Home » Verbatim » 2018 » Verbatim Tuesday 26th June, 2018

Verbatim Tuesday 26th June, 2018

NATIONAL ASSEMBLY OF SEYCHELLES

Tuesday 26th June, 2018

The Assembly met at 9am

National Anthem

Moment of Reflection

Mr Deputy Speaker in the Chair

MR DEPUTY SPEAKER

Bon bonzour tou bann Manm Onorab.  Bonzour tou bann envite ki dan Gallery ozordi.  Nou annan bann rezidan Mont Buxton an partikilye.  En bonzour spesyal pou zot. Zot MNA osi isi ozordi. En bonzour spesyal pou zot team leader ki Marie Helene Niole. E nou osi annan ozordi avek nou sa ki nou apel Disabled Support Group. E ankor pou zot osi en byenveni spesyal e mersi zot team leader Jourdanne Ernesta.

Mon pou konmans avek en pti kominikasyon petet pou lenformasyon bann dimoun, ki ozordi nou annan nou en pe mwens Manm parey zot vwar dan Lasanble.  Rezon pou sa se i annan Manm ki pe vwayaze.  Aktyelman i annan 6 Manm avek en Manm Sekretarya ki’n al reprezant nou dan 43zyenm Plenyer Sesyon Lasanble SADC PF, sa pe fer Angola depi le 20 Zen ziska le 2 Zilyet 2018.

Sa bann Manm se nou Speaker Onorab Prea, Leader Lopozisyon Onorab Ramkalawan, lo zot a rapel i Chairman, i ti ganny elekte Chairman Standing Committee SADC PF ki en Komite ki regard bann zafer demokrasi gouvernans avek Drwa Imen, an  Avril 2018.

Answit nou annan Onorab Chantal Ghislain, Onorab Mondon, Onorab Regina Esparon, Onorab Egbert Aglae.   E lo kote Sekretarya nou’n ganny reprezante par Mrs Jelline Quatre.

Nou osi posibleman dan lazournen nou pou annan serten lezot Manm ki piu absante akoz pou annan Komite Anti-Viktimizasyon ki ozordi zot annan en ‘hearing ‘Ankour 9er bomaten e i posib pou annan serten lezot Manm ki pou absante pandan lazournen.  Esperons ki nou pou still annan en quorum pou nou kontinyen.

Avek sa mon ti a kontan ki nou konmans nou travay pou lazournen.  Onorab Henrie ou ti le dir keksoz ?

 

HON GERVAIS HENRIE

Mersi Mr Speaker.  Bonzour tou dimoun e en bonzour spesyal pou bann rezidan Mont Buxton ki avek nou Mr Speaker sa i fer dezyenm group depi Sizyenm Lasanble sorti Mont Buxton ki vizit nou.

Anba Order 36 (1) Mr Speaker mon i ta kontan raise en matter of privilege konman Chairperson Komite Lasirans COGA. 

Mr Speaker mon oule aport latansyon Lasanble ki nou ti’n tonm dakor avek Brans Egzekitif ki letan zot vin dan Lasanble partikilyerman pou dan sesyon reponn  kestyon ki okenn lenformasyon ou dokiman ki zot promet Lasanble zot pou donnen nou’n tonm dakor ki zot fer sa pli tar Vandredi 4er; konmsi end of working hours sa semenn spesifik.

E resaman in annan bann omwen 3 Minis ki’n vini Minis Loustau-Lalanne, Minis Dogley e Minis Charlette ki’n promet nou serten dokiman dan ka par egzanp Kontra Avangarde pou Militer; bann dokiman konsernan lease, sa morso later lo Alphonse dan kestyon Onorab Ferrari, apre 2 PNQ li dan Lopozisyon partikilyerman Air Seychelles loss and profit account par egzanp e osi lease later endistriyel en kestyon ki Onorab Pillay ti demande.

E nou’n vwar ki sa pa pe ganny fer e mon ti ava demande ki Sekretarya Lasanble ti kapab anvoy en note kot Sekreter Cabinet pou remind sa laranzman.

E nou note osi vwar poudir i annan serten Minis par egzanp ki vin zot tousel, zot tousel i fer ki probableman sa bann lasirans ki Zot pe donnen napa en dimoun lo zot kote ki pe note.

E Sesyon demann kestyon i en size telman enportan, nou pe deal avek taxpayers, nou pe deal avek voter.  Mon demande koman Chairman COGA ki nou byen prepare zot vin avek bann keksoz byen e zot donn nou sa bann lenformasyon, parey sa interview ki mon’n fer depi an Zanvye ki SBC in pase yer swar.  Mersi bokou.

 

MR DEPUTY SPEAKER

Mersi Onorab Henrie.  Sa pwen ki ou’n fer souleve i enportan akoz byensir travay Lasanble i bezwen en travay serye kot bann komitman ki’n ganny fer ek Lasanble i bezwen ganny garde par Egzekitif.

Ki mon ti a sizere avek ou si ou kapab parey ou’n dir mwan spesifikman idantifye sa bann, sa bann pwen klerman atraver verbatim, fer mon ganny zis sa ekstre sa bann morso relevan ki mwan lo mon kote mon ava fer sir ki Sekretarya si fodre mwan menm mon ava ekrir Konsey de Minis pou port a zot latansyon poudir ti annan komitman ki’n fer e pa pe ganny respekte.

Zis en pti pwen lo kote Kontra Avangarde, mwan mon rapel mon’n gannyen en kopi sa Kontra, me petet mon’n ganny li dan kapasite konman Deputy Chair FPAC, me mon panse lezot manm FPAC osi in osi ganny en Kontra me nou ava fer sir poudir ki si – letan ki sa ti’n ganny bann dokiman ki’n ganny promet avek Lasanble tou Manm i devret alors kapab ganny akse avek.  Mersi Onorab Henrie. Onorab Ferrari.

 

HON JEAN-FRANCOIS FERRARI

Mersi Mr Speaker.  Bonzour tou dimoun.  Bonzour tou dimoun a lekout. Mr Speaker mon entervenir pou mon rod ou gidans lo en sityasyon ki mon ti a kontan ki nou reflesir e nou ki nou gete ki mannyer nou kapab deal avek.

E mon lentansyon Mr Speaker pou mon challenge (SI) 27 ki’n ariv devan Lasanble an Avril, ki’n ganny depoze e ki konsern konsesyon e egzanpsyon lo fuel i apel Excise Tax Fuel Exemption And Concessions Regulations 2018.

Now mon problenm Mr Speaker se ki sa Lalwa, sa Regilasyon anba Excise Tax i konsern plizyer sekter.

Notaman enn bann sekter se konsesyon fuel pou bann peser, ki mon dir toudswit ki nou an faver e ki nou’n vote.  Nou’n vote pou ki bann peser i ganny sa bann konsesyon.

Me selman anba sa nouvo Regilasyon Minister Finans in fer antre serten keksoz ki mwan konman Manm sa Lasanble e mon vwar li en pe drol e mon problenm se ki  e se la kot mon pe rod ou gidans, si mon challenge sa (SI) si mon sey quash sa (SI) i pou cancel tou sa bann provizyon e notaman sa enn ki mon’n fer konsernan bann peser.

E mon pa anvi fer sa akoz nou tou konman en Lasanble nou dakor ki bann peser i kontinyen ganny sa konsesyon.  Par kont anba sa menm (SI) nou vwar par egzanp e enn sa enn ki en pe pli ekstraordiner se ki sa (SI) i osi donn konsesyon fuel pou helicopter ki pe fer  bann flight komersyal.

Mr Speaker dan en moman kot pri elektrisite pe monte e ki fuel lo laponp kot stasyon petrol in ogmante, vreman koman en Seselwa, konman en Manm sa Lasanble mon pa vwar akoz sa operater ki pe lwe helicopter ki lwe sa avek bann milyonner pa avek ti Pol Leternit oubyen okenn lot dimoun me selman sa milyonner, sa Sheikh, oubyen sa lerwa i kapab peye sa pri. Me selman nou pe donn sa operater en konsesyon.

Mon pa konnen Mr  Speaker si sa in antre ladan i pa ti devret antre ladan me mon bezwen en gidans ki mannyer  mon kapab ganny en solisyon lo en bout ki mon krwar i pa akseptab, an menm tan ki mon kit bann bout ki akseptab?

Ou konnen lot keksoz ki akseptab Air Seychelles i gannyen en pe, i ganny 50poursan discount lo fuel.  SPTC i gannyen.  Sa se bann keksoz i enportan, pou nou gard bann servis piblik –  bann servis piblik a en pri rezonnab.

Me la nou pe tonm lo bann kestyon komersyal  ki mannyer mon pou fer Mr Speaker akoz a la fen mwan prosen, le 24 mwan prosen i pou’n tro tar, e mwan mon anvi challenge sa provizyon dan sa (SI).  Alors silvouple donn mwan ou gidans lo la.  Mersi.

 

MR DEPUTY SPEAKER

Mersi Onorab Ferrari.  Sa ki mwan mon kapab sizere se ki anba Interpretation And General Provision’s Act i annan en clause kot si mon pa tronpe i 62 oubyen 72 (4) ki permet avek en rezolisyon Lasanble Nasyonal, ki Lasanble i kapab quash en (SI).  Me ou’n eksplik byen ki  ou pa anvi i pa ou lentansyon pou quash sa (SI) akoz i pou quash lezot keksoz ki ou ti a kontan i ganny mentenir.

En regilasyon i pa – i form parti Lalwa me ou pa kapab anmenn en Bill pou sanz en regilasyon.  I en prerogativ Gouvernman.  Mon sizesyon avek ou se petet ou devret ekrir Minis Finans ki mon prezimen se li ki’n siny sa (SI) anba Excise Tax Act e demann li si i kapab konsider re fer sa (SI) ; savedir repeal sa (SI) an antye apre e ranplas li par en versyon san sa morso ki pe donn bann konsesyon avek operater ki ou krwar pa merit gannyen tel ki helicopter.

E mon krwar fer sa pozisyon kler ki piblik, Minis, Gouvernman i ava vwar i kler poudir ou pa kont larestan me sa enn la ou kont e vreman prerogativ i pou zot, pou zot re fer en (SI) e prezant li devan Lasanble.

Parsi finalman se nou ki nou apel lawmaker e sa i for parti Lalwa e si Lasanble pa santi li konfortab i zot devwar pou zot eksprimen e pou bann rezon ki ou’n eksplike.

E alor se sa mon sizesyon, ekri en let Minis Finans, fer li kler pibliy ou let so tou dimoun a vwar poudir ki ou pozisyon ou pe pran, ou pa kont sa bann lezot konsesyon me sa enn la oubyen lezot ankor ki ou pa dakor ou fer kler lo la.  Mon a ofer Onorab De Commarmond –  ou ti oule dir en keksoz lo la ?

 

HON CHARLES DE COMMARMOND

Mersi Mr Speaker.  Bonzour Mr Speaker, bonzour tou Manm Onorab e tou dimoun ki a lekout spesyalman bann dan galeri.

Mr Speaker pou mon mwan mon anvi zis anvi donn en gidans en pti pe, en sizesyon.  Olye ki ou donn en ruling la, mon ti ava sizere ki ou tenirr ou ruling ou pa donn li la apre Break konmsi ki ava donn ou letan pandan break pou ou konsilte Legal Advisor Lasanble mon aprann nou annan enn la konmela.

Si i annan en Legal Advisor Lasanble ki ou kapab ganny en advise avek li.

E an menm tan permet pou vwar petet pli an detay ki en kontak mon menm mwan mon a donn en koudmen mon a fer en kontak  avek Minister Finans pou vwar, rasyonnel deryer sa.

E petet konman  nou ankor annan letan akoz i donn trwa mwan pou nou kapab quash en (SI).  Mon toutafe dakor largiman ki’n ganny avanse pou nou kapab vwar e si fodre apel zot isi dan Lasanble dan en fason irzan pou nou kapab vwar e konpran rasyonnel deryer sa (SI) pou nou kapab apre pran en desizyon an kolektiv pou nou kapab al devan.  Mersi.

 

MR DEPUTY SPEAKER

Ok, mon krwar i rezonnab pozisyon ki pe ganny pran. I bon nou rod en pti pe plis klarifikasyon.

Lo mon kot e  mon a fer sa osi e answit noua va rod en fason pou nou fer sir poudir Lasanble i satisfe avek (SI) ki deor pe donn konsesyon.

Bon nou pou kontinyen avek travay pou ozordi.  Nou travay vreman lo Order Paper i annan 6 kestyon pou Minis pou Ledikasyon ek Devlopman Resours Imen – Minis Jeanne Simeon.

I annan 3 kestyon sorti kot Onorab Noline Sophola, 1 kestyon sorti kot Onorab Hoareau, 2 kestyon sorti kot Onorab Hoareau pardon,  e 1 kestyon sorti kot Onorab Wavel Woodcock.

San fer plis ki sa, mon ti a demann Deputy Clerk, Parliamentary Reporter pou silvouple apel Minis pou Ledikasyon ek Devlopman Resours Imen.

Zis pou zot lenformasyon Minis pou ganny akonpannyen ozordi par son Konseye Spesyal Mrs Merida Delcy e son PS pour Tertiary Education and Human  Resource Development  Madanm Dr Linda Barallon, e PS pou Early Childhood Primary and Secondary Education ki Dr Odile De Commarmond.

E pandan ki nou pe atann zot zis lezot item lo nou Order Paper ozordi, ler nou pou’n fini tou nou bann kestyon ki mon anvizaze pou al ziska petet lafen bomaten, nou pou annan bann Mosyon ki nou pou pran e i annan 3 Mosyon an realite.  Me enn ladan, Mosyon N0.2 par Onorab Mondon petet nou pou skip li parski Onorab Mondon pa dan pei i Rwanda – Angola avek delegasyon ki pe attend SADC PF.

Bonzour Minis Jeanne Simeon, bonzour Mrs Delcy, Dr Barallon e Dr De Commarmond.  Byenveni dan Lasanble pou reponn sa 6 kestyon ki konsern  ledikasyon.  E toudswit mon ti a demann Onorab Noline Sophola pou poz ou kestyon.

 

HON NOLINE SOPHOLA

Bonzour e mersi Mr Speaker.  Bonzour Minis ek ou delegasyon, tou Manm Onorab, tou envite dan Galeri e tou dimoun ki a lekout.

Mr Speaker mon premye kestyon pou Minis i lir koumsa.  Eski Minis i kapab dir sa Lasanble ki kalite incentive ki son Minister i annan an plas pou ankouraz e permet bann ansennyan La Digue ek Praslin pou swiv zot devlopman profesyonnel?  Mersi.

 

MR DEPUTY SPEAKER

Mersi Onorab Sophola.  Minis Simeon ou annan laparol.

 

MINISTER JEANNE SIMEON

Mersi Mr Speaker.  Bonzour Mr Speaker, bonzour tou Manm Onorab prezan.  Bonzour piblik dan galeri e osi tou  dimoun ki a lekout.

Mr Speaker, Minister Ledikasyon i annan son plan pou devlopman profesyonnel bann ansennyan konman enn son stratezik kle pou amelyor lansennyman e laprantisaz dan nou bann lekol.

Anliny avek sa stratezi pou bann ansennyan Praslin ek La Digue ki vin pou swiv zot devlopman profesyonnel lo Mahe, Teachers Scheme of Service i fer provizyon konm swivan ;

En ansennyan ki pa rezidan Mahe ki anrezistre lo training a plen tan pou plis ki 6mwan lo demann Minister i ganny asiste avek Housing Allowance R1500 par mwan.

En ansennyan ki pa rezidan Mahe ki anrezistre lo training lo part time pou plis ki 6mwan a la demann Minister i ganny asiste avek Housing Allowance R2mil par mwan.

Baze lo leksperyans asiste ansennyan Praslin ek La Digue ki vin training lo Mahe Minister i rekonnet ki i annan serten limitasyon avek sa de allowance an vi kou,  an vi kou eleve pou akomodasyon an se moman e pri lavi an zeneral.

Se pou sa rezon Mr Speaker ki Minister atraver SITE – Lenstitisyon pou Formasyon bann Ansennyan in adopte en nouvo model formasyon ki konpri training fas-a-fas e a distans sa ki nou apel en blended learning mode.

Sa i a permet otan ansennyan pou ganny formasyon sa bezwen pas en kantite letan lwen avek zot fanmir e osi san bezwen enteripsyon dan laprantisaz ek lansennyman.

Sa formasyon in deza konmanse an Avril sa lannen e dapre dernyen statistic i annan en total 210 ansennyan ki pe swiv sa progranm.  Sa i enkli ansenyan lo Praslin ek La Digue. 28 lo Praslin e 8 lo La Digue.  Mersi Mr Speaker.

 

MR DEPUTY SPEAKER

Mersi Minis.  Kestyon adisyonnel Onorab Sophola.

 

HON NOLINE SOPHOLA

Mersi Minis.  Mr Speaker Minis i byen ki in dir i annan formasyon ki pe fer pou bann ansennyan, me selman apard sa bann keksoz ki ou’n dir akoz en teacher dan laklas i annan son full load e parfwa zot pe teach 24 oubyen 26.

E apre sa 12 oubyen 14 free periods ki zot gannyen sa se preparasyon pou zot delivery, pou zot leson normal.

Eski Minis zot in fer provizyon pou donn sa bann teachers en pti ‘ekstra’ pou zot kapab pli byen travay lo zot formasyon ki zot pe gannyen?

Apard ki mon konnen dan SIP zot pe donn zot fortnightly zot pe ganny SIP free, me apard sa akoz SIP osi mon krwar i annan son rol enportan ki i zwe, sa bann keksoz ki i fer bann teachers i bezwen okouran ki pe pase. Nou pa kapab toultan pran SIP donn zot.  Me selman apard sa eski i annan keksoz provizyon ankor keksoz ki zot in fer?  Mersi.

 

MR DEPUTY SPEAKER

Mersi Onorab Sophola.  Minis ou annan laparol.

 

MINISTER JEANNE SIMEON

Mersi Mr Speaker.  Pou ansennyan ki pe swiv sa formasyon ki mon’n fek nonmen la, sa blended learning mode sa i konpri letan ki zot vin  bann kour fas a fas e letan ki zot swiv bann kour a distans, e zot osi ganny release from zot lekol pou zot vin swiv bann kour fas a fas.

Savedir dan sa ka osi nou pe siport zot, zot pe vin training alor nou donn zot sa de zour par semenn pou zot swiv training.

 

HON NOLINE SOPHOLA

Mersi Minis.  Mr speaker mon annan en  dernyen rekomandasyon ki petet mon ti a demann Minis apre ki mon’n zwenn serten teachers ki mon’n koz avek.  Zot ti a swete si kekfwa ti kapab fer en keksoz ekstra pou donn zot kantmenm en 80 minit par semenn, pou zot travay lo sa kour.

Akoz apre ki zot in dedye tou zot letan zot konnen ki travay ansennyan i pa zanmen fini, zot anmenn avek zot.  Zot ti a bezwen konmsi ganny sa ekstra pou zot donn plis si nou anvi  ganny en bon keksoz, en bon rezilta sorti kot bann ansennyan.  Mersi.

 

MR DEPUTY SPEAKER

Mersi Onorab Sophola. Mon pa konnen si Minis i le fer en komanter lo…

 

MINISTER JEANNE SIMEON

Mersi Mr Speaker.  Depi ler kour in konmanse lo nivo Minister Ledikasyon nou pa’n ganny okenn komanter de la sorte sorti kot bann teachers, me i pa anpese si nou ganny en feedback dan sa laliny ki Onorab Sophola pe dir ki as a Ministry vi ki nou anvi siport nou bann teachers, nou a kapab konsidere.  Parey mon’n dir teachers zot menm zot in konmans sa training e nou pa’n ganny okenn feedback pou dir zot bezwen plis letan ouswa non pou le moman. Mersi Mr Speaker.

 

MR DEPUTY SPEAKER

Mersi Minis.  Onorab Vidot.

 

HON AUDREY VIDOT

Bonzour Mr Speaker.  Bonzour Minis ek ou delegasyon, tou Manm Onorab e tou dimoun ki a lekout.  Mr Speaker mon kestyon pou Minis, eski Minis i kapab enform nou Lasanble si Minister pe reviz en pe bann incentive allowance, ki pe ofer nou bann ansenyan, e menm nou bann etidyan ki teaching oubyen lezot ki pe viv dan bann pei kot pri lavi in monte kot zot annan zot bann training – course, si i annan bann – pou zot kapab adjust ek bann difikilte e petet rent, pri fuel ensidswit.  Mersi.

 

MR DEPUTY SPEAKER

Onorab mon ti a demann ou pou fer en referans spesifik  avek Praslin –  Praslin ek La Digue ki ou pe koz lo la?  Ok? Minis.  Ok mon pe donn la parol Minis.

 

(Interruption)

 

MR DEPUTY SPEAKER

Ok. Order silvouple.  Mon pe donn parol Minis.  Minis ou kapab reponn sa kestyon silvouple ?

 

MINISTER JEANNE SIMEON

Mersi Mr Speaker.  Anyway sa ki pou – incentive ki mon pou donnen la i pa neseserman pou zis Praslin ek La Digue i konsern tou ansennyan.

Mon oule fer resorti ki dan en lespas 5an already nou’n revise nou Teachers Scheme of Service 2 fwa.  E bi sa revizyon se pou toultan regarde ki mannyer nou kapab pli byen rémunéré nou bann teachers e osi ki kalite sipor nou kapab donn zot pou ki zot santi zot pli alez pou donn nou en bon servis kot i konsern lansennyman.  Mersi Mr Speaker.

 

MR DEPUTY SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon ti a kontan demann Minis si sa formasyon ki zot pe ofer i dan okenn fason obligatwar oubyen ki mannyer zot ankouraz bann teachers pou aktyelman fer sa bann formasyon lifelong kontinyel?

E dezyenmman ler bann ansennyan in aksepte pou zot fer sa formasyon, zot in sakrifye ki benefis konkret ou kapab dir nou ki sa ansennyan i kapab ekspekte apre sa zefor ki in fer pou li perfeksyonn son profesyon?  Konmsi sa ki mon pe rode avek ou Minis, ki lankourazman ki Minister i met devan, pou fer sir ki tou son ansennyan i benefisye avek sa kalite formasyon?  Mersi.

 

MR DEPUTY SPEAKER

Mersi.  Minis.

 

MINISTER JEANNE SIMEON

Mersi Mr Speaker.  Vi ki nou regard nou bann ansenyan koman bann dimoun kle dan lansennyman pou kapab donn nou rezilta ki nou pe rode, Minister Ledikasyon i pa zis ankouraze, me i asire ki tou ansennyan ki lo en serten nivo ki bezwen hausse zot nivo pou ariv en pe pli o pou ganny plis konesans i asire ki zot swiv sa bann kour formasyon.

E se sa parey mon pe dir k nou’n fer li nou’n sanz model, nou’n sanz mode training pou nou fasilit sa pou nou kapab zot tou swiv pou pa dir nou poudir nou napa, nou pa ganny letan kot lekol eksetera, nou annan fanmir eksetera.

So nou’n esey fer le mieux posib pou nou kapab ganny otan ansennyan pou kapab swiv.   E sa i pou en formasyon kontini ler nou fini avek en group nou pou pran lot group.  E sa se ki nou’n fer pou nou kapab, pou nou  kapab ed nou bann ansennyan pou swiv sa training.

Prezan Onorab lo kote ki nou donn zot, ki sipor nou donn zot letan zot in asiste sa training konplet sa training ki nou pe konsider e  menm kapab dir i obligatwar si ou lo sa level pou ou mont lo level en pe pli o.

Dapre Scheme of Service ler  ou fini en training e ou ganny en kalifikasyon pli o  i annan en azisteman ki nou fer avek ou saler. E osi dan  dernyen revizyon Scheme of Service, nou’n entrodwir en nouvo eleman ki apel marketable skills, akoz nou konnen poudir i annan kalifikasyon ki ou lezot Lorganizasyon pe rode pou anploy ou, so nou pou nou pa perdi sa teacher ki nou’n already train nou donn li sa ki nou apel en marketable skill.

E sa marketable skill i depan lo  level ou training, ok? I pran depi R700 par mwan pou certificate, i monte i ariv ziska R4000 as marketable skills.

E osi parey nou konnen letan ou’n ganny en kalifikasyon pli eleve, sa osi i met ou dan en pli bon pozisyon, ou a ganny sa loportinite pou ou ganny en promosyon.  Akoz dan lekol osi nou annan diferan kad ansennyan, nou annan Heads of Subjects, i annan Deputy Heads, Heads of Department.  So avek sa konesans, sa kalifikasyon ki ou gannyen i kapab met ou dan en pli pozisyon pou ou kapab ganny en promosyon a lenteryer ou Lenstitisyon, ouswa dan en lot lekol.  Mersi Mr Speaker.

 

MR DEPUTY SPEAKER

Mersi.  Onorab Ferrari.

 

HON JEAN-FRANCOIS FERRARI

Mersi Minis pou ou larepons.  Sel lot kestyon ki mon annan se ki lo sa konteni sa bann training ki zot donnen eski zot pe – i annan en module oubyen i annan en training pou management dan ledikasyon akoz sa i paret ki i enn ki nou bezwen ranforsi lo la.  Ki lenportans zot pe donn sa kalite training spesifik?  Mersi.

 

MR DEPUTY SPEAKER

Mersi Minis.

 

MINISTER JEANNE SIMEON

Mersi Mr Speaker.  Training lo nivo management ki nou apel Education Leadership in dan Minister Ledikasyon pou en bon pe letan menm avan mon ti sorti dan Minister Ledikasyon ti annan en progranm pou bann Head teachers, Deputy Head Teachers and aspiring Deputy Head Teachers.

Ok so sa training nou ti pe fer li avek en liniversite etranze, Lincoln University. Nou’n train pandan sa letan laplipar nou bann headteachers ki ankor la konmela avek nou dan lekol in swiv sa training.

E la nou’n recently nou’n osi konmans en nouvo training  dan educational leadership sa voyaz avek liniversite Maurice, petet i pou kout nou en pe pli meyer marse i dan la rezyon e sa training ki nou pe fer pou school leadership, i pou kontinyen sa training pou nou bann school leaders, pou nou bann managers dan lekol akoz nou bezwen osi ekip zot avek sa leadership, akoz se zot ki pe bezwen lead curriculum development dan lekol, lead management dan  zot Lenstitisyon.

So nou vwar poudir i enportan ki zot osi zot ganny sa bann managerial skills and knowledge.  Mersi Mr Speaker.

 

MR DEPUTY SPEAKER

Mersi Minis. Onorab Sylvanne Lemiel.

 

HON SYLVANNE LEMIEL

Mersi Mr Speaker. Bonzour tou dimoun a lekout.  Minister mon ti a kontan demande dan kad incentive ki ou Minister pe donn bann teachers spesifikman Praslin La Digue, me letan nou get lezot teachers osi, eski Minister i ankor annan sa Laptop Scheme ki pou ed sa bann teachers pou pourswiv zot letid konman en incentive?  Mersi.

 

MR DEPUTY SPEAKER

Minis.

 

MINISTER JEANNE SIMEON

Mersi Mr Speaker.  Ankor enn fwa Laptop Scheme in dan Minister Ledikasyon pou en bon pe letan ok.  Nou’n annan mon krwar 3 ou 4 zenerasyon  Scheme. Ok.  Nou donn en parti laptop, computers apre sa ler nou ganny nouvo ansennyan nou entrodwir en kot zenerasyon e si mon pa tronpe la nou pe annan nou – en Scheme ki pe konmanse la mon krwar katriyenm zenerasyon Laptop Scheme pou teachers.

E byento bann teachers ki napa ki pa’n benefisye dan Scheme avan ouswa ki’n perdi zot laptop, laptop in kase, zot ava ganny sa sans pou zot kapab aste en nouvo laptop.  Mersi Mr Speaker.

 

MR DEPUTY SPEAKER

Mersi Minis.  Nou ava al lo dezyenm kestyon Onorab Sophola.

 

HON NOLINE SOPHOLA

Mersi Mr Speaker.  Minis dan lespri egalite, loportinite eski ou kapab dir nou Lasanble dan ki fason ki ou Minister i soutenir bann zelev La Digue ek Praslin pou partisip dan bann aktivite edikasyonnel parey bann fairs ki organize par diferan Minister?  Mersi.

 

MR DEPUTY SPEAKER

Mersi Onorab Sophola.  Minis.

 

MINISTER JEANNE SIMEON

Mersi Onorab.  Mersi Mr Speaker.  Mr Speaker Minister Ledikasyon i organiz diferan aktivite pandan lannen kot nou demann tou nou bann lekol pou partisipe. Sa i dan kad nou progranm co-curricular activities pou ki annan pou bi anrisir e ranforsi laprantisaz nou bann zanfan.

Lo nivo – tou progranm co-curricular activities headquarters Minister Ledikasyon an kolaborasyon avek management lekol i pran sarz fre deplasman, akomodasyon e restorasyon pou bann zanfan Praslin avek La Digue.

Dan ka bann aktivite ki pa tonm dan kad co-curricular activities, bann Lenstitisyon i fer zot prop laranzman.

Pou bann aktivite ki annan en lyen avek progranm letid e ki nesesit deplasman bann etidyan e zot ansennyan, management  lekol i toultan kapab antre an diskisyon konversasyon avek Minister Ledikasyon pou  ganny lasistans anliny avek nou guidelines lo nou cost sharing.

An plis ki sa dan kad plis lotonomi pou nou bann management lekol, zot ganny ankouraze pou konsolid zot partenarya avek diferan partener dan la kominote pou lasistans adisyonnel.

Mr Speaker i annan lezot Minister ek Lorganizasyon ki organiz aktivite ki enplik nou bann ansennyan.  Nou ganny lenvitasyon pou zot partisipe.  Dan sa ka sa Minister oubyen Lorganizasyon konsernen i pran responsabilite pou bann lozistik, an konsiltasyon avek management lekol e avek laprouvasyon Minister Ledikasyon.  Mersi Mr Speaker.

 

MR DEPUTY SPEAKER

Mersi Minis.  Onorab Sophola.

 

HON NOLINE SOPHOLA

Mersi Mr Speaker.  Minis mersi pou larepons ki ou’n donnen, me selman mon pou elabor en pti pe.  Par egzanp i annan sa kan Minister pou lanplwa i organiz sa job fair, something like that, ki mon vwar bokou lekol i desann zot anmenn zot zelev vin regarde.

E ler mon pe regard Praslin La Digue bann zanfan i ganny left out, akoz dan sa aktivite se la ki bann zanfan i kapab fer zot swa karyer.  Akoz parey la Digue i annan keksoz ki zanfan pa pe vwar.  Zot pa konnen.  Se ler zot vin la ki zot aprofondir zot en pti pe e sa i donn zot en lankourazman pou dir be ok mon  ti anvi vin en pilot, mon ti anvi vin en enzenyer alor la la bann keksoz ki mon bezwen.

E mwan mon pe demande ki si lekol i kapab ganny asiste osi lo la, malgre ki ou’n dir koumsa i annan sa cost sharing, i byen mon konnen ozordi ki mon pou vwar ki lekol ler i annan sa bann keksoz zot e kot Minister Ledikasyon pou konnen. Sa i enportan.

E apre Minis i annan sa at the end of the year i annan sa Sportsmen of the Year ki fer pou lekol.  E ler mon regarde Praslin La Digue nou pou ganny left out toultan.  Akoz ?

Lekol isi Mahe zot sorti zot anmenn zot zanfan zot vin partisip ladan.  Zot gannyen en lakoup.  Plaisance in gannyen, Anse Royale in gannyen me La Digue ek Praslin nou pa kapab vini akoz pou kou ki ban zanfan i bezwen vini dan ban aktivite ki ganny fer.  Mersi Mr Speaker.

 

MR DEPUTY SPEAKER

Mersi onorab Sophola.  Minis.  Minis ou kapab- ler ou pare.

 

MINISTER JEANNE SIMEON

Mersi Onorab. Mersi Mr Speaker. Mr Speaker parey mon’n dir taler nou annan sa cost sharing ok, ki Minister Ledikasyon par egzanp i kapab antre an parey mon dir an diskisyon avek sa lekol si sa lekol i santi ok, i pa pe kapab meet tou bann cost, therefore i apros Minister Ledikasyon e nou parey nou dir nou annan sa loportinite pou nou kapab ed lekol. Ok?

Apre mon ti a kontan osi met en pti lanfaz lo management bann lekol dan sa nouvo parkour ot nou pe ale kot nou pe donn lotonomi nou bann lekol ok? So ler lekol in ganny son lotonomi nou pe ekspekte lekol avek son  School Council, avek son PTA Chairperson pou zot kapab zot osi vin proactive, apros zot kominote, apros bann dimoun dan zot kominote, ki kapab donn zot sa sipor.

Akoz zot pou de mwen an mwen depan lo central administration pou kapab fasilit tou sa bann keksoz pou zot e  sa i pou montre nou zot level of responsabilite ki zot annan,  e ki mannyer zot kapab angaz zot kominote dan ledikasyon zot zanfan, akoz nou dir la e nou kontinyen dir poudir ledikasyon zanfan i en shared responsabilite.  Mersi Mr Speaker.

 

MR DEPUTY SPEAKER

Mersi Minis.  Onorab Sophola.

 

HON NOLINE SOPHOLA

Minis mersi ki ou pe dir bann paran dan la kominote i bezwen fer ?  Mon toutafe dakor.  Paran i bezwen partnership i bezwen get ledikasyon zot zanfan.  Me selman si nou pe regard li byen annou etal li.  Nou pou vwar kou ki paran Praslin la Digue i invest dan zot zanfan i ‘bokou’ konpare avek pou Mahe.

Akoz si sak deplasman ki bann paran i bezwen met zot lanmen dan zot pos mon krwar zot pou faid.  E la Minis  eski ou pe donn ou commitment ki ou pe dir, mon pou retourn ankor lo sa zafer sports mwan, ki ler bann zanfan i pou vin isi i annan bann keksoz ki pou ganny fer ki Minister Ledikasyon anba sa cost sharing ki ou’n dir ki management lekol i kapab demande.

Zis mon pou donn en legzanp.  En group volleyball i vin isi Mahe dan sa bann zafer menm ki nou ti krwar nou kapab anmenn nou zanfan i kout nou R10mil.  Mazinen dan en lannen si sa bann aktivite pe ganny fer kote si paran pou mete toultan.  E si nou, nou pe dir ki nou  anvi ki lekol i evolye, nou anvi ki zanfan i progrese, nou anvi ki zanfan pa tonm dan sa bann labi, mon krwar fodre ki mon krwar i annan en  larzan dan Bidze ki ganny mete pou Praslin/ La Digue pou sa bann keksoz  pou bann deplasman bann zanfan.  Mersi Minis.

 

MR DEPUTY SPEAKER

Mersi.  Minis.

 

MINISTER JEANNE SIMEON

Mersi Onorab.  Mersi Mr Speaker.  Mr Speaker parey mon’n dir taler nou toultan open pou diskisyon, pou konversasyon avek bann lenstitisyon e pou kapab vwar ki mannyer nou kapab ede kot mwayen Minister Ledikasyon i permet.  Parski nou osi nou annan en Bidze ki nou bezwen zere, me nou kapab ofer sipor lekol ki mannyer nou kapab.

Me selman fodre osi parey mon’n dir nou sanz sa mantalite ki toultan se lekol ki bezwen fer toultan, se Minister Ledikasyon ki bezwen fer, toultan se paran ki bezwen me lanmen dan pos.  Nou annan lezot partners ki donn lasistans ki si nou aprose pou vwar si nou kapab gannyen sa lasistans menm si nou konnen poudir Ledikasyon Minister i annan en manda pou ledikasyon bann zanfan.  Me i osi responsabilite tou bann partner dan lasosyete.  Mersi Mr Speaker.

 

MR DEPUTY SPEAKER

Mersi Minis. Onorab Henrie.

 

HON GERVAIS HENRIE

Mersi Mr Speaker.  Ankor enn fwa bonzour tou dimoun.  Mr Speaker premyerman mon ti ava kontan demann Minis in nonm nou sa ki in dir co-curricular activities.  Mon ti ava kontan demann li lekel bann aktivite ki ganny klasifye konman co-curricular? E lekel bann aktivite ki pa tonm anba  sa co-curricular?  Sa i mon premye.

