Home » Verbatim » 2018 » Verbatim Tuesday 3rd April, 2018

Verbatim Tuesday 3rd April, 2018

NATIONAL ASSEMBLY OF SEYCHELLES

 Tuesday 3rd April, 2018

The Assembly met at 9am

National Anthem

Moment of Reflection

Mr Speaker in the Chair

 

MR SPEAKER

Bonzour tou Manm Onorab e bonzour tou dimoun ki a lekout e pe swiv travay Lasanble Nasyonal.  Bon bomaten parey nou ti enform zot semenn pase, bomaten nou ti sipoze pe pran kontinyasyon sa PNQ pour lo sityasyon Sinohydro lo sa Kontra lo lagrandisman Danm La Gogue. Lasanble ti’n demande, ti’n summon 2 lot Minis ki osi dan sa, zot involve dan sa proze.          Sa se Minis Dogley e Minis Bastienne me anvi ki nou’n aprann ki Minis Bastienne pa dan pei i lo en Misyon Ofisyel aletranze nou pa pour kapab pran sa kestyon, kontinyasyon sa kestyon bomaten, alor nou pour postpone li probableman pour Mardi prosen, ler nou ava ganny prezans Minis Bastienne osi avek nou dan Lasanble.  

So alor bomaten la nou pour pran Air Seychelles e i annan en PNQ osi ki’n rantre, pour fer en pti pe zistis mon’n pran en desizyon pour donn Minis Lasante en pti pe letan pour li prepar li, nou pour pran sa PNQ 2er apre midi.

So nou pour pran Air Seychelles bomaten e mon panse i ava anmenn nou ziska dan midi e nou ava pran PNQ Minis Adam, Minis Lasante 2er apre midi.  Yes Onorab Ramkalawan.

 

HON WAVEL RAMKALAWAN

Mersi bokou.  Mr Speaker bonzour e bonzour tou bann koleg Onorab e tou bann dimoun dan, ki pe ekout nou, Mr Speaker an sa ki konsern Air Seychelles mon krwar ki i annan serten keksoz ki’n deroule depi letan nou’n ganny kopi bann Kontra, letan nou ti fer meeting, meeting Lasanble, biznes Lasanble dan prezans tou bann dimoun konsernen ou menm ou pe Chair, Deputy, sa 2 Leaders avek bann Chief Whips ek Clerk ek son Asistan.  Air Seychelles atraver son PS ti demande pour asiste sa meeting e enn bann keksoz ki zot ti dir se ki dan bann Kontra i kapab annan bann keksoz ki commercially sensitive.

Mr Speaker nou’n pas dan tou sa bann Kontra e nou pa’n vwar nanryen ki commercially sensitive, an plis ki sa nou krwar ki pour fer Lazistis avek nou Lasanble koman son rol pour oversight tou bann travayer Air Seychelles ki pe ganny pouse fodre zot konnen akoz, kwa ki’n arive dan zot Lakonpannyen e piblik an zeneral pour nou pa repet menm fot, mon pe move ki tou Manm Lasanble i devret ganny en kopi sa bann diferan dokiman.

E si tou Manm Lasanble pour ganny en kopi sa bann diferan dokiman mon krwar ki i pour unfair pour nou fer Minis vin la parske bann kestyon ki bann Manm ti ava kontan demande i pour limite parske zot pa pour konn tou sa bann detay bann, kekfwa bann lenformasyon sokan osi tou ki Manm i devret konnen.

Alor mon anvi fer en propozisyon Mr Speaker, vi ki ou’n dir PNQ pour pran apre midi, eski la bomaten nou pa ti ava kapab kontinyen avek Mosyon lo Lasante, pour nou fini sa morso ki 10.30 oubyen 11er bann Manm ti ava’n kapab ganny sa bann dokimantasyon pour zot kapab komans regarde e apre sa nou ti ava pran Air Seychelles, mon pe, parey ou vwar mon pa pe met en keksoz konkret, mon pe zis sey met bann diferan eleman, mon pe met bann diferan eleman pour nou kapab sanz Order Paper e ou annan Lotorite pour ou fer sa, afen ki nou kapab fer Lazistis avek tou sa ki nou’n, lo nou papye.

Parske semenn pase osi nou ti dir Minis Finans, Minis, sa 2 lezot Minis pour vin devan Lasanble e tou keksoz ti ok pour zot vini, la en kou an gran tou keksoz ou a krwar i an dezord.  E Gouvernman lo son kote pour servi lekspresyon Mrs Pother yer swar “ou krwar konmsi pe roul lo diferan gir, i annan 1 i lo premyer, lot i lo senkyenm, lot i lo trwazyenm e nou pa tro, i annan ki lo neutral tou pe fer ayer ki nou nepli konnen ki Gouvernman pe fer.

Alors nou, nou anvi ganny keksoz byen drwat, byen annord.  E lefe ki nou annan en Mosyon ki nou kapab tackle pour nou fini e ti napa bokou dimoun ankor ki ti anvi koze, nou ti ava kapab.  Se sa ki mon pe met devan ou Mr Speaker.  Mersi bokou.

 

MR SPEAKER

Mersi Onorab Ramkalawan, mon a donn laparol Onorab De Commarmond, Leader Zafer Gouvernman.  Onorab.

 

HON CHARLES DE COMMARMOND

Bonzour Mr Speaker, bonzour tou Manm ki la prezan, tou dimoun ki a lekout, Mr Speaker tan ki mon konpran sa ki pe al ganny avans devan mon pa oule osi ki nou Lasanble i ganny gete konmsi ki li osi pa konnen ki i pe fer, sa Kontra ki devan nou ki mon annan en kopi of anfen kont bann dimoun ki lo FPAC dan mon kote zot in preview sa Kontra parey nou ti’n tonm dakor zot pour ganny met okouran – be si, i annan en gran weekend ki’n pase la 4 zour depi Vandredi, Sanmdi, Dimans, Lendi si petet lo kote Lopozisyon si zot in vwar poudir i annan sa, i zistifye sa ki zot pe dir ki bezwen konnen ki ou vin diskite la.

Me selman petet zot in kapab zwenn, ti’n kapab pran responsabilite konteni sa Kontra, pa gard li zis pour detrwa zot ki i annan sa, share epi kekfwa annan en fason kontrole pour ranmas li ouswa mon pa konnen.

Me selman ki zot in kapab pran sa responsabilite ki zot in kapab konnen kwa ki ladan pour nou kapab diskit li ozordi, olye al diskit li dan FPAC pour diskit li dan Lasanble la mwan mon dakor avek sa.

Me selman lo lot kote annou pa delay ankor Minis i la, in deza arive la annou, konnen si nou bezwen en demi erdtan, en kard erdtan pour konsilte me ouswa share ek – zot annan deza sa, mon pans koumsa mwan konmsi, selman nou pa delay ankor keksoz taler dimoun a krwar nou, nou pa konnen ki nou pe fer dan Lasanble.  Mersi.

 

MR SPEAKER

Mersi Onorab De Commarmond, pour lenformasyon bann Manm Lasanble nou’n, yer Lofis Clerk avek mon menm nou’n an kontak e nou’n fer bann laranzman pour Minis ek Delegasyon Air Seychelles vini bomaten e Minis i deza la ek son delegasyon.

Anvi ki sa sityasyon Sinohydro in lev dan en lot fason e labsans Minis Bastienne, nou’n re kas Order Paper pour fer ki Air Seychelles in vini.  E Air Seychelles ki ti pour probableman vin demen matin in agree e zot in fer serten preparasyon pour zot vini la bomaten.

Or else la bomaten nou ti pour bezwen parey Onorab Leader Lopozisyon in dir vwar nou pe kontinyen avek Mosyon.  So mon pa oule vreman upset Minis ki deza busy i annan bokou travay ki pe ganny fer ek son delegasyon Air Seychelles, me mon ava ekout Chief Whip lo kote Lopozisyon, Onorab Ferrari.

 

HON JEAN-FRANÇOIS FERRARI

Mersi Mr Speaker, Mr Speaker sityasyon i kler, ler nou ti rankontre avek en reprezantan Minister Touris dan ou prezans semenn pase, nou ti ganny dir ki i annan bann lenformasyon ki commercially sensitive.  E nou ti agree pour nou vwar sa bann lenformasyon dan FPAC, nou pe tenir nou konfidansyalite e nou pe vin devan Lasanble pour nou dir avek Lasanble, nou koman bann Manm FPAC nou’n regard sa bann dokiman nou’n vwar poudir napa nanryen ki commercially sensitive.  

Donk nou pe enform Lasanble ki nou ti a kontan ki tou bann Manm i ganny sa bann dokiman pour zot kapab prepar en seri kestyon e enteraksyon avek Minis responsab pour Lavyasyon Sivil.

Se pour sa ki nou, nou pe dir ki probableman fason pli meyer pour nou travay se nou kontinyen sa Mosyon ziska 10.30 nou pran nou PNQ ziska 11er e apre Air Seychelles i vini apre midi tou bann Manm, i paret ki lot kote Parti Lepep zot pa’n respekte sa Clause konfidansyalite, zot in sirkil sa bann lenformasyon avek tou bann lezot Manm an deor bann Manm FPAC ki pa apropriye nou, nou pe enform Lasanble ki nou this is what we want, se sa ki nou anvi fer pour ki tou Manm i ganny sans entervenir lo sa size dan en fason konpreansiv.

E mon krwar ki vi ki Minis pour Lavyasyon Sivil ti konnen poudir demen ki nou ti pour zwenn ok?  Nou ava kapab prezan zwenn apre midi dan en fason ki, akoz nou nou’n, Minis, Mr Speaker nou nou’n travay lazournen antye yer nou, i pa en kestyon konmsi ki nou pa’n travay.  So mwan mon santi poudir tou bann Manm i bezwen ganny en akse egal avek sa bann dokiman.  Mersi.

 

MR SPEAKER

Ok.  Mersi, Onorab De Commarmond.

 

HON CHARLES DE COMMARMOND

Mr Speaker mersi bokou, dan sa Lasanble nou bezwen serye. Sa ki Onorab Ferrari in fek dir la bomaten pa normal ditou…

 

HON CHARLES DE COMMARMOND

Mon oule met byen kler, si li yer in travay en kantite lazournen antye e i pa’n kapab fer sa ki i ti devret fer, pa vin met sa lour la lo sa Lasanble ozordi bomaten.  Mwan mon krwar mon e nou lo kote Parti Lepep i kler sa Lagreman in ganny donnen pour nou donn bann dimoun ki lo FPAC.

E lo nou kote i annan mwan, i annan Onorab Pillay avek Onorab Churchill Gill, si nou, nou ti krwar poudir nou bezwen diskit sa further therefore mon pran mon responsabilite mon ti ava fer li avek kontrol.

Zot osi menm parey, sa ti dan zot lanmen e ou, ou annan en kopi Onorab Ferrari, Onorab Leader i annan en kopi, Onorab Afif i annan en kopi e Onorab Mondon i annan en kopi. So antre zot si ti neseser ki zot krwar poudir pa neseser pour al diskit dan FPAC e ki nou bezwen diskit antre zot pour zot kapab share sa avek, be napa problenm sa, nou pran responsabilite e sa, e nou nou’n pa’n fer sa nou lo nou kote nou, nou pa’n fer sa nou.  Se sa ki mon pe sey dir si nou ti krwar sa i pour ede nou ti a’n fer, so nou pa kapab ankor pran la, mon pa konnen ki nou pe sey fer en.  Mersi.

 

MR SPEAKER

Mersi Onorab, zis pour rikord Onorab De Commarmond pa’n dir ki in sirkil kopi sa Kontra ….

 

(Mic Off)

 

MR SPEAKER

Attends, attends, attends I’ve got, mwan ki annan la parol, mwan ki annan la parol.  In fer son pozisyon kler dan son premye statement i pa’n dir ki in sirkil kopi sa Kontra avek tou Manm, in re dir dan son dezyenm statement ki in sirkil avek selman son bann Manm ki lo son kote.

Onorab Ferrari in fer sa statement, Onorab De Commarmond in korize nou’n konpran, me anvi ki Onorab Ferrari i dir zot rankontre yer e tou bann, eski FPAC ti rankontre semenn pase pour regard sa bann Kontra?

 

(Interruption)

 

MR SPEAKER

En moman, en moman Chair eski …?

 

HON WAVEL RAMKALAWAN

Mr Speaker zisteman parfwa mon pa ganny en konpran ki mannyer pour koz Kreol!  Mwan mon’n dir pour fer lazistis avek sa size fodre ki tou Manm i annan en kopi sa Kontra, se sa ki mon’n dir e Onorab De Commarmond pa’n dakor avek sa.  Alors i swiv ki poudir sa lozik ki Onorab Ferrari in mete i apel lozik sa.

Si mwan mon pe dir fodre tou Manm i annan en kopi pour nou annan en deba zistifye, lo lot kote i dir non, soz ensidswit i vedir ki son bann Manm i konnen sa Kontra e son lot kote lozik ki nou kapab dir se ki li Onorab De Commarmond i anvi kit son bann Manm dan fernwar pour zot pa konnen ki i annan dan sa Kontra, be li zot 3 zot ava konnen!  Alor…

 

MR SPEAKER

Ok, ok, Onorab…

 

HON WAVEL RAMKALAWAN

Mr Speaker, Mr Speaker si oule zis les mwan terminen, mwan mon lozik ki senp e lozik LDS i senp; Air Seychelles i en size enportan, i annan kopi Kontra mon konnen poudir Minis in vini avek son bann dimoun nou, nou pa ganny dikte akoz Minis in ariv la 9er bomaten nou, nou dan sa Lasanble nou ganny dikte lo travay ki nou bezwen fer! Si fodre Minis i retourn kot li i ava retourn kot li dan son Biro.  FPAC pa ankor zwenn lo sa size, wi bann Manm in ganny kopi Kontra, in ganny plizyer kopi Kontra, in ganny Kontra Etihad i annan 2, in ganny Summary Kontra IBM, in ganny Kontra sa 2 Lakonpannyen sa 2 Lakonpannyen ki’n vin fer Redundancy Program in ganny tou bann Kontra Rental lo Eden Island ek tou bann lezot SCAA e tousala, i annan tou sa bann dokiman.

Be Mr Speaker dan sa Lasanble napa zis 7 Manm, dan sa Lasanble i annan 33 Manm e alors fodre ki sa 33 Manm zot konnen ki zot pe koz lo la.  Ki mannyer Onorab Lemiel pour koz ek bann travayer Air Seychelles ki dan son distrik ki pe ganny pouse?  Alor Mr Speaker si Manm pa ankor gannyen, se sa ki nou pe demande tou Manm i ganny fasilite pour zot vwar sa bann dokiman.  Mersi bokou.

 

MR SPEAKER

Bon mon ava fer, mon ava pran en Ruling – ok? Onorab De Commarmond in dir i osi son bann Manm napa access ek sa bann Kontra, aparaman zis FPAC, si FPAC osi pa ankor meet pa ankor vwar sa bann Kontra nou ava fer ki ozordi FPAC a ganny letan i ava meet, desizyon ki zot ava pran si pour sirkil sa bann Kontra avek tou Manm Lasanble, desizyon FPAC i ava pran nou ava fer sir desizyon i koumsa, nou ava fer tou bann Manm Lasanble ganny en kopi Kontra ki tou lede kote latab a kapab diskite and all that e mon pran en desizyon la.  Madanm Clerk ou ava enform Minis ki i pour bezwen retournen, prezant nou leskiz nou ava fer li konnen ki ler i pour retournen.

Me la bomaten, bon nou pour travay nou ava kontinyen sa Mosyon, en moman Onorab De Commarmond nou ava kontinyen sa Mosyon le 2 kote latab nou ava fer kopi, parey mon’n dir.

 

(Interruption)

 

MR SPEAKER

Non! Premye FPAC i ava meet dan Break, zot ava pran en desizyon pour sirkil, si zot pour sirkil sa bann dokiman, mon oule ki pa enn ki pran desizyon, the whole Committee of FPAC i pran desizyon nou ava fer sa, nou ava prepar sa bann kopi Kontra si pa, zot santi ki Air Seychelles i devret retournen 2er zot ava les nou konnen nou ava kominik avek Minis e nou ava anvoy sa PNQ pour Minis Lasante pour plitar. Ok?

Sa Mosyon ki nou’n komanse mon annan ankor plizyer Manm, mon pa vwar sa Mosyon pour fini 10.30 amwen ki sak Manm i koz 5 minit – ok? Mon pa vwar.  Onorab De Commarmond.

 

HON CHARLES DE COMMARMOND

Mr Speaker zis en keksoz, swivan sa ki Onorab Ramkalawan in dir la, i paret ki i annan lezot dokiman ki nou napa! Savedir mon pa konnen kot in vini, si zot annan serten sa bann Kontra, nou annan zis 3 dokiman la ek nou.

 

(Interruption)

 

MR SPEAKER

Wi, ok, ok.  Order!  Order!  Mwan…

 

(Interruption)

 

HON CHARLES DE COMMARMOND

… be si ou gannyen, savedir ou share.

 

MR SPEAKER

Ok, Onorab De Commarmond ki annan la parol.  Ok ou’n fini? Wi.

 

HON CHARLES DE COMMARMOND

Mon pe dir ki sa bann dokiman ki ou’n mansyonnen la pa tou ki nou, nou annan.  Ki FPAC, ki bann Manm FPAC; savedir mon pa konnen si in reste avek zot si kan nou pour gannyen.

 

MR SPEAKER

Bon mon ava… wi.

 

HON CHARLES DE COMMARMOND

Ti a bon en leklersisman e….

dan sa sans la, ti a bon nou ganny li vre akoz nou napa serten keksoz la.

 

MR SPEAKER

Wi, mersi Onorab De Commarmond, mon osi tou mon lofis napa tou sa dokiman.  Me mon’n vwar atraver bann mails ki’n antre la, bann dokiman in kontinyen rantre pandan wikenn.

 

(Interruption)

 

MR SPEAKER

En moman – en moman.   E moman.

 

HON CHARLES DE COMMARMOND

Pe vin zis en kote.

 

MR SPEAKER

Dokiman in rantre kot Lofis Clerk, mon krwar Lofis Clerk pe sirkil bann dokiman kot in … Si Onorab Ramkalawan in gannyen, in gannyen koman Chair FPAC, wi se sa rezon ki mon’n dir mon Ruling se ki FPAC i ava meet dan Break then zot ava pran desizyon koman en Komite pour sirkil bann dokiman avek larestan Manm; ki ankor i a fer zistis ki larestan Manm i ava konnen kwa ki nou pe vin kestyonn lo la.  Yes Onorab Ramkalawan.

 

HON WAVEL RAMKALAWAN

Mr Speaker, nou pa devret pursue sa.

 

MR SPEAKER

Annou pa ouver en deba …

 

HON WAVEL RAMKALAWAN

Egzakteman.

 

MR SPEAKER

….ankor kot nou pe perdi letan.

 

HON WAVEL RAMKALAWAN

Mr Speaker mwan osi tou mon krwar sa deba, koman Chairperson FPAC mon’n resevwar bann dokiman.  E akoz mon’n resevwar bann dokiman, se ki FPAC i sipoze dapre nou progranm ti sipoze zwenn ozordi 2er apre midi!

E mwan letan mon’n go through bann dokiman, ok Onorab Ferrari ti la obor mwan koman en Manm FPAC, Onorab De Commarmond, Onorab Pillay avek Onorab Gill, zot pa dan LDS zot, si zot ti dan LDS e zot ti Manm FPAC zot ti ava vwar sa bann dokiman akoz mon ti ava partaz li avek zot, me selman zot welcome pour vini.

Mr Speaker e alor se sa e Madanm Clerk mwan letan in fini donn mwan tousala, mwan koman Chairperson FPAC e FPAC i en Komite ki konn byen ki tou dokiman, tou dokiman ki mwan mon gannyen koman Chairperson, mon partaz avek zot.

Zot pa ankor gannyen akoz ozordi i Lendi e yer ti en konze piblik Onorab, Onorab Speaker, mon ti pour demann Clerk pour fer bann kopi available pour tou bann Manm FPAC!  Zot be la granmaten zot pe vin, fek fini Pak, zot viv olye ganny lespri lape zot ganny lespri kankan anndan zot?

 

(Interruption)

 

MR SPEAKER

Bon ale, non, non, non, non, se sa.

 

HON CHARLES DE COMMARMOND

Mr Speaker pa normal sa, mon krwar ti devret retract sa.

 

MR SPEAKER

Se sa, se sa annou pa al dan sa direksyon.   Nou….

 

(Interruption)

 

HON SEBASTIEN PILLAY

Mr Speaker…

 

MR SPEAKER

Order!  Order!

 

HON SEBASTIEN PILLAY

Mr Speaker koman en Manm FPAC sa ki Chairman FPAC in dir mon dakor avek sa i fer sans.  Be Onorab Ferrari in dir ki nou’n zwenn e nou’n deside ok.  Nou pa ankor zwenn pour nou deside as FPAC e Chairman in fer kler sa, so Onorab Ferrari li in fer en lot statement konmkwa poudir Onorab De Commarmond in breach konfidans en meeting ki ou, ou ti pe Chair, se sa ki mwan mon pe dir ou poudir li i devret retract sa statement.  I pa devret pe fer bann Statement koumsa.

 

HON WAVEL RAMKALAWAN

Mr Speaker la mon pa ganny en konpran! Onorab De Commarmond bomaten in koze, mon mazinen i mazinen ki in dir, kot in dir i ti annan Vandredi, Sanmdi, Dimans, Lendi Konze Piblik, zot ti ava’n, zot ti’n ganny tou letan pour zot travay!  Letan en dimoun i dir sa, savedir ki zot, zot in asize zot in travay! This is logic Mr Speaker.  Mwan mon pa ganny en konpran parske logic, Mr Speaker napa nanryen pour retract akoz napa nanryen lakizasyon ki’n ganny fer mon’n eksplik en baze lo son soz.  Mersi bokou. Mr Speaker annou travay zot!

 

MR SPEAKER

Ok, order! Order!  Sa i mon final Ruling!  Sa meeting ki nou ti fer Merkredi dan prezans PS Albert mwan as far ki mwan mon aware tou keksoz ki’n ganny diskit dan sa meeting in reste konfidansyel.  Desizyon apre ki’n ganny pran pour Air Seychelles vin la bomaten se rezon ki mon’n site taler akoz nou pa pe ganny bann Minis pour vin diskit pour vin fer kontinyasyon sa deba lo Sinohydro.

Lo sa zafer Manm ki’n ganny access avek bann dokiman Air Seychelles, Onorab De Commarmond in klarifye poudir li i pa’n dir ki in distribye sa bann Kontra avek son bann Manm, apard son 2 Manm ki i avek ki lo Komite FPAC.  Mon final Ruling se ki FPAC i ava meet 10.30 e zot ava deside si larestan bann Manm Lasanble pour ganny access ek sa bann kopi Kontra and then nou ava pran li from there.

Me pour le moman mon ava zis enform, mon ava dir Clerk fer enform Minis eskiz li parmi nou, I mean mon konnen in fini arive ki nou ava enform li dan lazournen ki ler i pour vini, ok Madanm Clerk ou ava fer sa le neseser.  Alright.

Bon nou ava kontinyen lo nou Order Paper, nou annan nou annan nou 3 First Readings, mon ava demann Madanm Clerk pour fer sa 3 First Readings.

 

MADAM CLERK

Mersi bokou Mr Speaker bonzour tou Manm, bonzour tou dimoun ki a lekout.  Dapre lord ki i aparet lo nou Order Paper,

National Council for the Elderly Bill, 2018, this Act may be cited as the National Council for the Elderly Act, 2018.

Dezyenm, Enterprise Seychelles Agency Bill, 2018.  This Act may be cited as the Enterprise Seychelles Agency Act 2018 and shall come into operation on such day as the Minister may by notice published in the Gazette appoint.

        E trwazyenm se Seychelles Human Rights Commission Bill 2018. This Act maybe cited as the Seychelles Human Rights Commission Act 2018 and shall come into operation on such date as the Minister may by notice published in the Gazette appoint.  Mersi Mr Speaker.

 

MR SPEAKER

Mersi Madam Clerk.  Bon ankor mon pour servi Order 95 e nou ava kontinyen avek deba lo Mosyon ki ti ganny move par Onorab Clive Roucou, zis donn mwan 2 minit mon a rod mon lalis, mon a regard bann Manm ki ankor lo la pour koze.

Bon zis mon ava pas lo lalis bann Manm ki mwan mon annan e okenn lezot Manm ki santi mon’n kit zot an deor i ava lev lanmen, lo kote LDS mon annan Onorab Afif avek Onorab Ramkalawan.  Si i annan okenn lezot Manm ki ti pour dezire koze lo la kote LDS zot ava endik mwan.

Lo kote Parti Lepep mon annan Onorab Ernesta, Onorab Ghislain, Onorab Sebastien Pillay, Onorab De Commarmond.  Okenn lezot Manm ki ti pour koze lo sa Mosyon Onorab Roucou?  Non?  Savedir mon reste avek lalis, mon ava komans avek Onorab Paul Ernesta.  Onorab laparol i pour ou.

 

HON PAUL ERNESTA

Mersi Mr Speaker. Mr Speaker bann Koleg Onorab tou dimoun a lekout bonzour. Mr Speaker mon pour komans lo sa pwen nou lasante i nou responsabilite e nou Gouvernman, Gouvernman Parti Lepep/ SPPF yer in toultan annan sa volonte pour garanti en meyer lasante pour nou pep, sa in ankre dan progranm e Manifesto nou Parti (Onorab Henrie).  Laprev i la devan nou kot dan reparti son Bidze Minister Lasante in toultan enn parmi sa 3 Minister ki’n ganny pli gran morso Bidze pei, an rezilta sa lasante gratwit ki Parti Lepep i garanti sa pep pandan sa bann dernyen lannen nou’n eksperyans en bon nivo progre dan sa sekter.

E Mr Speaker annou zis get en pti pe detrwa statistik pour sa dernyen 4an ki demontre sa.  Life expectancy in sorti 74.2 poursan an 2012 e in mont 74.8 poursan an 2016.  Nou nivo infant mortality rate an mwayenn i zis 10 ka lanmor dan mil zanfan ki ne.  Dapre Minister Lasante bokou sa bann ka lanmor i akoz bokou sa bann paran i lo sibstans eroin, lakantite anplwayer Profesyonnel dan sa sekter parey Dokter, Dantis, Ners, e lezot in osi ogmante, an 2012 ti annan zis 1,286 anplwaye dan sa sekter.

E an 2016 i annan 1,780 Anplwaye tousala i bann siny progre Mr Speaker.  Malgre sa nou bezwen rekonnet limitasyon sa Minister pour fer fas ek bann nouvo challenge ki egziste ozordi.  Par egzanp demann pour servis plis spesyalize, masin pli modern pour detekte e tret bann maladi, limitasyon profesyonnel lokal dan serten domenn, latitid e konportman ki pa Profesyonnel par serten bann travayer e sa parfwa i ganny fer par malis par serten zofisye.

Politik, letan linyorans serten politisyen lo lot kote latab i fer bann alegasyon zis akoz lanbisyon ilizyonnen pour vin O Pouvwar e dan proses zot detri tou.  Sa i danzere pour nou pei.

Mr Speaker lavi dimoun nou pa zwe avek e nou pa ni menm fer Politik, nesesite pour sirmont sa bann defi pour asire ki nou pep i ganny en swen e servis lasante ki pli soutenab lo en pli o nivo e pli spesyalize i reste en challenge pour sa Minister.  E sa i obliz Gouvernman pour vwar pli meyer fason ki pli inovativ pour zwenn sa demann e an rezilta sa nou’n aprann ki Minister Lasante in devlop en Master Plan ver sa lobzektif, pli enteresan dan sa Master Plan i trouv sa Mosyon anmennen par Onorab Roucou.

Mr Speaker letan mon analiz sa Mosyon mon remark en similarite dan plan Minister Lasante pour devlop en tel fasilite dan pei.  E sa i fer mwan demann mon lekor kestyon lo nivo Konfidansyalite dan nou Egzekitiv, a sa pwen les mon a dir serten bann Onorab e zot politik bon marse pour fer atansyon, zot bezwen annan respe pour nou bann Profesyonnel Lasante, annou pa zis fer politik ek tou keksoz letan nou pe dir nou bann dimoun i intellectually spent.

I kit mwan dan dout Mr Speaker.  Ki kalite lavenir nou pe annan pour nou pei, mazinen pa politisyen ki’n fer sa Master Plan, sa in ganny fer par bann profesyonnel Mr Lasante an partikilye Dr Todorovic koman Konsiltan ek lezot kontribisyon bann teknisyen sorti dan diferan Departman.

Fodre nou realize letan nou fer latak san levidans e sa i en latak kont bann profesyonnel dan lasante, bann profesyonnel ki donn zot meyer toulezour; bann profesyonnel ki riske zot lavi pour nou, Lasante i en sekter teknik letan zot atak sa sistenm, zot pe atak sa bann zonm ek fanm ki toulezour i kontribye pour fer nou pei progrese.

Mr Speaker ozordi si mon ti en Ekriven, en Poet ou menm en Santer, Konpoziter sityasyon ki nou pe eksperyanse dan sa Lasanble mon ti pour annan bokou laspirasyon pour mon konpoze.

Mr Speaker resers in prouve ki ozordi avek devlopman bokou dimoun in swazir pour al trete aletranze e Sesel i pa zis en leksepsyon.  Baze lo rikord pour sa dernyen 4an en pti pe plis ki 5, 000 dimoun in al trete aletranze e tou sa ki’n koz avan mwan zot in donn diferan rezon akoz ki nou dimoun in swazir pour al trete aletranze, e i annan ki’n menm donn serten leksperyans pratik ki zot in fer fas atraver.

Mr Speaker pour mwan 2 rezon prensipal ki fer dimoun al rod tretman aletranze, premyerman zot ganny tretman pli spesyalize e de kalite, e dezyenmman akoz limitasyon serten kalite servis dan nou pei, menm si dan bokou sa bann tretman i reisi avek bokou sikse, me de lot kote i annan serten lenstans kot sa pa neseserman le ka.

Bann problenm ki nou bann dimoun i rankontre i vreman sagrinan par egzanp apre ki zot in fer en gro depans pour zot swa pour al trete ou menm fer en checkup zot realize ki napa solisyon pour zot problenm.  Konsekaman ou vwar problenm sa bann pasyan i double, premyerman problenm zot maladi ki napa gerizon, e dezyenmman zot bezwen struggle finansyerman pour fer de bout zwenn akoz sa depans ki zot in fer Mr Speaker.  An prenon kont demars ki Minister Lasante pe fer pour devlopman en tel fasilite parey Mosyon pe demande, Mr Speaker parey mon’n dir malerezman an prenon kont ki deza Minister pe fer serten travay dan sa domenn e sa Mosyon i pa en keksoz nouvo e sa travay deza pe ganny fer, mwan toute en respectant tou nou bann dimoun ki deza pe trete, mon pa pour kapab donn mon sipor, mon pour plito abstain kont sa Mosyon akoz deza Gouvernman pe deza fer li.

E Mr Speaker avan mon terminen permet mwan fer en demann devan Minister Lasante pour vin devan Medya ou menm nou Lasanble pour prezant lepep Seselwa avek sa Master Plan e an partikilye lo sa bann devlopman, sa sit pour en Lopital Spesyalize parey Mosyon pe demande ki i ava vin an laprev ki Gouvernman deza pe travay lo en keksoz e tre byento pour sa ganny finalize.  Mersi Mr Speaker.

 

MR SPEAKER

Mersi Onorab Ernesta.  Onorab Afif.

 

HON AHMED AFIF

Mersi Mr Speaker, bonzour tou bann Manm Onorab e tou dimoun a lekout.  Mr Speaker sa Mosyon ki devan nou i pe demande ki nou annan en meyer servis medikal e i pe osi demande ki petet nou devret promouvwar sa ki apel medical tourism.

Lo sa premye bout si nou devret annan en meyer servis medikal mon krwar larepons i kler, i devret wi, nou devret annan en meyer servis medikal senpleman parske si ou koz avek tou dimoun ki deor, tou dimoun ki’n ganny leksperyans al dan nou servis medikal ozordi, i kler poudir wi nou annan en kantite resours ki’n ganny met ladan, me an term konfyans dan sa sistenm i annan bokou kestyon.  Sa i kler sa, e an rezilta ki dimoun pour plizyer rezon pa neseserman ki nou pe blanm bann profesyonnel, bann ners ki pe travay dir eksetera Bidze ki nou konnen zot pe gannyen pour plizyer rezon i annan bokou Seselwa, en kantite Seselwa nou’n ganny bann sif 186, 184, 200, 254 pandan bann dernyen lannen ki’n pase, me sa ki nou konnen se ki Seselwa tou le lannen pe vwayaz aletranze an granm nonm.

Dan Leta Lanasyon Prezidan ti, Msye Faure ti dir poudir ti annan pros 170, 000 Seselwa ki’n vwayaze, ladan i annan ki repete, me mwan mon pe dir sirtou avek sa vol Sri Lanka, Sri Lankan Airlines ki vini, en kantite parmi sa bann vwayazer se bann dimoun ki pe al pour rezon medikal.

Nou kapab dir be zot pe ale akoz zot pe al rod en servis spesyalize ki napa isi.  Me mwan mon lenformasyon ki mon gannyen avek plizyer dimoun menm dan mon distrik ki mon koz avek, zot pe al senpleman pour zot rod en dezyenm lopinyon akoz zot napa konfyans dan gidans, konsey ki zot pe ganny donnen isi.  Si nou pran dan sa sif forse 3, 000 dimoun malgre ki nou konnen Minister Lasante pe anvoy anviron 254, me sa sif 254 ou kapab miltiplir li par 10 parske i annan plizyer lezot ki Lasante pa pe anvoye li, me zot pe ale.

Ou pe ganny ou fasilman dan en lannen 3, 000 dimoun parmi sa 70, 000 ki kit pei rezidan ki pe al aletranze probableman pour medikal.  E si ou pe pran sakenn 3, 000 pe depans li enkli son tiket, enkli son Lotel ki pa depans medikal me i pe depanse, apre son Lopital 3, 000 Dolar sakenn ou pe ganny ou 9 milyon Dolar fasilman ki pe kit pei tou le lannen senpleman akoz dimoun napa konfyans dan sa ki egziste lokal, sa i en kantite larzan, nou pe koz preski 140, petet R150 milyon tou le lannen ki pe sorti akoz napa en swen ki alaoter lekspektasyon Seselwa e ki donn li sa konfyans.

R150 milyon si ou pe fer bann low cost housing ekivalan 300 lakaz, se sa kantite larzan ki pe kit pei, ki pe al dan lot depans senpleman akoz dimoun i mank konfyans dan en sistenm.  Sa Mosyon ki pe dir?  I pe dir be nou devret fer Seselwa ganny en meyer servis medikal.  E alor mwan mon siport sa parske zot pe zisteman al aletranze parske zot santi zot pa pe ganny en meyer servis medikal.

Ki servis medikal ki zot pe rode?  Be mon mazinen Sesel avek nouvo lim pasyan ki nou pour annan nou pa pour al fer petet heart transplant nou pa pour al fer loperasyon konplike, me kwa ki anpes nou annan en Sant Dyagnostik ki avanse, ki permet nou kapab annan bann dokter aletranze ki kapab fer bann bon dyagnostik Sesel ki petet Lopital isi pa pe fer, en zour i ava fer, me pa pe fer la ozordi ki kapab permet dimoun vin pour fer Medical Tourism kot petet ankor enn fwa mwan mon pa pe anvizaze nou pour annan en servis vreman o parey petet Malaisie i kapab donnen, Singapore i kapab donnen dan medical tourism me kot i kapab permet dimoun, touris vin isi pour rekiperasyon pour fer physiotherapy dan en lanvironnman ki zoli, dan en lanvironnman ki zot kapab vreman dan zot lespri zot pour anpe, zot fanmir i kapab vin la ek zot.

Alor pour mwan sa Mosyon pe demann senpleman, i pa pe dir fodre Gouvernman li menm li ki fer, i pe envit sekter prive pour li kapab osi pran par ladan, kot nou pour met nou servis medikal a en oter bokou pli o avek si Gouvernman i kapab met en, met son zefor ladan e sekter prive e an menm tan eparny nou depans tou sa deviz pour al aletranze, an menm tan anmenn deviz dan Sesel, alors pour mwan set en keksoz ki mwan krwar nou devret siporte, mon definitivman mon pour siporte e parske mon konnen poudir atraver sa kalite aksyon nou pour anmenn lavi nou sitwayen pli byen, nou pour anmenn zot lasante pli byen, nou pour fer Seselwa vin pli prodiktiv e nou pour fer zot gard en kantite sa deviz ki sitan presye pour reste Sesel pour li al ganny depanse dan Lotel ek avyon ek fuel ek transpor olye vreman servi li pour medikal.

Alor mwan mon ti a kontan siport sa Mosyon mon felisit Onorab Roucou pour en bon Mosyon e mon krwar nou devret al dan sa direksyon.  Mersi Mr Speaker.

 

MR SPEAKER

Mersi Onorab Afif. Onorab Chantal Ghislain.

