour met zot okouran nou oule tackle 4 Bill semenn prosenn.  I annan Bill Pension (Amendment) ki ti li premye 2017, Desanm 2017. Nou annan Truth and Reconciliation.  Apre nou annan sa de Bill ki nou’n fer First Reading sa se Civil Status (Amendment) Bill avek Seychelles Intelligence Bill.

So, nou annan sa 4 Bill devan nou e Bills Committee bann Manm vin avek zot 4 kopi Bill pour nou kapab konmans get travay lo la.  Be nou ava regarde kwa ki nou kapab deal avek Mardi.   Me parey mon pe dir, nou’ fini lans bann prosedir e nou bezwen konmans pran pour nou debat lo la.  Ok?

Pour zot lenformasyon mon kontan Onorab Pillay in fer mwan siny. Civil Code nou ti’n konmans diskite.  Ki mannyer mon konpran rezerv semenn le 16 a le 20 Zilyet.

E Civil code Lasanble Nasyonal pour travay en semenn antye lo la pour regarde si nou kapab konplete, si nou pa kapab konplete nou ava carry on son semenn apre.

Nou pou annan nou 2 expert 2 avoka enternasyonal ki pou osi ede dan sa prosesis pou prezan a sa moman.  Ok so vwala en pti pe ki mon ti anvi anonse.  Nou ava break e nou ava repran travay 2er apre midi.

 

(BREAK)

 

MR SPEAKER

Bonn apre midi tou Manm Onorab.  Bonn apre midi tou Manm piblik ki a lekout e ki pe swiv travay Lasanble Nasyonal.  Nou pour kontinyen lo Mosyon ki ti ganny prezante bomaten par Onorab Mondon.  Deba ti deza konmanse lo la.  Onorab Ramkalawan ou le fer…?

 

HON WAVEL RAMKALAWAN

Mr Speaker.  Mon zis mon pa demande pour mon koze la pour mon fer mon lentervansyon mon anvi koz en pe plitar.

E in fact lo nou kote pour annan zis Onorab Henrie avek mon menm ki pour koze.  Pandan break nou ganny en dyalog ansanm avek Loter Mosyon Onorab Mondon.  E pour ki i napa okenn anbigite parske nou tou lede kote nou anvi keksoz i kler ki sa lanket lenvestigasyon i ganny fer pour met keksoz o kler nou tonm dakor lo en propozisyon lamannman ki konmsi mon santi i neseser pour fer li la.  So that okenn dimoun ki pour koze

I ava pran sa an konsiderasyon ki lamannman zis sa premye bout ki pour sanze I ava lir koumsa – I ava lir;

‘Vi ki in annan plizyer propriyete larepiblik COSPROH dan lepase, sa Lasanble i fer en demann pour ki Prezidan Larepiblik i etabli en Komisyon lanket anba direksyon Oditer Zeneral pour fer en lanket detaye e i kontinyen’.  Ok so I annan zis sa bout la

‘…sa Lasanble i fer en demann pour ki Prezidan Larepiblik I etabli en komisyon lanket anba en direksyon Oditer Zeneral’.  Mon kapab fer ou ganny en kopi Mr Speaker.

 

MR SPEAKER

Mersi Onorab Ramkalawan.

 

HON WAVEL RAMKALAWAN

Anler i annan son orizinal anba i annan son…

 

MR SPEAKER

Ok, bon i annan en lamannman.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker mon le segonn sa lamannman.  Nou diskite ansanm nou vwar baze lo sa ki Onorab Basil Hoareau ti met devan, e ki diskisyon in ganny fer an deor Chamber e nou tonm dakor lo sa way forward.  That is the way ki mon krwar nou devret ale pour fer keksoz vin efektiv.  Alor mon le segonn sa lamannman.  Mersi.

 

MR SPEAKER

Ok.  Mersi Onorab De Commarmond.  Bon lamannman in segonde.  Mon krwar i ase sibstansyel nou devret pran en vot lo la akoz i sanz en pti pe konteks Mosyon eski nou kapab pran en vot lo la?

`       Tou bann Manm ki an faver lamannman?  Okenn Manm ki kont?  Ok Madanm Clerk.

 

MADAM CLERK

Mersi bokou Mr Speaker.  Mon rikord 22 Manm an faver.  Personn kont.  Mersi.

 

MR SPEAKER

Bon savedir lamannman in pase.  Bon deba la I pour swiv lo Motion as amended en?  Onorab Churchill Gill oule entervenir.  Go ahead Onorab.

 

HON CHURCHILL GILL

Mersi Mr Speaker.  Bon apre midi Mr Speaker.  Bon apre tou Manm e tou dimoun al ekout.  Mr Speaker mon santi ki mon devret anmenn mon kontribisyon e mon sipor pour sa Mosyon.  Akoz COSPROH ti annan assets sibstansyel anba son direksyon, e i enportan ki sa Komisyon Lanket I ganny fer I ganny etabli pour ki nou a kapab vwar tou bann aktivite ki in pase dan sa bann tranzaksyon son bann pri ki in ganny vann son bann valer ki in ganny asosye avek sa bann letan.

E an menm tan son bann diferan lezot tranzaksyon ki warrant ler ou pe vann en propriyete si tou sa bann keksoz in ganny swiv.  Akoz parey mon dir avan sa asset value ki ti anba COSPROH I tre, tre sibstansyel.

Bon mon pour donn sipor sa Mosyon akoz mon kapab swiv en pe bann deliberasyon en pe sa bann tranzaksyon, akoz mon ti a en moman letan mon ti pe responsab lotel pour konpannyen etranze.  E mon vwar en pe sa bann tranzaksyon.  E mon santi I ti a byen sis a lanket I ganny fer e I ava eklersi.

Kekfwa i annan keksoz ki byen oubyen parey lezot Manm ki dir nou pa pe blanm personn me selman sa lanket I ava determinen kwa ki in pase, ki mannyer in ganny fer.  Si in ganny fer dapre I devret e ki sa Lasanble alafen dizour I a ganny son rapor nou a kapab determinen si nou satisfe e ki tou keksoz in al annord.

E parey bann Manm avan in fer sorti, nou bezwen pran en lapros tre serye ek sa, akoz si I annan okenn keksoz ki pa al dapre in devret, mon krwar si I annan okenn aksyon neseser ki I devret ganny pran a sa moman, sa a ganny determinen.

E tou Manm ki in koze in fer sorti bokou pwen mon pa pour al repet sa.  Mon anvi zis entervenir konman en dimoun ki in deza travay dan sa lendistri e ki konpran sa bann keksoz.  Mersi Mr Speaker.  Mon pour anmenn mon sipor pour sa Mosyon.

 

MR SPEAKER

Mersi Onorab Churchill Gill.  Mon a donn laparol Onorab Gervais Henrie.

 

HON GERVAIS HENRIE

Mersi Mr Speaker.  Bonn apre midi tou dimoun.  Mr Speaker en parol ki in ganny dir depi bomaten se ki, nou pa pour blanm personn.  E mon prezimen bann keksoz ki rezon ki bann dimoun pe dir sa se ki akoz sa Lasanble pe debat en Mosyon ki pe fer en demann.  En demann tre kler, tre direk anfet se trwa demann prensipal dan en lanket dan COSPROH e si okenn dimoun dan lakonpannyen prive in benefisye dan lavant, sa bann byen COSPROH?  Sa I premye demann.

2enm pour etabli si I annan okenn konfli lentere dan sa bann tranzaksyon?

E 3enm demann se si reveni Gouvernman a okenn moman in ganny konpromi?  Mwan mon pour dir ki letan mon ekout sa ki in ganny dir depi bomaten e sa ki mon konnen.  Bann lenformasyon ki domenn piblik pour en pe letan, sirtou atraver lapres lo size COSPROH mwan mon annan en for soupson ozordi, poudir larepons sa 3 kestyon ki in ganny etabli I pli wi ki non.

E rezon i senp.  Nenport pei ki annan en rezim politik ki fer tro lontan ou pour vwar I tante annan sa bann kalite labi.  Non selman lo konfyans piblik me lo resours e prensipalman larzan Fon Piblik I ganny detournen.

Atraver Lafrik kot bann rezim politik in lontan ou pour vwar nou vwar sa.  Nigeria par egzanp resaman zot Prezidan in ganny anmennen ankour kot in bezwen rann 500milyon Dolar – Angola parey Lezip nou vwar Mubarak ganny anmennen Ankour lo lanmak, akoz in annan sa labi.

E dan konteks Sesel ler mon pe ekout tou sa ki bann entervenan avan mwan in dir bomaten, mon dir pa kapab ki si an 82 kot teknolozi pa ti sitan avanse, nou ti mont L’Angleterre al bug en lasanm.  ‘Konplo 412’ ti pase konman en Telenovela tou le Dimans lo radyo.  Pa dir mon poudir Gouvernman sa letan pa ti aware sa bann keksoz ki ti pe pase dan COSPROH e ki mannyer zot pa’n demann kestyon parey Onorab Pillay bomaten pe dir – les ti napa prosedir tender, me pa’n demande be si sa bann propriyete in ganny vann lavaler marse sa letan.

Savedir sa I bezwen al pli lwen ki non bann endividi ki’n ganny mansyonnen depi bomaten I bezwen al bokou pli lwen.

E se pour sa rezon ki alor ki mon siport lamannman ki’n ganny fer pour ki I anmenn Prezidan Larepiblik ladan direkteman Lasanble I fer en propozisyon ki li I etabli en Komisyon Lanket anba Oditer Zeneral.

E alor sa Komisyon Lanket nou ava anmenn tou bann dimoun ki ava annan sa abilite ki kapab pran bann dimoun dan SHTA.  I a kapab anmenn en reprezantan Lasanm Komers Sesel osinon si I annan en lorganizasyon isi ki re group bann auditors osi anmenn zot pour ki I ava annan en levantay abilite talan pour get sa size pre.

Akoz sa size I enportan?  Sesel nou pa ankor dekouver delwil, be nou tourizm ki nou delwil.  Ozordi dan lemonn bann pei ki prodwir delwil par egzanp UAE, nou zanmi pros la obor Kuwait zot prodwir delwil zot selman ou konnen poudir zot reveni tourizm I plis ki zot reveni delwil.

E letan ki sa leksitasyon ki Onorab Larue in dir ki lekritir ansyen Prezidan France Albert Rene I malen li.  E in vwar I annan en vizyon li e in dir dan tourizm lala kot larises sa pei I ete.

E ziska ozordi I ankor leka par egzanp nou reveni tourizm an 2016 ti sot plis ki 516.7milyon Dolar ameriken.

E an 2017 sa sipoze agrandi sa 7.9poursan e I pour kontinyen agrandi par 3.6poursan ant 2017 a 2027 ki pour fer li ariv en total par lao 791.7milyon Dolar e son total agrandisman I espekte ariv 38.3poursan.

Alor ou vwar ki mannyer tourizm I enportan pour nou e ki mannyer nou bezwen fer sir poudir ki napa okenn labi Sesel I benefisye avek tou fason posib ki nou kapab dan nou tourizm.

E ozordi mon regret en pe sa kalite devlopman ki nou anmennen kot tourizm I vini I reste deryer en miray I pa enplike avek kominote kot en lotel I baze.  Dir par egzanp Four Seasons kot I baze laba Baie Lazare zot pa sorti pour servis taxi zot pa al manze dan bann pti restoran zot pa al aste keksoz laboutik.  Nou’n fer en lerer.

E COSPROH in azout lo sa lerer.  Vizyon ti byen pour met sa bann propriyete anba direksyon Leta.  Me apre ki in arive?  Mr Speaker mon’n dir poudir Prezidan Rene ti annan en vizyon ansyen Prezidan e kekfwa sa vizyon I pa ti mal dan son totalite i ti annan en merit e bokou bann zenn dan bann lannen ‘80 an montan ti tonm dakor pour regard sa boug.  En vizyoner en ki ti preski parey en Che Guevara. Mwan mon’n fer Young Pioneers dan mon letan primer e mon ti kontan ekout li sa boug lo ansyen Prezidan lo radyo letan I ti koze mon ti toultan war li koz konmsi avek en pasyon, i ti annan I ti annan preski dir en senserite dan sa ki i ti dir nou!