Dezyenmman malgre Minis in dir nou ki pa zis lekol fodre paran osi i kontribye, fodre bann partener i ede, mon ti ava kontan demann li si Minister li dan planifikasyon son Bidze i annan en poursantaz Bidze ki i mete pou finans sa co-curricular activities akoz i form parti devlopman zanfan?  Sa i mon dezyenm.

E trwazyenm an vi ki Children’s Fund aprezan pou al ganny byen zere par en Komite ou en Komisyon, eski son Minister pe mazin antre dan en Lagreman avek zot ki Children’s Fund i annan en kontribisyon tou-le-z-an ki fer ver Minister Ledikasyon pou siport sa bann aktivite co-curricular ankor pou ede dan devlopman zanfan?  Mersi bokou.

 

MR DEPUTY SPEAKER

Mersi Onorab Henrie.  Minis.

 

MINISTER JEANNE SIMEON

Mersi Onorab.  Mr Speaker extra co-curicular activities si mon kapab nonm enn de mazer ladan se sa National Schools Athletic Championship ki relye avek nou progranm physical education  dan lekol.

I annan osi Science Fair ki nou pa pe fer li tou-le-z-an me  tou le 2an.  I annan osi ECO School’s Competition sa i ale e ECO School Fair sa i an lyen avek nou ledikasyon lanvironnman.

Nou annan Wide Life Clubs ki nou fer.  I annan osi Festival Kreol ki relye avek nou cultural nou progranm kiltir dan lekol.   Mon’n dir Science Fair.  Sa i detrwa e lezot aktivite ki nou fer se parey mon’n dir taler se bann aktivite ki annan en lyen avek direk avek curriculum.  Sa i parey si dan progranm P2 ouswa progranm P4 i annan en konponan ladan ki pe tret lavil Victoria, parey ou konnen manrmay i ti pti i annan ki pa toultan pe desann anvil.  I  annan osi ki kantmenm i desann anvil paran pa pou eksplik li bann diferan keksoz ki annan dan lavil, bann diferan moniman,  bann diferan sit so i annan  bann visits ki ganny organize par lekol pou anmenn zot zanfan anvil pou zot vwar sa bann diferan sit diferan keksoz ki annan .

I annan osi  lezot dan kad  science ki zot kapab al vizite.  Al vizit lanmar, larivyer eksetera ok ?  Apre sa nou annan dan lekol sa ki nou apel extra curricular activities.  Parey son non i dir sa i an deor curriculum menm ki i ede pou build ledikasyon eksetera bann valer eksetera me selman i pa dan as part of the curriculum.

Sa extra curricular activities sa i bann tim volleyball, bann quiz competition ki ganny organize par lekol ouswa par parey kreol, Quiz Kreol pou festival kreol.

Sa i bann extra manrmay osi kot lekol i kapab form bann pti klib kot zot lekol, sa zot fer sa bann aktivite apre ler lekol.  Tandis ki co-curricular sa i pandan ler lekol e parey ou’n demande Onorab, dan nou Bidze nou annan  larzan se sa ki nou kapab fund ler Praslin ek La Digue i vini pou National Athletics Championship nou fer – nou peye pou zot bann atlet ansennyan eksetera pou vin pran par dan sa konpetisyon.

E osi pou science fair nou osi nou meet the cost.  Parfwa i annan lekol ki dir ou Miss mwan tel dimoun i dir nou i ava donn nou en bis lo Mahe.  So nou donn zot lezot keksoz.

Par egzanp si zanfan i la pou en zournen ler nou fer legzibisyon zanfan i bezwen la en zournen kot bann exhibit pou eksplik paran eksplik piblik nou donn zot refreshment.

Ou vwar?  I bann keksoz ki nou ede osi pou  transport zot bann materyo, si i annan bann gro materyo ki zot anmennen pou sa science fair exhibition. So i varye me selman dan Bidze Minister Ledikasyon nou fer plan pou sa.

Lo kote Children’s Fund parey ou konnen, in fek etabli li sa mwan pase mon krwar, so nou a kapab antre an konversasyon avek son Komite, son Board pou nou regarde ki mannyer zot kapab ede.

Me dan le pase Children’s Fund in deza ede ledikasyon dan konferans ki nou fer for Early Childhood par egzanp ki nou fer nou funds nou ti demann  lasistans kot Children’s Fund e nou ti gannyen.  E mon krwar osi i annan lekol endividyel, Lenstitisyon endividyel ki ti annan proze ki zot in submit e zot in ganny asiste dan lepase so mon krwar byen ki pou lavenir nou ava kapab apros zot e vwar ki mannyer nou kapab ganny lasistans.  Mersi Mr Speaker.

 

MR DEPUTY SPEAKER

Mersi Minis.  Onorab Henrie en klarifikasyon.

 

HON GERVAIS HENRIE

Mersi pou ou larepons Minis.  Mr Speaker zis pou nou kapab apresye pou dir ki Minister vreman pe met en lanfaz lo sa co- curricular activities, Minis in dir nou i annan en larzan, si ou ti kapab donn nou en sif apepre pou nou vwar si vreman zot pe pran sa seryezman.  Mersi.

 

MR DEPUTY SPEAKER

Mersi Onorab Henrie.  Minis.

 

MINISTER JEANNE SIMEON

Mersi Onorab.  Mersi Mr Speaker.  Mon napa li la avek mwan me mon ava fer ou gannyen.  Ok?  Mersi.

 

MR DEPUTY SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker. Bonzour tou Manm e bonzour Minis ek ou delegasyon. Minis eski ou kapab dir nou si Minister Ledikasyon in deza travay ek sa bann lekol Praslin La Digue pou etabli pandan en lannen ki bann – ki kou i koute pou zot partisip dan bann aktivite apard ki bann aktivite co-curricular nou konnen i annan lezot Minister i organiz bann aktivite e ki demann partisipasyon bann lekol.

Par egzanp Minister Lanplwa i kapab vini, Departman Kiltir.  So eski zot in deza travay ek bann lekol pou etabli en kou e prezan vwar atraver sa breakdown ki annan ki bann landrwa spesifik sa bann lezot Departman e Minister i kapab come in e ede avek sa transportasyon oubyen deplasman sa bann etidyan. Eski i annan sa travay ki’n ganny fer?  Mersi Mr Speaker.

 

MR DEPUTY SPEAKER

Mersi Onorab Pillay.  Minis.

 

MINISTER JEANNE SIMEON

Mersi Onorab.  Mersi Mr Speaker.  Mr Speaker nou avoue poudir nou pa’n fer sa legzersis me nou konnen par egzanp pou bann main activities parey nou’n dir National Athletic Championship, Science Fair, ECO School Competition sa tou lekol nou konnen ki kantite zot depanse e ensi ki Praslin ek La Digue zot ekstra pou bato or avyon whatever so nou pa’ n fer en survey detaye pou rod lenformasyon spesifikman pou Praslin avek la Digue.

Akoz nou bezwen fer sa an zeneral pou nou kapab met dan nou update pou demann Bidze, me selman needs for Praslin and La Digue mon pa pe kapab dir zot la poudir nou’n fer me i en keksoz ki nou kapab antreprann.

Petet i ava ed nou pou pli regarde ki mannyer zot bezwen i ete.  Me parey mon’n dir osi ler lezot Minister i organiz aktivite kot nou bann zanfan i ganny envite pou partisipe zot osi zot kontribye dan sa depans ki zanfan i bezwen fer.  Mersi.

 

MR DEPUTY SPEAKER

Mersi Minis.  Onorab Pillay.

 

HON SEBASTIEN PILLAY

Mersi Mr Speaker.  Mr Speaker realistikman nou pe vwar poudir pli gro problenm prensipal, issue prensipal, se pou transport sa bann etidyan pou anmenn zot lo Mahe. Mon krwar sa i main issue.  Eski Minister Ledikasyon dan le fitir avek ou bann lezot partener pa pe sey travay lo etabli en swa en memorandum of understanding, oubyen en Lagreman avek zisteman bann Lakonpannyen Ferry ouswa bato pou vwar ki bann rediksyon oubyen discount zot kapab donn bann lekol, lo pwennvi ede avek transportasyon zanfan mon pa pe koz lo bann gro volim zanfan nou pe koz par egzanp bann zanfan – pou ankouraz zanfan partisip dan bann aktivite.

Par egzanp Public Speaking, Australian Maths Competition, bann aktivite ki akademikman i pou ed sa bann zanfan dan le fitir.  So eski i annan sa travay ki’n ganny fer lo sa kote?  Mersi Mr Speaker.

 

MR DEPUTY SPEAKER

Mersi Onorab Pillay.  Minis.

 

MINISTER JEANNE SIMEON

Mersi Onorab.  Mersi Mr Speaker.  Mr Speaker nou pa’n fer en tel travay pou le moman.  Me nou kapab apros sa bann lakonpannyen e regarde si nou kapab ganny en better deal lo term pasaz, deplasman pou nou bann etidyan dan lavenir.  Mersi.

 

MR DEPUTY SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker.  Bonzour Minis ek ou delegasyon.  Bonzour tou Manm e tou dimoun ki pe ekout nou.  Mr Speaker boner dan Lasanble sa lannen mon ti fer sorti ki inner island in ler pou li son Bidze pa devret ganny allocate dan sa fason ki pe ganny fer ozordi.  E la i annan  en legzanp tipik devan nou akoz ki i  pa devret ganny fer parey i pe fer.

Sa sityasyon Praslin La Digue e Bidze i limite ki mannyer i pe ganny allocate pou Praslin la Digue.  Akoz Praslin i kontribye sibstansyelman.  Akoz parey nou tou nou konnen Praslin i en zil ki annan bokou otelye e kontribisyon i enorm.  E alors mon ti a sizere Minis ki petet ti a bon vwar avek Minis Finans e sa legzersis ki’n ganny propoze par Onorab ki’n koze avan mwan, i tre itil akoz zisteman se koumsa ki ou pou kapab konpran ki kantite depans Praslin avek La Digue pou bezwen.

E ler sa in ganny fer then nou kapab propoz en Bidze ki asire ki tou bann keksoz ki devret ganny fer pou sa de lekol i a kapab ganny materyalize.  Mersi.

 

MR DEPUTY SPEAKER

Mersi. Minis.

 

MINISTER JEANNE SIMEON

Mersi Onorab.  Mersi Mr Speaker.  Mr Speaker Praslin/ La Digue pou nou kapab fer en bilan nou Bidze pou co-curricular activities, Praslin ek La Digue i ganny demande pou anvoy zot bezwen e sa zot fer li tou le lannen ok?

Si mon kapab azoute osi avek evolisyon responsabilite dan kad lotonomi  bann Lenstitisyon, bann Lenstitisyon pou bezwen zer zot prop Bidze.  Zot pou bezwen demann  en Bidze ki zot pou gannyen e answit se zot ki pou zer zot Bidze.

Savedir zot pou zer zot Bidze pou zot Lenstitisyon anba zot prop responsabilite.  So ladan zot ava bezwen met zot bezwen ek konnen ki mannyer prezan pou adres zot bezwen a lenteryer Bidze ki zot pou gannyen parey nou osi as a Ministry nou gannyen e nou zere.  Mersi Mr Speaker.

 

MR DEPUTY SPEAKER

Mersi Minis.  Onorab Gill follow-up.

 

HON CHURCHILL GILL

Mersi Mr Speaker.  Mon konpran tre byen mannyer Minis in eksplike e Minis selman fodre i donn nou en garanti ki ler nou donn sa bann dimoun lotonomi e sa Bidze ki zot, zot krwar zot bezwen pou fer marse then i pa devret ganny restrikte.  Zot devret kapab ganny parey zot demande akoz zot ki konnen kwa ki zot pe al fer.  Mersi.

 

MR DEPUTY SPEAKER

Mersi Onorab Gill.  Mon pa konnen Minis si ou fer en komanter sinon mon ava al lo en lot klarifikasyon.  Onorab Arissol.

 

HON SANDY ARISSOL

Bonzour Mr Speaker.  Bonzour Minis avek ou delegasyon.  Bonzour tou bann envite dan galeri.  Mr Speaker si mon’n ekout kestyon Onorab Sophola byen leokri deor se sipor bann etidyan pou vin Mahe e osi Praslin akoz si mon pa tronpe dan bann interview ki ti ganny fer la pou  Sport Day sa sete bann komanter ki paran menm ansennyan ti fer pou dir pa egzanp sa ki Minis in koz lo la an  relasyon avek  sport day tou lekol i ganny en sipor par deryer zot letan zot pe partisipe eksepte Praslin ek La Digue. E mwan  mon popu siport Praslin ek La Digue lo sa laliny.

Alor mon ti a kontan fer en propozisyon. Eski Minis ansan avek Gouvernman pa kapab koz avek propriyeter Cat Cocos parey zot fer toultan letan i annan bann rally politik, nou vwar Cat Cocos i desann plen avek bann siporter pou ranpli laplenn, mon pe demande la si Minister ledikasyon avek Gouvernman pa kapab koz avek bann operater ferry ki  Cat Cocos ki nou pe koz lo la ; an vi ki  Cat Cocos i al La Digue i al Praslin tou an vi ki Praslin la Digue zot kontribye enormeman parski zot  servi bato pou zot vin Mahe pou ki propriyeter Cat Cocos o mwen en fwa par lannen, en fwa par lannen zot ed  bann zanfan La Digue ek Praslin pou zot osi kapab ganny en bon group siporter pou zot vin siport zot lekip pou Sport Day.

Osi avek bann lezot aktivite ki ganny fer sa  zour swa pou nanryen swa en pri rezonnab ki paran i kapab peye avek korperasyon Minister Ledikasyon e osi avek sipor Gouvernman.  Mersi.

E ek bann konsesyon fuel ki zot osi gannyen pou ed zabitan La Digue avek Praslin parey Onorab Gill in dir parski zot kontribye enormeman zot osi an sa ki konsern Bidze pei.  Mersi bokou Mr Speaker.

 

MR DEPUTY SPEAKER

Minis.

 

MINISTER JEANNE SIMEON

Mersi Onorab.  Mersi Mr Speaker.  Mr Speaker fotespere bann managers sa bann ferry zot pe ekout Lasanble ozordi.  E parey mon’n dir avek Onorab Pillay sa i en keksoz ki nou kapab konsidere, nou kapab apros sa bann managers pou regarde ki kalite sipor zot kapab donn nou.

E mon ti a kontan osi note ki Praslin ek La Digue pou National Schools Athletic Championship zot anmennen siporter pa anmenn  en gran group siporter parey  Pointe Larue ouswa Port Glaud me selman zot annan en group siporter ki vin siport zot pou zot kapab fer byen  pou zot ganny lakoup.  Mersi Mr Speaker.

 

MR DEPUTY SPEAKER

Mersi Minis.  Nou pou al lo trwazyenm kestyon.  Onorab Sophola.

 

HON NOLINE SOPHOLA

Mersi Mr Speaker.  Minis an vi difikilte ou Minister i gannyen, pou plasman ansennyan lo La Digue ek Praslin eski ou kapab dir nou Lasanble ki incentive ou Minister pe fer pou ankouraz e motiv sa bann ansennyan pou reste e travay lo sa 2 zil?  Mersi.

 

MR DEPUTY SPEAKER

Mersi Onorab Sophola.  Minis.

 

MINISTER JEANNE SIMEON

Mersi Onorab.  Mersi Mr Speaker.  Malgre staffing i reste enn nou konsern mazer, Minister i reste angaze pou rod tou bann stratezi pou asire ki nou annan sifizaman ansennyan dan tou nou bann lekol an kontan lekol Praslin ek La Digue.

Kot i konsern incentives pou ankouraz e motiv bann ansennyan sorti Mahe  pou al travay Praslin ek La Digue, Teachers Scheme Of Service 2015 ki’n osi ganny revize an 2017 i fer  sa bann provizyon swivan.

Tou ansennyan ki al travay lo sa de zil a la demann Minister zot ganny akomodasyon gratwit.  An plis ki sa zot ganny sa ki nou apel en island posting allowance konm swivan :-  R400 par mwan pou bann ansennyan ki ganny poste Praslin e R600 par mwan pou ansennyan ki ganny poste lo La digue.

Mr Speaker Minister pe kontinyelman fer tou son posib pou ganny ansennyan ki pa rezidan lo sa2e zil pou travay laba e sa i touzour reste touzour en defi.

Aktyelman i annan 15 ansennyan lo La Digue.  6 expatriates avek 9 sorti Mahe.  Tandis ki Praslin segonder i annan li 26 ansennyan, 12 ki sorti Mahe e 14 expatriates.

Praslin Primer i annan 16.  8 grand Anse avek 8 Baie Ste Anne Primer.  Pou bann ansennyan ki sorti Mahe reste Praslin avek La Digue nou bezwen rod lakaz dan private sector e sa i kout Minister en sonm R758mil par mwan pou akomodasyon e zot allowance i kout nou R16,600 par mwan sa ki nou apel sa island posting.

Par kont Minister i rekonnet ki sa posting allowance i dwatet ganny revwar e konsidere dan kad revizyon Teachers Scheme of Service.  Nou swete osi ki bokou plis Digwa ek Pralinwa i konsider pran lansennyman konman en karyer pou ede minimiz sa depandans lo  expatriate e osi lo ansenyan ki sorti Mahe.  Mersi Mr Speaker.

 

MR DEPUTY SPEAKER

Mersi Minis.  Onorab Sophola.

 

HON NOLINE SOPHOLA

Mersi Minis. Minis i enn mon swe mon ti pe al demann ou pou revise sa island posting bann teachers ki ou fek fini dir.  E osi ki mon pe sey demande, anliny avek sa si Minister ti kapab petet regarde petet pou lannen prosenn si ti kapab donn sa bann teachers en pasaz pou zot vin Mahe enn fwa par mwan.

E mon dezyenm pwen Minis in koz lo lakaz teachers ki Minister i depans bokou.  Minis nou konnen ki La Digue nou ti deza annan sa teachers quarter.  Petet Minis revwar ankor.  Akoz nou pa pe  re aranz sa teachers quarter pou nou  pa depans tou sa larzan lo sa bann lakaz ki nou pe peye ?

E nou pou konnen ki nou tou nou teachers i la i safe akoz malgre parfwa ki nou pe met teachers dan en lakaz petet kot i pe reste i pa sitan byen.  Mersi.

 

MR DEPUTY SPEAKER

Mersi.  Minis.

 

MINISTER JEANNE SIMEON

Mersi Onorab.  Mr Speaker teachers quarters La Digue i la.  Ladan i annan li 12 lakaz.  I annan 4 ki okipe ki nou annan teachers ki pe reste ladan.  Malerezman sa larestan nou’n mont La Digue an Me nou’n al regard leta sa bann lakaz e nou’n already  met li dan plan pou nou kapab fer renovasyon, akoz nou vwar ki sa i ava redwir en pe kou lo akomodasyon pou nou bann teachers ki sorti Mahe ki al La Digue.

So already vizit in ganny fer, assessment in ganny fer lo kwa ki bezwen ganny fer dan sa bann lakaz.  E dan Bidze nou annan en pti pe savings sa lannen ki nou pou servi pou nou kapab fer renovasyon sa bann lakaz.  Akoz la pou le moman nou annan vacancies lo la Digue e nou pou bezwen rod lakaz pou met teachers.  Mersi Mr Speaker.

 

HON NOLINE SOPHOLA

Minis mon’n demann ou en demann lo lapar bann teachers, si Minis i kapab regarde pou donn zot en pasaz enn fwa par mwan pou mont Mahe?  Mersi.

 

MR DEPUTY SPEAKER

Minis.

 

MINISTER JEANNE SIMEON

Mersi Onorab. Mersi Mr Speaker.  Mr Speaker mon pa pe fer okenn commitment devan sa Lasanble.  I en keksoz ki nou a kapab vwar ansanm avek management lekol e ansanm avek headteacher me selman mon pa pe kapab donn en lasirans devan sa Lasanble ki pou sa.

Parey mon’n dir pou revizyon zot allowance ki zot gannyen sa parey mon’n dir the next Teacher Scheme Of Service pe ganny revwar nou pou revize.  Mersi Mr Speaker.

 

MR DEPUTY SPEAKER

Mersi Minis.  Onorab Larue ou ti annan en follow-up lo sanmenm sa pwen?  Ok mon permet ou.

 

HON FLORY LARUE

Bonzour Mr Speaker. Bonzour tou dimoun. Bonzour Minis ek ou delegasyon.  Bonzour tou dimoun dan galeri.  Minis Mr Joel Morgan letan i ti Minis pour Ledikasyon in deza koz lo sa bann lakaz.  Eski ou kapab donn nou en dat pli spesifik, en komitman pli spesifik ki dele letan zot pou  travay lo la pou montre ki Gouvernman i serye pou devlopman ledikasyon lo La Digue.  Mersi.

 

MR DEPUTY SPEAKER

Mersi.  Minis.

 

MINISTER JEANNE SIMEON

Mersi Onorab.  Mr Speaker parey mon’n dir travay in deza konmanse pou fer preparasyon.  Nou’n al vizite, nou anmenn bann dimoun, bann teknik laba ki’n donn nou kwa ki bezwen ganny fer parey nou konnen pou en proze ki enkli 8 lakaz i pou kout nou en bon pti sonm larzan, so nou bezwen go through the tendering process me nou, nou pe met en dele letan ki petet by early 2019 tou sa bann prosedir a’n fini ganny fer petet travay ava’n konmanse e nou a kapab konman antre dan sa bann lakaz.  Mersi Mr Speaker.

 

MR DEPUTY SPEAKER

Mersi Minis. Lo menm pwen Onorab Larue.  Ale.

 

HON FLORY LARUE

Mersi bokou Mr Speaker.  Si Minis ti kapab pli spesifik akoz la i pa spesifik ditou.  Napa en plan kler letan nou pe dir pou konmans tender la apre renovasyon an Zanvye ouswa pou’n fini early Zanvye for the next school yearWhat comitment ki Minister pou fer?

 

MR DEPUTY SPEAKER

Mersi.  Minis ou kapab donn plis leksplikasyon si ou annan.

 

MINISTER JEANNE SIMEON

Mersi Onorab.  Mr Speaker si tou i mars byen akoz tendering process nou napa sa lo la, me si tou keksoz i mars byen nou pe dir ki by Zanvye 2019 nou kapab konmans servi sa bann lakaz.  Mersi Mr Speaker.

 

MR DEPUTY SPEAKER

Mersi Minis.  Onorab Waven William.

 

HON WAVEN WILLIAM

Mersi Mr Speaker.  Bonzour tou dimoun ki a lekout.  Bonzour Minis avek ou lekip.  Minis la fason mon pou demann mon kestyon mon pou demann en leskiz ki ;

Enn mon pa pe vin arogan ouswa ensolan me mon anvi konmsi ki ou ganny mon kestyon kler.  Mon anvi demann ou Minis mon anvi konpran policy ant anploy en ansennyan Seselwa avek pou anploy en ansennyan etranze.  Mon santi poudir ou a krwar i annan en pwa de mezir.

Konmsi pou anploy en ansennyan etranze i fasil pou fer bann negosyasyon e kondisyon, Lagreman i ganny fer vitman.  Be pou sa ansenyan Seselwa mon santi poudir ou a krwar Gouvernman i trenn lipye lo la.

Akoz si mon’n ekout ou byen Minis ou pou dir pou ganny fer pou bann Scheme mon ti a kontan ki ou donn nou bann dele letan ki vreman spesifik.

Ledikasyon nou bann zanfan swa lo Praslin lo la Digue lo Mahe i tre enportan.  E osi lontan ki zot pa ganny bann bezwen ouswa ganny bann ansennyan ki zot bezwen dan sa bann lekol i pou fer ki zot ledikasyon pou an retar e nou pou dan problenm.

Nou bezwen rekonnet ki nou annan problenm.  Mwan mon anvi demann ou Minis akoz ki Gouvernman pa kapab travay lo sa bann Scheme ase vit.  Konmsi ki bann retar akoz tou-le-z-an nou pe koz nou pe re vwar nou pe revwar Scheme isi laba, me solman nou pa vreman ganny bann larepons ouswa bann dele letan konkret.  Mon ti a kontan demann ou Minis finalman se vreman silvouple donn nou bann ansennyan lespwar ki vreman dan en tel dele letan sa bann scheme pou’n fini travay lo la.

Parey ou’n fer ek bann travayer etranze kot vitman bann gro, gro sonm.  La ou’n dir sa posting allowance i R7800, zot pou revwar Minis kan? Akoz si napa incentive nou bann ansennyan, pa pou ganny bann bon ansennyan.  Mersi.

 

MR DEPUTY SPEAKER

Mersi Onorab.  Minis.

 

MINISTER JEANNE SIMEON

Mersi Onorab.  Mersi Mr Speaker.  Mr Speaker, Scheme pou teachers i kouver tou teachers regardless si i en expatriate ouswa i en teacher Seselwa.

Mon’n dir pli boner ki Minister Ledikasyon son manda kle se fer sir ki nou bann lekol i ganny ekipe avek teachers pou ki i kapab annan bon lansennyman e nou ganny bon rezilta.

Lo kote teachers Seselwa Minister Ledikasyon i fer bokou pou nou kapab atire, pou nou kapab formen e pou nou kapab retain teachers.  Sa trwa konponan i paret dan nou Teachers Scheme of Service.  Ki mannyer nou kapab atir teachers, ki mannyer nou form zot, nou train zot e ki mannyer nou retain zot.

Pli tar  dan en lot kestyon mon pou met detrwa stratezi ater ki Minister Ledikasyon in pran pou nou kapab al lo sa lalinyOk?  Pou Teacher Scheme of Service parey mon dir, mon krwar i sanmenm sa Scheme dan Gouvernman ki ganny re vwar pli souvan.  Ok?

Parey mon pe dir dan sa dernyen 5an nou’n already revwar li de fwa e i annan incentive ki nou pe al donn teachers dapre dernyen revizyon Scheme la sa mwan an Zilyet ok?  Bann marketable skills.  Nou pe al donn zot la an Zilyet.

E parey mon pe dir nou bezwen prezan kapab pran en pti gin letan avan ler nou konmans reviz en lot voyaz akoz incentive pe ganny donnen la dapre dernyen revizyon ok? 

So nou pe revwar, nou pou vwar a la demann teachers, a la demann lezot partener ki si posib pou nou regarde ki mannyer nou kapab pli byen siport nou bann teachers – menm ki nou dan ledikasyon nou konnen poudir pa neseserman monetary gains ki laplipar nou bann teachers pe rode.

I annan lezot kondisyon travay ki zot pe rode.  Training ki zot demande nou donnen ok.  Lezot keksoz parey nou dir, Laptop Scheme okSo sa osi i bann lezot incentive ki nou donnen e ler nou donnen nou donn tou nou bann teachers pou asire parey nou pe dir ki lo zot kote prezan  zot donn nou sa servis ki pou kapab ed nou fer monte ledikasyon nou bann zanfan.  Mersi Mr Speaker.

 

MR DEPUTY SPEAKER

Mersi Minis.  Onorab William en klarifikasyon.

 

HON WAVEN WILLIAM

Mersi Mr Speaker.  Mr Speaker mon pe lir sa kestyon N0. 3 e Onorab Sophola pe demann sa pou La Digue e mon kestyon i spesifik lo kote a ler aktyel la avek sityasyon ki nou ladan,  pou ankouraz sa bann teachers, mwan mon ti ava propoz ek Minis ki (1), nou fer keksoz ase vit pou kapab satisfer sa bezwen  La Digue.  Akoz parey mon pe dir se ki Minis ou pa pe donn nou bann dele letan.

Mon pa pe koz lo sa gran Scheme mwan.  Kestyon i  spesifik lo La Digue pou adres sa mankman e i lo incentive pou kapab fer bann teachers reste.  E mon sipliy ou Minis silvouple pou travay lo la.  Mersi.

 

MR DEPUTY SPEAKER

Mersi Onorab.  Minis ou le fer en komanter.  Si non …

 

MINISTER JEANNE SIMEON

Mersi Onorab.  Mersi Mr Speaker.  Parey mon’n dir Onorab nou pou – nou pe al travay lo la.  Mersi.

 

MR DEPUTY SPEAKER

Mersi Minis. Onorab Sandy Arissol.

 

HON SANDY ARISSOL

Mersi Mr Speaker. Bonzour ankor enn fwa.  Mr Speaker letan nou pe koz incentive lo La Digue ki Onorab Sophola in koz lo la mon ti a kontan demann Minis eski i annan en disparite ant bann housing allowance ki ganny donnen pou bann teachers eski i annan en disparite ant son ki ganny donnen par egzanp i annan ki ganny 400mil i annan ki ganny 2500?

Sa i mon premye kestyon disparite ant housing allowance ki bann teachers i gannyen?  Dezyenmman letan mon’n tann Minis koz lo teachers quarters ki annan la Digue ki i annan en pe pa pe servi ek en pe ki pe servi avek pri ki zot pey bann lakaz prive eski tou bann dimoun lo la Digue la ki per servi teachers quarters ki pe reste dan teachers quarters eski zot bann ansennyan?  Mersi.

 

MR DEPUTY SPEAKER

Mersi Onorab Arissol.  Minis.

 

MINISTER JEANNE SIMEON

Mersi Onorab.  Mersi Mr Speaker.  Mr Speaker mon kapab demann Onorab pou repet premye parti son kestyon silvouple, akoz mon pa’n tro gannyen sa allowance ki i pe koz lo la silvouple. Mersi.

 

MR DEPUTY SPEAKER

Onorab Arissol.

 

HON SANDY ARISSOL

Mersi Minis.  Mersi Mr Speaker. Non mon ti pe demann Minis si dan bann housing allowance ki ganny donnen avek bann ansenyan eski i annan  en disparite dan sonm ki zot gannyen?

Par egzanp sandy Arissol i ganny 4mil e Minis Simeon li i ganny 2500.  Eski i annan n disparite oubyen zot tou zot ganny parey an term housing allowance?  Mersi.

 

MR DEPUTY SPEAKER

Mersi.  Minis.

 

MINISTER JEANNE SIMEON

Mersi Onorab.  Mersi Mr Speaker.  Sa allowance ki Onorab Arissol pe koz lo la sa se housing allowance pou returning graduates e i en allowance ki aplikab pou tou returning graduates.  Lakaz ansenyan Teachers Quarters la Digue, tou sa 4 dimoun ki dan sa 4 lakaz ki abitab pou le moman i bann ansennyan.  I annan expatriates osi parmi.  Mersi Mr Speaker.

 

MR SPEAKER

Mersi Minis.  Onorab Wilbert Herminie.

 

HON WILBERT HERMINIE

Mersi Mr Speaker.  Bonzour Minis avek ou delegasyon.  Eski Minis i kapab dir nou konbyen ansennyan ki pa natirelman Digwa ki pe reste lo La Digue?  E konbyen sa pe kout Gouvernman an term bidzeter par lannen  enkli tou zot bann allowance ansanm ?  Mersi.

 

MR DEPUTY SPEAKER

Mersi Onorab.  Minis.

 

MINISTER JEANNE SIMEON

Mersi Onorab.  Mersi Mr Speaker.  Mr Speaker parey mon’n dir taler aktyelman i annan 16 ansennyan lo La Digue.  I annan 6 expatriates avek 9 ki sorti Mahe.  Sonm ki mon’n donnen taler sa R758mil pou housing i kouver Praslin avek La Digue ok ?  Si nou kapab taler nou a donn ou en breakdown pou La Digue tousel – separeman.  Mersi bokou.

 

MR DEPUTY SPEAKER

Ok.  Mersi Minis.  Onorab Phillip Arissol.

 

HON PHILLIP ARISSOL

Mersi Mr Speaker.  Bonzour tou dimoun.  Mr Speaker mon annan en kestyon lo incentive.  Anvi ki Air Seychelles avek Cat Cocos pe ganny fuel concessions, akoz zot pa donn konsesyon bann teachers pou voyaz ant Mahe Praslin ek la Digue o mwen enn fwa – e pou retourn se zot enn fwa o mwen enn fwa par mwan?  Mersi.

 

MR DEPUTY SPEAKER

Mersi Onorab.  Minis.

 

MINISTER JEANNE SIMEON

Mersi Onorab.  Mersi Mr Speaker.  Parey mon’n dir sa mon krwar i zwenn avek sizesyon ki Onorab Pillay ti’n met devan taler konsernan bann managers bann ferries.  Nou kapab parey ki ou pe dir, nou kapab apros sa Lazans me tou i pou depan lo Air Seychelles, ok?

Nou dan Minister nou kapab fer sa premye pa me nou pa pou kapab donn en garanti ki  nou pou ganny pasaz pou teachers obor Air Seychelles tou le mwan or whatever.  Me selman i pa anpes nou apros sa lakonpannyen.  Mersi Mr Speaker.

 

MR DEPUTY SPEAKER

Mersi Minis.  Nou pou al lo katriyenm kestyon e sa pou ganny pose par Onorab John Hoareau Manm pou Beau Vallon.

 

HON JOHN HOAREAU

Mersi Mr Speaker.  Bonzour Mr Speaker. Bonzour Minis ek ou delegasyon.  Bonzour bann envite dan Galeri e bonzour tou dimoun ki pe ekout Lasanble bomaten.

Mr Speaker mon ti a plifere demann mon kestyon an de porsyon.  Mon ti a plifere ou diskresyon, si mon kapab demann premye kestyon avan, apre Minis i reponn apre nou ava al lo lezot kestyon.

 

MR DEPUTY SPEAKER

Ok.

 

HON JOHN HOAREAU

Ok.  Mon premye kestyon i lir koumsa.  Eski Minis pou Ledikasyon i kapab eksplik sa Lasanble akoz ki bann etidyan ki fek fini ‘A Level studies i ganny forse pou al travay dan ban lekol konman teachers an prenon kont ki sa bann etidyan napa konesans travay konman en teacher?  Mersi.

 

MR DEPUTY SPEAKER

Mersi Onorab.  Minis.

 

MINISTER JEANNE SIMEON

Mersi Onorab.  Mersi Mr Speaker.  Mr Speaker mon osi mon annan en demann lo ou diskresyon.  Vi ki sa premye parti kestyon Onorab Hoareau i annan bokou lyen avek kestyon  ki Onorab Woodcock in demande.  I lo menm laliny nou pe regard ‘O level students. So Mr Speaker mon pe demann ou permisyon si mon a kapab reponn sa de morso kestyon konman en sel repons, apre si i annan okenn kestyon siplemanter pou klarifye?

 

MR DEPUTY SPEAKER

Ki mon pou demande, se Onorab John Hoareau si ou kapab lir sa lot 2 kestyon parski i pa long e nou a fer Minis ava pran en sel.

 

HON JOHN HOAREAU

Mersi Mr Speaker.  Mr speaker mon lot kestyon se ki, eski Minis i kapab donn sa Lasanble en kontrandi lo konbyen teachers i manke pou travay dan seksyon primer, segonder, post segonder e professional Centres.

(2)  Ki bann mezir permanan ki pe ganny pran pou remedi sityasyon kalifye dan sa 4 seksyon ledikasyon?  Mersi.

 

MR DEPUTY SPEAKER

Mersi Onorab Hoareau.  Minis ou a kapab reponn prezan.

 

MINISTER JEANNE SIMEON

Mersi Mr Speaker.  Mon kapab – kestyon ki Onorab Hoareau in demande i pe tret ‘A level.  Kestyon ki Onorab Woodcock in demande i osi annan pou fer avek etidyan. Pou Onorab Woodcock …

 

MR DEPUTY SPEAKER

Minis nou ti pe reste lo kestyon Onorab Hoareau.

 

MINISTER JEANNE SIMEON

Bon pou dezyenm parti avek trwazyenm parti kestyon Onorab Hoareau, Mr Speaker en mandan kle Minister Ledikasyon ek Devlopman Resours Imen i pou asir provizyon e o nivo ledikasyon pou tou zanfan Seselwa ki a permet zot devlop tou zot kapasite potansyel pou zot kapab partisip pli aktivman dan devlopman ek aktivite sosyoekonomik nou pei.

Pou arive delivre lo sa manda i enportan alor, ki bann Lenstitisyon edikasyonnel savedir bann lakres, lekol primer, lekol segonder, ek bann sant profesyonnel i ekipe avek sifizaman ansennyan de kalite, pou fasilit laprantisaz ek devlopman holistic nou bann etidyan.

Mr Speaker fodre rekonnet ki pou ekip tou bann Lenstitisyon edikasyonnel avek sifizaman ansenyan kalifye i en defi global.