 

HON CHANTAL GHISLAIN

Mersi Mr Speaker, Mr Speaker Mosyon ki Onorab Roucou in anmenn devan sa Lasanble, i annan pour fer avek en keksoz ki konsern tou Seselwa.  E letan nou regard maladi parey toultan mon dir, en dimoun ki malad i touzour fer fas avek sa maladi li tousel e se pour sa rezon ki ou vwar li i al kot en Sant Lasante e kot sa Sant Lasante byensir dimoun ki i pour an kontak direk avek se sa nurse ek sa dokter, wi Gouvernman i la pour met an plas sistenm lasante me i reste touzour dan lanmen dokter ouswa sa nurse, mwan mon dir dokter premyerman se li ki diagnose maladi, se li ki sonny maladi, e bann nurse i la pour okipe e donn sa latansyon an plis ki sa pasyan i bezwen koman en endividi avek son maladi.

Pour mwan mon santi mwan par egzanp semenn pase blese, letan ou tann en Onorab i dir ou Sistenm Lasante in fail nou piblik, pour mwan letan mon tann sa komanter parey i fer mwan mazin tou sa bann nurse, tou sa bann dokter ki zot, zot diagnose maladi e mon pa tro krwar i annan 1 antre zot ki ti a voudre, ki santi zot kontan ouswa rezouir letan zot perdi en pasyan, ouswa menm letan zot in mal diagnose en maladi.

E nou tou nou konnen poudir mal diagnose maladi i pa zis Sesel, i partou atraver lemonn, nou’n koz bokou lo bann dimoun ki al aletranze ou’n nonm en sif la 1, 453 si mon pour pran sa sif ki Onorab Esparon ti mete.  E Minister Lasante li i dir ou ladan li i ti anvoy 254 sa ki li in anvoye, bokou lezot in al lo zot menm e nou pe dir poudir en dimoun i ale i al rod en dezyenm lopinyon, me letan ou tann dir ou poudir dimoun i al rod en dezyenm lopinyon akoz i mank konfyans dan sistenm, but is it the system ki diagnose maladi?

E pour mwan letan ou fer en komanter mank konfyans savedir ou pe mank konfyans dan sa dokter, ou pe mank konfyans dan sa nurse ki pe okip ou and pour mwan mon pa santi li i en fason pour nou dir menm si apre ou dir ou poudir a mon respekte tou nurse, mon respe tou dokter.

Ler ou dir ou poudir Minister in fail but is it the Minister ki atas sa pasyan e eski mon ti a voudre konnen konmsi dan tou sa bann lanmor ouswa bann lezot maladi i annan dimoun ki i annan son maladi me selman ki pe viv avek bann konplikasyon rezilta son maladi, eski ti an rezilta pilil ki pa’n donnen ouswa, eski i an rezilta bann keksoz ki Minister i sipoze provide pour sa pasyan?

Nou kapab dir posib i annan detrwa, me selman letan mon pe regard lakantite lanmor ki i annan ki Minister Lasante dizon in rikorde nou pe regard sa an 2017 mon annan mwan 748 lanmor e ladan 18 i bann pti baba.  25 i annan pour fer avek kardyo, sorry ladan i annan 76 lanmor ki ti annan pour fer avek bann maladi leker e Minister Lasante i dir ou in anvoy 25 aletranze e apre i annan lezot 60 ki li lezot bann heart diseases ki tousala i bann lanmor.

Me letan nou pe regard tou sa bann, sa kantite lanmor ki nou pe dir la an rezilta bann kardyo, respiratwar e ladan i annan 198 dimoun ki’n mor e tousala zot aze par lao 65an, tousala i bann keksoz ki nou devret pe pran kont.

Ler mon pe regard ankor statistik konsiltasyon dan tou bann Sant Lasante i annan 35, i annan 350 351milyon dimoun ki’n al konsilte dokter, ladan 12, 347 ki’n ganny admit dan Lopital.

E letan nou regard dan sa 12, 347 ki’n admit Lopital zis 322 domaz ki’n mor, i fermal sak fwa nou dimoun i mor an rezilta en maladi, mon krwar nou tou ki la nou’n pas ladan, nou’n annan en manm pros ki’n mor nou tou nou ti a voudre ki tou nou bann dimoun ki sak fwa i malad i ganny sove.

Mon kestyon se ki ler nou pe dir dimoun i ganny sove me i annan nou bezwen admet poudir i annan maladi ki pe enport ki ou pour fer ki sa dokter, sa nurse pour fer me nou pa kapab sove i domaz, i fermal wi me selman nou bezwen viv avek, nou bezwen viv avek.

So, letan mon pe regard Mosyon Onorab Roucou i vre ki bokou maladi nou pe rod sa swen bokou pli, pli avanse me i ti pour fer bokou plis sans si nou menm nou Sesel nou ti annan en Sant Dyagnostik ki pli avanse.  Akoz mon dir sa, se parske letan ou pe regard sa, mon ti’n donn sa gro sif 350, 000 dimoun ki’n al konsilte kot dokter dan diferan Sant Lasante atraver pei mon pe dir, si sakenn dan tou bann Sant Lasante ki nou ti ale, kekfwa pa tou ki bann keksoz ki bann dokter i kapab diagnose sa maladi direkteman.

Me si nou ti annan en Sant Dyagnostik kot i ti fasil en senp tes disan bokou pli avanse i ti a’n ganny fer la and bokou mon krwar sa bann maladi ki’n lev avek bann konplikasyon i ti ava’n ganny sonnyen pli a tan.

Nou get parey kanser bokou bann ka kanser ki ganny dekouver ozordi se trwa kar bann ki’n ariv dan 3enm e 4enm staz.  Nou annan 2 nurse la ki zot ankor, mon sipoze krwar ki zot ankor nurse parske mon vwar zot lo lalis as bann Nurse zot pour dakor poudir trwa kar bann ka kanser ki ganny dekouver se touzour dan 3enm e 4enm staz, i annan parfwa menm, menm si dokter i dir ou nou pour ale nou pour al opere and nou tou nou konn, nou konnen i dir ou dokter i zis in ouver in frenm lanmenm, mon krwar i annan son bann rezon medikal akoz.

Me si dizon par egzanp nou ti annan sa Sant Dyagnostik byen avanse kekfwa bokou ladan ti ava’n ganny rezourd ouswa ti ava’n ganny trouve a tan.

Me i annan bann poursantaz dimoun osi ki pe viv avek kanser konmela e trwa kar zot ki ankor pe viv en lavi ki byen i pour dir ou poudir mwan mon ti vwar pour mon a tan, zot kekfwa zot santi zot pli sanse, me en kantite osi ki mon konnen ki’n mor borde zot ti dekouver i forse zis 3 pa ni menm 9 mwan depi ler zot in dekouver ki sa, zot ganny kanser.

E i annan en kantite posibleman i annan i dir ou poudir i ti monte desann Lopital dokter pa’n zanmen vwar, me selman nou pa kapab blanm Gouvernman nou, nou pa kapab blanm sistenm, ou konpran mwan?  Me selman ler ou pe dir blanmen, mwan sa zafer blanmen sistenm in fail, but it’s not the system ki diagnose maladi, se dokter.

So annou aret blanmen, annou aret blanmen parske pour mwan mon pa kapab dir blanm sistenm kan mwan konnen poudir dokter ki diagnose maladi, so mwan pa ni pour blanm personn.

        So mwan mon pa ni pour blanm ni sa dokter.  Annou arete sa zafer blanmen sa ki i annan pour fer avek lasante akoz lasante dimoun tou dimoun i santi li son lasante i li nou tou nou pa ti a kontan voudre poudir demen bomaten nou santi en douler la, zour nou al kot dokter i dir nou, nou ganny kanser ouswa nou ganny en maladi ki telman, ki finalman apre zis ou vwar sa dimoun i deteryore.

So sa ki mwan mon, wi mon siporte sa sizesyon ki nou bezwen annan en Sant Lasante ki i annan sa, kot dimoun i kapab ale resevwar bann tretman pli avanse, me selman nou pli bezwen en sant kot i zis kapab diagnose maladi, mon asire si nou ti kapab diagnose bon pe sa bann maladi nou kont bann dimoun ki al kont nonm bann dimoun ki al swiv bann tretman spesyalize, i ti pour bokou redwir.

Akoz bokou ler ou realize i bann maladi ki’n progrese ki’n komans ptipti in progrese, in monte, so sa sete mon kontribisyon e nou pe regarde osi ki bokou osi i annan pour fer avek nou stil lavi, nou pa kapab mye tousala donk sa ki mon ti annan pour mwan dir lo Mosyon Onorab Roucou.  Mersi Mr Speaker.

 

MR SPEAKER

Mersi Onorab Ghislain.  Bon mon annan ankor 2 Manm nouvo ki’n eksprim zot lentansyon, zot anvi koze me mon ti a, mon pour permet zot me annou pa fer li tro long.

Petet zis pour lenformasyon manm piblik ki pe swiv nou mon ava zis relir Mosyon ki nou pe kontinyen deba lo la, sa Mosyon i ganny anmennen par Onorab Clive Roucou, vi ki Seselwa ozordi i bezwen al aletranze pour swiv tretman spesyalize e vi ki i annan en sit en allant Providence ki pour Gouvernman e kot en Lopital Spesyalize ti’n ganny planifye, sa Lasanble i demande ki Gouvernman i pran desizyon neseser afen ki en Partner apropriye i ganny idantifye pour konstrir en Lopital Spesyalize e ki Seselwa i ava ganny en meyer servis medikal isi Sesel e an menm tan ganny servi koman en sant pour promot medical tourism ki i ava benefisye lekonomi Sesel.  Bon mon ava pas la parol avek Onorab Valmont.

 

HON JUDE VALMONT

Bonzour e mersi Mr Speaker, bonzour tou koleg Onorab e tou bann manm piblik ki pe swiv nou.  Mr Speaker mon pour bref parey ou’n dir, mon vwar lespri sa Mosyon i bon ki Onorab Roucou in mete lide pour annan en Sant Spesyalize i enn ki dan lavantaz tou Seselwa, i premyerman i pour ede redwir depans parey mon bann koleg Onorab in dir oparavan depans tiket, Lotel eksetera mon fer leksperyans ek mon menm ek dan mon distrik bokou dimoun ler zot travel parey nou konnen Mr Speaker Minister Lasante i pey pour zot akomodasyon, zot tretman e tousala nou konnen bokou i al MIOT, i menm al pli devan e pey pour en manm fanmir i pey Lotel e i pey tiket me detanzantan sa manm fanmir i li, i vwar li pos pa sa sitan fon ki i vwar li bezwen vin tap laport kot zanmi, kot zot MNA e lezot dimoun e pa toultan ki zot annan sa gran kantite larzan pour ale.  Akoz zot pa konnen laba kot ki kapab arive ki zot bezwen reste plis letan alor tousala i akimile koman depans.

Mr Speaker an lot kote i ede osi en Sant Spesyalize pour ede redwir depans Gouvernman, nou bezwen note ki Gouvernman enn bann pli gran porsyon nou larzan, se larzan tax ki Seselwa i peye i al anver lasante, alor sa i a ede redwir sa osi, redwir sa depans.

Mr Speaker mon pe gete ler, si, si i annan en sant parey nou pe dir ki ganny fer e prive i zwe son rol ladan i kontribye, sa presyon finansyer i sorti lo Gouvernman e i permet ki larzan ki nou, nou pe kontribye aktyelman i al plis anver lenfrastriktir.

La mon pe koz osi lo sa Master Plan, i en keksoz ki’n la oparavan e dan sa laliny mon a petet mon a demann Minister Lasante pour vin devan donn nou en leksplikasyon kwa sa Master Plan akoz ek enteraksyon ki mwan mon’n gannyen pe fer resers dan pour sa Mosyon, se ki bokou sa bann keksoz i deza pe ganny fer Mr Speaker i pa nouvo parey nou pe ganny lenpresyon, bokou pe ganny fer me selman petet zis highlight i bezwen pe ganny mete lo la pour nou vwar kwa ki pe ganny fer dousman, dousman.  E alor sa larzan ki petet Gouvernman a nobou save atraver annan en Sant koumsa ki prive pe antre ladan i al ver lenfrastriktir parey mon’n dir i kapab osi ede amelyor servis train plis nou bann ners, nou bann dokter mon krwar bokou dimoun in met lanfaz lo la.

Nou konnen nou lasante i enportan, lavi dimoun i enportan e alor nou demande ki larzan i ganny mete osi dan training sa bann ners e osi staff e osi lezot staff Minister Lasante i a ede amelyor welfare osi.

Toultan nou’n vwar, la resaman Ners in fer protestasyon zot in dir amelyor Saler mon dakor, zot merit en meyer saler, me selman alor annou envestir sa larzan pour egzakteman amelyor zot welfer osi, zot wellbeing i vreman enportan.

Mr Speaker en lot keksoz ki mon dir ler larzan i ganny save, se ki resours a ganny met a dispozisyon pep Seselwa. Kantite fwa mwan dan mon distrik mon’n eksperyans problenm minwi, 1er bomaten dimoun i call ou i dir ek ou lanbilans pa ankor vini i annan 1erdtan, 2erdtan konbyen zot la bann Manm Onorab ki’n eksperyans sa problenm ek zot bann dimoun dan kominote.  Alor plis resours a ganny met a dispozisyon lepep Seselwa.

Mr Speaker mwan mon dakor totalman avek Onorab Roucou, pa Roucou sorry Onorab Ernesta ek Ghislain ki zot dir zot, nou pa kapab zis asize nou koman bann politisyen blanm sistenm, blanm bann ners ek dokter, nou dir sistenm in fail, Ners ek dokter sa bann zonm ek fanm koleg Onorab lot kote, zot in leve, (Onorab Henrie aret malelve silvouple, les mwan fini koze mersi bokou)

Mr Speaker i pour donn en sans parey nou dir sa bann Ners ek Dokter sa bann Staff zot leve granmaten zot kit zot fanmir e zot vin travay e alor i pa normal ki nou dir zot in fail, Minister Lasante in fail akoz ki nou pe dir an dot mo parey mon bann Koleg Onorab in dir, nou pe dir sa bann zonm ek fanm in fail nou, me non akoz nou lo kote Parti Lepep nou met valer dan kouraz sa bann dimoun.

Akoz nou, nou ale nou servi sa bann servis nou bann dimoun i ganny sa bann servis alor nou, nou profite la pour dir zot en gro mersi e se pour sa rezon ki ler serten politisyen i asize lot kote latab zot akize ki sistenm in fail i fer mwan dir 2 keksoz, mwan dakor ek sa Mosyon mon dakor ek sa lide Onorab Roucou pa pran mwan personnel, mon dakor ek sa lide Sant Spesyalize, me selman ler zot asize zot dir ki sistenm in fail, sa bann dimoun in fail mon pa dakor.

Alor mwan mon pour abstain e mwan mon pour dir mwan mon siport sa bann Ners e mwan mon profite dir zot en gro mersi.  Mersi Mr Speaker.

 

MR SPEAKER

Mersi Onorab Valmont. Onorab Waven William.

 

HON WAVEN WILLIAM

Mersi Mr Speaker parey ou’n dir mon pa pour tro long.  Me mwan mon kontribisyon se ki mon vwar poudir sa Mosyon lafason in ganny ekrir i tre kler dan son lobzektif e mon a dir annou pa get lafason ki parol pe ganny servi, annou get lesansyel e lobzektif sa Mosyon.  Akoz pa les nou ganny anpaye e perdi par bann parol ouswa lafason ki bann parol pe ganny servi.  Sa Mosyon i enportan e mon krwar poudir Gouvernman i bezwen get dan sa fer sa posibilite pour sa Mosyon ganny realize.

Mr Speaker mon pe koz lo la akoz atraver mon leksperyans, atraver mon posting ki mon ti gannyen an L’Inde nou’n sey fer bokou zefor pour sey fer sa arive e mon konnen poudir Minister Lasante a en lepok ti siny en Lagreman avek MIOT Hospital, MIOT Hospital ti anvi vin Sesel pour kapab met en brans isi e zisteman letan mon pe lir sa Mosyon, avek bi avek menm lobzektif (1) pour promot medical tourism e pour anmenn en pti pe pli pros sa servis spesyalize pour nou bann dimoun.

Enn; parey Onorab Afif in dir i ava koup depans, pa fer deviz sorti akoz nou bezwen deviz e an menm tan ofer en pli meyer servis nou pep.  E dan sa loptik e avek sa bann lobzektif Mr Speaker, mwan pour donn mon sipor akoz mon krwar poudir in ler petet mon pa konnen ki problenm ki i annan me mwan pe lans en lapel ek Gouvernman se ki (1) regarde akoz mon konnen poudir pour anmenn bann Envestiser etranze dan pei i pour demann negosyasyon.

Me nou bezwen nou parey nou dir, annou regard Sesel, annou regard nou Seselwa, annou regarde ki nou bezwen, sa i en priyorite alors mwan mon pe dir annou fer tou sa ki posib pour fer li arive akoz (1) i pour byen pour pei, i pour sov nou en ta larzan e an menm tan i pour anmenn deviz dan pei.  Mersi bokou Mr Speaker.

 

MR SPEAKER

Mersi Onorab William, Onorab Sebastien Pillay.

 

HON SEBASTIEN PILLAY

Mersi Mr Speaker, bonzour Mr Speaker, bonzour tou Manm Onorab e bonzour tou dimoun ki a lekout.  Mr Speaker nou pe debat lo en Mosyon ki i annan serten lenportans pour nou e i enportan ki nou fer zistis sa size ki nou pe diskite, non pa zis al ver sa ki sansasyonnel zis pour nou fer politik avek bann parol ki nou dir.

Mr Speaker i kler ki nou’n annan plizyer keksoz ki’n ganny dir lo sa Mosyon e plizyer parol ki’n ganny pase, me i enportan ki nou regard byen nide deryer en tel Mosyon e osi lenportans ki nou annan pour ki nou realiz serten eleman sa Mosyon an menm tan prenon kont bann lezot keksoz enportan ki sa Mosyon i kapab anmennen pour nou.

Premyerman Mr Speaker mon ti a kontan koz en pti pe lo bann keksoz ki mon’n tann dir pandan sa detrwa dernyen zour an sa ki konsern sa Mosyon.  E mwan pour dir ou mon en pti pe dezapwente par lefe ki largiman ki’n ganny avanse i par Mover Mosyon li menm e lezot dimoun ki’n koze lo son kote latab in prezant li koman kwa konmsi ki se Gouvernman ki pe vin akter Prensipal dan realiz en tel proze.  Mon krwar sa se en bann keksoz ki mover Mosyon i bezwen fer kler e mon krwar i annan 2 Manm lo lot kote latab e sa se Onorab Woodcock ek Onorab Flory Larue ki’n koze ki zot in prezant sa as if i problenm Gouvernman e mon krwar se la kot nou pa pe konpran akoz nou annan en tel Mosyon en lideal en tel Mosyon, sa Mosyon i pe dir ki Gouvernman i bezwen sanz oubyen pran desizyon pour ki nou annan sa fasilite ki ganny manifeste.

Me lefe i reste ki Gouvernman in deza pran desizyon lo sa fasilite, ti annan dimoun ki ti envestir ladan e zot pa’n successful me lefe i reste ki ti annan en nide pour ki sa i realize akoz ti annan en lenportans pour fer li, me depi ler sa proze ti pour ganny realize ziska ozordi i annan bokou keksoz ki’n arive ki’n sanze ki nou bezwen met an perspektiv e la mon krwar kot ler Onorab Gill ti prezant en lamannman to sa Mosyon Onorab Ferrari atraver ou Mr Speaker ti sorti, ti fer serten komanter ki mon krwar Onorab Ferrari parfwa i bliye ki li menm li in dir dan Lasanble dan lepase.

Le 8 Mars 2008, le 18 Mars 2008 mon rapel tre byen Mr Speaker Onorab Ferrari letan ki Onorab Loizeau ti prezant lamannman lo en Mosyon anmennen par Onorab Mitcy Larue sorti Baie Ste Anne Praslin i ti dir ki ler en Manm i fer en kontribisyon si nou pa dakor ek sa kontribisyon nou les li ater e nou ale, me en Manm i ganny dwa fer son kontribisyon e i ti ganny siporte par Onorab Georges ki ti dir Lartik 40 Konstitisyon i donn tou dimoun pour li fer en kontribisyon anver preanbil nou Konstitisyon.

E zisteman se sa ki Onorab Gill pe fer, e Onorab Gill pe fer son kontribisyon baze lo Lartik 40 nou Konstitisyon e en servant Lartik 102 nou Konstitisyon ki donn li Pouvwar anba Konstitisyon pour fer li fer son kontribisyon dan Lasanble.  E ki zot pa’n oule vwar lo lot kote latab, zot pa’n oule vwar ki son kontribisyon i annan en eleman enportan ladan, akoz nou pa pe zis koz lo sa tretman spesyalize ki en dimoun i bezwen gannyen, me nou pe osi koz lo bann lezot fakter ki sorti avek – zisteman parey Deputy Speaker lot kote latab Onorab Afif in fer sorti, se dyagnostik osi i vin en pwen kardinal sa eleman.

Akoz mon dir sa Mr Speaker?  Mr Speaker mon’n ekout bann Onorab koze lot kote latab par egzanp Onorab Afif in dir ek nou koumsa poudir atraver ou Mr Speaker ki i annan apepre 2, 500 dimoun, in pran sa sif in miltiplir par 10, sa sif i apepre 1, 500 dimoun akoz se sa sif ki Biro Statistik i kolekte ler nou ranpli sa bann Embarkation Card pour donnen bann purpose nou bann vizit, ok? I  1500 dimoun.

So ou’n dir nou 9 milyon, i bon lanmwatye sa 9 milyon i 4.5 milyon, premyerman lo sa sif, now si nou pran sif, sif tretman ki Onorab Roucou in donn nou e lezot Onorab lot kote latab in donn nou, nou pour vwar poudir Gouvernman in kontribye apepre R36 milyon, si ou pran sa 4.5 milyon Dolar ki ou’n nonmen savedir maximum kontribisyon ladan oubyen la mazorite kontribisyon ladan i vin atraver kontribisyon ki Gouvernman pe peye pour li anvoy dimoun trete aletranze, e zot pwen ki zot in fer sorti, se ki si nou annan en Sant Tretman Spesyalize isi sa pour fer desann pri ki nou pe peye pour nou anvoy dimoun trete aletranze.

Dan mon lopinyon personnel, dan mon analiz pour mwan, mon pa krwar si sa pour arive.  Mon pour dir zot akoz mon pa krwar i pour arive, akoz ozordi par egzanp si nou annan 5 dimoun ki kapab swiv en tretman spesyalize i annan en Sistenm Medikal ki zot servi, bann profesyonnel Lasante ki fer sa triyaz, i annan petet 2 ki ganny sans al swiv sa tretman akoz petet zot kondisyon i pli kritik.  So kou pour sa tretman i redwir, me si ou annan 5 ki kapab swiv sa tretman isi ler sa Lopital i fer isi, sa kou pour ogmante lo sa kote akoz tou le 5 dimoun pour al laba.

Dezyenmman, dezyenmman sa ki osi enportan pour nou konsidere se lefe ki ler ou pe fer sa servis isi i pour kout ou pli ser akoz ou pour annan bann spesyalis ki bezwen vin isi pour fer sa servis, lefe i reste Mr Speaker, lesansyel i reste se ki tretman spesyalize pa pour zanmen vin pli bon marse.

E alors pour sey servi sa largiman pour dir pour fer pli bon marse i pa le ka, non pa pe vedir poudir then en Sant Tretman Spesyalize nou pa bezwen, nou bezwen, me pa sey servi largiman pour dir pour fer desann pri e pour fer desann sa kou akoz i pa sa le ka, lenportans se ki ou pe donn sa servis ou bann dimoun e se sa mon krwar ki devret baz ou largiman, ou pe provide sa servis pour ki dimoun i kapab vini.

Me i pa vedir ki tou dimoun ki pour kapab ganny akse ek sa servis akoz sa servis pa pour pe ganny run par Gouvernman, i pour ganny run par en dimoun prive, savedir ou pe dir mwan poudir envestiser i ava envestir, i ava envestir lo grounds ki ou mete e ou ki pour dir li ki kantite dimoun i pour anmennen dan son Lopital, si i oule met 100 lili i pour dir li rezerv 50 lili pour ou akoz ou ‘n anvoy 50 dimoun laba e ou, ou pour oule rate reduced, me lekel sa envestiser ki pour oule tir son larzan envestir dan en Lopital ki koute ki pour oule fer sa, so sa largiman larzan nou pa devret tro servi li akoz nou devret konn byen bann lezot dinamik.  Petet mwan mon mal dan mon analiz, me lefe i reste, me lefe i reste Mr Speaker lefe i reste ki lo lot kote latab zot tou zot pa’n pran an gran perspektiv sa akoz zot tou zot in koz lo la as if se Gouvernman ki bezwen vin devan pour vin fer sa.

Me en lot keksoz enportan, en lot keksoz enportan se ki zot in bliye poudir nou deza annan en Lopital Sesel Mr Speaker, e lo sa Lopital Sesel nou bezwen kontinyen envestir dan improve sa bann servis.  Si nou ale nou dir Gouvernman al envestir oubyen mannyer zot pe koze  akoz mon pa kler ki mannyer zot in koze akoz i paret mwan poudir Onorab Woodcock i santi poudir atraver ou Mr Speaker i santi poudir se Gouvernman ki devret fer, Onorab Larue i dir Gouvernman ki’n anpes sa bann lenvestisman antre dan pei ankor atraver ou Mr Speaker, so Onorab Roucou i ava klarifye taler si i pe dir Gouvernman ale vin akter Prensipal pour fer li akoz mwan mon krwar poudir rol Gouvernman se devlop sa servis ki i annan e fer sa servis ki i annan i vin alaoter.

Se sa mon krwar ki reste baz annan en Lopital, pour annan en Lopital Prive se les prive fer li e lefe i reste prezan i ava al promot en lot laspe sa ki vin avek sa tretman spesyalize oversee se medical tourism, personn lo lot kote latab apard Onorab Afif Mr Speaker atraver ou ki’n koz lo medical tourism an premye ki sipoze premye ambit – premye rol annan sa tretman spesyalize isi, se pour atrakte dimoun vini e prezan nou, nou ava ganny landrwa pour anvoy nou dimoun e sa i ava ede pour subsidize pour sa Lopital.  Se sa lenportans me zot, zot pa koz lo la zot, zot in prefere pour zot mazin sa 2 bout later dan plas koz lo lenportans sa Lopital.

Mon lot pwen Mr Speaker zot pe demann mwan pour wrap-up, wrap-up selman mon pa ankor fini, zot in koze, mon’n ekoute.

 

MR SPEAKER

Order! Order! Order! Onorab Sebastien i annan laparol.

 

HON SEBASTIEN PILLAY

Mersi Mr Speaker.  Mr Speaker en keksoz ki mon krwar bokou Seselwa pa pe realize ozordi ou konnen, mwan gear box i bon mon pa trakase pour ou ki grennen, mon krwar i annan en keksoz ki nou pa pe realize Seselwa e mon krwar i enportan ki nou komans konpran.

Bokou Seselwa i dir ou i al kot dokter ler i santi en douler dokter pa tret li, Mr Speaker mwan mon annan 2 paran a premye repriz mon manman ti ganny sans al fer tretman spesyalize ler mwan mon ti annan apepre 12an i ti al La Reunion pour fer tretman pour kanser.  Mon papa in ganny sans, in fer tretman isi pour kanser menm.  En keksoz ki mon’n remarke Mr Speaker se ki Sesel la mazorite dimoun pa al fer bann tes boner, pa al fer; si par egzanp ou koz avek bokou Spesyalis Lasante menm bann landrwa kot ou kapab fer serten sa bann tes bokou dimoun pour dir ou dimoun pa al fer sa bann tes boner, akoz zot pa al fer sa bann tes boner set akoz parfwa, 1 mon pa pe dir largiman se ki napa bann tes i annan landrwa ki kapab fer parfwa petet son kou petet i difisil pour zot akse avek akoz kou fer sa bann tes i pa ba, e dezyenmman parfwa dimoun pa zis mazinen pour al fer sa bann tes.

Si nou get bann resers medikal ki’n sorti pandan sa bann dernyen lannen Mr Speaker, ek Onorab Roucou i konn tre byen zot bann dimoun, bann zonm par egzanp, bann msye pe ganny ankouraze par egzanp pour al fer tes dan plas al fer li 45an zot pe ganny ankouraze al fer bann tes 40an, e se sa mon krwar lanfaz ki’n devret pe ganny mete, mon krwar i annan 2 Onorab lo lot kote latab e sa kote latab ki’n met lanfaz lo la, e mon krwar ler ou pe koz en Sant Tretman Spesyalize nou bezwen konnen whether nou pe koz en Sant Tretman ki pour annan en eleman dyagnostik an premye oubyen en sant tretman ki pour annan en eleman tretman an premye ki pour fer swa radyografi swa laser pour fer tretman akoz dan lespri Seselwa ler ou koz tretman spesyalize, bokou Seselwa i mazin bann maladi parey kanser, bann maladi leker bann maladi koumsa.  E se sa ki i enportan ki nou, nou met lanfaz lo la .

Enn, e sa i anmenn mwan lo pwen ki Onorab Gill ti fer sorti atraver sa Mosyon ou konnen ozordi Sesel nou pa oule koz lo sa bann size akoz parfwa i en pti pe taboo me i reste enportan ki par egzanp ler in ariv ou 40an, 45an ou ale ou al fer tes pa akoz ou pa, ou al fer tes akoz ou anvi konnen si ou malad oubyen ou pa malad akoz ler ou pour al fer li plitar, ou al dekouver li i donn ou plis letan pour ou lager avek li, se sa problenm Mr Speaker e bokou par egzanp enn bann kanser ki pli popiler Sesel ozordi se, colorectal cancer Mr Speaker e i annan en letid ki’n ganny fer par enn bann, en zenn profesyonnel Seselwa si mon pa tronpe dernyen er in etabli en lyen direk ant ou ancestry savedir ou desandans avek sa maladi, prezan dan sa bann fanmir par egzanp bann resers koumsa i devret ganny met a gran piblik pour ki dimoun i konnen poudir par egzanp si dan mon fanmir lontan ti annan detrwa dimoun ki ganny sa kalite maladi pour ki mon kapab ale al fer bann tes boner, se sa ki i enportan, e sa bann tes i vreman, vreman enportan mes amis akoz se sa ki pour ed ou determinen si ou pour kapab lager avek sa maladi oubyen non, se pour sa rezon ki mwan mon pe enplor Mover Mosyon ler ou pe debat, ler ou pe fer ou konklizyon oubyen ou pe fer ou summary annou ganny li kler lo kwa ki nou pe vreman demande ki pe arive Sesel akoz at the end of the day si nou oule annan en Sant Dyagnostik lo nivo en Apollo Hospital par egzanp Lenn mon pa vwar nou pe ariv sa nivo akoz volim dimoun ki pour annan pour deservi sa fasilite pour pli ba unless ou pe focus lo medical tourism ki sipoze premye eleman ou Mosyon, me si nou pe koz lo en eleman enportan ki en eleman dyagnostik atraver sa Mosyon.

En eleman ki nou pa pe koz zis lo tretman spesyalize me nou pe osi koz lo en dyagnostik e tretman spesyalize then i ava fer sans pour nou vwar poudir nou anmenn bann eleman dan sa Mosyon ki pour zisteman deservi dimoun e at the end of the day sey asire ki ler nou annan bann kondisyon medikal ki dimoun i annan nou kapab tret sa bann kondisyon medikal.

Mr Speaker nou kapab dir en kantite keksoz lo sa ki konsern bann Profesyonnel Lasante me en keksoz i bezwen reste, mon krwar fodre nou aprann dir mersi osi, mon’n ekout bann Manm lot kote latab e mwan mon en pti pe dezapwente avek zot par lefe ki okenn antre zot pa’n pran letan pour zot dir mersi bann Profesyonnel Lasante swa lezot distrik, swa kot Lopital, bokou nou nou’n al Lopital isi, bokou nou mwan plizyer fwa e call dayer mon dir mersi sa bann nurse ki travay English River plizyer fwa mon al kot Klinik English River avek mon zanfan si in ganny asma oubyen mwan menm mon mon’n al kot English River e zanmen mon’n deza ganny en move resepsyon avek sa bann nurse, i annan en madanm ki travay Casualty Mr Speaker, en nurse i travay Casualty mon vini 2 fwa ek mon vwazen i tonm malad mon’n anmenn li Casualty sa madanm ti la, e ler i dir mwan pour dir li mannyer i pe travay, so mon dir li mersi, mon konnen poudir i pa pe travay dan bann kondisyon ki ideal me mwan dir li mersi.

Akoz mwan mon pa vin fer, mon pa pe vini pour mon zis debat sa Mosyon, mwan mon anvi vwar en sanzman dan lafason ki nou pe think about lasante, se sa nou pe koz en deba pli larz, nou’n devret aret koz lo tretman pour en maladi e koz lo prevansyon pour en maladi.  E prevansyon pour en maladi i vin atraver bann tes ki ou bezwen fer.

Mr Speaker mwan mon ankouraz tou bann msye la anndan pour fer sir zot ganny en tes avan zot ariv 50an ok?  0u ava determinen avek ou dokter kalite tes oule gannyen (Onorab Henrie) selman mwan mon ava advise ou, akoz mon advise ou pour fer li, akoz mon advise ou pour fer li, akoz mon advise ou pour fer li, Mr Speaker mon pe fer mon civic responsibility mwan, akoz mon advise zot pour fer li mes amis se akoz mon krwar ler rezilta sa letid mon krwar se mon pa sir ….

 

(Interruption)

 

HON SEBASTIEN PILLAY

…ou fer pap smear Onorab Henrie?  Onorab Henrie i fer pap smear?

 

(laughter)

 

HON SEBASTIEN PILLAY

Mr Speaker mon en pti pe dezapwente Onorab Henrie i fer tes pap smear

 

(laughter)

HON SEBASTIEN PILLAY

Be anyway.

MR SPEAKER

Kontinyen Onorab.

HON SEBASTIEN PILLAY

Mon retract Mr Speaker, mon retract sa.  Mr Speaker sa ki Onorab Henrie pe dir malgre i pe dir in just mon konnen ki i pe sey dir, se ki i pour enportan pour nou akoz i annan bann letid ki pe ganny fer par bann profesyonnel Seselwa.

Ozordi ki pe demontre poudir prevalence kanser, kalite kanser parmi bann zonm Seselwa pe ogmante e souvandfwa ler ou pour al Lopital ou pour al lo bann Ward ou pour vwar poudir tretman ki pe gannyen se bann zonm ki pe resevwar bann kanser ki parfwa petet si ou ti’n kapab dekouver li pli boner ou kapab anpes li.

E se pour sa rezon ki mon krwar poudir enn bann eleman enportan ler nou pe koz lo en Sant Tretman Spesyalize se koz lo prevansyon bann keksoz ki nou kapab fer pour nou anpes nou ganny sa bann maladi.

Now an konklizyon Mr Speaker mon konnen ki ler mon’n fini koze plizyer dimoun lo lot kote latab pour vini pour vin dir sa ki nou’n dir nou pa konpran nou annan gear pa bon isi laba en bann kalite komanter, gear box pa bon mon pa konnen lekel ki ganny son brav mekanisyen lot kote latab mon konnen napa Mekanisyen, mon konn zis enn ki en mekanisyen ase bon apardsa mon pa konn larestan.

Me selman sa ki reste enportan Mr Speaker se ki annou koz lo sa Mosyon dan lespri ki par egzanp Prezidan in koz lo la dan son Leta de Lanasyon, dan lespri ki nou bezwen rod en fason pour nou amelyor nou servis lasante, rod en fason pour nou vreman anmenn en sanzman dan nou servis lasante.

Me annou pa pran en Mosyon ki i annan pour fer avek en keksoz ki napa nanryen pour fer avek nou servis lasante ki i annan pour fer avek servis lasante prive e atak nou servis lasante, atak bann Profesyonnel ki pe travay laba e mwan mon krwar sa i en eleman ki nou bezwen arete.

Akoz si nou pe koz lo konfidans dan nou servis lasante, mes amis dir mwan ki dernyen fwa dan sa Lasanble enn antre zot in vini in dir enn zot dimoun in pass en bon leksperyans dan Lopital Victoria?

Napa enn antre zot ki’n deza vini dan sa Lasanble dir en dimoun in pas en bon leksperyans Lopital.  Malgre ki plizyer zot bann zabitan in pas dan Lopital in ganny bon leksperyans; plizyer dimoun in pas dan Lopital i ganny trete, in ganny bon leksperyans, so mon pa pe dir poudir tou keksoz i parfe kot Lopital i annan defayans me mon pa pour zanmen, mon pa pour zanmen krwar ki poudir fer en Sant Tretman Spesyalize pour rezourd tou nou problenm lasante dizour o landmen parey serten zot lot kote latab zot fer pe mwan krwar.

Mon konnen poudir i annan en realite ki i pour ede wi an parti i pour ede pour annan en lot solisyon me nou bezwen rod the right solution, akoz nou pour right back to square one apre ki nou’n fer en Sant Tretman Spesyalize.

