Home » Verbatim » 2018 » Verbatim Tuesday 17th April, 2018

Verbatim Tuesday 17th April, 2018

NATIONAL ASSEMBLY OF SEYCHELLES

 Tuesday 17th April, 2018

 The Assembly met at 9am

 National Anthem

 Moment of Reflection

 Mr Speaker in the Chair

 

MR SPEAKER

Bonzour tou Manm Onorab e bonzour tou manm piblik ki a lekout e pe swiv deba Lasanble Nasyonal.  Bomaten avan nou konmanse, mon annan 2 Manm ki mon’n ekri e mon’n demann zot pou fer en apology to the House.  Mon remarke ki Onorab Sebastien Pillay i enn ladan e absante e i lo Misyon aletranze.  Dezyenm Manm ki mon’n ekri se Onorab Audrey Vidot.  Alor mon ava donn ou laparol  Onorab Vidot.

 

HON AUDREY VIDOT

Mersi Mr Speaker.  Bonzour Mr Speaker.  Bonzour tou Manm e tou dimoun ki a lekout.  Mr Speaker dernyen Sitting Merkredi pase a 3 repriz mon ti’n lev mon lanmen konman en Manm pou mwan koze lo deba anmenn en Mosyon par Onorab De Commarmond.  E ler mon ti pe kit Lasal ankor mon ti pe sey dir ou ki mon’n demann permisyon pou mwan koze ou pa’n les mwan e ou ti’n dir mon poudir mon Leader in walkout.  E mon konnen mon’n … ou lotorizasyon, mon’n met on mon mic e pou sa mon ava apologise.  Mersi.

 

MR SPEAKER

Mersi Onorab Vidot.  Apology accepted.  Mon annan ankor kominikasyon pou mwan fer, eski i annan pou fer avek ou pe raise en point of order Onorab Ghislain?  Mon pe fer communication from the Chair les mon ava  fini avan.

Bon, dezyenmman mon pou adres sa kestyon koup lapey.  Leader Lopozisyon ti’n fer sorti ki mwan mon bezwen regarde e i ti enplore ki lapey bann Manm ki’n walkout pa ganny koupe.

Mon pa ti fer en desizyon lo la akoz mon ti anvi regarde egzakteman kwa ki Lalwa i dir.  Mwan, mon osi i pa mon lentansyon, mon pa anvi ki nou fer sa ki nou egzers bann Lalwa rizid koumsa.  Me apre ki mon’n vwar Lalwa National Assembly Emoluments Act 1993 e ki ti ganny amande an 2007 e i ti fer provizyon ki ler  en Manm i absante without the leave of The Speaker, ki son lapey i ganny koupe par R1000 e Speaker Herminie sa lepok in egzers  sa Lalwa a plizyer repriz.

Parey mon’n dir mon ti a swete ki mon pa ti ava dan sa pozisyon pou mon fer sa me si mon akt otreman savedir mon pe al kont Lalwa, mon pe akt kont Lalwa.  Dapre Lalwa ki mon  bezwen adere bann Manm ki ti  walkout semenn pase zot lapey i ganny dezormen koupe par R1000 a leksepsyon Onorab Basil Hoareau ki pa ti prezan ler sa walkout ti ganny staged.

So vwala,  vwala mon desizyon ki mon’n pran.  Parey mon’n dir i pa en desizyon  ki fasil me Lalwa i dir koumsa.  Me sa ankor dan sa  sizyenm Lasanble kot nou pe reviz bokou  bann keksoz ki konsern bann Manm,  I’m sure nou Standing Orders Committee osi i ava osi regard sa Lalwa ki diriz en pti pe kondwit bann Manm Lasanble.

Ok so vwala mon pozisyon lo la.  Avan nou kontinyen  nou Biznes mon ava donn la parol Onorab Ghislain.

 

HON CHANTAL GHISLAIN

Mersi Mr Speaker.  Mr Speaker parey mon’n dir mon ti le raise en matter of privilege anba Order 36 nou Standing Orders.  Mr Speaker mon oule raise sa matter of privilege an relasyon avek mon drwa pou koze e partisip dan deba konman en Manm Lasanble ki ganny proteze anba Lartik 102 (1) nou Konstitisyon – ok?

Mr Speaker dan dernyen sesyon Lasanble Merkredi le 11 Avril 2018 mon ti’n lev mon lanmen pou mwan endik ou Mr Speaker ki mon ti anvi entervenir lo sa 3 Mosyon.  Apre ki mon ti’n lev mon lanmen e mon ti’n menm gard mon lanmen anler, ou Mr Speaker ou pa ti donn mwan drwa koze me plito ou ti re donn Onorab Leader Lopozisyon drwa koze menm si i ti’n deza koze oparavan, e apre donn laparol Onorab Leader of Government Business mover Mosyon pou fer son Right of Reply.

Efektivman Mr Speaker ou ti pe ferm deba lo sa 3 Mosyon e ou pa ti pe les okenn Manm enkli mwan drwa pou koz lo sa Mosyon.

Apre ki deba ti’n ouver lo sa 3 Mosyon ti annan zis de Manm Onorab Ramkalawan e Onorab Sebastien Pillay ki ti’n koz lo sa Mosyon.  An dot mo dan sa Lasanble 33 manm selman de Manm ki ti’n partisip dan sa deba.

Mr Speaker mon’n santi ki mon drwa ki ganny proteze par Lartik 102(1) nou Konstitisyon ki Lalwa Siprenm nou pei pa’n ganny respekte par ou Mr Speaker avek tou respe Mr Speaker.

Lartik 102(1) nou Konstitisyon i pli for ki nenport ki dimoun ki esey servi son Lotorite pou anpes en dimoun koze e i pran  tou presedans lo tou provizyon nou Standing Orders.  An dot mo nou  pa kapab servi en provizyon  dan Standing Orders pou enterfer avek drwa koze en Manm dan Lasanble ki ganny donnen par Lartik 102(1) nou Konstitisyon.

I mon swe konman en Manm sa Lasanble ki mon drwa koze e partisip dan deba i ganny  respekte.

Apre tou nou tou isi dan sa Lasanble avan ki nou ti pran  Lofis konman en Manm lasanble Nasyonal nou ti pret serman pou prezerv, protez e defann nou Konstitisyon.

Mon ti ava apresye Mr Speaker lo la baz sa bann keksoz ki mon’n dir ki ou donn mwan loportinite pou adres sa Lasanble lo sa 3 Mosyon.

E Mr Speaker anfen mon ou le osi o non Lasanble Nasyonal prezant mon leskiz avek madanm Luciana Lagrenade ki ti la avan dan Lasanble ki nou pa’n menm kapab envit omwen pou dir li en pti bonzour.  Mersi Mr Speaker.

 

(APPLAUSE)

 

MR SPEAKER

Mersi Onorab.  Onorab ou matter of privilege mon’n ekoute, mon’n note e mon  pou fer mon Ruling deswit.

Bon swivan prezantasyon Mosyon par Onorab De Commarmond konman Leader of Government Business, deswit Leader Lopozisyon ti fer son Statement ti’n fer pozisyon parti kler.

Apre sa Onorab Ferrari apre ki’n annan serten lesanz Onorab Ferrari in move en Mosyon ki anba Standing Orders i annan tou drwa.

Ler ou fer referans avek Lartik 102 Konstitisyon, i vre ki i donn drwa bann Manm pou eksprim zot koze. Me nou osi tou bezwen mazinen ki nou Standing Orders i pa al kont Konstitisyon.

Nou Standing Orders i sorti dan Konstitisyon.  Wi i posib i annan plizyer keksoz ki pa, ki pa annord ozordi dan nou zour e se sa rezon ki Standing Orders Committee pe fer en review total.

Me nou pa ankor fini me nou swe se ki par laniverser Lasanble 25an an Juillet nou a’n kapab fini e nou a’n  kapab pibliye.  Sa bann issues osi tou i pou ganny adrese.  Me antretan nou ankor pe akt lo Standing Orders 2009.

Ler Onorab Ferrari in move son Mosyon, son Mosyon in segonde e apre ki Onorab Basil Hoareau in entervenir mwan konman Speaker mon’n adjourn.  Mon’n adjourn akoz anvi parey Standing Orders 23(1) i dir, i posib ki i annan lentansyon ki mazoriter pe abiz lo minoriter.  So mon’n servi sa Lartik 23(1) pou adjourn pou donn sans  konsiltasyon.

Ler nou’n retournen lo floor keksoz in sanze, mon’n vwar ki ou’n lev lanmen e Onorab Audrey Vidot in lev lanmen me diskisyon ti pe ganny fer ant le 2 Leaders.

E ler lo kote LDS lopozisyon in mentenir son pozisyon mon santi ki mon’n pran en pozisyon drwat omwen mon’n ofer mover Mosyon Leader of Government Business the Right of Reply; akoz sa Mosyon ki mon ti’n met on hold move par Onorab Ferrari ti’n fini fer provizyon anba Standing Orders pou pran en  vot.

LDS ti’n fini dir zot pozisyon i kler e napa okenn lezot Manm ki pou koze e nou bezwen move pou sa Mosyon pou pran en vot.  Se sa rezon ki mwan mon’n donn laparol omwen ki mon  pa ti oblize fer li me omwen mon ti donn laparol Leader of Government Business pou li omwen fer son Right of Reply.

Me nou konnen ki’n arive apre, kwa ki’n swiv.  So mon respekte ou drwa e  vwala mon ruling ki mon’n fer se ki apre sa walkout Onorab Leader Zafer Gouvernman in forfeit son drwa pou li reponn e la bomaten mon bezwen move the next step kot mon annan en Mosyon ki mon’n segonde ki mon’n met on hold e mon bezwen move pou nou kapab pran desizyon lo sa trwa Mosyon ki Onorab De Commarmond in met devan Lasanble.

So vwala mon Ruling.  Nou pou napa ankor deba.  Deba pa pe ouver e nou pou al direkteman pou nou fini avek biznes ki nou ti’n konmanse semenn pase avan ki nou al lo Order Paper normal.

So swivan Mosyon move by Onorab Ferrari, segonde par Onorab Afif ki demande ki nou pran en desizyon lo sa 3 Mosyon move par Onorab De Commarmond  mon ava demande ki Lasanble i pran en vot lo premye Mosyon ki lir konm swivan;

‘In accordance with Article 69(2) of the Constitution, I move that the National Assembly approves the nomination of Mrs Luciana Chantal Lagrenade to be appointed as Minister by the President of the Republic. ‘

 

(Mic Off)

 

MR SPEAKER

Ou le…wi..ok, ok, wi nou pa ti ankor pran en vot.  Mon ti met sa vot on hold.  Mon ava zis demann Onorab Ferrari pou repet son Mosyon e move pou byennet piblik deor e apre nou ava move.  Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon ti a kontan anba Order 23 that you now put the question on vote to close the debate on these three Motions.  Mersi.

 

MR SPEAKER

Mersi Onorab Ferrari.  Okenn Manm ki segonde.

 

HON AHMED AFIF

Mersi Mr Speaker mon ti a kontan segonn sa Mosyon.

 

MR SPEAKER

Mersi Onorab Afif.  Lo sa Mosyon move par Onorab Ferrari nou kapab pran en vot.

Tou Manm ki an faver?

Okenn Manm ki kont?

Madanm Clerk.

 

MADAM CLERK

Mersi bokou Mr Speaker.  Mon’n rikord 18 Manm an faver e 11 kont.  Mersi.

 

MR SPEAKER

Bon savedir Mosyon in ganny aprouve alor nou ava move pou nou pran en vot lo sa trwa Mosyon. Mon re lir ankor premye Mosyon ki Lasanble pou pran en vot lo la.

‘In accordance with Article 69(2) of the Constitution I move that the National Assembly approves the nomination of Mrs Luciana Chantal Lagrenade to be appointed as Minister by the President of the Republic.’

Tou Manm ki an faver?

Okenn Manm ki kont?

Madanm Clerk.

 

MADAM CLERK

Mersi Mr Speaker.  11 Manm ki an faver e 18 Manm i kont.  Mersi.

 

MR SPEAKER

Bon savedir premye Mosyon in ganny defet.  I pa’n ganny aprouvasyon Lasanble Nasyonal. Nou ava bouz lo dezyenm Mosyon.  Dezyenm Mosyon i lir konm swivan:-

‘In accordance with Article 69(2) of the Constitution I move that the National Assembly approves the nomination of Mr Patrick Alain Payet to be appointed as Minister by the President of the Republic.’

Mon a demann tou Manm ki an faver?  Okenn Manm ki kont?

Madanm Clerk.

 

MADAM CLERK.

Mersi Mr Speaker.  Mon’n rikord 12 manm ki an faver e 18 Manm i kont. Mersi.

 

MR SPEAKER

Mersi Madanm Clerk. Savedir dezyenm Mosyon in ganny rezete.  I pa’n ganny laprouvasyon Lasanble Nasyonal. Nou ava al lo trwazyenm Mosyon;

‘In accordance with Article 69(2) of the Constitution I move that the National Assembly approves the nomination of Mr Billy Rangasamy to be appointed as Minister by the president of the Republic. Tou Manm ki an faver? Okenn Manm ki kont?

Madanm Clerk.

 

 

MADAM CLERK

Mersi Mr Speaker. 18 Manm ki an faver e (eskiz mwan, eskiz mwan Mr Speaker) 12 Manm i an faver e 18 Manm i kont.  Mersi.

 

MR SPEAKER

Mersi, mersi Madanm Clerk savedir sa trwazyenm Mosyon osi pa’n ganny aprouvasyon  Lasanble Nasyonal.

Bon sa i vedir ki sa 3 Mosyon pou sa 3 nominasyon post Minis dan Gouvernman pa’n ganny aprouvasyon Lasanble Nasyonal.

Bon nou ava kontinyen avek nou travay lo Order Paper.  Nou annan bann Papers Laid.  Mon ava demann Madanm Clerk pou zis lir bann Papye ki’n ganny laid before the Assembly.  Madanm Clerk.

 

MADAM CLERK

Mersi bokou Mr Speaker.  Nou annan;

S.I. 18, 2018, Employment Exemption Order 2018. 

S.I 19, 2018 Misuse of Drugs Appointment of Forensic Analyst Regulations of 2018.

S.I 20, 2018, Employment Act Exemption No. 2 Order of 2018. 

S.I 21, 2018 Electronic Transaction (Amendment) Regulations 2018. 

S.I 22, 2018 Electronic Transactions (affixing digital signature), Regulations 2018. 

S.I 24, 2018 Environment Protection Environmental Levees Regulations 2018.  Mersi Mr Speaker.

 

MR SPEAKER

Mersi Madanm Clerk.  Bon an vi ki – ale Onorab De Commarmond mon a donn ou laparol.

 

HON CHARLES DE COMMARMOND

Mersi.  Bonzour Mr Speaker.  Bonzour tou Manm e tou dimoun ki a lekout.  Mr Speaker anba Order 72 nou Standing Order mon oule move pou withdraw Bill International Business Companies (Amendment) Bill 2017).  Mon ti’n fini koz ek Clerk lo la ki-

 

MR SPEAKER

In deza ganny fer First Reading?

 

HON CHARLES DE COMMARMOND

In deza fer First Reading.

 

MR SPEAKER

Ok mersi Onorab De Commarmond.  Madanm Clerk ou a note?  Mersi.  Bon, anvi mouvman Minis nou annan en  PNQ plus en Urgent Question ki’n la en pe letan, ki mon’n allow – i annan serten similarite me mon’n aksepte ki tou le de in pas plis admissibility.  I annan kestyon irzan pou Onorab Aglae ki annan pou fer avek sityasyon prizon Montagne Posée e yer bomaten Leader Lopozisyon osi tou in anvoy en plaint lo lensidan resan ki’n arive pandan weekend kot prizon Montagne Posée.

An vi availability Minis nou pa pou kapab pran sa de kestyon bomaten me nou pou pran demen.  Demen napa Cabinet meeting e Minis in pare pou vini demen bomaten pou deal avek sa de kestyon.

E an vi sityasyon Minis Adam osi, Minis Lasante mon’n ganny en koze avek li semenn pase son Statement lo Lasante i pou pran sa  demen bomaten.  Me ozordi i pou vini pou li prezant sa Bill Seychelles Human Rights Commission.

Me an vi i la bomaten i pe attend to en business, en urgent business kot son Minister, Minis pou available –  10.30.  So si zot dakor swa, swa nou adjourn la nou pran sa premye Break la nou ava repran 10.30 instead of nou Break 10.30 nou ava repran  10er edmi.  Minis a prezant sa Bill ek Human Rights e nou ava kontinyen all the way ziska midi e apre midi nou ava kontinyen avek lezot Mosyon akoz apre sa nou annan Mosyon ki pe swiv.  Yes Onorab Ramkalawan.

 

HON WAVEL RAMKALAWAN

Mr Speaker.  Bonzour e bonzour tou bann koleg MNA e tou dimoun ki a lekout.  Mr Speaker mon ti ava move ki olye ki nou adjourn la nou’n fek konmanse i 9.25 mon krwar ki ou annan Lotorite pou ou sanz en pe Order Paper avek tou sa bann keksoz ki ou’n dir.  Mon ti ava propoze ki nou al direk lo Mosyon.  Nou konmans Mosyon deswit e apre sa at least nou ava annan nou 1erdtan, nou ava annan nou 1erdtan ziska 10.30pou nou konmans avek Mosyon, premye Mosyon lo Order Paper.

E apre sa, apre sa si Minis pe vini 11er nou ava pran sa Bill nou ava adjourn Mosyon e nou ava kontinyen apre midi.  Mon pe dir sa pou nou kapab bouze pou nou kontinyen  fer travay.  Mersi bokou.

 

MR SPEAKER

Bon i annan en propozisyon in ganny mete par Leader Lopozisyon.  Mon ti a kontan ganny pwennvi Leader Zafer Gouvernman Onorab De Commarmond ? I annan en propozisyon in ganny mete mon ti a kontan  ganny ou pwennvi.

 

HON CHARLES DE COMMARMOND

Deside Mr Speaker.

 

MR SPEAKER

Bon.  Bon.  Non, non, non.  Non i ok.  I ok.

 

HON CHARLES DE COMMARMOND

Mon pa pe mank respe.  Si mwan mon dir non, nou put to the vote ….mon… I mean pou mwan i en senp keksoz.

 

MR SPEAKER

Ok.  Mersi.

 

HON CHARLES DE COMMARMOND

Sa Speaker i kapab rule lo la i kapab desid lo la.  I mean

 

MR SPEAKER

Be bokou …  Yes.  Mersi Onorab De Commarmond.  Bokou desizyon nou pran atraver en konsansis.  Malgre diferans ant le de kote nou tou nou konnen poudir sa 6enm Lasanble i fer bokou travay e bokou travay in vin atraver konsansis.

Napa en moman kot petet zot in dir poudir, menm Manm piblik deor in dir ki travay in ganny bloke akoz en kote oubyen lot kote.  Travay in ganny fer atraver konsansis e  mwan ozordi ki Speaker ki dan Chair, mon apresye sa relasyon.  Nou kapab annan nou diferans isi dan Chamber me nou konnen  bann Komite i travay, i marse.  E se sa rezon ki mwan mon anvi travay dan sa fason ki i annan  en propozisyon e mon extend lo ou kote pou regard ou pozisyon.  Yes Onorab De Commarmond.

 

HON CHARLES DE COMMARMOND

Mr Speaker si nou pou vin lo konsansis mon krwar nou pou fer en lot deba dan sa Lasanble ok ?   Ou rapel tre byen semenn pase letan nou ti demann pou adjourn nou ti tonm li en konsansis.  Sa konsansis pa ti ganny respekte en ?  Mon pa pou al dan detay lo la ozordi, me selman  si ou le pou nou koz lo la ankor, nou adjourn la nou ava koz lo la.

Me selman la pou mwan mon vwar sa i en senp matter ki the Speaker i rule, i kontinyen.  Se sa rezon ki ou vwar mon’n dir koumsa.  Mon pa’n dir sa pou mank respe piu ou.  Mon’n dir sa pirman akoz mon krwar sa pa ti bezwen detrwa lezot dimoun pou dir i ok, pa ok.   Mon krwar sa i en straight forward thing ki ou ou rule akoz sa Mosyon i deza lo Order Paper.  Ou, ou deside nou ale nou fer.

 

MR SPEAKER

Mersi.  Mersi.

 

(Interruption)

 

MR SPEAKER

Order!  Order!  Mersi.

 

HON CHARLES DE COMMARMOND

Mr Speaker si toultan nou pou koze lot kote i pou enterfer koumsa e taler, e taler les mwan dir en keksoz –  Taler konmsi…

 

MR SPEAKER

Onorab !  Onorab ! Onorab !  Pa dir.  Pa dir.  Aret la.  Mon pe al adres sa sityasyon. Mon pe al adres sa sityasyon.

 

HON CHARLES DE COMMARMOND

Ou konpran ki mon pe sey – kot mon pe vini.

 

MR SPEAKER

Annou pa fer ki Lasanble i deroul dan en landrwa kot i annan…

 

HON CHARLES DE COMMARMOND

…nou’n komanse Mr Speaker

 

MR SPEAKER

Bon.  Bon, mon anvi, mon anvi ki ozordi nou annan en lord dan sa Lasanble.  Mon anvi ki  ozordi ler en Manm mon donn li laparol lezot Manm i respekte son drwa.  This is the way ki mon pe rule ozordi.  Onorab Georges.

 

HON BERNARD GEORGES

Mersi Mr Speaker. Mr Speaker konman en Manm Lasanble e Chair Standing Order’s Committee, mon krwar i mon devwar pou aport a ou latansyon Order 22(5) lo sa propozisyon annou pran 1erdtan travay apre adjourn.  Mon pa krwar ki sa desizyon i kapab ganny pran an avans.  Mon krwar se sa Manm ki pe koze 10.30 oubyen 11er ki kapab fer sa Mosyon pou adjourn the debate to another date.  Mon  oule zis port sa ou latansyon pou ou kapab pran en desizyon lo sa kestyon ki devan ou.

 

MR SPEAKER

Mersi Onorab Georges.  Bon Standing Order i gid nou e anba, anba Order 95 konman Speaker mon pe rule ki nou kontinyen avek travay.  Nou annan en Mosyon mon krwar i fer 2 semenn i lo Order Paper e mon ava demann mover Mosyon Onorab Chantal Ghislain pou prezant son Mosyon.   Onorab laparol i pou ou.

 

HON CHANTAL GHISLAIN

Mersi Mr Speaker.  Mr Speaker Mosyon devan Lasanble ozordi i lir koumsa;

Lasanble Nasyonal pe demande ki Gouvernman i seryezman met an plas bann Polisi e pran aksyon pou ankouraz nou popilasyon pou adopte en meyer kiltir, en meyer kiltir stil lavi.  Mr Speaker mon anvi zis avan mon koz lo la fer en pti aliterasyon dan sa Mosyon pou ranplas en mo – anfet 2 mo par en mo ki ava lir koumsa prezan; Lasanble Nasyonal pe demande ki Gouvernman i seryezman revwar dan plas met an plas seryezman revwar bann Polisi e pran aksyon pou ankouraz nou popilasyon pou adopte en meyer kiltir stil lavi. Ok Mr Speaker?

 

MR SPEAKER

Yes, move Mosyon.

 

HON CHANTAL GHISLAIN

Mersi Mr Speaker.  If we could give every individual the right amount of nourishment and exercise not too little and not too much we would have found the safest way to health.

Mr Speaker sa i sitasyon Hippocrates sa physician Greek mye koni konman father of medicine.  En sitasyon ki formil en lavi an bon sante ki Hippocrates in propoze plis ki 2000an pase.  E parey mon’n dir Lasanble ozordi mon’n met devan Lasanble ozordi sa Mosyon ki pou  lir parey mon’n dir oparavan. E sa Mosyon i annan de konponan Mr Speaker.

Premyerman lo kestyon Polisi e dezyenmman lo aksyon.

Mr Speaker en popilasyon ki pa an bonn sante i annan en  lenpak direk lo nou  sistenm lasante e i annan gran risk pe vin en fardo ekonomik lo nou pei.  Sesel  in touzour ganny vwar konman enn bann pei tre ris lo kontinan Lafrik.  Pandan ki i pe tenir premye pozisyon pou devlopman imen e pli o  GDP par capita me i pe osi tenir ven senkyenm pozisyon parmi bann pei ki annan  en popilasyon avek en pli o poursantaz dimoun ki tro gro. Nou popilasyon in eksperyans en sanzman konsiderab dan nou patern manze e stil lavi ki fer in anmenn en logmantasyon alarman dan bann maladi kardyovaskiler tel ki dyabet, tansyon, maladi leker e lezot  non-communicable diseases tel ki kanser, malad lefwa e ronnyon.

Me se bann maladi kardyovaskiler ki lakoz mazer bann lanmor Sesel.  Statistik in monte ki an 2014 ti annan en total 725 lanmor e  ladan 202 egal a 28poursan ti zis bann maladi kardyovaskiler.

2015 en total 103 lanmor konpare avek 725 an 2014.

Maladi kardyovaskiler ti kontribye 31poursan savedir 216 total lanmor.

2016 ti annan  en gran logmantasyon dan total lanmor 747 an tou konpare a 703 an 2015.  Ankor logmantasyon dan kantite lanmor bann maladi kardyovaskiler 33poursan ki ti egal 249 lanmor.

2017 en total 748 lanmor ki ti ganny raporte konpare a 747 an 2016.

Me zis ekout sa gran logmantasyon dan lanmor an rezilta maladi kardyovaskiler, 39poursan ki egal 289 konpare  avek selman 249 an 2016.

Mr Speaker an 2015 Sesel atraver Minister Lasante an kolaborasyon avek Minister Ledikasyon ti fer 2 letid mazer atraver bann lekol lo Mahe, Praslin ek La Digue.  Sa letid ti annan pou bi konn bann fakter de risk ki pe afekte nou bann adolesan e zanfan ant laz 13 a 16an.  Letid ki ti montre ki enn dan 4 etidyan i annan en problenm lapeze ki tro o.

Sa rezilta in ganny vwar konman tre alarman par lasante piblik nou pei.  E i endike ki pli nou annan plis zanfan  ki tro gro plis dimoun pou devlop dyabet, tansyon e lezot maladi kardyovaskiler e lezot konplikasyon lasante.

Deza nou menm nou annan plis ki 75poursan nou popilasyon adilt ki annan problenm lapeze tro o.

In prouve ki konsonmasyon an ekse bann fast foods parey hamburgers, chips, bann lezot manze fri, tro bokou disik ek disel.  Konsonmasyon lalkol an ekse, sigaret, drog zot annan bann lefe serye lo nou lasante.  E tou sa bann keksoz ki mon’n mansyonnen i an rezilta direk nou stil lavi.

Swa ki nou fer dan nou lavi, swa lo kwa ki nou konsonmen e kantite osi ki nou konsonmen. Nou’n koz lo tretman spesyalize.  I annan en kantite kondisyon lasante konmela ki’n vin direk an rezilta nou stil lavi e ki pasyan prezan i bezwen lasistans tretman spesyalize.  Nou kapab redwir sa nonm konsiderableman si selman nou adopte en bon stil lavi.

Mr Speaker ozordi si ou pas dan nenport ki magazen atraver pei bann premye keksoz ki ou vwar lo letazer se tou sort kalite, groser e kouler pake chips enporte, ki napa okenn benefis alimanter ki ganny klasifye plis konman gonaz dan nou lalang Kreol.  E lo letazer pli o ki’n alinyen  dan divers kalite e kouler boutey se lalkol.

I annan menm ki  apard dan zot magazen zot in ouver en lot pti bout lanmenm dan kote kot zot vann zis lalkol.

I fer ou demann kestyon, bokou kestyon lo lakantite forex ki al dan lenportasyon lalkol e tou  lezot kalite gonaz ki napa okenn valer nitritif. Par kont ou al dan chiller lanmenm obor ou kapab konte lo ou ledwa ki kantite varyete fri e legim.  Fri ou kapab gannyen.

a zot in flood marse avek en varyete kalite labyer enporte e tre enkyetan se ler ou regard son poursantaz lalkol lo la.  Enn ki’n vreman sok mwan se sa kalite mark labyer ki apel Amsterdam.  Son poursantaz lalkol i varye ant 11 a 15poursan, e son pli o i ale ziska 18poursan.  Deza 18poursan i fini bit dan kategori spirit e still sa prodwi i ankor pe ganny kategorize konman labyer.

Donk aksyon imedyat se ki Gouvernman atraver Minister Finans i bezwen seryezman kontrol lenportasyon sa bann keksoz ki fer dimoun plis ditor ki dibyen e ki pe osi enpakte lo nou servis lasante e lakantite larzan ki ganny depanse pou tretman sa bann maladi.