A sa pwen Mr Speaker, mon ti a kontan donn en kont randi sityasyon mank ansennyan dan nou diferan seksyon ledikasyon ki seksyon primer, seksyon segonder e seksyon post-segonder.

Lo nivo primer an se moman nou annan nou 13 vacancies dan sa bann lekol swivan:-

Anse Aux Pins (1).

Anse Boileau (2),

Anse Etoile (1),

Anse Royale (1),

Baie Lazare (1),

Beau vallon (1),

Bel Au (1),

Au Cap (1),

Grand Anse Mahe (1), e

Ile Perseverance (1).

Lo nivo segonder  kot i konsern sa bann lekol nou annan 31 vacancies e i  konm swivan:- Anse Boileau Segonder (3), Anse Royale Segonder (4) ; Beau Vallon Segonder (2) ;  English River (2), La Digue (2), Mont Fleuri Segonder (1) ; Plaisance (3), Pointe Larue (3), sorry Plaisance (4), Praslin Segonder (5), Ile Perseverance segonder (3) ki donn nou sa total 31.

Pou bann sant profesyonnel nou annan nou 20 vacancies konm swivan :- SIT i annan (4), Teacher Education nou annan (5), Lagrikiltir ek Ortikiltir nou annan (4), Business Studies nou annan (1),  Art and Design  nou napa e Maritim nou annan (6).

Mr Speaker an sa ki konsern bann mezir permanan ki pe ganny pran pou remedye mank ansennyan kalifye dan sa trwa seksyon primer, segonder e bann sant profesyonnel,  mon kapab partaz avek zot 5 stratezi kle ki Minister pe met an plas pou atire, formen e retenir ansennyan avek bi remedye sityasyon ansennyan kalifye dan sa  trwa seksyon.

Premyerman pou premye dan striktir Minister Ledikasyon, en nouvo seksyon Teacher Management And Development in  ganny kree pou enstitisyonaliz sa domenn enportan dan ledikasyon.

Sa seksyon i pou responsab pou travay an etrwat kolaborasyon avek Lenstiti ki ansarz formasyon ansennyan, pou promouvwar sa profesyon lansennyman e asir pli bon kalifikasyon e zesyon nou bann ansenyan.

Dezyenmman plis lanfaz pou ganny mete lo lenplimantasyon sa nouvo progranm Aspiring Teacher Program, ki en linisyativ ki ti ganny lanse par Minister ledikasyon an Oktob 2016.

Sa progranm ki an partenarya avek Lenstiti pou formasyon ansennyan i annan  pou bi ede atir bann etidyan depi lo nivo S3 lo Mahe, Praslin ek La Digue ki annan en laspirasyon, en lentere pou li vin en ansennyan pou zot kapab pli tar swazir lansennyman konman en profesyon.

Ler progranm ti lanse, ti annan  75 etidyan ki ti’n montre lentere dan sa progranm.

Sa nouvo seksyon ki mon fek mansyonnen boner i pou asire ki i annan  en bon lankadreman an plas pou ede soutenir e ranforsi sa Aspiring Teacher Program.

En trwazyenm mezir se pou met an plas en Relief Teacher Program.  Pou le moman Minister pe finaliz bann diferan konponan sa progranm avek bi pou konmans lenplimantasyon trwazyenm trimes sa lannen.

Provizyon pou sa progranm in deza ganny fer dan Bidze 2018.  Pou sa progranm bann dimoun ki pou vin dan lekol i pou ede pou en letan spesifik. Nou pou anploy zot pou ranplas par egzanp bann teachers ki’n al lo maternity leave, akoz deplizanpli i pe ogmante la in ariv 4mwan.  Pou ranplas teachers ki lo long medical leave e pou osi ranplas teachers ki pe swiv bann kour devlopman profesyonnel.

Sa progranm in konmans –( pardon)  En katriyenm mezir se lentrodiksyon en nouvo mode training nou bann teachers nou apel sa en blended learning mode e sa i en stratezi ki nou pe servi pou nou kapab train plis ansennyan a la fwa san ki zot bezwen kit zot lekol pou en long peryod letan.

Mon’n deza mansyonnen taler ok e sa vedir osi i pou annan mwens lenteripsyon dan teaching avek learning.

Sa progranm in konmanse depi Avril 2018 e i annan en group 210 ansennyan ki pe swiv e i pe ganny ofer par Lenstiti Nasyonal pou Ledikasyon ansennyan.

Sa progranm i annan konponan kot bann teachers pou kapab vini pou bann kour fas a fas avek zot bann lecturers e i osi annan en konponan a zistans ki zot bezwen fer e osi en konponan kot nou servi online and offline materials ki pou ed zot.

SITE Lenstitisyon pou Formasyon Bann Ansennyan, i osi an negosyasyon avek Edith Owen University Australie pou formasyon o nivo B.Ed pou ansennyan lo nivo Pti Anfans ek primer.

Konman en lot mezir pou atir plis etidyan pou zwenn SITE sa Lenstiti pou formasyon bann ansennyan depi 2016 allowance pou tou etidyan in revize e in varye depi R1500 ziska R6mil.  Finalman pandan sa dernyen 5an parey mon’n dir taler, Minister Ledikasyon in reviz Teachers Scheme of Service omwen de fwa e dan sa dernyen revizyon nou’n entrodwir en nouvo konponan en nouvo incentive ki nou apel marketable skills, e sa i pou mars etrwatman avek zot formasyon, zot training e avek bi pou retenir bann ansennyan kalifye dan nou sistenm; bann ki nou’n kontribye anver zot devlopman profesyonnel pou zot kapab reste dan nou sistenm.

Sa allowance pou marketable skills i varye ant R1000mil ziska R3mil baze lo nivo kalifikasyon.  E sa parey mon’n dir taler, i pou pran lefe an zilyet sa lannen.

An plis ki sa parey nou konnen lo nivo Gouvernman in osi annan en lentrodiksyon en special pension ki kouver osi nou bann ansennyan konman bann travayer spesyal, pou ede retenir zot bann ki kalifye ki annan bokou leksperyans pou plis lannen posib dan nou sistenm.

Mon sezi sa loportinite Mr Speaker pou mwan lans lapel avek tou ansennyan kalifye avek bokou leksperyans, ki pou en rezon ouswa en lot in nepli dan lansennyman pou rekonsider zot desizyon e zwenn bann ki’n deza retournen pou vin donn en koudmen batir fitir zenerasyon, swa a plen tan swa lo baz  part time.  Mersi Mr Speaker.

 

MR DEPUTY SPEAKER

Mersi Minis. Onorab Hoareau ou ti le demann kestyon adisyonnel?

 

HON JOHN HOAREAU

Wi Mr Speaker. Mersi Mr Speaker.  Mr Speaker mon ti ava kontan konnen si sa bann rekomandasyon ki Minis in donn nou si sa bann rekomandasyon se bann rekomandasyon ki’n ganny pran atraver sa taskforce ki ti ganny kree lannen pase pou re get lo recruitment ek retention of teachers, premyerman.

E dezyenmman mon ti ava kontan konnen ki bann attrition rate pou bann teacher etranze lannen pase e egalman pou teacher Seselwa.

E osi mon ti a kontan konnen si sa mankman  teacher, sa 13 vacancies parey pe dir dan primary e 31 dan secondary si sa i pe kree en lenpak lo workload sa bann leres teachers ki reste e si i  annan okenn reminerasyon ki ganny peye pou extra workload ki bann lezot teachers pe pran?  Mersi.

 

MR DEPUTY SPEAKER

Mersi.  Minis.

 

MINISTER JEANNE SIMEON

Mersi Onorab.  Mersi Mr Speaker.  Mr Speaker i annan serten rekomandasyon ki mon’n nonmen la ki sorti lo taskforce e sa i plizoumwen bann training, bann professional development.

Lezot i linisyativ ki pe ganny entrodwir par Minister Ledikasyon li menm.  Pou attrition rate nou ava  fer ou gannyen akoz mon napa li la avek mwan la pou le moman.  E pou siport ki mannyer nou kapab soulaz lezot ansennyan ki la, an vi sa mankman ansennyan dan nou sistenm nou annan lezot stratezi par egzanp nou pe anploy part timers pou le moman pou kapab ede.

E parey nou’n osi fer resorti avek nou relief teacher la ki nou pe al konmanse byento, sa osi i pou kapab ede.

E pou lo kote allowances pou ansennyan ki fer en pe plis, parey ou dir sa nou kapab get li de kote.  Si already i annan son full load ki i pe fer letan pou korize, pou prepare eksetera, me  selman i annan ki pare pou ede e sa nou annan, nou annan sa ki nou apel sa en responsibility allowance ki nou  donn sa ban ki pare pou ede kot nou bezwen.

Me selman osi fodre fer remarke ki parey ou pe dir sa i pa en keksoz ki nou  kapab fer li a lonterm akoz en teacher osi i bezwen annan son letan pou li kapab prepar byen, mark byen se sa ki nou pe rod lezot mwayen  parey relief teaching, part time teachers pou kapab ede dan lekol.  Mersi Mr Speaker.

 

MR DEPUTY SPEAKER

Mers Minis. Nou annan ankor enn de klarifikasyon avek kestyon lo sa menm sa pwen e answit i reste nou 2 kestyon be i 10.38 mon a propoz ki nou adjourn ziska 11er e nou a repran larestan kestyon 11er.

 

(BREAK)

 

MR DEPUTY SPEAKER

Bon bonzour tou bann Manm Onorab.  I paret mwan ki nou pa ankor ganny quorum, mon pour donn 2 minit pour esper lezot Manm i arive e pour nou deside si nou annan ase dimoun pour nou kontinyen.

Zis pour lenformasyon bann manm piblik, quorum se normalman en dimoun par lao lanmwatye Manm Lasanble ki 33.

Alor nou bezwen annan 17 dimoun enkli Speaker pour nou kapab kontiny nou travay.  Lasal pe ranpli ase vit, mank nou zis en dimoun, oubyen nou annan 17.  Ok nou pour kontinyen nou travay, nou pour kontiny nou travay lo kestyon No.4 pour Minis pour Ledikasyon, Devlopman Resours Imen, Madanm Jeanne Simeon, kestyon No.4 ti par Onorab Hoareau, Onorab Hoareau Minis ti’n fek reponn kestyon, ou ti annan en klarifikasyon.

 

HON JOHN HOAREAU

Wi Mr Speaker, mon ti a kontan konnen si Minis i annan plan pour reviz sa lapey ki zot pe donn bann supply teachers ki antre on part time, sa R95 par erdtan, si sa i kapab ganny met anliny avek en pti pe at par avek larzan ki bann teachers i gannyen as to tuition fee pour kot ALDEC?  Mersi.

 

MR DEPUTY SPEAKER

Mersi Onorab.  Minis.

 

MINISTER JEANNE SIMEON

Mersi Mr Speaker.  Parey mon’n dir, nou pe kontinyelman fer sa ki nou kapab pour nou kapab donn sipor nou bann dimoun ki vin ed nou lo nivo part time dan ledikasyon.

E si i annan en bezwen pour nou revwar an term allowance, budget permitting nou ava kapab konsidere, fodre tenir kont osi poudir Minister Ledikasyon i osi pe operate within a budget.  Mersi.

 

MR DEPUTY SPEAKER

Mersi Minis.  Mon annan Onorab Norbert Loizeau, ou ti annan en kestyon.

 

HON NORBERT LOIZEAU

Mersi Mr Speaker, bonzour Minis ek ou delegasyon, bonzour tou dimoun. Mr Speaker mon anvi demann Minis, mon anvi fer en pti komanter, Minis vi ki mwan en Manm Konsil lekol Bel Eau byensir nou okouran ki i annan en mankman ansennyan kalifye, e vi ki i annan bokou bann unqualified teachers ki pe ganny anvoye dan bann lekol ki zot pa’n pas dan okenn bann Lenstitisyon kot teaching i konsernen, eski Minis i kapab dir nou lekel ki i annan manda pour train sa bann unqualified teachers, si SITE ouswa sa Subject Cordinator kot lekol?  Akoz souvandfwa mon vwar sa Subject Cordinator ki pe zwe sa rol koman sa dimoun pour ankadre sa bann unqualified teachers.

        E osi Minis mon anvi demann ou si zot annan en mankman ansennyan ledikasyon fizik dan bann lekol?  Apre mon annan en lot kestyon ki a swiv Mr Speaker apre son repons.

 

MR DEPUTY SPEAKER

Mersi Onorab Loizeau. Minis.

 

MINISTER JEANNE SIMEON

Mersi Onorab pour ou kestyon, mersi Mr Speaker, Mr Speaker nou ava pran PE Teachers vacancy, nou napa dan primer, nou annan en vacancy lekol Anse Royale Segonder.

Kot i konsern training bann unqualified ouswa bann supply teachers ki nou annan dan lekol, taler mon’n mansyonnen poudir nou annan en plan dan Minister Ledikasyon pour devlopman profesyonnel nou bann ansennyan, e sa i enkli bann unqualified teachers ki pe swiv sa training ki nou pe fer pour le moman, e sa i ongoing anmezir ki nou ganny lezot dan sistenm nou ofer sa training.

Ou’n dir poudir ou’n remarke ki kot lekol Bel Eau i annan en mankman teachers kalifye parey ou pe dir, wi parey mon’n dir taler nou annan mankman teachers kalifye dan tou bann lekol, e se sa ki’n nou’n met an plas sa bann stratezi ki mon’n nonmen boner pour nou kapab atir teachers, train zot e osi retain zot dan lekol.  Sa i pa zis kot lekol Bel Eau i en problenm ki nou annan nationwide.

Pour training kot, ki ou pe dir lo nivo lekol, sa ki mon okouran en subject coordinate dan en lekol primer i leadership position, ok?  I en school, i osi parmi bann management koman en leader dan sa lekol e li i annan en responsabilite pour li donn sipor, pour li donn sipor bann teachers ki tonm dan son seksyon ouswa dan son group size ki li i responsab.

E sa training i pa en training formel ki pe donnen lo lekol, i en training on the job pour kapab asiste sa teacher pour li kapab plan son leson byen, montre li bann teknik pour delivre leson, donn li bann pti skills, bann pti teknik pour classroom management pour li kapab gard disiplin dan son laklas, sa i bann keksoz ki sa studies cordinator i fer lo nivo lekol, ok.

Me training formel pour nou bann unqualified teachers, sa se responsabilite Lenstiti pour formasyon ansennyen ki nou apel SITE e ki mon’n mansyonnen taler i travay tre pros avek Minister Ledikasyon, i form parti Minister Ledikasyon en autres e li i, sa manda li i pour train teachers, tou teachers, nou train sa ki napa kalifikasyon ditou e osi i train sa bann pour ogmant zot kalifikasyon, anmenn zot lo en lot nivo, sorti Certificate pour al Advanced Certificate, Diploma, Advanced Diploma e nou vwar la i pe fer menm Masters in Education Leaderships.  So sa i son manda.  Mersi Mr Speaker.

 

MR DEPUTY SPEAKER

Mersi Minis, klarifikasyon Onorab Loizeau.

 

HON NORBERT LOIZEAU

Mr Speaker mon annan 2 lezot pti kestyon pour Minis, Minis vi ki ou’n mansyonn sa Master Degree ki serten teachers pe fer, mon anvi demann ou ki kriter ki ganny servi pour en dimoun kalifye pour fer sa Masters Degree akoz i annan serten dimoun ki i annan Bachelor Degree ki’n apply me selman zot laplikasyon pa’n ganny aprouve.

Mon dezyenm kestyon i konsern ledikasyon fizik, vi ki dan lepase bokou dimoun ki ti ansenny ledikasyon fizik ti Seselwa, bann Seselwa ki’n partisip dan sport plis ou mwen, me ki nou’n vwar akoz ki Minis zot in vwar li neseser pour recruit en ansennyan ledikasyon fizik etranze, kan i annan Seselwa ki ti’n apply me selman zot pa’n ganny sa sans pour zot kapab fer li.  Mersi Mr Speaker.

 

MINISTER JEANNE SIMEON

Mersi Onorab pour ou kestyon.  Mersi Mr Speaker. Mr Speaker kot i konsern ansennyan pour ledikasyon fizik ki ou pe dir nou poudir i ti’n apply i pa’n ganny apwente, sa pour le moman la mon pa okouran, me nou a, nou ava kapab rod en pe plis lenformasyon lo la, me mon napa sa lenformasyon avek mwan la pour le moman.

Pour MBA, MBA in  Education Leadership nou annan nou 2 cohort, ok?  I annan enn ki’n deza komanse, e i annan enn ki pour al fer apre, savedir si sa dimoun ki ou pe dir nou i pa’n ganny sans lo sa premye cohort i pour ganny sans osi lo sa dezyenm cohort.

E pour ou kapab fer sa, parey ou pe dir nou bezwen en First Degree me i osi annan konsiderasyon ki ganny donnen pour bann dimoun ki i annan en Advanced Diploma i pa neseserman ki ou bezwen annan en First Degree, sa i en kondisyon ki nou’n negosye avek sa Lenstitisyon ki nou pe travay avek an partnership Maurice ok?

        E pour osi, pour ou kapab antre lo sa progranm ou pour bezwen, nou pour bezwen vwar osi poudir ou annan sa potansyel pour ou kapab lead, leadership ok?  Nou pa pe pran okenn dimoun just for the sake of donn sa dimoun en Masters in Education Leadership, akoz nou bezwen sa bann dimoun ki nou train pour al take up positions dan lekol koman bann School Leaders ok?

Savedir si ou ou’n deside pour antre ladan ou bezwen mazinen poudir a lafen ou pour kapab travay dan lekol koman en School Leader swa en Deputy Head, swa en sa – ok?

E osi priyorite ler pour nou swazir sa bann kandida nou plito vwar bann dimoun, sa premye cohort i bann dimoun ki lo middle management ok?  

Parey bann Subject Leaders, Subject Cordinators, Deputy Head Teachers apre nou ava regarde o frir a mezir si nou kapab include lezot, me selman priyorite i pour sa bann ki’n already pe travay dan en leadership position kantmenm i at middle management, me ki pe montre nou sa potansyel ki i annan pour li vin en School Leader demen.  Mersi Mr Speaker.

 

MR DEPUTY SPEAKER

Mon a permet ou en dernyen klarifikasyon Onorab Loizeau.

 

HON NORBERT LOIZEAU

I annan en bout kestyon ki mon pa’n ganny larepons sa, an sa ledikasyon fizik etranze ki dapre konpran i kot lekol Mont Fleuri pe ansennyen.

 

MR DEPUTY SPEAKER

Minis bann ansenyan ledikasyon fizik.

 

MINISTER JEANNE SIMEON

Mersi Onorab, mersi Mr Speaker. Mr Speaker parey mon’n dir taler, mankman ansennyan i en problenm ki nou pe fer fas avek dan Minister Ledikasyon, sa i pa, i pa’n fek devlope la, i annan en ta letan pase depi ler nou ti pe komans rod bann premye group teachers etranze pour vin travay dan nou lekol akoz nou pa pe kapab ganny teachers Seselwa.

Nou vwar la i annan en a range of subjects kot nou’n bezwen rod bann teachers etranze dan en range of countries pour vin Sesel pour ed nou kapab delivre nou manda, ki met ansennyan kalifye dan lekol pour ed laprantisaz e pour nou kapab ganny rezilta demen.

Dan kad kot nou napa sa teacher ok, lokal nou bezwen pran etranze.  Me parey mon’n dir taler sa dimoun spesifik ki ou pe nonm lo la mon pa, napa lenformasyon, mon pa okouran, me mon ava kapab rode, mon ava donn ou plis lenformasyon lo la ok?  Mersi Mr Speaker.

 

MR DEPUTY SPEAKER

Onorab Loizeau mon’n permet ou 3 kestyon klarifikasyon, ou oule en klarifikasyon spesifikman lo physical education? 

 

HON NORBERT LOIZEAU

(Mic Off)

Yes.

 

MR DEPUTY SPEAKER

Minis ou annan lenformasyon spesifik lo ledikasyon fizik?

 

HON NORBERT LOIZEAU

Akoz nou annan Seselwa ki kapab fer li, ki kapab montre ledikasyon fizik dan lekol, akoz ki en etranze ki bezwen?  Mon konpran ki lot size matematik answit, swit ok mon konpran, me ledikasyon fizik, nou annan dimoun ki kapab ki’n apply.  Sa i mon kestyon.

 

MR DEPUTY SPEAKER

Minis eski ou annan en larepons pour ledikasyon fizik an partikilye?

 

MINISTER JEANNE SIMEON

Mersi Onorab, mersi Mr Speaker.  Mon’n aprann la pandan plizyer Mwan Minister Ledikasyon pe advertise pour PE Teachers e nou pa’n ganny okenn aplikan ki’n apply pour sa bann post, ok i annan lezot post osi enkli PE ki nou pa’n ganny aplikan.

I annan mon okouran poudir i annan en ansennyan etranze ki pe teach dan en lekol segonder, wi nou’n bezwen pran rekour avek teachers etranze, parey pour tou lezot size ler nou pa pe kapab ganny nou teachers Seselwa, nou ti a prefere annan teachers Seselwa e fodre nou konnen osi pour nou bann teachers PE pour le moman dan lekol i annan en kantite zot laz in monte, i annan ki pe retire ok?

E mon konn spesifikman enn ki nou’n bezwen menm anploy li beyond retirement age pour li kontinyen dan lansennyman.

So parey ou pe dir nou pe fer tou nou posib pour nou kapab ganny, nou ti a prefere ganny Seselwa, me selman ler nou pa pe kapab gannyen ki nou kapab fer?

Nou lekol i bezwen ansennyan, nou bezwen donn ledikasyon nou bann zanfan, so nou bezwen rod en lot mwayen ki petet i pa, pour serten dimoun pa tro the best, wi nou konnen me selman i pour le moman se sa ki nou kapab fer, anmezir ki nou kapab recruit plis teachers, atir teachers parey mon’n dir taler dan sa progranm ki nou pe fer komans nurture zot depi ler zot ankor dan lekol segonder, siport zot, anmenn zot ki petet demen zot a deside pour pran lansennyman.

I pa fasil me selman Minister Ledikasyon pe fer tou sa ki i posib pour nou kapab ganny nou prop dimoun, nou prop Seselwa pour ansennyen dan nou bann lekol.  Mersi Mr Speaker.

 

MR DEPUTY SPEAKER

Mersi, mersi Minis. Onorab Valmont ou ti’n demann en kestyon klarifikasyon pli boner.

 

HON JUDE VALMONT

Yes Mr Speaker bonzour e mersi, bonzour Speaker, bonzour Minis e delegasyon e tou Koleg Onorab e tou ki a lekout.

Mr Speaker sa, Minis in mansyonn revizyon Scheme saler 3 fwa pour bann teachers e in osi nonm incentives, alor mon premye kestyon Mr Speaker allow mwan 2 pti kestyon, premye kestyon i eski sa i enkli osi bann general assistant, akoz ler nou pe koze dan diskisyon bann dimoun ki pe enterakte ek nou lo telefonn par mesaz, general assistant zot dir zot, zot pa’n ganny touse ladan, mon ti a voudre konnen eski sa i vre, kwa ki pe ganny fer ?

E dezyenm pti kestyon, se lo kote graduates bann teachers en, graduate housing allowance sa i zis en pti mesaz mon’n gannyen pour pas avek Minis e aparaman zot, DPA ti’n anvoy en dokiman ti’n sirkiler ti’n dir zot R4, 000 pa pour ganny touse, sa koman incentives, pa pour ganny touse, tax pa pour ganny tire lo la, me aparaman zot annan sa issue e zot pa tro asire ki i neseser pour ganny fer.

Alor mon ti a voudre Minis i get en pti kou ladan as well.  Mersi.

 

MR DEPUTY SPEAKER

Mersi Onorab.  Minis.

 

MINISTER JEANNE SIMEON

Mersi Onorab, mersi Mr Speaker. Mr Speaker pour general assistants dan nou bann lekol GAs zot Scheme of Service in fek fer en revizyon, zot in ganny en nouvo Scheme, ti napa avan zot in, nou’n etablir en nouvo Scheme pour zot an Oktob 2017 ok?

Pour Graduate Housing, sa i ganny zere par Minister Finans ok, pour sa sonm ki i donnen pour R4, 000 allowance for Graduates Housing e…

 

MR DEPUTY SPEAKER

Mersi, kontinyen Minis si ou oule…

 

MINISTER JEANNE SIMEON

Byensir lenformasyon adisyonnel avan sa i ti ganny zere par DPA e prezan avek nouvo fason fer dan kot Minister Finans sa i pour ganny zere par Minister li menm e sa i pour ganny azoute avek zot saler koman en allowance, for the salary and in this case it will be taxable ok?  Mersi.

 

MR DEPUTY SPEAKER

Mersi Minis.  Klarifikasyon Onorab Valmont.

 

HON JUDE VALMONT

Yes mersi, mersi pour ou bann repons Minis, zis konsernan sa kestyon N0. 1, si alor Minis in dir depi Oktob 2017 sa Scheme of Saler in ganny revize, petet mon ti a sizere ki zot get en pti kou sa bann general assistants akoz i annan zot dir mwan aparaman zot pa konnen, me zot sipoze konnen akoz si in ganny get ladan.  Mersi.

 

MR DEPUTY SPEAKER

Mersi.  Minis.

 

MINISTER JEANNE SIMEON

Mersi Onorab, mersi Mr Speaker, Mr Speaker aparaman bann GA’s General Assistants sa lekol, depi ler sa nouvo Scheme in an loperasyon zot in komans ganny zot allowance an Novanm 2017 e sa, en lot group travayer lekol ki zot osi in ganny Scheme se bann wardens, e zot osi sa Scheme i an operasyon depi 2017 e zot in deza komans ganny zot allowances dan sa Scheme.  Mersi.

 

MR DEPUTY SPEAKER

Mersi Minis.  Onorab Noline Sophola.

 

HON NOLINE SOPHOLA

Mersi Mr Speaker, Minis mon ti a voudre si ou ti kapab eksplik en pti pe lo sa Relief Teachers Program ki kalifikasyon ki bann aplikan i bezwen?

E dezyenmman konsernan mank ansennyan, mon krwar petet nou bezwen servi sa bann ansennyan ki nou met dan lekol to the maximum, akoz ki pe arive?

Nou annan ansennyan ki nou ganny plase dan lekol, zot ganny zot load, i manke pour donn zot, zot total ki zot bezwen teach, prezan sa bann ansennyan i ganny en size ki zot napa ni Nosyon ladan zot menm, me selman zot vwar zot, zot pe teach, eski sa nou pe ed nou zanfan, oubyen nou pe retard progre nou zanfan?

E nou lot ankor, se ki sa ki mon pe pran en pwen spesifik pour La Digue, bann teachers ki nou transfer lo La Digue silvouple, mon pe demann Minister pour petet get profil sa bann ansennyan ki nou anvoy lo La Digue, akoz dan lepase in arive ki bann dimoun ki nou anvoy lo La Digue sirtou sa bann dimoun ki pe rankontre serten problenm lo Mahe, zot anvoy kot nou.  E la ler zot vin kot nou olye ki zot pe ed nou, management lekol i bezwen deal ek problenm sosyal sa bann ansennyan, in arive dan lepase e aktyelman i pe arive, mon pe demann Minis pour revwar sa silvouple.  Mersi.

 

MR DEPUTY SPEAKER

Mersi. Minis ou oule fer en komanter?

 

MINISTER JEANNE SIMEON

Mersi Onorab, mersi Mr Speaker. Mr Speaker konsernan load teachers, ler teachers’ napa ase pour ranpli son load parey ou pe dir, me mon pa tro konpran akoz teachers dan lekol i annan en load ki nou donn li, ok tan peryod 40 minit pour teach par semenn, me si parkont sa load ki in gannyen i pa arive sa nonm ki nou gannyen, nou fer li e al ede dan en lot seksyon lekol kot i kapab ansennyen.

E sa i pa Minister Ledikasyon ki donn sa direktiv, sa i management lekol ki diskit avek sa teachers ki vwar forte sa teachers son pwen feb, son pwen for e kote kot i kapab donn plis rannman dan son lekol pour li kapab ranpli son nonm peryod ki i gannyen, sa i pa ganny en desizyon ki ganny pran at Minister of Education Headquarters ok ?

Se sa ki nou annan nou bann Leaders dan lekol, se sa ki nou pe donn zot ase training pour zot kapab pran sa bann desizyon koumsa e fer zot lekol marse.

Kot i konsern profil ansenyan pour al ansenny dan lekol, ler nou pe rekrit ansennyan pour vin teach nou get zot kalifikasyon, nou get zot motivasyon, nou get si zot kapab ansennyen, me parfwa nou pa konnen zot background parey ou pe dir problenm sosyal kekfwa sa i pa ankor manifeste, ouswa i, nou pa pe konnen sa lot kote ki i annan petet sa anmezir ki travay dan lekol, si i en problenm sosyal i devlope, ankor en fwa son management lekol i bezwen donn li sa sipor, fer en pti pe counseling, vwar li en pti gin, gete ki mannyer zot kapab ed li pour rezourd problenm si i plis i deborde lo kote lekol, zot kapab transfer, anmenn sa bann problenm lo nivo santral kot Minister Ledikasyon ki nou, nou ava regarde nou osi ki mannyer nou kapab ede ok? 

Me selman nou letan nou anvoy teachers La Digue nou pe mazin bezwen lansennyman La Digue, nou pe mazin nou bann zanfan La Digue ki bezwen ganny en ledikasyon, e si sa teacher i meet sa bann kriter ki mon’n donn ou, then nou poste li La Digue parey nou ti poste li dan nenport ki lekol lo Mahe dapre bezwen lekol.  Mersi Mr Speaker.

 

MR DEPUTY SPEAKER

Onorab Sophola, vitman en klarifikasyon.

 

HON NOLINE SOPHOLA

Mersi.  Mersi Mr Speaker, Minis i vre avek respe ki mon annan pour tou dimoun, me selman souvandfwa in arive ki kot Minister Ledikasyon zot konnen problenm sa bann dimoun, zot anvoy La Digue, sa mon pour dir ou mon leksperyans mon’n dan lekol as management mon konnen e la i pe ariv ankor kot Minister petet ou, ou pa’n okouran me selman bann dimoun i konnen kisisa ki zot anvoy kot nou, e prezan lo sa laspe mon pour demande eski ler nou pe dir nou donn lekol lotonomi, nou pe donn lekol son full lotonomi ki si ou pe donn li en teacher ki i santi apre ki in fer son lobzervasyon, i dir ou mon pa pe pran sa teacher dan mon lekol, zot pour annan drwa fer li akoz zot annan zot lotonomi, e apre osi nou pe, ler nou pe koz lo teacher nou teacher i travay ek zanfan, ek zanfan osi i vin en problenm kot nou pour bezwen petet dan sa lotonomi kapab servi pour nou fer sa bann keksoz.  Mersi.

 

MR DEPUTY SPEAKER

Mersi Onorab Sophola. Minis mon pa konnen si ou oule fer en komanter sinon mon pour al direk lo lot dimoun lo nou lalis, Onorab.

 

MINISTER JEANNE SIMEON

Mersi Mr Speaker, mersi Onorab.  Mon a zis fer en pti komanter ok, parey toultan nou konnen si nou vwar enn ki i annan problenm nou sey kategoriz tou dimoun koman problenm, mwan mon’n dan ledikasyon en bon letan, 40an parla e nou ti pe donn teachers La Digue, i annan teachers ki’n al travay La Digue tre bon teachers en, very good teachers ki i annan ki mon krwar in fer 20an dan lekol La Digue e i ankor pe travay dan lekol La Digue e i ganny apresye par management lekol La Digue ok?

Me selman parey nou konnen dan lasosyete si enn, kek enn pa pe fer byen nou tant pour met li dan en sel basket, ok annou be objective, annou gete sa ki bon annou dir e annou donn lankourazman teachers osi ok, bann teachers sorti Mahe ki pe travay La Digue mon felisit zot akoz zot in fer en serten sakrifis ok, pour zot al travay La Digue nou’n ankouraz zot e zot in reponn a nou lapel, petet i ava pli byen ki si i annan okenn ka ki spesifik parey ou pe dir, nou ti a kontan ki sa Headteacher i anvoy en rapor kot Minister Ledikasyon parey mon dir si in nepli kapab li deal avek lo nivo son lekol anvoy kot nou santral nou ava regarde ki nou pe kapab fer.

En lot pwen ki ou’n mansyonnen taler ki pe dir dan kad lotonomi lekol, si lekol i vwar ki en teacher i pa pe performen si i kapab dir i pa oule sa teacher ankor en fwa si i pa pe performen i annan en kantite keksoz ankor ki nou bezwen vwar ki sipor in gannyen avan ler ki nou pour, ki pour rann Minister Ledikasyon sa teacher nou bezwen vwar lo nivo lekol ki sipor in donn sa teacher eski sa teacher in receptive lo sa sipor ki i pe gannyen e ki mannyer i pe progrese, la ki nou a pran en desizyon, nou pa zis pour hire and fire lo nivo lekol.  Mersi bokou.

 

MR DEPUTY SPEAKER

Nou pour bezwen bouze Onorab…

 

HON NOLINE SOPHOLA

Mr Speaker zis en klarifikasyon silvouple, Minis tou ansennyan ki sorti Mahe i koumsa, nou annan ansennyan ki La Digue i annan sote 20an ekek ane ki pe teach, me sa ki mon pe fer resorti i annan la aktyelman ki’n arive, mon’n dir dan lepase in annan ou konnen, mon konnen, nou tou dimoun i konnen, e la osi i annan me selman mon pa kontan ki ou pe dir konmsi dan en fason mon pe dir tou ansennyan ki vini, ansennyan ki sorti Mahe i vini tre bon.

Nou tou nou imen nou bezwen donn zot en sans me selman parey mon’n dir souvandfwa se ler en dimoun i vini ou koz ek li i dir ou, mon ti annan tel problenm mon’n demande pour mwan vin La Digue, mon ti annan tel problenm mon’n demande pour mwan vin La Digue.  Mersi Mr Speaker.

 

MR DEPUTY SPEAKER

Ok, pwen in ganny fer mersi.  Mon pour bouz lo prosen Manm, Onorab Phillip Arrisol.

 

HON PHILLIP ARISSOL

Mersi Mr Speaker, Mr Speaker eski Minis i kapab dir sa Lasanble ki staz son Minister in arive avek Scheme of Service pour bann ansennyan post segonder e sant profesyonnel, ki diferans ant sa bann Scheme e osi ki diferans ant saler bann ansennyan Seselwa ek bann ansennyan expatriate?  Mersi.

 

MR DEPUTY SPEAKER

Minis.

 

MINISTER JEANNE SIMEON

Mersi Onorab, mersi Mr Speaker.  Mr Speaker Scheme pour bann ansennyan ki dan bann professional centres nou’n fini travay lo la i pe ganny finalize ok, an kolaborasyon avek DPA e pour nou kapab fer li fonksyonnel.  Mersi Mr Speaker.

 

MR DEPUTY SPEAKER

Mersi Onorab Arrisol en pwen klarifikasyon.

 

HON PHILLIP ARISSOL

Mr Speaker diferans ant sa bann Scheme, e osi ki diferans ant saler bann ansennyan Seselwa e saler bann expatriate post segonder ek sant profesyonnel?  Mersi.

 

MR DEPUTY SPEAKER

Mersi.  Minis.

 

MINISTER JEANNE SIMEON

Bon mersi Onorab, mersi Mr Speaker.  Mr Speaker dan sa Scheme tou nou bann ansennyan Seselwa e osi bann expatriate zot komans lo menm level baze lo zot kalifikasyon.  Mersi Mr Speaker, nou napa detay lo zot bann levels ki zot ale, me selman pour letan nou rekrit en teacher i komans lo en level baze lo son kalifikasyon si i annan en 1st Degree, si i annan en Masters, si i annan en Advanced Diploma, son lapey i baze lo sa kalifikasyon.  Mersi.

 

MR DEPUTY SPEAKER

Mersi Minis, petet ou kapab fourni sa bann detay en pe pli tar pour benefis bann Manm e sirtou Onorab Arrisol.  Nou kontinyen avek Onorab Waven William.

 

HON WAVEN WILLIAM

Mersi Mr Speaker, Mr Speaker mon kestyon pour Minis i konm swivan, Minis dan, letan ou pe koz lo sa relief teachers program la, mon ti a kontan si ou donn nou en pti pe detay lo sa allowance ki baze ant 1,500 a R6, 000 konmsi kwa ki kalifye ou pour ganny 1, 500 e ganny upgrade ziska R6, 000?