E mon dernyen pwen Mr Speaker, mon’n tann koz lo bann dimoun ki’n vin devan, ki’n vin eksprim lentere, mwan mon dir tre senp parey nou pe fer dan tou keksoz whoever i vin devan i a vin devan dan latransparans, Gouvernman i a fer en lekspresyon Lentere ki tou dimoun ki enterese i a met o kler pa zis sa enn ki sipoze in vini vin kot Minister Lasante prezan i pa’n ganny sans non!  Tou dimoun ki enterese i a ganny sans pour zot vin partisipe akoz apre tou sa i pour annan en benefis pour Sesel, so mon pe reste lo mon baz, mon ti a kontan mover Mosyon ler i fer son konklizyon si i kapab met sa eleman dyagnostik kler dan son Mosyon si petet i kapab entrodwir sa eleman dyagnostik dan son Mosyon akoz apre tou pa bliye ozordi Lopozisyon zot nepli en minorite dan Lasanble, zot en mazorite wi be zot, i kler sa e sa ki zot bezwen fer se azir parey en mazorite akoz ler zot anmenn en Mosyon devan Gouvernman e demen Gouvernman pa fer nou pa kapab dir poudir Gouvernman pa pe ekout nou si Mosyon pa kler, so mon pe demann ou pour fer ou Mosyon pli kler.  Mon pe ed zot.  Mr Speaker mon pe ed Lopozisyon dan sa Lasanble pour fer son Mosyon pli kler ou konpran?

Mon konnen mon letan pe fini Mr Speaker mon oule remersi ou, en dernyen pti parol Mr Speaker, dernyen pti parol Mr Speaker mon konnen mon letan pe fini i reste mwan 5 minit mon krwar non?  I reste mwan 5 minit Mr Speaker.

 MR SPEAKER

Go ahead Onorab.

HON SEBASTIEN PILLAY

Mersi Mr Speaker, en dernyen parol Mr Speaker ki mon ti a kontan leave avek mover Mosyon, se ki ler ou pe fer ou konklizyon mon ti a kontan osi ou kler lo bann spesyalizasyon ki nou krwar poudir i ava enportan pour annan dan en Sant Tretman Spesyalize ki baze lo nou later Sesel.

Akoz ki mon ti a kontan ou fer sa, mon ti a kontan ou fer li baze lo ou, petet mon konnen ou annan sa bann statistik lo bann kondisyon medikal ki pli prevalence Sesel e ki alors i annan tretman e si nou pour fer li koumsa then mon vwar en rezon akoz mon bezwen, mon kapab anmenn en serten sipor pour ou Mosyon.

Me si ou pour al fer li dan lesanz ki ou pour ouver sa Sant Spesyalizasyon dan tou kalite kot nou pe koz plastic surgery ki mwan mon krwar i pour vin en eleman enportan akoz dimoun pour oule vin fer plastic surgery isi pour li kapab apre pran son convalescence pour li vin, pour li pli byen apre, so mon krwar se bann keksoz ki nou bezwen mazin byen lo la, so pour mwan par egzanp bann eleman parey cardiology parey dermatolozi akoz nou viv dan en pei tropik kot nou annan bokou dimoun ki ganny bann kondisyon lapo ki difisil ok, mon pe koz lo bann kondisyon parey ki relye avek kanser, ok bann kondisyon ki relye avek bann maladi ki asosye konmsi ki prevalent dan nou sosyete, se sa ki pour montre poudir ou’n serye atraver ou Mosyon ou pa zis anmenn ou Mosyon pour koz lo 2 bout later ki’n ganny donnen, Lopital pa’n ganny fer, me ou’n anmenn ou Mosyon avek en bi vreman en bi senser pour ou anmenn en lot fason fer, pour ou anmenn en loportinite pour donn Seselwa en loportinite pour li kapab ganny sans al dan en Sant Tretman Spesyalize lo son pei.

E non pa parey mon’n dir ou’n anmenn ou Mosyon pour ou vin koz lo 2 bout later ki pa’n ganny servi, so mon ti ava swete Onorab, mon ti ava swete pour servi en fason koze enn mon Koleg lot kote latab silvouple, silvouple, silvouple koz pour Seselwa e non pa vin fer politik avek sa Mosyon.  Mersi Mr Speaker.

 

(APPLAUSE)

 

MR SPEAKER

Mersi Onorab Pillay. Yes Onorab Henrie.

 

HON GERVAIS HENRIE

Mr Speaker mon ti’n demann en Point of Order depi boner, nou dan en deba e letan bann Manm i dir en keksoz lot kote latab zot bezwen kalifye zot statement e entervenan ki’n koz avan mwan in fer egzakteman sa dernyen fraz.  Zot akiz nou pe fer politik nou’n kritik bann dimoun dan lasante, be zot bezwen kalifye lekel sa Manm ki’n fer sa akoz i posib zot pe zis dir en keksoz ki pe zis senm, zot pe mislead dimoun e oule letan dimoun in praise Sistenm Lasante dan 4enm Lasanble ti ariv en aksidan avek Onorab Ferrari i ti bezwen al Lopital en lensidan Praslin, i ti vin dan sa Lasanble e i ti remersye tou dimoun ki ti pran swen avek li.  Zot pe mislead the public Mr Speaker.  Mersi.

 

(Interruption)

 

MR SPEAKER

Bon, non, non, non, non, non mon pa pe, mon pa pe ouver deba lo sa pwen ki in fer mon kontan ler ou’n dir poudir nou fer politik se la kot nou fer politik, son fason ki in fer politik e zot annan lot fason fer politik.

Bon i paret ki sa wikenn in donn zot bokou lenerzi, bomaten mon pe remarke ki zot annan bokou lenerzi e mon swete ki nou kapab servi sa lenerzi dan en fason pozitiv, nou pour pran en Break, ….

 

HON JEAN-FRANÇOIS FERRARI

Ki lenerzi mon gear box in ganny dimal…

 

MR SPEAKER

I reste mwan ankor 2 Manm Onorab pour koze avek mover Mosyon ki pour fer konklizyon, nou ava pran en Break.  E deswit la FPAC pour al meet dan Committee Room 3 tou bann provizyon in ganny fer pour zot anler, FPAC pe meet.  

mon’n fini donn lord Madanm Clerk pour sirkil bann kopi dokiman avek bann Manm FPAC ecopy akoz i annan dokiman ki en pe gro, zot ava diskite e swivan zot desizyon ler nou ava repran 11er Komite i ava anonse si tou bann Manm pour ganny en kopi dokiman e pour nou kapab kontinyen travay. Ok? Onorab De Commarmond.

 

HON CHARLES DE COMMARMOND

Mersi Mr Speaker, Mr Speaker anba Order 72 nou Standing Order mon oule move ki Guy Morel Institute Bill, 2017 i ganny withdraw before The House.  Mersi.

 

MR SPEAKER

Ok. Yes.

 

HON JEAN-FRANÇOIS FERRARI

Ki rezon gear box pa bon?

 

(laughter)

 

MR SPEAKER

Bon pour lenformasyon Lasanble Bills Committee ti … Order please! Order! Bills Committee ti rankontre e nou ti dan prezans Minis ki ti pour move sa Bill Minis pour Ledikasyon, Minis Morgan plizyer keksoz in monte, Minis in retournen in konsilte avek AG’s Office e nou’n dekouver ki i pa neseser ki en tel Bill i vini.  I ava vin koman en (SI) e i ava tonm anba Tertiary Education Act.

Vwala rezon nou’n fer First Reading e ki Onorab De Commarmond in fer anba Standing Order 72 in move ki sa Bill i ganny withdrawn.  Bon avek sa nou ava pran en Break e nou ava retournen 11er.

 

(BREAK)

 

MR SPEAKER

Bon nou a repran nou travay mon a zis pas laparol avek Chair FPAC.  Mon konnen zot in meet zis pour gid nou lo desizyon ki zot in pran.

 

HON WAVEL RAMKALAWAN

Yes Mr Speaker mersi bokou.  FPAC in efektivman zwenn e desizyon ki nou’n pran e ki nou pe met devan Lasanble se ki.  Akoz i annan bokou bann dokiman nou pe demann Clerk pour donn sak Manm en pendrive avek tou bann dokiman.  E sa i ava fer ki tou bann Manm i ava annan zot letan pour zot regarde tou bann keksoz.  E lo sa pendrive nou ava selman met dokiman bann dokiman Air Seychelles me i ava osi met sa kontra Sinohydro.  E nou propoze ki demen bomaten nou pran Air Seychelles.  Yes Mr Speaker.  Mersi bokou.

 

MR SPEAKER

Mersi Onorab Ramkalawan.  Bon mon anvi zis averti tou bann Manm Lasanble.  An vi ki sa bann Kontra i konfidansyel ant par egzanp annou pran Air Seychelles avek Etihad and so on.  Me pour rezon travay nou Lasanble nou’n kapab ganny akse avek, silvouple sa bann Kontra bann detay sa bann Kontra pa devret sorti pour al an piblik.  Pour zot lenformasyon osi mon annan kontak avek serten Minis pandan Break espesyalman Minis Dogley.  Demen bomaten parey Onorab Ramkalawan in dir nou pour dan en pozisyon pour nou pran Air Seychelles.  Demen apre midi nou pour pran Sinohydro nou pour pran sa kestyon lo danm.

Menm dan labsans Minis Bastienne Minis Dogley in fer mon konpran ki Minis Bastienne son involvement i dan roulman truck drivers.  Konman Minis ki ansarz Land Transport dan sa Kontra ki PUC in sinyen avek Sinohydro i rest pirman lo Minis Finans avek Minis Dogley ki PUC i tonm anba li.  Minis Dogley in fer mwan konpran ki semenn prosen i pour lo en Misyon aletranze so nou pa pour rod li ankor.  Demen apre midi li i pare pour li pran okenn kestyon ki annan pour fer avek Kontra avek PUC avek son Minister.

E petet menm in involve dan sa bann miting avek Minis Bastienne si i annan okenn bann kestyon ki osi tou I al dan sa direksyon I pare pour pran.  So an menm tan osi tou demen pour napa Cabinet miting so nou pour annan availability of Ministers.  Parey mon pe dir taler nou pour fini Mosyon la par midi 2er nou ava pran Minis Adam sa Kestyon Irzan ki’n leve.  Demen maten nou ava pran Air Seychelles e demen apre midi nou ava pran sa kestyon lo Danm La Gogue.

Bon nou ava kontinyen avek nou travay mon pas laparol Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker I annan bokou keksoz ki’n ganny dir lo sa Mosyon.  Be an menm tan mon pour dir ki I malere i malere ki serten dimoun olye regard spesifikman kwa ki sa Mosyon pe demande zot in al lo en laliny pe rod konpasyon.  E remersiman pour ners pour dokter pour tou bann travayer Lasante be sa I en keksoz ki nou fer souvan dan sa Lasanble.

E mon ava fer enn la Mr Speaker Mr Speaker lo lapar Lasanble Nasyonal mon ti ava kontan felisit sa 12 nouvo Ners ki’n graduate sa semenn enkli sa 6 Fanm Sarz annou konman en Lasanble aplodir zot.

 

(APPLAUSE)

 

HON WAVEL RAMKALAWAN

E Mr Speaker mon kapab dir deswit pour rikord piblik ki pe regarde,  Onorab Ghislain ki pe li menm li koz plis lo remersiman li I pa’n bat lanmen pour li aplodir sa bann dimoun.  Tandis ki son bann lezot koleg in aplodir e sa pour mon Mr Speaker i ganny montre klerman ki Anbasader Potter ti annan rezon I annan problenm gear box!

Mr Speaker Mosyon ki devan nou Lasanble i annan bann pwen spesifik ladan.  I dir: ‘vi ki ozordi vi ki Seselwa ozordi I bezwen al aletranze pour swiv tretman spesyalize e vi ki i annan en sit an alan Providence ki pour Gouvernman.  E kot en Lopital Spesyalize ti ganny planifye sa Lasanble i demande ki Gouvernman I pran desizyon neseser afen ki en partner apropriye (Onorab Pillay atraver Mr Speaker) i pa pe dir Gouvernman fer li’.  En partner apropriye I ganny idantifye pour konstrir en Lopital Spesyalize e ki Seselwa I a ganny en meyer servis medikal isi Sesel.  E an menm tan servi konman en sant pour promot medical tourism ki ava benefisye ekonomi Sesel.

Mr Speaker byensir letan Onorab Roucou I met sa Mosyon Onorab Roucou konman en spesyalis dan lasante konman en dimoun ki annan en degre dan lasante.  Onorab Roucou i a pe dir i konnen ki poudir Sesel pa pour zanmen lo sa nivo kot tou keksoz pour ganny fer isi.  Par egzanp dan sa moman kot nou pe koze Onorab Roucou I konnen ki poudir open heart sugery, brain surgery sa bann keksoz koumsa I pa pour arive deswit.  I konnen sa li.  E Onorab Roucou I osi konnen ki poudir menm bann pei devlope parey L’Angleterre parey nenport ki pei I annan serten spesyalizasyon ki zot pa fer dan zot prop pei.  Zot al dan bann lezot pei.

Par egzanp Mr Speaker sa weekend mon ti pe regard en progranm ki annan pour fer avek en lopital spesyalize pour zanfan an Scotland – Lacoste.

E Mr Speaker bann pasyan bann zanfan ki sorti England zot ganny anmennen dan bann sityasyon irzan dan helicopter dan avyon dan lanbilans full andormi pour zot al spesifikman kot sa Lopital.  Akoz L’Angleterre li menm li I napa sa I napa lopital ki pour pran swen avek zanfan dan sa sityasyon alors Lacoste li I annan e zot al Lacoste.  Nou osi vwar bann sityasyon kot parfwa lo televizyon kot I annan bann konfli kot Lopital pa oule en zanfan L’Angleterre pour li travel pour li al dan pour li al Turkey oubyen pour al en lot landrwa kot I annan en serten spesyalizasyon pour zot kapab ganny tretman.  Alor menm dan rezyon Seselwa I al Maurice be I pa tou keksoz ki fer Mauritius.  I annan Morisyen ki ganny refere dan bann lezot Lopital I annan Morisyen ki al L’Inde i annan Morisyen ki al Singapore akoz sa spesyalite I pa available Maurice.  E pourtan Mauritius zot fer open heart surgery zot in fer open heart surgery dan zot Lopital Gouvernman dan Lopital Gouvernman Moka pa Moka Panplemousse sorry ki mon konn tre byen.  Parske letan mon ti pe etidye ti enn mon rol pour al vizit pasyan dan sa Lopital Panplemousse.  Zot annan en sant kardyolozi spesyalize zot annan bann sirizyen kardyolog ki fer bann loperasyon.

Alor Mr Speaker Onorab Roucou i konn byen li ki poudir pa tou ki pour arive isi me kwa ki I pe demande.  I a pe demande ki en partner apropriye I ganny idantifye I annan Manm ki’n mansyonnen Onorab William in mansyonnen ki poudir MIOT landrwa ki mon deza fer en entervansyon sirizikal yes sirizikal zot riye tou.  Onorab Ghislain ki’n riye son gear pa bon menm li wi.

 

(laughter)

 

HON WAVEL RAMKALAWAN

Mr Speaker Mr Speaker.

 

MR SPEAKER

En moman Order!  Order!  Mon dir annou servi sa lenerzi dan en fason pozitiv.  Kontinyen Onorab.

 

HON WAVEL RAMKALAWAN

Mr Speaker sa Lopital efektivman parske letan mon ti laba mon ti ganny sans koz avek son owner profeser.  E i annan en Seselwa osi tou ki travay laba e zot ti pe koz an term pour vin isi pour fer en sant isi.  Gouvernman L’Inde in enterese pour servi sa landrwa an alan Providence.  Zot ed Gouvernman Sesel atraver en grant pour ki zot konstrir sa Lopital e apre sa pandan 5an.  E Onorab William osi pour konnen sa e pandan 5an pour nobou donn bann spesyalis.

E letan nou pe koz lo la Mr Speaker Onorab Pillay in demande ki kalite spesyalite.  E bann pwen ki Onorab Pillay serten bann pwen ki’n mansyonnen par egzanp e Onorab Pillay i konn byen ki mon annan respe pour li letan I koz lo paran.  Lo sa ki leksperyans ki in pas ladan nou pe koz lo ki posibilite pour ki sa bann tretman anchology pour tretman kanser.  Nou ava annan en Sant Spesyalize.

Oozordi isi Sesel nou napa en sant spesyalize pour onchology.  Nou annan en Departman Oncology me selman ki nou vwar nou vwar bann dokter bann Sirizyen bann ners ensidswit.  Zot pe osi fer lezot keksoz alor spesyalize kardyolozi e sa I en legzanp ki mon Onorab Mr Speaker.  Kontrerman avek Onorab pas dan leksperyans kanser, m wan avek mon manman mon pas dan leksperyans kardyolozi.

E se pour sa rezon ki mon pour siport sa Mosyon Onorab Roucou.  Ki arive ozordi?  Ozordi si ou annan en dimoun en manm ou fanmir ki in al dizon L’Inde oubyen Sri Lanka oubyen Maurice pour li fer en triple heart bypass.  Apre sa i retourn Sesel si i ganny en problenm I pa santi li byen ki ou bezwen fer Mr Speaker?  Ou anmenn sa dimoun kot Casualty.  kot CAsualty I pa zwenn bann Ners spesyalize I asiz lo ban pran limero fer isi fer laba e I pran en kantite letan.  E se sa Onorab Pillay ki’n ariv avek mon manman.

Si par egzanp ti annan en Sant Kardyolozi spesyalize letan I pa ti santi li byen mon ti kapab anmenn li direkteman kot sa sant.  Zis letan I ti pour ariv kot sa sant I ti pour zwenn en   ners ki spesyalize ladan deswit zot ti pour konnen ki zot pour fer zot ti pour annan en kardyolog zot ti pour pran swen avek li.  E lekel ki konnen ozordi I posib I ti ava la avek nou.  E sa leksperyans Sesel antye pe fer Seselwa antye pe fer sa so en bon sant kardyolozi en bon sant pour tretman kanser.  E sa Mr Speaker I de malady ki plis dimoun I mor avek ki pli o leker I premye kanser i 2enm.

Alor nou ti ava annan keksoz spesyalize i annan lot keksoz ki lot spesyalite ki konsern mazorite Seselwa se ortopedi.  Bann zafer lezo ou ganny bokou dimoun ki pe al zisteman deor ki pe al fer loperasyon I mean zot ganny douler dan zot lipye apre I dir avek zot spine I annan problenm ladan.  Parey mwan mon ti gannyen e zenou I dan problenm tou bann keksoz ki annan pour fer avek lezo la osi tou nou ti ava kapab annan nou en bon Sant Ortopedik, kot dimoun ti ava kapab letan ou pe koz en sant spesyalize ou a pe osi en bon laboratwar.

E letan ou pe koz en bon laboratwar se enn ki letan ou pour vini ou pour ou fer ou tes ou pour ganny en rezilta.  E sa rezilta I pour efektivman en rezilta ki dokter pour kapab azir lo la vitman.  E se la Mr Speaker kot letan serten Manm in dir sistenm lasante in fail Seselwa.  Pa pe dir ki dimoun I al Lopital I ganny tretman pa pe dir ki tou dokter Seselwa. In fact mon Mr Speaker mwan mon enn sa bann dimoun ki annan full konfyans dan nou dokter Seselwa.  Akoz mon krwar ki poudir mon senserman krwar ki poudir i annan en kantite sa bann dokter, bann dokter kot Seselwa I ale deor ki Maurice ki I Sri Lanka ki L’Inde.  Mon krwar letan zot al lo zot menm an prive I annan en kantite sa bann dokter zot enterese plis avek zot larzan.

E nou dokter Seselwa zot bon lo fer dyagnoz e zot kapab ed nou.  Mon plis ki sir ki Onorab De Commarmond tou.  Parske mon konn en pe leksperyans Onorab De Commarmond mon pour dir gran mersi i ti annan en zanmi.  Gran mersi I ti annan en zanmi dokter ki ti nobou gid li me Sistenm Lasanble fodre pa ki I baze lo granmersi nou annan en zanmi.  Sistenm Lasante tou dimoun I devret ganny menm posibilite avek fodre tou dimoun i annan menm posibilite pour ki son maladi I ganny dekouver atan.

E apre sa letan son maladi i ganny dekouver i ganny tretman neseser pour li kapab viv akoz lavi nou annan en sel.

E Mr Speaker ankor enn fwa la ki leksperyans nou Seselwa ankor enn fwa nou tou nou konnen ki poudir si I dekouver atan nou kapab fer keksoz.  Leksperyans nou Seselwa pa krwar ki Seselwa pa enterese dan son lasante i ale kot dokter e letan I al kot dokter I fer li referans avek spesyalis pour fer serten tes.  Be pour li fer en senp rezilta parfwa konbyen letan I pran li?  I donn li I al fer son tes la an Mars i dir avek li retourn an Zen retourn an Zilyet.

Me Mr Speaker antretan antretan tou keksoz pe arive li sa dimoun sa dimoun I a pe fer tousala.  E Onorab Andre in fer sa resorti ki poudir letan I pe koz lo son papa.  Bann leksperyans personnel bann leksperyans ki reel alor nou a pe dir annan sa sant apropriye.

E lo kestyon lekonomi wi nou pa pour kapab fer tousala me la mon pa dakor avek Onorab Pillay.  Letan I dir I pa pour pli bonmarse be mon fer en senp en senp pti kalkil mon kalkile ki poudir si nou kapab anmenn en spesyalis isi.  E la pa bliye Mr Speaker e Onorab Pillay ankor enn fwa mon mansyonn son non I konn byen.  Parske nou ti al Silhouette nou dan Komite Zil e letan nou ti al Silhouette nou ti fer en leksperyans.  Klinik Silhouette atase avek lotel Labriz ki i fer Mr Speaker I donn en dokter spesyalize en konze pour nanryen.  Sa dokter i vin isi I enjoy son konze sel keksoz ki i demande se ki sa dokter I bezwen kapab servi Decompression Chamber.  E sa dokter I vini son konze lotel I donn li full board I al lapes e tou.  Me I osi atase avek sa lotel pour li kapab take care of bann pasyan.

E sa bann pasyan sa bann touris ki vini akoz zot annan zot lasirans medikal letan zot fer bann letan si i annan okenn keksoz ki bezwen fer pour zot.  Sa dokter lefe ki I en spesyalis isi ensidswit apre sa I ganny reklanmen lo zot lasirans.

Be Mr Speaker I annan en kantite spesyalis ki ti ava kontan vin donn zot servis Sesel.  I annan Seselwa in ganny mansyonnen tou ki zot demande en lotel pey zot tiket zot ava vin isi e apre sa zot ava donn zot servis pour nanryen.  E sa bann dimoun i annan en kantite zot Mr Speaker letan Lions Club i fer i fer en progranm pour fer loperasyon katarak.  Kot zot vini sepa zot oper lo 100 dimoun tou sa bann ki vini sa bann dokter se bann spesyalis and.  Me dezyenmman zot pe fer li pour nanryen akoz malgre letan nou ouver nou televizyon nou vwar zis lager nou vwar kot bann Palestinyen pe ganny touye.  Nou vwar kot bann zanfan dan Syria pe ganny masakre nou vwar bann zenn fiy Nigeria pe ganny kidnap par Boko haram leker imen I ankor en bon leker.

E nou annan nou en kantite dimoun ki annan sa bon leker e ki pare pour vini partou kote.  Medecins sans frontières.  Medecins  sans frontières se bann dimoun ki’n spesyalize aprezan zot pe donn zot servis.

E zot anvi vin isi me alor si nou ti annan nou en bon sant lasante nou ti annan nou parey Onorab Roucou pe demande en Lopital Spesyalize.  Nou ti ava kapab annan sa platform pour nou met sa bann dimoun pour nou envit zot.  Pour nou annan en progranm e tousala ti ava ede Mr Speaker.

Mr Speaker be zisteman letan nou pe koz lo sa size e letan nou dir ki sistenm in fail pa bezwen melanz li avek bann dimoun ki travay dan sa sistenm.

Mon a donn ou en legzanp Mr Speaker in annan in annan bokou koze e Onorab Gill ti lev en dokiman semenn pase.  Mon konnen sa dokiman Onorab Aglae li in dir I pour abstain akoz I osi tou I konn sa dokiman Ernesta sorry.  Onorab Aglae mon zanmi mon zanmi dan pak mon zanmi lo Pan-Africa Parliament lo SADC alors I mon zanmi.  Me Onorab Ernesta in dir sa me mon ti anvi mon ti anvi dir avek atraver ou Mr Speaker pour dir avek Onorab Ernesta, ki poudir sa dokiman letan ti ganny anvoye kot Tender Board sete pour en procurement of R100mil.

Apre sa letan I ti pas atraver bann sa en kou an gran ti’n monte ti’n ariv R6milyon sa dokiman ki ti dan ou lanmen Onorab Gill.  Ti’n ariv R6milyon pour fer letan in fini R6milyon I pa’n aret la zot in dekouver ki poudir VAT pa ti’n ganny peye.  Zot ti azout VAT 68mil Dolar sa dokiman finalman in ariv R7milyon ki i pe fer sa dokiman Mr Speaker, i pe asize.  E sa depi Zilyet Out 2015.

I annan keksoz ki pa normal e se la letan nou dir be sistenm in fail.  Parske ou’n depans tou sa kantite larzan pour fer en Master Plan e napa gran keksoz ki’n arive.  Overseas treatment eski nou’n demande si tou sa bann larzan ki nou pe depanse i annan en proper audit.  Eski i annan proper audit pour sa overseas medical treatment?  

Alor Mr Speaker zis pour retourn lo sa pwen senp sa pti kalkil.  En spesyalis dan Sesel I kapab fer dizon ki 20 pasyan Seselwa pa bezwen vwayaze met li lo en pti sif 20.  Be lanmenm la avek en tiket R8mil lanmenm la ou’n fer en lekonomi R100mil.  Zis pour vwayaze.  Be pa I apel lekonomi sa?  Konbyen bann lezot bann pasyan an tou ki pa pour bezwen vwayaze pour al fer sa bann keksoz alor Mr Speaker.  I annan bokou bann largiman ki pa vreman ki pa vreman byen me selman Mr Speaker I annan bokou bann lezot.

Nou kapab koz lo sa size pandan en long letan me selman mon krwar ki Seselwa pe rod en fasilite ki pour kapab kot I pour kapab reste Sesel.  E la Mr Speaker mon mazin zis par egzanp bann pasyan ki sorti Praslin avek La Digue.  Letan nou al vizit Lopital parfwa nou zwenn en dimoun ki’n vin ki sorti Praslin pour li vin Mahe oubyen ki’n sorti La Digue pour li vin Mahe.  E sa dimoun mazinen ou zis 20mil kanal I santi li tris parske son fiy pa kapab vin kot li son garson pa kapab vizit li.

Parske prezan mazin ou letan sa dimoun I sorti Sesel pour li al aletranze kalkil e tou dimoun I dir avek ou ki tretman swen medikal lo sa kote fanmir.  Lo sa kote prezans sipor sa I enn bann keksoz ki pli enportan pour ou ganny en dimoun ki pour lav ou lenz ki pour koz avek ou.

Letan ou’n asize lo sa Lopital ou letan ou’n alonze lo lili visiting hours tou bann dimoun la obor ou son fanmir I vini e ou pe asize ou tousel.  Aprezan en etranze ki vini ki demann ou ki mannyer ou ete ensidswit.  Mr Speaker I pa ede dan sa healing process dan sa konvalesans.

Alor nou kapab konpran kwa ki nou pe rode e ki mannyer sa I enportan.  Me pour idantifye en partner etranze e se la kot nou vin lo sa lo sa Lopital.  Mr Speaker mon pa konnen konbyen nou ki’n fer letour oubyen ki’n pase ki regarde egzakteman ki degre konstriksyon oubyen ki kapab al lo Google Earth pour regarde ki kantite batiman ki ganny konstrir laba.  E ki ozordi zis pe pouri be pourtan labank in repran sa, sa nou ava vin en pti kou lo la.  Labank in repran sa e in annan diferan partner etranze in annan diferan dimoun ki’n idantifye bann partner ki enterese.  Ki vini ki dir annou ofer en laranzman, en laranzman agreab pour ki lopital I kapab fini.  Me I resanble ki napa lentere konbyen lannen in arive la mon krwar in fini depas 5an in fini depas 6an sepa si pa pre pour al lo 10an depi ki depi ki sa Lopital ti’n sipoze ti pour rafal eleksyon.  Mon bliye konbyen lannen.

Me selman I annan en bonpe lannen e Onorab Roucou pe dir Gouvernman idantifye en partner apropriye.  E akoz Gouvernman akoz Gouvernman se parske labank ki’n sezi sa propriyete se Nouvobanq.  E Nouvobanq I en labank Gouvernman e li Gouvernman i kapab donn en direktiv son labank.  I kapab donnen i kapab donnen pour ki zot kapab idantifye e regarde ki mannyer letan ou’n idantifye en nouvo partner.  Be apre sa sa dimoun sepa sa ki mannyer I pour peye parske i pa pe ganny sa pour nanryen.  I a bezwen tou le mwan pey en larzan e sa larzan I a kapab retournen pour service sa sonm ensidswit.  Ki keksoz I ava kapab tonm byen annou pa regard annou pa regard problenm.

Me selman Mr Speaker an menm tan letan ou regarde.  E se sa problenm avek nou pei e se sa letan nou dir ki sistenm in fail nou letan zot koz lo konblaz eski zot konnen.  Eski zot konnen ki poudir zis lo sa bout lo sa morso later lo sa morso konblaz ant ron pwen Eden Island ziska pon ki poudir I annan en lakonpannyen Emerald Holdings ki pour Madanm Sarah Rene I annan plis ki 10arpan.  Plis ki 10arpan later I pour li e la in tir en bout akoz sa Lopital labank in sezi.

Mr Speaker ou konmans azoute kot later kot lopital I ete V12348 25559met kare V 6arpan V8072 – 1763met kare V8073  -5858met kare – V18385 1008met kare – V18386 803met kare – V18387 – 1238met kare; V18388 – 2611met kare.  E pa bliye Mr Speaker obor li Intelvision se la kot sistenm in fail.  Obor li Mr Mukesh Valabhji li V1145 – 4262met kare 1arpan!  E apre sa I annan en lot bout par deryer V11148 – 8995met kare.  E ansyen Minis Dugasse li in rann sa ki pour li ki ti 3234met kare.

 

HON JEAN-FRANCOIS FERRARI

Konblaz ti pour zot alors.  Pa ti pou malere.

 

HON WAVEL RAMKALAWAN

Alor Mr Speaker letan parfwa zot koz lo konblaz, al regarde e zot pour vwar ki poudir konblaz se pa pep Seselwa ki’n benefisye I annan bokou dalon ki’n benefisye!

 

(APPLAUSE)

 

HON WAVEL RAMKALAWAN

E ki e ki se sa bann keksoz ki nou pour vwar e byento, byento dan sa Lasanble nou pour bezwen vin diskit tou sa bann keksoz osi.  Parske ki mon pe dir Mr Speaker si par egzanp letan mon pe get tou sa bann later tou sa bann later e nou pe koz en Lopital.  Pa bliye Mosyon Onorab Roucou I pe osi dir konman pour promot medical tourism.  Ozordi lo sa morso later I annan ti annan Wharf Hotel, pli devan I annan bann apartman e la I annan lot apartman ankor Pangia ki pe ganny konstrir.  E tousala se bann soz ki touris en touris ki pe vin fer ki pe vin fer ki’n deside pour li akoz in vwar ki poudir i ok.

I bezwen sa konvalesans I annan en lopital spesyalize si par egzanp ti annan en pti lotel la ki atase avek sa avek sa sant I ti a.  Be Mr Speaker la pour le moman nou bezwen repran sa later akoz Madanm Sarah Rene ki annan later lo beach front!  Lo beach front pour li sa e Mr Speaker ou konnen spesyalman pour le moman kot nek zis ou tann morso later ki pe ganny vann.  E apre pe al dan tou bann diferan direksyon mwan mon krwar ki poudir mon krwar ki poudir nou bezwen bouz en pe vit osi tou.  Sistenm bezwen bouz vit pour ki larzan ki sa pep in depanse pour fer sa bann konblaz pei I benefisye.

Nou Seselwa I kapab benefisye e letan nou ava fer sa la nou ava pe met li kler ki poudir sistenm pe ed Seselwa e pa pe fail Seselwa!  Alor Mr Speaker mon krwar ki poudir I enportan pour nou fer sa.  E en lot spesyalite ki mon krwar ki nou bezwen regard byen ladan apre midi nou pour demann kestyon lo sa zafer dyaliz.

Be Mr Speaker mon annan en zanmi Mr Allain Savy ki’n dir avek mon pa ezite pour mansyonn son non.  Mr Allain Savy ki pe koz avek mon kominik avek mon pe dir ki ozordi la kantite pasyan ki pe fer sa dyaliz, sa I en lot spesyalite ki nou bezwen port atansyon lo la.  E pour bokou dimoun ki mon pa konnen MNA ki pase parfwa dan bomaten letan ou pas Lopital kot Sant Dyaliz I ete ou vwar bann pasyan pe asize deor anba sa pti kouvertir ki mont anler.  Ok ou dyalog avek zot ensidswit be eski pa i ti ava bon ki nou annan nou en bon landrwa kot i annan tou sa bann fasilite kot nou konnen ki poudir sa i nou Sant Spesyalize Dyaliz.

E nou’n vwar la ki poudir I deza annan en konpetisyon avek Renesans anba kot batiman ESPACE.  E mon sa msye par egzanp i dir avek mwan i dir sa osi lo televizyon kot avan i ti pe fer dyaliz 3fwa par semenn la in redwir.  I fer dyaliz zis 2 fwa par semenn e sa Mr Speaker ou konnen ki i vedir i vedir Gouvernman i fer en lekonomi 200 Dolar parske 1 sesyon dyaliz i 200 Dolar.  E aprezan pour son lasante menm sa AMSA ki sipoze vin rezourd tou nou bann zafer e ki taler parey mon pe dir nou pour demann kestyon, I pe dir  e enn bann keksoz enportan pour bann pasyan dyaliz se nivo Creatinine dan son disan.  Pour li in desann sorti 1200 pour vin 250 e son balans medikal se 130.  Ki vedir i pe ariv pli pre laba.

La kantite lirin parske letan ou ganny problenm ronnyon ou ganny problenm la kantite lirin ki ou pase son lirin sorti 250mililit in ogmante pour vin 1200mililit.  Ankor enn fwa I annan serten progre e si nou e tousala se bann keksoz ki nou bezwen regard dan en fason tre pre Mr Speaker.  E mwan mon anvi osi eksprim avek Minister Lasante letan nou pe koz lo tou sa bann keksoz pour nou regarde.  Vi ki laba I pli bonmarse e ki bann pasyan pe reklanmen ki poudir zot pe ganny en bon servis annou regarde ki mannyer nou pa kapab.  Ki mannyer nou ti ava kapab met plis bann pasyan laba ki ava kout Gouvernman mwens me an menm tan osi kot zot ava ganny en pli bon servis.  Parske an menm tan Mr Speaker mon konnen ki poudir I annan serten pasyan ki’n ganny dir ki zot bezwen konmans dyaliz zot in al laba.  In dir avek zot non zot pa bezwen konmans zot pa bezwen konmans dyaliz.

Alor sa osi tou nou bezwen regarde ki mannyer en sant spesyalize ti ava kapab ed nou bann dimoun.  E Mr Speaker mon pour donn mon pour donn tou mon sipor sa Mosyon akoz mon krwar senserman ki si nou annan nou en bon sant en bon sant spesyalize pour nou regard bann –  pour nou kapab baz li en pe lo bann lo bann maladi ki nou pep I gannyen bann rezon akoz nou anvoy zot deor pour fer bann tretman spesyalize.  Mon konvenki ki poudir nou kapab ariv nou kapab fer bokou progre e nou kapab donn nou pep meyer tretman posib.  Avek sa detrwa mo Mr Speaker mon pour dir ki nou pour donn nou sipor total sa Mosyon.  E nou demande ki Gouvernman I aret trenn son lipye; ki Gouvernman I met son masin dan gir I bouze lo la pour donn nou Seselwa meyer tretman posib.  Mersi bokou Mr Speaker.

 

MR SPEAKER

Mersi Onorab Ramkalawan.  Mon a donn laparol Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker sa Mosyon paret en senp Mosyon me i tous nou lasante.  E letan I tous nou lasante savedir I son lanpler son valer i ogmante.  E akoz lasante dimoun parey nou dir ou pa zwe avek.  Lasante i serye e tou dimoun I bezwen byensir regard byen son lasante.  Mr Speaker bokou keksoz in ganny dir e pa neseserman ki mon bezwen repet tou keksoz.  Me selman I enportan fer sorti detrwa keksoz pour ki nou pep I ganny keksoz kler.  Enn i kler e mon apresye ki sa I ganny remet anbale e perspektiv ki nou sistenm lasante nou sistenm lasante i en bon sistenm.  Tou dimoun I dakor avek sa menm mon rapel tre byen detrwa zour pase detrwa semenn pase dan larepons lo Leta Lanasyon.  Ler Onorab Ferrari I ti fer resorti klerman poudir li I pour defann sa sistenm lasante a tou pri akoz bann Ners I donn li en bon servis ensidswit.  E mon apresye sa me menm Onorab Ferrari apre I dir nou poudir sistenm in fail.  So pour mon sa issue sistenm fail la nou bezwen regard li avek pozitivite nou bezwen regard li dan en fason obzektif regard li byen.  Kwa ki’n fail e kwa ki nou pe dir sistenm lasante in marse akoz ki mannyer sistenm I kapab fail letan WHO United Nations I bat lanmen pour Sesel.