San kont lakantite dimoun ki pe viv avek bann konplikasyon lasante an rezilta konsonmasyon an ekse lalkol, sigaret,  drog, manze gra, disik ek disel.

Zis atraver statistics nou’n kapab vwar sa kantite outlet ki annan license pou vann lalkol.

egzanp zis en pti kominote parey La Digue avek en popilasyon zis 2,836 dimoun.  I annan 17 landrwa ki vann lalkol.  Anse Royale popilasyon 4,281 i annan 27 landrwa ki  ganny license pou vann lalkol Mr Speaker.

Mont Buxton popilasyon 3173 e 23 outlet ki vann lalkol.  Mont Fleuri popilasyon 3,512 dimoun ki reste dan sa distrik, 24 outlet ki van lalkol.

r Speaker mon pa’n kapab al lo tou bann distrik me sa bann ki mon’n nonmen i bann ki tre alarman.  Gro kestyon pou nou bann dirizan ki fer Lalwa ozordi dan sa Lasanble.  Mr Speaker, patern nitrisyon nou popilasyon in sanz konpletman.  Nou nepli konsonm sa kantite legim ek fri lokal, pwason ek lezot prodwi lokal tel ki patat e mayok, fiyapen.  E nou’n swazir plito pou konsonm plis bann prodwi enporte tel ki diri, lafarin, min lasoup, bann manze dan bwat konserv, limonnad, lavyann e bokou lezot ankor ki tousala i ranpli avek lagres, disel ek disik.

Plis larzan in anmenn nou pli pros avek teknolozi e san gran zefor in fer in vin pli fasil pou ganny sa ki nou bezwen pou manze par zis antre dan nou loto, al kot en  supermarket.

Kontrerman a nou bann zanset ki zot ti bezwen kontant li avek en senp pti repa a baz bann prodwi ki zot in kiltive zot menm kot lakour apre en lazournen  trimouse dan sa gro ker soley.

Legzersis ek lasante i de mo ki devret rezonnen dan lavenn tou Seselwa.  Mank legzersis ek aktivite fizik in fer nou vin en popilasyon ki fizikman pares.  Ankor teknolozi in pran kontrol.  Sa kantite erdtan ki nou pase devan televizyon, laptop, lo telefonn, lo bann rezo sosyal e lezot gadget elektronik i enkyetan.

Zanfan nepli trouv li itil pou al zwe deor, grenpe, sote, taye e anpandan partou.  Pou nou bann zanfan ki’n konn en lanfans koumsa ti gou e i ti anmenn son benefis.  Me domaz ozordi nou’n bliy tou nou kiltir, en lavi ranpli ek aktivite fizik.

Mr Speaker Drwa Iniversel pou tou Seselwa manz en repa i spesifye ki nou bezwen manz sifizaman kalori e drwa pou en repa fortifyan pou garanti en bon lasante pou nou grandi e devlope dan tou staz lavi, tou Seselwa.

Me avek sa sanzman nou stil lavi ki pe met nou lasante a risk in fer ki nou’n devlop plizyer Polisi  relye direkteman ouswa endirekteman lo size manze e sekirite alimanter.  Parmi i annan  2017 a 2018 lanse an Novanm 2007 stratezi Sekirite Alimanter 2018/2011 lanse me 2008 ti devlope an rezilta kriz ekonomik mondyal kot IMF ti’n enpoz en progranm restriktirasyon ekonomik pou Sesel.

Polisi lo Biosekirite, en National Medium Term Priority Framework devlope avek sipor FAO pou idantifye bann landrwa priyorite kot FAO i kapab siport Sekter Lagrikiltir Sesel, Polisi Nitrisyon pou bann lekol ki annan bi adres bann bon labitid pou manz bann manze ki an bonn sante i donn en platform pou  enplimant bann stratezi, e linisyativ popu asire ki bann etidyan i ganny sa ledikasyon li nitrisyon.  Sa Polisi i ganny servi pou kordin tou laspe nitrisyon  dan curriculum lekol selman.  Tuck shop dan bann lekol e provizyon pou school meals.

En bon nitrisyon  i neseser pou devlopman bann zanfan pou zot vin ban adilt ki prodiktiv.  I osi annan Polisi lo lapes, gid alimanter 2008, ki la baz ledikasyon lo manz an bon sante e i target Polisi 2an e  plis.

Apre osi i annan en Polisi lo the Hospital Infant Feeding Policy, en Polisi ki ankouraz bann manman  pou donn tete baba omwen ziska laz 2an.

Wi Mr Speaker i annan diferan Polisi an plas me ler ou pas atraver sa diferan Polisi tousala pe fer sakenn son bout dan zot kwen me Sesel li menm konman en pei napa en Polisi Nasyonal an se ki konsern manze, nitrisyon ek sekirite alimanter.  An dot mo en Polisi Nasyonal ki pou regroup tou bann stakeholders ki enkli Minister, Departman, Lenstitisyon, NGO, Medya e lezot ki annan en rapor direk avek ledikasyon  lo nitrisyon e nou konsonmasyon ki enpakte lo nou stil lavi.  En tel Polisi i a fer ki ler en Minister ouswa Lazans i met en Polisi an se ki konsern manze e stil lavi tou lezot Departman, Minister e Lazans pou bezwen form  parti dan lenplimantasyon sa Polisi.

Mr Speaker mon’n koz lo konsonmasyon e akse an abondans avek lalkol.  San bliy bann ki pe prodwir lokalman Pti Ponm, i annan menm en lepok ou ti’n tann nonm Windowlin, Tyomityo, No.1 tou sa avek en  poursantaz lalkol bokou tro o ki pe fer nou bann zonm, fanm, père et mère de fanmir ensi ki nou lazenes revolte  dan bann lakour.  Logmantasyon dan bann vyolans domestik e lezot fleo sosyal.  Me annou get en kou lo kalite manze e la mon pe koz spesifikman li en konponan dan bann manze ki nou enporte.  E sa i trans fat ouswa lagres ki pa satire unsaturated fatty acid.

Sa kalite lagres i natirel an pti porsyon dan la natir.  E se pou sa rezon ki i pli meyer ki nou konsonm lavyann ki nou prodwir lokalman olye enporte.  Me danze se ki dan lendistri prodiksyon  manze i prodwir sa bann lagres dan zot faktori menm an servan lagres vezetab.  Sa kalite lagres i ganny  vwar konman lagres pli danzere lefe ki lakoz bann maladi kardyovaskiler tel ki malad leker e ensi ki en kantite lespes kanser.

Bokou pei in redwir prodiksyon  sa kalite lagres dan zot ban lendistri pou vin 0.5.  Me sa ki bann eksper medikal pe dir se ki 0.0 trans fat dan bann prodwi ki nou konsonmen e omwen 6 pei lerop in fini Ban lenportasyon ensi ki prodiksyon bann manze ki annan trans fat ladan.

Sesel sa kalite lagres ankor trouve an abondans.  I ganny trouve dan  bann delwil vezetal, parey sa mark delwil turkey, margarin, serten biskwi, bann bwat konserv parey luncheon meat, bwat bef, lezot prodwi legim dan bwat, margarin bann manze ki’n fini kwi, bann snacks ki nou konsider konman gonaz e bokou lezot ankor akoz zot servi sa bann lagres pou zot prezerv sa bann manze.

Mr Speaker legzersis ek lasante i de mo ki devret rezonnen parey mon’n dir dan lespri tou Seselwa.  In ler pou konsider bann lezot laspe devlopman nou pei.  Nou nepli mars sa kantite zistans pou ariv  lekol, travay e lezot destinasyon.  Topografi nou bann zil sirtou Mahe i fer li difisil pou serten lenfrastriktir semen pou permet nou adopte en lot fason sirkile apard ki dan en loto.

Me i annan bokou landrwa ki nou kapab fer keksoz.  Mon pran en  Housing Estate parey Perseverance.  Landrwa i plat, lespas i annan.  Konsider en track spesyal tou dilon sa bann semen pou permet ki nou popilasyon osi i kapab servi bisiklet konman en alternativ pou deplase.  Ed sa bann zabitan pou kiltiv sa nouvo stil lavi.  Roche Caiman i en lot landrwa kot nou kapab enplimante konstriksyon sa bann track zis pou bisiklet tou dilon semen.  Avek sa kantite loto ki pe sirkile lo semen, lizour konman aswar, lakantite carbon ki ganny large dan ler dan en menm moman i devret en pwen konsern.  Polisyon ler i  pa bon pou lasante.

Annan en lot alternativ pou dimoun deplase i a  permet ki dimoun i  fer plis legzersis, mwens transpor ava pe roule an menm tan.  Mr  Speaker lapel spesyal a nou bann madanm.

Resers in montre ki 74 nou popilasyon  madanm i overweight e 43poursan i obez.  Sa i alarman prenon kont ki 90poursan bann madanm konmela Sesel ki responsab en lakour.  Se nou menm bann madanm ki okip nou bann zanfan e pli enportan se nou menm bann madanm ki okip nou bann zonm ler zot malad.  So lasante nou bann madanm  i devret vin pli enportan.

Mr Speaker an konklizyon lasante i nou responsabilite, nou fason viv osi i nou responsabilite.  Me nou pa vedir zis mwan, ou, e zot konman en endividi me nou i vedir tou endividi ensi ki Gouvernman pou asire ki nou viv an bonn sante  e ki nou fer bann bon swa pou byennet nou prop lekor.  Mr Speaker I beg to move. 

 

MR SPEAKER

Mersi Onorab Ghislain.  Okenn Manm ki segonn Mosyon?  Onorab Vidot.

 

HON AUDREY VIDOT

Mersi Mr Speaker mon le segonn sa Mosyon  avek ou permisyon  si ou permet mwan pou entervenir.

 

MR SPEAKER

Go ahead Onorab Vidot.

 

HON AUDREY VIDOT

Mersi Mr Speaker.  Mr Speaker Gouvernman son vizyon se pou tou dimoun dan Sesel i attain en pli o nivo lasante fizik, sosyal, mantal e spirityel.  E viv an larmoni avek lanatir.

Mosyon Onorab Ghislain  i enn  ki tous sa vizyon e fer ki kontenir sa Mosyon i annan son merit. Mr Speaker atraver sa Mosyon nou pe demann Gouvernman pou seryezman re vwar bann Polisi aktyel e vwar vreman kwa ki pe ganny enplimante ki pe mars tre byen, apre vwar kot ki annan problenm ki a permet li met an plas nouvo Polisi e montre bann aksyon ki pe ganny pran pou ankouraz nou popilasyon ki pe vyei e pou adopte en kiltir meyer stil lavi ki osi donn lespwar devlopman soutenab nou pep.  E se sa ki pou fer Gouvernman realiz sa vizyon.

Mr Speaker sak endividi i annan son valer e latitid.  En endividi i ganny enfliyans-e par diferan fakter.  Tel ki imen, kiltir, medya e globalizasyon.  E nou vwar sa bann lenfliyans ki pe met presyon lo nou pep ki fer ki zot aste e servi keksoz ki direkteman e endirekteman koz problenm pou zot lasante e lanvironnman.  E parmi sa bann lenfliyans, i annan enn ki nou pli gro defi e se pou met bann fleo sosyal anba kontrol.

Mr Speaker bokou sa bann fleo i sorti dan logmantasyon konsonmasyon lalkol e problenm reel ozordi ki pe afekte nou bann fanmir.  E kalite lalkol ki pe ganny konsonmen pe afekte lasante nou sitwayen zenn konman vye.  Nou bann zanfan pe ganny akse avek lalkol tro fasilman e sa zenerasyon ki pe monte pe grandi dan en lanvironnman kot lalkol i an abondans e kot drog i en tantasyon.

Zis fer letour dan nou bann laboutik atraver pei zot pou vwar kot 98poursan lalkol  i ganny vann dan chiller zis akote nou bann soft drinks ek juice.  E zis 2poursan ki bann separeman avek lezot marsandiz dan laboutik.  E nou le konnen kote problenm i été?  97poursan lalkol pe ganny vann deryer kontwar e zis 3poursan dan en liquor store.  Me ler 100poursan nou bann laboutik loi Mahe, Praslin e La Digue i ranpli avek plis lalkol e zot in garni zot landrwa avek bann gran lavertisman lalkol dan plas ranpli avek prodwi ki bon sante pou nou sitwayen.  I fer nou demande ki mannyer nou ekspekte kapab met kontrol lo sa bann problenm Mr Speaker.

Mr Speaker mon demann Loter Mosyon Onorab Ghislain pou met lanfaz dan son – wrapping up – pou ki Gouvernman i fer en keksoz lo sa size grander lavertisman lalkol an deor bann laboutik.  Revwar permi lavant lalkol kot bann pti laboutik atraver pei. Mr Speaker, nou konsyan ki devlopman en Nasyon i depan lo en lafors travayer an bonn sante e donk nesesite pou mentenir devlopman lasante e sanitasyon i bezwen reste konman en priyorite nou Gouvernman.

Sa ki osi enportan dir se ki malgre tou ban defi en gran nonm fanmir i sirmont sa bann defi sosyal e  zot in gard zot zanfan entak. Prezidan Faure in deza dir devan nou Lasanble ki sa bann fanmir i merit vin en laspirasyon pou nou bann zenn paran.  En zenn fanmir ki pe monte ozordi pou en sosyete parey Sesel kontinyen devlop son sekter sosyal.

Alors prenon kont bann defi ki mon’n mansyonnen i enportan ki nou  reflesir tre byen lo soutenabilite nou bann progranm e vwar ki mannyer nou kapab entegre sa bann fanmir ki mon’n mansyonnen Mr Speaker enn nou bann progranm sansibilizasyon ek prevansyon i bezwen ganny entansifye afen ki nou a batir en zenerasyon pli rezilyans ki kapab dir non.

Non a labi drog ek lalkol  e evite angaz li dan lezot kalite konportman anti-sosyal.  Nou bezwen osi pe kontinyelman devlop nou lekonomi, fer li bokou pli solid ki i ete.  Pli  diversifye, pli efikas e pli performan avek bi soutenir sa devlopman sosyal.  Mr Speaker sa Mosyon in anmenn mwan dan nou sistenm ledikasyon.  Sa ki nou  bezwen  fer se kontinyen  ranforsi ledikasyon sivik dan lekol e donn ansennyan mwayen modern pou fer fas avek bann defi ozordi letan pe koz lo stil lavi avek nou lazenes.  E nou rekonnet zefor ki nou bann ansenyan in donn nou bann zenn  dan lekol. (eskize).  I tre enteresan pou konn bann progranm aprantisaz ki bann ansennyan i partaz avek nou bann zenn etidyan lekol segonder ki bokou fwa nou tann dir i napa ase.

Mr Speaker permet mwan mansyonn serten sa bann size.  Problenm lasante ki afekte adolesan, responsabilite lo stil lavi, lasante seksyel, preparasyon pou lavi la fanmir, devlopman paran e zanfan, prevansyon labi zanfan, ledikasyon lo mentenans parti fizik en lekor, presyon e ki mannyer pou adres presyon, ledikasyon lo devlopman lo lemosyon, respe e konfidans personnel, valer lasante, ladyet balanse e labi sibstans e adiksyon.

Mr Speaker i pou byen si nou servi en lapros diversifye avek led nou bann volonter.  Pou ankouraz bann zenn konman vye dan bann aktivite pozitiv tel ki sport, kiltir e devlopman personnel  dan lekol e dan kominote pou elev zot stil lavi.

En parti mandan  bann klib dan distrik se pou ankouraz kominote spesyalman bann ki annan defi sosyal atraver bann progranm zisteman pou ede elev zot stil lavi.

Akoz sikse nou bann progranm ki met dimoun o sant devlopman e reflekte lo logmantasyon  l’espérance lavi tou nou sitwayen.  E nou bezwen kontinyen envestir dan progranm devlopman nou lazenes pou etabli lankadreman nou bann zenn pou en meyer kalite lavi ki a servi konman en labaz pou amelyor lavi nou bann zenn dan Sesel e evalye re tonbe progranm ek plan ki pe ganny enplimante.

La kot Konsey Nasyonal Lazenes i bezwen asire ki kordyalman Polisi i reste santral dan lenplimantasyon Polisi Lazenes atraver tou sekter.

Mr Speaker i enn nou priyorite pou met presyon lo Gouvernman ki resours i ganny mete dan distrik e swete vwar en sanzman.  En sanzman radikal dan kalite progranm aktivite ki ganny fer o nivo kominoter.  Mon rekonnet langazman serten distrik kot pe permet annan bann aktivite sport e kiltirel dan zot sant ek playng field ki  ede dan  devlopman lasante fizik moral e sosyal.

Me i annan distrik ki ankor mank sa volonte pou ankouraz sa bann progranm parey karate, judo, laklas legzersis, laklas ladans, yoga e lezot ankor.  Nou rekomande ki Gouvernman Lokal i siport linisyativ Prezidan Faure pou elev nou bann progranm dan distrik par ankouraz bann distrik ki annan bann bon fasilite pou servi li o maximum e mon dir sa akoz i annan, i annan  ki pa pe fer ase.

Mr Speaker lizour konman aswar nou vwar bokou dimoun lo fitness trail lo highway e dan bann Gym pe fer zot legzersis fizik.  Sa i tre byen.  E nou felisit sa bann dimoun ki konsyan lenportans en bon lasante fizik.

Mr Speaker Sesel par kont i annan  en mankman  bann senp fasilite kot en dimoun i kapab servi pou fer  bann senp aktivite legzersis dan bann landrwa kle.  Permet mwan  donn legzanp  Mr Speaker.

I annan bann pti laplenn oubyen zarden dan lavil e menm dan distrik kot kapab enstal bann pti fasilite parey nou vwar kot fitness trail Roche Caiman pou fer yoga, oubyen annan en pti board lenformasyon pou kapab gid nou bann dimoun pou fer bann senp pti legzersis fizik.  En pei ki fer sa tre byen  se La Chine.  Partou kot ou pase dan  en pti landrwa ki ou kapab vwar bann dimoun diferan laz kot zot ganny sans pou zot fer bann pti aktivite parey.

E sa ki en portan se bokou sa bann dimoun i ban dimoun aze e zot vreman aktiv.  Mr Speaker i annan bokou ki nou kapab koz lo la kot i konsern nou stil lavi me mon pou konklir  par met lanfaz lo medya.  Medya i annan en gran rol pou li zwe lo sa size.  I annan en mankman bann progranm ki tous lavi dimoun lo size stil lavi pli enportan lavertisman, prevansyon pou sansibiliz nou pep e bann lorganizasyon pa devret ganny sarze pou bann tel lavertisman ki ava ankouraz dimoun pou viv en meyer stil lavi.

E bann lavertisman kot i annan lavant sigaret e lavan lalkol se sa kot devret annan plis peyman  pou zot fer lo sa size dan lavertisman. Mr Speaker sa  bann problenm ki nou pe diskit lo la, ki nou pou diskit lo la ozordi pa pou ganny rezourd di zour ou lannmen.

Me si vreman nou anvi en Sesel kot nou lafors travayer i enn ki an bonn sante e prodiktiv nou bezwen ansanm dan en fason kolektiv anmenn sa konba kont sa bann fleo sosyal ki  pe ronz striktir de baz nou sosyete ozordi parey Prezidan in dir e mon quote :

‘I bezwen en konba ki zis menm si i en konba ki difisil me nou bezwen fer li en konba ki vo lapenn.  Me pli enportan ankor i en konba ki neseser pou fer li ansanm pou Sesel’. (e mon unquote)  Mersi Mr Speaker.

 

MR SPEAKER

Mersi Onorab Vidot.  Onorab Lemiel.

 

HON SYLVANNE LEMIEL Mersi Mr Speaker.  Bonzour Mr Speaker.  Bonzour tou bann koleg Manm Onorab e tou bann dimoun ki a lekout.  Mr Speaker mentenir en meyer stil lavi i enkorpor diferan eleman.  I annan sa laspe mantal, spirityel, lwazir, sosyal, profesyonnel e imen.  I enportan pou note ki sakenn i defini meyer stil lavi a son fason.  E dapre son konteks kiltir se bann tradisyon, koutim e nou fason viv.

Pou annan en meyer stil lavi i enportan ki nou pep i ganny edike e sansibilize.  A mon avis   mon santi ki i annan bokou sansibilizasyon e ledikasyon ki Minister Lasante e osi NSC pe donn nou pep lo ki mannyer pou tou dimoun vey byen ki zot konsonmen e lenportans fer legzersis pou ki nou viv en lavi pli an bonn sante.

Me eski sa bann sansibilizasyon  e ledikasyon pe vreman konsyantiz tou kous nou popilasyon.  Mr Speaker mon demann sa kestyon akoz ozordi mon ankor pe vwar bokou dimoun pe konsonm nenport kwa.  Junk food ki kontyen bokou trans fat e i pa bon pou nou lasante.  Limonnad, lalkol diferan kalite tel ki Pti Ponm, Pti Zonn ki mazorite bann dimoun pe bwar li san menm koupe.  E sa  pe afekte lasante bokou fanm e zonm.

Konsonmasyon lalkol, sigaret e drog in ogmante sirtou parmi nou bann zenn fiy e garson.  E sa pe afekte bokou nou bann zenn ki ozordi ou vwar zot pa prodiktiv dan lasosyete.

Bokou dimoun pe fer sex an bonnavini.  E sa pe fer  ki maladi seksyel  i o sirtou parmi nou bann zenn fir san pran kont lansentman anba laz.  Mr Speaker ler ou regard lo letazer dan bann magazen nou ankor pe vwar bann marsan  pe kontinyen enport ban komodite ki pa neseserman bon pou nou lasante.

E serten napa okenn valer nitritif.  Nou vwar keksoz parey twistees, ice cakes, serten prodwi ki ekri zi langaz lo son bwat e ou pa ni konnen ki ou pe vreman konsonmen.  Serten kalite delwil, lavyann en porte ki ou pa konnen ki zot in enzekte ladan pou  fer ki sa poul i grosi vitman e lezot keksoz ankor.  A mon avis mon krwar ki Gouvernman i devret enpoz en tax tre o oubyen menm konsider met en Ban lo sa bann tel komodite parey lollipop, twistees, chewing gum e bann manze ki annan trans fat ladan.  I osi annan en Ban kalite labyer ki son poursantaz lalkol i vreman o ki pe ganny enporte ozordi dan nou pei.

Mon krwar sa osi in ler pou Gouvernman get en pe ladan  e pran serten desizyon.  Bann fanmir pe ganny afekte en kantite avek sa problenm lalkol.  Parfwa ou vwar depi manman ek papa tou le de pe konsonm bokou lalkol e zanfan i ganny neglize.

Apre sa bann menm kalite dimoun i ganny konsidere konman bann ka lapovrete.  En lapovrete ki li menm i met li ladan akoz son stil lavi ki i pe viv.

Mr Speaker Loter Mosyon pe demande ki Gouvernman i seryezman re vwar bann Polisi e aksyon pou ankouraz nou popilasyon adopte en kiltir meyer stil lavi.  Mr Speaker ler mon’n fer en pti resers mon’n vwar ki i annan detrwa Polisi ki tous serten laspe ki loter Mosyon pe demande e sa i konpri National Health Policy, Reproductive Health Policy 2012, National Food and Nutrition Security Policy 2013, Food-based Dietary Guidelines Seychelles, National Sports Policy, Youth Policy ki la i pe al ganny revize, National Ageing Policy, National School Nutrition Policy, National Family Policy ki tous sa laspe viv an bonn sante lo kote sosyal.

 

A mon avis se lenplimantasyon sa bann Polisi ki en problenm.  I bezwen annan  dimoun ki committed pou enplimante e monitor sa bann Polisi.  Nou osi bezwen konsistan dan desizyon ki nou pran ler keksoz pa pe marse dapre Polisi.

An plis ankor nou osi bezwen edik nou zanfan depi tre pti pou adopte en stil lavi an bonn sante.  Ozordi zour ki kantite nou ki chicken and chips, frozen food, manze dan  bwat konserv in vin nou manze tou le zour.  Ki kantite nou ki aksepte pou nou zanfan pa fer ledikasyon fizik dan lekol akoz nou santi i pa enportan.

Akoz zisteman nou bann lekol fason ki in ganny striktire i ede devlop nou zanfan holistically.  Setadir zanfan i devlop mantalman, spirityelman, sosyalman, fizikman.

Mr Speaker leta aktyel nou pei i egzize ki bann Minister, Departman, Lazans i travay plis ansanm.  A mon avis mon krwar ki nou pa bezwen en lot Polisi prenon kont bann bidzeter resours imen ki Gouvernman pe fer fas avek.

I enportan ki bann Polisi aktyel i ganny re vwar parey loter Mosyon ler in re aranz son Mosyon in demann nou, pou asire ki zot pe reponn bezwen devlopman bann zenn, bann dimoun aze, lafanmir e dimoun ki pe viv avek en dezabilite.

Pou konklir mon krwar ki nou merit ranforsi lo lenplimantasyon e monitoring sa bann Polisi ki an egzistans.  Evalye serten e modifye kot fodre pou enkli sa laspe viv en meyer stil lavi.  Nou osi bezwen kontinyelman rod fason fer desann pri bann komodite ki bon pou lasante akoz pou viv en meyer lavi i annan osi en kou ki al avek.  Mersi Mr Speaker.

 

MR SPEAKER

Mersi Onorab Lemiel.  Okenn lezot Manm ki le entervenir lo Mosyon ki devan Lasanble? Onorab Sophola.  Go ahead Onorab.

 

HON NOLINE SOPHOLA

Bonzour e mersi Mr Speaker, tou Manm Onorab e tou dimoun ki a lekout bonzour.  Mr Speaker loter Mosyon inn donn en tre bon apersi li stil lavi dan Sesel e in menm donn bann diferan sif pou nou kapab konpare, konpar bann fakter ki pe kontribye ladan.

Mr Speaker tre resaman nou’n koz bokou lo amelyorasyon Sistenm Lasante dan Sesel e sa in montre ki pep Seselwa i konsernen avek zot lasante.  Nou vwar ki bokou dimoun ki al lopital pou plizyer rezon.  Parfwa rezon i valab e parfwa osi non.  Mon dir annou fer mannyer ki otan ki posib ki nou pa al dan ni enn sa bann Sant Lasante.  Annou fer tou pou pran ka ek nou lasante.  I enportan ki nou krwar dan  sa tenm ‘Mon lasante mon responsabilite.’

Sa i devret enn parmi nou bann fraz kotidyen.  Nenport ki landrwa ki nou ete pou nou pli pran konsyans nou lasante.  Kan en pep i  an bonn sante i anmenn bokou larises  dan pei.

Mr Speaker Loter Mosyon in fer nou konpran ki i annan bokou ka lanmor ki arive akoz nou stil lavi.  Mon toutafe dakor ki stil lavi i zwe en tre gran rol ladan.  Pou mwan en meyer stil lavi i vedir ki nou fer tou fason pou reste an bonn sante osi byen mantalman ki fizikman.  I vedir ki nou  bezwen viv en lavi senp e sen.  Pou sa arive nou pou bezwen pran e met an pratik sa ki nou aprann, eksperyanse e menm temwaye.

La enn de fason ki nou kapab konsidere pou ed nou amelyor nou stil lavi.   Swazir pou nou servi manze natirel e sen.  Elimin ou evite tou sityasyon ki kapab fer nou trakase parey evite mank konprenezon dan nou relasyon dan lakour menm avek nou vwazen, dan lakominote antye.  Avek bann manm dan nou fanmir e koleg dan  nou travay.  E fer legzersis pli souvan e evit konsonmasyon lalkol an tro e fim sigaret ou drog.  Pran  swen avek nou lanvironnman.  Sa pa kout en sou me bokou nou souvandfwa nou neglize.

Mr Speaker i vre ki pei evolye e ki popilasyon i bezwen al anliny avek evolisyon.  Me ki pe arive.  Souvandfwa nou oubliy nou kiltir.  Nou adopte bann kiltir vini.  Mon napa  kont mon napa okenn problenm avek kiltir vini osi lontan ki i pa afekte oubyen  annan en lenpak negativ lo nou prop kiltir parey mon re dir ankor nou prop kiltir ki pou nou.  Akoz dan sa monn ki’n vin en pti vilaz gras a internet ek bann rezo sosyal.  Nou pa kapab fer konmsi nou pa pe vwar pli lwen ki nou bann lans oubyen pli lwen ki laliny lorizon nou lanmer.

Me si nou pou kopye annou kopye sa ki byen  pou nou kiltir e nou pei.  Mr Speaker ledikasyon i konmans dan lakour.

Dan mon prezantasyon mon pou met lanfaz lo bann zanfan.  Lo stil lavi ki bann zanfan i anmennen.  Lontan sak fanmir ti asire ki son zanfan ti manz en repa balanse par zour.  Bwar ase delo.  Manz bokou fri ki ti trouve partou an abondans.  Me ozordi  i pa le ka.  Ozordi nou bezwen donn nou zanfan bann manze vitman parey pasta, burger, zis lavyann.  Pwason serten zanfan i refize e i menm dir zot paran,

’’ Mon pa manze sa !’’