Mon dezyenm kestyon i en pti pe en konsern, Minis lefe ki nou pe koz bann PE teachers, mon pa ti ava swete ki nou anploy bann teachers etranze pour vin fer PE dan nou lekol, akoz mwan mon ti a kontan annan, petet mon a fer en sizesyon; lefe ki nou annan bokou bann zenn ozordi i annan serten ki napa travay me ki kapab aprann, mon pe demande si zot pa ti kapab petet konsider annan understudy sa bann vye PE teachers ki pe al kite annan en relasyon travay avek NSC ki nou kapab garanti ki (1)

nou pa zanmen les bann ansennyan etranze vini pour vin fer PE dan lekol, Minis mon ti a kontan ou konsider sa akoz pour mwan mon krwar poudir nou annan dimoun Sesel ki kapab fer sa bann travay.  Mersi.

 

MR DEPUTY SPEAKER

Mersi Onorab.  Minis mon ti a kontan petet nou pa al tro lontan lo la parski Onorab Loizeau in deza demann sa kestyon ou’n reponn, me selman pour ou benefis Onorab William e lezot mon permet ou klarifye.

 

MINISTER JEANNE SIMEON

Mersi Onorab, mersi Mr Speaker.  Mr Speaker parey mon’n dir taler Minister Ledikasyon ti a swete annan tou son teacher Seselwa dan lekol depi dan primer, dan lakres ziska dan sant profesyonnel.

Me malerezman parey mon’n dir taler nou annan en mank ansennyan lo nivo Nasyonal e nou bezwen pran rekour avek teachers expatriate, nou pa ti a voudre, e dan nou gran plan se ki nou kapab ranplas sa bann teachers o frir a mezir avek nou prop teacher ki nou pe fer tou sa bann, pe pran tou sa bann mezir ki mon’n nonmen avan pour nou kapab ganny plis teacher Seselwa.

Mon’n dir taler poudir dan PE nou’n menm kapab negosye pour nou kapab kontinyen anploy bann teacher ki ti pe retire, sa nou’n fer li nou annan legzanp lo la ki zot in laz retire me selman nou santi ankor fwa nou konnen poudir ler ou retire pour ou kapab ganny re anploye ou bezwen fer medical test espesyalman pour PE teachers ou bezwen medically fit.

So sa bann ka ki mon’n konnen zot in pas zot medical test e nou’n kapab kontinyen anploy zot, me nou pa pour kapab kontinyen anploy zot á jamais, e nou pa pe gannyen parey mon’n dir taler nou’n advertise nou pa gannyen ok ? so nou ti a voudre petet osi lo nivo kominote si nou bann MNA’s zot osi fer en pti pe travay promosyon pour nou lo nivo sa, ankouraz dimoun ki ou konnen i kapab fer sa travay, dir li apros Minister Ledikasyon nou pe rode, nou bezwen.  Mersi Onorab.  Mersi Mr Speaker.

 

MR DEPUTY SPEAKER

Mersi Minis.  Nou prosen Onorab Audrey Vidot.

 

HON AUDREY VIDOT

Mersi Mr Speaker, zisteman Mr Speaker mon pour al lo sa bout note ki Minis in fer, fek fer resorti annefe letan ou ava ale ozordi mon annan 2 non pour mwan soumet ek ou akoz mon konpran, mon pa konnen petet ki channel sa 2 dimoun in pase, zot enterese pour vin PE teachers, zot 2 dimoun ki’n aktiv dan sports e zot ganny look up par bann zenn, so ti ava byen petet mon pa konnen parey mon dir ki channel zot in pase pour zot laplikasyon, mon a donn ou sa 2 non pour ankouraze.

Petet Minis mon ti a zis en leklersisman konbyen dele letan zot fer prosedir interview pour bann dimoun ki enterese pour bann pozisyon parey pour PSE, PE teachers pour zot kapab ganny ankadre si zot kalifye.  Mersi.

 

MR DEPUTY SPEAKER

Mersi.  Minis.

 

MINISTER JEANNE SIMEON

Mersi Onorab, mersi Mr Speaker.  Mon byen kontan Mr Speaker mon byen kontan ki Madanm Onorab la i kapab pe fer son homework dan son kominote pe regarde si nou kapab ganny dimoun ki kapab vin PE teacher, me parey ou’n dir, ou ava donn mwan sa 2 non nou ava regarde akoz pour ou vin en teacher osi i annan serten kriter ki nou pe pran, petet si ou pa tro okouran sa bann kriter.

Ler zot ava vin kot Minister Ledikasyon nou ava regarde zot kriter, kalifikasyon ki zot annan, leksperyans eksetera pour nou kapab anploy zot.

E pour, nou ava demann zot pour fer zot laplikasyon e sa letan nou’n ganny sa laplikasyon dan en dele 8 zour nou kapab prepar nou pour en, interview zot e apre sa i annan bann parey ou konnen dan tou lezot Minister i annan sa bann prosedir ki ou bezwen fer pour apwentman.

Me i pa pour pran 1 mwan ouswa plis si tou keksoz i annord si zot annan zot bann papye neseser tou keksoz i annord then nou pour kapab dan en pli kourt dele letan parey ou dir nou bezwen zot dan lekol, so nou pa pe kapab dormi lo la.  Mersi Mr Speaker.

 

HON AUDREY VIDOT

Mr Speaker si ou permet mwan zis dernyen kestyon, lekel pour lenformasyon petet bann ki pe ekoute, lekel sa dimoun spesifik ki ou Minister ki sa bann dimoun i bezwen vini pour vwar pour fer sa laplikasyon?  Thank you.

 

MINISTER JEANNE SIMEON

Mersi Onorab.  Mersi Mr Speaker.  Mr Speaker tou laplikasyon ki ou fer pour en pozisyon parey nou dir all correspondence ki ou anvoye kot Minister Ledikasyon ou anvoy li lo biro PS e PS li i transfer li kot Seksyon Human Resource zot ki organize interview and everything.  Mersi Mr Speaker.

 

MR DEPUTY SPEAKER

Mersi Minis. Onorab Paul Ernesta.

 

HON PAUL ERNESTA

Mersi Mr Speaker, Minis, delegasyon bonzour tou bann Koleg Onorab, tou dimoun a lekout.  Minis pli boner ou’n mansyonn en seri bann vacancies ki i annan, mon pa konnen si ou a tret mon kestyon koman en kestyon ouswa koman en sizesyon, mon konnen i annan sa progranm kot bann retrete i kapab retournen pour donn zot letan part time, what about si i annan en teachers ki’n sorti petet i pe travay dan en lot domenn i anvi vin dan Minister pour kapab donn son servis lo baz part time, eski zot konsidere or si non si zot kapab pran sa an konsiderasyon.  Mersi.

 

MR DEPUTY SPEAKER

Minis.

 

MINISTER JEANNE SIMEON

Mersi Onorab, mersi Mr Speaker.  Onorab ou pe dir teachers ki’n kite dan ledikasyon ki dan en lot domenn lanplwa si i kapab vin travay part time ek Minister Ledikasyon?  Sa i, nou, nou pour anvi teachers nou pour aksepte li nou, me selman i pour depan son landrwa travay si i pare pour release li pour vin fer sa part time dan ledikasyon ok? Alor nou, nou la nou i kapab vin demen si ou oule demen as part time teacher nou pe rode, ou vwar?  E i annan ki deza pe travay koumsa avek laprouvasyon zot landrwa travay, zot lorganizasyon ki zot pe travay avek ok?

 

MR DEPUTY SPEAKER

Mersi Minis.  Klarifikasyon Onorab Ernesta.

 

HON PAUL ERNESTA

Wi Mr Speaker, annefe i annan dimoun ki’n vini kot Minister zot in dir ki, petet la nou kapab apre refer kot ou Minister ki’n dir ki zot in dir zot pa dan zot Polisi pour zot pran en tel kad koumsa pour repran sa dimoun ki’n sorti pour vin part time dan Minister, i annan sa ka mon ava refer avek ou apre.  Thank you

 

MR DEPUTY SPEAKER

Mersi.  Onorab François Adelaide.

 

HON FRANÇOIS ADELAIDE

Mersi Mr Speaker, bonzour Minis avek ou delegasyon, bonzour tou Manm Onorab. Minis zis en pti komanter, mon’n anvoy en pti lenvitasyon pour envit ou kot nou lekol Baie Lazare e mon pa ankor ganny okenn larepons, so mon ti a kontan petet ou ti a konsidere vin vizit nou en pti gin pour partaz en pe nou pti problenm dan lekol Baie Lazare.

Mon lot pti kestyon se ki Minis vi ki nou’n koz lo PE teacher eski i annan okenn kour ki SITE i ofer pour train bann PE teachers swa bann lab technician pour zot kapab ranplas bann dimoun ki pe kite?  Mersi.

 

MR DEPUTY SPEAKER

Mersi.  Minis.

 

MINISTER JEANNE SIMEON

Mersi Onorab, mersi Mr Speaker.  Mr Speaker mon oule remersye Onorab pour sa lenvitasyon ok pour attend sa pti sesyon ki ou pe fer par egzanp i bon pour nou konnen, nou ava konnen bezwen ou kominote, bezwen lekol eksetera.  So mersi pour sa, nou ava fer nou posib pour nou vini.

Konsernan PE teachers’ e osi lab technicians parey ou pe dir, Minister Ledikasyon i annan son plan pour professional development son bann dimoun, son bann teachers e i annan, i annan pour PE teachers son bann kour ki li osi i bezwen swiv pour li ganny son kalifikasyon koman en teacher ok?  E osi i annan bann ongoing, bann pti, bann short courses, bann refreshers ki nou fer dan vakans parfwa osi dan letan lekol dan apre mdi or whatever pour sa bann teachers ouswa lab technicians, pour nou kapab osi get en pe zot devlopman profesyonnel.  So nou pa kit zot deryer akoz nou bezwen zot.  Mersi bokou Mr Speaker.

 

MR DEPUTY SPEAKER

Mersi Minis. Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker mon ti a kontan demann Minis an relasyon avek mezir pour remédier sa sityasyon i annan, ti annan sa progranm special level ki ti ganny entrodwir pour bann school leavers ki pour ankouraz zot apre pour kontinyen dan teaching, up to now ki mannyer Minister i santi poudir zot pe nobou atrakte bann zanfan segonder pour vin lo sa progranm e apre al swiv formasyon kot SITE?  Mersi Mr Speaker.

 

MR DEPUTY SPEAKER

Mersi.  Minis.

 

MINISTER JEANNE SIMEON

Mersi Onorab, mersi Mr Speaker. Mr Speaker sa special A’ Level program ti’n komanse en bon pe lannen pase.

Apre nou’n vwar poudir in rankontre en bon pe defi en allant espesyalman ler SITE, ler NIE the ex-NIE ti tonm anba Liniversite Sesel, me la in repran son souf nou’n, nou pe regard li ankor de pre donn li sa sipor neseser e akoz parey, ou’n byen dir poudir nou pe ekspekte ki nou a ganny detrwa ladan ki pe aspire pour zwenn ledikasyon pour zwenn lansennyman koman teachers demen, mon aprann poudir lo sa, dan sa progranm pour le moman nou annan 16 etidyan ki’n montre sa lentere e ki nou pe nurture zot pour nou kapab ganny enn de ladan pour zwenn lansennyman demen.  Mersi Mr Speaker.

 

MR DEPUTY SPEAKER

Klarifikasyon Onorab Pillay.

 

HON SEBASTIEN PILLAY

Mersi Mr Speaker. Mr Speaker lo en baz prozeksyon lo en turn over tou le lannen, eski zot in met an plas en mechanism pour zot balans li lo ki kantite zanfan ki pour sorti atraver sa progranm ki pour al SITE?

E ki kantite zanfan prezan pour swiv progranm SITE pour ki tou le lannen nou pe annan nou en cohort teachers dan maximum size e oubyen eski zot pe rankontre serten difikilte pour annan zanfan pour pran serten size spesifik?  Mersi Mr Speaker.

 

MR DEPUTY SPEAKER

Mersi.  Minis.

 

MINISTER JEANNE SIMEON

Mersi Onorab, mersi Mr Speaker.  Mr Speaker nou annan sa prozeksyon, nou annan sa close kolaborasyon avek SITE.  E problenm ki nou’n rankontre se pour ganny etidyan pour bann size syantifik avek Matematik.

Nou ganny plito bann ki pare pour teach langaz, me si nou pe vwar across nou sistenm se dan sa bann size domenn koumsa Matematik avek Lasyans kot nou annan plis bezwen ansennyan, me selman nou,  parey nou dir si zot montre sa lentere e nou travay avek NIE e formasyon i annan loportinite posibilite pour ou fer sa.

E parey mon’n dir taler nou, dan Minister Ledikasyon dan nou striktir nou’n kree sa seksyon ok pour teacher management la e sa osi li pour sa lankadreman pour nou kapab pli byen soutenir sa progranm.  Mersi Mr Speaker.

 

MR DEPUTY SPEAKER

Mersi Minis nou bezwen avek konstrent letan al lo 5enm kestyon, Onorab Woodcock in pran an kontak avek mwan parske malerezman in bezwen deplase pour al Ankour ok en keksoz ki pa ti’n prevwar e in demann Onorab Ferrari pour demann sa kestyon lo son lapar e mon’n dakor avek sa, Onorab Ferrari laparol i pour ou.

 

HON JEAN-FRANÇOIS FERRARI

Mersi Mr Speaker.  Mr Speaker Onorab Wavel Woodcock ti a kontan demann avek Minis akoz ki bann etidyan ki’n fini zot A ‘Level ki pe esper zot scholarship pour al etidye aletranze pe ganny oblize pour teach en fulltime timetable dan bann lekol segonder lo en saler R2, 800 ki pli ba ki minimum wage R5, 050?  Mersi.

 

MR DEPUTY SPEAKER

Mersi Onorab. Minis.

 

MINISTER JEANNE SIMEON

Mersi Onorab, mersi Mr Speaker.  Mr Speaker mon ti’n osi demande taler si mon pe kapab pran en menm larepons pour kouver osi premye parti kestyon Onorab Hoareau, ok?

        Mr Speaker i annan plis ki 20an depi ki Gouvernman in met an plas en Scheme pour bann etidyan ki konplet zot letid lo nivo A’ Level avek sikse e ki annan, i meet sa kriter pour kalifye pour en labours pour al etidye Liniversite.

Sa Scheme i donn bann etidyan loportinite viz zot pei koman en zenn adilt e osi reste angaze dan en fason konstriktiv anver devlopman nou pei en attendant zot labours, nou devret fer resorti ki sa bann etidyan zot performans zot nivo ledikasyon i alaoter e i reprezant e model pour lezot zenn espesyalman sa bann ki i ankor dan lekol.

En konponan enportan sa Scheme, se sa ki nou apel attachment, ki bann etidyan i fer avan ki zot al komans zot letid, sa Scheme i kouver attachment dan 2 sekter kle dan Gouvernman Ledikasyon avek Lasante.

Kot i konsern ledikasyon dapre revised Scheme ki an plas depi 2013 en etidyan i devret pe asiste en ansennyan pandan sa peryod attachment dan lekol ki dire pour en peryod 6 a 12 mwan, dan konteks ledikasyon ler nou koz lo asiste ouswa attachment i vedir travay a kote en ansennyan ki’n ganny anploye a plen tan par Minister Ledikasyon ; savedir al dan bann laklas avek sa ansennyan donn koudmen koriz kaye, anim serten aktivite dan prezans e osi dan labsans sa ansennyan.

Mr Speaker sepandan prenon kont sityasyon dan nou bann lekol segonder, i arive parfwa ki serten sa bann etidyan ki lo attachment i vwar zot dan sityasyon kot zot pe bezwen pran en laklas lo zot menm.

Dan lenstans kot zot bezwen fer sa, nou ankouraz zot pour al si i posib al a 2 e fer sa ki nou apel team teaching.

Me i arive dan serten mankman ansennyan kot zot bezwen parfwa pa pour en long peryod letan pran laklas zot tousel, me sa i osi avek sipor zot bann Subject Leaders dan lekol, Deputy Head Teachers, Heads of Department ki osi donn zot sa sipor.

Nou ti a kontan osi fer resorti, ki serten sa bann etidyan zot in vreman adapte zot byen dan lekol e parfwa volonterman zot eksprim lentere pour parfwa pran laklas lo zot menm, tandis ki sa teacher i obzerve ki mannyer zot fer, sa i zot swa.

Mr Speaker i neseser pour fer osi resorti ki dan nou sistenm ledikasyon en full time table pour en ansennyan lo nivo segonder i 28 a 30 peryod 40 minit par semenn.  Me pour sa bann etidyan ki lo sa Scheme letan zot lo attachment zot ganny demande normalman pour asiste en teacher pour pa plis ki 18 peryod par semenn, attachment pour sa bann etidyan i normalman komanse an mars apre ki zot in ganny zot rezilta an Zanvye, sa menm lannen e laplipar i konplet sa attachment lafen dezyenm trimes skoler kot zot sorti, zot exit pour zot prepare pour zot al komans zot letid iniversiter an Septanm.

Bann etidyan ki zot letid iniversiter i komans an Zanvye ouswa an fevriye zot, zot reste lo attachment ziska lafen trimes an desanm, ki i fer ki sa attachment pa dir plis ki 12 mwan depandan lo larantre zot liniversite.

Dapre dernyen statistik lo sa bann etidyan ki’n fek kalifye pour en labours Gouvernman an zanvye 2018 e ki lo attachment aktyelman dan lekol, i annan 56 zot an tou e zot pe fer sa attachment dan 10 diferan lekol segonder.

An sa ki konsern zot attachment allowance, sa in ganny revize an 2017 pour sorti 2,875 pour vin 3, 875 par mwan, Roupi par mwan.

Fodre fer resorti Mr Speaker ki sa bann etidyan pa dan en lanplwa permanan.  Par konsekans nou pe donn zot en allowance e sa allowance pa ganny bidzete koman en saler minimum anba sa Scheme aktyel.  Mersi Mr Speaker.

 

MR DEPUTY SPEAKER

Onorab Ferrari.

 

HON JEAN-FRANÇOIS FERRARI

Minis mersi pour ou larepons Msye, Onorab Woodcock i ti enterese konnen vi ki i pa en lanplwa formel ki sa bann etidyan i antre ladan, e ki sa bann etidyan, anfen bann prospective students zot annan osi en, sa lannen sa grapiy la i en moman kot zot pe prepar pour Liniversite, eski Minister i, an vi ki zot pa pe ganny en full saler eski Minister in reflesir lo en sistenm en pe pli fleksib ki mentenir sa bann etidyan dan en travay kot lekol, me ki donn zot en pe fleksibilite pour zot osi prepar sa ki pe vini apre.

Sa kestyon mon pe demann li akoz zot, ou dir, Minis in dir nou poudir zot lanplwa pa formel me selman zot letan travay i formel, they have to be on site, zot bezwen on site pandan sa peryod, zot pa kapab kit landrwa me i pa formel, eski zot in reflesir lo en sistenm en pe pli fleksib ki i ava permet sa bann zenn maksimiz zot letan.  Mersi.

 

MR DEPUTY SPEAKER

Mersi.  Minis.

 

MINISTER JEANNE SIMEON

Mersi Onorab, mersi Mr Speaker.  Mr Speaker i annan serten fleksibilite akoz i annan ki ganny en lazournen lib dan lasemenn, i annan ki demann permisyon pour sorti si i annan keksoz ki i pe al fer e sa i ganny planifye lo nivo lekol.  

So nou bezwen rekonnet osi ki sa bann etidyan pe donn nou en servis e nou osi nou bezwen aport nou sipor anver zot, pour ki sa peryod ki zot pase dan nou lekol i pa, zot pa vwar li koman en peryod dezagreab, me plito en peryod kot zot pe aprann serten keksoz.

Mon toultan dir poudir sa peryod pour mwan mon vwar li koman en preparasyon pour lavenir, akoz toultan mon dir si en dimoun in pas atraver sistenm lekol ok, i annan bann skills ki pour devlope ki pour ed li tou dilon son lavi.

Nou konnen poudir konmela get nou bann teachers, akoz nou bezwen kontinyelman ankouraz bann teachers pour nou retain zot akoz they are very marketable, pa zis akoz zot kalifikasyon, me akoz serten skills ki ou devlope letan ou pe ansennyen ki dan nenport ki landrwa kot ou ale kot ou al travay ou pour adapte akoz ou’n pas atraver sa sistenm ledikasyon, parey mon krwar i annan kantite Onorab ki la avek nou bomaten i kapab ateste lo la.

So nou ankouraz osi nou meet avek sa bann etidyan e nou fer serten induction e nou fer zot vwar kote pozitiv sa progranm rather than vwar li as a burden lo zot ok, pour zot kapab reste dan lekol.

Se sa ki mon’n fer resorti taler ki i annan ki menm in sitan kapab adapte li akoz sa bann etidyan ki zot pe teach i apepre zot menm, preski menm laz pa tro annan en gran egalite, e i annan ki vreman annan sa bon relasyon avek sa bann etidyan dan zot laklas e ki zot menm demande pour pran laklas lo zot menm.

Zot anvi teste zot skills e si en zour apre mon studies mon anvi, mon retournen mon a kontan, mon ti a kontan vin en teacher, mon’n goute, ok mon’n konpran ki what it is all about.  Mersi Mr Speaker.

 

MR DEPUTY SPEAKER

Mersi Minis, vi ki midi mon annan 2 propozisyon, (1) se nou kapab kontinyen i reste nou ankor 1 kestyon me senn la i annan ankor 4 dimoun ki i anvi demann kestyon lo la, nou kapab ale ziska dizon 12.30, mon krwar nou kapab fer 15, 15 nou fini sa 2 kestyon ouswa nou a demann Minis pour tournen 2er.  Mon a demann Onorab Ferrari, ki ou panse?

 

HON JEAN-FRANÇOIS FERRARI

Non Mr Speaker mon ava lead by example, mon pa ava demann en dezyenm kestyon siplemanter, e fotespere tou bann Manm i demann en kestyon.

 

MR DEPUTY SPEAKER

Non, mon ti pe plito demann lo sa propozisyon ki nou ale ziska 12.30.

 

HON JEAN-FRANÇOIS FERRARI

Wi, wi non, non toutafe dakor, 1 kestyon siplemanter.  Mersi.

 

MR DEPUTY SPEAKER

LGB eski ou happy lo ou kote ki nou kontinyen ziska 12.30 nou fini sa 2?

 

HON CHARLES DE COMMARMOND

(Mic Off)

….

 

MR DEPUTY SPEAKER

Ok nou kontinyen alors.  Onorab John Hoareau.

 

HON JOHN HOAREAU

Mersi Mr Speaker.  Mr Speaker mon ti a kontan demann Minis, si an ka en etidyan A’ Level i refize al travay koman en teacher dan lekol, eski sa i annan okenn reperkisyon lo son scholarship ki i pe gannyen ek Gouvernman?

Dezyenmman, pandan sa dernyen 20an ki sa Scheme i an servis, eski Minis kapab dir nou, si i annan plis manrmay ki’n pas atraver sa Scheme ki’n fini A ‘Level ki’n retourn dan teaching oubyen si i annan mwens?

Lot kestyon mon ti a kontan demann Minis, se ki eski i vwar li fair pour en etidyan ki’n antre se li en pleurant, apre ki in pas en move leksperyans, en move lazournen sirtou avek bann problenm disiplin ki i annan konmela, parey in dir i annan i kontan, me pa tou ki kontan, i annan i ganny bokou problenm pour adapte dan bann lekol.

Sirtou akoz zisteman zot preski menm laz ek sa bann lezot etidyan e i annan sirtou bann fiy ki ganny sexual harassment avek bann garson, e osi i annan lo, ki kalite lenpak i annan lo zot lasante ler zot pe pas atraver sa bann trauma en pe psikolozi?  Mersi.

 

MR DEPUTY SPEAKER

Ok.  Minis.

 

MINISTER JEANNE SIMEON

Mersi Onorab, mersi Mr Speaker.  Ler ou dir nou si nou’n fer en survey pour nou vwar si sa bann manrmay ki al lo attachment A’ Level letan zot retournen zot retourn dan teaching, sa bann etidyan ki pe fer attachment dan lekol lo nivo Liniversite zot pe al fer diferan course ok?

I annan ki al fer accountancy or whatever ok, diferan kalite e zot pa neseserman bezwen retourn dan teaching, ok zot pa retourn dan teaching, zot al swiv zot own career paths apre Liniversite.

Akoz nou bann etidyan ki pour fer teaching pour antre dan lansennyman zot, zot, i annan ki al fer en premye degre e apre zot retournen apre pour zot fer zot PGCE kot SITE ok?  So pa neseserman ki zot pe retourn dan ledikasyon ok.

Konsernan ou dezyenm parti ki i annan ki ou dir mwan ki i annan ki retourn dan lakour en pleurant troma dan lekol, anyway mwan ki mon kapab dir nou’n annan dan lepase ok sityasyon koumsa ki i form parti petet zot growing up, zot kapasite kapab cope avek lavi, me sa ki enportan se ki zot ganny sa sipor akoz menm qualified teachers ki’n sorti NIE ki’n al dan lekol in end up en pleurant akoz i, premye semenn adaptasyon i en pti pe dir pour zot, me sa osi i devlop sa rezilyans dan zot, me ankor en fwa mon dir, si zot ganny sa sipor lo kote school management, ok zot kapab e nou napa okenn ka pour le moman parey ou ti pe demande si in annan ki in refize pour ale, si sa i konpromi zot labours.

Pour le moman nou napa okenn ka kot in annan ki’n point blank dir poudir i pa pe fer, i pa pe sa, so nou kapab dir si i arive, me selman nou konnen parey si i en Scheme parey mon’n eksplike nou koz ek zanfan, nou counsel zot, nou fer zot vwar kote pozitiv sa Scheme rather than a very bad experience.  Mersi Mr Speaker.

 

MR DEPUTY SPEAKER

Mersi Minis.  Mon pa oule limit diskisyon, me selman kestyon ti vreman spesifik, akoz ki nou pe pey 2, 800 olye 5, 050 so annou pa tro al dan bann kestyon an deor lo kondisyon travay, ou annan en klarifikasyon Onorab Hoareau, annou fer li vit silvouple akoz i deza midi 7.

 

HON JOHN HOAREAU

Wi, non lo mon premye bout kestyon ki mon ti’n demande, kestyon N0. 4 akoz i a pe pran li ansanm, wi Mr Speaker mon ti ava kontan konnen egzakteman, i vre ki pa tou sa bann etidyan ki ler zot pe al fer sa bann attachment dan lekol ki pe al pran an karyer dan teaching, me selman an revi ler ou pe gete sityasyon ki mannyer i ete kantite ki pran en premye Degre dan en size apre i retournen pour vin teach i vreman diminyen parey an konparezon pli lannen i pase.

Akoz senpleman bokou bann etidyan ki pas atraver sa Scheme zot ganny move leksperyans teaching e zot pa’n ganny sa pti formasyon avan pour zot kapab fer li.  Alor zot ganny en bad experience.

Dezyenmman Mr Speaker mon ti ava kontan fer rekonnet ki bann etidyan ki fini A’ Level zot ti kapab kontribye osi pozitivman dan sosyete atraver lezot kad dan sistenm, par egzanp si zot pe al aprann enzenyer akoz pa en attachment avek en firm ki pe fer enzenyer oubyen en lot size.  Mersi.

 

MR DEPUTY SPEAKER

Mersi.  Minis.

 

MINISTER JEANNE SIMEON

Mersi Onorab, mersi Mr Speaker. Mr Speaker konsernan en pti training pour zot parey mon’n dir avan ler ki zot komans sa attachment, nou annan en peryod induction parey nou dir kot nou ankouraz zot pour vwar sa koman en keksoz pozitiv rather than en move leksperyans pour zot.

E zot ganny osi bann pti tips, bann pti sipor pour ki mannyer zot pour kapab debourye dan lekol, e parey mon’n dir depi ler sa Scheme in met an plas nou’n ariv plis ki 20an e nou vwar ki i en keksoz ki mars ase byen si Gouvernman in deside pour ou gard li an plas.

E lo kote kot ou’n dir poudir bann ki ale ki apre zot pa retournen pour zot pran lansennyman apre sa, sa bann ki pour pran lansennyman i en lot kategori.

Akoz parey mon’n dir zot already annan zot First Degree e ler zot tournen zot ganny ankouraze pour zot pran teaching of the subject ki zot in pran dan zot First Degree, zot swiv en kour PGCE e dan lepase letan mon ti dan ledikasyon e mon krwar i pe menm kontinyen SITE pe ofer sa bann progranm kot zot, kot bann manrmay ki i annan en First  Degree dan Science, dan Matematik, dan Geography, History and so on, ler zot tournen zot kapab fer en PGCE ki donn zot sa kalifikasyon pour zot kapab ansennyen.

So parey mon’n dir taler mon pa oule tro, pran tro bokou letan.  Pour mwan mon pour toultan dir poudir si zot pran li pozitiv sa leksperyans i pour en bon leksperyans e pour zot pour devlop rezilyans e lezot skills, kalite ki zot pour, i pour ed zot dan zot travay demen – wherever zot tonbe parey nou dir an Kreol.

I annan menm ki’n go atraver sa progranm in al fer son letid, in kontinyen son letid as at Masters level ki zwenn avek nou ki dir nou poudir avek bann dimoun ledikasyon ki sa progranm in, i pa ti ekspekte si dan son training ki i pe fer avanse i pour vwar keksoz ki i pour tonm lo la ki in aprann atraver son peryod letan dan lekol.

E si nou pe ekout sa bann  pti vibes koumsa petet i donn nou en lankourazman petet pour nou kontinyen avek sa progranm e vwar ki mannyer petet nou kapab fer pli byen, amelyor li si i posib fer li vin pli en pe pli fleksib parey nou’n dir a lavenir.  Mersi Mr Speaker.

 

MR DEPUTY SPEAKER

Mersi Minis.  Onorab Gervais Henrie.

 

HON GERVAIS HENRIE

Mersi Mr Speaker, sa ki mon anvi demann Minis an vi ki sa bann etidyan pe ganny R3, 875 ki minimum ki zot ekspekte fer an term zot teaching load?  Mersi.

 

MR DEPUTY SPEAKER

Mersi.  Minis.

 

MINISTER JEANNE SIMEON

Mersi Onorab, mersi Mr Speaker. Mr Speaker taler mon’n dir zot pe ganny demande pour teach at least 12 to 15 periods, pa plis ki 18 peryod.  E sa osi sa bann peryod ki nou pe dir, ler avek sa teacher, sa teacher i touzour la avek zot dan laklas pour ofer sa sipor okenn breakdown dan management laklas, sa teacher i la pour donn zot sa sipor.

Problenm petet ki i arive, se zis ler zot bezwen pran sa laklas zot tousel an ka sa teacher pa la pour en peryod letan, me parey mon dir ler sa teacher pa la zot kapab annan rekour avek lezot manm lekol, management, eksetera pour donn zot sa sipor.  Mersi Mr Speaker.

 

MR DEPUTY SPEAKER

Mersi Minis. Onorab Jude Valmont.

 

HON JUDE VALMONT

Mersi Mr Speaker, mon pe zis demann en pti kestyon dan laliny sa ki Onorab Hoareau in demande, Minis eski depi ler zot in met sa bann etidyan ki pour al etidye lo sa Scheme pour ou al dan lekol la, zot in get, Minister in fer en letid in get dan posibilite diversifye parey Onorab in fer resorti?

Akoz mwan mon annan en zenn fiY La Digue aktyelman in apros mwan detrwa semenn pase en rezidan Pointe Larue in antre dan sa progranm, i ti anvi teach, me parey ou’n dir i annan in vwar zot anvi teach ler zot dan sa progranm, be i annan ki’n vwar ki zot pa kapab teach akoz i pe ganny sa problenm, alor mon pe demande eski zot in fer letid ki zot kapab diversifye e anvoy bann etidyan parey Onorab in refer sorti al fer enzenyer dan bann landrwa parey PUC and whatnot?  Mersi bokou.

 

MR DEPUTY SPEAKER

Mersi Minis, kestyon se zis si ou annan lezot opsyon pour sa bann dimoun ki’n komans sa apre pa kapab kontinyen.

 

MINISTER JEANNE SIMEON

Mersi Onorab, mersi Mr Speaker.  Mr Speaker pour le moman nou napa en lot opsyon akoz nou pe enplimant sa Scheme parey i ete, si i pour bezwen revize, then Gouvernman i ava vwar nesesite pour nou kapab revize ok?  Mersi.

 

MR DEPUTY SPEAKER

Mersi Minis.  Onorab LGB…

 

HON CHARLES DE COMMARMOND

Mersi Mr Speaker, bonzour Minis ek ou delegasyon, bonzour tou dimoun ankor kekfwa, Mr Speaker sa issue ki nou pe koze la ti ganny leve an 2017 dan nou Lasanble Nasyonal e swivan sa Former Speaker Pillay mon menm dan Leaders Forum nou ti lev sa issue avek Prezidan Larepiblik ki ti met dan Cabinet e en desizyon Cabinet ti ganny pran pour ogmant sa allowance, eski Minis pe dir nou ki sa allowance, sa sif ki in mansyonnen taler 3, 875 se sa desizyon ki Cabinet ti pran pour ogmante?  Si wi eski alor ki bBdze 2019 zot pe prepare Minister Ledikasyon i kapab konsider revwar sa allowance etandonnen work load sa bann etidyan ki pe fer sa lansennyman la.  E an menm tan avek pri lavi ki mannyer i ete dan pei, eski zot pare pour revwar sa dan bidze 2019 pour kapab ogmant li ankor en pe.  Mersi.

 

MR DEPUTY SPEAKER

Mersi Onorab.  Savedir nou pe demande si en desizyon Cabinet e si zot pour revwar li pour lannen prosenn.  Mersi.  Minis.

 

MINISTER JEANNE SIMEON

Mersi Onorab, mersi Mr Speaker.  Mr Speaker sa logmantasyon ki’n donnen dan Scheme, i 2017, ok?  So e sa allowance parey nou konnen i annan 2 porsyon, i sorti dan Bidze ANHRD Lazans ki ansarz Human Resource Development e lot porsyon i sorti dan Bidze Lazans Proteksyon Sosyal, ok?  So lo kote si nou vwar nesesite pour nou ogmante parey mon’n dir, nou’n fek fer en revizyon an 2016 bann etidyan ti pe ganny 2, 500, 2016 – 2017 boner nou ti monte pour vin 2, 800 e 2017 lafen lannen, nou’n revwar ankor nou’n ogmante pour fer li vin R3, 875.

So dan Bidze pour 2019 nou pa pe, nou pa’n konsidere ok, akoz sa i en revizyon ki’n fek ganny aprouve by Cabinet of Ministers.  Mersi Mr Speaker.

 

MR DEPUTY SPEAKER

Mersi Minis. Onorab Sebastien Pillay.

 

HON SEBASTIEN PILLAY

Mersi Mr Speaker. Mr Speaker eski Minis i kapab dir nou en keksoz tre senp, konbyen letan maximum o maximum sa bann zanfan i fer depi ki zot in ganny zot rezilta, konnen zot in ganny zot scholarship apre zot al dan lekol, la i ale.  Konmsi konbyen letan zot fer o maximum dan en lekol?  Mersi.

 

MR DEPUTY SPEAKER

Mersi Onorab.  Minis.

 

MINISTER JEANNE SIMEON

Mersi Onorab, mersi Mr Speaker.  Mr Speaker mon’n dir taler ki zot pas en peryod pa plis ki 12 mwan.  E sa i depandan lo larantre zot Liniversite, i annan ki sorti a lafen 2enm trimes, bann ki komans zot Liniversite an Septanm, e bann ki komans zot Liniversite lannen answit an Zanvye, Fevriye zot, zot kit a lafen 3enm trimes skoler.

Me si ou pe regarde sa peryod letan i, nou pe dir 9 a 12 mwan i, ok si nou pe gete osi an term letan ki zot pran dan lekol letan ou pe tir bann vakans skoler eksetera lo maximum ki nou kapab donnen, se 4 mwan plen ouswa 5 mwan parla.

So i pa vreman en gran peryod dan lekol, letan nou’n kalkil sa bann 9 a 12 mwan nou ankor pe konsider antye koman kalandriye lekol, me ler ou tir vakans ladan, i reste apepre 4 mwan plen.