Me bokou letan plitar mon fer Young Pioneers 82 letan Rampal I vin Sesel, mon dan sa group ki pe fer mass display.   NYS 2an konsekitiv an ‘88 ek ‘89 mwan avek ansyen CEO STC Veronique Laporte I ganny swazir pour al donn li son kado State House.  Mwan ki fer son diskour pour remersi li pour tou sa ki in fer; en Diskour zot kapab al rode dan Arsiv SBC sa bann letan Msye Danny Faure Prezidan aktyel ki ti ansarz NYS.  

Nou pas en lazournen dan son biro Mont Fleuri kot Minister Ledikasyon avek bann sa bann ansyen bann ansenyan Afriken bokou zot en group sa, asize pour ekrir Diskour.

E mon rapel sa letan an ‘88, ‘89 mon ser ti travay kot State Assurance – SACOS son bann koleg I sikann li I dir ‘ou frer ti reste zis pour li tonm azenou e lis lipye Msye Rene’.  Akoz telman sa bann afriken ti anbelir sa Diskour pour met Msye Rene lo en pedestal.

Me finalman NYS mon konmans fer letid listwar nou etidye European avek British history ki prezan mon konmans analize e reflesir poudir, be politik vreman ou sipoze deserve ou pep e met ou parol an aksyon.

E sa letan mon ankor en zenn garson mon konmans realize poudir sa Gouvernman (zot ti SPPF sa letan zot ti sanz non SPUP) poudir zot aksyon ek zot parol I de keksoz.

Malgre the romanticism about the party and the man in charge me Bondye in pitye mon depi an ‘88, ‘89 mwan mon’n konmans realiz sa mon sote.  E mon pitye bann dimoun ki ankor laba ki ankor krwar ladan, e mon envit zot pour war sa ki nou pe dir akoz bokou sa bann keksoz ki mon pe dir lapres Lopozisyon depi retour miltiparti in ekri bokou keksoz lo COSPROH poudir there was something wrong with the model. 

E parti SPPF ki ti mazorite sa letan pa’n fer nanryen pour anmennen e ozordi sirkonstans politik pe fors zot pour koz avek sa kalite pasyon akoz lopozisyon I an mazorite pour sanz zot tune.

Me eski mwan personnelman mon krwar ladan?  Non?  Mon krwar I en stratezi, i en manev politik e mon enplor bann dimoun ki pe ekout mon pour pa tonm dan sa latrap.

Parske si ou get depi an 2016 letan nou vin konstitye 6enm Lasanble Nasyonal get bann keksoz ki Lopozisyon LDS in pouse konpare avek sa ki Parti Lepep in pouse.  Si Parti Lepep vreman ti senser pour met an prensip, pour met an aksyon la transparans rann kont e bon gouvernans, zot ti pour fer bokou plis ki sa.

Nou’n anmenn en kantite keksoz Mr Speaker ki ozordi ler mon pe koze I fer ki I annan en kantite pending investigation laklerte e ki pour kapab sanz fason ki politik i ganny fer Sesel, ki bann future government I diriz sa pei, me pli enportan parey mon ti koz lo la letan mon ti fer prezantasyon, lo sa Mosyon ACCS ethical leadership, I bezwen antre dan politik Sesel.

Ozordi FPAC i annan de pending investigation devan zot vizavi FIU avek NDEA.

Onorab Larue in anmenn Mosyon lo bann propriyete ansyen First Lady Madanm Sarah Rene Zaquani.

I annan lanket lo music stadium ki ongoing 50milyon dan SMB.

 Size Alphonse ki in ganny diskite semenn pase sa zafer Fly Fishing Mr Speaker en goldmine sa.

E ozordi letan mon pe koze I fer 14zour depi ki Minis Finans ti asiz la e I ti dir avek nou I pour fer Lasanble ganny dokiman lekel sa 2 Direkter dan sa lakonpannyen ki apel Alphonse Island Lodge Limited ki li I pe fer plis ki 20milyon Dolar par an, me I pe pey IDC zis apepre 10poursan dan reveni ki li i pe gannyen.  Lekel ki pe benefisye avek sa?  90poursan lakantite larzan ki pe antre dan fly fishing.

Ankor I bann keksoz ki nou konman en Lasanble nou pour bezwen leve.  E tou sa bann size ki mon mansyonnen se LDS an gran parti avek soutyen byensir lot kote pour met laklerte lo la.

E prezan bann dimoun laba deor pa bezwen tonm dan pyez ki Onorab Pillay in sey avanse depi bomaten poudir wi nou pe koz bokou, nou pe koz bokou.  Nou en Brans Leta nou rekonnet sa, nou met en size de lavan. I annan en landrwa ki nou pour vwar i arête.

Annou pran sa size FIU, NDEA par egzanp eski par egzanp Prezidan larepiblik ti zwenn avek o Komiser Irlande ki ti vin prezant li son bann dokiman de creance menm si I pa anvi enterfer ladan direkteman, me eski in lev sa size avek li poudir be I annan ou bann resortisan irlande ki en pe dan problenm la, ki mannyer ou kapab ed nou?  Mon pe – en kestyon ki mon met devan.

Par egzanp dan kestyon later ansyen First Lady later Madanm Zarquani Rene, Rezistrar ti kapab antre ladan pour regarde ki mannyer sa bann tranzaksyon in pase.

 SRC ti kapab regarde be eski bann duties, bann stamp duty ti devret peye eski in mars byen?  Industrial Estate Authority ki in fer li?

Minister Later nou tande la prezan ki I pe al fer konversasyon.  Sa i bann bout kid an Brans Egzekitiv alor Prezidan toultan nou tann li asize dan son Press Conference I koz lo lendepandans sa bann entities.

Me konman en dirizan ki konsernen parey Onorab Ferrari in fer nou rapel bomaten I bezwen demontre son lotorite son konsern dan sa bann zafer e met en parol ou de parol pour fer ki sa bann keksoz I bouze.

Dan sa lanket 50milyon in deza enplik son lekor parske in koz lo la piblikman dan en konpanny Parti Lepep kot I ti dir poudir sa larzan in al pour SMB, me eski in fer son due deligence konman Prezidan Larepiblik, pour al kot ACCS parey ti annan en lapel piblik ki ti ganny dir poudir dimoun ki konn keksoz vin devan eski li in fer due deligence pour al de lavan?

Alor parol avek aksyon I de keksoz.  Nou lo sa kote latab nou pour kontinyen met sa bann keksoz de lavan.

la propozisyon ki mon pour fer Mr Speaker anba direksyon Oditer Zeneral I ganny apwente mon demande ki enn bann lorganizasyon enternasyonal ki zot demann led avek se IMF.

IMF I annan en unit ki apel Stolen Asset Recovery Program pour zot kapab ed bann pei pour ale fer sa bann forensic auditing e pour kapab ed zot anmenn laklerte dan bann ka ki zot pe sey investigate.

Nou konnen poudir nou mank kapasite e alor nou bezwen ganny led dan tou fason posib.

Mr Speaker i enportan – i enportan ki nou retourn dan sa zafer COSPROH pour la senp rezon ki tourizm son kantite larzan ki I anmenn pour sa pei nou bezwen fer sir poudir I annan en lord ladan.

Detrwa mwan se pa lannen pase ti annan en group Ameriken ki ti vin Sesel pou vin fer en seminar dan posibilite ki Sesel i dekouver delwil ki mannyer bann antite piblik e prive i bezwen alert lo tou bann tranzaksyon ki pe arive pour ki alor anpes pour ki i annan koripsyon.

Be nou tourizm kekfwa ozordi i en keksoz ki nou bezwen osi regard ver lavenir.  I annan sa gro kestyon price – price transfer ki Minister Finans dan en konversasyon ki nou mon Komite Lasanble ki mon Chair COGA in fer avek Minister Finans ki zot in dir poudir sa pei I annan en gro defayans.  Nou pa pe kapab kontrole parske bokou sa bann lakonpannyen booking I ganny fer deor larzan pa zanmen antre Sesel.

E la nou pe tande poudir bann lotel ki ti pour COSPROH ozordi I propriyete bann lakonpannyen BVI.  Be sa I en size en pe parey Alphonse Mr Speaker, kot ou vwar en lakonpannyen li I annan lease li lo en propriyete bann pti bout zil li apre lo sa pti bout zil ki li I annan lease I annan en lotel lo la.  Savedir sa lotel li I pey en lease IDC be selman sa I pe bezwen sublease.

Enn bann dimoun pe pli benefisye lasyer labote sa pei parey parol Msye Rene ti dir be selman 40an zot lo pouvwar zot pa eparny nou avek sa keksoz ki mal.

Donk, mon bezwen dir ankor avek bann dimoun ki ekoute 40an nou annan menm sistenm gouvernans nou o pouvwar.  Tou sa bann keksoz ki in arive la depi FIU, NDEA, later Madanm Rene, music stadium, 50milyon SMB, COSPROH, Alphonse pa ariv lo watch LDS sa.  Non.  In lo watch SPUP/ Parti Lepep/ SPPF.  E se zot alor ki nou pour kontinyen donn konfyans?

Eski zot ki pe dir non la nou pour al sanz non nou pe al re organiz nou tande ki dimoun pe dir ou pour kontinyen fer konfyans?  Ou’n donn konfyans an ’93; ou’n donn konfyans an ‘98 an 2001, 2002, 2006, 2007, 2011, 2012, 2015 ou pour donn konfyans ankor?  Be ou pa kapab!  Ou pa kapab kontinyen fer sa akoz dan sa letan kot ou ti pe met laliny 3er bomaten pour ou met materyo konstriksyon; kot letan ou ti pe ganny fouye lo erport avek 200 Dolar kot ti pe pran avek ou pour anmenn ou zanfan trete aletranze, ou konnen ki zot ti pe fer?  Eski ou konnen ki zot ti pe fer?

Larzan ti pe kit pei be en pei ti pe ganny vann antre dalon!  Good deals pe ganny fer antre zot! Me ki mannyer nou kapab konman en pti Nasyon koumsa kontinyen fer konfyans en sel group dimoun?

Mon dir ou depi taler poudir dan tou pei atraver lemonn kot en Gouvernman in reste lontan tro o pouvwar pour tro lontan, i abiz konfyans bann voter e i annan sa risk ki detournman fon piblik i arive.

E ozordi mon pa pour dir   poudir pa pour blanm personn parey bann serten in fer avan bann serten in fer parey avan mwan.  Mwan mon pour dir mon annan en for soupson poudir sa in arive e I neseser ki alor ki sa Komisyon I ganny apwente e anba son direksyon Oditer Zeneral nou trouv ki in arive e nou ganny larepons pour bann kestyon ki ozordi nou pe demande.  Mersi Mr Speaker.

 

(APPLAUSE)

 

MR SPEAKER

Mersi Onorab Henrie.  Mon ava pas laparol avek Onorab Simon Gill.

 

HON SIMON GILL

Bonn apre midi Mr Speaker.  Mersi Mr Speaker pour donn mon laparol.  Bonn apre midi tou koleg Onorab e bonn apre midi tou Manm Piblik ki pe ekout nou deba ozordi lo Mosyon prezante par Onorab Mondon.

Mr Speaker nou pe koz lo sa Mosyon parey in ganny amande e mon kontan ki nou kapab trouv merit dan soumisyon fer par Onorab Basil Hoareau.