I dir Sesel ou en legzanp dan rezyon ou en legzanp dan Lafrik ou en legzanp dan lemonn e ou’n fer en kantite sikse.  So ou vwar sa so sa I en pwen alor I kler poudir nou sistenm e letan nou ti pran nou sistenm an 1977 ler nou ti fer sanzman dan nou pei.  Si ozordi letan mon get sa sistenm lasante be i fantastik I annan en kantite progre ki’n ganny fer en kantite lavansman ki nou’n fer.  E pour mon sa pran lo immune system nou kestyon vaksinasyon be nou fer enormeman progre ensi ki lezot landrwa ankor dan nou sistenm lasante.  Me en gro me mon dir akoz i annan room for improvement me pli ki ou avanse sa mon ti dir klerman dan mon speech lo Leta Lanasyon.  Pli nou avanse Mr Speaker pli I annan nouvo challenge nouvo defi.  Akoz pour ou tenir sa bann aki ki ou’n fer sa bann progre ki ou’n fer I vin osi en nouvo challenge.  E ou bezwen rod fason pour ou fer avanse davantaz baze lo egzizans nou pep.

Si lontan nou ti pe lager kont lever kont Kwashiorkor kont bann senp problenm lasante.  Ki letan mon koze la serten dimoun poudir Sesel ti annan tou sa bann keksoz be nou ti annan problenm mikrob ensidswit.  Ki ozordi nou fasilman rezourd now ensi ki lezot problenm.  Sa problenm dyaliz i pa ti koumsa parey nou vwar ozordi me I bann nouvo maladi ki nou gannyen avek devlopman.  Now having said that i enportan konpran e i enportan osi la ki nou lans en lapel avek Minister.  I pa normal Minister i annan li sa dokiman ki in fer dapre ki in ganny dir in depans sitan larzan pour fer e ki sa pe dormi laba ater.  Be mon aprann osi ki I annan bout ladan ki pe konmans ganny enplimante zot dir mon ICU pe al fer la ensidswit.  Me petet piecemeal I don’t know be mon krwar ki I enportan e mon pour fer li mon devwar pour mon anvoy mon kestyon pour demann Minister Minis Lasante.  Pour vin dan nou Lasanble pour vin koz avek nou fer en statement zisteman lo sa dokiman.  I bezwen vini pour ki nou Manm Lasanble isi nou tou nou bezwen prezan pe rode ki arive akoz ki tou sa letan in ganny fer akoz i pa pe bouze.  E nou konsernen e petet la ki zot pe sey dir letan zot tip e dir sistenm in fail.  Kekfwa zot pe sey dir I annan bann landrwa ki in bezwen ganny improve.  Si zot pe dir landrwa ki pa pe ganny improve then kalifye li byen dir I annan landrwa ki bezwen ganny improve.  E nou tou nou krwar nou tou nou konpran i annan landrwa ki bezwen ganny improve.  Mon prouv avek zot poudir nou sistenm i bon li, me malerezman along the line I annan dimoun ki pa pran son responsabilite byen.  E zisteman ler Onorab Ramkalawan i pe koz lo mon sityasyon pour mon ki dir gran mersi en dokter zanmi sa pa ti devret ariv avek mon koumsa.  E mon toutafe dakor avek ou me selman mon pas atraver sa sistenm menm sistenm e dokter ki’n kalifye.

I dir mon non apre ki nou ti’n fer X-RAY i dir mwan non ou bezwen al fer enpe legzersis sa douler dan ou ledo la petet ou fim enpe al fer enpe legzersis.  I pour ok.  Parkont lot dokter I dir mon tyonbo en kou sa ki mannyer ou pe eksplik mwan mon krwar nou bezwen al direkteman al fer MRI al get en kou.  Kan nou fini fer i vwar i dir mwan zafer pa bon.  Ou konpran mwan?  Be sistenm I la li sistenm in etablir fantastik masin MRI i la tou bann lezot masin I la zis en kestyon Dokter.  I en kestyon dimoun pour mon montre its not the problem of the system me i en problenm imen.

I zis parey ozordi dan nou sistenm lasante dan nou Minister Lasante nou annan nou bann pli bon masin pour kestyon lizye.  Problenm lizye la al dan nou lopital la masin ki dan larezyon Maurice napa nou annan nou.  Selman personn pa kapab servi li nou annan en problenm.  Problenm dimoun be selman mon nonm pour kestyon lizye kestyon I kapab annan lezot domenn ankor me problenm se kwa?

E ki nou pe dir nou se dan lopital sa ki pe diriz nou Minister Lasante ok e la responsabilite byensir I pour tonm lo Minis avek son tim.  Pour bezwen revwar ki mannyer keksoz pe marse pa kapab bouz sa lavites?  Lepep nou lasante nou dimoun I pe espekte plis.  I dir sanz gir egzakteman Prezidan li I koz dan en gir li in fini pas son 5enm gir ki mannyer Minister li I ankor dan 3enm gir.  I bezwen nou pe demande ki zisteman sa bann amelyorasyon i ganny fer dan sa direksyon Mr Speaker.

Dan sa direksyon annou get en kou zisteman lo sa ki Mosyon I a pe demande nou a pe koz sa bout later laba lo an alan lo bor Wharf ant Wharf avek Airtel Intelvision sa bann dan sa border la.  Be i kler sa later la i pa pour Gouvernman per se me i fini al pour labank Nouvobanq.  E Nouvobanq la I en konpannyen Gouvernman I pa Gouvernman li I annan sa diferans ki ou bezwen fer.  Me nou ki nou pe dir se Gouvernman Minister Lasante ok ler I vwar e I konnen li akoz I annan en Master Plan.  I konnen ki kote nou pe ale avek nou sistenm Minister Lasante.  Ki mannyer nou sistenm Lasante I bezwen al lo sa lot nivo.

Akoz i konnen?  Akoz deza la ki nou pe koze dan nou Lasanble la plizyer dimoun I annan bokou lannen.  Plizyer lenvestiser in vini kot Minister Lasante in demande in mete devan Minister Lasante plizyer propozisyon, pour anmennen Lopital Spesyalize.  E mon al pli lwen ki sa Mr Speaker I pa zis dan son lopital spesyalize me osi ki I kapab train nou bann dimoun e mon la mon pour pouse pour par egzanp MIOTMIOT li ozordi laba i annan son bann problenm pour li mon pa pe al dan sa bann detay e li I ti’n ganny en bout later li osi li pour al fer zisteman en keksoz dan sa direksyon.  Be si i pa pe kapab Gouvernman pa devret tarde esper MIOT  pe vwar I pe dan problenm.  E prezan I annan lezot lenstitisyon dan India akoz la ozordi mazorite pasyan pa pe ale MIOT.pe anvoy li lezot landrwa.

Nou pe anvoy Sims Hospital en Sims Hospital fek vin kot Minister Lasante la 1mwan pase – 2mwan pase e zot in met devan li progranm ki zot kapab fer.  I dir donn en bout later nou a fer en lopital spesyalize e osi nou ava train nou dimoun pour nou dimoun kapab vin dan l’Inde laba nou a train ankor laba en fason akoz zot lentere I kler.  Zot le anmenn keksoz lo sa lot nivo pour nou e pour zot so I annan scope e prezan Gouvernman li atraver Minister Lasante letan I vwar sa ki I devret pe fer.  I devret sorti e think outside the box li I devret ale ganny en kontak avek zisteman Nouvobanq.  Dir be Nouvobanq ou osi ou annan en lentere Gouvernman ou soz Gouvernman e ou sa later ki ou’n pran avek son bann charge lo la son bann lipotek lo la ensidswit son bann det.  Ti ariv sepa 14milyon Dolar tir sa bann lentere fer li fasil pour sa bann lenvestiser e prezan I ava vin zis sa e ou pour napa lot bout pour ou peye.  Akoz la ki mannyer pe fer la li Nouvobanq li pe tenir sa li osi I a pe esper pour klersi 2 det e non pa enn.

Mon pour al dan detay lo la pour le moman ok e sa ki konnen I kler.  Be nou pa pour kapab kontinyen dan sa pei bann keksoz koumsa.  Sa ki nou pe dir e lo sa kote latab isi nou osi nou pe dir dan Parti Lepep se sa ki nou pe koze.  Nouvo Parti Lepep e mon repete nouvo Parti Lepep I pe dir sa bann keksoz fodre arête.

 

(Interruption)

 

 

HON CHARLES DE COMMARMOND

Nouvo Parti Lepep pe dir avek sa bann dimoun annan konfyans gear pe ganny sanze gear pour sanze e zot pour vwar lavites kot nou pour ale I pour anmenn nou lo sa lot nivo bokou pli vit! Annan konfyans e annan lespwar kit nou lespwar vivan.  Mr Speaker lo orizinal – dan Lopozisyon i annan Lopozisyon Orizinal.  Pa trakase Onorab Ferrari nou, nou konnen poudir zot pe fossilize napa problenm ou.

 

(laughter)

 

 

HON CHARLES DE COMMARMOND

Nou Mr Speaker nou pe dir sa ki mon pe koze la nou pe dir avek Gouvernman zisteman Gouvernman Parti Lepep nou pe dir li sakouy li.  Nou pe dir avek Minister ki nou kontrole ozordi I dan nou lanmen Minister I lo kote Parti Lepep akoz se nou ki o pouvwar lo kote Gouvernman.  Nou pe dir avek li bouze; bouz pli vit e fer lepep konnen ki pe pase.

La nou annan sa bout la ki nou pe koze sa bout later I annan lot bout later ki parey mon pe dir ti pe donn MIOT Hospital.  Sa osi nou pe dir ou pa kapab dir ou pour donn dimoun en keksoz apre I tarde I pran 50an pour li fer keksoz bouze.

E nou pe dir zisteman annou ale dan sa direksyon dan lespri sa Mosyon akoz nou konnen nou poudir avek sikse ki nou fer dan nou sistenm lasante.  Tou sa progre ki nou fer dan nou sistenm lasante e ki nou pe ganny sipor e lapir WHO e United Nations e tou bann sistenm mondyal I pe siport nou dan sa ki nou pe fer.  Ki nou pe fer byen I pe dir ki nou bezwen ariv lo sa lot nivo sa lot nivo I pa pour depan lo nou tousel nou Gouvernman zisteman I bezwen sa bout prive in ariv ler la.  I kler sistenm i ouver e sa bann lenvestiser i bezwen vini.  Lot zour mon poz en kestyon dan nou Lasanble la avek Minis Finans lenvestiser oli foreign direct investment?

E la bann posibilite e nou pe trenn lipye be zisteman annou bouze letan ou vwar ki annan lenvestiser ki pe fer keksoz ki pozitiv ki I bon.  Ki pour fer nou sistenm ganny ankor plis lanpler plis lanbelisman pour nou avans pli vit e pli byen be non annou pa tarde.  Annou zisteman fer lepep konnen la ki nou Gouvernman pe fer en kantite keksoz pozitiv Mr Speaker dan nou sistenm e dan nou Gouvernman.

E dan nou Minister ki pe ganny fer dan en fason fantastik I pa pe ganny ariv devan pour lepep konnen.  Nou pe fail nou dimoun dan sa fason si mon kapab dir li koumsa.  Akoz nou pa pe fer konnen sa bann keksoz ki bon e ki dan lentere nou dimoun.

So Mr Speaker dan sa direksyon i enportan ki nou sistenm i fer sa bout an plis.  E ki sa Lopital ki nou pe koze I kapab annan enn i kapab annan de.  I bezwen nou lepep I bezwen vwar li pe arive en pe pli vit.  E mon dir pa kasyet keksoz mon dir sa bann dimoun ki le vin envestir dir.  Prezan nou a konnen kote problenm i ete si problenm i avek Gouvernman ouswa I avek envestiser.  Akoz pa mal osi nou gannyen bann mon pa pour dir fake envestiser me envestiser ki vini I fer en bann promes isi laba apre napa nanryen ki arive.

Sa osi tou nou bezwen nou pa kapab zis anmenn sa bann pake dan montanny nou.  Alor i enportan ki sa bann keksoz I ganny fer be nou konnen ki poudir en Lopital Spesyalize I pour bon.  I pour bon pour nou pour nou pei akoz i pour anmenn nou lo lot nivo.  Ou pran par egzanp bann touris bann dimoun ki le vini pour vin fer vakans Sesel e i konnen poudir Sesel i annan en Lopital Spesyalize be fantastik.  I pour le vini i pli convince pour li le vini akoz i pour ganny en servis isi.

E an menm tan son medical insurance i pour konnen ki lenstitisyon ki i rekonnet pour ki ler i ariv en problenm i kapab trete dan sa lopital e li I rekonnet laba pour li fer peyman.  So I annan tou sa bann sistenm e nou bezwen bouz dan sa bann direksyon.  Probableman osi se sa ki Prezidan in dir nou lot zour annou reflesir ansanm.  E in dir lans en deba dan nou Lasanble pour nou koz an zeneral pa zis lo sa bout nou sistenm lasante be an zeneral lo nou sistenm lasante.

Be I paret mon lo nou pozisyon i annan serten dimoun ki sir non nou pa pour koze lo la nou pour dir li konnen ki i pe fer avek sistenm lasante.  

So si I koumsa savedir zot pe konfirm sa ki detrwa zot in dir kestyon koabitasyon pa pe marse.  E i pa normal sa si pa pour marse annou dir en annou dir nou a konnen ki direksyon nou pour pran nou tou.  Akoz sa zafer konmsi I annan detrwa dimoun ki vin dir nou la koabitasyon pa pour marse pour serten keksoz annou be careful.

Mon dir sa seryezman e mon relans lapel ki nou bezwen nou tou Prezidan i annan grander lespri ki i pe konpran ki kot nou arive avek sa ta progre ki nou’n fer dan nou sistenm lasante I enportan pour nou diskit ansanm.  In ouver laport pour nou pour nou tou diskit ansanm akoz nou ki nou’n fer an plis Mr Speaker Sir.  Nou fer ki sa Sistenm Lasante ki Parti Lepep in kree ki’n fer avanse nou’n ankre li dan nou Konstitisyon.  Nou’n dir la bann landrwa e bann direksyon ki nou pour ale.  E nou fer sir poudir lasante primer nou pa pour vin sanze bonnavini pour dir konmsi ou pour al retourn sa sistenm lasante ti ete avan 1977.  Pa pour fer e nou dir dan Sesel pa pour fer sa zafer nou bezwen fer sir anmenn li lo lot nivo.

Mr Speaker pour mon konklir I enportan mon fer sorti detrwa keksoz les mon osi koz lo sa zafer dyaliz.  I enteresan sa zafer dyaliz la e sa osi mon kontan ki sa kestyon I vini apre midi nou a ganny sans pour diskit lo li.

Be nou bezwen vwar lekel nou’n ganny koze lo la pa trakase ou taler I ava ganny koze an plis ankor.  Nou bezwen vwar pour lekel sa sistenm dyaliz laba Renesans la eski pa menm dimoun ki ti kot nou sistenm lasante avan?  Non mon pe poz kestyon so ou konpran akoz laba I pli bon marse ki mannyer pa’n fer pour ki nou tou tip li bon marse?

Konmsi i annan en bann kestyon la taler nou a ganny sans pour elabore pour gete e nou.  Nou pe dir nouvo Parti Lepep nouvo Parti Lepep pe dir sa bann kalite keksoz koumsa la nou pa kapab les kontinyen arive.  Nou bezwen annan keksoz ki ganny fer ki byen dan sa pei e napa kestyon orizinal la napa orizinal Onorab Ferrari.  I annan nouvo Parti Lepep letan mon pe dir nouvo Parti Lepep se bann dimoun sirtou from your side …

 

(laughter)

 

HON CHARLES DE COMMARMOND

… ki pe vin zwenn nou.  E ki’n deza desann kip e zwenn nou e ki nou pe fer nou ta bokou pli gro e avek nouvo determinasyon nou pe fer sir ki next time it will not be in this House again.

 

(laughter)

 

HON CHARLES DE COMMARMOND

La nou pe dir nou pe dir Mr Speaker ki lenerzi I for ou vwar sa.  Pak in anmenn nouvo lenspirasyon pour nou e nou gear box o ok Onorab Ramkalawan.  E mon pe dir ou klerman fully anform nou gear box e gear box i bezwen sanze se laba lot kote kot zot menm.  Pa trakase ou pour vwar byento ki mannyer i pour sanze.  I pa pour zis sanze pour kraze Mr Speaker.

 

(laughter)

 

HON CHARLES DE COMMARMOND

(laughter) Zisteman zot menm ki pour ‘zet anba.’ Mr Speaker pour fini mon le dir poudir I enportan nou’n koz lo oncology mon krwar bann pwen ki’n avanse lo kestyon oncology lo kestyon cardiology bann stroke.  E mon letan nou pe koz lo stroke la osi, mwan mon felisit Madanm Woodcock lafanmir Woodcock Cascade ki’n fek lans en Fondasyon pa tro lontan pase.  Zisteman dan kestyon sa cardiology, stroke ensidswit e pour mon sa i bann bon linisyativ.  Ki fer ki i anbelir nou sistenm i anbelir nou sistenm akoz sa bann keksoz koumsa i parey pour cancer.  Nou annan Fondasyon pour Cancer ensidswit sa bann keksoz koumsa I pour anmenn nou byensir bokou pli vit lo lot nivo.  E nou bezwen travay e nou bezwen travay dan sa direksyon.  E sa fason Mr Speaker I pour fer ki pour vwar nou dan sa pti pei.  Dan sa zoli pti pei pour fer ki nou pour byensir anmenn keksoz bokou pli byen e bokou pli bon pour nou pep.  Nou pep i bezwen sa e nou pe dir avek nou Gouvernman pa trenn lipye.  Bouze e si nou vwar lenvestiser annou koz avek pour nou kapab al pli vit pour ganny sa tretman spesyalize.  Akoz sa pour ed nou redwir nou cost enormeman lo kestyon nou bann konman dir sa tretman aletranze.

Tretman aletranze nou vwar lot zour MIOT Hospital in anvoy bill e zis nou peye nou.  E mon krwar dan FPAC byento I annan keksoz ki nou bezwen diskit ankor e regarde kler tors pour klere.  Nou pa pour kapab nek zot anvoy bill nou peye be ou pa gete vreman si sa dimoun ti ale ki mannyer ti ale ki mannyer?  Konmsi I bezwen annan detay ki atase avek so bann dimoun ki responsab I bezwen fer sa travay ekstra pour ki definitivman nou kapab fer sir ki i annan valer pour larzan.

Lodit lo medical overseas medical treatment, i bezwen ganny fer e i bezwen byen.  E nou konvenki I pa kestyon krwar nou konvenki ki avek en lopital spesyalize I pour ed nou definitivman pour fer desann pri ki nou depanse abroad en kantite.  En bon pe Mr Speaker i ok ou.  Mon pe eksplik ou mon pe dir ou sa.  Me pa tou keksoz ki nou kapab fer.

 

MR SPEAKER

Order!  Order!

 

HON CHARLES DE COMMARMOND

Pa tou keksoz ki nou kapab fer par egzanp en lopital spesyalize nou pa pour kapab fer petet radyasyon.  Radyasyon li I en lot konplikasyon li e li en pti pei parey nou pa pour kapab petet kestyon nou lanvironnman tou nou pa pour kapab pran sa bout la.  Sa bout la li I a reste deor I a reste aletranze akoz nou pour still anvoy serten dimoun aletranze.

Be I a redwir konsiderableman e mon krwar poudir en tel devlopman I pa zis bezwen vini.  I en nesesite e nou pe dir nou Lasanble fortman pe dir ki sa I bezwen arive depi yer.  Vedir I bezwen bouz vitman pour kapab ganny an konkretize.  Mr Speaker avek sa mon pour dir avek bann dimoun dan mon kote isi lo kote Parti Lepep mon pa pour met presyon poudir vot isi vot laba.  Mon pour les zot vot dapre zot konsyans, ki mannyer zot anvi vote liberte de vot.  Fer mannyer zot anvi.  Mersi bokou.  Mersi bokou Mr Speaker.

 

(Interruption)

 

HON JEAN-FRANCOIS  FERRARI

Be solman Broker, fodre annan Broker.

 

MR SPEAKER

Mersi, mersi.  Bon annou pa tro enteronpe nou anvi fini sa Mosyon avan nou Break la.  Onorab Ramkalawan vitman.

 

HON WAVEL RAMKALAWAN

Mr Speaker mon annan en point of order lo konpozisyon Lasanble Nasyonal.  Lasanble Nasyonal apre Eleksyon 2016 sa ki ti ganny gazete ti annan 2 parti politik.  Ti annan Parti Lepep avek LDS.  Mwan anvi Onorab De Commarmond in koz lo Nouvo Parti Lepep.  Mon anvi demann ou konman Speaker si ou’n ganny okenn notifikasyon sorti kot Komisyon Elektoral ki poudir Parti Lepep in sanz son non e ki ozordi I apel Nouvo Parti Lepep.  Akoz si ou pa’n ganny okenn notifikasyon i pa kapab koz lo non parti politik ki pa egziste!

 

(APPLAUSE)

 

MR SPEAKER

Mersi.  Mersi Onorab Ramkalawan.  Mon lofis i ava take up sa matter avek Onorab De Commarmond taler.

 

HON CHARLES DE COMMARMOND

Mr Speaker si oule mon reponn sa mon reponn sa direk la  mwan.  Napa problenm.

MR SPEAKER

Ok, ale.  Order!  Bon nou ava pas laparol avek mover Mosyon i ava fer son konklizyon.

HON JEAN-FRANCOIS  FERRARI

Simon i en Orizinal li.

MR SPEAKER

Onorab ou annan ou 15minit.

HON CLIVE ROUCOU

Mersi Mr Speaker.  Mr Speaker pour konmanse mon anvi remersye tou bann Manm ki’n aport zot kontribisyon lo sa Mosyon ki mon prezante.  Me en remersiman spesyal pour nou lo kote LDS tou mon bann koleg ki’n travay avek mwan pour sa tel Mosyon avek bokou lenportans.  Nou bezwen asire e nou bezwen konnen ki toultan bann Mosyon ki annan lepep Seselwa a ker i sorti kot LDS.

Menm sa nouvo Parti Lepep swadizan pa egziste e zot pa pour kapab zanmen anmenn okenn Mosyon ki annan valer e lenportans pour nou pep.

Mr Speaker mon’n realize ki vre dan Parti Lepep gir in kase.  Sa ki dan premyer I dan premyer sa ki pour li in tonm dan reverse sa ki dan 2enm diferan.  E mon asire ki Onorab Pillay li pour li i dan reverse.

 

(laughter)

 

HON CLIVE ROUCOU

Akoz ler mon get Mosyon ki mon prezante I vreman kler mon tonm lo en sel konklizyon ki I vre ledikasyon pa lentelizans.  Mr Speaker…

 

MR SPEAKER

Onorab, Onorab konsantre ou konklizyon lo Mosyon…

 

HON CLIVE ROUCOU

Wi li menm sa lo Mosyon sa Mr Speaker.

 

(Interruption)

 

MR SPEAKER

Order!  Order!

 

HON CLIVE ROUCOU

Mr Speaker.

 

MR SPEAKER

Order!  Order!  Order!  Order! Order! Onorab Pillay si non nou pa pour fini.  Konsantre ou bann konklizyon lo bann komanter, lo bann deba ki bann Manm in leve.  Ale go ahead.

 

HON CLIVE ROUCOU

Sorry Mr Speaker mon a kontinyen?  Mr Speaker Onorab Pillay in koz lo Sant Diagnosis ki mon krwar Onorab Pillay pa pe tro konpran ki savedir tretman.  Ler nou koz dan langaz medikal Onorab Pillay ler nou koz tretman Mr Speaker mon pe adres Onorab Pillay en pti kou la atraver Mr Speaker wi.  Ler nou koz tretman I depi koleksyon data avek sa diagnosis kot nou analiz sa bann data kot nou selekte tretman nou rod metod tretman nou fer plan sa tretman ziska ler discharge planning I arive.   Sanmenm sa ki nou koz tretman dan langaz medikal Onorab Pillay.

So ler ou vwar sa mo tretman tousala I ganny enkorpore ladan.

Mr Speaker pour kontinyen Onorab Ernesta I osi tou I dan en konfizyon total en konfizyon total kot in menm dir sa ti deza dan plan Minister Lasante.  Be ankor lannen apre lannen nou vwar bann gran dokiman bann gran plan ki zot lo sa kote zot koz lo la.  Mon anvi dir nouvo Parti Lepep swadizan, plan avek dokiman pa sov lavi dimoun!  Se pour se la ki nou dan LDS kolektivman nou’n travay for pour nou anmenn tel Mosyon a laporte lepep Seselwa.

Mr Speaker semenn pase apre ki mon prezant sa Mosyon mon koz avek en kantite dimoun dan mon vilaz menm e detrwa zour ler mon anvil mon koz avek dimoun kot dimoun in aport zot sipor e lenportans sa Mosyon an faver en tel proze.

E tou dimoun e nou tou la anndan nou vwar lenportans en tel proze konman en Lopital Spesyalize ki pour a benefis lepep Seselwa e Gouvernman e Minister Lasante respektivman.  Mr Speaker en tel fasilite parey diferan Manm in met devan ki sa benefis finansyel I pour vreman gran kot Seselwa ki ti pe al aletranze pour vwar ki pour napa sa gran perdi dan la kantite larzan ki zot pour al avek.

Nou vwar benefis familyal konman sipor moral ler en pasyan pour fer son lentervansyon isi menm Sesel.  Onorab Ramkalawan in koz en pti git lo la oparavan kot nou vwar tretman I kapab o kalite me lenportans lavi lafanmir sipor moral I limero 1.  En kantite Manm in koz lo progresyon karyer nou’n vwar lyen lesanz medikal kot nou pour vwar kot nou servis lasante pour agrandi.  E menm Onorab De Commarmond in met lanfaz lo la nou pour vwar en tel servis i pour benefisye ankor nou bann tou bann kad travayer medikal.

Mr Speaker mon anvi anvoy en lapel for pour Msye Faure pour li enn fwa ekoute ki sa Lasanble pe dir atraver sa Mosyon.  Sa Mosyon i annan son signifikan e i annan son weight ladan.  Msye Faure fodre ki ou reakte lo sat el Mosyon en tel fasilite mon asire pour annan benefis pour mon bann frer ek ser Seselwa.

Dan lot kote mon anvi dir lepep Seselwa ki nou dan kote LDS nou pour kontinyen travay a zot benefis nou pour kontinyen anmenn bann kestyon Mosyon e met laklerte dan tou nou bann proze le fitir.  Alors mon anvi dir ankor enn fwa ki Gouvernman Parti Lepep in ler pour zot aret trenn zot lipye reazir.  Reazir pour benefis sa pep konmdir Onorab Ghislain in dir ki kanser i ganny diagnoz dan bann 4enm staz.  Sa i egzakteman ki nou lo sa kote latab nou pe anpese arive nou pa anvi kanser I ganny diagnose lo 4enm staz oubyen 5enm staz oubyen konmdir li menm dan 9mwan sa dimoun i mor.

Nou anvi ki enn fwa pour tou lepep Seselwa I ganny fer en diagnosis konfirmen kot i ava annan en prognosis ki nou asire sa dimoun i ava byen.  Mr Speaker nou lo sa kote latab nou pa’n ensilte okenn bann travayer lasante bann profesyonnel lasante.  Kontrer mon pour kontinyen salye mon bann frer ek ser ki travay dan bann sityasyon difisil.  Espesyalman mon bann koleg Ners kot mon travay en kantite lannen avek zot.  Nou pa pour zanmen nou lo sa kote latab mank respe pour zot nou pour kontinyen vwar sa bon travay ki zot fer.  Me parkont me parkont Gouvernman Parti Lepep zot ki napa konfyans dan nou servis lasante.  Ki dernyen fwa nou vwar okenn nou bann koleg Minis oubyen bann o zofisye avek limero 4 oubyen limero 12 lo ban?  Nou pa vwar me nou lo sa kote latab nou kontinyen a tou repriz remersye tou bann travayer lasante.  E nou kontinyen asiz lo ban e vwar nou dokter e ners Seselwa.  Alors Mr Speaker pour terminen pour terminen mon anvi dir Gouvernman silvouple reakte lo sa Mosyon ki enn fwa pour tou Seselwa I a benefisye.  Mersi.

 

MR SPEAKER

Mersi Onorab Roucou.  Bon ler in arive pour nou pran en desizyon lo Mosyon ki lir konm swivan: ‘Vi ki Seselwa I bezwen al aletranze pour li swiv tretman spesyalize e vi ki I annan en sit an alan Providence ki pour Gouvernman e kot en Lopital Spesyalize ki ti’n ganny planifye.  Sa Lasanble I demann Gouvernman pour pran desizyon neseser afen ki en partner apropriye i ganny idantifye pour konstrir en lopital spesyalize e ki Seselwa I ava ganny en meyer servis medikal isi Sesel.  E an menm tan ganny servi konman en sant pour promot medical tourism ki ava benefisye lekonomi Sesel’.  Okenn Manm – nou pour pran en vot lo la.  Tou Manm ki an faver?  Okenn Manm ki kont?  Ok Madanm Clerk.

 

MADAM CLERK

Mersi Mr Speaker.  24 Manm an faver mersi.

 

MR SPEAKER

Bon savedir Mosyon in ganny aprouve par Lasanble Nasyonal.  I en Mosyon Lasanble Nasyonal.  Bon avan nou pran Break mon annan zis de pti lanons pour mwan fer ABC pour meet la Speaker’s Conference Room.  Me la deswit Komite Madanm pe rankontre e mon krwar zot osi dan Speakers Conference Room.  Ok?  Avek sa nou ava adjourn e nou ava repran 2er apre midi.

 

 

(BREAK)

 

 

MR SPEAKER

Bon apre midi tou Manm Onorab.  Bon apre midi tou dimoun ki pe swiv deba Lasanble nou pour kontinyen nou travay pour ozordi e parey mon ti’n anonse bomaten.  Nou annan Minis pour Lasante Minis Jean-Paul Adam ki pe vin reponn en kestyon sorti kot Leader Lopozisyon en Private Notice Question.

Madanm Clerk nou kapab apel Minis silvouple.  Bon mon ti a kontan swet labyenveni Minis Adam Msye Dr Danny Louange CEO Health Care e Dr Lauren Reginald Special Advisor to the Minister e osi Mr Marty Vidot Personal Assistant to the Minister.  Minis avek ou delegasyon welcome dan Lasanble Nasyonal e mon ava toudswit pas laparol avek Leader Lopozisyon Onorab Ramkalawan.

 

HON WAVEL RAMKALAWAN

Mersi bokou Mr Speaker.  Bon apre midi Minis avek ou delegasyon e tou Manm.  Mr Speaker swivan konsern serye eksprimen par pasyan ki fer dyaliz Lopital Victoria konpare avek servis prive ki sa nouvo Sant pe ofer kot batiman ESPACE,  kot pasyan ouvertman i koz lo zot progre remarkab, eski Minis pour Lasante i kapab dir sa Lasanble (1); ki konplent ki i pe resevwar avek pasyan kot Lopital Sesel?

(2) Eski i satisfe avek servis enkli pri ki lakonpannyen AMSA pe donnen anba zot Kontra?

Trwazyenmman ki laranzman travay I annan ant Minister Lasante avek sa nouvo Sant Dyaliz?  E finalman eski Gouvernman I annan en nouvo plan pour servis dyaliz?  Mersi bokou.

 

MR SPEAKER

Mersi Onorab Ramkalawan.  Minis laparol i pour ou.

 

MINISTER JEAN-PAUL ADAM

Mersi bokou Mr Speaker.  Bon apre midi Mr Speaker, Leader Lopozisyon, Leader Zafer Gouvernman tou bann Manm Onorab e tou dimoun ki pe swiv nou deba mersi pour donn mon sa loportinite pour reponn sa bann kestyon.  Mr Speaker avan ki mon al en pti pe pli lwen permet mon eksprim nou kondoleans anver lafanmir Mr Ogilvy Berlouis ansyen Minis e ki’n kit nou ozordi malerezman.  E nou prezant nou kondoleans avek son madanm Madanm Maryse Berlouis e tou son fanmir e nou eksprim nou solidarite osi anver zot fanmir e mersi pour donn mon sa lokazyon zis pour mon prezant sa pti mo senpati.

Mr Speaker pour adres sa kestyon, mon ti ava swete tou dabor fer en pti pe –  en kontrandi lo kot nou sorti atraver bann servis dyaliz e nou ava apel ki dan Minister Lasante nou’n konmans servis dyaliz depi Zen 1992.  An 2014 nou’n konmans fer en renovasyon pour nou amelyor fasilite ki ti disponib.  E an 2015 apartir Avril nou’n antre dan en partenarya piblik prive avek lakonpannyen AMSA ki’n ed nou pour amelyor nou servis lo Mahe e osi lo Praslin.  E AMSA in fer lenvestisman an term lekipman me osi an term bann pratik.  E zot in fer lenplimantasyon serten protokol e osi akreditasyon trwa standar ISO e osi akreditasyon e sertifikasyon bann staff ki travay dan sa unit.

Nou ava rapel ki I annan 22 staff ki travay dan sa unit ladan i annan 15 ners e 7 teknisyen.  E parmi sa 15 ners 11 I Ners Seselwa e larestan I etranze.  Nou an se ki konsern la kantite pasyan aktyelman nou ariv 166 pasyan an total e sa I enkli 159 lo Mahe e 7 lo Praslin e nou fer apepre 2mil sesyon dyaliz par mwan atraver sa unit.

Nou ava note ki lo Mahe nou annan en sistenm shift akoz volim pasyan e premye shift I konmanse 5.30 bomaten apre midi apre nou annan en shift 10.30.  E apre nou annan shift 3.30 apre midi me vi la kantite shift e dirasyon parfwa sa dyaliz vedir ki serten dimoun parfwa I annan son sesyon en pe tar.

An se ki konsern bann konplet ki nou gannyen avek bann pasyan.  Sorti kot lopital Sesel petet premye konsern ki’n met devan, se difikilte pour bann pasyan ganny en loportinite pour fer zot dyaliz a en moman ki konvenab pour zot.  Akoz aktyelman nou donn sa servis dyaliz baze lo plizyer fakter.  Me I annan serten dimoun malerezman ki bezwen annan bann slots swa granmaten ki petet pa ideal pour zot.  Oubyen parfwa zot in la apre midi oubyen en pe tar aswar ki enkonvenyans zot vizavi; par egzanp I annan ki travay I annan ki prodiktiv dan nou sosyete e sa I bann konsern ki’n ganny met devan.

Nou fer sir atraver sa unit ki tou pasyan I ganny en lapwentman.  Me parfwa I annan bann ka irzans kot nou bezwen rearanze.  E aktyelman avek sa nouvo Sant Dyaliz Renesans ki disponib kot ESPACE.  Swivan lasemenn ronnyon kidney week ki ti ganny fer zot ti fer serten ofer avek serten pasyan pour donn zot pour nanryen pandan en serten letan akse avek zot servis dyaliz dan zot fasilite.  Depi ki nou annan serten pasyan ki pe al laba enn bann rezon ki nou pasyan in dir letan akoz zot prefere al laba plito ki dan servis lopital enn se sa kestyon lenkonvenyans.

Parfwa zot ler ki zot gannyen pour zot dyalize in annan osi serten konsern ki’n ganny met devan verbalman.  Kot I konsern kalite tretman kot zot santi kalite tretman ki bon kot sa nouvo Sant Dyaliz Renesans konpare avek sa ki AMSA pe ofer.

Minister nou’n demann bann promoter ki travay dan sa konpannyen.  Ki si i annan bann konsern ki konsern sa tretman spesifik ki en pasyan i gannyen i enportan ki sa i ganny dokimante e ki sa i ganny soumet formelman avek Minister Lasante.  Ki nou kapab revwar en pti pe sa bann kestyon sa bann ka spesifik pour nou vwar si i annan serten landrwa amelyorasyon i bezwen ganny fer.

E personnelman mon vwar serten pasyan ki’n met devan serten konsern.  E nou konsern ki nou annan ziska prezan se ki sa bann konsern sorti kot pwennvi medikal pa ankor ganny dokimante dan en fason sistematik e ekrir.  Ki nou pe fer lo nivo Minister Lasante se Lotorite Lasante Piblik Public Health Authority pe organiz en miting Zedi.  Sa semenn ant Renesans avek AMSA kot nou pour demann Renesans pour li dokimant bann ka, kot k santi petet ki nivo tretman dapre zot analiz I pa lo sa standar.

Pour le moman nou napa en levidans mon kapab dir konkret oubyen lobzektif pour dir ki I annan en mankman an term sa standar.  I enportan pour konpran ki dan tou tretman ki dokter pour fer I kapab annan bann diferan lopinyon ant dokter.  Sa pa forseman en meyer keksoz me sa ki enportan se bann dokter I koze zot partaz pwennvi e kot I annan en meyer pratik sa I ganny adopte e I ganny swiv.  I enportan osi pour note ki sa sant ki’n ganny etablir kot batiman ESPACE in ganny fer a labaz konman en sant prive avek bi prensipal pour viz touris medikal.