 

MR DEPUTY SPEAKER

Mersi Minis, nou pour pran dernyen kestyon pour bomaten, e sa se par Onorab John Hoareau.

 

HON JOHN HOAREAU

Mersi Mr Speaker. Mr Speaker mon kestyon i lir koumsa, eski Minis i kapab dir sa Lasanble kwa ki pe ganny fer pour amelyor kondisyon travay bann librarian dan lekol?  Mersi.

 

MR DEPUTY SPEAKER

Mersi Onorab.  Minis.

 

MINISTER JEANNE SIMEON

Mersi Onorab, mersi Mr Speaker.  Mr Speaker dan tou nou bann lekol i annan librarian ki pe travay dan bann bibliotek skoler pour asire ki bann etidyan i annan akse avek bann resours, sipor pour laprantisaz tel ki liv, diksyonner, liv referans e liv pour fer resers e osi bann zwe edikatif.

Zot osi travay pros avek bann ansennyan pour ede avek bann aktivite pour laprantisaz e ranforsman lektir.

Dan nou sistenm pour le moman nou annan nou en total 48 librarian dan lekol primer ek segonder e 6 school librarians lo nivo sant profesyonnel.  Zot kondisyon travay i ganny definir dan zot Scheme of Service, i annan en Scheme of Service for school librarians ki an operasyon depi 2012.

Dapre plan Minister pour devlopman profesyonnel bann librarian, Minister i annan plizyer keksoz ki’n met an plas ; i annan training pour zot, i annan attachment ki zot fer, lezot exposure enternasyonal ki zot kapab partisip ladan, aktyelman nou annan en group 11 ki’n swiv en Certificate Course lo la baz part time dan library and Information Science avek Lenstiti Guy Morel.

Zot in termin zot formasyon lafen 2017 e training pour en lot group pe ganny met an plas, akoz sa nou pe vwar li koman en devlopman profesyonnel a baz kontini.

An plis ki sa parey mon’n dir zot ganny loportinite pour zot al aprofondir zot konesans an deor Sesel, an 2017 nou annan 3 librarian ki ti al lo en attachment La Reunion dan en sant pour lektir e zot ti fer 2 semenn laba.

Sa lannen 2 in al en Konferans ki i annan pour fer avek school library – Turkey pour 1 semenn, e la aktyelman i annan 2 dan L’Inde ki pe swiv en short course anba progranm Indian Technical Economic Cooperation Program – ITEC.  

I osi parey nou dir i annan bann lezot devlopman profesyonnel ki kontini e ki Minister i organize dapre bezwen bann school librarians.  Mersi Mr Speaker.

 

MR DEPUTY SPEAKER

Mersi Minis. Yes Onorab Hoareau klarifikasyon.

 

HON JOHN HOAREAU

Mersi Mr Speaker.  Mr Speaker mon ti ava kontan konnen enn i travay en pti pe direkteman avek zanfan, konmela librarian nepli sa dimoun ki zis asize ki donn liv, zot fer osi bann pti progranm laprantisaz lektir, debate, resers ensidswit avek zanfan, eski Minis i kapab konsidere ki sa bann, an vi ki zot travay direkteman ek zanfan ki zot kapab osi benefisye avek en vakans parey bann teachers i benefisye?  Sa i premye kestyon.

E dezyenm kestyon ki mon ti ava kontan konnen, se ki akoz ki sa bann group ki’n fini zot Certificate Course ki zot in fer avek SIM depi Oktob 2017 ki zot pa ankor ganny increment ki zot sipoze gannyen apre ki zot in konplet sa formasyon?  Mersi.

 

MR DEPUTY SPEAKER

Mersi.  Minis.

 

MINISTER JEANNE SIMEON

Mersi Onorab, mersi Mr Speaker.  Mr Speaker dapre zot Scheme of Service bann school librarian pa entitle pour ganny vakans parey bann ansennyan.  Zot ede parey mon’n dir avek bann aktivite lektir, zot parfwa osi ede pour sirvey en laklas dan ka ki ansennyan pa la, me zot pa teach parey bann ansennyan.

Parkont zot dapre zot Scheme zot benefisye en konze 21 zour, sa i dapre landrwa travay e zot kapab pran zot konze nenport letan pandan vakans skoler.

I enportan pour note ki en library pa sipoze fermen pandan vakans skoler. Sa i akoz zot bezwen fasilit akse avek bann servis pour bann zanfan pandan vakans, i annan etidyan ki bezwen vin dan library dan vakans pour fer serten resers, zot bezwen annan akse avek liv, so nou pa pe kapab donn zot en vakans, ler zot pran vakans, se sa ki dan bann lekol nou annan en pe, nou annan 2 librarian o maximum e ler enn i al vakans, enn i toultan la ok?

 

(Mic Off)

 

MINISTER JEANNE SIMEON

Parey mon’n dir i pa sipoze.  E pour asire ki sa servis, servis library dan vakans i reste operasyonnel, Scheme of Service for school librarians i fer provizyon pour bann librarian ganny en inducement allowance R660 per month e sa i ek zot pour les sa library ouver pandan lasemenn e osi lezot aktivite siplemanter ki zot fer avek bann zanfan.

Mr Speaker, Onorab bann ki’n partisip dan sa premye group training, zot i annan antre zot ki annan en pti retar dan pour termin zot kour e once sa in fini aranze met normal, le neseser pe fer pour zot ganny zot allowance, sa ki enportan se ki zot pe gannyen, pour le moman la i annan 19 ki lo training e bann ki’n fer premye group ki ti fer zot, zot in fini ganny zot azisteman saler.

 

MR DEPUTY SPEAKER

Mon permet ou en dernyen klarifikasyon Onorab Hoareau e answit mon pour al dernyen kestyon avek…

 

HON JOHN HOAREAU

Eski pour annan en back pay pour bann ki i annan sa retar?  Mersi.

 

MR DEPUTY SPEAKER

Si pour annan back pay Minis.

 

MINISTER JEANNE SIMEON

Bon anyway nou’n, nou pe aziste zot saler ler zot prodwir zot Sertifika.  Ok parey mon dir sa ki’n fini, in prodwir Sertifika in fini ganny son azisteman, sa bann ki pa ankor fini ler zot a terminen avek zot Sertifika, nou pa pour kapab backdate zot pour sa, ler i annan Sertifika nou sa, sa group ki pe an training pour le moman la parey mon’n dir, zot pa ankor terminen, ler zot terminen zot a prodwir zot Sertifika ki validate zot training, la nou ava aziste zot saler.  Mersi Mr Speaker.

 

MR DEPUTY SPEAKER

Mersi Minis, dernyen kestyon Onorab Arrisol, Sandy Arissol.

 

HON SANDY ARISSOL

Mr Speaker bonn apre midi ankor enn fwa, bonn apre midi tou Manm, Mr Speaker mon ti a kontan dir avan mon demann mon kestyon, depi bomaten mon pe ekout Minis Simeon i annan en kantite keksoz Minis, en kantite larepons ki ou pe donn nou ki pa adjust avek sa ki ou pe dir nou avek larealite deor.

mon komans avek sa enn, bomaten mon ti demann en kestyon an relasyon avek teachers quarters lo La Digue, ou ti dir mwan i annan 4 dimoun pe reste dan teachers quarters, mon’n ganny lenformasyon i annan 3 dimoun pe reste dan teachers quarters avek en katriyenm en zonm ki balye kot lekol La Digue ki fer katriyenm teachers dapre Minis Ledikasyon ki pe reste dan teachers quarters.

Dezyenmman housing allowance mon’n demande bomaten, i paret mwan i annan en disparite parske i annan ki pe ganny 2, 500, i annan ki pe ganny 4, 000 mon pa konnen lekel ki vre.

Trwazyenmman Minis, mon’n tann ou dir poudir training pour PE teacher avek lab teknisyen dan vakans i annan.  Mon anvi reasir Minis Mr Speaker poudir bann teknisyen laboratwar dernyen fwa ki zot ti ganny en training dan vakans ti 2004 ek 2005, mwan mon ti ankor dan ledikasyon, ziska prezan napa okenn training pour lab teknisyen.  Pour bann PE teacher si napa en pti course avek NSC ki ganny fer dan vakans, Minister Ledikasyon anba NIE anba SITE konmela, pa organiz nanryen pour PE teacher, e si zot pa fer nanryen zot pour perdi plis PE teacher ankor.

Katriyenmman, mon’n tann koz lo Scheme of Service pour librarian, mon anvi dir avek Minister Ledikasyon Mr Speaker poudir bann librarians zot Scheme of Service sipoze update depi Zilyet lannen pase, ziska prezan pa ankor revize, e la Zen pe fini nou pe al Zilyet pour fer nou egzakteman 1an bann librarian pe esper zot Scheme of Service ki mon’n tann Minis pe koz lo la.

E pour fini mon ti a kontan siport sa ki Onorab John Hoareau in dir Mr Speaker parske bann librarian, bann teknisyen laboratwar, mon kontan letan Minis ti dir zot Scheme librarian pa parey avek bann teachers, me selman mon anvi dir avek Minis Ledikasyon ki la poudir bann librarian zis parey bann manrmay A’ Level zot ganny forse pour al supervise laklas!

Zot ganny forse pour al vey legzanmen, zot ganny forse pour fer lezot aktivite pour kouver teachers ler zot pa la, be selman letan i annan incentive pour ganny donnen, zot ganny dir par Minis Ledikasyon poudir zot pa tonm dan sa Scheme!

Selman letan pour al ede pour al kouver pour al supervise laklas, wi zot ganny forse pour al antre dan sa Scheme, alor mon pe demann avek Minis Ledikasyon ki la Mr Speaker pour letan nou pe koz ed tou zanfan dan lekol siport bann staff, i enportan ki letan nou pe get incentive, annou pa get zis en kategori dimoun dan lekol.

Ozordi tou bann non-teaching staff enkli bann teknisyen laboratwar mon konn Sir Philip Gomme ki’n 37an dan sa servis Belonie Segonder ozordi i pe kouver li 4 lab li tousel, 4 lab i pe manage avek tou sa zanfan, avek tou sa science teacher.

I enportan letan nou bann lenformasyon, nou donn bann lenformasyon ki korek, e letan nou pe siport nou staff silvouple mwan ki ti en non-teaching staff dan ledikasyon pour 10an, mon pe rod sipor pour sa bann menm group dimoun.  Mersi bokou Mr Speaker.

 

(APPLAUSE)

 

MR DEPUTY SPEAKER

Mersi Onorab Arrisol, Minis ou oule fer en komanter?

 

MINISTER JEANNE SIMEON

Mersi Onorab, mersi Mr Speaker. Mr Speaker sa se lenformasyon ki nou ti’n gannyen sorti kot nou Housing Officer ki lo, ki ansarz La Digue avek Praslin pour bann lakaz, e mwan mon ti dir i annan 4 lakaz ki abitab ki, vi ki i ti dir i apel teachers quarters, nou ti prezimen ki i annan teachers ladan, me sa ki travay kot lekol i en travayer Minister Ledikasyon, si i annan en bezwen pour li kapab, pour nou kapab ed li osi, Minister in fer le neseser.  Me selman normalman nou bann lakaz i ganny dedye pour bann teachers.  E sa ki nou pe fer renovasyon lo la nou pour asire ki i pour ganny servi par nou bann teachers.

        Dan progranm revizyon Scheme pour lannen 2017, nou ti annan 3 Schemes of Service ki ti’n, ki ti lo la – ti drayver, warden avek general assistant.  Scheme pour Counselors avek librarian pour ganny revwar 2018.

Pour housing allowance si mon kapab demann en pti gin lendilzans Onorab, nou ava rod sa lenformasyon korek e mon ava fer ou gannyen kot i konsern sa disparisyon, si i annan nou ava fer le neseser pour nou rode, pour nou klarifye, me parey mon dir lenformasyon ki nou nou’n gannyen se R4, 000 pour graduate housing allowance.

Sipor pour bann staff, bann support staff parey nou dir, mon pa konn okenn lenstans ki i annan librarian ki’n ganny forse pour li al pran laklas, petet librarian in ganny demande pour sirvey laklas dan labsans en teacher.  

Akoz nou konnen librarian kwa ki i kapab teach, kwa ki i pa kapab, si management lekol in vwar i kapab fer en pti pe size, then in demann li pour fer sa dan sa lespri sipor lekol, akoz i dan sa lekol i pe travay dan sa lekol e lekol i bezwen li pour en serten lasistans, so mon krwar sa in bezwen ganny met devan li e in pa’n ganny forse pour li al pran laklas.

I menm parey avek nou bann lab technicians, mon konnen dan lepase ki bann lab technicians in, nou’n negosye avek zot, nou’n menm demann zot pour kapab pran serten laklas pour letan zot teacher pa la, e sa mon, ankor en fwa mon get li lo plan zot prop devlopman akoz nou’n annan lab technicians ki’n ganny training e ki konmela i fulltime teacher avek, i annan ki avek en First Degree e in, e si nou pe donn zot sa loportinite pour zot kapab pran serten laklas e apre join training pour zot kapab vin en teacher, mwan mon get li lo kote pozitiv, pa lo kote ki nou pe fors pour pran laklas.

Ankor enn fwa konsernan nou bann support staff dan lekol, nou bann school managers parey nou pe dir training pour bann lab technicians, sa training ki ou pe nonmen lo la, sa ti en formel, en fulltime training en Certificate Course ki nou ti ofer pour bann lab technician, me parey mon’n dir, si ou pe dir poudir zot ganny en pe training avek NSC be nou, nou konsider NSC koman en, enn koman nou bann partner kle e NSC pour li kapab fer training avek nou bann PE teachers i bezwen ganny laprouvasyon sorti dan lekol.

So si zot in fer sa dan vakans, savedir i avek laprouvasyon Minister Ledikasyon konmsi nou menm nou ki pe fer akoz i nou bann partner.

E nou parey ou pe dir nou pour kontinyen avek nou plan devlopman e menm bann lab technicians si mon pa tronpe i annan menm ki ganny sans pour al fer bann pti, bann soz aletranze GIKA dan progranm GIKA zot ganny sans pour zot al dan ITEC zot kapab ganny sa sans osi pour zot al ganny sa exposure enternasyonal.

So nou dan lekol nou koman en Minister nou siport tou nou bann staff be it teachers, be it non-teaching staff akoz zot tou zot anmenn en kontribisyon anver devlopman nou bann zanfan dan lekol, zot anmenn en kontribisyon anver ledikasyon dan lekol ki nou manda as a Minister.

So nou asir zot toultan tou nou sipor e si zot annan okenn, okenn issues ki zot krwar zot pa tro happy avek dan zot lekol, zot pa oule diskit avek zot school management for one reason or another nou kot Minister Ledikasyon nou laport i ouver spesyalman kot mwan mon vwar dimoun tou le semenn.

So si zot annan okenn issues zot anvi met devan silvouple anmenn kot nou akoz si nou pa konnen nou pa pe kapab fer keksoz.

So fer nou konnen met a nou latansyon akoz nou ki zot anplwayer, ok.  So si i annan okenn keksoz parey mon dir silvouple anmenn devan.

Si in pas kot en biro laba pa’n ganny rezourd i annan recourse to the Minister’s office ki mon a vwar li nou ava regarde ki nou kapab fer akoz tou problenm ki i annan, i si i afekte sistenm i nou konsern e nou bezwen fer keksoz avek, nou pa pour kapab les problenm trennen ok?  Mersi Mr Speaker.

 

MR DEPUTY SPEAKER

Mersi Minis, e avek sa nou’n ariv a lafen nou sesyon lo Question Time pour Minis pour Ledikasyon, Devlopman Resours Imen.  Minis mon ti a kontan remersi ou pour ou letan bomaten, malgre ki in en pe long e nou ti ava eskiz ou avek ou Special Advisor Delcy, PS Barallon, Dr Barallon e Dr De Commarmond.

 

MINISTER JEANNE SIMEON

Mersi Mr Speaker, mersi tou bann Onorab pour zot kestyon e osi pour zot kontribisyon.  Mersi bokou.

 

(MINISTER JEANNE SIMEON AND HER DELGATION WAS EXCUSED FROM THE HOUSE)

 

MR DEPUTY SPEAKER

Bon avek sa nou’n ariv a lafen nou Sesyon pour bomaten lo Question Time nou pour adjourn e nou pour re zwenn 2er apre midi.

 

(BREAK)

 

 

MR DEPUTY SPEAKER

Bon, bonn apre midi tou bann Manm Onorab.  Bonn apre midi tou dimoun a lekout.  Nou pou kontiny nou travay lo Order Paper ki devan nou.  E lo nou Order Paper nou annan en seri Mosyon.  Premye se Mosyon par Onorab Waven William ki nou ti’n deza komans fer deba lo la.  Si mon pa tronpe ti le 30 Me e lo lalis bann dimoun ki ti’n lev lanmen, ti annan 8 dimoun enkli en Manm ki pa la ozordi.

E prosennman lo sa lalis, e petet zis pour ed manm piblik sirtou ki pe ekoute, sa Mosyon i lir konm swivan –

‘Sa Lasanble i aprouve pou demann Gouvernman ki i fer li son priyorite pou anmenn en lalit agresiv kont okenn form kriminalite dan pei.’

Se sa Mosyon.  Ti ganny segonder, plizyer Manm ti pe koze.  E alor parey mon’n dir, mon annan plizyer, mon annan omwen 7 Manm ki lo lalis e prosennman pou koze se Onorab Sebastien Pillay, laparol i pour ou.

 

HON SEBASTIEN PILLAY

Mersi Mr Speaker.  Mr Speaker, sa Mosyon ki devan nou i enn ki anmenn nou pou fer bokou refleksyon lo ki mannyer nou pe tret sa size ozordi.  E lo lafason ki koman en nasyon, ler nou pou avans pli devan, ki mannyer nou pou deal avek bann sityasyon ki ganny souleve par sa size kriminalite dan pei, Mr Speaker.

Premyerman, mon krwar ki i enportan ki nou remind nou lekor ki nou, nou en pei demokratik, nou en pei ki imen, nou en Nasyon ki annan konpasyon e nou en Nasyon ki fer a tou pri sa ki nou kapab pour nou konpran sa ki lezot dimoun pe pas ladan.

Mon’n swazir pou mwan komans mon lentervansyon lo sa Mosyon koumsa Mr Speaker, akoz apre ki sa Mosyon in ganny prezante devan Lasanble e apre ki’n annan deba lo la par bann Manm ki’n koze, in annan bokou reaksyon piblik ki mon krwar koman en Lasanble, nou bezwen sezi sa loportinite osi pour nou pa zis siport serten sa bann reaksyon, me pour osi pour nou edike e pour nou kosyonn nou popilasyon lo serten reaksyon ki nou kapab pe pran oubyen ki nou anvi pran an relasyon avek sa size kriminalite, Mr Speaker.

Mr Speaker, nou bezwen toultan mazinen poudir pinisyon pour sa ki en dimoun i fer i bezwen proportionate avek sa krim ki in komet.  E nou pa kapab war nou pe al dan en deba oubyen pe al dan en sityasyon kot nou pe ensit lopinyon piblik pour nou al ver bann Lalwa oubyen al fer bann mezir ki dan li menm i al kont  lespri nou Konstitisyon.  I enportan sa, Mr Speaker.

Mon konnen poudir i annan bokou dimoun ki’n soufer atraver bann aksyon ki’n ganny komet par bann kriminel.  E la mon konnen poudir i annan bokou dimoun pa pou kontan ler mon’n dir sa ki mon’n dir oparavan.  Me lesansyel i reste pou dir ki nou bezwen nou tou regard sa sityasyon dan en konteks pli larz koman en pep ki mannyer pour nou deal avek.

Mr Speaker, mon totalman senpatiz avek okenn dimoun ki santi poudir in nepli an sekirite dan son lakour akoz serten kriminel oubyen endividi pe fer serten aksyon ki rann li si oule, enposib pour sa dimoun annan en lavi sen, en lavi sof dan son lakour.

Parey sa dikton i dir an angle – a man’s home is his castle.  Tou dimoun ti a kontan en sekirite an permanans dan zot lakour.  Me malerezman lefe i reste ki ozordi atraver posibilite oubyen loportinite ki serten dimoun, serten endividi i war, oubyen ki sa kriminel i war, pour li ganny en fason pou fer larzan, i pare pour li antre dan lakour sa dimoun, pour li atak sa dimoun, atak son fanmir, teoriz li e apre pran son byen.

E sa ki zot pa pe realize sa bann dimoun, ki pe komet sa bann aksyon, se ki zot pou pe demann lasosyete demen pou pran bann mezir bokou sever ki egziste ozordi pour deal avek sa sityasyon.

E la, Mr Speaker, i enportan ki ler nou, nou pe regard sa size koman en Lasanble, nou pa zis regard li dan pwennvi emosyonnel.  Nou bezwen osi regard li lo en pwennvi pratik.  Kwa ki permet nou pou fer dan nou pei?  Kwa ki nou bann Lalwa i permet nou pour nou fer?

Me nou bezwen osi koman politisyen, realiz lenpak ki nou menm nou, nou annan lo sa sityasyon.  Mr Speaker, mon dir sa akoz i enportan osi por nou realize poudir ki souvandfwa kan in suit nou, kan in satisfer nou bezwen politik, nou servi sa size kriminalite pour avans nou lakoz ki nou’n annan.

Par egzanp, nou’n souvandfwa vwar lo bann zournal, portre bann endividi konmkwa ki Lapolis oubyen kek Lafors de L’ordre in abiz lo sa bann endividi.  E sa in ganny servi par politisyen pour zisteman anmenn en largiman dan faver sa size Drwa Imen.

Me ozordi, ki nou pe vwar?  Nou pe vwar Seselwa pe annan en diskisyon bokou pli serye lo sa size e ki pou anmenn nou prezan pour regarde nou bann prop pozisyon ki nou’n pran oparavan lo sa size kriminalite, Mr Speaker.

Speaker, Sesel dapre bann Konvansyon enternasyonal ki’n sinyen, ti pran en desizyon pour li move away from sa ki nou apel Death Penalty.

E i enportan mon met sa la Mr Speaker, akoz ozordi nou annan Seselwa ki panse poudir sa i en mezir ki nou devret reentrodwir.  E si nou koman en Lasanble nou al dan sa largiman e nou ensit plis largiman otour sa size, nou pou vwar nou a en moman done pe bezwen fer desizyon lo sa enn.

So, mon krwar i enportan ki nou met sa byen an perspektiv lo kwa egzakteman ki nou, nou bezwen fer koman politisyen pour nou ede rezourd sa problenm.

I byen ki nou’n anmenn sa Mosyon devan.  I byen ki nou pe debat lo la.  Me i osi enportan pour nou osi realize poudir sa bann mezir ki nou, nou pe demann pou pran, i bezwen ganny enplimante par bann Lafors ki egziste ozordi.

E en lot pwen lo sa size Mr Speaker, mon bezwen demann Lasanble si nou santi poudir i fasil pour ozordi Lafors Lapolis fer son louvraz kan bann Zofisye Lapolis pe ganny kritike left, right and center pour tou sa ki arive dan pei.

I byen ki nou kritik Zofisye Lapolis.  Me selman koman en Manm Lasanble, mon bezwen osi remind pep Seselwa ki sa bann menm polisye e polisye ki zot pe kritike i osi bann manman, bann per-d-fanmir, i osi a en moman done i pas atraver sa bann sityasyon difisil.  E pour nou kontinyelman atak Lapolis, pour nou kontinyelman atak bann Lafors lord, sa i undermine zot konfidans dan lafason ki zot fer zot louvraz.

Mon pou donn ou en legzanp tipik, Mr Speaker.  Lo rezo sosyal a plizyer moman, Mr Speaker, mon’n vwar bann kritik avanse ver Lapolis kot Lapolis zot antre en landrwa dan en fason, Lapolis in fer son louvraz dan en fason.

Me mon oule felisit sa dimoun ki li i ti poste en video kot i ti dir poudir bann Zofisye Lapolis i byen fer son louvraz.  Kot i ti monte bann Zofisye Lapolis pe fer zot louvraz.  Se mon krwar, i bezwen annan en balans dan lafason ki nou apros nou kritik anver sa size.  I bezwen annan balans dan lafason ki nou apros nou kritik anver sa size.  I bezwen annan en balans lafason ki nou regard sa size dan son totalite.  Mr Speaker, lefe i reste ki nou bezwen osi pa allow lezot endividi, lezot kriminel pou servi sa palto ozordi kot nou pe blanm tou sa ki pe arive lo bann dimoun ki pe servi drog pour zot pas atraver sa e fer zot bann aksyon kriminel e apre sa bann droger i ganny blanmen me zot, zot kontinyen reste la dan milye, pe fer zot bann aktivite ilegal.

Les mwan klarifye Mr Speaker.  In annan bokou deba dan Lasanble ki’n koz lo sa bann pti menn lapoud ki pe vin vol isi, vol laba, vol isi, vol laba!  Be eski nou’n realize poudir eski probableman i annan en rezo krim organize, byen organize ki pe servi, ki pe servi sa bann endividi zisteman, pour zot menm zot komet bann aksyon kriminel, ki apre ler nou, nou pe blanm sa bann dimoun, ki lo, ki nou dir i lo lapoud, parey dan langaz kouran ki nou dir, i kapab plito bann kriminel ki pli an for, pli for, ki zot, zot pe servi sa loportinite ki egziste ozordi pou komet zot bann akt kriminel?  Eski a en moman done, nou’n mazin lo la?

Eski a en moman done nou’n mazinen poudir pli ki nou reste lo en divizyon politik lo sa bann size, dan milye bann reseler e bann kriminel i enjoy sa, akoz nou pa kapab tonm lo en konsansis lo ki bann mezir ki nou bezwen pran?

E la i anmenn mwan Mr Speaker, pou koz lo pwen fondamantal sa Mosyon.  Sa ki sa Mosyon pe demande, se ki koman en Lasanble, nou zwenn ansanm pou demande ki nou’n pran bann aksyon konkret kont sa ki pe arive an sa konsern kriminalite.

Mr Speaker, mwan mon en dimoun ki avan mon pou kritik Lafors Lapolis, mon pou regard tou sa travay ki i fer dan son totalite.

E napa en dimoun dan Lasanble ozordi isi ki kapab dir poudir tou sa ki Lapolis i fer i mal.  Me nou vwar poudir nou popilasyon kan li i pa konpran oubyen i santi poudir serten keksoz pa dan son faver, i reakte dan en fason ki fer ki i undermine travay ki Lapolis i pe fer.  Mon pou donn ou en legzanp pli senp ankor, Mr Speaker.

Lapolis i fer en travay pou asire ki tou dimoun i met en seatbelt lo zot.  Nou menm annan dimoun ki vin lo rezo sosyal ki demande, akoz ki Lapolis i bezwen vey zot, pe rod seatbelt, dan plas al rod, tay deryer kriminel?  Be sa osi i form par son travay ki i bezwen fer.  Akoz ler ou’n met sa seatbelt, i protez ou kont en aksidan.  So, i annan tout en ledikasyon ki nou bezwen fer, ki nou bezwen travay lo la pour nou eksplike kwa ki pe arive.

Me sa pa vedir, Mr Speaker, ki napa bann lacking an se ki konsern travay ki Lapolis pe fer.

I pa tir lefe ki i annan travay davantaz ki Lapolis i bezwen fer pour anmenn plis konfidans parmi popilasyon lo sa travay ki zot pe fer pour zot zisteman deal avek sa sityasyon, ki bokou dimoun dan popilasyon i santi pe depas zot.

E bann kestyon ki nou bezwen demande se, eski Lapolis pe fer ase pour li angaz avek popilasyon dan bann komite pou vwar si travay ki zot pe fer pe abouti a en rezilta aki demann nou kapab dir nou pe tackle sa size kriminalite dan pei?

Mr Speaker, nou rekour se pa pou pran dimoun pour anvoy zot Montagne Posée pour plizyer lannen.  Bokou pei in war resaman poudir plis nou met en dimoun dan prizon, pli ou annan pli gran risk ki sa dimoun i sorti, i vin en residivis e i osi, i vin en pli hardened criminal ler i sorti dan prizon.

Me sa ki reste enportan, se ki nou bezwen annan en fason osi pour nou deal avek bann sityasyon ki nou pe fer fas avek dan pei.  Mon pou donn ou en lot legzanp, Mr Speaker.  Si en papa pa pey son alimoni, i vwar li dan en case Ankour, i vwar li pe al end up prizon.  Nou vwar poudir nou striktir Zidisyer pa kapab, pa pe neseserman deal avek sa sityasyon.  I pa lafot personn, me i lafot serten lacking ki nou annan, ki nou bezwen adrese.  Kot par egzanp, nou bezwen entrodwir community service, kot en dimoun ki pa neseserman dan prizon, i ava kapab al travay pour li kontribye pour li, zisteman pey sa ki i dwa.

En lot pwen enportan, Mr Speaker, i konsern restitution pour sa dimoun ki li in ganny vole ler sa dimoun in antre dan son lakour.

Ozordi Mr Speaker, nou pa pe vreman adres sa.  Par egzanp, en dimoun in travay, in save son larzan, in anmas tou sa ki i kapab, in aranz son lakaz, in aste son byen in met dan son lakaz.  E en bo zour in al travay li avek son fanmir, ler i retournen aswar, lakaz in kase.  Son byen ki in aste, in fini ganny vole.  E souvandfwa sa bann dimoun dan sa bann ka spesifik pa regannyen zot byen.

Me si nou, nou focus deba lo lezot size apard ki lo sa dimoun ganny en restitution son byen.  Ki mannyer nou fer sa kriminel, sa dimoun ki’n komet sa aksyon anver sa lot endividi ki’n ganny tyonbo, ki mannyer nou fer li re-pey sa endividi pour zisteman sa harm ki in koze?  Se sa lesansyel ki nou bezwen aporte dan sa deba.

Akoz koman en pti popilasyon, i annan mezir ki petet serten gran pei pe pran, e mon konnen bokou bann Lafors Lapolis dan lemonn i baze lo bann gran prensip zeneral.  Be nou bezwen osi vwar dan nou konteks Sesel, ki bann mezir spesifik nou bezwen pran pour nou deal avek sa sityasyon.

Mr Speaker, mon konnen poudir dan sa Lasanble, i annan dimoun ki santi poudir fodre nou annan bann santans pli sever.  Be nou’n vwar ki’n arive ler in entrodwir bann santans pli sever.  Nou’n vwar lenpak ler in entrodwir bann santans pli sever.  Mon pa krwar poudir i annan en MNA la anndan ki pa’n ganny accoster par en manman, enn son zanfan, ki santi poudir son zanfan in komet en pti lofans me i pe la dan prizon pour en kantite letan.

Si nou fran ek nou lekor, nou pou admet pou dir sakenn entre nou in ganny aprose a enn moman done par en dimoun ki’n ganny afekte par sa sityasyon.  I annan nou ki menm ganny aprose par paran ki’n demann nou led pour ki zot zanfan, zot, sa dimoun dan zot fanmir i al prizon.

So, i annan tout en sityasyon la deor ki pe devlope e ki tre byen ki Onorab William in anmenn sa Mosyon pour nou kapab aport sa deba.  Me sa i pa devret en deba ki zis Lasanble i fer.  I devret en deba ki devret angaz popilasyon an antye lo sa size.  Nou devret angaz nou lo nou rol koman popilasyon, lo nou rol koman endividi dan nou kominote, kwa ki nou fer koman endividi pour nou kapab osi annan en kominote deal avek sa sityasyon.  Mon aplodi zefor ki nou annan sa Community Crime Watch ki pe fer.  Me eski sa zefor pe transcend tou bann lezot eleman pour ki ou kapab anmenn maksimonm dimoun dan en kominote ansanm pour travay anver sa?

I senp Mr Speaker.  Si Lotorite ki enkli nou dan sa Lasanble, nou pa fer en keksoz lo sa size, demen nou pou war Seselwa komans pran Lalwa dan zot lanmen.  Nou pou vwar en mouvman pou anmenn vigilantes lo nivo nou bann kominote, e la nou pou war nou dan en sityasyon kot nou bezwen demann serten kestyon fondamantal.  Eski sa dimoun ki’n war en dimoun pe antre lakour en boug, ki’ donn li en bon koud mayos, in fer lofans?

Konmsi tou sa bann kestyon, i bann kestyon ki nou bezwen aborde dan en fason serye akoz deplizanpli ki dimoun i santi zot ganny afekte par sa problenm, dimoun pou bezwen reakte.

Me Mr Speaker, mon pou retourn lo sa pwen – politisyen nou bezwen zwe nou rol.  Pandan plizyer lannen dan sa pei, Mr Speaker, Gouvernman in ganny atake par bann politisyen dan Lopozisyon lo sa size Drwa Imen.

A tou moman ki gard in fer en raid, ki travay en polisye in ganny fer,  nou’n vwar latak sorti dan bann zournal Lopozisyon, dann bann zournal politik ki pe atak Gouvernman lo travay ki zot pe fer.

Me ozordi ki sa in fer, sa in undermine nou bann Lafors ki nou annan.  Whether Lopozisyon i oule ekoute, i oule tande, i pa oule dakor avek, pe enport Mr Speaker, lefe i reste ki sa i en realite.

E i en realite osi ki ler nou pran en portre kot Lapolis pe fer son travay nou met lo Facebook, dan plas demann nou lekor dan ki konteks sa portre in ganny tire.  Nou tou koman Seselwa nou swa vini ‘like’ e nou tyonbo sa bann Zofisye Lapolis nou maltrete pli ba ki later.  Eski nou pe fer zistis avek sa sityasyon?

Mr Speaker, resaman la dan Lasanble nou’n koz avek Minister Ledikasyon e nou pe koz lo zenn pran teaching.  I annan bann acolyte ki lo Facebook, menm la anndan dan sa Lasanble, Mr Speaker, ki a plizyer repriz mon vwar bann post ki ganny mete, si en teacher in deal avek en zanfan kot lekol, sa paran i vini, i maltret sa teacher pli ba ki later, e nou Seselwa, bann frer, ser sa teacher ki ganny maltrete, nou donn lanmen.  Nou donn lanmen san gete ki konteks sityasyon in arive, nou donn lanmen.

Mr Speaker, nou problenm ki nou, nou annan dan sa pei, se ki nou pa oule adres problenm dan en fason striktire Mr Speaker.  Nou pa oule adres problenm dan en fason konkret.

Ki nou oule fer?  Nou sanksyonnaliz tou keksoz.  Nou fer politik avek e apre dan plas anmenn solisyon pour sa problenm, nou kree plis problenm.  Parske nou undermine zisteman bann dimoun ki sipoze fer sa travay pour rezourd sa sityasyon.

 

(Interruption)

 

HON SEBASTIEN PILLAY

Mr Speaker, ou war ki mannyer reaksyon sa bann dimoun i ete? Nou bezwen aksepte larealite Mr Speaker.  Ler en kriminel pou atak, ler en dimoun pou antre se ou, i pa pou swazir ki ou grad, ki ou ran, i pou antre kot ou li. E ler in antre kot ou, i pou atak ou, i annan dimoun ki’n perdi zot lavi.  I pa pou gete ki ou ran, ki ou kouler politik li.

Me ki nou, nou pe war?  Nou pe war poudir serten nou, nou kapab distans nou avek sa problenm.  Serten nou, menm dan kominote, e sa i en realite, nou krwar nou kapab distans nou avek sa problenm.  E sa i abord mwan, Mr Speaker, pou koz lo en dernyen pwen.

Mr Speaker, nou vwar poudir ozordi bokou Seselwa dan bann kominote, i vin pli endividyalis.  Nou regard nou lentere, nou lakour, nou pa fatig nou avek sa group zenn ki nou war dan bor semen pe bwar.  Nou pa fer nou vwazen konnen poudir ki ti annan en group zenn ki ti pe fer letour son lakour boner pandan lazournen.  E pli tar ki arive?

Sa group zenn menm, dan plas atak zis sa dimoun kot zot ti pe vey sa lakour, zot atak lezot lakour.  Nou’n vwar Mr Speaker, lezot dimoun ki ozordi, sitan zot in organize, zot pran en loto zot fer letour, letour Mahé.  Akoz in nepli, mon krwar nou bezwen aret get sa zis dan konteks ‘pti men lapoud la.’

I annan dimoun byen organize ki organiz zot byen ki al veye sa landrwa.  Mon pa konnen ki mannyer ou pou apel li, me i paret.