E se sa lespri travay dan Lasanble Nasyonal Sesel non pa Lasanble Nasyonal LDS.  Nou reprezant Sesel konman en Lasanble Nasyonal e nou koz konman en Lasanble Nasyonal.  Byensir dan sa Lasanble Nasyonal Sesel I annan bann reprezantan sorti dan divers parti politik.

E i normal alor ki nou annan en diferans dan nou lopinyon akoz sakenn de nou parfwa nou vwar keksoz diferan me leksperyans depi ler Lasanble in sermante an 2016 nou osi vwar en kantite moman kot nou annan bann pozisyon inanim lo bann diferan size ki nou debat lo la dan sa Lasanble.

Swa en Prozedlwa sa en Mosyon oubyen pour nou diskite aprouv Bidze.  Sa i tre byen.  E koumsa ki nou devret kontinyen marse. Alor Mr Speaker lo kote latab ki mon reprezante isi nou parti ki nou reprezante isi dan sa Lasanble, I apel Parti Lepep.

 

(APPLAUSE)

 

HON SIMON GILL

Napa okenn lenvansyon oubyen bann lezot non barok ki zot pour donn nou ki definir lesansyel nou parti.

Mr Speaker en parkour dan listwar nou parti ki lepep ozordi I en parkour ki ris.  I ris an bokou keksoz ki nou fer dan sa pei ki byen me malerezman ozordi lepep Seselwa pe ganny fer krwar ki tou sa ki nou fer dan sa pei pa bon!

Tou Seselwa ki entelizan si zot dir tou Seselwa I vwar kler e tou Seselwa ki vwar kler I konnen poudir pa tou keksoz ki nou fer dan sa pei ki mal.  Nou aksepte ki plis ki 40an nou o pouvwar wi nou o pouvwar e dan sa plis ki 40an ki nou o pouvwar Mr Speaker mwan ozordi Simon Gill, mon fyer pour sa bann lakonplisman pozitiv ki nou parti dan Gouvernman nou reisi akonpli!  Mon fyer!

E I annan en kantite dimoun i fyer pour tou sa bann lakonplisman ki nou reisi akonplir pour sa pep.  E si in annan dimoun ki’n ris ki’n vin bann milyonner ki’n vin bann milyarder zot in vin bann risar bann milyarder, wi dan sa moman ki nou lo pouvwar.  Napa en lot Gouvernman ki’n la.

Milyonner Mr Speaker napa zis Parti Lepep.  I annan tou bann dimoun ki sorti dan plizyer parti politik ki bann milyonner ki bann milyarder dan sa pei!

E pa ki nou zalou zot rises.  Pa ki nou zalou zot rises.  Nou fyer ki zot in reisi montre ki zot bann zonm fanm ki’n kapab leve e profit bann loportinite ki nou parti dan Gouvernman pandan plis ki 40an in ofer zot.

E nou felisit zot si zot in fer li lo en baz onnet ou larises ki ou ganny li lo en baz onet kot ou pa fer koripsyon kot ou pa fer okenn lezot magouy nou felisit ou.

E nou dir ou keep it up – keep going – keep going e nou pour siport ou osi lontan ki nou la dan Gouvernman.  And this is the spirit!  Siport nou bann Seselwa ki’n ganny zot larises lo en baz onnet e ki an retour zot in donn zot kontribisyon zot in retourn zot kontribisyon dan sa pei pour ki nou ki la otour sa latab ozordi apre midi, dan sa Lasanble, nou pe ganny peye lo bann kontribisyon ki zot pe fer konman bann taxpayers.

Me Mr Speaker nou parti Mr Speaker atraver lannen in evolye.  I pa en aksidan listwar e i pa ni en koensidans listwar.  Pep Seselwa dan dernyen eleksyon la fason ki zot in vote zot in deside pour donn LDS en mazorite dan Lasanble Nasyonal.

E sa I en rezilta ki lepep I bezwen aksepte e ler nou aksepte LDS in ganny mazorite dan Lasanble Nasyonal, nou isi dan Parti Lepep avek nou minorite nou dir pa akoz zot in ganny mazorite ki nou bezwen kasyet nou latet anba latab

We will stand up e nou pour donn lanmen pour nou kontinyen anmenn sa pei kot nou krwar nou bezwen anmenn sa pei.  Mr Speaker – Mr Speaker nou dan Parti Lepep nou konsyan bann sanzman ki in arive dan sa pei e ozordi dan leadership nou parti I annan en nouvo zenerasyon leadership ki pe monte.

 

(APPLAUSE)

 

HON SIMON GILL

E sa nouvo zenerasyon leadership ki pe monte dan Parti Lepep Mr Speaker pour anmenn bann new thinking  …

 

(APPLAUSE)

 

HON SIMON GILL

…nou pour anmenn bann new thinking.

Mr Speaker bann new thinking, bann new thinking, pour anmenn nou pour anmenn Sesel o de la sa 25an sa 30an sa 40an – 50an.  Malgre Onorab Henrie pa dakor avek sa.  Onorab Henrie pa kapab al vot pour sa plis ki 60mil Seselwa ki vote dan sa pei.  Onorab Henrie I annan li zis 1 casting vote.

E si sa pep i deside dan prosen eleksyon pour elekte nou parti dan Gouvernman they will do it!

 

(APPLAUSE)

 

HON SIMON GILL

E si zot deside pour elekte LDS dan Gouvernman they will do it e si zot deside pour donn LDS en mazorite dan Lasanble Nasyonal they will do it!  E si zot deside par konsekans donn the new party sa nouvo parti sa nouvo zenerasyon leadership ki pe monte lo nou kote mazorite dan Lasanble Nasyonal they will do it!

 

(APPLAUSE)

 

HON SIMON GILL

Akoz se lepep ki annan pouvwar, se lepep ki annan pouvwar.  Now I annan en keksoz ki enportan – lo Mosyon ki mon pe koze mon pe koz lo Mosyon si Mr Speaker dan sa parkour lo legzistans nou Gouvernman, in annan dimoun ki anba nou watch in go greedy then in normal ki nou kler tors lo zot.

E pa zis go greedy koumsa menm dan labstre me kot I annan bann akt ki in ganny fer ki pa koresponn avek normalite tranzaksyon biznes or fer biznes.  Sa I enportan ki nou deal avek.

Mr Speaker nou al pli lwen si I annan koripsyon ki in ganny fer ki bann risar bann multi milyonner in antrenn zot lekor ladan then nou ava deal avek.  E nou’n dir sa nou, ava deal avek nou al pli lwen Mr Speaker nou al pli lwen I annan en keksoz ki nou bezwen fer – mon dan mon mazinasyon se ki dan sa Lasanble nou pa pour arête trouv bann Mosyon ki anmenn nou dan nou pase ki anmenn nou dan nou pase negativ.  Ki anmenn nou lo nou mankman lepase.

E si mon pour sizer en keksoz ozordi Mr Speaker an relasyon avek sa Mosyon ki pe kontinyen antre lo latab lo Lasanble, se pour anmenn en nouvo Mosyon pour demande ki enn fwa pour tou nou ouver tou bann liv lepase.

Donn bann lenstitisyon sa responsabilite pour ouver sa liv lepase.  Donn zot sa travay pour fer pour ki enn fwa pour tou nou a konnen poudir I annan en lenstitisyon de lenstitisyon ou trwa lenstitisyon ki pe ouver live lepase e anmenn keksoz pour donn sa pep pour dir zot vwala keksoz I koumsa, i koumsa,  i koumsa.

Mon pe dir sa Mr Speaker akoz mon senserman krwar poudir nou Lasanble I bezwen move on.  Nou Lasanble I bezwen move on anmenn bann kontribisyon ki anmenn nou pour definir en nouvo lavenir pour pep Seselwa.

 

(APPLAUSE)

 

HON SIMON GILL

Nou annan en kantite leksperyans atraver nou reprezantasyon isi dan sa Lasanble.  Annou sorti dan nou pase, akoz mon pe dir dan nou pase nou donn bann ensitasyon pour li investigate.  Sa ki nou bezwen fer se fer sir ki bann lenstitisyon I annan kapasite neseser pour zot kapab dig dan sa pase e nou konman en Lasanble nou move on avek fitir sa pep.

Nou move on pour anmenn size ki pour anmenn nou pour anmenn devlopman Sesel bokou pli lwen o dela sa 10, 15, 20an ki devan nou.

Mr Speaker tou dimoun ki ekout nou ki ekout Prezidan Faure anler State House pe sey konpran e I annan in konpran poudir sa Msye Prezidan Faure I pa oule listwar I dekrir li konman en Diktater dan sa pei.  E ki in fer?  In fer en deklarasyon dan State House in koz lo transparency, accountability, good governance.

E dan sa nouvo lapros son Gouvernman in permet or I pour permet tou dimoun, tou Seselwa konsernen rasire ki dan sak Departman, dan sak Minister sak bann zonm fanm ki pe fer marse Brans L’Egzekitiv – Lezislatif e menm zidisyer ki zot travay pe ganny fer byen.

I annan preski partou bann posibilite check and balances pour nou kapab fer sir ki sa Gouvernman e sistenm Gouvernman dan son totalite, pe fonksyonn byen.  E nou bezwen kontinyen dan sa direksyon.  Nou bezwen kontinyen dan sa direksyon Mr Speaker.  Annou  pa arete -annou kontinyen demann Prezidan Faure son Gouvernman pour kontinyen donn kapasite bann lenstitisyon pour ki bann lenstitisyon i kapab fer zot travay byen.

E Prezidan Faure pa kapab ozordi Mr Speaker krwar poudir li I en Lakour, I en ziz I ziri tou li menm.  E se pour sa rezon ki in kree  bann lenstitisyon e donn responsabilite, donn lotorite bann lenstitisyon pour zot kapab fer sir ki sa transparency, accountability and good governance, I pa reste lo latab Prezidan Faure.

Ki nou tou nou take ownership of transparency, accountability and good governance dan tou sa ki nou fer.

Now Mr Speaker lo kestyon lenvestigasyon ki pe ganny demande pour fer mon napa okenn problenm avek sa.  Mon pe dir let’s move on annou al investigate dan sak lentervansyon nou pe koz 45milyon – 50milyon Dolar.

Nou bezwen anmenn closure lo sa size nou bezwen anmenn closure lo la e nou bezwen donn bann lenstitisyon pa ki nou al donn zot lord, be nou bezwen pe dir ki nou bezwen anmenn closure lo sa size Onorab Henrie in sit detrwa kestyon ki ankor deor la pa ankor ganny closure nou Lasanble pe rod closure lo sa bann size.

E mon pour ensiste ki nou bezwen annan closure lo la, akoz Sesel I bezwen bouze nou bezwen bouze avek fitir sa pep.  Annou dekol nou dan nou pase, annou move on Mr Speaker byento, tre byento nou pour vwar nou pour apresye en transformasyon fondamantal ki pour arive dan sa pei.

Nou determinen, nou determinen nou sa nouvo zenerasyon leadership dan Parti Lepep.

 

(APPLAUSE)

 

HON SIMON GILL

Okenn zonm, fanm ki annan bann legois personnel endividyel ki pa krwar dan lavenir dan byennet sa pep, pa pour kapab kontinyen pe swiv nou.

 

(APPLAUSE)

 

HON SIMON GILL

Nou konmans byen mon kontan Onorab Afif bomaten in sit en paragraf dan enn nou liv wi si oule dir istorik I enportan dir istorik pour mwan. I enportan pour montre poudir sa filozofi, sa lideal ki nou krwar ladan nou swiv I pa neseserman I en lideal e I en filozofi ki zis en zonm ki anmennen.

E si Onorab Henrie in fer fot, in fer fot mon pe dir, mwan si I annan en zonm ki enpoter okenn lide se pa sa zonm neseserman ki matter me son lide lideal son prensip ki matter.  E nou isi dan kote Parti Lepep Msye Rene ale Prezidan Michel ale Simon Gill ale Prezidan Meriton ale, sa ki nou pour kontinyen krwar ladan bann zenerasyon ki pour vini se bann lide ideal bann filozofi bann prensip sakre ki nou pour kontinyen defann.