E son pri dapre son bann dokiman ki ti’n soumet atraver SIB atraver lazans lenvestisman son pri ti pour plis ki 300 Ero par sesyon.  Me in deside pour li fer sa lof anver nou bann pasyan mon krwar dan konteks son responsabilite sosyal.  E sa I pa en keksoz ki li Minister Lasante I kont – o kontrer nou anvi ki sekter prive I partisip dan devlopman lasante dan nou pei.

Me definitivman kestyon ki nou bezwen demande lo nou kote se ki mannyer nou asire ki sa servis ki zot pe ofer i kree problenm pour bann pasyan ki nou pa konnen kantite letan ki zot pour kapab benefisye atraver sa servis aktyelman ki pour nanryen.

E fodre nou konpran osi ki standar servis en fasilite parey sa enn kot Renesans kot ou annan mwens pasyan relatif avek staff ou pour annan en nivo servis ki pour meyer.  An se ki konsern eski nou satisfe avek servis e pri ki AMSA pe donnen anba zot Kontra.  Dan en fason zeneral Minister Lasante I santi ki servis dyaliz ki AMSA I ofer in ofer i permet nou amelyor standar dan nou Sistenm Lasante e dan en term zeneral bann nivo kalite in ganny mentenir.

Fodre note ki I annan de lodit ki pe ganny fer ki premyerman I annan odit ki’n ganny fer an se ki konsern pri par Biro Oditer Zeneral.  Me nou osi demann en 2enm odit an se ki konsern bann standar medikal e klinik sa ki nou apel bann clinical standards en Clinical Audit.

E sa pour ganny fer alafen Avril par en tim sorti dan en lopital renonmen Singapore.  E si ou permet Mr Speaker mon pour bezwen pas en pti pe lo rezilta sa lodit ki’n ganny fer par Biro Oditer Zeneral pour nou kapab byen ziz sa kestyon kou e son lefikasite vizavi nou sistenm.

Nou ava rapel ki aktyelman nou pe pey 200 Dolar pour sak pasyan kot AMSA avek en refund 5 Dolar pour en pri elektrisite.  Dapre odit ki’n ganny fer par Biro Oditer Zeneral zot kou ki zot in kapab analize en sesyon dyaliz I ariv 175 Dolar swa R2424mil.  E sa I enkli laplipar bann kou me Oditer Zeneral in note ki in pa’n kapab kalkil tou bann kou akoz I osi I an deor sa pri.  I annan kou par egzanp ki asosye avek delivre sa servis.  I annan osi kestyon bann staz depresyasyon avek bann batiman avek lenfrastriktir.

E bann kou spesifik pour maintenance ek servis bann masin dyaliz e lezot lekipman ki ganny servi dan sa unit.  La pli par sa bann sif ki mon site tou fason in ganny pran par Lazans Lasante.  Me I annan malgre sa I annan serten eleman ki pran kont par AMSA e Oditer Zeneral in note ki I difisil pour nou kapab idantifye dan en fason presi sa kou.  Me Lazans Lasante in neanmwen dakor ki sa pri debaz 175 Dolar ki’n ganny idantifye par Biro Oditer Zeneral I reflekte kou sa servis.

Me I enportan osi pour note ki si par egzanp Minister Lasante ti pour repran sa servis.  Son kou pour en pe pli o ki sa akoz I annan serten sa bann eleman ki mon mansyonnen pa kouver dan sa kou.  Swivan sa odit ki’n ganny fer par Biro Oditer nou annan lentansyon servi sa dokiman pour nou konmans en negosyasyon avek lakonpannyen AMSA,  pour nou adres osi serten lezot eleman ki devret ganny klarifye swivan sa rapor.  Petet mon pa devret al an detay ozordi lo tou sa bann diferan eleman akoz mon konpran nou pour diskit sa rapor osi dan FPAC en moman pli tar.  E ki nou ava kapab osi adres sa bann diferan kestyon.

Atraver sa negosyasyon nou ava kapab fer pli klerman lekel bann pri ki pour ganny fer par AMSA e lekel ki pour pran kont par Minister Lasante.

E nou servi sa baz sa Rapor Biro Oditer Zeneral pour sa re negosyasyon.  Nou osi note ki dan sa re negosyasyon nou pour pran an kont rezilta sa odit klinik sa odit medikal ki pour ganny fer lafen Avril.

E sa byensir nou pour bezwen pran sa an kont e nou pour pran an kont osi bann diferan lopinyon ki ganny donnen lo en pwennvi legal vizavi sa kestyon.  An se ki konsern bann laranzman travay ki egziste ant Minister Lasante avek sa nouvo Sant Dyaliz aktyelman Minister Lasante napa okenn Lagreman avek sa nouvo Sant Dyaliz.  Minister Lasante e sirtou Lotorite Lasante Piblik in ganny konsilte letan sa lenvestisman ti ganny fer.  E se Lotorite Lasante Piblik ki’n donn bann diferan standar ki ti neseser pour ganny enplimante pour sa lenvestisman ganny fer.  Pour asire ki I an konformite avek bann norm ki nou deza etablir.  Osi letan nou konsider sa moman letan Gouvernman in konsider sa lenvestisman.  Ankor enn fwa nou’n santi I ti en keksoz ki enteresan pour nou pei me I enportan pour note ki a sa moman lentansyon sa lenvestisman sete sirtou pour viz touris medikal.  E a en pri byen ki bokou pli o ki sa pri ki aktyelman nou pe peye.

An term sa lefe ki en fason enformel sa konpannyen Renesans in propoze ki Minister Lasante i anvoy pasyan laba.  Minister Lasante aktyelman pe fer en analiz an term nou Polisi aktyel pour vwar si I annan en lavantaz pour nou konsider ofer servis dyaliz lo en baz en pri.

E ki alor dimoun I kapab al dan nenport ki sant evantyelman petet I annan sant ki ganny fer lezot envestisman ki ganny fer.  Me mon fer kler ki pour le moman sa I en analiz Gouvernman pa ankor pran en desizyon lo sa size akoz I annan detrwa eleman ki nou bezwen gard an tet avan ki nou pran okenn desizyon.  Nou bezwen analiz tou bann diferan kote enn bann eleman ki nou bezwen gard an tet.  Se byensir ki mannyer ou pour deside ki pasyan ki annan sa nouvo fasilite ki pasyan ki reste kot lopital sa I en eleman ki bezwen ganny adrese dan en fason transparan.

I annan osi kestyon an term procurement si ou rod en servis avek en ot operater bezwen swiv bann demars selon Procurement Act.

E sa I baz ou bezwen annan tou dabor ou bezwen annan en Polisi e swivan si ou adopte sa Polisi ou bezwen vwar ki bann prosedir pour swiv atraver en call for proposers pour regarde si i annan operater ki kapab pour fer sa.  Nou note ki si nou pran la baz sa analiz se si ou annan en pri par pasyan e ki la kantite pasyan I reste plizoumwen parey nou pa espekte ki letan ou anvoy dan en lot Sant Dyaliz ki sa I ogmant kou.  Me mon krwar i enportan ki Lasanble I okouran sa bann diferan eleman ki nou bezwen gard an tet.  E ki nou pa kapab zis deside en zour ziska lanmen pour pran en desizyon parey.

Lot eleman ki enportan pour nou pran an kont e sa i lir avek 4enm parti sa kestyon se eski i annan nouvo plan pour servis dyaliz?  Premyerman lakonpannyen AMSA in deza konmans travay renovasyon lo en nouvo fasilite adisyonnel pour dyaliz ki en 16 masin adisyonnel.  E sa pour azoute avek sa 26 ki deza an operasyon.  Nou kapab note ki la kantite pasyan lo dyaliz in kontinyen ogmante.  Mon pran not dan diferan deba ki enn bann pwen ki’n ganny fer sorti se ki si nou konsider par egzanp anvoy en pasyan dan en lot Sant Dyaliz.  E sa Sant Dyaliz i kapab redwir la kantite sesyon ki en pasyan i fer.  Ki sa i kapab redwir kou dan en fason wi me lo lot kote ou bezwen vwar byen lo en baz medikal.  Eski ou pour kapab redwir sa nonm sesyon pour lonterm akoz an zeneral si en pasyan I lo dyaliz pour lonterm standar se 3 sesyon par semenn.

I en keksoz ki nou ava osi adrese letan nou fer sa odit klinik pour vwar si I annan lezot fason ki nou kapab redwir la kantite sesyon ki ganny fer.  Alor sa lenvestisman pour ganny fer sa lannen I sipoze ganny konplete avan 3enm kar sa lannen.

An se ki konsern osi lezot laranzman pour dyaliz se ki Minister Lasante I annan lentansyon atraver nou plan lopital devlopman Sant Lasante pour regard posibilite pour ofer servis dyaliz dan lezot parti Mahe.

Sa i enkli par egzanp enn pour Sid ki idealman ti pour sitye kot Lopital Anse Royale.  E ki permet redwir deplasman ki dimoun I bezwen fer.  E I annan osi posibilite nou revwar si I annan lezot landrwa ki nou kapab vwar pour nou desantraliz sa servis dyaliz.

Mr Speaker sa labaz larepons ki nou ki nou pe mete lo sa kestyon.  E zis pour dir ki akoz mon swiv osi Mr Speaker dan sa detrwa zour bann deba ki’n pase dan sa Lasanble.  In tous lo pour servis lasante pour dir ki mon apresye bann Manm Lasanble pe regard Sekter Lasante.  Me mon bezwen osi Mr Speaker koz lo lapar bann travayer lasante.  Akoz nou servis lasante pour nou amelyor li I bezwen baze lo en lapros baze lo levidans.  E sa I vedir ki nou mezir nou sikse dan Sekter Lasante baze lo levidans ki ganny fer swa atraver an odit.  Atraver bann statistik ki ganny anmase atraver bann evalyasyon bann protokol.

E mon konnen ki travayer lasante serten ki’n apros mon e ki’n koz avek mon letan zot in tann bann deba.  Zot pli gran konsern sete ki lo bokou kestyon Manm Lasanble i sanble zot pa pe konpran labaz servis lasante ki nou pe met an plas dan nou pei.  Akoz enn bann pwen ki’n sorti i annan dimoun ki’n dir Sistenm Lasante in fail.  Me en Sistenm Lasante pa pe fail si tou le lannen ou pe vwar amelyorasyon atraver bann rezilta ki sorti dan sa sistenm.

E Mr Speaker i enportan pour mon fer sa pwen akoz dan tou eleman e dan sa kestyon ki nou pe debat ozordi nou bezwen pran li lo en lapros levidans.  E bann travayer lasante zot pour touzour pare pour zot defann nenport keksoz ki zot fer lo labaz levidans.  Mon note ki Leader Lopozisyon li menm li par egzanp in sit serten pwen pli boner ozordi.  E ki nou’n vwar par egzanp ki …

 

MR SPEAKER

Minis en moman.  Yes Onorab Ramkalawan.

 

HON WAVEL RAMKALAWAN

Mr Speaker.  Minis in sipoze vin reponn en kestyon ki devan soz.  I pa’n envite pour li vin partisip dan deba ki Lasanble in fer.  Si I anvi partisip dan deba la prosenn fwa letan i annan Eleksyon Lasanble i ava met son kandidatir i ava vin en Manm Lasanble.  Mersi bokou.

 

MR SPEAKER

Ok, bon.

 

MINISTER JEAN-PAUL ADAM

Mersi Manm Onorab pour sa klarifikasyon.  Mon krwar sa bann size ki mon pe adrese i adres osi sa kestyon ki mon pe koze akoz i koz lo levidans.  Mon apresye sa pwen ki in dir e mon ava sizere ki mon ava swiv lenvitasyon Leader Zafer Gouvernman ki in sizere ki mon vin fer en Statement.

Par egzanp lo en plan Lopital lo kot nou pe ale an term nou bann Plan Lasante.  Akoz bi se pour nou anmenn tou bann Leader politik ansanm pour nou kapab montre osi avek nou travayer lasante ki nou konpran sa zefor ki zot pe fer.

E mon ava servi sa provizyon e mon krwar Onorab Ernesta osi ti demann fer sa sizesyon e avek lakor Speaker mon ava demann sa plitar pour en lot zour.  Me mon pwen ti sirtou pour dir Mr Speaker annou adres tou size Lasante pour labaz levidans.  Mersi Mr Speaker.

 

MR SPEAKER

Mersi Minis.  Anba Standing Order and all that ou annan sa privilez pour ou vin fer Statement dan Lasanble apre ou a kapab enterakte avek bann Manm.  Yes Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mersi Minis pour ou larepons.  Petet Minis I ava sirprann pour konnen ki poudir se prensipalman bann travayer lasante ki kontakte bann MNA pour nou anmenn sa kalite kestyon.

Mr Speaker mon premye kestyon se pour demann Minis.  Ki prosedir ki son Minister pe fer pour swazir bann pasyan ki al fer tretman kot sa nouvo Sant Renesans?  E ki maximum kantite pasyan ki zot santi ki zot kapab anvoy laba kot sa sant?

Dezyenmman, eski Minis I kapab dir avek nou si dan sa analiz ki zot pe fer vi ki sa nouvo sant e mon pa pe vin fer okenn kanpanny pour nouvo sant.  Me zis pe balans bann pri ki bann pasyan dyaliz zot menm zot in kontakte mon pour donn mon.  Baze lo levidans mon kapab donn ou non Mr Allain Savy ki’n kontakte mon tre konsernen avek zafer dyaliz.  Kot laba zot pare pour sarz 190 Dolar pour en sesyon ki mwens ki sa ki AMSA pe propoze.

Si ki son Minister pour fer an relasyon avek sa pour aksepte en pli bon deal?  E apre mon anvi ankor enn fwa baze lo levidans, eski Minis I kapab dir avek nou ki kalite dialyser (mon krwar mon ganny li byen ki mannyer I pronons li.  Ki kalite dialyser ki AMSA pe servi kot Lopital Victoria?  Akoz dapre levidans se sa ki fer diferans, kot nouvo sant pe servi sa nouvo sant pe servi en dialyser ki Bbronm e sa I pour 80erdtan.  E se pour sa rezon ki pasyan parey Mr Allain Savy ki avan ti a pe fer 3 sesyon dyaliz Lopital Victoria.  Sant Dyaliz Lopital ozordi I a pe fer zis 2 ki son nivo Creatinine in desann sorti 1200 pour vin 250.  Ki la kantite lirin ki in pase in sorti 250mililit pour vin 1250 baze lo levidans.  Alor eski Minis I kapab dir avek nou si sa bann dialyser ki pe servi lopital I pa bann dialyser ki son standar I pa lo sa nivo ki kapab ed bann pasyan dan en fason pli efektiv?  Mersi bokou Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi bokou Leader Lopozisyon Onorab.  Mon ti a kontan zis ou klarifye.  Mwan osi letan mon pe koz dan sa Lasanble mon pe vin koz lo bann pwen ki bann travayer lasante i met devan mon.  E zot konsern se si nou koz deba par egzanp lo nou Sistenm Lasante ki enportan ki nou regard bann statistik par egzanp zot menm zot in donnen.  E mon tann Leader Lopozisyon taler dir ki par egzanp nou bezwen regard pour nou anvoy dimoun deor pour orthopedic kan 97poursan orthopedic i fer isi Sesel.  Deza ozordi bann statistik ki bann travayer lasante zot menm zot in fourni.  Alor tou bann pwen ki mon vini dan Lasanble e pour mwan defann sa lentegrite bann travayer Lasante e sa ki zot fer toulezour.

 

HON WAVEL RAMKALAWAN

Mr Speaker i pa per reponn mon kestyon.

 

MINISTER JEAN-PAUL ADAM

Mr Speaker an se ki konsern…

 

MR SPEAKER

Minis.

 

HON WAVEL RAMKALAWAN

Reponn kestyon ki ou ganny demande pa vin fer statement!

Reponn kestyon ki ou ganny demande pa vin fer statement!

……..

 

(Interruption)

 

MR SPEAKER

Ok.  Order!  Order! 

 

MINISTER JEAN-PAUL ADAM

Mon ava pran kestyon Mr Speaker?

 

MR SPEAKER

Minis reponn kestyon.

 

MINISTER JEAN-PAUL ADAM

Mon ava kontinyen?

 

HON WAVEL RAMKALAWAN

Reponn kestyon.

 

MINISTER JEAN-PAUL ADAM

Premye parti kestyon, Mr Speaker, se ki mannyer bann pasyan i ganny selekte?  E petet Onorab pa’n tro byen konpran mon premye lentervansyon akoz aktyelman Gouvernman Minister Lasante, pa pe anvoy okenn pasyon kot Renesans.  Renesans  li menm li in fer sa demars vizavi bann pasyan endividyel dam konteks mon krwar si mon pa tronpe mon krwar in komans dan Lasemenn Ronnyon Kidney Week kot i en Zournen Enternasyonal marke par Lorganizasyon Mondyal pour Lasante e zot in ofer avek serten pasyon en sans kot pou zot komans servi fasilite kot Renesans.  Alor se pa Minister Lasante ki’n anvoy zot laba se en seleksyon ki ganny fer mon kapab dir ant en pasyon ki’n al laba pou li seye e sa lorganizasyon ki’n avi demontre servis ki i kapab fer.  E napa okenn lyen direk ant Minister Lasante e avek sa lakonpannyen prive.

An term sa analiz parey mon’n eksplike anter m sa Polisi ki nou pe fer, ti se en bann kestyon kle ki monte se si evantyelman ki Gouvernman ti pou anvoy pasyon laba lo ki baz sa bann pasyon i ganny selekte pou anvoy laba e sa i en kestyon aktyelman ki ganny deba atraver bann profesyonnel.  E nou avan vwar ki bann opsyon ki annan.

Dezyenm an se ki konsern pri, Mr Speaker an se ki konsern Minister Lasante se ki nou anvi se ki i annan bon kalite dyaliz ki dan en fason zeneral nou kapab dir ki ek sa nouvo sant nou fer bon kalite dyaliz sanson i pa ti pou ganny son License akoz in ganny evalye par Lotorite Lasante Piblik.  E nou lentansyon se al vwar si i annan sa servis lo en pri konpetitif.  An se ki konsern sa pri 190 Dolar zot pa’n ekrir Minis Lasante pou dir zot in pare pou fer sa me verbalman zot in pas mesaz pou dir zot in pare pou match pri ki zot annan avek AMSA.

Me Mr Speaker i enportan osi pou nou regard sa kestyon dan konteks sa re negosyasyon ki mon’n koz lo la ki nou demande pou nou fer vizavi AMSA akoz si nou al lo labaz Oditer Zeneral ki dir kou debaz i 75 Dolar mon ekspekte ki nou annan en  pti ogmantasyon lo la akoz sa i bezwen – sa i kou; i  pa pe enkli profi i pa pe enkli detrwa lezot eleman ki dan Rapor Oditer Zeneral i adrese.  Nou ekspekte ki i en pti pe pli o ki sa, alor ki kantite mon pa sir.  Me sa osi i bezwen ganny adrese atraver en Clinical Audit ki pou ganny fer.  E alor lentansyon an term Minister Lasante nou bezwen adres sa kestyon lo renonsyasyon avek AMSA lo premye faz avan ki nou konsider lo si sa Polisi i fezab pou nou kapab outsource avek lezot operater nou bezwen ganny pri ki nou konfortab avek e ki reflekte larealite.

An sa ki konsern bann dialyzer, aktyelman dan Unit Dyaliz Lopital Victoria nou annan tou lede Brand.  Nou annan Bbronm e nou annan Frenesius e sa i tou lede i bann konpanny renonmen tou lede i bann konpannyen Alman e bann kontinyen renonmen en term masin Dyaliz.  Mwan osi mon’n ganny serten repar avek serten pasyon enkli Mr Savy ki ni dir ki i vwar en amelyorasyon atraver son  tretman ki i pe swiv kot Renesans.  Fodre nou note ki i enpotan pou nou kapab fer en assessment eski sa in arive akoz en diferans akoz dan tretman?

Mon krwar pa akoz baze lo lekspertiz bann profesyonnel  travayer Lasante ki baze lo sa masin li menm; akoz sa masin i similer.  Akoz serten sa bann sa masin Bbronm ki nou annan dan Lasante i menm masin ki zot annan laba.  Bon petet mon pa konnen si zot annan en diferans son spesifisite son masin me an gro i plizoumwen menm masin.  Sertennman sa ki mon krwar i en fe se ki letan ou annan en swivi pli direk avek en dokter ki pa pe bezwen adres preski 166 pasyan an menm tan zot annan mwan pasyon ou annan en swivi ki pli personnalize.  Ok?  Alor mon krwar a sa staz kestyon se ki vreman i annan?  E amelyorasyon a lonterm an term son tretman oubyen eski i annan serten amelyorasyon atraver en petet en pti pe en meyer servis dan lemisyon.

Sa i en kestyon ki petet Renesans nou pou ganny sans pou li adrese e nou pe demann li pou li dokimanter bann dokter i kapab menm adres bann kestyon konfidansyel en pasyon akoz tou sa bann pasyan ki’n al kot Renesans zot osi bann pasyon kot Unit Dyaliz kot Lopital Victoria.  E alors dan sa meeting zot ava ganny sans dokimant bann konsern oubyen osi par egzanp si i annan serten pasyan ki’n fer gran amelyorasyon pou zot osi edike atraver sa tretman kwa ki’n fer sa gran amelyorasyon, dokimant li.  E par egzanp Minister Lasante si atraver sa nou vwar poudir i annan en mankman vizavi lapros ki AMSA pe fer, nou kapab adres sa atraver  kontak ki nou annan avek zot nou kapab adres sa osi atraver sa Clinical Audit ki pou ganny fer.  Mersi Mr Speaker. Mersi Onorab.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi Mr Speaker.  Mr Speaker zis an pasan mon anvi dir avek Minis ki in mal quote mwan letan in fer son deklarasyon an relasyon avek orthopedic E alor ganny son levidans byen.  Mr Speaker, eski Minis i kapab dir Lasanble ki pou arive avek bann pasyon ki la pou le moman zot fer tretman kot zot pe fer dyaliz kot Renesans e vi ki in dir ki ti pou en baz lenvitasyon e vi ki zot in komans sa tretman laba eski Minister i annan en desizyon ki zot in pran lo si zot pou kontin byen pey pou sa bann pasyon kontinyen fer zot tretman vi ki la zot in sanze ki kout anviron 190 Dolar?

E dezyenmman Mr Speaker, sa Rapor ki Minis in fer referans avek ki zisteman FPAC ti’n demann Oditer Zeneral pou fer sa Rapor lo la, mon ti ava kontan konnen ki Minis i annan pou dir lo paz 2 limero 2; ‘scope for reductions to better management’ kot Oditer Zeneral, i fer kler ki poudir e mon ava lir li egzakteman parey in  mete ki poudir the likely cost reductions through better management could be in the region of some R16million per annum e i konpran sa avek sa ki Onorab Afif ti dir letan nou ti pe regard Bidze Minister Lasanble kot i ti mansyonnen ki with better management Minister Lasante ti a kapab fer en savings anviron R16milyon a R20milyon.

Eski pa i kler alor ki poudir atraver sa Rapor, atraver bann findings ki poudir ozordi nou pa pe gannyen en bon deal avek AMSA E ki nou pe pey zot an ekse?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker, e mersi Onorab Leader Lopozisyon.   An se ki konsern sa scope for reduction of cost, parey mon ti dir letan nou ti fer deba lo Bidze, nou ti agree ki i annan lespas pou redwir kou definitivman, e dan Rapor Oditer Zeneral in koz lo serten bann management measures ki nou kapab met an plas, ki nou kapab adres sa.  E osi mon krwar re negosyasyon sa Kontra kot i kler responsabilite enn ek lot i pou ed nou.

Me an term sa sonm 16milyon ki Oditer Zeneral in idantifye e mon krwar petet ou’n tronpe an term sa ki Onorab Afif in dir akoz I ti sit.  Mon regard Verbatim dan deba Bidze i ti sit son sonm ant 100 Dolar a 125 Dolar.  Alor mon krwar si ou pran sa equation mon krwar pa si ou ti dir R16milyon akoz i pa ti pour match.  Mon konnen I ti dir pour annan en saving, me selman sa sif se pa li.

An term lo sa response ki Lazans Lasante in fer vizavi Rapor Oditer Zeneral Lazans Lasante in kanmenm note ki annan serten kou.  Alor par egzanp akoz sa Rapor ki Oditer Zeneral in fer in dir ki si nou pour repran par egzanp sa servis lo kote Minister Lasante ofer li nou menm son kou debaz i 175 Dolar par tretman.  Me i annan serten eleman ki pa kouver dan sa 175 Dolar e sa in ganny dir dan sa Rapor Oditer Zeneral osi.   E alor Lazans Lasante dan son larepons in dir ki si nou enplimant sa bann rekomandasyon ki’n ganny mete dan sa Rapor.  E osi si nou re negosye sa Kontra avek AMSA lo labaz sa 175 Dolar ki pri debaz.  Nou kapab annan en amelyorasyon me ki nou pa espekte ki 16milyon i total konplet pour sa saving.  Me neanmwen si i annan en saving parey nou ti agree osi dan Bidze, ki osi sa larzan si i annan en saving.  Sa larzan i ganny mete lo lenplimantasyon bann Schemes of Service.  Mersi Mr Speaker.

 

MR SPEAKER

Mersi.  Yes Onorab.

 

HON WAVEL RAMKALAWAN

Zis en pti bout lo bann pasyan.  Si Minister pour…

 

MINISTER JEAN-PAUL ADAM

Wi Mr Speaker e Onorab Leader Lopozisyon.  Ankor petet I annan en move konpreansyon akoz Minister pa’n zanmen peye pour sa bann pasyan al Renesans.  I kler sa.  Nou pa’n -Gouvernman pa’n zanmen peye pour zot al Renesans.  Renesans in ofer zot sa pour nanryen mannyer mon konpran konman en incentive pour zot kapab dekouver sa servis.

E bon letan mon pe dir zot pa pe peye petet i annan pasyan ki pe peye.  I annan pasyan petet i annan mwayen sa mon pa sir.  Selman bann pasyan ki mon vwar ti annan apepre 6 zot ki ti vin vwar mon parmi zot ti pe ganny sa gratwitman pour sa bann ki’n vin vwar mwan.

E alor pour kontinyasyon zot tretman kot I konsern nou Unit Dyaliz.  Letan sa dimoun I mank 2 sesyon dyaliz nou tir li lo Roster akoz nou kapab donn sa slot avek en lot dimoun ki petet dan plas al en pe tar nou kapab met li en pti pe pli boner.  I vin en lavantaz pour sa dimoun ki lo dyaliz.  Me sa pasyan i reste son rikord i reste la e letan I retourn kot nou I dir ki I anvi retourn dan nou sistenm.  Nou re entegre li dan sistenm tretman e son dyaliz dan Unit Dyaliz kot Lopital.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Wi be zisteman sete sa pwen ki Minis i klersi e i pa pe klersi.  Si i annan sa bann pasyan ki ozordi zot pe fer zot tretman laba baze lo sa sistenm volonter ki mon konpran ki Minister peye.  Me apre sa dizon i ariv en pwen e zot satisfe avek tretman ki zot gannyen.  E aprezan I ariv en pwen kot Renesans i dir avek zot be regard sa.  Zot in fer tretman avek nou pandan 6mwan be la nou pour nepli kapab kontinyen fer li pour nanryen fodre nou kontinyen peye.  Se la kot nou pe demande lefe ki zot in konmanse tretman i bon zot satisfe zot pe fer mwens sesyon.  Eski Minister i pare pour pey pour zot kontinyen fer zot tretman laba?  Se sa ki mon kestyon.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Onorab mersi Leader Lopozisyon.  Sa kestyon nou pe adres li lo sa analiz Polisi entern dan Lasante ki nou pa ankor reponn sa konpletman pour bann rezon ki mon deza site.

Akoz premyerman se atraver bann Polisi ou bezwen annan en baz lo ki ou kapab refer sa dimoun.  Ou bezwen annan en striktir, en gidans en Polisi, ki dokimante pour ki mannyer ou refer sa pasyan laba vizavi sa lot pasyan ki reste isi.  Bon i annan plizyer eleman ki nou pe regarde ki bann opsyon.

Apre dezyenmman parey mon deza dir i osi liye avek sa kestyon AMSA alor nou anvi adres sa kestyon revi dan Kontra avek AMSA.  Adres sa kestyon pri pey sa pri ki nou sipoze pe peye sa pri ki koresponn avek vre ki nou annan ki sa I kler.  Akoz si par egzanp 190 Dolar par egzanp avek Renesans me apre ganny en pri pli ba avek AMSA?  I pa pour fer sans mon krwar nou bezwen fikse sa pri e a sa moman la lapros ki nou pe pran nou bezwen regard li lo sa kote sa kote si I fezab an term Polisi.  E sa i en kestyon ki nou pe konsilte bann profesyonnel Lasante menm.  Akoz mon konnen osi ki par egzanp pour bann travayer Lasante ki dan Unit Dyaliz I osi administrativman aktyelman zot pe ganny en kantite presyon.

Anler ou annan en pasyan ki vin en zour kot zot I al laba mon krwar plizoumwen in stabiliz en pti pe.  Me lo konmansman ti fer en bon pe presyon lo sa bann staff dan Unit Dyaliz.  E osi lo konmansman parfwa ti annan mon kapab dir en mank kominikasyon ki sa miting ki pour fer Zedi pour osi adrese.  Pour nou kapab fer sir ki bann dokter kot Renesans pe pas byen lenformasyon si zot annan en problenm sa pasyan I annan en problenm ki sa lenformasyon ti osi ganny pase avek Lopital.  Akoz nou ava rapel ki servis ICU tou bann servis irzans I reste dan Lopital.

Nou kapab annan en sant an deor Lopital pour dyaliz me I pa pour tou pasyan.  Tousala I bann eleman ki nou kapab regard dan sa analiz Polisi.

Apre 3enm pwen ki enportan se an term procurement.  Alor mannyer mon konpran letan mon konsilte avek Minister Finans letan nou pour fer sa analiz polisi lo nou kote se premyerman nou bezwen adopte en Polisi kler lo kote Gouvernman.  Pour le moman nou Polisi se ki dyaliz i ganny fer atraver servis dan Lopital Sesel.  Alor si nou revwar sa Polisi apre la ou annan sa opsyon pour regarde si i annan lezot operater ki kapab fourni sa servis.  E apre ou bezwen etablir sa pri e sa I lye avek sa travay ki nou fer avek AMSA.  Mersi Onorab.

 

MR SPEAKER

Mersi Minis.  Onorab Esparon.

 

HON REGINA ESPARON

Mersi Mr Speaker.  Eski Minis i kapab dir nou e konfirmen ki AMSA pe fer vini zis bann emergency order?  E dir nou ki difikilte ki zot pe rankontre pour stok bann prodwir parey legan, sereng, normal saline?  E ki sa bann prodwir pe ganny fourni par Minister Lasante?  E menm dressing pack Health Care Agency ki pe fourni zot e zot pa pe peye.  De lot kote eski Minis I kapab eksplik nou baze lo sa kontra ki AMSA in sinyen avek Minister Lasante an 2012, kot bann staff ki atase Hemodialysis Center ti sipoze reste lo payroll Health Care Agency.  E sa ti pour ganny ranbourse par AMSA e ziska prezan zis anviron R7milyon ki’n ganny ranbourse.  Eski Minis i kapab dir nou konbyen larzan ki AMSA i ankor dwa Minister Lasante?  E ki Minister pe fer pour rekiper sa bann det avek zot?  Mersi.

 

MR SPEAKER

Mersi Onorab Esparon.  Minis.

 

MINISTER JEAN-PAUL ADAM

Mersi Mr Speaker e mersi Onorab pour ou kestyon.  An se ki konsern bann diferan prodwir ki ganny enporte, alor in annan serten moman kot par egzanp in annan petet en mankman kot Minister Lasante par egzanp in ensiste.  A lenvers osi in annan sityasyon kot AMSA in annan e nou’n napa.  E fodre nou gard antet ki nou ti annan en serten en kantite lekipman en serten kantite consumables ki nou ti deza aste oparavan dan Minister Lasante.

E pour sa bann materyo pour sa bann medikaman pour sa bann lekipman pa gate pour sa bann consumables pa gate.  Nou’n fourni sa avek AMSA e AMSA in ranbours nou valer sa bann diferan kou.

Alor wi in ariv de diferan in ariv en serten moman kot in annan serten larzan ki AMSA ti dwa Gouvernman mon pa sir lo sa sif R7milyon akoz mon pe sey rod sa bout dan sa dan Rapor Oditer Zeneral.  E pour le moman mon pa’n kapab trouv li akoz mon pa rapel sa sif egzakt.  (Me pardon ki paz?)  Paz 5.  Ok mon pa kapab konfirmen ki sa in fini ganny peye, me akoz sa in ganny idantifye dan odit sa size in fini ganny leve avek AMSA.  Invoice in fini ganny anvoye mon pa kapab konfirmen si in ganny peye mon kapab verifye apre vin kot Lasanble.

Me nou mon krwar sa ki nou kapab tire konman konklizyon dan sa odit se bann striktir pour nou revwar lenplimantasyon sa Lagreman i bezwen ganny ranforsi.  Ki permet nou dan en fason pli sistematik adres sa bann kestyon me sa ki nou’n kapab vwar dan sa odit osi.  Se ki malgre a sa moman i annan larzan ki’n ganny drwa lo tou lede kote me ki evantyelman nou’n kapab raise sa bann invoice e fer sir ki sa bann peyman i ganny fer.  Me mon ava konfirmen spesifikman sa sonm R7.7milyon si in ganny peye.  Mersi.

 

MR SPEAKER

Mersi Minis.  Onorab Esparon.

 

HON REGINA ESPARON

Mersi Mr Speaker.  Minis petet ou ti kapab eklersi nou poudir nou ki bann difikilte ki AMSA i rankontre konmsi.  Ki bezwen fer vini zis bann emergency order e mazorite letan i pe servi bann prodwir Minister Lasante.  Ki kalite difikilte zot pe rankontre?

 

MR SPEAKER

Mersi Onorab.  Minis.

 

MINISTER JEAN-PAUL ADAM

Non Mr Speaker e mersi Onorab.  Me mon pa krwar sa lenformasyon I azour e i korek.  Petet a en serten moman zot ti fek konmanse petet ti annan serten difikilte me aktyelman sa i pa le ka.  Mersi.

 

MR SPEAKER

Mersi Minis.  Onorab.  Yes Minis.

 

MINISTER JEAN-PAUL ADAM

Eskiz mon Mr Speaker.  Eskiz mon Onorab malerezman mon pa’n reponn kestyon lo staff akoz annefe aktyelman bann staff Minister Lasante.  Zot ganny segonde dan unit dyaliz savedir zot reste lo payroll Minister Lasante.  E annefe AMSA i ranbours nou pour sa kou sa staff ki nou peye.  Byensir nou annan bann staff osi bann staff etranze ki’n ganny rekrite par AMSA.  E zot ganny peye direk zot pa lo payroll Minister Lasante.  Me bann ners zot benefisye avek nou Scheme tou bann lavantaz ki annan dan nou Scheme zot osi zot gannyen parey tou lezot Ners.  Mersi Mr Speaker, mersi Onorab.

 

MR SPEAKER

Mersi Minis.  Onorab John Hoareau.

 

HON JOHN HOAREAU

Mersi Mr Speaker.  Bon apre midi Mr Speaker bon apre midi Minis avek ou delegasyon.  Mr Speaker mon ti ava kontan si Minis ti ava dir nou an zeneral si I satisfe avek AMSA ki mannyer I a pe delivre dapre son Lagreman?  E an pasan mon ti ava kontan osi konnen si par egzanp sa Lagreman in koz lo touris medical tourism ki AMSA ti sipoze anmennen.  Eski I annan okenn larzan ki’n ganny remet avek Gouvernman Sesel lo lapar AMSA pour tret bann touris?  Mersi.

 

MR SPEAKER

Mersi Onorab Hoareau.  Minis.

 

MINISTER JEAN-PAUL ADAM

Mersi Mr Speaker.  E mersi osi Onorab.  An se ki konsern lenplimantasyon sa lakor dan en fason zeneral.  Parey mon deza dir enn bann eleman se ranforsman sa bann mekanizm e bann verifikasyon e swivi met sa fason.  Sa fason ki nou met an aplikasyon sa Lagreman.

Me osi I neseser pour nou revwar sa Lagreman konpletman pour get sa e fer li kler dan son Lagreman.  Akoz I annan serten eleman ki adrese I annan serten eleman ki I pa adrese selman an pratik nou pe fer li.

Apre lot parti ou kestyon an term bann overseas dialysis nou’n ganny 70 nou ganny 70 pasyan 70 sesyon an 2017.  Sa I dernyen sif ki mon annan ki’n ganny fer pour bann pasyan etranze e mon pa’n kapab fer sa kalkil en pti pe vitman.  Me nou ganny 100 Dolar pour sak pasyan.