Akoz zot konnen egzakteman kot pou antre, zot konnen ki mannyer pou kouver akoz ou vwar par egzanp lo rezo sosyal Mr Speaker.  E la i en landrwa kot mon war rezo sosyal i fer byen, kot ou war sa dimoun i menm kouver son figir akoz i konnen poudir i annan tel camera, tel landrwa.  So, tousala Mr Speaker, i bann eleman ki enportan ki nou bezwen factor-in dan sa deba ki nou pe f er ozordi.

So, an konklizyon Mr Speaker, ki mannyer nou pou deal avek sa sityasyon ki nou pe fer fas avek ozordi?  Eski i normal ki si en dimoun i antre kot mwan, ler mwan mon deal ek li, mon’n tap li, mon fer kek aksyon kont li, mon mayos li, kestyon ki nou bezwen pe demande lo sa Mosyon, en?  Eski i normal pou mwan ganny konsidere koman en kriminel mwan osi ler mon’n fer sa?

Ok?  Eski i normal?  Mon koleg in antre Mr Speaker.  Mon konnen in fini koz lo sa Mosyon, me mon konnen li osi i vreman pasyonnen avek sa size.

Eski i normal Mr Speaker, pou ki le en dimoun i vol mon byen, Lapolis in fer son lanket, sa dimoun i war koupab, me sa dimoun i zis al prizon e mwan zanmen mon reganny mon byen?  Mon bezwen kontrer al travay ankor pour mwan kapab re-aste pour li, pour li donn mwan mon byen.  Eski i normal, Mr Speaker, pou ki mon’n travay, mon’n fer mon lakour, mon’n save, mon sorti travay e ler mon antre kot mwan, mon laport in kase, mon lisyen in ganny pwazon, mon keksoz in ganny vole dan mon lakaz, mon zanfan nepli kapab dormi aswar akoz toultan nou pe per pangar dimoun i antre?

 

(Interruption)

 

HON SEBASTIEN PILLAY

Be 40an, ou ki ti met nou ladan Mr Onorab Ferrari.  Ou ki ti komanse sa.  Koudeta ti komans ek ou !  Pa bliye ! pa zwe bliye.  Sa lespri otokritik ti komans ek ou sa!

 

(laughter)

 

HON SEBASTIEN PILLAY

Annou pa bliy nou responsabilite ki nou, nou ti annan anver sa bann size.  Pete mwan, mon pa kapab koz lo 40an.  Be ou, ou kapab koz lo la byen ou!

Mr speaker, sa ki Onorab Ferrari in fer i tre byen, in remind mwan en keksoz ki enportan.  In remind mwan akoz nou dan sa problenm ki nou ladan ozordi.  Nou dan sa problenm ki nou ladan ozordi akoz nou koman politisyen nou pa kapab vin ansanm pour nou sey rezourd sa problenm.  Nou pa pare pour nou vin ansanm pour rezourd sa problenm.  Akoz nou tou, enn i oule pran en kote pou dir 40an ou’n la, ou pa’n fer nanryen, mon pou blanm ou pour tou keksoz.

Lot i la pou dir, be pandan 40an ou’n pas ou letan zis kritike, nanryen ou pa’n fer.

So, mon krwar in ler pour nou vin ansanm e sey rezourd sa problenm as a collective.  Koman en pep nou bezwen stand up to sa sityasyon.  Kot ou war en dimoun obor lakour ou kanmarad, si ou konn sa dimoun, rod en fason telefonn ou vwazen, fer li konnen.

Kot ou kapab fer en bout, ou fer en bout, Mr Speaker.  Me, prezan nou bezwen adres sa size mezir pli sever.  E la mon ti a kontan ki Mover Mosyon ler i pe fer son summing-up lo sa Mosyon, i met an perspektiv deba pli larz ozordi ki nou pe gannyen lo bann Lalwa ki nou annan, lo bann amannman dan bann Lalwa ki dimoun pe demande, ki dan serten sirkonstans mon bezwen konpran en dimoun, Mr Speaker.

Akoz ler en dimoun i plenny son sor, ou bezwen ekoute.  Me lo en lot kote, san ki nou reakte dan en fason emosyonnel lo sa size, nou bezwen osi konpran poudir nou bezwen lozik dan sa ki nou pe demande.

Mr Speaker, mwan sa i en Mosyon ki mon pou vot an faver akoz mon pa krwar pou dir a okenn moman, okenn dimoun i devret santi li dan lensekirite dan son lakour.

Mon pa krwar a okenn moman, okenn dimoun i devret santi li per pou rantre se li, per pour dormi se li.  E si i annan dimoun, i annan lendividi laba deor ki krwar poudir zot in ganny loportinite la pour met tou blanm lo bann dimoun ki lo, ki swa bann pti menn ki lo lapoud, ou whatever, dan en fason pli organize zot pe organiz zot, Mr Speaker.  Mon krwar sa Lasanble i bezwen lans en warning avek sa bann dimoun e dir zot koumsa poudir nou pou pran mezir, nou pou bezwen pran mezir ki protez Lepep Seselwa, ki protez nou sitwayen pou asire Mr Speaker, ki tou dimoun dan sa pei i kapab dormi an pe san ki i bezwen per, san ki i bezwen annan krentif.  Mersi Mr Speaker.

 

MR DEPUTY SPEAKER

Mersi Onorab Sebastien Pillay.  Onorab Jude Valmont.

 

HON JUDE VALMONT

Mr Speaker, mon ti’n deza pran laparol oparavan.  Mersi bokou.

 

MR DEPUTY SPEAKER

Ou’n deza pran laparol?  Ok.  Mon a bouz lo Onorab Sandy Arissol.

 

HON SANDY ARISSOL

Mersi Mr Speaker.  Mon a zis demann en leskiz pour mon lavwa.  Mon krwar en Mosyon sitan enportan, mon bezwen dir en pti keksoz.  Me selman mon ti a kontan dir poudir Onorab Pillay letan in koze in distans li lo sa Mosyon, Mr Speaker.

Parski mon’n tann li koz lo Lapolis, labi lo Lapolis, me i pa’n koz lo kriminalite parey Mosyon pe demann nou.  Son lisyen in ganny pwazon, mon pa konnen si in ganny kado pwazon son lisyen, in koz en pe lo la.

Onorab Pillay in tous en pwen enportan ki mon kontan.  Mon pa ti pou al lwen, me selman mon kontan in tous lo la.  Onorab Pillay in koz lo 40an pase. Onorab Pillay in koz lo 1977, Koudeta.  Pli gro krim ki ti arive Sesel sete zisteman 1977, letan en pti group bandi, en pti group voler, en pti group bandi, en pti group voler, Mr Speaker – en pti group bandi, en pti group voler ti pran pei.

 

(laughter)

 

HON SANDY ARISSOL

Ki zot, zot ankor pe siporte ziska prezan.  Selman zot pe montre ledwa lo Onorab Ferrari.  Be selman Onorab Ferrari omwen parey zot pe dir, ti ladan, in ganny kouraz pour li dir, get sa, sa ki nou ti fer 1977 ti mal, alor annou travay ansanm pour nou kapab rekonstrir nou pei.

 

(APPLAUSE)

 

HON SANDY ARISSOL

Me par kont, parti ki Onorab Pillay i siporte, Mr Speaker.  Pillay ti lo lot kote li, apre in zwenn sa parti lot kote ki ti fer Koudeta 77, alor li prezan i pe siport sa ki dapre li Onorab Ferrari ti fer ki pa ti bon.  E Onorab Pillay prezan li i pe siport sa.

Be sa ki mal avek tousala Mr Speaker, sa ki enportan pour nou remind nou bann zenn lo sa Mosyon Onorab Waven William?  Se ki pli gro krim ti ariv 1977 letan zot ti vol pei, fer krim, disparisyon, entimidasyon, later ti ganny pran, sa ti en pli gro krim ki ti arive.

Dezyenmman, (ou kontinyen bwar delo ou seval ou, relax ou lekor) –  Mr Speaker, dezyenmman, la lo medya tou resaman nou’n tann koz lo zafer Assomption.  I annan en lot leokri la, Assomption.

 

 

(APPLAUSE)

 

HON SANDY ARISSOL

Sa i pou en lot krim sa kont Seselwa sa, sa size Assomption la.  Nou koman en Lasanble, nou pou bezwen vey sa byen akoz Lepep Seselwa deor pe vey sa tre byen.  Size Mosyon Mr Speaker, Mosyon i baze lo krim.  Sa ki mon pe koz lo la se bann krim ki kapab arive kont Lepep Seselwa avek pei.

Prezan, letan Onorab Valmont in koze, i pa’n dir absoliman nanryen li, be selman mwan mon pou remind li en pti gin bann keksoz ki nou kapab adrese lo sa Mosyon ki nou pe koz lo la Mr Speaker.

Parski ozordi sa Mosyon ki nou pe koz lo la i sitan enportan.  Ler nou pe koz krim dan distrik, ki Onorab Valmont pa’n koz lo la ditou, i enportan pour mwan felisit Mr Ernesta ki dan mon distrik.  Mr Ernesta in annan sa group, Latrankilite, Lape – Trankilite ki baze Saint Louis.  Mon bezwen felisit li.  Omwen distrik Saint Louis in komans en landrwa par en zabitan.

Dezyenmman, mon annan osi, Shane Chang-Seng.  Shane Chang-Seng i en zenn ki annan atraver rezo sosyal in ouver en group Community Crime Watch, kot zot annan bann spot kot zot met bann camera.  Bann vwazen i kapab partaz bann spot lo Facebook atraver zot camera kot zot idantifye bann dimoun ki’n antre lo propriyete endividyel bann dimoun, pour zot kapab rod en fason omwen fer keksoz.

Omwen deza nou annan nou 2 zabitan Saint Louis ki’n komans en keksoz pour zot kapab ede avek sa kriminalite ki annan dan distrik, Mr Speaker.

Me selman par kont, krim i vin dan diferan fason li, diferan fason.  I annan premyerman drog, ki ozordi nou’n koz lo la.  E letan nou pe koz lo drog, i enportan pour nou dir, pour eksplike pou dir, Seselwa deor ozordi i fristre avek lafason ki drog pe ganny deal avek, avek lafason ki progranm pe antreprann sa size drog pour bann dimoun ki lo drog.

I enportan pour nou koz lo la sa, pour nou okouran poudir dimoun deor i fristre, Mr Speaker.  E dan distrik Saint Louis i pa en leksepsyon. I annan en kantite drog dan distrik e drog i ede parfwa anmenn krim dan distrik.

Dezyenmman, letan nou pe koz lo krim dan bann distrik, e Saint Louis i enn parmi kot nou annan bokou bann propriyete abandonnen dan distrik.  I annan bann vye lakaz oubyen bann vye building ki soutir plizyer bann naryen fer parey nou kapab apel zot, pour zot ganny en lokasyon, pour zot maske, pour zot desin en progranm oubyen pour zot kapab fer en rezon ki mannyer pour li komet son lo aksyon.  Bann vye building dan distrik ozordi i en problenm sa, sa osi nou bezwen deal avek.  Bann dimoun ki annan zot propriyete, zot pe reste aletranze, be selman zot propriyete i dan nou distrik e personn pa pe okipe.  Alor sa i vin en landrwa kot bann nanryen fer, zot pran li koman en lokasyon pour zot kapab fer rezon lo bann lakour ki nou annan ozordi, Mr Speaker.

Trwazyenmman, ozordi dan nou pei nou annan tro bokou nanryen fer, Mr Speaker.  Tro bokou dimoun i nanryen fer dan nou pti pei Sesel.  Letan ou pas Lari Bazar par egzanp, lala letan nou pe koze la, 2.39 apre midi, si nou al en kou Lari Bazar, nou pou antre dan Lari Legliz parey nou dir, nou annan kot Regis Mein, lo peron.

Ou pou get kantite dimoun ki asize lo peron Regis Mein depi 8er bomaten, pas 4er i lanmenm, pas 5er i lanmenm.  Ki i pe fer?  Nanryen.  Swa i pe bwar, saw i pe fimen, swa i pe mandyan nenport ki dimoun ki pase.  I annan kot Regis Mein ki tonm dan distrik Saint Louis.

Nou annan osi kot Happy Youth Club, anba sa pye dibwa kot tou dimoun i asize ozordi.  Zot kriy nenport ki, zot mandyan, zot bwar.  Sa i bann lokasyon dan distrik ozordi ki’n fer ki lavil Victoria li menm li i en lobstak, i en lannwi pour plizyer Seselwa ki serye, ki pe rod en lavi, ki pe travay, ki desann anvil pour li fer al fer son pti konmisyon.

Alor i ganny sa lannwi avek sa bann dimoun ki nanryen fer.  Tro bokou nanryen fer dan nou pei!  Dimoun ki pa travay, zis zot la.  E mwan toultan mon kontan fer referans lo en gro garson ki reste anler Anse Boileau.  Mon fek pe dir avek Onorab Arissol, tou le bomaten i desann lavil li.  I pa travay li, zis i pase bazar, i mandyan nenport ki dimoun, i harass touris pour demann larzan, sa osi i ede dan krim.

Parski parfwa ou war bann touris zot menm zot per pour vin dan lavil, pour gete kwa ki nou annan dan nou lavil.  Parski ou annan sa bann dimoun ki zis la, nanryen fer, napa plan, napa bi, Mr Speaker.

Sa i bann size ki nou bezwen adrese.  Kot letan mon’n tann Onorab Pillay koz lo Lapolis.  Kot Lapolis zot bezwen pli efektiv dan zot lapros.  En pti pe pli efektiv dan lafason ki zot apros keksoz.

Letan mon lo Lapolis, mon’n kontan letan Onorab Pillay in mansyonnen poudir dan lepase Lopozisyon nou’n kritik Lapolis, sak fwa Lapolis in fer son travay.  Nou koman en Lopozisyon responsab, sak fwa Lapolis i abiz son pouvwar, nou pou bezwen met devan Lotorite dir, zot in abiz zot pouvwar.

E mon kontan ozordi Lotorite in rekonnet sa.  Parski i annan en komite ki pou ganny set up pour deal avek bann labi ki’n ganny fer par bann Zofisye Lapolis, swa bann zofisye dan SPDF pour ki nou annan sa rekour kot dimoun i kapab santi poudir, be get sa, sa in fini, annou efas sa, annou demann serten pardon an relasyon avek tousala.

So, tousala, letan nou pe koz kriminalite dan pei, parey Onorab Pillay in koz lo Lapolis ki ti napa nanryen pou fer ek Mosyon, ler i pe nonm lo Mosyon.  Alor i enportan pour nou adres tou sa bann size ki nou pe koz lo la, Mr Speaker.

Alor Lapolis, parey mon pe demande, i bezwen vin pli efektiv, pli efikas dan son lapros.  Me, fer son louvraz byen san abiz zot pouvwar, san fors zot pouvwar lo piblik.

Mr Speaker, letan mon lo lavil, i annan lavil Victoria ki tonm en pe mazorite dan distrik Saint Louis, Bel Air, avek tou lezot distrik ki konpri lavil.  Ti annan en Manm ki ti koz lo la letan sa Mosyon ti monte an relasyon avek lavil, kot letan i ariv 5er diswar dan lavil, letan mon pe koz lavil, i annan sa bout letan nou sorti kot Mrs Pana Chetty, nou koup semen avek Chez Deenu, nou desann drwat pour nou ariv lo Trinity House kot Traffic Light i ete, i annan sa milye la, kot i annan sa 2 laboutik la.

La i annan lalkol ki ganny vann Mr Speaker, dan lavil, zot annan zot laysenns pour vann zot lalkol.  Me i paret i annan dimoun pe konplent.  I paret ler lalkol i ganny vann ziska apre ler.  Ler 5er i sonnen, parey ti ganny dir par en lot Manm, i annan bann etranze ki vini, i annan bann lezot dimoun ki vini e la i annan en festen ki pase, disturbance tou lannwit la dan sa bout lavil.

E letan mon annan en zabitan ki’n reste dan lavil pour plizyer lannen, sa se lafanmir Meghjee, ki tou dimoun i konnen.  En fanmir ki’n kontribye enormeman dan lekonomi Sesel.  Zot osi zot pey zot taks parey nenport ki Seselwa.  E zot bann Seselwa ki’n kontribye dan lekonomi me malerezman zot, zot in end up reste dan lavil ozordi.

E alor zot, zot santi poudir zot sibir plizyer labi letan in ariv apre ler.  Kantite tapaz, zoure, bann aksyon ki pase dan lavil ki mon krwar, mon retourn ankor ver Lapolis, pour nou vwar ansanm ki mannyer nou kapab fer ki nou lavil li menm i vin en lavil an pe, trankil, pour ki napa bann aksyon anti-sosyal ki pase dan nou lavil.  Sa i fer ki parfwa i ankouraz krim.  Kot letan i annan drog ek lalkol, dimoun i lager, dimoun i komet bann lezot aksyon ki pa agreab, Mr Speaker.

Me letan mon sorti lo lavil, i enportan pour mwan dir, pour mwan met dan latansyon poudir letan nou mont pli o dan distrik ozordi, letan nou get bann landrwa parey Bwa Blan, flat Bwa Blan, bann dimoun i konplent par ski i annan plizyer dimoun ki vin bwar lo zot peron, ki antre ziska devan zot laport pour maske Lapolis pour li vin bwar zot lalkol.

Sa i fer ki parfwa i annan diskisyon.  Letan nou mont pli o, i annan obor lekol Belonie.  Obor lekol Belonie segonder toulezour i annan en stasyon menm dimoun ki debout la.  Letan ou koz avek bann ansennyan kot lekol Belonie segonder, zot dir ou i annan drog ki ganny sirkile la.  Zot vey bann manrmay lekol segonder ki pase.  E letan ou pas kot lekol Belonie, toultan i menm group dimoun ki debout, i annan son tranzaksyon ki pe fer, Mr Speaker.

Letan nou pe koz lo sekirite, nou pe koz lo kriminalite, konnen sa ki enteresan?  Letan Onorab Waven William ti anmenn sa Mosyon, mon rapel son lavan lo medya Nasyonal, nou ti tann bann fermye anler Grand Anse pe eksprim zot dezapwentman anver lafason ki zot ganny vole zot prodwi, zot keksoz ki zot travay dir.  Me selman parfwa Mr Speaker, sa ki regretab letan ou antre dan bazar Sir Selwyn Clarke ki baze dan distrik Saint Louis, ou koz ek bann bazardye zot menm, bazardye i montre ou ledwa, i point lo lezot bazardye e zot dir ek ou se bazardye ki fer fermye soufer.

Parski se bazardye ki aste keksoz vole avek lezot bann voler pour li vann pour nanryen.  Letan sa fermye in travay lasyer de son fron, parey nou dir, pour li ganny son keksoz, se bazardye.  Ozordi letan nou pe koze la, dan bazar, Sir Selwyn Clarke anvil, ki tonm dan distrik Saint Louis, ou annan bazardye ki asize, ki aste mobile vole, ki aste laptop, ki aste lezot keksoz.  Letan ou pase, ou koz ek bazardye, zot montre ou, zot dir ou lekel ki pe fer.

Sa osi i ede pour ki letan sa fermye li in travay dir, in donn tou son kouraz, me se en lot koleg dan bazar menm ki pe aste son prodwi vole.  Parey ti ganny dir oparavan, si napa reseler, pou napa voler.  Sa osi i bann keksoz ki nou bezwen deal avek pour dekouraz voler kontinyelman afekte swa fermye, swa bann endividi, bann lakour prive, parey in ganny dir pli boner.

Mon krwar Mosyon anmennen ozordi i en leokri ki Onorab William ti kriye e Onorab William ti eksprim son dezapwentman senser e i ti servi serten lekspresyon pour montre son lakoler pour ki Egzekitiv i tann nou, i tann sa lavwa ki nou pe kriye ozordi, pour zot fer keksoz, Mr Speaker.

E mwan, mon krwar bann lannen ki pe vini, olye ki nou annan bann tenm ki fay, par egzanp, nou bezwen annan bann tenm ki for, ki adres size ki nou koman en Lasanble nou koz lo la.  Par egzanp, annou dir 2019, annan en tenm ki dir,

‘’Nou pou travay sa lannen, nou pou konbat kont kriminalite dan nou pei.’’

Nou bezwen annan bann tenm serye, bann tenm ki ansanm avek bann Mosyon ki nou’n anmennen dan Lasanble Nasyonal, pour montre Egzekitiv poudir nou, nou serye.  I annan bann tenm ki ganny servi pour montre lakominote poudir Gouvernman i serye, parey nou dan Lasanble Nasyonal, nou serye letan Onorab Waven William pe anmenn en tel Mosyon, pe demann en leokri, pe demann en led e pe rod sipor tou Manm Lasanble Nasyonal pour nou kapab konbat sa fleo kriminalite ki egziste dan tou distrik ozordi san eksepsyon.

Alors lo sa pwen Mr Speaker, mon ti a kontan reasir Onorab Waven William pou dir mwan mon pou donn li sipor.  Parski mon distrik pa’n ganny eparnye avek sa ki konsern krim, menm lezot keksoz ki annan pou fer ek krim, ki drog, ki lalkol, mon distrik pa’n ganny eparnye.

Alor mon osi mon pou lager antoure pour nou kapab kit nou pti pei, e ki nou lavil Victoria i retourn sa lavil kot nou ti konn li byen zantiman, zwaye, kot tou keksoz ti pas ok.  Me pa en lavil kot ozordi in vin en landrwa kot nenport ki devergonde oubyen nenport ki nanryen fer i kapab zis vini pour li komet son aksyon, sa ki i anvi fer, Mr Speaker.

Alor avek sa detrwa mo, Mr Speaker, mon ti a kontan prezant mon sipor avek Onorab William pour son Mosyon ki in anmennen la dan Lasanble Nasyonal.  Mersi Mr Speaker.  Mersi bokou.

 

MR DEPUTY SPEAKER

Mersi Onorab Sandy Arissol.  Onorab Jany De Letourdie.

 

HON JANY DE LETOURDIE

Mersi Mr Speaker.  Bon apre midi tou dimoun.  Mr Speaker, dan sa Mosyon i annan detrwa mo an partikilye ki’n atir mon latansyon plis.  Dan premye laliny, nou ganny sa mo ‘priyorite.’

E dan dezyenm laliny i annan detrwa mo, okenn form kriminalite.  Priyorite Mr Speaker, set akoz sa sityasyon in la pour bokou letan e aprezan i pe depas nou.  Mon pe osi konpran ki loter Mosyon pe fer konpran ki si nou pa anmenn en lalit agresiv ozordi, nou pou war nou, nou pe rekolte sa ki nou ti senmen, ki nou pe semen demen.

Me Mr Speaker, si nou agree ki tou form kriminalite i osi konpri viktimizasyon ek koripsyon, mwan koman en manm lo Komite Anti-Viktimizasyon, mon’n antann ase ka kriminel, tout sord dimansyon ki fer mwan osi dir ki sa ki nou ti semen yer, in osi anmenn sa move rekolt ozordi.  Mr Speaker, i annan bokou rekomandasyon ki’n ganny fer e ki’n ganny dir an sa ki konsern bann ka viktimizasyon.  E nou koman en Komite, nou pe met bokou zefor, bokou lenerzi pour nou omwen esey soulaz en frer ek en ser ki’n ganny viktimize, me o kontrer, nou war nou ki pe ganny viktimize.  I annan bokou ka vol, touy dimoun, vyole, koripsyon, viktimize ki’n arive me ki pa ankor ganny deal avek oubyen ki’n ganny les pase Mr Speaker.

Mr Speaker, in ganny fer sorti ki se Lapolis ki annan Manda pour konbat krim dan nou pei.  Pa zis apre ki krim in arive, me osi koman en mezir prevansyon.

Me Mr Speaker, i kler ki tou sa ki nou’n tande avan par lezot Onorab ki Lapolis i annan pa mal problenm lo zot menm ki alors pa permet zot pour anmenn en lalit agresiv pour ki omwen ti a kapab soulaz sityasyon kriminalite dan Sesel.  Ki nou pe fer Mr Speaker?  Ki nou pou fer plito?

Anfen, la pou premye fwa dan mon lavi, mon dir mon war mwan nou mank en kou nou bann sorsye, mon dir zot retournen.  Akoz lontan letan ti vole, ou ti a vol en fwa, ou pa ti pou vol 2 fwa.  I ti a fer ou reste lanmen e tou dimoun ti a pase bomaten, ti ava war ou.  Pour premye fwa mon war mwan, mon mank sorsye la, mon dir retournen.  Ennler mon dir be bann voler ek bann kriminel, zot telman profesyonnel Mr Speaker, ki, be fer zot vin ditektiv zot menm akoz zot pli malen ki nou bann gard!  Alors zot ti a ganny en dyob, nou pa ti a met zot dan prizon.

Mr Speaker, pour bokou viktim ki enkli mwan, ki pas dan plizyer ka vol ek vandalizm avek son lakour, i pa fer gran diferans pour nou menm si nou konnen lekel ki’n vole.  Akoz nou pa ganny rann sa ki nou’n perdi.  E nou pa kapab ganny zot pour menm pri ki nou ti peye.  Pour li ki pe al dan prizon akoz in vole, be i napa okenn traka li.  Son santans pe mars ansanm ek letan ki ti pe rimann, son dormi i asire e i an sekirite an plis, son manze ek bwar i garanti, e si i malad, i pou ganny tire.  Alors, ki i fer li sa si i al dan prizon?

Ler i a sorti, i a refer ankor parey.  Mr Speaker, eski en dimoun ki’n deza kas lakaz e vole, si i fer ankor sa santans, eski son santans pour triple oubyen i pou ganny kondann plis?  Parski parfwa ou war menm dimoun deor ki pe vole apre ki in fek sorti dan prizon.

Mr Speaker, mon osi konpran akoz ki bann viktim i deside fer zot prop Crime Watch e pran Lalwa dan zot lanmen menm si nou pe dir i pa byen.  Mr Speaker, akoz ler in watch and seen, sa laraz ki bwi anndan li, i pa kapab tenir.  Akoz ou konnen, sa komannman, “Tu ne voleras pas” i fer li “Tu ne tueras pas”.  Se sa ki arive Mr Speaker.  Alors, la si Lapolis pa pe kapab ed li, la i pe ed son lekor.

Mr Speaker, mon ti a byen kontan sa picket fence kot mon reste, e ler mon plant mon bann pye palm, mon asize deor regard ver lanmer, me nepli kapab kontanple sa zoli lanatir.  Akoz aprezan mon pe bezwen fer demars en manman miray an blok, fer demars burglar bar, baro feray e finalman al dan prizon mwan menm!

Mr Speaker, vi ki pri lavi i o, konbyen dimoun ozordi ki pou kapab aktyelman fer tou sa bann keksoz? Aste camera, menm ki en komanter lot kote in dir, konmela camera osi zot kouver, zot anvoy sifon lo camera oubyen zot kouver zot figir!

So, i reste burglar bar ek en gro miray.  Konbyen dimoun ki pou kapab afford sa?  La mon ti a lans en lapel petet, pour dezormen demann Gouvernman pou ler i konstrir bann lakaz, mazin boundary wall ek burglar bars.   Akoz ki bann “poudrers” i bezwen ganny plis proteze zot? Akoz ki zot bezwen ganny plis proteze?  Ki sa fanmir ki li i pe sey fer 2 bout ansanm zwenn, ki li i pa pe kapab abouti dan nanryen?

Nou pa kapab anpes zot ni pike, ni vole, ni zot nou baraz. Me omwen petet nou a kapab anpes zot antre dan nou lakaz.  Petet en Scheme spesyal pour ed bann lakour protez zot lakour, ti ava en nide pour konsidere.

Mr Speaker, pour terminen, mon ti a kontan sinyale ki nou bezwen osi gard nou lizye gran ouver aktyelman.  Akoz i annan bann landrwa ki bann lobze vole in ganny stoke oubyen kasyet.

Mon 2 landrwa mwan ki’n ganny met a mon latansyon.  Me mon pa pou devwale la an piblik.  Mon panse bann Crime Watch e Lapolis ti a enterese pour ganny sa lenformasyon.  Bann reseler, atansyon!  Zonm in vin telman araze parey Onorab William in dir, in ganny ase.  Atansyon sa ki ou pe aste, pe byento pe filmen ou, oubyen pe rikord ou menm!

Dan sa demars pour anmenn sa lalit agresiv Mr Speaker, mon ti a lans en lapel avek tou dimoun dan Sesel, demann tou Lotorite konsernen dan Gouvernman, pou vreman met tou lipye ater e get sa problenm kriminalite fran dan son dan lizye.  E komans trouv bann mezir ek bann aksyon konkret e efektiv.  Mersi Mr Speaker.

 

MR DEPUTY SPEAKER

Mersi Onorab Jany De Letourdie.  Onorab François Adelaide.

 

HON FRANCOIS ADELAIDE

Mersi Mr Speaker.  Bonn apre midi tou bann Manm Onorab e tou dimoun ki a lekout.  Mr Speaker, sa Mosyon pe demann Gouvernman pou fer li son priyorite pour anmenn en lalit agresiv kont tou form kriminalite dan sa pei.  Wi, Onorab William, mon pou kontan ki sa Mosyon pe sorti lo lot kote latab.  E mon osi kontan ki mannyer Loter Mosyon in met lanfaz ler in koze.  Son ton lavwa in eksprim son mekontantman akoz son prop Gouvernman ki i pe siporte pa pe pran sa size o serye.  Savedir, letarzik pe kontribye pour agrav sityasyon.

Mr Speaker, 15 lo 10 pa’n zis liber Lopozisyon pou debout pour zot drwa.  Me in osi donn kouraz laplipar siporter Lepep pour eksprim zot libreman lo lafason ki zot santi.  E sa divan sanzman in ariv osi dan sa Lasanble Nasyonal, ki vin parey en lespri beni ki pe manifeste dan serten MNA Parti Lepep.

Si mon kapab konpare Mr Speaker, i parey La Pentecôte.  Ler mon, ler mon tann Onorab Hoareau koze, Mr Speaker, napa en keksoz ki mon pli kontan.  Konpare ek ler i ti vini avan, mon felisit ou Onorab!

 

(APPLAUSE)

 

HON FRANCOIS ADELAIDE

Mr Speaker, si Sesel in ariv koumsa, i bezwen annan en landrwa ki sa bann move manni in komanse.  Ler mon fer tour d’horizon, mon demann kestyon avek bann ki pli vye ki mwan.  Mon konstate ki keksoz ti komans deteryore ler en group bandi, parey Onorab Arissol in dir, ti antre dan Stasyon Lapolis granmaten le 5 Zen 1977, fer en ta dezord.

Tou ti ganny konfirmen par Msye Faure ler ti demann leskiz tou dernyerman e dir ki i regrete e demann pardon pour sa.  Mr Speaker, avan sa mon’n ganny dir ki Lafors Lapolis sa bann letan, sa bann dimoun aze ki’n dir mwan, zot ti apel zot Gard Larenn.  Personn pa ti oze tous zot, ni finyol zot, ni menas zot.

E zot parol ler zot ti koze, personn pa ti ganny Drwa dezobei.  Ou kas en bouton dan zot semiz, maler!  Ou zet zot kasket, pli move!  Zot pa ti bezwen tay avek personn, me zis zot ti met zot lanmen lo ou zepol e dir “msye mon aret ou e ou pou bezwen raport Kordgard”.  Lafors Lapolis ti sitan ganny respekte e sa ti ede kree en kominote responsab, disiplinen, ki respe i reste primordyal.

Me apre ki sa bann dominer ti pran Lalwa dan zot lanmen, kot sa ki ti napa leksperyans ti ganny mete pou ansarz bann ki annan bokou leksperyans dan mentenir lord ek lape, keksoz ti sanze.  Sa ti dekouraz detrwa zofisye.  Sa ki ti kite, ti kite.  Sa ki ti koze, ti ganny menase, ganny persekite, menm ganny tourmante.

Zot ti bezwen kit pei, swa zot ganny disparet.  Sete a sa moman ki dezord, kriyote disparisyon, viktimizasyon e lezot form kriminalite ti fleri dan Sesel.  En lepok kot Larme ti dikte Lapolis ki pou fer.  En lepok kot mazor e lezot zofisye dan Larme ti marse avek rivolver parey dan ‘Wild Wild West.’  Antre dan diskotek, tap rivolver lo latab e dir,

‘’anmenn wiski!’’

‘’Mon oule tel fanm!’’  Bour rivolver anba lagorz Seselwa pour teoriz Seselwa! Zot ti’n fini pran Lalwa dan zot lanmen.  E sete a sa lepok ki en pti group ti ganny konsidere koman par lao Lalwa, ti fer provizyon pou dir Lalwa i ganny separe an 2 – i annan bann ki par lao Lalwa e i annan bann ki par anba Lalwa.  Lalwa ti pour en group, me en lot group pa ti ganny aplike.  Mr Speaker, vwala sours nou problenm ki pe kontinyen deteryore ziska nou’n vwar nou ariv dan sa sityasyon alarman, e ozordi nou pe kriy ‘o syel.’

Si nou ti annan en Gouvernman ki ti respe, ki ti annan respe pour Lalwa, e kot kantmenm ou piti, en Zofisye Lapolis dan Gouvernman, ou ganny atrape avek en kargezon drog, ou ti ganny deal avek korekteman, zanmen nou ti pou ariv dan tel sityasyon ozordi.

Ozordi ler nou pe tret sa size, premyerman ki vin dan nou latet, se Lafors Lapolis.  Akoz ki nou Lafors Lapolis i dan en tel sityasyon?  Eski sa Gouvernman in vreman valoriz bann travayer Lapolis dan sa pei?

Mr Speaker, eski annan en bon progranm dan lekol segonder ki komans met lentere etidyan pou swazir sa metye nob?  Souvandfwa nou’n tann dir ki si ou pa kapab ganny en louvraz, Lafors Lapolis i la pour anmas ou.

Eski i devret koumsa?  En tel lenstitisyon, a mon avi, i ganny konsidere koman enn vreman enportan.  E sa i devret en priyorite pour Gouvernman met plis resours finansyel kot i kapab atrakte bokou plis zenn avek en bon baz akademik pour konsidere angaz zot dan bann kour pour devlopman dan sa domenn.

Eski bann etidyan i ganny ase ekspoze avek sa metye sitan enportan?  Si pa tro, mon ti a demann Loter Mosyon pour enkli sa koman en propozisyon pour met a latansyon Gouvernman.  Mazin byen, ledikasyon i lakle.

Mon’n aprann ki i annan en pe problenm laba kot Lakademi Lapolis, kot etidyan pe ganny kit deryer, akoz i mank enstrikter dan diferan domenn e mon krwar ki si sa i korek, deswit Gouvernman i devret get ladan.

Mr Speaker, Lafors Lapolis, mon rekonnet ki i annan bokou ki’n ganny fer pou fer ki sa Lafors i vin pli efikas.  Nou’n fek aprouv bidze adisyonnel pour donn zot plis sipor.  Mon pou salye tou bann zofisye ki pe devoue pou fer sir ki lord e lape i renye dan nou pei.

Mon pa pou fer zistis si pa mon rekonnet sa kalite travay dir ki sa bann madanm e zonm dan liniform pe fer.  Nou’n koze, nou’n sosyalize.  Gouvernman i devret fer li en priyorite pou get dan welfare Lapolis.

Lontan dan lepok Kolonyal, welfare gard ti ganny gete.  Barak pour gard ti en incentive, transpor pour grad ti en lot incentive, e sa ti ankouraz zot.  E zot ti reste dan sa profesyon.  Mazin byen, ki en barak dan sak distrik pour Lapolis i deza en deterrent pour bann fouter dezord.

Zofisye Lapolis i viv pli an sekirite.  Akoz ki nou pa fer sa en priyorite?  En sistenm transpor pour zot!  Mazin sa Zofisye Gard ki fek atrap en voler, in menm fer en case pou prosekit sa voler.  Sa voler i ganny large lo bel, i dray son gro loto pour li al se li, i vwar sa menm gard ki bomaten fek sarz li, pe tyake lo bus-stop.  Ki mannyer i apele, Mr Speaker?

Sa menm vander drog ki ganny arete avek sa Zofisye Lapolis bomaten, e in sarz li pour aparet Ankour, i pase dan son gro manman jeep, i arete, i dir, “konstab la en pasaz pour ou, anbark ek mwan.’’  Ki mannyer nou apele sa Mr Speaker?  Pa sanmenm sa ki nou war ki levidans i perdi dan sa pei?