‘’Fri lokal pa bon !’’

Nou bezwen konsonm sa ki enporte.  Si nou anmenn en zoranz lokal ek en zoranz enporte nou dir en zanfan swazir definitivman i pou swazir enporte.

Me la ankor in mank serten ledikasyon.  Delo i ganny ranplase par juice ouswa limonnad ki annan en bon kou ki atase avek kan en pti boutey delo i pa tro ser pou nou kapab gannyen.

Me pa enterpret mwan mal, en fast food enn fwa letan i normal me pa tou le zour.  Mon pa krwar ki i annan nou ki pa konn sa konsekans fast food lo nou lavi me kestyon ki mon demande akoz ki nou kontinyen fer li kan nou konn son lakonsekans?

Si nou paran nou pa enkilke sa bann bon latitid, bon valer manze e fer legzersis dan nou zanfan lekel ki pou fer li pou nou ? Mon pou donn en legzanp.  Pa tro lontan en madanm i vwar mwan pe kas mon bred pti fey.  I dir mwan, ‘Ou pe al manz sa?’’ Mon dir, ‘’Sa i mon prefere konpare ek sa bann ki mon pou al aste lo bazar.’’  I dir, ‘’ankor OU ! Si mon ti kapab kwi sa toulezour kot mwan mon ti a bon.’’  Mon dir li ‘’be mwan mon fer li 3 fwa par semenn akoz mon santi ki i ed mwan.’’  I dir, ‘’Mwan kot mwan si mon kwi sa mon pou manz mon tousel!’’  Mon dir, ‘’be ou zanfan pa manz bred mouroum ?’’ I reponn:  ‘’Mon bezwen fer en pti pasta, en pti chips apar.  Si mon kwi bouyon bred ek pwason dan lakour mon manz mon tousel.’’  Ki sa i montre nou?  Senpleman nou pe mal edik nou zanfan.  Parfwa paran i dir ou mwan mon koz ek li i pa pe konpran mwan mon bezwen esper lekol ler zot fer PSE koz ek bann zanfan lo fason ki nou  devret pe byen manze.

Me la ankor mon krwar lasosyete nou annan bokou travay, bokou travay pou nou fer pou nou edik tou lasosyete pa paran tou  lasosyete depi anler ziske anba akoz sa i ariv dan tou fanmir.

Mr Speaker pou Leta Lanasyon Prezidan Danny Faure ti ankouraz tou dimoun pou fer legzersis.  Pa bezwen ki ou desann lo stad pou fer legzersis.

Legzersis ou kapab fer nenport ki landrwa.  Dan lakour kot ou, ou kapab fer legzersis.  Menm dan ou flat ou kapab fer legzersis.  I annan peron ou kapab monte desann.  Sa osi i form parti legzersis.   Pa bezwen, pa bezwen ki ou annan labiyman spesyal pou fer legzersis.  Nou bezwen  regarde ki rezon det ki nou pe fer legzersis.  Ki son lobzektif ki nou pe fer li.

Mr Speaker si nou servi nou letan pou nou marse sa osi i legzersis.  Bokou nou, nou pa konn  nou pei akoz nou pa zanmen fer letan pou al vizite.  E si nou fer letan pou nou al vizite nou fer letour nou pe fer legzersis osi san ki ou realize ou pe met presyon lo ou lavi.  Tou sa i bann fason ki nou kapab ede  pou reste an bonn sante.

Lo kote lekol, Minister Ledikasyon anliny avek Minister Lasante zot in met an plas en Polisi ki konpri en lalis bann manze ki devret pe ganny vann kot lekol.  Sa osi i en konmansman e konmansman Zanvye sa lannen bann zofisye Minister in travay de pre avek bann tuck shop operators pou diskit sa Polisi avan son lenplimantasyon.

Enn de parmi sa bann keksoz ki bezwen byen ganny kontrole i delwil e disik.  Lo sa mon pou bezwen dir ki i pa fasil pou ban tuck shop operators prodwi bann manze, bann healthy food pou nou zanfan.  Malgre ki zot fer zot mye akoz tou keksoz i ser.  Si nou anvi ed nou zanfan la mon pe demann Gouvernman pou regarde ki fason ki zot kapab ed sa bann tuck shop operators e an retour zot ed tuck shop operators, e tuck shop operators i donn en bon servis nou bann zanfan.  Paran i bezwen eksplik zanfan akoz zot bezwen manz en tel manze e pa konsonm sa lot.

Akoz nou bezwen pa manz manze ki annan bokou delwil oubyen ki tro dou.  Paran dan lakour e ansennyan kot lekol nou bezwen vin model.  Met an pratik sa ki nou dir. Zot ki pou vin  meyer legzanp dan sa lalit.

Mon osi demann ansennyan pou pran en pti letan dan en leson pandan lazournen koz i la.  5 minit i ase.  Oubyen fer zot leson entegre avek sa topik reste an bonn sante.

Pa depan zis lo PSE teacher pou fer sa akoz sa i  en lager pou nou tou.  Pour konmanse i pa pou fasil ni pou paran, ni pou tuck shop operators, ni pou zanfan, ni pou lakominote an zeneral akoz nou tou nou konnen ki larealite lavi i parfwa difisil sirtou avek sa mank e osi sirtou bann pri lo serten  komodite.

Me pli tar tou dimoun pou kontan e fyer ler nou kapab vwar benefis sa Polisi.  E ler rapor medikal a ganny pibliye e nou a vwar ka mortalite an relasyon avek nou stil lavi in desann konpare avek bann lannen presedan.  Nou tou konman  en pep nou pou kontan e fyer.  I vre ki i pou pran en pe letan pou sa konsep ganny aksepte par lakominote me gradyelman i pou vini e sa i pou vin en gran pa pou nou pei e pou nou pep ki pou pran kontrol lo son lasante.

Pou fini mon lentervansyon mon pou dir ki mon pou donn mon sipor total sa Mosyon akoz mon pa ti a swete vwar enn mon frer ou ser kit mwan zis akoz son stil lavi.  Oubyen zis akoz i pa’n tro kapab pran swen avek son lavi.  Mersi Mr Speaker.

 

MR SPEAKER

Mersi Onorab Sophola.  Mon ti a kontan  zis fer en pti remark lo sa zafer bouyon bred.  Ankor petet  en pti pe- i edik en pti pe nou bann dimoun deor.  Mon annan mwan en pti zanfan byento i pe al ganny 8an.  Son laz 6an mon ti anmenn li dan en restoran ler ti demann li ki i ti anvi manze i ti dir ek nou, ‘’papa demann zot si napa bouyon bred.’’  

So i annan zanfan mon krwar ki kontinyen pran sa stil lavi ki parey Onorab Sophola in dir i en still ki healthy me nou’n pran nou’n met akote.  Bon avan nou Break mon ti a zis kontan fer en mansyon ki Lasanble Nasyonal de tanzantan nou ganny bann viziter ki vin zis drop in, zot on holiday Sesel, zot drop in.  Vandredi nou ti ganny ankor i ti lo holiday Sesel ek son msye en Sekreter ek Parlman Endyen Lok Sabha ki ti vin fer en vizit kot Lasanble e apre i ti pas en pti moman kot mwan.  In rankontre Madanm Clerk tou e ozordi kekfwa la mon bezwen sanz langaz.  ‘’This morning I would like to welcome a couple who are actually visiting Seychelles and they have decided to visit the National Assembly and they’re seated in the gallery just to follow the debate.  Unfortunately the debate is in creole but we welcome you and we will also like to invite you- we are going to have a break, we invite you to have tea with us, with Members of the National Assembly and of course we can exchange greetings and ideas.’’

Bon nou direksyon apre ki nou pou pran Minis Adam pe vini pou prezant sa Bill lo Human Rights Commission.  So nou pou move away from the Motion e nou pou al  direkteman lo Bill ler nou rantre 11er e apre ler nou fini ek Bill nou ava pran kontinyasyon Mosyon.  Ok so nou pou adjourn nou ava re pran 11er.

 

(BREAK)

 

MR SPEAKER

Bon nou ava kontinyen nou travay.  E parey mon ti’n anonse avan nou pran Break, nou pou aprezan pran Bill ki lo Order Paper.  Mon ava demann Madanm Clerk pou apel Minis avek son delegasyon.  E se Minis Jean-Paul Adam ki pe vin prezant sa Bill Seychelles Human Rights Commission

Bon mon ti a kontan welcome parmi nou, Minis Jean-Paul Adam, Minis responsab pour Lasante.  Be bomaten i pe vin prezant Seychelles Human Rights Commission Bill.  E Minis i akonpannyen par Mr Frank Ally, Attorney General, Mr Samuel Verghese ki Principal Legal Draftsperson, Mr Marthy Vidot ki Personal Assistant to the Minister e Ms Gulmette Bootna ki Assistant Legal Draftsperson.

Bon, petet avan mon donn laparol Minis, Minis ou ti pe nou pe, nou’n partaz en pti parol deor taler dan Break.  Mon pa konnen si Onorab Basil Hoareau oubyen Chair of the Committee, of the Bills Committee, nou ava zis diriz Lasanble ki mannyer nou pou pran sa Bill an vi ki i annan serten travay ankor ki Bills Committee pou soumet avek Minis.  Onorab Georges.

 

HON BERNARD GEORGES

Mersi Mr Speaker.  Bonzour Minis.  Bonzour tou dimoun.  Attorney General, Principal Legal Draftsman, bonzour.  Mr Speaker sa Bill devan nou, i en Bill ki Bill’s Committee i ganny en sans konsidere.  Me in evidan ki i annan plizyer pwen Policy ki nou’n remarke ti ava bon pou refer avek Minis pour li pran en desizyon lo la avan ki Bill i vin dan Lasanble.

Bills Committee ti annan en swa, swa demann ou pou postpone deba lo sa Bill ozordi, pour ki Bills Committee i kapab angaz avek Minis.  Ouswa plito les deba lo merit sa Bill al devan, pour ki tou bann Manm a kapab ganny en ganny pour koze e ki Minis a kapab apre sa, pran sa bann pwen onboard.

Alor sa ki nou pe propoze avek ou permisyon bomaten, se ki nou fer en deba lo prensip sa Bill.  Lo bann objects and reasons e son bann prensip zeneral.  Me nou pa al dan okenn amannman ozordi.

Enn fwa ki tou sa bann, ki deba ava ganny exhausted bomaten.  Nou ekspekte ki sa ava kapab ganny fer avan ki nou break pou dezennen.  Bills Committee prezan ava pran an konsiderasyon tou sa bann keksoz ki’n sorti, nou ava met sa dan nou rapor, nou ava sirkil rapor avek Manm e avek Minis a lafen lazournen ozordi.  Pour ki prezan demen si i posib oubyen en lot zour, e sa i ava ou diskresyon, nou a kapab retourn lo bann amannman ki nou pou fer.  In other words, ozordi si nou kapab fer deba lo prensip zeneral me pa al dan Staz Komite.  Mersi.

 

MR SPEAKER

Mersi Onorab Georges.  Mon krwar sa i lantant ki nou’n gannyen deor.  So e Minis osi, Minis pe retournen demen pou fer sa Statement.  Petet avan i pran sa Statement demen, s i tou bann amannman in ganny prezante avek li e avek Attorney General, demen nou kapab fini avek sa Bill apre Minis i ava al lo son Statement lo lasante, ki nou konnen pour dir nou fini avek enn fwa pour tou.  Onorab Georges.

 

HON BERNARD GEORGES

Mersi Mr Speaker.  Mon krwar sa i ava, i a en bon desizyon.  E mon profite donk pou demann ou a lafen si nou pou fini deba lo prensip zeneral sa Bill midi ozordi, pour demann tou bann Manm Bills Committee pou nou zwenn ant midi ek 2er pour nou fer sa legzersis.  Mersi.

 

MR SPEAKER

Mersi Onorab Georges.  Bon, nou ava kontinyen.  Mon avan demann en Mosyon pour Second Reading.  Onorab De Commarmond.

 

HON CHARLES DE COMMARMOND

Thank you Mr Speaker, sir.  Mr Speaker bonzour.  Bonzour Minis.  Bonzour AG ek ou delegasyon ek tou dimoun ki a lekout.  Mr Speaker mon oule move ki anba Order 64(2) lo Standing Order, ki the Seychelles Human Rights Commission Bill, 2018 i ganny lir en Dezyenm Fwa.  Mersi.

 

MR SPEAKER

Mersi Onorab De Commarmond.  Okenn Manm ki segonde?

 

HON BASIL HOAREAU

Mon segonn Mosyon Mr Speaker.

 

MR SPEAKER

Mersi Onorab Basil Hoareau.  Bon, mon ava donn laparol Minis pour prezant Bill.

 

MINISTER JEAN-PAUL ADAM

Mersi Mr Speaker.  Mr Speaker, Leader Lopozisyon dan Lasanble, Leader Zafer Gouvernman, bann Manm Onorab e tou dimoun ki pe swiv nou deba ozordi, bonzour.

Mr Speaker, bann Lenstitisyon Nasyonal pour Drwa Imen i bann lorganizasyon endepandan ki zwe en rol tre enportan dan promosyon ek sirveyans lenplimantasyon efektiv bann standar Enternasyonal lo drwa imen e dan nou konteks Nasyonal isi Sesel.

Sa bann prensip Iniversel Drwa Imen, ki dan bann diferan konvansyon Enternasyonal enkli bann konvansyon Nations Unis, i bann prensip ki Gouvernman in touzour gard a ker e met a laplikasyon.

An se ki konsern bann lenstitisyon Drwa Imen, i annan plizyer model ki ganny adopte dan diferan pei.  Me lenportans se ki sak pei, malgre ki annan son diferan sistenm, i kapab asire ki sa bann lenstitisyon i rankontre sa standar ki apele sa bann Prensip Paris, oubyen an Anglais parey nou dir, the Paris Principles.

Isi Sesel nou’n adopte model kot Biro Ombudsman ek Komisyon Drwa Imen i form en sel lenstitisyon.  Lalwa Proteksyon Drwa Imen 2009 i donn manda Ombudsman pou fer lanket dan bann konplent ki bann sitwayen i anmennen devan li, ki fer alegasyon, en vyolasyon, oubyen potansyel en vyolasyon drwa imen, ki swa par aksyon ou par omisyon okenn dimoun.

Aktyelman se Ombudsman ki Chairman Komisyon Drwa Imen.  Menm si sa 2 lenstitisyon i sipoze annan son, zot prop Bidze ek travayer, an pratik zot pe partaz bann menm lofis e bann travayer i souvandfwa annan bann rol ki nou kapab dir pa kler ant sa diferan lenstitisyon.

An plis nou’n kapab rankontre bann kontrent resours imen ek finansyel.  Atraver sa Lalwa ki nou pe propoze ozordi, nou pe vwar ranforsman dan Lalwa ki pou fer ki tou le 2 lenstitisyon – ki sa bann lenstitisyon i kapab ganny en plas pli for dan Lalwa e alor pli fasilman adapte bann metodolozi e ganny bann resours neseser.

Nou’n obzerv serten defayans e kontradiksyon ant Lalwa Proteksyon Drwa Imen 2009 ek Lartik 143, Schedule 5 dan nou Konstitisyon konsernan Ombudsman.  Par egzanp, Ombudsman i annan en manda 7an tandis ki Chairman Komisyon Drwa Imen son manda i 4an.  Menm si tou le 2 rol pe ganny desarze aktyelman par menm dimoun.  Swivan bokou konsiltasyon ki ti enplik serten Lazans Gouvernman, Lasosyete Sivil e osi Lasanble Nasyonal li menm e bann manm Biro Ombudsman ek Komisyon Drwa Imen, Gouvernman in deside pour separ sa Biro Ombudsman e Komisyon Drwa Imen konpletman.  Sa i annan pour bi pour ranforsi sa 2 lenstitisyon pour ki zot kapab zwe zot rol dan en fason pli efektif.

Mr Speaker sa Prozedlwa ki mon pe prezant avek Lasanble ozordi se pour etablir en Komisyon Drwa Imen ki, premyerman pou konpoze par en Chairman, en Vis-Chairman e 3 Komisyoner.

E ki pour ganny sipor en Sef Egzekitif dan son fonksyon administratif ek finansyel.  Dezyenmman ki annan pouvwar pour angaz dan medyasyon, bann diskisyon amikal ek negosyasyon dan ka lanket pour detekte okenn ka konsernen labi drwa imen, e pour fer rekomandasyon avek Gouvernman.

Trwazyenmman, osi ki annan tou pouvwar pou fer son travay en fonksyonn en fason endepandan.  Nou ava rapel ki prosesis pour etablir en Komisyon Drwa Imen ti konmans avek en White Paper ki ti pibliye lo sit web Gouvernman pour komanter par piblik.  Minister Zafer Etranzer a sa moman, ki ti pe diriz sa prosesis, ansanm avek Biro Attorney General, e zot ti fer en seri miting piblik dan bann distrik lannen pase pour ganny lopinyon ek kontribisyon piblik an zeneral.

Mon ankouraze pour dir ki i annan serten propozisyon enteresan sorti dan sa bann miting ki Konsey Minis in aprouve e ki’n ganny enkli dan sa Prozedlwa.  Mon oule remersye piblik pour zot partisipasyon dan sa legzersis tre enportan.

Mr Speaker, an se ki konsern konpozisyon Komisyon.  Komisyon li menm ki pour sa 5 dimoun.  Savedir Chairman, Vis-Chairman ek sa 3 Komisyoner.

Tou le 5 pozisyon pou ganny pibliye pour ki dimoun ki kalifye, fer laplikasyon e sa bann laplikasyon pou fer atraver Lotorite Lapwentman Konstitisyonnel, ki apre ava fer rekomandasyon bann non avek Prezidan Larepiblik.  Prezidan i ava fer lapwentman an konsiltasyon avek Sef Ziz ek Speaker Lasanble Nasyonal.  An se ki konsern Chairman, pour en dimoun kalifye pour li vin Chairman Komisyon, fodre in servi oubyen i kalifye pour servi koman en Ziz Lakour Siprenm oubyen Ziz Lakour D’Apel.  Kot i konsern Vis-Chairman, en dimoun ki’n en Ziz oubyen Avoka pour plis ki 5an, i kalifye pour fer laplikasyon pour pozisyon Vis- Chairman.  An se ki konsern Komisyoner, en dimoun ki annan konesans dan size drwa imen, drwa sivil oubyen Servis Sosyal.  Ki annan leksperyans travay benevol.  Ki annan konesans an se ki konsern filozofi oubyen Larelizyon oubyen ranforsman Lalwa ek lenvestigasyon, i kapab ganny apwente koman en Komisyoner.

An plis ki sa, fodre sa bann dimoun i en sitwayen Sesel, byensir e ki zot pe viv permanan isi Sesel.  Fodre sa bann dimoun i annan lentegrite, zot pa andete e ki zot pa dan en en sityasyon fait.  Okenn zofisye oubyen travayer parti politik, Manm Lasanble Nasyonal, Manm Konsey Distrik oubyen en dimoun ki’n deza kondannen e servi en santans pour en peryod 6mwan ou plis pour lofans frod, akt dezonnet, konportman grav konsernan moralite oubyen okenn lezot lofans anba okenn Lalwa pour kalifye pour vin lo sa Komisyon.

Tou bann Manm Komisyon pou ganny apwente pour en manda 5an e pour kapab ganny osi re-apwente.

Mr Speaker en se ki konsern Sef Egzekitif, i propoze pou annan en Sef Egzekitif ki pou ganny apwente par Prezidan lo rekomandasyon Komisyon li menm apre ki’n resevwar bann laplikasyon e fer en prosesis seleksyon.  Sa Sef Egzekitif i pou donn sipor administratif e finansyel

Komisyon e i pou osi sa Accounting Officer.  Son reminerasyon ek son bann term travay pou determinen par Prezidan Larepiblik.

Mr Speaker an se ki konsern pouvwar ek lendepandans Komisyon, Komisyon pou gouvern son lekor.  Savedir i pa pou pran direktiv oubyen ganny kontrole par okenn endividi oubyen Lotorite.  Bann manm ek staff Komisyon i merit egzers zot fonksyon ek pouvwar anba sa Lalwa dan en fason enparsyal, an bonn fwa, san lafreyer, faver oubyen prezidis.

Tou Lotorite lorganizasyon ek lenstitisyon piblik i oblize asiste Komisyon dan son lanket kan i ganny demande.  I napa drwa anpes oubyen met bar dan okenn, dan travay okenn manm oubyen travayer Komisyon.

En manm ou travayer Komisyon i bezwen osi, i merit deklar okenn konfli lentere ki i annan e i pou napa drwa donn okenn lasistans oubyen enplike dan lanket sa ka spesifik kot i annan konfli lentere.  Sa Prozedlwa Mr Speaker i osi fer provizyon pour bann penalti kot okenn manm ou travayer Komisyon ki pa deklar konfli lentere oubyen ki servi zot privilez pour bann byen personnel oubyen pour benefisye en lot dimoun dan en fason ki pa apropriye.

Manm e travayer Komisyon pa merit azir dan okenn fason ki konpromiz kredibilite, enparsyalite, lendepandans oubyen lentegrite Komisyon.

Komisyon i annan pouvwar pour fer lanket dan okenn alegasyon vyolasyon drwa imen ki ariv devan li oubyen kot li menm li i santi in annan en vyolasyon oubyen potansyel pour en vyolasyon ganny komet.

Enn fwa ki’n konplet lanket e i dan lopinyon ki’n annan en vyolasyon, Komisyon i ava asiste sa endividi oubyen group ki’n anmenn sa konplent ek okenn dimoun ki’n ganny afekte negativman pour ganny rekour.

E kot i neseser, fer laranzman pour lasistans financière, pour sa dimoun kapab inisye aksyon legal dan en Lakour konpetan oubyen adres son konplent dan en Foronm apropriye.

Komisyon i annan pouvwar pour etablir bann Komite ki pou konsey li oubyen fer rekomandasyon oubyen lo, oubyen bann size ki Komisyon in met dev…, in demann li.  Komisyon i annan osi drwa pour fer medyasyon, antre dan bann diskisyon amikal oubyen negosyasyon pour rezourd okenn dispit oubyen pou rektifye okenn aksyon ou omisyon ki reprezant en vyolasyon oubyen ki menas drwa imen.  Komisyon pou bezwen soumet en rapor avek Prezidan Larepiblik lo son travay tou le 6mwan.  Me i kapab soumet rekomandasyon bann ka spesifik avek Prezidan nenport ki moman.

An konklizyon Mr Speaker, en créant en Komisyon Drwa Imen ki endepandan avek Biro Ombudsman, nou pe ranforsi sa 2 lenstitisyon pour zot vin pli efektiv.

I osi fer ki nou Komisyon Drwa Imen, atraver sa ranforsman dan Lalwa, pou koresponn pli direkteman avek bann tes Prensip Paris, Paris Principles.  E sa bann prensip i gouvern letablisman bann lenstitisyon pou promouvwar e sofgard drwa imen.  En Komisyon Drwa Imen parey sa Projet de Loi i propoze, i pou ankor ranforsi en pilye nou demokrasi e donn nou zouti neseser pour nou ranforsi proteksyon drwa imen pour nou popilasyon.

Menm si sa pa en size ki petet leve toulezour dan nou sosyete, i pa vedir ki nou pa devret adres li dan en fason sistematik.  E sa ranforsman atraver sa Prozedlwa i donn nou en meyer Lalwa ki kapab adres sa bann sityasyon.

Mon ti ava kontan remersye tou bann Manm Lasanble Nasyonal ki’n deza fer zot kontribisyon atraver prosesis konsiltasyon, tou bann dimoun ki’n fer propozisyon osi atraver bann diferan konsiltasyon dan distrik oubyen atraver bann latelye ek bann workshop ki ti organize.  Mon ti a kontan osi remersye tou bann teknisyen, tou bann travayer Biro Attorney General ki’n travay lo sa Lalwa.

Mr Speaker mersi pou donn mwan sa lokazyon pour prezant sa Prozedlwa.  E mon demann tou Lasanble, tou Manm Lasanble pour donn zot sipor sa Prozedlwa ki konsern nou tou, ki enportan pour nou tou.  Mersi Mr Speaker.

 

MR SPEAKER

Mersi Minis Adam.  Bon, deba i ouver lo merit e prensip zeneral sa Bill.  Okenn Manm ki oule entervenir?  Onorab Georges.

 

HON BERNARD GEORGES

Mersi Mr Speaker.  Mersi pour donn mwan laparol bomaten.  Mr Speaker, sa size Drwa Imen i en size ki enteres tou dimoun.  E i pa en size ki zis pour bann avoka, me mon krwar ki i enn sa bann, sa bann rar size Lalwa ki dimoun i pasyonnen avek.  E konteks sa nouvo Lalwa ki devan nou ozordi i enn ki mon war li enteresan e apropriye, akoz dan 2mwan nou pou selebre 25enm laniverser nou konstitisyon, le 18 Juin, 2018.  E parey nou konnen, nou konstitisyon i annan en long lalis drwa imen ki sa Komisyon ki pou vin travay, sa Komisyon, en fwa ki i ganny apwente.

Alor mon anvi dir, o konmansman mon lentervansyon bomaten ki mwan mon pou anmenn mon sipor pou sa Bill e mon sipoze e mon swete ki Lasanble an antye i ava anmenn nou sipor.

Nou annan nou parey mon’n dir, en Konstitisyon ki annan en long levantay drwa imen ki ganny klasifye an 2 porsyon.  Bann drwa sivil, sa ki bokou dimoun i kontan apel li bann drwa premye degre lavi.  Lavi, mouvman, laliberte lekspresyon, Onorab Ghislain…., i pa la, bomaten.  Me i ti’n fer nou rapel ki anba Lartik 102 sa drwa i egziste, malgre ki mon pa dakor avek son lenterpretasyon me sa i en lot keksoz.  Me i montre nou ki mannyer sa deba i pasyonnan.

E apre en dezyenm kategori drwa, ki bann drwa sosyoekonomik.  Bann drwa lozman, travay, lasante, en lanvironnman prop, drwa kiltirel, eksetera.

E nou annan nou osi, e fodre dir, (Onorab Ghislain in tann mwan pe mansyonn li e alor in antre) nou annan nou fodre dir Mr Speaker, en osi bon levantay lenstitisyon ki protez, ou ki sipoze protez bann drwa imen.  I annan Lakour Konstitisyonnel li menm ki preski tou le semenn pe ekout en ka.  I annan parey Minis in fer resorti, Biro Ombudsman ki ti osi double koman Biro Human Rights Commission.  I annan bann avoka.  Me i annan nou osi ki bann MNA.  Akoz sak fwa ki en dimoun dan nou distrik i ganny en problenm konstitisyonnel oubyen en problenm drwa imen, nou ki ganny, nou ki ganny telefonnen.  Mon frer in ganny arete yer bomaten 9er, la ozordi nou’n ariv 11er i pa ankor ganny large par Lapolis, gete ki ou kapab fer.

Sa se bann keksoz ki nou tou lo en, lo en baz kotidyen, nou interface avek.  E tousala se bann sipor ki nou anmennen pou garanti sa bann drwa ki nou’n ne avek me ki Konstitisyon dan son 3enm sapit in elabor pour nou.

E parey mon’n dir plizyer fwa dan sa Lasanble e ailleurs, nou annan nou en lalis drwa imen ki, ki tou konplet.  I en lalis ki bezwen, nou bezwen fer ankor enn de pti amannman avek.  Me zeneralman i en lalis ki osi konplet ki nou ti ava, nou ti ava swete.  Tousala Mr Speaker i byen.

Alor kestyon ki kekfwa bokou dimoun i ava demande se, si ou annan deza tou sa bann gard fou, si ou annan deza sa bann lenstitisyon ki kapab siport bann drwa imen, akfer ki fodre nou annan en lot?

Akfer ki fodre nou annan en Human Rights Commission?  Sirtou parey nou konnen ki sa Komisyon Drwa Imen ki nou’n annan anba sa Lalwa ki sa enn pou repeal, in, (e fodre dir keksoz mannyer i été) plito missing in action pour sa bann detrwa dernyen lannen.

E sa set en kestyon mon krwar ki, ki en kestyon enportan e parey mon’n dir, i byen ki sa deba pe vin 2mwan avan ki nou selebre en kar syek depi ki nou Konstitisyon in ganny promulgué isi Sesel.

Si nou pou regard sa Komisyon Drwa Imen senpleman koman en Biro Konplent, senpleman koman en lot biro avoka oubyen en lot biro MNA.  E ki nou pa en landrwa ki nou pou call ler problenm i arive, nou pou realize ki nou pa bezwen en Human Rights Commisision.  Nou pa bezwen en Human Rights Commisision ki pou fer sa.  E parey mon’n dir, listwar in montre nou ki, annan pa annan, napa gran diferans dan lavi, dan lavi dimoun akoz zot annan lezot laport pour zot al tape. Bann laport ki ouver pli vit e ki anmenn en rezilta pli apropriye.