 

(APPLAUSE)

 

HON SIMON GILL

Se pa dan zonm neseserman akoz zonm I vini, I ale wi bann zonm fanm I ne I mor I fer son kontribisyon parey Onorab Ferrari dan en moman istorik ou’n fer ou kontribisyon dan 5 Zen – ou papa in fer kontribisyon dan 5 Zen and you need to be proud of it!

(APPLAUSE)

HON SIMON GILL

Malgre ou’n ale, malgre ou’n ale Onorab Ferrari listwar in rikorde ou kontribisyon ki ou fer.  E ozordi malgre ki ou lot kote latab, ki ou pa oule mwan fini koze, malgre ou lot kote latab mon apresye ou konman enn sa bann zonm ki in deside a en serten moman, pour fer en sanzman ki ti neseser a lepok.

 

(APPLAUSE)

HON SIMON GILL

Now nou problenm ki nou annan se ki nou annan bann zonm fanm ki zot in fer bann mankman, bann fo pa zot in drive e zot pa reste senser avek bann lideal inisyal ki nou krwar ladan e ki mwan mon ankor krwar ladan, akoz I pa ankarne dan zis en zonm!  I la e nou bezwen viv li e nou pe viv li.

Lazistis sosyal, loportinite, legalite e sa I bann prensip iniversel e ki a sa moman – a sa moman nou ti krwar ladan.  E i annan bann mankman, nou konnen I annan bann mankman e nou acknowledge ki I annan bann mankman, akoz nou napa bann zonm fanm ki parfe ni dan LDS ni dan Parti Lepep – napa bann zonm fanm ki parfe!

Nou pou fer fot – nou pou fer fot, zot pou fer fot, me sa ki enportan avek sa parkour dan nou listwar sa ki nou fer Mr Speaker, se tir bann leson e zanmen repet bann menm fot ankor!

(APPLAUSE)

HON SIMON GILL

E se sa ki nou pe fer dan Parti Lepep ozordi e sa nouvo zenerasyon dan Parti Lepep pe tir leson dan nou pase e nou pe dir never again e we are moving on!

(APPLAUSE)

HON SIMON GILL

Se sa ki nou pe fer.  E nou pe dir nou pa pe kasyet nanryen.  Nou pa pe kasyet nanryen!  Annou al investigate ouver tou bann liv sa ki bezwen deal avek ava ganny deal avek!

Nou nouvo zenerasyon leadership  dan Parti Lepep we are moving on!   Nou determinen pour move on e nou kontinyen anmenn nou kontribisyon pour transform Sesel.  ANSANM – TOGETHER – avek LDS ki ozordi I an mazorite dan Lasanble Nasyonal.

E se sa ki nou pour fer.  Se sa ki nou pe fer.  Ozordi Mr Speaker,  Mr Speaker ozordi ki I annan?  Ozordi nou annan nou dan Gouvernman ozordi malgre ki nou le krwar ki Gouvernman I zis lepep – dan Gouvernman ozordi nou annan en kantite bann reprezantan en kantite diferan parti politik e zot pe travay.

Si I annan pe trenn son lipye, nou pe espekte zot lo kote mazorite LDS dan Lasanble avek zot bann dimoun ki dan Gouvernman move on – move on  fer sa bann dosye bouze.  Fer sa bann dosye bouze.

Akoz nou, nou krwar, nou, nou krwar, I serye, nou senser nou, nou krwar poudir nou bezwen pe anmenn en transformasyon profon e serye dan sa pei.  Serye.

Si I annan bann mankman ki nou fer enkli mwan ki en zonm ki pa parfe enkli nou, ki personn pa parfe.  Si i annan bann se mea culpa ki nou bezwen fer, annou fer e annou tonm dakor nou tou, pour anmenn sa Sesel e pep Seselwa pli lwen!

Yes Mr Speaker sa Mosyon ki mon pe koz lo la, I menm Mosyon ki Onorab Gervais Henrie in fer lentervansyon lo la.  E menm Mosyon ki Onorab Ferrari in fer e menm Mosyon ki Onorab Ramkalawan in anmenn en amannman e ki I pe al koz lo la ok?   I menm Mosyon ki tou lezot bann dimoun in entervenir in koz lo la enkli Onorab Woodcock.

Mr Speaker nou le ki sa Sesel, nou le ki sa Sesel I ganny en nouvo souf nou le ki sa Sesel I ganny permet pour li epanouir.  Nou serye lo sa ki nou pe dir.  E se sa ki nou pe demande.   Ki nou pe demande Annou tir tou sa bann zafer politik, kot devret ganny tire.  Annou tire.  Annou les bann lenstitisyon ki nou bezwen donn zot sipor build zot up fer bann travay ki zot merit fer, e apre sa nou kontinyen anmenn bann lide anmenn bann kontribisyon pour nou fer sa pei bouze.

Pour nou fer sir ki nou reste Mr Speaker bann gardyen fidel larises Sesel pour asire ki personn ki ler nou fini pas en lazournen travay, apre ki nou anmenn larises I tay avek en gro kopo I ale pa konnen kot I ale avek.

Nou fer sir ki nou reste gardyen e rasire ki sa distribisyon larises Sesel I dezormen ganny fer dan en fason egal dan en fason ekitab.  E sakenn de nou ava kapab pe ganny nou morso ki nou merite.  Mr Speaker sa ki zot dir Singapore sa ki Onorab Ferrari I dir Singapore bannla in pran nou pe dir al rode al investigate al gete kot I ete si nou kapab prouve poudir I larises ki pa devret kot I ete, annou retourn li met li kot I devret ete!

Mr Speaker Onorab Ferrari in ganny en sans koze e mon ganny mon sans koze mon pa pour al pli lwen ki sa Mr Speaker, me mon pour dir avek Onorab Mondon ki lo sa kote latab, nou tou nou pour vot an faver sa Mosyon, akoz nou konsyan nesesite en tel Mosyon, nou konsyan kwa ki devret ganny fer pour nou kapab depouy keksoz ki devret ganny depouye, e nou konsyan poudir osi nou bezwen sorti dan nou pase e bouz de lavan.

Mr Speaker mon kontan ki Onorab Mondon in aksepte atraver Onorab Ramkalawan pour amann sa Mosyon, e mon swete ki nou pour ganny laprouvasyon nou tou dan sa Lasanble.  E ki sa I montre sa lespri travay ‘ansanm’ sa lespri TOGETHER konman en Lasanble Nasyonal Sesel.  Mersi bokou Mr Speaker.

 

(APPLAUSE)

 

MR SPEAKER

Mersi Onorab Simon Gill.  Bon I reste mwan ankor….

(Interruption)

MR SPEAKER

Order! Order!  I reste mwan ankor 2 Manm avek mover Mosyon pour wrap-up.  Mon ava donn laparol Onorab Ramkalawan.  Onorab.

 

HON WAVEL RAMKALAWAN

Mersi bokou Mr Speaker.  Mr Speaker sa Mosyon ki nou pe debat lo la apre midi, e avek son lamannman, mon krwar ki I tre enportan.

E nou ganny sans pour nou tonm dakor lo en lamannman e la zis pour klersi tou keksoz letan nou pe dir ki Lasanble I demann Prezidan, pour etabli sa Komisyon Lanket e letan nou nonm Oditer Zeneral nou pe deza dir ki Oditer Zeneral I devret sa Chairman sa Komisyon Lanket.

Pour ki nou pa al dan en lot prosesis kot nou pour gaspiy letan ensidswit.

Alor nou a pe osi mon krwar in kler lo tou lede kote ki poudir nou pa anvi en keksoz ki trennen.

Nou anvi ki avek sa Mosyon, tou lede kote I dakor ki poudir I annan bokou keksoz plizyer keksoz in mansyonnen, alor o pli vit posib etabli sa Komisyon Lanket, e letan sa Komisyon Lanket I fini ganny etabli mon krwar ki nou menm kapab demann en timeline kot nou kapab ganny en rezilta.

E mon krwar ki Onorab Pillay in mansyonn lo plizyer repriz ki poudir ki mannyer Gouvernman I ete ensidswit, be mon krwar ki lazisteman Lasanble Nasyonal pe dir avek Mr Faure antan ki Sef L’Egzekitiv – savedir lo kote lo sa kote L’Egzekitiv degaze etablir sa Komisyon ki nou Lasanble nou pran sa linisyativ pour nou anmennen e letan zot in fer zot travay serten in dir ki nou pa la pour zize.

Me selman si nou vwar ki poudir sis a Komisyon Lanket letan zot fer zot travay zot vwar ki poudir I bezwen al pli devan kekfwa menm bezwen al Ankour Zidisyer I ava fer son travay.

E la mon krwar I en legzanp pour nou pep kot sa 3 Lebra Gouvernman I travay konman en Gouvernman Lasanble Lezislatif I prezante Prezidan ansarz L’Egzekitiv I pran sa travay serye e si fodre zidisyer I avanse.  Alor sa I mon premye pwen.

Mr Speaker mon bezwen eksprim mon dezapwentman avek Onorab Gill.  Onorab Gill in fer en Mosyon in koze pandan tou sa letan I pa’n mansyonn en fwa COSPROH I pa mansyonn en fwa bann dimoun ki involve dan COSPROH son managing director Mr Mukesh Valabhji.  I pa’n mansyonn sa ditou alor Onorab Gill Mr Speaker in fer I dir nou in fer kari poul, me ni en lapo poul napa dan sa kari ki in fer!

Sel keksoz ki in sey fer nou krwar lo in sey koz lo la se son nouvo parti, parti ki pour deal avek bann dimoun ki voras pour deal avek zot ensidswit.  Be Mr Speaker mon krwar ki nou bezwen fer kler sa size COSPROH ki nou pe koz lo la I pa’n fek arive apartir 2016 li Septanm 2016 sa zafer COSPROH Onorab Hoareau li menm li in dir COSPROH in fini ganny dizourd.

In ganny etabli dan bann lannen dan bann konmansman lannen 2000 ok depi lannen ‘80.  E dan bann lannen ‘80 lekel ki ti o pouvwar be pa ti Parti Lepep ki ti o pouvwar?  Pa SPPF ki ti o pouvwar?  E lannen ‘80 lekel ki ti ete?  Onorab Gill ti fini pe fer son bann pe fer tou sa bann lamars depi ptipti pa li menm li ki in rakont nou tanzantan dan Lasanble.  Letan COSPROH I dizourd – letan zot pe vann sa bann later kote Onorab Gill ti ete? Onorab Gill ti en Manm Lasanble Nasyonal. Onorab Gill ti en Manm Lasanble Nasyonal.  Be ki zot ti fer konman en Manm Lasanble Nasyonal?

Zot ki ti annan mazorite.  Zot rapel ki mannyer zot ti bouldoz tou keksoz?  Be pa ti annan Komite FPAC?  Komite FPAC non depi 1993 si mon pa tronpe Onorab Gill ti lo Komite FPAC.

E ou pa ti lo FPAC selman ou ti zwe en gran rol alor Mr Speaker mon dir annou pa zis sey vin anbet dimoun e mon kontan si zot in vin parey nou dir dan larelizyon bann born again.

Si ozordi zot in deside pour zot re ne pour zot sanz zot fason fer politik nou dir avek zot welcome parske, finalman apre tou sa ki nou dir apre tou sa bann lannen kot nou lager pour nou retourn miltiparti dan nou pei kot nou debout for kot nou anmenn bann Mosyon ensidswit, la ozordi nou kontan sa ki Onorab Gill pe dir me selman pa sey fer nou krwar sa ki nou deza krwar ladan!

Si zot aprezan pe konpran sa pa bezwen vin pres avek nou.  E nou konnen ki mannyer I ete sa.  Dan lavi I koumsa bann dimoun ki pa krwar en keksoz apre sa zot krwar ladan apre sa zot vin ansenny ou sa ki ou deza konnen ou deza krwar.