Mon krwar I annan serten larzan ki manke an term 2017 ki nou pe lev sa kestyon avek AMSA.  Pour nou fer sir ki sa I ganny peye baze lo sa kantite pasyan ki’n ganny ki ganny refer.  Nou ava osi note ki enn bann pwen dan Lagreman ki’n ganny fer sorti dan lodit se ki aktyelman nou si napa okenn pasyan ki vini, then AMSA i kapab pey nou en sonm konman konpansasyon ki napa okenn pasyan.  Me I annan pasyan ki pe vini me aktyelman parey mon dir nou’n fer 70 sesyon.  Me sa kantite ki pe vini I pa koresponn avek sa ki nou ti pe espekte e dan revizyon Lagreman nou le fer sa Lagreman dan sa Kontra pli kler.  Mersi Mr Speaker e mersi Onorab.

 

MR SPEAKER

Mersi Minis.  Onorab Aglae.

 

HON EGBERT AGLAE

Bon apre midi Mr Speaker.  Bon apre midi Minis ek ou delegasyon.  Minis mon annan 2 pti kestyon.  Premyerman baze lo ou bann larepons ki ou’n donnen swivan repons limero 1 mon ti a kontan demann ou si ou Minister a lavenir pou konsider antre an partenarya avek sa Sant Renesans kot i ava ede tir en pe presyon lo Sant Victoria – Lopital Sesel?

E dezyenmman ler ou pe kontan servis ki Sant Dyaliz Lopital Victoria pe donnen sa i konpri depi al sers sa pasyan kot i reste; ler ou pe kontan servis ki ou pe donnen e sa ki petet ou okouran Sant Renesans pe donnen ki mannyer ou Minister li menm li i kapab antre an konparatif avek sa 2 servis?  Mersi.

 

MR SPEAKER

Mersi Onorab Aglae.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  An term sa kestyon lo si nou kapab al ver sa nouvo sant?  Ankor i liye ek sa analiz ki nou pe fer, i annan sa kestyon ki kriter nou kapab servi pou refer pasyan. Kestyon otour odit AMSA e son pri ki vin avek e osi kestyon procurement.  Sa 3 eleman i kapab definir si sa i posib oubyen non.

An se ki konsern similarite servis, nou [pa ankor fer en analiz pou nou konnen eski sa i zot fer i parey?   En keksoz ki ou’n site ki mon krwar i enportan pou note se ki anba nou Kontra avek AMSA aktyelman zot al sers dimoun kot zot, zot anmenn zot kot Lopital; i annan manze.  Nou pa ankor fer sa assessment avek Renesans.  Mon  tande poudir son servis i bon.  Me mon pa krwar pou le moman zot annan sa servis al sers dimoun dan lakour.

Lot eleman pou nou garde anter se ki Renesans letan i ti etabli son servis, sa ti ganny fer atraver koman en lenvestisman pou touris medikal.  E sa pri zot in dir zot kapab fer sa pri menm parey ki zot pe pey AMSA me baze lo bann dokiman ki in soumet avek SIB sa i pa son vre pri.  Son vre pri i bokou pli o ki sa.  Me an term mon krwar pou zot ganny serten kliyantel zot in pare pou fer pri spesyal vizavi Gouvernman si nou ti pou enterese.  Ankor enn fwa mon dir sa i en kestyon, bann keksoz ki’n ganny site dan en fason verbal; dan en fason enformel pa forseman atraver en lapros sistematik.

Me Minister Lasante kot nou ete aktyelman nou pe fer sa analiz Polisi a lentern nou Minister e swivan sa nou pou pran en desizyon pou si i fezab pou nou ofer sa servis avek bann lezot Sant Dyaliz oubyen non.

Mersi Mr Speaker.  Mersi Onorab.

 

MR SPEAKER

Mersi Minis.  Onorab Aglae.

 

HON EGBERT AGLAE

Mon annan en pti follow-up question Minister.  Minis mon pe met en konparezon devan ou.  I annan pasyon parey Onorab Ramkalawan in nonm en Mr Savy ki’n al laba in satisfe.  E nou, nou konnen poudir Minister Lasante li, i garanti en lasante ki gratwit.  Servis Dyaliz.  Si demen Mr Savy i deside e AMSA parey in dir in ariv 6 mwan i dir  be la mon pe nepli donn free services, e li Mr Savy i refize vin kot Minister Lasante vi ki nou pe donn lasante pou nanryen parey nou pe dir, eski Gouvernman pou annan en swa kot i pou bezwen entervenir pou anpese ki Mr Savy i perdi son lavi akoz i anvi kontiny sa servis kot Renesans?  Mersi.

 

MINISTER JEAN-PAUL ADAM

Fer sa dan Lopital – dan Lopital Sesel akoz tousala I azout lo kou e tousala i bezwen ganny analize pour nou kapab pran en desizyon.  Me sa ki nou kapab dir se ki en pasyan ki lo dyaliz si sa pasyan i lo dyaliz I pour bezwen swiv en Sistenm Dyaliz en fason ou en lot.  E nou ti ava voudre kapab ofer meyer servis pour tou dimoun me nou annan serten kontrent osi konman en sistenm ki pour nanryen konman enn ki gratwit kot dimoun i servi li.  E nou bezwen balans sa nesesite pour annan pli bon kalite posib e osi annan en servis ki konvenab e ki osi ekitab.  Akoz mon pa kapab osi nou pa pour kapab defann osi ki nou ofer de kalite servis.  Nou bezwen ofer en servis konparab dan nou pei.  E si sa pour fezab oubyen non pour depan lo rezilta sa analiz lo fason ki nou mezir ki nou regard lafason ki sa tretman I ganny fer dan sa diferan landrwa.  E vwar ki mannyer nou kapab konpare pour nou kapab fer sir ki nou annan en fason ekitab ki nou kapab konpare.  Mersi Onorab e mersi Mr Speaker.

 

MR SPEAKER

Mersi Minis.  Onorab Gervais Henrie.

 

HON GERVAIS HENRIE

Mersi Mr Speaker.  Bon apre midi tou dimoun.  Mr Speaker Minis in dir nou ki pour annan bann sanzman neseser dan nivo servis I enportan ki I annan levidans avek sa ki nou apel evalyasyon protokol.  Me an menm tan Minis in admet ki serten bann pasyan in koz avek li direkteman, e la mon prezimen ki zot in met serten konplent lo servis Sant Dyaliz.  Serten sa bann konplent se ki AMSA in redwir son servis konsiderableman konpare ler zot ti konmans zot kontra an 2012.  Si mon kapab donn de pti legzanp Mr Speaker par egzanp I annan latizann ki elev hemoglobin dan pasyan oubyen latizann ki balans nivo calcium ler sa masin i netway zot disan.  E bann pasyan pe dir ki AMSA in koupe sa prezan i fer ki sa i degrad lasante bann pasyan ki sitan frazil.  E a lonterm i kapab anmenn en fardo lo Minister Lasante an plis.

E i annan bann senp keksoz parey manze ou tande poudir bann pasyan i bezwen dormi lo rido olye en tapi so sa vedir nou annan sa rediksyon.  Alor mon anvi premye kestyon demann Minis eski sa bann temwannyaz personnel pour ede dan anmenn en amelyorasyon?  Si sa pour ganny konsidere konman en levidans personnel I enportan sa.

E dezyenmman mon anvi demann Minis lo kontra AMSA eski I ti ganny demande ki fer par egzanp bann pasyan ki annan Hepatit ki ganny trete dan en pti bout.  Sa pa pe diskrimin kont zot me zot ganny met apar me eski zot pe fer sa?  Parske en keksoz ki mon aprann se ki AMSA i pe dir avek bann pasyan par egzanp ki sorti Renesans ki sorti kot li.  Zot bezwen dezormen fer en tes HIV avan zot retourn dan sistenm normal kan zot konnen sa bann dimoun ti napa avan ki ti vin kot Renesans.  So ki mannyer nou balans sa de keksoz?  Mersi bokou.

 

MR SPEAKER

Mersi Onorab Henrie.  Minis.

 

MINISTER JEAN-PAUL ADAM

Ok mersi bokou Mr Speaker.  E mersi Onorab.  Nou pa an kont sa bann diferan temwannyaz.  I annan ki serten in met an ekrir.  Me ankor nou vin ankor lo sa kestyon levidans akoz pour le moman pour le moman nou pa ankor ganny en Rapor sorti kot sa Dokter Renesans pour ariv kot nou.  Alor pasyan par egzanp I koz lo medikaman selman an letan ou pour regard par egzanp atraver bann medikaman ki’n ganny donnen atraver AMSA.  Standar I parey e I annan sa Ners Ansarz par egzanp ki en travayer Gouvernman Sesel e li i pe verifye sa bann keksoz.  E li I pe dir nou ki I pe dir nou napa en sanzman lo sa bann eleman.

Alor sak pasyan I annan osi en diferan tretman depandan lo sirkonstans sa pasyan.  E ki nou pe par egzanp si nou pran sa legzanp sak pasyan ki’n anvoy nou en temwannyaz personnel.  Nou soumet sa atraver sa Ners Ansarz atraver sa Dokter Ansarz pour regard sa kestyon vizavi zot plan tretman.  Sa ki mon krwar I vre se ki letan ou annan lakantite pasyan nou annan 166pasyan ozordi avan nou ti annan 93.  Alor letan ou annan plis pasyan pour menm kantite dokter ou annan en pti pe mwens vizibilite dokter vizavi sa pasyan.

Konpare ler ou pour al en Sant Dyaliz kot i annan ou napa sa menm ratio alor ou pe kapab pe ganny plis letan pour detay sa bann keksoz medikal eksetera.

E lo sa lapros levidans nou pe dir dan sa miting ki pour ganny fer avek Public Health Authority pour nou dokimant sa.  Nou pe demann sa bann dokter pour met sa lo papye tel pasyan I annan sa amelyorasyon ki koumsa oubyen I annan sa problenm I pa ankor adrese.  E ki sa i ganny fer dan en fason sistematik e nou si nou pran par egzanp nou sekter prive.  Nou annan diferan sekter bann diferan bann dokter prive ozordi letan zot konsilte en pasyan ki zot santi sa pasyan I bezwen admet.  Zot anvoy sa pasyan Lopital Sesel avek en Rapor e zot dir vwala sa bann keksoz ki mon vwar dan – .  E zot met en lopinyon.

E parfwa zot met en lopinyon ki diferan petet avek sa lot dokter ki’n vwar sa pasyan oparavan.  I normal sa dan en sistenm medikal me ou bezwen baz li lo sa levidans sa bann diferan sa tretman ki ou’n donnen ki mannyer sa pasyan i reazir avek sa tretman.  E lapros ki nou pe pran se dokimant li dan en fason sistematik.

Me temwannyaz nou pa pran li alalezer, me i pour pli enportan lo sa lot staz ki sa dokter osi i fer li en pwen pour li met sa bann pwen lo papye pour nou kapab osi analiz li dan en fason obzektif.  E pour le moman sertennman a ma konesans se e mon management ki la nou pa’n gannyen.  Petet i annan ki’n anvoye atraver pasyan menm me Doctor to Doctor mon krwar pa si zot in gannyen sa bann Rapor.  Mersi.

 

MR SPEAKER

Mersi Minis.  Onorab Henrie.

 

HON GERVAIS HENRIE

Mon 2enm kestyon lo sa Unit Hepatitis?

 

MR SPEAKER

Minis.

 

MINISTER JEAN-PAUL ADAM

Mersi Mr Speaker.  E mersi Onorab.  Annefe sa ti en pwen ki’n ganny leve avek mon par sa bann pasyan.  Protokol dan nenport ki Sant Dyaliz se ki letan ou pe entrodwir en pasyan ki’n swiv en tretman dan en lot fasilite ki ofer sa screen ankor enn fwa.

Bon i vre dan kote konteks Sesel i annan petet zis de fasilite petet I en keksoz ki kapab ganny diskite pli an detay.  Me protokol standar se ou enplimant li koumsa e sa i enn bann size ki pour ganny adrese dan sa miting Zedi.  E ti annan osi sa kestyon manze kot mon osi mon ganny sa konplent e ankor nou lev sa avek AMSA.  E mon krwar parfwa en varyasyon i annan parfwa kot i en pe pli bon.  I annan parfwa kot i en pe pli mwen bon.  Nou pe sey atraver osi sa negosyasyon nou etablir klerman en standar ki lo kote sa.

Me i annan osi sa eleman preferans personnel ki I difisil parfwa letan ou annan 166 pasyan pour annan en manze ki konvenab pour tou dimoun.  Ok?  Mersi Mr Speaker e mersi Onorab.

 

MR SPEAKER

Mersi Minis.  Onorab Henrie.

 

HON GERVAIS HENRIE

Mersi Mr Speaker.  Mersi pour ou larepons Minis.  Me mon krwar ou larepons in baze plito lo sa protokol pour refer screening HIV me Hepsi ou pa’n vreman reponn si i merit annan.

E zisteman Mr Speaker koman mon annan mikro mon ti ava kontan demann Minis par lefe ki sa Kontra orizinalman I ti sinyen an 2012.  Mon pe prezimen petet I tie n kontra apepre 5an ki’n bezwen renouvle?

 

(Mic Off)

 

HON GERVAIS HENRIE

An 2015 ok?  Ok then i ava fer tonbe mon kestyon.  Mersi.

 

MR SPEAKER

Mersi Minis ou le reponn sa bout lo Hepsi?

 

MINISTER JEAN-PAUL ADAM

Wi annefe eskiz mwan.  Mersi Onorab, mersi Mr Speaker.  Hepatit i parey HIV; bann screening –  bann blood diseases  i annan en masin spesifik ki ganny rezerve pour sa bann eleman e sa i tonm parti dan nou protokol pour nou adres li ok.  Mersi.

 

MR SPEAKER

Mersi Minis.  Onorab De Letourdie.

 

HON JANY DE LETOURDIE

Mersi Mr Speaker.  Bonzour tou dimoun bon apre midi.  Minister Lasante mon krwar son rol I osi pour asire ki i mentenir standar avek fasilite dyaliz.  Me la nou vwar ki i annan konpetisyon me an menm tan toultan nou pe ganny dir met konfyans dan Minister Lasante.

Mon pwen se ki mon pe dir ki nou pour trouve la eski nou pour vwar I vreman annan en standar pour baliz pour vreman balanse avek konpetisyon ki pe arive.  I ganny plis valer i ganny plis fasilite?  Mon ti a kontan demande osi dan sa 166 pasyan ki ou’n dir konbyen dimoun deza ki’n al fer dyaliz avek Sant Renesans?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Ok mersi Mr Speaker e mersi Onorab.  Wi annefe rol Minister Lasante e Public Health Authority, se dan en fason zeneral pour nou regard standar lasante dan nou pei.  E sa ki konsern standar pour AMSA atraver sa Lagreman nou annan serten key performance indicators ki nou swiv vizavi lenplimantasyon zot progranm.  Prezan nou re vin ankor lo sa kestyon ki serten pasyan pe anmenn konplent devan, ki nou konpran zot si zot santi ki poudir servis i meyer laba.

Me nou bezwen parey nou dir angle break it down.  Nou bezwen dir be ok egzakteman ki sa eleman.  E bokou sa bann pwen ki’n ganny met devan ki dizon son Creatinine in aranze ek avan eksetera.  Me nou bezwen kapab dir be akoz sa i koumsa ki tretman ki’n fer li al koumsa?  E sa dokter i bezwen pare pour li endike sa tretman i marse pour sa pasyan.

Pour le moman nou pa ankor ariv lo sa staz kot nou annan tou sa bann dokimantasyon pour nou kapab dir klerman la bann kestyon ki Renesans pe leve vizavi AMSA.  E pour nou kapab evalye zot vizavi sa bann ki performance indicators.

Selman an term sa bann ki performance indicators pour le moman AMSA pe swiv sa standar ki’n met an plas.

Lot keksoz ki ou’n dir mon krwar ki korek se ki letan I annan konpetisyon ou kapab ou annan en sityasyon kot standar an zeneral ou kapab amelyore.  Me sa i pa vedir ki tou keksoz zis akoz parey servis I vreman bon i pa vedir ki tou keksoz i le meyer.  Akoz premye keksoz ki ou bezwen regarde se si sa pasyan pe ganny byen proteze.

Si sa pasyan akoz parfwa en pasyan i anvi en serten tretman i pa vedir ki sa tretman i meyer pour li a sa moman.  Sa staz ki nou ete la i enportan ki e rol ki Minister Lasante e Lotorite Lasante Piblik pe zwe se pour fasilit sa konversasyon sa bann dokimantasyon ant sa 2 Sant Dyaliz.  E sa pour ganny fer atraver sa miting ki mon deza koz lo la kot zot pour envit tou lede parti kot zot pour met an plas pour zot dokimant zot bann diferan konsern.  E apre pour nou kapab fer en evalyasyon.

Nou pou osi fer sa atraver sa Clinical Audit ki pour ganny fer lo AMSA parey mon dir lafen Avril.  Mersi Mr Speaker e mersi Onorab.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker, mersi.  Mon ti a kontan demann Minis Mr Speaker eski Minister Lasante par egzanp baze lo sa odit ki in ganny fer.  Eski zot in asize avek Departman Oditer Zeneral pour zot vwar lo ki baz Oditer Zeneral in etablir sa sif 16milyon?   An se ki konsern ki i kapab ganny fer?

 

MR SPEAKER

Mersi Onorab.  Minis.

 

MINISTER JEAN-PAUL ADAM

Wi mersi Mr Speaker e mersi Onorab.  Annefe nou’n zwenn avek Biro Oditer Zeneral plizyer fwa lo sa Rapor.  E parey mon dir ou Lazans Lasante in dan son larepons avek AMSA in dir ki sa saving ki AMSA in site, i pa forseman pran kont tou eleman.  Alor par egzanp enn bann eleman se bann kestyon Akreditasyon bann kestyon Sertifikasyon.  E amelyorasyon dan quality of service the care.  E sa I en eleman ki difisil pour met en kou lo la sa odit klinik pour ed nou fer sa.  Akoz sa sonm 175 Dolar ki nou dakor avek sa sonm 175 Dolar i reprezant sa sif ki nou’n kapab mezire sa bout kot nou kapab dir wi sa i en kou.  Me sa I son kou.

Savedir ou pa ankor met serten eleman ki ou met ladan an term bann amelyorasyon ki ou anvi fer.  Lenvestisman ki ou anvi fer eksetera.

Nou osi agree avek Oditer Zeneral ki sa ki i annan amelyorasyon ki kapab ganny fer atraver en meyer sirveyans sa Rapor.  Avek en amelyorasyon sa prosesis ki nou revwar lenplimantasyon.  Kote ki i annan en diferans lopinyon se lo sa sonm egzakt R16milyon ki zot in site.  Ki nou santi si nou pour pran li dan la lot fason si Minister Lasante ti pour repran sa servis, nou pa ti vwar sa saving absoli R16milyon.  Nou pour kapab petet fer en saving me petet pa a sa nivo.

Apre lot eleman ki i antre ladan, se eski ou kapab mentenir sa standar e sa servis akoz i annan sa bout pri ki kouver sa eleman amelyorasyon dan servis.

Nou konpran poudir baze lo deba ki nou annan ozordi I annan dimoun ki met serten konplent devan.  E nou anvi adres sa bann konplent me nou bezwen fer li dan en sistenm sistematik e baze lo levidans.  Ok mersi Mr Speaker, mersi Onorab.

 

MR SPEAKER

Mersi Minis.  Onorab Pillay.

 

HON SEBASTIEN PILLAY

Mersi Mr Speaker.  Zisteman dan laliny  adres sa bann konplent ki dimoun pe met devan,  eski Minister Lasante par egzanp parey in fer dan lezot landrwa in fer en Customer Service Poll or Review ki donn bann pasyan dyaliz zisteman loportinite pour zot fer komanter lo sityasyon care ki zot pe gannyen; lo bann keksoz lo manze.  Lo tou bann keksoz, asosye avek sa servis ki zot pe gannyen kot nou ava ganny en baz syantifik ki sorti kot sa bann pasyan?  Eski in annan en zefor pour fer sa kalite legzersis si oule?  Vwala en Customer Satisfaction Survey.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker e mersi Onorab.  Nou annan en letid ki ti ganny fer lafen 2015 e ki fek pe al ganny pibliye la par Labank Mondyal.  I pa adres tou eleman ki ou’n koz lo la me I fer en lodit dan en fason zeneral lo nou Sistenm Lasante.  In gard osi dyaliz.

E I osi regard nou sistenm lasante vizavi par rapor i benchmark nou avek bann pei sa ki apel bann OECD countries.  E sa ki montre nou sa Rapor Labank Mondyal e mon pe koz dan en fason zeneral mon napa sa Rapor avek mon la.  Me letan mon pour vin fer mon statement dan Lasanble mon pour fer sir ki mon anmenn sa Rapor.  E bi sa Rapor osi ki nou ti demann Labank Mondyal pour fer li se akoz pour nou get lefikasite nou Sistenm Lasante.

Alor sa I osi form parti sa deba ki nou pour annan parey Prezidan in envit nou dan Leta Lanasyon pour nou koz lo lafason ki nou finans nou Sistenm Lasante.  E ki sa Rapor Labank Mondyal in montre dan en fason mon pe dir an zeneral ok akoz I pa ti spesifik pour dyaliz.  I dir zeneral nou Sistenm Lasante par rapor avek lenvestisman ki nou fer nou ganny en tre bon rezilta.  E sa i enkli dan sa Sistenm Dyaliz savedir nou ganny en bon retour lo nou lenvestisman.

Sa Rapor i montre ki dyaliz wi i ser dan tou pei dan lemonn dyaliz i ser akoz toultan tretman pour en kondisyon I pli ser ki prevansyon.  E me i sa Rapor i montre en pti pe dan laliny kot i pe ale eski I annan amelyorasyon?

Wi in annan amelyorasyon vizavi avan 2015 sa ki nou ti annan.  Eski I parfe?  Non.  Eski I annan ankor amelyorasyon pour fer?  Wi?  Eski osi letan ou annan en lot operater ofer en bon servis eski sa pa en defi osi pour nou fer sir ki nou kapab lev standar an menm tan ki nou fer.  Si I posib redwir kou akoz sa ki nou anvi fer nou anvi fer pli bon kalite servis me gard kou pli ba ki posib.  Mersi Mr Speaker e mersi Onorab.

 

MR SPEAKER

Mersi Minis.  Onorab Pillay.

 

HON SEBASTIEN PILLAY

Mersi Mr Speaker.  Mersi Mr Speaker zis en dernyen pti kestyon following lo sa ki Minis in dir sirtou konsernan bann pasyan.  Eski zot in fer okenn prozeksyon lo ogmantasyon la kantite pasyan ki pour annan ki pour depan lo sa servis?  E sey konekte sa avek rol prezan oubyen protokol ki zot bezwen annan polisi ki zot bezwen annan vizavi bann lenstitisyon prive ki pe ofer sa servis?  Eski zot pe vwar en ogmantasyon ki pe met plis presyon lo servis ki nou pe fer ozordi?  Ki fer ki prezan nou pour bezwen otomatikman tourn fer bann lenstitisyon prive, kot nou pa pour kapab meet petet bezwen tou dimoun ler nou vwar sa pe arive.  Mersi Mr Speaker.

 

MR SPEAKER

Mersi Onorab Pillay.  Minis.

 

MINISTER JEAN-PAUL ADAM

Mersi Mr Speaker e mersi Onorab.  Nou’n fer serten travay pour nou analize kote ki kantite ogmantasyon nou pour annan dan pasyan dyaliz.  I difisil pour nou kapab met en sif spesifik akoz byensir ou pa kapab prevwar tou keksoz.

Me ki nou’n vwar se apre ki nou konmans ofer en servis akredite enternasyonalman ki nou annan en gran ogmantasyon en sel kou dan la kantite pasyan dyaliz.  Sa in stabilize.  Nou ankor annan ogmantasyon me pe ogmant mon krwar lannen pase nou ti annan 157 e la nou annan 166.  Nou ogmant par 9 pasyan dan 1an anviron.  Konmsi alor letan ou pe regarde nou pe ogmant apepre 10 pasyan par lannen.  E i annan selman serten lezot eleman ki nou bezwen gard antet.

Par egzanp pour fasilite sa bann pasyan i pour meyer si nou kapab ofer servis pli pre avek zot.  Alor par egzanp en pasyan ki reste Takamaka ozordi i vreman ki bezwen al dyalize 3 fwa par semenn, i en gran – i tir en kantite dan son zournen pour li bezwen al 3 fwa par semenn pour li al fer dyaliz.

Alor si nou ti kapab annan en sant dan Oditer Zeneral Oditer Zeneral id e nou bi se fer li Anse Royale sa I en keksoz ki nou anvi anmennen.

Lot eleman ki kapab ede redwir se fer plis pasyan kapab fer transplant zot kidney ki kapab permet zot sorti lo dyaliz.  E sa i en eleman ki i annan provizyon pour sa dan avek AMSA.  Me i annan serten eleman ki nou bezwen adrese nou bezwen adres Lezislasyon an term nou pei.  Pour nou annan Lezislasyon ki permet transplant pour fer isi.

Nou kapab an atandan anvoy serten pasyan aletranze pour fer sa transplant, me I vre ki I konplike aletranze akoz si ou pran en pei par egzanp L’Inde.  Zot pa pour aksepte en ka transplant si I pa ant de manm fanmir.  Sri Lanka i en pti pe pli fleksib zot in fer amannman dan zot Lalwa prezaman kot nou kapab annan i touzour annan serten kontrent akoz ou bezwen fer bann dokiman legal.  Lafidavit ant bann pasyan me nou annan sa posibilite kot nou kapab fer sa bann pasyan.  Si nou annan plis pasyan ki al fer transplant I pour osi redwir la kantite pasyan ki vin pour dyaliz.

Alor nou espekte ki nou pour kapab stabiliz nou pour annan en logmantasyon leze sak lannen me nou pour espere ki nou kapab stabiliz sa ogmantasyon.  Mersi Mr Speaker.

 

MR SPEAKER

Mersi Minis.  Onorab Terence Mondon.

 

HON TERENCE MONDON

Mersi Mr Speaker.  Bonn apre midi Minis avek ou lekip.  Mr Speaker levidans ki devan nou Lasanble e ki’n sorti dan sa Rapor spesyal ki Oditer Zeneral in fer parey Minis in mansyonnen.  I montre klerman ki Minister in fail (enn) pour respekte tou provizyon anba sa Kontra avek AMSA.  Par egzanp devlop en marse kliyantel pour bann viziter.  Dezyenmman in fail pour met an plas en bon sistenm kontrol pour monitor e evalye performans servis dyaliz.

Trwazyenmman in fail pour fer en proper costing kot nou ti kapab pe pey 175 Dolar par pasyan par sesyon olye 200 Dolar.

E katriyenmman i pa’n swiv Lalwa Prokirman.  Alor mon kestyon i senp kwa ki anpes Minister fer sa kat keksoz parey Oditer Zeneral in fer sorti?  Mersi Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker e mersi Onorab.  Tou dabor mon krwar I annan en move konprenezon an term ki sa Rapor i dir.  Akoz sa Rapor I dir ou cost dialysis se son kou dyaliz i 175 Dolar.  Savedir avan ou met en profi lo la par egzanp akoz si ou pe fer en outsource mon pa konn en lakonpannyen ki pour fer en keksoz pour nanryen.  Ok?

Alor sa ki sa Rapor pe dir ou se ki si Minister Lasante demen, ti pour pran sa responsabilite pour li kapab fer sa loperasyon li menm, i ti pour kout 175 Dolar.  Sof ki i annan apre serten keksoz ki pa kouver dan sa kou.  Alor son vre kou Minister Lasante ti pour en pe pli o me sa pa’n ganny sifre dan sa Rapor alor i pa korek pour dir ki ou ti pour kapab fer dyaliz pour 175 Dolar absoliman.

Konmsi zis sa pti klarifikasyon en akoz nou pa anvi kre en fo lekspektasyon vizavi sa ki fezab avek sa ki pa fezab.  E pour nou e se ki konsern diferan amelyorasyon ki Oditer Zeneral in site mon osi pa dakor poudir ki Minister in fail an term lenplimantasyon sa Lagreman.   Akoz nou pe swiv atraver bann former indicators. Ki nou kapab donn zot sa lalis i annan en gran lalis ki montre atraver bann rezilta tretman; bann keksoz parey mortality rate; an term zot reaksyon vizavi tretman.  Tousala i bann keksoz ki ganny mezire toulezour par bann profesyonnel Lasante pour kapab montre poudir i annan en amelyorasyon an term rezilta.

Mon dakor selman e mon krwar ki tou dimoun ki dan Lasante i dakor poudir ki sa i pa vedir ki wi nou monitoring en enplimantasyon sa Lagreman i parfe.  E sirtou mon osi dakor ek sa ki Oditer Zeneral i dir ki se ki Lagreman li menm i annan serten problenm avek.  Nou dakor

Ou’n lev sa size an term procurement ki mannyer sa Lagreman ti ganny sinyen en ti ganny deside.   E i vre nou osi agree avek Biro Oditer Zeneral ki sa pa’n ganny fer dan en fason ideal.  Premyerman ki desizyon pou outsourcinig ti ganny fer letan nou’n fer en lanaliz entern sa osi in ganny mansyonnen dan Rapor ki ti montre ki pri ki nou, nou ti peye dan nou sistenm ti plis ki R3mil ok a sa moman.

Ti annan serten sif parey Oditer Zeneral in montre ki sa sif pa ti 100 poursan korek.  Ok? E parey Oditer Zeneral in montre pri i plis ver 2400 keksoz Roupi.  Savedir i annan en diferans ant sa ki sa analizater sa lepok ti’n ganny sinyen.

Lot eleman se pou pas atraver Oversight Unit e sa wi Oditer Zeneral i annan rezon ki ti’n devret ganny kot Oversight Unit e i pa ti’n ganny fer e mon’n koz avek mon koleg Minis ki ti la, sa moman e li in eksplik mwan ki sa konversasyon pou nou regard fer outsourcing ti’n komanse me ki sa CEO sa lepok ti’n pran li ou sinyen ki malerezman wi sa i pa an konformite avek Procurement Act. Avek sa bann prensip ki nou’n adopte pou procurement e nou dakor avek sa finding ki Oditer Zeneral in met devan lo sa size.  Me mon krwar vizavi bann problenm  ki annan avek  sa Lagreman  in ganny idantifye dan sa Rapor nou’n eksplike ki mannyer nou anvi adres sa  bann problenm.  E si ou pou regard sa bann key former indicators ou pou kanmenm vwar poudir i annan en amelyorasyon dan rezilta vizavi sa ki nou ti annan oparavan.  Mersi Mr Speaker.  Mersi Onorab. 

 

MR SPEAKER

Mersi Minis.  Onorab Mondon.

 

HON TERENCE MONDON

Mr  Speaker, i pa akseptab kot tanzantan dan sa Lasanble kot tou tann en Minister vini i dir nou wi nou pa ‘n – nou ti’n devre pe swiv Lalwa Prokirman nou pa’n swiv e konmsi sa i vin en keksoz normal.  I pa akseptab akoz i larzan pep Seselwa e mon oule ki bann Minister i pran li serye ki Lalwa i dir ki fodre fer e zot bezwen respekte Lalwa.  Si Minister pa pe respekte Lalwa, ki mannyer nou kapab aksepte ki nou larzan i ganny zere dan sa domenn?  Pour mwan i fer lapenn tanzantan nou tann bann komanter nou aksepte wi nou pa’n swiv, me solman nou pa pe fer nanryen – keksoz i kontinyen parey i ete.   E ler ou get sistenm kontrol Minis i dir ou wi i aksepte napa sistenm kontrol.  Plizyer milyon.  I annan 2016 R66milyon ki’n ganny bidzete dan Dyaliz.  Me solman napa en sistenm kontrol pou fer sir ki larzan ki  pe peye i sanmenm sa ki reflekte sa servis.

Nou vwar kot i annan duplication of pasyan.  En pasyon Minister pe pey 2 fwa pou menm pasyan.  I pa akseptab!  E pour mwan – pour mwan Mr Speaker mon oule ki Minis i sorti dan Lasanble i konpran poudir nou pa kapab pe aksepte sa bann keksoz koumsa akoz i larzan pep Seselwa ki pe ganny mal zere.  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker.   Mersi Onorab.  Premyerman mon krwar i annan en gran diferans akoz ou’n dir napa kontrol.  E pa sa ki’n montre dan sa Rapor.   I dir ou i annan kontrol.  Solman i pe dir ou i montre bann landrwa kot i devret annan plis kontrol.  E Mr Speaker e Onorab i enportan pou fer sa diferans. Akoz i fasil dir wi i napa kontrol – zis dezord.  Me pou ou aranze ou pa pou aranze si ou dir zis napa kontrol, dezord, kan sa i pa sa realite.  Ou bezwen al pwen par pwen dan sa Rapor odit e ou adres sa bann pwen par pwen.

Alor mwan mon pa kapab fer mars aryer poudir alor nou pour anvoy li Procurement akoz la in fini pase.  E nou dakor poudir sa pa’n ganny swiv sa lepok e sa dimoun ki’n fer li I bezwen pran son responsabilite.

E osi an se ki konsern pour nou si ou pe regard sa ki Minister Lasante pe met an plas an term procurement, i en keksoz ki nou pe fer atansyon avek nou pe met bokou lanfaz lo la dan Minister Lasante.  E nou pe adres sa bann size dan en fason sistematik baze lo finding dan sa Rapor.  Me osi dan bann lezot Rapor.  Se en pti pe dan sa laliny ki mon ti anvi kouver Mr Speaker.

 

MR SPEAKER

Mersi Minis.  Bon nou pour pran en Break.  Mon ti a kontan zis averti bann Manm Lasanble e Minis osi ki deza ou’n pran zis 8 Manm ki’n poz kestyon.  Mon annan 10 lo mon lalis; petet ler nou antre nou fer nou kestyon pli presi nou avoid fer statements.  E Minis osi dan ou repons pli kourt, pli pointu konmdir Onorab Sandy Arissol.  Bon nou ava pran en Break nou ava retournen 4.10.

 

 

(BREAK)

 

 

MR SPEAKER

Bon nou a kontinyen avek nou travay.  Prosennman lo mon lalis mon annan Onorab Afif.

 

HON AHMED AFIF

Mersi Mr Speaker.  Mr Speaker mon ti a kontan demann Minis vi ki Rapor Oditer Zeneral in trouv plizyer defayans dan la fason ki sa Kontra pou outsource Hemodialysis in ganny fer e i montre klerman lo paz 2 ki i annan en posibilite, gran posibilite ki pei ti’n kapab sov li omwen R16milyon oubyen 1milyon Euro konman en minimum.  

E zot a rapel mon ti koz lo en sif anviron R20milyon ki kapab ganny save dan Bidze lannen pase kan zot ti prezante.  E i montre atraver sa Rapor bokou bann landrwa ki sa i kapab ganny fer pou zisteman koup bann kou e fer loperasyon vin bokou pli ba.

Ki Minis i kapab dir nou an term ki zot, zot in fer konman en Minister parske sa Rapor in ganny prepare depi le 26 Fevriye e mon asire ler i pe prepare in donn zot en kopi savedir depi le 26 Fevriye plis ki 5 semenn pase zot konnen  tou sa ki’n al mal zot.  Ki ou kapab dir nou ki zot in fer pou etabli premyerman – konbyen ki AMSA i dwa Minister Lasante?

Zot bezwen annan en sif la ozordi.  Parski si dan en lannen zot in pey R16milyon an plis, en kantite i annan pou fer avek li.

E li i la depi 2014.  Ozordi nou 2018.  2015 alor 2018 3an eski par egzanp zot a dwa nou R48milyon?  I en gro sonm larzan ki nou pe koze, e mon krwar i devret en priyorite pou Minister etabli pou nou ozordi konbyen AMSA i dwa Minister Lasante.

Dezyenm; vi ki zot in annan sa Rapor pandan 5 semenn ou menm plis parski zot ti pe travay lo la avan sa ki Minister pe fer egzakteman, konsernan tou sa bann pwen ki’n mete ki nou’n koz lo la ozordi enkli par egzanp bann lenstans kot AMSA i build zot plis ki en fwa pou menm  pasyan.  E savedir i pe sarz ou par lao sa 16milyon bann larzan pou pasyan ki pe fer billing 2 fwa.  Ki Minister pe fer zisteman pou koriz tou sa bann fot e pou fer sir ki nou pe pey en servis dyaliz ki rezonnab e pou en servis ki alaoter?  Mersi.

 

MR SPEAKER

Mersi Onorab.  Minis.

 

MINISTER JEAN PAUL ADAM

Mersi bokou Mr Speaker e mersi Onorab.  E parey ou’n fer rapel letan nou ti debat lo Bidze an 2017 pou Bidze 2018 ou ti dir ki dapre lenformasyon ki ou annan  se ki dyaliz i devret ant 100 a 125 Dolar ok a pasyan.  Parey Rapor Oditer Zeneral i montre poudir kou de baz i 175 Dolar par pasyan.

Alor mon konpran  lapros ki ou pe pran ou pe dir ki dapre ou lenterpretasyon se ki sa diferans ant 175 ek 195 ki nou pe peye – savedir 120 Dolar akoz nou ti pou pey 200 selman akoz zot donn nou 5 Dolar pou elektrisite i ariv 195.  Savedir ou pe dir ki pou  sa 20 Dolar adisyonnel dan sa…

 

(Mic Off)

 

MINISTER JEAN PAUL ADAM

…non – be petet Mr Speaker, Onorab ou kapab klarifye alor sa larzan ki AMSA i dwa nou petet ou kapab klarifye ki ou pe mean par sa.