Me la diferans se ki sa Komisyon Drwa Imen ki pe ganny etablir par sa Lalwa i al bokou, bokou li lwen.  I pa zis en Biro Konplent, i pa zis en landrwa kot ou tap, ou en laport pou ou tape ler ou annan en problenm ek drwa imen.

Me i en lenstitisyon ki pou al pli lwen ki okenn sa bann lezot lenstitisyon tel ki parey avoka, Biro Ombudsman  ek Lakour Konstitisyonnel i kapab ale.  E tou sa ki nou bezwen fer, se regard Seksyon 16 ou plito Clause 16 akoz sa Lalwa pa ankor pase, pardon 15, pour nou vwar egzakteman ki bann fonksyon sa Komisyon.

E ler nou regard sa bann fonksyon nou vwar ki i annan rekomandasyon ki pou bezwen ganny fer avek Minister  a tou nivo Gouvernman.  A tou bann nivo Gouvernman pou fer sir ki sak brans Gouvernman a sak nivo pe enplimant bann drwa imen.  Pe fer bann keksoz i pa al an kont bann drwa imen.

I pou etidye bann, bann keksoz ki arive dan lemonn, dan sa domenn pour li enform son lekor e pour li enform nou nasyon as a whole.  I pou devlop lenformasyon ek progranm ledikasyon ki tre, tre, tre enportan akoz ler, se ledikasyon, se sa, sa zenerasyon fitir ki bezwen ne e viv anba en sistenm constitutionnalité pou fer sir ki demen nou pei pou mye ki i ti ete yer.

I pour reste en lyezon avek bann lezot lenstitisyon dan lemonn e isi Sesel osi ki pe promouvwar drwa imen.  I pou fer tou sa bann keksoz e bokou, bokou keksoz ankor.

E ler nou regard Clause 15(2) nou vwar en lot rol sa Komisyon.  E sa se pour rekomann avek Prezidan ladopsyon nouvo Lalwa.  E anba sa pti sou-seksyon i vin en, en gro responsabilite.  E set en responsabilite ki elas pandan sa dernyen 25an nou pa’n annan volonte oubyen nou pa’n annan letan pou fer li.  E sa se pou upgrade tou nou bann Lalwa ki egziste.  En bon nou bann Lalwa i depi lepok kolonyal.  Enn de depi lepok kolonyal Français ki, ki’n arete depi 1815, e fer sir  ki zot vin en reg Sapit 3 nou konstitisyon.

E nou’n vwar, e nou ankor vwar, nou’n vwar resaman ki Public Order Act ler ti bezwen ganny renouvle, tou dimoun ti realize ki i pa ti en ligne avek Konstitisyon, depi 1993.  Personn pa’n fer nanryen ziska 2 ou 3an pase.  E menm la, e menm la ler in ganny sanze, ti parey en vizit kot dantis pour ou al tir ledan.

Personn pa ti anvi fer e finalman ti bezwen Lakour pou dir ki sa Lasanble pa ti’n, pa ti’n, pa ti’n azir dan en fason, dan en fason byen.  Alor nou problenm i ankor devan nou.  Nou problenm i la.

Constitutionalism set en keksoz Mr Speaker ki sakenn parmi nou, nou devret pe viv.  E annefe, annefe se nou konstitisyon li menm anba Lartik 40, e mon, mon enplor tou Manm Lasanble e tou Sitwayen Sesel toulezour pour lir Lartik 40 parey en lapriyer ler ou fer en Notre Père bomaten, lir osi Lartik 40.  Akoz se la kot nou annan tou nou drwa ek nou responsabilite.

Tou nou responsabilite i dir nou fodre nou viv en lavi an konformite avek nou Konstitisyon toulezour.  Si nou fer li mon krwar ki nou pei ava bouz devan bokou pli vit ki asa i arive.

Alor donk enn bann rol prensipal sa Komisyon, i pa pou asize deryer en laport, esper en dimoun tap lo sa laport ler i annan en problenm.  I pou proactif, i pou annan sa bann keksoz pou fer.  E enn sa bann keksoz se pou fer sir ki tou nou Lalwa ansanm avek Biro Attorney  Zeneral i ganny modifye pour li ariv a en laspe constitutionnalité.

E dan enn sa bann deba, dan en sa bann deba akoz sa problenm i la, i pe tourn an ron, malgre ki  nou pa anvi regard li.  Nou pou bezwen fer fas avek sa lartik nou Konstitisyon ki dir nou ki tou dimoun i egal e nou pou bezwen regard bann size same sex.  Konnen dimoun pa kontan ler nou koz lo la.  Dimoun i grense e dir i annan lezot keksoz pour nou regarde.  Me letan nou pe regard Konstitisyon, sa set enn bann problenm ki pou arive.  Resaman in ariv devan Lakour D’Apel e Lakour D’Apel in dir sorry nou pa kapab ed ou madanm, me ou annan lezot laport pou al tape e alor al tape.

E la sa Human Rights Commission, nou vwar ki set en laport ki pou ouver pour sa, pour sa dimoun tape.  Akoz parey Minis in dir, Komisyon Drwa Imen i a kapab antre an lyezon avek Gouvernman e fer medyasyon, fer en konsiltasyon, arive trouv en solisyon.  Pa sweep li anba karpet me fer fas avek en sityasyon e pran en desizyon.

Trwazyenm keksoz ki sa Komisyon pou ganny apele pour fer e ki pe ganny fer partou dan lemonn antye, se pou raise, se pou fer monte stati sa bann Drwa Sosyoekonomik dan nou konstitisyon pou fer li vin menm stati ki bann drwa politik e bann drwa sivil anba Sapit 3.

Se pour dir ki ou pou kapab, ou pou kapab al Ankour e ganny en lasistans Lakour ler ou bezwen en lakaz.  Lakour pou bezwen antre dan en rol pli proactif pour fer sir ki dimoun i annan pa zis parol dan en Konstitisyon ki dir zot annan drwa a en lozman, a en travay, a en swen lasante.  Me ki sa drwa i bezwen performan.

E nou’n vwar laport in konmans ouver.  Sud Afrique i annan 2 ou 3an pase zot in élève, zot in konmans élève sa bann drwa ki fer zot vin lo menm stati ki bann drwa sivil ek politik.

Alor tousala mwan mon war set en moman lazwa, en moman eksitan pour nou viv, pour, dan sa pei kot nou pou vwar sa Komisyon Drwa Imen avek sa bann dimoun ki pou ganny apwente.  E nou espere ki se bann dimoun ki osi enterese e eksite ki mwan e ki nou tou isi dan sa Lasanble nou ete pour fer, pour promouvwar sa kiltir constitutionnalité dan nou pei sirtou apre, apre 25an ki nou’n pase.

Mwan pase ou 2 mwan pase, Sef Ziz avek mwan, nou ti’n ganny envite pour al selebre, pour al pran par dan selebrasyon senkantyenm laniverser Konstitisyon Maurice.  E enn bann keksoz ki’n strike mwan Mr Speaker, se ki tou bann, tou bann dimoun ki’n koze in dir Maurice nou annan en Konstitisyon Maurice me nou napa en Konstitisyon Mauricien.  E sa i enportan akoz zot, zot Konstitisyon set enn ki l’Angleterre in donn zot, in dir zot debourye mannyer zot kapab.

Nou, nou annan en Konstitisyon Seselwa.  Akoz nou se, nou’n fer nou Konstitisyon nou menm, pa personn ki’n donn nou.  Nou’n asize otour en latab, parey nou konnen 25an pase e nou’n fer nou Konstitisyon.

Alor nou annan deza en fondasyon ekstraordiner lo lekel nou kapab batir.  E enn, enn sa bann keksoz ki pe vin azout a sa levantay Lenstitisyon ki nou annan pour fer nou Konstitisyon vin en Konstitisyon vivan dan leker sak Seselwa se sa Komisyon Drwa Imen.

E bann dimoun ki pu ganny apwente se bann dimoun ki annan bann responsabilite serye.  Ou pa kapab vin Chairman sa Komisyon si pa kapab vin en Ziz.

Donk ou vwar son nivo, set en nivo tre o, set en Lenstitisyon ki mon anvi e mon krwar ki si nou apwent bann bon dimoun, apwent bann dimoun ki, ki annan letan e ki annan leker pou fer sa travay.  Set en lenstitisyon ki kapab vin Lenstitisyon kle e tir presyon lo lezot bann Lenstitisyon, tel ki parey Lakour Konstitisyonnel, eksetera.

Akoz? Akoz li sa Komisyon i ganny drwa fer en Medyasyon.  En keksoz ki Lakour napa drwa fer.  Lakour i bezwen Ziz en keksoz dapre ler i vin devan li.  Me sa enn pou annan bokou plis fleksibilite, bokou plis, bokou plis bataz.  E nou’n vwar bann, bann Komisyon Konstitisyonnel ou plito bann Komisyon Drwa Imen dan, dan lemonn.  Resaman, mon krwar lannen pase Prezidan oubyen Komisyoner Drwa Imen Maurice, Monscieur Seguin ki ti en Ziz Maurice oubyen plito swa i ti en Ziz, swa i ti frer sa Ziz.

Me annefe i Komiser Drwa Imen Maurice ki’n vizit nou.  Mon ti ava kontan nou, paret nou’n promet 2 mwan pase ler nou ti Maurice, mon ti a kontan vwar Seselwa al Maurice e montre zot ki mannyer bann dimoun ki annan en Konstitisyon Seselwa i kapab donn zot en legzanp lo ki mannyer zot pou fer.

Alor nou annan sa, sa leksitasyon devan nou parey mon’n dir.  Mr Speaker avek sa Lalwa ki devan nou pour, anvizaze espere ki en fwa ki sa Lalwa e i ava annan en pe modifikasyon pour nou fer, se pour sa, se sa ki nou’n, nou’n tonm dakor bomaten.

Enn fwa ki nou’n met li annord e ki sa Lasanble i an aprouv bann amannman apre ki Gouvernman i an reflesir lo la e donn son pwennvi, mon ti ava swete ki nou annan en Human Rights Commission ki pou fer nou fyer.

E ki nou, nou ava kapab ler nou annan en problenm, depann lo la pou fer marse nou rezim Constitutionnalité dan pei.  Mersi Mr Speaker.

 

MR SPEAKER

Mersi Onorab Georges.  Onorab John Hoareau.

 

HON JOHN HOAREAU

Mersi Mr Speaker.  Bonzour Mr Speaker.  Bonzour Minis ek ou delegasyon.

Mr Speaker sa Bill ki devan nou pe fer provizyon pour Prezidan apwent en Komisyon pour drwa imen e osi repeal protection of Human Rights Commission Act, Cap 301.  Mr Speaker oparavan sa Lofis Drwa Imen ti anba Ombudsman parey in ganny dir e i ti plizoumwen parey Onorab ki’n koz avan mwan in dir, en more or less en Biro Konplent.

Me sa Lalwa li menm i pe avans fonksyon sa biro, i pe avans bann responsabilite sa biro bokou pli devan ki sa.  I en morso Lalwa ki nou kapab dir i ase modern e plis ki zanmen nou bezwen Lalwa koumsa pour kapab sofgard Lartik, pour kapab sofgard Lartik 3, Sapit 3 nou Konstitisyon ki annan tou bann Lartik lo bann drwa fondamantal e bann liberte.

Mr Speaker ler nou get en pe fonksyon sa Komisyon, premyerman mon oule souliny le pwen ki i pou annan en rol kot i pou promot drwa imen parmi lasosyete avek serten form ledikasyon e advice ki i pou donnen o size drwa imen an kolaborasyon avek bann Minister e bann Sosyete Sivil ki annan dan nou pei.

E swivan son bann findings ki i trouve apre bann lenvestigasyon, i pou kapab permet li osi anmenn serten soumisyon, serten, serten rekomandasyon avek Gouvernman lo sa bann size.  E pour mwan sa prensip ledikasyon i enn ki mon krwar i primordyal e i byen enportan a sa moman dan nou listwar.  Akoz si ou pa konn ou drwa, ki mannyer ou pou kapab reklanm ou drwa?  So, pour mwan ledikasyon e ledikasyon e ledikasyon i enportan.

Mr Speaker i a pe osi, parey nou dir, i a pe rope-in Civil Society, Sosyete Sivil pou fer sir ki i annan en lafors oubyen en lapros kordinen avek bann Sosyete Sivil dan nou pei.  E si nou rapel yer swar menm lo televizyon, nou’n vwar Sosyete Sivil Arid ki ti pe montre serten ka kot drwa imen ti’n ganny abize.

Mr Speaker dezyenmman mon krwar pour dir sa Lalwa i pe met Sesel at par avek plizyer lezot pei demokratik ki annan kot Sesel i osi annan bann langazman enternasyonal pour li mentenir son bann commitment anver bann Konvansyon Enternasyonal e Rezyonal.  E sa Lalwa pe permet li zisteman kapab al dan direksyon.

Trwazyenmman i pou annan sa posibilite pour sa Komisyon li menm servi warant e rod bann lenformasyon e rantre dan bann lofis, rod bann lenformasyon, pour fer li posib pour li kapab anmenn en lenvestigasyon kot i annan ka ki drwa imen in ganny vyole oubyen i soupsonnen in ganny vyole.  E pli devan i kapab anmenn sa bann, sa lenvestigasyon o nivo Lakour  e demann Lakour pour pronons li so sa bann size, lo sa bann case.  Me sa ki osi enteresan dan sa Lalwa ki mon’n lir, mon vwar i annan en proteksyon kont self- incrimination.  Setadir bann prensip zidisyer kot si en dimoun i pe donn en serten lenformasyon ki pou incriminate li, i ganny drwa, sa lenformasyon i ganny drwa pa servi in the Court of Law, the Court of Law.  

So, anba Clause 17(4) i etablir serten sa bann prensip, serten sa bann prensip kot en dimoun i devret ganny gete inosan unless ki i, i soz, in ganny proven guilty, right? 

So, pour mwan en lot laspe sa Lalwa se sa medyasyon ki i kapab anmennen osi e negosyasyon avek en trwazyenm parti.  Vedir i kapab osi si oule annan en lapros parey en Tribinal.  Kot i negosye serten keksoz e i kapab rezourd serten problenm there and, thereonSo, i pa bezwen gaspiy letan, ou kapab asire poudir i pou en keksoz efektiv e i pou mars ase vit.

Mr Speaker ler nou pe get dan lepase, pa tro lwen dan lepase, 2016, i annan bann rapor department of states ki’n ganny fer Sesel en servant lenformasyon journalistique e osi lenformasyon ki Minister Foreign Affairs i donn sa lorganizasyon.  Nou’n vwar pour dir i annan bann ka kot lapolis in servi son lafors, son gros bras parey nou dir, britalite, sirtou parey NDEA ki’n dan, enplike dan serten ka kot zot in servi, zot trigger happy, zot servi boulet karoutsou pour sey fer dimoun comply pour sa ki zot, zot anvi dimoun i comply.  Me selman sa i pa neseserman the right approach. 

Se sa en pti pe sa bann keksoz, bann konplent koumsa ki sa rapor in anmennen ki drwa, sa Komisyon Drwa Imen pou bezwen investigate ladan.  I annan osi bann ka kot in annan bann harassment lo bann Lopozisyon, lo bann dimoun ki fer politik.

E parey nou konnen dan lepok parti inik in annan bokou e dan lepok en pti pe pli resan osi in annan kontinyelman bann kalite harassment ki bann politisyen in gannyen.  E sa i kont drwa imen.  E sa i bann keksoz ki sa biro pou kapab take up e fer sir i take them to task.

I annan vyolans kon bann madanm, kont bann zanfan.  Parey mon’n dir, bann ka kot bann travayer etranze i ganny deny zot right.  I annan bann ka osi kot nou vwar bann dimoun avan ki zot anmennen Ankour, zot ganny detenir avan, bann pre-trial detention e sa enn ler i al lo tro bokou letan avan swa ki sa case i kapab ganny en zizman Ankour.  Alor sa osi i en ka kot bann, sa Komisyon i pou kapab investigate.

Bien entendu i annan koripsyon ki osi ganny get koman en labi drwa imen.  I annan human trafficking, i annan forced labour, labi dan Prizon.  Nou’n fek tande pour dir i annan en prizonnyen ki’n mor.  E sa i en size kestyon ki Leader Lopozisyon pe anmenn devan as a Private Notice Question.  E nou’n vwar dan lepase, Robert Banane osi in perdi son lavi dan prizon.  Alor, avan ki prezidan i pran sa linisyativ pour fer demann en enquiry, nou ava annan nou en body ki annan en Lalwa ki marse, en Lalwa ki morde, ki ava pran lo li menm pour li pran sa bann ka e fer bann lenvestigasyon.

I annan disparisyon dimoun, disparisyon a en serten moman ti komen Sesel.  Me la in, i paret mwan i pe retourn ankor en pti pe parske nou’n vwar 2 dimoun ki’n disparet e nou pa’n zanmen konn okenn, ganny okenn latras ki bor zot in ale.  I annan Mr Mervin Asba avek Mr Peter Zoe tou dernyerman.  So sa i bann keksoz ki sa body, sa Komisyon i a kapab get ladan.

Mr Speaker mon pou siport sa bill e mon demann mon bann koleg pour donn sipor total sa Bill.  Akoz i pou anmenn devan en Komisyon ki pou annan bann Lalwa ki morde deryer li.  E ki pou kapab reponn a bann bezwen ki nou annan dan sosyete ozordi.  Mersi.

 

MR SPEAKER

Mersi Onorab Hoareau.  Bon i reste nou 10 minit.  I annan detrwa Manm ki lo mon papye pour entervenir.  Prosennman mon annan Onorab Henrie, ou kapab fer ou entervansyon dan 10 minit?  Ok.  Akoz mon anvi rann lantenn avek SBC midi.  Onorab Henrie.

 

HON GERVAIS HENRIE

Mersi Mr Speaker.  Bonzour tou dimoun.  Mr Speaker dan bann lentervansyon ki’n annan avan mwan, 2 keksoz ki’n frap mwan.  Dabor letan Minis in dir ki letablisman sa Komisyon i pou ranforsi en pilye nou demokrasi.  Apre letan Onorab Georges in koze, in dir nou pour dir i annan plizyer bann lenstitisyon, konmsi i deza annan bokou keksoz an plas ozordi ki ti’n kapab si zot ti serye, si zot ti annan resours, si zot ti annan sa volonte, mon krwar in servi sa mo, ti pou’n anmenn sityasyon drwa imen bokou plis devan.  E en keksoz ki mon krwar dan Sesel en defi Nasyonal, se kot sitwayen Seselwa pa’n forseman konn zot drwa imen.

E si zot pa konnen, ki mannyer ou pou konnen si i annan vyolasyon?  Alor sa i en keksoz ki mon swete sa Komisyon i ava adrese.  Anfet merit sa Bill, mon pa krwar pour dir i annan bokou dimoun ki pour kont.

Donk nou tou nou ava krwar pour dir i en bon keksoz ki i pe fer.  Me mwan sa ki mon trakase avek sa bann Komisyon letan zot vini, sa ki fodre pa e mon swete bann dimoun ki kekfwa ki ava enterese dan lavenir pour met zot non de l’avant pour pran bann pozisyon dan sa lorganizasyon, ki swa koman en Komisyoner ouswa koman en senp travayer, zot pe ekout nou e zot ava pe pran kont sa nou, nou pe dir.

Parski nou pa anvi kontinyen dan sa pei zis met bann lorganizasyon ki tick bann bwat pour Sesel letan nou pe get konmsi dan standar Enternasyonal pou dir, wi i annan en Komisyon ki deal ek Koripsyon, wi i annan Ombudsman, wi i annan isi, wi i annan laba.  Me zot bezwen delivre, akoz sirtou nou koman en Lasanble, dan nou oversight role, letan nou donn zot en Bidze, nou pou bezwen egzize pour dir zot rann sa servi ki Sesel e bann dimoun ki nou ki’n ganny elekte prensipalman, nou reprezante, fodre ki sa Komisyon i donn zot sa servis.

Alor enn bann keksoz ki mon krwar sa Komisyon i dwatet fer.  Mon kontan pour dir dan dezyenm parti, son clause 3(2), i koz lo lendepandans sa Komisyon.  E sa i enportan.

Alor dan son lendepandans,  i pran li a cœur i ava en Komisyon i ava tre fonksyonnel e sirtou, sirtou i bezwen konsantre lo sa laspe ledikasyon ki mon’n konmans mon prezantasyon avek, kot i ava fer bann resers pou idantifye bann defi dan bann size drwa imen ki Sesel pe fer fas avek.  E enn fwa ki i fer son resers, i ava kapab fer bann lentervansyon apropriye, kot i ava handle bann konplent ki vin devan li.

Parski ozordi anfet mon vreman apresye sa viger ki mon war Arid en sel kou in, in pran a cœur en size.  E nou’n vwar bann advert lo televizyon, kot letan medya Nasyonal in ezite mansyonn non bann lakonpannyen ki ti pe maltret bann travayer etranze.  Me li Arid in met en advert kot in name and shame. 

E sa i byen, tre byen, kontinyen fe sa ki zot pe fer.  E Mr Speaker, parski dan lepase en kantite fwa medya, sirtou media endepandan, medya ki’n tant pour dan kan lopozisyon, in raport lo plizyer bann sityasyon.  Depi bann labi par Lapolis, move tretman bann travayer etranze.  Be tre souvan bann Lotorite konpetan ki ti merit apre pran sa bann size e swiv sa bann size, mon krwar zot in pran sa konmsi, ar i en lot latak pou sali repitasyon Gouvernman.  Non, non, non !

Sa bann dimoun ti pe fer sa akoz zisteman ti pe annan sa bann problenm.  E parey Onorab Georges in rapel nou, Lartik 40 nou Konstitisyon, kot nou, nou ti pe pran nou responsabilite zisteman koman bann sitwayen konsyansye pour met de l’avant sa bann keksoz.

E mon kontan finalman ki Gouvernman in ekoute letan, par egzanp Commonwealth, sekretarya Commonwealth ti anvoy en delegasyon isi an Zen 2015.  Mon krwar zot ti vini, zot in fer en diskisyon.  E apre kot sa Bill la in komans ganny diskite, in annan sa White Paper stage ki Minis in koz lo la dan son prezantasyon.  Donk ki’n fer ki tou bann stakeholders konsernen in kapab vin devan pour met zot konsern vizavi sa Bill.

Donk, lot par mon prezantasyon Mr Speaker, mon ava zis vitman pas lo serten bann clause ki petet Minis i donn nou en lesplikasyon dan son summing-up.  Lartik 5(1) par egzanp, kot i koz lo apwentman Chairperson, Deputy Chair avek Komisyoner.  Letan mon pe get sa model, mon krwar, mon tante krwar i enn ki mon koleg lot kote latab Onorab Hoareau pou kontan akoz i enn fason ki in koz lo la dan lepase lo fason ki, la in met en spesifik sif, ki fodre i annan en serten kantite kandida pour CAA swazir anvoy, kot Prezidan pour swazir.

Me solman mon kestyon lo la i se ki, mon war li diferan avek fason ki bann lenstitisyon osi enportan, son Chairman, son Depite avek son bann Komisyoner i ganny swazir.  Letan mon pe mazin detrwa la, par egzanp Electoral Commission, ACCS, CAA.  Konmsi mwan mon ti ava mazinen pour dir dan nou model gouvernans Sesel, si nou’n konmans pran en metod apwentman, akoz nou pa stick avek sa model?  Konmsi dan term konsis, consistency.

Sennla i en pe diferan e zot ava koriz mwan si zot krwar mon pa neseserman korek lo sa fason.  Donk nou ti ava kontan en lesplikasyon akoz li i pou vin dan sa fason dan 5(1), kot, konsernan lapwentman.

En lot pwen ki mon en pe konsernen avek dan 5(4) se kalifikasyon bann dimoun ki pou ganny apwente.  E mwan mon pe dir sa akoz Sesel son grander, nou bann dimoun ki nou annan, eski vreman nou pou annan Seselwa avek sa bann kalifikasyon pour vin devan e pour ganny apwente?

E annou legzanp Public Person Declaration Asset Commissionner, Lasanble in amande pour redwir kalifikasyon sa pozisyon.  Me ziska la letan nou pe koze, pa ankor annan.  E nou koman bann Constitutional Appointees parmi lezot, nou pa ankor deklar nou asset akoz zisteman Lalwa in pase me bann dimoun konpetan pour fer sa travay pa ankor ganny trouve.  Donk, eski nou pa pou trouv ankor en lot sityasyon la kot kalifikasyon e en pe tro o e napa dimoun ki vin devan pour fer sa travay?

Lot pwen se, kot i konsern, ya vin 5(6), nou vwar pour dir bann dimoun pou dan lofis pour 5an e zot kapab ganny re-apwente. Me eski i annan en term limit ki zot kapab?  Eski i 2 fwa 5an, 3 fwa 5an?  Si i annan par la mon pa’n vwar.

So, si zot ti kapab zis, highlight sa akoz an term, ankor kestyon consistency.  En prezidan i kapab debout pa plis ki 10an.  Be sa osi ti a bon met en term limit dan lakantite letan ki en chairman i kapab deservi dan son pozisyon.

Lot pwen ki mon ti oule adrese lo kestyon investigation by commission.  E sa la nou pe koz Lartik 16(17).  Ki kantite letan sa Komisyon i kapab pran en case pour retourn an aryer pou al fer en lenvestigasyon?  E mon pe dir sa akoz pour evit bann sityasyon duplication.  Nou konnen pour dir la komite Truth and Reconciliation in fini soumet son rapor.  Nou pe swete pour dir pou annan en, en Komisyon Nasyonal ki ava ganny apwente pour al deal avek serten case.  Eski pou napa duplication?  E eski, how far back sa Komisyon li i kapab deal avek serten case?  Mon war Onorab Hoareau laba i sakouy son latet, in dir mwan non.  Ok, mon ava pran son sa lo sa size.

Dan Lartik 20(1) Mr Speaker, letan nou pe koz reports by commission, mon krwar konmsi nou en pti pe tro enthousiasme lo sa size la.  Letan nou pe dir bezwen soumet en raport avek prezidan en Lasanble Nasyonal tou le 6mwan.  Mon krwar i en pti pe… Mon krwar en fwa par an mwan, i rezonnab.  E letan nou get dan lepase, sa National Commission li ki la, apenn si i’n raport en, apenn si i’n fer en rapor.  Si in annan, mwan mon pa rapel mon’n bat avek enn.  Donk, en fwa par an en rapor mon krwar i rezonnab.

Lo son trwazyenm parti, kot i deal avek finans.  Sertennman mon mazinen pour dir i ava annan en bidze siplemanter ki pou vini si sa Lalwa i pas la avan lafen lannen, alor pour met li an Mars.

E kekfwa nou ti kapab ganny en nide lo ki kalite reminerasyon Gouvernman pe mazinen pour bann dimoun ki pou ganny apwente dan bann diferan pozisyon.

E finalman, dernyen, wi, dan Lartik 29 kot i koz lo repeal of Protection of Human Rights Commission Act.  Petet Minis ti kapab donn nou en kont randi zisteman lo ki diferans sa Komisyoner ki ti la avan in fer dan lavi Seselwa ?

Pour nou kapab apresye pour dir zisteman prezan nou pe sanz model ki pou annan en lot lorganizasyon ki pou vini.  E nou ava krwar, nou ava krwar dan sa l’enthousiasme ki Onorab Georges in met devan.  Dan fason ki i pou annan en diferans à l’avenir.  Donk, avan ki nou zis oubliye ki zot ti egziste, nou ti ava kontan konnen ki diferans zot in fer dan lavi bann Seselwa ordiner.  E pour ede promouvwar drwa imen e pour ede met de l’avant drwa bann Seselwa.  Se tou ki mon ti annan pour dir Mr Speaker.  Mersi bokou pour sa letan ki ou’n akord mwan.

 

MR SPEAKER

Mersi Onorab Henrie.  Bon avan nou pran Break, mon ti a kontan petet demann Minis pour, ki nou retournen avek ou delegasyon 2er.  E petet mon zis anvi dir en pti parol with regards to prezans Attorney Zeneral ozordi parmi nou.  Tou Lalwa i enportan me ou prezans ozordi in montre nou lanfaz ki Lasanble, ki ou biro, ou menm pe mete lo la.  E nou vreman apresye AG ki ou la parmi nou.  E nou swete ki dan le fitir osi tou, nou a kapab vwar ou en pti pe pli souvan parmi nou.  Mersi AG pour ou prezans.