Alor sa lantouzyazm bann nouvo konverti, annou pa sey vin met li la avek nou akoz nou dan LDS nou konn egzakteman sa ki nou krwar ladan, nou konn egzakteman sa ki nou dan direksyon ki nou ti ava kontan vwar sa pei bouze e nou kontan ki poudir ki I annan en kantite nou bann lide ki pe ganny met aplikasyon pour ki nou kapab bouz devan.

Alor sa bann zafer si zot pe pas dan zot kriz, zot pe rod sanz zot non, zot pe rod sanz zot Konstitisyon fer li an trankilite pa bezwen letan zot pe fer sa krwar dimoun ki poudir zot ki konn tou keksoz – ok?

Annou ganny sa kler e letan zot ava vin avek zot nouvo non, letan zot ava vin avek zot nouvo Konstitisyon zot ava von avek zot nouvo tou keksoz fair and good byensir nou kontan nou pour kontan si zot re envant zot lekor, si zot retir tou sa bann keksoz ki zot ti ekrir, me ki zot pa’n met an pratik.

E parey in ganny lir bann gran prensip sosyalis ki poudir tou dimoun I bezwen sakenn ganny menm keksoz al dan menm lekol, letan zot ti fer tou lekol prive, tou sa bann zafer al kot dantis Gouvernman, al kot avoka Gouvernman ensidswit, pour ki tou dimoun I legal ki zanmen zot in krwar ladan e la mon felisit Onorab Henrie letan in dir avek zot aret krwar ladan parske la bokou dimoun in konpran sa.

Letan nou pe anmenn bann Mosyon nou a pe montre lepep Seselwa, ki poudir letan zot ti pe desann dan lapousyer pe pile lo laplenn lapousyer pe monte avek zot pe – fire brigade letan zot ti pe fer sa la ti bezwen zot vin dans kanmtole tousala ti annan bann msye ki ti a pe akimil larises.

Letan zot ti deor labank pe esper 400 Dolar depi 5er bomaten pour zot premye dan laliny ti annan bann msye ki ti a pe vol larzan lepep Seselwa.  Ki ti a pe transfer larzan lepep Seselwa; ki ti a pe vann bann byen lepep Seselwa, ki ozordi nou a pe dir sorry sa I pour lepep Seselwa.

Alors sa ki pour lepep Seselwa fodre ki I retourn pour lepep Seselwa.

E Mr Speaker vreman, vreman mon pou dir mon’n apresye – mon’n apresye lentervansyon Onorab Hoareau.  Me mon kapab konpran akoz Onorab Hoareau I koz lo sa direksyon – akoz Onorab Hoareau li I pa tro krwar dan sa bann zafer ‘Onwards to Socialism’ li Onorab Hoareau lot zour ki zot in ris li konpran zot I dir be ok mon a donn zot en koudmen.

Me selman son leker li menm son leker I ankor isi li! Son leker pa laba, menm si zot vwar Onorab Hoareau dan bann gro semiz rouz la me sa I zis lakok sa anndan dan son leker son prensip se bann prensip demokratik, se bann prensip ki in grandi avek se bann prensip ki in aprann avek son granpapa, se bann prensip ki in aprann letan in vwar tou sa bann keksoz ki in pase.

Alor mon konpran akoz I koz koumsa e mon respekte dan lafason ki I koze e mon espere ki poudir Onorab Hoareau akoz li in toultan krwar dan sa bann prensip la ki I parmi zot I ava ed zot pour zot I ava konverti zot dan sa bann prensip e apre sa I ava kapab bouz devan.

 

(APPLAUSE)

 

HON WAVEL RAMKALAWAN

Alors Onorab Hoareau Mr Speaker nou pour dir avek Onorab Hoareau, nou konpran ou kontinyen fer sa bon travay e la spesyalman ki ou ganny sa responsabilite pour re ekri Konstitisyon Parti Lepep donn zot enn ki demokratik donn zot enn ki dwat e zot ava kapab zot ava kapab bouz dan menm direksyon.  E finalman ki pour arive se nou pei ki pour bouz devan e se sa ki nou pe rode.

Alor Mr Speaker Mosyon lo COSPROH I dir annou fer en lenvestigasyon.  Annou fer en lenvestigasyon pour nou regard tousala pour nou regarde lekel bann lakonpannyen prive bann lakonpannyen ki benefisye annou regarde si I annan konfli lentere dan bann tranzaksyon e annou regarde si reveni Gouvernman a okenn moman ki in ganny konpromi.

Mr Speaker fodre ou pa ni bezwen en gran syantis pour ou konpran ki poudir sa trwa kestyon en pe parey Onorab Henrie in dir sa 3 kestyon son larepons I wi.

E levidans I partou.  Letan serten Manm avan mon in koz lo Fisherman’s Cove par egzanp son pri ki I ti devret ete konbyen zot in vann ki bann tranzaksyon ki zot in fer, byensir nou konnen ki poudir I annan bann deal.  Letan nou regard sa gran propriyete kot H Hotel I ete, byensir nou konnen poudir I annan bann keksoz.  E la I annan serten Manm lekel bann Manm ki pour mazin sa, Onorab William pour mazin sa, Onorab De Commarmond pour mazin sa; de Manm ki ti dan Lasanble letan nou ti ankor kot Libreri Nasyonal e lo nou kote pour osi annan enn de Manm ki pour mazin sa wi Onorab Gill osi pour mazinen.

Letan ou Mr Speaker, ou Mr Speaker ou ti anmenn en Mosyon e Mosyon ki ou ti anmennen ti demande ki sa bout later ki H Hotel I ete, ki poudir I ganny prezerve akoz ti annan bann diferan lespes.  Ou rapel Mr Speaker?  Ki ti arive?  Zot, zot ti konnen ki bann deal in fini ganny fer, ki poudir sa kare later ki ti pour Khashoggi oparavan zot ti fini fer bann tranzaksyon anba latab – ti’n fini fer bann tranzaksyon anba latab nou ti krwar ki poudir I ankor pour Gouvernman sa ler la ti fini transfer British Virgin Island.

Mr Speaker letan ou ti prezant ou Mosyon personn lo kote Parti Lepep/ SPPF pa ti koze zot ti ganny lord avek Msye Rene pour pa koze akoz sa bout later ansanm avek Fisherman’s Cove Msye Rene avek Mr Mukesh Valabhji zot ti fini konnen ki zot pour fer avek sa e alor zot ti trankil e se sa.  E la nou retourn ankor lo sa ki Onorab Gill in dir ou parti.  E mon’n vreman kontan letan mon al mon ganny akse avek Konstitisyon Parti Lepep Lartik 7 (ii) Romain (e)  i dir

‘a leader shall never entertain any corrupt practice.’ I deza dan zot Konstitisyon sa, me ou konnen ki in arive?  Zot leader in entertain corrupt practices.

 

(APPLAUSE)

 

HON WAVEL RAMKALAWAN

E se pour sa e se sa ki ozordi nou koz lo la sa ki nou pe koz lo la COSPROH se Msye Rene avek son bann lide li menm li ki ti ekri Konstitisyon SPUP apre in vin la apre mon lir me I ti entertain corrupt practices.

Alor Mr Speaker wi in annan koripsyon e mon pa pour ezite pour dir in annan koripsyon dan bann zafer COSPROH e se pour sa rezon ki nou bezwen fouye.  Nou bezwen fouye pour nou regard bann keksoz.  Bann lavant ki in ganny fer san ki nou’n konnen kote larzan in ale.

E sa bann lenvestigasyon sa Komisyon Lanket I ava kapab detay byen kote sa bann larzan in ale e ki mannyer keksoz in ganny fer.  Akoz Mr Speaker nou bezwen konpran en keksoz dan sa pei e I en keksoz tre senp sa.

Anba Prezidan Msye Rene ti annan en msye ki ti son konseye ekonomi.  Ti annan enn msye ki ti konn tou keksoz e sak fwa ki ti annan gro bout li ki ti al ansarz.  E sa mon poudir kler sete Mr Mukesh Valabhji!

Letan ti pour al deal dan bann zafer lotel, Mr Valabhji ki ti vini ki ti tyonbo gro bout.

Letan PUC ti pour aste zenerater Mr Valabhji ki ti vin ladan.

Zafer desalinasyon li ki vin ladan akoz li I konn fer byen sa bann deal.

Letan ti annan pour deal avek SMB Mr Mukesh Valabhji ki ti vin ladan.

E Mr Speaker sa bann zafer se sa ki in kontrol sa pei pandan en long letan.

SMB in kontrol tou keksoz letan pour fer kanmaron parske I ti annan plan pour fer larzan Coetivy Mr Valabhji menm ki in vini!

Letan nou pour get listwar nou pei anba prezidans Msye Rene nou pour vwar sa non Mr Mukesh Valabhji.  E sa non Mr Mukesh Valabhji I asosye avek tou bann larzan 50milyon Dolar ki disparet Mr Valabhji I ladan I Chairman li I Chairman SMB.  Bann deal Australie pour aste laferm Australie mon’n dir zot mon annan en file e dan sa file letan sa Komisyon I ava ganny etabli mwan osi mon ava vin devan.

Mon ava vin donn zot en kou sa file, mon a ouver sa file.  Dan sa file I annan son non pe transfer larzan gos, drwat kot Madanm Sarah Rene ensidswit.

SMB – SMB – ozordi Coetivy nou ankor pep eye nou Seselwa plis ki 150milyon Dolar – Onorab De Commarmond ansanm avek bann Manm tou Komite Zil, nou al laba pa nou vwar sa kalite gaspiyaz.  Pa nou vwar bann lenfrastriktir ki in la abandonnen?

Me selman nou ki pey lepo kase antretan ki pe arive?  Sa msye ki ti responsab pour Coetivy li I pe rod vann Lil Pasyon.  Felisite me nou kapab osi demande be Felisite ki mannyer in kapab ariv dan sa bann lanmen?

Tousala se bann keksoz ki nou bezwen fouye.  E sa lanket mon kapab dir avek zot ki poudir ozordi letan mon pe koz sa bann deal si I annan bann kontradiksyon mon kapab dir avek zot ki dan moman kot ti annan bann kot nou ti pe pas dan kriz ekonomik zis en pti git letan apre ki ki sa Intelvision ti ganny sezi ,mon kapab dir avek zot ki in annan bann transfer.  Mon annan bann dokiman dan mon lanmen.  Bann transfer kot par egzanp le 15 Oktob 2004 in annan en sonm 109mil Dolar  ki ganny transfer pour al dan pour al laba dan kot zot annan  Hotel Properties.

 Intelvision – Intelvision e letan nou regard son bann kont sa pa ni antre ladan pourtan le 26 Out 2005, ti ganny transfer Mr Speaker sa Ero ti R6.70 ti transfer 1milyon Ero.  Kot pour ale?  Intelvision.

Alor Mr Speaker en lot – le 15 – la en lot ankor ki mon annan kot ok le 01/2/2005 en lot sonm 655mil Dolar I ganny transfer la ankor.

So I annan en kantite sa bann zafer.  E ki nou pour vwar Mr Speaker nou pour vwar ki poudir I annan bann non spesifik ki asosye avek COSPROH.  E savedir I annan keksoz la ki nou bezwen fouye.  Letan ou aprann ki poudir Mr Karimjee in aste atraver Airtel I annan shares dan Airtel apre sa I aste lotel Barbarons.

E letan ou pour regarde Mr Karimjee li menm li ki ti abitye I ti annan deal avek SMB pour li enport diri.  Be Mr Speaker sa pa I vin 1,2,3,4?

Be I pran en syantis pour dekouver sa?  Sa 1,2,3,4 se sanmenm koripsyon!