 

MR SPEAKER

Go ahead Onorab Afif.

 

HON AHMED AFIF

Mersi Mr Speaker.  Mr Speaker mon pe dir ki Oditer Zeneral dan son Rapor i dir poudir through better management nou ti’n kapab fer savings anviron R16milyon.  E answit in donn plizyer pwen ki montre ki mannyer sa bann savings ti kapab ganny fer; par egzanp bann kou ki AMSA i bill zot, zot pa kapab verifye.  Bann valer bann dialyzers ki servi i pa kler.

I annan bann enzeksyon heparin ki zot, zot donnen avek AMSA ki apre zot, zot pa bill li.  I annan acid concentrate ek antiseptic ki zot, zot ganny bill me selman personn pa konnen konbyen i koute.  Savedir sa ki i mete sanmenm.

I annan stok medikal ki zot, zot sipoze stoke me zot pa stoke zot ou ki stoke, ou supply zot e apre ou pa bill zot.

I annan bann stok medikaman ki ganny aprovizyonnen, i anmennen apre i zis gate.  I vin en kou menm lo zot sa.  Selman zot pe fer sa pou AMSA sa zot.  Apre i annan bann duplication ki pe arive.  Savedir ler mon pe get tou sa bann pwen Minis atraver Mr Speaker, mon pe dir ki tou sa bann zafer kot ou, ou sipoze anvoy en invoice kot AMSA e ou pa’n fer.  E kot AMSA li i sipoze vreman etabli konbyen sa bann kou ki pe bill ou i pa’n fer e answit i annan bann invoice ki i pe donn ou de fwa pou bann pasyan.  E sa in pran sa zis lo 17 pasyan.  Ou annan 170 pasyan, li in fer en sample 17 in vwar in ariv pros mon krwar R500mil en keksoz koumsa.

Alor si in fer konklizyon poudir Minister Lasante ti’n kapab sov li R16milyon dan en lannen an gran parti i ti pou ariv parske AMSA ki’n bezwen ganny sa ek sa larzan.  E ou konman Minister zot bezwen fer en legzersis pou dir be ok be tou sa bann keksoz ki nou’n supply li ki pa’n peye, nou pou adisyonnen.  Tou sa bann keksoz ki li in bill nou 2 fwa nou pou adisyonnen parske larzan in reste ek li.

Tou sa bann lezot kou ki pa’n ganny klarifye i en kou ki ou pe pey li ki petet pa ti devret pe pey li.  Akoz se atraver sa ki savings i vini.  Savedir li in ganny bokou plis larzan ki i devret an realite.  Alor se sa ki mon pe dir Minister i bezwen in fer en legzersis ki montre poudir dan en lannen si zot kapab fer en savings R16milyon, i senpleman parski li in ganny 16milyon an plis ki i devret gannyen.  E alor si zot in fer sa legzersis konbyen i ete depi 2015 e kan zot pe donn li en invoice, eski lot semenn Vandredi i pa pou kapab ganny en invoice pour R45milyon e dir li rann nou parski se fot ki’n arive dan zot sistenm.  Mersi Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mr Speaker si mon kapab demande sa sif 45milyon lo ki baz sa 45milyon.

 

HON AHMED AFIF

Wi mon’n pran 16, ti kapab 48 fer li 50 fwa 3 lannen.  Mersi.

 

MINISTER JEAN-PAUL ADAM

Ok be Mr Speaker mon  konpreansyon ki Rapor Odit i diferan ek sa ki Onorab Afif in dir akoz, e si ou pou pran egzakteman sa ki Oditer i dir . Akoz Oditer i dir si sa servis, si sa servis ti ganny fer par Gouvernman ti pou kout 175 Dolar par personn be san kalkil sa bann lezot keksoz ki pa’n kapab kalkile.

Larealite se sa servis pa’n ganny ofer par Minister Lasante in ganny ofer par AMSA.  Alor kestyon se petet kestyon ki pe demande mon pou pran li an de fason.  Ok i annan sa bann eleman kot ou pe dir ki i annan serten peyman par egzanp kot ti annan en mankman an term swivi, kot invoice pan ganny raise.

E ankor mon pou demande si ou’n regard bann management response ki i annan apartir part 3 findings, conclusion and recommendation apartir paz 16 e apre sak rekomandasyon i annan larepons sorti kot Health Care Agency.

E dan plizyer ka si mon pran legzanp sa par kot ou pe dir sa odit an term bann pasyan ki’n ganny liste plis ki en fwa e ou ava vwar poudir … ti dekouver ankor letan i ti al e in fini adres sa e in anvoy, in demann AMSA pou regilariz sa.

Alor wi ti annan en fot ki ti pe arive atraver petet en pti pe mank latansyon par sa bann dimoun ki ti pe fer sa zesyon, me letan sa in ganny adrese in ganny take-up avek AMSA e in ganny demande pou adrese.

Menm parey pou sa bann diferan parey bann stok si ou pe pran sa kestyon, stok sa osi ti ganny adrese avek AMSA e zot in ganny demande pou gard omwen 3 mwan consumables konman standar.

Alor – e i annan detrwa lezot ki ou’n mansyonnen, letan ou pou pas lo sa bann diferan findings, ou pou vwar serten aksyon ki’n ganny pran par Health Care Agency.  E wi i annan – ou’n sit par egzanp Heparin e si ou pou – si ou pou regard lo paz 30 lo Rapor ou vwar poudir sa in ganny invoice pou Heparin konman en aksyon ki swivan sa Rapor Oditer Zeneral.  Alor i annan serten sa bann aksyon spesifik ki’n ganny adrese dan sa Rapor e wi nou dakor poudir akoz la fason ki sa lakor in ganny drafte, ki i annan serten problenm avek akoz i pa ideal dan serten ka, e ki nou bezwen anmenn en serten klarite.  Me si ou pou swiv dan sak sa bann management responses kot nou’n adrese, nou’n adres avek Oditer Zeneral lafason ki nou pe adres sa atraver kot i neseser pou nou invoice AMSA pou sa kou adisyonnel.

Prezan dezyenm eleman i sa diferans – sa 16milyon par lannen ki ou pe pran li konman adisyonnel.  Me sa pe assume ki ou pe pran 175 Dolar as cost price ok?  E parey mon’n deza dir avan mon pa konn okenn operater prive ki i pou aksepte zis pou li pey at costOk alor i annan en eleman profi ki nou bezwen get ladan, konbyen i pou arive.

Mon pa en expert ladan pou nou vwar apre i annan en lot eleman ki form parti swivi ki nou’n konmans bouz lo la se pou nou fer sa clinical audit lo AMSA akoz sa osi i determinen si par egzanp ou pe meet ou standar akoz si ou pe amelyor ou standar i annan en quality improvement ki annan en cost avek.

Idealman si mon kapab ganny AMSA pou donn mwan sa Kontra pou 175 Dolar oubyen si mon kapab ganny enport ki pou ofer sa servis pou 175 Dolar napa problenm ti a bon.

Me pa sa ki sa Rapor ti dir ou.  Sa Rapor pe dir ou si sa outsource sa i ou cost.  I pa vedir ki sa dimoun ki pou fer sa servis in pare pou li pey 175 Dolar akoz sa i pe dir ou sa ou cost.

Mon krwar ou dakor lo sa, lo sa lenterpretasyon.  E alor dezyenm eleman ki en kestyon legal, alor eski sa larzan adisyonnel ki mon pa kapab koz pou AMSA mon pa konnen ki zot perspektiv, sa en keksoz nou ti pe al pran avek zot dan re negosyasyon.

Me dan sa larzan sa diferans 16milyon par lannen si ladan i annan sertennman in en poursantaz ki son profi.  Ladan sertennman i annan en poursantaz ki li i pou dir ou i link ek sa quality improvement ki sa Oditer Zeneral osi in fer referans avek.

Oditer Zeneral in dir ou sa pri 175 Dolar i valid si Gouvernman ti pou pran sa demen pou li run sa servis.  Me menm Oditer Zeneral in aksepte poudir sa kou i pou en pe plis ki sa akoz serten eleman ki pa’n ganny fakter dan sa kou e zis pou nou fer  sir ki nou konpran byen egzakteman, ki Oditer Zeneral in dir lo paz 2.2 Scope for cost reduction through better management.  The costing analysis for one dialysis session per patient was at 175 Dolar or around 2,144 according to audit.  This includes almost all cost attribute to the service delivery but without the depreciation charges relating to building, infrastructures and specific cost of maintenance and servicing of dialysis machines and other equipment used at the Hemodialysis Unit which either way are still incurred by the Ministry of Health or/Heath Care Agency. 

Alor sa pwen pe dir ou si Minister Lasante oubyen Health Care Agency ti bezwen ofer sa servis son minimum ti pou koute se 175 Dolar.  Alor sa diferans ant sa de alor nou kapab pran en lapros avek AMSA poudir sa larzan i adisyonnel oubyen non me nou ava rapel osi ki nou annan en Kontra avek AMSAOk?  E sa i en kestyon legal ki osi nou an konversasyon avek, avek Attorney Zeneral.  Attorney Zeneral mon asire pou donn nou serten gidans lo ki mannyer sa eleman i antre ladan.

E alor zis pou fer en pti pe an bref Mr Speaker bann aksyon ki nou’n pran lye avek sa odit, in ganny liste dan bann larepons sorti kot management ki dan sa Rapor li menm.  E apre sak pwen ou pou annan sa aksyon ki’n ganny pran par management.  Pli enportan ankor se sa Clinical Audit ki pou fer an Avril e apre sa prosedir re negosyasyon avek AMSA kot nou kapab adres sa size.  Mersi Mr Speaker e mersi Onorab.

 

MR SPEAKER

Mersi Minis.  Onorab Afif.

 

HON AHMED AFIF

Mersi Mr Speaker.  Zis pou dir ki mon pa’n vreman ganny en sif.  Mon ti pe rod en sif avek ou konbyen AMSA i dwa Gouvernman Sesel.  Mon ti pe rod en sif parey ou dir en  Heparin zot in bill li be konbyen? Kot i annan invoice in raise in duplication konbyen?  Reimbursement of salaries paid by HCA konbyen i sipoze rann zot?  Mon bezwen sif.  Nou bezwen sif pou konnen konbyen AMSA i dwa nou.  Parske baze lo sa Rapor si nou ti’n fer sa loperasyon nou menm tou le lannen nou ti annan nou 1milyon Ero an plis dan ou Bidze, 3 lannen 3milyon Ero.  So 3milyon Ero in ale.  AMSA i dwa nou, nou pa konnen konbyen.  Se tou ki mon ti pe rode konbyen AMSA i dwa nou?

 

MR SPEAKER

Mersi Onorab.  Minis.

 

MINISTER JEAN PAUL ADAM

Mr Speaker e onorab.  Mon pou refer ankor lo paz 2 kot dan sa Rapor Oditer Zeneral i dir ou :-This includes almost all cost attributed to the service delivery but without the depreciation charges relating to buildings, infrastructures and specific cost of maintenance and servicing of dialysis machines and other equipment used at the HDU which either way are still incurred by the Ministry of Health and the Health Care Agency.

Savedir sa bann kou i touzour la ok.  Tou fason sa bann kou i la e an term sa kestyon lo si ou pou lev sa avek, avek AMSA (pardon eskiz mwan) sa kestyon ki ou’n dir se konbyen nou ankor dwa AMSA baze lo sa Rapor?  E ankor letan ou pou al lo sa- sak sa bann findings tou sa bann findings ladan in ganny adrese avek AMSA atraver bann invoice neseser kot in adrese dan sa Rapor.

Mon pa ankor fini reponn, mersi.  Ok?  E pou Mr Speaker mon krwar mon bezwen ganny en sans pou mon reponn.  E an term sa sak diferan eleman ki’n ganny adrese dan sa Rapor tou in fini ganny peye,  i annan serten kot i annan – akoz i annan serten kou ki tou le zour ou annan sa  kestyon pou invoice AMSA pou ganny rann alor mon napa sa sif aktyelman egzakteman ozordi le 3 Avril konbyen nou dwa AMSA oubyen konbyen AMSA i dwa nou.

Mon napa sa sif egzakt me nou kapab fer sa kalkil e nou kapab donn zot sa sif.  Me lakle vizavi Rapor Oditer Zeneral, se pou dir ki sa bann pwen ki’n ganny idantifye ladan, in fini ganny pran avek AMSA.  Sa bann diferan sif ki’n ganny mete dan Rapor.  Mersi.

 

MR SPEAKER

Mersi Minis.  Onorab Clive Roucou.

 

HON CLIVE ROUCOU

Mersi Mr Speaker.  Bonn apre midi Minis avek ou delegasyon.  Mr Speaker 2 kestyon pou Minis.   Premye kestyon mon ti anvi demann Minis, eski Minis ou kapab dir sa Lasanble konbyen erdtan en pasyan i fer lo dialysis par zour?  Sa i mon premye kestyon.  An relasyon avek menm kestyon, si i annan okenn aksyon lo baz pirman medikal ki pou ganny pran avek whoever dan AMSA kot zot aksyon ki étiquement mal e degradan pou zot met non pasyan de fwa lo lalis ki’n fer dyaliz?  Sa étiquement i mal konman bann medical personnel.

Epi dezyenm kestyon lo baz Lagreman. Eski okenn komite in ganny formen parey Lagreman ti demande pou zot get performans AMSA e odit tou son bann aktivite ki i pe fer?  Mersi Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker e mersi Onorab.  Pou dyaliz an zeneral i 4erdtan par sesyon dyaliz. An se ki konsern bann pasyan ki ti ganny 2 fwa lo lalis, mon’n deza reponn sa poudir sa in ganny leve avek AMSA e AMSA in adres sa.  I en kestyon baze lo resers ki nou’n fer ki i en fot administrative, akoz sa pasyan dan serten ka petet sa pasyan  in vin bomaten.  E in vwar poudir ti en pti pe bizi e in deside re vin apre midi me i en lerer ki konsekan nou dakor, me sa in ganny adrese  e in ganny leve avek AMSA e nou annan  en verifikasyon ki pe fer sir la ki sa kestyon pa lev ankor.

E dan okenn ka kot in annan en invoice ki’n ganny leve pou menm pasyan, ki sa in ganny mete devan AMSA pou refund.  E eskiz mwan ti annan en trwazyenm parti ou kestyon mon krwar mon’n manke.

 

MR SPEAKER

Onorab Roucou.

 

HON CLIVE ROUCOU

Mersi Mr Speaker.  Mr Speaker mon’n anvi demann Minis lo aksyon – lo Lagreman lo Health Care Agency avek pou AMSA.  I sipoze annan en Komite ki devret ganny etabli pou obzerv bann odit ek aktivite ki AMSA pe fer.  Mon pe demann li si sa in ganny met an plas silvouple.

 

MR SPEAKER

Minister.

 

MINISTER JEAN-PAUL ADAM

Mersi Mr Speaker e mersi Onorab.  Efektivman sa Lagreman i fer provizyon pou en komite kot i annan 4 dimoun ki sorti kot Minister e – anfen 4 dimoun ki sorti dan Lasante dan bann diferan lenstans e 2 ki sorti kot AMSA.  E sa efektivman i en mankman an term lenplimantasyon sa Lagreman me sa i pa vedir ki  ti napa okenn verifikasyon lo sa Lagreman.

Ti annan bann key performance indicators ki ti ganny verifye par bann staff Lopital ki pe enplimante alor par egzanp parmi sa  bann key performance indicators, i lakantite letan ki en pasyan i bezwen espere pou ganny dyalize.

Apre an term par egzanp ledikasyon ki ganny donnen avek sak pasyan an term mortality rate, an term bann proporsyon, bann nouvo pasyan dyaliz par egzanp sa ki apel en permanent vascular access.  Bann kestyon lo lakantite erer medikal ki ganny idantifye.  Alor tousala i bann key performance indicators ki Management Lopital ti pe swiv dan en fason sistematik e nou pe kontinyen swiv avek AMSA.

Pou letablisman sa komite sa pou ganny fer an lyezon avek Board Health Care Agency, pou nou adres sa rekomandasyon Rapor Oditer Zeneral.  Mersi bokou Mr Speaker e mersi Onorab.

 

MR SPEAKER

Mersi Minis.  Onorab Roucou.

 

HON CLIVE ROUCOU

Mersi Mr Speaker.  Mr Speaker dan larepons Minis in nonm vascular access.  Mon ti ava anvi demann Minis si i annan okenn vascular surgeon ki spesyalize kot dyaliz pou fer okenn vascular access pou permet fer dyaliz?  Epi an relasyon avek larepons osi, mon anvi demann Minis si i annan bann paramet spesifik ki’n ganny … (kapab kontinyen)?  Mon pe osi demann Minis si i annan bann paramet spesifik ki’n ganny idantifye e met an plas ki pou asire ki tou bann pasyan ki pe al dyaliz pe swiv? Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Wi mersi Mr Speaker e mersi Onorab.  An term sa sirizyen vaskiler, sa vascular surgeon nou annan  en sirizyen en  sirizyen vaskiler i pa atase a plen tan avek sa Unit Dyaliz me i vwar bann pasyan ki sorti kot unit dyaliz kot i neseser.  Nou annan osi bann lezot sirizyen vaskiler sorti aletranze ki vini sorti dan en baz regilye, ki osi  vwar sa bann pasyan.

E atraver ban standar mon krwar i dezyenm parti ou kestyon sa i adrese atraver sa key performance indicators ki ganny re vwar regilyerman avek Management Lopital vizavi, vizavi performans AMSA avek sa bann lendikater ki zot gannyen dan lenplimantasyon zot travay.  Mersi Mr Speaker, mersi Onorab.

 

MR SPEAKER

Mersi Minis.  Onorab Simon Gill.

 

HON SIMON GILL

Mersi Mr Speaker.  Bon apre midi Mr Speaker, bon apre midi Minis ek ou delegasyon, tou koleg Onorab e Manm piblik.  Mr Speaker detrwa mon bann kestyon ki mon ti annan lo mon lalis in ganny demande. Me kantmenm i annan detrwa kestyon ki mon ti ava voudre poz Minis atraver ou Mr Speaker byensir.  Ou konnen mon’n ekout en kantite sa bann deba la apre midi e mon tante pou pous nou pou mazin en pe lwen ankor.

Pou mwan letan mon  vwar larive Renesans mon ti pe pran li konman en good news.  Me i paret ki son larive pe vin en pe kontroversyel.   Kontroversyel dan le sans kot in penetre dan nou sistenm, nou Servis Lasante avek sa zafer ‘’penetre’ petet an parantez ou antre girme, pran nou bann pasyan kot Minister Lasante anmenn kot li mon pa konnen si ti pe fer experiment si mon kapab servi sa term, me apre sa bann dimoun in satisfe avek sa servis  ki zot e gannyen laba.

Se sa mon pe dir nou ti pe vwar son larive konman en keksoz pozitiv.  Be sa dan li menm li in ganny transformen dan en challenge pou nou sistenm e servis dyaliz ki Gouvernman  pe donnen e ki nou pe tande  dapre bann spekilasyon Minis ki i annan bann dimoun ki ti part sa laranzman AMSA ki ozordi i kot Renesans.

E kot nou tande laba i annan pli bon lekipman, pli o standar lekipman.  E probableman sa i bann rezon akoz servis laba bann pasyan i pli byen satisfe ankor avek serten rezervasyon byensir akoz pa ankor ganny tou detay pli satisfe avek sa ki Gouvernman pe donnen.

Now kestyon ki nou poze. Avek ki lavites Minister Lasante, Gouvernman, i kapab bouze pou etidye kalite lekipman baze lo en premiz ki bann dimoun ki’n met sa servis anler dan Minister Lasante zot menm zot ki laba kot Renesans ki mannyer nou fer sa comparative analysis pou ki nou gete si napa en problenm ki’n arive dan sa process.  Sa i premye kestyon.

Dezyenm kestyon nou’n tann lenplikasyon larzan.  Konmkwa ki i annan en pe problenm lo sa kestyon.  So dan ki mezir Gouvernman i kapab asire e asir nou ozordi ki nou pe pran tou bann mezir ki AMSA pa sarz Gouvernman Sesel plis ki i devret sarze.

Trwazyenm kestyon, trwazyenm kestyon i senp li, tre senp.  Ki mezir Gouvernman pou pran pour ki nou kapab arive donn tou sa 166 pasyan ki mon’n tann zot menm zot in dir166 pasyan ki pe swiv dyaliz ozordi, donn zot sa re asirans ki zot tretman i en tretman lo standar; ki konparab avek plizyer pei  e ki dan okenn moman Gouvernman pa pou abes sa standar e tou le kontrer Gouvernman i pran  li konman par son lobligasyon pou fer sir ki nou elev standar ki nou pe donn nou bann pasyan  dan servis piblik nou Sistenm Lasante en standar ki konparab; e si menm pa depas sa ki Renesans pe donnen.  Lot kestyon.

 

MR SPEAKER

Dernyen kestyon.

 

HON SIMON GILL

Ok si zot pa oule mon demann ankor i ok mersi bokou.  Mon a les Minis reponn sa bann epi Mr Speaker avek permisyon si ou donn mon permisyon mon annan ankor 3 kestyon si mon kapab demande.  Mersi bokou.

 

MR SPEAKER

Mersi Onorab Gill.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab pou ou bann kestyon.  Pou sa analiz Polisi ki nou pe fer aktyelman, premye eleman se sa eleman ki mannyer ou asire ki tou pasyan i ganny sa menm servis e ki ou kapab fer li dan menm fason  ekitab.

E nou pe fer li ase vitman i pou pran nou petet detrwa semenn pou fer sa analiz e apre pou nou kapab pran en pozisyon konman Gouvernman.  E sa analiz i baze byensir lo konsiltasyon avek bann profesyonnel dan Lasante akoz i osi en kestyon akoz i fasil pou dir annou anvoy sa enn isi annou anvoy sa enn laba me nou bezwen kapab analiz lo en baz ki konparab.

Lo kestyon lo ki mannyer nou kapab asire ki AMSA pa pe sarz an plis?  I enportan pou note ki sa Kontra ki nou note e nou agree avek Rapor Oditer Zeneral ki nou annan serten kestyon otour sa Lagreman ki nou ti anvi adrese me sa pri i fix dan sa Lagreman.  Alor lafason ki nou asire k nou fer sir ki Gouvernman e lepep Seselwa i ganny en bon rannman lo sa Lagreman se atraver verifikasyon tou bann diferan depans ki ganny fer anba sa Kontra, ki ganny fer dapre norm.

E wi malgre ki sa Rapor par egzanp nou’n idantifye serten mankman sa bann mankman dan laplipar ka i en kestyon pou ou lev en invoice anvoy kot AMSA e pou AMSA pey sa mankman e dan bann ka ki’n ganny idantifye dan sa Rapor sa in ganny adrese.

Apre i annan sa kestyon kot nou pou al pli devan pou nou kapab byen asire e donn  re asirans sa 166 pasyan ki la ozordi dan Lopital Sesel ki zot ganny en bon standar tretman.

Premyerman se atraver sa bann endikater performans ki osi baze lo bann standar enternasyonal – ki bann standar ki ganny rekonnet vizavi tretman dyaliz ki ozordi nou servis dyaliz i koresponn avek sa bann standar.

An plis ki sa nou pe fer sa clinical audit, sa odit klinik ki pou ganny fer lafen Avril ki pou kapab osi verifye ankor par en sours obzektif lo si sa bann standar i koresponn zisteman avek bann rezilta ki nou pe gannyen baze lo nou bann verifikasyon regilye ki ganny fer dan en fason entern dan Lazans Servis Lasante.  Mersi Mr Speaker e mersi Onorab.

 

MR SPEAKER

Mersi Minis.  Onorab Simon Gill mon donn ou ankor en kestyon

 

HON SIMON GILL

Mersi Mr Speaker.  Mr Speaker mon krwar nou bezwen bouz pli lwen ki sa.  Si demen bomaten Minis parmi mon trwa kestyon ki ti reste i annan en kestyon crucial.  Si demen bomaten dan sa 66 pasyan ki pe swiv dyaliz dan nou sistenm, 166 – si demen bomaten ou annan apepre lanmwatye ladan baze lo bann lenformasyon ki pe sorti la lanmwatye i dir nou pou arete anler la kot servis Gouvernman, nou pou al kot Renesans.  Ki pou pozisyon Gouvernman vizavi sa sityasyon?

Dezyenm ki ansennen ladan eski nou kapab anmenn bann dimoun kot Renesans otour en latab pou tonm dakor lo en fason pou prosede; par lefe ki zot menm zot ki’n call upon bann pasyan ki ti kot Gouvernman pou vin fer sa – si ou le donn zot sa loportinite pou eksperyans zot servis.  Ou kapab met zot lo latab pou nou gete ki mannyer sityasyon i balanse e ki mannyer nou pa kree en konfli e kontradiksyon ant servis ki Renesans pe donnen e servis dialysis kot lopital Gouvernman.

Lot kestyon ki beg itself i dir nou koumsa ki i annan ozordi partou dan bann Lenstitisyon Medikal kantite Seselwa pe ale pe al ganny bann servis dan sekter prive.  E zot pe pey larzan laba.  Zot pe peye.

Me nou Konstitisyon i provide ki Leta Gouvernman i dwa nou pep en lasante apel li an parantez ‘’gratwit’’.  Now, probableman nou bezwen, nou bezwen dan sa kadreman lentervansyon ki Prezidan Faure ti fer dan son State of The Nation Address le 6, e se sa ki mwan mon ti pouse pou nou lans sa deba, sa deba Nasyonal pou koz lo soustenabilite nou servis lasante dan konteks sa logmantasyon bann servis prive ki pe rantre dan pei.

Akoz demen nou riske vwar nou avek en sityasyon ki nou pa pou kapab bare si mon kapab servi sa terminolozi pa pou kapab bare baze lo sityasyon ki pe evolye dan sa pei.  Mersi bokou Mr Speaker.  Mon’n fini poz mon 3 lezot kestyon ki mon ti annan.  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Pozisyon ozordi akoz ou’n demann sa kestyon tre presi.  Ozordi Polisi Gouvernman se ki dyaliz i ganny ofer Lopital Sesel.  Napa en lot landrwa kot dyaliz i ganny donnen akoz nou ofer sa servis atraver Lopital Sesel.

E pou vin lo sa kestyon Renesans mon rapel ankor letan sa lakonpannyen in fer son lenvestisman in fer son lenvestisman avek pou bi pa prensipalman pou li regard marse lokal.  I ti pe regard son lenvestisman prensipalman pou tourism medikal.

Byensir Gouvernman in akey sa dan en fason pozitiv akoz i bon pou nou annan en servis adisyonnel dan pei e osi konman en backup pou nou servis i bon pou annan sa servis.

Alor nou’n vwar li dan sa kote e  i annan serten  dimoun Seselwa ki ti pou anvi – ki annan son mwayen e ki ti pou anvi aste sa servis lo li menm e i annan ki mannyer mon  konpran pe servi.

Alor ozordi, me ozordi nou provizyon se ki sa i ganny fer atraver Lopital Sesel.  Parey mon’n eksplike akoz i enportan pou nou met tou kart lo latab.  Baze lo demann ki ganny fer par bann pasyan ki’n al laba, nou pe analiz posibilite?  Eski i annan posibilite.  Eski sa i fezab pou nou kapab revwar nous sistenm dyaliz ki dan plas baze ou fer li dan en landrwa dan Lopital Sesel, eski ou regard li lo baz en pri?  E sa i lye osi avek sa odit ki’n ganny fer lo AMSA.

Nou etabli sa pri e nou vwar eski i annan lezot operater ki kapab ofer sa servis?  I en analiz ki pe ganny fer aktyelman dan Minister Lasante e baze lo bann analiz par bann profesyonnel, nou ava kapab dan en pozisyon pou dir eski nou kapab fer sa san – premyerman – ki nou ogmant kou pou Bidze, e ki nou pa ogmant kou alor pou pep Seselwa?  Pou nou asire osi ki kapab fer sir ki sa standar servis i la.  E osi ki napa diferans dan sa servis savedir ki sa dimoun ki ganny sa servis i ganny lo menm baz e tousala i bann kestyon  ki bezwen ganny adrese.

Lo kestyon ki mannyer nou evit konfli ant sa 2 servis?  E parey mon’n deza eksplike Lotorite Lasante Piblik pe fer sa meeting ant sa 2 lorganizasyon pou zot kapab dokimant bann diferan konsern ki zot ant bann diferan konsern ki zot annan lo de kote.  E alor kapab osi idantifye si i annan mankman ki sa i kapab ganny analize.

E trwazyenm kestyon se an term soutenabilite nou servis lasante.  I en gran kestyon ozordi, akoz letan ou pou regard lakantite larzan ki nou depanse konman en poursantaz Bidze si mon pa tronpe apepre en 13poursan e i  deza ase o petet i annan lespas pou agrandi.  Petet ou kapab ariv 15poursan Bidze.  Tousala i bann posibilite me si ou pou regard konpare avek bann lezot pei Sesel la grand mazorite larzan ki al dan Lasante i sorti  dan Gouvernman.  National Health Accounts i monte ki plis ki 80poursan depans i ganny fer par Gouvernman.

Sa i pa vedir ki napa en depans konsekan par dimoun dan prive e osi National Accounts i rekonnet poudir i annan serten depans ki pe rantre petet pa pe byen ganny, pa pe byen ganny capture dan sa analiz.

Me aktyelman dapre sa metodolozi ki Lorganizasyon mondyal lasante i fer 80poursan nou depans dan Lasante i sorti dan Gouvernman.

Me letan nou met sa konman en poursantaz GDP i zis apepre en  3.5 poursan GDP – ki ba.  Sa i vedir ki i annan plis resours dan nou lekonomi ki ti kapab al dan Sekter Lasante e sa i otour sa deba ki Onorab Gill ou’n dir e ki Prezidan in envit nou pou nou fer.

Par egzanp nou regard Lasirans sa i bann kestyon ki kapab leve e sa i bann lapros ki Minister Lasante osi pe fer en serten analiz pou nou vin avek en serten sizesyon, pou nou debat e pou nou revwar.

E letan nou regard sa bann kestyon enn de Prensip de baz i reste.  Dan nou Konstitisyon nou koz lasante gratwit.  Savedir akse pou lasante i en laspe fondamantal dan nou Konstitisyon e sertennman pou Gouvernman nou pou touzour fer sir ki okenn progranm ki nou met an plas i pa afekte akse en pasyan avek sa swen ki i bezwen.  E sa i reste enn bann prensip fondamantal dan okenn analiz ki nou fer lo lafason ki nou al pli devan lo okenn servis ki nou kapab outsource.  Mersi Mr Speaker e mersi Onorab.

 

MR SPEAKER

Mersi Minis.  An vi letan mon ava demann lezot Manm pou gard zot kestyon kourt al direkteman dan kestyon e Minis osi repons presi.  Onorab Phillip Arissol.

 

HON PHILLIP ARISSOL

Mersi Mr Speaker.  Mr Speaker eski Minis i kapab dir nou dan sa 166 pasyan ki pe trete kot Lopital Sesel konbyen ki’n al trete kot Sant Dyaliz Renesans?  E baze lo kantite larzan ki pei i depanse pou anvoy pasyan deor pou fer transplant, eski Minis i kapab dir si Minister i satisfe avek nivo swivi ki AMSA pe fer lo bann pasyan, pou asire ki personn pa perdi zot ronnyon e gaspiy larzan taxpayers?  Mersi Mr Speaker.

 

MR SPEAKER

Mersi Onorab.   Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Aktyelman nou annan 7 pasyan ki nou konnen ki’n al kot Renesans sorti kot Lopital Sesel.  I annan posibilite ki i annan ki petet in al en fason enformel dan le fason ki zot pe kontinyen vin kot Lopital Sesel.  Petet zot pe fer en sesyon kot Renesans me nou annan 7 ki nou konnen i a plen tan dan Renesans.  Korek sa.  Wi.  An se ki konsern transplant, dan Unit Dyaliz dan Lopital nou ofer en klinik tou le semenn pou bann pasyan transplant.

Alor i annan en servis ki ofer tou bann eleman ki en pasyan transplant i bezwen an term son medikaman, son swivi e son bann tes.

E i annan en kantite tes ki nou kapab fer lokalman, i annan serten tes ki nou bezwen fer referans aletranze. Me i vre ki atraver lenplimantasyon sa Lagreman i en landrwa kot nou anvi anmenn en pe plis aksyon.

Nou anvi vwar plis transplant a lavenir e parey mon’n deza eksplike oparavan enn bann problenm otour transplant sete posibilite pou fer li dan bann lezot pei.  Nou napa sa kapasite pou fer li ozordi isi Sesel.  I en servis ki petet evantyelman nou ti a kapab ofer Sesel.

An atandan nou pe fer, nou pe anvoy bann pasyan ki ranpli sa kriter nou anvoy zot Sri Lanka pou kapab fer sa loperasyon.  Pa toultan ki fezab me letan i fezab nou sey adres sa e aktyelman i annan sa servis ki kapab swiv zot dan Unit Dyaliz dan Lopital.  Mersi Mr Speaker.  Mersi Onorab.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker trwa pti kestyon e mon ti ava sipliy Minis pou reponn akoz enn ladan se sa kestyon ant sa link ant AMSA avek Renesans.  Vi ki i Public Procurement Oversight Unit pa ti ganny konsilte, pa ti ganny met okouran ler sa Kontra orizinal ti ganny sinyen, eski Minis i kapab dir akoz i pa’n reponn kestyon Onorab Gill ki lyen i annan ant AMSA avek Renesans?  Eski sa i pa en bonnen/ lan, blan/bonnen ki fer ki nou krwar i annan konpetisyon me selman an realite nou napa konpetisyon e an menm tan nou kapab, Minis i kapab dir nou si i krwar ki i annan en Mr Banergy, Partha Banerjee ki ti sove Sesel apre i ti ganny  arete dan L’Inde an Zen 2016 e lannen pase le 14 Desanm 2017 nou vwar li pe fer  gran opening kot Renesans devan Vis-Prezidan e tou bann Minis; konmsi i annan  en leksplikasyon pou sa konmsi?  Nou zis konmsi nou pa pe deal en pe ek bann dimoun en pe dubious dan tousala?  Sa i mon premye kestyon.

Mon dezyenm kestyon, Minis in koz lo re negosyasyon sa Lagreman.  Mwan mon ti  a kontan demande akoz Minister Lasante pe zis konsider re negosyasyon en Lagreman ki Minis li menm in aksepte ki i annan en kantite flaws ladan, e non pa ki Minister i ouver sa posibilite avek lezot servis providers, enternasyonal oubyen lokal parey Minister Lasante.  Minister lasante li menm li i kapab dir akoz dan le pase nou ti sonnyen, nou ti sonnyen nou bann pasyan dyaliz isi apre mon pa konnen  zis nou tou nou tande poudir en  zour Prezidan Michel in dir fodre donn AMSA.  Fini e sa Minis i baze lo levidans kot bann dimoun dan Minister Lasante, bann dokter, bann administrater dan Minister Lasante i dir poudir it was a bad decision taken by ansyen Prezidan Michel.

So mon kestyon se akoz zot le re negosye en Lagreman ki zot krwar poudir i annan en kantite flaws ladan?  Zot pa pe rod en nouvo Lagreman, en nouvo fason pou fer sa travay.

E finalman mon ti a kontan demann Minis akoz tou eksper i ava dir ou ki 10 nouvo pasyan par lannen pou en popilasyon parey Sesel i en logmantasyon ki pa normal.

Eski alor Minister Lasante pa krwar ki AMSA pe konmans dyaliz tro boner pou en rezon biznes, akoz zot ganny peye par latet  e par sesyon e ki  finalman nou pei pe ganny ripped off avek bann servis ki nou pe vann ki nou pa pe – i pa neseser e laprev  in ganny donnen par Leader Lopozisyon pli boner konmkwa i annan dimoun ki’n  ganny dir ou pa bezwen – tro boner.  Sa 3 kestyon silvouple.  Mersi.

 

MR SPEAKER

Mersi Onorab Ferrari.  Minis.

 

MINISTER JEAN-PAUL ADAM

Mersi Mr Speaker e mersi Onorab.  Well premyerman zis pou note mon pa’n reponn kestyon Mr Gill akoz mon krwar la fason i ti’n koz lo la mon ti krwar i n plito met li konman en fe e bann kestyon ti bann bout apre.

Me efektivman mannyer mon konpran sa dimoun ki fasilitater pou Renesans e sete li menm li ki ti negosye a sa moman pou AMSA me lenvestisman dapre mannyer mon konpran, dapre lenformasyon SIB, lenvestisman li menm li se de diferan konpannyen ki separe.

Zot kapab demann ankor kestyon avek SIB.  Mwan mon napa tou bann detay konsernan sa.  E kestyon osi otour si sa dimoun i kredib oubyen non.  Ankor mannyer mon konpran tou envestiser ki vin dan nou pei i sipoze pas atraver en due diligence ki ganny fer atraver SIB e mwan si sa dimoun i annan okenn problenm dan son lepase oubyen  mon pa okouran me si ou annan okenn lenformasyon mon krwar ou devret met sa pli devan.

E si sa i en problenm i devret ganny adrese par lotorite konsernen si FIU, si SIB tousala i bann kestyon ki letan en envestiser i vin dan sa pei i met son provizyon devan, i met son propozisyon devan.