Mon anvi annan, mon anvi fer zis detrwa lanons bann komite ki pe zwenn pandan lunch time.  Bills Committee pe zwenn tout de suite apre ki nou break la.  E IAC pe rankontre 12.45 e Assembly Business Committee 1.15.  Bon, avek sa nou ava pran en Break e nou ava retournen 2er.

 

(BREAK)

 

MR SPEAKER

Bonn apre midi tou Manm Onorab.  Bonn apre midi Minis, bonn apre midi Mr Vidot mon war ki ou’n perdi ou delegasyon.  Bonn apre midi osi tou dimoun ki a lekout.  nou pou repran nou travay Onorab Basil Hoareau.

 

HON BASIL HOAREAU

Mersi Mr Speaker anba Order 22, (1) mon ti a kontan move ki the debate regarding the Bill be now adjourn.  Rezon ki nou pe demann sa se ki evantyelman nou pou bezwen al dan Komite e nou realize pou dir dan Komite pou annan en ta lamannman e i pou quiet substantial amendments e ki nou riske pa kapab fer li ozordi e menm lot semenn akoz nou Chairperson Bills Committee pa pou dan pei e mon’n aprann osi ki Minis osi pa pou dan pei lot semenn.

E lot semenn nou dernyen Sitting ki nou pe fer pou sa term.   So nou pe propoze alor ki nou bezwen konplet son pou al dan Committee Stage e tou lot term.  So pou sa rezon nou pe dir meyer ki nou pa kontinyen ek deba lo sa Bill alor nou adjourn debate lo sa Bill pou nou pran term prosen Mr Speaker.

 

MR SPEAKER

Ok mersi Onorab Basil Hoareau.  I annan en Mosyon pour adjourn debate lo Human Rights Bill.  Okenn Manm ki segonder? Yes Onorab Ramkalawan.

 

HON WAVEL RAMKALAWAN

Mr Speaker apre midi mon pou siport minorite dan Lasanble. Minorite i move ki nou adjourn nou pa pe pran li koman nou pe stifle debate pou nou anpes minorite koze alors nou, nou pou siport sa ki minorite in propoze.  Mersi bokou.

 

MR SPEAKER

Mersi Onorab Ramkalawan, bon annou pran en vot lo Mosyon move par Onorab Basil Hoareau.  Tou Manm ki an faver? Okenn Manm ki kont?  Non.  Bon savedir debate lo Human Rights Bill i ganny differed pou en later date. Minis nou ti a kontan remersye ou pou vin avek nou e nou ava eskiz ou parmi nou Minis.  Wi nou pou vwar ou tou fason demen matin 9er pou Statement.  Mersi Minister.  Mersi Mr Vidot.

 

(MINSTER JEAN-PAUL ADAM AND HIS DELEGATION WAS EXCUSED FROM THE HOUSE)

 

 

MR SPEAKER

Bon nou ava kontinyen alor avek travay ki ti devan nou bomaten.  Bomaten nou’n ti’n komans en Mosyon move par Chantal Ghislain.  Bon lo mon lalis mon napa okenn Manm ankor pou entervenir petet mon ava zis demande si i pou annan lezot Manm ki pou entervenir lo Mosyon move par Onorab Chantal Ghislain.  Yes Onorab William mon a donn ou laparol.

 

HON WAVEN WILLIAM

Mersi Mr Speaker.  Mr Speaker mon pe siport sa mosyon e mon vwar li koman en lot wake up call.   En wake up call pou sosyete koman konsonmater, en wake up call pou bann ki dann pozisyon enfliyansyel tel parey Egzekitif Lezislatif, zidisyer sekter prive e sosyete sivil.  Ki bann akter kle ki kapab dan zot diferan rol enfliyans sanzman dan fason konportman panse e fason fer dan sosyete.

Mr Speaker listwar i montre ki devlopman e modernizasyon in drastikman transform nou lanvironnman e an retour annan en lenpak direk lo nou fason viv an alan.

Gouvernman ek pep fas a sa kouran sanzman konsyaman e enkonsyanman in bezwen abandonn serten koutim stil lavi e fason konsonmen e viv.

Vites devlopman e mank sifizaman resours, mank opsyon e fas ek presyon lavi. Bokou fanmir in sibir bann riptir dan diferan sirkonstans e mankman dan enplimantasyon dan stratezi nou bann prensip e stil lavi i ganny konpromi.  Legzanp ki mon kapab donnen ozordi i lerozyon nou koutir koutim zilwa pa lenvazyon e lenpak fenomenn globalizasyon e lentegrasyon marse lib, transformasyon dan teknolozi transportasyon e telekominikasyon.

Ki’n arive Mr Speaker malgre tou bann koze lo Souverennte san ki nou konnen nou Souverennte pti a pti nou’n ganny anvair par lezot kiltir e kalite komodite transformen me ki pa fre kot bokou kemikal e zengredyen pou prolonz zot lavi avan konsonmen.

Sa vites ek swa Gouvernman e pep pou aziste Polisi modern e azour in fer nou an retar parey bokou lezot Pti Leta Zil e bann pei anba devlopman.  Mosyon pe dir revwar mwan mon dir revwar lo en baz kontinyel pou reste dan lakours ek devlopman ek modernizasyon. Gouvernman koman Gouvernman tou dimoun pou bezwen larg ankor kontrol dan sa lespri partenarya akoz larepons i ek sosyete, Gouvernman i la pou gide e donn direksyon.

Stratezi o nivo kominote bezwen vize plis ver lafanmir e lekol pou vreman anmenn sa lenpak konsiderab signifikan pou sa diferans vizib e mezirab. Pou bezwen annan bann target dan en dele letan. Lapros bann diferan Lazans Gouvernman pou bezwen sanze dan distrik, Gouvernman pou osi bezwen met resours a la baz dan distrik pa zis koze e rekonnet mankman me pa montre aksyon konkret.                        E la mon pe fer en pledwari lezitim parey mon ti fer dan Bidze silvouple donn nou resours dan distrik pou ede fer sa diferans.

Mr Speaker mon aport mon sipor e demande ki nou sey tou pou kit sa kiltir fason fer reaktiv me vin pli proaktiv de-lavan. Annou pa kontant nou ek zis bouze ouswa bouze menm annou vin pli anbisye ek en vizyon pli kler.  Mersi Mr Speaker.

 

MR SPEAKER

Mersi Onorab William.  Mon donn laparol Onorab Aglae.

 

HON EGBERT AGLAE

Bonn apre midi Mr Speaker, bonn apre midi tou Manm e tou dimoun a lekout.  Mr Speaker mon pou aport mon kontribisyon pou sa mosyon.

Bomaten ler Onorab Chantal in prezant son Mosyon in tous en de pwen enportan kot i konsern nou stil lavi.  Mon pou konsantre mon lentervansyon enn ti pe lo sa ki konsern kwa ki nou konsonmen an term manze. Mr Speaker i annan en Franse Mr Anthelme Brillat-Savarin ki an 1926 i ti fer en sitasyon, “dis-moi ce que tu mange je te dirais ce que tu es.

Ann Angle parey nou dir ozordi you are what you eat.

Mr Speaker 99poursan bann maladi kardyovaskiler i relye avek sa ki nou konsonmen.  Mr Speaker pou ou kapab travay, marse, taye, fer ou biznes, annan en plan, en plan devlopman personnel pou ou fitir, ou bezwen asire ki ou an bonn sante pou ou war tousala arive.  E en eleman ki afekte nou lasante se sa ki nou konsonmen, manze.

Bokou bann prodwir ki nou pe konsonmen ozordi i ganny process dan en faktori e i kontinyen bokou sa ki nou apel en eleman trans fat.

Onorab Ghislain in mansyonnen bomaten, e bokou nou pa konnen ki savedir trans fat sa ki nou pe koz lo la. E li i enn bann pli gran…. akoz maladi kardyovaskiler ki egziste ozordi. Pou bann ki pa konpran petet ki pe ekoute, trans fat i en byproduct delwil ki ganny fer ler dan son proses ler i annan idrozenn ki ganny dan son prosedir.

I zis parey ler nou koz delwil brit crude oil ki delwil brit dan son bann prosedir ki i ganny distile fractioning parey nou dir, nou ganny bann lezot prodwir parey petrol, bennzin, gas.  E trans fat li i ganny arive li ler sa bann delwil i ganny pas dan bann serten bann prosedir. Alor ki mannyer nou dir trans fat parey nou dir i danzere pou nou lasante?

I danzere se ki akoz ler nou konsonm sa bann delwil parey nou dir, sa bann delwil sirtou ki satire e li i ganny store dan nou lekor e li i reste dan en form solid e nou vwar li difisil pou ganny tire dan nou lekor.  Sa prosedir eliminasyon pou li i vreman konplike ouswa tarde.                 Mr Speaker, tou prodwi ki nou manze ler ou get lo son label i annan en landrwa ki met bann konteni ki i annan ladan. Me souvandfwa nou bann konsonmater ler nou al laboutik nou tant pou get zis pri nou pa gete ki eleman i annan dan sa prodwi.

Mr Speaker parey mon annan en legzanp devan mwan la, i annan en pake biskwi e enn bann prodwi ki konteni bokou bann trans fat i bann biskwi ki nou manze i ganny crackers parey nou dir e lezot prodwi a labaz soya ouswa mai.  Mr Speaker ler nou get sa ki nou apel valer nitrisyon dan en pake biskwi ou vwar pour dir i donn ou depi son lenerzi son protein e i donn ou osi bann kalite lagres ki annan, swa lagres ki satire, swa lagres parey nou dir trans fat.  E i donn ou kolesterol osi son kantite disik ouswa disel ki sa prodwi i annan ladan. Me nou koman konsonmater ozordi nou al laboutik nou rod sa ki pli meyer marse byensir me nou souvandfwa bliye pour dir tou sa ki nou pe konsonmen i annan bann prodwi a lonterm ler ou pe konsonm li bokou i gard serten toksisite dan ou lekor.

E nou, nou bezwen konsyan sa, e sa se ledikasyon ki nou anvi anmennen pou fer nou bann pepe p konpran pour dir ler nou pe konsonm en keksoz annou pa zis get pri annou get bann keksoz ki annan ladan osi.                                     Mr Speaker enternasyonalman nou annan FDA e se li ki aprouv bann prodwi ouswa ki reglemante si sa prodwi i safe pou nou manze ouswa i pa safe pou nou manze.  E bokou letid i ankor pe ganny ger pou determin bann kalite prodwi ki nou manze si i safe ouswa non.

Mr Speaker kalite manze ki annan trans fat ozordi i partou lo marse e resers i montre pou dir 36 pour san dan tou bann grocery store ki ou antre i annan bann prodwi ki annan a la baz trans fat.  Bokou nou bann zenn ozordi sirtou nou bann manrmay ki lekol nou kontan manz parey bann crackers, bann cookies bann gato ki bake, nou kontan manz bann frozen pizza bann pies, bann lezot snacks popcorn twisties menm bann kontan bwar kafe son creamers osi i annan trans fat ladan.  E tousala i annan bann processes meat e tousala ozordi i pe ede pou anmenn toksisite ki dan a longer di tan nou pou war nou avek bann konplikasyon lasante.

Mr Speaker en pei parey Lanmerik in war li in kapab met anba kontrol bann prodwi ki kontyen sa bann kalite lagres ladan 78poursan rediksyon in ariv lo en nivo kot in kapab redwi a 78 poursan.

E zot in war 6poursan rediksyon dan bann maladi kardyovaskiler dan zot zabitan. Mr Speaker eski nou kapab elimin sa bann delwil sa bann move delwil parey nou dir?  Larepons i non. Akoz sa bann kalite delwil i ganny trouve natirelman dan lavyann e dan bann prodwir dile e dan bann delwil.  Mr Speaker sa ki enportan se pou nou konnen kwa ki nou pe konsonmen toulezour, keler ki nou pe manz sa bann keksoz osi e ki nou fer letan nou konsonm sa bann keksoz. E pou nou kapab egzers en stil lavi an bonn sante nou bezwen annan balans, e tou sa ki ou fer dan lavi si ou fer li an ekse i annan son konsekans lo nou lasante. E si ou konnen ou pe viv en lifestyle kot ou pou annan sa bann balans ou pa bezwen enkyetid me resers ki’n ganny fer avek nou bann zenn ozordi nou koz lo bokou lobezite nou vwar poudir sa sityasyon pe vin alarman e enkyetan e Minister Lasante koman sa body ki li i deal avek bann keksoz ki antre e ki konsonmen e ki regilarize. I enportan pou li vin pli for.

Mon konnen pou dir i annan en High Level Committee ki deza pe adres serten sityasyon tel kot i konsern lalkol ek bann lezot manze ki pa bon pou lasante, me nou bezwen met lipye ater osi pou vwar sa bann enportater ki zis fer vini serten keksoz lo baz ganny profi me non pa get lo baz lasante.

r Speaker en lot pwen se ki lotorite i bezwen aware lo konteni bann keksoz ki annan lo bann prodwi.  I annan SBS ozordi ki teste diferan kalite prodwi ki pe antre tel ki parey lalkol zot pe teste get pour san taz. Me selman nou pa pe al ase profon kot i konsern manze pou nou teste bann manze osi ki nou pe konsonmen. I enportan pou annan sa bann tes ganny fer e vwar ki sa bann manze ki ler in ganny met valer azoute ouswa in sorti dan bann faktori son bann konteni i pa vin en danze pou nou lasante ouswa nou popilasyon.

Mr Speaker en lot keksoz modern ozordi ki bokou nou pe war me napa ase ledikasyon lo la se GMO, bann genetically modified food. Bann manze zenetikman ki ganny modifye parey nou annan bann soya bann corn e lezot bann plant ki ganny grandi atraver zot aliterasyon dan zot DNA, dan zot lagrenn.           Mr Speaker ozordi 90poursan mai ouswa soya bean i ganny zenerikman modifye ki nou pe konsonmen pa bokou nou ki konnen sa. Bokou nou bann manze ozordi nou bann snacks i a la baz sa de prodwi ki pe ganny zenetikman modifye, e i annan son ban pros parey nou dir ek son bann cons.

Bokou syantis in argimante pou dir sa bann kalite manze ki ganny zenetikman modifye i annan son bon kote, tel ki dir ou i annan rezistans kont bann pest, bann zensek.  I annan tolerans kont bann erbisid sa i bann sibstans toksik ki kapab detri plant.  I annan tolerans anver lasaler, lafreser e i fer ki ler ou pe antre ou, ou pe entrodwi sa bann keksoz koman en agrikilter ou fer fas ek mwens bann defi ki kapab pe detri ou bann plant e in the end ou, ou ganny en good deal en bon prodiksyon e ou ganny en benefis savedir ou biznes i profitab e ou ganny ou bann prodwi.

Me dan lot kote Mr Speaker i annan son move lefe sa bann kalite prodwi ki ganny zenerikman modifye. Nou koz lo alerzi ozordi, bokou nou parfwa menm dan bann manm fanmir ou tande, entel in manz tel keksoz i pa konnen ki’n gannyen in anfle dokter pa konnen ki i gannyen ouswa i ganny difikilte pou respire sa i koze par bann allergy.

E ozordi o monn letid in montre pou dir 5poursan bann zanfan anba 18an i develop bann severe allergy akoz serten keksoz ki zot in manze sa i labaz prodwi zenetik.

Dezyenmman Mr Speaker nou annan sa ki nou apel antibiotic resistance, rezistans antibyotik. Ozordi plis ki 2 milyon dimoun o monn tou-le-z-an pe sibir bann alerzik avek bann rezistans avek antibyotik e i annan plis ki 23 mil dimoun par lannen i mor akoz sa, e sa i ganny koze atraver bann keksoz ki nou pe manze ki zenetikman nou, nou enkonsyan pou dir sa keksoz i dan sa ki nou pe konsonmen.

E demen ler ou pe ganny en lenfeksyon ou ale ou pe servi antibyotik ou vwar ki sa antibyotik pa pe pran lefe lo ou e ou pe demann ou lekor kestyon.         Mr Speaker trwazyenm pwen i annan kanser, bokou nou, nou’n koz bokou lo kanser isi dan sa Lasanble e depi 2013 resers in ganny fer lo sa ki nou apel zenetik alman modifye sa i mai. I annan en korelasyon ki’n ganny refer sorti ant sa bann mai ki nou pe manze ki zenetikman avek kanser.

E bann tes ti ki ganny fer parey nou konnen lo lera i montre ki 28 pour san bann lera ti ganny sa kanser e 28 pour san ti annan bann premature death sa ki nou dir bann lanmor prematir ki’n arive.

So sa i pe montre pou dir lefe i reste lo nou lasante e souvandfwa de gro lakonpannyen ki per fer bilyon e de bilyon zot pe kasyet sa bann keksoz zot pe dir ou ki sa i bon pou nou lasante.

Me nou koman bann konsonmater nou devret vin en ti pe pli konsyan lo sa bann keksoz ki ler nou pou aste bann prodwi pou donn nou zanfan annou get byen. Annou get byen akoz ankor dan 10an – 15an nou pe ekspoz nou zanfan, i parey nou pe donn enn ti doz nou zanfan ki ler i ariv dan 10an nou war pou dir nou zanfan in malad in ariv son nivo toksisite.

r Speaker mon pe siport sa Mosyon akoz i annan son baz. Ler nou koz aktivite legzersis Mr Speaker mon krwar i enportan ki nou koman bann lezislater e ki Gouvernman i ekout nou osi kot ler nou pe nonmen pou dir nou bezwen do away avek serten fason fer. Nou bezwen annan bann progranm oubyen fasilite pou kapab annan en balans ant nou aktivite lwazir nou aktivite fizik ouswa nou aktivite lwazir dan en sans kot nou kontan manze Seselwa i kontan manze Seselwa i kontan son manze Seselwa i kontan son bwar, me selman ou bezwen annan sa balans.     Mr Speaker kot konsern lekol plis zefor i devret ganny mete pou dir bann zanfan i kontinyen fer bann legzersis. Mon salye zefor Minister ledikasyon pour fer sir ki son bann tuck shop i annan bann bon prodwir pou fer sir ki zanfan i kapab ganny en meyer lasante me nou tou nou konnen i vin avek en pri.

Dan lakominote Minister Gouvernman Lokal annou sorti pli for pou fer sir ki dan nou bann Housing Estate i annan fasilite pou bann dimoun lwazir ki ler zot sorti travay at least 30 minit legzersis i kapab ganny fer.

Sa Mr Speaker si nou kapab met sa bann keksoz an mars e lotorite i reste vizilan osi annan bann enportater ki pa nenport kwa ki i antre. Nou war bann pei parey Lanmerik, Lerop lo bann kontinan ki zot, zot konsyan avek bann prodwi ki zot konsonmen. Me bokou nou bann prodwi i annan bokou ki sorti dan bann pei parey Lazi. Mon tann in nonm serten pei ki mon pa pou nonm non me nou konnen pou dir en ta keksoz i pase dan bann faktori laba ki pa ganny teste.

Pa ganny teste pou konnen e ler keksoz in arive souvandfwa i annan bann lekritir ki nou menm nou, nou pa kapab lir nou pa konnen ki annan ladan, me akoz i bon marse nou aste, nou donn nou zanfan ouswa nou menm nou, nou pe konsonmen. Alors Mr Speaker i annan en ledikasyon enportan ki nou bezwen fer kot i konsern kwa ki nou pe konsonmen an term manze mersi Mr Speaker.

 

MR SPEAKER

Mersi Onorab Aglae. Onorab Herminie.

 

HON WILBERT HERMINIE

Mersi Mr Speaker.  Mr Speaker koleg Manm Onorab tou dimoun a lekout bonn apre midi.  Mr Speaker mon pou aport mon sipor pou sa mosyon anmennen pa Onorab Ghislain, premyerman mon pou aport mon sipor a sa Mosyon akoz sa Mosyon pe abor en size ki konsern lepep Seselwa.  Lasante mon pep.  E mon Mr Speaker parey ler mon ti antre dan sa Lasanble mon ti dir e mon pou kontinyen dir a nenport size ki ganny anmennen dan sa Lasanble ki pe pran kont sa pep dan en fason pozitiv pou zot prop byennet mon Mr Speaker mon pou toultan siporte e rod fason pou ki sa pep i viv en meyer lavi.       Mon aksyon se senpleman akoz mon toultan rekonesan se sa pep an partikilyerman zabitan La Riviere Anglaise ki ti met mon la pou koz pou zot e an retour mon pou toultan annan sa leker pou zot e fer sir zot ganny le meyer.

An plis ki sa Mr Speaker mon pou fer remarke ki dan sa Mosyon Onorab pe fer byen kler ki pe demann Gouvernman pou seryezman met an plas bann polisi e aksyon pou ankouraz nou popilasyon pou adopte en kiltir pou en pli meyer stil lavi.

Mr Speaker lekel parti ziskan aprezan ki’n demontre plis konpasyon e lentere dan lasante e stil lavi son pep? San pran kont son kouler politik son Larelizyon oubyen son kouler lapo.  Sa se pa lot ki SPUP/SPPF e Parti Lepep.

Wi Mr Speaker Parti Lepep pou toultan met zonm o sant son devlopman. Akoz nou, nou krwar ki en zonm an bonn sante i enportan. Prensip parti Lepep pou reste toultan relevan. Sa Gouvernman e Gouvernman avan li in toultan montre ki nou annan en leker pou nou pep, ki nou toultan rod meyer fason pou amelyor e pran ka avek son pep si pa toultan ki lot kote i agree avek bann desizyon e bann sanzman ki nou fer.

me listwar i la pou lepep zize, e la mon mazin le Prezidan Faure ti anonse dan son Diskour dan Leta Lanasyon pou sa lannen i ti dir ki pou annan bann Homes ki pou ganny konstri pou pran kont kondisyon ban aze. E la ankor nou ti ganny demande akfer e akoz nou pa servi bann sant kominoter, alors mon a demande, eski sa i pou bon, i pou en bon pratik e pou bon stil lavi pou bann dimoun aze?

Mr Speaker tou Gouvernman ki enterese ek son pep in toultan rod en meyer lavi pou son pep. Lasante en pep i enn ki primordyal. En pep an bonn sante i annan bokou lavantaz pou en pei kot i annan plis prodiktivite dan travay. Kan en dimoun i an bonn sante i travay i kapab nouri son fanmir.  Kan en zanfan i grandi e viv an bonn sante sa i en lakonplisman dan li menm. Me Mr Speaker Sesel ozordi nou pe war en gran logmantasyon maladi menm lanmor. Bokou dimoun in ganny dyagnoz ek bann maladi e i annan gran poursantaz dimoun ki’n mor relye ek maladi swivi zot stil lavi. Lavi i evolye, Seselwa osi i bouz ek lavi. Me sa size i en ki pe vin pli alarman e in plis ki ler pou nou adres li dan en fason imedya. Nou stil lavi Mr Speaker, Seselwa pe bouze, Seselwa pe devlope me de lot kote nou negliz nou lasante ki i en keksoz vreman enportan.

Pou konmanse mon pou tous lo nou manze, si nou fer enn pti tour d’horizon nou pou war ki nou stil manze n sanze. La i fer mwan mazin madanm Marie anler Majoie ler ou demann li kwa kin fer li krwar in kapab ariv 108an?  Son larepons se toultan manz son gro manze e sa in ed li pou ariv sa laz ozordi.

Mr Speaker sa i en pwen tre for ki plizyer bann dimoun aze in toultan fer resorti ki lontan se zot friyapen, mayok, patat, kanbar eksetera ki zot ti koze pou sa rezon ki’n fer zot viv sa larz ki zot arive ozordi san okenn gran konplikasyon dan zot lasante.

Diri zot ti manze me dan rar. Eski sa i ankor relevan dan nou bann lakwizin konmela? Alors Mr Speaker mon pe propoze ki Minister Ledikasyon i enkli entrodwi lenportans manz gro manze koman zot bann topik dan PSE ki ganny fer ek bann etidyan a tre zenn az.     Sa senpleman pou edik zot e fer zot apresye en kiltir manz gro manze. Annou apresye manz gro manze akoz sa i aport bokou a nou lasante. La mon a poz sa kestyon konbyen nou menm e ki dernyen fwa ki nou’n manz en gro manze.                             Me Mr Speaker i annan en kantite dimoun ki i ti a kontan met sa an pratik pou manz gro manze. Pri ki sa bann gro manze i vann konmela Mr Speaker en friyapen an mwayen si ou napa R25 ou pa pou ganny enn.  Me mon soulaze e mon rekonnet e mon dir felisitasyon a Minister Lagrikiltir ki’n pran sa linisyativ pou fer sa lafwar dan ex-SMB hall kot bann fermye in vin ansanm e la plizyer gro manze in ganny vann a en pri afordab.

La mon pou demande ki Minister Lagrikiltir i kontinyen avek linisyativ e met en pe plis lanfaz lo sa laspe gro manze pou en meyer lasante. Ankouraz plis fermye pou partisipe e an retour se nou sitwayen ki a benefisye.  Lot size ki mon ti a kontan aborde ler nou pe koz adopte en kiltiv meyer stil lavi se legzersis.

Me avan mon abord sa size mon ti a kontan a fer resorti Mr Speaker ki lo sa enn i depan lo en endividi li menm. Legzersis i enportan dan en lavi en endividi, sa endividi i bezwen rekonnet ki dibyen ki legzersis pou anmennen dan son lavi.

Ou bezwen annan sa determinasyon ou osi lo ou menm pou fer sa diferans. La mon tir sapo lo Minister Lasante pou sa seri progranm legzersis ki zot pe fer dan Zedi pou promot legzersis dan lavi.

La mon demande pou plis travayer dan bann Minister osi dan bann travay pou zwenn ansanm avek Minister Lasante pou fer sa diferans e nou osi Manm Lasanble annou zwenn e donn sipor e donn legzanp.

Mr Speaker ledikasyon fizik dan lekol; Minis Ledikasyon i devret pran en aksyon pli serye lo sa size. Zot devret sorti pli for e fer li obligatwar ki pou bann i pratik aktivman sa size ledikasyon fizik. Si sa size pa enteresan annou rod meyer fason pli inovativ pou fer li vin pli enteresan. Enkli plis aktivite dan sa tel size pou fer bann etidyan partisip plis e vwar vre lenportans.

Nou stil lavi ozordi drog, sigaret ek lakol pe zwe en gran rol dan logmantasyon bann maladi e lanmor nou bann sitwayen sirtou nou bann zenn.  E lo sa enn not mon ti a dir mon a sorti for Mr Speaker pou demande ki Gouvernman i pran aksyon pli konpreansiv pou adres sa size. Prostitisyon nou bann zenn ozordi i annan zis pou zot feed zot bann habits e ankor i ogmant bann maladi kot zot vwar bann zenn pe mor a tre zennaz.

Dray anba lenfliyans lalkol kot bann zenn pe perdi zot lavi, tousala Mr Speaker se bann stil lavi ki konmela nou pe viv.  Mr Speaker mon okouran ki annan plizyer keksoz ki pe ganny fer dan diferan direksyon e i pou bezwen en sipor kolektiv sorti kot nou tou, pou nou osi kapab adres sa bann sityasyon; akoz se nou bann zenn ki pe ganny afekte se nou lafors travayer, nou fitir demen.

Ler nou gete i annan plizyer keksoz ki pe ganny fer me selman i mank sa lankourazman i mank sa willpower. I annan bann progranm ki mank plis aksyon, i annan bann ki’n zis konmanse e apre in les dan milye semen pou diferan rezon swa partisipasyon oubyen the willingness pou kontinyen.          Se lo sa not ki mon pou siport e fer demann ki sak Minister e sekter konsernen dan sa Gouvernman i seryezman met an plas bann polisi kot i ti annan zot revize kot fodre aranze zot aranze zot fodre sanze zot sanze. Sorti pli for e pli serye e ki aksyon serye i ganny pran pou pli ankouraz nou popilasyon pou adopte en kiltir e en meyer stil lavi.  Apre tou se sa endividi li menm ki pou benefisye par viv en lavi pli long e pli konfortab.

Me pou terminen Mr Speaker les mon fer resorti ki depi SPUP/ SPPF e Parti Lepep sa Gouvernman in toultan fer son pep pas avan e nou pou kontinyen fer li malgre tou defi.

Avek sa de mo Mr Speaker mon pou toultan reste angaze anver lasante mon pep e mon pou toultan aport mon sipor a en meyer lasante a mon sitwayen.  Mersi Mr Speaker.

 

(APPLAUSE)

 

MR SPEAKER

Mersi Onorab Herminie. Onorab Ernesta.

 

HON PAUL ERNESTA

Mersi Mr Speaker, mon bann koleg Onorab tou dimoun a lekout espesyalman zabitan Takamaka, bonn apre midi.  Mr Speaker stil lavi i ganny defini koman lafason ki en dimoun i viv son lavi.  Sa i enkli lafason ki tret son prop lekor e lafason ki i enterakte avek lezot.  En meyer stil lavi i vedir ki en dimoun i pran swen avek son lekor, par fer aktivite sportif, konsonm prodwi ki kit li an bonn sante, pa fer bann swa ki met son lasante e lavi a risk e osi partisip pozitivman dan lavi ek son lakour e son kominote.