E la mon ava dir zot ki poudir Airtel letan ti vin Sesel zot konn byen zot ki poudir nou tou nou konnen ki poudir Mr Valabhji I annan en gran rol pour zwe ladan, atraver Mr Karimjee.

E apre sa letan I ti vin Sesel I ti pti li se larzan Seselwa ki’n ede pour devlop sa lakonpanni ki apel Airtel!  Se nou ki’n fer Airtel vin gran se nou atraver ki mannyer?  Vann sa lotel apre sa lotel ti ganny servi konman en mwayen pour tir foreign exchange dan pei.

Regard ankor enn fwa nou bezwen regard sa patern, sa patern ki egziste dan nou pei pandan sa bann moman ki nou annan kriz la bann lakonpannyen I aste en lotel.

Letan zot aste en lotel zot ti ganny permisyon pour zot tir foreign exchange e atraver sa lekel ki soufer Seselwa I soufer 4er bomaten devan Nouvobanq – 4er bomaten devan Barclays Bank tandis ki Nouvobanq li I a pe fer bann gro transfer partou kote laba deor.

Alor Mr Speaker I kler ki poudir in annan bann diferan magouy.  E tanzantan zot in ed zot lekor e se sa ki petet ozordi letan lafason mon tann Onorab Gill pe koze mon kontan ki poudir Onorab Gill I kapab koz koumsa, e mon kontan ki poudir nou dan LDS nou kapab liber Onorab Gill pour li kapab koz koumsa.

 

(APPLAUSE)

 

HON WAVEL RAMKALAWAN

Parske Onorab Gill I bezwen rekonesan ki poudir koz koumsa kont ou bann sef lontan premyerman dan caucus Parti Lepep ou ti pour ganny disiplinen.   Ansyen Onorab Dick Esparon pandan plis ki 3 mwan ti annan letan kot I ti ganny defann koze.

Dan 5enm Lasanble Onorab Herbert Hoareau ti ganny defann koze pandan en peryod letan, senpleman akoz I ti dir serten keksoz.

Alor ozordi nou kontan poudir nou kapab liber zot liber Onorab Gill e atraver sa hopefully nou ava kapab bouz devan e nou ava kapab avanse.

Kot ou ti pour al nonm non msye …. (anr ok ou pa’n nonm son non sorry) parske ou pa’n nonm okenn non dan ou zafer.  Petet ou ankor annan sa lafreyer me la si ou ankor annan sa lafreyer nou pour dir avek ou frer liber ou kapab nonm non Mukesh Valabhji dan sa Lasanble, parske si in pran byen si in pran byen leta si in pran byen Seselwa, nou pour bezwen fer li retourn avek.

Parey Onorab Hoareau byen for sa ki pour Sesel si I Singapore si I kot I ete si I pour nou I bezwen retourn isi Sesel pou ki sa dimoun ki pe esper elektrisite anler dan fen for Anse Aux Pins oubyen nenport landrwa I ava kapab benefisye.

E byensir Mr Speaker parey mon dir zot in ed zot lekor ozordi letan ou pas dan plantasyon dite anler Sans Soucis pe desann Port Glaud, letan ou pas dan plantasyon dite lekel ki annan son prop lakaz be se Mr Mukesh Valabhji.

Be eski I ti lo lalis later li?  Eski tea plantation ki pe ganny ti dan land bank?  Be tea plantation pa ti dan land bank li me selman li sa msye in deside akoz I ti ansarz, akoz I ti ansarz SMB in deside pour li pran son bout later dan land bank pour li ler I kot li regard Ile Therese I regard anba kot Onorab William Grand Anse antye I vwar I regard kot Onorab … I ok.

E lot kote I annan son stor I annan tou son bann zafer.  Mr Speaker zot in ed zot lekor zot pa ed lepep Seselwa e si ozordi dan Sesel nou pe koz 40poursan lapovrete I enportan pour bann dimoun realize ki poudir si nou pe koz 40poursan lapovrete, se parske byen sa pep pa’n ganny byen servi; ki poudir byen sa pep ki pour ede pour soulaz lapovrete in al dan pos serten dimoun ki annan bann gran pos.

Si ozordi nou pe koz 6poursan nou popilasyon se bann adikt drog eroin, ankor enn fwa se parske pei pa’n ganny ase resours pour li kapab debourye pour li kapab fer bann keksoz ki neseser.

Alor Mr Speaker I enportan – I enportan pour nou kapab ganny sa lenvestigasyon o pli vit posib e atraver sa lenvestigasyon nou ava konnen kote nou larzan in ale e nou ava kapab balanse.

Parske an menm tan osi I annan serten dimoun ki krwar ki poudir serten sa bann fanmir la zot ti ne ris be nou ki pli vye pa nou konnen nou be pa nou konnen kot zot ti konmanse pa nou konnen ki bann forfe ki zot in fer? E alor annou pa anbet nou lekor.

Mr Speaker I enportan pour nou dir ki enn bann keksoz ki ou pa kapab vreman detri se paper trail – the paper trail is there.

E parfwa bann dimoun zot sitan krwar ki poudir zot bann dimoun ki ou pa kapab tous zot, zot en pe neglizan e ozordi bokou bann keksoz ki Onorab Mondon in partaz avek nou mon al lo internet ou regarde letan ou kalkil sa bann milyon dan bann proze Singapore milyon dan bann proze UAE milyon dan bann proze Bulgarie, milyon dan bann proze Nigeria ensidswit milyon dan bann proze isi Zil Pasyon par egzanp.

Ou bezwen demann ou lekor be tyonbo en kou be ki in arive?  Akoz ki rezerv sa bann dimoun I plis ki rezerv nou pei?  Ki mannyer I kapab koumsa?  Ki mannyer I kapab koumsa?

I bezwen annan en keksoz ki pa normal.  E mon fek mansyonnen pli boner ki poudir zot ed zot lekor.  Letan tou keksoz ki pe antre dan pei e letan nou ti koz lo SMB nou ti sa ti ganny fer resorti byen kler, kot menm si zot in sorti zot ki ankor kontrole.

Menm si zot in sorti tou transpor ki SMB I aste, I bezwen Daihatsu.  Alor Mr Speaker nou bezwen balans tousala.

Me mon krwar poudir pour en travay ki pour ase senp e mon konman en dimoun ansanm avek nou tou ki isi dan Lasanble mon poudir lefe ki ozordi nou lo menm paz dan sa lager kont koripsyon.

Me dan sa menm paz ki ete fodre ki nou met plis zefor.  E mon pa pour repet sa ki Onorab Ferrari in dir me nou bezwen dir ki Onorab Pillay in koz ek nou lo Komite Etik, pour regard bann leaders ensidswit.  Me mean mon pour dir ankor enn fwa Mr Speaker lo Komite Santral Parti Lepep I annan en msye ki apel Mr Dolor Ernesta levidans I montre ki li in pran 52 morso later e letan nou aprann pa zis 52 me 79 kare in pran!

Me zot konman en parti zot pa kriy li pour disiplin li?  Pour dir avek li sef nou krwar ou’n pran en pe tro bokou nou zot menm zot konman en parti politik.  Nou fek ganny lalis bann dimoun ki pe rod en bout later ki pe esper vitam aeternam pour en bout later eski I pa ler poudir avek zot parti ,akoz lo sa nivo etik poudir be zot konman en parti politik zot in pran 40 morso – be Sef annou rann en pe annou rann en pe kot nou kapab fer serten keksoz pour kominote.

Ki mannyer zot in ganny tousala?  Ki mannyer kot sant kominoter I pour zot?  Zot napa en konsyans poudir be annou retourn sa pour kominote.  Akoz nou abize e mon ti espere poudir se sa bann kalite keksoz poudir Onorab Gill mon pa konnen si dan nouvo parti ou pour ankor asistan ou pour ankor Depite Sekreter Zeneral, me selman parske nouvo zenerasyon.

Mr Lespoir I devret pran ou plas apre sa I devret mont pli o.  Me nou pa konnen tousala selman zot pe koz nouvo zenerasyon Mr Speaker selman Mr Lespoir ti anvi vin Kongre e zot in fer sir lord sekirite ki poudir pa bezwen les li antre ditou.

 

(laughter)

 

HON WAVEL RAMKALAWAN

E alor – alor Mr Speaker, Mr Speaker mon pe zis, mon pe met enn de keksoz poudir letan nou pe koz lo sa nivo etik pour ki zot kapab dir be I mal – i mal  ki poudir Parti Lepep tou le mwan pe kolekte R800mil avek .  Zot devret dir ethically I mal.  Parske sa pe ede pour fer pri lavi monte alor tousala bann keksoz vini deal avek met lo latab e nou ava krwar zot.  Parske si zot pa kontinyen si zot kontinyen dan sa fason nou pa pour krwar zot e nou pour senpleman dir ki zot pe rod bat nou latet e nou parey zot konnen nou pa pour aksepte sa.

Mr Speaker mon krwar ki sa Mosyon I en bon Mosyon e tou lede kote in eksprim sa volonte pour vot an faver e la aprezan letan nou pour vot lo sa Mosyon I kler ki pour arive.

E la mon anvi dir avek lepep Seselwa pour zot letan zot pour zwenn nou zot pa vin demann nou kestyon poudir avek nou zot in koz en ta koze be ki in arive?

Mosyon in dir Lasanble Nasyonal pe demann Prezidan Larepiblik konman sef L’Egzekitiv.  Letan nou fini vot sa Mosyon lepep Seselwa nou pe pran sa Mosyon Lasanble Sekretarya pour anmenn sa Mosyon State House.  State House pour dir avek Msye Faure –

‘’Msye Faure I annan en komisyon ki sorti kot Lasanble Nasyonal pour ou.’’  Msye Faure aprezan li ki pour bezwen fer sa 2enm morso.  Mon kapab konmans dir li poudir (I pe ekout nou li) nou bezwen nou kapab konmans dir li I annan en pti radyo obor li pe ekoute wi- wi bann (ptipti radyo) I pe ekoute.  Alors lepep Seselwa sa I pour sorti dan nou kort I pour al anler State House e nou espere ki poudir deswit apre sa parske nou fini dir li ki I pour fer nou fini ede etabli sa Komisyon Lanket met Oditer Zeneral konman son Chairperson apre sa rod 2 dimoun ensidswit li I ava regarde maximum 2 dimoun.  Fer sa lenvestigasyon e nou espere ki poudir letan sa lenvestigasyon in fini fer letan zot ava donn li son kopi lefe ki nou ki pe fer sa demann nou osi nou ava ganny en kopi – petet I ava neseser pour FPAC regard sa rapor, oubyen I ava neseser pour Komisyon Anti-Koripsyon fer li me selman nou ava fer li.

Alor lepep Seselwa ozordi dan nou Lasanble nou, nou pe fer sa travay.

Nou konnen ki poudir I annan problenm nou konen ki poudir I annan bann lakonpannyen prive ki’n benefisye dan lavant bann byen COSPROH, nou konnen ki poudir in annan lentere konfli dan sa bann tranzaksyon e nou osi konnen poudir ki reveni Gouvernman in ganny konpromi.

Travay I kontinyen e nou espere ki poudir avan ki sa lannen I fini nou ava kapab ganny en rezilta e ki en bon pe milyon Dolar I ava re antre dan nou lekonomi.

E parey nou dir si sa 50milyon ki ti sipoze al kot SMB la lanmenm la nou ganny 700milyon si nou pe ganny en pe larzan bann lotel ki’n ganny vann e ki larzan pa’n byen antre la ankor enn fwa nou ava ganny nou detrwa bilyon.

E mwan Mr Speaker, mon prop estimasyon se si sa travay I ganny fer byen, dan lekonomi Sesel atraver sa bann zafer bann asset ki sipoze sezi, parske zot in ganny aste avek byen lepep Seselwa; sa bann batiman Singapore I ava vin pour lepep Seselwa ensidswit mon mazinen se pa milyon ki nou pe koz lo la se pa milyon Dolar ki nou pe koz lo la se bilyon Dolar ki nou pe koz lo la.  Larzan ki pour sifizan pour fer nou pei avans devan.