E par egzanp lo kote Lasante nou regard lo son kote an term son standar, son kapasite pou li enplimant sa proze e ki benefis i anmennen zeneralman dan nou pei.

E parey i annan lezot operater ki prive dan Lasante ou dir li ki son – ki standar ki i bezwen ariv lo la e i enplimant sa standar e apre si in pare pou li fer son lenvestisman i fer son lenvestisman.  Lo sa kestyon re negosyasyon, sa i lapros ki nou’n met devan baze lo bann pwen ki’ n ganny vwar dan sa – dan Rapor Oditer Zeneral.

Mon konnen nou pou diskit sa ankor dan FPAC, mon mazinen ki sa pou vin ankor devan FPAC.  I annan petet diferan lopinyon ki petet en lot lapros sipoze ganny pran.

Eski si sa i le ka si en lot lapros i bezwen ganny pran nou bezwen gidans legal pou nou konnen ki sa lapros ki son lenpak.  Par egzanp lo Gouvernman ki lenpak an term sa Kontra eksetera.

An term Minister Lasante nou prensip se asire ki nou annan sa standar ki – sa standar ki kapab ganny swiv, kapab ganny verifye e ki nou annan sa – nou kapab aplik sa standar baze lo en bon pri.

A en pri ki konpetitiv e efikas.  Ou’n lev en pe sa size lo  a sa moman lafason ki sa Kontra in ganny donnen avek AMSA eksetera.   E mon krwar nou’n deza tous sa en pti pe dan lepase letan nou’n koz lo Rapor Oditer Zeneral e mon krwar i enportan pou nou regard osi evolisyon dan servis dyaliz Sesel.

Efektivman nou ti fer sa servis nou menm, nou ti fer li ase byen me dapre bann endikater ki nou annan ozordi nou’n osi kapab anmenn serten amelyorasyon atraver sa travay ki nou’n fer avek AMSA.

Alor i en kestyon lezitim pou demande, eski ou ti pou kapab fer sa amelyorasyon san AMSA oubyen non?  I en deba.  I en deba ki ou kapab annan e – me an term nou lavenir, an term dyaliz lenportans se ki premyerman nou met pasyan premye, nou asire ki sa standar kapab ganny aplike pou pasyan ki pasyan osi i kapab ganny swiv byen.

Apre ou dernyen pwen ki ou’n leve se ou’n dir ki dapre bann eksper 10 pasyan logmantasyon sak lannen i pa normal.  Mon ti a sizere si i annan en eksper ki’n donn ou sa lopinyon e sa eksper i met son – i ekri en let i dir poudir i krwar i annan sa problenm akoz sa i pa normal.

E ki sa i endike ki poudir i annan en problenm standar.  Mon krwar ki nou pa kapab annan bann eksper ki zis ganny nonmen konman bann eksper.  Sa bann eksper i bezwen vin devan.  Ok be nou ava demann Dokter Wong.  Demann Dokter Wong pou ekrir en let.

Lot keksoz ki nou pe fer se nou pe fer en odit Klinik lo travay ki AMSA pe fer. sa odit pou adres sa bann size e nou pe travay avek en Lopital Singapour pou fer sa odit e sa pou ganny fer lafen Avril e nenport ki eksper ki santi poudir i annan konsern lo size lafason ki AMSA pe travay ozordi, nou envit zot pou zot fer, pou met an ekri tou zot konsern e nou kapab adres sa bann konsern.

Akoz mon krwar tro bokou letan nou koz lo sa bann size parfwa nou dir sa, nou dir sa dan en fason zeneral.  Dan medicine i baze lo levidans e en dokter ou nenport ki profesyonnel i bezwen pare pou li met son lopinyon lo papye e debat sa lopinyon lo labaz levidans.

E sa ki nou pou fer an term sa odit Klinik se pou, pou kree sa prosesis kot nou annan sa levidans.  Si levidans i montre poudir i annan tro bokou pasyan lo dyaliz, then nou pou annan sa levidans pou nou adrese.  Mon pa kapab zis fer en sanzman akoz Onorab Ferrari i dir i krwar sa i bon.

 

MR SPEAKER

Ok.  Mersi Minis.  Onorab Ferrari.

 

HON JEAN-FRANCOIS FERRARI

Follow up mon ti a zis kontan dir Minis ki Minis Peter Larose fek met lo son levidans lo SBC e in ganny pouse.  Ok?  Alors isi Sesel nou ankor annan sa problenm.  So met levidans  lo papye …

 

MR SPEAKER

Onorab, Onorab.

 

(Interruption)

 

MR SPEAKER

Order!  Order!  Order!  Order!  Order!  Order!  Mon annan la parol.

 

HON JEAN-FRANCOIS FERRARI

Wi.

 

MR SPEAKER

Mon pe diriz, Onorab – Onorab al direkteman lo kestyon ki devan Minis.

 

HON JEAN-FRANCOIS FERRARI

Ok.  Mwan mon ti demann  Minis sa kestyon son relasyon sa link ant AMSA ek Renesans pou en rezon byen spesifik e mon ti krwar i ti pou dir mwan, lefe ki Renesans i baze kot ESPACE ki afilye avek Jj Spirit ki li Minis  Jean Paul Adam i en Manm fondater lo sa Board e i ankor en Manm Board.  Eski pa i enportan pou nou demande si napa en  konfli lentere dan sa bann aktivite ki lye servis dyaliz servis avek Jj Spirit?  Mersi.

 

MR SPEAKER

Mersi Onorab.  Minis être kourt, presi.

 

MINISTER JEAN-PAUL ADAM

Mr Speaker mon pa tro apresye sa laliny kestyon ki Onorab Ferrari in demande.  Mon pou pran li  dan en lapros selman pozitiv.  Mon pou pran li lefe ki i anvi le meyer pou nou pei.  Mwan osi mon anvi le meyer pou nou pei.  Mwan mon napa okenn nanryen avek okenn sa bann Konpannyen.  Mon oule fer kler.  Mwan osi pa en Manm ozordi dan Jj Spirit.  I vre mon ti en Manm fondater me ozordi konman en Minis mon napa okenn lyen avek.

E si nou pou pran sa kalite lapros ou ti kapab demande be akoz Leader Lopozisyon pe met en kestyon ozordi lo sa size?  E akoz i annan sizesyon pou nou al ankor kot Renesans?  Nou ti kapab pran en lapros koumsa me se pa sa lapros ki nou anvi pran. Nou anvi regarde kwa ki meyer pou pasyan.  Kwa ki meyer pou pasyan ki nou kapab enplimant en standar e ki sa i kapab ganny swiv dan en fason sistematik.  Mersi bokou Mr Speaker.  Mersi Onorab.

 

MR SPEAKER

Mersi Minis.  Onorab Lemiel.

 

HON SYLVANNE LEMIEL

Mersi Mr Speaker.

 

(Mic Off)

 

MR SPEAKER

Non, non.  En moman Onorab Lemiel.  I pa’n, in zis, in fer – mon annan la parol.  In fer referans avek rezon ki ou’n met akoz ki ou’n met en kestyon?  I pe demande pou dir petet ou – i demande akoz ou’n met en kestyon ozordi.  Ou’n met en kestyon akoz ou santi i annan  en lenportans Nasyonal.  E Minis pe reponn.  I pa’n fer, i pa’n fer en referans ki pou lev en deba ok?

 

 

HON WAVEL RAMKALAWAN

Mr Speaker, sorry anba Standing Orders sa ki Minis in fer in impute improper motives e li menm li Mr Speaker.  Mr Speaker, Mr Speaker, Mr Speaker if I may li menm li in dir dan son lentrodiksyon ki i pa dakor avek lapros Onorab Ferrari e apre sa in dir ki li i nepli en Manm Jj Spirit in soz ensidswit.

Savedir in divors son lekor avek sa direksyon kestyon Onorab Ferrari me selman apre in impute improper motives e anba Standing Orders i pa kapab mansyonn Leader Lopozisyon i pa kapab nonm Leader Lopozisyon unless there is a debate specifically on the Leader of Opposition.  E Mr Speaker mon pou demande ki i withdraw sa ki in dir.

 

(Interruption)

 

MR SPEAKER

Order! Non, Order! Order!  Order! Order!  Order! Mon annan la parol.

 

 

(Interruption)

 

MR SPEAKER

Order! Order!  Mon annan laparol.  Mwan sa ki mon’n konpran Minis in fer lefe ki ou ki ou loter kestyon in fer referans avek ou’n anmenn en kestyon.  Onorab Ferrari in demann li ki son relasyon ant sa de, ant AMSA avek Renesans e lefe ki i ti belong to Jj Spirit Foundation si i annan okenn konfli lentere e Minis in reponn.  Minis in reponn.

 

HON WAVEL RAMKALAWAN

Mr Speaker 55 (5).  The conduct of en …

 

MR SPEAKER

…. i pa kestyon ou conduct Onorab.

 

HON WAVEL RAMKALAWAN

…be i pe demande akoz mon’n anmenn sa Kestyon savedir i pe impute improper motives!

 

MR SPEAKER

Bon, bon, Minis

 

HON WAVEL RAMKALAWAN

Anyway mon pa pou argue avek ou Mr Speaker me selman Minis in azir malonnet!  Mon pou dir sa.

 

MR SPEAKER

Onorab.  Onorab.  Onorab mwan ki dan Chair mwan ki pe koze.  Ok?  Onorab Lemiel.

 

HON SYLVANNE LEMIEL

Mersi Mr Speaker.  Bon apre midi Minister avek ou lekip.  Mon kestyon i viz ver en larepons ki Minis ti donnen taler.  I ti dir ki i le desantraliz sa servis pou anmenn li lo rezyon Sid e in nonm spesifikman  distrik Anse Royale e mwan mon ti a  kontan konnen Minis petet kote ou pe mazin pou met sa servis e dan ki dele letan?

Akoz mon konnen lopital aktyel ki nou pe mazinen pou donn sa servis ladan petet byento i pou al ouver e i pa ti’n ganny petet met pou en tel fasilite.  So eski ou pe mazin met sa dan sa outpatient clinic ler in ganny fer e ki dele letan.  Mersi Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker e mersi Onorab.  Mr Speaker zis  permet mwan pou dir mon ti napa okenn lentansyon pou mon kree okenn problenm, alor mon prezant mon leskiz si i annan okenn dimoun ki ofanse.

Mon ava pran kestyon Onorab Lemiel.  Desantralizasyon Servis Dyaliz i anliny osi avek nou plan pou redevlopman Lopital ki enkli bann diferan Sant Lasante, enkli Anse Royale.  E nou plan re devlopman Lopital ki mon’n tann detrwa dimoun koz lo la zot krwar poudir sa plan pa pe ganny enplimante me dan Bidze ki sa Lasanble in vote pou 2018 i annan plizyer proze ki anliny avek sa plan.  Sa i enkli devlopman outpatient Anse Royale kot wi sa sonm ki nou’n gannyen sa lannen pa pou permet nou konpletman  fini sa proze me i pou permet nou fer en konmansman.

E dan sa proze outpatient pou Anse Royal idealman se bi pou nou kapab ofer servis dyaliz dan si Mahe, ki pou ofer en meyer servis pou bann pasyan ki aktyelman bezwen voyaz bann gran zistans souvan pou zot al Lopital Sesel.

Alor sa i toutafe anliny avek nou plan re devlopman Lopital ki enkli nou bann diferan Sant Lasante.  Mersi Mr Speaker e mersi Onorab.

 

MR SPEAKER

Mersi Minis.  Onorab Lemiel.

 

HON SYLVANNE LEMIEL

Sorry Mr Speaker.  Minis pa’n dir nou dele letan ki ou pe mazinen sa pou ganny fer.

 

MR SPEAKER

Mersi Onorab. Minis.

 

MINISTER JEAN PAUL ADAM

Mersi Mr Speaker.  Baze lo Bidze ki nou’n gannyen sa lannen nou pou fer plan konsep, konsep pou sa outpatient building e avek son rekritman en medical architect ki pou permet nou bouz pli devan avek lenplimantasyon sa proze.

E alor son faz kot ou pou annan son servis dyaliz i pou pran –  son konstriksyon i kapab pran 1an edmi a 2an.  Alor nou pe vwar lafen 2019 a 2020 pou nou kapab annan sa servis.  Mersi Mr Speaker.  Mersi Onorab.

 

MR SPEAKER

Mersi Minis.  Onorab Woodcock.

 

HON WAVEL WOODCOCK

Mersi Mr Speaker.  Bonn apre midi Minis, ou delegasyon e tou dimoun a lekout.  Mr Speaker dapre Special Review Rapor par Oditer Zeneral date 2008 lo paz 5 ki findings 10 Oditer Zeneral in fer sorti ki dan Seksyon 6 (4) dan sa Lagreman ant AMSA avek Health Care Agency i state, i stipulate ki si AMSA i fail pou anmenn pasyan etranze Sesel pou Holiday Dialysis i pou bezwen pey a quarterly compensation at the rate of 0.5million Seychelles rupees per year to the Ministry of Health.

Odit in osi fer sorti ki i pa kler ki kantite pasyan ki AMSA i sipoze anmenn Sesel pou Holiday Dialysis par lannen.  Oditer Zeneral in osi fer sorti ki dan sa Rapor ki napa okenn konpansasyon ki AMSA in pey Minister Lasante regardan Holiday Dialysis.  In anmenn selman 19 pasyan etranze ki’n fer 105 sesyon Holiday Dialysis depi Mars 2015 ziska Septanm 2017.  Mon kestyon i konm swivan;  ki kantite  pasyan etranze AMSA i bezwen anmenn Sesel pou Holiday Dialysis par an pou avoid pou evite pey sa konpansasyon?  E si zot pa’n anmenn ase etranze Sesel parey sa Lagreman akoz ki AMSA pa ankor pey okenn konpansasyon Minis pour Lasante? Mersi.

 

MR SPEAKER

Mersi Onorab.  Minis.

 

MINISTER JEAN PAUL ADAM

Mersi bokou Mr Speaker e mersi Onorab.  Annefe nou ti adres sa pwen en pe lo kestyon Onorab Mondon.  E wi i annan en defayans dan la fason ki Lagreman i koz lo sa size e sa in ganny adrese dan Rapor Oditer Zeneral, akoz napa en sif spesifik ki kantite ki ganny konsidere konman ase.

I ganny dir ki si napa ditou then – si napa ditou en konpansasyon i ganny peye.  Me aktyelman AMSA pe anmennen serten pasyan ki pou 2017 sif i 70 sesyon ok e – me dan pou nou  adres sa nou bezwen re aranz Lagreman pou fer li kler, nou’n met en sif nou bezwen met en sif lo konbyen pasyan oubyen konbyen sesyon dyaliz nou ekspekte konman en minimum akoz aktyelman defayans dan Lagreman se ki si ou napa ditou ou ganny en konpansasyon selman si ou annan en pe menm si ou ganny en pti pe mwens larzan ou bezwen  aksepte sa.

Bon lot eleman se ki nou osi pe refer sa avek bann avoka pou donn nou en gidans lo sa size lo ki mannyer nou kapab adres sa.  Dan kestyon re negosyasyon i kler lo ki mannyer nou pou adres li, me an term le pase ki mannyer nou pou adres li petet pou met a zour baze lo Rapor Oditer Zeneral aktyelman bann etranze ki pe fer, AMSA pe fer peyman vizavi ek sa bann pasyan me lakantite i pti gin.  70 sesyon pou mon krwar 12 pasyan an 2017.  Wi.  Dan Rapor Oditer Zeneral sa sif ki  zot donnen i lo en peryod plis ki 1an zot sit 19 pasyan, me i pa lo en peryod 1an i lo en pe me pou 2017 sa sif ti 12 pasyan 70 sesyon.  Mersi Mr Speaker e mersi onorab.

 

MR SPEAKER

Mersi Minis. Onorab Chantal Ghislain.

 

HON CHANTAL GHISLAIN

Mersi Mr Speaker.  Mr Speaker mon kestyon i annan pou fer avek en follow – mon pou demann en kestyon me mon follow-up i pou depan lo repons Minis.  Mon premye – mon kestyon i al koumsa.  Minis eski bann pasyan ki al fer dyaliz prenon kont zot kondisyon lasante eski i annan ki apre ki zot in fini fer dyaliz zot bezwen end up dan ICU e konbyen pasyan nou pe koze la?

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker.  Mersi Onorab.  Nou napa a ma konesans pasyan ki’n al ICU direkteman lye avek dyaliz.  Ou kapab annan pasyan ki annan lezot konplikasyon ki’n bezwen ganny admit dan ICU apre ki nesesit dyaliz selman nou napa sif bann pasyan ki’n al – ki’n bezwen al ICU sorti dan dyaliz akoz en problenm, en konplikasyon otour dyaliz.  Mersi.

 

MR SPEAKER

Mersi Minis.

 

HON CHANTAL GHISLAIN

Yes Minis mon kestyon pa ti pou relye avek dimoun ki fer- konmsi apre dyaliz li.  Konmsi lefe son kondisyon lasante ki parfwa letan zot al fer dyaliz zot lasante i desann ki zot bezwen al ICU.  Sa i mon kestyon ki mon ti pe demann lo…savedir i annan pasyan ki kapab ki ale.  Minis nou osi annan ler nou pe koz Renesans dizon ki arive avek en pasyan ki apre in al laba kot Renesans e lefe ki Renesans in napa ICU li, ki arive avek sa pasyan si i bezwen ganny refer avek Lopital Victoria pou al ICU parey nou’n dir ki apre – konmsi prenon kont son kondisyon lasante ki bezwen al ICU, eski Renesans i bezwen pey Minister Lasante pou servi ICU ouswa sa pasyan i ale san peye free of charge?

Mon dezyenm kestyon lefe ki kot AMSA Lopital Victoria Sant Dyaliz i ouver 24 lo 24.  E ki arive avek en pasyan ki li i pe swiv tretman son dyaliz kot Renesans e i ariv en kondisyon ek li dan milye lannwit dizon, ki i bezwen ganny – definitivman i pou bezwen vin Lopital Victoria i bezwen ganny admet e i bezwen sa Servis Dyaliz irzan?

E lefe ki …boner  i annan kestyon ki’n leve konmkwa i annan zafer latizann and all ki zot pe dir i pa parey laba, ki arive avek sa pasyan.  Eski zot bezwen esper lannmen bomaten pou al laba pou li refer ouswa Minister Lasante i fer?  Eski in arive Pasyan dan sa ka.  Mersi.

 

MR SPEAKER

Mersi Onorab.  Minis.

 

MINISTER JEAN PAUL ADAM

Mersi Mr Speaker e mersi Onorab.  Eskiz mwan zis mon ti pe konsilte avek mon bann koleg.  Premyerman an term bann pasyan ki par egzanp al Renesans e ki bezwen  en swen entansif, bon premyerman anba son License anba son permisyon pou li fer son  aktivite i annan serten pasyan ki  pa pou kapab pran konpare avek Lopital par egzanp.

Akoz pa tou pasyan ki pou kapab al dan sa fasilite.  Me osi an term pou li ariv dan – pou li ganny son License in bezwen  soumet en plan irzans.  Savedir si ou annan en pasyan ki petet i konpletman normal tou son lendikasyon i normal me pou en rezon ou en lot par egzanp i ganny en stroke en keksoz koumsa savedir en pasyan i ganny en lensidan pou zot ganny zot License pou zot ganny zot permisyon zot ti bezwen soumet en plan dirzans ki’n ganny valide par Lotorite Lasante Piblik.

E alor zot annan zot protocol an plas ki dan ka en irzans ki mannyer zot transfer sa Lopital, sa pasyan Lopital Victoria.  An term dyaliz irzan lot kestyon ti eski si en pasyan i ganny en referans sorti Renesans pou al Lopital Sesel si i bezwen peye? Si i en Seselwa non akoz parey nenport ki Seselwa letan ou antre dan nou servis lasante ou pa bezwen pey pou sa servis e sa servis i reste gratwit.  Si i en etranze e alor i annan en bill ki pou ganny donnen atraver Renesans.  Renesans ki pou ganny sa bill e li ki pou bezwen aranze avek sa pasyan.  Me selman si i en etranze.

An se ki konsern dyaliz irzan nou annan provizyon pou sa.  Nou annan en masin dyaliz ki baze a plen tan dan ICU par egzanp; me osi kot i neseser nou fourni, nou donn priyorite pou bann ka irzan dan Servis Dyaliz dan Unit Dyaliz e kot i neseser nou donn sa servis.  Mersi Mr Speaker.  Mersi Onorab.

 

MR SPEAKER

Mersi Minis.  Onorab Ghislain.

 

HON CHANTAL GHISLAIN

Mr Speaker mon kestyon lo servis dirzans mon ti pe refer a bann pasyan ki al kot Renesans, i ariv en kondisyon irzan dizon dan milye lannwit e Renesans i fermen li.  Kot Lopital Victoria i ouver 24 lo 24.  Sa pasyan definitivman in tonm malad i bezwen vin Lopital Victoria e i bezwen dyaliz emergency e lefe ki it i pe swiv son tretman laba kot Renesans, i bezwen fer sa servis dirzans dan Lopital Victoria.  Eski, ki mannyer i marse sa lefe ki li i ti annan en swa pou li al laba akoz mon pa konnen kekfwa latizann, bann keksoz koumsa.  Eski sa pasyan i annan dizon refize or ki mannyer i marse sa?

 

MR SPEAKER

Mersi Onorab.  Minis.

 

MINISTER JEAN PAUL ADAM

Bon mersi Mr Speaker e mersi Onorab.  Nenport ki pasyan i annan drwa refiz tretman me lo lot kote en dokter pou fer sir ki i ganny sa tretman ki i bezwen.

E alors si en pasyan i bezwen servis dyaliz e si en Seselwa zot pa pou zanmen refiz li.  Menm en etranze zot pa pou refiz li tretman, nou pou pran sa etranze me apre i pou ganny en bill.

Me avek en Seselwa nou pou fer sir de ki i ganny refer avek servis lopital, i antre dan sistenm lopital i ganny trete parey nenport ki pasyan.  I pa diferan ki par egzanp letan nou annan en pasyan ki al kot en dokter prive.

Si en pasyan i al kot en dokter prive e sa dokter prive i fer en referans i dir sa pasyan i bezwen admit, konman sa pasyan i vin kot Lopital kot casualty i pou antre dan sistenm referans pou li ganny admit dan lopital.

Alor nou protocol i prevwar ki letan en pasyan i ganny refer sorti kot nenport ki, nenport ki servis prive Lasante ki son bezwen i ganny adrese imedyatman e avek irzans san okenn diferans.  Mersi.

 

MR SPEAKER

Mersi Minis.  Onorab Clifford Andre.

 

HON CLIFFORD ANDRE

Mersi Mr Speaker.  Mersi Minis.  Mon kestyon – Minis in dir nou sa Lagreman pe al ganny anvoye kot bann avoka pou zot revwar.  Eski Minis i kapab dir nou sa Lagreman avan eski ti annan avoka ki ti get ladan?  Si wi lekel ki nou pa’n vwar sa bann eleman parey nou pe koz lo la la.

Dezyenm eski ou Minis Jean Paul Adam eski ou annan okenn lenfliyans konman Minis pou ou transfer en pasyan sorti kot sa servis ki AMSA pe ofer kot Minister Lasante pou dir mon pe donn ou en referral pou ou al kot Renesans? Sa i dezyenm.

Mon lot kestyon se i annan bann, ou’n adres sa konman bann mankman an term bann servis ki Minister Lasante pe donnen e si nou pe get incineration cost ki 3.9milyon par lannen, eski letan nou pe get sa  nou pe al demann AMSA pou pey nou sa ki zot drwa nou? Konmsi nou bezwen cost recovery la ki mannyer mon pe dir, nou pe al demann zot nou bann cost ki zot pa’n pey nou pandan sa letan?

E mon lot kestyon se ki par lefe ki ou menm ou Minis avek bann, bann, bann profesyonnel dan Minister Lasante in vwar sa diferans ant sa servis ki pe ganny ofer par Renesans konpare avek sa enn AMSA akoz nou pa demann AMSA pou li os son standar ki i a vin konparab avek sa ki pou ez en pti git an referans avek sa kestyon ki Onorab Ghislain in dir ki demen si i ariv en sityasyon sa dimoun i konnen mon lo menm standar irespektiv si mon’n al kot Renesans oubyen mon kot lopital AMSA.  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker e mersi Onorab.  Mon pa sir sa letan mon’n ganny dir ki petet Attorney Zeneral sa lepok ti’n regard sa Lagreman me mon pa  sir ki in donn son gidans an ekri nou ava kapab verifye a sa moman ki, ki ti le ka.

Me an tou ka la nou fer sir ki no verifye sa avek Attorney Zeneral e ki nou ganny sa gidans apropriye e mon asire letan nou pou diskit sa dan FPAC ki nou fer sir ki okenn desizyon ki nou pran nou fer li avek gidans avoka e Attorney Zeneral an partikilye.

E osi an se ki konsern eski mwan konman Minis nou kapab fer en referral kot Renesans non akoz nou, an baz nenport ki procurement ti konmans avek en Polisi.

Aktyelman nou Polisi se dyaliz i ganny fer dan Lopital Sesel.  Alor nou pa kapab fer en referral e sertennman konman Minis an tou ka mon pa ladan.

Okenn referral pasyan i bezwen ganny fer dokter ziska dokter.  Alors se en dokter ki pou refer en pasyan avek en lot pasyan.  Avek Renesans nou napa sa policy framework pou nou anvoy zot laba e i pa egziste.  Alor pou nou anvoy en pasyan pou nou fer peye aktyelman nou pa kapab.  E parey mon’n eksplike nou pe fer en analiz la pou vwar si i vo lapenn revwar sa policy. Si i vo lapenn revwar sa policy e alor nou kapab adopte en policy e lo sa baz nou kapab regarde pou nou fere bann prosedir procurement.  Ok?  Alor mon’n ganny gidans avek Finans ki si nou al dan sa direksyon pou fer li koumsa me ankor mon le dir si ou al dan sa direksyon akoz i enportan dan sa analiz ki nou regard tou bann diferan kestyon.

Apre an term sa kestyon larzan ki’n ganny peye avek AMSA pou li ganny rann sa i en pti pe lye avek sa ki Onorab Afif ti’n demande pli boner.  E baze lo tou bann pwen ki’n ganny idantifye par Rapor Oditer Zeneral bann keksoz par egzanp kot invoice pa ti’n ganny demande avek AMSA tou sa bann kestyon pe ganny adrese.

Swa in fini ganny adrese dan serten ka ou pou vwar dan sa Rapor Oditer Zeneral kot management HCA in fini edike kot in demann sa invoice, in donn sa invoice oubyen dan serten ka kot sa peyman in ganny fer.

Apre selman lot eleman ki al avek sa se sa larzan, sa diferans ki Onorab Afif in fer leve sa 16milyon.  Alor kestyon se eski ou konsider sa konman en kestyon dan Kontra oubyen eski ou konsider sa konman en fot dan Kontra?  Ok?  Mon pa vreman kalifye pou mon dir ou wi oubyen non.  Mon krwar i en kestyon legal selman sertennman sa ki’n etabli dan Rapor Oditer Zeneral se ki son kou san ki ou met profi, san ki ou met okenn amelyorasyon, san ki ou met okenn akreditasyon, son kou i 175 Dolar.

E prezan nou a kapab ganny en gidans legal, eski nou annan en baz pou nou demann larzan pou ganny rann dan le pase oubyen non.  I pa en kestyon ki mwan mon kapab reponn deswit, ok?

Apre sa kestyon standar alor Renesans fodre nou kler,  ziska prezan sa ki nou pe gannyen se bann temwannyaz sorti kot  bann pasyan e nou ekout zot sa bann pasyan.

E sa bann temwannyaz i reste sa i lopinyon  enpasyan petet baze lo sa ki en dokter in dir li. Me sa ki nu bezwen se ki sa dokter i bezwen met son dokiman a latansyon Minister Lasante.

E parey mon’n eksplike Zedi sa semenn Lotorite Lasante Piblik pe fer en meeting avek AMSA ek Renesans tou le de, e pe demann zot pou zot donn zot pwennvi, par egzanp zot kapab sanz zot pwennvi lo diferan pasyan ki pe ganny trete par bann dokter respektif e zot kapab vwar eski i annan serten keksoz par egzanp ki’n marse pou sa pasyan kot Renesans.  Akoz in marse pou ou kapab fer li adres sa atraver AMSA par egzanp.

Me mon krwar osi i enportan pou nou note se ki si nou poudir Renesans i en pli o standar fodre nou baz li osi lo en evalyasyon sa standar akoz nou letan nou pe koz standar nou pe koz bann standar medikal pa forseman bann standar servis.

Nou anvi meyer servis toultan me definitivman letan ou annan mwens pasyan avek plis dokter relatif ek ou pasyan ou annan tandans pou ganny en meyer servis akoz ou annan plis akse avek sa dokter.

Alor i pa forseman ki ou kapab konpar standar servis dan Renesans ek dan Lopital me an se ki konsern standar medikal, sa i kapab ganny verifye e sa i pou ganny fer atraver legzersis ki nou pe fer sa semenn e Lotorite Lasante Piblik pe fer e i pou osi a ganny adrese atraver sa odit, sa Clinical Audit ki pe ganny fer lafen Avril.  Mersi Mr Speaker e mersi Onorab.

 

MR SPEAKER

Mersi Minis.  Onorab Andre.

 

HON CLIFFORD ANDRE

Zis en pti klarifikasyon Minis.  Ou’n dir avek nou ki poudir tou bann eleman dan Rapor odit in ganny adrese me ou’n dir osi bann invoice in ganny raise.  So ou pe dir invoice retrospektivman pou sa bann servis ki zot pa’n peye Gouvernman Sesel in fini anvoy AMSA?  Ok, mersi.

 

MR SPEAKER

Ok Onorab.  Minis.

 

MINISTER JEAN-PAUL ADAM

Mersi Mr Speaker.  Wi dan preski tou ka mon krwar i annan petet enn ou de ka selman sa dokiman in ganny prepare e petet i pa ankor ganny peye.  Sa nou kapab verifye e parey ti’n ganny demande oparavan pou nou donn en breakdown egzakteman ki bann larzan ki’n ganny peye avek AMSA.  Mersi Mr Speaker, mersi Onorab.

 

MR SPEAKER

Mersi minis.  Nou a pran dernyen kestyon.   Onorab Flory Larue.

 

HON FLORY LARUE

Mersi Mr Speaker.  Bonn apre midi Minis.  Eski Minis i kapab dir nou si Minister i n rod bann rezon pou bann logmantasyon dan sa maladi ronnyon? Eski zot in regarde si i annan en lyen avek konsonmasyon delo desalinasyon?  Akoz nou konnen ki dimoun i ganny bokou problenm lo kote fittings and pipes.  Eski i annan en lyen ek delo ki dimoun i konsonmen?  E eski zot annan en progranm prevansyon akoz nou konnen prevention is better than cure.

Mon dezyenm kestyon i vi ki letan Renesans i set up i bezwen fer son  due diligence devan Medical Council, eski Minister i kapab provide nou avek bann lenformasyon pou nou konnen lekel propriyeter sa lakonpannyen silvouple?

E Minis in koz lo en odit ki pe ganny fer par en body sorti Singapore.  Eski i kapab dir nou konbyen sa odit pou koute ?

E lefe ki i dir ki tou sa ki’n ganny mansyonnen dan Rapor Oditer Zeneral in ganny adrese premye findings i dir nou ki napa levidans pou montre ki mannyer Minister ti pran desizyon pou outsource sa servis.

Eski lefe ki tou in ganny adrese si bann dokimantasyon i kapab ganny fer available pou nou konnen ki mannyer Minister ti deside pou fer sa servis silvouple

 

MR SPEAKER

Mersi onorab.  Minis.

 

MINISTER JEAN-PAUL ADAM

Mersi bokou Mr Speaker.  Mersi Onorab.  I annan zis trwazyenm bout kestyon ki mon pa’n tro ganny kler. Mon’n ganny sa bout lo delo desalinasyon sa kestyon lo bann bout dan odit ki’n ganny adrese selman ti annan en bout dan milye ki mon’n manke si ou kapab repran.  Mersi.

 

MR SPEAKER

Onorab.

 

HON FLORY LARUE

In koz lo en audit ki pou ganny fer par en body sorti Singapore swa en group dimoun sorti Singapore, si i kapab dit nou konbyen sa audit pou koute silvouple?  Apre Medical Council i bezwen fer due diligence lo Renesans eski nou kapab ganny bann lenformasyon pou nou konnen lekel ki annan par dan sa lakonpannyen silvouple?  Apre lezot de mon krwar ou’n gannyen Minis.

 

MR SPEAKER

Mersi Onorab.  Minis.

 

MINISTER JEAN PAUL ADAM

Mersi bokou Mr Speaker e mersi Onorab.  Premyerman napa, napa a ma konesans okenn dokimantasyon oubyen resers enternasyonal ki fer en lyen ant, ant bann maladi ronnyon e alor nesesite pou en dimoun al lo dyaliz avek delo desalinen.  Akoz i pa devret annan en lyen akoz an fet lakoz prensipal pou bann maladi ronnyon se atraver tansyon ek dyabet.  Sa Sesel i sa bann koz prensipal e nou konnen ki Sesel nou annan en kantite problenm avek bann maladi non- kominikab.

E an term prevansyon definitivman nou pe met bokou lanfaz lo la.  Par egzanp Prezidan Faure in diriz sa prensip pou nou fer legzersis regilyerman, nou’n donn en kantite gidans an term nitrisyon avek bann zenn e osi avek bann dimoun aze.

E nou pou kontinyen nou konnen avek prevansyon zanmen i ase toultan fodre ou fer plis.  Me nou pe toutafe al dan sa direksyon.  Apre an term sa odit ki pou ganny fer par sa Lopital Singapour nou ava, mon napa sa sif avek mwan me nou ava rod sa sif e nou ava fer zot gannyen.

An term due diligence lo sa owner AMSA sorry, Renesans sa i pa tonm anba rol Medical Council e osi an term Minister Lasante nou – i plito lo la baz SIB letan sa envestiser,  i vin avek son proze akoz i en proze lenvestisman ki a sa  moman la ki en due diligence i ganny fer.  Mon asire ki SIB pa pou annan en problenm pou li partaz avek Lasanble son, sa travay ki in fer mon asire  ki sa pa pou en problenm. Mon krwar mon’n adres bann kestyon.  Mersi Onorab e mersi Mr Speaker.

 

MR SPEAKER

Mersi Minis.  Onorab Larue.

 

HON FLORY LARUE

Non, sa kestyon kot mon’n demann li lo Rapor Oditer Zeneral, Mr Speaker premye pwen i dir ki napa okenn rezon kler bann dokimantasyon pou montre ki mannyer Minister Lasante ti deside pou outsource sa servis.

Lefe ki Minis i dir ki tou bann pwen in ganny adrese eski nou kapab ganny bann dokimantasyon pou eksplik nou ki mannyer ki Minister ti outsource sa silvouple.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Wi.  Mersi Mr Speaker e mersi Onorab.  Mon krwar si ou regard sa Rapor Oditer Zeneral efektivman wi i dir ki i annan serten mankman an term la fason ki procurement sa servis avek AMSA in ganny fer, me an term son zistifikasyon ou ava note ki in sit sa letid ki ti ganny fer dan Minister avek sipor Lorganizasyon Mondyal Lasante – WHO kot sa letid ti montre ki nou kou ti R3,610 par pasyan par sesyon dyaliz.

Parey osi in montre dan sa Rapor Oditer Zeneral ki i annan serten kou ki ti enkli dan sa 3610 ki pa ti forseman bann tes ki ti bezwen ganny fer a sak fwa.

Alor son kou i en pti pe mwens.  Alor letan nou pe dir in ganny adrese nou’n eksplike avek biro Oditer Zeneral ki rasyonn al ki ti ganny servi.  Me wi efektivman sa i pa vedir ki sa i fer ki procurement i ganny fer byen.

Nou pa kapab al an aryer pou nou aranz son procurement parey nou ti’n deza koze letan Onorab Mondon ti’n lev sa size.  Mersi Mr Speaker.  Mersi Onorab.

 

MR SPEAKER

Mersi Minis.  Bon avek sa nou ava remersi Minis avek ou delegasyon parmi nou Dr Louange, Dr Reginald e Mr Vidot.  Minis mersi e nou ava eskiz ou parmi nou.

 

(MINISTER JEAN-PAUL ADAM AND HIS DELEGATION WAS EXCUSED FROM THE HOUSE)

 

MR SPEAKER

Bon avan nou adjourn  mon ankor zis anvi averti bann Manm ki demen bomaten nou pe pran Air Seychelles e mon panse nou kapab anmennen ziska midi e 2er apre midi nou ava pran kestyon lo Danm La Gogue.  OkSo sa nou travay pou demen.

Mon ti a kontan zis petet welcome back delegasyon ki’n sorti 138enm Konferans IPU.  Bann Manm ki’n ale Onorab William, Onorab De Letourdie avek byensir akonpannyen par Madanm Deputy Clerk.  Welcome back e dan lasemenn nou pou fer en pti rankont ansanm en pti postmortem.  Mon krwar Rapor in deza ariv lo mon latab.  So avek sa nou ava adjourn e nou a repran nou travay demen bomaten 9er.

 

(ADJOURNMENT)