An menm tan pou viv en meyer stil lavi i osi depan lo serten fakter ki parfwa i an deor kontrol sa dimoun. Parey son lanvironnman fizik e sosyal son lanvironnman e natir son travay. De lot kote nou rekonnet ki en move lanvironnman i kontribye pou anmenn stress dan lavi en dimoun e konsekaman redwi son kalite lavi.  Alors letan nou pe koz en meyer stil lavi nou pe aktyelman met lanfaz lo byennet en endividi.

Mr Speaker loter Mosyon in idantifye de fakter ki merit ganny konbat sa, se bann maladi lye avek en move stil lavi parey dyabet, tansyon o, maladi transmet par sex zis pou nonm enn de. Zis mon get dan mon distrik Mr Speaker Takamaka that is, ozordi i annan en total 87 dimoun ki’n ganny dyagnoz avek dyabet, e 3 nouvo ka in ganny detekte avek sa maladi pou sa premye kar lannen.                  165 dimoun pe viv avek tansyon o e 5 nouvo ka ankor in fek ganny detekte depi Zanvye ziska la e 35 dimoun pe viv ek tansyon o ek dyabet. Mr Speaker bann ka lanmor lye avek bann move stil lavi i osi alarman. Sa ki pli trakasan avek sa sityasyon nou vwar ki plis nou bann zenn e nou bann mwayenn-az ki pe tonm viktim ou pe viv en move stil lavi. E sa de group laz i reprezant lavenir nou pei.

Alors i tre enportan ki nou koman dirizan nou konsernen avek sa sityasyon e ansanm nou vwar mwayen pou aret sa kalamite ki pe met lavi e progre nou pep e pei an danze.

Donk lespri sa Mosyon i gide ver sa direksyon kot pou vwar nou pep pe viv lontan e tou dilon zot lavi zot reste an bonn sante parey sa ki bann eksper i apel healthy life expectancy. Mr Speaker loter mosyon in osi fer kler atraver son Mosyon ki ladopsyon en kiltir meyer stil lavi par pep Seselwa i mwayen pou konbat bann maladi e envit bann ka lanmor lye avek en move stil lavi.

Dan sa konteks Mosyon pe demann Gouvernman pou met an plas bann mekanizm pou ankouraz pep Seselwa pou adopte en kiltir meyer stil lavi. E sa i osi ranforsi lenportans ki nou Gouvernman i mete dan byennet nou pep.  Mr Speaker pou nou kapab asire ki nou viv en meyer stil lavi i depan lo bokou diferan fakter.               Par egzanp akse avek bon nouritir, pratik spor oubyen aktivite fizik, sansibilizasyon e ledikasyon nou popilasyon, en bon lozman bon vwazinaz, bon lanvironnman e kondisyon travay e lalit kont bann konportman riske.

Si Gouvernman pou adopte bann Polisi e pran bann aksyon ki pou ankouraz nou pep pou adopte kiltir meyer stil lavi son bann aksyon i devret pran an konsiderasyon sa 7 diferan fakter ki mon’n mansyonnen pli boner. E sa i bezwen ganny resorti koman en lobzektif sa bann polisi e progranm.

Pou sa arive Gouvernman i bezwen fer plizyer keksoz, premyerman i bezwen reviz bann Polisi aktyel e re-aliny bann progranm e lasistans pou fer sir ki zot kontribye ver ladopsyon en meyer stil lavi.

Dezyenmman fodre ki bann nouvo Polisi ki ganny adopte e bann nouvo progranm ki ganny enplimante i klerman idantifye en meyer stil lavi koman enn bann lobzektif prensipal.

Trwazyenmman fodre ki Gouvernman i adopte en lapros ki entegre bann diferan Polisi e progranm dan diferan sekter pou fer sir ki kontribisyon sak enn anver ladopsyon en meyer stil lavi i ranforsi kanmarad avek bi kree sinerzi lo nivo Nasyonal. Mr Speaker letan mon get sa moman ki Onorab Ghislain in anmenm sa Mosyon mon vwar ki’n ariv en tre bon moman akoz, i tonm dan en moman kot Gouvernman i dan prosesis adopte nouvo Polisi. Par egzanp Departman Planifikasyon Ekonomik pe aktyelman travay lo Stratezi Devlopman Nasyonal.

E i enportan ki sa stratezi i met byennet pep Seselwa e en meyer stil lavi o sant tou bann polisi e progranm devlopman ki nou pou al adopte e enplimante. Mon konstate ki koman en dokiman sa Stratezi Devlopman Nasyonal pou ganny enplimante lo nivo bann Minister e bann Lazans.

Ti a rekonmandab ki sak Minister e Departman Gouvernman e Lazans piblik i tradwir bann laspe relevan sa Stratezi Nasyonal an bann aksyon konkret.

Mr Speaker en lot keksoz enteresan, pandan ki departman planifikasyon ekonomik pe develop sa Stratezi Devlopman Nasyonal bann Minister e Departman Gouvernman zot, zot pe swa reviz oubyen develop nouvo stratezi.

Sa ankor i en lot loportinite kot nou kapab entegre sa konsep en meyer stil lavi dan sa bann diferan stratezi e polisi.  Par egzanp NSC pe byento travay lo en nouvo Polisi Nasyonal pou sport. Akoz sa enn pour 2013, 2017 in fini ekspire depi lannen pase.  Dan sa prosesis NSC ti a rekonmandab ki en survey Nasyonal i ganny fer pou vwar nivo partisipasyon nou bann dimoun dan aktivite sport swa lo nivo konpetitiv ou lwazir. E bann lenformasyon ki ganny kolekte i a ede dan devlopman son Polisi.

An menm tan NSC i merit osi sezi sa loportinite pou fer byennet nou popilasyon antre koman en lobzektif nouvo polisi nasyonal pou spor e en meyer stil lavi i merit soulinyen koman en outcome dan sa dokiman.

Akoz ozordi letan mon get sa lakantite dimoun ki pe pratik aktivite sportif i kit mwan avek bokou kestyon. Dapre mon resers i annan en total 27 diferan disiplin sportif anrezistre anba diferan Federasyon ki fer en total 3,568 atlet ki pe pratik sport lo en nivo konpetitiv.

Mr Speaker i ti a swetab osi ki lo term aksyon sa polisi pou sport i devret repran bann aksyon spesifik ki ti sorti dan spor pou tou e ti ganny lanse an Zen 2016.  Akoz mon senserman krwar ki sa bann aksyon i devret kontribye pou atenn en nouvo kalite lavi dan Sesel. Akoz tou kous nou popilasyon anba sak aksyon i annan diferan progranm tel ki lwazir e rekreasyonnel, Parents Welcome ki target bann paran, Stay Young ki target bann sitwayen aze e plizyer lezot ankor.

De lot kote Seychelles National Youth Council, SNYC i osi en lot lazans ki fer aktivite sport e lwazir menm legzersis fizik ki kontribye ver ladopsyon en kiltir en meyer stil lavi. Parey progranm EX 30 ti legzanp parmi sa bann linisyativ.

Bi sa progranm ankouraz bann adolesan pou fer omwen 30 minit legzersis tou le zour. Me malerezman pou diferan rezon sa progranm in bezwen arete. Mr Speaker monn konsantre mon lentervansyon lo spor e aktivite fizik akoz mon rekonnet ki spor i en eleman ki kontribye pou en meyer stil lavi.

Akoz mon konvenki si plis Seselwa i fer spor swa lo nivo konpetitiv oubyen lwazir nou pou atenn nou lobzektif. Me parey mon’n dir en meyer stil lavi i depan lo plizyer fakter e spor ek fizik i selman enn parmi sa bann fakter.  Mr Speaker nou bezwen apresye ki pou annan en meyer stil lavi i pou anmenn bokou benefis pou bann endividi e osi pou lafanmir lakominote e lasosyete.  Kou bann move stil lavi i tro lour pou Sesel. Tou-le-z-an Gouvernman i depans en sonm vreman sibstansyel dan reabilitasyon bann ki abiz sibstans e osi dan tretman bann maladi relye avek move stil lavi.

An konklizyon par adopte en kiltir en meyer stil lavi i pa pou zis sov nou pei an term finansman, lo depans lasante me i pou osi anmenn nou plis benefis an term pli gran kontribisyon ki nou pep i a kapab fer anver son fanmir, son lakominote e son pei.  Avek sa Mr Speaker mon terminen an konklizyon pou dir mon pou anmenn mon sipor pou sa Mosyon e mon pou demann tou bann lezot koleg pou zot osi siport sa Mosyon. Mersi Mr Speaker.

 

MR SPEAKER

Mersi Onorab Ernesta.  Onorab Valmont.

 

HON JUDE VALMONT

Mersi Mr Speaker, bonn apre midi Mr Speaker, bonn apre midi tou koleg Onorab, bonn apre midi tou Seselwa ki pe swiv nou.  Mr Speaker Sesel in devlop vitman pandan sa bann lannen, bokou nouvo prodwir in antre dan pei an rezilta lenportasyon.  Nou tou nou konnen ki mazorite keksoz ki nou servi swa konsonmen i servi aletranze e souvandfwa lanfaz i ganny mete lo pri dan plas mete lo kalite alors sa dan li menm i konpromiz leta nou lasante.            Mr Speaker letan nou get manze ki nou pep ti konsonmen lontan ti annan bokou plis legim frir ek gro manze, sa set akoz lenportasyon ti bokou mwens ki ozordi alors ki konsantrasyon baz nou konsonmasyon ti plis lo sa bann prodwir ki monn nonmen. Konmela Mr Speaker ou ava agree avek mwan ki nou trend in sanz bokou, nou konsonm bokou plis manze avek lenfliyans bann pei was tel ki fast food, e bann prodwir konserve parey bef dan bwat, luncheon meat eksetera. Mazorite sa, tou sa bann prodwi zot kontyen bann prezervatif artifisyel ki a longer di-tan i annan bann lenpak negativ direk lo nou lasante. Onorab Ghislain in fer sorti ozordi ki rezilta i la pou nou tou vwar par bann logmantasyon bann diferan ka maladi. Mr Speaker mon’n osi mansyonn fast food kot bokou dimoun i konn li koman junk foods. Bokou nou konmela nou konsonm bokou manze tel koman chicken and chips pizza e bokou lezot ankor.

Pa bliye Mr Speaker ki nou osi annan labitid konsonm bokou prodwi ki’n fri parey samousa gato isi gato laba.  Dan bomaten koman breakfast e pandan letan tea break e nou osi dan Lasanble pa leksepsyon nou osi nou pe konsonm sa bann junk food aktyelman. Tousala Mr Speaker i annan lenpak negativ lo lasante nou pep, tou resaman in ganny prouve tou resaman avek bann statistik ki’n ganny prezante dan en mosyon devan sa menm Lasanble an term bann kalite e bann maladi ki nou pep i fer fas avek.

Mr Speaker nou stil lavi osi in sanz bokou an term kalite e kantite legzersis fizik ki nou aktyelman fer konmela. En legzanp senp zis gete kantite nou ki aktyelman marse. Lontan mwayen transportasyon en term loto e bis piblik ti bokou mwens e sa natirelman ti ede pou nou popilasyon ganny legzersis e ki nou permete ki nou reste pli fit.  Ki nou vwar konmela Mr Speaker, an rezilta devlopman plis semen in ganny konstri e nou war bokou nou Seselwa konmela nou annan nou prop transpor ou servi mwayen transportasyon piblik.  Sa dan li menm i redwi kantite marse ki nou marse. Par lo la Mr Speaker egalman avek devlopman rapid nou lekonomi in fer ki en sanzman drastik i ganny arive dan kalite louvraz ki Seselwa i fer. En gran kantite travayer Seselwa zot aktyelman travay dan en biro.

Alors sa i fer ki zot reste asize a en gran mazorite letan zot lazournen e menm laplipar zot lavi, e sa i egal en bes dan kantite legzersis fizik ki nou aktyelman fer dan nou lavi.

Senpleman Mr Speaker sa kalite stil lavi i koumsa, annou dir bokou nou i leve dan bomaten 6er nou pran bis desann pou al travay asize apepre 2 erdtan dan trafik avan ariv travay nou aste detrwa samousa ek en limonnad.  Avan ariv biro nou asize nou pran break 10er nou konsonm bann junks – lunch break midi nou rod en take away mazorite fwa se bann fast food. 1

1er apre midi nou kontinyen asize ziskan 4er. Alor repran, apre 4er nou repran en bis nou ariv lakaz ki nou fer Mr Speaker, nou manze, nou bennyen nou get TV swa nou asiz lo Facebook apre nou dormi.  Alor Mr Speaker an mwayenn nou asiz omwen 13 erdtan par zour, e dormi pou apepre en lot 8erdtan.

Alors an realite i reste nou zis apepre 3 erdtan pou vreman ganny legzersis fizik Mr Speaker. Alors souvandfwa nou pa ni menm fer sa bann aktivite fizik, sa i fer an rezilta nou bril tre pe kalori e alors nou vin pli gro e bokou mwen an bonn sante.  Lefe ki nou transpir mwens bokou toksin nou konsonmen pandan la zournen i reste dan nou lekor e develop bann maladi tel ki kanser e maladi kardyovaskiler. Mr Speaker mosyon i demande ki Gouvernman i seryezman met an plas bann Polisi e progranm pou ankouraz nou popilasyon pou adopte en kiltir stil lavi pli meyer, sa pa vedir ki napa ditou.  Bann entervenan avan mwan in fer mansyonn divers Polisi ki egalman vize ver attend sa lobzektif.

Mr Speaker Onorab in osi refer sorti ki byen ki nou bezwen en vizyon en direksyon nasyonal ki for e ki kapab ede armoniz tou sa bann polisi ki egziste.

Mwan mon totalman agree avek sa akoz se dan sa fason ki nou pei i kapab maksimiz litilite resours limite ki nou aktyelman annan. Mr Speaker dan lentervansyon Onorab Vidot in donn en bonn legzanp ler in fer resorti ki nou kapab rod en fason pou met an plas bann ti kwen legzersis dan bann distrik.  La in donn legzanp en pei ki fer sa byen, e sa se Lasin.

Mr Speaker mwan mon koz dapre leksperyans personnel parey zot tou zot konnen mon’n etidye Laba mon’n ganny sans pas 5an laba e mon’n war ki zot in fer bann keksoz senp. Legzanp dan liniversite zot in met dan bann ti kwen bann lekipman an feray kot ou kapab vini ler ou pa dan laklas, aswar ou vini ou fer legzersis e i ede ankouraz en bonn sante e osi Mr Speaker dan bann public areas, Lasin dan bann public areas osi ou vwar sa bann lekipman.  Sa bann lekipman Mr Speaker i en pe parey sa bann Beau Vallon isi, ou ganny sans ou pa zis kot ou bann dimoun aze aktyelman Lasin zot pe fer legzersis.

Akoz ou konnen pandan lazournen. (Mr Speaker silvouple si Onorab Arissol i oule mon order enn pou li mon a order) pou kontinyen Mr Speaker Lasin osi ou konnen en keksoz ki mon’n remarke Lasin ek Sesel i annan serten similarite lo baz lespas si ou gete, bann lespas vid ki nou annan me selman an Sinn ki zot fer apre travay zot servi byen sa bann lespas zot, i annan bann enstrikter ki vini zot anmenn sa bann speakers la, parey nou annan konmela ki nou trennen ki nou dir bann boom box zot vini zot met zot lanmizik ou war bann gran kantite dimoun i vini i fer zot letour e montre zot bann ladans e bann keksoz koumsa, e sa an realite i ed ou mouvmante i ed ou transpire e i ed ou gard en bon lasante.  Me definitivman dimoun i fer sa koman enn ti biznes me mon krwar pa si ou pou pran sa kantite larzan me selman lesansyel se ki ou ganny sans bouz en kominote, en kominote i bouze e nou reste an bonn sante.

Mr Speaker mon pa pou fer zistis si mon pa rekonnet ki i annan serten keksoz ki pe deroule dan mon distrik Pointe Larue. E la mon felisit Mr Steven Freminot en zenn garson ou vwar li tou le Mardi swar, Zedi swar in pran enn ti scooter i sorti mon krwar somewhere dan lavil i mont Pointe Larue i en enstrikter legzersis li alor i vini i montre bann endividi dan kominote larezyon sirtou sorti Cascade, Pointe Larue, Anse Aux Pins i ris bokou bann madanm apre travay i donn zot legzersis alor sa i ganny fer dan Mardi parey mon dir dan Zedi e i ankouraz sa bann dimoun bouze sirtou dan distrik zot desann e zot ganny sa sans lapartenans an menm tan zot pe gard zot an bonn santer.

Mr Speaker lo en lot kote bokou Manm i refer sorti ki lalkol i afekte nou stil lavi, Pointe Larue i pa en leksepsyon, Pointe Larue i pa en leksepsyon Mr Speaker bokou dimoun pe pas atraver bann lenpak negativ lo zot lasante, e menm zot pos e vann zot fanmir.

Alors Mr Speaker avek lespri ankouraz plis Seselwa fer plis legzersis fizik e viv en stil lavi an bonn sante mon ti a kontan propoz sa bann pwen swivan ki Gouvernman e bann groupman e bann endividi dan bann kominote i vin ansanm pou develop e met an pratik plis bann progranm fizik e edikatif o nivo lokal e ki Gouvernman i ekout mon lapel pou li konsider focus kontribisyon CSR tax par sa bann menm lakonpannyen ki pe fer prodwi lalkol pou al fer bann klib sportif pou ki permete ki bokou plis Seselwa i a ganny ankadre dan enn ou plis bann klib sportiv.

Mr Speaker dan mon distrik mon fyer pou nou annan 2 lekip foutbol ki dan dezyenm divizyon zot pe fer ase byen lekip St Jean Bosco e PTL Bazar Brothers, me zot annan konstrent, zot trouv kontrent resours i kout zot, zot pe struggle pou zot ganny finansman pou gard standar training ase o e ganny lekipman.

Alor petet sa Gouvernman i konsider sa, ler mon dir sa Mr Speaker mon pe ankouraz avertisman lalkol per se, me selman face larealite ki nou vwar Premiere League, ki nou vwar Champions League, nou war lakonpannyen ki prodwi lalkol pe advertise lo televizyon, me selman par deryer zot pare pou met larzan pou form bann lakademi pou ankadre bann zenn bann dimoun e sa i ede ki dan plas spend 3 erdtan anba en pye kalis pe bwar at least ou pe spend 3 erdtan ou pe train lo en laplenn e sa i ankouraz bon lasante.

Alor Mr Speaker pou konklir mon ti a swete dan lespri pou ankouraz en bon stil lavi e en pei ki son leta lafors travayer e zot fanmir i tre an bonn sante mon fer en lapel avek bann endividi, sosyete sivil, sekter prive pou vin devan prezant avek Gouvernman prezant bann propozisyon e plan konkret, e ki ansanm nou kapab ankouraz nou pep viv pli byen, pli an bonn sante pli ere e pli lontan.

Avek sa de ti mo Mr Speaker mon aport mon sipor pou sa Mosyon e mersi pou ekoute.

 

(APPLAUSE)

 

MR SPEAKER

Mersi Onorab Valmont.  Bon vi ki mon napa person ankor lo mon lalis mon ava demann Onorab Ferrari, ok ou oule entervenir? Ok go ahead Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon oule entervenir pou 2 minit, pou mwan dir avek nou Lasanble fodre nou serye, e la ozordi nou’n pa’n serye.  Parti Lepep laplipar son bann Manm in koz lo en problenm ki premyerman zot menm zot ki’n kree, e dezyenmman zot pa’n anmenn okenn solisyon.

Mr Speaker Si en keksoz i mal e si ou, ou responsab pour sa keksoz i mal fodre ou aksepte pour dir ou annan en par ladan. Ou pa kapab zis vini servi bann gro, gro mo, koz bann gran, gran parol teori. Enn ler mon ti krwar nou pa dan Lasanble nou dan en laklas nitrisyonnis pe eksplik nou ki mannyer nou pour fer pour nou manz byen, pour nou bwar byen, pour nou fer legzersis byen.  Eskiz mwan Mr Speaker mon pa anvi konmsi degrade nou Lasanble me be selman zot pa serye. Zot bezwen fer keksoz sa i annan bokou keksoz pli enportan pour nou fer dan sa Lasanble pour nou anmenn sa pei devan silvouple. Vreman mon dir zot sa okenn problenm ki. An fen par mwan i pour dir zot, mon pour repete parey Madanm Potter mon krwar i enn zot Dirizan i dir zot fodre zot sanz gear akoz la zot pa dan gear ditou la!

Zot bezwen, sa pei i bezwen bouze.  E zot, zot lo bann keksoz ki pa pe fer gran keksoz, ki pa pe anmenn okenn solisyon pour nou lavenir e zis bann gro, gro mo. La parey Onorab Aglae li in mansyonn prosedir. Mon pa konnen kantite prosedir pour fer. Konmsi zis enn ler mon krwar. Mon anvi dir avek zot nepli kapab bat latet Seselwa avek sa bann keksoz koumsa. Seselwa i konnen.  Seselwa i ankoler ler zot letan Lasanble ki nou pe ganny peye pour fer bann louvraz enportan, nou pe fer sa bann keksoz koumsa.

Mr Speaker parti bwar se parti nou konnen lekel parti ki’n fer, parti SPPF, Parti Lepep, parti SPUP, part bwar vann Heineken R10. Mon krwar pa ankor fini pey en container kot ISPC. Bann ankor pe rod en container depi dernyen eleksyon pa ankor fini peye sa bann keksoz. Bis plen par egzanp, ler zot ti anmenn manrmay Mahe Beach, bis plen monte par Sans Souci, kriye an montan partou, desann lot kote tournen, bwar sou, manrmay roule dan bis!

Be ..e.   Konmsi mwan mon sa ki fer mwan ankoler Mr Speaker se ler en dimoun pe vin koz en keksoz konmsi li i napa nanryen pour fer avek sa. Konmsi i bliy net tou bann keksoz, tou bann move pratik, prezan i pe vin pour li prezant zis bann solisyon mirak. Mr Speaker, nou bezwen serye nou dan sa Lasanble. Nou bezwen serye nou akoz ozordi nou pa kapab vin dir pour dir dimoun i bwar lapire kan nou menm nou pa nou, eskiz mwan kan zot menm zot ki ti promot lapire. Ti annan ki ti mont lo televizyon ti eksplik reset ki mannyer pour fer lapire. Pour fer bann bon lapire! Ti annan bon lapire avek bann move lapire!

La ozordi lapire pa bon, selman ler eleksyon pour vini la tousala pour bon.  Tousala pour bon dan bann gro Honda Accord lontan ki bann Minis ti annan deryer zis galon lapire, anmennen St Louis anba laboutik Sinwan, anmenn anba kot Kopai,  anmenn anba ponm lo Glacis zis galon lapire ek galon baka.  Sa ti bon!  La ozordi nou vini nou akonte ki mannyer nou bann dimoun i annan 85 dimoun ki annan dyabet. Nou bezwen konmsi annou pran en pe responsabilite.

Once nou pou’n pran responsabilite, la nou ava kapab move on.  E i enportan Mr Speaker.  I enportan pour nou dir ki Parti Lepep pa pour zanmen fer nanryen pour zot deal avek sa bann problenm lekse, bann manze ki pa apropriye, bwar pour preski pour nanryen napa tax, zot pa pour fer nanryen. Akoz zot konnen kote larzan kanpanny i sorti pour finans zot.

Dernyen fwa nou ti koze Minis Faure ti vini ti aksepte ki pour annan taks serye lo bann lalkol ki fer lokalman.  Bidze in vini, Bidze in ale, nanryen!  Bwar i ankor pe sorti dan lizin, Pti Ponm, Pti Zonn, Windowlin, Mous Zonn, Mous Ver. Nenport  Tyomityo… nek i devide menm. Me si nou ti annan en Gouvernman serye, nou ti ava met en pe kontrol lo la.  Akoz se sa lalkol se sanmenm sa keksoz pli serye avek drog ki pe afekte nou popilasyon. Bokou pli ki manze.

E sa i ti ava deza en premye mesaz ki nou pe fer li akoz nou konsyan ki nou bezwen protez lasante nou pep.  Nou pa fer nanryen. Me selman ozordi nou vini nou tann bann gro, gro parol.

I pa zoli parey bann dimoun i dir. I pa byen ki zot fer bann keksoz koumsa. Akoz zot fer dimoun ankoler.

Non, mwan pa’n fer mwan. Mwan zis mon anvi dir zot vini zot koze, nou, nou oule bann solisyon. Nou oule bann solisyon. Ok.  Nou oule konnen akoz par egzanp sa lizin ki fer pti ponm la pour lekel sa? Personn pa reponn, personn pa reponn sa bon kestyon. Be anyway la mon donn zot en homework?  Ale fer sa homework, gete pour lekel ki pe fer Pti Ponm dan pei. Lekel ki pe promote?  Alors Mr Speaker. Mwan mon santi pour dir, mwan pa pour pran bokou letan Lasanble. Akoz mon santi pour dir letan Lasanble in ase ganny gate bomaten. Selman mon ti anvi, mon krwar i mon responsabilite, i nou responsabilite lo sa kote latab omwen enn antre nou i pran laparol pour dir ase bat latet sa pep.

Si zot annan keksoz pour fer, fer li. Pran bann desizyon, vin avek bann propozisyon konkret, konkret ki mannyer nou pour avans bann keksoz. Nou pour met plis tax lo lalkol ki fer lokalman. Wi. Nou pour anpes, nou pour met en zistans ant bann laboutik ki vann lalkol avek bann lekol. Wi!

Nou pour anpes bann, nou pour rod en fason pour anpes bann zenn, bann manrmay anba 18 an antre dan laboutik pour aste lalkol. Wi la i la bann propozisyon konkret ki nou merit fer. Nou devret, eski nou devret annan en laboratwar kot SBS ki teste bann manze ki pa apropriye pour nou teste sa poul sorti Brazil?  Sa i en lot legzanp.

Nou ti pe prodwir nou poul nou, nou ti pe prodwir nou poul Sesel, nou ti konnen ki nou pe manze. La ozordi nou manz plastik, nou bwar, nou manz bann kemikal ki met dan poul, bann antibiotic ki met dan poul. Be kot nou’n ale, kot nou’n al mal? Omwen annou gete kote nou’n al mal. Lekel ki responsab pour tousala? La nou ava kapab sanze. Parey nou sanson Milener i dir. Nou bezwen demann pardon avan nou kapab move on.

E la zot in zis vini ou a krwar konmsi zot in blir tou sa 40an. Zot pa pe mazin ditou tou sa bann keksoz, zot pa pe vin ek okenn solisyon.

So alors Mr Speaker mwan mon pa konnen si dan Standing Orders i bezwen mete dan Standing Orders bann zafer gat letan Lasanble la. Frivolous e suspicious repetitious, ominous, odious, tousala se bann keksoz ki pa zoli. Ki nou pa devret fer dan Lasanble.

Alor mon ti ava demande Mr Speaker annou vin pli serye. E mwan mon krwar ou devret ler ou war sa bann keksoz koumsa, ou pran en desizyon. Mon konnen ou pour ganny akize konmkwa ou stifle debate, ou’n anpes bann dimoun koze. La ozordi nou, espere, la ozordi nou les 11, i annan 11 ki’n koze lot kote. Nou stifle debate non, 11 dimoun in koze, ki zot in dir Mr Speaker?  Ki zot in dir nouvo pour anmennen pour sa pei pour fer sa pei avans devan?  Zero lo 100! Zero lo 100!  Ok?

Alors Mr Speaker. Mwan deplizanpli mwan mon nepli ankoler mwan, mon tris.  Mon tris ler mon vwar sa bann keksoz koumsa.  Akoz larzan lepep ki pe ganny sa.  Mon ti krwar sa R100mil ki ou’n ronnyen lo zot, i ava fer zot en pe pli serye, si zot pa’n serye, e mon war li i domaz.

E alors e sak fwa mon pour dir sa, lepep Seselwa i war pour dir zot, zot pe zis anvi met retar bann keksoz enportan ki nou, nou bezwen fer. Sa se bann Mosyon met retar, met retar lo nou travay. E se tou ki zot anvi fer.  Ok? . Alor si zot pour met retar annou fer sa Eleksyon vitman. In ler pour nou fer sa Eleksyon.  La kekfwa nou a ganny en tim lo lot kote ki nou pour konnen kote i ete, kote i debout.  Nou, nou ava fer sa ki nou annan pour fer akoz si zot, zot pour met retar sa pei, zet sa travay lo nou, nou ava fer li pli byen e nou ava fer li dan lentere Sesel. Mersi Mr Speaker.