Alor Mr Speaker avek sa detrwa parol mon dir Onorab Mondon felisitasyon pour ou resers ki ou’n fer lo sa Mosyon pour ou prezantasyon.

Mon dir avek ou felisitasyon e mon osi felisit tou bann Manm ki koze parske zot in vini zot in montre klerman ki poudir wi in annan keksoz.

E mon bezwen termin parey mon ti konmanse poudir Onorab Gill felisitasyon akoz parske finalman ou pe ariv lo menm paz avek nou e Onorab Pillay nou krwar ki I byen ki poudir sa alarm ki ou tann li dezormen aprezan la sey fer fason pour ou lev avan ou alarm clock.

E sa I ava montre ki poudir vreman ou ariv dan sa staz kot nou kapab travay ansanm pour byennet sa pep Seselwa.  Mersi bokou Mr Speaker.

(APPLAUSE)

 MR SPEAKER

Mersi Onorab Ramkalawan.  Bon avek sa nou ava pran en Break e nou ava retournen 4er pour nou fini Mosyon.

(BREAK)

MR SPEAKER

Bon avan nou kontiny nou travay mon ti ava zis prezant en leskiz pour sa pti retar.  Nou ava kontinyen prezan mon annan Onorab De Commarmond ki mon pour donn ou laparol.  Go ahead Onorab.

 

HON CHARLES DE COMMARMOND

Mersi Mr Speaker.  Mr Speaker lo sa Mosyon ki devan nou mon pa pour long, me senpleman mon osi pour zwe mon rol e ki mannyer mon dir sa savedir met mon par dan sa Mosyon ki mon krwar en Mosyon tre enportan.

En Mosyon ki I pour ed nou pour nou avans devan konman en pei e nou osi konman Lasanble nou Lasanble avans devan konman sa Mosyon.

I annan detrwa keksoz selman mon le met an perspektiv an vites, sa Mosyon I koz osi lo posibilite koripsyon parey I pe dir pa pe akiz personn fer sa investigation pour kapab konnen si ti annan problenm si ti annan kek fon ki’n ganny detournen ensidswit kot ki annan bann lenzistis ouswa bann koripsyon konkret ki in kapab ganny fer.

E la mon anvi dir ki la koripsyon I enportan nou pep I konpran ki I pa zis dan Gouvernman koripsyon, I kapab arive dan nenport ki lenstans I kapab dan Larelizyon dan bann Legliz, I kapab dan sosyete sivil dan biznes partou I kapab annan serten koripsyon e sa bann landrwa I pran responsabilite letan zot in vwar ouswa I annan doutans ki I annan kek keksoz zot fer en lodit pour kapab vwar kote problenm I ete.

E nou osi konman en Gouvernman e en Gouvernman responsab si nou krwar, I annan serten keksoz nou bezwen fer sa lodit pour nou kapab vwar kote keksoz I ete pour nou pran aksyon neseser, e an menm tan si napa I ava ganny montre I ava annan latransparans e I a konpran poudir napa e I ava sa file I ava ganny met laba.

Me si I annan alor aksyon neseser a ganny pran e si fodre bann fon neseser a ganny retournen a Leta.  E sa I enportan e mon krwar ki nou devret al dan sa direksyon.

Me osi I annan bann pwen ki in dir par egzanp lontan par egzanp mon enn bann dimoun ki ti la Onorab Ramkalawan Onorab Ferrari, Onorab Gill ensidswit, nou’n la lontan e petet dan sa bann letan ki ti annan sa Mosyon ki ti vin devan nou Lasanble.

I korek I vre petet nou pa’n vot lo la me petet sa letan osi I annan bann mank lenformasyon nou pa’n konnen ouswa lenformasyon ki nou gannyen I pa’n neseserman korek.  Ozordi ki ou vwar sa e ozordi se sa rezon nou pe siport sa akoz mon krwar Onorab Mondon ki pe avans sa Mosyon in lo FPAC pour plizyer letan, e li osi sa bann letan I ti en lepok sa.

E se sa rezon ki ozordi nou pe sey dan nou pe sey kler tors alor I annan sa alegasyon e nou pe dir annou get li pli o profon pou vwar si I annan keksoz de sibstans ladan pour nou kapab anmenn devan.

Me ler mon ekout bann dimoun koze mon vwar savedir lo la nou tou nou lo sa paz isi lo nou kote nou lo sa paz depi lontan nou.  E mon vwar poudir dan sa ki pe ganny anmennen la e ler mon ekout bann diferan Manm koze, be zot pa’n koz zis lo sa Mosyon ki devan nou pa’n koz zis lo COSPROH zot in anmenn lezot issues ki petet tourn otour.

E mwan letan mon fer en lanaliz mon dir konmsi zot in e I vre I pa zis en dimoun ki in fer sa.  Ler mon ekout tou dimoun koze paret I annan plizyer dimoun I paret I annan lezot ki an zwe la akoz zot in nonm Mr Mukesh Valabhji mon pa krwar li tousel ki in fer tou sa keksoz.

Mon krwar si I annan keksoz ki in ganny fer in ganny fer an asosyasyon avek lezot.  Mon krwar I annan lezot ki’n zwe en rol e zot in nonm lezot biznes zot in nonm lezot lenstans Gouvernman ki in kapab annan relasyon I pa’n zis reste lo COSPROH.  COSPROH in dekoul lo SMB, SMB in nonm Coetivy e la ler mon nonm Coetivy deswit la lot zour ler mon ti pe dir dan FPAC e la mon dir ankor kontrer ler ankor nou zwenn next time nou bezwen met sa lo nou azanda, pour nou kapab follow up.  Liquidation prawns farm Coetivy pa ankor fini ganny fer.

E mon relev sa topik akoz mon krwar I relevan mon krwar ki I enportan ki I bezwen fini ganny fer ou konpran?  So I annan lezot lenstans detrwa semenn pase nou koz lo I annan kestyon ki in vin dan nou Lasanble la.  

So tou sa bann keksoz pour mon I anmenn mon demann mon lekor si pa fodre mon anmenn sa Mosyon ankor.

Oubyen ler ki en kontrandi sa Mosyon I ganny anvoye kot Prezidan savedir kot L’Egzekitiv akoz Mosyon in amande la in dir ki nou pe demann Prezidan pour etabli en Komisyon Lanket pour deal ek sa.

Ler ki sa sentez sa Mosyon I ganny anvoye devan e mon ti Prezidan la mon pe mazinen si I pa devret al an plis ki sa akoz mon krwar letan mon ekout tou bann entervenan koze, mon vwar poudir I devret vin koumsa sa Mosyon.

Swivan tou sa bann deklarasyon ki in ganny fer dan sa Lasanble konsernan move zerans finans e lekonomi pei dan sa lepok ki zot pe koze, e petet depi bann lannen ‘80 ziska 2010 mon panse.  Nou dir ki lefe ki paret I annan serten dimoun pa zis en dimoun I annan serten, I annan plis ki enn sa serten dimoun dan pozisyon, dan bann pozisyon prominan dan Gouvernman sa lepok, ki paret in mal zer finans pei, ankor nou dir sa lepok e menm preski anmenn pei ver en sityasyon fait an 2008, 2009 – la nou ti dan en problenm en kriz.

E mon krwar I annan kek keksoz in nonm PUC in nonm tou sa bann zafer mon krwar I annan keksoz ki al dan sa direksyon.  ‘Nou Lasanble I demann alor Gouvernman, Prezidan dan sa kans la, pour ouver en lanket en lenvestigasyon pour vwar tou sa ki koupab e anmenn zot a lazistis e kot I neseser retourn bann fon ki kapab ki’n kapab ganny detournen’.

Mon krwar I al devret al pli lwen sa Mosyon mwan, akoz ozordi nou pe anmenn en Mosyon lo COSPROH; dan lepase in anmenn lo lezot e I pour vin ankor lo lezot.  Be fer en sel Mosyon prezan en sel investigation ava fer a vwar son bann spill over I preski petet menm group dimoun mon pa konnen mwan.

Me selman tou sa ki responsab la a kapab vwar.  Akoz ou pa kapab get zis enn mon krwar mon letan mon al vwar poudir Mr Valabhji I pe kasyet bokou keksoz mwan.  Akoz ler ou al lo internet deswit ou vwar en kantite plizyer bann 3 konpannyen worldwide laba parey in ganny dir nou a pe koz en kantite milyon la forex en – so pour mon I en konsern.  Mon pa pe kestyonnen kote in gannyen me selman I kler nou pe demann nou pe met sa ek tousala me I pa pe kasyet li akoz in met sa I piblik sa.

Akoz nenport dimoun I al lo internet I google I war sa bann keksoz.  Si ou google Mr Valabhji -Mukesh Valabhji ou vwar tou sa bann keksoz.  Savedir enn; pour mwan I pa pe kasyet mon pa pe defann li mwan.  Far from that ,me selman mon pe dir si alor I annan sa Mosyon ki pe demann pour get ladan be annou gete be pa get zis la akoz ozordi nou pe demann sa issue.  Demen I pour vin en lot I pour demann en lot e apre demen I pour demann pour en lot lenstans, I kapab vin lo SEYPEC I kapab vin lo SACOS, I kapab vin lo Fon Pansyon I kapab vin lo pa konnen kwa nenport be sir Gouvernman get dan sa lepok la si I kapab fer en investigation I ava vwar tou sa ki I annan pour vwar, ava pran bann aksyon en sel, ava fini.  Prezan pour nou kapab bouz de lavan.

Mon krwar Onorab Gill Simon Gill in fer en pwen tre enportan, nou Lasanble pa kapab zis konmsi pase get lepase ou pa pe mazin devan sa pep sa pep la e sa kondisyon sityasyon cost of living mannyer I ete mon krwar sa I annan bokou lo la, ek sa nou bezwen gete ki mannyer nou pour anmenn solisyon.

on dakor I annan lyen dan en serten fason, si nou kapab fer I annan serten fon ki I kapab fer detournen I retourn dan nou kof Gouvernman I ava ed nou ek nou kestyon cost of living.

Mon dakor ek sa, me selman mon dir annou fer en gro investigation – a vwar tousala pour nou kapab bouz de lavan, nou osi nou Lasanble ante I bezwen pe get sa future sa pei, I bezwen pe get pour amelyor lavi e kondisyon pep pour fer ki I viv en pe pli byen.

Alor vwala brefman mon pwen se sa.  Mwan mon krwar Mr Speaker avek bann sanzman ki pe arive e sirtou lo nou kote, en kestyon krwar dan dimoun mon letan pe koz lo re born sepa born again – sepa kwa be mon dir nou toultan re ne – ler mon dir re ne  mon dir Albert Rene ou konpran.

Be nou toultan re born nou lot zour I annan enn mon zanmi I apel Rene mon sikann li mon dir li Re born ki dir Re born.  Be nou toultan pe krwar dan sa bann sanzman e nou pa believe zis dan en zonm nou.  Nou, nou believe dan en filozofi – dan lide, dan lideolozi ki bon.

E lideolozi nou parti Mr Speaker parey lot kote in koze serten pwen, be I anmenn nou.  Nou pe rod sa bann valer sa bann keksoz ki bon pour nou pep ki bezwen pe al devan avek.

E la mon pour salye filozofi ki ler mon ekout Onorab Gervais Henrie in dir.  I osi in swiv sa filozofi in vwar li bon be apre ler ou’n vwar ki I annan dimoun ki pa pe met li an pratik problenm I vin la li problenm I vin la sa lide I fantastik me letan I pa ganny met an pratik la ki problenm I vini.