Eski en sistenm transportasyon pour Lapolis pa vin koman en incentive pour sa zofisye vi ki son natir travay i met li a bokou risk?  Lapey e sistenm promosyon, ki Gouvernman pe per pou fer sir latransparans e gard pa war sa koman en sours dekourazman?  Met a dispozisyon Lapolis bann debousman, tel ki labours training aletranze dan diferan field.

Tousala se bann keksoz ki Gouvernman i devret get ladan pour ankouraz Seselwa pou antre dan sa Lafors. E bann ki ladan, reste, pour ki nou ava ganny nou en bon Lafors Lapolis dan lavenir.  Lekipman avek teknolozi i en zouti pour ede dan konbat krim.  Eski pa in ler pou Gouvernman met plis resours ladan?  Konmela en drayver i ganny arete plis ki 5 fwa avek 5 diferan group Lapolis zis pour get son laysenns si i valid.  E sa i ede pour kree plis tansyon ant gard ek piblik.  Eski pa in ler pou annan en sistenm apropriye ki ava rezourd, ede rezourd sa bann problenm?

Mr Speaker, si ou siport Lopozisyon, swa ou siport Parti Lepep, nou tou nou devret ganny gete parey e nou devret annan menm Drwa anba Lalwa Sesel.  Fodre ki sa bann gard i aret travay malis.  Par egzanp, vin fer spot check dan kontour kornis e aret loto dan kontour, vi ki nou konnen sa i en sarz e ou pa devret aret en loto dan kontour.

En lot size ki vize ver gard se ki, zot devret azour avek Lalwa.  I annan bokou bann aksyon ki si zot ti azour e konn byen zot Lalwa, ti pou evite annan en ta problenm.  Par egzanp, en boug pe marse, pe drive, ki kapab vin en hazard pour en lot dimoun, souvandfwa nou’n trouve kot zot menm ganny tape, e ki ou war?  Sa drayver i ganny detenir dan kaso 24erdtan menm ki i pa ti son lafot.

Mr Speaker, lontan zot dir mwan ti annan bann sarz ki pour parey ‘walking vagabond’, ‘walking in disorderly manner’, ‘disturbing the peace.’  Sa ti bann bout, bout Lalwa ki ti fer sir ki ti annan lord dan Sesel.  E si nou kontinyen avek sa bann kalite Lalwa, mon krwar nou pou annan en pe plis lord dan nou pei.

Mr Speaker, en lot pti keksoz ankor ki ede parfwa, ki Seselwa i dekouraze pour donn Lapolis levidans, se laspe konfidansyalite.  Ou fek donn Lapolis, ou fek donn li en detay lo en tranzaksyon, ou non i monte.

E ou menm ou si ou’n war, si ou soz, ou ganny anmase, ou ganny met anndan.  Be tousala i dekouraz dimoun pour envite donn gard lenformasyon e ou war sa bann pov zofisye zot, zot tousel.

E si nou kapab organize e fer sir ki nou fer tou sa bann tranzisyon byen, byensir plis dimoun pou koste avek Lapolis e zot pour donn Lapolis zot sipor pour zot kapab lit kont drog.

Mr Speaker, Onorab Arissol taler in dir, linaksyon.  Linaksyon – lazenes napa ase lokipasyon dan distrik i en lot problenm.  Konbyen fwa nou’n tann CEO Lazenes vin dan sa Lasanble e demande pour ganny plis larzan pour li fer son bann progranm distrik?  Mr Speaker, CEO Lazenes in deza vin Baie Lazare, in debourye, in anmenn li en gro group me solman i pa kapab kontinyen akoz i napa finans.  E la mon ava demann Onorab William, met sa koman en propozisyon – demann avek Gouvernman, donn CEO pour Lazenes en pe plis bidze pour ki zot a kapab fer zot bann aktivite e ede retir bann zenn dan bann zafer lalkol.

Mr Speaker, mon pe lager Baie Lazare pour nou ganny en bout later ki Gouvernman in les abandonnen pour nou kapab fer en Fun Park, pour nou donn bann loportinite biznes, bann loportinite lwazir.

Ziska ozordi mon pa ankor ganny ni en larepons pour nou kapab ganny en vizit, pour nou kapab komans inisye nide.

Mr Speaker, si sa Gouvernman i serye, met a dispozisyon bann bout later avek distrik pour ki nou osi nou ava kapab devlop sa bann distrik dan biznes.  Fer bann dimoun annan sa power pour zot take ownership of zot distrik.

Mon krwar sa i pou en lot fason pour tir sa bann zenes dan lezot bann lenfliyans e ki zot a konsernen dan zot kominote.  Mr Speaker, en lot keksoz ankor – lapoud, drog, kan i ganny donnen?  Tou dimoun pa i konnen, rafal eleksyon kot zot ti mete? Kote zot ti mete rafal eleksyon, drog?

Mr Speaker, tan ki nou annan en Gouvernman, tan, mon repete, tan ki nou annan en Gouvernman ki deside pran son lazenes, i deside pran son lazenes e fer zot, fer sa bann lazenes vin, ki mannyer nou kapab dir sa?  Parey bann dimoun, bann vilnerab, Mr Speaker nou pa pou kapab annan en Gouvernman ki les son lazenes vin vilnerab.  Akoz lazenes se nou batonn-vyeyes.  Nou pou bezwen kapab komans lev sa bann lazenes, donn zot bann bon valer, ensit bann bon keksoz anndan zot!  Pa servi zot zis pour zot ganny pouvwar, pa servi sa bann lazenes zis pour kit zot lo pouvwar.

Mr Speaker, mon konnen mon letan in sot en pti gin.  Pour konklir, Sesel i devret tir en leson dan sa ki pe arive dan nou pei ozordi.  Si nou’n ariv dan sa leta, set akoz i annan en pti group dimoun byen konekte dan Gouvernman, ki zis bat latet Seselwa e fer nou krwar ki koripsyon i en persepsyon.  Kan o fet, zot pe pran larzan Seselwa left, right and center zis pou anbelir zot, zot lekor ek zot fanmir.  An fezan sa, zot fer nou prop pep vin vilnerab, kot filozofi bef dan disab i renye.

Nesans bann geng i vin an legzistans, lespri bandisite i devlope e nou vwar laparisyon tou bann vis ki pa sipoze arive dan en sosyete responsab.  Nou resours i devret ganny mete dan bann landrwa ki pour ed nou pei avanse e fer ki nou pep a vin bann bon sitwayen.

Nou larzan i devret ganny envestir dan nou pep, me non pa dan bann kont personnel aletranze.  Mon quote Mr Speaker, Msye Larose, Minis Larose avan i ti kite i ti dir nou en keksoz li, “Sesel i en min lor ki pe espere pour ganny eksplwate”.  Parey mon kontan konklir, 80mil zabitan ki annan en siperfisi lanmer ek en resours pour nou eksplwate pour nou devlopman, en lanvironnman ; kot bokou viziter i vin vizite, swa envestir, en pozisyon lo map ki ganny proteze kont bokou lefe klima advers, zis mazinen, si sa Gouvernman ti partaz byen larises nou pei, ozordi nou pa ti pou vwar nou dan sa tel sityasyon.

En leson ki nou devret tire dan tousala Mr Speaker – pa zanmen fer dezord dan en sistenm ki annan lord pour ou fer ou pe vin fer pli byen kan ou pe vin get ou prop welfare personnel.

Me avek LDS, nou pou fer sir nou pou siport Onorab Waven William…

 

(APPLAUSE)

 

HON FRANCOIS ADLAIDE

….ki’n ganny sa lafors avek tou sa kouraz pour li demann son prop Gouvernman pour li fer sa koman en priyorite.  Fotespere Onorab, ou Egzekitiv pe ekout ou.  Akoz la i a sorti kot zot e zot a pran sa serye.

Mr Speaker, mon pou siport ou, mon pou siport Mosyon Onorab William avek bi ki nou war en nouvo Sesel parey LDS in toultan prese.  Mersi Mr Speaker.

 

MR DEPUTY SPEAKER

Mersi Onorab Adelaide.  Onorab Clifford André.

 

HON CLIFFORD ANDRE

Mersi Mr Speaker.  Bonn apre midi tou dimoun.  Bonn apre midi tou bann ki a lekout e bann Onorab ki dan Lasanble.  Mr Speaker, Mosyon anmennen par Onorab Waven Willian, Manm Grand Anse, i lir koumsa –

‘’Sa Lasanble i aprouv pou demann Gouvernman ki i fer li son priyorite pou anmenn en lalit agresiv kont okenn form kriminalite dan pei.’’  Mr Speaker, parey Onorab Adelaide in dir, mon vwar sa Mosyon i enn ki tre bon, tre serye e ki i montre nou bokou keksoz.

Premyerman Mr Speaker, i montre nou ki Gouvernman Parti Lepep pa pe pran sa size koman en priyorite.

Dezyenmman, i montre nou ki zot pa pe anmenn en lalit agresiv kont tout form kriminalite.  Sesel Mr Speaker, i en pti pei.

Nou Konstitisyon i fer provizyon ki tou dimoun i ganny menm drwa anba Lalwa.  I osi enportan pour fer resorti ki par ler letan nou servi bann pozisyon pour nou pa respe Konstitisyon i bann krim ki pe ganny komet a en o nivo.

E ki osi fer ki lezot  kalite krim apre i antre.  Alor si nou annan en Konstitisyon, annou nou tou respe sa Konstitisyon.  Annou pa bezwen servi nou pozisyon pour nou fer bann derogasyon anba Konstitisyon kot serten i ganny privilez ki sipoze anba Konstitisyon, me serten pa gannyen.

E ki li i pa ganny, e i napa loportinite pour li anmenn  case Ankour akoz i napa mwayen par ler e alors li i reste deryer e i sibir sa bann konsekans.

So, demann Gouvernman, e nou bezwen onnet –  taler mon’n ekout, letan mon ti pe vini sorti Ankour, mon’n ekoute, mon’n tann Onorab Pillay pe dir ki si nou pa travay ansanm, e nou dir enn, nou blanm enn pour 40an, i pa’n fer naryen, nou blanm lot pour 40an, i dir ou ti la, ou pa’n fer nanryen.

Me Mosyon i kler, Mosyon pe demann Gouvernman.  Gouvernman lekel?  Gouvernman lekel?  Napa Gouvernman LDS, pa ankor vini i pou vini, pe vini.

 

(APPLAUSE)

 

HON CLIFFORD ANDRE

Me selman pour le moman Gouvernman se en Gouvernman Parti Lepep.  Nou bezwen être onnet e fran.

Alors, Gouvernman Parti Lepep, kekfwa mon ava demann Onorab pour amann en pti gin, mete Gouvernman Parti Lepep pour li fer sa son priyorite.

E i enportan sa Mosyon akoz nou pe vwar nou pei pe tonm dan en sityasyon kot, en sityasyon dekadans, kot nou vwar ki i annan bokou, bokou case Ankour.  E mwan koman en avoka, nou ganny bokou bann sityasyon, e mon mazinen i aplik parey pour Onorab Hoareau.  Akoz sanmenm sa kekfwa in sorti lo bann Komite Lasanble, akoz travay i bokou.

So, i montre nou ki poudir bokou travay ki nou bezwen fer e menm si nou a ganny kritik ki dimoun i fer kot nou, me selman sa i nou louvraz.

Nou bezwen fer nou louvraz dapre Konstitisyon, dapre en set Lalwa ki’n ganny mete, ki ti ganny pase par bann Lasanble avan.

Alors, sityasyon i ki kriminalite i pe ogmante.  Nou bezwen fran avek nou lekor.  Si nou fer en statistik, nou pou vwar in ogmante.  Kwa ki’n fer li ogmante?

Eski akoz Lalwa ki mannyer i ganny aplike?  Mwan mon pou dir non.  Lalwa in la pour en bon pe letan.  I annan bokou Lalwa.  Nou pe get Penal Code, in la pour en bon pe letan me sityasyon in kontinyen ogmante.

Eski sa i pa demande kekfwa ki nou revwar, nou reviz Lalwa?  Pour li ariv, mete an konformite avek sityasyon ki nou ladan.  Akoz tou keksoz i evolye.  Lalwa i en keksoz ki dinamik e li osi i bezwen ganny amande o fir amezir.

I enportan osi Mr Speaker, pour nou fer resorti ki Lafors Lapolis, ki sa Lotorite ki sipoze fer enplimantasyon sa bann Lalwa oubyen pran serten Law and Order, zot deal avek Law and Order, zot osi zot annan serten kontrent.

Ozordi nou vwar ki bokou gard, mon ava koz pour Anse Aux Pins akoz mon MNA pour Anse Aux Pins.  Nou annan en zoli Kordgard, nou fer nou en zoli Kordgard.  Me resours imen pour mannye sa Kordgard i at en minimum level.

Lekipman pou donn sa minimum level resours imen ki annan dan Kordgard, i preski zero.  Lotrozour i annan en sityasyon letan gard i arive, i ariv 4 gard dan en jeep, i pran apepre 15, 20 minit pour ariv dan sa sityasyon, ki letan nou ti gete, ti dir nou ki reaction time i within 10 minutes, me selman in pran 15, 20 minit pour arive.

Letan gard i arive, zot tou zot zis dan en vest.  I annan ki dan zot liniform, me selman i annan ki dan en vest kot i met Police lo la.  Alors, si sityasyon i deteryore, gard pou war li i pe bezwen ale, oubyen i pou bezwen taye.

So, i pa apropriye e mwan mon konpran sityasyon par ler ki sa bann polisye i vwar zot ladan.  E ki zot dir ek ou, be si zot bannla pe ek kouto laba, ki mwan mon pou fer mwan?  Konmsi ki mannyer li i pou al deal ek en boug pou dir, chief arete ek kouto, les sa kouto – i pa kapab.  E sityasyon, zot bezwen zot osi annan serten lekipman.

Annou get en pti kou, bokou nou, nou tou ki la nou’n deza fer en pti vizit Dubai.  Ou pase dan semen, gard i annan son pistol avek li, i annan son pistol.  Enn, akoz i konnen ki mannyer i pou respe son pistol.

E sa dimoun ki pase dan semen, nou tou nou konnen poudir Dubai i en landrwa ki vol i lo minimonm, si pa zero akoz bann aksyon ki ganny pran.

E gard letan i pou atrap ou, napa pitye, aksyon i ganny pran.  Letan ou pas Ankour, aksyon i ganny pran, aksyon apropriye i ganny pran.  I enportan pour nou kapab, akoz mon pe fer sa analozi, se ki pour montre ki poudir isi nou bann Zofisye Lapolis i bezwen annan serten lekipman ki pou fer zot earn the respect of the public e osi bann kriminel.

Mr Speaker, Sesel ankor i en pei ki nou annan bokou touris ki pe vini.  E nou’n vwar, nou’n vwar dan lepase kot kriminalite kont touris in ogmante.  Statistik pou montre nou sa – kriminalite kont touris in ogmante.  I pa ki si akoz i kont touris ki nou bezwen deal avek diferaman.

Me selman nou bezwen annan en standar ki fer li apropriye ki nou deal avek sa bann sityasyon letan i arive.

Mr Speaker, lalit – an servant sa mo lalit, i montre nou ki poudir i en batay, e mon pou dakor e Onorab William ki poudir en batay.  I paret mwan dan nou pei tou keksoz i en batay, tou keksoz i en batay.  Ou bezwen bataye pour war lazistis, kan Lalwa i ekri, i dir fer koumsa.  Ou bezwen lager pour ou montre poudir Lalwa i dir ou pa rimann en boug, Lalwa ki dir, Konstitisyon ki dir.

Me selman ou bezwen bataye, argimant enn erdtan pour ou kapab senpleman montre ki poudir pa mwan ki dir, Lalwa ki dir.  E konstitisyon ti fer ganny, Prezidan René, ti annan Prezidan Michel, ti annan Prezidan Faure, ti annan Sef Ziz li menm ti ladan, defen Msye Mancham.

Me ki mannyer ozordi, e mon krwar Onorab William li osi ti form parti, oubyen non, non, Msye, Onorab, bann Onorab ki ti ladan mon pa pou nonm zot non akoz mon kapab manke, kekfwa bann ki ti ladan i a dir mwan i pa ti ladan, bann ki pa ti ladan – me selman i enportan pour nou vwar ki poudir i en Konstitisyon ki’n ganny fer an konsiltasyon, e sa i en Lalwa.

Akoz mwan mon tous lo la?  Akoz i en Lalwa li, Lalwa siprenm annefe dan nou pei, ki in ganny fer.  Akoz ki nou bezwen lager pour nou aplik li?

Nou ava ale, nou ava fer en argiman 15 minit pour montre akoz sa i la.  Me sa i montre ki poudir swa nou bann lenstitisyon pa pare pour li respe bann dokiman legal pour ki, ki sipoze ganny respe, pour li garanti ki poudir nou pei i mars koman en pei ki an pe, ki annord, ki free from kriminalite.

Nou tou nou konnen, nou swe, i ki nou annan en pei ki free from kriminalite.  Me selman nou tou nou konnen, si sa i arive, nou pou annan en kantite dimoun ki pou napa travay.  Gard pou napa travay, avoka pou napa travay, Lakour pou napa travay.  So, tou sa bann dimoun pou ganny fer redundant, epi nou pou war nou avek en to somaz ki ase o, ase eleve.  Me alors, nou bezwen fer sir ki aplikasyon sa bann lareg i ganny met an perspektiv.

Mon pou siport Onorab Adelaide e lezot ki’n koze avan mwan, letan zot in dir ki poudir nou bezwen gete ki mannyer sityasyon kriminalite in ariv lo sa nivo.

Eski akoz serten ler i komet serten lofans, Lotorite i enterfer avek Zidisyer?  Pou dir, li donn li en fine 2mil Roupi, les li – i mal.  Si mwan, Clifford André mon’n komet en lofans, Lalwa i bezwen aplike.  Menm zafer, menm zafer si Onorab Hoareau in komet en lofans, Lalwa i bezwen aplik parey.

I pa kapab annan en distenksyon ant Clifford André avek Onorab Hoareau.  Nou bezwen annan sa liniformite, e se sa, pa vedir ki Onorab Hoareau in komet okenn lofans – non, zis mon pe tir en legzanp ladan.

E se sa, se sa ki pou montre nou ki nou laplikasyon Lalwa, e Law and Order, parey in ganny dir la, demann Gouvernman, ki i fer li son priyorite pou anmenn en lalit agresiv kont okenn form kriminalite dan nou pei.

E si i annan serten dimoun ki letan i komet en krim, li akoz i afilye avek serten dimoun, son tretman i diferan avek sa lot ki napa okenn afilyasyon.

Nou pou toultan annan sa diskord.  E se la kot mon pou dezagree avek Onorab Pillay, letan i dir nou pou bezwen travay ansanm.  I toultan enportan pour en pei annan unity e se sa ki nou tou lede lo kote latab nou’n advocate.  Me selman si nou pe aplik sa Lalwa, ok?

Gouvernman, Zidisyer, i pa devret les li ganny enfliyanse par sa dimoun ki devan li, i pa devret les li ganny enfliyanse par non sa dimoun ki devan li.  I devret fer uniform application of the Law irespektiv lekel ki devan li.  I kapab en, i kapab piti en sef, oubyen i kapab en Sef li menm, me selman laplikasyon Lalwa i bezwen ganny fer.

Mr Speaker, tout form kriminalite dan pei i montre nou ki poudir nou pei i ranpli avek bokou krim.  Ozordi letan mon pe get Anse Aux Pins, mon pran Anse Aux Pins koman en legzanp, Lapolis, NDEA in dir Minster, MLUH, in dir zot pe vin adres bann problenm lo Chetty Flat – parey zot ti dir, zot in adres bann problenm lo Saint André.  Me ki zot pa gete Mr Speaker, se ki zot senpleman migrate the problem.  I sorti la, i sot lot kote – zot pa’n rezourd sa problenm.

Zot in zis fer, ozordi ou pou ale, Chetty Flat in bare ek miray, i annan baro pour antre.  Lo Chetty Flat, statistik pour montre ou poudir sa bann aktivite ki ti pe arive, in redwir.

Eski sa Mr Speaker, in montre nou ki poudir laplikasyon Lalwa in ganny fer?  Get antye dan Anse Aux Pins, senpleman zot sorti zot migrate en lot landrwa e aktivite i sanz pozisyon.  Eski pa in ler pour nou annan en Lafors Lapolis ki pran en holistic approach pour problenm dan pei.  Akoz si ou tir problenm Anse Aux Pins ou anvoy Les Mamelles, ou tir problenm Les Mamelles, ou anvoy Grand Anse, ou tir problenm Grand Anse, ou anvoy Anse Etoile – ou pa’n solve problenm!  Ou pa’n solve problenm, ou pa’n ede solve problenm.

Nou bezwen fer sir ki nou get, mwan mon pe demande, e si sa i demann resours, mon krwar nou koman en Lasanble, nou bezwen donn resours.

Taler mon’n ganny en loportinite pour mwan koz avek detrwa gard avan mon vin isi, e zot in dir mwan poudir sityasyon se ki lanons ki ti ganny fer pour en logmantasyon pour bann gard, me selman sa pa ankor ganny met an aplikasyon.

Sa i fer ki gard i dekouraze pour li travay.  Mon dakor avek Onorab Adelaide letan in dir poudir i bezwen annan serten incentive – transpor, lezot keksoz.  Me selman, gard li menm dan Kordgard i bezwen fer sir ki poudir letan i travay dan en distrik, tou dimoun dan sa distrik i sibir menm tretman.

Letan i pou al aret en dimoun, ou pa kapab dir, mon pou aret enn.  En sityasyon in arive lo en scene, ki’n deza arive ki mon’n bezwen entervenir – lo scene i ariv en serten sityasyon, i enportan pour nou aret tou lede sa dimoun e gete lo investigation lekel ki pou ganny sarze, lekel ki pa pou ganny sarze.

Me si ou ale, 2 dimoun in lager, ou pa konnen gard ou, lekel ki’n tir koudpwen avan, selman tou lede i annan disan lo zot – ou kapab aret zis enn, pa aret lot? La ou pe kree dezord.  Akoz fanmir sa enn ki pe ganny arete, li menm li i pou kree en sityasyon kot i pou ganny met dan kaso prezan.  Plis dimoun, dan plas ou ti’n pran sa 2 dimoun ki ti’n lager, pour ou pacify, cool down sa sityasyon, ou anmenn tou lede kot Kordgard, ou met sakenn dan en cell, ou koz ek zot ou lede, apre ou fer prosedir si zot avoka i vini, i met serten issue devan, ou larg sa bann dimoun lo bail.

So, i enportan ki gard menm par ler, zot pa kree en sityasyon kot i annan serten dezord.  Akoz kriminalite, nou pa pe dir zis vol, mon prezimen letan mon’n ekoute, i pa zis vol, i pa zis drog.  Ozordi i kapab annan dimoun ki dan en lakour, senpleman zot in ganny en pti sityasyon, zot pe tap kanmarad, zot pe fer – e sa i vin en form kriminalite osi.

Avek sa 2 pti mo Mr Speaker, mon oule asir Onorab William ki mwan e zabitan Anse Aux Pins, nou pou donn li nou full sipor pour ki Gouvernman Parti Lepep i fer li son priyorite pour anmenn en lalit agresiv, e tre agresiv si oule, mon ti a propoze, tre agresiv, kont okenn form kriminalite dan nou pei.

Akoz sa pou ed nou pour annan en pei ki stab e zis kot nou tou nou kapab zwir letan LDS i vin o pouvwar.  Mersi Mr Speaker.

 

MR DEPUTY SPEAKER

Mersi onorab André.  I reste mwan zis en entervenan e answit Onorab William li menm i pou fer summing-up.  Nou annan 2 swa – swa nou pran en Break la e nou a retournen 4er oubyen nou kapab kontinyen e fer summing-up la, e nou adjourn pour lazournen.  Ki mannyer zot ti a prefere?  Nou pran en Break?  Nou a pran en Break e nou a retournen 4er.

 

(BREAK)

 

MR DEPUTY SPEAKER

Bonn apre midi tou bann Manm Onorab tou dimoun a lekout.  Nou kontinyen avek nou travay lo Mosyon Onorab Waven William.  I reste parey mon ti anonse avan ,  Zis en entervenan.  Onorab Ferrari avan mon donn laparol Onorab William pou summing-up.  

 

HON JEAN-FRANCOIS FERRARI

Mersi Mr Speaker. Mr Speaker mon ti santi i enportan pran laparol ozordi sa Lasanble lo sa Mosyon ki devan nou.  E pou rezon prensipal pou nou rekonnet travay ki bokou dimoun liniform bokou bann Zonm ek Fanm dan Liniform i pe fer lo sa size kriminalite e dan bann sityasyon vreman difisil.

Mon krwar i enportan konman en parti dan sa Lasanble nou rekonnet e nou ankouraze kot i annan keksoz ki byen.

Mon konmans mon Mosyon mon prezantasyon pou dir Onorab William i pe demann en lalit agresiv kot okenn form kriminalite.

Mwan personnelman mon pa ti pou servi sa mo lalit agresiv.  Akoz mon pa kontan mon pa krwar Lapolis oubyen Gouvernman oubyen Lakour i devret annan en latitid agresiv.

Mon ti ava dir ki mon ti a swete ki Onorab William ti’n demande ki nou anmenn en latitid entelizan.  E dan sa travay akoz pandan plizyer lannen tou keksoz i montre nou ki nou pa’n anmenn nou pa’n atak sa problenm avek lentelizans e avek sa serye ki devret annan.

Parey lo lot kote latab zot kontan dir ki i enportan pou konnen kote nou sorti pou nou konnen kote nou pe ale.  Mon krwar mon ava dir de pti mo pou eksplik en pe kote ki nou’n al mal.

Onorab Pillay in fer referans an 1977 e kote mwan mon ti ete.  Mon krwar i enportan pou dir ki i ariv en moman dan lavi Sesel dan lavi nou pei ki’n en moman douloure en moman pa zoli en moman ki kas Lotorite pei.  E nou’n fini avek en breakdown dan Lord ek Lalwa.  Sa ti an ‘77.

Mon konman en dimoun ki ti a sa moman la dan en fanmir ki yi siport Parti SPUP i pa’n pran mon bokou letan pou mon realize ki sa direksyon kot nou ti pe ale pa ti en bon direksyon.  E mon bann fanmir pa’n tarde osi pou realize pou dir pa ti en bon direksyon ki nou ti pe al ladan.  Pa ti en bon mannyer ki nou ti pe swiv.

E la ozordi ler larestan dimoun pe kit Parti Lepep pe ale.  Mon vwar in annan  enn de zot prezan ki zot pe antre ladan.  E Onorab Pillay li prezan ki pe rantre ladan, bon nouvel se ki napa bokou zot, zot bezwen al fer kongre la an sekre ferm tou laport akoz zot dan problenm.

Me sa i en bon nouvel.  Akoz nou realize pou dir nou realize pou dir mazorite Seselwa in abandonn sa bann prensip ki’n anmenn nou dan en sityasyon difisil.

Enn bann pwen li enportan enn bann largiman pli enportan dan sa refleksyon se ki nou pli gro problenm in sorti lafason ki lepep Seselwa in perdi konfyans dan son Lapolis – in perdi konfyans dan Lotorite.

Sa mon krwar i vreman en keksoz en gran ler listwar pou rekonnet sa dernyen depi ‘77 ziska la ozordi konbyen in fer, i fer 31an.  Ler listwar pou rekonnet sa bout dan nou listwar zot pou vwar pou dir kot Anglais ti’n kit nou avek en lenstitisyon formidab ki ti Lapolis premye keksoz ki Parti SPUP in fer se detri Lapolis.

Msye Rene mwan mon konnen akoz mon’n frekant li i pa ti kontan Lapolis.  Pa ti kontan Lapolis akoz ler Lapolis ti vin aret li pou bann zafer bonm ti i ti ganny  met Ankour e i ti ganny investigate e apre sa zanmen in kontan Lapolis.

E in fer tou pou li detri Lapolis.  O  kontrer in fer in sey fer larme ranplas Lapolis.  Dimoun bann zenn dimoun dan Sesel baze Seselwa i ava etonnen pou aprann ki ler nou ti ganny endepandan ti annan plis kord gard dan Sesel ki i annan ozordi.  Ti annan ti annan plis Cascade.  E la ozordi apre 31an legacy sa Gouvernman se mwens kord gard bann Kordgard delapide tandis ‘bann fasilite militer modern o nivo transpor zot annan, biro zot annan lekipman zot annan be Lapolis in ganny kit deryer.

Sa se pli gro pli gro defet ki mon krwar in arive pou la dernyen 30an e ozordi nou pe anmas konsekans sa latitid vizavi Lotorite Lapolis.

2enm keksoz se en move laplikasyon dan Lalwa.  Souvan Lalwa pa’n ganny aplike Lalwa in ganny aplike depandan ki ou ete, ki ou siporte, lekel ou fanmir, e nou ti vwar en sistenm de pwen de mezir si ou vol en zironmon ou al dan prizon.

Si ou vol 52 bout later ou marse anvil dan gro Lexus.  La i la an rezimen ki mannyer nou ete dan Sesel.  E mon repete dan Sesel ou vol en zironmon ou al dan prizon ou pran 52 bout later ou marse anvil dan en gro Lexus.

La i la prezan ou demann ou lekor akoz sa sitwayen in nepli annan sa krentif pou Lapolis in nepli annan sa krentif pou Lalwa.  Parey Anglais i kontan dir the long arm of the Law – en gran lebra ki vin rod ou kot ou ete laba si ou’n kas Lalwa.

Isi Sesel Lalwa ni en lebra i napa.  Zis dimoun i pase i kapab fer lofans devan kord gard i kapab fer lofans dan Kordgard i kapab fer lofans dan milye lavil i konnen si son kontak i bon i pou sape.

Se sa bann keksoz koumsa ki kas in kas en pe in kas bokou konfyans ki en pep ki bann sitwayen in merit annan dan son Lafors Lapolis dan sa lafors ki merit protez li.

Nou vwar ankor dernyerman, nou’n vwar Prezidan Faure lo televizyon yer swar pe koz lo 100 milyon 100 milyon Dolar ki L’Inde pou donnen e pou al dan bann zafer pou aste bann zarm, bann lekipman militer.  E pourtan se Lapolis ki bezwen lekipman.

Se Lapolis ki bezwen lekipman.  Lotrozour en gard in dir mon zot in gannyen pe en zofisye NDEA ki drug mon’n bliye ki mannyer i apele pe dir mon zot in gannyen bann tors.  Si sa tors i sape i tonm ater en fwa pran zete.  I telman fay.  Donk plito ki ou rod lekipman ki adapte ki bon kalite nou pa pe donnen.

Bann zofisye bann promosyon bomaten mon’n    rakont mon lekel pe dir mon nou ti annan en sef CID mon kapab nonm son non Mr Freminot.  Ki mon pa konn li personnelman me selman in ariv en i ti ansarz CID apre in kite ti annan en Sud Africain ki zot in fer li arete, akoz pou bann rezon ki zot konn pli byen in retourn Sud Afrique apre in retourn ankor pou pran plas en Seselwa.  Konmsi ou vwar pou dir keksoz pa pe al dan sa direksyon ki nou merit annan.

Mon ti anvi akoz lo la Mr Speaker, akoz i enportan ki nou sitye sa problenm ki nou ladan.  E ki  mon ki nou konnen pou dir pou dir se la rasin nou problenm.  Rasin nou problenm, se ler nou annan en pep ki pa per ganny arete par Lalwa.

Zot dir ou dan tou pei i annan kriminel dan tou pei pou annan dimoun i pou kas Lalwa.  Me diferans ant nou pei avek en lot pei se ki nou dan nou pei avek bokou dimoun i konnen zot asire ki Lalwa pa pou kapab fer zot nanryen.  Alors zot kontinyen kas Lalwa.  Tandis dan lezot pei ki ou blan ki ou nwanr ki ou ris ki ou mizer Lalwa i en gran lebra i kapab vin redir ou kot ou ete.  E sa diferans.

E ler en senp dimoun ki ou pe dir li sorti lo pye mang i tande pou dir en dimoun dan Gouvernman in ganny li 52 bout later i pa konpran ou ler ou dir li be i mal sa ki ou pe fer.

Be i mal sa ki mwan mon pe fer?  Be sa msye laba i pa mal sa ki’n fer?  Sa madanm laba i pa mal sa ki’n fer?  Ou  konpran?  Donk se sa se sa ki’n fer in kas sa konfyans.  Me selman i annan listwar, parey mon’n dir i annan listwar.  Akoz nou vwar ki ti annan bokou dimoun ki ti believe dan sa sistenm agresiv pe sanze.  E Onorab Hoareau ou a krwar konmsi i le sanze.

Me ki keksoz pe al dan en direksyon pli enteresan.  Nou konman en parti politik nou rekonnet travay difisil ki bann Zofisye Lapolis i fer.  Me solman nou anvi fer en pe propozisyon.

Pandan sa bann dernyen lannen parey mon’n dir pli boner tou zefor in ganny mete lo larme.  Ozordi i annan en kantite dimoun ki dan liniform ki bann manm SPDF bann manm Lafors Defans.  Ki vreman ou demande bokou dimoun i demande ki zot fer pandan lazournen.  Apart bann zofisye Coast Guard, s nou konnen e nou konman en parti nou’n toultan ankouraz devlopman Coast Guard e nou konnen bann dimoun ki dan Coast Guard zot bizi pe fer travay enportan.

Me bann ki dan limiter bann ki pe vey ansyen Prezidan sa bann dimoun la zot pa kapab ganny redirize ver en travay en travay ki konplemanter ek travay Lapolis.

Nou konnen pou dir par egzanp Sesel i annan Lapolis i provide zonm  ek fanm pou fer static duties pou veye pou vey en Minister pou vey kot lakaz en Minis, pou vey en batiman  Gouvernman, pou fer sa bann louvraz ki zis ou bezwen debout e fer travay statik parey nou dir.

Eski pa ti ava bon dan sa klima kot kriminalite i ogmante ?  Ki nou ava servi nou ava re train e rediriz serten bann zofisye larme dan bann static duties en mannyer nou ava kapab servi tou nou Zofisye Lapolis, tou.

Sa bann dimoun ki pe asize lo zot baz PSSW mon krwar i apele ki pandan plizyer lannen zot in ganny tain pou zot krwar ki Lopozisyon pe vin detrir sa pei.  E zot training sete pou veye pou mobilize ler Lopozisyon i fer rally. 

Me sa bann dimoun in vwar pou dir Lopozisyon pa’n vin detri en pei.  Sa i ti en zistwar.  Prezan in ler prezan ler nou’n fini vwar laverite in ler pou nou tr sa bann dimoun lo sa kan e anmenn zot pou zot fer bann travay prodiktiv pou pei.  Se sa bann mezir koumsa ki nou, nou anvi propoze.

Nou anvi ki Gouvernman i revwar Lafors Lapolis ki mannyer in ganny organize revwar pou dir sa lepok  ti annan bann zot ti kre bann mos zot ti kre bann sityasyon ki p ti egziste.  La prezan ozordi kekfwa Onorab William akoz depi lontan i pe kriye dan son distrik.  Lontan i pe kriye.  E ler zot vini pou Bidze dan Lasanble zot dir pou dir keksoz in amelyore i annan mwens tel vol i annan mwens tel aktivite Onorab William i kriye li.  Dir be Grand Anse i pa’n vwar, kekfwa dan sa ka nou ti a kapab pran redeploy detrwa zofisye Grand Anse Mahé pou kapab asiste fer en pe patrol, se sa ki nou anvi. Nou anvi vwar Lapolis lo patrol nou anvi vwar zot dan kominote, pe angaz zot avek kominote.

E mwan sa si en dimoun dan Mont Fleuri se en prensip dan Mont Fleuri mon’n demande e mon pe kolabore avek Sirentandan Ernesta avek Lenspekter Jean pou nou fer sir pou dir nou annan en pe  boots on the ground.  Me zot osi ot bann zofisye zot dir mon Onorab zot ti a kontan fer plis.  Me solman nou napa ase zonm.  Nou napa ase lekipman nou fer mannyer nou kapab.