 

MR SPEAKER

Mersi, mersi Onorab Ferrari. Mwan ava demann mover Mosyon Onorab Chantal Ghislain pour fer son konklizyon.  Onorab.

 

HON CHANTAL GHISLAIN

Mersi Mr Speaker.  Mr Speaker zis domaz ki mwan mon dir tou Mosyon i en Mosyon.  Sa ki nou pe adrese i enportan. Lasante nou pep i en size ki enportan.  I regretan ki Onorab Ferrari in fer politik bonmarse avek sa Mosyon.  E mon ti ava advice li ki si i ti napa nanryen pour dir lo sa Mosyon i pa ti’n a ouver son labous pour li koze Mr Speaker.

 

(APPLAUSE)

 

HON CHANTAL GHISLAIN

And Mr Speaker wi in koz lo Eleksyon. Be in ler pour nou serye osi, Eleksyon pa bingo ki nou zwe sa. Si o tan posib ki nou toultan pe pran Eleksyon koman lotri or bingo, nou pour toultan katern. Mersi Mr Speaker.

 

(APPLAUSE)

 

HON CHANTAL GHISLAIN

Mr Speaker prenan kont tou bann maladi e danze ki sa kalite lagres ki anmennen, mon pe demann Gouvernman pour met en Ban total lo lenportasyon bann prodwi manze ki annan trans fat ouswa lagres ki pa satire.  Lo en pwennvi medikal mwens ki 05 poursan i akseptab.  Si nou regard lo en kantite prodwi, legzanp biskwi, son kantite lo la i 0.1.  Sa i pour fer ki nou bann konsonmater pour pas plis bokou letan dan magazen letan nou pe fer nou shopping. Nou pour lir byen lo la sirtou sa bout kot i mark bann valer nitritif sa prodwi.  E byensir sa i pour fors nou fer bann bon swa lo kwa ki nou aste pour nou ek nou fanmir kwa ki nou met dan bwat nou bann zanfan.

Nou’n koz lo availability lalkol dan nou pei. Mr Speaker i kont Lalwa pour konsonm lalkol dan landrwa piblik. Nou’n fer bokou fwa konplent lo leta enn bann landrwa par egzanp ki dan sant Victoria, Ste Claire, ouswa dan rezyon Happy Youth Club, sa kantite dimoun enkli madanm e zenn fiy osi bann zenn garson ki bwar la.

Bann Zofisye Lapolis i pas souvan, zot menm zet bwar sa bann dimoun me dimoun pa ti pour vin bwar la dan sa landrwa si zot pa ti’n ganny akse byen vit avek lalkol lanmenm obor zis dan milye lavil pli presizeman dan Lari Bazar ki osi en landrwa piblik, i annan 3 laboutik ki annan license pour vann lalkol.  Akoz ki nou bezwen donn license en magazen pour vann lalkol dan milye lavil ki en landrwa piblik?

Wi nou pe koz osi Onorab Ferrari, in koz lo lalkol konmkwa nou pa serye.  Be nou, nou pe koz lo bann magazen mon pa konnen si i pe prezerv sa bann magazen kekfwa sa bann ki sponsor li mon pa konnen dan Eleksyon. Nou pe koze osi pour ki Gouvernman i pran aksyon serye.  I devret pran pour evalye la kantite forex ki al dan lenportasyon lalkol an relasyon avek lenportasyon manze pli presizeman fri avek legim.  Mon osi sizere ki Gouvernman i fer en Polisi lo grander e lakantite lavertisman lalkol dan nou pei. Fer ki magazen ki vann manze pa kapab menm vann manze ouswa vann lalkol ek sigaret me plito ouver bann designated leaker stores ki ava annan zot ler ouver e ler fermen.

Menm sa bann leaker stores i devret balanse an relasyon avek dansite dan sa bann distrik ouswa kominote. Propozisyon pour plis fitness trails e landrwa lwazir dan bann distrik, revwar fason konstriksyon nou bann semen e ofer lezot alternativ pour dimoun deplase.

Ed nou bann fermye pour redwir pri ki zot vann zot bann legim e fri lokal.  E pli gro kou ki nou bann fermye i fer fas avek se zot kou prodiksyon. I pa sifi ki nou zis retir taks lo lenportasyon bann prodwi ki bann fermye i servi dan zot prodiksyon lo lezot laferm.  Nou kapab al bokou pli lwen ki sa.  Si peser i ganny konsesyon lo fuel, nou bann fermye osi i kapab ganny konsesyon lo fuel.

Mon pour eksplike; rezon se ki ozordi bann fermye i ganny akse avek en loan ki ariv R1milyon lo en to lentere 2.5 poursan.  Pour sa menm fermye i kapab aste en transpor duty free pour permet son deplasman.  Me i annan bokou fermye pour prefere servi sa loan pour aste zouti e lezot keksoz ki i santi pli enportan pour li servi lo son laferm.

Donk pour li ariv bazar aprezan i still bezwen akse avek en transport pour li ariv lo Bazar.  E bokou sa bann fermye pour dir ou ki i depans bokou plis pour li anmenn son prodwi Bazar.  En fermye ki sorti Danm Lerwa Baie Lazare par egzanp, i depans li ant 1500 a R2mil zis pour li ariv bazaar Victoria pour li vann son prodwir.

Donk mon pe fer en pledwari lo non sa bann fermye pour zot ganny konsesyon lo transpor ouswa fuel si nou kapab apel li koumsa.  I pour byen fasil swiv sa akoz (1) sa fermye Baie Lazare par egzanp i deza anrezistre avek Lazans Lagrikiltir. (2) zot bezwen pey bazar.  E zot resi i ganny issue par Lazans Lagrikiltir.

Donk sa fermye Baie Lazare, i annan zis pour li prodwir son resi transpor e son resi ki in pey Bazar e i a resevwar son konsesyon.

Mr Speaker mon pour konklir an dizan ki nou lasante i nou responsabilite, donk i responsabilite nou tou pour fer sir ki nou adopte en kiltir meyer stil lavi pour nou prop byennet, byennet nou fanmir e byennet nou pei. Mersi Mr Speaker.

 

(APPLAUSE)

 

MR SPEAKER

Mersi, mersi. Bon in ariv moman pour nou pran en vot lo Mosyon parey in ganny amande.  En pti amannman. Mosyon i lir koumsa;

‘’An vi logmantasyon dan bann maladi e lanmor an rezilta nou stil lavi, nou Lasanble Nasyonal pe demande ki Gouvernman i seryezman revwar bann Polisi, e aksyon pour ankouraz nou popilasyon pour adopte en kiltir meyer stil lavi.’’

Mon a demann tou Manm ki an faver?

Okenn Manm ki kont? Madanm Clerk?

 

MADAM CLERK

Mersi Mr Speaker. 13 Manm i an faver e personn kont. Mersi.

 

MR SPEAKER

Bon Mosyon in ganny aprouve par Lasanble Nasyonal. Avek sa nou ava pran en Break, e nou ava retournen 4er pour kontinyasyon nou travay.

 

(BREAK)

 

MR SPEAKER

Nou ava kontinyen nou travay.  Nou ava pran lot Mosyon lo Order Paper.  Mosyon pou ganny pran par Onorab Flory Larue.  Mon ava demann Onorab pou li pran son Mosyon.

 

HON FLORY LARUE

Mersi Mr Speaker.  Bonn apre midi Mr Speaker Bonn apre midi tou Manm Onorab.  Bonn apre midi tou bann dimoun dan lakour.  S Mosyon i lir koumsa.  Sa Lasanble i demande ki Gouvernman i repran tou later ki Mrs Sarah Rene oubyen son Lakonpannyen in gannyen, ki pa ankor devlope e an menm tan ki en lenvestigasyon i ganny fer pou regarde akoz, ki sa Madanm oubyen son lakonpannyen, in ganny sa kantite morso Later Leta.

Mr Speaker mon Mosyon I enn ki’n pran bokou letan pour reserse; pour kapab tras bann dokiman.  Akoz nou Sistenm Rezistrar I konpletman mannyel ki’n fer sa louvraz enn ki’n pran bokou dedikasyon pour kapab demele.

O komansman mon bann resers later, mon ti ganny bokou difikilte pour mwan ganny akse avek okenn file ki ti asosye avek bann ansyen Prezidan, bann ansyen madanm Prezidan, bann Minis e ansyen Minis e zot bann zanmi pros.

Mon bann resers i akimilasyon travay bann ki’n dedye zot letan pour anmenm en lalimyer dan sa pei.  Spesifikman monn ganny bokou lasistans avek Mr Alexander Pierre ki’n fer bokou resers volonter pour devwal bann koripsyon ki’n pase sirtou avek later. Mr Alexander Pierre pann zanmen bes lebra, in persevere e ozordi se bokou son bann resers ki a la baz mon prezantasyon.

Akoz tou ti mannyel noun bezwen pas bokou letan pour fer ki sa Mosyon I fer sans e dimoun i kapab vwar sa pli gran portre deryer sa bann lanpayaz; ki bann ki’n abiz zot pouvwar in sey fer pour nou pa vwar laverite.  Mr Speaker In en lanpayaz bann o plase ansanm avek zot zanmi e zot avoka ki sipoze protez bann byen Leta.

Bann byen ki apartyen a sak Seselwa e sirtou a nou zenerasyon fitir. Me nou pou vwar ki zot lentere, lentere zot fanmir e lentere sa pti group ki’n kontinyen abize e pran, pran, e pran menm san okenn limit Mr Speaker.  Mon leker I lour e I fermal.  Me ozordi mon fyer Mr Speaker ki monn ariv dan sa lasanble e mon kapab montre Seselwa akoz ki Sistenm Parti Lepep depi son Per Fondater ziska prezan in enn ki’n ganny dirize par en lanbisyon pirman personnel.

Mr Alexander Pierre avek son koleg Mr Bernard Sullivan ti ganny akize pour fer dega dan Biro Rezistrar Later e 20 gard ti vin rod li kot son lakaz sa menm zour swar pour son larestasyon.  Pou aret en zonm ki pa’n zanmen fer okenn krim.

Mr Bernard Sullivan li I ti dormi dan kaso pour sa lakizasyon. Nou ti vwar Lorganizasyon Lapolis e SBC pour penn sa de dimoun koman 2 gran kriminel.  E sa pa ti letan Parti Inik.  Me dernyerman an 2016 Mr Speaker.  Me en video ki zot ti’n filmen an kasyet ti montre egzakteman ki ti’n pase e se gras a Facebook ki zot laverite ti kapab sorti.  Si zot ti napa sa laprev sa de dimoun ti riske al prizon, pour en krim ki zot pa ti’n komet akoz zot ti pe sey anmenn en laklerte lo sa bann aksyon bann o zofisye Parti Lepep e zot bann dalon.

E zot ti pare pour sakrifye bann inosan pour kasyet tou sa bann demagozi.  E zot in toultan sakrifye byennet pep Seselwa.  Sa parti Mr Speaker dan mon lopinyon in detri sa pei, in anmenn lafreyer e vorasite. Napa sa zafer Nouvo Lepep Mr Speaker.   Zot en sel bebet. Zot tou zot parey.  E sa parti politik li menm I annan 40 bout later –

 

MR SPEAKER

Onorab, Onorab en moman – en moman non – non.    Onorab, Onorab zis retract sa pti bout.

 

HON FLORY LARUE

I’m sorry Mr Speaker it’s a direct interpretation.  An Angle ou dir an animal.

 

MR SPEAKER

Non, ou pa ti a kontan lot kote apel ou parti i bann bebet.  Ok retract sa pti bout.

 

HON FLORY LARUE

Ok. Mon a retract sa bout me solman i zis en direct translation Mr Speaker.  Mersi.

 

MR SPEAKER

Mersi. Carry on.

 

HON FLORY LARUE

Alor mon a repran.  Napa sa zafer nouvo Lepep.  Se en sel antite.   Zot tou zot parey e sa parti politik li menm i annan 40 bout later i in pran, pran, pran avek Leta.  Me resaman latitid in sanze e mon krwar sa i gras a 15 lo 10 e sanzman ki LDS i anmennen.  Mon ti a kontan remersye bann staff kot Biro Rezistrar ki’n donn mwan bokou korporasyon avek bann lasistans dernyerman pou kapab anmenn bann lenformasyon dan sa Mosyon.  Mon ti a kontan remersye tou mon koleg e sipor ki tou bann manm Onorab LDS, Leader Lopozisyon e Madanm Alexia in donn mwan.

Mr Speaker mon’n anmenn sa Mosyon direkteman apre en Mosyon kot Onorab Roucou ti demann Gouvernman pour seryezman rod lenvestiser pour fer en Lopital Spesyalize lo en bout later ki annan en batiman abandonnen, ki ti sipoze ganny servi pou lans sa menm kalite biznes an 2007.  Sa premye Mosyon Mr Speaker in revel bokou apropo propriyeter sa later ek lezot later ki sa propriyeter I annan.

Sa morso later i en bout ki’n tre kontroversyal.  Piblik in fer son bann prezonpsyon lo zistwar sa later, me souvan bann non ki’n asosye avek in lev bokou lafreyer, ki’n fer ki laverite pann zanmen kler.

Lafreyer Mr Speaker akoz prezonpsyon propriyeter sa later ti bann afilyasyon ki mont tre o dan pei. Direkteman kot Prezidan sa lepok.

Propriyeter later nimero V12348 ki mezir 25,559met kare I Emerald Holdings Company Limited.  Sa later I vreman gran Mr Speaker. Si nou ti pou fer bann morso 600 met kare nou ti pou ganny nou  40 bout later – 42 bout later (ekskize) Emerald Holdings Company Limited ti en lakonpannyen ki ti ganny formen an Septanm 1993 e son 2 propriyeter ti Mr Gregoire Payet e Madanm Sarah Zarqani Rene.

Mon le fer rapel tou dimoun ki Madanm Sarah Rene I madanm ansyen Prezidan France Albert Rene.  Sa madanm ti marye avek Msye Albert Rene an 1993, menm lannen ki son lakonpannyen ti formen.  Sa letan Msye Rene ti ankor Prezidan Sesel.  Sa i en rezon akoz dimoun in souvan per pour koz lo sa size.  Nou konnen ki Msye Rene ti Prezidan pandan letan Parti Inik e bokou in pase dan sa letan pour senm sa lafreyer.  E sa lafreyer ti permet zot pour fer bokou keksoz.

Mr Speaker, mon resers lo Mosyon Onorab Roucou, in devwal bokou lezot later ki sa lakonpannyen I annan.  E sa bann dekouvert in fer mwan kirye.  E mon’n al regard pli pre lo size later sa lakonpannyen e son propriyeter.  Sa size later I osi enn ki vreman sansib, akoz I en komodite ki vreman rar isi Sesel, akoz nou pti e sirtou ki bokou napa akse avek later.  Later Sesel in vin ser e bokou Seselwa I santi ki kot noun arive ozordi avek pri lavi, ki zot, zot pa pou zanmen kapab aste en morso later ozordi e ou dan le fitir.

Bokou nou zenn in perdi lespwar, ki en zour zot pou annan en bout later pour swa fond zot fanmir ki a labaz en sosyete stab, pour prodwir bann sitwayen stab – ouswa ganny en morso later pour fer en biznes ki osi a labaz soutenans en pei, atraver tax ki ganny ranmase letan en lekonomi pe fonksyonnen.  Sa sityasyon I enn ki Gouvernman dan son kapasite koman gardyen later nou repiblik, ti sipoze sey zere pour fer en lapartaz ki pli ekitab, e ki pour dire dan letan, e non pa protez de santenn mil met kare later pour zis en pti group.  Mr Speaker sesel I annan 90mil Seselwa me non pa zis en pti group ki fanmir bann ansyen Prezidan, Minis ouswa zot bann dalon.

Nou’n tann nonm labi pouvwar dan tou lezot pei lo Nouvel e lezot, kot zot in al an detay pour devwal tou bann aki bann ansyen politisyen sirtou.  Me nou pou nou, I ankor reste en “taboo”. Nou’n tann prosekisyon aletranze e bann ki’n al prizon pour koripsyon akoz zot in pran keksoz pour fer zot pli ris.  Akoz vole I vole Mr Speaker.  E Per Fondater le 6 Zen 1977 apre Koudeta ti dir ki e mon quote “ Mon pou fer pli kler pour dimoun konpran ki mannyer Sesel pou ganny dirize dan lavenir.

Dan nouvo Sesel ki nou pou kree I pou en Gouvernman pour lepep Seselwa an antye e non pa zis pour en group dimoun.  Mon oule ki tou seselwa I santi dan son leker ki I annan drwa dir sa ki I panse. Si zot santi, ki nou, ki responsab pou fer marse Gouvernman pe fer mal, nou oule ki zot dir nou e non pa per pour eksprim zot lekor.  Si nou, ki sipoze servi lepep, pa kapab ganny kritike, zanmen nou pou konnen kan nou fer mal.  Se selman an permetan tou dimoun eksprim zot lekor ki nou pou kapab ganny linite e korporasyon. Dimoun ki pa travay i vole, i vagabonde, konmsi Kreol i nanryen fer.  Nou bezwen asire ki tou dimoun I bezwen travay, nou pa kapab annan dan nou pei dimoun ki pa oule travay me I depann lo lezot. ’’End of quote Mr Speaker.  Sa ti Albert Rene ki ti dir le 6 Zen ’77 apre koudeta Sesel.

La Mr Speaker mon le dir Msye Rene an fen dimoun pa per.  Mwan Mr Speaker mon pa per. Sirtou mon pa per akoz mon pe dir laverite.  E mon laverite in ganny ekrir an nwanr ek blan lo papye sinyen par tou sa bann dimoun zot menm, koman levidans zot bann aksyon. Bokou sa bann dimoun zot ankor dan Gouvernman ozordi. Msye Rene menm i ankor avek nou.  Enn bann papye kot Msye Rene I siny 3 morso later lo son lekor an 1991 ti ganny sinyen par Attorney Zeneral pei sa letan ki ti, Mr Pesi Padiwalla e Madanm Mathilda Twomey ki ti asistan noter ofisyel ki ti siny sa dokiman.  Ozordi sa madanm I Sef Ziz.

Mon demann sa bann dimoun ki ozordi zot form par nou Sistenm Zidisyer, Madanm Twomey prensipalman ki a latet nou Zidisyer e i nou Sef Ziz. Msye Padiwalla i en avoka e li ozordi I annan en biznes ki apel Pardiwalla Twomey and Lablache.

Eski sa bann keksoz ki mon pe anmenn devan ozordi I keksoz ki pou kapab pas dan nou Sistenm Zidisyer e lazistis pour ganny donnen?  I en kestyon ki nou bezwen demande; akoz tel ki nou isi dan Lasanble fodre pep Seselwa ki vote.  Pareyman Egzekitiv se dimoun ki vot pour Prezidan, me nou Sef Ziz se en lot sistenm.  Bann ki zot forte i dan Lalwa mon sipliy avek zot get nou Sistenm Zidisyer e vin ansanm pour fer ki lazistis I toultan primordyal e drwa repiblik I ganny proteze.

Mr Speaker, Gouvernman in menm annan en polisi ki nou tou nou konnen, ki dir si ou deza propriyeter en morso later ou pa pou kapab aste en dezyenm bout later avek Gouvernman.   Alor en dimoun I sipoze ganny loportinite pour aste en bout Later Leta zis en fwa.  Mr Speaker, savedir 1 later par personn.

Madanm Sarah  Rene ti ne an Me 1958 e ozordi i annan 59 an. Dan en interview ki I ti fer an 2015, I ti deklar son lekor koman en madanm ki pa’n travay, i en “housewife” , en manman e i ti  annan rol First Lady depi 1993 ziska 2004.

Madanm Sarah Zarqani Rene ti annan en morso later ki I ti aste avek Seychelles Housing Development Corporation an 1988.  Sa later ki ganny trouve vizavi lotel Bel Air e I mezir 1811 met kare e a sa lepok ti kout R 120,000.

Apre sa premye later Madanm Sarah Rene in annan 10 morso later lo son non personnel an total.

Parmi in aste 3 propriyete La Digue later LD1110, LD1510 e LD112 an lannen 2000 zis akote Lotel La Digue Island Lodge.  Sa later in osi annan son bann kontradiksyon.  I annan dimoun ki ti enterese pour aste sa later avan sa madanm.  Me zot ti ganny dir ki sa later pa ti disponib pour vann, akoz pa ti favorab pou konstriksyon. Me nou vwar finalman li ki’n vin propriyeter.  E si nou regard byen sa batiman ki trouve lo sa later ki direkteman bord avek lanmer, i batiman pli o ki’n annan lo sa morso lakot La Digue.  Eski sa ti akoz son stati koman madanm Prezidan?

Bann Digwa solman a konnen osi ki sa Madanm ti frekant bokou L’Union Estate, ki ti ganny servi koman rezidans Msye Rene letan zot ti vin pas sezour laba.  Sa osi in en privilez byen Leta ki sa bann madanm in zouir.  Nou tou nou konnen ki enn son pasyon se zwe tennis e nou vwar ki bann tennis court ti ganny fer lo later L’Union e ozordi sa I dan labandon.  Eski sa osi ti en depans pour li kapab pratik sa zwe dan son letan lwazir?  Sa bann Digwa ki pou konn pli byen.  Me ozordi personn pa pe servi sa lenfrastriktir.

Dan lannen 2002, Madanm Rene i aste ankor en morso later avek Gouvernman, ki ti mezir 6850 met kare, plot No.T2224 pour R100,000.  Sa later I annan en restriksyon spesifik lo la ki demande ki sa later I ganny ofer ek Gouvernman, si I ganny vann avan 5an ki in ganny aste.  Mon pa’n vwar sa dokiman dan File Later pou montre ki sa ti ganny fer letan Madanm Rene ti vann sa later an 2005,  zis 3an apre i ti vann avek en lakonpannyen apele Saint Sebastian Enterprises Limited.

Sa tranzaksyon dan li menm I lev bokou kestyon.  Akoz lavant final ki I ti fer ti enkli 2 bout later ansanm.

En premye bout ki I ti’n aste prive an 1997 pour R900,000. Apre I ti aste sa dezyenm morso ek Gouvernman zis obor pour SCR 100,000.  Ki fer ki in aste sa 2 bout later ansanm pour en total R1milyon. Me mon sirprann letan I vann sa later ki prezan I vin T2252 ki mezir plis ki 72, 000 met kare ouswa pres 18 arpan later, i vann li pour R 1milyon  selman parey in aste.  Sa I vreman drol. Sa premye morso ti ganny aste plis ki 9an avan. Sa dezyenm morso 3an avan. Mwan dapre mon’n toultan konpran later son pri I monte.  Akoz ki dan sa ka sa gran morso later plis ki 72mil met kare ki direkteman lo lans an alan ver Grand Police kot Xanadu I ete son pri pa ti mont ditou?   Sa ti en beachfront property.  Eski Rezistrar Later sa letan ti pran son rol serye pour fer sir ki later pe ganny vann a son vre valer? Eski madanm Rene ti fer tou neseser avan I vann sa later ki in aste ek Gouvernman avan 5 an?

E ki mannyer sa madanm ti kontinyen ganny akse avek later Gouvernman?  Eski I ti lo lalis priyoriter?

Mr Speaker, an Me 2003 sa madanm ti aste en bout later ki mezir 106,749 met kare avek Msye France Albert Rene, son Msye marye,  Grand Anse Mahe kot zot pe reste pour le moman.

Sa lavant I paret en lavant prive me sa I pa le ka.  Sa later B1854 I konpri tou ansanm plizyer morso later ki’n ganny met ansanm.  En pe sa bann later Msye Rene ti aste avek Madanm Troian lo en baz prive.  Me I annan 3 morso ki I ti aste avek Gouvernman Sesel direkteman. Sa 3 morso ki mezir 33,764 met kare ouswa 8.3 arpan later, ti ganny aste avek Gouvernman an 1991 pour R65,000 selman pou tou le 3 morso.

E mon pou lir sa dokiman ki pas sa later avek Msye Rene sorti kot Gouvernman.  And it says.  I quote. 

I France Albert Rene, President and Commander in Chief of the Republic of Seychelles acting in such capacity for and on behalf of the Government of Seychelles in consideration of Seychelles Rupees Sixty Five Thousand Only hereby transfer to Mr France Albert Rene of Victoria, Mahe Seychelles, land comprised in the above mentioned titles.”

Mr Speaker, alor Msye Rene i klerman sit son pozisyon koman Prezidan Larepiblik e koman reprezantan Gouvernman I vann son lekor later Gouvernman.  Be Mr Speaker ki mannyer nou kapab dekrir sa?  Zis mazinen si land bank ti annan sa later e I ti pe donn bann morso 600 met kare I ti pou kapab donn 56 bout later ki ti pou asiste 56 fanmir.   Me o kontrer nou vwar ki sa later pa ankor ganny devlope.

An Me 2014 Madanm Rene i fer dokiman pour ki li ek Msye Rene I ganny zis zwizans lo sa later.  E i pas sa later an porsyon egal lo son 3 fiy ki an 2014 zot tou zot annan bann gran morso later ki Msye Rene ti deza sinyen de lapar son bann zanfan.

Miss Ella Rene, ki ti ne Avril 1990, ki pli gran fiy Msye e Madanm Rene ti aste B1407 ki mezir 3044 met kare ki direkteman pre avek lanmer  an 1998 avek en zanmi pros Msye Rene. Msye Rene  ti siny bann dokiman de la par son fiy.

An Septanm 1999 letan sa manmzel ti annan 9an I ti aste en lot morso later direkteman avek Gouvernman.  Sa later B1846 ki osi obor lanmer I mezir 5105 met kare.  Sa I fer en total son 2 morso later ansanm 8149 met kare later avan ki I ti menm ganny 10an.

Zot dezyenm fiy ki ti ne an Septanm 1997 in osi aste en morso, B1405 ki mezir 3398met kare avek en zanmi pros letan I ti annan 1an. Menm parey son gran ser, sa dimoun ti’n aste en later Gouvernman ki apre in vann avek sa fiy atraver son papa akoz zot laz miner.  E letan I ti annan 2an  Mr Speaker, I ti aste en morso avek Gouvernman, ki mezir 5244 met kare, ki  fer ki laz 2an sa zenn manmzel  ti annan  li 2 bout later ki mezir 8642  met kare ansanm.

Sa trwazyenm Manmzel ti osi aste en morso avek Gouvernman a en zenn laz 9 an. I ti aste en morso pre avek lanmer ki mezir  en total 6710 met kare pour R135, 000 an Oktob 2011.

Mr Speaker eski i normal pou zanfan miner aste fanmir aste Later Leta?  Eski lezot paran Seselwa I annan menm loportinite pou aste sa bann Later Leta?  Tou sa bann later I ganny trouve Grand Anse Mahe dan rezyon vreman pre avek kot rezidans Msye Rene I ete.  Tou sa bann later I annan bann lenfrastriktir tel ki semen, delo e elektrisite lo la.

Avek sa transfer pour later B1854, ki zot rapel  madanm Rene ti aste avek son msye,  sak fiy I ganny 35,500 met kare  an plis ankor koman byen an form later ki zot pou erite e bokou ladan ti Later Leta.

Mr Speaker pa fini, fini la I pli fer lapenn ankor. Koman Madanm marye Msye France Albert Rene sa madanm ek son zanfan I kapab ganny bann par dan okenn lakonpannyen ki son msye I annan si en keksoz I arive ek son msye.

Mosyon i koz lo propriyete Madanm Rene.  Sa bann later eritye ki i kapab gannyen i osi teknikman pou li.   Dokiman i montre Mr Speaker ki en konpannyen apel Capricorn Estate ki propriyete later B2311.  Sa later i ganny trouve zis obor later bann zanfan Msye Rene e ant sa premye morso ki i ti vann ek son madanm.  Sa later li i mezir 80, 484 met kare mon repete Mr Speaker, 80, 484 met kare.   Sa later li i en later ki pe ganny lease avek Gouvernman Sesel ki pe lwe sa later pou 60an ek Gouvernman Sesel depi Zanvye 2004 pou R25mil par an.  Sa i fer rent Mr Speaker R2mil par mwan pou en later 80, 484 met kare ziska lannen 2064.   Mon kapab vreman plere Mr Speaker.

Mon kapab plere Mr Speaker.

Sa lakonpannyen, Capricorn Estate, ki propriyeter sa later.  Li son propriyeter I apel Katiti Properties ki en lot lakonpannyen ankor.