Alor I annan serten dimoun ki pa ede pour met li an pratik e nou bezwen put these people to task.  Nou bezwen al gete si nou krwar I vreman sa ki pe ganny dir I fer sans, I annan kek keksoz korek me annou pa per nou tou annou demande ki vreman en lenvestigasyon, I ganny fer e la pep Seselwa a vwar pa zis enn a vwar si I annan 4, 5, 6, 7, 8, 9, 10, 20 si I vwar tousala I a bon olye zis 500mil ouswa 5milyon I ava vin bokou plis.  

So nou demande ki en pli gran investigation rather than sa ki zis pe ganny demande I ganny fer.

Avek sa mon pour dir Onorab Mondon nou pour siport sa Mosyon.  Nou pour siporte akoz nou krwar poudir sa Mosyon I bon I ava met laklerte lo serten keksoz prezan ler I a kler si dimoun ti pe koze I a konnen si I vre ok si pa vre osi I aret koze  ou konpran?  Nou pa kapab dir keksoz dan sa pei e rather nou bezwen get vant Seselwa.

Mersi bokou Mr Speaker mon krwar nou pour al nou tou nou pour vot pour sa Mosyon ti a bon e ki nou donn en mesaz kler.

Mr Speaker pa tarde konman nou fini avek sa Mosyon pran en pe letan konmsi pa tard bokou pour nou kapab anvoy sa kot Prezidan kot L’Egzekitiv donn nou en kopi nou de Onorab Ramkalawan e Lider Lopozisyon ek mon menm nou ganny en kopi pour nou follow osi nou a donn en koudmen pour fer la swivi laswit.  Mersi bokou Mr Speaker.

MR SPEAKER

Mersi Onorab De Commarmond.  Bon mon ava pas laparol avek mover Mosyon pour li fer son konklizyon.  Onorab Terence Mondon.

 

HON TERENCE MONDON

Mersi Mr Speaker.  Mr Speaker dabor mon oule remersi tou bann Onorab ki entervenir lo sa Mosyon.  I en deba enteresan e tre ris sorti kot bann Manm tou lede kote latab e bann pwen pertinan dan sa deba premyerman sa nesesite pour fer sa lenvestigasyon.

Tou Manm in tonm dakor ki nou bezwen fer sa lenvestigasyon.  E pwen enportan ki nou fer sorti se ki I toutafe normal pour Seselwa kestyonnen e nou konman en Lasanble nou bezwen fer tou neseser ki pe arive avek lavant sa bann byen Leta.

I annan dimoun ki dir I danzere pour koz lo serten size dan sa pei.  Pwen ki in ganny fer resorti se ki napa size ki danzere nou bezwen kapab koz lo tou size.

Manm lo kote LDS in elabor lo bann mankman serten lenformasyon esansyel ki pa disponib e donn plizyer legzanp par egzanp lease agreement ki nou pa’n vwar bann annual returns pour lakonpannyen COSPROH ki I pa’n soumet pandan lannen 2002 ziska 2004 sirtou dan sa prosesis dissolution.

Onorab Henrie in met lanfaz lo sa nesesite pour al pli lwen e pli o fon posib dan sa lenvestigasyon ki mon toutafe dakor akoz sa 50milyon Dolar I form parti sa equation ki mon krwar nou sa lenvestigasyon I kapab atrape dan ler zot pe fer zot travay.

Sif ki in ganny reprezante par bann Manm lo kote LDS ki deza lo rikord kot Biro Rezistrar in montre bann tranzaksyon vreman bizar.  Alors sa I met lanfaz ki sa lenvestigasyon I bezwen ganny fer par egzanp Reef Hotel in ganny vann pour R10milyon let sorti kot Hotel Properties ki donn pour power of attorney pour negosye lavant Fisherman’s Cove ek Meridien Barbarons e kot en sonm R150mil in ganny propoze en keksoz ki vreman bizar e ki poz en kantite kestyon.

Onorab Churchill in fer resorti ki COSPROH I annan bann asset sibstansyel e ki nou devret fer lenvestigasyon e I pe koz konman son leksperyans dan letan ki I pe travay kot bann lotel Praslin.  Onorab Henrie ankor in dir I annan kot koripsyon I konsernen I annan plis en wi ki en non, baze lo bann rapor bann zournal ki in fer sorti bann leksperyans ki in arive dan Lafrik.  Byensir en pwen enportan I dir ki tourizm I nou delwil e ki i fer bokou sans.  Onorab Pillay i fer resorti size akse avek lenformasyon vizavi lo bann Direkter lakonpannyen anrezistre offshore.

E largiman lo kote LDS dan se ki Lalwa I permet en Lotorite pour fer demann fer en demann e fer akse avek lenformasyon lo bann Direkter.  Mon mazinen nou Lasanble Nasyonal I enn sa lotorite ki kapab ganny akse avek bann lenformasyon parey nou prensip bon gouvernans nou ganny bann kontribisyon tre valab lo sa size sorti kot plizyer Onorab.

Wi nou pa la pour defann okenn aksyon malonnet e anfet nou devret egzize ki dimoun I devret rann kont pour zot aksyon.  Pep Seselwa I bezwen pe ganny lazistis e bann byen malaki I bezwen retourn kot pep Seselwa.

Mon krwar se sa mesaz ki in sorti e mon welcome sa lapros Onorab Pillay in met lanfaz lo rol Lasanble Nasyonal konman en brans Gouvernman Lasanble Nasyonal – sa Lasanble Nasyonal pe fer son rol pe fer son bout me kestyon ki mon demande, akoz Prezidan Larepiblik pa vwar li neseser pour enplimant deklarasyon bann byen parey I ti anonse?  Deklarasyon byen I enportan dan sa prosesis e la 2an 2 lannen pe koule e deklarasyon bann byen pa ankor fer.

Alor ler nou pe koz rol Lasanble Nasyonal nou bezwen osi montre ledwa lo L’Egzekitiv ki zot pa pe zwe zot rol dan sa prosesis.

Dan menm konteks akoz ki Prezidan I pe trenn lipye dan sa 50milyon Dolar?  Mwan mon ti a swete ki Prezidan I pran li en linisyativ lo li menm pour li fer sir ki sa lenvestigasyon I ganny fer e parey zot dir I ava anmenn en closure e ki tou Seselwa I a konnen ki I arive.

Onorab Woodcock in koz lo parkour ki la fanmir Dutchman in fer en lepok pour mon I en parkour tre tris ki nou pa swete ki I ariv ankor dan nou pei.

Sa lenpresyon ki zis en pti group dimoun in vreman benefisye avek byen leta I enn ki reel adrese definitivman.

Onorab Arissol – Sandy Arissol in koz lo travay Lasanble an relasyon avek sityasyon e kondisyon lavi nou pep ozordi I en pwen tre valab e sa I enn bann rezon ki nou annan sa Mosyon devan nou Lasanble nou bezwen konbat tou form koripsyon dan nou pei akoz I annan en lenpak direk lo lavi nou frer ek ser Seselwa.

Onorab Gill in plito koz lo transformasyon Parti Lepep Onorab Gill in dir nou annou sorti dan lepase, me an menm tan son koleg Onorab Hoareau in dir nou ki latransparans I egziz ki nou retourn dan lepase.

Mon kontan ki Onorab in dir de mo lo sa Mosyon alafen son lentervansyon me selman mon anvi dir Onorab Gill avek Onorab De Commarmond, ki Seselwa in fer konfyans Parti Lepep me Parti Lepep in abiz loo sa konfyans.

Mon eskize poudir Onorab mon pa krwar ki Parti Lepep pour kapab transformen akoz mon antann diferan versyon sa zistwar dan diferan lepok.

Parti Lepep I mank senserite Onorab Lopozisyon wi nou dan LDS nou anvi ki keksoz I bouze e ki nou ganny en rezilta o pli vit posib.  Mon pour agree avek Leader Lopozisyon ler I dir ki siporter lepep ler siporter lepep pe sote dan lapousyer sef pe donn bal avek resours Leta.

Bokou legzanp I donnen e keksoz pe vin deplizanpli pe kler Seselwa pe note e I kler Seselwa pour reklanm zot byen.

Mr Speaker ler Onorab De Commarmond I dir I annan koripsyon partou me sa pa fer koripsyon en keksoz normal. Fodre fer atansyon annou pa rod okenn leskiz annou pa donn lenpresyon ki I normal ki I annan koripsyon dan nou pei.

Nou bezwen pran en lapros direk for pour nou kapab deal ek sa size.

Pwen avanse par Onorab Hoareau lo fonksyonnman e Oditer Zeneral pour antreprann en tel lenvestigasyon dan en fason efektiv in ganny byen apresye e in ganny konsidere Onorab Leader Lopozisyon in fer propozisyon amannman in ganny prezante e aprouve.

Alor Mr Speaker mon krwar tou keksoz I annord pour nou pran en vot.  Mon remersi ou.

 

MR SPEAKER

Mersi Onorab Terence Mondon.  Bon nou pour pran en vote en desizyon lo Mosyon konman in amande.  E Mosyon parey in amande I lir konm swivan

‘Vi ki I annan plizyer lavant propriyete lakonpannyen piblik COSPROH dan lepase sa Lasanble I fer en demann pour ki Prezidan Larepiblik I etablir en Komisyon Lanket anba direksyon Oditer Zeneral, pour fer en lanket detaye pour etabli si okenn dimoun oubyen lakonpannyen prive I benefisye dan lavant sa bann byen COSPROH.  Si ti annan okenn konfli lentere dan sa bann tranzaksyon e si reveni Gouvernman a okenn moman in ganny konpromi’.

Mon krwar mon ganny li byen.  Bon Lasanble I ava pran en vot lo Mosyon.  Mon ava demann tou Manm ki an faver?  Okenn Manm ki kont?  Madanm Clerk.

 

MADAM CLERK

Mersi Mr Speaker.  30 Manm an faver.  E personn kont.  Mersi.

 

MR SPEAKER

Bon savedir desizyon I inanim.  E Mosyon I ganny aprouve par Lasanble Nasyonal e nou ava fer le neseser avan lafen lasemenn lesansyel ava ganny fer nou ava anvoy kot biro Prezidan State House.

Avan nou adjourn mon zis anvi fer rapel bann Manm Bills Committee ki demen nou pour rankontre demen 9.30 dan Committee Room 3.

E petet osi mon kapab lo mon kapab lans en lapel avek bann Manm ki enterese ki oule vin asiste miting si zot around demen feel free.  Mon konnen le de Leaders tanzantan ler zot vini zot vin asiste e zot kapab feel free si zot annan bann inputs osi zot le fer.

Mon anvi osi remind bann Manm pour sa half day workshop Vandredi ki pe ganny organize par UNDP lo bann sustainable development goals e rol parlmanter dan sa prosesis.  Sa I pour fer 9er bomaten kot lotel Savoy Beau Vallon.  Avek sa mon krwar se tou ki mon annan konman lanons.  Yes Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon ti a zis kontan mon ti a kontan atir latansyon bann Manm IAC ki nou pe rankontre demen 12.15 dan Committee Room 3.  I en miting en pti pe pli long ki labitid, me selman nou annan en pe biznes pour nou dispose of, so mon ti ava swete ganny partisipasyon tou Manm.  Mersi.

 

MR SPEAKER

Mersi Onorab Ferrari.  Savedir IAC osi demen pe meet 12.15 isi menm kot Lasanble.

Bon mon krwar in vin nou fer 2 zour zoli travay 2 zour byen plen parey mon anonse taler mon anons 4 Bill ki nou pour deal avek.  Me I pa neseserman ki nou pour pran tou le 4 Bill, Mardi nou ava regarde ki mannyer keksoz I ale.

Me nou Bills Committee pour sey fer son travay pour prepar – ki pour ki nou kapab met sa 4 Bill lo Order Paper menm si I ava pran 2 Mardi e 2 I ava swiv en pti pe plitar.  Ok? Bon nou ava Lasanble I adjourn e nou ava repran Mardi le 10 – 9er bomaten.

 

 

(ADJOURNMENT)