Mwan mon ankouraz zot, me selman mon demann Gouvernman, Gouvernman osi pou ankouraz zot ler nou pe ganny ler L’Inde parey en pei zanmi i vini i dir ou mon pou donn 100 milyon Dolar pou en line of credit, pou aste bann lekipman militer ki by the way nou konnen i pa pou arive akoz nou pa pe otorize sa nou.  Sa mon pa konnen kote, kote i sorti, akoz sa i pou bezwen pas devan nou dan sa Lasanble.  Sa bann kalite depans koumsa nou pa pe otorize.  Nou sa ki nou anvi otorize mon konnen pou dir Onorab William pou vot avek nou se pou bann keksoz ki pou efektivman improve lavi nou bann  dimoun dan distrik.  Se sa ki nou pou vot lo la.

E se sa ki nou anvi ki sa Gouvernman ki la i realize pou dir sanz sa focus.  Aret per aret per ki en dimoun i fer koudeta,  koudeta.  Zot vwar en tim koudeta la?  Sa in fini sa lepok.  Sa lepok in fini kot ou bezwen per kot en Prezidan i bezwen mars avek 6 gro jeep larme an ba tou pran San Souci in fini sa lepok.

An tou ka lo nou kote i pa pou egziste sa keksoz.  Donk i en nouvo lepok e nou bezwen bann nouvo metod e nou bezwen bann nouvo fason fer keksoz.

Mon ava terminen Mr Speaker pou dir ki wi kriminalite sirtou bann vol bann petty thieving.  Bann vol avek agresyon kas lakaz en dimoun vol son keksoz ki in travay dir pou li gannyen i vreman en fleo.  I en fleo ki deranz lavi bann sitwayen kot ou konnen ou pe travay ler ou pe travay ou pe mazinen be ki’n arive laba anler, ozordi mon pa’n kapab kit personn kot lakour e sa i vreman, vreman terib.

Me mon konpran Onorab William ler in vin avek sa avek sa sityasyon avek bokou dimoun pe dir avek li zot nepli kapab.

Me pa tou – i pa tou keksoz ki osi mal.  I annan enn de keksoz ki amelyore.  I annan enn de bann keksoz ki bann siny politik.  Par egzanp bann sitwayen ki’n pran sa linisyativ pou zot regard zot distrik, regard zot kominote.   Sa i pozitiv, e mon enn bann dimoun ki kapab dir kot mon reste Au Cap kot mon kapab dir mon reste dan vwazinaz ki vreman tou dimoun i angaze pou zot zet en  koudey lo sa vwazinaz.

E rezilta se napa bokou bann kriminalite, napa preski ditou.  Akoz ler ou vwar pase en dimoun avek en goni oubyen avek en gran kouto ou telefonn lot kote oubyen ou kriy sa madanm lot kote ou dir ou konn li entel ki’n pase la kot pe ale.

So i annan pe ganny fer.  E sa travay i bezwen kontinyen.  Me mwan mon santi ki pli enportan keksoz se pou nou convince nou bann Leaders.  Mon krwar nou Gouvernman pa Onorab William mon ava dir ou onnetman mon krwar pou dir nou Gouvernman pa ankor ase sansibilize.  Ler mon dir nou Gouvernman mon dir sa bann dimoun, anler zot pa ankor ase sansibilize.  Akoz Onor ab William ou napa en PMU  ki pe veye kot ou lakaz ou.  Me sa msye i annan enn kot li.  Savedir li ler ou dir avek li ler ou dir ek li ou konnen i voler me i pa tande.  I annan en PMU sa Minis lakaz.  Prezidan i annan detrwa ankor erezman sa enn ki la i en pe mwens.  I annan bann i annan en platoun larme pe vey zot.

Me ler ou dir li voler menm parey ler ou dir en dimoun ki pa’n zanmen aste larou loto dan son lavi ou dir li be mon pe rod 2 larou loto i pa ni konnen ki pri larou.  Sa bann dimoun ki pe diriz nou pei pa konnen ki degre sa fleo kriminalite i e fleo.  Zot pa konnen.  Zot viv lo en nyaz zot.  Zot pa viv dan milye lavil parey Onorab Arissol in eksplik bomaten, kot i annan tapaz, kot i annan zoure la.  Tousala in pran en pti kwen en pti bout anler lo montanny ok, zot pa konnen zot lwen avek lakominote e zot ganny proteze.  Se sa diferans.

Zour nou bann dirizan pou konpran e en zour i pou arive, me selman i pou’n tro tar pou bokou dimoun.  Akoz ou kapab fer miray.  Ou kapab met barb wire lo miray.  Ou kapab double baro si en zour en boug i le sot sa miray i pou sote sa miray.  I pou vin rode.

Alors nou bezwen nou tou met lespri ansanm.  E nou bezwen met bann mwayen nou bezwen met bann mwayen.  Nou bezwen parey zot lo lot kote latab zot bezwen ler sa Bidze i vini zot bezwen  konnen ki priyorite zot bezwen donnen.  Ler zot Prezidan i ale i al La Chine i retournen, i dir la, la, la lalis mon’n al ek en tant vit la, la ki mon’n retourn avek la 6 proze 100 milyon Dolar.

Zot prezan la demen non demen zot dan Lasanble Zedi zot devret annan en meeting avek Prezidan pou dir avek li msye nou byen apresye ou’n al shopping laba dan L’Inde, nou byen apresye me selman pa sa ki nou pe rode pa sa ki nou pei i bezwen.  Nou pei i bezwen sa, i bezwen sekirite, i bezwen lape dan vwazinaz, i bezwen proteksyon pou sa keksoz ki’n travay dir.  Se sa bann keksoz.

Nou lo sa kote nou pa’n zwenn sa msye nou.  Ler nou zwenn nou zwenn dan en fason enformel, zot, zot zwenn.  Se zot! Responsabilite i lo zot pa bezwen per, pa bezwen per zot in ganny elekte zot.  Zot in ganny elekte apart Onorab Sebastien ki li nou konpran ki li nou konpran konmsi i lo en wayer i kapab anytime i kapab tonbe.  Nou konpran !  ou reste ou trankil ou !  Pangar ou a perdi ou pti bol manze ok? 

Me lezot bann Manm be brave, be brave met sa devan.  Sanz direksyon annou al dan en direksyon ki entelizan ki fer sans e nou pei i ava progrese.

Alors mwan mon anvi raport mon sipor pou sa Mosyon e mon anvi dir avek Onorab William, ki nou tou nou espere lo sa kote ki son lavwa i ganny tande.  Akoz i pe fer tande son lavwa li depi 15 lo 10.  I annan en sanson ki dir fer tande ou lavwa.  Onorab William in ekoute sa sanson i pe fer tande son lavwa.

Me zot tou zot bezwen sant ansanm align zot synchronized zot sant ansanm ‘en sel lespwar pou tou bann zanfan.’  Ok se sa Mr Speaker ki mon anvi dir avek zot.  E mon anvi swet zot kouraz dan sa travay.

E la par egzanp mon ava termin lo la pou dir Sanmdi, Sanmdi zot annan en lot Kongre, ok nou, nou pa pou konnen akoz zot pe ferm tou laport.  Zot pe pous SBC zot pa oule vwar okenn camera.  Nou  konnen zot dan en pe problenm.  Zot annan en pti pe problenm me selman nou konpran zot.

Me ler zot laba anndan antre zot la met sa bann pwen lo latab.  Koz lo sa bann pwen.  Fer mannyer ki zot bann Leaders i konpran s ki dimoun pe dir deor.

E zot ava’n fer en bon keksoz pou zot pei e pou lavenir nou bann zanfan.  Mersi Mr Speaker.

 

MR DEPUTY SPEAKER

Mersi Onorab Ferrari.  Mersi Onorab Pillay.  Mon a donn laparol Onorab Waven William pou ou fer ou summing-up.  Mersi.

 

HON WAVEN WILLIAM

Mersi Mr Speaker.  Mr Speaker s Mosyon ki pe demann Lasanble ki Lasanble i aprouve pou demann Gouvernman ki fer li son priyorite pou anmenn en lalit agresiv kont okenn form kriminalite dan pei.  Mon annan kronm swivan pou dir.

Mr Speaker mon anvi kontinyen par lir kot 2 verse dan Labib sa pli gran liv pou moralite ki ganny trouve dan Amos sapit 5 verse 12 e 15.  Verse 12 mon quote.  ‘For I know many are your offenses and how great your sins.  Oppress to the righteous and take bribes and you deprive the poor of justice in the courts. ‘ Unquote verse 15 Mr Speaker mon quote, ‘Hate evil, and love good maintain justice in the courts.’’  Unquote  

        Mr Speaker mon remersi tou Manm pou konsernen e atantiv avek sor piblik.  Mon repete avek sor piblik.  Wi ek sa sityasyon kriminalite dan pei.

Sa Lasanble i kapab vin sa baton papay deryer Egzekitif par fer sir ki depans ki devret al ver sekirite pep i vreman ganny fer byen.  Komite Ladefans e Sekirite devret ganny mandate par Lasanble pou get an detay stratezi e plan travay pou etablir plan e lape par Lafors Lapolis e lezot Lazans konsernen.  Ki pep e viziter i santi zot lib e an sekirite dan zot fwaye e dan pei.

Mr Speaker mon swete, ki nou zefor Lasanble pa aret ek sa deba, e ki i kontinyen ek bann mezir e aksyon vizib ki pep i vwar pe arive dan pei.

La Mr Speaker mon propoze ki Brans Egzekitif ki konpri Prezidan Larepiblik Cabinet Minis, Lapolis, lofis Attorney Zeneral e lezot Lazans.  Tel parey Komisyon Drwa Imen, lofis Ombudsman parmi lezot ki ansanm zot konsilte pou anmenn bann Prozedlwa ouswa bann amannman e krealite denozour an konsiltasyon avek piblik.  Sa i premye Brans Gouvernman Mr Speaker, ki Mosyon pe fer referans avek pe egzekit enplimant Polisi.

Lezislatif 2enm Brans Gouvernman, nou isi dan sa Lasanble ler sa bann Lalwa i vin devan nou annou fer nou travay byen.  Kot fodre amande avan aprouve.  I nou devwar pou depouy sa Prozedlwa e fer sir ki lentere sekirite lord e lape bann provizyon neseser i antre dan sa  bann Lalwa pou tenir kont a ker konsern piblik Mr Speaker.

Annou pa kit bann trou vid pou protez ouswa fer plezir serten group.  Annou otan posib asir lazistis dan son totalite i ganny promouvwar.

3enm Brans Gouvernman ki fasilit lazistis i tonm e fini avek brans Zidisyer.  I enplik Ziz, Avoka, prosekisyon Seselwa pe espekte lazistis dan son totalite osi dan zizman.  Me pa par bout.  I annan sa nesesite pou revwar lafason ki kalite e sa bon balans dan rann lazistis.  Bezwen annan plis konsiltasyon an sa ki konsern balans lazistis Mr Speaker.

Mr Speaker en Manm Elekte son manda, se pou anmenn swe son elektora devan Gouvernman pou esey trouv en solisyon aprouv Lezislasyon e pou fer sanzman ki neseser pou asir byennet pep.

Mr Speaker dan en mo ki’n ganny servi o konmans letan nou ti konmans debs lo sa Mosyon sa se petty theft.  Sa dan Lalwa pa egziste Mr Speaker, en vol i apel vol i en krim anba Lalwa.

Mr Speaker si en dimoun i reste li zis R25 dan son posesyon pou soutenir li ziska lafen di-mwan ki i leka pou serten fanmir ver le 15 an de sandan larzan i preski fini.  Sa dimoun i ganny vole son R25 moralman.  Annou zize eski  nou rapel sa petty theft ouswa en vol Mr Speaker?

Si en sitwayen i annan li son pye limon ek en pye papay dan son propriyete ki pe pran ka avek pou vann pli tar pou ganny son pti touk lapentir, pey son bis, donn gadyak son zanfan pou al lekol, pey delo ouswa kouran ouswa menm aste en bal siman dan pe fer sa de bout zwenn Mr Speaker, sirtou la ek sa lavi tre difisil.  Kot malgre la sa ti mwenza ki serten pou gannyen ek tax progressive ek sa tandans pri pou monte progresiv ki pou vedir olye antre lo kont pou savings i pou al ver  pri ogmante.

Seryezman eski ou apel sa petty theft?  Mr Speaker Seselwa pou dir ou ki’n ganny vole.  Akoz son byennet in ganny dekale, son drwa in ganny vyole e son rezerv in ganny anrase san son konsantman.  Eski sa viktim pou cool down Mr Speaker?  Ouswa i pou annan en laraz?

Si dan son deep i reste en sel bout pwason sa i ganny vole eski lozikman i apel en petty theft? Eski moralman byen pou ziz sa aksyon konman n pti vol e serten zofisye ziz sa ka konman enferyer.  San vreman konn son valer a sa moman donnen pou sa viktim Mr Speaker.

Eski nou pou kontinyen avek sa latitid e get pti ka  konman enferyer e dir petty theft ler enn nou frer e ser mwen fortinen son drwa i ganny vyole?

Tou Seselwa i merit ganny trete parey anba Lalwa.  Ki i gro ouswa i pti.  Ganny bole akoz ou en gro zans e ki valer i pli o ganny vole akoz ou en malere e ki valer i pli ba pa devret ganny trete diferaman Mr Speaker.  Fodre ki lazistis i ganny asire dan son totalite.

Mon envit nou tou pou demann nou Bondye pou gid nou ek lasazes, pridans e avek konprenezon dan sakenn nou pozisyon gouvernans.  Pou asir piblik sa lazistis dan son totalite pou anmenn ansanm  sa lalit agresiv kont tou form kriminalite ki pe ronz nou pei Mr Speaker.

Nou’n ganny mete la pou nou asir ki sa ki bon e sa ki byen i ganny fer atraver desizyon e aksyon Gouvernman pou sa pep.  Konman Brans Lezislatif nou bezwen demontre atraver deba e pozisyon ki nou fer e pran.

Mr Speaker sa Lasanble serye ozordi avan ki nou pran en vot lo sa Mosyon pa pou kapab Mr Speaker fini avek zis en deba avek en vot.  Depi ozordi sa Lasanble pou bezwen arete sa kalite pratik business as usual zis ki nou byen koze espekte ki vre sanzman pou arive.  Pa devret reste leka Mr Speaker.

Ozordi Mr Speaker mon anvi ki nou Lasanble i montre pep Seselwa ki nou konpran zot sor, par montre ki nou anvi aksyon e solisyon, dan en dele letan konsiderab par Egzekitif pou adres bann sityasyon.  Piblik ki ti pe ekout Konferans De Pres ti antann Prezidan dir ki i konnen ki Compol i konnen ki pou fer.

Sa Lasanble pe dir e piblik pe anvi vwar pou aktivite pou sa bann plizyer Lazans pou vreman promot sa nouvo Lord e Lape ki sa pep pe espekte Mr Speaker.

Atraver sa Mosyon Mr Speaker sa Lasanble son aksyon swivi bezwen pe anvoy en mesaz for e kler ki enough is enough.  Wi Mr Speaker ki enough is enough parey serten zot dir les sa Lasanble abwaye epi pa zot pou trankil e dosil, akoz zot napa ledan pou morde.

Mr Speaker yer swar menm Mr D’Offay dan Sesyon TET-A-TET in dir ek tyermenn Komite COGA ki sa Lasanble pa resanble ki i annan en ledan.  Pou lenfliyans Egzekitif pou delivre dan en dele letan.

Mr Speaker ozordi ek ou permisyon sa Lasanble i bezwen montre ki i annan ledan.  Mon krwar ki atraver sa deba lo sa size santiman ek lemosyon ki’n ganny sorti pa ti zis koze dan vid.  Me bann bon propozisyon ki’n sorti ki kapab ganny konsidere par egzekitif.

Mr Speaker travay i la nou responsabilite se konman ki nou pou lenfliyans Egzekitif pou azir proaktikman poum sorti dan sa zone konfor e vin avek bann aksyon pli konkret.

Mr Speaker lefe ki nou dirizan e tou Manm lo tou lede latab nou’n montre sa konsern, mon pe demann ou e mon krwar mon pe eksprim en swe kolektiv ki sa Lasanble i sorti ek en dokiman rezolisyon lo bann propozisyon sorti dan sa deba Mr Speaker.  Ki sa Lasanble a formil e adopte ki nou adopte pou angaz serye Egzekitif lezot Lazans konsernen pou solisyon e aksyon dan en dele letan agree ek bann parti konsernen.

Mr Speaker ek ou permisyon mon pou tous lo serten sa bann pwen ki nou kapab mete dan sa rezolisyon kronm swivan.

Prenon kont Lagreman Genève ki Sesel konman en Manm i ratifye.  Prenon kont sa Nasyon Ini lo drwa imen ki Sesel i ratifye konmen manm prenon kont sa L’Union Africain ki Sesel in sinyen e en manm prenon kont sa L’Union Africain ki Sesel in sinyen i en manm.

An rekonesan ki sa bann menm drwa in ganny trouve dan nou Konstitisyon pei ki pep Seselwa  ti adopte atraver referendum an rekonesan drwa sak endividi kot i konmanse i fini sa Lasanble i demann Gouvernman, Egzekitif, Zidisyer, Lezislatif pou travay ansanm, pou asir lord e asir lazistis dan son totalite.

Demann Gouvernman e biro Attorney Zeneral pou revwar Prozedlwa kot sivil kot prosedir kriminalite, kot prosedir rann zizman pou donn en balans fairness demann Gouvernman pou revwar Lalwa e ladministrasyon prizon.  Revwar kalite training k pe ganny donnen pou reabilit bann prizonnyen.  Demann Gouvernman pou angaz e siport bann linisyativ, tel parey ‘crimes watch’ pou lede pou konbat kriminalite dan pei.

E la Mr Speaker mon aprann ki zot anvi bouz lo en lot nouvo.  E ki bann Lazans Gouvernman konsernen ki letan sa bann groupman i ganny kontak avek zot ki zot pa ferm laport, me ouver laport pou kapab ganny plis lasistans pou kapab deal avek sityasyon sa ki nou ladan.  Demann Gouvernman pou revwar stratezi travay a la baz e lafanmir pou angaz ek Sosyete Sivil Lotorite Lokal distrik ed fanmir vilnerab pou konsider ranplas serten sa bann Komite dan distrik ek nouvo taskforce pou atak problenm avan i vin pli grav sirtou avek latansyon spesyal pou bann ki pli vilnerab.

Ki sa survey ki pe ganny fer par lofis Sekreter D’Eta pou elimin lapovrete i ganny donnen tou sipor neseser pou ki i ganny fer byen.  Ki a permet Gouvernman adres vreman bann sityasyon vilnerabilite dan sosyete pou adres problenm kot sours Mr Speaker.  Ki sa Lasanble i serye i met an plas mekanizm pou swivre de pre e fer Egzekitif e lezot brans Gouvernman rann kont lo zot aksyon desizyon dan serten dele letan apropriye.

Ki sa Lasanble apart ki en kominike sorti kot lofis Speaker ki sa Lasanble i konsider revwar manda e rol Komite Lasirans dan konteks devlopman ozordi san ki Egzekitif i vwar Lasanble pe enterfer dan son travay.

Ki kopi sa dokiman Rezolisyon si sa Lasanble i aksepte apre ki in ganny konsidere e amande si fodre pou enkli lezot demann apropriye par Komite Lasanble en pi i ganny anvoye kot Prezidan Larepiblik, Sef Ziz, Chairman Nasyonal Lasosyete Sivil, Komisyoner Lapolis e lezot bann Lazans Gouvernman Mr Speaker ki i annan pou fer avek sa bann problenm.

Ki en metod travay i ganny devlope e Egzekitif pou swivre progre sa bann aksyon ki merit e ki kapab ganny fer atraver rezolisyon.

Mr Speaker sa se bann rezolisyon ki á mon avis piblik deor pe ekoute.  Pe tenir kont zot sor ki zot nepli tande.  Zot anvi trouve ki wi ki wi zot a dir ki sa i vreman zot Lasanble ki nou pe ekout zot e ki vreman  nou mean business e pe kree kondisyon pou solisyon e aksyon ganny fer an plis ki sa ki zot pe eksperyanse konmela.

Mr Speaker en terminent mon oule dir ki pandan le moman ki nou pre pou komemor 25enm kreasyon nou Lasanble miltiparti.  E ki travay pou amann nou Standing Order pe pran plas dan sa direksyon annou atraver sa Mosyon evolye parey bann lezot Parlman pe fer mondyal kot zot lenstitisyon Lezislatif pe sanz zot fason travay konman gardyen lepep e drwa imen.

Lasanble en tel Parlmanter pei L’Afrique,     Pacifique, e L’Union Européen, an se moman menm pe diskit lo nouvo rol e dimansyon travay Parlman.  Pou angaz plis sirtou la  ki pei ACP  pe diskit e kree en pozisyon lo sa nouvo lakor partenarya ek L’Union Européen, ki Sesel i en manm deza pou lot letap 2020.  Kot en nouvo lakor pou bezwen ganny adopte pou gard sa Korperasyon an sa de parti an progresyon.

Mr Speaker mon pou demann nou 2 dirizan e tou Manm dan sa Lasanble pou être brave parey nou toultan nou’n ganny dir nou bezwen être brave.  Pou nou fer sa diferans.  E 2adopte sa Mosyon e rezolisyon.  Adopte e pou bouz lo sa lot nivo pou swivre de-pros travay Egzekitif pou solisyon.  Akoz piblik in ganny ase.  Zot anvi sanzman dan nou fason fer.  Annou fer li pou zot.

Yes we care Mr Speaker, wi nou kapab.  E annou fer li pou Sesel ki vreman letan nou pe selebre nou 42enm laniverser Larepiblik dan nou leker e dan nou lespri nou ava annan 4en lazwa e sa lape i a kapab dir ki wi mon kontan Sesel e nou kontan Sesel, si rol e manda Komite COGA i merit ganny revwar, mon demande ki nou fer li atraver sa Mosyon si fodre met plis Manm ki anvi ede.  Annou fer li par adopte rezolisyon e permet bann kontrandi avek Egzekitiv dan bann dele letan par egzanp nou kapab tonm dakor lo 6 mwan sirtou avek sa Mosyon size ki sa Mosyon pe trete dan Komite Lasanble.  Ouver li avek piblik ki a lekout pou swivre pou asire ki keksoz pe bouz dan en bon direksyon.

Mr Speaker la mon ti a kontan refer en pti pe avek manda Ki COGA i annan.  Par egzanp mon vwar ki i annan en bout ki dir ki Komite COGA apart ki travay ki pe fer i kapab ganny mandate swa par Speaker.

E mwan mon pe dir pou dir i devret osi par sa Lasanble.  Akoz si sa i enkli dan son manda mon pe demann ou Mr Speaker ozordi, akoz mon asire ki ou osi tou lezot Manm isi dan Lasanble.  Nou’n koz en kantite, nou’N fer bann zoli diskour.  Me sa pep deor la ki pe ekoute pe ziz nou i dir be wi i annan zoli deba, zoli koze me epi aksyon nou pa pe trouve.

Alors Mr Speaker avan nou pran en vot lo sa Mosyon mon ti a kontan ganny ou pwennvi lo propozisyon ki mon’n met devan.  Akoz Mr Speaker mon pa ti a kontan mon a ti a kontan ki avek s problenm ki dan lespri e i en konsern pou lepep, ki zis nou fini li avek en deba ki nou pa vin avek bann aksyon en stratezik konkret pou kapab permet sa Lasanble vreman swivre travay Gouvernman, e fer sir ki rezilta ki piblik pe espekte nou gannyen.

Mr Speaker mon ti a kontan ganny ou pwennvi.  Mersi.

 

(APPLAUSE)

 

MR DEPUTY SPEAKER

Mersi Onorab William.  Mersi Onorab William e petet zis pou donn mon pwennvi personnel lo la.  Pou mwan Lasanble set en lenstitisyon set en lebra Gouvernman.  I pa form parti Egzekitiv.

Me son travay, son deliberasyon e son pouvwar konman en lebra Egzekitiv i fer ki Gouvernman i oblize ekoute.

Lo en pwennvi legal mon pa asire ki mekanizm ki ou kapab servi pou ou fer sir ki en Mosyon ki pase par Lasanble Nasyonal, i ganny enplimante neseserman par Gouvernman.  Mon pa asire si i annan okenn mekanizm ki egziste ozordi pou fors lebra Gouvernman.

Me mon krwar en Gouvernman ki responsab ki’n ekout bann dimoun ki reprezant popilasyon, ki’n ganny elekte sirtou en Gouvernman ki responsab pou bezwen ekout demann ki reprezantan bann diferan kominote distrik pe met devan.

Parske i dan zot lentere osi pou zot fer sir ki zot, zot ekoute.  Personnelman mon krwar pou dir lafason pou nou met presyon, se pou fer nou pozisyon kler otan ki nou kapab.

E par egzanp ou sizesyon ki nou devret enform lezot brans Gouvernman tel ki Zidisyer oubyen dan Egzekitif bann lezot brans parey Lapolis nou bann Lotorite sekirite.

Mon krwar nou kapab fer en swivi atraver let ki normalman nou fer ki nou anvoy kot konsey de Minis sa mon konnen i ganny fer sak fwa en Mosyon i pase.  Sekretarya i ekrir Konsey de Minis i dir ek li vwala Mosyon ki’n fek ganny pase ozordi apre midi par en mazorite Lasanble.  E nou ti a kontan ou port sa a latansyon Konsey de Minis.

Me petet nou kapab al pli lwen.  Nou kapab osi direkteman pa anpes nou ekrir Komisyoner Lapolis non selman donn li en kopi sa rezolisyon.  Me petet fer en rezimen bann pwen kle ki’n monte dan deba.

Ou kapab antas verbatim par egzanp avek e anvoy kot Komisyoner Lapolis.  Anvoy kot SSU, anvoy kot Militer si fodre.  E pareyman fer pou Zidisyer ou kapab anvoy kot Sef Ziz.

Sa se mon pwennvi pou mon.  Mon krwar finalman presyon i évitable ki pou vin  lo Egzekitiv se atraver se atraver eleksyon evantyelman.  Parske konman Manm Lasanble tou dimoun in ganny elekte.  E ou ganny elekte lo en baz.  Promes ki ou kapab fer en sanzman.

E pareyman Gouvernman ki la ozordi i pou ganny elekte, Gouvernman lavnir pou ganny elekte lo en promes.  E lo son sa ki nou apel sa en track record. 

Alor mon krwar sa dan li menm i pou en presyon parske bokou dimoun in eksprim zot lopinyon bokou dimoun in dir ki fodre fer.  Ozordi dan sa nouvo letap ki nou ladan mon pa krwar Gouvernman i annan en swa pou li pa ekoute.  Mon pa krwar mon ozordi senserman.

Alor mon krwar sa enteraksyon sa deba ki nou pe annan ozordi, i pou definitivman i pe ganny atann par Gouvernman.

Me parey mon’n dir si zot pa pe atann, si zot pa pe ekoute.  I pou annan en konsekans lo zot.  E alor se pou sa rezon mon senserman krwar avek sa ek sa zefor ki nou fer pou kopi zot verbatim kopi zot en pe ek seri nou deba i pou ede fer nou Gouvernman kapab ekout nou.  E enplimant sa ki Lasanble Nasyonal pe demande.

Vwala mon lopinyon Onorab William, mon a permet ou en pti komanter avan nou pran en vot.

 

HON WAVEN WILLIAM

Mr Speaker mersi.  Mon’n apresye ou komanter.  Me ankor mon pou refer avek sa TET-A-TET yer swar e mon santi pou dir kontantman avek zis anvoy sa bann let mon anvi ki akoz ki arive parey ou’n dir ou’n byen dir ou’n byen eksplike ki nou konman Manm Lasanble nou ganny elekte.

E i annan en espektasyon avek nou avek pep deor avek nou.  E mon santi pou dir ki nou kapab fer en diferans.  E taler Onorab Ferrari dan son lentervansyon in dir nou pa pe eksperyanse sa long arm of the Law, napa Lalwa.  Me i pa pe ganny swivre e respekte.

E prezan mon anvi osi ed nou bann Komite Lasanble atraver sa Mosyon, pou vwar par egzanp la i annan plizyer bann sizesyon ki’n sorti bann bon sizesyon sorti kot plizyer bann Manm ki fason nou kapab ed nou bann Komite pou zot kapab pli angaze – enn.

Letan nou ekout koze deor i annan keksoz pa bezwen bokou larzan ki kapab ganny fer.  Me ki ou regarde pa pe ganny fer.  E la nou pa pe akiz personn me nou santi pou dir in perdi en pti pe sa.  Nou anvi ki nou repran keksoz an men, pou nou kapab fer sir     lepep Seselwa i koze ki nou dan brans gouvernans nou pa zis ekoute Mr Speaker.  Me ki nou tande, akoz pep Seselwa i anvi solisyon e i anvi aksyon.  Mersi bokou ki Bondye i beni nou pei.

 

MR DEPUTY SPEAKER

Mersi Onorab William.  Petet zis pou azoute osi parey en pti dan laliny parey Onorab Ferrari ti sizere.  Vi ki zot lo sa kote latab sertennman zot lo kote Egzekitiv petet Leader Government Business zot menm konman bann Manm elekte dan sa parti, zot kapab egzers presyon rezonnab tan ki zot kapab e okenn lenfliyans ki zot annan pou asire ki sa lavwa sa dezir ki pe ganny eksprimen ozordi apre midi sirtou parol konman loter Mosyon, i ganny ekoute.  Mon krwar sa i en lot fason.

Mon a permet en dernyen komanter avan nou ferm deba.

 

HON CHARLES DE COMMARMOND

Mersi Mr Speaker.  Mr Speaker dan sa lespri la ki mover Mosyon pe met devan, mon le fer atansyon en pe keksoz – enn nou konnen pou dir en Mosyon i pa binding lo Gouvernman.

Me selman an menm tan pou mon met devan dan Leaders Forum nou ti tonm dakor ki sak fwa ki i annan en Mosyon malgre ki pa binding ki Lasanble i fer sentez sa Mosyon e i anvoy kot Egzekitiv pou ki Egzekitiv dan relasyon nouvo relasyon travay ki i annan ek Parlman ek Lasanble e ki zot, zot kapab pran serten mezir kot zot vwar sa bann mezir i pou pozitiv sa ‘bann sizesyon rekomandasyon ki sorti kot Lasante i pozitiv pou zot aksyonn lo la.

Mon pa konnen to what extend ki Lasanble pe fer sa.  E  mwan mon ti ava demande alor ki i pa zis en let sa.  Bezwen annan sa bann rekomandasyon.

E mon ti ava sizere ki dan sa bout dernyen bout ki ou’n dir la ki le de Leaders i ganny en kopi sa ki Lasanble i anvoy kot Egzekitiv zisteman pou nou kapab fer la swivi, pou nou kapab rod en fason pou donn en koudmen pou fer lenplimantasyon oubyen aksyon nou osi kot nou vwar keksoz i kapab pozitiv i kapab ganny realize korekteman.

Me an menm tan lo lot bout se ki dan mon bann dernyen koze avek Egzekitiv mon konman Leader Zafer Gouvernman.  I osi sorti kler ki Egzekitiv i oule fer pli byen.  Me letan i vin devan Lasanble pou demann nouvo Minis Lasanble pa aprouve sa osi i en problenm pou ki Egzekitiv, me mwan mon pe dir zot in koze mon’n ekoute mon pe dir ki kote problenm i ete.

I osi bezwen aksyonn-en, aksyonn-en mannyer ou aksyonn-en ou bezwen aksyonn-en avek mendev kalite mendev apropriye e a de kwa.

Alors nou vwar pou dir la osi i annan sa problenm kot Egzekitiv i met devan mon dan mon tête-à-tête ki mon annan avek zot.  Mon anvi partaz sa la konmdir manrmay nou pran sa ,nou met la lo latab mon poz li la.  Mersi.

 

MR DEPUTY SPEAKER

Mersi LGB.  Mon pa pe ouver deba plis ki sa me vi mon’n ganny en Leader pou koz lo sa kote mon permet Onorab Ferrari mon pou ferm deba.  Parske nou bezwen reste lo Mosyon ki nou ete.  Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker sa ki Onorab De Commarmond i fek dir i zis leskiz pou en failure ki zot pa coule aksyon responsabilite pou sa failure.  Mersi.

 

(APPLAUSE)

 

MR DEPUTY SPEAKER

Ok, ok, ok nou pou bezwen aret diskisyon an deor sa Mosyon la.  Mon’n permet en pti gin zis pou nou fer letour pou nou vreman anvi otour sa pwen ki’n ganny, fer par Onorab William.

Le pwen in ganny fer.  In ariv ler pou nou pran en vot lo sa Mosyon.  Mon relir Mosyon.  Onorab William ki dir konm swivan,

‘’sa Lasanble i aprouve pou demann Gouvernman ki fer li son priyorite pou anmenn en lalit agresiv kont okenn form kriminalite dan pei.’’

Tou bann Manm ki an faver le zot lanmen silvouple.  Okenn Manm ki kont?  Madanm Deputy Clerk ou a donn nou rezimen.

 

MADAM DEPUTY CLERK

Mersi Mr Speaker.  Bonn apre midi tou bann Manm.  24 Manm in vot an faver sa Mosyon.  E personn kont.  Mersi Mr Speaker.

 

MR DEPUTY SPEAKER

Mersi Madanm Deputy Clerk.  Savedir 24 in vot an faver sa

Mosyon i pase.  Ki nou pou fer se anliny avek sa ki nou pe dir Onorab De Commarmond byensir nou pou ekrir en let kot sekreter konsey Minis pou donn li.

E mon napa problenm ki en kopi sa bann rekomandasyon en kopi korespondans i sorti i ganny share parmi bann Leaders sa i pa en problenm ditou.  In toultan ganny fer by the way.  In toultan ganny fer.  E non i ganny ekrir me solman petet pa ti’n ganny kopi.  Me nou ava fer ou ganny en kopi sa bann korespondans.  So …

 

(Interruption)

 

MR DEPUTY SPEAKER

Eski en point of order?   Oubyen ….

 

(Mic Off)

 

MR DEPUTY SPEAKER

Point of order.  Ale mon ava permet ou zis en point of order. 

 

HON SEBASTIEN PILLAY

Mersi Mr Speaker.  Come down Onorab.  Mr Speaker mon krwar nou’n ariv a en lenpas kot i konsern ki mannyer lasanble i fonksyonnen vizavi Egzekitiv.

Mon propozisyon – (ekoute ou ava konn en keksoz Onorab)  Mon propozisyon ki mon ti le fer se ki vi ki COGA i deal avek bann Government Assurances ki ganny fer avek Lasanble.  Me nou napa en striktir an plas ki deal avek bann rezolisyon Lasanble ki anver Egzekitiv, why not ki dan meeting ABC avek le de Leaders nou tonm lo en Lagreman ki nou form en Komite nou form en Komite non peyant ki nou ava met bann Manm lo la.  E sa Komite i ava aswiv lo bann rezolisyon ki al ver Egzekitiv.  That’s en propozisyon.  Mersi Mr Chair.

 

MR DEPUTY SPEAKER

Any way i en propozisyon ki ganny fer.  Mwan mon pa krwar petet nou devret refer travay COGA ki deza en Komite.  So mon krwar nou’n ariv a lafen nou travay pou ozordi.  I preski 5er mon a permet dernyen parol Onorab Ferrari.

 

HON JEAN-FRANCOIS FERRARI

Onorab Pillay son propozisyon i enteresan.  Me i annan meeting Komite Santral i pe rod en Komite, i annan en Komite Santral laba Sanmdi !

 

(laughter)

 

HON JEAN-FRANCOIS FERRARI

Eksplik Komite Santral sa ki nou pe rode.  Sa ki i oule.  Akoz laba ki bann Leaders i ete.  Eksplik zot Sanmdi.

 

(laughter)

 

HON JEAN-FRANCOIS FERRARI

Mersi.

 

HON SEBASTIEN PILLAY

Me nou’n anvoy en lenvitasyon pou Onorab Ferrari kontrer i pe vini Sanmdi li.

 

MR DEPUTY SPEAKER

Ale annou retourn lo nou travay ki devan nou lo Order Paper.  Parey mon ti eksplike bomaten i annan 2 Mosyon ki reste.  Mosyon pou Onorab Terence Mondon nou pa pou kapab pran li sa semenn parske i pa dan pei.

Alor demen bomaten 9er, nou ava pran Mosyon par Onorab Jean-Francois Ferrari.  E nou pou adjourn alors ozordi ziska demen 9er.

 

(ADJOURNMENT)