E Mr Speaker sa lakonpannyen li son propriyeter I pa lot ki Msye France Albert Rene.  Msye Rene ti ankor Prezidan sa letan e I ti pas la prezidans avek James Alix Michel sa menm lannen detrwa mwan apre an Avril 2004.  Akoz ki Msye Rene ti bezwen kasyet deryer 2 lakonpannyen pour li lwe en morso later avek Gouvernman Mr Speaker?  Pa fini Mr Speaker Madanm Sarah Zarqani Rene, I aste en morso later B6926 avek Gouvernman letan deza I annan tou sa lezot later ki mezir 886 met kare – byen pti.   Me Mr Speaker i aste sa bout later 886 met kare pour R2587. An 2012 Mr Speaker,  ti annan en bout later 886 met kare pe vann pour  R2587.  Msye Yves Choppy I vann sa later Gouvernman avek en ansyen Madanm Prezidan pour mwens ki 1sou par met kare Mr  Speaker an 2012, zis 6 an pase. Mr Speaker sa I vreman apel en labi total! En krim kont tou Seselwa!  En laont koman en ansyen Premye Madanm nou pei.  I vreman degoutan Mr Speaker akoz sa madanm a sa pwen I annan de mil e de mil met kare later lo son non e lo non son zanfan e pour son msye!

Sa madanm in ganny soutenir tou son lavi par larzan tax sa pep Mr Speaker.  En pep ki’n pas dan tou kalite difikilte finansyel.  En pep ki ozordi preske 5000 dimoun pe rod en morso later.  En pep ki serten I asire ki zot pa pou zanmen ganny en morso later dan zot lavi.   En pep ki 40poursan son popilasyon I pe viv dan lapovrete.  En pep ki ti’n met konfyans dan sa madanm Mr Speaker.

Sa madanm pandan sa bann letan in zouir lo bann Zil Elwanye tel ki Remire kot zot de Prezidan Rene koman en koup zot ti fer  konstrir en lakaz. Sa lakaz pa ni lo later ki pour Msye ouswa Madanm Rene, me later gouvernman.  Sa zil ti en zil pour Gouvernman Sesel e apepre 1995 ti vin anba management IDC.  I pa ni ti menm zot later Mr Speaker.  Ki lotorite zot ti annan pour fer konstrir sa batiman, ki ti zo lakaz e osi en tennis court.  Mr Speaker.  En tenis court pou son plezir personnel lo Remire.   Nou vwar en tennis court ki kouver menm lo Coetivy Mr Speaker.  Mon pa konnen si i ti al servi laba tou.  Akfer tousala?

Mr Speaker sa madanm i annan en total 10 morso later parey mon‘n dir ki prensipalman i sorti kot Gouvernman dan son non prop.

Nou retourn prezan lo later ki ti deklans sa resers; sa later kot sa lopital I ete lo highway ki ti pou Emerald Holdings. Sa lakonpannyen ki son propriyeter letan I ti formen ti Mr Gregoire Payet e Madanm Sarah Rene.  Ozordi Msye Payet in nepli propriyeter sa lakonpannyen.  Dan son annual return 2013 mon vwar en lot Msye apele Kan Kim Sun, ki nou osi konn li koman Sunny Kan ki propriyeter ansanm avek Madanm Rene.

Plis lenvestigasyon i montre mwan ki Mr Kan I osi propriyeter Island Motors e i osi annan par dan CCCL e la i an bann zistwar vreman konplike.  Sa later li kot Lopital i ete i en later ki’n retourn lo non Gouvernman.  Sa later I pa zis gran me I enorm parey mon’n dir.   Sa later ti ganny donnen lo en “lease” avek Gouvernman Sesel le 24 Oktob 2007.  Sa ti’n ganny transfer a en lakonpannyen apele Emerald Holdings ki pou Madanm Rene e sa transfer ti ganny sinyen par Madanm Veronique Herminie koman PS sa letan. Ozordi Madanm Herminie I Depite CEO IDC e osi General Manager Green Island Construction.  Tou le de I bann antite Gouvernman.

Sa later Mr Speaker in en later ki ti’n ganny repran par labank an Mars 2015.  In en later ki’n akimil en det.  I ti annan en sarz Nouvobanq kont li 3.5milyon Ero.  Letan labank ti repran son later zot ti drwa plis ki R1000milyon  lavaler bann keksoz ki ti annan lo la.  Alor Mr Speak3er zis apre ki sa later ti ganny pran nou vwar ki Emerald Holdings i ganny ankor later.  Nou vwar sa bout later an 2014 kot Airtel i ete lo highway – mon pa pou donn plot No. akoz dimoun i konnen kote sa bann later i ete – kot Airtel i ete, apre sa 3 Blok Flat ki zis par devan Airtel tou le 4 sa morso later sa 4 morso later i pou Emerald Holdings ki pou en lease ki zot in gannyen avek Gouvernman pou R308mil – R308,526mil par an ki fer R77 mil par mwan.  Ekskize Mr Speaker, R308,526mil pou tou le 4 morso later – (pardon) ki fer ki sak morso later i pey R77mil par an ki fer R6500 par mwan. Sa i zis 1an apre ki Emerald Holdings in fail pou gard en bout later ki i ti’n ganny avek Gouvernman ki mezir 25mil met kare later i ganny ankor 4 bout lannmen obor.

Dan mon resers osi mon vwar ki an 2002 par kont Emerald Holdings ti deza annan 2 bout later ki ganny trouve  zis par devan  sa later kot sa Lopital abandonnen i ete.  Sa 2 bout later V8072 E V8073 i bann bout ki pe ganny lease tou lede ansanm pou R205, 767mil par an ki fer R100mil sakenn par an ki fer R8mil rent par mwan.  Sa i 2 beachfront property ki Emerald Holdings i annan.  La i fer nou en total 6 bout zis dan sa zanmerant.

Plitar mon vwar osi ki Emerald Holdings i ganny 3 bout later Providence.  La nou pe koz Providence santral Mr Speaker kot sa roundabout i ete zis obor kot sa bakery Pain De Mie i ete.

Sa 3 bout later ki V6795 – V6811 ek V8948 ti pou Emerald Holdings ki zot pe lwe Mr Speaker.   Zot pri ki zot ti pe lwe pou tou ansanm i fer 2200mil met kare pou 3 morso ansanm obor kanmarad.  Alor nou vwar ki en lakonpannyen i ganny 3 morso later dan Providence kot tou dimoun pe rod later pou fer biznes, li sa lakonpannyen i ganny priyorite i ganny 3 bout later ansanm.  Tou le 3 bout ansanm pe lwe R66, 760mil pou tou le 3 morso par an ki fer R5mil apepre pou sak morso par mwan pou sak morso later.  La Mr Speaker azout sa 6 avek sa lot 3 i fer nou 9 morso pou Emerald Holdings.  Sa 3 later son  bann dokiman ki mwan mon annan i vreman resan.  I montre ki Emerald Holdings ki annan en lease lo sa later lo sa 3 later, i pase i pas son lease avek en lot lakonpannyen ki apel Laxmi Trading.  Me letan i fer sa tranzaksyon pou sa 3 morso napa dokimantasyon pou  tou le 3 morso.  Zis en morso ki ganny leased.  Sa bann dokiman Mr Speaker i date Oktob 2017 sa bann dernyen ki mon annan e mon pa vwar Lagreman ki Gouvernman i agree outright pou lease sa bann later – pou transfer sa lease.  Me solman nou vwar  akoz mon’n regard en pe dokiman later Mr Speaker nou vwar ki letan sa transfer  i ganny fer napa valer pou sa lease sa later.  Letan en later i ganny lwe avek en dimoun i annan en valer ki ou vann ou lease.  Sa dokiman i montre ki pou tou le 3 morso ki’n ganny transfer avek Laxmi Trading napa en valer ki’n ganny deklare kot Registrar.  E sa i pa korek.  Mon’n vwar en kantite papye later Mr Speaker kekfwa  bann dimoun legal ava regarde sa i pa korek.

Alor Emerald Holdings i fer bann tranzaksyon resaman an Oktob 2017 e bann tranzaksyon pa korek.  An total lo lalis kart later Emerald Holdings i annan 12 morso later.  Bann lezot morso later ki i annan Mr Speaker, i later H5404 avek H5403 ki annan en lyen ek kanmarad.  Sa 2 later dimoun pou konn li koman bann later kot Vacoas Village. H5404 i mezir 32mil met kare ki fer apepre 8 arpan later Mr Speaker.  Sa i lo non Emerald Holdings.  H5403 ki mezir 10mil met kare later ki apepre 2.5 arpan later Mr Speaker, i pou en Lakonpannyen ki apel ONEARN me propriyeter ONEARN i osi Emerald Holdings.  Alor sa nou vwar dan son annual return 2006 nou vwar ki ONEARN son propriyeter se Emerald Holdings nou vwar lekel son shareholder ki fer ki Emerald Holdings i annan plis ki 40 ekek mil met kare later dan Nor dan Beau Vallon kot Vacoas Village i ete Mr Speaker.  Ki sa ki pli enteresan ankor avek sa later, e nou vwar bann dokimantasyon pou Vacoas VillageVacoas Village ti en lotel ki ti pou Gouvernman Mr Speaker atraver company Seychelloise De Promotion Hotelier LTM ki nou tou nou ti konn li koman COSPROH.  Ti en antite Gouvernman.     Dan bann dokimantasyon nou vwar ki sa Mukesh Valabjhi ki  ti Direkter sa lakonpannyen e li ki ti fer dokimantasyon pou fer sa lakonpannyen.  Sa later ki ti pou Vacoas Village, in en later ki’n ganny subdivide parti subdivide akoz sistenm later i mannyel Mr Speaker, i pran bokou letan pou ou al trouver lekel ki vre propriyeter sa later.  Me solman nou vwar ki later Vacoas Village ki ti pou COSPROH i ganny transfer avek ONEARN avek Emerald Holdings ki a lafen nou vwar Emerald Holdings i pou madanm Sarah Rene.  Sa i pou bezwen bokou plis letan akoz son bann file i annan ase konplikasyon ladan, me solman a lafen nou vwar ki sa 2 morso later son proprietor se Emerald Holdings e ONEARN ki shareholder e osi Emerald Holdings ki fer ki Madanm Sarah Rene i direkteman propriyeter sa 2 morso later.

Mr Speaker, nou bezwen annan lazistis dan nou pei e dimoun i bezwen ganny kondannen si zot in komet bann krim.  E koripsyon i en krim Mr Speaker.

Msye Rene le 6 Zen 1977 ti dir “pour nepli annan lenterferans par Gouvernman avek okenn Ziz. Tro souvan dan lepase, Gouvernman ki dir kan fodre kondann dimoun e kan pa fodre kondannen.  A lavenir Ziz a desid li menn ki fodre fer e personn pa pou enterfer avek li. Dan lot kote pa pou kapab en Lalwa pour en bann e en lot Lalwa pour lezot. Lalwa I pou aplik pour tou dimoun ki ou blan, nwar ou zonn.  Ki ou ris ou Pov.” Fodre nou fer en lanket imedya pou  komanse pou met sa bann milye met kare later okler Mr Speaker.  Later Leta i pou tou Seselwa.  Madanm Sarah Rene, ki’n annan 10 bout lo son non prop e 12 bout lo son lakonpannyen ki li in pas atraver en Polisi kot Gouvernman ti dir en bout later Gouvernman par dimoun e dimoun ki napa later.  Mon demann mon bann koleg e la mon demann lot kote latab atraver ou Mr Speaker pou siport sa Mosyon.  Mon pare pou ekout tou zot propozisyon, pou konklir ki mannyer nou pou bouz devan.  Mon poz sa la Mr Speaker.  Mersi.

 

(APPLAUSE)

 

MR SPEAKER

Mersi, mersi Onorab Larue. Bon Mosyon i devan Lasanble.  Okenn Manm ki segonde. Onorab Henrie.

 

HON GERVAIS HENRIE

Mr Speaker mon segonn sa Mosyon e….

 

MR SPEAKER

Ou anvi entervenir.  Ou annan ou apepre 15 minit.  En pti pe plis.

 

HON GERVAIS HENRIE

Wi probableman mon pour al en pti pe plis.

 

MR SPEAKER

As long ki nou pa. bon ou annan ou tou fason, ou annan ou en maksimonm 30 minit. So si nou pour overlap, nou pour….  Petet ziska 5.15 akoz mon pa oule al pli lwen ki sa. Ok laparol i pour Onorab Henrie.

 

HON GERVAIS HENRIE

Mon ava seye kantmenm…

 

MR SPEAKER

Petet zis mwan ava kosyonn en pti pe bann Manm.  Mover Mosyon in fer referans avek Sef Ziz.  Me zis ler i ti travay dan Biro Attorney Zeneral e ozordi ki pozisyon i pe okipe.

Annou pa al pli profon akoz bann Constitutional Appointees nou pour bezwen anmenn en Mosyon direk pour nou kapab kestyon zot, zot bann dealings and so on. So zis en pti kosyonn pour Manm ler nou entervenir lo la pour nou fer en pti atansyon. Onorab Henrie.

 

HON GERVAIS HENRIE

Mersi Mr Speaker. Bonn apre midi tou dimoun. Mr Speaker later i en size ki pre avek leker tou dimoun.  Mon pa konnen si akoz dan serten konsep relizye i dir nou ganny kree avek lapousyer e letan nou mor nou al, nou ganny antere. Alor i fer ki later i reste touzour en size sansib. I en size ki’n koz revolisyon atraver lemonn. Me pli enportan bann rezim politik atraver lemonn souvandfwa in servi later koman en size pour kontrol dimoun pour ki dimoun i reste annan sa depandan lo zot. E politik SPUP/SPPF, e Parti Lepep i reste enn zot bann lakle fason ki zot fer politik an servan later.  E i pa drol alor ki sa Mosyon in ariv dan Lasanble parski LDS se lalimyer dan Sesel.  En kantite keksoz in pas mal dan sa pei enkli size later e i enportan ki nou anmenn laklerte lo sa size.

Nou bezwen brav, nou bezwen onnet.  Me pli enportan nou bezwen pa per pour adres sa bann size.

E pour dimoun laba deor mwan letan mon’n ekout sa prezantasyon Onorab Larue mwan ti kapab ankoler, me mon pa ankoler me plito mon vreman sagren.  Ou konnen mon leksperyans personnel Mr Speaker letan mon ti en zenn etidyan sorti etidye, alor tou returning graduate mon ti’n fini marye sa letan, mon ti annan mon zanfan. Mon sel zanfan e nou pe fer en demars later, lakaz, en dimoun i dir ek mwan be ale al kot en madanm National House e al avek ou fanmir. Koumsa li i en madanm e kekfwa ou kapab tous en pe son lemosyon koman en manman.  E alor kekfwa ou ava kapab ganny en led en pe pli vit.  Donk, mon’n obeir son konsey mon’n ale e sa madanm i redi en tirwar i tir en papye A4, dir avek mwan, mwan ava dir ou laverite, mon pour met ou non lo lalis.  Me ou 22enm. Alor i dir mwan i pour pran en pe letan. Donk komans fer demars atraver Gouvernman pour ganny en bout later me finalman mon fanmir zot ti annan en pe later Grenis donk mon papa i dir ek mwan be ok mon a vann ou mon par.

E sa letan mon ti’n al kot bann Minister konsernen, ranpli tou bann form.  Donk letan sa bann papye in pas tou sa bann prosedir anrezistre, mon ti pe travay SBC mon ganny en call son lannmen. Mon papye anrezistre, dizon ozordi, demen mon ganny en call. E en dimoun ki mon konn byen ti Politeknik enn an ouswa 2 an apre mwan.

I dir mwan Mr Henrie, wi i dir mwan mon pe call ou pour en enform ou ki nou pe retir ou non lo lalis parski i pa Polisi Gouvernman pour vann later avek dimoun ki deza annan later, e dapre nou rikord i annan en bout later ki’n fek anrezistre dan ou non.

Mon pa kapab ankoler avek li akoz mon konnen pour dir i osi i ti en senp public servant ki ti pe fer son travay ler in konsern mwan son travay in ganny aplike dapre Lalwa par vann later avek dimoun ki’n deza annan later. E mwan mon dir ek li napa problenm, malerezman pour mwan i ti en later zeritye ki ziska ozordi sa ti apepre 2002, e ziska ozordi mon pa kapab devlope akoz lipotek nou tou nou konnen mannyer i ete. Antye bann propriyete ki ti’n deza lo la pour bezwen ganny afekte. Ziska ozordi mon pa kapab devlop sa later. B

Be sa i mon pe eksplik sa akoz ki mannyer mon Gervais Henrie an 2002 en call in vini pour mwan nou pe retir ou non lo lalis akoz nou rikord i montre pour dir ou deza annan non lo en propriyete anrezistre e i pa Polisi Gouvernman pour vann later avek dimoun ki deza annan later1 Me prezantasyon Mosyon in les mwan konnen pour dir en endividi ki en Seselwa parey mwan ki son drwa i pa al pli lwen ki pour mwan dapre nou Konstitisyon.

Me li i annan 10 bout dan son prop non e 12 dan bann lakonpannyen ki li i annan par ladan! Ki mannyer nou eksplike sa?  E zis taler midi mon’n annan meeting avek en zennonm Mont Buxton ki’n les mwan konnen poudir i annan 4 an li i pe rod en bout later.

E mwan pe mazin osi bann lezot dimoun parey manmzel Theresine Grenis mon pe mazin le de ser Rosette ankor Grenis, manmzel Laporte tousala bann dimoun Grenis dan mon vwazinaz. Tousala pe rod later depi lontan.

Me nou’n osi aprann poudir i annan en plot V12348 ki si nou ti pour diviz li par bann met, par bann bout 600 met kare, 42 bout ti an gannyen, 42 bout, en bout ti pour kapab al pour msye Fred, en bout ti pour kapab al pour manmzel Theresine.  En bout sakenn pour le de ser Rosette e manmzel Laporte osi ti ava ganny en bout.

Mr Speaker be bann keksoz koumsa i ras ker, akoz mon’n toultan antann bann zistwar an komansan par I Imelda Marcos, nou rapel li Philippines. Nou mazin resaman bann zistwar parey Grace Mugabe. E i annan en lot ankor sa enn la Nigeria touzour en ansyen First Lady ki’n enplike li i apel Turay Adura – tou sa bann dimoun zot in servi zot pozisyon, koneksyon, zot mari pour sa ki nou apel an Angle land grabbing.  Grace Mugabe par egzanp an 2014 dan son pei i pran 800 ektar, an 2013 en lannen avan 1600 ektar, son leskiz se ki i ti pe agrandi propriyete kot ti annan en Lorfelina.

E selman sa ti zis en bat latet. E dan menm konteks isi Sesel se ki letan nou ti pour tann sa bann zistwar nou ti ava krwar poudir be sa i ariv laba.  Be saler ti pe ariv la. I ti pe ariv la avek konplisite, avek linefikasite bann dimoun ki ti sipoze pe vey nou aki.  Nou aki nou later, nou later, nou aki, toultan nou rapel sa fame diskour an 2004, nou pour protez aki.

E protez aki i bann dimoun ki’n dan Gouvernman pour mwan depi zis apre, zis apre koudeta in annan en long lalis sa bann dimoun. Nou kapab komans depi par bann Minis, bann dimoun ki’n annan bann pozisyon Sekreter Prensipal.  In annan bann dimoun ki’n bann Direkter Zeneral, i bann dimoun ki’n dan Rezistrar, zot tou, zot tou san eksepsyon zot koupab. Parski sa bann keksoz in ariv on your watch!  E zot in fail lepep Seselwa par les nou ganny abize! Par les nou konfyans ganny trair.  Par les bann dimoun pran lavantaz nou linyorans.

Me zot, zot ti pe ganny konfye en responsabilite, ganny en saler.  Me zot in les sa bann keksoz arive e i annan en long lalis sa bann Minis. An komansman par depi Mr Dolar Ernesta, in Minis later pour plizyer lannen. I annan Mr Joseph Belmont ki ti ansyen Vis Prezidan.  I osi in ansarz later avek lakaz, Mr Joel Morgan ki’n en Minis Later avek Lakaz. Jaquelin Dugasse dan son letan ki i ti National Development ti annan sa Portfolyo Land and Housing. Mr Michel dan en moman 2011, 2012 apre retirement Mr Dugasse i ti pran sa Portfolyo. Mr Christian Lionnet an 2012, 2016 Mr Bastienne in vin an 2016. Tousala in ariv dan zot anba zot responsabilite.

Me sa ki enportan loter Mosyon in fer nou rapel parol Msye Rene ki’n quote letan i dir, dir nou si i annan en keksoz ki pe mars mal, dir nou. Pa per pour eksprim zot lekor. Akoz, eski sa bann dimoun ti per, ouswa eski sa bann dimoun ti konplis, ouswa sa bann dimoun ti pe fer faver, dalon. Sa bann dimoun tip e fer faver bann dimoun ki lo menm kote politik avek zot!

E dan zot linefikasite pour desarz zot responsabilite konbyen Seselwa, konbyen fanmir ki zot in met retar. Ozordi dimoun pe ariv dan son 50 an montan, seve pe blan e en twa i pa ankor kapab mete son latet.  Eski se sa lazistis. Eski se sa zonm o sant devlopman ki nou’n tann koz lo la sitan lontan.  Eski sa i byen. E pour bann dimoun ki pe ekoute laba deor sa bann dimoun annou blir avan ‘93 parski zot ti’n vini an ‘77 avek fizi dan fernwanr, vol pei, apre kit en fizi la dan nou latet. Nou’n per. Me ‘93 en konstitisyon in vini, Lopozisyon in la. Lopozisyon in warn zot enkli mwan. Konbyen nou ki pare pour ekoute ziska ozordi i annan dimoun pe dir montre levidans be si sa ki Onorab Larue in prezante ozordi, i pa levidans, mon pa konnen kwa ankor ki ou pour krwar levidans.  Ou’n donn zot en sans an ‘93. Ou’n donn zot en sans an ‘98, ou’n donn zot en sans an 2001, e 2002. Ou’n donn zot en sans an 2006 e 2007.

Ou’n donn zot en sans an 2011.  Ou’n donn zot en sans an 2015 e 2016. Eski laprosenn fwa ou pour donn zot en sans ankor? Eski ou pour kapab fer sa?  Later i pre avek leker tou dimoun. I larises nou pei.  E pour mwan letan mon’n ekout sa prezantasyon, mon pa’n vwar bann dimoun ki’n azir dan lentere sa pep.  Mon pa’n vwar bann dimoun ki’n azir dan lentere pei pour dir konmsi zot in, zot in ganny sa bann propriyete, zot in envestir pour anmenn larises ladan. Non, sa bann dimoun pa’n fer sa ditou akoz sa bann dimoun in azir senpleman e pirman dan zot lentere personnel.  Zot in fer sa pour anrisir zot prop lekor.  Zot in fer sa pour anbelir stati zot fanmir dan nou pei.  Me alor eski nou kapab dir pour dir ti annan lazistis dan sa ki zot in fer?

Ditou pa. Plito mwan mon’n gete koman en bann aksyon degoutan. En bann aksyon egois.  En bann aksyon voras pirman vorasite. Akoz senpleman i pa ti pour lanmour bann dimoun ordiner. Seselwa later in bezwen konble Sesel pour donn zot en bedsiter pour donn zot en pti lakaz 2 lasanm, 3 lasanm lo later konble ki nou pa swete, me kalamite natirel, Tsunami  en zour i kapab vini balye ou.

Kan ti annan later partou ki nou ti’n kapab gannyen pour reste pre dan nou bann kominote ki tradisyonnelman nou ti abitye reste.

E Mr Speaker, Mosyon pe demande ki en lanket i ganny fer. E mon pour souliny sa mo la en lanket i ganny fer. Parski mon’n dir dan mon prezantasyon pli boner, i annan en long lalis dimoun ki bezwen rann kont ki mannyer sa in arive. Ki mannyer ou pa’n pran aksyon. E ki mannyer ou pa’n sonn laklos alarm pour dir sa pe arive? Me pli enportan sa ki enteresan la pour vwar prezan ki pour arive. Boul byento pour dan kare Egzekitiv.

E i annan en Minis ki ansarz bann zafer later. Nou annan en Komisyon Anti-Koripsyon.  E nou annan en Prezidan ki pe pres ozordi latransparans, rann kont, e bon gouvernans.

Byensir nou pour bezwen atantiv e mon enplor mon bann zanmi dan medya, pour swiv sa dosye avek lentere e asire ki sa bann dimoun i rann nou en kont ki zot pour fer dezormen enn fwa ki sa Mosyon i ganny adopte par Lasanble Nasyonal. E nou dir an levan nou lanmen nou aprouve pour ki Gouvernman i fer en lanket dan sa ki’n arive?

E si nanryen pa ganny fer, eski ou pour donn zot en lot sans pour fer sir ki demen later ankor i kontinyen ganny partaze antre dalon, antre fanmir e ki ou kontinyen espere.

Eski sa ou pour war pour dir zot pe fer ou lazistis, e lazistis zanfan 9an, 2an, aste later avek Gouvernman?  Konmsi mon pe rod en mo, i ridikil sa.  I skandale, i tou en. E pour mwan konmsi ki mannyer sa bann keksoz in arive. I en krim. En krim kont pep Seselwa e en krim kont Sesel. e o sant sa krim la in en madanm Mr Speaker dan en entervi ki madanm, Rene ti donnen le 3 Zilyet an 2015 avek zournal TODAY i quote, I mean i dir e mon quote

“There are very few people that can be trusted. Everyone is just out for what they can get, which is really such a shame.”  Fen sitasyon.

Me pour mwan sa ki’n arive se zisteman sa.  Bann dimoun i pe dekrir son lekor, son konsyans pe koz avek li parski in dan en pozisyon privilezye, son msye – Prezidan pei. E li an 88 nou’n antann dan prezantasyon Mosyon premye bout later ki aste anler Bel Air, dan distrik mon koleg Onorab Loizeau, 1,811 met kare pour en sonm 120mil roupi sa letan e apre sa nou’n antann ki mannyer in aste ankor propriyete, bann lannen ki mon’n sezi, ‘97, 2002, 2003, e finalman nou’n tande total, 3 bout i annan La Digue. 12 plot pour bann lakonpannyen ki annan share ladan.  E 10 lo son non personnel.

E eski alor i pa ti dan en pozisyon ki li in zis pran, sa ki li i ti kapab gannyen letan i ti dan en pozisyon privilezye? E pour our ki mon’n dir ou ankor taler ki’n donn Parti SPUP/SPPF Lepep, sans tou sa bann lannen.  Eski ou pa krwar poudir sa, la ou’n tande dan Lasanble Nasyonal ozordi ki mannyer en endividi pros avek koneksyon State House, in abiz sa pozisyon.  Be lezot alor ki in fer. Ki kantite sa bann dimoun in fer, ki kantite bal zot in donnen?  Tanto avan ou al dormi fer refleksyon lo la. Ki kantite bal ou krwar zot in donnen?

Sa, sa ki nou’n war. E alor Mr Speaker, mwan mon konnen pour dir i annan bann lezot entervenan lo mon kote ki annan bokou keksoz pour dir.  Me mon pour pli enterese pour antann larepons lot kote latab.  Ki zot pour dir, mon pa pour kapab met parol dan zot labous mwan. Be selman zis fer atansyon ki zot dir.  Zis fer atansyon. Parski parol dezormen ki nou dir la anndan i reste an lekritir, i reste an odyo, i reste an vizyel e demen sa parol i kapab ganny servi kont ou.  Sirtou si i annan nou ki enplike dan spekilasyon aste later kit la apre pour revann pli tar, fer atansyon si zot vin dir en parol. Parski nou’n antann dan prezantasyon Mosyon, en pe sa bann tranzaksyon in al dan sa direksyon. Nou konn zot, nou pour veye lekel ki dir kwa!

Alor fer atansyon.  Donk mwan ava termin lo sa de mo Mr Speaker an dizan Sesel, Sesel i ganny abize, Sesel in ganny abize akoz koman en nasyon, en nasyon avek listwar tre kourt ki malgre nou annan ledikasyon dan sa pei kot nou aprann lir konte, e ekrir pour bokou fwa, mon bann, frer ser Seselwa in napa sa privilez, in napa sa mwayen pour nou kapab vwar e tann bann keksoz ki pe arive dan sa prop, nou prop pei ki pe afekte nou koman en endividi e ozordi bondye in pitye nou in donn nou LDS, in donn nou lalimyer dan Sesel.  In donn nou laverite dan Sesel!  In donn nou lespwar dan Sesel!  E nou pe met devan bann keksoz dousman, dousman pour ki alor evantyelman nou pour anmenn en transformasyon e anmenn lazistis dan Sesel pour tou bann ki’n fatige, fatige ganny pil lo la apre en sistenm ki dimoun i fer konfyans.  Mersi Mr Speaker.

 

(APPLAUSE)

 

MR SPEAKER

Mersi Onorab Henrie.  Bon nou pour aret la pour ozordi e nou ava rann lantenn SBC.  Nou ava kontinyen nou travay demen matin 9er.

 

(ADJOURNMENT)